ఆండ్రీ ఆగస్సీ, మరియా షరపోవా లాంటి ఆటగాళ్లను తీర్చిదిద్దిన దిగ్గజ టెన్నిస్‌ కోచ్‌ నిక్ బొల్లెట్టిరి(91) కన్నుమూశాడు. ఈ విషయాన్ని ఆయన స్థాపించిన ఐఎంజీ అకాడమీ సోమవారం రాత్రి ట్వీట్‌ చేసింది. వయో బారంతో కొంతకాలంగా అనారోగ్యంతో బాధపడుతున్న నిక్‌ బొల్లెట్టిరి తుది శ్వాస విడిచినట్లు ఐఎంజీ తమ ప్రకటనలో స్పష్టం చేసింది. విషయం తెలుసుకున్న టెన్నిస్‌ మాజీ క్రీడాకారులు ఆయనకు సంతాపం తెలిపారు. అంతర్జాతీయ టెన్నిస్‌ సమాఖ్య(ఐటీఎఫ్‌) నిక్‌ బొల్లెట్టిరికి నివాళి అర్పించింది. ఇక టెన్నిస్‌ ఆటగాళ్లను తయారు చేయడమే లక్ష్యంగా నిక్‌ బొల్లెట్టిరి 1978లో ఫ్లోరిడా వేదికగా ఐఎంజీ అకాడమీ(IMG Academy) స్థాపించాడు. ఈ అకాడమీలో ఆండ్రీ అగస్సీ, మరియా షరపోవాల, వీనస్‌ విలియమ్స్‌, సెరెనా విలియమ్స్‌, బొరిస్‌ బెకర్‌ లాంటి దిగ్గజాలు శిక్షణ తీసుకున్నారు. టాప్‌-10లో కొనసాగిన ఆటగాళ్లంతా ఏదో ఒక సమయలో బొల్లెట్టిరి దగ్గర శిక్షణ తీసుకున్నవారే కావడం విశేషం.   Nick Bollettieri, the legendary tennis coach and founder of Nick Bollettieri Tennis Academy, which served as the foundation for today’s IMG Academy, has passed away. He was 91 years old. 💙🤍 🔗: https://t.co/vvFnYHowKc pic.twitter.com/zJYem2SvF6 — IMG Academy (@IMGAcademy) December 5, 2022

Maria Sharapova Welcomes Son: రష్యా మాజీ టెన్నిస్‌ స్టార్‌ మారియా షరపోవా తల్లయ్యారు. పండంటి బాబుకు ఆమె జన్మనిచ్చారు. ఈ శుభవార్తను సోషల్‌ మీడియా వేదికగా శుక్రవారం అభిమానులతో పంచుకున్నారు. తమ కుమారుడి పేరు థియోడర్‌ అని షరపోవా వెల్లడించారు.  కాగా 35 ఏళ్ల ఈ రష్యన్‌ బ్యూటీ షరపోవా.. బ్రిటన్‌కు చెందిన 42 ఏళ్ల వ్యాపారవేత్త అలెగ్జాండర్‌ గిల్కెస్‌తో ప్రేమలో ఉన్న విషయం తెలిసిందే. వీరిద్దరు 2020లో తమకు నిశ్చితార్థం జరిగినట్లు ప్రకటించారు. ఈ క్రమంలో ఈ జంట జూలై 1న తమ తొలి సంతానానికి జన్మనిచ్చారు. ఈ విషయాన్ని వెల్లడిస్తూ.. ‘‘మా కుటుంబానికి అత్యంత అందమైన.. ఎంతో గొప్పదైన బహుమతి లభించింది.. థియోడర్‌’’ అంటూ తమకు కుమారుడు జన్మించిన విషయాన్ని షరపోవా వెల్లడించారు. ఈ సందర్భంగా ఇన్‌స్టాలో తమ చిన్నారి పాపాయితో ఉన్న ఫొటోను షేర్‌ చేశారు. ఇక తన కెరీర్‌లో మారియా షరపోవా ఐదు గ్రాండ్‌స్లామ్‌ టైటిళ్లు గెలుచుకున్నారు. పదిహేడేళ్ల వయసులో 2004లో తన తొలి వింబుల్డన్‌ టైటిల్‌ గెలిచిన ఆమె.. 2006లో యూఎస్‌ ఓపెన్‌, 2008లో ఆస్ట్రేలియా ఓపెన్‌, 2012, 2014 సంవత్సరాల్లో ఫ్రెంచ్‌ ఓపెన్‌ విజేతగా నిలిచారు. సుదీర్ఘ కెరీర్‌కు 2020లో ఆటకు వీడ్కోలు పలికిన షరపోవా ప్రస్తుతం వ్యక్తిగత జీవితాన్ని, మాతృత్వ మధురిమలను ఆస్వాదిస్తున్నారు.  View this post on Instagram A post shared by Maria Sharapova (@mariasharapova) చదవండి: IRE Vs NZ: కివీస్‌ కొంపముంచిన టవల్‌.. క్రికెట్‌ చరిత్రలోనే తొలిసారి! టి20 ప్రపంచకప్‌కు జింబాబ్వే, నెదర్లాండ్స్‌

రష్యా మాజీ టెన్నిస్‌ స్టార్‌ మారియా షరపోవా అభిమానులతో శుభవార్త పంచుకున్నారు. త్వరలోనే తాను తల్లికాబోతున్నట్లు తెలిపారు. ఈ మేరకు.. ‘‘అమూల్యమైన సరికొత్త ఆరంభాలు!!’’ అంటూ తాను గర్భవతినన్న విషయాన్ని సోషల్‌ మీడియా వేదికగా వెల్లడించారు. బీచ్‌లో నిల్చుని ఉన్న ఫొటోను షేర్‌ చేసి తల్లి కాబోతున్న అనుభూతులను పదిలం చేసుకుంటున్నట్లు పేర్కొన్నారు. కాగా తన కెరీర్‌లో ఐదు గ్రాండ్‌స్లామ్‌ టైటిళ్లు గెలిచిన షరపోవా.. 2020లో టెన్నిస్‌కు గుడ్‌బై చెప్పిన సంగతి తెలిసిందే. ‘‘మరో  ఉన్నత శిఖరాన్ని అధిరోహించేందుకు సిద్ధమయ్యాను. విభిన్నమైన మైదానంలో పోటీపడబోతున్నాను. టెన్నిస్‌కు గుడ్‌బై చెబుతున్నా’’ అంటూ తన నిర్ణయాన్ని వెల్లడించారు. ఇక షరపోవా వ్యక్తిగత జీవితం విషయానికొస్తే.. బ్రిటన్‌కు చెందిన వ్యాపారవేత్త అలెగ్జాండర్‌ గిల్కెస్‌తో ఆమె రిలేషన్‌షిప్‌లో ఉన్నారు. ఇక వీరిద్దరు త్వరలోనే బిడ్డకు జన్మనివ్వబోతున్నారు. View this post on Instagram A post shared by Maria Sharapova (@mariasharapova)

రష్యన్‌ టెన్నిస్‌ దిగ్గజం మరియా షరపోవాతో పాటు ఫార్ములావన్‌ మాజీ చాంపియన్‌ మైకెల్‌ షుమాకర్‌లపై గుర్గావ్‌ పోలీస్‌ స్టేషన్‌లో చీటింగ్‌, క్రిమినల్‌ కేసులు నమోదయ్యాయి. ఢిల్లీలోని చత్తార్‌పూర్‌ మినీఫామ్‌కు చెందిన షఫాలీ అగర్వాల్‌ అనే మహిళ ఫిర్యాదు మేరకు గుర్గావ్‌ పోలీసులు షరపోవా, షుమాకర్‌ సహా 11 మంది వ్యాపారులపై బుధవారం ఎఫ్‌ఐఆర్‌ నమోదు చేశారు. షఫాలీ అగర్వాల్‌ మాట్లాడుతూ.. రియల్‌టెక్‌ డెవలప్‌మెంట్‌ అండ్‌ ఇన్‌ఫ్రాస్ట్రక్చర్‌ ఇండియా ప్రైవేట్ లిమిటెడ్‌ అనే  రియల్‌ ఎస్టేట్‌ కంపెనీ తమని మోసం చేసిందని తెలిపారు. సెక్టార్‌ 73లోని షరపోవా ప్రాజెక్ట్‌ పేరిట షుమాకర్‌ టవర్స​ అపార్టమెంట్‌లో ఒక ఫ్లాట్‌ కోసం కంపెనీ ప్రతినిధులు సుమారు రూ.80 లక్షలు తీసుకున్నారని పేర్కొన్నారు. 2016లో ఫ్లాట్‌ను అందిస్తామని నమ్మించి ఇంతవరకు మాకు అందించలేదని తెలిపారు. ఈ విషయమై కంపెనీ ప్రతినిధులను ఎన్నిసార్లు సంప్రదించినా న్యాయం జరగలేదని.. జాతీయ వినియోగదారుల కమిషన్‌లో ఫిర్యాదు చేసినా లాభం లేకపోయిందని వివరించారు. ఈ నేపథ్యంలోనే కోర్టును ఆశ్రయించగా.. వారిపై క్రిమినల్‌, చీటింగ్‌ కేసులు నమోదు చేయమని కోర్టు వెల్లడించిందని పేర్కొన్నారు. కాగా 2016లో సదరు కంపెనీకి షరపోవా, షుమాకర్‌లు అంబాసిడర్‌గా వ్యవహరించడంతో పాటు భాగస్వాములుగా ఉన్నట్లు పోలీసులు తెలిపారు. పలుమార్లు కంపెనీ ప్రతినిధులతో కలిసి షరపోవా, షుమాకర్‌లు డిన్నర్‌ పార్టీల్లో పాల్గొన్నట్లు తేలింది. ఫార్ములావన్‌లో మెర్సిడెస్‌కు ఎక్కువగా ప్రాతినిధ్యం వహించిన మైకెల్‌ షుమాకర్‌ ఏడుసార్లు ఫార్ములావన్‌ చాంపియన్‌గా నిలిచాడు. ప్రస్తుత చాంపియన్‌ లుయీస్‌ హామిల్టన్‌ కూడా ఏడుసార్లు ఫార్ములావన్‌ చాంపియన్‌షిప్‌ను గెలిచాడు. ఇక షుమాకర్‌ రికార్డులు పరిశీలిస్తే.. 2012లో రిటైర్‌ అయ్యేవరకు 91 విజయాలు, 155 ఫోడియమ్స్‌, 1566 కెరీర్‌ పాయింట్లు, 68 పోల్‌ పోజిషన్స్‌, 77 ఫాస్టెస్ట్‌ లాప్స్‌ అందుకున్నాడు.  ఇక మహిళల టెన్నిస్‌ విభాగంలో తనకంటూ ప్రత్యేకస్థానం ఏర్పరచుకుంది. 2001లో అంతర్జాతీయ టెన్నిస్‌లో అరంగేట్రం చేసిన షరపోవా.. టెన్నిస్‌లో అందాల రాణిగా నిలిచింది. 2001-2020 మధ్య ఐదుసార్లు గ్రాండ్‌స్లామ్‌ టైటిల్స్‌ నెగ్గడంతో పాటు 18 ఏళ్ల వయసులోనే నెంబర్‌ వన్‌ స్థానాన్ని ఆక్రమించింది. 2005లో 21 వారాలపాటు షరపోవా మహిళల టెన్నిస్‌ నెంబర్‌వన్‌ క్రీడాకారిణిగా నిలిచింది. ఇక కెరీర్‌ గ్రాండ్‌స్లామ్‌(యూఎస్‌ ఓపెన్‌, వింబుల్డన్‌, ఫ్రెంచ్‌ ఓపెన్‌, ఆస్ట్రేలియన్‌ ఓపెన్) అందుకున్న క్రీడాకారిణిగా షరపోవా చరిత్ర సృష్టించింది. చదవండి: PAK vs AUS: 23 ఏళ్ల క్రితం టీమిండియా బ్యాటర్‌‌.. ఇప్పుడు పాకిస్తాన్‌ బ్యాటర్‌; సీన్‌ రిపీట్‌ AUS vs PAK: 'మా గుండె ఆగినంత పనైంది'.. అప్పుడు తిట్టినోళ్లే ఇవాళ పొగుడుతున్నారు

US Open 2021 Winner Emma Raducanu:  టెన్నిస్‌ చరిత్రలో పెనుసంచలనం చోటు చేసుకుంది. యూఎస్‌ ఓపెన్‌ ఫైనల్‌లో పద్దెనిమిదేళ్ల ఎమ్మా రెడుకాను విజేతగా ఆవిర్భవించింది.  ఈ బ్రిటిష్‌ టెన్నిస్‌ సెన్సేషన్‌..  19 ఏళ్ల కెనడా ప్లేయర్‌ లేలా ఫెర్నాండెజ్‌ను 6-4, 6-3 తేడాతో ఓడించి చరిత్ర సృష్టించింది.  న్యూయార్క్‌లోని కరోనా పార్క్‌ ‘అర్థర్‌ ఆషే స్టేడియం’లో భారత కాలమానం ప్రకారం.. శనివారం అర్ధరాత్రి దాటాక(ఆదివారం ఉదయం) US Open 2021 మహిళల ఫైనల్‌ మ్యాచ్‌ జరిగింది.  సెట్‌ కూడా ఓడిపోకుండా టీనేజర్‌ ఎమ్మా రెడుకాను మ్యాచ్‌పై పట్టు సాధించి గెలుపును ఖాతాలో వేసుకుంది. అత్యంత చిన్నవయస్సులోనే గ్రాండ్‌స్లామ్‌ వేటలో ఫైనల్‌లో విజేతగా ఆవిర్భవించింది. అంతేకాదు ఈ గ్రాండ్‌ విక్టరీతో తన కెరీర్‌లో తొలి గ్రాండ్‌స్లామ్‌ టైటిల్‌ను కైవసం చేసుకుంది. గతంలో మరియా షరపోవా(17 ఏళ్ల వయసులో వింబుల్డన్‌ విజేత- 2004) తర్వాత ఏదేని ప్రతిష్టాత్మక టోర్నమెంట్‌లో ఈ రికార్డు సాధించిన టీనేజర్‌గా గుర్తింపు ఇప్పుడు ఎమ్మా ఘనత దక్కించుకుంది. Hanging out with ESPN 😎📺 pic.twitter.com/QpIX2TgDvs — US Open Tennis (@usopen) September 12, 2021 కాగా, ఎమ్మా రెడుకాను కెరీర్‌లో ఇప్పటిదాకా చెప్పుకోదగ్గ విజయాలేవీ లేకపోవడం విశేషం. ఈ నేపథ్యంలో ఆమె సక్సెస్‌ గురించి ఆసక్తికర చర్చ నడుస్తోంది.   ఇదిలా ఉంటే బ్రిటిష్‌ ప్లేయర్‌ వర్జీనియా వేడ్  1977లో వింబుల్డన్‌  గ్రాండ్‌స్లామ్‌ నెగ్గిన తర్వాత ఇప్పుడు.. ఎమ్మా రెడుకాను ఈ ఘనత సాధించింది. Emma lifts the trophy for the fans outside Arthur Ashe stadium #EmmaRaducanu #USOpen2021 pic.twitter.com/8FwLeB4le4 — Sarah Gough (@sarahgoughy) September 11, 2021 చదవండి: స్వర్ణ పతక విజేతను ఓడించి.. ఫైనల్‌లో జొకోవిచ్‌

ఆరేళ్ల క్రితం.. ‘సచిన్‌ ఎవరో నాకు తెలీదు’ అని టెన్నిస్‌ తార మారియా షరపోవా అన్నందుకు ఆగ్రహించిన సచిన్‌ అభిమానులు ఇప్పుడు ఆ షరపోవాకే.. ‘మన్నించు మారియా, నువ్వన్నది కరెక్టే. అతడు నీకు తెలిసి ఉండాల్సినంత మనిషి కాదు’ అని ఆమె ఫేస్‌బుక్‌లో పోస్టుల మీద పోస్టులు పెడుతున్నారు. ఆమెకు లైకుల మీద లైకులు కొడుతున్నారు. రైతు ఉద్యమానికి మద్దతుగా నిలిచిన విదేశీ ప్రముఖుల్ని హెచ్చరిస్తూ.. ‘ఇది మా సొంత విషయం’ అని సచిన్‌ ట్వీట్‌ చేయడమే ఇందుకు కారణం. ఢిల్లీ సరిహద్దులలో కొన్ని నెలలుగా రైతు ఉద్యమం జరుగుతోంది. ప్రభుత్వం తెచ్చిన మూడు సాగు చట్టాలు తమ మెడకు ఉరి వంటివి కనుక వాటిని రద్దు చేయాలని రైతుల డిమాండ్‌. ప్రభుత్వానికి, రైతులకు మధ్య ఎన్ని విడతలుగా చర్చలు జరిగినా ఒక ఫలవంతమైన ముగింపు రావడం లేదు. ఈలోపు వివిధ కారణాల వల్ల కనీసం 170 మంది ఉద్యమ రైతులు మరణించారని వస్తున్న వార్తలతో ప్రపంచం నలుమూలల నుంచి రైతుల డిమాండ్‌కు ట్వీట్‌ల ద్వారా మద్దతు లభిస్తోంది. స్వీడన్‌ నుంచి పర్యావరణ పరిరక్షణ ఉద్యమ కార్యకర్త గ్రెటా థన్‌బర్గ్, బార్బడోస్‌ పాప్‌ గాయని రిహాన్నా వంటివారు రైతులకు తమ సంఘీభావం ప్రకటించారు. ఈ క్రమంలో మాజీ క్రికెటర్‌ సచిన్‌ టెండూల్కర్‌.. విదేశీ సానుభూతి పరులకు వ్యతిరేకం గా పెట్టిన ట్వీట్‌ ఆయన అభిమానుల ఆగ్రహానికి కారణం అయింది. ‘భారత్‌ తన సార్వభౌమాధికారం విషయంలో రాజీకి రానవసరం లేదు. బయటి శక్తులు వీక్షకులుగా ఉండొచ్చు కానీ, భాగస్వాములు కాదగరు’ అని థన్‌బర్గ్, రిహాన్నాలను ఉద్దేశించే సచిన్‌ ఆ ట్వీట్‌ పెట్టారు. ∙∙ నిప్పు జ్వాల గాలి దిశను బట్టి వ్యాíపిస్తుంది. ఆగ్రహ జ్వాల ఎటువైపు అధాటున మళ్లుతుందో ఎవరూ ఊహించలేరు. సచిన్‌ను ‘క్రికెట్‌ దేవుడు’ అని ఆరాధించిన ఆయన అభిమానులు.. రైతులకు మద్దతు ఇస్తున్న విదేశీయుల్ని సచిన్‌ ‘హద్దుల్లో ఉండండి’ అని అర్థం వచ్చేలా హెచ్చరించినందుకు ఆయనపై నిరసన వ్యక్తం చేస్తున్నారు. ఆ నిరసన నేరుగా లేదు. పరోక్షంగా ఉంది. పరోక్షంగా ఉన్నప్పటికీ శక్తిమంతంగా ఉంది. రష్యన్‌ టెన్నిస్‌ దిగ్గజం మారియా షరపోవా ఆరేళ్ల క్రితం ఒక ఇంటర్వ్యూలో ఒక ప్రశ్నకు సమాధానంగా ‘సచిన్‌ ఎవరో నాకు తెలియదు’ అని అన్నందుకు ఆగ్రహోదగ్రులైన భారతీయులు, ముఖ్యంగా మలయాళీలు షరపోవా ఫేస్‌బుక్‌ వాల్‌పై కూర్చొని ఆనాడు ఆమెను అనరాని మాటలు అన్నారు. చాలావరకు అవి భారతీయ భాషల్లో ఉన్నాయి కనుకు షరపోవాకు అర్థమయ్యే అవకాశం లేదు. ఇంగ్లిష్‌లో ఉన్న కామెంట్స్‌నైనా ఆమె పట్టించుకున్న దాఖలాలు లేవు. కాని ఇప్పుడు అదే సచిన్‌ అభిమానులు.. అదే షరపోవా ఫేస్‌ బుక్‌ వాల్‌ మీదకు వెళ్లి ఆమెకు సారీ చెబుతున్నారు. ‘మన్నించు మారియా, నువ్వన్నది కరెక్టే. అతడు మీకు తెలిసి ఉండాల్సినంత మనిషి కాదు’ అని పోస్ట్‌ల మీద పోస్ట్‌లు పెడుతున్నారు. ఒకరైతే.. ‘మారియా, ఇండియా రండి. నా రెస్టారెంట్‌లో మీ కోసం ప్రత్యేకంగా షవర్‌మా, కుళిమంతీ (బిర్యానీ) చేయించి పెడతాను’ అని ఆమెను ఆహ్వానించారు. నాడు మారియాపై పడిన రాళ్లే, ఇప్పుడు పూలుగా మారుతున్నాయి. ‘డియర్‌ మారియా, వి ఆర్‌ సారీ. సచిన్‌కి సపోర్ట్‌ చేస్తూ ఆనాడు మీపై సైబర్‌ అటాక్‌ చేసినందుకు బాధపడుతున్నాం’ అని ఒకరు; ‘మారియా, ఆరోజు నాకు పరిణతి లోపించింది. సచిన్‌ తెలియదు అన్నందుకు నిన్ను నానా మాటలు అన్నాను. నన్ను క్షమించు’ అని ఇంకొకరు పోస్టు పెట్టారు. ఒక మహిళ అయితే.. ‘సారీ సిస్టర్, యువర్స్‌ ట్రూలీ’ అంటూ షరపోవాకు లైకుల మీద లైకులు కొట్టారు. ఈ ప్రేమ జ్వాల అంతకంతకూ పెరిగిపోయి, సచిన్‌ ఉండే ముంబై మీదుగా రైతులు పోరాడుతున్న ఢిల్లీ వరకు వ్యాపించేలా మారియాపై పూల వర్షం కురుస్తోంది. ఆ పూల వానను రైతుల పోరాటానికి ఆశీస్సులనే అనుకోవాలి. రిహాన్నా, గ్రెటా థన్‌బర్గ్‌

మాస్కో: రష్యా మాజీ టెన్నిస్‌ స్టార్‌ మారియా షరపోవా తన అభిమానులకు క్రిస్మస్‌, న్యూయర్‌ సర్‌ప్రైజ్‌ ఇచ్చారు. తన బాయ్‌ఫ్రెండ్‌ అలెగ్జాండర్‌ గిల్కెస్‌ను త్వరలో నిశ్చితార్థం చేసుకోబోతున్నట్లు సోషల్‌ మీడియా వేధికగా ప్రకటించారు. ఇటీవల టెన్నిస్‌కు గూడ్‌బై చెప్పిన మారియా శనివారం తన బాయ్‌ఫ్రేండ్‌తో కలిసి ఉన్న ఫొటోలను, వీడియోలను ఇన్‌స్టాగ్రామ్‌లో షేర్‌ చేస్తూ.. ‘ఇది చిన్న రహస్యం. మేము కలిసిన మొదటి రోజు నుంచే ఒకే చెబూతూనే ఉన్నాను. ఇతడు అలెగ్జాండర్‌ గిల్కెస్‌ కదా’ అంటూ తన ప్రేమ రహస్యాన్ని బయటపెట్టారు. (చదవండి: టెన్నిస్‌కు గుడ్‌బై: షరపోవా భావోద్వేగం) ఇక మారియా పోస్టుకు బాయ్‌ఫ్రెండ్‌ గిల్కెస్‌ ఇలా సమాధానం ఇస్తూ.. ‘ఒకే చెప్పి నన్ను చాలా చాలా సంతోషమైన అబ్బాయిని చేసినందుకు ధన్యవాదాలు’ అంటూ మారియాతో కలిసి ఉన్న ఫొటోను పంచుకున్నాడు. కాగా మారియా రష్యా వ్యాపారవేత్త అయిన అలెగ్జాండర్‌ గిల్కెస్‌తో ప్రేమలో ఉన్నట్లు 2018లో ప్రకటించిన విషయం తెలిసిందే. ఇక ఐదుసార్లు గ్రాండ్‌ స్లామ్‌ చాంపియన్‌గా నిలిచిన మారియా ఈ ఏడాది ఫిబ్రవరిలో రిటైర్మెంట్‌ ప్రకటించారు. 32 ఏళ్లకే 28 ఏళ్ల తన టెన్నిస్‌ ఆటకు ముగింపు పలకడంతో ఆమె అభిమానులంతా షాక్‌కు గురయ్యారు.  View this post on Instagram A post shared by Maria Sharapova (@mariasharapova)

