ప్రైవేట్ రంగ బ్యాంక్ ఫెడరల్ బ్యాంక్ సరికొత్త డిజిటల్‌ చెల్లింపు వ్యవస్థను తీసుకొచ్చింది. ‘స్మైల్ పే’ అనే ఫేషియల్ పేమెంట్ సిస్టమ్‌ను ప్రారంభించింది. దీంతో కస్టమర్లు కేవలం కెమెరాను చూసి నవ్వుతూ చెల్లింపులు జరపవచ్చు. ఈ సేవతో డబ్బు లావాదేవీల కోసం మీకు నగదు, కార్డ్ లేదా మొబైల్ అవసరం ఉండదు. రిలయన్స్ రిటైల్, అనన్య బిర్లాకు చెందిన ఇండిపెండెంట్ మైక్రో ఫైనాన్స్ ద్వారా కొన్ని ఎంపిక చేసిన శాఖలలో దీని వినియోగం ఇప్పటికే ప్రారంభమైంది.పైలట్ ప్రాజెక్టుప్రస్తుతం ఈ సదుపాయాన్ని పైలట్ ప్రాజెక్టుగా ప్రారంభించారు. ఈ చెల్లింపు వ్యవస్థ 'భీమ్‌ ఆధార్ పే'పై ఆధారపడి ఉంటుంది. దీనిపై నిర్మించిన అప్‌గ్రేడెడ్ ఫేస్ రికగ్నిషన్ టెక్నాలజీని ఇది ఉపయోగించుకుంటుంది. యూజర్లు తమ ఫేస్‌ను స్కాన్ చేయడం ద్వారా చెల్లింపులు చేయడానికి వీలు కల్పిస్తుంది. దీంతో కార్డు లేదా మొబైల్ లేకుండా కూడా వ్యాపారులకు చెల్లింపులు చేయగలరు. మొత్తం లావాదేవీ ప్రక్రియ రెండు దశల్లో పూర్తవుతుంది.స్మైల్‌పే ఫీచర్లుస్మైల్‌పే ద్వారా నగదు, కార్డ్ లేదా ఫోన్‌ని తీసుకెళ్లకుండానే మీ లావాదేవీని పూర్తి చేయవచ్చు. దీనితో పాటు, ఈ సదుపాయాన్ని ప్రవేశపెట్టడం వల్ల కౌంటర్ వద్ద రద్దీ నుండి ఉపశమనం లభిస్తుంది. సురక్షితమైన ఆధార్‌ ఫేస్ రికగ్నిషన్ సర్వీస్ ఆధారంగా చేసే లావాదేవీలతో భద్రత చింత ఉండదు. స్మైల్‌పే ఫీచర్ ఫెడరల్ బ్యాంక్ కస్టమర్‌లకు మాత్రమే ప్రత్యేకంగా అందుబాటులో ఉంటుంది. దీని కోసం వ్యాపారులు, వినియోగదారులు ఇద్దరూ ఆ బ్యాంకులో ఖాతాలను కలిగి ఉండాలి. రాబోయే రోజుల్లో ఈ వ్యవస్థను మరింత విస్తరించాలని ఫెడరల్ బ్యాంక్ యోచిస్తోంది.ఎలా పనిచేస్తుందంటే..స్మైల్‌పేను వినియోగించాంటే మొబైల్‌లో ఫెడ్‌ మర్చెంట్‌ (FED MERCHANT) అనే యాప్‌ ఉండాలి.ఫెడరల్ బ్యాంక్‌తో అనుసంధానమైన దుకాణాల్లో షాపింగ్‌ చేసి బిల్లు చెల్లింపు సమయంలో స్మైల్ పే ఎంచుకోవాలి. తర్వాత దుకాణదారు.. కస్టమర్ ఆధార్ నంబర్‌ను నమోదు చేసి యాప్ ద్వారా చెల్లింపును ప్రారంభిస్తారు. దుకాణదారు మొబైల్ కెమెరా కస్టమర్ ఫేస్‌ను స్కాన్ చేస్తుంది. ఆధార్‌ సిస్టమ్ ఆధారంగా ఫేస్‌ రికగ్నిషన్‌ డేటాతో సరిపోల్చుకుని చెల్లింపు పూర్తవుతుంది. కస్టమర్ ఖాతా నుండి డబ్బు దుకాణదారుడి ఖాతాలో జమవుతుంది.

హైదరాబాద్, బిజినెస్‌ బ్యూరో: వచ్చే ఏడాదిన్నర వ్యవధిలో తెలుగు రాష్ట్రాల్లో తమ శాఖల సంఖ్యను 100 పైచిలుకు స్థాయికి పెంచుకోనున్నట్లు ఫెడరల్‌ బ్యాంక్‌ ఎండీ శ్యామ్‌ శ్రీనివాసన్‌ తెలిపారు. తద్వారా రెండు రాష్ట్రాలను పూర్తి స్థాయి జోన్‌గా మార్చే యోచన ఉన్నట్లు పేర్కొన్నారు. ప్రస్తుతం ఏపీ, తెలంగాణలో సంఖ్య 78గా ఉందని చెప్పారు. హైదరాబాద్‌లో బ్యాంకు కార్యకలాపాలు ప్రారంభించి 50 ఏళ్లు పూర్తయిన సందర్భంగా గురువారమిక్కడ నిర్వహించిన కార్యక్రమాల్లో ఆయన పాల్గొన్నారు. ప్రస్తుతం హైదరాబాద్‌లో తమ లోన్‌బుక్‌ 10,500 కోట్ల స్థాయిలో ఉందని, రిటైల్‌ బ్యాంకింగ్‌పై మరింతగా దృష్టి పెడుతున్నామని శ్రీనివాసన్‌ వివరించారు. ప్రత్యేక ప్రాంతీయ క్రెడిట్‌ హబ్‌ ద్వారా గ్రామీణ, వ్యవసాయ రంగాల ఆర్థిక అవసరాలు తీరుస్తున్నట్లు తెలిపారు. నలభై అయిదేళ్ల వ్యవధిలో సాధించిన వ్యాపారాన్ని గత అయిదేళ్లలో రెట్టింపు చేసుకున్నామని శ్రీనివాసన్‌ చెప్పారు. ఇక్కడి నుంచి మూడేళ్లలోనే రెట్టింపు వ్యాపారం లక్ష్యంగా పెట్టుకున్నామని వివరించారు. బ్యాంకుకు ప్రస్తుతం దేశవ్యాప్తంగా సుమారు 1,600 శాఖలు ఉన్నాయి.

ముంబై: ప్రైవేట్‌ రంగ సంస్థ ఫెడరల్‌ బ్యాంక్‌ గత ఆర్థిక సంవత్సరం(2023–24) చివరి త్రైమాసికంలో ఆసక్తికర ఫలితాలు ప్రకటించింది. జనవరి–మార్చి(క్యూ4)లో నికర లాభం నామమాత్ర వృద్ధితో రూ. 906 కోట్లకు చేరింది. అంతక్రితం ఏడాది(2022–23) క్యూ4లో రూ. 903 కోట్లు ఆర్జించింది. ఇందుకు పెన్షన్‌ ప్రొవిజన్లు కారణమయ్యాయి. నికర వడ్డీ ఆదాయం 15 శాతం ఎగసి రూ. 2,195 కోట్లను తాకింది. 20 శాతం రుణ వృద్ధి ఇందుకు సహకరించగా.. నికర వడ్డీ మార్జిన్లు 3.36 శాతం నుంచి 3.21 శాతానికి నీరసించాయి. పెన్షన్లకు రూ. 162 కోట్ల ప్రొవిజన్లు చేపట్టింది. ఇక పూర్తి ఏడాదికి బ్యాంక్‌ రూ. 3,720 కోట్ల నికర లాభం ఆర్జించింది. 2022–23లో రూ. 3,010 కోట్లు మాత్రమే నమోదైంది. ఈ ఏడాది(2024–25) 18 శాతం రుణ వృద్ధిని లక్ష్యంగా పెట్టుకుంది. తాజా స్లిప్పేజీలు రూ. 436 కోట్ల నుంచి రూ. 352 కోట్లకు తగ్గాయి. స్థూల మొండిబకాయిలు 2.13 శాతానికి చేరగా.. కనీస మూలధన నిష్పత్తి 16.13 శాతంగా నమోదైంది. ఎండీ, సీఈవో శ్యామ్‌ శ్రీనివాసన్‌ సెప్టెంబర్‌లో బాధ్యతల నుంచి తప్పుకోనున్న నేపథ్యంలో కొత్త చీఫ్‌ ఎంపికకు బోర్డు కసరత్తు చేస్తున్నట్లు బ్యాంక్‌ వెల్లడించింది. అభ్యర్ధుల జాబితాలను కొద్ది వారాలలో సిద్ధం చేయనున్నట్లు తెలుస్తోంది. ఫెడరల్‌ బ్యాంక్‌ షేరు ఎన్‌ఎస్‌ఈలో 3.2 శాతం బలపడి రూ. 168 వద్ద ముగిసింది.

అమెరికా ఫెడరల్‌ బ్యాంక్‌ ఈ మధ్య కాలం వరకూ వడ్డీ రేట్లను పెంచుతూ వచ్చింది. అనంతరం గత కొద్ది దఫాల తమ సమావేశాలలో ఆ పెరిగిన వడ్డీ రేట్లను యథాతథంగా ఉంచుతూ నిర్ణ యాలు తీసుకుంటూ వచ్చింది. ఈ వడ్డీరేట్ల పెంపు ఉద్దేశ్యం దేశంలో పెరిగిన ద్రవ్యోల్బణాన్ని అదుపు చేయడం. ఈ చర్య వల్ల ప్రస్తుతం ఆ దేశంలో ద్రవ్యోల్బణం అదుపులోకి వచ్చింది. నవంబర్‌ 2023కు సంబంధించి వెలువడిన  అమెరికా ‘వినియోగదారుల ధరల సూచీ’ 3.1 శాతంగా నమోదు అయింది. అంతకుముందరి అక్టోబర్‌ మాసంలో ఈ ద్రవ్యోల్బణం 3.2 శాతంగా ఉంది. ముఖ్యంగా, కోర్‌ ఇన్‌ఫ్లేషన్‌గా పిలవబడే ఆహార, ఇంధన ధరల పెరుగుదలను లెక్కలలోంచి తీసివేసి, అంచనా వేసే ద్రవ్యోల్బణం 4 శాతం వద్ద స్థిరంగా ఉంది. నిన్నా మొన్నటి వరకూ పెరుగుతూ వచ్చిన వడ్డీరేట్ల వలన అమెరికా ప్రజల కొనుగోలు శక్తీ, వారు తమ అవసరాల కోసం బ్యాంకుల నుంచి రుణాలు తీసుకునే అవకాశాలూ తగ్గిపోతూ వచ్చాయి. అలాగే వారు తాము గృహాలు లేదా వాహనాల కొనుగోలు కోసం తీసుకున్న రుణాలపై వడ్డీ మొత్తాలు పెరిగిపోయిన కారణంగా కూడా ప్రజల కొనుగోలు శక్తి దెబ్బ తినటం, అనేక సందర్భాలలో వారు అసలు తిరిగి తమ రుణా లను చెల్లించలేని స్థితికి చేరడం వంటివీ జరిగాయి. ఈ నేప థ్యంలోనే నేడు అమెరికాలోని అనేక బ్యాంకింగ్, నాన్‌బ్యాంకింగ్‌ ఫైనాన్స్‌ కంపెనీలకు మొండి బకాయిలు పెరిగి పోయి, ప్రస్తుతం తీవ్ర ఒత్తిడికి లోనవుతున్నాయి. ఈ పెరిగిన వడ్డీరేట్ల వలన అమెరికా ఆర్థిక వ్యవస్థలో మెల్ల మెల్లగా మందగమనం మొదలవుతోంది. అక్టోబర్‌ 2023లో అమెరికాలో ఉపాధి కల్పన 8.7 మిలియన్లకు తగ్గడం దీనిపర్యవసానమే. ఈ  రెండేళ్ల కాలంలో అతి తక్కువ స్థాయి ఇదే! ఒక పక్కన ద్రవ్యోల్బణం తగ్గుముఖం పట్టిన దాఖలాలూ... మరో పక్కన తగ్గిపోతున్న ఉపాధి కల్పన గణాంకాలూ... డిసెంబర్‌ నెలలో జరిగిన అమెరికా ఫెడరల్‌ బ్యాంక్‌ సమావేశంలో 2024లో వడ్డీరేట్లను తగ్గించే అవకాశాలు ఉన్నా యంటూబ్యాంక్‌ ఛైర్మన్‌ జరోమ్‌ పావెల్‌ సంకేతాలను ఇచ్చేలా చేశాయి. పెరిగిపోతున్న ఆటోమేషన్‌ (మర మనుషులు, సాఫ్ట్‌ వేర్‌లలో పురోగతి), కొన్ని దేశాల్లో శ్రామిక శక్తి చౌకగా లభించడం వల్ల  అమెరికా వంటి ధనిక దేశాల నుంచి పరి శ్రమలు, సేవారంగం భారీగా విదేశాలకు తరలిపోతున్నాయి. అమె రికాలో నేడు ప్రజల కొనుగోలు శక్తిని నిలిపి వుంచుతోంది షేర్‌ మార్కెట్లు, రియల్‌ ఎస్టేట్‌ వంటి సట్టా వ్యాపారాలూ, ఉద్దీపనా పథకాలూ; రుణ స్వీకరణను సులువు చేస్తూ, బ్యాంక్‌వడ్డీరేట్ల తగ్గింపు వంటి చర్యలే! స్థూలంగా అటు ఉద్దీపన రూపంలో ఆర్థిక వ్యవస్థలో డబ్బు చలామణీని పెంచే చర్యలూ... అలాగే వడ్డీరేట్లను 0 (సున్నా) శాతానికి తగ్గించి వేస్తూ తీసుకున్న నిర్ణయాల వల్ల అమెరికా వంటి దేశాలలో మార్కెట్‌లో డబ్బు చలామణి విపరీతంగా పెరిగిపోయింది. అందుకే సరఫరా పెరిగిపోయిన ఏ సరుకైనా దాని విలువ పడి పోయినట్లుగానే అమెరికా డాలర్‌ విలువ కూడా పడిపోయింది. సూక్ష్మంగా చెప్పాలంటే డాలర్‌ కొనుగోలు శక్తి పతనమై, ద్రవ్యోల్బణం పెరిగిపోయింది. ఇలా ద్రవ్యోల్బణం పెరిగి నప్పుడు అటు ప్రజల కొనుగోలు శక్తీ, ఇటు షేర్‌ మార్కెట్లవంటి ఎటువంటి ఉత్పత్తి లేకుండానే పెట్టుబడిగా పెట్టిన డబ్బును లాభాలతో కలిపి మరింత డబ్బుగా పెంచే వ్యాపా రాలు వంటివన్నీ నష్టపోతాయి. కాబట్టి ఈ పరిస్థితిని చక్కదిద్దే బాధ్యత మరలా తిరిగి ప్రభుత్వంపైనో... లేకుంటే ఆ దేశం తాలూకూ కేంద్రబ్యాంకు పైనో పడుతుంది.  ఇక ఇప్పుడు, కేంద్రబ్యాంకు వడ్డీరేట్ల తగ్గింపు రూపంలో, తాను చలామణీలోకి తెచ్చిన అధిక నగదు మొత్తాన్నో... లేదా ప్రభుత్వం ఆర్థిక వ్యవస్థలోకి ఉద్దీపన రూపంలో పంపిన డబ్బునో తిరిగి మరలా వెనక్కి లాక్కోవలసి వస్తుంది. దీనికోసం కేంద్రబ్యాంకు వడ్డీరేట్లను పెంచుతుంది, ప్రభుత్వం ఉద్దీపన పథకాలను నిలిపివేస్తుంది. తద్వారా, ఆర్థిక వ్యవస్థలో ఉన్న అదనపు డబ్బును వెనక్కి లాగివేసి ద్రవ్యోల్బణాన్ని తగ్గించే ప్రయత్నం చేస్తుంది. అమెరికాలో నేడు నడుస్తోన్న కథ ఇదే! ఆర్థిక వ్యవస్థలో మందగమనం ఏర్పడితే డబ్బు చలామణీ పెంచడం... ఈ డబ్బు చలామణీ పెరగడం వలన ద్రవ్యోల్బణం పెరిగితే తిరిగి మరలా అధికంగా చలామణిలోకి తెచ్చిన ఆ డబ్బును వెనక్కి లాగివేయటం అనే వలయమే ఈ కథ సారాంశం. అమెరికా ఆర్థిక వ్యవస్థ తాలూకు ఈ రెండు దశల మధ్యనా ఉన్న కాలవ్యవధి నేడు వేగంగా కుచించుకు పోతోంది. నిజానికి, అమెరికా ఆర్థిక వ్యవస్థలో డాలర్ల ముద్రణ గత అనేక దశాబ్దాలుగా జరుగుతున్నప్పటికీ... మనం 2008 అనంతరం పరిణామాలను ఇక్కడ ముఖ్యంగా గమనించాలి. 2008లో అమెరికాలో ఫైనాన్స్‌ సంక్షోభం ఏర్పడింది. ఈసంక్షోభ క్రమంలో, అమెరికా జనాభాలోని సగానికి సగంమంది రాత్రికి రాత్రే దారిద్య్ర రేఖకు దిగువకు నెట్టివేయ బడ్డారు. ఈ పరిస్థితిని చక్కదిద్దేందుకు 2009 ఫిబ్రవరిలో ఒబామా ప్రభుత్వం 7,00,800 బిలియన్‌ డాలర్ల ఉద్దీపనను, అమెరికా ఆర్థిక వ్యవస్థకు ఇచ్చింది. ఆ తరువాత కూడా కొద్ది దఫాలు మరిన్ని ఉద్దీపనలు ఇచ్చారు. తదనంతరం నెలవారీ (95 బిలియన్ల డాలర్ల మేర) ఉద్దీపనలను ఇస్తూ పోయారు. తరువాత ఈ ఉద్దీపనల స్టెరాయిడ్‌ల ప్రభావంతో ఆర్థిక వ్యవస్థ ‘నిలదొక్కుకుందనే’ నమ్మకం కుదిరాక, కొంతమేర ఈ ఉద్దీప నలను తగ్గించివేశారు. అయితే, 2020 కోవిడ్, లాక్‌డౌన్‌ల అనంతరం మరలా లక్షల కోట్ల డాలర్ల మేర కరెన్సీనిముద్రించి అమెరికా ఉద్దీపనలను ఇచ్చింది. లాక్‌డౌన్‌ల వలన ఇళ్ళకే పరిమితం అయిపోయి... ఆదాయాలు నిలిచిపోయిన కుటుంబీకులను ఆదుకునేందుకు ఈ చర్య అవసరంఅయ్యింది. అయితే, 2008 తరువాతి ఉద్దీపనలూ, వడ్డీరేట్ల తగ్గింపులూ, తదనంతరం 2020 నాటి మరింత ఉద్దీపనలూ కలగలిసి 2022 నాటికి ద్రవ్యోల్బణం రూపంలో దాడి మొదలు పెట్టాయి. అప్పటికే శక్తికి మించిన భారాన్ని మోస్తోన్న ఒకఒంటె మూపుపై అదనంగా మరో గడ్డిపోచ వేసినా  కుప్ప కూలి పోయినట్లు... 2008 నుంచి పెంచుతూ వచ్చిన డాలర్ల చలామణీ ప్రభావం, అంతిమంగా 2022లో తీవ్ర ద్రవ్యోల్బణ రూపంలో బయటపడింది. దీనికి విరుగుడుగా మరలా ద్రవ్య చలామణీని తగ్గించే వడ్డీరేట్ల పెంపు వంటి నిర్ణయాలు జరుగుతూ పోయాయి. ఈ క్రమంలోనే నేడు అమెరికా తిరిగి మందగమనం, ఉపాధి కల్పనలో బలహీన స్థితికి చేరింది.  ప్రస్తుత ఫెడరల్‌ బ్యాంక్‌ సమావేశం 2024లో మూడు దఫాలుగా 75 బేసిస్‌ పాయింట్ల మేరకు వడ్డీరేట్లను తగ్గించే అవకాశం గురించి మాట్లాడిందంటే ఈ మందగమనం ద్రవ్యోల్బణాల విషవలయం తాలూకు మరో రౌండ్‌ మొదలయ్యిందన్న మాట! కానీ, ఈ రౌండ్‌... గత రౌండ్‌ (2008, 2022)లు ఉన్నంత కాలం ఉండే అవకాశమే లేదు. ప్రస్తుతరౌండు వడ్డీరేట్ల తగ్గింపు నిర్ణయాలు అతి స్వల్పకాలంలోనే ద్రవ్యోల్బణం తిరిగి తలెత్తే పరిస్థితిని తెచ్చి పెడతాయి. ఫలితంగా ప్రస్తుతం అమెరికా ఆర్థిక వ్యవస్థ తాలుకూ ఈ గడియారం లోలకం పరస్పర విరుద్ధ కొసలు అయిన వృద్ధి మందగమనం– ద్రవ్యోల్బణం మధ్య... మరింత వేగంగా కొట్టుమిట్టాడుతుంది. ఆర్థిక వ్యవస్థలో అటువంటి అనిశ్చితి అమెరికా ప్రజా జీవితంలో మరింత తీవ్ర అభద్ర తకూ, అనిశ్చితికీ దారితీయగలదు. ఈ క్రమంలోనే అమెరికా డాలర్‌ పతనం ప్రమాదం కూడా మరింత తీవ్రతరం అవుతుంది. ఇదే జరిగితే ప్రపంచ ఆర్థిక వ్యవస్థ తాలూకూ స్వరూప స్వభావాలనే పునర్నిర్వచించే పరిస్థితి తలెత్తవచ్చు! - డి. పాపారావు  వ్యాసకర్త ఆర్థిక రంగ నిపుణులు మొబైల్‌: 98661 79615

రెండు ప్రముఖ బ్యాంకులకు భారతీయ రిజర్వ్‌ బ్యాంక్‌ (RBI) ఝలక్‌ ఇచ్చింది. నిబంధనలు ఉల్లంఘించినందుకు గానూ ప్రభుత్వ ఆధీనంలోని పంజాబ్ నేషనల్ బ్యాంక్‌, ప్రైవేట్ రంగ  ఫెడరల్ బ్యాంక్‌తో పాటు మరో రెండు ఫైనాన్స్‌ సంస్థలకు భారీగా జరిమానాలు విధించింది. వడ్డీ రేట్లు, బ్యాంకుల్లో కస్టమర్‌ సర్వీస్‌ నిబంధనలు పాటించడంలో విఫలమైన పంజాబ్ నేషనల్ బ్యాంక్‌కు రూ.72 లక్షలు, కేవైసీ నిబంధనలు ఉల్లంఘించిన ఫెడరల్ బ్యాంక్‌కు రూ.30 లక్షల జరిమానా విధించినట్లు రిజర్వ్ బ్యాంక్ తెలిపింది. ఇక కేవైసీ నిబంధనలను పాటించనందుకు మెర్సిడెస్-బెంజ్ ఫైనాన్షియల్ సర్వీసెస్ ఇండియా ప్రైవేట్ లిమిటెడ్ (గతంలో డైమ్లర్ ఫైనాన్షియల్ సర్వీసెస్ ఇండియా ప్రైవేట్ లిమిటెడ్)కు రూ. 10 లక్షల పెనాల్టీని ఆర్బీఐ విధించింది. అలాగే ఎన్‌బీఎఫ్‌సీ నిబంధనలను ఉల్లంఘించిన కొసమట్టం ఫైనాన్స్ లిమిటెడ్‌పై రూ. 13.38 లక్షల నగదు పెనాల్టీ విధించినట్లు సెంట్రల్‌ బ్యాంక్‌ తెలిపింది.

న్యూఢిల్లీ: ప్రయివేట్‌ రంగ సంస్థ హెచ్‌డీఎఫ్‌సీ మ్యూచువల్‌ ఫండ్‌ పెట్టుబడుల్లో భాగంగా ఫెడరల్‌ బ్యాంక్, ఈక్విటాస్‌ స్మాల్‌ ఫైనాన్స్‌ బ్యాంక్‌సహా పలు బ్యాంకులలో అదనపు వాటాలు కొనుగోలు చేయనుంది. ఇందుకు ఆర్‌బీఐ నుంచి తాజాగా అనుమతులు లభించినట్లు హెచ్‌డీఎఫ్‌సీ ఎంఎఫ్‌ వెల్లడించింది. వెరసి అనుమతి పొందిన బ్యాంకులలో వాటాను 9.5 శాతంవరకూ పెంచుకునేందుకు గ్రీన్‌సిగ్నల్‌ లభించినట్లు తెలియజేసింది. బ్యాంకులలో అదనపు పెట్టుబడులను చేపట్టేందుకు పెట్టుకున్న దరఖాస్తుకు ఆర్‌బీఐ క్లియరెన్స్‌ ఇచి్చనట్లు వివరించింది. హెచ్‌డీఎఫ్‌సీ అసెట్‌ మేనేజ్‌మెంట్‌ కంపెనీ(ఏఎంసీ) పెట్టుబడులు పెట్టేందుకు అనుమతి పొందిన జాబితాలో డీసీబీ బ్యాంక్, కరూర్‌ వైశ్యా బ్యాంక్, సిటీ యూనియన్‌ బ్యాంక్‌ సైతం ఉన్నాయి. మరోవైపు చెల్లించిన మూలధనం లేదా వోటింగ్‌ హక్కులలో 9.5 శాతం వాటాను సొంతం చేసుకునేందుకు హెచ్‌డీఎఫ్‌సీ ఏఎంసీకి ఆర్‌బీఐ నుంచి అనుమతి లభించినట్లు విడిగా ఈక్విటాస్‌ ఎస్‌ఎఫ్‌బీ ఒక ప్రకటనలో పేర్కొంది. కాగా.. 2023 జూన్‌30కల్లా ఫెడరల్‌ బ్యాంక్‌లో 4.49 శాతం, ఈక్విటాస్‌ ఎస్‌ఎఫ్‌బీలో 4.68 శాతం చొప్పున హెచ్‌డీఎఫ్‌సీ ఎంఎఫ్‌ వాటాలు కలిగి ఉంది. అయితే తాజా కొనుగోళ్ల తదుపరి ఒక్కో బ్యాంకులో 9.5 శాతం వాటాను మించేందుకు అనుమతించరు. 

