సాక్షి, హైదరాబాద్: పార్లమెంట్ సాక్షిగా ఇచ్చిన ప్రత్యేక హోదా హామీ, రాష్ట్ర ప్రజలకు దక్కిన హక్కుల సాధన కోసం ప్రతిపక్ష నాయకుడు వైఎస్ జగన్‌మోహన్‌రెడ్డి ప్రజాస్వామిక పద్ధతిలో చేపట్టిన నిరవధిక నిరాహార దీక్షను టీడీపీ ప్రభుత్వం అపహాస్యం చేయడంపై ప్రజల్లో సర్వత్రా నిరసనలు వ్యక్తమవుతున్నాయి. రాష్ట్ర భవిష్యత్తుకు ఎంతో కీలకమైన ప్రత్యేక హోదా కోసం అన్ని పక్షాలతో కలిసి కేంద్రంపై ఒత్తిడి తేవాల్సిన సీఎం చంద్రబాబు ఆ పని చేయకపోగా మెతుకు ముట్టకుండా కఠోర దీక్ష సాగిస్తున్న జగన్ ఆరోగ్యంపై తప్పుడు నివేదికలతో నీచ రాజకీయాలకు దిగడంపై అన్ని వర్గాల్లో విస్మయం వ్యక్తమవుతోంది.
 
 ప్రత్యేక హోదా సాధించాల్సిన చంద్రబాబు ఆ పని చేయకపోగా, దానికోసం ప్రాణాలను ఫణంగా పెట్టి జగన్ సాగిస్తున్న దీక్షపై తప్పుడు నివేదికలు సృష్టించడమే కాకుండా నిస్సిగ్గుగా అవహేళన చేయడంతో..  హోదా సాధన విషయంలో ప్రభుత్వ చిత్తశుద్ధి ఏమిటో తేటతెల్లమైంది. ఈ నెల 7వ తేదీ నుంచి నిరవధిక దీక్ష చేస్తున్న జగన్‌కు నిర్వహించిన వైద్య పరీక్షల్లో చక్కెర స్థాయి ఎందుకు పెరిగిందో తెలియదంటూ వైద్యారోగ్య శాఖ మంత్రి కామినేని శ్రీనివాస్ మాట్లాడటం గమనిస్తే ప్రభుత్వం ఏ స్థాయికి దిగజారిందో అర్థమవుతుంది.
 
 ఏదైనా సమస్యను పరిష్కరించాలని కోరుతూ నిరశన  చేపట్టినప్పుడు ప్రభుత్వం దిగొచ్చి చర్చలు, సంప్రదింపులతో సమస్య పరిష్కారానికి కృషి చేస్తుంది. అలాంటి ప్రక్రియను ఎప్పుడో తమ డిక్షనరీ నుంచి తొలగించిన టీడీపీ ప్రభుత్వం ఇప్పుడు ఏకంగా ప్రజాస్వామిక నిరశనలను అపహాస్యం చేసే నీచస్థాయికి దిగజారింది. ప్రత్యేక హోదా డిమాండ్‌తో ప్రతిపక్ష నేత నిరవధిక నిరాహార దీక్ష చేస్తుంటే.. తమ కనుసన్నల్లో పనిచేసే ప్రభుత్వ వైద్యుల ద్వారా తప్పుడు నివేదికలను తయారు చేయించి చవకబారు రాజకీయానికి పాల్పడిన ఉదంతం బహుశా దేశ చరిత్రలోనే ఇప్పటివరకు లేదని విశ్లేషకులు చెబుతున్నారు.
 
 ఇది ప్రత్యేక హోదాను అడ్డుకోవడం కాదా?
 రాష్ట్రాన్ని విభజించి కట్టుబట్టలతో పంపించారని చెప్పిన చంద్రబాబుకు.. ఆ పరిస్థితి నుంచి రాష్ట్రాన్ని గట్టెక్కించడానికి తన వంతుగా ప్రజల పక్షాన నిలబడిన ప్రతిపక్ష నాయకుడు జగన్ ప్రజాస్వామిక పద్ధతిలో పోరాటం చేస్తుంటే ఎందుకు అంత ఉలుకు? రాష్ట్రానికి ఐదేళ్లు ప్రత్యేక హోదా ఇస్తే... ఏమొస్తుంది? కనీసం 15 సంవత్సరాలు ప్రత్యేక హోదా సాధిస్తామని ఎన్నికలకు ముందు చంద్రబాబు చెప్పారు. తీరా అధికారంలోకి వచ్చి 16 నెలలు దాటుతున్నా నిమ్మకు నీరెత్తినట్టుగానే ఉన్నారు.
 
 దీక్షతో జగన్ ఆరోగ్యం క్షీణిస్తుంటే... సమస్య పరిష్కారం దిశగా కృషి చేయాల్సిన ముఖ్యమంత్రి అందుకు విరుద్ధంగా దీక్షను అవహేళన చేసే విధంగా వ్యవహరించడంలోని ఆంతర్యమేంటి? జగన్ దీక్షను ఆభాసుపాలు చేయాలనుకుంటే ఎవరికి నష్టం? ప్రత్యేక హోదా కోసం దీక్ష చేస్తున్న జగన్‌పై నిందలు వేయడమంటే.. హోదాకు అడ్డుపడటం కాదా? ప్రత్యేక హోదా సాధన కోసం పోరాటం చేస్తుంటే దాన్నుంచి దృష్టి మళ్లించాలన్న దుర్బుద్ధితోనే బాబు చవకబారు ఎత్తుగడలను తెరమీదకు తెస్తున్నారంటూ ప్రజలు ఆగ్రహం వ్యక్తం చేస్తున్నారు.
 
 జగన్ ప్రతి దీక్షలోనూ దక్షత
 వైఎస్సార్ కాంగ్రెస్ పార్టీని స్థాపించిన తర్వాత రాష్ట్రంలో అనేక ప్రజా సమస్యలపై జగన్‌మోహన్‌రెడ్డి రాజీలేని పోరాటం చేశారు. ఆంధ్రప్రదేశ్ రాష్ట్రాన్ని విభజించడానికి కేంద్రం అనుసరిస్తున్న ఏకపక్ష ధోరణికి నిరసనగా, విభజన తీరును నిరసిస్తూ సమైక్య రాష్ట్రం కోసం చంచల్‌గూడ జైలులో జగన్ 7 రోజులు దీక్ష చేశారు.
 
 తనపై తప్పుడు కేసులు బనాయించిన దశలోనూ వెరవకుండా 2013 ఆగస్టు 24న నిరవధిక నిరాహార దీక్షను ప్రారంభించారు. కనీసం నలుగురు వ్యక్తులు కూడా ఆయనను చూడడానికి వీలులేని పరిస్థితుల్లో జైలు గోడల మధ్య దీక్ష సాగించారు. కేవలం ప్రచారం కోసమే అయితే జైలు గోడల మధ్య ఎవరూ చూడలేని చోట దీక్ష చేయాల్సిన అవసరం లేదు. ఆరోగ్యం క్షీణించడంతో చివరకు 29వ తేదీ అర్ధరాత్రి జైలు అధికారులు ఆయన్ను ఆస్పత్రికి తరలించారు. అయినప్పటికీ ఆయన దీక్షను కొనసాగించారు. ఆరోగ్యం విషమించడంతో 31 వ తేదీన వైద్యులు బలవంతంగా ప్లూయిడ్స్ ఎక్కించారు.
 
 జైలు గోడల మధ్య ఏడు రోజుల దీక్ష చేసిన జగన్ ఆ తర్వాత కూడా తన ఆరోగ్యాన్ని ఏమాత్రం ఖాతరు చేయకుండా అక్టోబర్‌లోనే మరోసారి నిరాహార దీక్ష చేపట్టారు. ఆంధ్రప్రదేశ్ విభజనను వ్యతిరేకిస్తూ లోటస్‌పాండు వేదికగా ఆమరణ నిరాహార దీక్ష చేపట్టారు. 2013 అక్టోబర్ 5న దీక్షను ప్రారంభించారు. ఈ దీక్ష కొనసాగిస్తున్న దశలో ఆరోగ్యం బాగా క్షీణించి శరీరంలో కీటోన్స్ ప్రమాదకర స్థాయికి చేరుకున్న ఆందోళనకర పరిస్థితుల నేపథ్యంలో 9 వ తేదీ రాత్రి పోలీసులు నిమ్స్‌కు తరలించి బలవంతంగా ఫ్లూయిడ్స్ ఎక్కించారు.
 
 ఇక రాష్ట్రంలో అధికారంలో ఉన్న కాంగ్రెస్, ప్రతిపక్ష టీడీపీలు మిలాఖతయిన రోజుల్లో విద్యార్థులకు ఫీజు రీయింబర్స్‌మెంట్ మంజూరు చేయకపోవడాన్ని నిరసిస్తూ 7 రోజుల పాటు ఇందిరాపార్క్ వద్ద జగన్ కఠోర దీక్ష సాగించారు. వైద్యులు అనేక దఫాలుగా హెచ్చరించినప్పటికీ ఆయన ఆరోగ్యం విషయంలో ఏమాత్రం వెరవలేదు. 2011 ఫిబ్రవరి 18 నుంచి 24 వరకు దీక్ష సాగించగా చివరకు పోలీసుల ద్వారా బలవంతంగా ఆస్పత్రికి తరలించారు.


 హైదరాబాద్: ఆరోగ్యం క్షీణిస్తున్నందున వైఎస్ జగన్ మోహన్ రెడ్డి దీక్ష విరమించాలని కాంగ్రెస్ రాజ్యసభ సభ్యుడు వి. హనుమంతరావు విజ్ఞప్తి చేశారు. వైఎస్ జగన్ ఆరోగ్య పరిస్థితి విషమిస్తున్నందున ప్రత్యేక హోదాపై కేంద్ర, రాష్ట్ర ప్రభుత్వాలు ఓ ప్రకటన చేయాలని ఆయన డిమాండ్ చేశారు. రాజధాని శంకుస్థాపనకు వస్తున్న ప్రధాని నరేంద్ర మోదీ రాకకు ముందే ప్రత్యేక హోదాపై ప్రకటన చేయాలన్నారు. ముందుగా వైఎస్ జగన్ దీక్ష విరమించాలని, సానుకూల ప్రకటన రావాలని ఆయన ఆకాంక్షించారు.
 
 ఆంధ్రప్రదేశ్ కు ప్రత్యేక హోదా10 ఏళ్ల పాటు కావాలని డిమాండ్ చేసిందే వెంకయ్య నాయుడు అని గుర్తు చేశారు. హామీని నెరవేర్చాల్సిన వెంకయ్య ఇప్పుడు చంద్రబాబు భజన చేస్తున్నారని విమర్శించారు.


 గుంటూరు: ఆరు రోజులుగా నిరాహారదీక్ష చేస్తున్న తన భర్త వైఎస్ జగన్ మోహన్ రెడ్డి ఆరోగ్యం క్షీణిస్తుండడంపై ఆయన సతీమణి వైఎస్ భారతి ఆందోళన వెలిబుచ్చారు. తన భర్త ఆరోగ్య పరిస్థితిపై మంత్రులు బాధ్యతారహితంగా మాట్లాడడం సరికాదని అన్నారు. జగన్ ను ఈ పరిస్థితుల్లో చూస్తే బాధగా ఉందని చెప్పారు.
 
 దీక్షా ప్రాంగణం వద్ద ఆమె మీడియాతో మాట్లాడారు. 'షుగర్ లెవెల్ కూడా 61కి వచ్చేసింది. అది కనీసం 80 పైన ఉంటే మంచిదని చెబుతున్నారు. మంత్రులు వాళ్లేం చేస్తారో అది మాట్లాడితే మంచిది గానీ, పక్కన వాళ్లను తప్పుపడితే ఎలా? వైఎస్ జగన్ ఆరు రోజుల నుంచి ఏమీ తినడం లేదు. చాలా బాధగా ఉంది' అని వైఎస్ భారతి అన్నారు.


 హైదరాబాద్: ఉక్కు సంకల్పంతో దీక్ష బూనిన జననేతకు యావదాంధ్ర ప్రజ దన్నుగా నిలిచింది. రాష్ట్ర మేలు కోరి ప్రాణాన్ని ఫణంగా పెట్టిన రాజన్న తనయుడికి బాసటగా నిలిచింది. అన్నపానీయాలు ముట్టకుండా ఆరు రోజులుగా నిరాహారదీక్ష చేస్తున్న జగనన్న ఆరోగ్యం కుదుటపడాలని దేవుళ్లకు మొక్కుతున్నారు. ప్రత్యేక హోదా కోసం అలుపెరగని పోరు సల్పుతున్న వైఎస్ జగన్ మోహన్ రెడ్డి దీక్ష విజయవంతం కావాలని ప్రత్యేక పూజలు, ప్రార్థనలు చేస్తున్నారు.
 
 శ్రీకాకుళం
 వైఎస్ జగన్ ఆరోగ్యం మెరుగుపడాలని అరసవెల్లి సూర్య దేవాలయంలో వైఎస్సార్ సీపీ జిల్లా అధ్యక్షురాలు రెడ్డి శాంతి ప్రత్యేక పూజలు నిర్వహించారు.
 
 తూర్పుగోదావరి
 జననేత కోలుకోవాలని అయినవెల్లి వినాయక ఆలయంలో వైఎస్సార్ సీపీ నేతలు విశ్వరూప్, పిల్లి సుభాష్ చంద్రబోస్, చిట్టబ్బాయి ప్రత్యేక పూజలు చేశారు
 
 కృష్ణా
 పెడన నియోజకవర్గ ఇన్ చార్జి ఉప్పాల రాంప్రసాద్ ఆధ్వర్యంలో జగన్ కోసం ప్రత్యేక పూజలు నిర్వహించారు.
 మైలవరం నియోజకవర్గ ఇన్ చార్జి జోగి రమేశ్ ఆధ్వర్యంలో ఆలయాలు, చర్చిలు, మసీదుల్లో పూజలు, ప్రార్థనలు జరిపారు.
 
 అనంతపురం
 వైఎస్ జగన్ దీక్ష విజయవంతం కావాలని అనంతపురం వెంకటేశ్వరస్వామి ఆలయంలో మాజీ ఎమ్మెల్యే గుర్నాథ్ రెడ్డి, ఎర్రి స్వామిరెడ్డి ప్రత్యేక పూజలు చేశారు.


 గుంటూరు: ప్రత్యేక హోదా కోసం దీక్ష చేస్తున్న వైఎస్ జగన్ మోహన్ రెడ్డి ఆరోగ్య పరిస్థితి అంతకంతకు విషమిస్తోందని కడప ఎంపీ వైఎస్ అవినాష్ రెడ్డి ఆందోళన వ్యక్తం చేశారు. ఆయన ఆరోగ్య పరిస్థితిపై వైద్యులు ఆందోళన వ్యక్తం చేశారని తెలిపారు. పరిస్థితి ఇలాగే కొనసాగితే ఆయన కోమాలోకి వెళ్లిపోయే ప్రమాదముందని డాక్టర్లు చెప్పారని అన్నారు. రాష్ట్ర భవిష్యత్, నిరుద్యోగ యువత కోసం జగనన్న తన ప్రాణాన్ని ఫణంగా పెట్టి దీక్ష చేస్తున్నారని చెప్పారు.
 
 ప్రత్యేక హోదా సాధన ఉద్యమాన్ని తమ చేతుల్లోకి తీసుకోవాలని ప్రజలకు, యువతకు పిలుపునిచ్చారు. జగన్ చూపిన బాటలో ప్రత్యేక హోదా సాధించే వరకు పోరాడాలని కోరారు. పార్టీలకు అతీతంగా మద్దతు పలకాల్సిన అంశమిదని, అవహేళన చేసే విధంగా మంత్రులు మాట్లాడడం చాలా దారుణమని ఆవేదన వ్యక్తం చేశారు. ప్రతిపక్ష నేత ఆరోగ్య పరిస్థితిని పట్టించుకోని వ్యక్తి ఆరోగ్య శాఖ మంత్రిగా ఉండడం సిగ్గుచేటని అవినాష్ రెడ్డి ఆగ్రహం వ్యక్తం చేశారు.


 గుంటూరు: వైద్యులను అడ్డుపెట్టుకుని టీడీపీ నీచ రాజకీయాలు చేస్తోందని ఒంగోలు ఎంపీ వైవీ సుబ్బారెడ్డి విమర్శించారు. రాష్ట్ర భవిష్యత్ కోసం ఆరు రోజులుగా దీక్ష చేస్తున్న వైఎస్ జగన్ మోహన్ రెడ్డి ఆరోగ్య పరిస్థితిపై మంత్రులు నోటికొచినట్టు మాట్లాడం సిగ్గుచేటని ధ్వజమెత్తారు. తమకు అనుకూల మీడియాలో విషప్రచారం చేస్తున్నారని మండిపడ్డారు. ఇంత నీచరాజకీయాలు చేయాల్సిన అవసరముందా అని టీడీపీ ప్రభుత్వాన్ని ఆయన సూటిగా ప్రశ్నించారు.
 
 రాష్ట్ర భవిష్యత్తు కోసమే ప్రత్యేక హోదా కావాలని జగన్ పోరాటం చేస్తున్నారని పునరుద్ఘాటించారు. వైఎస్ జగన్ ఆరోగ్యం బాగా క్షీణించిందని ఆందోళన వ్యక్తం చేశారు. కేంద్ర, రాష్ట్ర ప్రభుత్వాలు ఇప్పటికైనా కళ్లు తెరచి ప్రత్యేక హోదాపై స్పష్టమైన ప్రకటన చేయాలని డిమాండ్ చేశారు.


 గుంటూరు: ఆంధ్రప్రదేశ్ రాష్ట్రానికి ప్రత్యేక హోదా కోసం ఆరు రోజులుగా నిరాహార దీక్ష చేస్తున్న ప్రతిపక్ష నాయకుడు, వైఎస్సార్ సీపీ అధ్యక్షుడు వైఎస్ జగన్ మోహన్ రెడ్డి బాగా నీరసించిపోయారు. సోమవారం ఉదయం ఆయనకు డాక్టర్లు వైద్య పరీక్షలు నిర్వహించారు.  ఆరు రోజులుగా ఆహారం తీసుకోకపోవడంతో ఆయనకు షుగర్ లెవల్ తగ్గింది. బీపీ, పల్స్‌రేటు పడిపోయాయి. బరువు కూడా తగ్గారు.
 
 జననేత ఆరోగ్య పరిస్థితిపై రాష్ట్ర ప్రభుత్వం హెల్త్ బులెటిన్ విడుదల చేయకపోవడంపై ఆందోళన వ్యక్తమవుతోంది. ప్రతిపక్ష నాయకుడు ఆరు రోజులుగా నిరాహారదీక్ష చేస్తుంటే ప్రభుత్వానికి చీమ కుట్టినట్టైనా లేకపోవడం దారుణమని వైఎస్సార్ సీపీ నాయకులు ఆగ్రహం వ్యక్తం చేశారు. వైఎస్ జగన్ ఆరోగ్య పరిస్థితిపై హెల్త్ బులెటిన్ విడుదల విడుదల చేయాలని డిమాండ్ చేశారు. రాష్ట్రానికి ప్రత్యేక హోదా వచ్చే వరకూ తాను చేస్తున్న నిరవధిక నిరాహారదీక్షను ఎట్టి పరిస్థితుల్లోనూ ఆపేది లేదని వైఎస్ జగన్‌మోహన్‌రెడ్డి స్పష్టం చేశారు.
 
 జననేత ఆరోగ్యం క్షీణిస్తుండడంతో వైఎస్సార్ సీపీ నాయకులు, కార్యకర్తలు, అభిమానులు ఆందోళన చెందుతున్నారు. కాగా, ప్రత్యేక హోదా సాధనే ధ్యేయంగా దీక్షకు దిగిన వైఎస్ జగన్ ను ఈ ఉదయం జర్నలిస్ట్ నాయకులు కలిశారు. ఐజేయు సెక్రటరీ జనరల్ దేవులపల్లి అమర్ తదితరులు జగన్ ను కలిసి, ఆయన ఆరోగ్య పరిస్థితిని అడిగి తెలుసుకున్నారు.


 గుంటూరు: ఆంధ్రప్రదేశ్ కు ప్రత్యేక హోదా కోసం నిరవధిక నిరాహారదీక్ష చేస్తున్న వైఎస్ జగన్ మోహన్ రెడ్డికి ఈ ఉదయం నుంచి వైద్య పరీక్షలు నిర్వహిస్తూనే ఉన్నామని గుంటూరు ప్రభుత్వాసుపత్రి వైద్యులు డాక్టర్ ఉదయ్ శంకర్ తెలిపారు. వైఎస్ జగన్ శరీరంలో డీహైడ్రేషన్ మొదలైందని, ఆయన దీక్ష విరమిస్తే మంచిదని సూచించారు. కీటోన్స్ కారణంగా కిడ్నీలపై ప్రభావం ఉంటుందని తెలిపారు.
 
 వైఎస్ జగన్ తక్షణం దీక్ష విరమించి, ఆహారం తీసుకోవాలని సలహాయిచ్చారు. వైఎస్ జగన్ ఆరోగ్య పరీక్షలకు సంబంధించిన నివేదికను తమ సూపరింటెండెంట్ కు సమర్పిస్తామని చెప్పారు. ఐదు రోజులుగా నిరాహారదీక్ష చేస్తున్న వైఎస్ జగన్ మోహన్ రెడ్డి ఆరోగ్యం క్షీణించడంతో వైఎస్సార్ సీపీ నాయకులు, కార్యకర్తలు, అభిమానులు ఆందోళన వ్యక్తం చేస్తున్నారు.


 తిరుపతి: ముఖ్యమంత్రి చంద్రబాబునాయుడికి ఓటుకు కోట్లు కేసు భయం పట్టుకుందని వైఎస్ ఆర్ కాంగ్రెస్ పార్టీ నేత భూమన కరుణాకర్ రెడ్డి అన్నారు. ఆ భయం వల్లే చంద్రబాబు కేంద్రంపై ప్రత్యేక హోదా విషయంలో ఒత్తిడి తీసుకురాలేకపోతున్నారని ఆరోపించారు. తరుచూ ఢిల్లీకి వెళుతున్న బాబు ప్రత్యేక హోదాపై మాత్రం ఎందుకు మాట్లాడటం లేదని ప్రశ్నించారు.
 
 వైఎస్ జగన్పై టీడీపీ మంత్రులు విమర్శలు చేయడం సిగ్గుచేటని అన్నారు. ప్రత్యేక హోదా కోసం ప్రాణాలు కూడా లెక్కచేయకుండా ఉద్యమిస్తున్న జగన్పై చేతిగాని తనం వల్లే నిందలు వేస్తున్నారని చెప్పారు. దమ్ముంటే కేంద్రంలో మంత్రి పదవులు వదిలి ప్రత్యేక హోదాపై పోరాడాలని సవాల్ విసిరారు.