అన్‌స్టాపబుల్‌ : మై లైఫ్‌ సో ఫార్‌.. అని రెండున్నరేళ్ల క్రితం మారియా షరపోవా తన బయోగ్రఫీ రాసుకున్నారు. ఆపలేని ఎదుగుదల.. అని. ఆ పుస్తకం బయటికి రావడానికి కొద్దినెలల  ముందే.. పదిహేను నెలల నిషేధం తర్వాత ఆమె మళ్లీ టెన్నిస్‌లోకి వచ్చారు. రెండేళ్లు ఆడారు. అంతలోనే మళ్లీ రెండు రోజుల క్రితం రిటైర్‌మెంట్‌ని ప్రకటించారు. ఆమెను ఎవరూ ఆపలేదు. ఆమే ఆగిపోయారు. అంతమాత్రాన ఆమె ‘అన్‌స్టాపబుల్‌’ కాకుండా పోరు. టెన్నిస్‌లో రాణించడానికి షరపోవా ఎంత కష్టపడ్డారో.. టెన్నిస్‌ తర్వాత లైఫ్‌లోనూ ఎదగడానికి అంతగా కృషి చేస్తారని అంచనా వెయ్యడానికి ఆమె కెరీర్‌లోని మలుపులే కొలమానాలు. షరపోవా క్యాండీ సుగర్‌పోవా అనే క్యాండీ ఒకటి ఉంది. అది అమెరికాలో దొరుకుతుంది. పిల్లలకు ఎంతో ఇష్టమైనది. ఫన్నీగా ఉంటుంది. నోట్లో వేసుకుంటే స్వీట్‌గా ఉంటుంది. క్యాండీల వ్యాపారి జెఫ్‌ రూబిన్‌.. షరపోవా పేరు మీదే, ఆమెతో కలిసి సుగర్‌పోవా క్యాండీని సృష్టించాడు. దాని అమ్మకాలపై వచ్చే డబ్బు ‘షరపోవా చారిటీ’కి వెళుతుంది. ఒక సందర్భంలోనైతే షరపోవా తన పేరును సుగర్‌పోవాగా మార్చుకోవాలని కూడా అనుకున్నారు! అంతగా ఆ ప్రాడెక్ట్‌ ఇమేజ్‌ పెరిగిపోయింది. షరపోవా ప్రాక్టీస్‌ ఆరవ యేట మాస్కోలోని మార్టినా నవ్రతిలోవా నడుపుతున్న టెన్నిస్‌ క్లినిక్‌లో చేరడం షరపోవా కెరీర్‌ను మలుపుతిప్పింది. మార్టినా ఈ చిన్నారిని ఫ్లారిడాలోని ఐ.ఎం.జి.అకాడమీకి రికమండ్‌ చేసింది! ఆండ్రీ అగస్సీ, మోనికా సెలెస్, అన్నా కోర్నికోవా లాంటి టెన్నిస్‌ దిగ్గజాలు ట్రైనింగ్‌ తీసుకున్న అకాడమీ అది. కానీ షరపోవా తండ్రి దగ్గర డబ్బుల్లేవు. అప్పు చేయాలి. డబ్బైతే అప్పు చేయగలడు కానీ, ఇంగ్లీషులో మాట్లాడలేడు కదా! ఇంట్లో ఎవ్వరికీ ఇంగ్లిష్‌ రాదు. ఆ భయంతో ఏడాది తాత్సారం చేసి ధైర్యం చేశాడు. మరోవైపు వీసా నిబంధనలు తండ్రీ కూతుళ్లను మాత్రమే యు.ఎస్‌.లోకి రానిచ్చాయి. తల్లి ఎలీనా రెండేళ్ల పాటు భర్తకు, కూతురికి దూరంగా రష్యాలోనే ఉండిపోవలసి వచ్చింది. షరపోవా, ఆమె తండ్రి తొలిసారి ఆమెరికాలో అడుగుపెట్టేనాటికి వాళ్ల దగ్గరున్న డబ్బు 700 డాలర్లు. ఇప్పటి లెక్కల్లో సుమారు 47 వేల రూపాయలు. వాటిని జాగ్రత్తగా వాడుకుంటూనే ఫ్లారిడాలో ఇళ్లల్లో పాత్రలు కడగడం వంటి చిన్న చిన్న ఉద్యోగాలు చెయ్యడం మొదలుపెట్టాడు తండ్రి. తర్వాతి ఏడాదికల్లా అకాడమీ ప్రవేశానికి అర్హమైన తొమ్మిదేళ్ల వయసు రాగానే కూతుర్ని ఐ.ఎం.జి.లో చేర్చాడు. ఇక షరపోవాకి ట్యూషన్‌ ఫీజు, ఇంత సదుపాయాలు, సౌకర్యాలు అన్నీ అకాడమీవే. అలా కెరీర్‌తో పాటు, షరపోవా జీవితం కూడా యు.ఎస్‌.తో ముడిపడిపోయాయి. ఆటల్లోనే కాదు, చారిటీల్లో కూడా ఆమె పెద్ద సెలబ్రిటీ అయ్యారు.  షరపోవా ‘తప్పు’ ఆస్ట్రేలియన్‌ ఓపెన్‌కు ముందు డ్రగ్‌ టెస్ట్‌ చేసినప్పుడు ఆమె ఒంట్లో ‘మెల్డోనియం’ అనే మందు బయటపడింది. అదేమీ నిషేధించిన ఔషధం కాదు. అప్పటికి పదేళ్లుగా ఆమె తన ఆరోగ్యం కోసం తనకు తెలియకుండానే మెల్డోనియం కలిసి ఉన్న మెడిసిన్‌ని వాడుతున్నారు. వరల్డ్‌ యాంటీ డోపింగ్‌ ఏజెన్సీ కొత్తగా విడుదల చేసిన నిషేధిత ఔషధాలలో దానిని కూడా చేర్చడంతో షరపోవా దోషి కావలసి వచ్చింది! అందుకు పడిన శిక్ష ఆట నుంచి పదిహేను నెలల బ్యాన్‌!   షరపోవా ఆట   షరపోవా రష్యన్‌ ప్రొఫెషనల్‌ ప్లేయర్‌. ఇరవై ఐదేళ్లుగా యు.ఎస్‌.లో ఉంటున్నారు. ఒలింపిక్‌ మెడలిస్ట్‌. టెన్నిస్‌ కోర్టులో గర్జించే సింహం. 6 అడుగుల 2 అంగుళాల ఎల్తైన మనిషి. ఆమెకు మాత్రమే ప్రత్యేకమైన ఆ స్వింగింగ్‌ వ్యాలీలు ప్రత్యర్థుల గుంyð ల్ని కిందికి జారుస్తాయి. ఒక ఆట గెలిచినప్పుడు షరపోవా వెంటనే తర్వాతి ఆటకు ప్రాక్టీస్‌ మొదలు పెడతారు! ఆటలో ఓడిపోయినప్పుడు ఆ ప్రెజర్‌ నుంచి బయట పడడానికి షాపింగ్‌కి వెళతారు! షరపోవా ‘రీబర్‌’ సోవియెట్‌ యూనియన్‌లో చెర్నోబిల్‌ అణు ప్రమాదం సంభవించిన తర్వాత ఏడాదికి న్యాగన్‌ పట్టణంలో షరపోవా పుట్టింది. ఆ పట్టణం చెర్నోబిల్‌ దుర్ఘటన జరిగిన ప్రిప్యత్‌ పట్టణానికి 3,500 కి.మీ. దూరంలో ఉంటుంది. చెర్నోబిల్‌ ప్రమాద ప్రభావం పడకుండా ఉండేందుకు షరపోవా తల్లిదండ్రులు ప్రిప్యత్‌ నుంచి ఎంత దూరంగా వీలైతే అంత దూరంగా వెళ్లిన తర్వాతే బిడ్డను కనాలని నిర్ణయించుకుని న్యాగన్‌లో తలదాచుకున్నారు. చెర్నోబిల్‌ ప్రమాదం 1986 ఏప్రిల్‌ 26న జరిగింది. ముప్పై ఏళ్ల తర్వాత మళ్లీ అదే రోజున నిషేధం తర్వాత షరపోవా తన ‘రీబర్త్‌’ టెన్నిస్‌ను ఆడారు.  షరపోవా స్నేహం పద్దెనిమిదవ యేటే టెన్నిస్‌లో ఆమె వరల్డ్‌ నెం.1 ర్యాంకులోకి వచ్చేశారు. ఆదే ఏడాది 18వ బర్త్‌డే పార్టీలో అమెరికన్‌ పాప్‌ రాక్‌ బ్యాండ్‌ మెరూన్‌ 5 సింగర్‌ ఆడమ్‌ లెవీన్‌ ఆమెకు పరిచయం అయ్యాడు. తర్వాత అమెరికన్‌ టెలివిజన్‌ ప్రొడ్యూజర్‌ చార్లీ ఎబర్సోల్‌ ఆమె జీవితంలోకి వచ్చాడు. తర్వాత స్లొవేనియా బాస్కెట్‌బాల్‌ ప్లేయర్‌ సషా ఉజాసిక్, తర్వాత బల్గేరియన్‌ టెన్నిస్‌ ప్లేయర్‌ గ్రిగర్‌ దిమిత్రోవ్‌. ప్రస్తుతం ఆమె బాయ్‌ఫ్రెండ్‌ అలెగ్జాండర్‌ గిల్కెస్‌. షరపోవా రిటైర్మెంట్‌ని ప్రకటించినప్పుడు ఆమె కెరీర్‌ను కొనియాడుతూ సోషల్‌ మీడియాలో పోస్ట్‌ పెట్టాడు. షరపోవా రాకెట్‌ షరపోవాకు రెండేళ్ల వయసులో ఆమె కుటుంబం సోచ్‌ సిటీకి మారింది. అక్కడ ఆమె తండ్రికి అలెగ్జాండర్‌ కఫెల్నికోవ్‌ అనే వ్యక్తి పరిచయం అయ్యాడు. అలెగ్జాండర్‌ తన పద్నాలుగేళ్ల కొడుకు ఎవ్‌జెనీకి టెన్నిస్‌లో శిక్షణ ఇప్పిస్తున్నప్పుడు వారి పరిచయం జరిగింది. తర్వాత రెండేళ్లకు తండ్రితో పాటు ఆట చూడడానికి వచ్చిన షరపోవాను చూసి ముచ్చట పడి ఆ చిన్నారికి కూడా ఓ టెన్నిస్‌ రాకెట్‌ కొనిచ్చాడు అలెగ్జాండర్‌. అదే తొలిసారి షరపోవా రాకెట్‌ పట్టుకోవడం. లోకల్‌ పార్క్‌లో చాలాకాలం పాటు ఆ రాకెట్‌తోనే ఆడింది. తర్వాత రష్యన్‌ కోచ్‌ యూరి యట్కిన్‌ దగ్గర టెన్నిస్‌ పాఠాలు నేర్చుకుంది. తొలి ఆటలోనే షరపోవాలోని అతి ప్రత్యేకమైన ‘హ్యాండ్‌–ఐ కోఆర్డినేషన్‌’ని గమనించాడు కోచ్‌.  షరపోవా కోపం కోపంగా ఉన్నప్పుడు షరపోవా రాకెట్‌తో లాగిపెట్టి టెన్నిస్‌ బంతిని కొడతారు. అవతల ఎవరూ ఉండరు. ప్రాక్టీస్‌ వాల్‌ను పిడిగుద్దులు గుద్దినట్టుగా బంతిని వాల్‌ పైకి ఈడ్చి కొడుతూనే ఉంటారు. ఊరికినే తనకు కోపం రాదు. వస్తే ఊరికే ఉండిపోదు. కోపం తీర్చుకుంటుంది. ఎదురుగా ఉన్న గోడల్ని బంతులతో పగలగొడుతుంటారు. షరపోవా యోగా పదిహేను నెలల నిషేధంలో షరపోవా యోగా, ధ్యానం సాధన చేశారు. హార్వర్డ్‌ బిజినెస్‌ స్కూల్‌లో చేరారు. మంచి మంచి బుక్స్‌ చదివారు. బయోగ్రఫీ రాశారు. బాక్సింగ్‌ ప్రాక్టీస్‌ మొదలుపెట్టారు. ఆట నుంచి బ్యాన్‌ అవగానే చాలామందే చికాకు పరిచారు ఆమెను. మొదటగా డేవిడ్‌ హెగర్టీ! ఇంటర్నేషనల్‌ టెన్నిస్‌ ఫెడరేషన్‌ ప్రెసిడెంట్‌. ఆమె బ్యాన్‌ నిర్ణయం అతడిదే. ఇంకా.. సాటి ప్లేయర్‌లు జాన్‌ మెకెన్రో, ప్యాట్‌ క్యాష్, జెన్నిఫర్‌ కాప్రియాటీ, సెరెనా విలియమ్స్, రోజర్‌ ఫెదరర్, రాఫెల్‌ నాదల్, ఆండీ ముర్రే, నొవాక్‌ జకోవిక్‌..  తలో మాటా అన్నారు. ‘ఇలా చేసిందంటే నమ్మలేక పోతున్నాం’ అని ఒకరు, ‘తన టైటిళ్లనీ వెనక్కు తీసేసుకోవాలి’ అని ఒకరు, ‘సారీ చెప్పినా ఒప్పుకోవద్దని ఒకరు’... తలో రాయి విసిరారు. షరపోవా ఎవరికీ సారీ చెప్పలేదు. వీళ్లందర్నీ క్షమించేయడానికి బాక్సింగ్‌ కన్నా, ధ్యానం ఆమెకు ఎక్కువ ఉపయోగపడింది.  షరపోవా బాల్యం బాల్యం నుంచి దూరంగా వచ్చేస్తున్నకొద్దీ, బాల్యం ఆమె దగ్గరగా రావడం షరపోవా జీవితంలోని ఒక విశేషం. చిన్నపిల్ల నవ్వు, చిన్నపిల్ల వెక్కిరింపు ఇవెక్కడికీ పోలేదు. ఆమె దగ్గర చిన్నప్పటి స్టాంప్‌ కలెక్షన్‌ ఇంకా పోగవుతూనే ఉంది. చిన్నప్పటి ఆమె జ్ఞాపకాల సుగంధ పరిమళం స్టెల్లా మెకార్ట్నీ ఎప్పుడూ ఆమెను అంటుకునే ఉంటుంది! పిప్పీ లాంగ్‌స్టాకింగ్‌ బుక్స్‌ కూడా ఇంకా చదువుతూనే ఉన్నారు షరపోవా. పిప్పీ లాంగ్‌స్టాకింగ్‌ అనేది స్వీడిష్‌ రచయిత్రి ఆస్ట్రిడ్‌ లిండ్‌గ్రెన్‌ నవలల్లోని ఒక అమ్మాయి క్యారెక్టర్‌. పిప్పీ జుట్టు ఎర్రగా ఉంటుంది. రెండు జడలు ఉంటాయి. స్ట్రాంగ్‌గా ఉంటుంది. సింగిల్‌ హ్యాండ్‌తో తన గుర్రాన్ని అదుపు చేస్తుంటుంది. చురుగ్గా ఉంటుంది. ఎప్పుడేం చేస్తుందో చెప్పలేనంత ఎగై్జటింగ్‌గా ఉంటుంది. ఆ పాత్రలో తనను తను చూసుకున్నట్లుంది షరపోవా. అందుకే పిప్పీ అంటే అంతిష్టం. మిగతా పిల్లల సాహిత్యాన్ని కూడా ఆసక్తిగా చదువుతుంది.

ఏ ఆరంభానికైనా ముగింపు తప్పదు. తన ఆటతో టెన్నిస్‌ను శాసించి, ఆ రంగంలో తనకంటూ ప్రత్యేక స్థానాన్ని సంపాదించుకున్న షరపోవా కూడా తన ఇరవై ఎనిమిదేళ్ల ఆటకు గుడ్‌బై చెబుతున్నట్టు బుధవారం ప్రకటించింది. నాలుగేళ్లక్రితం షరపోవా అతి ముఖ్యమైన ప్రకటన చేస్తారని ఆమె ప్రతినిధి ప్రకటించినప్పుడే నిష్క్రమణపై అంచనాలు వెలువడ్డాయి. ఎందుకంటే అప్పటికే భుజానికి ఏర్పడిన  గాయం ఆమెకు ప్రతిబంధకమైంది. దాన్ని బేఖాతరు చేసి విజయాలు సాధిస్తున్నా మును పటి ఉరవడి మందగించిందన్న అసంతృప్తి అభిమానుల్లో ఉండేది. కానీ ఎవరి ఊహకూ అంద కుండా డోపింగ్‌ వివాదంలో తాను తాత్కాలికంగా నిష్క్రమిస్తున్నానని షరపోవా ప్రకటించి అందర్నీ దిగ్భ్రాంతి పరిచింది. అటు తర్వాత 15 నెలల సస్పెన్షన్‌ ముగిసి, మళ్లీ టెన్నిస్‌ బ్యాట్‌ పట్టుకున్నా, ఒకటీ అరా విజయాలు సాధించినా పాత గాయాలు ఆమెను వెన్నాడుతూనే వచ్చాయి. 2008 మొదలు ఆమె తన భుజానికి తగిలిన గాయానికి తరచు శస్త్ర చికిత్సలు చేయించుకోవాల్సివచ్చింది. ఒకపక్క ఆడుతూనే నెలల తరబడి ఫిజియో థెరపీలు తీసుకోవాల్సివచ్చింది. బరిలో దిగడానికి అర గంట ముందు ప్రత్యేక థెరపీ తప్పనిసరయ్యేది. కానీ ఇవన్నీ ఆమెను పాత షరపోవాగా మార్చ లేక పోయాయి. 2004లో అప్పటికే దిగ్గజంగా వున్న సెరెనా విలియమ్స్‌తో తలపడి çపదిహేడేళ్ల వయ సులో వింబుల్డన్‌ ఫైనల్‌ను చేజిక్కించుకున్న షరపోవా, అదే సెరెనాతో నిరుడు 6–1, 6–1 తేడాతో ఓడిపోక తప్పలేదు. ఇక నిష్క్రమించడం మంచిదని అప్పుడే ఆమె నిర్ణయించుకుని వుంటుంది. షరపోవాలాంటివారు ఏ రంగంలోనైనా అరుదుగా వుంటారు. ఆరేళ్ల వయసులోనే అమ్మకు దూరంగా ఉండాల్సిరావడం,  స్వస్థలమైన రష్యాను వదిలి వేల కిలోమీటర్ల దూరంలోని అమెరికాకు శిక్షణ కోసం పయనం కావడం సాధారణం కాదు. అమెరికాలోని ఫ్లారిడాలో తన టెన్నిస్‌ బడిలో ఆండ్రీ అగస్సీ, వీనస్‌ విలియమ్స్, సెరినా విలియమ్స్, మోనికా సెలెస్, అన్నా కోర్నికోవా, మార్టినా హింగిస్‌ వంటి ఉద్దండుల్ని సృష్టించిన నిక్‌ బొలెట్టిరీయే షరపోవాను కూడా చేర్చుకుని మంచి శిక్షణనందించాడు. భవిష్యత్తు గ్రాండ్‌ స్లామ్‌ విజేతగా తీర్చిదిద్దాడు. సరదా ఆటలతో కాలక్షేపం చేయాల్సిన లేత వయసులో తోటిపిల్లల్ని తన ప్రత్యర్థులుగా పరిగణించడం, ఓడించాలనుకోవడం షరపోవా అలవాటు చేసుకుంది. గెలుపు తప్ప మరిదేన్నీ కోరుకోని జీవితం ఆమెకు ప్రత్యర్థులనే కాదు... శత్రువుల్ని కూడా ఇచ్చింది. 2016లో నిషేధిత ఉత్ప్రేరకాలు వాడిందని రుజువు కావడంతో షరపోవాపై నిషేధాస్త్రం ప్రయోగించినప్పుడు ఆ రంగంలోని వారినుంచి తగిన సానుభూతి లభిం చకపోవడానికి ఇదొక కారణం. కానీ ఈ రంగమే షరపోవాకు కావలిసినంత కీర్తిప్రతిష్టల్ని ఆర్జించి పెట్టింది. కోట్లాదిమంది అభిమానుల్ని సాధించిపెట్టింది. ఆమె సాధించిన విజయాలు చిన్నవి కాదు. వింబుల్డన్‌ సింగిల్స్‌ గెల్చుకున్నాక వరసగా యూఎస్‌ ఓపెన్‌(2006), ఆస్ట్రేలియన్‌ ఓపెన్‌(2008) చేజిక్కించుకుంది. 2012, 2014 సంవత్సరాల్లో ఫ్రెంచ్‌ ఓపెన్‌ కూడా ఆమె సొంతమైంది. షరపోవా దూకుడు ఒక్క టెన్నిస్‌కే పరిమితం కాలేదు. వ్యాపార రంగంలో కూడా అడుగుపెట్టి విజయాలు అందుకుంది. ఆమె వ్యాపార సామ్రాజ్యం విలువ 1,200 కోట్ల డాలర్ల పైమాటేనని రెండేళ్లక్రితం ఫోర్బ్స్‌ పత్రిక ప్రకటించింది.   రష్యాలోని సైబీరియాలో చిన్నపాటి మధ్యతరగతి కుటుంబంలో పుట్టి టీనేజ్‌లోనే వరస విజయాలతో ప్రత్యర్థుల్ని హడలెత్తించిన షరపోవా తన ఆటతో టెన్నిస్‌ రంగానికే వన్నె తెచ్చింది. తర్వాత కాలంలో ఆటలో మాత్రమే కాదు... ఆట వెలుపల కూడా ఆమె సంచలనంగా మారింది. ప్రపంచ ప్రఖ్యాతి చెందిన నైక్, పోర్షే, ఎవియాన్‌ వంటి అనేకానేక సంస్థలకు ఆమె బ్రాండ్‌ అంబాసిడర్‌గా మారింది. ఎన్నో మేగజీన్‌ల ముఖపత్రాలను అలంకరించింది. ఇలాంటి సమయంలో ఆమెపై డోపింగ్‌ ఆరోపణలొచ్చినప్పుడు అందరూ ఆశ్చర్యపోయారు. క్రీడా రంగ దిగ్గజాలుగా ఉన్నవారెందరో అడపా దడపా పట్టుబడుతున్నా షరపోవాను ఎవరూ అలా ఊహించలేకపోయారు. తాను చాన్నాళ్లుగా వాడుతున్న మందు నిషేధిత ఉత్ప్రేరకాల జాబితాలో చేరిందని తెలియక వాడి దోషినయ్యానని ఇచ్చిన సంజాయిషీ ఎవరినీ సంతృప్తిపరచలేదు. ఎందుకంటే ఆ ఔషధం వాడితే అనర్హత వేటు పడుతుందని అంతకు ముందునుంచే క్రీడా సంస్థలు హెచ్చరిస్తూ వచ్చాయి. వ్యక్తి మాత్రులుగా ఉన్నవారికి ఆ సంగతి తెలియలేదంటే అర్ధం చేసుకోవచ్చు. కానీ షరపోవా కోసం ప్రత్యేక బృందం ఉండి పనిచేస్తుంటుంది. ఆమెపై ఎక్కడెక్కడ ఎవరెవరు ఎలా వ్యాఖ్యానిస్తున్నారో, టెన్నిస్‌ రంగంలో జరుగుతున్న పరిణామాలేమిటో, నియమ నిబంధనల్లో ఎటువంటి మార్పులు కావాలన్న డిమాండ్లు వస్తున్నాయో, ఏమేరకు అవి మారాయో ఆ బృందం ఎప్పటికప్పుడు ఆమెకు తెలియజేస్తూ ఉంటుంది. ఎంచుకున్న రంగంలో ఏకాగ్రతతో పనిచేయడం, ఆ క్రమంలో ఎదురయ్యే అవరోధాలను అధి గమించడానికి నిరంతరం ప్రయత్నించడం వంటివి గెలుపును గ్యారెంటీ చేస్తాయి. షరపోవా అలాంటి అడ్డంకులెన్నిటినో ఎదుర్కొంది. కేవలం 700 డాలర్ల సొమ్ముతో అమెరికాలో తండ్రితో పాటు అడుగిడిన ఆమె ఈ రంగంలో మిగిలినవారికన్నా మిన్న కావడానికి తనలోని ఏకాగ్రత, పట్టుదల, ఆటను ఎప్పటికప్పుడు మెరుగుపరుచుకునే గుణం దోహదపడ్డాయి. అయితే వచ్చిపడుతున్న వరస విజయాలు చూపును మసకబార్చకూడదు. గత నెలలో మెల్‌బోర్న్‌లో జరిగిన ఆస్ట్రేలియాలో ఓపెన్‌లో తొలి రౌండ్‌లోనే ఆమెకు సంప్రాప్తించిన అపజయం షరపోవా ర్యాంక్‌ను 373కు నెట్టేసింది. సవాళ్లు ఛేదించే క్రమంలోనో, ఫలానా వారిని మించిపోవాలన్న లక్ష్యాన్ని పెట్టుకోవడంలోనో ఆమె తప్పటడుగులు వేసివుండొచ్చు. కానీ బరిలో దిగిన ప్రతిసారీ షరపోవా చూపిన ప్రతిభాపాటవాలు, విన్యాసాలు ఆమెను ఎప్పటికీ మరిచిపోనీయవు. ఏ రంగంలోనైనా రాణించాలనుకునేవారికి షర పోవా జీవితం అధ్యయనం చేయదగ్గ మహత్తర గ్రంథం. 

