ఏటూరునాగారం: అంతరించిపోయే జంతువుల జాబితాలో ఉన్న అడవి అలుగు (ఇండియన్‌ పాంగోలిన్‌)కు అంతర్జాతీయ మార్కెట్లో రూ.1.5 కోట్ల ధర ఉందన్న ప్రచారం అంతా అబద్ధమని ములుగు జిల్లా అటవీశాఖ అధికారులు కొట్టిపారేశారు. కొందరు జంతు స్మగ్లర్లు ఉద్దేశపూర్వకంగానే ఇలాంటి పుకార్లు పుట్టిస్తున్నారని, వారి మాటలు నమ్మవద్దని సూచించారు. అరుదైన ఈ జంతువును వేటాడినా, స్మగ్లింగ్‌ చేసినా కఠిన చర్యలు తీసుకొంటామని హెచ్చరించారు.వేటగాళ్లకు ఆశచూపి..భూపాలపల్లికి చెందిన చిదం రవి అనే వ్యక్తి ఇటీవల అడవి అలుగుకు అంతర్జాతీయ మార్కెట్‌లో రూ.1.5 కోట్ల ధర పలుకుతుందని, చైనాలో మందుల తయారీలో దీని పెంకులు వాడుతారని ప్రచారం చేశాడు. అడవి అలుగును వేటాడి తీసుకొస్తే భారీగా డబ్బు ఇస్తానని భూపతిపూర్‌కు చెందిన కోరం నాగయ్య, కోరం పెంటయ్య, కోరం కృష్ణమూర్తి అనే వేటగాళ్లకు ఆశ చూపాడు. దీంతో భూపతిపూర్‌ అడవుల్లో ఆ జంతువును పట్టుకొన్న వారు.. రవికి అందజేశారు. ఈ నెల 20వ తేదీన దానిని భూపాలపల్లికి తరలించేందుకు ప్రయత్నిస్తుండగా.. ఏటూరునాగారం నార్త్‌ అటవీశాఖ అధికారులు పట్టుకొన్నారు. అడవి ఎలుగుతో చిదం రవి పట్టుబడ్డాడు. జీవితకాలం 20 ఏళ్లు అంతరించిపోతున్న అరుదైన జీవి ఇండియన్‌ పాంగోలిన్‌. దీని జీవితకాలం 20 ఏళ్లు. సింహం కూడా తినలేనంత గట్టిగా అలుగు పెంకులు ఉంటాయి. అత్యధిక వర్షపాతం, పురుగులు, చీమల పుట్టలు, దట్టమైన అటవీ ప్రాంతాల్లో ఇవి జీవిస్తుంటాయి. ఎడారి అడవుల్లోనూ ఉంటాయని అటవీశాఖ అధికారులు తెలిపారు. ఈ జంతువు పెంకులను చైనాలో మందుల తయారీలో వాడుతారని స్మగ్లర్లు ప్రచారం చేసి సొమ్ము చేసుకుంటున్నారు. మధ్యవర్తులకు భారీ ధరకు విక్రయిస్తున్నారు. అలుగు పెంకులు ఏ మందుల్లోనూ వాడరు అడవి అలుగు పెంకులను ఎలాంటి మందుల తయారీకి వాడరు. అదంతా అపోహ మాత్రమే. స్మగ్లర్లు సొమ్ము చేసుకునేందుకే అమాయకులకు ఇలా మాయమాటలు చెబుతున్నారు. – అబ్దుల్‌ రెహమాన్, సౌత్‌ రేంజ్‌ అధికారి, ఏటూరునాగారం.చ‌ద‌వండి: కోతుల‌తో భ‌యం.. కొండ‌ముచ్చుల‌తో ఉపాయం

హైదరాబాద్‌, సాక్షి: ములుగు జిల్లా ఏటూరు నాగారం మావోయిస్టుల ఎన్‌కౌంటర్‌ పిటిషన్‌పై తెలంగాణ హైకోర్టు ఇవాళ కీలక ఆదేశాలు జారీ చేసింది. మల్లయ్య అలియాస్‌ మధు మృతదేహాన్ని కూడా భార్య ఐలమ్మకు అప్పగించాలని ఆదేశించింది. శుక్రవారం(నవంబర్‌ 6) మధ్యాహ్నాంలోగా అప్పగింత పూర్తి చేయాలని.. మృతదేహంపై గాయాలుంటే గనుక ఫొటోలు, వీడియోలు తీయాలని స్పష్టం చేసింది. ఏటూరునాగారం మావోయిస్టుల ఎన్‌కౌంటర్‌పై తెలంగాణ హైకోర్టు ఇవాళ విచారణ జరిపింది. గత విచారణలో.. ఎన్‌కౌంటర్‌లో మరణించిన ఏడుగురు మావోయిస్టుల్లో ఈగోలాపు మల్లయ్య అలియాస్‌ మధు తప్ప మిగిలిన ఆరుగురి మృతదేహాలను వారి కుటుంబసభ్యులకు అప్పగించాలని ప్రభుత్వానికి హైకోర్టు ఆదేశాలు జారీచేసిన సంగతి తెలిసిందే. అదే సమయంలో.. మల్లయ్య మృతదేహం అప్పగించకపోవడంతో.. భార్య ఐలమ్మ అలియాస్‌ మీనా హైకోర్టును ఆశ్రయించారు.గత విచారణలో.. ‘‘ఈ ఎన్‌కౌంటర్‌ బూటకమని, మావోయిస్టులు తినే ఆహారంలో మత్తుపదార్థాలు కలిపి చిత్రహింసలు పెట్టి చంపారు’’ అని పిటిషనర్‌ తరఫు న్యాయవాది సురేష్‌ కుమార్‌. అలాగే.. శవ పంచనామాలో కుటుంబసభ్యులను అనుమతించలేదని, పోస్ట్‌మార్టం ఫోరెన్సిక్‌ నిపుణుల ఆధ్వర్యంలో జరగలేదని పేర్కొన్నారు. మల్లయ్య మృతదేహాన్ని చూడటానికి ఐలమ్మను కేవలం 10 నిమిషాలే అనుమతించారని, ఈ కొద్ది సమయంలోనే ఆమె తన భర్త మృతదేహంపై దాదాపు 11 గాయాలను గుర్తించారని తెలిపారు. శవ పంచనామాకు పిటిషనర్‌ను అనుమతించలేదన్నారు. ఎన్‌హెచ్చార్సీ మార్గదర్శకాల ప్రకారం జ్యుడీషియల్‌ మేజిస్ట్రేట్‌ ఆధ్వర్యంలో శవ పంచనామా జరిపించేలా ఆదేశించాలని కోరారు. ఇది ఎన్‌కౌంటర్‌ కాదని.. కస్టోడియల్‌ డెత్‌ అని ఆరోపించారు. వాదనలు నమోదు చేసుకున్న విజయ్‌సేన్‌రెడ్డి ధర్మాసనం.. పిటిషనర్‌ పలు అనుమానాలు వ్యక్తం చేస్తున్న నేపథ్యంలో ఆమె భర్త మల్లయ్య మృతదేహం తప్ప మిగితావాళ్లవి వారి బంధువులు అడిగితే అప్పగించాలని స్పష్టం చేసింది. పోస్ట్‌మార్టం ఎగ్జామినేషన్‌, శవపంచనామా నిర్వహణలో అనుసరించిన విధానంపై సంక్షిప్త వివరాలు సమర్పించాలని పేర్కొంది. ఇవాళ.. మృతదేహం అప్పగింతపై ఆదేశాలిచ్చింది.చల్పాక-ఐలాపూర్‌ అటవీ ప్రాంతంలో ఈ నెల 1న జరిగిన ఎన్‌కౌంటర్‌లో మావోయిస్టులు మరణించిన ఘటనపై కలెక్టర్‌ దివాకర ఇదివరకే విచారణకు ఆదేశించారు. విచారణ అధికారిగా ములుగు ఆర్డీవో వెంకటేశ్‌ను నియమించారు.

సాక్షి,హైదరాబాద్‌:ఏటూరునాగారంలో ఇటీవల జరిగిన మావోయిస్టుల ఎన్‌కౌంటర్‌పై మంగళవారం(డిసెంబర్‌3) హైకోర్టులో విచారణ జరిగింది.పిటిషనర్‌,ప్రభుత్వం తరపున వాదనలను కోర్టు విన్నది. పిటిషనర్‌ ఐలమ్మ భర్త మధు అలియాస్‌ మల్లయ్య మృతదేహాన్ని భద్రపరచాలని హైకోర్టు పోలీసులను ఆదేశించింది. తన భర్త మృతదేహంపై తీవ్ర గాయాలున్నాయన్న ఐలమ్మ తరపు న్యాయవాది వాదనల మేరకు హైకోర్టు తాజా ఆదేశాలిచ్చింది.కుటుంబ సభ్యులు అడిగితే ఎన్‌కౌంటర్‌లో మృతి చెందిన ఇతర మావోయిస్టుల మృతదేహాలను హ్యాండ్‌ఓవర్‌ చేయాలని కోర్టు ఆదేశించింది. కేసు తదుపరి విచారణను గురువారానికి వాయిదా వేసింది. కాగా,ఆదివారం ఏటూరునాగారం చల్పాక వద్ద జరిగిన ఎన్‌కౌంటర్‌లో ఏడుగురు మావోయిస్టులు మృతిచెందిన విషయం తెలిసిందే.అయితే మావోయిస్టుల మృతిపై అనుమానాలున్నాయని కుటుంబ సభ్యులతో పాటు పౌరహక్కుల సంఘాలు హైకోర్టును ఆశ్రయించాయి.హైకోర్టు ఆదేశాలతో మావోయిస్టుల మృతదేహాలను కాకతీయ మెడికల్‌ కాలేజీ(కేఎంసీ) మార్చురిలో పోలీసులు భద్రపరిచారు. కోర్టు మంగళవారం ఇచ్చిన ఆదేశాల తర్వాత మధు బాడీ తప్ప మిగిలిన మావోయిస్టుల మృతదేహాలను కుటుంబ సభ్యులకు అప్పగించనున్నారు.ఇదీ చదవండి: వారి మృతదేహాలను భద్రపర్చండి

సాక్షి, ములుగు జిల్లా:  అయ్యప్ప భక్తుని కారుతో ఢీకొట్టిన ఘటనలో ఏటూరు నాగారం పీఎస్‌లో బైరి నరేష్‌పై కేసు నమోదైంది. అయ్యప్ప భక్తుడిని వాహనంతో ఢీకొట్టి గాయపర్చిన ఘటనలో బాధితుడి ఫిర్యాదు మేరకు పోలీసులు కేసు నమోదు చేశారు. ఈ ఘటన అనంతరం మంగపేట వైపు వెళ్తుండగా నరేష్‌ వాహనం ప్రమాదానికి గురైంది. జీడివాగు వద్ద అదుపుతప్పి చెట్టును ఢీకొట్టింది. సకాలంలో ఎయిర్ బెలూన్లు ఓపెన్ అవడంతో అంతా సురక్షితంగా బయటపడ్డారు. ఘటన తర్వాత వాహనం అక్కడే వదిలేసి నరేష్‌ బస్సులో వెళ్లిపోయారు. వాహనం ప్రమాదంపై మరో కేసు నమోదైంది. ప్రమాదం జరిగిన అనంతరం మణుగూరు వైపు వెళ్లిన బైరి నరేష్, అయన భార్య, కొడుకు, డ్రైవర్ వెళ్లినట్లు సమాచారం. బైరి నరేష్‌ కోసం పోలీసులు ఆరా తీస్తున్నారు. బైరి నరేష్ స్వగ్రామం హనుమకొండ జిల్లా కమలాపూర్ మండలం కన్నూరు.   ఇదీ చదవండి: బిర్యానీ గొడవ: కస్టమర్లపై దాడి.. రాజాసింగ్‌ సీరియస్‌

ములుగు, సాక్షి: ఏటూరు నాగారంలో ఇవాళ ఉద్రిక్త పరిస్థితులు ఏర్పాడ్డాయి. నాస్తికుడు బైరి నరేష్‌పై అయ్యప్ప భక్తులు భగ్గుమంటున్నారు. అతన్ని అరెస్ట్‌ చేయాలని ఆందోళన చేపట్టారు. అందుకు కారణం.. బైరి నరేష్‌ వాహనం కారణంగా ఓ అయ్యప్ప భక్తుడికి గాయాలు కావడమే. సోమవారం.. కోరేగావ్‌ సమావేశం కోసం బైరి నరేష్‌ ఏటూరు నాగారం వెళ్లాడు. అది తెలుసుకుని అక్కడికి చేరుకున్నారు అయ్యప్ప స్వాములు. గతంలో అయ్యప్ప మీద చేసిన వ్యాఖ్యలు బహిరంగ క్షమాపణలు చెప్పాలంటూ బైరి నరేష్‌తో వాగ్వాదానికి దిగారు. ఈ క్రమంలో నరేష్‌ అక్కడి నుంచి వెళ్లిపోయే ప్రయత్నం చేశాడు. అయితే నరేష్‌ క్షమాపణలు చెప్పాల్సిందేనంటూ అయ్యప్ప స్వాములు వాహనాన్ని అడ్డుకునే యత్నం చేశారు. ఈ క్రమంలో.. నరేష్‌ వాహనం ముందుకు దూసుకెళ్లింది. ఈ ఘటనలో ఓ అయ్యప్ప భక్తుడికి గాయాలయ్యాయి. బాధితుడ్ని పోగు నర్సింహారావుగా గుర్తించారు. దీంతో నరేష్‌ను అరెస్ట్‌ చేయాలంటూ స్వాములు అందోళన చేపట్టారు.  గతంలో.. ఏడాది కిందట.. అయ్యప్ప స్వామి పుట్టుక గురించి బైరి నరేష్‌ చేసిన వ్యాఖ్యలు పెను దుమారం రేపాయి. హిందూ సంఘాలు, అయ్యప్ప స్వాముల ఫిర్యాదు నేపథ్యంతో కేసు నమోదు అయ్యింది. దాదాపు 45 రోజుల పాటు నరేష్ చర్లపల్లి జైలులో ఉన్నాడు. కోడంగల్ కోర్టు బెయిల్ మంజూరు చేయడంతో జైలు నుంచి విడుదలయ్యాడు. జైలు నుంచి వచ్చాక కూడా నరేష్ మరోసారి అనుచిత వ్యాఖ్యలు చేయడంతో.. హనుమకొండలో మరోసారి అయ్యప్ప భక్తులు దాడి చేశారు. అయితే ఉద్దేశపూర్వకంగానే తాను ఆ వ్యాఖ్యలు చేసినట్లు అప్పుడు పోలీసుల విచారణలో బైరి నరేష్‌ అంగీకరించాడు.

హనుమకొండ, సాక్షి: జిల్లా రహదారి నెత్తురోడింది. శుక్రవారం తెల్లవారుజామున ఎల్కతుర్తి మండలం పెంచికల్ పేట శివారులో ఘోర ప్రమాదం జరిగింది. ఇసుక లారీ ఎదురుగా వస్తున్న కారును ఢీకొట్టడంతో నలుగురు మృతి చెందారు. గాయపడిన వాళ్లను వరంగల్‌ ఎంజీఎం తరలించి చికిత్స అందిస్తున్నారు.  వీళ్లంతా ఏటూరునాగారంకు చెందిన ఒకే కుటుంబంగా నిర్ధారణ అయ్యింది. దైవదర్శనం కోసం శంకర్‌ తన కుటుంబ సభ్యులతో కలిసి వేములవాడకు వెళ్తుండగా ఈ దుర్ఘటన జరిగింది. మృతదేహాల్ని ఎంజీఎం మార్చురీకి తరలించి పోలీసులు ఘటనపై దర్యాప్తు చేపట్టారు.  మృతులు మంతెన కాంతయ్య(72) మంతెన శంకర్(60) మంతెన భారత్(29) మంతెన చందన(16) చికిత్స పొందుతున్నవాళ్లు మంతెన రేణుక(60) మంతెన భార్గవ్(30) మంతెన శ్రీదేవి(50)  

సాక్షి, ములుగు: జిల్లాలోని ఏటూరునాగారం పరిధిలో యువకుడి దారుణ హత్య కలకలం రేపింది. తనను వేధిస్తున్న దగ్గరి బంధువును.. కత్తితో పొడిచి చంపింది ఓ యువతి. హత్య అనంతరం సరాసరి పోలీస్‌ స్టేషన్‌కి వెళ్లి తాను ఎందుకు చంపింది వివరించి మరీ పోలీసులకు లొంగిపోయిందామె.  ఏర్రలవాడలో నివసించే రామటెంకి శ్రీనివాస్‌ అనే యువకుడు స్థానికంగా ఉంటున్న జాడి సంగీతను ప్రేమ, పెళ్లి పేరుతో వేధిస్తున్నాడు. వీళ్లిద్దరూ దగ్గరి బంధువులు. ఇరు కుటుంబాలు కూలీ పనితో జీవనం కొనసాగిస్తున్నాయి. అయితే.. సంగీతపై శీను వేధింపులు శ్రుతి మించిపోతూ వస్తున్నాయి.  ఈ క్రమంలో విసిగిపోయిన ఆమె.. శీనుపై కేసు పెట్టింది.  దీంతో శీనును అరెస్ట్‌ చేశారు పోలీసులు. జైలుకు వెళ్లొచ్చాక కూడా అతని ప్రవర్తనలో మార్పు రాలేదు.  వెంటపడి పెళ్లి చేసుకోవాలంటూ వేధించడం పెంచాడు.  ఈసారి మద్యం మత్తులో వేధించడం మొదలుపెట్టాడు. భరించలేకపోయిన సంగీత.. శీనును చేతులు కట్టేసి మరీ కత్తితో పొడిచి చంపేసింది. ఆపై నేరుగా స్థానిక పోలీస్‌ స్టేషన్‌కు వెళ్లి లొంగిపోయింది. ఈ ఘటన స్థానికంగా తీవ్ర కలకలం సృష్టించింది.

