నంద్యాల, సాక్షి: జిల్లా మండల పరిధిలోని చాపిరేవుల(Chapirevula)లో ఈ ఉదయం విషాదం నెలకొంది. ఓ ఇంట్లో వంట చేస్తుండగా.. ప్రమాదవశాత్తూ గ్యాస్‌ సిలిండర్‌ పేలింది. పేలుడు ధాటికి ఆ ఇల్లు కుప్పకూలిపోగా.. ఈ ఘటనలో ఇద్దరు మృతిచెందారు. మరో పది మందికిపైగా గాయాలైనట్లు సమాచారం. చాపిరేవులలోని ఓ ఇంట్లో మంగళవారం ఉదయం గ్యాస్‌ సిలిండర్‌ పేలింది. ప్రమాద ధాటికి చుట్టుపక్కల నివాసాలు దెబ్బ తిన్నాయి. ఘటనా స్థలం నుంచి రెండు మృతదేహాలను స్థానికులు బయటకు తీశారు. వారిని వెంకటమ్మ(62), దినేష్‌(10)గా గుర్తించారు. మృతుల సంఖ్యపై మరింత స్పష్టత రావాల్సి ఉంది. ప్రస్తుతం సహాయక చర్యలు కొనసాగుతున్నాయి.ప్రమాద ధాటికి చుట్టుపక్కల నివాసాల్లోని పది మందికి పైగా గాయాలైనట్లు సమాచారం. వీళ్లను స్థానికంగా ఉన్న ఆస్పత్రికి తరలించారు. గ్యాస్ స్టౌవ్‌ ఆన్‌లోనే ఉండడంతోనే ఈ ప్రమాదం జరిగి ఉంటుందని ప్రాథమికంగా పోలీసులు ఓ అంచనాకి వచ్చారు.

సాక్షి, సికింద్రాబాద్: చిలకలగూడ పరిధిలోని దూద్ బావి బస్తీలో బుధవారం గ్యాస్ సిలిండర్ పేలుడు సంభవించింది. ఈ ఘటనలో ఒకరు అక్కడికక్కడే మృతి చెందగా.. మరో తొమ్మిది మందికి గాయాలయ్యాయి. గ్యాస్ సిలిండర్ పేలుడు ధాటికి ఇల్లు పూర్తిగా ధ్వంసం అయ్యింది. సమాచారం అందుకున్న అగ్నిమాపక సిబ్బంది సంఘటన స్థలానికి చేరుకొని మంటలను అదుపులోకి తీసుకొచ్చారు. ఈ ప్రమాదంలో మరణించిన వ్యక్తిని ఇంటి యజమాని నారాయణరావుగా గుర్తించారు. ఆయన భార్య, పిల్లలు సైతం గాయాలపాలయ్యారు. క్షతగాత్రులను సికింద్రాబాద్ గాంధీ ఆసుపత్రికి తరలించారు. పేలుడు ప్రభావానికి స్థానికంగా ఎనిమిది ఇళ్ల వరకు పాక్షికంగా దెబ్బతిన్నాయి. ఈ ఘటనలో పోలీసులు దర్యాప్తు వేగవంతం చేశారు. సంఘటన స్థలంలో క్లూస్‌ టీం, బాంబ్‌ స్కాడ్‌ తనిఖీలు చేపట్టింది. గ్యాస్ లీక్ కారణంగానే సిలిండర్ పేలినట్టుగా అనుమానిస్తున్నారు.  చదవండి: Banjara Hills: డీఏవీ స్కూల్‌ గుర్తింపు రద్దుపై గందరగోళం.. నిర్ణయమెటో? 

నిజామాబాద్‌ అర్బన్‌ : అమ్మా ఆకలేస్తోంది.. పాలు కావాలంటూ చిన్నారులు మారం చేశారు. పిల్లలకు పాలు తాగించేందుకు తల్లి సిలిండర్‌ వెలిగించింది.. మంటలు చెలరేగి ఐదేళ్ల పాప మృతి చెందగా మరో ఇద్దరు చిన్నారులు, భార్యభర్తలు గాయాల పాలయ్యారు. వివరాల ప్రకారం.. పాల వ్యాపారం చేసే రాజస్థాన్‌కు చెందిన సునీల్‌యాదవ్, ధన్వంతరిబాయి దంపతులు నిజామాబాద్‌ జిల్లా కేంద్ర శివారులోని సారంగాపూర్‌ డెయిరీ ఫారం వద్ద ఓ గదిని అద్దెకు తీసుకుని నివసిస్తున్నారు. వీరికి ముగ్గురు పిల్లలు బబ్లూ, జగ్గు, నమ్కిబాయి (5) ఉన్నారు. సోమవారం అర్ధరాత్రి బబ్లూ, జగ్గు పాలుతాగుతామని తల్లిని అడిగారు. తల్లి మినీ సిలిండర్‌ పై పాలను వేడి చేస్తోంది. సిలిండర్‌కు చెందిన గ్యాస్‌ పైపులైన్‌ స్టౌవ్‌ వద్ద మంటలు అంటుకొని తెగిపోయింది. దీంతో ఒక్కసారిగా పెద్ద ఎత్తున మంటలు చెలరేగాయి. ముగ్గురు పిల్లలకు అంటుకున్నాయి. భార్యాభర్తలకు స్వల్ప గాయాలయ్యాయి. వెంటనే తేరుకున్న భార్యభర్తలు పిల్లలను జిల్లా కేంద్ర ప్రభుత్వ ఆస్పత్రికి తరలించారు. ఇందులో నమ్కిబాయి చికిత్స పొందుతూ మరణించింది. మిగితా ఇద్దరు పిల్లలను హైదరాబాద్‌కు తరలించారు. ప్రమాదవశాత్తు ఘటన జరిగిందని 6వ టౌన్‌  ఎస్సై ఆంజనేయులు తెలిపారు. కేసు నమోదు చేసి దర్యాప్తు చేస్తున్నామన్నారు.

లక్నో: ఉత్తర ప్రదేశ్‌లోని గోండా జిల్లాలో ఘోర అగ్ని ప్రమాదం  సంభవించింది. టీక్రీ అనే గ్రామంలోని ఓ ఇంట్లో గ్యాస్‌ సిలిండర్‌ పేలింది. పేలుడు ధాటికి రెండు ఇళ్లు శిథిలమయ్యాయి. ఈ ఘటనలో ఏడుగురు ప్రాణాలు కోల్పోగా..మరో ఏడుగురికి తీవ్ర గాయాలయ్యాయి.  పోలీసుల వివరాల ప్రకారం.. ప్రమాదం జరిగిన విషయాన్ని తెలుసుకున్న స్థానికులు, సహాయక సిబ్బంది ఘ‌ట‌నాస్థలానికి చేరుకుని శిథిలాల కింద చిక్కుకున్న 14 మందిని రక్షించారని పేర్కొన్నారు. శిథిలాల కింద చిక్కుకున్న ఓ వ్యక్తిని కోసం సహాయక చర్యలు జరుగుతున్నట్టు తెలిపారు. క్షతగాత్రులు ఆసుపత్రిలో చికిత్స పొందుతున్నట్టు వెల్లడించారు. బాధితుల్లో ఇద్దరు పురుషులు, ఇద్దరు మహిళలు, పిల్లలు కూడా ఉన్నారని పోలీసులు తెలిపారు. (చదవండి: విషాదం: దొంగను పట్టుకోబోయి రైలు కింద పడ్డ మహిళ)

సాక్షి, కాకినాడ : గాంధీ పార్కు సమీపంలో శుక్రవారం ఉదయం భారీ అగ్ని ప్రమాదం సంభవించింది. సుమారు తెల్లవారుజామున 4.30 నిమిషాల సమయంలో మూడు సిలిండర్లు ఒకదాని తర్వాత ఒకటి  పేలి పెద్ద ఎత్తున  మంటలు చెలరేగాయి. పెద్దగా శబ్ధం రావడంతో చుట్టుపక్కల స్థానికులు భయంతో ఇళ్ల నుంచి బయటకు పరుగులు తీశారు. దీంతో పక్కనున్న ఇళ్లలో కూడా మంటలు వ్యాపించడంతో అందులో ఉన్న సిలిండర్లు కూడా పేలాయి. సమాచారం అందుకున్న అగ్నిమాపక సిబ్బంది మంటలను అదుపులోకి తీసుకొస్తున్నారు. అయితే దురదృష్టవశాత్తు మంటల్లో చిక్కుకొని ఓ వృద్ధురాలు సజీవ దహనం అయ్యింది.. మృతురాలిని తుమ్మల విజయలక్ష్మీ(65)గా గుర్తించారు. ఈ ప్రమాదంలో మరణించిన వృద్ధురాలి సోదరి మాట్లాడుతూ.. ప్రమాదం ఎలా జరిగిందో తెలీయదని,  ఒక్కసారిగా మంటలు చేలరేగాయని అన్నారు. ఇళ్లు కాలిపోతున్నాయని తన సోదరే అందరికి చెప్పిందని, కానీ బయటకు వచ్చేందుకు దారి లేక తను మంటల్లో చిక్కుకొని మరణించిందని కన్నీరు పెట్టుకున్నారు.  ఈ ప్రమాదంలో నాలుగు కుటుంబాలకు ఆస్తినష్టం జరిగినట్లు పోలీసులు అంచనా వేస్తున్నారు.

సాక్షి, సూళ్లూరుపేట: అందరూ గాఢనిద్రలో ఉండగా ఇంట్లోని గ్యాస్‌ సిలిండర్‌ పేలి నలుగురు తీవ్రంగా గాయపడ్డారు. ఈ ఘటన పట్టణంలోని కాపువీధిలో ఆదివారం అర్ధరాత్రి జరిగింది. స్థానికుల సమాచారం మేరకు.. కాపువీధిలో నివాసం ఉంటున్న వంకా శ్రీనివాసులు (49), భార్య వంకా మునిసుబ్బమ్మ (40) కుమార్తె జాహ్నవి (10) కుమారుడు చరణ్‌సాయి (4) ఆదివారం రాత్రి భోజనాల అనంతరం అందరూ నిద్రిస్తున్నారు. సిలిండర్‌ పైపు నుంచి గ్యాస్‌ లీకై ఇల్లంతా వ్యాపించింది. ఆదివారం రాత్రి 12.30 గంటల సమయంలో గ్యాస్‌ వాసన వస్తుండడంతో అప్రమత్తమైన శ్రీనివాసులు  లేచి లైట్‌ వేయగానే ఒక్క సారిగా మంటలు వ్యాపించాయి. లీకైన గ్యాస్‌ ఫ్రిజ్‌ కిందకు కూడా వ్యాపించడంతో మంటలు అధికమై ఫ్రిజ్‌ పేలడంతో ప్రమాద తీవ్రత పెరిగింది. లీకైన గ్యాస్‌ బెడ్‌రూంలోకి కూడా వ్యాపించడంతో గాఢ నిద్రలో ఉన్న శ్రీనివాసులు కుమార్తె, కుమారుడు మంచాల కింద నుంచి మంటలు రేగి అగ్ని ప్రమాదానికి గురయ్యారు. ప్రమాదం జరిగిన విషయాన్ని తెలుసుకున్న స్థానికులు వెంటనే 108కి ఫోన్‌ చేస్తే ఓజిలిలో ఉన్నట్లు సమాధానం చెప్పారు. ఆగ్నిమాపక కార్యాలయానికి ఫోన్‌ చేస్తే ఆ ఫోన్‌ పనిచేయడం లేదు. రాత్రి గస్తీలో ఉన్న పోలీసులు స్పందించి స్థానికులతో కలిసి క్షతగాత్రులను ప్రభుత్వాస్పత్రికి తరలించారు. ప్రభుత్వాస్పత్రిలో ప్రాథమిక చికిత్స అనంతరం పరిస్థితి విషమంగా  ఉండడంతో నెల్లూరు సింహపురి ఆస్పత్రికి తరలించారు. వీరిలో శ్రీనివాసులు, కుమార్తె జాహ్నవి పరిస్థితి విషమంగా ఉందని తెలుస్తోంది. మునిసుబ్బమ్మ, చరణ్‌సాయి పరిస్థితి మెరుగ్గా ఉందని బాధిత బంధువుల ద్వారా తెలిసింది. ఈ ప్రమాదంపై పోలీసులు ఎలాంటి కేసు నమోదు చేయలేదని చెబుతున్నారు.

సాక్షి, కృష్ణా జిల్లా: విజయవాడ ప్రసాదంపాడులోని ఓ ఇంట్లో సిలిండర్ పేలిపోవడంతో ఇద్దరు తీవ్రంగా గాయపడ్డారు. వారిని విజయవాడ ప్రభుత్వాసుపత్రికి తరలించారు. పేలుడు సంభవించడంతో ఇల్లు ధ్వంసం అయ్యింది. పేలుడు ధాటికి ఇంటి పై కప్పు ఎగిరి రోడ్డుపై పడింది. భయంతో స్థానికులు పరుగులు తీశారు. పోలీసులు ఘటన స్థలానికి చేరుకుని దర్యాప్తు చేస్తున్నారు.

సాక్షి, హైదరాబాద్‌ : మలక్‌పేటలోని వెంకటాద్రినగర్‌లో ఒక ఇంట్లో ఆదివారం అర్థరాత్రి సిలిండర్‌ పేలుడు జరిగింది. ఈ ప్రమాదంలో నలుగురికి గాయాలయ్యాయి. కాగా సిలిండర్‌ పేలుడు దాటికి ఇళ్లుతో పాటు పలు వాహనాలు దగ్దమయ్యాయి. సిలిండర్‌ పేలి ఒక్కసారిగా శబ్ధం రావడంతో చుట్టుపక్కల ఉన్న స్థానికులు భయంతో ఇళ్లలో నుంచి బయటకు పరుగులు తీశారు. సమాచారం అందుకున్న పోలీసులు ఘటనా స్థలికి చేరుకొని గాయపడిన నలుగురిని గాంధీ ఆసుపత్రికి తరలించారు.