 గుంటూరు: ముఖ్యమంత్రి చంద్రబాబునాయుడు కేబినెట్ను కేబినెట్ అంటారా? ఆయన మంత్రులను మంత్రులు అంటారా అని వైఎస్ఆర్ కాంగ్రెస్ పార్టీనేత వాసిరెడ్డ పద్మ అన్నారు. వారంతా మంత్రులు కాదని స్వార్థపరుల గుంపు అని అన్నారు. ఆంధ్రప్రదేశ్కు ప్రత్యేక హోదా సాధించడం కోసం వైఎస్ జగన్ బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే.
 
 ఈ దీక్ష నేటికి రెండో రోజుకు చేరింది. ఈ సందర్భంగా వాసిరెడ్డి పద్మ మాట్లాడారు. మట్టినుంచి ఇసుక వరకు అక్రమంగా ముఖ్యమంత్రి చంద్రబాబునాయుడు, ఆయన మంత్రి వర్గం అమ్ముకుంటుందని ఆరోపించారు. అసలు వారు నాయకులా.. రాబందులా సంతతా అని మండిపడ్డారు. కొత్తగా ఏర్పడిన రాష్ట్రాన్ని తల్లి లేని రాష్ట్రం అని చెప్పి.. ఇప్పుడు ఆ రాష్ట్రం కోసం ఏం చేస్తున్నారని ప్రశ్నించారు. ఆమె ఇంకా ఏమన్నారంటే..
 
 దిక్కులేని అనాధలా రాష్ట్రాన్ని వదిలేశారు
 
 ప్రత్యేక హోదా ఆశ చూపి నాడు మహోద్యమం ఆపేశారు
 
 ఎన్నికలు అయిపోయాక ఆ మాటలు పక్కకు పెట్టారు
 
 ప్రత్యేక హోదాకు ఇతర రాష్ట్రాలు ఎందుకు ఒప్పుకోవు
 
 రాజధాని కడుతున్నాం.. దానిని చూసి మురుసుకొమ్మంటున్నారు
 
 రాజధానిని సినిమా చూపిస్తున్నట్లు చూపిస్తున్నారు
 
 మరి భూములు కోల్పోతున్న రైతుల పరిస్థతి ఏమిటి
 
 సింగపూర్ వాసులకు ఏపీని రియల్ ఎస్టేట్ భూమిగా మార్చారు
 
 ఎన్నిలక్షల ఎకరాలు ప్రైవేటు సంస్థలకు, కార్పొరేట్కు కట్టబెడతారు
 
 చంద్రబాబు ప్రజా వ్యతిరేకి, రైతు వ్యతిరేకి, మహిళల వ్యతిరేకి
 
 వైఎస్ ను చూస్తే ఆరోగ్యశ్రీ, ఫీజురీయింబర్స్ మెంట్ గుర్తొస్తుంది
 
 చంద్రబాబును చూస్తే నేడు కరువులు, కొరతలు గుర్తొస్తున్నాయి
 
 నిజాయితీతో ఏం అభివృద్ధి చేయలేకపోయారు
 
 లాభాల్లో ఉన్న చిత్తూరు డైరీని నాశనం చేసి తన హెరిటేజ్ డెవలప్ చేశారు
 
 చంద్రబాబు ముఖ్యమంత్రి అయ్యాక హెరిటేజ్ లాభాలు ఎలా పెరిగాయి
 
 మోసం చేసి మరోసారి చంద్రబాబునాయుడు ఆయన కుమారుడిని తీసుకొస్తున్నాడు
 
 పోలవరం పూర్తవ్వాలంటే కేంద్రం కూడా భయపడే పరిస్థితి తీసుకొచ్చారు
 
 ప్రత్యేక హోదా చంద్రబాబు తీసుకురాలేకపోయాడు కాబట్టే వైఎస్ జగన్ దీక్షకు దిగారు
 
 ఆంధ్రప్రదేశ్ను సాధాసీదాగా ఉండే రాష్ట్రంగా జగన్ చూడాలనుకోవడం లేదు
 
 ప్రత్యేక హోదా సాధించలేక పోతే చంద్రబాబునాయుడు ప్రభుత్వం సచ్చినట్లే లెక్క
 
 అవసరం అయితే, వైఎస్ జగన్ దీక్ష చూపించైనా కేంద్రంపై ఒత్తిడి తీసుకురాండి
 
 13 జిల్లాల ప్రజల గొంతుక నేటి వైఎస్ జగన్ దీక్షా శిబిరం
 
 నిరవధిక దీక్ష విజయవంతమౌతుంది.. ప్రత్యేక హోదా తప్పక వస్తుంది
 
 ప్రత్యేక హోదా వచ్చే వరకు ఈ పోరాటం ఆగదు.. దీక్ష కొనసాగుతుంది


 న్యూఢిల్లీ: ప్రత్యేక హోదా కోసం వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి చేస్తున్న దీక్ష సఫలం కావాలని కోరుకుంటున్నట్లు ఉండవల్లి అరుణ్ కుమార్ అన్నారు. ఆంధప్రదేశ్ రాష్ట్ర విభజనకు సంబంధించిన అంశాలపై ఆయన గురువారం ఢిల్లీలో మాట్లాడుతున్న సందర్భంగా ఈ వ్యాఖ్యలు చేశారు. విభజన విషయంలో అడ్డగోలుగా వ్యవహరించారని ఉండవల్లి అరుణ్ కుమార్ అన్నారు. నాటి ప్రతిపక్షం, అధికార పక్షం కలిసి ఏకమై మోసం చేశాయని చెప్పారు.
 
 విభజన సందర్భంలో సభలో జరిగిన అంశాలతో పొందుపరిచిన పుస్తకాన్ని రాష్ట్రపతి ప్రణబ్ ముఖర్జీకి సమర్పించిన అనంతరం ఆయన మీడియాతో మాట్లాడారు. విభజన బిల్లులో ఆంధ్రప్రదేశ్కు అన్యాయం జరిగిందని అన్నారు. తామేం చేసినా అడిగే దిక్కెవరూ లేరన్నట్లుగా విభజన చేశారని అన్నారు. విభజన సందర్భంగా కాంగ్రెస్, బీజేపీ ఇచ్చిన మాటను తప్పాయని చెప్పారు. విభజన జరిగి ఏడాదిన్నర అయినా ఎక్కడి సమస్యలు అక్కడే ఉన్నాయని తెలిపారు. ప్రత్యేక హోదాపై వెంకయ్యనాయుడు సినిమా చూపించారని అన్నారు. విభజన అంశాన్ని బీజేపీ ఎన్నికల్లో వాడుకుందని అన్నారు. ఎన్నికలు ముగిశాక మాత్రం ఇచ్చిన హామీ మరిచిపోయిందని చెప్పారు. బిల్లులోని ఏ ఒక్క హామీని బీజేపీ అమలుచేయలేదని అన్నారు. అసలు ఈ విభజన బిల్లు పాసవలేదని అన్నారు. బిల్లును ప్రతిపక్షాలు అన్నీ వ్యతిరేకిస్తున్నా తాము మాత్రం విభజనకు మద్దతు ఇస్తున్నామని నాడు సుష్మా స్వరాజ్ అన్నారని చెప్పారు. వెంకయ్యనాయుడు, కపిల్ సిబాల్ కలిసే బిల్లు సిద్ధం చేశారని ఆమె చెప్పారని కూడా అన్నారు.
 
 విభజన కారణంగా ఇప్పుడు తలెత్తిన పలు సమస్యలకు పార్లమెంటే సమాధానం చెప్పాలని అన్నారు. నాడు విభజనలో లేవనెత్తిన సవరణ అంశాలను పట్టించుకోకుండానే బిల్లు ఆమోదింపజేశారని, ప్రస్తుత సమావేశాల్లో వాటన్నింటిపై తిరిగి చర్చ చేపట్టాలని అన్నారు. ఇక ప్రత్యేక హోదా ఇచ్చే ఉద్దేశం లేకుంటే కేంద్రం ఆ విషయం స్పష్టం చేయాలని అన్నారు. ఏపీకి ప్రత్యేక హోదా అంశంపై ఎవరూ అభ్యంతరం వ్యక్తం చేయడం లేదని అన్నారు. ప్రత్యేక హోదా కోసం వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి చేస్తున్న దీక్ష సఫలం కావాలని కోరుకుంటున్నట్లు తెలిపారు. ఇప్పటికైనా కేంద్రం మనసు మారాలని చెప్పారు.
  


 గుంటూరు: ఆంధ్రప్రదేశ్కు ప్రత్యేక హోదా కోసం అసెంబ్లీ సాక్షిగా చేసిన ఏకగ్రీవ తీర్మానాన్ని ఇప్పటి వరకు కేంద్రానికి పంపించలేదని వైఎస్ఆర్ కాంగ్రెస్ పార్టీ ఎమ్మెల్యే ఆళ్ల రామకృష్ణారెడ్డి అన్నారు. దానిని మోదీ ప్రభుత్వానికి పంపించకుండా అసెంబ్లీ పెట్టెల్లో దాచి పెట్టారని చెప్పారు. ఆంధ్రప్రదేశ్కు ప్రత్యేక హోదా సాధించడం కోసం వైఎస్ జగన్ మోహన్ రెడ్డి బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే. ఈ దీక్ష నేటికి రెండో రోజుకు చేరింది.
 
 ఈ సందర్భంగా ఆళ్ల రామకృష్ణారెడ్డి మాట్లాడుతూ పై వ్యాఖ్యలు చేశారు. ఓటుకు నోటు కేసులో ఇరుక్కుపోయి చంద్రబాబునాయుడు తన స్వార్థం కోసం మొత్తం ఏపీ ప్రజలను ప్రధాని మోదీ వద్ద తాకట్టు పెట్టారని అన్నారు. మోదీ ఎక్కడ కేసులు పెడతారో అని భయపడి కేవలం ఢిల్లీకి పోయి రాష్ట్ర ప్రజలను మోసగిస్తున్నారని మండిపడ్డారు. ప్రత్యేక హోదా వస్తుందని వారు చెప్పిన మరుక్షణమే అరుణ్ జైట్లీ వంటి మంత్రులు ప్రత్యేక హోదా ఇవ్వబోమని చెప్తున్నారని, దీనిని బట్టి చంద్రబాబు ఏపీ ప్రజలను మోసం చేస్తున్నారని ఆగ్రహం వ్యక్తం చేశారు.


 గుంటూరు: ప్రత్యేక హోదా విషయంలో ఆంధప్రదేశ్ ప్రభుత్వం తీవ్ర నిర్లక్ష్యం వహిస్తోందని ఉరవకొండ వైఎస్ఆర్ కాంగ్రెస్ పార్టీ ఎమ్మెల్యే విశ్వేశ్వర్ రెడ్డి అన్నారు. అందుకే తమ పార్టీ అధినేత వైఎస్ జగన్ మోహన్ రెడ్డి అన్ని రకాలుగా పోరాడి నిరవధిక నిరాహార దీక్షకు దిగారని చెప్పారు.  ఆంధ్రప్రదేశ్కు ప్రత్యేక హోదా సాధించడం కోసం వైఎస్ జగన్ బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే. ఈ దీక్ష నేటికి రెండో రోజుకు చేరింది.
 
 ఈ సందర్భంగా విశ్వేశ్వర్ రెడ్డి దీక్ష వద్ద మాట్లాడుతూ రైతులను ప్రభుత్వం పూర్తిగా విస్మరిస్తోందని అన్నారు. కార్పొరేట్ సంస్థలను, బడా కాంట్రాక్టర్లను మాత్రమే చూస్తున్న ప్రభుత్వం రైతులను మాత్రం పక్కకు పెట్టేసిందని చెప్పారు. కాంగ్రెస్ పార్టీ హయాంలో ఉన్న బకాయిలకు ఇన్పుట్ సబ్సిడీ ఇవ్వబోమంటూ ప్రత్యక్షంగా చెబుతోందని, ఇతర సంస్థలకు ఎలా చెల్లిస్తున్నారని ప్రశ్నించారు.
 
 పరిశ్రమల బకాయిలు చెల్లించేటప్పుడు గుర్తుకు రాని కాంగ్రెస్ ప్రభుత్వం హయాం ఒక్క రైతుల విషయంలో ఎందుకు గుర్తుకువస్తుందని ప్రశ్నించారు. కార్మికులు రాష్ట్ర అభివృద్ధికి ఆటంకంగా మారారని ప్రభుత్వం ఇష్టమొచ్చినట్లుగా మాట్లాడుతుందని చెప్పారు. ప్రతిసారి పరిశ్రమల గురించి, పారిశ్రామిక వేత్తల గురించి మాట్లాడే ప్రభుత్వానికి పేదలు కనిపించడం లేదా అని ప్రశ్నించారు. వారికి ఇప్పటి వరకు ఒక్క ఇళ్లయినా ఇచ్చారా అని ప్రశ్నించారు.
  


 గుంటూరు: వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డికి గురువారం వైద్యులు ఆరోగ్య పరీక్షలు నిర్వహించారు. ఆంధ్రప్రదేశ్కు ప్రత్యేక హోదా సాధించడం కోసం ఆయన బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే. ఈ దీక్ష నేటికి రెండో రోజుకు చేరింది.
 
 ఈ సందర్భంగా ప్రత్యేక వైద్య సిబ్బంది వచ్చి వైఎస్ జగన్కు వైద్య పరీక్షలు నిర్వహించింది. బీపీ చెక్ చేయడంతో పాటు షుగర్ లెవల్స్, సాల్ట్ లెవెల్స్ తెలుసుకునేందుకు కోసం రక్త నమునాను సేకరించింది. మరికాసేపట్లో ఆయన ఆరోగ్య పరిస్థితిపై వివరాలు తెలియనున్నాయ.


 గుంటూరు: ప్రత్యేక హోదా ఉద్యమం కీలక మలుపు తిరుగుతుందని, మహోద్యమంగా మారేందుకు తమ పార్టీ అధినేత వైఎస్ జగన్ మోహన్ రెడ్డి చేస్తున్న నిరవధిక నిరాహార దీక్ష పునాది కానుందని పార్టీ నేత అంబటి రాంబాబు చెప్పారు. వైఎస్ జగన్ ఆధ్వర్యంలో తప్పకుండా రాష్ట్రానికి ప్రత్యేక హోదా సాధిస్తామని చెప్పారు. ఆంధ్రప్రదేశ్కు ప్రత్యేక హోదా సాధించడం కోసం వైఎస్ జగన్ బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే.
 
 ఈ దీక్ష నేటికి రెండో రోజుకు చేరింది. ఈ సందర్భంగా అంబటి మాట్లాడుతూ ఆంధప్రదేశ్ ప్రభుత్వంపై విరుచుకుపడ్డారు. బీజేపీ అధికారంలోకి వచ్చినా మాట తప్పిందని అన్నారు. ప్రత్యేక రాదు అంటూ చెప్పకనే చెప్తోందని.. ఈ నేపథ్యంలో కీలక మలుపు తిప్పేందుకే తాము ఈనిర్ణయం తీసుకున్నామని, తమ అధినేత నిరవధిక నిరాహార దీక్షకు దిగారని చెప్పారు.  గతంలో ఎన్నో ఉద్యమాలు చేశారని, కేంద్రానికి తమ డిమాండ్ తెలియజేశారని గుర్తు చేశారు. తక్షణమే కేంద్రప్రభుత్వం ప్రత్యేక హోదా ఇవ్వకుంటే ఇది మహోద్యమంగా మారుతుందని ఆయన హెచ్చరించారు.


 గుంటూరు: అబద్ధాల పోటీ పెడితే ప్రపంచంలోనే ముఖ్యమంత్రి చంద్రబాబునాయుడు మొదటి స్థానంలో ఉంటాడని వైఎస్ఆర్ కాంగ్రెస్ పార్టీ నేత లక్ష్మీ పార్వతి అన్నారు. ఆయన అబద్ధాల్లో గిన్నీస్ బుక్లోకి కూడా ఎక్కుతాడని విమర్శించారు. ఆంధప్రదేశ్కు ప్రత్యేక హోదా కోరుతూ పార్టీ అధ్యక్షుడు వైఎస్ జగన్ మోహన్ రెడ్డి గుంటూరు జిల్లా నల్లపాడు వద్ద నిరవధిక నిరాహార దీక్ష బుధవారం ప్రారంభించిన విషయం తెలిసిందే. ఈ దీక్ష రెండో రోజుకు చేరిన సందర్భంగా అక్కడికి వచ్చిన లక్ష్మీ పార్వతీ మీడియాతో మాట్లాడారు.
 
 వైఎస్ జగన్ దీక్షకు అనూహ్యమద్దతు వస్తుందని చెప్పారు. ప్రభుత్వం ఏర్పాటు చేసే కార్యక్రమాలకు అక్రమంగా కోట్లు ఖర్చుపెట్టి వాహనాలు ఏర్పాటు చేస్తున్నా వచ్చేందుకు ఆసక్తి చూపని జనం.. వైఎస్ జగన్ దీక్షకు మాత్రం భారీ సంఖ్యలో తరలి వస్తున్నారని చెప్పారు.  వైఎస్ జగన్ చేస్తున్న దీక్ష ప్రజలకే కాకుండా రైతులకు ఓ ధైర్యం అని చెప్పారు. మరోపక్క, దీక్షకు మద్దతుగా గుంటూరు జిల్లా బార్ అసోసియేషన్ మద్దతు తెలిపింది. భారీ సంఖ్యలో న్యాయవాదులు దీక్ష ప్రాంగణానికి చేరి వైఎస్ జగన్కు సంఘీభావం తెలిపారు.


 గుంటూరు: ఆంధ్రప్రదేశ్ హోదా కోసం, రాష్ట్ర ప్రజల బాగుగోసం, భవిష్యత్ తరాల ప్రయోజనం కోసం వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి దీక్ష చేస్తున్నారని వైఎస్ఆర్ కాంగ్రెస్ పార్టీ అధికార ప్రతినిధి వాసిరెడ్డి పద్మ అన్నారు. అలాంటి ఆయనకు మద్దతు పలికి వెంట రావాల్సిందిపోయి విమర్శలు చేస్తారా అని ఆమె మండిపడ్డారు.
 
 ఆంధ్రప్రదేశ్కు ప్రత్యేక హోదా సాధించడం కోసం వైఎస్ జగన్ బుధవారం గుంటూరు జిల్లా నల్లపాడు వద్ద నిరవధిక నిరాహార దీక్షను ప్రారంభించిన విషయం తెలిసిందే. ఈ దీక్ష నేటికి రెండో రోజుకు చేరింది. ఈ సందర్భంగా ప్రభుత్వ నాయకులు చేస్తున్న ప్రకటనలపట్ల వాసిరెడ్డి పద్మ ఆవేదన వ్యక్తం చేశారు. చేతనైతే ప్రజల అభీష్టాన్ని కేంద్ర ప్రభుత్వానికి తెలియజేయాలని, బీజేపీతో భాగస్వాములైన ముఖ్యమంత్రి చంద్రబాబునాయుడు రాష్ట్రానికి ప్రత్యేక హోదా కావాలనే ఏపీ ప్రజల డిమాండ్ను ప్రధాని నరేంద్రమోదీకి చెప్పాలని డిమాండ్ చేశారు. అంతేకానీ, ప్రజల కోసం నిరాహార దీక్ష చేస్తున్న వైఎస్ జగన్ ను విమర్శిస్తే మాత్రం సహించేది లేదని చెప్పారు.
 
 మరోపక్క,  నిరవధిక నిరాహార దీక్షకు భారీ ఎత్తున మద్ధతు లభిస్తోంది. రెండో రోజు కూడా వివిధ ప్రాంతాలనుంచి ఆయన మద్దతుదారులు, పార్టీ కార్యకర్తలు, ప్రజలు భారీ సంఖ్యలో దీక్ష వద్దకు వస్తున్నారు. పలువురు వచ్చి ఆయనకు సంఘీభావం తెలుపుతున్నారు. ఒక్క ఆంధ్రప్రదేశ్ నలుమూలల నుంచే కాకుండా విదేశాల్లోనే ఎన్నారైలు కూడా ఈ దీక్షపట్ల భారీగా స్పందిస్తున్నారు. ఆంధ్రప్రదేశ్ ప్రభుత్వం రాష్ట్రానికి ప్రత్యేక హోదా తెచ్చి తీరాలని డిమాండ్ చేశారు. ప్రత్యేక హోదా కోసం నిరవధిక నిరాహార దీక్షకు దిగిన వైఎస్ జగన్కు వారంతా ప్రత్యేక ధన్యవాదాలు తెలుపుతున్నారు.


 గుంటూరు: ఆంధ్రప్రదేశ్ ప్రత్యేక హోదా కోసం వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి నిరవధిక నిరహార దీక్షను ప్రారంభించారు. అశేష ప్రజానీకంతో కిక్కిరిసిపోయిన సభా ప్రాంగణానికి మధ్యాహ్నం చేరుకున్న ఆయన దీక్ష వేదికపై వైఎస్ఆర్ చిత్రపటానికి పూలమాలలు వేసి నివాళి అర్పించి మధ్యాహ్నం 2.25గంటలకు దీక్ష ప్రారంభించారు. అనంతరం ప్రత్యేక హోదా కోసం ఇప్పటికే ప్రాణాలర్పించిన వారి చిత్రపటాలకు పూలమాలలు వేసి నివాళులు అర్పించి ప్రజలకు అభివాదం చేశారు.
 
 ఈ సందర్భంగా జై జగన్ అంటూ సభా ప్రాంగణం దద్దరిల్లిపోయింది.  ఆంధ్రప్రదేశ్ ప్రత్యేక హోదా సాధన కోసం వైఎస్ఆర్ కాంగ్రెస్ పార్టీ ఆధ్వర్యంలో వైఎస్ జగన్ గుంటూరులో నిరవధిక నిరాహార దీక్షను తలపెట్టిన విషయం తెలిసిందే. ఈ సందర్భంగా ఆయన రోడ్డు మార్గం ద్వారా బయలు దేరి 12 గంటల ప్రాంతంలో విజయవాడకు చేరుకున్నారు. వెంటనే, కనకదుర్గ ఆలయాన్ని సందర్శించి అమ్మవారి ఆశీస్సులు తీసుకున్నారు. దర్శనం అనంతరం గుంటూరు దీక్షా స్థలికి బయలుదేరి మధ్యాహ్నం 2గంటల ప్రాంతంలో దీక్షా స్థలికి చేరుకుని దీక్ష ప్రారంభించారు.


 గుంటూరు: ఆంధ్రప్రదేశ్ రాష్ట్ర ప్రజల అభివృద్ధి కోరుకునే వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి దీక్ష చేస్తున్నారని పార్టీ ఎంపీ మేకపాటి రాజమోహన్ రెడ్డి అన్నారు. ఈ విషయాన్ని రాష్ట్ర ప్రభుత్వం అర్ధం చేసుకుంటే మంచిదని చెప్పారు.
 
 ప్రధాని నరేంద్రమోదీ కూడా ఈ విషయాన్ని పరిగణనలోకి తీసుకొని ఆంధ్రప్రదేశ్ ప్రజల మనోభావాలను గౌరవించాలని, ప్రత్యేక హోదా ఇవ్వాలని కోరారు. ప్రధాని అనవసరంగా అపవాదు మోయొద్దని, ఆంధ్రప్రదేశ్ ప్రజలకు కూడా ప్రధానిపై నమ్మకం ఉందని, దానిని కోల్పోవద్దని హితవు పలికారు. పార్లమెంటు సాక్షిగా చేసిన వాగ్దానాన్ని, ఇచ్చిన మాటను నిలబెట్టుకోవాలని అన్నారు.