న్యూఢిల్లీ: ప్రయివేట్‌ రంగ సంస్థ ఫెడరల్‌ బ్యాంక్‌ అనుబంధ కంపెనీ ఫెడ్‌బ్యాంక్‌ ఫైనాన్షియల్‌ సరీ్వసెస్‌(ఫెడ్‌ఫినా) మరోసారి పబ్లిక్‌ ఇష్యూ సన్నాహాలు ప్రారంభించింది. ఇందుకు వీలుగా క్యాపిటల్‌ మార్కెట్ల నియంత్రణ సంస్థ సెబీకి తాజాగా ప్రాథమిక ప్రాస్పెక్టస్‌ను దాఖలు చేసింది. వీటి ప్రకారం రూ. 750 కోట్ల విలువైన ఈక్విటీని కొత్తగా జారీ చేయనుంది. వీటికి అదనంగా 7.03 కోట్ల షేర్లను ప్రమోటర్‌ ఫెడరల్‌ బ్యాంక్, ప్రస్తుత వాటాదారు ట్రూనార్త్‌ ఫండ్‌ వీఐ ఎల్‌ఎల్‌పీ.. విక్రయానికి ఉంచనున్నాయి. వీటిలో ఫెడరల్‌ బ్యాంక్‌ 1.65 కోట్లు, ట్రూ నార్త్‌ ఫండ్‌ 5.38 కోట్ల షేర్లను ఆఫర్‌ చేయనున్నాయి. ఈక్విటీ జారీ నిధులను భవిష్యత్‌ అవసరాలరీత్యా టైర్‌–1 మూలధన పటిష్టతకు వినియోగించనుంది. కాగా.. ఇంతక్రితం 2022 ఫిబ్రవరిలోనూ ఫెడ్‌ఫినా లిస్టింగ్‌ కోసం ఫెడరల్‌ బ్యాంక్‌ సెబీకి ముసాయిదా పత్రాలను దాఖలు చేసింది. తద్వారా రూ. 900 కోట్ల ఈక్విటీ జారీతోపాటు ఆఫర్‌ ఫర్‌ సేల్‌కు ప్రణాళికలు వేసిన విషయం విదితమే.

ముంబై: ప్రైవేట్‌ రంగ సంస్థ ఫెడరల్‌ బ్యాంక్‌ గత ఆర్థిక సంవత్సరం(2022–23) చివరి త్రైమాసికంలో కన్సాలిడేటెడ్‌ ప్రాతిపదికన రూ. 954 కోట్ల నికర లాభం ఆర్జించింది. 62 శాతం ఎగసింది. ఇది ఒక త్రైమాసికానికి బ్యాంక్‌ చరిత్రలోనే అత్యధికం కాగా.. ఇందుకు పెట్టుబడుల విక్రయ లాభాలు దోహదపడినట్లు బ్యాంక్‌ పేర్కొంది. ఇక మార్చితో ముగిసిన పూర్తి ఏడాదికి నికర లాభం 61 శాతం ఎగసి రూ. 3,165 కోట్లకు చేరింది. అంతక్రితం ఏడాది(2021–22) రూ. 1,970 కోట్లు మాత్రమే ఆర్జించింది. కాగా.. క్యూ4లో నికర వడ్డీ ఆదాయం 25 శాతం పుంజుకుని రూ. 1,909 కోట్లను అధిగమించింది. ఇతర ఆదాయం 58 శాతం ఎగసి రూ. 734 కోట్లను తాకింది. దీంతో రికార్డ్‌ లాభం ఆర్జించినట్లు బ్యాంక్‌ వెల్లడించింది. స్థూల మొండిబకాయిలు(ఎన్‌పీఏలు) 2.78 శాతం నుంచి 2.35 శాతానికి తగ్గాయి.

ముంబై: ట్రేడింగ్‌ ఆద్యంతం పరిమిత శ్రేణిలో కదలాడిన స్టాక్‌ సూచీలు బుధవారం స్వల్పలాభాలతో గట్టెక్కాయి. అమెరికా ఫెడరల్‌ రిజర్వ్‌ ద్రవ్య విధాన వైఖరి వెల్లడికి ముందు ఇన్వెస్టర్లు ఆచితూచి వ్యవహరించారు. ప్రపంచ ఈక్విటీ మార్కెట్ల నుంచి సానుకూల సంకేతాలు అందుకున్న దేశీయ సూచీలు ఉదయం లాభాలతో మొదలయ్యాయి. సెన్సెక్స్‌ 170 పాయింట్లు పెరిగి 58,245 వద్ద, నిఫ్టీ 71 పాయింట్లు లాభంతో 17,177 వద్ద ప్రారంభమయ్యాయి. తొలి దశలో కొనుగోళ్ల మద్దతు లభించడంతో సెన్సెక్స్‌ 344 పాయింట్లు ఎగసి 58,418 వద్ద, నిఫ్టీ 100 పాయింట్లు బలపడి 17,207 వద్ద ఇంట్రాడే గరిష్టాన్ని తాకాయి. అయితే దేశీయ మార్కెట్‌ నుంచి విదేశీ ఇన్వెస్టర్ల పెట్టుబడుల ఉపసంహరణ కొనసాగుతుండటంతో సూచీలు ఆరంభ లాభాల్ని కోల్పోయాయి. ఫలితంగా సెన్సెక్స్‌ 140 పాయింట్ల స్వల్పలాభంతో 58,215 వద్ద స్థిరపడింది. నిఫ్టీ 44 పాయింట్ల పెరిగి 17,152 వద్ద నిలిచింది.  ఫార్మా, ఫైనాన్స్, బ్యాంకింగ్, ఐటీ కమోడిటీ షేర్లు రాణించడంతో బీఎస్‌ఈ మిడ్, స్మాల్‌ క్యాప్‌ సూచీలు వరుసగా 0.50%, 0.18 శాతం చొప్పున లాభపడ్డాయి. మెటల్, మీడియా, రియల్టీ షేర్లలో లాభాల స్వీకరణ చోటు చేసుకుంది.

ముంబై: ఈ వారం దేశీయ స్టాక్‌ సూచీలపై ప్రపంచ పరిణామాలు ప్రభావం ఉండొచ్చని మార్కెట్‌ నిపుణులు చెబుతున్నారు. అమెరికా బ్యాంక్‌ సంక్షోభం, ఫెడ్‌ రిజర్వ్‌ సమావేశ పరిణామాల నేపథ్యంలో సెంటిమెంట్‌ ప్రతికూలంగానే ఉండొచ్చంటున్నారు. వీటితో పాటు దేశీయ మార్కెట్లో విదేశీ ఇన్వెస్టర్ల పెట్టుబడులు, క్రూడాయిల్‌ కదలికలను ఇన్వెస్టర్లు వర్గాలు నిశితంగా పరిశీలించే వీలుంది. డాలర్‌ మారకంలో రూపాయి విలువ, బాండ్ల రాబడులపై దృష్టి సారించవచ్చు.   ‘‘స్టాక్‌ సూచీల ఒడిదుడుకులకు ట్రేడింగ్‌ కొనసాగే వీలుంది. కొన్ని వారాలుగా జరిగిన ఏకపక్ష అమ్మకాలతో మార్కెట్‌ సెంటిమెంట్‌ పూర్తిగా బేరిష్‌గా మారింది. సాంకేతికంగా నిఫ్టీ గత ఏడు వారాల కన్సాలిడేషన్‌ రేంజ్‌ను చేధించి 17100 స్థాయి వద్ద ముగిసింది. అమ్మకాలు నెలకొంటే దిగువ స్థాయిలో 16,600–16,800 శ్రేణిలో తక్షణ మద్దతు లభిస్తుంది. ఎగువ స్థాయిలో 17,250–17,400 రేంజ్‌ని చేధించాల్సి ఉంటుంది’’అని రిలిగేర్‌ బ్రోకింగ్‌ సాంకేతిక నిపుణుడు అజిత్‌ మిశ్రా తెలిపారు.   గడిచిన వారంలో సెన్సెక్స్‌ 1,145 పాయింట్లు, నిఫ్టీ 313 పాయింట్లు చొప్పున నష్టపోయాయి. విస్తృత మార్కెట్‌లోనూ అమ్మకాలు కొనసాగడంతో బీఎస్‌ఈ మిడ్, స్మాల్‌ క్యాప్‌ సూచీలు వరుసగా 2 శాతం, 2.5 శాతం చొప్పున క్షీణించాయి. 1. బ్యాంకింగ్‌ వ్యవస్థలో సంక్షోభ ఘంటికలు ద్రవ్యోల్బణం ముదిరి ఆర్థిక మాంద్యం కమ్ముకొస్తున్న వేళ బ్యాంకింగ్‌ వ్యవస్థలో సంక్షోభ పరిస్థితులు నెలకొన్నాయి. ప్రపంచవ్యాప్తంగా వారం రోజుల్లోనే ఏకంగా ఐదు బ్యాంకులు భారీ కుదుపులకు లోనయ్యాయి. అమెరికాలో సిలికాన్‌ వ్యాలీ బ్యాంక్‌ దివాలా, సిగ్నేచర్‌ బ్యాంక్‌ మూసివేత పరిణామాల తర్వాత తాజాగా శాన్‌ఫ్రాన్సిస్కో ఆధారిత ఫస్ట్‌ రిపబ్లిక్‌ బ్యాంక్‌ ఉదంతం తెరపైకి వచ్చింది. అయితే ఈ బ్యాంకును కాపాడేందుకు 11 పెద్ద బ్యాంకులు కలిపి 30 బిలియన్‌ డాలర్ల సమకూర్చాయి. ఈ ప్రకంపనలు అమెరికాకే పరిమితం కాకుండా ప్రపంచంలో ఇతర దేశాల బ్యాంకులకు విస్తరించవచ్చని ఆర్థికవేత్తలు ఆందోళన వ్యక్తం చేస్తున్నారు. గతవారంలోనే  క్రిడెట్‌ సూసీ ఆర్థిక ఐసీయూపైకి చేరడంతో స్విస్‌ నేషనల్‌ బ్యాంక్‌ 54 బిలియన్‌ డాలర్ల నగదు సాయం చేసింది. ‘‘ప్రభుత్వాలు జోక్యం చేసుకొని తక్షణ నిధులు సమకూర్చినంత మాత్రన బ్యాంకింగ్‌ సంక్షోభం ముగిసిందని చెప్పడం తొందరపాటే అవుతుంది. ప్రస్తుతానికి అదుపులో ఉందంతే. ఐరోపాలోని బ్యాంకుల పరిస్థితులను గమనిస్తే యూఎస్‌ పరిస్థితులు అక్కడి పాకినట్లు తెలుస్తుంది. ఈ సంకేతాలు ప్రపంచ ఆర్థిక వ్యవస్థకే కాకుండా ఈక్విటీ మార్కెట్లకు మంచిది కాదు’’ అని ఫస్ట్‌ వాటర్‌ క్యాపిటల్‌ ఫండ్‌ సహ వ్యవస్థాపకుడు అరుణ్‌ చులానీ తెలిపారు. మంగళవారం ఫెడరల్‌ రిజర్వ్‌ సమావేశం ఫెడరల్‌ ఓపెన్‌ మార్కెట్‌ కమిటీ సమావేశం మంగళవారం(మార్చి 21న) ప్రారంభమవుతుంది. ఆ మరుసటి రోజు బుధవారం ఫెడ్‌ చైర్మన్‌ జెరోమ్‌ పావెల్‌ ద్రవ్య కమిటీ నిర్ణయాలను ప్రకటించనున్నారు. అమెరికా ద్రవ్యోల్బణం దిగివచ్చిన నేపథ్యంలో 50 బేసిస్‌ పాయింట్ల రేట్ల పెంపు ఉండకపోవచ్చని... అలాగే తదుపరి సమావేశాల నుంచి రేట్ల పెంపు ఉండకపోవచ్చనే ప్రకటన వెలువడుతుందని మార్కెట్‌ వర్గాలు ఆశిస్తున్నాయి. ఇప్పుటికే యూరోపియన్‌ యూనియన్‌ బ్యాంక్‌ 50 బేసిస్‌ పాయింట్ల వడ్డీరేట్ల పెంపు నేపథ్యంలో ఇప్పుడు ఫెడ్‌ రిజర్వ్, బ్యాంక్‌ ఇంగ్లాండ్‌ (మార్చి 23న)లు ఏమేర రేట్ల పెంపు ఉంటుందోనని మార్కెట్‌ వర్గాలు ఆసక్తి ఎదురు చూస్తున్నాయి. వారం రోజుల్లో రూ. 8 వేల కోట్ల విక్రయాలు విదేశీ ఇన్వెస్టర్లు దేశీయ మార్కెట్లో వారం రోజుల్లో రూ. 8 వేల కోట్ల విలువైన ఈక్విటీలను విక్రయించారు. అమెరికా బ్యాంకింగ్‌ వ్యవస్థలో సంక్షోభ పరిస్థితులు ఇందుకు కారణమైనట్లు నిపుణులు చెబుతున్నారు. ఇదే సమయంలో సంస్థాగత ఇన్వెస్టర్లు రూ.9,200 కోట్ల షేర్లను కొనుగోలు చేసి దేశీయ ఈక్విటీ మార్కెట్‌ భారీ పతనాన్ని అడ్డుకుంటున్నారు. ‘‘ ప్రపంచ ఈక్విటీ మార్కెట్లలో నెలకొన్ని అనిశ్చిత పరిస్థితుల దృష్ట్యా ఎఫ్‌ఐఐలు బంగారం, డాలర్‌ వంటి రక్షణాత్మక సాధనాల వైపు తమ పెట్టుబడులను మళ్లిస్తున్నారు. ఇటీవల డాలర్‌ మారకంలో రూపాయి క్షీణత కొంత ప్రతికూలంగా మారింది’’ అని జియోజిత్‌ ఫైనాన్సియల్‌ సర్వీసెస్‌ రీసెర్చ్‌ హెడ్‌ వినోద్‌ నాయర్‌ తెలిపారు. ప్రపంచ పరిణామాలు... ఈక్విటీ మార్కెట్లతో పాటు క్రూడాయిల్‌ ధరలు సైతం బేర్‌ గుప్పిట్లోకి వెళ్లాయి. ప్రస్తుత సంవత్సరంలోనే వారం ప్రాతిపదికన అతిపెద్ద నష్టాన్ని చవిచూశాయి. క్రూడ్‌ ధరల పతనం భారత్‌ మార్కెట్‌కు కలిసొచ్చే అంశమైనప్పట్టకీ.., క్షీణత స్థిరంగా ఉంటేనే స్వాగతించాలని నిపుణులు చెబుతున్నారు. నేడు అమెరికా జనవరి బ్యాలెన్స్‌ ఆఫ్‌ ట్రేడ్, రేపు యూరోజోన్‌ కన్‌స్ట్రక్షన్‌ అవుట్‌ డేటా వెల్లడి అవుతాయి. యూఎస్‌ ఫెడ్‌ రిజర్వ్‌ ద్రవ్య కమిటీ నిర్ణయాలుతో పాటు బ్రిటన్‌ ఫిబ్రవరి ద్రవ్యోల్బణ డేటా బుధవారం విడుదల అవుతుంది. గురువారం బ్యాంక్‌ ఆఫ్‌ ఇంగ్లాండ్‌ వడ్డీరేట్లను ప్రకటిస్తుంది. వారాంతాపు రోజైన శుక్రవారం చైనా ఫిబ్రవరి రిటైల్‌ అమ్మకాలతో పాటు జపాన్‌ ఫిబ్రవరి ద్రవ్యోల్బణం, యూరోజోన్‌ మార్చి ప్రథమార్థపు తయారీ రంగ వివరాలు వెల్లడి అవుతాయి. 

న్యూఢిల్లీ: ప్రయివేట్‌ రంగ సంస్థ ఫెడరల్‌ బ్యాంక్‌ ఈ ఆర్థిక సంవత్సరం(2022–23) మూడో త్రైమాసికంలో ప్రోత్సాహకర ఫలితాలు సాధించింది. అక్టోబర్‌–డిసెంబర్‌(క్యూ3)లో నికర లాభం 54 శాతం దూసుకెళ్లి రూ. 804 కోట్లను తాకింది. అధిక వడ్డీ ఆదాయం, రుణాల నాణ్యత మెరుగుపడటం ఇందుకు సహకరించాయి. గతేడాది(2021–22) ఇదే కాలంలో రూ. 522 కోట్లు ఆర్జించింది. ఇక మొత్తం ఆదాయం సైతం రూ. 3,927 కోట్ల నుంచి రూ. 4,967 కోట్లకు ఎగసింది. నికర వడ్డీ ఆదాయం 27 శాతం పుంజుకుని రూ. 1,957 కోట్లకు చేరింది. నికర వడ్డీ మార్జిన్లు 0.22 శాతం మెరుగై 3.49 శాతాన్ని తాకాయి. స్థూల మొండిబకాయిలు(ఎన్‌పీఏలు) 3.06 శాతం నుంచి 2.43 శాతానికి తగ్గాయి. ఈ బాటలో నికర ఎన్‌పీఏలు 1.24 శాతం నుంచి 0.73 శాతానికి నీరసించాయి. బాసెల్‌–3 నిబంధనల ప్రకారం కనీస మూలధన నిష్పత్తి(సీఏఆర్‌) స్వల్ప వెనకడుగుతో 13.35 శాతంగా నమోదైంది. తొలి 9 నెలల్లో 60 బ్రాంచీలను జత చేసుకోగా క్యూ4లో మరో 20 ప్రారంభించనున్నట్లు బ్యాంక్‌ వెల్లడించింది. ఫలితాల నేపథ్యంలో ఫెడరల్‌ బ్యాంక్‌ షేరు ఎన్‌ఎస్‌ఈలో 1.2 శాతం బలపడి రూ. 140 వద్ద ముగిసింది.

సాక్షి,ముంబై:  ఫెడరల్ బ్యాంక్  తన వినియోగదారులకు శుభవార్త చెప్పింది. తన కస్టమర్ల కోసంఏజియాస్ ఫెడరల్ లైఫ్ ఇన్సూరెన్స్‌తో కలిసి సాచెట్ లైఫ్ ఇన్సూరెన్స్ ప్రొడక్ట్ 'గ్రూప్ క్రెడిట్ షీల్డ్'ను ప్రారంభించింది. ఈ కార్డు ద్వారా  పలు సౌలభ్యాలు అందిస్తోంది. ముఖ్యంగా ఈ క్రెడిట్ కార్డు తీసుకున్న వారికి రూ.3 లక్షల జీవిత బీమా  ఆఫర్‌ చేస్తోంది.  ప్రమాదవశాత్తూ కార్డు దారుడు మరణిస్తే నామినీకి రూ. 3 లక్షలు బీమా లభిస్తుంది. అలాగే ఈ కార్డుపై  రూ.3 లక్షల వరకు క్రెడిట్ అందించడం మరో విశేషం. అయితే ఈ సింగిల్‌ ప్రీమియం ప్లాన్‌ లైఫ్ కవర్ ఒక సంవత్సరం మాత్రమే. ఈ మేరకు ఏజిస్ ఫెడరల్ లైఫ్ ఇన్సూరెన్స్‌తో ఒప్పందం చేసుకున్నట్లు ఫెడరల్ బ్యాంక్ ఒక ప్రకటనలో తెలిపింది. గ్రూప్ క్రెడిట్ షీల్డ్ క్రెడిట్ కార్డ్ తన కస్టమర్లకు ప్రత్యేకమైన కవర్‌ను అందిస్తుంది. ఈ కార్డ్ క్రెడిట్ పరిమితి గరిష్టంగా రూ. 3 లక్షలు.   ప్రస్తుతం Celesta, Imperio, Signet అనే  మూడు వేరియంట్‌లను అందిస్తోంది.  ఈ కార్డులపై కస్టమర్లకు జీవిత భద్రత కల్పిస్తున్నట్లు ఫెడరల్ బ్యాంక్ తెలిపింది. తమ  క్రెడిట్ కార్డ్ హోల్డర్‌లు కేవలం 3 నిమిషాల్లో  దీన్ని ఆన్‌లైన్‌లో కొనుగోలు చేసుకోవచ్చని, బైట్ సైజ్, బండిల్డ్ ప్రొడక్ట్‌ల ద్వారా దేశంలో బీమా వ్యాప్తిని మరింత పెంచాలని భావిస్తున్నామని బ్యాంకు ఫెడరల్ బ్యాంక్ ఎగ్జిక్యూటివ్ డైరెక్టర్ షాలిని వారియర్ అన్నారు. ఫెడరల్ బ్యాంక్ క్రెడిట్ కార్డ్ కస్టమర్‌ల కోసం తమగ్రూప్ క్రెడిట్ షీల్డ్‌ నిమిత్తం ఫెడరల్ బ్యాంక్‌తో భాగస్వామ్యం చాలా సంతోషదాయకమని ఏజిస్‌ ఫెడరల్ లైఫ్ ఇన్సూరెన్స్  చీఫ్ మార్కెటింగ్ ఆఫీసర్, హెడ్-ప్రొడక్ట్స్ కార్తిక్ రామన్ తెలిపారు.  గ్రూప్ క్రెడిట్ షీల్డ్ కస్టమర్‌లకు జీవిత బీమా  కల్పించి దురదృష్టకర సంఘటన జరిగినప్పుడు రుణాన్ని తిరిగి చెల్లించే భారం లేకుండా వారిని కాపాడుతుందన్నారు.

ముంబై: అమెరికా ఫెడ్‌ రిజర్వ్‌ ద్రవ్య పాలసీ, ఆర్‌బీఐ ద్రవ్య విధాన కమిటీ అత్యవసర సమావేశపు నిర్ణయాలు ఈ వారం మార్కెట్‌ను నడిపిస్తాయని స్టాక్‌ నిపుణులు భావిస్తున్నారు. కార్పొరేట్‌ క్యూ2 ఆర్థిక ఫలితాలు, స్థూల ఆర్థిక గణాంకాలు ట్రేడింగ్‌ను ప్రభావితం చేయోచ్చంటున్నారు. వీటితో పాటు విదేశీ ఇన్వెస్టర్ల పెట్టుబడుల ధోరణి, డాలర్‌ మారకంలో రూపాయి విలువ, క్రూడాయిల్‌ కదిలికలు ప్రభావం చూపొచ్చంటున్నారు. హిందూ నూతన సంవత్సరం ‘2079 సంవత్‌’ తొలివారంలో సెన్సెక్స్‌ 650 పాయింట్లు, నిఫ్టీ 200 పాయింట్లు లాభపడ్డాయి.   ‘‘జాతీయ, అంతర్జాతీయ మార్కెట్లు స్థిరీకరణ దిశగా సాగొచ్చు. కార్పొరేట్ల రెండో క్వార్టర్‌ ఆర్థిక ఫలితాల విడుదల నేపథ్యంలో స్టాక్‌ ఆధారిత ట్రేడింగ్‌పై దృష్టి సారించడం శ్రేయస్కరం. కన్సాలిడేషన్‌లో భాగంగా దిగివచ్చిన నాణ్యమైన షేర్లను గుర్తించి ఎంపిక చేసుకోవాలి. సాంకేతికంగా నిఫ్టీకి 18,100 పాయింట్ల వద్ద నిరోధం ఎదురుకావచ్చు. దిగువ స్థాయిలో 17,400 స్థాయి వద్ద తక్షణ మద్దతు లభించవచ్చు’’ అని మోతీలాల్‌ ఓస్వాల్‌ సర్వీసెస్‌ రీసెర్చ్‌ హెడ్‌ సిద్ధార్థ ఖేమా తెలిపారు.   ఫెడ్‌ రిజర్వ్‌ సమావేశం   అగ్రరాజ్యం అమెరికా కేంద్ర బ్యాంక్‌ ఫెడ్‌ రిజర్వ్‌ పాలసీ సమావేశం మంగళవారం(నవంబర్‌ ఒకటిన) ప్రారంభం కానుంది. మరుసటి రోజు(బుధవారం) చైర్మన్‌ జెరోమ్‌ పావెల్‌ ద్రవ్య కమిటి నిర్ణయాలను వెల్లడించనున్నారు. వరుసగా నాలుగోసారి వడ్డీరేట్లను 75 బేసిస్‌ పాయింట్లు పెంచవచ్చని మార్కెట్‌ వర్గాలు అంచనావేస్తున్నాయి. పాలసీ ప్రకటన సందర్భంగా ఫెడ్‌ చైర్మన్‌ వ్యాఖ్యలను విదేశీ ఇన్వెస్టర్లు క్షుణ్ణంగా పరిశీలించే అవకాశం ఉంది. ఆర్‌బీఐ ఎంపీసీ అత్యవసర భేటీ రిజర్వ్‌ బ్యాంక్‌ తన తదుపరి పరపతి ద్రవ్య సమీక్ష(ఎంపీసీ) సమావేశాన్ని గురువారం (నవంబర్‌ 3న) అత్యవసరంగా నిర్వహించనుంది. వరుసగా మూ డు త్రైమాసికాలుగా ద్రవ్యోల్బణాన్ని కట్టడి చేయడంలో విఫలంకావడంతో ఆర్‌బీఐ మరోదఫా వడ్డీరేట్లను పెంచడానికి సిద్ధమవుతున్నట్లు తెలుస్తుంది. కార్పొరేట్‌ ఆర్థిక ఫలితాలు   ఈ వారంలో సుమారు 100కి పైగా కంపెనీలు తమ క్యూ2తో గణాంకాలను ప్రకటించనున్నాయి. ఎస్‌బీఐ, భారతీ ఎయిర్‌టెల్, ఎల్‌అండ్‌టీ, హెచ్‌డీఎఫ్‌సీ, టాటా స్టీల్, అదానీ పోర్ట్స్, సన్‌ ఫార్మా, టెక్‌ మహీంద్రా, యూపీఎల్, హీరో మోటోకార్ప్, హెచ్‌పీసీఎల్, బ్రిటానియా ఇండస్ట్రీస్, సిప్లా, గెయిల్‌ ఇండియా, టైటాన్, పవర్‌ గ్రిడ్‌ తదితర దిగ్గజ కంపెనీలు ఫలితాలు వెల్లడించే జాబితాలో ఉన్నాయి. ఫలితాల ప్రకటన సందర్భంగా కంపెనీల యాజమాన్యం చేసే అవుట్‌లుక్‌ వ్యాఖ్యలను మార్కెట్‌ వర్గాలు నిశీతంగా పరిశీలించే వీలుంది. స్థూల ఆర్థిక గణాంకాలు ప్రస్తుత ఆర్థిక సంవత్సరం జూన్‌ త్రైమాసిక జీడీపీ డేటాతో పాటు జూలై ద్రవ్యోల్బణ లోటు, మౌలిక రంగ గణాంకాలు బుధవారం(ఆగస్టు 31న) వెల్లడి కానున్నాయి. సెప్టెంబర్‌ ద్రవ్యలోటు, మౌలిక రంగ గణాంకాలు సోమవారం విడుదల కానున్నాయి. మరసటి రోజు అక్టోబర్‌ నెల వాహన విక్రయ గణాంకాలతో పాటు అదే నెల తయారీ రంగ డేటా కూడా విడుదల అవుతుంది. సేవారంగ డేటా గురువారం వెల్లడి కానుంది. అలాగే శుక్రవారం ఆర్‌బీఐ అక్టోబర్‌ 21 తేదీతో ముగిసిన ఫారెక్స్‌ నిల్వల డేటా, ఇదే నెల 28వ తేదీతో ముగిసిన డిపాజిట్‌– బ్యాంక్‌ రుణ వృద్ధి డేటాను వెల్లడించనుంది. దేశీయ ఆర్థిక వ్యవస్థ స్థితిగతులను ప్రతిబింబించేసే ఈ స్థూల గణాంకాలను మార్కెట్‌ వర్గాలు క్షుణ్ణంగా పరిశీలిస్తాయి. దేశీయ ఆర్థిక వ్యవస్థ స్థితిగతులను ప్రతిబింబించేసే ఈ స్థూల గణాంకాలను మార్కెట్‌ వర్గాలు క్షుణ్ణంగా పరిశీలిస్తాయి.    తగ్గిన ఎఫ్‌ఐఐల అమ్మకాల ఉధృతి దేశీయ మార్కెట్లో విదేశీ ఇన్వెస్టర్ల అమ్మకాల ఉధృతి తగ్గుముఖం పట్టింది. సెప్టెంబర్‌లో రూ.7,600 కోట్ల ఈక్విటీలను విక్రయించిన ఎఫ్‌ఐఐలు ఈ నెలలో ఇప్పటి వరకు(29 తేదీ నాటికి) రూ.1,586 కోట్ల షేర్లను మాత్రమే అమ్మారు. ఆగస్ట్‌లో రూ. 51,200 కోట్లు ఇన్వెస్ట్‌ చేశారు. ఈ ఏడాదిలో నికరంగా 1.70 లక్షల కోట్లు పెట్టుబడులను ఉపసంహరించుకున్నట్లు గణాంకాలు చెబుతున్నాయి. ‘‘ఫెడ్‌ వడ్డీ రేట్ల పెంపు, రూపాయి పతనం, ఆర్థిక మాంద్యం భయాలు, ద్రవ్యోల్బణ ఒత్తిళ్లు, ఉక్రెయిన్‌పై రష్యా యుద్ధం కొనసాగడం, బ్రిటన్‌లో రాజకీయ అస్థిరత తదితర అంశాల నేపథ్యంలో భవిష్యత్‌లోనూ ఎఫ్‌పీఐల పెట్టుబడుల్లో ఆటుపోట్లు కనిపించవచ్చు’’ అని మార్నింగ్‌స్టార్‌ ఇండియా అసిసోయేట్‌ డైరెక్టర్‌ హిమాన్షు శ్రీవాస్తవ తెలిపారు.

