దివ్యాంగులను ఆదరించాలి

దివ్యాంగులను ఆదరించాలి

హొసపేటె: దివ్యాంగులకు సమాన హక్కులు, సౌకర్యాలు, అవకాశాలు కల్పించడం మనందరి బాధ్యత అని విజయనగర ఎమ్మెల్యే హెచ్‌ఆర్‌.గవియప్ప తెలిపారు. బుధవారం నగరంలోని జిల్లా స్టేడియంలో ఏర్పాటు చేసిన దివ్యాంగుల సాంస్కృతిక కార్యక్రమాలు, క్రీడా పోటీలను ఆయన ప్రారంభించి మాట్లాడారు. ప్రభుత్వమే కాకుండా సంస్థలు, ప్రజానీకం, తమ జీవితాల్లో స్వావలంబన సాధించేలా చేయూత అందించాలన్నారు. దివ్యాంగులు తమ ప్రతిభను గుర్తించి సామాజిక, ఆర్థిక, సాంస్కృతిక జీవితంలో తగినంతగా పాల్గొనేందుకు తగిన వాతావరణం కల్పించాలన్నారు. దివ్యాంగులను సానుభూతితో చూడకుండా సమానంగా, మన సమాజంలో అంతర్భాగంగా పరిగణించాలన్నారు. దివ్యాంగుల్లో ప్రతిభను గుర్తించేందుకు ఈ కార్యక్రమాలు సంవత్సరానికి ఒకసారి కాకుండా ప్రతి మూడు నెలలకోసారి నిర్వహించాలన్నారు. దివ్యాంగులైన చిన్నారులు, పెద్దలకు ప్రత్యేక విద్య, వృత్తిపరమైన శిక్షణ అందిస్తూ వారిలో ఆత్మవిశ్వాసం పెంపొందిస్తున్న సంస్థల కృషి అభినందనీయమన్నారు. కార్యక్రమంలో శారీరక దివ్యాంగులకు షాట్‌పుట్‌, జావలిన్‌ త్రో, షటిల్‌ కాక్‌, రన్నింగ్‌ రేస్‌, దృష్టి లోపం ఉన్న వారికి చెరకు రేసు, షాట్‌పుట్‌, వినికిడి లోపం ఉన్న వారికి 100 మీటర్ల రేసు, షాట్‌పుట్‌, రింగ్‌ త్రో, బుద్ధి మాంద్యం, బాల్‌ టాస్‌, సమూహ క్రీడల్లో నిలబడి, కూర్చొని క్రికెట్‌, కబడ్డీ పోటీలు, జానపద పాటలు, లిరిక్‌, పెయింటింగ్‌ పోటీలను నిర్వహించారు. జిల్లా దివ్యాంగుల సంక్షేమ అధికారి అవినాష్‌ తదితరులు పాల్గొన్నారు.