 హైదరాబాద్: ఆంధ్రప్రదేశ్ ప్రభుత్వ పాలన అంతా కూడా సింగపూర్ నుంచే నడుస్తోందని పశ్చిమగోదావరి జిల్లా నిరుద్యోగుల సంఘం ఆరోపించింది. ముఖ్యమంత్రి చంద్రబాబునాయుడు సామాన్య ప్రజానీకంలోకి రావడం లేదని, ప్రజల్లోకి అడుగు పెట్టకుండానే సింగపూర్ వెళుతున్నారని, అక్కడే ఉంటున్నారని ఆరోపించారు.  ప్రత్యేక హోదా కోసం గుంటూరు జిల్లాలో వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి చేపట్టిన నిరవధిక నిరాహార దీక్షకు పశ్చిమ గోదావరి జిల్లా నిరుద్యోగ సంఘం బయలు దేరింది.
 
 ఈ నేపథ్యంలో వారు మీడియాతో మాట్లాడారు. బాబు వస్తే జాబు వస్తుందని చెప్పి నేడు ఉపాధి కల్పించాలని కోరుతుంటే డబ్బులు లేవని అంటున్నారని మండిపడ్డారు. ముఖ్యమంత్రి చంద్రబాబు చూపిస్తున్నట్లుగా అమరావతి నగరాన్ని నిర్మించలేరని అవన్నీ గ్రాఫిక్స్లోనే సాధ్యమని చెప్పారు. మరోపక్క, శ్రీ వెంకటేశ్వర విశ్వవిద్యాలయం విద్యార్థులు కూడా దీక్షకు బయలు దేరిన సందర్భంగా మీడియాతో మాట్లాడుతూ ప్రత్యేక హోదాపై సాధ్యం కాకుంటే ముఖ్యమంత్రి చంద్రబాబునాయుడు తప్పుకోవాలని, వైఎస్ జగన్ సాధిస్తారని అన్నారు.
 
 ఎంబీఏ, ఎంసీఏ, ఇంజినీరింగ్ విద్యార్థులు బెంగళూరులో దయనీయ స్థితిలో ఉన్నారని, కేవలం ఆరువేల రూపాయలకు అవమానకర పరిస్థితుల మధ్య పనిచేస్తున్నారని ఆవేదన వ్యక్తం చేశారు. ఇవన్నీ పోవాలంటే కేవలం ప్రత్యేక హోదానే పరిష్కార మార్గం అని చెప్పారు. ప్రత్యేక హోదాపై పోరాడుతున్న వైఎస్ జగన్ ను అడ్డుకోవడం అంటే మొత్తం రాష్ట్ర ప్రజల ప్రయోజనాన్ని అడ్డుకున్నట్లేనని అన్నారు. ప్రత్యేక హోదాతో తమకు కనీసం ప్రైవేటు ఉద్యోగాలయినా వస్తాయని చెప్పారు.


 హైదరాబాద్: వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి బుధవారం మధ్యాహ్నం బెజవాడ కనకదుర్గమ్మ అమ్మవారిని దర్శించుకున్నారు. ఆంధ్రప్రదేశ్ ప్రత్యేక హోదా సాధన కోసం వైఎస్ఆర్ కాంగ్రెస్ పార్టీ ఆధ్వర్యంలో ఆయన గుంటూరులో నిరవధిక నిరాహార దీక్షను తలపెట్టిన విషయం తెలిసిందే. ఈ ఉదయం రోడ్డు మార్గంలో హైదరాబాద్ నుంచి బయలు దేరిన ఆయన మధ్యాహ్నం 12 గంటల ప్రాంతంలో విజయవాడ చేరుకున్నారు.
 
 అనంతరం అమ్మవారి ఆశీస్సులు తీసుకునేందుకు కనకదుర్గ అమ్మవారి ఆలయాన్ని సందర్శించారు. ఆలయ అధికారులు ఆయనకు స్వాగతం పలికారు. ఈ సందర్భంగా జననేత ప్రత్యేక పూజలు నిర్వహించారు. దీక్షకు ప్రభుత్వం పలు రకాలుగా ఆటంకం కలిగిస్తున్న నేపథ్యంలో ఆంధ్రప్రదేశ్ ప్రజల కోసం తాను చేస్తున్న దీక్ష విజయవంతం కావాలని, ప్రజలకు మేలు జరగాలని ఈ సందర్భంగా అమ్మవారిని వేడుకొని అనంతరం గుంటూరుకు బయలు దేరారు.
 మరిన్ని చిత్రాలకు ఇక్కడ క్లిక్ చేయండి


 హైదరాబాద్: ఆంధ్రప్రదేశ్ ప్రత్యేక హోదా సాధన కోసం వైఎస్ఆర్ కాంగ్రెస్ పార్టీ ఆధ్వర్యంలో గుంటూరులో తలపెట్టిన నిరవధిక నిరాహార దీక్షకు బయలు దేరిన పార్టీ అధ్యక్షుడు వైఎస్ జగన్ మోహన్ రెడ్డి విజయవాడకు చేరుకున్నారు. ఈ సందర్భంగా కృష్ణా జిల్లా వైఎస్ఆర్ కాంగ్రెస్ పార్టీ నేతలు, కార్యకర్తలు వైఎస్ జగన్ కు ఘన స్వాగతం పలికారు.
 
 ఆయనతోపాటు ఎంపీ మిధున్ రెడ్డి, భూమన కరుణాకరరెడ్డి కూడా ఉన్నారు. మరికాసేపట్లో వైఎస్ జగన్ విజయవాడ కనకదుర్గ అమ్మవారి ఆశీస్సులు తీసుకోనున్నారు. అనంతరం నేరుగా దీక్షా స్థలికి చేరుకుంటారు. గుంటూరు శివారులోని నల్లపాడు రోడ్డు వద్ద దీక్షా శిబిరం ఏర్పాటు చేసిన విషయం తెలిసిందే. కాగా, ఈ దీక్షకు మద్దతుగా ఆంధ్రప్రదేశ్ నలుమూలల నుంచి లక్షలాదిగా ప్రజలు బయలుదేరి వస్తున్నారు.


 కడప: ఆంధ్రప్రదేశ్కు ప్రత్యేక హోదాపై ముందునుంచి కూడా ఒక్క వైఎస్ఆర్ కాంగ్రెస్ పార్టీనే పనిచేస్తుందని వైఎస్ఆర్ కడప జిల్లాకు చెందిన ఎమ్మెల్యే అంజన్ భాషా అన్నారు. కేంద్రం, రాష్ట్రం ఇచ్చిన హామీలన్నీ వెంటనే అమలు చేయాలని ఆయన డిమాండ్ చేశారు. ప్రత్యేక హోదా కోసం గుంటూరు జిల్లాలో వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి చేపట్టిన నిరవధిక నిరాహార దీక్షకు వైఎస్ఆర్ కడప జిల్లా నుంచి భారీగా ప్రజలు తరిలారు.
 
 ఈ నేపథ్యంలో ఆయన అంజన్ భాషా మాట్లాడుతూ ఒక్క జిల్లా నుంచే దాదాపు నాలుగు లక్షలమంది వైఎస్ జగన్ దీక్షకు సంఘీభావం తెలిపేందుకు వెళుతున్నారని చెప్పారు. ప్రభుత్వం మెడలు వంచైనా వైఎస్ జగన్ ప్రత్యేక హోదా సాధిస్తారని చెప్పారు. చంద్రబాబు నైజం అందరికీ తెలిసిందేనని, తొలి దీక్షా స్థలిని అందుకే అడ్డుకున్నారని, అప్పుడే ఆయన కుట్ర తెలిసిందని చెప్పారు. సొంత ఆస్తులు కాపాడుకునేందుకు చంద్రబాబు ఆరాటం తప్ప రాష్ట్ర ప్రజల కోసం ఏమీ చేయడం లేదని చెప్పారు.


 కడప: ఆంధప్రదేశ్ ప్రత్యేక హోదా కోసం గుంటూరులో వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి తలపెట్టిన నిరవధిక నిరాహార దీక్షకు కడప జిల్లా వ్యాప్తంగా దీక్ష మద్దతుదారులు, కార్యకర్తలు, ప్రజలు భారీ ఎత్తున సంఘీభావం తెలిపేందుకు కదిలారు.
 
 పోరుమామిళ్ల నుంచి ఎమ్మెల్యే జయరాములు, నాయకులు, కార్యకర్తలు, ఇతర ప్రజలు బయలుదేరగా రాజం పేట నుంచి వైఎస్సార్సీపీ మాజీ ఎమ్మెల్యే ఆకేపాటి అమర్నాథ్ రెడ్డి ఆధ్వర్యంలో భారీగా దీక్ష వద్దకు తరిలారు. ఎమ్మెల్యే కొరుముట్ల శ్రీనివాసులు ఆధ్వర్యంలో కూడా భారీగా రైతులు, విద్యార్థులు, వైఎస్ఆర్ సీపీ కార్యకర్తలు సంఘీభావం తెలిపేందుకు బయలుదేరారు.


 హైదరాబాద్: చేతకాని వాళ్లు, చేతులెత్తేసిన వాళ్లు ఏమైనా చెప్తారని వైఎస్ఆర్ కాంగ్రెస్ పార్టీ నేత మేరుగ నాగార్జున అన్నారు. ప్రత్యేక హోదాపై ఇప్పటి వరకు ముఖ్యమంత్రి చంద్రబాబునాయుడి నుంచి పలువురు అధికార మంత్రులు ఎమ్మెల్యేలు చేసిన వ్యాఖ్యలపై మండిపడ్డారు. ప్రత్యేక హోదాపై గట్టిగా నిలబడలేనివాళ్లు కేంద్రాన్ని నిలదీయలేని వాళ్లు ఇక రాష్ట్రాన్ని ఎలా సంక్షేమ బాటలో నడిపిస్తారని ప్రశ్నించారు. ముందు నుంచి కూడా తమ పార్టీ అధినేత వైఎస్ జగన్ మోహన్ రెడ్డి మాటకు కట్టుబడి ఉన్నారని, ప్రత్యేక హోదా కోసం ఉద్యమాలు చేశారని, దేశం నడిబొడ్డున దీక్ష చేపట్టారని గుర్తు చేశారు.
 
 ఇప్పుడు చేయబోయే నిరవధిక నిరాహార దీక్ష మరో ఉద్యమం కాబోతుందని చెప్పారు. ఇక మరోనేత విశ్వేశ్వర్ రెడ్డి మాట్లాడుతూ.. రాష్ట్రంలో, కేంద్రంలో బీజేపీతో భాగస్వాములై ఉండి కూడా ప్రత్యేక హోదా సాధించడంలో ముఖ్యమంత్రి చంద్రబాబునాయుడు విఫలమయ్యారని అన్నారు. కేంద్రంపై ఒత్తిడి తేవాల్సిందిపోయి వారిని పొగడటంతోనే సరిపెడుతున్నారని చెప్పారు. సంకుచిత మనస్తత్వంతో చంద్రబాబు ఆలోచిస్తున్నారని ఆరోపించారు. అందుకే వైఎస్ జగన్ నిర్మాణాత్మక దీక్షకు దిగారని ప్రత్యేక హోదా సాధించేవరకు దీక్ష ఉంటుందని తెలిపారు.


 హైదరాబాద్: ఆంధ్రప్రదేశ్ ప్రత్యేక హోదా కోసం వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్మోహన్ రెడ్డి తలపెట్టిన నిరవదిక నిరహార దీక్షకు భారీ ఎత్తున మద్దతు లభిస్తోంది. దీక్షకు స్పందించి ఆంధ్రప్రదేశ్ నలుమూలల నుంచి భారీ ఎత్తున ప్రజలు దండుగా కదిలారు. వైఎస్ఆర్ కాంగ్రెస్ పార్టీ కార్యకర్తలతోపాటు సామాన్య జనం కూడా కుప్పలుగా గుంటూరు శివారులోని నల్లపాడు రోడ్డు వద్ద ఏర్పాటు చేసిన దీక్షా స్థలికి కదిలారు. తూర్పు గోదావరి జిల్లా నుంచి దీక్షకు మద్దతుగా ప్రత్తిపాడు ఎమ్మెల్యే వరుపుల సుబ్బారావు ఆధ్వర్యంలో 30 వాహనాల్లో బయలుదేరారు.
 
 అలాగే, కాకినాడ సిటీ మాజీ ఎమ్మెల్యే ద్వారంపూడి చంద్రశేఖర్ రెడ్డి పెద్ద ఎత్తున మద్దతుదారులతో దీక్ష వద్దకు కదిలారు. కాకినాడ రూరల్ నియోజకవర్గం నుంచి పార్టీ కన్వీనర్ వేణుగోపాలకృష్ణ ఆధ్వర్యంలో గుంటూరు నేతలు కార్యకర్తలు తరలి వెళ్లారు. పెద్దకూరపాడు నియోజకవర్గం నుంచి పార్టీ నేత అనిల్ రెడ్డి ఆధ్వర్యంలో బయలు దేరారు. తూర్పుగోదావరి జిల్లాలోని ముమ్మిడివరం నియోజకవర్గం నుంచి గుత్తుల సాయి ఆధ్వర్యంలో 25 వాహనాల్లో కార్యకర్తలు వస్తున్నారు. అలాగే పీ గన్నవరం నియోజకవర్గం నుంచి కొండేటి చిట్టిబాబు ఆధ్వర్యంలో 50 వాహనాల్లో కార్యకర్తలు దీక్ష వద్దకు బయలుదేరారు. దర్శి నియోజకవర్గ ఇంఛార్జ్ శివప్రసాద్ రెడ్డి ఆధ్వర్యంలో 150 వాహనాల్లో దీక్షకు బయల్దేరారు.


 గుంటూరులో జగన్ దీక్షకు మద్దతు ప్రకటించిన యూనివర్సిటీల విద్యార్థులు
 
 ప్రత్యేక హోదా సాధన కోసం ప్రతిపక్షనేత వైఎస్ జగన్‌మోహన్‌రెడ్డి చేపట్టనున్న దీక్ష.. ఒకరోజు ముందుగానే విద్యార్థుల్లో కదలిక తెచ్చింది.  రాష్ట్రవ్యాప్తంగా విశ్వవిద్యాలయాలు, కాలేజీలు వేదికగా.. ప్రత్యేక హోదా వల్ల కలిగే ప్రయోజనాల గురించి మాట్లాడుకున్నారు. కేంద్ర, రాష్ట్ర ప్రభుత్వాల మోసపూరిత వైఖరిని ఎండగట్టాలని తీర్మానించుకున్నారు. ప్యాకేజీలతో రాజీపడి రాష్ట్ర ప్రయోజనాలను దెబ్బతీస్తున్న చంద్రబాబుకు బుద్ధి చెప్పాలంటే వైఎస్ జగన్ చేస్తున్న దీక్షకు మద్దతు పలకాలని నిర్ణయించుకున్నారు. రాష్ట్ర ప్రయోజనాల కోసం ఇకపై అంతా కలిసి ఉద్యమిస్తామని ప్రకటించారు.
 
 శ్రీకృష్ణదేవరాయ విశ్వవిద్యాలయంలో..
 సమైక్య ఉద్యమ పురిటిగడ్డ అయిన శ్రీకృష్ణదేవరాయ విశ్వవిద్యాలయం వేదికగా ప్రత్యేకహోదా ఉద్యమానికి జవసత్వాలు నింపేందుకు విద్యార్థులంతా ఏకమయ్యారు. హోదా సాధించేవరకు ఏ బెదిరింపులకూ భయపడకుండా ఉద్యమాన్ని కొనసాగించాలని తీర్మానించారు. ఎన్నో ప్రయో జనాలున్న ప్రత్యేక హోదాను ఐదు కోట్ల మంది ప్రజలు కోరుకుంటున్నారు. ఇప్పటికే ఐదుగురు ఆత్మార్పణం చేసుకున్నారని, వారి ఆత్మశాంతికోసమైనా ఇకపై ఉద్య మించాలని నిర్ణయించుకున్నారు.
 
 రాష్ట్ర విభజనే అన్యాయం. అంతోఇంతో న్యాయం జరిగే మార్గం ప్రత్యేక హోదా సాధన ఒక్కటే. సార్వత్రిక ఎన్నికల సమయంలో బీజేపీ , టీడీపీ ఇదే తరహాలో డిమాండ్ చేశాయి. రాష్ట్రాన్ని విభజించేముందు పార్లమెంటులో ఇచ్చిన హామీలకే దిక్కులేకపోతే ఎలా? అని ప్రశ్నించారు. ఈ కార్యక్రమంలో ప్రత్యేక హోదా సాధన కమిటీ సభ్యులు బాలస్వామి, డాక్టర్ వీరబ్రహ్మం, వైఎస్సార్ విద్యార్థి విభాగం రాష్ట్ర కార్యదర్శి లింగారెడ్డి తదితరులు పాల్గొని ప్రసంగించారు.
 
 ఆంధ్ర విశ్వవిద్యాలయంలో..
 కొత్త రాష్ట్రం ఆంధ్రప్రదేశ్‌కు ప్రత్యేక ప్యాకేజీ వల్ల నష్టమేనని, రూ.15 వేల కోట్ల లోటు బడ్జెట్‌తో అవతరించిన రాష్ట్రానికి ప్రత్యేక హోదాతోనే ఆసరా దొరుకుతుందని విశాఖ విద్యార్థులు నినదించారు. ఆంధ్ర విశ్వావిద్యాలయం ఆర్ట్స్ కళాశాల ప్రాంగణంలో మంగళవారం నిర్వహించిన ప్రత్యేక హోదా చర్చాగోష్టిలో ప్రత్యేక హోదాతో రాష్ట్రానికి కలిగే లాభం, ప్రత్యేక ప్యాకేజీ వల్ల కలిగే నష్టాలను చర్చించారు. జగన్ నిరవధిక దీక్షకు మద్దతు పలకాలని తీర్మానించుకున్నారు.
 
 ప్రత్యేక హోదా సాధించడానికి ప్రతిపక్షనేత ఉద్యమించడం విద్యార్థిలోకానికి కొండంత ధైర్యాన్నిచ్చిందన్నారు. ఎమ్మెస్సీ పీడీఎఫ్ సోషల్‌వర్క్ విభాగం విద్యార్థి బి. మోహన్‌దాస్ మాట్లాడుతూ.. ఆంధ్రప్రదేశ్‌కు ప్రత్యేక హోదా కల్పిస్తే పన్నుల్లో రాయితీలు వస్తాయని, రాయితీలు వస్తే పరిశ్రమల ఏర్పాటుకు పారిశ్రామికవేత్తలు ముందుకొస్తారని, కంపెనీలు వస్తే ఉపాధి అవకాశాలు పెరిగి నిరుద్యోగ సమస్య పరిష్కారమవుతుందని ఆశాభాశం వ్యక్తం చేశారు.
 
 బీఆర్‌ఏయూలో...
 ప్రత్యేక హోదాతోనే రాష్ట్ర భవిష్యత్తు సాధ్యమని ఎచ్చెర్లలోని బీఆర్‌ఏయూ వేదికగా విద్యార్థులు నినదించారు. హోదా అవసరంపై మంగళవారం వర్సిటీలో సమావేశమయ్యారు. ఏపీ లోటు బడ్జెట్‌తో ఉందని, నోటిఫికేషన్లు ఇచ్చి, పరీక్షలు నిర్వహించినా నియామకాలు చేపట్టలేని దుస్థితిలో రాష్ట్రం ఉందన్నారు. టెక్కలిలోని ఆదిత్య ఇంజినీరింగ్ కళాశాల విద్యార్థులు హోదాపై చర్చించుకున్నారు. ఆంధ్రప్రదేశ్‌కు ప్రత్యేక హోదా తప్పనిసరిగా ఇవ్వాలని వైఎస్ జగన్‌మోహన్‌రెడ్డి ఉద్యమాలు చేస్తుంటే, అధికార పక్షం అడ్డుకోవడం దారుణమని ఆగ్రహం వ్యక్తం చేశారు.
 
 విజయనగరంలో...
 ప్రత్యేక హాదా ఇవ్వకుంటే రాష్ట్రం అధోగతి పాలవుతుందని.. పార్లమెంటు సాక్షిగా పాలకులు ఇచ్చిన హామీని నిలబెట్టుకొనేవరకు ఉద్యమి స్తామని విజయనగరం విద్యార్థులు తీర్మానించుకున్నారు. ప్రత్యేకహోదా  కోసం ప్రతిపక్షనేత జగన్‌మోహన్‌రెడ్డి ఆధ్వర్యంలో గుంటూరులో ఈరోజు నుంచి చేస్తున్న దీక్షకు తామంతా అండగా నిలబడతామని ప్రకటిం చారు. విజయ నగరంలో మంగళవారం నిర్వహించిన కార్యక్రమంలో సత్యా డిగ్రీకాలేజీ, సత్యా పీజీ కాలేజీ, ఎంఆర్, సీతం ఇంజనీరింగ్ కళాశాలల విద్యార్థులు పెద్ద సంఖ్యలో పాల్గొన్నారు. 
 
 అధిక శాతం ఉపాధిని కల్పించే కెమికల్, ఫార్మస్యుటికల్ పరిశ్రమలు పూర్తిగా హైదరాబాద్‌లోనే ఉన్నాయని, ఈ ప్రాంతాల్లో చదువుకున్న విద్యార్థులు అక్కడికెళ్తే మీది ఈ రాష్ట్రం కాదు.. పొమ్మంటున్నారని విద్యార్థులు  ఆవేదన వ్యక్తం చేశారు. ప్రత్యేక హోదా కల్పిస్తే కేంద్ర ప్రభుత్వ రాయితీలతో అవే పరిశ్రమలు మన రాష్ట్రంలో ఏర్పాటవుతాయని ధీమా వ్యక్తం చేశారు.
 
 పశ్చిమ గోదావరిలో...
 ఆంధ్రరాష్ట్రం అభివృద్ధి చెందాలంటే ప్రత్యేకహోదా తప్పనిసరి అని, దానిని సాధించి తీరాలని విద్యార్థి లోకం గళమెత్తింది. పశ్చిమగోదావరి జిల్లా తాళ్లపూడిలోని కరిబండి సుబ్బారావు మోమోరియల్ విద్యాసంస్థల్లో డిగ్రీ చదువుతున్న విద్యార్థులు మంగళవారం ప్రత్యేకహోదా ఇవ్వాలని డిమాండ్ చేశారు. విభజన చట్టంలో కేంద్ర ప్రభుత్వం ఇచ్చిన హామీని అమలు చేయాలన్నారు. ప్రత్యేకహోదాతోనే ఉద్యోగ అవకాశాలు, పరిశ్రమలు, పన్ను రాయితీలు వస్తాయని, ప్యాకేజీల వల్ల లాభం లేదన్నారు. ప్రత్యేక హోదా సాధనకు ఉద్యమాలు చేస్తున్న వారికి ప్రతి ఒక్కరూ సహకరించడం ద్వారా కేంద్ర, రాష్ట్ర ప్రభుత్వాలపై వత్తిడి తేవాలని పిలుపునిచ్చారు.
 
