సత్యదేవునికి జన్మ నక్షత్ర పూజలు

సత్యదేవునికి జన్మ నక్షత్ర పూజలు

అన్నవరం: రత్నగిరి వాసుడు సత్యదేవుని జన్మనక్షత్రం ‘మఖ’ సందర్భంగా శుక్రవారం సత్యదేవుడు, అనంతలక్ష్మీ సత్యవతీ దేవి అమ్మవార్లకు ప్రత్యేక పూజలు, అభిషేకాలు, ఆయుష్య హోమం ఘనంగా నిర్వహించారు. తెల్లవారుజామున రెండు గంటలకు స్వామివారి ఆలయం తెరిచి స్వామి, అమ్మవార్లకు అర్చకస్వాములు ప్రత్యేక పూజలు చేశారు. అనంతరం సత్యదేవుడు, అమ్మవార్ల మూలవిరాట్‌లకు, శివ లింగానికి పండితులు పంచామృతాలతో మహాన్యాస పూర్వక అభిషేకం నిర్వహించారు. అభిషేకం అనంతరం సుగంధ భరిత పుష్పాలతో, స్వర్ణాభరణాలతో స్వామి, అమ్మవార్లను అలంకరించి పూజించారు. అనంతరం ఉదయం ఆరు గంటల నుంచి భక్తులను స్వామివారి దర్శనానికి అనుమతించారు.

ఘనంగా ఆయుష్యహోమం

స్వామివారి యాగశాలలో ఉదయం తొమ్మిది గంటల నుంచి సత్యదేవుడు, అనంతలక్ష్మీ సత్యవతీదేవి అమ్మవార్లకు అయుష్యహోమం ఘనంగా నిర్వహించారు. 11 గంటలకు పూర్ణాహుతి నిర్వహించారు. వేదపండితులు గొల్లపల్లి గణపతి ఘనాపాఠి, అర్చకులు బులుసు శర్మ, వ్రత పురోహితుడు పాలంకి పట్టాభి ఈ కార్యక్రమాన్ని నిర్వహించారు.

సత్యదేవుని దర్శించిన 40 వేల మంది భక్తులు

సుమారు 40 వేల మంది భక్తులు సత్యదేవుని దర్శించి పూజలు చేశారు. సత్యదేవుని దర్శించిన అనంతరం భక్తులు గోశాలలో సప్తగోవులను దర్శించి పూజలు చేశారు. అనంతరం రావిచెట్టు వద్ద జ్యోతులు వెలిగించి ప్రదక్షిణ చేశారు. సత్యదేవుని వ్రతాలు రెండు వేలు నిర్వహించగా అన్ని విభాగాల ద్వారా దేవస్థానానికి రూ.35 లక్షల ఆదాయం వచ్చిందని అధికారులు తెలిపారు. సత్యదేవుని నిత్యాన్నదాన పథకంలో ఐదు వేల మందికి భోజనం పెట్టారు.

సత్యదేవుని జన్మనక్షత్రం ‘మఖ’ సందర్భంగా

ఆయుష్యహోమం నిర్వహిస్తున్న పండితులు