వ్యక్తి ఆత్మహత్య

శ్రీకాకుళం క్రైమ్‌ : జిల్లాకేంద్రంలోని బలగ పొందరవీధికి చెందిన ఓ వ్యక్తి మనస్థాపంతో ఆత్మహత్యాయత్నానికి పాల్పడినట్లు రెండో పట్టణ సీఐ ఈశ్వరరావు తెలిపారు. గిడుతూరి గోవిందరావు (52) మద్యానికి బానిస కావడంతో భార్య, కుమారుడు మందలించేవారు. ఈ క్రమంలో ఈ నెల 25న ఫూటుగా మద్యం తాగడంతో భార్య మందలించడంతో మనస్థాపానికి గురై బాత్రూమ్‌లో ఉన్న ఫినాయిల్‌ తాగాడు. వెంటనే రిమ్స్‌కు తీసుకెళ్లి వైద్య చికిత్స చేయించారు. చికిత్స పొందుతూ బుధవారం మృతిచెందడంతో కేసు నమోదు చేసి దర్యాప్తు చేస్తున్నట్లు సీఐ చెప్పారు.

‘స్వయం ప్లస్‌’పై సమీక్ష

ఎచ్చెర్ల క్యాంపస్‌: కేంద్ర విద్యా మంత్రిత్వ శాఖ ఈ ఏడాది ప్రారంభించిన స్వయం ప్లస్‌పై ఉన్నత విద్యా మండలి బుధవారం ఆన్‌లైన్‌లో సమీక్ష నిర్వహించింది. పలువురు విద్యారంగ నిపుణులు హాజరై పలు సూచనలు చేశారు. స్వయం ప్లస్‌ కోర్సుల్లో విద్యార్థులు చేరేలా ప్రోత్సహించాలని సూచించారు. విద్యార్థులు, ఆధ్యాపకులు విషయ పరిజ్ఞానం పెంచుకోవాలన్నారు. పారిశ్రామిక అవసరాలు, అంతర్జాతీయ విద్యా రంగ మార్పులపై అవగాహన కలిగి ఉండాలన్నారు. సమీక్షలో వీసీ కె.ఆర్‌.రజిని, వర్సిటీ అధికారులు పాల్గొన్నారు.