నేటి నుంచి కుష్టువ్యాధిగ్రస్తుల గుర్తింపు

నేటి నుంచి కుష్టువ్యాధిగ్రస్తుల గుర్తింపు

మహారాణిపేట : ఈనెల 20 నుంచి వచ్చే నెల 2వ తేదీ వరకు జిల్లాలోని అన్ని పట్టణ ప్రాథమిక ఆరోగ్య కేంద్రాల్లో కుష్టు వ్యాధిగ్రస్తులను గుర్తించే ప్రత్యేక కార్యక్రమం చేపట్టనున్నారు. ఈ మేరకు ప్రత్యేక పోస్టర్‌ను కలెక్టర్‌ ఎం.ఎన్‌.హరేందిర ప్రసాద్‌ సోమవారం ఆవిష్కరించారు. ఈ కార్యక్రమం అమలు చేసేందుకు జిల్లాలో 951 టీమ్‌లు వేశామని, వీరు ఇంటింటికి వెళ్లి అనుమానితులను గుర్తించి, సమీపంలో యూపీహెచ్‌సీకి తీసుకెళ్లి పరీక్షలు నిర్వహిస్తారని డీఎంహెచ్‌వో డాక్టర్‌ పి.జగదీశ్వరరావు చెప్పారు. ఈ ఏడాది ఇప్పుటివరకు జిల్లాలో 85 కుష్టువ్యాధి గ్రస్తులను గుర్తించామని, వీరికి ఉచితంగా చికిత్స అందిస్తున్నామన్నారు. కార్యక్రమంలో జిల్లా లెప్రసీ నివారణాధికారి డాక్టర్‌ జి.పూర్ణేంద్రబాబు, కేజీహెచ్‌ ఆర్‌ఎంవో డాక్టర్‌ దవళ భాస్కరరావు, ఆరోగ్యశ్రీ కోఆర్డినేటర్‌ డాక్టర్‌ అప్పారావు పాల్గొన్నారు.