సాక్షి, హైదరాబాద్‌: పచ్చని కుటుంబంలో ఊహించని ప్రమాదం పెను విషాదం రేపింది. గ్యాస్‌ సిలిండర్‌ మృత్యుపాశంగా మారి చిన్నారితో సహా ముగ్గురు కుటుంబ సభ్యులను బలి తీసుకుంది. గ్యాస్‌ సిలిండర్‌ లీకై మంటలంటుకున్న ఘటనలో తీవ్రంగా గాయపడిన చిన్నారి చికిత్స పొందుతూ మృతి చెందిన సంఘటన దుండిగల్‌ పోలీస్‌స్టేషన్‌ పరిధిలో బుధవారం చోటు చేసుకుంది. పోలీసుల కథనం మేరకు వివరాలిలా ఉన్నాయి. కొత్తగూడెం జిల్లా, మదిర గ్రామానికి చెందిన షేక్‌ సుభానీ(32), షేక్‌ షర్మిళ (25) దంపతులు హైదరాబాద్‌ నగరానికి వలస వచ్చి సూరారం హనుమాన్‌ నగర్‌లో నివాసముంటున్నారు. వీరికి షేక్‌ హైదర్‌ ఫిర్దోస్‌(3) కుమార్తె. ఈ నెల 6న గ్యాస్‌ సిలిండర్‌ లీకై మంటలు చెలరేగడంతో ముగ్గురూ తీవ్రంగా గాయపడ్డారు. ఈ నెల 5న సాయంత్రం ఇంట్లో గ్యాస్‌ సిలిండర్‌ ఖాళీ కావడంతో సుభానీ సిలిండర్‌ మార్చాడు. 6వ తేదీ ఉదయం అతను సెల్‌ ఫోన్‌ చార్జింగ్‌ పెట్టేందుకు స్విచ్‌ ఆన్‌ చేశాడు. అప్పటికే  గ్యాస్‌ లీకై ఉండటంతో ఒక్కసారిగా మంటలు చెలరేగాయి. దీంతో సుభానీతో పాటు అతడి భార్య షర్మిళ, కుమార్తె ఫిర్దౌస్‌లు తీవ్రంగా గాయపడ్డారు. స్థానికులు వారిని కూకట్‌పల్లిలోని ప్రైవేట్‌ ఆస్పత్రికి తరలించగా, చికిత్స పొందుతూ ఈ నెల 12న సుభాని, షర్మిళ మృతి చెందగా, చిన్నారి ఫిర్దోస్‌ బుధవారం కన్నుమూసింది.

సాక్షి, విశాఖపట్నం: జిల్లాలోని సాగర్‌ నగర్‌లో దారుణం చోటు చేసుకుంది. ఓ ఇంట్లో గ్యాస్‌ సిలిండర్‌ పేలిన ఘటనలో అన్నాచెల్లెళ్లు మృత్యువాత పడగా.. తండ్రి తీవ్రంగా గాయపడ్డాడు. వివరాలు.. సాగర్ నగర్ హెచ్‌ఐజీలో ఆర్టీసీ రీటైర్డ్ జేఈ చల్ల ఉమా మహేశ్వరరావు కుటుంబం నివాసం ఉంటోంది. ఈ క్రమంలో గురువారం రాత్రి ఉమ మహేశ్వరరావు, కొడుకు, కుమార్తెతో కలిసి ఇంట్లో నిద్ర పోయారు. అర్ధరాత్రి వాళ్లింట్లో గ్యాస్ సిలిండర్ పేలినట్లు స్థానికులు గుర్తించారు. ఆ ఘటనలో కుమారుడు సతీష్ చంద్ర (38), కూతురు లావణ్య (32) మృత్యువాత పడ్డారు.  ఉమా మహేశ్వరరావు ప్రాణాపాయ స్థితిలో వున్నారు.  అయితే వీరిది ఆత్మహత్యే అంటున్నారు పోలీసులు. ప్రమాదం జరిగిన ఇంట్లో పోలీసులు ఓ లేఖను స్వాధీనం చేసుకున్నారు. కొద్ది కాలం క్రితం ఉమా మహేశ్వరరావు భార్య మరణించింది. అప్పటి నుంచి ఆయన కుమారుడు, కుమార్తెతో కలిసి ఉంటున్నాడు. ఇదిలా ఉండగా ఉమా మహేశ్వరరావు అనారోగ్యంతో ఇబ్బంది పడుతున్నాడు. మానసిక సమస్యల నేపథ్యంలోనే గ్యాస్‌ లీక్‌ చేసుకుని ఆత్మహత్యకు పాల్పడి ఉండవచ్చని పోలీసులు భావిస్తున్నారు.

సాక్షి, గుంటూరు : జిల్లాలోని చిలకలూరిపేట ఎన్టీఆర్‌ నగర్ కాలనీలోని ఓ ఇంట్లో గ్యాస్‌ సిలిండర్‌ పేలింది. ఈ ఘటనలో ఇద్దరు మహిళలు మృతి చెందగా, ఐదుగురికి తీవ్రగాయాలు అయ్యాయి. వారిలో ఇద్దరి పరిస్థితి విషమంగా ఉంది. గ్యాస్‌ స్టౌవ్‌ రిపేర్‌ చేస్తుండగా ఈ ఘటన జరిగింది. ఎన్టీఆర్‌ నగర్‌ కాలనీకి చెందిన ఆది లక్ష్మీ ఈ రోజే  కొత్తగా గ్యాస్‌ సిలిండర్‌ను కొనుక్కొచ్చారు. గ్యాస్‌ పొయ్యిని సిలిండెర్‌కు కలెక్షన్‌ ఇచ్చేందుకు పక్కింటి దివ్యను పిలిచారు. గ్యాస్‌ స్టౌవ్‌ రిపేర్‌ చేస్తుండగా సిలిండర్‌ పేలింది. ఈ ఘటన రేకుల షెడ్డు పేలి దివ్య, ఆదిలక్ష్మీ అక్కడికక్కడే మృతి చెందారు.ఇంట్లో ఉన్న మరో ఐదుగురికి తీవ్రగాయాలు అయ్యాయి. వీరిలో ఇద్దరి పరిస్థితి విషమంగా ఉంది. క్షతగాత్రులను స్థానిక ప్రభుత్వ ఆస్పత్రికి తరలించారు.

విజయనగరం టౌన్‌: ఒక్కసారిగా  మంటలు చెలరేగాయి... ఇంతలో గ్యాస్‌ సిలిండర్‌ పేలుడు.. ఎం జరిగిందో తెలుసుకునేలోపే జరగాల్సిన నష్టం జరిగిపోయింది... కేవలం గంటలోనే ఆ ప్రాంతమంతా బూడిదగా మారింది.. దుకాణాలు కాలిపోవడంతో బాధితుల ఆర్తనాదాలు మిన్నంటాయి.. వివరాల్లోకి వెళితే.... పట్టణ నడిబొడ్డున ఉన్న గంటస్తంభం ప్రాంతంలో చిన్న మార్కెట్‌ నిత్యం కూరగాయల వ్యాపారంతో కిటకిటలాడుతుంటుంది. ఆదివారం అర్ధరాత్రి దాటిన తర్వాత ఒంటి గంట నుంచి రెండు గంటల ప్రాంతంలో ఆ ప్రాంతమంతా ఒక్కసారిగా  మంటలు చెలరేగాయి. దీంతో  మార్కెట్‌లో ఉన్న సుమారు 60 కుటుంబాలకు చెందిన 54  కూరగాయల షాపులు దగ్ధమయ్యాయి. ఈ ప్రమాదంలో కూరగాయలు, షాపులు పూర్తిగా కాలి బూడిదయ్యాయి. సమాచారం అందుకున్న ఫైర్‌  సిబ్బంది హుటాహుటిన సంఘటనా స్థలానికి చేరుకుని మంటలను అదుపు చేశారు. విద్యుత్‌ షార్ట్‌ సర్క్యూట్‌ వల్ల ప్రమాదం జరిగి ఉంటుందని అధికారులు అనుమానం వ్యక్తం చేస్తున్నారు. మంటలు చెలరేగిన కొద్దిసేపటికే పరిసర ప్రాంతంలో ఉన్న గ్యాస్‌ సిలిండర్‌ పేలిపోవడంతో మంటలు ఎక్కువగా వ్యాపించాయి. కేవలం 20 నిమిషాల్లోనే జరగాల్సిన నష్టం జరిగిపోయింది. ఈ ప్రమాదంలో సుమారు 25 లక్షల రూపాయలకు పైగా ఆస్తి నష్టం జరిగి ఉంటుందని వ్యాపారులు అంచనా వేస్తున్నారు. అయితే అగ్నిమాపక శాఖాధికారులు మాత్రం ఏడు లక్షల రూపాయల నష్టమే జరిగిందని అంచనా వేశారు. ప్రమాదం సంభవించిందని తెలియగానే జిల్లా అగ్నిమాపకశాఖాధికారి అవినాష్‌ జయసింహ, సహాయ అగ్నిమాపకాధికారి మాధవనాయుడు, సిబ్బంది సంఘటనా స్థలానికి చేరుకుని మంటలను అదుపు చేశారు. లబోదిబోమంటున్న బాధితులు ఉదయం లేచిన దగ్గర నుంచి రాత్రి పది గంటలకు ఇంటికెళ్లే వరకూ షాపుమీదే ఆధారపడి బతుకుతున్నాం. షాపులు కట్టేసి ఇంటికి వెళ్లినప్పుడు అంతా బాగానే ఉందని... సరిగ్గా అర్ధరాత్రి సమయంలో ప్రమాదం జరిగిపోయిందని బాధితులు లబోదిబోమంటున్నారు. కేవలం దుకాణాలమీదనే ఆధారపడి బతుకుతున్న తమను ప్రభుత్వమే ఆదుకోవాలని కోరుతున్నారు.  బాధితులకు చేయూతనివ్వాలి అగ్ని ప్రమాదంలో తీవ్రంగా నష్టపోయిన బాధితులను ప్రభుత్వమే ఆదుకోవాలని మానవ హక్కుల సంఘ రాష్ట్ర అధ్యక్షుడు ఎస్‌. అచ్చిరెడ్డి అన్నారు. సంఘటనా స్థలానికి వెళ్లి బాధితులను పరామర్శించారు. ఈ సందర్భంగా ఆయన మాట్లాడుతూ,  ప్రమాదానికి గల కారణాలు తెలుసుకోవాలన్నారు. నష్టం జరిగిన వ్యాపారులకు ఒక్కో దుకాణానికి  పర్మినెంట్‌ షెడ్‌లు నిర్మించి, వారికి నష్టపరిహారం చెల్లించాలని డిమాండ్‌ చేశారు. కొంతమంది ఆకతాయిలు అర్ధరాత్రి సమయంలో మార్కెట్‌లో మద్యం తాగుతూ హడావిడి చేస్తున్నారని.... ఈ విషయాన్ని డీఎస్పీ దృష్టికి తీసుకెళ్తామన్నారు. పరామర్శలో ఆయనతో పాటు సంఘ ప్రతినిధులు సింహాద్రి, అమ్మాజమ్మ, తదితరులు పాల్గొన్నారు. ప్రభుత్వమే ఆదుకోవాలి... విజయనగరం మున్సిపాలిటీ: అగ్ని ప్రమాద బాధితులను ప్రభుత్వమే ఆదుకోవాలని ఎమ్మెల్సీ, వైఎస్సార్‌సీపీ ఉత్తరాంధ్ర కన్వీనర్‌ కోలగట్ల వీరభద్రస్వామి  అన్నారు.  సోమవారం ఉదయం ప్రమాదం జరిగిన చిన్నబజార్‌ ప్రాంతంలో పర్యటించిన కోలగట్ల ప్రమాదానికి గల కారణాలను అడిగి తెలుసుకున్నారు. అనంతరం  స్థానిక వ్యాపారి  ఎంకేబీ శ్రీనివాసరావు బాధితుల కోసం రూ. 50 వేల చెక్కును కోలగట్ల వీరభద్రస్వామి చేతుల మీదుగా అందజేశారు. అనంతరం కోలగట్ల మాట్లాడుతూ, బాధితులందరూ చిరు వ్యాపారులేనన్నారు. సుమారు 30 సంవత్సరాల కిందట ఇదే మార్కెట్‌లో అగ్ని ప్రమాదం జరిగిందని గుర్తు చేశారు. బాధితుల వివరాలు పక్కాగా సేకరించి ఆదుకోవాలని డిమాండ్‌ చేశారు. పరామర్శలో ఆయనతో పాటు వైఎస్సార్‌సీపీ విజయనగరం పట్టణ అధ్యక్షుడు ఆశపు వేణు, మండల అధ్యక్షుడు నడిపేన శ్రీనివాసరావు, మున్సిపల్‌ కౌన్సిలర్‌ ఎస్‌వీవీ రాజేష్, యువజన విభాగం నాయకులు జి.ఈశ్వర్‌ కౌషిక్, యువజన విభాగం అధ్యక్షుడు ఎస్‌. బంగారునాయుడు, పట్టణ యువజన విభాగం అధ్యక్షుడు అల్లు చాణక్య, రాష్ట్ర బీసీ సెల్‌ ప్రధాన కార్యదర్శి బొద్దాన అప్పారావు, జిల్లా సేవాదళ్‌ అధ్యక్షుడు మారం బాలబ్రహ్మరెడ్డి, జిల్లా యువజన విభాగం ప్రధాన కార్యదర్శి బోడసింగి ఈశ్వరరావు, పార్టీ నాయకులు కొబ్బరికాయల నారాయణరావు,  తదితరులు పాల్గొన్నారు.

