సాక్షి, హైదరాబాద్‌: కిరాణాకొట్టులో గంజాయి చాక్లెట్లను విక్రయిస్తున్న వ్యక్తిని సైబరాబాద్‌ స్పెషల్‌ ఆపరేషన్‌ టీం (ఎస్‌ఓటీ) పోలీసులు ఆదివారం అరెస్టు చేశారు. వివరాలిలా ఉన్నాయి.. ఉత్తరప్రదేశ్‌లోని గోహ్నియా గ్రామానికి చెందిన పివేస్‌ అలియాస్‌ ప్రైవేష్‌ బతుకుతెరువు కోసం కొన్నేళ్ల క్రితం ఐడీపీఎల్‌ బాలానగర్‌కు వలస వచ్చాడు. పేట్‌ బషీరాబాద్‌ పోలీసు స్టేషన్‌ పరిధిలోని సుభా నగర్‌లో కిరాణాష్‌ కొట్టు పెట్టాడు. ఆశించిన మేర ఆదాయం లేకపోవడంతో గంజాయి విక్రయించాలని నిర్ణయించుకున్నాడు. ఈక్రమంలో తన స్వస్థలమైన యూపీ నుంచి అక్రమంగా గంజాయి చాక్లెట్లను నగరానికి తీసుకొస్తున్నాడు. వీటిని స్కూల్, కాలేజీ విద్యార్థులు, యువత, దినసరి కూలీలకు విక్రయిస్తున్నాడు. విశ్వసనీయ సమాచారం అందుకున్న మేడ్చల్‌ ఎస్‌ఓటీ, పేట్‌ బషీరాబాద్‌ పోలీసులు కిరాణా కొట్టులో ఆకస్మిక తనిఖీలు చేయగా.. 5 ప్యాకెట్లలో 200 గంజాయి చాక్లెట్లు లభించాయి. నిందితుడిని అరెస్టు చేసి రిమాండ్‌కు తరలించారు.

సాక్షి, బెంగళూరు: యువకుడిపై గంజాయి ఆరోపణలు రావడంతో తీవ్ర మనస్తాపానికి గురై డెత్‌నోటు రాసి పెట్టి ఉరి వేసుకొన్నాడు. మృతుడు అభిషేక్‌ (23) వీడియోగ్రాపర్‌గా పనిచేసేవాడు.  స్నేహితునికి ఇచ్చిన అప్పును వసూలు చేసుకోవాలని అభిషేక్‌ అక్కడికి వెళ్ళిన సమయంలో కొందరు గంజాయి తాగుతుండగా పోలీసులు వచ్చి అందరినీ పోలీస్‌స్టేషన్‌కు తీసుకెళ్లారు. నీవు కూడ గంజాయి తాగుతావా అని అభిషేక్‌ని ప్రశ్నించారు. తాగలేదని చెప్పడంతో ఇంటికి పంపించారు. విచారణకు అవసరమైతే మళ్లీ రావాలని సూచించారు.  ఈ సంఘటనతో తీవ్రంగా మథనపడ్డాడు. తాను ఎలాంటి తప్పు చేయలేదని, కానీ ఇలాంటి ఆరోపణలు రావడం భయంగా ఉందని, ఇప్పటివరకు ఎన్ని కష్టాలు వచ్చినా కూడా భరించానని, కానీ ఎలాంటి తప్పు చేయకున్నా గంజాయి తాగినట్లు పట్టుకుని వెళ్లడాన్ని తట్టుకోలేకపోతున్నానని పేర్కొన్నాడు. ఈ మేరకు సుసైడ్‌ లెటర్‌ రాసి ఉరి చేసుకొని ఆత్మహత్య చేసుకున్నారు. అశోకపురం పోలీసులు పరిశీలించి ఈ ఘటనపై కేసు నమోదు చేశారు.   

సాక్షి, అమరావతి: నాటు సారా, అక్రమ మద్యాన్ని పూర్తిగా అరికట్టాలని ఉప ముఖ్యమంత్రి, ఎక్సైజ్‌ శాఖ మంత్రి కె.నారాయణ స్వామి అధికారులను ఆదేశించారు. దశాబ్దాలుగా సారా తయారీయే వృత్తిగా జీవిస్తున్నవారికి ప్రత్యామ్నాయ ఉపాధి అవకాశాలు కల్పించేందుకు ఉద్దేశించిన ‘పరివర్తనం’ కార్యక్రమాన్ని పకడ్బందీగా అమలు చేయాలన్నారు. వెలగపూడిలోని సచివాలయంలో గురువారం నిర్వహించిన ఎక్సైజ్‌ శాఖ సమీక్ష సమావేశంలో ఉప ముఖ్యమంత్రి మాట్లాడుతూ ప్రభుత్వ మద్యం దుకాణాల్లో అక్రమాలకు పాల్పడినవారి నుంచి సంబంధిత మొత్తాన్ని వసూలు చేసేందుకు ఆర్‌ ఆర్‌ చట్టం ప్రయోగించాలని ఆదేశించా­రు. అంతర్రాష్ట్రస్థాయి గంజాయి అక్రమ ర­వాణాను అరికట్టేందుకు విస్తృతంగా తనిఖీ­లు చేపట్టాలన్నారు. ఎక్సైజ్‌ శాఖ ప్రత్యేక ప్ర­ధాన కార్యదర్శి రజత్‌ భార్గవ, కమిషనర్‌ వివేక్‌ యాదవ్, రాష్ట్ర బెవరేజస్‌ కార్పొరేషన్‌ ఎండీ డి.వాసుదేవరెడ్డి తదితరులు పాల్గొన్నా­రు.   

సాక్షి, అమరావతి: సరిహద్దు రాష్ట్రాల నుంచి గంజాయి అక్రమ రవాణాకు అడ్డుకట్ట వేసేందుకు రాష్ట్ర పోలీసు శాఖ కార్యాచరణను వేగవంతం చేసింది. అందుకోసం సరిహద్దు రాష్ట్రాల పోలీసులతో కలిసి ప్రత్యేక బృందాలతో నిఘాను పటిష్టం చేస్తోంది. మొదటిదశగా ఒడిశా సరిహద్దు ప్రాంతాల్లో రెండురాష్ట్రాల పోలీసులు సంయుక్త కార్యాచరణ చేపట్టారు. దేశంలో ఇలా గంజాయి దందాకు అడ్డుకట్ట వేసేందుకు ఇతర రాష్ట్రాలతో కలిసి ఉమ్మడి కార్యాచరణ చేపట్టిన తొలిరాష్ట్రం ఆంధ్రప్రదేశ్‌ కావడం ప్రాధాన్యత సంతరించుకుంది. తరువాత దశల్లో ఛత్తీస్‌గఢ్, తెలంగాణ రాష్ట్రాలతో కూడా ఉమ్మడి కార్యాచరణను విస్తరించాలని పోలీసు శాఖ భావిస్తోంది. ఆపరేషన్‌ పరివర్తన్‌ ద్వారా రాష్ట్రంలో గంజాయి సాగును దాదాపుగా ధ్వంసం చేసినప్పటికీ సరిహద్దు రాష్ట్రాల్లో అక్రమంగా సాగుచేస్తున్న గంజాయిని రవాణా చేసేందుకు మన రాష్ట్ర భూభాగాన్ని గేట్‌వేగా ఉపయోగిస్తున్నారు. తమిళనాడు, కేరళ రాష్ట్రాలకు చెందిన గంజాయి ముఠాలు ఒడిశా, ఛత్తీస్‌గఢ్‌లలో కొనుగోలు చేసిన గంజాయిని అల్లూరి సీతారామరాజు జిల్లా ద్వారా ఇతర ప్రాంతాలకు తరలిస్తున్నాయి. ఈ గంజాయి దందాకు అడ్డుకట్ట వేసేందుకు ఏపీ పోలీసు శాఖ ఒడిశా పోలీసులతో కలిసి కొన్ని నెలల కిందటే సమన్వయ కమిటీని ఏర్పాటు చేసింది. అల్లూరి సీతారామరాజు జిల్లా ఎస్పీ, అదనపు ఎస్పీ/ఓఎస్డీ, డీఎస్పీలు, ఒడిశాలోని కోరాపుట్, మల్కనగిరి, జైపూర్‌ జిల్లాల ఎస్పీలు, అదనపు ఎస్పీలు, డీఎస్పీలు ఈ కమిటీలో సభ్యులుగా ఉన్నారు. ఒడిశాలో గంజాయి సాగును శాసిస్తున్న ముఠాల వివరాలను కూడా ఏపీ పోలీసులు ఆ రాష్ట్ర పోలీసులకు అందించారు. ఏపీ పోలీసులు ఇచ్చిన 38 మంది గంజాయి స్మగ్లర్ల వివరాల మేరకు ఆయా గ్రామాల్లో ఒడిశా ప్రత్యేక పోలీసు బృందాలు విస్తృతంగా సోదాలు నిర్వహించాయి. మరోవైపు రెండు రాష్ట్రాల సమన్వయ కమిటీ ఆధ్వర్యంలో స్థానిక గిరిజనులను భాగస్వాములుగా చేసుకుని నిఘాను పటిష్టం చేశారు. ప్రధానంగా ఒడిశాలోని చిత్రకొండ, జోలాపుట్, మల్కనగిరి ప్రాంతాల నుంచి మన రాష్ట్రానికి అనుసంధానించే ప్రధాన రహదారులతోపాటు ఇతర మార్గాల్లో గస్తీని ముమ్మరం చేశారు. ఆ మార్గాల్లో ఇప్పటికే అటు ఒడిశా, ఇటు ఏపీ వైపు కొత్తగా ఆరు చెక్‌పోస్టులు ఏర్పాటు చేశారు. ఒడిశా వైపు చిత్రకొండ, సుకుమా, జోలాపుట్, పడువ, సిమిలిగూడల్లో ఒడిశాకు చెందిన ప్రత్యేక పోలీసు బలగాలను మోహరించారు. ఆంధ్రప్రదేశ్‌ పరిధిలోని సీలేరు, డొంకరాయి, మారేడుమిల్లి, రంపచోడవరం, గోకవరం, మోతుగూడేల్లో స్పెషల్‌ ఎన్‌ఫోర్స్‌మెంట్‌ బ్యూరో (సెబ్‌) బృందాలు తనిఖీలు విస్తృతం చేశాయి.  త్వరలో ఛత్తీస్‌గఢ్, తెలంగాణలతో కలిసి.. ఇదే తరహాలో ఛత్తీస్‌గఢ్, తెలంగాణ పోలీసులతో కూడా కలిసి త్వరలో కార్యాచరణ చేపట్టాలని ఏపీ పోలీసు శాఖ భావిస్తోంది. అందుకోసం ఛత్తీస్‌గఢ్‌ పోలీసు శాఖతో ఇప్పటికే ప్రాథమికంగా చర్చించింది. త్వరలో తెలంగాణ పోలీసు ఉన్నతాధికారులతో కూడా ఏపీ పోలీసు ఉన్నతాధికారులు చర్చించనున్నారు. పొరుగు రాష్ట్రాలతో కలిసి ఉమ్మడి కార్యాచరణపై నార్కోటిక్స్‌ కంట్రోల్‌ బ్యూరో (ఎన్‌సీబీ)కి ఎప్పటికప్పుడు నివేదిస్తున్నారు. మన రాష్ట్రంలో ఆపరేషన్‌ పరివర్తన్‌ను విజయవంతంగా నిర్వహించిన తీరును ఎన్‌సీబీ నిశితంగా పరిశీలించింది. ఆంధ్రప్రదేశ్‌ పోలీసుల వ్యూహాన్ని అనుసరించమని ఇతర రాష్ట్రాలకు సూచించింది కూడా. గంజాయి ప్రభావిత రాష్ట్రాల డీజీపీలతో త్వరలో ఓ ఉన్నతస్థాయి సమావేశాన్ని నిర్వహించాలని భావిస్తున్నారు. ఎన్‌సీబీ ఉన్నతాధికారులు కూడా హాజరయ్యే ఈ సమావేశంలో కీలక నిర్ణయాలు తీసుకోనున్నారు. 