సాక్షి, ములుగు: ఏటూరునాగారం సమీక్ష సందర్భంగా అటవీ శాఖ అధికారులపై సీఎం కేసీఆర్‌ మండిపడ్డారు. ‘‘ఫారెస్ట్‌ డిపార్ట్‌మెంట్‌లో దొంగలు తయారయ్యారు. అన్నీ అమ్ముకుదొబ్బారు. ఒక్కచెట్టు అయినా ఉందా?’’ అని ములుగు జిల్లా ఫారెస్ట్‌ ఆఫీసర్‌ ప్రదీప్‌ కుమార్‌శెట్టిని ప్రశ్నించారు. ‘‘అటవీ ప్రాంతంలో రోడ్డు వేయనీయం, బ్రిడ్జి కట్టనీయం, కరెంట్‌ పోల్‌ వేయనీయం అనడం మంచిదికాదు. శాపల్లి బ్రిడ్జి నిర్మాణాన్ని ఎందుకు అడ్డుకుంటున్నారు? రోడ్డు సౌకర్యం లేక రేషన్‌ ఇవ్వలేక కలెక్టర్, ప్రజలు చావాలా? వెరీ సారీ.. ఇది మంచి పద్ధతి కాదు’’ అని మండిపడ్డారు.   చదవండి: (ఇంకా ఉద్యమాలు చేయాలె..  మాజీ మహిళా నక్సలైట్‌తో సీఎం కేసీఆర్‌)

సాక్షి, వరంగల్‌: ‘‘ధైర్యంగా ఉండమ్మా.. ఇంకా మనం ఉద్యమాలు చేయాలె.. టీఆర్‌ఎస్‌లో ఇంకా బాగా పనిచేయాలె.. త్వరలో హైదరాబాద్‌కు పిలిపించుకుని మాట్లాడుతా..’’అని మాజీ నక్సలైట్, టీఆర్‌ఎస్‌ పార్టీ నాయకురాలు పురి స్వరూప అలియాస్‌ సంధ్యకు సీఎం కేసీఆర్‌ భరోసా ఇచ్చారు. ఏటూరునాగారంలో సమీక్ష పూర్తిచేసుకుని హనుమకొండకు బయలుదేరుతున్న సమయంలో.. స్వరూప సీఎంను కలిసేందుకు ప్రయత్నించగా పోలీసులు అడ్డుకున్నారు. అది చూసిన సీఎం ఆమెను బస్సులోకి పిలిపించుకుని మాట్లాడారు. అనంతరం స్వరూప మీడియాతో మాట్లాడారు. ‘‘మాది తాడ్వాయి మండలం కాల్వపల్లి గ్రామం. చిన్నవయసులోనే మావోయిస్టు పార్టీలో పనిచేసి లొంగిపోయాను. ప్రస్తుతం టీఆర్‌ఎస్‌ పార్టీలో పనిచేస్తున్నాను. నాకు అమ్మనాన్న ఎవరూ లేరు. ప్రభుత్వం నుంచి ఎలాంటి సాయం అందలేదు. ఈ విషయాలన్నీ సీఎం కేసీఆర్‌కు విన్నవించుకున్నాను. సార్‌ నా ఫోన్‌ నంబర్‌ తీసుకున్నారు. హైదరాబాద్‌కు పిలిపించుకుని మాట్లాడుతానని హామీ ఇచ్చారు..’’అని వివరించారు.  చదవండి: (CM KCR: వరదలు విదేశీ కుట్రే.. సీఎం కేసీఆర్‌ సంచల వ్యాఖ్యలు)

సాక్షి, వరంగల్‌: ఉగాది పండుగ రోజున ములుగు జిల్లాలో విషాదం చోటుచేసుకుంది. ఏటూరునాగారం మండలం రోహీర్‌ గ్రామ సమీపంలోని గోదావరి నదిలో ముగ్గురు విద్యార్థులు గల్లంతయ్యారు. రోహీర్‌ గ్రామానికి చెందిన డోంగిరి సందీప్, ఆకుదారి సాయివర్దన్, సతీష్ బెడిక ముగ్గురు విద్యార్ధులు ఉగాది పండుగ రోజున గోదావరిలో ఈత కొట్టేందుకు వెళ్లారు. నీటిలో దిగి ఈత కొడుతుండగా ప్రవాహం అధికంగా ఉండడంతో గల్లంతయ్యారు. విషయం తెలుసుకున్న స్థానికులు గ‌ల్లంతైన వారి గాలింపు చ‌ర్యలు చేప‌ట్టారు. చదవండి: అలాంటి వారు వెంటనే అన్‌ఫాలో కండి: కేటీఆర్‌ 

సాక్షి, మల్కాజిగిరి/ఏటూరునాగారం : ఉన్నత విద్య కోసం యూకే వెళ్లిన ఆ యువకుడు సెలవులకు ఇంటికి వచ్చి రోడ్డు ప్రమాదంలో మృతి చెందాడు. ఎస్సై శ్రీనివాస్‌ తెలిపిన వివరాల ప్రకారం.. ములుగు జిల్లా ఏటూరునాగారానికి చెందిన హర్షవర్ధన్‌రెడ్డి(26) యూకేలో ఎంఎస్‌ చేస్తున్నాడు. క్రిస్మస్‌ సందర్భంగా అక్కడ సెలవులు ఇవ్వడంతో సొంతవూరికి వచ్చాడు. వచ్చే నెలలో తిరిగి యూకేకు వెళ్లాల్సివుంది. మల్కాజిగిరిలో ఉంటున్న తన స్నేహితుడు రాహుల్‌ను కలవడానికి బుధవారం తన బైక్‌ మీద మల్కాజిగిరికి వస్తుండగా ఆర్‌.కె.నగర్‌ ప్రాంతంలో ఆర్టీసీ బస్సు ఢీ కొట్టింది. ఈ ఘటనలో హర్షవర్ధన్‌రెడ్డికి తీవ్రగాయాలు కావడంతో పోలీసులు చికిత్స కోసం ఆస్పత్రికి తరలిస్తుండగా మృతి చెందాడు. ఈ సంఘటన పై అతని సోదరుడు ఫిర్యాదు చేయడంతో కేసు నమోదు చేసి దర్యాప్తు చేస్తున్నారు. సంఘటన దురదృష్టకరం.. : ఎమ్మెల్యే మైనంపల్లి ఉన్నత చదువు చదువుకుంటున్న విద్యార్థి రోడ్డు ప్రమాదంలో మృతి చెందడం తనను కలిచివేసిందని ఎమ్మెల్యే మైనంపల్లి హన్మంతరావు అన్నారు. గతంలో కూడా అదే ప్రాంతంలో జరిగిన ప్రమాదాల్లో మరి కొందరు మృతి చెందినట్లు తెలిసిందన్నారు. ఆ ప్రాంతంలో  స్పీడ్‌ బ్రేకర్లు ఏర్పాటు చేయాలని అధికారులను ఆదేశించామన్నారు. 

ఏటూరునాగారం/ములుగు: పోలీసులు అంతర్రాష్ట్ర స్మగ్లర్ల ముఠాను అరెస్టు చేసి.. వారి నుంచి పెద్దపులి చర్మాన్ని స్వాధీనం చేసుకున్నారు. ములుగు జిల్లా ఎస్పీ సంగ్రామ్‌సింగ్‌ పాటిల్‌ గురువారం ఈ విషయాన్ని మీడియాకు తెలిపారు. వివరాలిలా ఉన్నాయి.. ఏటూరునాగారం పోలీస్‌స్టేషన్‌ పరిధిలోని ముళ్లకట్ట బ్రిడ్జి వద్ద పులి చర్మం అమ్మకానికి సిద్ధంగా ఉన్నట్లు పోలీసులకు సమాచారం అందడంతో అక్కడికి వెళ్లి పులి చర్మంతో పాటు ఇద్దరు వ్యక్తులను అదుపులోకి తీసుకున్నారు. వారిని విచారించగా.. వాజేడు మండల కేంద్రానికి చెందిన తిరుమలేశ్, ఛత్తీస్‌గఢ్‌ రాష్ట్రం బీజాపూర్‌ జిల్లా చండూరు గ్రామానికి చెందిన సత్యం అని తేలింది. ఇన్‌చార్జి ఎఫ్‌డీఓ శ్రీగోపాల్‌రావు, ఇతర అధికారులు పులి చర్మాన్ని పరీక్షించి.. నిజమైనదేనని నిర్ధారించారు. కాగా, పులి చర్మాన్ని వరంగల్‌లోని ఓ మహిళా కాంట్రాక్టర్‌కు అప్పగించడానికి వారు ముల్లకట్ట బ్రిడ్జి వద్దకు వచ్చారని పోలీసుల విచారణలో వెల్లడైంది.

ఏటూరునాగారం: మీ గూడెంలో ఎవరికైనా కరోనా వచ్చిందా.. అని ప్రశ్నించినప్పుడు వారు చెప్పే సమాధానం వింటే ఎవరైనా ఆశ్చర్యపోవాల్సిందే. అవును.. అడవిలో ఆహ్లాదకరమైన వాతావరణంలో జీవనం సాగించే వారికి కరోనా అంటే కొత్తగా వచ్చిన జ్వరం అని మాత్రమే తెలుసు.! ప్రపంచాన్ని గడగడలాడిస్తోన్న కోవిడ్‌ ఆ గూడెం పొలిమేర కూడా దాటకపోవడం గమనార్హం. సుమారు 15 సంవత్సరాల క్రితం ఛత్తీస్‌గఢ్‌ నుంచి వచ్చిన వీరు ఏటూరునాగారం గ్రామ పంచాయతీలోని మామిడిగూడెంలో కరోనా వంటి మహమ్మారి ఆనవాళ్లు కూడా తాకకుండా ఆనందంగా జీవనం సాగిస్తోన్నారు. ఉదయం లేచినప్పటి నుంచి నిత్యం ఏదో ఒక పనిలో నిమగ్నం కావడం తప్ప మరో ద్యాస లేకుండా ఉంటున్నారు. గ్రామంలోని ఉన్న ఇళ్లు దూరం దూరంగా ఉంటూ అన్ని రకాల చెట్ల మధ్యలో నివసిస్తుంటారు. రిజర్వు ఫారెస్టు కావడంతో పక్కా ఇళ్లు లేకున్నా గూనపెంకులు, మట్టి గోడలను నిర్మించుకొని సావాసం చేస్తున్నారు.  విభిన్నమైన అలవాట్లు గూడేనికి ఆనుకొని ప్రవహిస్తున్న జంపన్నవాగులోని చెలిమల నీటినే నేటికీ తాగునీటిగా వాడుతారు. ఇప్ప పువ్వులను వండుకొని తింటారు. గంజి, అంబలి, లద్దా లాంటివి సేవిస్తారు. ఇప్ప పువ్వు సారను తాగుతుంటారు. కట్టుబొట్టు అంతా విభిన్నంగా ఉంటుంది. ఒకరింటికి ఒకరు పోవడం గానీ, ఒకరి ఆహారం మరొకరు తీసుకోవడం వంటివి చేయరు. ఎవరి ఇంటిలో వారే వండుకోవడం, ఎవరి ఆహారాన్ని వారే సమకూర్చుకుంటారు. అడవిలో లభించే నల్లగడ్డలు, ఎర్రగడ్డలు, పుట్టగొడుగులు ఆహారంగా తీసుకుంటారు. ఏటూరునాగారంలో ప్రతీ శనివారం నిర్వహించే సంతకు వచ్చి వారానికి సరిపడా నిత్యావసర వస్తువులను కొనుగోలు చేసుకుంటారు. అలాగే ఇప్ప పువ్వును బియ్యానికి విక్రయిస్తారు. పువ్వు ఇచ్చి బియ్యాన్ని తీసుకోవడం వారి అలవాటు. కూలీ పనులకు పోయి వస్తే వెంటనే వాగుల్లోకి వెళ్లి స్నానం చేసిన తర్వాతనే గూడెంలోకి వస్తామని గూడెం ప్రజలు చెబుతున్నారు. శానిటైజేషన్‌  అంటే వారికి తెలియదు. శానిటైజర్‌ బాటిళ్లు ఎలా ఉంటాయో కూడా తెలియవు. మూతికి మాస్క్‌ కూడా ఆ గూడెంలో ఎవరు కట్టుకోరు. కరోనాతో ప్రపంచం వణుకుతోన్న ఈ రోజుల్లో కూడా వారు స్వేచ్ఛాయుత జీవితాన్ని గడుపుతున్నారు. కరోనా వచ్చిందా.. మీ గూడెంలో ఎవరికైనా కరోనా వచ్చిందా.. అంటే రాలేదు.. రాదు ధీమాగా చెబుతున్నారు ఈగూడెంవాసులు. ఆ గూడెంలోని జనులను సాక్షి పలకరించగా.. పలు విషయాలను వెల్లడించారు. ఏ ఇంటికి వెళ్లి అడిగినా కరోనా వచ్చిందా అంటే రాలేదనే సమాధానమే వస్తుంది. కరోనా అంటే తెలుసా అంటే కొత్తగా వచ్చిన జ్వరం కదా అని వారి అమాయకమైన మాటలు వింటుంటే విచిత్రంగా ఉంది. కరోనా పేరు చెబితే గడగడలాడుతున్న నేటి తరుణంలో కరోనా అంటే ఉట్టి జ్వరం అన్న ఆలోచనలో ఉండడం గమనార్హం. ఇదేకాకుండా వారిలో ఆత్మవిశ్వాసం ఎక్కువగా ఉన్నట్లు కనిపిస్తోంది. గతంలో వారికి ఏదైనా వ్యాధులు వస్తే చెట్ల పసర్లు, మంత్రాలతోనే నయం చేసుకునేవారు. ఈ మధ్య కాలంలోనే ఆ గూడేనికి ఏఎన్‌ఎంలు వెళ్లి చికిత్సలు అందిస్తున్నారు. లేకుంటే వారికి చెట్ల పసర్లు, మూలికలతోనే వారి రోగాలకు చికిత్సలు చేయించుకునేవారు. కరోనా వైరస్‌ వారి ధరి చేరకపోవడం సంతోషకరం. అయితే వారు ఎప్పుడు కూడా గుమికూడిన ప్రదేశాల్లో ఉండరు. ఎవరిని ముట్టుకోరు. షాపుల దగ్గరకు వస్తే దూరంగా ఉంటూ సామాన్లను సేకరిస్తుంటారు. వారికి తెలియకుండానే కరోనా నియమాలను పాటించడం గమనార్హం. గిరిజనుల అలవాట్లు ఇంటికి ఇంటికి మధ్య దూరం ఉంటుంది. ఆ గూడెంలోకి ఎవరు రాకుండా కుక్కలు కాపలా ఉంటాయి. గూడెంలోకి కొత్త వ్యక్తి వస్తే పది అడుగుల దూరం నుంచి మాట్లాడి పంపిస్తారు. గ్రామం చుట్టూ దట్టమైన అడవి, ఒక పక్క వాగు నీరు  ఎలాంటి విద్యుత్‌ సరఫరా, ఫ్యాన్లు, కూలర్లు ఉండవు. ప్రతి ఇంటి వద్ద రాత్రి వేళలో నెగడు (కర్రలతో నిప్పుపెట్టుకొని ) ఉంటారు.   పొద్దుగాల అడవికి పోతం లేవగానే ముఖం కడుక్కొని అడవికి పోతాం. అడవిలో కావాలి్సన ఫలాలను సేకరిస్తాం. తునికిపండ్లు సేకరించి ఇంటికి తెచ్చుకొని పిల్లలకు ఇస్తాం. కట్టెలు కొట్టడం, ఇంటిచుట్టూ శుభ్రం చేస్తుంటాం. మాకు కావాలి్సన ఆహారాన్ని తయారు చేసుకొని ఉదయమే తింటాం. ఆ తర్వాత చిన్న చిన్న పనులు చేసుకొని పడుకుంటాం. మాకు ఈ కరోనా గురించి పెద్దగా తెలవదు.    - అడమయ్య, మామిడిగూడెం కరోనా అంటే భయం లేదు కరోనా వైరస్‌ మాకు వస్తుందనే భయం లేదు. ఎందుకంటే మేము ఎటు పోవడం లేదు. మా గూడేనికి ఎవరు రావడం లేదు. అది మనుషులతోనే వస్తుందని తెలుసు. ఇప్పటి వరకు మా గూడెంలోని ఎవరికి రాలేదు. అందరం మంచిగానే ఉన్నాం. స్కూళ్లు కూడా బంద్‌ కావడంతో సారు కూడా రావడం లేదు. కరోనా వైరస్‌ అంటే పెద్దగా మేము పట్టించుకోవడం లేదు. - మహేశ్, మామిడిగూడెం ముందస్తు అవగాహన  మామిడిగూడెంలోని గిరిజనులకు ముందస్తుగా అవగాహన కల్పించాం. ఎవరు కూడా బయటకు రాకుండా ఉండాలని వివరించాం. గ్రామానికి ఎవరైనా వస్తే వెంటనే పంపించి వేయాలని సూచనలు చేశాం. గ్రామంలో జ్వరం, దగ్గు, జలుబు వంటి లక్షణాలు వస్తే వెంటనే వైద్య సిబ్బందికి సమాచారం ఇవ్వాలని ఫోన్‌ నంబర్లను అందుబాటులో పెట్టాం. గ్రామానికి వచ్చిపోయే వారు ఎవరు కూడా లేకపోవడంతో వారికి కరోనా భయం లేదు. కరోనా వచ్చే అవకాశాలు కూడా తక్కువే.  - ఈసం రామ్మూర్తి, ఏటూరునాగారం సర్పంచ్‌ చదవండి: జనం చస్తుంటే.. జాతర చేస్తారా.. చదవండి: చెరువులో విషప్రయోగం..

