చికిత్స పొందుతూ మహిళ మృతి

చికిత్స పొందుతూ మహిళ మృతి

బూర్జ: మండలంలోని బూర్జ పంచాయతీ చిన్నకురింపేట గ్రామానికి చెందిన బొడ్డు యశోదమ్మ(59) శ్రీకాకుళంలోని ఒక ప్రైవేటు ఆస్పత్రిలో చికిత్స పొందుతూ శనివారం మృతి చెందింది. గ్రామస్తులు తెలిపిన వివరాల మేరకు.. ఆమెతో కలిసి 9 మంది కనుమ రోజు బుధవారం సీతంపేట మండలానికి పర్యటనకు వెళ్లారు. అక్కడ ఆడలి వ్యూ పాయింట్‌ సమీపంలో ఆటో అదుపు తప్పి బోల్తాపడి దెబ్బలు తగిలాయి. దీంతో 9 మందిని పాలకొండ ఏరియా ఆస్పత్రికి వైద్యం నిమిత్తం తరలించారు. వీరిలో బొడ్డు యశోదమ్మ తలకు బలమైన దెబ్బలు తగలడంతో చెవి నుంచి రక్తస్రావం జరిగింది. దీంతో మెరుగైన చికిత్స కోసం శ్రీకాకుళంలోని ఒక ప్రైవేటు ఆస్పత్రికి ఆమెను తరలించారు. కాగా అక్కడ చికిత్స పొందుతూ ఆమె మృతి చెందారు. ఆమెకు భర్త లచ్చుము, ఇద్దరు వివాహమైన ఆడపిల్లలు, ఒక కొడుకు ఉన్నారు.