కుమ్మరికుంట కబ్జా

కుమ్మరికుంట కబ్జా

కోనరావుపేట(వేములవాడ): మండలంలోని కొలనూర్‌లో చెరువు కబ్జాకు గురవుతోంది. కోనరావుపేట మండలం కొలనూర్‌లోని బీసీకాలనీ శివారులో సర్వే నంబర్‌ 416, 417లో కుమ్మరికుంట ఉంది. పురాతన కాలం నుంచి యాదవుల పేరిట ఉన్న ఈ కుంటలో 2002లో రజకసంఘానికి దోబీఘాట్లు నిర్మించి ఇచ్చారు. కొన్నేళ్లుగా వారు దోబీఘాట్లను వినియోగించకపోవడంతో అవి శిథిలమయ్యాయి. కొన్నేళ్లుగా అలాగే ఉన్న ఈ చెరువులో కొద్ది రోజుల క్రితం గ్రామానికి చెందిన వ్యక్తి చెరువులో కొంతభాగాన్ని చదును చేశారు. ఈ చెరువు తమదేనంటూ రజక సంఘం ఆధ్వర్యంలో హద్దులు పాతారు. కాగా ఈ కుమ్మరికుంట సుమారు 4 ఎకరాల్లో ఉండగా ప్రస్తుతం 20 గుంటలకే పరిమితమైంది. ఈ విషయాన్ని తెలుసుకున్న గ్రామస్తులు రెవెన్యూ అధికారులకు ఫిర్యాదు చేయగా డీటీ, ఆర్‌ఐ క్షేత్రస్థాయిలో విచారణ చేపట్టి హద్దురాళ్లను తొలగించాలని ఆదేశించారు. ఇప్పటి వరకు హద్దురాళ్లు అలాగే ఉన్నాయి. తమ గ్రామానికి చెందిన కుమ్మరికుంట చెరువును కాపాడాలని రైతులు, గ్రామస్తులు కోరుతున్నారు.