రైల్వే స్టేషన్‌ వద్ద గంజాయి స్వాధీనం

రైల్వే స్టేషన్‌ వద్ద గంజాయి స్వాధీనం

రాయగడ: స్థానిక రైల్వే స్టేషన్‌ వద్ద ఇద్దరు నిందితులను పట్టుకుని వారి నుంచి 25 కిలోల గంజాయిని రైల్వే పోలీసులు సొమవారం స్వాధీనం చేసుకున్నారు. స్వాధీనం చేసుకున్న గంజాయి విలువ సుమారు రూ.2.50 లక్షలు ఉంటుందని పోలీసులు అంచనా వేశారు. అరెస్టయిన వారిలో గుజరాత్‌ రాష్ట్రానికి చెందిన సూరజ్‌ పాసవాన్‌, హర్సా శర్మలు ఉన్నట్లు గుర్తించారు. రైల్వే పోలీసులు తెలియజేసిన వివరాల ప్రకారం.. కొరాపుట్‌ నుంచి అక్రమంగా గంజాయిని రాయగడకు తీసుకువచ్చిన నిందితులు రాయగడ నుంచి అహ్మదాబాద్‌కు ఆ గంజాయిని తరలించేందుకు ట్రైన్‌ కోసం ఎదురు చూస్తున్నారు. ఈ క్రమంలో రైల్వే పోలీసులు ప్లాట్‌ఫారం వద్ద యథావిధిగా తనిఖీలు నిర్వహిస్తున్న సమయంలో అనుమానాస్పదంగా కనిపించిన వీరి బ్యాగులను తనిఖీ చేయగా గంజాయి పట్టుబడింది. దీనిపై కేసు నమోదు చేసి నిందితులను కొర్టుకు తరలించారు.