 ‘రాష్ట్రానికి ప్రత్యేక హోదా ఇవ్వడం ద్వారా ఉద్యోగాలు వస్తాయి. నిరుద్యోగులందరికీ ఉపాధి దొరుకుతుంది. మన అవసరాలు తీరడంతోపాటు అన్ని రంగాల్లోను అభివృద్ధి సాధించడం మరింత సులభమవుతుం’ని బీకామ్ ఫైనల్ ఇయర్ విద్యార్థిని పి. గంగాభవాని పేర్కొన్నారు.  ఆంధ్రప్రదేశ్‌కు ప్రత్యేకహోదా వస్తే మనం కొనే వస్తువుల ధరలు సగానికి సగం తగ్గుతాయని, ప్రజల జీవన ప్రమాణాలు మెరుగుపడతాయని, ఆర్థిక పరిస్థితి చక్కబడుతుందని మరికొంతమంది విద్యార్థులు తమ అభిప్రాయాలను వ్యక్తం చేశారు.
 
 ఒంగోలులో..
 ఒంగోలులోని  నాగార్జున డిగ్రీ కాలేజీ ఆవరణలో వైఎస్సార్‌సీపీ విద్యార్థి విభాగం ఆధ్వర్యంలో ప్రత్యేక హోదా ఆంధ్రుల హక్కు అనే నినాదంతో మంగళవారం సదస్సు నిర్వహించారు. సదస్సులో ఏపీ ప్రత్యేక హోదా సాధన సమితి జిల్లా కన్వీనర్ షంషేర్ అహ్మద్ మాట్లాడుతూ హోదా వస్తే రాష్ట్రానికి నిధుల కేటాయింపులో రాజ్యాంగ బద్ధమైన హక్కు లభిస్తుందన్నారు. విద్యార్థి జేఏసీ రాష్ట్ర కన్వీనర్ నాగరాజు మాట్లాడుతూ.. ప్రత్యేక హోదాపై జగన్‌మోహన్ రెడ్డి తలపెట్టిన దీక్షకు ప్రతి ఒక్కరూ మద్దతు తెలపాలన్నారు. 
 
 చంద్రబాబు ఢిల్లీలో ప్రత్యేక ప్యాకేజీ కోసం వెంపర్లాడుతూ, రాష్ట్రంలో ప్రత్యేక హోదా పై కృషి చేస్తున్నానని కల్లబొల్లి కబుర్లు చెప్పడం దారుణమన్నారు. డిగ్రీ విద్యార్థిని ఊహారాణి మాట్లాడుతూ.. నిరుద్యోగులు ఉద్యోగాల వేటలో ఏ కంపెనీకి పోయినా ప్రస్తుత పరిస్థితుల్లో నో వేకెన్సీ బోర్డులు కనిపిస్తున్నాయని, ఆ బోర్డులు పోయి వాంటెడ్ బోర్డులు రావాలంటే ఏపీ ప్రత్యేక హోదా తప్పనిసరిగా రావాల్సిందేనన్నారు. చిత్తశుద్ధితో అందరూ ముందుకు సాగితేనే హోదా సాధించడం పెద్ద కష్టమేమీ కాదన్నారు.
 
 కర్నూలులో...
 ప్రత్యేక హోదా ఆంధ్రుల హక్కు అని విద్యార్థి సంఘాలు ఉద్ఘాటించాయి.  మంగళవారం నారాయణ జూనియర్ కళాశాలలో వివిధ విద్యార్థి సంఘాల ఆధ్వర్యంలో ప్రత్యేకహోదా-ఆంధ్రుల హక్కు అనే అంశంపై సదస్సు నిర్వహించారు.  పార్లమెంట్ సాక్షిగా ఏపీకి ఐదేళ్లు ప్రత్యేక హోదా ఇస్తామని చెప్పి కేంద్ర, రాష్ట్ర ప్రభుత్వాల్లు మోసం చేశాయని ఆవేదన వ్యక్తం చేశారు. కేంద్ర, రాష్ర్ట ప్రభుత్వాలు ఆంధ్రప్రదేశ్‌పై వివక్ష చూపుతున్నాయన్నారు. జగన్‌తో కలిసి ఉద్యమించి, హోదా సాధించుకుందామని తీర్మానించుకున్నారు.
 
 నెల్లూరులో...
 ప్రత్యేక హోదా అంధ్రుల హక్కుని, ప్రత్యేక ప్రతిపత్తి కోసం ఉద్యమిస్తామని విద్యార్ధి లోకం గళమెత్తింది. స్థానిక రామలింగాపురంలోని శ్రీచైతన్య కళాశాలలో మంగళవారం వైఎస్సార్ విద్యార్ధి విభాగం జిల్లా అధ్యక్షులు శ్రావణ్ ఆధ్వర్యంలో హోదాపై సమావేశం నిర్వహించారు. ఆంధ్రప్రదేశ్‌కు ప్రత్యేక హోదా రాకుంటే రాష్ట్రం పూర్తిగా వెనుకబడుతుందని పలువురు విద్యార్థులు ఆందోళన వ్యక్తం చేశారు.  ప్రత్యేకహోదా కోసం నిరవధిక దీక్ష చేపడుతున్న జగన్మోహనరెడ్డికి సంపూర్ణ మద్దతు పలుకుతున్నామన్నారు. సీనియర్ ఇంటర్ విద్యార్థి ఆర్‌టీ సిద్ధార్థ మాట్లాడుతూ.. ప్రత్యేక హోదా రాకుంటే నిరుద్యోగం పెరుగుతుందని, ప్రత్యేక హోదాతోనే రాష్ట్రం అభివృద్ది చెందు తుందన్నారు.


 జగన్ సమర దీక్ష జయప్రదం
 వైఎస్సార్ సీపీ కార్యకర్తల్లో సరికొత్త ఉత్సాహం
  
  సాక్షి, విజయవాడ బ్యూరో : రాష్ట్ర ప్రభుత్వ ఏడాది వైఫల్యాలపై వైఎస్సార్ కాంగ్రెస్ పార్టీ అధినేత వైఎస్ జగన్‌మోహన్‌రెడ్డి మంగళగిరిలో నిర్వహించిన రెండు రోజుల సమర దీక్ష పార్టీ శ్రేణుల్లో సమరోత్సాహం నింపింది. అమలుకాని హామీలు ఇచ్చి అధికారంలోకి వచ్చాక ప్రజలను పట్టించుకోని పాలకులపై జగన్‌మోహన్‌రెడ్డి సమరశంఖం పూరించిన తీరు అందరినీ ఆకట్టుకుంది. రెండ్రోజుల దీక్ష విజయవంతం కోసం పదిరోజుల నుంచి వైఎస్సార్ సీపీ కీలక నేతలు చేసిన కృషి ఫలించింది.
 
 తరలివచ్చిన ప్రజలకే కాకుండా రాష్ట్రంలోని 13 జిల్లాల్లోని ప్రజల ముంగిటకు సమరదీక్ష సంకల్పాన్ని తీసుకెళ్లగలిగారు. పార్టీ రాష్ట్ర ప్రధాన కార్యదర్శి వి.విజయసాయిరెడ్డి రాష్ట్రమంతా పర్యటించి పార్టీ శ్రేణులను సమరదీక్ష కోసం సన్నద్ధం చేయగలిగారు. పార్టీ  ప్రోగ్రామింగ్ కో-ఆర్డినేటర్ తలశిల రఘురామ్ మంగళగిరి వైజంక్షన్ వద్ద స్థలం ఎంపిక నుంచి దీక్ష పూర్తయ్యే వరకు ఏర్పాట్లను పర్యవేక్షించడంలో పార్టీ శ్రేణులను సమన్వయం చేశారు. గుంటూరు జిల్లా పార్టీ అధ్యక్షుడు మర్రి రాజశేఖర్, స్థానిక ఎమ్మెల్యే ఆళ్ల రామకృష్ణారెడ్డి(ఆర్కే) సమరదీక్ష విషయంలో బాధ్యత తీసుకుని తమవంతు కృషి చేశారు.  పార్టీ కీలక నేతలతోపాటు గుంటూరు, కృష్ణా జిల్లాల పార్టీ నేతలు బాధ్యత తీసుకుని పనిచేయడంతో లక్ష్యాన్ని సాధించినట్టయింది.
 
  ప్రజల్లోకి వినూత్న తరహాలో ప్రభుత్వ వైఫల్యాలు
  ఎన్నికల ముందు, అధికారంలోకి వచ్చాక చంద్రబాబు ఇచ్చిన హామీలు, వాటి అమలులో వైఫల్యాలను ప్రజలకు వివరించడంలో వైఎస్సార్ సీపీ చేసిన ప్రయత్నం ఫలప్రదమైంది. టీడీపీ ప్రభుత్వం ఇచ్చిన వందల హామీల్లో మచ్చుకు  ఒక వంద హామీలను ప్రస్తావిస్తూ తొలిరోజున విడుదల చేసిన ప్రజా బ్యాలెట్‌కు అపూర్వ స్పందన లభించింది. ఏడాది క్రితం టీడీపీ ప్రభుత్వం మంగళగిరి ప్రాంతంలోనే ప్రమాణస్వీకారోత్సవం నిర్వహించగా, ఏడాది తరువాత అదే ప్రాంతంలో చరిత్రాత్మక సమర దీక్ష నిర్వహించడంతో వైఎస్సార్ కాంగ్రెస్ పార్టీ మరింత పట్టు సాధించేందుకు దోహదం చేసింది.  
 
  సమరదీక్షతో టీడీపీ శ్రేణుల్లో కలవరం: ఎమ్మెల్యే కోన
  బాపట్ల :  చంద్రబాబు నయవంచనకు నిరసనగా  వైఎస్ జగన్‌మోహన్‌రెడ్డి  నిర్వహిం చిన సమరదీక్షకు అనూహ్య స్పందన లభించిందని బాపట్ల ఎమ్మెల్యే కోన రఘుపతి చెప్పారు. దూరప్రాంతాల నుంచి సమరదీక్షకు తరలివచ్చిన అభిమానులకు ఆయన  కృతజ్ఞతలు తెలిపారు. శుక్రవారం బాపట్లలో   విలేకరుల సమావేశంలో మాట్లాడుతూ రాష్ట్ర ప్రభుత్వ ఏడాది పాలనపై ప్రజల్లో అసంతృప్తి ఉందనేది సమరదీక్షకు వచ్చిన స్పందనతో తేటతెల్లమైందని చెప్పారు. ప్రజాస్పందన చూసి అధికారపార్టీ నాయకుల్లో కలవరం మొదలైందన్నారు. హామీ ల అమలు విషయంలో ప్రభుత్వం పై ఒత్తిడి తెచ్చేందుకు జగన్ ఉన్నారనే నమ్మకం కలిగిందని, ఆ నమ్మకంతోనే రాబోవు రోజుల్లో మరిన్ని ఉద్యమాలకు సిద్ధమవుతున్నారని పేర్కొ న్నారు. రేవంత్‌రెడ్డి విషయంపై సీఎం సమాధానం చెప్పాలని  డిమాండ్ చేశారు.


  తణుకు : వైఎస్సార్ సీపీ అధినేత వైఎస్ జగన్‌మోహన్‌రెడ్డి మంగళగిరిలో నిర్వహించిన సమరదీక్షకు ప్రజలు స్వచ్ఛందంగా భారీ సంఖ్యలో తరలివచ్చి విజయవంతం చేశారని వైఎస్సార్ సీపీ రాష్ట్ర ప్రధాన కార్యదర్శి, నియోజకవర్గ సమన్వయకర్త కారుమూరి వెంకట నాగేశ్వరరావు తెలిపారు. శుక్రవారం నిర్వహించిన విలేకరుల సమావేశంలో మాట్లాడుతూ చంద్రబాబు ఏడాది పాలనపై విసుగెత్తిన ప్రజలు సమరదీక్షకు పోటెత్తారన్నారు. అన్నివర్గాల ప్రజలు పెద్ద సంఖ్యలో పాల్గొని వైఎస్ జగన్‌మోహన్‌రెడ్డికి సంఘీభావం తెలిపారని కారుమూరి చెప్పారు. జన స్పందనను చూసి ఈర్ష పడిన ప్రభుత్వం దీక్షా శిబిరం వద్ద కనీస భద్రత కూడా ఏర్పాటు చేయలేదని, ప్రతిపక్ష నేతకు ఇచ్చే గౌరవం ఇదేనా అని ఆయన ప్రశ్నించారు. జిల్లాలో టీడీపీ ప్రజాప్రతినిధులు ప్రజాధన దోపిడీకి పాల్పడుతున్నారన్నారు. చెరువులను తవ్వే పేరుతో గట్లు పటిష్టం చేయకుండా నిబంధనలకు విరుద్ధంగా మట్టిని తెగనమ్ముకుంటున్నారని కారుమూరి విమర్శించారు.  
  
  వేల్పూరుకేనా అభివృద్ధి?
  నియోజకవర్గంలో పర్యటించిన ముఖ్యమంత్రి ఒక్క వేల్పూరుకే వరాల జల్లు కురిపించడం ఎంతవరకు సమంజసమని కారుమూరి ప్రశ్నించారు. నియోజకవర్గంలోని అన్ని గ్రామాలకు సమాన ప్రాతినిధ్యం ఇస్తూ అభివృద్ధికై నిధులు కోరాల్సింది పోయి కేవలం వేల్పూరు గ్రామాభివృద్ధికే నిధులు ఇవ్వమని ఎమ్మెల్యే కోరడం దారుణమన్నారు. ఎమ్మెల్యే కొనుగోలులో రేవంత్‌రెడ్డి, డబ్బు సంచి వ్యవహారంలో మంత్రి పీతల సుజాత విషయంలో చంద్రబాబు నోరు విప్పకపోవడం సిగ్గు చేటని కారుమూరి విమర్శించారు. ఏఎంసీ మాజీ చైర్మన్ చిట్టూరి సునంద, మండపాక సర్పంచ్ ఉండవల్లి జానకి, నాయకులు ఎస్‌ఎస్ రెడ్డి, చోడే జోషి, కడియాల సూర్యనారాయణ, మద్దిరాల రామసతీష్ తదితరులు పాల్గొన్నారు.
  


 హైదరాబాద్: ప్రభుత్వ విధానాలకు వ్యతిరేకంగా వైఎస్ జగన్ చేపట్టిన సమర దీక్ష రెండో రోజూ కొనసాగుతోంది. అందులో భాగంగా వైఎస్సార్సీపీ సీనియర్ నేత ధర్మాన ప్రసాద్ రావు ఏపీ సీఎం చంద్రబాబు పాలనా తీరును ఎండగట్టారు. నాడు వైఎస్ రాజశేఖర్ రెడ్డి ప్రతిపక్ష నేతగా ఉన్న కాలంలో ఆయన మాటలను లెక్కచేయనందుకే పదేళ్ల పాటు టీడీపీ  అధికారానికి దూరమైందని ధర్మాన ఆగ్రహం వ్యక్తం చేశారు.
 
 "ప్రధాన ప్రతిపక్షం చెబుతున్న పనులకు సవరణలు చేస్తే నేడు రాష్ట్రంలో ఈపరిస్థితి ఉండేది కాదు. వైఎస్ రాజశేఖర్ రెడ్డి ప్రజా ప్రతిపక్ష నాయకుడిగా ఎంతో మేలు చేశారు. అనంతరం అధికారంలోకి వచ్చారు. అదే తరహాలో నేడు మహానేత తనయుడు ప్రభుత్వ తీరును ఎండగట్టేందుకు సిద్ధమయ్యారు. శాసన సభలో ఆనాడు వైఎస్ఆర్ మాటలను ప్రభుత్వం పట్టించుకోలేదు. ఫలితంగా పదేళ్లు అధికారానికి దూరమైంది. రాష్ట్రంలో పురుగుల మందు తాగి రైతులు ఆత్మహత్యలు చేసుకుంటున్నా ప్రభుత్వ పట్టించుకోలేదు.
 
 ప్రభుత్వ సహాయం కోసం ప్రజలు ఎదురు చూస్తుంటే ప్రభుత్వం నిమ్మకు నీరెత్తినట్టుంది.  నాడు వైఎస్సార్ పాదయాత్రను ప్రజల భరోసాగా మలిచారు. ఇచ్చిన మాట ప్రకారమే రైతుల ఉచిత విద్యుత్ పై తొలి సంతకం చేశారు. ఎన్నికల మేనిఫెస్టో విడుదల చేసి.. మారానని నమ్మబలికి చంద్రబాబు గెలిచారు. అధికారంలోకి వచ్చిన నాటి నుంచి నేటి వరకు ఏ ఒక్క హామీని నెరవేర్చిన పాపాన పోలేదు. ఐదేళ్ల ప్రభుత్వానికి ఏడాదిలోపే ఎన్నో ఆరోపణలు ఉన్నాయి" అని ధర్మాన ప్రసాదరావు ప్రభుత్వంపై నిప్పులు చెరిగారు.


 గుంటూరు: రేవంత్ వ్యవహారంలో అడ్డంగా దొరికిన ఆంధ్రప్రదేశ్ సీఎం చంద్రబాబు నాయుడు, వైఎస్ఆర్సీపీ పై దుష్ప్రచారం చేస్తున్నారని ఎమ్మెల్యేలు రవీంద్రనాథ్ రెడ్డి, వెంకటరమణ, అంజాద్ బాషాలు తీవ్ర స్థాయిలో మండిపడ్డారు. వైఎస్ జగన్ చేపట్టిన సమర దీక్షలో ఎమ్మెల్యేలు బుధవారం మాట్లాడుతూ.. టీఆర్ఎస్ తో కుమ్మక్కైంది మేము కాదు.. 2009 ఎన్నికల్లో మహాకూటమి అంటూ టీఆర్ఎస్తో పొత్తు పెట్టుకుంది నువ్వు కాదా చంద్రబాబూ అని సూటిగా ప్రశ్నించారు. రేవంత్ వ్యవహారంలో చంద్రబాబు పాత్ర కూడా ఉందని టి.హోంమంత్రి నాయిని నర్సింహారెడ్డి కూడా స్పష్టం చేసిన విషయాన్ని గుర్తు చేశారు. తక్షణమే చంద్రబాబును A-1 ముద్దాయిగా చేర్చాలని డిమాండ్ చేశారు.
  


 మంగళగిరి: అవినీతికి వ్యతిరేకంగా పోరాటం చేద్దామంటూ.. చంద్రబాబు నాయుడు ప్రమాణం చేయించడం సిగ్గుచేటు అని చిత్తూరు జిల్లా చంద్రగిరి ఎమ్మెల్యే చెవిరెడ్డి భాస్కర్‌రెడ్డి అన్నారు. ఓటుకు నోటు పద్ధతిలో ఎమ్మెల్యేను కొనబోయి అడ్డంగా బుక్కైన ఘటన మరువక ముందే మంత్రి ఇంట్లో రూ.10లక్షలు దొరకడం చూస్తే టీడీపీది ఎంత అవినీతి చరిత్రో అర్థమవుతుందని ఆయన బుధవారమిక్కడ వ్యాఖ్యానించారు. సమర దీక్షతో చంద్రబాబు మోసపూరిత వైఖరిని ఎంగడతామని తెలిపారు.


 మంగళగిరి: ఆంధ్రప్రదేశ్ ముఖ్యమంత్రి చంద్రబాబు నాయుడుపై మంగళగిరి ఎమ్మెల్యే ఆళ్ల రామకృష్ణారెడ్డి తీవ్రంగా మండిపడ్డారు. వైఎస్ జగన్ చేపట్టిన సమర దీక్షలో ఆయన బుధవారం మాట్లాడారు. 'తొలి సంతకానికి విలువ ఉంటుందని నిరూపించిన వ్యక్తి వైఎస్సార్. సీఎం చంద్రబాబు ఇచ్చిన హామీల కోసం ప్రజలందరూ ఎదురు చూస్తున్నారు. ఏడాదిలోపే 600 పై చిలుకు వాగ్దానాలు చేశారు. అందులో కనీసం 5 వాగ్దానాలు కూడా నెరవేర్చలేదు. ఇచ్చిన మాట తప్పిన సీఎం ఎవరంటే అది ప్రపంచ రాజకీయాల్లో చంద్రబాబే. ప్రజలందరూ తప్పు తెలుసుకున్నారు.
 
 నాడు చంద్రబాబు ఊరూరా తిరిగి అబద్ధాలు చెప్పి కుట్రలు, కుతంత్రాలు పన్ని సీఎం పదవి చేపట్టారు. తమకు అండగా జగన్ నిలుస్తారన్న ఉద్దేశంతోనే ప్రజలు మా వెంట వస్తున్నారు. వైఎస్సార్ వారసుడిగా నేడు మన ముందున్నారు వైఎస్ జగన్. సమాజానికి దశ, దిశ ఇస్తారని ప్రజానీకం ఎదురు చూస్తున్నారు. దివంగత నేత ఇచ్చిన మాట ప్రకారం తొలి సంతకం ఉచిత విద్యుత్ పై చేశారు. ప్రపంచ రాజకీయాల్లో వైఎస్సార్ నెంబర్ వన్ గా నిలిచారు. వైఎస్సార్ పాలనలో బడుగు, బలహీన వర్గాలందరూ సశ్యశ్యామలంగా జీవితాన్ని గడిపారు' అని ఆళ్ల రామకృష్ణారెడ్డి అన్నారు.


 మంగళగిరి: వైఎస్ఆర్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి మంగళగిరిలోని సమర దీక్ష ప్రాంగణానికి చేరుకున్నారు. వైఎస్ జగన్ రాకతో ఒక్కసారిగా సభా ప్రాంగణం జై జగన్ నినాదాలతో మార్మోగిపోయింది. నినాదాలు, చప్పట్లు, ఈలలతో పార్టీ కార్యకర్తలు, అభిమానులు తమ మద్దతు తెలిపారు. పోలీసుల బందోబస్తు మధ్య వైఎస్ జగన్ దీక్షా స్థలికి చేరుకున్నారు. అభిమానులు కరచాలనం కోసం ఎగబడుతున్నారు.
 
 రెండు రోజుల దీక్షకు ఇప్పటికే పలు జిల్లాల నుంచి కార్యకర్తలు తరలివచ్చారు. ఇంకా వస్తూనే ఉన్నారు. అభిమానుల కేరింతలు, జై జగన్, జోహార్ వైఎస్ఆర్ నినాదాల మధ్య వైఎస్ జగన్ మోహన్ రెడ్డి దీక్షా ప్రాంగణంలోకి చేరుకున్నారు. వేదికపైకి చేరుకున్న వైఎస్ జగన్.. అభిమానులకు, కార్యకర్తలకు అభివాదం చేశారు. ప్రజలకు, కార్యకర్తలకు అసౌకర్యం కలగకుండా ఏర్పాట్లు చేశారు.