న్యూఢిల్లీ: ప్రభుత్వ రంగ దిగ్గజ బ్యాంక్‌– స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) నిధుల సమీకరణ ఆధారిత రుణ రేటును (ఎంసీఎల్‌ఆర్‌)ను పెంచింది. రెండు ప్రైవేటు రంగ దిగ్గజ బ్యాంకులు– కోటక్‌ మహీంద్రా బ్యాంక్, ఫెడరల్‌ బ్యాంక్‌లు కూడా ఈ మేరకు నిర్ణయం తీసుకున్నాయి. దీనితో ఎంసీఎల్‌ఆర్‌కు అనుసంధానమైన ఆయా బ్యాంకుల వ్యక్తిగత, గృహ, ఆటో రుణాలు మరింత ప్రియం కానున్నాయి. ఆర్‌బీఐ రెపో రేటు (మే నుంచి 1.9 శాతం పెంపుతో 5.9 శాతానికి అప్‌)  పెంపు బాట పట్టిన నేపథ్యంలో పలు బ్యాంకులు తమ రుణ రేట్లను పెంచుతున్న సంగతి తెలిసిందే. ఎస్‌బీఐ, కోటక్, ఫెడరల్‌ బ్యాంక్‌ రేట్ల పెంపు వివరాలు ఇలా.. ► ఎస్‌బీఐ బెంచ్‌మార్క్‌ ఏడాది కాలపరిమితి ఎంసీఎల్‌ఆర్‌ 25 బేసిస్‌ పాయింట్లు (100 బేసిస్‌ పాయింట్లు ఒకశాతం) పెరిగి 7.95 శాతానికి చేరింది.  ఈ రేటు అక్టోబర్‌ 15 నుంచీ అమల్లోకి వస్తుంది.  మెజారీటీ  కస్టమర్ల రుణ రేటు ఏడాది రేటుకే అనుసంధానమై ఉంటుంది.  రెండు, మూడు సంవత్సరాల కాలపరిమితుల ఎంసీఎల్‌ఆర్‌ పావుశాతం చొప్పున పెరిగి వరుసగా 8.15 శాతం, 8.25 శాతానికి ఎగసింది. ఓవర్‌నైట్, నెల, మూడు, ఆరు నెలల రేట్లు 7.60–7.90 శాతం శ్రేణిలో ఉన్నాయి.   ► కోటక్‌ మహీంద్రా బ్యాంక్‌ ఎంసీఎల్‌ఆర్‌ వివిధ కాలపరిమితులపై 7.70–8.95  శ్రేణిలో ఉంది. ఏడాది ఎంసీఎల్‌ఆర్‌ 8.75 శాతం. అక్టోబర్‌ 16 నుంచి తాజా నిర్ణయం అమలవుతుంది.   ► ఫెడరల్‌ బ్యాంక్‌ ఏడాది రుణ రేటు అక్టోబర్‌ 16 నుంచి 8.70 శాతానికి పెరిగింది. ఎస్‌బీఐ సేవింగ్స్‌ అకౌంట్‌ డిపాజిట్‌ రేటు కోత కాగా, ఎస్‌బీఐ సేవింగ్స్‌ డిపాజిట్‌ రేటును 5 బేసిస్‌ పాయింట్లు తగ్గించింది. దీనితో ఈ రేటు 2.70 శాతానికి దిగివచ్చింది. అక్టోబర్‌ 15 నుంచి తాజా రేటు అమల్లోకి వస్తుంది. రూ.10 కోట్ల కన్నా తక్కువ బ్యాలెన్స్‌ ఉన్నవారికి తాజా రేటు అమలవుతుంది. కాగా, రూ.10 కోట్లు దాటిన సేవింగ్స్‌ అకౌంట్స్‌పై వడ్డీరేటును 2.75 శాతం నుంచి 3 శాతానికి పెంచుతున్నట్లు ఎస్‌బీఐ ప్రకటన పేర్కొంది. నిధుల భారీ సమీకరణ లక్ష్యంగా వివిధ బ్యాంకులు డిపాజిట్లపై వడ్డీరేట్లు పెంచుతున్న నేపథ్యంలో ఎస్‌బీఐ చేసిన ఈ సర్దుబాట్లకు ప్రాధాన్యత సంతరించుకుంది.   ఎఫ్‌సీఎన్‌ఆర్‌ డిపాజిట్లపై బీఓబీ రేట్ల పెంపు కాగా, ప్రవాస భారతీయుల ఫారిన్‌ కరెన్సీ (ఎఫ్‌సీఎన్‌ఆర్‌) డిపాజిట్లపై బ్యాంక్‌ ఆఫ్‌ బరోడా (బీఓబీ) వడ్డీరేట్లు పెంచింది. వివిధ కరెన్సీలు, మెచ్యూరిటీ కాలపరిమితులపై 135 బేసిస్‌ పాయింట్ల వరకూ వడ్డీరేటు పెరిగినట్లు బీఓబీ ఒక ప్రకటనలో తెలిపింది. ఈ నెల 16 నుంచి నవంబర్‌ 15 వరకూ తాజా రేట్లు అమలవుతాయని కూడా వివరించింది.

ముంబై: ప్రస్తుత ఆర్థిక సంవత్సరం రెండో త్రైమాసికంలో ప్రైవేట్‌ రంగ ఫెడరల్‌ బ్యాంక్‌ నికర లాభం 52 శాతం (స్టాండెలోన్‌ ప్రాతిపదికన) పెరిగింది. వడ్డీ రాబడి, ఇతర ఆదాయాలు మెరుగుపడటంతో రూ.704 కోట్లకు చేరింది. గత క్యూ2లో ఇది రూ. 460 కోట్లు. మరోవైపు, ఆదాయం రూ. 3,871 కోట్ల నుంచి రూ. 4,630 కోట్లకు చేరింది. కన్సాలిడేటెడ్‌ ప్రాతిపదికన లాభం 50 శాతం పెరిగి రూ. 733 కోట్లకు చేరింది. లాభాలపరంగా చూస్తే బ్యాంకు చరిత్రలోనే ఇది అత్యుత్తమ త్రైమాసికమని సంస్థ ఎండీ శ్యామ్‌ శ్రీనివాసన్‌ తెలిపారు. ప్రొవిజన్‌ కవరేజీ నిష్పత్తి (పీసీఆర్‌)కి సంబంధించి కేటాయింపులు భారీగా పెంచినప్పటికీ మెరుగైన ఫలితాలు సాధించగలిగామని ఆయన పేర్కొన్నారు. సమీక్షాకాలంలో మొత్తం కేటాయింపులు 12.6 శాతం పెరిగి రూ. 506 కోట్లకు చేరాయి. నికర వడ్డీ ఆదాయం 19.1 శాతం పెరిగి రూ. 1,762 కోట్లుగా నమోదైంది. నికర వడ్డీ మార్జిన్‌ (నిమ్‌) 0.10 శాతం పెరిగి 3.30 శాతానికి చేరింది. ఈ ఆర్థిక సంవత్సరంలో నిమ్‌ 3.27–3.35 శాతంగా ఉండొచ్చని అంచనా వేస్తున్నట్లు శ్రీనివాసన్‌ తెలిపారు. రుణ వృద్ధిని బట్టి 2023లో అదనపు మూలధనాన్ని సమీకరించుకునే అవకాశాలు ఉన్నాయని చెప్పారు. ఇక ఇతర ఆదాయం రూ. 492 కోట్ల నుంచి రూ. 610 కోట్లకు పెరిగింది. స్థూల నిరర్థక ఆస్తుల నిష్పత్తి 3.24 శాతం నుంచి 2.46 శాతానికి దిగి వచ్చింది.

న్యూఢిల్లీ: రైతులకు కిసాన్‌ క్రెడిట్‌ కార్డుల (కేసీసీ) జారీని సులభతరం చేసే ప్రక్రియకు యూనియన్‌ బ్యాంక్‌ ఆఫ్‌ ఇండియా, ఫెడరల్‌ బ్యాంక్‌ శ్రీకారం చుట్టాయి. దీనికి సంబంధించి పైలట్‌ ప్రాజెక్టులను ప్రారంభించాయి. కేసీసీ తీసుకునేందుకు పేపర్‌ రూపంలో స్థల రికార్డుల పత్రాలను దాఖలు చేయడం, భౌతికంగా బ్యాంకు శాఖను సందర్శించడం వంటి బాదరబందీ లేకుండా డిజిటల్‌గానే ప్రక్రియ పూర్తి చేయవచ్చని తెలిపాయి. ఇందుకోసం రెండు బ్యాంకులు రిజర్వ్‌ బ్యాంక్‌ ఇన్నోవేషన్‌ హబ్‌ (ఆర్‌బీఐహెచ్‌)తో జట్టు కట్టాయి. యూనియన్‌ బ్యాంక్‌ ఆఫ్‌ ఇండియా మధ్యప్రదేశ్‌లోని హర్దా జిల్లాలో, ఫెడరల్‌ బ్యాంక్‌.. చెన్నైలో ఈ ప్రాజెక్టులను ప్రారంభించాయి. బ్యాంకు శాఖను సందర్శించాల్సిన అవసరం లేకుండా మొబైల్‌ హ్యాండ్‌సెట్‌ ద్వారా కేసీసీ కోసం దరఖాస్తు చేసుకోవచ్చని, ఆన్‌లైన్‌లోనే పొలం వెరిఫికేషన్‌ కూడా జరుగుతుందని యూనియన్‌ బ్యాంక్‌ ఆఫ్‌ ఇండియా ఎడీ ఎ మణిమేఖలై తెలిపారు.

ముంబై: నియంత్రణపరమైన నిబంధనల అమలులో లోపాలు ఉన్నట్టు గుర్తించిన ఆర్‌బీఐ ఫెడరల్‌బ్యాంక్‌కు రూ.5.72 కోట్ల జరిమానా విధించింది. అలాగే, కేవైసీ నిబంధనలు కొన్ని పాటించనందుకు బ్యాంక్‌ ఆఫ్‌ ఇండియాకు రూ.70 లక్షల జరిమానాను విధిస్తూ ఆర్‌బీఐ ఆదేశాలు జారీ చేసింది. బీమా బ్రోకింగ్, కార్పొరేట్‌ ఏజెన్సీ సర్వీసెస్‌ కోసం ఉద్యోగులకు ఎలాంటి ప్రోత్సాహకాలు ఇవ్వకుండా నిబంధనలను అమలు చేయడంలో ఫెడరల్‌ బ్యాంక్‌ విఫలమైనట్టు ఆర్‌బీఐ తెలిపింది. కేవైసీ నిబంధనలను అమలు చేయనందుకు గురుగ్రామ్‌కు చెందిన ధనిలోన్స్‌ అండ్‌ సర్వీసెస్‌కు సైతం ఆర్‌బీఐ 7.6 లక్షల జరిమానా విధించింది.     

బ్యాంకుల గురించి సామాజిక మాధ్యమాల్లో బోలెడు జోక్స్, మీమ్స్‌ కనిపిస్తుంటాయి. మచ్చుకు కొన్ని... ‘ఈరోజు మీకు బ్యాంకులో పని ఉందా? అయితే ఇవి మీతో పాటు తెచ్చుకోవడం అనివార్యం... 1. ఐడీ ప్రూఫ్, 2. లంచ్‌ బాక్స్, 3.ప్లేయింగ్‌ కార్డ్స్‌ 4. డిన్నర్‌ సరంజామా, 5.బెడ్‌షీట్, 6. మెత్తని దిండు, 7. బ్లాంకెట్‌ 8.ఫోన్‌ చార్జర్‌... వీటన్నికంటే ముఖ్యమైనది బోలెడు ఓపిక’ ‘ఈ అమ్మాయి పేరు సువర్ణముఖి. బ్యాంకుకు వెళ్లే ముందు ఎంత ఫ్రెష్‌గా ఉందో చూడండి. బ్యాంకుకు వెళ్లి వచ్చిన తరువాత చంద్రముఖిగా మారిన సువర్ణముఖి రూపం ఇది’ ‘ఒక బ్యాంకు ఉద్యోగి వాచ్‌లో టైమ్‌ స్థానంలో లంచ్, లంచ్, లంచ్‌... అని ఉంటుంది. గడియారం ముళ్లు వాటి మీదే తిరుగుతుంటాయి’ ఇవి అతిశయోక్తితో కూడిన జోక్స్‌ అయినప్పటికీ, సంప్రదాయ బ్యాంకులకు వెళ్లడానికి నవతరంలో ఎక్కువమంది అంతగా ఆసక్తి చూపడం లేదు. దీని కారణాలలో క్యూ, దూరభారంలాంటివి ఉన్నాయి. బ్యాంకులకు వెళ్లడానికి ఇష్టపడని మిలీనియల్స్‌ నియో బ్యాంకులపై ఆసక్తి చూపుతున్నారు.  ఏమిటీ నియో బ్యాంకులు? నియో బ్యాంకులు అనేవి వర్చువల్‌ బ్యాంక్స్‌. వీటికి ఫిజికల్‌ బ్రాంచ్‌లు ఉండవు. అయితే ఫిజికల్‌ బ్రాంచ్‌లు ఉన్న ప్రముఖ బ్యాంకులతో వీటికి భాగస్వామ్యం ఉంటుంది. ‘క్యూ’ కంటే ‘క్విక్‌’ విధానానికి ప్రాధాన్యత ఇచ్చే యువతరం ఈ బ్యాంకులను అమితంగా ఇష్టపడుతుంది. సంప్రదాయ బ్యాంకులకు ‘విశ్వసనీయత’ అనేది గట్టి పునాది అయినప్పటికీ, వీటితో పోల్చితే నియో బ్యాంకులు రకరకాల ప్రత్యా మ్నాయ అవకాశాలు కల్పిస్తున్నాయి. మనీ మేనేజ్‌మెంట్‌ టూల్స్‌ అనేవి మరో ప్లస్‌ పాయింట్‌గా మారింది. వీటి ద్వారా తమ ఖర్చులు, పొదుపు నకు సంబంధించి స్వీయ విశ్లేషణ చేసుకునే అవకాశం యూజర్‌కు కలుగుతుంది. బడ్జెటింగ్, సేవింగ్, ఇన్వెస్టింగ్, రుణ నిర్వహణకు సంబంధించి సులభంగా గ్రహించగలిగే ఆర్థిక సలహాలను బ్యాంకింగ్‌ సర్వీస్‌ ప్రొవైడర్స్‌ నుంచి కోరుకుంటున్నారు మిలీనియల్స్‌. వారి అంచనాలు సంప్రదాయ బ్యాంకులు అందుకోలేక పోవడం కూడా నియో బ్యాంకుల వైపు ఆకర్షితులు కావడానికి ఒక కారణం. రోబోటిక్స్‌ సహాయంతో ఆర్టిఫిషియల్‌ ఇంటెలిజెన్స్‌ ఉపయోగించి తక్కువ సమయంలో సేవలు అందిస్తున్నాయి నియో బ్యాంకులు. తక్కువ ఛార్జీలు, సులభంగా ఖాతా ప్రారంభించే అవకాశం ఉండడం, రుణాలు, బిల్లులు... మొదలైన చెల్లింపులను గుర్తు చేయడానికి రిమైండర్‌ సదుపాయం... ఇలాంటివి నియో విజయానికి కొన్ని కారణాలుగా చెప్పవచ్చు. రకరకాల ఫైనాన్షియల్‌ సర్వీస్‌లను నియో బ్యాంకులు ఒకే గొడుగు కిందికి తీసుకురావడం టెక్‌–సావి మిలీనియల్స్‌ను ఆకట్టుకునే అంశం. రేజర్‌ పే ఎక్స్, జూపిటర్,  ఓపెన్‌... మొదలైనవి మన దేశంలోని కొన్ని నియో బ్యాంకులు. గూగుల్‌ పే క్రియేటర్స్‌ సుజిత్‌ నారాయణ్, సుమిత్‌లు మిలీనియల్స్‌ను ప్రత్యేకంగా దృష్టిలో పెట్టుకొని ‘ఫై’ అనే నియోబ్యాంకును ప్రారంభించారు. ఇది ఫెడరల్‌ బ్యాంక్‌ భాగస్వామ్యంతో పనిచేస్తుంది. మన దేశంలో నియో బ్యాంక్‌ స్టార్టప్‌ల సంఖ్య పెరగడానికి కారణం మిలీనియల్స్‌ ఆదరణ. స్థూలంగా చెప్పాలంటే... నియో బ్యాంకింగ్‌ సెగ్మెంట్‌లో మిలీనియల్స్‌ అతి ముఖ్యమైన ప్రాధాన్యతను సంతరించుకున్నారు. అయితే నియో బ్యాంకుల మధ్య కూడా గట్టి పోటీ ఉంది. వాటి పనితీరు ఆధారంగా రేటింగ్స్‌ ఉంటున్నాయి. డిజైన్‌ లాంగ్వేజ్‌ అనేది వాటి ఆదరణలో కీలకమైన పాత్ర పోషిస్తుంది.  

ముంబై: ప్రపంచ మార్కెట్‌ సూచీలను అనుసరించి దేశీ స్టాక్‌ మార్కెట్‌ లాభాల బాటలో ఉంది. మార్కెట్‌ ఆరంభం కావడం మొదలు ఇటు బీఎస్‌ఈ సెన్సెక్స్‌, అటు ఎన్‌ఎస్‌ఈ నిఫ్టీలు జెట్‌ స్పీడ్‌తో దూసుకుపోతున్నాయి. బంగారం, క్రూడ్‌ ఆయిల్‌ ధరలు కిందికి దిగడం, ఫెడ్‌ రిజర్వ్‌ బ్యాంక్‌ వడ్డీ రేపు పెంపు ఊహించినట్టుగానే ఉండటంతో ఇన్వెస్టర్లు మార్కెట్‌పై ఆసక్తి చూపిస్తున్నారు. ఫెడ్‌ రిజర్వ్‌ బ్యాంక్‌ వడ్డీ రేట్లు పెరిగితే మార్కెట్‌ నుంచి పెట్టుబడులు వెనక్కి పోతాయనే అంచనాలు తారుమారు అయ్యింది. మార్కెట్‌ చూపిస్తున్న జోరు ఇన్వెస్టర్లు, మార్కెట్‌ నిపుణులను ఆశ్చర్యానికి గురి చేస్తోంది. ఈ రోజు ఉదయం 9:45 గంటల సమయానికి బీఎస్‌ఈ సెన్సెక్స్‌ 760 పాయింట్లు లాభపడింది. ఫలితంగా బీఎస్‌ఈ సెన్సెక్స్‌ మరోసారి 57 వేల మార్క్‌ని క్రాస్‌ చేసింది. మార్కెట్‌ ప్రారంభమైన 45 నిమిషాలకే 1.35 శాతం వృద్ధితో 57,576 పాయింట్ల వద్ద ట్రేడవుతోంది. ఎన్‌ఎస్‌ఈ నిఫ్టీలో సైతం ఇదే జోరు కొనసాగుతోంది. 209 పాయింట్ల లాభంతో 1.23 శాతం వృద్ధితో 17,184 పాయింట్ల దగ్గర ట్రేడవుతోంది. నిఫ్టీ సైతం కీలకమైన 17వేల మార్క్‌ని క్రాస్‌ చేసింది. హెచ్‌డీఎఫ్‌సీ, యాక్సిస్‌బ్యాంక్‌, ఏషియన్‌ పేయింట్స్‌ షేర్లు భారీ లాభాలు పొందగా సెన్సెక్స్‌ 30లో అన్ని అన్ని షేర్లు సానుకూలంగా ఉన్నాయి. మిడ్‌ క్యాప్‌ షేర్లలోనూ ఇదే జోరు కనిపిస్తోంది. ముఖ్యంగా నిఫ్టీ మిడ్‌కాప్‌ ఇండెక్స్‌ 1.36 శాతం వృద్ధిని చూపిస్తోంది.

అగ్రరాజ్యం అమెరికాకు ఉన్న అప్పులు అంతకంతకూ పెరిగిపోతున్నాయి. కరోనా సంక్షోభం తర్వాత అగ్రరాజ్యం అమెరికా పీకల్లోతు అప్పుల్లో కూరుకు పోతున్నట్లు నిపుణులు తెలుపుతున్నారు. ఆ దేశ ట్రెజరీ డిపార్ట్ మెంట్ వెల్లడించిన డేటా ప్రకారం.. ఆ దేశ మొత్తం ప్రభుత్వ రుణ బకాయిలు ఇప్పుడు 30 ట్రిలియన్ డాలర్లకు పైగా చేరుకుంది. కోవిడ్-19 మహమ్మారి సంక్షోభం నుంచి బయట పడటానికి అమెరికా ఎక్కువగా ఖర్చు చేయడంతో ప్రభుత్వ రుణాలు భారీగా పెరిగాయి. 2019 చివరి నుంచి ఇప్పటి వరకు జాతీయ రుణం సుమారు 7 ట్రిలియన్ డాలర్ల వరకు పెరిగింది. ఆ దేశ ఆర్థికవేత్తలు ఇది నిజంగా అతి పెద్ద సమస్య అని అంటున్నారు."ఇది స్వల్పకాలిక సంక్షోభం కాదు, కానీ మేము దీర్ఘకాలంలో పేదవారిగా ఉండబోతున్నామని అర్థం" అని ప్రపంచ ప్రధాన వ్యూహకర్త డేవిడ్ కెల్లీ అన్నారు. వడ్డీ ఖర్చులు మాత్రమే రాబోయే 10 సంవత్సరాలలో $5 ట్రిలియన్లను అధిగమిస్తుందని అంచనా వేశారు. ఇది 2051 నాటికి మొత్తం ఫెడరల్ ఆదాయంలో దాదాపు సగం ఉంటుందని పీటర్ జి. పీటర్సన్ ఫౌండేషన్ సంస్థ తెలిపింది. పెరుగుతున్న రుణ ఖర్చుల వల్ల వాతావరణ మార్పు వంటి ప్రధాన ప్రాధాన్యతలపై అమెరికా చేసే ఖర్చులు తగ్గే అవకాశం ఉన్నట్లు కెల్లీ అభిప్రాయపడ్డారు. ఫెడరల్ ప్రభుత్వం ఇప్పుడు జపాన్ & చైనా నేతృత్వంలోని విదేశీ, అంతర్జాతీయ పెట్టుబడిదారులకు దాదాపు 8 ట్రిలియన్ డాలర్లు బకాయి పడింది.  (చదవండి: కష్టకాలంలో శ్రీలంకకు అండగా భారత్..!)

