సాక్షి, హైదరాబాద్‌: ప్రకృతి వైపరీత్యాల సమర్థ నిర్వహణకు కౌన్సిల్‌ ఫర్‌ సైంటిఫిక్‌ అండ్‌ ఇండస్ట్రియల్‌ రీసెర్చ్‌ (సీఎస్‌ఐఆర్‌) పరిశోధనశాలలు తమవంతు కృషి చేస్తున్నాయని సంస్థ డైరెక్టర్‌ జనరల్‌ శేఖర్‌ సి.మండే తెలిపారు. ఇటీవలి ఫానీ తుపాను సమయంలో చెన్నైలోని సీఎస్‌ఐఆర్‌ పరిశోధన సంస్థ ఎస్‌ఈఆర్‌సీ డిజైన్‌ చేసి, రెడ్‌క్రాస్‌ సంస్థ నిర్మించిన తుపాను బాధితుల కేంద్రాలు ఎంతో ఉపయోగపడ్డాయని, అలాగే గుజరాత్‌లోని మరో పరిశోధన సంస్థ తుపాను బాధితులకు స్వచ్ఛమైన తాగునీరు అందించేందుకు మొబైల్‌ నీటి శుద్ధీకరణ ప్లాంట్లను సరఫరా చేసిందని చెప్పారు. ఇండియన్‌ ఇన్‌స్టిట్యూట్‌ ఆఫ్‌ కెమికల్‌ టెక్నాలజీ (ఐఐసీటీ)లో పద్మభూషణ్‌ ఎ.వి.రామారావు ‘కిలో’ల్యాబ్‌ను ఆవిష్కరించిన సందర్భంగా జరిగిన విలేకరుల సమావేశంలో శేఖర్‌ మాట్లాడుతూ, తుపాను బాధితులకు అందించే ఆహారం శుభ్రంగా ఉండేందుకు, ఎక్కువ కాలం నిల్వ ఉండేలా చేసేందుకు మైసూరులోని సీఎస్‌ఐఆర్‌ సంస్థ సీఎఫ్‌టీఆర్‌ఐ ప్రత్యేక ప్యాకేజింగ్‌ను అభివృద్ధి చేసిందని, దీని సాయంతో అతితక్కువ కాలంలోనే పెద్ద సంఖ్యలో ఆహారపు పొట్లాలను సిద్ధం చేయగలిగామ ని వివరించారు. ప్రకృతి వైపరీత్యాల సమయంలో సముద్రపు నీటితోపాటు ఎలాంటి మురికి నీటినైనా శుద్ధి చేసి గంటకు నాలుగు వేల లీటర్ల తాగునీరు ఇవ్వగల మొబైల్‌ వ్యాన్‌ పూర్తిగా స్వదేశీ సాంకేతిక పరిజ్ఞానంతో అభివృద్ధి చేశామని తెలిపారు. దేశం మొత్తమ్మీద పదుల సంఖ్యలో సీఎస్‌ఐఆర్‌ సంస్థలు ఉన్నాయని.. వేర్వేరు పరిశోధన సంస్థలు కలిసికట్టుగా ప్రాజెక్టులు చేపట్టడం కూడా ఇటీవలి కాలంలో ఎక్కువగా జరుగుతోందని, వ్యవసాయ సంబంధిత ఆగ్రో మిషన్‌లో ఎనిమిది సంస్థలు పాల్గొంటుండగా.. ఫార్మా మిషన్‌లోనూ ఐదు సంస్థలు భాగస్వాములుగా పనిచేస్తున్నాయని వివరించారు.  కిలో ల్యాబ్‌ ప్రత్యేకమైంది: శ్రీవారి చంద్రశేఖర్‌  ఐఐసీటీ ప్రాంగణంలో ఆవిష్కృతమైన పద్మభూషణ్‌ ఎ.వి.రామారావు కిలో ల్యాబ్‌ చాలా ప్రత్యేకమైందని.. అత్యంత పరిశుద్ధమైన వాతావరణంలో మం దుల తయారీకి అవసరమైన రసాయనాలను పెద్ద ఎత్తున తయారు చేసేందుకు వీలు కల్పిస్తుందని ఐఐసీటీ డైరెక్టర్‌ డాక్టర్‌ శ్రీవారి చంద్రశేఖర్‌ తెలిపారు. సీఎస్‌ఐఆర్‌ డైరెక్టర్‌ జనరల్‌ శేఖర్‌తో కలిసి విలేకరుల సమావేశంలో పాల్గొన్న ఆయన ల్యాబ్‌ ప్రత్యేకతలను వివరించారు. ప్రభుత్వ రంగ సంస్థల్లో ఇలాంటి పరిశోధనశాల ఏర్పాటు కావడం ఇదే తొలిసారి అని తెలిపారు. మొత్తం రూ.పదికోట్ల వ్యయంతో నిర్మించామని, ఫార్మా రంగపు స్టార్టప్‌ కంపెనీలు, చిన్న, మధ్య స్థాయి కంపెనీలు కూడా దీన్ని ఉపయోగించుకోవచ్చునని చెప్పారు. యాంటీ వైరల్, కేన్సర్‌ చికిత్సకు ఉపయోగించే అత్యంత ప్రమాదకరమైన రసాయనాలతోనూ సురక్షితంగా పనిచేసేందుకు ఇందులో ఏర్పాట్లు ఉన్నాయన్నారు. ఈ పరిశోధన శాలలో తయారైన రసాయనం మరే ఇతర శుద్ధీకరణ అవసరం లేకుండా ఫార్మా కంపెనీలు క్లినికల్‌ ట్రయల్స్‌ కోసం వాడుకోవచ్చునన్నారు. 2021 నాటికి దేశీయంగానే కీటకనాశినులు, పురుగుల మందులు తయారు చేసేందుకు ఐఐసీటీ ప్రయత్నాలు చేస్తోందని.. డ్యూపాంట్, సిన్‌జెంటా తదితర అంతర్జాతీయ కంపెనీల 15 కీటకనాశినుల పేటెంట్లకు కాలం చెల్లనున్న నేపథ్యంలో వాటిని మరింత మెరుగుపరిచి సొంతంగా తయారు చేస్తామని చెప్పారు. 

భువనేశ్వర్‌: ఫొని తుపాను సృష్టించిన వినాశనం నుంచి ఒడిశా ఇప్పడిప్పుడే కోలుకుంటుంది. గత నెల ఫొని వినాశనానికి రాష్ట్రం అతలాకుతలమైన విషయం తెలిసిందే. తుపాను దెబ్బకు రాష్ట్ర వ్యాప్తంగా పర్యవరణం తీవ్రంగా దెబ్బతిన్నది. అనేక వృక్షాలు నేలకొరిగాయి. ఫొని ధాటికి దాదాపు 20 లక్షలకు పైగా వృక్షాలు కుప్పకూలినట్లు కేంద్ర విపత్తు నిర్వహణ సంస్థ వెల్లడించింది. దీని ప్రభావం వాతావరణంపై తీవ్రంగా ఉంటుందని భావించిన రాష్ట్ర ముఖ్యమంత్రి నవీన్‌ పట్నాయన్‌ వెంటనే నష్ట నివారణ చర్యలను చేపట్టారు. పర్యవరణ పరిరక్షణ నిమిత్తం ఐదేళ్ల కాలానికి ప్రణాళికను ఏర్పాటు చేశారు. ఫొని కారణంగా నష్టపోయిన వృక్ష సంపదను తిరిగి సాధించేందుకు రూ.188ను కేటాయించారు. ఆ నిధుల ద్వారా రాష్ట్ర వ్యాప్తంగా గ్రీనరీని ఏర్పాటుచేయనున్నారు. ముఖ్యంగా భువనేశ్వర్‌, కటక్‌ ప్రాంతాల్లో పెద్ద ఎత్తున మొక్కలను నాటనున్నారు. ఫొను నష్టంపై శనివారం ఉన్నతాధికారులతో సమావేశమైన నవీన్‌ ఈ మేరకు అంచనాలను వేసి నష్టనివారణ చర్యలను వేగవంతం చేయాలని అధికారులను ఆదేశించించారు. రాష్ట్ర వ్యాప్తంగా 2,780 హెక్టార్ల పంట నష్టం కూడా సంభవించింది. కాగా ఫొని తుపాను విరుచుకుపడినప్పుడు తన ప్రజలకు తక్షణ సహాయ సహకారాలను అందించడంలో ఒడిశా సీఎం నవీన్‌ పట్నాయక్‌ తీసుకున్న చర్యలు యావద్దేశం ప్రశంసలను అందుకున్న విషయం తెలిసిందే.   

భువనేశ్వర్‌ : ఫొని తుపాను తన జీవితాన్ని ఆగమ్యగోచరంగా మార్చిందని ఓ దళిత వ్యక్తి ఆవేదన వ్యక్తం చేశాడు. తుపాను ధాటికి తన గుడిసె కూలిపోవడంతో ప్రస్తుతం టాయిలెట్‌లో నివసిస్తున్నానంటూ దీనస్థితిని వివరించాడు. వివరాలు.. భారీ వర్షాలు, గాలులతో ఫొని తుపాను ఒడిశాలో బీభత్సం సృష్టించిన సంగతి తెలిసిందే. ఈ క్రమంలో కేంద్రపర జిల్లాలోని రఘుదీపూర్‌ గ్రామం అల్లకల్లోమైంది. ఈ ప్రకృతి వైపరీత్యంలో ఖిరోడ్‌ జేనా అనే దళిత వ్యక్తి గుడిసె కూలిపోయింది. దీంతో రోజువారీ కూలీ అయిన జేనా కుటుంబం రోడ్డున పడాల్సిన పరిస్థితి ఏర్పడింది. ఈ క్రమంలో స్వచ్ఛభారత్‌ కార్యక్రమంలో భాగంగా తమకు కేటాయించిన బాత్‌రూంలోనే జేనా కుటుంబం కాలం వెళ్లదీస్తోంది. ఈ విషయం గురించి జేనా మాట్లాడుతూ..‘ తుపాను కారణంగా నా ఇళ్లు నాశనమైంది. అయితే ఈ పక్కా టాయిలెట్‌ ఎండా వానల నుంచి ప్రస్తుతం మమ్మల్ని రక్షిస్తోంది. నాతో పాటు నా భార్య, ఎదిగిన ఇద్దరు కూతుళ్లను కాపాడుతోంది. అయితే ఇక్కడ ఎన్నాళ్లు ఉండనిస్తారో తెలియదు. ఇక్కడ ఉంటున్న కారణంగా బహిరంగ విసర్జనకు వెళ్లాల్సి వస్తోంది. మళ్లీ ఇళ్లు కట్టుకునేందుకు నాకు ఎటువంటి జీవనాధారం లేదు. కూలీ చేస్తేనే రోజు గడుస్తుంది. తుపాను సహాయక నిధులు అందేదాకా మాకు ఈ దుస్థితి’ తప్పదు అని తుపాను బాధితులు ఎదుర్కునే ఇబ్బందుల గురించి చెప్పుకొచ్చాడు. కాగా ప్రధాన మంత్రి ఆవాస్‌ యోజన కింద పక్కా ఇళ్లుకు దరఖాస్తు చేసుకున్నానని పేర్కొన్నాడు. ఈ విషయంపై స్పందించిన జిల్లా గ్రామీణాభివృద్ధి ఏజెన్సీ అధికారి జేనా కుటుంబాన్ని ప్రభుత్వం ఆదుకుంటుందని హామీ ఇచ్చారు. తుపాను సహాయక నిధులతో పాటు పక్కా ఇళ్లు కూడా మంజూరయ్యేలా చేస్తామని పేర్కొన్నారు.

సాక్షి, హైదరాబాద్‌: ఫొని తుపాను సృష్టించిన విధ్వంసంతో అతలాకుతలమైన ఒడిశాలో విద్యుత్‌ సరఫరా పునరుద్ధరణకు మన రాష్ట్ర విద్యుత్‌ సిబ్బంది పడుతున్న శ్రమ ఆ రాష్ట్ర ప్రజల మనసులను దోచుకుంటోంది. తుపాను దెబ్బకు విద్యుత్‌ సరఫరా కుదేలై అంధకారం నెలకొన్న ప్రాంతాల్లో విద్యుత్‌ సరఫరా పునరుద్ధరించేందుకు తెలంగాణ విద్యుత్‌ సంస్థల ఉద్యోగులు సాయం చేస్తున్నారు. మన రాష్ట్ర విద్యుత్‌ సిబ్బంది సహకారంతో మంగళవారం నాటికి ఒడిశా రాజధాని భువనేశ్వర్‌తో పాటు చుట్టుపక్కల 34 కిలోమీటర్ల మేర ప్రాంతాల్లో విద్యుత్‌ లైన్లకు మరమ్మతులు పూర్తి చేసి విద్యుత్‌ సరఫరాను పునరుద్ధరించారు. ఫొని తుపాను కారణంగా భీకరంగా వీచిన గాలులతో ఒడిశావ్యాప్తంగా విద్యుత్‌ స్తంభాలు, ట్రాన్స్‌ఫార్మర్లు నేలకూలాయి. విద్యుత్‌ లైన్లు తెగిపోయాయి. దీంతో 16 జిల్లాల్లో విద్యుత్‌ సరఫరా నిలిచిపోయింది. విద్యుత్‌ సరఫరా పునరుద్ధరణకు సహకరించాలని ఒడిశా ప్రభుత్వం విజ్ఞప్తి చేయగా.. సీఎం కేసీఆర్‌ స్పందించారు. ఒడిశాలో విద్యుత్‌ సరఫరా పునరుద్ధరణ పనుల్లో భాగం కావాలని సీఎస్‌ ఎస్‌కే జోషి, ట్రాన్స్‌కో సీఎండీ డి.ప్రభాకర్‌రావును ఆదేశించారు. దీంతో రాష్ట్ర విద్యుత్‌ సంస్థలు 1,000 మంది ఉద్యోగులను ఈ నెల 7న ఒడిశాకు పంపాయి. మన విద్యుత్‌ సిబ్బంది విద్యుత్‌ సరఫరా పునరుద్ధరణకు అవసరమైన సామగ్రి, ఆహార సామగ్రి, గుడారాలు కూడా వెంట తీసుకెళ్లారు. టీఎస్‌ఎస్పీడీసీఎల్‌ ఎస్‌ఈ ఎల్‌.గోపయ్య పునరుద్ధరణ చర్యలను పర్యవేక్షిస్తున్నారు. ఇప్పటివరకు పూర్తిగా దెబ్బతిన్న ప్రాంతంలో 34 కిలోమీటర్ల మేర పనులు పూర్తి చేశారు. 537 కరెంటు స్తంభాలను ఏర్పాటు చేశారు. దెబ్బతిన్న 74 ట్రాన్స్‌ ఫార్మర్లను మళ్లీ పనిచేసేలా చేశారు. భువనేశ్వర్‌తో పాటు, పూరీ జిల్లాలో విద్యుత్‌ సరఫరా పునరుద్ధరణ చేశారు. తెలంగాణ ఉద్యోగులు కష్టపడి విద్యుత్‌ సరఫరా పునరుద్ధరణ పనులు చేస్తున్నారని కోర్దా కలెక్టర్‌ భూపేందర్‌సింగ్‌ పూనియా కృతజ్ఞతలు తెలిపారు. సీఎం కేసీఆర్‌ ప్రశంసలు ఒడిశాలో తుపాను తాకిడికి గురైన ప్రాంతాల్లో సహాయక చర్యల్లో పాలుపంచుకుంటున్న విద్యుత్‌ సిబ్బందికి ముఖ్యమంత్రి కేసీఆర్‌ అభినందనలు తెలిపారు. తెలంగాణ ఉద్యోగులు మానవతా దృక్పథంతో ఒడిశాకు వెళ్లి సహాయక చర్యలు అందిస్తున్నారని ప్రశంసించారు. తక్కువ సమయంలోనే అక్కడ విద్యుత్‌ పునరుద్ధరణ పనులు విజయవంతం చేశారని అభినందించారు. కష్టాల్లో ఉన్న వారికి సహాయం అందించేందుకు ప్రతికూల వాతావరణంలోనూ తెలంగాణ విద్యుత్‌ ఉద్యోగులు శ్రమిస్తున్నారని ట్రాన్స్‌కో సీఎండీ దేవులపల్లి ప్రభాకర్‌రావు కొనియాడారు. కొన్ని గంటల సమయంలోనే అక్కడికి చేరుకుని, వర్షంలో కూడా పనిచేసి సామాజిక బాధ్యత నెరవేర్చారని కొనియాడారు.

ముంబై : గత కొన్ని రోజులుగా కెనడా పౌరసత్వం కలిగి ఉన్నాడని సోషల్‌ మీడియాలో ట్రోల్‌ అవుతున్న బాలీవుడ్‌ స్టార్‌ అక్షయ్‌కుమార్‌ మాతృదేశం పట్ల మరోసారి పెద్ద మనసు చాటుకున్నారు. ఫొని తుపానుతో నష్టపోయిన ఒడిషాకు భూరీ విరాళం ప్రకటించారు. ఒడిశా సీఎం సహాయనిధికి కోటి రూపాయలు విరాళమిచ్చారు. పలు సామాజిక సమస్యలపై స్పందిస్తూ తన వంతుగా సాయమందించడంలో ముందుండే అక్షయ్‌.. ఒడిశాకు విరాళం ప్రకటించిన మొదటి యాక్టర్‌గా నిలవడం విశేషం. (చదవండి : దేశం మీద ప్రేమను నిరూపించుకోవాలా?) గతంలో కేరళ, చెన్నై వరదల సమయంలో కూడా ఆయన విరాళం అందించారు. ఇటీవల పుల్వామా ఉగ్రదాడిలో అమరులైన జవాన్ల కుటుంబాలకు రూ. 5 కోట్ల విరాళం ఇచ్చారు. భద్రతా బలగాల కుటుంబాలకు సాయం చేసేందుకు ‘భారత్ కే వీర్’ వెబ్‌సైట్ కూడా నెల కొల్పారు. కొంతకాలం క్రితం నిరుపేద యువతులకు సామూహిక వివాహాలు జరిపించే కార్యక్రమంలో పాల్గొని ఒక్కో జంటకు ల‌క్ష రూపాయల చొప్పున అంద‌జేశారు. అక్షయ్ కుమార్‌ ఇటీవల ప్రధాన మంత్రి నరేంద్ర మోదీని ఇంటర్వ్యూ చేసిన విషయం తెలిసిందే.  (చదవండి : ఇదేంది అక్షయ్‌.. ఇట్లా చేస్తివి!?)

ఎస్‌.కోట నియోజకవర్గంలోని వేపాడ, జామి, ఎల్‌.కోట మండలాల్లో సోమవారం మధ్యాహ్నం ఒక్కసారిగా ఈదురుగాలులు విరుచుకుపడ్డాయి. చెట్లు నేలకూలాయి. అరటి, బొప్పాయి తోటలు ధ్వంసమయ్యాయి. విద్యుత్‌ స్తంభాలు విరిగిపడ్డాయి. పల్లెల్లో అంధకారం అలముకుంది. పిడుగుపాటుకు జామి మండల కేంద్రంలోని దొండపర్తి కూడలిలో ఒక ఆవు మృతి చెందింది. గాలుల ధాటికి జనం బెంబేలెత్తిపోయారు. ఇళ్లకు పరుగుతీశారు. తీరా.. చిరుజల్లులే కురవడంతో రైతులు నిరాశచెందారు. వేపాడ/జామి/ఎల్‌.కోట: ఎస్‌.కోట నియోజకవర్గంలో సోమవారం మధ్యాహ్నం 2 గంటల సమయంలో ఈదురుగాలులు బీభత్సం సృష్టించాయి. ఒక్కసారిగా వీచిన ఈదురు గాలులకు జనం భయంతో పరుగు తీశారు. ఎక్కడికక్కడే చెట్లు, విద్యుత్‌ స్తంభాలు కూలిపోవడంతో భయపడ్డారు. గాలుల ధాటికి వేపాడ మండలంలోని ఎస్‌కేఎస్‌ఆర్‌ పురంలో విద్యుత్‌ట్రాన్స్‌ఫార్మర్‌ నేలకొరిగింది. విద్యుత్‌ స్తంభాలు నేలకొరిగాయి. దిబ్బపాలెంలో పశువుల పాకలు కూలిపోయాయి. ఎస్‌కేఆర్‌ పురానికి చెందిన రైతు శిరికి ఈశ్వరమ్మకు చెందిన సుమారు 5.60 ఎకరాల బొప్పాయి తోట ధ్వంసమైంది. సుమారు రూ.25 లక్షల పంట చేతికొచ్చేదశలో నష్టపోయామంటూ ఆమె గగ్గోలు పెడుతోంది. చామలాపల్లి పంచాయతీ పోతుబందిపాలెంగిరిజన గ్రామంలో విద్యుత్‌ స్తంభాలు ఇళ్లపై పడడంతో జనం పరుగులు తీశారు. విద్యుత్‌ సరఫరా పూర్తిగా నిలిచిపోయింది. లక్కవరపుకోట మండలంలో సాయంత్రం కురిసిన చిరుజల్లులకు వాతావరణం చల్లబడింది. ఈదురు గాలులకు ఎల్‌.కోట బీసీ కాలనీలో తాటి చెట్టు బి.పార్వతమ్మ ఇంటిపై కూలిపోయింది. దీంతో ఇంటిగోడ కూలిపోయే స్థితికి చేరింది. ఎవరికీ ఎటువంటి ప్రమాదం జరగక పోవడంతో ఊపిరి పీల్చుకున్నారు. అరకు–విశాఖ ప్రధాన రోడ్డులో సోంపురం జంక్షన్‌ సమీపంలో తాటిచెట్టు విద్యుత్‌ తీగెలపై పడడంతో రాకపోకలకు అంతరాయం కలిగింది. ఎస్సై ప్రయోగమూర్తి జేసీబీ సాయంతో తాటిచెట్టును తొలిగించి ట్రాఫిక్‌ను క్రమబద్ధీకరించారు. ఈదురు గాలులకు సుమారు 8 విద్యుత్‌ స్తంభాలు నేలకొరగడంతో మండలంలో పూర్తిగా విద్యుత్‌కు అంతరాయం కలిగింది. జామి మండలంలో పిడుగులు, మెరుపులతో కూడిన భారీవర్షం కురిసింది. ఫొని తుపాను ఎలాంటి ప్రభావం చూపకపోగా ఒక్కసారి ఈదురుగాలులు ధాటిగా వీయడం, పిడుగులు పడడంతో జనం భయపడ్డారు. జామి మండలంలో మొత్తం 21 విద్యుత్‌ స్తంభాలు కూలిపోయాయి. కె.భీమసింగిలో–5, జామి, శ్రీచక్ర సిమ్మెంట్‌ ఫ్యాక్టరీ మధ్యలో 7, ఏ.ఆర్‌.పేటలో 5, కొత్తూరులో 2, గొడికొమ్ములో ఒకటి, అలమండలో ఒకటి చొప్పున విద్యుత్‌ స్తంభాలు కూలిపోయాయి. దీంతో విద్యుత్‌ తీగెలు తెగిపోయాయి. గాలుల బీభత్సానికి విద్యుత్‌ శాఖకు సుమారు రూ.3 లక్షల ఆర్థిక నష్టం చేకూరిందని జామి విద్యుత్‌ శాఖ అధికారులు తెలిపారు. కె.భీమసింగి, యాతపాలెం, చిల్లపాలెం తదితర గ్రామాలకు మంగళవారం సాయంత్రానికి విద్యుత్‌ సరఫరాను పునరుద్ధరిస్తామని చెప్పారు. మామిడి పంటకు అపారనష్టం అసలే ఈ ఏడాది అరకొరగా మామిడిపంటతో మామిడి రైతులు ఆందోళనలో ఉన్నారు. సోమవారం వీచిన గాలులకు మామిడిపంటకు తీవ్ర నష్టం వాటిల్లింది. మండలంలో ఎక్కడికక్కడ మామిడి కాయలు నేలరాలాయి. దీంతో రైతులు గగ్గోలు పెడుతున్నారు. పిడుగుపడి ఆవు మృతి.. జామి మండల కేంద్రంలోని దొండపర్తి జంక్షన్‌ వద్ద కొత్తలి రాంబాబుకు చెందిన సుమారు రూ.50వేలు విలువ చేసే ఆవు పిడుగుపాటుకు గురై మృతిచెందింది. కల్లాంలోని ఓ చెట్టుకింద ఉన్న ఆవుపై పిడుగు పడడంతో ఈ ప్రమాదం జరిగింది. ఎక్కడికక్కడే భారీ శబ్దంతో పిడుగులు పడడంతో మండల వాసులు భయాందోళన చెందారు.

భువనేశ్వర్‌: ప్రధాని మోదీ సోమవారం ఒడిశాలోని ‘ఫొని’ తుపాను బాధిత ప్రాంతాలను ఏరియల్‌ సర్వే చేశారు. ప్రకృతి బీభత్సంతో తీవ్రంగా నష్టపోయిన రాష్ట్రానికి ఇప్పటికే అందజేసిన రూ.381 కోట్లకు అదనంగా తక్షణం రూ.1,000 కోట్లు ఇస్తామని ప్రకటించారు. తుపాను కారణంగా ప్రాణాలు కోల్పోయిన 34 మంది కుటుంబాలకు రూ.2 లక్షల చొప్పున, గాయపడిన వారికి రూ.50 వేలు సాయంగా అందిస్తామని ప్రధాని తెలిపారు. ఏటా ప్రకృతి విపత్తులు సర్వసాధారణంగా మారిన ఒడిశా, మిగతా తీరప్రాంత రాష్ట్రాల కోసం దీర్ఘకాలిక పరిష్కారం రూపొందించాల్సిన అవసరం ఉందన్నారు. వాతావరణ శాఖ హెచ్చరికలతో రాష్ట్ర యంత్రాంగాన్ని అప్రమత్తం చేసి దాదాపు 12 లక్షల మందిని సురక్షిత ప్రాంతాలకు తరలించి, ప్రాణనష్టాన్ని కనిష్టానికి తగ్గించిన సీఎం నవీన్‌ పట్నాయక్‌ను ఆయన అభినందించారు. అనంతరం భువనేశ్వర్‌లో సీఎం అధ్యక్షతన జరిగిన ఉన్నత స్థాయి సమావేశంలో ప్రధాని పాల్గొన్నారు.ఫొని కారణంగా రాష్ట్రంలో వాయిదా పడిన నీట్‌ను ఈ నెల 20వ తేదీన నిర్వహించనున్నారు. ఫోన్‌ చేస్తే మమత మాట్లాడలేదు పశ్చిమబెంగాల్‌ సీఎం మమతా బెనర్జీ తన ఫోన్‌కాల్‌ను స్వీకరించలేదని, ఆమె తిరిగి తనకు ఫోన్‌ చేయలేదని మోదీ చెప్పారు. రాష్ట్రంలో ఫొని తుపానుతో జరిగిన నష్టాన్ని తెలుసుకునేందుకు రెండు సార్లు ఫోన్‌ చేసినా ఆమె మాట్లాడలేదని, తుపాను నష్టంపై సమీక్షించేందుకు సమావేశం ఏర్పాటు చేయాలని కోరినా ఆమె స్పందించలేదని పేర్కొన్నారు. పశ్చిమ మిడ్నపూర్‌ జిల్లాలో, జార్ఖండ్‌లోని చైబాసాలో సోమవారం ఎన్నికల ర్యాలీలో ప్రధాని ప్రసంగించారు. రాష్ట్రంలో తుపాను ప్రభావం తెల్సుకునేందుకు బెంగాల్‌ సీఎం మమతకు  రెండుసార్లు ఫోన్‌ చేశా. అయినా, ఆమె నాతో మాట్లాడటానికి నిరాకరించారు.  ఆమెకు ప్రజల బాగోగులు పట్టవు’ అని అన్నారు. మరోవైపు, ప్రస్తుతం జరుగుతున్న లోక్‌సభ మిగతా విడత ఎన్నికల్లో మాజీ ప్రధాని రాజీవ్‌ గాంధీ పేరుతో పోటీ చేయాలని కాంగ్రెస్‌ పార్టీకి ప్రధాని మోదీ సవాల్‌ విసిరారు. బోఫోర్స్‌ కుంభకోణం తదితర అంశాలపైనా చర్చకు రావాలన్నారు. ‘కోల్‌కతాలోని నా కార్యాలయానికి మోదీ ఫోన్‌ చేసినపుడులో ఖరగ్‌పూర్‌లో తుపాను సహాయక చర్యలను దగ్గరుండి పర్యవేక్షిస్తున్నా. అందుకే ఫోన్‌ మాట్లాడలేదు’ అని మమత వివరణ ఇచ్చారు.

ఫొని తుపాను విరుచుకుపడినప్పుడు తన ప్రజలకు తక్షణ సహాయ సహకారాలను అందించడంలో ఒడిశా సీఎం నవీన్‌ పట్నాయక్‌ తీసుకున్న చర్యలు యావద్దేశం ప్రశంసలను పొందుతున్నాయి. ఏపీ సీఎం బాబులాగా తన చుట్టూ అధికారుల్ని తిప్పుకుంటూ, పచార్లు కొడుతూ ప్రజల దృష్టిని ప్రచార ఆర్భాటం కోసం ఆకర్షించుకోవడానికి పట్నాయక్‌ ఆస్కారం ఇవ్వలేదు. ఒడిశా లోతట్టు ప్రాంతాల్లోని 10 వేల గ్రామాల నుంచి, 12 లక్షల మంది ప్రజల్ని 4 వేల సురక్షిత కేంద్రాలకు, 860 ఉచిత ఆహార సదుపాయ కేంద్రాలకు జయప్రదంగా లక్షమంది అధికారులు తరలించగలగడానికి పట్నాయక్‌ చుట్టూ అధికారులు వందిమాగధుల్లా నాట్యం ఆడకపోవడమే ప్రధాన కారణమని గుర్తించాలి. వేసవిలో తుపానులు రావటం అందులో అరుదైన ప్రకృతి వైపరీత్యం. కానీ మారిన వాతావరణ పరిస్థితుల్లో, వేసవి కాలాన్ని కూడా తుపానులు విడిచిపెట్టడం లేదు. గత 43 సంవత్సరాల్లో ఎదురైన తుపానుల్లో ‘ఫొని’ వేసవి తుపాను దేశంలోనే అత్యంత బలీయమైన దృశ్యం. బంగాళాప్రాంతం నానాటికీ వేడెక్కిపోతున్న ఫలితంగానే ఈ అసాధారణ పరిణామం’’. – భారత వాతావరణ శాఖ ప్రకటన ‘‘ఈసారి భారత వాతావరణ శాఖ చేసిన ముందస్తు హెచ్చరికలు, భారీ జన నష్టాన్ని నివారించడానికి దోహదం చేశాయి. ఆ సంస్థ ఈ సారి ఆచి తూచినట్లు చేసిన అంచనా జననష్టాన్ని అదుపు చేయగలిగింది.  ఫలి తంగా అధికారులు తుపాను ధాటికి గురి కానున్న ప్రాంతాల ప్రజల్ని ముందస్తు వ్యూహంతో, తక్కువ జననష్టంతో సురక్షిత కేంద్రాలకు చేర్చి రక్షించడానికి దోహదం చేసింది’’ – ఐక్యరాజ్యసమితి ప్రకృతి వైపరీత్యాల నియంత్రణ సంస్థ కితాబు. వాన బడాయి చవిటి పర్రమీద’ అన్నట్లుగా వాతావరణ కాలుష్యంపై ప్రపంచ దేశాలు ఎన్ని అంతర్జాతీయ సమావేశాలు నిర్ణయించుకున్నా, జనాల ఉనికిని,  ఉసురునూ పంటల్నీ, పంట పొలాలను, పారిశ్రామిక వాడల్ని పలు వర్గాల జనావాసాల్ని అతలాకుతలం చేసి, భారీ ధన ప్రాణ నష్టాలకు దారి తీస్తాయి అకాల వర్షాలూ, తుపానులూ. కానీ ఇటీవల ఆంధ్రప్రదేశ్‌లోని కొన్ని జిల్లాలను చుట్టుముట్టిన తిత్లీ తుపా నుకూ, కొన్ని రోజుల క్రితం పొరుగు రాష్ట్రమైన ఒడిశాను పెనవేసుకుని భారీనష్టానికి పగబట్టి మరీ గురిచేసిన ఫొనికీ నష్ట విస్తృతిలో పెద్ద తేడా ఉంది. అయితే ఏ ప్రకృతి వైపరీత్యం ఉన్న ఫళాన విరుచుకుపడినా,  దాని నివారణకు, నష్టాల వ్యాప్తి నియంత్రణకు స్థానిక ప్రభుత్వాలు సర్వసన్నద్ధంగా ఉండాల్సిన ధర్మం పాలకులదీ, అధికారులదీ. నష్టాలను అంచనా కట్టడంలోనే కాదు, వాటిని దొరికిందే అదనుగా భావించి పాలకులు, వారి అవినీతి ప్రవర్తన స్థాయిని బట్టి సంబంధిత అధి కారులు వాస్తవాలను కేంద్రానికి సహాయార్థం సమర్పించడంలో కూడా చొరవ, నిజాయితీ అవసరం. ఇక్కడ అన్నింటికంటే ప్రధానమైన అంశం.. వాతావరణ శాఖ ఫలానా తుపాను విరుచుకుపడబోతున్నదని ప్రకటించిన మరుక్షణమే ఆ ఉపద్రవం ఘటిల్లడానికి ముందే తొలి ఇరవైనాలుగు గంటలలోనే తుపానుకు గురికాగల ప్రాంతాలనుంచి ప్రజల్ని సురక్షిత ప్రాంతాలకు, సహాయక కేంద్రాలకు హుటాహుటిన తరలించే చైతన్యం పాలకుల్లో ఉండాలి. ఇటువంటి ప్రకృతి వైపరీత్యాల సమయంలో 1970లలో ఆంధ్రప్రదేశ్‌లో వచ్చిన తుపాను సమయంలో ఇలాంటి జాగ్రత్తలు తీసుకోకుండా అజాగ్రత్త వహించిన ఆనాటి పాల కుల మూలంగా, 72 గంటల ముందుగానే అమెరికా వాతావరణ సంస్థలు అంత దూరంనుంచి మన బంగాళాఖాతం జలాల్లో రగులు తున్న, మసులుతున్న, సుడులు తిరుగుతూ పైకి ఎగసిపడుతున్న జ్వాలా తోరణాన్ని పసిగట్టి హెచ్చరించినా పట్టించుకోకుండా నిద్రావ స్థలో ఉన్న నాటి రాష్ట్ర పాలకుల అలసత్వం వల్ల దివిసీమ గ్రామాలను 12 అడుగుల ఎత్తున ముంచివేసి 10నుంచి, 12 వేలమంది నిండు ప్రాణాలను నిమి షాల్లో బలిగొన్నది. అలాంటి దారుణ విషాద ఘట్టాన్ని చవిచూడకుండా ఒడిశా ప్రభుత్వం, ప్రధానంగా ముఖ్యమంత్రి నవీన్‌ పట్నాయక్‌ వాతా వరణ శాఖ హెచ్చరికలు ప్రారంభమైన మరుక్షణం నుంచి శరవేగాన కదిలి, అధికార యంత్రాంగాన్ని తనచుట్టూ తిప్పుకోకుండా తుపాను నష్టనివారణ పనులకు వారిని హుటాహుటిన సంబంధిత ప్రాంతాలకు తరలించి ప్రజల రక్షణకు, పునరావాస, సదుపాయాల కల్పనకు ప్రాధా న్యమివ్వడంతో యావత్తు దేశ ప్రజల ప్రశంసలకు పాత్రులయ్యారు. ముఖ్యమంత్రి తన చుట్టూ అధికారుల్ని తిప్పుకుంటూ పచార్లు కొడుతూ ప్రజల దృష్టిని ప్రచార ఆర్భాటం కోసం ఆకర్షించుకోవడానికి పట్నాయక్‌ ఆస్కారం ఇవ్వలేదు. అధికారుల్ని స్వేచ్ఛగా రంగంలోకి దించి, తాను మాత్రం హెలికాప్టర్‌లో వెళ్లి నష్టాలకు గురైన ప్రాంతాలలో పర్యటించి, నష్టాన్ని అంచనా కట్టడానికి అధికారులతో సంప్రదించడానికి మాత్రమే ప్రాధాన్యం ఇవ్వడం– పరమ ఆచరణ సాధ్యమూ నికార్సయిన వైఖరిగా మనం భావించాలి. ఇంతవరకు హుదూద్‌ తుపాను బీభత్సంవల్ల ఆంధ్ర ప్రదేశ్‌లోని బాధిత ప్రాంతాల పంటలకు, ఆస్తులకు, ప్రజలకు వాటిల్లిన నష్టాన్ని ఆదుకోడానికి కేంద్ర ప్రభుత్వం అందించిన రూ. 1,600 కోట్ల సహాయానికి లెక్క జమా చూపలేదని ఈ క్షణం దాకా కేంద్రం ఫిర్యాదు చేయడాన్ని స్థానిక పాలకులు సిగ్గుగా, రాష్ట్రానికి తలవంపులుగా చంద్ర బాబు భావించడం లేదు.  ఇప్పుడు పడగవిప్పి ఒడిశాకు భారీ నష్టం కలగజేసిన ‘ఫొని’ మాత్ర మేకాదు, రానున్న రోజుల్లో కాలుష్య వాతావరణం వ్యాప్తిని అరికట్టడా నికి శ్రద్ధ వహించని ప్రపంచ పాలకుల వైఫల్యం కారణంగా ఆ కాలుష్యం రానున్న రోజుల్లో వచ్చే సాధారణ వర్ష రుతువు చక్రగతిని కూడా భారీ ఎత్తున నిరోధించే అవకాశం ఉందని ‘నేచర్‌’ అనే అంతర్జాతీయ సాధి కార పరిశోధనా పత్రిక హెచ్చరిస్తోందని మరచిపోరాదు. ‘ఫొని’ వల్ల కలి గిన నష్టం ఒడిశాలో ఎంత తీవ్రస్థాయిలో ఉందంటే–లోతట్టు ప్రాంతా ల్లోని 10 వేల గ్రామాల నుంచి, 12 లక్షల మంది ప్రజల్ని 4 వేల సురక్షిత కేంద్రాలకు, 860 ఉచిత ఆహార సదుపాయ కేంద్రాలకు జయప్రదంగా లక్షమంది అధికారులు తరలించగలగడం ముఖ్యమంత్రి పట్నాయక్‌ చుట్టూ అధికారులు వందిమాగధులా ‘హల్లీసకం’ (నాట్యం) ఆడకపోవ డమే ప్రధాన కారణమని గుర్తించాలి. ఎందుకంటే, వసుంధర (భూమి) సౌందర్యానికి మూలం వానలు గదా. అందుకే ‘వరిపొట్టుకు పుట్టెడు నీరు’ కావాలన్న సామెత వచ్చింది. మనకు ఇంగ్లిష్‌ నెలలపట్టీ వచ్చి, తెలుగు వెలుగు నుంచి తప్పుకుని అక్కడ ‘మరక’ లేదు, ఇక్కడ ‘మచ్చ’ లేదనడానికి బదులు వ్యాపారకర్తల నోట్లో తెలుగు ‘నో మచ్చ’ ‘నో మరక’ అన్న అవతారం ఎత్తింది. తెలుగు పదాల వాడకానికే ‘నామోషీ’ అవుతున్నప్పుడు తెలుగు మాసాలు, రుతువులు, తిథులు, నక్షత్రాలు, దిక్కులు తెలియకుండా ‘దిక్కులు’ చూడ్డం ఆనవాయితీగా మారింది. రత్న శాస్త్రం మాదిరిగా వర్ష శాస్త్రం కూడా ఉంది. ఆకాశంలో పుట్టిన మబ్బుల ఆకారాన్ని, రంగుల్ని బట్టి ఉరుములూ, మెరుపులూ చూసి, వానలు కురిసే తీరుతెన్నుల్ని అంచనా కట్టారు ప్రాచీనులు. ప్రాచీన ఖగోళ శాస్త్రవేత్తలలో ఒకరైన వరాహమిత్రుడు మబ్బులు చెట్ల ఆకారంలో కన్పించినా, నిగనిగలాడుతూ, తెల్లతెల్లగా వెలిమబ్బుల్లా కన్పించినా అలాంటి మబ్బులు నేలపైన అధికంగా వాన కురిపిస్తాయట. వాటి ఆకా రాలను వర్ణిస్తూ ఆయన మేఘాల సమూహాన్ని రకరకాలుగా వర్ణించడం ఒక విశేషం: అతనికెలా అనిపించిందట? ఆ మేఘాలు ఒక్కో కోణంలో ఒక మంచంలా, ఒక సింహంలా, ఏనుగు కుంభ స్థలంలా, ఒక విసనకర్ర (వింజామరం)లా, చంద్రబింబపు సొగసులా, గుడి గోపురంలా, వెండి కొండలా, ఓ చెరువులా, ఓ కొలనులా, గొడుగులా, మొసళ్లలా, దేవతా విమానాల్లో కనిపించాయట. మేఘాలు ఉంటే ధ్వనిని బట్టి అవి కురిసే మబ్బులా అరిచే మబ్బులా అని ఆయా మబ్బు రంగుల్ని బట్టి ఆయా ప్రాంతాల ప్రజల్లో పెరిగే కలహాలను కూడా ఊహించగలిగేవారట. విత్త నాలు జల్లాల్సిన కాలాల్ని, అందుకు అనుకూలించే కార్తెల్ని, నక్షత్రాల్ని పేర్కొనేవారు, ధాన్యాదుల తరగతుల్ని బట్టి, వేసే పైరుల్నిబట్టి పంట ‘జాతకం’ లెక్క గట్టేవారు, కోతల కాలాల్ని నిర్ణయించేవారు. భారత వాతావరణశాఖ అయినా ఈ ఏడాది నిక్కచ్చిగా ఉజ్జాయింపున సరిగానే తుపానుల అవకాశాన్ని అంచనా వేసినా, ఫ్రెంచి పరిశోధకులు మాత్రం  సముద్రజలాల ఆధారంగా ఏర్పడే మెరైన్‌ మేఘాలు వాతావరణ మార్పులవల్ల వేడెక్కిపోతున్న భూమివల్ల వ్యాపించే సెగ నుంచి మానవు లకు రక్షణ కవచంగా తోడ్పడవచ్చునని ఊహిస్తున్నారు. సముద్ర ఉపరి తలంపై ఏర్పడే ఈ మేఘాలు వేడెక్కిపోతున్న వాతావరణంలో మరి రెండుమూడు రెట్లు పెరిగిపోయే బొగ్గుపులుసు వాయువుల్ని ఒక మేరకు చెదరగొట్టవచ్చునని కూడా వారు అంచనా వేశారు. ఈ ప్రమాదకర దృశ్యాన్ని వివరిస్తూ ఆ శాస్త్రవేత్తలు ‘మనకు తెలియని ఈ ప్రమాదకర వాతావరణం వాకిళ్లు తెరుచుకుని ఉందన్న వాస్తవాన్ని మరవరాదని’ కూడా హెచ్చరిస్తున్నారు. మన దేశం ఇరుగు పొరుగు దేశాలలో వచ్చే వేసవి తుపానులు వాయుగుండాలుగా గానీ, లేదా క్రమంగా అల్ప పీడ నం గానీ ఏర్పడవచ్చు. ఇలాంటి బాపతు తుపానులు 35 శాతం సంభ  వమని కూడా వారు చెబుతున్నారు. అయితే వీటిలో అత్యంత భీకర రూపం దాల్చి వినాశనం సృష్టించగలవిగా ఉంటే 7 శాతానికి మించవు.  మన ఆలోచనలు, మనసులు, సభలు, సమావేశాలు అరుణారుణం కావచ్చుగానీ, మేఘం మాత్రం అరుణారుణం అయితే మాత్రం అతి తక్కువ వర్షం పడుతుందట. కనుకనే బహుశా మన ప్రాచీనులు పొలంలో విత్తనాలు చల్లడానికి (బీజావాపన) అనుకూలించే కార్తెల జాబితాను ఎంచుకుని ‘ఉత్తర’తో మొదలయ్యే మూడు నక్షత్రాలున్న (ఉత్తర ఫల్గుని, ఉత్తారాషాడ, ఉత్తరాభాద్ర) రోజున పొలంలో విత్తనాలు చల్లితే ఆయా ధాన్యాల రాబడి ఇబ్బడిముబ్బడిగా ఉంటుందని ఒక విశ్వాసం. కాగా ప్రపంచ విజ్ఞానం, శాస్త్ర, సాంకేతిక, పరిశోధనా సంస్థలు శాఖోపశాఖలుగా పెరిగి వాటితోపాటు విత్తన పరిశోధనలు కూడా తామ రతంపరగా వృద్ధి అవుతున్న ఆధునిక యుగంలో ఏ పంట వంగడమైనా అంటూ సొంటూ అన్న భేదం తొలగిపోయింది. అందుకే అన్నారు– ‘అదను ఎరిగి సేద్యం, పదును ఎరిగి పైరు’ అని! -ఏబీకే ప్రసాద్‌ సీనియర్‌ సంపాదకులు  abkprasad2006@yahoo.co.in