కందుకూరు: రాష్ట్రంలోని ఏజెన్సీ ప్రాంతం నుంచి శ్రీ పొట్టి శ్రీరాములు నెల్లూరు జిల్లా కందుకూరు మీదుగా ఢిల్లీకి అక్రమంగా తరలిస్తున్న దాదాపు రూ.10 లక్షల విలువజేసే 105 కేజీల గంజాయిని స్వాధీనం చేసుకున్న ఘటనలో పరారీలో ఉన్న ఇద్దరిని కందుకూరు పోలీసులు సోమవారం అరెస్టు చేశారు. డీఎస్పీ కండె శ్రీనివాసరావు వివరాలు వెల్లడించారు. పల్నాడు జిల్లాకు చెందిన పాములపాటి శ్రీనివాస్‌ వృత్తిరీత్యా సెకండ్‌హ్యాండ్‌ కార్ల వ్యాపారం చేస్తుంటాడు. ఈజీగా డబ్బు సంపాదించేందుకు మత్తు పదార్థాలు అక్రమ రవాణా  చేసేవాడు. రాష్ట్రంలోని ఏజెన్సీ ప్రాంతం నుంచి గంజాయి తీసుకురావడం.. దేశ రాజధాని ఢిల్లీకి తరలించి అక్కడి ఏజెంట్లకు అప్పజెప్పడం వంటి పనులు చేస్తుండేవాడు. ఈ క్రమంలో 2016లో రాజమండ్రి పోలీసులు అరెస్టు చేయడంతో మూడేళ్ల జైలుశిక్ష అనుభవించాడు. తరువాత 2021లో మరోసారి ఢిల్లీ పోలీసులకు చిక్కి ఇటీవలే జైలు నుంచి విడుదలై బయటకు వచ్చాడు. ఈ నేపథ్యంలో కృష్ణాజిల్లా  ఉంగుటూరు మండలం ఆత్కూరు గ్రామానికి చెందిన పాల రవితేజ అనే వ్యక్తితో పరిచయం ఏర్పడటంతో ఇద్దరూ కలిసి మళ్లీ గంజాయి అక్రమ రవాణాకు తెరతీశారు. కాగా, గత నెల 24వ తేదీ కందుకూరు ఓవీ రోడ్డులోని పలుకూరు అడ్డరోడ్డు వద్ద పోలీసులు వాహనాలను తనిఖీ చేస్తున్నారు. అదే సమయంలో కారులో గంజాయి తరలిస్తున్న వీరిద్దరూ పోలీసులను చూసి కారు వదిలేసి పారిపోయారు. కారును స్వాధీనం చేసుకున్న పోలీసులు పరిశీలించి చూడగా.. కారు సీటు కింద ప్రత్యేకంగా ఏర్పాటు చేసిన అరలో గంజాయి ఉన్నట్లు గుర్తించారు. 51 ప్యాకెట్ల గంజాయిని స్వాధీనం చేసుకున్నారు. దర్యాప్తు ప్రారంభించిన పోలీసులు కందుకూరులోని శ్రీనగర్‌ కాలనీలో ఉన్న శ్రీనివాస్, రవితేజను సోమవారం అరెస్టు చేశారు. వీరి వద్ద నుంచి మరో 20కేజీల గంజాయిని, రూ.20 లక్షల విలువైన మూడు కార్లను, రూ.20వేల విలువజేసే 8 మద్యం బాటిళ్లను స్వాధీనం చేసుకున్నారు. 

సాక్షి, ప్రత్యేక ప్రతినిధి: ‘‘గంజాయి సరఫరాకు ఇప్పటికే కళ్లెం వేశాం. ఆ మహమ్మారి సమూల నిర్మూలన అసాధ్యమేమీ కాదు. సర్వత్రా కట్టడి కష్టమూ కాదు. సీఎం వైఎస్‌ జగన్‌మోహన్‌రెడ్డి ఆదేశాలతో ఇప్పటికే ఆ దిశగా నిరంతరాయంగా పటిష్ట చర్యలు కొనసాగుతున్నాయి. పోలీసుల యత్నాలకు అన్నిస్థాయిల్లో తమవంతుగా ప్రజలూ స్పందించి సహకరిస్తే గంజాయితోపాటు మాదకద్రవ్యాలను సమాజం నుంచి పారదోలవచ్చు.  వీటి బారి నుంచి విద్యార్థులు, యువతను దూరంగా ఉంచి భవితకు భరోసా ఇవ్వవచ్చు’’ అని చెప్పారు దక్షిణ కోస్తా డీఐజీ త్రివిక్రమ వర్మ. గంజాయ్‌ గెటవుట్‌... పోలీస్‌ టార్గెట్‌ అనే నినాదంతో పనిచేస్తున్నామని,  గంజాయి నియంత్రణ విషయంలో ఇప్పటికే గణనీయమైన ఫలితాలు సాధ్యమయ్యాయని, గంజాయి ధ్వంసం, స్వాధీనం, కేసుల నమోదు, అరెస్టులే ప్రభుత్వ చిత్తశుద్ధికి నిదర్శనాలని డీఐజీ స్పష్టం చేశారు. ఆయన శుక్రవారం ‘సాక్షి’తో ప్రత్యేకంగా మాట్లాడారు. ఆ వివరాలు ఆయన మాటల్లోనే..  పట్టుబడితే అంతే సంగతులు గంజాయి, మత్తుపదార్థాలకు యువత, విద్యార్థులు దూరంగా ఉండాలి. వాటిని ఉత్పత్తి చేసినా, కలిగి ఉన్నా, రవాణా చేసినా, కొనుగోలుకు సహకరించినా, అక్రమ వ్యాపార లావాదేవీలకు ఆర్థిక సహాయం చేసినా, నిల్వ పెట్టుకున్నా, తమ స్థలాల్లో నిల్వకు అనుమతించినా చట్టరీత్యా నేరం. వారెంట్‌ లేకున్నా అరెస్టు చేయవచ్చు. నార్కోటిక్‌ డ్రగ్స్‌ అండ్‌ సైకోట్రాఫిక్‌ సబ్‌స్టెన్స్‌(ఎన్‌డీపీఎస్‌) యాక్ట్‌–1985 ప్రకారం నేర తీవ్రతను బట్టి ఏడాది నుంచి ఇరవయ్యేళ్ల వరకు శిక్ష ఖరారు కావచ్చు. అక్రమంగా వ్యాపారం చేయడం ద్వారా సంపాదించిన మొత్తాన్ని సీజ్‌ కూడా చేయవచ్చు.    ‘ఆపరేషన్‌ పరివర్తన్‌’తో గంజాయి ఉత్పత్తికే చెక్‌   గంజాయి నియంత్రణపై చర్యలకన్నా అసలు దాని ఉత్పత్తే లేకుండా చేయగలిగితే సమస్యకు శాశ్వత పరిష్కారం లభిస్తుందనే ముఖ్యమంత్రి సూచనల మేరకు ఆంధ్ర– ఒడిశా సరిహద్దు ప్రాంతాలు, ఉత్తరాంధ్ర, తూర్పుగోదావరి జిల్లాల్లో విభిన్న శాఖల సహకారంతో ‘ఆపరేషన్‌ పరివర్తన్‌’ పేరిట పోలీస్‌ యంత్రాంగం పూర్తిస్థాయిలో దృష్టిసారించి సత్ఫలితాలను సాధిస్తోంది. గిరిజనులే స్వచ్ఛందంగా గంజాయి సాగుకు తిలోదకాలు ఇస్తున్నారు. అవగాహన సదస్సులతో గిరిజనుల్లో అధికారులు చైతన్యం తీసుకొస్తున్నారు. దేశంలోనే ఎన్నడూ.. ఎక్కడా జరగని రీతిలో ఈ ఏడాది ఫిబ్రవరిలో ఒకే రోజున రూ.300 కోట్లకు పైగా విలువ చేసే రెండు లక్షల కిలోల గంజాయిని ధ్వంసం చేయడం రికార్డు.    సీఎం చిత్తశుద్ధికి నిదర్శనమిది..   అటవీ ప్రాంతాల్లో సాగవుతున్న గంజాయిని సమూలంగా లేకుండా చేయడంలో భాగంగా గిరిజనులకు లక్ష ఎకరాల్లో ప్రత్యామ్నాయ పంటల సాగుకు ముఖ్యమంత్రి వైఎస్‌ జగన్‌మోహన్‌రెడ్డి ప్రణాళికను రూపొందింపజేశారు. మూడేళ్లలో రూ.144 కోట్లతో విభిన్న ప్రోత్సాహకాలను అందజేస్తున్నారు. వేలాది మంది గిరిజనులకు లక్షల ఎకరాలను ఆర్‌ఓఎఫ్‌ఆర్‌ పట్టాలిచ్చి వారికి యాజమాన్య హక్కులు కలి్పంచి శాశ్వత జీవనోపాధికి బాటలు వేస్తున్నారు. ప్రత్యామ్నాయ పంటల సాగుతో గంజాయికి చెక్‌ పెడుతున్నారు.    ఏపీ నుంచి సరఫరా అనేది ఒకప్పటి మాట..   దక్షిణాది రాష్ట్రాలకు ఏపీ నుంచి గంజాయి సరఫరా అన్నది ఒకప్పటి మాట. ఇప్పుడు ఆ పరిస్థితులు లేనే లేవు. ఎస్‌ఈబీ, పోలీసులు తీసుకుంటున్న చర్యలు గంజాయి నియంత్రణకు బాగా ఉపకరిస్తున్నాయి.  రెండేళ్ల కిందట చెన్నైలో జరిగిన దక్షిణాది రాష్ట్రాల సమావేశంలో వచ్చిన అంశాన్ని ఇప్పుడు ప్రస్తావించి ఆపాదించడం ఏమాత్రమూ సరికాదు. రాష్ట్రంలో 2020లో 650 కేసులు, 2021లో 2,200 కేసులు నమోదయ్యాయి. అలాగే 2020లో 90 వేల కిలోలు, 2021లో 2.31 లక్షల కిలోల గంజాయిని స్వా«దీనం చేసుకున్నాం. మేం తీసుకున్న చర్యలకు ఇవే నిదర్శనాలు.   గుంటూరు, కృష్ణా జిల్లాల్లో ‘ఆపరేషన్‌ నయా సవేరా’.. గంజాయి తదితర మాదకద్రవ్యాల నిరోధానికి గుంటూరు, కృష్ణా జిల్లాల్లో ‘ఆపరేషన్‌ నయా సవేరా’ పేరిట పైలెట్‌ ప్రాజెక్టును  స్పెషల్‌ ఎన్‌ఫోర్స్‌మెంట్‌ బ్యూరో (ఎస్‌ఈబీ) ప్రత్యేకంగా చేపట్టింది. ఎస్‌ఈబీ ప్రత్యేక బృందాలను ఏర్పాటుచేసి మాదకద్రవ్యాల రవాణా, వినియోగాన్ని కట్టడి చేసేందుకు రెండు జిల్లాల్లో గత ఏడాది మార్చి 25– 31 తేదీల మధ్య దాడులు నిర్వహించి 33 కేసులు నమోదుచేసి 56 మందిని అరెస్టు చేసి వారి నుంచి 78.7 కిలోల గంజాయితో పాటు 4 గ్రాముల ఎండీఎంఏ (సింథటిక్‌ డ్రగ్స్‌) స్వా«దీనం చేసుకుంది.   

ఒంగోలు: రెండు లక్షల రూపాయల విలువైన డ్రగ్స్‌ తరలిస్తున్న కేసులో కీలక నిందితుడు మలిపెద్ది సాయిరాఘవ అలియాస్‌ సోనును అరెస్టు చేసినట్టు ఎస్‌ఈబీ సూపరింటెండెంట్‌ అవులయ్య తెలిపారు. ఒంగోలు ఎస్‌ఈబీ కార్యాలయంలో ఆదివారం నిందితుడిని మీడియా ముందు హాజరుపరిచారు. ఈ సందర్భంగా ఆయన మాట్లాడుతూ ఎస్‌ఈబీ జాయింట్‌ డైరెక్టర్‌ గరికపాటి బిందుమాధవ్‌ నుంచి వచ్చిన సమాచారం మేరకు తమ సిబ్బంది ఈ నెల 18న స్థానిక రైల్వే స్టేషన్‌ సమీపంలో గుజ్జు విజయశివభార్గవరెడ్డిని అరెస్టు చేసి అతని వద్ద నుంచి రూ.2 లక్షల విలువైన నిషేధిత డ్రగ్స్‌ను సీజ్‌ చేసినట్టు తెలిపారు. అతనిని విచారించగా ఈ కేసులో బెంగళూరుకు చెందిన ఆంటోనీ, వైజాగ్‌కు చెందిన సోనులు కీలక పాత్రధారులుగా గుర్తించామన్నారు. ఈ నేపథ్యంలో తమ సిబ్బంది వైజాగ్‌ వెళ్లి మలిపెద్ది సాయిరాఘవ అలియాస్‌ సోనును అరెస్టు చేసి విచారించగా.. 2019లో వైజాగ్‌లో సంచలనం సృష్టించిన రేవ్‌ పార్టీ గంజాయి కేసులో ప్రధాన నిందితుల్లో ఒకడుగా తేలిందన్నారు. సోనును రిమాండ్‌కు తరలించినట్టు అవులయ్య వివరించారు. కార్యక్రమంలో ఎస్‌ఈబీ అసిస్టెంట్‌ ఎన్‌ఫోర్సుమెంట్‌ సూపరింటెండెంట్‌ శ్రీధర్‌బాబు, ఒంగోలు ఎస్‌ఈబీ ఇన్‌స్పెక్టర్‌ లత తదితరులున్నారు.  