 మంగళగిరి: ఆంధ్రప్రదేశ్ ప్రభుత్వ వైఖరికి నిరసనగా ప్రతిపక్షనేత వైఎస్ జగన్ మోహన్ రెడ్డి చేపట్టిన 'సమర దీక్ష'  ప్రారంభానికి ముందుగా సాంస్కృతిక కార్యక్రమాలతో అలరిస్తున్నారు. నటుడు శివారెడ్డి తన మిమిక్రీతో అందరినీ ఆకట్టుకుంటున్నాడు. మాజీ సీఎం కె.రోశయ్య, కొండవలస, పోసాని కృష్ణమురళి,  తదితరుల గొంతుతో శివారెడ్డి అందరినీ అలరిస్తున్నారు. మంగళగిరి వై జంక్షన్ సమీపంలో వైఎస్ జగన్ సమర దీక్ష చేపడుతున్న సంగతి తెలిసిందే.


 హైదరాబాద్: ఏడాది పాలనలోనే టీడీపీ సర్కార్‌పై ప్రజావ్యతిరేకత విపరీతంగా పెరిగిందని వైఎస్ఆర్‌సీపీ సీనియర్ నేత ఉమ్మారెడ్డి వెంకటేశ్వర్లు అన్నారు. ఇచ్చిన హామీలు అమలు చేయకుండా.. తమకు దగా చేసిన ప్రభుత్వాన్ని నిలదీసేందుకు అన్ని వర్గాల ప్రజలు సమరదీక్షకు తరలి వస్తున్నారని ఆయన బుధవారమిక్కడ తెలిపారు.
 
 తొమిదేళ్ల పాలనతో చంద్రబాబు ప్రజలను ఎలా వంచించారో.. ఇప్పుడూ అదే వైఖరిని ప్రదర్శిస్తున్నారని వైఎస్‌ఆర్‌సీపీ గుంటూరు నగర అధ్యక్షుడు లేళ్ల అప్పిరెడ్డి మండిపడ్డారు. చంద్రబాబు వంచనను అర్థం చేసుకున్న ప్రజలు.. వైఎస్‌ జగన్‌కు మద్దతు తెలిపి సమరదీక్ష ద్వారా ప్రభుత్వ మొండి వైఖరిని ప్రశ్నించేందుకు సిద్ధమయ్యారని ఆయన అన్నారు.
 
 మరోవైపు ఆంధ్రప్రదేశ్‌ రైతులు.. టీడీపీ సర్కార్‌ది దగాకోరు తనమని మండిపడుతున్నారు . రైతులను బెదిరించి, భయపెట్టి భూములు లాక్కొని.. ఇష్టపూర్వకంగా ఇచ్చారని చెప్పుకోవడం చంద్రబాబు సర్కార్‌కే చెల్లిందంటున్నారు. ఈ దగాకోరు సర్కార్‌ మెడలు వంచడం కోసమే.. సమరదీక్షలో పాల్గొనేందుకు వేలాదిగా తరలి వచ్చామని రైతులు చెబుతున్నారు.


 మంగళగిరి: అధికారంలోకి వచ్చి ఏడాది పూర్తి అయినా ఎన్నికలకు ముందు ఇచ్చిన హామీలను నెరవేర్చకుండా ప్రజలను మోసపుచ్చిన ముఖ్యమంత్రి చంద్రబాబు నాయుడు వైఖరిని ఎండగడుతూ ప్రతిపక్ష నేత, వైఎస్ఆర్ సీపీ అధ్యక్షుడు వైఎస్ జగన్ మోహన్ రెడ్డి సమర దీక్షకు దిగారు. గుంటూరు జిల్లా మంగళగిరి 'వై' జంక్షన్ సమీపంలో ఆయన బుధవారం దీక్ష చేపట్టారు. ముందుగా వైఎస్ జగన్ దీక్షా శిబిరం వద్ద ఏర్పాటు చేసిన మహానేత వైఎస్ రాజశేఖరరెడ్డి విగ్రహానికి పూలమాల వేసి నివాళులు అర్పించారు. అనంతరం ఆయన దీక్షకు కూర్చున్నారు. వైఎస్ జగన్ తో పాటు వేదికపై పార్టీ ఎమ్మెల్యేలు కూడా దీక్షలో పాల్గొన్నారు.
 
 చంద్రబాబు మోసాలపై ప్రజల్లో ఎండగట్టడంతో పాటు ఇచ్చిన హామీలను అమలు చేసేలా ప్రభుత్వంపై ఒత్తిడి పెంచే లక్ష్యంతో వైఎస్ జగన్ ఈ దీక్ష చేపట్టారు. ప్రధానంగా వ్యవసాయ రుణాల మాఫీ, డ్వాక్రా మహిళల రుణాలను మాఫీ చేస్తామన్న హామీ నిలబెట్టుకోకపోవడం, ఇంటింటికీ ఉద్యోగం విషయంలో అశ్రద్ధ, ఏపీకి ప్రత్యేక హోదా సాధనలో విఫలం కావడం తదితర అంశాలపై ఈ వేదిక ద్వారా సర్కారుపై ఆయన  సమర శంఖం పూరించారు. రెండు రోజుల పాటు ఈ దీక్ష కొనసాగనుంది.  వివిధ జిల్లాల నుంచి పెద్ద సంఖ్యలో పార్టీ కార్యకర్తలు, ప్రజలు తరలి వస్తున్నారు. మరోవైపు వారికి ఎలాంటి అసౌకర్యం కలగకుండా పార్టీ నాయకులు ఏర్పాట్లు చేశారు.


  నరసన్నపేట :  ఏడాది పాలనలో ఎన్నికల వాగ్దానాల అమలులో పూర్తిగా విఫలమైన టీడీపీ తీరును నిరసిస్తూ వైఎస్‌ఆర్ కాంగ్రెస్ పార్టీ అధ్యక్షుడు వైఎస్ జగన్మోహనరెడ్డి చేపట్టనున్న సమర దీక్షను విజయవంతం చేయాలని మాజీ ఎమ్మెల్యే, ఆ పార్టీ బీసీ విభాగం రాష్ట్రపార్టీ అధ్యక్షుడు ధర్మాన కృష్ణదాసు పిలుపునిచ్చారు. నరసన్నపేటలోని పార్టీ కార్యాలయంలో ఆయన మాట్లాడుతూ ఏ పరిస్థితుల్లో జగన్ సమర దీక్ష చేస్తున్నదీ వివరించారు. ఏపీ రాజధాని మంగళగిరిలో 3,4 తేదీల్లో చేపట్టనున్న దీక్షలో పార్టీ శ్రేణులు, అన్ని వర్గాల వారు తరలిరావాలని కోరారు. టీడీపీ రైతులకు, డ్వాక్రా మహిళలు, నిరుద్యోగులకు ఇచ్చిన వాగ్దానాలను నిస్సిగ్గుగా తుంగలో తొక్కిందన్నారు.
  
   ప్రభుత్వ తీరును నిరసించకపోతే మరింతగా ప్రజలకు అన్యాయం చేయడానికి టీడీపీ బరితెగించే ప్రమాదం ఉందన్నారు. అందుకే జగన్మోహనరెడ్డి సమరదీక్ష పూనుకున్నారని, అన్నివర్గాల ప్రజలు, మహిళలు, నిరుద్యోగులు మద్దతు నివ్వాలని కోరారు. నరసన్నపేట నుంచి  సమరదీక్షకు ప్రత్యేకంగా పయనమవుతున్నామని కృష్ణదాసు తెలిపారు. సమావేశంలో వైఎస్‌ఆర్ కాంగ్రెస్ పార్టీ నాయకులు ఆరంగి మురళి, కరిమి రాజేశ్వరరావు, యాళ్ల బైరాగినాయుడ గ్గు రమణయ్య, మడ్డు కృష్ణ తదితరులు ఉన్నారు.
  


 ధర్మాన కృష్ణదాసు ధ్వజం
 సమర దీక్ష పోస్టర్ ఆవిష్కరణ
  
  నరసన్నపేట : ఎన్నికల ముందు మాయ మాటలు చెప్పి అధికారంలోకి వచ్చిన టీడీపీ అధినేత చంద్రబాబు నాయుడు ఆ హామీలు అమలులో పూర్తిగా విఫలమ య్యారని వైఎస్సార్ సీపీ బీసీ విభాగం రాష్ట్ర శాఖ అధ్యక్షుడు, మాజీ ఎమ్మెల్యే ధర్మాన కృష్ణదాసు అన్నారు. వచ్చే నెల 3,4 తేదీల్లో అమరావతిలో పార్టీ అధ్యక్షుడు జగన్‌మ్మోహనరెడ్డి చేపట్టే సమర దీక్షకు సంబంధించిన పోస్టర్లను ఆయన గురువారం ఆవిష్కరించారు. ఈ సందర్భంగా మాట్లాడుతూ చంద్రబాబు పాలన తీరును దుయ్యబట్టారు.
 
 ఏ ప్రజలకు ఇచ్చిన  హామీలతో అధికారానికి వచ్చారో వారినే మరిచి సీఎం ఇష్టానుసారంగా పాలన సాగిస్తున్నారని ఆరోపించారు. ఎన్నికల ముందు ఇచ్చిన హామీలు ఒక్కటీ సవ్యంగా అమలు చేయలేదన్నారు. రుణ మాఫీ పేరిట రైతులను తీవ్రంగా మోసం చేశారని పేర్కొన్నారు. రుణ మాఫీ కాకపోగా వాడుకున్న రుణం వడ్డీతో కలపి తడిసిమొపెడు అవుతోందని అన్నారు. డ్వాక్రా రుణాల వ్యవహారంలో కూడా చంద్రబాబు మహిళలను దారుణంగా మోసం చేశారని అన్నారు. ఈవిధంగా చేయడం చంద్రబాబు నైజమన్నారు.
 
 డ్వాక్రా రుణాలు అన్నింటినీ మాఫీ చేస్తామన్న బాబు.. సీఎం అయిన తరువాత నోటికొచ్చినట్లు మాట్లాడుతూ చివరికి అప్పులపాలు చేస్తున్నారని కృష్ణదాసు ధ్వజమెత్తారు. ప్రస్తుతం డ్వాక్రా సభ్యుల ఖాతాల్లో వేసిన మూడు వేల రూపాయలు కూడా మూలధనం అట అని ఎద్దేవా చేశారు. అన్ని వర్గాలకు ఆయన మోసం చేశారని పేర్కొన్నారు. మోసపోయిన ప్రజలకు అండగా ఉంటూ వారి తర ఫున జగన్‌మోహన్‌రెడ్డి దీక్షకు దిగుతున్నారని..ఈ దీక్షల్లో అంతా పాల్గొనాలని కోరారు. పోస్టరు ఆవిష్కరణలో నరసన్నపేట సొసైటీ అధ్యక్షుడు సురంగి నర్సింగరావు, వైఎస్సార్ సీపీ నాయకులు ఆరంగి మురళి, యాళ్ల కృష్ణంనాయుడు, పతివాడ గిరీశ్వరరావు, యాళ్ల బైరాగినాయుడు, బొబ్బాది ఈశ్వరరావు, మొజ్జాడ శ్యామ్, దండి జయప్రకాష్, యాబాజీ రమేష్ పాల్గొన్నారు.


 పట్నంబజారు(గుంటూరు) :  అబద్ధాలు చెప్పటంలో ప్రపంచవ్యాప్తంగా పోటీలు పెడితే రాష్ట్ర ముఖ్యమంత్రి నారా చంద్రబాబు నాయుడుకు ప్రథమస్థానం దక్కి, గిన్నిస్ రికార్డు నెలకొలుపుతారని వైఎస్సార్ కాంగ్రెస్‌పార్టీ రాష్ట్ర ప్రధాన కార్యదర్శి వి. విజయసాయిరెడ్డి ఎద్దేవా చేశారు. ఆయన అబద్ధాలను, మోసాలను ఎండగట్టేందుకు మంగళగిరి వేదికగా జూన్ 3,4 తేదీల్లో తమ పార్టీ అధినేత వైఎస్ జగన్‌మోహన్‌రెడ్డి చేపట్టనున్న సమర దీక్షను విజయవంతం చేయాలని ప్రజలకు పిలుపునిచ్చారు. ఏడాది పాలనలో చంద్రబాబు చేసిన మోసాలను ఎండగట్టి ఆయన నిజస్వరూపాన్ని బయటపెట్టడానికే సమర దీక్ష నిర్వహిస్తున్నట్టు చెప్పారు.
  
  గుంటూరు నగరంపాలెంలోని కేకేఆర్ ఫంక్షన్ ప్లాజాలో సోమవారం ఆ పార్టీ జిల్లా విస్త్రృత స్థాయి సమావేశం జరిగింది. పార్టీ జిల్లా అధ్యక్షుడు మర్రి రాజశేఖర్ అధ్యక్షత వహించగా, తొలుత మహానేత వైఎస్ రాజశేఖరరెడ్డి విగ్రహానికి పూలమాలలు వేసి నివాళులు అర్పించారు. అనంతరం సమర దీక్ష పోస్టర్లు ఆవిష్కరించారు. ఆయా నియోజకవర్గాల నాయకులు, కార్యకర్తలు మాట్లాడిన అనంతరం వారి సమస్యలను నేతలు అడిగి తెలుసుకున్నారు. ఈ సందర్భంగా విజయసాయిరెడ్డి మాట్లాడుతూ టీడీపీ నేతలు అధికారంలోకి వచ్చిన నాటి నుంచి రాజ్యాంగ, చట్టవ్యతిరేక విధానాలకు పాల్పడుతున్నారని ఆరోపించారు. రాష్ట్రంలో హింసా రాజకీయాలకు మరోసారి నాంది పలికిన ఘనత చంద్రబాబుకు మాత్రమే దక్కుతుందన్నారు.
  
  ఈ క్రమంలో కార్యకర్తలకు ఎలాంటి కష్టం కలిగించినా ఉపేక్షించబోమని హెచ్చరించారు. వైఎస్సార్ సీపీ ప్రధాన కార్యదర్శి ఉమ్మారెడ్డి వెంకటేశ్వర్లు మాట్లాడుతూ మోసం, ద్రోహం, వెన్నుపోటు అనే పదాలకు నిలువెత్తు నిదర్శనం చంద్రబాబని విమర్శించారు. రాష్ట్ర అధికార ప్రతినిధి అంబటి రాంబాబు మాట్లాడుతూ జననేత జగన్ చేపడుతున్న సమరదీక్షతో ఇప్పటికే తెలుగుదేశం పార్టీ గుండెల్లో గు బులు పట్టుకుందన్నారు. జిల్లా అధ్యక్షుడు మర్రి రాజశేఖర్ మాట్లాడుతూ బాబు వస్తే జాబు ఖాయమని చె ప్పారని, ఆయన అధికారంలోకి రాగానే ఉన్న ఉద్యోగాలు పోతున్నాయని ఎద్దేవా చేశారు. గుంటూరు తూర్పు నియోజకవర్గ ఎమ్మెల్యే  మొహ్మద్ ముస్తఫా మాట్లాడుతూ ప్రతి ఇంటి నుంచి ఒకరు సమర దీక్షకు తరలి రావాల్సిన అవసరం ఉందన్నారు. నరసరావుపేట ఎమ్మెల్యే గోపిరెడ్డి శ్రీనివాసరెడ్డి మాట్లాడుతూ టీడీపీ నేతల అరాచకాలు రోజురోజుకు మితిమీరిపోతున్నాయని మండిపడ్డారు.
  
   బాపట్ల ఎమ్మెల్యే కోన రఘుపతి మాట్లాడుతూ శాసనసభలో వైఎస్ జగన్ సంధించే ప్రశ్నాస్త్రాలకు సమాధానాలు చెప్పలేక టీడీపీ నేతలు తెల్లముఖాలు పెడుతున్నారన్నారు. మాజీ మంత్రి మోపిదేవి వెంకటరమణ మాట్లాడుతూ చంద్రబాబు ప్రభుత్వం సంవత్సర కాలంలో పూర్తి వైఫల్యాలను మూటగట్టుకుందన్నారు. రాష్ట్ర రైతు విభాగం అధ్యక్షుడు ఎంవీఎస్ నాగిరెడ్డి మాట్లాడుతూ రైతుల కడుపులు కొట్టి అక్రమంగా రాజధాని నిర్మాణం కోసం భూములు లాక్కుంటున్నారని దుయ్యబట్టారు. కేంద్రపాలక మండలి సభ్యుడు జంగా కృష్ణమూర్తి మాట్లాడుతూ ఇచ్చిన వాగ్దానాలను గాలికి వదిలేసిన టీడీపీ వైఎస్సార్ సీపీ లక్ష్యంగా పనిచేస్తోందని మండిపడ్డారు. మాజీ ఎమ్మెల్యే రావి వెంకటరమణ మాట్లాడుతూ రాష్ట్ర ప్రభుత్వ వ్యతిరేక విధానాలపై కలసికట్టుగా తిరుగుబాటు చేయాలన్నారు. రాష్ట్ర ఎస్సీ విభాగం అధ్యక్షుడు మేరుగ నాగార్జున మాట్లాడుతూ రాజ్యాంగ విలువలను మంటగలిపేలా టీడీపీ సర్కార్ వ్యవహరిస్తోందన్నారు.
  
  గుంటూరు నగర అధ్యక్షుడు లేళ్ల అప్పిరెడ్డి మాట్లాడుతూ టీడీపీ సంవత్సర పాలనలో ఏం చేశారని విజయోత్సవ సభలు పెడుతున్నారో చెప్పాలని ప్రశ్నించారు. అనంతరం  ఎమ్మెల్సీ ఎన్నికల్లో పార్టీ అభ్యర్థిని గెలిపించుకోవాలని తీర్మానం చేశారు. సమావేశంలో వైఎస్సార్ సీపీ పోగ్రామ్స్ కమిటీ కన్వీనర్ తలశిల రఘురామ్, పార్టీ నేతలు ఆళ్ల పేరిరెడ్డి, బొల్లా బ్రహ్మనాయుడు, అన్నాబత్తుని శివకుమార్, కత్తెర క్రిస్టీనా, సురేష్‌బాబు, చల్లామధుసూదన్‌రెడ్డి, కావటి మనోహరనాయుడు, ఎండీ నసీర్‌అహ్మద్, జయలక్ష్మి, సయ్యద్‌మాబు, కొత్తా చిన్నపరెడ్డి, మెట్టు వెంకటప్పారెడ్డి, పానుగంటి చైతన్య, మండేపూడి పురుషోత్తం, బండారు సాయిబాబు, మొగిలి మధు, కోవూరి సునీల్, సలాంబాబు, కిలారి రోశయ్య,  డైమండ్‌బాబు, ఎన్.శారదాలక్ష్మి, శానంపూడి రఘురామి రెడ్డి, శిఖాబెనర్జీ, జేపి,  తిప్పారెడ్డి రామకృష్ణారెడ్డి, ఉత్తంరెడ్డి, ప్రభాకరరావు, చింకా శ్రీనివాసరావు  పాల్గొన్నారు.  
  


 విజయవాడ: వైఎస్ఆర్ కాంగ్రెస్ పార్టీ అధ్యక్షుడు, ఆంధ్రప్రదేశ్ శాసనసభ ప్రతిపక్ష నాయకుడు వైఎస్ జగన్మోహన్ రెడ్డి తలపెట్టిన సమరదీక్ష పోస్టర్, వీడియో ట్రైలర్ను పార్టీ నేతలు విడుదల చేశారు. శనివారం జరిగిన సమీక్షా సమావేశంలో వైఎస్ఆర్ కాంగ్రెస్ పార్టీ నాయకులు విజయసాయి రెడ్డి, ఉమ్మారెడ్డి వెంకటేశ్వర్లు, పార్థసారథి తదితరులు పాల్గొన్నారు.
 
  ప్రజా సమస్యలను పరిష్కరించంలో అధికార టీడీపీ వైఫల్యాన్ని ఎండగడుతూ జూన్ 3, 4 తేదీల్లో వైఎస్ జగన్ మంగళగరిలో సమరదీక్ష చేయనున్న సంగతి తెలిసిందే. ఈ నేపథ్యంలో సమీక్ష సమావేశం నిర్వహించారు. ఏడాది పాలనలో చంద్రబాబు వైఫల్యాలను సమరదీక్ష ద్వారా ప్రజల్లోకి తీసుకువెళ్తామని విజయసాయి  రెడ్డి అన్నారు. రైతులు, మహిళలు, నిరుద్యోగులను మోసగించిన వైనాన్ని ఎండగడతామని చెప్పారు. సమరదీక్షను విజయవంతం చేయాలని ఉమ్మారెడ్ది వెంకటేశ్వర్లు కోరారు. వైఎస్ఆర్ సీపీ నేతలు సమరదీక్ష పోస్టర్, వీడియో ట్రైలర్ను విడుదల చేశారు.


 హైదరాబాద్: ఏడాది కాలంగా మాయమాటలతో ప్రజలను మోసం చేస్తున్న ముఖ్యమంత్రి చంద్రబాబు నాయుడు వైఖరిని ఎండగట్టి, ఎన్నికల ముందు ఇచ్చిన హామీలను నెరవేర్చాలని ఒత్తిడి చేయడానికే ప్రతిపక్ష నేత జగన్‌మోహన్‌రెడ్డి సమర దీక్ష నిర్వహిస్తున్నట్టు వైఎస్సార్ కాంగ్రెస్ పార్టీ ప్రకటించింది. జూన్ 3, 4 తేదీల్లో రెండు రోజుల పాటు మంగళగిరిలో తలపెట్టిన జగన్‌మోహన్‌రెడ్డి సమరదీక్షకు సంబంధించిన పోస్టర్‌ను పార్టీ నేతలు శుక్రవారంనాడిక్కడ పార్టీ రాష్ట్ర కార్యాలయంలో ఆవిష్కరించారు.
 
 పార్టీ నాయకులు విజయసాయిరెడ్డి, ఎస్.రామకృష్ణారెడ్డి, ఉమ్మారెడ్డి వెంకటేశ్వర్లు, సాగి ప్రసాదరాజు, ఘట్టమనేని శేషగిరిరావు, అంబటి రాంబాబు, ఎమ్మెల్యే వరుపుల సుబ్బారావు, రైతు విభాగం కన్వీనర్ నాగిరెడ్డి, అధికార ప్రతినిధి వాసిరెడ్డి పద్మ, గుడివాడ అమరనాథ్, చల్లా మదుసూధన్‌రెడ్డి తదితరులు పోస్టర్ ఆవిష్కరణ కార్యక్రమం నిర్వహించారు. దీక్షను పురస్కరించుకుని పార్టీ రూపొందించిన ప్రచార వీడియో చిత్రాన్ని ఆదిశేషగిరిరావు ఆవిష్కరించారు. అనంతరం ఉమ్మారెడ్డి మీడియాతో మాట్లాడుతూ... చంద్రబాబు  ఏడాది పాలన ఆర్భాటాలు, ప్రచారమే తప్ప ప్రజలకు జరిగిందీ ఒరిగిందీ ఏమీ లేదని విమర్శించారు.
 
 
 
 రోజుకో విధంగా మాయమాటలతో చంద్రబాబు అన్ని వర్గాల ప్రజలను మోసం చేస్తున్నారని దుయ్యబట్టారు. రాష్ట్రంలో రైతు వ్యవస్థనే ఛిన్నాభిన్నంగా చేసేలా రైతు రుణమాఫీ హామీ విషయంలో వ్యవహరించారని తూర్పారపట్టారు. డ్వాక్రా రుణమాఫీ విషయంలో ఏడాది కాలంలో మహిళల ఆర్థిక మూలాలను పూర్తిగా నాశనం చేశారని చెప్పారు. రాజధాని పేరు చెప్పి రైతుల నుంచి బలవంతంగా భూములు లాక్కొని, విదేశీ కంపెనీలకు అప్పగించి రియల్‌ఎస్టేట్ వ్యాపారం నడపబోతున్నారన్నారు.
 