ముంబై: ప్రైవేట్‌ రంగ ఫెడరల్‌ బ్యాంక్‌ త్వరలో ప్రారంభించే ఇంటర్న్‌షిప్‌ ప్రోగ్రాంలో చేరేందుకు అర్హత గల అభ్యర్ధుల నుంచి దరఖాస్తులు ఆహ్వానిస్తున్నట్లు ప్రకటించింది. ఫెడరల్‌ ఇంటర్న్‌షిప్‌ ప్రోగ్రాం (ఎఫ్‌ఐపీ) పేరిట నిర్వహించే ఈ కోర్సు కాలవ్యవధి రెండేళ్లుగా ఉంటుంది. మణిపాల్‌ గ్లోబల్‌ ఎడ్యుకేషన్‌ సర్వీసెస్‌ (ఎంఏజీఈ)తో కలిసి ఈ కోర్సును అందిస్తున్నట్లు బ్యాంక్‌ తెలిపింది. కోర్సు పూర్తయిన తర్వాత మణిపాల్‌ అకాడెమీ ఆఫ్‌ హయ్యర్‌ ఎడ్యుకేషన్‌ నుంచి పోస్ట్‌ గ్రాడ్యుయేట్‌ డిప్లొమా ఇన్‌ బ్యాంకింగ్‌ సర్టిఫికెట్‌ అందుకోవచ్చని ఫెడరల్‌ బ్యాంక్‌ తెలిపింది. అంతేకాదు ప్రొబేషనరీ ఆఫీసర్‌గా ఫెడరల్‌ బ్యాంక్‌లోనే అవకాశాలు దక్కవచ్చు కూడా. ఈ ప్రోగ్రాంలో చేరే అభ్యర్థులు ఏటా రూ. 5.70 లక్షల దాకా ఆర్జించే అవకాశాలు ఉంటాయని పేర్కొంది. దరఖాస్తు చేసుకోవాలంటే..  ► ఆంధ్రప్రదేశ్, తెలంగాణ తదితర రాష్ట్రాలకు చెందిన వారు దరఖాస్తు చేసుకోవచ్చు ► పదో తరగతి, ఇంటర్‌(ఫ్లస్‌ టూ), గ్రాడ్యుయేషన్‌.. ఏదైనా సరే 60 శాతం మార్కులకు పైబడి ఉండాలి ► 2021 అక్టోబర్‌ 1 నాటికి అభ్యర్థి వయస్సు 27 సంవత్సరాలకు మించకూడదు. ► దరఖాస్తు సమర్పించడానికి ఆఖరు తేదీ అక్టోబర్‌ 23 ►నవంబర్‌ 11న ఆన్‌లైన్‌లో ఆప్టిట్యూడ్‌ టెస్ట్‌ ఉంటుంది.   దరఖాస్తు చేసుకోవడానికి కింద లింక్‌ను క్లిక్‌ చేయండి.. https://www.federalbank.co.in/federal-internship-program

న్యూఢిల్లీ: ప్రైవేట్‌ రంగ ఫెడరల్‌ బ్యాంకులో ఇంటర్నేషనల్‌ ఫైనాన్స్‌ కార్పొరేషన్‌ (ఐఎఫ్‌సీ) సుమారు అయిదు శాతం వాటాలు దక్కించుకుంది. ఇందుకోసం రూ. 916 కోట్లు వెచ్చింది. దీంతో ఫెడరల్‌ బ్యాంక్‌లో ఐఎఫ్‌సీ కీలక వాటాదారుగా మారింది. షేరు ఒక్కింటికి రూ. 87.39 రేటు చొప్పున ఐఎఫ్‌సీ, ఐఎఫ్‌సీ ఫైనాన్షియల్‌ ఇన్‌స్టిట్యూషన్స్‌ గ్రోత్‌ ఫండ్, ఎల్‌పీ (ఎఫ్‌ఐజీ), ఐఎఫ్‌సీ ఎమర్జింగ్‌ ఏషియా ఫండ్, ఎల్‌పీ (ఈఏఎఫ్‌)లకు 10.48 కోట్ల షేర్లను (4.99 శాతం వాటా) కేటాయించే ప్రతిపాదనకు ఫెడరల్‌ బ్యాంక్‌ బోర్డు గత నెలలో ఆమోదముద్ర వేసింది. తాజాగా సమీకరించిన నిధులను పర్యావరణ అనుకూల ప్రాజెక్టులతో (ఈఎస్‌జీ) పాటు ఇతరత్రా కార్యకలాపాలకు వినియోగించనున్నట్లు బ్యాంక్‌ తెలిపింది. గ్రీన్‌హౌస్‌ గ్యాస్‌ (జీహెచ్‌జీ) ఉద్గారాలకు సంబంధించి అంతర్జాతీయంగా భారత్‌ మూడో స్థానంలో ఉంది. ప్యారిస్‌ ఒప్పందం ప్రకారం 2030 నాటికి జీహెచ్‌జీ ఉద్గారాలను తగ్గించుకోవడానికి భారత్‌కు గణనీయంగా పెట్టుబడులు అవసరం కానున్నాయి. ఈ నేపథ్యంలో 2030 నాటికి పర్యావరణ అనుకూల పెట్టుబడులకు సంబంధించి భారత్‌లో 3 లక్షల కోట్ల డాలర్ల మేర ఇన్వెస్ట్‌మెంట్‌ అవకాశాలు ఉన్నాయని ఐఎఫ్‌సీ అంచనా వేస్తోంది.  

హుషారుగా ప్రారంభమైన దేశీ స్టాక్‌ మార్కెట్లు మరింత జోరందుకున్నాయి. ప్రస్తుతం సెన్సెక్స్‌ 424 పాయింట్లు జంప్‌చేసి 40,407ను తాకింది. నిఫ్టీ 105పాయింట్లు ఎగసి 11,867 వద్ద ట్రేడవుతోంది. ఈ నేపథ్యంలో ప్రస్తుత ఆర్థిక సంవత్సరం ద్వితీయ త్రైమాసికంలో ప్రోత్సాహకర పనితీరు చూపడంతో అటు టాటా కమ్యూనికేషన్స్‌, ఇటు.. ఫెడరల్‌ బ్యాంక్‌ కౌంటర్లకు డిమాండ్‌ పెరిగింది. ఇన్వెస్టర్లు కొనుగోళ్లకు ఎగబడటంతో ఈ రెండు షేర్లూ భారీ లాభాలతో సందడి చేస్తున్నాయి. వివరాలు చూద్దాం.. టాటా కమ్యూనికేషన్స్‌ ఈ ఏడాది క్యూ2(జులై- సెప్టెంబర్‌)లో టెలికం మౌలిక సదుపాయాల కంపెనీ టాటా కమ్యూనికేషన్స్‌ రూ. 385 కోట్ల నికర లాభం ఆర్జించింది. గతేడాది క్యూ2తో పోలిస్తే ఇది 7 రెట్లు అధికంకాగా.. కన్సాలిడేటెడ్‌ ప్రాతిపదికన మొత్తం ఆదాయం 4 శాతం పుంజుకుని రూ. 4,282 కోట్లకు చేరింది. ఫలితాల నేపథ్యంలో టాటా కామ్‌ షేరు ఎన్‌ఎస్‌ఈలో 5 శాతం అప్పర్‌ సర్క్యూట్‌ను తాకింది. రూ. 919 ఎగువన ఫ్రీజయ్యింది. తద్వారా 52 వారాల గరిష్టం రూ. 935కు చేరువైంది. ఫెడరల్‌ బ్యాంక్‌ ప్రయివేట్‌ రంగ సంస్థ ఫెడరల్‌ బ్యాంక్‌ ఈ ఏడాది క్యూ2(జులై- సెప్టెంబర్‌)లో రూ. 308 కోట్ల నికర లాభం ప్రకటించింది. ఇది 26 శాతం క్షీణతకాగా.. ప్రొవిజన్లకు అధిక కేటాయింపులు చేపట్టడం ప్రభావం చూపినట్లు నిపుణులు పేర్కొన్నారు. అయితే నికర వడ్డీ ఆదాయం 23 శాతం వృద్ధితో రూ. 1,380 కోట్లకు చేరింది. రుణ మంజూరీ 6 శాతం పుంజుకోగా.. నికర వడ్డీ మార్జిన్లు 3.13 శాతంగా నమోదయ్యాయి. ప్రొవిజన్లు, తదితరాలు 135 శాతం పెరిగి రూ. 592 కోట్లను అధిగమించాయి. ఈ కాలంలో స్థూల మొండిబకాయిలు(ఎన్‌పీఏలు) 0.12 శాతం నీరసించి 2.84 శాతానికి చేరగా.. నికర ఎన్‌పీఏలు 0.23 శాతం మందగించి 0.99 శాతాన్ని తాకాయి. దీంతో ఎన్‌ఎస్‌ఈలో ఫెడరల్‌ బ్యాంక్‌ షేరు ప్రస్తుతం 5 శాతం జంప్‌చేసి రూ. 55 సమీపంలో ట్రేడవుతోంది.

సాక్షి, ముంబై:  కరోనా కాలంలో రవాణా సదుపాయాలు తగినంతగా లేక ఇబ్బందులు పడుతూ, ద్విచక్ర వాహనాన్ని సొంతం చేసుకోవాలని  చూస్తున్న వారికోసం ఫెడరల్ బ్యాంక్ శుభవార్త చెప్పింది. కేవలం ఒక్క రూపాయికే బైక్ బుక్ చేసుకోవచ్చంటూ తన కస్టమర్లకు ఊరటనిచ్చింది. బ్యాంక్ కస్టమర్లుఫెడరల్ డెబిట్ కార్డు ద్వారా కేవలం ఒక్క రూపాయి చెల్లించి, మిగిలిన సొమ్మును ఈఎంఐ చెల్లింపు అవకాశంతో కొనుగోలు చేయవచ్చని ఒక ప్రకటనలో తెలిపింది.  దేశంలో ఎంపిక చేసిన హీరో, హోండా, టీవీఎస్ షోరూంలలో ఈ ఆఫర్ అందుబాటులో ఉంటుందని తెలిపింది. మరోవైపు ఫెస్టివల్ ఆఫర్‌గా ఎంపిక చేసిన హోండా మోటార్ సైకిల్ షోరూంల ద్వారా డెబిట్ కార్డు ఈఎంఐతో బైక్ కొనుగోలు చేసినవారికి 5 శాతం క్యాష్‌బ్యాక్‌ను సైతం బ్యాంక్ అందిస్తోంది. 3, 6, 9,12 నెలలకు ఈఎంఐను ఎంచుకునే అవకాశాన్ని ఖాతాదారులకు ఫెడరల్ బ్యాంక్ కల్పిస్తోంది. ఈఎంఐ అర్హతను తెలుసుకోవడానికి ఫెడరల్ బ్యాంక్ కస్టమర్లు ‘DC-SPACE-EMI’ అని టైప్ చేసి 5676762 నంబర్‌కు ఎస్ఎంఎస్ చేయాలి. అలాగే 7812900900 నంబరుకు మిస్డ్‌కాల్ ఇచ్చి కూడా వివరాలు తెలుసుకోవచ్చు. హోండా మోటార్ సైకిల్ షోరూమ్‌ల నుండి ద్విచక్ర వాహనం కొనుగోలు చేసేవారికి పండుగ ఆఫర్‌గా5 శాతం క్యాష్ బ్యాక ఆఫర్  కూడా ఉంది. 500సీసీ ఇంజన్ కన్నా తక్కువ సామర్థ్యం ఉన్న బైక్‌లపై 17 శాతం వడ్డీ రేటు అందిస్తున్నట్లు బ్యాంకు పేర్కొంది.  రానున్న పండుగ సీజన్,  కరోనా మహమ్మారి ప్రోటోకాల్స్, కార్డ్‌ల ద్వారా ద్విచక్ర వాహనాల కొనుగోళ్లపై జీఎస్‌టీ తగ్గింపు నేపథ్యంలో ఈజీ ఫైనాన్స్, క్యాష్ బ్యాక్ ఆఫర్లతో కస్టమర్లకు ప్రోత్సాహాన్నివ్వాలని భావిస్తున్నట్టు బ్యాంకు తెలిపింది. భారతదేశం అంతటా 36,000 దుకాణాలలో వినియోగదారుల డ్యూరబుల్స్ కొనుగోలు కోసం బ్యాంక్ డెబిట్ కార్డులపై ఈఎంఐ సదుపాయం అందిస్తోంది.  కాగా ఈకామర్స్  పోర్టల్స్ అమెజాన్, ఫ్లిప్‌కార్ట్‌ కొనుగోళ్లపై కూడా ఇటీవలఈఎంఐ ఆఫర్ అందించడం ప్రారంభించింది.

అమెరికా ఆర్థిక వ్యవస్థ కోలుకోవడానికి చాలా కాలమే పడుతుందని ఆ దేశ కేంద్ర బ్యాంక్‌ సంకేతాలివ్వడంతో  ప్రపంచ మార్కెట్లతో పాటే మన మార్కెట్‌ కూడా గురువారం పతనమైంది. టెలికం కంపెనీలు ఏజీఆర్‌ బకాయిలు చెల్లించాల్సిందేనంటూ సుప్రీం కోర్ట్‌ వ్యాఖ్యానించడం, ఇటీవల బాగా పెరిగిన బ్యాంక్, ఆర్థిక రంగ షేర్లలో లాభాల స్వీకరణ చోటు చేసుకోవడం, డాలర్‌తో రూపాయి మారకం విలువ క్షీణించడం, మళ్లీ లాక్‌డౌన్‌ విధిస్తారనే వదంతులు, కరోనా కేసులు పెరుగుతుండటం... ప్రతికూల ప్రభావం చూపించాయి. బీఎస్‌ఈ సెన్సెక్స్‌ 34,000 పాయింట్లు, ఎన్‌ఎస్‌ఈ నిఫ్టీ 10,000 పాయింట్ల దిగువకు పడిపోయాయి. సెన్సెక్స్‌ 709 పాయింట్లు క్షీణించి 33,538 పాయింట్ల వద్ద, నిఫ్టీ 214 పాయింట్లు పతనమై 9,902 పాయింట్ల వద్ద ముగిశాయి. గత మూడు వారాల్లో సెన్సెక్స్, నిఫ్టీలు ఒక్క రోజులో ఈ స్థాయిలో నష్టపోవడం ఇదే ప్రథమం. ఇంట్రాడేలో సెన్సెక్స్‌ 767 పాయింట్లు, నిఫ్టీ 231 పాయింట్ల మేర నష్టపోయాయి. అన్ని రంగాల సూచీలు నష్టాల్లోనే ముగిశాయి. కాగా ఇన్వెస్టర్లు అప్రమత్తంగా ఉండాలని విశ్లేషకులు సూచిస్తున్నారు.   మరిన్ని వివరాలు... ► ఎస్‌బీఐ షేర్‌ 6% నష్టంతో రూ.177 వద్ద ముగిసింది. సెన్సెక్స్‌లో బాగా పడిన షేర్‌ ఇదే.   ► 30 సెన్సెక్స్‌ షేర్లలో ఐదు షేర్లు–ఇండస్‌ఇండ్‌ బ్యాంక్, హీరో మోటొకార్ప్, పవర్‌ గ్రిడ్, మహీం ద్రా అండ్‌ మహీంద్రా, నెస్లే ఇండియా మాత్రమే లాభపడ్డాయి. మిగిలిన 25 షేర్లు నష్టపోయాయి.   ► మార్కెట్‌ భారీగా నష్టపోయినా, 80కు పైగా షేర్లు ఏడాది గరిష్ట స్థాయిలకు చేరాయి. అరబిందో ఫార్మా, ముత్తూట్‌ ఫైనాన్స్, క్యాడిలా హెల్త్‌కేర్, గ్రాన్యూల్స్‌ ఇండియా తదితర షేర్లు ఈ జాబితాలో ఉన్నాయి.   ► స్టాక్‌ మార్కెట్‌లో భారీ క్షీణత చోటు చేసుకున్నా దాదాపు 350కు పైగా షేర్లు అప్పర్‌ సర్క్యూట్లను తాకాయి. పీఎన్‌బీ హౌసింగ్, ఫ్యూచర్‌ రిటైల్, లెమన్‌ ట్రీ హోటల్స్, ఫ్యూచర్‌ కన్సూమర్, డిష్‌ టీవీ తదితర షేర్లు ఈ జాబితాలో ఉన్నాయి.   ► ప్రముఖ ట్రేడర్‌ విజయ్‌ ఖేడియా 1.1 శాతం వాటా షేర్లను కొనుగోలు చేయడంతో రామ్‌కో సిస్టమ్స్‌ షేర్‌ 20 శాతం లాభంతో రూ.110 వద్ద ముగిసింది. ఇక ఆర్థిక ఫలితాలు బాగా ఉండటంతో శంకర బిల్డింగ్‌ షేర్‌ 16 శాతం ఎగసి రూ.352 వద్ద ముగిసింది.   ► ఏజీఆర్‌ బకాయిల విషయమై ఊరట లభించకపోవడంతో టెలికం షేర్లు నష్టపోయాయి. వొడాఫోన్‌ ఐడియా, భారతీ ఇన్‌ఫ్రాటెల్, హెచ్‌ఎఫ్‌సీఎల్, తేజాస్‌ నెట్‌వర్క్స్, ఐటీఐ, భారతీ ఎయిర్‌టెల్‌ షేర్లు 13 శాతం వరకూ నష్టపోయాయి.   ► వరుసగా ఐదో రోజూ ఇండస్‌ఇండ్‌ బ్యాంక్‌ షేర్‌ పెరిగింది. ఒక్క వారంలో ఈ షేర్‌ 30 శాతం లాభపడింది. నష్టాలు ఎందుకంటే... ► ఫెడ్‌ కఠిన వ్యాఖ్యలు... వడ్డీరేట్లను యథాతథంగా ఉంచినప్పటికీ, అమెరికాలో ఆర్థిక రికవరీకి దీర్ఘకాలమే పడుతుందని అమెరికా ఫెడరల్‌ రిజర్వ్‌ వ్యాఖ్యానించడం ప్రపంచ ఈక్విటీ మార్కెట్లను పడగొట్టింది. వడ్డీరేట్లను మరో రెండేళ్ల పాటు సున్నా స్థాయిల్లోనే కొనసాగిస్తామని, తక్కువ రేట్లను కొనసాగించడానికి బాండ్ల కొనుగోళ్లు కొనసాగిస్తామని ఫెడ్‌ వెల్లడించింది. కరోనా కల్లోలంతో కుదేలైన ఆర్థిక వ్యవస్థ కోలుకోవడానికి చాలా కాలమే పడుతుందని ఈ వ్యాఖ్యల ద్వారా ఫెడ్‌ అంగీకరించినట్లయింది.    ఫెడ్‌ వ్యాఖ్యల కారణంగా ఆసియా, యూరప్‌ మార్కెట్లు 1–4 శాతం మేర నష్టపోయాయి.   ► ఏజీఆర్‌ బకాయిలు చెల్లించాల్సిందే... టెలికం కంపెనీలు ఏజీఆర్‌(సవరించిన స్థూల రాబడి)బకాయిలు చెల్లించాలాంటూ సుప్రీం కోర్ట్‌ తేల్చి చెప్పడంతో బ్యాంక్‌ షేర్లు పడ్డాయి.   ► బ్యాంక్‌ షేర్లలో లాభాల స్వీకరణ... లాక్‌డౌన్‌ నిబంధనలు సడలించినప్పటి నుంచి ఆర్థిక రికవరీపై సానుకూల అంచనాలతో బ్యాంక్, ఆర్థిక రంగ షేర్లు పెరుగుతూ వస్తున్నాయి. ఈ షేర్లన్నీ బాగా పెరిగిన నేపథ్యంలో ఫెడ్‌ తాజా నిర్ణయం కారణంగా పై స్థాయిల్లో లాభాల స్వీకరణ చోటు చేసుకుంది. ► రూపాయి పతనం   డాలర్‌తో రూపాయి మారకం విలువ 20 పైసలు పతనమై 75.79 వద్దకు చేరింది.   ► మళ్లీ లాక్‌డౌన్‌...? కరోనా కేసులు బాగా పెరుగుతుండటంతో ఈ నెల 15 నుంచి దేశవ్యాప్తంగా లాక్‌డౌన్‌ను విధిస్తారన్న వదంతులు చెలరేగాయి. ఈ వార్తలను కేంద్రం ఖండించినప్పటికీ, లాక్‌డౌన్‌ వార్తలు ఇన్వెస్టర్ల సెంటిమెంట్‌ను దెబ్బతీశాయి. ► పెరుగుతున్న కరోనా కేసులు... ప్రపంచవ్యాప్తంగా, దేశవ్యాప్తంగా కరోనా కేసులు పెరుగుతున్నాయి. ప్రపంచవ్యాప్త కరోనా కేసులు 74 లక్షలకు, మరణాలు 4.2 లక్షలకు చేరువయ్యాయి. ఇక భారత్‌లో కరోనా కేసులు 2.9 లక్షలకు పైగా చేరగా, మరణాలు 8 వేలు దాటిపోవడం కూడా మార్కెట్లపై ఒత్తిడి పెంచాయి.   ► ఎస్‌ అండ్‌ పీ రేటింగ్స్‌ ఆందోళన   గత వారం మన రేటింగ్‌ను మూడీస్‌ సంస్థ డౌన్‌గ్రేడ్‌ చేసిన విషయం తెలిసిందే. అయితే స్డాండర్డ్‌ అండ్‌ పూర్స్‌ (ఎస్‌ అండ్‌ పీ) గ్లోబల్‌ రేటింగ్స్‌ సంస్థ మన సావరిన్‌ రేటింగ్‌ను కొనసాగించడం ఒకింత ఊరటనిచ్చింది. అయితే ద్రవ్యలోటు, ఆర్థిక రంగ బలహీనతలపై ఆందోళన వ్యక్తం చేయడం ప్రతికూల ప్రభావం చూపించింది. రూ.2.4 లక్షల కోట్లు ఆవిరి స్టాక్‌ మార్కెట్‌ భారీ నష్టాల కారణంగా రూ.2.4 లక్షల కోట్ల ఇన్వెస్టర్ల సంపద ఆవిరైంది. ఇన్వెస్టర్ల సంపదగా పరిగణించే బీఎస్‌ఈలో లిస్టైన కంపెనీల మొత్తం మార్కెట్‌ క్యాప్‌ రూ.2.4 లక్షల కోట్లు తగ్గి రూ.133 లక్షల కోట్లకు పడిపోయింది. భారీ నష్టాల్లో అమెరికా మార్కెట్‌ కరోనా కేసులు అంతకంతకూ పెరిగిపోతుండటం, అమెరికా ఆర్థిక వ్యవస్థ కోలుకోవడంపై అమెరికా ఫెడరల్‌ రిజర్వ్‌ నిరాశాపూర్వక వ్యాఖ్యలు చేయడంతో గురువారం అమెరికా స్టాక్‌ సూచీలు భారీ నష్టాల్లో ట్రేడవుతున్నాయి. అమెరికాలో కరోనా కేసులు 20 లక్షలకు పైగా పెరిగిపోగా, మరణాలు 1.1 లక్షలకు చేరాయి. కరోనా కేసులు మళ్లీ తిరగబెడుతున్నాయని నిపుణులంటున్నారు. రాత్రి గం.11.30ని. సమయానికి డోజోన్స్‌ సూచీ 1,300 పాయింట్లు, (5 శాతం), నాస్‌డాక్‌ సూచీ 328 పాయింట్లు (3 శాతం), ఎస్‌ అండ్‌ పీ 500 సూచీ 128 పాయింట్లు(4 శాతం) మేర నష్టాల్లో ట్రేడవుతున్నాయి. ఇక మన ఎన్‌ఎస్‌ఈ నిఫ్టీకి ప్రతీక అయిన ఎస్‌జీఎక్స్‌ నిఫ్టీ సూచీ 278 పాయింట్ల(2%) నష్టంతో 9,575 పాయింట్ల వద్ద ట్రేడవుతోంది. ఈ ప్రభావంతో శుక్రవారం మన స్టాక్‌ సూచీలు భారీ గ్యాపప్‌తో మొదలవుతాయని అంచనా.

ముంబై: భారతీయులకు బంగారం అంటే ఎంత ఇష్టమొ అందరికి తెలిసిందే. పసిడి మన సంస్కృతిలో అంతర్భాగమని నిపుణులు చెబుతుంటారు. కరోనా వైరస్‌ విలయతాండవంతో దేశ వ్యాప్తంగా ప్రభుత్వం లాక్‌డౌన్‌ అమలు చేస్తుంది. ఈ సంక్షోభం నుంచి గట్టెక్కి తిరిగి వ్యాపారంలో పుంజుకునేందుకు ప్రజలు బంగారు రుణాల వైపు మొగ్గు చూపుతున్నట్లు బ్యాంక్‌ అధికారులు తెలిపారు. బ్యాంక్‌లు కూడా వివిధ ఆస్తుల గ్యారెంటీ కన్నా బంగారు రుణాలే మేలని భావిస్తున్నాయి. దేశంలో బంగారు రుణాలవైపు ప్రజలు మొగ్గు చూపుతున్నట్లు క్రెడిట్‌ రేటింగ్ ఏజెన్సీ క్రెసిల్ పేర్కొంది.‌   వ్యాపారంలో పెట్టుబడులు పెట్టడానికి, ఎక్కువ శాతం ప్రజలు బంగారు రుణాలు తీసుకోవడానికి సానుకూలంగా ఉన్నట్లు వరల్డ్‌ గోల్డ్‌ కౌన్సిల్‌ హెడ్‌ పీఆర్‌ సోమ సుందరం పేర్కొన్నారు. కాగా దేశంలోని ప్రజలు సగటున (రూ.40,000) బంగారు రుణాలు తీసుకుంటున్నట్లు ముథుట్ ఫైనాన్స్ మేనేజింగ్ డైరెక్టర్ జార్జ్ అలెగ్జాండర్ ముథూట్ తెలిపారు. బంగారు రుణాలు ఇవ్వడానికే తమ బ్యాంక్‌ ప్రాధాన్యమిస్తున్నట్లు ఫెడరల్ బ్యాంక్ చీఫ్ ఫైనాన్షియల్ ఆఫీసర్ అశుతోష్ ఖాజురియా పేర్కొన్నారు. (చదవండి: మీ రుణం ‘బంగారం’ గాను..)