పర్లాకిమిడి (ఒడిశా): పర్లాకిమిడి ఉప కారాగారంలో రిమాండ్‌లో ఉన్న బీహార్‌ రాష్ట్రానికి చెందిన ఖైదీ పిల్లలను గజపతి జిల్లా అధికారులు వారి స్వగ్రామం పాట్నాకు బుధవారం తరలించారు. గంజాయి అక్రమ రవాణా చేస్తున్న పాట్నాకు చెందిన వివాహిత ఇటీవల మోహానా వద్ద పోలీసులకు పట్టుబడింది. ఆమెను అరెస్టు చేసి, పర్లాకిమిడి ఉప కారాగారంలో రిమాండ్‌ ఖైదీగా ఉంచారు. ఆమెతో పాటే 5, 7 ఏళ్ల వయస్సు ఉన్న ఇద్దరు అమ్మాయిలను కూడా కారాగారానికే తరలించడంపై జిల్లా శిశు సంరక్షణ సమితి, జిల్లా లీగల్‌ సర్వీసెస్‌ అధ్యక్షులు అభ్యంతరం వ్యక్తం చేశారు. మైనర్‌ బాలికలను జైలులో ఉంచకుండా వారి స్వగ్రామానికి తరలించాల్సిందిగా ఆదేశించారు. దీంతో జిల్లా కలెక్టర్‌ లింగరాజ్‌ పండా, ఎస్పీ జయరాం శత్పథి సూచనల మేరకు పిల్లలిద్దరినీ పాట్నా తీసుకొని వెళ్తేందుకు డీసీపీయూ కార్యాలయానికి చెందిన నరేష్‌కుమార్‌ నాయక్, మరో ఇద్దరు మహిళా కానిస్టేబుళ్లను వెంట పంపించారు. వారంతా పర్లాకిమిడి నుంచి పయనమై వెళ్లారు.  చదవండి: (మీ ముఖ్యమంత్రికి కృతజ్ఞతలు చెప్పండి!)

సాక్షి, హైదరాబాద్‌: పెడ్లర్ల నుంచి స్వాధీనం చేసుకున్న గంజాయి ‘తరలింపు’లో పోలీసుల నిర్లక్ష్యం ఓ ప్రైవేట్‌ సెక్యూరిటీ గార్డుకు కలిసి వచ్చింది. ‘మిగిలిపోయిన’ గంజాయిని సొంతం చేసుకున్న అతగాడు స్థానికంగా విక్రయించాడు. ఇలా ఖరీదు చేసి వినియోగిస్తున్న వారిని పోలీసులు పట్టుకోవడంలో కథ మొత్తం బయటకు వచ్చింది. ఈ ‘గమ్మత్తు’ వ్యవహారంలో సెక్యూరిటీ గార్డుపై రెండు కేసులు నమోదు కాగా.. నిర్లక్ష్యంగా వ్యవహరించిన హయత్‌నగర్‌ పోలీసులపై చర్యలకు రంగం సిద్ధమవుతోంది.  చదవండి: HYD: ఆరేళ్ల చిన్నారిపై అఘాయిత్యాన్ని అడ్డుకున్న ఆటోడ్రైవర్‌  ఠాణాకు మరమ్మతులు జరుగుతుండడంతో..   ముఖ్యమంత్రి ఆదేశాల మేరకు కొన్నాళ్లుగా పోలీసులు గంజాయిపై జంగ్‌ చేస్తున్నారు. ఫలితంగా వరుసగా విక్రేతలు, వినియోగదారులు పట్టుబడుతున్నారు. ఇటీవల హయత్‌నగర్‌ పోలీసులు ఇలాంటి ఓ ముఠాను పట్టుకున్నారు. వీరి నుంచి స్వాధీనం చేసుకున్న 9 కేజీల గంజాయిని కోర్టు ఆదేశాలతోనే ధ్వంసం చేయాల్సి ఉంటుంది. అప్పటి వరకు కచ్చితంగా దర్యాప్తు అధికారులు ఆ సరుకును తమ అధీనంలో ఉంచుకోవాలి. సాధారణంగా పోలీసులు ఇలా స్వాధీనం చేసుకున్న గంజాయిని ఠాణాలోనే ఉంచుతారు. ఆ సమయంలో పోలీసుస్టేషన్‌కు మరమ్మతులు జరుగుతుండటంతో స్థానికంగా ఉన్న ఓ ప్రైవేట్‌ గోదాంలో భద్రపరిచారు.  చదవండి: ఎమ్మెల్సీ ఎన్నికల్లో టీఆర్‌ఎస్‌ బోణీ.. కవిత సహా ముగ్గురు ఏకగ్రీవం..! తరలింపులో నిర్లక్ష్యం..   ఠాణాకు మరమ్మతులు పూర్తయిన తర్వాత పోలీసులు ఈ గంజాయిని తీసుకురావచ్చారు. ప్యాకెట్లలో ఉన్న గంజాయిని తీసుకువచ్చిన బృందం వాటి కింద పరిచిన కార్పెట్‌ కింద పడిపోయిన దాన్ని పట్టించుకోలేదు. ఈ నిర్లక్ష్యమే సదరు గోదాం సెక్యూరిటీ గార్డుకు కలిసి వచ్చింది. గోదాం శుభ్రం చేసే నెపంతో అక్కడ పడిన గంజాయిని అతడు సొంతం చేసుకున్నాడు. దాన్ని తన వద్దే భద్రపరిచి, స్థానికంగా కొందరికి విక్రయించాడు. విడతల వారీగా జరిగిన ఈ విక్రయంపై హయత్‌నగర్‌ పోలీసులకే సమాచారం అందింది. దీంతో రంగంలోకి దిగిన అధికారులు ఖరీదు చేసిన వారిని, వారి ద్వారా సదరు సెక్యూరిటీ గార్డును పట్టుకున్నారు.  నిర్లక్ష్యం బయటకు...  కొన్నేళ్లుగా నగరంతో పాటు శివారు జిల్లాలకు గంజాయి విశాఖ ఏజెన్సీ నుంచి సరఫరా అవుతోంది. ఈ సెక్యూరిటీ గార్డుకు గంజాయి అలానే చేరిందని పోలీసులు భావించారు. విచారణ నేపథ్యంలోనే తమ నిర్లక్ష్యం బయటపడింది. తాము భద్రపరిచిన గంజాయిలో కొంత భాగం చోరీ చేయడంపై దొంగతనం కేసు, ఆ సరుకును విక్రయించడంపై మాదకద్రవ్యాల చట్టం కింద మరో కేసు నమోదు చేశారు. ప్రైవేట్‌ సెక్యూరిటీ గార్డును హయత్‌నగర్‌ పోలీసులు గుట్టుచప్పుడు కాకుండా రిమాండ్‌కు తరలించారు. ఈ ‘గమ్మత్తు’ కథ మొత్తం తెలుసుకున్న ఉన్నతాధికారులు తీవ్రంగా పరిగణించారు. సీజ్‌ చేసిన గంజాయి నిల్వ, తరలింపులో నిర్లక్ష్యంగా ఉన్న హయత్‌నగర్‌ ఇన్‌స్పెక్టర్‌ ఎం.సురేందర్‌తో పాటు మరో ఇద్దరు పోలీసులకు చార్జి మెమోలు జారీ చేసినట్లు రాచకొండ పోలీస్‌ కమిషనర్‌ మహేశ్‌ భగవత్‌ తెలిపారు. ప్రస్తుతం జరుగుతున్న అంతర్గత విచారణ ముగిసిన తర్వాత తదుపరి చర్యలు చేపట్టనున్నారని సమాచారం.   

సాక్షి, విశాఖ జిల్లా: టీడీపీ కష్టాల్లో వున్నప్పుడు మాత్రమే పవన్ కల్యాణ్ తెరపైకి వస్తారని పెందుర్తి ఎమ్మెల్యే అదీప్‌రాజ్‌ ఎద్దేవా చేశారు. బుధవారం ఆయన మీడియాతో మాట్లాడుతూ, చంద్రబాబు హయాంలో విశాఖ డ్రగ్స్‌ మాఫియా కనిపించలేదా అని ప్రశ్నించారు. చంద్రబాబు హయాంలో గంజాయి సాగు జరిగినట్లు అప్పటి మంత్రి గంటానే అంగీకరించారన్నారు. (చదవండి: కష్టం.. కలవలేం: చంద్రబాబుకు అపాయింట్‌మెంట్‌ ఇవ్వని మోదీ, అమిత్‌ షా)  టీడీపీ హయాంలో భారీగా గంజాయి అమ్మకాలు: కరణం ధర్మశ్రీ విశాఖలో గంజాయి తాగేవాళ్లే లేరని ఎమ్మెల్యే కరణం ధర్మశ్రీ అన్నారు. చంద్రబాబు సిగ్నల్‌ ఇవ్వగానే పవన్‌ డ్రగ్స్‌పై ట్వీట్‌ పెట్టాడని మండిపడ్డారు. టీడీపీ హయాంలోనే భారీగా గంజాయి అమ్మకాలు జరిగాయన్నారు. చదవండి: పచ్చదళం దుష్ప్రచారం

సాక్షి, అమరావతి: నేర విచారణ ప్రక్రియ స్మృతి (సీఆర్‌పీసీ)లో అత్యంత ప్రాధాన్యత ఉన్న సెక్షన్‌ 41ఏ విషయంలో హైకోర్టు కీలక తీర్పు వెలువరించింది. సీఆర్‌పీసీ సెక్షన్‌ 41ఏ ఐపీసీ నేరాలకు మాత్రమే కాకుండా ప్రత్యేక చట్టాలకు సైతం వర్తిస్తుందంటూ తీర్పునిచ్చింది. ఇందులో భాగంగానే నార్కోటిక్‌ డ్రగ్స్‌ అండ్‌ సైకోట్రోపిక్‌ సబ్‌స్టాన్సస్‌ చట్టం (ఎన్‌డీపీఎస్‌) కింద జరిగే నేరాలకు కూడా సీఆర్‌పీసీ సెక్షన్‌ 41ఏ వర్తిస్తుందని హైకోర్టు స్పష్టం చేసింది. ఎన్‌డీపీఎస్‌ చట్టం కింద నమోదు చేసే కేసులకు సీఆర్‌పీసీ 41ఏను వర్తింప చేయరాదన్న నిషేధం ఏదీ లేదంది. ఎన్‌డీపీఎస్‌ చట్టంలో ఏడేళ్ల కన్నా తక్కువ శిక్ష పడే సెక్షన్ల కింద కేసు నమోదు చేసినప్పుడు, దర్యాప్తు అధికారులు నిందితులకు సీఆర్‌పీసీ సెక్షన్‌ 41ఏ కింద నోటీసులు ఇచ్చి వివరణ తీసుకోవాల్సి ఉంటుందని తెలిపింది. ఈ మేరకు న్యాయమూర్తి జస్టిస్‌ చీకటి మానవేంద్రనాథ్‌ ఇటీవల తీర్పు వెలువరించారు. బెంగళూరుకు చెందిన కె.రంజిత్‌ వాహనంలో గంజాయి ప్యాకెట్లు దొరకడంతో చిత్తూరు జిల్లా గంగవరం పోలీసులు అతడితోపాటు మరికొందరిపై ఎన్‌డీపీఎస్‌ చట్టంలోని సెక్షన్‌ 20(బీ(2)(సీ) కింద గంజాయి అక్రమ రవాణా కేసు నమోదు చేశారు. ఈ కేసును కొట్టేయాలని కోరుతూ రంజిత్‌ పిటిషన్‌ దాఖలు చేశారు. ఈ వ్యాజ్యంపై జస్టిస్‌ మానవేంద్రనాథ్‌ రాయ్‌ విచారణ జరిపారు.  25 ఏళ్లకు పొడిగించవచ్చు.. పిటిషనర్‌ తరఫు న్యాయవాది డాక్టర్‌ మజ్జి సూరిబాబు వాదనలు వినిపిస్తూ.. పిటిషనర్‌ వద్ద కేవలం 600 గ్రాముల గంజాయి మాత్రమే ఉందన్నారు. ఇలా స్వల్పంగా దొరికినప్పుడు నేరం నిర్ధారణ అయితే సెక్షన్‌ 20(బీ)(2)(ఏ) కింద ఏడాది మాత్రమే జైలుశిక్ష పడుతుందన్నారు. అందువల్ల పిటిషనర్‌కు సీఆర్‌పీసీ సెక్షన్‌ 41ఏ కింద నోటీసులు ఇచ్చేలా ఆదేశాలు ఇవ్వాలని కోరారు. అయితే ఈ వాదనను పోలీసుల తరఫు రాష్ట్ర అదనపు పబ్లిక్‌ ప్రాసిక్యూటర్‌ దుష్యంత్‌రెడ్డి వ్యతిరేకించారు. పోలీసులు నమోదు చేసిన సెక్షన్‌ కింద 10 ఏళ్ల జైలు శిక్ష పడుతుందని.. దాన్ని 25 ఏళ్లకు సైతం పొడిగించవచ్చన్నారు. సీఆర్‌పీసీ సెక్షన్‌ 41ఏ నోటీసు ఎన్‌డీపీఎస్‌ చట్టం కింద పెట్టిన కేసులకు వర్తించదన్నారు. ఇరుపక్షాల వాదనలు విన్న న్యాయమూర్తి.. ‘ఎన్‌డీపీఎస్‌ చట్టం ప్రకారం.. 1,000 గ్రాముల గంజాయి.. స్వల్ప పరిమాణం. 20 కిలోలు ఉంటే అది వాణిజ్య పరిమాణం. ప్రస్తుత కేసులో పిటిషనర్‌ వద్ద దొరికింది కేవలం 600 గ్రాములే కాబట్టి అతడిపై సెక్షన్‌ 20(బీ(2)(సీ) కింద కేసు సరికాదు. పిటిషనర్‌పై 20(బీ)(2)(ఏ) కింద మాత్రమే కేసు నమోదు చేయాలి. సీఆర్‌పీసీలోని సెక్షన్‌ 4(2) ఇతర చట్టాల కింద నమోదైన కేసులను కూడా విచారించి తీరాలని చెబుతోంది’ అని న్యాయమూర్తి పేర్కొన్నారు. ఏడేళ్లలోపు శిక్ష పడే కేసులకు.. ఏ రకంగా చూసినా ఎన్‌డీపీఎస్‌ చట్టం కింద ఏడేళ్ల లోపు శిక్ష పడే కేసులకు సీఆర్‌పీసీ నిబంధనలు వర్తిస్తాయి. పోలీసులు ఇష్టారాజ్యంగా చేసే అరెస్టుల నుంచి పౌరుల స్వేచ్ఛను కాపాడేందుకు సీఆర్‌పీసీ సెక్షన్‌ 41, 41ఏ ఉన్నాయి. పౌరుల స్వేచ్ఛకు సంబంధించిన ఆ నిబంధనలు ప్రత్యేక చట్టాలకూ వర్తిస్తాయి. ప్రస్తుత కేసులో పిటిషనర్‌ వాహనంలో 600 గ్రాముల గంజాయి దొరికినందున, అందుకు పడే శిక్ష ఏడేళ్ల కన్నా తక్కువ కాబట్టి అతడి విషయంలో సీఆర్‌పీసీ సెక్షన్‌ 41ఏ ప్రకారం నడుచుకోవాలి’ అని దర్యాప్తు అధికారిని న్యాయమూర్తి ఆదేశించారు.  

