సూపర్‌బజార్‌(కొత్తగూడెం): పరిశ్రమల యాజమాన్యాలు సీఎస్సార్‌ నిధులు అందజేసి జిల్లా అభివృద్ధిలో భాగస్వామ్యం కావాలని కలెక్టర్‌ జితేష్‌ వి పాటిల్‌ కోరారు. కలెక్టరేట్‌లో బుధవారం ఆయన ఎమ్మెల్యేలు కూనంనేని సాంబశివరావు, పాయం వెంకటేశ్వర్లు, తెల్లం వెంకట్రావ్‌, కోరం కనకయ్యతో పాటు వివిధ పరిశ్రమల ప్రతినిధులతో సమీక్ష సమావేశం నిర్వహించారు. ఈ సందర్భంగా మాట్లాడుతూ.. సామాజిక, విద్య, వైద్య రంగాల అభివృద్ధికి సీఎస్సార్‌ నిధులు కేటాయిస్తామని తెలిపారు. జిల్లాలోని పరిశ్రమలు తమ వంతు బాధ్యతగా రెండు శాతం నిధులు అందజేయాలని కోరారు. గతంలో సీఎస్సార్‌ నిధుల కింద జిల్లాలోని అన్ని నియోజకవర్గాల పరిధిలో పలు అభివృద్ధి పనులు విజయవంతంగా నిర్వహించామని తెలిపారు. ఈ నిధులతో ప్రభుత్వ పాఠశాలల్లో మౌలిక వసతుల కల్పనకు తొలి ప్రాధాన్యత ఇస్తామని చెప్పారు. స్థానిక ప్రజాప్రతినిధుల సూచన మేరకు అవసరమైన పనులకు ఈ నిధులు వినియోగించేలా ప్రణాళిక రూపొందిస్తామని వివరించారు. సమావేశంలో అదనపు కలెక్టర్‌ డి. వేణుగోపాల్‌, సింగరేణి, కేటీపీఎస్‌, ఐటీసీ, నవభారత్‌, బీటీపీఎస్‌ పరిశ్రమల ఉన్నతాధికారులు, జిల్లా పరిశ్రమల అధికారి తిరుపతయ్య, సీపీఓ సంజీవరావు తదితరులు పాల్గొన్నారు. కాందిశీకుల భూముల పరిశీలన..పాల్వంచరూరల్‌ : మండల పరిధిలోని పాండురంగాపురం, రెడ్డిగూడెం గ్రామాల మధ్య గల 40 ఎకరాల కాందిశీకుల భూములను కలెక్టర్‌ జితేష్‌ వి పాటిల్‌ బుధవారం పరిశీలించారు. ప్రస్తుతం ఆ భూమిని ఎవరు సాగు చేస్తున్నారనే వివరాలను ఆరా తీశారు. ఆయన వెంట అదనపు కలెక్టర్‌ వేణుగోపాల్‌, తహసీల్దార్‌ వివేక్‌, ఆర్‌ఐ హచ్యా ఉన్నారు.

సూపర్‌బజార్‌(కొత్తగూడెం): దేశంలో, రాష్ట్రంలో కార్మికులు, ఉద్యోగులు అనుభవించే ప్రతీ హక్కు ఏఐటీయూసీ పోరాట ఫలితంగానే వచ్చాయని సీపీఐ రాష్ట్ర కార్యదర్శి, ఎమ్మెల్యే కూనంనేని సాంబశివరావు అన్నారు. రుద్రంపూర్‌ కమ్యూనిటీ హాల్‌లో రెండు రోజుల పాటు నిర్వహించిన జిల్లా స్థాయి రాజకీయ శిక్షణా తరగతులు బుధవారం ముగిశాయి. ఈ సందర్భంగా జరిగిన సభలో ఆయన మాట్లాడుతూ.. పని భద్రత, కనీస వేతనాలు అమలు చేయడం పాలకులు, యాజమాన్యాల బాధ్యత అని అన్నారు. అయితే నేడు దీన్ని విస్మరించి పాలన సాగిస్తున్నారని విమర్శించారు. ఎన్నో పోరాటాలు, ప్రాణ త్యాగాలతో సాధించుకున్న 44 కార్మిక చట్టాలను నాలుగు కోడ్‌లుగా విభజించిన కేంద్ర ప్రభుత్వం కార్మిక సంక్షేమాన్ని యాజమాన్యాలకు, పారిశ్రామిక వేత్తలకు తాకట్టు పెడుతోందని ఆరోపించారు. ఆదానీ, అంబానీ వంటి పెట్టుబడిదారులకు మోదీ సర్కార్‌ ఊడిగం చేయడం మినహా దేశ ప్రజలకు, కార్మికులకు చేసిందేమీ లేదని విమర్శించారు. చట్టాలు, హక్కుల అమలుకు కార్మికులు తిరగబడాలని పిలుపునిచ్చారు. సమావేశంలో ఏఐటీయూసీ రాష్ట్ర ప్రధాన కార్యదర్శి బాలరాజు, కార్యదర్శి సింగు నరసింహారావు, జిల్లా గౌరవాధ్యక్షుడు ఎస్‌కే సాబీర్‌పాషా, జిల్లా అధ్యక్ష ప్రధాన కార్యదర్శులు కంచర్ల జమలయ్య, ప్రసాద్‌, వట్టికొండ మల్లికార్జునరావు, గోనె మణి, డి.శంకర్‌, వేల్పుల మల్లికార్జున్‌, టి.రాజు, రాంచందర్‌, బండి నాగేశ్వరావు, విజయలక్ష్మి, వెంకటేశ్వర్లు, బంధం నాగయ్య, కె రాము తదితరులు పాల్గొన్నారు.

రఘునాథపాలెం: వివాహం జన్మజన్మల అనుబంధమని, చెరోసగంగా భార్యాభర్తలు జీవనం సాగించడం అన్యోన్య దాంపత్యమని పెద్దలు చెబుతారు. ఈ తరహాలోనే ఓ మహిళ తన భర్తను బతికించుకునేందుకు కాలేయదానం చేసి ఆయనలో సగభాగంగా మారడమే కాదు.. కలకాలం కష్టసుఖాల్లో పాలుపంచుకుంటానని పెళ్లి రోజున చేసిన ప్రతిజ్ఞకు కట్టుబడి నిలిచినట్లయింది. రఘునాథపాలెం మండలం పెద్ద ఈర్లపూడికి చెందిన ధారావత్‌ శ్రీను ఖమ్మంలోని ఏపీజీవీబీలో విధులు నిర్వర్తిస్తున్నాడు. ఆయన భార్య లావణ్య ఎల్‌ఎల్‌బీ చివరి సంవత్సరం చదువుతుండగా వీరికి ఇద్దరు కుమార్తెలు ఉన్నారు. కొన్నాళ్ల క్రితం శ్రీను అనారోగ్యం బారిన పడడంతో ఖమ్మంలోని ఓ ఆస్పత్రిలో పరీక్షలు చేయించుకున్నాడు. కామెర్లు సోకగా కాలేయం సమస్య ఎదురైందని వైద్యులు గుర్తించారు. ఆపై హైదరాబాద్‌లో చికిత్స చేయించుకున్నా నయం కాలేదు. అంతేకాక వివిధ పరీక్షల అనంతరం కాలేయ మార్పిడి మాత్రమే శ్రీనును బతికిస్తుందని వైద్యులు తేల్చిచెప్పారు. దీంతో కాలేయదానం చేసే వారి కోసం ఆరా తీస్తుండగా లావణ్యే ముందుకొచ్చింది. తన భర్తను కాపాడుకోవడానికి లివర్‌ ఇస్తానని చెప్పడంలో పరీక్షలు చేసిన వైద్యులు సరిపోతుందని నిర్ధారించారు. ఈ మేరకు లావణ్య లివర్‌ నుంచి 65శాతం మేర తీసిన సికింద్రాబాద్‌లోని కిమ్స్‌ ఆస్పత్రి వైద్యులు ఈనెల 16న శస్త్రచికిత్స ద్వారా శ్రీనుకు అమర్చారు. ప్రస్తుతం దంపతులిద్దరూ ఆరోగ్యంగా ఉండగా కోలుకుంటున్నారని కుటుంబీకులు తెలిపారు.భర్తకు కాలేయదానం చేసిన భార్య

కొత్తగూడెంఅర్బన్‌: జిల్లా స్కూల్‌ గేమ్స్‌ ఫెడరేషన్‌ ఆధ్వర్యంలో ఇటీవల నిర్వహించిన అండర్‌– 17 బాలుర రాష్ట్ర స్థాయి ఫుట్‌బాల్‌ పోటీల్లో అత్యంత ప్రతిభ కనబరచిన క్రీడాకారులను జాతీయస్థాయి పోటీలకు ఎంపిక చేసిన విషయం విదితమే. ఎంపికై న రాష్ట్ర జట్టు సభ్యులు ఈనెల 30 నుంచి డిసెంబర్‌ 6వ తేదీ వరకు జమ్మూ కశ్మీర్‌లో జరుగనున్న జాతీయ స్థాయి పోటీల్లో పాల్గొంటారు. ఈ జట్టులో వివిధ జిల్లాల క్రీడాకారులు ఉండగా.. జట్టు సమన్వయం కోసం గురువారం నుంచి ఐదు రోజుల పాటు స్థానిక ప్రగతి మైదానంలో శిక్షణ శిబిరం నిర్వహించనున్నట్లు జిల్లా విద్యాశాఖాధికారి వెంకటేశ్వరాచారి, జిల్లా స్కూల్‌ గేమ్స్‌ ఫెడరేషన్‌ నిర్వాహక కార్యదర్శి వాసిరెడ్డి నరేష్‌కుమార్‌ బుధవారం ఒక ప్రకటనలో తెలిపారు. ఎస్‌జీఎఫ్‌ ఆధ్వర్యంలో క్రీడాకారులకు ఉచిత భోజన, వసతి సౌకర్యాలు కల్పిస్తున్నట్లు వివరించారు. గౌతంపూర్‌ జెడ్పీ ఉన్నత పాఠశాల పీడీ బట్టు ప్రేమ్‌కుమార్‌ నేతృత్వంలో శిక్షణ కొనసాగుతుందని పేర్కొన్నారు. పొదుపుతోనే జీవితంలో మలుపులీడ్‌ బ్యాంక్‌ మేనేజర్‌ రాంరెడ్డి అశ్వారావుపేటరూరల్‌: చిన్న పొదుపుతోనే ప్రతి ఒక్కరి జీవితాల్లో మలుపు సాధ్యమని జిల్లా లీడ్‌ బ్యాంక్‌ మేనేజర్‌ వి.రాంరెడ్డి అన్నారు. బుధవారం స్థానిక వ్యవసాయ కళాశాలలో ఆర్థిక అక్షరాస్యత కార్యక్రమం నిర్వహించగా, ఆయన హాజరై మాట్లాడారు. ప్రతీ ఒక్కరి జీవితంలో ఆర్థిక యాజమాన్యం ఎంతో అవసరమని అన్నారు. ఆర్థిక లావాదేవీలు, సైబర్‌ నేరాల పట్ల అప్రమత్తంగా ఉండాలని సూచించారు. అనంతరం ఆర్థిక నిపుణులు కె.వి.బాబూరావు మాట్లాడుతూ.. ఆర్థిక అక్షరాస్యత ప్రాముఖ్యత, ఆర్థిక వ్యవహారాల్లో లోటుపాట్లు, కేంద్ర, రాష్ట్ర ప్రభుత్వాలు అందిస్తున్న పథకాలు, అవకాశాల గురించి వివరించారు. కార్యక్రమంలో కళాశాల అసోసియేట్‌ డీన్‌ డాక్టర్‌ హేమంత్‌కుమార్‌, ప్రొఫెసర్లు డాక్టర్‌ టి.శ్రావణ్‌కుమార్‌, డాక్టర్‌ కె.శిరీష, డాక్టర్‌ ఐ. కృష్ణతేజ తదితరులు పాల్గొన్నారు. జిల్లా ఒలింపిక్‌ అసోసియేషన్‌ ఎన్నికపాల్వంచ: జిల్లా ఒలింపిక్‌ అసోసియేషన్‌ కార్యవర్గాన్ని పాల్వంచలో జిల్లా యువజన, క్రీడల శాఖ అధికారి పరంధామరెడ్డి సమక్షంలో బుధవారం ఎన్నుకున్నారు. అధ్యక్షుడిగా డాక్టర్‌ జి.యుగంధర్‌ రెడ్డి, కార్యదర్శిగా రాజేంద్రప్రసాద్‌ ఎన్నికయ్యారు. కోశాధికారిగా ఎస్‌కె.హుస్సేన్‌, ఉపాధ్యక్షులుగా వై.వెంకటేశ్వర్లు, బి.ఎం.ప్రేమ్‌కుమార్‌, మొగిలి, నాగేంద్ర త్రివేదిని ఎన్నుకున్నారు. అనంతరం పరంధామ రెడ్డి మాట్లాడుతూ జిల్లాలో క్రీడలను మరింతగా ప్రోత్సహించేందుకు కృషి చేయాలని కోరారు. కార్యక్రమంలో అంతర్జాతీయ క్రీడాకారిణి సింధు తపస్వి, బార్‌ కౌన్సిల్‌ సభ్యులు అనుదీప్‌, కె.మహిధర్‌, భూపేష్‌, రమేష్‌, బీహెచ్‌ రావు, కబీర్‌దాస్‌, రామిరెడ్డి, భాస్కర్‌, సతీష్‌, డానియేల్‌, రాంబాబు పాల్గొన్నారు. నేడు, రేపు మాజీ మంత్రి హరీశ్‌రావు పర్యటన ఖమ్మంమయూరిసెంటర్‌: మాజీ మంత్రి హరీశ్‌రావు గురు, శుక్రవారం ఖమ్మం జిల్లాలో పర్యటించనున్నారని బీఆర్‌ఎస్‌ జిల్లా అధ్యక్షుడు, ఎమ్మెల్సీ తాతా మధు ఒక ప్రకటనలో తెలిపారు. లగచర్ల గిరిజనులకు సంఘీభావంగా గురువారం సాయంత్రం ఖమ్మం పెవిలియన్‌ గ్రౌండ్‌ నుండి జెడ్పీ సెంటర్‌లోని అంబేద్కర్‌ సెంటర్‌ వరకు సాగే ర్యాలీలో హరీశ్‌రావు పాల్గొంటారని వెల్లడించారు. అలాగే, శుక్రవారం ఉదయం ఖమ్మం వ్యవసాయ మార్కెట్‌లో పత్తి, మిర్చి రైతులతో మాట్లాడి సమస్యలు తెలుసకుంటారని చెప్పారు. ఆతర్వాత బీఆర్‌ఎస్‌ జిల్లా కార్యాలయంలో విలేకరుల సమావేశంలో మాట్లాడతారని తెలిపారు. మధ్యాహ్నం చింతకాని మండలం ప్రొద్దుటూరులో ఆత్మహత్య చేసుకున్న రైతు బోజడ్ల ప్రభాకర్‌ కుటుంబంతో పాటు ఇటీవల జైలుకు వెళ్లొచ్చిన బీఆర్‌ఎస్‌ మండల అధ్యక్షుడు పెంట్యాల పుల్లయ్యను పరామర్శించడమే కాక చింతకాని మండలం లచ్చగూడెంలో విద్యుత్‌ శాఖ నిర్లక్షంతో మృతి చెందిన రైతు గూని ప్రసాద్‌ కుటుంబాన్ని పరామర్శిస్తారని తెలిపారు.