ప్రకృతి ప్రకోపించి విరుచుకుపడినప్పుడు దాన్ని శాంతింపజేయడం ఎవరి తరమూ కాదు. ఇప్పటి కున్న శాస్త్ర పరిజ్ఞానం మేరకు మనిషి చేయగలిగిందల్లా దాని ఆనవాళ్లను ముందుగా పసిగట్టి, అది సృష్టించగల విధ్వంసాన్ని అంచనా వేసుకుని ప్రజలందరినీ అప్రమత్తం చేయడం, వారిని సురక్షిత ప్రాంతాలకు తరలించి జన నష్టం లేకుండా శాయశక్తులా ప్రయత్నించడం మాత్రమే. ఇవిమాత్రమే కాదు...వైపరీత్యం సమయంలోనూ, అది నిష్క్రమించాకా సహాయ, పునరావాస కార్యక్రమాలను సమర్థవంతంగా చేపట్టగలగాలి. అందుకవసరమైన సమస్త మౌలిక సదుపాయాలనూ సిద్ధం చేయాలి. వీటన్నిటినీ ఎంత ఒడుపుగా, ఎంత నేర్పుగా, ఎంత సమన్వయంతో చేయగలుగుతుం దన్నదే ఏ ప్రభుత్వ పనితనానికైనా గీటురాయి. దాదాపు పదిరోజులపాటు తీర ప్రాంత రాష్ట్రాలను ఊపిరాడనీయకుండా చేసిన ‘ఫొని’ తుపాను శుక్రవారం ఒడిశాలోని పూరి సమీపంలో తీరం దాటినప్పుడు అది సృష్టించిన విలయం అంతా ఇంతా కాదు. గంటకు దాదాపు 205 కిలోమీటర్ల వేగంతో పెనుగాలులు వీచాయి. కుండపోతగా వర్షాలు పడ్డాయి. లక్షలాదిమందిని పునరావాస కేంద్రాలకు తరలించవలసి వచ్చింది. 30మంది ప్రాణాలు కోల్పోయారు. ప్రధానంగా పూరి, ఖుర్దా జిల్లాలు తుపాను తాకిడికి చివురుటాకుల్లా వణికాయి. ‘ఫొని’ ఆచూకీ పదిరోజుల ముందే తెలిసినా అది ఉన్నకొద్దీ బలం పుంజుకుంటూ, వంపులు తిరుగుతూ సాగిన తీరు శాస్త్రవేత్తలను కూడా అయోమయంలో పడేసింది. దాని నడకను గమనిస్తూ అది తమిళనాడు దగ్గర తీరం దాటొచ్చునని ఒకసారి, ఆంధ్రప్రదేశ్‌పై విరుచుకుపడొచ్చునని మరోసారి వారు అంచనా వేశారు. కానీ గాలులు వీచే తీరు, సముద్రంలో అనూహ్యంగా చోటుచేసుకున్న పరిణామాలు దాని దిశను మార్చాయి. అయితే ఆంధ్రప్రదేశ్‌ తీరాన్ని ఒరుసుకుంటూ అది సాగించిన ప్రయాణం వల్ల ఉత్తరాంధ్ర జిల్లాలు, ప్రత్యేకించి శ్రీకాకుళం, విజయనగరం జిల్లాలు నష్టాన్ని చవిచూడక తప్పలేదు. జన నష్టం లేక పోయినా వేల ఇళ్లు దెబ్బతిన్నాయి. 958 హెక్టార్లలో పంటలు దెబ్బతిన్నాయి. ఈ రెండు జిల్లాల్లో రూ. 58.61 కోట్ల నష్టం వాటిల్లిందని ప్రభుత్వ ప్రధాన కార్యదర్శి ఎల్వీ సుబ్రహ్మణ్యం కేంద్రానికి పంపిన ప్రాథమిక అంచనా నివేదికలో తెలియజేశారు.    ‘ఫొని’ విలయాన్ని ఒడిశా ఎదుర్కొన్న తీరు అత్యంత ప్రశంసనీయమైనది. ప్రభుత్వం 43,000 మంది వలంటీర్లను రంగంలోకి దించింది. విపత్కర పరిస్థితుల్లో సాయం అందించడానికి మరో వేయిమంది సిబ్బందిని ముఖ్యప్రాంతాలకు తరలించింది. ఎస్సెమ్మెస్‌లు, టీవీ చానెళ్లు, సైరన్‌లు, మైక్‌లు... ఒకటేమిటి అన్నిటినీ సంపూర్ణంగా వినియోగించుకుంది. ‘తుపాను విరుచుకుపడబోతోంది... సురక్షిత ప్రాంతాలకు తరలివెళ్లండ’న్నదే ఆ సందేశాల సారాంశం. రంగంలోకి దిగిన ఐఏఎస్, ఐపీఎస్‌ అధికారులు క్షేత్ర స్థాయిలో పనిచేసే వేలాదిమంది వలంటీర్లతో, సహాయ సిబ్బందితో సమన్వయపరచుకుంటూ సహాయశిబిరాలకు 12 లక్షలమంది తరలివెళ్లేలా చూశారు. అక్కడ కనీస సదుపాయాలు అందుబాటులో ఉండేందుకు అవసరమైన చర్యలు తీసుకున్నారు. ముఖ్యంగా ఆహారం, మంచినీరు ప్యాకెట్లు ప్రతి ఒక్కరికీ చేరేయగలిగారు. 1999నాటి పెనుతు పాను 10,000మందిని పొట్టనబెట్టుకున్నదని గుర్తుంచుకుంటే...‘ఫొని’ రాక్షసిని ఇప్పుడు ఒడిశా ఎంత సమర్ధవంతంగా ఎదుర్కొన్నదో అవగాహనకొస్తుంది. పాలకులకు ముందు చూపుంటే, తీవ్రతను అంచనా వేయగలిగితే, దానికి తగ్గట్టుగా సర్వ శక్తుల్ని కేంద్రీకరించగలిగితే నష్టాన్ని కనిష్ట స్థాయికి పరిమితం చేయడం కష్టం కాదని ఒడిశా నిరూపించింది. కేవలం అయిదు పేజీల కార్యాచరణ ప్రణాళిక ఈ అద్భుతాన్ని సాధించిందంటే ఆశ్చర్యం కలుగుతుంది. ఈ ప్రణాళిక ప్రతి అంశాన్నీ స్పృశించింది.  షెల్టర్‌లకు ప్రజల్ని చేరేసేటపుడు ఏ ఏ అంశాల్ని దృష్టిలో పెట్టుకోవాలో ఇది సూచించింది. ముఖ్యంగా సీనియర్‌ సిటిజన్లు, చిన్న పిల్లల విషయంలో తీసుకోవాల్సిన జాగ్రత్తలేమిటో చెప్పింది. తమ ప్రాంతాల్లో ఉన్న ఇళ్లు, అందులో నివసిస్తున్నవారి వివరాలున్న జాబితాలను క్షేత్రస్థాయి సిబ్బందికి అందించారు. ‘ఫొని’ శుక్రవారం ఉదయం విరుచుకుపడగా అంతకు 24 గంటలకన్నా ముందే ఒక క్రమపద్ధతిలో సహాయచర్యలు మొదలైపోయాయి.  విపత్తులు విరుచుకుపడినప్పుడు ప్రభుత్వాలు ఎలా వ్యవహరించాలో ఒడిశా తన ఆచరణ ద్వారా దేశానికి మాత్రమే కాదు... ప్రపంచ దేశాలకు కూడా చాటింది. అందువల్లే అది అంత ర్జాతీయ మీడియా ప్రశంసలు కూడా అందుకుంది. ఆంధ్రప్రదేశ్‌లో ఎన్నికల నియమావళి అమల్లో ఉన్న కారణంగా ప్రభుత్వ యంత్రాంగం సమర్థత అందరికీ తేటతెల్లమైంది. ప్రభుత్వ ప్రధాన కార్యదర్శి ఎల్వీ సుబ్రహ్మణ్యం సారథ్యంలో తుపానును ఎదుర్కొనడానికి ప్రభుత్వంలో పైనుంచి కిందివరకూ అందరికందరూ ఎవరి బాధ్యతలను వారు అంకితభావంతో, దృఢ సంకల్పంతో నిర్వర్తించారు. కానీ చంద్రబాబు ఏలుబడి దీనికి భిన్నం. ఆయన అధికారంలోకొచ్చాక ఇంచు మించు ఏడాదికొక తుపాను రాష్ట్రంపై విరుచుకుపడింది. ఈ సందర్భాలన్నిటా ఆయనకు ప్రచారయావ తప్ప సామాన్య జనం పడే కష్టాలు కనబడలేదు. అంతటా తానే కనబడుతూ, సిబ్బందిని అదిలిస్తూ కేవలం తన కారణంగా మాత్రమే వారంతా పనిచేస్తున్నారన్న అభిప్రాయం కలిగించ డానికి ఆయన వెంపర్లాడేవారు. పర్యవసానంగా క్షేత్రస్థాయిలో సహాయకార్యక్రమాలు చతికిలబ డేవి. సొంత మీడియా మాత్రం ఆయన్ను ఆకాశానికెత్తేది. హుద్‌హుద్, తిత్లీ తుపానుల సమ యంలో ఆయన చేసిన హడావుడిని, తాగునీరు సైతం అందక ప్రజలు ఇబ్బందిపడిన తీరును ఎవరూ మరిచిపోరు. ఇప్పుడలాంటి అనాలోచిత చేష్టలు లేవు. అధికార యంత్రాంగం స్వేచ్ఛగా, సమర్ధవంతంగా పనిచేయగలిగింది. విపత్తు నిర్వహణ నియమావళిని తు.చ. తప్పకుండా పాటించ గలిగింది. ఫలితంగా బాధిత ప్రజలకెంతో మేలు జరిగింది. ఒడిశా, ఆంధ్రప్రదేశ్‌ అనుభవాలు మున్ముందు అందరికీ ఆదర్శం కావాలని ఆశించాలి. 

కోల్‌కతా : సార్వత్రిక ఎన్నికల ప్రచారంలో భాగంగా నాయకులు విమర్శలు, ప్రతి విమర్శలతో ప్రచార కార్యక్రమాల్ని హోరెత్తిస్తున్నారు. ఈ క్రమంలో సోమవారం పశ్చిమ బెంగాల్‌లో ఎన్నికల ప్రచారంలో పాల్గొన్న ప్రధాని నరేం‍ద్ర మోదీ మరోసారి ఆ రాష్ట్ర ముఖ్యమంత్రి మమతా బెనర్జీ మీద విమర్శనాస్త్రాలు సంధించారు. ‘జై శ్రీరాం’ అని నినాదాలు చేసే వారిని మమతా బెనర్జీ అరెస్ట్‌ చేయించి.. జైలులో పెడుతున్నారని మోదీ ఆరోపించారు. ఒక వేళ తాను ‘జై శ్రీరాం’ అంటే.. దీదీ తనను కూడా అరెస్ట్‌ చేయిస్తుందని మోదీ పేర్కొన్నారు. మూడు రోజుల క్రితం కొందరు వ్యక్తులు ఎన్నికల ప్రచారానికి వెళ్తోన్న దీదీ కాన్వాయ్‌ను అడ్డుకుని ‘జై శ్రీరాం’ అని నినాదాలు చేసిన సంగతి తెలిసిందే. అయితే వారిని అరెస్ట్‌ చేసి జైలుకు పంపించారు మమతా. దీనిపై స్పందిస్తూ.. మోదీ ఈ వ్యాఖ్యలు చేశారు. అంతేకాక.. ‘ప్రస్తుతం దీదీ చాలా చిరాగ్గా ఉన్నారు. ఇప్పుడు ఆమె ముందు దేవుడి పేరు ఎత్తినా తప్పే. ప్రధాని కావాలనేది దీదీ కోరిక. కానీ ఆమె కల నెరవేరదు. బెంగాల్‌లో ఆమె 10 సీట్లు కూడా గెలవద’న్నారు మోదీ. అంతేకాక ‘దీదీకి దేశం పట్ల కొంచెం కూడా ప్రేమ లేదు. ఇప్పటి వరకూ దేశాన్ని పొగుడుతూ ఆమె ఒక్క మాట కూడా మాట్లాడలేదు. ఆఖరికి మసూద్‌ అజర్‌ని అంతర్జాతీయ ఉగ్రవాదిగా ప్రకటించినప్పుడు కూడా ఆమె ఏం మాట్లాడలేదు. అలా మాట్లాడితే.. ఆమె ఓటు బ్యాంక్‌ ప్రమాదంలో పడే ప్రమాదం ఉంది. అందుకే దీని గురించి ఆమె ఎక్కడా ప్రస్తావించలేద’న్నారు మోదీ. అంతేకాక ఫొని తుపాను గురించి ఆరా తీయడానికి తాను దీదీకి ఫోన్‌ చేశానన్నారు మోదీ. కానీ తనతో మాట్లాడ్డానికి ఆమెకు అహంకారం అడ్డువచ్చిందన్నారు. అందుకే తన కాల్స్‌ అటెండ్‌ చేయలేదన్నారు మోదీ. ఈ వ్యాఖ్యలపై స్పందించిన దీదీ.. గడువు తీరిన ప్రధానితో మాట్లాడాల్సిన అవసరం తనకు లేదని స్పష్టం చేశారు.

సాక్షి, ఢిల్లీ, అమరావతి : ఫొని తుఫాన్ కారణంగా తీవ్రంగా నష్టపోయిన ఒడిశా రాష్ట్రానికి ఆంధ్రప్రదేశ్ ప్రజల తరపున శాయశక్తులా అండగా ఉంటామని ఏపీ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం తెలిపారు. ఒడిశా ప్రజలకు ఆంధ్రప్రదేశ్ ప్రజలు అన్ని విధాలా అండగా ఉంటారన్నారు. ఆదివారం  ఫొని తుఫాన్ ప్రభావిత రాష్ట్రాలైన ఆంధ్రప్రదేశ్, ఒడిశా, పశ్చిమ బెంగాల్ రాష్ట్రాల ప్రధాన కార్యదర్శులతో కేంద్ర క్యాబినెట్ కార్యదర్శి ప్రదీప్ కుమార్ సిన్హా వీడియో కాన్ఫరెన్స్ నిర్వహించారు. ఈ సందర్భంగా ఏపీ సీఎస్‌ ఎల్‌వీ సుబ్రమణ్యం మాట్లాడుతూ.. కూలిపోయన చెట్ల తొలగింపునకు 200 పవర్ షా(కటింగ్ రంపాలు) అందించామన్నారు. 12 లక్షల వాటర్ ప్యాకెట్లతో పాటు 20 వాటర్ ట్యాంకర్లతో తాగునీరు పంపిణీ చేశామన్నారు. సోమవారం మరో 20 ట్యాంకర్లతో తాగునీరు అందజేస్తామని తెలిపారు. విద్యుత్ సేవల పునరుద్ధరణకు 1100 మంది విద్యుత్ సిబ్బంది సిద్ధంగా ఉన్నారని, వారిని ఒడిశాకు పంపేలా చర్యలు తీసుకుంటామని వెల్లడించారు. ఇప్పటికే వారంతా శ్రీకాకుళంలో ఉన్నారని, అక్కడి కలెక్టర్‌తో మాట్లాడి, విద్యుత్ సిబ్బంది ఒడిశాకు తరలిస్తామన్నాని చెప్పారు. ఇనుప విద్యుత్ స్తంభాలు, 5 వేల లీటర్ల కెపాసిటీ కలిగిన 500 సింటెక్స్ వాటర్ ట్యాంకులు అందజేయాలని ఒడిశా సీఎస్ కోరారన్నారు. వాటర్ ట్యాంకుల పంపిణీకి చర్యలు తీసుకుంటామని, ఇనుప విద్యుత్ స్తంభాలు తమ దగ్గర లేవని, ఏపీలో సిమెంట్‌తో తయారు చేసిన విద్యుత్ స్తంభాలే వాడుతున్నట్లు తెలిపామన్నారు. ఈ వీడియో కాన్ఫరెన్స్‌లో రాష్ట్ర విపత్తుల నిర్వహణ శాఖ కార్యదర్శి డి.వరప్రసాద్ తదితరులు పాల్గొన్నారు. కాగా ఒడిశా తుపాన్ బాధితులకు ఆంధ్రప్రదేశ్ ముఖ్యమంత్రి చంద్రబాబునాయుడు రూ.15కోట్లు విరాళం ప్రకటించారు. ఛత్తీస్‌ఘర్‌ 11కోట్లు, ఉత్తరప్రదేశ్‌, తమిళనాడులు తలా 10‍ కోట్ల విరాళాలు ప్రకటించాయి.

సాక్షి, శ్రీకాకుళం : ఫొని తుపాను ఖర్చుల్లోనూ భారీ అవినీతి వెలుగుచూస్తోంది. శ్రీకాకుళం జిల్లాలో తుపాను నష్టాన్ని పెంచి చూపిస్తున్నారన్న ఆరోపణలు వినిపిస్తున్నాయి. రూ. 38 కోట్ల 43లక్షల మేర నష్టం జరిగితే... అధికారులు రూ. 58కోట్ల 61 లక్షలుగా చూపిస్తున్నారని సమాచారం. ముఖ్యంగా విద్యుత్‌ శాఖ ఖర్చుల్లోనే ఎక్కువగా అవినీతి ఉందని తెలుస్తోంది. తుపాను బీభత్సం ఘటనాస్థలానికి చేరుకుని వినియోగించని క్రేన్లు, జనరేటర్లు, కూలీలకు కోట్లలో నగదు చెల్లింపులు జరిగాయని చూపిస్తున్నారని, ఈపీడీసీఎల్‌లో మెటీరియల్‌ కొనుగోళ్లలో ప్రాజెక్ట్స్‌, ఆపరేషన్ సీజీఎంలు చేతివాటం ప్రదర్శించినట్టు సమాచారం.

ఢాకా/భువనేశ్వర్‌: భారత్‌లోని ఒడిశా రాష్ట్రాన్ని వణికించిన పెను తుపాన్‌ ‘ఫొని’ శనివారం బంగ్లాదేశ్‌ తీరాన్ని తాకింది. తుపాను ప్రభావంతో భారీ వర్షాలకు తోడుగా వాగులు, వంకలన్నీ ఉప్పొంగడంతో బంగ్లాదేశ్‌లో ఒక్కరోజే 14 మంది ప్రాణాలు కోల్పోగా, 63 మంది గాయపడ్డారు. కుండపోత వర్షాలతో నదులు పొంగడంతో 36 గ్రామాలు నీటమునిగాయి. 16 లక్షల మంది ప్రజలను బంగ్లా అధికారులు సురక్షిత ప్రాంతాలకు తరలించారు. బలమైన ఈదురు గాలులకు 8 తీరప్రాంత జిల్లాల్లో వందలాది ఇళ్లు ధ్వంసమయ్యాయి. ఒడిశాలో 16కు చేరుకున్న మృతులు ఒడిశాలో ‘ఫొని’ పెను తుపాను కారణంగా ప్రాణాలు కోల్పోయినవారి సంఖ్య 16కు చేరుకుంది. ఫొని ప్రభావంతో శుక్రవారం నాటికి 8 మంది చనిపోగా, ఈ సంఖ్య తాజాగా 16కు పెరిగింది. కాగా, ఫొని భారత తీరానికి దూరంగా వెళ్లిపోవడంతో సహాయక చర్యలను అధికారులు ముమ్మరం చేశారు.  రాష్ట్రంలో కుప్పకూలిన 10,000 విద్యుత్‌ స్తంభాలను పునరుద్ధరిస్తున్నామని వెల్లడించారు. ప్రధాని మోదీ  ‘ఫొని’ ప్రభావిత ప్రాంతాలను సందర్శించనున్నట్లు ఒడిశా సీఎం కార్యాలయం తెలిపింది.

సాక్షి, అమరావతి : ఫొని తుపాను కారణంగా రాష్ట్రంలోని శ్రీకాకుళం, విజయనగరం జిల్లాలో రూ.58.61 కోట్ల నష్టం వాటిల్లిందని రాష్ట్ర ప్రభుత్వ ప్రధాన కార్యదర్శి ఎల్వీ సుబ్రహ్మణ్యం వెల్లడించారు. ఇది ప్రాథమిక అంచనా అని ఆయన చెప్పారు. తుపాను సహాయక చర్యలపై శనివారం ఢిల్లీ నుంచి కేంద్ర కేబినెట్‌ సెక్రటరీ ప్రదీప్‌కుమార్‌ సిన్హా రాష్ట్రంతో పాటు ఒడిశా, పశ్చిమ బెంగాల్‌ రాష్ట్రాల ప్రభుత్వ ప్రధాన కార్యదర్శులతో వీడియో కాన్ఫరెన్స్‌ నిర్వహించారు. ఈ సందర్భంగా రాష్ట్రంలో జరిగిన నష్టం, తీసుకున్న చర్యలను సీఎస్‌ ఆయనకు వివరించారు. శ్రీకాకుళం జిల్లా ఇచ్ఛాపురం మండలంలో అత్యధికంగా 19.7 సెంమీల వర్షపాతం నమోదైందన్నారు. ఇదే జిల్లాలోని నాలుగు మండలాల్లో 2 లక్షల 74వేల మంది తుపానుకు ప్రభావితమయ్యారన్నారు. 304 ఇళ్లు దెబ్బతినగా, వాటిలో 168 ఇళ్లు పాక్షికంగాను, 19 పక్కా ఇళ్లు.. 35 కచ్చా ఇళ్లు పూర్తిగాను దెబ్బతిన్నాయని సిన్హాకు సీఎస్‌ వివరించారు. శ్రీకాకుళం జిల్లాలో 15,460 మందిని 139 పునరావాస కేంద్రాలకు, విజయనగరం జిల్లాలో 2వేల మందిని 15 పునరావాస కేంద్రాలకు తరలించామన్నారు. బాధితుల కోసం 348 వైద్య శిబిరాలను నిర్వహించామని తెలిపారు.  958 హెక్టార్లలో పంటలకు నష్టం  కాగా, తుపాను కారణంగా ఈ రెండు జిల్లాల్లో 958 హెక్టార్లలో పంటలు దెబ్బతిన్నాయని ఎల్వీ చెప్పారు. 214 హెక్టార్లలో వరి, 743 హెక్టార్లలో వేరుశనగ, పత్తి, జొన్న, పొద్దుతిరుగుడు వంటి పంటలకు నష్టం కలిగిందన్నారు. సుమారు 10 వేల కొబ్బరి చెట్లు నేలకూలగా 1,991 మంది రైతులు నష్టపోయారని తెలిపారు. విజయనగరం జిల్లాలో 229 ఎకరాల్లో అరటి తోటలు దెబ్బతిన్నాయని ఎల్వీ సుబ్రహ్మణ్యం కేంద్ర కేబినెట్‌ కార్యదర్శికి వివరించారు. అలాగే, రోడ్లు, భవనాల శాఖకు రూ.21.57 కోట్లు, పంచాయతీరాజ్‌ శాఖ రహదారులకు రూ.20.05 కోట్లు, విద్యుత్‌ శాఖకు రూ.9.75 కోట్లు, ఉద్యానవన శాఖకు రూ.4.09 కోట్లు, మున్సిపల్‌ పరిపాలనా శాఖకు రూ.1.82 కోట్లు, గ్రామీణ రక్షిత మంచినీటి విభాగానికి రూ.42.68 లక్షలు, గృహ నిర్మాణానికి రూ.85.35 లక్షలు, పశు సంవర్థక శాఖకు రూ.3.94 లక్షలు కేటాయించామన్నారు. కాగా చేనేత జౌళిశాఖ సహా పలు రంగాలకు సంబంధించి ప్రాథమిక నష్టం అంచనాలను కూడా రూపొందిస్తున్నట్లు ఆయన  తెలిపారు.   దెబ్బతిన్న విద్యుత్‌ స్తంభాలు 2,100   తుపాను కారణంగా శ్రీకాకుళం జిల్లాలోని 14 మండలాల్లో 733 గ్రామాలకు విద్యుత్‌ సరఫరాలో అంతరాయం కలిగిందని వీడియో కాన్ఫరెన్స్‌లో సీఎస్‌ చెప్పారు. 33 కేవీ ఫీడర్లు 19, 11 కేవీ ఫీడర్లు 101, 11/33 కేవీ ఫీడర్లు 45 దెబ్బతినగా సుమారు 2,100 విద్యుత్‌ స్తంభాలు దెబ్బతిన్నాయని వివరించారు. అన్ని మండల కేంద్రాలకు ఇప్పటికే విద్యుత్‌ సరఫరాను పునరుద్ధరించామన్నారు. మరో 74 గ్రామాల్లో పనులు జరుగుతున్నాయని తెలిపారు. దెబ్బతిన్న స్తంభాలన్నింటితోపాటు.. లక్షా 73 వేల వ్యవసాయేతర విద్యుత్‌ సర్వీసులను పునరుద్ధరించామన్నారు. గ్రామీణ మంచినీటి సరఫరా, మున్సిపల్‌ పరిపాలన, ఆర్‌ అండ్‌ బి శాఖలకు సంబంధించిన పనులు యుద్ధప్రాతిపదికన జరుగుతున్నాయన్నారు. సమావేశంలో సిన్హా మాట్లాడుతూ.. నష్టం అంచనాలను త్వరితగతిన అంచనా వేసి పునరుద్ధరణ పనులు త్వరగా పూర్తిచేయాలని ఆదేశించారు.  ఒడిశాకు రాష్ట్రం చేయూత  రాష్ట్రం నుంచి రెండు లక్షల టార్పాలిన్‌ ప్లాస్టిక్‌ షీట్లు, 12 లక్షల మంచినీటి ప్యాకెట్లు, యాంత్రిక రంపాలను హెలికాప్టర్‌ ద్వారా ఒడిశాకు పంపిస్తున్నట్లు సీఎస్‌ ఎల్వీ సుబ్రహ్మణ్యం కేంద్ర కేబినెట్‌ కార్యదర్శికి తెలిపారు. ఈ మేరకు ఒడిశా ప్రభుత్వ ప్రధాన కార్యదర్శితో కూడా ఎల్వీ మాట్లాడారు. అవసరాన్ని బట్టి వీటిని యుద్ధప్రాతిపదికన పంపించాలని రాష్ట్ర విపత్తు నిర్వహణ సంస్థ కార్యదర్శి వరప్రసాద్‌ను సీఎస్‌ ఆదేశించారు. వీడియో కాన్ఫరెన్స్‌లో ఐటీ, ట్రాన్స్‌కో సీఎండీ కే విజయానంద్, ఆర్టీజీఎస్‌ సీఈఓ బాబు పాల్గొన్నారు.  

సాక్షి, అమరావతి: ఎలాంటి హడావిడి లేకుండా అధికార యంత్రాంగాన్ని తమ పని తాము చేసుకోనిస్తే అద్భుత ఫలితాలుంటాయనడానికి ‘ఫొని’ తుపాను సందర్భంగా జరిగిన పరిణామాలు తేటతెల్లం చేస్తున్నాయి. ‘రేయింబవళ్లు సమీక్షలు లేవు.. అది చేయండి.. ఇది చేయండి.. ఇలా కాదు.. అలా కాదు.. అనే సీఎం చంద్రబాబు హడావిడి అసలే లేదు.. మంత్రులు, సీఎం పర్యటనలు లేవు.. తుపాను సన్నద్ధత, బాధితులకు సహాయ కార్యక్రమాలను గాలికొదిలి సీఎం బాబు కోసం నిరీక్షణ అంతకన్నా లేదు.. వెరసి ఉత్తరాంధ్రలో తుపాను ప్రభావిత ప్రాంతాల్లో అధికారులు ఎవరి బాధ్యతలు వారు పక్కాగా నిర్వహించారు. లోతట్టు ప్రాంతాల్లో, పునరావాస ప్రాంతాల్లో ఎలాంటి ముందు జాగ్రత్తలు తీసుకోవాలి? సన్నద్ధత ఎలా ఉండాలి? అనే అంశాలపై వివిధ కీలక హోదాల్లో పని చేసిన ప్రభుత్వ ప్రధాన కార్యదర్శి ఎల్వీ సుబ్మహ్యణ్యంకు ఉన్న అనుభవం ఇప్పుడు ఫొని తుపానును సమర్థవంతంగా ఎదుర్కొనేందుకు ఉత్తరాంధ్ర అధికార యంత్రాంగానికి బాగా ఉపయోగపడింది. ‘తుపాను ప్రభావం చూపడానికి రెండు మూడు రోజుల ముందే సీనియర్‌ అధికారులు, ఉత్తరాంధ్ర జిల్లాల కలెక్టర్లతో సీఎస్‌ సమీక్షించారు. ఎక్కడెక్కడ ఎలాంటి జాగ్రత్తలు తీసుకోవాలో స్పష్టంగా వివరించారు. విద్యుత్‌ సరఫరాకు అంతరాయం కలుగుతుందని ముందే తెలిసినందున జనరేటర్లను సిద్ధంగా ఉంచుకోవాలని ఆదేశించారు. నిత్యావసర సరుకులు సిద్ధంగా ఉంచుకోవాలని సూచించారు. ఇలా అన్ని అంశాలపై అధికారులకు తన అనుభవంతో ఎల్వీ సుబ్రహ్మణ్యం మార్గనిర్దేశం చేశారు. సంబంధిత అధికారులంతా అంకిత భావంతో పనిచేశారు. దీంతో ఎక్కడా ఎలాంటి సమస్య లేకుండా సహాయ కార్యక్రమాలన్నీ సజావుగా సాగాయి. హడావిడి మాటే లేదు. ఎక్కడెక్కడ ఏయే పనులు చేయాలో అవన్నీ యథా ప్రకారం జరిగిపోయాయి. తుపాను తీరం దాటిన రెండో రోజుకే ప్రభావిత ప్రాంతాల్లో దాదాపుగా ప్రజలకు ఇబ్బందులు లేకుండా చేశారు. మార్గనిర్దేశం బాగుంటే ఫలితాలు ఇలాగే ఉంటాయి’ అని క్షేత్ర స్థాయి అధికారులతోపాటు ఐఏఎస్‌ అధికారులు సంతోషం వ్యక్తం చేస్తున్నారు.  విపత్తు నియమావళి చెప్పిందదే.. ‘విపత్తులు సంభవించినప్పుడు క్షేత్ర స్థాయి అధికారులను ఎవరి పని వారు చేసుకోనివ్వాలి. వీఐపీలు, ప్రజా ప్రతినిధులు వెళ్లి హడావిడి చేస్తే బాధితులకు సేవలు పక్కన పెట్టి అధికారులు,  వీరి వెంట పరుగులు తీయాల్సి వస్తుంది. ఇది సహాయ కార్యక్రమాలకు ప్రతికూలంగా మారుతుంది. అందువల్ల విపత్తులు సంభవించినప్పుడు ప్రజా ప్రతినిధులు, వీఐపీలు సాధ్యమైనంత వరకు ఆ ప్రాంతాల పర్యటనలు పెట్టుకోరాదు’ అని విపత్తు నిర్వహణ నియమావళి స్పష్టంగా చెబుతోంది. సీఎం చంద్రబాబు ప్రచార యావతో దీనికి విరుద్ధంగా వ్యవహరించడం రివాజుగా మారింది. 2014 అక్టోబర్‌లో హుద్‌ హుద్‌ తుపాను సందర్భంగా చంద్రబాబు విశాఖలో మకాం వేసి సహాయ కార్యక్రమాలకు అంతరాయం కలిగించారు. గత ఏడాది అక్టోబర్‌లో  ‘తిత్లీ’ తుపాను సందర్భంగానూ ఇలాగే హడావిడి చేశారు. అధికారులంతా ఆయన వెంట తిరిగేందుకు ప్రాధాన్యం ఇవ్వక తప్పలేదు. దీంతో వారాల తరబడి నిత్యావసర సరుకులు, తాగునీరు సైతం అందక బాధితులు ధర్నాలకు దిగడం తెలిసిందే.   ఐఎండీపై ఐక్యరాజ్యసమితి ప్రశంసల జల్లు ‘ఫొని’ తుపాను ప్రభావం ఎంత తీవ్రంగా ఉంటుందనే విషయంలో భారత వాతావరణ విభాగం (ఐఎండీ) అత్యంత కచ్చితమైన ముందస్తు అంచనాతో భారత ప్రభుత్వం చాలా వరకు నష్టాన్ని తగ్గించగలిగిందని ఐక్యరాజ్య సమితి ప్రశంసించింది. చక్కటి అంచనాలతో ప్రజలను, ప్రభుత్వ యంత్రాంగాన్ని అప్రమత్తం చేయడం వల్లే ఆస్తి, ప్రాణ నష్టం బాగా తగ్గిందని ఐక్యరాజ్యసమితికి చెందిన డిజాస్టర్‌ రిస్క్‌ రిడక్షన్‌ ఆర్గనైజేషన్‌  ఓ ప్రకటనలో కొనియాడింది. తుపాను.. తీరం ఎక్కడ దాటుతుంది? ఈ సమయంలో ఎంత వేగంతో గాలులు వీస్తాయి? దాని ప్రభావం ఎంత వరకు ఉంటుందనే అంశాలన్నింటినీ చాలా ముందుగా అత్యంత కచ్చితంగా ఐఎండీ అంచనాలు వేసిందని, అందువల్లే ప్రభుత్వం 11 లక్షల మందిని సురక్షిత ప్రాంతాలకు చేరవేయగలిగిందని ప్రశంసించింది. ఈ మేరకు ఐఎండీకి లేఖ పంపినట్లు తమకు సమాచారం అందిందని ఐఎండీ డైరెక్టర్‌ జనరల్‌ డాక్టర్‌ కేజే రమేష్‌ ‘సాక్షి’ ప్రతినిధికి తెలిపారు. ఉత్తరాంధ్ర జిల్లాల ప్రజల్లో హర్షం ఒడిశాను అతలాకుతలం చేసిన ఫొని తుపాన్‌ వల్ల రాష్ట్రంలో ఎక్కువ నష్టం జరగకుండా అధికార యంత్రాంగం అన్ని రకాల ముందు జాగ్రత్తలు తీసుకుందని ఉత్తరాంధ్ర ప్రజలు ఆనందం వ్యక్తం చేస్తున్నారు. ‘పెనుగాలులకు స్తంభాలు వంగిపోవడం, వైర్లు తెగిపోవడం లాంటి కారణాలవల్ల 740 గ్రామాలకు విద్యుత్తు సరఫరా ఆగిపోయినా యుద్ధ ప్రాతిపదికన మరమ్మతులు చేసి శనివారం ఒక్కరోజే అత్యధిక గ్రామాలకు సరఫరాను పునరుద్ధరించారు. గాలుల వేగం ఎలా ఉంటుంది? వర్షం ఏ మోతాదులో కురుస్తుందనే అంశాలపై ఐఎండీ ఇచ్చిన అంచనాల మేరకు సీఎస్‌ మార్గనిర్దేశం వల్ల పెద్దగా నష్టం చేకూరలేదు. రెండు మూడు రోజుల్లోనే సాధారణ పరిస్థితి ఏర్పడనుంది. పంట నష్టపోయిన వారికి పెట్టుబడి సాయం తర్వాత అందిస్తారు’ అని విపత్తు నిర్వహణపై అపారమైన అనుభవం ఉన్న ఒక సీనియర్‌ ఐఏఎస్‌ అధికారి ‘సాక్షి’తో అన్నారు.  

సాక్షి, అమరావతి/సాక్షి, విశాఖపట్నం: సూర్యుడు నిప్పుల వర్షం కురిపిస్తున్నాడు. రోజురోజుకూ ఉష్ణోగ్రతలు పెరుగుతుండటంతో రాష్ట్రం నిప్పుల కుంపటిలా మారింది. ఓవైపు కణకణ మండుతున్న సూర్యుడు, మరోవైపు భగభగమంటున్న భూతాపంతో వడగాడ్పుల తీవ్రత పెరుగుతోంది. నిప్పులు కక్కే ఎండలతో వడగాడ్పులు వీస్తున్నాయి. సాధారణం కంటే 4–7 డిగ్రీలు అధికంగా పగటి ఉష్ణోగ్రతలు నమోదవుతూ జనాన్ని బెంబేలెత్తిస్తున్నాయి. రాష్ట్రంలోని పలు ప్రాంతాల్లో శనివారం ఈ సీజన్‌లోనే గరిష్ట ఉష్ణోగ్రతలు నమోదయ్యాయి. విశాఖపట్నం, పశ్చిమ గోదావరి, కృష్ణా, చిత్తూరు జిల్లాల్లో పలుచోట్ల 45 డిగ్రీల సెల్సియస్‌ పైగా గరిష్ట ఉష్ణోగ్రతలు నమోదైనట్లు రాష్ట్ర విపత్తు నిర్వహణ శాఖ ప్రకటించింది. ప్రస్తుతం ఉత్తర, వాయవ్య భారతదేశంలో ఉష్ణతీవ్రత ఎక్కువగా ఉంది. ఫొని తుపాను వాయవ్య, పశ్చిమ గాలులను తన వైపు లాక్కుంటోంది. ఫలితంగా చల్లదనాన్నిచ్చే దక్షిణ గాలులు వీయడం లేదు. ఫొని తుపాను పూర్తిగా బలహీన పడే దాకా గాలులు ఇలాగే కొనసాగుతాయని వాతావరణ నిపుణులు చెబుతున్నారు. ఫొని అల్పపీడనంగా మారాక మరో రెండు మూడు రోజుల వరకు సాధారణ స్థితికి వచ్చే అవకాశం లేదు. అంటే ఈ నెల పదో తేదీ వరకు అధిక ఉష్ణోగ్రతలు తప్పవని అంచనా వేస్తున్నారు. రాష్ట్రంలో వడగాడ్పుల తీవ్రత అధికంగా ఉంటోంది. వేడి గాలులను తట్టుకోలేక జనం తీవ్ర ఇబ్బందులు పడుతున్నారు. మధ్యాహ్నం సమయంలో వేడిగాలులు అగ్నికీలల్లా తగులుతున్నాయి. వ్యవసాయ కూలీలు మధ్యాహ్నం 11–12 గంటల వరకే పనిచేసి, తర్వాత చెట్ల నీడకు వెళుతున్నారు. గర్భిణులు, గుండె, ఊపిరితిత్తుల సమస్య ఉన్నవారు, వృద్ధులు, పిల్లలు వేడికి తట్టుకోలేక అవస్థలు పడుతున్నారు. ఇంట్లోనే ఉన్నప్పటికీ భవనం పైకప్పు నుంచి, గోడల నుంచి వస్తున్న వేడి, ఉక్కపోతను తట్టుకోలేపోతున్నామని వృద్ధులు ఆవేదన వ్యక్తం చేస్తున్నారు. రానున్న మూడు రోజులు కృష్ణా, గుంటూరు, ప్రకాశం, నెల్లూరు, రాయలసీమ జిల్లాల్లో పలుచోట్ల, విశాఖ, ఉభయగోదావరి జిల్లాల్లో అక్కడక్కడ వడగాడ్పులు వీస్తాయని భారత వాతావరణ విభాగం (ఐఎండీ) శనివారం రాత్రి విడుదల చేసిన నివేదికలో వెల్లడించింది. అంటే విజయనగం, శ్రీకాకుళం మినహా రాష్ట్రంలో అన్ని జిల్లాలకు వడగాడ్పులు తప్పవన్నమాట. వడగాడ్పుల నేపథ్యంలో ప్రజలు అప్రమత్తంగా ఉండాలని, వీలైనంత వరకూ ఎండ సమయంలో బయటకు వెళ్లకపోవడం ఉత్తమమని ఐఎండీ సూచించింది.  47 డిగ్రీల దాకా నమోదు కానున్న ఉష్ణోగ్రతలు  వాతావరణ నిపుణుల అంచనా ప్రకారం.. ఈ నెల 5న (ఆదివారం) కృష్ణా, గుంటూరు, ప్రకాశం, నెల్లూరు జిల్లాల్లోని కొన్ని ప్రాంతాల్లో 44–45 డిగ్రీల సెల్సియస్‌ ఉష్ణోగ్రతలు నమోదయ్యే అవకాశం ఉంది. ఈ నెల 6న కృష్ణా, గుంటూరు, ప్రకాశం జిల్లాల్లో 44–45 డిగ్రీల సెల్సియస్‌ ఉష్ణోగ్రతలు నమోదవుతాయి. ఈ నెల 7న కృష్ణా, గుంటూరు, ప్రకాశం, నెల్లూరు జిల్లాల్లో కొన్ని ప్రాంతాల్లో 45–47 డిగ్రీల సెల్సియస్‌ గరిష్ట ఉష్ణోగ్రతలు నమోదయ్యే అవకాశం ఉంది. విశాఖపట్నం, ఉభయ గోదావరి, చిత్తూరు, కడప, అనంతపురం, కర్నూలు జిల్లాల్లో 42– 45 డిగ్రీల సెల్సియస్‌ గరిష్ట ఉష్ణోగ్రతలు నమోదవుతాయి. ఈ నెల 8న కృష్ణా, గుంటూరు, ప్రకాశం, నెల్లూరు, చిత్తూరు జిల్లాల్లో 44–45 డిగ్రీల సెల్సియస్‌ గరిష్ట ఉష్ణోగ్రతలు నమోదవుతాయి. ఈ నెల 9న కృష్ణా, గుంటూరు, ప్రకాశం, నెల్లూరు జిల్లాల్లో 45–46 డిగ్రీల సెల్సియస్‌ గరిష్ట ఉష్ణోగ్రతలు నమోదయ్యే అవకాశం ఉంది.   ప్రజలను చైతన్య పర్చండి  ఉష్ణోగ్రతలు అధికంగా ఉంటున్నందున వడగాడ్పులు తీవ్రమవుతాయని భారత వాతావరణ విభాగం హెచ్చరికలు జారీ చేసింది. వడగాడ్పుల బారిన పడకుండా ప్రజలను చైతన్య పరిచేందుకు అధికార యంత్రాంగం చర్యలు తీసుకోవాలని రాష్ట్ర విపత్తు నిర్వహణ శాఖ ఆయా జిల్లాల అధికార యంత్రాంగాలను ఆదేశించింది. ఈ మేరకు విపత్తు నిర్వహణ శాఖ కార్యదర్శి వరప్రసాద్‌ కలెక్టర్లకు ఆదేశాలు జారీ చేశారు. వడగాడ్పుల బారిన పడకుండా తీసుకోవాల్సిన జాగ్రత్తలపై విపత్తు నిర్వహణ శాఖ రూపొందించిన కరపత్రాలను పంపిణీ చేయాలని సూచించారు.  జాగ్రత్తలు తప్పనిసరి  రాష్ట్రంలో ఉష్ణోగ్రతలు తీవ్రరూపం దాల్చుతున్న నేపథ్యంలో ప్రజలు.. ముఖ్యంగా వృద్ధులు, పిల్లలు, గర్భిణులు, దీర్ఘకాలిక వ్యాధులతో బాధపడుతున్న వారు తప్పనిసరిగా జాగ్రత్తలు తీసుకోవాలని వైద్య నిపుణులు సూచిస్తున్నారు. ‘‘ఎండ సమయంలో సాధ్యమైనంత వరకూ బయటకు వెళ్లకుండా ఇళ్లల్లో గానీ, నీడపట్టున గానీ ఉండాలి. తప్పనిసరై బయటకు వెళ్లాల్సి వస్తే తలకు, ముఖానికి నేరుగా ఎండ తగలకుండా గొడుగు ఉపయోగించాలి. తెలుపు లేదా లేత రంగు నూలు వస్త్రాలు ధరించాలి. నీరు, మజ్జిగ, కొబ్బరినీరు లాంటివి సేవించాలి. డీహైడ్రేషన్‌ నుంచి రక్షణ కోసం ఉప్పు కలిపిన మజ్జిగ సేవించడం ఉత్తమం. ఇళ్లల్లో కూడా వేడి ఎక్కువగా ఉంటే గది వాతావరణాన్ని తగ్గించుకోవాలి. ఇందుకోసం కిటికీలకు వట్టివేర్ల తెరలను కట్టి నీరు చల్లాలి. ఒకవేళ ఎవరైనా వడదెబ్బకు గురైతే వెంటనే చల్లని ప్రదేశానికి తరలించి, గాలి తగిలేలా చూడాలి. చల్లని నీటిలో తడిపిన వస్త్రంతో శరీరాన్ని తుడవాలి. ఫ్యాన్‌ కింద ఉంచవచ్చు. అప్పటికీ కోలుకోలేకపోతే ఆసుపత్రికి తీసుకెళ్లాలి. తగిన వైద్యం అందించాలి’’ అని నిపుణులు చెప్పారు. 

సాక్షి, హైదరాబాద్‌: దేశవ్యాప్తంగా ఎంబీబీఎస్, బీడీఎస్‌లో ప్రవేశాలకు నిర్వహించే ‘నీట్‌’ ఆదివారం మధ్యాహ్నం 2 నుంచి 5 వరకు జరగనుంది. సుమారు 70 వేల మంది పరీక్ష రాసే అవకాశం ఉంది. ఫొని తుపాను కారణం గా ఒడిశాలో నీట్‌ను వాయిదా వేశారు. తెలంగాణలో హైదరాబాద్, వరంగల్, కరీంనగర్, ఖమ్మం, రంగారెడ్డి జిల్లాల్లో దాదాపు వంద కేంద్రాల్లో పరీక్ష నిర్వ హిస్తున్నారు. తెలంగాణ, ఏపీలో విద్యార్థులకు తెలుగులో పరీక్ష రాసే వీలు కల్పించారు. నిబంధనల ప్రకారం పరీక్ష ప్రారంభ సమయానికి 2 గంటల ముందే కేంద్రాన్ని తెరుస్తారు. విద్యార్థులు మధ్యాహ్నం 1.30 గంటలలోగా పరీక్ష కేంద్రాలకు చేరుకోవాలి. ఆ తర్వాత ఒక్క నిమిషం ఆలస్యమైనా అనుమతించరు. డ్రెస్‌కోడ్‌ మొదలు ఇతరత్రా అనేక నిబంధనలు విధించారు.  ఇంటర్‌ గందరగోళం విద్యార్థులపై ప్రభావం...  రాష్ట్రంలో ఇంటర్‌ ఫలితాల్లో తప్పిదాల వల్ల వేలాది మంది విద్యార్థులకు తక్కువ మార్కులు వచ్చాయి. ముఖ్యంగా బైపీసీ విద్యార్థులు నీట్‌ పరీక్షకు సిద్ధం అవుతుండగా ఇంటర్‌లో వచ్చిన మార్కులు వారిని తీవ్ర నిరాశకు గురిచేశాయి. దీంతో వారంతా ప్రవేశపరీక్షకు సిద్ధం కాలేదని తెలిసింది. కొన్నిచోట్ల నీట్‌ కోచింగ్‌ సెంటర్లకు మొదట్లో చేరిన వారిలో కొందరు ఇంటర్‌ ఫలితాల తర్వాత రాలేదని సమాచారం. కొన్ని విద్యాసంస్థల యాజమాన్యాలు మాత్రం తల్లిదండ్రులకు ఫోన్లు చేసి నీట్‌కు ఇంటర్‌ వెయిటేజీ ఏమీ ఉండదని, తక్కువ మార్కులు వచ్చినా ఏమీ పరవాలేదని భరోసా కల్పించాయి. 

