బియ్యం లోడు లారీని ఢీకొట్టిన మరో లారీ

బియ్యం లోడు లారీని ఢీకొట్టిన మరో లారీ

కోదాడరూరల్‌: రోడ్డు వెంట ఆగి ఉన్న బియ్యం లారీని మరో లారీ ఢీకొట్టడంతో మంటలు చెలరేగి దగ్ధమైంది. ఈ ఘటన హైదరాబాద్‌–విజయవాడ జాతీయ రహదారిపై కోదాడ మండల పరిధిలోని దోరకుంట శివారులో మంగళవారం తెల్లవారుజామున జరిగింది. స్థానికులు తెలిపిన వివరాల ప్రకారం.. బియ్యం లోడుతో వెళ్తున్న లారీ దోరకుంట శివారులో మరమ్మతుకు గురికావడంతో డ్రైవర్‌ రోడ్డు వెంట నిలిపివేశాడు. ఈ క్రమంలో మఠంపల్లి మండలం నుంచి వస్తున్న మరో లారీ వేగంగా వచ్చి బియ్యం లోడుతో వెళ్తున్న లారీని ఢీకొట్టింది. ఈ ప్రమాదంలో బియ్యం లారీ రోడ్డు కిందకు దూసుకెళ్లి బోల్తా పడగా.. ప్రమాదానికి కారణమైన లారీలో మంటలు చెలరేగి దగ్ధమైంది. విషయం తెలుసుకున్న ఫైర్‌ సిబ్బంది ఘటనా స్థలానికి చేరుకుని మంటలు ఆర్పివేశారు. రెండు లారీల డ్రైవర్లు క్షేమంగా బయటపడ్డారు. లారీలోని బియ్యాన్ని సివిల్‌ సప్‌లై అధికారులు పరిశీలించి రేషన్‌ బియ్యం కాదని తేల్చారు. కాగా ఈ ఘటనపై తమకు ఎలాంటి ఫిర్యాదు అందలేదని కోదాడ రూరల్‌ పోలీసులు తెలిపారు.

ఫ మంటలు చెలరేగి లారీ దగ్ధం