సాక్షి, విజయవాడ : కృష్ణాజిల్లా మచిలీపట్నంలోని మగ్గాలకాలనీలో విషాదం చోటు చేసుకుంది. ఓ ఇంట్లో గ్యాస్‌ సిలిండర్‌ పేలి.. మహ్మద్‌ బాజీ అనే యువకుడు సజీవ దహనమయ్యాడు. పెద్ద ఎత్తున లేచిన మంటలకు ఇంట్లోని వస్తువులన్నీ పూర్తిగా కాలిపోయాయి. వెంటనే ఫైర్‌ సిబ్బంది వచ్చి మంటలను అదుపులోకి తెచ్చారు. పేలుడు శబ్దానికి స్థానికులు తీవ్ర భయాందోళనకు గురయ్యారు.

సాక్షి, సిటీబ్యూరో: వంటింట్లో గ్యాస్‌ వణికిస్తోంది. వరుస సిలిండర్‌ పేలుళ్లు నగరవాసులను బెంబేలెత్తిస్తున్నాయి. వంట గ్యాస్‌ ఉపయోగించడంలో వినియోగదారుల నిర్లక్ష్యం, భద్రత ప్రమాణాలపై అవగాహన లోపం, సిలిండర్‌ డోర్‌ డెలివరీ కాగానే తనిఖీ చేయకపోవడం, గ్యాస్‌ లీకేజీలపై చిన్నపాటి ఏమరుపాటు వంటి కారణాలతో కుటుంబం మొత్తం భారీ మూల్యాన్నే చెల్లించుకోవాల్సి వస్తోంది. ప్రధాన ఆయిల్‌ కంపెనీలు కనీస భద్రత ప్రమాణాలను గాలికి వదిలేశాయి. ఏడాదికి ఒకసారి మొక్కుబడిగా అవగాహన సదస్సు నిర్వహించి చేతులు దులుపుకొంటున్నాయి. గ్యాస్‌ డిస్ట్రిబ్యూటర్ల వద్ద అత్యవసర సేవలకు సంబంధించి టెక్నికల్‌ సిబ్బంది కొరత వెంటాడుతోంది. దీంతో గ్యాస్‌ లీకేజీ, ఇతరత్రా వినియోగదారుల కాల్స్‌ పెండింగ్‌లో పడిపోతున్నాయి. డెలివరీ బాయ్స్‌ రిపేరు సిబ్బందిగా అవతారమెత్తి  ప్రయివేటు టెక్నీషియన్స్‌ కంటే అదనంగా సర్వీస్‌ చార్జీలు బాదేస్తున్నారనే ఆరోపణలు వినవస్తున్నాయి. మొత్తం మీద ఆయిల్‌ కంపెనీల నిర్లక్ష్యం, మానవ తప్పిదాలు వంటింట్లో విస్ఫోటనాలకుకు దారితీస్తున్నాయి.  సిలిండర్‌ టెస్ట్‌లో నిర్లక్ష్యం ప్రధానంగా ఆయిల్‌ కంపెనీలు సిలిండర్‌ టెస్టింగ్‌లో నిర్లక్ష్యం వహిస్తున్నట్లు తెలుస్తోంది. సిలిండర్‌ జీవిత కాలపరిమితి పదేళ్లు. ఆ తర్వాత తిరిగి పరిశీలించి సిలిండర్‌ ప్రమాణాలను బట్టి మరో ఐదేళ్లు రీఫిల్లింగ్‌ చేయడమా? లేదా తుప్పు కింద పడేయడం చేయాల్సి ఉంటుంది. గ్యాస్‌ టెర్మినల్‌లో రీఫిల్లింగ్‌ జరిగే ముందు ప్రతిసారి సిలిండర్‌ బాడీ ఇతరత్రా వాటిని టెస్ట్‌ చేయాల్సి ఉంటుంది. కానీ, ఆయిల్‌ కంపెనీలు ఇవేమీ పట్టించుకోకుండా టెర్మినల్‌కు వచ్చిన సిలిండర్‌ను మొక్కుబడి పరిశీలనతో రీఫిల్లింగ్‌  చేసి సరఫరా చేస్తున్నాయి. దీనివల్లే వంటింటి విస్ఫోటనాలు చోటుచేసుకుంటున్నాయి.  సిలిండర్‌ ప్రమాణాలకు సంబంధించిన టెస్ట్‌ డ్యూ డేట్‌ ఐదు, పదేళ్లకు ఒకసారి ఉండటం నిర్లక్ష్యానికి అద్దం పడుతోంది. ప్రతి ఒక్క సిలిండర్‌ గ్యాస్‌ టెర్మినల్‌ నుంచి డిస్ట్రిబ్యూటర్‌ గోదాముకు, అక్కడి నుంచి వినియోగదారుడి ఇంటికి,  ఖాళీ అనంతరం తిరిగి గోదాముకు అక్కడి నుంచి గ్యాస్‌ టెర్మినల్‌కు వెళ్తుంది. ఇలా ఏడాదిలోనే కనీసం 72 ప్రాంతాలు సిలిండర్‌ తిరగాల్సింటుంది. దీంతో రవాణా, ఇతరత్రా కారణాలతో సిలిండర్‌ నాణ్యత ప్రమాణాలు దెబ్బతినడం సర్వ సాధారణం. అయితే ఆయిల్‌ కంపెనీలు  సిలిండర్‌ ప్రమాణాలపై మాత్రం పదేళ్లు, ఐదేళ్లకు ఒకసారి పరిశీలన జరిపి డ్యూ డేట్‌ను వేయడం ఆందోళన కలిగిస్తోంది. సిలిండర్‌ కాలపరిమితి ఇలా.. వంట గ్యాస్‌ సిలిండర్‌ భద్రత ప్రమాణాలను కాలపరిమితి (డ్యూ డేట్‌) బట్టి గుర్తించవచ్చు. డ్యూ డేట్‌లు సిలిండర్‌పై త్రైమాసాకానికి ఒక కేటగిరిగా అక్షరాలు ఉంటాయి. అక్షరంతో పాటు అంకె అంటే కాలపరిమితి గడువు సంవత్సరం కూడా ఉంటుంది. ఉదాహరణకు సిలిండర్‌ పైన ఏ–19 బీ–19, సీ–19, డీ–19 అనే అక్షరాలు ఉంటాయి. ఏ–అంటే జనవరి నుంచి మార్చి వరకు,  బీ అంటే ఏప్రిల్‌ నుంచి జూన్‌ వరకు, సీ అంటే జూలై నుంచి సెప్టెంబర్‌ వరకు. డీ అంటే  అక్టోబర్‌ నుంచి డిసెంబర్‌ వరకు పరిగణించాలి. పక్కన ఉన్న అంకెను సంవత్సరంగా గుర్తించాలి.  అయితే ఖాళీ అయిన సిలిండర్‌ నాణ్యత ప్రమాణాలు పూర్తి స్థాయిలో పరిశీలించకుండానే రీఫిల్లింగ్‌ పాయింట్‌లో  కాలపరిమితి ఆధారంగా  రీఫిల్లింగ్‌ చేసి వినియోగదారులకు పంపిణీ చేయడం పరిపాటిగా మారింది. టెక్నీషియన్ల కొరత వంట గ్యాస్‌ డిస్ట్రిబ్యూటర్ల వద్ద టెక్నీషియన్ల కొరత అధికంగా ఉంది. ఒక్కో డిస్ట్రిబ్యూటర్‌ పరిధిలో సుమారు వేలాది కనెక్షన్లు ఉన్నా..సిబ్బంది మాత్రం ఇద్దరు, ముగ్గురుకి మించి ఉండరు. దీంతో వినియోగదారులు అత్యవసర నంబర్‌కు ఫోన్‌చేసినా ఫలితం లేకుండా పోతోంది. ఒక్కోసారి డెలివరీ బాయ్స్‌నే టెక్నీషియన్స్‌ అంటూ పంపించి సర్వీస్‌ చార్జీలు వసూలు చేస్తున్నారు.  అప్రమత్తత లేక... గ్యాస్‌ విస్ఫోటనాలకు మానవ తప్పిదాలు కూడా ప్రధానంగా కారణమవుతున్నాయి.  గ్యాస్‌ సిలిండర్ల  లీకేజీలు, సిలిండర్, రెగ్యులేటర్, రబ్బర్‌ ట్యూబ్‌ల నాణ్యత, వాటి తనిఖీల్లో నిర్లక్ష్యం ప్రమాదాలకు దారితీస్తున్నాయి. కొత్త సిలిండర్‌ అమర్చే సమయంలో రెగ్యులేటర్, వాచర్‌ రెండూ సరిగ్గా ఇమడక గ్యాస్‌ బయటకు వస్తోంది. గ్యాస్‌ లీక్‌  గమనించకపోవడం, రబ్బర్‌ ట్యూబ్‌ వినియోగించడం, వంట చేసే సమయంలో గ్యాస్‌ను సిమ్‌లో ఉంచి మరిచి పోవడం, బర్నర్‌ మూసుకుపోవడం తదితరాలతో ప్రమాదాలు చోటుచేసుకుంటున్నాయి. జాగ్రత్తలు  ♦ వంట గ్యాస్‌ స్టవ్‌ వినియోగించని సమయంలో రెగ్యులేటర్‌ను ఆఫ్‌ చేయాలి. రాత్రి పూట తప్పనిసరిగా రెగ్యులేటర్‌ ఆఫ్‌లో ఉండే విధంగా చూసుకోవాలి. వంట గది తలుపుల కింద కనీసం ఒక అంగుళం ఖాళీగా ఉండే విధంగా ఉండాలి ♦ గ్యాస్‌ లీకేజీ జరిగినప్పుడు తప్పనిసరిగా వాసన వస్తుంది. అలాంటి సమయంలో ఎలాంటి ఏమరుపాటు పనికి రాదు. విద్యుత్‌ స్విచ్‌లు ముట్టుకోవడం, అగ్గిపుల్ల వెలిగించడం చేయకూడదు. విద్యుత్‌ స్విచ్‌లు ఆన్‌ చేయడం, ఆఫ్‌ చేయడం చేయవద్దు. స్విచ్‌ ఆన్‌ ఆఫ్‌ చేస్తే వచ్చే చిన్నపాటి స్పార్క్‌(మెరుపు) ప్రమాదానికి దారితీస్తోంది.     ♦ గ్యాస్‌ వాసన పసిగట్టగానే తక్షణం వంటింటి తలుపులు, కిటికీలు బార్లా తెరిచి గ్యాస్‌ను బయటకు పంపే ప్రయత్నం చేయాలి. ఆ తర్వాత గ్యాస్‌ లీక్‌ అవుతున్నట్లు గుర్తిస్తే సిలిండర్‌ను బయటికి తీసుకెళ్లి  బహిరంగ ప్రదేశంలో సేఫ్టీ పిన్‌ బిగించి ఉంచాలి.   ♦ గ్యాస్‌ డిస్ట్రిబ్యూటర్‌ వద్ద కాకుండా బహిరంగ మార్కెట్‌లో, గ్యాస్‌ రీఫిల్లింగ్‌ వ్యాపారుల వద్ద సిలిండర్‌ కొనుగోలు చేయడం ప్రమాదకరం. ♦ సిలిండర్‌ కంటే ఎత్తులో స్టవ్‌ ఉండాలి. సిలిండర్‌ను నిలువుగానే పెట్టాలి. ♦ వంట గదిలో ఫ్రిజ్‌ పెట్టవద్దు. అందులో ఉండే థర్మోస్టాట్‌ వల్ల ఆటో కటాఫ్‌ అవుతోంది. గ్యాస్‌ లీకైన సమయంలో  ప్రమాదానికి దారితీస్తోంది. ♦ వంటింట్లో గ్యాస్‌ లీకేజీ గుర్తించగానే గ్యాస్‌ కంపెనీ అత్యవసర (టోల్‌ ఫ్రీ) నెంబర్‌ 1906 గానీ, డిస్ట్రిబ్యూటర్‌ అత్యవసర నెంబర్‌కు గానీ ఫోన్‌ చేయవచ్చు.   అవగాహన అవసరం వంట గ్యాస్‌ వినియోగదారులు పూర్తిగా డోర్‌ డెలివరీ కాగానే సీల్‌ కరెక్టుగా ఉందా లేదా చూసుకోవాలి. సిలిండర్‌ కాలపరిమితి పరిశీలించాలి. సీల్‌ తీయగానే ఓపెన్‌ రింగ్‌ కట్‌ అయినా...గ్యాస్‌ వాసన వచ్చినా తిరిగి సిలిండర్‌ వెనక్కి పంపాలి. రెగ్యులేటర్,  బర్నర్‌ను ఎప్పటి కప్పుడు తనిఖీ చేసుకోవాలి. రెండేళ్లకు ఒకసారి స్టవ్‌ను మార్చు కోవాలి.     – అశోక్, అధ్యక్షుడు, వంట గ్యాస్‌ డీలర్ల సంఘం గ్రేటర్, హైదరాబాద్‌ మానవ తప్పిదాలతోనే ప్రమాదాలు    వంటింట్లో మానవ తప్పిదాలతోనే ప్రమాదాలు సంభవిస్తున్నాయి. టెర్మినల్‌లో భద్రత ప్రమాణాల ఆధారంగా సిలిండర్‌లో రీఫిల్లింగ్‌ చేసి పంపిణీ చేస్తారు. గ్యాస్‌ వినియోగం తోపాటు గ్యాస్‌ లీకేజీ, రెగ్యులేటర్, బర్నర్‌ తదితర వాటిపై వినియోగదారులకు అవగాహన అవసరం. వంట గ్యాస్‌ వినియోగంపై ఆయిల్‌ కంపెనీల వారిగా అవగాహన కార్యక్రమాలు కూడా నిర్వహిస్తున్నాం. – రోహిత్‌గార్గే, ఆయిల్‌ కంపెనీ ప్రతినిధి

హస్తినాపురం: ఇటీవల కాప్రాలో జరిగిన ఘోర ప్రమాదాన్ని మరవకముందే మరో సిలిండర్‌ పేలుడు చోటుచేసుకుంది. వనస్థలిపురం పోలీస్‌ స్టేషన్‌ పరిధిలో మంగళవారం ప్రమాదవశాత్తు గ్యాస్‌ సిలిండర్‌ పేలి వృద్ధురాలు మృతి చెందగా, మరో మహిళకు తీవ్ర గాయాలయ్యాయి. వనస్థలిపురం ఇన్‌స్పెక్టర్‌ వెంకటయ్య తెలిపిన వివరాల ప్రకారం... ఆంధ్రప్రదేశ్‌లోని వైజాగ్‌కు     – మిగతా 6లోu చెందిన శ్రుతికీర్తి(80) వనస్థలిపురం బీఎన్‌రెడ్డి నగర్‌లోని సోమనాథ క్షేత్రానికి వచ్చింది. మంగళవారం మధ్యాహ్న సమయంలో ఆలయం వంట గదిలోని స్టవ్‌ వెలిగించగా, ఆకస్మాత్తుగా సిలిండర్‌ పేలింది. పేలుడు ధాటికి శ్రుతికీర్తికి తీవ్ర గాయాలయ్యాయి. పక్క గదిలో ఉన్న లలితకు కిటీకి అద్దాలు పగిలి శరీరానికి గుచ్చుకున్నాయి. వెంటనే అక్కడున్న భక్తులు వచ్చి వీరిద్దరినీ ఎల్‌బీనగర్‌లోని ఓ ప్రైవేట్‌ ఆస్పత్రికి తరలించారు. చికిత్స పొందుతూ శ్రుతికీర్తి రాత్రి 9గంటల సమయంలో మృతి చెందింది. కేసు నమోదు చేసుకొని దర్యాప్తు చేస్తున్నామని ఇన్‌స్పెక్టర్‌ వెంకటయ్య తెలిపారు.  

