పెంచిన పనివేళలను ఉపసంహరించుకోవాలి

పెంచిన పనివేళలను ఉపసంహరించుకోవాలి

● పీఆర్‌టీయూ జిల్లా అధ్యక్షుడు డి.గోపినాథ్‌ డిమాండ్‌

కాశీపురం హైస్కూల్లో మాట్లాడుతున్న పీఆర్‌టీయూ జిల్లా అధ్యక్షుడు గోపినాథ్‌

దేవరాపల్లి: ఉన్నత పాఠశాలల్లో పెంచిన పనివేళలను ప్రభుత్వం వెంటనే ఉపసంహరించుకోవాలని పీఆర్‌టీయూ జిల్లా అధ్యక్షుడు డి.గోపినాథ్‌ డిమాండ్‌ చేశారు. పీఆర్‌టీయూ సభ్యత్వ నమోదు కార్యక్రమంలో భాగంగా మండలంలోని కాశీపురం, ఎ.కొత్తపల్లి, ముషిడిపల్లి, ఎం.అలమండ, కలిగొట్ల, తెనుగుపూడి తదితర పాఠశాలలను గురువారం ఆయన సందర్శించారు. ఈ సందర్భంగా మాట్లాడుతూ మన రాష్ట్రానికి ఇరువైపులా ఉన్న ఇతర రాష్ట్రాలలోని పాఠశాలల్లో 5 గంటల వరకు పనివేళలు ఎక్కడా లేవన్నారు. విద్యార్థులు పాఠశాలల్లో సుమారు 8 గంటలపాటు ఉండటంతో తీవ్రమైన మానసిక ఒత్తిడికి గురికావాల్సి వస్తుందన్నారు. ఈ ఇబ్బందుల దృష్ట్యా ఉన్నత పాఠశాలల్లో పనివేళలను పెంచే ఆలోచనను ప్రభుత్వం తక్షణమే ఉపసంహరించుకోవాలని కోరారు. కొఠారి కమిషన్‌ సూచన మేరకు పాత పనివేళలను కొనసాగించాలన్నారు. పీఆర్‌టీయూ రాష్ట్ర కార్యదర్శి సత్యంనాయుడు, మండల అధ్యక్షుడు సుధాకర్‌, కార్యదర్శి అప్పారావు తదితర్లు పాల్గొన్నారు.