రోడ్డుప్రమాదంలో సింగిల్‌విండో మాజీ డైరెక్టర్‌ మృతి

రోడ్డుప్రమాదంలో సింగిల్‌విండో మాజీ డైరెక్టర్‌ మృతి

చౌడేపల్లె: కర్ణాటక రాష్ట్రం కోలారు జిల్లా రాయలపాడు పోలీస్‌స్టేషన్‌ సమీపంలో జరిగిన రోడ్డు ప్రమాదంలో వైఎస్సార్‌సీపీ నాయకుడు, సింగిల్‌విండో మాజీ డైరెక్టర్‌ బాజిగం చిట్టిబాబు(45) మృతిచెందాడు. మృతుడి కుటుంబ సభ్యుల కథనం మేరకు వివరాలిలా.. చిట్టిబాబు ముదిమడుగు హరిజనవాడలో గల తన బామ్మర్ది చంద్రమోహన్‌ వివాహానికి హాజరయ్యాడు. బుధవారం సాయంత్రం సత్రం నుంచి కడప–బెంగళూరుకు వెళ్లే ప్రధాన రహదారిలో బైక్‌లో వెళ్తుండగా ఎదురుగా వస్తున్న ఆర్టీసీ బస్సు ఢీకొంది. తీవ్రంగా గాయపడిన చిట్టిబాబును కోలార్‌ జాలప్ప ఆస్పత్రికి తరలించగా అప్పటికే మృతి చెందినట్లు వైద్యులు ధ్రువీకరించారు. కాగా బైక్‌లో వెనుక వైపు కూర్చున్న మరో మహిళకు తీవ్ర గాయపడగా ఆస్పత్రిలో చికిత్స పొందుతోంది. పోస్టుమార్టం అనంతరం మృతదేహాన్ని ఏ.కొత్తకోటకు తరలించారు. చిట్టిబాబు మృతితో గ్రామంలో విషాదచాయలు అలుముకున్నాయి. విషయం తెలుసుకున్న మాజీమంత్రి పెద్దిరెడ్డి రామచంద్రారెడ్డి, ఎంపీ మిథున్‌రెడ్డి, తంబళ్లపల్లె ఎమ్మెల్యే ద్వారకనాథరెడ్డి, రాష్ట్ర కార్యదర్శి పెద్దిరెడ్డి ఫోన్‌లో చిట్టిబాబు కుటుంబసభ్యులను పరామర్శించారు. వైఎస్సార్‌సీపీలో కీలక నాయకున్ని కోల్పోయామని విచారం వ్యక్తం చేశారు. అలాగే జెడ్పీటీసీ సభ్యుడు దామోదరరాజు, పలువురు పార్టీ శ్రేణులు నివాళులు అర్పించారు.