అతను ఉన్నత చదువులు చదివాడు. సాఫ్ట్‌వేర్‌ ఇంజనీర్‌గా కూడా పనిచేశాడు. అయితే తన ప్రతిభను, అర్హతలను సక్రమంగా కాకుండా వక్రమార్గంలో వాడాడు. కొన్నేళ్ల క్రితం మ్యాట్రిమోనీ వెబ్‌సైట్‌ ద్వారా ఓ యువతితో పరిచయం పెంచుకుని, చాటింగ్‌తోనే చీటింగ్‌ చేసి రూ.లక్షలు కొట్టేశాడు. చాలా సులువుగా డబ్బులు రావడంతో అప్పటినుంచి అదే ప్రవృత్తిగా ఎంచుకున్నాడు. తనకు బట్టతల ఉన్న విషయాన్ని దాచి.. మ్యాట్రిమోనీ వెబ్‌సైట్లలో యువతులకు వల వేసి మోసాలకు పాల్పడ్డాడు. అంతేకాదు.. గంజాయి స్మగ్లింగ్, నకిలీ సాఫ్ట్‌వేర్‌ కంపెనీలు పెట్టి ఉద్యోగాల పేరిట మోసాలు.. ఇలా అతని నేరాల చిట్టా చేంతాడంత ఉంది. చివరకు పోలీసుల చేతికి చిక్కడంతో అతగాడి లీలలకు తెరపడింది.  చిత్తూరు అర్బన్‌: పెళ్లికాని యువతులను మ్యాట్రిమోనీ (వివాహ సంబంధాల) వెబ్‌సైట్ల ద్వారా పరిచయం చేసుకుని, వారి నుంచి రూ.లక్షలు కాజేసే కేటుగాడిని చిత్తూరు జిల్లా పోలీసులు అరెస్ట్‌ చేశారు. ఎస్పీ సెంథిల్‌కుమార్, డీఎస్పీ సుధాకర్‌రెడ్డిలు సోమవారం మీడియా సమావేశంలో వివరాలు వెల్లడించారు. ప్రకాశం జిల్లా అద్దంకి మండలం కొటికలపూడి గ్రామానికి చెందిన పున్నాటి శ్రీనివాస్‌ (33) డిగ్రీ వరకు అద్దంకిలో చదివి, హైదరాబాద్‌లో ఎంసీఏ చేశాడు. ఆపై ఐఐటీ కాన్పూర్‌లో ఎంటెక్‌ చేస్తూ మధ్యలో మానేశాడు. కొన్నాళ్లు సాఫ్ట్‌వేర్‌ ఇంజనీరుగా పనిచేశాడు. 2017లో ఓ మ్యాట్రిమోనీ వెబ్‌సైట్‌లో తన ఫొటో ఉంచగా.. ఓ యువతి పరిచయమైంది. ఆ యువతితో ఆన్‌లైన్‌ చాటింగ్‌ చేసి రూ.లక్షలు కాజేశాడు. కష్టపడకుండానే డబ్బులు రావడంతో ఇదే ప్రవృత్తిగా ఎంచుకున్నాడు. పలు మ్యాట్రిమోనీ వెబ్‌సైట్లలో తనకు బట్టతల ఉన్న విషయాన్ని దాచిపెట్టి.. విగ్గుతో ఉన్న ఫొటోలు పెట్టేవాడు. నకిలీ పేర్లతో పెళ్లికాని యువతులతో ఆన్‌లైన్‌లో చాటింగ్‌ చేయడం, పరిచయం పెరిగాక మాయమాటలు చెప్పి వారితో డబ్బులు తన బ్యాంకు ఖాతాలోకి వేయించుకునేవాడు. అలా.. 2017లో ఒంగోలుకు చెందిన ఓ టెకీ యువతి వద్ద రూ.27 లక్షలు, 2018లో నరసరావుపేటకు చెందిన మరో టెకీ యువతి వద్ద రూ.40 లక్షలు కాజేసి రెండు సార్లు అరెస్టు కూడా అయ్యాడు. జైలు జీవితం అనుభవించినా శ్రీనివాస్‌లో ఏమాత్రం మార్పు రాలేదు. రెండు నెలల క్రితం చిత్తూరుకు చెందిన ఓ యువతిని మ్యాట్రిమోనీ ద్వారా మోసం చేసి రూ.1.4 లక్షలు, మదనపల్లెలో మరో యువతిని మోసం చేసి రూ.7 లక్షలు కాజేశాడు. బాధిత యువతుల ఫిర్యాదుతో కేసు నమోదు చేసిన పోలీసులు నిందితుడికోసం గాలిస్తుండగా.. చిత్తూరు–బెంగళూరు బైపాస్‌ రోడ్డు వద్ద నాలుగు కిలోల గంజాయి స్మగ్లింగ్‌ చేస్తూ దొరికిపోయాడు. విచారణలో శ్రీనివాస్‌ లీలలు వెలుగుచూశాయి. నకిలీ సాఫ్ట్‌వేర్‌ కంపెనీలు, ఉద్యోగాల పేరిట డబ్బులు వసూలు చేయడం లాంటి నేరాల చిట్టా బయటపడింది. నిందితుడి నుంచి రూ.50 వేల నగదు, ఓ విగ్గు, రెండు సెల్‌ఫోన్‌లను పోలీసులు స్వాధీనం చేసుకున్నారు. కేసు ఛేదించడంలో ప్రతిభ చూపించిన పోలీసు సిబ్బందికి ఎస్పీ నగదు రివార్డులు అందజేశారు. 

పాడేరు: ఏజెన్సీ నుంచి మైదాన ప్రాంతాలకు అక్రమంగా తరలిస్తున్న గంజాయిని పెద్ద మొత్తంలో పోలీసు శాఖ పట్టుకుంది. మంగళవారం సాయంత్రం విశాఖ జిల్లా పాడేరు మండలం చింతలవీధి జంక్షన్‌ వద్ద తనిఖీలు నిర్వహిస్తుండగా ఏపీ30యూ3517 నంబర్‌ గల ఐచర్‌ వ్యాన్‌ తనిఖీ చేయగా ఈ గంజాయి అక్రమ రవాణా వెలుగు చూసిందని ఎస్‌ఐ లక్ష్మణ్‌ బుధవారం తెలిపారు. వ్యాన్‌ వెనుక భాగంలో తనిఖీ చేస్తున్న సమయంలో వాహనంలో ఉన్న డ్రైవర్, ఇతర సిబ్బంది తప్పించుకుని పరారయ్యారని ఎస్‌ఐ తెలిపారు. ఈ ఐచర్‌ వ్యాన్‌ను సీజ్‌ చేశామని, 2,520 కిలోల గంజాయిని స్వాధీనం చేసుకున్నామన్నారు. పట్టుబడిన గంజాయి విలువ రూ.75 లక్షలు ఉంటుందన్నారు. పరారైన నిందితులను పట్టుకునేందుకు ప్రత్యేక పోలీసు బృందాన్ని ఏర్పాటు చేశామని చెప్పారు.  