కోవిడ్‌–19 (కరోనా) వైరస్‌ కల్లోలం కొనసాగుతుండటంతో స్టాక్‌ మార్కెట్‌ సోమవారం భారీగా నష్టపోయింది. అమెరికా ఫెడరల్‌ రిజర్వ్‌ ఫండ్ల రేట్లను దాదాపు సున్నా స్థాయికి తగ్గించినప్పటికీ, భారత్‌తో పాటు ప్రపంచ దేశాల స్టాక్‌ మార్కెట్లన్నీ పతనబాటలోనే సాగాయి. బీఎస్‌ఈ సెన్సెక్స్‌ 32,000 పాయింట్లు, ఎన్‌ఎస్‌ఈ నిఫ్టీ 9,200 పాయింట్ల దిగువకు పడిపోయాయి. సెన్సెక్స్‌ చరిత్రలోనే రెండో అతి పెద్ద పతనాన్ని నమోదు చేసింది. 2,713 పాయింట్లు క్షీణించి 31,390 పాయింట్ల వద్ద ముగిసింది. ఇక ఎన్‌ఎస్‌ఈ నిఫ్టీ 758 పాయింట్లు పతనమై 9,197 పాయింట్ల  వద్దకు చేరింది. శాతం పరంగా చూస్తే, సెన్సెక్స్‌ 7.96 శాతం, నిఫ్టీ 7.61 శాతం చొప్పున క్షీణించాయి. అన్ని రంగాల సూచీలు నష్టపోయాయి. నిఫ్టీ మూడేళ్లు, సెన్సెక్స్‌ రెండున్నరేళ్ల కనిష్టానికి పడిపోయాయి.   ఆరంభం నుంచి అదే వరుస.... ఆసియా మార్కెట్ల బలహీనతతో సెన్సెక్స్, నిఫ్టీలు భారీ నష్టాల్లో మొదలయ్యాయి. సెన్సెక్స్‌ 1,000 పాయింట్ల నష్టంతో 33,103 పాయింట్ల వద్ద, నిఫ్టీ 368 పాయింట్లు పతనమై 9,588 పాయింట్ల వద్ద ట్రేడింగ్‌ను ఆరంభించాయి. ఏ దశలోనూ కోలుకోలేకపోయాయి. ఇంట్రాడేలో సెన్సెక్స్‌ 2,827 పాయింట్లు, నిఫ్టీ 790 పాయింట్ల మేర పతనమయ్యాయి. ఈ నెల 12న సెన్సెక్స్‌ 2,919 పాయింట్లు, నిఫ్టీ 868 పాయింట్లు చొప్పున నష్టపోయాయి. చరిత్రలో ఇదే అతి పెద్ద పతనం. సోమవారం రెండో అతి పెద్ద పతనం నమోదైంది. వారం వ్యవధిలో స్టాక్‌ సూచీలు ఇలా భారీ స్థాయిలో పతనం కావడం ఇదే తొలిసారి.  శుక్రవారం   విరామం అనంతరం స్టాక్‌ మార్కెట్‌లో నష్టాలు మళ్లీ కొనసాగాయి.   ఎదురీదిన యస్‌ బ్యాంక్‌ అన్ని రంగాల షేర్లు భారీగా పతనమైనప్పటికీ, యస్‌ బ్యాంక్‌ షేర్‌ మాత్రం 45% ఎగసి రూ.37కు చేరింది.  యస్‌ బ్యాంక్‌లో వివిధ బ్యాంక్‌లు రూ.10,000 కోట్లు ఇన్వెస్ట్‌ చేస్తుండటం, నగదు విత్‌డ్రాయల్‌ పరిమితులను మరో 2 రోజుల్లో తొలగించనుండటం సానుకూల ప్రభావం చూపాయి. రూ.7.6 లక్షల కోట్ల సంపద ఆవిరి స్టాక్‌ మార్కెట్‌ భారీ నష్టాల కారణంగా ఇన్వెస్టర్ల సంపద రూ.7.6 లక్షల కోట్లు ఆవిరైంది. ఇన్వెస్టర్ల సంపదగా పరిగణించే బీఎస్‌ఈలో లిస్టైన మొత్తం కంపెనీల మార్కెట్‌ క్యాప్‌ రూ.7.62 లక్షల కోట్లు హరించుకుపోయి రూ.121.63 లక్షల కోట్లకు పడిపోయింది. నష్టాలు ఎందుకంటే....  కోవిడ్‌–19 వైరస్‌ కల్లోలం.... కోవిడ్‌–19 వైరస్‌ కల్లోలం అంతకంతకూ పెరిగిపోతోంది. సోమవారం తాజాగా 9 కొత్త దేశాలకు పాకింది. మరోవైపు ఇటలీ, స్పెయిన్‌ దేశాల్లో మరణాల సంఖ్య పెరుగుతోంది. మన దేశంలో ఇప్పటివరకూ కరోనా కేసుల సంఖ్య 110కు, మరణాలు రెండుకు చేరాయి. ఇక ప్రపంచవ్యాప్తంగా 1.70 లక్షల మందికి ఈ వైరస్‌ సోకగా, 6,500 మందికి పైగా మరణించారు.   గణాంకాలతో గజగజ.... చైనా తయారీ రంగ, రిటైల్‌ అమ్మకాల గణాంకాలు సోమవారం వెలువడ్డాయి. చైనా తయారీ రంగ సూచీ 30 ఏళ్ల కనిష్టానికి పడిపోయింది.  రిటైల్‌ అమ్మకాలు కూడా బారీగా తగ్గాయి.  కోవిడ్‌–19 వైరస్‌ కల్లోలం ఆర్థిక సంక్షోభానికి దారితీస్తుందనే భయాలను ఈ గణాంకాలు మరింతగా పెంచాయి.   ప్రపంచ మార్కెట్ల పతనం..... ఆసియా మార్కెట్లు 2–4 శాతం రేంజ్‌లో నష్టపోవడం, యూరప్‌ మార్కెట్లు ఆరంభంలోనే 8 శాతం పతనం కావడం ఇన్వెస్టర్ల సెంటిమెంట్‌ను దెబ్బతీసింది.   ముడి చమురు ధరలు మరింత పతనం.... ఆర్థిక మాంద్యం భయాల నేపథ్యంలో వినియోగం తగ్గి, డిమాండ్‌ కూడా తగ్గగలదన్న ఆందోళనతో ముడి చమురు ధరలు 10 శాతం మేర దిగివచ్చాయి.   అమెరికా వడ్డీ రేట్లు @ 0 ఫెడ్‌ మరో అనూహ్య కోత వాషింగ్టన్‌: అమెరికా సెంట్రల్‌ బ్యాంక్‌–  ఫెడరల్‌ రిజర్వ్‌ రెండు వారాల్లోనే రెండోసారి వడ్డీ రేట్లలో కోత  పెట్టింది. అదీ ఏకంగా 1 శాతం తగ్గించేసింది.  వెరసి ప్రస్తుతం ఫెడ్‌ ఫండ్‌ రేటు సున్నా (0–0.25 శాతం) స్థాయికి చేరింది.  రెండు వారాల్లోనే రేటును ఫెడ్‌  ఏకంగా 1.5 శాతం తగ్గించడం గమనార్హం. నిజానికి ఈ నెల 17, 18 తేదీల్లో  ఫెడరల్‌ రిజర్వ్‌ పాలసీ సమావేశాన్ని నిర్వహించవలసి ఉంది. అయితే కోవిడ్‌–19 సృష్టిస్తున్న విలయం కారణంగా రెండు వారాల క్రితం తొలిసారి అత్యవసర ప్రాతిపదికన 0.5 శాతం వడ్డీ రేటును తగ్గించింది.  ఆదివారం అర్ధరాత్రి (భారత కాలమానం ప్రకారం సోమవారం తెల్లవారు జామున) వడ్డీ రేట్లను సున్నా స్థాయికి చేర్చుతున్నట్లు ప్రకటించింది. అంతేకాకుండా 700 బిలియన్‌ డాలర్లతో భారీ సహాయక ప్యాకేజీని ప్రకటించింది. ఈ మేరకు బాండ్లను కొనుగోలు చేయనుంది.  తాజా రేటు కోత నేపథ్యాన్ని పరిశీలిస్తే, కరోనా వైరస్‌తో ప్రపంచం నిలువెల్లా వణుకుతోంది. దాదాపు ప్రపంచ దేశాలన్నీ కోవిడ్‌–19 వైరస్‌ ప్రభావానికి లోనైనట్లు వార్తలు వెలువడుతున్నాయి. దీంతో అంతర్జాతీయ ఆర్థిక వ్యవస్థ కుదేలయ్యే పరిస్థితులు తలెత్తాయి. ముఖ్యంగా అమెరికా  ఆర్థిక వ్యవస్థసైతం తీవ్ర అనిశ్చితిలో పడిపోయింది.     ఫెడ్‌ చైర్మన్‌ జెరోమ్‌ పావెల్‌ 2008 తదుపరి... 2008లో ప్రపంచ ఆర్థిక సంక్షోభ పరిస్థితులకు దారితీసిన సబ్‌ప్రైమ్‌ సంక్షోభ సమయంలో వృద్ధికి ఊతం అందించడానికి  అమెరికా ఫెడ్‌ ఫండ్‌ రేటును సున్నా స్థాయికి తగ్గించడం జరిగింది. తరువాత కొన్ని సానుకూల ఆర్థిక అంశాలతో ఈ రేటు 2.5 శాతం వరకూ పెరుగుతూ వచ్చింది. అటు తర్వాత గడచిన సంవత్సర కాలంలో వేగంగా తిరిగి సున్నా స్థాయికి చేరింది.  తాజాగా ఫెడ్‌ వడ్డీ రేట్లలో భారీ కోతలను చేపట్టడంతోపాటు.. బ్యాంకులు నగదు నిల్వలను వినియోగించుకునేందుకు వీలుగా రిజర్వ్‌ రిక్వైర్‌మెంట్స్‌ నిబంధనలు సడలించింది.   అధ్యక్షుని ప్రశంసలు... మరోవైపు  అధ్యక్షుడు డొనాల్డ్‌ ట్రంప్‌ ఫెడ్‌ నిర్ణయాలను ప్రశంసించారు. ఫెడ్‌ చర్యలను ఊహించలేదని..ఇదెంతో సంతోషకర విషయమని వ్యాఖ్యానించారు. ఇటీవల ఎదురవుతున్న సంక్షోభాల నుంచి ఆర్థిక వ్యవస్థ గట్టెక్కినట్లు విశ్వసించేవరకూ కనీస వడ్డీ రేట్లనే కొనసాగించనున్నట్లు ఫెడ్‌ చైర్మన్‌ జెరోమీ పావెల్‌ పేర్కొన్నారు. కరోనా కారణంగా ఎదురవుతున్న క్లిష్ట పరిస్థితులను సమర్థవంతంగా ఎదుర్కొనే బాటలో ఇటీవల ఫెడ్‌ 0.5 శాతం వడ్డీ రేట్లను తగ్గించడంతోపాటు.. 500 బిలియన్‌ డాలర్లను వ్యవస్థలోకి విడుదల చేసే చర్యలను చేపట్టిన సంగతి తెలిసిందే.   అనుసరించనున్న ఆర్‌బీఐ! మరోవైపు భారత్‌ సెంట్రల్‌ బ్యాంక్‌ ఆర్‌బీఐ కూడా రెపో రేటు కోత (బ్యాంకులకు తానిచ్చే రుణాలపై ఆర్‌బీఐ వసూలు చేసే వడ్డీరేటు– ప్రస్తుతం 5.15%) బాటలో నిలు స్తుందన్న సంకేతాలను ఇచ్చారు గవర్నర్‌ శక్తికాంత దాస్‌. ఆర్‌బీఐ ప్రధాన కార్యాలయంలో జరిగిన సమావేశంలో ఒక విలేకరి అడిగిన ప్రశ్నకు సమాధానమిస్తూ.. ‘‘కరోనా ప్రభావం నుంచి భారత్‌ ఆర్థిక వ్యవస్థ బయటపడటానికి ఆర్‌బీఐ వద్ద తగిన విధానపరమైన సాధనాలు ఉన్నాయి’’ అన్నారు. ఏప్రిల్‌ 3న పాలసీ సమీక్ష నేపథ్యంలో ఆర్‌బీఐ ఈ వ్యాఖ్యలు చేశారు.  ఇటీవలి పాలసీ సమీక్ష సందర్భంగా రేటు కోత నిర్ణయం ఎందుకు తీసుకోలేదన్న ప్రశ్నకు సమాధానం చెబుతూ, ‘‘ప్రస్తుత చట్టం ప్రకారం, రేట్‌ కోత నిర్ణయాన్ని ద్రవ్య విధాన కమిటీ తీసుకుంటుంది. రేటు కోత నిర్ణయాన్ని తోసిపుచ్చలేను. పరిస్థితులకు అనుగుణంగా తగిన సమయంలో తగిన నిర్ణయం తీసుకోవడం జరుగుతుంది’’ అన్నారు. వ్యవస్థలో  లిక్విడిటీ సమస్యల్లేకుండా చర్యలు తీసుకుంటామని దాస్‌ పేర్కొ న్నారు. కోవిడ్‌ ఆందోళనలతో అమెరికా సెంట్రల్‌ బ్యాంక్‌ ఫెడ్, యూరోపియన్‌ సెంట్రల్‌ బ్యాంక్, బ్యాంక్‌ ఆఫ్‌ ఇంగ్లాండ్‌సహా దాదాపు 43 సెంట్రల్‌ బ్యాంకులు రేటు కోత నిర్ణయం తీసుకున్నాయి. రూపాయి, క్రూడ్‌ క్రాష్‌ ముంబై: డాలర్‌ మారకంలో రూపాయి పతన ధోరణి కొనసాగుతోంది.  ఇంటర్‌బ్యాంక్‌ ఫారెక్స్‌ మార్కెట్‌లో సోమవారం ఒకేరోజు 50 పైసలు పడిపోయి 74.25 వద్ద ముగిసింది. అంతర్జాతీయంగా నెలకొన్న కోవిడ్‌–19 భయాలు,  ప్రపంచాభివృద్ధిపై దీని ప్రభావం, రేటు కోతతో వృద్ధికి ఊతం ఇవ్వాలని భావించిన అమెరికా సెంట్రల్‌ బ్యాంక్‌– ఫెడ్‌ నిర్ణయం... వెరసి మాంద్యం భయాలు భారత్‌ కరెన్సీపై  ప్రభావం చూపుతున్నాయి. ఈక్విటీ భారీ నష్టాలూ ఇక్కడ గమనార్హం.  శుక్రవారం రూపాయి ముగింపు 73.75.  ట్రేడింగ్‌ మొత్తంమీద 74.09 గరిష్ట–74.35 కనిష్ట స్థాయిల మధ్య కదలాడింది. రూపాయి కనిష్ట స్థాయిల చరిత్ర గురించి చూస్తే ఈ నెల 12, 13తేదీల ఇంట్రాడేల్లో వరుసగా  74.50ని చూసినా, ఇప్పటి వరకూ కనిష్ట స్థాయి ముగింపు మాత్రం  74.39.       క్రూడ్, బంగారం ‘బేర్‌’   మరోవైపు ఈక్విటీ మార్కెట్లతో పాటు కమోడిటీ మార్కెట్లూ కరోనా కాటుకు బలవుతున్నాయి. అంతర్జాతీయ మార్కెట్‌లో నైమెక్స్‌ క్రూడ్‌ బేరల్‌ ధర ఈ వార్త రాసే సమయం 10.35కు 8.35 శాతం నష్టంలో (2.68 డాలర్లు) 29.43 డాలర్ల వద్ద ట్రేడవుతోంది. ట్రేడింగ్‌ ఒక దశలో 28.52 డాలర్లనూ చూసింది.  బ్రెంట్‌ బ్యారల్‌ ధర ఇదే సమయానికి 11.73 శాతం  నష్టంతో 29.88 డాలర్ల వద్ద ట్రేడవుతోంది. ఒక దశలో 29.55 డాలర్లనూ చూసింది. ఇక పసిడి విషయానికి వస్తే, ఔన్స్‌ (31.1గ్రా) ధర 5 డాలర్ల నష్టంతో 1,512 డాలర్ల వద్ద ట్రేడవుతోంది. ఒక దశలో ఈ యల్లో మెటల్‌ ధర 1,451 డాలర్లనూ చూడ్డం గమనార్హం. తాజా పరిస్థితుల నేపథ్యంలో పసిడి పూర్తి స్వచ్ఛత 10 గ్రాముల ధర దేశీయంగా రూ.40,000 లోపునకు వచ్చే అవకాశాలు కనిపిస్తున్నాయి. ఈ వార్తరాసే సమయంలో దేశీయ ఫ్యూచర్స్‌ మార్కెట్‌–ఎంసీఎక్స్‌లో పసిడి పూర్తి స్వచ్ఛత 10 గ్రాముల ధర రూ.500కుపైగా నష్టంతో రూ.39,775 వద్ద ట్రేడవుతోంది. ఎస్‌బీఐ కార్డ్స్‌కు కరోనా సెగ ఎస్‌బీఐ అనుబంధ కంపెనీ, ఎస్‌బీఐ కార్డ్స్‌ అండ్‌ పేమెంట్‌ సర్వీసెస్‌ షేర్ల లిస్టింగ్‌పై కోవిడ్‌–19 వైరస్‌ తీవ్రంగానే ప్రభావం చూపించింది. ఈ వైరస్‌ కారణంగా ప్రపంచ మార్కెట్లతో పాటు మన మార్కెట్‌ కూడా భారీగా నష్టపోయాయి. ఈ నేపథ్యంలో ఎస్‌బీఐ కార్డ్స్‌ అండ్‌ పేమెంట్‌ సర్వీసెస్‌ షేర్ల లిస్టింగ్‌ కూడా పేలవంగానే జరిగింది. మరోవైపు కొన్ని కంపెనీలు తమ ఐపీఓలను వాయిదా వేశాయి. కాగా పార్క్‌ హోటల్స్‌ ఐపీఓకు మార్కెట్‌ నియంత్రణ సంస్థ, ఆమోదం తెలిపింది.     13 శాతం నష్టంతో లిస్టింగ్‌.....   ఇష్యూ ధర, రూ.755తో పోల్చితే ఎస్‌బీఐ కార్డ్స్‌ అండ్‌ పేమెంట్‌ సర్వీసెస్‌ షేర్‌ బీఎస్‌ఈలో 13 శాతం నష్టంతో రూ.658 వద్ద లిస్టయింది. ఈ షేర్‌కు ఇదే ఇంట్రాడే కనిష్ట స్థాయి. ఇంట్రాడేలో ఇష్యూ ధర, రూ.755కు ఎగసినప్పటికీ, చివరకు 9.5 శాతం నష్టంతో రూ.683 వద్ద ముగిసింది. బీఎస్‌ఈలో 41.6 లక్షలు, ఎన్‌ఎస్‌ఈలో 6.08 కోట్ల షేర్లు ట్రేడయ్యాయి. ఈ కంపెనీ మార్కెట్‌ క్యాప్‌ రూ.57,199 కోట్లకు చేరింది.   ఈ నెలలోనే వచ్చిన ఈ కంపెనీ ఐపీఓ(ఇనీషియల్‌ పబ్లిక్‌ ఆఫర్‌) 22 రెట్లకు పైగా ఓవర్‌ సబ్‌స్క్రైబయింది. ఈ ఐపీఓ ద్వారా ఈ కంపెనీ రూ.10.000 కోట్ల మేర నిధులు సమీకరించింది.   రిటైల్‌ ఇన్వెస్టర్లకు రూ.308 కోట్ల నష్టం..   పేలవంగా లిస్టింగ్‌  10% నష్టంతో రూ. 683 వద్ద ముగింపు ఐపీఓలో భాగంగా రిటైల్‌ ఇన్వెస్టర్లకు (రూ.2 లక్షల కంటే తక్కువగా ఇన్వెస్ట్‌ చేసేవాళ్లు) 4.27 కోట్ల ఈక్విటీ షేర్లను కేటాయించారు. ఇష్యూ ధర రూ.755తో పోల్చితే ఈ షేర్‌ బీఎస్‌ఈలో రూ.72 నష్టంతో రూ.683 వద్ద ముగిసింది. ఒక్కో షేర్‌కు రూ.72 నష్టం పరంగా చూస్తే, మొత్తం రిటైల్‌ ఇన్వెస్టర్లకు రూ.308 కోట్ల నష్టం వచ్చింది. అలాగే క్వాలిఫైడ్‌ ఇన్‌స్టిట్యూషనల్‌ బయ్యర్లకు రూ.174 కోట్లు, సంస్థాగతేతర ఇన్వెస్టర్లకు రూ.132 కోట్ల మేర నష్టాలు వచ్చాయి.      మరిన్ని విశేషాలు.... సెన్సెక్స్‌లోని అన్ని షేర్లు నష్టాల్లోనే ముగిశాయి. ఇండస్‌ఇండ్‌ బ్యాంక్‌ 17.5 శాతం క్షీణించి రూ.663 వద్ద ముగిసింది సెన్సెక్స్‌లో బాగా నష్టపోయిన షేర్‌ ఇదే. టాటా స్టీల్‌ 11 శాతం, హెచ్‌డీఎఫ్‌సీ 11 శాతం,  యాక్సిస్‌ బ్యాంక్‌ 10 శాతం, ఐసీఐసీఐ బ్యాంక్‌ షేర్లు 10% మేర నష్టపోయాయి.   ► యస్‌ బ్యాంక్‌ తరహానే త్వరలోనే సంక్షోభంలోకి జారిపోగలదన్న భయాలు చెలరేగడంతో ఆర్‌బీఎల్‌ బ్యాంక్‌ 21% నష్టపోయి రూ.163 వద్ద ముగిసింది.   ► వివిధ రాష్ట్రాల్లో సినిమా హాళ్లను ఈ నెల 31 వరకూ మూసేయాలని ఆయా రాష్ట్ర ప్రభుత్వాలు నిర్ణయించడంతో మల్టీప్లెక్స్‌లను నిర్వహించే పీవీఆర్, ఐనాక్స్‌ లీజర్‌ షేర్లు 19 శాతం వరకూ నష్టపోయాయి.   ► దాదాపు 500కు పైగా షేర్లు ఏడాది కనిష్ట స్థాయిలకు పడిపోయాయి. బంధన్‌ బ్యాంక్, పీవీఆర్, ఆర్‌బీఎల్‌ బ్యాంక్, యూపీఎల్, ఎల్‌ అండ్‌ టీ ఫైనాన్స్‌ హోల్డింగ్స్, ఇక్రా, పిరామల్‌ ఎంటర్‌ప్రైజెస్, శ్రీరామ్‌ సిటీ యూనియన్‌ ఈ జాబితా కొన్ని.   ► 600కు పైగా షేర్లు లోయర్‌ సర్క్యూట్లను తాకాయి. అవెన్యూ సూపర్‌మార్ట్స్, ఐఆర్‌సీటీసీ, ఆఫిల్‌ ఇండియా, సువెన్‌ ఫార్మా, ఇండియాబుల్స్‌ రియల్‌ ఎస్టేట్, అదానీ గ్రీన్‌ ఎనర్జీ, డీహెచ్‌ఎఫ్‌ఎల్, వెల్‌స్పన్‌  తదితర షేర్లు  ఈ జాబితాలో ఉన్నాయి.   ► సెన్సెక్స్‌ 2,700 పాయింట్ల నష్టంలో హెచ్‌డీఎఫ్‌సీ ద్వయం షేర్ల వాటాయే దాదాపు నాలుగో  వంతుగా ఉంది. ఈ రెండు షేర్లు కలిసి 660 పాయింట్ల మేర సెన్సెక్స్‌కు పడగొట్టాయి. సెన్సెక్స్‌ను....రిలయన్స్‌ ఇండస్ట్రీస్‌ 276 పాయింట్లు, ఐసీఐసీఐ బ్యాంక్‌ 271 పాయింట్లు, ఇన్ఫోసిస్‌ 211 పాయింట్ల మేర నష్టపరిచాయి.   ఫెడ్‌ తగ్గించినా... నష్టకష్టాలే! అమెరికా ఫెడరల్‌ రిజర్వ్‌ అత్యవసర చర్యల్లో భాగంగా ఆదివారం ఫండ్స్‌ రేట్‌ను దాదాపు సున్నా స్థాయికి తగ్గించింది. ప్రస్తుతం ఈ ఫండ్స్‌ రేటు 0–0.25 శాతం రేంజ్‌లో ఉంది. ఈ రేట్ల ఆధారంగానే బ్యాంక్‌లు, ఆర్థిక సంస్థలు రుణాలపై వడ్డీరేట్లను నిర్ణయిస్తాయి. అంతే కాకుండా 70,000 కోట్ల డాలర్ల ఉద్దీపన ప్యాకేజీని ప్రకటించింది. ఒక్క వారంలో ఫండ్స్‌ రేట్లను ఫెడరల్‌ రిజర్వ్‌ తగ్గించడం ఇది రెండోసారి. 2008లో సబ్‌ప్రైమ్‌ సంక్షోభం నెలకొన్నప్పుడు కూడా ఇలానే ఫెడ్‌ రేట్లను తగ్గించింది. సాధారణ పరిస్థితుల్లో ఫెడ్‌ రేట్లను తగ్గిస్తే, అదీ సున్నా స్థాయికి వస్తే, ప్రపంచ మార్కెట్లు లాభాలతో ఊగిపోయేవి. కానీ ఈ సారి పరిస్థితి రివర్స్‌ అయింది. ఆర్థిక సంక్షోభం అంచనాలను మించి ఉంటుందని, ఫెడ్‌ రేట్లను తగ్గించడం దీనికి సంకేతమన్న భావనతో ప్రపంచ మార్కెట్లు కుదేలయ్యాయి. పార్క్‌ హోటల్స్‌ ఐపీఓ @ రూ.1,000 కోట్లు... పార్క్‌ హోటల్స్‌ ఐపీఓకు మార్కెట్‌ నియంత్రణ సంస్థ, సెబీ ఆమోదం తెలిపింది. ఐపీఓలో భాగంగా రూ.400 కోట్ల విలువైన తాజా షేర్లను జారీ చేస్తారు. వీటితో పాటు రూ.600 కోట్ల విలువైన షేర్లను ఆఫర్‌ ఫర్‌ సేల్‌(ఓఎఫ్‌ఎస్‌) మార్గంలో విక్రయిస్తారు. మొత్తం మీద ఈ ఐపీఓ సైజు రూ.1,000 కోట్లు. ఈ కంపెనీ హైదరాబాద్, విశాఖపట్టణం బెంగళూరు, చెన్నై, కోల్‌కతా, ముంబై, ఢిల్లీ–ఎన్‌సీఆర్, జైపూర్, జోధ్‌పూర్, కోయంబత్తూర్‌ తదితర నగరాల్లో ద పార్క్‌ బ్రాండ్‌  హోటళ్లను నిర్వహిస్తోంది.   ఐపీఓలు వాయిదా...: కోవిడ్‌–19 వైరస్‌ ధాటికి స్టాక్‌ మార్కెట్‌ విలవిలలాడుతుండటంతో పలు కంపెనీలు తమ ఐపీఓలను వాయిదా వేశాయి. ఈ నెల 4నే మొదలైనా, ఐపీఓను ఈ నెల 16 వరకూ పొడిగించినప్పటికీ, ఇన్వెస్టర్ల నుంచి సరైన స్పందన లేకపోవడంతో అంటోని వేస్ట్‌ హ్యాండ్లింగ్‌ సెల్‌  కంపెనీ తన ఐపీఓను ఉపసంహరించుకుంది. కాగా బర్గర్‌ కింగ్‌ ఇండియా కంపెనీ తన ఐపీఓను వాయిదా వేసుకుందని సమాచారం. ఈ నెలాఖరులో ఐపీఓకు వచ్చి రూ.400 కోట్లు సమీకరించాలనేది ఈ కంపెనీ ప్రణాళిక. జీడీపీకి కరోనా కాటు! వృద్ధి 50 బేసిస్‌ పాయింట్లు తగ్గుతుందన్న ఆందోళన ముంబై: కరోనా వైరస్‌ మహమ్మారి ప్రతాపం మరింత వ్యవధిపాటు కొనసాగితే 2020–21 ఆర్థిక సంవత్సరంలో దేశ జీడీపీ వృద్ధి రేటు అర శాతం వరకు తగ్గుతుందన్న ఆందోళన దేశీయ కంపెనీల నుంచి వ్యక్తమైంది. అంతేకాదు, ఈ వైరస్‌ ప్రభావం దీర్ఘకాలం కొనసాగితే ద్రవ్యలోటు మరింత పెరిగిపోవడమే కాకుండా బ్యాంకులకు మొండి బాకీలు (ఎన్‌పీఏలు) మరింత జోడవుతాయని పేర్కొన్నాయి. కరోనా వైరస్‌ ప్రభావం దేశ ఆర్థిక వ్యవస్థపై ఏ మేరకు ఉండొచ్చన్న దానిపై రేటింగ్‌ ఏజెన్సీ కేర్‌ 150 మంది సీఈవోలు, సీఎఫ్‌వోలు, ఇన్వెస్టర్లు, అనలిస్టులు, ఇతర భాగస్వాముల నుంచి అభిప్రాయాలను సేకరించగా ఈ అంశాలు వెల్లడయ్యాయి. వైరస్‌ ఎక్కువ కాలం పాటు ఉంటే ఆర్థిక వ్యవస్థపై ప్రతికూల ప్రభావం గణనీయంగా ఉంటుందన్న అభిప్రాయం వ్యక్తమైంది. జీడీపీ అరశాతం వరకు తగ్గొచ్చని సర్వేలో పాల్గొన్న వారిలో అత్యధికులు అభిప్రాయపడితే, 22 శాతం మంది అయితే ఒక శాతం వరకు తగ్గిపోవచ్చని అంచనా వేశారు. రేట్ల కోతతో కీడే ఎక్కువ వివిధ దేశాల కేంద్ర బ్యాంక్‌లు రేట్లను తగ్గించడం వల్ల మేలు కంటే కీడే ఎక్కువగా జరుగుతోంది.   కోవిడ్‌ వైరస్‌ ఆర్థికంగా చూపించే ప్రభావం అంచనాల కంటే అధికంగానే ఉండగలదన్న సంకేతాలను కేంద్ర బ్యాంక్‌ల రేట్ల తగ్గింపు  సూచిస్తోంది. అందుకే ప్రపంచవ్యాప్తంగా స్టాక్‌ మార్కెట్లు భారీగా పతనమవుతున్నాయి.    –వినోద్‌ నాయర్, జియోజిత్‌ ఫైనాన్షియల్‌ సర్వీసెస్‌ ఎనలిస్ట్‌      పతనం కొనసాగే అవకాశాలే అధికం దేశీయంగా కోవిడ్‌–19 వైరస్‌ మెల్లమెల్లగా విస్తరిస్తోంది. ఇది ఎక్కడ దాకా చేరుతుందో అంతూ, దరీ తెలియడం లేదు. రానున్న రోజుల్లో ఈ పతనం కొనసాగే అవకాశాలే అధికంగా ఉన్నాయి.   –అజిత్‌ మిశ్రా, రెలిగేర్‌ బ్రోకింగ్‌ ఎనలిస్ట్‌.