చర్ల: మండలంలో పత్తి వ్యాపారుల మోసాన్ని గుర్తించిన రైతులు వారికి దేహశుద్ధి చేశారు. మండలంలోని సింగసముద్రంలో బుధవారం ఈ ఘటన చోటుచేసుకుంది. వివరాలిలా ఉన్నాయి. జూలూరుపాడు మండలానికి చెందిన కొందరు పత్తి వ్యాపారులు ఇటీవల చర్ల, దుమ్ముగూడెం మండలాల్లో పత్తి కొనుగోలు చేసేందుకు వస్తున్నారు. గ్రామాల్లో తిరిగి రైతుల వద్ద నుంచి పత్తిపంటను కొనుగోలు చేస్తున్న వ్యాపారులు సింగసముద్రంలో బుధవారం ఉదయం కొందరు రైతుల వద్ద నుంచి పత్తి కొనుగోలు చేసి తీసుకొని వెళ్తున్నారు. పత్తి అమ్మిన రైతుల్లో కొందరు ముందుగానే వారి సొంత కాటాల ద్వారా పత్తిని కాటా వేసుకోగా వ్యాపారులు వేసిన కాటాలకు, రైతుల కాటాకు తేడా వచ్చింది. పత్తి కొనుగోలు చేసిన వ్యాపారులు తీసుకొని వెళ్తున్న సందర్భంలో రైతులు వారిని అడ్డగించి నిలదీసి, దేహశుద్ధి చేశారు. వారి పత్తిని తిరిగి తీసుకున్నారు. తమకు ఎలాంటి ఫిర్యాదు అందలేదని సీఐ రాజువర్మ తెలిపారు.

● మార్కెట్‌లో సన్నరకం ధాన్యానికి తగ్గిన డిమాండ్‌ ● సాగు విస్తీర్ణం పెరగడంతో దక్కని మద్దతు ధర ● ప్రభుత్వ కొనుగోలు కేంద్రాల్లో విక్రయిస్తేనే ‘ఎంఎస్‌పీ’ ● అక్కడ అమ్మాలంటే తేమ శాతం తంటాలు..బూర్గంపాడు: మార్కెట్‌లో డిమాండ్‌ ఎక్కువగా ఉండే సన్నరకం ధాన్యం ధర ఈ ఏడాది మందమైంది. రాష్ట్ర ప్రభుత్వం సన్నరకం ధాన్యానికి క్వింటాకు రూ.500 బోనస్‌ ప్రకటించటంతో రైతులు ఎక్కువగా ఈ రకాలనే సాగుచేశారు. పొరుగు రాష్ట్రాల్లోనూ ఈ ఏడాది వరి సాగు విస్తీర్ణం గణనీయంగా పెరడగంతో ధాన్యం ధరపై ప్రభావం పడుతోంది. గత ఐదారేళ్లుగా సన్నరకం ధాన్యాన్ని రైతులు కోసిన వెంటనే మిల్లర్లు పచ్చి వడ్లనే అధిక ధరలకు కొనుగోలు చేసేవారు. గతేడాది వానాకాలం సీజన్‌లో సన్నరకం ధాన్యం పచ్చివే క్వింటా రూ.2,300 నుంచి రూ.2,700 వరకు ధర పలికింది. ఈ సంవత్సరం మాత్రం సన్నరకం ధాన్యం కొనుగోళ్లకు మిల్లర్లు అంతగా ఆసక్తి చూపడం లేదు. ప్రస్తుతం బాగా ఆరిన ధాన్యాన్నే క్వింటా రూ.2వేల చొప్పున కొనుగోలు చేస్తున్నారు. 1.75 లక్షల ఎకరాల్లో సాగు.. జిల్లాలో ఈ ఏడాది సుమారు 1.75లక్షల ఎకరాల్లో రైతులు వరిసాగు చేశారు. ఇందులో 80 శాతం సన్నరకాలే ఉన్నాయి. అయితే అధిక వర్షాలు, తెగుళ్లు, పురుగు, దోమ ఉధృతితో ఈ రకం ధాన్యం సాగుకు పెట్టుబడి ఖర్చులు పెరగగా, దిగుబడి గణనీయంగా తగ్గింది. ఎకరాకు 25 నుంచి 30 బస్తాల వరకే దిగుబడి వస్తుండడం, మరోవైపు ఖర్చులు పెరగడం రైతులను కలవరపరుస్తోంది. ఇక మార్కెట్‌లో సన్నరకం ధాన్యానికి డిమాండ్‌ ఉంటుందని ఆశించినా ప్రతికూల పరిస్థితులే ఎదురయ్యాయి. గతంలో సన్నరకం ధాన్యాన్ని కోసిన వెంటనే ఆంధ్రప్రదేశ్‌, తమిళనాడు రాష్ట్రాల మిల్లర్లు పచ్చి వడ్లనే అధిక ధరకు కొనుగోలు చేసేవారు. ఈ సంవత్సరం ఆ రాష్ట్రాల్లోనూ ఽవరి సాగు విస్తీర్ణం పెరగడంతో అక్కడి మిల్లర్లు ఇటు రావడం లేదు. ప్రభుత్వం ప్రకటించిన రూ. 500 బోనస్‌ వస్తుందనే ఆశతో రైతులు ఈ ఏడాది ఎక్కువ విస్తీర్ణంలో సన్నరకాలను సాగు చేశారు. అధిక పెట్టుబడి పెట్టినా సరైన దిగుబడి రాకపోవడంతో దిగులు చెందుతున్నారు. ప్రభుత్వ కొనుగోలు కేంద్రాల్లో విక్రయించే రైతులకు ధాన్యం నగదు ముందుగా చెల్లిస్తున్న అధికారులు.. ఆ తర్వాత రైతుల ఖాతాల్లో బోనస్‌ డబ్బు జమ చేస్తామని చెబుతున్నారు. అలా కాకుండా మొత్తం డబ్బు కొనుగోలు కేంద్రాల్లో వెంటనే చెల్లించాలని రైతులు కోరుతున్నారు. కొనుగోళ్లు వేగవంతం చేయాలి వడ్ల కొనుగోళ్లు వేగవంతం చేయాలి. ధాన్యం రోజుల తరబడి ఆరబెట్టాలంటే చాలా ఖర్చులవుతున్నాయి. ఈ ఏడాది సన్న రకం వడ్లు సాగు చేస్తే ఎకరానికి 25 బస్తాల దిగుబడి వచ్చింది. పెట్టుబడులు బాగా పెరిగాయి. వడ్లు అమ్మితే పెట్టుబడి ఖర్చులు కూడా వచ్చే పరిస్థితి లేదు. – నీరుడు రాజు, రైతు, బూర్గంపాడుబోనస్‌ కూడా వెంటనే చెల్లించాలి ధాన్యం డబ్బుతో పాటు ప్రభుత్వం ప్రకటించిన క్వింటాకు రూ. 500 బోనస్‌ కూడా రైతుల ఖాతాల్లో వెంటనే జమచేయాలి. ఈ ఏడాది దిగుబడులు బాగా తగ్గాయి. పెట్టుబడులు కూడా తిరిగి రాని పరిస్థితి. కొనుగోలు కేంద్రాలలో అమ్మిన ధాన్యానికి హమాలీ చార్జీలు ప్రభుత్వమే భరించాలి. – ఆవుల వెంకటేశ్వరరెడ్డి, రైతు, రెడ్డిపాలెంప్రభుత్వ కేంద్రాల్లో తేమ శాతం కొర్రీలు మిల్లర్లు, ప్రైవేట్‌ వ్యాపారులు తక్కువ ధరకే సన్నరకం ధాన్యం కొనుగోలు చేస్తుండగా.. మద్దతు ధర దక్కాలంటే రైతులు ప్రభుత్వ కొనుగోలు కేంద్రాల్లోనే విక్రయించాలి. అక్కడ మద్దతు ధరతో పాటు క్వింటాకు రూ.500 బోనస్‌ కూడా చెల్లిస్తామని ప్రభుత్వం ప్రకటించింది. అయితే ప్రభుత్వ కొనుగోలు కేంద్రాల్లో ధాన్యం విక్రయించాలంటే తేమశాతం 17కు మించకూడదు. ఇందుకు కనీసం వారం, పది రోజుల పాటు ధాన్యాన్ని ఆరబెట్టాలి. ఇక కొనుగోలు కేంద్రాల్లో విక్రయించే ధాన్యానికి రైతులే హమాలీ చార్జీ కింద క్వింటాకు రూ.100కు పైగా చెల్లించాల్సి వస్తోంది. అదే ప్రైవేటు వ్యాపారులకు అమ్మితే ఈ ఖర్చులన్నీ వారే భరిస్తారు.

