జగనన్న కాలనీలో విజిలెన్స్‌ బృందం సందర్శన

జగనన్న కాలనీలో విజిలెన్స్‌ బృందం సందర్శన

నాదెండ్ల: గణపవరం గ్రామ రెవెన్యూ పరిధిలోని జగనన్న కాలనీని విజిలెన్స్‌ అధికారులు గురువారం సందర్శించారు. గత వైఎస్సార్‌ సీపీ ప్రభుత్వ హయాంలో సుమారు 30 ఎకరాల విస్తీర్ణంలో 1200 మంది లబ్ధిదారులకు పట్టాలు మంజూరు చేశారు. అనంతరం లబ్ధిదారుల పేరిట రిజిస్ట్రేషన్‌ చేయించి పత్రాలు అందించారు. గ్రామంలో రక్షిత మంచినీటి చెరువు దిగువ భాగాన సర్వే నెంబర్లు 80, 81, 94, 95, 96లలో సుమారు 29.76 సెంట్ల భూమిని కావూరు లింగంగుంట్ల వెళ్ళే రోడ్డులో వీరాంజనేయస్వామి ఆలయం పక్కనే మరో మూడెకరాలు ప్రభుత్వం సేకరించి లబ్ధిదారులకు ప్లాట్లుగా అందించింది. జిల్లా విజిలెన్స్‌ అధికారి సీహెచ్‌ శివాజీ, ఏవో ఆదినారాయణ, శ్రీరాంమూర్తిలు కాలనీని సందర్శించి రైతులతో మాట్లాడారు. ప్రభుత్వం భూమిని సేకరించకముందు భూమి ధరలు, సేకరించిన తరువాత ధరలను సమీక్షించారు. కార్యక్రమంలో వీఆర్వోలు ఆదిలక్ష్మి, అంకమ్మరావు, గ్రామ సర్వేయర్లు ప్రసన్నకుమారి, పవన్‌కుమార్‌, అనిల్‌, శ్రీనివాసరావు, ఇంజనీరింగ్‌ అసిస్టెంట్లు బాష, సంతోష్‌, ఉమాదేవి పాల్గొన్నారు.