ఏటూరునాగారం : కరోనాతో ప్రపంచమంతా గడగడలాడిపోతుంటే ఏటూరునాగారం మండల పరిధిలోని కోయగూడ ఎల్లాపురం పంచాయతీ పరిధిలోని లంబాడీతండా ప్రజలు మాత్రం ప్రశాంత జీవనం గడుపుతున్నారు. వారి చైతన్యమే ఇందుకు కారణమని చెప్పవచ్చు. కట్టుబాట్లు, గ్రామ పెద్దలు తీసుకునే నిర్ణయాలను సమష్టిగా ఆచరిస్తూ.. కోవిడ్‌ మహమ్మారి నుంచి తమను తాము రక్షించుకుంటున్నారు. ప్రతి ఒక్కరూ మాస్క్‌ ధరించాలని, భౌతికదూరం పాటించాలని, చేతులు ఎప్పటికప్పుడు శానిటేషన్‌ చేసుకోవాలని గ్రామ పంచాయతీ సిబ్బంది ప్రజలకు అవగాహన కల్పిస్తున్నారు. అత్యవసర పరిస్థితుల్లో ఈ గ్రామాల నుంచి బయటకి వెళ్లిన వారు ఇంటికి తిరిగి రాగానే వేడినీళ్లతో స్నానం చేయాలని నిర్ణయించారు. రోజూ వేడి చేసిన నీరు తాగుతూ.. వ్యక్తిగత శుభ్రత పాటించడంతో కరోనా తమ గ్రామానికి రాలేదని గ్రామస్తులు ముక్తకంఠంతో చెబుతున్నారు. అన్ని కార్యక్రమాలకు దూరం తండాలోని ప్రజలు ఎవరూ బయటికి వెళ్లకుండా ఉండడం.. తండాకు ఎవరినీ రానీయకుండా ఆపేయడం వంటి చర్యలతో కరోనా నియంత్రణలో ఉందని గ్రామస్తులు తెలిపారు. ఇక్కడి ప్రజలు మూడు దశాబ్దాలుగా పోడు వ్యవసాయంతో పాటు  వరి, మొక్కజొన్న, మిర్చి, పత్తి, వేరుశనగ పండిస్తున్నారు. గ్రామాల్లో కనీస మౌలిక సదుపాయాలు లేకపోవడంతో నిరంతరం ఇబ్బందులు పడుతుంటారు. అయినా చైతన్యంతో స్థానిక పరిస్థితులపై నిరంతరం అప్రమత్తంగా ఉంటున్నారు. కరోనా మొదటి వేవ్‌ ప్రారంభంలోనే ప్రజలంతా ఏకమై కట్టుదిట్టమైన చర్యలు చేపట్టారు. వ్యవసాయంపై ఆధారపడిన కుటుంబాలు కావడంతో నిత్యావసర వస్తువులను పంటల ఆధారంగా ఒకేసారి నిల్వ చేసుకోవడం జరుగుతుంటుంది. ఒక వైపు జీడివాగు, మరోవైపు అటవీప్రాంతం కావడంలో ఆహ్లాదకరమైన వాతావరణం ఉంటుంది. సెకండ్‌ వేవ్‌లో ఒక్క కేసు కూడా లేకపోవడం గమనార్హం.  సంపూర్ణ అవగాహనతోనే.. కరోనా నిబంధనలపై ప్రజలకు పూర్తిగా అవగాహన కల్పించాం. గ్రామంలో 102 కుటుంబాలున్నాయి. గ్రామంలో బ్లీచింగ్, శానిటేషన్‌ పనులు చేయించాం. ట్రైబల్‌ ప్రాంతం కావడంతో సంపూర్ణ మద్దతులో అభివృద్ధి పనులు చేపట్టాం. పారిశుద్ధ్య పనులతోపాటు వ్యక్తిగత మరుగుదొడ్ల నిర్మాణం కూడా చేపట్టడం జరిగింది. దోమల మందు పిచికారీ చేయించడం జరిగింది.  – లక్ష్మి, పంచాయతీ కార్యదర్శి, కోయగూడ ఎల్లాపురం  సమష్టిగా నిర్ణయాలు.. గ్రామంలో అభివృద్ధి పనులకై సమష్టిగా నిర్ణయం తీసుకుంటాం. కరోనా కట్టడికి మాస్క్‌లు, శానిటేషన్‌తోపాటు భౌతికదూరం పాటించే అలవాటు ఉంది. అన్ని కుటుంబాలు వ్యవసాయ పనుల పైనే దృష్టి పెట్టారు. రాత్రి అయితే గానీ ఎవరూ ఎవరికి కలవరు. ఉదయం నుంచి రాత్రి వరకు పొలాల వద్ద, అటవీ ప్రాంతాలకు పనుల నిమిత్తం పోతుంటారు. దాని వల్ల భౌతికదూరం ఏర్పడుతుంది.  – నగేష్, ఉప సర్పంచ్, కోయగూడ ఎల్లాపురం  

ఏటూరునాగారం/చెన్నూరు: మంచిర్యాల జిల్లా చెన్నూరు అటవీ ప్రాంతం నుంచి కవ్వాల్‌ – 4(కె–4) పెద్దపులి ములుగు జిల్లా ఏటూరునాగారం అభయారణ్యంలోకి ప్రవేశించిందనే సమాచారంతో ఉద్యోగులు అన్వేషణలో నిమగ్నమయ్యారు. ఈ మేరకు చెన్నూరు, ఏటూరునాగారం వన్యప్రాణి సిబ్బంది సంయుక్తంగా పులిజాడల కోసం తీవ్రంగా గాలిస్తున్నారు. రెండు నెలల క్రితం చెన్నూరు అటవీ ప్రాంతం నుంచి బుద్దారం అడవుల్లోకి వెళ్లే క్రమంలో కెమెరాకు చివరిసారిగా చిక్కిన పులి ఆ తర్వాత జాడ లేకుండా పోయింది. దీంతో మహారాష్ట్ర, జయశంకర్‌ భూపాలపల్లి, ములుగు అటవీ ప్రాంతాల్లోకి పులి వెళ్లి ఉంటుందనే అంచనాతో ఉద్యోగులు విస్తృతంగా తనిఖీ చేస్తున్నారు. ఏటూరునాగారం అభయారణ్యంలోకి కవ్వాల్‌ –4 (కె–4) పెద్దపులి వచ్చిన జాడల కోసం ముమ్మరంగా తనిఖీలు చేపట్టారు. దట్టమైన అటవీ ప్రాంతం కావడంతో పులి ఇక్కడే ఆవాసం ఏర్పాటు చేసుకుని ఉంటుందని అభిప్రాయపడుతున్నారు.   ఐలాపురం అడవుల్లో ఆనవాళ్లు  ఏటూరునాగారం రేంజ్‌ పరిధిలోని ఐలాపురం అటవీ ప్రాంతంలో పెద్దపులి అడుగులను అటవీశాఖ అధికారులు ఈనెల 8న గుర్తించారు. దీంతో పెద్దపులి కదలికలను తెలుసుకునేందుకు కెమెరాలను కూడా ఏర్పాటు చేయించారు. ఏటూరునాగారం డీఎఫ్‌వో ప్రదీప్‌శెట్టిని వివరణ కోరగా ఆ పాదముద్ర ఇప్పటివరకు ఏ పులిది అనే విషయం నిర్ధారించలేదన్నారు. అలాగే, ఈ ఏడాది జనవరి 29న కూడా కన్నాయిగూడెం మండలంలోని భూపతిపూర్‌ అటవీ ప్రాంతంలో పెద్దపులి అడుగులు కనిపించడంతో అక్కడి సిబ్బంది అప్రమత్తమయ్యారు. గతంలో ఈ ప్రాంతంలో ఎక్కువ సంఖ్యలో పెద్దపులులు ఉండేవని అటవీశాఖ రికార్డుల ద్వారా తెలుస్తోంది. ఇందుకోసం కెమెరాలను ఈ ప్రాంతంలో అమర్చి పరిశీలిస్తున్నారు.   అనుమానాలు అనేకం..  నడుముకు ఉచ్చు బిగిసి నాలుగేళ్లపాటు ఎటూ కదలని కె–4 పులి రెండు నెలల క్రితం ఇతర ప్రాంతానికి ఎలా వెళ్లింది..? ఒకవేళ కె–4 మంచిర్యాల ఫారెస్ట్‌ డివిజన్‌లోని ఇతర ప్రాంతానికి వెళ్తే సీసీ కెమెరాలకు ఎందుకు చిక్కలేదు..? ఈ ప్రాంతంలో దాని పాదముద్రలు ఎందుకు లభ్యం కాలేదు..? అనే అనుమానాలు కలుగుతున్నాయి.   చదవండి: ఆరేళ్లుగా కుమార్తె అస్థికలు భద్రపరిచి.. జాడలేని తల్లి.. పాపం పులి కూనలు..

సాక్షి, ఏటూరునాగారం: కట్టుకున్న భర్త భార్యపై పెట్రోల్‌ పోసి హత్య చేసిన సంఘటన మండల కేంద్రంలోని తీగలవాయి ప్రాంతంలో బుధవారం సాయంత్రం చోటు చేసుకుంది. స్థానికుల కథనం ప్రకారం. ఏటూరునాగారం మండలకేంద్రంలోని తీగలవాయి ప్రాంతానికి చెందిన గునిగంటి ప్రవీణ్‌కుమార్‌తో ఇదే మండలం చిన్నబోయినపల్లి పంచాయతీ హనుమాన్‌ నగర్‌కు చెందిన గొసు్కల జ్యోతి, నర్సయ్య కుమార్తె శిరీషతో రెండేళ్ల క్రితం ప్రేమ వివాహం జరిగింది. స్థానికంగా ఇద్దరూ నివాసం ఉంటున్నారు. వీరికి ఏడాది బాబు కూడా ఉన్నాడు. అనాథగా మారిన బాలుడు   బుధవారం భార్యభర్తల మధ్య గొడవలు రావడంతో భర్త ప్రవీణ్‌కుమార్‌ భార్య శిరీషపై పెట్రోల్‌ పోసి నిప్పంటించగా మంటలు వ్యాప్తి చెంది శిరీష ఒల్లు కాలిపోయింది. ప్రాణాపాయ స్థితిలో ఉన్న శిరీషను భర్త ప్రవీణ్‌ ఏటూరునాగారం సామాజిక ఆస్పత్రికి తరలించాడు. పరిస్థితి విషమించడంతో ఎంజీఎం ఆస్పత్రికి తరలిస్తుండగా మార్గమధ్యలో మృతి చెందినట్లు భర్త ప్రవీణ్‌కుమార్‌ విలేకరులకు తెలిపారు. భార్య మృతదేహాన్ని వదిలేసి పారిపోయి తన నివాసానికి రావడంతో స్థానికులు పోలీసులకు సమాచారం అందించారు. కానిస్టేబుల్‌ కృష్ణయ్య నిందితుడిని అదుపులోకి తీసుకొని పోలీస్‌స్టేషన్‌కు తరలించారు. తల్లి మృతి చెందడంతో దిక్కుతోచని స్థితిలో బాలుడు ఉన్నాడు.

ఏటూరునాగారం: ములుగు జిల్లా ఏటూరునాగారం రేంజ్‌ ఐలాపురం అటవీ ప్రాంతంలో సోమవారం పెద్దపులి అడుగులను అటవీశాఖ అధికారులు గుర్తించారు. ఎఫ్‌ఆర్‌ఓ ఆసిఫ్‌ పులి అడుగు జాడలపై డీఎఫ్‌వో ప్రదీప్‌కుమార్‌శెట్టికి సమాచారం ఇచ్చారు. పులి జాడను కనిపెట్టేందుకు కెమెరా ట్రాప్స్‌ ఏర్పాటు చేయాలని డీఎఫ్‌వో ఆదేశించడంతో పులి సంచరించే నీటి వసతి ఉన్న ప్రాంతాలు, వాగులు, చెలిమలు, కుంటల వద్ద కెమెరాలతో అన్వేషిస్తున్నారు. చదవండి:  కే–4 ఆడ పులి.. దాని జాడేది? 

సాక్షి, హైదరాబాద్‌: ఏటూరునాగారం అటవీ ప్రాంతంలో పులి పాదముద్రలు, కదలికలు రికార్డయ్యాయి. టైగర్‌ రిజర్వ్‌లకు ఆవల కొత్తగా మరో అడవిలో పులి కనిపించడం, అక్కడే ఆవాసం ఏర్పాటు చేసుకునేందుకు ప్రయత్నించడం ఒక శుభపరిణామంగా అటవీశాఖ అధికారులు, పర్యావరణవేత్తలు భావిస్తున్నారు. ఏటూరునాగారంతో పాటు కిన్నెరసాని, పాకాల అటవీ ప్రాంతాల్లోనూ పులులు స్థిరనివాసం ఏర్పరచుకునేందుకు అనువైన పరిస్థితులున్నాయని పర్యావరణవేత్తలు వెల్లడించారు. రాష్ట్రంలో మెరుగైన అటవీ, వన్యప్రాణుల సంరక్షణ, పర్యావరణ పరిరక్షణ చర్యలతో పాటు సువిశాల దట్టమైన అడవి, తగిన సంఖ్యలో వివిధ రకాల జంతువులు, నీటి వనరులు అందుబాటులో ఉండటం పులులు ఆవాసాలు ఏర్పరచుకోవడానికి, వాటి సంఖ్య వృద్ధి చేసుకునేందుకు అనువుగా ఉన్నట్టుగా ఫారెస్ట్‌ డిపార్ట్‌మెంట్‌ వైల్డ్‌ లైఫ్‌ ఓఎస్డీ ఎ.శంకరన్‌ ‘సాక్షి’కి తెలిపారు.  పెద్ద టైగర్‌ రిజర్వ్‌లతో అనువైన పరిస్థితులు..  దేశంలో 50 టైగర్‌ రిజర్వ్‌లుండగా, వాటిలో 2 వేల చ.కి.మీ. పైబడి అటవీ వైశాల్యమున్న 4, 5 అభయారణ్యాల్లో.. ఏపీలోని నాగార్జునసాగర్‌ శ్రీశైలం టైగర్‌ రిజర్వ్‌ (ఎన్‌ఎస్‌టీఆర్‌) 3,728 చ.కి.మీ.లలో, తెలంగాణలోని ఆమ్రాబాద్‌ టైగర్‌ రిజర్వ్‌ (ఏటీఆర్‌) 2,611 చ.కి.మీ, మరో పులుల అభయారణ్యం కవ్వాల్‌ టైగర్‌ రిజర్వ్‌ (కేటీఆర్‌) 2,016 చ.కి.మీ.లలో విస్తరించి ఉన్నాయి. ఒక పులి స్వేచ్ఛగా తిరిగి, తన జీవనాన్ని సాగించేందుకు 50 చ.కి.మీ. అడవి అవసరమవుతుంది. దీనిని బట్టి తెలంగాణలోని ఏటీఆర్, కేటీఆర్‌లతో పాటు ఇతర అనువైన అటవీ ప్రాంతాలు కలుపుకుని 5 వేల చ.కి.మీ. పైగానే దట్టమైన అటవీ విస్తీర్ణం ఉన్నందున ఇక్కడ వంద దాకా పులుల స్థిరనివాసం ఏర్పరుచుకునేందుకు అవకాశముందని శంకరన్‌ తెలిపారు. ఇప్పటివరకు పులులు లేని కిన్నెరసాని, పాకాల, ఏటూరునాగారం వంటి కొత్త ప్రదేశాల్లోనే 5 నుంచి 10 దాకా పులులు జీవనం సాగించేందుకు అనువైన పరిస్థితులున్నాయని ఆయన పేర్కొన్నారు. భవిష్యత్‌లో మనుషుల జీవనాధారం పులుల భద్రత పరిరక్షణతోనే ముడిపడి ఉండబోతోందని, పులులు తమ తమ ఆవాసాల్లో సంతోషంగా జీవిస్తేనే, మనుషులు కూడా ఆనందమయ జీవితాన్ని గడిపే అవకాశం ఉంటుందని శంకరన్‌ వెల్లడించారు. ప్రత్యక్షంగా, పరోక్షంగా ఒక పులి మీద అడవి, పర్యావరణం, ప్రకృతి, జంతుజాలం, గడ్డి భూములు, జీవవైవిధ్యం వంటివి ఆధారపడి ఉన్నందున పులుల మనుగడ అనేది మానవాళి కొనసాగేందుకు కూడా ప్రధానమన్న విషయాన్ని ప్రజలు తెలుసుకోవాల్సిన అవసరముందని చెప్పారు.  తాజా నివేదికపై అభ్యంతరాలు..  రాష్ట్రంలో 26 పులులున్నట్టుగా గతేడాది విడుదలైన టైగర్‌ సెన్సెస్‌ రిపోర్ట్‌–2018లో వెల్లడైంది. మంగళవారం ‘స్టేటస్‌ ఆఫ్‌ టైగర్స్‌ అండ్‌ కోప్రిడేటర్స్‌ అండ్‌ ప్రే ఇన్‌ ఇండియా–2018’పేరిట కేంద్ర అటవీ పర్యావరణ శాఖ విడుదల చేసిన రిపోర్ట్‌లోనూ తెలంగాణలో 26 పులులున్నట్టు పేర్కొన్నారు. అయితే కవ్వాల్‌ టైగర్‌ రిజర్వ్‌లో పులుల సంఖ్య తక్కువగా చూపడం, ఇతర అటవీ ప్రాంతాల్లోనూ పులులకు ఆహారంగా ఉపయోగపడే జంతువుల సంఖ్య తక్కువగా పేర్కొనడం పట్ల హైదరాబాద్‌ టైగర్‌ కన్జర్వేషన్‌ సొసైటీ కో ఫౌండర్‌ ఇమ్రాన్‌ సిద్ధిఖీ అభ్యంతరం తెలిపారు. తాజా నివేదికలో రాష్ట్రంలోని టైగర్‌ రిజర్వ్‌ల్లోని పులుల లెక్కింపు, ఇతర అంశాల పరిశీలన అసమగ్రంగా ఉందని, కొన్ని విషయాల్లో స్పష్టత లోపించిందని తెలిపారు. తెలంగాణలోని 2 పులుల అభయారణ్యాల్లో మెరుగైన పరిస్థితులున్నాయని అందువల్ల గతంలో అంచనా వేసిన 26 కంటే కూడా ఎక్కువగానే పులుల సంఖ్య ఉంటుందనే విశ్వాసాన్ని ‘సాక్షి’తో మాట్లాడుతూ ఇమ్రాన్‌ తెలిపారు. పులుల ఆవాసాల ద్వారా పర్యావరణ పరంగా అందుబాటులోకి వచ్చే సేవలను డబ్బు పరంగా లెక్కిస్తే ఒక్కో పులి రూ.250 కోట్ల విలువ చేస్తుందన్నారు. కోవిడ్‌ సంక్షోభం మనందరికీ ప్రకృతి, పర్యావరణం, వన్యప్రాణులను గౌరవించి, కాపాడుకోవాల్సిన ఆవశ్యకతను ఒక హెచ్చరికగా తెలియజేసిందని చెప్పారు.  పొరుగు రాష్ట్రాల నుంచి వలసలు..  తెలంగాణలోని టైగర్‌ రిజర్వ్‌ల్లో పులుల వృద్ధికి అనుకూల పరిస్థితులతో పాటు పొరుగునే ఉన్న మహారాష్ట్రలోని తిప్పేశ్వర్, తడోబా, ఛత్తీస్‌గఢ్‌లోని ఇంద్రావతి అభయారణ్యాల్లోంచి రాష్ట్రంలోకి పులుల వలసలు పెరుగుతున్నాయి. తడోబా, తిప్పేశ్వర్‌లలో పులుల సంఖ్య గణనీయంగా పెరగడంతో అక్కడ చోటు సరిపోక, ఇంద్రావతిలో సానుకూల వాతావరణం లేక తెలంగాణలో మెరుగైన అటవీ విస్తరణ, వేటకు తగిన సంఖ్యలో జంతువులు, నీటివనరులు వంటివి ఉండటంతో ఇక్కడకు వస్తున్నట్టుగా అటవీ, పర్యావరణ శాఖ అధికారులు చెబుతున్నారు.  