భయాందోళనలో విద్యార్థులు.. ఇటీవల మెడికల్‌ కాలేజీ హాస్టళ్లకు సరఫరా చేసిన భోజనం తిని కొందరు విద్యార్థులు అస్వస్థతకు గురయ్యారు. అయితే ఈ విషయాన్ని కాలేజీ యాజమాన్యం దృష్టికి తీసుకెళ్లడానికి విద్యార్థులు వెనకాడుతున్నారు. గతంలో మెస్‌ బాగా లేదని ఫిర్యాదు చేస్తే.. పరిష్కారం చూపకపోగా నెలల తరబడి తిండికి ఇబ్బంది పడే దుస్థితి ఎదురైంది. దీంతో మధ్యాహ్నం వేళ పస్తులున్న విద్యార్థులకు.. రాత్రి వేళ భోజనానికి పాల్వంచ పట్టణంలోని హోటళ్లే దిక్కయ్యాయి. ఒక్కోసారి పదుల సంఖ్యలో వచ్చే విద్యార్థులకు ఆ హోటళ్లు కూడా భోజనం అందించలేకపోయాయి. దీంతో మెస్‌ విషయంలో మరోసారి ఫిర్యాదు చేస్తే పరిస్థితి మరింత దిగజారుతుందనే భయాందోళనలో విద్యార్థులు ఉన్నారు. సాక్షి ప్రతినిధి, భద్రాద్రి కొత్తగూడెం: జిల్లాకు 2022 – 23 విద్యాసంవత్సరంలో 150 సీట్లతో వైద్య కళాశాల మంజూరైంది. నర్సింగ్‌ కాలేజీ కోసం నిర్మించిన భవనాల్లోనే మెడికల్‌ కాలేజీ తరగతులు ప్రారంభించారు. ఇప్పటికే రెండు బ్యాచ్‌ల విద్యార్థులు ఇక్కడ చదువుతుండగా మరో బ్యాచ్‌ విద్యార్థులు కూడా రానున్నారు. ఇక్కడ చదివే అమ్మాయిలు, అబ్బాయిలకు పాల్వంచలో వేర్వేరుగా హాస్టళ్లు నిర్వహిస్తున్నారు. విద్యార్థులే సొంతంగా డబ్బు చెల్లించేలా మెస్‌ కాంట్రాక్టర్‌ను నియమించారు. అయితే నాణ్యమైన భోజనం అందడం లేదని విద్యార్థులు గత మార్చిలో ఆందోళన చేయగా సదరు కాంట్రాక్టర్‌ను తప్పించారు. ఆ తర్వాత ఐదారు నెలల పాటు విద్యార్థులు ఇబ్బంది పడినా మరే ఇతర ప్రత్యామ్నాయ ఏర్పాట్లు చేయలేదు. ఇటీవల మహిళా శక్తి పేరుతో స్వయం సహాయక సంఘానికి అప్పగించినా పరిస్థితి మారలేదు. బస్‌ సర్వీస్‌ల పంచాయితీ.. వైద్య కళాశాల తరగతి గదులు, హాస్టల్‌, బోధనాస్పత్రులు వేర్వేరు చోట ఉండటంతో విద్యార్థుల రాకపోకలకు ఇబ్బంది కలుగుతోంది. దీంతో కాలేజీ అవసరాల కోసం అద్దె ప్రాతిపదికన మూడు బస్సులను గతేడాది ఏర్పాటు చేశారు. ముందుగా వీటిని ఇతర ప్రాంతాల నుంచి కొత్తగూడెం వచ్చే ప్రథమ సంవత్సర విద్యార్థులకే ఉపయోగించాలని, అందుకు సంబంధించిన చార్జీలను వారే చెల్లించాలని నిర్ణయించారు. కానీ క్షేత్రస్థాయిలో పరిస్థితుల కారణంగా ప్రథమ, ద్వితీయ సంవత్సర విద్యార్థులు పలువురు కూడా ఈ బస్‌ సర్వీస్‌ను ఉపయోగించుకున్నారు. దీంతో తమతో పాటు సెకండియర్‌ విద్యార్థుల నుంచి కూడా బస్‌ చార్జీలు వసూలు చేయాలని ఫస్టియర్‌ వారు డిమాండ్‌ చేస్తున్నారు. అయితే ద్వితీయ సంవత్సర విద్యార్థుల నుంచి దీనిపై సానుకూల స్పందన కరువైంది. ఇలా బస్‌ సర్వీస్‌ల బకాయిలు పేరుకుపోతున్నాయి. గత ఫిబ్రవరి నుంచి అక్టోబర్‌ వరకు ఒక్క రూపాయి కూడా చెల్లించకపోవడంతో ఇటీవల సదరు కాంట్రాక్టర్‌ సర్వీసు నిలిపేసేందుకు సిద్ధం కాగా చర్చలు, హామీలతో వెనక్కి తగ్గాడు. ఇన్‌చార్జ్‌ల పాలన మెడికల్‌ కాలేజీకి మొదట ప్రిన్సిపాల్‌గా లక్ష్మణ్‌రావు నియమితులయ్యారు. అయితే నిర్వహణ పరమైన లోపాలపై ఆరోపణలు రావడంతో ఈ ఏడాది సెప్టెంబర్‌లో ఆయనను బదిలీ చేశారు. అప్పటి నుంచి పాథాలజీ ప్రొఫెసర్‌ రాజ్‌కుమార్‌ ఇన్‌చార్జ్‌ ప్రిన్సిపాల్‌గా వ్యవహరిస్తున్నారు. దీంతో కాలేజీ నిర్వహణ వ్యవహారాల్లో పూర్తిస్థాయి నిర్ణయాలు ఆయన తీసుకోవడం లేదు. ఫలితంగా ఇక్కడ సమస్యలు నానాటికీ పేరుకుపోతున్నాయి. ఇప్పటికై నా మంత్రులు, ప్రజాప్రతినిధులు, జిల్లా అధికారులు స్పందించి వైద్య కళాశాలలో నెలకొన్న సమస్యలు పరిష్కరించాలని తల్లిదండ్రులు కోరుతున్నారు. మెస్‌లో సమస్య లేదు మెస్‌లో సమస్య ఉన్న అంశం నా దృష్టికి రాలేదు. ఒకరిద్దరు విద్యార్థులు బయట తినడం వల్ల ఫుడ్‌ పాయిజన్‌ అయి ఇబ్బంది పడ్డారు. బస్సులకు సంబంధించిన విషయంలో కాలేజీ మేనేజ్‌మెంట్‌ కేవలం అనుసంధానకర్త మాత్రమే. పూర్తి బాధ్యత మాది కాదు. – రాజ్‌కుమార్‌, ఇన్‌చార్జ్‌ ప్రిన్సిపాల్‌ వైద్య కళాశాలలో పూర్తికాని హాస్టల్‌, మెస్‌ నిర్మాణ పనులు ప్రైవేట్‌ హాస్టళ్లు, హోటళ్లను ఆశ్రయిస్తున్న విద్యార్థులు గతంలో కాలేజీ మెస్‌ బాగా లేదంటూ ఆందోళన కాంట్రాక్టు రద్దుతో నెలల తరబడి ఇబ్బంది పడిన విద్యార్థులు భోజనం విషయంలో మళ్లీ తప్పని ఇక్కట్లు వాట్సాప్‌ గ్రూపులో చర్చ.. మెడికల్‌ కాలేజీ విద్యార్థుల తల్లిదండ్రులకు సంబంధించిన వాట్సాప్‌ గ్రూపులో మెస్‌లో భోజనం బాగా లేని విషయంపై చర్చ జరిగింది. దీంతో కొందరు తల్లిదండ్రులు చొరవ చూపించి భోజనంలో లోపాలు లేకుండా చూడాలని మెస్‌ నిర్వాహకుడితో పాటు కాలేజీ మేనేజ్‌మెంట్‌కు చెప్పారు. అక్కడి నుంచి సరైన భరోసా రాకపోవడంతో ఫుడ్‌ ఇన్‌స్పెక్టర్‌ దృష్టికి తీసుకెళ్లినట్టు సమాచారం.

అన్నపురెడ్డిపల్లి (చండుగొండ) : విద్యార్థుల మేధస్సు దేశానికి అవసరమని, వారి పైనే దేశ భవిష్యత్‌ ఆధారపడి ఉందని కలెక్టర్‌ జితేష్‌ వి పాటిల్‌ అన్నారు. అన్నపురెడ్డిపల్లి గురుకుల కళాశాలలో మూడు రోజులుగా కొనసాగుతున్న జిల్లాస్థాయి సైన్స్‌ఫేర్‌ బుధవారం ముగిసింది. ఈ సందర్భంగా జరిగిన కార్యక్రమంలో కలెక్టర్‌ మాట్లాడుతూ.. విద్యార్థులు చదువుతో పాటు ఆట పాటలు, వైజ్ఞానిక ప్రదర్శనలపై దృష్టి పెట్టాలని సూచించారు. విద్యార్థుల ప్రయోగాలను పరిశీలించి.. అద్భుతంగా ఉన్నాయని ప్రశంసించారు. నిత్యం మంచి ఆలోచనలతో ఉంటే చదువుతోపాటు ఇతర అంశాలపై దృష్టి సారించవచ్చని అన్నారు. గ్రామీణ ప్రాంతాల్లో ప్రధాన ఆదాయ వనరు వ్యవసాయ రంగమేనని, వ్యవసాయం అంటే కూలీ పని కాదని, సమాజంలో రైతులదే ప్రథమ స్థానమని చెప్పారు. ఎస్పీ రోహిత్‌రాజ్‌ మాట్లాడుతూ.. విద్యార్థులు తమ సందేహాలను నివృత్తి చేసుకునేందుకు ప్రశ్నించేతత్వం అలవర్చుకోవాలని సూచించారు. నైపుణ్యంతో నేర్చుకునే ప్రతీ అంశం జీవితంలో పనికొస్తుందని అన్నారు. చెడు వ్యసనాల జోలికి పోకుండా విలువలు, క్రమశిక్షణతో మెలగాలని హితవు పలికారు. అంతకుముందు ఆయన శ్రీభ్రమరాంబ సమేత మల్లికార్జునస్వామిని దర్శించుకున్నారు. అంకితభావంతో ముందుకు సాగాలి మారుమూల ప్రాంతమైనప్పటికీ జిల్లా నలుమూలల నుంచి 800 పైగా ఎగ్గిబిట్స్‌ రావడం సంతోషంగా ఉందని ఎమ్మెల్యే జారే ఆదినారాయణ అన్నారు. విద్యార్థులు ఇదే అంకితభావంతో ముందుకు సాగాలని పిలుపునిచ్చారు. కార్యక్రమ విజయవంతానికి సహకరించిన అధికారులు, ఉపాధ్యాయులకు కృతజ్ఞతలు తెలిపారు. ఇల్లెందు ఎమ్మెల్యే కోరం కనకయ్య మాట్లాడుతూ.. మారుమూల ప్రాంతంలో జిల్లా స్థాయి వైజ్ఞానిక ప్రదర్శన విజయవంతం చేసిన జారే ఆదినారాయణను ‘శభాష్‌ తమ్ముడు’ అంటూ అభినందించారు. రాష్ట్రస్థాయికి 27 మంది.. జిల్లా స్థాయి సైన్స్‌ఫేర్‌లో అసాధరణ ప్రతిభ కనబర్చి ప్రయోగాలు ప్రదర్శించిన 27 మంది విద్యార్థులు రాష్ట్రస్థాయికి ఎంపికయ్యారు. వారికి కలెక్టర్‌, ఎస్పీలతో పాటు ఎమ్మెల్యేలు జారే ఆదినారాయణ, కోరం కనకయ్య చేతుల మీదుగా ప్రశంసాపత్రాలు, జ్ఞాపికలు అందజేశారు. కార్యక్రమంలో రాష్ట్ర మార్క్‌ఫెడ్‌ చైర్మన్‌ కొత్వాల శ్రీనివాసరావు, డీఈఓ వెంకటేశ్వరాచారి, డీఎస్‌ఓ చలపతిరాజు, తహసీల్దార్‌ జగదీశ్వర్‌ప్రసాద్‌, ఎంపీడీఓ మహాలక్ష్మి, ఎంఈఓ ఆనంద్‌కుమార్‌, పర్సా వెంకట్‌, గాంధీ పాల్గొన్నారు. వారి మేధస్సు దేశానికి అవసరం చిన్నప్పటి నుంచే అన్ని రంగాలపై దృష్టి పెట్టాలి కలెక్టర్‌ జితేష్‌ వి పాటిల్‌

మణుగూరుటౌన్‌: కోల్‌ ఇండియా స్థాయిలో సింగరేణి విజయకేతనం ఎగురవేయాలని ఏరియా జీఎం దుర్గం రాంచందర్‌ అన్నారు. బుధవారం సింగరేణి కాలరీస్‌ డబ్ల్యూపీఎస్‌ అండ్‌ జీపీఏ ఆధ్వర్యంలో మణుగూరు భద్రాద్రి స్టేడియంలో హాకీ టోర్నమెంట్‌ ముగిసింది. ఈ సందర్భంగా జీఎం మాట్లాడుతూ.. కార్మికులు యోగా, ధ్యానం, క్రీడల కోసం కొంత సమయం కేటాయించాలన్నారు. క్రీడాపోటీల్లో మొదటి స్థానంలో నిలిచిన మందమర్రి బెల్లంపల్లి, రన్నరప్‌గా నిలిచిన శ్రీరాంపూర్‌ జట్లకు బహుమతుల ప్రదానం చేశారు. కార్యక్రమంలో వై.రాంగోపాల్‌, కృష్ణంరాజు, శ్యాంసుందర్‌, సలగల రమేశ్‌, పాసినేట్‌, వెస్లీ, అశోక్‌, శ్రీనివాస్‌, రమేశ్‌ తదితరులు ఉన్నారు. డీఆర్‌యూసీసీ మెంబర్‌గా శ్రీనివాసరెడ్డి ఖమ్మంవన్‌టౌన్‌: దక్షిణ మధ్య రైల్వే సికింద్రాబాద్‌ డివిజనల్‌ యూజర్స్‌ కన్సల్టేటివ్‌ కమిటీ(డీఆర్‌యూసీసీ) మెంబర్‌గా కొత్తగూడెంనకు చెందిన యరమల శ్రీనివాసరెడ్డి నియమితులయ్యారు. ఖమ్మం ఎంపీ రామసహాయం రఘురాంరెడ్డి సిఫారసుతో నియమితులైన ఆయన రెండేళ్ల పాటు పదవిలో కొనసాగనున్నారు. ఈ సందర్భంగా ఎంపీని బుధవారం ఖమ్మంలో కలిసిన శ్రీనివాసరెడ్డి తన నియామకానికి సహకరించడంపై కృతజ్ఞతలు తెలిపారు. కాగా, ఉమ్మడి జిల్లాలో ప్రయాణికులకు మెరుగైన సౌకర్యాలు అందేలా రైల్వే బోర్డు సమావేశాల్లో చర్చించాలని ఎంపీ ఆయనకు సూచించారు. నాయకుడు కొప్పుల చంద్రశేఖర్‌ పాల్గొన్నారు.

