గాంధీ, శాస్త్రిల జీవితం స్ఫూర్తిదాయకం

గాంధీ, శాస్త్రిల జీవితం స్ఫూర్తిదాయకం

తుమ్మపాల: జాతిపిత మహాత్మాగాంధీ, లాల్‌ బహదూర్‌ శాస్త్రి నిరాడంబరంగా జీవించి స్వాతంత్య్రోద్యమం ద్వారా దేశప్రజలకు స్వేచ్ఛను ఇవ్వడంలో ముఖ్య పాత్ర పోషించారని, వారి జీవితం అందరికీ ఆదర్శమని కలెక్టర్‌ విజయ కృష్ణన్‌ అన్నారు.పట్టణంలో బెల్లం మార్కెట్‌ వద్ద నిర్వహించిన గాంధీజయంతి ఉత్సవాల్లో ఆమెతో పాటు జాయింట్‌ కలెక్టర్‌ జాహ్నవి, ఎమ్మెల్యే కొణతాల రామకృష్ణ తదితరులు మహాత్ముని విగ్రహానికి పూల మాలలు వేసి నివాళి అర్పించారు. ఈ సందర్భంగా కలెక్టర్‌ మాట్లాడుతూ గాంధీజీ చేసిన శాంతియుత పోరాటం అందరికీ స్ఫూర్తిదాయకమన్నారు. పరిసరాలను పరిశుభ్రంగా ఉంచుకోవడం ప్రతి ఒక్కరి బాధ్యతని తెలిపారు. అంతకుముందు నిర్వహించిన స్వచ్ఛతా హీ సేవ కార్యక్రమంలో కలెక్టరేట్‌ ప్రాంగణం, శంకరం రైల్వే బ్రిడ్జి మీద చెత్తను తొలగించి పరిసరాలను శుభ్రం చేశారు.కలెక్టర్‌, జేసీ స్వయంగా కొడవలి చేతపట్టి మొక్కలను కట్‌ చేశారు. చీపురుతో రోడ్డును శుభ్రం చేశారు.ఈ కార్యక్రమంలో రెవెన్యూ డివిజన్‌ అధికారి చిన్నికృష్ణ, జిల్లా పంచాయతీ అధికారి శిరీష రాణి, ఇతర అధికారులు పాల్గొన్నారు.