సాక్షి, సిటీబ్యూరో: నగరవాసులకు సిలిం‘డర్‌’ పట్టుకుంటోంది... ఇటీవల కాలంలో తరచుగా ‘గ్యాస్‌’ ప్రమాదాలు చోటు చేసుకుంటున్నాయి...గడిచిన రెండు నెలల్లోనే ‘గ్యాస్‌ బాంబ్‌’కు పలువురు బలయ్యారు. గత ఏడాది నవంబర్‌ 9న కొత్తగూడ షాగౌస్‌ హోటల్‌లో, డిసెంబర్‌ 27న ఫిల్మ్‌నగర్‌ పరిధిలోని బసవతారకానగర్‌లో, శుక్రవారం కాప్రా పరిధిలో గ్యాస్‌ సిలిండర్లు బీభత్సం సృష్టించాయి. ఏడాదికి 40 నుంచి 50 వరకు జరుగుతున్న ఈ ప్రమాదాల్లో ప్రాణనష్టం తక్కువగా ఉంటున్నా... ఆస్తి నష్టం మాత్రం భారీగా చోటు చేసుకుంటోంది. గ్యాస్‌ వినియోగంపై వినియోగదారులకు పూర్తి అవగాహన లేకపోవడం వల్లే ఇలా జరుగుతోందని నిపుణులు చెప్తున్నారు.  ఏమిటీ గ్యాస్‌ సిలిండర్‌...   గ్యాస్‌ సిలిండర్‌... ప్రస్తుతం దాదాపు ప్రతి ఇంట్లోనూ ఉండే నిత్యావసర వస్తువు. మన వంటింట్లో ఉండే సిలిండర్‌లో బ్యూటేన్, ప్రొఫైన్‌ అనే రసాయిన వాయువులు కలిసి ఉంటాయి. ఎలాంటి వాసన ఉండని సహజవాయువుకు దానికోసం మరŠాక్యప్టెయిన్‌( కెమికల్‌)ను కలుపుతారు. దాదాపు 14.5 కేజీల బరువున్న ఈ వాయువులను అత్యధిక ఒత్తిడితో గ్యాస్‌ సిలిండర్‌లో ద్రవ రూపంలో నిక్షిప్తం చేస్తారు. ఈ బండ వినియోగంలో ఏమాత్రం నిర్లక్ష్యం వహించినా, అవగాహన కొరవడిగా సంభవించే ప్రమాదం బాంబు పేలుడుతో సమానం.  ఏడు చోట్ల లీక్‌కు చాన్స్‌... సాధారణంగా స్టౌవ్‌ ఆఫ్‌ చేసి ఉన్నప్పటికీ... గ్యాస్‌ లీకేజ్‌ అనేది ఏడు ప్రాంతాల నుంచి జరిగే అవకాశం ఉంది. సిలిండర్, స్టౌవ్‌లను కలుపుతూ రబ్బర్‌ ట్యూబ్‌ ఉంటుంది. ఇది అటు సిలిండర్‌కు, ఇటు స్టౌవ్‌కు అతికే ప్రాంతాల్లో ఏదో ఒక చోట నుంచి లీక్‌ అయ్యే ప్రమాదం ఉంది. సాధారణంగా స్టౌవ్‌కు అనుసంధానిచే చోటే వేడి వల్ల ఈ ట్యూబ్‌ సాగే గుణం కోల్పోతుంది. ఫలితంగా పెళుసుదనం సంతరించుకుని పగుళ్లు ఏర్పడతాయి. కేవలం గుండు సూది మొనంతం రంధ్ర ఏర్పడితే చాలు. దీని లోంచి గంటకు ముప్పావు నుంచి కేజీన్నర వరకు గ్యాస్‌ లీక్‌ అవుతుంది. మెల్లమెల్లగా ఇల్లంతా వ్యాపిస్తుంది. మరోపక్క స్టౌవ్‌కు ఉండే నాబ్స్, రెండు నాబ్స్‌నూ కలిపే పైప్, కొత్త సిలిండర్‌ బిగించే సమయంలో రెగ్యులేటర్, సిలిండర్‌ నాబ్‌ల నుంచీ లీక్‌ అయ్యే అవకాశం ఉంది.  ‘తెరిచి ఉన్నా’ ఫలితం నిల్‌... వంటింటికి కిటికీలు, వెంటిలేటర్లు ఉంటే లీకైన గ్యాస్‌ వాటి నుంచి బయటకు వెళ్లిపోతుందనే భావన చాలా మందికి ఉంటుంది. ఇది కేవలం అపోహ మాత్రమే. వంట గ్యాస్‌లో ఉండే వాయువులు గాలి కన్నా చాలా బరువైనవి. అందుకే లీకైన తరవాత నేలపైకి చేరతాయి. నాలుగడుగుల కంటే తక్కువ ఎత్తులోనే వ్యాపిస్తాయి. దీంతో కిటికీలు  తెరిచి ఉన్నా... వెంటిలేటర్లు ఉన్నా వాటి ద్వారా బయటకు పోయే అవకాశం ఉండదు.  అగ్నికి ప్రేరణలు ఎన్నో... లీకైన గ్యాస్‌ అంటుకోవడానికి అనేక రకాలుగా ప్రేరణలు ఉంటాయి. గ్యాస్‌ వ్యాపించి ఉన్న గదిలో లైట్‌ వేసినా, అగ్గిపుల్ల, లైటర్‌ వెలిగించినా, ఏదైనా బరువైన వస్తువు ఎత్తుమీద నుంచి కిందపడినా వచ్చే స్పార్క్‌ వల్ల అంటుకుంటుంది. మరోపక్క మన ఇంట్లో ఉండే ఫ్రిజ్‌లు కూడా గ్యాస్‌ మండటానికి ప్రేరణలుగానే పని చేస్తాయి. ఫ్రిజ్‌లో కూలింగ్‌ పెరిగినప్పుడు ఆగిపోయి, తగ్గిన వెంటనే మళ్లీ స్టార్ట్‌ అయ్యే పరి/ê్ఞనం ఉంటుంది. దీన్నే రిలే మెకానిజం అంటారు. ఇలా రిలే జరిగేటప్పుడు ఫ్రిజ్‌ నుంచి ‘టక్‌’ మనే శబ్దం వస్తుంది. అందులో ఉత్పన్నమయ్యే స్పార్క్‌ వల్లే ఈ శబ్దం వెలువడేది. ఇంట్లో వ్యాపించిన గ్యాస్‌ దీనివల్లా అంటుకునే ప్రమాదం ఉంది. 12 వేల రెట్లు వ్యాకోచిస్తుంది... ఇల్లంతా వ్యాపించి ఉన్న గ్యాస్‌కు ప్రేరణ లభించగానే ఒక్కసారిగా అంటుకుటుంది. ఇలా అంటుకున్న సందర్భంలో విస్తరించి ఉన్న గ్యాస్‌ 12 వేల రెట్లు వ్యాకోచిస్తుంది. అంటే కేజీ గ్యాస్‌ లీకై ఉంటే... మంట అంటుకున్న వెంటనే అది 12 వేల కేజీల వరకు వ్యాకోచిస్తుంది. ఫలితంగానే గ్యాస్‌ ప్రమాదం చోటు చేసుకున్న చోట భారీ ఆస్తి నష్టం ఏర్పడుతుంది. తలుపులు, కిటికీలతో పాటు కాస్త బలహీనంగా ఉన్న గోడలు సైతం విరిగిపోతాయి. ఒక్కసారిగా గ్యాస్‌ అంటుకుని ఆరిపోవడం వల్ల భారీ ఆగ్నిప్రమాదం సైతం సంభవించదు. అయితే ఆ సమీపంలో ఉన్న వ్యక్తులు మాత్రం ప్రాణాలు కోల్పోవడమో, 50 శాతం వరకు కాలిపోవడమో జరుగుతుంది. కెమికల్‌ ఎక్స్‌ప్లోజన్‌గా పిలిచే ఈ ప్రమాదాల్లో సాధారణంగా గ్యాస్‌ సిలిండర్‌  చెదరదు. సిలిండర్‌ కూడా ఛిద్రం అయితే అది మెకానికల్‌ పేలుడు.

