బరిలోకి దిగిన ప్రతిసారీ ప్రత్యర్థులకు ముచ్చెమటలు పట్టిస్తూ వీక్షకులను మంత్రముగ్ధుల్ని చేసిన టెన్నిస్‌ దిగ్గజం రోజర్‌ ఫెదరర్‌ ఆటకు వీడ్కోలు పలకబోతున్నట్టు చేసిన ప్రకటన ప్రపంచవ్యాప్తంగా ఉన్న టెన్నిస్‌ అభిమానులను దిగ్భ్రాంతి పరిచింది. వచ్చేవారం లండన్‌లో జరిగే లేవర్‌ కప్‌తో ఇక గ్రౌండ్‌నుంచి నిష్క్రమించబోతున్నానని ఆ ప్రకటన సారాంశం. నిజానికి ఇది ఊహిం చని పరిణామ మేమీ కాదు. ఆయన రేపో, మాపో ఆటకు గుడ్‌బై చెబుతాడని మూడు నాలుగేళ్లుగా ఊహాగానాలు వెలువడుతున్నాయి. అభిమానులను కలవరపెడుతూనే ఉన్నాయి. వింబుల్డన్, ఆస్టేలియన్‌ ఓపెన్, యూఎస్‌ ఓపెన్, ఫ్రెంచ్‌ ఓపెన్‌లలో ఫెదరర్‌కు గాయాలూ, శస్త్ర చికిత్సలూ రివాజయ్యాయి. పర్యవసానంగా అప్పుడప్పుడు ఆటకు విరామం ప్రకటించక తప్పలేదు. వాస్తవానికి నిరుడు జూలైకి ముందు 14 నెలలుగా అతను ఆడింది లేదు. ఆ నెలలో జరిగిన వింబుల్డన్‌ క్వార్టర్స్‌లో దారుణమైన ఓటమి చవిచూశాడు. అందుకే ఫెదరర్‌ ఏం చెబుతాడోనన్న సందేహం అభిమానులను నిత్యం వేధించేది. అలాగని టెన్నిస్‌లో అతనేమీ అత్యున్నత స్థానాన్ని అధిరోహించిన మేటి ఆటగాడు కాదు. టెన్నిస్‌ దిగ్గజ త్రయంలో ఫెదరర్‌తోపాటున్న రాఫెల్‌ నాదల్, జోకోవిచ్‌లిద్దరూ గ్రాండ్‌ స్లామ్‌ సింగిల్స్‌ టైటిల్‌ రేస్‌లో అతన్నెప్పుడో అధిగమించారు. ఆ త్రయంలో అతనిది మూడో స్థానమే. కానీ ఎప్పుడూ అంకెలే వీక్షకుల్ని చకితుల్ని చేయలేవు. తన ఆటకు సృజనాత్మకతను జోడించడం, అందరూ కొట్టే షాట్లే అయినా ప్రతిసారీ తన ప్రత్యేకతను ప్రదర్శించడం, చురుకైన తన కదలికలతో వీక్షకుల్ని కట్టిపడేయడం ఫెదరర్‌కే సాధ్యం. ఆ కదలికల్లో ఒక్కటైనా అనవసరమైనది కనబడదు. తనవైపు దూసుకొచ్చిన బంతిని ప్రత్యర్థి అంచనాకు అందని రీతిలో కొట్టి వారితో తప్పులు చేయించడం, పాయింట్‌ సాధించడం అతనికి అలవోకగా అబ్బిన విద్య. బ్యాక్‌హ్యాండ్, ఫోర్‌హ్యాండ్‌ షాట్లు రెండింటికీ అతనే కేరాఫ్‌ అడ్రస్‌. ఫుట్‌వర్క్, అటాకింగ్‌ గేమ్‌ అతనికే సొంతం. ఒక్కోసారి కొన్ని షాట్లు విఫలం కావొచ్చుగాక... గెలుపోటములతో నిమిత్తం లేకుండా అవి మళ్లీ మళ్లీ నెమరేసుకునే దృశ్యాలుగానే ఎప్పటికీ మిగిలాయి. అందుకే ఆటలో ప్రత్యేక ప్రతిభ తన సొంతమని అతను చేసిన ప్రకటన ఎవరికీ అతిశయోక్తి అనిపించలేదు. 2002లోనే అతను టాప్‌–50 ర్యాంకింగ్స్‌లోకి ప్రవేశించాడు. ఈ ఏడాది జూన్‌ వరకూ చెక్కు చెదరకుండా అక్కడే నిలిచాడు. పురుషుల టెన్నిస్‌లో 2004లో నంబర్‌ వన్‌ ప్లేయర్‌ అయ్యాడు. 2008 వరకూ నిరంతరాయంగా కొనసాగాడు. అనేకసార్లు మళ్లీ ఆ స్థానాన్ని దక్కించుకున్నాడు.  ఎంచుకున్న రంగంలో ఏకాగ్రతతో పనిచేయడం, ఎదురయ్యే అవరోధాలను అధిగ మించేందుకు ఎప్పటికీ ప్రయత్నిస్తూనే ఉండటం ఫెదరర్‌ ఆటలో కనబడుతుంది. ఈ లక్షణమే అతన్ని ఇప్పటికీ యోధుడిగా నిలిపింది. ఓడిన సందర్భాల్లో సైతం క్రీడాభిమానులు అతనికి నీరాజనాలు పట్టేలా చేసింది. 41 ఏళ్ల వయసంటే... దాదాపు రెండున్నర దశాబ్దాల అనుభవమంటే... 1,500కు మించిన మ్యాచ్‌లంటే ఏ క్రీడాకారుడికైనా నిష్క్రమించక తప్పని సమయమని చెప్పాలి. ఎందుకంటే ఎప్పటికప్పుడు సరికొత్త తారలు దూసుకొస్తుంటాయి. ఆటను కొత్తపుంతలు తొక్కిస్తుంటాయి. నాదల్, జోకోవిచ్‌ల సంగతలా ఉంచి హ్యూబర్ట్‌ హుర్కజ్‌లాంటి సరికొత్త మెరుపు ముందు ఫెదరర్‌ తలవంచక తప్పని సందర్భమూ వచ్చింది. అందుకే కావొచ్చు... తన శరీర సామర్థ్యంపై మదింపు వేసుకున్నాడు. తన పరిమితులేమిటో తెలుసుకున్నాడు. ఫెదరర్‌ వదిలిపోతున్న వారసత్వం అత్యుత్తమమైనది. ఒక ఆటగాడు వ్యక్తిగా ఎలా ఉండాలో, ఎలాంటి ప్రమాణాలు పాటించాలో తన సద్వర్తన ద్వారా అతను చూపాడు. ఓటమి ఎదురైతే ప్రత్యర్థులపై నిప్పులు కక్కడం ఏ ఆటలోనైనా ఇప్పుడు రివాజు. గెలుపు సాధించినవారు విర్రవీగుతున్న ఉదంతాలూ లేకపోలేదు. ఇక టెన్నిస్‌లో ఓటమి ఎదురైతే సహనం కోల్పోయి రాకెట్లు విరగ్గొడుతున్నవారూ ఉంటున్నారు. ఎన్నడో కెరీర్‌ మొదట్లో ఫెదరర్‌ కూడా సహనం కోల్పోయిన సందర్భాలున్నాయి. కానీ అతి త్వరలోనే తన ప్రవర్తన మార్చుకున్నాడు. ప్రశాంతంగా, ఏకాగ్రతతో ఆడితే సత్ఫలితం సాధించడం సాధ్యమేనని తెలుసుకున్నాడు. సేవా కార్యక్రమాల్లో సైతం ఎందరికో ఆదర్శప్రాయుడయ్యాడు. తన పేరిట ఉన్న ఫౌండేషన్‌ ద్వారా చదువుల్లో రాణించే నిస్సహాయ పిల్లలకు చేయూతనందించడం, ప్రకృతి వైపరీత్యాలు విరుచుకు పడినప్పుడు ఎగ్జిబిషన్‌ మ్యాచ్‌లతో విరాళాలు సేకరించి ఆపన్న హస్తం అందించడం అతని ప్రత్యేకత. ఆటాడుతున్నప్పుడు నాదల్, జొకోవిచ్‌లతో నువ్వా నేనా అన్న రీతిలో తలపడటం షరా మామూలే అయినా ఎప్పుడూ అవి వ్యక్తిగత వివాదాలుగా ముదరలేదు. చెప్పాలంటే ఆ ముగ్గురూ కలిసి టెన్నిస్‌కు కనీవినీ ఎరుగని జనాదరణను తెచ్చారు. ఆ ఆట స్థాయిని పెంచారు. జోకోవిచ్‌పై ఒక సందర్భంలో డోపింగ్‌ ఆరోపణలు వచ్చాయి. ఆస్ట్రేలియన్‌ ఓపెన్‌లో పాల్గొనడానికి వెళ్లినప్పుడు వ్యాక్సిన్‌ వేయించుకోని కారణంగా ఆటంకాలెదురయ్యాయి. ఫ్రెంచ్‌ ఓపెన్‌ ఆడుతున్నప్పుడు కాలికి సమస్య ఏర్పడటంతో కొన్ని ఇంజెక్షన్లు తీసుకున్నానని నాదల్‌ ప్రకటించి వివాదంలో చిక్కుకున్నాడు. కానీ ఇలాంటి వివాదాలేవీ ఫెదరర్‌కు ఎదురుకాలేదు. టెన్నిస్‌ ప్రపంచంలో చివరంటా ధ్రువతారగా కొనసాగిన ఫెదరర్‌ మిగిల్చిన జ్ఞాపకాలు ఎన్నటికీ చెక్కుచెదరనివి. అభిమానులకు ఎప్పటికీ అపురూపమైనవి.

గ్రాస్ కోర్ట్ సీజన్ సందర్భంగా దురదృష్టవశాత్తు స్విట్జర్లాండ్‌ టెన్నిస్‌ దిగ్గజం ఫెడరర్‌ మోకాలికి గాయం మళ్లీ తిరగబెట్టింది. దాంతో ప్రతిష్టాత్మక టోక్యో ఒలింపిక్స్ నుంచి తప్పుకోవాల్సి వచ్చింది. ఇక వింబుల్డన్‌ టోర్నీ తర్వాత మోకాలి నొప్పితో ఈ ఆట‌గాడు మళ్లీ రాకెట్‌ పట్టలేదు. అయితే తాజాగా త‌న‌ పునరాగమనంపై ఫెడరర్ స్పందించాడు. మోకాలి శస్త్రచికిత్స చేయించుకున్న ఫెడ‌ర‌ర్ తాను యూఎస్ ఓపెన్‌లో పాల్గొనే అవకాశలు లేవ‌ని సోష‌ల్ మీడియాలో తెలిపాడు. 20 సార్లు గ్రాండ్‌స్లామ్ ఛాంపియన్ ఇటీవ‌ల చేసుకున్న‌ శస్త్రచికిత్స కార‌ణంగా వైద్యుల స‌ల‌హా మేర‌కు ఈ నిర్ణయం తీసుకున్న‌ట్లు తెలిపాడు.  ఫెడ‌ర‌ర్ మాట్లాడుతూ.. ఇటీవ‌ల గాయం కార‌ణంగా చాలా నెలలు ఆటకు దూరంగా ఉన్నాను. ఇది కొన్ని విధాలుగా కష్టంగా ఉంటుంది, కానీ అదే సమయంలో నేను ఆరోగ్యంగా ఉండడం కూడా చాలా ముఖ్యం. అందుకే ఇంత గ్యాప్ తీసుకుంటున్నా.  "నేను వాస్తవాలు మాట్లాడుతున్నా, నన్ను తప్పుగా భావించవద్దు. ఈ వయసులో ఇప్పుడు మరొక శస్త్రచికిత్స చేసి ప్రయత్నించడం ఎంత కష్టమో నాకు తెలుసు, ”అని తెలిపాడు. ఇప్పటికే నేను రిహాబిలిటేషన్ ప్రారంభించాను. మళ్లీ రీ ఎంట్రీ ఇస్తాననే నమ్మకం ఉందంటూ ఫెడ‌ర‌ర్ త‌న ఇన్‌స్టా ఖాతాలో పంచుకున్నాడు. View this post on Instagram A post shared by Roger Federer (@rogerfederer)

ఈనెల 30న మొదలయ్యే యూఎస్‌ ఓపెన్‌ గ్రాండ్‌స్లామ్‌ టోర్నీలో ఆడేది లేనిది ఇప్పుడే చెప్పలేనని స్విట్జర్లాండ్‌ టెన్నిస్‌ దిగ్గజం ఫెడరర్‌ వ్యాఖ్యానించాడు. ఈ ఏడాది కేవలం 13 మ్యాచ్‌లు ఆడిన ఫెడరర్‌ వింబుల్డన్‌ టోర్నీ తర్వాత ఆటకు విరామం ఇచ్చాడు. ‘వింబుల్డన్‌ టోర్నీ తర్వాత మోకాలి నొప్పితో మళ్లీ రాకెట్‌ పట్టలేదు. ఈ వారంలో డాక్టర్లను కలవాల్సి ఉంది. ఇప్పటికైతే నా పునరా గమనంపై అనిశ్చిత నెలకొని ఉంది’ అని  ఫెడరర్‌ వివరించాడు.

మెల్‌బోర్న్‌: స్విట్జర్లాండ్‌ టెన్నిస్‌ దిగ్గజం రోజర్‌ ఫెడరర్‌ పేరిట ఉన్న అత్యధిక గ్రాండ్‌స్లామ్‌ సింగిల్స్‌ టైటిల్స్‌ రికార్డును అధిగమించడమే తన తదుపరి లక్ష్యమని సెర్బియా స్టార్‌ జొకోవిచ్‌ తెలిపాడు. రికార్డుస్థాయిలో ఎనిమిదోసారి ఆస్ట్రేలియన్‌ ఓపెన్‌ టైటిల్‌ నెగ్గిన 32 ఏళ్ల జొకోవిచ్‌ సోమవారం విడుదల చేసిన ఏటీపీ ర్యాంకింగ్స్‌లో మళ్లీ నంబర్‌వన్‌ ర్యాంక్‌ను సొంతం చేసుకున్నాడు. జొకోవిచ్‌ కెరీర్‌లో ఇది 17వ గ్రాండ్‌స్లామ్‌ టైటిల్‌. 20 గ్రాండ్‌స్లామ్‌ టైటిల్స్‌తో ఫెడరర్‌ అగ్రస్థానంలో... 19 గ్రాండ్‌స్లామ్‌ టైటిల్స్‌తో స్పెయిన్‌ స్టార్‌ నాదల్‌ రెండో స్థానంలో ఉన్నారు. ‘నా జీవితంలోని ఈ దశలో గ్రాండ్‌స్లామ్‌ టోర్నీలకే ఎక్కువ ప్రాధాన్యత ఇస్తాను. ఈ మెగా టోర్నీల కోసమే నేను పూర్తి సీజన్‌లో ఆడుతున్నాను. ఫెడరర్‌ రికార్డును అందుకోవడం, దానిని అధిగమించడమే నా తదుపరి లక్ష్యం. గ్రాండ్‌స్లామ్‌ టైటిల్‌తో సీజన్‌ను ప్రారంభించినందుకు అమితానందంతో ఉన్నాను. ఇదే ఉత్సాహంతో మిగిలిన సీజన్‌లో మంచి ఫలితాలు సాధిస్తాను’ అని జొకోవిచ్‌ వ్యాఖ్యానించాడు.

మెల్‌బోర్న్‌: టెన్నిస్‌లో ఆ్రస్టేలియా దిగ్గజం మార్గరెట్‌ కోర్ట్‌ పేరు మీదున్న ఆల్‌టైమ్‌ గ్రాండ్‌స్లామ్‌ సింగిల్స్‌ టైటిల్స్‌ రికార్డు (24)ను సమం చేయడానికి సెరెనా విలియమ్స్‌ ఒకవైపు... పురుషుల విభాగంలో ఫెడరర్‌ (20 టైటిల్స్‌) సరసన చేరడానికి ఒక్క గ్రాండ్‌స్లామ్‌ టైటిల్‌ దూరంలో ఉన్న ‘స్పెయిన్‌ బుల్‌’ రాఫెల్‌ నాదల్‌ మరోవైపు... నేటి నుంచి ఆరంభమయ్యే ఏడాది తొలి గ్రాండ్‌స్లామ్‌ ఆస్ట్రేలియన్‌ ఓపెన్‌ టైటిలే లక్ష్యంగా బరిలో దిగుతున్నారు. డిఫెండింగ్‌ చాంపియన్, ఏడుసార్లు విజేత జొకోవిచ్‌ (సెర్బియా), 38 ఏళ్ల వయసులోనూ తన బ్యాక్‌ హ్యాండ్‌ పవర్‌ ఏమాత్రం తగ్గలేదంటూ రోజర్‌ ఫెడరర్‌ మరో గ్రాండ్‌స్లామ్‌ టైటిల్‌పై కన్నేశారు. 2017 ఆస్ట్రేలియన్‌ ఓపెన్‌ తర్వాత మరో గ్రాండ్‌స్లామ్‌ టైటిల్‌ నెగ్గని సెరెనాను మార్గరెట్‌ కోర్ట్‌ ఆల్‌టైమ్‌ రికార్డు ఊరిస్తోంది. తల్లి అయ్యాక... సెరెనా నాలుగు గ్రాండ్‌స్లామ్‌ (2018–వింబుల్డన్, యూఎస్‌; 2019–వింబుల్డన్, యూఎస్‌ ఓపెన్‌) టోరీ్నలలో ఫైనల్స్‌ చేరినా... టైటిల్‌ను గెలవడంలో మాత్రం విఫలమైంది. అయితే ఆక్లాండ్‌ ఓపెన్‌లో విజేతగా నిలిచి సెరెనా ఆత్మవిశ్వాసంతో ఆ్రస్టేలియన్‌ ఓపెన్‌లో బరిలో దిగుతోంది. నేటి తొలి రౌండ్‌ మ్యాచ్‌లో పొటపోవా (రష్యా)తో సెరెనా ఆడుతుంది.

మెల్‌బోర్న్‌: ఆ్రస్టేలియాను అతలాకుతలం చేస్తున్న కార్చిచ్చు బాధితులకు సాంత్వన పలికేందుకు టెన్నిస్‌ హేమాహేమీలు బరిలోకి దిగనున్నారు. టెన్నిస్‌ సూపర్‌స్టార్స్‌ ఫెడరర్‌ (స్విట్జర్లాండ్‌), నాదల్‌ (స్పెయిన్‌), సెరెనా (అమెరికా) తదితర దిగ్గజాలు ఎగ్జిబిషన్‌ మ్యాచ్‌లు ఆడేందుకు సై అన్నారు. విరివిగా నిధులు సేకరించేందుకు ఈ చారిటీ మ్యాచ్‌లు దోహదం చేస్తాయని టెన్నిస్‌ ఆ్రస్టేలియా చీఫ్‌ క్రెయిగ్‌ టైలీ వెల్లడించారు. ఆరంభ గ్రాండ్‌స్లామ్‌ టోర్నీ ఆ్రస్టేలియన్‌ ఓపెన్‌ టోరీ్నకి సరిగ్గా ఐదు రోజుల ముందు ఈ నెల 15న జరిగే ఎగ్జిబిషన్‌ మ్యాచ్‌ల్లో దిగ్గజాలు తలపడతారు. నయోమి ఒసాకా (జపాన్‌), వొజి్నయాకి (డెన్మార్క్‌), కిరియోస్‌ (ఆ్రస్టేలియా), సిట్సిపాస్‌ (గ్రీస్‌)లు విరాళాల సేకరణ కోసం హేమాహేమీలతో కలిసి ఆడనున్నారు. ఈ ఎగ్జిబిషన్‌ చారిటీ మ్యాచ్‌ల ద్వారా సుమారు 1.2 మిలియన్‌ ఆసీస్‌ డాలర్లు (రూ.5.88 కోట్లు) సేకరించి బాధితులకు ఇవ్వనున్నారు.

కెరీర్‌లో తొలిసారిగా గ్రాండ్‌స్లామ్‌ టోర్నమెంట్‌ మెయిన్‌ ‘డ్రా’ మ్యాచ్‌ ఆడిన భారత యువ ప్లేయర్‌ సుమీత్‌ నాగల్‌ సంచలన ప్రదర్శన చేశాడు. 20 గ్రాండ్‌స్లామ్‌ సింగిల్స్‌ టైటిల్స్‌ విజేత ఫెడరర్‌పై ఏకంగా తొలి సెట్‌ గెలిచి అందరి దృష్టిని ఆకర్షించాడు. అయితే ఫెడరర్‌ వెంటనే తేరుకొని ఆ తర్వాతి మూడు సెట్‌లను సాధించి విజయాన్ని అందుకున్నాడు. మొత్తానికి మ్యాచ్‌ ఓడినా... తన ఆటతో సుమీత్‌ మనసులు గెల్చుకున్నాడు.    న్యూయార్క్‌: ఊహించిన ఫలితమే వచ్చినా... భారత యువ ఆటగాడు సుమీత్‌ నాగల్‌ పరాజయంలోనూ గౌరవాన్ని పొందాడు. టెన్నిస్‌ సీజన్‌ చివరి గ్రాండ్‌స్లామ్‌ టోర్నమెంట్‌ యూఎస్‌ ఓపెన్‌లో క్వాలిఫయర్, ప్రపంచ 190వ ర్యాంకర్‌ సుమీత్‌ నాగల్‌ తొలి రౌండ్‌లోనే నిష్క్రమించాడు. ప్రపంచ మూడో ర్యాంకర్, 38 ఏళ్ల రోజర్‌ ఫెడరర్‌ (స్విట్జర్లాండ్‌)తో భారత కాలమానం ప్రకారం మంగళవారం ఉదయం జరిగిన పురుషుల సింగిల్స్‌ తొలి రౌండ్‌లో సుమీత్‌ 6–4, 1–6, 2–6, 4–6తో ఓడిపోయాడు. ఆర్థర్‌ యాష్‌ స్టేడియం సెంటర్‌ కోర్టులో 2 గంటల 30 నిమిషాలపాటు జరిగిన ఈ మ్యాచ్‌లో సుమీత్‌  కళ్లు చెదిరే ఇన్‌సైడ్‌ అవుట్‌ ఫోర్‌హ్యాండ్‌ షాట్‌లతో అలరించాడు. మ్యాచ్‌ సాగుతున్నకొద్దీ ఫెడరర్‌ దూకుడు పెంచగా... అంతర్జాతీయ అనుభవం అంతగా లేకున్నా సుమీత్‌ ప్రతీ పాయింట్‌కు తన శక్తినంతా ధారపోసి ఆడాడు. ఫెడరర్‌కు సులువుగా పాయింట్లు ఇవ్వకుండా పోరాడాడు. మ్యాచ్‌ మొత్తంలో ఫెడరర్‌ 12 ఏస్‌లు సంధించి 7 డబుల్‌ ఫాల్ట్‌లు చేశాడు. 57 అనవసర తప్పిదాలు చేసిన స్విస్‌ దిగ్గజం ఏడు బ్రేక్‌ పాయింట్లు సాధించాడు. మరోవైపు సుమీత్‌ మూడుసార్లు ఫెడరర్‌ సర్వీస్‌ను బ్రేక్‌ చేశాడు. 32 అనవసర తప్పిదాలు చేశాడు. ‘ఫెడరర్‌లాంటి దిగ్గజంతో నా కెరీర్‌లో తొలి గ్రాండ్‌స్లామ్‌ టోర్నీ మ్యాచ్‌ ఆడినందుకు చాలా అద్భుతంగా అనిపిస్తోంది. ఫెడరర్‌ ఆటను చూశాక ఎన్నో కొత్త విషయాలు నేర్చుకున్నాను’ అని 22 ఏళ్ల సుమీత్‌ వ్యాఖ్యానించాడు. ‘సుమీత్‌కు ఉజ్వల భవిష్యత్‌ ఉంది. ఈ మ్యాచ్‌లో అతను చాలా నిలకడగా ఆడాడు. అంతర్జాతీయస్థాయిలో సక్సెస్‌ సాధించాలంటే ఈ రకమైన ఆటతీరును కొనసాగించాల్సి ఉంటుంది’ అని ఫెడరర్‌ అన్నాడు. తొలి రౌండ్‌లో ఓడిన సుమీత్‌కు 35 ర్యాంకింగ్‌ పాయింట్లతోపాటు 58,000 డాలర్ల (రూ. 41 లక్షల 62 వేలు) ప్రైజ్‌మనీ లభించింది. ఫెడరర్‌తోపాటు డిఫెండింగ్‌ చాంపియన్, టాప్‌ సీడ్‌ జొకోవిచ్‌ (సెర్బియా) కూడా రెండో రౌండ్‌కు చేరుకున్నాడు. తొలి రౌండ్‌లో జొకోవిచ్‌ 6–4, 6–1, 6–4తో కార్‌బెలాస్‌ బేనా (స్పెయిన్‌)పై గెలిచాడు. మహిళల సింగిల్స్‌లో మాజీ చాంపియన్‌ సెరెనా విలియమ్స్‌ (అమెరికా) 6–1, 6–1తో షరపోవా (రష్యా)పై గెలిచింది.  గత రెండు దశాబ్దాల్లో గ్రాండ్‌స్లామ్‌ టోర్నీ సింగిల్స్‌ మ్యాచ్‌లో ఒక సెట్‌ గెలిచిన నాలుగో భారతీయ ప్లేయర్‌ సుమీత్‌. గతంలో సోమ్‌దేవ్, యూకీ బాంబ్రీ, సాకేత్‌ ఈ ఘనత సాధించారు. ఫెడరర్‌పై మెయిన్‌ ‘డ్రా’ మ్యాచ్‌లో సెట్‌ గెలిచిన ఏకైక భారతీయ ప్లేయర్‌ సుమీత్‌. గతంలో ఫెడరర్‌తో రోహన్‌ బోపన్న, సోమ్‌దేవ్‌ మ్యాచ్‌లు ఆడినా వరుస సెట్‌లలో ఓడిపోయారు.   

లండన్‌: ఈ సీజన్‌లో తన అద్వితీయ ప్రదర్శన కొనసాగిస్తూ ప్రపంచ నంబర్‌వన్, డిఫెండింగ్‌ చాంపియన్‌ నొవాక్‌ జొకోవిచ్‌ వింబుల్డన్‌ గ్రాండ్‌స్లామ్‌ టోర్నమెంట్‌ ఫైనల్లోకి దూసుకెళ్లాడు. శుక్రవారం జరిగిన పురుషుల సింగిల్స్‌ తొలి సెమీఫైనల్లో టాప్‌ సీడ్‌ జొకోవిచ్‌ (సెర్బియా) 6–2, 4–6, 6–3, 6–2తో 23వ సీడ్‌ బాటిస్టా అగుట్‌ (స్పెయిన్‌)పై విజయం సాధించాడు. ఆదివారం జరిగే ఫైనల్లో రెండో సీడ్‌ ఫెడరర్‌ (స్విట్జర్లాండ్‌)తో జొకోవిచ్‌ తలపడతాడు. 3 గంటల 2 నిమిషాలపాటు జరిగిన రెండో సెమీఫైనల్లో ఫెడరర్‌ 7–6 (7/3), 1–6, 6–3, 6–4తో మూడో సీడ్‌ రాఫెల్‌ నాదల్‌ (స్పెయిన్‌)పై గెలిచాడు. వరుసగా 21వ ఏడాది వింబుల్డన్‌ టోర్నీలో ఆడుతున్న 37 ఏళ్ల ఫెడరర్‌ 12వసారి ఫైనల్‌కు చేరాడు. 8 సార్లు టైటిల్‌ నెగ్గిన అతను మూడుసార్లు రన్నరప్‌గా నిలిచాడు.    ఈ ఏడాది బాటిస్టా అగుట్‌తో ఆడిన రెండు మ్యాచ్‌ల్లోనూ ఓడిపోయిన జొకోవిచ్‌ మూడోసారి మాత్రం విజయాన్ని రుచి చూశాడు. 27వ ప్రయత్నంలో కెరీర్‌లో తొలిసారి ఓ గ్రాండ్‌స్లామ్‌ టోర్నీలో సెమీఫైనల్‌ చేరిన అగుట్‌ ఆ అడ్డంకిని మాత్రం దాటలేకపోయాడు. 2 గంటల 49 నిమిషాలపాటు జరిగిన పోరులో జొకోవిచ్‌కు రెండో సెట్‌ మినహా అంతగా ప్రతిఘటన ఎదురుకాలేదు. మ్యాచ్‌ మొత్తంలో తొమ్మిది ఏస్‌లు సంధించిన జొకోవిచ్‌ మూడు డబుల్‌ ఫాల్ట్‌లు చేశాడు. నెట్‌ వద్దకు 53 సార్లు దూసుకొచ్చిన అతను 42 సార్లు పాయింట్లు సాధించడం విశేషం.అగుట్‌ సర్వీస్‌ను ఐదుసార్లు బ్రేక్‌ చేసిన జొకోవిచ్‌ రెండో సెట్‌లో ఒకసారి తన సర్వీస్‌ను కోల్పోయాడు. 42 విన్నర్స్‌ కొట్టిన జొకోవిచ్‌ 29 అనవసర తప్పిదాలు చేశాడు. మరోవైపు అగుట్‌  కేవలం ఐదు ఏస్‌లు సంధించి రెండు డబుల్‌ ఫాల్ట్‌లు చేశాడు. అగుట్‌పై విజయంతో జొకోవిచ్‌ తన కెరీర్‌లో 25వసారి గ్రాండ్‌స్లామ్‌ టోర్నీలో టైటిల్‌ పోరుకు చేరాడు. 15 గ్రాండ్‌స్లామ్‌ టైటిల్స్‌ నెగ్గిన అతను 9సార్లు రన్నరప్‌ ట్రోఫీతో సరిపెట్టుకున్నాడు. వింబుల్డన్‌ ట్రోఫీని నాలుగుసార్లు (2011, 2014, 2015, 2018) సొంతం చేసుకున్న జొకోవిచ్‌ ఒకసారి (2013లో) రన్నరప్‌గా నిలిచాడు.

లండన్‌: వింబుల్డన్‌ గ్రాండ్‌స్లామ్‌ టెన్నిస్‌ టోర్నమెంట్‌లో పురుషుల సింగిల్స్‌ విభాగంలో రెండో సీడ్‌ ఫెడరర్‌ (స్విట్జర్లాండ్‌), మూడో సీడ్‌ రాఫెల్‌ నాదల్‌ (స్పెయిన్‌) ప్రిక్వార్టర్‌ ఫైనల్లోకి అడుగు పెట్టారు. మూడో రౌండ్‌ మ్యాచ్‌ల్లో ఫెడరర్‌ 7–5, 6–2, 7–6 (7/4)తో లుకాస్‌ పుయి (ఫ్రాన్స్‌)పై, మూడో సీడ్‌ నాదల్‌ 6–2, 6–3, 6–2తో సోంగా (ఫ్రాన్స్‌)పై గెలిచారు. మహిళల సింగిల్స్‌ మూడో రౌండ్‌ మ్యాచ్‌ల్లో సెరెనా విలియమ్స్‌ (అమెరికా)  6–3, 6–4తో జులియా జార్జెస్‌ (జర్మనీ)పై, టాప్‌ సీడ్‌ యాష్లే బార్టీ (ఆస్ట్రేలియా) 6–1, 6–1తో హరియెట్‌ డార్ట్‌ (బ్రిటన్‌)పై గెలిచి ప్రిక్వార్టర్స్‌కు చేరుకున్నారు.

గతవారం మాడ్రిడ్‌ మాస్టర్స్‌ సిరీస్‌ టోర్నీలో క్వార్టర్‌ ఫైనల్లో డొమినిక్‌ థీమ్‌ (ఆస్ట్రియా) చేతిలో ఓడిన స్విట్జర్లాండ్‌ దిగ్గజం  ఫెడరర్‌... రోమ్‌ మాస్టర్స్‌ సిరీస్‌ టోర్నమెంట్‌లో గాయం కారణంగా క్వార్టర్‌ ఫైనల్లో వైదొలిగాడు. గ్రీస్‌ యువతార సిట్సిసాస్‌తో క్వార్టర్‌ ఫైనల్లో తలపడాల్సిన  అతను కుడి కాలి గాయం కారణంగా బరిలోకి దిగలేదు. ‘నేను వంద శాతం ఫిట్‌గా లేకపోవడంతో మ్యాచ్‌ ఆడకూడదని నిర్ణయించుకున్నాను’ అని 2015 తర్వాత మళ్లీ ఈ ఏడాది ఫ్రెంచ్‌ ఓపెన్‌ ఆడనున్న ఫెడరర్‌ వ్యాఖ్యానించాడు.      

మాజీ చాంపియన్‌ రోజర్‌ ఫెడరర్‌ మయామి ఓపెన్‌ మాస్టర్స్‌ సిరీస్‌–1000 టెన్నిస్‌ టోర్నమెంట్‌  సెమీఫైనల్లోకి దూసుకెళ్లాడు. శుక్రవారం జరిగిన పురుషుల సింగిల్స్‌ క్వార్టర్‌ ఫైనల్లో ఫెడరర్‌ 6–0, 6–4తో కెవిన్‌ అండర్సన్‌ (దక్షిణాఫ్రికా)ను ఓడించాడు.  సెమీస్‌లో కెనడా యువ సంచలనం డెనిస్‌ షపోవలోవ్‌తో ఫెడరర్‌ ఆడతాడు. క్వార్టర్‌ ఫైనల్లో షపోవలోవ్‌ 6–7 (5/7), 6–4, 6–2తో ఫ్రాన్సెస్‌ టియాఫో (అమెరికా)పై గెలుపొందాడు.    

