సాక్షి, వైఎస్సార్‌: వైఎస్సార్‌సీపీ ప్రభుత్వ హయాంలో మద్యం బ్రాండ్‌లపై చంద్రబాబు విష ప్రచారం చేశారని ఆరోపించారు వైఎస్సార్‌సీపీ మాజీ ఎమ్మెల్యే రాచమల్లు శివ ప్రసాద్‌ రెడ్డి. రాష్ట్రంలో మద్యం ధరలు తగ్గిస్తామన్న చంద్రబాబు హామీ ఏమైంది? అని ప్రశ్నించారు. అలాగే, ఏపీలో గతంలో ఉన్న బ్రాండ్సే ప్రస్తుతం ఏపీ వైన్‌ షాపుల్లో ఉన్నాయి.వైఎస్సార్‌సీపీ మాజీ ఎమ్మెల్యే రాచమల్లు గురువారం మీడియాతో మాట్లాడుతూ..‘ఎన్నికల సమయంలో మందుబాబులను రెచ్చగొట్టి చంద్రబాబు లబ్ధి పొందారు. ఎన్నికలు అయ్యాక మద్యం ధరలు తగ్గిస్తామని మోసం చేశారు. వైఎస్సార్‌సీపీ ప్రభుత్వ హయాంలో మద్యం బ్రాండ్‌లపై చంద్రబాబు విష ప్రచారం చేశారు. గతంలో ఉన్న బ్రాండ్స్‌ ప్రస్తుతం ఏపీ వైన్‌ షాపుల్లో ఉన్నాయి. మా ప్రభుత్వ హయాంలో ఉన్న ధరలే ఇప్పుడూ ఉన్నాయి. మద్యం ధరలు తగ్గిస్తామన్న చంద్రబాబు హామీ ఏమైంది? అని ప్రశ్నించారు.వైఎస్‌ జగన్ ప్రభుత్వంలో అధిక ధరలన్నాడు.. నాణ్యత లేదన్నాడు. ఆడ పిల్లల మంగళ సూత్రాలు తెంపుతాడు.. మీ ఆరోగ్యం గోవింద అన్నాడు. అధికారంలోకి వచ్చాక ఇచ్చిన హామీలన్నీ మర్చిపోయాడు. 99 రూపాయలకే మద్యం అన్నాడు.. కానీ ఆ చీఫ్ లిక్కర్ మాత్రం దొరకడం లేదు. మీరిచ్చిన మాట ప్రకారం ధరలు ఎక్కడ తగ్గించారు?. జగన్ ప్రభుత్వంలో అది విషం.. ఇప్పుడు అదే మందు అమృతం అవుతుందా?. ఇప్పుడు ఆడ బిడ్డల మెడలో తాళిబొట్టు తెగవా?. మేము ఓడిపోవడానికి ప్రధాన కారణం మద్యం తాగే సోదరులే. వారితో ఓటు వేయించుకుని అధికారంలోకి వచ్చి ఇప్పుడు వారిని కూడా బాబు మోసం చేశాడు.చంద్రబాబు ఇచ్చే చీఫ్ లిక్కర్ 99కి అమ్మితే.. అదే మందు కేరళలో 85కి ఇస్తున్నారు. దానికి తోడు ఈ చీఫ్ లిక్కర్ నాణ్యమైనది కాదనేది నా అభిప్రాయం. కొన్ని ఏళ్లు ఈ మద్యం తాగితే వారి ఆరోగ్యం తప్పకుండా చెడిపోతుంది. చివరికి మద్యం వ్యాపారులను కూడా మోసం చేశారు. వారికి 20 శాతం మార్జిన్ అని చెప్పి ఇప్పుడు 9.5శాతం మార్జిన్ ఇస్తున్నాడు. విచ్చలవిడిగా బెల్టు షాపులు వెలిశాయి.. అధిక ధరలకు మద్యం అమ్ముతున్నారు. మా ప్రభుత్వంలో 47వేల బెల్టు షాపులు రద్దు చేస్తే మళ్ళీ వాటిని తెరిచి విచ్చలవిడిగా అమ్ముతున్నారు. మద్యం షాపులు సంఖ్య తగ్గించి పర్మిట్ రూమ్స్ లేకుండా చేశాం. కానీ, మళ్ళీ చంద్రబాబు పాత రోజులు తెచ్చి మద్యాన్ని ఏరులై పారిస్తున్నారు

సాక్షి ప్రతినిధి, కడప: రాష్ట్రంలో పరిశ్రమలు తెస్తా­మంటూ ఎన్నికల్లో ఊదరగొట్టిన కూటమి నేతలు.. అధికారంలోకి వచ్చిన తర్వాత కొత్త పరిశ్రమలు తేకపోగా, ఉన్న వాటిని కూడా వెళ్లగొట్టేలా దుశ్చర్యలకు పాల్పడుతున్నారు. వారి అరాచకా­లకు భయపడి పారిశ్రామికవేత్తలు రాష్ట్రంలో యూనిట్ల ఏర్పాటుకు వెనకడుగు వేస్తున్నారు. ఇప్పటికే సినీ నటి కాదంబరి జత్వానీని అడ్డం పెట్టుకొని కూటమి నేతలు పన్నిన కుట్రతో రాష్ట్రంలో భారీ పెట్టుబడులకు సిద్ధమైన ప్రముఖ జెఎస్‌డబ్ల్యూ జిందాల్‌ గ్రూప్‌ వెనకడుగు వేసింది. గత నెలలో టీడీపీ ఎమ్మెల్యే సోమిరెడ్డి చంద్ర­మోహన్‌రెడ్డి తన అనుచరులతో కలిసి కృష్ణపట్నం పోర్టు దగ్గర అదానీ గ్రూపు ఉద్యోగులపై దాడికి పాల్పడ్డారు. తాజాగా వైఎస్సార్‌ జిల్లా జమ్మల మడుగులో అక్కడి ఎమ్మెల్యే వర్గీయులు అదానీ ప్రాజెక్టులో విధ్వంసానికి దిగారు. దీంతో దేశంలో అతి పెద్ద పారిశ్రామిక సంస్థల్లో ఒకటైన అదానీ గ్రూపే రాష్ట్రమంటేనే భయపడే పరిస్థితి తలెత్తింది. ప్రతి పనికీ కమీషన్లు ఇవ్వాలని, పనులు తమకే ఇవ్వాలంటూ పలువురు ఎమ్మెల్యేలు చేస్తున్న దాడులు పారిశ్రామికవేత్తల్లో వణుకు పుట్టిస్తు­న్నాయి. ప్రభుత్వ పెద్దలు కూడా ఎమ్మెల్యేల దుశ్చర్యలను అడ్డుకోకపోవడం పలు అనుమానా­లకు తావిస్తోంది. ఈ తీరు రాష్ట్రానికి భారీ నష్టాన్ని కలగజేస్తుందని పారిశ్రామికవేత్తలు అంటున్నారు. ఇదీ జరిగింది..వైఎస్సార్‌ జిల్లాలో గండికోట ప్రాజెక్టు ఆధారంగా వెయ్యి మెగావాట్ల సామర్థ్యంతో హైడ్రో పవర్‌ ప్రాజెక్టు ఏర్పాటుకు వైఎస్సార్‌సీపీ ప్రభుత్వం సంకల్పించింది. ఈ ప్రాజెక్టు అదానీ సంస్థకు దక్కింది. తొలి విడతగా రూ.1,800 కోట్లతో అదానీ సంస్థ నిర్మాణానికి శ్రీకారం చుట్టింది. టెండర్లలో అనకాపల్లి ఎంపీ సీఎం రమేష్‌కు చెందిన రిత్విక్‌ కన్‌స్ట్రక్షన్స్‌ సంస్థకు సివిల్‌ పనులు దక్కాయి. పనులు కూడా మొదలు పెట్టారు. ఈ పనులు తమకే ఇవ్వాలని జమ్మలమడుగు ఎమ్మెల్యే ఆదినారాయణరెడ్డి పట్టుబట్టారు. అయినా స్పందన లేకపోవడంతో మంగళవారం ఎమ్మెల్యే ఆది­నారాయణరెడ్డి సోదరుడు శివనారాయణరెడ్డి, మరో సోదరుడి కుమారుడు రాజేష్‌రెడ్డి నేతృత్వంలో భారీ సంఖ్యలో ఎమ్మెల్యే వర్గీయులు ప్రాజెక్టు వద్ద విధ్వంసం సృష్టించారు. అక్కడి సిబ్బందిపై దాడి చేసి, వాహనాలను ధ్వంసం చేశారు. దీంతో అక్కడి ఉద్యోగులు, ప్రజల్లో భయాందోళన నెలకొంది. ఇక్కడ పనులు కూడా చేసుకునే పరిస్థితి లేదంటూ రిత్విక్‌ కన్‌స్ట్రక్షన్స్‌ ప్రతినిధి, ఎంపీ సీఎం రమేష్‌ సోదరుడు రాజేష్‌నాయుడు బుధవారం సీఎం చంద్ర­బాబుకు ఫిర్యాదు చేసినా ఎటువంటిస్పందనా రాలేదు. ఎంపీ సీఎం రమేష్, ఎమ్మెల్యే ఆదినారాయణరెడ్డి మధ్య జరుగుతున్న ఘర్షణ మొత్తం ప్రాజెక్టు పైనే పడుతుందని స్థానికులు ఆందోళన వ్యక్టం చేస్తున్నారు. ఇప్పటికే ఎమ్మెల్యే వర్గీయుల విధ్వంసంతో అదానీ సంస్థకు నష్టం కలిగిందని, నాయకుల మధ్య ఈ దందాలు ఇలాగే కొనసాగితే ప్రాజెక్టు కొనసాగుతుందో, ఆగిపోతుందోనని స్థానికులు అనుమానాలు వ్యక్తం చేస్తున్నారు.ఆగిపోయిన జిందాల్‌ స్టీల్‌ పరిశ్రమవైఎస్సార్‌సీపీ ప్రభుత్వ హయాంలో రాష్ట్రంలో భారీగా పెట్టుబడులు పెట్టడానికి ప్రముఖ సంస్థ జేఎస్‌డబ్ల్యూ జిందాల్‌ గ్రూప్‌ ముందుకు వచ్చింది. వైఎస్సార్‌ జిల్లాలో భారీ స్టీల్‌ ప్లాంట్‌ ఏర్పాటుతోపాటు మరికొన్ని భారీ పెట్టుబడులు పెట్టాలని కూడా నిర్ణయించింది. కూటమి ప్రభుత్వం అధికారంలోకి వచ్చిన తర్వాత సినీ నటి కాదంబరి జత్వానీ పేరుతో దారుణంగా కేసులు పెట్టించి, రాష్ట్రంలో ఆ గ్రూపు పెట్టుబడులు పెట్టకుండా కూటమి పెద్దలు అడ్డుకొంటున్నారు. దీంతో ఆ గ్రూపు ఇప్పుడు రాష్ట్రం వైపు చూడటానికే జంకుతోంది. వైఎస్సార్‌ జిల్లాలో స్టీల్‌ పరిశ్రమ నిలిచిపోయింది.కృష్ణపట్నం పోర్టు వద్ద సోమిరెడ్డి దాడులుగత నెలలో కృష్ణపట్నం పోర్టు సిబ్బందిపై టీడీపీ ఎమ్మెల్యే సోమిరెడ్డి చంద్రమోహన్‌ రెడ్డే స్వయంగా దాడికి పాల్పడ్డారు. పోర్టులో కంటైనర్‌ టెర్మినల్‌ పునరుద్ధరణపై మాట్లాడుతానంటూ తన అనుచరులతో కలిసి పోర్టుకు వెళ్లిన సోమిరెడ్డి.. అక్కడి అదానీ సంస్థ ఉద్యోగులను దూషిస్తూ దాడికి దిగారు. పోర్టు డీజీఎంపైనా దౌర్జన్యానికి దిగారు. ఈ ఘటన పారిశ్రామిక, వాణిజ్య వర్గాల్లో ఆందోళన కలిగించింది.అదానీ పవర్‌ ప్రాజెక్టుపై దాడి ఘటనలో కేసు నమోదుకొండాపురం: అదానీ సంస్థ హైడ్రో పవర్‌ ప్రాజెక్టుపై మంగళవారం జరిగిన దాడి ఘటనకు సంబంధించి కొందరిపై కేసు నమోదు చేసినట్లు తాళ్లప్రొద్దుటూరు ఎస్‌ఐ హృషికేశ్వర్‌రెడ్డి తెలిపారు. అదానీ సంస్థకు చెందిన రామకృష్ణ, రిత్విక్‌ కన్‌స్ట్రక్షన్‌ కంపెనీ ప్రతినిధుల ఫిర్యాదు మేరకు ఈ కేసు నమోదు చేశామన్నారు.

