గురుకులాల్లో ప్రవేశాలకు దరఖాస్తులు

డిచ్‌పల్లి: తెలంగాణ సాంఘిక సంక్షేమ, గిరిజన సంక్షేమ, మహాత్మా జ్యోతి రావు ఫూలే వెనుకబడిన తరగతుల సంక్షేమ, సాధారణ గురుకుల పాఠశాలల్లో 2025–26 విద్యా సంవత్సరానికి 5వ తరగతి నుంచి 9 వతరగతి ప్రవేశాలకు నిర్వహించే ప్రవేశ పరీక్ష టీజీసెట్‌ – 2025కు ఆన్‌లైన్‌లో దరఖాస్తులను స్వీకరిస్తున్నట్లు గురుకుల విద్యాలయాల సంస్థ జోనల్‌ –2 ఆఫీసర్‌ ఫ్లోరెన్స్‌ రాణి ఒక ప్రకటనలో తెలిపారు. 2024–25 విద్యా 4 నుంచి 8వ తరగతి వరకు చదువుతున్న ఎస్సీ, ఎస్‌టీ, బీసీ, మైనారిటీ, ఆర్థికంగా వెనకబడిన విద్యార్థులు అర్హులని ఆమె పేర్కొన్నారు. తల్లి దండ్రుల వార్షికాదాయం పట్టణాలలో ఏడాదికి రూ.2 లక్షలు, గ్రామీణ ప్రాంతాలలో రూ.1.5 లక్షలలోపు ఉండాలన్నారు. ఆసక్తి, అర్హత కలిగిన విద్యార్థులు www.tswreis.ac.in లేదా http://tgcet.cgg.gov.in వెబ్‌ సైట్‌ ద్వారా రూ.100 చెల్లించి దరఖాస్తు చేసుకోవాలని ఆమె సూచించారు. 23 ఫిబ్రవరి 2025 న జరిగే టీజీసెట్‌ –2025 ప్రవేశ పరీక్షలో కనబర్చిన ప్రతిభ, విద్యార్థులు ఎంపిక చేసుకున్న పాఠశాలల ప్రాధాన్యత ప్రకారం ప్రవేశాలు ఉంటాయన్నారు. ఎంపికైన విద్యార్థులకు ఆంగ్ల మాధ్యమంలో విద్యాబోధనతో పాటు ఉచిత భోజనం, వసతి సదుపాయాలు ఉంటాయన్నారు. దరఖాస్తులు సమర్పించేందుకు తుదిగడువు 2025 ఫిబ్రవరి 1 అని జోనల్‌ ఆఫీసర్‌ తెలిపారు.