భధ్రాచలం: భద్రాచలం శ్రీ సీతారామచంద్ర స్వామి వారి దేవస్థానంలో బుధవారం శ్రీరామ పునర్వసు దీక్షలు ఘనంగా ప్రారంభమయ్యాయి. కార్తీక మాసంలో పునర్వసు నక్షత్రం రోజున శ్రీరామ దీక్షలను భక్తులు స్వీకరించడం ఆనవాయితీ. శ్రీరామ మాలను స్వీకరించేందుకు తరలివచ్చిన పలువురు భక్తులు తొలుత పవిత్ర గోదావరిలో పుణ్యస్నానాలు ఆచరించాక ఆలయానికి చేరుకున్నారు. అర్చకులు మాలలు వేసి దీక్షలను ప్రారంభించారు. కాగా డిసెంబర్‌ 17 మార్గశిర పునర్వసు రోజున ఈ దీక్షల విరమణ ఉంటుంది. ఆ రోజు గిరి ప్రదక్షిణ, పాదుకా పూజ, సాయంత్రం వెండి రథ సేవ, 18న శ్రీరామ పట్టాభిషేకం కార్యక్రమాలు నిర్వహించనున్నారు. క్యాలెండర్లు, డైరీల ఆవిష్కరణ.. శ్రీ సీతారామ చంద్రస్వామి దేవస్థానం ఆధ్వర్యంలో రూపొందించిన 2025 సంవత్సర క్యాలెండర్లు, డైరీలను బుధవారం ఆవిష్కరించారు. అంతరాలయంలో రామయ్య పాదాల చెంత ఉంచి ప్రత్యేక పూజల అనంతరం ఈఓ ఎల్‌.రమాదేవి ఆవిష్కరించారు. ఈ సందర్భంగా ఆమె మాట్లాడుతూ.. స్వామి వారి అవతారాలు, ప్రఽధాన ఉత్సవాలకు సంబంధించి చిత్రాలతో అందంగా తయారు చేసిన క్యాలెండర్లు భక్తుల కోసం అందుబాటులో ఉంచినట్లు తెలిపారు. వీటితో పాటు ఈ ఏడాది డైరీలను సైతం తయారు చేయించి విక్రయశాలల్లో అందుబాటులో ఉంచామని పేర్కొన్నారు. వైభవంగా రామయ్య నిత్యకల్యాణం.. శ్రీ సీతారామచంద్రస్వామి వారి నిత్యకల్యాణ వేడుక బుధవారం కమనీయంగా జరిగింది. తెల్ల వారుజామున గర్భగుడిలో స్వామి వారికి సుప్రభాత సేవ, సేవా కాలం, ఆరాధన తదితర పూజలు చేశారు. అనంతరం బేడా మండపంలో కొలువుదీర్చి విశ్వక్సేన పూజ, పుణ్యావాచనం చేశారు. స్వామివారికి కంకణధారణ, యజ్ఞోపవీత ధారణ, అమ్మవారికి కంకణధారణ, యోక్త్రధారణ గావించి నిత్యకల్యాణ ఘట్టాన్ని అర్చకులు శాస్త్రోక్తంగా నిర్వహించారు. భక్తులు స్వామి వారిని దర్శించుకుని తీర్థప్రసాదాలు స్వీకరించారు.

కొత్తగూడెంఅర్బన్‌/కొత్తగూడెంటౌన్‌/కొత్తగూడెంరూరల్‌: సింగరేణి సంస్థలో టిప్పర్‌, లారీ ఓనర్ల వెల్ఫేర్‌ అసోసియేషన్‌ ఎన్నికలు జరగకుండా అడ్డుకోవడం సరికాదని బీఎస్పీ రాష్ట్ర ప్రధాన కార్యదర్శి ఎర్రా కామేశ్‌ పేర్కొన్నారు. ఎన్నికలు నిర్వహించేందుకు కొత్తగూడెం బుధవారం సీఈఆర్‌ క్లబ్‌లో సిద్ధమవుతుండగా కామేశ్‌తో పాటు పలువురిని పోలీసులు అదుపులోకి తీసుకున్నారు. ఈ సందర్భంగా ఆయన మాట్లాడుతూ.. నాయకులను రెండు వర్గాలుగా విడగొట్టి నెలల తరబడి తిప్పుకుంటున్నా కొందరు పెత్తనం కోసం యత్నిస్తున్నారని తెలిపారు. కాంగ్రెస్‌ నాయకుడు జేబీ శౌరీని కలిసి మాట్లాడాక ఇరువర్గాలు సంప్రదించి ఎన్నికల నిర్వహణకు నిర్ణయించారని చెప్పారు. ఆపై నామినేషన్ల స్వీకరణ, తదితర ప్రక్రియలు పూర్తిచేసి గురువారం సీఈఆర్‌ క్లబ్‌లో ఎన్నికలకు ఏర్పాట్లు చేస్తే పర్యవేక్షకులుగా వెళ్లిన తనతో పాటు మారపాక రమేశ్‌ను పోలీసులు అదుపులోకి తీసుకున్నారని ఆరోపించారు. పారదర్శకంగా జరుగుతున్న ఎన్నికను అడ్డుకోవడం సరికాదన్నారు. కాగా, కామేశ్‌, రమేశ్‌తో పాటు బూర్గుల అనిల్‌కుమార్‌, తానంగి రవికుమార్‌, మైల చైతన్య, పెండ్యాల శ్రీనివాస్‌, దువ్వ సంపత్‌కుమార్‌, కాంటాత్మక ముకేశ్‌, నారా మహేందర్‌, కోలా నాగవర్మ, పలువురు లారీ ఓనర్లు, డ్రైవర్లను పోలీసులు అదుపులోకి తీసుకునే సమయాన రసాభాసగా మారింది. అయితే, అనుమతి లేకుండా ఎన్నిక నిర్వహిస్తుండటంతో వారిని అదుపులోకి తీసుకుని ఆ తర్వాత సొంత పూచీకత్తుపై విడుదల చేశామని సీఐ కరుణాకర్‌ వెల్లడించారు. కాగా, లారీ ఓనర్‌ అసోసియేషన్లకు సంబంధించి రెండు వర్గాల్లో యజమానులు ఐక్యంగా ఉన్నందున అవాంతరాలు లేకుండా ఎన్నికలు జరిగేలా చూడాలని డీసీసీ అధ్యక్షుడు పొదెం వీరయ్య సూచించారు. కొత్తగూడెంలోని పార్టీ కార్యాలయంలో నాయకులతో సమావేశమైన ఆయన మాట్లాడుతూ కొన్ని పార్టీల నాయకులు చిచ్చు పెట్టేలా వ్యవహరిస్తున్నందున యజమానులు అప్రమత్తంగా ఉండాలని తెలిపారు. సమావేశంలో నాయకులు జేబీ శౌరీ, గౌస్‌, ఉస్మాన్‌, గడ్డం రాజశేఖర్‌, దావూద్‌ పాల్గొన్నారు. అనుమతి లేదంటూ అడ్డుకున్న పోలీసులు

● పత్తి మీద పడడంతో ఊపిరి ఆడక కన్నుమూత తిరుమలాయపాలెం: మండలంలోని గోల్‌తండా పరిధిలోని శ్రీ భాగ్యలక్ష్మి కాటన్‌ ఇండస్ట్రీస్‌లో పనిచేస్తున్న ఓ కార్మికుడు మృతి చెందాడు. ఎస్‌ఐ కూచిపూడి జగదీష్‌ తెలిపిన వివరాలు.. మహారాష్ట్రకు చెందిన మాధవన్‌(20) కొన్నాళ్లుగా మిల్లులో పనిచేస్తుండగా మంగళవారం రాత్రి పత్తి బేళ్లపై నిద్రించాడు. అయితే, అర్ధరాత్రి చలి పెరగడంతో పక్కనే కుప్పగా వేసిన పత్తిలో పడుకున్నట్లు తెలుస్తోంది. ఈ విషయాన్ని గమనించని యంత్రం డ్రైవర్‌ పత్తిని తీస్తుండగా మాధవన్‌పై పడడంతో ఊపిరి ఆడక అస్వస్థతకు గురయ్యాడు. కాసేపయ్యాక సహచర కార్మికులకు మాధవన్‌ కనిపించకపోవడంతో సీసీ కెమెరాల పుటేజీని పరిశీలించి పత్తిలో కూరుకుపోయినట్లు గుర్తించారు. ఆపై వాహనంలో ఆయనను ఖమ్మం ఆస్పత్రికి తరలించగా అప్పటికే మృతి చెందినట్లు వైద్యులు నిర్ధారించారు. మృతుడి తల్లిదండ్రులకు సమాచారం ఇవ్వగా, వారు చేరుకున్నాక అజాగ్రత్తగా యంత్రాన్ని నడిపిన వ్యక్తిపై కేసు నమోదు చేయనున్నట్లు ఎస్సై తెలిపారు. కుటుంబ కలహాలతో ఆత్మహత్యాయత్నంసత్తుపల్లి: కుటుంబ కలహాల కారణంగా ఓ యువకుడు గొంతు కోసుకొని ఆత్మహత్యాయత్నానికి పాల్పడ్డాడు. వివరాలిలా ఉన్నాయి. సత్తుపల్లి ఎన్టీఆర్‌ నగర్‌కు చెందిన ఇమ్రాన్‌ బేతుపల్లికి చెందిన నందినిని ఇటీవల ప్రేమవివాహం చేసుకున్నాడు. కొన్నాళ్లకు ఇరువురి మధ్య గొడవలు మొదలవడంతో నందిని పుట్టింటికి వెళ్లిపోయింది. దీంతో బుధవారం బేతుపల్లికి వెళ్లిన ఇమ్రాన్‌ తన భార్యను పంపించాలని ఆమె కుటుంబీకులను బెదిరిస్తూ బ్లేడ్‌తో పీక కోసుకోవడంతో తీవ్ర రక్తస్రావమైంది. ఈమేరకు ఆయనను సత్తుపల్లి ప్రభుత్వాస్పత్రికి తరలించగా అక్కడి నుంచి పారిపోయే యత్నం చేయడంతో కుటుంబీకులు, ఆస్పత్రి సిబ్బంది పట్టుకుని చికిత్స చేశారు. గతంలో కూడా ఇమ్రాన్‌ ఆత్మహత్యాయత్నానికి పాల్పడ్డాడని కుటుంబ సభ్యులు తెలిపారు. సమాచారం తెలుసుకున్న పోలీసులు కేసు నమోదు నమోదు చేసి దర్యాప్తు చేపట్టారు. చేపల వేటకు వెళ్లిన వ్యక్తి గల్లంతు చింతకాని: మండలంలోని తిమ్మినేనిపాలెంకు చెందిన కొమ్ము మహేందర్‌ (55) గ్రామ సమీపంలోని మున్నేరులో బుధవారం చేపల వేటకు వెళ్లి గల్లంతయ్యాడు. ఆయన సాయంత్రమైనా ఇంటికి రాకపోవటంతో కుటుంబీకులు, గ్రామస్తులు మున్నేరు వద్దకు వెళ్లి వెతికారు. అయినా ఫలితం లేక పోలీసులకు సమాచారం ఇవ్వగా ఎస్సై నాగుల్‌మీరా.. అగ్నిమాపక సిబ్బందితో పాటు గజ ఈతగాళ్లను పిలిపించి రాత్రి వరకు గాలించినా మహేందర్‌ ఆచూకీ లభించలేదు. దీంతో గురువారం ఉదయం మళ్లీ గాలింపు చేపడుతామని ఎస్సై తెలిపారు.