ఫ్లోరిడా: మయామి ఓపెన్‌ మాస్టర్స్‌ సిరీస్‌–1000 టెన్నిస్‌ టోర్నమెంట్‌లో స్విట్జర్లాండ్‌ దిగ్గజం రోజర్‌ ఫెడరర్‌ ప్రిక్వార్టర్‌ ఫైనల్లోకి దూసుకెళ్లాడు. మంగళవారం జరిగిన పురుషుల సింగిల్స్‌ మూడో రౌండ్‌లో ఫెడరర్‌ 7–5, 6–3తో ఫిలిప్‌ క్రాజినోవిచ్‌ (సెర్బియా)పై విజయం సాధించాడు. ఈ టోర్నీ చరిత్రలో ఫెడరర్‌కిది 52వ విజయం కావడం విశేషం. గంటన్నరపాటు జరిగిన ఈ మ్యాచ్‌లో ఫెడరర్‌ 14 ఏస్‌లు సంధించాడు. ప్రిక్వార్టర్‌ ఫైనల్లో రష్యా యువ సంచలనం డానిల్‌ మెద్వెదెవ్‌తో ఫెడరర్‌ ఆడతాడు. మరో ప్రిక్వార్టర్‌ ఫైనల్లో ప్రపంచ 15వ ర్యాంకర్‌ మెద్వెదెవ్‌ 7–6 (7/5), 6–7 (5/7), 7–6 (7/0)తో రీలి ఒపెల్కా (అమెరికా)పై గెలిచాడు. గత ఏడాది కాలంలో మెద్వెదెవ్‌ మూడు టైటిల్స్‌ సాధించి అద్భుత ఫామ్‌లో ఉన్నాడు.   హలెప్‌ ముందంజ...  ఇదే టోర్నీ మహిళల సింగిల్స్‌లో మాజీ నంబర్‌వన్‌ హలెప్‌ (రొమేనియా) క్వార్టర్‌ ఫైనల్‌కు చేరింది. ప్రిక్వార్టర్‌ ఫైనల్లో హలెప్‌ 6–3, 6–3తో 38 ఏళ్ల వీనస్‌ విలియమ్స్‌ (అమెరికా)పై విజయం సాధించింది. మూడో రౌండ్‌లో ప్రపంచ నంబర్‌వన్‌ ఒసాకా (జపాన్‌)పై నెగ్గిన సు వె సెయి (చైనీస్‌ తైపీ) మరో గొప్ప విజయంతో క్వార్టర్‌ ఫైనల్లోకి అడుగు పెట్టింది. సు వె సెయి 6–3, 6–7 (0/7), 6–2తో ప్రపంచ మాజీ నంబర్‌వన్‌ వొజ్నియాకి (డెన్మార్క్‌)ను ఓడించింది. ఇతర ప్రిక్వార్టర్‌ ఫైనల్స్‌లో మూడో సీడ్‌ క్విటోవా (చెక్‌ రిపబ్లిక్‌) 6–3, 6–3 తో గార్సియా (ఫ్రాన్స్‌)పై, ఐదో సీడ్‌  ప్లిస్కోవా (చెక్‌ రిపబ్లిక్‌) 2–6, 6–3, 7–5తో యులియా (కజకిస్తాన్‌)పై గెలిచారు.    

కాలిఫోర్నియా: టైటిల్‌ ఫేవరెట్స్‌ను బోల్తా కొట్టిస్తూ ప్రతిష్టాత్మక ఇండియన్‌ వెల్స్‌ మాస్టర్స్‌ సిరీస్‌–1000 టెన్నిస్‌ టోర్నమెంట్‌లో కొత్త చాంపియన్స్‌ అవతరించారు. పురుషుల సింగిల్స్‌లో ఏడో సీడ్‌ డొమినిక్‌ థీమ్‌ (ఆస్ట్రియా)... మహిళల సింగిల్స్‌లో ‘వైల్డ్‌ కార్డు’తో బరిలోకి దిగిన బియాంక ఆండ్రీస్కు (కెనడా) టైటిల్స్‌ సొంతం చేసుకొని సంచలనం సృష్టించారు. పురుషుల సింగిల్స్‌ ఫైనల్లో డొమినిక్‌ థీమ్‌ 3–6, 6–3, 7–5తో నాలుగో సీడ్, గతంలో ఐదుసార్లు చాంపియన్‌గా నిలిచిన రోజర్‌ ఫెడరర్‌ (స్విట్జర్లాండ్‌)ను ఓడించగా... మహిళల సింగిల్స్‌ ఫైనల్లో 18 ఏళ్ల బియాంక ఆండ్రీస్కు 6–4, 3–6, 6–4తో ప్రపంచ మాజీ నంబర్‌వన్‌ ఎంజెలిక్‌ కెర్బర్‌ (జర్మనీ)పై విజయం సాధించింది. చాంపియన్స్‌గా నిలిచిన థీమ్, బియాంకాలకు 13,54,010 డాలర్ల (రూ. 9 కోట్ల 29 లక్షలు) చొప్పున ప్రైజ్‌మనీతోపాటు 1000 ర్యాంకింగ్‌ పాయింట్లు లభించాయి.  22 ఏళ్ల తర్వాత...  గతంలో రెండుసార్లు మాస్టర్స్‌ ఫైనల్స్‌ (మాడ్రిడ్‌ ఓపెన్‌) ఆడి రెండుసార్లూ ఓడిపోయిన డొమినిక్‌ థీమ్‌కు మూడో ఫైనల్‌ కలిసొచ్చింది. దిగ్గజ ప్రత్యర్థి ముందున్నా... తొలి సెట్‌ను కోల్పోయినా... ఏదశలోనూ నిరాశకు లోనుకాకుండా ఆడిన థీమ్‌ ఆఖరికి అనుకున్న ఫలితం సాధించాడు. చెరో సెట్‌ గెలిచాక... నిర్ణాయక మూడో సెట్‌లోని 11వ గేమ్‌లో ఫెడరర్‌ సర్వీస్‌ను బ్రేక్‌ చేసిన థీమ్‌ ఆ తర్వాత తన సర్వీస్‌ను నిలబెట్టుకొని విజయాన్ని దక్కించుకున్నాడు. ఈ క్రమంలో 22 ఏళ్ల తర్వాత మాస్టర్స్‌ సిరీస్‌ టైటిల్‌ నెగ్గిన ఆస్ట్రియా ప్లేయర్‌గా గుర్తింపు పొందాడు. ఆస్ట్రియా తరఫున చివరిసారి థామస్‌ ముస్టర్‌ (1997లో మయామి ఓపెన్‌) మాస్టర్స్‌ సిరీస్‌ టైటిల్‌ గెలిచాడు.  

పెర్త్‌: హాప్‌మన్‌ కప్‌లో అరుదైన సమరం ఆవిష్కృతమైంది. ‘ఆల్‌టైమ్‌ గ్రేట్‌ స్టార్స్‌’ ఫెడరర్‌ (స్విట్జర్లాండ్‌), సెరెనా విలియమ్స్‌ (అమెరికా) తొలిసారి కోర్టులో ‘ఢీ’కొన్నారు. మిక్స్‌డ్‌ డబుల్స్‌ విభాగంలో జరిగిన ఈ పోరు హాప్‌మన్‌ కప్‌కే హైలైట్‌గా నిలిచింది. దేశాల మధ్య జరిగే ఈ టీమ్‌ ఈవెంట్లో తొలి సింగిల్స్‌లో డిఫెండింగ్‌ చాంపియన్‌ స్విట్జర్లాండ్‌ తరఫున ఫెడరర్‌ 6–4, 6–1తో టియాఫో (అమెరికా)పై నెగ్గాడు. తర్వాత మహిళల సింగిల్స్‌లో సెరెనా 4–6, 6–4, 6–3తో బెన్సిచ్‌ (స్విట్జర్లాండ్‌)ను ఓడించడంతో స్కోరు 1–1తో సమమైంది. ఇక నిర్ణాయక మిక్స్‌డ్‌ డబుల్స్‌లో ఫెడరర్‌–బెన్సిచ్‌ జంట 4–2, 4–3 (5/3) సెరెనా–టియాఫొ జోడీపై గెలిచింది. కోర్టులో రాకెట్లు దూసిన దిగ్గజాలు మ్యాచ్‌ ముగిశాక తమ స్మార్ట్‌ఫోన్లతో సెల్ఫీ ముచ్చట తీర్చుకున్నారు. ఆటతో పాటు ఈ హేమాహేమీల ‘స్వీయచిత్రం’ అందర్నీ ఆకట్టి పడేసింది. అన్నట్లు వెంటనే ఇద్దరు ట్విట్టర్, ఇన్‌స్టాగ్రామ్‌లో తమదైన శైలి క్యాప్షన్‌లతో పోస్ట్‌ చేయడంతో లెక్కలేనన్ని లైక్‌లు వస్తున్నాయి. 

షికాగో (అమెరికా): పురుషుల టెన్నిస్‌లో యూరోప్‌ ఆటగాళ్ల ఆధిపత్యాన్ని చాటుకుంటూ వరుసగా రెండో ఏడాది రాడ్‌ లేవర్‌ కప్‌ను యూరోప్‌ జట్టు దక్కించుకుంది. ఫెడరర్‌ (స్విట్జర్లాండ్‌), జొకోవిచ్‌ (సెర్బియా), జ్వెరెవ్‌ (జర్మనీ), దిమిత్రోవ్‌ (బల్గేరియా), గాఫిన్‌ (బెల్జియం), ఎడ్మండ్‌ (బ్రిటన్‌)లతో కూడిన యూరోప్‌ జట్టు 13–8తో ప్రపంచ జట్టుపై గెలుపొందింది. ప్రపంచ జట్టుకు అండర్సన్‌ (దక్షిణాఫ్రికా), ఇస్నెర్‌ (అమెరికా), కిరియోస్‌ (ఆస్ట్రేలియా), జాక్‌ సోక్‌ (అమెరికా), ష్వార్ట్‌జ్‌మన్‌ (అర్జెంటీనా), టియాఫో (అమెరికా) ప్రాతినిధ్యం వహించారు. చివరి రోజు మూడు మ్యాచ్‌లు జరుగగా... రెండింటిలో యూరోప్‌ ఆటగాళ్లు గెలిచి కప్‌ను సొంతం చేసుకున్నారు. డబుల్స్‌ మ్యాచ్‌లో ఇస్నెర్‌–జాక్‌ సోక్‌ (వరల్డ్‌ టీమ్‌) ద్వయం 4–6, 7–6 (7/2), 11–9తో ఫెడరర్‌–జ్వెరెవ్‌ (యూరోప్‌) జోడీని ఓడించింది. ఆ తర్వాత సింగిల్స్‌ మ్యాచ్‌లో ఫెడరర్‌ 6–7 (5/7), 7–6 (8/6), 10–7తో ‘సూపర్‌ టైబ్రేక్‌’లో ఇస్నెర్‌ (వరల్డ్‌ టీమ్‌)పై గెలిచాడు. చివరి మ్యాచ్‌లో జ్వెరెవ్‌ 6–7 (3/7), 7–5, 10–7తో ‘సూపర్‌ టైబ్రేక్‌’లో అండర్సన్‌ (వరల్డ్‌ టీమ్‌)పై విజయం సాధించి యూరోప్‌ విజయాన్ని ఖాయం చేశాడు. మూడు రోజుల పాటు జరిగిన ఈ టోర్నీలో యూరోప్‌ జట్టు ఏడు మ్యాచ్‌ల్లో... వరల్డ్‌ టీమ్‌ జట్టు నాలుగు మ్యాచ్‌ల్లో విజయాలు సాధించాయి.  

న్యూయార్క్‌: యూఎస్‌ ఓపెన్‌ గ్రాండ్‌స్లామ్‌ టెన్నిస్‌ టోర్నమెంట్‌లో టాప్‌స్టార్లంతా తొలిరౌండ్‌ను సులభంగానే అధిగమించారు. స్విట్జర్లాండ్‌ దిగ్గజం, ఐదు సార్లు యూఎస్‌ విజేత అయిన ఫెడరర్‌ 6–2, 6–2, 6–4తో జపాన్‌కు చెందిన యోషిహితో నిషిఒకాపై విజయం సాధించగా, ఏడో సీడ్‌ సిలిచ్‌ (క్రొయేషియా) 7–5, 6–1, 1–1తో ఆధిక్యంలో ఉన్న దశలో మారియస్‌ కొపిల్‌ (రొమేనియా) వైదొలిగాడు. మహిళల సింగిల్స్‌లో రెండో సీడ్‌ వోజ్నియాకి (డెన్మార్క్‌) 6–3, 6–2తో స్టోసుర్‌ (ఆస్ట్రేలియా)పై గెలుపొందగా, నాలుగో సీడ్‌ కెర్బర్‌ (జర్మనీ) 7–6 (7/5), 6–3తో గాస్పర్యాన్‌ (రష్యా)ను ఓడించింది. మరో వైపు భారత నంబర్‌వన్‌ టెన్నిస్‌ ప్లేయర్‌ యూకీ బాంబ్రీ ఆట తొలిరౌండ్లోనే ముగిసింది. ప్రపంచ 96వ ర్యాంకర్‌ యూకీ 3–6, 6–7 (3/7), 5–7తో పీర్‌ హెర్బర్ట్‌ (ఫ్రాన్స్‌) చేతిలో ఓడాడు.   ఎండతో పోరాడలేక... సెర్బియన్‌ స్టార్‌ నోవాక్‌ జొకోవిచ్‌ యూఎస్‌ ఓపెన్‌ లో ఒంటిని పిండేసే ఎండతో విలవిల్లాడాడు. 38డిగ్రీ సెల్సియస్‌ ఉష్ణోగ్రతను తాళలేక రెండు సెట్లయ్యాక  చివరకు జొకో, అతని ప్రత్యర్థి మార్టన్‌ ఫుక్సోవిక్స్‌ (హంగేరి) మాకో పది నిమిషాల విశ్రాంతి కావాల్సిందేనంటూ కోర్టు బయటికొచ్చారు. అప్పుడు ఇద్దరు చెరో సెట్‌ గెలిచివున్నారు. కోర్టు పక్కనే జొకో, ఫుక్సోవిక్స్‌ చొక్కాలిప్పి ఐస్‌బాత్‌తో సేదతీరాకే మళ్లీ రాకెట్‌ పట్టారు. చివరకు సెర్బియన్‌ స్టార్‌ 6–3, 3–6, 6–4, 6–0తో ఫుక్సోవిక్స్‌పై నెగ్గాడు.   

న్యూయార్క్‌: ఈ ఏడాది ‘బిగ్‌ ఫోర్‌’తో తొలిసారి ఓ గ్రాండ్‌స్లామ్‌ టోర్నీ రసవత్తరం కానుంది. గాయంతో చాన్నాళ్లుగా ఆటకు దూరమైన మాజీ చాంపియన్‌ ఆండీ ముర్రే (బ్రిటన్‌) పునరాగమనంతో పాటు ఈ ఏడాది ‘గ్రాండ్‌’ చాంపియన్లు ఫెడరర్‌ (ఆస్ట్రేలియన్‌ ఓపెన్‌), నాదల్‌ (ఫ్రెంచ్‌), జొకోవిచ్‌ (వింబుల్డన్‌) బరిలోకి దిగనుండటంతో యూఎస్‌ ఓపెన్‌లో హోరాహోరీకి రంగం సిద్ధమైంది. టాప్‌ స్టార్లంతా ఆడుతున్న సీజన్‌ చివరి గ్రాండ్‌ స్లామ్‌ టోర్నీకి నేడు తెరలేవనుంది. భారత్‌ నుంచి యూకీ బాంబ్రీ పురుషుల సింగిల్స్‌లో... రోహన్‌ బోపన్న, దివిజ్‌ శరణ్‌ డబుల్స్‌లో దిగుతున్నారు. ‘24’ కోసం సెరెనా... మహిళల సింగిల్స్‌ బరిలో ‘అమెరికా నల్లకలువ’ సెరెనా విలియమ్స్‌ను మరో రికార్డు ఊరిస్తోంది. 23 గ్రాండ్‌స్లామ్‌ టోర్నీల చాంపియన్‌ సెరెనా ఈసారి విజేతగా నిలిస్తే అత్యధిక సింగిల్స్‌ గ్రాండ్‌స్లామ్‌ టైటిల్స్‌ నెగ్గిన క్రీడాకారిణిగా మార్గరెట్‌ కోర్ట్‌ (24 టైటిల్స్‌) పేరిట ఉన్న రికార్డును సమం చేస్తుంది.    జోరుమీదున్న ‘జోకర్‌’... వింబుల్డన్‌ చాంపియన్, ఆరో సీడ్‌ జొకోవిచ్‌ (సెర్బియా) న్యూయార్క్‌లోనూ టైటిల్‌పై కన్నేశాడు. గతేడాది భుజం గాయంతో యూఎస్‌కు దూరమైన ‘జోకర్‌’ ఇక్కడ మూడో టైటిల్‌ ముచ్చట తీర్చుకోవాలనుకుంటున్నాడు. 2011, 2015లలో విజేతగా నిలిచిన జొకో ఐదుసార్లు రన్నరప్‌కే పరిమితమయ్యాడు. ఇటీవల సిన్సినాటి ఓపెన్‌ ఫైనల్లో ఫెడరర్‌పై టైటిల్‌ గెలిచిన జొకోవిచ్‌ మొత్తం తొమ్మిది వేర్వేరు మాస్టర్స్‌ టైటిల్స్‌ నెగ్గిన తొలి ఆటగాడిగా రికార్డులకెక్కాడు. జోరు మీదున్న ఈ సెర్బియన్‌ స్టార్‌ తన ఫామ్‌ కొనసాగించాలనే పట్టుదలతో ఉన్నాడు. మరోవైపు ప్రపంచ నంబర్‌వన్, డిఫెండింగ్‌ చాంపియన్‌ నాదల్‌ (స్పెయిన్‌), రెండో సీడ్‌ ఫెడరర్‌ (స్విట్జర్లాండ్‌) ఈ ఏడాది రెండో గ్రాండ్‌స్లామ్‌ టైటిల్‌పై కన్నేశారు. 

లండన్‌: రికార్డుస్థాయిలో తొమ్మిదోసారి వింబుల్డన్‌ గ్రాండ్‌స్లామ్‌ టైటిల్‌ సాధించాలని ఆశించిన స్విట్జర్లాండ్‌ దిగ్గజం రోజర్‌ ఫెడరర్‌కు ఊహించని పరాజయం ఎదురైంది. వింబుల్డన్‌ పచ్చిక కోర్టులపై అద్వితీయ రికార్డు కలిగిన ఈ డిఫెండింగ్‌ చాంపియన్‌ ప్రస్థానం ఈసారి క్వార్టర్‌ ఫైనల్లోనే ముగిసింది. ఎనిమిదో సీడ్‌ అండర్సన్‌ (దక్షిణాఫ్రికా)తో బుధవారం జరిగిన పురుషుల సింగిల్స్‌ క్వార్టర్‌ ఫైనల్లో టాప్‌ సీడ్‌ ఫెడరర్‌ 6–2, 7–6 (7/5), 5–7, 4–6, 11–13తో ఓడిపోయాడు. 4 గంటల 13 నిమిషాలపాటు జరిగిన ఈ మ్యాచ్‌లో 6 అడుగుల 8 అంగుళాల పొడవు, 92 కేజీల బరువున్న అండర్సన్‌ 28 ఏస్‌లు సంధించి, 65 విన్నర్స్‌ కొట్టాడు. మరోవైపు తొలి రెండు సెట్‌లు గెలిచి... మూడో సెట్‌లో 5–4తో ఆధిక్యంలో ఉండి... అండర్సన్‌ సర్వీస్‌లో మ్యాచ్‌ పాయింట్‌ సంపాదించిన ఫెడరర్‌ బ్యాక్‌హ్యాండ్‌ షాట్‌ బయటకు కొట్టి విజయం సాధించే సువర్ణావకాశాన్ని వృథా చేసుకున్నాడు. ఆ తర్వాత అండర్సన్‌ తన సర్వీస్‌ను నిలబెట్టుకొని స్కోరును 5–5తో సమం చేశాడు. అనంతరం ఫెడరర్‌ సర్వీస్‌ను బ్రేక్‌ చేసి, తన సర్వీస్‌ను కాపాడుకొని మూడో సెట్‌ను నెగ్గి మ్యాచ్‌లో నిలిచాడు. నాలుగో సెట్‌లో ఒకసారి ఫెడరర్‌ సర్వీస్‌ను బ్రేక్‌ చేసిన అండర్సన్‌ అదే జోరులో ఈ సెట్‌నూ దక్కించుకున్నాడు. ఇక నిర్ణాయక ఐదో సెట్‌లో ఇద్దరూ ప్రతీ పాయింట్‌కూ హోరాహోరీగా పోరాడారు. చివరకు ఫెడరర్‌ సర్వీస్‌ చేసిన 23వ గేమ్‌లో అండర్సన్‌ బ్రేక్‌ పాయింట్‌ సంపాదించాడు. అనంతరం తన సర్వీస్‌ను కాపాడుకొని సెట్‌తోపాటు మ్యాచ్‌నూ సొంతం చేసుకొని సంచలన విజయం దక్కించుకున్నాడు.  వరుసగా 20వసారి వింబుల్డన్‌ టోర్నీలో బరిలోకి దిగిన ఫెడరర్‌ మ్యాచ్‌ పాయింట్‌ సంపాదించాక ఓడిపోవడం ఇదే తొలిసారి. కెవిన్‌ కరెన్‌ (1983లో) తర్వాత వింబుల్డన్‌ టోర్నీలో సెమీఫైనల్‌కు చేరిన తొలి దక్షిణాఫ్రికా ప్లేయర్‌గా అండర్సన్‌ గుర్తింపు పొందాడు.   జొకోవిచ్‌ జోరు... మరో క్వార్టర్‌ ఫైనల్లో మూడుసార్లు చాంపియన్‌ జొకోవిచ్‌ (సెర్బియా) 6–3, 3–6, 6–2, 6–2తో నిషికోరి (జపాన్‌)పై గెలిచి 2015 తర్వాత ఈ టోర్నీలో సెమీఫైనల్లోకి ప్రవేశించాడు.    

లండన్‌: గత నెలలో ఫ్రెంచ్‌ ఓపెన్‌లో ఫైనల్‌ చేరి రన్నరప్‌గా నిలిచిన డొమినిక్‌ థీమ్‌ వింబుల్డన్‌ టోర్నమెంట్‌లో మాత్రం తొలి రౌండ్‌లోనే వెనుదిరిగాడు. ఏడో సీడ్‌గా బరిలోకి దిగిన ఈ ఆస్ట్రియా ఆటగాడు మార్కోస్‌ బగ్ధాటిస్‌ (సైప్రస్‌)తో జరిగిన పురుషుల సింగిల్స్‌ తొలి రౌండ్‌లో 4–6, 5–7తో రెండు సెట్‌లను చేజార్చుకొని మూడో సెట్‌లో 0–2తో వెనుకబడిన దశలో థీమ్‌ గాయం కారణంగా తప్పుకున్నాడు. మరో తొలి రౌండ్‌ మ్యాచ్‌లో పదో సీడ్‌ డేవిడ్‌ గాఫిన్‌ (బెల్జియం) 4–6, 3–6, 4–6తో మాథ్యూ ఎబ్డెన్‌ (ఆస్ట్రేలియా) చేతిలో ఓడిపోయాడు. మరోవైపు రెండో సీడ్‌ రాఫెల్‌ నాదల్‌ (స్పెయిన్‌), నాలుగో సీడ్‌ అలెగ్జాండర్‌ జ్వెరెవ్‌ (జర్మనీ), ఐదో సీడ్‌ డెల్‌పొట్రో (అర్జెంటీనా) రెండో రౌండ్‌లోకి ప్రవేశించారు. తొలి రౌండ్‌లో నాదల్‌ 6–3, 6–3, 6–2తో డూడీ సెలా (ఇజ్రాయెల్‌)పై, జ్వెరెవ్‌ 7–5, 6–2, 6–0తో డక్‌వర్త్‌ (ఆస్ట్రేలియా)పై, డెల్‌పొట్రో 6–3, 6–4, 6–3తో గొజోవిక్‌ (జర్మనీ)పై గెలిచారు.  క్విటోవా ఇంటిముఖం...  మహిళల సింగిల్స్‌లో 2011, 2014 చాంపియన్, ఎనిమిదో సీడ్‌ పెట్రా క్విటోవా (చెక్‌ రిపబ్లిక్‌) తొలి రౌండ్‌లోనే ఇంటిదారి పట్టింది. బెలారస్‌ అమ్మాయి సస్నోవిచ్‌ 6–4, 4–6, 6–0తో క్విటోవాపై సంచలన విజయం సాధించింది. ఇతర మ్యాచ్‌ల్లో మూడో సీడ్‌ ముగురుజా (స్పెయిన్‌) 6–2, 7–5తో బ్రాడీ (బ్రిటన్‌)పై, టాప్‌ సీడ్‌ సిమోనా హాలెప్‌ (రొమేనియా) 6–2, 6–4తో కురిమి  (జపాన్‌)పై గెలిచారు.   ఫెడరర్‌ రికార్డు బద్దలు  వరుసగా అత్యధిక గ్రాండ్‌స్లామ్‌ టోర్నమెంట్‌లు ఆడిన ప్లేయర్‌గా స్పెయిన్‌ ఆటగాడు ఫెలిసియానో లోపెజ్‌ కొత్త రికార్డు నెలకొల్పాడు. స్విట్జర్లాండ్‌ దిగ్గజం ఫెడరర్‌ (వరుసగా 65) పేరిట ఉన్న ఈ రికార్డును వరుసగా 66వ గ్రాండ్‌స్లామ్‌ టోర్నీ ఆడుతోన్న లోపెజ్‌ బద్దలు కొట్టాడు. మంగళవారం జరిగిన తొలి రౌండ్‌లో లోపెజ్‌ 6–3, 6–4, 6–2తో డెల్‌బోనిస్‌ (అర్జెంటీనా)పై గెలిచాడు.    

రోమ్‌: టెన్నిస్‌ ప్రపంచంలో ఆల్‌ టైమ్‌ గ్రేట్‌ ఎవరంటే ప్రస్తుతానికి అందరూ ఠక్కున చెప్పే పేరు రోజర్‌ ఫెడరర్‌. కానీ... మహిళల మాజీ నం.1 మరియా షరపోవా మాత్రం రాఫెల్‌ నాదల్‌ అంటోంది. ఈ మేరకు ఆమె సోమవారం ట్విట్టర్‌లో పెట్టిన వీడియో వివాదాస్పదమైంది. ఇటాలియన్‌ ఓపెన్‌కు సన్నాహకంగా నాదల్‌తో కలిసి ఇక్కడ సాధనలో పాల్గొంటున్న షరపోవా... ‘కోర్టులో రెండు నిమిషాల సాధనలో గ్రేటెస్ట్‌ ఆఫ్‌ ఆల్‌ టైమ్‌ (జీవోఏటీ) ఆటగాడి ముందు తేలిపోయాను’ అంటూ పోస్ట్‌ చేసింది. ఇందులో ‘మట్టి కోర్టులపై గ్రేటెస్ట్‌ ఆటగాడు’ అని నొక్కి చెప్పకపోవడంతో... ఫెడరర్‌ అభిమానులకు మరోలా అనిపించింది. గెలిచిన 16 గ్రాండ్‌స్లామ్స్‌లో పది మట్టి కోర్టులపై ఆడే ఫ్రెంచ్‌ ఓపెనే కాగా...  నాదల్‌  గ్రేటెస్ట్‌ ఎలా అవుతాడంటూ వారు మండిపడ్డారు. ఇది ఇద్దరిలో ఎవరు గొప్ప అనే చర్చకు దారి తీసింది. మరోవైపు కెరీర్‌లో 20 గ్రాండ్‌స్లామ్స్‌ నెగ్గిన ఫెడరర్‌ ఖాతాలో ఒక ఫ్రెంచ్‌ ఓపెన్‌ కూడా ఉంది. ముఖాముఖిలో మాత్రం ఫెడరర్‌పై నాదల్‌ (23–15)దే పైచేయి కావడం విశేషం.   

పారిస్‌: రెండు నెలలుగా ఆటకు దూరంగా ఉన్నప్పటికీ స్విట్జర్లాండ్‌ టెన్నిస్‌ దిగ్గజం రోజర్‌ ఫెడరర్‌ మళ్లీ ప్రపంచ నంబర్‌వన్‌ ర్యాంక్‌ను అందుకున్నాడు. గతవారం మాడ్రిడ్‌ ఓపెన్‌ మాస్టర్స్‌ సిరీస్‌ టోర్నమెంట్‌లో డిఫెండింగ్‌ చాంపియన్‌గా బరిలోకి దిగిన రాఫెల్‌ నాదల్‌ టైటిల్‌ను నిలబెట్టుకోలేకపోయాడు. క్వార్టర్‌ ఫైనల్లో డొమినిక్‌ థీమ్‌ (ఆస్ట్రియా) చేతిలో నాదల్‌ ఓడిపోయాడు. దాంతో అతని పాయింట్లలో కోత పడింది. మరోవైపు గత ఏడాది మాదిరిగా ఈసారీ ఫెడరర్‌ క్లే కోర్టు సీజన్‌లో ఆడటం లేదు. ఫలితంగా ఫెడరర్‌ అదనంగా పాయింట్లు కోల్పోయే అవకాశం లేదు. సోమవారం విడుదల చేసిన తాజా ర్యాంకింగ్స్‌లో ఫెడరర్‌ 8,670 పాయింట్లతో అగ్రస్థానానికి చేరుకోగా... గత వారం వరకు టాప్‌ ర్యాంక్‌లో ఉన్న నాదల్‌ 7,950 పాయింట్లతో రెండో స్థానానికి పడిపోయాడు. ఈ వారంలో రోమ్‌ ఓపెన్‌ మాస్టర్స్‌ సిరీస్‌లో గనుక నాదల్‌ విజేతగా నిలిస్తే మళ్లీ నంబర్‌వన్‌ అవుతాడు. 2004 ఫిబ్రవరి 2న తొలిసారి నంబర్‌వన్‌ ర్యాంక్‌ను అందుకున్న ఫెడరర్‌ 2008 ఆగస్టు 17 వరకు ఆ స్థానంలో కొనసాగాడు. కొంతకాలంపాటు నాదల్, జొకోవిచ్‌లకు టాప్‌ ర్యాంక్‌ కోల్పోయిన అనంతరం ఫెడరర్‌ 2009 జూలై 6 నుంచి 2010 జూన్‌ 6 వరకు మళ్లీ నంబర్‌వన్‌గా నిలిచాడు. ఆ తర్వాత 2012 జూలై 9 నుంచి 2012 నవంబర్‌ 4 వరకు అగ్రస్థానంలో కొనసాగాడు. ఆ తర్వాత నాదల్, జొకోవిచ్‌ ధాటికి వెనుకబడిపోయిన ఫెడరర్‌ ఈ ఏడాది ఆస్ట్రేలియన్‌ ఓపెన్‌ నెగ్గి ఫిబ్ర వరిలో ఆరేళ్ల తర్వాత మళ్లీ నంబర్‌వన్‌ ర్యాంక్‌ను సొంతం చేసుకున్నాడు. ఈ క్రమంలో టాప్‌ ర్యాంక్‌ అందుకున్న పెద్ద వయస్కుడిగా రికార్డు సృష్టించాడు.  

కాలిఫోర్నియా: ఈ ఏడాది వరుసగా 17 విజయాలతో ఊపు మీదున్న నంబర్‌వన్‌ రోజర్‌ ఫెడరర్‌కు షాక్‌. గతంలో ఐదు సార్లు ఇదే టైటిల్‌ సాధించి డిఫెండింగ్‌ చాంపియన్‌గా బరిలోకి దిగిన ఈ స్విస్‌ స్టార్‌కు ఇండియన్‌ వెల్స్‌ మాస్టర్స్‌ సిరీస్‌ టోర్నీ ఫైనల్లో ఊహించని పరాజయం. అర్జెంటీనా ఆటగాడు డెల్‌పొట్రో సంచలన ప్రదర్శన ముందు ఫెడెక్స్‌ తలవంచాల్సి వచ్చింది. ఫైనల్లో డెల్‌పొట్రో 2 గంటల 42 నిమిషాల్లో 6–4, 6–7 (8/10), 7–6 (7/2)తో ఫెడరర్‌ను ఓడించి తొలిసారి మాస్టర్స్‌–1000 స్థాయి టైటిల్‌ను గెలుచుకున్నాడు. మూడో సెట్‌లో 5–4తో ఆధిక్యంలో ఉండి తన సర్వీస్‌లో ఫెడరర్‌ 40–15తో విజయం అంచుల్లో నిలిచాడు. అయితే ఇదే గేమ్‌లో అతను మూడు సార్లు మ్యాచ్‌ పాయింట్లను కోల్పోవడం అనూహ్యం! ఫెడరర్‌ సర్వీస్‌ చేసిన పదో గేమ్‌లో డెల్‌పొట్రో బ్రేక్‌ సాధించడం... ఆ తర్వాత ఇద్దరు తమ సర్వీస్‌లు నిలబెట్టుకోవడంతో ఆట టైబ్రేక్‌కు చేరింది. ఈ దశలో చెలరేగిన డెల్‌పొట్రో మరో అవకాశం ఇవ్వలేదు. తాజా ప్రదర్శనతో డెల్‌పొట్రో ప్రపంచ ర్యాంకింగ్స్‌లో ఆరో స్థానానికి చేరుకున్నాడు. రెండేళ్ల పాటు గాయాలతో ఆటకు దూరమై ఒక దశలో 1,045 ర్యాంక్‌కు పడిపోయిన అతను 2016లో పునరాగమనం చేసి ఇటీవలే టాప్‌–10లోకి అడుగు పెట్టాడు.  ఫెడరర్, డెల్‌పొట్రో మధ్య ఈ ఫైనల్‌కు ముందు 24 మ్యాచ్‌లు జరగ్గా... 18 సార్లు విజయం రోజర్‌నే వరించింది. విజేతగా నిలిచిన డెల్‌పొట్రోకు 13,40,860 డాలర్ల ప్రైజ్‌మనీ (రూ. 8 కోట్ల 74 లక్షలు) దక్కగా... ఫెడరర్‌ ఖాతాలో  6,54,380 డాలర్లు (రూ. 4 కోట్ల 26 లక్షలు) చేరాయి.   ఇది నిజంగా చాలా పెద్ద విజయం. ఫైనల్లో ఫెడరర్‌ను ఓడించి నేను ఈ టైటిల్‌ను గెలిచానంటే నమ్మలేకపోతున్నాను. నా ఎడమ చేతి మణికట్టుకు మూడో శస్త్రచికిత్స తర్వాత ఆటను మానేయాల్సిన స్థితిలో నిలిచిన నేను ఈ క్షణాన్ని అసలు ఊహించలేదు. పునరాగమనం కోసం నేను చాలా కష్టపడ్డాను. ప్రస్తుతం నేను చాలా అద్భుతంగా ఆడుతున్నాననేది వాస్తవం. ఇక ముందు కూడా ఇదే జోరు కొనసాగిస్తా.     – డెల్‌ పొట్రో  4 ఫైనల్స్‌లో ఫెడరర్‌పై డెల్‌ పొట్రో సాధించిన విజయాల సంఖ్య. 2009 యూఎస్‌ ఓపెన్, 2012, 2013 బాసెల్‌ ఓపెన్‌ ఫైనల్స్‌లో ఫెడరర్‌ను  ఓడించాడు. వారెవ్వా...ఒసాకా  ఇండియన్‌ వెల్స్‌ డబ్ల్యూటీఏ ప్రీమియర్‌ టెన్నిస్‌ టోర్నమెంట్‌లో అన్‌సీడెడ్‌గా బరిలోకి దిగిన 20 ఏళ్ల జపాన్‌ క్రీడాకారిణి నయోమి ఒసాకా విజేతగా అవతరించింది. ఫైనల్లో ఒసాకా 6–3, 6–2తో 20వ సీడ్‌ దరియా కసత్‌కినా (రష్యా)ను ఓడించింది. తద్వారా సెరెనా విలియమ్స్‌ (అమెరికా–1999లో), కిమ్‌ క్లియ్‌స్టర్స్‌ (బెల్జియం–2005లో) తర్వాత అన్‌సీడెడ్‌ హోదాలో ఈ టోర్నీ టైటిల్‌ నెగ్గిన మూడో క్రీడాకారిణిగా ఆమె గుర్తింపు పొందింది. విజేతగా నిలిచిన ఒసాకాకు 13,40,860 డాలర్ల ప్రైజ్‌మనీ (రూ. 8 కోట్ల 74 లక్షలు), రన్నరప్‌ కసత్‌కినాకు  6,54,380 డాలర్లు (రూ. 4 కోట్ల 26 లక్షలు) ప్రైజ్‌మనీగా లభించాయి.    