ఏటూరునాగారం: ఛత్తీస్‌గఢ్‌ రాష్ట్రానికి చెందిన మహిళా మవోయిస్టును ములుగు జిల్లా ఏటూరునాగారం పోలీసులు ఆదివారం అరెస్టు చేశారు. స్థానిక సీఐ నాగబాబు దీనికి సంబంధించిన వివరాలు మీడియాకు తెలిపారు. ఎస్సై శ్రీకాంత్‌రెడ్డి సిబ్బందితో ఏటూరునాగారంలో పెట్రోలింగ్‌ నిర్వహిస్తుండగా.. బస్టాండ​ వద్ద ఒక మహిళ అనుమానాస్పదంగా కనిపించడంతో తనిఖీ చేయగా ఆమె వద్ద ఉన్న సంచిలో పేలుడు పదార్థాలు, పేలుళ్లకు వాడే టిఫిన్‌ బాక్స్‌, వైర్లు, విప్లవ సాహిత్యం లభించిందని చెప్పారు. ఆమెను విచారించగా, తన పేరు హేమ్ల జయమతి, భర్త పేరు మడకం ఉంగ, ఛత్తీస్‌గఢ్‌లోని మరియుగొండి మండలం పుల్లుం గ్రామవాసిగా తెలిపిందని సీఐ నాగబాబు వెల్లడించారు. ఈ విషయాన్ని ఛత్తీస్‌గఢ్‌ పోలీసులకు తెలపగా.. ఆమె నేరచరిత్రపై వివరాలు పంపించారని చెప్పారు. మవోయిస్టు పార్టీలో ఆమె 14 ఏళ్ల నుంచి ఆమె పనిచేస్తోందని, 2017లో పామేడు ఏరియా కమిటీలో పనిచేసిన జయమతి పలు ఎన్‌కౌంటర్లలో పాల్గొని తప్పించుకుందని చెప్పారు. 2013 ఏప్రిల్‌, మే మధ్యకాలంలో చిన్నగల్లెం, బానిసగూడ పీఎస్‌​ పరిధిలో పోలీసు పార్టీని చంపడానికి జరిపిన కాల్పుల్లో కీలక పాత్ర పోషించినట్టు తెలిపారు. తాజాగా పామేడు కమిటీ సెక్రటరీ మనీల ఆదేశాల మేరకు ఛత్తీస్‌గఢ్‌ నుంచి ఏటూరునాగారం గుర్త తెలియన వ్యక్తి దగ్గర నుంచి పేలుడు పదార్థాలు, విప్లవ సాహిత్యం తీసుకొని తిరిగి ఛత్తీస్‌గఢ్‌ వెళ్లేందుకు ఏటూరునాగారం బాస్టాండ్‌కు రాగా పట్టుకున్నట్టు తెలిపారు. ఆమెపై కేసు నమోదు చేసి రిమాండ్‌కు పంపుతున్నామని వివరించారు. జయమతిపై ఛత్తీస్‌గఢ్‌ రాష్ట్రం రూ.8 లక్షల రికార్డు ప్రకటించిందని చెప్పారు.

సాక్షి, ఏటూరునాగారం: గిరిజన యువతీ, యువకులను వృత్తి నైపుణ్యులుగా తీర్చిదిద్ది ఉపాధి కల్పించాలనే ఆలోచనతో ఐటీడీఏ ఆధ్వర్యాన అనేక కార్యక్రమాలు నిర్వహిస్తుంటారు. ఇందులో భాగంగా 2019 సెప్టెంబర్‌లో జీఎన్‌ఎం, డీఓటీ, డీఎంఎల్‌టీ కోర్సుల కోసం దరఖాస్తుల ఆహ్వానించారు. దరఖాస్తుదారులనుంచి 58 మందిని ఐటీడీఏ అధికారులు అక్టోబర్‌ 5న ఎంపిక చేశారు. ఇందులో 40 మందిని హైదరాబాద్‌లోని గాంధీ, ఉస్మానియా ఆస్పత్రికి జీఎన్‌ఎం, డీఎంఎల్‌టీ కోర్సుల్లో శిక్షణ నిమిత్తం పంపించారు. మిగతా వారిని వరంగల్, కరీనంగర్‌ వైద్య కోర్సులకు పంపించారు. అయితే హైదరాబాద్‌లోని విద్యానగర్‌లోని గిరిజన హాస్టల్స్‌లో నాలుగు నెలలుగా 40 మంది విద్యార్థులు ఉంటున్నారు. వీరికి  భోజనం, వసతితోపాటు ఉపకార వేతనాలు, హాస్టల్‌కు మెస్‌చార్జీలు కూడా అందించాల్సి ఉంది. నాలుగు నెలల నుంచి ఇవ్వకపోవడంతో అక్కడి నిర్వాహకులు విద్యార్థులను చిన్న చూపు చూడడం, అందులో ఉండే డిగ్రీ విద్యార్థులకు మాంసం భోజనాలు పెట్టి వీరికి పెట్టకపోవడంతో చిన్నబుచ్చుకున్న విద్యార్థులు చదువు కూడా ఒంటబట్టని పరిస్థితి నెలకొంది. అయితే వారికి విద్యార్థులకు కావాల్సిన భోజన బిల్లులను ఐటీడీఏ నుంచి రాకపోవడంతో అక్కడున్న నిర్వాహకులు భోజనం, పాలు, టిఫిన్‌ వడ్డించేందుకు నిరాకరిస్తున్నారు. దీంతో విద్యార్థులు పస్తులుండాల్సిన దుస్థితి నెలకొంది. మెస్‌చార్జీలు ఇస్తేగాని సరైన భోజనం పెట్టని పరిస్థితి ఉందని విద్యార్థులు వాపోతున్నారు. అంతేకాకుండా ఉపకార వేతనాలు లేక హాస్టల్స్‌ నుంచి గాంధీ, ఉస్మానియా ఆస్పత్రులకు రోజు పోయి రావడానికి బస్సు చార్జీలు తడిసిమోపెడు అవుతున్నాయి. ఇంటి వద్ద నుంచి తెచ్చుకున్న డబ్బులు కూడా అయిపోయాయి. దీంతో బస్‌పాస్‌లు కల్పించాలని అధికారులను వేడుకున్నా ఫలితం లేకుండా పోయింది. ఏమిచేయలేక ఇంటి దగ్గర నుంచి డబ్బులు అందక కాలేజీకి పోలేని పరిస్థితి నెలకొంది. ఇటు మెస్‌చార్జీలు చెల్లించక, ఉపకార వేతనాలు అందక విద్యార్థులు కంటి నిండ నిద్ర, కడుపు తిండిలేకుండానే రోజులు వెళ్లదీస్తున్నారు. వృత్తి కోర్సులను నేర్పించడానికి తీసుకెళ్లిన అధికారులు విద్యార్థులు అలాన పాలన చూసుకోకుండా చేతులు దులుపుకున్నారనే ఆరోపణలు వినిపిస్తున్నాయి. తల్లిదండ్రులు, పెరిగిన ఊరును వదిలేసి పట్టణంలో ఉంటున్న వారి పరిస్థితి ఆగమ్యగోచరంగా మారింది.  సమస్యను పరిష్కరించాలని వినతి  ఐటీడీఏ అధికారులు సకాలంలో బిల్లులు చెల్లించి మెస్‌చార్జీలు ఇస్తేగానీ భోజనం పెట్టే పరిస్థితి లేదని విద్యార్థినులు వాపోతున్నారు. సోమవారం  ఐటీడీఏ పీఓ హనుమంత్‌ కె జెండగేకు విన్నవించి ఆవేదన వ్యక్తం చేశారు. అంతేకాకుండా ఉపకార వేతనాలు, బస్‌పాస్, పుస్తకాలు, యూనిఫాం, సరైన వసతులు కల్పించాలని పీఓకు మొరపెట్టుకున్నారు. స్పందించిన  పీఓ ఏపీఓ వసంతరావు ద్వారా హైదరాబాద్‌లోని హాస్టల్‌ వార్డెన్‌కు ఫోన్‌లో మాట్లాడమని ఆదేశించారు. ఐటీడీఏ ద్వారా బిల్లులను అందించడానికి చర్యలు చేపడుతున్నామని, మా పిల్లలకు ఎలాంటి ఇబ్బంది లేకుండా చూడాలని ఏపీఓ వార్డెన్‌ను ఫోన్‌లో కోరారు.  

సాక్షి, ఏటూరునాగారం: మావోయిస్టు అమరుల సంస్మరణ వారోత్సవాల నేపథ్యంలో ఏజెన్సీలోని టీఆర్‌ఎస్‌ నాయకుల్లో గుబులు పుట్టింది. మావోయిస్టు నక్సల్స్‌ టీఆర్‌ఎస్‌ నాయకులను టార్గెట్‌ చేస్తున్నారని విశ్వసనీయ సమాచారంతో పోలీసులు ఒక్కసారిగా టీఆర్‌ఎస్‌ నాయకులు, ప్రజాప్రతినిధులను అప్రమత్తం చేశారు. మారుమూల ప్రాంతాల్లో ఉన్న టీఆర్‌ఎస్‌ నాయకులు వెంటనే సురక్షిత ప్రాంతాలకు తరలివెళ్లాలని ఆదేశాలు జారీ చేశారు. జయశంకర్‌ భూపాలపల్లి, ములుగు జిల్లాలోని ఏటూరునాగారం, మంగపేట, తాడ్వాయి, కన్నాయిగూడెం, వాజేడు, వెంకటాపురం(కే) మండలాలకు చెందిన అధికార టీఆర్‌ఎస్‌ పార్టీ నాయకులను సురిక్షత ప్రాంతాలకు తరలివెళ్లాలని పోలీసులు ఆదేశాలు ఇవ్వడంతో సేఫ్‌ జోన్‌లోకి వెళ్లినట్లు సమాచారం. చిట్యాల, రేగొండ, టేకుమట్ల, పలిమల వంటి ప్రాంతాల్లోని టీఆర్‌ఎస్‌ నాయకులతోపాటు టార్గెట్‌లో ఉన్న వ్యక్తులు ఎవరు కూడా గ్రామాల్లో ఉండొద్దని రాష్ట్ర స్థాయి పోలీసు అధికారులను స్థానిక అధికారులకు ఆదేశాలు అందాయి. దీంతో పోలీసులు వారికి సెల్‌ఫోన్, మేసేజ్‌తోపాటు, లిఖిత పూర్వకంగా కూడా ముందస్తు హెచ్చరికలను అందజేశారు. పూర్వపు ఘటనలు పునరావృతం కాకుండా ఉండాలనే ఉద్దేశంతో పోలీసులు నాయకులను, టార్గెట్లను అప్రమత్తం చేస్తూ వారికి రక్షణ కల్పిస్తున్నారు. జూలై 12న కొత్తగూడెం జిల్లా చర్ల మండల పరిధిలోని బేస్తకొత్తూరుకు చెందిన పెదమిడిసిలేరు ఎంపీటీసీ సభ్యుడు నల్లూరి శ్రీనివాసరావును ఈనెల 8న మావోయిస్టులు అపహరించుకు తీసుకెళ్లారన్నారు. ఈనెల 12న ఛత్తీస్‌గఢ్‌లోని పుట్టపాడుకు వెళ్లే మార్గంలో శ్రీనివాసరావు మృతదేహాన్ని ఆయన బైక్‌ను వదిలిపెట్టి వెళ్లారు. అక్కడే అతడిని హతమార్చారు. అయన టీఆర్‌ఎస్‌ పార్టీ కావడంతో తెలంగాణ రాష్ట్రంలోని ఏజెన్సీ ప్రాంతాల్లోని నక్సల్స్‌ ప్రభావిత ప్రాంతాలను గుర్తించి వాటిని ప్రత్యేక దృష్టి సారించారు. ఈమేరకు రాష్ట్ర ప్రభుత్వం, పోలీసులు సవాల్‌గా తీసుకొని ప్రత్యేక చర్యలను ముమ్మరం చేశారు. అడవుల్లో కూంబింగ్‌తోపాటు అనుమానితులను అదుపులోకి తీసుకోవడం, గొత్తికోయగూడెంల్లో ఆకస్మిక తనికీలు, కార్డెన్‌ సెర్చ్‌ కార్యక్రమాలను చేపడుతున్నారు. అంతర్రాష్ట్ర ప్రధాన రోడ్డు అయిన ఛత్తీస్‌గఢ్‌– హైదరాబాద్‌ ప్రాంతాల మధ్యలోని ఏటూరునాగారం వై జంక్షన్, ముల్లకట్ట బ్రిడ్జి వద్ద పోలీసులు గట్టి నిఘా వేసి తనిఖీలను తీవ్ర స్థాయిలో చేపడుతున్నారు. ఏజెన్సీలో పోలీసుల తనిఖీలు, మావోయిస్టుల కదలికలతో ప్రజలు భయాందోళనలో గడుపుతున్నారు. 

సాక్షి, ఏటూరునాగారం(ములుగు): ప్రజలకు భద్రత కల్పించడంతోపాటు వారిని  రక్షించాల్సిన బాధ్యత పోలీసులదే. పోలీసులు బాధ్యతను సక్రమంగా నిర్వహించినప్పుడే వారిపై ప్రజలకు నమ్మకం ఉంటుంది. నీళ్లలోకి దూకి ఆత్మహత్య చేసుకోవాలనుకున్న ఓ యువతిని పోలీసులు సకాలంలో స్పందించి.. కాపాడారు. నీళ్లలో మునిగిపోతున్న యువతిని వెలికితీసి.. ప్రాణాలు కాపాడి నిజమైన పోలీస్‌ అనిపించున్నాడు వాజేడు ఎస్‌ఐ కృష్ణప్రసాద్‌. మండలంలోని తాళ్ళగడ్డ ప్రాంతానికి  చెందిన మహిళ పర్వతం మల్లేశ్వరీ.. ముల్లకట్ట బ్రిడ్జ్‌ పై నుంచి నీళ్లలోకి దూకి ఆత్మహత్య ప్రయత్రం చేసింది. స్థానికులు పోలీసులకు సమాచారం అందివ్వడంతో సంఘటన స్థలానికి చేరుకున్నారు. పరిస్థితిని గమనించిన వాజేడు ఎస్‌ఐ కృష్ణప్రసాద్‌తోపాటు అక్కడే ఉన్న ఓ వాహనదారుడు సకాలంలో స్పందించి ఆమెను కాపాడారు.  ఇటీవలే కరీంనగర్‌లోని  జమ్మికుంట పట్టణంలో ఎస్‌ఐ సృజన్‌ రెడ్డి సాహసోపేతంగా బావిలోకి దిగి ఇద్దరిని కాపాడిన విషయం తెలిసిందే. ఈ అపూరూప దృశ్యాన్ని మరవక ముందే మరో సంఘటన చోటు చేసుకోవడం విశేషం. 

సాక్షి, వరంగల్‌ : ములుగు జిల్లా ఎమ్మెల్యే సీతక్క కారు ఓ ద్విచక్ర వాహనాన్ని ఢీకొన్న ఘటనలో ఓ చిన్నారి మృతి చెందింది. ములుగు జిల్లా ఏటూరు నాగారం శివారులోని జీడివాగు సమీపంలో ఈ ప్రమాదం జరిగింది. దంపతులు తమ చిన్నారిని తీసుకొని బైక్‌పై వెళ్తుండగా జీడివాగు సమీపంలో ఎదురుగా దూసుకొచ్చిన ఎమ్మెల్యే కారు ఢీకొట్టింది. ఈ ఘటనలో బైక్‌పై ఉన్న చిన్నారి అక్కడికక్కడే మృతి చెందగా, దంపతులు గాయపడ్డారు. అయితే పాప తండ్రి పరిస్థితి విషమంగా ఉంది.  దంపతులను చికిత్స నిమిత్తం ఏటూరు నాగారం ప్రభుత్వ ఆస్పత్రికి తరలించారు. పూర్తి వివరాలు తెలియాల్సి ఉంది. సంబంధిత వీడియో కోసం ఇక్కడ క్లిక్ చేయండి : ఎమ్మెల్యే సీతక్క వాహనం ఢీకొని చిన్నారి మృతి

