బాలుడిని కాపాడిన అయ్యప్పమాలధారులు

బాలుడిని కాపాడిన అయ్యప్పమాలధారులు

నందిగామ టౌన్‌: మండలంలోని దాములూరు కూడలి సంగమేశ్వర స్వామి ఆలయ సమీపంలోని వైరా కట్టలేరులో నీటి ప్రవాహంలో కొట్టుకెళ్తున్న ఓ విద్యార్థిని అయ్యప్పమాలధారులు కాపాడి ఒడ్డుకు చేర్చిన ఘటన శుక్రవారం జరిగింది. దాములూరు గ్రామానికి చెందిన కుంచం కృష్ణ కుమారుడు ప్రవీణ్‌ కొణతమాత్మకూరు గ్రామంలోని జిల్లా పరిషత్‌ ఉన్నత పాఠశాలలో పదో తరగతి చదువుతున్నారు. కార్తిక పౌర్ణమి సందర్భంగా స్నేహితులతో కలిసి ప్రవీణ్‌ నదీ స్నానం చేసేందుకు వైరా కట్టలేరు వెళ్లాడు. స్నానానికి దిగిన వారు లోతు ఎక్కువ ఉన్న ప్రాంతంలో ఈత కొడుతుండగా నదీ ప్రవాహానికి ప్రవీణ్‌ కొట్టుకెళ్తుండటంతో భయపడిన స్నేహితులు అక్కడి నుంచి వెళ్లిపోయారు. బాలుడు నీటిలో కొట్టుకుపోవడాన్ని గమనించిన అయ్యప్పమాలధారులు నేలవెల్లి సిద్ధార్థ, బత్తుల గోపీచంద్‌, మువ్వా కనకయ్య, బత్తుల నరసింహారావు, బండారు మురళి తాడు సాయంతో విద్యార్థిని కాపాడి ఒడ్డుకు చేర్చారు. అయ్యప్ప భక్తులకు విద్యార్థి కుటుంబ సభ్యులు కృతజ్ఞతలు తెలిపారు.