అందమైన ప్రకృతి ఒడిలో గంజాయి పెరుగుతోంది. గార్డెన్‌ సిటీగా పేరొందిన బెంగళూరుకు తరలిపోతోంది. ఈ మార్గంలోని చిత్తూరులో పిల్లలను మత్తుకు బానిసలుగా చేస్తోంది. ఇటీవల మైనర్లు గంజాయి తాగుతున్న వీడియోలు వెలుగులోకి రావడంతో పోలీ సులు రంగంలోకి దిగారు. గంజాయి అక్రమ రవాణాపై ఉక్కుపాదం మోపారు. పిల్లలకు హెచ్చరికలు, తల్లిదండ్రులకు కౌన్సెలింగ్‌ ఇచ్చారు. స్మగ్లింగ్‌పై ప్రత్యేక నిఘా పెట్టారు. చదవండి: బైకుల దొంగ.. 18 మోటార్‌ సైకిళ్లు స్వాధీనం  చిత్తూరు అర్బన్‌: అరకు.. ఈపేరు వింటేనే ఎత్తయిన కొండలు.. అందమైన లోయలు. ప్రకృతి హొయలు కళ్లముందు కదలాడుతుంటాయి. ఇంత అందమైన వనంలో టన్నుల కొద్దీ గంజాయి సాగు చేసి స్మగ్లింగ్‌ చేయడంలో ఆరితేరినవారూ ఉన్నారు. ఇటీవల అరకు నుంచి పెద్ద మొత్తంలో జిల్లాకు గంజాయి రవాణా అవుతుండడమే దానికి నిదర్శనం. దీనిమత్తులో యువత చిత్తవుతున్నారు. రవాణా ఇలా..   విశాఖ జిల్లాలోని అరకులో గంజాయి మొక్కల పెంపకం గుట్టుచప్పుడు కాకుండా సాగుతోంది. ఈ పంటను నిర్మూలించడానికి ఎన్ని ప్రయత్నాలు చేస్తున్నా ఏదో ఒకరూపంలో  ఇతర ప్రాంతాలకు చేరుతోంది. ఇక విశాఖలోని అరకు, గాజువాక ప్రాంతాల నుంచి చిత్తూరు జిల్లాకు చేరుతున్నట్టు పోలీసులు గుర్తించారు. గంజాయి ఆకులను బాగా ఎండబెట్టి చిన్న చిన్న ముక్కలుగా కత్తిరించి 5 కిలోలు, 10 కిలోల సంచుల్లో జిల్లాకు అక్రమ రవాణా చేస్తున్నారు. ఒక్కోసారి 20 కేజీల బ్యాగుల రూపంలో కూడా ఇక్కడకు వస్తోంది. వీటి రవాణాలో ఎవరికీ అనుమానం రాకుండా స్మగ్లర్లు చాలా జాగ్రత్తలు తీసుకుంటున్నారు. కొన్నిసార్లు ఆర్టీసీ బస్సుల్లోనే లగేజీ రూపంలో తీసుకొస్తుండగా, చాలా వరకు లారీల్లో ఇక్కడకు తరలిస్తున్నా రు. నిత్యావసర సరుకులు, గృహ నిర్మాణ పరికరాలతో పాటు గంజాయి బ్యాగులను లారీ అడుగు భాగంలో దాచి ఉంచి కొనుగో లుదారులకు వీటిని చేరుస్తున్నారు. మారువేషాలతో..   చిత్తూరులోని కొంగారెడ్డిపల్లె ప్రాంతంలో కొందరు మైనర్లు గంజాయి పీలుస్తున్న వీడియాలు ఇటీవల సామాజిక మాధ్యమాల్లో వైరల్‌ కావడంతో పోలీసులు దీనిపై దృష్టి సారించారు. డీఎస్పీ సుధాకర్‌రెడ్డి ఆధ్వర్యంలో ఓ ప్రత్యేక బృందాన్ని నియమించి రంగంలోకి దింపారు. మొత్తం 15 మందితో ఉన్న ఈ బృందం అరకు, గాజువాక ప్రాంతాలకు వెళ్లి మధ్యవర్తుల అవతారం ఎత్తింది. వంద కేజీల గంజాయి కావాలంటూ మారువేషాల్లో బేరమాడి అరకుకు చెందిన ప్రధాన స్మగ్లర్లు రమణ, కుడా భాస్కర్, గాజువాకకు చెందిన పోతురాజును ఇటీవల అరెస్టు చేశారు. వీరి నుంచి రాబట్టిన సమాచారంతో పూతలపట్టు బండపల్లె, కల్లూరు, మదనపల్లె, పాకాల, తవణంపల్లె ప్రాంతాలకు చెందిన 50 మందిని పోలీసులు అరెస్టు చేశారు. గంజాయి స్మగ్లింగ్‌ కేసులో మరో నింది తుడు బెంగళూరుకు  చెందిన సిద్ధూ కోసం ముమ్మరంగా గాలిస్తున్నారు. వయా బెంగళూరు..   విశాఖ జిల్లా నుంచి వస్తున్న గంజాయి తొలుత తిరుపతికి చేరుతోంది. ఇక్కడ రైల్వే స్టేషన్, బస్టాండు సమీప ప్రాంతాల్లో కొందరు చిన్నపాటి పొట్లాలుగా చుట్టి అమ్ముతున్నారు. పది సిగరెట్లలో ఉండే పొగాకు పరిమాణంలో ఉన్న ఒక్కో ప్యాకెట్‌ ధర రూ.200 నుంచి రూ.500 వరకు విక్రయిస్తున్నారు. తిరుపతి తరువాత పశ్చిమ ప్రాంతాలకు పూతలపట్టు మండలంలోని బండపల్లె నుంచి పెద్దమొత్తంలో తరలిస్తున్నారు. పుంగనూరు, పలమనేరు, కల్లూరు, పాకాల, మదనపల్లెతోపాటు కుప్పం వరకు  సరుకు బండపల్లె నుంచే వెళుతోంది. ఇంతటితో ఆగని గంజాయి స్మగ్లింగ్‌ బెంగళూరుకు సైతం పాకింది. బెంగళూరులోని మెజిస్టిక్, రైల్వే స్టేషన్లలో లభించే గంజాయి అరకుదేనని పోలీసులు తేల్చారు.  జీవితఖైదు కంటే ఎక్కువ శిక్ష  మాదకద్రవ్యా ల వాడకం, అమ్మకం రెండూ నేరమే. ఈ కేసులో పట్టుబడిన వారిపై నేరం రుజువైతే జీవితఖైదు కంటే ఎక్కువ శిక్ష పడుతుంది. గంజాయి కేసులో మూలాలను పట్టుకుని, ప్రధాన స్మగ్లర్లను ఇప్పటికే అరెస్టు చేశాం. మరికొందరిని అరెస్టు చేయడానికి నిఘా పెట్టాం. 18 మందిపై షీట్లు ఓపెన్‌ చేశాం. గంజాయి మత్తుకు ఎక్కువగా యువత చిత్తవుతోంది. పిల్లలు ఏం చేస్తున్నారో తల్లిదండ్రులు ఓ కన్నేసి ఉంచాలి.  – ఎస్‌.సెంథిల్‌కుమార్, ఎస్పీ, చిత్తూరు చదవండి: చిన్నారి చికిత్సకు సీఎం రూ.17.5 లక్షల సాయం

మత్తును చిత్తు చేసేందుకు పోలీస్‌ యంత్రాంగం పకడ్బందీగా చర్యలు చేపడుతోంది. గుట్కా.. గంజాయి రహిత జిల్లాగా మార్చేందుకు కట్టుదిట్టంగా కసరత్తు చేస్తోంది. నిషేధిత పదార్థాల విక్రయాన్ని అరికట్టేందుకు విస్తృతంగా దాడులు నిర్వహిస్తోంది. స్మగ్లర్ల కదలికలపై నిఘా పెట్టి ఎప్పటికప్పుడు సిబ్బందిని అప్రమత్తం చేస్తోంది. చెక్‌పోస్టుల వద్ద  వాహనాలను తనిఖీ చేసి అక్రమ రవాణాకు పాల్పడుతున్న వారిని అదుపులోకి తీసుకుంటోంది. పట్టుబడిన నిందితులపై కేసులు నమోదు చేసి కటకటాల వెనక్కు నెట్టేస్తోంది.   సాక్షి, తిరుపతి: జిల్లాలో మత్తు పదార్థాల విక్రయంపై పోలీసులు ఉక్కుపాదం మోపుతున్నారు. తనిఖీలను ముమ్మరంగా చేసి అక్రమ వ్యాపారులపై కొరడా ఝుళిపిస్తున్నారు. ఎమ్మెల్యే భూమన కరుణాకరరెడ్డి ఫిర్యాదుతో తిరుపతి అర్బన్‌ జిల్లా ఎస్పీ వెంకట అప్పలనాయుడు ఆధ్వర్యంలో వరుస దాడులు నిర్వహిస్తున్నారు. ఈక్రమంలోనే తిరుపతి మున్సిపల్‌ కౌన్సిల్‌ సైతం ఆధ్యాతి్మక నగరంలో గుట్కా అమ్మకాలను అరికట్టే దిశగా తీర్మానం చేసింది. పొరుగు రాష్ట్రాల నుంచే..  ప్రజల ఆరోగ్యరక్షణ కోసం ప్రభుత్వం గుట్కా, పాన్‌పరాగ్, హాన్స్‌ తదితర పదార్థాలపై నిషేధం విధించింది. అయితే కొందరు నిబంధనలకు విరుద్ధంగా వీటిని విక్రయిస్తున్నారు. తమిళనాడు, కర్ణాటక నుంచి అక్రమంగా జిల్లాకు రవాణా చేస్తున్నారు. బస్సులు, కార్లు, ట్రాన్స్‌పోర్ట్‌ వాహనాల ద్వారా పార్సిళ్లు తెప్పించుకుంటున్నారు. ఈ విధంగా తీసుకువచ్చిన ప్యాకెట్లను  తిరుపతి, చిత్తూరు , శ్రీకాళహస్తి, పుత్తూరు, నగరి, పలమనేరు, మదనపల్లె తదితర అర్బన్‌ ప్రాంతాలకు తరలిస్తున్నారు. అక్కడి నుంచి నిత్యావసర సరుకుల మాటున గ్రామాల్లోని దుకాణాలకు సైతం చేరవేస్తున్నారు. సరదాగా మొదలై..  గుట్కా, గంజాయి, పాన్‌ పరాగ్, హాన్స్‌ని కొందరు స్నేహితులతో సరదాగా వినియోగిస్తున్నారు. అది కాస్తా వ్యసనంగా మారి మత్తు ఊబిలో కూరుకుపోతున్నారు. దీంతో పలు వ్యాధులకు గురై చివరకు ప్రాణాలనే కోల్పోతున్నారు. ముఖ్యంగా యువతే అత్యధికంగా నిషేధిత ఉత్పత్తులను వాడుతున్నారు. మత్తుకు అలవాటు పడి ఎంత ధర చెల్లించైనా వీటిని కొనుగోలు చేస్తున్నారు. వీరి బలహీనతను ఆసరాగా చేసుకుని వ్యాపారులు రెట్టింపు రేట్లకు అమ్మి సొమ్ము చేసుకుంటున్నారు.  అక్రమ రవాణాపై ఉక్కుపాదం ప్రభుత్వ ఆదేశాల మేరకు పోలీసు, విజిలెన్స్‌ అధికారులు రంగంలోకి దిగారు. కొద్ది రోజులుగా జిల్లా వ్యాప్తంగా ముమ్మరంగా తనిఖీలు నిర్వహించి గుట్కా, పాన్‌ పరాగ్, హాన్స్, గంజాయిని స్వాధీనం చేసుకుంటున్నారు. ♦పాత తిరుచానూరు రోడ్డులో ఫిజియోథెరపీ ప్రాక్టీస్‌ చేస్తున్న జయప్రకాష్‌ , కొందరు స్నేహితులతో కలిసి గంజాయి విక్రయిస్తుండగా పోలీసులు అరెస్ట్‌ చేశారు. నిందితుల నుంచి భారీగా గంజాయిని స్వా«దీనం చేసుకున్నారు. కిలో గంజాయిని రూ.16వేలకు కొనుగోలు చేసి ప్యాకెట్లలో పెట్టి విక్రయిస్తున్నట్లు పోలీసులు గుర్తించారు.   ♦తిరుపతిలో పోలీసులు  ఇటీవల చేసిన వరుస దాడుల్లో  సుమారు రూ.కోటి విలువైన గుట్కా, పాన్‌ పరాగ్, హాన్స్, విదేశీ బ్రాండ్‌ సిగరెట్లు భారీగా పట్టుబడ్డాయి.  ♦ఏర్పేడు మండలం పాపానాయుడుపేటలోని పలు కిరాణా దుకాణాల్లో విక్రయిస్తున్న గుట్కా, పాన్‌ పరాగ్, హాన్స్‌ ప్యాకెట్లను పోలీసులు స్వా«ధీనం చేసుకున్నారు.  ♦మదపనపల్లె పరిధిలో ఇటీవల రూ.5 లక్షలకు పైగా విలువైన గంజాయిని స్వా«దీనం చేసుకుని 8మందిని అరెస్ట్‌ చేశారు.  ♦నగరి పరిధిలో ఓజీ కుప్పం చెక్‌పోస్టు వద్ద 2.2 కిలోల గంజాయిని స్వా«దీనం చేసుకుని ఇద్దరిని అరెస్ట్‌ చేశారు.  ♦పిచ్చాటూరు సమీపంలోని కీళపూడి వద్ద రూ.1.50 లక్షల విలువైన హాన్స్‌ ప్యాకెట్లను పోలీసులు స్వా«దీనం చేసుకున్నారు.   ♦బెంగుళూరు నుంచి కూరగాయల వాహనంలో తరలిస్తున్న రూ. 33 లక్షలు విలువైన గుట్కా, పాన్‌ పరాగ్‌ ప్యాకెట్లను గంగవరం చెక్‌పోస్టు వద్ద పోలీసులు పట్టుకున్నారు. తొమ్మిది మందిపై కేసు నమోదు చేశారు.  ♦పలమనేరుకు చెందిన ఇద్దరు వ్యక్తులు బెంగుళూరు నుంచి వాహనంలో తీసుకొస్తున్న రూ.82 వేల విలువైన గుట్కా ప్యాకెట్లను స్వాధీనం చేసుకుని నిందితులపై కేసు నమోదు చేశారు.  ♦తాజాగా ఆదివారం పుంగనూరులో గంజాయి విక్రయిస్తున్న ఆవుల కృష్ణ, ఆవుల కృష్ణప్ప అనే ఇద్దరిని పోలీసులు అరెస్ట్‌ చేసి 6 కేజీల గంజాయిని స్వాధీనం చేసుకున్నారు. చదవండి: టీడీపీలో కలకలం: కుప్పంలో ‘జూనియర్‌’ జెండా!   కోవిడ్‌ సోకిందని గొంతుకోసుకున్నాడు!

పాడేరు: విశాఖ జిల్లాలో బుధవారం భారీగా గంజాయిని స్వాధీనం చేసుకున్నారు. పాడేరులో 1,200 కిలోలు, మర్రిబంద వద్ద 544 కిలోలు పట్టుకున్నారు. వ్యాన్‌లో పసుపు బస్తాల మాటున తరలిస్తున్న 1,200 కిలోల గంజాయిని పాడేరు పాత బస్టాండ్‌ వద్ద అంబేడ్కర్‌ సెంటర్‌లో  పోలీసులు స్వాధీనం చేసుకున్నారు. ముంచంగిపుట్టు మండలం జోలాపుట్టు ప్రాంతం నుంచి పసుపు లోడుతో వస్తున్న వ్యాన్‌ను తనిఖీ చేయగా పసుపు బస్తాల కింద గంజాయి బస్తాలున్నట్లు గుర్తించారు. గంజాయిని స్వాధీనం చేసుకుని డ్రైవర్, క్లీనర్‌తో పాటు మరో గిరిజనుడిని అరెస్టు చేశారు. ఈ గంజాయి విలువ రూ.36 లక్షలు ఉంటుందని ఎస్‌ఐ శ్రీనివాస్‌ తెలిపారు. యలమంచిలి మండలం మర్రిబంద వద్ద 544 కిలోల గంజాయిని స్వాధీనం చేసుకున్నట్టు సీఐ వి.నారాయణరావు తెలిపారు. దీన్ని తరలిస్తున్న నలుగురిని అదుపులోకి తీసుకున్నట్లు చెప్పారు. 