ఆటతో పాటు అందం కూడా కలిసి నడిచే మహిళల టెన్నిస్‌లో ఒక శకం ముగిసింది. 16 ఏళ్లుగా ప్రపంచ వ్యాప్తంగా అభిమానులను అలరించిన రష్యన్‌ బ్యూటీ మారియా షరపోవా టెన్నిస్‌కు గుడ్‌బై చెప్పింది. ఐదు గ్రాండ్‌స్లామ్‌ టైటిల్స్‌ నెగ్గినా... వరల్డ్‌ నంబర్‌వన్‌ ర్యాంక్‌ సాధించినా... తన అందంతోనే ఎక్కువగా ఆకర్షించిన ఈ బుట్టబొమ్మ తన రాకెట్‌ను పక్కన పెడుతున్నట్లు ప్రకటించింది. తన పేరుతో పెట్టిన క్యాండీ ‘షుగర్‌పోవా’లాగే ఎన్నో  తీపి జ్ఞాపకాలను పదిలపర్చుకొని వీడ్కోలు  పలుకుతున్నట్లు వెల్లడించింది.    పారిస్‌: రష్యా టెన్నిస్‌ స్టార్, మాజీ వరల్డ్‌ నంబర్‌వన్‌ మారియా షరపోవా ఆట నుంచి తప్పుకుంది. ‘టెన్నిస్‌–నేను గుడ్‌బై చెబుతున్నా’ అంటూ ప్రకటించింది. నాలుగు వేర్వేరు గ్రాండ్‌స్లామ్‌లను నెగ్గిన అతి కొద్ది మంది ప్లేయర్లలో ఆమె కూడా ఉండటం విశేషం. 32 ఏళ్ల షరపోవా కొన్నేళ్లుగా వరుస గాయాలతో సతమతమవుతోంది. కోలుకొని అప్పుడప్పుడూ బరిలోకి దిగుతున్నా ఫలితాలు అన్నీ ప్రతికూలంగా వచ్చాయి. ఒకప్పుడు వరల్డ్‌ నంబర్‌వన్‌గా నిలిచిన ఆమె ఇప్పుడు 373వ ర్యాంక్‌కు పడిపోయింది. దాంతో ఆట నుంచి తప్పుకోవాలని నిర్ణయించుకుంది. ఒకప్పటి సోవియట్‌ యూనియన్‌లో పుట్టినా... ఏడేళ్ల వయసులోనే ఆమె కుటుంబం అమెరికాకు వలస వెళ్లిపోయింది. ఆటలో మాత్రం రష్యాకు ప్రాతినిధ్యం వహించడాన్ని షరపోవా కొనసాగించింది. 2004 వింబుల్డన్‌ ఫైనల్లో అమెరికా నల్లకలువ సెరెనా విలియమ్స్‌ను ఓడించి 17 ఏళ్ల వయసులోనే తొలి గ్రాండ్‌స్లామ్‌ టైటిల్‌ నెగ్గి ప్రపంచం దృష్టిని ఆకర్షించిన ఈ భామ ఇక వెనుదిరిగి చూసుకోవాల్సిన అవసరం రాలేదు. ఆమె చక్కటి ఆటకు అందం తోడై అత్యంత పాపులర్‌ ప్లేయర్‌గా షరపోవాకు గుర్తింపు తెచ్చి పెట్టాయి. వరుసగా 11 ఏళ్ల పాటు అత్యధిక ఆర్జన ఉన్న మహిళా క్రీడాకారిణిగా ‘ఫోర్బ్స్‌’ జాబితాలో నిలిచింది.   28 ఏళ్ల ఆట, 5 గ్రాండ్‌స్లామ్‌ల తర్వాత గుడ్‌బై చెబుతున్నా. వేరే రంగంలో పోటీ పడి మరింత ఎత్తుకు ఎదిగే సత్తా నాలో ఇంకా ఉంది. నేను నా జీవితాన్ని టెన్నిస్‌కు ఇస్తే టెన్నిస్‌ నాకు జీవితాన్ని ఇచ్చింది. ఎంతగా శ్రమిస్తే అంత గొప్ప ఫలితాలు సాధించవచ్చని నేను నమ్మా. గతం గురించో, భవిష్యత్తు గురించో అతిగా ఆలోచించకుండా వర్తమానంలో కష్టపడటం వల్లే ఈ విజయాలు దక్కాయనేది నా భావన. టెన్నిస్‌ కోర్టుకు సంబంధించి అన్ని జ్ఞాపకాలూ పదిలంగా నా మనసులో ఉంటాయి. అవి కోల్పోతున్న బాధ నాకూ ఉంది. టెన్నిస్‌ అనేది నాకు శిఖరంలాంటిది. అక్కడికి చేరే క్రమంలో ఎన్నో ఎత్తుపల్లాలు చవి చూసినా ఒక్కసారిగా పైకి ఎక్కిన తర్వాత వచ్చే ఆనందమే వేరు. ఇక ముందు కూడా జీవితంలో కొత్త లక్ష్యాలు పెట్టుకొని శ్రమిస్తా. మరిన్ని విజయాలు అందుకున్నా. –వీడ్కోలు సందేశంలో షరపోవా    మొత్తం గెలిచిన మ్యాచ్‌లు: 645 మొత్తం ఓడిన మ్యాచ్‌లు: 171 కెరీర్‌లో సాధించిన ప్రైజ్‌మనీ:  3,87,77,962 డాలర్లు  (రూ. 277 కోట్ల 76 లక్షలు) షరపోవా సాధించిన గ్రాండ్‌స్లామ్‌ సింగిల్స్‌ టైటిల్స్‌: 5 (2004–వింబుల్డన్‌; యూఎస్‌ ఓపెన్‌–2006; ఆస్ట్రేలియన్‌ ఓపెన్‌–2008; ఫ్రెంచ్‌ ఓపెన్‌–2012, 2014) కెరీర్‌లో నెగ్గిన సింగిల్స్‌ టైటిల్స్‌ సంఖ్య: 36 అత్యుత్తమ ర్యాంకింగ్‌ (ఆగస్టు 22, 2005): 1 ప్రొఫెషనల్‌గా మారిన ఏడాది: 2001 ప్రస్తుత ర్యాంక్‌: 373 కెరీర్‌లో   నంబర్‌వన్‌ ర్యాంక్‌లో కొనసాగిన వారాలు: 21

మాస్కో: రష్యా టెన్నిస్‌ స్టార్‌ మారియా షరపోవా ఆటకు గుడ్‌బై చెప్పారు. క్రీడా ప్రపంచంలో తనకంటూ ప్రత్యేక స్థానం సంపాదించుకున్న ఈ స్టార్‌ ప్లేయర్‌.. బుధవారం రిటైర్‌మెంట్‌ ప్రకటించారు. ఈ మేరకు... ‘‘28 ఏళ్ల తర్వాత.. ఐదు గ్రాండ్‌ స్లామ్‌ టైటిళ్లు నెగ్గిన నేను... ప్రస్తుతం మరో శిఖరాన్ని అధిరోహించేందుకు సిద్ధమయ్యాను. విభిన్నమైన మైదానంలో పోటీపడబోతున్నాను. టెన్నిస్‌కు గుడ్‌బై చెబుతున్నా’’ అని షరపోవా తన నిర్ణయాన్ని వెల్లడించారు. కాగా గతంలో టెన్నిస్‌ నెంబర్‌ 1 ర్యాంకర్‌గా వెలుగొందిన షరపోవా ప్రస్తుతం వరుస వైఫల్యాలతో సతమతమవుతున్నారు. పదహారేళ్ల క్రితం టీనేజర్‌గా కోర్టులో అడుగుపెట్టి వింబుల్డన్‌ చాంపియన్‌గా అవతరించి మహిళల టెన్నిస్‌లో మెరుపుతీగలా దూసుకొచ్చిన ఆమె... ప్రస్తుతం ర్యాంకింగ్స్‌లో 373వ స్థానంలో ఉన్నారు. ఈ క్రమంలో 32 ఏళ్ల వయస్సులో బుధవారం ఆమె ఆటకు వీడ్కోలు పలికారు. ఈ సందర్భంగా.. ‘‘టెన్నిస్‌కు నా జీవితాన్ని ధారపోశాను. అదే విధంగా టెన్నిస్‌ నాకు జీవితాన్నిచ్చింది. ఇక నుంచి ప్రతిరోజూ నేను దానిని మిస్సవుతాను. ట్రెయినింగ్‌, రోజూ వారీ దినచర్య అంతా మారిపోతుంది. నిద్రలేచిన తర్వాత.. కుడికాలు ముందు.. ఎడమ కాలు పెట్టి షూలేసులు కట్టుకోవడం.. మొదటి బాల్‌ను కొట్టే ముందు కోర్టు గేటును మూసివేయడం... నా టీం అంతటినీ మొత్తం మిస్సవుతాను. నా కోచ్‌లను కూడా. మా నాన్నతో కలిసి కోర్టు బెంచ్‌ మీద కూర్చునే క్షణాలు అన్నీ మిస్సవుతాను. ఓడినా.. గెలిచినా.. పరిచయం ఉన్నా లేకపోయినా... ఇచ్చిపుచ్చుకునే షేక్‌హ్యాండ్లు, వెన్నుతట్టి ఆటలో నన్ను ప్రోత్సహించిన వారిని మిస్సవుతాను. ఇప్పుడు వెనక్కి తిరిగి చూసుకుంటే.. టెన్నిస్‌ ఓ పర్వతంలా కనిపిస్తోంది. నా దారి అంతా లోయలు, మలుపులతో నిండి ఉంది. అయితేనేం.. శిఖరం అంచు నుంచి చూస్తే అపురూపమైన ఘట్టాలు ఎన్నో కనిపిస్తున్నాయి’’అంటూ షరపోవా భావోద్వేగానికి గురయ్యారు. View this post on Instagram Tennis showed me the world—and it showed me what I was made of. It’s how I tested myself and how I measured my growth. And so in whatever I might choose for my next chapter, my next mountain, I’ll still be pushing. I’ll still be climbing. I’ll still be growing. Tennis—I’m saying goodbye. A post shared by Maria Sharapova (@mariasharapova) on Feb 26, 2020 at 5:19am PST

పూర్వ వైభవం కోసం తపిస్తున్న రష్యా టెన్నిస్‌ స్టార్‌ మరియా షరపోవా కెరీర్‌ మళ్లీ గాడిన పడే అవకాశం కనిపించడంలేదు. ఆమె ప్రస్తుత ర్యాంక్‌ ప్రకారమైతే నేరుగా ఆస్ట్రేలియన్‌ ఓపెన్‌ మెయిన్‌ ‘డ్రా’లో ఆడే అవకాశం లేకపోయినా... గత రికార్డును పరిగణనలోకి తీసుకొని నిర్వాహకులు ‘వైల్డ్‌ కార్డు’ రూపంలో నేరుగా ఆడే అవకాశం ఇచ్చారు. కానీ ఈ మాజీ చాంపియన్, మాజీ ప్రపంచ నంబర్‌వన్‌ దీనిని సద్వినియోగం చేసుకోవడంలో విఫలమైంది. గతేడాది వింబుల్డన్, యూఎస్‌ ఓపెన్‌ గ్రాండ్‌స్లామ్‌ టోర్నీల్లో తొలి రౌండ్‌లోనే ఇంటిదారి పట్టిన 32 ఏళ్ల షరపోవా ఆ్రస్టేలియన్‌ ఓపెన్‌లోనూ మొదటి రౌండ్‌ను దాటలేకపోయింది. ఫలితంగా కెరీర్‌లో తొలిసారి వరుసగా మూడు గ్రాండ్‌స్లామ్‌ టోరీ్నలలో తొలి రౌండ్‌లోనే ఓడిపోయి భవిష్యత్‌పై తుది నిర్ణయం తీసుకునే రోజు సమీపంలోనే ఉందని సంకేతాలు పంపించింది.   మెల్‌బోర్న్‌: పదహారేళ్ల క్రితం టీనేజర్‌గా వింబుల్డన్‌ చాంపియన్‌గా అవతరించి మహిళల టెన్నిస్‌లో మెరుపుతీగలా దూసుకొచ్చిన రష్యా స్టార్‌ మరియా షరపోవా కెరీర్‌ తిరోగమనంలో పయనిస్తోంది. ‘వైల్డ్‌ కార్డు’తో ఆ్రస్టేలియన్‌ ఓపెన్‌ గ్రాండ్‌స్లామ్‌ టోర్నీలో అడుగుపెట్టిన షరపోవా తొలి రౌండ్‌లోనే నిష్క్రమించింది. ప్రపంచ 20వ ర్యాంకర్‌ డోనా వెకిచ్‌ (క్రొయే షియా)తో జరిగిన మహిళల సింగిల్స్‌ తొలి రౌండ్‌లో ప్రపంచ 145వ ర్యాంకర్‌ షరపోవా 3–6, 4–6తో ఓడిపోయింది. 81 నిమిషాలపాటు జరిగిన ఈ మ్యాచ్‌లో షరపోవా ఐదు డబుల్‌ ఫాల్ట్‌లు, 31 అనవసర తప్పిదాలు చేసింది. 2008 ఆ్రస్టేలియన్‌ ఓపెన్‌ చాంపియన్, 2007, 2012, 2015 రన్నరప్‌ అయిన షరపోవా తన సర్వీస్ ను నాలుగుసార్లు కోల్పోయి, ప్రత్యర్థి సర్వీస్ ను రెండుసార్లు బ్రేక్‌ చేసింది. గతేడాది ఈ టోరీ్నలో ప్రిక్వార్టర్‌ ఫైనల్లో ఓడిన షరపోవా ఈసారి తొలి రౌండ్‌లోనే వెనుదిరగడంతో ఫిబ్రవరి 3న విడుదల చేసే ప్రపంచ ర్యాంకింగ్స్‌లో ఆమె 350వ స్థానానికి పడిపోయే అవకాశముంది.    రెండో రౌండ్‌లో ప్లిస్కోవా... మహిళల సింగిల్స్‌ ఇతర మ్యాచ్‌ల్లో రెండో సీడ్‌ కరోలినా ప్లిస్కోవా (చెక్‌ రిపబ్లిక్‌), నాలుగో సీడ్‌ సిమోనా హలెప్‌ (రొమేనియా), ఐదో సీడ్‌ స్వితోలినా (ఉక్రెయిన్‌), ఆరో సీడ్‌ బెలిండా బెన్సిచ్‌ (స్విట్జర్లాండ్‌), తొమ్మిదో సీడ్‌ కికి బెర్‌టెన్స్‌ (నెదర్లాండ్స్‌), పదో సీడ్‌ మాడిసన్‌ కీస్‌ (అమెరికా), మాజీ చాంపియన్‌ ఎంజెలిక్‌ కెర్బర్‌ (జర్మనీ) రెండో రౌండ్‌లోకి ప్రవేశించారు. 12వ సీడ్‌ జొహనా కొంటా (బ్రిటన్‌) మాత్రం తొలి రౌండ్‌లో ఓడింది. ప్లిస్కోవా 6–1, 7–5తో మ్లాడెనోవిచ్‌ (ఫ్రాన్స్‌)పై, హలెప్‌ 7–6, (7/5), 6–1తో జెన్నిఫర్‌ బ్రాడీ (అమెరికా)పై, స్వితోలినా 6–4, 7–5తో కేటీ బుల్టర్‌ (బ్రిటన్‌)పై, బెన్సిచ్‌ 6–3, 7–5తో ష్మెద్లోవా (స్లొవేకియా)పై, కికి బెర్‌టెన్స్‌ 6–1, 6–4తో ఇరీనా బేగూ (రొమేనియా)పై, కీస్‌ 6–3, 6–1తో కసత్‌కినా (రష్యా)పై, కెర్బర్‌ 6–2, 6–2తో కొకియారెటో (ఇటలీ)పై గెలిచారు.  కొంటా 4–6, 2–6తో ఆన్స్‌ జెబెయుర్‌ (ట్యూనిíÙయా) చేతిలో ఓటమి పాలైంది.   మెద్వదేవ్, థీమ్‌ ముందంజ పురుషుల సింగిల్స్‌లో ఎలాంటి సంచలనాలు నమోదు కాలేదు. తొలి రౌండ్‌లో టాప్‌ సీడ్‌ రాఫెల్‌ నాదల్‌ (స్పెయిన్‌) 6–2, 6–3, 6–0తో డెలియన్‌ (బొలీవియా)పై అలవోకగా నెగ్గి రెండో రౌండ్‌కు చేరుకున్నాడు. నాలుగో సీడ్‌ మెద్వెదేవ్‌ (రష్యా) 6–3, 4–6, 6–4, 6–2తో టియాఫో (అమెరికా)పై, ఐదో సీడ్‌ థీమ్‌ (ఆస్ట్రియా) 6–3, 7–5, 6–2తో మనారినో (ఫ్రాన్స్‌)పై, ఏడో సీడ్‌ జ్వెరెవ్‌ (జర్మనీ) 6–4, 7–6 (7/4), 6–3తో సెచినాటో (ఇటలీ)పై గెలిచి రెండో రౌండ్‌లోకి అడుగు పెట్టారు. 15వ సీడ్, 2014 చాంపియన్‌ వావ్రింకా (స్విట్జర్లాండ్‌), పదో సీడ్‌ మోన్‌ఫిల్స్‌ (ఫ్రాన్స్‌), 11వ సీడ్‌ గాఫిన్‌ (బెల్జియం), 12వ సీడ్‌ ఫాగ్‌నిని (ఇటలీ) కూడా రెండో రౌండ్‌లోకి ప్రవేశించారు.   ప్రజ్నేశ్‌కు నిరాశ ‘లక్కీ లూజర్‌’గా మెయిన్‌ ‘డ్రా’లో అడుగు పెట్టిన భారత నంబర్‌వన్‌ ప్రజ్నేశ్‌ గుణేశ్వరన్‌ వరుసగా ఐదో గ్రాండ్‌స్లామ్‌ టోర్నీలోనూ తొలి రౌండ్‌లో ఓడిపోయాడు. ప్రపంచ 144వ ర్యాంకర్‌ తత్సుమ ఇటో (జపాన్‌)తో జరిగిన తొలి రౌండ్‌లో ప్రపంచ 122వ ర్యాంకర్‌ ప్రజ్నేశ్‌ 4–6, 2–6, 5–7తో ఓటమి పాలయ్యాడు. తొలి రౌండ్‌లో ఓడిన ప్రజ్నేశ్‌కు 90 వేల ఆ్రస్టేలియన్‌ డాలర్లు (రూ. 43 లక్షల 92 వేలు) ప్రైజ్‌మనీగా లభించాయి.

మెల్‌బోర్న్‌: టెన్నిస్‌ సీజన్‌ తొలి గ్రాండ్‌స్లామ్‌ టోర్నమెంట్‌ ఆ్రస్టేలియన్‌ ఓపెన్‌లో నేరుగా ఆడేందుకు ప్రపంచ మాజీ నంబర్‌వన్, ఈ టోర్నీ మాజీ విజేత మరియా షరపోవాకు నిర్వాహకులు అవకాశం కల్పించారు. గాయం కారణంగా గతేడాది ఈ రష్యా స్టార్‌ ఎక్కువ కాలం ఆటకు దూరమైంది. దాంతో ఆమె ర్యాంక్‌ 147కు పడిపోయింది. ఫలితంగా ర్యాంక్‌ ప్రకారం ఆ్రస్టేలియన్‌ ఓపెన్‌లో 32 ఏళ్ల షరపోవాకు మెయిన్‌ ‘డ్రా’లో చోటు దక్కలేదు. అయితే ఈ టోరీ్నలో ఆమె గత రికార్డును పరిగణనలోకి తీసుకొని నిర్వాహకులు వైల్డ్‌ కార్డు ద్వారా నేరుగా మెయిన్‌ ‘డ్రా’లో స్థానం కలి్పంచారు. 2003లో తొలిసారి ఆ్రస్టేలియన్‌ ఓపెన్‌ ఆడిన షరపోవా 2008లో చాంపియన్‌గా నిలిచింది. 2007, 2012, 2015లలో ఫైనల్లో ఓడి రన్నరప్‌ ట్రోఫీ అందుకుంది. ‘ఆస్ట్రేలియన్‌ ఓపెన్‌లో ఆడనుండటం ఎంతో ప్రత్యేకం. ఈ టోరీ్నలో నాకెన్నో మధురజ్ఞాపకాలు ఉన్నాయి. ఒకసారి విజేతగా నిలిచాను. మూడుసార్లు ఫైనల్లో ఓడాను. మరోసారి ఇక్కడ ఆడే అవకాశం ఇచి్చనందుకు సంతోషంగా ఉంది’ అని షరపోవా వ్యాఖ్యానించింది.  