కుషాయిగూడ: గ్యాస్‌ లీకై సిలిండర్‌ పేలిన ఘటనతో కాప్రా ప్రాంతం ఒక్కసారిగా ఉలిక్కిపడింది. శుక్రవారం ఉదయం నుంచి రాత్రి వరకు కూడా జనం తేరుకోలేకపోయారు. శిథిల భవనాలు, పేలుడు ఆనవాళ్లు, రక్తపు మరకలు, పరిసర నివాసాల్లో చోటు చేసుకున్న విధ్వంసం స్థానికులను తీవ్ర ఆందోళనకు గురిచేసింది. ఇద్దరు వ్యక్తులు మృతిచెందడం..మరికొందరు గాయపడడం విషాదం నింపింది. ఇక రాత్రి వరకు కూడా పేలుడు ప్రాంతంలో పోలీసులు, బాంబ్‌స్క్వాడ్‌ బృందాలు విచారణ జరిపాయి. పేలుడు చోటు చేసుకున్న పైఅంతస్థును పూర్తిగా తొలగించారు. సిలిండర్‌ పేలితే ఇంతటి విధ్వంసమేమిటో అర్థం కావడం లేదంటూ స్థానికులు చర్చించుకుంటున్నారు. భారీగా విన్పించిన పేలుడు శబ్ధంతో తాము ప్రాణాల మీద ఆశ వదులుకున్నామని కొందరు విలపించడం కన్పించింది. 200 మీటర్ల వరకు తీవ్రత కనిపించిన పేలుడు ఘటన...మరో గంట ఆలస్యంగా జరిగి ఉంటే మరింత ప్రాణ నష్టం వాటిల్లేదని స్థానికులు అన్నారు. ఉదయం 8 దాటిందంటే ఈ ప్రాంతామంతా రద్దీగా ఉంటుందని చెప్పారు. మృతుల కుటుంబాలకు ఎక్స్‌గ్రేషియా: కలెక్టర్‌ కుషాయిగూడ: కాప్రా పేలుడు ఘటనలో మృతిచెందిన కుటుంబాలకు ప్రభుత్వం తరపున ఎక్సగ్రేషియా అందేలా చూడటంతో పాటుగా క్షతగ్రాతులకు మెరుగైన వైద్యం అందేలా చర్యలు తీసుకుంటామని మేడ్చల్‌ జిల్లా కలెక్టర్‌ ఎంవీరెడ్డి తెలిపారు. ఘటన స్థలాన్ని సందర్శించి వెళ్లిన కలెక్టర్‌ ఆసుపత్రిలో చికిత్స పొందుతున్న క్షతగాత్రులను పరామర్శించారు. అనంతరం శిథిలాల ధాటికి మృతిచెందిన రవి కుటుంబ సభ్యులకు తన సానుభూతి తెలియజేశారు. క్షతగాత్రులకు ప్రభుత్వ ఖర్చులతో వైద్య సేవలు అందించడంతో పాటు వారం రోజులు భోజన వసతిని కూడ కల్పించనున్నట్లు పేర్కొన్నారు. దేవుడి దయవల్లబతికి బయటపడ్డాం మేం పేలుడు జరిగిన ఇంటి పక్కనే ఉంటున్నాం. స్వల్ప గాయాలయ్యాయి. మేం నిజంగా దేవుడి దయవల్ల బతికి బయట పడ్డాం. పేలుడు ధాటికి ఇంట్లోని వస్తువులన్నీ చిందరవందరగా పడిపోయాయి. మంచంపై పడుకున్న నా భార్య కింద పడిపోయింది. ఏం జరిగిందో తెలియక వణికిపోయి...కొద్దిసేపు లోపలే ఉండిపోయాం. – కొప్పుల కుమార్‌ (స్థానికుడు) భయాందోళనకు గురయ్యాం భారీ పేలుడుతో ఒక్కసారిగా భయాందోళనలకు గురయ్యాం. పేలుడు తీవ్రతను బట్టి చూస్తే సిలిండర్‌ వల్ల జరిగిందని అనిపించడం లేదు. బలమైన పేలుడు సంభవించి శ్లాబ్‌ పూర్తిగా విరిగిపడింది. మా ఇంట్లోని వస్తువులు, వాహనాలు పూర్తిగా ధ్వంసమయ్యాయి. భయంతో బయటకు వస్తుండగా చందూలాల్‌ భార్య లీల కాలిన గాయాలతో అరుస్తూ కన్పించింది. మేం వెంటనే పైకి వెళ్లి మంటలు ఆర్పాం.          – కమలాదేవి కనీస జాగ్రత్తలు అవసరం – డాక్టర్‌ వెంకన్న, క్లూస్‌ ఇన్‌చార్జ్‌ గ్యాస్‌ సిలిండర్‌ అనేది నిత్యావసర వస్తువే కాదు... దాదాపు ప్రతి ఇల్లు, కార్యాలయాల్లో అందుబాటులో ఉంటోంది. ప్రమాదాల బారినపడకుండా ఉండాలంటే ప్రతి ఒక్కరూ కనీస జాగ్రత్తలు తీసుకోవాలని క్లూస్‌ టీమ్స్‌ ఇన్‌చార్జ్‌గా ఉన్న సైంటిఫిక్‌ ఆఫీసర్‌ డాక్టర్‌ వెంకన్న చెప్తున్నారు. కొన్నింటిని ఆయన ‘సాక్షి’కి వివరించారు.   ♦ ప్రతి రోజూ నిద్రకు ఉపక్రమించే ముందు స్టౌవ్‌తో పాటు రెగ్యులేటర్‌ సైతం ఆఫ్‌ చేయాలి. ♦ స్టౌవ్‌ దగ్గర ఉన్న ట్యూబ్‌ను అనునిత్యం పరిశీలిస్తూ పగుళ్లు వచ్చాయేమో గుర్తించాలి. ప్రతి ఆరు నెలలకు ట్యూబ్‌ తప్పనిసరిగా మార్చాలి.   ♦ ట్యూబుకు పైన ఏ విధమైన తొడుగులు లేకుండా ఉన్నవే వాడాలి. లేదంటే దానికి వచ్చిన పగుళ్లు గమనించలేం. ♦ వీలైతే సిలిండర్‌ను నేలపైన కాకుండా... కనీసం అరడుగు లోతులో ఉంచే విధంగా  ఏర్పాటు చేసుకోవాలి. ♦ ఫ్రిజ్‌ను వంటగదిలో ఉంచకూడదు. వంటింటికి అందుబాటులో ఉండే మరో గదిలో పెట్టుకోవాలి.   ♦ గ్యాస్‌ లీకైనట్లు అనుమానం వస్తే... ఆ గదిలో లైట్లు వేయడం, ఆర్పడం చేయకుండా రబ్బరు చెప్పులతో మాత్రమే ప్రవేశించి తలుపులు తీయాలి. నాబ్స్‌ను చాలా జాగ్రత్తగా ఆఫ్‌ చేయాలి. ఈ ప్రయత్నాల్లో ఎక్కడా ఘర్షణ చోటు చేసుకోవడానికి ఆస్కారం లేకుండా చూసుకోవాలి. ♦ మీ ఇంటికి గ్యాస్‌ సిలిండర్‌ తీసుకువచ్చిన వారితో కేవలం బరువు మాత్రమే కాకుండా లీకేజ్‌లు కూడా చెక్‌ చేయమని చెప్పండి.   ♦ ఎలాంటి సహాయం కావాల్సి వచ్చినా నిస్సంకోచంగా స్థానిక డీలర్‌ను సంప్రదించండి. మీకు సహాయ పడటం వారి విధి.   ♦ వీలున్నంత వరకు గ్యాస్‌ సిలిండర్‌ వంటింట్లో లేకుండా బయట ఉండేలా, ఫ్రిజ్‌ను కిచెన్‌లో కాకుండా డైనింగ్‌ హాల్‌ లేదా హాల్‌లో ఉండేలా చూసుకోవాలి.   ♦ ప్రతి వ్యక్తి నిద్రలో ఉండగా వాసన పసిగట్టే సామర్ధ్యం కోల్పోతాడు. అందుకే గ్యాస్‌ లీకైన విషయం ఉదయం లేచాక తెలుస్తుంది. అలాంటి అనుమానం వచ్చినా, సాధారణంగా అయినా ఉదయం లేచిన వెంటనే వంట గదిలో లైట్‌ వేయకూడదు. తలుపులు తీసిన తర్వాత కొంత సేపటికే ఆన్‌ చేసుకోవాలి. 

లబ్బీపేట (విజయవాడ తూర్పు) : లాడ్జిలోని వంట గదిలో అకస్మికంగా గ్యాస్‌ సిలెండర్‌ పేలడంతో ఒకరికి స్వల్ప గాయాలు కాగా, ఐదుగురు సురక్షితంగా బయటపడ్డారు. నివాసాల మధ్య ఉన్న లాడ్జిలో సిలెండర్‌ పేలిన వెంటనే మంటలతో పాటు, దట్టమైన పొగ వ్యాపించడంతో చుట్టుపక్కల వారు తీవ్ర భయభ్రాంతులకు గురయ్యారు. అగ్నిమాపక సిబ్బంది సకాలంలో చేరుకుని మంటలను అదుపు చేశారు. వివరాల ప్రకారం మహాత్మా గాంధీ రోడ్డులోని హోటల్‌ ఫారŠూచ్యన్‌ మురళీ పార్క్‌ ఎదురుగా చిన్న ఇరుకు వీధిలో ఫ్రభ ఇన్‌ రెస్ట్‌హౌస్‌ (లాడ్జి) ఉంది. గ్రౌండ్‌ ఫ్లోర్‌లో వంట గదితో పాటు, సిబ్బంది ఉంటారు.  సోమవారం మధ్యాహ్నం 12 గంటల సమయంలో వంట చేస్తుండగా సిలెండర్‌ ఒక్కసారిగా పేలింది. దీంతో దట్టమైన పొగతో పాటు మంటలు వ్యాపించాయి. దీంతో సమీపంలో ఉన్న లాడ్జి మేనేజర్‌ ప్రవీణ్‌కుమార్‌ గౌడ్‌కు స్వల్ప గాయాలయ్యాయి. పక్క గదిలో ఉన్న ఇద్దరు యువకులు ప్రహరీ దూకి బయటపడ్డారు. అదే సమయంలో మొదటి అంతస్తులోని ఓ గదిలో ఉన్న ఇద్దరు యువతులు సైతం కిటికీలో నుంచి పక్క భవనంపైకి దూకి బయటపడగా, రెండో అంతస్తులో ఉన్న స్వీపర్‌ లక్ష్మి దట్టమైన పొగలోనూ మెట్లు వెతుక్కుంటూ బయటపడింది. కాగా రెండో అంతస్తులోని ఓ గదిలో ఉన్న వ్యక్తి కిందకి రాలేక, భయభ్రాంతులతో కేకలు వేశారు. దీంతో అగ్నిమాపక సిబ్బంది పక్క భవనంపై నుంచి నిచ్చెన వేసి అతనిని కిందకు దించారు.  అగ్నిమాపక సిబ్బంది సమయస్ఫూర్తి.. సిలెండర్‌ పేలి మంటలు వ్యాపించడంతో చుట్టుపక్కల నివాసాల వారు తీవ్ర భయభ్రాంతులకు గురయ్యారు. లాడ్జి భవనానికి ఆనుకునే ఇళ్లు ఉండటంతో అందులోని వాళ్లు తీవ్ర ఆందోళనకు గురయ్యారు. అయితే అగ్నిమాపక సిబ్బంది సకాలంలో ఘటనా స్థలానికి చేరుకుని మంటలను అదుపులోకి తీసుకు వచ్చారు. అంతేకాక పై అంతస్తులో చిక్కుకున్న వ్యక్తిని సైతం సురక్షితంగా కిందకు దింపడంతో అందరూ ఊపిరి పీల్చుకున్నారు. ఇళ్ల మధ్యన ప్రమాదం జరగడంతో ఘటనా స్థలానికి మూడు ఫైర్‌ ఇంజిన్లు వచ్చాయి.    

సాక్షి, ఖానాపూర్‌: పొట్ట కూటి కోసం ఎడారి దేశాలకు వలస వెళ్లిన బతుకులకు భరోసా కరువైంది. ఉన్న ఊరిలో ఉపాధి కరువై.. నెర్రెలు బారిన నేలతల్లి ఆదుకోక.. ఆర్థికంగా చితికి.. అప్పు మూటతో విదేశాలకు వెళ్లిన వారిలో మోసపోయిన వారు కొందరైతే.. తిరిగిరాని లోకాలకు చేరిన వారు మరికొందరు. నిస్సహాయ స్థితిలో ఉన్న బాధిత కుటుంబాలకు గల్ఫ్‌ మానని గాయాలు మిగిల్చింది. అక్కడ జరిగిన పలు ప్రమాదాలతో పాటు గల్ఫ్‌ ఏజెంట్ల చేతిలో మోసపోయిన వారు, వివిధ కారణాలతో మృతి చెందిన బాధిత కుటుంబాల గుండె కోత తీర్చలేనిది. ఆయా కుటుంబాలకు ప్రభుత్వాల నుంచి ఎలాంటి ఎక్స్‌గ్రేషియా రాకపోవడంతో వారంతా దీనస్థితిలో ఉన్నారు.    మోసపోతున్న కుటుంబాలు...   గల్ఫ్‌ దేశాలకు వెళ్లి మోసపోతున్న వలసజీవుల బాధలు చెప్పలేకుండా ఉన్నాయి. బోగస్‌ ఏజెంట్లు నకిలీ, విజిట్‌ వీసాలను కంపెనీ వీసాలుగా నమ్మిస్తే గంపెడాశతో అక్కడికి వెళ్లిన అనేక మంది దిక్కుతోచని స్థితిలో ఉండగా ఎంతో మంది పలు కారణాలతో మృత్యువాత పడుతున్నారు. వీటన్నింటిని నకిలీ ఏజెంట్‌ వ్యవస్థే శాసిస్తోంది. అనివార్య కారణాలతో మృతి చెందిన కుటుంబాల మృతదేహాలు సైతం స్వదేశానికి తీసుకురావడానికి ఏడాదికిపైగా బాధిత కుటుంబాలు తడారిన కళ్లతో వేచి చూడాల్సి దుస్థితి. ప్రస్తుతం రాష్ట్రంలో ఎన్నికల నేపథ్యంలో అన్ని రాజకీయ పార్టీలు గల్ఫ్‌ సమస్యలను మేనిఫెస్టోలో చేర్చి వలస కుటుంబాలకు న్యాయం చేసేలా దృష్టి సారించాలని పలువురు కోరుతున్నారు.   ఇవీ నిబంధనలు...  విదేశాల్లో ఉన్న ఉద్యోగ నియామకాలు జరిపే కంపెనీలు విధిగా కేంద్ర విదేశాంగ శాఖ లైసెన్స్‌ పొంది ఉండాలి. కేంద్రం వద్ద రూ. 50 లక్షలు డిపాజిట్‌ చేయాలి. వారికి అనుమతించిన పరిధిలోనే నియామకాలు జరపాలి. ఉద్యోగ వివరాలతో పత్రిక ప్రకటన ఇవ్వాలి. స్థానికులు, అధికారుల అనుమతి పొంది ఉండాలనే నిబంధనలు కేంద్ర ప్రభుత్వం పెట్టింది. వీటిని పాటించని కంపెనీలపై కేంద్రానికి ఫిర్యాదు చేస్తే వారి డిపాజిట్‌ జప్తుతో పాటు లైసెన్స్‌ రద్దు అవుతుంది. అయితే బహిరంగంగా నకిలీ ఏజెంట్లు నిర్వహించే ఇంటర్వ్యూలు, జారీచేసే ప్రకటనలపై స్థానిక పోలీసు, రెవెన్యూ విభాగాలు కఠినంగా వ్యవహరించడం లేదనే విమర్శలున్నాయి. గల్ఫ్‌ దేశాల్లో ఉపాధి కల్పిస్తామని, పాస్‌పోర్టులు మొదలు వీసాలు, టికెట్ల సేవలందించే పేరుతో ఏర్పాటు చేసే సంస్థల్లో బోగస్‌వే ఎక్కువ. రాష్ట్ర వ్యాప్తంగా మూడు వేల వరకు ఇలాంటి ఏజెన్సీలు ఉన్నాయి. రెండు ప్రభుత్వ కంపెనీలైనా ఉమ్మడి రాష్ట్రంలో ఏర్పాటు చేసిన ఓంకాం, స్వరాష్ట్రంలో ఏర్పాటు చేసిన టాంకాంతో పాటు 29 కంపెనీలకు మాత్రమే కేంద్ర ప్రభుత్వం ఆమోదించిన లైసెన్స్‌లు ఉన్నాయి.   తగ్గని గల్ఫ్‌ చావులు..  తెలంగాణలోని ఉమ్మడి ఆదిలాబాద్, కరీంనగర్, నిజామాబాద్, వరంగల్, మహబూబ్‌నగర్, నల్గొండ జిల్లాలోని ఎంతో మంది గల్ఫ్‌ కార్మికులు వివిధ కంపెనీల్లో పనిచేయగా, వేలాది మంది కార్మికులు వీసాలు లేకుండా కల్లివెల్లి అవుతున్నారు. గల్ఫ్‌ నుంచి వచ్చిన మృతదేహం వద్ద రోదిస్తున్న కుటుంబీకులు(ఫైల్‌)    ఉన్న ఊరిలో ఉపాధి కరువై ఆశల సౌదంలో గల్ఫ్‌ బాట పడుతున్న పలువురు అక్కడే మృత్యువాత పడుతున్నారు. రోడ్డు ప్రమాదంలో కొందరు మృతి చెందుతుండగా.. అధిక పనిబారం, వేతనం తక్కువ, కంపెనీల వేదింపులతో ఎంతో మంది గుండెపోటుకు గురవ్వడం, ఆత్మహత్యలు చేసుకోవడం, అనారోగ్యంతో మృతి చెందడం జరుగుతుంది.   ఒకే ప్రమాదంలో జిల్లాలోని   ముగ్గురు మృతి  దుబాయ్‌లోని అబుదాబికి 10 కిలోమీటర్ల దూరంలోఉన్న అల్రీమ్‌ ఐలాండ్‌లో గతేడాది అక్టోబర్‌ 19న జరిగిన అగ్ని ప్రమాదంలో తెలంగాణలోని ఐదుగురు కార్మికులు అక్కడిక్కడే కాలి బూడిద కాగా, అందులో జిల్లావాసులే ముగ్గురు ఉన్నారు. సత్తన్‌పల్లికి చెందిన ప్రకాశ్‌ మృతితో పెద్దదిక్కు కోల్పోయిన కుటుంబం     ఈ ప్రమాదంలో క్యాంపులోని రూం నెం.20లో గల నిర్మల్‌ జిల్లా ఖానాపూర్‌ మండలం  సేవానాయక్‌ తండాకు చెందిన ఎం.ప్రకాష్‌ నాయక్‌ (29), రూం నెం.30లో మామడ మండలం పొన్కల్‌కు చెందిన గాండ్ల్ల అఖిలేష్‌ (22), సారంగాపూర్‌కు చెందిన మంచాల నరేష్‌ (29) ఉండగా.. రూం నెం.17లో గల కామారెడ్డిలోని మాచారెడ్డి చౌరస్తాకు చెందిన పిట్ల నరేష్‌ (25), నిజామాబాద్‌ జిల్లా నందిపేట్‌కు చెందిన తోట రాకేశ్‌ (32)లు ఆహుతయ్యారు.   గల్ఫ్‌లోనూ నిబంధనలు తూచ్‌ ..  దుబాయిలో జరిగిన ప్రమాదంలో ఐదుగురు మృతి చెందిన ఘటనలో సదరు కంపెనీ నిబంధనలు పాటించలేదని తెలుస్తోంది. సెంచురి అనే కంపెనీకి చెందిన జిలానీ అనే క్యాంపును నిర్వాహకుల నుంచి గల్ఫ్‌ డ్యూమ్స్‌ అనే కంపెనీ అద్దెకు తీసుకుని, తన కంపెనీకి చెందిన కార్మికులకు వసతి కల్పించింది. ఈ క్యాంపు యూఏఈ ప్రభుత్వ నింబంధనల ప్రకారం లేదు. ఇది 30ఏళ్ల క్రితం నిర్మించిన రేకుల షెడ్డులో ఉంది. అక్కడి అనేక క్యాంపుల్లో గ్యాస్‌ను కాని, బయట ఆహారాన్ని గాని క్యాంపుల్లోకి అనుమతించరు. దుబాయ్‌లోని కంపెనీలో అగ్నిప్రమాద  దృశ్యం(ఫైల్‌)    అలాగే ఈ క్యాంపులో కూడా ఎలాంటి గ్యాస్‌ సిలిండర్లను, వంట చేసుకోవడానికి అనుమతించరు. క్యాంపునకు సమీపంలో ఉన్న మెస్‌లోనే వీరంతా భోజనం చేస్తారని అక్కడి కార్మికులు తెలిపారు. అయితే ఈ ప్రమాదానికి కారణం కార్బన్‌ మిథైల్, టోక్సిస్‌ గ్యాసెస్‌ అయి ఉంటాయని వీటికి చాలా వేగంగా మండే గుణం ఉంటుందని నిపుణులు అభిప్రాయపడుతున్నారు. కాబట్టి ఈ ప్రమాదానికి గ్యాస్‌సిలిండర్‌ అనే సమస్యే తలెత్తదని పేర్కొన్నారు. కేవలం షార్ట్‌సర్క్యూట్‌ కారణంతోనే కార్మికులు మృతి చెందారని సంఘటన తీరుతో తెలిసింది.  