సాక్షి, ఏటూరునాగారం: వస్త్ర దుకాణంలో దొంగలు చొరబడి రూ. 50 వేల విలువైన దుస్తులు, రూ. 63 వేల నగదు ఎత్తుకెళ్లిన సంఘటన ఏటూరునాగారం మండల కేంద్రంలోని బస్టాండ్‌ సమీపంలో శుక్రవారం రాత్రి చోటు చేసుకుంది.  మండల కేంద్రంలో ఆర్‌ఆర్‌ రెడీమేడ్‌ షాపును మాచర్ల సారంగపాణి నడిపించుకుంటున్నారు. రోజువారిలాగానే షాపుకు తాళాలు వేసి ఇంటికి వెళ్లాడు. శనివారం ఉదయం షాపు తెరిచి లోనికి వెళ్లి చూడగా వెనుక ఉన్న బాత్‌ రూమ్‌ వెంటిలేటర్, షాపు వెనుకభాగంలో ఉన్న తలుపును గడ్డపారతో పలుగగొట్టి లోనికి చొరబడినట్లు గుర్తించానని షాపు యజమాని తెలిపాడు. బట్టల షాపులో విలువైన రెడీమెడ్‌ పాయింట్లు, టీషర్టులతో పాటు షాపులో రూ. 63 వేల నగదును ఎత్తుకెళ్లినట్లు బాధితుడు వెల్లడించారు. దొంగతనం విషయంపై స్థానిక పోలీస్‌స్టేషన్‌లో ఫిర్యాదు చేయగా పోలీసులు వచ్చి పరిశీలించినట్లు తెలిపాడు.  సీసీ పుటేజీలో అనవాళ్లు ఆర్‌ఆర్‌ రెడీమేడ్‌ షాపు పక్కనే ఉన్న స్వాతి జ్యూవెల్లరి నగల దుకాణం వెనుకాల అమర్చిన సీసీ కెమెరాలో దొంగల ముఖాలు కనిపించాయి. ఇద్దరు వ్యక్తులు వచ్చి ఆ షాపు వెనుకాల రెక్కి నిర్వహించినట్లు తెలుస్తోంది. ఒకరు లోనికి చొరబడగా మరోకరు కాపలా ఉన్నట్లు తెలుస్తోంది. ముఖం పూర్తిగా కనబడకపోవడంతో ఆ వ్యక్తి ఎవరు అనేది తెలియాల్సి ఉంది. సీసీ పుటేజీలో రికార్డు అయిన వీడియోను  పోలీసులకు అందజేయనున్నట్లు షా పు యజమాని తెలిపారు. అంతేకాకుండా పోలీసులు ఇటీవల గ్రామంలో ఏర్పాటు చేసిన సీసీ కెమెరాల్లోని పుటేజీలను పోలీసులు పరిశీలిస్తున్నారు.  మానుకోటలోని ఓ ఇంట్లో దొంగతనం మానుకోట పట్టణంలోని నర్సంపేట బైపాస్‌రోడ్డులోగల  హోలియదాసరి బజార్‌లో నివాసం ఉండే వట్టం ఉపేందర్, భాగ్యమ్మ నివాసంలో శుక్రవారం రాత్రి చోరీ జరిగింది. మానుకోట రూరల్, టౌన్‌ ఇన్‌చార్జి ఎస్సై పత్తిపాక జితేందర్‌ కథనం ప్రకారం...మానుకోట పట్టణంలోని నర్సంపేట బైపాస్‌రోడ్డులోగల  హోలియదాసరి బజార్‌లో నివాసం ఉండే వట్టం భాగ్యమ్మ వృత్తిరీత్యా ముత్యాలమ్మగూడెం ఏహెచ్‌ఎస్‌లో ఉపాధ్యాయురాలు.   ఆమె ఎన్నికల విధుల్లో భాగంగా వర్ధన్నపేటకు గురువారం సాయంత్రం వెళ్లారు. ఆమె భర్త వట్టం ఉపేందర్‌ కొత్తగూడ మండలంలోని గోపాలపురంకు ఓటు వేయడం కోసం వెళ్లారు. ఆయన శుక్రవారం రాత్రి ఇంటికి వచ్చి చూసే సరికి ఇంట్లోని సామానులు చిందరవందరగా పడేసి ఉన్నాయి.  బెడ్‌రూంలోకి వెళ్లి చూసేసరికి  బీరువా తలుపులు పగులగొట్టి కనిపించాయి. సమాచారం అందుకున్న టౌన్‌ సీఐ ఎస్‌.రవికుమార్, సీసీఎస్‌ సీఐ ఎన్‌.వెంకటేశ్వర్లు, క్లూస్‌టీం బృందం ఘటనా స్థలానికి వచ్చి పరిశీలించారు

ఏటూరునాగారం వరంగల్‌ : వర్షాకాలం కావడంతో సీజనల్‌ వ్యాధులతో ఆస్పత్రికి వచ్చే రోగుల తాకిడి ఎక్కువగా ఉంటుంది.. వైద్యులు అప్రమత్తంగా ఉండాలని కలెక్టర్‌ అమయ్‌కుమార్‌ ఆదేశించారు. ఏటూరునాగారం సామాజిక ఆస్పత్రిని ఆయన సోమవారం ఆకస్మిక సందర్శించారు. మొదట ఆస్పత్రిలోకి వెళ్లిన ఆయన ఈసీజీ తీయించుకున్నారు. అనంతరం ఓపీ నమోదు, రోగులకు అందుతున్న సేవల గురించి వైద్యాధికారులను అడిగి తెలుసుకున్నారు. సిబ్బంది పనితీరు, మందుల కొరత తదితర విషయాలపై ఆరా తీశారు. నిత్యం ఓపీ 500ల నుంచి 800 వరకు నమోదవుతున్నట్లు వైద్యులు కలెక్టర్‌కు వివరించారు.  వేతనాలు రావడంలేదు.. తమకు ఐదు నెలల నుంచి వేతనాలు రావడం లేదని ఆస్పత్రిలో కాంట్రాక్టు పద్ధతిన పనిచేస్తున్న వైద్యులు, సిబ్బంది కలెక్టర్‌ దృష్టికి తీసుకెళ్లగా బడ్జెట్‌ రాలేదని వచ్చాక ఇస్తామన్నారు. లేదంటే తన నిధుల నుంచి అందజేస్తానని హామీ ఇచ్చారు. ఈ సందర్భంగా ఆస్పత్రికి వచ్చిన కన్నాయిగూడెం మండలం బుట్టాయిగూడెం గ్రామానికి చెందిన సునారికాని సమ్మక్క తనకు డబుల్‌ బెడ్‌రూం ఇల్లు ఇప్పించాలని, పింఛన్‌ రావడంలేదని చెప్పడంతో ఆమె ఆదార్‌కార్డును పరిశీలించిన కలెక్టర్‌ వయస్సు 65 సంవత్సరాలు ఉంటేనే పింఛన్‌ వస్తుందని చెప్పారు. డబుల్‌ బెడ్రూం ఇంటి కోసం ప్రపోజల్‌ పెట్టాలని తహసీల్దార్‌ నరేందర్‌ను ఆదేశించారు. కలెక్టర్‌ వెంట ఐటీడీఏ పీఓ చక్రధర్‌రావు, ట్రైబల్‌ వెల్ఫేర్‌ ఈఈ శంకర్‌రావు, ఏఈఈ మధుకర్, వీఆర్‌ఓలు పాండ్య, రాములు తదితరులు ఉన్నారు.


 
 
 నందిగామ రూరల్‌ :  గ్రామంలో బెల్టు షాపులను ఎత్తివేయాలని డిమాండ్‌ చేస్తూ ఏటూరు గ్రామ మహిళలు నందిగామ ఎక్సైజ్‌ శాఖ కార్యాలయం ఎదుట శనివారం ధర్నా నిర్వహించారు. అధికారులు చర్యలు తీసుకునే వారుకు ఆందోళన కొనసాగిస్తామని హెచ్చరించారు. గతంలో ఆందోళన ఫలితంగా మూడు నెలలపాటు బెల్టు షాపులు మూసివేశారని, అయితే, ఇటీవల మళ్లీ బెల్టు షాపులు తిరిగి ఏర్పాటు చేయడంపై మండపడ్డారు. విద్యార్థులు కూడా మద్యానికి బానిసలవుతున్నారని వాపోయారు. మహిళల ఆందోళనకు సీపీఎం నాయకుడు సయ్యద్‌ ఖాసిం, కటారపు గోపాల్‌ మద్దతు తెలిపారు. విషయం తెలుసుకున్న అధికారులు మధ్యాహ్నం 1.30 గంటల సమయంలో ఎక్సైజ్‌ సీఐ సాయిస్వరూప్‌ ఆధ్వర్యంలో సిబ్బంది గ్రామానికి వెళ్లారు. వారు తిరిగి కార్యాలయానికి వచ్చే వరకు మహిళలు ఆందోళన కొనసాగిస్తూనే ఉన్నారు. గ్రామంలోని బెల్టు షాపులను పూర్తిగా మూసివేయించామని, ఇకపై గ్రామంలో బెల్టు షాపు నడవకుండా చూసుకుంటామని హామీ ఇవ్వడంతో ఆందోళన విరమించారు. డ్వాక్రా సంఘాల లీడర్లు శీలం నాగేంద్రం, కామా అరుణకుమారి, నేలపాటి మరియమ్మ, సుజాత, తేరేజమ్మ, దుర్గ, మరియమ్మ పాల్గొన్నారు.
  


 * కవలలు జననం.. ఒకరు మృతి.. చికిత్స పొందుతున్న మరొకరు
 * రోడ్డుమార్గం లేక ఆస్పత్రికి చేరుకోలేకపోయిన గర్భిణి
 ఏటూరునాగారం: పురిటి నొప్పులతో బాధపడుతున్న గర్భిణిని ఆస్పత్రికి తీసుకెళ్లడానికి రోడ్డుమార్గం లేక కావడిపై మోసుకొస్తుండగా.. నడిరోడ్డుపైనే ఓ చింతచెట్టు కింద ప్రసవించిన ఘటన మంగళవారం జరిగింది. వరంగల్ జిల్లా ఏటూరునాగారం మండలం శివాపురం పరిధిలోని లింగాపురం గొత్తికోయగూడేనికి చెందిన మాడవి పోసమ్మకు మంగళవారం పురిటి నొప్పులు వచ్చాయి. గూడేనికి సరైన రోడ్డు లేక 108, ఇతర వాహనాలు కానీ వచ్చే పరిస్థితి లేదు.
 
 దీంతో భర్త భద్రయ్యతో పాటు మరికొందరు మంచానికి తాళ్లు కట్టి పోసమ్మను మోసుకుం టూ 2 కి.మీ. దూరం వచ్చారు. అప్పటికే ఓ ఆటోను పిలిపించారు. కానీ, ఆ ఆటో కూడా మార్గమధ్యలో బురదలో కూరుకుపోయింది. అంతా కలసి ఆటోను బయటకు లాగినా.. పోసమ్మకు నొప్పులు ఎక్కువ కావడంతో గోగుపల్లిలోని ఓ చింత చెట్టుకింద నిలిపివేశారు. దీంతో ఆ చెట్టు కిందే స్థానిక మహిళలంతా కలసి చుట్టూ చీరలు కట్టి.. తమకు తెలిసిన విధంగా పురుడు పోశారు.
 
 పోసమ్మకు ఇద్దరు మగ శిశువులు జన్మించగా, అందులో ఒక బాబు మృతి చెందాడు. గోగుపల్లి సబ్‌సెంటర్ ఏఎన్ ఎం ధనలక్ష్మీ ఈ నెల మొదటి వారంలోనే గొత్తికోయగూడేనికి వెళ్లి పోసమ్మను సామాజిక ఆస్పత్రిలో చేరాలని సూచించింది. అరుునా, ఆమె వెళ్లకపోవడంతో ఈ పరిస్థితి తలెత్తింది. పోసమ్మకు రక్తస్రావం అవుతుండడంతో గోగుపల్లి నుంచి 108లో ఆస్పత్రికి తరలించారు. అనార్యోగంతో ఉన్న మరో బిడ్డను పిల్లల ఆస్పత్రికి తరలించగా, ఐసీయూలో చికిత్స అందిస్తున్నారు.


 ఏటూరునాగారం(వరంగల్): వేగంగా వెళ్తున్న కారు అదుపుతప్పి రోడ్డు పక్కన నడుచుకుంటూ వెళ్తున్న వ్యక్తి పైకి దూసుకెళ్లిన ఘటనలో వ్యక్తి అక్కడికక్కడే మృతిచెందాడు. ఈ సంఘటన వరంగల్ జిల్లా ఏటూరు నాగారంలో ఆదివారం చోటుచేసుకుంది. స్థానికంగా నివాసముంటున్న బాస నర్సయ్య(40) రోడ్డు పక్కనుంచి నడుచుకుంటూ వెళ్తుండగా.. మితిమీరిన వేగంతో వచ్చిన కారు అతన్ని ఢీకొట్టింది.
 
 దీంతో తీవ్ర గాయాలపాలైన నర్సయ్య అక్కడికక్కడే మృతిచెందాడు. సమాచారం అందుకున్న పోలీసులు కేసు నమోదు చేసుకొని దర్యాప్తు చేస్తున్నారు.


 
 నాలుగు రేంజ్‌లకు కలిపి ఏర్పాటు
 
 రక్షణ కోసం మరిన్ని చర్యలు
 
 ఏటూరునాగారం : ఏటూరునాగారంలో వన్యప్రాణి విభాగం జిల్లా డివిజనల్‌ కార్యాలయం ఏర్పాటు చేసేందుకు సన్నాహాలు చేస్తున్నారు. జిల్లాల పునర్విభజనలో భాగంగా ఏటూరునాగారాన్ని వన్యప్రాణి, అడవుల రక్షణ కోసం ప్రత్యేక హోదా కలిగిన అధికారితోపాటు కార్యాలయాన్ని కూడా ఏర్పాటు చేయనున్నారు. గతంలో ఏటూరునాగారంలో ఉన్న అటవీశాఖ టెరిటోరియల్‌ రేంజ్‌ ఆఫీస్, వన్యప్రాణి రేంజ్‌ ఆఫీస్, పస్రా, తాడ్వాయి రేంజ్‌ కార్యాలయాలు వరంగల్‌ నార్త్‌ డీఎఫ్‌ఓ కింద పనిచేసేవి. ఇప్పుడు జయశంకర్‌ జిల్లా ఏర్పడుతుండటంతో ఏటూరునాగారాన్ని ప్రత్యేక డివిజన్‌గా ఏర్పాటు చేసి ఫారెస్ట్‌ డిస్టిక్ట్ర్‌ ఆఫీసర్‌ (ఎఫ్‌డీఓ) అధికారిని కూడా నియమించనున్నారు. దీంతో ఈ కార్యాలయం పరిధిలో తాడ్వాయి, ఏటూరునాగారం, ఆకులవారి ఘ ణపురం, పస్రాలోని రేంజ్‌ అధికారులు పనిచేయాల్సి ఉంటుంది. ఏజెన్సీలో వన్యప్రాణి, టెరిటోరియల్‌ అనే రెండు శాఖలు అటవీశాఖ పరిధిలో ఉండేవి. నూతన జిల్లా పరిధిలోని ఏ జెన్సీ మండలాలైన తాడ్వాయి, పస్రా, ఏటూరునాగారంను వన్యప్రాణి విభాగంగా ప్రకటించనున్నారు. దీనివల్ల ఏజెన్సీలోని అడవులతోపాటు జంతువుల సంరక్షణ కూడా ఉంటుందని ఈ మార్పులు చేపట్టారు. నలుగురు రేంజ్‌ అధికారులు, ఒక సబ్‌ డీఎఫ్‌ఓ, ఒక ఎఫ్‌డీఓ అధికారులు ఉంటారని వెల్లడించారు.
  
 పటిష్టంగా అమలు కానున్న అటవీ చట్టాలు
 ప్రస్తుత రేంజ్‌ అంతా వన్యప్రాణి విభాగం పరి ధిలోకి రాగా అటవీశాఖ చట్టాలు పట్టిష్టంగా అమలు కానున్నాయి. జంతువుల సంఖ్య 15 సంవత్సరాల్లో ఘణనీయంగా తగ్గింది. పులు లు, సింహాలు, దుప్పి, జింక, కొండ గొర్రెలు, ఎలుగుబంటి, మెకం వంటి వన్యప్రాణులు కానరాకుండా పోతున్నాయి. ప్రధాన కార్యాలయం స్థానికంగా ఉండడం వల్ల అధికారు లు, సిబ్బంది స్థానికంగా ఉంటూ సంరక్షణకు ప్రత్యేక శ్రద్ధ చూపే అవకాశాలు మెండుగా ఉన్నాయి. ప్రధాన కార్యాలయం కోసం ఇప్పటికే చర్యలు చేపట్టారు. గతంలో ఉన్న భవనాలకు మరింత సౌకర్యాలు పెంచే దిశగా అధికారులు అడుగులు వేస్తున్నారు.  


 
 ఎంసీపీఐ(యూ) జిల్లా కమిటీ డిమాండ్‌
 
 న్యూశాయంపేట : ఏటూరునాగారం కేంద్రంగా గిరిజన అటానమస్‌ జిల్లా ఏర్పాటు చేయాలని ఎంసీపీఐ(ఐక్య) జిల్లా కార్యదర్శి గాదగోని రవి ప్రభుత్వాన్ని డిమాండ్‌ చేశారు. హన్మకొండ ప్రెస్‌క్లబ్‌లో శనివారం ఏర్పాటు చేసిన విలేకరుల సమావేశంలో ఆయన మాట్లాడారు. వరంగల్‌ చారిత్రక నేపథ్యాన్ని విస్మరించి వరంగల్, హన్మకొండ జిల్లాలుగా విడదీయాలనుకోవడాన్ని వ్యతిరేకిస్తున్నట్లు చెప్పారు.
  
 అటవీ చట్టాల ప్రకారం షెడ్యూల్‌ ప్రాం తాలను స్వయం పాలిత జిల్లాలుగా ఏర్పాటు చేయడానికి రాజ్యాంగం నిర్దేశిస్తోందన్నారు. చట్టాలను తుంగలో తొక్కుతూ ఇటు భూపాలపల్లి, మహబూబాబాద్‌ జిల్లాల పేరుతో ఆదివాసీ గిరిజన జాతిని చీల్చుతస్తున్నారని తెలిపారు. ప్రతిపాదిత భూపాలపల్లి జిల్లాను రద్దు చేసి ఏటూరునాగారం కేంద్రంగా అటానమస్‌ జిల్లాగా ఏర్పాటు చేయాలని కోరారు. జనగామను కూడా జిల్లా చేయాలన్నారు. ఈ సమావేశంలో నాయకులు గోనె కుమారస్వామి, పరికరాల భూమయ్య, మంద రవి, ఎగ్గని మల్లికార్జున్‌ పాల్గొన్నారు. 


 ఖిలా వరంగల్‌ :  ఏటూరునాగారం కేంద్రంగా ఆదివాసీ స్వయంపాలిత జిల్లాను ఏర్పాటు చేయాలని ఎంసీపీఐ(యూ) జిల్లా కార్యదర్శి గాదగోని రవి డిమాండ్‌ చేశారు. వరంగల్‌ అండర్‌ బ్రిడ్జి వద్ద గల ఎంసీపీఐ(యూ) జిల్లా కార్యాలయంలో జరిగిన రౌండ్‌ టేబుల్‌ సమావేశంలో ఆయన మాట్లాడారు. ఏటూరునాగారం, తాడ్వాయి, గోవిందరావుపేట, వెంకటాపురం, ములుగు కొత్తగూడ, గూడూరు, ఖానాపురం, నల్లబెల్లి, భూపాలపల్లి, గణపురం, మహాముత్తారం మహదేవ్‌పూర్‌ ప్రాంతాలను కలిపి ఆదివాసీ జిల్లా ఏర్పాటు చేయాలని డిమాండ్‌ చేశారు.
  
 సీపీఎం జిల్లా కార్యదర్శివర్గ సభ్యుడు గాదె ప్రభాకర్‌రెడ్డి, సీసీఐ నాయకులు మేకల రవి, కత్తి నాగార్జున, న్యూడెమోక్రసీ నాయకులు పసునూటి రాజు, ఆరెల్లి కృష్ణ, ఎంసీపీఐ(యూ) నేతలు గోనె కుమారస్వామి, హంసారెడ్డి, నాగెల్లి కొముర య్య, రవి, రాజమౌళి, మల్లికార్జున్, రవీందర్, బాబురావు పాల్గొన్నారు. 