పారిస్‌: త్వరలో ప్రారంభం కానున్న ప్రతిష్టాత్మక ఫ్రెంచ్‌ గ్రాండ్‌ స్లామ్‌ టోర్నీ నుంచి మాజీ చాంపియన్‌, రష్యన్‌ స్టార్‌ క్రీడాకారిణి మరియా షరపోవా వైదొలిగారు. కొన్ని వారాల క్రితం భుజానికి శస్త్ర చికిత్స చేయించుకున్న షరపోవా ఇంకా పూర్తిగా కోలుకోపోవడంతో టోర్నీ నుంచి తప్పుకున్నారు. ఈ మేరకు షరపోవా బుధవారం ఓ ప్రకటన విడుదల చేశారు. ‘నేను ఫ్రెంచ్‌ ఓపెన్‌ నుంచి తప్పుకుంటున్నాను. కొన్ని సందర్భాల్లో సరైన నిర్ణయాలు తీసుకోవడం అంత సులభతరం కాదు’ అని తన ఇన్‌స్టాగ్రామ్‌ అకౌంట్‌లో పోస్ట్‌ చేశారు. ఇప్పటివరకూ ఓవరాల్‌గా ఐదు గ్రాండ్‌ స్లామ్‌ టైటిల్స్‌ గెలిచిన షరపోవా.. రెండు సార్లు ఫ్రెంచ్‌ ఓపెన్‌ టైటిల్స్‌ను సొంతం చేసుకున్నారు. 2012,14 సంవత్పరాల్లో షరపోవా ఫ్రెంచ్‌ ఓపెన్‌లో విజేతగా నిలిచారు. అయితే ఈ ఏడాది జనవరి నుంచి ఏ టోర్నీలోనూ షరపోవా పాల్గొనలేదు. ఫిబ్రవరి నెలలో భుజానికి శస్త్ర చికిత్స చేయించుకున్న ఆమె తిరిగి కోలుకుంటున్నారు. ఈ క్రమంలోనే ఫ్రెంచ్‌ ఓపెన్‌ నుంచి తప్పుకున్నారు షరపోవా. మే 26వ తేదీ నుంచి ఫ్రెంచ్‌ ఓపెన్‌ ఆరంభం కానున్న సంగతి తెలిసిందే.  

మెల్‌బోర్న్‌: ఆస్ట్రేలియన్‌ ఓపెన్‌ మహిళల సింగిల్స్‌ విభాగంలో మాజీ చాంపియన్‌ మారియా షరపోవా (రష్యా) కథ ముగిసింది. ఆదివారం జరిగిన ప్రీక్వార్టర్‌ మ్యాచ్‌లో క్రికెటర్‌ కమ్‌ టెన్నిస్‌ స్టార్‌ ఆష్‌బార్టీ (ఆస్ట్రేలియా)ఈ రష్యాస్టార్‌ను మట్టికరిపించింది. షరపోవాపై 4-6, 6-1, 6-4 తేడాతో ఆష్‌బార్టీ విజయం సాధించింది. ఈ విజయంతో 22 ఏళ్ల ఆష్‌బార్టీ తొలిసారిగా గ్రాండ్‌స్లామ్‌ క్వార్టర్‌ ఫైనల్‌కు చేరింది. 2014లో టెన్నిస్‌కు విరామం ఇచ్చి అనూహ్యంగా క్రికెట్‌ ఆడిన ఆష్‌బార్టీ.. మహిళల బిగ్‌బాష్‌లీగ్‌లో బ్రిస్బేన్‌ హీట్‌ జట్టుకు ప్రాతినిథ్యం ఇచ్చింది. టెన్నిస్‌ రాకెట్‌ వదిలి బ్యాట్‌ పట్టుకున్నఈ యంగ్‌ లేడీ క్రికెట్‌లోనూ అదరగొట్టింది. లీగ్‌ అరంగేట్ర మ్యాచ్‌లోనే 29 బంతుల్లో 37 పరుగులు చేసి అందరి దృష్టిని ఆకర్షించింది. అనంతరం మళ్లీ టెన్నిస్‌ రాకెట్‌ పట్టుకున్న ఆష్‌బార్టీ గతేడాదే కెరీర్‌ బెస్ట్‌ 15వ ర్యాంకును సొంత చేసుకుంది. ఇక తాజాగా ఐదు గ్రాండ్‌ స్లామ్‌లు గెలిచిన టెన్నిస్‌ దిగ్గజం షరపోవాను మట్టికరిపించి ఔరా అనిపించింది. కెరీర్‌లో తొలి గ్రాండ్‌స్లామ్‌ క్వార్టర్‌ ఫైనల్‌ చేరింది. The most famous victory of her young career. Congratulations, @ashbar96 👏👏👏#AusOpen pic.twitter.com/MEvPFeKZc7 — #AusOpen (@AustralianOpen) January 20, 2019

కాన్‌బెర్రా: ఆస్ట్రేలియన్‌ ఓపెన్‌లో సంచలన జరిగింది. ఆస్ట్రేలియన్‌ ఓపెన్ ప్రీక్వార్టర్స్‌లో దిగ్గజ క్రీడాకారిణి మరియా షరపోవా అనూహ్యంగా ఓటమిపాలయ్యారు. షరపోవాపై 4-6, 6-1, 6-4 తేడాతో నయాసంచలనం ఆష్‌బార్టీ సంచలన విజయం నమోదు చేశారు. ఆదివారం ఇక్కడి మెల్‌బోర్న్ పార్క్‌ మైదానంలో జరిగిన మ్యాచ్‌లో ఆష్‌బార్టీ అద్భుత విజయాన్ని సొంతం చేసుకున్నారు. దీంతో గ్రాండ్‌స్లామ్‌లో తొలిసారి ఆష్‌బార్టీ క్వార్టర్‌ ఫైనల్‌కు చేరారు. ఈ దశాబ్దాంలో తొలిసారి అస్ట్రేలియన్‌ క్వార్టర్‌ ఫైనల్‌కు చేరిన తొలి ఆస్ట్రేలియన్‌ ప్లేయర్‌గా ఆమె రికార్డు సృష్టించారు. 22 ఏళ్ల ఆష్‌బార్టీ 5సార్లు గ్రాండ్‌స్లామ్‌ విజేత అయిన షరపోవాను ఓడించడం విశేషం.  

మెల్‌బోర్న్‌: ఆస్ట్రేలియన్‌ ఓపెన్‌ మహిళల సింగిల్స్‌ విభాగంలో డిఫెండింగ్‌ చాంపియన్‌ కరోలైన్‌ వొజ్నియాకి కథ ముగిసింది. మాజీ విజేత షరపోవా (రష్యా) కీలకదశలో పైచేయి సాధించి వొజ్నియాకిని బోల్తా కొట్టించి ప్రిక్వార్టర్‌ ఫైనల్లోకి దూసుకెళ్లింది. శుక్రవారం జరిగిన మహిళల సింగిల్స్‌ మూడో రౌండ్‌లో మాజీ నంబర్‌వన్, 30వ సీడ్‌ షరపోవా 6–4, 4–6, 6–3తో మూడో సీడ్‌ వొజ్నియాకి (డెన్మార్క్‌)పై గెలిచింది. 2 గంటల 24 నిమిషాలపాటు జరిగిన ఈ మ్యాచ్‌లో 2008 చాంపియన్‌ షరపోవా ఐదు ఏస్‌లు సంధించి, ఏడు డబుల్‌ ఫాల్ట్‌లు చేసింది. 46 అనవసర తప్పిదాలు చేసిన ఈ రష్యా స్టార్‌ వొజ్నియాకి సర్వీస్‌ను ఐదుసార్లు బ్రేక్‌ చేసి ఫలితాన్ని శాసించింది. రెండో సీడ్‌ కెర్బర్‌ (జర్మనీ), ఐదో సీడ్‌ స్లోన్‌ స్టీఫెన్స్‌ (అమెరికా), ఎనిమిదో సీడ్‌ క్విటోవా (చెక్‌ రిపబ్లిక్‌) కూడా ప్రిక్వార్టర్‌ ఫైనల్లోకి ప్రవేశించారు. మూడో రౌండ్‌ మ్యాచ్‌ల్లో కెర్బర్‌ 6–1, 6–0తో కింబర్లీ బిరెల్‌ (ఆ స్ట్రేలియా)పై, స్లోన్‌ స్టీఫెన్స్‌ 7–6 (8/6), 7–6 (7/5)తో పెట్రా మార్టిక్‌ (క్రొయేషియా)పై, క్విటోవా 6–1, 6–4తో బెన్సిచ్‌ (స్విట్జర్లాండ్‌)పై నెగ్గారు. 11వ సీడ్‌ సబలెంకా (బెలారస్‌) 3–6, 2–6తో అనిస్‌మోవా (అమెరికా) చేతిలో... 19వ సీడ్‌ గార్సియా (ఫ్రాన్స్‌) 3–6, 2–6తో డానియెలా (అమెరికా) చేతిలో ఓడిపోయారు.  ఫెడరర్, నాదల్‌ జోరు  పురుషుల సింగిల్స్‌ విభాగంలో డిఫెండింగ్‌ చాంపియన్‌ ఫెడరర్‌ (స్విట్జర్లాండ్‌), మాజీ విజేత రాఫెల్‌ నాదల్‌ (స్పెయిన్‌) ప్రిక్వార్టర్‌ ఫైనల్‌కు చేరారు. మూడో రౌండ్‌లో ఫెడరర్‌ 6–2, 7–5, 6–2తో టేలర్‌ ఫ్రిట్జ్‌ (అమెరికా)పై, నాదల్‌ 6–1, 6–2, 6–4తో అలెక్స్‌ డి మినార్‌ (ఆస్ట్రేలియా)పై గెలిచారు. ఆరో సీడ్‌ మారిన్‌ సిలిచ్‌ (క్రొయేషియా) 4–6, 3–6, 6–1, 7–6 (10/8), 6–3తో ఫెర్నాండో వెర్డాస్కో (స్పెయిన్‌)పై శ్రమించి నెగ్గగా... పదో సీడ్‌ కరెన్‌ ఖచనోవ్‌ (రష్యా) 4–6, 5–7, 4–6తో బటిస్టా అగుట్‌ (స్పెయిన్‌) చేతిలో ఓడిపోయాడు. 

పారిస్‌ : ఎన్నో ఆశలతో  ఫ్రెంచ్‌ ఓపెన్‌లో అడుగుపెట్టిన రష్యా టెన్నిస్‌ స్టార్‌, మాజీ చాంపియన్‌ మారియా షరపోవాకు నిరాశే ఎదురైంది. మూడో సీడ్‌, స్పెయిన్‌ స్టార్ గార్బిన్‌ ముగురుజాతో గురువారం జరిగిన మహిళల సింగిల్స్‌ క్వార్టర్‌ ఫైనల్లో షరపోవా 6-2,6-1 తేడాతో పరాజయం పాలైంది. వరుస సెట్‌లలో షరపోవాపై ముగురుజా సునాయస విజయం సాధించింది. ప్రిక్వార్టర్‌ ఫైనల్లో మాజీ చాంపియన్‌ సెరెనా విలియమ్స్‌ భుజం కండరాలు పట్టేయడంతో షరపోవాకు వాకోవర్‌ ఇచ్చింది. దీంతో ఈ మ్యాచ్‌ ఆడకుండానే షరపోవా క్వార్టర్‌ఫైనల్‌కు చేరిన విషయం తెలిసింది.   హలెప్‌ హవా.. ప్రపంచ నంబర్‌వన్‌ ర్యాంక్‌ అందుకున్నా... ఎంతోకాలంగా ఊరిస్తోన్న గ్రాండ్‌స్లామ్‌ టైటిల్‌ను ఈసారైనా నెగ్గాలనే పట్టుదలతో ఉన్న సిమోనా హలెప్‌ తన హవా కొనసాగిస్తోంది. జర్మనీ క్రీడాకారిణి ఎంజెలిక్‌ కెర్బర్‌తో జరిగిన మరో క్వార్టర్‌ ఫైనల్లో హలెప్‌ 6-2(2/7), 6-3, 6-2 తేడాతో విజయం సాధించింది. ఇక హలెప్‌ సెమీ ఫైనల్లో స్పెయిన్‌ స్టార్ గార్బిన్‌ ముగురుజాతో తలపడనుంది. 

పారిస్‌/రొనాల్డ్‌ గారోస్‌ : బిడ్డకు పాలిచ్చి వచ్చిన పులి సెరెనా. బోనులోంచి బయటికి వచ్చిన చిరుత షరపోవా. ఇద్దరిలో ఆకలి ఉంది. బరిలో ఆహారం ఉంది. ఇదొక యుగాంతపు ఆట అని, ఉమెన్స్‌ టెన్నిస్‌లో ఈరోజు ధూమ్స్‌ డే అనుకున్న అభిమానులకు నిరాశే ఎదురైంది. ఫ్రెంచ్‌ ఓపెన్‌ మహిళల సింగిల్స్‌ విభాగం నాలుగో రౌండ్‌లో భాగంగా అమెరికా టెన్నిస్‌ స్టార్‌ సెరెనా విలియమ్స్‌, రష్యా స్టార్‌ మారియా షరపోవాల మధ్య ఉత్కంఠగా సాగుతుందనుకున్న మ్యాచ్‌ జరగనేలేదు. సెరెనా భుజ కండరాల గాయంతో  మ్యాచ్‌కు ముందే తప్పుకోవడంతో షరపోవా ఆడకుండానే గెలిచి క్వార్టర్‌ ఫైనల్లోకి ప్రవేశించింది. క్వార్టర్‌ ఫైనల్లో రష్యా స్టార్‌ ముగురుజ(స్పెయిన్‌), లెసియా సురెంకో (ఉక్రెయిన్)ల్లో ఒకరితో తలపడనుంది. సెరెనా ఆవేదన.. ‘దురదృష్టవశాత్తు భుజ కండరాల గాయంతో టోర్నీ నుంచి నిష్క్రమిస్తున్నాను. ఈ పరిస్థితుల్లో నేను ఆడలేను. ఇది చాలా కష్టంగా ఉంది. మారియాతో పోటీని ఎప్పుడు ఇష్టపడుతాను. ఇలా జరుగుతుందని ఊహించలేదు. చాలా బాధేస్తుంది. నా కూతురు, కుటుంబానికి దూరంగా ఉంటూ సాధన చేశాను. ఈ పరిస్థితి చాలా కఠినంగా ఉంది.’అని సెరెనా ఆవేదన వ్యక్తం చేసింది. ఇక ఆదివారం జరిగిన ఉమెన్‌ డబుల్స్‌లో విలియమ్స్‌ సిస్టర్స్‌ అండ్రెజా క్లెపాక్‌(స్లోవేనియా)-మరియా జోస్‌ మార్టినెజ్‌(ఇటలీ) చేతిలో  ఓటమిపాలైన విషయం తెలిసిందే. చదవండి: పులి.. చిరుత

పారిస్‌: ఫ్రెంచ్‌ ఓపెన్‌లో రెండు సార్లు విజేతగా నిలిచిన మారియా షరపోవా మరో టైటిల్‌ వేటలో ముందంజ వేసింది. ఈ టోర్నీలో ఆమె మూడో రౌండ్‌లోకి ప్రవేశించింది. గురువారం జరిగిన రెండో రౌండ్‌ మ్యాచ్‌లో షరపోవా 7–5, 6–4 స్కోరుతో డోనా వెకిక్‌ (క్రొయేషియా)పై విజయం సాధించింది. తర్వాతి మ్యాచ్‌లో షరపోవా, చెక్‌ రిపబ్లిక్‌కు చెందిన ఆరో సీడ్‌ కరోలినా ప్లిస్కోవాతో తలపడుతుంది. 2016 చాంపియన్, మూడో సీడ్‌ గార్బిన్‌ ముగురుజా (స్పెయిన్‌) కూడా అలవోకగా గెలిచింది. రెండో రౌండ్‌లో ఆమె 6–4, 6–4తో ఫియోనా ఫెర్రో (ఫ్రాన్స్‌)ను ఓడించింది. గతంలో రెండు సార్లు ఫైనలిస్ట్‌గా నిలిచిన సిమోనా హలెప్‌ (రొమేనియా) 6–3, 6–1తో టేలర్‌ టౌన్‌సెండ్‌ (యూఎస్‌ఏ)ను ఓడించి ముందుకు దూసుకెళ్లింది. మూడోరౌండ్‌లో సెరెనా  అమెరికా టెన్నిస్‌ స్టార్‌ సెరెనా విలియమ్స్‌ ఫ్రెంచ్‌ ఓపెన్‌లో మరో విజయాన్ని సాధించింది. ఆస్ట్రేలియా క్రీడాకారిణి ఆష్లీ బర్తితో గురువారం జరిగిన మహిళల సింగిల్స్‌ రెండోరౌండ్‌లో 36 ఏళ్ల సెరెనా 3–6, 6–3, 6–4తో విజయం సాధించింది.   సిలిచ్, థీమ్‌ శ్రమించి...: పురుషుల వరల్డ్‌ నంబర్‌వన్‌ రాఫెల్‌ నాదల్‌ (స్పెయిన్‌) కూడా తనదైన శైలిలో చెలరేగి మూడో రౌండ్‌లోకి అడుగు పెట్టాడు. రెండో రౌండ్‌లో నాదల్‌ 6–2, 6–1, 6–1తో అర్జెంటీనా కుర్రాడు గిడో పెలాను చిత్తుగా ఓడించాడు. మూడో సీడ్‌ సిలిచ్‌ మాత్రం తీవ్రంగా శ్రమించాడు. రెండో రౌండ్‌లో అతను 6–2, 6–2, 6–7 (3/7), 7–5తో క్వాలిఫయర్‌ ఆటగాడు హ్యూబర్ట్‌ హర్కజ్‌ (పోలండ్‌)పై విజయం సాధించాడు. ఐదో సీడ్‌ డెల్‌పొట్రో (అర్జెంటీనా) 6–4, 6–3, 6–2తో జూలియన్‌ బెన్నెట్‌ (ఫ్రాన్స్‌)ను చిత్తు చేశాడు. ఏడో సీడ్‌ డొమినిక్‌ థీమ్‌ (ఆస్ట్రేలియా) 6–2, 2–6, 6–4, 6–4తో స్టెఫెనోస్‌ స్టిట్సిపాస్‌ (గ్రీస్‌)పై గెలుపొందాడు.  రెండో రౌండ్‌లో యూకీ–శరణ్‌  పురుషుల డబుల్స్‌ విభాగంలో భారత్‌కు చెందిన యూకీ బాంబ్రీ–దివిజ్‌ శరణ్‌ జంట రెండో రౌండ్‌లోకి ప్రవేశించింది. తొలి రౌండ్‌ మ్యాచ్‌లో ఈ జోడి 6–3, 7–5, 6–4 స్కోరుతో ఫాబ్రిస్‌ మార్టిన్‌ (ఫ్రాన్స్‌)–çపురవ్‌ రాజా (భారత్‌) జంటను ఓడించింది. రెండో రౌండ్‌లో బాంబ్రీ–శరణ్‌ ద్వయం ఒలివర్‌ మరాక్‌–మేట్‌ పావిక్‌తో తలపడతారు. 

రోమ్‌: టెన్నిస్‌ ప్రపంచంలో ఆల్‌ టైమ్‌ గ్రేట్‌ ఎవరంటే ప్రస్తుతానికి అందరూ ఠక్కున చెప్పే పేరు రోజర్‌ ఫెడరర్‌. కానీ... మహిళల మాజీ నం.1 మరియా షరపోవా మాత్రం రాఫెల్‌ నాదల్‌ అంటోంది. ఈ మేరకు ఆమె సోమవారం ట్విట్టర్‌లో పెట్టిన వీడియో వివాదాస్పదమైంది. ఇటాలియన్‌ ఓపెన్‌కు సన్నాహకంగా నాదల్‌తో కలిసి ఇక్కడ సాధనలో పాల్గొంటున్న షరపోవా... ‘కోర్టులో రెండు నిమిషాల సాధనలో గ్రేటెస్ట్‌ ఆఫ్‌ ఆల్‌ టైమ్‌ (జీవోఏటీ) ఆటగాడి ముందు తేలిపోయాను’ అంటూ పోస్ట్‌ చేసింది. ఇందులో ‘మట్టి కోర్టులపై గ్రేటెస్ట్‌ ఆటగాడు’ అని నొక్కి చెప్పకపోవడంతో... ఫెడరర్‌ అభిమానులకు మరోలా అనిపించింది. గెలిచిన 16 గ్రాండ్‌స్లామ్స్‌లో పది మట్టి కోర్టులపై ఆడే ఫ్రెంచ్‌ ఓపెనే కాగా...  నాదల్‌  గ్రేటెస్ట్‌ ఎలా అవుతాడంటూ వారు మండిపడ్డారు. ఇది ఇద్దరిలో ఎవరు గొప్ప అనే చర్చకు దారి తీసింది. మరోవైపు కెరీర్‌లో 20 గ్రాండ్‌స్లామ్స్‌ నెగ్గిన ఫెడరర్‌ ఖాతాలో ఒక ఫ్రెంచ్‌ ఓపెన్‌ కూడా ఉంది. ముఖాముఖిలో మాత్రం ఫెడరర్‌పై నాదల్‌ (23–15)దే పైచేయి కావడం విశేషం.   

మెల్‌బోర్న్‌: సుదీర్ఘ విరామం తర్వాత ఎన్నో ఆశలతో  ఆస్ట్రేలియా గ్రాండ్‌ స్లామ్‌లో అడుగుపెట్టిన రష్యా టెన్నిస్‌ స్టార్‌ మారియా షరపోవాకు నిరాశే ఎదురైంది. శనివారం జరిగిన మూడో రౌండ్‌ పోరులో షరపోవా 1-6, 3-6 తేడాతో జర్మనీ స్టార్‌ క‍్రీడాకారిణి ఎంజెలిక్ కెర్బర్ చేతిలో పరాజయం పాలైంది. ఏకపక్షంగా సాగిన పోరులో షరపోవా అంచనాలను అందుకోలేక ఓటమి పాలైంది. తొలి సెట్‌ను సునాయాసంగా కోల్పోయిన షరపోవా.. రెండో సెట్‌లో కాస్త పోరాడింది. కాగా, కెర్బర్‌ ధాటికి తలవంచిన షరపోవా టోర్నీ నుంచి భారంగా నిష్క్రమించింది. తొలి రెండు రౌండ్లలో ఆకట్టుకున్న షరపోవా.. మూడో రౌండ్‌ అడ్డంకిని మాత్రం అధిగమించలేకపోయింది. కెర్బర్‌ రూపంలో బలమైన ప్రత్యర్థి ముందు షరపోవా అనుభవం సరిపోలేదు. దాంతో వరుస సెట్లను కోల్పోయిన షరపోవా టోర్నీ నుంచి వైదొలిగింది. 2016లో  నిషేధిత ఉత్ర్పేరకాలు వాడిన కారణంగా షరపోవాపై 15 నెలల నిషేధం పడిన సంగతి తెలిసిందే.

ఇస్తాంబుల్‌: ర‌ష్యా టెన్నిస్ క్రీడాకారిణి మ‌రియా ష‌ర‌పోవాకు వింత అనుభవం ఎదురైంది. ఈ మాజీ నెం1 ర్యాంకర్‌ మ్యాచ్ ఆడుతుండ‌గా ఓ అభిమాని పెళ్లి ప్ర‌పోజ‌ల్ చేశాడు. దానికి ఆమె ఇచ్చిన స‌మాధానం స్టేడియంలో ఉన్న వారందరికీ న‌వ్వులు పూయించింది. ఐదు గ్రాండ్‌స్లామ్‌లు గెలుచుకున్న షరపోవా.. వచ్చే గ్రాండ్‌స్లామ్‌ సీజన్‌ కోసం తీవ్రంగా కసరత్తు చేస్తోంది. ఇందులో భాగంగా ఇస్తాంబుల్‌లోని సినాన్ ఎర్దేం హాల్‌లో స్థానిక  ప్లేయర్‌ కాగ్ల బైకుకాకేతో మ్యాచ్ ఆడుతుండ‌గా ఈ సంఘ‌ట‌న జ‌రిగింది. అప్పుడే బాల్ స‌ర్వ్ చేయ‌డానికి సిద్ధ‌మ‌వుతున్న ష‌ర‌పోవాను 'మ‌రియా... న‌న్ను పెళ్లి చేసుకుంటావా' అని ఓ అభిమాని రష్యన్‌ భాషలో గట్టిగా అరిచాడు. దీనికి ఏమాత్రం విసుగు చెందని షరపోవా ఓ రెండు క్ష‌ణాలు ఆలోచించి...'ఏమో!' అని స‌మాధాన‌మిచ్చింది. దీంతో అక్క‌డ ఉన్న వారంతా ప‌గ‌ల‌బ‌డి న‌వ్వారు. ఇప్పుడు ఈ వీడియో సోష‌ల్ మీడియాలో వైరల్‌ అయింది.