సాక్షి, అమరావతి: ఆంధ్రప్రదేశ్‌లో ఏళ్ల తరబడి ఉన్న మాదకద్రవ్యాల ‘మత్తు’ వదిలించేందుకు స్పెషల్‌ ఎన్‌ఫోర్స్‌మెంట్‌ బ్యూరో (ఎస్‌ఈబీ) రంగంలోకి దిగింది. గంజాయి తదితర మాదకద్రవ్యాల నిరోధానికి ‘ఆపరేషన్‌ నయా సవేరా’ చేపట్టింది. రాష్ట్ర ప్రభుత్వం ప్రజలకు మెరుగైన సేవలను అందిస్తూ ముందుకు సాగుతున్న తరుణంలో సమాజంలో మాదకద్రవ్యాలు రుగ్మతగా మారాయి. దీంతో ఈ మహమ్మారిని నిర్మూలించాలంటూ ముఖ్యమంత్రి వైఎస్‌ జగన్‌మోహన్‌రెడ్డి ఆదేశించడంతో డీజీపీ డి.గౌతమ్‌ సవాంగ్‌ సూచనల మేరకు ఎస్‌ఈబీ ప్రత్యేక కార్యాచరణ చేపట్టింది. ఎస్‌ఈబీ కమిషనర్‌ వినీత్‌ బ్రిజ్‌లాల్‌ రాష్ట్ర వ్యాప్తంగా స్పెషల్‌ టాస్క్‌ఫోర్స్‌ బృందాలను ఏర్పాటు చేశారు. మాదకద్రవ్యాల రవాణా, వినియోగాన్ని కట్టడి చేసేందుకు పైలట్‌ ప్రాజెక్టుగా ‘ఆపరేషన్‌ నయా సవేరా’ పేరుతో కృష్ణా, గుంటూరు జిల్లాల్లో విస్తృత కార్యక్రమాలు చేపట్టారు. గతనెల 25 నుంచి 31వ తేదీ వరకు నిర్వహించిన విస్తృత దాడుల్లో గుంటూరు జిల్లాలో 22 కేసులు నమోదు చేసి 44 మందిని అరెస్టు చేయడంతోపాటు 59.7 కిలోల గంజాయిని స్వాధీనం చేసుకున్నారు. కృష్ణాజిల్లాతోపాటు విజయవాడ నగరంలో 10 కేసులు నమోదు చేసి 12 మందిని అరెస్టు చేసి 19 కిలోల గంజాయిని స్వా«దీనం చేసుకున్నారు. గతనెల 29న గుంటూరు అర్బన్, విజయవాడలో ఎస్‌ఈబీ బృందాలు దాడులు నిర్వహించి 4 గ్రాముల ఎండీఎంఏ (సింథటిక్‌ డ్రగ్స్‌) స్వాధీనం చేసుకుని నలుగురుని అరెస్టు చేశారు. రాష్ట్రవ్యాప్తంగా మొత్తం 174 మందిపై 69 కేసులు నమోదు చేసి 2,176 కిలోల గంజాయి స్వాధీనం చేసుకున్నారు. కృష్ణా, గుంటూరు జిల్లాలపై ఫోకస్‌  గంజాయి ఇతర మాదకద్రవ్యాలను అరికట్టేందుకు పైలట్‌ ప్రాజెక్టుగా కృష్ణా, గుంటూరు జిల్లాలపై ప్రధానంగా ఫోకస్‌ పెట్టినట్టు ఎస్‌ఈబీ కమిషనర్‌ వినీత్‌ బ్రిజ్‌లాల్‌ ‘సాక్షి’కి చెప్పారు. ఈ రెండు జిల్లాల్లోను క్షేత్రస్థాయిలో 179 కార్యక్రమాలు నిర్వహించి 24 వేలమందికి అవగాహన కలి్పంచినట్టు తెలిపారు. డ్రగ్స్‌ ప్రమాదంపై ర్యాలీలు, సదస్సులు, హోర్డింగ్‌ల ఏర్పాటు చేశామన్నారు. మత్తు పదార్థాల గురించి తెలిస్తే కంట్రోల్‌ రూమ్‌లకు సమాచారం అందించాలని ఆయన కోరారు. చదవండి: పరువు కోల్పోయేకంటే ఇదే బెటర్..   జగనన్నను కలిశాకే.. ఈ కాళ్లకు చెప్పులు

నగరంపాలెం (గుంటూరు): గంజాయి తరలిస్తున్న 9 మంది యువకులను అరెస్ట్‌ చేసి, వారి నుంచి 7 కిలోల గంజాయి, 2 కార్లు, 5 సెల్‌ఫోన్లు స్వాధీనం చేసుకున్నట్లు గుంటూరు అర్బన్‌ జిల్లా ఎస్పీ అమ్మిరెడ్డి తెలిపారు. అర్బన్‌ జిల్లా పోలీస్‌ కార్యాలయంలో శనివారం జరిగిన విలేకర్ల సమావేశంలో కేసు వివరాలను ఎస్పీ వెల్లడించారు. ఆయన తెలిపిన వివరాల ప్రకారం.. అక్రమంగా గంజాయి తరలిస్తున్నారనే ముందస్తు సమాచారంతో తాడేపల్లి పోలీస్‌స్టేషన్‌ సీఐ ఎం.సుబ్రమణ్యం, ఎస్సై జి.బాలకృష్ణలు తమ సిబ్బందితో శనివారం సీతానగరం రైల్వే బ్రిడ్జి సమీపంలో రెండు కార్లను ఆపి తనిఖీలు చేశారు. భారీగా గంజాయి పట్టుబడటంతో వాహనాల్లో ఉన్న 9 మంది యువకులను అదుపులోకి తీసుకుని విచారణ చేశారు. వీరంతా తాడేపల్లి టౌన్, పెనుమాక, తుళ్లూరు మండలంలోని వెంకటపాలెం, మంగళగిరిలోని కాజ, ఎర్రబాలెం గ్రామాలకు చెందిన వారుగా గుర్తించారు. చదువుకునే రోజుల నుంచే మిత్రులు అయిన వీరంతా చెడు వ్యసనాలకు అలవాటుపడి, గంజాయి అక్రమ రవాణాకు పాల్పడినట్లుగా గుర్తించామని ఎస్పీ తెలిపారు. వీరిపై రౌడీషీట్‌లు తెరిచి నిఘా ఉంచుతామన్నారు. సమావేశంలో నార్త్‌ డీఎస్పీ దుర్గాప్రసాద్, సీఐలు సుబ్రమణ్యం, జె.రాజారావు, ఎస్సై బాలకృష్ణ పాల్గొన్నారు. 

సాక్షి,సిటీబ్యూరో: గ్రేటర్‌లో మళ్లీ డ్రగ్స్‌ రాకెట్‌ కలకలం రేపుతోంది. తాజాగా ఈ రాకెట్‌లో చిరువ్యాపారులు భాగస్వాములు కావడం సంచలనం సృష్టిస్తోంది. నగరంలో ఎక్సైజ్‌ ఎన్‌ఫోర్స్‌మెంట్‌ విభాగం ఇటీవల నిర్వహిస్తున్న వరుస దాడుల్లో ముంబై కేంద్రంగా పని చేస్తున్న బడా డ్రగ్స్‌ మాఫియా గుట్టు రట్టయింది. అక్రమార్కులు నగరంలోని కొందరు చిరు వ్యాపారులు, కొందరు నైజీరియన్లు, నిరుద్యోగులకు డబ్బు ఎరవేసి డ్రగ్స్‌ సరఫరాలో వారి సేవలను వినియోగిస్తుండటం ఆందోళన కలిగిస్తోంది. ఇటీవల బోయిన్‌పల్లి చెక్‌పోస్ట్‌ వద్ద పోలీసులు నిర్వహించిన తనిఖీల్లో టైల్స్‌ వ్యాపారి హనుమాన్‌ రామ్‌ కారును తనిఖీ చేయగా.. రూ.1.20 లక్షల విలువైన ఓపియం డ్రగ్‌ను తరలిస్తున్న వైనం వెలుగుచూసింది. రాజస్థాన్‌కు చెందిన ఇతను పదేళ్ల క్రితం నగరానికి వలస వచ్చి జీడిమెట్లలో టైల్స్‌ దుకాణం నిర్వహిస్తున్నాడు. లాక్‌డౌన్‌ నేపథ్యంలో వ్యాపారంలో నష్టాలు రావడంతో అడ్డదారుల్లో డబ్బు సంపాదించాలని ఇలా డ్రగ్స్‌ వ్యాపారంలోకి దిగినట్టు పోలీసుల విచారణలో ఇతను వెల్లడించడం గమనార్హం. కాగా ఇటీవల కాలంలో నగరంలో తరచు నమోదవుతున్న  డ్రగ్స్‌ కేసులు సంచలనం సృష్టిస్తున్నాయి.  సిటీలోతరచు డ్రగ్స్‌ కలకలం..   ఇటీవల నగరంలోని  తార్నాక చౌరస్తాలో భారీ డ్రగ్స్‌ రాకెట్‌ గుట్టును ఎక్సైజ్‌ ఎన్‌ఫోర్స్‌మెంట్‌ పోలీసులు రట్టుచేశారు. నిందితుల వద్ద  నుంచి రూ.1.64 లక్షల విలువ చేసే 104 గ్రాముల కొకైన్‌తోపాటు ఒక యమహా ఎఫ్‌జడ్‌ బైక్, నాలుగు మొబైల్‌ ఫోన్లను స్వాధీనం చేసుకున్నారు. నైజీరియాకు చెందిన జడీ పాస్కల్‌(35),అతని గర్ల్‌ఫ్రెండ్‌ ఎబిరె మోనికా(30) తార్నాక నాగార్జుననగర్‌లో ఇటీవల ఓ ఇంటిని అద్దెకు తీసుకున్నారు. వీరికి ముంబై కేంద్రంగా డ్రగ్స్‌రాకెట్‌ నడుపుతున్న ఎరిక్,బెన్,» బెంగళూరుకు చెందిన బనార్డ్‌లు డ్రగ్స్‌ సరఫరా చేస్తున్నారు. ఈ జంట వారు సరఫరా చేసిన కొకైన్‌ ను గ్రాము రూ.8 వేలు చొప్పున నగరంలో పలువురికి విక్రయిస్తోంది.   గచ్చిబౌలి, జూబ్లీహిల్స్, బంజారాహిల్స్‌ ప్రాంతాలకు సైతం ఈ జంట మాదకద్రవ్యాలను సరఫరా చేసినట్లు పోలీసుల ప్రాథమిక విచారణలో వెల్లడైంది.  సెలబ్రిటీలకు సరఫరాపై అనుమానాలు..  నగరంలో సంపన్నులు నివసించే జూబ్లీహిల్స్, బంజారాహిల్స్, గచ్చిబౌలి తదితర ప్రాంతాల్లో వీఐపీలు, సెలబ్రిటీలను లక్ష్యంగా చేసుకొని నగరంలో విచ్చలవిడిగా డ్రగ్స్‌ సరఫరా అవుతున్నట్లు ఇటీవల వరుసగా పట్టుబడుతున్న డ్రగ్స్‌ రాకెట్‌ ఉదంతాలు స్పష్టం చేస్తున్నాయి. ముంబై, బెంగళూరు కేంద్రంగా పనిచేస్తున్న బడా డ్రగ్స్‌ మాఫియా పలువురు నైజీరియన్లకు, చిరువ్యాపారులు, నిరుద్యోగులకు డబ్బును ఎరగా చూపి ఈ వ్యాపారంలోకి దించుతూ..నగరంలో వినియోగదారులకు డ్రగ్స్‌ను సరఫరా చేస్తున్నట్టు  స్పష్టమౌతోంది. తాజా కేసు ఇలాంటి కోవకే చెందినది కావడం గమనార్హం. ఎక్సైజ్‌ పోలీసులు నగరంలో ప్రత్యేకంగా కాల్‌సెంటర్‌ ఏర్పాటుచేసి సమాచారం అందిన వెంటనే డ్రగ్స్‌ రాకెట్‌ గుట్టును రట్టు చేయాలని సిటీజన్లు కోరుతున్నారు.  

