రెండు బైకులు ఢీ.. వ్యక్తి మృత్యువాత

రెండు బైకులు ఢీ.. వ్యక్తి మృత్యువాత

మరో ఇద్దరికి తీవ్ర గాయాలు

మాచవరం: మండలంలోని తురకపాలెం గ్రామ సమీపంలో రెండు ద్విచక్ర వాహనాలు ఢీకొన్న దుర్ఘటనలో ఒక వ్యక్తి మృతి చెందగా, ఇద్దరు వ్యక్తులకు తీవ్ర గాయాలయ్యాయి. ఈ సంఘటన శనివారం రాత్రి జరిగింది. వివరాల ప్రకారం.. తురకపాలెం గ్రామానికి చెందిన షేక్‌ మస్తాన్‌ వలి (25), దరియా వలి ద్విచక్ర వాహనంపై స్వగ్రామం నుంచి మాచవరం వెళుతున్నారు. మాచవరం నుంచి వేమవరం వైపు వస్తున్న ద్విచక్ర వాహనం బలంగా ఢీకొంది. ఘటనా స్థలంలోనే మస్తాన్‌ వలి మృతి చెందాడు. దరియావలికి, మరో బైకుపై వచ్చిన పిన్నెల్లి గ్రామానికి చెందిన శ్రీనుకు తీవ్ర గాయాలయ్యాయి. వీరిని 108లో చికిత్స నిమిత్తం పిడుగురాళ్ల ప్రైవేటు ఆసుపత్రికి తరలించారు. ఘటనా స్థలాన్ని ఎస్‌ఐ సతీష్‌ పరిశీలించారు. ఘటనపై కేసు నమోదు చేసినట్లు పోలీసులు తెలిపారు.

కాలువలో ఇంజినీరింగ్‌ విద్యార్థి గల్లంతు

మాచర్ల రూరల్‌: స్నేహితులతో కలిసి ఈతకు వెళ్లి నీటి ప్రవాహంలో ఇంజినీరింగ్‌ విద్యార్థి గల్లంతయ్యాడు. ఈ సంఘటన నాగార్జునసాగర్‌ కుడి కాలువ వద్ద ఆదివారం చోటు చేసుకుంది. పోలీసుల కథనం ప్రకారం... మండలంలోని ఓ ప్రైవేటు ఇంజినీరింగు కళాశాలలో బీటెక్‌ ఫస్ట్‌ ఇయర్‌ చదువుతున్న ఏలూరు జిల్లాకి చెందిన విద్యార్థి కొడమంచిలి మౌనిష్‌ కుమార్‌ (18) ఆదివారం ఇద్దరు స్నేహితులతో కలిసి పట్టణ శివారులో ఉన్న నాగార్జునసాగర్‌ కుడి కాలవలో ఈతకు వెళ్లాడు. నీటి ప్రవాహం అధికంగా ఉండటంతో కొట్టుకుపోయాడు. కేసు నమోదు చేసి దర్యాప్తు చేస్తున్నట్లు సీఐ తెలిపారు.