వ్యక్తిపై కత్తితో దాడి

వ్యక్తిపై కత్తితో దాడి

త్రిపురారం: పెద్ద మనుషుల సమక్షంలో పంచాయితీ పెట్టగా.. క్షణికావేశంలో ఓ వ్యక్తిపై మరో వ్యక్తి కత్తితో దాడి చేశాడు. ఈ ఘటన తిరుమలగిరి(సాగర్‌) పోలీస్‌ స్టేషన్‌ సమీపంలో మంగళవారం జరిగింది. సాగర్‌ సీఐ బీసన్న తెలిపిన వివరాల ప్రకారం.. తిరుమలగిరి(సాగర్‌) మండలం కీచ్యతండాకు చెందిన మోహన్‌ భార్యతో మునినాయక్‌ అనే వ్యక్తి తరచూ మాట్లాడుతుండగా.. మోహన్‌ అనుమానంతో తన భార్యతో తిరుమలగిరి పోలీస్‌ స్టేషన్‌లో మునినాయక్‌పై కేసు పెట్టించాడు. ఇదే విషయమై మంగళవారం తిరుమలగిరి పోలీస్‌ స్టేషన్‌ సమీపంలోని మార్కెట్‌ యార్డు వద్ద పెద్ద మనుషుల సమక్షంలో పంచాయితీ పెట్టగా.. మెహన్‌, మునినాయక్‌ మాట్లాడుకుంటున్నారు. ఈ క్రమంలో ఒక్కసారిగా మునినాయక్‌పై మోహన్‌ కత్తితో దాడికి పాల్పడ్డాడు. ఈ దాడిలో మునినాయక్‌కు వెన్ను, పొట్ట భాగంలో కత్తి పోట్లు పడ్డాయి. వెంటనే గమనించిన బంధువులు, పోలీసులు మునినాయక్‌ను ఆస్పత్రికి తరలించారు. నిందితుడు మెహన్‌ అదుపులోకి తీసుకొని విచారణ చేస్తున్నట్లు సీఐ బీసన్న తెలిపారు. తిరుమలగిరి(సాగర్‌) ఎస్‌ఐ వీరశేఖర్‌ పంచనామా నిర్వహించారు.

గుర్తుతెలియని వాహనం ఢీకొని వ్యక్తి మృతి

ఆత్మకూరు(ఎం): గుర్తుతెలియని వాహనం ఢీకొని వ్యక్తి మృతిచెందాడు. ఈ ఘటన ఆత్మకూరు(ఎం)మండలం కూరెళ్ల గ్రామంలో మంగళవారం సాయంత్రం జరిగింది. గ్రామస్తులు తెలిపిన వివరాల ప్రకారం.. కూరెళ్ల గ్రామానికి చెందిన మారుపాక వీరయ్య మృతిచెందడంతో మంగళవారం ఆయన అంత్యక్రియలు గ్రామంలో నిర్వహిస్తుండగా.. అదే గ్రామానికి చెందిన మారుపాక ఉప్పలయ్య(75) రోడ్డు పక్కన నిల్చున్నాడు. ఈ క్రమంలో గుర్తుతెలియని వాహనం వచ్చి ఉప్పలయ్యను ఢీకొట్టడంతో తీవ్రంగా గాయపడ్డాడు. చికిత్స నిమిత్తం అతడిని భువనగిరికి తరలిస్తుండగా మార్గమధ్యలో మృతిచెందాడు.