ఇల్లెందురూరల్‌: మండలంలోని హజరత్‌ నాగుల్‌మీరా మౌలా చాన్‌ దర్గా షరీఫ్‌లో కులమతాలకు అతీతంగా నిర్వహించే ఉర్సే షరీఫ్‌ ఉత్సవాలు నవంబర్‌ 30, డిసెంబర్‌ 1వ తేదీల్లో నిర్వహించనున్నారు. ఈ మేరకు ప్రచార పోస్టర్‌ను ఉత్సవ కమిటీ ప్రతినిధులు బుధవారం ఆవిష్కరించారు. మండలంలోని సత్యనారాయణపురం గ్రామ శివారు అటవీ ప్రాంతంలో హజరత్‌ నాగుల్‌మీరా మౌలా చాన్‌ దర్గా షరీఫ్‌లో కొలువుదీరిన నాగుల్‌మీరా సమక్షంలో ఉర్సు ఉత్సవాలు ఏటా ఘనంగా నిర్వహించడం ఆనవాయితీగా వస్తోంది. 22వ ఉర్సు ఉత్సవాల కోసం దర్గా ముస్తాబవుతోంది. ఏటా పట్టణంలోని హజరత్‌ ఖాసీం దుల్హా దర్గాహ్‌ షరీఫ్‌లో కార్తీక పౌర్ణమి రోజున ఉర్సు ఉత్సవాలు నిర్వహిస్తారు. తిరిగి మండలంలోని సత్యనారాయణపురం గ్రామ శివారులోని నాగుల్‌మీరా మౌలా చాన్‌ దర్గా షరీఫ్‌లో అమావాస్య రోజు వరకు ఉత్సవాలు కొనసాగుతాయి. ఉర్సే షరీఫ్‌ ఉత్సవాల్లో భాగంగా పట్టణంలోని హజరత్‌ ఖాసీం దుల్హా దర్గా షరీఫ్‌ నుంచి ఈ నెల 30 తేదీన సాయంత్రం 5 గంటలకు చాదర్‌ను, సాయంత్రం 6 గంటలకు సందల్‌ను ఊరేగింపుగా నాగుల్‌మీరా మౌలా చాన్‌ దర్గా షరీఫ్‌కు చేరుస్తారు. డిసెంబర్‌ 1వ తేదీన ఉదయం 8 గంటలకు హజరత్‌ ఖాసీం దుల్హా దర్గాహ్‌ షరీఫ్‌ నుంచి భారీ జులూస్‌ ప్రారంభమై నాగుల్‌మీరా మౌలాచాన్‌ దర్గా షరీఫ్‌ వరకు కొనసాగుతుంది. దర్గాలో మధ్యాహ్నం 12 గంటలకు దావతే హజరత్‌, సాయంత్రం 6 గంటలకు సలామీ, రాత్రి 7 గంటలకు ఖవ్వాలి నిర్వహిస్తామని నిర్వాహకులు వివరించారు. హజరత్‌ నాగుల్‌మీరా మౌలా చాన్‌ దర్గాలో ఏర్పాట్లు

ఇల్లెందు: ఇల్లెందు పట్టణం 16వ వార్డుకు చెందిన డాక్టర్‌ జయంతికి తెలంగాణ రాష్ట్ర అర్హత పరీక్ష (టీజీసెట్‌–2024) ఫలితాల్లో 9వ ర్యాంకు లభించింది. బుధవారం వెల్లడైన ఫలితాల్లో అమె అత్యుత్తమ మార్కులు పొందారు. ఆమె భర్త డాక్టర్‌ శ్రీధర్‌లోద్‌ హనుమకొండ అర్ట్స్‌, సైన్స్‌ కళాశాలలో అసిస్టెంట్‌ ప్రొఫెసర్‌గా పనిచేస్తున్నారు. 2022లో కాకతీయ యూనివర్సిటీ నుంచి పీహెచ్‌డీ పూర్తి చేసిన జయంతిని పలువురు అభినందించారు. తెలంగాణ ఉద్యమకారుడు మృతి ఇల్లెందు: పట్టణంలోని స్టేషన్‌బస్తీకి చెందిన బండి పుష్పరాజ్‌ అలియాస్‌ డిష్‌ రమేశ్‌ (50) అనారోగ్యంతో బుధవారం మృతిచెందగా పలువురు నివాళులర్పించారు. నెలన్నర కిందట ఆయన సతీమణి రాధిక కూడా మృతి చెందింది. మలి దశ ఉద్యమంలో కీలకంగా పనిచేసిన పుష్పరాజ్‌.. ఒక దశలో పట్టణంలోని గోవింద్‌సెంటర్‌ బీఎస్‌ఎన్‌ఎల్‌ సెల్‌ టవర్‌ ఎక్కి హల్‌చల్‌ సృష్టించాడు. ఆనాడు రమేశ్‌పై ఇల్లెందు పోలీస్‌ స్టేషన్‌లో కేసు కూడా నమోదైంది. రమేశ్‌, ఆయన సతీమణి రాధిక మృతితో వారి పిల్లలు అనాథలయ్యారు. ముగ్గురిపై కేసు పాల్వంచరూరల్‌: ప్రభుత్వ అధికారి విధులకు ఆటంకం కలిగించి.. ఇసుకను అన్‌లోడ్‌ చేసిన ముగ్గురు వ్యక్తులపై పోలీసులు బుధవారం కేసు నమోదు చేశారు. మండలంలోని నాగారం సమీపంలోని కిన్నెరసాని వాగు నుంచి అక్రమంగా ఇసుక తరలిస్తున్న ట్రాక్టర్‌ను ఆదివారం రాత్రి ఫారెస్ట్‌ బీట్‌ ఆఫీసర్‌ బి.హరినాయక్‌ పట్టుకున్నారు. దానిని కార్యాలయానికి తరలిస్తుండగా ట్రాక్టర్‌ ఓనర్‌ అన్నపురెడ్డి తమయ్య, అతని సోదరుడు జైసూర్య, డ్రైవర్‌ బి.రవి కలిసి దౌర్జన్యంగా ఇసుకను అన్‌లోడ్‌ చేశారు. ఎఫ్‌బీఓ హరినాయక్‌ ఫిర్యాదు మేరకు ఆ ముగ్గురిపై కేసు నమోదు చేశామని ఎస్‌ఐ సురేశ్‌ తెలిపారు. టేకు దిమ్మెలు స్వాధీనం కరకగూడెం: అనుమతులు లేని టేకు కలపను స్వాధీనం చేసుకొని ఓ వ్యక్తిపై ఫారెస్ట్‌ అధికారులు కేసు నమోదు చేసిన ఘటన మండలంలో చోటుచేసుకుంది. అనంతారం ఎఫ్‌ఎస్‌ఓ గోవింద్‌ కథనం ప్రకారం.. కొత్తగూడెం గ్రామానికి చెందిన ఓ వ్యక్తి ఇంటి వెనకాల పత్తి చేనులో బుధవారం తనిఖీలు చేపట్టారు. అనుమతులు లేకుండా కలప దిమ్మెలను నిల్వ ఉంచగా వాటిని స్వాధీనం చేసుకొని సదరు వ్యక్తిపై కేసు నమోదు చేసినట్లు తెలిపారు. కలప విలువ సుమారు రూ.50 వేలు ఉంటుందన్నారు. తనిఖీల్లో ఫారెస్ట్‌ బీట్‌ అధికారులు రోజా, లక్ష్మీనర్సు, బేస్‌ క్యాంపు సిబ్బంది రాంబాబు, సాంబ, గణేశ్‌ పాల్గొన్నారు. నాటుసారా పట్టివేత టేకులపల్లి: మండలంలో బుధవారం వాగొడ్డుతండా, లచ్యతండా, ఏ–కాలనీ, బీ–కాలనీ, చంద్రుతండా, శంభునిగూడెం గ్రామాల్లో టాస్క్‌ఫోర్స్‌ బృందం తనిఖీలు చేపట్టింది. 5 లీటర్ల నాటుసారా స్వాధీనం చేసుకొని ఇద్దరు వ్యక్తులపై కేసు నమోదు చేశారు. దాడుల్లో ఎస్‌ఐ గౌతమ్‌, సిబ్బంది రామకృష్ణగౌడ్‌, హబీబ్‌, గురవయ్య, సుమంత్‌, శ్రావణి, రమేశ్‌ పాల్గొన్నారు. ఎస్‌ఐ పి.సురేశ్‌ ఆధ్వర్యంలో మండలంలోని మద్రాస్‌తండాలో తనిఖీలు నిర్వహించగా బాణోతు రాంబాబు ఇంట్లో రెండున్నర లీటర్ల నాటుసారా లభించింది. సారాను స్వాధీనం చేసుకుని బాధ్యుడిపై కేసు నమోదు చేశారు. ఏడు ఇసుక ట్రాక్టర్లు సీజ్‌ చింతకాని: మండలంలోని చిన్నమండవ మున్నేరు నుంచి అక్రమంగా ఇసుక రవాణా చేస్తున్న ఏడు ట్రాక్టర్లను బుధవారం పోలీసులు సీజ్‌ చేశారు. వైరా సీఐ సాగర్‌, ఎస్సై నాగుల్‌మీరా ఆధ్వర్యాన తనిఖీలు చేపట్టగా అనుమతి లేకుండా ఇసుక తరలిస్తున్నట్లు తేలింది. ఈ సందర్భంగా సీఐ మాట్లాడుతూ అక్రమంగా ఇసుక తరలిస్తే ట్రాక్టర్లను సీజ్‌ చేయడమేకాక యజమానిపై కేసు నమోదు చేస్తామని హెచ్చరించారు. కాగా, మండలంలోని చిన్నమండవ, తిమ్మినేనిపాలెం మున్నేరు నుంచి ఇసుకను తరలింపునకు అడ్డుకట్ట వేసేలా సిబ్బంది గస్తీ ముమ్మరం చేయాలని సూచించారు.

● కొనుగోళ్లు నిలిపివేయడంతో ప్రధాన రహదారిపై ధర్నా ● ఆంక్షలు తొలగించాలని కొనుగోళ్లకు రాని వ్యాపారులు ● అధికారుల హామీతో విరమణ జూలూరుపాడు: కమీషన్‌ తీసుకోవద్దని, పత్తి క్వింటాకు రెండు కిలోల తారం తీయొద్దని అధికారులు ఆంక్షలు విధించడంతో వ్యాపారులు బుధవారం స్థానిక ఉప మార్కెట్‌ యార్డులో పత్తి కొనుగోళ్లను నిలిపివేశారు. అయితే, ముందస్తు సమాచారం ఇవ్వకుండా తాము వాహనాల్లో పత్తి తీసుకొచ్చాక ఇలా చేయడం సరికాదంటూ రైతులు తల్లాడ – కొత్తగూడెం ప్రధాన రహదారిపై ధర్నా చేపట్టారు. ఓ పక్క దిగుబడి లేక, ధర రాక ఇబ్బంది పడుతున్న తమను మరింత ఇక్కట్లకు గురిచేయొద్దని డిమాండ్‌ చేశారు. రైతులకు సీపీఎం, సీపీఐ నాయకులు మద్దతు పలకగా రెండు వైపులా పెద్దసంఖ్యలో వాహనాలు నిలిచిపోయాయి. అలాగే, ట్రాఫిక్‌లో నిలిచిపోయిన బీఆర్‌ఎస్‌ నాయకుడు కోనేరు సత్యనారాయణ రైతులతో మాట్లాడి విషయాన్ని కలెక్టర్‌ పాటిల్‌కు ఫోన్‌లో వివరించారు. అంతలోనే పత్తి కొనుగోళ్లు జరిగేలా చర్యలు తీసుకుంటామని మార్కెట్‌ అధికారులు హామీ ఇవ్వడంతో రైతులు ఆందోళన విరమించారు. సీపీఎం, సీపీఐ మండల కార్యదర్శులు యాసా నరేశ్‌, గుండెపిన్ని వెంకటేశ్వర్లు, నాయకులు గార్లపాటి వెంకటి, గడిదేశి కనకరత్నం, ఎస్కే చాంద్‌పాషా, ఇల్లంగి సీతారాములు తదితరులు పాల్గొన్నారు. రైతులను ఇబ్బంది పెట్టొద్దు రైతులను ఇబ్బంది పెట్టకుండా నిబంధనల మేరకు పత్తి కొనుగోలు చేయాలని కొత్తగూడెం డీఎస్పీ అబ్దుల్‌ రెహమాన్‌ సూచించారు. జూలూరుపాడులో రైతులు ఆందోళన చేపట్టిన విషయం తెలియడంతో ఆయన చేరుకున్నారు. అప్పటికే రైతులు ఆందోళన విరమించగా, పత్తి కొనుగోళ్లు మొదలయ్యాయి. ఈ మేరకు వ్యాపారులతో మాట్లాడిన ఆయన ఏదైనా సమస్య ఉంటే రైతులకు ముందస్తు సమాచారం ఇవ్వాలే తప్ప కొనుగోళ్లు నిలిపివేయొద్దని హెచ్చరించారు. అలాగే, మార్కెటింగ్‌ శాఖ ఖమ్మం జిల్లా అధికారి ఎం.ఏ.అలీం కూడా వచ్చి కొనుగోళ్లను పరిశీలించి వ్యాపారులతో సమావేశమయ్యారు. కమీషన్‌, తరుగు సమస్యలు త్వరలో పరిష్కరిస్తామని తెలిపారు. అనంతరం ఆయన విలేకరులతో మాట్లాడుతూ రైతులు 8 నుంచి 12 శాతం మేర తేమ ఉండేలా పత్తి తీసుకొస్తే మద్దతు ధర లభిస్తుందన్నారు. కాగా, ఖమ్మం జిల్లాలో తొమ్మిది కేంద్రాలు ఇప్పటి వరకు 5 వేల మెట్రిక్‌ టన్నుల పత్తి కొనుగోలు చేశాయని తెలిపారు. ఏన్కూరు మార్కెట్‌ కార్యదర్శి బజారు, సూపర్‌వైజర్‌ రామారావు, వ్యాపారులు పెండ్యాల రామనర్సింహారావు, తొండెపు నవీన్‌, ఎస్‌కే.అన్వర్‌, ఉడుతా వెంకటేశ్వర్లు, కొదుమూరి రమేశ్‌, కమలాకర్‌, ఎస్‌డీ యాసిన్‌, తొండెపు సుబ్బారావు, దుగ్గిన్ని బాలకృష్ణ తదితరులు పాల్గొన్నారు.