 నేడు పులివెందులకు వైఎస్ జగన్
 పులివెందుల: వైఎస్సార్‌సీపీ అధ్యక్షుడు జగన్‌మోహన్‌రెడ్డి శనివారం వైఎస్‌ఆర్ జిల్లా పులివెందులకు రానున్నట్లు కడప ఎంపీ వైఎస్ అవినాష్‌రెడ్డి తెలిపారు. జగన్ శనివారం ఉదయం 8.30 గంటలకు తన తాత రాజారెడ్డి ఘాట్ వద్దకు చేరుకొని నివాళులర్పిస్తారని చెప్పారు. అనంతరం స్థానికంగా కార్యక్రమాల్లో పాల్గొంటారన్నారు. ఆదివారం వేముల, లింగాల మండలాల్లో ఇటీవల అప్పుల బాధతో ఆత్మహత్య చేసుకున్న ఇద్దరు రైతుల కుటుంబసభ్యులను పరామర్శిస్తారని తెలిపారు. 25న క్యాంపు కార్యాలయంలో ప్రజలకు అందుబాటులో ఉంటారన్నారు.


 గుంటూరు: ప్రజాసమస్యల పరిష్కారంలో వైఫల్యం చెందిన టీడీపీ ప్రభుత్వ తీరును ఎండగడుతూ ప్రతిపక్షనేత, వైఎస్సార్ సీపీ అధ్యక్షుడు వైఎస్ జగన్‌మోహన్‌రెడ్డి జూన్ 3, 4 తేదీలలో మంగళగిరిలో తలపెట్టిన సమరదీక్షను జయప్రదం చేయాలని ఎమ్మెల్యే పిన్నెల్లి రామకృష్ణారెడ్డి పిలుపునిచ్చారు. పార్టీ కార్యాలయంలో శుక్రవారం ఆయన విలేకరులతో మాట్లాడుతూ ఎన్నికల సమయంలో సీఎం చంద్రబాబు పలు హామీలిచ్చి..తీరా అధికారంలోకి వచ్చాక  వాటిని అమలు చేయడంలో వెనుకంజ వేస్తున్నారని మండిపడ్డారు. రాజధాని పేరుతో భూములు లాక్కొని రైతులను భయపెడుతున్నారని విమర్శించారు.
  
 టీడీపీ ప్రభుత్వం ప్రజా సమస్యలను పూర్తిస్థాయిలో విస్మరించిందన్నారు. అన్ని వర్గాల సమస్యల పరిష్కారానికి ప్రభుత్వంపై ఒత్తిడితెచ్చి ప్రజల పక్షాన నిలబడేందుకే జగన్‌మోహన్‌రెడ్డి సమరదీక్షను చేపట్టినట్లు వెల్లడించారు.
  


 చంద్రబాబు ప్రభుత్వం ఏడాది పాలనలో ఏ ఒక్క వాగ్దానాన్నీ అమలు చేయలేదని వైఎస్ఆర్ కాంగ్రెస్ పార్టీ సీనియర్ నాయకుడు ఉమ్మారెడ్డి వెంకటేశ్వర్లు మండిపడ్డారు. ప్రభుత్వంపై సమరశంఖం పూరించేందుకే పార్టీ అధ్యక్షుడు వైఎస్ జగన్ మోహన్ రెడ్డి 'సమరదీక్ష' చేపడుతున్నారని ఆయన చెప్పారు.
 
 'సమరదీక్ష' పోస్టర్ను ఆయనతో పాటు పలువురు సీనియర్ నేతలు కలిసి హైదరాబాద్లో శుక్రవారం విడుదల చేశారు. గుంటూరు జిల్లా మంగళగిరి వద్ద జూన్ 3, 4 తేదీలలో వైఎస్ జగన్ మోహన్ రెడ్డి సమరదీక్ష చేస్తున్నారని ఉమ్మారెడ్డి వెంకటేశ్వర్లు చెప్పారు. అన్ని వర్గాల ప్రజలను చంద్రబాబు మోసగించారని ఆయన మండిపడ్డారు.


 ►చంద్రబాబు ఏడాది పాలన
 ►వైఫల్యాలపై..నిరసన
 ►గుంటూరు- విజయవాడ
 ►పరిసరాల్లో వేదిక
 ►ఐదు ప్రధాన అంశాలపై దీక్ష
  
 హైదరాబాద్: ఆంధ్రప్రదేశ్ ముఖ్యమంత్రి చంద్రబాబు నాయుడు ఏడాది పాలనలో వైఫల్యాలపై ప్రతిపక్ష నేత, వైఎస్సార్ కాంగ్రెస్ అధ్యక్షుడు వైఎస్ జగన్‌మోహన్‌రెడ్డి జూన్ 3, 4 తేదీల్లో రెండు రోజుల పాటు ‘సమర దీక్ష’ పేరుతో నిరాహార దీక్ష చేయనున్నారు. గుంటూరు-విజయవాడ మధ్య వేదికగా భారీ ఎత్తున ఈ కార్యక్రమం చేపట్టాలని వైఎస్ జగన్ అధ్యక్షతన బుధవారం ఆయన క్యాంపు కార్యాలయంలో జరిగిన గుంటూరు, కృష్ణా జిల్లాల పార్టీ నేతల సమావేశంలో నిర్ణయించారు.
 
 
 సమావేశ వివరాలను పార్టీ అధికార ప్రతినిధి కె.పార్థసారథి మీడియాకు వెల్లడిస్తూ ఐదు ప్రధాన అంశాలపై ఈ సమర దీక్ష కు దిగుతున్నట్టు వెల్లడించారు. అధికారంలోకి వస్తే రైతుల రుణాలన్నింటినీ మాఫీ చేస్తానని చెప్పి చేయకపోవడం, డ్వాక్రా మహిళల రుణాలను మాఫీ చేస్తానన్న హామీ నిలబెట్టుకోకపోవడం, బాబొస్తే జాబొస్తుందని ఇంటింటికీ ప్రచారం చేసి ఇప్పుడు ఆ ఊసెత్తకపోవడం, ఉద్యోగమివ్వకపోతే నెలకు రూ.2000 చొప్పున నిరుద్యోగ భృతి ఇస్తానని చెప్పి ఏ ఒక్కరికీ ఇవ్వకపోవడం, వంటి వాటిని ఎత్తిచూపడానికి దీక్ష సాగిస్తున్నట్టు కె.పార్థసారథి వివరించారు.
 
 కుర్చీ కోసం అబద్ధాలు..
 కుర్చీ కోసం ఎన్నికల ముందు అబద్ధాలాడి, అధికారంలోకి వచ్చాక చంద్రబాబు ప్రజలను మోసం చేశారని పార్టీ ప్రతినిధి పార్థసారథి విమర్శించారు. మొత్తం రైతుల రుణాలు రూ.87,617 కోట్లు ఉంటే ఇప్పటికి రూ.6,500 కోట్లు మాత్రమే నిధులిచ్చారంటే దానర్థమేంటని దుయ్యబట్టారు. రూ. 22 వేల కోట్ల డ్వాక్రా మహిళల రుణాల మాఫీ ప్రస్తావన లేకుండా పూర్తిగా మొండిచేయి చూపారని మండిపడ్డారు.
 
 దీక్ష సందర్భంగా ఈ వైఫల్యాలన్నింటిపైనా జగన్ ప్రభుత్వాన్ని నిలదీయడంతో పాటుగా ప్రజలను చైతన్య పరుస్తారని చెప్పారు. ఈ సమావేశంలో పార్టీ ప్రధాన కార్యదర్శులు వి.విజయసాయిరెడ్డి, అంబటి రాంబాబు, ఉమ్మారెడ్డి వెంకటేశ్వర్లు, ఎమ్మెల్యేలు ఆళ్ల రామకృష్ణారెడ్డి, మహ్మద్ ముస్తఫా, కోన రఘుపతి, గుంటూరు జిల్లా పార్టీ అధ్యక్షుడు మర్రి రాజశేఖర్ లు పాల్గొన్నారు.


 గుంటూరు: వైఎస్ఆర్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ గుంటూరు ప్రభుత్వ ఆస్పత్రిలో సమరదీక్ష కొనసాగిస్తున్నారు. రాష్ట్రాన్ని విభజిస్తే అన్ని ప్రాంతాలకు సమన్యాయం చేయాలని, అలా చేయలేని పక్షంలో రాష్ట్రాన్ని యథాతథంగా ఉంచాలన్న డిమాండ్‌తో ఆమె చేపట్టిన ఆమరణదీక్ష ఆరవ రోజుకు చేరుకుంది. శుక్రవారం అర్ధరాత్రి దాటిన తరువాత పోలీసులు ఆమె దీక్షను భగ్నం చేశారు.  బలవంతంగా ఆమెను ఆస్పత్రికి తరలించారు. కనీసం అంబులెన్స్ కూడా తీసుకురాకుండా అవమానకరంగా ఆమెను పోలీస్ వ్యాన్లోనే తరలించారు. శిబిరం వద్ద ఉన్న నేతల పట్ల కూడా పోలీసులు దారుణంగా ప్రవర్తించారు.
 
 అయిదు రోజుల నుంచి ఆమె నిరవధిక నిరాహారదీక్ష చేస్తున్నందున  విజయమ్మ  ఆరోగ్యం మరింత క్షీణించిందని ప్రభుత్వ వైద్యులు చెప్పారు. తప్పనిసరిగా ఆమె ఫ్లూయిడ్స్ తీసుకోవాలని వారు కోరుతున్నారు. అయితే విజయమ్మ మాత్రం అందుకు నిరాకరిస్తున్నారు. ఆస్పత్రిలోనే ఆమె దీక్ష కొనసాగిస్తున్నారు. కేంద్ర ప్రభుత్వం నుంచి ప్రకటన వచ్చేవరకు దీక్షను కొనసాగిస్తానని ఆమె చెప్పారు. ప్రాణాలైనా వదులుతాను గానీ దీక్ష మాత్రం ఆపనని తెగేసి చెప్పారు.
 
 ఆస్పత్రి వద్ద పోలీసులు భారీ సంఖ్యలో మోహరించి ఉన్నారు. ఆస్పత్రి లోపలికి పోలీసులు  ఎవరినీ అనుమతించడంలేదు.


 గుంటూరు: రాష్ట్రాన్ని విభజిస్తే అన్ని ప్రాంతాలకు సమన్యాయం చేయాలని, అలా చేయలేని పక్షంలో రాష్ట్రాన్ని యథాతథంగా ఉంచాలన్న డిమాండ్‌తో ఆమరణదీక్ష చేపట్టిన వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ  ఆరోగ్యం మరింత క్షీణించింది. ప్రభుత్వ ఆస్పత్రిలో కూడా ఆమె దీక్ష కొనసాగిస్తున్నారు. ఆమె చేపట్టిన సమరదీక్ష ఆరవ రోజుకు చేరుకుంది. విజయమ్మ ఆరోగ్యంపై  గుంటూరు  ప్రభుత్వాస్పత్రి  వైద్యులు హెల్త్ బులెటిన్ విడుదల చేశారు. తక్షణం దీక్ష విరమించాలన్న తమ విజ్ఞప్తిని ఆమె తిరస్కరిస్తున్నట్లు చెప్పారు.
 
 విజయమ్మ ఇదే విధంగా దీక్ష కొనసాగిస్తే ప్రమాదకరం అని వారు హెచ్చరించారు. ఆమె మూత్రపిండాలు పాడయ్యే అవకాశముందన్నారు. తక్షణం వైద్యచికిత్స అందించకుంటే మెదడు మీదా ప్రభావం చూపుతుందని చెప్పారు. కీటోన్ బాడీస్ విడుదలవుతున్నట్లు తేలిందని, ఇది ప్రమాదకరమని  వైద్యులు తెలిపారు.
 
  విజయమ్మ చేపట్టిన ఆమరణ నిరాహార దీక్షను తీవ్ర ఉద్రిక్తతల మధ్య శుక్రవారం అర్ధరాత్రి దాటిన తరువాత 1.55 గంటలకు పోలీసులు భగ్నం చేశారు.  పోలీసు బలగాలు శిబిరంలోకి దూసుకొచ్చాయి.  నీరసిం చిన విజయమ్మను తమతోపాటు రావాలని, ఆస్పత్రికి తరలిస్తామని పోలీసులు కోరారు. ప్రభుత్వం స్పష్టమైన ప్రకటన చేసే వరకు దీక్షవిరమించేది లేదని విజయమ్మ తేల్చి చెప్పారు. అక్కడ ఉన్న నేతలు, కార్యకర్తలు  పోలీసులను అడ్డుకున్నారు. జై జగన్, జై సమైక్యాంధ్ర నినాదాలతో దీక్షా ప్రాంగణం హోరెత్తింది.
 
 కనీసం అంబులెన్స్ కూడా తీసుకురాని పోలీసులు 1.55 గంటలకు బలవంతంగా ఆమెను పోలీసు వ్యాన్‌లోనే గుంటూరు ప్రభుత్వాసుపత్రికి తరలించారు. ఈ సమయంలో పార్టీ  శ్రేణులు, పోలీసులకు మధ్య తీవ్ర వాగ్వాదం, తోపులాట చోటుచేసుకున్నాయి. కొందరు నేతలను పోలీసులు వేదికపై నుంచి ఎత్తి పడేశారు. కోటంరెడ్డి శ్రీధరరెడ్డిని వేదిక పైనుంచి కిందికి తోసేశారు. దీంతో ఆయన కాలికి గాయమయింది.
 
 పోలీసుల వైఖరిని నిరసిస్తూ విజయమ్మ ఆస్పత్రి నుంచి బయటికి వచ్చి రోడ్డుపై బైఠాయించి నిరసన వ్యక్తంచేశారు. 20 నిమిషాల తర్వాత వైద్యులు వచ్చి ఆమెను ఐసీయూలోకి తరలించారు. కాగా, సర్కారు తీరును నిరసిస్తూ వైఎస్సార్‌సీపీ ఈరోజు సీమాంధ్ర బంద్‌కు పిలుపునిచ్చింది.
 
 అయితే  ఆస్పత్రిలోనూ విజయమ్మ దీక్షను కొనసాగిస్తున్నారని వాసిరెడ్డి పద్మ తెలిపారు. ఐవీ ప్లూయిడ్స్  తీసుకునేందుకు కూడా  ఆమె ఒప్పుకోవడం లేదని వెల్లడించారు. మహానేత సతీమణిని అమానుషంగా తరలించిన తీరుకు నిరసనగా బంద్ కు పిలుపునిస్తున్నట్టు చెప్పారు.  బంద్కు అందరూ సహకరించాలని కోరారు.


 గుంటూరు :  సమన్యాయం చేయాలంటూ వైఎస్ఆర్ కాంగ్రెస్ పార్టీ గౌరవ అధ్యక్షురాలు వైఎస్ విజయమ్మ చేస్తున్న సమర దీక్ష నేటికి అయిదో రోజుకు చేరింది. గత నాలుగు రోజులుగా మంచినీళ్ల మీదే ఉండటంతో ఆమె ఆరోగ్యం బాగా క్షీణించినట్లు విజయమ్మకు వైద్య పరీక్షలు చేసిన డాక్టర్లు చెప్పారు. తక్షణమే దీక్షను విరమించాలంటూ సూచించారు. అయినా విజయమ్మ మాత్రం పట్టదలతో దీక్ష కొనసాగుతుందని స్పష్టం చేశారు.
 
 రోజు ఉదయం, మధ్యాహ్నం, సాయంత్రం వేళల్లో ప్రభుత్వ వైద్యులు దీక్షా శిబిరానికి వచ్చి విజయమ్మ ఆరోగ్యాన్ని పరీక్షిస్తున్నారు. బీపీ, సుగర్ లెవల్స్ బాగా తగ్గిపోయాయని వైద్యులు నిర్థారించారు. అయితే ఆమె ఆరోగ్య పరిస్థితిపై వైద్యులు పెదవి విప్పటంలేదు. మరోవైపు విజయమ్మ కూర్చొనే ఓపిక లేకపోవడంతో కొన్నిసార్లు పడుకునే ఉంటున్నారు.
 శిబిరానికి తరలివచ్చిన ప్రజలకు అభివాదం కూడా చేయలేకపోతున్నారు. శక్తిని కూడదీసుకుని కూర్చోవడాన్ని చూసి అక్కడకొచ్చిన వారి కళ్లు చెమ్మగిల్లాయి. విజయమ్మ ఆరోగ్య పరిస్థితి క్షీణిస్తూ ఉండటంతో శిబిరం వద్ద పార్టీ నేతలు, కార్యకర్తలు, అభిమానుల్లో ఆందోళన నెలకొంది.
  


 సాక్షి, గుంటూరు: సమన్యాయం చేయకుండా రాష్ట్రాన్ని విడగొట్టే అధికారాన్ని, హక్కుల్ని తన చేతుల్లోకి తీసుకున్న కాంగ్రెస్ ప్రభుత్వ నిరంకుశ వైఖరిని నిరసిస్తూ వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ గుంటూరు వేదికగా చేపట్టిన సమరదీక్షకు పశ్చిమగోదావరి జిల్లా పార్టీ నేతలు సంఘీభావం ప్రకటించారు.  ప్రముఖ పారిశ్రామికవేత్త కనుమూరి రఘురామకృష్ణంరాజు నేతృత్వంలో గుంటూరుకు గురువారం తరలివచ్చి విజయమ్మ దీక్షకు అండగా నిలిచారు. ఈ సందర్భంగా దీక్షా వేదికపై నుంచి రఘురామకృష్ణంరాజు మాట్లాడుతూ  తెలుగు వారి ఆత్మ గౌరవాన్ని సోనియాగాంధీ కాళ్ల వద్ద పరిచిన రెండు కళ్ల సిద్ధాంతిని ఎవరూ నమ్మే పరిస్థితి లేదన్నారు.
  
 ప్రస్తుతం రాష్ట్రం ఈ దుస్థితికి చేరడానికి కారకులెవరో అందరికీ తెలుసునని చెప్పారు. ఈ విపత్తును ముందుగా పసిగట్టి రాజీనామాలు చేసింది వైఎస్సార్ సీపీ ప్రజాప్రతి నిధులేనని అన్నారు. రాష్ట్రానికి గోడలు కట్టే హక్కు, అధికారం కాంగ్రెస్ పెద్దలకు ఎవరిచ్చారని ప్రశ్నించారు. హైదరాబాద్‌ను యూటీలా కాకుండా ఢిల్లీ తరహా పాలన చేసేందుకు ప్రయత్నిస్తున్న కాంగ్రెస్ నేతల్ని ప్రజలు క్షమించరన్నారు. షర్మిల పాదయాత్రకు ‘వస్తున్నాయ్ రథచక్రాలు’ అనే పాట రాయించిన పాలకొల్లుకు చెందిన వైఎస్సార్ సీపీ నేత ఆకెన వీరాస్వామి నాయుడు (అబ్బు)ను పార్టీ ముఖ్య నేత వైవీ సుబ్బారెడ్డి షర్మిలకు పరిచయం చేశారు. మాజీ ఎమ్మెల్యేలు గ్రంధి శ్రీనివాస్, పాతపాటి సర్రాజు, తాడేపల్లిగూడెం, తణుకు, ఆచంట నియోజకవర్గాల సమన్వయకర్తలు తోట గోపి, చీర్ల రాధయ్య, మల్లుల లక్ష్మీనారాయణ, కండెబోయిన శ్రీను తదితరులు వైఎస్ విజయమ్మ, షర్మిలను కలిసి సంఘీభావం తెలిపారు.
  


 జంగారెడ్డిగూడెం / జంగారెడ్డిగూడెం రూరల్, న్యూస్‌లైన్ : రాహుల్‌గాంధీని ప్రధానమంత్రిని చేసేందుకే సోనియూగాంధీ రాష్ట్ర విభజనకు పూనుకున్నారని వైఎస్సార్‌సీపీ నాయకులు, మాజీ ఎమ్మెల్యే ఆళ్ల నాని విమర్శించారు. వైఎస్ విజయమ్మ సమరదీక్షకు మద్దతుగా స్థానిక గంగానమ్మ గుడి సెంటర్‌లో ఆమరణ నిరాహారదీక్ష చేస్తున్న రాఘవరాజు ఆది విష్ణును ఆళ్ల నాని, వైఎస్సార్ సీపీ సీఈసీ సభ్యులు కొయ్యే మోషేన్‌రాజు, మాజీ ఎమ్మెల్యే మద్దాల రాజేష్‌కుమార్ పరామర్శించి మద్దతు తెలిపారు. నాని మాట్లాడుతూ జిల్లాలో సమైక్యాంధ్ర ఉద్యమాలకు ఆదివిష్ణు ఆమరణ దీక్ష మరింత ఉత్సాహాన్నిస్తోందన్నారు. కావూరి లాంటి అనామకులకు కేంద్ర మంత్రి పదవిని కట్టబెట్టారని, సీమాంధ్ర నాయకులను ప్రలోభపెట్టి పదవులను ఎరచూపిన ఢిల్లీ పెద్దలు ప్రజలను మాత్రం మభ్యపెట్టలేరని చెప్పారు. సీమాంధ్ర ప్రాంతం వారు భూములు, ఆస్తులను అమ్ముకుని హైదరాబాద్‌లో పరిశ్రమలు స్థాపించి అభివృద్ధి చేశారన్నారు. హైదరాబాద్‌ను వదులుకోవాలని తెలంగాణ  నాయకులు మాట్లాడటం సమంజసం కాదని చెప్పారు.
  
  ప్రజాభిప్రాయ సేకరణ లేకుండా ప్రతిపక్ష నాయకుడు చంద్రబాబు అండ చూసుకుని రాష్ట్ర విభజనకు పాల్పడుతున్నారన్నారు. విభజన నిర్ణయూన్ని వెనుకకు తీసుకోకపోతే కోట్లాదిమంది సీమాంధ్రులు కాంగ్రెస్, టీడీపీలను తరిమికొడతారని హెచ్చరించారు. మోషేన్‌రాజు మాట్లాడుతూ ప్రజల ఆకాంక్షలను పట్టించుకోకుండా లెటర్ ఇచ్చానని, దానికే కట్టుబడి ఉన్నానని చంద్రబాబునాయుడు పేర్కొనడం దారుణమన్నారు. మద్దాల రాజేష్‌కుమార్ మాట్లాడుతూ  రాష్ట్రాన్ని ఐక్యంగా ఉంచే బాధ్యతను భుజస్కంధాలపై వేసుకున్న ఉద్యోగుల ఉద్యమంలో భాగస్వాములమవుతామని, వారికి ఎప్పుడూ వైఎస్సార్‌సీపీ అండగా ఉంటుందని భరోసా ఇచ్చారు. మండల, పట్టణ కన్వీనర్లు నులకాని వీరాస్వామి నాయుడు, చనమాల శ్రీనివాస్, నాయకులు గుడిపూడి రవి, పోల్నాటి బాబ్జి తదితరులు పాల్గొన్నారు.
  
