మీ స్పందన కోసం ఎదురు చూస్తున్నా : విక్రమ్‌

‘‘నా ‘అపరిచితుడు’ సినిమా దేశంలోనే విజయవాడలో అత్యధిక రోజులు ఆడింది. బ్యూటిఫుల్‌ అడ్వెంచరస్‌గా రూపొందిన నా తాజా‘తంగలాన్‌’ మూవీ ప్రేక్షకులను కొత్త ప్రపంచంలోకి తీసుకెళుతుంది. మా చిత్రాన్ని థియేటర్స్‌లోనే చూడండి’’ అన్నారు హీరో విక్రమ్‌. పా. రంజిత్‌ దర్శకత్వంలో విక్రమ్, పార్వతీ తిరువోతు, మాళవికా మోహనన్‌ నటించిన చిత్రం ‘తంగలాన్‌’. 

కేఈ జ్ఞానవేల్‌ రాజా నిర్మించిన ఈ సినిమా ఈ నెల 15న విడుదలవుతోంది. ఈ చిత్రాన్ని తెలుగులో మైత్రీ మూవీ డిస్ట్రిబ్యూషన్‌ రిలీజ్‌ చేస్తోంది. సోమవారం విజయవాడలో జరిగిన ప్రెస్‌మీట్‌లో విక్రమ్‌ మాట్లాడుతూ– ‘‘తంగలాన్‌’ మంచి సినిమా. మీరంతా (ప్రేక్షకులు) ఎప్పుడెప్పుడు ఈ సినిమాని చూసి మీ స్పందన తెలియజేస్తారా? అని వేచి చూస్తున్నా’’ అని తెలిపారు.