ఇల్లెందురూరల్‌: విద్యార్థి పుస్తక పఠనం ద్వారానే జీవితంలో ఉన్నత శిఖరాలను అధిరోహించగలుగుతాడని ప్రభుత్వ డిగ్రీ కళాశాల ప్రిన్సిపాల్‌ చిన్నప్పయ్య, లైబ్రేరియన్‌సైన్స్‌ అసిస్టెంట్‌ ప్రొఫెసర్‌ డాక్టర్‌ విజయ్‌కుమార్‌ అన్నారు. 57వ జాతీయ గ్రంథాలయ వారోత్సవాల్లో భాగంగా బుధవారం కళాశాల ఆవరణలో పుస్తక ప్రదర్శన ఏర్పాటు చేయగా ఆయన మాట్లాడారు. విద్యార్థుల్లో పఠనాసక్తిని పెంచడమే వారోత్సవాల ముఖ్య ఉద్దేశమని పేర్కొన్నారు. ప్రతి విద్యార్థి తన విరామ సమయంలో గ్రంథాలయాన్ని సందర్శించి పుస్తకాలను చదవి, పోటీ పరీక్షలకు సన్నద్ధం కావాలని సూచించారు. కళాశాల గ్రంథాలయంలో విద్యార్థుల కోసం న్యూస్‌ పేపర్లు, అకడమిక్‌, పాఠ్య పుస్తకాలు, ఇంటర్నెట్‌, వైఫై సౌకర్యాలను అందుబాటులో ఉంచామని వివరించారు. అనంతరం జాతీయ గ్రంథాలయ సంస్థ పితామహుడు రంగనాథన్‌ చిత్రపటానికి పూలమాల వేసి నివాళులర్పించారు.

కొత్తగూడెంటౌన్‌: అంగన్‌వాడీలకు అద్దె బిల్లుల కోసం ఎదురుచూపులు తప్పడం లేదు. చాలీచాలని వేతనాలతో ఇల్లు గడవడమే కష్టం అనుకుంటే అద్దెలు ఎలా చెల్లించాలని 8 నెలలుగా పెండింగ్‌ బిల్లులు రాకపోవడంతో ఇబ్బందులు పడుతున్నా మని అంగన్‌వాడీలు ఆగ్రహం వ్యక్తం చేస్తున్నారు. అద్దెలు కడతారా? లేదా ఖాళీ చేస్తారా?.. భవనాలకు తాళం వేస్తామని ఓనర్లు ఒత్తిడిని చేస్తున్నారని, సెంటర్ల నిర్వహణకు ఇబ్బందులు పడాల్సి వస్తోందని అంగన్‌వాడీలు ఆవేదన వ్యక్తం చేస్తున్నారు. 785 సెంటర్లు అద్దె భవనాల్లోనే.. జిల్లాలోని మెయిన్‌ అంగన్‌వాడీ సెంటర్‌లు 2,060 ఉన్నాయి. అందులో 782 అంగన్‌వాడీ కేంద్రాలకు సొంత భవనాలు ఉండగా మరో 493 కేంద్రాలు ఉచిత భవనాల్లో కొనసాగుతున్నాయి. ఇక 785 సెంటర్లను అద్దె భవనాల్లో నిర్వహిస్తున్నారు. ఒక్కో సెంటర్‌కు ఆయా ఏరియాలను బట్టి రూ.1000 నుంచి రూ.4 వేల వరకు అద్దెలు చెల్లించాల్సి ఉంది. విద్యార్థుల సంఖ్య ఆధారంగా ఒకటి, రెండు లేదా మూడు గదుల్లో నిర్వహణ కొనసాగుతోంది. అయితే, ఏనెలకానెల అద్దె బిల్లులు ఎప్పుడు కూడా మంజూరు కావడం లేదు. 2023 సెప్టెంబర్‌ నుంచి ఈ ఏడాది ఫిబ్రవరి వరకు ఆరు నెలల అద్దె బకాయిలు రూ.84,91,420ను ఈ ఏడాది ఫిబ్రవరిలో ప్రభుత్వం చెల్లించింది. ఆపై మళ్లీ ఎవరూ పట్టించుకోలేదు. దీంతో ఇక ఈ ఏడాది మార్చి నుంచి అక్టోబర్‌ వరకు ఎనిమిది నెలల అద్దె బిల్లులు అంగన్‌వాడీ సెంటర్లకు పెండింగ్‌లోనే ఉన్నాయి. ఈ విషయంలో ఐసీడీఎస్‌ అధికారులు నిర్లక్ష్యంగా వ్యవహరిస్తున్నారని అంగన్‌వాడీ టీచర్లు ఆగ్రహం వ్యక్తం చేస్తున్నారు. అద్దె బకాయిలు రాకపోవడంతో యాజమానుల ఒత్తిడితో తాము ఇబ్బందులు పడుతున్నామని చెబుతున్నారు. ఇప్పటికై నా అధికారులు స్పందించి అద్దె బకాయిలన్నీ చెల్లించడమే కాక, ఇక నుంచి ఏనెలకానెల విడుదల చేయాలని డిమాండ్‌ చేస్తున్నారు. గత ఫిబ్రవరిలో ఆరు నెలల అద్దె విడుదల ఆ తర్వాత 785 అంగన్‌వాడీలకు మళ్లీ బిల్లులు పెండింగ్‌.. యజమానుల ఒత్తిడితో ఇబ్బంది పడుతున్న టీచర్లు ఉన్నతాధికారులకు నివేదిస్తాం.. అంగన్‌వాడీ సెంటర్ల అద్దె బకాయిలు కొంత మేర ఈ ఏడాది ఫిబ్రవరిలో చెల్లించాం. ఇంకా ఎనిమిది నెలల బకాయిలు ఉన్నాయి. ఈ విషయమై ఉన్నతాధికారులకు నివేదిక అందజేస్తాం. నిధులు మంజూరు కాగానే చెల్లిస్తాం. –స్వర్ణలత లెనీనా, జిల్లా సంక్షేమ శాఖ అధికారి

79 దరఖాస్తులు.. ఖమ్మం కలెక్టర్‌ ముజమ్మిల్‌ ఖాన్‌ మాట్లాడుతూ బీసీ కమిషన్‌ చేపట్టిన విచారణలో 79 దరఖాస్తులు అందాయని తెలిపారు. ఖమ్మం జిల్లాలో 26 లక్షల జనాభా ఉన్నట్లు అంచనాతో సమగ్ర కుటుంబ సర్వే మొదలుపెట్టగా ఇప్పటివరకు 60 శాతం పూర్తయిందని చెప్పారు. ముందస్తు ఉన్న లెక్కల ప్రకారం బీసీ జనాభా 35 నుంచి 40 శాతం ఉంటుందనే అభిప్రాయం తెలిపామన్నారు. భద్రాద్రి కొత్తగూడెం కలెక్టర్‌ జితేష్‌ వి.పాటిల్‌ మాట్లాడుతూ జిల్లాలో కుటుంబ సర్వే 70 శాతం మేర పూర్తయిందని వివరించారు. తొలుత వివిధ కుల సంఘాలు, పార్టీల నాయకులు తమ అభిప్రాయాలు వెల్లడించారు. ప్రతినిధుల సౌలభ్యం కోసం అధికారులు హెల్ప్‌ డెస్క్‌ ఏర్పాటు చేయడమే కాక రిజిస్ట్రేషన్లు, నోటరీ, జిరాక్స్‌ సేవలు ఉచితంగా అందించారు. ఈ సమావేశంలో బీసీ కమిషన్‌ ప్రత్యేకాధికారి సతీష్‌, రెండు జిల్లాల బీసీ అభివృద్ధి అధికారులు జి.జ్యోతి, ఇ.ఇందిర తదితరులు పాల్గొన్నారు. ● జనాభా దామాషా ప్రకారం రిజర్వేషన్లు పెంచండి.. ● బీసీ కమిషన్‌కు వినతుల వెల్లువ ● బహిరంగ విచారణలో వాదనలు వినిపించిన ఉమ్మడి జిల్లా వాసులు ● నివేదిక ప్రభుత్వానికి అందజేస్తామని కమిషన్‌ వెల్లడి ● సర్వేకు సహకరించేలా ప్రజలను చైతన్యపరచాలని సూచనఖమ్మంమయూరిసెంటర్‌: జనాభా ప్రాతిపదికన బీసీలకు రాజకీయంగానే కాక ఇతర రంగాల్లో తగిన రిజర్వేషన్లు కల్పించాలని, కుల వృత్తులతో జీవనం సాగించే వారికి సర్వేలో చెప్పుకునేందుకు కులం పేరు లేకపోవడంతో సంచార జాతులకు గుర్తింపు దక్కడం లేదని వివిధ పార్టీలు, కుల, ప్రజాసంఘాల నాయకులు పేర్కొన్నారు. అంతేకాక బీసీల్లో కొన్ని కులాలకే పదవులు దక్కుతుండగా, ఆర్థికంగా వెనకబడిన కులాలకు సరైన అవకాశాలు లభించడం లేదని తమ వాదనలు వినిపించారు. బీసీ కమిషన్‌ ఆధ్వర్యాన సామాజికంగా, విద్యాపరంగా వెనుకబడిన తరగతుల స్థితిగతుల అధ్యయనం కోసం ఖమ్మం కలెక్టరేట్‌లో ఉమ్మడి జిల్లా స్థాయి బహిరంగ విచారణ మంగళవారం చేపట్టారు. బీసీ కమిషన్‌ చైర్మన్‌ గోపిశెట్టి నిరంజన్‌ నేతృత్వాన జరిగిన విచారణలో సభ్యులు రాపోలు జయప్రకాశ్‌, తిరుమలగిరి సురేందర్‌, రంగు బాలలక్ష్మి, ఖమ్మం, భద్రాద్రి కలెక్టర్లు ముజమ్మిల్‌ఖాన్‌, జితేష్‌ వి.పాటిల్‌, ఖమ్మం సీపీ సునీల్‌దత్‌ పాల్గొన్నారు. ఈ సందర్భంగా సంఘాల నేతల నుండి వినతులు స్వీకరించడంతో పాటు వారి వాదనలు విన్నారు. రిజర్వేషన్లు పెంచాలి.. ప్రస్తుతం ఉన్న రిజర్వేషన్లతో బీసీల్లో ఉన్న అనేక కులాలకు సమన్యాయం జరగడం లేదని, ప్రధానంగా ముస్లిం మైనార్టీలు రాజకీయంగా నష్టపోతున్నారని పలువురు వివరించారు. ఉన్న రిజర్వేషన్లనే అన్ని కులాలకు పంచడంతో చాలామందికి అన్యాయం జరుగుతోందన్నారు. కులగణన సర్వేలో విశ్వకర్మ, విశ్వబ్రాహ్మణ అనే కులాలు లేకపోవడంతో ఎలా నమోదు చేసుకోవాలో తెలియడం లేదని విశ్వబ్రాహ్మణ సంఘం నేతలు తెలిపారు. మున్నూరుకాపు కుల ధ్రువీకరణ పత్రాల కోసం ఇబ్బందులు తలెత్తుతున్నాయని, ఏజెన్సీ ప్రాంత గౌడ కులస్తులకు ఎస్టీ సర్టిఫికెట్‌ ఇస్తున్నా సాంకేతిక సమస్యలు ఎదురవుతున్నాయని చెప్పారు. ఇతర ప్రాంతాల నుంచి వచ్చిన వారు తప్పుడు కుల సర్టిఫికెట్లతో చేపలు పడుతుండగా గంగపుత్రులు నష్టపోతున్నందున రూ.5వేల పెన్షన్‌ ఇప్పించాలని ఆ సంఘం నాయకులు కోరారు. అలాగే, వడ్డెరలకు జరుగుతున్న అన్యాయాన్ని ఆ సంఘ నేతలు వివరించగా బీసీ కులాలు, ఉపకులాలకు సంబంధించి మొత్తం 79 మంది తమ వాదనలను వినిపించారు. అవకాశాలు కల్పించండి బీసీ సంఘాల నేతలు వెల్లడించిన అంశాలు, అందజేసిన వినతుల ఆధారంగా ప్రభుత్వానికి నివేదిక ఇస్తామని కమిషన్‌ చైర్మన్‌ గోపిశెట్టి నిరంజన్‌ తెలిపారు. జనాభా దామాషా ప్రకారం బీసీలకు అవకాశాలు కల్పించేలా ప్రభుత్వం చర్యలు తీసుకుంటుందని, అందుకే సమగ్ర ఇంటింటి సర్వే చేయిస్తోందని అన్నారు. ఈ సర్వేలో ప్రజలు వివరాలన్నీ నమోదు చేయించుకోవాలని సూచించారు. స్వామి ఆశీస్సులతో... ఖమ్మం చేరుకున్నాక తొలుత లక్ష్మీనరసింహస్వామి ఆలయంలో స్వామిని దర్శించుకుని ప్రభుత్వం ప్రతిష్టాత్మకంగా చేపట్టిన విచారణకు హాజరయ్యామని చైర్మన్‌ నిరంజన్‌ తెలిపారు. ఆతర్వాత పాత మున్సిపల్‌ కార్పొరేషన్‌ కార్యాలయం వద్ద మాజీ ప్రధాని ఇందిరాగాంధీ విగ్రహానికి నివాళులర్పించామని, పేదల అభ్యున్నతి కోసం ఆమె హయాంలో అనేక విప్లవాత్మకమైన చర్యలు తీసుకున్నారని చెప్పారు. బ్యాంకుల జాతీయీకరణతో చిన్న వ్యాపారులు, రైతులతో పాటు అన్ని వర్గాల ప్రజల కు బ్యాంకులు దగ్గరయ్యాయని తెలిపారు.