 
 సాయం కోసం ఎదురుచూస్తున్న నిరుపేద క్రీడాకారులు 
 
 ఏటూరునాగారం : నిరుపేద కుటుంబంలో పుట్టిన క్రీడా కుసుమాలకు ఆర్థిక ఇబ్బందులు ఎదురయ్యాయి. పల్లె నుంచి పొరుగు దేశంలో జరిగే ప్రతిష్టాత్మక పోటీలకు ఎంపికైనప్పటికీ అక్కడికి వెళ్లే స్తోమత లేక ఆందోళన చెందుతున్నారు. దాతలు చేయూతనిస్తే పోటీల్లో సత్తా చాటుతామంటున్నారు. మండల కేంద్రానికి చెందిన క్రికెట్‌ క్రీడాకారులు సయ్యద్‌ రియాజ్, ఎండి. ఖయూమ్‌ మహారాష్ట్రలోని ఔరంగబాద్‌లో ఈనెల 13 నుంచి 17 వరకు జరిగిన అండర్‌ –19 క్రికెట్‌ ఫస్ట్‌ యూత్‌ గేమ్స్‌ జాతీయ స్థాయి పోటీలలో తెలంగాణ జట్టు తర ఫున పాల్గొని ప్రతిభ కనబర్చారు. దీంతో నిర్వాహకులు వీరిని నేపాల్‌లో ఈ నెల 25 నుంచి ఆగస్టు 4 వరకు జరిగే సౌత్‌ ఏషియన్‌ క్రికెట్‌ పోటీలకు భాతర జట్టు తరపున ఎంపిక చేశారు. అయితే నిరుపేద కుటుంబాలకు చెందిన ఇద్దరికి నేపాల్‌ వెళ్లేందుకు ప్రయాణ, ఇతర ఖర్చులకు డబ్బు లేక మనోవేదనకు గురవుతున్నారు. ప్రభుత్వం, దాతలు  ఆదుకుంటే పోటీల్లో పాల్గొని సత్తాచాటుతామంటున్నారు. సయ్యద్‌ రియాజ్‌కు సాయం చేసేవారు 8500178436, ఎండి. ఖయూమ్‌కు సాయం చేసేవారు 9912613312 నంబర్లలో సంప్రదించాలని వారు కోరారు.


 ఏటూరు నాగారం : వరంగల్ జిల్లాలో తాను దత్తత తీసుకున్న గ్రామాల్లో కాళోజీ ఆరోగ్య వర్సిటీ సేవలను ప్రారంభించింది. ఏటూరునాగారం మండలం చిన్నబోయినపల్లి గ్రామం సమీపంలో అటవీ ప్రాంతంలో ఉన్న గొత్తికోయ గూడేలు లింగాపురం, రాయిబందం, చిన్మలమర్రిలో 600 కుటుంబాలకు ఆదివారం వస్త్రాలు పంపిణీ చేశారు.
 
 కాళోజీ వర్సిటీ వీసీ బి.కరుణాకర్‌రెడ్డి ఈ సందర్భంగా మాట్లాడుతూ... రానున్న రెండు మూడేళ్లలో ఈ గూడేలలో కనీస అవసరాలకు ఇబ్బంది రాకుండా అభివృద్ధి చేస్తామన్నారు. ఈ కార్యక్రమంలో సర్పంచ్ సిద్ధబోయిన నాగార్జున, ఎంపీపీ మహీరున్నీసా తదితరులు పాల్గొన్నారు.


  అటవి మృగాల కోసం ఏర్పాటు చేసిన విద్యుత్ తీగలు తాకి వేటగాడు మృతిచెందిన సంఘటన వరంగల్ జిల్లా ఏటూరునాగారం మండలం భూపతిపురం అటవీ ప్రాంతంలో గురువారం వెలుగుచూసింది. కన్నయగూడెం గ్రామానికి చెందిన వాసం రమేష్(30) అడవిపందులను వేటాడటం కోసం ఏర్పాటు చేసిన విద్యుత్ తీగలు ప్రమాదవశాత్తు కాలికి తాకడంతో.. అక్కడికక్కడే మృతిచెందాడు. సమాచారం అందుకున్న పోలీసులు వివరాలు సేకరిస్తున్నారు.
 
  


 ఏటూరునాగారం: వరంగల్ జిల్లా ఏటూరు నాగారం మండల కేంద్రంలోని ప్రభుత్వ జూనియర్ కళాశాల వద్ద ప్రధాన రహదారి పక్కనే ఉన్న గోతిలో డీసీఎం వ్యాను బోల్తా పడింది. ఆదివారం మధ్యాహ్నం జరిగిన ఈ ప్రమాదంలో 13 మందికి గాయాలు కాగా వారిని సామాజిక ఆస్పత్రికి తరలించారు. వారిలో కొందరికి తీవ్ర గాయాలు అయ్యాయి.
 ఏటూరు నాగారం మండలం ముప్పనపల్లి గ్రామానికి చెందిన సంగెం వెంకటేశ్వర్లు కుమార్తు రోజా వివాహం శనివారం జరిగింది. దీంతో వివాహ విందు కోసం గాను వధువు తరఫు బంధువులు డీసీఎం వాహనంలో కరీంనగర్ జిల్లా కాటారం మండలం ఎడ్లపల్లి గ్రామానికి వెళుతుండగా ప్రమాదం జరిగింది.


 ఆలయంలో దొంగలు పడి హుండీలోని నగదును ఎత్తుకెళ్లిన సంఘటన వరంగల్ జిల్లా ఏటూరునాగారంలో ఆదివారం రాత్రి చోటుచేసుకుంది. స్థానిక శివాలయంలో గుర్తుతెలియని దుండగులు రెండు హుండీలను పగలగొట్టి అందులో ఉన్న సుమారు రూ. 60 వేలను ఎత్తుకెళ్లారు. ఇది గమనించిన స్థానికులు పోలీసులకు సమాచారం అందించారు. సంఘటనా స్థలానికి చేరుకున్న ఎస్సై వినయ్ విచారణ చేపడుతున్నారు.
 
  


 ఏటూరు నాగారం: వరంగల్ జిల్లా ఏటూరునాగారంలో ఓ యువకుడు దారుణ హత్యకు గురైయ్యాడు. రేసు హన్మంతు (31) మండల కేంద్రంలోని నందమూరి నగర్‌లో నివాసం ఉంటున్నాడు. శనివారం ఉదయం ఇంటి దగ్గర రక్తపు మడుగులో విగతుడిగా పడి ఉన్న అతడ్ని చూసి స్థానికులు పోలీసులకు సమాచారం అందించారు.
 పాత కక్షల నేపథ్యంలో హన్మంతును గుర్తుతెలియని దుండగులు హత్య చేసి ఉంటారని భావిస్తున్నారు. హన్మంతు భార్య కొద్ది రోజుల క్రితమే పుట్టింటికి వెళ్లగా ఒక్కడే ఇంట్లో ఉన్న సమయంలో ఈ ఘటన జరిగింది. పోలీసులు కేసు నమోదు చేసి దర్యాప్తు చేపట్టారు.


 ట్రైబల్ సర్క్యూట్ టూరిస్ట్ ప్రాంతంగా ఎంపిక
 * తాడ్వాయి అడవి, బొగతా జలపాతం, లక్నవరం చెరువు, మేడారం, మల్లూరు, దామరవాయిలకు చోటు
 * 'స్వదేశీ దర్శన్' పథకం కింద ప్రాజెక్టును మంజూరు చేసిన కేంద్రం
 * గిరిజన ఇతివృత్తంతో భారీ ప్రణాళిక సిద్ధం చేసిన పర్యాటకాభివృద్ధి సంస్థ
 * రూ.120 కోట్లతో తొలిదశ పనులు.. రూ.92 కోట్లు కేటాయించిన కేంద్రం
 * రెస్టారెంట్లు, విశ్రాంతి గదులు, రోడ్ల నిర్మాణం
 * ట్రెక్కింగ్ వంటి సాహస క్రీడలకు ఏర్పాట్లు
 * విదేశీ పర్యాటకులను ఆకట్టుకునే రీతిలో ఏర్పాట్లకు నిర్ణయం
  
  సాక్షి, హైదరాబాద్: మండు వేసవిలోనూ కనువిందు చేసే అద్భుత జలపాతం.. పదివేల ఏళ్ల నాడు మానవ సమూహం జీవించిన ప్రాంతం.. దట్టమైన అడవిలో 15 అడుగుల ఎత్తయిన భారీ రాళ్లతో అబ్బురపరిచే సమాధులు.. గుట్టపైనుంచి గలగలాపారే నీటి జాడలు... పక్కనే పదడుగుల ఎత్తయిన మూలవిరాట్టుతో అలరారే లక్ష్మీనరసింహస్వామి దేవాలయం.. అద్భుత ఇంజినీరింగ్ ప్రతిభ దాగిన లక్నవరం సరస్సు... స్థానికులకు తప్ప ఇతర ప్రపంచం దృష్టి అంతగా పడని ఈ అద్భుతాలన్నీ కొలువుదీరిన వరంగల్ జిల్లా ఏటూరు నాగారం ప్రాంతానికి ఇక పర్యాటక శోభ రానుంది.
 ఇంతకాలం మావోయిస్టులకు పెట్టనికోటగా, ఎదురుకాల్పులు-పోలీసు కూంబింగ్‌ల హడావుడితో మారుమోగే ప్రాంతంగా ఉన్న ఈ ప్రదేశంలోని ప్రత్యేకతలకు దేశవ్యాప్తంగా ప్రాచుర్యం కల్పించేందుకు భారీ ప్రణాళిక సిద్ధమైంది. కేంద్ర ప్రభుత్వం ప్రారంభించిన 'స్వదేశ్ దర్శన్' పథకంలో భాగంగా రాష్ట్ర పర్యాటకాభివృద్ధి సంస్థ ఈ ప్రాంతాన్ని గిరిజన ఇతివృత్తంతో ‘ట్రైబల్ సర్క్యూట్’గా అభివృద్ధి చేయనుంది. ఇందుకోసం రూ. 120 కోట్లతో తొలిదశ పనులను చేపట్టనుండగా... కేంద్రం రూ. 92 కోట్లు, రాష్ట్ర ప్రభుత్వం రూ. 8 కోట్లు ఇవ్వనున్నాయి. మిగతా సొమ్మును పబ్లిక్ ప్రైవేటు భాగస్వామ్యం కింద సమకూర్చుతారు.
 
 అన్నీ అద్భుతాలే..
  వరంగల్ జిల్లా ములుగు ప్రాంతం ఈ ప్రాజెక్టుకు ‘ప్రవేశ మార్గం’గా ఉండనుంది. రెస్టారెంట్లు, రోడ్డు పక్కన సౌకర్యాలు (వే సైడ్ ఎమినిటీస్) ఇక్కడ ఏర్పాటు చేస్తారు. ఇక్కడికి సమీపంలోని లక్నవరం సరస్సు వద్ద రెస్టారెంట్లు, మంచి రోడ్లు, విశ్రాంతి భవనాలు నిర్మిస్తారు. కాకతీయుల కాలంలో నిర్మించిన ఈ సరస్సు చిన్నచిన్న దీవులతో మనోహరంగా ఉంటుంది. ఆ దీవుల అనుసంధానంగా ఇప్పటికే దీనిపై వేలాడే వంతెనను నిర్మించారు. కానీ ఇక్కడ పెద్దగా వసతులు లేవు. విదేశీ పర్యాటకులను ఆకట్టుకునే  రీతిలో ఇక్కడ వసతులు కల్పిస్తారు. బోటింగ్, జెట్టీలు ఏర్పాటు చేస్తారు. దీనికి చేరువలోనే ప్రఖ్యాత రామప్ప గుడి, రామప్ప చెరువు ఉన్నాయి. సమీపంలో దట్టమైన అడవితో అలరారే తాడ్వాయిని సాహస క్రీడలకు కేంద్రంగా మార్చుతారు. అక్కడ రెస్టారెంట్లు, విశ్రాంతి గదులు, గైడ్లను అందుబాటులో ఉంచుతారు.
 ఏటూరు నాగారానికి చేరువగా ఖమ్మం జిల్లా పరిధిలోని వాజేడు మండలంలో కొలువుదీరిన బొగతా జలపాతానికి వెళ్లేలా రోడ్డు నిర్మిస్తారు. తెలంగాణ నయగారాగా పేరొందిన ఈ జలాపాతం వద్ద రెస్టారెంట్లు, విశ్రాంతి గదులు నిర్మిస్తారు. సెక్యూరిటీ పోస్టు ఏర్పాటు చేస్తారు. క్రీస్తుపూర్వం నాటి వందల సమాధులున్న దామరవాయి వద్ద విజ్ఞాన కేంద్రాన్ని, నాటి మానవ మనుగడ ఎలా ఉండేదో తెలిపే వీడియో, ఆడియో ప్రదర్శనశాల, మ్యూజియాన్ని ఏర్పాటు చేస్తారు. నిరంతరం నీటి గలగలలు వినిపించే మల్లూరులో పర్యాటకుల విడిది ఏర్పాటు చేస్తారు. ట్రెక్కింగ్ లాంటి సాహస క్రీడలకు వసతులు కల్పిస్తారు. ఇక్కడి పురాతన హేమాచల లక్ష్మీనరసింహస్వామి ఆలయాన్ని భక్తులకు అందుబాటులోకి తెచ్చి దాని విశిష్టతను తెలిపే ఏర్పాట్లు చేస్తారు. ప్రఖ్యాత గిరిజన జాతర జరిగే మేడారం వద్ద ప్రత్యేక గిరిజన మ్యూజియాన్ని ఏర్పాటు చేయటంతో పాటు సాధారణ రోజుల్లో పర్యాటకులు వస్తే ఉండేందుకు అవసరమైన వసతులు కల్పిస్తారు.


 వరంగల్ జిల్లా ఏటూరునాగారం మండలంలోని బుట్టాయిగూడెం అడవి ప్రాంతంలో లక్షల సంవత్సరాల కిందటి వృక్ష శిలాజాలు, డైనోసర్ శిలాజాల ఆనవాళ్లు లభించాయి. ఆది మానవుల కాలం నాటి చరిత్రను గత మూడేళ్లుగా వెలుగులోకి తెస్తున్న కవి, అధ్యాపకుడు రత్నాకర్‌రెడ్డి పరిశోధనలో నమ్మలేని శిలాజాలు బయటపడ్డాయి.
 గత కొన్ని రోజులుగా బుట్టాయగూడెంలో పరిశోధనలు చేస్తున్న రత్నాకర్ రెడ్డి మాట్లాడుతూ.. ఏటూరునాగారం నుంచి భద్రాచలం వెళ్లేదారిలో గోదావరి నది అనేక పాయలుగా చీలి దారి మార్చుకొని ప్రవహించడం వల్ల భూగర్భంలోని వృక్ష శిలాజాలు బయటకి వస్తున్నాయి.
 గ్రామ శివారు భూముల్లో అనేక శిలాజాలు ఉన్నట్లు గుర్తించాం. రెండు మీటర్ల పొడువైన వృక్ష శిలాజంతోపాటు అనేక ప్రాంతాల్లో డైనోసర్ ఎముకల వంటి శిలాజాలను గుర్తించాం. వీటిని స్థానికులు రాకాసి బొక్కలు అని పిలుస్తుంటారు. దేవతల, రాక్షసుల యుద్ధంలో రాక్షసులు చనిపోయారని, ఈ శిలాజాలను వారి బొక్కలుగా భావిస్తున్నారు.
 ఈ గ్రామంలో ప్రాచీన శిలా యుగానికి చెందిన అనేక రాతి పనిముట్లును సేకరించాం. ఒక సూక్ష్మరాతి పనిముట్టు కూడా లభించిందని ఆయన వెల్లడించారు. బుట్టాయిగూడెం నుంచి అడవుల్లోకి వెళితే మరిన్ని శిలాజాలు వెలుగులోకి వచ్చే అవకాశం ఉందని ఆయన అభిప్రాయపడ్డారు. అందులో డైనోసర్ శిలాజాలు కూడా లభించవచ్చని ఆయన అన్నారు.
  


 పిడుగుపాటుకు గ్రామ రెవెన్యూ సహాయకుడు(వీఆర్‌ఏ) ఒకరు ప్రాణాలు కోల్పోయాడు. వరంగల్ జిల్లా తాడ్వాయి మండలం బీరెల్లి గ్రామంలో ఆదివారం సాయంత్రం ఈ ఘటన జరిగింది. వీఆర్‌ఏ కొలుకుల నర్సింహులు ఇంటి దగ్గర పశువులకు మేత వేస్తుండగా సమీపంలోనే పిడుగు పడింది. దీంతో నర్సింహులతో పాటు ఓ దుక్కిటెద్దు మృతి చెందింది.
  


 వరంగల్(ఏటూరునాగారం): వరంగల్ జిల్లాలో ఏటూరు నాగారం మండలం భట్టాయిగూడెంలో తెల్లబెల్లంతో గుడుంబా తయారు చేస్తున్న స్థావరాలపై శుక్రవారం పోలీసులు దాడిచేశారు. తయారీ కేంద్రం నుంచి సుమారు 5 వేల లీటర్ల గుడుంబాను స్వాధీనం చేసుకున్నారు. పోలీసులు రావడం గమనించి తయారీదారులు పరారయ్యారు. కేసు నమోదు చేసుకుని దర్యాప్తు చేస్తున్నారు.


 వరంగల్ (ఏటూరు నాగారం) : రోడ్డు ప్రమాదంలో 15 మందికి తీవ్ర గాయాలయ్యాయి. ఈ ఘటన ఆదివారం ఉదయం వరంగల్ జిల్లా మంగపేట మండలంలో చోటుచేసుకుంది. మండలంలోని కమాలాపురం వద్ద బాధితులు ప్రయాణిస్తున్న వాహనం బోల్తా కొట్టింది. దీంతో 15 మంది గాయపడ్డారు. వీరిలో ఇద్దరి పరిస్థితి విషమంగా ఉంది.
 
 క్షతగాత్రులు పర్వతిగిరి, రాయపర్తి మండలాలకు చెందిన వారిగా సమాచారం. బాధితులు ఏటూరు నాగారం ప్రభుత్వ ఆస్పత్రిలో చికిత్స పొందుతున్నారు. సమాచారం అందుకున్న పోలీసులు కేసు నమోదు చేసి దర్యాప్తు ప్రారంభించారు. మరిన్ని వివరాలు తెలియాల్సి ఉంది.