సాక్షి, న్యూఢిల్లీ: రష్యా టెన్నిస్ స్టార్‌ మరియా షరపోవాపై మోసం, నేరపూరిత కుట్ర అభియోగాల కింద గూర్గావ్‌లో కేసు నమోదైంది. హోంస్టెడ్ ఇన్‌ఫ్రాస్ట్రక్చర్ అనే రియల్ ఎస్టేట్ సంస్థ 2012లో బాలెట్ బై షరపోవా పేరుతో విలాసవంతమైన అపార్ట్‌మెంట్లను నిర్మించేందుకు భారీ మొత్తంలో పెట్టుబడులు సేకరించింది. ఈ కంపెనీకి షరపోవా బ్రాండ్ అంబాసిడర్‌గా వ్యవహరించడంతో చాలా మంది పెద్ద మొత్తంలో డబ్బులు చెల్లించి ఫ్లాట్లను బుక్ చేసుకున్నారు. ఈ అపార్ట్‌మెంట్‌లో టెన్నిస్ అకాడమీ, క్లబ్ హౌస్, హెలీప్యాడ్ కూడా ఉంటుందని అప్పట్లో నిర్వాహకులు ప్రకటించడంతో కొనుగోలుదారులు ఎగబడ్డారు. 2013లో ఒప్పందాలు కుదుర్చుకున్నా.. 2016లోపు నిర్మాణాలను పూర్తి చేస్తామని చెప్పి ఇప్పటివరకు కనీసం నిర్మాణాలు కూడా మొదలుకాకపోవడంతో కొనుగోలుదారులు పోలీసులకు ఫిర్యాదు చేశారు. దీనిపై కేసు నమోదు చేసిన పోలీసులు విచారణ చేపట్టారు. ఇంటి యజమానులకు అనుగుణంగా ప్రత్యేకమైన, భిన్నమైన ఇండ్లను అందించడమే తమ లక్ష్యమని షరపోవా చెబుతున్నట్లు కంపెనీ వెబ్‌సైట్‌లో రాశారని, ,అందుకే ఈ కేసులో ఆమె హస్తం కూడా ఉందని న్యాయవాది పీయూష్ సింగ్ ఆరోపించారు. ఇక మాజీ వరల్డ్‌ నెం1 టెన్నిస్‌ ర్యాంకరైన షరపోవా 2015లో ఫోర్బ్స్‌ కథనం మేరకు 23 మిలియన్ల డాలర్లను ప్రచారకర్తగా ఆర్జించింది.

బీజింగ్: చైనా ఓపెన్ లో రష్యా టెన్నిస్ క్వీన్, మాజీ నెంబర్ వన్ మరియా షరపోవాకు చుక్కెదురైంది. డోపింగ్ ఆరోపణలతో 15 నెలల నిషేధం తర్వాత ఆడిన ప్రతి టోర్నమెంట్లో ఏదో ఓ దశలో ఇంటిబాట పడుతున్న షరపోవా.. తాజాగా చైనా ఓపెన్ మూడో రౌండ్లో ఓటమి పాలైంది. రొమేనియా భామ, వరల్డ్ నెంబర్ 2 సిమోనా హలెప్ చేతిలో 6-2, 6-2తో రెండు వరుస సెట్లు కోల్పోయిన షరపోవా చైనా ఓపెన్ నుంచి నిష్క్రమించింది. వరుస సెట్లలో షరపోవాకు ముచ్చెమటలు పట్టించిన హలెప్ ఈ విజయంతో గతంలో ఎదురైన పరాభవాలకు ప్రతీకారం తీర్చుకుంది. డోపింగ్ నిషేధం తర్వాత గత ఏప్రిల్ లో మళ్లీ టెన్నిస్ రాకెట్ పట్టిన రష్యన్ టెన్సిస్ క్వీన్ వరుస పరాజయాలతో సతమతమవుతోంది. బీజింగ్ లోని హార్డుకోర్టులోనూ రాణించలేకపోవడంతో హలెప్ చేతిలో చిత్తయింది. ఇటీవల యూఎస్‌ ఓపెన్‌ టోర్నీలో నాలుగో రౌండ్‌లో లాత్వియాకు చెందిన అనస్తాసిజా సెవస్తోవా చేతిలో 5-7, 6-4, 6-2 తేడాతో షరపోవా ఓటమిపాలైంది. మునుపటిలా గ్రాండ్ స్లామ్ లు, భారీ టోర్నీలు నెగ్గాలంటే షరపోవా అంతకుమించి శ్రమించాల్సి ఉంటుందని టెన్నిస్ విశ్లేషకులు భావిస్తున్నారు. మరోవైపు వరల్డ్ నెంబర్ వన్ ముగురుజా టోర్నీ నుంచి ఇదివరకే తప్పుకోవడంతో, చైనా ఓపెన్ లో హలెప్ అవకాశాలు మెరుగయ్యాయి.


 షరపోవా మనసులో మాట  
 
 న్యూయార్క్‌: గత దశాబ్ద కాలంలో మహిళల టెన్నిస్‌లో సెరెనా విలియమ్స్‌ (అమెరికా), మరియా షరపోవా (రష్యా) మధ్య జరిగిన మ్యాచ్‌లు ఎక్కువ మందిని ఆకర్షించాయి. 21 మ్యాచ్‌లలో 19 గెలిచి సెరెనా ఏకపక్షంగా ఆధిపత్యం ప్రదర్శించినా... వీరి పోరుపై ఆసక్తి ఏమాత్రం తగ్గలేదు. అనేక సందర్భాల్లో కోర్టు బయట కూడా వీరిద్దరు పరస్పర విమర్శలతో వార్తల్లో నిలిచారు. తాజాగా విడుదలైన తన ఆటోబయోగ్రఫీ ‘అన్‌ స్టాపబుల్‌ –మై లైఫ్‌ సో ఫర్‌’లో షరపోవా, సెరెనాపై తన విద్వేషాన్ని మరోసారి ప్రదర్శించింది. తన శ్వేత వర్ణం వల్లే సెరెనా తనపై ద్వేషభావం పెంచుకుందని ఆమె వ్యాఖ్యానించింది. 2004 వింబుల్డన్‌ ఫైనల్లో సెరెనాను ఓడించి షరపోవా విజేతగా నిలిచింది. గత 13 ఏళ్లుగా ఈ శత్రుత్వం కొనసాగుతోందని షరపోవా చెప్పింది.
 
 ‘వింబుల్డన్‌లో అనేక అవాంతరాలను అధిగమించి నాలాంటి ఒక శ్వేత వర్ణపు క్రీడాకారిణి ఆమెను ఓడించడం వల్లే సెరెనా నాపై ద్వేషం పెంచుకుంది. లాకర్‌ రూమ్‌లో ఆమె ఏడవటం కూడా నేను చూశాను. అది ఆమెను మరింతగా బాధపెట్టి ఉంటుంది. ఇన్నేళ్ల పాటు ఆమెను ఓడించడంలో నేను సఫలం కాలేకపోయాను. ఇంకా చెప్పాలంటే తన భారీ, బలమైన శరీరంతోనే ఆమె నన్ను భయపెట్టేసేది’ అని షరపోవా తన పుస్తకంలో రాసింది. పరోక్షంగా తాను అందమైన, సున్నితమైన దానినని చెప్పే ప్రయత్నం చేసింది. అయితే ఆమె మాటలపై ప్రపంచ వ్యాప్తంగా పెద్ద సంఖ్యలో విమర్శలు వినిపించాయి. 23 గ్రాండ్‌స్లామ్‌లు గెలిచిన సెరెనాతో 5 గ్రాండ్‌స్లామ్‌లు నెగ్గిన షరపోవాకు అసలు పోలికే లేదని వారంతా ఘాటుగా వ్యాఖ్యానించారు. సెరెనాను విమర్శించే క్రమంలో ఈ పుస్తకంలో ఏకంగా 106 సార్లు ఆమె పేరును షరపోవా ప్రస్తావించడాన్ని కూడా వారు వ్యంగ్యంగా గుర్తు చేస్తున్నారు!  


 సాక్షి, స్పోర్ట్స్(న్యూయార్క్‌)‌:  యూఎస్‌ ఓపెన్‌ టోర్నీలో మరియా షరపోవా పోరు ముగిసింది. నాలుగో రౌండ్‌లో ఓటమితో టోర్నీ నుంచి ఈ రష్యన్‌ భామ నిష్క్రమించింది. 
  
 ఆదివారం రాత్రి జరిగిన మ్యాచ్‌లో లాత్వియన్‌కు చెందిన అనస్తాసిజా సెవస్తోవాతో తలపడగా 5-7, 6-4, 6-2 తేడాతో షరపోవా ఓటమిపాలైంది. తద్వారా మాజీ ఛాంపియన్‌ ఓడించిన అనస్తాసిజా క్వార‍్టర్‌ ఫైనల్‌ కు చేరుకుంది. అమెరికాకు చెందిన స్లోయెన్‌ స్టీఫెన్స్ తో  క్వార‍్టర్‌లో అనస్తాసిజా తలపడనుంది.
  
 ముప్పై ఏళ్ల షరపోవా డోపింగ్ ఆరోపణలతో నిషేధం ఎదుర్కుని ఏప్రిల్‌లో తిరిగి రీఎంట్రీ ఇచ్చింది. వైల్డ్ కార్డు ద్వారా ఆమె యూఎస్‌ ఓపెన్‌ టోర్నీలో ఆడిన విషయం తెలిసిందే. ఆరంభంలో అదరగొట్టిన షరపోవా చివరకు ఓటమితో అభిమానులను నిరాశపరిచింది.


 ♦ ప్రిక్వార్టర్స్‌లోకి రష్యా స్టార్‌
 ♦ ప్లిస్కోవా, ముగురుజా కూడా
 ♦  యూఎస్‌ ఓపెన్‌ టోర్నీ
 
 న్యూయార్క్‌: డోపింగ్‌ నిషేధం గడువు ముగిశాక బరిలోకి దిగిన తొలి గ్రాండ్‌స్లామ్‌ టోర్నమెంట్‌ యూఎస్‌ ఓపెన్‌లో రష్యా స్టార్‌ మరియా షరపోవా హడలెత్తిస్తోంది. తొలి రెండు రౌండ్‌లలో మూడు సెట్‌లలో గట్టెక్కిన ఈ మాజీ చాంపియన్‌... మూడో రౌండ్‌లో మాత్రం వరుస సెట్‌లలో విజయం సాధించి ప్రిక్వార్టర్‌ ఫైనల్లోకి దూసుకెళ్లింది. శనివారం జరిగిన మహిళల సింగిల్స్‌ మూడో రౌండ్‌లో షరపోవా 7–5, 6–2తో సోఫియా కెనిన్‌ (అమెరికా)పై గెలిచింది. 2011 యూఎస్‌ ఓపెన్‌ నుంచి ఇప్పటివరకు 15 గ్రాండ్‌స్లామ్‌ టోర్నీల్లో బరిలోకి దిగిన షరపోవా 14 సార్లు ప్రిక్వార్టర్‌ ఫైనల్‌ దశకు చేరుకోవడం విశేషం. సోఫియాతో గంటా 42 నిమిషాలపాటు జరిగిన మ్యాచ్‌లో షరపోవా ఎనిమిది ఏస్‌లు సంధించి, ఏడు డబుల్‌ ఫాల్ట్‌లు చేసింది. 38 విన్నర్స్‌ కొట్టిన ఈ మాజీ విజేత 33 అనవసర తప్పిదాలు చేసింది.  మరోవైపు మూడో సీడ్‌ ముగురుజా (స్పెయిన్‌), తొమ్మిదో సీడ్‌ వీనస్‌ విలియమ్స్‌ (అమెరికా), 16వ సీడ్‌ అనస్తాసియా సెవస్తోవా (లాత్వియా) కూడా ప్రిక్వార్టర్‌ ఫైనల్‌కు చేరుకున్నారు. మూడో రౌండ్‌లో వీనస్‌ 6–3, 6–4తో మరియా సకారి (గ్రీస్‌)పై, ముగురుజా 6–1, 6–1తో రిబరికోవా (స్లొవేకియా)పై, సెవస్తోవా 6–2, 6–2తో డోనా వెకిక్‌ (క్రొయేషియా)పై గెలిచారు.
 
 ఐదో సీడ్‌ సిలిచ్‌కు షాక్‌
 పురుషుల సింగిల్స్‌ విభాగంలో రెండు సంచలనాలు నమోదయ్యాయి. 2014 చాంపియన్, ఐదో సీడ్‌ మారిన్‌ సిలిచ్‌ (క్రొయేషియా), పదో సీడ్‌ జాన్‌ ఇస్నెర్‌ (అమెరికా) మూడో రౌండ్‌లోనే నిష్క్రమించారు. 29వ సీడ్‌ డీగో ష్వార్ట్‌జ్‌మన్‌ (అర్జెంటీనా) 4–6, 7–5, 7–5, 6–4తో సిలిచ్‌పై... 23వ సీడ్‌ మిషా జ్వెరెవ్‌ (జర్మనీ) 6–4, 6–3, 7–6 (7/5)తో జాన్‌ ఇస్నెర్‌పై గెలుపొంది ప్రిక్వార్టర్‌ ఫైనల్లోకి ప్రవేశించారు.  
 
 షపోవలోవ్‌ దూకుడు...
 కెనడా రైజింగ్‌ స్టార్, 18 ఏళ్ల డెనిస్‌ షపోవలోవ్‌ 3–6, 6–3, 6–3, 1–0తో ఆధిక్యంలో ఉన్న దశలో అతని ప్రత్యర్థి ఎడ్మండ్‌ (బ్రిటన్‌) గాయం కారణంగా వైదొలగడంతో షపోవలోవ్‌ను విజేతగా ప్రకటించారు. 1989లో మైకేల్‌ చాంగ్‌ (17 ఏళ్లు) తర్వాత యూఎస్‌ ఓపెన్‌లో ప్రిక్వార్టర్‌ ఫైనల్‌కు చేరిన రెండో పిన్న వయస్కుడిగా క్వాలిఫయర్‌ షపోవలోవ్‌ గుర్తింపు పొందాడు. ప్రిక్వార్టర్‌ ఫైనల్లో 12వ సీడ్‌ పాబ్లో బుస్టా (స్పెయిన్‌)తో షపోవలోవ్‌ ఆడతాడు. గత 3 మ్యాచ్‌ల్లో ఒక్క సెట్‌ కూడా కోల్పోని బుస్టా 1967 తర్వాత ఓ గ్రాండ్‌ స్లామ్‌ టోర్నీలో వరుసగా నాలుగో మ్యాచ్‌లోనూ క్వాలిఫయర్‌ను ఎదుర్కోనున్న తొలి ప్లేయర్‌గా గుర్తింపు పొందనున్నాడు. మరోవైపు 35 ఏళ్ల ప్రాయంలో ఓ గ్రాండ్‌స్లామ్‌ టోర్నీలో తొలిసారి ప్రిక్వార్టర్‌ ఫైనల్‌కు చేరిన ప్లేయర్‌గా లొరెంజీ (ఇటలీ) రికార్డు నెలకొల్పాడు. మూడో రౌండ్‌లో లొరెంజీ 6–2, 6–4, 6–4తో ఫాబియానోపై గెలిచాడు.
 
 ఓటమి అంచుల నుంచి...
 మహిళల సింగిల్స్‌ విభాగంలో ప్రపంచ నంబర్‌వన్, టాప్‌ సీడ్‌ కరోలినా ప్లిస్కోవా (చెక్‌ రిపబ్లిక్‌) అతికష్టమ్మీద ప్రిక్వార్టర్‌ ఫైనల్‌కు చేరింది. షుయె జాంగ్‌ (చైనా)తో జరిగిన మూడో రౌండ్‌లో ప్లిస్కోవా 3–6, 7–5, 6–4తో గెలిచింది. తొలి సెట్‌ కోల్పోయి, రెండో సెట్‌లో స్కోరు 4–5 వద్ద జాంగ్‌ సర్వీస్‌లో మ్యాచ్‌ పాయింట్‌ కాపాడుకున్న ప్లిస్కోవా స్కోరును 5–5తో సమం చేసింది. ఆ తర్వాత మరోసారి జాంగ్‌ సర్వీస్‌ను బ్రేక్‌ చేసి రెండో సెట్‌ను దక్కించుకొని మ్యాచ్‌లో నిలిచింది. మూడో సెట్‌లోనూ గట్టిపోటీ ఎదుర్కొన్న ప్లిస్కోవా పట్టుదలతో పోరాడి గట్టెక్కింది.


 న్యూయార్క్:యూఎస్ గ్రాండ్ స్లామ్లో రష్యా భామ మారియా షరపోవా తన జోరును కొనసాగిస్తున్నారు. డోపింగ్ కారణంగా దాదాపు 15 నెలలు పాటు ఆటకు దూరమైనా తన ఆటలో ఏ మాత్రం వన్నె తగ్గలేదని షరపోవా మరోసారి నిరూపించుకున్నారు. మహిళల సింగిల్స్ లో భాగంగా ఇక్కడ జరిగిన పోరులో షరపోవా 7-5, 6-2 తేడాతో యూఎస్ టీనేజర్ సోఫియా కెనిన్ పై అలవోక విజయాన్ని సాధించారు. తద్వారా ప్రిక్వార్టర్స్ బెర్తును ఖాయం చేసుకున్నారు.
  
 తొలి సెట్ లో అనేక విన్నర్స్ ను సాధించిన షరపోవా అదే క్రమంలో అనవసర తప్పిదాలను కూడా చేశారు. దాంతో 7-5 తేడాతో మాత్రమే తొలి సెట్ ను కైవసం చేసుకున్నారు. అయితే రెండో సెట్ లో సోఫియాకు ఏమాత్రం అవకాశం ఇవ్వకుండా ఏకపక్ష విజయం సాధించారు. రెండో సెట్ లో 3-0 ఆధిక్యంతో దూసుకుపోయిన షరపోవా..ఆపై వెనుదిరిగి చూసుకోలేదు. షరపోవా తన తదుపరి రౌండ్ లో అన‌స్తిజా సెల‌వ‌టోవాతో తలపడనున్నారు.


 ♦ గ్రాండ్‌’గా రష్యా స్టార్‌ పునరాగమనం
 ♦ యూఎస్‌ ఓపెన్‌ తొలి రౌండ్‌లో
 ♦ రెండో సీడ్‌ హలెప్‌పై విజయం  
 
 న్యూయార్క్‌: డోపింగ్‌ కారణంగా 15 నెలల పాటు ఆటకు దూరమైనా... తన ఆటతీరులో ఏమాత్రం పదును తగ్గలేదని రష్యా టెన్నిస్‌ స్టార్‌ మరియా షరపోవా నిరూపించుకుంది. సీజన్‌ చివరి గ్రాండ్‌స్లామ్‌ టోర్నీ యూఎస్‌ ఓపెన్‌లో ఈ మాజీ నంబర్‌వన్‌ ఘనంగా పునరాగమనం చేసింది. మంగళవారం జరిగిన మహిళల సింగిల్స్‌ తొలి రౌండ్‌లో షరపోవా 6–4, 4–6, 6–3తో ప్రపంచ రెండో ర్యాంకర్, రెండో సీడ్‌ సిమోనా హలెప్‌ (రొమేనియా)ను బోల్తా కొట్టించింది.
 
  2 గంటల 45 నిమిషాలపాటు జరిగిన ఈ పోరులో షరపోవా ఖాతాలో 60 విన్నర్స్, 64 అనవసర తప్పిదాలు, ఏడు ఏస్‌లు, ఏడు డబుల్‌ ఫాల్ట్‌లు ఉన్నప్పటికీ... కీలక దశలో పాయింట్లు నెగ్గడం ఆమెకు కలిసొచ్చింది. మరోవైపు హలెప్‌ కేవలం 15 విన్నర్స్‌ సాధించింది. షరపోవా సర్వీస్‌ను పదిసార్లు బ్రేక్‌ చేసే అవకాశం వచ్చినా హలెప్‌ నాలుగుసార్లు మాత్రమే సఫలమైంది. తన సర్వీస్‌ను మాత్రం ఐదుసార్లు కోల్పోయింది. షరపోవా చేతిలో హలెప్‌కిది వరుసగా ఏడో పరాజయం. యూఎస్‌ ఓపెన్‌ తుది ఫలితం ద్వారా ఈసారి మహిళల సింగిల్స్‌లో ఏకంగా ఎనిమిది మందికి టాప్‌ ర్యాంకర్‌ అయ్యే అవకాశం ఉండగా... ఈ ఓటమితో హలెప్‌కు ప్రపంచ నంబర్‌వన్‌ ర్యాంకర్‌ అయ్యే అవకాశం చేజారిపోయింది.  
 
 ఆరో సీడ్‌ కెర్బర్, ఏడో సీడ్‌ కొంటా అవుట్‌...
 మరోవైపు ఆరో సీడ్‌ ఎంజెలిక్‌ కెర్బర్‌ (జర్మనీ), ఏడో సీడ్‌ జొహానా కొంటా (బ్రిటన్‌) తొలి రౌండ్‌లోనే ఇంటిదారి పట్టారు. నవోమి ఒసాకా (జపాన్‌) 6–3, 6–1తో కెర్బర్‌ను... క్రునిక్‌ (సెర్బియా) 4–6, 6–3, 6–4తో కొంటాను ఓడించి సంచలనం సృష్టించారు. గత ఏడాది రన్నరప్, ప్రపంచ నంబర్‌వన్, టాప్‌ సీడ్‌ కరోలినా ప్లిస్కోవా (చెక్‌ రిపబ్లిక్‌) శుభారంభం చేసింది. తొలి రౌండ్‌లో ప్లిస్కోవా 6–2, 6–1తో మగ్దా లినెట్టి (పోలాండ్‌)పై అలవోకగా గెలిచింది. ఇతర తొలి రౌండ్‌ మ్యాచ్‌ల్లో మాజీ చాంపియన్, తొమ్మిదో సీడ్‌ వీనస్‌ విలియమ్స్‌ (అమెరికా) 6–3, 3–6, 6–2తో కుజ్‌మోవా (స్లొవేకియా)పై, 23వ సీడ్‌ స్ట్రికోవా (చెక్‌ రిపబ్లిక్‌) 6–1, 6–3తో మిసాకి దోయి (జపాన్‌)పై గెలిచారు.   
 
 పురుషుల సింగిల్స్‌లో మాజీ చాంపియన్, ఐదో సీడ్‌ మారిన్‌ సిలిచ్‌ (క్రొయేషియా), నాలుగో సీడ్‌ అలెగ్జాండర్‌ జ్వెరెవ్‌ (జర్మనీ), ఎనిమిదో సీడ్‌ సోంగా (ఫ్రాన్స్‌), పదో సీడ్‌ జాన్‌ ఇస్నెర్‌ (అమెరికా) రెండో రౌండ్‌లోకి ప్రవేశిం చారు. తొలి రౌండ్‌లో సిలిచ్‌ 6–4, 6–3, 3–6, 6–3తో సాండ్‌గ్రెన్‌ (అమెరికా)పై, జ్వెరెవ్‌ 7–6 (11/9), 7–5, 6–4తో డారియన్‌ కింగ్‌ (బార్బడోస్‌)పై, సోంగా 6–3, 6–3, 6–4తో కోపిల్‌ (రొమేనియా)పై, ఇస్నెర్‌ 6–1, 6–3, 4–6, 6–3తో హెర్బెర్ట్‌ (ఫ్రాన్స్‌)పై విజయం సాధించారు.