సాక్షి, హైదరాబాద్‌ : తుపాకి రాముడి కోతలు మొదలయ్యాయని సీఎం చంద్రబాబునాయుడిపై వైఎస్సార్‌సీపీ జాతీయ ప్రధాన కార్యదర్శి, రాజ్యసభ సభ్యుడు వి.విజయసాయిరెడ్డి ఆగ్రహం వ్యక్తం చేశారు. అధికార యంత్రాంగం రేయింబవళ్లు తుపానుకు ఎదురొడ్డి ప్రాణనష్టం లేకుండా చూస్తే అభినందించాల్సింది పోయి వాళ్ల క్రెడిట్ కొట్టేస్తున్నాడని మండిపడ్డారు. కలెక్టర్లు, సిబ్బంది స్పందించిన తీరు ప్రశంసనీయని ట్విటర్‌లో పేర్కొన్నారు. థాంక్యూ సీఎం అని హోర్డింగులు పెట్టుకోలేక పోయానని చంద్రబాబు బాధపడుతున్నారని ఎద్దేవా చేశారు. 'ఫొని నష్టంపై కేంద్రానికి అప్పుడే నివేదిక వెళ్లింది. ఇంతకు ముందు లేని నష్టాన్ని కూడా చూపే వారు. 2800 ఎకరాల్లో పంట, 2 వేల స్థంబాలు, 117 సబ్ స్టేషన్లు దెబ్బతిన్నాయని సీఎస్ వాస్తవిక రిపోర్టు పంపారు. చంద్రబాబు డిస్టర్బెన్స్ లేక పోవడంతో యంత్రాంగం స్వేచ్ఛగా, వేగంగా పనిచేసింది. బొంకరా బొంకరా పోలిగా అంటే టంగుటూరు మిర్యాలు తాటికాయంత అన్నాడట చంద్రబాబు లాంటి వాడు. వీవీప్యాట్లను తన ఒత్తిడి వల్లే ప్రవేశ పెట్టారని కోస్తున్నాడు. 2013లో నాగాలాండ్ నోక్సెన్ అసెంబ్లీ, 2014 లోక్ సభ ఎన్నికల్లో 8 చోట్ల  ప్రయోగాత్మకంగా ఉపయోగించారు. అప్పుడీయన ఎక్కడున్నాడు. ఫొని తుఫాను సహాయ చర్యలకు తమ హెల్ప్ కావాలంటే చెప్పాలని ఒరిస్సా సీఎంను చంద్రబాబు అడిగారట. గతంలో తిత్లీ తుఫాను తీరం దాటక ముందే.. థ్యాంక్యూ సీఎం సార్, తుఫాను నుంచి మా ప్రాణాలు రక్షించినందుకు అని సొంతంగా హోర్డింగులు పెట్టించుకున్నట్టే ఉంది ఈ వ్యవహారం కూడా. ఉత్తరాంద్రలో తుఫాను పునరావాస పనులు జరుగుతున్నాయి. మరో పక్క ఎన్నికల కోడ్ అమలులో ఉండగా గ్రూప్-2 పరీక్షలు నిర్వహించడమేమిటి? మరో నెల రోజులు వాయిదా వేయలేరా? ఏపీపీఎస్సీ ఛైర్మన్ దేనికో హడావుడి పడుతున్నట్టు కనిపిస్తోంది. గవర్నర్ జోక్యం చేసుకుని వాయిదా వేయించాలి' అని విజయసాయిరెడ్డి ట్విటర్‌లో పేర్కొన్నారు.

సాక్షి, హైదరాబాద్‌ : ఏపీలో ప్రస్తుతం ఉన్న కరువు, తుపాను పరిస్థితుల పట్ల బీజేపీ యువ మోర్చా అధ్యక్షుడు రమేష్‌ నాయుడు స్పందించారు. శనివారమిక్కడ ఏర్పాటు చేసిన మీడియా సమావేశంలో ఆయన మాట్లాడుతూ.. ఆంధ్రప్రదేశ్‌లో రాయలసీమ జిల్లాలో ఎండల తీవ్రతతో నీళ్లు అడుగంటిపోతున్నాయన్నారు. వందల అడుగుల లోతు బోర్లు వేసినా నీళ్లు పడక రైతులు ఆర్థికంగా నష్టపోతున్నారని తెలిపారు. రాయలసీమలో తాగడానికి నీళ్ల కోసం మహిళలు కిలోమీటర్ల మేర నడిచి వెళ్తున్నారన్నారు. గుంటూరు తదితర ప్రాంతాల్లో పశుగ్రాసాలు లేక మూగ జీవాలు అల్లాడుతున్నాయని ఆయన ఆవేదన వ్యక్తం చేశారు. కరువు ప్రాంతాల గురించి కేంద్ర ప్రభుత్వానికి వివరాలు అందించాలని బీజేపీ కోరుతుందన్నారు. నకిలీ విత్తనాలతో పత్తి దిగుబడి చాలా తగ్గిపోయిందని తెలిపారు. ప్రభుత్వం సర్టిఫై చేసిన కంపెనీలు నకిలీ విత్తనాలు ఇవ్వడంతో రైతులు తీవ్రంగా నష్టపోయారన్నారు. ఫొని తుపాను బారిన పడిన నాలుగు రాష్ట్రాలకి కేంద్రం రూ. 1000 కోట్లు కేటాయించిందని తెలిపారు. దీనిలో ఆంధ్రప్రదేశ్‌కి రూ. 250 కోట్ల రూపాయల వరకు వచ్చే అవకాశం ఉందన్నారు. ఆ నిధుల్ని సక్రమంగా ఉపయోగించాలని కోరారు. ఓడిపోతానని స్పష్టంగా తెలిసిపోయింది కాబట్టే చంద్రబాబు నాయుడు సహనం కోల్పోయి అడ్డగోలుగా మాట్లాడుతున్నారన్నారు.

భువనేశ్వర్‌: దేశ వ్యాప్తంగా మే 5న నిర్వహించే జాతీయ అర్హత ప్రవేశ పరీక్ష (నీట్‌)ను తుపాను కారణంగా ఒడిశాలో వాయిదా పడింది. ఫొని సృష్టించిన విధ్వంసం నుంచి రాష్ట్రంలో ఇప్పుడిప్పుడే  పునరావాస చర్యలు జరుగుతోన్న విషయం తెలిసిందే. ఈ నేపథ్యంలో రాష్ట్ర ప్రభుత్వ విజ్ఞప్తి మేరకు నీట్‌ పరీక్షను వాయిదా వేస్తున్నట్లు హైయ్యర్‌ ఎడ్యుకేషన్‌ సెక్రటరీ ఆర్‌.సుబ్రహ్మణ్యం శనివారం వెల్లడించారు. మిగతా రాష్ట్రాల్లో షెడ్యూల్ ప్రకారం మే 5న నీట్‌ పరీక్షను జరగనుంది. ఒడిశాలో ఈ పరీక్షను నిర్వహించే తేదీలను త్వరలో ప్రకటిస్తామని ఆయన ట్విటర్‌ వేదికగా వెల్లడించారు. అలాగే రాష్ట్రంలో వివిధ వర్సిటీల పరిధిలో జరిగే పరీక్షలను కూడా వాయిదా వేస్తున్నట్లు రాష్ట్ర ప్రభుత్వం తెలిపింది. ఇదిలా ఉండగా, తమిళనాడు, ఆంధ్రప్రదేశ్‌, ఒడిశా రాష్ట్రాలు సైక్లోన్‌ ఫొని కారణంగా విపత్కర పరిస్థితులు ఎదుర్కొన్న నేపథ్యంలో నీట్‌ను వాయిదా వేయాలంటూ పలవురు కేంద్ర మానవవనరుల మంత్రిత్వ శాఖకు లేఖ రాశారు. దీనిని పరిశీలించిన సంబంధిత శాఖ.. సహాయక చర్యలను, విద్యార్థులు ఎదుర్కొనే సమస్యలను దృష్టిలో ఉంచుకుని పరీక్షను వాయిదా వేస్తున్నట్లు తెలిపింది. భీకర గాలులు, సైక్లోన్‌ ఫొని తూర్పు తీర రాష్ట్రాల్లో భయానక వాతావరణాన్ని సృష్టించిన సంగతి తెలిసిందే. మందుస్తు హెచ్చరికలతో ప్రజలను సురక్షిత ప్రాంతాలకు తరలించారు. ప్రస్తుతం పునరావాస చర్యలు కొనసాగుతున్నాయి.  220కి పైగా రైళ్ల రద్దు ఒడిశాలో ముందు జాగ్రత్త చర్యగా రైలు, విమాన సర్వీసులను నిలిపివేశారు. కోల్‌కతా–చెన్నై మార్గంలో ప్రయాణించే 220కి పైగా రైళ్లను శనివారం వరకు రద్దు చేసినట్లు ఈస్టుకోస్టు రైల్వే అధికారులు వెల్లడించారు. భువనేశ్వర్, కోల్‌కతా విమానాశ్రయాల్లో విమానాల రాకపోకలపై నిషేధం కొనసాగుతోంది. ప్రజలను సురక్షిత ప్రాంతాలకు చేర్చేందుకు రైల్వేశాఖ మూడు ప్రత్యేక రైళ్లను కేటాయించింది. ప్రధాన స్టేషన్లలోని స్టాళ్లలో ఆహార పదార్థాలు, తాగునీటిని సిద్ధంగా ఉంచినట్లు ప్రకటించింది. మరో మూడు రోజుల వరకు ఉద్యోగులు సెలవులు పెట్టొద్దని కోరింది. ఒడిశా రాజధాని భువనేశ్వర్, పర్యాటక క్షేత్రం పూరీ రైల్వేస్టేషన్లు తీవ్ర గాలుల ధాటికి పూర్తిగా దెబ్బతిన్నాయి. వివిధ ప్రాంతాల్లో 34 సహాయక బృందాలు పునరావాస చర్యల్లో నిమగ్నమయ్యాయి. 

సాక్షి, హైదరాబాద్‌ : ప్రజలు తీర్పు అర్థమయ్యే చంద్రబాబు పిచ్చి మాటలు మాట్లాడుతున్నారని వైఎస్సార్‌ కాంగ్రెస్‌ పార్టీ అధికార ప్రతినిధి వాసిరెడ్డి పద్మ అన్నారు. శనివారమిక్కడ పార్టీ కేంద్ర కార్యాలయంలో ఆమె విలేకరులతో మాట్లాడారు. ఈ సందర్భంగా.. ఫొని తుపానును జాగ్రత్తగా తానే పక్కకు తప్పించానని చంద్రబాబు చెప్పడం విడ్డూరంగా ఉందని ఎద్దేవా చేశారు. తన పాపాలపుట్ట బద్దలవుతుందన్న భయంతో ఏం మాట్లాడుతున్నారో ఆయనకే అర్థం కావడం లేదన్నారు. ఐదేళ్లలో చంద్రబాబు క్యాబినెట్ మీటింగ్ పెట్టి ఏం సాధించారని...కనీసం ఒక్క క్యాబినెట్ మీటింగ్ అయినా భూకేటాయింపులు లేకుండా జరిగిందా అని ప్రశ్నించారు. అలాంటిది మరి ఈ రోజు క్యాబినెట్ మీటింగ్ పెట్టి ఏ నిర్ణయాలు తీసుకుంటారో చెప్పాలని డిమాండ్‌ చేశారు.   చదవండి : ఎవరు అడ్డుకుంటారో చూస్తా...! మీ రోత చూసి విసిగిపోతున్నారు.. ‘ఐదు నెలలుగా ఉద్యోగులకు జీతాలు రాని పరిస్థితి ఉంది. క్యాబినెట్ మీటింగ్ పెట్టి ఎవరిని పిలుస్తారు. మీ మంత్రులు దాక్కున్నారా. అసలు క్యాబినెట్ మంత్రులు ఎవరూ కనబడటం లేదు. వారంతా చంద్రబాబు రోత చూసి విసిగిపోతున్నారు. ఓడిపోతామనే తెలిసి వాళ్లంతా సొంత పనుల్లో ఉన్నారు. ఐదేళ్లుగా అవినీతి, అరాచకాలు చేసి... ఇప్పుడు చంద్రబాబు మాట్లాడుతున్న తీరు హాస్యాస్పదంగా ఉంది. ఓటమి భయంతో చంద్రబాబు పిచ్చిగా మాట్లాడుతున్నారు. వైఎస్‌ జగన్‌ నవ్వినా ఆయన ఏడుస్తున్నారు. వైఎస్ జగన్‌కు జీవించే హక్కు లేకుండా చంపాలని చూశారు. కనీసం ఆయనకు సినిమాకు వెళ్లే హక్కు కూడా లేదా. టీటీడీ బంగారం వ్యవహారంపై స్పందించని చంద్రబాబు వైఎస్‌ జగన్‌ సినిమాకు వెళ్తే మాత్రం మాట్లాడతారు. మీ లోకేష్ ఎక్కడున్నారో చెప్పండి. కోడెల ఎదుర్కొన్న పరిస్థితి మరే టీడీపీ నేతలు తెచ్చుకోవద్దు’ అని వాసిరెడ్డి పద్మ హితవు పలికారు.

పూరీ: బంగాళాఖాతంలో దాదాపు పది రోజుల పాటు తుపానుగానే కొనసాగిన ‘ఫొని’ శుక్రవారం ఉదయం 10 గంటల ప్రాంతంలో ఒడిశాలోని పూరీ సమీపంలో తీరాన్ని తాకిన సంగతి తెలిసిందే. ఆ సమయంలో గంటకు 175-205 కిలోమీటర్ల వేగంతో వీచిన పెనుగాలులు ఒడిశా తీరప్రాంతాలను చిన్నాభిన్నం చేశాయి. ఫొని తుపాను, ప్రచండ గాలుల ధాటికి పెద్ద ఎత్తున ఆస్తినష్టం సంభవించింది. ఒడిశాలోని పలు జిల్లాల్లో బీభత్సం సృష్టించిన ఫొని తుపాను వేగంగా కదులుతూ బెంగాల్‌ దిశగా సాగిపోయింది. ఫోని తుపాను బీభత్సానికి సంబంధించిన వీడియోలు ప్రస్తుతం సోషల్‌ మీడియాలో వైరల్‌ అవుతున్నాయి. ముఖ్యంగా భువనేశ్వర్‌లోని కలింగా ఇన్‌స్టిట్యూట్‌ ఆఫ్‌ ఇండస్ట్రీయల్‌ టెక్నాలజీ (కేఐఐటీ)లో ఫొని తుపాను సందర్భంగా వీచిన ప్రచండ గాలులు తీవ్ర విధ్వంసాన్ని మిగిల్చాయి. భీకరంగా వీచిన గాలుల ధాటికి కాలేజీ కిటికీ అద్దాలు అమాంతం బద్దలైపోయాయి. ఈ సందర్భంగా కాలేజీ భవనంలో ఉన్న విద్యార్థులు భయభ్రాంతులకు గురయ్యారు. గాలుల ధాటికి అమాంతం బద్దలైన కిటికీ అద్దాలు అక్కడివారిని కాసేపు వణికించాయి. ఈ ఘటనకు సంబంధించిన వీడియోలు సోషల్‌ మీడియాలో పోస్టు చేసిన విద్యార్థులు.. తుపాను సృష్టించిన బీభత్సాన్ని గుర్తుచేసుకుంటున్నారు.

సాక్షి, న్యూఢిల్లీ : ఫొని తుపాను వల్ల తీవ్రంగా నష్టపోయిన ఒడిశాలో ప్రధానమంత్రి నరేంద్ర మోదీ పర్యటించనున్నారు. ఆదివారం ఆయన ఒడిశాలో పర్యటించి, పరిస్థితిని సమీక్షించనున్నారు. ఈ మేరకు ప్రధాని శనివారం తన ట్వీటర్‌ ఖాతాలో ట్వీట్‌ చేశారు. కాగా ఫొని తుపానుకు ఒడిశాలో ఎనిమిదిమంది మృతి చెందారు.  Day after tomorrow, on the 6th morning, I will be going to Odisha to take stock of the situation arising in the wake of Cyclone Fani. — Chowkidar Narendra Modi (@narendramodi) 4 May 2019 మరోవైపు ఒడిశాలో ముందుజాగ్రత్త చర్యగా రైలు, విమాన సర్వీసులను నిలిపివేసిన విషయం తెలిసిందే. భువనేశ్వర్‌, కోల్‌కతా విమానాశ్రయాల్లో విమానాల రాకపోకలపై నిషేధం కొనసాగుతోంది. భువనేశ్వర్‌, పర్యాటక క్షేత్రం పూరీ రైల్వేష్టేన్లు తీవ్ర గాలుల ధాటికి పూర్తిగా దెబ్బతిన్నాయి. పై కప్పులు ఎగిరిపోయాయి. ఇక వివిధ ప్రాంతాల్లో 34 సహాయక బృందాలు పునరావాస చర్యల్లో నిమగ్నమయ్యాయి. ఫొని తుపాను గండం నుంచి బయటపడినా, భారీ వర్షాలు కురవడంతో ఒడిశాలో జన జీవనం స్తంభించిపోయింది.

భువనేశ్వర్‌ : వాయువేగంతో ఒడిశా తీరం వైపు దూసుకువచ్చిన ఫొని తుపాను శుక్రవారం ఉదయం పూరి సమీపంలో తీరం దాటింది. దీని ప్రభావంతో పూరి తీరప్రాంతంలో గంటకు 180–200 కిలోమీటర్ల వేగంతో ఈదురు గాలులు వీస్తున్నాయి.  ఈ పెనుగాలుల దాటికి నిన్న భువనేశ్వర్‌లో భవననిర్మాణాలకు ఉపయోగించే పెద్ద క్రేన్‌ ఒకటి నేల కొరిగింది. అంతేకాకండా ఓ పెద్ద బస్సుసైతం గాలుల దాటికి అట్టముక్కలా కొట్టుకుపోయింది. ఇక బైకులు, చిన్న చిన్న వాహనాల సంగతైతే చెప్పనక్కర్లేదు. ఇప్పుడు ఈ సంఘటనలకు సంబంధించిన వీడియోలు సోషల్‌ మీడియాలో వైరల్‌గా మారాయి. ఫొని సృష్టించిన ప్రళయ కాల భీభత్సం దాటికి ఇప్పటివరకు 8 మంది మృత్యువాత పడగా.. వేలకోట్ల రూపాయల ఆస్తి నష్టం వాటిల్లింది.

న్యూఢిల్లీ: మాలా, హెలెన్, నర్గీస్, నీలోఫర్‌.. ఏంటీ, ఎవరో హీరోయిన్ల పేర్లు విన్నట్లు అనిపిస్తోందా? అయితే ఒక్క క్షణం ఆగండి.. ఈ పేర్లన్నీ విధ్వంసకర గాలులకు, భారీ వానలకు, పెను వినాశనానికి సూచికలు. ప్రళయం సృష్టించే తుపాన్లకు పెట్టిన పేర్లే ఇవన్నీ..  ఒడిశాను అతలాకుతలం చేస్తున్న తుపానుకు ‘ఫొని’ పేరు రావడం వెనుక, రాబోయే తుపాన్లకు సైతం ముందే పేర్లు నిర్ణయింపబడటం వెనుక పెద్ద చరిత్రే ఉంది. ప్రస్తుతం కలవరం పుట్టిస్తున్న ‘ఫొని’ తుపానుకు ఆ పేరు పెట్టింది బంగ్లాదేశ్‌. ‘ఫొని’ అంటే ‘పాము పడగ’ అని అర్థం.  సైక్లోన్లకు పేరు పెట్టే విధానం ఇలా మొదలైంది?  ఆసియా, ‘పసిఫిక్‌’ దేశాలకు సంబంధించిన ప్రపంచ మెటియిరోలాజికల్‌ ఆర్గనైజేషన్‌/ ఎకనమిక్, సోషల్‌ కమిషన్‌ 2000వ సంవత్సరంలో మస్కట్, ఒమన్‌లో తుపాన్లకు సంబంధించి 27వ సమావేశం నిర్వహించింది. ఈ సందర్భంగా బంగాళాఖాతం, అరేబియా మహా సముద్రాల్లో సంభవించే తుపాన్లకు కొత్తగా పేర్లు పెట్టాలని నిర్ణయించింది. తర్వాత అనేక చర్చల తర్వాత 2004 సెప్టెంబర్‌లో బంగాళాఖాతం, అరేబియా మహాసముద్రం తీర ప్రాంత 8 దేశాలు అక్షర క్రమంలో తుపాన్లకు పేర్లు పెట్టాలని నిర్ణయించాయి. అక్షర క్రమంలో బంగ్లాదేశ్, ఇండియా, మాల్దీవ్స్, మయన్మార్, ఒమన్, పాకిస్తాన్, శ్రీలంక, థాయ్‌లాండ్‌ దేశాలు వరుసగా పేర్లు సూచించాలని ఒప్పందం కుదుర్చుకున్నాయి.  తుపాన్లకు ఆ పేరు ఇలా పెడతారు?  ఢిల్లీలోని రీజినల్‌ స్పెషలైజ్డ్‌ మెటియిరోలాజికల్‌ సెంటర్‌ (ఆర్‌ఎస్‌ఎంసీ) అరేబియన్‌ మహా సముద్రం, బంగాళాఖాతంలో భవిష్యత్తులో ఏర్పడబోయే తుపాన్లను గుర్తిస్తాయి. వీటి పేర్లను 8 సభ్య దేశాలు అక్షర క్రమంలో నిర్ణయిస్తాయి. ఇలా మొదటి సారిగా బంగ్లాదేశ్‌ ‘ఒనిల్‌’ పేరు సూచించగా.. 2004 సెప్టెంబర్‌– అక్టోబర్‌ మధ్య మన దేశంలోని గుజరాత్‌ రాష్ట్రంలో సంభవించిన భారీ తుపానుకు ఈ పేరు పెట్టారు. ‘ఒనిల్‌’ ప్రభావం అప్పట్లో భారత్‌తో పాటు పాకిస్తాన్‌పై కూడా పడింది. అలాగే ఆంధ్రప్రదేశ్‌లో గతేడాది డిసెంబర్‌లో సంభవించిన ‘పెథాయ్‌’ తుపానుకు ఆ పేరు థాయ్‌లాండ్‌ పెట్టింది. అలాగే ఇప్పటి ‘ఫొని’ తర్వాత సంభవించబోయే తుపానుకు ఇండియా ‘వాయు’ అనే పేరు పెట్టింది. అలాగే మాలా, హెలెన్, నీలోఫర్‌ పేర్లను శ్రీలంక, బంగ్లాదేశ్, పాకిస్తాన్‌ దేశాలు పెట్టాయి. ఇలా ఇప్పటి వరకు మొత్తం 64 పేర్లను 8 దేశాలు సూచిస్తే 57 పేర్లను ఉపయోగించేశారు.  పేరు పెట్టడంలో అనేక జాగ్రత్తలు..  ఈ తుపాను పేర్లకు సంబంధించి సభ్య దేశాలు, ఆర్‌ఎస్‌ఎంసీ కొన్ని నిబంధనలు రూపొందించాయి. తుపాన్ల వల్ల భారీగా ప్రాణ, ఆస్తి నష్టం సంభవిస్తుండటం వల్ల వీటి పేరు మళ్లీ వింటే ప్రజలు భయాందోళనకు గురయ్యే అవకాశం ఉన్నందున ఒక్కసారి ఉపయోగించిన పేరును తిరిగి వాడకూడదు. అలాగే తుపాన్లకు సాధారణ ప్రజలు కూడా నిబంధనలకు లోబడి పేరును సూచించవచ్చు. ఆయా పేర్లు చిన్నవిగా, మీడియాలో ప్రసారం చేసేటప్పుడు అర్థమయ్యేలా ఉండే వాటిని ఎంపిక చేస్తారు. అలాగే సాంస్కృతికంగా సున్నితమైన పేర్లను పెట్టకూడదు. అలాగే అంతర్లీనంగా ఇతరులను నొప్పించే అర్థం వచ్చే పేర్లు పెట్టకూడదు. అసలు ఈ తుపాన్లకు పేర్లు పెట్టే సంప్రదాయాన్ని యునైటెడ్‌ స్టేట్స్‌ ఆఫ్‌ అమెరికా మొట్టమొదటిగా ప్రవేశపెట్టింది.   

సాక్షి, అమరావతి: ఫొని తుపాను ఉత్తరాంధ్రలో విద్యుత్‌ వ్యవస్థను చిన్నాభిన్నం చేసింది. ప్రధానంగా శ్రీకాకుళం, విజయనగరం జిల్లాల్లో భారీ నష్టం వాటిల్లింది. మొత్తం 2 వేల విద్యుత్‌ స్తంభాలు నేలకూలగా, దాదాపు 300 గ్రామాల్లో విద్యుత్‌ సరఫరా నిలిచిపోయింది.  శ్రీకాకుళం జిల్లా ఇచ్ఛాపురం, కంతిలి, సోంపేట, వజ్రపుకొత్తూరు, పలాస, కవిటి, నందిగాం, టెక్కలి, సంతబొమ్మాళి, గార, పొలాకీ మండలాల్లో విద్యుత్‌ నష్టాలు భారీగా ఉన్నట్టు అధికారులు తెలిపారు. 32 కేవీకి చెందిన 19 ఫీడర్లలోని 733 గ్రామాల్లో విద్యుత్‌ వ్యవస్థకు అంతరాయం కలిగినట్టు, అయితే శుక్రవారం సాయంత్రానికి చాలా ప్రాంతాల్లో విద్యుత్‌ సరఫరా పునరుద్ధరించామని తూర్పు ప్రాంత విద్యుత్‌ పంపిణీ సంస్థ (ఈపీడీసీఎల్‌) సీఎండీ రాజబాపయ్య వివరించారు. కడపటి వార్తలు అందే సమయానికి విద్యుత్‌ పునరుద్ధరణ చర్యలు చురుకుగా కొనసాగుతున్నాయి. విద్యుత్‌ శాఖ సలహాదారు రంగనాథం, ఏపీ ట్రాన్స్‌కో డైరెక్టర్‌ ఆడమ్స్‌ పరిస్థితిని చక్కదిద్దడానికి శ్రీకాకుళంలోనే మకాం వేశారు. క్షేత్రస్థాయిలో విద్యుత్‌ పునరుద్ధరణ పనులు పూర్తయ్యే వరకూ తుపాను బాధిత ప్రాంతాల్లోనే ఉంటామని ఆడమ్స్‌ తెలిపారు. రాష్ట్రంలోని అన్ని జిల్లాల నుంచి 2,600 మంది సిబ్బందిని రప్పించామని, వాళ్ళంతా రాత్రింబవళ్ళు విద్యుత్‌ పునరుద్ధరణకే కృషి చేస్తున్నారని రంగనాథం వివరించారు. తిత్లీ అనుభవాలను దృష్టిలో ఉంచుకుని తక్షణ చర్యలకు వీలుగా 400 ట్రాన్స్‌ఫార్మర్లు సిద్ధంగా ఉంచారు.  అయితే, వీటి అవసరం పెద్దగా కన్పించలేదని, విద్యుత్‌ స్తంభాలు విరిగిపడటం తప్ప ట్రాన్స్‌ఫార్మర్లకు నష్టం వాటిల్లలేదని ఈపీడీసీఎల్‌ సీఎండీ రాజబాపయ్య తెలిపారు. వజ్రపుకొత్తూరు, పలాస, టెక్కలి మండలాల్లో కొన్ని నెలల క్రితమే తిత్లీ బీభత్సం సృష్టించింది. ఆ సమయంలో ఈ ప్రాంతాల్లో కొత్తగా విద్యుత్‌ స్తంభాలు, తీగలు వేశారు. ప్రస్తుతం గాలికి వీటిల్లో చాలా వరకు నేలకూలాయి. కొద్ది నెలల్లోనే వీటిని మళ్ళీ వేయాల్సి వస్తోందని అధికారులు తెలిపారు. తుపాను తగ్గుముఖం పట్టిన కారణంగా శనివారం సాయంత్రానికి అన్ని గ్రామాలకు విద్యుత్‌ పునరుద్ధరించే అవకాశం ఉందని ఈపీడీసీఎల్‌ అధికారులు తెలిపారు.  

సాక్షి, గుంటూరు: ఫొని తుపాను ప్రభావం గ్రూప్‌–2 స్క్రీనింగ్‌ పరీక్ష రాస్తున్న అభ్యర్థులపై పడింది. 446 గ్రూప్‌–2 పోస్టులకు ఈ నెల 5న ఏపీపీఎస్సీ స్క్రీనింగ్‌ టెస్ట్‌ నిర్వహిస్తున్న విషయం తెలిసిందే. ఈ పరీక్షకు రాష్ట్రవ్యాప్తంగా 2.95 లక్షల మంది అభ్యర్థులు హాజరవుతున్నారు. ఫొని తుపాను నేపథ్యంలో దక్షిణ మధ్య రైల్వే దాదాపు 80 రైళ్లను రద్దు చేసింది. దీంతో అభ్యర్థులు తీవ్ర ఇబ్బందులు పడుతున్నారు. ముఖ్యంగా తుపాను ప్రభావం ఎక్కువ ఉన్న ఉత్తరాంధ్రలో అభ్యర్థుల కష్టాలు అన్నీఇన్నీ కావు.  రవాణా వ్యవస్థకు తీవ్ర అంతరాయం చాలా మంది అభ్యర్థులు హైదరాబాద్, విశాఖ తదితర నగరాల్లో కోచింగ్‌ తీసుకున్నారు. గ్రూప్‌–2 పరీక్షకు హాజరయ్యేందుకు తమ సొంత జిల్లాలకు చేరుకోవడానికి వీరంతా రైళ్లు, బస్సులకు రిజర్వేషన్‌ చేయించుకున్నారు. ఫొని తుపాను కారణంగా దక్షిణ మధ్య రైల్వే 80 వరకు రైళ్లను రద్దు చేసింది. రోడ్డు మార్గంలో చేరుకోవాలన్నా ఉత్తరాంధ్ర సహా తీర ప్రాంతాల్లో తుపాను ప్రభావం తీవ్రంగా ఉంది. దీంతో ఆయా ప్రాంతాల్లో రవాణా వ్యవస్థకు అంతరాయం ఏర్పడింది. అంతేకాకుండా తుపాను ప్రభావం అధికంగా ఉన్న జిల్లాలు, తీర ప్రాంతాల్లో ప్రభుత్వ యంత్రాంగానికి సెలవులు రద్దు చేశారు. ఈ నేపథ్యంలో గ్రూప్‌–2కు దరఖాస్తు చేసుకున్న వీఆర్‌వో, వీఆర్‌ఏ, కానిస్టేబుళ్లు, ఇతర ప్రభుత్వ ఉద్యోగులు పరీక్షకు దూరం కావాల్సిన పరిస్థితి.  పరీక్ష వాయిదా వేయాలి అభ్యర్థులు తమ సొంత జిల్లాలకు చేరుకోవడానికి తీవ్ర ఇబ్బందులు పడుతున్నారు. ఇంతటి ప్రతికూల పరిస్థితుల్లో పరీక్ష నిర్వహించడం ఏపీపీఎస్సీ నియంతృత్వ ధోరణికి నిదర్శనం. పరీక్షలను వెంటనే వాయిదా వేసి అందరూ హాజరయ్యే విధంగా మళ్లీ నిర్వహించాలి.  – సమయం హేమంత్‌ కుమార్,ఏపీ నిరుద్యోగ జేఏసీ రాష్ట్ర అధ్యక్షుడు పరీక్ష కేంద్రాలకు వెళ్లడం కష్టమే మాది కొత్తపాలెం గ్రామం. నేను గ్రూప్‌–2 పరీక్ష రాయాల్సిన కేంద్రం టెక్కలిలో ఉంది. తుపాను నేపథ్యంలో మా ప్రాంతంలో రవాణాకు తీవ్ర అంతరాయం నెలకొంది. పరీక్ష వాయిదా వేస్తే బాగుంటుంది.  – జి.లక్ష్మి, గ్రూప్‌–2 అభ్యర్థిని, శ్రీకాకుళం జిల్లా ప్రైవేట్‌ రవాణా ఏర్పాటు చేసుకోవాలన్నారు ఫొని తుపానుతో అభ్యర్థులు తీవ్ర ఇబ్బందులు పడుతున్నారు. వీటిని దృష్టిలో ఉంచుకుని పరీక్షను వాయిదా వేయాలని ఏపీపీఎస్సీ చైర్మన్‌ను కోరగా ఆయన ప్రైవేట్‌ రవాణా ఏర్పాటు చేసుకుని పరీక్షకు హాజరుకావాలని నిర్లక్ష్యంగా వ్యవహరించారు. – ఎస్‌.మహబూబ్‌ బాషా, ఏపీ నిరుద్యోగ జేఏసీ వ్యవస్థాపకుడు

సాక్షి నెట్‌వర్క్‌/భువనేశ్వర్‌/పూరీ: ఆంధ్రప్రదేశ్‌కు ‘ఫొని’ తుపాను ముప్పు తప్పింది. బంగాళాఖాతంలో దాదాపు పది రోజుల పాటు తుపానుగానే కొనసాగిన ‘ఫొని’ శుక్రవారం ఉదయం 10 గంటల ప్రాంతంలో ఒడిశాలోని పూరీ సమీపంలో ఎట్టకేలకు తీరాన్ని తాకింది. అక్కడే అధిక ప్రభావం చూపించింది. ఆ సమయంలో గంటకు 175–205 కిలోమీటర్ల వేగంతో పెనుగాలులు వీచాయి. తుపాను ధాటికి ఒడిశాలో ఎనిమిది మంది మరణించారు. తుపాను తీరాన్ని దాటాక అతితీవ్ర తుపానుగా బలహీనపడి ఉత్తర ఈశాన్య దిశగా పయనిస్తోంది. శుక్రవారం రాత్రికి ఇది ఒడిశాలోని బాలాసోర్‌కు నైరుతిగా 60 కిలోమీటర్లు, పశ్చిమ బెంగాల్‌లోని మిడ్నాపూర్‌కు నైరుతి దిశగా 160 కిలోమీటర్ల దూరంలోనూ కేంద్రీకృతమై ఉంది. ఇది ఉత్తర ఈశాన్య దిశగా కదులుతూ తీవ్ర తుపానుగా పశ్చిమ బెంగాల్‌లోకి ప్రవేశించనుంది. తర్వాత మరింతగా బలహీనపడుతూ శనివారం నాటికి బంగ్లాదేశ్‌లోకి ప్రవేశించి తుపానుగా, వాయుగుండంగా మారనుందని భారత వాతావరణ విభాగం(ఐఎండీ) శుక్రవారం రాత్రి విడుదల చేసిన నివేదికలో వెల్లడించింది.    పూరీ నగరం ఏరియల్‌ వ్యూ...  పెనుగాలులు.. కుండపోత వర్షాలు..  ఫొని తుపాను  ప్రభావంతో ఒడిశాలో కుండపోత వర్షాలు కురుస్తున్నాయి. పెనుగాలులు, భారీ వర్షాల ధాటికి వేలాది మంది నిరాశ్రయులయ్యారు. పలు రహదారులు ధ్వంసమయ్యాయి. వేల సంఖ్యలో విద్యుత్‌ స్తంభాలు నేలకొరిగాయి. ఈ నేపథ్యంలో ఒడిశావ్యాప్తంగా హై అలర్ట్‌ ప్రకటించారు. మరోవైపు సముద్ర తీరప్రాంతం అల్లకల్లోలంగా మారింది. పూరీ క్షేత్రానికి వచ్చిన పర్యాటకులు వెంటనే నగరం విడిచి వెళ్లాలని అధికారులు చెప్పారు. తుపాను నేపథ్యంలో ముఖ్యమంత్రి నవీన్‌ పట్నాయక్, ప్రభుత్వ ప్రధాన కార్యదర్శి ఆదిత్య ప్రసాద్‌ పాఢి ఆయా జిల్లాల కలెక్టర్లు, ఉన్నతాధికారులతో సమీక్ష నిర్వహించారు. ఇప్పటికే 11 వేల మందికి పైగా బాధితులను సురక్షిత ప్రాంతాలకు తరలించామని అధికారులు తెలిపారు. మొత్తం 900 సహాయ, పునరావాస శిబిరాలు ఏర్పాటు చేశామన్నారు.    రైళ్లు, విమానాలు రద్దు   ఒడిశాలో ముందు జాగ్రత్త చర్యగా రైలు, విమాన సర్వీసులను నిలిపివేశారు. కోల్‌కతా–చెన్నై మార్గంలో ప్రయాణించే 220కి పైగా రైళ్లను శనివారం వరకు రద్దు చేసినట్లు ఈస్టుకోస్టు రైల్వే అధికారులు వెల్లడించారు. భువనేశ్వర్, కోల్‌కతా విమానాశ్రయాల్లో విమానాల రాకపోకలపై నిషేధం కొనసాగుతోంది. ప్రజలను సురక్షిత ప్రాంతాలకు చేర్చేందుకు రైల్వేశాఖ మూడు ప్రత్యేక రైళ్లను కేటాయించింది. ప్రధాన స్టేషన్లలోని స్టాళ్లలో ఆహార పదార్థాలు, తాగునీటిని సిద్ధంగా ఉంచినట్లు ప్రకటించింది. మరో మూడు రోజుల వరకు ఉద్యోగులు సెలవులు పెట్టొద్దని కోరింది. ఒడిశా రాజధాని భువనేశ్వర్, పర్యాటక క్షేత్రం పూరీ రైల్వేస్టేషన్లు తీవ్ర గాలుల ధాటికి పూర్తిగా దెబ్బతిన్నాయి. పైకప్పులు ఎగిరిపోయాయి. దీంతో ప్రయాణికులు తీవ్ర ఆందోళనకు గురయ్యారు. వివిధ ప్రాంతాల్లో 34 సహాయక బృందాలు పునరావాస చర్యల్లో నిమగ్నమయ్యాయి.  ఫొని తుపాను గండం నుంచి బయటపడినా, భారీ వర్షాలు కురవడంతో ఒడిశాలో జన జీవనం స్తంభించిపోయింది.   

సాక్షి, అమరావతి/సాక్షి, న్యూఢిల్లీ: తుపాను ప్రభావిత ప్రాంతాల్లో వేగవంతంగా సహాయక చర్యలు చేపట్టేందుకు వీలుగా రాష్ట్రంలోని నాలుగు జిల్లాల్లో ఎన్నికల నిబంధనలను సడలిస్తూ కేంద్ర ఎన్నికల సంఘం నిర్ణయిం తీసుకుంది. రాష్ట్ర ఎన్నికల సంఘం నుంచి వచ్చిన లేఖను పరిశీలించాక తూర్పుగోదావరి, విశాఖ, విజయనగరం, శ్రీకాకుళంజిల్లాల్లో ఎన్నికల నిబంధనలను సడలిస్తూ నిర్ణయం తీసుకుంది. ఈ మేరకు కేంద్ర ఎన్నికల సంఘ కార్యదర్శి కేపీ సింగ్‌ రాష్ట్ర ఎన్నికల ప్రధానాధికారి గోపాలకృష్ణ ద్వివేదికి లేఖ రాశారు. తుపాను సహాయక చర్యలు చేపట్టేందుకు వీలుగా ఈ నాలుగు జిల్లాల్లో ఎన్నికల నిబంధనలను సడలించినట్లు ద్వివేది తెలిపారు. ఆయన శుక్రవారం విలేకరులతో మాట్లాడుతూ వర్షాలు అధికంగా కురిసిన విజయనగరం, శ్రీకాకుళం జిల్లాల్లో స్ట్రాంగ్‌ రూమ్‌లు భద్రంగా ఉన్నాయని, వర్షాలకు తడవకుండా వాటిని ప్లాసిŠట్‌క్‌ షీట్లతో కవర్‌ చేసినట్లు చెప్పారు.  రీ–పోలింగ్‌కు సిద్ధం రాష్ట్రంలో మే 6న నిర్వహించనున్న రీ–పోలింగ్‌ ఏర్పాట్లకు సంబంధించి గుంటూరు, ప్రకాశం, నెల్లూరు జిల్లాల కలెక్టర్లు, జిల్లా ఎస్పీలతో వీడియో కాన్ఫెరెన్స్‌ ద్వారా ద్వివేది సమీక్ష నిర్వహించారు. ఓటర్లు స్వేచ్ఛగా ఓటు హక్కు వినియోగించుకునేలా ఆయా ఎన్నికల అధికారులు చర్యలు తీసుకోవాలని సూచించారు. రీ–పోలింగ్‌ ప్రక్రియను అత్యంత ప్రశాంతంగా నిర్వహించాలని మాక్‌ పోలింగ్, ఇతర పోలింగ్‌ ప్రక్రియలను పకడ్బందీగా నిర్వహించాలని చెప్పారు. ఆయా పోలింగ్‌ కేంద్రాల పరిధిలో టెంట్లు, ఇతర మౌలిక వసతులైన తాగునీరు తదితర ఏర్పాట్లను పూర్తిచేశామని, బందోబస్తుకు సంబంధించిన అన్ని చర్యలు తీసుకున్నట్టు గుంటూరు, ప్రకాశం, నెల్లూరు జిల్లాల ఎన్నికల అధికారులు, సూపరింటెండెంట్‌ ఆఫ్‌ పోలీస్‌లు సీఈవోకు వివరించారు. రీ–పోలింగ్‌ కేంద్రాల పరిధిలో ఇప్పటికే విస్తృత ప్రచారం చేపట్టినట్లు తెలిపారు. ఆయా కేంద్రాల పరిధిలో వెబ్‌–కాస్టింగ్‌¬తో పాటు మాన్యువల్‌ వీడియోగ్రాఫింగ్‌ కూడా చేస్తున్నట్లు అధికారులు వివరించారు. రీ–పోలింగ్‌ జరిగే ఐదు పోలింగ్‌ కేంద్రాల పరిధిలో ఐదుగురు ప్రత్యేక పరిశీలకులను నియమించామని, ఆయా పోలింగ్‌ కేంద్రాల వద్ద బెల్‌ ఇంజినీర్లను అందుబాటులో ఉంచనున్నట్లు ద్వివేది తెలిపారు. ఈ వీడియో కాన్ఫరెన్స్‌లో రాష్ట్ర ప్రధాన ఎన్నికల కార్యాలయం నుంచి అదనపు ఎన్నికల అధికారులు సుజాతశర్మ, వివేక్‌ యాదవ్‌¬తో పాటు ఇతర అధికారులు, సాంకేతిక సిబ్బంది హాజరయ్యారు. అంతకుముందు సర్వీసు ఓట్ల లెక్కింపుపై కేంద్ర ఎన్నికల సంఘ ఐటీ సంచాలకులు వీఎన్‌ శుక్లా, రాష్ట్ర ఎన్నికల అధికారులు, జిల్లా ఎన్నికల అధికారులతో వీడియో కాన్ఫరెన్స్‌ నిర్వహించారు. సమావేశంలో పాల్గొన్న వివేక్‌యాదవ్‌ మాట్లాడుతూ రాష్ట్రంలో 60,250 మంది సర్వీసు ఓటర్లున్నారని, శ్రీకాకుళం జిల్లాలో అత్యధికంగా 13,000 మంది ఉన్నట్లు తెలిపారు. మే 23న ఓట్ల లెక్కింపు ప్రక్రియలో భాగంగా సర్వీసు ఓట్లు, పోస్టల్‌ బ్యాలెట్‌ ఓట్ల లెక్కింపు ప్రక్రియను తొలుత చేపడతామని, ఈ విషయంలో ఇప్పటికే సంబంధిత జిల్లా ఎన్నికల అధికారులకు, ఎన్నికల రిటర్నింగ్‌ అధికారులకు వివరాలు పంపినట్లు వివరించారు.  కడప జేసీపై చర్యలకు సిఫార్సు లక్ష్మీస్‌ ఎన్టీఆర్‌ సినిమాను విడుదల చేయొద్దని స్పష్టమైన ఆదేశాలు జారీచేసినప్పటికీ వైఎస్సార్‌ కడప జిల్లాలో రెండు థియేటర్లలో సినిమా ప్రదర్శించడంపై ఎన్నికల సంఘం ఆగ్రహం వ్యక్తం చేసింది. ఆ థియేటర్ల లైసెన్సులు రద్దు చేయాలని జిల్లా అధికారులకు ఆదేశాలిచ్చినట్టు ద్వివేది తెలిపారు. సినిమా ప్రదర్శనను అడ్డుకోలేకపోయిన జేసీ కోటేశ్వరరావుపై చర్యలకు సీఈసీకి నివేదిక ఇచ్చినట్టు వివరించారు. 