తన 20 ఏళ్ల ప్రొఫెషనల్‌ కెరీర్‌లో ఫెడరర్‌ తొలిసారి ఓ సీజన్‌ను వరుసగా 17 విజయాలతో ప్రారంభించాడు. 2006 సీజన్‌ ఆరంభంలో వరుసగా 16 విజయాలు నమోదు చేయడమే ఇప్పటిదాకా అతని అత్యుత్తమ ప్రదర్శన. కానీ ఇండియన్‌ వెల్స్‌ మాస్టర్స్‌ సిరీస్‌ టోర్నమెంట్‌లో ఈ స్విట్జర్లాండ్‌ స్టార్‌ తన జైత్రయాత్ర కొనసాగిస్తూ టైటిల్‌ పోరుకు అర్హత సాధించాడు. రికార్డుస్థాయిలో ఆరో టైటిల్‌కు మరో విజయం దూరంలో నిలిచాడు. కాలిఫోర్నియా: తన ప్రత్యర్థి నుంచి ఊహిం చని ప్రతిఘటన ఎదురైనా... అనుభవాన్నంతా రంగరించి పోరాడిన స్విస్‌ టెన్నిస్‌ స్టార్‌ రోజర్‌ ఫెడరర్‌ ఇండియన్‌ వెల్స్‌ మాస్టర్స్‌ సిరీస్‌ టోర్నీ ఫైనల్లోకి దూసుకెళ్లాడు. ప్రపంచ 49వ ర్యాంకర్‌ బోర్నా కొరిక్‌ (క్రొయేషియా)తో జరిగిన పురుషుల సింగిల్స్‌ సెమీఫైనల్లో ఫెడరర్‌ 5–7, 6–4, 6–4తో గెలుపొందాడు. 2 గంటల 20 నిమిషాలపాటు జరిగిన ఈ మ్యాచ్‌లో ఫెడరర్‌కు గట్టిపోటీనే లభించింది. తొలి సెట్‌ కోల్పోయిన ఈ డిఫెండింగ్‌ చాంపియన్‌ రెండో సెట్‌లో 2–4తో వెనుకబడ్డాడు. అయితే 20 ఏళ్లుగా అంతర్జాతీయ టెన్నిస్‌ ఆడుతోన్న ఫెడరర్‌ ఆందోళన చెందకుండా సంయమనంతో ఆడుతూ వరుసగా నాలుగు గేమ్‌లు గెలిచి రెండో సెట్‌ 6–4తో నెగ్గి మ్యాచ్‌లో నిలిచాడు. నిర్ణాయక మూడో సెట్‌లోనూ ఓ దశలో ఫెడరర్‌ 3–4 తో వెనుకబడ్డాడు. ఈసారీ ఎలాంటి ఒత్తిడి కి లోనుకాకుండా వరుసగా మూడు గేమ్‌లు సాధించి సెట్‌తోపాటు మ్యాచ్‌ దక్కించుకున్నాడు. ఫైనల్లో యూఎస్‌ ఓపెన్‌ మాజీ చాంపియన్‌ డెల్‌ పొట్రో (అర్జెంటీనా)తో ఫెడరర్‌ ఆడతాడు. ‘సెమీస్‌లో విజయం అంత సులువుగా లభించలేదు. కీలక సందర్భాల్లో అదృష్టం కూడా కలిసొచ్చింది. ఈ తరహా మ్యాచ్‌లు నా కెరీర్‌లో చాలాసార్లు ఆడాను. ఓ సీజన్‌లో వరుసగా 17 విజయాలు దక్కడం నా కెరీర్‌లో ఇదే తొలిసారి. ఇదే జోరును ఫైనల్లోనూ కొనసాగిస్తాను’ అని 36 ఏళ్ల ఫెడరర్‌ వ్యాఖ్యానించాడు.   

మెల్‌బోర్న్‌: ఆస్ట్రేలియన్‌ ఓపెన్‌ టైటిల్‌ నిలబెట్టుకునే దిశగా రోజర్‌ ఫెడరర్‌ (స్విట్జర్లాండ్‌) మరో అడుగు వేశాడు. ఏడాది తొలి గ్రాండ్‌స్లామ్‌ టోర్నీలో అతను సెమీఫైనల్లోకి ప్రవేశించాడు. మహిళల సింగిల్స్‌లో మాజీ విజేత ఏంజెలిక్‌ కెర్బర్‌ (జర్మనీ), టాప్‌సీడ్‌ సిమోనా హలెప్‌ (రొమేనియా) సెమీస్‌ చేరారు. పురుషుల విభాగంలో ఫెడరర్‌తో పాటు దక్షిణ కొరియాకు చెందిన అన్‌సీడెడ్‌ హైన్‌ చుంగ్‌ కూడా సెమీఫైనల్లోకి దూసుకెళ్లాడు. మిక్స్‌డ్‌ డబుల్స్‌లో భారత ఆటగాడు రోహన్‌ బోపన్న జోడీ సెమీఫైనల్‌ పోరుకు అర్హత సంపాదించింది.  రోజర్‌ 43వ సారి...  రెండో సీడ్‌ ఫెడరర్‌ తన గ్రాండ్‌స్లామ్‌ కెరీర్‌లో 43వ సారి సెమీఫైనల్లోకి ప్రవేశించాడు. ఆస్ట్రేలియన్‌ ఓపెన్‌లోనే అతను సెమీస్‌ చేరడం ఇది 14వ సారి కావడం విశేషం. బుధవారం ఏకపక్షంగా సాగిన క్వార్టర్‌ ఫైనల్లో రోజర్‌ 7–6 (7/1), 6–3, 6–4తో థామస్‌ బెర్డిచ్‌ (చెక్‌ రిపబ్లిక్‌)పై వరుస సెట్లలో విజయం సాధించాడు. మరో క్వార్టర్‌ ఫైనల్లో కొరియన్‌ సంచలనం హైన్‌ చుంగ్‌ 6–4, 7–6 (7/5), 6–3తో టినిస్‌ సాండ్‌గ్రెన్‌ (అమెరికా)పై గెలుపొందాడు. శుక్రవారం సెమీస్‌లో ఫెడరర్‌... హైన్‌ చుంగ్‌తో తలపడతాడు.  హలెప్‌ అలవోకగా..: మహిళల సింగిల్స్‌లో ప్రపంచ నంబర్‌వన్‌ హలెప్, జర్మనీ స్టార్‌ కెర్బర్‌ అలవోక విజయాలతో సెమీఫైనల్‌ చేరుకున్నారు. క్వార్టర్‌ ఫైనల్లో టాప్‌ సీడ్‌ హలెప్‌ 6–3, 6–2తో ఆరో సీడ్‌ కరోలినా ప్లిస్కోవా (చెక్‌ రిపబ్లిక్‌)పై గెలుపొందింది. మరో పోరులో 21వ సీడ్‌ కెర్బర్‌ ధాటికి అమెరికా క్రీడాకారిణి మాడిసన్‌ కీస్‌ చేతులేత్తేసింది. జర్మనీ స్టార్‌ వరుస సెట్లలో 6–1, 6–2తో 17వ సీడ్‌ కీస్‌ (అమెరికా)ను చిత్తు చేసింది. 2016 ఆస్టేలియన్‌ ఓపెన్‌ చాంపియన్‌ అయిన కెర్బర్‌ 51 నిమిషాల్లోనే ఈ మ్యాచ్‌ను ముగించింది. సెమీస్‌ మ్యాచ్‌ల్లో కెర్బర్‌తో హలెప్, ఎలైస్‌ మెర్టెన్స్‌ (బెల్జియం)తో వోజ్నియాకి (డెన్మార్క్‌) పోటీపడతారు.  సెమీస్‌లో బోపన్న జోడి  మిక్స్‌డ్‌ డబుల్స్‌లో రోహన్‌ బోపన్న (భారత్‌)–తిమియా బాబోస్‌ (హంగేరి) జంట సెమీఫైనల్లోకి దూసుకెళ్లింది. క్వార్టర్‌ ఫైనల్లో ఐదో సీడ్‌ భారత్‌–హంగేరి జోడీ 6–4, 7–6 (7/5)తో సెబాస్టియన్‌ కెబల్‌ (కొలంబియా)– అబిగెల్‌ స్పియర్స్‌ (అమెరికా) జంటను కంగుతినిపించింది.  

పెర్త్‌: అందరి అంచనాలను తారుమారు చేస్తూ గతేడాది రెండు గ్రాండ్‌స్లామ్‌ టైటిల్స్‌ నెగ్గిన స్విట్జర్లాండ్‌ టెన్నిస్‌ దిగ్గజం రోజర్‌ ఫెడరర్‌ ఈ ఏడాదిలోనూ శుభారంభం చేశాడు. ప్రతిష్టాత్మక హాప్‌మన్‌ కప్‌లో సహచరురాలు బెలిండా బెన్సిచ్‌తో కలిసి అతను 17 ఏళ్ల తర్వాత స్విట్జర్లాండ్‌కు టైటిల్‌ అందించాడు. శనివారం జరిగిన ఫైనల్లో ఫెడరర్, బెన్సిచ్‌లతో కూడిన స్విట్జర్లాండ్‌ జట్టు 2–1తో అలెగ్జాండర్‌ జ్వెరెవ్, ఎంజెలిక్‌ కెర్బర్‌ సభ్యులుగా ఉన్న జర్మనీ జట్టును ఓడించింది. 30 ఏళ్ల చరిత్ర ఉన్న ఈ టోర్నీలో స్విట్జర్లాండ్‌ విజేతగా నిలువడం ఇది మూడోసారి. 2001లో మార్టినా హింగిస్‌తో కలిసి ఫెడరర్‌ ఈ టోర్నీలో టైటిల్‌ నెగ్గగా... 1992లో జాకబ్‌ హసెక్, మాన్యుయెలా మలీవా తొలిసారి స్విట్జర్లాండ్‌ను చాంపియన్‌గా నిలబెట్టారు.   శనివారం జరిగిన ఫైనల్లో పురుషుల సింగిల్స్‌ మ్యాచ్‌లో ఫెడరర్‌ 6–7 (4/7), 6–0, 6–2తో జ్వెరెవ్‌పై గెలిచి స్విట్జర్లాండ్‌కు 1–0 ఆధిక్యాన్ని అందించాడు. మహిళల సింగిల్స్‌లో కెర్బర్‌ 6–4, 6–1తో బెన్సిచ్‌ను ఓడించి స్కోరును 1–1తో సమం చేసింది. నిర్ణాయక మిక్స్‌డ్‌ డబుల్స్‌ మ్యాచ్‌లో ఫెడరర్‌–బెన్సిచ్‌ జోడీ 4–3 (5/3), 4–2తో కెర్బర్‌–జ్వెరెవ్‌ జంటను ఓడించి టైటిల్‌ను ఖాయం చేసుకుంది. మిక్స్‌డ్‌ డబుల్స్‌ మ్యాచ్‌ను ‘బెస్ట్‌ ఆఫ్‌ త్రీ’ ఫాస్ట్‌4 టెన్నిస్‌ సెట్స్‌ పద్ధతిలో నిర్వహించారు. సెట్‌లో తొలుత నాలుగు గేమ్‌లు గెలిచిన వారికి సెట్‌ దక్కుతుంది. స్కోరు 3–3తో సమంగా నిలవడంతో నిబంధనల ప్రకారం ఎనిమిది పాయింట్లున్న టైబ్రేక్‌ను నిర్వహించారు. తొలుత ఐదు పాయింట్లు గెలిచిన ఫెడరర్‌ జంటకు తొలి సెట్‌ దక్కింది. రెండో సెట్‌లో ఫెడరర్‌ జోడీ నాలుగు గేమ్‌లు గెలిచి విజయాన్ని ఖాయం చేసుకుంది.    

లండన్‌: క్రీడాకారుడిగా తన కెరీర్‌లో ఎన్నో గొప్ప విజయాలు సాధించిన స్విట్జర్లాండ్‌ టెన్నిస్‌ దిగ్గజం రోజర్‌ ఫెడరర్‌ కోర్టు బయట కూడా తన పేరిట ఎన్నో ఘనతలు లిఖించుకున్నాడు. తాజాగా అవార్డుల విభాగంలోనూ ప్రత్యేకతను చాటుకున్నాడు. ప్రఖ్యాత మీడియా సంస్థ బ్రిటిష్‌ బ్రాడ్‌కాస్టింగ్‌ కార్పొరేషన్‌ (బీబీసీ) ప్రతీ ఏడాది అందించే క్రీడా పురస్కారాల్లో రోజర్‌ ఫెడరర్‌కు ‘విదేశీ అత్యుత్తమ క్రీడాకారుడు’ అవార్డు లభించింది. ఫెడరర్‌కు ఈ పురస్కారం లభించడం ఇది నాలుగోసారి. 2004, 2006, 2007లో ఈ అవార్డు గెల్చుకున్న ఫెడరర్‌ పదేళ్ల విరామం తర్వాత మళ్లీ ఈ పురస్కారాన్ని సొంతం చేసుకోవడం విశేషం. 1960 నుంచి బీబీసీ ఈ అవార్డులు ఇస్తుండగా... బాక్సింగ్‌ దిగ్గజం మొహమ్మద్‌ అలీ (అమెరికా–1973, 1974, 1978)... మేటి అథ్లెట్‌ ఉసేన్‌ బోల్ట్‌ (జమైకా–2008, 2009, 2012) మూడుసార్లు చొప్పున ఈ పురస్కారం గెల్చుకున్నారు. ఆదివారం లివర్‌పూల్‌లో జరిగే కార్యక్రమంలో ఫెడరర్‌ ఈ అవార్డు అందుకుంటాడు.  ఘనం... పునరాగమనం...  గత ఏడాది వింబుల్డన్‌ టోర్నీ తర్వాత మోకాలి గాయంతో ఆరు నెలలపాటు ఫెడరర్‌ ఆటకు దూరమయ్యాడు. మోకాలికి శస్త్ర చికిత్స చేయించుకొని కావాల్సినంత విశ్రాంతి  అనంతరం ఈ ఏడాది నూతనోత్సాహంతో బరిలోకి దిగాడు. సీజన్‌ తొలి గ్రాండ్‌స్లామ్‌ టోర్నీ ఆస్ట్రేలియన్‌ ఓపెన్‌లో తన చిరకాల ప్రత్యర్థి రాఫెల్‌ నాదల్‌ను ఓడించి విజేతగా నిలిచి పెను సంచలనం సృష్టించాడు. తన పని అయిపోయిందని విమర్శించిన వారికీ తన రాకెట్‌తోనే బదులు ఇచ్చాడు. ఆస్ట్రేలియన్‌ ఓపెన్‌తో మొదలైన ఫెడరర్‌ జోరు ఇండియన్‌ వెల్స్, మయామి మాస్టర్స్‌ టోర్నీల్లోనూ కొనసాగింది. ఈ రెండు టోర్నీల్లోనూ అతను విజేతగా నిలిచాడు. ఆ తర్వాత హాలే ఓపెన్‌లో... వింబుల్డన్‌ గ్రాండ్‌స్లామ్‌ టోర్నీలో చాంపియన్‌గా నిలిచిన ఈ స్విస్‌ స్టార్‌ షాంఘై మాస్టర్స్‌ సిరీస్‌... బాసెల్‌ ఓపెన్‌లోనూ టైటిల్స్‌ను దక్కించుకున్నాడు. ఈ ఏడాది ఫెడరర్‌ 52 మ్యాచ్‌ల్లో గెలిచి కేవలం ఐదింటిలో ఓడాడు. 17 టోర్నీల్లో ఆడి 1,30,54,856 డాలర్ల ప్రైజ్‌మనీ (రూ. 83 కోట్లు) సంపాదించాడు. 


 రాఫెల్‌ నాదల్‌ ఇంటర్వ్యూ
 
 గాయాలతో పడుతూ లేస్తూ సాగుతున్న స్పెయిన్‌ టెన్నిస్‌ స్టార్‌ రాఫెల్‌ నాదల్‌ కెరీర్‌లో ఈ ఏడాది అద్భుతమనే చెప్పవచ్చు. జనవరిలో ఆస్ట్రేలియన్‌ ఓపెన్‌లో ఫైనల్‌కు చేరగా... ఆ తర్వాత జరిగిన ఫ్రెంచ్, యూఎస్‌ ఓపెన్‌ గ్రాండ్‌స్లామ్‌ టోర్నమెంట్‌లలో విజేతగా నిలిచి మరోసారి నంబర్‌వన్‌ ర్యాంక్‌ను కూడా దక్కించుకున్నాడు. ఇదే జోష్‌తో ఈనెల 22 నుంచి 24 వరకు చెక్‌ రిపబ్లిక్‌లోని ప్రేగ్‌ పట్టణంలో టీమ్‌ యూరోప్, టీమ్‌ వరల్డ్‌ జట్ల మధ్య ‘లేవర్‌ కప్‌’ కోసం జరిగే టోర్నీ లో నాదల్‌ ‘టీమ్‌ యూరోప్‌’ తరఫున బరిలోకి దిగబోతున్నాడు. ఈ టోర్నీలో సింగిల్స్‌తో పాటు తన చిరకాల ప్రత్యర్థి ఫెడరర్‌తో కలిసి తొలిసారిగా నాదల్‌ డబుల్స్‌ మ్యాచ్‌ ఆడే యోచనలో ఉన్నాడు.    
  
 ఈ ప్రతిష్టాత్మక టోర్నీలో ఆడబోతున్నందుకు ఎలా అనిపిస్తోంది?
 దిగ్గజ ఆటగాళ్లంతా కలిసి ఆడనుండటంతో ఈ టోర్నీ ప్రాముఖ్యత పెరిగింది. ఫెడరర్‌లాంటి ఆటగాళ్లు కూడా ఇందులో ఉండటంతో నాకైతే చాలా ప్రత్యేకంగా అనిపిస్తోంది.  
 
 భవిష్యత్‌లో వేగంగా ముగిసే టోర్నీలదే హవా ఉంటుందని భావిస్తున్నారా?
 అలా ఏమీ జరగదు. ప్రపంచ టెన్నిస్‌లో ఇదీ ఓ భాగమే తప్ప మేజర్‌ టోర్నీలను ఇది భర్తీ చేయలేదు. టెన్నిస్‌లో మార్పులను నేనేమీ కోరుకోవడం లేదు. సుదీర్ఘంగా సాగే మ్యాచ్‌ల్లో నాటకీయత, భావోద్వేగాలు, శారీరక పటిష్టత అన్నీ కలిసి ఉండి అభిమానులను ఆకర్షిస్తాయి.  
 
 మీ చిరకాల ప్రత్యర్థి రోజర్‌ ఫెడరర్‌తో కలిసి ఒకే జట్టులో ఆడబోతుండడాన్ని ఎలా చూస్తున్నారు?  
 ఒకే జట్టులో ఫెడెక్స్‌తో కలిసి ఆడడం నిజంగా నమ్మలేకపోతున్నాను. ఈ టోర్నీలో డబుల్స్‌లో కూడా అతనితో కలిసి ఆడే చాన్స్‌ ఉంది. తనలో ఉన్న లక్షణాలు ఇతర ఆటగాళ్లలో చూడలేదు. సర్వీస్, ఫోర్‌హ్యాండ్, వ్యాలీ ఇలా అన్నీ భారీగానే ఉంటాయి. అతడు నాకు చాలా కఠినమైన ప్రత్యర్థి. మా వైరం గురించి కోర్టులోనే కాకుండా బయట కూడా మాట్లాడుకోవడం ఈ క్రీడకు మంచిదే.
 
 చాలా కాలం నుంచి మీరు అగ్రశ్రేణి క్రీడాకారుడిగా కొనసాగుతున్నారు. దీని రహస్యం ఏమిటి?
 నా శక్తి సామర్థ్యాలపై ఉన్న నమ్మకమే కావచ్చు. ఆరోగ్యంగా ఉండటం ముఖ్యం. ఆ తర్వాతే ప్రాక్టీస్‌ అని నమ్ముతాను. ఈ ఏడాది ఆఫ్‌ సీజన్‌లో నేను చేసే పని ముందుగా ఆరోగ్యంగా ఉండటమే.    
 
 క్లే కోర్టులో మీ సీజన్‌ అత్యంత విజయవంతంగా గడిచింది. దీన్ని మీరు ఆస్వాదిస్తున్నారా?
 కచ్చితంగా. క్లే కోర్టు టోర్నీలను గెలవడంలో నాకు మంచి రికార్డు ఉంది. ఫ్రెంచ్‌ ఓపెన్, మాంటెకార్లో, బార్సిలోనా, రోమ్‌ ఇలా అన్నింటిలో విజయాలు సాధించాను. అలాగే ఇతర కోర్టులపై కూడా మెరుగ్గా ఆడటాన్ని సవాల్‌గా తీసుకుంటాను. ఇటీవలే హార్డ్‌ కోర్టులో యూఎస్‌ ఓపెన్‌ గెలిచాను.
 
 మీ కెరీర్‌లో గట్టి ప్రత్యర్థి ఎవరని భావిస్తున్నారు?
 ఫెడరర్‌. అతడి నుంచి ఎదురయ్యే పోటీని ఆస్వాదిస్తాను. ఇద్దరం సమకాలీకులవడం గర్వంగానూ ఉంది. జొకోవిచ్, ముర్రే కూడా గట్టి ప్రత్యర్థులే.  
  
 భారత్‌లో మరోసారి మీ ఆటను అభిమానులు చూసే అవకాశం ఉందా?
 నిజంగా నాకు తెలీదు. కానీ ఆంధ్రప్రదేశ్‌లోని అనంతపురం ఎడ్యుకేషనల్‌ సెంటర్‌ ద్వారా టెన్నిస్‌లో శిక్షణతో పాటు విద్యలో కూడా మా ఫౌండేషన్‌ సేవలందిస్తోంది.
 
 కెరీర్‌ ముగిశాక మీ జీవితాన్ని ఎలా ఊహించుకుంటున్నారు?  
 నేను కుటుంబాన్ని అమితంగా ఇష్టపడేవాడిని. పిల్లలంటే చాలా ఇష్టం. కెరీర్‌ ముగిశాక వారితోనే నా జీవితం అనుకుంటున్నాను. 


 ⇒ ఫెడరర్‌ ఆట ముగించిన డెల్‌పొట్రో
 ⇒ క్వార్టర్స్‌లో స్విస్‌ స్టార్‌పై అద్భుత విజయం
 ⇒ సెమీస్‌లో నాదల్‌తో ఢీ
 ⇒ యూఎస్‌ ఓపెన్‌ టెన్నిస్‌ టోర్నీ  
 
 యూఎస్‌ ఓపెన్‌లో వరుసగా 5 సార్లు టైటిల్‌ గెలిచి ఊపు మీదున్న  ఫెడరర్‌ను 2009 ఫైనల్లో డెల్‌పొట్రో అడ్డుకున్నాడు. డెల్‌పొట్రో కెరీర్‌లో అది ఏకైక గ్రాండ్‌స్లామ్‌ టైటిల్‌ కాగా... ఆ తర్వాత ఫెడరర్‌ మళ్లీ యూఎస్‌ ఓపెన్‌ గెలవలేకపోయాడు. ఈ ఏడాది అద్భుత ఫామ్‌తో మూడో గ్రాండ్‌ స్లామ్‌ టైటిల్‌పై కన్నేసిన ఫెడెక్స్‌ ఎనిమిదేళ్ల తర్వాత కూడా అదే అర్జెంటీనా స్టార్‌ చేతిలో చావుదెబ్బ తిన్నాడు. ప్రత్యర్థి జోరు ముందు నిలవలేక, నాటి ఓటమికి ప్రతీకారం తీర్చుకోలేక  క్వార్టర్‌ ఫైనల్లోనే నిష్క్రమించాడు.
 
 తొలి రెండు రౌండ్‌లలో ఫెడరర్‌ ఐదు సెట్ల పాటు శ్రమించి నెగ్గడంతోనే అతని ఆట, ఫిట్‌నెస్‌పై సందేహాలు కనిపించాయి. తర్వాతి రెండు మ్యాచ్‌లలో మెరుగ్గా ఆడినా... డెల్‌పొట్రో ముందు నిలవడం కష్టమని అనిపించింది. చివరకు అదే జరిగింది. ప్రత్యర్థి జోరుతో పాటు స్వీయ తప్పిదాలు టెన్నిస్‌ ఆల్‌టైమ్‌ గ్రేట్‌కు మరో గ్రాండ్‌స్లామ్‌ టైటిల్‌ అవకాశాన్ని చేజార్చాయి. ఫలితంగా యూఎస్‌ ఓపెన్‌లో ప్రత్యర్థులుగా తొలిసారి ఫెడరర్, రాఫెల్‌ నాదల్‌ ఆట చూడవచ్చని భావించిన అభిమానులకు నిరాశ తప్పలేదు.   
 
 న్యూయార్క్‌: యూఎస్‌ ఓపెన్‌ టెన్నిస్‌ టోర్నమెంట్‌లో మాజీ చాంపియన్, 19 గ్రాండ్‌స్లామ్‌ టైటిల్స్‌ విజేత రోజర్‌ ఫెడరర్‌ (స్విట్జర్లాండ్‌) కథ ముగిసింది. 2017లో మూడో గ్రాండ్‌స్లామ్‌ టైటిల్‌ సాధించాలనే లక్ష్యంతో బరిలోకి దిగిన ఫెడరర్‌కు మరో మాజీ విజేత  డెల్‌పొట్రో (అర్జెంటీనా) క్వార్టర్‌ ఫైనల్లో షాక్‌ ఇచ్చాడు. 2 గంటల 50 నిమిషాల పాటు సాగిన ఈ పోరులో 2009 యూఎస్‌ ఓపెన్‌ చాంపియన్, 28 ఏళ్ల డెల్‌పొట్రో 7–5, 3–6, 7–6 (10/8), 6–4తో ఫెడరర్‌ను చిత్తు చేశాడు. సెమీఫైనల్లో నంబర్‌వన్‌ నాదల్‌ (స్పెయిన్‌)తో డెల్‌పొట్రో తలపడతాడు. క్వార్టర్స్‌లో నాదల్‌ 6–1, 6–2, 6–2తో రుబ్లేవ్‌ (రష్యా)పై అలవోకగా నెగ్గాడు. 28 ఏళ్ల డెల్‌పొట్రో గ్రాండ్‌స్లామ్‌ టోర్నీలలో సెమీస్‌కు చేరడం ఇది నాలుగోసారి మాత్రమే. 2009 యూఎస్‌ ఓపెన్‌ సెమీస్‌లోనూ అతను నాదల్‌ను ఓడించడం విశేషం.  
 
 స్వయంకృతం...
 వరుస గాయాలతో పాటు మణికట్టుకు నాలుగు సర్జరీలతో దాదాపుగా ఆటకు దూరమైన డెల్‌పొట్రో ఈసారి తన సత్తా చాటాడు. ఈ క్వార్టర్‌ ఫైనల్‌ మ్యాచ్‌కు ముందు ఫెడరర్‌కు 16–5తో డెల్‌పొట్రోపై మెరుగైన రికార్డు ఉంది. అయితే ఇప్పుడు మాత్రం పొట్రో ఎక్కడా తగ్గలేదు. భారీ సర్వీస్‌లు, పదునైన ఫోర్‌హ్యాండ్‌లతో అతను విరుచుకు పడ్డాడు. పోటాపోటీగా సాగిన తొలి సెట్‌లో ఫెడరర్‌ ఓడినా రెండో సెట్‌లో అతడికి ఎలాంటి ఇబ్బందీ ఎదురు కాలేదు. అయితే మూడో సెట్‌ మ్యాచ్‌ను మలుపు తిప్పింది. ఈ సెట్‌ టైబ్రేక్‌లో ఫెడరర్‌కు నాలుగుసార్లు సెట్‌ పాయింట్లు లభించినా ఫలితం లేకపోయింది. నాలుగో సెట్‌లో ఒక దశలో స్కోరు 2–2తో సమంగా నిలిచినా... ఈ దశలో ఫెడరర్‌ పేలవమైన ఆటతీరు కనబర్చడంతో మ్యాచ్‌ చేజారిపోయింది. ఈ మ్యాచ్‌లో ఫెడరర్‌ ఏకంగా 41 అనవసర తప్పిదాలు చేయగా... అందులో 22 తప్పిదాలు ఫోర్‌హ్యాండ్‌ ద్వారానే జరిగాయి.    
 
 ఆల్‌ అమెరికా...
 మహిళల సింగిల్స్‌ విభాగంలో 1981 తర్వాత మొదటిసారి నలుగురు అమెరికా క్రీడాకారిణులే సెమీఫైనల్లో తలపడనున్నారు. వీనస్‌ విలియమ్స్, స్లోన్‌ స్టీఫెన్స్, కోకో వాండవె ఇప్పటికే సెమీస్‌ చేరగా... మాడిసన్‌ కీస్‌ వారితో జత కలిసింది. క్వార్టర్‌ ఫైనల్లో మాడిసన్‌ కీస్‌ 6–3, 6–3 స్కోరుతో కయీ కనెపి (ఎస్తోనియా)పై విజయం సాధించింది. 36 ఏళ్ల క్రితం యూఎస్‌ ఓపెన్‌ మహిళల సెమీస్‌లో అమెరికాకే చెందిన మార్టినా నవ్రతిలోవా, క్రిస్‌ ఎవర్ట్, ట్రేసీ అస్టిన్, బార్బా పొటర్‌ తలపడ్డారు. మహిళల డబుల్స్‌ క్వార్టర్‌ ఫైనల్లో నాలుగో సీడ్‌ సానియా మీర్జా (భారత్‌)–షుయె పెంగ్‌ (చైనా) ద్వయం 7–6 (7/5), 6–4తో ఐదో సీడ్‌ తిమియా బాబోస్‌ (హంగేరి)–ఆండ్రియా హలవకోవా (చెక్‌ రిపబ్లిక్‌) జంటను ఓడించి సెమీఫైనల్లోకి ప్రవేశించింది.   
 
 ప్రస్తుతం నేను ఆడిన లేదా ఆడుతున్న తీరు ఈ టోర్నీ గెలిచేందుకు సరిపోదు. నేను నిష్క్రమించడమే మంచిదైంది. నాకన్నా మెరుగైన వ్యక్తి టైటిల్‌ సాధిస్తాడు. నాకు సెమీస్‌ చేరే అర్హత లేదు. బయటకు కనిపిస్తున్న దానికంటే కూడా నా ఆట బలహీనంగా ఉంది. టోర్నీ ఆరంభం నుంచీ ఇబ్బంది పడ్డాను. గట్టి ప్రత్యర్థి ఎదురైతే కష్టమని అనిపించింది కూడా. ఓటమి నుంచి కోలుకునేందుకు కొంత సమయం పట్టవచ్చు. అయితే ఈ ఏడాది సంతృప్తిగా గడిచిందనే చెప్పగలను. ఇక సెమీఫైనల్‌ గురించి నిజాయతీగా మాట్లాడాలంటే నాదల్‌ను ఓడించే అవకాశం డెల్‌పొట్రోకు ఉంది.      
 – ఫెడరర్‌
 
 టోర్నమెంట్‌లో నేను నా అత్యుత్తమ మ్యాచ్‌ ఆడాను. సర్వీస్‌ బాగా చేశాను. నా ఫోర్‌హ్యాండ్‌ కూడా పని చేసింది. కచ్చితంగా గెలిచే అర్హత నాకు మాత్రమే ఉంది. గాయాలు, శస్త్ర చికిత్సల తర్వాత నాకెంతో ఇష్టమైన టోర్నీలో మళ్లీ సెమీస్‌ ఆడగలనని ఏమాత్రం ఊహించలేదు. ఇది నా సొంత కోర్టులాంటిదే. మరోసారి నాదల్‌ను ఓడించగలనని నమ్ముతున్నా. అతను ప్రస్తుతం నంబర్‌వన్‌ అయినా టెన్నిస్‌లో ఏదైనా సాధ్యమే.                               
 – డెల్‌పొట్రో 


 ∙ డెల్‌పొట్రోతో పోరుకు సిద్ధం  
 ∙ మిక్స్‌డ్‌లో ఓడిన బోపన్న జోడి
 ∙ యూఎస్‌ ఓపెన్‌
 
 క్వార్టర్‌ ఫైనల్లో కసి తీర్చుకునే మ్యాచ్‌కు రంగం సిద్ధమైంది. అర్జెంటీనా స్టార్‌ డెల్‌ పొట్రోతో స్విస్‌ దిగ్గజం రోజర్‌ ఫెడరర్‌ తలపడనున్నాడు. యూఎస్‌ ఓపెన్‌లో వరుస టైటిళ్లతో (2004–2008) దూసుకెళ్తున్న ఫెడెక్స్‌కు 2009 ఫైనల్లో డెల్‌ పొట్రో షాకిచ్చాడు. ఇప్పుడు ఎనిమిదేళ్ల తర్వాత రోజర్‌కు ప్రతీకారం తీర్చుకునే అవకాశం వచ్చింది. ఇందులో చెలరేగితే సెమీస్‌లో చిరకాల ప్రత్యర్థుల (నాదల్, ఫెడరర్‌) మధ్య ఆసక్తికర సమరం జరిగే అవకాశముంది.   
 
