ఎర్రచందనం దుంగలు స్వాధీనం

బద్వేలు అర్బన్‌ : బద్వేలు – కడప రహదారిలోని కొంగలవీడు క్రాస్‌ వద్ద 7 ఎర్రచందనం దుంగలను స్వాధీనం చేసుకుని ఒక వ్యక్తిని అరెస్టు చేయడంతో పాటు ఒక టాటాగూడ్స్‌ వాహనాన్ని స్వాధీనం చేసుకున్నట్లు బద్వేలు ఫారెస్టు రేంజ్‌ ఆఫీసర్‌ నయీమ్‌ అలీ పేర్కొన్నారు. స్థానిక సిద్దవటం రోడ్డులోని ఫారెస్టు బంగ్లా ఆవరణలో మంగళవారం ఏర్పాటు చేసిన విలేకరుల సమావేశంలో ఆయన వివరాలను వెల్లడించారు. కొంగలవీడు క్రాస్‌ రోడ్డు వద్ద ఎర్రచందనం దుంగలు అక్రమ రవాణా చేసేందుకు సిద్ధంగా ఉంచారని రాబడిన సమాచారం మేరకు సిబ్బందితో వెళ్లి దాడులు నిర్వహించామన్నారు. కర్ణాటక రాష్ట్రం కటిగినహల్లికి చెందిన సయ్యద్‌ముబారక్‌ వాహనంలో దుంగలు తరలిస్తూ పట్టుబడ్డారన్నారు. స్వాధీనం చేసుకున్న దుంగల విలువ సుమారు రూ.లక్ష ఉంటుందని ఆయన పేర్కొన్నారు. ఈ దాడుల్లో డిప్యూటీ రేంజ్‌ ఆఫీసర్‌ కె.వెంకటశేషయ్య పాల్గొన్నారు.