సాక్షి, అమరావతి: ‘వచ్చే వారం కేబినెట్‌ మీటింగ్‌ పెడతా. అధికారులు రాకుండా ఎవరు అడ్డుకుంటారో చూస్తా. ఈసీ వద్దంటే రాతపూర్వకంగా వివరణ ఇవ్వాలి. బిజినెస్‌ రూల్స్‌ను అతిక్రమించే వారిపై సీరియస్‌ చర్యలు తీసుకుంటా’ అని సీఎం చంద్రబాబు అధికారులను హెచ్చరించారు. ‘అన్ని రాష్ట్రాల్లో సీఎస్‌లు సీఎంల దగ్గరకు వచ్చి వివరిస్తారు. కానీ మన దగ్గర మాత్రం సీఎం దగ్గరకు సీఎస్‌ రారు. సీఎస్‌ రావాలని నేను అడుక్కోవాలా? అధికారులు చదువుకోలేదా? రాజ్యాంగం ఏం చెబుతోందో తెలియదా?’ అని చంద్రబాబు తీవ్ర స్థాయిలో మండిపడ్డారు. శుక్రవారం ఉండవల్లిలోని ప్రజావేదికలో సీఎం చంద్రబాబు విలేకరులతో మాట్లాడారు.  22 ఏళ్లుగా ఎన్నో ఎన్నికలు చూశా... ‘అధికారులు మాకు కాకుండా ఎన్నికల సంఘానికి నివేదించాలని ఎక్కడ ఉంది? ఎన్నికల వరకు అధికారులు ఎన్నికల సంఘానికి నివేదించాలి. మిగిలిన అన్ని విషయాలు నాకు నివేదించాలి. అధికారులు చదువుకోలేదా? ఎన్నికలు, ఎన్నికలేతర విషయాల్లో ఎవరికి రిపోర్ట్‌ చేయాలో తెలియదా? అభివృద్ధికి సంబంధించిన వ్యవహారాలు కూడా ఎన్నికల సంఘానికి నివేదిస్తారా? ప్రజాస్వామ్య వ్యవస్థలో అధికారులు ఇష్టానుసారంగా వ్యవహరిస్తాం. సమీక్షలకు రామంటే ఎలా? బిజినెస్‌ రూల్స్‌ ఏం చెబుతున్నాయి? అధికారుల్లో చీలిక తేవాలని నేను అనుకోవడం లేదు. కానీ అధికారులు బాధ్యతారాహిత్యంగా వ్యవహరిస్తే ఊరుకోను. ఈ ప్రధాన కార్యదర్శి మూడు నెలలు ఉండొచ్చు. కానీ 22 ఏళ్లుగా, సీఎంగా ఎన్నో ఎన్నికలు చూశా. కొంతమంది అధికారాన్ని దుర్వినియోగం చేసినా, విర్రవీగినా తర్వాత వ్యవస్థను సరిదిద్దాల్సి ఉంటుంది. ఈసీ హద్దులు తెలుసుకోవాలి ఈవీఎంలు అంటే ఏమిటో మన దేశంలో సగం మందికి అవగాహన లేదు. అర్థంకాని వ్యవస్థలను పెట్టి లేనిపోని సమస్యలు ఎందుకు తెస్తారు? ఈ దేశానికి పేపర్‌ బ్యాలట్‌ ద్వారా ఎన్నికలు మినహా మరో మార్గం లేదు. ఈవీఎంలకు, వీవీ ప్యాట్‌లకు ఓట్లలో తేడా వస్తే వీవీ ప్యాట్‌ల ఓట్లే పరిగణిస్తామని ఎన్నికల సంఘం చెబుతోంది. కానీ అలా తేడా వస్తే మొత్తం అన్ని వీవీ ప్యాట్లు లెక్కించాలి. తెలంగాణాలో ఈవీఎంలకు, వీవీ ప్యాట్లకు ఓట్లలో తేడా రాలేదా? మోదీ నచ్చారు కాబట్టే ఎన్నికల సంఘం రూల్స్‌ పెడుతోంది. మోదీ ఏం మాట్లాడినా ఎన్నికల సంఘం చెవులకు సంగీతంలా బాగుంటుంది. ఎన్నికల నియమావళి అందరికీ ఒకేలా ఉండాలి. కేబినెట్‌ మీటింగ్‌లు, సమీక్షలు నిర్వహించకూడదని రూల్స్‌ ఎక్కడున్నాయి? మోదీ నాలుగు కేబినెట్‌ మీటింగ్‌లు పెట్టలేదా? ఈసీ కూడా హద్దులు తెలుసుకోవాలి. రాజ్యాంగమే మీకు, మాకు అధికారాలు ఇచ్చిందని గుర్తుంచుకోవాలి. రాష్ట్రంలో త్వరలో నిర్వహించే మున్సిపల్‌ ఎన్నికల్లో కూడా ఈవీఎంలతోపాటు వీవీ ప్యాట్‌లు పెట్టాలి. నాకున్న అనుభవం ఎవరికి ఉంది? మోదీ మళ్లీ అధికారంలోకి రారని దేశమంతా నిర్ణయానికి వచ్చేసింది. నాలుగు దశల ఎన్నికల తరువాత పార్టీలు కూడా తమ విధానాలను మార్చుకుంటున్నాయి. 22 ఏళ్లు అధికారంలో ఉన్న పార్టీగా, పదేళ్లు ప్రతిపక్షనేతగా, విభజన తరువాత కొత్త రాష్ట్రానికి ముఖ్యమంత్రిగా ఉన్న నాకున్నంత అనుభవం ఎవరికి ఉంది? 2002కు ముందు మోదీ ఎవరికి తెలుసు? 2014కు ముందు అమిత్‌ షా ఎవరికి తెలుసు?  తుపాన్‌పై సమర్థంగా వ్యవహరించాం.. ఫొని తుపాను తీవ్రతను ముందుగానే అంచనా వేసి సమర్థంగా వ్యవహరించాం. తుపాను వల్ల 14 మండలాలు నష్టపోయాయి. ఇప్పటికే 9 మండలాల్లో నష్టాన్ని అంచనా వేసి సహాయక చర్యలు చేపట్టాం. మిగిలిన ఐదు మండలాల్లో రేపటికి అంచనా పూర్తి అవుతుంది. మొత్తం 733 గ్రామాలు దెబ్బతిన్నాయి. 33 కేవీ ఫీడర్స్‌ 19 దెబ్బతింటే 16 పునరుద్ధరించాం. 11 కేవీ ఫీడర్స్‌ 101 దెబ్బతింటే 57 పునరుద్ధరించాం. 14 లక్షల మందికి ఐవీఆర్‌ఎస్‌ కాల్స్‌ ద్వారా ఎప్పటికప్పుడు సమాచారం అందించాం. ఆర్టీజీఎస్‌ సేకరించిన సమాచారాన్ని ఒడిశాకు కూడా అందించాం’’ నిష్క్రమించిన అధికారులు... తుపాను సహాయక చర్యలపై చంద్రబాబు వివరిస్తున్న సమయంలో ఆర్టీజీఎస్‌ సీఈవో బాబు మరికొందరు అధికారులు అక్కడే ఉన్నారు. అయితే చంద్రబాబు సీఎస్, ఎన్నికల సంఘంపై విమర్శలకు దిగగానే వారంతా అక్కడి నుంచి నిష్క్రమించడం గమనార్హం. 

సాక్షి, హైదరాబాద్‌ : శ్రీకాకుళం జిల్లాను ప్రభావితం చేసిన ఫొని తుపాను పరిస్థితిపై ఏపీ ప్రతిపక్ష నేత, వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డి సమీక్షించారు. ఆయన శుక్రవారం శ్రీకాకుళం జిల్లా పార్టీ నేతలు ధర్మాన ప్రసాదరావు, ధర్మాన కృష్ణదాస్, తమ్మినేని సీతారాం, కిల్లి కృపారాణితో పాటు పలువురితో తుపానువల్ల ఏ మేరకు నష్టం జరిగిందన్న విషయంపై ఆరా తీశారు. తుపాను ప్రభావిత ప్రాంతాల్లో ప్రజలకు అందుబాటులో ఉండి వారికి అండగా నిలవాలని జగన్‌ వారిని కోరారు. ఆయన పార్టీ శ్రేణులను అప్రమత్తం చేస్తూ బాధితులను ఆదుకోవాలని ఆదేశించారు. 

సాక్షి, అమరావతి/సాక్షి, విశాఖపట్నం/సాక్షి నెట్‌వర్క్‌: ఐదారు రోజులుగా ఉత్తరాంధ్ర ప్రజలకు కంటి మీద కునుకు లేకుండా చేసిన ‘ఫొని’ తుపాను ముప్పు తప్పిపోయింది. ఈ తుపాను ప్రభావం వల్ల రాష్ట్రంలో ఎక్కడా పెద్దగా ఆస్తి, ప్రాణ నష్టం సంభవించలేదు. బంగాళాఖాతంలో దాదాపు పది రోజుల పాటు తుపానుగానే కొనసాగిన ‘ఫొని’ శుక్రవారం ఉదయం 10 గంటల ప్రాంతంలో ఒడిశాలోని పూరి సమీపంలో ఎట్టకేలకు తీరాన్ని తాకింది. అక్కడే అధిక ప్రభావం చూపించింది. ఆ సమయంలో గంటకు 175–205 కిలోమీటర్ల వేగంతో పెనుగాలులు వీచాయి. తుపాను ధాటికి ఒడిశాలో ఎనిమిది మంది మరణించారు. తుపాను తీరాన్ని దాటాక అతి తీవ్ర తుపానుగా బలహీనపడి ఉత్తర ఈశాన్య దిశగా పయనిస్తోంది. శుక్రవారం రాత్రికి ఇది ఒడిశాలోని బాలాసోర్‌కు నైరుతిగా 60 కిలోమీటర్లు, పశ్చిమ బెంగాల్‌లోని మిడ్నాపూర్‌కు నైరుతి దిశగా 160 కిలోమీటర్ల దూరంలోనూ కేంద్రీకృతమై ఉంది. ఇది ఉత్తర ఈశాన్య దిశగా కదులుతూ తీవ్ర తుపానుగా పశ్చిమ బెంగాల్‌లోకి ప్రవేశించనుంది. తర్వాత మరింతగా బలహీనపడుతూ శనివారం నాటికి బంగ్లాదేశ్‌లోకి ప్రవేశించి తుపానుగా, వాయుగుండంగా మారనుందని భారత వాతావరణ విభాగం(ఐఎండీ) శుక్రవారం రాత్రి విడుదల చేసిన నివేదికలో వెల్లడించింది.  తుపాను దిశ ఇలా..  ఊపిరి పీల్చుకున్న ఉత్తరాంధ్ర  పెను తుపాను వల్ల ఉత్తరాంధ్ర, ముఖ్యంగా శ్రీకాకుళం జిల్లాకు తీవ్ర నష్టం వాటిల్లుతుందని కొద్దిరోజులుగా వాతావరణ నిపుణులు అంచనా వేస్తున్నారు. హుద్‌హుద్, తిత్లీ తుపానుల తీవ్రతను దృష్టిలో ఉంచుకుని ‘ఫొని’ ఎలాంటి ఉపద్రవాన్ని తెచ్చిపెడుతుందోనని ఉత్తరాంధ్ర వాసులు క్షణమొక యుగంగా గడిపారు. శ్రీకాకుళం జిల్లా వాసులైతే మరింతగా హడలెత్తిపోయారు. కానీ, ఉత్తరాంధ్రలో పెద్దగా నష్టం లేకుండానే ఫొని తుపాను రాష్ట్రాన్ని దాటిపోవడంతో అధికారులు, ప్రజలు ఊపిరి పీల్చుకున్నారు.  శ్రీకాకుళం జిల్లాలో రూ.38.43 కోట్ల నష్టం  తుపాను ప్రభావం వల్ల శ్రీకాకుళం జిల్లాలో రూ.38.43 కోట్ల నష్టం వాటిల్లినట్లు శుక్రవారం సాయంత్రానికి అధికారుల ప్రాథమిక అంచనాలో తేలింది. విద్యుత్తు స్తంభాలు ఒరిగిపోవడం, ఫీడర్లు దెబ్బతినడం, వైర్లు తెగిపోవడం వల్ల 733 గ్రామాల్లో కరెంటు సరఫరా ఆగిపోయింది. జిల్లాలోని పలు ప్రాంతాల్లో శుక్రవారం భారీ నుంచి అతి భారీ వర్షాలు కురిశాయి. పెనుగాలులు వీచాయి. తీరానికి ఆనుకుని ఉన్న మండలాల్లో 100 నుంచి 140 కిలోమీటర్ల వేగంతో గాలులు వీయడంతో ఉద్యాన పంటలకు ఎక్కువగా నష్టం వాటిల్లింది. అరటి, మామిడి, జీడిమామిడి, బొప్పాయి పంటలు దెబ్బతిన్నాయి. ఉద్ధానం ప్రాంతంలో 7,600 కొబ్బరి చెట్లు కూలిపోయాయి. 187 హెక్టార్లలో వరి పంట దెబ్బతింది. వేరుశనగ, వంగ, పత్తి, జొన్న, మొక్కజొన్న, కొర్ర, రాగి, పొద్దుతిరుగుడు, పొగాకు తదితర పంటలు ధ్వంసమయ్యాయి. 162 ఇళ్లు దెబ్బతిన్నాయి. ఆర్‌అండ్‌బీ శాఖ పరిధిలో 141.6 కిలోమీటర్ల మేర రహదారులు దెబ్బతిన్నాయి. తుపాను హెచ్చరికలతో శ్రీకాకుళం జిల్లా అధికార యంత్రాంగం ముందుగానే అప్రమత్తమైంది. జిల్లా కలెక్టరేట్‌లో కంట్రోల్‌ రూమ్‌ ఏర్పాటు చేశారు. సముద్ర తీరం, లోతట్టు గ్రామాల్లోని సుమారు 3,334 కుటుంబాలను 142 పునరావాస కేంద్రాలకు తరలించారు. మరోవైపు ఎన్‌డీఆర్‌ఎఫ్, ఎస్‌డీఆర్‌ఎఫ్, అగ్నిమాపక బృందాలు తుపాను ప్రభావిత ప్రాంతాల్లో రహదారులపై కూలిపోయిన చెట్లను తొలగించాయి. శ్రీకాకుళం జిల్లాకు తుపాను ముప్పు తప్పిపోయిందని కలెక్టర్‌ జె.నివాస్‌ శుక్రవారం ప్రకటించారు.  విజయనగరం జిల్లాలో ప్రభావం స్వల్పమే  ఫొని తుపాను ప్రభావం విజయనగరం జిల్లాలో స్వల్పంగానే కనిపించింది. జిల్లాలో శుక్రవారం ఉదయం నుంచి ఎక్కడా పెద్దగా గాలులు వీయలేదు. పార్వతీపురం డివిజన్‌లో స్వల్పంగా గాలి వీచినా నష్టం కలిగించలేదు. తీరప్రాంతంలో అలలు సాధారణ స్థాయికి చేరుకోవడంతో ఇక ఎలాంటి ముప్పు లేదని గ్రహించిన అధికారులు పునరావాస కేంద్రాల్లో ఉన్న 2 వేల మందిని వారి స్వగ్రామాలకు పంపించారు. నెల్లిమర్లలో ముద్దుర్తి శ్రీను(34) అనే వ్యక్తి విద్యుదాఘాతానికి గురై మృతి చెందాడు. గురువారం రాత్రి వీచిన ఈదురు గాలులకు మామిడి పంట నేలమట్టమైంది. తెర్లాం, మెరకముడిదాం, చీపురుపల్లి, గరివిడి, గుర్ల, నెల్లిమర్ల, పూసపాటిరేగ, డెంకాడ, భోగాపురం మండలాల్లో వందలాది ఎకరాల్లో మామిడితోటలు ధ్వంసమయ్యాయి. పలు మండలాల్లో మొక్కజొన్న పంట నేలమట్టమైంది. అరటి చెట్లు కూడా విరిగిపోయాయి. కొన్ని చోట్ల ఇళ్లు కూలిపోయాయి. రహదారులు దెబ్బతిన్నాయి. ఫొని తుపాను ప్రభావంతో విజయనగరం జిల్లాలో రూ.6.09 కోట్ల నష్టం వాటిల్లినట్లు అధికారులు చెబుతున్నారు. గురువారం ఉదయం నుంచి శుక్రవారం ఉదయం వరకు జిల్లాలో కేవలం 12.1 మిల్లీమీటర్లు వర్షపాతం నమోదైంది.  కొనసాగుతున్న రైళ్ల రద్దు  తుపాను ప్రభావం వల్ల పలు రైళ్లను శనివారం కూడా రద్దు చేసినట్లు, మరికొన్నింటిని దారి మళ్లించినట్లు వాల్తేరు డివిజన్‌ అధికారులు తెలిపారు. రైళ్ల రద్దు గురించి ముందే తెలుసుకున్న ప్రజలు ప్రయాణాలను రద్దు చేసుకోవడమో, వాయిదా వేసుకోవడమే చేశారు. కానీ, అప్పటికే బయల్దేరి రైళ్లలో ఉన్న ప్రయాణికులు శుక్రవారం తీవ్ర ఇబ్బందులు ఎదుర్కొన్నారు. రైల్వే శాఖ పూర్తి టికెట్‌ రిఫండ్‌ అందజేసింది. విశాఖపట్నం నుంచి భువనేశ్వర్, హౌరా వెళ్లే ప్రయాణకులు రైల్వేస్టేషన్‌లోనే పడిగాపులు కాయాల్సి వచ్చింది. రైళ్లు ఎప్పుడు నడుస్తాయో తెలియక స్టేషన్‌లో వేచి చూస్తున్నారు.   ఐఎండీ అంచనాలు భేష్‌  భారత వాతావరణ విభాగం(ఐఎండీ) అంచనాలు మరోసారి నిజమయ్యాయి. ఏప్రిల్‌ 25న ఏర్పడిన అల్పపీడనం దశల వారీగా ఎలా బలపడుతుంతో ఐఎండీ తెలియజేసింది. తొలుత తుపాను ఉత్తర తమిళనాడు– దక్షిణ కోస్తాంధ్ర తీరం వైపు పయనించి, ఆ తర్వాత ఉత్తర–ఈశాన్య దిశగా పయనిస్తుందని వెల్లడించింది. ఈ తుపాను తీవ్రరూపం దాల్చి పెనుతుపానుగా మారుతుందని పేర్కొంది. తుపాను పెనుతుపానుగానే ఒడిశాలోని పూరి సమీపంలో శుక్రవారం ఉదయం తీరాన్ని దాటుతుందని ఐదు రోజుల క్రితమే ప్రకటించింది. ఐఎండీ అంచనా వేసినట్లు కచ్చితంగా పూరి వద్ద శుక్రవారం తుపాను తీరాన్ని దాటింది. ఐఎండీ శాస్త్రవేత్తల అంచనాలు నిజం కావడంపై అభినందనలు వెల్లువెత్తుతున్నాయి.  పూరి ఏరియల్‌ వ్యూ చిత్రీకరించిన నౌకాదళం ఫొని తుపాను ప్రభావంతో అతలాకుతలమైన పూరి పరిసర ప్రాంతాల పరిస్థితిని భారత నౌకాదళం సమీక్షించింది. తూర్పు నౌకాదళానికి చెందిన రెండు డోర్నియర్‌ ఎయిర్‌క్రాఫ్ట్‌లతో తుపాను ప్రభావానికి సంబంధించిన ఏరియల్‌ వ్యూని శుక్రవారం చిత్రీకరించింది. ముంపునకు గురైన ప్రాంతాలకు సంబంధించిన చిత్రాలు, వీడియోలను సేకరించింది. లక్షల సంఖ్యలో చెట్లు, విద్యుత్‌ స్తంభాలు నేలకొరిగిన దృశ్యాలు, వరద ముంపులో ఉన్న రహదారుల ఫోటోలతో పాటు పూరి, చిల్కా సరస్సు మధ్య ప్రాంతాల్లో తుపాను కారణంగా నెలకొన్న విషాద పరిస్థితులకు సంబంధించిన ఫుటేజీని నేవీ బృందాలు ఒడిశా ప్రభుత్వానికి అప్పగించాయి. ఈ ఫుటేజీ ఆధారంగా సహాయక చర్యలు వేగవంతం చేసేందుకు ఆస్కారం ఉంటుందని ప్రభుత్వాధికారులు చెబుతున్నారు.

భువనేశ్వర్‌ : ఉపద్రవం గుప్పిట్లో చిక్కుకుని ప్రజలంతా అల్లాడుతున్న సమయాన.. మరో ప్రాణి క్షేమంగా ఈ భూమ్మీదకు వస్తే గట్టి పిండమే అంటాం. అంతేకాక ఆ చిన్నారికి ఉపద్రవాన్ని ప్రతిబింబించే పేరే పెడతారు. ఇలాంటి సంఘటనే ఒకటి భువనేశ్వర్‌లో చోటు చేసుకంది. ఒకవైపు బంగాళాఖాతం తీర రాష్ట్రాలు ‘ఫొని’ తుపాను సృష్టిస్తోన్న బీభత్సంతో వణికిపోతుంటే.. దానికి ఏమాత్రం జడవకుండా.. క్షేమంగా భూమ్మీదకు వచ్చిన ఓ చిన్నారి పాపకు ‘ఫొని’ అనే పేరు పెట్టారు తల్లిదండ్రులు. వివరాలు.. ఓ 32 ఏళ్ల మహిళ భువనేశ్వర్‌లోని రైల్వే కోచ్‌ రిపేర్‌ వర్క్‌షాప్‌లో విధులు నిర్వహిస్తుంది. ప్రస్తుతం నెలలు నిండిన ఆ మహిళ శుక్రవారం ఉదయం రైల్వే ఆస్పత్రిలో ఆడబిడ్డకు జన్మనిచ్చింది. ఓ వైపు ఒడిషా అంతా ఫొని ఎఫెక్ట్‌తో విలవిల్లాడుతూంటే.. ఈ చిట్లి తల్లి మాత్రం వెచ్చగా తల్లి పొత్తిళ్లలో సేదతీరుతుంది. ఇంతటి ఉపద్రవంలో కూడా క్షేమంగా భూమ్మీదకు వచ్చిన చిన్నారికి ఆమె తల్లితండ్రులు ‘ఫొని’ అని పేరు పెట్టారు. ప్రస్తుతం తల్లిబిడ్డ ఇద్దరూ ఆరోగ్యంగా ఉన్నట్లు వైద్యులు తెలిపారు. ‘ఫొని’ తుపాను ఒడిశాలో బీభత్సం సృష్టిస్తోంది. భారీ వర్షాలు, గాలుల ధాటికి 6గురు ప్రాణాలు కోల్పోయారు. గంటకు 80-125 కి.మీ. వేగంగా పెనుగాలులు, అతి భారీ వర్షాలతో వేలాది మంది నిరాశ్రయులయ్యారు. పలు రహదారులు ధ్వంసమైపోయాయి. చాలా చోట్ల విద్యుత్‌ సంభాలు నేలకొరిగాయి. ఈ నేపథ్యంలో ఒడిశాలో హై అలర్ట్ ప్రకటించారు.

సాక్షి, అమరావతి: రాష్ట్ర ప్రభుత్వ ప్రధాన కార్యదర్శి ఎ‍ల్వీ సుబ్రహ్మణ్యం, ఉన్నత అధికారులపై ఆపద్దర్మ ముఖ్యమంత్రి చంద్రబాబు నాయుడు మరోసారి అసహనం వ్యక్తం చేశారు. ఫొని తుపాను నేపథ్యంలో ఎన్నికల సంఘం కోడ్‌ను సడలించడంతో చంద్రబాబు శుక్రవారం సమీక్షించారు. అనంతరం విలేకరులతో మాట్లాడుతూ... అధికారులపై అక్కసు వెళ్లగక్కారు. ‘అన్ని రాష్ట్రాలలో సీఎస్‌లు ముఖ్యమంత్రికి రిపోర్ట్ చేస్తారు. మన దగ్గర మాత్రం ప్రధాన కార్యదర్శి సీఎం వద్దకు రారు. ముఖ్యమంత్రి దగ్గరకు వచ్చి మాట్లాడాలని తెలీదా? సీఎస్‌ని రమ్మని మేము అడుక్కోవాలా. రివ్యూలకు రారా? ఇక్కడి అధికారులు చదువు కోలేదా, చట్టం తెలీదా? అధికారి ఎవరైనా బాధ్యతారహితంగా ఉంటే సహించను. వచ్చే వారం కేబినెట్‌ సమావేశం పెడతా. ఎన్నికల కోడ్‌ పేరుతో అధికారులను ఎలా ఆపుతారో చూస్తాను’ అంటూ చంద్రబాబు రుసరుసలాడారు. ఈసీ అడ్డుపడింది.. భారత వాతావరణ శాఖ కంటే ఆర్టీజీ సమర్థవంతంగా పనిచేసిందని ఆయన చెప్పుకొచ్చారు. ఆర్టీజీ ద్వారా ఒడిశాకు సమాచారం ఇచ్చామని, నాలుగు జిల్లాలలో దీని ప్రభావం ఉంటుందని ముందే చెప్పామన్నారు. పక్కా ప్రణాళికతో ప్రాణ, ఆస్తి నష్టం లేకుండా చేయగలిగామని చెప్పారు. తుపాను పర్యవేక్షణ చర్యలకు ఎన్నికల సంఘం అడ్డుపడిందని చంద్రబాబు విమర్శించారు. తుపాను వెళ్లిపోయాక రివ్యూలకు అనుమతి ఇచ్చిందని మండిపడ్డారు. ప్రధాని నరేంద్ర మోదీ రివ్యూకు అనుమతి అవసరం లేదా అని ప్రశ్నించారు.

భువనేశ్వర్‌ : ఫొని తుపాను ఒడిశాలో బీభత్సం సృష్టిస్తోంది. భారీ వర్షాలు, గాలుల ధాటికి 6గురు ప్రాణాలు కోల్పోయారు. గంటకు 80-125 కి.మీ. వేగంగా పెనుగాలులు, అతి భారీ వర్షాలతో వేలాది మంది నిరాశ్రయులయ్యారు. పలు రహదారులు ధ్వంసమైపోయాయి. చాలా చోట్ల విద్యుత్‌ సంభాలు నేలకొరిగాయి. ఈ నేపథ్యంలో ఒడిశాలో హై అలర్ట్ ప్రకటించారు. టూరిస్టులందరూ పూరీ విడిచి వెళ్లాలని ఆదేశించారు. ప్రభావిత ప్రజలను ఆదుకునేందుకు ఒడిశా ప్రభుత్వం అన్ని ఏర్పాట్లు చేస్తోంది. ఇప్పటికే 11 వేల మందికి పైగా బాధితులను  సురక్షిత ప్రాంతాలకు తరలించినట్టు అధికారులు చెప్పారు. మరోవైపు ప్ర‌భావిత రాష్ట్రాల్లో ప్రజలకు భయపద్దనీ..తాము ఉన్నామంటూ దేశ ప్రధానమంత్రి నరేంద్ర మోదీ భరోసా ఇచ్చారు.  తూర్పు తీర ప్రాంత ప్ర‌జ‌లు తుఫాన్ వ‌ల్ల ఇబ్బందులు ప‌డుతున్నార‌ని, ఆయా రాష్ట్రాల‌తో కేంద్రం నిరంత‌రంగా ట‌చ్‌లో ఉంటూ పరిస్థితిని సమీక్షిస్తున్నామని చెప్పారు. ఒడిశా, బెంగాల్‌, ఆంధ్రా, త‌మిళ‌నాడు, పుదుచ్చేరి రాష్ట్ర ప్ర‌భుత్వాల‌తో కేంద్రం సంప్ర‌దింపులు జ‌రుపుతోంద‌న్నారు. రాజ‌స్థాన్‌లోని క‌రౌలీలో జ‌రిగిన బ‌హిరంగ స‌భ‌లో  ప్రసంగించిన మోదీ తుఫాను బాధితులు త్వరగా కోలుకోవాలని మోదీ కోరారు.  తుఫాన్‌ ప్రభావిత రాష్ట్రాలకు ముందుగానే  వెయ్యి కోట్లకుపైగా నిధులు రిలీజ్ చేశామ‌ని అన్నారు. ఎన్డీఆర్ఎఫ్‌, ఇండియ‌న్ కోస్టు గార్డ్‌, ఆర్మీ, నేవీ, ఎయిర్‌ఫోర్స్ ప‌రిస్థితిని అంచ‌నా వేస్తున్నార‌న్నారని మోదీ వివరించారు.

సాక్షి, అమరావతి : ఫొని తుపాన్‌పై ఆంధ్రప్రదేశ్‌ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం కేంద్రానికి ప్రాథమిక నివేదిక పంపారు. దీనిలో తుపాన్‌ ప్రభావం వల్ల 2 వేల విద్యుత్‌ స్థంభాలు, 117 సబ్‌స్టేషన్లు దెబ్బతిన్నాయని తెలిపారు. ఈ రోజు సాయంత్రానికి 733 గ్రామాల్లో విద్యుత్‌ సరఫరాను పునరుద్ధరిస్తామని నివేదికలో పేర్కొన్నారు. 553 హెక్టార్లలో పంటలు.. 520 హెక్టార్లలో ఉద్యానవన పంటలు దెబ్బతిన్నాయన్నారు. ఫొని తుపాన్‌ వలన ఎలాంటి ప్రాణ నష్టం సంభంవిచలేదని ఎల్వీ సుబ్రహ్మణ్యం స్పష్టం చేశారు.

సాక్షి, అమరావతి : ఫొని తుపాను సహాయ పనులు చంద్రబాబు నాయుడుకు సంబంధం లేకుండానే జరుగుతుండటంతో ఎల్లో మీడియా ప్రభుత్వ యంత్రాంగంపై బురద చల్లే వార్తలు కుమ్మరిస్తోందని వైఎస్సార్‌ కాంగ్రెస్‌ పార్టీ జాతీయ ప్రధాన కార్యదర్శి, రాజ్యసభ సభ్యుడు విజయసాయిరెడ్డి మండిపడ్డారు. శ్రీకాకుళం జిల్లాలో శిబిరాల్లో ఉన్న ప్రజలకు భోజన వసతి సరిగా లేదని గొట్టాలు పెట్టి గోల చేస్తూ, టీడీపీ కార్యకర్తలతో తిట్టిస్తున్నారని ట్విటర్‌లో ధ్వజమెత్తారు.   'తుఫాన్లు వచ్చినపుడల్లా పచ్చ చొక్కాలకు కోట్ల విలువైన పనులను నామినేషన్ మీద ఇచ్చి ప్రజాధనాన్ని పంచిపెట్టేవారు చంద్రబాబు. ఫొని తర్వాత కలెక్టర్లు నిబంధనల ప్రకారం పారదర్శకంగా నడుచుకోవాలి. విద్యుత్‌ పునరుద్ధరణకు జాప్యం జరగకుండా చూసుకోవాలి. ఫొని బీభత్సం వల్ల ప్రాణ నష్టం లేకుండా ముందస్తు జాగ్రత్తలు తీసుకున్న అధికార యంత్రాంగానికి ధన్యవాదాలు. ఎటువంటి ప్రచార హడావుడి లేకుండా మూడు రోజులుగా అవిశ్రాంతంగా కష్టపడ్డారు. విద్యుత్‌ పునరుద్ధరణ, మంచినీటి సరఫరా అందజేసి ప్రజలు ఎవరిళ్లకు వారు చేరేలా జాగ్రత్తలు తీసుకోవాలి. ఓటమి ఫిక్సయి దిగిపోయే ముందు, పదవిపై అతిగా ఆశలు పెట్టుకున్న నాయకుడు- కోడ్ అమలులో ఉండగా సీఎస్‌తో పెట్టుకున్న 40 ఇయర్స్ ఇండస్ట్రీ మంచి పేరు తెచ్చుకున్నట్ట చరిత్రలో లేదు. ఉత్సవ విగ్రహాల హోదా కూడా కాదు. గోడపైన క్యాలెండర్ ఫోటో స్థాయే' అని ట్విటర్‌లో విజయసాయిరెడ్డి పేర్కొన్నారు.

సాక్షి, హైదరాబాద్‌: ఉత్తరాంధ్రపై పెను ప్రభావం చూపించిన ఫొని తుపానుపై వైఎస్సార్ కాంగ్రెస్ పార్టీ అధ్యక్షుడు, ప్రతిపక్ష నేత వైఎస్‌ జగన్‌మోహన్‌రెడ్డి ఆరా తీశారు. శ్రీకాకుళం జిల్లా పార్టీ నాయకులు ధర్మాన ప్రసాదరావు, ధర్మాన కృష్ణదాస్‌, తమ్మినేని సీతారాం, కిల్లి కృపారాణి, తదితర నేతలతో ఆయన శుక్రవారం ఫోన్‌లో మాట్లాడారు. ఉత్తరాంధ్రలో ఫొని ప్రభావాన్ని అడిగి తెలుసుకున్న వైఎస్‌ జగన్‌... తుపాను ప్రభావిత ప్రాంతాల్లో ప్రజలకు అండగా నిలవాలని పార్టీ శ్రేణులకు పిలుపునిచ్చారు. కాగా తుపాను తీరం దాటినప్పటికీ శ్రీకాకుళం జిల్లా భారీ వర్షాలతో పాటు, ఈదురు గాలులు వీస్తున్నాయి. మరోవైపు జిల్లా కలెక్టర్‌ కూడా పరిస్థితిని ఎప్పటికప్పుడూ సమీక్షిస్తున్నారు. ఇక టెక్కలిలో తుపాను ధాటికి అన్నా క్యాంటీన్ షెల్టర్ గాలికి ఎగిరిపోయింది. దీనితో కరెంటు వైర్లు తెగిపడ్డాయి. లోతట్టు ప్రాంతాలన్నీ జలమయం అయ్యాయి. చదవండి: ఉత్తరాంధ్రకు తప్పిన పెను తుఫాన్ ముప్పు

కోల్‌కతా : ఫొని తుపాన్‌ పలు రాష్ట్రాలపై పెను ప్రభావం చూపుతోంది. ఒడిషా తీరాన్ని తాకిన ఫొని తుపాన్‌ ప్రచండ వేగంతో కదులుతుండగా కొల్‌కతా విమానాశ్రయాన్ని శుక్రవారం మధ్యాహ్నం నుంచి శనివారం ఉదయం వరకూ మూసివేయాలని పౌరవిమానయాన డైరెక్టరేట్‌ జనరల్‌ (డీజీసీఏ) ఆదేశించింది. కోల్‌కతా విమానాశ్రయం నుంచి శుక్రవారం మధ్యాహ్నం 3 గంటల నుంచి  శనివారం ఉదయం 8 గంటల వరకూ విమానాల రాకపోకలు నిలిపివేసినట్టు డీజీసీఏ పేర్కొంది. ఫొని తుపాన్‌ పురోగతిని పరిశీలించి కోల్‌కతా విమానాశ్రయంలో విమాన రాకపోకల నిలిపివేత సమయాన్ని సవరించామని అధికార వర్గాలు పేర్కొన్నాయి. మరోవైపు విమానాల రద్దుపై ఎలాంటి సమాచారం రాకపోవడంతో కోల్‌కతా విమానాశ్రయంలో పెద్దసంఖ్యలో ప్రయాణీకులు నిలిచిపోవడంతో గందరగోళం నెలకొంది.

సాక్షి, న్యూఢిల్లీ: ఆంధ్రప్రదేశ్‌లో నాలుగు జిల్లాల్లో ఎన్నికల కోడ్‌ను కేంద్ర ఎన్నికల సంఘం సడలించింది. ఫొని తుపాను కారణంగా సహాయక చర్యలు, పునరావాస చర్యల కోసం సీఈసీ శుక్రవారం ఎన్నికల కోడ్‌ ఎత్తివేసింది. తూర్పు గోదావరి, విశాఖ, విజయనగరం, శ్రీకాకుళం జిల్లాలకు మినహాయింపు ఇస్తూ ఈ మేరకు రాష్ట్ర ఎన్నికల సంఘానికి ఆదేశాలు ఇచ్చింది. కాగా ఏపీ అసెంబ్లీ ఎన్నికల పోలింగ్‌ జరగగా, ఓట్ల లెక్కింపు ఈ నెల 23వ తేదీన జరగనుంది. అప్పటి వరకూ ఉన్న ఎన్నికల కోడ్‌ను ప్రస్తుతం ఫొని తుపాను కారణంగా నాలుగు జిల్లాల్లో రద్దు చేశారు.

సాక్షి, భువనేశ్వర్‌ : దక్షిణ అగ్నేయ మధ్య బంగాళాఖాతంలో ఏర్పడిన అల్పపీడనం తీవ్ర అల్పపీడనంగా మారి వాయగుండంగా రూపాంతరం దాల్చి వాయువేగంతో ఒడిశా తీరం వైపు దూసుకువచ్చిన ఫొని తుపాను శుక్రవారం ఉదయం పూరి సమీపంలో తీరం దాటింది. దీని ప్రభావంతో పూరి తీర ప్రాంతంలో గంటల 180-200 కిలోమీటర్ల వేగంతో ఈదురు గాలులు, కుండపోతగా వర్షాలు కురుస్తున్నాయి. మరోవైపు పూరి తీరప్రాంతం అల్లకల్లోలంగా మారింది. ఆర్టీజీఎస్‌ అంచనాలకు అనుగుణంగానే ఫొని తుపాను ఈ రోజు ఉదయం 10.30 నుంచి 11.30 గంటల మధ‍్యలో తీరాన్ని దాటింది. తుపాను ప్రభావిత ప్రాంతాల్లో మొత్తం 900 శిబిరాలు ఏర్పాటు చేసింది. రాష్ట్రవ్యాప్తంగా అన్ని పాఠశాలలు మూసివేసి, పునరావాస కేంద్రాలుగా మార్చారు.   మరోవైపు ఒడిశాలో ముందుజాగ్రత్త చర్యగా రైలు, విమాన సర్వీసులను నిలిపివేశారు. కోల్‌కతా-చెన్నై మార్గంలో ప్రయాణించే 220కి పైగా రైళ్లు రేపటివరకూ రద్దు అయ్యాయి. భువనేశ్వర్‌, కోల్‌కతా విమానాశ్రయాల్లో విమానాల రాకపోకలపై నిషేధం కొనసాగుతోంది. ముందస్తు జాగ్రత్తలు తీసుకోవాలని తీరప్రాంత విమానాశ్రయాలకు హెచ్చరికలు జారీ అయ్యాయి. అలాగే ప్రజలను సురక్షిత ప్రాంతాలకు చేర్చేందుకు రైల్వేశాఖ మూడు ప్రత్యేక రైళ్లను కేటాయించింది. ప్రధాన స్టేషన్లలోని స్టాల్స్‌లో ఆహార పదార్థాలు, మంచినీటిని సిద్ధంగా ఉంచినట్లు రైల్వేశాఖ ప్రకటించింది. అంతేకాకుండా మరో మూడు రోజుల వరకూ సెలవులు పెట్టొద్దని ఉద్యోగులకు రైల్వేశాఖ సూచించింది. అలాగే తుపాను ప్రభావం తెలుసుకునేందుకు వాయుసేన విమానాలను సిద్ధంగా ఉంచింది. వివిధ ప్రాంతాల్లో 34 సహాయక బృందాలను తీరప్రాంత రక్షణదళం ఉంచింది.  ఒడిశాలో గత 24 గంటల్లో సగటు వర్షపాతం 16.07 మి.మీగా నమోదు అయింది. జిల్లాల వారిగా నమోదు అయిన వర్షపాతం వివరాలు: రాయ్‌గఢ్‌: 9.5 మి.మీ కోల్నార : 5.2 మి.మీ కెసింగ్‌పుర్‌: 1.8 మి.మీ గుణ్‌పుర్‌: 24 మి.మీ పద్మాపుర్‌    : 18.7 మి.మీ గుడారి : 28.6 మి.మీ రామన్‌గుడ : 14.4 మి.మీ కటక్‌ : 3.2 మి.మీ మునిగడ : 47 మి.మీ చంద్రాపుర్‌ : 22 మి.మీ  ఒడిశా నుంచి కోల్‌కతా వైపు ఫొని తుపాను పయనిస్తుండటంతో పశ్చిమ బెంగాల్‌ ప్రభుత్వం అప్రమత్తం అయింది. అవసరం అయితే రెండురోజుల పాటు ఖరగ్‌పూర్‌లోనే ఉండి పరిస్థితిని సమీక్షిస్తామని పశ్చిమ బెంగాల్‌ సీఎం మమతా బెనర్జీ తెలిపారు. ఫొని తుపాను రేపు అర్థరాత్రి లేదా ఆదివారం ఉదయానికి ఢాకా సమీపంలో పూర్తిగా బలహీనపడనుంది.

సాక్షి, విశాఖ : ఫొని తుపాను ఆంధ్రప్రదేశ్‌ను దాటినా... దాని ప్రభావం మాత్రం భారీగానే ఉంది. తుపాను ప్రభావంతో మూడు జిల్లాల్లో పలు ప్రాంతాల్లో విద్యుత్ స్తంభాలు నేలకొరగగా, విద్యుత్‌ వైర్లు ఎక్కడివక్కడ తెగిపడ్డాయి. విద్యుత్‌ ట్రాన్స్‌ఫార‍్మర్లు కూడా పడిపోవడంతో ప్రజలు అప్రమత్తంగా వ్యవహరించాలని ఆంధ్రప్రదేశ్ తూర్పు ప్రాంత విద్యుత్ పంపిణీ సంస్థ సీఎండీ రాజ బాపయ్య విజ‍్ఞప్తి చేశారు. విద్యుత్‌ సరఫరా, పునరుద్దరణకు సంబంధించి టోల్‌ ఫ్రీ నెంబర్‌ 1912, కమాండ్‌ కంట్రాలో సెంటర్ల నంబర్ల (శ్రీకాకుళం 9490612633, విజయనగరం  9490610102, విశాఖపట్నం 7382299975, ఏపీఈపీడీసీఎల్‌ కార్పొరేట్ ఆఫీస్ 0891 2853854)కు, సంబంధిత సెక్షన్‌ (ఏఈ) కార్యాలయాలకు తెలియచేయాలని ఆయన కోరారు. మరోవైపు ఎన్‌డీఆర్‌ఎఫ్‌ బృందాలు రంగంలోకి దిగి సహాయక చర్యలు చేపట్టాయి.  అలాగే తుపాను సమస్యలపై 1100కు కాల్ చేయవచ్చని ఆర్టీజీఎస్‌ సూచించింది. విజయనగరం జిల్లాలో నిన్న సాయంత్రం 5 గంటల నుంచి 70 నుంచి 150 కిలోమీటర్ల వేగంతో గాలులు బీభత్సం సృష్టించాయి. దీంతో విద్యుత్‌ సరఫరా నిలిచిపోయింది. జిల్లాలోని చాలా ప్రాంతాల్లో అంధకారం అలుముకుంది. తీర ప్రాంతాల్లో ఉన్న ఆరు గ్రామాల ప్రజలను అధికారులు పునరావాస కేంద్రాలకు తరలించారు. దాదాపు 2 వేల మందికి భోజనం, వసతి సౌకర్యాలు కల్పించారు.  ఇక శ్రీకాకుళం జిల్లాలో తుపాను ప్రభావంతో గురువారం మధ్యాహ్నం నుంచి జిల్లాలో వర్షాలు ప్రారంభమయ్యాయి. సాయంత్రానికి ఈదురు గాలులు మరింత ఉధృతమయ్యాయి. తుపాను తీరం దాటిన తర్వాత గంటకు 160 కిలోమీటర్ల వేగంతో తీరం వెంబడి బలమైన గాలులు, భారీ వర్షాలు నేపథ్యంలో శ్రీకాకుళం జిల్లా అధికార యంత్రాంగం అప్రమత్తమైంది. విశాఖపట్నం ఎయిర్‌పోర్టు నుంచి వెళ్లాల్సిన 11 విమానాలను తుపాను ప్రభావం వల్ల ఈదురు గాలులు, వాతావరణం అనుకూలించకపోవడంతో రద్దు చేశారు. ఒక విమానాన్ని దారి మళ్లించారు. ప్రయాణికులతో సందడిగా ఉండే విశాఖ విమానాశ్రయం బోసిపోయింది. ఇక్కడి నుంచి 28 విమానాలు రాకపోకలు సాగించాల్సి ఉండగా 11 ఇండిగో విమానాలు రద్దయ్యాయని అధికారులు పేర్కొన్నారు. అలాగే ఫొని తుపాను ప్రభావంతో విశాఖ రైల్వేస్టేషన్‌లో సికింద్రాబాద్‌-భువనేశ్వర్‌ ఎక్స్‌ప్రెస్‌ను అధికారులు నిలిపివేశారు. దీంతో ప్రయాణికులు విశాఖ రైల్వేస్టేషన్‌లో పడిగాపులు పడుతున్నారు.