 న్యూయార్క్‌: టోర్నమెంట్‌ మొదట్లో ప్రతీ మ్యాచ్‌లోనూ చెమటోడ్చిన టెన్నిస్‌ దిగ్గజం రోజర్‌ ఫెడరర్‌ టోర్నీ జరుగుతున్న కొద్దీ చెలరేగుతున్నాడు. యూఎస్‌ ఓపెన్‌ గ్రాండ్‌స్లామ్‌ టెన్నిస్‌ టోర్నమెంట్‌లో ఈ మాజీ చాంపియన్‌ క్వార్టర్‌ ఫైనల్లోకి ప్రవేశించాడు. మంగళవారం జరిగిన పురుషుల సింగిల్స్‌ ప్రిక్వార్టర్‌ ఫైనల్లో మూడో సీడ్‌ స్విట్జర్లాండ్‌ స్టార్‌ 6–4, 6–2, 7–5తో ఫిలిప్‌ కొహ్ల్‌ష్చెబెర్‌ (జర్మనీ, 33వ సీడ్‌)పై అలవోక విజయం సాధించాడు. మిగతా మ్యాచ్‌ల్లో 24వ సీడ్‌ జువన్‌ మార్టిన్‌ డెల్‌ పొట్రో (అర్జెంటీనా) 1–6, 2–6, 6–1, 7–6 (7/1), 6–4తో ఆరో సీడ్‌ డొమినిక్‌ థీమ్‌ (ఆస్ట్రియా)ను కంగుతినిపించగా... అండ్రీ రుబ్లెవ్‌ (రష్యా) 7–5, 7–6 (7/5), 6–3తో తొమ్మిదో సీడ్‌ డేవిడ్‌ గాఫిన్‌ (బెల్జియం)కు షాకిచ్చాడు.
 
 ఫెడెక్స్‌ జోరు
 యూఎస్‌ ఓపెన్‌ టైటిల్‌ ఫేవరెట్‌గా బరిలోకి దిగిన రోజర్‌ ఫెడరర్‌ ప్రిక్వార్టర్స్‌లో ప్రత్యర్థిని వరుస సెట్లలో ఓడించాడు. గంటా 49 నిమిషాల పాటు జరిగిన ఈ పోరులో ఫిలిప్‌ కొహ్ల్‌ష్చెబెర్‌ ఒక్క మూడో సెట్‌లోనే కాస్త పోటీఇచ్చాడు. ఐదు సార్లు యూఎస్‌ చాంపియన్‌ అయిన ఫెడరర్‌ ఈ మ్యాచ్‌లో నాలుగు ఏస్‌లు సంధించాడు. 15 విన్నర్స్‌ కొట్టిన ఫెడెక్స్‌ 10 అనవసర తప్పిదాలు చేశాడు. రెండో సెట్‌నైతే రోజర్‌ వేగంగా ముగించేశాడు. ప్రత్యర్థికేమాత్రం అవకాశమివ్వకుండా కేవలం 27 నిమిషాల్లోనే ఆటకట్టించాడు. మూడో సెట్‌లో జర్మనీ ఆటగాడు కొహ్ల్‌ష్చెబెర్‌ కాస్త పోరాడినా ఫెడరర్‌ ధాటికి అదేమాత్రం సరిపోలేదు. ఐదు సెట్ల పాటు జరిగిన హోరాహోరీ పోరులో  డెల్‌ పొట్రో ఆరో సీడ్‌ థీమ్‌పై చెమటోడ్చి నెగ్గాడు. అర్జెంటీనా ఆటగాడు 9 ఏస్‌లు సంధించి, 31 విన్నర్స్‌ కొట్టాడు. దీటుగానే బదులిచ్చిన థీమ్‌ 5 ఏస్‌లు, 51 విన్నర్స్‌ కొట్టాడు. అనవసర తప్పిదాల్లో ఇద్దరూ అర్ధసెంచరీ దాటేశారు. డెల్‌ పొట్రో 59, థీమ్‌ 53 చేశారు. క్వార్టర్‌ ఫైనల్లో డెల్‌ పొట్రోతో ఫెడరర్‌ తలపడనున్న నేపథ్యంలో ఎనిమిదేళ్ల క్రితం 2009లో ఎదురైన పరాజయానికి ప్రతీకారం తీర్చుకునే అవకాశం ఫెడరర్‌కు లభించింది.
 
 స్వితోలినా ఔట్‌
 మహిళల సింగిల్స్‌లో నాలుగో సీడ్‌ ఎలీనా స్వితోలినా (ఉక్రెయిన్‌) కథ ప్రిక్వార్టర్స్‌లో ముగిసింది. 15వ సీడ్‌ మాడిసన్‌ కీస్‌ (అమెరికా) 7–6 (7/2), 1–6, 6–4తో స్వితోలినాపై విజయం సాధించింది. తొలి సెట్‌లో ఇద్దరు పోటాపోటీగా తలపడటంతో ఈ సెట్‌ టైబ్రేక్‌కు దారితీసింది. అయితే ఇందులో కీస్‌ పైచేయి సాధించింది. తర్వాత సెట్లో పుంజుకున్న ఉక్రెయిన్‌ క్రీడాకారిణి కేవలం 24 నిమిషాల్లో సెట్‌ను చేజిక్కించుకుంది. నిర్ణాయక పోరులో పోరాడినప్పటికీ కీస్‌ చేతిలో పరాజయం తప్పలేదు.  
 
 మిక్స్‌డ్‌లో బోపన్న ఔట్‌: మిక్స్‌డ్‌ డబుల్స్‌లో ఏడో సీడ్‌ రోహన్‌ బోపన్న (భారత్‌)–దబ్రౌస్కీ (కెనడా) జంటకు క్వార్టర్‌ ఫైనల్లో చుక్కెదురైంది. మూడో సీడ్‌ మైకేల్‌ వీనస్‌– హ చింగ్‌ చాన్‌ (చైనీస్‌ తైపీ) ద్వయం 4–6, 6–3, 10–8తో సూపర్‌ టైబ్రేక్‌లో బోపన్న జంటను కంగుతినిపించింది.


 రెండో రౌండ్‌లోనూ ఐదు సెట్‌లలో గట్టెక్కిన ఫెడరర్‌
 ⇒ ఏడో సీడ్‌ దిమిత్రోవ్‌కు షాక్‌   
 ⇒ యూఎస్‌ ఓపెన్‌ టోర్నీ
 డిఫెండింగ్‌ చాంపియన్‌ వావ్రింకా, మాజీ విజేతలు జొకోవిచ్, ఆండీ ముర్రే గైర్హాజరీతో కచ్చితమైన ఫేవరెట్స్‌లో ఒకరిగా ఉన్న రోజర్‌ ఫెడరర్‌ వరుసగా రెండో మ్యాచ్‌లోనూ గట్టిపోటీ ఎదుర్కొన్నాడు. మిఖాయిల్‌ యూజ్నీతో జరిగిన రెండో రౌండ్‌లో ఈ స్విట్జర్లాండ్‌ దిగ్గజం ఐదు సెట్‌లలో గట్టెక్కి ఊపిరి పీల్చుకున్నాడు. తొలి రౌండ్‌లో ఫెడరర్‌ను 19 ఏళ్ల అమెరికా కుర్రాడు ఫ్రాన్సిస్‌ టియాఫో హడలెత్తించగా... రెండో రౌండ్‌లో 35 ఏళ్ల యూజ్నీ ఈ స్విస్‌ స్టార్‌కు చుక్కలు చూపించాడు. అయితే పురుషుల టెన్నిస్‌ చరిత్రలో అత్యధికంగా 71 గ్రాండ్‌స్లామ్‌ టోర్నీలు ఆడిన ప్లేయర్‌గా ప్రపంచ రికార్డు నెలకొల్పిన 36 ఏళ్ల ఈ అపార అనుభవజ్ఞుడు రెండు మ్యాచ్‌ల్లోనూ పైచేయి సాధించడం విశేషం.
 
 
 న్యూయార్క్‌: తన 18 ఏళ్ల అంతర్జాతీయ టెన్నిస్‌ కెరీర్‌లో ఫెడరర్‌ ఒక్కసారి మాత్రమే ఓ గ్రాండ్‌స్లామ్‌ టోర్నీలో వరుసగా రెండు మ్యాచ్‌ల్లో ఐదు సెట్‌లు ఆడి గెలుపొందాడు. అదీ ఈ ఏడాది ఆస్ట్రేలియన్‌ ఓపెన్‌లో సెమీస్‌లో వావ్రింకాపై, ఫైనల్లో నాదల్‌పై ఐదు సెట్‌లు పోరాడి విజయం సాధించడం జరిగింది. ఏడు నెలల తర్వాత ఫెడరర్‌ మరోసారి ఈ విన్యాసాన్ని పునరావృతం చేశాడు. సీజన్‌ చివరి గ్రాండ్‌స్లామ్‌ టోర్నీ యూఎస్‌ ఓపెన్‌లో మూడో సీడ్‌ ఫెడరర్‌ (స్విట్జర్లాండ్‌) మూడో రౌండ్‌ చేరుకోవడానికి తన అనుభవాన్నంతా రంగరించి పోరాడాల్సి వచ్చింది. మిఖాయిల్‌ యూజ్నీ (రష్యా)తో జరిగిన పురుషుల సింగిల్స్‌ రెండో రౌండ్‌లో 36 ఏళ్ల ఫెడరర్‌ 6–1, 6–7 (3/7), 4–6, 6–4, 6–2తో గెలుపొందాడు.
 
 3 గంటల 7 నిమిషాలపాటు జరిగిన ఈ మ్యాచ్‌లో నెగ్గిన ఫెడరర్‌ యూఎస్‌ ఓపెన్‌లో 70వ విజయాన్ని నమోదు చేసుకున్నాడు. యూజ్నీతో ఆడిన 17 సార్లూ ఫెడరరే గెలుపొందడం విశేషం. మూడో రౌండ్‌లో స్పెయిన్‌కు చెందిన 35 ఏళ్ల ఫెలిసియానో లోపెజ్‌తో ఫెడరర్‌ ఆడతాడు. లోపెజ్‌తో ముఖాముఖి రికార్డులో ఫెడరర్‌ 12–0తో ఆధిక్యంలో ఉన్నాడు. యూజ్నీతో జరిగిన మ్యాచ్‌లో ఫెడరర్‌ 12 ఏస్‌లు సంధించి, రెండు డబుల్‌ ఫాల్ట్‌లు చేశాడు. 63 విన్నర్స్‌ కొట్టిన ఈ స్విస్‌ స్టార్‌ 68 అనవసర తప్పిదాలు కూడా చేశాడు. ‘తొలి రౌండ్‌లో కంటే బాగా ఆడినందుకు సంతృప్తిగా ఉంది. అన్ని రకాలుగా ఈ మ్యాచ్‌ కష్టంగా అనిపించింది. చివరకు గట్టెక్కినందుకు చాలా సంతోషంగా ఉన్నాను. మూడో రౌండ్‌ చేరుకునే వరకు నేను అంచనా వేసినదానికంటే ఎక్కువగా అలసిపోయాను.
 
 అయితే గతంలో ఇలాంటి సందర్భాలు చాలా ఎదుర్కొన్నాను. ఈ విషయంలో నాకెలాంటి ఆందోళన లేదు’ అని ఫెడరర్‌ వ్యాఖ్యానించాడు. మరోవైపు టాప్‌ సీడ్, ప్రపంచ నంబర్‌వన్‌ రాఫెల్‌ నాదల్‌ (స్పెయిన్‌) రెండో రౌండ్‌లో 4–6, 6–3, 6–2, 6–2తో ప్రపంచ 121వ ర్యాంకర్‌ తారో డానియల్‌ (జపాన్‌)పై కష్టపడి గెలిచాడు. ‘అన్ని మ్యాచ్‌లు క్లిష్టంగానే ఉంటాయి. అయితే గ్రాండ్‌స్లామ్‌ స్థాయి టోర్నీల్లో అందరూ తమ అత్యుత్తమ ఆటతీరు ప్రదర్శించేందుకు చూస్తారు’ అని నాదల్‌ వ్యాఖ్యానించాడు.  
 
 మరో మ్యాచ్‌లో తొమ్మిదో సీడ్‌ డేవిడ్‌ గాఫిన్‌ (బెల్జియం) 3–6, 7–6 (7/5), 6–7 (2/7), 7–6 (7/4), 6–3తో 4 గంటల 19 నిమిషాల్లో గిడో పెల్లా (అర్జెంటీనా)పై నెగ్గగా.. ఆండ్రీ రుబ్లెవ్‌ (రష్యా) 7–5, 7–6 (7/3), 6–3తో ఏడో సీడ్‌ దిమిత్రోవ్‌ (బల్గేరియా)ను బోల్తా కొట్టించడం విశేషం. 2009 చాంపియన్‌ డెల్‌పొట్రో (అర్జెంటీనా) 6–2, 6–3, 7–6 (7/3)తో అడ్రియన్‌ మెనెడెజ్‌ (స్పెయిన్‌)పై, ఆరో సీడ్‌ డొమినిక్‌ థీమ్‌ (ఆస్ట్రియా) 6–4, 6–4, 4–6, 7–5తో టేలర్‌ ఫ్రిట్జ్‌ (అమెరికా)పై గెలిచారు. అన్‌సీడెడ్‌ డల్గొపలోవ్‌ (ఉక్రెయిన్‌) 3–6, 6–1, 7–6 (7/5), 6–2తో 15వ సీడ్‌ థామస్‌ బెర్డిచ్‌ (చెక్‌ రిపబ్లిక్‌)ను ఓడించగా... 18వ సీడ్‌ గేల్‌ మోన్‌ఫిల్స్‌ (ఫ్రాన్స్‌) 6–3, 6–7 (3/7), 6–4, 2–6, 7–5తో డొనాల్డ్‌ యంగ్‌ (అమెరికా)పై కష్టపడి గెలిచాడు.
 
 ప్రిక్వార్టర్స్‌లో క్విటోవా  
 మహిళల సింగిల్స్‌ విభాగంలో 13వ సీడ్‌ పెట్రా క్విటోవా (చెక్‌ రిపబ్లిక్‌) ప్రిక్వార్టర్‌ ఫైనల్లోకి దూసుకెళ్లింది. శుక్రవారం జరిగిన మూడో రౌండ్‌లో క్విటోవా 6–0, 6–4తో 18వ సీడ్‌ కరోలినా గార్సియా (ఫ్రాన్స్‌)ను ఓడించింది.   
 
 కుజ్‌నెత్సోవా ఇంటిముఖం...
 మరోవైపు ఎనిమిదో సీడ్, 2004 చాంపియన్‌ స్వెత్లానా కుజ్‌నెత్సోవా (రష్యా) 3–6, 6–3, 3–6తో కురుమి నారా (జపాన్‌) చేతిలో ఓడిపోయి టోర్నీ నుంచి నిష్క్రమించింది. ఈ టోర్నీలో టాప్‌–8 సీడింగ్స్‌ క్రీడాకారిణుల్లో ఐదుగురు మూడో రౌండ్‌లోపే ఇంటిదారి పట్టడం గమనార్హం. రెండో సీడ్‌ సిమోనా హలెప్‌ (రొమేనియా), ఆరో సీడ్, డిఫెండింగ్‌ చాంపియన్‌ ఎంజెలిక్‌ కెర్బర్‌ (జర్మనీ), ఏడో సీడ్‌ జొహనా కొంటా (బ్రిటన్‌) తొలి రౌండ్‌లోనే ఓడిపోగా... ఐదో సీడ్‌ వొజ్నియాకి (డెన్మార్క్‌) రెండో రౌండ్‌లో పరాజయం పాలైంది. ప్రపంచ నంబర్‌వన్, గతేడాది రన్నరప్‌ కరోలినా ప్లిస్కోవా (చెక్‌ రిపబ్లిక్‌) 2–6, 6–3, 6–4తో క్వాలిఫయర్‌ నికోల్‌ గిబ్స్‌ (అమెరికా)పై శ్రమించి గెలిచింది.   
 
 షెల్బీ రోజర్స్, గావ్రిలోవా రికార్డు...
 మహిళల సింగిల్స్‌ విభాగంలో షెల్బీ రోజర్స్‌ (అమెరికా), దరియా గావ్రిలోవా (ఆస్ట్రేలియా) ‘రికార్డు’లో భాగస్వాములయ్యారు. వీరిద్దరి మధ్య జరిగిన రెండో రౌండ్‌ మ్యాచ్‌ యూఎస్‌ ఓపెన్‌లో సుదీర్ఘంగా సాగిన మహిళల సింగిల్స్‌ మ్యాచ్‌గా గుర్తింపు పొందింది. 3 గంటల 33 నిమిషాలపాటు జరిగిన ఈ మ్యాచ్‌లో షెల్బీ 7–6 (8/6), 4–6, 7–6 (7/5)తో గావ్రిలోవాను ఓడించి మూడో రౌండ్‌లోకి చేరుకుంది. ఇప్పటివరకు ఈ రికార్డు జొహనా కొంటా (బ్రిటన్‌), ముగురుజా (స్పెయిన్‌) పేరిట ఉంది. రెండేళ్ల క్రితం జరిగిన 3 గంటల 23 నిమిషాలపాటు జరిగిన ఆ మ్యాచ్‌లో ముగురుజాపై కొంటా గెలిచింది.


 ఒకే పార్శ్వంలో నాదల్, ఫెడరర్‌ ∙యూఎస్‌ ఓపెన్‌ ‘డ్రా’ విడుదల
 న్యూయార్క్‌: యూఎస్‌ ఓపెన్‌ చరిత్రలో స్పానిష్‌ స్టార్‌ రాఫెల్‌ నాదల్, స్విట్జర్లాండ్‌ దిగ్గజం రోజర్‌ ఫెడరర్‌ ఒకరికొకరు ఎప్పుడూ ఎదురుపడలేదు. అయితే ఈసారి మాత్రం ఈ టెన్నిస్‌ లెజెండ్స్‌ ఇద్దరూ ఒకే పార్శ్వంలో ఉన్నారు. దీంతో టాప్‌ సీడ్‌ నాదల్, మూడో సీడ్‌ ఫెడరర్‌ తమ ప్రత్యర్థులను ఓడించుకుంటూ సెమీస్‌ వెళితే మాత్రం... దిగ్గజాల పోరుతో ఈ గ్రాండ్‌స్లామ్‌ ఈవెంట్‌ హోరెత్తనుంది. అది సెమీస్‌ అయినా ‘ఫైనల్‌’ను తలపిస్తుంది. సోమవారం మొదలయ్యే ఈ సీజన్‌ చివరి గ్రాండ్‌స్లామ్‌ ఈవెంట్‌ ‘డ్రా’ను శుక్రవారం రాత్రి విడుదల చేశారు. తొలిరౌండ్లో నాదల్‌... లెజొవిచ్‌ (సెర్బియా)తో తలపడనుండగా, ఫెడరర్‌... ఫ్రాన్సెస్‌ టియాఫె (అమెరికా)తో ఆడతాడు. మహిళల సింగిల్స్‌లో మరియా షరపోవాకు తొలిరౌండ్లో రెండో సీడ్‌ సిమోనా హలెప్‌ (రుమేనియా) ఎదురైంది. డోపింగ్‌ సస్పెన్షన్‌ తర్వాత రష్యా స్టార్‌ బరిలోకి దిగుతున్న తొలి గ్రాండ్‌స్లామ్‌ టోర్నీ ఇదే. ఆమెకు నిర్వాహకులు వైల్డ్‌కార్డ్‌ ఎంట్రీ ఇచ్చారు.


 విశ్లేషణ
 జీవన కాలమ్‌
 
 ఆట అయ్యాక ఓడిన, అలిసిన చిలిచ్‌ భోరుమన్నాడు. గెలిచిన, చరిత్ర కారుడు ఫెడరర్‌ కూడా భోరుమన్నాడు. అలౌకికమైన ఆనందానికీ, అనిర్వచనీయమైన విషాదానికీ విముక్తి– కన్నీరే!
 
 జీనియస్‌ల సౌందర్యం వర్ణనాతీతం. అది శరీరా నిది కాదు. అది ఒక తేజస్సు. అది శరీరానికి లొంగదు. ఆల్బర్ట్‌ ఐన్‌ స్టీన్‌ని, చార్లెస్‌ డార్విన్‌ని చూస్తున్నప్పుడు వారి శారీ రక సౌందర్యం మనకి కని పించదు. మానవాళికి వారి మేధస్సు చేసిన ఉపకారం మన కళ్లను మిరుమిట్లు గొలుపుతుంది. ఏ విధంగా చూసినా సెరీనా విలి యమ్స్‌ అందగత్తె కాదు. కానీ 22 సార్లు ఈ ప్రపం చాన్ని దిగ్భ్రాంతుల్ని చేసిన ఆమె అఖండ ప్రతిభ ఆమెను అలౌకికమైన సౌందర్యరాశిగా మలుస్తాయి.
 
 శ్రీశ్రీ, విశ్వనాథ అందగాళ్లుకాదు. కానీ మహా ప్రస్థానం, కల్పవృక్షం నేపథ్యం వారిని అఖండ తేజ స్వుల్ని చేస్తాయి. నిజానికి తెలుగు సాహిత్యానికి– నాకు తెలిసి –ఇద్దరే అందమైన రచయితలు. తిలక్, గుంటూరు శేషేంద్ర శర్మ. ఈ మాట అంటూనే ఆవంత్స సోమసుందర్‌ని రన్నర్‌ అప్‌గా నిలుపుతు న్నాను. ఇవి సరదాగా చెప్పే మాటలు.
 
 నిన్నటి వింబుల్డన్‌ పురుషుల ఫైనల్స్‌ ఒక చరిత్ర. ఒక విధంగా జాలిగొలిపే చరిత్ర. ఒక పక్క ప్రపంచంలో రికార్డ్‌ నెలకొలిపే చాంపియన్‌ నిలు వగా– ఎదురుగా ఎన్నో అవరోధాల్ని దాటి వచ్చిన 28 ఏళ్ల ఆటగాడు– మారిన్‌ చిలిచ్‌. ఒకపక్క ఒక చాంపియన్‌ దూసుకు వెళ్లడం తెలుస్తోంది. మరొక పక్క ఓ యువకుడు– అభిమన్యుడిలాగ నిస్సహా యంగా కూలిపోవడం తెలుస్తోంది. నాకు ఆట కాదు. చివర ఫెడరర్‌ అన్న మాట పతాక స్థాయిలో నిలుస్తుందనిపించింది: ‘‘ఒకొక్క  ప్పుడు ఇది క్రూరమైన విషయం. మారిన్‌ హీరో లాగా పోరాడాడు. మారిన్‌! నువ్వు గర్వపడే సమ యమిది. ఇది అపూర్వమైన టోర్నమెంటు. ఒకొక్క ప్పుడు ఫైనల్లో అధిగమించలేకపోవచ్చు’’ ఇది గెలి చిన చాంపియన్‌ ఓడిన కుర్రాడికి ఇచ్చిన కితాబు.
 
 ఆ రోజుల్లో బోర్గ్‌ వరుసగా ఐదేళ్లు గెలి చినప్పుడు– ఇంగ్లండు ఒక నానుడిని మార్చుకుంది. ‘‘అసాధ్యమైన విషయాన్ని చెప్పడానికి ‘ఇది బియాండ్‌ బోర్గ్‌’ అని’ (బోర్గ్‌కే అసాధ్యమని చెప్పడం. అంటే ఎవరికీ సాధ్యం కాదని). తర్వాత చరిత్రలో క్రూరమైన శస్త్రచికిత్స చేసే ఆటగాడు– పీట్‌ శాంప్రాస్‌ వచ్చాడు. తర్వాత కనుబొమ్మలనయినా ఎగరేయకుండా దూసుకుపోయే ఫెడరర్‌ వచ్చాడు– చరిత్రను తిరగరాయడానికి. ఎనిమిదిసార్లు కప్పు గెలుచుకున్నాడు.
 
 నేను వింబుల్డన్‌ సెంట్రల్‌ కోర్ట్‌ చూశాను. ఫెడ రర్‌ నడిచిన కారిడార్‌లో నడిచాను. అదొక మైకం. 18 కోట్ల 53 లక్షల డబ్బుని సొంతం చేసుకున్న ఫెడరర్‌– గత రెండువారాలలో– ఒక్క సెట్‌ కూడా ఓడిపోని 36 ఏళ్ల ఆటగాడికి వింబుల్డన్‌ ప్రసారాలు శుభాకాంక్షలు తెలుపుతూ– టీవీ స్క్రీన్‌ అంతా కని పించేలాగ ఒక పదాన్ని వేశాయి. ‘బిలీవ్‌’. అంతే కాదు. బిలీవ్‌లో ఎల్, ఐ ల స్థానంలో 19 అంకెను వేశాయి. ఇప్పటికి ఫెడరర్‌ 19 గ్రాండ్‌ స్లామ్‌ టైటి ళ్లను దక్కించుకున్నాడు. బిలీవ్‌. ఒకే మాట– తను సాధించగలననే ‘ఆత్మ విశ్వాసం’. అదీ చాంపియన్‌కి పెట్టుబడి. ఫెడరర్‌ పిల్లలు– నలుగురినీ చూపిస్తూ ఇంటర్వ్యూ చేసే అమ్మాయి అడిగింది: ‘‘మీ పిల్లలు ఈ విజయాలకి ఏమంటారు?’’ అని. ఫెడరర్‌ నవ్వాడు. ‘‘వాళ్లు చిన్నపిల్లలు. వాళ్లకి ఇదేమీ తెలి యదు. నాన్న ఓ ఆట ఆడుతున్నాడనుకుంటారు. పెద్దయ్యాక అర్థమౌతుంది’’ అన్నాడు.
 
 ఆట అయ్యాక ఓడిన, అలిసిన చిలిచ్‌ భోరు మన్నాడు. గెలిచిన, చరిత్రకారుడు ఫెడరర్‌ కూడా భోరుమన్నాడు. అలౌకికమైన ఆనందానికీ, అనిర్వ చనీయమైన విషాదానికీ విముక్తి– కన్నీరే! కామెం టరీ చెప్తున్న బోరిస్‌ బెకర్‌ ఓ మాట అన్నాడు: ‘‘మారిన్‌ చిలిచ్‌ కృంగిపోనక్కరలేదు. ప్రపంచ టెన్నిస్‌ చరిత్రలో అగ్రస్థానంలో నిలిచిన ఓ గొప్ప ఆటగాడి ముందు– ప్రపంచంలోకెల్లా గొప్ప టెన్నిస్‌ కోర్టులో ఈనాటి అపజయం కూడా విజయమే’’.ఫెడరర్‌ వింబుల్డన్‌ కప్పుని అందుకోవడానికి వెళ్తున్నప్పుడు– కామెంటరీ చెప్పే వ్యక్తి అన్నాడు: ‘‘ఈ క్షణంలో ఫెడరర్‌ కాళ్లు నేలని తాకుతున్నాయో లేదో చూడాలని మీకూ అనిపిస్తుంది’’.
 
 వింబుల్డన్‌ చాంపియన్‌షిప్‌ ఆఖరి పాయింట్‌ గెలవగానే నేలమీద కూలబడి దొర్లడం చూశాం. అది అనూహ్యమైన ఆనందానికి సంకేతం. నరాలు తెగి పోయే ఉత్కంఠకి విముక్తి. ఫెడరర్‌ లోగడ ఇలా ఆనందించడం చూశాం. కానీ ఈసారి ఫెడరర్‌ ఆ పని చెయ్యలేదు. చెయ్యాలనుకోలేదా? ఎందుకని? మొదటి బ్రేక్‌ పాయింట్‌కే ‘విశ్వాసం’ సడలి భోరు మన్న కుర్రాడిని, కాలి చర్మం చిట్లి 1974 నాటి కెన్‌ రోజ్‌వాల్‌ లాగ ఆట మధ్యలోనే నిష్క్రమించకుండా ధైర్యంగా మూడు సెట్లూ ఆడి ఓడిన కుర్రాడి సమ  క్షంలో విజయం– విర్రవీగేది కాదు. సంయమనంతో అందుకునేది. ఈ ప్రపంచ స్థాయి క్రీడల్లో నాకు కొట్టొచ్చినట్టు కనిపించేది–ఆటలో నైపుణ్యం పక్కన ఉంచగా– ఓడి పోయిన ఆటగాడి డిగ్నిటీ, గెలిచిన ఆటగాడి ఉదా త్తత. విజయం ఆ స్థాయిలో ఒక సంకేతం. వ్యక్తిత్వం ఆ క్షణాన్ని చిరస్మరణీయం చేస్తుంది.
 గొల్లపూడి మారుతీరావు
  


 జొకోవిచ్‌
 
 పారిస్‌: స్విట్జర్లాండ్‌ స్టార్‌ రోజర్‌ ఫెడరర్‌ తెలివైన ఆటగాడని ప్రపంచ నంబర్‌–2 ర్యాంకర్‌ నొవాక్‌ జొకోవిచ్‌ చెప్పుకొచ్చాడు. ఫ్రెంచ్‌ ఓపెన్‌నుంచి మాజీ నంబర్‌వన్‌ రోజర్‌ తప్పుకోవడంపై అతను మాట్లాడుతూ ‘తనకు కష్టమైన క్లేకోర్టును కాదని గ్రాస్‌ కోర్టుల్లో మరిన్ని విజయాలు సాధించేందుకే ఫెడరర్‌ రోలండ్‌ గారోస్‌ నుంచి వైదొలిగాడు’ అని అన్నాడు. ప్రతిష్టాత్మక వింబుల్డన్‌ సహా ఇతర గ్రాస్‌ కోర్టుల్లో టైటిల్స్‌ సాధించాలనే లక్ష్యంతో అతను ఈ నిర్ణయం తీసుకున్నాడని సెర్బియన్‌ స్టార్‌ జొకోవిచ్‌ చెప్పాడు.
 
 ‘మైదానంలోనే కాదు తెలివైన నిర్ణయాలు తీసుకోవడంలోనూ రోజర్‌ దిట్ట. తను ఏంచేస్తున్నాడో అతనికి బాగా తెలుసు. అందుకే తనకు తిరుగులేని గ్రాస్‌కోర్టు ఈవెంట్స్‌ కోసం క్లేకోర్టును కాదనుకున్నాడు’ అని జొకోవిచ్‌ పేర్కొన్నాడు. 18 గ్రాండ్‌స్లామ్‌ టైటిల్స్‌ సాధించి ఆల్‌టైమ్‌ రికార్డు నెలకొల్పిన ఫెడరర్‌ ఫ్రెంచ్‌ ఓపెన్‌ను మాత్రం ఒకే ఒక్కసారి గెలిచాడు. 35 ఏళ్ల ఫెడరర్‌ ప్రస్తుత ర్యాంకింగ్స్‌లో ఐదో స్థానంలో ఉన్నాడు. జూలై 3 నుంచి జరగనున్న వింబుల్డన్‌ ఈవెంట్‌ కోసం ప్రస్తుతం సన్నద్ధమవుతున్నాడు. ఈ గ్రాండ్‌స్లామ్‌ టోర్నీలో అతను ఏడుసార్లు చాంపియన్‌గా నిలిచాడు.
  


 బాసెల్‌ (స్విట్జర్లాండ్‌): రాబోయే గ్రాస్‌ కోర్టు, హార్డ్‌ కోర్టు సీజన్‌లపై మరింత దృష్టి సారించాలని స్విట్జర్లాండ్‌ టెన్నిస్‌ దిగ్గజం ఫెడరర్‌ నిర్ణయించుకున్నాడు. ఈ నేపథ్యంలో ఈనెల 28న మొదలయ్యే ఫ్రెంచ్‌ ఓపెన్‌ గ్రాండ్‌స్లామ్‌ టోర్నీ నుంచి వైదొలుగుతున్నట్లు ప్రకటించాడు.
 
 పురుషుల టెన్నిస్‌ చరిత్రలో అత్యధికంగా 18 గ్రాండ్‌స్లామ్‌ సింగిల్స్‌ టైటిల్స్‌ నెగ్గిన ఫెడరర్‌ ఎర్రమట్టి కోర్టులపై జరిగే ఫ్రెంచ్‌ ఓపెన్‌ను మాత్రం ఒకే ఒక్కసారి (2009లో) సాధించాడు. మోకాలి గాయం కారణంగా గతేడాది కూడా ఫెడరర్‌ ఫ్రెంచ్‌ ఓపెన్‌లో ఆడలేదు.  


 ప్రేగ్‌: ఫెడరర్‌... నాదల్‌... ప్రపంచ టెన్నిస్‌లో వీరిద్దరి మధ్య పోరు జరిగితే ఎంత భీకరంగా ఉంటుందో అందరికీ తెలిసిందే. అయితే ఇద్దరు కలిసి డబుల్స్‌ బరిలోకి దిగితే అభిమానులకు పండగే. టెన్నిస్‌ గ్రేట్‌ రాడ్‌ లేవర్‌ పేరిట ఈ ఏడాది సెప్టెంబర్‌లో జరిగే ప్రారంభ లేవర్‌ కప్‌లో ఈ దృశ్యం కనిపించే అవకాశం ఉంది. ఎందుకంటే నాదల్‌తో కలిసి డబుల్స్‌ ఆడాలని ఉందని ఫెడరర్‌ తన మనసులో మాట బయటపెట్టాడు. గత నెలలో జరిగిన ఆస్ట్రేలియన్‌ ఓపెన్‌ ఫైనల్లో నాదల్‌పై ఫెడరర్‌ గెలిచిన విషయం తెలిసిందే. ఇక ఈ లేవర్‌ కప్‌లో టెన్నిస్‌ దిగ్గజాలు బోర్గ్‌ నాయకత్వంలోని యూరోపియన్‌ టీమ్, మెకన్రో కెప్టెన్సీలోని రెస్ట్‌ ఆఫ్‌ ద వరల్డ్‌ జట్లు తలపడతాయి.
 
 ‘నాదల్‌తో ఆడేందుకు ఎప్పుడూ ఇష్టపడతాను. ఎందుకంటే మా మధ్య ఆటపరంగా ఉన్న శతృత్వం అలాంటిది. అతడి ఫోర్‌హ్యాండ్‌ షాట్స్‌ అంటే నాకిష్టం. మేం కలిసి ఆడాలని లేవర్‌ కూడా కోరుకున్నారు’ అని 35 ఏళ్ల ఫెడరర్‌ తెలిపాడు. సెప్టెంబర్‌ 22 నుంచి 24 వరకు జరిగే లేవర్‌ కప్‌లోని రెండు జట్లలో ఆరేసి ఆటగాళ్లుంటారు.