● రాజు వెడ్స్‌ రాంబాయి షూటింగ్‌ ప్రారంభం ● నిర్మాతగా ‘విరాటపర్వం’ వేణు ఉడుగుల సాక్షి ప్రతినిధి, భద్రాద్రి కొత్తగూడెం: బొగ్గుట్టగా పిలిచే ఇల్లెందు నేపథ్యాన మరో చిత్రం వెండితెరపైకి ఎక్కనుంది. ఈ మేరకు మంగళవారం చిత్ర యూనిట్‌ నుంచి ప్రకటన వెలువడింది. 1980, 90వ దశకాల్లో ఊరేగింపు, కామ్రేడ్‌, చీకటిసూర్యుడు తదితర చిత్రాల షూటింగ్‌లు ఇక్కడ జరిగాయి. ఆ తర్వాత చాన్నాళ్ల పాటు నిలిచిపోగా తెలంగాణ వచ్చాక ఇల్లెందు నేపథ్యంలో చిత్రాలు తెరకెక్కుతున్నాయి. ఇటీవల విజయ్‌ దేవరకొండ హీరోగా వచ్చిన వరల్డ్‌ ఫేమస్‌ లవర్‌, మెగాస్టార్‌ చిరంజీవి, రాంచరణ్‌ నటించిన ఆచార్య సినిమాల షూటింగ్‌ ఇల్లెందులో జరిగింది. ఇప్పుడు కొత్తగా రాజు వెడ్స్‌ రాంబాయి చిత్ర ప్రకటన వెలువడింది. నీది నాది ఒకటే కథ, విరాటపర్వం చిత్రాలకు దర్శకత్వం వహించిన వేణు ఉడుగుల ఈ చిత్రాన్ని నిర్మిస్తుండగా సాయిలు కాంపాటి దర్శకత్వం వహించనున్నారు. 2025లో ప్రేమికుల దినోత్సవమైన ఫిబ్రవరి 14న చిత్రం విడుదల కానుంది. ఈ మేరకు ఎక్స్‌ వేదికగా చిత్రం టీజర్‌ను మంగళవారం విడుదల చేశారు. నిజ జీవితంలో జరిగిన సంఘటనల ఆధారంగా ఈ సినిమా తెరకెక్కుతోందని వెల్లడించారు.

ఆనవాళ్లు కోల్పోతున్న వాగులు.. కిన్నెరసాని నది గుండాల మండలంలో మొదలై టేకులపల్లి, ఆళ్లపల్లి, లక్ష్మీదేవిపల్లి, పాల్వంచ, బూర్గంపాడు మండలాల ద్వారా ప్రవహిస్తోంది. ఈ నది ఆరంభం నుంచి చివరి వరకు అనేక చోట్ల రాత్రయిందంటే చాలు.. ఇసుక ట్రాక్టర్లు రంగంలోకి దిగుతున్నాయి. ఈ తరహా ఇసుక అక్రమ వ్యాపారాలు పాములేరుకు సంబంధించి ములకలపల్లి మండలం, ముర్రేడు విషయంలో కొత్తగూడెం, లక్ష్మీదేవిపల్లి, చుంచుపల్లి మండలాల్లో ఉన్నాయి. చాలా చోట్ల ఇసుక మాఫియా స్థానికంగా ఉండే అధికారుల్లో కొందరిని మేనేజ్‌ చేస్తూ దందా కొనసాగిస్తున్నారు. ఇక సారపాక దగ్గరైతే ఏకంగా గోదావరి నుంచే అక్రమ దందా సాగిస్తున్నారు. ఈ దందాకు అడ్డుకట్ట వేయకపోవడంతో ముర్రేడువాగు ఇప్పటికే చాలావరకు రూపురేఖలు కోల్పోయింది. జోరుగా సాగుతున్న ఇసుక దందాకు ఇప్పటికై నా బ్రేక్‌ వేయకుంటే కొన్నేళ్లలో కిన్నెరసాని, పాములేరు సహా ఇతర ప్రధాన వాగులకూ ముర్రేడు దుస్థితే దాపురిస్తుందనడం అతిశయోక్తి కాదు. సహజ వనరులకు పుట్టిల్లుగా.. జిల్లా సహజ వనరులకు పుట్టిల్లుగా ఉంది. గోదావరి, కిన్నెరసాని వంటి నదులతో పాటు పాములేరు, ముర్రేడు, బుగ్గవాగు, పెద్దవాగు తదితర నదులు ఉన్నాయి. గోదావరి తీరం వెంట ఇసుక రీచ్‌లను ప్రభుత్వం ఏర్పాటు చేసింది. రాష్ట్రం మొత్తానికీ ఇక్కడి నుంచి ఇసుక సరఫరా అవుతోంది. గోదావరి తీరం నుంచి ఇసుక తీసుకోవాలంటే టీజీఎండీసీ వెబ్‌సైట్‌ ద్వారా కొనుగోలు చేయాల్సి ఉంటుంది. పక్కనే వాగులు, వంకల్లో ఇసుక ఉండగా ఆన్‌లైన్‌కు వెళ్లి కొనుగోలు చేయడానికి స్థానికులు మొగ్గు చూపడం లేదు. మరోవైపు వినియోగదారులు టీజీఎండీసీ వెబ్‌సైట్‌కు వెళ్లనవసరం లేకుండా స్థానిక వాగుల నుంచే కొందరు ఎడ్లబండ్ల ద్వారా ఇసుక సరఫరా చేసి జీవనోపాధి పొందుతున్నారు. అయితే కాలం గడిచేకొద్దీ గోదావరి, కిన్నెరసాని, ముర్రేడు, పాములేరు వాగుల వెంబడి ఇసుక మాఫియాలు అవతరించాయి. ట్రాక్టర్లతో ఎడాపెడా అనుమతులు లేకుండా ఇసుక తోడేస్తున్నాయి. ఒకప్పుడు సర్కారుకు ఆదాయం.. వాగుల్లో ఇష్టారీతిగా ఇసుక తోడేస్తే నీటి ప్రవాహం దెబ్బతింటుంది. తీర ప్రాంతంలో భూగర్భ జలాలు పడిపోతాయి. దీంతో రైతులకు ఇబ్బంది కలుగుతుంది. పైగా ఇసుక తీసుకోవాలంటే మైనింగ్‌ శాఖ అనుమతి తప్పనిసరి. గతంలో పాములేరు, కిన్నెరసాని నదుల్లో అధికారికంగా ఇసుక రీచ్‌లు ఏర్పాటుచేశారు. ఫలితంగా ఈ జల ప్రవాహాల్లో మేట వేసిన ఇసుకను అధికారికంగా తొలగించే వారు. దీంతో ప్రభుత్వానికి ఆదాయం రావడంతో పాటు ప్రజలకు నాణ్యమైన ఇసుక సరసమైన ధరకు లభించేది. గత కొన్నేళ్లుగా గోదావరి మినహా మిగిలిన జల ప్రవాహాల నుంచి ఇసుక తీయడంపై నిషేధం ఉంది. అయితే ఇది పక్కాగా అమలు కాకపోవడంతో సమస్యలు వస్తున్నాయి. ఇప్పుడవి ఏకంగా ప్రభుత్వ సిబ్బందిపైనే దాడులకు దిగేలా దారి తీస్తున్నాయి. నామ్‌ కే వాస్తే.. సారపాక దాడి విషయంలోనూ ఏకంగా 45 మందిపై బూర్గంపాడు పోలీస్‌ స్టేషన్‌లో కేసు నమోదైంది. ఇందులో ట్రాక్టర్‌ యజమానులు, డ్రైవర్లు, ముఠా సభ్యులు ఉన్నారు. కేసు నమోదు చేయడం మినహా ఇందులో మరే పురోగతీ లేదు. పాల్వంచ ఫారెస్ట్‌ బీట్‌ ఆఫీసర్‌పై దాడి ఘటనలోనూ ఫిర్యాదు అందినా మంగళవారం రాత్రి వరకు కేసు నమోదు కాలేదు. వికారాబాద్‌ జిల్లా లగచర్ల ఘటన రాష్ట్ర వ్యాప్తంగా సంచలనంగా మారింది. దీనిపై ఇప్పటికే ప్రభుత్వ ఉద్యోగులు గుర్రుగా ఉన్నారు. పోలీసు యంత్రాంగం కేసులు పెడుతున్నా సర్కారు ఇక్కడ ఇసుక మాఫియా ఆగడాలను చూసీచూడనట్టుగా వదిలేయడం విస్మయం కలిగిస్తోంది. అధికార పార్టీ నేతల నుంచి ఒత్తిళ్లు రావడం వల్లే నామ్‌ కే వాస్తేగా కేసుతో సరిపెడుతున్నారనే విమర్శలు వస్తున్నాయి. స్పెషల్‌ డ్రైవ్‌ నిర్వహిస్తాం అనుమతి లేకుండా ఇసుక తరలిస్తే చర్యలు తీసుకుంటాం. రంగాపురం, తోగ్గూడెం నుంచి రాత్రివేళలో అక్రమంగా ఇసుక తరలిస్తున్నారని మా దృష్టికి వచ్చింది. దీనిపై నిఘా పెట్టడమే కాక సిబ్బందితో పెట్రోలింగ్‌ చేస్తున్నాం. అక్రమార్కులపై చర్యలు తీసుకునేందుకు మైనింగ్‌, పోలీస్‌, రెవెన్యూ శాఖలతో కలిపి కమిటీ ఏర్పాటు చేసి స్పెషల్‌ డ్రైవ్‌ నిర్వహిస్తాం. – వివేక్‌, పాల్వంచ తహసీల్దార్‌ జిల్లాలో యథేచ్ఛగా ఇసుక దందా ప్రభుత్వ అధికారులపై వరుస దాడులు మొన్న రెవెన్యూ.. నిన్న ఫారెస్ట్‌.. ఆ తర్వాత ఎవరిపైనో ? ఆనవాళ్లు కోల్పోతున్న వాగులు జిల్లాలో ఇసుక మాఫియా రెచ్చిపోతోంది. ఇదేంటని ప్రశ్నించిన ప్రభుత్వ సిబ్బందిపైనే దాడులకు తెగబడుతోంది. సారపాకలో రెవెన్యూ సిబ్బందిపై దాడి చేసిన ఘటన మరువక ముందే పాల్వంచ మండలంలో ఫారెస్ట్‌ బీట్‌ ఆఫీసర్‌కు ప్రమాదం తలపెట్టింది. – సాక్షి ప్రతినిధి, భద్రాద్రి కొత్తగూడెం

ఆకాశయానం.. అనుకూల పవనంసాక్షి ప్రతినిధి, భద్రాద్రి కొత్తగూడెం: ఎయిర్‌పోర్ట్‌ నిర్మాణం విషయంలో ఒక్కొక్కటిగా సానుకూల ప్రకటనలు వస్తున్నాయి. తాజాగా వరంగల్‌ బహిరంగ సభలో సీఎం రేవంత్‌రెడ్డి మాట్లాడుతూ కొత్తగూడెంలో ఎయిర్‌పోర్టు నిర్మిస్తామని ప్రకటించారు. అంతకు ఒకరోజు ముందు హైదరాబాద్‌లో ఏర్పాటు చేసిన మీడియా సమావేశంలో మున్సిపల్‌ మంత్రి కోమటిరెడ్డి వెంకట్‌రెడ్డి సైతం వరంగల్‌తో పాటు కొత్తగూడెం, రామగుండంలో ఎయిర్‌పోర్టుల నిర్మాణానికి తమ ప్రభుత్వం కట్టుబడి ఉందని ప్రకటించారు. ఈ అంశంపై ఇప్పటికే మంత్రి తుమ్మల నాగేశ్వరరావు కేంద్ర విమానయాన శాఖ మంత్రి రామ్మోహన్‌నాయుడుకు వినతిపత్రం సమర్పించగా, అక్కడి నుంచి కూడా సానుకూల స్పందన వచ్చింది. ప్లేస్‌ మారింది.. కొత్తగూడెంలో ఎయిర్‌పోర్టు నిర్మాణం అంశం 17 ఏళ్ల నుంచి నలుగుతోంది. కేంద్రమంత్రిగా రేణుకాచౌదరి పని చేసిన కాలంలో ఈ అంశంపై కొంత కదలిక వచ్చింది. సుజాతనగర్‌ ప్రాంతంలో నిర్మిస్తారనే వార్తలు షికారు చేసినా ఆ తర్వాత ఆగిపోయింది. తెలంగాణ ఏర్పాటైన తర్వాత లక్ష్మీదేవిపల్లి మండలం పునుకుడుచెలక, పాల్వంచ మండలం గుడిపాడు – బంగారుజాల మధ్య ఎయిర్‌పోర్టు నిర్మాణం కోసం పలుమార్లు సర్వే చేసినా సానుకూల నిర్ణయాలు రాలేదు. ప్రస్తుతం కొత్తగూడెంలో ఎయిర్‌పోర్ట్‌ నిర్మాణానికి రాష్ట్ర ప్రభుత్వం కృత నిశ్చయంతో ఉండడంతో కొత్తగూడెం సమీపంలోని గరీబ్‌పేట చుట్టూ చుంచుపల్లి, సుజాతనగర్‌, కొత్తగూడెం మండలాల పరిధిలో ఇంచుమించు వెయ్యి ఎకరాల విస్తీర్ణంలో సన్నాహాలు జరుగుతున్నాయి. ఈ ఏడాది ఆరంభంలో సీఎం రేవంత్‌రెడ్డి ఢిల్లీ పర్యటన తర్వాత కొత్తగూడెం ఎయిర్‌పోర్టు విషయంలో కదలిక వచ్చింది. అప్పటి నుంచి ఇప్పటివరకు రోజుకో సానుకూల ప్రకటన వస్తోంది. అయితే ఎయిర్‌పోర్ట్‌ నిర్మాణం పూర్తయ్యేంతవరకూ ఇదే ఉత్సాహం కొనసాగాలని జిల్లా వాసులు కోరుకుంటున్నారు.

