కంటికి కునుకు కరువాయే!

కంటికి కునుకు కరువాయే!

హుడాకాంప్లెక్స్‌: ఇంటర్నెట్‌, ఫేస్‌బుక్‌, వాట్సాప్‌, టెక్నాలజీ, టెలివిజన్‌ ప్రసారాలు సిటీజన్లకు కంటిమీద కునుకు లేకుండా చేస్తున్నాయి. రాత్రి 9 గంటలకే పడకెక్కాల్సిన వారు.. అర్ధరాత్రి దాటినా అరచేతిలో ఫోన్‌తో గడుపుతున్నారు. అందివచ్చిన సాంకేతిక, మారిన జీవనశైలి, ఆహారపు అలవాట్లు తోడు కావడంతో జిల్లాలో 40 శాతం మంది నిద్రలేమి సమస్యతో బాధపడుతున్నట్లు వైద్యుల పరిశీలనలో వెల్లడైంది. పరోక్షంగా ఇది తీవ్రమైన మానసికఆందోళన, ఏకాగ్రత లోపం, మధుమేహం, హైపర్‌ టెన్షన్లకే కాదు, యువత దాంపత్య జీవితంపై తీవ్ర ప్రభావం చూపుతోంది.

సమస్య నుంచి మరో సమస్య..

ఒకప్పుడు రాత్రి 8 గంటలకే నిద్రకు ఉపక్రమించిన సిటీజన్లు.. ప్రస్తుతం తీవ్రమైన పని ఒత్తిడి, మానసిక ఆందోళనతో అర్ధరాత్రి దాటినా రెప్పవాల్చడం లేదు. ఐటీ అనుబంధ రంగాల్లో పనిచేస్తున్న వారు.. విదేశాలకు అనుగుణంగా తమ పని వేళలను మార్చుకోవడం, వీకెండ్‌ పార్టీల పేరుతో వీరు ఎక్కువ సేపు డిస్కోలు, పబ్‌లలో గడుపుతున్నారు. ఇదే సమయంలో అర్ధరాత్రి దాకా మద్యం తాగడం, ఆయిల్‌, మసాలా ఫుడ్‌ ఎక్కువగా ఆరగిస్తున్నారు. ఆహారం జీర్ణం కాకముందే నిద్రకు ఉపక్రమించడంతో.. శ్వాసనాళాలపై ఒత్తిడి పెరుగుతోంది. పడకెక్కిన పది నిమిషాలకే గురకపెడుతున్నారు. బాధితుల్లో కొంతమంది స్లీపింగ్‌ టాబ్లెట్స్‌, ఇతర మత్తు పదార్థాలకు, మద్యానికి అలవాటు పడుతున్నారు. ఇలా ఒక సమస్య నుంచి బయట పడేందుకు యత్నించి, మరో సమస్యలో చిక్కుకుంటున్నట్లు జాతీయ నిద్ర ఫౌండేషన్‌ ఇటీవల నిర్వహించిన సర్వేలో వెల్లడైంది.

రోజుల వయసు శిశువులు: 18 గంటలు

ఏడాది లోపు చిన్నారులు: 14– 18 గంటలు

ఏడాది నుంచి మూడేళ్లలోపు: 12– 15 గంటలు

3–5 ఏళ్లలోపు చిన్నారులు: 11–13 గంటలు

5– 12 ఏళ్లలోపు ఉన్న వారు: 9– 11

12– 19 ఏళ్లలోపు ఉన్న వారు: 9–10 గంటలు

21 సంవత్సరాలు పైబడిన వారు: 7– 8 గంటలు

50 ఏళ్లు పైబడిన వారు 5– 7 గంటలు..

ఎవరు ఎన్నిగంటలు నిద్ర పోవాలి..