 మళ్లీ పైకెగసిన వెటరన్‌
 రిటైర్మెంట్‌ ప్రశ్నే లేదంటున్న ఫెడరర్‌
 
 దాదాపు పధ్నాలుగేళ్ల క్రితం పీట్‌ సంప్రాస్‌ కెరీర్‌ కూడా డోలాయమానంలో ఉంది. 13 గ్రాండ్‌స్లామ్‌ టైటిల్స్‌తో అప్పటికే దిగ్గజంగా గుర్తింపు తెచ్చుకున్నా, కెరీర్‌ చరమాంకానికి చేరినట్లనిపిస్తోంది. 31 ఏళ్ల వయసు, అంతకుముందు ఆడిన ఆరు గ్రాండ్‌స్లామ్‌ టోర్నీలలో ఆరంభ రౌండ్లలోనే పరాజయాలు. సంప్రాస్‌ శకం ముగిసిందని అంతా అనుకున్న సమయంలో అతను సంచలన ప్రదర్శనతో 2002 యూఎస్‌ ఓపెన్‌ను సొంతం చేసుకొని సత్తా చాటాడు. ఈ క్షణం కోసమే తాను ఆగానన్నట్లుగా అప్పుడే ఆటనుంచి తప్పుకోవాలని అతను నిర్ణయించుకున్నాడు.
 
 రోజర్‌ ఫెడరర్‌ అభిమానులు కూడా ఆదివారం అలాంటి ప్రకటన ఏదైనా రావచ్చేమోనని ఆందోళన చెందారు. 17 గ్రాండ్‌స్లామ్‌ల విజేతకు కొత్తగా సాధించి చూపించాల్సింది ఏమీ లేకపోయినా, తనలో సత్తా తగ్గలేదని మరోసారి నిరూపించాలని ఫెడరర్‌ భావించినట్లున్నాడు. అందుకే అన్ని ప్రతికూలతలను ఎదుర్కొని పట్టుదలగా పోరాడాడు. ఇప్పుడు అద్భుత రీతిలో మరో గ్రాండ్‌స్లామ్‌ అతని ఖాతాలో చేరింది. మరోసారి తన ముద్రను చూపించి ఆటను ముగించేందుకు ఇలాంటిదే సరైన సమయమని చాలా మంది ఆటగాళ్లు భావిస్తారు. కానీ ఫెడరర్‌ అలా ఆలోచించడం లేదు!  
 
 సాక్షి క్రీడా విభాగం పునరాగమనం... ఫెడరర్‌కు ఈ మాట సరిగ్గా సరిపోకపోవచ్చు. అతనేమీ ఆటకు దూరం కాలేదు. గాయంతో ఆరు నెలల పాటు బరిలో దిగకపోయినా, అంతకుముందు మాత్రం తన స్థాయికి తగని ఆటతీరుతో పరాజయాలు ఎదుర్కొన్నాడు. ర్యాంకు పడిపోయింది. ఏడాది క్రితం కెరీర్‌లో తొలిసారి శస్త్రచికిత్స కూడా జరిగింది. అతనికంటే చురుకైన కుర్రాళ్లు ఎంతో మంది వచ్చేశారు. అతని ముందే ‘బేబీ ఫెడరర్‌’ అంటూ మరో ఆటగాడిని పోల్చడం కూడా ఇక నీ వయసైపోయిందని పరోక్షంగా చెబుతోంది. ఫెడరర్‌ కథ ముగిసిపోయినట్లేనని అంతా భావించారు. అతని ‘చివరి రోజులు’ అంటూ చాన్నాళ్ల క్రితమే కథనాలు వచ్చాయి. ఒకనాడు మొహమ్మద్‌ అలీ అంతటివాడు కూడా మళ్లీ రింగ్‌లోకి దిగి విఫలమైనప్పుడు ‘యువరాజు బండిలో ఇంటింటికి వెళ్లి చెత్తను పోగు చేసుకుంటున్నట్లు కనిపిస్తోంది’ అంటూ ఘాటుగా వ్యాఖ్యలు చేసిన తరహాలోనే ఫెడరర్‌ కూడా విమర్శలు ఎదుర్కొన్నాడు. అతను ఆటను చాలించాల్సిన సమయం వచ్చిందని మాజీలు విశ్లేషించారు.
 
 అందుకే కావచ్చు ఆస్ట్రేలియన్‌ ఓపెన్‌లో ఒక్కో రౌండ్‌ దాటుతున్న కొద్దీ దీనిని చాలా మంది ఫెడరర్‌ పునరాగమనంగానే చూశారు. ఇప్పుడు విజయంతో అతను అందరికీ సమాధానమిచ్చాడు. ఫీనిక్స్‌ పక్షిలా మరోసారి రివ్వున పైకి ఎగిశాడు. ‘నేను ఫ్రెంచ్‌ ఓపెన్‌ విజయం కోసం ఎంతో ప్రయత్నించాను. చాలా పోరాడాను. మళ్లీ మళ్లీ ప్రయత్నించి విఫలమయ్యాను. ఎట్టకేలకు దానిని అందుకోగలిగా. ఇప్పుడు ఈ విజయం దాదాపు అలాగే అనిపిస్తోంది. ఈ గెలుపును ఆస్వాదించేందుకు కూడా సమయం పడుతుందేమో’ అని ఉద్వేగంగా చెప్పడం అతని దృష్టిలో ఈ టైటిల్‌కు ఉన్న విలువేమిటో అర్థమవుతోంది.
 
 మరో టైటిల్‌ వెనుక...
 ఆల్‌టైమ్‌ గ్రేట్‌ ఆటగాడు ఇన్నేళ్ల తర్వాత కోచ్‌ నుంచి కొత్తగా నేర్చుకునేందుకు ఏముుం టుంది? కానీ ఫెడరర్‌ మాత్రం అలా ఆలోచించలేదు. నాలుగేళ్ల తర్వాత అతను మళ్లీ ‘మేజర్‌’ టైటిల్‌ గెలవడంలో ప్రధాన కోచ్‌ సెవెరిన్‌ ల్యూటీతో పాటు  క్రొయేషియాకు చెందిన ఇవాన్‌ లుబిసిచ్‌ పాత్ర చాలా ఉంది. 2015లో ఘోర వైఫల్యం తర్వాత స్టీఫెన్‌ ఎడ్బర్గ్‌తో విడిపోయి మరో మాజీ ఆటగాడు లుబిసిచ్‌తో 2016 సీజన్‌లో కలిసి పని చేయబోతున్నట్లు రోజర్‌ ప్రకటించడం చాలా మందికి ఆశ్చర్యం కలిగించింది. తాను ప్రాక్టీస్‌ చేస్తున్న వీడియోను కూడా కొద్ది రోజుల క్రితమే విడుదల చేసిన అతను తన ఆత్మవిశ్వాసం లో కోచ్‌ తెచ్చిన మార్పు గురించి చెప్పాడు. ‘ఎప్పుడైనా కొత్తగా నేర్చుకునేందుకు ఏదైనా ఉంటుందని నేను నమ్ముతాను. దీంతో పాటు పోరాడాలనే పట్టుదల, విజయాలు సాధించాలనే కసి కూడా మనలో రగిలించాలి. లుబిసిచ్‌ నాకు ఈ విషయంలో ఎంతో తోడ్పడ్డారు. నేను సొంతంగా బాగా ఆడగలిగినా, వారి వల్ల పది శాతం ఆట మెరుగైనా అది ఎంతో ముఖ్యం’ అని ఫెడరర్‌ కృతజ్ఞతలు చెప్పాడు. ఆరు నెలలపాటు ఆటకు దూరమైన తర్వాత కోలుకొని రాణించడంలో ఫిజియోథెరపిస్ట్‌ డానియెల్‌ ట్రాక్స్‌లర్, ఫిట్‌నెస్‌ ట్రైనర్‌ పియరీ ప్యాగినినీ కూడా రోజర్‌కు అండగా నిలిచారు. చాంపియన్‌ ఆటగాడిగా ఫెడరర్‌ కష్టం వృథా పోలేదు.
 
 మళ్లీ వస్తాను...
 ఆస్ట్రేలియన్‌ ఓపెన్‌ ట్రోఫీ స్వీకరించే సమయంలో ‘వచ్చే ఏడాది మళ్లీ వస్తాను. ఒకవేళ రాలేకపోతే ఇక్కడ అద్భుతమైన రీతిలో ముగించానని అనుకోవచ్చు’ అని వ్యాఖ్యానించడంతో ఫెడరర్‌ భవిష్యత్తు గురించి చర్చ మొదలైంది. ముఖ్యంగా ‘ఒకవేళ’ అనడంలోనే ఇక రోజర్‌ నాటకీయ రీతిలో తన శుభం కార్డు వేస్తున్నాడని కూడా టెన్నిస్‌ ప్రపంచం దాదాపు నిర్ధారణకు వచ్చేసింది. అయితే మరుసటి రోజు అతను ఇచ్చిన వివరణ ఫెడెక్స్‌ ఫ్యాన్స్‌ను సంతోషపరిచింది. ‘తర్వాతి గ్రాండ్‌స్లామ్‌ ఏమిటనేది ఎవరూ చెప్పలేరు. నేను గాయపడవచ్చు కూడా. ఐదు సెట్‌ల మ్యాచ్‌లు మూడు ఆడానంటే పరిస్థితి అర్థమవుతుంది. కఠినంగా సాగిన గత ఏడాది తర్వాత ఇక్కడ మళ్లీ గెలవగలిగాను. నా కోసం మరో అవకాశం ఎదురు చూస్తోందా లేదా అనేది మనం ప్రణాళిక వేసుకున్నంత సులువు కాదు’ అని అతను స్పష్టం చేశాడు. పైగా మరో మూడు వారాల్లో ప్రారంభం కానున్న దుబాయ్‌ ఓపెన్‌ మొదలు వింబుల్డన్‌ సన్నాహక టోర్నీల వరకు కూడా తాను పాల్గొనే టోర్నమెంట్‌ల జాబితా అతను చెప్పేశాడు. వింబుల్డన్‌లో తనకు మంచి అవకాశం ఉందని, ఫ్రెంచ్‌ ఓపెన్‌ గురించి పెద్దగా ఆశలు లేవంటూ తన బలాలు, బలహీనతల గురించి కూడా నిర్మొహమాటంగా చెబుతూ ఫెడరర్‌ ఇచ్చిన స్పష్టత అతని ఉద్దేశాలు ఏమిటో చాటి చెబుతోంది. తరం మారినా నన్ను ఓడించడం మీతరం కాదంటూ కొత్త ఆటగాళ్లకు సవాల్‌ విసురుతున్న ఈ స్విస్‌ సూపర్‌ స్టార్‌ కోసం ఇంకా ఎన్ని స్లామ్‌లు ఎదురు చూస్తున్నాయో!


 ఏడాదిలో మొదటి గ్రాండ్‌స్లామ్‌ టోర్నీ ఆస్ట్రేలియన్‌ ఓపెన్ లో ఐదో రోజు ఎలాంటి సంచలనాలు నమోదు కాలేదు.అగ్రశ్రేణి ఆటగాళ్లు ముర్రే, ఫెడరర్‌ అంచనాలకు అనుగుణంగా సునాయాసంగా నాలుగో రౌండ్‌లోకి ప్రవేశించగా,  ముగురుజ, వీనస్‌ విలియమ్స్‌ కూడా ముందంజ వేశారు. భారత్‌కు సంబంధించి సానియా దూసుకుపోగా, బొపన్న పురుషుల డబుల్స్‌ నుంచి నిష్క్రమించాడు.
 
 మెల్‌బోర్న్‌: కెరీర్‌లో తొలి ఆస్ట్రేలియన్‌ ఓపెన్‌ వేటలో ఉన్న వరల్డ్‌ నంబర్‌న్  ఆండీ ముర్రే (బ్రిటన్‌) కీలక పోరులో సత్తా చాటి ప్రిక్వార్టర్‌ ఫైనల్లోకి అడుగు పెట్టాడు. శుక్రవారం జరిగిన మూడో రౌండ్‌ మ్యాచ్‌లో ముర్రే 6–4, 6–2, 6–4తో స్యామ్‌ క్వారీ (అమెరికా)ను చిత్తు చేశాడు. 31వ సీడ్‌ క్వారీని గత ఏడాది వింబుల్డన్ లో జొకోవిచ్‌ను ఓడించిన రికార్డు ఉంది. తాజాగా జొకొవిచ్‌ కూడా రెండో రౌండ్‌లోనే ఓడిపోవడంతో మరో సంచలనపై అందరి దృష్టి నిలిచింది. కానీ ముర్రే వాటిని పటాపంచలు చేస్తూ అలవోక విజయం అందుకున్నాడు. రెండు గంటల్లోనే ఈ మ్యాచ్‌ ముగిసింది.
 మరో మ్యాచ్‌లో మాజీ చాంపియన్, 17వ సీడ్‌ రోజర్‌ ఫెడరర్‌ (స్విట్జర్లాండ్‌) 6–2, 6–4, 6–4 తేడాతో థామస్‌ బెర్డిచ్‌ (చెక్‌ రిపబ్లిక్‌)పై ఘన విజయం సాధించాడు. గంటన్నరలోనే ముగిసిన ఈ పోరులో ఫెడరర్‌ ఎనిమిది ఏస్‌లు కొట్టాడు. పురుషుల సింగిల్స్‌లో ఇతర మూడో రౌండ్‌ మ్యాచ్‌లలో నాలుగో సీడ్‌ వావ్రింకా (స్విట్జర్లాండ్‌) 3–6, 6–2, 6–2, 7–6 (7)తో విక్టర్‌ ట్రోయ్‌కీ (సెర్బియా)పై, నిషికొరి (జపాన్  6–4, 6–4, 6–4తో ల్యూ కాస్‌ లాకో (స్లొవేకియా)పై గెలుపొందారు.
 
 కెర్బర్‌ దూకుడు...
 మహిళల సింగిల్స్‌లో వరల్డ్‌ నంబర్‌వన్‌ కెర్బర్‌ (జర్మనీ) జోరు కొనసాగుతోంది. మూడో రౌండ్‌లో ఆమె 6–0, 6–4తో ప్లిస్కోవా (చెక్‌ రిపబ్లిక్‌)ను చిత్తు చేసి ప్రిక్వార్టర్స్‌లోకి ప్రవేశించింది. ఏడో సీడ్, స్పెయిన్ కు చెందిన గాబ్రియెలా ముగురుజా కూడా సునాయాసంగా ముందంజ వేసింది. మూడో రౌండ్‌లో ఆమె 6–4, 6–2తో సెవస్తొవా (లాత్వియా)ను ఓడించింది. అమెరికా స్టార్‌ వీనస్‌ కూడా నాలుగో రౌండ్‌లోకి అడుగు పెట్టింది. ఆమె 6–1, 6–0తో అతి సునాయాసంగా యింగ్‌ డువాన్‌(చైనా)ను చిత్తుగా ఓడించింది. ఎనిమిదో సీడ్‌ స్వెత్లానా కుజ్‌నెత్సొవా(రష్యా) 6–4, 5–7, 9–7తో జెలెనా జంకోవిచ్‌(సెర్బియా)పై గెలుపొంది ప్రిక్వార్టర్స్‌ చేరింది.
 
 ముర్రే, వావ్రింకా కూడా ముగురుజ, వీనస్‌ ముందంజ
 ఆస్ట్రేలియన్‌ ఓపెన్ 
 ఆస్ట్రేలియన్‌ ఓపెన్ లో మరో తీవ్ర సంఘటన జరిగింది. ఈఎస్‌పీఎన్‌ తరఫున టీవీ కామెంటరీ చేస్తున్న వ్యాఖ్యాత డౌగ్‌ ఆల్టర్‌ అమెరికా స్టార్‌ క్రీడాకారిణి వీనస్‌ను ‘గొరిల్లా’ అంటూ సంబోధించాడు. దాంతో ఆగ్రహం చెందిన ప్రసారకర్తలు అతడిని వెంటనే తప్పించారు. అయితే తాను ఆ పదాన్ని పలికే తీరులో తప్పు చేశానని, తన ఉద్దేశం అది కాదంటూ అతను వివరణ ఇస్తూ క్షమాపణ కోరా డు.
 వీనస్‌ రెండో రౌండ్‌ మ్యాచ్‌ సందర్భంగా ఈ ఘటన చోటు చేసుకుంది. 2017లోనూ విలియమ్స్‌ సిస్టర్స్‌ పై తీవ్ర వ్యాఖ్యలు ఆగడం లేదంటూ నెటిజన్లు ఆగ్రహం వ్యక్తం చేశారు.  
 
 దూసుకుపోతున్న సానియా జోడి
 మహిళల డబుల్స్‌ విభాగంలో నాలుగో సీడ్‌ సానియా మీర్జా (భారత్‌), బార్బరా స్ట్రికోవా (చెక్‌ రిపబ్లిక్‌) జోడి సునాయాసంగా ముందంజ వేసింది. రెండో రౌండ్‌ మ్యాచ్‌లో సానియా, స్ట్రికోవా 6–1, 6–4తో సమంతా స్టొసర్‌ (ఆస్ట్రేలియా), షుయి జాంగ్‌ (చైనా) జంటను ఓడించి మూడో రౌండ్‌లోకి ప్రవేశించారు. గంటా 21 నిమిషాల పాటు ఈ పోరు సాగింది. అయితే పురుషుల డబుల్స్‌లో మాత్రం భారత ఆటగాడు రోహన్‌ బొపన్నకు నిరాశే ఎదురైంది. 15వ సీడ్‌ బొపన్న–పాబ్లో క్వాస్‌ (ఉరుగ్వే) ద్వయం రెండో రౌండ్‌లో 6–2, 6–7 (2), 4–6 స్కోరుతో ఆస్ట్రేలియా జంట అలెక్స్‌ బోల్ట్, బ్రాడ్లీ మౌస్లీ చేతిలో పరాజయం పాలైంది.
 అయితే తన ఓటమికి అంపైరింగ్‌ నిర్ణయాలే కారణమని బొపన్న మ్యాచ్‌ అనంతరం తీవ్రంగా విమర్శించాడు. కీలక సమయంలో వివాదాస్పద రీతిలో పాయింట్‌ ఇవ్వడమే తమను ఓడించిందని బొపన్న, క్వాస్‌ ద్వయం వ్యాఖ్యానించింది. వీరిద్దరు దీనిపై చెయిర్‌ అంపైర్‌తోనే వాగ్వాదానికి కూడా దిగారు. ‘రిఫరీ మ్యాచ్‌ ఫలితాన్ని శాసించడం జీర్చించుకోలేకపోతున్నాను’ అంటూ ఆ తర్వాత బొపన్న ట్వీట్‌ చేశాడు.


 ►గ్రాండ్‌స్లామ్ టోర్నమెంట్‌లలో అత్యధిక విజయాలు సాధించిన ప్లేయర్‌గా రికార్డు
 ►308 విజయాలతో అగ్రస్థానంలోకి  ఫెడరర్‌ను దాటిన అమెరికన్ స్టార్
 
 ఇప్పటికే ఎన్నో ఘనతలు సాధించిన అమెరికా నల్లకలువ సెరెనా విలియమ్స్ మరో అద్భుతం చేసింది. ఓపెన్ శకంలో (1968 నుంచి) గ్రాండ్‌స్లామ్ టోర్నమెంట్‌లలో అత్యధిక విజయాలు సాధించిన ప్లేయర్‌గా ప్రపంచ రికార్డు నెలకొల్పింది. 307 విజయాలతో స్విట్జర్లాండ్ దిగ్గజం రోజర్ ఫెడరర్ పేరిట ఉన్న రికార్డును సెరెనా 308వ విజయంతో బద్దలు కొట్టింది. యూఎస్ ఓపెన్‌లో క్వార్టర్ ఫైనల్లోకి ప్రవేశించి రికార్డుస్థారుులో 23వ గ్రాండ్‌స్లామ్ టైటిల్ దిశగా మరో అడుగు ముందుకేసింది. 
 
 న్యూయార్క్: కొత్త మ్యాచ్... కొత్త ప్రత్యర్థి.. అరుునా ఫలితంలో మార్పు లేదు. అమెరికా టెన్నిస్ స్టార్ సెరెనా విలియమ్స్ జోరులో పదును తగ్గలేదు. రికార్డుస్థారుులో 23వ గ్రాండ్‌స్లామ్ సింగిల్స్ టైటిల్ లక్ష్యంగా యూఎస్ ఓపెన్‌లో బరిలోకి దిగిన సెరెనా విలియమ్స్ దూసుకుపోతోంది. మంగళవారం జరిగిన మహిళల సింగిల్స్ ప్రిక్వార్టర్ ఫైనల్లో టాప్ సీడ్ సెరెనా 6-2, 6-3తో యారోస్లావా ష్వెదోవా (కజకిస్తాన్)పై గెలిచింది. కేవలం 68 నిమిషాల్లో ముగిసిన ఈ మ్యాచ్‌లో సెరెనా 11 ఏస్‌లు సంధించి, రెండు డబుల్ ఫాల్ట్‌లు చేసింది. ష్వెదోవా సర్వీస్‌ను మూడుసార్లు బ్రేక్ చేసిన ఈ అమెరికన్ స్టార్ ప్రత్యర్థికి ఒక్కసారి కూడా బ్రేక్ పారుుంట్ అవకాశం ఇవ్వలేదు. అంతేకాకుండా నెట్‌వద్దకు 14 సార్లు దూసుకొచ్చి 10 సార్లు పారుుంట్లు నెగ్గి పైచేరుు సాధించింది. క్వార్టర్ ఫైనల్లో ఐదో సీడ్ సిమోనా హాలెప్ (రొమేనియా)తో సెరెనా అమీతుమీ తేల్చుకుంటుంది. గత తొమ్మిదేళ్లలో సెరెనా యూఎస్ ఓపెన్‌లో కనీసం క్వార్టర్ ఫైనల్‌కు చేరింది.
  
 18 ఏళ్ల సుదీర్ఘ ప్రయాణం: గ్రాండ్‌స్లామ్ టోర్నమెంట్‌లలో ఎవరికీ సాధ్యంకాని విజయాల రికార్డును సాధించిన సెరెనా ‘గ్రాండ్’ ప్రస్థానం 1998 ఆస్ట్రేలియన్ ఓపెన్‌తో మొదలైంది. ఆ ఏడాది జనవరి 19న జరిగిన తొలి రౌండ్ మ్యాచ్‌లో సెరెనా 6-7 (5/7), 6-3, 6-1తో ఇరీనా స్పిర్లియా (రొమేనియా)పై గెలిచి తన కెరీర్‌లో తొలి గ్రాండ్‌స్లామ్ విజయాన్ని నమోదు చేసింది. అరుుతే తర్వాతి మ్యాచ్‌లోనే సెరెనాకు తన అక్క వీనస్ చేతిలో పరాజయం ఎదురుకావడం గమనార్హం. గత 18 ఏళ్లలో ఎన్నో ఆటుపోట్లను చవిచూసిన సెరెనా పలు రికార్డులను తిరగరాసి ఇప్పటికీ తన కెరీర్‌ను దిగ్విజయంగా కొనసాగిస్తోంది.
  
 వీనస్‌కు ప్లిస్కోవా షాక్: ఒకవైపు చెల్లెలు సెరెనా ‘గ్రాండ్’ రికార్డు విజయం నమోదు చేయగా... మరోవైపు అక్క వీనస్ విలియమ్స్‌కు మాత్రం నిరాశ ఎదురైంది. పదో సీడ్ కరోలినా ప్లిస్కోవా (చెక్ రిపబ్లిక్)తో జరిగిన ప్రిక్వార్టర్ ఫైనల్లో ఆరో సీడ్ వీనస్ 6-4, 4-6, 6-7 (3/7)తో ఓడిపోరుుంది. ప్లిస్కోవా  తన కెరీర్‌లో తొలిసారి ఓ గ్రాండ్‌స్లామ్ టోర్నీలో క్వార్టర్ ఫైనల్‌కు చేరింది. మరోవైపు నాలుగో సీడ్ అగ్నెస్కా రద్వాన్‌స్కా (పోలాండ్)కు కూడా ప్రిక్వార్టర్ ఫైనల్లోనే చుక్కెదురైంది. అన్‌సీడెడ్ అనా కొంజు (క్రొయేషియా) 6-4, 6-4తో రద్వాన్‌స్కాపై సంచలన విజయం సాధించింది. మరో మ్యాచ్‌లో ఐదో సీడ్ సిమోనా హాలెప్ (రొమేనియా) 6-2, 7-5తో 11వ సీడ్ కార్లా నవారో (స్పెరుున్) పై గెలిచింది.
  
 సెమీస్‌లో కెర్బర్
 మహిళల సింగిల్స్ విభాగంలో రెండో సీడ్ ఎంజెలిక్ కెర్బర్ (జర్మనీ) సెమీఫైనల్లోకి అడుగుపెట్టింది. గతేడాది రన్నరప్, ఏడో సీడ్ రొబెర్టా విన్సీ (ఇటలీ)తో మంగళవారం జరిగిన క్వార్టర్ ఫైనల్లో కెర్బర్ 7-5, 6-0తో గెలిచింది. యూఎస్ ఓపెన్‌లో సెమీఫైనల్లోకి చేరడం కెర్బర్‌కిది రెండోసారి.
 
 ‘మరిన్ని విజయాలు సాధిస్తా’
  గ్రాండ్‌స్లామ్ టోర్నీల్లో అత్యధిక విజయాలు సాధించిన ప్లేయర్ రికార్డు ఎవరి పేరు మీద నిలుస్తుందో వేచి చూడాలని సెరెనా అంటోంది. ‘నాకై తే తెలియదు. వేచి చూద్దాం. నాతోపాటు ఫెడరర్‌కు కూడా ఈ అవకాశం ఉంది. నేను ఓ ప్రణాళికతో ముందుకు సాగుతాను. ఫెడరర్ కూడా అలాగే చేస్తాడేమో’ అని సెరెనా వ్యాఖ్యానించింది. గత ఆగస్టులో ఫెడరర్ 35 ఏళ్లు పూర్తి చేసుకోగా... ఈనెల 26న సెరెనాకు 35 ఏళ్లు నిండుతారుు. ‘నా వరకై తే 308 సంఖ్య చాలా గొప్పది. ఇంతకాలంపాటు టెన్నిస్ ఆడతానని ఊహించలేదు. ఇంత నిలకడగా ఆడుతున్నందుకు గర్వంగా అనిపిస్తోంది. నా ఆటను ఎప్పుడు నిలిపేస్తానో కచ్చితంగా చెప్పలేను. ఈ క్షణాలను నేనెంతగానో ఆస్వాదిస్తున్నాను’ అని సెరెనా తెలిపింది.


 ♦ వింబుల్డన్ సెమీస్‌లో ఫెడరర్
 ♦ ఉత్కంఠ పోరులో సిలిచ్‌పై గెలుపు
 ♦ రావోనిక్, బెర్డిచ్ కూడా ముందుకు
 నాలుగేళ్లుగా గ్రాండ్‌స్లామ్ టైటిల్ కోసం పోరాటం చేస్తున్న ప్రపంచ మాజీ నంబర్‌వన్ రోజర్ ఫెడరర్... వింబుల్డన్‌లో తన విశ్వరూపాన్ని చూపెట్టాడు. రెండు సెట్లు వెనుకబడి... నాలుగో సెట్‌లో మూడు మ్యాచ్ పాయింట్లు కాపాడుకుని ఓ యోధుడిలా పోరాడాడు. దీంతో ఉత్కంఠ రేకెత్తించిన క్వార్టర్స్ పోరులో చివరి వరకు సిలిచ్‌ను సింహంలా వేటాడి గెలిచి నిలిచాడు.
 లండన్: ప్రత్యర్థి నుంచి ఊహించని ప్రతిఘటన ఎదురైనా... తనదైన శైలిలో చెలరేగిన ప్రపంచ మూడో ర్యాంకర్ రోజర్ ఫెడరర్... వింబుల్డన్‌లో సెమీఫైనల్లోకి ప్రవేశించాడు. బుధవారం జరిగిన పురుషుల సింగిల్స్ క్వార్టర్‌ఫైనల్లో మూడోసీడ్ ఫెడరర్ (స్విట్జర్లాండ్) 6-7 (4/7), 4-6, 6-3, 7-6 (11/9), 6-3తో తొమ్మిదో సీడ్ మారిన్ సిలిచ్ (క్రొయేషియా)పై విజయం సాధించాడు. వింబుల్డన్‌లో ఫెడరర్ సెమీస్‌కు చేరడం ఇది 11వసారి కాగా, మేజర్ టోర్నీల్లో 40వది.
 వింబుల్డన్‌లో 84వ గెలుపుతో జిమ్మీ కానర్స్ రికార్డును సమం చేసిన ఫెడరర్... గ్రాండ్‌స్లామ్ టోర్నీల్లో 307 విజయాలతో సరికొత్త రికార్డును నెలకొల్పాడు. ఎనిమిదోసారి వింబుల్డన్ టోర్నీ కోసం బరిలోకి దిగిన ఫెడరర్.... మ్యాచ్‌లో రెండు సెట్లు వెనుకబడి గెలవడం కెరీర్‌లో పదోసారి. కెన్ రోస్‌వాల్ (1974) తర్వాత సెమీస్‌కు చేరిన ఎక్కువ వయసు క్రీడాకారుడిగా కూడా ఫెడరర్ (39 ఏళ్లు) రికార్డులకెక్కాడు.
  సెంటర్ కోర్టులో మూడు గంటలా 17 నిమిషాల పాటు జరిగిన మ్యాచ్‌లో ఫెడరర్, సిలిచ్‌లు కొదమ సింహాల్లా తలపడ్డారు. స్విస్ స్టార్ 27 ఏస్‌లు, 67 విన్నర్లు సంధించి... 2014 యూఎస్ ఓపెన్ సెమీస్‌లో సిలిచ్ చేతిలో ఎదురైన పరాజయానికి ప్రతీకారం తీర్చుకున్నాడు. అయితే తొలిసెట్ ఐదో గేమ్‌లో కేవలం బ్రేక్ పాయింట్లను మాత్రమే కాచుకున్న ఫెడరర్.. టైబ్రేక్‌లో వెనుబడ్డాడు. 5-0 ఆధిక్యంలో ఉన్నప్పుడు సిలిచ్ నాలుగుసార్లు సెట్ పాయింట్లను చేజార్చుకున్నా చివరకు ఫలితాన్ని సాధించాడు. ఇక రెండో సెట్‌లోనూ క్రొయేషియన్ జోరు చూపెట్టడంతో ఫెడరర్ ఇబ్బందుల్లో పడ్డాడు. అయితే మూడో సెట్ ఏడో గేమ్‌లో మూడు బ్రేక్ పాయింట్లను కాపాడుకుని ఫెడరర్ మ్యాచ్‌లో నిలిచాడు.
 ఇక దాదాపు గంటపాటు సాగిన నాలుగో సెట్‌లో సర్వీస్‌లతో చెలరేగిన సిలిచ్ ఓ దశలో 5-4 ఆధిక్యంలోకి వెళ్లాడు. అయితే పదో గేమ్‌లో ఫెడరర్ మ్యాచ్ పాయింట్‌ను కాపాడుకోవడంతో గేమ్ మలుపు తిరిగింది. తర్వాత ఇద్దరు సర్వీస్‌లు నిలబెట్టుకోవడంతో టైబ్రేక్‌కు వెళ్లింది. టైబ్రేక్‌లో రెండు సెట్ పాయింట్లను చేజార్చుకున్న స్విస్ స్టార్... సిలిచ్ తన సర్వీస్‌లో కొట్టిన ఫోర్‌హ్యాండ్ షాట్ నెట్‌కు తగలడంతో మూడో మ్యాచ్ పాయింట్‌ను కాపాడుకున్నాడు. ఇక అక్కడి నుంచి ఉత్కంఠగా సాగిన పోరులో మరో రెండుసార్లు ఫెడరర్ సెట్ పాయింట్లను కోల్పోయాడు. కానీ సిలిచ్ కొట్టిన షాట్స్ కూడా పదేపదే నెట్‌కు తాకడంతో సెట్ ఫెడరర్ సొంతమైంది. ఇక ఐదో సెట్‌లో తన అనుభవాన్ని రంగరించిన ఫెడరర్... బలమైన బేస్‌లైన్ ఆటతో సిలిచ్ ఆట కట్టించాడు.
  రావోనిక్ కూడా..
 ఇతర క్వార్టర్స్ పోరులో ఆరోసీడ్ మిలోస్ రావోనిక్ (కెనడా) 6-4, 7-5, 5-7, 6-4తో 28వ సీడ్ స్యామ్ క్వెరీ (అమెరికా)పై; 10వ సీడ్ థామస్ బెర్డిచ్ (చెక్) 7-6 (7/4), 6-3, 6-2తో 32వ సీడ్ లుకాస్ పౌలీ (ఫ్రాన్స్)పై నెగ్గారు. శుక్రవారం జరిగే సెమీస్‌లో ఫెడరర్.. రావోనిక్‌తో తలపడతాడు.


 ► తొమ్మిదోసారి బార్సిలోనా ఓపెన్ టైటిల్ సొంతం
 ► మూడు టోర్నీలను 9సార్లు నెగ్గిన తొలి ప్లేయర్‌గా రికార్డు
 ► అత్యధిక క్లే కోర్టు టైటిల్స్ రికార్డు సమం
  
  
  బార్సిలోనా (స్పెయిన్): కొంతకాలంగా గాయాలతో సతమతమవుతూ ఫామ్ కోల్పోయినట్లుగా కనిపించిన స్పెయిన్ టెన్నిస్ స్టార్ రాఫెల్ నాదల్ మళ్లీ గాడిలో పడ్డాడు. వరుసగా రెండో వారం మరో సింగిల్స్ టైటిల్‌ను గెలిచాడు. ఆదివారం రాత్రి ముగిసిన బార్సిలోనా ఓపెన్ టోర్నమెంట్‌లో టాప్ సీడ్ నాదల్ విజేతగా నిలిచాడు.డిఫెండింగ్ చాంపియన్ కీ నిషికోరి (జపాన్)తో జరిగిన ఫైనల్లో నాదల్ 6-4, 7-5తో విజయం సాధించాడు. క్లే కోర్టులపై నాదల్‌కిది 49వ టైటిల్ కావడం విశేషం. ఈ క్రమంలో నాదల్ బార్సిలోనా ఓపెన్ టైటిల్‌ను రికార్డుస్థాయిలో తొమ్మిదిసార్లు సాధించి కొత్త చరిత్ర లిఖించాడు. గతంలో నాదల్ 2005 నుంచి 2009 వరకు... 2011 నుంచి 2013 వరకు ఈ టోర్నీ టైటిల్స్‌ను సాధించాడు.
 