కలెక్టర్‌ శ్రీధర్‌ చెరుకూరి కడప సెవెన్‌రోడ్స్‌: కిశోర బాలికలు మానసికంగా, శారీరకంగా పరిపూర్ణ మహిళగా ఎదిగితేనే అన్ని రకాలుగా ఆరోగ్యకరమైన భావితరాన్ని, సమాజాన్ని అందివ్వగలుగుతారని కలెక్టర్‌ శ్రీధర్‌ చెరుకూరి పేర్కొన్నారు. బుధవారం కలెక్టరేట్‌లోని సభాభవన్‌లో మహిళాభివృద్ధి, శిశు సంక్షేమ శాఖ ఆధ్వర్యంలో నిర్వహించిన ‘కిశోరీ వికాసం‘పై జిల్లా స్థాయి శిక్షకుల శిక్షణా కార్యక్రమానికి ఆయన ముఖ్య అతిథిగా హాజరై ప్రసంగించారు. ఈ సందర్భంగా ఆయన మాట్లాడుతూ తల్లిదండ్రులు పిల్లలతో స్నేహపూర్వకంగా మెలుగుతూ విలువలను పెంపొందించేలా అవగాహన పెంపొందించాల్సిన అవసరం ఉందన్నారు. టీనేజ్‌ బాలికలపై వారి చుట్టూ ఉన్న వారి ప్రభావం అధికంగా ఉంటుందన్నారు. ఈ వయస్సు బాలికలకు శారీరక, మానసిక స్థితిపై ఖచ్చితంగా అవగాహన పెంచాల్సిన అవసరం ఉందన్నారు. అందుకోసం గ్రామస్థాయిలో మనకు చేరువలో ఉన్న మహిళా పోలీసు, ఐసీడీఎస్‌ శాఖకు సంబంధించిన కౌన్సిలర్లు ఆ ప్రాంతంలోని కిశోరి బాలికలతో ఒక గ్రూపు తయారుచేసి వారి తల్లిదండ్రుల సమక్షంలో వాట్సా ప్‌ గ్రూపును క్రియేట్‌ చేయాలన్నారు. వారితో స్నేహ పూర్వకంగా ఉంటూనే వారి శారీరక, మానసిక స్థితిగతులపై ప్రత్యేక అవగాహన కల్పించాలన్నారు. అంగన్వాడీ కేంద్రాల్లో ఇంటి పరిధిలో అందిబాటులో ఉన్న 23,000 మంది కిశోరి బాలికలను గుర్తించామన్నారు వీరికి అవగాహన కల్పించే క్రమంలో కిశోరీ వికాసం కార్యక్రమాన్ని నిర్వహించడం జరుగుతోందన్నారు. మహిళలపై, చిన్నపిల్లలపై వేధింపులు, బాల్య వివాహాలు, మహిళలపై అఘాయిత్యాలు, నేరాలను అరికట్టే దిశగా ప్రజల్లో అవగాహన పెంచాలన్నారు. మహిళలూ, చిన్నారులపై లైంగిక దాడులు, నేరాలు, అఘాయిత్యాలు సంబంధిత కేసుల నమోదు శాతాన్ని ‘0‘ స్థాయికి తీసుకువచ్చేందుకు సంబంధిత అధికారులు సమన్వయంతో పని చేయాలని కలెక్టర్‌ తెలిపారు. ఐసీడీఎస్‌ పీడీ శ్రీలక్ష్మీ కిశోర బాలికల వికాసంపై మాట్లాడారు. ఈ కార్యక్రమంలో జెడ్పీ సీఈఓ ఓబులమ్మ, ఐసీడీఎస్‌ ఆర్జేడీ రోహిణి, డీఆర్డీఏ, మెప్మా పీడీలు ఆనంద్‌ నాయక్‌, సురేష్‌ రెడ్డి, డీఈవో మీనాక్షి, సోషల్‌ వేల్ఫేర్‌ డీడీ సరస్వతీ, సఖి సిబ్బంది, ఎన్జీవో ప్రతినిధులు, ప్రత్యేక పబ్లిక్‌ ప్రాసికూటర్లు, సఖి, ఐసీడీఎస్‌ సిబ్బంది పాల్గొన్నారు.

సిద్దవటం: మండలంలోని మాధవరం–1 గ్రామ పంచాయతీలోని ఎస్‌కేఆర్‌ నగర్‌లోని చేనేత క్లస్టర్‌ ప్రహరీ పనులను బుధవారం హౌసింగ్‌ పీడీ రాజారత్నం పరిశీలించారు. ఆయన మాట్లాడుతూ గత ప్రభుత్వంలో ఆన్‌లైన్‌ టెండర్‌ ద్వారా రూ. 49 లక్షలకు బద్వేల్‌కు చెందిన ఓబుల్‌రెడ్డి పనులు చేయడానికి టెండర్‌ దక్కించుకున్నారన్నారు. చేనేత క్లస్టర్‌ చుట్టూ ప్రహరీ, బిల్డింగ్‌ పనులు, టాయిలెట్‌ గదులు, మెయిన్‌టెనెన్స్‌ పనులు పూర్తి చేయాలని ఆయన అన్నారు. స్థానిక కమిటీ సభ్యుడు గంజి సుబ్బరాయుడు, హౌసింగ్‌ ఏఈ చెన్నయ్య పాల్గొన్నారు.

కడప కల్చరల్‌: ఐదు రోజులపాటు జరిగిన కడప పెద్ద దర్గా ఉరుసు ఉత్సవాలు ముగిశాయి. ఇందులో భాగంగా దర్గా పీఠాధిపతి హజరత్‌ సయ్యద్‌షా ఆరీఫుల్లా హుసేనీ సాహెబ్‌ బుధవారం రాత్రి నగరోత్సవాన్ని కడప నగరంలో అత్యంత వైభవంగా నిర్వహించారు. ఉదయం ఫకీర్లు, ఇతర శిష్య గణాలతో కలిసి పీఠాధిపతి పెద్దదర్గా నుంచి పెన్నానది అటువైపు తీరాన గల గండి వాటర్‌ వర్క్స్‌ కొండ గుహల వద్దకు వెళ్లి జెండా ప్రతిష్ఠించి ఫాతెహా నిర్వహించారు. తర్వాత ఆ ప్రాంతంలో హజరత్‌ మస్తాన్‌స్వామి స్మారకంగా అన్నదానం నిర్వహించారు. సాయంత్రం అక్కడి నుంచి ఊరేగింపుగా కడప నగరానికి తిరిగి వచ్చారు. పలు వాహనాలలో ఆయన శిష్యులు, ప్రముఖులు ఆయన వెంట వాహనాలలో ఊరేగింపులో పాల్గొన్నారు. రాత్రి మాసాపేటలోని హజరత్‌ మై అల్లా దర్గా షరీఫ్‌ వద్ద నుంచి పీఠాధిపతి ఫకీర్లు, సంఘ ప్రతినిధులతో కనుల పండువగా విద్యుద్దీపాలు, పూలతో అలంకరించిన ప్రత్యేక వాహనంపై నగరంలో ఊరేగింపుగా బయలుదేరారు. ముస్లిమేతరులు కూడా ఈ కార్యక్రమంలో పెద్ద ఎత్తున పాల్గొన్నారు. అడుగడుగునా యువకుల బృందాలు ఆయనకు స్వాగతం పలికి ఆశీస్సులు పొందారు. ఆయనను దర్శించుకునేందుకు భక్తులు వెల్లువెత్తారు. నగరంలోని పలు ముఖ్య కూడళ్ల ద్వారా సాగిన ఈ ఊరేగింపులో అడుగడుగునా యువత బ్యాండు మేళాల సంగీతానికి యువకులు తమ ఉత్సాహాన్ని ప్రదర్శిస్తూ నృత్యాలు చేశారు. ఊరేగింపు తెల్లవారుజామున తిరిగి దర్గాకు చేరింది.

కమలాపురం : స్థానిక బీఆర్‌ అంబేడ్కర్‌ బాలికల గురుకుల పాఠశాలలో 7వ తరగతి చదువుతున్న అను అనే విద్యార్థిని పీఈటీగా పని చేస్తున్న చంద్ర కళావతి చితక బాదిన ఘటన ఆలస్యంగా వెలుగు చూసింది. ఈ నెల 18వ తేదీన ఇంటర్మీడియట్‌ విద్యార్థులు అన్నం తిన్న తర్వాత అరటి తొక్కలు ఎక్కడ పడితే అక్కడ వేయకుండా చూసేందుకు కేర్‌టేకర్‌గా అను అనే విద్యార్థిని మరో ఉపాధ్యాయురాలు నియమించారు. అయితే అక్కడున్న పీఈటీ చంద్ర కళావతి నీకు ఇంటర్మీడియట్‌ విద్యార్థుల వద్ద ఏం పని ఉందని వీపు పై చితక బాదారు. అలాగే చెంప మీద కొట్టబోయారు. ఆ సమయంలో అను చేయి అడ్డం పెట్టడంతో గాజు తగులుకుని విద్యార్థిని చేతికి గాయమైంది. అలాగే చేయి కూడా నొప్పిగా ఉందని బాధిత విద్యార్థిని కన్నీటి పర్యంతమైంది. విషయం తెలుసుకున్న విద్యార్థిని తల్లిదండ్రులు బ్రహ్మయ్య, గంగాదేవిలు బుధవారం పాఠశాలకు చేరుకుని ఆందోళనకు దిగారు. సోమవారం ఘటన జరిగితే మంగళవారం సాయంత్రం వరకు తమకు సమాచారం అందించలేదని ఆగ్రహం వ్యక్తం చేశారు. అసలు పీఈటీకి కొట్టే బాధ్యత ఎవరిచ్చారని వారు ప్రశ్నించారు. నెల రోజుల క్రితం ఇదే పాఠశాలలో చదువుతున్న చిన్న కుమార్తె గీతాంజలి బాత్‌ రూంలో జారి పడి చేయి విరిగిందని, అప్పుడు కూడా వారం రోజులకు సమాచారం ఇచ్చారని, అప్పుడు తాము హాస్పిటల్‌కు తీసుకెళ్లి వైద్య సేవలు అందించామన్నారు. కాగా, పాఠశాలలో ఉన్న ఇద్దరు పీఈటీల మధ్య మనస్పర్థలే ఇందుకు కారణం అని విశ్వసనీయం సమాచారం. పేరేంట్స్‌ కమిటీ జిల్లా అధ్యక్షుడు భాస్కర్‌ మాట్లాడుతూ ఇద్దరు పీఈటీలకు షోకాజ్‌ నోటీసులు ఇవ్వాలని డిమాండ్‌ చేశారు. లేదా డీసీఓకు వారిని సరెండర్‌ చేయాలన్నారు. ఈ విషయమై ప్రిన్సిపల్‌ తులశమ్మను వివరణ కోరగా విద్యార్థినిని కొట్టిన మాట వాస్తవమేనని, అయితే విద్యార్థిని చేయి అడ్డం పెట్టడం వలన చేతికి చిన్న గాయం అయిందన్నారు. అప్పుడే ఆసుపత్రికి తరలించి వైద్య సేవలు అందించామన్నారు. ఘర్షణకు కారణమైన ఇద్దరు పీఈటీలకు షోకాజ్‌ నోటీసులు ఇస్తామన్నారు.ఆందోళనకు దిగిన తల్లిదండ్రులు