కావలిరూరల్‌: అగ్ని ప్రమాదంలో చిక్కుకున్న మహిళను ప్రాణాలకు తెగించి ఓ అధ్యాపకుడు కాపాడారు.  పట్టణంలోని జనతాపేటకు చెందిన మాదవరపు మహేష్‌ కో ఆపరేటీవ్‌ కళాశాలలోని తన గురువు విశ్రాంత ప్రిన్సిపల్‌ రత్నజోసెఫ్‌ ఇంటికి వచారు. ఆ సమయంలో రత్నజోసెఫ్‌ ఇంటి ఎదురుగా మిద్దెపైన ఉన్న మందా వెంకటేశ్వరరావు ఇంటి నుంచి కేకలు వినిపిస్తున్నాయి. వీధిలోని వారంతా అక్కడ గుమికూడి చూడగా వంట గదిలో గ్యాస్‌ సిలిండర్‌ నుంచి మంటలు చెలరేగాయి. వెంకటేశ్వరరావు భార్య అన్నపూర్ణ మంటలను దాటుకొని బయటకు రాలేక భయంతో కేకలు వేస్తూంది. అక్కడికి చేరుకున్న వారు అగ్నిమాపకశాఖ వారికి సమాచారమందించి చూస్తూ నిలబడిపోయారు. అయితే ప్రమాదాన్ని గ్రహించిన మహేష్‌ వెంటనే మిద్దె మీదకు వెళ్లి తలుపులు నెట్టివేసి లోనికి వెళ్లాడు. అయితే మంటలు చెలరేగి పక్కనే ఉన్న ఫ్రిజ్‌కు అంటుకుంటున్నాయి. అత్యంత వేగంగా అన్నపూర్ణను చాకచక్యంగా పక్కకు తప్పించి గ్యాస్‌ సిలిండర్‌ను నెట్టేయడంతో అది పక్కకు పడిపోయింది. బెడ్‌షీటును తడిపి గ్యాస్‌ సిలిండర్‌పై వేయడంతో మంటలు ఆరిపోయాయి. గ్యాస్‌ సిలిండర్‌ రెగ్యులేటర్‌ను ఆఫ్‌ చేసి సిలిండర్‌ కిందకి తీసుకువెళ్లాడు. అగ్నిమాపక శాఖ సిబ్బంది గ్యాస్‌ సిలిండర్‌ను పరిశీలించి పూర్తిగా ప్రమాదం తప్పిందని నిర్ధారించారు. మహేష్‌ ప్రాణాలకు తెగించి ఈ సాహసం చేసి అన్నపూర్ణను కాపాడటతో పలువురు అభినందించారు.  

మిర్యాలగూడ అర్బన్‌: బంగారం దుకాణంలో ప్రమాదవశాత్తు మంటలు అంటుకుని గ్యాస్‌ సిలిండర్‌ పేలిం ది. ఈ ఘటన  పట్టణంలోని పెద్దబజారులో శుక్రవా రం చోటుచేసుకుంది. స్థానికులు, వన్‌టౌన్‌ పోలీసులు తెలిపిన వివరాల ప్రకారం.. సంధ్యజువెల్లరి దుకాణంలో నగలను తయారు చేస్తుండగా గ్యాస్‌ సిలిండర్‌ నుంచి ఒక్కసారిగా మంటలు వ్యాపించాయి. దీంతో అందులో పనిచేస్తున్న వారు భయంతో బయటకు పరుగులు తీశారు. సిలిండర్‌ ద్వారా వచ్చిన మంటలు సామగ్రికి అంటుకుని ఒక్కసారిగా భవనాన్ని కమ్మెశాయి. అనంతరం సిలిండర్‌ ఒక్కసారిగా పెద్ద శబ్దంతో పేలిపోయింది. దీంతో భవనం కుప్పకూలి పోయింది. స్థానికులు ఫైర్‌స్టేషన్‌కు సమాచారం అం దించారు. ఫైర్‌ట్యాంకర్‌ సకాలంలో రాకపోవడంతో భవనం మెత్తం కాలిబూడిదైంది. దీంతో సమాచారం అందుకున్న వన్‌టౌన్‌ సీఐ జి.వెంకటేశ్వర్‌రెడ్డి సంఘటన స్థలానికి చేరుకుని మున్సిపల్‌ అధికారులతో మా ట్లాడారు. స్పందించిన మున్సిపల్‌ అధికారులు రెండు వాటర్‌ట్యాంకర్లను రప్పించారు. స్థానికులు, ఫైర్‌స్టేషన్‌ సిబ్బంది సహకారంతో మంటలను అదుపులోకి తెచ్చారు. కాగా మంటలు విపరీతంగా చెలరేగడంతో పక్క బిల్డింగ్‌కు మంటలు వ్యాపించకుండా ముందు జాగ్రత్తగా ఇంటిని ఖాళీ చేయించారు. కాగా సంధ్యజువెల్లరి దుకానం నిర్వాహకుడు నారాయణసింగ్‌ మా ట్లాడుతూ ఆ దుకాణంలో సుమారు 40తులాల బం గారం ఉందని, సుమారు 20లక్షల ఆస్తినష్టం వాటిల్లినట్లు తెలిపారు. దుకాణం నిర్వాహకుడి ఫిర్యాదు మేరకు కేసు దర్యాప్తు చేస్తున్నట్లు సీఐ జి.వెంకటేశ్వర్‌రెడ్డి తెలిపారు. కాగా, ఘటన స్థలాన్ని తహసీల్దార్‌ కృష్ణారెడ్డి, మాజీ ఎమ్మెల్యే జూలకంటి రంగారెడ్డి పరిశీలించారు.

సాక్షి, బెంగళూరు : వంటగ్యాస్‌ సిలిండర్‌ పేలి ఇళ్లు కూలిన ఘటనలో ఆరుగురు మృత్యువాత పడగా.. పలువురు తీవ్రంగా గాయపడ్డారు. ఈ సంఘటన నగరంలోని ఎజిపురా ప్రాంతంలో సోమవారం ఉదయం ఏడు గంటల ప్రాంతంలో చోటుచేసుకుంది. రెండంతస్థుల భవనంలో వంట గ్యాస్‌ సిలిండర్‌ ఒక్కసారిగా పేలడంతో.. ఆ ధాటికి భవనం కుప్పకూలింది. దీంతో పాటు పక్కనే ఉన్న నాలుగు ఇళ్లు పాక్షికంగా దెబ్బతిన్నాయి. ఈ ప్రమాదంలో నిండు గర్భిణీ సహా ఆరుగురు మృతి చెందారు. విషయం తెలుసుకున్న అగ్నిమాపక శాఖ అధికారులు, ఎన్డీఆర్‌ఎఫ్‌ బృందాల సాయంతో శిథిలాల కింద చిక్కుకున్న వారిని బయటకు తీసేందుకు యత్నిస్తున్నారు. ఇప్పటి వరకు శిథిలాల కింది నుంచి ఇద్దరు చిన్నారులను సురక్షితంగా రక్షించారు. శిథిలాల నుంచి వెలికితీసిన మృతదేహాలను కళావతి(68), రవిచంద్రన్‌(30)లుగా గుర్తించారు. ప్రస్తుతం సహాయ చర్యలు ముమ్మరంగా సాగుతున్నాయి. విషయం తెలుసుకున్న రాష్ట్ర హోంమంత్రి రామలింగా రెడ్డి సంఘటనా స్థలానికి చేరుకొని సహాయక చర్యలను పర్యవేక్షించారు. అలాగే బెంగళూరు అభివృద్ధిశాఖ మంత్రి కేజే జార్జి... మృతుల కుటుంబాలకు రూ.5 లక్షల నష్టపరిహారాన్ని ప్రకటించారు. అలాగే  గాయపడినవారిని రూ.50వేలు చెల్లించనున్నట్లు తెలిపారు. ఈ ప్రమాదంలో తల్లిదండ్రులను కోల్పోయిన చిన్నారిని ప్రభుత్వం దత్తత తీసుకుంటుందని కేజే జార్జి పేర్కొన్నారు.

ఆదిలాబాద్‌ ,నస్పూర్‌ (మంచిర్యాల): శ్రీరాంపూర్‌ క్రిష్ణాకాలనీలోని కేడి–323 క్వార్టర్‌లో బుధవారం ఉదయం గ్యాస్‌ సిలిండర్‌ నుంచి మంటలు వెలువడిన ఘటనలో మహిళకు తీవ్రగాయాలయ్యాయి. మందమర్రి ఏరియాలోని కేకే–1 గనిలో కార్మికునిగా పనిచేసే మేకల మల్లేష్‌ భార్య సంధ్యారాణి ఇంట్లో దసరా పండుగకు బంధువులు రావడంతో పిండి వంటలు చేయడానికి సిద్ధమయ్యారు. మూకుడులో నూనె వేడి చేస్తుండగా గ్యాస్‌ అయిపోయింది. మరో సిలిండర్‌ను అమర్చి స్టౌ వెలిగిస్తుండగా ఒక్కసారిగా మంటలు లేచి ఇల్లంతా వ్యాపించాయి. దీంతో ఇంట్లో ఉన్నవారంతా ఒక్కసారిగా బయటకు పరుగుతీశారు. వంటగదిలో చిక్కుకున్న సంధ్యారాణి కేకలు వేయడంతో స్థానికులు వంటగది వెనుక కిటికీని ఊడదీసి ఆమెను బయటకు తీశారు. తీవ్రంగా గాయపడిన సంధ్యారాణిని రామకృష్ణాపూర్‌ ఏరియా ఆసుపత్రికి తరలించారు.సమాచారం అందుకున్న అగ్నిమాపక సిబ్బంది మంటలను ఆర్పివేశారు. ఈ ప్రమాదంలో ఇంట్లోని ఫ్రిజ్, ఇతర సామానులు పూర్తిగా కాలిపోయాయి. ప్రమాద స్థలాన్ని  సింగరేణి సూపర్‌బజార్‌ డీఎం ముకుంద సత్యనారాయణ సందర్శించి కారణాలను అడిగి తెలుసుకున్నారు. ఆర్‌ఐ మాధవిలత పంచనామ నిర్వహించారు.