సాక్షి, విశాఖ : ప్రచండ వేగంతో దూసుకొస్తున్న ఫొని తుపాను ఆంధ్రప్రదేశ్‌ను దాటడంతో ఉత‍్తరాంధ్రకు ముప్పు తప్పింది. తుపాను శ్రీకాకుళం జిల్లాను దాటినా, దాని ప్రభావం 30 కిలోమీటర్ల వరకూ ఉంటుందని వాతావరణ కేంద్రం అధికారులు చెబుతున్నారు. ఫొని తుపాను ప్రస్తుతం పూరికి 40 కిలోమీటర్లు, గోపాల్‌పూర్‌కు 30 కిలోమీటర్ల దూరంలో కేంద్రీకృతమై ఉంది. ఈ ఉదయం లేదా మధ్యాహ్ననికి పూరికి సమీపంలో తుపాను తీరం దాటనుంది. ఉత్తర ఈశాన్య దిశగా పయనిస్తూ, క్రమేణా బలహీనపడి అతి తీవ్ర తుపానుగా పశ్చిమ బెంగాల్‌ వైపు పయనించనుంది. తీరం దాటే సమయంలో 170 నుంచి 200 కిలోమీటర్ల వరకూ పెనుగాలులు వీయనున్నాయి. ఇక శ్రీకాకుళం జిల్లాలో 60 నుంచి 115 కిమీ వరకూ పెనుగాలులు వీచే అవకాశం ఉంది. రాగల 24 గంటల్లో జిల్లాలో భారీ నుంచి అతి భారీ వర్షాలు, విశాఖ, విజయనగరం జిల్లాల్లో ఓ మోస్తరు వర్షాలు పడనున్నాయి.  ఫొని తుపాను జిల్లాను దాటింది: కలెక్టర్‌ ఈ సందర్భంగా శ్రీకాకుళం జిల్లా కలెక్టర్‌ జె నివాస్‌ మాట్లాడుతూ...ఫొని తుపాన్‌ జిల్లాను దాటిందని, కంచిలి మండలంలో 19 సెంటీమీటర్ల వర్షపాతం నమోదు అయినట్లు తెలిపారు. ఇచ్చాపురం మండలంలో 140 కిలోమీటర్లకు పైగా వేగంతో గాలులు వీచాయని, సముద్ర తీరానికి దగ్గరలో ఉన్న గ్రామాల ప్రజలను తరలించినట్లు వెల్లడించారు. ఇచ్ఛాపురంలో మూడు ఇళ్లు మినహా ఎటువంటి ప్రాణ, ఆస్తి నష్టం జరగలేదన్నారు. విద్యుత్‌ స్తంభాలు కొన్ని దెబ్బతిన్నట్లు సమాచారం అందిందని, వాటిని తక్షణమే పునరుద్ధరణ చేస్తామన్నారు.  రహదారిపై రాకపోకలకు అంతరాయం లేకుండా చూస్తామని, తుపాను అనంతరం వరదలు వచ్చే అవకాశం ఉందన్నారు. అధికారులు అప్రమత్తంగా ఉండాలని, బహుదా, వంశధార నదులుకు వరదలు వస్తాయని, ఇసుక తవ్వకాలు లేదా ఇతర పనులకు నదుల్లోకి వెళ్లరాదని కలెక్టర్‌ సూచించారు. నదీతీరంలోని ప్రజలు మరింత అప్రమత్తంగా ఉండాలని అన్నారు. కమ‍్యూనికేషన్‌ వ్యవస్థ దెబ్బతినకుండా చర్యలు తీసుకున్నామని, తుపాను ప్రభావిత ప్రాంతాల్లో సెల్‌ సర్వీసులకు అంతరాయం లేకుండా ఏర్పాట్లు చేస్తామన్నారు. తుపాను ప్రభావిత మండలాల్లో ఇంట్రా సర్కిల్‌ రోమింగ్‌ విధానం అమల్లో ఉందని, ఓ ఆపరేటర్‌ టవర్‌ పనిచేయకపోయినా ఆ ప్రాంతంలో ఉన్న ఇతర ఆపరేటర్ల టవర్‌ ద్వారా సెల్‌ సర్వీసులు అందుబాటులోకి వస్తాయన్నారు. శ్రీకాకుళం, విజయనగరం జిల్లాల్లో పలు ప్రాంతాల్లో చెట్లు కూలాయి. ఓడ రేవుల్లో కొనసాగుతున్న ప్రమాద హెచ్చరికలు.. మరోవైపు ఓడ రేవుల్లో ప్రమాద హెచ్చరికలు కొనసాగుతున్నాయి. భీమునిపట్నం, కళింగపట్నం ఓడరేవుల్లో 10వ నంబర్‌ ప్రమాద హెచ్చరిక, విశాఖ, గంగవరం పోర్టుల్లో 8వ నంబర్‌, కాకినాడ, మచిలీపట్నం, నిజాంపట్నం, కృష్ణపట్నం ఓడరేవుల్లో మూడో నంబర్‌ ప్రమాద హెచ్చరికలు జారీ అయ్యాయి.

సాక్షి, విశాఖపట్నం: ఫొని తుపాను తీరం దాటుతున్నందున భారీ వర్షాలు పడే అవకాశాలున్నాయంటూ వాతావరణశాఖ హెచ్చరికలతో జిల్లా యంత్రాంగం అప్రమత్తమైంది. తుపాను ప్రభావంతో గురువారం ఉదయం నుంచి జిల్లా వ్యాప్తంగా ఓ మోస్తరు ఈదురుగాలులతో కూడిన తేలికపాటి జల్లులు కురిశాయి. సూపర్‌ సైక్లోన్‌గా మారిన ఫొని విశాఖ తీరానికి 154 కిలోమీటర్ల దూరంలో కేంద్రీకృతమై ఉంది. ఈ ప్రభావంతో జిల్లాలోని తీరప్రాంత మండలాల్లో ఈదురుగాలులు వీచాయి. విశాఖ నగరంలో అడపా దడపా ఓ మోస్తరు జల్లులు కురిశాయి. జిల్లాలో తేలిక పాటి జల్లులు తప్ప తుపాను ప్రభావం పెద్దగా కనిపించలేదు. కాగా విశాఖ నుంచి వెళ్లే 11 విమాన సర్వీసులను రద్దు చేయగా, 89 రైళ్ల రాకపోకలను నిలిపివేసినట్టుగా అధికారులు ప్రకటించారు. తుపాను బాధితులకు అవసరమైన సహాయ సామగ్రి, వైద్య సహాయ బృందాలతో ఇప్పటికే యుద్ధనౌకలు తీరంలో సిద్ధంగా ఉంచారు. వైద్య బృందాలు, డైవింగ్‌ సిబ్బంది ఇప్పటికే రోడ్డు మార్గంలో ఒడిశాకు పంపారు. సహాయక బృందాల తరలింపు కోసం హెలికాప్టర్లను కూడా నేవీ సిద్ధం చేసింది. మరో వైపు రెండు ఎన్‌డీఆర్‌ఎఫ్‌ బృందాలను ఉంచారు. జిల్లా వ్యాప్తంగా బుధవారం 65 పునరావాస కేంద్రాలను ఏర్పాటు చేయగా గురువారం మరో 14 కేంద్రాలను అదనంగా పెంచారు. సగానికి పైగా కేంద్రాల్లో గురువారం మధ్యాహ్నం, సాయంత్రం కూడా తుపాను బాధితులకు భోజనాలు పెట్టినట్టుగా అధికారులు ప్రకటించారు. దాదాపు ప్రతి కేంద్రంలోనూ రెండువందల నుంచి ఐదు వందల మంది వరకు బాధితులు ఆశ్రయం పొందినట్టుగా చెబుతున్నారు. రేషన్‌ షాపులు, ఎంఎల్‌ఎస్‌ పాయింట్ల నుంచి బియ్యం, కంది పప్పు, ఆయిల్, ఉప్పు తదితర నిత్యావసరాలను పునరావాస కేంద్రాలకు తరలించారు. శుక్రవారం మధ్యాహ్నం కూడా పునరావాస కేంద్రాల్లో తుపాను బాధితుల కోసం భోజనాలు ఏర్పాటు చేస్తున్నట్టుగా అధికారులు ప్రకటించారు. అవసరమైతే శుక్రవారం రాత్రి కూడా పునరావాస కేంద్రాల్లో భోజనాలు ఏర్పాటు చేస్తామన్నారు. కలెక్టరేట్‌లో కమాండ్‌ కంట్రోల్‌ రూమ్‌లో జిల్లా యంత్రాంగం 24 గంటలూ సమీక్షిస్తుంది. అదేవిధంగా డివిజన్, మండల స్థాయిల్లో ప్రత్యేకంగా కంట్రోల్‌ రూమ్‌లు ఏర్పాటుచేసి అధికారులు ఎప్పటికప్పుడు తుపాను పరిస్థితులను సమీక్షిస్తున్నారు. విశాఖకు 154 కిలోమీటర్ల దూరంలో కేంద్రీకృతమై ఉన్న తుపాను అర్ధరాత్రి దాటి సమయానికి విశాఖ సరిహద్దు దాటి ఒడిశా వైపు దూసుకెళుతోందని, శుక్రవారం మధ్యాహ్నానికి పూరి వద్ద తీరం దాటే అవకాశాలున్నాయని అంచనా వేస్తున్నారు. ఈ ప్రభావంతో ఈరోజు రాత్రి నుంచి రేపు మధ్యాహ్నం వరకు బలమైన ఈదురు గాలులు వీస్తాయని, రేపు రాత్రి వరకు  జిల్లా వ్యాప్తంగా ఓ మోస్తరు నుంచి భారీ వర్షాలు కురుస్తాయని అంచనా వేస్తున్నారు. అందువలన అంతా అప్రమత్తంగా ఉండాలని జిల్లా కలెక్టర్‌ కాటం నేని భాస్కర్‌ అధికారులను ఆదేశించారు.తుపాను ప్రత్యేకాధికారి గోపాలరావు, నర్సీపట్నం ఆర్డీవో గోవిందరావు, ఏఎస్పీ ఆరిఫ్‌ హఫీజ్‌లు తీరప్రాంత గ్రామాల్లో పర్యటించి పరిస్థితిని సమీక్షించారు. పోలీసు, అగ్నిమాపకశాఖ సిబ్బంది కూడా తుపాను ప్రభావిత గ్రామాల్లో ఎప్పటికప్పుడు పర్యటిస్తూ అప్రమత్తంగా వ్యవహరిస్తున్నారన్నారు. సరంజామా  సిద్ధం 500 లైఫ్‌ బాయ్స్, 1500 లైఫ్‌ జాకెట్లను జిల్లా యంత్రాంగం కలెక్టరేట్‌లో సిద్ధం చేసింది. ఎన్‌డీఆర్‌ఎఫ్‌ టీమ్‌ 10 పవర్‌ సాస్, యాక్స్‌లు, 4 ఆస్కా లైట్లు సిద్ధం చేయగా, రెండు ఎస్‌డీఆర్‌ఎఫ్‌ బృందాలు 60 పవర్‌ యాక్స్‌లు అందుబాటులో ఉంచాయి. అగ్నిమాపక శాఖ సైతం 52 యాక్స్‌లు, 5 ఆస్కా లైట్లు, 76 లైఫ్‌ బాయ్స్, 83 లైఫ్‌ జాకెట్లు, ఒక బోట్‌ సిద్ధం చేసుకున్నాయి. ఆర్‌అండ్‌ బీ శాఖ, పంచాయతీరాజ్‌ శాఖలు 20 యాక్స్‌లు 14 జేసీబీలు అందుబాటులో ఉంచాయి. అటవీ, ఏపీఈపీడీసీఎల్‌ కలిసి 31 పవర్‌ సాలు, నాలుగు సెర్చ్‌లైట్లు సిద్ధం చేసుకున్నాయి. కట్టుదిట్టమైన ఏర్పాట్లతో కోస్ట్‌గార్డ్‌ విశాఖసిటీ: తీరంలో అలజడి రేపుతున్న ఫొని తుపానును ఎదుర్కొనేందుకు భారత తీరభద్రతా దళం కట్టుదిట్టమైన భద్రతా ఏర్పాట్లు చేసింది. తీరం వెంబడి పూర్తిస్థాయిలో సిబ్బందిని సరంజామాతో మోహరించింది. రాష్ట్ర పరిపాలన సిబ్బంది, ఎన్‌డీఆర్‌ఎఫ్, బారత నౌకాదళంతో కలిసి ప్రభావిత ప్రాంతాల్లో సహాయక చర్యలు చేపట్టేందుకు సమాయత్తమైంది. పశ్చిమ బెంగాల్‌లోని కోల్‌కతా, ఫిరోజ్‌గంజ్, హల్దియాహవాలో పూర్తి సరంజామాతో 12 బృందాలను అప్రమత్తం చేసింది. విశాఖ తీరం వెంబడి 8 బృందాలతో పాటు ఫ్రంట్‌లైన్‌ షిప్స్‌లో మరో రెండు బృందాలు ఏర్పాటు చేసింది.  రెండు ఎయిర్‌ క్రాఫ్ట్‌లను సైతం లైఫ్‌బోట్లు, గార్డులు, లైఫ్‌ జాకెట్లతో చెన్నైలో సిద్ధంగా ఉంచినట్లు కోస్ట్‌గార్డు వర్గాలు వెల్లడించాయి. మెరైన్‌ పోలీసులతో కలిసి సంయుక్త కార్యచరణను సిద్ధం చేసుకున్నామనీ, తీరప్రాంతంలో ఉన్న మత్స్యకారులందరికీ ఎప్పటికప్పుడు సమాచారం చేరవేస్తూ.. వారిని అప్రమత్తం చేస్తున్నామని కోస్ట్‌గార్డు వర్గాలు తెలిపాయి. పునరావాస కేంద్రాలు ఏర్పాటు ఫొని తుఫాను ప్రభావం ఎక్కువగా ఉంటుందని భావిస్తున్న మండలాల్లో పునరావాస కేంద్రాలు ఏర్పాటు చేశారు. అచ్యుతాపురం మండలంలో 7, రాంబిల్లిలో 5, ఎస్‌.రాయవరంలో 2, నక్కపల్లిలో 8, పాయకరావుపేటలో 6, భీమిలిలో 10, గాజువాకలో 10, పరవాడలో 2, పెదగంట్యాడలో 7, విశాఖ రూరల్‌లో 6, విశాఖ అర్బన్‌లో 16 చొప్పున మొత్తం 79 పునరావాస కేంద్రాలు అందుబాటులోకి తీసుకొచ్చారు. ఇవీ చర్యలు ♦ ప్రతి జోన్‌లోనూ కంట్రోల్‌ రూమ్‌ ఏర్పాటు, 8 గంటల షిఫ్ట్‌ చొప్పున 24 గంటలూ అందుబాటులో సిబ్బంది. ♦ 8 జోన్లలో 53 పునరావాస కేంద్రాలు ఏర్పాటు ♦ 10 లక్షల మంచినీటి ప్యాకెట్లు సిద్ధం ♦ మంచినీటి సరఫరాకు అందుబాటులో 56 వాటర్‌ ట్యాంకర్లు ♦ సిటీ సెల్‌ టవర్స్‌ పర్యవేక్షణకు 20 మంది సిబ్బంది నియామకం ♦ ప్రతి పంపింగ్‌ స్టేషన్‌లోనూ జనరేటర్‌ ఏర్పాటు. విద్యుత్‌ అంతరాయం ఏర్పడినా... నీటి సరఫరాకు ఇబ్బంది తలెత్తకుండా చర్యలు జీవీఎంసీ నిరంతర పర్యవేక్షణ విశాఖసిటీ: కోస్తాను వణికిస్తున్న ఫొని తుపాను పట్ల జీవీఎంసీ ముందస్తు చర్యలకు ఉపక్రమించింది. ప్రకృతి విపత్తు కారణంగా ఎలాంటి అవాంఛనీయ ఘటనలు చోటు చేసుకోకుండా.. నగర ప్రజలకు ఎలాంటి ఇబ్బందులు పడకుండా ఉండేందుకు ప్రత్యేక ఏర్పాట్లు చేశారు. అన్ని జోన్లలోనూ పునరావాస కేంద్రాలు, మంచినీటి ట్యాంకర్లను సిద్ధం చేశారు. మరోవైపు సిటీ సెల్‌ టవర్స్‌ పర్యవేక్షించేందుకు ప్రత్యేక సిబ్బందిని నియమించారు. కార్పొరేషన్‌ పరిధిలో ఉన్న ప్రతి ఒక్కరి సెలవులు రద్దు చేస్తూ.. 24 గంటలూ తుపాను ప్రభావాన్ని పర్యవేక్షించాలని కమిషనర్‌ ఆదేశాలు జారీ చేశారు.ముంచుకొస్తున్న ఫొని తుపానును సమర్థంగా ఎదుర్కొనేందుకు మహా విశాఖ నగర పాలక సంస్థ సమాయత్తమైంది. తుపాను ప్రభావం తీవ్రంగానే ఉంటుందనే హెచ్చరికల నేపథ్యంలో జీవీఎంసీ కమిషనర్‌ హరినారాయణన్‌ అధికారులతో సమీక్ష నిర్వహించారు. ఫొని సృష్టించే ఎలాంటి విపత్తునైనా ఎదుర్కొనేందుకు సిద్ధంగా ఉండాలని కమిషనర్‌ ఆదేశించారు. అన్ని జోన్లలో కంట్రోల్‌ రూమ్‌లు పనిచేసేలా చూడాలని 24 గంటలూ సిబ్బంది అప్రమత్తంగా ఉండి.. ప్రతి ఫిర్యాదును స్వీకరించి దాన్ని త్వరితగతిన పరిష్కరించేందుకు ప్రయత్నించాలని సూచించారు. తుపాను కారణంగా ప్రజలు ఎలాంటి అవస్థలు పడినా.. తక్షణమే తన దృష్టికి తీసుకురావాలని సూచించారు. ఎప్పటికప్పుడు తుపాను నివేదికల్ని తనకు అందించాలని అధికారులను సూచించారు. అన్ని పంపింగ్‌ స్టేషన్లలోనూ, ఇతర అత్యవసర ప్రాంతాల్లో జనరేటర్లు సిద్ధం చెయ్యాలన్నారు. జోనల్‌ కమిషనర్లు తమ పరిధిలో ఉన్న పునరావాస కేంద్రాల్లో ఎలాంటి లోపం తలెత్తకుండా సహాయ చర్యలు యుద్ధ ప్రాతిపదికన నిర్వర్తించాలని కమిషనర్‌ ఆదేశించారు.

ఎన్‌ఏడీ జంక్షన్‌(విశాఖ పశ్చిమ): శంషాబాద్‌ నుంచి విశాఖ బయలుదేరిన స్పైస్‌ జెట్‌ విమానం వాతావరణం అనుకూలించకపోవడంతో రద్దు చేశారు. దీంతో విశాఖ రావాల్సిన ప్రయాణికులు అవస్థలు పడుతున్నారు. ఈ విమానంలో సుమారు 80 మంది ప్రయాణికులు ఉన్నట్లుగా తెలుస్తోంది. ఇందులో ఇద్దరు ఐఏఎస్‌ అధికారులు సైతం ఉన్నట్లు తెలుస్తోంది. వీరితోపాటు వైఎస్సార్‌ సీపీ విధ్యార్థి విభాగం రాష్ట్ర ప్రధాన కార్యదర్శి జీలకర్ర నాగేంద్ర కూడా ఉన్నారు. శుక్రవారం కూడా తుపాను ప్రభావం నేపథ్యంలో శనివారం ప్రయాణించేందుకు ఏర్పాట్లు చేస్తున్నట్లు చెబుతున్నారు.

సాక్షి, అమరావతి: విపత్తులు సంభవించినప్పుడు ఒడిశా ప్రభుత్వ యంత్రాంగం మన రాష్ట్రం కంటే మరింత సన్నద్ధంగా ఉంటోందని ముఖ్యమంత్రి చంద్రబాబు ప్రశంసించారు. ఆ రాష్ట్రం అనుసరిస్తున్న విధానాలను తెలుసుకుని ఇక్కడి అధికారులు కూడా అప్రమత్తంగా ఉండాల్సిన అవసరం ఉందని చెప్పారు. ఫొని తుపాను సహాయక చర్యలపై అత్యవసరంగా సమీక్షించేందుకు గురువారం ఆయన సచివాలయానికి వచ్చారు. ఆర్టీజీఎస్‌ కేంద్రంలో అధికారులు, తన కార్యదర్శులతో కలిసి తుపాను ప్రభావిత ప్రాంతాల కలెక్టర్లు, ఉన్నతాధికారులతో వీడియో కాన్ఫరెన్స్‌లో సమీక్షించారు. అధికారులు కమ్యూనికేషన్‌ వ్యవస్థ దెబ్బతినకుండా చూడాలని, సెల్‌ ఫోన్లు చార్జింగ్‌ చేసుకునేలా జనరేటర్లు ఏర్పాట్లు చేయాలని చెప్పారు. శ్రీకాకుళం జిల్లా ఉద్దానం ప్రాంతంలోని 15 మండలాలు, 200 గ్రామాలపై తుపాను ప్రభావం తీవ్రంగా ఉండొచ్చని విపత్తుల ప్రత్యేకాధికారి వర ప్రసాద్, ఆర్టీజీఎస్‌ సీఈవో అహ్మద్‌ బాబు ముఖ్యమంత్రికి తెలిపారు. 120 క్యాంపులను నిర్వహిస్తున్నామని, ముగ్గురు ఐఏఎస్‌ అధికారులను ప్రత్యేకంగా సహాయ, ముందస్తు కార్యక్రమాల అమలు, పర్యవేక్షణ కోసం నియమించామని.. టెక్కలి, పలాస కేంద్రాలుగా సూపర్‌ సైక్లోన్‌ బృందాలు పని చేస్తున్నట్టు వివరించారు. మండలాల్లో కాకుండా, గ్రామాల్లో తుపాను సహాయ బృందాలను అందుబాటులో వుంచాలని, విశాఖ కేంద్రంగా తాగునీరు, పాలు, కూరగాయలు, నిత్యావసరాలు తుపాన్‌ ప్రభావిత ప్రాంతాలకు అందించేలా చూడాలని చంద్రబాబు సూచించారు. ఫొని తుపాన్‌ సహాయక చర్యల కోసం కొత్త జీవోలు అక్కర్లేదని, తిత్లీ తుపాను సమయంలో జారీ చేసిన ఆదేశాలనే ఇప్పుడూ అనుసరించాలన్నారు.   ఈసీకి లేఖ రాస్తే స్పందించలేదు..  అవసరమైతే తాను క్షేత్ర స్థాయి పర్యవేక్షణకు వస్తానని, తుపాను ప్రభావిత జిల్లాల్లో ఎన్నికల నియమావళిని సడలించాలని భారత ఎన్నికల సంఘానికి లేఖ రాస్తే స్పందించలేదని చంద్రబాబు ఆగ్రహం వ్యక్తం చేశారు. ఈసీ మితిమీరి జోక్యం చేసుకుంటోందని తాను ముందు నుంచీ చెబుతూనే ఉన్నానని తెలిపారు. తుపాన్‌ ప్రభావం గురించి ఈ సమావేశం నుంచే ఒడిశా ముఖ్యమంత్రి నవీన్‌ పట్నాయక్‌తో ఫోన్‌లో మాట్లాడారు. టీడీపీ నేతలు, కార్యకర్తలు తుపాన్‌ బాధితులకు అండగా నిలవాలని బాబు పిలుపునిచ్చారు.  

సాక్షి, అమరావతి/సాక్షి, విశాఖపట్నం: ఉత్తరాంధ్ర, ఒడిశాల్లో పెను విధ్వంసం సృష్టించే దిశగా పయనిస్తున్న  ఫొని పెను తుపాన్‌ శుక్రవారం ఉదయం ఆంధ్రప్రదేశ్‌ తీరం దాటింది. ఒడిశా రాష్ట్రంలోకి ప్రవేశించిన ఫొని తుపాను గంటకు 11 కిలోమీటర్ల వేగంతో కదులుతోంది. పెను తుపానుగా కొనసాగుతూ గురువారం రాత్రి ప్రచండ తుపాను (సూపర్‌ సైక్లోన్‌)గా బలపడిన ఫొని ప్రచండ తుపాను గంటకు 15 కిలోమీటర్ల వేగంతో పయ నిస్తూ బలం పుంజుకుంటోంది. పశ్చిమ మధ్య బంగాళాఖాతంలో కొనసాగుతున్న ఫొని పెను తుపాను ఉత్తర ఈశాన్య దిశగా కదులుతోంది. గురువారం రాత్రికి విశాఖకు తూర్పు ఆగ్నేయంగా 150 కిలోమీటర్లు, పూరీకి దక్షిణ నైరుతి దిశగా 275 కి.మీ.ల దూరంలో కేంద్రీకృతమై ఉంది. శుక్రవారం ఉదయం 10–11 గంటల మధ్య ఒడిశాలోని పూరీ సమీపంలో బలుగోడు వద్ద పెను తుపానుగానే తీరాన్ని దాటనుందని భారత వాతావరణ విభాగం(ఐఎండీ) అంచనా వేస్తోంది. పెను తుపాను తీరాన్ని దాటాక ఉత్తర ఈశాన్య దిశగా పయనిస్తూ తీవ్ర తుపానుగా బలహీనపడి పశ్చిమ బెంగాల్‌ తీరంలోకి ప్రవేశించనుంది. క్రమంగా బలహీనపడుతూ బంగ్లాదేశ్‌ మీదుగా అస్సాంలోకి ప్రవేశించి అల్పపీడనంగా మారనుంది.  తీర ప్రాంతాల్లో రెడ్‌ అలర్ట్‌  తుపాను తీరం దాటే సమయంలో గంటకు 170–180 కిలోమీటర్ల వేగంతో పెనుగాలులు వీస్తాయని, ఇవి ఒక దశలో 200 కిలోమీటర్లకు పైగా గరిష్ట వేగానికి చేరే అవకాశం ఉందని ఐఎండీ అంచనా వేసింది. ఉత్తరాంధ్ర జిల్లాల్లో గంటకు 90 నుంచి 100 కిలోమీటర్ల వేగంతో గాలులు వీస్తాయని, ఇవి 115 కిలోమీటర్ల గరిష్ట వేగాన్ని తాకే అవకాశం ఉందని ప్రకటించింది. తుపాను నేపథ్యంలో శ్రీకాకుళం, విజయనగరం జిల్లాల్లోని తీర ప్రాంతాల్లో ప్రభుత్వం రెడ్‌ అలర్ట్‌ ప్రకటించింది. ఈ ప్రాంతాల్లోని ప్రజలు శుక్రవారం బయటకు వెళ్లొద్దని, సురక్షిత ప్రాంతాల్లోనే ఉండాలని రియల్‌ టైమ్‌ గవర్నెన్స్‌ సొసైటీ(ఆర్టీజీఎస్‌) సూచించింది. ఉత్తరాంధ్రలో మరీ ముఖ్యంగా శ్రీకాకుళం జిల్లాలో గంటకు 130 నుంచి 150 కిలోమీటర్ల వేగంతో గాలులు వీచే అవకాశం ఉందని ఆర్టీజీఎస్‌ వెల్లడించింది. ఒడిశాలో తుపాను భూమిని తాకే (తీరం దాటే) ప్రాంతం చాలాదూరం సమతలంగా ఉన్నందున ఉప్పెన ఏర్పడే ప్రమాదం ఉన్నట్లు గోపాల్‌పూర్‌ డాప్లర్‌ రాడార్‌ కేంద్రం అధికారులు అంచనా వేశారు. అదే జరిగితే ఒడిశాలో నష్టం తీవ్రంగా ఉండడం ఖాయం.   పదో నంబరు ప్రమాద హెచ్చరికలు జారీ  భీమిలి, కళింగపట్నం పోర్టుల్లో అత్యంత ప్రమాదకరమైన పదో నంబరు ప్రమాద హెచ్చరికలను వాతావరణ శాఖ గురువారం జారీ చేసింది. విశాఖపట్నం, గంగవరం పోర్టుల్లో ప్రమాదకరమైన ఎనిమిదో నంబరు ప్రమాద హెచ్చరికలు జారీ చేసింది. మచిలీపట్నం, కృష్ణపట్నం, నిజాంపట్నం, కాకినాడ, వాడరేవుల్లో మూడో నంబరు ప్రమాద హెచ్చరికలు జారీ చేశారు. ఉత్తరాంధ్రలోని శ్రీకాకుళం, విజయనగరం, విశాఖపట్నం జిల్లాల్లో సముద్రం అల్లకల్లోలంగా ఉంది. గాలివానలు కొనసాగుతున్నాయి. కోస్తాంధ్రలో మత్స్యకారులు సముద్రంలోకి చేపల వేటకు వెళ్లరాదని ప్రభుత్వం హెచ్చరించింది.  శ్రీకాకుళంలో ఈదురు గాలుల ధాటికి ఊగుతున్న చెట్లు  ప్రజలను సురక్షిత ప్రాంతాలకు తరలించండి  విశాఖపట్నం, శ్రీకాకుళం, విజయనగరం జిల్లాల్లో శుక్రవారం భారీ నుంచి అతి భారీ వర్షాలు కురుస్తాయని వాతావరణ శాఖ ప్రకటించింది. 20 సెంటీమీటర్లకు పైగా వర్షపాతం నమోదయ్యే అవకాశం ఉందని పేర్కొంది. గాలుల వేగం, వర్షం తీవ్రతకు ఉత్తరాంధ్ర జిల్లాల్లో పూరిళ్లు నేలకూలుతాయని, పైకప్పు రేకులు ఉంటే లేచి పోయే ప్రమాదం ఉందని ఐఎండీ హెచ్చరించింది. విద్యుత్తు స్తంభాలు వంగిపోవడం, నేలకూలడం వల్ల విద్యుత్తు సరఫరా వ్యవస్థ దెబ్బతింటుందని పేర్కొంది. రోడ్డు, రైలు మార్గాల్లో రాకపోకలకు అంతరాయం ఏర్పడుతుందని తెలిపింది. పంటలకు తీవ్ర నష్టం వాటిల్లుతుందని వెల్లడించింది. మామిడి, అరటి, జీడి, కొబ్బరి వంటి తోటలు కూలిపోయే ప్రమాదం ఉన్నట్లు తెలిసింది. కోస్తా ప్రాంతాల్లో మొబైల్‌ టీమ్‌లను ఏర్పాటు చేసి, లోతట్టు ప్రాంతాల ప్రజలను సురక్షిత ప్రదేశాలకు తరలించాలని సూచించింది.   ఒడిశా నుంచి వచ్చే వరద నీటితో గండం   ఒడిశాలో తుపాను తీరం దాటనుండడం, భారీ వర్షాలు కురిసే అవకాశం ఉండడంతో అక్కడి నుంచి వంశధార, మహేంద్రతనయ నదులు శ్రీకాకుళం జిల్లాలోకి ఉప్పొంగే ప్రమాదం ఉంది. పూరీ జిల్లా బ్రహ్మగిరి సమితి బలుకుండో వద్ద శుక్రవారం మధ్యాహ్నం 11–12 గంటల తుపాను మధ్య తీరం దాటే అవకాశం ఉందని గోపాల్‌పూర్‌ డాప్లర్‌ రాడార్‌ కేంద్రం అధికారులు తెలిపారు. తుపాను నేపథ్యంలో ఒడిశా, పశ్చిమ బెంగాల్, ఆంధ్రప్రదేశ్‌ రాష్ట్రాలను కేంద్ర ప్రభుత్వం అప్రమత్తం చేసింది. ఆయా రాష్ట్రాల ప్రభుత్వ ప్రధాన కార్యదర్శులతో కేంద్ర హోంశాఖ సమీక్షించింది. ఇప్పటికే శ్రీకాకుళం, ఒడిశా తీరం వెంబడి వర్షాలు కురుస్తున్నాయి. ఒడిశాలో ఉప్పెన తప్పదా?  ఒడిశాకు తుపానుతో పాటు ఉప్పెన ముప్పు కూడా పొంచి ఉందని గోపాల్‌పూర్‌ డాప్లర్‌ రాడార్‌ కేంద్రం అధికారులు బాంబు పేల్చారు. ఒడిశాలో ఆస్తి, ప్రాణ నష్టం అధికంగా ఉంటుందని అధికారులు ఆందోళన చెందుతున్నారు. ‘ఫొని’ తుపాను తీరం దాటే సమయంలో సముద్రంలో 1.5 నుంచి 2 మీటర్ల ఎత్తు వరకూ రాకాసి అలలు ఎగిసిపడే అవకాశముందని వాతావరణ అధికారులు అంటున్నారు. తుపాను తీరం దాటుతుందని ఐఎండీ అంచనా వేసిన ఒడిశాలోని పూరీ జిల్లా బ్రహ్మగిరి సమితి బలుకుండో ప్రాంతం చాలా సమతలంగా ఉంటుంది. సాధారణంగా సమతల ప్రాంతంలో అధిక తీవ్రత గల తుపాన్లు సంభవిస్తే ఉప్పెన ప్రమాదం పొంచి ఉంటుంది. అలల తీవ్రతకు సముద్ర జలాలు గ్రామాల్లోకి పొంగిపొర్లడాన్ని ఉప్పెన అంటారు. సమతల భాగంలో తుపాను తీరం దాటితేనే ఇలా ఉప్పెన ముప్పు ఉంటుందని ఒడిశాలోని గోపాల్‌పూర్‌ డాప్లర్‌ రాడార్‌ కేంద్రం డైరెక్టర్‌ ఉమాశంకర్‌ దాస్‌ తెలిపారు. ‘‘పూరీ నుంచి జగత్‌సింగ్‌పూర్‌ వరకు 175 కిలోమీటర్ల పరిధిలో సముద్ర తీరం మొత్తం సమతల భూభాగమే ఉంది. అందువల్ల ఫోని తుపాను వల్ల ఉప్పెన వచ్చే ప్రమాదం ఉందని అంచనా వేస్తున్నాం. పూరీ–జగత్‌సింగ్‌పూర్‌ మధ్య బ్రహ్మగిరి, కృష్ణప్రసాద్, యరసమ, మహాకాలపడ, పారాదీప్‌ ప్రాంతాల్లో ఈ ముప్పు పొంచి ఉంది’’ అని దాస్‌ పేర్కొన్నారు.  ఒడిశాలో 5 నదులకు వరద ముప్పు  ‘‘తుపాను ప్రభావం వల్ల ఒడిశా వ్యాప్తంగా భారీ నుంచి అతి భారీ వర్షాలు కురుస్తాయి. తుపాను తీరం దాటే సమయంలో శుక్రవారం ఒక్కరోజే 25 నుంచి 30 సెంటీమీటర్లు (250 నుంచి 300 మిల్లీమీటర్ల) రికార్డు స్థాయి వర్షపాతం నమోదయ్యే అకాశం ఉంది. దీంతో ఒడిశాలోని మహానది, వైతరణి, రుషికుయ్య, సురవర్ణరేఖ, దేవీ నదులతోపాటు వాటి ఉప నదులకు కూడా వరద ప్రమాదం పొంచి ఉంది. అందువల్ల నదీ పరివాహక ప్రాంతాల ప్రజలను అప్రమత్తం చేయాలి’’ అని ఐఎండీ హెచ్చరించింది.  ఎక్కడి రైళ్లు అక్కడే..  ఫొని తుపాను ముప్పును దృష్టిలో ఉంచుకుని రైల్వేశాఖ అప్రమత్తమైంది. హౌరా, భువనేశ్వర్‌ల నుంచి విశాఖపట్నం, విజయవాడ, హైదరాబాద్, చెన్నై వైపునకు వెళ్లే 74 రైళ్లను రద్దు చేసింది. ఇప్పటికే మార్గమధ్యంలో ఉన్న రైళ్లను ప్రధాన రైల్వే స్టేషన్లలో నిలిపివేశారు.    సహాయక చర్యలకు నౌకాదళం సిద్ధం  ఫొని తుపాను సహాయక చర్యల్లో పాల్గొనేందుకు తూర్పు నౌకాదళం సిద్ధమైంది. గంటకు 200 కిలోమీటర్ల వేగంతో గాలులు వీస్తాయని వాతావరణ విభాగం హెచ్చరికలు జారీ చేసిన నేపథ్యంలో ప్రభావిత ప్రాంతాల్లో సహాయక చర్యలు చేపట్టేందుకు తూర్పు నౌకాదళ ప్రధాన కేంద్రం విశాఖపట్నం నుంచి ఐఎన్‌ఎస్‌ సహ్యాద్రి, ఐఎన్‌ఎస్‌ రణ్‌వీర్, ఐఎన్‌ఎస్‌ కద్మత్‌ యుద్ధ నౌకలను సహాయక సామగ్రితోపాటు వైద్య బృందాలను సిద్ధం చేసినట్లు ఈఎన్‌సీ అధికారులు తెలిపారు. దీంతో పాటు అదనపు సహాయక సామగ్రి, వైద్య బృందాలు, డైవింగ్‌ టీమ్‌లను విశాఖ నుంచి ఒడిశాకు రోడ్డు మార్గంలో పంపిస్తున్నట్లు వెల్లడించారు. తుపాను తీరం దాటే ప్రాంతాల్లో సహాయక చర్యలు అందించేందుకు ఒక ఎయిర్‌ క్రాఫ్ట్‌ని విశాఖలో సిద్ధంగా ఉంచామన్నారు. టెంట్‌లు, దుస్తులు, మందులు, దుప్పట్లను బాధిత ప్రాంతాల ప్రజలకు అందించనున్నట్లు నౌకాదళ వర్గాలు వివరించాయి.   అధికార యంత్రాంగం సర్వసన్నద్ధం  ఫోని తుపానును ఎదుర్కొనేందుకు అధికార యంత్రాంగం సర్వసన్నద్ధమైంది. ఉత్తరాంధ్ర జిల్లాల్లో సహాయక కార్యక్రమాల నిమిత్తం జాతీయ విపత్తు సహాయక బృందాలు(ఎన్‌డీఆర్‌ఎఫ్‌), రాష్ట్ర విపత్తు సహాయక దళాలు (ఎస్డీఆర్‌ఎఫ్‌)లను ప్రభుత్వం సిద్ధంగా ఉంచింది. శ్రీకాకుళం జిల్లాలో లోతట్టు ప్రాంతాలకు చెందిన 15,000 మందిని పునరావాస కేంద్రాలకు తరలించారు. విద్యుత్‌ స్తంభాలు, వైర్లు పడిపోతే యుద్ధప్రాతిపదికన పునరుద్ధరించేందుకు విద్యుత్తు శాఖ అవసరమైన పనిముట్లను, సిబ్బందిని సిద్ధంగా ఉంచింది.  

సాక్షి నెట్‌వర్క్‌: ఫొని తుపాను ప్రభావంతో ఉగ్రరూపం దాల్చిన బంగాళాఖాతం గ్రామాలపై విరుచుకు పడుతోంది. ఎప్పుడేం జరుగుతుందో తెలియక తీర ప్రాంతాల ప్రజలు బిక్కుబిక్కుమంటూ కాలం గడుపుతున్నారు. పలు జిల్లాల్లో పంటలు దెబ్బతిన్నాయి. పండ్ల తోటలు ధ్వంసమయ్యాయి. గురువారం ఉదయం నుంచి సముద్ర కెరటాల ఉధృతి పెరిగింది. తూర్పు గోదావరి జిల్లాలో పిఠాపురం నియోజకవర్గం కొత్తపల్లి మండలం ఉప్పాడ, మాయాపట్నం, సూరాడపేట, పల్లిపేట, సుబ్బంపేట, కోనపాపపేట తదితర గ్రామాల్లో బలమైన ఈదురు గాలులు వీచాయి.  ఈ గాలుల ధాటికి దాదాపు 30 మత్స్యకారుల గృహాలు ధ్వంసమయ్యాయి. మత్స్యకారులు ఇతర ప్రాంతాల్లో తలదాచుకోడానికి తరలి వెళుతున్నారు. తీరప్రాంతాన్ని ఆనుకుని ఉన్న ఇళ్లు దెబ్బతింటున్నాయి. కాకినాడ లైట్‌హౌస్‌ నుంచి ఉప్పాడ వరకు ఉన్న బీచ్‌రోడ్డుపై సముద్ర కెరటాలు సుమారు ఐదు మీటర్ల ఎత్తున ఎగసి పడుతున్నాయి. బీచ్‌రోడ్డు కోతకు గురవుతూ ప్రమాదకరంగా మారింది. కొత్తపల్లి మండలం పొన్నాడ శివారులోని కోనపాపపేట కెరటాల ఉధృతికి కొట్టుకుపోతుండడంతో స్థానికులు తీవ్ర భయాందోళనకు గురవుతున్నారు. రాజోలు నియోజకవర్గంలోని అంతర్వేది బీచ్‌లో సముద్రం 300 మీటర్లు ముందుకు చొచ్చుకొచ్చింది. ఇప్పటికే కోత దశకు చేరుకుంటున్న వరి పంట భారీ వర్షాలు, ఈదురు గాలులకు నేలకొరిగే ప్రమాదం ఉండడంతో రైతులు ఆందోళన వ్యక్తం చేస్తున్నారు.  విజయనగరం జిల్లాలో భారీగా ఈదురు గాలులు   విజయనగరం జిల్లాలో ఫొని తుపాను ప్రతాపం చూపిస్తోంది. సముద్రం అల్లకల్లోలంగా మారింది. అలలు ఉవ్వెత్తున ఎగసిపడుతున్నాయి. కొన్ని గ్రామాల వద్ద సముద్రం ముందుకు చొచ్చుకొచ్చింది. జిల్లాలో గురువారం భారీగా ఈదురుగాలులు వీచాయి. సముద్ర తీర ప్రాంతాలైన పూసపాటిరేగ, భోగాపురంతోపాటు డెంకాడ, నెల్లిమర్ల, విజయనగరం, గుర్ల, చీపురుపల్లి, గరివిడి మండలాల్లో 60 నుంచి 70 కిలోమీటర్ల వేగంతో గాలులు వీచాయి. సాయంత్రం 5 గంటల నుంచి 70 నుంచి 150 కిలోమీటర్ల వేగంతో గాలులు బీభత్సం సృష్టించాయి. విద్యుత్‌ సరఫరా నిలిచిపోయింది. జిల్లాలోని చాలా ప్రాంతాల్లో అంధకారం అలుముకుంది. తీర ప్రాంతాల్లో ఉన్న ఆరు గ్రామాల ప్రజలను అధికారులు పునరావాస కేంద్రాలకు తరలించారు. దాదాపు 2 వేల మందికి భోజనం, వసతి సౌకర్యాలు కల్పించారు.  శ్రీకాకుళం జిల్లాలో 126 పునరావాస కేంద్రాలు  తిత్లీ తుపాను తాకిడితో అల్లాడిన శ్రీకాకుళం జిల్లాలోని ఉద్దానం ప్రాంతానికి ‘ఫొని’ రూపంలో మరో ముప్పు ఏర్పడింది. ఈ తుపాను ప్రభావంతో గురువారం మధ్యాహ్నం నుంచి జిల్లాలో వర్షాలు ప్రారంభమయ్యాయి. సాయంత్రానికి ఈదురు గాలులు మరింత ఉధృతమయ్యాయి. తుపాను తీరం దాటిన తర్వాత గంటకు 160 కిలోమీటర్ల వేగంతో తీరం వెంబడి బలమైన గాలులు వీస్తాయని, భారీ వర్షాలు కురుస్తాయని వాతావరణ శాఖ హెచ్చరించడంతో శ్రీకాకుళం జిల్లా అధికార యంత్రాంగం అప్రమత్తమైంది. జిల్లా కలెక్టరేట్‌లో ఏర్పాటు చేసిన కంట్రోల్‌ రూమ్‌ నుంచి కలెక్టర్‌ జె.నివాస్‌ ఎప్పటికప్పుడు పరిస్థితులను, సహాయక పునరావాస చర్యలను పర్యవేక్షిస్తున్నారు. బాధితుల కోసం జిల్లాలో 126 పునరావాస కేంద్రాలను ఏర్పాటు చేశారు. వంశధార, నాగావళి, బాహుదా నదులకు వరద ముంపు ప్రమాదం ఉన్నందున పరివాహక గ్రామాల్లో తగిన రక్షణ చర్యలు చేపట్టారు. గురువారం శ్రీకాకుళం జిల్లావ్యాప్తంగా 412 మిల్లీమీటర్ల వర్షపాతం నమోదైంది. నందిగాం, టెక్కలి, సంతబొమ్మాళి, వజ్రపుకొత్తూరు మండలాల్లో ఎక్కువగా వర్షం కురిసింది. టెక్కలి మండలం భగీరథిపేట గ్రామానికి చెందిన జనపాన ఈశ్వరమ్మ(65) అనే మహిళ భారీ ఈదురు గాలులకు భయపడి  గుండె ఆగి మృతి చెందింది.   గుంటూరు జిల్లాలో బీభత్సం   తుపాను కారణంగా గుంటూరు జిల్లాలో గురువారం రాత్రి ఈదురుగాలులు బీభత్సం సృష్టించాయి. పలుచోట్ల చెట్లు, విద్యుత్‌ స్తంభాలు కూలిపోయాయి. మిర్చి, మామిడి, అరటి రైతులకు తీవ్ర నష్టం వాటిల్లింది. ప్రత్తిపాడు ప్రాంతంలో కల్లాల్లో ఉన్న మిర్చి రాశులు తడిసిపోయాయి. రైతులు ముందు జాగ్రత్తగా పట్టాలు కప్పినప్పటికీ ఫలితం లేకుండా పోయింది. ఈదురుగాలులకు పట్టాలు లేచిపోయి మిర్చి తడిసిపోయింది. యడ్లపాడు మండలంలో మామిడి తోటల్లో కాయలు రాలిపోయాయి. అరటి తోటలు విరిగి పడిపోయాయి. వినుకొండ, ఈపూరు, బొల్లాపల్లి, క్రోసూరు, బెల్లంకొండ తదితర ప్రాంతాల్లో ఈదురుగాలుల ధాటికి విద్యుత్‌ స్తంభాలు, చెట్లు నేలకొరిగాయి.  విశాఖ ఎయిర్‌పోర్టు నుంచి 11 విమానాలు రద్దు  విశాఖపట్నం ఎయిర్‌పోర్టు నుంచి వెళ్లాల్సిన 11 విమానాలను తుపాను ప్రభావం వల్ల ఈదురు గాలులు, వాతావరణం అనుకూలించకపోవడంతో రద్దు చేశారు. ఒక విమానాన్ని దారి మళ్లించారు. ప్రయాణికులతో సందడిగా ఉండే విశాఖ విమానాశ్రయం గురువారం బోసిపోయింది. ఇక్కడి నుంచి 28 విమానాలు రాకపోకలు సాగించాల్సి ఉండగా 11 ఇండిగో విమానాలు రద్దయ్యాయని అధికారులు పేర్కొన్నారు. మిగిలిన సర్వీసులు యథాతథంగా కొనసాగుతున్నాయని పేర్కొన్నారు. పలు జిల్లాల్లో భారీ వర్షాలు  ఫొని తుపాను ప్రభావంతో శుక్రవారం నుంచి ఒడిశాలోని గంజాం, గజపతి, ఖుర్దా, పూరీ, జగత్‌సింగ్‌పూర్, కేంద్రపార, భద్రక్, జైపూర్, బాలాసోర్, పశ్చిమ బెంగాల్‌లోని తూర్పు, పశ్చిమ మేదినపూర్, దక్షిణ, ఉత్తర 24 పరగణాలు, హౌరా, హూగ్లీ, ఝార్‌గ్రామ్, కోల్‌కతా, ఆంధ్రప్రదేశ్‌లోని శ్రీకాకుళం, విజయనగరం, విశాఖపట్నం జిల్లాల్లో భారీ వర్షాలు కురుస్తాయని వాతావరణ విభాగం ప్రకటించింది. ఫొని తుపాను వాయువేగంతో ఒడిశా తీరం వైపు దూసుకొచ్చింది. తీర ప్రాంతంలో గురువారం విపరీతంగా ఈదురు గాలులు, కుండపోత వర్షాలు కురిశాయి.   ‘ఫొని’పై ప్రధాని మోదీ సమీక్ష సాక్షి, న్యూఢిల్లీ:  ఫొని తుపాన్‌ ప్రభావాన్ని సమర్థంగా ఎదుర్కోవాలని ప్రధానమంత్రి నరేంద్ర మోదీ ఆదేశించారు. ఆయన గురువారం ఢిల్లీలో తుపాను సహాయక చర్యలను సమీక్షించారు. తుపాను గమనాన్ని అధికారులు ప్రధానమంత్రికి వివరించారు. ప్రస్తుతం తీసుకుంటున్న ముందస్తు జాగ్రత్తలు, చేపడుతున్న సన్నాహక చర్యలను తెలియజేశారు. కేంద్ర ప్రభుత్వంలోని సీనియర్‌ అధికారులు తుపాను ప్రభావిత రాష్ట్రాల అధికారులతో ఎప్పటికప్పుడు మాట్లాడుతూ సహాయక చర్యలను ముమ్మరం చేయాలని ప్రధాని మోదీ సూచించారు. నష్ట నివారణ చర్యలను తీసుకోవాలన్నారు. తుపాను ప్రభావిత ప్రాంతాల్లోని ప్రజలను సురక్షిత ప్రాంతాలకు తరలించాలని, వారికి వైద్య సహాయం అందజేయాలని చెప్పారు. విద్యుత్తు, టెలికమ్యూనికేషన్‌ వ్యవస్థకు విఘాతం కలిగితే వెంటనే పునరుద్ధరించాలన్నారు.  ఫొని తుపానుపై న్యూఢిల్లీలోని తన కార్యాలయంలో ఉన్నతాధికారులతో సమీక్షిస్తున్న ప్రధాని నరేంద్ర మోదీ  