కడప స్పోర్ట్స్‌: జిల్లాస్థాయి ఎస్‌జీఎఫ్‌ క్రీడా ఎంపికలు శుక్రవారం నిర్వహించనున్నట్లు డీఈఓ మీనాక్షి, ఎస్‌జీఎఫ్‌ జిల్లా కార్యదర్శి బి. అరుణకుమారి ఒక ప్రకటనలో తెలిపారు. ఈనెల 22న ఓబులవారపల్లె మండలం ముక్కవారిపల్లె ఏపీ రెసిడెన్షియల్‌ పాఠశాలలో త్రోబాల్‌ అండర్‌–14, అండర్‌–17 బాలబాలికల ఎంపికలు నిర్వహించనున్నట్లు తెలిపారు. అలాగే ఈనెల 22న పెద్దచెప్పలి జెడ్పీ హైస్కూల్‌లో బీచ్‌ వాలీబాల్‌ అండర్‌–14, అండర్‌–17 బాలబాలికల ఎంపికలు నిర్వహిస్తున్నట్లు తెలిపారు. త్రోబాల్‌ ఎంపికలకు ఫిజికల్‌ డైరెక్టర్‌ ప్రదీప్‌ను 7981472484 నెంబర్‌లో, బీచ్‌ వాలీబాల్‌ ఎంపికలకు ఎల్‌.ఎ. సునీల్‌ను 98497 20930 నెంబర్‌లో సంప్రదించాలని కోరారు. 23న కబడ్డీ జిల్లాస్థాయి ఎంపికలు కడప స్పోర్ట్స్‌: కడప నగరంలోని డీఎస్‌ఏ క్రీడామైదానంలో ఈనెల 23న జిల్లాస్థాయి కబడ్డీ సీనియర్‌ విభాగం ఎంపికలు నిర్వహించనున్నట్లు జిల్లా కబడ్డీ అసోసియేషన్‌ అధ్యక్ష, కార్యదర్శులు ఓ. రవీంద్రారెడ్డి, ఆర్‌. వెంకటసుబ్బయ్య, ఆర్గనైజింగ్‌ సెక్రటరీ టి. శ్రీవాణి తెలిపారు. జిల్లా జట్టుకు ఎంపికయ్యే క్రీడాకారులు డిసెంబర్‌ 5 నుంచి 8వ తేదీ వరకు ప్రకాశం జిల్లా సంతనూతలపాడులో నిర్వహించే రాష్ట్రస్థాయి పోటీల్లో పాల్గొనాల్సి ఉంటుందని తెలిపారు. పూర్తి వివరాలకు 63043 09294, 9949304160 నెంబర్లలో సంప్రదించాలని కోరారు. 24న రాష్ట్రస్థాయి ఓపెన్‌ ప్రైజ్‌మనీ చెస్‌ టోర్నమెంట్‌ కడప స్పోర్ట్స్‌: కడప నగరంలోని ఇంటర్నేషనల్‌ ఫంక్షన్‌హాల్‌లో ఈనెల 24వ తేదీ రాష్ట్రస్థాయి ఓపన్‌ ప్రైజ్‌మనీ చెస్‌ టోర్నమెంట్‌ నిర్వహించనున్నట్లు జిల్లా చెస్‌ అసోసియేషన్‌ కార్యదర్శి బి. అనీస్‌దర్బారీ తెలిపారు. టోర్నీ విజేతలకు రూ.53 వేల మేర నగదు బహుమతులు, ట్రోఫీలు, మెడల్స్‌ అందజేయనున్నట్లు తెలిపారు. పోటీలకు హాజరయ్యే క్రీడాకారులకు ఉచిత భోజన సదుపాయం, సర్టిఫికెట్లు ప్రదానం చేయనున్నట్లు తెలిపారు. ఈ పోటీలకు చీఫ్‌ ఆర్బిటర్లుగా ఎం.గోపీనాథ్‌, రామ్‌లు హాజరవుతారని తెలిపారు. వీరితో పాటు రాష్ట్రంలోని చెస్‌ అసోసియేషన్‌ ప్రతినిధులు, క్రీడాకారులు హాజరవుతున్నట్లు తెలిపారు. పూర్తి వివరాలకు 83412 55151 నెంబర్‌లో సంప్రదించాలని కోరారు. సమస్యల పరిష్కారానికి కృషి చేస్తాంకడప ఎడ్యుకేషన్‌: జిల్లాలో ఉండే మండల విద్యాశాఖాధికారులు –1 సమస్యల పరిష్కారానికి కృషి చేస్తామని ఎంఈఓ–1 నూతన అసోసియేషన్‌ జిల్లా నూతన అధ్యక్ష, ప్రధాన కార్యదర్శులు దిద్దకుంట గంగిరెడ్డి, పద్మలత పేర్కొన్నారు. బుధవారం కడపలో జరిగిన ఎంఈఓ–1 జిల్లా సమావేశం సందర్భంగా జిల్లా ఎంఈఓ–1 అసోసియేషన్‌ జిల్లా నూతన కమిటీని ఏకగ్రీవంగా ఎన్నుకున్నారు. ఇందు లో ఎంఈఓ–1 అసోసియేషన్‌ జిల్లా అధ్యక్షుడి గా దిద్దకుంట గంగిరెడ్డి(కడప ఎంఈఓ–1) ప్రధాన కార్యదర్శిగా పద్మలత(మైదుకూరు), గౌరవాధ్యక్షుడిగా విలియమ్స్‌రాజ్‌ (అట్లూరు) ట్రెజరర్‌గా జీఎల్‌వీఎస్‌ శివప్రసాద్‌ (ఎర్రగుంట్ల)లను ఏకగ్రీవంగా ఎన్నుకున్నారు. రిమ్స్‌ సూపరింటెండెంట్‌ రాజకీయ బదిలీ కడప సెవెన్‌రోడ్స్‌: కడప సూపర్‌ స్పెషాలిటీ ఆస్పత్రి జీజీహెచ్‌ సూపరింటెండెంట్‌ (ఎఫ్‌ఏసీ)గా పనిచేస్తున్న డాక్టర్‌ ఎం.సురేశ్వర్‌రెడ్డిపై రాజకీయ బదిలీ వేటు పడింది. ఆయన్ను బదిలీ చేస్తూ రాష్ట్ర హెల్త్‌ మెడికల్‌ అండ్‌ ఫ్యామిలీ వెల్ఫేర్‌ శాఖ బుధవారం జీఓ ఆర్‌టీ నెంబరు 701 విడుదల చేసింది. ఆయనను పాడేరు జీఎంసీలో జనరల్‌ మెడిసిన్‌ ప్రొఫెసర్‌గా బదిలీ చేశారు. డైరెక్టర్‌ ఆఫ్‌ మెడికల్‌ ఎడ్యుకేషన్‌ ప్రతిపాదనల మేరకు బదిలీ చేసినట్లు ప్రభుత్వం తమ ఉత్తర్వుల్లో పేర్కొన్నారు. రిమ్స్‌ డెంటల్‌ కళాశాలలో ఇటీవల జరిగిన ఓ కార్యక్రమానికి కడప ఎమ్మెల్యే మాధవీరెడ్డి హాజరయ్యారు. అక్కడ అధికారులు తమకు ప్రోటోకాల్‌ పాటించలేదని ఆమె ఆగ్రహం వ్యక్తం చేశారు. ఇటీవల కలెక్టరేట్‌లో ఇన్‌ఛార్జి మంత్రి సవిత అధ్యక్షతన జరిగిన జిల్లా సమీక్షా కమిటీ సమావేశంలో ఎమ్మెల్యే మాధవీరెడ్డితోపాటు ఎమ్మెల్సీ రామగోపాల్‌రెడ్డి ఈ అంశాన్ని ప్రస్తావించారు. ఈ నేపధ్యంలో సురేశ్వర్‌రెడ్డిపై బదిలీ వేటు పడింది. నిజానికి ఈ వ్యవహారంలో ఎలాంటి సంబంధం లేని ఆయనను రాజ కీయ కక్షతో బదిలీ చేశారనే విమర్శలు వినబడుతున్నాయి.

జమ్మలమడుగు : పందుల తరలింపులో పట్టణంలో ఉద్రిక్తత నెలకొంది. పోలీసులు, మున్సిపల్‌ సిబ్బందిపై పందుల యజమానులు రాళ్లతో దాడికి పాల్పడ్డారు. ఈ సంఘటన బుధవారం ముద్దనూరు రోడ్డులో రిపబ్లిక్‌ క్లబ్బు సమీపంలో జరిగింది. ప్రజా ఆరోగ్యం దృష్ట్యా పందులను తరలించాలని మున్సిపల్‌ అధికారులు పందుల పెంపకందారులకు నోటీసులు ఇచ్చారు. నెలరోజుల క్రితమే మున్సిపల్‌ కమిషనర్‌ వెంకట్రామిరెడ్డి నోటీసులు ఇవ్వడంతోపాటు వారం రోజుల క్రితం స్వయంగా వెళ్లి పందులను తరలించకపోతే చట్టపరమైన చర్యలు తీసుకుంటామని హెచ్చరించారు. అయినా పందుల పెంపకందారులు స్పందించలేదు. దీంతో మున్సిపల్‌ అధికారులు పట్టణంలోని పందులను పట్టుకుని తరలించే ప్రయత్నం చేశారు. విషయం తెలుసుకున్న పందుల యజమానులు, మహిళలు ఒక్కసారిగా ముద్దనూరు రహదారిలో ఉన్న మినీ లారీపై దాడి చేశారు. సీసాలలో పెట్రోల్‌ తీసుకుని వచ్చి వాహనంపై పోసి నిప్పు అంటించారు. అడ్డుకున్న పోలీసులపై రాళ్లతో దాడికి దిగారు. డ్రైవర్‌కు తీవ్ర గాయాలు.. పందులను ఇతర ప్రాంతాలకు తరలించే ప్రయత్నంలో పందుల యజమానులు ఒక్కసారిగా పెట్రోల్‌ బాటిళ్లతో దాడి చేసి మినీలారీకి నిప్పుపెట్టడంతో డ్రైవర్‌ ప్రసాద్‌కు గాయాలయ్యాయి. స్థానికులు వెంటనే స్పందించి మంటలను ఆర్పేశారు. గాయపడిన డ్రైవర్‌ను జమ్మలమడుగు ప్రభుత్వాసుపత్రికి తరలించారు. పోలీసులు మినీలారీని పోలీసు స్టేషన్‌కు తరలించారు. పోలీసులు, మున్సిపల్‌ అధికారులపై రాళ్లదాడి