 
 ► తాజా విజయంతో నాదల్ మూడు వేర్వేరు టోర్నమెంట్‌లలో తొమ్మిదిసార్లు చొప్పున విజేతగా నిలిచిన ఏకైక ప్లేయర్‌గా అరుదైన రికార్డు నెలకొల్పాడు. గతంలో నాదల్ ఫ్రెంచ్ ఓపెన్‌లో తొమ్మిదిసార్లు (2005 నుంచి 2008 వరకు; 2010 నుంచి 2014 వరకు)... మోంటెకార్లో టోర్నీలో తొమ్మిదిసార్లు (2005 నుంచి 2012 వరకు; 2016లో) చాంపియన్‌గా నిలిచాడు.
 
 ► గతంలో స్విట్జర్లాండ్ దిగ్గజం ఫెడరర్ (హాలె ఓపెన్), అర్జెంటీనా మాజీ స్టార్ గిలెర్మో విలాస్ (బ్యూనస్ ఎయిర్స్ ఓపెన్) ఒక టోర్నీని అత్యధికంగా ఎనిమిదిసార్లు చొప్పున సాధించారు.
 
 ► ఓవరాల్‌గా నాదల్ కెరీర్‌లో ఇది 69వ సింగిల్స్ టైటిల్. ఈ గెలుపుతో నాదల్ క్లే కోర్టులపై అత్యధికంగా 49 టైటిల్స్ సాధించిన ప్లేయర్‌గా రికార్డు నెలకొల్పిన గిలెర్మో విలాస్ సరసన చేరాడు. మరో టైటిల్ సాధిస్తే నాదల్ క్లే కోర్టులపై అత్యధిక టైటిల్స్ నెగ్గిన ప్లేయర్‌గా కొత్త రికార్డు సాధిస్తాడు.
 
 ► రెండు గంటల నాలుగు నిమిషాలపాటు జరిగిన ఈ మ్యాచ్‌లో నాదల్ ఆరంభం నుంచే దూకుడుగా ఆడాడు. నాలుగో గేమ్‌లో నిషికోరి సర్వీస్‌ను బ్రేక్ చేసిన అతను 3-1తో ఆధిక్యంలోకి వెళ్లాడు. అదే ఊపులో తొలి సెట్‌ను సొంతం చేసుకున్నాడు. రెండో సెట్‌లోనూ నాదల్ తన జోరు కొనసాగిస్తూ 4-1తో ఆధిక్యాన్ని సంపాదించాడు.
 
 అయితే నిషికోరి వెంటనే తేరుకొని నాదల్ సర్వీస్‌ను బ్రేక్ చేయడంతోపాటు స్కోరును 4-4తో సమం చేశాడు. ఆ తర్వాత పన్నెండో గేమ్‌లో నిషికోరి సర్వీస్‌ను బ్రేక్ చేసిన నాదల్ విజయాన్ని ఖాయం చేసుకున్నాడు. విజేతగా నిలిచిన నాదల్‌కు 4,60,000 యూరోల ప్రైజ్‌మనీ (రూ. 3 కోట్ల 45 లక్షలు) లభించింది.


 ♦ వరుసగా ఐదో గ్రాండ్‌స్లామ్ ఫైనల్లో జొకోవిచ్
 ♦ సెమీస్‌లో ఫెడరర్‌పై గెలుపు
 ♦ మిక్స్‌డ్ సెమీస్‌లో భారత స్టార్
 ♦ 26వసారి గ్రాండ్‌స్లామ్ ఫైనల్లో అమెరికా స్టార్
 
 మెల్‌బోర్న్: మేటి ప్రత్యర్థి ఎదురైనా... అద్వితీయమైన ఆటతీరుతో చెలరేగిన ప్రపంచ నంబర్‌వన్ నొవాక్ జొకోవిచ్ (సెర్బియా)... ఆరోసారి ఆస్ట్రేలియన్ ఓపెన్ ఫైనల్లోకి దూసుకెళ్లాడు. గురువారం జరిగిన పురుషుల సింగిల్స్ సెమీస్‌లో ఈ టాప్‌సీడ్ ఆటగాడు 6-1, 6-2, 3-6, 6-3తో మూడోసీడ్ రోజర్ ఫెడరర్ (స్విట్జర్లాండ్)పై గెలిచాడు. తాజా విజయంతో ముఖాముఖి రికార్డును 23-22తో మెరుగుపర్చుకోగా, వరుసగా ఐదో గ్రాండ్‌స్లామ్ టైటిల్ పోరుకు అర్హత సాధించడం విశేషం.
 రెండు గంటలా 19 నిమిషాల పాటు జరిగిన ఈ మ్యాచ్‌లో జొకోవిచ్... 17సార్లు గ్రాండ్‌స్లామ్ చాంపియన్ ఫెడరర్ షాట్లకు కచ్చితమైన సమాధానం ఇచ్చాడు. 54 నిమిషాలలో ముగిసిన తొలి రెండు సెట్లలో కేవలం మూడు గేమ్స్ మాత్రమే చేజార్చుకున్నాడు. ఫెడరర్ ఫస్ట్ సర్వీస్‌ను బ్రేక్ చేసిన సెర్బియన్ తర్వాత సర్వీస్‌ను నిలబెట్టుకుని 3-0 ఆధిక్యంలోకి వెళ్లాడు. ఆరో గేమ్‌లో కూడా ఫోర్‌హ్యాండ్‌తో ఫ్రెడ్డీ సర్వీస్‌ను బ్రేక్ చేశాడు. ఓవరాల్‌గా తొలి 14 పాయింట్లలో 12 గెలిచాడు. ఫెడరర్‌పై తొలి సెట్‌ను ఇంత సులభంగా గెలవడం జొకొవిచ్‌కు ఇదే మొదటిసారి. ఇక రెండో సెట్‌లోనూ మూడు, ఐదో గేమ్‌లో ఫెడరర్ సర్వీస్‌ను బ్రేక్ చేయడంతో జొకోవిచ్‌కు ఆధిక్యం లభించింది.
 మూడోసెట్‌లో దూకుడును చూపెట్టిన ఫెడరర్... ఆరో గేమ్‌లో జొకోవిచ్ సర్వీస్‌ను తొలిసారి బ్రేక్ చేశాడు. తర్వాత అదే ఒత్తిడిని కొనసాగిస్తూ... మూడోసెట్ పాయింట్‌తో సెట్‌ను చేజిక్కించుకున్నాడు. వర్షం పడే సూచనలు కనిపించడంతో స్టేడియం రూ్‌ఫ్‌ను మూసేవరకు ఇద్దరు ఆటగాళ్లు కాసేపు సేదతీరారు. ఇక నాలుగో సెట్‌లో అద్భుతమైన గ్రౌండ్‌స్ట్రోక్స్‌తో చెలరేగిన జొకోవిచ్ ఎనిమిదో గేమ్‌లో పదునైన ఫోర్‌హ్యాండ్ రిటర్న్‌తో ఫెడరర్ సర్వీస్‌ను బ్రేక్ చేశాడు. మ్యాచ్ మొత్తంలో ఇది ఐదోసారి. తర్వాత సర్వీస్‌ను నిలబెట్టుకుని ఎలాంటి ఇబ్బంది లేకుండా సెట్‌ను, మ్యాచ్‌ను చేజిక్కించుకున్నాడు.
  ఆస్ట్రేలియన్ ఓపెన్‌లో భారత స్టార్ సానియా మీర్జా జైత్రయాత్ర కొనసాగుతోంది. క్రొయేషియా భాగస్వామి ఇవాన్ డోడిగ్‌తో కలిసి మిక్స్‌డ్ డబుల్స్‌లో సెమీస్‌లోకి ప్రవేశించింది. క్వార్టర్‌ఫైనల్లో టాప్‌సీడ్ సానియా-డోడిగ్ 7-6 (7/1), 6-3తో డిఫెండింగ్ చాంపియన్స్ లియాండర్ పేస్ (భారత్)-మార్టినా హింగిస్ (స్విట్జర్లాండ్)పై నెగ్గారు. గంటా 13 నిమిషాల పాటు జరిగిన ఈ మ్యాచ్ ఆరంభంలో సానియా ద్వయం కాస్త తడబడింది. పేస్-హింగిస్‌ల సర్వీస్‌లను అడ్డుకునే ప్రయత్నంలో అనవసర తప్పిదాలు చేసింది. అయితే ఏకపక్షంగా సాగిన టైబ్రేక్‌లో మాత్రం అంచనాలకు మించి రాణించింది. సర్వీస్‌తో పాటు అద్భుతమైన వ్యాలీలతో చెలరేగింది.
 రెండోసెట్‌లో మరింత అప్రమత్తతతో వ్యవహరించిన ఇండో-క్రొయేషియా జోడి అనుకున్న ఫలితాన్ని సాధించింది. ఐదు బ్రేక్ పాయింట్ అవకాశాల్లో మూడింటిని సద్వినియోగం చేసుకుంది. అయితే ప్రత్యర్థుల సర్వీస్‌లో ఒక్క బ్రేక్ పాయింట్‌ను కాచుకుని మ్యాచ్‌ను చేజిక్కించుకుంది. మ్యాచ్ మొత్తంలో సానియా జంట 12; పేస్ ద్వయం 18సార్లు అనవసర తప్పిదాలు చేశారు. తమ సర్వీస్‌లో 76 శాతం పాయింట్లు సాధించిన సానియా-డోడిగ్... రెండో సర్వీస్‌లో మాత్రం 61 శాతమే నెగ్గారు. శుక్రవారం జరిగే సెమీస్‌లో సానియా జంట... ఐదోసీడ్ ఎలెనా వెస్నినా
  (రష్యా)- బ్రూనో సోరెస్ (బ్రెజిల్)తో తలపడతారు.
 మరోవైపు సానియా-హింగిస్ జోడి ఇప్పటికే మహిళల డబుల్స్‌లో టైటిల్ పోరుకు చేరుకుంది. ఈ మ్యాచ్ కూడా నేడే జరగనుంది. ఏడోసీడ్ చెక్ జోడి ఆండ్రియా హల్వకోవా-లూసి హర్డెకాతో వీళ్లు తలపడతారు. పదునైన సర్వీస్‌లు.. తిరుగులేని రిటర్న్... బలమైన బేస్‌లైన్ ఆటతో అమెరికా నల్ల కలువ సెరెనా విలియమ్స్... ఆస్ట్రేలియన్ ఓపెన్ మహిళల సింగిల్స్‌లో ఫైనల్ పోరుకు అర్హత సాధించింది. సెమీస్‌లో టాప్‌సీడ్ సెరెనా 6-0, 6-4తో నాలుగోసీడ్ అగ్నెస్కా రద్వాన్‌స్కా (పోలెండ్)ను చిత్తు చేసింది. సెరెనాకు ఇది 26వ గ్రాండ్‌స్లామ్ ఫైనల్ కాగా ఆస్ట్రేలియన్ ఓపెన్ టైటిల్ పోరుకు అర్హత సాధించడం ఇది ఏడోసారి. ఓవరాల్‌గా కెరీర్‌లో 21 గ్రాండ్‌స్లామ్ టైటిల్స్ నెగ్గిన సెరెనా... ఓపెన్ ఎరాలో స్టెఫీగ్రాఫ్ (22) రికార్డుకు అడుగు దూరంలో నిలిచింది.
 మ్యాచ్ మొదలైన తొలి నిమిషంలో క్లీన్ విన్నర్‌తో బ్రేక్ పాయింట్ సాధించిన సెరెనా.... 64 నిమిషాల్లోనే ప్రత్యర్థి ఆట కట్టించింది. తన సర్వీస్ పవర్‌ను చూపెట్టిన అమెరికా స్టార్ నెట్ వద్ద సూపర్ స్మాష్‌తో 2-0 ఆధిక్యంలోకి వెళ్లింది. ఈ దశలో ప్రత్యర్థి సర్వీస్‌ను అడ్డుకునే ప్రయత్నంలో రద్వాన్‌స్కా డబుల్ ఫాల్ట్ చేయడంతో ఆధిక్యం 3-0కు పెరిగింది. కొన్నిసార్లు సెరెనా కొట్టిన కచ్చితమైన షాట్లకు పోలెండ్ అమ్మాయి కోర్టులో పరుగెత్తలేకపోయింది. దీంతో 17 నిమిషాల్లోనే సెరెనా స్కోరు 5-0కు పెరిగింది.
 తర్వాత సర్వీస్‌ను నిలబెట్టుకున్న అమెరికా ప్లేయర్ మరో మూడు నిమిషాల్లో సెట్‌ను ముగించింది.  రెండో సెట్‌లో సెరెనా బేస్‌లైన్ నుంచి కొట్టిన షాట్ నెట్‌కు తగలడం, ఆ వెంటనే రద్వాన్‌స్కా సర్వీస్‌ను నిలబెట్టుకోవడంతో 2-1 ఆధిక్యంలోకి వెళ్లింది. తర్వాత ఇరువురు హోరాహోరీగా తలపడటంతో స్కోరు 3-3తో సమమైంది. డ్యూస్ వరకు వెళ్లిన ఏడో గేమ్‌లో రద్వాన్‌స్కా, ఎనిమిదో గేమ్‌లో సెరెనా సర్వీస్‌లను నిలబెట్టుకున్నారు. అయితే తొమ్మిదో గేమ్‌లో మరోసారి తడబడిన పోలెండ్ ప్లేయర్ సర్వీస్‌ను చేజార్చుకుంది. దీంతో స్కోరు 5-4గా మారింది. ఇక పదో గేమ్‌లో సెరెనా మూడు ఏస్‌లతో తొలి మ్యాచ్ పాయింట్‌ను సాధించింది.  మరో సెమీస్‌లో ఏడోసీడ్ కెర్బర్ (జర్మనీ) 7-5, 6-2తో జొహానా కొంటా (బ్రిటన్)పై నెగ్గింది.


 •  సెరెనా  విలియమ్స్ బయోగ్రఫీ  
 
  ఎత్తు:  5 అడుగుల 9 అంగుళాలు  (1.75 మీటర్లు) బరువు: 70.5 కిలోలు ఆమె షూ సైజ్ 10  సెరెనా గరిష్ట సర్వీస్ స్పీడ్
  గంటకు 207 కిలోమీటర్లు. టెన్నిస్ చరిత్రలో మహిళల్లో  అత్యధిక వేగంతో (210.8) సర్వీస్ చేసింది జర్మనీ క్రీడాకారిణి లిసికి.
  పదేళ్లు కూడా లేని పసితనంలోనే వర్ణవివక్ష సమస్యలు ఎదురైతే... అవి జీవితాంతం వెంటాడుతుంటే ఎవరికైనా కసి పెరుగుతుంది. ఆ కసిని పాజిటివ్ ఎనర్జీగా మలుచుకుంది సెరెనా విలియమ్స్. చరిత్రలోనే అతి గొప్ప టెన్నిస్ స్టార్‌గా ఎదిగింది. స్పోర్ట్స్ ఇలస్ట్రేటెడ్ మ్యాగజైన్ ఏటా ఇచ్చే ప్రతిష్టాత్మక ‘స్పోర్ట్స్ పర్సన్ ఆఫ్ ద ఇయర్’ అవార్డు గెలుచుకుంది.
 
  
  ఓటమితో ఎప్పుడూ కుంగిపోకూడదు. తిరిగి లేవాలి. మరింత కష్టపడాలి. మరింత సాధన చేయాలి. నేను జీవితంలో ప్రతిసారీ అదే చేశాను. ఎప్పుడూ వదలొద్దు అని చాలా మంది చెబుతుంటారు. కానీ ఆ విషయాన్ని మనసులోకి తీసుకుని పోరాడితేనే తిరిగి మళ్లీ పైకి లేవగలుగుతాం. అందుకే ఎప్పుడూ దేని గురించి నిరాశ చెందకూడదు. తిరిగి పోరాడాలి.
 
  మానసిక బలమే...
  సెరెనా టెన్నిస్ ఆడుతుంటే ప్రత్యక్షంగా చూడటం చాలా బాగుంటుంది. మ్యాచ్‌లో వెనకబడిన సమయంలో తనని తాను ప్రోత్సహించుకోవడానికి కేకలు పెడుతుంది. ఇక ఓ గొప్ప పాయింట్ సాధించినప్పుడు తన అరుపు ప్రత్యర్థికే కాదు... ప్రేక్షకుల్లోనూ భయం పెంచుతుంది. ఫిజికల్‌గా ఎంత ఫిట్‌గా ఉంటుందో... మెంటల్‌గా కూడా అంతే బలంగా ఉండటం సెరెనా విజయ రహస్యం. అయితే దీనిని తెచ్చింది మాత్రం ఆమె బాల్యమే.
  
 వామ్మో... సిస్టర్స్!
 1999 నుంచి 2003 వరకు సెరెనా సిస్టర్స్‌ది స్వర్ణయుగం. ఏ టోర్నీ జరిగినా సింగిల్స్‌లో వాళ్లే. డబుల్స్‌లో వాళ్లే. తర్వాత గాయాలు, ఫామ్‌లేమి కారణాలతో కాస్త వెనకబడ్డా... తిరిగి 2009-10 సమయానికి తిరిగి మళ్లీ ప్రపంచాన్ని వణికించారు. కానీ క్రమంగా అక్క ఆట తేలిపోయింది. దీంతో సెరెనా సింగిల్స్‌కే పరిమితమైంది.
 
 
  ఆ ఫిట్‌నెస్‌కు సలామ్
 ప్రస్తుతం సెరెనా వయసు 34 సంవత్సరాలు. ఫెడరర్ వయసు కూడా అంతే. అయితే ఫెడరర్ మీద వయసు ప్రభావం ఎంతో కొంత కనిపిస్తోంది. కానీ అదేంటో సెరెనా మాత్రం రోజు రోజుకూ మరింత ఫిట్‌గా తయారవుతోంది. ప్రొఫెషనల్ టెన్నిస్ సర్క్యూట్‌లోకి అడుగుపెట్టి 20 ఏళ్లు పూర్తయినా... మధ్యలో అనేక సార్లు గాయాల గండాలను అధిగమించినా... ఇంకా ఆ ఫిట్‌నెస్ అలాగే ఉంది.
 
  రికార్డులు
  ఇప్పటివరకు సెరెనా 21 గ్రాండ్‌స్లామ్ సింగిల్స్ టైటిల్స్, 13 డబుల్స్ టైటిల్స్, 2 మిక్స్‌డ్ డబుల్స్ టైటిల్స్ సాధించింది.
  అటు పురుషుల్లోగానీ, ఇటు మహిళల్లోగానీ సింగిల్స్, డబుల్స్ విభాగాల్లో ‘కెరీర్ గోల్డెన్‌స్లామ్’ (నాలుగు గ్రాండ్‌స్లామ్ టైటిల్స్‌తోపాటు ఒలింపిక్స్‌లో స్వర్ణం నెగ్గడం)  సాధించిన ఏకైక ప్లేయర్ సెరెనాయే.
  మహిళల క్రీడా ప్రపంచంలో ఇప్పటివరకు టోర్నమెంట్‌ల ద్వారా అత్యధిక ప్రైజ్‌మనీ (7 కోట్ల 40 లక్షల 83 వేల 421 డాలర్లు-రూ. 489 కోట్లు) సంపాదించిన క్రీడాకారిణిగా గుర్తింపు.
  30 ఏళ్ల వయసు దాటాక ఎనిమిది గ్రాండ్‌స్లామ్ సింగిల్స్ టైటిల్స్ నెగ్గిన ఏకైక క్రీడాకారిణిగా గుర్తింపు.
  
  నిజమైన చాంపియన్
  సెరెనాతో ఆడటం ఎవరికీ సులభం కాదు. ఎందుకంటే తను ఏ పాయింట్ కూడా సులభంగా ఇవ్వదు. బ్రేక్ పాయింట్ దగ్గర అయినా, మ్యాచ్ పాయింట్ దగ్గర అయినా ఏ దశలో అయినా ప్రత్యర్థి తన శక్తినంతా ఉపయోగించి  పోరాడితేనే పాయింట్ దక్కుతుంది. అందుకే సెరెనా నిజమైన చాంపియన్  
                       - షరపోవా
  
   మోడల్‌గా ఉన్నారా?
  ఫ్యాషన్ డిజైనర్. సొంతంగా స్విమ్ సూట్స్, ఇన్నర్‌వేర్ ఉత్పత్తులను తయారు చేస్తుంది. న్యూయార్క్ ఫ్యాషన్ షోలో కనిపిస్తుంది. తన ఉత్పత్తులకు తనే మోడల్.
  
   బ్రాండ్ అంబాసిడర్‌గా ఎంత సంపాదించారు?
  స్పాన్సర్స్ ద్వారా ఏడాదికి 85 మిలియన్ డాలర్లు (రూ.561 కోట్లు) సంపాదిస్తుంది. తనకంటే షరపోవా 90 మిలియన్ డాలర్లు (రూ.594 కోట్లు) ఎక్కువ సంపాదిస్తుంది. ఓవరాల్‌గా ఫెడరర్, షరపోవా తర్వాత స్థానం సెరెనాది.
  
   షూ సైజ్?  10.
   నటన?
  పలు టీవీ సిరీస్‌లలో నటించింది. ఒకట్రెండు సినిమాల్లో చిన్న క్యారెక్టర్స్ వేసింది.
  
   ఇండియా వచ్చిందా?  
   సెరెనా తొలిసారి 2008లో బెంగళూరు వచ్చింది. ఆ సమయంలో ఆమె, అక్క వీనస్ కలిసి చీర కట్టి ఓ కార్యక్రమంలో పాల్గొని సందడి చేశారు.
  
  
 
  టెన్సిస్ కోర్టులో కన్నీళ్లు పెట్టిన సందర్భం?
  2012 ఫ్రెంచ్ ఓపెన్ తొలి రౌండ్ మ్యాచ్‌లో రెండో సెట్ టై బ్రేకర్‌లో 5-1 ఆధిక్యంలో ఉంది. ఇక ఒక్క పాయింట్ వస్తే టైటిల్ గెలిచేది. ఈ దశ నుంచి మ్యాచ్ పోగొట్టుకుంది. ఈ ఓటమి తర్వాత దుఃఖాన్ని ఆపుకోలేకపోయింది. గాయాల కారణంగా ఏడ్చిన సందర్భాలు ఉన్నా... మ్యాచ్ ఓడిపోయాక బాగా ఎమోషన్ కావడం 2012లోనే.
  
   ప్రేమాయణం
   2002లో కేస్వాన్ జాన్సన్ అనే పుట్‌బాల్ ఆటగాడితో ప్రేమ  2004 నుంచి 2006 వరకు డెరైక్టర్ బ్రెట్ రాట్నర్‌తో ప్రేమ  2007 నుంచి ఏడాది పాటు నటుడు జాకీలాంగ్‌తో ప్రేమాయణం  2008 నుంచి రెండు సంవత్సరాల పాటు కామన్ అనే పేరున్న సింగర్‌తో ప్రేమలో గడిపింది  అమెరికా బాస్కెట్‌బాల్ లీగ్ ఎన్‌బీఏలో ప్లేబోయ్‌గా పేరున్న స్టోడిమేర్‌తో 2010లో కొంతకాలం ప్రేమాయణం  2011లో కెనడా సింగర్ డ్రేక్‌తో కొంతకాలం డేటింగ్ చేసింది  2012లో టెన్నిస్ క్రీడాకారుడు దిమిత్రోవ్‌తో కలిసి ఉన్నట్లు వార్తలు వచ్చాయి  2013 నుంచి ప్రస్తుతం వరకు టెన్నిస్ కోచ్ ప్యాట్రిక్‌తో ప్రేమలో ఉంది.
  
   ఓటమిని ఎలా స్వీకరిస్తుంది?
  ఓటమిని అంగీకరించదు. మ్యాచ్ ముగిశాక ఒక రోజు పాటు కోపంతోనే ఉంటుంది. పలుసార్లు మ్యాచ్ ఓడిపోయాక మీడియా ప్రశ్నలకు విసుగ్గా సమాధానం చెప్పింది.
  హ్యూమన్ అనాటమీ అండ్ ఫిజియాలజీ! అమెరికాలో వైద్య విద్యకు ముందు విద్యార్థులు చదివే పుస్తకం. ముఖచిత్రం సెరెనా విలియమ్స్‌ది. మనిషి శరీరం బాగా క్లిష్టమైన స్థాయిలో ఎలా పని చేస్తుందో ఈ పుస్తకంలో వివరిస్తారు. దిగ్గజాలుగా ఎదిగిన క్రీడాకారుల మెంటాలిటీ ఒకటే. పోరాడు... చివరి క్షణం దాకా పోరాడు. సెరెనా కూడా అటు కోర్టులో ప్రత్యర్థులతో, ఇటు కోర్టు బయట జాత్యహంకారులతో పోరాడుతూనే ఉంది.
  
  ఎవరైనా కోర్టులోకి వస్తున్నప్పుడు ఎంతో కొంత ఒత్తిడితో ఉంటారు. కానీ సెరెనా మాత్రం మ్యాచ్ గెలవబోతున్నాననే ధీమాతో వస్తుంది. నిజానికి తనను చూస్తే ప్రత్యర్థి సగం మ్యాచ్‌కు ముందే ఓడిపోతుంది. ఇలాంటి లక్షణం గతంలో మైక్ టైనస్‌లో కనిపించేది. ప్రత్యర్థులెవరూ అతని కళ్లలోకి చూసేవారు కాదు. చూస్తే భయంతో ఓడిపోతారని. ప్రస్తుతం సెరెనా కూడా టైసన్ లాగే ప్రత్యర్థులను వణికిస్తోంది.
  
  మూడేళ్ల వయసులోనే
  సెరెనా విలియమ్స్ అమెరికాలోని చాలా సాధారణ కుటుంబం నుంచి వచ్చింది. ఐదుగురు అక్కచెల్లెళ్లలో ఆమె చిన్నది. వాళ్ల అమ్మ ఆరెసెన్ ప్రిన్స్‌కు ముగ్గురు ఆడపిల్లలు పుట్టిన తర్వాత రిచర్డ్ విలియమ్స్‌ను రెండో వివాహం చేసుకుంది. రిచర్డ్ విలియమ్స్ దంపతులకు తొలి సంతానం వీనస్. రెండో అమ్మాయి సెరెనా. రిచర్డ్‌కు టెన్నిస్ అంటే ఆసక్తి ఎక్కువ. ఈ ఆటలో మాత్రమే డబ్బులు బాగా వస్తాయని, ఒక్క గ్రాండ్‌స్లామ్ గెలిస్తే లైఫ్ సెటిల్ అయిపోతుందని చిన్న వయసులోనే రాకెట్స్ కొని కూతుళ్లు ఇద్దరికీ ఇచ్చేశాడు. 1984లో మూడేళ్ల వయసులో సెరెనా తొలిసారి టెన్నిస్ రాకెట్ చేతబట్టింది.
  
  అయితే నల్ల జాతీయులను అమెరికాలో స్వేచ్ఛగా ఆడుకోనివ్వరని రిచర్డ్స్‌కు భయం. చాలాకాలం పాటు ఇంట్లోనే కూతుళ్లకు టెన్నిస్ నేర్పించాడు. చిన్నగా టోర్నీలకు పంపడం ప్రారంభించాడు. తన జాతకాన్ని మార్చేది వీనస్ అని రిచర్డ్స్ నమ్మకం. పదేపదే అదే మాట అనేవాడు. దీనివల్ల తెలియకుండానే ఓ వివక్ష చూపించాడు. అలా ఆరేళ్ల వయసులోనే సెరెనాకు అర్థమైపోయింది... గెలవాలంటే పోరాడాలని.
  
  ప్రత్యర్థి ప్రపంచమే!
  క్రమంగా అక్కాచెల్లెళ్లు బయటకు వెళ్లి టోర్నమెంట్స్ ఆడటం మొదలుపెట్టారు. వీనస్ కంటే సెరెనా బాగా ఆడేది. పదేళ్ల వయసు వచ్చేసరికి సెరెనా ఆ ఏజ్ గ్రూప్‌లో అమెరికాలో నంబర్‌వన్‌గా ఎదిగింది. అయితే సెరెనా విజయాలను శ్వేత జాతీయుల తల్లిదండ్రులు జీర్ణించుకోలేకపోయారు. జాతి వివక్ష వ్యాఖ్యలు మొదలయ్యాయి. అప్పుడు సెరెనాకు బాగా తెలిసిపోయింది... తాను పోరాడాల్సింది ప్రపంచంతో అని.
  
  పాఠశాలలో హేళన... వెక్కిరించే అబ్బాయిలు... అడుగడుగునా కనిపించే ‘వివక్ష’. 1995లో తొలిసారి ప్రొఫెషనల్ సర్క్యూట్‌లోకి 14 ఏళ్ల వయసులో అడుగుపెట్టింది. ఆ తర్వాత రెండేళ్లకే మగవాళ్లకు సవాళ్లు విసురుతూ.. తనపై గెలిచి చూపించమనేది. అటు వీనస్ కూడా అంతే. సెరెనాకు ఏమాత్రం తగ్గేది కాదు. అక్కాచెళ్లెల్లు ఎప్పుడూ ఒకే మాట మీద ఉండేవారు. ఎవరినైనా సవాల్ చేసేవారు.
  
  ‘ఓపెన్’ గెలిచినా వెక్కిరింతలే
  1999లో యూఎస్ ఓపెన్ గ్రాండ్‌స్లామ్ టైటిల్ సాధించింది. దీనికి కొద్దిగా ముందే ఫ్రెంచ్ ఓపెన్‌లో అక్కతో కలిసి డబుల్స్ టైటిల్ సాధించినా, సింగిల్స్ టైటిల్ నెగ్గడంలో ఉన్న మజా ఏంటో సెరెనాకు తెలిసింది. అంతేకాదు చిన్నప్పుడు తనని అవమానించిన వ్యక్తులు చూస్తుండగా... తన దేశంలోనే తొలిసారి సగర్వంగా ట్రోఫీని అందుకుంది. అంతే... అప్పుడు ప్రారంభమైన ప్రస్థానం 2015 వరకూ కొనసాగుతూనే ఉంది.
  
  2000వ సంవత్సరం నాటికి అక్కాచెళ్లెల్లు ఇద్దరు పీక్స్‌లోకి వచ్చేశారు. ఎవరు గెలుస్తారో ఎవరూ చెప్పలేని పరిస్థితి. ఆ ఇద్దరి మధ్య పోరాటం చూడటానికి టెన్నిస్ అభిమానులకు రెండు కళ్లు సరిపోయేవి కావు. టెన్నిస్ ప్రపంచం మీద విలియమ్స్ సిస్టర్స్ ముద్ర పడిపోతూ ఉన్న సమయంలో... ఓ ఆందోళన. అక్కాచెళ్లల్ల మధ్య మ్యాచ్‌లలో ఎవరు గెలవాలో తండ్రి రిచర్డ్స్ ముందే నిర్ణయిస్తున్నాడంటూ విమర్శలు వచ్చాయి. ఇది ఆ కుటుంబానికి షాక్. తామేంటో, తమ సత్తా ఏంటో చూపించినా... ఇంకా తేలికగా చూస్తున్నారు.... సెరెనా కోపం నషాళానికి అంటింది. అప్పుడు నిర్ణయించుకుంది... ఇక ఎవరినీ ఉపేక్షించకూడదని.
  
  చీదరించుకున్నా... చారిటీ కోసం...
  2001లో ఇండియన్ వెల్స్ ఓపెన్. సెరెనా, వీనస్‌ల మధ్య మ్యాచ్. తనకు గాయం ఉందని ఆడలేనని వీనస్ ముందే చెప్పేసింది. కానీ నిర్వాహకులు మాత్రం ఆడుతుందనే ఆశతో చివరిక్షణం వరకు చూశారు. కానీ రాలేదు. దీంతో అభిమానులు అక్కాచెళ్లెల్లు కలిసి మోసం చేస్తున్నారని భావించారు. సెరెనా ఫైనల్ ఆడుతున్నప్పుడు అడుగడుగునా హేళన చేశారు. దీంతో సెరెనా 14 ఏళ్ల పాటు ఆ టోర్నమెంట్‌ను బహిష్కరించింది. ఎవరు ఎంత బతిమాలినా ఒప్పుకోలేదు. తాజాగా ఈ ఏడాది 2015లో మళ్లీ ఆ టోర్నమెంట్ ఆడింది. అది కూడా ఓ చారిటీ సంస్థ కోరిక మేరకు ఆడింది.
  
  అంపైర్లు కూడా ప్రత్యర్థులే
  ఇక 2004 యూఎస్ ఓపెన్‌లో అయితే ఏకంగా అంపైర్ సెరెనా పట్ల వివక్ష చూపించారు. పదే పదే కావాలని సెరెనాకు వ్యతిరేకంగా నిర్ణయాలు ఇచ్చారు. దీనిపై తను గొంతు విప్పింది. ఎందుకిలా? అంటూ ప్రశ్నించింది. ఫలితమే... హాక్‌ఐ (ఏ్చఠీజు ఉడ్ఛ) టెక్నాలజీ. అప్పుడు సెరెనా చేసిన పోరాటం వల్ల ఇప్పుడు మిగిలిన క్రీడాకారులంతా టెక్నాలజీ సహాయంతో న్యాయమైన నిర్ణయాలను చూస్తున్నారు.
  
  సెరెనా కోపాన్ని ఎప్పుడూ దాచుకోదు. 2009 యూఎస్ ఓపెన్‌లో తనకు వ్యతిరేకంగా నిర్ణయాలు వస్తున్నాయనే కోపంతో లైన్ అంపైర్‌ను చంపేస్తానని బెదిరించింది. అంతే... అవకాశం కాచుకుని కూర్చున్నవాళ్లంతా జూలు విదిల్చారు. మామూలుగా జరిమానాతో సరిపెట్టొచ్చు. కానీ నిషేధం విధిస్తామన్నారు. క్షమించమని బహిరంగంగా కోరితే నిర్ణయాన్ని సమీక్షిస్తామన్నారు. తనకు ఇష్టం లేకపోయినా శ్రేయోభిలాషుల సలహా మేరకు క్షమించమని కోరింది. నిషేధాన్ని తప్పించుకుంది, కానీ లక్షా 75 వేల డాలర్ల జరిమానా చెల్లించాల్సి వచ్చింది.
  అయితే ఈ రెండు దశాబ్దాలలో సెరెనా శాంతించింది. వయసుతో పాటు తనలో పరిణితి కూడా వచ్చింది. అయినా కోర్టులో అడుగుపెట్టగానే వచ్చే కసి మాత్రం తగ్గలేదు. తగ్గదు కూడా. తనలో ఆ తపన, పట్టుదల తగ్గిన రోజు సెరెనా కోర్టులో కనిపించదు.
                                                                                                               - బత్తినేని జయప్రకాష్
  
  


 టెన్నిస్ టాప్ స్టార్స్ రోజర్ ఫెడరర్, నొవాన్ జొకోవిచ్ 10 కోట్ల డాలర్ల (రూ.660 కోట్లు) ప్రైజ్‌మనీ క్లబ్‌లో చేరనున్నారు. 34 ఏళ్ల ఫెడరర్ వివిధ టోర్నీల ద్వారా ఇప్పటివరకూ 97.3 మిలియన్ డాలర్లు (రూ.643 కోట్లు) ప్రైజ్‌మనీ అందుకోగా... 28 ఏళ్ల జొకోవిచ్ 94 మిలియన్ డాలర్లు (రూ.621 కోట్లు) సాధించాడు. ఇప్పటివరకూ టెన్నిస్ చరిత్రలో ఎవరూ 10 కోట్ల డాలర్ల ప్రైజ్‌మనీని సంపాదించలేదు. 2016లో ఫెడరర్, జొకోవిచ్‌లలో ఒకరు ముందుగా ఈ మార్కును చేరుకుని చరిత్ర సృష్టించబోతున్నారు.
  