 సాక్షి, న్యూయార్క్‌: యూఎస్‌ ఓపెన్‌ 2017ను మాజీ ప్రపంచనెంబర్‌ వన్‌ స్టార్‌ మరియా షరపోవా అద్భుత విజయంతో ఆరంభించారు. డోపింగ్‌లో పట్టుబడి 15 నెలల నిషేధం అనంతరం తొలిసారి రాకెట్‌ పట్టిన ఆమె రెండో సిమోనా హలెప్‌ను 6-4, 4-6, 6-3 వరుస సెట్లలో మట్టి కరిపించారు.
 భారత కాలమానం ప్రకారం మంగళవారం తెల్లవారుజామున జరిగిన ఈ మ్యాచ్‌లో షరపోవా, హలెప్‌లు హోరాహోరీగా తలపడ్డారు. ఒత్తిడి అధిగమించే క్రమంలో తడబాటుకు గురైన హలెప్‌ మ్యాచ్‌లో చిత్తైయ్యారు. మ్యాచ్‌ అనంతరం మాట్లాడిన షరపోవా.. నాకు ఇదో కొత్త రోజుగా భావించాను. కొత్త అవకాశం. కొత్త మ్యాచ్‌. గెలవాలనే బరిలోకి దిగాను. కానీ అంతకంటే ఎక్కువ సాధించినట్లు అనిపిస్తోంది.' అని అన్నారు.
 


 పారిస్‌: డోపింగ్‌లో పట్టుబడి 15 నెలల నిషేధానికి గురై... గత నెలలోనే పునరాగమనం చేసిన రష్యా టెన్నిస్‌ స్టార్‌ మరియా షరపోవాకు ‘వైల్డ్‌ కార్డు’ ఇవ్వడం లేదని ఫ్రెంచ్‌ ఓపెన్‌ నిర్వాహకులు ప్రకటించారు. దాంతో గతంలో రెండుసార్లు (2012, 2014లో) ఈ టోర్నీలో విజేతగా నిలిచిన షరపోవా ఈసారి బరిలో దిగే అవకాశాన్ని కోల్పోయింది.
 
 నిషేధం గడువు ముగిశాక ‘వైల్డ్‌ కార్డు’ల సహాయంతో షరపోవా మూడు టోర్నీల్లో ఆడింది. ప్రస్తుతం ఆమె టాప్‌–200లోకి రావడంతో జూలైలో జరిగే వింబుల్డన్‌ టోర్నీ క్వాలిఫయింగ్‌ మ్యాచ్‌లు ఆడేం దుకు అర్హత సాధించింది. ‘గాయాల నుంచి తేరుకున్న వాళ్లకు వైల్డ్‌ కార్డులు ఉంటాయి. అంతేగానీ డోపింగ్‌లో పట్టుబడి తిరిగి వచ్చేవాళ్లకు వైల్డ్‌ కార్డులు ఇవ్వరు’ అని ఫ్రెంచ్‌ టెన్నిస్‌ సమాఖ్య అధ్యక్షుడు ఫెరాన్‌డిని తెలిపారు.


 స్టట్‌గార్ట్‌ (జర్మనీ): టైటిల్‌ సాధించి తన పునరాగమనాన్ని ఘనంగా చాటుకోవాలని ఆశించిన రష్యా టెన్నిస్‌ స్టార్‌ మరియా షరపోవాకు నిరాశ ఎదురైంది. స్టట్‌గార్ట్‌ ఓపెన్‌ టోర్నమెంట్‌లో షరపోవా పోరాటం సెమీఫైనల్లోనే ముగి సింది. ఫ్రాన్స్‌ క్రీడాకారిణి క్రిస్టినా మ్లాడెనోవిచ్‌తో శనివారం జరిగిన మహిళల సింగిల్స్‌ సెమీఫైనల్లో షరపోవా 6–3, 5–7, 4–6తో పోరాడి ఓడిపోయింది.
 2 గంటల 38 నిమిషాలపాటు జరిగిన ఈ పోరులో షరపోవా ఎనిమిది ఏస్‌లు సంధించడంతోపాటు ఐదు డబుల్‌ ఫాల్ట్‌లు చేసింది. తొలి సెట్‌ను అలవోకగా నెగ్గిన షరపోవా రెండో సెట్‌లో 12వ గేమ్‌లో తన సర్వీస్‌ను కోల్పోయి సెట్‌ను చేజార్చుకుంది. నిర్ణాయక మూడో సెట్‌లో పదో గేమ్‌లో షరపోవా సర్వీస్‌ను బ్రేక్‌ చేసిన మ్లాడెనోవిచ్‌ సెట్‌తోపాటు మ్యాచ్‌ను సొంతం చేసుకుంది.


 డోపింగ్‌ ఆరోపణలతో 15 నెలలు నిషేధానికి గురైన టెన్నిస్‌ స్టార్‌ మరియా షరపోవా పునరాగమనంలోనూ సత్తా చాటింది. 15 నెలల నిషేధం తర్వాత ఆడిన తొలి మ్యాచ్‌లో ఆమె విజయం సాధించింది. రాబెర్టా విన్సీని 7-5, 6-3 తేడాతో చిత్తుగా ఓడించింది.
 
 ఐదు గ్రాండ్‌స్లామ్‌ల విజేత, మాజీ నంబర్‌ 1 అయిన ఆమెకు ఈ మ్యాచ్‌ వీక్షకులు లేచి నిలబడి కరతాళ ధ్వనులతో ఘనమైన స్వాగతం పలికారు. అయితే, ఆమె పునరాగమనంపై కెనడా టెన్నిస్‌ స్టార్‌ యూజినీ బౌచర్డ్‌ ఫైర్‌ అయింది. నిషేధిత ఉత్ప్రేరకాలు వాడిన ఆమెను మళ్లీ ఆడేందుకు ఎలా అనుమతి ఇస్తారని ప్రశ్నించింది.
 
 ‘ఇది సరికాదు. ఆమె ఒక మోసగత్తె. ఏ క్రీడలో అయిన మోసగాళ్లను మళ్లీ ఆడనివ్వకూడదు. ఇలా ఆడనివ్వడం ఇతర ఆటగాళ్లకు అన్యాయం చేయడమే. ప్రపంచ టెన్నిస్‌ సమాఖ్య ఈ విషయంలో తప్పుడు సంకేతాలు ఇస్తోంది. మోసం చేసిన వాళ్లను కూడా తిరిగి ఘనంగా ఆహ్వానిస్తారనే తప్పుడు సంకేతాలు ఈ చర్చ వల్ల పిల్లలకు వెళ్లే అవకాశముంది. షరపోవాకు జీవితకాల నిషేధమే సరైన శిక్ష’ అని యూజినీ అభిప్రాయపడింది. షరపోవా పునరాగమనంపై పలువురు ఇతర టెన్నిస్‌ స్టార్లు కూడా అభ్యంతరం వ్యక్తం చేస్తున్నారు. 


 నిషేధిత ఉత్ప్రేరకాలు వాడి.. నిషేధానికి గురయిన టెన్నిస్‌ బ్యూటీ మరియా షరపోవా తాజాగా పలు ఆసక్తికర విషయాలు వెల్లడించింది. ఆటకు దూరమైన ఈ ఏడాదికాలంలో నచ్చినవాడితో డేటింగ్‌ చేద్దామని అనుకున్నానని, కానీ తన ప్రేమ అన్వేషణ ఫలించలేదని చెప్పుకొచ్చింది. తను భయపెట్టేరకమని పురుషులు భావిస్తున్నారని, అందుకే ఈ ఏడాదికాలంలో ఎవరితో డేటింగ్‌ చేయడానికి వీలుపడలేదని చెప్పింది.
 
 ‘విభిన్న రంగాలు, విభిన్న సంస్కృతులకు చెందిన విభిన్న వ్యక్తులతో కలిసి గడుపాడాన్ని నేను ఆస్వాదిస్తాను. ఆ దృష్టితో నేను ప్రపంచపటం అంతా చుట్టి రావాలనుకుంటాను’ అని 29 ఏళ్ల షరపోవా చెప్పింది. మరి ఎలాంటి పురుషుడు మీకు నచ్చుతాడని ప్రశ్నిస్తే.. ‘సొంత అభిప్రాయాలు కలిగి ఉండి, సొంత జీవిత దృక్పథంతో తన రంగును, వ్యక్తిత్వాన్ని గౌరవించుకునే వ్యక్తి నాకు నచ్చుతాడు’ అంటూ ముసిముసి నవ్వులు నవ్వింది.
 
 2016 ఆస్ట్రేలియా ఓపెన్‌ సందర్భంగా షరపోవా నిషేధ ఉత్ప్రేరకం మెల్డోనియం వాడినట్టు పరీక్షల్లో తేలడంతో ఆమెపై రెండేళ్లు సస్పెన్షన్‌ విధించారు. తర్వాత నిషేధిత కాలాన్ని 15 నెలలకు తగ్గించారు. మెల్డోనియంను నిషేధించిన విషయం తనకు తెలియదని, అధికారులు ఈ విషయాన్ని నేరుగా అథ్లెట్లకు తెలియజేసి ఉంటే బాగుండేదని షరపోవా అప్పట్లో చెప్పింది. తాజాగా, ఆ ఉత్ప్రేరకం తీసుకొని ఉండాల్సింది కాదంటూ షరపోవా పశ్చాత్తాపాన్ని వ్యక్తం చేసింది.


 మాస్కో: అవగాహన లేకుండా నిషేధిత ఉత్ప్రేరకం మెల్డోనియం వాడినందుకు నిషేధం ఎదుర్కొన్న రష్యా టెన్నిస్‌ స్టార్‌​ మరియా షరపోవా అంతర్జాతీయ టెన్నిస్‌ సమాఖ్యను నిందించింది. నిషేధిత ఉత్ప్రేరకాల జాబితాలో మెల్డోనియంను చేర్చినట్టుగా తనను అప్రమత్తం చేయడంలో ఐటీఎఫ్‌ తగిన ప్రయత్నాలు చేయలేదని షరపోవా పేర్కొంది.
 
 2016 ఆస్ట్రేలియా ఓపెన్‌ సందర్భంగా షరపోవా నిషేధ ఉత్ప్రేరకం మెల్డోనియం వాడినట్టు పరీక్షల్లో తేలడంతో ఆమెపై రెండేళ్లు సస్పెన్షన్‌ విధించారు. తర్వాత నిషేధిత కాలాన్ని 15 నెలలకు తగ్గించారు. మెల్డోనియంను నిషేధించిన విషయం తనకు తెలియదని, అధికారులు ఈ విషయాన్ని నేరుగా అథ్లెట్లకు తెలియజేసి ఉంటే బాగుండేదని షరపోవా ఓ ఇంటర్వ్యూలో చెప్పింది. ఏదేమైనా తెలుసుకోకుండా నిషేధిత ఉత్ప్రేరకం వాడటం తనదే తప‍్పని, ఇందుకు బాధ్యత తనదేనని వాపోయింది. ఈ నెల చివర్న జరిగే టోర్నీలో షరపోవా ఆడనుంది.


 డోపింగ్‌ కేసులో నిషేధానికి గురైన రష్యా టెన్నిస్‌ స్టార్‌ మరియా షరపోవాకు ఊరట లభించింది. షరపోవాపై విధించిన రెండేళ్ల నిషేధిత కాలాన్ని 15 నెలలకు తగ్గించారు. స్పోర్ట్‌ ఆర్బిట్రేషన్‌ కోర్టు (సీఏఎస్‌) ఈ మేరకు తీర్పు చెప్పింది. మొత్తం నిషేధిత కాలంలో​ తొమ్మిది నెలల శిక్షను సస్సెండ్‌ చేసింది.
 
 ఈ ఏడాది జనవరి 26 నుంచి ఆమెపై నిషేధం కొనసాగుతోంది. తాజా తీర్పుతో వచ్చే ఏడాది ఏప్రిల్‌ 26 నాటికి షరపోవాపై నిషేధితం ముగుస్తుంది. ఆ తర్వాత ఆమె అంతర్జాతీయ టెన్నిస్‌ ఆడేందుకు అర్హురాలు అవుతుంది. వచ్చే ఏడాది జరిగే ఫ్రెంచ్‌ ఓపెన్‌లో ఆమె పాల్గొనే అవకాశం ఉంటుంది.
 
 షరపోవా నిషేధిత ఉత్ప్రేరకం మెల్డోనియం వాడినట్టు డోపింగ్‌ పరీక్షల్లో తేలడంతో గత జనవరిలో అంతర్జాతీయ టెన్నిస్‌ సమాఖ్య ఆమెపై వేటువేసిన సంగతి తెలిసిందే.  డాక్టర్‌ సలహా మేరకు కొన్నేళ్లుగా మెల్డోనియం టాబ్లెట్లు వాడుతున్నానని, అయితే వీటిని నిషేధిత జాబితాలో చేర్చినట్టు తెలియక పొరపాటును తీసుకున్నానని అప్పట్లో షరపోవా బహిరంగంగా ప్రకటించింది. షరపోవా ఉద్దేశ్యపూర్వకంగా ఈ నిషేధిత డ్రగ్‌ను తీసుకోలేదని భావించడంతో తక్కువ శిక్ష వేశారు. కోర్టును ఆశ్రయించడంతో నిషేధిత కాలాన్ని మరికొంత తగ్గించింది.


 రియో డీ జనీరో: రష్యా టెన్నిస్ స్టార్ మారియా షరపోవా వచ్చే ఏడాది నుంచి బరిలోకి దిగే అవకాశముంది. 2017, జనవరిలో షరపోవా రాకెట్ చేతబట్టనుందని రష్యా టెన్నిస్ సమాఖ్య అధ్యక్షుడు షామిల్ తార్పిష్చెవ్ తెలిపారు. రియో ఒలింపిక్స్ లో ఆయన ఈ విషయం వెల్లడించారు.
 
 'షరపోవా పునరాగమనంపై సెస్టెంబర్ లో నిర్ణయం తీసుకునే అవకాశముంది. కచ్చితంగా చెప్పలేను కానీ వచ్చే ఏడాది జనవరి నుంచి ఆమె మళ్లీ మైదానంలోకి అడుగుపెట్టే అవకాశాలు కన్పిస్తున్నాయ'ని షామిల్ చెప్పారు. డోపింగ్ టెస్టుల్లో పట్టుబడిన షరపోవా రెండేళ్లు నిషేధం ఎదుర్కొంటున్న సంగతి తెలిసిందే. దీంతో రియో ఒలింపిక్స్ లోనూ ఆడే అవకాశం  దక్కలేదు.


 రష్యా టెన్నిస్ బ్యూటీ, ఆరు అడుగుల పొడగరి మారియా షరపోవా ఆశలు అడియాసలు అయ్యాయి. రియో ఒలింపిక్స్ లో తన దేశం తరఫున ఆడాలనుకున్న ఈ సుందరిలో తాజా ఉత్తర్వులు నిరాశా నింపాయి. డోపింగ్ పరీక్షల్లో అడ్డంగా దొరికిపోయి టెన్నిస్ కు దూరమైన షరపోవా తాజాగా చేసుకున్న అప్పీలుపై క్రీడా వివాదాల పరిష్కార కోర్టు తన తీర్పును సెప్టెంబర్ వరకు వాయిదా వేసింది. దీంతో రియో ఒలింపిక్స్ లో షరపోవా ఆడే చాన్స్ పూర్తిగా లేనట్టే.
 
 డోపింగ్ టెస్టుల్లో పట్టుబడిన షరపోవా రెండేళ్లు నిషేధం ఎదుర్కొంటున్న సంగతి తెలిసిందే. తనపై అంతర్జాతీయ టెన్నిస్ ఫెడరేషన్ (ఐటీఎఫ్) విధించిన నిషేధాన్ని సవాల్ చేస్తూ ఆమె కోర్టుకు వెళ్లింది. ఈ అప్పీలుపై సోమవారం తీర్పు వెలువడాల్సి ఉండగా.. తీర్పు వాయిదాకు షరపోవా, ఐటీఎఫ్ అంగీకరించాయని, దీంతో తుది ఉత్తర్వులను సెప్టెంబర్ లో వెలువరిస్తామని న్యాయస్థానం తెలిపింది.


 రష్యాలోపుట్టి.. రాకెట్ చేతబట్టి.. ఒట్టి చేతులతో అమెరికా గడ్డపై అడుగు పెట్టి.. వరుస విజయాలు సాధిస్తూ కోట్లు గడించి.. చివరికి డోపింగ్ టెస్టులో విఫమై రెండేళ్ల నిషేధానికి గురైన టెన్నిస్ స్టార్ మరియా షరపోవా కెరీర్ ఆద్యంతం సినిమా కథను తలపిస్తుంది. ఓ వైపు అంతర్జాతీయ టెన్నిస్ సమాఖ్య తనపై విధించిన నిషేధ కాలాన్ని తగ్గించుకునే ప్రయత్నాలు చేస్తోన్న ఆమె.. మరోవైపు వ్యాపారాన్ని విస్తరించేపనిలో బిజీగా ఉంది. షరపోవా సొంత కంపెనీ 'షుగర్ పోవా' ఇప్పటికే 32 దేశాల్లో టేస్టీ క్యాండీలను విక్రయిస్తోంది. కాగా, కంపెనీని మరిన్ని దేశాలకు విస్తరించడంతోపాటు కొత్త కంపెనీలను కూడా ప్రారంభించానుకుంటోంది. (చదవండి: అనుకోకుండా అగాధంలోకి..)
 
 ఆ క్రమంలోనే వ్యాపార మెలకువలు నేర్చుకునేందుకు ప్రఖ్యాత హార్వర్డ్ బిజినెస్ స్కూల్(బోస్టన్)లో చేరింది. రెండు వారాల ప్రత్యేక కోర్సులో చేరిన మరియా.. 'ఇదెలా జరిగిందో తెలియదు.. హార్వర్డ్ లో ప్రోగ్రామ్ చేయకుండా ఉండలేకపోతున్నా' అంటూ ట్విట్టర్ లో స్పందించింది. షరాపోవా పనే బాగుంది. కుదిరితే మళ్లీ బ్యాట్ పట్టుకుని బ్రాండ్లకు అంబాసిడర్ కావచ్చు. లేదంటే బిజినెస్ లో ఇంకా ముందుకు వెళ్లొచ్చు.
 
 


 డోపింగ్ టెస్టులో దొరికిపోయిన రష్యా టెన్నిస్‌ స్టార్‌ మరియా షరపోవాపై అంతర్జాతీయ టెన్నిస్ ఫెడరేషన్ రెండేళ్లపాటూ నిషేధం విధించింది. ఐదు సార్లు గ్రాండ్స్లామ్ చాంపియన్ అయిన మరియా షరపోవా నిషేధిత ఉత్ప్రేరకం (మెల్డోనియం) వాడినట్టు ఆస్ట్రేలియా ఓపెన్ సందర్భంగా నిర్వహించిన డ్రగ్ పరీక్షల్లో తేలింది. ఈ విషయాన్ని షరపోవా స్వయంగా వెల్లడించడంతో ఆమె కెరీర్ ప్రశ్నార్థకంగా మారింది. 
 
 2006 నుంచి డ్రగ్ తీసుకుంటున్నానని, అయితే దీన్ని ఈ ఏడాదే నిషేధిత జాబితాలో చేర్చారని షరపోవా చెప్పింది. ఆరు అడుగులకుపైగా ఎత్తుతో ఉండే ఈ  28 ఏళ్ల అందాల సుందరి తిరుగులేని ఆటతో కొన్నేళ్లపాటు టెన్నిస్‌ను ఏలింది. అత్యద్భుతమైన ఆటతీరుతో ప్రపంచవ్యాప్తంగా అభిమానులను సంపాదించుకుంది.


 మాస్కో: సెరెనా విలియమ్స్, మారియా షరపోవా.. ఇద్దరూ పేర్లూ టెన్నిస్ అభిమానులకు సుపరిచతమే. వీరిద్దరూ స్టేడియాల్లో చేసే హడావుడి  ప్రేక్షకులకు వీనుల విందుగా ఉంటుంది. ఈ భామలిద్దరూ ఒకేసారి తలపడుతున్నారంటే అరుపులు, కేకలకు కొదవ ఉండదు. అయితే  పేలవమైన ఫామ్తో పాటు, డోపింగ్ ఆరోపణలతో షరపోవా ఢీలా పడితే, వరుసగా రెండు గ్రాండ్ స్లామ్ల్లో ఫైనల్ కు చేరి టైటిల్ వేటలో సెరెనా చతికిలబడింది. గతేడాది మూడు గ్రాండ్ స్లామ్లు(ఆస్ట్రేలియా, ఫ్రెంచ్, వింబుల్డన్) గెలిచిన సెరెనా, ఈ ఏడాది రెండు టైటిల్స్కు(ఆస్ట్రేలియా, ఫ్రెంచ్) అడుగుదూరంలో నిలిచిపోయి రన్నరప్గా సరిపెట్టుకుంది. 2015లో మంచి ఫామ్లో ఉన్న సెరెనా. .ఈ ఏడాదికొచ్చేసరికి ఆటలో అదృష్టం కలిసిరాకపోయినా,  ఆదాయంలో మాత్రం టాప్కు ఎగబాకింది.
 తాజాగా ఫోర్బ్స్ వెల్లడించిన అత్యధిక సంపాదన క్రీడాకారిణుల జాబితాలో సెరెనా ప్రథమ స్థానంలో నిలిచింది. ఈ ఏడాది ప్రైజ్ మనీ, వాణిజ్యప్రకటనల ద్వారా సెరెనాకు సమకూరిన ఆదాయం 28.9 మిలియన్ డాలర్లు (రూ. సుమారు 192కోట్లు)తో అగ్రస్థానాన్ని ఆక్రమించి అత్యధిక సంపాదన గల మహిళా అథ్లెట్ గా నిలిచింది. ప్రస్తుతం టాప్ ర్యాంక్ లో కొనసాగుతున్న సెరెనా ఆదాయంలో మేటి అనిపించుకుని  సరికొత్త చరిత్ర సృష్టించింది.
 దీంతో  వరుసగా 11 సంవత్సరాల నుంచి ఆదాయార్జనలో అగ్రస్థానంలో కొనసాగుతున్న రష్యన్ భామ షరపోవాకు బ్రేక్ పడింది. ఈ ఏడాది 21.9 మిలియన్ డాలర్లు(రూ.దాదా146 కోట్లు) సంపాదనకే పరిమితమైన షరపోవా రెండో స్థానానికి పడిపోయింది. ఇది గతేడాది షరపోవా ఆదాయం కంటే ఎనిమిది మిలియన్ డాలర్లు(రూ.53కోట్లు) తక్కువ కావడం గమనార్హం. తన ఆటతీరు, అందంతో ప్రపంచ వ్యాప్తంగా అభిమానులను సంపాదించుకున్న రష్యా టెన్నిస్ స్టార్.. డ్రగ్ పరీక్షల్లో ఫెయిల్ కావడంతో కెరీర్ ప్రశ్నార్థకంగా మారింది. ఈ వార్త షరపోవాతో పాటు అభిమానులకు, క్రీడాకారులకు, క్రీడా సంఘాలకు షాక్ కలిగించింది. కొన్ని కంపెనీలు షరపోవాతో ఎండార్స్మెంట్లను రద్దు చేసుకోవడంతో ఆమె ఆదాయం గణనీయంగా తగ్గిపోయింది.
 
 2001లో డబ్ల్యూటీఏ టూర్లో పాల్గొన్న షరపోవా తక్కువ కాలంలోనే ప్రపంచ అగ్రశ్రేణి క్రీడాకారిణిగా ఎదిగింది. 2004లో వింబుల్డన్ సింగిల్స్ టైటిల్ సాధించిన ఈ రష్యా బ్యూటీ ఆ మరుసటి ఏడాదే 2005లో 18 ఏళ్ల వయసులో ప్రపంచ నెంబర్ వన్ ర్యాంక్ను సొంతం చేసుకుంది. 2005 నుంచి ఇప్పటివరకూ మహిళా అథ్లెట్ల సంపాదనలో షరపోవా అగ్రస్థానంలో ఉండటం విశేషం.


