‘పది’లో వందశాతం ఉత్తీర్ణత సాధించాలి

‘పది’లో వందశాతం ఉత్తీర్ణత సాధించాలి

● కలెక్టర్‌ రాజర్షి షా ● ప్రధానోపాధ్యాయులతో గూగుల్‌మీట్‌

కై లాస్‌నగర్‌: పదో తరగతిలో వందశాతం ఉత్తీర్ణత సాధించేలా హెచ్‌ఎంలు, ఉపాధ్యాయులు ప్రత్యేక శ్రద్ధ వహించాలని కలెక్టర్‌ రాజర్షి షా ఆదేశించారు. ‘పది’ పరీక్షల సన్నద్ధతపై కేజీబీవీలు, ఉన్నత పాఠశాలలు, మోడల్‌ స్కూళ్లు, జూనియర్‌ కళాశాలల ప్రిన్సిపాళ్లు, ప్రధానోపాధ్యాయులు, మండల ప్రత్యే క అధికారులకు శుక్రవారం గూగుల్‌ మీట్‌ ద్వారా దిశానిర్దేశం చేశారు. షెడ్యూల్‌ ప్రకారం ప్రత్యేక తరగతుల నిర్వహణ, అభ్యాస దీపికలు ఫాలో అవుతున్నారా లేదా అనే అంశాలపై ఆరా తీశారు. ఈ సందర్భంగా కలెక్టర్‌ మాట్లాడుతూ పరీక్షలు సమీపిస్తున్న తరుణంలో చాలా మంది విద్యార్థుల్లో ఆందోళన, ఒత్తిడి కలిగే అవకాశముంటుందన్నారు. ఈ పరిస్థితుల్లో వారికి మనోధైర్యం కల్పించాల్సిన బాధ్యత తల్లిదండ్రులు, ఉపాధ్యాయులపైనే ఉంటుందన్నారు. మండల ప్రత్యేక అధికారులు, ప్రిన్సిపాళ్లు, ప్రధానోపాధ్యాయులు వచ్చే ఈ రెండు నెలల పాటు విద్యార్థులకు అందుబాటులో ఉండి వారు మంచి మార్కులు సాధించేలా దృష్టి సారించాలన్నారు. అలాగే ఇంటర్మీడియెట్‌లోనూ వందశాతం ఉత్తీర్ణతే లక్ష్యంగా పనిచేయాలని సూచించారు. ఇందులో బీసీ సంక్షేమాధికారి రాజలింగు, సెక్టోరియల్‌ అధికారులు తదితరులు పాల్గొన్నారు.