 ఏళ్లకేళ్లుగా కొండలు, గుట్టలే వారి ఆవాసాలు. సంప్రదాయాలు.. కట్టుబాట్లే వారి ఆస్తిపాస్తులు. గోదావరి పరివాహకమే వారి  జీవనాధారం. కానీ, ప్రస్తుత గోదావరి పుష్కరాల సందడి వారి గూడేల్లో కన్పించడం లేదు. అసలామాటకొస్తే తమకు పుష్కరాలంటేనే తెలియదంటున్నారు గొత్తికోయలు.
  
 ఏటూరునాగారం: ఏటూరునాగారం అభయారణ్యంలో సుమారు 3వేల మంది గొత్తికోయలు జీవిస్తున్నారు.  వీరు ఏడాదిలో రెండు సార్లు(పుష్యమాసం, వైశాఖ మాసం) తమ దేవతామూర్తులను గోదావరి నీటితో శుద్ధి చేస్తారు. అసలు తమకు పుష్కరాలు అంటే ఏమిటోతెలియదంటున్నారు . నాయకపోడ్‌లు తమ ఆడబిడ్డ అయిన లక్ష్మీదేవరను గోదావరి పుణ్యస్నానాలు ఆచరించి ఉత్సవా లు జరుపుకుంటారు. మడుగులోని నీటిని కూడా ఆదివాసీ గిరిజనులు పవిత్ర జలాలుగా భావిస్తారు.
  
 ఎన్నో తెగలు.. భిన్న సంస్కృతులు
  ఏడు రాష్ట్రాల్లో విస్తరించిన గోదావరి పరివాహక ప్రాంతాల్లో ఎన్నో తెగలు, భిన్న సంస్కృతులతో జీవనం సాగిస్తున్నారుు. గోండ్, అంబుజ్ మేరి యా, బిస్నోమ్ మెరియ, మురియా, హల్పా, బట్రా, పజ్రా, గొత్తికోయ, కోయలు, మాంజీ, బంజారాలంబాడీ, నాయకపోడ్ తెగలు ఏజెన్సీలో జీవిస్తున్నాయి. ఒకప్పుడు వేట.. ప్రస్తుతం పోడు వ్యవసాయం వీరి కడుపు నింపుతోంది. వెదురుతో సృజానాత్మక వస్తువులు తయారు చేస్తారు.నాసిక్‌లో నివసించే వర్లితెగ గిరిజనులు రూపొందించే వర్లి చిత్రాలుగా ప్రసిద్ధి చెందాయి.
  
  ఇప్పటి వరకు ఎప్పుడు చేయలె
  పుష్కరాలకు స్నానాలు అంటే ఏమిటి? ఇప్పటి వరకు ఎప్పు డూ చేయలె. ఇక్కడికి వచ్చినకాడి నుంచి వాగులు, కుంటల్లోనే స్నానాలు చేస్తాం. సంక్రాంతి ముందు వడ్లు కోసేటప్పుడు పండుగ చేసుకొని గొర్రెలు, మేకలను బలిస్తాం. పొలిమేరల చుట్టూ నల్లటి ముగ్గు పోసి ఎవరు రాకుండా చూస్తాం.
  - మాడవి జోగయ్య, చింతలపాడు
  
  


 ఏటూరునాగారం : వరంగల్ జిల్లా ఏటూరు నాగారం మండల కేంద్రంలో పింఛన్లు అందటం లేదని 'ఆసరా' పథకం లబ్ధిదారులు ఆందోళనకు దిగారు. మండల కేంద్రంలోని జాతీయరహదారిపై శనివారం ఉదయం పది గంటల నుంచి బైఠాయించి, అధికారులకు వ్యతిరేకంగా నినాదాలు చేస్తున్నారు. పోస్టల్ అధికారులు పింఛన్ల పంపిణీలో అలసత్వం ప్రదర్శిస్తున్నారని ఆందోళన వ్యక్తం చేశారు. ఆధార్ కార్డు లింకు లేదని అనర్హత వేటు వేశారని కొందరు ఆరోపించారు.


 వరంగల్: వరంగల్ జిల్లాలోని ఏజెన్సీ ప్రాంతాల్లో భారీ వర్షాలకు పలు ప్రాంతాలకు రాకపోకలు నిలిచిపోయాయి. ఎగువ ప్రాంతాల్లో కురిసిన వర్షాలకు ముల్లకట్టవద్ద ఆదివారం గోదావరి పరవళ్లు తొక్కుతోంది. ఏటూరునాగారం-తుపాకులగూడెం ప్రధాన రహదారిలో మాటుకుంట వాగు పొంగి ప్రవహిస్తుండడంతో రాకపోకలు నిలిచిపోయాయి. దీంతో ఆయా ప్రాంత వాసులు అవస్థలు పడుతున్నారు.


 వరంగల్: బాల్య వివాహం జరుగుతుందన్న సమాచారం అందుకున్న అధికారులు వివాహాన్ని అడ్డుకున్నారు. ఈ సంఘటన వరంగల్ జిల్లా ఏటూనాగారం మండల కేంద్రంలో బుధవారం చోటుచేసుకుంది. బెత్సవాడకు చెందిన మైనర్ బాలక(16)కు ఖమ్మం జిల్లా వెంకటాపురం మండలం బెత్సగూడానికి చెందిన రామెల్ల రమేష్‌తో వివాహం జరపడానికి ఏర్పాట్లు పూర్తిచేశారు.
 ఉన్నతాధికారుల నుంచి ఈ బాల్యవివాహ సమాచారం అందుకున్న ఎస్సై వినయ్‌కుమార్, ఐసీడీఎస్ సూపర్‌వైజర్ ప్రమీలారాణి సరైన సమయానికి అక్కడికి చేరుకొని వివాహాన్ని నిలిపివేయడంతో పాటు వధువరులకు కౌన్సిలింగ్ ఇచ్చారు.


 - వెయిటింగ్ లేకుండా ఇసుక లోడింగ్
 - ఏటూరు ఇసుక రవాణాలో అక్రమాలు
 - కొందరు లారీ యజమానుల అత్యాశ
 - ఒక్కో లారీకి రోజుకు వెయ్యి వసూలు
 - మైనింగ్, పోలీసు అధికారుల తీరుపై విమర్శలు
 - కలెక్టర్ కరుణ దృష్టిసారిస్తే మేలు
 - ఇసుక రవాణా చేసి ఎక్కువ ఆదాయం సమకూర్చు
 కోవాలని కొందరు అక్రమాలకు తెరలేపారు. స్థానికంగా ఉన్న మైనింగ్, పోలీసు అధికారులకు లారీకి రూ.1000 చొప్పన ఇచ్చి.. ఏటూరుకు తమ లారీ వచ్చిన వెంటనే లోడింగ్ చేసేలా కొత్త వ్యవహారం మొదలుపెట్టారు.
 
 సాక్షి ప్రతినిధి, వరంగల్ : ఏటూరు ఇసుక క్వారీకి అవినీతి చీడ పడుతోంది. రాష్ర్టంలోనే ఆదర్శంగా నిలుస్తున్న క్వారీ.. మెల్లిగా ఇసుక రవాణా చేసే లారీ యజమానులు, వ్యాపారుల అత్యాశతో అభాసుపాలవుతోంది. లాభార్జనే ధ్యేయంగా కొందరు లారీ యజమానులు వ్యవస్థనే పక్కదారి పట్టిస్తున్నారు. అధిక ట్రిప్పుల ఇసుకను రవాణా చేయూలనే ఉద్దేశంతో అడ్డదారులు తొక్కుతున్నారు. సాధారణంగా ఒక లారీకి మూడు రోజులకు ఒక ట్రిప్పు వంతున వస్తుంది. మైనింగ్, పోలీసులను మచ్చిక చేసుకుని కొందరు రోజుకో ట్రిప్పు వంతున రవాణా చేస్తున్నారు. అధికారులు భాగస్వాములు కావడంతో అక్రమ దందా బయటికి రావడం లేదు.
 
 కలెక్టర్ విధానానికి తూట్లు
 ప్రజల అవసరాల దృష్ట్యా అందుబాటులో ధరలో ఇసుక సరఫరా చేసేందుకు కలెక్టర్ కరుణ కొత్త విధానాన్ని తీసుకొచ్చారు. ఏటూరునాగారం మండలం ఏటూరు వద్ద గోదావరిలో మార్చి 16 ఇసుక క్వారీని ప్రారంభించారు. వ్యాపారుల పెత్తనాన్ని పక్కనబెట్టి ఏటూరు, కంతనపల్లి, సింగారం గ్రామాల్లోని కుటుంబాలతో సహకార సంఘాన్ని ఏర్పాటు చేశారు. ఇసుక తవ్వకాల బాధ్యతను ఈ సంఘానికి అప్పగించారు. గోదావరిలో తవ్వే ఇసుకకు సంబంధించి ప్రతి క్యూబిక్ మీటరుకు రూ.150 చొప్పున రాష్ట్ర ఖనిజాభివృద్ధి సంస్థ ఈ సంఘానికి చెల్లిస్తోంది.
 
 రవాణా ఖర్చుల కింద టిప్పర్ల కాంట్రాక్టరుకు క్యూబిక్ మీటరుకు రూ.80 చొప్పున ఖర్చవుతోంది. ఈ ఖర్చు పోను ప్రతి క్యూబిక్ మీటరుకు రూ.70 చొప్పున ఏటూరు సహకార సంఘానికి ఆదాయం ఉంటోం ది. ఈ ప్రక్రియతో సంఘంలోని ప్రతి కుటుంబానికి మొదటి విడతలో రూ.10 వేల చొప్పున ఆదాయం వచ్చింది. మార్కెట్ పెరిగే కొద్ది ఆదాయం పెరగనుంది. ఇలా సహజ వనరుల తవ్వకాల విషయంలో స్థానికులే మొదట లబ్ధి పొందేలా రూపొందించిన ఈ విధానం రాష్ట్రవ్యాప్తంగా ఆదర్శంగా నిలుస్తోంది.
 
 అత్యాశతో..
 ఏటూరు వద్ద క్వారీలో తవ్విన ఇసుకను టిప్పర్ల సహాయంతో కిలో మీటరున్నర దూరంలో ఉన్న డంపింగ్ యార్డుకు తరలిస్తారు. ఈ డంపింగ్ యార్డును రాష్ట్ర ఖనిజాభివృద్ధి సంస్థ నిర్వహిస్తోంది. ఇందిరా క్రాంతి పథకం(ఐకేపీ) సిబ్బంది విధులు నిర్వహిస్తారు. ఇసుక కోసం వచ్చే లారీలు డంపింగ్ యార్డుకు రెండు కిలో మీటర్ల దూరంలో ఒక పార్కింగ్ స్థలంలో వేచి ఉంటాయి. అక్కడికి లారీ చేరుకోగానే ఇసుకకు సరిపడా డబ్బులు చెక్కు రూపంలో అధికారులకు ఇవ్వాల్సి ఉంటుంది. 13.5 క్యూబిక్ మీటర్లు(21 టన్నులు) ఇసుక లారీకి రూ.7,425.. 10.5 క్యూబిక్ మీటర్ల(18 టన్నుల) ఇసుక లారీకి రూ.5,775 ధర ఉంది.
 
 ఈ మొత్తానికి చెక్కు ఇచ్చిన లారీ నిర్వాహకులకు అధికారులు టోకెన్ నెంబరు, వే బిల్లు ఇసా ్తరు. సీరియల్ నంబరు ప్రకారం లారీలో డంపింగ్ యా ర్డుకు వెళ్లి ఇసుకను లోడ్ చేసుకుని వరంగల్, హైదరాబాద్ తదితర ప్రాం తాల వైపు వెళ్తారుు. ఇక్కడే అవినీతి దందా మొదలైంది. ఏటూరు క్వారీ ఇసుకకు ఎక్కువ డిమాండ్ ఉంటోంది. ప్రతిరోజు 250 నుం చి 300 లారీ లు క్వారీకి వస్తున్నాయి. ఒక లారీకి సగటున మూడు, నాలుగు రోజులకు ఒకసారి లోడింగ్ వంతు వస్తోంది. ఇసుక కోసం వచ్చిన లారీలు మూడునాలుగు రోజులు వేచి ఉండాల్సిన పరిస్థితి. దీంతో నెలలో 8 నుంచి 10 ట్రిప్పులే పడుతున్నాయి. భవన నిర్మాణాల సీజను కావడంతో ఇప్పుడు డిమాండ్ ఉంటోంది.
 
 అక్రమాలు ఇక్కడే..
 ఇసుక రవాణా చేసి ఎక్కువ ఆదాయం సమకూర్చుకోవాలని కొందరు అక్రమాలకు తెరలేపారు. స్థానికంగా ఉన్న మైనింగ్, పోలీసు అధికారులకు లారీకి రూ.1000 చొప్పన ఇచ్చి.. ఏటూరుకు తమ లారీ వచ్చిన వెంటనే లోడింగ్ చేసేలా కొత్త వ్యవహారం మొదలుపెట్టారు. మారుమూల ప్రాంతంలో నాలుగు రోజులు వేచి ఉం టే లారీ డ్రైవరు, క్లీనరు భోజన ఖర్చుల కోసమే రూ.2 వేల వరకు అవుతోందని.. రూ.1000 ఇస్తే లారీ త్వరగా వెళ్తొందని అధికారులే సూచనలు ఇస్తున్నారు.
 
 మామూళ్లు ఇచ్చిన లారీలు వచ్చిన వెంటనే అక్కడి అధికారులు.. వీటికి ప్రత్యేక ప్రాధాన్యత ఇస్తూ వెంటనే టోకెన్ నంబర్లు ఇస్తున్నారు. ప్రభుత్వ పనులకు సంబంధించిన లారీలు అని చెప్పి మిగతా వారిని దబాయిస్తున్నారు. అసలే ఇసుక రవాణా వ్యాపారం కావడం.. మైనింగ్ అధికారులు, పోలీసులతో గొడవ ఎందుకనే ఉద్దేశంతో కొందరు లారీ యజమానులు మిన్నకుండిపోతున్నారు. ఇప్పుడిప్పుడే మొదలైన ఈ అడ్డదారి రవాణా కు అడ్డుకట్ట వేయాల్సిన అవసరం ఎంతైనా ఉంది.


 వరంగల్ : ఇసుక క్వారీల ఏర్పాటుకు గ్రామసభను ఏర్పాటు చేశారు. ఈ సంఘటన వరంగల్ జిల్లా ఏటూరునాగారం మండలంలోని ఏటూరు గ్రామంలో సోమవారం జరిగింది. మండలంలోని ఏటూరు, సింగారం, కంతలపల్లి గ్రామాలకు చెందిన ప్రజలు సోమవారం ఏటూరులో సమావేశమయ్యారు. ఈ సమావేశంలో ఇసుకు క్వారీ ఏర్పాటుకోసం గ్రామసభను ఏర్పాటు చేశారు. కాగా, ఈ సోసైటీని రహస్యంగా ఏర్పాటు చేశారని ఆయా గ్రామాల ప్రజలు గొడవకు దిగారు. దీనిని వెంటనే రద్దు చేయాలని డిమాండ్ చేశారు. ఈ సందర్భంగా అధికారులకు, గిరిజనులకు మధ్య వాగ్వాదం చెలరేగింది.
 (ఏటూరునాగారం)


 రంగంలోకి ఇసుక మాఫియా
 రాష్ట్ర స్థారుులో డెరైక్షన్
 అధికారులే సూత్రధారులు
 సొసైటీ పేరిట దళారుల పరం
 ఖరారు కాకముందే యంత్రాల చేరిక
 హడావుడిగా 34 ఎకరాల్లో స్టాక్ యార్డ్
 పేర్లు లేవని పనులు అడ్డుకున్న ప్రజలు
  
 వరంగల్ రూరల్ : గోదావరిలో ఇసుక క్వారీ నిర్వహణ బాధ్యతలను ఇసుక మాఫియూకే అప్పగిస్తున్నారా... అధికారులే ఈ దందా నడిపిస్తున్నారా... అంటే అవుననే సమాధానమే వస్తోంది.  ఏటూరు వద్ద ఏర్పాటు కానున్న ఇసుక క్వారీ వ్యవహారంలో గుట్టుచప్పుడు కాకుండా నడుస్తున్న తతంగమే ఇందుకు ఉదాహరణగా  నిలుస్తోంది.  రాష్ట్రంలో ఇసుక కొరత తీర్చేందుకు ప్రభుత్వం కొత్త పాలసీ అమల్లోకి తీసుకువచ్చింది. అధికారుల కనుసన్నల్లోనే ఇసుక స్టాక్ యార్డులను ఏర్పాటు చేసి తక్కువ ధరలకు విక్రయించాలని ఈ మేరకు ఆదేశాలు జారీ చేసింది. ఇందులో భాగంగా ఏటూరునాగారం మండలం ఏటూరు గ్రామపంచాయతీ సమీపంలోని గోదావరిలో క్వారీ నిర్వహించాలని జిల్లా అధికారులు నిర్ణయించారు. కంతనపల్లి బ్యారెజ్ నిర్మాణ స్థలం నుంచి తుపాకులగూడెం వరకు గోదావరిలో రూ. 1.20 కోట్ల క్యూబిక్ మీటర్ల ఇసుకను తోడేందుకు అనుమతించాలని జిల్లా స్థాయి సమావేశంలో తీర్మానించారు. దీని నిర్వహణ బాధ్యతను అక్కడి గ్రామ పంచాయతీకే అప్పగించాలని కలెక్టర్ కరుణ ఆదేశించారు. పెద్ద మొత్తంలో ఇసుక క్వారీకి అనుమతి వస్తున్నందని భావించిన దళారులు రంగప్రవేశం చేశారు. అధికార పార్టీ ప్రజాప్రతినిధులను ప్రసన్నం చేసుకుని అధికారులపై ఒత్తిడి తీసుకువచ్చారు. అధికారులే ముందు ఉండి ఇసుక క్వారీలను ప్రైవేటు పరం చేసేందుకు వ్యూహం పన్నారు.
 
 రాష్ట్ర స్థాయిలో ఆదేశాలు..!
 