అల్లిపురం/ పెదవాల్తేరు: జీవీఎంసీ 9వ వార్డు పాతవెంకోజిపాలెంలోని ఓ ఇంట్లో గ్యాస్‌ సిలిండర్‌ పేలిపోయింది. ఈ ఘటనలో ఎటువంటి ప్రాణనష్టం జరగకపోవడంతో అంతా ఊపిరి పీల్చుకున్నారు.  పాతవెంకోజిపాలెం గొల్లవీధిలో ఒడిశాకు చెందిన బబ్లుసాహు తన కుటుంబంతో కలసి జీవిస్తున్నాడు. ఈయన బుల్లయ్య కాలేజీ వద్ద పానిపూరి వ్యాపారం చేస్తుంటాడు. సాయంత్రం వ్యాపారం నిమిత్తం అక్కడికి వెళ్లిపోయాడు. ఆయన భార్య, బాబుతో కలిసి ఇంట్లోనే ఉంది. రాత్రి 9.30 గంటల సమయంలో వంట చేసేందుకు ఆమె స్టవ్‌ వెలిగించింది. అకస్మాత్తుగా మంటలు చెలరేగడంతో ఆమె బాబును తీసుకుని బయటకు వచ్చేసింది. చుట్టుపక్కల వారు స్పందించేలోపే మంటలు గదంతా వ్యాపించాయి. పెద్ద శబ్ధంతో గ్యాస్‌ సిలిండర్‌ పేలిపోయింది. స్థానికుల సమాచారంతో అగ్నిమాపక సిబ్బంది సంఘటనా స్థలానికి చేరుకుని మంటలను అదుపుచేశారు. ఈ సంఘటనలో సుమారు రూ.20 వేలు నగదు, ఐదు తులాల బంగారం, ఇతర సామగ్రి మొత్తం  రూ.1.50 లక్షలు నష్టం వాటిల్లిందని బాధితులు వాపోయారు. ప్రమాదం జరిగిన సమయంలో ఇంట్లో మూడు సిలండర్లు ఉన్నాయని, వాటిలో రెండు ఖాళీవి కావడంతో ప్రమాదం తప్పిందని అగ్నిమాపక దళ అధికారులు తెలిపారు. మాజీ డిప్యూటీ మేయర్‌ మల్ల అప్పలరాజు సంఘటన స్థలానికి చేరుకుని ప్రమాద విషయాన్ని తహసీల్దార్‌కు వివరించారు. 


 కామారెడ్డి: అమర్‌నాథ్‌ యాత్రలో విషాదం చోటుచేసుకుంది. కామారెడ్డి జిల్లా నుంచి అమర్‌నాథ్‌ యాత్రకు బయల్దేరిన వారి టూరిస్టు బస్సులో గ్యాస్‌ సిలిండర్‌ పేలడంతో ఒకరు మృతి చెందారు. కామారెడ్డి పట్టణం, రాజంపేట, మద్దికుంట చుట్టుపక్కల ప్రాంతాలకు చెందిన 30మంది అమర్‌నాథ్‌ యాత్రకు ప్రైవేటు ట్రావెల్స్‌ బస్సులో బయలుదేరారు.
 గురువారం సాయంత్రం జమ్ము నుంచి శ్రీనగర్‌ వెళ్తుండగా కుల్‌గా జిల్లా ఖాజీగఢ్‌ ప్రాంతంలో బస్సులో సిలిండర్‌ పేలింది. తొమ్మిదిమందికి గాయాలు కాగా, వారు అనంత్‌నాగ్‌ ఆస్పత్రిలో చికిత్స పొందుతున్నారు. సదాశివనగర్ జెడ్పీటీసీ రాజేశ్వర్ రావు ఈ విషయాన్ని జిల్లాకు చెందిన వ్యవసాయ శాఖ మంత్రి పోచారం శ్రీనివాస్ రెడ్డి దృష్టికి తీసుకెళ్లగా ఆయన కేంద్ర అధికారులకు సమాచారం అందించారు. తమ వారి పరిస్థితిపై ఆయా కుటుంబాల వారు ఎప్పటికప్పుడు ఫోన్‌లు చేసి సమాచారం తెలుసుకుంటున్నారు.


 విజయనగరం: విజయనగరం జిల్లాలోని బాడంగి మండలం ఎరుకులపాకలో విషాద సంఘటన చోటు చేసుకుంది. ప్రమాదవశాత్తు వంట గ్యాస్‌ సిలిండర్‌ పేలిన ఘటనలో ఓ బాలుడు మృతి చెందాడు. గ్రామానికి చెందిన ఓ ఇంట్లో గురువారం మధ్యాహ్నం గ్యాస్‌ సిలిండర్‌ పేలింది. పేలుడు ధాటికి ఇళ్లు కూలిపోవడంతో పాటు పెద్ద ఎత్తున మంటలు ఎగిసి పడటంతో ఇంట్లో ఉన్న వేణు(10) అనే బాలుడు అక్కడికక్కడే మృతిచెందాడు. విషయం తెలుసుకున్న అగ్నిమాపక సిబ్బంది సంఘటనా స్థలానికి చేరుకొని మంటలను అదుపులోకి తీసుకొచ్చారు


 కంకిపాడు : కృష్ణాజిల్లాలో ఆదివారం ఘోర అగ్నిప్రమాదం సంభవించింది. కంకిపాడు మండలం మంతెన గ్రామంలో గ్యాస్‌ సిలిండర్ లీకై 120 గుడిసెలు అగ్నికి ఆహుతయ్యాయి. నల్లగొండ జిల్లా రామచంద్రపురం నుంచి చెరకు నరికేందుకు నెలరోజుల కిందట 150 కుటుంబాలు మంతెనకు వచ్చాయి. ఇక్కడే చెరకు తోట పక్కన వున్న ఖాళీ స్థలంలో తాత్కాలిక గుడిసెలు వేసుకుని నివాసం ఉంటున్నారు.
 
 ఆదివారం ఉదయం కూలీలు పనులకు వెళ్లిన సందర్భంలో ఓ గుడిసెలోని గ్యాస్ సిలెండర్ లీకై భారీగా మంటలు చెలరేగాయి. మంటలు మిగతా గుడిసెలకు కూడా వ్యాపించడంతో 120 గుడిసెలు అగ్నికి ఆహుతయ్యాయి. గుడిసెల్లో ఉన్న తొమ్మిది సిలెండర్లు కూడా పేలడంతో మంటలు భారీగా ఎగిసిపడ్డాయి. ప్రమాదం జరిగినప్పుడు ఎవరూ లేకపోవడంతో ప్రాణనష్టం తప్పింది. సమాచారం అందుకున్న ఫైర్‌ సిబ్బంది రంగంలోకి దిగి మంటలను అదుపులోకి తీసుకువచ్చారు.
  


 యాదాద్రి :  యాదాద్రి జిల్లాలో శనివారం తెల్లవారుజామున గ్యాస్‌ సిలిండర్‌ పేలిన ఘటనలో ముగ్గురికి తీవ్రగాయాలయ్యాయి. బీబీనగర్‌ మండలం ఇందిరమ్మ కాలనీలో ఈ ప్రమాదం సంభవించింది.
 
 ఎస్సై సురేష్‌కుమార్‌ తెలిపిన వివరాల ప్రకారం.. కాలనీకి చెందిన పెద్దపాటి లచ్చిరెడ్డి ఇంట్లో వంట చేస్తుండగా శనివారం తెల్లవారుజామున ప్రమాదవశాత్తు గ్యాస్‌ సిలిండర్‌ పేలింది. ఈ ఘటనలో లచ్చిరెడ్డి, అతని భార్య రాజమ్మకు తీవ్రగాయాలు కాగా.. లక్ష్మికి స్వల్ప గాయాలయ్యాయి. పెద్ద శబ్ధం రావడాన్ని గమనించిన స్థానికులు బాధితులను చికిత్స నిమిత్తం భువనగిరి ఏరియా ఆస్పత్రికి తరలించారు. పోలీసులు సంఘటనా స్థలానికి చేరుకొని ప్రమాద వివరాలు సేకరించారు. పేలుడు ధాటికి ఇళ్లు పాక్షికంగా దెబ్బతింది.


 శంషాబాద్ రూరల్: వంట గ్యాస్ సిలిండర్ పేలిన ఘటనలో ముగ్గురికి తీవ్ర గాయాలయ్యాయి. ఈ సంఘటన రంగారెడ్డి జిల్లా శంసాబాద్ రూరల్ మండలం పెద్దతూప్రలో శుక్రవారం చోటు చేసుకుంది. గ్రామానికి చెందిన సత్తయ్య ఇంట్లో అతని భార్య లక్ష్మమ్మ వంట చేస్తున్న సమయంలో ప్రమాదవశాత్తు గ్యాస్ సిలిండర్ పేలింది. దీంతో సత్తయ్య, లక్ష్మమ్మలతో పాటు నర్సింహ అనే వ్యక్తికి తీవ్ర గాయాలయ్యాయి. ఇది గుర్తించిన స్థానికులు వారిని చికిత్స నిమిత్తం ఆస్పత్రికి తరలించి పోలీసులకు సమాచారం అందించారు. 


 
  ప్రమాద సమయంలో వందమందికి పైగా విద్యార్థులు
 
 నలుగురికి గాయాలైనట్లు ప్రచారం
 
 టీడీపీ నాయకుడి కాలేజీ కావడంతో గోప్యత పాటిస్తున్న వైనం
 
  
 కావలిరూరల్‌ : తరగతి గదిలో గ్యాస్‌ సిలిండర్‌ పేలిన సంఘటన పట్టణంలోని జనతాపేటలో ఉన్న శ్రీనివాస జూనియర్‌ కాలేజీలో మంగళవారం తెల్లవారుజామున చోటుచేసుకుంది. వివరాలు.. కాలేజీ మూడో అంతస్తులో ఉన్న తరగతి గదిలో వందమందికి పైగా ఇంటర్మీడియట్‌ విద్యార్థులు కూర్చొని చదువుకుంటున్నారు. ఐదుగంటల ప్రాంతంలో అక్కడే కాలేజీ సిబ్బంది టీ తయారుచేయడం ప్రారంభించారు. ఈ క్రమంలో గ్యాస్‌ లీకైనట్లుగా విద్యార్థులు గుర్తించి చూడగా సిలిండర్‌ వద్ద మంటలు రేగాయి. ఒక్కసారిగా ఉలిక్కిపడ్డ విద్యార్థులు పుస్తకాలు వదిలి కిందకు పరుగులు తీశారు. అంతలోనే పెద్దశబ్దంతో సిలిండర్‌ పేలింది. గది కిటికీ అద్దాలు తునాతునకలయ్యాయి. పుస్తకాలు కాలిపోయాయి. ఫైర్‌ సిబ్బంది వచ్చి మంటలు చెలరేగకుండా అదుపుచేశారు. 
  టీడీపీ నాయకుడిది కావడంతో..
  కళాశాల పట్టణానికి చెందిన ఓ టీడీపీ నాయకుడిది కావడంతో కొందరు నాయకులు అక్కడకు చేరుకుని ప్రమాద వివరాలను గోప్యంగా ఉంచేందుకు ప్రయత్నించారు. మీడియా ప్రతినిధులను కళాశాలలోకి పోనివ్వకుండా అడ్డుకున్నారు. కళాశాల సిబ్బందిని మాట్లాడకుండా చేశారు. ప్రమాదం ఎలా జరిగింది? ఎవరైనా గాయపడ్డారా? తదితర వివరాలు బయటకు రాకుండా పట్టణస్థాయి నాయకుడు దగ్గరుండి చూసుకున్నారు. కాగా నలుగురు విద్యార్థులకు గాయాలయ్యాయని వారిని కారులో నెల్లూరు తరలించారని ప్రచారం జరిగింది. చికిత్స పొందుతున్న వారిలో ఇద్దరు మరణించారని పుకార్లు వచ్చాయి. అయితే వివరాలను మాత్రం కాలేజీ యాజమాన్యం వెల్లడించడంలేదు. ఈ ఘటనపై పోలీసులకు సమాచారం లేదు. 
  


 సిద్ధిపేట : కొమరవెల్లి జ్యువెలరీ షాపులో బుధవారం తెల్లవారుజామున విషాదం చోటు చేసుకుంది. పనివారు బంగారు ఆభరణాలు తయారు చేస్తుండగా సిలిండర్ పేలింది. ఈ ఘటనలో ఇద్దరు వ్యక్తులు తీవ్రంగా గాయపడ్డారు. స్థానికులు వెంటనే స్పందించి... వారిని సమీపంలోని ఆసుపత్రికి తరలించారు. వారి పరిస్థితి విషమంగా ఉందని వైద్యులు వెల్లడించారు. ఈ ఘటనపై సమాచారం అందుకున్న పోలీసులు ఘటన స్థలికి చేరుకున్నారు.  ఆ తర్వాత పోలీసులు కేసు నమోదు చేసి దర్యాప్తు చేస్తున్నారు.


 హైదరాబాద్ : ప్రమాదవశాత్తు గ్యాస్ సిలిండర్ పేలిన ఘటనలో ఐదుగురు తీవ్రంగా గాయపడ్డారు. నగరంలోని నేరేడ్‌మెట్ కృప కాంప్లెక్స్ సమీపంలో గురువారం ఉదయం ఈ పేలుడు సంభవించింది. కృష్ణాపైప్ లైన్ లీకేజి మరమ్మత్తుల్లో భాగంగా గ్యాస్ సిలిండర్‌తో కార్మికులు పని చేస్తున్నారు. ఈ సమయంలో సిలిండర్ ప్రమాదవశాత్తు పేలింది. దీంతో ఐదుగురు కార్మికులు గాయపడ్డారు. స్థానికులు వెంటనే స్పందించి.. వారిని సమీపంలోని ఆసుపత్రికి తరలించారు.


 రాజమండ్రి: తూర్పుగోదావరి జిల్లాలో ఆదివారం తెల్లవారు జామున అగ్నిప్రమాదం సంభవించింది. ఏటపాక మండలం నెల్లిపాక గ్రామంలో చీమల శ్రీనివాసరావు అనే వ్యక్తి ఇంటిలో ఒక్కసారిగా మంటలు చెలరేగాయి.
 