సాక్షి, అమరావతి : కొద్ది సేప‌టి క్రిత‌మే ఫొని సూప‌ర్ సైక్లోన్‌గా మారినట్లు ఆర్టీజీఎస్‌ అధికారులు వెల్లడించారు. విశాఖ‌ప‌ట్నానికి 175 కిలోమీట‌ర్ల దూరంలో.. తూర్పు ఆగ్నేయ దిశ‌గా కేంద్రీకృతమై ఉన్నట్లు తెలిపారు. ఈ పెను తుపాను ద‌క్షిణ ఒడిశా వైపు దూసుకెళుతున్నట్లు వెల్లడించారు. శ్రీకాకుళం తీర‌ ప్రాంత మండ‌లాల్లో కుంభ‌వృష్టి కురిసే సూచ‌న‌లు ఉన్నట్లు తెలిపారు. ఫొని తుఫాను ప్రభావం ఈ రాత్రినుంచి అధికంగా ఉండే అవకాశం ఉన్నందున జాతీయ రహదారిపై ఈ రాత్రి 8 గంటల నుంచి రేపు ఉదయం 9 గంటల వరకు ట్రాఫిక్ క్రమబద్దీకరించటానికి జిల్లా యంత్రాంగం చర్యలు చేపట్టింది. బంగాళాఖాతంలో ఏర్పడ్డ ఫొని తుఫాను అలజడి సృష్టిస్తోంది. వేగంగా ఉత్తారాంధ్ర వైపు దూసుకువస్తోంది. దీంతో శ్రీకాకుళం తీరప్రాంత మండలాల్లో ఆర్టీజీఎస్‌ రెడ్‌ అలర్ట్‌ ప్రకటించింది. ఒడిశాలోని పూరీకి 320 కిలోమీటర్ల దూరంలో.. విశాఖకు 170 కిలోమీటర్ల దూరంలో ఫొని కేంద్రీకృతమైంది. రేపు గోపాల్‌పూర్‌-చాంద్‌బలి మధ్య ఫొని తీరందాటనుంది. తీరం దాటే సమయంలో 180 కిలోమీటర్ల వేగంతో గాలులు వీచే అవకాశం ఉంది. శ్రీకాకుళం, విజయనగరం, విశాఖ జిల్లాల్లో భారీ వర్షాలు పడే అవకాశం ఉంది. శ్రీకాకుళం జిల్లాల్లో 21 సెంటీమీటర్ల కంటే ఎక్కువ వర్షపాతం పడే అవకాశం ఉంది. విజయనగరం, విశాఖ తీరం వెంబడి గంటకు 60-70 కిలోమీటర్ల వేగంతో గాలులు వీచనున్నాయి. భీముని పట్నం, కళింగపట్నం ఓడరేవుల్లో 10వ నెంబర్‌ ప్రమాద హెచ్చరిక జారీ అయ్యింది. విశాఖ, గంగవరం పోర్టుల్లో 8వ నెంబర్‌,  కాకినాడ పోర్టులో 5వ నెంబర్‌ ప్రమాద హెచ్చరికలను అధికారులు జారీ చేశారు. అలర్ట్‌ అయిన అధికార యంత్రాంగం శ్రీకాకుళం : ఫొని ప్రభావం ఉండనున్న 13 మండలాల్లో 43 పునరావాస కేంద్రాలను అధికారులు ఏర్పాటు చేశారు. మూడు వేల మందిని పునరావాస కేంద్రాలకు తరలించారు. శిథిలావస్థలో ఉన్న ఇళ్లు, పూరిళ్లు, రేకుల ఇళ్లళ్లో ఉన్నవారిని బలవంతంగా ఖాళీ చేయిస్తున్నారు. తుఫాను నేపథ్యంలో అధికార యంత్రాంగం అలర్ట్‌ అయ్యింది. నాగావళి, వంశధార, మహేంద్రతనయ బహుదా నదుల్లో వరద నీరు వస్తుందని ఒడిశా అధికారులు హెచ్చరికలు జారీ చేశారు. ఇచ్చాపురం, పలాస, నరసన్నపేట, టెక్కలి ఒక్కో అసెంబ్లీ నియోజకవర్గానికి ఒక్కో IAS అధికారిని నియమించింది ప్రభుత్వం. తుపాను ప్రభావిత మండలాలు 17 ప్రాంతాలను అధికారులు గుర్తించారు. 17 మండలాల్లో 120 పునరావాస కేంద్రాలు ఏర్పాటు చేశారు. పాతిక వేల మందిని పునరావాస కేంద్రాలకు తరలించారు. లక్ష మందికి భోజన వసతి ఏర్పాటు చేశారు. ప్రతి పునరావాస కేంద్రం వద్ద గ్రామధికార్లతో పాటు పోలీస్, ఆరోగ్య కార్యకర్తలను నియమించారు. శుక్రవారం రోజు మొత్తం పునరావాస కేంద్రాలు కొనసాగనున్నాయి.

సాక్షి, న్యూ ఢిల్లీ : ఫొని తుఫానుపై భారత ప్రధాని నరేంద్ర మోదీ ఉన్నత స్థాయి సమీక్ష నిర్వహించారు. తుఫాను నష్ట నివారణ చర్యలు, ముందు జాగ్రత్త చర్యలపై గురువారం ఉన్నాతాధికారులతో సమీక్ష జరిపారాయన. ప్రధాని సమీక్షాసమావేశానికి కేంద్ర కేబినెట్ కార్యదర్శి, ఉన్నతాధికారులు హాజరయ్యారు. ఫొని తుఫాను గమనంపై ఐఎండీ డైరక్టర్‌ జనరల్‌ వివరించగా.. తీసుకోనున్న ముందు జాగ్రత్త చర్యల గురించి ఎన్డీఆర్‌ఎఫ్‌ చీఫ్‌ వివరించారు. తుఫాను ప్రభావిత రాష్ట్రాల ఉన్నతాధికారులతో సమన్వయం చేసుకోవాలని ప్రధానమంత్రి అధికారులకు సూచించారు. అత్యవసర పరిస్థితుల నేపథ్యంలో అవసరమైన అన్ని సహాయ పునరావాస చర్యలు తీసుకోవాలని ఆదేశించారు.

అచ్యుతాపురం (యలమంచిలి): తుపాను వచ్చిందంటే మత్స్యకారుల కంటి మీద కునుకు ఉండదు.  ఒక పక్క కెరటాల ఉద్ధృతితో తీరం చేరి పడవలు తాకుతూ భయంకర శబ్దం చేస్తాయి. సముద్రం కోతకు గురై ఇసుక కొట్టుకుపోయి గోతులు ఏర్పడతాయి. తీరంలో ఉన్న గుడిసెలపైకి కెరటాలు దూసుకు వస్తాయని భయం.. ఒక పక్క పడవల్ని కాపాడుకోవాలి మరో పక్క ఇళ్లను కాపాడుకోవాలి.  వలలు, ఇతర సామగ్రి భద్రపరచుకోవాలి.  అర్ధరాత్రి అ యినా మత్స్యకారులకు కష్టాలు తప్పడం లేదు. పూడిమడకతీరంలో వెయ్యి పడవలకు రక్షణ లేకుండా పో యింది. మత్స్యకారులకు ప్రశాంతత కరువైంది. ఫొని తుఫాను హెచ్చరికతో మత్స్యకారుల మరోసారి ఉలిక్కిపడ్డారు. పడవల్ని కాపాడుకోవడానికి నానా అవస్థలు పడ్డారు. జెట్టీ నిర్మించకపోవడం, రక్షణగోడ ఏర్పాటు కాకపోవడంతో మత్స్యకారులకు తుపాను కష్టాలు తప్పటం లేదు. రక్షణగోడ నిర్మించాలి విశాఖకు – కాకినాడకు మధ్య వెయ్యి పడవలలో ఆరువేలమంది మత్స్యకారులు వేటాడే పెద్దగ్రామం పూడిమడక. పూడిమడక జనాబా 16వేల మంది ఉన్నారు. ఇక్కడి తీరం వేటకు అనుకూలంగా ఉండటంతో çపరవాడ, అచ్యుతాపురం, రాంబిల్లి , ఎస్‌.రాయవరం, నక్కపల్లి, పాయకరావుపేట మండలాల మత్స్యకారులు ఇక్కడ నుంచి వేటాడతారు. పూడిమడక మత్స్యకారులకు చెందిన బంధువులు సీజన్‌లో ఇక్కడికి వచ్చి వేటసాగిస్తారు.  ఆ వేట ప్రశ్నార్థకంగా మారింది. తీరం వద్ద నివాసం ఉండేవéరు ప్రాణాలు అరచేతిలో పెట్టుకోక తప్పదు.  జాలరిపాలెం కొండ నుంచి మెరైన్‌పోలీస్‌ స్టేషన్‌ వరకూ రెండు కిలోమీటర్ల పరిధిలో రక్షణ గోడ నిర్మించాలని మత్స్యకారులు కోరుతున్నా అధికారులు పట్టించుకోవడంలేదు. తీరం వెంబడి ఆరువందల కుటుం బాలను ఖాళీ చేయించడానికి ప్రభుత్వం ఇళ్లు నిర్మించింది. ఆ ఇళ్లను పంపిణీ చేయకపోవడంతో ఇప్పటికీ మత్స్యకారుల తీరానికి సమీపంలో నివాసం ఉంటున్నా రు. తీరప్రాంత మత్స్యకారులకు సురక్షిత ప్రాంతంలో ఇళ్లు నిర్మించి తరలించాలని  తీరం నుంచి రెండువందల అడుగుల దూరంలో రక్షణ గోడ నిర్మించాలని మత్స్యకారులు కోరుతున్నారు. జెట్టీ లేక పడవలకు ముప్పు ఖరీదైన చేపల్ని వేటాడడానికి మత్స్యకారులు 200 కిలోమీటర్లకు మించి దూరం వేటకు వెళ్తున్నారు. ఇందుకోసం పెద్దబోట్లు, ఇంజిన్లను విని యోగిస్తున్నారు.రూ.పదిలక్షల ఖర్చుతో వేటసామగ్రి తయారు చేసుకుంటున్నారు. జెట్టీ లేకపోవడంతో తీరం వద్ద ఇసుకతిన్నలపై ఉంచేస్తున్నారు. కెరటాల తీ వ్రత పెరిగినప్పుడు తక్షణమే పడవల్ని సురక్షిత ప్రాం తానికి  చేర్చాలి. జాగ్రత్తపడకపోతే పడవలు ఢీకొని దెబ్బతింటున్నాయి.  ఒక్కొక్క పడవని జరపాలంటే కనీ సం 12 మంది భుజంపట్టి ఈడ్చాల్సి వస్తుంది. వేటకు వెళ్లేటప్పడు, వేట ముగిసిన తరువాత పడవల్ని భూజంపట్టి లాగుతారు. చేపలు పడినా పడకపోయినా ఈ మోత తప్పడం లేదు. గతంలో సీజన్‌ను బట్టి కెరటాలు ఎక్కడికి వస్తాయో అంచనా ఉండేది. తుపానుకు  కెరటాలు ఉద్ధృతంగా వస్తాయని భావించేవారు. ఇప్పుడు క్షణంలో పరిస్థితి మారుతోంది. దీంతో రాత్రులు కంటి మీద కునుకు ఉండటం లేదు. జెట్టీ నిర్మిస్తే  కెరటాల తీవ్రత పెరిగినా జెట్టీలో లంగరు వేసిన పడవలు సురక్షితంగా ఉంటాయి. వేటసామగ్రి భద్రంగా ఉంటుంది. మోతభారం పూర్తిగా ఉండదు.. ఇద్దరు మత్స్యకారులు లంగరు విదిలించి పడవను తీసుకొని వేటకు వెళ్లగలరు. మోతకు భయపడి పలువురు వేటకు దూరమవుతున్నారు. జెట్టీ నిర్మాణానికి నిధులు మంజూరు పూడిమడక తీరం కోతకు గురవుతోందన్నది వాస్తవం. తీరం వెంబడి ఇళ్లకు ప్రమాదం ఏర్పడుతుంది. ఎక్కువ బోట్లు వేట సాగిస్తున్నందు వల్ల జెట్టీ్ట నిర్మాణం జరిగితే మత్స్యకారులకు శ్రమ తగ్గుతుంది. రక్షణగోడ, జెట్టీ నిర్మాణానికి గతంలో పతిపాదనలు పంపించాం. జెట్టీ నిర్మాణానికి రూ. 50లక్షల నిధులు మంజూరయ్యాయి. పనులు ప్రారంభించాల్సి ఉంది.           –పి.శ్రావణి కుమారి, ఎఫ్‌డీవో, అచ్యుతాపురం

కర్నూలు(అగ్రికల్చర్‌):  బంగాళాఖాతంలో ఏర్పడిన ‘ఫొని’ తుపాను ప్రభావంతో జిల్లాలో పెనుగాలులు బీభత్సం సృష్టించాయి. తేలికపాటి నుంచి భారీ వర్షాలు కూడా కురిశాయి. పెనుగాలుల తీవ్రతకు ఉద్యాన పంటలకు అపార నష్టం వాటిల్లింది. భారీవృక్షాలు సైతం కూకటివేళ్లతో సహా నేలకూలాయి. పండ్ల తోటలు దాదాపు 650 ఎకరాల్లో దెబ్బతిన్నట్లు సమాచారం. పెనుగాలులకు దాదాపు రూ.35 కోట్ల మేర నష్టం వాటిల్లినట్లు ప్రాథమికంగా అంచనా వేస్తున్నారు. మంగళవారం సాయంత్రం నుంచి రాత్రి వరకు సంభవించిన గాలివాన బీభత్సం వల్ల అనేక గ్రామాల్లో జనజీవనానికి ఆటంకం కల్గింది. వందలాది విద్యుత్‌ స్తంభాలు నేలకూలడంతోపలు ప్రాంతాల్లో కరెంట్‌ సరఫరా నిలిచిపోయింది. సరఫరాను పునరుద్ధరించేందుకు విద్యుత్‌ అధికారులు, సిబ్బంది బుధవారం తీవ్రంగా శ్రమించారు. 10.8 మి.మీ వర్షపాతం జిల్లా మొత్తం మీద 10.8 మిల్లీమీటర్ల (మి.మీ) వర్షపాతం నమోదైంది. ఆదోనిలో అత్యధికంగా 59.4 మి.మీ వర్షం కురిసింది. హాలహర్వి 54.8, పెద్దకడబూరు 48.2, ఆలూరు 48.2, సి.బెళగల్‌ 46.2, ఎమ్మిగనూరు 38.0, కోడుమూరు 29.2, పత్తికొండ 23.4, గోనెగండ్ల 22.8, దేవనకొండ 22.8, కోసిగి 19.4, వెలుగోడు 17.4, అవుకు 17.2, మంత్రాలయం 15.8, వెల్దుర్తి 15.4, నందవరంలో 14.0 మి.మీ ప్రకారం వర్షపాతం నమోదైంది. మొత్తమ్మీద 31 మండలాల్లో వర్షం పడింది. కొన్ని ప్రాంతాల్లో వడగండ్ల వాన కురిసింది. భారీ వర్షం కారణంగా హాలహర్వి మండలం బిలేహాల్‌ చెరువుకు గండి పడింది. వర్షాల వల్ల ఉష్ణోగ్రతలు కొంతవరకు తగ్గాయి. నందవరంలో అత్యధికంగా 40.75 డిగ్రీల ఉష్ణోగ్రత నమోదైంది. ఈ వర్షాలకు రైతులు వ్యవసాయ పనులు చేపడుతున్నారు. ఉద్యాన తోటలకు అపార నష్టం పెనుగాలుల తీవ్రత వల్ల ఉద్యాన తోటలకు భారీ నష్టం వాటిల్లింది. ముఖ్యంగా అరటి తోటలు విరిగి పడ్డాయి. ఒక్క మహానంది మండలంలోనే  దాదాపు 300 ఎకరాల్లో అరటి, మునగ తోటలు దెబ్బతిన్నాయి. ఉద్యాన శాఖ అధికారులు పంట నష్టం సర్వేలో నిమగ్నమయ్యారు. పండ్లతోటలకు జరిగిన నష్టంపై పూర్తి వివరాలు గురువారానికి తెలుస్తాయని ఉద్యాన శాఖ అసిస్టెంట్‌ డైరెక్టర్‌ (ఏడీ) రమణ తెలిపారు. కాగా.. ఉద్యాన శాఖ నంద్యాల డివిజన్‌ పరిధిలోనే దాదాపు 600 ఎకరాల్లో పండ్లతోటలు దెబ్బతిన్నట్లు సమాచారం. నంద్యాల, ఓర్వకల్లు, బేతంచెర్ల, రుద్రవరం, ఆళ్లగడ్డ, పాణ్యం మండలాల్లో అరటి, మామిడి వంటి పంటలకు నష్టం వాటిల్లింది. ఇక కర్నూలు డివిజన్‌లో 50 ఎకరాల్లో దెబ్బతిన్నాయి. ప్యాపిలి, ఎమ్మిగనూరు, పత్తికొండ, కృష్ణగిరి, మంత్రాలయం తదితర మండలాల్లో  పండ్లతోటలు దెబ్బతినడంతో పాటు భారీ చెట్లు, విద్యుత్‌ స్తంభాలు కూడా నేలకూలాయి. 

సాక్షి, విశాఖపట్నం : బంగాళాఖాతంలో ఏర్పడ్డ ఫొని తుఫాను అలజడి సృష్టిస్తోంది. ప్రస్తుతం విశాఖ తీరానికి 235 కిలోమీటర్ల దూరంలో కేంద్రీకృతమైంది. శ్రీకాకుళం జిల్లాకు కేవలం 40 నుంచి 50 కిలోమీటర్ల దూరం నుంచే ఒడిశా వైపుగా ప్రయణిస్తుందని వాతావరణ శాఖ అంచనా వేస్తోంది. దీని ప్రభావంతో శ్రీకాకుళం జిల్లాకు భారీ ముప్పు వాటిల్లే అవకాశం ఉంది. బంగాళాగాతంలో అతి తీవ్ర తుపాన్‌గా మారిన ఫొని ప్రభావంతో ఉత్త‌ర శ్రీకాకుళం, తీర‌ప్రాంత శ్రీకాకుళం, విజ‌య‌న‌గ‌రం జిల్లాల్లో రెండురోజుల పాటు అతి భారీ వ‌ర్షాలు కురిసే అవకాశం ఉంది. ఫొని తుపాన్  ప్రస్తుతం కాకినాడ నుంచి తూర్పు ఆగ్నేయ దిశ‌గా 250 కిలోమీట‌ర్ల దూరంలో కేంద్రీకృత‌మైన ఉంది. దీని ప్రభావంతో  విశాఖ‌ప‌ట్నం,తూర్పు గోదావ‌రి జిల్లాల్లో ఒక మోస్త‌రు నుంచి భారీ వ‌ర్షాలు పడనున్నాయి.  నిన్న సాయంత్రం పశ్చిమ మధ్య బంగాళాఖాతం నుంచి ఉత్తర ఈశాన్య దిశగా తుఫాన్‌ దిశ మార్చుకుంది. ప్రస్తుతం ఈశాన్య దిశలోనే కదులుతూ గంటకు ఏడు కిలోమీటర్ల వేగంతో ప్రయాణిస్తోంది. రేపు మధ్యాహ్నం పూరీకి సమీపంలో తీరం దాటనుంది. తీరం దాటే సమయంలో 200 కిలోమీటర్ల వరకు ప్రచండ గాలులు వీచే అవకాశం ఉన్నట్లు వాతావరణ శాఖ తెలిపింది. ఫొని తుఫానును విశాఖ, మచిలీపట్నం, చెన్నైలోని రాడార్లు ఎప్పటికప్పుడు పరిశీలిస్తున్నాయి. మరోవైపు ఇప్పటికే తీర ప్రాంతంలో పెద్ద ఎత్తున అలలు ఎగసిపడుతున్నాయి. ఒకటిన్నర మీటర్ల ఎత్తులో అలలు తీరాన్ని తాకుతున్నాయి. తీర ప్రాంతాల్లో సముద్రం అల్లకల్లోలంగా మారింది. ముఖ్యంగా ఒడిశాలోని లోతట్టు ప్రాంతాల్లో భారీగా అలలు ఎగసిపడే సూచనలు కనిపిస్తున్నాయి. తీర ప్రాంతాల్లో సముద్రం అల్లకల్లోలంగా మారింది.  శ్రీకాకుళం ఉత్త‌ర, తీర‌ప్రాంత మండ‌లాల్లో రెడ్ అలర్ట్‌ ఫొని తుఫాను ప్రభావంతో శ్రీకాకుళం జిల్లా ఉత్తర, తీరప్రాంత మండలాల్లో రెండురోజుల పాటు రెడ్‌ అలర్ట్‌ కొనసాగనుంది. శ్రీకాకుళం తీరప్రాంత మండలాల్లో గంటకు 120 నుంచి 130 కిలోమీట‌ర్ల వేగంతో ఈ ప్రాంతాల్లో పెనుగాల‌లు వీస్తాయని ఆర్టీజీఎస్‌ హెచ్చరించింది. శ్రీకాకుళంలో తీవ్ర ప్ర‌భావ‌మున్న మండ‌లాలు : గార‌, ఇచ్చాపురం, క‌విటి, కంచిలి, సోంపేట‌, మంద‌స‌, సంత‌బొమ్మాళి, ప‌లాస‌, పొలాకి, నందిగం, వ‌జ్ర‌పుకొత్తూరు, శ్రీకాకుళం అలాగే విజయనగరం తీరప్రాంత మండలాల్లో గంటకు 90 నుంచి 110 కిలో మీటర్ల వేగంతో గాలులు వేస్తాయని... ఈరోజు అర్థరాత్రి నుంచి రేపు తెల్లవారుజాము వరకు వరకు తీవ్ర ప్రభావం ఉంటుందని తెలిపింది.  ప్రజలు అప‍్రమత్తంగా ఉండాలి విజ‌య‌న‌గ‌రం: భోగాపురం, చీపురుప‌ల్లి, డెంకాడ‌, గ‌రివిడి, గుర్ల‌, నెల్లిమ‌ర్ల‌, పూస‌పాటిరేగ‌ మండ‌లాల్లోని ప్ర‌జ‌లు చాలా జాగ్ర‌త్త‌గా ఉండాలని, తుపాన్ తీరం దాటడానికి ముందు ఎవ‌రూ బ‌య‌ట‌కు రాకూడ‌దని అధికారులు హెచ్చరించారు. సుర‌క్షిత ప్రాంతాల్లో త‌ల‌దాచుకోవాలని, వాహ‌నాల‌పైన బ‌య‌ట సంచ‌రించ‌కూడ‌దని ప్రజ‌ల‌కు రియ‌ల్ టైమ్ గ‌వ‌ర్నెన్స్ సొసైటీ (ఆర్టీజీఎస్‌) సూచించింది. ఆర్టీజీఎస్‌ తుపాన్ గ‌మ‌నాన్ని నిశితంగా ప‌రిశీలిస్తోంది. ఎప్ప‌టిక‌ప్పుడు యంత్రాంగాన్ని అప్ర‌మ‌త్తం చేస్తూ...తీర‌ప్రాంతాలను స‌ర్వైలెన్స్ కెమెరాల‌ ద్వారా అధికారులు పర్యవేక్షిస్తున్నారు. పర్యాటకులకు అనుమతి నిరాకరణ పశ్చిమగోదావరి జిల్లా మొగల్తూరు మండలం పేరుపాలెం బీచ్‌లో అలల ఉధృతి ఎక్కువగా ఉంది. దీంతో పర్యాటకులను అధికారులు అనుమతించడం లేదు. తుపాను హెచ్చరికలతో పశ్చిమగోదావరి జిల్లా అధికార యంత్రాంగం అప్రమత్తమైంది. మొగల్తూరు, నరసాపురం, భీమవరం, పాలకొల్లు, యలమంచిలి, ఆచంట మండలాలకు ప్రత్యేక అధికారులను నియమించారు. నరసాపురం, మొగల్తూరు మండలాల్లో 8 పునరావాస కేంద్రాలు సిద్ధం చేశారు. తుఫాన్‌ ప్రభావంతో తీర ప్రాంతంలో సముద్రపు అలలు సాధారణం కంటే రెండు, మూడు మీటర్ల ఎత్తు పెరుగుతుందంటూ హెచ్చిరించారు. తీర ప్రాంతంలోని ప్రతీ మండలానికి అందుబాటులో 108, 104 వాహనాలు ఉంచారు.  ప్ర‌జ‌ల‌కు ఆర్టీజీఎస్ (రియ‌ల్ టైమ్ గ‌వ‌ర్నెన్స్ సొసైటీ) విజ్ఞ‌ప్తి  తుపాన్ ప‌ర్య‌వేక్ష‌ణ‌కు ప‌రిష్కార వేదిక‌లో ప్ర‌త్యేక ఏర్పాట్లు  ఆర్టీజీఎస్ నుంచి స‌ర్వైలెన్స్ కెమెరాల ద్వారా తుపాను ప్ర‌భావిత ప్రాంతాల ప‌ర్య‌వేక్ష‌ణ  కాకినాడ నుంచి తూర్పు ఆగ్నేయ దిశ‌గా 250 కిలోమీట‌ర్ల దూరంలో కేంద్రీకృత‌మైన ఫోని తుపాన్‌ శ్రీకాకుళం ఉత్త‌ర, తీర‌ప్రాంత మండ‌లాల్లో కొన‌సాగుతున్న‌ రెడ్ అలర్ట్‌ శ్రీకాకుళం తీరప్రాంత మండలాల్లో గంటకు  120 నుంచి 130 కిలోమీట‌ర్ల వేగంతో ఈ ప్రాంతాల్లో పెనుగాల‌లు విజయనగరం తీరప్రాంత మండలాల్లో గంటకు 90 నుంచి 110 కిలో మీటర్ల వేగంతో గాలులు ఈరోజు అర్థరాత్రి నుంచి రేపు తెల్లవారుజాము వరకు వరకు శ్రీకాకుళం, విజ‌య‌న‌గ‌రం జిల్లాల‌పై తీవ్ర ప్రభావం చూప‌నున్న ఫొని తుపాన్ ఉత్త‌ర, తీర‌ప్రాంత శ్రీకాకుళం, విజ‌య‌న‌గ‌రం జిల్లాల్లో ఈరోజు మరియు రేపు అతి భారీ వ‌ర్షాలు కురిసే సూచ‌న‌లు 

సాక్షి, అమరావతి : ఆంధ్రప్రదేశ్‌ ముఖ్యమంత్రి చంద్రబాబు నాయుడు 13 రోజుల విరామం అనంతరం సచివాలయానికి వస్తున్నారు. ఎన్నికల కోడ్‌ అమల్లో ఉన్న నేపథ్యంలో సచివాలయానికి దూరంగా ఉన్న ఆయన గురువారం ఉదయం 11 గంటలకు రానున్నారు. ఫొని తుఫాన్‌ అత్యవసర పరిస్థితుల దృష్ట్యా తూర్పు గోదావరి, విశాఖ, విజయనగరం, శ్రీకాకుళం జిల్లాల్లో ఎన్నికల ప్రవర్తనా నియమావళిని సడలించాలని ముఖ్యమంత్రి చంద్రబాబు కేంద్ర ఎన్నికల సంఘాన్ని కోరుతూ ముఖ్యమంత్రి చంద్రబాబు నిన్న కేంద్ర ఎన్నికల అధికారికి లేఖ రాసిన విషయం విదితమే. చదవండి...(తుపాను వస్తే సమీక్ష చేయొద్దా?) ఫొని తుపాను సమాచారాన్ని ఎప్పటికప్పుడు తీర ప్రాంతాల ప్రజలకు చేరవేసేందుకు, మానవ వనరుల సమీకరణ, ఇతర నష్ట నివారణ చర్యలను చేపట్టడానికి రాష్ట్రంలో ఎన్నికల కోడ్‌ అడ్డంకిగా మారిందని లేఖలో పేర్కొన్నారు. రాష్ట్రంలో శాసనసభ, పార్లమెంట్‌ ఎన్నికల పోలింగ్‌ పూర్తయిన దృష్ట్యా నాలుగు జిల్లాల్లో కోడ్‌ను సడలించాలని చంద్రబాబు విజ్ఞప్తి చేశారు.  అయితే ఆ లేఖపై కేంద్ర ఎన్నికల సంఘం ఇంకా స్పందించలేదు. ఈ నేపథ్యంలో ఫొని తుఫాన్‌ ప్రభావంపై చంద్రబాబు ....అధికారులను వివరాలు అడిగి తెలుసుకోనున్నారు.

సాక్షి, విశాఖపట్నం/అమరావతి: ఫొని తుపాను రేపు (3న) ఒడిశాలోని గోపాల్‌పూర్, చాంద్‌బలీల మధ్య తీరాన్ని దాటే అవకాశం ఉన్న నేపథ్యంలో శ్రీకాకుళం, విజయనగరం జిల్లాల అధికారులు అప్రమత్తంగా ఉండాలని ప్రభుత్వ ప్రధాన కార్యదర్శి ఎల్వీ సుబ్రహ్మణ్యం ఆదేశాలు జారీ చేశారు. ఈ జిల్లాల్లో తీవ్ర ఈదురుగాలులతో భారీ వర్షాలు పడే అవకాశం ఉన్నందున తగిన జాగ్రత్తలు తీసుకోవాలని కలెక్టర్లకు సూచించారు. ఈ మేరకు బుధవారం సచివాలయంలో రాష్ట్ర ఉన్నతాధికారులతో కలిసి ఫొని తుఫానుపై శ్రీకాకుళం, విజయనగరం, విశాఖపట్నం, తూర్పుగోదావరి తదితర కోస్తా జిల్లాల కలెక్టర్లు, ఎస్పీలతో ఆయన వీడియో కాన్ఫరెన్స్‌ నిర్వహించారు. ఈ సందర్భంగా ఎల్వీ సుబ్రహ్మణ్యం మాట్లాడుతూ శ్రీకాకుళం, విజయనగరం జిల్లాల్లో నేడు, రేపు తీర ప్రాంతం వెంట గంటకు 90 నుంచి 120 కి.మీల వేగంతో బలమైన గాలులు వీయడంతోపాటు భారీ నుంచి అతి భారీ వర్షాలు కురిసే అవకాశాలున్నాయని చెప్పారు. మత్స్యకారులు సముద్రంలో చేపల వేటకు వెళ్లకుండా చూడాలన్నారు.  పర్యవేక్షణకు ముగ్గురు ఐఏఎస్‌ అధికారులు  సహాయక చర్యలను పర్యవేక్షించేందుకు ముగ్గురు ఐఏఎస్‌ అధికారులను పంపుతున్నామని, అలాగే ప్రతి మండలానికి ఒక ప్రత్యేక అధికారిని నియమించి సకాలంలో తగిన చర్యలు తీసుకోవాలని ఎల్వీ సుబ్రహ్మణ్యం కలెక్టర్లను ఆదేశించారు. తాగునీటి వనరులకు, విద్యుత్‌కు అంతరాయం కలిగితే సకాలంలో నీరందించేందుకు వీలుగా ట్యాంకర్లను, జనరేటర్లను అందుబాటులో ఉంచాలన్నారు. పునరావాస కేంద్రాల్లో కావాల్సిన సౌకర్యాలను కల్పించాలన్నారు. కమ్యూనిటీ కిచెన్లను ఏర్పాటు చేసి బాధితులకు ఆహారం అందించేందుకు కృషి చేయాలన్నారు. నిత్యావసర సరుకులను, మందులను, మంచినీటి ప్యాకెట్లను, కమ్యూనికేషన్‌ కోసం శాటిలైట్‌ ఫోన్లను అందుబాటులో ఉంచాలని చెప్పారు ఇంధన శాఖ ముఖ్య కార్యదర్శి అజయ్‌ జైన్‌ మాట్లాడుతూ విద్యుత్‌కు అంతరాయం కలిగితే తక్షణం పునరుద్ధరించడానికి వీలుగా ప్రతి విద్యుత్‌ ఉప కేంద్రం పరిధిలో 500 విద్యుత్‌ స్తంభాలు, రెండు జేసీబీలు, ఇతర మెటీరియల్‌ అందుబాటులో ఉంచుతున్నట్టు తెలిపారు. ఇంకా ఈ సమావేశంలో పంచాయతీరాజ్, గ్రామీణాభివృద్ధి శాఖ ముఖ్య కార్యదర్శి డా.కేఎస్‌ జవహర్‌రెడ్డి, పట్టణాభివృద్ధి శాఖ ప్రత్యేక ప్రధాన కార్యదర్శి కరికాల వల్లవన్, జలవనరుల శాఖ ముఖ్య కార్యదర్శి శశిభూషణ్‌ కుమార్, విపత్తుల నిర్వహణ సంస్థ కార్యదర్శి డి.వరప్రసాద్, ఐటీ శాఖ ముఖ్య కార్యదర్శి విజయానంద్, ఆర్టీజీఎస్‌ సీఈవో బాబు సహాయక చర్యలను వివరించారు.   ఎలాంటి పరిస్థితినైనా ఎదుర్కొనేందుకు సిద్ధంగా ఉండండి: కేంద్ర కేబినెట్‌ కార్యదర్శి సిన్హా      ఫొని తుపానును సమర్థవంతంగా ఎదుర్కొనేందుకు అన్ని విధాలా సిద్ధంగా ఉండాలని కేంద్ర కేబినెట్‌ కార్యదర్శి ప్రదీప్‌ కుమార్‌ సిన్హా ఆంధ్రప్రదేశ్, ఒడిశా, పశ్చిమ బెంగాల్‌ రాష్ట్ర ప్రభుత్వ యంత్రాంగాలను ఆదేశించారు. ఈ మేరకు బుధవారం ఆయన ఢిల్లీ నుంచి మూడు రాష్ట్రాల ప్రభుత్వ ప్రధాన కార్యదర్శులతో వీడియో కాన్ఫరెన్స్‌ నిర్వహించారు. ఈ సందర్భంగా సిన్హా మాట్లాడుతూ భారత వాతావరణ శాఖ అంచనా ప్రకారం.. 3వ తేదీ సాయంత్రం 5గం.ల 35 నిమిషాల సమయంలో ఒడిశాలోని గోపాల్‌పూర్, చాంద్‌బలీ ప్రాంతాల మధ్య తుపాన్‌ తీరాన్ని దాటొచ్చన్నారు. దీని ప్రభావం ఒడిశా తీరంపై అధికంగా ఉంటుందని చెప్పారు. అలాగే ఆంధ్రప్రదేశ్‌లోని శ్రీకాకుళం, విజయనగరం జిల్లాల్లో తీవ్ర గాలులతో కూడిన భారీ వర్షాలు పడొచ్చని తెలిపారు. ఈ ప్రాంతాల్లో కచ్చా గృహాల్లో నివసించేవారిని సురక్షిత ప్రాంతాలకు తరలించి తగిన పునరావాసం కల్పించాలని సీఎస్‌ను ఆదేశించారు. కేంద్రం నుంచి ఎలాంటి సాయం  కావాలన్నా అందిస్తామన్నారు.    తుపాన్‌ ఎఫెక్ట్‌... పవర్‌ సెక్టార్‌ అలర్ట్‌ ‘ఫొని’ తుఫాన్‌ నేపథ్యంలో ఆంధ్రప్రదేశ్‌ తూర్పు ప్రాంత విద్యుత్‌ పంపిణీ సంస్థ (ఏపీఈపీడీసీఎల్‌) అప్రమత్తమయింది. తుఫాన్‌  ప్రభావం ఉత్తరాంధ్రలో, మరీ ముఖ్యంగా శ్రీకాకుళం జిల్లాపై ఎక్కువ చూపనుంది. దీంతో గతంలో హుద్‌హుద్, తిత్లీ తుపాన్లు సృష్టించిన పెనుబీభత్సాన్ని దృష్టిలో ఉంచుకుని ఈపీడీసీఎల్‌ అధికారులు ముందస్తు చర్యలు చేపట్టారు. శ్రీకాకుళం జిల్లాలో పలాస, టెక్కలి, మందస, సోంపేట, ఇచ్ఛాపురం, కవిటి, వజ్రపుకొత్తూరు, కంచిలి, సంతబొమ్మాళి, పోలాకి, గార, నందిగామ మండలాల్లో తుపాను ప్రభావం అధికంగా ఉంటుందని అంచనా వేస్తున్నారు. తుఫాన్‌ వల్ల తలెత్తే పరిణామాలను ఎదుర్కోడానికి ఐదు వేల మంది కార్మికులను శ్రీకాకుళం జిల్లాకు తరలించారు. అలాగే తుపానుకు విద్యుత్‌ స్తంభాలు కూలిపోయిన పక్షంలో వాటి స్థానంలో అమర్చడానికి 12 వేల స్తంభాలను ఆ జిల్లాకు పంపారు. వాటిని పాతడానికి అవసరమైన 30 పోల్‌ డ్రిల్లింగ్‌ మిషన్లు, 70 పవర్‌ రంపాలు, క్రేన్లను సిద్ధం చేశారు. తగినన్ని ట్రాన్స్‌ఫార్మర్లు, కండక్టర్లు (విద్యుత్‌ తీగలు), ఇన్సులేటర్లను అందుబాటులో ఉంచారు. ఈపీడీసీఎల్‌ పరిధిలోని ఉభయగోదావరి, విశాఖ, విజయనగరం జిల్లాల సిబ్బందిని శ్రీకాకుళం జిల్లాకు పంపారు. నాలుగు మండలాలకు ఒక చీఫ్‌ జనరల్‌ మేనేజర్‌ (సీజీఎం)ను, మూడు సబ్‌ స్టేషన్లకు ఒక జనరల్‌ మేనేజర్, ఒక్కో సబ్‌స్టేషన్‌కు ఒక ఎగ్జిక్యూటివ్‌ ఇంజినీర్, ఫీడర్‌కు ఒక ఏఈఈ చొప్పున ఇన్‌చార్జులను నియమించినట్టు ఈపీడీసీఎల్‌ ఆపరేషన్స్‌ డైరెక్టర్‌ బొడ్డు శేషుకుమార్‌ చెప్పారు. ఈపీడీసీఎల్‌ సీఎండీ రాజబాపనయ్య బుధవారం శ్రీకాకుళం జిల్లాకు వెళ్లారు. తుఫాన్‌ తీవ్రత తగ్గుముఖం పట్టే వరకు ఆయన అక్కడే ఉండి అవసరమైన సహాయ, పునరావాస పనులను సమీక్షిస్తారు. సమాచారం కోసం శ్రీకాకుళం (94906 12633), విశాఖపట్నం (0891–2853854)కంట్రోల్‌ రూంలలో సంప్రదించాలని ఆపరేషన్స్‌ డైరెక్టర్‌ శేషుకుమార్‌ కోరారు. 