 ఏటూరునాగారం మండలంలోని ఏటూరు వద్ద ఏర్పాటు కానున్న ఇసుక క్వారీ నిర్వహణ ఎవరికి అప్పగించాలన్న ఆదేశాలు రాష్ట్ర స్థాయి నుంచి జిల్లా అధికారులకు వస్తున్నట్లు తెలుస్తోంది. అక్కడి నేతలు, అధికారుల డెరైక్షన్లతోనే ఇక్కడి అధికారులు ఉరుకులు... పరుగుల మీద చర్యలు చేపడుతున్నారు. పక్క జిల్లాలో టెండర్ల నిర్వహణకు పది రోజుల సమయం ఇచ్చిన అధికారులు... జిల్లాలో మాత్రం ఆఖరు రోజున  టెండర్ ప్రక్రియ పూర్తి చేయాలని అధికారులకు అదేశాలు వచ్చినట్లు తెలిసింది. ఎలాంటి డిపాజిట్ లేకుండా కేవలం లెటర్‌హెడ్‌లపై టెండర్లు వేయడాన్ని పలువురు అక్షేపించారు. దీంతో టెండర్లు మరో రెండు రోజులపాటు తీసుకుంటామని బుధవారం ప్రకటించిన అధికారులు... గురువారం సాయంత్రం టెండర్లను రద్దు చేస్తున్నట్లు ప్రకటించారు. మీడియాలో వస్తున్న కథనాలకు ఎన్‌ఎండీసీ ఎండీ ప్రకటనలు ఇవ్వడంతో ఈవ్యవహారం రాష్ట్ర స్థాయిలో జరుగుతున్నదానికి నిదర్శనమని పలువురు భావిస్తున్నారు.
  
 సొసైటీ పేరిట దళారులకు అప్పగింత...
 
 క్వారీ కోసం పెద్ద ఎత్తున ఒత్తిళ్లు వస్తున్న నేపథ్యంలో అక్కడి గ్రామ సంఘానికే ఇసుక క్వారీ నిర్వహణ బాధ్యతలు అప్పగిస్తామని కలెక్టర్ గ్రామస్తులకు హామీ ఇవ్వడంతో పాటు అధికారులను ఆదేశించారు. సొసైటీకి యంత్రాలు పెట్టుకునే స్థోమత లేనందున గోదావరిలో ఇసుక తోడేందుకు టెండర్లు నిర్వహించాల్సి ఉంటుంది. ఇదే విషయాన్ని ఎన్‌ఎండీసీ ఎండీ మీడియాకు వెల్లడించారు. పొరుగు జిల్లాల్లో ఇసుక తోడేందుకు టెండర్లు నిర్వహించిన అధికారులు... ఇక్కడ ఎందుకు నిర్వహించడం లేదన్న అనుమానాలు వ్యక్తమవుతున్నాయి. టెండర్లు రద్దు చేస్తామని అధికారులు ప్రకటించిన 24 గంటల్లోపే ఏటూరు వద్ద గల గోదావరిలో రెండు ప్రొక్లైనర్లు ప్రత్యక్షం కావడంతో అధికారులే ముందు ఉండి నడిపిస్తున్నారన్న ఆరోపణలు వినిపిస్తున్నాయి.
 
 పేర్లు లేక పోవడంపై ఆగ్రహం
 
 ఏటూరు పరిధిలో క్వారీ లేబర్ కాంట్రాక్ట్ సొసైటీ లిమిటెడ్ పేరిట రిజిస్టర్ అయినట్లు అధికారులు చెబుతున్నప్పటికీ.. అంతా సీక్రెట్‌గా జరిగినట్లు తెలిసింది. గ్రామంలో వేసిన సోసైటీ కమిటీలో గ్రామాలకు చెందిన సభ్యులు ఉండగా... రిజిస్ట్రేషన్ సమయంలో జిల్లా సహకార అధికారి వద్ద దాఖలైన దరఖాస్తుల్లో ఇతరుల పేర్లు చేర్చినట్లు  సమాచారం. ఈ విషయం తెలిసిన ఏటూరు, సింగారం, కంతనపెల్లి గ్రామాలకు చెందిన ప్రజలు శుక్రవారం క్వారీ నిర్వహణ కోసం అధికారులు చేస్తున్న పనులను అడ్డుకున్నారు. దీంతో గోదావరిలో ఇసుక తోడేందుకు తీసుకువచ్చిన రెండు ప్రొక్లైనర్లను (డైవర్లు పక్కనబెట్టి విశ్రాంతి తీసుకున్నారు. అసలు ఈ క్వారీ సొసైటీ నిర్వహిస్తోందా.... వారి పేరిట ఇతరులకు అప్పగించారన్న విషయాలు ఇసుక తోడడం ప్రారంభిస్తే తప్పా.. తెలిసే అవకాశం లేదు.
  
 స్టాక్ యార్డ్ ఏర్పాటు...
 
 టెండర్లు నిర్వహించకుండాన సొసైటీకి అధికారికంగా అప్పగించినట్లు ప్రకటించక ముందే... ఏటూరు గ్రామ సమీపంలో 34 ఎకరాల్లో స్టాక్‌యార్డును శుక్రవారం అధికారులు ఏర్పాటు చేశారు. ఎకరాకు ఏడాదికి రూ.20 వేల చొప్పున కౌలు ఇచ్చే విధంగా అధికారులే సొసైటీ పేరిట నిర్ణయాలు తీసుకున్నట్లు తెలిసింది. సొసైటీలో పేర్ల లేవన్న కారణంగా స్టాక్‌యార్డు పనులను గ్రామ ప్రజలు అడ్డుకోవడంతో అధికారులు వెనుదిరిగారు.
 
 సొసైటీ రిజిస్ట్రేషన్ అయింది...
 
 ఏటూరు గ్రామ ప్రజల ఇసుక క్వారీ లేబర్ కాంట్రాక్ట్ సొసైటీ లిమిటెడ్ పేరిట నమోదైందని జిల్లా సహకార అధికారి సంజీవరెడ్డి తెలిపారు. ఈ సొసైటీకి రిజిస్ట్రేషన్ ఎప్పుడు జరిగిందని ‘సాక్షి’ వివరణ కోరగా... తటపటాయిస్తూ 15రోజుల కిందట జరిగిందని సమాధానమిచ్చారు. జిల్లాలో ఈనెల 11 నుంచి శాసన మండలి ఎన్నికల నియమావళి అమలులో ఉంది. ఎప్పుడు సొసైటీ రిజిస్టర్ అయిందో... అధికారులు దీనికి ఎప్పుడు అనుమతి ఇచ్చారనే అంశాల్లో అంతా అస్పష్టత నెలకొంది. ఇదంతా చూస్తుంటే భారీ మొత్తంలో నగదు చేతులు మారినందునే హడావుడిగా క్వారీని ప్రారంభించేందుకు అధికారులు సమాయత్తమవుతున్నారన్న ఆరోపణలు వెల్లువెత్తుతున్నాయి.


 వరంగల్: ఓ కాలేజీ ప్రిన్సిపాల్ మహిళా అటెండర్తో వివాహేతర సంబంధం పెట్టుకున్నాడు. మీడియాకు దొరికిపోయాడు.  ఏటూరునాగారం ప్రభుత్వ జూనియర్ కాలేజీ ప్రిన్సిపాల్, కాలేజీలో పనిచేసే మహిళా అటెండర్తో గురువారం రాత్రి 9 గంటలకు ఏకాంతంగా ఉండగా విద్యార్థులు చూశారు. రెండ్‌హ్యాండ్ గా  పట్టుకుని, ఇలా చేయడం వృత్తికే మచ్చ అని మందలించారు.   మీడియాకు కబురందించారు. దాంతో అయ్యగారి బండారం బయటపడింది.
 
 విద్యార్థుల రాకను పసిగట్టిన ప్రిన్సిపాల్ పారిపోయేందుకు ప్రయత్నించగా పట్టుకున్నారు. తీరా విద్యార్థులు నిలదీసేసరికి తాను భోజనం చేయడానికి వచ్చానని బుకాయించాడు. ఓ కేసు విషయంలో సాయం చేయడానికి వచ్చానే తప్ప ఎలాంటి ఉద్దేశం లేదని చెప్పాడు.
 **


 ఏటూరునాగారం : ప్రభుత్వ ఉద్యోగులు ఎక్కడ పనిచేస్తే అక్కడే వేతనం తీసుకోవడం రివాజు. అయితే ఐటీడీఏలో మాత్రం ఏక్కడ పనిచేసినా అధికారులు ఇక్కడే వేతనం చెల్లిస్తున్నారు. అందుకు సంబంధించిన వివరాలు ఇలా ఉన్నాయి.
 
  భద్రాచలం ఏఓగా పనిచేస్తున్న హరిప్రసాద్, కాకినాడలోని ఐటీడీఏ కార్యాలయంలో డీఎస్‌ఓగా పనిచేస్తున్న వి.సూర్యప్రభాకర్‌రావుకు 2011 జూలై 28న ఒకేసారి ఏపీఓ జనరల్‌గా ప్రమోషన్ ఇస్తూ గిరిజన సంక్షేమశాఖ కమిషనర్ ద్వారా ప్రభుత్వం ఆదేశాలు జారీ చేసింది. సూర్యప్రభాకర్‌రావును ఐటీడీఏ ఏటూరునాగారం, హరిప్రసాద్‌ను పశ్చిమ గోదావరి జిల్లా రామచంద్రపురం(ఆర్‌కేపురం)లోని ఐటీడీఏకు బదిలీ చేసింది. అయితే సూర్యప్రభాకర్‌రావు 2011 ఆగస్టు 1న ఏటూరునాగారం ఐటీడీఏలో  విధుల్లో చేరగా హరి ప్రసాద్ ఆర్‌కేపురానికి వెళ్లడం ఇష్టం లేక భద్రాచలంలోనే ఉండిపోయారు.
 
  వీరిద్దరు కలిసి హైదరాబాద్‌లోని గిరిజన సంక్షేమ కమిషనర్ శాంతికుమారిని 2011 సెప్టెంబర్ 2 కలుసుకుని మ్యాచువల్ డిప్యూటేషన్‌పై పనిచేసేందుకు అనుమతి ఇప్పించాలని వేడుకోగా 2011 సెప్టెంబర్ 30న తాత్కాలిక వర్కింగ్ అడ్జెస్ట్‌మెంట్ ఉత్తర్వులు జారీ చేశారు. దీంతో సూర్యప్రభాకర్‌రావు ఇక్కడి నుంచి 2011 అక్టోబర్ 1న రిలీవ్ అయి ఆర్‌కేపురం ఐటీడీఏకు వెళ్లిపోయారు. దీంతో హరిప్రసాద్ 2011 అక్టోబర్ 3న ఏటూరునాగారం ఐటీడీఏలో విధుల్లో చేరారు. హరిప్రసాద్ 2013 మే 31న ఉద్యోగ విరమణ పొందారు.
 
 అప్పటి నుంచి ఏపీఓ జనరల్ పోస్టు ఖాళీగా ఉంది. అసలు విషయమేమిటంటే ప్రభాకర్‌రావు పనిచేసేది ఆర్‌కేపురంలో అయితే వేతనం చెల్లించేది ఏటూరునాగారం ఐటీడీఏ కార్యాలయమే. ఏడాది కాలంగా నెలకు రూ.30వేల చొప్పున చెల్లిస్తూనే ఉంది. ఆర్‌కేపురం నుంచి విధుల హాజరు పట్టిక రావడంతో ఇక్కడి అధికారులు వేతనాలు చెల్లిస్తున్నారు.
 
  స్థానికంగా ఏపీఓ లేకపోవడంతో సంక్షేమ పథకాలు గిరిజనుల దరిచేరడంలేదని, విషయం గ్రహించిన అప్పటి ఐటీడీఏ పీఓ సర్ఫరాజ్ అహ్మద్ 2013 అక్టోబర్ 29న గిరిజన సంక్షేమ కమిషనర్‌కు లేఖ రాశారు. ఇక్కడ పనిచేయాల్సిన ప్రభాకరావు ఆర్‌కేపురం ఐటీడీఏలో ఉన్నారని, వెంట నే ఇక్కడికి బదిలీ చేయాలని కోరారు. అనంత రం పీఓ బదిలీ కావడంతో ఆ విషయాన్ని ఎవరూ పట్టించుకోలేదు. ఇప్పటికైనా ఆర్‌కేపురంలో పనిచేస్తున్న ఏపీఓ జనరల్ ప్రభాకర్‌రావును ఇక్కడి బదిలీ చేయాలని గిరిజన సంఘాల నాయకులు కోరుతున్నారు.


  ఏటూరునాగారం, న్యూస్‌లైన్ : నిరుపేదల అభ్యున్నతి కోసమే మహాజన సోషలిస్టు పార్టీ(ఎంఎస్‌పీ)ని స్థాపించామని పార్టీ వ్యవస్థాపక అధ్యక్షుడు మంద  కృష్ణమాదిగ అన్నారు. శుక్రవారం  ఏటూరునాగారం మండల కేంద్రంలో ఎంఎస్‌పీ జెండాను అనంతరం సభలో ఆయన మాట్లాడారు. బడుగుబల హీన వర్గాల అభివృద్ధిని ప్రస్తుత పాలకు విస్మరించారని, కేవలం వారి స్వలాభాల కోసం తాపత్రయ పడుతున్నారని అన్నారు.
 
 ఎస్సీ, ఎస్టీ, బీసీ, మైనార్టీ వర్గాల ఓట్లతో గెలుపొందిన ఎమ్మెల్యేలు ఏనాడూ ఆ వర్గాల కోసం అసెం బ్లీలో మాట్లాడిన దాఖలాలు లేవన్నారు. వికలాంగుల సంక్షేమం కోసం అనేక పథకాలు పెట్టామని గొప్పలు చెప్పుకుంటున్న నాయకు లు ఆచరలో పెట్టడం లేదన్నారు. ఎన్నికల సమ యం సమీపిస్తుండడంతో అనేక పార్టీల నాయకులు ఓట్ల కోసం ప్రజలను మాయమాటలు చెప్పి ఓట్లు దండుకోవాలని చూస్తున్నారని మంద కృష్ణ మండిపడ్డారు.
 
 పాలకులు మారుతున్నారే గానీ ప్రజల తలరాత మారడం లేదన్నారు. మహాజన సోషలిస్టు పార్టీతో రాజ్యాధికారం చేపట్టి స్వరాష్ట్ర పాలనను సాధించుకుందామని పిలుపునిచ్చారు. సీమాంధ్ర నాయకులు తెలంగాణ రాష్ట్ర ఏర్పాటు అడ్డుకోవాలని చూస్తున్నారని, వారి కుట్రలను తిప్పికొట్టేందుకు ప్రతి తెలంగాణ వాది సిద్ధంగా ఉండాలని ఆయన కోరారు.
 
  అనంతరం ఇగ్నో యూనివర్సీటీ ఫ్రొఫెసర్ రీయాజ్ మాట్లాడుతూ ప్రజాస్వామ్య తెలంగాణ కావాలని, దొరల తెలంగాణ కాదన్నారు. తెలంగాణలో ఉన్న పార్టీలు కేవలం సొంత ప్రయోజనాల కోసం పనిచేస్తున్నాయని, ప్రజలకోసం కాదన్నారు. పేదలు దుర్భర జీవితాలను గడుపుతున్నారని, ధనికులు మాత్రం మేడలపై మేడలు కడుతున్నారని ఆగ్రహం వ్యక్తం చేశారు.


 హన్మకొండ, సాక్షి : ఏటూరునాగారం బ్లాక్ కాంగ్రెస్ అధ్యక్షుడు.. బెల్లం.. ఇసుక.. లిక్కర్ దందాలో ఆరితేరిన వలీబాబా తాజాగా గంజాయి రవాణా చేస్తూ పట్టుబడ్డాడు. ఇన్నోవా వాహనంలో గంజాయిని తరలిస్తూ ఖమ్మం జిల్లా పినపాక మండలం ఏడూళ్ల బయ్యారం వద్ద పోలీసులకు అడ్డంగా దొరికిపోయాడు. ఈ సంఘటన ఏజెన్సీ ఏరియాలో చర్చనీయాంశమైంది. అడ్డూఅదుపు లేకుండా చాటుమాటుగా సాగే అక్రమ వ్యాపారాలకు వలీబాబా పెట్టింది పేరు.
 
 అధికార పార్టీ పెద్దల అండదండలు.. పోలీసుల కనుసన్నల్లోనే  నల్లబెల్లం వ్యాపారంలో ఈయన పాతుకుపోయాడు. మరోవైపు తాడ్వాయి మండలం నుంచి ఇసుక రవాణా, ఏటూరునాగారం కేంద్రంగా లిక్కర్ వ్యాపారాలన్నింటినీ శాసించే స్థాయికి ఎదిగాడు. ఇటీవల ఏకంగా అతడికి ఏటూరునాగారం బ్లాక్ కాంగ్రెస్ అధ్యక్ష పదవి ఇచ్చి కాంగ్రెస్ నాయకులు భక్తిని చాటుకున్నారు. తాజాగా గంజాయి కేసులో వలీబాబా ఇరుక్కోవడంతో ఆ పార్టీ శ్రేణులకు మింగుడుపడడం లేదు. వలీబాబా ములుగు మాజీ ఎమ్మెల్యే పొదెం వీరయ్యకు ముఖ్యఅనుచరుడిగా చెలామణిలో ఉన్నారు.
 
 భద్రాచలం నుంచి 3 కిలోల గంజాయిని ఏటూరునాగారం తీసుకొస్తూ వలీబాబాతోపాటు అతడి అనుచరుడు గౌస్‌పాషా పోలీసులకు చిక్కారు. ఖమ్మం జిల్లా పోలీసులు వారిద్దరిని అరెస్టు చేసి కేసు నమోదు చేశారు. మరోవైపు వలీబాబాను కాపాడేందుకు స్వయంగా ఓ మంత్రి రంగంలోకి దిగినట్లు ప్రచారం జరుగుతోంది. అక్రమ దందాలు నిర్వహిస్తున్న వలీబాబా పద్ధతి మార్చుకోవాలని.. లేకుంటే శిక్ష తప్పదని ఇప్పటికే పలుమార్లు మావోయిస్టులు హెచ్చరికలు జారీ చేశారు. తన వ్యాపారాలను కాపాడుకునేందుకు వలీబాబా కాంగ్రెస్ పార్టీలోనూ చురుగ్గా పనిచేస్తున్నాడనే వాదనలున్నాయి. ఈ క్రమంలోనే  కేంద్ర మంత్రి బలరాంనాయక్‌కు దగ్గరయ్యాడని.. బహుమతిగా బ్లాక్ కాంగ్రెస్ అధ్యక్ష పదవి అందుకున్నట్లు పార్టీ కార్యకర్తలు అభిప్రాయపడుతున్నారు.