సమష్టిగా విజయవంతం చేద్దాం

సమష్టిగా విజయవంతం చేద్దాం

● కలెక్టర్‌ అభిలాష అభినవ్‌ ● ఉత్సవాల ఏర్పాట్ల పరిశీలన

జిల్లా చరిత్రలో నిలిచిపోయేలా నిర్మల్‌ ఉత్సవాల ను నిర్వహిద్దామని, జిల్లా ప్రజలందరి భాగస్వామ్యంతో విజయవంతం చేద్దామని కలెక్టర్‌ అభిలాషఅభినవ్‌ అన్నారు. స్థానిక ఎన్టీఆర్‌ మినీస్టేడియంలో శనివారం అదనపు కలెక్టర్లు ఫైజాన్‌అహ్మద్‌, కిశోర్‌కుమార్‌తో కలిసి నిర్మల్‌ ఉత్సవాల ఏర్పాట్లను ఆమె పరిశీలించారు. స్టాళ్లు, వేదిక, మరుగుదొడ్లు, పార్కింగ్‌ ఏర్పాట్లను పరిశీలించి సంబంధిత అధికారులకు పలు సూచనలు చేశారు. అనంతరం వారితో మాట్లాడుతూ.. జిల్లాలో నూతన సంవత్సరంలో కొత్తగా నిర్వహిస్తున్న నిర్మల్‌ ఉత్సవాలను సమష్టిగా విజయవంతం చేద్దామని చెప్పారు. ఆదివారం నుంచి ఈనెల 7వ తేదీ వరకు మూడురోజుల పాటు నిర్వహించే కా ర్యక్రమాలకు పక్కాగా ఏర్పాట్లు చేయాలని సూ చించారు. నిర్మల్‌ జిల్లా చరిత్ర, సాంస్కృతిక వారసత్వాన్ని ప్రపంచానికి తెలియజేసేలా ఈ ఉత్సవాలను నిర్వహిస్తున్నామని తెలిపారు. పట్టణ, గ్రామీణ ప్రాంతాల్లో నిర్మల్‌ ఉత్సవాలపై విస్తృత ప్రచారం చేయాలని పేర్కొన్నారు. వాహనాల పార్కింగ్‌కు ఎలాంటి ఇబ్బంది కలగకుండా చూడాలన్నారు. కార్యక్రమాల వద్ద షీటీమ్‌లను ఏర్పాటు చేయాలని సూచించారు. ఎలాంటి అవాంఛనీయ ఘటనలు జరగకుండా పటిష్ట బందోబస్తు, కంట్రోల్‌రూమ్‌, సీసీ కెమెరాల పర్యవేక్షణ ఉండాలని పేర్కొన్నారు. నిర్మల్‌ ఉత్సవాలు, ‘ఐ లవ్‌ నిర్మల్‌’ లాంటి సెల్ఫీ పాయింట్‌లను ఏర్పాటు చేయాలని సూచించారు. సమావేశంలో అదనపు ఎస్పీ ఉపేంద్రరెడ్డి, ఆర్టీవో రత్నకళ్యాణి, డీఆర్టీవో విజయలక్ష్మి, డీఈవో రామారావు, ఆర్‌అండ్‌బీ ఈఈ అశోక్‌కుమార్‌, డీవైఎస్వో శ్రీకాంత్‌రెడ్డి, మున్సిపల్‌ కమిషనర్‌ ఖమర్‌అహ్మద్‌, ఇతర అధికారులు, సిబ్బంది పాల్గొన్నారు.