  వేణుగోపాల్ దీక్షకు మద్దతు  
  జంగారెడ్డిగూడెంలో ఆమరణ నిరాహారదీక్ష చేపట్టిన తిరివీధి వేణుగోపాల్ దీక్షా శిబిరం వద్దకు వైఎస్సార్ సీపీ నాయకులు ఆళ్ల నాని, కొయ్యే మోషేన్‌రాజు, మాజీ ఎమ్మెల్యే మద్దాల రాజేష్‌కుమార్, ఇందుకూరి రామకృష్ణంరాజు, కనమతరెడ్డి శ్రీనివాసరెడ్డి, బీసీ సెల్ జిల్లా కన్వీనర్ పాశం రామకృష్ణ  సందర్శించి మద్దతు తెలిపారు. జేఏసీ ప్రతినిధులు, వైఎస్సార్ సీపీ నాయకులు పాల్గొన్నారు.
  


  విభజనకు కాంగ్రెస్ పార్టీ అనుసరిస్తున్న విధానానికి వ్యతిరేకంగా, ఇరు ప్రాంతాలకు న్యాయం చేయలేకపోతే  రాష్ట్రాన్ని విభజించవద్దన్న డిమాండ్తో  వైఎస్ఆర్ కాంగ్రెస్ పార్టీ గౌరవాధ్యక్షురాలు విజయమ్మ గుంటూరులో చేస్తున్న సమరదీక్షకు సీమాంధ్ర వ్యాప్తంగా మద్దతు లభిస్తోంది.
 
 
 
 
 
 
 


 ఇరు ప్రాంతాలకు న్యాయం చేయలేని పక్షంలో రాష్ట్రాన్ని యథాతథంగా ఉంచాలన్న డిమాండ్తో గుంటూరులో నాలుగు రోజులుగా ఆమరణ నిరాహార దీక్ష చేస్తున్న వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మను గుంటూరు ప్రభుత్వాస్పత్రి వైద్యులు గురువారం ఉదయం మరోసారి పరీక్షించారు. ఆమె రక్తంలో చక్కెర స్థాయి బాగా తగ్గిందని, దాంతో పాటు పల్స్, బీపీ కూడా తగ్గాయని వైద్యులు చెప్పారు.
 
 సాధారణంగా బీపీ 120/80 ఉండాలి గానీ, విజయమ్మకు 110/70 మాత్రమే ఉందని, అలాగే రక్తంలో చక్కెర స్థాయి 80 నుంచి 130 మధ్య ఉండాల్సినది 76 మాత్రమే ఉందని తెలిపారు. వైఎస్ విజయమ్మ బాగా నీరసించారని, కనీసం ద్రవాహారమైనా తీసుకోవాల్సిందిగా తాము సూచించామని అన్నారు. కానీ దానికి కూడా ఆమె నిరాకరించారని, ఆమె ఆరోగ్యం బాగుపడాలంటే తక్షణమే దీక్ష విరమించి ఆహారం తీసుకోవాలని గుంటూరు ప్రభుత్వాస్పత్రికి చెందిన డాక్టర్లు సూచించారు. లేదంటే ఆరోగ్యం దెబ్బతింటుందని తెలిపారు. సాయంత్రం 6 గంటల సమయంలో మరోసారి వైఎస్ విజయమ్మకు వైద్యపరీక్షలు చేయనున్నారు.


 గుంటూరు : ప్రజల ఆకాంక్షలు, మనోభావాలను పట్టించుకోని ప్రభుత్వాలు నిలబడవని వైఎస్ఆర్ కాంగ్రెస్ పార్టీ గౌరవ అధ్యక్షురాలు వైఎస్ విజయమ్మ అన్నారు. సమన్యాయం చేయాలంటూ గుంటూరులో ఆమె చేపట్టిన సమర దీక్ష నేటికి నాలుగో రోజుకు చేరింది. ఈరోజు ఉదయం ఆమెకు డాక్టర్లు వైద్య పరీక్షలు నిర్వహించారు. ఈ సందర్భంగా విజయమ్మ మాట్లాడుతూ తన ఆరోగ్యం బాగానే ఉందని... సమన్యాయం జరిగే వరకూ దీక్ష కొనసాగిస్తానని  స్పష్టం చేశారు.
 
 టీడీపీ ప్రజా ప్రతినిధులు పదవులకు రాజీనామా చేసుంటే పరిస్థితి ఇలా ఉండేది కాదని విజయమ్మ అన్నారు. తద్వారా సీడబ్ల్యూసీ రాష్ట్ర విభజన నిర్ణయాన్ని వెనక్కి తీసుకునేదని  ఆమె అభిప్రాయపడ్డారు. దొంగ నాటకాలు ఆడేది తెలుగుదేశం పార్టీయేనని అన్నారు.  న్యాయం చేయలేకపోతే విభజన చేయకూడదని వైఎస్ విజయమ్మ డిమాండ్ చేశారు.
 విడిపోతామనే వాళ్లకు హైదరాబాద్ ఇస్తానంటున్నారని విజయమ్మ వ్యాఖ్యానించారు.  రాష్ట్రానికి అత్యధిక నిధులు వచ్చేది హైదరాబాద్ నుంచేనని ఆమె అన్నారు. అలాగైతే ప్రజల సంక్షేమ పథకాల మాటేమిటి అని విజయమ్మ ప్రశ్నించారు. ఇతరులను రాజీనామా చేయాలంటున్న కాంగ్రెస్ ప్రజా ప్రతినిధులు ముందు వారు రాజీనామా చేసి ఇతరులకు చెప్పాలని ఆమె సూచించారు.


 ఇరు ప్రాంతాలకు న్యాయం చేయలేని పక్షంలో రాష్ట్రాన్ని యథాతథంగా ఉంచాలన్న డిమాండ్తో గుంటూరులో ఆమరణ నిరాహార దీక్ష చేపట్టిన వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మను గుంటూరు ప్రభుత్వాస్పత్రి వైద్యులు బుధవారం పరీక్షించారు. ఆమె రక్తంలో చక్కెర స్థాయి బాగా తగ్గిందని వైద్యులు చెప్పారు. దీనివల్ల ద్రవాహారం తీసుకోవాల్సిందిగా వారు సూచించినా, ఆమరణ దీక్షలో ఉన్నందు వల్ల ఎలాంటి ద్రవాహారం తీసుకోడానికి తాను సిద్ధంగా లేనంటూ విజయమ్మ వారి విజ్ఞప్తిని తిరస్కరించారు.
 
 వైఎస్ విజయమ్మ ఆరోగ్య పరిస్థితిని తాము పరీక్షించామని, ఆమె రక్తంలో చక్కెర స్థాయి తగ్గినందువల్ల ద్రవాహారం తీసుకోవాల్సిందిగా సూచించామని గుంటూరు ప్రభుత్వాస్పత్రికి చెందిన డాక్టర్ సునీత 'సాక్షి'కి తెలిపారు. అయితే, ద్రవాహారం తీసుకోడానికి కూడా విజయమ్మ నిరాకరించినట్లు ఆమె వెల్లడించారు.
 
 సాధారణంగా రక్తంలో చక్కెర స్థాయి 80-120 మధ్య ఉండాలి. మంగళవారం నాడు వైఎస్ విజయమ్మ రక్తంలో 90 వరకు ఉన్న చక్కెర స్థాయి బుధవారం నాడు ఒక్కసారిగా 74కు పడిపోయింది. దీంతో కనీసం సెలైన్ పెడతామని వైద్యులు చెప్పినా ఆమె నిరాకరించారు. రేపటికి ఏదైనా ద్రవాహారం ఇస్తేనే మంచిదని డాక్టర్ సునీత తెలిపారు. చక్కెర స్థాయి తగ్గినందువల్ల మూత్రపిండాలు, ఇతర అవయవాల పనితీరు దెబ్బతినే ప్రమాదం ఉందని, వాటి నిర్ధారణకు మరి కొన్ని పరీక్షలు కూడా చేస్తామని వైద్యులు చెప్పినా అందుకు విజయమ్మ అంగీకరించలేదు.


 గుంటూరు : రాష్ట్ర విభజనపై చిక్కు ప్రశ్నలకు జవాబు చెప్పాల్సిన బాధ్యత కేంద్రంపై ఉందని వైఎస్ఆర్ కాంగ్రెస్ పార్టీ గౌరవ అధ్యక్షురాలు వైఎస్ విజయమ్మ అన్నారు. సమన్యాయం చేయాలంటూ గుంటూరులో విజయమ్మ చేపట్టిన సమర దీక్ష నేటికి మూడో రోజుకు చేరింది. ఈ సందర్భంగా ఆమె బుధవారమిక్కడ మాట్లాడుతూ సర్పంచ్లకు చెక్ పవర్ను నియంత్రిస్తే గ్రామాభివృద్ధి ఎలా సాధ్యమని ప్రశ్నించారు.
 
 సీమాంధ్రలో ప్రజాగ్రహం ఈ స్థాయిలో ఉందని ఏ పార్టీ ఊహించలేదని విజయమ్మ అన్నారు. రాష్ట్రాన్ని తానే అభివృద్ధి చేశానంటున్న చంద్రబాబు ఏం చేశారో చెప్పాలని సూటిగా ప్రశ్నించారు. చిదంబరం, చంద్రబాబు మధ్య ఉన్న సంబంధాన్ని ఆయనే ఒప్పుకున్నారని విజయమ్మ అన్నారు. 
 తమకు, కాంగ్రెస్ పార్టీ పెద్దలకు హాట్లైన్ లింకే ఉంటే తమ కుటుంబం ఎందుకింత బాధపడేదని విజయమ్మ అన్నారు. జగన్ జైల్లో ఎందుకు ఉండేవారని ప్రశ్నించారు. ఎవరివి వీధి నాటకాలో ప్రజలే గమనిస్తున్నారని ఆమె అన్నారు. భావోద్వేగాలకు లోనై ఏ ఒక్కరూ ఆత్మార్పణ చేసుకోవద్దని ఈ సందర్భంగా విజయమ్మ ఉద్యమకారులకు విజ్ఞప్తి చేశారు. శాంతియుతంగా పోరాడి డిమాండ్లను నెరవేర్చుకుందామని విజయమ్మ సూచించారు.


  సమన్యాయం చేయనపుడు సమైక్యంగా ఉంచాల్సిందే: విజయమ్మ
  గుంటూరులో మూడో రోజుకు చేరుకున్న ఆమరణ దీక్ష
 కాంగ్రెస్, టీడీపీలు కూడబలుక్కుని నిరంకుశ విభజనకు తెరతీశాయి
 ఓట్ల కోసం, సీట్ల కోసం తమకిష్టమొచ్చిన రీతిలో వ్యవహరిస్తున్నాయి
 ప్రజలు వారికి బుద్ధి చెప్పేందుకు సిద్ధంగా ఉన్నారు
  
  సాక్షి, గుంటూరు: రాష్ట్ర ప్రజలకు సమన్యాయం జరిగేవరకూ విశ్రమించేది లేదని.. సమన్యాయం జరగనపుడు రాష్ట్రం సమైక్యంగా ఉండేందుకు బొందిలో ప్రాణం ఉన్నంత వరకూ పోరాడతానని వైఎస్సార్ కాంగ్రెస్ గౌరవాధ్యక్షురాలు వై.ఎస్.విజయమ్మ స్పష్టంచేశారు. రాష్ట్రం ఒక కుటుంబం లాంటిదని.. కుటుంబానికి పెద్ద తన పిల్లలందరికీ ఒకేలా న్యాయం చేస్తాడని.. కానీ కాంగ్రెస్ ప్రభుత్వం ఒకరికి ఒక న్యాయం, మరొకరికి అన్యాయం చేసేందుకు ప్రయత్నిస్తోందని ఆమె ఆగ్రహం వ్యక్తంచేశారు. కాంగ్రెస్ ప్రభుత్వం, ప్రతిపక్ష టీడీపీలు కూడబలుక్కుని ఓట్ల కోసం, సీట్ల కోసం రాష్ట్రాన్ని వారికిష్టమొచ్చిన రీతిలో నిరంకుశంగా విభజించటానికి పూనుకున్నాయని ధ్వజమెత్తారు. ప్రజలు పిచ్చివాళ్లు కాదని వారికి బుద్ధిచెప్పేందుకు సిద్ధంగా ఉన్నారని హెచ్చరించారు. ఉద్యమం కోసం ఎవరూ ఆత్మహత్యలకు పాల్పడవద్దని.. ఈ పోరాటంలో అంతా సంయమనం పాటించాలని కోరారు.
  
  రాష్ట్ర విభజన విషయంలో కాంగ్రెస్ నిరంకుశ నిర్ణయాన్ని వ్యతిరేకిస్తూ విజయమ్మ సోమవారం గుంటూరులో ప్రారంభించిన ఆమరణ నిరాహారదీక్ష మంగళవారం రెండో రోజుకు చేరుకుంది. ఈ సందర్భంగా సమర దీక్ష వేదిక వద్ద ఆమె మీడియాతో మాట్లాడారు. వైఎస్సార్ కాంగ్రెస్ మొదటి నుంచీ ఒకే మాటకు కట్టుబడి ఉందని, ప్రజలకు సమన్యాయం చేయాలని, లేకుంటే రాష్ట్రాన్ని యథాతథంగా ఉంచాలనేదే తమ విధానమని పునరుద్ఘాటించారు. టీడీపీ అధినేత చంద్రబాబు తెలంగాణకు తాము అనుకూలమని లేఖ రాయడం వల్లే కాంగ్రెస్ విభజనకు శ్రీకారం చుట్టిందన్నారు. ఇప్పుడు చంద్రబాబు ఆత్మగౌరవ యాత్ర చేస్తానంటున్నారు.. ఆయన ఏం మొహం పెట్టుకుని ప్రజల్లోకి వస్తారని ప్రశ్నించారు. ప్రజలే ఆయనకు బుద్ధి చెప్తారని, కాంగ్రెస్, టీడీపీలకు బుద్ధి చెప్పే సమయం ఆసన్నమైందని అన్నారు.
  
  హైదరాబాద్ తెలుగు ప్రజలందరిదీ...
  దివంగత ముఖ్యమంత్రి వై.ఎస్.రాజశేఖరరెడ్డి తెలంగాణను, సీమాంధ్రను రెండు కళ్ళలా ఒకే రకంగా చూశారని విజయమ్మ పేర్కొన్నారు. కానీ ప్రస్తుత ప్రభుత్వం తన స్వలాభం కోసం ప్రతిపక్ష టీడీపీతో చేతులు కలిపి కుట్రలతో నిరంకుశ విభజనకు తెరతీసిందని మండిపడ్డారు. రాష్ట్ర రాజధాని హైదరాబాద్ నగరం తెలుగు ప్రజలందరికీ చెందుతుందని.. అది అరవై ఏళ్లుగా తెలుగు ప్రజలు కష్టపడి కట్టుకున్న అపురూప కట్టడమని అభివర్ణించారు. 1956 నుంచీ ప్రభుత్వం ఎన్నో ప్రభుత్వ రంగ సంస్థలను హైదరాబాద్‌లో నిర్మించిందని గుర్తుచేశారు. ఇప్పుడు ప్రభుత్వమే ప్రభుత్వ రంగ సంస్థలను ఏర్పాటు చేయడం లేదని, అన్నీ ప్రభుత్వ-ప్రైవేటు భాగస్వామ్యంతో ఏర్పాటు చేస్తోందని, ఇక కొత్త రాష్ట్రం ఏర్పాటు చేస్తే అక్కడ ప్రభుత్వ రంగ సంస్థలు వచ్చే అవకాశాలు లేవని అన్నారు. పేద, ధనిక అన్న తేడా లేకుండా ప్రతి గ్రామం నుంచి యువకులు, వ్యాపారులు, ఉద్యోగులు హైదరాబాద్ వెళ్లి పని చేసుకుంటున్నారని వారందరికీ హైదరాబాద్ కావల్సిందేనని స్పష్టంచేశారు.
  
  ప్రభుత్వ చర్యలకు భయపడొద్దు...
  సీమాంధ్రలో ఎన్‌జీవోలు చేపట్టిన సమ్మెను అణచివేసేందుకు ప్రభుత్వం ఎస్మాను ప్రయోగించటం కుట్రలో ఒక భాగమేనని విజయమ్మ పేర్కొన్నారు. ప్రభుత్వం ఇబ్బందులు పెడుతోందని ఉద్యోగులు భయపడవద్దన్నారు. రానున్నది రామరాజ్యం కనుక ఇప్పుడున్న ప్రభుత్వం ఎన్నికుట్రలు పన్నినా వైఎస్సార్ సీపీ వారికి న్యాయం చేస్తుందని అభయమిచ్చారు. ప్రజల ఆగ్రహానికి ప్రభుత్వం గురికాకతప్పదని.. ప్రజాగ్రహంతో ప్రభుత్వాలు కూలటం తథ్యమని స్పష్టంచేశారు. విద్యార్థులు సమైక్యాంధ్ర ఉద్యమంలో పాల్గొన్నా తమ విద్యను మరవొద్దని చక్కగా చదువుకుని ఉన్నత స్థానాలకు ఎదగాలని పిలుపునిచ్చారు.
  రైతులను నట్టేట ముంచారు: దివంగత మహానేత వై.ఎస్.రాజశేఖరరెడ్డి అధికారంలో ఉండగా ఎన్నో ప్రాజెక్టులకు రూపకల్పన చేశారని, పులిచింతల ప్రాజెక్టు నిర్మాణం పూర్తయితే సాగునీటి సమస్య తొలగుతుందని విజయమ్మ పేర్కొన్నారు. ఆయన బతికుండగానే 90 శాతం పూర్తయిన ప్రాజెక్టు మిగిలిన పనులు పూర్తి చేయటానికి ప్రభుత్వం ఎందుకు జాప్యం చేస్తోందో ప్రజలు ఆలోచించాలన్నారు. ప్రభుత్వానికి ప్రజల విషయంలో చిత్తశుద్ధిలేదని.. అదే ఉంటే వైఎస్ ఆశయాలను తుంగలో తొక్కి మోసం చేసేదికాదన్నారు. రాష్ట్రంలో రైతులను నట్టేట ముంచారని ఆమె ధ్వజమెత్తారు. పార్టీలో అందరూ ఒకే మాట ఒకే బాట అన్నట్లుగా ప్రజల కోసం, వారి క్షేమం కోసం పదవులను త్యజించి రాజీనామాలు చేసి ఉన్నతాశయాలతో పోరాటం చేస్తున్నామని విజయమ్మ పేర్కొన్నారు.
  
  వారిద్దరూ ఒకరికొకరు సలహాదారులే...
  అధికారంలో ఉన్న ముఖ్యమంత్రి కిరణ్‌కుమార్‌రెడ్డి విభజన ప్రకటన వెలువడిన తరువాత పది రోజులకు తాను విభజనకు వ్యతిరేకమంటూ ప్రకటన చేయటం పట్ల ఆమె ఆవేదన వ్యక్తం చేశారు. ‘‘అధికారంలో ఉన్న వారికి తెలియకుండా విభజన జరుగుతుందా?’’ అని ప్రశ్నించారు. ఆ రోజే ఎందుకు ఎదురు తిరగలేదని నిలదీశారు. ఇప్పుడు ప్రజల్లో వైఎస్సార్ కాంగ్రెస్ పట్ల పెరుగుతున్న ఆదరణ చూసి భయపడి కిరణ్‌కుమార్‌రెడ్డి విభజనకు వ్యతిరేకమంటూ మాటలు చెప్తున్నారని తూర్పారబట్టారు. కిరణ్‌కు చంద్రబాబు ఒకరికొకరు సలహాదారులేనని.. కూడబలుక్కుని ప్రజలను మోసం చేసేందుకు నాటకాలాడుతున్నారని ధ్వజమెత్తారు.
  
  దీక్షలో రెండో రోజు...
  వై.ఎస్.విజయమ్మ మంగళవారం ఉదయం ఎనిమిది గంటలకే దీక్షా వేదికపైకి చేరుకున్నారు. అప్పటికే దీక్షా ప్రాంగణం మొత్తం పెద్ద ఎత్తున మహిళలు, యువకులతో కిక్కిరిసిపోయింది. దీక్షా ప్రాంగణం వద్ద కేంద్ర బలగాల్ని భారీగా మోహరించారు. వైఎస్సార్ సీపీ నేతలతో పాటు సమైక్య ఉద్యమకారులు కేంద్ర ప్రభుత్వ అనాలోచిత నిర్ణయంపై మండిపడ్డారు. ఓట్ల రాజకీయం కోసం కాంగ్రెస్‌కు జత కలిసిన చంద్రబాబుపై వైఎస్సార్ సీపీ నేతలు దాడి వీరభద్రరావు, బాలినేని శ్రీనివాసరెడ్డిలు నిప్పులు చెరిగారు. సీమాంధ్రకు చెందిన కేంద్ర మంత్రులు ఆహార భద్రత బిల్లు పాస్ కాకుండా చూడాలని బాలినేని డిమాండ్ చేశారు. సోమవారం హైదరాబాద్ నుంచి బయలుదేరినప్పట్నుంచి విజయమ్మ నిరాహార దీక్షలోనే ఉన్నారు. మంగళవారం రాత్రి ఎనిమిది గంటలకు 32 గంటలు గడిచింది. గుంటూరు జీజీహెచ్ వైద్యుల బృందం విజయమ్మకు వైద్య పరీక్షలు నిర్వహించారు.
  
  వెల్లువలా సంఘీభావం
  అన్యాయానికి గురవుతున్న ప్రజల పక్షాన పోరాటం అందుకున్న విజయమ్మకు అన్ని వర్గాల ప్రజల నుంచి పెద్ద ఎత్తున మద్దతు పెల్లుబుకుతోంది. తానే పుట్టెడు కష్టాల్లో ఉండి కూడా.. రాష్ట్రం కోసం, ప్రజల సంక్షేమం కోసం ప్రాణాలను పణంగా పెట్టి ఆమరణ దీక్ష చేపట్టిన ప్రజానాయకురాలికి సంఘీభావం తెలిపేందుకు జనం వెల్లువెత్తుతున్నారు. దీక్ష రెండో రోజైన మంగళవారం వివిధ జిల్లాల నుంచి వైఎస్ అభిమానులు, వైఎస్సార్ సీపీ నేతలు, కార్యకర్తలు, వ్యాపారులు, విద్యార్థులు, సామాజిక వర్గాల సంఘాల నాయకులు, ఉద్యోగ, కార్మిక, కర్షక వర్గాల వారు విజయమ్మ దీక్షకు సంఘీభావం తెలిపేందుకు భారీగా తరలివచ్చారు.
  
