నదీం అదుర్స్‌, సెమీస్‌ లో జార్ఖండ్‌

వడోదర: రంజీ ట్రోఫీలో జార్ఖండ్‌ జట్టు సత్తా చాటింది. తొలిసారిగా సెమీ ఫైనల్లోకి ప్రవేశించింది. క్వార్టర్‌ ఫైనల్లో హర్యానాపై 5 వికెట్ల తేడాతో విజయం సాధించింది. ఆట నాలుగో రోజు హర్యానా నిర్దేశించిన 175 పరుగుల లక్ష్యాన్ని ఛేదించి సెమీస్‌ లో అడుగుపెట్టింది. 30.2 ఓవర్లలో 5 వికెట్లు కోల్పోయి 178 పరుగులు సాధించింది. ఓపెనర్‌ ఇషాన్‌ కిషాన్‌(86) అర్ధసెంచరీతో రాణించాడు.

146/2 ఓవర్‌ నైట్‌ స్కోరుతో నాలుగో రోజు ఆట ప్రారంభించిన హర్యానా వెంటవెంటనే వికెట్లు కోల్పోయి 262 పరుగులకు ఆలౌటైంది. జార్ఖండ్‌ బౌలర్లలో షహబాజ్‌ నదీం 4, లెగ్‌ స్పిన్నర్ సామర్‌ ఖాద్రి 3 వికెట్లు పడగొట్టారు. తొలి ఇన్నింగ్స్‌ లో హర్యానా 258, జార్ఖండ్‌ 345 పరుగులు చేశాయి. రెండు ఇన్నింగ్స్ లో కలిపి 11 వికెట్లు పడగొట్టిన నదీం 'మ్యాన్‌ ఆఫ్‌ ది మ్యాచ్‌'గా ఎంపికయ్యాడు.