చెక్కపల్లిలో భారీ చోరీ

చెక్కపల్లిలో భారీ చోరీ

ముసునూరు: చెక్కపల్లిలోని ఓ ఇంటిలో భారీ చోరీ జరిగింది. రూ.4 లక్షల నగదు, భారీ బంగారాన్ని దొంగలు అపహరించారు. వివరాలు ఇలా ఉన్నాయి. చెక్కపల్లిలో మందలపు వెంకట రాధాకృష్ణ దంపతులు మూడు రోజుల క్రితం దైవ దర్శనార్థం తిరుమల తిరుపతి వెళ్లారు. గుర్తు తెలియని వ్యక్తులు శనివారం రాత్రి ఇంటి వెనుక వైపు తలుపులు పగలగొట్టి చోరీకి పాల్పడ్డారు. ఆదివారం ఉదయం గమనించిన ఆ ఇంటి పనివారు యజమానికి విషయం తెలియజేశారు. అప్పటికే తిరుగు ప్రయాణంలో ఏలూరుకు చేరుకున్న రాధాకృష్ణ ముసునూరు పోలీసులకు సమాచారం ఇచ్చారు. ఈ ఘటనలో రూ.4 లక్షల నగదు, భారీగా బంగారం అపహరణకు గురైనట్లు చెబుతున్నారు. నూజివీడు సీఐ కొప్పిశెట్టి రామకృష్ణ, ఎస్సై ఎం.చిరంజీవి, చాట్రాయి ఎస్సై రామకృష్ణ జిల్లా కేంద్రం నుంచి క్లూస్‌ టీమ్‌, డాగ్‌ స్క్వాడ్‌ను రప్పించి, ఆధారాలు సేకరించారు. డీఎస్పీ కేవీవీఎన్‌వీ ప్రసాద్‌ ఘటనా స్థలాన్ని పరిశీలించి, పరిస్థితిని సమీక్షించారు.