 మాస్కో: డోపింగ్ వల్ల సస్పెన్షన్‌కు గురైన రష్యా స్టార్ ప్లేయర్ మరియా షరపోవా పేరును రష్యా టెన్నిస్ ఫెడరేషన్ (ఆర్‌టీఎఫ్) రియో ఒలింపిక్స్‌కు నామినేట్ చేసింది. ఈ మేరకు గురువారం విడుదల చేసిన మహిళల సింగిల్స్ జాబితాలో స్వెత్లానా కుజనెత్సోవా, అనస్థాషియా పవ్‌లిన్‌చుకోవా, డర్యా కసాట్కినాతో పాటుగా షరపోవాను చేర్చింది. కానీ రియోలో  షరపోవా ప్రాతినిధ్యంపై అంతర్జాతీయ టెన్నిస్ సమాఖ్య (ఐటీఎఫ్) నుంచి ఇంకా అనుమతి రాలేదు.
 నిషేధిత ఉత్ప్రేరకం మాల్డోనియంను ఉపమోగించినందున మార్చి 12 నుంచి షరపోవాపై నిషేధం కొనసాగుతోంది. నిబంధనల ప్రకారం అనుమతి లభించకపోతే షరపోవా స్థానంలో... ఎకటేరియన్ మస్కిమోవా ఒలింపిక్స్‌లో పాల్గొనే అవకాశం ఉంది.     
 
  


 మాంట్రియల్:  నిషిద్ధ ఉత్ప్రేరకాల జాబితాలో మెల్డోనియంను కొనసాగించడంపై అంతర్జాతీయ డోపింగ్ నిరోధక సంస్థ (వాడా) పునరాలోచనలో పడింది. మానవ శరీరంలో మెల్డోనియం బయటపడటానికి ఎంత సమయం పడుతుందో చెప్పడానికి కచ్చితమైన సాంకేతిక సమాచారం లేదు. దీంతో అథ్లెట్లు ఉత్ప్రేరకాన్ని ఈ ఏడాది జనవరి 1కి ముందా లేక తర్వాత తీసుకున్నారా అనే విషయాన్ని చెప్పడం వాడాకు కష్టంగా మారింది.
 
 ఈ ఏడాది జరిపిన డోప్ పరీక్షలో టెన్నిస్ స్టార్ మరియా షరపోవాతో పాటు 172 మంది అథ్లెట్లు ఈ మెల్డోనియంను వాడినట్లు తేలింది. అయితే ఇందులో ఎవరు జనవరి 1 తర్వాత తీసుకున్నారో స్పష్టంగా తేలడం లేదు. మరోవైపు మెల్డోనియంపై వాడా యూటర్న్ తీసుకున్నా... షరపోవా మాత్రం విచారణకు హాజరుకావాల్సిందేనని ఐటీఎఫ్ స్పష్టం చేసింది.


 డోపింగ్‌ టెస్టులో దొరికిపోయిన రష్యా టెన్నిస్‌ స్టార్ మరియా షరపోవాకు మరో షాక్‌ తగిలింది. డోపింగ్ కేసు వివాదం నేపథ్యంలో తమ గుడ్‌విల్ అంబాసిడర్‌గా మారియా షరపోవాను సస్పెండ్ చేసినట్టు ఐక్యరాజ్య సమితి తాజాగా ప్రకటించింది. రక్తప్రసరణను పెంచేందుకు ఉద్దేశించిన నిషేధిత మెల్డోనియం ఉత్ర్పేరకాన్ని తీసుకున్నట్టు డోపింగ్ పరీక్షల్లో షరపోవా పట్టుబడటంతో ఆమె నాలుగేళ్ల నిషేధాన్ని ఎదుర్కొనే అవకాశముంది. ప్రస్తుతం ఆమెపై ప్రపంచ టెన్నిస్ సమాఖ్య తాత్కాలిక సస్పెన్షన్ విధించింది.
  
 'షరపోవా తాజా ప్రకటన నేపథ్యంలో గుడ్‌విల్ అంబాసిడర్‌గా ఆమె హోదాను సస్పెండ్ చేస్తున్నాం. ఈ వ్యవహారంలో దర్యాప్తు కొనసాగినంతకాలం ఆమెతో ఎలాంటి కార్యక్రమాలు చేపట్టబోం' అని న్యూయార్‌లోని ఐక్యరాజ్యసమితి అభివృద్ధి పథకం ఓ ప్రకటనలో తెలిపింది. చెర్నాబిల్  అణువిపత్తు వ్యవహారంలో తమ సహాయ కార్యక్రమాలకు మద్దతు తెలిపినందుకు షరపోవాకు కృతజ్ఞతలు తెలిపింది. 2007 నుంచి పేదరికం, అసమానతలపై పోరాడేందుకు ఐక్యరాజ్యసమితి అంబాసిడర్‌గా షరపోవా కృషి చేస్తున్నది. చెర్నాబిల్ అణువిపత్తు వల్ల బెలారస్‌లో ప్రభావితమైన ప్రజలకు ఎడ్యుకేషన్ స్కాలర్‌షిప్‌లు అందించేందుకు అవసరమైన విరాళాలు సేకరించేందుకు యూఎన్‌డీపీతో కలిసి షరపోవా చారిటబుల్ ట్రస్టు కృషి చేసింది. 


 నిప్పులు చిమ్ముతు నింగికి ఎగిరితే నిబిడాశ్చర్యంతో వీరే... నెత్తురు కక్కుతు నేలకు నే రాలిపోతే నిర్ధాక్షిణ్యంగా వీరే... ఎప్పుడో మన శ్రీ శ్రీ రాసిన ఈ మాట ఇప్పుడు టెన్నిస్ స్టార్ మరియా షరపోవాకు అతికినట్టు సరిపోతుంది. టెన్నిస్ చరిత్రలో అత్యంత ‘ఖరీదైన’ క్రీడాకారిణిగా ఆకాశానికెత్తిన సమాజం... ఇప్పుడు డోపింగ్‌లో విఫలం కావడంతో విమర్శల వర్షం కురిపిస్తోంది. తెలిసి చేసినా, పొరపాటున చేసినా షరపోవా చాలా ఖరీదైన తప్పు చేసింది. చేతిలో చిల్లిగవ్వ లేకుండా చిన్నప్పుడు అమెరికా వెళ్లిన ఓ అమ్మాయి...
 
 1200 కోట్ల రూపాయలు సంపాదించి ప్రపంచంలోనే ఎక్కువ సంపాదన ఉన్న క్రీడాకారిణిగా ఎదిగింది. ఇన్నాళ్లూ ఆమె జీవితం ఎంతో మందికి ఆదర్శం. కానీ డోపింగ్ వివాదంతో ఆ పేరు పోగొట్టుకుంది.
  
 సాక్షి క్రీడావిభాగం: సాధారణంగా ఆట, అందం ఒకే చోట ఉండటం అరుదు. కానీ షరపోవాలో ఈ రెండూ ఉన్నాయి. అందుకే ఆమె కోట్లాది మంది టెన్నిస్ అభిమానులకు ఆరాధ్య దేవత. ఆట విషయంలో, మార్కెటింగ్ విషయంలోనూ ఆమె చాలా నిక్కచ్చిగా ఉంటుంది. ఏ రోజూ ట్రైనింగ్ షెడ్యూల్‌ను తప్పదు. డైట్ దగ్గరి నుంచి ప్రతి విషయంలోనూ చాలా జాగ్రత్తగా ఉంటుంది. ఇక తనని తాను మార్కెట్ చేసుకోవడంలో ఎంతో ముందు చూపుతో వ్యవహరిస్తుంది.
 
 అందుకే ప్రపంచ ప్రఖ్యాత బ్రాండ్‌లు ఆమె కోసం క్యూ కట్టాయి. కానీ ఒకే ఒక చిన్న నిర్లక్ష్యానికి ఇంత పెద్ద మూల్యం చెల్లించుకోవాల్సి ఉంటుందని ఆమె కలలో కూడా ఊహించి ఉండదు. ఒక ఈ-మెయిల్‌ను తెరచి జాగ్రత్తగా చదవకపోవడం వల్ల ఇంత అనర్థం జరిగింది. తన కెరీర్‌నే అర్ధాంతరంగా ముగించాల్సిన పరిస్థితి ఏర్పడింది.
  
 నాన్న సంకల్పం
 టెన్నిస్‌లో షరపోవా తనకంటూ ప్రత్యేక స్థానం ఏర్పరచుకోవడంలో తండ్రి యూరీ పాత్ర ఎనలేనిది. 1987లో ఏప్రిల్ 19న రష్యాలోని న్యాగన్ పట్టణంలో యూరీ, యెలానా దంపతులకు షరపోవా జన్మించింది. అంతకుముందు ఏడాది చెర్నోబిల్ అణు కర్మాగారంలో సంభవించిన విస్ఫోటం వల్ల ఆ ప్రభావం తమ ఆరోగ్యంపై పడకూడదనే ఉద్దేశంతో షరపోవా కుటుంబం 1989లో సోచి పట్టణానికి మకాం మార్చింది. అక్కడే టెన్నిస్ కోచ్ అలెగ్జాండర్ కఫెల్నికోవ్‌తో యూరీకి పరిచయం ఏర్పడింది. 1991లో షరపోవాకు అలెగ్జాండర్ కఫెల్నికోవ్ ఒక రాకెట్ ఇచ్చారు.
 
 ఈ రాకెట్‌తో షరపోవా తన తండ్రితో కలిసి స్థానిక పార్క్‌లో టెన్నిస్ ప్రాక్టీస్ మొదలుపెట్టింది. ఆ తర్వాత తన కూతురిని మేటి టెన్నిస్ ప్లేయర్‌గా తీర్చిదిద్దాలనే సంకల్పంతో తండ్రి యూరీ వెటరన్ కోచ్ యూరీ యుట్‌కిన్ వద్ద శిక్షణ ఇప్పించారు. 1993లో మాస్కోలో దిగ్గజం మార్టినా నవ్రతిలోవా నిర్వహించిన టెన్నిస్ క్లినిక్‌కు షరపోవా హాజరైంది. అక్కడే ఆరేళ్ల షరపోవా ఆటతీరును గమనించిన నవ్రతిలోవా అమెరికాలోని ఫ్లోరిడాలో ఉన్న విఖ్యాత నిక్ బొలెటరీ టెన్నిస్ అకాడమీలో చేర్పించాలని తండ్రి యూరీకి సూచించింది.
  
 తల్లికి దూరంగా...
 ఆర్థికంగా ఇబ్బందులు ఉన్నప్పటికీ, ఇంగ్లిష్ భాష తెలియనప్పటికీ... తన కూతురు భవిష్యత్ బాగుండాలనే లక్ష్యంతో యూరీ అప్పు చేశాడు. 1994లో చేతిలో 700 డాలర్లు పెట్టుకొని యూరీ, షరపోవా అమెరికాలోని ఫ్లోరిడా నగరంలో అడుగుపెట్టారు. వీసా సమస్యల కారణంగా షరపోవా వెంట ఆమె తల్లి రాలేకపోయింది. రెండేళ్లు తల్లికి దూరంగానే షరపోవా ఉండాల్సి వచ్చింది. మరోవైపు తాము తెచ్చుకున్న డబ్బులు అయిపోవడంతో యూరీ చిన్నా చితకా పనులు చేసి సంపాదించారు. చివరికి హోటళ్లలో ప్లేట్‌లు కూడా కడిగారు.
 
 కొంతకాలం స్థానిక రిక్ మాకీ అకాడమీలో శిక్షణ పొందిన షరపోవా కెరీర్ 1995లో మలుపు తిరిగింది. ఆమె ప్రతిభను గమనించిన ఐఎంజీ సంస్థ షరపోవాతో 1995లో ఒప్పందం చేసుకుంది. నిక్ బొలెటరీ అకాడమీలో ఉండి శిక్షణ పొందేందుకు ఏడాదికి అవసరమయ్యే 35 వేల డాలర్ల ఫీజును చెల్లించడానికి ఐఎంజీ సంస్థ అంగీకరించింది. దాంతో తొమ్మిదేళ్ల ప్రాయంలో షరపోవా నిక్ బొలెటరీ అకాడమీలో చేరింది. అక్కడి నుంచి షరపోవాకు ఎదురులేకుండా పోయింది.
 
 2000లో 13 ఏళ్ల ప్రాయంలో ఎడ్డీ హెర్ అంతర్జాతీయ టోర్నీలో షరపోవా అండర్-16 విభాగంలో టైటిల్ సాధించి ఒక్కసారిగా వార్తల్లో నిలిచింది. ఆ తర్వాత తన ఆటకు మరింత పదును పెట్టుకొని 14 ఏళ్ల ప్రాయంలో ప్రొఫెషనల్‌గా మారింది. 2003 చివరికొచ్చేసరికి టాప్-50లోకి వచ్చింది.
  
 టెన్నిస్‌లో రష్యా విప్లవం
 ఒక్కో మెట్టు ఎక్కిన షరపోవా 2004లో మొత్తం ప్రపంచ దృష్టిని ఆకర్షించింది. ఆ ఏడాది వింబుల్డన్ ఫైనల్లో షరపోవా వరుస సెట్‌లలో అమెరికా స్టార్ సెరెనా విలియమ్స్‌ను ఓడించి చాంపియన్‌గా అవతరించింది. రాత్రికి రాత్రే సెలబ్రిటీగా మారిపోయింది. వింబుల్డన్ టైటిల్ గెలిచినందుకు వచ్చిన ప్రైజ్‌మనీతో షరపోవా తన తండ్రి పేరిట ఉన్న అప్పులను తీర్చేసింది. 2005 ఆగస్టులో ప్రపంచ నంబర్‌వన్‌గా ఎదిగిన షరపోవా ఈ ఘనత సాధించిన తొలి రష్యా ప్లేయర్‌గా గుర్తింపు పొందింది. ఆ తర్వాత 2006లో ఆమె యూఎస్ ఓపెన్ గ్రాండ్‌స్లామ్ టైటిల్‌ను సొంతం చేసుకుంది.
 
 షరపోవా విజయాల స్ఫూర్తితో రష్యాలో టెన్నిస్‌కు విపరీతమైన ఆదరణ పెరిగింది. మరీ ముఖ్యంగా అమ్మాయిలు టెన్నిస్ క్రీడను కెరీర్‌గా ఎంచుకోవడం మొదలుపెట్టారు. 2007లో భుజం గాయంతో షరపోవా కొంతకాలంపాటు ఆటకు దూరమైంది. 2008లో ఆస్ట్రేలియన్ ఓపెన్ టైటిల్ సాధించి ఫామ్‌లోకి వచ్చిన ఈ రష్యా స్టార్‌కు భుజం గాయం తిరగబెట్టింది. దాంతో పది నెలలపాటు ఆటకు దూరమైంది. 2012లో ఫ్రెంచ్ ఓపెన్ సాధించి ‘కెరీర్ గ్రాండ్‌స్లామ్’ ఘనతను పూర్తి చేసుకున్న షరపోవా లండన్ ఒలింపిక్స్‌లో రజతం సాధించింది.
 
 2013లో అంతగా ఆకట్టుకోలేకపోయినా... 2014లో రెండోసారి ఫ్రెంచ్ ఓపెన్ టైటిల్ సాధించి తనలో చేవ తగ్గలేదని నిరూపించుకుంది. 2015లో ఆస్ట్రేలియన్ ఓపెన్‌లో ఫైనల్‌కు చేరుకున్నా... సెరెనా ధాటికి రన్నరప్‌గా నిలిచింది. ఫ్రెంచ్ ఓపెన్‌లో ప్రిక్వార్టర్ ఫైనల్‌కు, వింబుల్డన్‌లో సెమీస్‌కు చేరిన షరపోవా గాయంతో యూఎస్ ఓపెన్‌కు దూరమైంది.
 
 ఈ ఏడాది ఆస్ట్రేలియన్ ఓపెన్‌లో క్వార్టర్ ఫైనల్ చేరుకున్న షరపోవా ఈ టోర్నీ సందర్భంగా డోప్ టెస్టులో పట్టుబడింది. ఏం జరిగినా... ఇకపై మహిళల టెన్నిస్‌కు కొంత కళ తగ్గుతుందనేది వాస్తవం. షరపోవా కోసమే టెన్నిస్ చూసే అభిమానులు లక్షల్లో ఉంటారు. వాళ్లందరికీ నిరాశ తప్పదు. అయితే నాలుగేళ్ల తర్వాతైనా తిరిగి మళ్లీ వచ్చి కొంతకాల ఆడి సగర్వంగా వైదొలగాలనే షరపోవా ఆశ తీరాలనేది ఆమె అభిమానుల ఆకాంక్ష.


 ఓ చిన్న తప్పు... టెన్నిస్ క్రీడకు మచ్చ తెచ్చింది.  ఓ చిన్న నిర్లక్ష్యం... గొప్ప క్రీడాకారిణి కెరీర్‌కు కళంకం తెచ్చింది. తెలిసి చేసిందో... తెలియక చేసిందోగానీ.. చేసిన చిన్న తప్పిదానికి రష్యా టెన్నిస్ స్టార్ మరియా షరపోవా భారీ మూల్యం చెల్లించింది. ఎండకు ఎండి... చెమటకు తడిచి నిర్మించుకున్న 15 ఏళ్ల ఉజ్వల కెరీర్‌కు ఊహించని రీతిలో బ్రేక్ పడింది! ఈ ఏడాది ఆస్ట్రేలియన్ ఓపెన్ సందర్భంగా నిర్వహించిన డోప్ టెస్టులో షరపోవా విఫలమైంది. నిషేధిత ఉత్ప్రేరకం వాడుతున్నట్లు నిర్ధారణ అయింది. షరపోవా డోప్ టెస్టులో విఫలమైన వార్తతో టెన్నిస్ ప్రపంచం ఉలిక్కి పడింది.
  
 * డోపింగ్ టెస్టులో విఫలమైన షరపోవా
 * మెల్డోనియం వాడినట్లు నిర్ధారణ
 * నాలుగేళ్లు  నిషేధం పడే అవకాశం
 
 లాస్ ఏంజిల్స్ (అమెరికా): రష్యా టెన్నిస్ స్టార్, ఐదు గ్రాండ్‌స్లామ్‌ల విజేత మరియా షరపోవా డోపింగ్ టెస్టులో పట్టుబడింది. ఆస్ట్రేలియన్ ఓపెన్ సందర్భంగా ఆమె నిషేధిత ఉత్ప్రేరకం ‘మెల్డోనియం’ను వాడినట్లు నిర్ధారణ అయ్యింది. దీంతో షరపోవాపై తాత్కాలిక నిషేధం విధిస్తున్నట్లు అంతర్జాతీయ టెన్నిస్ సమాఖ్య (ఐటీఎఫ్) ప్రకటించింది. ఇది ఈనెల 12 నుంచి అమల్లోకి రానుంది. జనవరి 26న నిర్వహించిన డోప్ పరీక్షలో షరపోవా మెల్డోనియం వాడినట్లు తేలడంతో మార్చి 2న ఈ విషయాన్ని ఆమెకు తెలియజేశారు.
 
 సోమవారం అర్ధరాత్రి ఏర్పాటు చేసిన మీడియా సమావేశంలో రష్యా క్రీడాకారిణి ఈ విషయాన్ని ధ్రువీకరించింది. కేసు విచారణలో ఉండటంతో నిషేధం, జరిమానా ఎంత విధిస్తారన్న దానిపై స్పష్టత లేదు. అయితే ప్రపంచ డోపింగ్ నిరోధక సంస్థ (వాడా) నిబంధనల ప్రకారం అథ్లెట్లు ఉద్దేశపూర్వకంగా ఈ మందును తీసుకున్నారని తేలితే గరిష్టంగా నాలుగేళ్ల నిషేధం, తెలియక జరిగిన తప్పుగా భావిస్తే రెండేళ్ల నిషేధం, స్వల్ప జరిమానా విధించే అవకాశాలున్నాయి.
  
 అసలు కథ ఇది!
 వాస్తవానికి షరపోవా 2006 నుంచే మెల్డోనియంను వాడుతోంది. కానీ ఈ ఏడాది జనవరి 1 నుంచి ఈ డ్రగ్‌ను ప్రపంచ డోపింగ్ నిరోధక సంస్థ (వాడా) నిషేధిత జాబితాలో చేర్చింది. ఈ విషయాన్ని అథ్లెట్లందరికీ ఈ-మెయిల్ ద్వారా తెలియజేసింది. ఈ మెయిల్‌ను చదివిన షరపోవా కాస్త నిర్లక్ష్యపు ధోరణితో నిషేధిత డ్రగ్స్ జాబితాకు సంబంధించిన లింక్‌ను మాత్రం తెరచి చూడలేదు. దీంతో యధావిధిగా మెల్డోనియం ఉపయోగించడంతో డోపింగ్‌లో పట్టుబడింది.
  
 రక్త ప్రసరణ పెంచుతుంది
 తాను తరచుగా ఫ్లూ బారిన పడుతుండటం, కుటుంబంలో చాలా మందికి షుగర్ వ్యాధి ఉండటం, శరీరంలో మెగ్నీషియం స్థాయి తక్కువగా ఉండటం, గుండె సంబంధిత సమస్యల వంటి అనేక అంశాలతో గత పదేళ్ల నుంచి మెల్డ్రోనేట్ (మెల్డోనియం)ను వాడుతున్నట్లు షరపోవా తెలిపింది. అయితే మెల్డ్రోనేట్, మెల్డోనియం ఒకే రకమైన డ్రగ్ అనే విషయం తనకు తెలియదని చెప్పింది. మరోవైపు ఐషిమియా (శరీరంలో రక్త ప్రసరణ తక్కువగా ఉండటం) వ్యాధిగ్రస్తుల్లో రక్త ప్రసరణ పెంచడానికి మెల్డోనియంను ఉపయోగిస్తారు.
 
 దీనివల్ల ఆక్సిజన్‌ను తీసుకెళ్లే సామర్థ్యం పెరుగుతుంది. మెల్డోనియం తీసుకోవడం వల్ల అథ్లెట్లలో ఎక్స్‌ర్‌సైజ్ చేసే సామర్థ్యం గణనీయంగా పెరగడంతో పాటు మైదానంలో మెరుగైన ప్రదర్శనకు కారణం అవుతుందని వివిధ పరీక్షల ద్వారా నిర్ధారణ చేసుకున్న ‘వాడా’ ఎస్-4 నిషేధిత జాబితాలో చేర్చింది. లాత్వియా దేశంలో తయారయ్యే ఈ మందును రష్యా, బాల్టిక్ దేశాల్లో మాత్రమే అమ్ముతారు. అమెరికా ఎఫ్‌డీఏతో పాటు యూరోప్‌లోని కొన్ని ప్రాంతాల్లో దీనికి ఆమోదం లేదు.
  
 మరికొంత మంది కూడా...
 ఈ ఏడాది ఆరంభం నుంచి ఈ మందును వాడిన మరికొంత మంది అథ్లెట్లు కూడా డోప్ పరీక్షలో విఫలమయ్యారు. అబెబీ అర్గెవీ (మహిళల 1500 మీటర్లు), ఎండేషా నెగేస్సి (మారథాన్), ఓల్గా అబ్రామోవా, అర్టెమ్ టైచెంకో (ఉక్రెయిన్ బైఅథ్లెట్స్), ఎడ్వర్డ్ ఓర్గనోవ్ (రష్యా సైక్లిస్ట్), ఎకతెరినా (రష్యా ఐస్ డాన్సర్)లు డోపీలుగా తేలడంతో తాత్కాలిక నిషేధం విధించారు.
  