సాక్షి, అమరావతి/సాక్షి విశాఖపట్నం: పెను తుపాను ‘ఫొని’ పడగెత్తింది. ఉత్తరాంధ్ర, ఒడిశాలపై పెను ప్రభావం చూపడానికి దూసుకెళుతోంది. తుపాను, తీవ్ర తుపాను, అతి తీవ్ర తుపానుగా బలపడుతూ వచ్చి చివరకు పెను తుపానుగా మారింది. గంటకు 210 కిలోమీటర్ల వేగంతో వీచే భీకర గాలులు, భారీ వర్షాలతో ఎలాంటి ముప్పు తెచ్చి పెడుతుందోనన్న భయాందోళనలు ఇటు ఉత్తరాంధ్ర, ఒడిశా వాసుల్లో వ్యక్తమవు తున్నాయి. ఇప్పటికే తిత్లీ దెబ్బకు అతలాకుతలమైన శ్రీకాకుళం జిల్లా ఇంకా పూర్తిగా తేరుకోలేదు. ఆరు నెలల్లోనే ‘ఫొని’ రూపంలో మరో పెను తుపాను దూసుకువ స్తుండడం ఆ ప్రాంతం వారిని కంటి మీద కునుకులేకుండా చేస్తోంది. ఇది బుధవారం రాత్రికి పూరీకి దక్షిణ నైరుతి దిశగా 570, విశాఖపట్నానికి దక్షిణ ఆగ్నేయంగా 320 కిలోమీటర్ల దూరంలో కేంద్రీకృతమై ఉంది. ఇది ఉత్తర ఈశాన్య దిశగా ప్రయాణిస్తూ ఒడిశాలోని గోపాల్‌పూర్‌– చాంద్‌బలీ మధ్య పూరీకి సమీపంలో శుక్రవారం మధ్యాహ్నం తీరాన్ని దాటనుంది. తీరాన్ని దాటే సమయంలో గంటకు 170 నుంచి 200 కిలోమీటర్ల వేగంతో పెనుగాలులు వీస్తాయని భారత వాతావరణ విభాగం (ఐఎండీ) బుధవారం రాత్రి విడుదల చేసిన నివేదికలో వెల్లడించింది. ఇవి ఒక దశలో 210 కిలోమీటర్ల గరిష్ట వేగాన్ని తాకుతాయని పేర్కొంది. వీటి ధాటికి కచ్చా ఇళ్లు, గుడిసెలు, చెట్లు, విద్యుత్‌ స్తంభాలు కూలిపోతాయని, రోడ్లు, రైలు పట్టాలు కొట్టుకుపోయే ప్రమాదం ఉందని, సమాచార వ్యవస్థ స్తంభించిపోవచ్చని తెలిపింది. ఈ నెల 5 వరకు మత్స్యకారులు సముద్రంలోకి చేపల వేటకు వెళ్లొద్దని హెచ్చరించింది. ఇప్పటికే సముద్రం అల్లకల్లోలంగా మారింది. అలలు భారీగా ఎగసిపడుతున్నాయి. కోస్తాంధ్ర, ఒడిశా తీర ప్రాంతాల్లో పలుచోట్ల సముద్రం ముందుకు చొచ్చుకు వస్తోంది. కళింగపట్నం, భీమునిపట్నం, విశాఖపట్నం, గంగవరం, కాకినాడ, మచిలీపట్నం, నిజాంపట్నం, కృష్ణపట్నం, ఓడరేవు పోర్టుల్లో మూడో నంబర్‌ ప్రమాద హెచ్చరికను జారీ చేశారు. శ్రీకాకుళం జిల్లా తీర ప్రాంతాల్లో ప్రభుత్వం రెడ్‌ అలర్ట్‌ ప్రకటించింది. తుపాను తీరం దాటే సమయంలో ఈ ప్రాంతాల ప్రజలు బయటకు రావద్దని, సురక్షిత ప్రాంతాల్లో ఉండాలని హెచ్చరికలు జారీ చేసింది.  మంగినపూడిబీచ్‌లో ఎగసిపడుతున్న అలలు మధ్యలో పడవ    ఉత్తరాంధ్ర జిల్లాల్లో భారీ వర్షాలు తుపాను ప్రభావంతో ఉత్తరాంధ్ర జిల్లాల్లో మరీ ముఖ్యంగా శ్రీకాకుళం, విజయనగరం జిల్లాల్లో గురువారం భారీ నుంచి అతి భారీ వర్షాలు (20 సెం.మీకుపైగా), శుక్రవారం అతి భారీ వర్షాలు, పెనుగాలులు వీస్తాయని ఐఎండీ తన వెబ్‌సైట్‌లో పేర్కొంది. విశాఖపట్నం, తూర్పు గోదావరి జిల్లాల్లో ఓ మోస్తరు వర్షాలు కురుస్తాయని తెలిపింది. విశాఖపట్నం, విజయనగరం జిల్లాలకంటే శ్రీకాకుళం జిల్లాపై తుపాను ప్రభావం అత్యధికంగా ఉండనుంది. ఆ జిల్లాలో గార, ఇచ్ఛాపురం, కవిటి, కంచిలి, సోంపేట, మందస, సంతబొమ్మాళి, పలాస, పోలాకి, నందిగాం, వజ్రపుకొత్తూరు, శ్రీకాకుళం మండలాల్లో, విజయనగరం జిల్లాలో భోగాపురం, చీపురుపల్లి, డెంకాడ, గరివిడి, గుర్ల, నెల్లిమర్ల, పూసపాటిరేగ మండలాల్లోనూ తుపాను తీవ్ర ప్రభావం చూపనుంది. అందువల్ల ఎలాంటి విపత్తునైనా ఎదుర్కొనేందుకు సర్వసన్నద్ధంగా ఉండాలని ప్రభుత్వం అధికార యంత్రాంగాన్ని అప్రమత్తం చేసింది. సహాయక చర్యల నిమిత్తం ఈ మూడు జిల్లాలకు 15 జాతీయ విపత్తు సహాయక దళాలను విపత్తు నిర్వహణ శాఖ పంపించింది. తూర్పు నావికాదళం కూడా సన్నద్ధమైంది. విశాఖపట్నంలో తుపాను సహాయ సామగ్రితో యుద్ధనౌకలను సిద్ధం చేసింది. ఇంకా ఏరియల్‌ సర్వే కోసం నేవీ ఎయిర్‌క్రాఫ్ట్‌లను, ఉత్తరాంధ్ర, ఒడిశాల్లో తుపాను సహాయక చర్యల్లో పాల్గొనేందుకు గజ ఈతగాళ్లు, వైద్య బృందాలను అందుబాటులో ఉంచింది. మరోవైపు తుపాను తీరాన్ని దాటాక పశ్చిమ బెంగాల్, బంగ్లాదేశ్‌ల వైపు పయనిస్తూ అతి తీవ్ర తుపానుగా, 4న తుపానుగా, 5న వాయుగుండం, అల్పపీడనంగా ఇలా క్రమంగా బలహీనపడనుంది.  రైళ్లు, విమాన సర్వీసులూ రద్దు తుపాను నేపథ్యంలో హౌరా–చెన్నై–హైదరాబాద్‌ల మధ్య నడిచే అనేక రైళ్లను రైల్వే శాఖ రద్దు చేసింది. మరికొన్నింటిని దారి మళ్లించింది. తూర్పు కోస్తా రైల్వే.. విశాఖపట్నం, విజయనగరం, రాయగడ రైల్వేస్టేషన్లలో హెల్ప్‌లైన్‌ కేంద్రాలను ఏర్పాటు చేసింది. అలాగే కొన్ని విమాన సర్వీసులను రద్దు చేశారు. ప్రస్తుతానికి వీటిలో చెన్నై–వైజాగ్, వైజాగ్‌–చెన్నై, ఢిల్లీ–వైజాగ్, వైజాగ్‌–ఢిల్లీ తదితర సర్వీసులున్నాయి. గురువారం మరికొన్ని విమాన సర్వీసులు రద్దయ్యే అవకాశాలున్నాయి.  ‘చిక్కోలు ’ తీరంలో గంటకు 90 – 115 కిలోమీటర్ల వేగంతో గాలులు తుపాను తీరం దాటే సమయంలో ఉత్తరాంధ్రలో గంటకు 90 నుంచి 115 కిలోమీటర్ల వేగంతో గాలులు వీచే అవకాశం ఉందని ఐఎండీ బుధవారం రాత్రి ప్రకటించింది. 2018, అక్టోబర్‌లో శ్రీకాకుళం జిల్లాలో తిత్లీ తుపాను తీరం దాటిన సందర్భంగా గంటకు 160 కిలోమీటర్ల వేగంతో పెనుగాలులు వీచాయి. 2014, అక్టోబర్‌లో విశాఖపట్నం జిల్లాలో హుద్‌హుద్‌ తుపాను తీరం దాటిన సందర్భంగా గంటకు 220 కిలోమీటర్ల ప్రచండ వేగంతో గాలులు విరుచుకుపడ్డాయి. ‘తిత్లీ, హుద్‌హుద్‌ తుపాన్లు రెండూ రాష్ట్రంలోనే తీరం దాటాయి. అందువల్ల గాలుల వేగం ఎక్కువగా ఉంది. ఇప్పుడు ఫొని తుపాను ఒడిశాలో తీరం దాటుతున్నందున అప్పుడంత ప్రభావం ఉండదు. తీరం దాటే ప్రాంతంలోనూ, సమీపంలోనూ ఎప్పుడైనా గాలుల తీవ్రత, వర్ష ప్రభావం ఎక్కువగా ఉంటాయి. ‘ఫొని తుపాను ఒడిశాలోని గోపాల్‌పూర్‌ ప్రాంతంలో తీరం దాటుతున్నందున అక్కడ గంటకు 170 నుంచి 190 కిలోమీటర్ల వేగంతో గాలులు వీస్తాయి. ఇవి ఒక దశలో 210 కిలోమీటర్ల గరిష్ట వేగాన్ని కూడా తాకవచ్చని అంచనా వేస్తున్నాం. హుద్‌హుద్‌తో పోల్చితే దీని ప్రభావం తక్కువే’ అని వాతావరణ నిపుణులు తెలిపారు.  ‘ఫొని’ ప్రభావంతో ఈదురు గాలులు, వర్షాలు  బంగాళాఖాతంలో ఏర్పడిన ఫొని తుపాను ప్రభావంతో బుధవారం రాష్ట్రంలో అక్కడక్కడా వర్షాలు కురిశాయి. ఈదురుగాలులు బీభత్సం సృష్టించాయి. విజయనగరం జిల్లాలో సముద్రకెరటాలు ఉవ్వెత్తున ఎగసి తీర ప్రాంత గ్రామాలను తాకాయి. జిల్లాలో తీర ప్రాంత గ్రామాలైన కోనాడ, తిప్పలవలస, పులిగెడ్డ, పతివాడ బర్రిపేట, చింతపల్లి, చేపలకంచేరు, ముక్కాం గ్రామాల్లో సముద్రం 20 మీటర్ల ముందుకు వచ్చింది. జిల్లాలో రెండు రోజులపాటు భారీ వర్షాలు కురిసే అవకాశం ఉండటంతో తీర ప్రాంతాలను అప్రమత్తం చేశారు. శ్రీకాకుళం జిల్లా యంత్రాంగం అన్ని ముందు జాగ్రత్త చర్యలతో సిద్ధంగా ఉంది. 48 పునరావాస కేంద్రాలను కూడా ఏర్పాటు చేశారు. అక్కడ నిత్యావసర సరుకులు, బియ్యం, పప్పులు, కిరోసిన్, గ్యాస్‌ సిలిండర్లను కలెక్టర్‌ జె.నివాస్‌ అందుబాటులో ఉంచారు. జిల్లాలో ప్రవహించే వంశధార, నాగావళి పరివాహక ప్రాంతాల్లో వరదలు వస్తే ఎదుర్కొనేందుకు ముందు జాగ్రత్త చర్యలు తీసుకున్నారు.   తుపాను గమనాన్ని తెలుపుతున్న చిత్రం     ‘పశ్చిమ’ తీర ప్రాంతాల్లో అలజడి  ఫొని తుపాను ప్రభావంతో పశ్చిమ గోదావరి జిల్లాలోని నరసాపురం, భీమవరం తీర ప్రాంత గ్రామాల్లో అలజడి నెలకొంది. సముద్రపు అలలు ముందుకు చొచ్చుకొస్తుండటంతో ప్రజలు ఆందోళన చెందుతున్నారు. నరసాపురం మండలం పెదమైనవానిలంక, మొగల్తూరు మండలం పేరుపాలెంలో సముద్ర అలలు ఉవ్వెత్తున ఎగిసిపడుతున్నాయి. సముద్రం 10 మీటర్లు ముందుకు చొచ్చుకొచ్చింది. బుధవారం సాయంత్రం నుంచే వాతావరణం మారడంతో అధికారులు అప్రమత్తమయ్యారు. పేరుపాలెం బీచ్‌లో సందర్శకుల అనుమతిని రద్దు చేశారు. ముందు జాగ్రత్త చర్యల్లో భాగంగా నరసాపురం, మొగల్తూరు మండలాల్లో 8 పునరావాస కేంద్రాలను సిద్ధం చేస్తున్నట్టు ఆర్డీవో ఎన్‌.సలీంఖాన్‌ చెప్పారు. నియోజకవర్గంలో దాళ్వా పంటకు సంబంధించి ఇంకా 20 శాతం కోతలు పూర్తి కాలేదు. దీంతో రైతులు హడావిడిగా వరి కోతలు ప్రారంభించారు. కొయ్యలగూడెంలో విపరీతమైన ఈదురుగాలులు వీయడంతో ప్రధాన రహదారులపై భారీ వృక్షాలు కూలిపోయాయి. తణుకు రూరల్‌ గ్రామాల్లో కురిసిన వర్షానికి పలుచోట్ల ధాన్యం తడిసిపోయింది.         మత్స్యకారులను రక్షించిన అధికారులు  కృష్ణా జిల్లా బందరు రూరల్‌ మండలం మంగినపూడి వద్ద సముద్రం ఒక్కసారిగా అల్లకల్లోలంగా మారింది. అలల ఉధృతి పెరిగింది. బలమైన గాలులు వీస్తున్నాయి. సముద్రం 9 మీటర్ల మేర ముందుకు చొచ్చుకొచ్చింది. తుపాను ప్రభావంతో జిల్లాలో వర్షాలు కురిసే అవకాశం ఉంది. మచిలీపట్నం తీరంలోని తాళ్లపాలెం, కానూరు, కరగ్రహారం, చిన కరగ్రహారం గ్రామాల మత్స్యకారులు మూడు రోజుల క్రితమే చేపల వేటకు వెళ్లి సముద్రంలో చిక్కుకోగా వీరిని రక్షించారు. వీరి నాలుగు బోట్లు చిన కరగ్రహారం సముద్ర తీరం నుంచి సుమారు రెండు కిలోమీటర్ల దూరంలో కనిపించడంతో స్థానికులు ఆర్డీవో జె.ఉదయభాస్కర్‌కు సమాచారం ఇచ్చారు. ఆయన హుటాహుటిన తీరానికి చేరుకుని మత్స్యశాఖ అధికారులతో మాట్లాడి మత్స్యకారులను బోట్లతో సహా సురక్షితంగా తీరానికి చేర్చారు.   కర్నూలు జిల్లాలో నష్టం రూ.35 కోట్లు  కర్నూలు జిల్లాలో గాలివాన బీభత్సం సృష్టించింది. పెనుగాలుల తీవ్రతకు దాదాపు 650 ఎకరాల్లో అరటి, మామిడి, బొప్పాయి తదితర పండ్ల తోటలు దెబ్బతిన్నాయి. రూ.35 కోట్ల మేర నష్టం వాటిల్లినట్లు ప్రాథమిక అంచనా. వందలాది విద్యుత్‌ స్తంభాలు నేలకూలడంతో పలు ప్రాంతాల్లో కరెంట్‌ సరఫరా నిలిచిపోయింది. భారీ వర్షం కారణంగా హాలహర్వి మండలంలోని బిలేహాల్‌ చెరువుకు గండి పడింది.  వెనక్కి మళ్లిన ఇండిగో విమానం  ఫొని తుపాను కారణంగా వాతావరణం అనుకూలించకపోవడంతో విశాఖపట్నం విమానాశ్రయంలో ఇండిగో విమానం వెనుదిరిగింది. హైదరాబాద్‌ నుంచి ఉదయం 11.30కు విశాఖ చేరుకుని, చెన్నైకి మధ్యాహ్నం 12.15కు వెళ్లాల్సిన ఈ విమానం విశాఖ విమానాశ్రయానికి వచ్చేసరికి గాలుల వేగం ఎక్కువగా ఉండడంతో అధికారులు తిరిగి హైదరాబాద్‌కు మళ్లించారు. దీంతో చెన్నైకి వెళ్లాల్సిన ప్రయాణికులు ఇబ్బందులు పడ్డారు.

సాక్షి, విశాఖపట్నం: ‘ఫొని’ తుపాను తీవ్ర ప్రభావం చూపిస్తుందన్న వాతావారణ శాఖ హెచ్చరికల నేపథ్యంలో 81 రైళ్లను రద్దు చేస్తున్నట్టు రైల్వే శాఖ ప్రకటించింది. రెండు రైళ్లను దారి మళ్లించినట్టు వెల్లడించింది. రేపటి నుంచి భద్రక్ -విజయనగరం మధ్య రైలు సర్వీసులు నిలిపివేస్తున్నట్టు తెలిపింది. భువనేశ్వర్ - పూరీ రైళ్ల సర్వీసులపై రేపు రాత్రి నుంచి ఆంక్షలు విధిస్తున్నట్టు వెల్లడించింది. మే 3న పూరీ, భువనేశ్వర్‌ నుంచి నడిచే అన్ని రైళ్లను రద్దు చేస్తున్నట్టు ప్రకటించింది. ప్రయాణికులకు టిక్కెట్‌ డబ్బులు తిరిగి ఇవ్వనున్నట్టు తెలిపింది. విజయనగరం జిల్లాలో అప్రమత్తం ప్రచంఢంగా తీరం వైపు దూసుకొస్తున్న ఫోని తుపాను ప్రభావంతో జిల్లాలో రానున్న రెండు రోజుల్లో భారీ నుంచి అతి భారీ వర్షాలు కురిసే అవకాశం ఉందని విజయనగరం జిల్లా కలెక్టర్ హరి జవహర్ లాల్ అన్నారు. అత్యంత తీవ్రమైన తుపాను కావడంతో విస్తారమైన వర్షాలు  భారీగా ఈదురు గాలుల నేపధ్యంలో జిల్లా యంత్రాంగాన్ని అప్రమత్తం చేశామన్నారు. ప్రధానంగా తీరప్రాంత గ్రామాల్లో మంచినీరు, విద్యుత్తు సరఫరా వంటి సహాయ చర్యలకు సిబ్బంది సిద్ధంగా ఉన్నారని చెప్పారు. ఎన్డీఆర్‌ఎఫ్, ఎస్టీఆర్ఎఫ్ సిబ్బంది సహకారంతో వెంటనే సహాయ పునరావాస చేపట్టేందుకు సిద్ధంగా ఉన్నామన్నారు. జాతీయ రహదారులతో పాటు రోడ్డు మార్గంలో ఎక్కడ అవాంతరాలు ఏర్పడ్డా వెంటనే సహాయక చర్యల్లో పాల్గొనడానికి జిల్లా పోలీసులు సిద్ధంగా ఉన్నారని చెప్పారు.

సాక్షి, అమరావతి: ఫొని తుపాన్‌ ప్రాంతాల్లో ఎన్నికల కోడ్‌ వెసులుబాటు కల్పించాలని ప్రభుత్వం నుంచి ఎటువంటి ప్రతిపాదన రాలేదని రాష్ట్ర ఎన్నికల ప్రధాన అధికారి గోపాలకృష్ణ ద్వివేది స్పష్టం చేశారు. ఎన్నికల కోడ్‌ వెసులుబాటు కావాలంటే కేంద్ర ఎన్నికల సంఘానికి ప్రతిపాదనలు పంపాల్సి ఉంటుందని తెలిపారు. బుధవారం ఆయన మీడియాతో మాట్లాడుతూ.. ప్రభుత్వం నుంచి ఏ ప్రతిపాదనలు వచ్చినా సీఈసీ దృష్టికి తీసుకెళ్తానని తెలిపారు. కోడ్‌ వెసులుబాటు వంటి కీలక నిర్ణయాలు తీసుకునే అధికారం సీఈసీకే ఉంటుందని పేర్కొన్నారు. సీఈసీ ఇచ్చే ఆదేశాలను తాము అమలు చేస్తామని అన్నారు. తుపాన్‌ వల్ల స్ట్రాంగ్‌ రూమ్‌ల్లోని ఈవీఎంలకు ఎలాంటి ఇబ్బంది ఉండదని తెలిపారు. జిల్లా కలెక్టర్లు ముందస్తు జాగ్రత్తలు తీసుకున్నారని వెల్లడించారు. తుపాన్‌ ప్రభావిత శ్రీకాకుళం, విజయనగరం జిల్లాలో ఈవీఎంల విషయంలో అప్రమత్తంగా ఉండమని కలెక్టర్లను ఆదేశించినట్టు చెప్పారు.

సాక్షి, అమరావతి: ఫొని తుపాన్‌పై ఆంధ్రప్రదేశ్‌ ప్రభుత్వ ప్రధాన కార్యదర్శి ఎల్వీ సుబ్రహ్మణ్యం బుధవారం సమీక్ష చేపట్టారు. ఉత్తరాంధ్ర జిల్లాలకు చెందిన కలెక్టర్లు, ఆర్టీజీఎస్‌ అధికారులతో రివ్యూ నిర్వహించారు. తుపాన్‌ ప్రభావం దృష్ట్యా ఉత్తర కోస్తా మండలాల అధికారులను సీఎస్‌ అప్రమత్తం చేశారు. మడూ జిల్లాలకు మగ్గురు ఐఏఎస్‌ అధికారులను, అలాగే ప్రతి మండలానికి ఓ జిల్లా స్థాయి ప్రత్యేక అధికారిని నియమించారు. ఫొని ప్రభావిత ప్రాంతాల్లోని అధికారులు ముందుగానే సామాగ్రి సిద్దం చేయాలన్నారు. జనరేటర్లు, ఆహార పదార్థాలు అందుబాటులో ఉంచాలని ఆదేశించారు. విద్యుత్‌ సరఫరాను వీలైనంత త్వరగా పునరుద్ధరించాలని తెలిపారు. మరోవైపు అతి తీవ్ర తుపానుగా మారిన ఫొని తీరం వైపు దూసుకొస్తోంది. గంటకు 200 కి.మీ వేగంతో శుక్రవారం గోపాల్‌పూర్‌-చాంద్‌బలి (ఒడిశా) దగ్గర తుపాన్‌ తీరం దాటే అవకాశం వాతావరణ శాఖ (ఐఎండీ) వెల్లడించింది.  చదవండి: ఫొని తుపాను తిత్లీ కంటే ప్రమాదకరమైనది..!

ఫొని తుపాను జిల్లా వాసులను హడలెత్తిస్తోంది. కొంతమంది రైతుల పొలాల్లో కోసిన వరి పనలుండిపోయాయి. మరికొంతమంది రైతుల కళ్లాల్లో నూర్పులకు సిద్ధం చేసిన వరి కుప్పలు కంటిమీద కునుకులేకుండా చేస్తున్నాయి. ఓ వైపు తుపాను ఎటు పయనిస్తోందో...తుపాను ముప్పు తప్పినా భారీ వర్షాలు జిల్లాలో కురిస్తే చేతికొచ్చిన పంటల పరిస్థితేమిటోనని ఆందోళన చెందుతున్నారు. వేట నిషేధం కారణంగా మత్స్యకారులు వేటకు దూరంగా ఉండడం కొంత ఊరట. కానీ సముద్రం అలలు ఉవ్వెత్తున లేవడం, సముద్రం కొన్ని మీటర్ల ముందుకు వచ్చేస్తుండడంతో తీరప్రాంతవాసులను కంటిమీద కునుకులేకుండా చేస్తోంది. జిల్లా యంత్రాంగం ఎప్పటికప్పుడు సమీక్షిస్తూ ప్రత్యామ్నాయ చర్యలు తీసుకుంటోంది. తూర్పుగోదావరి  ,కాకినాడ సిటీ: ‘ఫొని’ తుపాను ప్రభావం ఫలితంగా  అలలు ఉవ్వెత్తున లేస్తుండడంతో సముద్రం అల్లకల్లోలంగా మారింది. సముద్రతీరం కోత కు గురవుతోంది. తుపాను తీవ్రతను తెలియజేస్తూ కాకినాడ పోర్టులో మూడో నంబర్‌ ప్రమాద హెచ్చరికను జారీ చేశారు. కృష్ణా జిల్లా మచిలీపట్నానికి ఆగ్నేయంగా 870 కిలోమీటర్ల దూరంలో కేంద్రీకృతమై... ఇది క్రమేపీ ఆ రాష్ట్ర తీరంవైపు కదులు తోందని, 1, 2 తేదీల్లో ఒడిశా తీరాన్ని తాకుతుందని అధికారులు చెబుతున్నారు.  జిల్లాపై ప్రభావం ఉంటుందని ముందుగా భావించినప్పటికీ వాయవ్య దిశగా పయనిస్తోందని అంచనా వేయడంతో జిల్లాకు ప్రమాదం ఏమీ ఉండదని అధికారులు చెబుతున్నారు. అయినా ముందస్తు చర్యల్లో భాగంగా ప్రజలంతా అప్రమత్తంగా ఉండాలని, పల్లపు ప్రాంతాల ప్రజలను సురక్షిత ప్రాంతాలకు తరలించాలని మత్స్యకార గ్రామాల్లో టాంటాం, మైకుల ద్వారా పెద్ద ఎత్తున ప్రచారం చేస్తున్నారు. ఇప్పటికే తీరప్రాంత మండలాలుగా ఉన్న 14 మండలాల్లో ప్రత్యేక అధికారులను నియమించి పరిస్థితిని సమీక్షిస్తున్నారు. అన్ని ఆర్డీవో కార్యాలయాలతోపాటు తహసీల్దార్‌ కార్యాలయాల్లోనూ ప్రత్యేక కంట్రోల్‌ రూమ్‌లను ఏర్పాటు చేశారు. ఇదిలా ఉంటే ఒడిశా ప్రాంతంలో తీరం దాటే అవకాశం ఉందని వాతావరణశాఖ ప్రకటించడంతో ఆ ప్రభావంతో జిల్లాలో పెద్ద ఎత్తున వర్షాలు పడే అవకాశం ఉందని అధికారులు అంచనా వేస్తున్నారు.  కాకినాడ తీరంలో పది మీటర్ల ముందుకు... కాకినాడ తీరంలోని సముద్రం పది మీటర్లు ముందుకు చొచ్చుకువచ్చిందని మత్స్యకారులు చెబుతున్నారు. ఎండ తీవ్రత ఎక్కువగా ఉండడంతో పెద్ద ఎత్తున పర్యాటకులు బీచ్‌కు తరలి వచ్చారు. పోలీసులు బీచ్‌కు వచ్చే పర్యాటకులను సముద్రతీరానికి వెళ్లకుండా అడ్డుకున్నారు. ప్రధాన ద్వారాలను బారికేడ్లతో మూసివేశారు. సముద్రంలో స్నానాలు చేస్తున్న పర్యాటకులకు తుపాను హెచ్చరికలు తెలియజేస్తూ సముద్ర తీరం నుంచి బయటకు పంపే కార్యక్రమాలు చేపట్టారు.  తుపాను గమనం రోజురోజుకూ మారుతుండడంతో అధికారులు కూడా ఫొని తుపానుపై కచ్చితమైన సమాచారం ఇవ్వలేకపోతున్నారు. బుధవారం మధ్యాహ్నానికి స్పష్టత వచ్చే అవకాశం ఉందని కలెక్టరేట్‌ వర్గాలు తెలిపాయి. తుపాను ప్రభావంతో తీరప్రాంతాల్లో 60 నుంచి 70 కిలోమీటర్ల వేగంతో గాలులు వీచే అవకాశం ఉందని వాతావరణశాఖ అధికారులు పేర్కొంటున్నారు. తీరంలో అప్రమత్తత... గత మూడు రోజులుగా సముద్రంలో అలజడి పెరి గింది. జిల్లాలో తీరప్రాంత మండలాలుగా ఉన్న 14 మండలాల్లో అధికారులు అప్రమత్తమయ్యారు. స ముద్ర వేటపై ఆధారపడి జీవనం సాగిస్తున్న మత్స్యకారులు ప్రస్తుతం ఏప్రిల్‌ 15వ తేదీ నుంచి జూన్‌ 15వ తేదీ వరకు సముద్రంలో వేటపై నిషేధం ఉండటంతో సురక్షిత ప్రాంతాల్లోనే ఉన్నారు. గత మూడు రోజులుగా సముద్రంలో చోటుచేసుకుంటున్న మార్పుల నేపథ్యంలో పడవలు, వలలు తీరం నుంచి సురక్షిత ప్రాంతాలకు తరలించే చర్యలు మత్స్యకారులు చేపట్టారు. అలల తీవ్రత పెరిగి మూడు మీటర్ల ఎత్తులో ఎగిసి పడుతున్నాయి. జిల్లా కలెక్టర్‌ కార్తికేయ మిశ్రా ముందస్తు హెచ్చరికలతో తీరప్రాంత గ్రామాలను అప్రమత్తం చేశారు.  ప్రత్యేక అధికారులు తహసీల్దార్లతో తీరప్రాంత గ్రామాల పరిస్థితిని సమీక్షిస్తున్నారు. 39 నుంచి 40 డిగ్రీల వరకు ఉష్ణోగ్రత నమోదు కావడంతో వడగాలులు కూడా మొదలయ్యాయి. వేగం తగ్గిన ఫొని పయనం... బంగాళాఖాతంలో ఏర్పడ్డ ఫొని తుపాను వేగం తగ్గిందని కాకినాడ పోర్టు అధికారులు తెలిపారు. ఇది ఒడిశా వైపు పయనిస్తుందని, రాష్ట్రం మీదుగా పయనించే సమయంలో వర్షాలు కురిసే అవకాశం ఉందని చెబుతున్నారు. ఇది బుధ, గురువారాల్లో ఒడిశా తీరాన్ని తాకే అవకాశం ఉన్నట్టు తెలిపారు. నేడు, రేపు వర్ష సూచన... బుధ, గురువారాల్లో జిల్లాలో ఓ మోస్తరు వర్షాలు పడే అవకాశం ఉందని అధికారులు చెబుతున్నారు. జిల్లా కలెక్టర్‌ అధికారులతో టెలీ కాన్ఫరెన్స్‌ నిర్వహించి ముందస్తు హెచ్చరికలు జారీ చేస్తూ అధికారులను అప్రమత్తం చేస్తున్నారు. అవసరమైతే పోలీస్‌ శాఖ పరంగా తీసుకోవాల్సిన చర్యలపై జిల్లా ఎస్పీ విశాల్‌గున్ని పోలీస్‌ అధికారులతో మాట్లాడి సముద్రతీర ప్రాంతాల్లో మెరైన్‌ పోలీసులతో గస్తీ ముమ్మరం చేశారు. ఇదిలా ఉంటే రైతులు పండించిన పంట ను రక్షించుకునే చర్యలు ముమ్మరంగా చేపట్టారు. కళ్లాల్లోనే ధాన్యం ఉండిపోవడంతో వాటిని ఒబ్బిడి చేసుకునే పనిలో తలమునకలయ్యారు. వర్షాలు రాకపోతే వడగాలులు... తుపాను దిశను మార్చుకొని వేరే ప్రాంతానికి తరలితే జిల్లాలో బుధవారం నుంచి వడగాలులు వీచే అవకాశముందని, ఎవరికీ వడదెబ్బ తగలకుండా వైద్య ఆరోగ్యశాఖ, రెవెన్యూ అధికారులు సమన్వయంతో చర్యలు చేపట్టాలని కలెక్టర్‌ కార్తికేయ మిశ్రా ఆదేశించారు.

భువనేశ్వర్‌ : అతి తీవ్ర తుపానుగా మారిన ఫొని తీరం వైపు దూసుకొస్తోంది. గంటకు 200 కి.మీ వేగంతో శుక్రవారం గోపాల్‌పూర్‌-చాంద్‌బలి (ఒడిశా) దగ్గర తీరం దాటే అవకాశం వాతావరణ శాఖ (ఐఎండీ) వెల్లడించింది. 500 కి.మీ విస్తీర్ణంతో పూరీకి 680 కి.మీ, విశాఖకు 430 కి.మీ దూరంలో ఫొని కేంద్రీకృమై ఉందని ఐఎండీ తెలిపింది. భారీ తుపాను నేపథ్యంలో ఒడిశాలో హై అలర్ట్‌ ప్రకటించారు. టూరిస్టులందరూ పూరీ విడిచి వెళ్లాలని ఆదేశాలు జారీ చేశారు. ఇక గంటకు 22 కి.మీ వేగంతో కదులుతున్న ఫొని నేటి నుంచి దిశ మార్చుకుని పయనించే అవకాముందని ఐఎండీ అంచనా వేసింది.  (చదవండి : ‘ఫొని’ని ఎదుర్కొనేందుకు అప్రమత్తం) ఫొని ప్రభావంతో బంగాళాఖాతం అల్లకల్లోలంగా మారింది. తీర ప్రాంతాల్లో గంటకు 90 నుంచి 110 కి.మీ వేగంతో గాలులు వీస్తున్నాయి. జాలర్లు చేపట వేటకు వెళ్లరాదని హెచ్చరిక జారీ అయ్యాయి. శ్రీకాకుళం జిల్లా సోంపేట బారువ తీర ప్రాంతం ఉంచి ఎర్రముక్కం వరకు అలల ఉధృతి పెరిగింది. తీరంలో 10 నుంచి 20 మీటర్లు సముద్రం ముందుకొచ్చింది. తుపాను ప్రభావంతో రేపు, ఎల్లుండి శ్రీకాకుళం, విజయనగరం జిల్లాల్లో అతిభారీ వర్షాలు, విశాఖలో ఓ మోస్తరు వర్షాలు కురిసే అవకాశముందని వాతావరణ శాఖ వెల్లడించింది. ఒడిశాలో 20 సెం.మీ కంటే అధిక వర్షపాతం నమోదయ్యే అవకాశముందని, పశ్చిమ బంగలో భారీ వర్షాలు కురిసే అవకాశముందని తెలిపింది. బంగాళాఖాతం వేడెక్కడం వల్లే ఈ ఫొని పెనుతుపానుగా మారిందని ఐఎండీ ప్రకటించింది.  అప్‌డేట్స్‌ : తిత్లీని మించి.. ఫొని తుపాను తిత్లీ తుపాను కంటే ప్రమాదకరమైనదని ప్రాంతీయ వాతావరణ శాఖ డైరెక్టర్‌ హెచ్‌ బిశ్వాస్‌ అభిప్రాయపడ్డారు. గతేడాది ఉత్తరాంధ్ర, ఒడిశాపై తిత్లీ విరుచుకుపడడంతో 60 మందికి పైగా మృతిచెందిన సంగతి తెలిసిందే. ఎంసీసీ ఎత్తివేత : ‘ఫొని’ సహాయక చర్యలకు ఆటంకాలు కలగకుండా ఎన్నికల కమిషన్‌ చర్యలు చేపట్టింది. ఒడిశా తీర ప్రాంత జిల్లాల్లో ఎన్నికల కోడ్‌ (ఎంసీసీ)ను ఎత్తేసింది. సీఎస్‌ ఎల్వీ సుబ్రహ్మణ్యం సమీక్ష : ఫొని తుపాను సహాయక చర్యలపై సీఎస్‌ ఎల్వీ సుబ్రహ్మణ్యం సమీక్ష నిర్వహించారు. శ్రీకాకుళం, విజయనగరం, విశాఖ కలెక్టర్లతో వీడియో కాన్ఫరెన్స్‌లో మాట్లాడారు. గండ్లు పడే చోట పునర్నిర్మాణం చేపట్టాలని సీఎస్‌ ఆదేశాలు జారీ చేశారు. శ్రీకాకుళం జిల్లా కలెక్టర్‌ జె.శ్రీనివాస్‌ సమీక్ష : రేపు, ఎల్లుండి జిల్లా వ్యాప్తంగా... భారీ ఉంచి అతిభారీ వర్షాలు కురిసే సూచనలున్నాయి. గంటలకు 100-120 కి.మీ వేంగంతో గాలులు వీచే అవకాశముంది. ‘ఫొని’తో అరటి, కొబ్బరి ఉద్యానవన పంటలకు తీవ్ర నష్టం కలగనుంది. వీలైనంత త్వరగా కోతకోసి పంటలను భద్రపరచుకోవాలి. ఐదు ఎన్‌డీఆర్‌ఎఫ్‌ బృందాలను సిద్ధంగా ఉంచాం. అధికారుల సెలవున్నింటినీ రద్దు చేశాం. 6 వేల ఎలక్ట్రికల్‌ పోల్స్‌ సిద్ధంగా ఉంచాం. కమ్యునికేషన్‌ సిబ్బందిని కూడా అలర్ట్‌ చేశాం. 48 పునరావాస కేంద్రాలను ఏర్పాటు చేశాం. విశాఖ కలెక్టర్‌ కాటమనేని భాస్కర్‌ సమీక్ష :  ఫొని తుపాన్‌ను ఎదుర్కోవడానికి యంత్రాంగం సిద్ధంగా ఉంది. రేపటి నుంచి 65 గ్రామాల్లో పునరావసం ఏర్పాటు చేస్తాం. విద్యుత్‌ సరఫరాకు అంతరాయం కలగకుండా జాగ్రత్తలు తీసుకున్నాం.

ప్రళయ భీకర గాలులు.. వాటి ధాటికి చిగురుటాకుల్లా వణికిపోయిన కట్టడాలు, వృక్షరాజాలు.. విద్యుత్, రవాణా వ్యవస్థల విచ్ఛిన్నం.. రోజుల తరబడి జనజీవనం చిన్నాభిన్నం.. ఆ చేదు జ్ఞాపకాలు.. ఆ చీకటి రోజులు.. ఐదేళ్ల క్రితం హుద్‌హుద్‌ మిగిల్చిన గాయాలు.. ఇంకా ప్రజల్లో స్మృతిపథంలో పచ్చిగానే ఉన్నాయి..ఇంతలోనే మరో పెనుముప్పు ఫొని రూపంలో కమ్ముకొస్తోందని.. నాటి హుద్‌హుద్‌ కంటే దీన్ని తీవ్రత ఎక్కువేనన్న వాతావరణ శాఖ హెచ్చరికలు విశాఖవాసులను బెంబేలెత్తిస్తున్నాయి. తీరానికి సమీపిస్తున్న కొద్దీ ఫొని తుపాను ప్రభావంతో 175 నుంచి 200 కి.మీ. వేగంతో భీకర గాలులు వీస్తాయని.. భారీ నుంచి అతి భారీ వర్షాలు కురుస్తాయని.. తీవ్రస్థాయిలో విధ్వంసం జరగవచ్చని అధికారులు హెచ్చరిస్తున్నారు.అందుకు తగినట్లే తీరగ్రామాలను అప్రమత్తం చేస్తున్నారు. అధికారులు, ఉద్యోగుల సెలవులు రద్దు చేశారు. మండలాలవారీగా తక్షణ సమాచారం కోసం టోల్‌ఫ్రీ నెంబర్లతో కాల్‌సెంటర్లు ఏర్పాటు చేశారు. నిత్యావసరం, ఇతర అత్యవసర వస్తువులను సిద్ధం చేస్తున్నారు. తక్షణం రంగంలోకి దిగేందుకు వీలుగా తూర్పు నావికాదళం అధికారులు, ఎన్డీఆర్‌ఎఫ్‌ బృందాలు సిద్ధమవుతున్నాయి. ఇన్ని జాగ్రత్తలు తీసుకుంటున్నా.. ఎంత నష్టం, కష్టం వాటిల్లుతుందోనని ప్రజలు గుబులు చెందుతున్నారు.మరోవైపు ప్రస్తుత అంచనాల ప్రకారం.. విశాఖకు సుమారు 500 కి.మీ. దూరంలో ఉన్న తుపాను.. రెండు, మూడు తేదీల్లో ఉత్తరాంధ్రపై తీవ్ర ప్రభావం చూపి ఒడిశా వైపు సాగిపోతుందని.. ఆ రాష్ట్రంలోని గోపాల్‌పూర్‌–చాంద్‌బలి మధ్య 4వ తేదీన తీరాన్ని తాకుతుందంటున్నారు. ఇదే నిజమవ్వాలని.. పెద్ద నష్టం కలిగించకుండానే ఫొని తుపానును అలా ముందుకే సాగిపోనీ.. అని మనసులో దేవుడ్ని మొక్కుకుంటున్నారు. –సాక్షి ప్రతినిధి, విశాఖపట్నం సాక్షి, విశాఖపట్నం: ఫొని పెను తుపాను ఉత్తరాంధ్ర వైపు దూసుకొస్తోంది. తీరానికి చేరువలోకి వచ్చే సరికి గంటకు 200 కిలోమీటర్లకు పైగా వేగంతో పెనుగాలులు వీయనున్నాయని వాతావరణ శాఖ ఇప్పటికే ప్రకటించింది. సాధారణంగా 100 కిలోమీటర్ల గాలి వేగానికే చెట్లు, విద్యుత్‌ స్తంభాలు నేలకూలతాయి. అలాంటిది అంతకు రెట్టింపు వేగంతో గాలులు వీస్తాయన్న హెచ్చరికలు అందరినీ కలవరపెడుతున్నాయి. ఈ పెను తుపాను ఒడిశాలోని పూరీకి సమీపంలో ఈనెల 3న తీరాన్ని దాటనుంది. దాని ప్రభావం ఉత్తరాంధ్రలో విశాఖపట్నం, విజయనగరం, శ్రీకాకుళం జిల్లాలపై పడనుంది. ప్రధానంగా విశాఖపట్నంకంటే విజయనగరం, శ్రీకాకుళం జిల్లాల్లో భారీ వర్షాలతో పాటు పెనుగాలులు విధ్వంసం సృష్టించవచ్చని వాతావరణ నిపుణులు హెచ్చరిస్తున్నారు. ఈ నేపథ్యంలో పెను తుపాను వేళ ప్రజలు ఎలా అప్రమత్తంగా ఉండాలో నేషనల్‌ డిజాస్టర్‌ మేనేజిమెంట్‌ అథారిటీ సూచించింది. తుపానుకు ముందు, తుపాను సమయం, తుపాను తర్వాత తీసుకోవలసి జాగ్రత్తలను వివరించింది. తుపానుకు ముందు.. ♦ నిత్యావసర వస్తువులను సమకూర్చుకోవాలి. ♦ పాలు, మందులు, తాగునీరు భద్రపరచుకోవాలి ♦ మీ మొబైల్‌ ఫోన్లకు చార్జింగ్‌ పెట్టుకోవాలి ♦ రేడియో, టీవీల్లో సమాచారాన్ని ఎప్పటికప్పుడు తెలుసుకోవాలి ♦ ముఖ్యమైన పత్రాలు, దస్త్రాలు తడిసిపోకుండా భద్రపరచుకోవాలి ♦ పదునైనా వస్తువులను బయట ఉంచకండి ♦ పెంపుడు జంతువులకు రక్షణ కల్పించండి తుపాను సమయంలో.. ♦ విద్యుత్‌ మెయిన్‌ను, గ్యాస్‌ సరఫరాను తొలగించండి ♦ తలుపులు, కిటికీలను మూసివేయాలి ♦ మీరుండే ఇల్లు సురక్షితం కాకపోతే మరో చోటకు వెళ్లిపోవాలి ♦ రేడియో/టీవీల ద్వారా సమాచారం తెలుసుకోవాలి ♦ వేడిచేసిన/శుద్ధిచేసిన నీటిని మాత్రమే తాగాలి తుపాను తర్వాత.. ♦ దెబ్బతిన్న, శిథిలమైన ఇళ్లు/భవనాల్లోకి వెళ్లకూడదు ♦ దెబ్బతిన్న విద్యుత్‌ స్తంభాలు, వైర్లకు దూరంగా ఉండాలి. ♦ సాధ్యమైనంత వరకు సురక్షిత షెల్టర్లలోనే ఉండాలి మత్స్యకారులకు.. ♦ రేడియో సెట్లకు అదనపు బ్యాటరీలను సమకూర్చుకోవాలి. ♦ పడవలు/బోట్లను సురక్షిత ప్రాంతంలో ఉంచుకోవాలి ♦ తుపాను తీవ్రత పూర్తిగా తగ్గేవరకు వేట మానుకోవాలి సహాయ చర్యలకు తూర్పు నౌకాదళం సన్నద్ధం విశాఖసిటీ: తీర ప్రాంతాలపై విరుచుకుపడనున్న ఫొని తుఫాను రక్షణ చర్యల్లో పాల్గొనేందుకు తమ బృందాలు సిద్ధంగా ఉన్నాయని తూర్పు నౌకాదళం మంగళవారం ప్రకటించింది. తుపాను బాధిత ప్రాంతాల్లో ప్రజలకు పూర్తిస్థాయి సహాయ సహకారాలు అందించడంతో పాటు వైద్య సదుపాయాల వంటి లాజిస్టిక్‌ సపోర్ట్‌ అందించేందుకు భారత నౌకాదళం అప్రమత్తంగా ఉందని వెల్లడించింది. అత్యంత ప్రభావిత ప్రాంతాలకు వెళ్లి సహాయక చర్యల్లో పాల్గొనేందుకు భారత యుద్ధ నౌకలు విశాఖపట్నం, చెన్నై తీరాల్లో సన్నద్ధంగా ఉన్నాయని నౌకాదళాధికారులు తెలిపారు. అదనపు గజఈతగాళ్లు, వైద్యులు, రబ్బరు పడవలు, ఆహార పదార్థాలు, తాత్కాలిక వస్తువులు, దుస్తులు, మందులు, దుప్పట్లు వంటి వాటిని అవసరమైన మేరకు అందించేందుకు సిద్ధం చేశామన్నారు. విశాఖలోని ఐఎన్‌ఎస్‌ డేగాతో పాటు తమిళనాడు అరక్కోణంలో ఉన్న ఐఎన్‌ఎస్‌ రాజాలి నేవల్‌ ఎయిర్‌ స్టేషన్లలో ఎయిర్‌ క్రాఫ్ట్‌లను కూడా సిద్ధంగా ఉంచామని వెల్లడించారు. అంతే కాకుండా జెమిని బోట్లతో పాటు డైవింగ్‌ సిబ్బందితో కూడిన బృందాలు ఇప్పటికే మోహరించాయని వివరించారు. తుఫాను తీవ్రత మొదలైన క్షణం నుంచి సహాయక చర్యలకు ఉపక్రమించేందుకు సిద్ధం చేసినట్లు వివరించారు. సహాయక చర్యలు ముమ్మరం చేయడంతో పాటు వాటిని ఎలా అభివృద్ధి చెయ్యాలనే విషయాలపై తూర్పు నౌకాదళం ప్రత్యేకంగా ఎప్పటికప్పుడు పర్యవేక్షిస్తుంటుందని నౌకాదళాధికారులు స్పష్టం చేశారు. 