జమ్మలమడుగు: పెన్నానదిలో ఈ ఏడాదిలో అత్యధికంగా 14.9 టీఎంసీల నీరు ప్రవహించినట్లు అధికారులు వెల్లడించారు. ఈ ఏడాది సెప్టెంబర్‌ నెలలో గండికోట జలాశయం నుంచి మైలవరం జలాశయంలోకి నీటి విడుదల చేస్తూ వచ్చారు. నిజానికి జిల్లాలో ఈ ఏడాది సరైన వర్షాలు పడకున్నా శ్రీశైలం ప్రాజెక్టు నుంచి గాలేరు–నగరి వరద కాలువ ద్వారా భారీగా వరదనీరు వచ్చి చేరింది. దీంతో మైలవరం ప్రాజెక్టు నుంచి పెన్నానదిలోనికి భారీగా నీరు విడుదల చేశారు. రెండు నెలల్లో దాదాపు 15 టీఎంసీల నీరు విడుదల చేసినట్లు అధికారులు స్పష్టం చేశారు. నాలుగేళ్లలో 112టీఎంసీల ప్రవాహం.. మైలవరం జలాశయం నుంచి పెన్నానదిలోనికి రికార్డు స్థాయిలో వరద నీరు ప్రవహించింది. 2020 నుంచి 2024 వరకు 112 టీఎంసీల నీరు పెన్నానదిలోనికి విడుదల చేశారు. 2021 నవంబర్‌ నెలలో ఏకంగా లక్షా 55వేల క్యూసెక్కుల నీరు పెన్నానదిలో ప్రవహించి రికార్డుగా నిలిచింది. ఇక అత్యల్పంగా 2023లో ఏడు టీఎంసీల నీరు ప్రవహించింది. 2020లో 31 టీఎంసీలు, 22లో 16టీఎంసీలు, 24నవంబర్‌ వరకు దాదాపు 15టీఎంసీల నీరు ప్రవహించింది. ప్రస్తుతం నీటి ప్రవాహం వల్ల పెన్నానదిలో బోర్లు రీచార్జ్‌ అవ్వడంతోపాటు, వ్యవసాయ బోర్లకు నీరు లభ్యత పెరిగింది. పెన్నానది పరీవాహక ప్రజలకు తాగునీటి సమస్య కొంత వరకు తగ్గిపోయింది. మైలవరంలో ఆరు టీఎంసీల నీరు నిల్వ... మైలవరం జలాశయం పూర్తి నీటి సామర్థ్యం 6.5టీఎంసీ కాగా ప్రస్తుతం జలాశయంలో ఆరు టీఎంసీలకు పైగా నీరు నిల్వ ఉంది. గత సెప్టెంబర్‌ మొదటి వారం వరకు మైలవరం జలాశయం డెడ్‌స్టోరేజి వచ్చే పరిస్థితి ఉండది. వరద నీటితో ఇప్పుడు పూర్తిస్థాయి నీటి మట్టం వరకు వచ్చింది. మైలవరం జలాశయం కింద సాగుచేసే పంటలకు రబీసీజన్‌లో నీటి సమస్య తలెత్తినప్పుడు పంటలకు నీరు అందించటానికి కూడా ఆస్కారం వచ్చింది. ఈ రెండు నెలల్లోనే 14.9 టీఎంసీల నీటి ప్రవాహం 2021లో నీటి ప్రవాహం ఇప్పటికీ రికార్డే 14.9 టీఎంసీల నీరు విడుదల చేశాం మైలవరం జలాశయం నుంచి రెండు నెలల కాలంలో పెన్నానదికి 14.9టీఎంసీల నీరు విడుదల చేశాం. ప్రస్తుతం మైలవరం జలాశయంలో 6.1టీఎంసీల నీరు నిల్వ ఉంది. రాబోయే రోజుల్లో వర్షాలు పడి జలాశయంలోనికి నీరు వస్తే మళ్లీ పెన్నాలోనికి నీటిని విడుదల చేసే అవకాశాలు ఉన్నాయి. – మూర్తి, డీఈఈ, మైలవరం జలాశయం

కడప కల్చరల్‌ : గ్రంథాలయాలు మనిషి మానసిక సామాజిక వికాసానికి ఎంతగానో తోడ్పడగలవని జిల్లా విద్యాశాఖాధికారి మీనాక్షి అన్నారు. 57వ జాతీయ గ్రంథాలయ వారోత్సవాల ముగింపు సభను బుధవారం సీపీ బ్రౌన్‌ భాషా పరిశోధన కేంద్రంలో నిర్వహించారు. తొలుత గ్రంథాలయ ఉద్యమకారుల చిత్రపటాలకు పూలమాలలు వేసి నివాళులర్పించారు. అనంతరం డీఈఓ మాట్లాడుతూ విద్యార్థులకు పుస్తకాన్ని మించిన గురువు, మిత్రుడు మరొకరు ఉండరని అవి జీవితానికి అవసరమైన విలువలను నేర్పుతాయన్నారు. జిల్లా గ్రంథాలయ సంస్థ కార్యదర్శి ఎస్‌.అమీరుద్దీన్‌ కార్యదర్శి నివేదిక సమర్పించారు. సభాధ్యక్షుడు విద్యావేత్త అలపర్తి పిచ్చయ్య చౌదరి మాట్లాడుతూ పుస్తక పఠనం మానవతా విలువలను నేర్పుతుందన్నారు. బ్రౌన్‌ భాషా పరిశోధన కేంద్రం సంచాలకులు ఆచార్య జి.పార్వతి మాట్లాడుతూ సెల్‌ఫోన్ల వల్ల బాలలకు కీడే జరుగుతోందని, పుస్తక పఠనమే మంచి మార్గమని అభిప్రాయపడ్డారు. జిల్లా ఆడిట్‌ అధికారి పి.మంజులవాణి, వయోజన విద్యాధికారి మల్లు సుబ్బారెడ్డి మాట్లాడారు. బహుమతి ప్రదానం ఈ సందర్భంగా గ్రంథాలయ వారోత్సవాలలో వారం రోజులపాటు హైస్కూల్‌ విద్యార్థులకు నిర్వహించిన పలు రకాల పోటీలలో విజేతలైన విద్యార్థులకు అతిథులు బహుమతులను ప్రదానం చేశారు. గ్రంథాలయ కార్యదర్శి అమీరుద్దీన్‌ ఆధ్వర్యంలో సిబ్బంది బాబ్జి, సుబ్రమణ్యం, పవన్‌ కుమార్‌, రాజ్‌ కుమార్‌, శ్రీనివాసచారి, మనోహర్‌ అతిథులను సత్కరించారు.పలు పాఠశాలలకు చెందిన విద్యార్థులు ఉపాధ్యాయులు పాల్గొన్నారు.ముగిసిన జిల్లా గ్రంథాలయ వారోత్సవాలు

కడప కోటిరెడ్డిసర్కిల్‌ : ఏపీఎస్‌ ఆర్టీసీ ప్రయాణికుల సమస్యలను పరిష్కరిస్తామని జిల్లా ప్రజా రవాణాధికారి పొలిమేర గోపాల్‌రెడ్డి తెలిపారు. బుధవారం సాయంత్రం డయల్‌ యువర్‌ ఆర్‌ఎం కార్యక్రమాన్ని నిర్వహించారు. పలువురు ప్రయాణికులు తమ సమస్యలు, సలహాలు తెలిపారు. ● సాయంత్రం 6 గంటల తర్వాత చిన్నమండెం బస్టాండులోకి మదనపల్లె, పుంగనూరు బస్సులు రావడం లేదని స్థానికుడైన పెద్దిరెడ్డి తెలిపారు. ● కడప కార్గోలో సాయంత్రం 5 నుంచి రాత్రి 9 గంటల వరకు బుకింగ్‌ సందర్భంగా విపరీతమైన రద్దీ దృష్ట్యా అదనపు బుకింగ్‌ కౌంటర్‌ను ఏర్పాటు చేయాలని నగరానికి చెందిన రామయ్య, పెంచలయ్యకోరారు. ● సిద్దయ్యగారి మఠానికి బస్సులు నడవడం లేదని కడపకు చెందిన వెంకట చలపతి కోరారు. ● కమలాపురం బస్టాండులో బస్సుల సమయాలను ఏర్పాటు చేయాలని రాజేశ్వర్‌రెడ్డి కోరారు. ● ఉదయం 6.30 నుంచి 7.30 గంటల మధ్యలో వేంపల్లె–నందిమండలం నుంచి పులివెందులకు పల్లె వెలుగు బస్సులు ఏర్పాటు చేయాలని ఆయా ప్రాంతాలకుచెందిన సతీష్‌, సుఫియాన్‌లు కోరారు. ● కడప–బెంగళూరు సర్వీసులను మదనపల్లె, చింతామణి బస్టాండుల మీదుగా నడపాలని, అలాగే బెంగళూరులోని సిల్క్‌ బోర్డు, యలహంక, వైట్‌ ఫీల్డ్‌, ఎలక్ట్రానిక్‌ సిటీ వరకు బస్సులు నడపాలని మదనపల్లెకు చెందిన సాయి శ్రీనివాస్‌ కోరారు. ● మైదుకూరు నుంచి ప్రొద్దుటూరుకు తిరుగుతున్న పల్లె వెలుగు బస్సులు అల్లాడుపల్లె దేవళాలు మీదుగా నడపాలని సీతారాంపురానికి చెందిన వెంకటేశ్వరరరెడ్డి కోరారు. ● బద్వేలు, జమ్మలమడుగు డిపోల నుంచి విజయవాడకు వయా పామూరు, కందుకూరు మీదుగా బస్సు ఏర్పాటు చేయాలని, అలాగే పులివెందుల, నూజివీడు సర్వీసును వయా పామూరు, కందుకూరు మీదుగా, పులివెందుల నుంచి ఒంగోలుకు వయా పామూరు, కందుకూరు మీదుగా, కడప నుంచి మైదుకూరు, పామూరు బస్సు సర్వీసును పునరుద్ధరించాలని పామూరుకు చెందిన విష్ణు, నరసింహారావులు కోరారు.ఆర్‌ఎం గోపాల్‌రెడ్డి

వేంపల్లె : ఇంటి అవసరాలకు ఇసుక తీసుకెళ్తున్న వారిని టీడీపీ నాయకులు అడ్డుకుంటున్నారు. వివరాలు ఇలా.. మండలంలోని గ్రామాల వారు ఇంటి అవసరాల కోసం ఇసుకను తీసుకెళ్లవచ్చని తహసీల్దార్‌ హరినాథ్‌ రెడ్డి సూచించారు. అయితే గ్రామ సచివాలయాలలో తమ ఇంటి నిర్మాణం కోసం ఇసుకను తీసుకెళ్తున్నట్లు అర్జీ పెట్టుకోవాలన్నారు. వారికి సచివాలయ సిబ్బంది కూపన్‌ ఇస్తారని తెలిపారు. కాగా కూపన్‌ తీసుకొని వస్తున్న ట్రాక్టర్లను కూడా తీసుకెళ్లనీయకుండా టీడీపీ నాయకులు అడ్డుకుంటున్నారు. బుధవారం ఉదయం పాపాఘ్ని నదిలో ఇసుకను తీసుకెళ్తున్న 10 ఇసుక ట్రాక్టర్లను అడ్డుకున్నారు. ఈ ప్రాంతంలో ఇసుకను తరలిస్తే తాగునీటికి, సాగునీటికి ఇబ్బంది పడతామని సాకు చెబుతున్నారు. రాత్రివేళల్లో మాత్రం యథేచ్ఛగా టీడీపీ నాయకులు ఇసుకను తరలించడం గమనార్హం. వీరు ఇష్టానుసారంగా ఇసుకను తరలిస్తున్నా పోలీసులు, రెవెన్యూ అధికారులు చూసీ చూడనట్లు వ్యవహరిస్తున్నారు. ఇంటి అవసరాల కోసం లబ్ధిదారులు ఇసుకను తీసుకువెళ్లొద్దని అడ్డుకోవడం... రెవెన్యూ అధికారులకు పట్టించి జరిమానాలు విధించడం చేస్తున్నారని కొందరు ట్రాక్టర్‌ యజమానులు ఆవేదన వ్యక్తం చేస్తున్నారు.

