నిబంధనలు పాటిస్తే ప్రమాదాలు దూరం

నిబంధనలు పాటిస్తే ప్రమాదాలు దూరం

హొసపేటె: వాహనదారులు రోడ్డు నిబంధనలు పాటిస్తే ప్రమాదాలను అరికట్టవచ్చునని ఎస్పీ శ్రీహరిబాబు తెలిపారు. శుక్రవారం నగర ఎస్పీ కార్యాలయం వద్ద ఏర్పాటు చేసిన రోడ్డు భద్రత వారోత్సవం, జనవరి–2025 సడక్‌ సురక్ష– జీవన్‌ రక్షణ కార్యక్రమానికి అధ్యక్షత వహించి ఆయన మాట్లాడారు. వాహనాన్ని రోడ్డుపైకి తీసుకెళ్లే ముందు వాహనం అన్ని విధాలుగా సుస్థితిలో ఉందో లేదో చూసుకోవాలన్నారు. తాగి వాహనం నడపవద్దన్నారు. మొబైల్‌ ఫోన్‌లో మాట్లాడుతూ డ్రైవింగ్‌ చేయకూడదన్నారు. ఎడమ లేదా కుడి వైపు తిరిగేటప్పుడు అకస్మాత్తుగా వాహనాన్ని తిప్పవద్దన్నారు. మీ సిగ్నల్‌ తెలుసుకోవడానికి రోడ్డు వినియోగదారులకు సమయం ఇవ్వాలన్నారు. ద్విచక్ర వాహనదారులకు హెల్మెట్‌ తప్పనిసరి అన్నారు. వేగం పరిమితిగా ఉండాలన్నారు. వేగం ఎక్కువగా ఉంటే ప్రమాదాన్ని ఆహ్వానిస్తుందన్నారు. పాదచారులు రోడ్డుపై నడిచేటప్పుడు ఫుట్‌పాత్‌ను ఉపయోగించాలన్నారు. స్కూలు వదిలిన వెంటనే రోడ్డు మీదకు పరుగెత్తకూడదన్నారు. రోడ్డు దాటుతున్నప్పుడు మీరు ఎడమ, కుడి వైపు చూసి, దాటడానికి సురక్షితంగా ఉందో లేదో చూసుకోవాలన్నారు. పాదచారులు నిర్దేశించిన రోడ్డుపైనే వెళ్లాలని సూచించారు. రోడ్డు నిబంధనలు పాటించడం వల్ల అందరికీ మేలు జరుగుతుందన్నారు. జీవితం కూడా సురక్షితం. కానీ అజాగ్రత్తగా వ్యవహరిస్తే వ్యతిరేక ప్రభావం ఉంటుందనడంలో సందేహం లేదన్నారు. ముందు జాగ్రత్తలు తీసుకుంటే ప్రమాదాలను అరికట్టవచ్చన్నారు. ఇలాంటి కృషిని ప్రతి ఒక్కరూ నిజాయితీగా చేపట్టాలన్నారు. ఈ సందర్భంగా ఆర్‌టీఓ అధికారి చౌహాన్‌, అదనపు జిల్లా ఎస్పీ పాషా, అధికారులు తదితరులు పాల్గొన్నారు.