అన్నపురెడ్డిపల్లి(చండ్రుగొండ): అన్నపురెడ్డిపల్లిలోని గురుకుల పాఠశాలలో నిర్వహిస్తున్న జిల్లాస్థాయి సైన్స్‌ఫేర్‌లో విద్యార్థుల ప్రదర్శనలు ఆకట్టుకుంటున్నాయి. జిల్లా నలుమూలల నుంచి వచ్చిన విద్యార్థులు రెండోరోజు మంగళవారం పలు అంశాలపై నమూనాలు ప్రదర్శించారు. ఎర్రగుంట జెడ్పీ పాఠశాల స్కౌట్‌ విద్యార్థులు ఏర్పాటుచేసిన క్యాంప్‌ ఫైర్‌ ను ఐటీడీఏ పీఓ బి.రాహుల్‌ ప్రారంభించారు. ఈ సందర్భంగా మాట్లాడుతూ.. విద్యార్థులు భవిష్యత్‌ మేధావులుగా ఎదగాలని ఆకాంక్షించారు. అనంతరం ఆదివాసీ గిరిజనుల సంప్రదాయ నృత్యాలు, విద్యార్థుల కళా ప్రదర్శనలను తిలకించారు. ఎమ్మెల్యే జారే ఆదినారాయణ మాట్లాడుతూ.. సైన్స్‌ఫేర్‌లో రూపొందించిన ప్రయోగాత్మక నమూనాలు విద్యార్థుల మేధాశక్తికి అద్దం పడుతున్నాయని అన్నారు. జిల్లా విద్యార్థులు రూపొందించిన ప్రాజెక్ట్‌లు జాతీయ స్థాయి పోటీలకు ఎంపికవుతాయన ఆశాభావం వ్యక్తం చేశారు. డీఈఓ వెంకటేశ్వరాచారి మాట్లాడుతూ.. ఇక్కడి సైన్స్‌ఫేర్‌లో ప్రతిభ చూపిన వారిని రాష్ట్రస్థాయికి ఎంపిక చేస్తామని అన్నారు. రాష్ట్రస్థాయిలో ప్రతిభ చాటిన వారిని జాతీయస్థాయికి పంపిస్తారని, అక్కడ ఉత్తమ ప్రదర్శనలకు కేంద్ర ప్రభుత్వం రూ.లక్ష బహుమతి అందిస్తుందని వివరించారు. కార్యక్రమంలో ప్రాజెక్టుల పరీశీలకులు సుకృత్‌, న్యాయనిర్ణేతలు మాధవి, జగన్మోహన్‌రాజు, ప్రిన్స్‌పాల్‌ బురాన్‌, ఎంఈఓ ఆనంద్‌కుమార్‌ తదితరులు పాల్గొన్నారు.

పాల్వంచ: నేరాల నియంత్రణలో సీసీ కెమెరాల పాత్ర కీలకమని ఎస్పీ రోహిత్‌రాజు అన్నారు. స్థానిక పట్టణ పోలీస్‌ స్టేషన్‌ పరిధిలో ఏర్పాటు చేసిన 43 సీసీ కెమెరాలను అనుసంధానం చేసే కంట్రోల్‌ సెంటర్‌ను మంగళవారం ఆయన ప్రారంభించారు. అనంతరం మాట్లాడుతూ.. జిల్లాలో ఇప్పటికే సీసీ కెమెరాల సహాయంతో అనేక నేరాలను ఛేదించామని చెప్పారు. జిల్లాలోని అన్ని ప్రాంతాల్లో సీసీ కెమెరాల ఏర్పాటుకు చర్యలు చేపడుతున్నామని తెలిపారు. స్టేషన్‌లో రికార్డులు పరిశీలించి కేసుల వివరాలు అడిగి తెలుసుకున్నారు. పోలీస్‌ అధికారులు, సిబ్బంది సమస్యలు పరిష్కరిస్తామని హామీ ఇచ్చారు. కార్యక్రమంలో డీఎస్పీ సతీష్‌ కుమార్‌, సీఐలు వినయ్‌కుమార్‌, నాగరాజు, ఎస్‌ఐలు సుమన్‌, రాఘవయ్య, జీవన్‌రాజు పాల్గొన్నారు.

చుంచుపల్లి: జిల్లాలో చలి తీవ్రత మొదలైంది. రెండు, మూడు రోజులుగా ఉష్ణోగ్రతలు క్రమేపీ తగ్గుతున్నాయి. పగటి ఉష్ణోగ్రతలు సాధారణంగానే నమోదవుతున్నా రాత్రి ఉష్ణోగ్రతలు మాత్రం భారీగా పడిపోతున్నాయి. అర్ధరాత్రి దాటిన తరువాత చలి తీవ్రమవుతోంది. మొన్నటివరకు 35 డిగ్రీలకు పైగా నమోదైన పగటి ఉష్ణోగ్రతలు ప్రస్తుతం 30, 32 డీగ్రీలకు చేరుకున్నాయి. ఇక రాత్రి సమయంలో కనిష్ట ఉష్ణోగ్రత 15, 16 డిగ్రీలకు చేరుతోంది. పలుచోట్ల ఉదయం పొగమంచు కూడా కురుస్తోంది. ఉదయమే పనులకు వెళ్లేవారు, ద్విచక్రవాహనదారులు పొగమంచు, చలిగాలులతో కొంత ఇబ్బంది పడుతున్నారు. ఈ ఏడాది వర్షాలు ఎక్కువగా కురిసినందున అలస్యంగా మొదలైన చలి తీవ్రత రాబోయే రోజుల్లో అధికంగా ఉంటుందని అంచనా వేస్తున్నారు. చలి తీవ్రత పెరుతున్నందున పిల్లలు, వృద్ధులు, అస్తమా వ్యాధిగ్రస్తులు అప్రమత్తంగా ఉండాలని వైద్యులు సూచిస్తున్నారు. కాగా, చలికాలం ప్రారంభం కావడంతో మధ్యప్రదేశ్‌, నేపాల్‌, రాజస్థాన్‌ తదితర ప్రాంతాల వ్యాపారులు కొత్తగూడెంలో ఇప్పటికే స్వెట్టర్లు, రగ్గులు, ఉన్ని దుప్పట్లు, మఫ్లర్లు వంటివి విక్రయిస్తున్నారు. జిల్లాలో పెరుగుతున్న చలి

భద్రాచలం: భద్రాచలం శ్రీసీతారామచంద్ర స్వామి వారి నిత్యకల్యాణ వేడుక మంగళవారం నేత్రపర్వంగా సాగింది. తెల్లవారుజామున గర్భగుడిలో స్వామివారికి సుప్రభాత సేవ, సేవాకాలం, ఆరాధన తదితర పూజలు చేశారు. అనంతరం బేడా మండపంలో కొలువుదీర్చి విశ్వక్సేన పూజ, పుణ్యావాచనం చేశారు. స్వామివారికి కంకణధారణ, యజ్ఞోపవీత ధారణ, అమ్మవారికి కంకణధారణ, యోక్త్రధారణ గావించి నిత్యకల్యాణ ఘట్టాన్ని అర్చకులు శాస్త్రోక్తంగా నిర్వహించారు. మంగళవారాన్ని పురస్కరించుకుని శ్రీ అభయాంజనేయస్వామి వారికి అభిషేకం. తమలపాకులతో అర్చన గావించారు. భక్తులు స్వామివారిని దర్శించుకుని తీర్థ ప్రసాదాలు స్వీకరించారు.న్యాయమూర్తిగా బాధ్యతలు స్వీకరణభద్రాచలంటౌన్‌: భద్రాచలం జ్యుడీషియల్‌ ప్రథ మ శ్రేణి న్యాయమూర్తిగా వి.శివనాయక్‌ మంగళవారం బాధ్యతలు చేపట్టారు. అనంతరం ఆయన శ్రీసీతారామచంద్ర స్వామి వారిని దర్శించుకోగా అర్చకులు స్వాగతం పలికారు. ఆలయ అధికారులు న్యాయమూర్తికి స్వామి వారి జ్ఞాపికతో పాటు ప్రసాదం అందజేశారు. 21న బాక్సింగ్‌ ఎంపికలుకొత్తగూడెంఅర్బన్‌: ఉమ్మడి ఖమ్మం జిల్లా స్థాయి అండర్‌ 14, 17, 19 బాలబాలికల బాక్సింగ్‌ ఎంపికలు ఈనెల 21న కొత్తగూడెం ప్రగతి మైదాన్‌లో నిర్వహిస్తున్నట్లు ఉమ్మడి జిల్లాల డీఈఓలు సోమశేఖరశర్మ, వెంకటేశ్వరాచారి మంగళవారం ఒక ప్రకటనలో తెలిపారు. 6 నుంచి 10వ తరగతి చదివే విద్యార్థులు అర్హులని పేర్కొన్నారు. ఎంపికలో పాల్గొనే క్రీడాకారులు ఆధార్‌ కార్డు జిరాక్స్‌, ఫొటోతో కూడిన ఎలిజిబిలిటీ ఫామ్‌, స్టడీ సర్టిఫికెట్‌తో హాజరు కావాలని సూచించారు. ధ్రువీకరణ పత్రాలు లేకుంటే అనుమతించేది లేదని స్పష్టం చేశారు. ఉమ్మడి జిల్లా నుంచి క్రీడాకారులు హాజరయ్యేలా చూడాలని పీఈటీలు, పీడీలకు సూచించారు. పీహెచ్‌సీల్లో సౌకర్యాలు మెరుగుపరుస్తాండీఎంహెచ్‌ఓ భాస్కర్‌నాయక్‌ ఇల్లెందురూరల్‌: జిల్లాలోని అన్ని పీహెచ్‌సీలలో సౌకర్యాలు మెరుగుపర్చడంతో పాటు ఖాళీలను కూడా త్వరలో భర్తీ చేస్తామని జిల్లా వైద్యారోగ్య శాఖ అధికారి భాస్కర్‌నాయక్‌ తెలిపారు. మండలంలోని కొమరారం పీహెచ్‌సీని మంగళవారం ఆయన తనిఖీ చేశారు. ఏయే రకాల మందులు అందుబాటులో ఉన్నాయని అడిగి తెలుసుకున్నారు. ఈ సందర్భంగా మాట్లాడుతూ.. ఇటీవల స్టాఫ్‌నర్స్‌లు బదిలీ కాగా, కొంత ఇబ్బందిగా ఉందని వైద్యులు చెప్పడంతో త్వరలోనే పోస్టులు భర్తీ చేస్తామని చెప్పారు. గ్రామాల్లో వైద్య శిబిరాలు నిర్వహించాలని, చలికాలంలో వచ్చే వ్యాధులు, తీసుకోవాల్సిన జాగ్రత్తలపై ప్రజలకు అవగాహన కల్పించాలని సూచించారు. కార్యక్రమంలో డాక్టర్‌ లోహిత, సిబ్బంది పాల్గొన్నారు. ‘నవోదయ’ దరఖాస్తుల స్వీకరణ గడువు పొడిగింపు కూసుమంచి: పాలేరులోని జవహర్‌ నవోదయ విద్యాలయలో వచ్చే విద్యాసంవత్సరానికి 9, 11వ తరగతుల్లో ఖాళీ సీట్ల భర్తీ కోసం నిర్వహించే ప్రవేశపరీక్ష దరఖాస్తుల గడువు మరోమారు పొడిగించారు. ఈ విషయాన్ని ప్రిన్సిపాల్‌ శ్రీనివాసులు ఒక ప్రకటనలో తెలిపారు. మంగళవారంతో ముగిసిన గడువును 26వ తేదీ వరకు పొడిగించినందున అభ్యర్థులు సద్వినియోగం చేసుకోవాలని సూచించారు.