వ్యవసాయం భారంగా మారుతున్న వేళ ఆయిల్‌పాం సాగు సాయంగా నిలుస్తోంది. నిత్యం కష్టాలు..నష్టాలతో అలిసిపోయిన సీమ రైతుల కళ్లల్లో ఆశలు నింపడానికి బిరబిరా వస్తోంది. వర్షాల్లేక.. పంటలు రాక బీడుగా కనిపించే సీమ చేలల్లో ఆయిల్‌పామ్‌ నిండుగా కనిపిస్తోంది. ● ‘ఆయిల్‌ పామ్‌’ సాగుతో సిరులు! ● జిల్లాలో 500 ఎకరాల్లో సాగుకు శ్రీకారం ● ఇప్పటికే 150 ఎకరాల్లో సాగు.. 4 ఏళ్ల నుంచి దిగుబడి ● పంట సాగుకు ప్రభుత్వం ప్రోత్సాహం ● హెక్టారుకు రూ. 71 వేల చొప్పున నాలుగేళ్లపాటు ఆర్థికసాయం నాలుగేళ్లపాటు పామ్‌ ఆయిల్‌ తోటలను జాగ్రత్తగా పెంచితే ఆ తరువాత 30 ఏళ్లపాటు రైతుకు నిరంతర లాభాలను తెచ్చిపెడుతుంది. నేల సారాన్ని బట్టి ఎకరాలకు 8 నుంచి 12 టన్నుల వరకు దిగుబడి వచ్చే అవకాశం ఉంటుంది. దీంతోపాటు ఎలాంటి చీడపీడల బెడద ఉండదు. నీటి వసతి అనుకూలంగా ఉన్న వారు బోరు బావుల కింద సాగు చేసుకోవచ్చు. సాధారణంగా ఒక ఎకరం వరిసాగుకు అవసరమయ్యే నీటితో 3,4 ఎకరాల్లో ఆయిల్‌ పామ్‌ను సాగు చేసుకోవచ్చు. అలాగే మొదటి నాలుగేళ్లలో అంతర్‌ పంటల సాగుతో రైతులు ఆర్థికంగా లబ్ధి పొందవచ్చు. కాగా ప్రస్తుతం టన్ను ధర సుమారు 17 వేలు ఉంది.కడప అగ్రికల్చర్‌: పెరిగిన ధరలు, సాగు ఖర్చులతో నేడు వ్యవసాయం రైతన్నలకు భారంగా మారు తోంది. ఆరుగాలం కష్టపడి పంటలు సాగు చేస్తు న్నా ఏదో విధంగా నష్టాలను చవి చూడాల్సి వస్తోంది. ఈ కష్టతర వ్యవసాయం నుంచి రైతన్నలను గట్టెక్కించేందుకు ఉద్యానశాఖ కసరత్తు చేస్తోంది. తక్కువ పెట్టుబడితో దీర్ఘకాలిక రాబడి వచ్చే పంటలను రైతులకు అందుబాటులోకి తీసుకొచ్చే కార్యక్రమంలో భాగంగా జిల్లాలో ఆయిల్‌ ఫామ్‌ సాగును ప్రోత్సహిస్తోంది. పంటసాగుకు కావాల్సిన అన్ని రకాల సబ్సిడీలను అందచేస్తూ సాగుపై రైతన్నను సమాయత్తం చేస్తోంది. జిల్లాలో సాగుకు శ్రీకారం... ఆయిల్‌పాం సాగును జిల్లా రైతులు శ్రీకారం చుట్టారు. జిల్లా ఉద్యానశాఖ ఆధ్వర్యంలో పలు ఓ ప్రైవేటు సంస్థ సహకారంతో పంట సాగైంది. 2024–25 ఆర్థిక సంవత్సరానికి గానూ జిల్లాలోని బిమఠం, మైదుకూరు, పొద్దుటూరు, కాశినాయన, పులివెందుల మండలాల పరిధిలో 500 ఎకరాల్లో పంట సాగు లక్ష్యంగా నిర్దేశించారు. ఇందుకుగాను జిల్లా ఉద్యానశాఖ అధికారలు ఆయిల్‌ పామ్‌ సాగుపై రైతన్నలకు అవగాహన కార్యక్రమాలను నిర్వహిస్తూ రైతన్నలను ప్రోత్సహిస్తోంది. ఇందులో పంటసాగు.. వాటి నిర్వహణ, ప్రభుత్వ ప్రోత్సాహం, దిగుబడి .. రాబడి తదితర విషయాలపై రైతులకు అవగాహన కల్పిస్తున్నారు. ఇందులో భాగంగా ఇప్పటి వరకు జిల్లాలోని ఎంపిక చేసిన మండలాల పరిధిలో 150 ఎకరాల్లో పంట సాగును చేపట్టారు. ● పంట సాగు నుంచి నాలుగేళ్ల తర్వాత దిగుబడి మొదలవుతుంది. 30 ఏళ్ల వరకు దిగుబడి వస్తూనే ఉంటుంది. ఖర్చులు పోనూ ఎకరాకు సుమారు లక్ష నుంచి లక్షన్నర వరకు ఆదాయం ఉంటుందని అధికారులు వివరించారు. ●సాగు విస్తరణ పెంచేందుకు... ●సాగుకు నాలుగేళ్లపాటు ఆర్థికసాయం

కడప సెవెన్‌రోడ్స్‌: గ్రామ స్థాయిలో వైద్యారోగ్య శాఖలో వైద్యాధికారులు, అనుబంధ శాఖల సిబ్బంది సమన్వయంతో పనిచేస్తూ ప్రజల ఆరోగ్యంపై ప్రత్యేక దృష్టి సారించాలని కలెక్టర్‌ శ్రీధర్‌ చెరుకూరి సూచించారు. బుధవారం కలెక్టరేట్లోని గ్రీవెన్స్‌ హాలులో ఆరోగ్యశ్రీ, అనుబంధ ఆస్పత్రుల ప్రభుత్వ, వైద్యులు, పట్టణ, గ్రామీణ ఆరోగ్య కేంద్రాల వైద్యులతో ఆరోగ్య సూచికలు, వైద్య శాఖ కార్యక్రమాలపై సమీక్ష సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ వైద్య వృత్తి ఎంతో గౌరవప్రదమైందని.. వైద్యులు ప్రజలకు ఎల్లవేళలా అందుబాటులో ఉంటూ వైద్య సేవ లు అందించాలన్నారు. జిల్లాలోని మొత్తం 51 ప్రాథమిక ఆరోగ్య కేంద్రాలలో వైద్యాధికారులు రాబోవు మూడు నెలలకు ప్లాన్‌ ఆఫ్‌ యాక్షన్‌ ను తయారు చేసుకొని వచ్చే సమావేశంలో పీపీటీ ప్రజెంటేషన్‌ ఇవ్వాలని సూచించారు. అనిమియా ఎక్కువగా ఉన్న వేంపల్లి, పోరుమామిళ్ల, చాపాడు వంటి రీజియన్ల పై ప్రత్యేక దష్టి సారించి వైద్య పరీక్షలు నిర్వహించాలన్నారు. జిల్లా వైద్య ఆరోగ్యశాఖ అధికారి డాక్టర్‌ నాగరాజు, డీఐఓ హిమదేవి, ఆరోగ్యశ్రీ జిల్లా కో ఆర్డినేటర్‌ బాలంజనేయులు,డిసీహెచ్‌ఎస్‌ ఇన్చార్జి కరిముల్ల, జీజీహెచ్‌ ఇన్చార్జి సూపర్డెంట్‌ నూకరాజు, డిప్యూటీ డీఎంహెచ్‌ఓలు ఉమా మహేశ్వర రావు, మల్లేష్‌,ఖాజా మొయినుద్దీన్‌, శాంతి కళ తదితరులు పాల్గొన్నారు.

బద్వేలు అర్బన్‌ : సుమారు మూడు నెలల క్రితం జరిగిన ఓ ఘర్షణలో తీవ్ర గాయాలపాలై చికిత్స పొందుతూ ఐదు రోజుల క్రితం మృతి చెందిన మంచాల వెంకటయ్య హత్య కేసులో ఇద్దరు నిందితులను అరెస్టు చేసినట్లు అర్బన్‌ సీఐ ఎం.రాజగోపాల్‌ పేర్కొన్నారు. బుధవారం స్థానిక అర్బన్‌ స్టేషన్‌ ఆవరణలో ఏర్పాటు చేసిన విలేకరుల సమావేశంలో ఇందుకు సంబంధించిన వివరాలను వెల్లడించారు. నెల్లూరు జిల్లా మర్రిపాడు మండలం చాబోలు గ్రామానికి చెందిన మంచాల వెంకటయ్య (38) కూలి పనులు చేసుకుని జీవనం సాగిస్తుండేవాడు. ఈయన చెల్లెలిని బద్వేలు మండలం అబ్బుసాహెబ్‌పేట గ్రామానికి చెందిన గొడుగునూరు క్రిష్ణయ్యకు ఇచ్చి వివాహం జరిపించారు. అయితే ఇరువురు మనస్పర్ధలతో విడిపోయి వేర్వేరుగా ఉంటున్నారు. ఇదే సమయంలో మైదుకూరు మండలం జాండ్లవరం గ్రామానికి చెందిన చెప్పలి దినేష్‌ తల్లితో వెంకటయ్య చనువుగా ఉంటుండేవాడు క్రిష్ణయ్య ఈ విషయాన్ని తెలుసుకుని దినేష్‌కు సమాచారం చేరవేశాడు. దీంతో దినేష్‌ వెంకటయ్యపై కక్ష పెంచుకుని క్రిష్ణయ్య సహకారంతో వెంకటయ్యపై దాడి చేసేందుకు పథకం పన్నారు. ఈ క్రమంలో ఈ ఏడాది ఆగస్టు 11వ తేదీన పట్టణంలోని హెచ్‌పీ పెట్రోలు బంకు సమీపంలో వెంకటయ్యపై ఇరువురు కలిసి దాడి చేశారు. తిరిగి 13వ తేదీన అబ్బుసాహెబ్‌పేట గ్రామానికి వెళ్లి వెంకటయ్యపై మళ్లీ దాడి చేసి కత్తితో పొడిచారు. అప్పట్లో ఈ విషయమై అదే నెల 15వ తేదీన అర్బన్‌ స్టేషన్‌లో కేసు నమోదైంది. తీవ్ర గాయాలపాలైన వెంకటయ్య నెల్లూరు, కడపలో చికిత్స చేయించుకుంటూ ఈ నెల 15న కడప రిమ్స్‌ ఆసుపత్రిలో మృతి చెందాడు. అయితే తన కుమారుడి మృతికి క్రిష్ణయ్య, దినేష్‌లే కారణమని మృతుని తండ్రి చిన్నయ్య ఇచ్చిన ఫిర్యాదు మేరకు దాడి కేసును హత్య కేసుగా మార్చుకుని నిందితులను పట్టణంలోని ఆర్టీసీ బస్టాండు సమీపంలో అరెస్టు చేసినట్లు సీఐ తెలిపారు. సమావేశంలో అర్బన్‌ ఎస్‌ఐ రవికుమార్‌, సిబ్బంది పాల్గొన్నారు. పాత కక్షలే హత్యకు కారణం వివరాలు వెల్లడించిన అర్బన్‌ సీఐ