సాక్షి, అమరావతి: ‘ఫొని’ తుపానును ఎదుర్కొనేందుకు శ్రీకాకుళం, విజయనగరం జిల్లాల యంత్రాంగాలను పూర్తి స్థాయిలో అప్రమత్తం చేసినట్టు రాష్ట్ర ప్రభుత్వ ప్రధాన కార్యదర్శి ఎల్వీ సుబ్రహ్మణ్యం చెప్పారు. ఫొని తుపాను ముప్పు పరిస్థితులపై కేంద్ర కేబినెట్‌ కార్యదర్శి ప్రదీప్‌ కుమార్‌ సిన్హా మంగళవారం ఢిల్లీ నుండి పుదుచ్చేరి, తమిళనాడు, ఆంధ్రప్రదేశ్, ఒడిశా, పశ్చిమ బెంగాల్‌ రాష్ట్రాల ప్రభుత్వ ప్రధాన కార్యదర్శులతో సమీక్షించారు. తుపాను ప్రభావం మే 2, 3 తేదీల్లో ఒడిశా, పశ్చిమబెంగాల్‌ రాష్ట్రాలపై ఎక్కువగా ఉంటుందని, అలాగే ఆంధ్రప్రదేశ్‌ రాష్ట్రంలోని శ్రీకాకుళం, విజయనగరం జిల్లాలపై దీని ప్రభావం ఉంటుందని కేబినెట్‌ కార్యదర్శి పీకే సిన్హా సమీక్ష సమావేశంలో వివరించారు. ఆయా రాష్ట్రాల యంత్రాంగం పూర్తి అప్రమత్తంగా ఉండాలని.. విద్యుత్, టెలికం సేవలకు అంతరాయం కలిగితే వెంటనే పునరుద్ధరించేలా తగిన ముందస్తు ఏర్పాట్లు చేసుకోవాలని రాష్ట్రాలను ఆదేశించారు. తుపాన్‌ ప్రభావిత ప్రాంతాల్లో తాగునీటికి ఇబ్బందులు కలిగితే తక్షణ నీటి సరఫరా ఏర్పాట్లు చేసేందుకు తగిన స్టాండ్‌ బై జనరేటర్లను సిద్ధంగా ఉంచుకోవాలని చెప్పారు. ఆయా రాష్ట్రాల్లో సేవలందించేందుకు ఎన్డీఆర్‌ఎఫ్, కోస్టుగార్డు, షిప్పింగ్, టెలికం సంస్థలు పూర్తిగా సిద్ధంగా ఉండాలని కేబినెట్‌ కార్యదర్శి సిన్హా ఆదేశించారు. అంతకు ముందు ప్రభుత్వ ప్రధాన కార్యదర్శి ఎల్వీ సుబ్రహ్మణ్యం మాట్లాడుతూ తుపాను ప్రభావం ఉండే శ్రీకాకుళం, విజయనగరం జిల్లాలకు మెన్‌ అండ్‌ మెటీరియల్‌ను తరలించి పూర్తి సన్నద్ధతో ఉన్నామని కేబినెట్‌ కార్యదర్శి పీకే సిన్హాకు వివరించారు. తుపాను ప్రభావంతో మే 3, 4 తేదీల్లో శ్రీకాకుళం, విజయనగరం జిల్లాల్లో 13 సెం.మీ.ల వరకూ వర్షపాతం నమోదు అయ్యే అవకాశాలున్నాయని తెలిపారు. శ్రీకాకుళం జిల్లాలోని వంశధార, నాగావళి నదులు వాటి పరివాహక ప్రాంతాల్లోని మైనర్‌ ఇరిగేషన్‌ చెరువులకు గండ్లు పడే అవకాశం ఉందని అలాంటి చోట్ల పూర్తి అప్రమత్తతో ఉండాలని ఇప్పటికే జిల్లా కలెక్టర్, పంచాయితీరాజ్, గ్రామీణాభివృద్ధి తదితర శాఖల అధికారులకు ఆదేశాలు జారీ చేశామని చెప్పారు. అవసరమైన ఇసుక బస్తాలను సిద్ధంగా ఉంచాలని ఆదేశాలు జారీ చేశామన్నారు. అలాగే రోడ్ల వెంబడి చెట్లుపడి రవాణాకు అంతరాయం కలిగితే వెంటనే తొలగించేందుకు వీలుగా ఏర్పాట్లు చేసినట్లు సీఎస్‌ పేర్కొన్నారు. తుపాను ప్రభావంతో రైళ్ల రాకపోకలకు ఆటంకం కలిగి కొన్ని రైళ్లు నిర్దేశిత స్టేషన్లకు చేరేందుకు చాలా ఆలస్యం కావడం లేదా చిన్న చిన్న స్టేషన్లలో గంటల తరబడి నిలిచిపోవడం జరుగుతుందన్నారు. అలాంటి సమయంలో ప్రయాణికులు తాగునీరు, ఆహారానికి ఇబ్బందులు లేకుండా ఏర్పాట్లు చేసేలా రైల్వే బోర్డుకు తగిన ఆదేశాలు జారీ చేయాలని సీఎస్‌ కేబినెట్‌ కార్యదర్శి పీకే సిన్హాకు సూచించారు.

సాక్షి, విశాఖపట్నం: ఫొని తుపాను మరింత దూకుడు పెంచింది. అతి తీవ్ర తుపాను నుంచి పెను తుపానుగా మారి ఒడిశా వైపు దూసుకుపోతోంది. గంటకు 6–12 కిలోమీటర్ల వేగంతో సోమవారం వరకు పయనిం చిన ‘ఫొని’ మంగళవారం రెట్టింపు వేగంతో (22 కి.మీలు) కదులుతోంది. విశాఖకు దక్షిణ, ఆగ్నేయ దిశగా 510 కి.మీ.ల దూరంలో, ఒడిశాలోని పూరీకి దక్షిణ నైరుతి దిశగా 730 కిలోమీటర్ల దూరంలోనూ మంగళవారం రాత్రి కేంద్రీకృతమై ఉంది. ఈ తుపాను ప్రస్తుతం నైరుతి బంగాళాఖాతంలో పశ్చిమ మధ్య, ఆగ్నేయ బంగాళాఖాతానికి ఆనుకుని కొనసాగుతోంది. వాయవ్య దిశగా పయనిస్తున్న ఈ పెను తుపాను బుధవారం ఉదయానికి మలుపు (రికర్వ్‌) తిరిగి ఉత్తర ఈశాన్య దిశ వైపు పయనించనుంది. క్రమంగా అదే దిశలో కదులుతూ ఒడిశాలోని గోపాల్‌పూర్‌–చాంద్‌బాలీల మధ్య దక్షిణ పూరీకి సమీపంలో మూడో తేదీ మధ్యాహ్నం పెను తుపానుగానే తీరాన్ని దాటుతుందని భారత వాతావరణ విభాగం (ఐఎండీ) మంగళవారం రాత్రి విడుదల చేసిన ప్రత్యేక బులెటిన్‌లో వెల్లడించింది. అనంతరం క్రమంగా పశ్చిమ బెంగాల్‌ మీదుగా పయనించి బంగ్లాదేశ్‌లో మే 5న వాయుగుండంగా బలహీనపడనుందని వివరించింది. తుపాను తీరాన్ని దాటే సమయంలో గంటకు 205 కిలోమీటర్ల వేగంతో బలమైన పెనుగాలులు వీస్తాయని తెలిపింది. బుధ, గురు, శుక్రవారాల్లో పశ్చిమ మధ్య, నైరుతి బంగాళాఖాతంలో తమిళనాడు, పుదుచ్చేరి, దక్షిణ కోస్తాంధ్ర, ఉత్తర కోస్తాంధ్రల తీరాలకు ఆనుకుని గంటకు 165–195 కిలోమీటర్ల వేగంతో పెనుగాలుల ఉధృతి ఉంటుందని పేర్కొంది. అదే సమయంలో బుధ, గురువారాల్లో ఉత్తర కోస్తాంధ్రలో గంటకు 60, శుక్ర, శనివారాల్లో 85–115 కిలోమీటర్ల వేగంతో గాలులు వీస్తాయి. రానున్న మూడు రోజులు ఒడిశా, పశ్చిమ బెంగాల్‌ రాష్ట్రాల్లోని తీరప్రాంతాల్లో గంటకు 170–200 కిలోమీటర్ల వేగంతో పెనుగాలులు విధ్వంసం సృష్టించనున్నాయి. కాగా, గురువారం శ్రీకాకుళం, విజయనగరం, విశాఖపట్నం, ఉభయగోదావరి, కృష్ణా, గుంటూరు జిల్లాల్లో అక్కడక్కడ భారీ వర్షాలు, శుక్రవారం శ్రీకాకుళం, విజయనగరం, విశాఖపట్నం జిల్లాల్లో కొన్నిచోట్ల భారీ నుంచి అతిభారీ వర్షాలు కురిసే అవకాశం ఉంది. ఒడిశాలో అతిభారీ వర్షాలు (20 సెం.మీలకు పైగా) కురవనున్నాయి. తుపాను గాలుల ధాటికి చెట్లు, విద్యుత్‌ స్తంభాలు, ఇళ్లు కూలిపోయే అవకాశం ఉంది. లోతట్టు ప్రాంతాల ప్రజలు అప్రమత్తంగా ఉండాలని ఐఎండీ హెచ్చరించింది. పెను తుపాను ఏకంగా నాలుగు రోజుల పాటు (ఈనెల 3 వరకు) కొనసాగుతుండడంవల్ల నష్ట తీవ్రత ఎక్కువగా ఉండవచ్చని వాతావరణ నిపుణులు అంచనా వేస్తున్నారు.  విజయనగరం, శ్రీకాకుళం జిల్లాలకు ముప్పు! ఫొని పెను తుపాను ఉత్తరాంధ్రలోని విజయనగరం, శ్రీకాకుళం జిల్లాలపై ప్రభావం చూపనుందని ఐఎండీ తెలిపింది. గురు, శుక్రవారాల్లో ఈ రెండు జిల్లాల్లో పెనుగాలుల ఉధృతితో పాటు భారీ వర్షాలు కురుస్తాయని పేర్కొంది. ఈనెల 4 వరకు తుపాను ప్రభావం ఉత్తరాంధ్రపై ఉంటుందని వివరించింది.  అల్లకల్లోలంగా సముద్రం పెను తుపాను ప్రభావంతో సముద్రం తీవ్ర అల్లకల్లోలంగా మారుతుంది. కెరటాలు ఉవ్వెత్తున ఎగసిపడనున్నాయి. మత్స్యకారులు చేపల వేటకు వెళ్లవద్దని, తమ బోట్లను సురక్షితంగా ఉండేలా ఏర్పాట్లు చేసుకోవాలని ఐఎండీ సూచించింది. మరోవైపు.. పెను తుపాను తీవ్రత దృష్ట్యా విశాఖపట్నం, మచిలీపట్నం, నిజాంపట్నం, కృష్ణపట్నం పోర్టుల్లో రెండో నంబరు, కాకినాడలో 4, గంగవరం పోర్టులో 5వ నంబరు ప్రమాద హెచ్చరికను జారీచేశారు. 

సాక్షి, అమరావతి : అతి తీవ్ర తుపానుగా మారిన ఫొని తీరం వైపు దూసుకోస్తుంది. ఒడిశాలోని పూరీకి నైరుతి దిశగా 830 కి.మీల దూరంలో.. విశాఖకు దక్షిణ ఆగ్నేయంగా 670 కి.మీల దూరంలో ఫొని పెను తుపాను కేంద్రీకృతమై ఉన్నట్టు అధికారులు వెల్లడించారు. మరో 12 గంటల్లో ఫొని తీవ్ర పెను తుపానుగా మారనుంది. ఈశాన్య దిశగా కదులుతూ దిశ మార్చుకొని ఒడిశా తీరం వైపు తరలనుంది. ఫొని తుపాను మే 3 మధ్యాహ్నానికి ఒడిశా తీరానికి చేరుకుంటుందని వాతావరణ శాఖ ప్రకటించింది. తుపాను కదులుతున్న మార్గంలో గంటకు 170 నుంచి 200 కిలో మీటర్ల వేగంతో పెను గాలులు వీస్తాయని అధికారులు పేర్కొంటున్నారు.  అయితే, ఫొని ప్రభావంతో ఆంధ్రప్రదేశ్‌లోని వివిధ ఓడరేవుల్లో ప్రమాద హెచ్చరికలు జారీచేశారు అధికారులు. కాకినాడ, గంగవరం పోర్టుల్లో ఐదో నంబర్ ప్రమాద హెచ్చరికను జారీ చేయగా.. విశాఖపట్నం, మచిలీపట్నం, కృష్ణపట్నం, నిజాంపట్నం పోర్టుల్లో రెండో నంబర్ ప్రమాద హెచ్చరికలు జారీ చేశారు. కేబినేట్‌ కార్యదర్శి సమీక్ష ఫొని తుపానుపై కేబినేట్‌ కార్యదర్శి ప్రదీప్‌ కుమార్‌ సిన్హా.. ఆయా రాష్ట్రాల ప్రభుత్వ ప్రధాన కార్యదర్శులతో పరిస్థితిని సమీక్షించారు. మే 2, 3 తేదీల్లో​ ఫొని ప్రభావం ఆంధ్రప్రదేశ్‌లోని శ్రీకాకుళం, విజయనగరం జిల్లాలపై ఉంటుందని తెలిపారు. తుపాను ప్రభావంతో రైళ్ల రాకపోకలకు ఆటంకం కలిగి నిలిచిపోయే అవకాశం ఉందన్నారు. ప్రయాణీకులకు ఇబ్బందులు ఎదురవ్వకుండా నీరు, ఆహారం అందించేందుకు రైల్వే బోర్టుకు తగిన ఆదేశాలు జారీ చేయాలని సీఎస్‌ ఎల్వీ సుబ్రహ్మణ్యం తెలిపారు.

సాక్షి, విశాఖపట్నం: ఊహించినట్టుగానే ‘ఫొని’ తుపాను తీవ్రరూపం దాల్చింది. అతి తీవ్ర తుపానుగా మారి ఉత్తర కోస్తాంధ్ర తీరం సమీపం నుంచి ఒడిశా వైపు దూసుకెళ్తోంది. గంటకు 16 కిలోమీటర్ల వేగంతో పెను విధ్వంసం సృష్టించే దిశగా పయనిస్తోంది. ఆగ్నేయ బంగాళాఖాతంలో కొనసాగుతున్న తుపాను సోమవారం సాయంత్రానికి తీవ్ర తుపానుగా మారింది. ఇది చెన్నైకి తూర్పు ఆగ్నేయంగా 690, మచిలీపట్నానికి దక్షిణ ఆగ్నేయంగా 760 కిలోమీటర్ల దూరంలోనూ కేంద్రీకృతమై ఉంది. మంగళవారం నాటికి అతి తీవ్ర తుపానుగా మారనుంది. ఒకటో తేదీ వరకు వాయవ్య దిశగా పయనిస్తూ పెను తుపాను (సూపర్‌ సైక్లోన్‌)గా బలపడనుంది. అనంతరం ఉత్తర వాయవ్య దిశగా మలుపు తిరిగి ఒడిశా తీరం వైపుగా కదులుతోంది. పెను తుపాను ఒకటో తేదీ నుంచి నాలుగో తేదీ వరకు అదే తీవ్రతతో కొనసాగనుంది. ఇదే ఇప్పుడు అందరిలోనూ తీవ్ర ఆందోళనను రేపుతోంది. బంగాళాఖాతంలో మంగళవారం గంటకు 135 నుంచి 160, బుధవారం నుంచి శుక్రవారం (3వ తేదీ) వరకు 160–200 కిలోమీటర్లు, 4వ తేదీన 150–190 కిలోమీటర్ల వేగంతో పెనుగాలులు వీయనున్నాయి. ఒకటి, రెండు తేదీల్లో ఉత్తరాంధ్ర, ఒడిశాల్లో గంటకు 60–85 కిలోమీటర్ల వేగంతో ఈదురుగాలులు వీస్తాయి. ఈ ఫొని తుపాను ప్రభావం ఉత్తరాంధ్రపై అధికంగా ఉండనుంది. మంగళ, బుధవారాల్లో ఉత్తర తమిళనాడు, దక్షిణ కోస్తాంధ్రలో కొన్నిచోట్ల, గురువారం నుంచి ఒడిశా, ఉత్తరాంధ్రల్లో భారీ నుంచి అతిభారీ వర్షాలు కురుస్తాయని భారత వాతావరణ విభాగం సోమవారం రాత్రి విడుదల చేసిన ప్రత్యేక బులెటిన్‌లో వెల్లడించింది. మంగళవారం శ్రీకాకుళం, విజయనగరం, విశాఖపట్నం, ఉభయగోదావరి జిల్లాల్లో ఉరుములు, మెరుపులతో కూడిన వర్షాలు కురవనున్నాయి. మే 4వ తేదీ వరకు పెనుగాలుల ధాటికి సముద్రం అల్లకల్లోలంగా మారనుంది. అలలు ఉవ్వెత్తున ఎగసిపడనున్నాయి. అందువల్ల మత్స్యకారులు సముద్రంలో చేపల వేటకు వెళ్లరాదని ఐఎండీ హెచ్చరించింది. విశాఖపట్నం, మచిలీపట్నం, కృష్ణపట్నం, నిజాంపట్నం పోర్టుల్లో రెండో నంబరు, కాకినాడ, గంగవరం పోర్టుల్లో ఐదో నంబరు ప్రమాద హెచ్చరికను జారీచేశారు. ఎన్డీఆర్‌ఎఫ్‌, నేవీ కూడా హై అలర్ట్‌ ప్రకటించాయి. సుదీర్ఘ తుపాను.. ఫొని తుపాను ఎన్నో మలుపులు తిరుగుతోంది. ఇది తీవ్రరూపం దాల్చడమే కాదు.. దీని వేగం రోజుకో విధంగా ఉంటోంది. నెమ్మది నెమ్మదిగా కదులుతూ మరింత బలం పుంజుకుంటోంది. ఎక్కువ రోజులు సముద్రంలోనే ఉంటూ రోజురోజుకు తీవ్రతను పెంచుకుంటోంది. దాదాపు పది రోజులపాటు కొనసాగుతూ అరుదైన తుపానుగా ప్రత్యేకతను సంతరించుకుంటోంది. సాధారణంగా అల్పపీడనం ఏర్పడ్డాక వాయుగుండం, తీవ్ర వాయుగుండం, తుపాను, తీవ్ర తుపానుగాను బలపడుతూ తీరాన్ని దాటతాయి. కానీ, ఈ ఫొని తుపాను అల్పపీడనంగా ఏర్పడిన రెండు రోజుకే తుపానుగా మారి వారం రోజుల పాటు బంగాళాఖాతంలోనే వివిధ రూపాలు మార్చుకుంటూ, బలం పెంచుకుంటూ సూపర్‌ సైక్లోన్‌ స్థాయికి చేరుకుంటోంది. ఇలాంటి తుపానులు అత్యంత అరుదని, ఇటీవల కాలంలో ఇంత సుదీర్ఘంగా కొనసాగిన తుపానులు లేవని వాతావరణ నిపుణులు చెబుతున్నారు. కోస్తా అంతటా అప్రమత్తం: ఎల్వీ అంతకు ముందు సీఎస్‌ ఎల్వీ సుబ్రహ్మణ్యం మాట్లాడుతూ.. తుపాను ఎదుర్కొనేందుకు తీసుకున్న ముందు జాగ్రత్త చర్యలను వివరించారు. ఇప్పటికే అందరు కోస్తా తీరప్రాంత జిల్లాల కలెక్టర్లకు తగిన ఆదేశాలు జారీచేశామని ఆయన తెలిపారు. ఎన్డీఆర్‌ఎఫ్, ఎస్డీఆర్‌ఎఫ్, ఆర్మీ, నేవీ, కోస్టుగార్డు, ఫైర్‌ సర్వీసెస్‌ తదితర ఏజెన్సీలను అప్రమత్తం చేశామన్నారు. తుపాను సమాచారాన్ని ఎప్పటికప్పుడు వాట్సప్, ఐవీఆర్‌ఎస్‌ ద్వారా కూడా తెలియబరుస్తున్నామని సీఎస్‌ వివరించారు. కాగా, రాష్ట్రానికి ఎన్డీఆర్‌ఎఫ్‌ కింద.. కరువు సహాయ చర్యల కింద రూ.500 కోట్లు కేంద్రం నుంచి రావాల్సి ఉందని, ఎన్నికల నియామవళితో ఆ నిధులు రాలేదని సీఎస్‌ చెప్పగా దానికి ఎన్నికల నియామవళి అడ్డురాదని ఆ నిధులు కేంద్రం నుంచి విడుదల అవుతాయని కేబినెట్‌ కార్యదర్శి సిన్హా చెప్పారు. తుపానును ఎదుర్కొనేందుకు సర్వసన్నద్ధం నాలుగు రాష్ట్రాల సీఎస్‌లతో కేంద్ర కేబినెట్‌ కార్యదర్శి సిన్హా సమీక్ష సాక్షి, అమరావతి : బంగాళాఖాతంలో ఏర్పడిన ‘ఫొని’ తుపానును ఎదుర్కొనేందుకు అన్ని విధాలా సర్వసన్నద్ధంగా ఉన్నామని ప్రభుత్వ ప్రధాన కార్యదర్శి ఎల్వీ సుబ్రహ్మణ్యం కేంద్ర కేబినెట్‌ కార్యదర్శి ప్రదీప్‌కుమార్‌ సిన్హాకు వివరించారు. ఈ తుపానును ఎదుర్కొనేందుకు తమిళనాడు, ఆంధ్రప్రదేశ్, ఒడిశా, పశ్చిమ బెంగాల్‌ రాష్ట్రాలు తీసుకున్న ముందు జాగ్రత్త చర్యలపై సిన్హా ఆయా రాష్ట్ర ప్రభుత్వ ప్రధాన కార్యదర్శులతో సోమవారం ఢిల్లీ నుంచి వీడియో సమావేశం ద్వారా సమీక్షించారు. ఎలాంటి పరిస్థితినైనా ఎదుర్కొనేందుకు పూర్తి కార్యాచరణ ప్రణాళికలతో అన్ని విధాలా సన్నద్ధమై ఉండాలని, కేంద్రం నుంచి అవసరమైన సహాయ సహకారాలను అందించేందుకు సిద్ధంగా ఉన్నామని సిన్హా భరోసా ఇచ్చారు. ఈ తుపాను మరో 24 గంటల్లో అతి తీవ్ర తుపానుగా రూపాంతరం చెందే అవకాశం ఉందని భారత వాతావరణ శాఖ నిపుణులు హెచ్చరిస్తున్నందున తమిళనాడు నుంచి పశ్చిమ బెంగాల్‌ వరకు గల నాలుగు తీరప్రాంత రాష్ట్రాల యంత్రాంగం పూర్తిగా అప్రమత్తంగా ఉండాలని, మత్య్సకారులు ఎవ్వరూ సముద్రంలో చేపల వేటకు వెళ్లకుండా చర్యలు తీసుకోవాలని ఆయన ఆదేశించారు. ఇప్పటికే వేటకు వెళ్లి ఉంటే వారిని తిరిగి తీరానికి చేరుకునేలా ఏర్పాట్లు చేయాలన్నారు. 

సాక్షి, విశాఖపట్నం: ఆగ్నేయ బంగాళాఖాతంలో కొనసాగుతున్న ‘ఫొని’ తుపాన్‌ ఉత్తర కోస్తా వైపు దూసుకోస్తుంది. మే 2 నుంచి ఫొని ఉత్తరాంధ్రపై ప్రభావం చూపనుందని విశాఖ వాతావరణ కేంద్రం తెలిపింది. ప్రస్తుతం చెన్నైకి తూర్పు ఆగ్నేయంగా 840 కి.మీ దూరంలో, మచిలీపట్నానికి 990 కి.మీ దూరంలో తుపాన్‌ కేంద్రీకృతమై ఉంది. ఫొని మంగళవారం లేదా బుధవారం అతి తీవ్ర తుపాన్‌గా మారనుంది. తుపాన్‌ ప్రభావంతో దక్షిణ కోస్తాలో మంగళవారం నుంచి తేలికపాటి వర్షాలు కురవనున్నాయి. మే 3వ తేదీ నుంచి ఉత్తరాంధ్రలో భారీ నుంచి అతి భారీ వర్షాలు కురవనున్నట్టు అధికారులు అంచనా వేస్తున్నారు. కోస్తా తీరం వెంబడి గంటకు 45 నుంచి 50 కి.మీ వేగంతో బలమైన గాలులు వీచే అవకాశం ఉంది. దీంతో అధికారులు అన్ని ప్రధాన పోర్టులో రెండో నెంబర్‌ ప్రమాద హెచ్చరిక జారీచేశారు.

సాక్షి, విశాఖపట్నం: ఫొని తుపాను అంతకంతకు తీవ్రరూపం దాలుస్తోంది. రోజురోజుకు ఉధృతమవుతోంది. ఊహించిన విధంగానే సూపర్‌ సైక్లోన్‌గా మారనుంది. ఆగ్నేయ బంగాళాఖాతంలో కొనసాగుతున్న తుపాను వాయవ్య దిశగా గంటకు 21 కిలోమీటర్ల వేగంతో కదులుతోంది. ఆదివారం రాత్రికి చెన్నైకి ఆగ్నేయంగా 910, మచిలీపట్నానికి దక్షిణ ఆగ్నేయంగా 1090 కిలోమీటర్ల దూరంలోనూ కేంద్రీకృతమై ఉంది. ఆదివారం అర్ధరాత్రికి తీవ్ర తుపానుగాను, అనంతరం 24 గంటల్లో అతి తీవ్ర తుపానుగాను మారనుంది. ఇలా మే ఒకటో తేదీ సాయంత్రం వరకు క్రమంగా వాయవ్య దిశగా పయనించనుంది. ఆ తర్వాత మలుపు (రీకర్వ్‌) తీసుకుని ఉత్తర ఈశాన్య దిశలో కదులుతుంది. మే ఒకటో తేదీన సూపర్‌ సైక్లోన్‌ (ఎక్‌స్ట్రీమ్‌లీ సివియర్‌ సైక్లోనిక్‌ స్టార్మ్‌)గా బలపడనుందని భారత వాతావరణ విభాగం ఆదివారం రాత్రి విడుదల చేసిన బులెటిన్‌లో వెల్లడించింది. తీవ్ర తుపానుగా ఉన్న సమయంలో బంగాళాఖాతంలో గంటకు 110–125, అతి తీవ్ర తుపానుగా మారాక 130–155, సూపర్‌ సైక్లోన్‌ అయ్యాక 160–195 కిలోమీటర్ల వేగంతో పెనుగాలులు వీస్తాయి. అదే సమయంలో కోస్తాంధ్ర, పుదుచ్చేరి, తమిళనాడు తీర ప్రాంతాల్లో గంటకు 50–70 కిలోమీటర్ల వేగంతో ఈదురుగాలులు వీయనున్నాయి. సముద్రంలో అలలు భారీగా ఎగసిపడతాయి. మత్స్యకారులు చేపలవేటకు వెళ్లవద్దని ఐఎండీ హెచ్చరించింది. మరోవైపు ‘ఫొని’ తుపాను నేపథ్యంలో రాష్ట్రంలోని విశాఖపట్నం, కృష్ణపట్నం, మచిలీపట్నం, నిజాంపట్నం ఓడరేవుల్లో 2వ నంబరు, కాకినాడ, గంగవరం పోర్టుల్లో 5వ నంబరు ప్రమాద హెచ్చరికను జారీ చేశారు.  30 నుంచి ‘ఫొని’ ప్రభావం! తుపాను ప్రభావం ఈనెల 30 నుంచి రాష్ట్రంపై కనిపించనుంది. రానున్న మూడు రోజులు కోస్తాంధ్ర, రాయలసీమల్లో అక్కడక్కడ తేలికపాటి నుంచి మోస్తరు వర్షాలు కురవనున్నాయి. మే 2వ తేదీన శ్రీకాకుళం, విజయనగరం, విశాఖపట్నం, తూర్పు, పశ్చిమగోదావరి జిల్లాల్లో ఒకట్రెండు చోట్ల భారీ వర్షాలు కురుస్తాయి.   విశాఖ ఏజెన్సీలో వర్షాలు విశాఖ ఏజెన్సీలో ఆదివారం సాయంత్రం మోస్తరు వర్షాలు కురిశాయి. హుకుంపేట, డుంబ్రిగుడ, అరుకులోయ మండలాల్లో వర్షం పడింది. మిగిలిన ప్రాంతంలో ఆకాశం మేఘావృతమై చల్లని గాలులు వీచాయి. మధ్యాహ్నం మాత్రం తీవ్రమైన ఎండతో జనం అవస్థలు పడ్డారు. కాగా శనివారం వీచిన గాలులతో విద్యుత్‌ వ్యవస్థ ఛిన్నాభిన్నమైన నర్సీపట్నం ప్రాంతంలో ఆదివారం కూడా సరఫరాను అధికారులు పూర్తిస్థాయిలో పునరుద్ధరించలేకపోయారు.   వానలకు బదులు ఎండలు.. వాస్తవానికి తుపానులు వచ్చినప్పుడు భారీ వర్షాలు కురుస్తాయి. కానీ ఈ తుపానుకు మాత్రం వానలకంటే ఎండలే ఎక్కువగా ప్రభావం చూపించనున్నాయి. ప్రస్తుతం మహారాష్ట్ర, రాజస్థాన్, మధ్యప్రదేశ్‌ తదితర ప్రాంతాల్లో పగటి ఉష్ణోగ్రతలు ఎక్కువగా నమోదవుతున్నాయి. ఈ తుపాను వాయవ్య దిశగా పయనించడం వల్ల అటు నుంచి వీస్తున్న వేడిగాలులను తుపాను శక్తి రాష్ట్రంపైకి లాక్కుని వస్తోంది. దీంతో రాష్ట్రంలో ప్రస్తుతం ఉష్ణోగ్రతలు పెరుగుతున్నాయి. రానున్న మూడు, నాలుగు రోజులు సాధారణంకంటే 3–4 డిగ్రీలు అధికంగా నమోదయ్యే అవకాశం ఉందని వాతావరణ శాఖ రిటైర్డ్‌ అధికారి రాళ్లపల్లి మురళీకృష్ణ ‘సాక్షి’తో చెప్పారు. 

సాక్షి, విశాఖపట్నం : తుపాను ఫణి (ఫొనిగా కూడా వ్యవహరిస్తున్నారు) వణికిస్తోంది. మరికొద్ది గంటల్లో తీవ్ర తూఫాను గా మారనున్న ఫొని  ప్రస్తుతం మచిలిపట్నం, చెన్నై మధ్య కేంద్రీకృతమై ఉంది. రాగల 24 గంటల్లో ఇది అతి తీవ్ర తుపానుగా మారుతుందని వాతావరణ విభాగం ఇప్పటికే వెల్లడించింది. అతి తీవ్ర తుపానుగా మారి.. ఫొని ఈ నెల 30 వరకు వాయువ్య దిశగా ప్రయాణిస్తుందని, అనంతరం రీకర్వ్ తీసుకొని ఈశాన్యం దిశగా వెళుతుందని విశాఖపట్నం వాతావరణ కేంద్రం వెల్లడించింది. క్రమంగా బలపడుతున్న ‘ఫొని’  అప్‌డేట్స్‌ ఇవి.. (చదవండి: పెను తుపాను! ) హమ్మయ్యా.. ఏపీకి తప్పిన ఫొని గండం! ఏపీకి ఫొని తుపాను గండం తప్పినట్టు కనిపిస్తోంది. రాష్ట్రంపై ఫొని తుఫాన్ ప్రభావం ఉండదని విశాఖపట్నం వాతావరణ కేంద్రం అధికారులు  తెలిపారు. ప్రస్తుతం మచిలిపట్నానికి దక్షిణ ఆగ్నేయంగా 1,230 కిలోమీటర్ల దూరంలో ఫొని తుపాను కేంద్రీకృతమై ఉందని, ఈ సాయింత్రానికి మరింత బలపడి ఇది తీవ్ర తుపానుగా మారుతుందని అధికారులు వెల్లడించారు. రేపటికి ఇది అతి తీవ్ర తుపానుగా మరే అవకాశముందన్నారు. ఫొని ప్రస్తుతం వాయువ్య దిశగా పయనిస్తూ..  మే 1నుండి దిశ మార్చుకుని ఉత్తర ఈశాన్య దిశగా పయనించనుందని చెప్పారు. రేపటి నుంచి తీరం వెంబడి గంటకు 45 నుండి 50 కిలోమీటర్ల వేగంతో బలమైన గాలులు వీచే అవకాశముందని తెలిపారు. క్రమేణా మే 3వరకు గాలులు వేగం పెరగొచ్చునని తెలిపారు. విశాఖపట్నం, కృష్ణపట్నం, నిజాంపట్నం పోర్టుల్లో జారీ చేసిన రెండో నంబర్ ప్రమాద హెచ్చరిక  ప్రస్తుతానికి కొనసాగుతోంది. కాకినాడ, గంగవరం పోర్టుల్లో డిడబ్ల్యూ-2, సెక్షన్ సిగ్నల్ 5 హెచ్చరిక జారీ చేశారు. ప్రస్తుతం సముద్రం అల్లకల్లోలంగా ఉన్నందున మత్స్యకారులు వేటకు వెళ్లరాదని అధికారులు హెచ్చరిస్తున్నారు. వాకాడు వద్ద 15 మీటర్లు ముందుకొచ్చిన సముద్రం నెల్లూరు జిల్లాలోనూ తీర ప్రాంత ప్రజలను ప్రభుత్వ అధికారులు అప్రమత్తం చేశారు. సముద్రంలో అలల ఉధృతి తీవ్రంగా ఉంది. సముద్రం అల్లకల్లోలంగా మారడంతో ఎప్పుడేం జరుగుతుందోనని తీర ప్రాంత ప్రజలు ఆందోళన చెందుతున్నారు. వాకాడు వద్ద సముద్రం దాదాపు 15 మీటర్లు ముందుకొచ్చింది. విడవలూరు వద్ద సముద్రంలో అలలు ఉధృతంగా ఉన్నాయి. తూపిలిపాలెం, కొత్తకోడూరు, మైపాడు, రామతీర్థం, తుమ్మలపెంటలోనూ సముంద్రం ముందుకు చొచ్చుకొచ్చింది. మత్స్యకార ప్రాంతాల్లో పోలీసులు, రెవెన్యూ అధికారులు పర్యటించి ప్రజలను అప్రమత్తం చేస్తున్నారు. మత్స్యకారులు వేటకు వెళ్లొద్దని హెచ్చరిస్తున్నారు. తమిళనాడు భయపెడుతున్న ఫొని! ఫొని తుపాను తమిళనాడును భయపెడుతోంది. చెన్నైకి వెయ్యి కిలోమీటర్ల దూరంలో ఈశాన్య బంగాళాఖాతంలో ప్రస్తుతం ఈ తుపాను కేంద్రీకృతమైంది. దీంతో తమిళనాడు, కోస్తాంధ్ర తీరప్రాంతంలో సముద్ర అలలు ఎగిసిపడుతున్నాయి. గంటకు 60 నుంచి 70 కిలోమీటర్ల వేగంతో ఈదురుగాలులు వీస్తున్నాయి. దీంతో చెన్నై, తిరువల్లూరు, కాంచీపురం, పుదుచ్చేరి, కడలూరు, కారైకాల్‌, నాగపట్నం తదితర తీర ప్రాంతాల ప్రజలను అధికారులు అప్రమత్తం చేశారు. ప్రకాశం జిల్లాలో కంట్రోల్‌ రూం ఏర్పాటు ప్రకాశం: ఫొని తుపాను ముంచుకొస్తున్న నేపథ్యంలో జిల్లా కలెక్టర్‌ అధికారులను అప్రమత్తం చేశారు. కలెక్టరేట్‌లో కంట్రోల్‌ రూమ్‌ ఏర్పాటు చేశారు. అత్యవసర సహాయం కోసం 222100, 281720, 231222 ఫోన్‌నెంబర్లకు కాల్‌ చేయవచ్చు. మత్స్యకారులు సముద్రంలో వేటకు వెళ్లవద్దని అధికారులు హెచ్చరించారు. నెల్లూరులో ఎగిసిపడుతున్న అలలు.. నెల్లూరు జిల్లా: బంగాళాఖాతంలో ఫొని తుపాను ప్రభావం కనిపిస్తోంది. దీంతో నెల్లూరు తీరంలో అలలు ఎగసిపడుతున్నాయి. తూపిలిపాలెం, కొత్త కోడూరు, మైపాడు, రామతీర్థం, తుమ్మలపెంట తదితర తీర ప్రాంతాల్లో సముద్రం ముందుకు చొచ్చుకొచ్చింది. ఫొని తుపాను నేపథ్యంలో మత్స్యకారులు, పర్యాటకులు సముద్రంలోకి వెళ్లవద్దని అధికారుల హెచ్చరించారు. తీరంలో మొదలైన ఈదురు గాలులు కృష్ణా జిల్లా:  ఫొని తుపాను ప్రస్తుతం మచిలీపట్నానికి తూర్పు దిశగా 1265 దూరంలో కదులుతోంది. అటు చెన్నైకి 1,080 కిలోమీటర్ల దూరంలో ఇది కేంద్రీకృతమై ఉంది. తుపాను కదలికలు వేగంగా ఉండటంతో తీరం వెంబడి ఈదురు గాలులు మొదలయ్యాయి. ఆదివారం 80-90 కిలోమీటర్ల వేగంతో ఈదురు గాలులు మొదలవుతాయని వాతావరణ శాఖ హెచ్చరిస్తోంది. ఫొని తుపాను ప్రభావంతో తమిళనాడు, దక్షిణ కోస్తాంధ్ర జిల్లాల్లో మోస్తరు వర్షాలు పడే అవకాశముంది. తుపాను తీరానికి దగ్గరయ్యే కొద్దీ కోస్తాంధ్రలో భారీ వర్షాలు పడొచ్చునని వాతావరణ శాఖ తెలిపింది. ఫొని తుపాను నేపథ్యంలో విశాఖపట్నం, మచిలీపట్నం, నిజాంపట్నం, కృష్ణపట్నం, కాకినాడ, గంగవరం పోర్టుల్లో రెండు నంబరు ప్రమాద హెచ్చరికను జారీచేశారు.

సాక్షి, విశాఖపట్నం/సాక్షి, అమరావతి/సాక్షి నెట్‌వర్క్‌: తుపాను ఫణి (ఫొణిగా కూడా వ్యవహరిస్తున్నారు) తన దిశను మార్చుకుంటోంది. తీవ్రతను సైతం పెంచుకుంటోంది. శనివారం ఉదయం తీవ్ర వాయుగుండం నుంచి తుపానుగా మారిన అనంతరం మధ్యాహ్నానికే తీవ్ర తుపానుగా బలపడింది. ఆదివారం నాటికి మరింత బలపడి అతి తీవ్ర తుపానుగా మారనుంది. ప్రస్తుతం ఈ తుపాను గంటకు 9 కిలోమీటర్ల వేగంతో నెమ్మదిగా కదులుతోంది. శనివారం రాత్రికి ఈ తీవ్ర తుపాను చెన్నైకి ఆగ్నేయంగా 1,200 కిలోమీటర్లు, మచిలీపట్నానికి దక్షిణ ఆగ్నేయంగా 1,390 కిలోమీటర్ల దూరంలోనూ కేంద్రీకృతమై ఉంది. ఇది క్రమంగా వాయవ్య దిశగా కదులుతూ ఈ నెల 30వ తేదీ నాటికి ఉత్తర తమిళనాడు, దక్షిణ కోస్తాంధ్ర తీరం వైపు పయనిస్తుంది. అనంతరం ఈశాన్య దిశగా మలుపు తిరిగి బంగ్లాదేశ్‌ వైపు మళ్లే అవకాశం ఉందని వాతావరణ నిపుణులు చెబుతున్నారు. ఏదేమైనా మే 2వ తేదీ వరకు బంగాళాఖాతంలోనే పయనించి పెను తుపానుగా బలపడే వీలుందని వారు అంచనా వేస్తున్నారు.   అంచనాకు అందట్లేదు.. ప్రస్తుతం ఫణి తుపాను తీరును బట్టి అది ఎక్కడ తీరాన్ని దాటుతుందో భారత వాతావరణ విభాగం(ఐఎండీ) ఇంకా ఒక అంచనాకు రాలేకపోతోంది. మరోవైపు తుపాను ప్రభావంతో నైరుతి బంగాళాఖాతంలో ఆదివారం గంటకు 125–150, సోమవారం 145–170, మంగళ, బుధవారాల్లో 125–150 కిలోమీటర్ల వేగంతో బలమైన పెనుగాలులు వీస్తాయని ఐఎండీ శనివారం రాత్రి విడుదల చేసిన నివేదికలో వెల్లడించింది. ఆదివారం నుంచి మంగళవారం వరకు తమిళనాడు, దక్షిణ కోస్తాంధ్రల్లో గంటకు 50–70 కిలోమీటర్ల వేగంతో ఈదురు గాలులు వీస్తాయి. సముద్రం అల్లకల్లోలంగా ఉన్న నేపథ్యంలో మే 2వ తేదీ వరకు మత్స్యకారులు చేపల వేటకు వెళ్లొద్దని ఐఎండీ హెచ్చరించింది.  దక్షిణ కోస్తాంధ్ర జిల్లాల్లో మోస్తరు వానలు   ఫణి తుపాను ప్రభావం వల్ల రాగల 24 గంటల్లో తమిళనాడు, దక్షిణ కోస్తాంధ్ర జిల్లాల్లో అక్కడక్కడా మోస్తరు వర్షాలు, ఒకటి రెండు చోట్ల మంచి వర్షం కురిసే అవకాశం ఉందని వాతావరణ నిపుణులు పేర్కొన్నారు. ఈ నెల 30వ తేదీ, వచ్చే నెల ఒకటో తేదీన తమిళనాడు, దక్షణ కోస్తా జిల్లాల్లో వర్షాలు కురిసే అవకాశం ఉంది. ‘‘ప్రస్తుతం తుపాను తీరానికి చాలా దూరంలో ఉంది. అందువల్ల దీని ప్రభావం ఏ స్థాయిలో ఉంటుందో చెప్పలేం. మరో 24 గంటల తర్వాత కొంత వరకూ పరిస్థితిని అంచనా వేయవచ్చు. మొత్తం మీద చూస్తే ఈ తుపాను దక్షిణ కోస్తా, తమిళనాడు మధ్య తీరం దాటే అవకాశం ఉన్నట్లు ప్రస్తుతం కనిపిస్తోంది. ఏది ఏమైనప్పటికీ దక్షిణ కోస్తా, తమిళనాడు, పాండిచ్చేరి ప్రాంతాల్లో ఈ నెల 30, మే 1వ తేదీల్లో భారీ వర్షాలు కురిసే అవకాశం ఉంది’’ అని హైదరాబాద్‌ వాతావరణ కేంద్రం అధికారి తెలిపారు.   నిజాంపట్నం హార్బర్‌లో రెండో నెంబర్‌ ప్రమాద సూచిక  ఫణి తుపాను హెచ్చరికల నేపథ్యంలో గుంటూరు జిల్లా నిజాంపట్నం హార్బర్‌లో శనివారం రెండో ప్రమాద సూచిక ఎగురవేశారు. తుపాను ఈ నెల 30న లేదా మే ఒకటో తేదీన తీరం దాటే అవకాశముందని వాతావరణ శాఖ అధికారులు చెబుతున్నారని పోర్టు కన్జర్వేటర్‌ మోపిదేవి వెంకటేశ్వరరావు వివరించారు. తుపాను ప్రభావంతో తీరం వెంబడి బలమైన ఈదురు గాలులు వీచే అవకాశం ఉందన్నారు. మత్స్యకారులు వేటకు వెళ్లకూడదని స్పష్టం చేశారు.  అల్లకల్లోలంగా మారిన సముద్రం  తుపాను ప్రభావంతో నెల్లూరు జిల్లాలోని తీర ప్రాంత ప్రజలను ప్రభుత్వ అధికారులు అప్రమత్తం చేశారు. సముద్రంలో అలల ఉధృతి తీవ్రంగా ఉంది. సముద్రం అల్లకల్లోలంగా మారడంతో ఎప్పుడేం జరుగుతుందోనని తీర ప్రాంత ప్రజలు ఆందోళన చెందుతున్నారు. వాకాడు వద్ద సముద్రం దాదాపు 15 మీటర్లు ముందుకొచ్చింది. విడవలూరు వద్ద సముద్రంలో అలలు ఉధృతంగా ఉన్నాయి. మత్స్యకార ప్రాంతాల్లో పోలీసులు, రెవెన్యూ  అధికారులు పర్యటించి ప్రజలను అప్రమత్తం చేస్తున్నారు. తీర ప్రాంతానికి ప్రత్యేక బలగాలను పంపేందుకు చర్యలు తీసుకుంటున్నామని నెల్లూరు జిల్లా ఎస్పీ ఐశ్వర్య రస్తోగీ తెలిపారు.  విశాఖ జిల్లాలో వర్షాలు   విశాఖ జిల్లాలో పలు ప్రాంతాల్లో శనివారం భారీ వర్షాలు కురిశాయి. వర్షంతోపాటు ఈదురు గాలుల ధాటికి విద్యుత్‌ స్తంభాలు, భారీ వృక్షాలు నేలకూలాయి. మామిడి పంట నేల రాలడంతో రైతులు తీవ్రంగా నష్టపోయారు. విద్యుత్‌ తీగలు తెగిపడడంతో పలు గ్రామాలకు విద్యుత్‌ సరఫరా నిలిచిపోయింది. నర్నీపట్నం, కోటవురట్ల, డుంబ్రిగుడ, అరకులోయ, రావికమతం, నాతవరం, గొలుగొండ తదితర మండలాల్లో వర్షాలు కురిశాయి. నర్సీపట్నం ఎంపీడీవో కార్యాలయం సమీపంలో విద్యుత్‌ లైన్‌పై తాటిచెట్టు విరిగిపడడంతో కరెంటు సరఫరా నిలిచిపోయింది. డుంబ్రిగుడ, నర్సీపట్నంలో ఈదురు గాలుల తీవ్రతకు హోర్డింగ్‌లు విరిగి పడ్డాయి.  భారీ వర్షాల ఆశలు గల్లంతేనా?  తుపాను వస్తుంది.. మంచి వానలు తెస్తుందని ఆశించిన రాష్ట్ర ప్రజల ఆశలు గల్లంతయ్యే సూచనలు కనిపిస్తున్నాయి. ముందుగా అంచనా వేసినట్టుగా ఫణి తుపాను ఉత్తర తమిళనాడు, దక్షిణ కోస్తాంధ్ర తీరానికి చేరుతుందని ఐఎండీ అంచనా వేసింది. అయితే ఇది తీవ్ర, అతి తీవ్ర తుపానుగా బలపడినప్పటికీ తన దిశను కోస్తాంధ్ర వైపు కాకుండా బంగ్లాదేశ్‌ వైపు మార్చుకునే అవకాశం లేకపోలేదని, దీంతో తేలికపాటి వర్షాలు తప్ప భారీ వర్షాలు కురిసే వీలు లేనట్టేనని వాతావరణ నిపుణులు చెబుతున్నారు. రానున్న రెండు రోజులు రాష్ట్రంలో తేలికపాటి జల్లులు లేదా వర్షాలు కురవవచ్చని ఐఎండీ తెలిపింది. 30న కోస్తాంధ్ర, రాయలసీమ జిల్లాల్లో, మే ఒకటో తేదీన కోస్తాంధ్రలో ఉరుములు, మెరుపులతో కూడిన అకాల వర్షాలు కురుస్తాయని, అక్కడక్కడ పిడుగులు పడే ప్రమాదం ఉందని హెచ్చరించింది. అదే సమయంలో కోస్తాంధ్ర, రాయలసీమలో పగటి ఉష్ణోగ్రతలు సాధారణం కంటే 2–3 డిగ్రీలు అధికంగా నమోదు కానున్నాయి. శనివారం రాష్ట్రంలోని పలు ప్రాంతాల్లో నమోదైన గరిష్ట ఉష్ణోగ్రతలివీ..(డిగ్రీల్లో)