సాక్షి, ముంబై: మూలధన సంక్షోభం పడిన యస్‌బ్యాంకునకు పెట్టుబడుల వరద పారుతోంది. ముఖ్యంగా ఆర్‌బీఐ ప్రతిపాదించిన పునరుద్ధరణ ప్రణాళికను కేంద్ర మంత్రివర్గం శుక్రవారం ఆమోదించింది. అంతేకాదు బ్యాంకునకు అందించే అధీకృత మూలధనాన్ని రూ. 6200 కోట్లకు పెంచినట్లు కేంద్ర మంత్రి నిర్మలా సీతారామన్  తెలిపారు. అలాగే   ప్రభుత్వ బ్యాంకుఎస్‌బీఐ 49 శాతం ఈక్విటీ కొనుగోలు ద్వారా రూ.7250  కోట్ల నిధులను యస్‌ బ్యాంకునకు అందించనుంది. దీంతో  యస్‌ బ్యాంకులో పెట్టుబడులకు  దిగ్గజ ప్రైవేటు బ్యాంకులు వరుసగా  క్యూ కడుతున్నాయి.  ఇప్పటికే ఐసీఐసీఐ, హెచ్‌డీఎఫ్‌సీ, యాక్సిస్, కోటక్‌ మహీంద్రా బ్యాంకులు పెట్టుబడులను ప్రకటించగా శనివారం బంధన్‌ బ్యాంక్‌ రూ.300 కోట్లు పెట్టుబడి పెట్టేందుకు సంసిద్ధతను వ్యక్తం చేసింది. ఈ మేరకు బోర్డు ఆమోదం లభించినట్టు తెలిపింది. రూ.2 ముఖ విలువున్న షేరును (రూ.8 ప్రీమియంతో) రూ.10 చొప్పున మొత్తం 30 కోట్ల ఈక్విటీ షేర్లను రూ.300 కోట్లతో కొనుగోలు చేయనున్నామని పేర్కొంది. నగదు రూపేణా ఈ లావాదేవీ జరుగుతుంది. తాజాగా ఫెడరల్ బ్యాంకు కూడా యస్ బ్యాంకులో రూ .300 కోట్లు పెట్టుబడి పెట్టనున్నట్టు వెల్లడించింది. 30 కోట్ల ఈక్విటీ షేర్లను ఈక్విటీ షేరుకు 10 రూపాయల చొప్పున  కొనుగోలు ద్వారా రూ. 300 కోట్ల పెట్టుబడులకు కట్టుబడి ఉన్నామని తెలిపింది. (యస్‌ సంక్షోభం : పెట్టుబడుల వెల్లువ) ఇప్పటివరకూ యస్‌ బ్యాంకులో ప్రైవేటుబ్యాంకుల పెట్టుబడులు ఐసీఐసీఐ బ్యాంక్  రూ .1000 కోట్లు  హెచ్‌డీఎఫ్‌సీ రూ. 1,000 కోట్లు యాక్సిస్‌ రూ.600 కోట్లు  కోటక్‌ మహీంద్రా రూ.500 కోట్లు బంధన్‌ బ్యాంకు రూ.రూ. 300 కోట్లు ఫెడరల్‌ బ్యాంకు రూ.  300 కోట్లు కాగా సమస్యాత్మక ప్రైవేట్ బ్యాంకు యస్‌ బ్యాంకు పునర్నిర్మాణ పథకానికి ప్రభుత్వం శుక్రవారం నోటిఫికేషన్ ఇచ్చింది. దీంతో బ్యాంకు, ఖాతాదారులు నగదు ఉపసంహరణపై తాత్కాలిక నిషేధాన్ని మార్చి 18 న ఎత్తివేయనున్న సంగతి తెలిసిందే.

అంతర్జాతీయ ఆర్థిక అనిశ్చితి నేపథ్యంలో 10 రోజుల క్రితం న్యూయార్క్‌ ఫ్యూచర్స్‌ మార్కెట్‌ నైమెక్స్‌లో ఔన్స్‌కు (31.1గ్రా) 1,440 డాలర్లను తాకిన పసిడి ధర, లాభాల స్వీకరణతో 1,388 డాలర్ల స్థాయిని తిరిగి తాకింది. అయినప్పటికీ 1,366 డాలర్ల పటిష్ట మద్దతు స్థాయిని కోల్పోకపోవడం గమనార్హం. 12వ తేదీ శుక్రవారంతో ముగిసిన వారంలో మళ్లీ 1,423 డాలర్లను చేరింది. చివరకు వారం వారీగా  దాదాపు 20 డాలర్లు ఎగసి 1418 డాలర్ల వద్ద ముగిసింది. అమెరికా ఆర్థిక వ్యవస్థ మందగమనం నేపథ్యంలో ఫెడ్‌ ఫండ్‌ రేటు (ప్రస్తుతం 2.25–2.50 శాతం శ్రేణి) తగ్గింపుకు వీలుందని అమెరికా సెంట్రల్‌ బ్యాంక్‌ చీఫ్‌ పావెల్‌ పంపిన సంకేతాలు పసిడిని మళ్లీ పటిష్ట స్థితికి చేర్చాయి. అయితే వారం వారీగా వెలువడిన ఉపాధి కల్పన గణాంకాలు, ద్రవ్యోల్బణం పెరగడం అమెరికా ఆర్థిక వ్యవస్థకు మళ్లీ కొంత ఊతాన్నిచ్చాయి. చివరకు పసిడి 1,418 డాలర్ల వద్ద ముగిసింది. అయితే అంతర్జాతీయ ఆర్థిక అనిశ్చితి వాతావరణం తొలిగిపోతుందన్న విషయంలో స్పష్టత లేకపోవడం, దీనితో డాలర్‌ ఇండెక్స్‌ (వారం ముగింపునకు 96.42) భారీగా పెరిగే అవకాశాలు లేకపోవడం, భౌగోళిక ఉద్రిక్తతలు వంటి అంశాలు దీర్ఘకాలంలో బంగారానికి బలాన్ని ఇచ్చే అంశాలేనని నిపుణులు భావిస్తున్నారు. అయితే పసిడి తిరిగి 1,360 డాలర్ల స్థాయి దిగువకు వస్తే, 1,300 డాలర్ల స్థాయిని కూడా చూసే అవకాశం ఉందనీ, ఇది కొనుగోళ్లకు మంచి అవకాశమనీ వారు పేర్కొంటున్నారు.   భారత్‌లో పరుగునకు ‘రూపాయి’ అడ్డు.. నిజానికి అంతర్జాతీయంగా ధర పెరిగినప్పటికీ, భారత్‌లో ఆ మేర పెరుగుదల కనిపించడం లేదు. డాలర్‌ మారకంలో రూపాయి విలువ పటిష్ట (68.68) ధోరణి దీనికి కారణం. దేశీయ ఫ్యూచర్స్‌ మార్కెట్‌– మల్టీ కమోడిటీ ఎక్సే్చంజ్‌లో పసిడి ధర శుక్రవారంతో ముగిసిన వారంలో 10 గ్రాములకు 34,905 వద్ద ముగిసింది. అయితే ధర తీవ్రత వల్ల స్పాట్‌ మార్కెట్‌లో కస్టమర్లు కొనుగోళ్లకు ‘వేచిచూసే’ ధోరణిని అవలంబిస్తున్నారని సంబంధిత వర్గాలు తెలిపాయి. అయితే సమీపకాలంలో పసిడి ధరలు రూ.30 వేల కిందకు దిగిరాకపోవచ్చన్నది నిపుణుల అభిప్రాయం. ఇక ముంబై స్పాట్‌ మార్కెట్‌లో 24, 22 క్యారెట్ల ధరలు శుక్రవారం రూ.35,280 రూ.33,600 వద్ద ముగిశాయి.

సాక్షి, బిజినెస్‌ విభాగం: డిజిటల్‌ మాధ్యమంలో ఆర్థిక లావాదేవీలు క్రమంగా ఊపందుకుంటున్నప్పటికీ.. బ్యాంకులు సంప్రదాయ బ్రాంచి బ్యాంకింగ్‌ను కూడా మరింత మెరుగుపర్చుకోవడంపై దృష్టి పెడుతున్నాయి. ఇటు మొబైల్, డిజిటల్‌ అటు బ్రాంచీల సాయంతో మరింత మందికి చేరువయ్యే ప్రయత్నాలు చేస్తున్నాయి. ఈ విధానాన్నే ముద్దుగా ఫిజిటల్‌గా (ఫిజికల్‌+డిజిటల్‌) వ్యవహరిస్తున్నాయి. ప్రైవేట్‌ రంగ బ్యాంకింగ్‌ దిగ్గజం కోటక్‌ మహీంద్రా బ్యాంకు చీఫ్‌ ఉదయ్‌ కోటక్‌ తొలుత చేసిన ఈ పదప్రయోగం.. నెమ్మదిగా ప్రాచుర్యంలోకి వస్తోంది. ఇంటర్నెట్‌ కనెక్టివిటీ మెరుగుపడటం, నెట్‌ అందుబాటులోకి రావడం వల్ల 2011 నుంచి మొబైల్, నెట్‌ బ్యాంకింగ్‌ లావాదేవీలు గణనీయంగా పెరిగాయి. అయితే, వీటితో పాటు శాఖలు కూడా కంటి ముందు కనిపిస్తుంటే ఖాతాదారులకు బ్యాంకుపై భరోసా ఉంటోందని బ్యాంకింగ్‌ వర్గాలు భావిస్తున్నాయి. ఈ నేపథ్యంలోనే ఇటు ప్రభుత్వ రంగ బ్యాంకులతో పాటు అటు ప్రైవేట్‌ రంగ బ్యాంకులు కూడా పోటాపోటీగా శాఖలు ఏర్పాటుపై కసరత్తు చేస్తున్నాయి. సాధారణంగా అన్ని వర్గాలకూ ఆర్థిక సేవలు అందుబాటులోకి తేవాల్సిన బాధ్యతతో ప్రభుత్వ రంగ బ్యాంకులు విస్తృతంగా శాఖలు నిర్వహిస్తున్నాయి. ఇపుడు ప్రైవేట్‌ బ్యాంకులు కూడా కొత్త కస్టమర్లకు చేరువయ్యేందుకు, డిపాజిట్లను పెంచుకునేందుకు శాఖలను పెంచుకుంటున్నాయి. డిజిటల్‌తో వినూత్న ప్రయోగాలు.. మొబైల్, ఇంటర్నెట్‌ బ్యాంకింగ్‌ ప్లాట్‌ఫాంల ద్వారా మరింత వినూత్నమైన బ్యాంకింగ్‌ సేవలు అందించేందుకు బ్యాంకులు ప్రయత్నిస్తున్నాయి. వీటికి ఖాతాదారుల నుంచి సానుకూల స్పందన కూడా వస్తోంది. అదే సమయంలో డిజిటల్‌కు సమానంగా ఫిజికల్‌ (భౌతికంగా) శాఖలూ ఏర్పాటు చేయాలనే అభిప్రాయం బ్యాంకింగ్‌ వర్గాల్లో వ్యక్తమవుతోంది. ‘బ్రాంచీలు ప్రధానంగా కస్టమర్లను ఆకర్షించేందుకు ఉపయోగపడతాయి. శాఖలపరంగా భారీ నెట్‌వర్క్‌ ఉంటే కస్టమర్లకు భరోసా ఉంటుంది. ఇక శాఖల నెట్‌వర్క్‌కు డిజిటల్‌ చానల్స్‌ అనుబంధంగా పనిచేస్తాయి. మరింత మెరుగైన సర్వీసు అందించేందుకు, ఇంకొంత మంది కొత్త కస్టమర్స్‌కు చేరువయ్యేందుకు ఉపయోగపడతాయి. ఫెడరల్‌ బ్యాంక్‌ విషయం తీసుకుంటే శాఖల్లో జరిగే 75 శాతం పైగా లావాదేవీలు ప్రస్తుతం డిజిటల్‌ చానల్స్‌ ద్వారా జరుగుతున్నాయి. మాకు దేశవ్యాప్తంగా పటిష్టమైన శాఖల నెట్‌వర్క్‌ ఉంది. గడిచిన మూడేళ్లలో కొత్త శాఖలేమీ ప్రారంభించలేదు కానీ.. ఈ ఏడాదిలో దీనిపై మళ్లీ కసరత్తు చేసే అవకాశం ఉంది. ఇటు డిజిటల్‌తో పాటు అటు బ్రాంచీల తోడ్పాటుతో ఫిజిటల్‌ సేవలు కొనసాగిస్తాం‘ అని ఫెడరల్‌ బ్యాంక్‌ డిప్యూటీ వైస్‌ ప్రెసిడెంట్‌ (డిజిటల్‌ హెడ్‌) జితేష్‌ పీవీ తెలిపారు. శాఖల్లో ఎక్స్‌పీరియన్స్‌కు ప్రాధాన్యం.. డిజిటల్, మొబైల్‌ మాధ్యమాలు ఉన్నప్పటికీ.. ఖాతాదారులకు ప్రత్యేక ఎక్స్‌పీరియన్స్‌ను ఇవ్వటంలో బ్యాంకుల శాఖలు ముందుంటాయని ఫిన్‌కేర్‌ స్మాల్‌ ఫైనాన్స్‌ బ్యాంకు చీఫ్‌ స్ట్రాటెజీ ఆఫీసర్‌ ప్రకాష్‌ సుందరం చెప్పారు. ‘‘సెల్ఫ్‌ సర్వీస్‌ డిజిటల్‌ కావొచ్చు.. అసిస్టెడ్‌ డిజిటల్‌ విధానం (బ్యాంకింగ్‌ సిబ్బంది సహాయంతో డిజిటల్‌ లావాదేవీలు నిర్వహించుకోవడం) కావొచ్చు.. శాఖ తీరు బాగుంటేనే ఆ బ్యాంకుతో లావాదేవీలు నిర్వహించేందుకు కస్టమరు ఇష్టపడతారు. కాబట్టి పరిమాణంలో చిన్నవైనా సరే శాఖల ప్రాధాన్యం తగ్గదు’’ అని ప్రకాష్‌ సుందరం చెప్పారు. యువతరం ఎక్కువగా మొబైల్, ఆన్‌లైన్‌ బ్యాంకింగ్‌ వైపే మొగ్గు చూపుతున్నప్పటికీ.. కొంత పాత తరం 45–50 ఏళ్ల వాళ్లు ఇప్పటికీ బ్యాంకు శాఖల ద్వారా లావాదేవీలు జరిపేందుకు ఇష్టపడుతున్నారని పేర్కొన్నారు. అలాగే ప్రత్యేకంగా లాకరు సదుపాయం, వ్యక్తిగత ఆర్థిక సేవలు కోరుకునే సంపన్న వర్గాలకు కూడా బ్యాంకు శాఖలు అవసరమని ప్రకాష్‌ చెప్పారు. యాక్సిస్‌ ఏటా 400 శాఖలు.. వినూత్న డిజిటల్‌ సేవలు ఆవిష్కరించడంతో పాటు మరిన్ని శాఖల ఏర్పాటుపై దృష్టి పెడుతున్నట్లు యాక్సిస్‌ బ్యాంక్‌ ఎండీ అమితాబ్‌ చౌదరి చెప్పారు. ఏటా 400 శాఖలు కొత్తగా ఏర్పాటు చేస్తున్నామని, మొత్తం శాఖల సంఖ్య 5,500కు చేరే దాకా ఇదే విధానం కొనసాగించనున్నట్లు ఆయన పేర్కొన్నారు. యాక్సిస్‌ ఈ ఏడాది మార్చిలో తమ 4,000వ శాఖను ఏర్పాటు చేసింది. ఆర్‌బీఎల్‌ వంటి చిన్న బ్యాంకులు కూడా శాఖలను పెంచుకుంటున్నాయి. 2018 మార్చి ఆఖరు నాటికి 265గా ఉన్న ఆర్‌బీఎల్‌ బ్రాంచీల సంఖ్య 2019 మార్చి 31 నాటికి 324కి పెరిగింది.  ప్రైవేట్‌ బ్యాంకింగ్‌ దిగ్గజం హెచ్‌డీఎఫ్‌సీ బ్యాంక్‌ ఇటీవల ఫిబ్రవరిలోనే తమ 5,000వ బ్రాంచీని ప్రారంభించింది. అయితే, బ్రాంచీల నెట్‌వర్క్‌పరంగా చూస్తే ప్రభుత్వ రంగ బ్యాంకులదే (పీఎస్‌బీ) ఆధిపత్యం ఉంటోంది. రిజర్వ్‌ బ్యాంక్‌  ఆఫ్‌ ఇండియా గణాంకాల ప్రకారం గతేడాది జూన్‌ ఆఖరు నాటికి పీఎస్‌బీ శాఖల సంఖ్య 90,821గా ఉంది. అదే ప్రైవేట్‌ బ్యాంకుల శాఖల సంఖ్య 28,805కి పరిమితమైంది.

వాషింగ్టన్‌: అంతర్జాతీయ ఫ్యూచర్స్‌ మార్కెట్‌– నైమెక్స్‌లో శుక్రవారంతో ముగిసిన వారమంతా పడిసి ఔన్స్‌ (31.1గ్రా) ధర 1,300 డాలర్ల దిగువనే కొనసాగింది. వారం చివరకు గతంతో పోల్చితే 10 డాలర్ల నష్టంతో 1,296 వద్ద ముగిసింది.  1,300 డాలర్లస్థాయి పసిడికి కీలక నిరోధం కావడం గమనార్హం. నిజానికి అమెరికా సెంట్రల్‌ బ్యాంక్‌– ఫెడ్‌ ఫండ్‌ రేటు పెంపుపై అనిశ్చితి పసికి బలోపేతం కావాల్సి ఉంది. అయినా, యల్లో మెటల్‌ నుంచి ఆ స్థాయి సానుకూల ధోరణి కనబడకపోవడానికి పలు కారణాలను నిపుణులు పేర్కొంటున్నారు.   ► వాణిజ్య అంశాలకు సంబంధించి చైనాతో జరుగుతున్న చర్చలు త్వరలో సానుకూలంగా ముగిసే అవకాశాలు ఉన్నాయని అమెరికా అధ్యక్షుడుట్రంప్‌ ప్రకటించారు. దీనితో వాణిజ్య యుద్ధం సమసిపోవచ్చన్న అంచనాలు నెలకొన్నాయి. దీనికితోడు చైనా ఆర్థిక గణాంకాలూ సానుకూలంగా నమోదయ్యాయి.  ఇది వృద్ధి అంచనాలకు కొంత సానుకూలమైంది.  అమెరికాలో ఉద్యోగాల కోసం దరఖాస్తుల సంఖ్య కూడా తగ్గినట్లు గణాంకాలు వెలువడ్డం గమనార్హం.   ► ఆయా అంశాలు డాలర్‌  బలోపేతానికి కారణమయ్యాయి.  డాలర్‌ ఇండెక్స్‌ 97 స్థాయిని తాకింది.  96–97 డాలర్ల శ్రేణిలో తిరిగింది.   ► భారత్‌సహా పలు ఆసియా దేశాల్లో ఈక్విటీలు జీవితకాల గరిష్ట స్థాయిలను తాకుతున్నాయి. బంగారంలోకి కాకుండా ఈక్విటీల్లోకి నిధుల ప్రవాహం బాగుందన్న అంచనాలు ఉన్నాయి.   ► తాజా పరిస్థితుల ప్రకారం... సమీప 15 రోజుల్లో పసిడి ధర 1,350 డాలర్ల స్థాయిని అధిగమించడం కష్టమేనన్న అంచనా ఉంది. అయితే 1,250 డాలర్ల లోపునకూ పడిపోవకపోవచ్చన్నది విశ్లేషణ.   ► ఇక భారత్‌ విషయానికి వస్తే, అంతర్జాతీయ బలహీనతలకు తోడు దేశీయంగా రూపాయి బలోపేత ధోరణి పసిడి పరుగును ఇక్కడ అడ్డుకుంటోంది. ఇంటర్‌ బ్యాంక్‌ ఫారెక్స్‌ మార్కెట్‌లో డాలర్‌ మార్కెట్‌లో రూపాయి విలువ 69.22 వద్ద ముగిసింది. ఇక భారత్‌ ఫ్యూచర్స్‌– మల్టీ కమోడిటీ ఎక్సే్చంజ్‌లో పసిడి 10 గ్రాముల ధర రూ.31,873 వద్ద ముగిసింది.

సాక్షి, ముంబై : దేశీయస్టాక్‌మార్కెట్లు భారీ నష్టాలతో ప్రారంభమైనాయి. ఈ ఏడాది(2019)లో వడ్డీ రేట్ల పెంపు ఉండబోదంటూ ఫెడరల్‌ రిజర్వ్‌ సంకేతాలివ్వడంతో ప్రపంచవ్యాప్తంగా ఇన్వెస్టర్ల సెంటిమెంటు దెబ్బతింది.   అంతర్జాతీయ మార్కెట్లన్నీ  నెగిటివ్‌గా స్పందించాయి. దీంతో దేశీయంగా  కూడా  అమ్మకాల జోరందుకుంది.  ఆరంభంలోనే సెన్సెక్స్‌ 300 పాయింట్లు పతనమైంది.   ప్రస్తుతం సెన్సెక్స్‌ 340  పాయింట్లు పతనమై 37,818 వద్ద, నిఫ్టీ  100 పాయింట్లు కోల్పోయి 11,357వద్ద ట్రేడవుతోంది.  అన్ని రంగాలూ 2-1 శాతం మధ్య బలహీనపడ్డాయి.  హిందాల్కో, వేదాంతా, సన్‌ ఫార్మా, జేఎస్‌డబ్లూ స్టీల్‌, ఐబీ హౌసింగ్‌, అల్ట్రాటెక్‌, టాటా మోటార్స్‌, ఎస్‌బీఐ, కొటక్‌ బ్యాంక్‌, ఎంఅండ్‌ఎం 2.6-1.6 శాతం మధ్య నీరసించాయి.  రియల్టీ స్టాక్స్‌లో ఇండియాబుల్స్‌, డీఎల్‌ఎఫ్‌, గోద్రెజ్‌ ప్రాపర్టీస్, బ్రిగేడ్‌, సన్‌టెక్‌, పీనిక్స్‌, ప్రెస్టేజ్ 3-1 శాతం మధ్య క్షీణించాయి.  మరోవైపు  ఐవోసీ, ఓఎన్‌జీసీ, కోల్‌ ఇండియా, బీపీసీఎల్‌,  హెచ్‌పీసీఎల్‌, ఎన్‌టీపీసీ,  టెక్‌ మహీంద్రా 2-0.7 శాతం మధ్య బలపడ్డాయి. 

ముంబై: ప్రైవేటు రంగంలోని ఫెడరల్‌ బ్యాంకుకు సెప్టెంబర్‌ త్రైమాసికంలో మొండి బకాయిల కాక తగిలింది. సెప్టెంబర్‌తో ముగిసిన మూడు నెలల కాలానికి ఫెడరల్‌ బ్యాంకు నికర లాభం కేవలం 0.88 శాతానికే పరిమితం అయింది. బ్యాంకు ప్రొవిజన్స్‌ 63 శాతం పెరిగి రూ.288 కోట్లకు చేరాయి. దీంతో లాభం రూ.266 కోట్లకు పరిమితం అయింది. క్రితం ఆర్థిక సంవత్సరం ఇదే త్రైమాసికంలో లాభం రూ.263.70 కోట్లుగా ఉండటం గమనార్హం. కేరళ వరదల ప్రభావం ఊహించదానికంటే ఎక్కువేమీ లేదని బ్యాంకు ప్రకటించింది. ‘‘రుణ నష్టాల కోసం రూ.152 కోట్లను పక్కన పెట్టాల్సి వచ్చింది. బ్యాంకు పలు ఇన్వెస్ట్‌మెంట్స్‌కు రూ.105 కోట్లు, స్టాండర్డ్‌ అసెట్స్‌ కోసం రూ.30 కోట్లు కేటాయించాం’’ అని ఫెడరల్‌ బ్యాంకు ఎండీ, సీఈవో శ్యామ్‌ శ్రీనివాసన్‌ తెలిపారు. కేరళ వరదల కారణంగా బ్యాంకు లాభాలపై రూ.35 కోట్ల మేర ప్రభావం ఉన్నట్టు చెప్పారు. బ్యాంకు నికర వడ్డీ ఆదాయం 13.75 శాతం వృద్ధితో రూ.1,022 కోట్లుగా నమోదైంది. బ్యాంకు రుణాలు 26 శాతం పెరగడం, నికర వడ్డీ మార్జిన్‌ స్వల్పంగా పెరిగి 3.15 శాతానికి చేరడం కలిసొచ్చాయి. ఇతర ఆదాయం సైతం క్రితం ఏడాది ఇదే కాలంలో ఉన్న రూ.287 కోట్ల నుంచి రూ.322 కోట్లకు చేరింది.   పెరిగిన ఎన్‌పీఏలు బ్యాంకుల ఆస్తుల నాణ్యత స్వల్పంగా క్షీణించింది. స్థూల ఎన్‌పీఏలు క్రితం ఏడాది ఇదే కాలంలో ఉన్న 2.39 శాతం నుంచి 3.11 శాతానికి పెరిగాయి. తాజాగా రూ.477 కోట్ల మేర రుణాలు ఎన్‌పీఏల్లోకి వచ్చి చేరాయి. ముఖ్యంగా ఎస్‌ఎంఈ రంగానికి ఇచ్చిన రుణాలు రూ.169 కోట్ల మేర ఎన్‌పీఏలకు జతయ్యాయి. ఆ తర్వాత కార్పొరేట్‌ రంగం నుంచి రూ.120 కోట్లు ఎన్‌పీఏలుగా మారాయి. తాజా ఎన్‌పీఏల్లో కేరళ వరదల కారణంగా వచ్చి చేరినవీ రూ.50 కోట్లు ఉన్నట్టు బ్యాంకు ఎండీ శ్రీనివాసన్‌ తెలిపారు. అంతేకాదు కేరళ వరదల ప్రభావంతో రానున్న రెండు క్వార్టర్లలోరూ రూ.50 కోట్ల చొప్పున ఎన్‌పీఏలు అదనంగా ఉంటాయని బ్యాంకు అంచనా వేసింది. కేరళ వరదల అనంతరం రుణ వ్యయాలు 0.65–0.75 శాతంగా ఉంటాయని, తాజా ఎన్‌పీఏలు 2018–19 ఆర్థిక సంవత్సరంలో రూ.1,500 కోట్ల మేర ఉండొచ్చన్న సవరించిన అంచనాలకు కట్టుబడి ఉన్నట్టు శ్రీనివాసన్‌ పేర్కొన్నారు. ఐఎల్‌ఎఫ్‌ఎస్‌లో బ్యాంకుకు ఎక్స్‌పోజర్‌ లేదని స్పష్టం చేశారు. ఎన్‌బీఎఫ్‌సీలకు సంబంధించి రూ.12,000 కోట్ల మేర ఎక్స్‌పోజర్‌ ఉండగా, ఇందులో టాప్‌ 5 ఎన్‌బీఎఫ్‌సీల వాటా 40 శాతంగా ఉన్నట్టు చెప్పారు. ఫలితాల నేపథ్యంలో ఫెడరల్‌ బ్యాంకు షేరు బీఎస్‌ఈలో 7.86 శాతం లాభపడి రూ.81.65 వద్ద ముగిసింది.