సింహాద్రిపురం : నాలుగు మేకలకు గుర్తు తెలియని వ్యక్తులు గొంతు కోసిన ఘటన బుధవారం చోటు చేసుకుంది. గొర్రెల యజమాని తెలిపిన మేరకు వివరాలు ఇలా ఉన్నాయి. మండలంలోని గురిజాల గ్రామానికి చెందిన కొమ్మెర రాజప్పకు చెందిన గొర్రెల గుంపును బుధవారం గొర్రెల దొడ్డిలో ఉంచి మధ్యాహ్నం 2 గంటల సమయంలో ఇంటికి వచ్చాడు. భోజనం చేసి తిరిగి వెళ్లేలోపు ఈ ఘటన చోటు చేసుకుంది. దాదాపు రూ.50 వేల వరకు నష్టం వాటిల్లినట్లు గొర్రెల యజమాని వాపోయాడు. నిందితులను గుర్తించి కఠిన చర్యలు తీసుకోవాలని పోలీసులకు విన్నవించాడు. శంకుస్థాపనలకే పరిమితమైన కడప స్టీల్‌ ప్లాంట్‌కడప సెవెన్‌రోడ్స్‌ : కడప ఉక్కు పరిశ్రమను ప్రభుత్వాలు శంకుస్థాపనలకే పరిమితం చేశాయని, ఇంకా జాప్యం చేస్తే తీవ్ర స్థాయిలో ఆందోళనలు చేపడతామని పీసీసీ అధ్యక్షురాలు వైఎస్‌ షర్మిల ప్రభుత్వాన్ని హెచ్చరించారు. కడప పర్యటనలో భాగంగా ఆమె కలెక్టర్‌ శ్రీధర్‌ను బుధవారం కలిసి వినతిపత్రం సమర్పించారు. అనంతరం విలేకరులతో మాట్లాడుతూ గత పాలకుల నిర్వాకంతో స్టీల్‌ ప్లాంటు నిర్మాణం ‘చెల్లి పెళ్లి జరగాలి మళ్లీమళ్లీ’ అన్న చందంగా మారిందని ఎద్దేవా చేశారు. టెంకాయ కొట్టేందుకే ప్లాంటు నిర్మాణాన్ని పరిమితం చేశారని ఆరోపిస్తూ అందుకు నిరసనగా ఆమె టెంకాయ కొట్టారు. 2014లో కేంద్రంలో కాంగ్రెస్‌ పార్టీ అధికారంలోకి వచ్చి ఉంటే ఈ పాటికి స్టీల్‌ ప్లాంటు పూర్తి చేసేదన్నారు. 2014 నుంచి బీజేపీ ఒక్క విభజన హామీ కూడా నెరవేర్చలేదని విమర్శించారు. ఈ కార్యక్రమంలో డీసీసీ అధ్యక్షురాలు విజయజ్యోతి, ఇతర నేతలు పాల్గొన్నారు. కాగా, బుధవారం ఉదయం వైఎస్సార్‌ సమాధి వద్ద షర్మిల పూలమాలలు వేసి ఘనంగా నివాళులర్పించారు.

ప్రొద్దుటూరు క్రైం : వైన్‌ షాపుల్లో కూర్చోబెట్టి మద్యం తాగిస్తే కేసులు నమోదు చేస్తామని ఉమ్మడి కడప జిల్లా డిప్యూటీ ఎకై ్సజ్‌ కమిషనర్‌ జయరాజ్‌ తెలిపారు. ప్రొద్దుటూరులోని లిక్కర్‌ డిపోను బుధవారం ఆయన తనిఖీ చేశారు. గోడౌన్‌లోని లిక్కర్‌ నిల్వలను పరిశీలించారు. లిక్కర్‌, బీరు కేసులు ఎంతమేర స్టాకు ఉన్నాయని డీఎం తిమ్మనాయుడును అడిగి తెలుసుకున్నారు. పాత స్టాకును డీసీ పరిశీలించారు. మద్యం షాపులకు పంపించే లిక్కర్‌ విషయంలో సమస్యలు తలెత్తకుండా చూసుకోవాలన్నారు. డిమాండ్‌ బ్రాండ్లను కోటా ప్రకారం పంపిణీ చేయాలన్నారు. నిబంధనలు పాటించని మద్యం షాపులు, బార్లపై కేసులు నమోదు చేస్తామని చెప్పారు. మద్యం షాపులు సమయపాలన పాటించేలా చర్యలు తీసుకోవాలని స్థానిక అధికారులను ఆదేశించారు. పర్మిట్‌ రూంలకు అనుమతి లేదని, అక్కడే కూర్చోబెట్టి మద్యం తాగించే షాపులపై కేసులు నమోదు చేయాలన్నారు. బెల్ట్‌ షాపులు పెట్టకుండా రోజు తనిఖీలు నిర్వహించాలని చెప్పారు. జిల్లాలోని మద్యం షాపులకు పర్మినెంట్‌ లైసెన్సుల జారీ ప్రక్రియ దాదాపు పూర్తయినట్లు తెలిపారు. లైసెన్సుల జారీ సమయాన్ని గురువారం వరకు పొడిగించినట్లు డీసీ పేర్కొన్నారు. ప్రొద్దుటూరులోని మద్యం షాపుల్లో కల్తీకి ఆస్కారం లేకుండా ఎప్పటికప్పుడు నాణ్యత పరీక్షలు నిర్వహించాలన్నారు. మద్యం షాపులతో నష్టపోతున్నాం: డీసీకి మొరపెట్టుకున్న బార్‌ల నిర్వాహకులు అనుమతి లేకున్నా మద్యం షాపుల్లో కూర్చోబెట్టి తాపుతున్నారని ప్రొద్దుటూరులోని బార్‌ల యజమానులు డీసీ జయరాజ్‌కు ఫిర్యాదు చేశారు. ఎకై ్సజ్‌ స్టేషన్‌ను డీసీ పరిశీలించారు. ఈ సందర్భంగా బార్ల యజమానులు డీసీని కలిసి మాట్లాడారు. అనుమతి లేకున్నా మద్యం షాపుల్లో బార్లను తలపించేలా టేబుళ్లను ఏర్పాటు చేశారన్నారు. ఎన్నో సార్లు స్థానిక ఎకై ్సజ్‌ అధికారులకు ఫిర్యాదు చేసినా వారు పట్టించుకోలేదన్నారు. అనధికార పర్మిట్‌ రూంల వల్ల రోజు వారి వ్యాపారం సగానికి పైగా పడిపోయినట్లు వారు డీసీ వద్ద వాపోయారు. రోజు రూ. 1.50 లక్షలు పైగా నష్టం వస్తోందని, సిబ్బందికి జీతాలు, రూంలకు బాడుగలు కూడా చెల్లించలేని పరిస్థితి నెలకొందన్నారు. వైన్‌ షాపుల చర్యలను నియంత్రించకుంటే బార్లను వదిలేయాల్సిన పరిస్థితి వస్తుందని చెప్పారు. దాడులు నిర్వహించి వెంటనే చర్యలు తీసుకునేలా అధికారులకు ఆదేశాలు జారీ చేస్తానని డీసీ వారికి హామీ ఇచ్చారు. బెల్టుషాపులను అరికట్టాలి ముద్దనూరు : బెల్టుషాపులు నిర్వహించకుండా తగిన చర్యలు తీసుకోవాలని ఎకై ్సజ్‌ డిప్యూటీ కమిషనర్‌ జయరాజు ఆదేశించారు. బుధవారం ఆయన స్థానిక ఎకై ్సజ్‌ సర్కిల్‌ స్టేషన్‌ను తనిఖీ చేశారు. ఈ సందర్భంగా ఆయన సిబ్బందితో మాట్లాడుతూ మద్యం దుకాణాల్లో మాత్రమే మద్యం విక్రయించాలని, ఎక్కడైనా బెల్టుషాపులు నిర్వహిస్తే తమ దృష్టికి తేవాలని సూచించారు. ఎకై ్సజ్‌ స్టేషన్‌ అద్దె భవనంలో కొనసాగుతున్న విషయాన్ని ఉన్నతాధికారుల దృష్టికి తీసుకెళ్లనున్నట్లు పేర్కొన్నారు. షాపుల్లో కూర్చోబెట్టి మద్యం తాగిస్తే కేసులు నమోదు చేస్తాం ఉమ్మడి కడప జిల్లా ఎకై ్సజ్‌ డిప్యూటీ కమిషనర్‌ జయరాజ్‌

కడప అర్బన్‌ : ఉమ్మడి జిల్లా పరిధిలోని పోలీసు అధికారులతో కడపలోని జిల్లా కోర్టు ఆవరణంలో బుధవారం జిల్లా న్యాయ సేవాధికార సంస్థ చైర్మన్‌, జిల్లా ప్రధాన న్యాయమూర్తి జి. శ్రీదేవి ముందస్తు జాతీయ లోక్‌ అదాలత్‌ కార్యక్రమాన్ని నిర్వహించారు. ఈ సందర్భంగా ఆమె మాట్లాడుతూ డిసెంబర్‌ 14న జరగబోయే జాతీయ లోక్‌ అదాలత్‌లో ఎక్కువ సంఖ్యలో కేసులు రాజీ అయ్యే విధంగా కృషి చేయాలన్నారు. ఈ కార్యక్రమంలో జిల్లా న్యాయ సేవాధికార సంస్థ సెక్రటరీ, జడ్జి ఎస్‌. బాబాఫకృద్దీన్‌తో పాటు, వైఎస్‌ఆర్‌ జిల్లా అదనపు ఎస్పీ (అడ్మిన్‌) కె. ప్రకాష్‌బాబు, అన్నమయ్య జిల్లా అదనపు ఎస్పీ (అడ్మిన్‌) వెంకటాద్రి, డీఎస్పీలు, పోలీసు అధికారులు పాల్గొన్నారు.