 పారిస్: ఆ ఇద్దరూ టెన్నిస్ రారాజులు. ఒకరు స్విస్ దిగ్గజం రోజర్ ఫెదరర్ కాగా మరొకరు సెర్బియా స్టార్ నొవాక్ జొకోవిచ్. వీరిలో జొకోవిచ్ ప్రపంచ నంబర్ వన్ ర్యాంకులో కొనసాగుతుండగా, ఫెదరర్ మూడో స్థానంలో ఉన్నాడు. టైటిల్స్ విషయంలో కూడా వీరిద్దరూ తమదైన ముద్రను వేశారు. ఫెదరర్ ఖాతాలో 17 గ్రాండ్ స్లామ్స్ ఉండగా..  జొకోవిచ్ ఇప్పటివరకూ 10 గ్రాండ్ స్లామ్స్ ను సాధించాడు. ఇదిలా ఉంచితే .. ఆట ద్వారా వచ్చే ఆదాయంలో  మాత్రం వీరిద్దరూ ఏ క్రీడాకారుడికి అందనంత ఎత్తులో ఉన్నారు.
 
 
 చివరిసారిగా 2012 లో వింబుల్టన్ గ్రాండ్ స్లామ్ ను గెలిచిన ఫెదరర్ ఆదాయంలో మాత్రం దూసుకుపోతున్నాడు. ప్రస్తుతం ఫెదరర్ 97 మిలియన్ డాలర్ల (సుమారు రూ. 641 కోట్లు) ఆదాయంతో ముందు వరుసలో ఉండగా,  జొకోవిచ్ 94 మిలియన్ డాలర్లు (సుమారు రూ.621కోట్లు) సంపాదనతో తరువాతి స్థానంలో ఉన్నాడు.  దీంతో ఈ దిగ్గజ ఆటగాళ్లు  వంద మిలియన్ డాలర్ల క్లబ్ లో చేరేందుకు అతి కొద్ది దూరంలో నిలిచారు. వచ్చే ఏడాది ఆరంభంలో జరిగే ఆస్ట్రేలియా ఓపెన్ లో ఫెదరర్ టైటిల్ ను కైవసం చేసుకుంటే మాత్రం 100 మిలియన్ డాలర్ల మార్కును చేరుకునే అవకాశం ఉంది.
  
 మరోపక్క అద్భుతమైన ఫామ్ లో ఉన్న జొకోవిచ్ .. ఆస్ట్రేలియా ఓపెన్ లో డిఫెండింగ్ చాంపియన్ గా బరిలోకి దిగుతున్నాడు.  ఈ ఏడాది జొకోవిచ్ మూడు గ్రాండ్ స్లామ్స్ ను తన ఖాతాలో వేసుకోవడమే కాకుండా 21.5 మిలియన్ డాలర్లు(సుమారు రూ.133 కోట్లు)ను టెన్నిస్ బ్యాట్ ద్వారా రాబట్టడం విశేషం. ఇదిలా ఉండగా ఈ ఏడాది ఫోర్బ్స్ జాబితా ప్రకారం ఎండోర్స్ మెంట్ ద్వారా అత్యధిక మొత్తాన్ని సంపాదించిన ఐదో ఆటగాడిగా ఫెదరర్ గుర్తింపు సాధించాడు. ఈ ఏడాది ఫెదరర్ కు ఎండోర్స్ మెంట్ ద్వారా 58 మిలియన్ డాలర్లు(సుమారు 383 కోట్లు) ఆదాయం లభించింది. వీరిద్దరూ ఆటలోనే కాదు.. ఆదాయంలో కూడా ఒకరితో ఒకరు పోటీ పడటం నిజంగా ఆసక్తికరమే కదా!


 సింగిల్స్, డబుల్స్‌లో విజయం   ఐపీటీఎల్‌లో ఇండియన్ ఏసెస్ ‘సిక్సర్’
 
  న్యూఢిల్లీ: వేదిక మారినా, ఫార్మాట్ మారినా... తన చిరకాల ప్రత్యర్థి రోజర్ ఫెడరర్ (స్విట్జర్లాండ్-యూఏఈ రాయల్స్)పై రాఫెల్ నాదల్ (స్పెయిన్-ఇండియన్ ఏసెస్) మరోసారి పైచేయి సాధించాడు. అంతర్జాతీయ ప్రీమియర్ టెన్నిస్ లీగ్ (ఐపీటీఎల్)లో భాగంగా వీరిద్దరూ శనివారం పురుషుల సింగిల్స్, డబుల్స్ మ్యాచ్‌ల్లో ముఖాముఖిగా తలపడ్డారు. పురుషుల డబుల్స్‌లో రోహన్ బోపన్న-రాఫెల్ నాదల్ (ఏసెస్) ద్వయం 6-4తో ఫెడరర్-మారిన్ సిలిచ్ (యూఈఏ రాయల్స్) జంటను ఓడించగా... పురుషుల సింగిల్స్‌లో నాదల్ 6-5 (7/4)తో ఫెడరర్‌ను ఓడించాడు.
  
   ఏటీపీ సర్క్యూట్ ముఖాముఖి రికార్డులో నాదల్ 23-11తో ఫెడరర్‌పై ఆధిక్యంలో ఉన్నాడు. నాదల్ ఆల్‌రౌండ్ ప్రదర్శన కారణంగా ఐపీటీఎల్‌లో ఇండియన్ ఏసెస్ జట్టు జైత్రయాత్రను కొనసాగిస్తూ తమ ఖాతాలో ఆరో విజయాన్ని నమోదు చేసుకుంది. యూఏఈ రాయల్స్ జట్టుపై ఏసెస్ జట్టు 30-19 గేమ్‌ల తేడాతో విజయం సాధించింది. మిక్స్‌డ్ డబుల్స్‌లో సానియా-బోపన్న జోడీ  (ఏసెస్) 6-4తో నెస్టర్-మ్లాడెనోవిచ్ (రాయల్స్) జంటపై; మహిళల సింగిల్స్‌లో రద్వాన్‌స్కా (ఏసెస్) 6-1తో మ్లాడెనోవిచ్ (రాయల్స్)పై; లెజెండ్ సింగిల్స్‌లో ఫాబ్రిస్ సాంతోరో (ఏసెస్) 6-5 (7/4)తో గొరాన్ ఇవానిసెవిచ్ (రాయల్స్)పై గెలిచారు. మరో మ్యాచ్‌లో సింగపూర్ స్లామర్స్ 24-22తో జపాన్ వారియర్స్‌పై నెగ్గింది.
  


 మాడ్రిడ్ : స్పెయిన్‌కు చెందిన జీసస్ అపారికో అనే వ్యక్తికి స్విట్జర్లాండ్ టెన్నిస్ స్టార్ ఫెడరర్ అంటే విపరీతమైన అభిమానం. తన రోల్‌మోడల్ ఫెడరర్ ఆట చూడటానికి మిగతా పనులన్నీ మానేసేవాడు. అయితే 2004 డిసెంబరు 12న అప్పటికి 18 ఏళ్ల వయసున్న అపారికో... ఘోర రోడ్డు ప్రమాదంలో గాయపడి కోమాలోకి వెళ్లిపోయాడు. కట్‌చేస్తే... 11 ఏళ్ల తర్వాత ఇటీవలే కోమాలోంచి బయటపడ్డాడు. అయితే ఏ విషయాన్నీ పూర్తిగా గుర్తు తెచ్చుకోలేకపోయాడట.
 
 ఆ సమయంలో ఫెడరర్ ఆడుతున్న టెన్నిస్ మ్యాచ్‌ను చూసి ఒక్కసారి అవాక్కయ్యాడంట. ఫెడరర్ ఇంకా ఆడుతున్నాడా..? అంటూ ఒక్కసారిగా అప్పట్లో ఫెడరర్ సాధించిన ఘనతలను చెప్పడం మొదలుపెట్టాడట. తను కోమాలోకి వెళ్లినప్పుడు ప్రపంచ నంబర్‌వన్‌గా ఉన్న ఫెడరర్ ఆ సీజన్‌లో నాలిగింటిలో మూడు గ్రాండ్‌స్లామ్‌లు గెలిచాడని చెబుతున్నాడు. ‘ఫెడరర్ 34 ఏళ్ల వయసులోనూ ఇంకా ఆడుతుండటంతో పాటు రెండో ర్యాంక్‌లో ఉన్నాడు. మొదట దీనిని నమ్మలేకపోయా.
 
 నన్ను ఆట పట్టిస్తున్నారని భావించా. 17 గ్రాండ్‌స్లామ్ టైటిల్స్ గెలిచాడని చెప్పటంతో సిగ్గుతో చేతులతో నా ముఖాన్ని కప్పేసుకున్నా. బాగా ఆడతాడని అనుకున్నా. కానీ ఇన్ని టైటిల్స్ గెలుస్తాడని మాత్రం ఊహించలేదు. అప్పట్లో ఫెడరర్‌కు హెవిట్ గట్టిపోటీ ఇచ్చేవాడు’ అని అపారికో వెల్లడించాడు. ఫెడరర్‌ను గుర్తించాక ఇతర పాత విషయాలన్నీ కూడా గుర్తు తెచ్చుకున్నాడట. యాక్సిడెంట్‌కు ముందు వింబుల్డన్‌కు వెళ్లాలని డబ్బులు పొదుపు చేసుకున్న అపారికో... ఇప్పుడు తన హీరో ఆటను ప్రత్యక్షంగా చూసేందుకు సిద్ధమవుతుండటం కొసమెరుపు.


 క్రీడావిభాగం: గత దశాబ్దకాలంలో టెన్నిస్ అభిమానులు రెండు వర్గాలుగా చీలిపోయారు. ఒకరు ఫెడరర్ వీరాభిమానులైతే... రెండో వర్గం నాదల్ కోసం ప్రాణమిచ్చేవాళ్లు. ఈ ఇద్దరి మధ్యలో ఐదేళ్ల కాలంగా అనేక విజయాలు సాధిస్తున్నా జొకోవిచ్ మాత్రం అభిమానులను సంపాదించుకోలేకపోయాడు. దీనికి కారణం లేకపోలేదు. ఫెడరర్, నాదల్ ఇద్దరి ఆటశైలి పూర్తిగా భిన్నం. ఫెడరర్ కోర్టులో ఈ చివరి నుంచి ఆ చివరికి సీతాకోక చిలుకలా వెళతాడు. చూడటానికి ఆహ్లాదంగా ఉంటుంది. నాదల్ బేస్‌లైన్ దగ్గర గెరిల్లా తరహాలో దూకుడుగా ఆడతాడు. ఒకరు పచ్చిక కోర్టుల్లో పరుగులు పెట్టించే ఆటగాడైతే... మరొకరు మట్టి కోర్టులో మహరాజు. ఈ ఇద్దరి స్థాయిలో అభిమానులు జొకోవిచ్‌ను ఆదరించలేదు. అయితే ఈ ఫ్యాన్స్ అందరూ అభిమానించే రెండో వ్యక్తి జొకోవిచ్.
 
 అటు ఫెడరర్ అభిమానులు, ఇటు నాదల్ అభిమానులు కూడా తమ రెండో ఓటును జొకోవిచ్‌కే వేశారు. నిజానికి ఇది జొకోవిచ్ తప్పుకాదు. అతను గొప్ప హాస్య చతురత ఉన్న వ్యక్తి. కోర్టులో ప్రత్యర్థుల శైలిని అనుకరిస్తూ తాను చేసే విన్యాసాలకు నవ్వుకోని టెన్నిస్ అభిమాని లేడు. అలాగే ప్రత్యర్థిని గౌరవించడంలోనూ అతను ముందుంటాడు. యూఎస్ ఫైనల్ గెలిచాక మాట్లాడుతూ ‘బహుశా టెన్నిస్ చరిత్రలోనే అతి గొప్ప ఆటగాడు ఫెడరర్’ అంటూ కితాబివ్వడం తన స్ఫూర్తికి నిదర్శనం. అయినా మిగిలిన ఇద్దరి స్థాయిలో అభిమానులను సంపాదించుకోలేకపోయాడు. ఇది జొకోవిచ్ కూడా గమనించాడు. ‘ఫెడరర్‌లాంటి గొప్ప ఆటగాడికి ప్రపంచంలో ఎక్కడ ఆడినా మద్దతు లభిస్తుంది. ఏదో ఒక రోజు ఆ స్థాయిలో అభిమానులను సంపాదించుకోవాలనేది నా కోరిక’ అని యూఎస్ టైటిల్ గెలిచాక వ్యాఖ్యానించాడు.
  ఆట పరంగా జొకోవిచ్ కాస్త ఫెడరర్‌కు దగ్గరగా ఉంటాడు. ఫెడరర్ 7 వింబుల్డన్ టైటిల్స్ సాధిస్తే... నాదల్ 9 ఫ్రెంచ్ టైటిల్స్ కొల్లగొట్టాడు. జొకోవిచ్ సాధించిన 10 గ్రాండ్‌స్లామ్‌లలో 5 ఆస్ట్రేలియన్ ఓపెన్ ద్వారా వచ్చినవే. అయితే ఆస్ట్రేలియన్ ఓపెన్ మీద జొకోవిచ్ ముద్ర లేకపోవడం కాస్త ఆశ్చర్యకరమే. అటు ఫెడరర్, నాదల్ ఇద్దరూ అన్ని గ్రాండ్‌స్లామ్ టైటిల్స్‌నూ సాధిస్తే... జొకోవిచ్‌కు మాత్రం ఫ్రెంచ్ ఇంకా అందలేదు. అతని కెరీర్‌లో ఉన్న లోటు ఇదే. ఆ ఒక్క టైటిల్ కూడా అందితే అతను పరిపూర్ణ ఆటగాడవుతాడు.
 
 ఒత్తిడిలోనూ సులభంగా...
 ఆదివారం రాత్రి జరిగిన యూఎస్ ఓపెన్ ఫైనల్లో జొకోవిచ్‌కు ఫెడరర్ నుంచే కాదు ప్రేక్షకుల నుంచి కూడా గట్టిపోటీ ఎదురయింది. ఒక దశలో ఫెడరర్ సాధించిన ప్రతి పాయింట్‌కూ స్టేడియం హోరెత్తింది. మొత్తం న్యూయార్క్ నగరంతో జొకోవిచ్ పోరాడాడా? అనిపించింది. అంత ఒత్తిడిని కూడా అతను జయించాడు. గత మూడేళ్లుగా ఫెడరర్ టైటిల్స్, జోరు తగ్గాయి. కానీ ఈ ఏడాది వింబుల్డన్ నుంచి అతను అద్భుతంగా ఆడుతున్నాడు. తన కెరీర్‌లో పీక్ దశలో ఆడిన టెన్నిస్‌ను మళ్లీ అభిమానులకు ఫెడరర్ రుచి చూపిస్తున్నాడు. అయితే జొకోవిచ్ దీనికి సన్నద్ధమై వచ్చాడు. ఫెడరర్ తీసుకొచ్చిన కొత్త టెక్నిక్‌ను, వైవిధ్యాన్ని జొకో పసిగట్టి సమర్థంగా ఎదుర్కొన్నాడు. ఈసారి కూడా జొకోవిచ్ గెలుస్తాడనే నమ్మకం అభిమానుల్లో ఉన్నా... టోర్నీలో ఫెడరర్ చూపించిన అసమాన ఆటతీరు పోరులో ఉత్కంఠను పెంచింది. అయినా చివరకు జొకో జోరును ఫెడెక్స్ ఆపలేకపోయాడు.
 
 దిగ్గజాల సరసన
  కెరీర్‌లో పది గ్రాండ్‌స్లామ్ టైటిల్స్ సాధించడం చాలా గొప్ప ఘనత. అతనికంటే ముందు ఈ మార్కును కేవలం ఏడుగురు మాత్రమే చేరుకున్నారు. జొకోవిచ్ ఇదే జోరును కొనసాగిస్తే ఫెడరర్ (17) టైటిల్స్ రికార్డును చేరడం కూడా కష్టమేమీ కాదు. ఇప్పటికే ‘ఆల్‌టైమ్ గ్రేట్’ జాబితాలో జొకోవిచ్ చేరిపోయాడు.  ఫెడరర్, నాదల్ ఒకరకంగా కెరీర్‌లో పీక్ స్టేజ్‌ను దాటి వచ్చేశారనే అనుకోవాలి. ఇక ముర్రే, వావ్రింకా అడపాదడపా మెరుస్తారే తప్ప జొకో స్థాయి లేదు. ప్రస్తుతం ఉన్న ఫామ్, తన ప్రణాళిక చూస్తే రాబోయే మూడు నాలుగేళ్లు జొకోవిచ్ హవా కొనసాగడం ఖాయంగా కనిపిస్తోంది. 2011తో పోలిస్తే ఇప్పుడు జొకోవిచ్‌లో పరిణతి బాగా పెరిగింది. భర్తగా, తండ్రిగా తన బాధ్యత పెరగడం వల్ల టెన్నిస్‌ను చూసే దృక్పథంలోనూ తేడా వచ్చిందని అంటున్నాడు. శారీరకంగా, మానసికంగా కూడా జొకోవిచ్ దృఢంగా తయారయ్యాడు.  శరీరం, మనసు రెండింటి మీదా నియంత్రణతో ఉన్న ఆటగాడు కచ్చితంగా ఎప్పుడూ చాంపియన్‌గానే ఉంటాడు. జొకోవిచ్ ఇదే కోవలోకి వస్తాడు.
  


 యూఎస్ ఓపెన్ విజేత జొకోవిచ్  
 కెరీర్‌లో పదో గ్రాండ్‌స్లామ్ టైటిల్ కైవసం
 ఫైనల్లో ఫెడరర్‌పై అద్భుత విజయం    
 రూ. 25 కోట్ల 21 లక్షల ప్రైజ్‌మనీ సొంతం
  
 ప్రత్యర్థి గొప్పవాడైతే తనలోని నైపుణ్యం మరింతగా బయటపడుతుందని నిరూపిస్తూ... సెర్బియా టెన్నిస్ యోధుడు నొవాక్ జొకోవిచ్ యూఎస్ ఓపెన్‌లో విజేతగా నిలిచాడు. టెన్నిస్‌లో పరిపూర్ణ ఆటతీరుకు పెట్టింది పేరైన ఫెడరర్‌లాంటి ప్రత్యర్థి అంతిమ సమరంలో ఎదురునిలిస్తే... ‘స్విస్’ స్టార్‌కంటే తానేం తక్కువ కాదని రుజువు చేస్తూ జొకోవిచ్ జయకేతనం ఎగురవేశాడు. కెరీర్‌లో పదో గ్రాండ్‌స్లామ్ సింగిల్స్ టైటిల్‌ను సొంతం చేసుకొని సమకాలీన టెన్నిస్‌లో ‘దశ’ ధీరుడిగా తనకంటూ ప్రత్యేక స్థానాన్ని ఏర్పరచుకున్నాడు.
  
 న్యూయార్క్: మూడేళ్లుగా ఊరిస్తున్న ‘గ్రాండ్‌స్లామ్’ విజయాన్ని ఈసారైనా సాధించాలని ఆశించిన స్విట్జర్లాండ్ దిగ్గజం రోజర్ ఫెడరర్ ఆశలను వమ్ము చేస్తూ... సెర్బియా స్టార్ నొవాక్ జొకోవిచ్ మరోసారి తన ఆధిపత్యాన్ని చాటుకున్నాడు. సీజన్ చివరి గ్రాండ్‌స్లామ్ టోర్నమెంట్ యూఎస్ ఓపెన్‌లో పురుషుల సింగిల్స్ చాంపియన్‌గా నిలిచాడు. భారత కాలమానం ప్రకారం సోమవారం ఉదయం జరిగిన ఫైనల్లో టాప్ సీడ్, ప్రపంచ నంబర్‌వన్ జొకోవిచ్ 6-4, 5-7, 6-4, 6-4తో రెండో సీడ్ ఫెడరర్‌ను ఓడించాడు. తద్వారా తన కెరీర్‌లో రెండోసారి యూఎస్ ఓపెన్ టైటిల్‌ను, ఓవరాల్‌గా పదో గ్రాండ్‌స్లామ్ ట్రోఫీని హస్తగతం చేసుకున్నాడు.
  
 విజేతగా నిలిచిన జొకోవిచ్‌కు 38 లక్షల డాలర్ల (రూ. 25 కోట్ల 21 లక్షలు) ప్రైజ్‌మనీ లభిం చింది. ఈ ప్రైజ్‌మనీలో యూఎస్ ఓపెన్‌కు సన్నాహకంగా నిర్వహించిన టోర్నీలలో రాణించినందుకు జొకోవిచ్‌కు బోనస్‌గా ఇచ్చిన 5 లక్షల డాలర్లు ఉన్నాయి. రన్నరప్ ఫెడరర్‌కు 16 లక్షల డాలర్లు (రూ. 10 కోట్ల 59 లక్షలు) దక్కాయి.3 గంటల 20 నిమిషాలపాటు జరిగిన ఫైనల్లో ఇద్దరూ ప్రతీ పాయింట్‌కూ నువ్వా నేనా అనే రీతిలో పోరాడి, తమ అత్యుత్తమ ఆటతీరును కనబరిచి ప్రేక్షకులను అలరించారు.
  
 ఈ టోర్నీలో కొత్త వ్యూహాలతో బరిలోకి దిగి మంచి ఫలితాలను సాధించిన 34 ఏళ్ల ఫెడరర్ ఫైనల్లో మాత్రం జొకోవిచ్ జోరును నిలువరించ లేకపోయాడు. ఫెడరర్ సర్వీస్‌ను ఆరుసార్లు బ్రేక్ చేసిన జొకోవిచ్, తన సర్వీస్‌ను నాలుగుసార్లు మాత్రమే కోల్పోయాడు.   జొకోవిచ్ దూకుడైన ఆటతీరు కారణంగా ఫెడరర్ ఒత్తిడికిలోనై ఏకంగా 54 అనవసర తప్పిదాలు చేశాడు. నెట్ వద్దకు 59 సార్లు దూసుకొచ్చినా కేవలం 39 సార్లు పాయింట్లు నెగ్గడంలో సఫలమయ్యాడు.
  
 ఫెడరర్ శక్తివంతమైన సర్వీస్‌లకు అంతే దీటుగా జవాబిస్తూ... నెట్ వద్ద కూడా అప్రమత్తంగా ఉంటూ... సుదీర్ఘ ర్యాలీలలో పైచేయి సాధిస్తూ... జొకోవిచ్ తనలోని మేటి ఆటతీరును ప్రదర్శించాడు. కొన్నిసార్లు ఫెడరర్ మెరుపులు మెరిపించినా కీలకదశలో మాత్రం తడబడ్డాడు. జొకోవిచ్ సర్వీస్‌లో ఫెడరర్‌కు 23 సార్లు బ్రేక్ పాయింట్ అవకాశాలు వచ్చినా, అతను కేవలం నాలుగుసార్లు మాత్రమే వాటిని సద్వినియోగం చేసుకోగలిగాడు.
  
 జొకోవిచ్ ఈ ఏడాది నాలుగు గ్రాండ్‌స్లామ్ టోర్నీల్లోనూ ఫైనల్‌కు చేరాడు. ఆస్ట్రేలియన్ ఓపెన్, వింబుల్డన్, యూఎస్ ఓపెన్‌లలో విజేతగా నిలిచి, ఫ్రెంచ్ ఓపెన్‌లో రన్నరప్‌తో సంతృప్తి పడ్డాడు.ఇప్పటివరకు జొకోవిచ్ ఐదుసార్లు ఆస్ట్రేలియన్ ఓపెన్‌లో, మూడుసార్లు వింబుల్డన్‌లో, రెండుసార్లు యూఎస్ ఓపెన్‌లో టైటిల్స్ సాధించాడు.ఒకే ఏడాది 3 గ్రాండ్‌స్లామ్స్‌ను సాధించడం జొకోవిచ్‌కిది రెండోసారి. 2011లోనూ అతను ఈ ఘనత సాధించాడు. గతంలో ఫెడరర్, నాదల్, విలాండర్, కానర్స్, రాడ్ లేవర్ ఈ ఘనత సాధించారు.
  
 ‘నా గ్రాండ్‌స్లామ్‌ల సంఖ్య రెండంకెలకు చేరింది. ఇన్ని టైటిల్స్ గెలిచిన దిగ్గజాల సరసన నిలవడం సంతోషంగా ఉంది. ఒకే ఏడాది మూడు గ్రాండ్‌స్లామ్‌ల ఫీట్‌ను పునరావృతం చేయడం అంత సులువు కాదు. అయినా సాధించగలిగాను. ఇప్పుడు నాకు 28 ఏళ్లు.  నాకు నా గురించి, నా కెరీర్ గురించి బాగా తెలుసు. నా ఆటలో, జీవన శైలిలో ఎలాంటి మార్పులు చేసుకోను. ఇకపై మరిన్ని టైటిల్స్ సాధించగలననే నమ్మకముంది. దాని కోసం శ్రమిస్తా.’                        -జొకోవిచ్
  
  


 మూడో సీడ్ ఆండీ ముర్రేకు షాక్
 ♦ దక్షిణాఫ్రికా ప్లేయర్ అండర్సన్ సంచలనం
 ♦ కెరీర్‌లో తొలిసారి గ్రాండ్‌స్లామ్ క్వార్టర్స్‌లోకి
 ♦ ఆరో సీడ్ బెర్డిచ్ కూడా ఇంటిదారి
 ♦ ఎదురులేని ఫెడరర్
  
  గత ఐదేళ్లుగా గ్రాండ్‌స్లామ్ టోర్నమెంట్‌లలో నిలకడకు మారుపేరుగా నిలిచిన బ్రిటన్ టెన్నిస్ స్టార్ ఆండీ ముర్రే ఈసారి తడబడ్డాడు. దక్షిణాఫ్రికా ఆజానుబాహుడు కెవిన్ అండర్సన్ ధాటికి ముర్రే ప్రిక్వార్టర్ ఫైనల్లో చేతులెత్తేశాడు. భారీ సర్వీస్‌లతో విరుచుకుపడిన అండర్సన్ ఆద్యంతం నిలకడగా ఆడి వండర్ ఫలితాన్ని సాధించాడు. తన కెరీర్‌లో తొలిసారి గ్రాండ్‌స్లామ్ టోర్నీలో క్వార్టర్ ఫైనల్లోకి దూసుకెళ్లాడు.
  
  న్యూయార్క్ : గొప్ప వేదికలపై గత రికార్డులు ప్రభావం చూపవని... ఆ రోజు అద్భుతంగా ఆడిన వారినే విజయం వరిస్తుందని మరోసారి రుజువైంది. 2011 నుంచి వరుసగా 18 గ్రాండ్‌స్లామ్ టోర్నమెంట్‌లలో కనీసం క్వార్టర్ ఫైనల్‌కు చేరిన బ్రిటన్ స్టార్ ఆండీ ముర్రే ఈసారి అలాంటి ఫలితాన్ని పునరావృతం చేయలేకపోయాడు. సీజన్ చివరి గ్రాండ్‌స్లామ్ టోర్నీ యూఎస్ ఓపెన్‌లో మూడో సీడ్ ముర్రే ప్రిక్వార్టర్ ఫైనల్లోనే ఇంటిముఖం పట్టాడు. 4 గంటల 18 నిమిషాలపాటు హోరాహోరీగా సాగిన పురుషుల సింగిల్స్ ప్రిక్వార్టర్స్ పోరులో 15వ సీడ్ కెవిన్ అండర్సన్ (దక్షిణాఫ్రికా) 7-6 (7/5), 6-3, 6-7 (2/7), 7-6 (7/0)తో ముర్రేను మట్టికరిపించాడు.
 
 ► 6 అడుగుల 8 అంగుళాల ఎత్తు, 90 కేజీల బరువున్న 29 ఏళ్ల అండర్సన్ ఈ మ్యాచ్‌లో 25 ఏస్‌లు సంధించాడు. ముర్రే సర్వీస్‌ను నాలుగుసార్లు బ్రేక్ చేసిన అతను తన సర్వీస్‌ను మూడుసార్లు కోల్పోయాడు. ఐదు డబుల్ ఫాల్ట్‌లు, 57 అనవసర తప్పిదాలు చేసినా.. నిర్ణాయక టైబ్రేక్‌లలో మాత్రం అండర్సన్ పైచేయి సాధించి విజయాన్ని ఖాయం చేసుకున్నాడు. టాప్-15 ర్యాంకుల్లోని ఆటగాడిపై నెగ్గడం అండర్సన్ కెరీర్‌లో ఇదే తొలిసారి.
 ► ఈ మ్యాచ్‌కు ముందు ముర్రేతో గతంలో ఆడిన ఆరు మ్యాచ్‌ల్లో అండర్సన్ ఐదుసార్లు ఓడిపోయాడు. గ్రాండ్‌స్లామ్ టోర్నీల్లో ఒకే ఒక్కసారి 2010 ఆస్ట్రేలియన్ ఓపెన్ తొలి రౌండ్‌లో ముర్రేతో ఆడిన అండర్సన్ కేవలం నాలుగు గేమ్‌లు మాత్రమే గెలిచి ఓటమిని  మూటగట్టుకున్నాడు. అయితే తనదైన రోజున తానెంత ప్రమాదకర ప్లేయర్‌నో అండర్సన్ నిరూపించాడు. గత ఫలితాలతో సంబంధం లేకుండా ఈసారి అద్భుత విజయాన్ని దక్కించుకొని ముర్రే ఆట కట్టించాడు.
 ► 1992లో వేన్ ఫెరారీ తర్వాత యూఎస్ ఓపెన్‌లో క్వార్టర్ ఫైనల్‌కు చేరిన దక్షిణాఫ్రికా ప్లేయర్‌గా అండర్సన్ గుర్తింపు పొందాడు. క్వార్టర్ ఫైనల్లో ఐదో సీడ్ స్టానిస్లాస్ వావ్రింకా (స్విట్జర్లాండ్)తో అండర్సన్ తలపడతాడు. ముఖాముఖి రికార్డులో అండర్సన్ 4-3తో ఆధిక్యంలో ఉండటం విశేషం. ప్రిక్వార్టర్ ఫైనల్లో వావ్రింకా 6-4, 1-6, 6-3, 6-4తో డొనాల్డ్ యంగ్ (అమెరికా)పై గెలుపొందాడు.
 
  సూపర్ ఫెడరర్
  మరోవైపు రెండో సీడ్ రోజర్ ఫెడరర్ (స్విట్జర్లాండ్) తన విజయపరంపర కొనసాగిస్తూ క్వార్టర్ ఫైనల్లోకి అడుగుపెట్టాడు. ప్రిక్వార్టర్ ఫైనల్లో ఫెడరర్ 7-6 (7/0), 7-6 (8/6), 7-5తో 13వ సీడ్ జాన్ ఇస్నెర్ (అమెరికా)పై గెలిచాడు. 2 గంటల 39 నిమిషాలపాటు జరిగిన ఈ మ్యాచ్‌లో ఫెడరర్ మూడో సెట్‌లోని 12వ గేమ్‌లో ఇస్నెర్ సర్వీస్‌ను ఒకసారి బ్రేక్ చేసి గెలిచాడు.
 
 ► 6 అడుగుల 10 అంగుళాల ఎత్తు, 109 కేజీల బరువున్న ఇస్నెర్ తన అంతర్జాతీయ కెరీర్‌లో తొలిసారి ఓ టైబ్రేక్‌ను 0-7తో కోల్పోయాడు. ఐదుసార్లు ఫెడరర్ సర్వీస్‌ను బ్రేక్ చేసే అవకాశం వచ్చినా ఇస్నెర్ సద్వినియోగం చేసుకోలేకపోయాడు. ఫెడరర్ 15 ఏస్‌లు సంధించి,16 అనవసర తప్పిదాలు చేశాడు.
 ► క్వార్టర్ ఫైనల్లో 12వ సీడ్ రిచర్డ్ గాస్కే (ఫ్రాన్స్)తో ఫెడరర్ తలపడతాడు. ముఖాముఖి రికార్డులో ఫెడరర్ 14-2తో ఆధిక్యంలో ఉన్నాడు. ప్రిక్వార్టర్ ఫైనల్లో రిచర్డ్ గాస్కే 2-6, 6-3, 6-4, 6-1తో ఆరో సీడ్ థామస్ బెర్డిచ్ (చెక్ రిపబ్లిక్)పై సంచలన విజయాన్ని సాధించాడు.
 
  చెమటోడ్చి నెగ్గిన హలెప్: మహిళల సింగిల్స్ విభాగంలో రెండో సీడ్ సిమోనా హలెప్ (రుమేనియా) తొలిసారి యూఎస్ ఓపెన్‌లో క్వార్టర్ ఫైనల్లోకి చేరింది. ప్రిక్వార్టర్ ఫైనల్లో హలెప్ 6-7 (6/8), 7-5, 6-2తో 24వ సీడ్ సబైన్ లిసికి (జర్మనీ)పై కష్టపడి గెలిచింది. 2 గంటల 38 నిమిషాలపాటు జరిగిన ఈ మ్యాచ్‌లో హలెప్ తన ప్రత్యర్థి సర్వీస్‌ను 10 సార్లు బ్రేక్ చేసి, తన సర్వీస్‌ను ఏడుసార్లు కోల్పోయింది. మహిళల టెన్నిస్‌లో వేగవంతమైన సర్వీస్, ఒకే మ్యాచ్‌లో అత్యధిక ఏస్‌లు సంధించిన రికార్డును కలిగిన లిసికి ఈ మ్యాచ్‌లో తొలి రెండు సెట్‌లలో అద్భుతంగా ఆడింది. అయితే కీలకమైన మూడో సెట్‌లో తడబడి మూల్యం చెల్లించుకుంది. లిసికి ఏకంగా 72 అనవసర తప్పిదాలు చేయడం గమనార్హం.
 