న్యూఢిల్లీ: ప్రైవేట్‌ రంగ ఫెడరల్‌ బ్యాంక్‌ నికర లాభం ప్రస్తుత ఆర్థిక సంవత్సరం తొలి త్రైమాసిక కాలంలో 25 శాతం పెరిగింది. గత క్యూ1లో రూ.210 కోట్లుగా ఉన్న నికర లాభం ఈ క్యూ1లో రూ.263 కోట్లకు పెరిగిందని ఫెడరల్‌ బ్యాంక్‌ తెలిపింది. మొత్తం ఆదాయం రూ.2,653 కోట్ల నుంచి రూ.2,938 కోట్లకు వృద్ధి చెందిందని వివరించింది. నికర వడ్డీ ఆదాయం 22 శాతం వృద్ధితో రూ.980 కోట్లకు పెరిగిందని, రుణ వృద్ది 24 శాతం ఎగసిందని పేర్కొంది. అంతకు ముందటి క్వార్టర్‌లో 3.11 శాతంగా ఉన్న నికర వడ్డీ మార్జిన్‌ ఈ క్యూ1లో 3.12 శాతానికి పెరిగింది.   తగ్గిన కేటాయింపులు...: మొండి బకాయిలు పెరగడంతో రుణ నాణ్యత క్షీణించింది. గత క్యూ1లో రూ.2,796 కోట్లుగా ఉన్న స్థూల మొండి బకాయిలు ఈ క్యూ1లో  రూ.2,869 కోట్లకు పెరిగాయని ఫెడరల్‌ బ్యాంక్‌ తెలిపింది. అలాతే నికర మొండి బకాయిలు రూ.1,552 కోట్ల  నుంచి రూ.1,620 కోట్లకు పెరిగాయని పేర్కొంది. శాతం పరంగా చూస్తే స్థూల మొండి బకాయిలు 2.42 శాతం నుంచి 3.42 శాతానికి, నికర మొండి బకాయిలు 1.39 శాతం నుంచి 1.72 శాతానికి పెరిగాయని వివరించింది. అయినప్పటికీ మొండి బకాయిలకు, అత్యవసరాలకు కేటాయింపులు రూ.236 కోట్ల నుంచి రూ.199 కోట్లకు తగ్గాయని పేర్కొంది. కేటాయింపులు 16 శాతం(క్వార్టర్‌ ఆన్‌ క్వార్టర్‌ ప్రాతిపదికన) 46 శాతం తగ్గాయని తెలిపింది. అలాగే ఒత్తిడి రుణాలు రూ.2,890 కోట్ల నుంచి రూ.2,680 కోట్లకు తగ్గాయని పేర్కొంది.   మొండి బకాయిలు పెరిగినప్పటికీ, కేటాయింపులు తగ్గడం, నికర వడ్డీ ఆదాయం, రుణ వృద్ధి పెరగడం, నికర లాభం 25 శాతం ఎగియడంతో ఫెడరల్‌ బ్యాంక్‌ షేర్‌ జోరుగా పెరిగింది. ఆరంభంలో ఏడాది కనిష్ట స్థాయి, రూ.73.60కు పడిపోయిన ఈ షేర్‌ బీఎస్‌ఈ ఇంట్రాడేలో 21 శాతం లాభంతో రూ.89కు ఎగసింది. చివరకు 19 శాతం లాభంతో రూ.88 వద్ద ముగిసింది. బ్యాంక్‌ మార్కెట్‌ క్యాప్‌ రూ.2,856 కోట్లు వృద్ధి చెంది  రూ.17,469 కోట్లకు పెరిగింది.

మహీంద్రా అండ్‌ మహీంద్రా - కొనొచ్చు ప్రస్తుత ధర: రూ. 897 బ్రోకరేజ్‌ సంస్థ: మోతిలాల్‌ ఓస్వాల్‌ టార్గెట్‌ ధర: రూ.10,53 ఎందుకంటే: ప్రస్తుతం 43 శాతంగా ఉన్న దేశీయ ట్రాక్టర్ల మార్కెట్‌ వాటాను 50 శాతానికి పెంచుకోవడానికి మహీంద్రా అండ్‌ మహీంద్రా ప్రయత్నాలు చేస్తోంది. ట్రక్‌స్టార్‌బ్రాండ్‌తో తక్కువ ధరల్లో ట్రాక్టర్లను అందించడం దాంట్లో ఒక ప్రయత్నం. వరుసగా రెండో ఏడాది కూడా వర్షాలు బాగా కురుస్తాయన్న అంచనాల కారణంగా ట్రాక్టర్ల అమ్మకాలు మరింతగా పెరుగుతాయని భావిస్తున్నాం. కూలీల కొరత తీవ్రమవుతుండటం, సాంకేతిక పరిజ్జానం మరింతగా అందుబాటులోకి రావడం, తదితర కారణాల వల్ల భారత్‌లో వ్యవసాయం తీరు మారుతోంది. దీంతో ట్రాక్టర్ల, సాగు యంత్రాల  మార్కెట్‌ మరింతగా వృద్ధి చెందగలదని కంపెనీ భావిస్తోంది. అందుకే ట్రాక్టర్లు కాకుండా ఇతర సాగు యంత్రాల సెగ్మెంట్లోకి ప్రవేశిస్తోంది.  సాగు యంత్ర పరికరాల విభాగం(ఎఫ్‌ఈఎస్‌) ఆదాయం ఆరేళ్లలో కనీసం 12% చక్రగతి వృద్ధితో రెట్టింపవుతుందని కంపెనీ అంచనా వేస్తోంది.  అంతర్జాతీయ సాగు యంత్ర సంబంధిత మార్కెట్‌లో మహీంద్రా ఎఫ్‌ఈఎస్‌ విభాగం వాటా 2 శాతం మాత్రమే  ఉంది. దీంతో అంతర్జాతీయంగా తమకు అపార అవకాశాలుంటాయని కంపెనీ భావిస్తోంది. అంతర్జాతీయ వ్యవసాయ యంత్ర పరిశ్రమలో మరింత వాటా పొందడానికి గట్టిగానే కృష్టి చేస్తోంది. అంతర్జాతీయంగా 98% భూ కమతాలు 50 హెక్టార్లపైనే ఉంటాయి. దీనికి తగ్గట్లుగా యంత్రాలను అందిం చాలని కంపెనీ యోచిస్తోంది. ఇప్ప టివరకూ భారత ట్రాక్టర్ల కంపెనీగా ఉన్న మహీంద్రా అండ్‌ మహీంద్రా సాగు యంత్ర పరికరాల విభాగం(ఎఫ్‌ఈఎస్‌) అంతర్జాతీయ సాగు యంత్ర సరఫరాదారుగా రూపాంతరం చెందుతోంది. ఇక కంపెనీ నిర్వహణలోని అన్ని వ్యాపారాల్లో పటిష్టమైన రికవరీ/వృద్ధిని సాధిస్తోంది. వాహన పరిశ్రమకు సంబంధించి గ్రామీణ మార్కెట్లు పుంజుకోవడం కంపెనీకి ప్రయోజనం కలిగించే అంశమే. కంపెనీ అందించనున్న కొత్త మోడళ్లు విజయం సాధించడం, యుటిలిటీ వెహికల్స్, ట్రాక్టర్లు, పిక్‌–అప్‌ వాహనాల విక్రయాల జోరు... సానుకూలాంశాలు. ఫెడరల్‌ బ్యాంక్‌ - కొనొచ్చు ప్రస్తుత ధర: రూ. 81 బ్రోకరేజ్‌ సంస్థ: ఎడిల్‌వీజ్‌ ఫైనాన్షియల్‌ సర్వీసెస్‌ టార్గెట్‌ ధర: రూ.130 ఎందుకంటే: కేరళ కేంద్రంగా ఈ ప్రైవేట్‌ బ్యాంక్‌ 25కు పైగా రాష్ట్రాల్లో కార్యకలాపాలు నిర్వహిస్తోంది. ఐడీబీఐ భాగస్వామ్యంతో బీమా, ఎన్‌బీఎఫ్‌సీ వ్యాపారాలను నిర్వహిస్తోంది. 1,252 బ్రాంచ్‌లతో, 1,696 ఏటీఎమ్‌లతో బ్యాంకింగ్‌ సేవలందిస్తోంది. బ్యాంక్‌ ఆస్తులు 1.3 లక్షల కోట్లుగా ఉన్నాయి. ప్రస్తుత ఆర్థిక సంవత్సరంలో 25 శాతానికి మించి రుణ వృద్ది సాధిస్తామని ఈ బ్యాంక్‌ ధీమాగా ఉంది. ఫీజు ఆదాయం పెంచుకోవడంపై యాజమాన్యం దృష్టి పెట్టింది. అసెట్‌ మేనేజ్‌మెంట్‌ సంస్థల్లో వాటాల కొనుగోలుకు, నాన్‌ బ్యాంకింగ్‌ ఫైనాన్స్‌ కంపెనీలు, సూక్ష్మ రుణ సంస్థల కొనుగోళ్ల కోసం కూడా ప్రయత్నాలు చేస్తోంది. మొండి బకాయిల సమస్య ప్రస్తుత ఆర్థిక సంవత్సరంలో అంత తీవ్రంగా ఉండకపోవచ్చని, రుణ నాణ్యత మెరుగుపడగలదని బ్యాంక్‌ భావిస్తోంది. అయితే ఎస్‌ఎమ్‌ఈ, రిటైల్‌ విభాగాలు మెరుగుపడుతున్నా, కార్పొరేట్‌ రుణ విభాగంలో ఒడిదుడుకులు తప్పకపోవచ్చు.  తీవ్రమైన మొండి బకాయిల సమస్య కారణంగా ప్రభుత్వ రంగ బ్యాంక్‌ల నుంచి పోటీ తీవ్రత తగ్గడం, వడ్డీరేట్ల పెంపు కారణంగా నికర వడ్డీ ఆదాయం మెరుగుపడే అవకాశాలు, నిర్వహణ వ్యయాల నియంత్రణ, ఆదాయ జోరు మెరుగుపడటంతో ఉత్పాదకత పెరగడం వల్ల రాబడి నిష్పత్తులు మెరుగుపడటం, పెట్టుబడులు పుష్కలంగా ఉండటం, డిజిటల్‌ బ్యాంకింగ్‌ ఫలాలు మధ్య కాలానికి అందనుండటం, ప్రొవిజన్‌ కవరేజ్‌ రేషియో 65 శాతంగా ఉండటం .. ఇవన్నీ  సానుకూలాంశాలు. కాసా నిష్పత్తి తక్కువగా ఉండటం, అధిక భాగం డిపాజిట్లు ప్రవాస భారతీయులవి కావడం.. ప్రతికూలాంశాలు. వచ్చే ఆర్థిక సంవత్సరం చివరికల్లా 1 శాతం రిటర్న్‌ ఆన్‌ అసెట్‌(ఆర్‌ఓఏ), 13 శాతం రిటర్న్‌ ఆన్‌ ఈక్విటీ(ఆర్‌ఓఈ) సాధించాలన్న లక్ష్యాలను ఈ బ్యాంక్‌ చేరుకోగలదని భావిస్తున్నాం. గత ఆరు నెలల్లో ఈ బ్యాంక్‌ షేర్‌  పతనమై ప్రస్తుతం కొనుగోలు చేయడానికి ఆకర్షణీయంగా ఉందని భావిస్తున్నాం.    గమనిక: ఈ కాలమ్‌లో షేర్లపై ఇచ్చిన సలహాలు, సూచనలు, వివిధ బ్రోకరేజి సంస్థలు వ్యక్తం చేసిన అభిప్రాయాలు మాత్రమే.

న్యూఢిల్లీ: ప్రైవేట్‌ రంగ ఫెడరల్‌ బ్యాంక్‌ నికర లాభం (స్డాండోలోన్‌) గత ఆర్థిక సంవత్సరం నాలుగో త్రైమాసిక కాలంలో 43 శాతం తగ్గింది. అంతకు ముందటి ఆర్థిక సంవత్సరం (2016–17) క్యూ4లో రూ.257 కోట్లుగా ఉన్న నికర లాభం గత ఆర్థిక సంవత్సరం క్యూ4లో రూ.145 కోట్లకు తగ్గిందని ఫెడరల్‌ బ్యాంక్‌ తెలిపింది. మొండి బకాయిలకు కేటాయింపులు పెరగడంతో నికర లాభం ఈ స్థాయిలో క్షీణించిందని పేర్కొంది. మొత్తం ఆదాయం రూ.2,598 కోట్ల నుంచి రూ.2,862 కోట్లకు పెరిగింది.

ఫెడరల్‌ బ్యాంక్‌ - కొనొచ్చు బ్రోకరేజ్‌ సంస్థ: ఎడెల్‌వీజ్‌ ఫైనాన్షియల్‌ సర్వీసెస్‌ ప్రస్తుత ధర: రూ.103 టార్గెట్‌ ధర: రూ.152 ఎందుకంటే: ఈ మిడ్‌సైజ్‌ ప్రైవేట్‌ రంగ బ్యాంక్‌  కేరళ కేంద్రంగా కార్యకలాపాలు నిర్వహిస్తోంది. దేశవ్యాప్తంగా 25 రాష్ట్రాలు, ఢీల్లీ, ఎన్‌సీఆర్‌లతో పాటు 4 కేంద్ర పాలిత రాష్ట్రాల్లో సేవలందిస్తోంది. ఐడీబీఐతో కలిసి జాయింట్‌వెంచర్‌గా బీమా, ఎన్‌బీఎఫ్‌సీ వ్యాపారాలను కూడా నిర్వహిస్తోంది. 1,252 బ్రాంచ్‌లు, 1,679 ఏటీఎమ్‌లతో కార్యకలాపాలు నిర్వహిస్తోంది. ఈ బ్యాంక్‌ ప్రస్తుత ఆర్థిక సంవత్సరం మూడో త్రైమాసిక ఆర్థిక ఫలితాలు అంచనాలకు అనుగుణంగానే ఉన్నాయి. ఎస్‌ఎంఈ, రిటైల్‌ రుణాలకు అధిక ప్రాధాన్యత ఇస్తోంది. బ్యాంక్‌ రుణాల్లో ఎస్‌ఎంఈ రుణాలు 22 శాతంగా, రిటైల్‌ రుణాలు 38 శాతంగా ఉన్నాయి. ఈ క్యూ3లో రుణాలు 22 శాతం వృద్ధి చెందాయి. నికర వడ్డీ ఆదాయం 20 శాతం పెరిగింది. నికర వడ్డీ మార్జిన్‌(ఎన్‌ఐఎమ్‌) 3.3 శాతంగా ఉంది. నిర్వహణ లాభం 35 శాతానికి ఎగసింది. ఈ జోరు కొనసాగుతుందని బ్యాంక్‌ అంచనా వేస్తోంది. 18 నెలల కాలంలో 50 కొత్త బ్రాంచ్‌లను ఏర్పాటు చేయాలనుకుంటోంది. టైర్‌–1 మూలధనం 13.8 శాతంగా ఉండడం,  స్థూల నికరర్థ రుణాలు, రీస్ట్రక్చరింగ్, తదితర రుణాలన్నీ 5 శాతంలోపే ఉండటం, డిజిటల్‌ బ్యాంకింగ్‌ జోరు పెంచుకోవడానికి తీసుకున్న చర్యల ఫలాలు భవిష్యత్తులో అందనుండటం, సానూకూల అంశాలు. 2019–20 కల్లా రిటర్న్‌ ఆన్‌ అసెట్‌(ఆర్‌ఓఏ) 1 శాతంగానూ, ఆర్‌ఓఈ(రిటర్న్‌ ఆన్‌ ఈక్విటీ) 12.3 శాతానికి పెరుగుతాయని అంచనా వేస్తున్నాం. రెండేళ్లలో ఆదాయం 27 శాతం, ఆర్‌ఈఓ 12 శాతం చొప్పున చక్రగతిన వృద్ధి చెందుతాయని భావిస్తున్నాం. ఈ బ్యాంక్‌ డిపాజిట్లు అధికంగా ప్రవాస భారతీయుల నుంచే వస్తున్నాయి. బ్యాంక్‌ మొత్తం డిపాజిట్లలో ఎన్నారైల వాటా 48 శాతంగా ఉంది. హిందుస్తాన్‌ యూనిలీవర్‌ - కొనొచ్చు బ్రోకరేజ్‌ సంస్థ: రిలయన్స్‌ సెక్యూరిటీస్‌   ప్రస్తుత ధర: రూ.1,363 టార్గెట్‌ ధర: రూ.1,514 ఎందుకంటే: ఈ ఎఫ్‌ఎమ్‌సీజీ కంపెనీ ప్రస్తుత ఆర్థిక సంవత్సరం మూడో త్రైమాసిక ఆర్థిక ఫలితాలు అంచనాలను మించాయి. గత క్యూ3లో పెద్ద కరెన్సీ నోట్ల రద్దు కారణంగా అమ్మకాలు తక్కువగా ఉండడం వల్ల వృద్ధి కాస్త మందగించింది. ఈ లో–బేస్‌ ఎఫెక్ట్‌కు పెరుగుతున్న వృద్ధి జోరు జత కావడంతో ఈ క్యూ3లో మంచి ఫలితాలను ఈ కంపెనీ సాధించింది.  నికర అమ్మకాలు రూ.8,320 కోట్లకు, ఇబిటా 24% వృద్ధితో రూ.1,680 కోట్లకు పెరిగాయి. అనుబంధ కంపెనీ నుంచి వచ్చిన డివిడెండ్‌ కారణంగా ఇతర ఆదాయం రూ.150 కోట్లు పెరిగి,  నికర లాభం 83% ఎగసింది. హోమ్‌కేర్‌ సెగ్మెంట్‌ 20 శాతం, పర్సనల్‌ కేర్‌ సెగ్మెంట్‌ 17% చొప్పున వృద్ధి చెందాయి. పెద్ద కరెన్సీ నోట్ల రద్దు, జీఎస్‌టీ అమలు కారణంగా ఏర్పడిన అస్తవ్యస్త పరిస్థితులు ఇప్పుడిప్పుడే తొలగిపోయి డిమాండ్‌ పుంజుకుంటుండటంతో పరిస్థితులు మెరుగుపడుతున్నాయని కంపెనీ భావిస్తోంది. ఉత్పత్తి వ్యయాలు తక్కువగా ఉండటంతో స్థూల మార్జిన్‌లు 3 శాతం పెరిగి 53.1 శాతానికి చేరాయి.  జీఎస్‌టీ సంబంధిత సమస్యలు సమసిపోతుండటంతో రానున్న క్వార్టర్లలో వృద్ధి జోరుగా పెరగగలదని భావిస్తున్నాం. కంపెనీ ఆదాయంలో దాదాపు 40% వరకూ గ్రామీణ ప్రాంతాల నుంచే వస్తోంది. గత రెండేళ్లుగా వర్షాలు విస్తారంగా కురియడం, కీలక పంటల మద్దతు ధరలు పెరగడం, విస్తృతమైన డిస్ట్రిబ్యూషన్‌ నెట్‌వర్క్‌ కారణంగా గ్రామీణ మార్కెట్ల నుంచి డిమాండ్‌ బాగా వృద్ధి చెందగలదని భావిస్తున్నాం. ఆయుర్వేద విభాగంలో మరింతగా విస్తరిస్తోంది. ప్రీమియమ్‌ ఉత్పత్తుల జోరు పెంచుతోంది. ఫలితంగా రెండేళ్లలో ఆదాయం 12%, నికర లాభం 18% చొప్పున చక్రగతిన వృద్ధి చెందనున్నాయని అంచనా వేస్తున్నాం. 

కోల్‌కతా: ఈ మధ్యనే లైఫ్‌ ఇన్సూరెన్స్‌ బిజినెస్‌లోకి ఎంట్రీ ఇచ్చిన ఫెడరల్‌ బ్యాంక్‌ తాజాగా మ్యూచువల్‌ ఫండ్‌ (ఎంఎఫ్‌) వ్యాపారంపై దృష్టి కేంద్రీకరించింది. ఇందులోకి అడుగుపెట్టాలని భావిస్తోంది. తన పూర్తి అనుబంధ ఎన్‌బీఎఫ్‌సీ విభాగం ‘ఫెడ్‌ఫినా’లో 26 శాతం వాటాను వ్యూహాత్మక ఇన్వెస్టర్‌కు విక్రయించి సబ్సిడరీ ఏర్పాటు కోసం నిధులను సమీకరించే ప్రక్రియలో నిమగ్నమయింది. ఇద్దరు బిడ్డర్లతో చర్చలు జరుగుతున్నాయని, ఆర్థిక సంవత్సరం చివరికల్లా వ్యూహాత్మక ఇన్వెస్టర్‌ ఎవరనేది ఖరారు కావొచ్చని బ్యాంక్‌ తెలిపింది. ‘మ్యూచువల్‌ ఫండ్‌ బిజినెస్‌పై దృష్టి కేంద్రీకరించాం. రిటైల్, లార్జ్‌ టికెట్‌ హోమ్‌ లోన్స్‌లోని పోర్ట్‌ఫోలియో కొనుగోళ్లకు చూస్తున్నాం’ అని ఫెడరల్‌ బ్యాంక్‌ ఎండీ, సీఈవో శ్యామ్‌ శ్రీనివాసన్‌ పేర్కొన్నారు.  

ముంబై: ప్రముఖ ఎన్‌బీఎఫ్‌సీ..బజాజ్‌ ఫైనాన్స్‌ ఈ ఆర్థిక సంవత్సరం క్యూ2లో రూ.557 కోట్ల నికర లాభం సాధించింది. గత క్యూ2లో సాధించిన నికర లాభంతో పోల్చితే 37% వృద్ధి సాధించామని బజాజ్‌ ఫైనాన్స్‌ తెలిపింది. జీఎస్‌టీ అమలు సంబంధిత సమస్యలు ఉన్నప్పటికీ, ఈ స్థాయి నికర లాభం సాధించామని కంపెనీ ఎండీ, రాజీవ్‌ జైన్‌ చెప్పారు. తమ ఎస్‌ఎంఈ లోన్‌బుక్‌పై జీఎస్‌టీ ప్రభావం చూపిందని వివరించారు. మరో ఆర్నెల్ల పాటు జీఎస్‌టీ భారం ఉండనున్నదని ఆయన అంచనా వేస్తున్నారు. నిర్వహణ ఆస్తులు రూ.52,332 కోట్ల నుంచి 38% వృద్ధితో రూ.72,139 కోట్లకు పెరిగాయని పేర్కొన్నారు. స్థూల మొండి బకాయిలు 1.68%గా, నికర మొండి బకాయిలు 0.51%గా ఉన్నాయని వివరించారు. కేటాయింపులు రూ.165 కోట్ల నుంచి రూ.228 కోట్లకు పెరిగాయని వివరించారు. ఎస్‌ఎంఈ రుణాలు 18 శాతం వృద్ధి చెందగా, కన్సూమర్‌ రుణాలు 42 శాతం పెరిగాయని పేర్కొన్నారు. ఆర్థిక ఫలితాల నేపథ్యంలో బీఎస్‌ఈలో బజాజ్‌ ఫైనాన్స్‌ షేర్‌ 4 శాతం నష్టపోయి రూ.1,889 వద్ద ముగిసింది. ఫెడరల్‌ బ్యాంక్‌ లాభం 31 శాతం అప్‌ న్యూఢిల్లీ: ప్రైవేట్‌ రంగ ఫెడరల్‌ బ్యాంక్‌ నికర లాభం ఈ ఆర్థిక సంవత్సరం రెండో త్రైమాసికంలో 31 శాతం పెరిగింది. గత క్యూ2లో రూ.201 కోట్లుగా ఉన్న నికర లాభం ఈ క్యూ2లో రూ.264 కోట్లకు ఎగసిందని ఫెడరల్‌ బ్యాంక్‌ తెలిపింది. మొత్తం ఆదాయం రూ.2,338 కోట్ల నుంచి 14 శాతం వృద్ధితో రూ.2,667 కోట్లకు పెరిగిందని పేర్కొంది. స్థూల మొండి బకాయిలు 2.78% నుంచి 2.39 శాతానికి, నికర మొండి బకాయిలు 1.61 శాతం నుంచి 1.32 శాతానికి  తగ్గాయని తెలిపింది. అయితే మొండి బకాయిలు, అత్యవసరాలకు కేటాయింపులు రూ.168 కోట్ల నుంచి రూ.177 కోట్లకు పెరిగాయని పేర్కొంది.  ఆర్‌బీఐ మార్గదర్శకాల ప్రకారమే మొండి బకాయిలకు కేటాయింపులు జరిపామని వివరించింది. ఇక బ్యాంక్‌ నికర వడ్డీ ఆదాయం రూ.726 కోట్ల నుంచి 24 శాతం వృద్ధితో రూ.899 కోట్లకు పెరిగింది. ఈ బ్యాంక్‌ ఫలితాలు అంచనాలను మించడం, మొండి బకాయిలు తగ్గి రుణ నాణ్యత మెరుగుపడటంతో ఈ షేర్‌ సోమవారం 6.4 శాతం ఎగబాకి ఆల్‌టైమ్‌ గరిష్టస్థాయిలో రూ.125 వద్ద ముగిసింది.


