జెడ్పీటీసీలకు గౌరవ వేతనం మంజూరు

అనంతపురం సిటీ: ఉమ్మడి జిల్లాలోని 63 మంది జెడ్పీటీసీలు, ఇద్దరు కో–ఆప్షన్‌ సభ్యులకు గౌరవ వేతనం మంజూరైంది. 2024, మార్చి ఒకటి నుంచి జెడ్పీ చైర్‌పర్సన్‌ సహా జెడ్పీటీసీలు, కో–ఆప్షన్‌ సభ్యులకు గౌరవ వేతనం మంజూరు కాలేదు. ఈ అంశంపై సమావేశాల్లో పలుమార్లు సభ్యులు జిల్లా స్థాయి అధికారులను నిలదీశారు. ఈ నేపథ్యంలో గౌరవవేతనం చెల్లింపులకు రూ.50 లక్షలు అవసరమని జెడ్పీ అధికారులు ప్రభుత్వానికి నివేదిక పంపగా... రూ.34 లక్షలు విడుదల చేస్తూ ఉత్తర్వులు జారీ అయ్యాయి. ఈ మొత్తాన్ని ప్రజాప్రతినిధుల వ్యక్తిగత బ్యాంక్‌ ఖాతాల్లోకి జమ చేయనున్నట్లు డిప్యూటీ సీఈఓ వెంకటసుబ్బయ్య మంగళవారం తెలిపారు.