కడప ఎడ్యుకేషన్‌ : ఉపాధ్యాయ ఎమ్మెల్సీ ఎంవీ రామచంద్రారెడ్డి బుధవారం జరిగిన శాసనమండలి సమావేశంలో రాయలసీమ సమస్యలపై చర్చించారు. ఇందులో భాగంగా కర్నూలు లోకాయుక్త, మానవ హక్కుల కమిషన్‌, విద్యుత్‌ రెగ్యులేటరీ సంస్థలను వేరే ప్రాంతానికి తరలిస్తున్న విషయంపై ప్రజల ఆందోళన చెందుతున్నారని ప్రస్తావించారు. దీనిపై ప్రభుత్వం వివరణ ఇవ్వాలని కోరారు. అలాగే జాతీయ న్యాయ విశ్వ విద్యాలయం కర్నూలులో ఏర్పాటు చేసేందుకు గత ప్రభుత్వం 273 ఎకరాల్లో రూ.1000 కోట్లతో శంకుస్థాపన చేసిందన్నారు. ఆ పనులు ఎప్పుడు ప్రారంభిస్తారో తెలపాలని కోరారు. రోడ్డు ప్రమాదంలో ఒకరి మృతి బి.కోడూరు : బి.మఠం మండలం రాణిబావి టోల్‌గేట్‌ దగ్గర జరిగిన రోడ్డు ప్రమాదంలో వెళ్లిబోయిన నారాయణ (45) అనే వ్యక్తి మృతి చెందగా పరమేశ్వర్‌ పరిస్థితి విషమంగా ఉంది. ఒకే కుటుంబానికి చెందిన వారు రోడ్డు ప్రమాదానికి గురి కావడంతో గ్రామంలో విషాద ఛాయలు అలుముకున్నాయి. మండలంలోని తుమ్మలపల్లె గ్రామానికి చెందిన నారాయణ, పరమేశ్వర్‌లు బుధవారం వ్యాపార నిమిత్తం మైదుకూరుకు వెళ్లి తిరిగి ఇంటికి వస్తున్న క్రమంలో రాణిబావి సమీపంలోని టోల్‌గేట్‌ దగ్గర బద్వేలు నుంచి మైదుకూరుకు అతివేగంగా వెళుతున్న లారీ వారిని ఢీకొంది. దీంతో నారాయణ అక్కడికక్కడే మృతి చెందాడు. పరమేశ్వర్‌ పరిస్థితి విషమంగా ఉండటంతో కడప రిమ్స్‌కు తరలించారు. నారాయణకు భార్య, ఒక కుమారుడు, ఇద్దరు కుమార్తెలు ఉన్నారు. వ్యాపారం చేసుకుని కుటుంబాన్ని పోషిస్తూ ఉన్న నారాయణ మృతి చెందడంతో ఆ కుటుంబం రోడ్డున పడింది. విషయం తెలుసుకున్న బి.మఠం పోలీసులు కేసు నమోదు చేసుకుని దర్యాప్తు చేస్తున్నారు. భూసేకరణలో అక్రమాలపై జేసీ విచారణపోరుమామిళ్ల : బెంగళూరు – అమరావతి ( వయా అనంతపురం, శింగరాయకొండ) సిక్స్‌ వే ఎన్‌హెచ్‌167బీ జాతీయ రహదారి నిర్మాణం కోసం జరిగిన భూసేకరణలో అక్రమాలపై జాయింట్‌ కలెక్టర్‌ అదితి సింగ్‌ విచారణ చేపట్టారు. ఈమేరకు జరుగుతున్న పనులను పరిశీలించేందుకు బుధవారం ఆమె మండలానికి వచ్చారు. బొప్పాపురం, చెన్నారెడ్డిపేట, పేరమ్మగారిపల్లెతో పాటు బి.మఠం మండల పరిధిలో జరుగుతున్న రోడ్డు పనులను పరిశీలించారు. ఈ సందర్భంగా కొందరు రైతులు రోడ్డు నిర్మాణంలో తమ భూములు పోయాయని, నష్టపరిహారం మాత్రం సిద్దు గురివిరెడ్డికి ఇచ్చారని జాయింట్‌ కలెక్టర్‌కు ఫిర్యాదు చేశారు. మరికొందరు తమకు నష్టపరిహారం ఇవ్వలేదన్నారు. రైతుల ఫిర్యాదుతో జేసీ అధికారులపై ఆగ్రహం వ్యక్తం చేశారు. భూములు వాస్తవంగా కోల్పోయిన రైతుల వివరాలు తనకు పంపితే పరిహారం మంజూరు చేయిస్తానన్నారు. ఈ కార్యక్రమంలో ఆర్టీఓ, తహసీల్దార్‌, రెవెన్యూ సిబ్బంది పాల్గొన్నారు.మరొకరి పరిస్థితి విషమం

● పంచాయతీరాజ్‌ ఎస్‌ఈ శ్రీనివాసులురెడ్డి కడప సెవెన్‌రోడ్స్‌: ఉపాధి హామీ పథకం కింద గ్రామీ ణ ప్రాంతాల్లో సిమెంటురోడ్ల నిర్మాణాలు చేపడుతున్నట్లు పంచాయతీరాజ్‌ పర్యవేక్షక ఇంజనీరు జీవీ శ్రీనివాసులురెడ్డి తెలిపారు. మంగళవారం తన కార్యాలయంలో రాయచోటి, రాజంపేట, కోడూరు, కమలాపురం, మైదుకూరు, బద్వేలు నియోజకవర్గాలకు చెందిన ఎగ్జిక్యూటివ్‌ ఇంజనీర్లు, డిప్యూటీ ఎగ్జిక్యూటివ్‌ ఇంజనీర్లు, ఏఈలు, ఇంజనీరింగ్‌ అసిస్టెంట్లలకు ఒకరోజు శిక్షణ కార్యక్రమం నిర్వహించారు. ఏపీ ఆర్‌ఆర్‌పీ అబ్జర్వర్లు కె.ప్రభాకర్‌రెడ్డి, వై.నరసింహారావు నాణ్యతా ప్రమాణాలతో రహదారుల నిర్మాణం ఎలా చేపట్టాలో పవర్‌ పాయింట్‌ ప్రెజెంటేషన్‌ ద్వారా వివరించారు. ఈ సందర్భంగా ఎస్‌ఈ శ్రీనివాసులురెడ్డి మాట్లాడుతూ మైదుకూరు నియోజకవర్గంలో 205 రోడ్డు పనులను రూ. 1235.28 లక్షలతో చేపడుతున్నామన్నారు. కమలాపురం నియోజకవర్గంలో 282 రోడ్డు పనులను రూ.1630 లక్షలతో చేపడుతున్నామని వెల్లడించారు. బద్వేలు నియోజకవర్గంలో 213 పనులను రూ. 1406 లక్షలతో, పులివెందుల నియోజకవర్గంలో 91 రోడ్లను రూ. 525.04 లక్షలతో, జమ్మలమడుగు నియోజకవర్గంలో 130 రోడ్లను రూ.1934.35 లక్షలతో, ప్రొద్దుటూరు నియోజకవర్గంలో 77 పనులను రూ. 850.04 లక్షలతో చేపడతామన్నారు. గ్రామసభల ద్వారా వెండార్స్‌ను ఎంపిక చేసి పనులను అప్పగించనున్నట్లు పేర్కొన్నారు.

కలెక్టర్‌ శ్రీధర్‌ కడప సెవెన్‌రోడ్స్‌: ఆకాంక్ష జిల్లాల (ఆస్పిరేషన్‌ డిస్ట్రిక్ట్స్‌) ఆశయాలకు అనుగుణంగా అధికారులు జిల్లాను ప్రగతి పథంలో నడిపించాలని కలెక్టర్‌ శ్రీధర్‌ చెరుకూరి పేర్కొన్నారు. మంగళవారం స్థానిక కలెక్టరేట్‌ బోర్డు రూమ్‌ హాలు నుంచి కలెక్టర్‌ అధ్యక్షతన ‘ఆకాంక్ష జిల్లాల ఆశయసాధనలో భాగంగా జిల్లాలో కార్యాచరణ, ప్రగతి‘పై సంబందిత శాఖల జిల్లా అధికారులతో సమీక్ష చేశారు. ఈ సందర్భంగా కలెక్టర్‌ మాట్లాడుతూ.. ‘నీతి ఆయోగ్‌‘ ఆధ్వర్యంలో కేంద్ర ప్రభుత్వం దేశవ్యాప్తంగా కొన్ని ఆకాంక్ష జిల్లాలను ఎంపిక చేసిందన్నారు. ఇందులో మన జిల్లా కూడా ఉందన్నారు. అందులో భాగంగా ఆయా జిల్లాల్లో సామాజిక స్థాయిని(అభివృద్ధి) ఉన్న స్థితి నుంచి ఉన్నత స్థితికి తీసుకురావడం ఈ కార్యక్రమం ముఖ్య ఉద్దేశ్యం అన్నారు. అందుకోసం సంబంధిత శాఖల అధికారులు, సిబ్బంది సమన్వయంతో ముందుకు సాగాలన్నారు. సంతృప్త స్థాయిలో నిర్దేశిత లక్ష్యం మేరకు సాధించిన ప్రగతి ఆధారంగా ప్రోత్సాహకాలను కూడా భారీ స్థాయిలో కేంద్ర ప్రభుత్వం అందిస్తుందన్నారు. ఆ మేరకు ప్రభుత్వ ఆశయాలకు అనుగుణంగా అధికారులు బాధ్యతగా వ్యవహరించాలని సూచించారు. అన్ని శాఖల పరిధిలో కొరత ఉన్న సౌకర్యాలు, సదుపాయాలు, అవసరాలను ఎప్పటికప్పుడు సంపూర్తి చేయాలన్నారు. ● ఈ సమావేశంలో జిల్లా వైద్య ఆరోగ్య శాఖ నాగరాజు, డిఆర్డీఏ పీడీ ఆనంద్‌ నాయక్‌,ఐసిడిఎస్‌ అధికారిని శ్రీలక్ష్మి, సీపీఓ వెంకటరావు, లీడ్‌ బ్యాంక్‌ జిల్లా మేనేజరు జనార్ధన్‌, ఏపీఎంఐపి పీడీ వెంకటేశ్వర రెడ్డి,తదితర అనుబంధ శాఖల అధికారులు హాజరయ్యారు.

హెచ్‌డబ్ల్యూఓ (హాస్టల్‌ వెల్ఫేర్‌ ఆఫీసర్స్‌)కు సక్రమంగా డైట్‌ బిల్లులు అందకపోవడంతో తీవ్ర ఇబ్బందులు పడుతున్నారు. ప్రభుత్వం డైట్‌ బిల్లులను సక్రమంగా అందించాలి. ప్రస్తుతం సరుకుల ధరలు పెరిగినందున అందుకు అనుగుణంగా డైట్‌ చార్జీలు పెంచాలి. టెండర్ల ద్వారా సరుకులను సరఫరా చేస్తే బాగుంటుంది. – రామలింగారెడ్డి, అధ్యక్షుడు, జిల్లా బీసీ హెచ్‌డబ్ల్యూఓ అసోసియేషన్‌ హాస్టళ్లను గాలికొదిలేసిన ప్రభుత్వం ప్రభుత్వ ఎస్సీ, బీసీ, ఎస్టీ హాస్టళ్లలో సమస్యలు అధికంగా ఉన్నాయి. బీసీ, ఎస్సీ హాస్టళ్లు చాలా వరకు కాలపరిమితి దాటిన అద్దె భవనాల్లో సాగుతున్నాయి. డైట్‌ బిల్లులను పెంచాలి. హాస్టల్‌ విద్యార్థుల కంటే ఖైదీలకు ఇచ్చే డైట్‌ బిల్లులు మెరుగ్గా ఉన్నాయి. ప్రభుత్వ హస్టళ్ల పరిరక్షణను పాలకులు గాలికొదిలేశారు. – గుజ్జుల వలరాజు, జిల్లా కార్యదర్శి, ఏఐఎస్‌ఎఫ్‌. ఎస్సీ విద్యార్థుల అభ్యున్నతికి కృషి ఎస్సీ హాస్టళ్లలో చదువుతున్న విద్యార్థుల అభ్యున్నతికి కృషి చేస్తున్నాం. విజయరామరాజు కలెక్టర్‌గా ఉన్నప్పుడు ఎస్సీ హాస్టళ్లలో రూ.6 కోట్లతో మరమ్మతు పనులు చేపట్టాం. ఆయన హయాంలోనే సీసీ కెమెరాలను ఏర్పాటు చేశాం. విద్యార్థుల విద్యాభివృద్ధికి చర్యలు చేపడుతున్నాం. – కె.సరస్వతి, డిప్యూటీ డైరెక్టర్‌, జిల్లా సాంఘిక సంక్షేమశాఖ

అంగన్వాడీ కేంద్రాలలో మరుగుదొడ్ల నిర్మాణాలు యుద్ధప్రాతిపదికన పూర్తి చేయాలని సంబంధిత అధికారులను కలెక్టర్‌ డాక్టర్‌ శ్రీధర్‌ చెరుకూరి ఆదేశించారు. మంగళవారం కలెక్టరేట్‌లోని బోర్డ్‌ మీటింగ్‌ హాల్‌లో అంగవ్వాడి కేంద్రాలలో మరుగుదొడ్ల నిర్మాణం, నీటి వసతి ల పై ఐసీడీఎస్‌, ఆర్డబ్ల్యూఎస్‌, పబ్లిక్‌ హెల్త్‌ శాఖల అధికారులతో సమావేశం జరిగింది. ఈ సంధర్భంగా కలెక్టర్‌ మాట్లాడుతూ జిల్లాలోని అన్ని అంగన్వాడీ కేంద్రాలలో మరుగుదొడ్ల నిర్మా ణాలు డిసెంబర్‌ 31 లోగా పూర్తి చేయాలని సంబంధిత అధికారులను ఆదేశించారు. ఈ కార్యక్రమంలో ఐసీడీఎస్‌ పీడీ శ్రీలక్ష్మి, ఆర్‌డబ్ల్యూఎస్‌, పబ్లిక్‌ హెల్త్‌ శాఖల అధికారులు తదితరులు పాల్గొన్నారు.