 మంటల వేడికి ఇంట్లోని గ్యాస్ సిలిండర్ పేలిడంతో మంటలు భారీగా ఎగిసిపడ్డాయి. స్థానికులు మంటలు ఆర్పేందుకు ప్రయత్నించినా ఫలితం లేకుండా పోయింది. అగ్ని మాపక సిబ్బందికి సమాచారం ఇవ్వడంతో వారు వచ్చి మంటలను అదుపులోకి తీసుకువచ్చారు. ఈ సంఘటనలో భారీగా ఆస్తి నష్టం జరిగిందని బాధితుడు తెలిపాడు. అగ్నిప్రమాదానికి కారణాలు తెలియరాలేదు. సిలిండర్ పేలుడుకు ఇల్లు పూర్తిగా ధ్వంసమైంది. ఆ శబ్దానికి గ్రామస్తులందరూ భయభ్రాంతులకు గురయ్యారు.


 అనంతపురం: అనంతపురం లోని నవోదయ కాలనీలో ఓ ఇంట్లో ప్రమాదవ శాత్తూ గ్యాస్ సిలిండర్ పేలింది. గురువారం జురిగిన ఈ ఘటనలో ఓ మహిళ మృతి చెందగా.. మరో ఇద్దరికి గాయాలయ్యాయి. పేలుడు ధాటికి ఇంటి పై కప్పు కూలిపోయింది. క్షతగాత్రులను చికిత్స నిమిత్తం జిల్లా ఆసుపత్రికి తరలించారు.
  
  
  
 
  


 ముప్పాళ్ల (గుంటూరు జిల్లా) : ముప్పాళ్ల మండలం చాగంటివారిపాలెంలో ఓ ఇంట్లో గ్యాస్ సిలిండర్ పేలింది. ఈ ప్రమాదంలో మారూరి ముత్యమ్మ(50) అనే మహిళకు తీవ్రగాయాలయ్యాయి. ఈ ఘటన శనివారం మధ్యాహ్నం చోటుచేసుకుంది. చికిత్స నిమిత్తం బాధితురాలిని స్థానిక ఆస్పత్రికి తరలించారు.


 చిట్టినగర్: విజయవాడలో విషాదం చోటుచేసుకుంది. వన్ టౌన్‌లోని సొరంగం ప్రాంతంలో ఓ ఇంట్లో సోమవారం తెల్లవారుజామున గ్యాస్ సిలిండర్ పేలడంతో వృద్ధురాలికి తీవ్ర గాయాలు అయ్యాయి.
 
 అప్పారావు, సూర్యనారాయణమ్మ(65) దంపతులు స్థానికంగా నివాసం ఉంటున్నారు. ఉదయాన్నే సూర్యనారాయణమ్మ ఇంట్లో టీ పెట్టేందుకు గ్యాస్ స్టవ్ వెలిగించింది. అప్పటికే గ్యాస్ లీకేజీ ఉండడంతో ఒక్కసారిగా పేలుడు సంభవించి మంటలు అంటుకున్నాయి. స్థానికులు మంటలను ఆర్పివేసి తీవ్రంగా గాయపడిన సూర్యనారాయణమ్మను ప్రభుత్వ ఆస్పత్రికి తరలించారు. గ్యాస్ సిలిండర్ పేలుడు దాటికి వారి ఇళ్లు కూడా పాక్షికంగా దెబ్బతింది.


 ఖాజీపేట: వైఎస్సార్ జిల్లాలో విషాదం చోటుచేసుకుంది. ఖాజీపేట మండలం వాసవీభవన్ దగ్గర శుక్రవారం తెల్లవారుజామున ఓ ఇంట్లో ప్రమాదవశాత్తూ సిలిండర్ పేలి భార్యభర్తలకు తీవ్రగాయాలయ్యాయి.
 ఈ ఘటనలో భర్త అనిల్‌కు స్వల్పగాయాలు కాగా భార్య సుజాతకు తీవ్రగాయాలయ్యాయి. పరిస్థితి విషమంగా ఉండటంతో మెరుగైన చికిత్స నిమిత్తం కడప రిమ్స్ ఆసుపత్రి నుంచి కర్నూలు ప్రభుత్వాసుపత్రికి తరలించారు. పేలుడు ధాటికి ఇల్లు పూర్తిగా ధ్వంసమైంది. పూర్తి వివరాలు తెలియాల్సి ఉంది.
  


 చిత్తూరు: చిత్తూరులో గురువారం తెల్లవారుజామున విషాదం చోటుచేసుకుంది. స్థానిక ధర్మరాజులుగుడి వీధిలో ఓ ఇంట్లో ప్రమాదవశాత్తు గ్యాస్ సిలిండర్ పేలింది. ఈ ప్రమాదంలో ఇద్దరు మరణించగా.. మరో ఇద్దరికీ తీవ్ర గాయాలయ్యాయి.
 ఇంటిలో నిద్రిస్తున్న బీబీ(52) అనే మహిళ అక్కడికక్కడే మృతిచెందింది. గమనించిన స్థానికులు గాయపడిన మరో ముగ్గురిని ఆసుపత్రికి తరలించారు. ఆసుపత్రిలో చికిత్స పొందుతూ మరొకరు చనిపోయారు. పూర్తి వివరాలు తెలియాల్సి ఉంది.


 ముంబయి: ముంబయిలో గ్యాస్ సిలిండర్ పేలి ఎనిమిది మంది మృతి చెందారు.  కుర్లా వెస్ట్ ఏరియాలోని హోటల్ సిటీ కినరలో శుక్రవారం మధ్యాహ్నం ఈ దుర్ఘటన చోటుచేసుకుంది. ఈ సంఘటనలో 8మంది మృతి చెందగా, పలువురు గాయపడినట్లు ముంబై మున్సిపల్ కార్పొరేషన్ అధికారులు తెలిపారు. క్షతగాత్రులను సమీప ఆస్పత్రికి తరలించారు.
  
 మరోవైపు సమాచారం అందుకున్న పోలీసులు ఘటనా స్థలానికి చేరుకుని పరిస్థితిని సమీక్షిస్తున్నారు. మృతుల్లో ఎక్కువమంది హోటల్ సిబ్బంది ఉన్నట్లు పోలీసులు తెలిపారు.  సంఘటనా స్థలానికి చేరుకున్న అగ్నిమాపక సిబ్బంది మంటలను అదుపు చేశారు. ప్రస్తుతం పరిస్థితి అదుపులో ఉంది. ఇందుకు సంబంధించి పూర్తి వివరాలు తెలియాల్సి ఉంది.


 సిద్దిపేట రూరల్(మెదక్): ప్రమాదవశాత్తు ఇంట్లో ఉన్న గ్యాస్ సిలిండర్ పేలడంతో ఒకరు గాయాలపాలైన సంఘటన సిద్దిపేట పట్టణంలో ఆదివారం సాయంత్రం చోటుచేసుకుంది. స్థానిక సాజిద్‌పురలోని మహ్మద్ గౌసుద్దీన్‌కు చెందిన భవనంలోని మూడో అంతస్తులో ఉంటున్న ఫరానాబేగం అలియాస్ రఫియాబేగం ఇంటికి ఆదివారం మధ్యాహ్నం కొత్త గ్యాస్ సిలిండర్ డెలివరీ అయింది. వంట చేసేందుకు ఆమె పొయ్యి వెలిగించగా గ్యాస్ లీకవుతూ మంటలు చెలరేగాయి.
 
 దీంతో రఫియాబేగంతో పాటు ఇంట్లో ఉన్న వారు బయటకు పరుగులు తీశారు. ఈ క్రమంలో రఫియా గాయపడింది. స్థానికుల సమాచారం మేరకు అక్కడికి చేరుకున్న ఫైర్‌ఇంజన్‌తో మంటలు అదుపులోకి వచ్చాయి. అప్పటికే ఇంట్లోని సామగ్రి అంతా కాలిపోయింది. ఈ ఘటనపై పోలీసులు కేసు నమోదు చేశారు. ప్రమాదంతో సుమారు రూ. 4లక్షల ఆస్తి నష్టం వాటిల్లినట్లు బాధితులు తెలిపారు. గ్యాస్ ఏజెన్సీ నిర్లక్ష్యం వల్లే గ్యాస్ లీకైందని వారు అరోపిస్తున్నారు.


 మిర్యాలగూడ: నల్లగొండ జిల్లా మిర్యాలగూడ మండలం తాళ్లగడ్డలో సోమవారం గ్యాస్ సిలిండర్ పేలి ముగ్గురు తీవ్రంగా గాయపడ్డారు. ఓ ఇంట్లో గ్యాస్ సిలిండర్ పేలడంతో ఈ ఘటన చోటుచేసుకుంది.
 
 క్షతగాత్రులను సమీపంలోని ఆస్పత్రికి తరలించారు. వీరి పరిస్థితి విషమంగా ఉంది.


 విశాఖపట్నం జిల్లా సాలిగ్రామపురంలోని ఇంట్లో బుధవారం ప్రమాదవశాత్తు గ్యాస్ సిలిండర్ పేలింది. దాంతో ఇంట్లో నుంచి భారీగా మంటలు ఎగసిపడుతున్నాయి. స్థానికులు వెంటనే స్పందించి అగ్నిమాపక సిబ్బంది, పోలీసులకు సమాచారం అందించారు. అగ్నిపమాక సిబ్బంది హుటాహుటిన సంఘటన స్థలానికి చేరుకుని మంటలు ఆర్పుతున్నాయి. పోలీసులు సహాయక చర్యలు చేపట్టారు. ఆ ఘటనలో ముగ్గురు మృతి చెందినట్లు పోలీసులు తెలిపారు. మృతులు సుల్తానా (40), సోఫియా (17), షఫీ (8)లుగా గుర్తించినట్లు చెప్పారు.
 
 ఇంటి యజమాని మొయినుద్దీన్ విశాఖపట్నం పోర్టులో కళాసిగా విధులు నిర్వహిస్తున్నాడని పోలీసులు వివరించారు. అయితే ఇంట్లో షార్ట్ సర్క్యూట్ కారణంగా మంటలు చెలరేగి ఉంటాయని... ఆ క్రమంలోనే గ్యాస్ సిలిండర్ పేలిందని పోలీసులు అనుమానిస్తున్నారు. అయితే ఆ ప్రమాదానికి షార్ట్ సర్క్యూల్ కారణం కాదని విద్యుత్ సిబ్బంది వెల్లడించారు. అయితే ప్రమాద ఘటన పలు అనుమానాలకు తావిచ్చేదిగా ఉందని  నగర ఏసీపీ మహేష్ విలేకర్లుకు వెల్లడించారు. దాంతో ఇంటి యజమాని మొయినుద్దీన్ను అదుపులోకి తీసుకుని విచారిస్తున్నట్లు చెప్పారు. తనకు ప్రమాదం ఎలా జరిగిందో తెలియదని అతడు పోలీసులకు వెల్లడించాడు. పోలీసులు కేసు నమోదు చేసి దర్యాప్తు చేస్తున్నారు.  


 చిత్తూరు జిల్లా శ్రీకాళహస్తి బి. అగ్రహారంలో ఓ ఇంట్లో మంగళవారం ఉదయం వంట చేస్తుండగా గ్యాస్ సిలిండర్ పేలింది. ఆ ఘటనలో ముగ్గురు తీవ్రంగా గాయపడ్డారు. స్థానికులు వెంటనే స్పందించి క్షతగాత్రులను తిరుపతి తరలించారు. వారిలో ఒకరి పరిస్థితి విషమంగా ఉందని వైద్యులు వెల్లడించారు.


 చెన్నై : చెన్నైలో గురువారం భారీ అగ్నిప్రమాదం సంభవించింది. తెలుగువారు అధికంగా నివసించే చెన్నై రాజా అన్నామలైపురం పక్స్‌రోడ్డులో భారీ ప్రమాదం జరిగింది. ప్లాస్టిక్ గోడౌన్‌లో నిల్వ ఉంచిన గ్యాస్ సిలిండర్లు పేలడంతో ఒక్కసారిగా మంటలు రాజుకున్నాయి. మంటలు అత్యంత వేగంగా వ్యాపించటంతో అప్పటికే కొన్ని ఇళ్లు కాలిపోయాయి.
 వెంటనే అగ్ని మాపక దళ సిబ్బందికి సమాచారమివ్వడంతో వారు సంఘటనాస్థలానికి చేరుకున్నారు. అయిదు ఫైరింజన్లతో నాలుగు గంటలపాటు శ్రమించి మంటలను అదుపు చేశారు.. అదృష్టవశాత్తు ఎలాంటి ప్రాణనష్టం జరగలేదు. కాగా సుమారు నాలుగుకోట్ల ఆస్తినష్టం జరిగి ఉంటుందని అంచనా.


 నందిగామ : ప్రమాదవశాత్తు గ్యాస్‌ సిలిండర్‌ పేలి కృష్ణాజిల్లాలో దంపతులు తీవ్ర గాయాలపాలయ్యారు. నందిగామ మండలం కేతవీరునిపాడులో ఈ సంఘటన చోటుచేసుకుంది. గ్రామానికి చెందిన పల్లి పుష్పలత గ్యాస్‌ లీకేజీని గమనించకుండా స్టౌ వెలిగించడంతో అది పేలిపోయింది. ఈ ప్రమాదంలో పుష్పలతతో పాటు భర్త వెంకటేశ్వర్లకు గాయాలయ్యాయి. పుష్పలత పరిస్థితి విషమంగా ఉండటంతో ఆమెను చికిత్స నిమిత్తం విజయవాడ ప్రభుత్వ ఆస్పత్రికి తరలించారు. భర్త వెంకటేశ్వర్లు పరిస్థితి మెరుగ్గా ఉందని వైద్యులు తెలిపారు.