  ఇతర ప్రిక్వార్టర్ ఫైనల్స్‌లో 26వ సీడ్ ఫ్లావియా పెనెట్టా (ఇటలీ) 6-4, 6-4తో 2011 చాంపియన్, 22వ సీడ్ సమంతా స్టోసుర్ (ఆస్ట్రేలియా)ను ఓడించగా... ఐదో సీడ్ పెట్రా క్విటోవా (చెక్ రిపబ్లిక్) 7-5, 6-3తో క్వాలిఫయర్ జొహనా కొంటా (బ్రిటన్)పై గెలిచింది.
  
  మిక్స్‌డ్ సెమీస్‌లో బోపన్న జంట
  మిక్స్‌డ్ డబుల్స్ క్వార్టర్ ఫైనల్లో రెండో సీడ్ రోహన్ బోపన్న (భారత్) -యుంగ్ జాన్‌చాన్ ద్వయం (చైనీస్ తైపీ) 7-6 (9/7), 5-7, 13-11తో ‘సూపర్ టైబ్రేక్’లో సు వీ సెయి (చైనీస్ తైపీ)-హెన్రీ కొంటినెన్ (ఫిన్‌లాండ్) జంటపై గెలిచింది. మరో క్వార్టర్ ఫైనల్లో లియాండర్ పేస్ (భారత్)-మార్టినా హింగిస్ (స్విట్జర్లాండ్) జోడీకి సిమోనా హలెప్-హొరియా టెకావ్ (రుమేనియా) జంట నుంచి వాకోవర్ లభించింది. సెమీస్‌లో బోపన్న-యుంగ్ జాన్ చాన్‌లతో పేస్-హింగిస్ తలపడతారు.
  
  ప్రాంజల పరాజయం
  జూనియర్ బాలికల సింగిల్స్ విభాగంలో హైదరాబాద్ అమ్మాయి యడ్లపల్లి ప్రాంజలకు తొలి రౌండ్‌లోనే పరాజయం ఎదురైంది. 15వ సీడ్ ప్రాంజల 6-7 (1/7), 3-6తో వాలెంటిని గ్రామాటికోపులూ (గ్రీస్) చేతిలో ఓడిపోయింది. 84 నిమిషాలపాటు జరిగిన ఈ మ్యాచ్‌లో ప్రాంజల తన సర్వీస్‌ను నాలుగుసార్లు కోల్పోయింది.


 అలవోక విజయంతో రెండో రౌండ్‌లోకి
 ఆండీ ముర్రే, వావ్రింకా కూడా  యూఎస్ ఓపెన్ టోర్నీ
  
 న్యూయార్క్: మహిళల సింగిల్స్ విభాగంలో టాప్-10లోని నలుగురు సీడెడ్ క్రీడాకారిణులు తొలి రౌండ్‌లోనే ఇంటిముఖం పట్టగా... దానికి భిన్నంగా పురుషుల సింగిల్స్ విభాగంలో మాత్రం సీడెడ్ ఆటగాళ్లు సునాయాస విజయాలతో శుభారంభం చేశారు. సీజన్ చివరి గ్రాండ్‌స్లామ్ టోర్నీ యూఎస్ ఓపెన్‌లో సులువైన ‘డ్రా’ పొందిన ఐదుసార్లు చాంపియన్ రోజర్ ఫెడరర్ (స్విట్జర్లాండ్)తోపాటు మాజీ చాంపియన్ ఆండీ ముర్రే (బ్రిటన్), స్టానిస్లాస్ వావ్రింకా (స్విట్జర్లాండ్), థామస్ బెర్డిచ్ (చెక్ రిపబ్లిక్) రెండో రౌండ్‌లోకి దూసుకెళ్లారు.
  అర్జెంటీనాకు చెందిన ప్రపంచ 34వ ర్యాంకర్ లియోనార్డో మాయెర్‌తో జరిగిన తొలి రౌండ్‌లో ఫెడరర్ 6-1, 6-2, 6-2తో కేవలం 77 నిమిషాల్లో విజయం సాధించాడు. 34 ఏళ్ల ఈ స్విస్ స్టార్ 12 ఏస్‌లు సంధించడంతోపాటు మాయెర్ సర్వీస్‌ను ఆరుసార్లు బ్రేక్ చేశాడు. ‘గతేడాది షాంఘై మాస్టర్స్ సిరీస్‌లో మాయెర్‌తో జరిగిన మ్యాచ్‌లో నేను ఐదు మ్యాచ్ పాయింట్లను కాపాడుకొని గెలిచాను. యూఎస్ ఓపెన్‌లో ఈసారి నా తొలి రౌండ్ ప్రత్యర్థి అతనే అని తేలడంతో గట్టిపోటీ తప్పదనుకున్నాను. కానీ ప్రస్తుతం మంచి ఫామ్‌లో ఉండటంతో వరుస సెట్‌లలో విజయం దక్కడంతో ఆత్మవిశ్వాసం పెరిగింది’ అని ఫెడరర్ వ్యాఖ్యానించాడు. వరుసగా 16వ సారి యూఎస్ ఓపెన్‌లో ఆడుతోన్న ఫెడరర్ రెండో రౌండ్‌లో స్టీవ్ డార్సిస్ (బెల్జియం)తో తలపడతాడు.
 
  ఆస్ట్రేలియా యువతార నిక్ కిరియోస్‌తో జరిగిన తొలి రౌండ్ మ్యాచ్‌లో మూడో సీడ్ ఆండీ ముర్రే 7-5, 6-3, 4-6, 6-1తో గెలుపొంది ముందంజ వేశాడు. 2 గంటల 43 నిమిషాలపాటు జరిగిన ఈ మ్యాచ్‌లో ముర్రే ఏకంగా 18 ఏస్‌లు సంధించడం విశేషం. ఇతర మ్యాచ్‌ల్లో ఫ్రెంచ్ ఓపెన్ చాంపియన్, ఐదో సీడ్ స్టానిస్లాస్ వావ్రింకా 7-5, 6-4, 7-6 (8/6)తో రామోస్ వినోలాస్ (స్పెయిన్)పై, ఆరో సీడ్ బెర్డిచ్ 6-3, 6-2, 6-4తో ఫ్రటాంగెలో (అమెరికా)పై, 13వ సీడ్ జాన్ ఇస్నెర్ (అమెరికా) 6-2, 6-3, 6-4తో జజిరి (ట్యూనిషియా)పై నెగ్గారు. అయితే 11వ సీడ్ గైల్స్ సిమోన్ (ఫ్రాన్స్) 6-2, 6-4, 4-6, 4-6, 4-6తో డొనాల్డ్ యంగ్ (అమెరికా) చేతిలో ఓడిపోయి తొలి రౌండ్‌లోనే నిష్ర్కమించాడు. పురుషుల సింగిల్స్ విభాగం రెండో రౌండ్ మ్యాచ్‌ల్లో ఏడో సీడ్ డేవిడ్ ఫెరర్ (స్పెయిన్) 7-5, 7-5, 7-6 (7/4)తో క్రాజ్నోవిచ్   (సెర్బియా)పై, 27వ సీడ్ జెరెమీ చార్డీ (ఫ్రాన్స్) 7-5, 6-4, 7-6 (7/1)తో క్లిజాన్ (స్లొవేకియా)పై విజయం సాధించి మూడో రౌండ్‌లోకి అడుగుపెట్టారు.
  
  మూడో రౌండ్‌లోకి మాడిసన్ కీస్
  మహిళల సింగిల్స్ విభాగంలో 19వ సీడ్ మాడిసన్ కీస్ (అమెరికా) మూడో రౌండ్‌లోకి ప్రవేశించింది. రెండో రౌండ్‌లో కీస్ 6-1, 6-2తో స్మిట్‌కోవా (చెక్ రిపబ్లిక్)పై గెలుపొందగా... 31వ సీడ్ పావ్లీచెంకోవా (రష్యా) 5-7, 4-6తో కొంటావీట్ (ఎస్తోనియా) చేతిలో ఓడిపోయింది. మరోవైపు ఐదో సీడ్ పెట్రా క్విటోవా (చెక్ రిపబ్లిక్), నాలుగో సీడ్ కరోలిన్ వొజ్నియాకి (డెన్మార్క్) శుభారంభం చేశారు. తొలి రౌండ్‌లో క్విటోవా 6-1, 6-1తో సిగెముండ్ (జర్మనీ)పై, వొజ్నియాకి 6-2, 6-0తో జేమీ లోబ్ (అమెరికా)పై గెలిచారు. ఇతర తొలి రౌండ్ మ్యాచ్‌ల్లో తొమ్మిదో సీడ్ ముగురుజా (స్పెయిన్) 6-2, 6-4తో వితోఫ్ట్ (జర్మనీ)పై, 11వ సీడ్ కెర్బర్ (జర్మనీ) 6-3, 6-1తో డల్గెరూ (రుమేనియా)పై, 18వ సీడ్ పెట్కోవిచ్ (జర్మనీ) 3-6, 6-4, 7-5తో గార్సియా (ఫ్రాన్స్)పై గెలిచారు.
  
  


 మూడోసారి వింబుల్డన్ ట్రోఫీ కైవసం
 ♦ కెరీర్‌లో తొమ్మిదో గ్రాండ్‌స్లామ్ టైటిల్
 ♦ ఫైనల్లో ఫెడరర్‌పై విజయం
  
  లండన్ : అదే ప్రత్యర్థి. అదే ఫలితం. అదే దృశ్యం. గతేడాది వింబుల్డన్ టోర్నమెంట్‌లో ఐదు సెట్‌ల పోరాటంలో ఫెడరర్‌ను ఓడించిన జొకోవిచ్ ఈసారి నాలుగు సెట్‌లలో ఆట కట్టించాడు. కోర్టు బయట, కోర్టు లోపల తన విలక్షణ శైలితో ఆకట్టుకొని ‘జోకర్’ అనే ముద్దుపేరును సొంతం చేసుకున్న ఈ సెర్బియా స్టార్ ముచ్చటగా మూడోసారి వింబుల్డన్ విజేతగా నిలిచాడు. ఆదివారం 2 గంటల 56 నిమిషాలపాటు జరిగిన పురుషుల సింగిల్స్ ఫైనల్లో టాప్ సీడ్ జొకోవిచ్ (సెర్బియా) 7-6 (7/1), 6-7 (10/12), 6-4, 6-3తో రెండో సీడ్ రోజర్ ఫెడరర్ (స్విట్జర్లాండ్)ను ఓడించాడు. విజేతగా నిలిచిన జొకోవిచ్‌కు 18 లక్షల 80 వేల పౌండ్లు (రూ. 18 కోట్ల 48 లక్షలు), రన్నరప్ ఫెడరర్‌కు 9 లక్షల 40 వేల పౌండ్లు (రూ. 9 కోట్ల 24 లక్షలు) ప్రైజ్‌మనీగా లభించాయి.
 
  సెమీస్‌లో ఆండీ ముర్రేను హడలెత్తించిన ఫెడరర్ ఫైనల్ మ్యాచ్ ఆరంభంలో పూర్తి విశ్వాసంతో కనిపించాడు. ఆరో గేమ్‌లో జొకోవిచ్ సర్వీస్‌ను బ్రేక్ చేసిన ఫెడరర్ 4-2తో ఆధిక్యంలోకి వెళ్లాడు. అయితే ఏడో గేమ్‌లో ఫెడరర్ సర్వీస్‌ను బ్రేక్ చేసిన జొకోవిచ్ ఆ తర్వాత తన సర్వీస్‌ను కాపాడుకొని స్కోరును 4-4తో సమం చేశాడు. ఆ తర్వాత ఇద్దరూ తమ సర్వీస్‌లను నిలబెట్టుకోవడంతో టైబ్రేక్ అనివార్యమైంది. టైబ్రేక్‌లో జొకోవిచ్ పైచేయి సాధించి తొలి సెట్‌ను దక్కించుకున్నాడు. రెండో సెట్‌లోనూ ఇద్దరూ హోరాహోరీగా తలపడ్డారు. ఈ సెట్ కూడా టైబ్రేక్‌కు దారితీసింది.
 
 టైబ్రేక్‌లో జొకోవిచ్ 6-3తో ఆధిక్యంలోకి వెళ్లి సెట్ విజయానికి పాయింట్ దూరంలో నిలిచాడు. అయితే పట్టువదలకుండా పోరాడిన ఫెడరర్ ఆఖరికి 12-10తో టైబ్రేక్‌లో గెలిచి రెండో సెట్‌ను సొంతం చేసుకున్నాడు. మూడో సెట్‌లో ఫెడరర్‌కు ప్రత్యర్థి సర్వీస్‌ను బ్రేక్ చేసే అవకాశాలు వచ్చినా వృథా చేసుకున్నాడు. మరోవైపు జొకోవిచ్ అందివచ్చిన ప్రతి అవకాశాన్ని తనకు అనుకూలంగా మల్చుకున్నాడు. ఫెడరర్ సర్వీస్‌ను ఒకసారి బ్రేక్ చేసి తన సర్వీస్‌లను నిలబెట్టుకున్న జొకోవిచ్ ఈ సెట్‌ను దక్కించుకున్నాడు. ఇక నాలుగో సెట్‌లో జొకోవిచ్ మరింత చెలరేగిపోయి రెండుసార్లు ఫెడరర్ సర్వీస్‌ను బ్రేక్ చేశాడు.
  
 ► ఈ గెలుపుతో గ్రాండ్‌స్లామ్ టోర్నమెంట్లలో జొకోవిచ్ 200వ విజయాన్ని సాధించాడు.
 ► జొకోవిచ్‌కు కోచ్‌గా ఉన్న బోరిస్ బెకర్ 1985లో తొలిసారి వింబుల్డన్ చాంపియన్‌గా అవతరించాడు. 30 ఏళ్ల తర్వాత బెకర్ సమక్షంలోనే అతని శిష్యుడు జొకోవిచ్ మరోసారి వింబుల్డన్ టైటిల్‌ను సాధించాడు.
 ► ఈ విజయంతో జొకోవిచ్ (9) అత్యధిక గ్రాండ్‌స్లామ్ సింగిల్స్ టైటిల్స్ నెగ్గిన క్రీడాకారుల జాబితాలో 8వ స్థానానికి ఎగబాకాడు.
 ► ఈ ఏడాది ఆడిన మూడు గ్రాండ్‌స్లామ్ టోర్నీల్లో జొకోవిచ్ ఫైనల్‌కు చేరుకోవడం విశేషం. ఆస్ట్రేలియన్ ఓపెన్‌లో విజేతగా నిలిచిన అతను, ఫ్రెంచ్ ఓపెన్‌లో రన్నరప్‌తో సరిపెట్టుకున్నాడు.
 ► ఈ ఫలితంతో ముఖాముఖి రికార్డులో జొకోవిచ్, ఫెడరర్ 20-20తో సమమయ్యారు.


 లండన్: డిఫెండింగ్ చాంపియన్, టాప్ సీడ్ నొవాక్ జొకోవిచ్ (సెర్బియా) మరోసారి వింబుల్డన్ గ్రాండ్‌స్లామ్ టైటిల్ ను చేజిక్కించుకున్నాడు. ఆదివారం జరిగిన ఫైనల్ పోరులో జొకోవిచ్ 7-6(7-1),6-7(10-12), 6-4, 6-3 తేడాతో స్విస్ దిగ్గజం రోజర్ ఫెదరర్ ను బోల్తాకొట్టించి ట్రోఫీని కైవసం చేసుకున్నాడు. దీంతో 9 వ గ్రాండ్ స్లామ్ సింగిల్స్ టైటిల్ తన ఖాతాలో వేసుకున్న జొకోవిచ్.. ముచ్చటగా మూడోసారి వింబుల్డన్ టైటిల్ ను గెలుచుకున్నాడు.
 
 
 కాగా, 18 వ గ్రాండ్ స్లామ్ సాధించాలన్నఫెదరర్ ఆశ నెరవేరలేదు.  తొలిసెట్ లో ఫెదరర్ ముందంజలో పయనించినట్లు కనిపించినా.. ఆ సెట్ టై బ్రేక్ కు దారి తీసింది. ఆ సమయంలో జొకోవిచ్ రెచ్చిపోయాడు. టై బ్రేక్ లో ఫెదరర్ కు ఒక్క పాయింట్ మాత్రమే చేజార్చుకున్న జొకోవిచ్ ఆ సెట్ ను వశ పరుచుకున్నాడు. ఇక రెండో సెట్ వచ్చేసరికి వీరిద్దరి మధ్య పోరు యుద్ధ వాతావారణాన్ని తలపించింది. నువ్వా-నేనా అన్నట్లు సాగిన రెండో సెట్ కూడా ట్రై బ్రేక్ వెళ్లింది. అయితే ఇక్కడ మాత్రం ఫెదరర్ ఆ సెట్ ను దక్కించుకుని స్కోరు సమం చేశాడు. కీలకమైన మూడో సెట్ లో జొకోవిచ్ పైచేయి సాధించి ఆధిక్యం దిశగా దూసుకుపోయాడు. తర్వాత జొకోవిచ్ కు ఎదురులేకుండా పోయింది. నిర్ణయాత్మ నాల్గో సెట్ లో జొకోవిచ్ దూకుడుగా ఆడి ఫెదరర్ ను మట్టికరిపించాడు.
  
 నొవాక్ జొకోవిచ్ ప్రొఫైల్..
 
 జన్మదినం: 1987 మే 22
 దేశం: సెర్బియా
 కెరీర్ సింగిల్స్ టైటిల్స్: 53
 ప్రస్తుత ర్యాంక్ 1
 గ్రాండ్స్లామ్ సింగిల్స్ టైటిల్స్ 9
 
 ఆస్ట్రేలియా ఓపెన్ 5
 వింబుల్డన్ 3
 యూఎస్ ఓపెన్ 1
 ఒలింపిక్ గేమ్స్
 2008లో కాంస్యం


 లండన్ : ప్రతిష్టాత్మక వింబుల్డన్ గ్రాండ్‌స్లామ్ టెన్నిస్ టోర్నమెంట్‌లో ఈసారి ముగ్గురు మాజీ చాంపియన్స్ రోజర్ ఫెడరర్, ఆండీ ముర్రే, రాఫెల్ నాదల్ ఒకే పార్శ్వంలో ఉన్నారు. అంతా అనుకున్నట్లు జరిగితే క్వార్టర్ ఫైనల్లో ముర్రే (బ్రిటన్)తో నాదల్ (స్పెయిన్) తలపడవచ్చు. ఈ మ్యాచ్‌లో నెగ్గినవారు సెమీఫైనల్లో ఫెడరర్ (స్విట్జర్లాండ్)తో ఆడే అవకాశముంది. మరోవైపు డిఫెండింగ్ చాంపియన్, ప్రపంచ నంబర్‌వన్ నొవాక్ జొకోవిచ్ (సెర్బియా)కు సెమీఫైనల్ వరకు సులువైన ‘డ్రా’ పడింది. జొకోవిచ్‌కు సెమీస్‌లో ఈ ఏడాది ఫ్రెంచ్ ఓపెన్ చాంపియన్ స్టానిస్లాస్ వావ్రింకా (స్విట్జర్లాండ్) ప్రత్యర్థిగా ఉండే అవకాశముంది. సోమవారం మొదలయ్యే వింబుల్డన్ టోర్నమెంట్‌కు సంబంధించి ‘డ్రా’ను శుక్రవారం విడుదల చేశారు.
 
  సెరెనా దారిలో షరపోవా
  మహిళల సింగిల్స్ విభాగంలో మాజీ చాంపియన్స్ సెరెనా విలియమ్స్ (అమెరికా), షరపోవా (రష్యా) ఒకే పార్శ్వంలో ఉన్నారు. వీరిద్దరూ సెమీఫైనల్లో తలపడే అవకాశముంది. అంతకుముందే నాలుగో రౌండ్‌లో తన సోదరి వీనస్‌తో సెరెనా ఢీకొనే చాన్స్ ఉంది. మరో పార్శ్వం నుంచి డిఫెండింగ్ చాంపియన్, రెండో సీడ్ పెట్రా క్విటోవా (చెక్ రిపబ్లిక్), మూడో సీడ్ సిమోనా హలెప్ (రుమేనియా) సెమీఫైనల్ చేరే అవకాశముంది.‘డ్రా’ విడుదలకు ముందు గురువారం రాత్రి జరిగిన క్రీడాకారిణుల పార్టీలో షరపోవా, సెరెనా, ఇవనోవిచ్‌లతోపాటు క్విటోవా, అజరెంకా, లిసికి, యూజిన్ బౌచర్డ్ తదితర స్టార్ ప్లేయర్లు ఫ్యాషన్ దుస్తులతో సందడి చేశారు.


 నేటి నుంచి ఢిల్లీలో ఐపీటీఎల్
  న్యూఢిల్లీ: ఇప్పటిదాకా టీవీల్లోనే చూసిన టెన్నిస్ స్టార్స్ రోజర్ ఫెడరర్, నొవాక్ జొకోవిచ్‌ల ఆటతీరును ఇక భారత అభిమానులు ప్రత్యక్షంగా తిలకించే అవకాశం కలగనుంది. ఫిలిప్పీన్స్, సింగపూర్‌లో విజయవంతంగా ముగిసిన అంతర్జాతీయ ప్రీమియర్ టెన్నిస్ లీగ్ (ఐపీటీఎల్) మూడో అంచె పోటీలు నేటి (శనివారం) నుంచి ఢిల్లీలో జరుగనున్నాయి.
  
  ఇప్పటిదాకా పోటీలకు దూరంగా ఉన్న ఫెడరర్, జొకోవిచ్ తొలిసారిగా తమ జట్ల తరఫున బరిలోకి దిగబోతున్నారు. ఇండియన్ ఏసెస్ తరఫున ఫెడరర్, యూఏఈ రాయల్స్ తరఫున నొవాక్ జొకోవిచ్ అభిమానులను అలరించనున్నారు. సోమవారం వరకు భారత్‌లో ఐపీటీఎల్ జరుగుతుంది.
  
  ఇండియన్ ఏసెస్ ఇప్పటికే ఆరు మ్యాచ్‌ల్లో నాలుగు గెలిచి 20 పాయింట్లతో అగ్రస్థానంలో ఉంది. ‘ఫెడరర్, జొకోవిచ్, సంప్రాస్‌ల కోసం భారత అభిమానులు చాలా ఆతృతగా ఎదురుచూస్తున్నారు. వారు కూడా ఇక్కడికి రావడానికి ఉత్సుకతతో ఉన్నారు. ఫెడరర్ కేవలం భారత్‌లో జరిగే పోటీలకు మాత్రమే హాజరుకానున్నాడు. దుబాయ్‌లో జరిగే చివరి లెగ్‌కు అందుబాటులో ఉండడు’ అని టోర్నీ నిర్వాహకుడు మహేశ్ భూపతి తెలిపారు. ఫెడరర్ చివరిసారిగా 2006లో యూనిసెఫ్ తరఫున భారత్‌కు వచ్చాడు.
  
  దిగ్గజం ఫెడరర్‌తో కలిసి ఆడాలన్న సానియా కల నిజం కాబోతుంది. ఆదివారం, సోమవారం జరిగే మిక్స్‌డ్ డబుల్స్‌లో ఫెడరర్, సానియా జతగా బరిలోకి దిగనున్నారు. ఫెడరర్‌తో కలిసి ఆడే అవకాశం రావడంపట్ల సానియా అమితానందం వ్యక్తం చేసింది.
  


 మనీలా (ఫిలిప్పిన్స్): అందరూ ఆసక్తిగా ఎదురుచూస్తున్న ఇంటర్నేషనల్ టెన్నిస్ ప్రీమియర్ లీగ్ (ఐపీటీఎల్)కు రంగం సిద్ధమైంది. మనీలాలో ఇండియన్ ఏసెస్, సింగపూర్ స్లామర్స్‌ల మధ్య నేడు జరిగే మ్యాచ్‌తో లీగ్‌కు తెర లేవనుంది. భారత్‌కు చెందిన ఇండియన్ ఏసెస్ జట్టులో ఫెడరర్‌తో పాటు సానియా మీర్జా ప్రధాన ఆకర్షణగా నిలవనున్నారు. అయితే తొలి అంచె పోటీల్లో ఫెడరర్ పాల్గొనడం లేదు.
  


 స్విట్జర్లాండ్‌కు తొలిసారి డేవిస్ కప్ టైటిల్
 
  పారిస్: ఇన్నాళ్లూ అందని ద్రాక్షగా ఉన్న డేవిస్ కప్ టైటిల్‌ను స్విట్జర్లాండ్ సాధించింది. ఫ్రాన్స్‌తో ఆదివారం ముగిసిన ఫైనల్లో స్విస్ 3-1తో గెలిచింది. దీంతో 115 ఏళ్ల చరిత్ర కలిగిన ఈ టోర్నీలో విజేతగా నిలిచిన 14వ దేశంగా స్విట్జర్లాండ్ గుర్తింపు పొందింది. 2-1తో ఆధిక్యంలో ఉంటూ ఆదివారం తొలి రివర్స్ సింగిల్స్ బరిలోకి దిగిన స్విట్జర్లాండ్‌కు ఫెడరర్ విజయాన్ని ఖాయం చేశాడు. రిచర్డ్ గాస్కేతో జరిగిన మ్యాచ్‌లో ఫెడరర్ 6-4, 6-2, 6-2తో గెలుపొందాడు.


 నేటి నుంచి యూఎస్ ఓపెన్
 గాయంతో నాదల్ దూరం
 18వ గ్రాండ్‌స్లామ్ టైటిల్‌పై ఫెడరర్, సెరెనా దృష్టి
  
 న్యూయార్క్: ఈ ఏడాది చివరి గ్రాండ్‌స్లామ్  యూఎస్ ఓపెన్‌కు నేడు (సోమవారం) తెరలేవనుంది. వచ్చే నెల 8 వరకు జరిగే ఈ టోర్నీలో డిఫెండింగ్ చాంపియన్ రాఫెల్ నాదల్ గాయం కారణంగా బరిలోకి దిగడం లేదు. దీంతో 2011లో ఈ టైటిల్ గెలిచిన ప్రపంచ నంబర్‌వన్ జొకోవిచ్, 2012 నుంచి ఒక్క గ్రాండ్‌స్లామ్ టోర్నీ కూడా సాధించలేకపోతున్న మాజీ నంబర్‌వన్ రోజర్ ఫెడరర్ ఈసారి ఆ లోటును తీర్చుకోవడానికి సిద్ధమవుతున్నారు. ఈ ఏడాది వింబుల్డన్ విజయంతో జోరు మీదున్న జొకోవిచ్ క్లిష్టమైన డ్రానే ఎదుర్కోనున్నాడు.
  
 సన్నాహక మ్యాచ్‌ల్లో భాగంగా ఆడిన మాస్టర్స్ సిరీస్ టోర్నమెంట్స్, సిన్సినాటీ టోర్నీ మూడో రౌండ్‌లోనే వెనుదిరిగినా ఆ ప్రభావం ఇక్కడ ఉండదని నమ్మకంగా ఉన్నాడు. మరో రెండు నెలల్లో తండ్రి కాబోతున్న ఉత్సాహంతో ఉన్న ఈ సెర్బియా ఆటగాడు అనుకున్న ప్రకారం ముందుకెళితే క్వార్టర్ ఫైనల్లో బ్రిటన్ ఆశాకిరణం ఆండీ ముర్రే ఎదురయ్యే అవకాశం ఉంది. సోంగా, వావ్రింకాలను కూడా ఎదుర్కోవాల్సి రావచ్చు. అయితే ఈ టోర్నీకి ముందు ఫామ్ పరంగా పెద్దగా ఆకట్టుకోలేకపోయిన జొకోవిచ్‌ను ప్రత్యర్థులు తక్కువగా తీసుకోవడానికి లేదు. మైదానంలో పాదరసంలా కదిలే ఈ సెర్బియన్‌కు అనూహ్యంగా పుంజుకునే సత్తా ఉంది.
  
 ఇక రికార్డు స్థాయిలో 18వ గ్రాండ్‌స్లామ్ అందుకునేందుకు ఉవ్విళ్లూరుతున్న రెండో సీడ్ ఫెడరర్‌కు ఆ కల తీర్చుకునే అవకాశాలూ మెరుగ్గానే ఉన్నాయి. ఈ ఏడాది సూపర్ ఫామ్‌తో దూసుకెళుతున్న తనకు డ్రా ప్రకారం సెమీస్ వరకు గట్టి ప్రత్యర్థి ఎదురయ్యే పరిస్థితి కనిపించడం లేదు. క్వార్టర్స్‌లో ఏడో సీడ్ దిమిత్రోవ్ (బల్గేరియా) ఎదురయ్యే అవకాశం ఉంది. వింబుల్డన్ ఫైనల్లో జొకోవిచ్ చేతిలో ఓడినా... ఆ తర్వాత జరిగిన టోర్నీల్లో టైటిల్స్ గెలిచి ఊపు మీదున్నాడు. అతడితో పాటు ముర్రే నుంచి ఫెడరర్‌కు ముప్పు పొంచి ఉంది. 33 ఏళ్ల ఫెడరర్ ఒకవేళ ఆరోసారి యూఎస్ ఓపెన్‌ను గెలుచుకుంటే మాత్రం అత్యధిక వయస్సులో గ్రాండ్‌స్లామ్ నెగ్గిన రెండో ఆటగాడిగా నిలుస్తాడు.
 
 సెరెనా గెలిస్తే దిగ్గజాల సరసన..
 మహిళల విభాగానికొస్తే ప్రస్తుత చాంపియన్, నంబర్‌వన్ సెరెనా విలియమ్స్ కూడా మరోసారి ఫేవరెట్‌గా బరిలోకి దిగుతోంది. 17 గ్రాండ్‌స్లామ్స్ నెగ్గిన ఈ అమెరికా దిగ్గజం మరో టైటిల్‌తో ఓపెన్ శకంలో 18 టైటిల్స్ నెగ్గి క్రిస్ ఎవర్ట్, మార్టినా నవత్రిలోవాల సరసన నిలిచేందుకు ఎదురుచూస్తోంది. అంతేకాకుండా దాదాపు 40 ఏళ్ల అనంతరం వరుసగా మూడు యూఎస్ ఓపెన్ టైటిల్స్ గెలిచిన క్రీడాకారిణిగా నిలవాలని అనుకుంటోంది. భవిష్యత్ అమెరికా స్టార్‌గా పిలువబడుతున్న 18 ఏళ్ల టేలర్ టౌన్సెండ్‌తో తొలి రౌండ్‌లో సెరెనా తలపడనుంది. అలాగే షరపోవా, ఈ ఏడాది మూడు గ్రాండ్‌స్లామ్ సెమీస్‌కు చేరిన బౌచర్డ్ (కెనడా) నుంచి పోటీ ఎదురుకానుంది. లీ నా, విక్టోరియా అజరెంకా గాయాల కారణంగా తప్పుకున్నారు.


  సెరెనా, రద్వాన్‌స్కా ముందంజ
  సోమ్‌దేవ్ ఓటమి
  ఫ్రెంచ్ ఓపెన్
  
  పారిస్: మాజీ నంబర్‌వన్, స్విట్జర్లాండ్ స్టార్ రోజర్ ఫెడరర్ ఫ్రెంచ్ ఓపెన్ గ్రాండ్‌స్లామ్ టెన్నిస్ టోర్నమెంట్‌లో శుభారంభం చేశాడు. మహిళల డిఫెండింగ్ చాంపియన్, టాప్‌సీడ్ సెరెనా విలియమ్స్ (అమెరికా), మూడో సీడ్ అగ్నెస్కా రద్వాన్‌స్కా (పోలండ్) కూడా ముందంజ వేశారు. పురుషుల విభాగంలో నాలుగో సీడ్ ఫెడరర్ 6-2, 6-4, 6-2తో లుకాస్ లాకో (స్లోవేకియా)పై విజయం సాధించాడు.
  
  ఆదివారం జరిగిన తొలి రౌండ్ మ్యాచ్‌లో 32 ఏళ్ల స్విస్ స్టార్ గంటకు 200 కి.మీ. వేగంతో చేసే సర్వీస్‌కు ప్రత్యర్థి నిలువలేకపోయాడు. పదో సీడ్ జాన్ ఇస్నర్ (అమెరికా) 7-6 (7/5), 7-6 (7/4), 7-5తో హెర్బెర్ట్ (ఫ్రాన్స్)పై చెమటోడ్చి నెగ్గగా, ఆరోసీడ్ బెర్డిచ్ 6-3, 6-4, 6-4 పొలన్‌స్కీ (కెనడా)పై గెలిచాడు. 13వ సీడ్ సోంగా (ఫ్రాన్స్) 7-6 (7/4), 7-5, 6-2తో సహచరుడు రోజర్ వాసెలిన్‌పై నెగ్గాడు.
  
  నల్లకలువల జోరు
  మహిళల సింగిల్స్‌లో సెరెనా విలియమ్స్ 6-2, 6-1తో అలిజ్ లిమ్ (ఫ్రాన్స్)పై విజయం సాధించగా... ఆమె సోదరి వీనస్ విలియమ్స్ 6-4, 6-1తో బెన్సిక్ (స్విట్జర్లాండ్)పై గెలిచింది. మూడో సీడ్ రద్వాన్‌స్కా 6-3, 6-0తో షువాయ్ జంగ్ (చైనా)పై, స్లోవేకియా సుందరి డానియెల హంతుచోవా 2-6, 6-2, 6-4తో జాక్సిక్ (సెర్బియా)పై గెలుపొందారు.
  
  మళ్లీ తొలిరౌండ్‌లోనే...
  భారత సింగిల్స్ స్టార్ సోమ్‌దేవ్ దేవ్‌వర్మన్ వరుసగా ఈ సీజన్ రెండో గ్రాండ్‌స్లామ్ ఈవెంట్‌లోనూ తొలిరౌండ్లోనే ఇంటిదారి పట్టాడు. అన్‌సీడెడ్ సోమ్‌దేవ్ 7-5, 3-6, 6-7 (4/7), 3-6తో నెదోవ్‌యెసోవ్ (కజకిస్థాన్) చేతిలో ఓడిపోయాడు. ఈ సీజన్ తొలి గ్రాండ్‌స్లామ్ టోర్నీ అయిన ఆస్ట్రేలియన్ ఓపెన్‌లోనూ సోమ్‌దేవ్ మొదటి రౌండ్‌లోనే నిష్ర్కమించాడు.