వృద్ధుడిని మోసం చేసి బంగారం చోరీ

వృద్ధుడిని మోసం చేసి బంగారం చోరీ

ఆలేరురూరల్‌: వృద్ధుడిని మోసం చేసి అతడి వద్ద ఉన్న బంగారంతో ఇద్దరు దొంగలు ఉడాయించారు. ఈ ఘటన ఆలేరు పట్టణ కేంద్రంలో మంగళవారం జరిగింది. పోలీసులు తెలిపిన వివరాల ప్రకారం.. మోటకొండూర్‌ మండలం అమ్మనబోలు గ్రామానికి చెందిన పులిగిల్ల బాలరాజు మంగళవారం హైదరాబాద్‌ నుంచి బస్సులో వచ్చి ఆలేరు పట్టణంలోని రైల్వే స్టేషన్‌ వద్ద దిగాడు. ఇంతలో ఇద్దరు గుర్తుతెలియని వ్యక్తులు అతడి వద్దకు వచ్చి తాము పోలీసులమని, ఇక్కడ దొంగలు పడ్డారని, ఒంటి మీద నగలు తీసి పేపర్‌లో పెట్టుకోమని చెప్పారు. దీంతో బాలరాజు తన వద్ద ఉన్న తులం బంగారం చైన్‌, రెండు ఉంగరాలు తీసి పేపర్‌లో పెట్టి జేబులో పెట్టుకుంటుండగా.. ఆ ఇద్దరు వ్యక్తులు ఒకసారి చెక్‌ చేస్తామని బాలరాజు నుంచి బంగారం తీసుకుని అప్పటికే తమ జేబులో ఉన్న రాళ్లు పేపర్‌లో పెట్టి బాలరాజు ఇచ్చారు. బాలరాజు పేపర్‌ తీసి బంగారాన్ని చూసుకునే లోపే ఇద్దరు దొంగలు అక్కడి నుంచి ఉడాయించారు. బాధితుడు ఇచ్చిన ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఎస్‌ఐ రజనీకర్‌ తెలిపారు.