మార్టూరు: గంజాయి రవాణా యథేచ్ఛగా సాగుతోంది. అధికారులు ఎంత నిఘా పెట్టినా వారి కళ్లు కప్పి కొత్త కొత్త దారుల్లో గంజాయిని తరలించేస్తున్నారు. తాజాగా శనివారం రాజుపాలెం చెక్‌పోస్టు వద్ద తనిఖీల్లో రూ.కోటి విలువైన 600 కేజీల గంజాయిని పోలీసులు స్వాధీనం చేసుకున్నారు. లారీ డ్రైవర్‌తో పాటు మరో వ్యక్తిని అదుపులోనికి తీసుకొని పోలీస్‌ స్టేషన్‌లో విచారించిన అధికారులు కీలక సమాచారం సేకరించినట్లు  సమాచారం.. మూడు రోజులుగా నిఘా.. జాతీయ రహదారిపై గంజాయి అక్రమ రవాణా జోరుగా సాగుతోందన్న సమాచారం అందుకున్న చీరాల డీఎస్పీ వై జయరామ సుబ్బారెడ్డి, ఇంకొల్లు సీఐ ఆర్‌ రాంబాబు, ఎస్సై శివకుమార్‌లతో కలిసి మూడు రోజులుగా రాజుపాలెం చెక్‌పోస్టు వద్ద నిఘా పెట్టారు. ఈ క్రమంలో శనివారం రాత్రి 8 గంటల ప్రాంతంలో తూర్పుగోదావరి జిల్లా తుని నుంచి చిత్తూరు జిల్లా మదనపల్లి వ్యవసాయానికి వినియోగించే కొబ్బరి పిట్టు లోడుతో వెళుతున్న లారీని ఆపి అధికారులు తనిఖీ చేశారు. లారీలో అడుగు భాగాన కంప్రెషర్‌ చేయబడిన గంజాయి ప్యాకెట్‌లు ఉంచి వాటి పైన కొబ్బరిపిట్టు లోడు చేసి గంజాయిని అక్రమంగా తరలిస్తున్నట్లు అధికారులు గుర్తించారు. స్వాధీనం చేసుకున్న గంజాయి ప్యాకెట్‌లు సుమారు 600 కేజీలు ఉన్నట్లు అధికారులు గుర్తించారు. కీలక నిందితులు మదనపల్లి ప్రాంతంలో ఉన్నట్లు తెలుసుకున్న అధికారులు శనివారం రాత్రికి రాత్రే ఒక ప్రత్యేక బృందాన్ని అక్కడికి పంపి గాలింపు చర్యలు చేపడుతున్నట్లు సమాచారం. పట్టుబడిన గంజాయి విలువ రూ.కోటి ఉండవచ్చని అధికారులఅంచనా.  ఒడిస్సా, ఛత్తీస్‌ఘడ్‌ నుంచి.. ఒడిస్సా, ఛత్తీస్‌ఘడ్‌ రాష్ట్రాల నుంచి తూర్పు గోదావరి జిల్లాకు సరఫరా అయిన గంజాయి అక్కడి నుంచి చిత్తూరు జిల్లాకు అక్రమంగా రవాణా చేస్తున్నట్లు విశ్వసనీయ సమాచారం. చిత్తూరు ప్రాంతం నుంచి సరిహద్దు రాష్ట్రాలైన తమిళనాడు, కర్ణాటకలకు గంజాయి అక్రమంగా తరలిపోతున్నట్లు అధికారులు భావిస్తున్నారు. గోదావరి జిల్లాల నుంచి 8, 9 జిల్లాలు దాటి రాష్ట్ర సరిహద్దుల వరకు గంజాయి అక్రమంగా తరలిపోతుండగా మధ్యలో ఉన్న జిల్లాల అధికారుల తీరు పలు అనుమానాలుకు దారితీస్తుంది. అక్కడక్కడ కొన్నిచోట్ల కీలక అధికారులు మామూళ్లకు అలవాటు పడి గంజాయి అక్రమ రవాణాకు సహకరిస్తున్నారనే ఆరోపణలు ఉన్నాయి. కీలక నిందితులను అదుపులోనికి తీసుకున్న అనంతరం అధికారులు రేపోమాపో వివరాలు వెల్లడించే అవకాశం ఉంది. మార్టూరులోను జోరుగా గంజాయి విక్రయాలు మార్టూరులోనూ గత పదేళ్లుగా గంజాయి విక్రయాలు జోరుగా సాగుతున్నాయన్నది బహిరంగ రహస్యం. స్థానిక పోలీస్‌ స్టేషన్‌కు చెందిన కొందరు కింది స్థాయి సిబ్బంది సహకారం ఉండటంతో దాడులు జరగడం లేదని ప్రజలు బహిరంగంగానే విమర్శిస్తున్నారు. రాజమండ్రి ప్రాంతం నుంచి మార్టూరు నిత్యం వస్తున్న చేపలలోడు లారీలలో గంజాయి అక్రమ రవాణా జరుగుతున్నట్లు   సమాచారం. స్థానిక పంచాయతీరాజ్‌ గెస్ట్‌ హౌస్‌ వెనుక ఉన్న ప్రాంతంలో గంజాయి విక్రయాలు కుటీర పరిశ్రమగా విస్తరించింది. స్థానిక నేతాజీ నగర్‌ కాలనీ సమీపంలోనూ జోరుగా గంజాయి విక్రయాలు సాగుతున్నాయని స్థానికులు ఆరోపిస్తున్నారు. గ్రానైట్‌ కార్మికులు, విద్యార్థులను టార్గెట్‌గా చేసుకొని గంజాయి వ్యాపారం ఇక్కడ విచ్చలవిడిగా సాగుతున్నా పోలీసులు పట్టించుకోవడం లేదన్న ఆరోపణలు ఉన్నాయి.  

భద్రాచలంఅర్బన్‌: కారులో అక్రమంగా గంజాయి తరలిస్తున్న నలుగురిని పోలీసులు పట్టుకుని కేసు నమోదు చేశారు. భద్రాచలం టౌన్‌ సీఐ వినోద్‌ రెడ్డి కథనం ప్రకారం.. పట్టణంలోని బ్రిడ్జ్‌ సెంటర్‌ వద్ద ఆదివారం టౌన్‌ ఎస్‌ఐ మహేష్‌ వాహనాల తనిఖీ చేపట్టారు. ఆ సమయంలో అనుమానాస్పదంగా వస్తున్న కారును ఆపి తనిఖీ చేయగా, గంజాయి లభ్యమయింది. షేక్‌ ముజామీల్, షేక్‌ డబ్రేజ్, షేక్‌ ఇమ్రాన్, షేక్‌ రేష్మా అనే వ్యక్తులు ఏపీ 15 ఏసీ 4748 నంబర్‌గల కారు ఒడిశాలోని మల్కన్‌గిరి నుంచి హైదరాబాద్‌కు గంజాయి తరలిస్తూ పట్టుబడ్డారు. కారులో ఉన్న సుమారు రూ. 25,80,000 విలువైన 175 కేజీల గంజాయిని పోలీసులు స్వాధీనం చేసుకున్నారు. నిందితులను న్యాయమూర్తి ఎదుట హాజరపర్చగా, రిమాండ్‌ విధించారు. ‘ఖమ్మం’ ఘటనలో మరికొందరి ప్రమేయం! ఖమ్మంఅర్బన్‌: ఖమ్మం నగరంలో రెండు రోజుల క్రితం రూ.44 లక్షల విలువైన గంజాయి పట్టుబడిన ఘటనలో పోలీసులు ఇప్పటికే శంకర్‌ అనే వ్యక్తిని అదుపులోకి తీసుకున్నారు. అయితే ఈ ఘటనలో మరికొందరి ప్రమేయం కూడా ఉందని ప్రచారం సాగుతోంది. గంజాయి దందాపై రవీంద్రనాయక్‌ పేరుతో ఆది వారం జిల్లా ఎస్పీ(కమిషనర్‌)కి సైతం ఫిర్యాదు చేసినట్లు ఒక ప్రకటన వెలుగు చూసింది. ఖమ్మం శ్రీనగర్‌ కాలనీలో ఓ అపార్ట్‌మెంట్‌కు ఎదురుగా ఉన్న ఖాళీ స్థలంలో నిలిపి ఉన్న ట్రాక్టర్‌ ట్రక్కులో అడుగు భాగంలో నిల్వ ఉంచిన రూ. 44 లక్షల విలువైన 440 కేజీల విలువైన గంజాయిని గత శుక్రవారం టాస్క్‌ఫోర్స్‌ పోలీసులు పట్టుకున్న విషయం విదితమే. మహబూబాబాద్‌ జిల్లా ఇస్లావత్‌ తండాకు చెందిన శంకర్‌ అనే నింది తుడు నిషేధిత గంజాయిని ఒడిశా రాష్ట్రం నుంచి ఖమ్మం జిల్లా మీదుగా మహారాష్ట్రకు అక్రమంగా తరలిస్తున్నట్లు తమ ప్రాథమిక విచారణలో తేలిందని పోలీసులు తెలిపారు. ఇప్పటికే శంకర్‌తో పాటు, గంజాయి తరలింపు సమయంలో ఎస్కార్టుగా ఉన్న సాన్య అనే యువకుడిని పోలీసులు అరెస్ట్‌ చేసిన విషయం తెలిసిందే. గంజాయి దందాపై పూర్తి స్థాయిలో విచారణ చేస్తే మరిన్ని వాస్తవాలు వెలుగు చూసే అవకాశం ఉంది. 

