మహిళ అదృశ్యం

మహిళ అదృశ్యం

ఎర్రగుంట్ల : మండల పరిధిలోని చిన్నదండ్లూరు గ్రామానికి చెందిన గాలి అశ్విని (24) అనే మహిళ అదృశ్యమైందని ఆమె భర్త గాలి సూరి ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు కలమల్ల ఎస్‌ఐ తిమోతి మంగళవారం తెలిపారు. ఈ నెల 5వ తేదీన భర్త గాలి సూరి కూలి పనుల నిమిత్తం వెళ్లగా సాయంత్రం ఇంటికి వచ్చి చూడగా తన భార్య కనిపించలేదు. బంధువుల ఇళ్లలో, తెలిసిన వారి ఇళ్లలో విచారణ చేయగా ఆచూకీ లభించలేదు. దీంతో మంగళవారం కలమల్ల పోలీ్‌స్‌స్టేషన్‌కు వచ్చి ఫిర్యాదు చేశాడు.

ఇందిరకు నివాళులు

కడప వైఎస్‌ఆర్‌ సర్కిల్‌ : దివంగత ఇందిరాగాంధీ ఆశయాలను ప్రతి ఒక్కరూ నెరవేర్చాలని పీసీసీ అధ్యక్షురాలు షర్మిల పేర్కొన్నారు. మంగళవారం జిల్లా కాంగ్రెస్‌ పార్టీ కార్యాలయంలో ఇందిరా గాంధీ జయంతి సందర్భంగా ఆమె చిత్రపటానికి పూలమాల వేసి నివాళులు ఆర్పించారు. తన పర్యటనలో భాగంగా ఆమె పెద్దదర్గాను సందర్శించారు. డీసీసీ అధ్యక్షురాలు ఎన్‌డీ విజయ జ్యోతి, నాయకులు అఫ్జల్‌ ఖాన్‌, దృవ కుమార్‌ రెడ్డి, ఇర్ఫాన్‌ భాష తదితరులు పాల్గొన్నారు.

దాడి చేసినవారిపై

చర్యలు తీసుకోవాలి

సాక్షి టాస్క్‌ఫోర్స్‌ : ఇటీవల కొన్ని రాజకీయ పార్టీల నేతలు మాదిగల మధ్యన చిచ్చుపెట్టే కుట్ర పన్నుతున్నారని ఏపీ ఎమ్మార్పీఎస్‌ రాష్ట్ర అధ్యక్షుడు దండు వీరయ్య మాదిగ విమర్శించారు. మంగళవారం ఆయన సింహాద్రిపురంలో విలేకరులతో మాట్లాడుతూ మండలంలోని బలపనూరు ఎస్సీ కాలనీలో ఉన్న ఎం.భార్గవ, తండ్రి ఎం.వెంకటరమణపై అగ్రవర్ణాల వారు దాడి చేశారని, అప్పట్లో వారిపైన సింహాద్రిపురం పోలీస్‌ స్టేషన్‌లో ఎస్సీ ఎస్టీ అట్రాసిటీ కేసు నమోదైందన్నారు. దాడి చేసిన గజ్జల చంద్రశేఖర్‌ రెడ్డికి అనుచరుడుగా ఉన్న ఎల్లయ్యగారి చిన్న ఓబయ్య గత కొన్నేళ్లుగా పులివెందులలో నివాసముంటున్న రామయ్యగారి కృష్ణమూర్తిపై దాడి చేశారు. ఇటీవల మళ్లి పెళ్లి సందర్భంగా బలపనూరుకు వచ్చిన కృష్ణమూర్తిపై ఎల్లయ్య గారి చిన్న ఓబయ్య దాడి చేయడం వెనుక గజ్జల చంద్రశేఖర్‌ రెడ్డి హస్తం ఉందన్నారు. పోలీస్‌ అధికారులు వెంటనే చర్యలు తీసుకోవాలన్నారు. ఈ కార్యక్రమంలో డప్పు చర్మ కళాకారుల రాష్ట్ర కన్వీనర్‌ కె.నాగభూషణం మాదిగ, జిల్లా ఉపాధ్యక్షులు రామయ్య గారి కృష్ణమూర్తి, తుమ్మలపల్లి సూర్యనారాయణ మాదిగ తదితరులు పాల్గొన్నారు.

1/2

మహిళ అదృశ్యం

2/2

మహిళ అదృశ్యం