 న్యూఢిల్లీ: పెట్టుబడులపై మంచి రాబడులు, వడ్డీ ఆదాయం పెరుగుదల ఊతంతో ప్రైవేట్‌ రంగ ఫెడరల్‌ బ్యాంక్‌ ఈ ఆర్థిక సంవత్సరం జూన్‌తో ముగిసిన తొలి త్రైమాసికంలో రూ.210 కోట్ల నికర లాభాన్ని ఆర్జించింది. గత ఆర్థిక సంవత్సరం క్యూ1లో నమోదైన రూ. 167 కోట్లతో పోలిస్తే ఇది 26 శాతం వృద్ధి. క్యూ1లో బ్యాంకు ఆదాయం రూ. 2,264 కోట్ల నుంచి రూ. 2,653 కోట్లకు పెరిగింది. ఇక, జూన్‌ త్రైమాసికంలో  స్థూల నిరర్ధక ఆస్తులు(జీఎన్‌పీఏ) 2.92% నుంచి 2.42%కి, నికర ఎన్‌పీఏలు 1.68% నుంచి 1.39%కి తగ్గాయి. బుధవారం బీఎస్‌ఈలో ఫెడరల్‌ బ్యాంక్‌ షేరు సుమారు 4% క్షీణించి రూ. 114.80 వద్ద ముగిసింది.


 తగ్గిన నికర మొండి బకాయిలు  
 ఒక్కో షేర్‌కు 90 పైసలు డివిడెండ్‌  
 
 న్యూఢిల్లీ: ప్రైవేట్‌ రంగ ఫెడరల్‌ బ్యాంక్‌ నికర లాభం గత ఆర్థిక సంవత్సరం నాలుగో త్రైమాసిక కాలంలో దాదాపు 25 రెట్లు పెరిగింది. 2015–16 క్యూ4లో రూ.10 కోట్లుగా ఉన్న నికర లాభం 2016–17 క్యూ4లో రూ.257 కోట్లకు పెరిగిందని ఫెడరల్‌ బ్యాంక్‌ పేర్కొంది. నికర మొండి బకాయిలు తగ్గడం.. రిటైల్, కార్పొరేట్‌ బ్యాంకింగ్‌ విభాగాల మంచి పనితీరుతో నికర లాభం ఈ స్థాయిలో పెరిగిందని బ్యాంక్‌ ఎండీ, సీఈఓ శ్యామశ్రీనివాసన్‌ చెప్పారు. ఆదాయం రూ.2,263 కోట్ల నుంచి రూ.2,598 కోట్లకు పెరిగిందన్నారు. ఒక్కో షేర్‌కు 90 పైసలు (45%) డివిడెండ్‌ను ఇవ్వనున్నట్లు తెలిపారు.
 
 రూ.2,500 కోట్లు సమీకరణ: రూ.2,500 కోట్ల మూలధన నిధులు సమీకరించడానికి తమ డైరెక్టర్ల బోర్డ్‌ ఆమోదం తెలిపిందని శ్రీనివాసన్‌  పేర్కొన్నారు. రైట్స్‌ ఇష్యూ, ప్రిఫరెన్షియల్‌ ఇష్యూ, ఎఫ్‌పీఓ, క్వాలిఫైడ్‌ ఇన్‌స్టిట్యూషనల్‌ ప్లేస్‌మెంట్‌(క్విప్‌).. ఇలా వివిధ మార్గాల్లో ఈ నిధులను సమీకరించనున్నామని చెప్పారు. మొత్తం విదేశీ వాటాను 74 శాతానికి పెంచుకునే ప్రతిపాదనను డైరెక్టర్ల బోర్డ్‌ ఆమోదించిందని తెలిపారు.  బీఎస్‌ఈలో ఫెడరల్‌  బ్యాంక్‌ షేర్‌ ఇంట్రాడేలో ఏడాది గరిష్ట స్థాయి, రూ.109ను తాకింది. చివరకు 14 శాతం లాభంతో రూ.108 వద్ద ముగిసింది.


 తిరువనంతపురం: పెద్ద నోట్ల రద్దు అనంతరం సామాన్యుల చేతికి నోటు చిక్కడమే కష్టంగా మారింది. బ్యాంకులు, ఏటీఎంల వద్ద క్యూలలో నిలుచున్నా డబ్బు దొరికే పరిస్థితి కనిపించడం లేదు. ఎలాగోలా బ్యాంకు నుంచి 5 రెండు వేల కరెన్సీ నోట్లను పొందిన కేరళలోని ఓ మహిళకు మరో రకమైన అనుభవం ఎదురైంది. అందులో ఓ నోటు డ్రా చేసిన కొద్ది సమయానికే ముట్టుకుంటే చిరిగిపోవడం ప్రారంభించింది.
 
 తాళిపరంబ టౌన్‌లోని ఫెడరల్‌ బ్యాంకు బ్రాంచ్‌ నుంచి పీసీ షరీఫా అనే మహిళ ఇటీవల 10 వేలు పొందింది. అందులో సీరియల్‌ నంబర్‌ 456828 ఉన్న రెండు వేల నోటు ముట్టుకుంటేనే చివర్లలో చిరిగిపోవడం ప్రారంభించింది. దీనిపై షరీఫా కుమారుడు షిమీల్‌ మాట్లాడుతూ.. మిగిలిన నాలుగు నోట్లు కూడా చిరిగిపోతుండటం గమనించానని, అయితే ఎలాగోలా వాటిని ఖర్చులకు వాడేశానని మీడియాతో వెల్లడించాడు. అయితే బాగా చిరిగిన నోటును ఎవరూ తీసుకోవడం లేదని, తిరిగి తీసుకోవాలని బ్యాంకు వారిని కోరగా.. వారు ఒప్పుకోలేదని తెలిపాడు. గంటల కొద్ది క్యూలో నిల్చున్న తరువాత గానీ ఈ నోట్లు దొరికాయని షరీఫా వెల్లడించింది. దీనిపై బ్యాంకు అధికారులు ఇంత వరకు స్పందించలేదు.


 ప్రైవేట్ రంగంలో దిగ్గజ బ్యాంకు ఫెడరల్ బ్యాంకు లాభాల్లో మార్కెట్ విశ్లేషకులు అంచనాలను అధిగమించింది. శుక్రవారం ప్రకటించిన 2016-17 ఆర్థిక సంవత్సర తొలి త్రైమాసిక ఫలితాల్లో నికర లాభాలు 18.3శాతం జంప్ అయి, రూ.167.3 కోట్లగా నమోదయ్యాయి. 2015-16 ఆర్థిక సంవత్సరం ఏప్రిల్-జూన్ క్వార్టర్లో ఈ లాభాలు రూ.141.4 కోట్లగా ఉన్నాయి. అదేవిధంగా నికర వడ్డీ ఆదాయంలో(అడ్వాన్సులపై వడ్డీ పొందటానికి, డిపాజిట్ లపై వడ్డీ చెల్లించడానికి తేడా) 15 శాతం ఎగిసి, ఏడాదికి ఏడాది రూ.693 కోట్లను ఆర్జించిందని కంపెనీ ప్రకటించిన ఫలితాల్లో పేర్కొంది. అయితే ఈ బ్యాంకు కేవలం రూ.156 కోట్ల నికరలాభాలను, రూ.680 కోట్ల నికర వడ్డీ ఆదాయాన్ని ఆర్జిస్తుందని మార్కెట్ విశ్లేషకులు అంచనావేశారు.
 
 అన్ని బ్యాంకులకు మాదిరిగా ఫెడరల్ బ్యాంకుకి కూడా కొంత నిరర్ధక ఆస్తుల బెడద తప్పలేదు. కానీ ఆస్తుల క్వాలిటీలో బ్యాంకు పట్టు సాధించినట్టు పేర్కొంది.  జూన్ త్రైమాసికంలో స్థూల నిరర్ధక ఆస్తులు 5శాతం పెరిగి రూ.1,741 కోట్లను నమోదుచేశాయి. అదేవిధంగా నికర నిరర్థక ఆస్తులు సైతం మార్చి క్వార్టర్ తో పోలిస్తే ఈ క్వార్టర్ కు 0.98 శాతం పెరిగి రూ.1.68 శాతంగా నమోదయ్యాయి.  ప్రొవిజన్లు 2016 జూన్ క్వార్టర్లో రూ.168.48కోట్లగా రికార్డు అయినట్టు కంపెనీ పేర్కొంది. 2015 జూన్ క్వార్టర్లో ఇవి రూ.153.10 కోట్లగా ఉన్నాయి. ఆస్తుల క్వాలిటీపై బ్యాంకు పట్టుసాధించినట్టు ప్రకటించడంతో, ఫెడలర్ బ్యాంకు షేర్లు ఒక్కసారిగా 5శాతం మేర జంప్ అయ్యాయి. ఫలితాల ప్రకటన అనంతరం ట్రేడింగ్ ముగిసే నాటికి బ్యాంకు షేరు 4.76 శాతం ఎగిసి, రూ.63.85గా నమోదైంది.


 ముంబై : ఐసీఐసీఐ నిరాశజనకమైన ఫలితాల అనంతరం మరో ప్రైవేట్ రంగ దిగ్గజ బ్యాంకు ఫెడరల్ బ్యాంకు సైతం నికర లాభాలను కోల్పోయింది. సోమవారం ప్రకటించిన నాలుగో త్రైమాసిక ఫలితాల్లో ఫెడరల్ బ్యాంకు నికర లాభాలు 96 శాతం పడిపోయి, రూ.10.26 కోట్లగా నమోదయ్యాయి. గతేడాది ఈ లాభాలు రూ.280.53 కోట్లగా ఉన్నాయి. అయితే జనవరి-మార్చి క్వార్టర్లో బ్యాంకు మొత్తం ఆదాయం రూ.2,214.28 కోట్ల నుంచి రూ.2,253.38 కోట్లకు పెరిగిందని కంపెనీ రెగ్యులేటరీకి సమర్పించిన నివేదికలో పేర్కొంది. 
 2014-15లో రూ.39.78 కోట్లగా ఉన్న ప్రొవిజన్స్(బ్యాంకు కలిగిఉన్న రుణాలు) కంపెనీ బ్యాలెన్స్ షీటు ప్రకారం రూ.388.64 కోట్లకు పెరిగాయని తెలిపింది. 2015-16లో రూ. 2 ముఖ విలువగా ఉన్న ప్రతి ఈక్విటీ షేర్ కు రూ.0.70 డివిడెంట్ ను కంపెనీ బోర్డు ప్రతిపాదించింది. ఈ నిరాశజనకమైన ఫలితాలతో ఫెడరల్ బ్యాంకు షేర్లు స్టాక్ మార్కెట్లో నష్టాలను చవిచూస్తున్నాయి.


 ఈ నెల 18 నుంచి వర్తింపు
 న్యూఢిల్లీ: ఫెడరల్ బ్యాంక్ బేస్‌రేటును పావు శాతం తగ్గించింది. 10.2  శాతంగా ఉన్న బేస్‌రేట్‌ను 9.95 శాతానికి తగ్గించామని ఫెడరల్ బ్యాంక్ తెలిపింది. ఈ తగ్గింపు ఈ నెల 18 నుంచి వర్తిస్తుందని పేర్కొంది. కీలక రేట్లను ఇటీవల ఆర్‌బీఐ  పావు శాతం మేర తగ్గించిన నేపథ్యంలో పలు బ్యాంకులు బేస్‌రేట్‌ను తగ్గించాయి. ఎస్‌బీఐ, అలహాబాద్ బ్యాంక్, దేనా బ్యాంక్, పంజాబ్ నేషనల్ బ్యాంక్, సెంట్రల్ బ్యాంక్ ఆఫ్ ఇండియా, సిండికేట్ బ్యాంక్‌లు ఇప్పటికే బేస్‌రేట్‌ను తగ్గించిన విషయం తెలిసిందే. బేస్ రేట్ తగ్గింపు నేపథ్యంలో ఫెడరల్ బ్యాంక్ షేర్ 1.6 శాతం నష్టపోయి రూ.133 వద్ద ముగిసింది.
 
 ఇండియన్ బ్యాంక్ తగ్గింపు 30 బేసిస్ పాయింట్లు
 ఇండియన్ బ్యాంక్ బేస్‌రేట్‌ను, బెంచ్‌మార్క్ ప్రైమ్ లెండింగ్ రేట్(బీపీఎల్‌ఆర్)ను చెరో  30 బేసిస్ పాయింట్లు చొప్పున తగ్గించింది. 10.25 శాతంగా ఉన్న బేస్‌రేట్‌ను 9.95 శాతానికి, అలాగే బీపీఎల్‌ఆర్‌ను 14.50 శాతం నుంచి 14.2 శాతానికి తగ్గించామని ఇండియన్ బ్యాంక్ తెలిపింది. ఈ తగ్గింపు సోమవారం నుంచే వర్తిస్తుందని పేర్కొంది. బీఎస్‌ఈలో ఈ షేర్ 3.6 శాతం నష్టపోయి రూ.146 వద్ద ముగిసింది.


 న్యూఢిల్లీ: ప్రైవేట్ రంగ ఫెడరల్ బ్యాంక్,  ఎస్‌బీఐ కార్డ్‌లు సంయుక్తంగా కో-బ్రాండెడ్ క్రెడిట్ కార్డులను ఆవిష్కరించాయి. ఫెడరల్ బ్యాంక్ ఎస్‌బీఐ ప్లాటినం క్రెడిట్ కార్డు పరిమితి రూ.5 లక్షలు. ఈ కార్డు ప్రత్యేకంగా ఇంధన, భోజన పేమెంట్స్‌పై పలు రాయితీలను వినియోగదారులకు అందిస్తుందని ఫెడరల్ బ్యాంక్ ఎండీ శ్యామ్ శ్రీనివాస్ అన్నారు. గోల్డ్ క్రెడిట్ కార్డు పరిమితి రూ.1.75 ల క్షలు.


 హైదరాబాద్: మల్కాజ్గిరిలో ఫెడరల్ బ్యాంక్ చోరీ కేసు విచారణ ప్రారంభించినట్లు డీసీపీ రమారాజేశ్వరి మంగళవారం విలేకర్ల సమావేశంలో వెల్లడించారు. విచారణలో భాగంగా బ్యాంక్ సిబ్బందిని అదుపులోకి తీసుకుని విచారిస్తున్నట్లు తెలిపారు. అయితే దుండగులు కేజీ బంగారం, రూ. 1.25 లక్షల బంగారం చోరీ చేశారని వివరించారు.
 బ్యాంక్లోని రెండు లాకర్లు మాత్రమే తెరిచారని వివరించారు. ఒకే వ్యక్తి మాత్రమే లోపలకు చొరబడినట్లు సీసీ కెమెరా ఫుటేజ్ పరిశీలనలో గుర్తించినట్లు రమారాజేశ్వరి తెలిపారు. ఫెడరల్ బ్యాంక్లో చోరీ చేసిన దుండగులు గ్రిల్స్ కట్ చేసి నగదు, నగలు దొంగిలించారని చెప్పారు.


 390 పాయింట్లు అప్
 26,637 వద్దకు సెన్సెక్స్
 3 రోజుల నష్టాలకు చెక్
  
 అమెరికా ఆర్థిక వ్యవస్థ పటిష్ట రికవరీ సాధించేవరకూ వడ్డీ రేట్లను నామమాత్ర స్థాయిలోనే కొనసాగించేందుకు ఫెడరల్ రిజర్వ్ కమిటీ నిర్ణయించినట్లు వెలువడ్డ వార్తలు ప్రపంచ స్టాక్ మార్కెట్లకు జోష్‌నిచ్చాయి. దీంతో దేశీయంగానూ ఇన్వెస్టర్లకు ప్రోత్సాహం లభించింది. సెన్సెక్స్ 390 పాయింట్లు జంప్‌చేసి రెండు వారాల గరిష్టం 26,637 వద్ద ముగిసింది.
 
 బుధవారం రాత్రి అమెరికా మార్కెట్లు హైజంప్ చేయడంతోపాటు, గురువారం ఆసియా మార్కెట్లు లాభపడటం దేశీయంగా సెంటిమెంట్‌ను మెరుగుపరచింది. వెరసి ఉదయం నుంచీ ఇన్వెస్టర్లు కొనుగోళ్లకు ఎగబడటంతో నిఫ్టీ సైతం 118 పాయింట్లు ఎగసి 7,961 వద్ద నిలిచింది.  
 
 ఇతర విశేషాలివీ...
 * బీఎస్‌ఈలో అన్ని రంగాలూ లాభపడగా, క్యాపిటల్ గూడ్స్, రియల్టీ, బ్యాంకింగ్, పవర్, మెటల్  3-2% మధ్య ఎగశాయి.
 * క్యాపిటల్ గూడ్స్ దిగ్గజాలలో భెల్ 8.5% జంప్‌చేసింది. తమిళనాడులో రూ. 7,800 కోట్ల విలువచేసే 1,320 మెగావాట్ల విద్యుత్ ప్రాజెక్ట్ ఆర్డర్‌ను పొందడం ఇందుకు కారణం.
 * బ్యాంకింగ్‌లో ఫెడరల్ బ్యాంక్ 8% దూసుకెళ్లగా, బీఓఐ, యస్ బ్యాంక్, కెనరా, ఎస్‌బీఐ, ఐసీఐసీఐ, పీఎన్‌బీ, యాక్సిస్, హెచ్‌డీఎఫ్‌సీ బ్యాంక్ 5-2% మధ్య పెరిగాయి.
 * రియల్టీలో డీబీ 8% పుంజుకోగా, యూని టెక్, హెచ్‌డీఐఎల్, ఇండియాబుల్స్, అనంత్‌రాజ్, డీఎల్‌ఎఫ్ 5-2.5% మధ్య పెరిగాయి.
 * పవర్ షేర్లు జేఎస్‌డబ్ల్యూ ఎనర్జీ, జీఎం ఆర్, జేపీ పవర్, అదానీ పవర్, ఆర్‌పవర్, టాటా పవర్ 6.5-2.5% మధ్య ఎగశాయి.


 
 ఎస్‌బీఐ ‘కోహినూర్’ దార్లో విజయా బ్యాంక్ ‘సమృద్ధి’
 
      ‘ప్లాటినమ్’ పేరిట ఎస్‌బీహెచ్ ఖాతాలు
 
      లక్ష రూపాయల జీతముంటే ‘ఫెడ్ క్లాసిక్’
 
      అధికాదాయ వర్గాలపై ప్రభుత్వ బ్యాంకుల దృష్టి
 
      ఖాతాదార్లకు ప్రత్యేక సౌకర్యాలు, రుణాల్లో ప్రాధాన్యం
 
  హైదరాబాద్, బిజినెస్ బ్యూరో: మీకు ఎస్‌బీఐ కోహినూర్‌లో ఖాతా ఉందా? పోనీ విజయాబ్యాంక్ సమృద్ధి శాఖలోనైనా...? కనీసం ఎస్‌బీహెచ్ ప్లాటినమ్ అయినా తీసుకున్నారా? ఫెడరల్ బ్యాంక్ ఫెడ్ క్లాసిక్ అయినా దొరికిందా? ఇవేవీ లేవా... అయితే మీరు శ్రీమంతులు కాదేమో లెండి!!
  
  కోటి రూపాయలుంటేనే ఖాతా ఇస్తామని కండిషన్ పెట్టింది స్టేట్ బ్యాంక్ ఆఫ్ ఇండియా(ఎస్‌బీఐ). అలా ముందుకొచ్చేవారి కోసం ‘కోహినూర్’ పేరిట వజ్రాల్లాంటి శాఖలు ఏర్పాటు చేసింది. ఈ ఖాతాదారులకు ప్రత్యేక సౌకర్యాలు కూడా అందిస్తోంది. దీన్ని చూసి విజయా బ్యాంక్ కూడా కొత్త ఆలోచన చేసింది. రూ.3 లక్షలు మినిమమ్ బ్యాలెన్స్‌గా ఖాతాలో ఉంచేసే వారికోసం ‘సమృద్ధి’ పేరిట కొత్త శాఖలను తెరవటం మొదలెట్టింది. ఈ శాఖల ఖాతాదారులకు ప్రత్యేక సౌకర్యాలెటూ ఉంటాయి. వీళ్లిద్దరినీ చూసి ఫెడరల్ బ్యాంక్ మరో అడుగు ముందుకేసింది. నెల జీతం కనీసం లక్ష రూపాయలుంటేనే ఖాతా ఇస్తామంటూ ప్రత్యేక పథకాన్ని ప్రవేశపెట్టింది. ఏతావాతా అర్థమయ్యేదేంటంటే... ప్రత్యేక సేవలు కావాలనుకునే శ్రీమంతుల కోసం ప్రభుత్వ బ్యాంకులూ గాలం వెయ్యటం మొదలెట్టాయన్న మాట. ప్రీమియం సేవలు కావాలనుకునేవారంతా ఇక ప్రయివేటు బ్యాంకుల వంకే చూడాల్సిన అవసరం లేదన్న మాట. స్టేటస్ సింబల్స్‌గా మారుతున్న ఈ సేవల వివరాలు కావాలా?
 
  ఎస్‌బీఐ స్ఫూర్తి
  దేశంలోనే తొలిసారిగా ఎస్‌బీఐ ‘కోహినూర్’ పేరుతో హైదరాబాద్‌లో ఏర్పాటు చేసిన ప్రత్యేక శాఖ విజయవంతం కావడంతో మిగిలిన ప్రభుత్వ రంగ బ్యాంకులు కూడా ఇలాంటి సేవలపై ప్రత్యేకంగా దృష్టిసారించడం మొదలెట్టాయి. కనీసం కోటి రూపాయలు ఉంటే కాని ఖాతా తెరవడానికి వీలులేని కోహినూర్ శాఖ ఏర్పాటు చేసిన రెండు సంవత్సరాల్లోనే రూ.250 కోట్లకు పైగా డిపాజిట్లను సేకరించింది. ఇదే స్ఫూర్తితో ఎస్‌బీఐ విశాఖపట్టణం వంటి నగరాలపై కూడా దృష్టి పెట్టింది. కాకపోతే విశాఖలో ఏర్పాటు చేసిన శాఖలో కనీస నిల్వ మొత్తాన్ని కోటి రూపాయల నుంచి రూ.50 లక్షలకు తగ్గించింది. ఇదే కోవలో పది రోజుల క్రితం విజయా బ్యాంక్ హైదరాబాద్‌లో సమృద్ధి పేరుతో కొత్త శాఖను ఏర్పాటు చేసింది.
  
  దీన్లో ఖాతా తెరిచేవారు తమ సేవింగ్స్ అకౌంట్‌లో కనీసం రూ.3 లక్షల నిల్వను ఎప్పుడూ కొనసాగించాలి.  కరెంట్ అకౌంట్ ఖాతాదారులైతే రూ.5 లక్షలు ఉంచాలి. ప్రైవేటు బ్యాంకులకు పోటీగా అధికాదాయ వర్గాలను ఆకర్షించడానికి సమృద్ధి పేరుతో చేసిన ప్రయోగం విజయవంతమయిందని, దీంతో హైదరాబాద్‌లో కూడా ఒక శాఖను ఏర్పాటు చేశామని విజయా బ్యాంక్ ఈడీ బి.ఎస్.రామారావు చెప్పారు. ప్రస్తుతం తమ బ్యాంక్ డిపాజిట్ల సేకరణ వ్యయం 8 శాతంగా ఉందని దీన్ని తగ్గించుకోవడానికి కాసా అకౌంట్స్‌పై దృష్టిపెట్టినట్లు రామారావు తెలియజేశారు. ఈ శాఖల్లో ఖాతాదారులకు ఉచిత ఇంటర్నెట్, లాంజ్, కాఫీ షాప్ వంటి సౌకర్యాలను ఏర్పాటు చేస్తున్నారు. రుణాల్లో ప్రాధాన్యమివ్వడం, ఇతర లావాదేవీలపై వసూలు చేసే ఫీజుల్లో రాయితీ లేదా పూర్తిగా మాఫీ వంటివి కూడా చేస్తున్నారు.
  
  వ్యయ నియంత్రణకు కాసా మంత్రం
  బ్యాంకులకు కరెంట్, సేవింగ్స్ ఖాతాలు(కాసా) పెరిగితే వాటిలోని మొత్తం వల్ల డిపాజిట్ల సేకరణకయ్యే వ్యయం తగ్గుతుంది. ఎందుకంటే సేవింగ్స్ ఖాతాలోని సొమ్ముపై బ్యాంకులు కేవలం 4% వడ్డీ ఇస్తాయి. అదే కరెంట్ అకౌంట్ అయితే వడ్డీయే ఉండదు. అందుకే ఇప్పుడు పీఎస్‌యూ బ్యాంకులు డిపాజిట్ల సేకరణ వ్యయాన్ని తగ్గించుకోవడానికి కాసా మంత్రం జపిస్తున్నాయి. మొత్తం డిపాజిట్లలో కాసా 22% ఉండటంతో దీన్ని పెంచుకోవడానికి ‘ప్లాటినమ్’ పేరిట ప్రత్యేక సేవింగ్ ఖాతాను అందుబాటులోకి తీసుకొచ్చినట్లు ఎస్‌బీహెచ్ ఎండీ ఎం.భగవంతరావు తెలిపారు. ఇప్పటికే ఉన్న ఇతర సేవింగ్ ఖాతాదారులు కూడా ప్లాటినమ్‌లోకి మారే అవకాశాన్ని ఎస్‌బీహెచ్ కల్పిస్తోంది. కాకపోతే ఇలా మారాలంటే కనీస త్రైమాసిక నిల్వ రూ. లక్ష ఉండాలి. లేదంటే రూ.10 లక్షలు డిపాజిట్ చేయాల్సి ఉంటుంది. ప్రభుత్వ బ్యాంకులకు భిన్నంగా పాతతరం ఫెడరల్ బ్యాంక్ మరో ముందడుగు వేసి లక్ష రూపాయలు జీతం దాటిన వారి కోసం ఫెడ్ క్లాసిక్ ప్రీమియం పేరుతో ప్రత్యేక సేవింగ్ ఖాతాను ప్రారంభించింది. ఈ ఖాతాదారులకు బేస్ రేటుపైనే లక్ష రూపాయల వరకు ఓవర్ డ్రాఫ్ట్ సౌకర్యాన్ని కల్పిస్తోంది. ఇలా అధికాదాయ వర్గాల వారికి ప్రత్యేక సౌకర్యాలను కల్పిస్తుండటంతో ఖాతాదారులు వీటిపట్ల బాగానే మొగ్గు చూపుతున్నారు.