నేరేడ్‌మెట్‌: విశాఖ ఏజెన్సీ నుంచి గంజాయి సరఫరాచేస్తున్న ముఠాను ఎల్‌బీనగర్‌ జోన్‌ ఎస్‌ఓటీ, అబ్దుల్లాçపుర్‌మెట్‌ పోలీసులు సంయుక్తంగా పట్టుకున్నారు. ఏడుగురు ముఠా సభ్యులను అరెస్టు చేసి, వారి నుంచి 81 కిలోల గంజాయి ప్యాకెట్లు, రెండు కార్లు, రూ.1.45లక్షల నగదు, 9సెల్‌ఫోన్లతోసహ మొత్తం రూ.30లక్షల సొత్తును పోలీసులు స్వాధీనం చేసుకున్నారు. శుక్రవారం నేరేడ్‌మెట్‌లోని తన కార్యాలయంలో ఏర్పాటు చేసిన విలేకరుల సమావేశంలో రాచకొండ సీపీ మహేష్‌భగవత్‌ కేసు వివరాలు వెల్లడించారు.   రెండేళ్లుగా గంజాయి దందా... సూర్యాపేట జిల్లాకు చెందిన ప్రధాన నిందితుడు  నునావత్‌ జగన్‌(29),  మలోత్‌ వినోద్‌(24), నునావత్‌ సుధాకర్‌(27),నాగర్‌కర్నూల్‌ జిల్లాకు చెందిన కేతవత్‌ మురళి(25) గత రెండేళ్లుగా విశాఖ ఏజెన్సీ నుంచి గంజాయిని కొనుగోలు చేసి హైదరాబాద్‌కు సరఫరా చేస్తూ సొమ్ము చేసుకుంటున్నారు.  2019లో  తూర్పుగోదావరి జిల్లా మోత్కుగూడెం ఠాణాలో నిందితుడు మురళిపై కొత్తగూడెం జిల్లా భద్రచలం ఠాణాలో వినోద్‌పై, హైదరాబాద్‌ కమిషనరేట్‌ పరిధిలోని గోల్కోండ పోలీసుస్టేషన్‌లో మరో నిందితుడు సుధాకర్‌పై కేసులు ఉన్నాయి. ఆయా కేసుల్లో పోలీసులు మురళి, వినోద్‌లను పోలీసులు అరెస్టు చేసి రిమాండ్‌కు తరలించారు. జైలులో ఒప్పందం.. రాజమండ్రి సెంట్రల్‌ జైలులో నిందితుడు మురళికి హైదరాబాద్‌లో ఉంటున్న రాజస్థాన్‌ రాష్ట్రానికి చెందిన ఏజెంట్‌ రాకేష్‌(27)తో పరిచయం ఏర్పడింది. విశాఖ ఏజెన్సీ ప్రాంతం నుంచి గంజాయిని హైదరాబాద్‌కు సరఫరా చేస్తే, రాజస్థాన్‌కు రవాణా చేస్తానని ఏజెంట్‌ మురళికి హామీ ఇవ్వడంతో ఇద్దరి మధ్య ఈ మేరకు ఒప్పందం కుదిరింది. మురళి జైలు నుంచి విడుదలైన అనంతరం ప్రధాన నిందితుడు నునావత్‌ జగన్‌ కలిసి జైలులో జరిగిన ఒప్పందం గురించి వివరించడంతో ఇందుకు అంగీకరించాడు. ఇందుకు  సూర్యాపేట జిల్లాకు చెందిన మిగతా నిందితులు వంకుడోతు సాయి(21), వంకడోతు సుధాకర్, వంకుడోతు జితేందర్‌(33)లతో కలిసి ముఠాగా ఏర్పడ్డారు. ప్రధాన నిందితుడికి చెందిన రెండు కార్లలో గంజాయిని హైదరాబాద్‌కు సరఫరా చేసి,  రాజస్థాన్‌కు చెందిన ఏజెంట్‌కు విక్రయించాలని ప్రణాళిక వేసుకున్నారు.  కిలో రూ.1500కు కొనుగోలు... విశాఖపట్నం జిల్లాలోని ధరకొండకు చెందిన గంజాయి విక్రేత రాజు(33)తో  ప్రధాన నిందితుడు నునావత్‌ జగన్, మరో నిందితుడు మురళిలకు పాత పరిచయం ఉంది. ఈ నేపథ్యంలో మిగతా నలుగురు ముఠా సభ్యులందరితో కలిసి వారు ఈనెల 25వ తేదీన ధరకొండకు వెళ్లి విక్రేత రాజును కలిశారు. కిలో రూ.1500 చొప్పున 81 కిలోల గంజాయిని కొనుగోలు చేశారు. హైదరాబాద్‌లో రాజస్థాన్‌ రాష్ట్రానికి చెందిన ఏజెంట్‌ రాకేష్‌కు కిలో రూ.8వేలకు విక్రయించాలని ముఠా నిర్ణయించుకుంది. గంజాయిని హైదరాబాద్‌కు తీసుకువస్తున్నట్టు ప్రధాన నిందితుడు, కీలక సూత్రధారి అయిన నిందితుడు మురళిలు ఏజెంట్‌ రాకేష్‌కు సమాచారం ఇచ్చారు. తాను అందుబాటులో ఉండలేనందున  ఏజెంట్‌ రాకేష్‌ హైదరాబాద్‌ నగర శివారులో ముఠా నుంచి గంజాయి ప్యాకెట్లను స్వీకరించేందుకు బోయినిపల్లికి చెందిన కూలీ  అనూప్‌కుమార్‌(27)తో ఒప్పందం చేసుకున్నాడు. సీట్లు, డిక్కీల్లో గంజాయి ప్యాకెట్లు... అంబర్‌పేట్‌ సమీపంలో అనూప్‌కుమార్‌ వేచి ఉన్నాడు. శుక్రవారం ఉదయం ప్రధాన నిందితుడికి చెందిన రెండు కార్ల సీట్లు, డిక్కీలలో దాచిపెట్టిన గంజాయి ప్యాకెట్లను తరలించిన ముఠా పెద్దఅంబర్‌పేటలో అప్పగించేందుకు వెళుతుంది. విశ్వసనీయ వర్గాల సమాచారం మేరకు ఎల్‌బీ.నగర్‌ జోన్‌ ఎస్‌ఓటీ, అబ్దుల్లాపూర్‌మెట్‌ పోలీసులు ఏడుగురు ముఠా సభ్యులను అరెస్టు చేసి,  గంజాయి ప్యాకెట్లను స్వాధీనం చేసుకున్నట్టు,  ఏజెంట్‌ రాకేష్, గంజాయి విక్రేత రాజులు పరారీలో ఉన్నారని సీపీ వివరించారు. రాచకొండ అడిషనల్‌ సీపీ సుధీర్‌బాబు,ఎల్‌బీనగర్‌ డీసీపీ సన్‌ప్రీత్‌సింగ్, ఎస్‌ఓటీ డీసీపీ సురేందర్‌రెడ్డి, అబ్దుల్లాపూర్‌మెట్‌ సీఐ దేవేందర్,సీఐలు రవికుమార్,సత్యనారాయణ, ఎస్‌ఓటీ ఎస్‌ఐ అవినాష్‌బాబులు పాల్గొన్నారు.

సూర్యాపేట: బొలెరో వాహనం ప్రమాదానికి గురి కావడంతో అక్రమ మార్గంలో జరుగుతున్న గంజాయి రవాణా గుట్టు రట్టయ్యింది. కట్టంగూర్‌ మండలం జాతీయ రహదారిపై శుక్రవారం ఉదయం కురుమర్తి క్రాస్‌ రోడ్డు వద్ద హైదరాబాద్‌ వైపు వెళ్తున్న బొలెరో వాహనం యూటర్న్‌ తీసుకుని రాంగ్ ‌రూట్‌లో కట్టంగూర్‌ వైపు వస్తుండగా చెట్టును ఢీకొట్టింది. డ్రైవర్‌ సహా మరో వ్యక్తికి గాయాలు కాగా, సమీపంలోని పంట పొలాల్లో ఉన్న రైతులు వారిని బయటకు తీశారు. కొద్దిసేపటికి  గాయాలతో ఉన్న ఇద్దరు పరారీ అయ్యారు. ఘటనపై పోలీసులకు సమాచారం ఇవ్వగా ప్రమాదం జరిగిన ప్రాంతానికి చేరుకున్నారు. బొలెరో వాహనంలో సుమారు 50 గంజాయి ప్యాకెట్లు ఉన్నట్లుగా  గుర్తించారు. గంజాయి ముఠా కోసం పోలీసులు గాలిస్తున్నారు.

ఇబ్రహీంపట్నంరూరల్‌: గంజాయితో పట్టబడ్డ విద్యార్థికి ఆరు నెలల జైలు శిక్షతో పాటు రూ.5 వేల జరిమానా విధిస్తూ ఇబ్రహీంపట్నం 25వ మెట్రోపాలిటన్‌ మేజిస్ట్రేట్‌ తీర్పు వెల్లడించారని ఆదిబట్ల సీఐ నరేందర్‌ శుక్రవారం తెలిపారు. హైదరాబాద్‌ ఆసిఫ్‌నగర్‌లో నివాసం ఉంటున్న సాయిని అరవింద్‌ అనే విద్యార్థి గంజాయితో పట్టుబడ్డాడు. ఇతని స్వస్థలం కరీంనగర్‌ జిల్లా గొల్లపల్లి మండలం చందోలి. నగరంలోని దోమల్‌గూడలోని ఏవీ కళాశాలలో న్యాయవాద విద్య మూడో సంవత్సరం చదువుతున్నాడు. కరీంనగర్‌లోని చెడు వ్యసనాల వల్ల అతనికి గంజాయి అలవాటైంది. ఈ క్రమంలో 17– 7– 2017వ తేదీన సాయంత్రం 5:30 గంటలకు సిల్వర్‌ కలర్‌ ఆల్టో కారులో గంజాయి పొట్లాలతో వస్తూ ఆదిబట్ల మున్సిపాలిటీ పరిధిలోని బొంగ్లూర్‌ ఔటర్‌ రింగ్‌ రోడ్డు వద్ద పెట్రోలింగ్‌ నిర్వహిస్తున్న అప్పటి సీఐ గోవింద్‌రెడ్డికి పట్టుబడ్డారు. దీంతో అతన్ని అరెస్టు చేసి గంజాయి, వాహనం, సెల్‌ఫోన్‌ను స్వాధీనం చేసుకున్నారు. హైదరాబాద్‌ మంగళ్‌హాట్‌ దూళ్‌పేట్‌ వద్ద గుర్తు తెలియని వ్యక్తుల నుంచి గంజాయిని కొనుగోలు చేశానని, తనకు గంజాయి తాగే అలవాటు ఉందని పోలీసుల విచారణలో అంగీకరించాడు. ఈ కేసును విచారణ జరిపిన ఇబ్రహీంపట్నం 25వ మెట్రోపాలిటన్‌ మెజిస్ట్రేట్‌ నిందితుడిని దోషిగా గుర్తిస్తూ శిక్ష విధిస్తూ తీర్పు వెల్లడించినట్లు తెలిపారు. ఆదిబట్ల పోలీస్‌ స్టేషన్‌ ఆధ్వర్యంలో గోవింద్‌రెడ్డి, వరలక్ష్మి, శేఖర్‌ ఈ విచారణలో ఉన్నట్లు సీఐ నరేందర్‌ తెలిపారు.

సాక్షి ప్రతినిధి, ఏలూరు: జిల్లాలో డ్రగ్స్‌ వ్యవహారం కలకలం సృష్టిస్తోంది. నాలుగురోజుల క్రితం నెదర్లాండ్స్‌ నుంచి చెన్నై వచ్చిన పార్శిల్‌లో డ్రగ్స్‌ ఉన్నట్లు గుర్తించిన కస్టమ్స్‌ అధికారులు దానిపై ఉన్న చిరునామా ఆధారంగా భీమవరానికి చెందిన పి.భానుచంద్రను అదుపులోకి తీసుకున్నారు. ఈ నెల 17న చెన్నైలో అరెస్టు చూపించారు.  దీంతో అసలు భానుచంద్రకు డ్రగ్స్‌ మాఫియాకు ఉన్న లింక్‌లు ఏంటనే దానిపై ఆరా తీస్తున్నారు.  బీటెక్‌ను మధ్యలోనే వదిలివేసినభానుచంద్ర చాలా కాలంగా ఈ డ్రగ్స్‌ వ్యవహారంలో ఉన్నట్లు ఆధారాలు లభ్యం అవుతున్నాయి.  ఎలా పట్టుబడ్డాడు... నెదర్లాండ్స్‌ నుంచి ఈ నెల 16న విమానంలో చెన్నైకి ఒక పార్శిల్‌ వచ్చింది. అందులో బొమ్మలు (టాయ్స్‌) ఉన్నట్లుగా ప్యాకింగ్‌పై ఉంది. నెదర్లాండ్స్‌ నుంచి భారతదేశానికి బొమ్మలు తెప్పించాల్సిన అవసరం ఏంటని అనుమానించిన కస్టమ్స్‌ అధికారులు దీన్ని తెరిచి పరిశీలించగా బొమ్మలలో 400కి పైగా పిల్స్‌ ఉన్నట్లు గుర్తించారు. దీన్ని ఎండీఎంఏ (మెథిలియా డ్యాక్సీ మెతంపెటామైన్‌) అనే డ్రగ్స్‌ ఉన్నట్లు గుర్తించారు. వీటిని మత్తుతో పాటు లైంగిక సామర్థ్యం పెరగడానికి వాడతారని సమాచారం. గతంలో కూడా భానుచంద్ర పదిసార్లు ఈ డ్రగ్స్‌ను ఇండియాకి తెప్పించినట్లుగా గుర్తించారు. డార్క్‌ నెట్‌ ద్వారా... భానుచంద్ర డార్క్‌నెట్‌ ద్వారా ఈ డ్రగ్స్‌ను బుక్‌చేసి తెప్పిస్తున్నట్లు గుర్తించారు. ఐదు వందల డాలర్లను ఆన్‌లైన్‌ ద్వారా చెల్లించి దీన్ని తెప్పించాడు. వీటి ధర ఇండియన్‌ మార్కెట్‌లో రూ.12 లక్షలకు పైగా ఉంటుందని సమాచారం. టెర్రరిస్ట్‌లు, డ్రగ్‌మాఫియా మాత్రమే ఉపయోగించే డార్క్‌నెట్‌తో భానుచంద్రకు సంబంధాలు ఎలా ఉన్నాయి? అతని వెనుక ఎవరు ఉన్నారు? అనే అంశంపై పోలీసులు దృష్టి పెట్టారు.  రంగంలోకి పోలీసులు జిల్లా పోలీసు యంత్రాంగం దీనిపై రంగంలోకి దిగింది. భీమవరంతోపాటు పరిసర ప్రాంతాలు నరసాపురం ప్రాంతాలలో డ్రగ్స్‌ను రహస్యంగా సరఫరా చేస్తున్నట్లు గుర్తించింది. భీమవరం పరిసర ప్రాంతాలలో సంపన్న వర్గాలకు ఈ డ్రగ్స్‌ను సరఫరా చేస్తున్నట్లు తెలిసింది. డ్రగ్స్‌ సరఫరా విషయంలో రాజకీయ నేతలు ఎవరైనా ఉన్నారా? ఇంకా డ్రగ్స్‌ ముఠాలు ఏమైనా ఉన్నాయా అన్న విషయాలపై దృష్టి పెట్టారు. భీమవరం ప్రాంతాల్లో డ్రగ్స్‌తో పాటు గంజాయి అమ్మకాలు జరిపే వారి పాత్ర ఈ వ్యవహారంలో ఎంత ఉందనే అంశంపై దృష్టి పెట్టారు. ఈ వ్యవహారంపై పూర్తి విచారణ జరిపితే జిల్లాలో బిగ్‌షాట్స్‌ బయటకు వచ్చే అవకాశం ఉంది.