  మహిళలు పెద్ద సంఖ్యలో విజయమ్మను చూసేందుకు దీక్షా వేదిక వద్ద బారులు తీరుతున్నారు. ఆర్‌టీసీ సిబ్బంది సమ్మె నేపథ్యంలో బస్సులు లేకపోవటంతో.. జిల్లాల నుంచి ఎవరికి వారు బృందాలుగా ప్రైవేటు ట్రావెల్స్ బస్సుల్ని అద్దెకు మాట్లాడుకుని వచ్చారు. కృష్ణా జిల్లా పార్టీ నేతలు వంగవీటి రాధాకృష్ణ, కొడాలి నానిలు విజయమ్మను కలిశారు. విజయమ్మ దీక్షా శిబిరానికి వివిధ ప్రాంతాల నుంచి ప్రజలు తరలివచ్చిన వాహనాల్ని గుంటూరు శివారుల్లోనే పోలీసులు నిలువరించటంపై విమర్శలు వ్యక్తమవుతున్నాయి. దూరప్రాంతాల నుంచి వచ్చిన తమను పోలీసు అధికారులు భయభ్రాంతులకు గురిచేస్తున్నారంటూ పలువురు ఆగ్రహం వ్యక్తంచేశారు.
  
  పులిచింతల ఊసేదీ?: విజయమ్మ
  దశాబ్దాలుగా వృథా అవుతున్న మిగులు జలాల్ని, వరదనీటిని సద్వినియోగం చేసుకుని.. కరువు ప్రాంతాలను సస్యశ్యామలం చేసేందుకు దివంగత ముఖ్యమంత్రి వై.ఎస్.రాజశేఖర్‌రెడ్డి చేపట్టిన ‘జలయజ్ఞం’ సాగునీటి పథకాల నిర్మాణాల్ని కిరణ్‌కుమార్‌రెడ్డి ప్రభుత్వం నీరుగారుస్తోందని విజయమ్మ ధ్వజమెత్తారు. కృష్ణా డెల్టాలో ఖరీఫ్‌కు సకాలంలో నీటిని అందించి, వరదలు, తుపాన్ల నుంచి పంటల్ని కాపాడేందుకు చేపట్టిన పులిచింతల ప్రాజెక్టును ఇప్పటికీ పూర్తిచేయలేదని తప్పుపట్టారు.
  
  ఈ ఏడాది ఆగస్టు 15న డెల్టాకు ఈ ప్రాజెక్ట్‌ను అంకితం చేస్తామని ముఖ్యమంత్రి కిరణ్ ఆర్భాటంగా ప్రకటించినా.. ఆచరణలో నిమ్మకునీరెత్తినట్లు వ్యవహరిస్తున్నారని.. స్వయంగా చెప్పిన గడువు దాటిపోయినా పులిచింతల ఊసే ఎత్తటం లే దని ఎండగట్టారు. ఈ సీజన్‌లోనూ కృష్ణా డెల్టా రైతాంగానికి పులిచింతల ఉపయోగపడటం సాధ్యం కాదని తేలిపోయిందన్నారు. ప్రాజెక్టులో ఆరు గేట్ల ఏర్పాటు ఇంకా పూర్తికాలేదని పేర్కొన్నారు. ఫలితంగా వరదనీటిని నిల్వచేసే అవకాశం లేకపోవటంతో ప్రస్తుతం కృష్ణాలోని వరద నీరంతా వృథాగానే పోతోందని ఆవేదన వ్యక్తంచేశారు. వైఎస్సార్ కాంగ్రెస్ పార్టీ ఈ పరిస్థితిపై ముందుగానే హెచ్చరించినా ప్రభుత్వం నిర్లక్ష్యం చేయటంతో రైతులు మరో ఏడాది కాలాల్ని కోల్పోవాల్సి వచ్చిందన్నారు.
  
  రూ. 1,281 కోట్ల వ్యయంతో కొనసాగుతున్న ప్రాజెక్టును పూర్తిచేసేందుకు వైఎస్ ఎంతగానో ఆసక్తి చూపారని, ఈ ప్రాజెక్ట్‌పై అప్పట్లో కొన్ని ప్రాంతాల ప్రజల్లో వ్యక్తమైన ఆపోహలను తొలగించి యుద్ధప్రాతిపదికన నిర్మాణం పూర్తిచేసేందుకు ఆయన కృషిచేశారని విజయమ్మ వివరించారు. కానీ ప్రస్తుత ప్రభుత్వం గత మూడేళ్లుగా తీవ్ర నిర్లక్ష్యం చేస్తూ రైతుల ఆశలను నిలువునా ముంచిందని విమర్శించారు. పులిచింతల నిర్మాణం పూర్తికావటం ద్వారా కృష్ణా పశ్చిమ డెల్టాలో ఐదు లక్షల ఎకరాల ఆయకట్టును స్థిరీకరించి సకాలంలో సాగునీరు అందించటంతో రైతులు తుపానులు, వరదలతో పంట నష్టపోకుండా ఆదుకోవటం సాధ్యమవుతుందని చెప్పారు.




 గుంటూరు : సీమాంధ్ర ప్రజల మీద చంద్రబాబునాయుడుకు అభిమానం ఉంటే తక్షణమే రాజీనామా చేయాలని వైఎస్ఆర్ కాంగ్రెస్ పార్టీ ఎమ్మెల్యే బాలినేని శ్రీనివాసరెడ్డి డిమాండ్ చేశారు. సమన్యాయం చేయాలంటూ గుంటూరులో వైఎస్ విజయమ్మ చేపట్టిన సమర దీక్ష ప్రాంగణంలో ఆయన మంగళవారం మాట్లాడారు.
 తెలంగాణ ప్రకటన వచ్చేవరకూ కేంద్రమంత్రులు, కాంగ్రెస్ పార్టీ ఎంపీలు కళ్లు మూసుకుని కూర్చున్నారంటే సీమాంధ్రపై వారి చిత్తశుద్ధి ఎలాంటిదో తెలియచేస్తుందన్నారు.  ఆహార భద్రత బిల్లును సీమాంధ్ర కాంగ్రెస్ ఎంపీలు వ్యతిరేకించినప్పుడే వారిని ప్రజలు నమ్ముతారని బాలినేని అన్నారు.
  


 ఇరుప్రాంతాలకు సమన్యాయం చేయడం చేతకాని పక్షంలో రాష్ట్రాన్ని యథాతథంగానే ఉంచాలన్న డిమాండుతో వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ చేపట్టిన ఆమరణ నిరాహారదీక్ష మంగళవారం రెండో రోజుకు చేరుకుంది. గుంటూరు బస్టాండు ఎదురుగా చేపట్టిన ఈ దీక్షకు అపూర్వ స్పందన వస్తోంది. పలువురు సీనియర్ నాయకులు విజయమ్మ దీక్షకు మద్దతుగా ముందుకొస్తున్నారు.
 
 విజయమ్మ దీక్షకు మద్దతుగా ఊరూవాడా సంఘీభావం లభిస్తోంది. పలు ప్రాంతాల్లో ఆమరణ, రిలే నిరాహార దీక్షలు వెల్లువెత్తుతున్నాయి. విజయమ్మ దీక్షకు సంఘీభావంగా నెల్లూరు జిల్లా కోవూరు ఎమ్మెల్యే నల్లపురెడ్డి ప్రసన్నకుమార్ రెడ్డి ఆమరణ దీక్ష రెండో రోజు కూడా కొనసాగిస్తున్నారు. తిరుపతిలో వైఎస్సార్ కాంగ్రెస్ నాయకుడు భూమన కరుణాకరరెడ్డి దీక్ష చేపట్టారు. ఆయన దీక్షా సభకు భారీ సంఖ్యలో మహిళలు హాజరయ్యారు. మాజీ ఎమ్మెల్సీ ఎస్వీ మోహనరెడ్డి కర్నూలులో ఆమరణ దీక్ష ప్రారంభించారు. రాజమండ్రిలో దీక్షా శిబిరాన్ని వైఎస్సార్సీపీ నాయకురాలు జక్కంపూడి విజయలక్ష్మి ప్రారంభించారు.  
 
 రెండోరోజు సభలో శాసనమండలి మాజీ సభ్యుడు, వైఎస్సార్ కాంగ్రెస్ పార్టీకి చెందిన సీనియర్ నాయకుడు దాడి వీరభద్రరావు అటు కాంగ్రెస్ పార్టీపైన, ఇటు తెలుగుదేశం పార్టీపైన నిప్పులు చెరిగారు.
 
 తెలంగాణ ప్రత్యేక రాష్ట్రాన్ని ఏర్పాటు చేయాలంటే చాలా సమస్యలున్నాయని, వాటిని పరిష్కరించిన తర్వాత మాత్రమే ఆ అంశాన్ని లేవనెత్తాలని, అప్పుడు మాత్రమే నిర్ణయం తీసుకోవాలి తప్ప ఇప్పట్లో ఈ అంశంపై నిర్ణయం తీసుకోవడం సబబు కాదనే వైఎస్ రాజశేఖరరెడ్డి నిండు సభలో తెలిపారని వైఎస్సార్సీపీ నాయకుడు దాడి వీరభద్రరావు తెలిపారు. అప్పట్లో తామంతా కూడా సభలో ఉన్నట్లు చెప్పారు. ఇందుకోసం రోశయ్య కమిటీని కూడా నియమించారన్నారు. కేంద్రంలో ప్రణబ్ కమిటీని వేస్తే.. ఇక్కడ రోశయ్య కమిటీని వేసినట్లు చెప్పారు.
 
 నిండు శాసనసభలో టీఆర్ఎస్ వాళ్లు ఇష్టం వచ్చినట్లు మాట్లాడుతుంటే తెలుగుతల్లిని తిట్టడానికి మీకు దమ్ము ఎక్కడుంది, మీకు బుద్ధి చెప్పే రోజులొస్తాయని హెచ్చరించిన ఏకైక ముఖ్యమంత్రి రాజశేఖరరెడ్డేనని దాడి అన్నారు. ఆయన చెప్పిన మాటలకు వక్రభాష్యం చెప్పి, శాసనసభలో తెలంగాణ కోసం తీర్మానం కూడా చేశారంటూ అవాస్తవాలు చెబుతున్నారని ఆయన మండిపడ్డారు.
 
 ట్యాంక్బండ్ మీద ఎన్టీఆర్ హయాంలో ఏర్పాటుచేసిన మహనీయుల విగ్రహాలను టీఆర్ఎస్ వాళ్లు కూల్చేస్తే, ఆ విగ్రహాలను చూడ్డానికి కూడా చంద్రబాబు వెళ్లలేకపోయారని, తెలుగువారి ఆత్మగౌరవానికి ఆయనిచ్చే మర్యాద, ఆత్మాభిమానం అదేనని దాడి ఎద్దేవా చేశారు. విగ్రహాలను చూడ్డానికి రమ్మంటే రాను పొమ్మన్నారని, తెలంగాణ వాళ్లు ఏమనుకుంటారోనన్నదే ఆయన భయమని చెప్పారు. ఏనాడూ తెలంగాణ వారి చర్యలను, దాడులను ఖండించలేదని, విభజనకు ఏకపక్షంగా కారకుడైన చంద్రబాబు చర్యలను ఈ రాష్ట్రం హర్షించదని, ఆయన వల్ల మనం చాలా నష్టపోవాల్సి వస్తోందని అన్నారు. హైదరాబాద్లో ఉన్న ఉద్యోగావకాశాలను యువత కోల్పోవాల్సి వస్తోందని ఆవేదన వ్యక్తం చేశారు. పార్లమెంటులో స్వయంగా ప్లకార్డు పట్టుకుని మరీ తాము సమైక్యాంధ్రకు మద్దతు పలుకుతున్నట్లు చెప్పి పోరాడిన ఏకైక నాయకుడు వైఎస్ జగన్మోహన్ రెడ్డి మాత్రమేనని వీరభద్రరావు తెలిపారు.


 ఏలూరు: సీమాంధ్ర ప్రజల తరఫున వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ చేపట్టిన సమర దీక్షకు ‘పశ్చిమ’ ప్రజలు జేజేలు పలుకుతున్నారు. ఆమె దీక్షకు మద్దతుగా  ఎమ్మెల్యే ఆళ్లనాని (కాళీ కృష్ణ శ్రీనివాస్)మంగళవారం ఏలూరులోని ఫైర్ స్టేషన్ సెంటర్లో దీక్ష చేపట్టారు. ఈ సందర్భంగా ఆయన మాట్లాడుతూ వైఎస్ రాజశేఖరరెడ్డి బతికుంటే రాష్ట్రానికి ఈ దుస్థితి వచ్చేది కాదన్నారు. విజయమ్మ సమర దీక్ష చారిత్రాత్మకమని ఆయన అన్నారు. చంద్రబాబునాయుడు వైఖరి వల్లే రాష్ట్రానికి ఈ దుస్థితి వచ్చిందని ఆళ్లనాని మండిపడ్డారు.
 
 బాబు బస్సుయాత్ర చేపడితే ప్రజలే బుద్ధి చెబుతారన్నారు. కేంద్రమంత్రి కావూరి సాంబశివరావు ఇప్పటికైనా రాజీనామా చేసి ప్రజా ఉద్యమంలో పాల్గొనాలని ఆళ్లనాని డిమాండ్ చేశారు. కాగా సమైక్యాంధ్రకు మద్దతుగా ఏలూరులో నేడు, రేపు విద్యాసంస్థలు బంద్ పాటిస్తున్నాయి. కృష్ణా, పశ్చిమ గోదావరి జిల్లాలకు చెందిన కొల్లేరు ప్రజలు భారీ ర్యాలీ చేపట్టారు. 22వ తేదీన ఏలూరులో పది వేలమంది రైతులతో భారీ ర్యాలీతోపాటు ధర్నా నిర్వహించనున్నారు.


 సాక్షి, గుంటూరు: ఉద్యమాల పురిటి గడ్డ గుంటూరు గర్జించింది. సమైక్య నినాదాలు మిన్నంటాయి. రాష్ట్రంలోని అన్ని ప్రాంతాలకు సమ న్యాయం చేయలేని కేంద్ర సర్కారుకు వాటిని విడగొట్టే అధికారం ఎవరిచ్చారని ప్రశ్నిస్తూ, న్యాయం చేయలేనప్పుడు రాష్ట్రాన్ని సమైక్యంగానే ఉంచాలనే డిమాండ్‌తో వైఎస్సార్ కాంగ్రెస్ పార్టీ గౌరవ అధ్యక్షురాలు వైఎస్ విజయమ్మ ప్రారంభించిన ఆమరణ నిరాహార దీక్షకు మద్దతు వెల్లువెత్తింది. ‘సమర దీక్ష’ శిబిరానికి పలు జిల్లాల నుంచి జనం వెల్లువలా కదిలి వచ్చారు. దివంగత వైఎస్సార్ ఆశయాల సాధనే లక్ష్యంగా ఉద్యమ స్ఫూర్తిని కొనసాగిస్తున్న విజయమ్మకు బాసటగా నిలుస్తూ తొలి రోజు కార్యక్రమంలో ప్రజలు భారీ సంఖ్యలో పాల్గొన్నారు. ప్రాణాలను లెక్క చేయకుండా, రాష్ట్ర ప్రజల సంక్షేమమే ధ్యేయంగా ఆమరణ దీక్ష తలపెట్టిన తెగువను మెచ్చుకున్నారు.
  
  విజయమ్మ హైదరాబాద్ నుంచి ఉదయాన్నే గన్నవరం విమానాశ్రయం చేరుకుని రోడ్డు మార్గాన గుంటూరు వచ్చారు.  విజయవాడ, మంగళగిరి, పెదకాకాని... ఇలా అడుగడుగునా వైఎస్సార్‌సీపీ నేతలు, కార్యకర్తలతో పాటు వివిధ సమైక్య జేఏసీ సంఘాల నుంచి ఆమెకు ఘన స్వాగతం లభించింది. గుంటూరు, విజయవాడ పార్టీ నేతల ఆధ్వర్యంలో జరిగిన భారీ ర్యాలీ నడుమ దీక్షా స్థలికి చేరుకున్నారు. నాగార్జున వర్సిటీ ప్రధాన ద్వారం దగ్గర జేఏసీ రిలే దీక్షల శిబిరం వద్ద ఆగి సంఘీభావం తెలిపారు. సరిగ్గా మధ్యాహ్నం 12.05కు దీక్షా శిబిరానికి చేరుకుని, తొలుత వైఎస్సార్ విగ్రహానికి పూలమాల వేసి నివాళులు అర్పించారు. సమర దీక్ష చేపట్టేందుకు దారితీసిన కారణాల్ని సమగ్రంగా వివరించారు. విభజన నిర్ణయంతో రాష్ట్రం అట్టుడుకుతుండటం చూసి జగన్ ఎంతో మథన పడుతున్నారన్నారు.
  
  నాలుగేళ్లుగా రాష్ట్రాన్ని రావణకాష్టంలా మార్చారన్నప్పుడు, తండ్రిలా న్యాయం చేయలేనప్పుడు విభజించే హక్కు కేంద్రానికి ఎవరిచ్చారని  ప్రశ్నించినప్పుడు హర్షద్వానాలు మిన్నంటాయి. వైఎస్ ఆశయాలను, ఆయన ప్రవేశపెట్టిన సంక్షేమ పథకాలను నూటికి నూరుపాళ్లు అమలు చేస్తే రాష్ట్రాన్ని విడగొట్టాల్సిన అగత్యమే రాదనప్పుడు ‘వైఎస్సార్‌కు జోహార్లు’ అంటూ నినాదాలు మారుమోగాయి. రెండున్నరేళ్లు ఓదార్పు యాత్రతో జనం మధ్య గడిపిన తన బిడ్డ జగన్ ఈ రాష్ట్ర ప్రజల సమస్యలను దగ్గరగా చూసి చలించి, తండ్రి వైఎస్సార్ కలల్ని నిజం చేసేందుకు, ఆశయాలను సాధించేందుకు పూనుకోవడం చూసి కాంగ్రెస్‌కు కన్ను కుట్టిందన్నప్పుడు జనం కళ్లు చెమ్మగిల్లాయి. జగన్ జైల్లో ఉన్నా రాష్ట్ర ప్రజల బాగు కోసమే తపిస్తున్నారని, రెండు ప్రాంతాల ప్రజల ఆందోళన నేపథ్యంలో రాత్రిళ్లు నిద్ర పట్టడం లేదని తనతో చెప్పారని విజయమ్మ వివరించారు. సమరదీక్షకు సంఘీభావం తెలిపేందుకు వచ్చిన అశేష జన స్పందనను జగన్‌కు తెలియజేస్తానని చెప్పగానే జనం జగన్‌కు జేజేలు పలికారు. పలికారు. మేధావులు, సమైక్యవాదుల ఆశీర్వచనాలతో సమర దీక్షను ప్రారంభిస్తున్నట్టు చెప్పి దీక్షకు కూర్చున్నారు.
  
  కిటకిటలాడిన గుంటూరు
  సమర దీక్ష శిబిరానికి తరలివచ్చిన సమైక్యవాదులతో గుంటూరు కిటకిటలాడింది. ఉభయ గోదావరి, కృష్ణా, విశాఖపట్నం జిల్లాల నుంచి పెద్ద ఎత్తున ప్రజలు, వైఎస్సార్‌సీపీ కార్యకర్తలు, సీనియర్ సిటిజన్లు, మహిళలు, వికలాంగులు పార్టీ జెండాలు చేబూని వచ్చారు.  టీచర్స్ ఫెడరేషన్, ఏపీ ఫోటోగ్రాఫర్ల అసోసియేషన్ నేతలు విజయమ్మను కలిసి దీక్షకు సంఘీభావం తెలిపారు. దీక్షలో ఉన్న విజయమ్మకు వైద్య పరీక్షలు చేసేందుకు గుంటూరు ప్రభుత్వ ఆస్పత్రి నుంచి వైద్య బృందం రాగా ఆమె తిరస్కరించారు.


 ఇరు ప్రాంతాలకు న్యాయం చేయలేనప్పుడు రాష్ట్రాన్ని విభజించవద్దనే నినాదంతో వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ గుంటూరులో ఆమరణ దీక్ష ప్రారంభించారు.
 ఫొటోలు: లావణ్య కుమార్, సాక్షి ఫొటోగ్రఫర్
 
  
  
  


 గన్నవరం : వైఎస్‌ఆర్‌ కాంగ్రెస్ పార్టీ గౌరవాధ్యక్షురాలు వైఎస్ విజయమ్మకు గన్నవరంలో ఘన స్వాగతం లభించింది. రాష్ట్రవిభజన విషయంలో  సమన్యాయం పాటించాలంటూ గుంటూరులో ఆమరణ నిరాహార దీక్ష చేపట్టనున్న ఆమె ఈరోజు ఉదయం హైదరాబాద్ నుంచి విమానంలో గన్నవరం చేరుకున్నారు.
 ఈ సందర్భంగా విజయమ్మకు పార్టీ నేతలు, కార్యకర్తలు పెద్ద ఎత్తున అభిమాన స్వాగతం పలికారు. అక్కడి నుంచి గుంటూరుకు రోడ్డు మార్గాన బయల్దేరిన ఆమె మరికాసేపట్లో దీక్షా స్థలికి చేరుకుంటారు. మరోవైపు విజయమ్మ దీక్షకు అన్నివర్గాల నుంచి మద్దతు లభిస్తోంది.  దీక్షకు మద్దతుగా వైఎస్ఆర్ సీపీ నేతలు జిల్లాల్లో దీక్షలు చేపడుతున్నారు.


 హైదరాబాద్ :  అన్ని ప్రాంతాలకు సమన్యాయం చేయాలంటూ నేటి నుంచి సమర దీక్షకు సిద్ధమైన వైఎస్ఆర్ కాంగ్రెస్పార్టీ గౌరవ అధ్యక్షురాలు వైఎస్ విజయమ్మ సోమవారం గుంటూరు బయల్దేరారు. ఆమె ఈరోజు ఉదయం లోటస్ పాండ్ నుంచి బయల్దేరి విమానంలో ఉదయం 9.45 గంటలకు గన్నవరం చేరుకుంటారు. అక్కడి నుంచి రోడ్డు మార్గంలో బయలుదేరి 10.30 గంటలకు దీక్షా ప్రాంగణానికి చేరుకుంటారు. దివంగత మహానేత వై.ఎస్.రాజశేఖరరెడ్డి విగ్రహానికి పూలమాలలు వేసి నివాళులర్పించి, సర్వమత ప్రార్థనల్లో పాల్గొంటారు. అనంతరం ‘సమర దీక్ష’ ప్రారంభిస్తారు.
 
 ఏకపక్షంగా, నిరంకుశ వైఖరితో అడ్డగోలుగా రాష్ట్ర విభజన చేస్తున్నారన్న నిర్ణయం వెలువడిన నాడే సీమాంధ్ర ప్రాంతం అగ్నిగుండంగా మారింది. జూలై 31వ తేదీ మొదలు మూడు వారాలుగా ఉద్యమంతో అట్టుడుకుతోంది. విద్యార్థులు, యువకులు, మహిళలు, ఉద్యోగులు, రైతులు.. అన్ని వర్గాల వారూ ఈ ఏకపక్ష విభజనను నిరసిస్తూ రాష్ట్రాన్ని సమైక్యంగా ఉంచాలని స్వచ్ఛందంగా రోడ్ల మీదకు వస్తున్నారు. సరిగ్గా ఇలాంటి తరుణంలో విజయమ్మ చేయనున్న దీక్షకు సకల వర్గాల నుంచి మద్దతు లభిస్తోంది.