● జిల్లా కేంద్రమైన కడప ప్రకాశ్‌నగర్‌లోని బీసీ కళాశాల హాస్టల్‌లో ఇంటర్మీడియేట్‌, ఆపైన చదివే విద్యార్థులు దాదాపు 130 మందికి పైగా ఉన్నారు. ఇక్కడ సరిపడా మరుగుదొడ్లు లేవు. అదే సందర్భంలో ఉన్న వాటికి తలుపులు లేకపోవడంతో విద్యార్థులు ఇబ్బందులు పడుతు న్నారు. అలాగే ఆ ప్రాంతమంతా దుర్వాసన వెదజల్లుతోంది. కాగా, పట్ట పగలే హస్టల్‌లోని గదు లు కారుచీకట్లు కమ్ముకున్న విధంగా ఉన్నాయి. కొన్నిమార్లు భోజనం సక్రమంగా ఉండదనే అభిప్రాయాన్ని పలువురు విద్యార్థులు వ్యక్తం చేశారు. టీటీడీ కల్యాణ మండపం వద్ద ఉన్న ఎస్సీ నెంబరు–3 బాలుర హాస్టల్‌లో సరిపడ స్నానపు గదులు లేకపోవడంతో విద్యార్థులు ఆరుబయట స్నానం చేస్తున్నారు. ● జమ్మలమడుగు బీసీ బాలికల హాస్టల్‌లో కిటికీలు లేకపోవడంతో వాటికి కర్టెన్లుగా బట్టలు కప్పారు. చెదలు కారణంగా కిటికీలు దెబ్బతినడంతో వాటిని అధికారులు పట్టించుకోలేదు. కనీసం బాలికలు అన్న స్పృహ కూడా లేకపోవడం శోచనీయం. అలాగే బీసీ కళాశాల హాస్టల్‌ ప్రైవేటు భవనంలో నడుస్తోంది. ఎర్రగుంట్లలో హాస్టల్‌ లేకపోవడంతో పేద విద్యార్థులు వసతి కోసం ఇబ్బందులు పడుతున్నారు. ● బద్వేలులో 40 ఏళ్ల కిందట నిర్మించిన బీసీ హాస్టల్‌ శిథిలావస్థకు చేరింది. ఇందులో చాలా గదులు మూతపడ్డాయి. ఇక్కడున్న 97 మంది బాలురు అసౌకర్యానికి గురవుతున్నారు. ఇక్కడే ఉన్న మరో ఎస్సీ బాలుర, బీసీ బాలికల కళాశాల హాస్టళ్లు అద్దె భవనాల్లో అరకొర సౌకర్యాల మధ్య విద్యార్థులు ఇబ్బందులు ఎదుర్కొంటున్నారు. అట్లూరు బీసీ హాస్టల్‌లో రిజిస్టర్‌లో 58 మంది ఉంటే, అక్కడ 21 మంది ఉన్నారు. సోమవారం రాత్రి విద్యార్థులకు ఆహారంలో గుడ్డును ఇవ్వ లేదు. పోరుమామిళ్ల ఎస్సీ బాలుర హాస్టల్‌లో 100 మంది విద్యార్థులు ఉంటున్నారు. ఈ భవనం శిథిలావస్థకు చేరింది. బి.కోడూరులోని బీసీ బాలుర హాస్టల్‌ అద్దె భవనంలో నడుస్తోంది. ఇక్కడ సౌకర్యాలు లేకపోవడంతో విద్యార్థులు బహిర్భూమికి ఆరుబయటకి వెళుతున్నారు. కాశినాయన మండల కేంద్రంలోని ఎస్సీ బాలుర హాస్టల్‌ ప్రైవేటు భవనంలో నడుస్తోంది. ఇందులో 100 మంది విద్యార్థులు ఉంటే ఒక మరుగుదొడ్డి, ఒక బాత్‌రూము మాత్రమే ఉంది. ప్రొద్దుటూరులోని పొట్టిపాడు రోడ్డులోగల ఎస్సీ బాయిస్‌ హాస్టల్‌లోనే కళాశాల హాస్టల్‌ కూడా నడుస్తోంది. ఇక్కడ నీటి కొరత సమస్యగా ఉంది. మోడెంపల్లె ఎస్సీ బాలుర హాస్టల్‌లో ప్రహారీ పడగొట్టడంతో రక్షణ లేకుండా పోయింది. ● పులివెందులలోని నల్లపురెడ్డిపల్లె బీసీ బాలుర హాస్టల్‌లో మరుగుదొడ్ల సమస్య ఉంది. మైదుకూరు పరిధికి సంబంధించి ఖాజీపేటలోని ఎస్సీ, బీసీ బాలుర హాస్టళ్లలో మరుగుదొడ్ల సమస్య అధికంగా ఉంది. అలాగే కమలాపురానికి సంబంధించి బీసీ బాలుర కళాశాల హాస్టల్‌ అద్దె భవనంలో నడుస్తోంది. ఇక్కడ కూడా కనీస సౌకర్యాలు లేవు.

జమ్మలమడుగు: జమ్మలమడుగు ఆర్టీసీ డిపో నుంచి తిరుపతి మీదుగా చైన్నెకు నూతన బస్సు సర్వీసు ప్రారంభమైంది. మంగళవారం ఉదయం డిపో మేనేజర్‌ ప్రవీన్‌ ఆధ్వర్యంలో ఈ సర్వీసును ప్రారంభించారు. ఈ సందర్భంగా డిపో మేనేజర్‌ ప్రవీన్‌ మాట్లాడుతూ ప్రస్తు తం చైన్నెకు నెల్లూరు–సూళ్లురుపేట మీదుగా బస్సు సర్వీసు నడుస్తోందన్నారు. అదనంగా తిరుపతి మీదుగా చైన్నెకు ప్రతిరోజు బస్సు సర్వీసు ఉంటుందన్నారు. ఈ సర్వీసులు ప్రయాణికులు సద్వినియోగం చేసుకోవాలని కోరారు. శబరిమలకు మరో ప్రత్యేక రైలు కడప కోటిరెడ్డిసర్కిల్‌: పవిత్ర పుణ్యక్షేత్రమైన శబరిమలకు వెళ్లే అయ్యప్ప భక్తుల కోసం కడప మీదుగా మరో ప్రత్యేక రైలును నడపుతున్నట్లు కడప రైల్వే చీఫ్‌ కమర్షియల్‌ ఇన్‌స్పెక్టర్‌ జనార్దన్‌ తెలిపారు. 07147/48 నెంబరుగల రైలు మచిలీపట్నంలో మధ్యాహ్నం 12.00 గంటలకు బయలుదేరి మరుసటిరోజు రాత్రి 9.20 గంటలకు కొల్లం చేరుతుందన్నారు. ఈ రైలు గుడివాడ, విజయవాడ, గుంటూరు, నరసరావుపేట, దొనకొండ, మార్కాపురంరోడ్డు, కంభం, గిద్దలూరు,నంద్యాల, ఎర్రగుంట్ల, కడప, రాజంపేట, రేణిగుంట, కాట్పాడి, జోలార్‌పేట మీదు గా కొల్లాం వెళుతుందన్నారు. ఈ రైలు డిసెంబరు 23, 30 తేదీలలో మచిలీపట్నం నుంచి, డిసెంబరు 25, జనవరి 1 తేదీలలో కొల్లం నుంచి బయలుదేరుతుందని వివరించారు. సివిల్స్‌ పరీక్షలకు ఉచిత శిక్షణ కడప కోటిరెడ్డిసర్కిల్‌: యూపీఎస్‌సీ నిర్వహించే సివిల్స్‌ ప్రిలిమినరీ, మెయిన్‌ పరీక్షలకు అర్హతగల వైఎస్సార్‌ జిల్లా వాసులకు బీసీ, ఎస్సీ, ఎస్టీలకు చెందిన అభ్యర్థులకు విజయవాడలో ఉచిత శిక్షణ ఇవ్వనున్నట్లు కడప బీసీ స్టడీ సర్కిల్‌ సంచాలకులు కృష్ణయ్య తెలిపారు. అర్హతగలవారు ఈనెల 24వ తేదీలోగా బీసీ స్టడీ సర్కిల్‌ వైఎస్సార్‌ కడప కార్యాలయంలో దరఖాస్తులు ఇవ్వాలని సూచించారు. అలాగే ఈనెల 27వ తేదిన స్క్రీనింగ్‌ పరీక్ష నిర్వహిస్తారని, అందులో ఉత్తీర్ణులైన వారికి మెరిట్‌ ఆధారంగా విజయవాడలో శిక్షణ ఇస్తారన్నారు. దరఖాస్తుచేసే అభ్యర్థులు తమ బయోడేటాతోపాటు విద్యా, ఆదాయ ధ్రువీకరణ పత్రాలు, ఆధార్‌, బ్యాంకు పాస్‌పుస్తకం, రెండు పాస్‌పోర్టు సైజ్‌ ఫొటోలు జతచేసి ఏపీ బీసీ స్టడీ సర్కిల్‌, పాత రిమ్స్‌, కడప అనే చిరునామాకు దరఖాస్తులు పంపాలన్నారు. ఇతర వివరాలకు నేరుగా కార్యాలయంలో లేదా 98499 19221,99664 18572 నెంబర్లలో సంప్రదించాలని సూచించారు. సాఫ్ట్‌వేర్‌ కోర్సుల్లో ..కడప ఎడ్యుకేషన్‌: సాఫ్ట్‌వేర్‌ కోర్సుల్లో యువతకు శిక్షణ ఇవ్వనున్నట్లు ఎస్‌ఏక్యూ టెక్నాలజీస్‌ నిర్వాహకులు అమీర్‌బాషా ఒక ప్రకటనలో తెలిపారు. ఇందులో అజూర్‌, సోల్స్‌ఫోర్స్‌, పుల్‌ ట్రాక్‌, ఎస్‌ఏపీ తదితర కోర్సుల్లో శిక్షణ ఇవ్వనున్నట్లు పేర్కొన్నారు. మొన్నటి వరకు ఇలాంటి కోర్సుల కోసం హైదరాబాదు, బెంగుళూరు తదితర సిటీలకు వెళ్లేవారని.. ఇప్పుడు ఆ అవసరం లేకుండానే కడపలోనే తొలి ప్రయత్నంగా ప్రొఫెషనల్స్‌ చేత కోర్సుల్లో శిక్షణ ఇస్తున్నామని వివరించారు. ఈనెల 25 నుంచి కొత్త బ్యాచ్‌లు ప్రారంభం అవుతాయని పేర్కొన్నారు. పూర్తి వివరాలకు 7093081073,9110388060 నెంబర్లలో సంప్రదించాలని కోరారు.