మంచి నిద్ర కోసం చిట్కాలు

నిద్ర పోవడానికి, మేల్కొనడానికి కచ్చితమైన వేళలు పాటించాలి. నిద్రకు ముందు ఎక్కువ భోజనం చేయకూడదు. నిద్రకు 4 గంటల ముందే మద్యం తాగడం ఆపేయాలి. ఆరు గంటల ముందే కాఫీ, టీతో పాటు సోడా, చాక్లెట్‌ వంటి వాటిని తీసుకోవడం ఆపేయాలి. క్రమం తప్పకుండా వ్యాయామం చేయాలి. కానీ నిద్రపోయే ముందు మాత్రం కాదు. గదిని చల్లగా, చీకటిగా, నిశ్శబ్దంగా ఉండేలా చూసుకోవాలి. శరీరానికి అవసరమైన ఉష్ణోగ్రత, వెంటిలేషన్‌ ఉండాలి. పడక గదిలో కంప్యూటర్లు, సెల్‌ఫోన్‌లు, ల్యాప్‌ట్యాప్‌లు లేకుండా చూసుకోవాలి.

– డాక్టర్‌ చిలువేరు శ్రీనివాసులు,

తిరుమల ఆస్పత్రి, ఓంకార్‌నగర్‌

అర్ధరాత్రి దాటినా ఫోన్‌ ఆట

నైట్‌ డ్యూటీలు, ఫేస్‌బుక్‌,

వాట్సాప్‌ టెక్నాలజీ ప్రభావం

మోతాదుకు మించిన మద్యపానం,

మాంసాహారం

జిల్లాలో నిద్రలేమి సమస్యతో

బాధపడుతున్న 40 శాతం మంది ప్రజలు

రోజుకు 7,8 గంటల నిద్రతోనే

ఆరోగ్యమంటున్న వైద్యులు

యువతలోనే అధికం

ప్రతి పది మందిలో ముగ్గురు నిద్రలేమితో బాధపడుతున్నారు. బాధితుల్లో ఎక్కువ మంది 35 ఏళ్లల లోపు వారే. నిద్ర లేమితో జబ్బులు రాకుండా ఉండాలంటే వ్యక్తికి కనీసం 8 గంటల నిద్ర తప్పనిసరి. ఆరు, అంతకన్నా తక్కువ గంటలు నిద్రపోతే ఏకాగ్రత లోపిస్తుంది. జ్ఞాపకశక్తి సంబంధ సమస్యలు వస్తాయి. రోగ నిరోధక శక్తి బలహీన పడుతుంది. కేవలం నాలుగైదు గంటలు మాత్రమే నిద్రపోయే వారిలో కేన్సర్‌పై పోరాడే శక్తి 70 శాతం తక్కువ ఉంటుంది. అంతేకాదు రాత్రి నిద్ర పోకపోవడం వలన మానసిక, శారీరక ఎదుగుదలకు సంబంధించిన హార్మోన్స్‌ తగ్గడంతో పాటు సెక్స్‌వల్‌ హార్మోన్స్‌ ఉత్పత్తిపై తీవ్ర ప్రభావం పడుతుంది.

– డాక్టర్‌ అమరవాది ప్రభాకరచారి, సీనియర్‌ వైద్య నిపుణులు

సుఖ నిద్ర కోసం జాగ్రత్తలు

నిద్రపోయే ముందు మొబైల్‌ ఫోన్లు, ఇతరత్రా డిజిటల్‌ స్క్రీన్లు చూడొద్దు. అవి నిద్రపై తీవ్ర ప్రభావం చూపుతాయి. కాఫీ తాగితే బాగా నిద్ర పడుతుందని చాలా మంది భావిస్తుంటారు. కానీ అది తప్పు. మెదడు చుట్టూ ప్రవహించే కెఫిన్‌ గాఢనిద్రను దూరం చేస్తుంది. మద్యం సాధ్యమైనంత త్వరగా స్పృహను పొగొట్టి, సహజసిద్ధమైన నిద్రను దూరం చేస్తుంది. రాత్రిపూట మధ్య మధ్యలో నిద్రలేచేలా చేస్తుంది. అలా లేచిన విషయం గుర్తుండకుండా చేస్తుంది. గాఢ నిద్రను అడ్డుకుంటుంది. కాబట్టి మద్యం నిద్రకు ఉపకరించదు. రాత్రి 7 గంటల లోపే డిన్నర్‌ పూర్తి చేయాలి. వ్యాయామం, యోగాసనాలు సుఖ నిద్రకు బాగా ఉపయోగపడతాయి.

– డాక్టర్‌ అర్చన, మెడికల్‌ ఆఫీసర్‌, సరూర్‌నగర్‌