 నైకీ బై బై
 డోపింగ్ ఉదంతం బయటకు రావడంతో వాణిజ్య ప్రకటనల ద్వారా కోట్లాది రూపాయలు కుమ్మరించే స్పా న్సర్లు ఒక్కొక్కరుగా తమ ఒప్పందాలను రద్దు చేసుకుంటున్నారు. ప్రముఖ క్రీడావస్త్రాల సంస్థ ‘నై కీ’... షరపోవాతో ఉన్న ఒప్పందాన్ని రద్దు చేసుకుం ది. స్విస్ వాచ్ కంపెనీ ‘టాగ్ హ్యుయేర్’ ఒప్పందాన్ని పునరుద్ధరించుకోవడానికి నిరాకరించింది. ‘నేను డోప్ పరీక్షలో విఫలమయ్యా. ఇందుకు పూర్తి బాధ్యత నాదే. చాలా పెద్ద తప్పు చేశా. నా అభిమానులకు, టెన్నిస్‌కు తలవంపులు తీసుకొచ్చా. నాలుగేళ్ల వయసులో రాకెట్ పట్టా. అప్పట్నించీ ఆటలోనే మునిగితేలా. ప్రస్తుత పరిణామాలు ఎక్కడికి దారి తీస్తాయో తెలుసు. నా కెరీర్‌ను ఇలా ముగించాలని అనుకోవడంలేదు. టెన్నిస్ ఆడేందుకు నాకు ఇంకో అవకాశం ఉంటుందని ఆశిస్తున్నా.’    - షరపోవా
  
 ప్రొఫైల్
 పూర్తి పేరు: మరియా షరపోవా
 పుట్టిన తేదీ: ఏప్రిల్ 19, 1987
 పుట్టిన స్థలం: న్యాగన్, రష్యా
 నివాసం: ఫ్లోరిడా, అమెరికా
 ఎత్తు: 6 అడుగుల 2 అంగుళాలు
 బరువు: 59 కేజీలు
 ప్రొఫెషనల్‌గా మారింది: 2001లో
 అత్యుత్తమ ర్యాంక్: 1 (2005, ఆగస్టు)
 ప్రస్తుత ర్యాంక్: 7
 కెరీర్ సింగిల్స్ టైటిల్స్: 35
 కెరీర్ డబుల్స్ టైటిల్స్: 3
 గ్రాండ్‌స్లామ్ టైటిల్స్: వింబుల్డన్ (2004), ఆస్ట్రేలియన్ ఓపెన్ (2008), ఫ్రెంచ్ ఓపెన్ (2012, 2014), యూఎస్ ఓపెన్ (2006)
 గెలుపోటములు: 601-145
 సంపాదించిన ప్రైజ్‌మనీ: 3,67,66,149 డాలర్లు (రూ. 247 కోట్లు)


 లాస్‌ ఏంజిల్స్‌: డోపింగ్ టెస్టులో దొరికిపోయిన రష్యా టెన్నిస్‌ స్టార్‌ మరియా షరపోవాకు ఒక్కసారిగా కష్టాలు చుట్టుముట్టాయి. గత పదేళ్లుగా నిషేధిత ఉత్ప్రేరకం (మెల్డోనియం) వాడుతున్నట్టు షరపోవా స్వయంగా వెల్లడించడంతో.. ఆమెతో వేలకోట్ల రూపాయల వాణిజ్య ప్రకటనల ఒప్పందాలు చేసుకున్న కంపెనీలు ఇప్పుడు రాంరాం చెప్తున్నాయి. తాజాగా ప్రఖ్యాత స్పోర్ట్స్ కంపెనీ నైకీ షరపోవాతో కాంట్రాక్టు రద్దు చేసుకుంటున్నట్టు ప్రకటించింది. అదేవిధంగా ఆమెతో తమ కాంట్రాక్టును పునరుద్ధరించుకోబోమని ప్రఖ్యాత గడియారాల కంపెనీ ట్యాగ్‌ హోయర్‌ తెలిపింది.   
 
 ఐదు సార్లు గ్రాండ్స్లామ్ చాంపియన్ అయిన మరియా షరపోవా నిషేధిత ఉత్ప్రేరకం (మెల్డోనియం) వాడినట్టు ఆస్ట్రేలియా ఓపెన్ సందర్భంగా నిర్వహించిన డ్రగ్ పరీక్షల్లో తేలింది. ఈ విషయాన్ని షరపోవా స్వయంగా వెల్లడించడంతో ఆమె కెరీర్ ప్రశ్నార్థకంగా మారింది.  2006 నుంచి డ్రగ్ తీసుకుంటున్నానని, అయితే దీన్ని ఈ ఏడాదే నిషేధిత జాబితాలో చేర్చారని షరపోవా చెప్పింది. 28 ఏళ్ల షరపోవాపై ఈ నెల 12 నుంచి  తాత్కాలిక నిషేధం అమల్లోకి రానుంది. ఆమెపై నాలుగేళ్ల వరకు నిషేధం విధించే అవకాశముంది.
 
 ఆరు అడుగులకుపైగా ఎత్తుతో ఉండే ఈ అందాల సుందరి తిరుగులేని ఆటతో కొన్నేళ్లపాటు టెన్నిస్‌ను ఏలింది. అత్యద్భుతమైన ఆటతీరుతో ప్రపంచవ్యాప్తంగా అభిమానులను సంపాదించుకుంది. అందంతోపాటు ఆట కూడా ఉండటంతో ఎన్నో ప్రఖ్యాత కంపెనీలు ఆమెను బ్రాండ్ అంబాసిడర్‌ గా పెట్టుకున్నాయి. ఈ నేపథ్యంలో షరపోవాతో కుదుర్చుకున్న 70 మిలియన్ డాలర్ల  (రూ. 472 కోట్ల) కాంట్రాక్టును రద్దు చేసుకుంటున్నట్టు నైకీ ప్రకటించింది. అదేదారిలో ఇతర కంపెనీలు సాగుతున్నాయి. ఇప్పటికిప్పుడు షరపోవా మళ్లీ టెన్నిస్‌ మైదానంలో అడుగుపెట్టడం కష్టమేనని నిపుణులు భావిస్తున్నప్పటికీ, రష్యా తరఫున ఆమె బ్రెజిల్ ఒలింపిక్స్ లో పాల్గొనే అవకాశముందని ఆ దేశ టెన్నిస్ ఫెడరేషన్ అధ్యక్షుడు ఆశాభావం వ్యక్తం చేశారు.


 మరియా షరపోవా.. ప్రపంచ మాజీ నెంబర్ వన్ టెన్నిస్ క్రీడాకారిణి. ప్రపంచంలో అత్యధిక సంపాదన గల మహిళా అథ్లెట్. అందానికి మారుపేరు. ఆటతీరు, అందంతో ప్రపంచ వ్యాప్తంగా అభిమానులను సంపాదించుకున్న రష్యా టెన్నిస్ స్టార్.. డ్రగ్ పరీక్షల్లో ఫెయిల్ కావడంతో కెరీర్ ప్రశ్నార్థకంగా మారింది. ఈ వార్త షరపోవాతో పాటు అభిమానులకు, క్రీడాకారులకు, క్రీడా సంఘాలకు షాక్ కలిగించింది.
 
 డోపింగ్ పరీక్షల్లో షరపోవా పాజిటీవ్గా తేలడం టెన్నిస్ ప్రపంచంలో కలకలం సృష్టించింది. మెల్డోనియం డ్రగ్ను 2006 నుంచి తీసుకుంటున్నట్టు షరపోవా చెప్పింది. అయితే ఈ డ్రగ్ను ఈ ఏడాదే నిషేధించారు. మెల్డోనియంను నిషేధించిన విషయం.. దీన్ని వాడాలని సూచించిన వైద్యుడికి తెలియదా అన్న ప్రశ్నకు సమాధానం చెప్పేందుకు షరపోవా నిరాకరించింది. పూర్తి బాధ్యత తనదేని చెప్పింది. షరపోవా ఇటీవల గాయాలతో బాధపడుతోంది.  దీని ప్రభావం ఆమె కెరీర్పైనా పడింది.
 
 2001లో డబ్ల్యూటీఏ టూర్లో పాల్గొన్న షరపోవా తక్కువ కాలంలోనే ప్రపంచ అగ్రశ్రేణి క్రీడాకారిణిగా ఎదిగింది. 2004లో వింబుల్డన్ సింగిల్స్ టైటిల్ సాధించిన ఈ రష్యా బ్యూటీ ఆ మరుసటి ఏడాదే 2005లో 18 ఏళ్ల వయసులో ప్రపంచ నెంబర్ వన్ ర్యాంక్ను సొంతం చేసుకుంది. 2006లో యూఎస్ ఓపెన్, 2008లో ఆస్ట్రేలియా ఓపెన్, 2012, 2014ల్లో ఫ్రెంచ్ ఓపెన్ గ్రాండ్స్లామ్ సింగిల్స్ టైటిళ్లను గెలిచింది. గత లండన్ ఒలింపిక్స్లో రజత పతకం నెగ్గింది. షరపోవా తన కెరీర్లో 4 ఐటీఎఫ్, 35 డబ్ల్యూటీఏ టైటిల్స్ కైవసం చేసుకుంది. ప్రస్తుతం ఏడో ర్యాంక్లో ఉంది. ఇక ధనార్జనలో షరపోవాదే అగ్రస్థానం. ఫ్రైజ్మనీతో పాటు ఎండార్స్మెంట్ల ద్వారా ప్రపంచంలో అత్యధిక మొత్తం సంపాదిస్తున్న క్రీడాకారిణి షరపోవానే. 2005 నుంచి వరుసగా 11 సంవత్సరాలు అగ్రస్థానంలో ఉండటం విశేషం. గతేడాది ఆమె సంపాదన దాదాపు 200 కోట్ల రూపాయలు. డోపీగా తేలడంతో షరపోవా కెరీర్ ప్రమాదంలో పడింది. అంతేగాక, ఎండార్స్మెంట్లను సంబంధింత కంపెనీలు రద్దు చేసుకునే అవకాశముంది.  షరపోవా డోపీగా తేలిన విషయం తెలిసిన వెంటనే నైక్ రద్దు చేసుకుంది.


 లాస్ ఏంజిలెస్: రష్యా టెన్నిస్ స్టార్, ఐదు సార్లు గ్రాండ్స్లామ్ చాంపియన్ మరియా షరపోవా పెను వివాదంలో చిక్కుకుంది. షరపోవా నిషేధిత ఉత్ప్రేరకం (మెల్డోనియం) వాడినట్టు పరీక్షల్లో తేలడంతో ఆమె కెరీర్ ప్రశ్నార్థకంగా మారింది. ఆస్ట్రేలియా ఓపెన్ సందర్భంగా నిర్వహించిన డ్రగ్ పరీక్షల్లో పాజిటీవ్గా తేలినట్టు ఆమె స్వయంగా వెల్లడించింది. 2006 నుంచి డ్రగ్ తీసుకుంటున్నానని, అయితే దీన్ని ఈ ఏడాదే నిషేధిత జాబితాలో చేర్చారని చెప్పింది. 28 ఏళ్ల షరపోవాపై ఈ నెల 12 నుంచి  తాత్కాలిక నిషేధం అమల్లోకి రానుంది. ఆమెపై నాలుగేళ్ల వరకు నిషేధం విధించే అవకాశముంది.
 
 'డోపింగ్ పరీక్షల్లో ఫెయిల్ అయ్యా. దీనికి పూర్తిగా నాదే బాధ్యత. నేను చాలా పెద్ద తప్పు చేశా. అభిమానుల మనసును గాయపరిచా. నాలుగేళ్ల వయసు నుంచి టెన్నిస్ ఆడుతున్నా. టెన్నిస్ను ఎంతో ప్రేమించా. డోపీగా తేలడం వల్ల ఎదురయ్యే పరిణామాల గురించి తెలుసు. ఈ విధంగా నా కెరీర్ను ముగించాలని కోరుకోవడం లేదు. టెన్నిస్ ఆడేందుకు మరో అవకాశం ఇస్తారని ఆశిస్తున్నా' అని ప్రపంచ మాజీ నెంబర్ వన్ షరపోవా లాస్ ఏంజిలెస్లో జరిగిన మీడియా సమావేశంలో చెప్పారు.
 
 జనవరి 26న నిర్వహించిన డ్రగ్ పరీక్షల్లో షరపోవా ఫెయిల్ అయినట్టు అంతర్జాతీయ టెన్నిస్ సమాఖ్య  ధ్రువీకరించింది. ఈ నెల 2న ఈ విషయాన్ని ఆమెకు తెలియజేసినట్టు వెల్లడించింది. షరపోవాపై నాలుగేళ్ల వరకు నిషేధం విధించే అవకాశముందని, అయితే శిక్షను తగ్గించే అవకాశం కూడా ఉందని ఆమె తరపు న్యాయవాది జాన్ హగెర్టీ చెప్పారు. రష్యా టెన్నిస్ సమాఖ్య అధ్యక్షుడు షమిల్ టర్పిషెవ్ ఈ విషయంపై స్పందిస్తూ షరపోవా రియో ఒలింపిక్స్లో ఆడే అవకాశముందని అభిప్రాయపడ్డారు. డోపింగ్ పరీక్షల్లో షరపోవా పాజిటీవ్గా తేలడం పట్ల టెన్నిస్ సంఘాలు, క్రీడాకారులు విస్మయం చెందారు.


 కాలిఫోర్నియా(అమెరికా):త్వరలో కాలిఫోర్నియాలో ఆరంభం కానున్న ఇండియన్ వెల్స్ డబ్యూటీఏ టోర్నీ నుంచి మాజీ ప్రపంచ నంబర్ వన్, రష్యన్ క్రీడాకారిణి మారియా షరపోవా ముందుగానే వైదొలిగింది. గత కొంతకాలంగా తనను వేధిస్తున్న ఎడమ చేతి గాయం ఇంకా తగ్గకపోవడంతో ఇండియన్ వెల్స్ కు దూరంగా కావాలని షరపోవా నిర్ణయించుకుంది.
 
 ఈ ఏడాది ఆరంభంలో జరిగిన ఆస్ట్రేలియా ఓపెన్లో పాల్గొన్న షరపోవా క్వార్టర్ ఫైనల్లో సెరెనా విలియమ్స్ చేతిలో ఓటమి పాలైంది. ఆ తరువాత  ఏ టోర్నీల్లో పాల్గొనని షరపోవా.. ఈనెల 9 వ తేదీ నుంచి జరిగే ప్రతిష్టాత్మక ఇండియన్ వెల్స్ నుంచి కూడా వైదొలిగింది. 'ప్రస్తుతం నా గాయంపై దృష్టి పెట్టా. 100 శాతం ఫిట్గా ఉంటే ఈ టోర్నీలో పాల్గొనాలని భావించా. డబ్యూటీఏ ఈవెంట్లలో ఇదొక నా ఫేవరెట్ ఈవెంట్. కానీ గాయం ఇంకా బాధించడంతో భారంగా టోర్నీకి దూరంగా కావాల్సి వస్తుంది 'అని షరపోవా పేర్కొంది. ఈ మేరకు టోర్నీ నిర్వహకులకు గురువారం ఓ నివేదికను అందజేసింది.


 మాస్కో: త్వరలో ప్రారంభం కానున్న ఖతార్ ఓపెన్ కు రష్యన్ స్టార్ టెన్నిస్ స్టార్ క్రీడాకారిణి మరియా షరపోవా దూరం కానుంది. గత కొంతకాలంగా గాయంతో బాధపడుతున్న షరపోవా.. ఖతార్ ఓపెన్లో పాల్గొనడం లేదని ఆ టోర్నీ యాజమాన్యం స్పష్టం చేసింది. ఇటీవల ఆస్ట్రేలియా ఓపెన్ సందర్భంగా  సెరెనా విలియమ్స్ తో జరిగిన క్వార్టర్ ఫైనల్ అనంతరం  గాయం కారణంగా మరియా ఏ పోటీల్లోనూ పాల్గొనలేదు. గత వారం జరిగిన ఫెడ్ కప్ లో షరపోవాకు రష్యన్ స్క్వాడ్ లో చోటు కల్పించినా ఆమె వైదొలిగింది.
 
 'నేను ఖతార్ ఓపెన్ లో పాల్గొనడానికి సిద్ధంగా లేను. నా ఎడమ మోచేతి గాయంతో బాధపడుతున్నా. దాంతో టోర్నీకి దూరంగా కావాల్సి వస్తుంది' అని ఖతార్ ఓపెన్ నిర్వహకులు అందజేసిన నివేదికలో షరపోవా పేర్కొంది. టెన్నిస్ కు ఎక్కువ మంది అభిమానులున్న దోహాలో తాను ఆడకపోవడం నిరాశగురౌతున్నట్లు తెలిపింది. ఈ టోర్నీలో వచ్చే ఏడాది ఆడతానని ఆశిస్తున్నట్లు షరపోవా పేర్కొంది.


 మెల్బోర్న్: ఆస్ట్రేలియా ఓపెన్ మహిళల సింగిల్స్లో అమెరికా నల్లకలువ సెరెనా విలియమ్స్ సెమీస్కు దూసుకెళ్లింది. మంగళవారం జరిగిన క్వార్టర్స్లో సెరెనా 6-4, 6-1 స్కోరుతో రష్యా భామ మరియా షరపోవాపై విజయం సాధించింది.
 
 తొలి సెట్లో కాస్త పోటీ ఇచ్చిన షరపోవా.. రెండో సెట్లో చేతులెత్తేసింది. సెరెనా వరుస సెట్లలో మ్యాచ్ను ముగించింది. మరో మ్యాచ్లో రద్వన్స్కా (పోలాండ్) 6-1, 6-3తో కార్లా నవర్రో (స్పెయిన్)ను ఓడించి సెమీస్లో ప్రవేశించింది.


 మెల్బోర్న్: ఆస్ట్రేలియా ఓపెన్ మహిళల సింగిల్స్లో ఆసక్తికర పోరుకు తెరలేవనుంది. క్వార్టర్ ఫైనల్లో ప్రపంచ నెంబర్ వన్ సెరెనా విలియమ్స్, ఐదో ర్యాంకర్ మరియా షరపోవా తలపడనున్నారు. నాలుగో రౌండ్లో అమెరికా నల్లకలువ సెరెనా 6-2, 6-1 స్కోరుతో మార్గరిటా గస్పర్యన్ (రష్యా)పై అలవోకగా విజయం సాధించింది. మరో మ్యాచ్లో రష్యా భామ షరపోవా 7-5, 7-5తో బిలిండా బెనిక్ (స్విట్జర్లాండ్)ను ఓడించింది.
 
 మిక్స్డ్ డబుల్స్లో భారత వెటరన్ లియాండర్ పేస్ జోడీ శుభారంభం చేసింది. మార్టినా హింగిస్ (స్విట్జర్లాండ్)తో జతకట్టిన పేస్ తొలి రౌండ్లో 6-3, 7-5తో అనస్టాసియా (రష్యా), డొమినిక్ ఇంగ్లోట్ (బ్రిటన్)పై గెలుపొందారు.


 న్యూయార్క్: రష్యా టెన్నిస్ స్టార్ మారియా షరపోవా యూఎస్ ఓపెన్ టోర్నమెంట్ నుంచి తప్పుకుంది. కుడి కాలికి గాయం కారణంగా ఆమె ఈ ప్రతిష్టాత్మక టోర్నికి దూరమైంది. షరపోవా స్థానంలో డారియా కసత్కినా బరిలోకి దిగుతుందని యూఎస్ ఓపెన్ టోర్నమెంట్ డైరెక్టర్ డేవిడ్ బ్రెవెర్ తెలిపారు.
 
 'దురదృష్టవశాత్తు ఈ ఏడాది యూఎస్ ఓపెన్ లో ఆడలేకపోతున్నా. ఈ ప్రతిష్టాత్మక టోర్నిలో ఆడాలని చాలా ప్రయత్నించా. కొన్ని వారాల్లోనే కోలుకుని పూర్తి ఫిటెనెస్ తో బరిలోకి దిగుతానని అభిమానులందరికీ చెబున్నా' అని షరపోవా ట్వీట్ చేసింది. షరపోవా వైదొలగడంతో 'క్యాలెండర్ గ్రాండ్ స్లామ్' పూర్తి చేయాలన్న లక్ష్యంతో బరిలోకి దిగుతున్న అమెరికా స్టార్ సెరెనా విలియమ్స్ కు ఒక అడ్డంకి తొలగినట్టైంది.


 మూడో రౌండ్‌లోకి రష్యా స్టార్
  జొకోవిచ్, రావ్‌నిక్ ముందంజ
  వింబుల్డన్ టోర్నమెంట్
  
  
  పేస్ జంట శుభారంభం
  పురుషుల డబుల్స్ విభాగంలో భారత క్రీడాకారులకు మిశ్రమ ఫలితాలు ఎదురయ్యాయి. తొలి రౌండ్‌లో లియాండర్ పేస్ (భారత్)-డానియల్ నెస్టర్ (కెనడా) ద్వయం 6-3, 6-4, 7-5తో విక్టర్ ట్రయెస్కీ-దుసాన్ లాజోవిచ్ (సెర్బియా) జంటను ఓడిం చింది. అయితే పురవ్ రాజా (భారత్)-ఫాబ్రిస్ మార్టిన్ (ఫ్రాన్స్) జోడీ మాత్రం 1-6, 4-6, 6-4, 6-7 (7/9)తో జొనాథన్ ముర్రే (బ్రిటన్)-ఫ్రెడరిక్ నీల్సన్ (డెన్మార్క్) జంట చేతిలో పోరాడి ఓడిపోయింది.
  
  
  లండన్: పచ్చికపై పసందైన ఆటతీరుతో రష్యా స్టార్ మరియా షరపోవా వింబుల్డన్ గ్రాండ్‌స్లామ్ టోర్నమెంట్‌లో మూడో రౌండ్‌లోకి దూసుకెళ్లింది. రికార్డుస్థాయిలో ఉష్ణోగ్రత (35.7 డిగ్రీలు) నమోదైన వేళ ఈ మాజీ చాంపియన్ ఎలాంటి ఇబ్బంది పడకుండా అలవోక విజయంతో ముందంజ వేసింది. క్వాలిఫయర్ రాచెల్ హోగెన్‌క్యాంప్ (నెదర్లాండ్స్)తో జరిగిన రెండో రౌండ్‌లో నాలుగో సీడ్ షరపోవా 6-3, 6-1తో గెలిచింది.
  
  
   1976 తర్వాత వింబుల్డన్‌లో తొలిసారి రికార్డుస్థాయిలో ఉష్ణోగ్రత నమోదవ్వడంతో ఎండ నిబంధన అమల్లోకి వచ్చింది. ఫలితంగా మహిళల విభాగం మ్యాచ్‌ల్లో రెండో సెట్ ప్రారంభానికి ముందు పది నిమిషాలు విరామం ఇచ్చారు. రాచెల్‌తో జరిగిన మ్యాచ్‌లో షరపోవా ఏకంగా ఎనిమిది డబుల్ ఫాల్ట్‌లు చేసినా, కీలక సమయంలో ప్రత్యర్థి సర్వీస్‌ను ఐదుసార్లు బ్రేక్ చేసి విజయాన్ని ఖాయం చేసుకుంది.
  
  ప్లిస్కోవాకు షాక్
  మరోవైపు 11వ సీడ్ కరోలినా ప్లిస్కోవా (చెక్ రిపబ్లిక్) రెండో రౌండ్‌లోనే ఇంటిదారి పట్టింది. వాండెవెగె (అమెరికా)తో జరిగిన మ్యాచ్‌లో ప్లిస్కోవా 6-7 (5/7), 4-6తో ఓటమి చవిచూసింది. ఇతర మ్యాచ్‌ల్లో 22వ సీడ్ సమంతా స్టోసుర్ (ఆస్ట్రేలియా) 6-3, 6-4తో ఉర్సులా రద్వాన్‌స్కా (పోలండ్)పై, 30వ సీడ్ బెలిండా బెన్సిచ్ (స్విట్జర్లాండ్) 7-5, 4-6, 6-0తో ఫ్రీడ్‌సమ్ (అమెరికా)పై గెలుపొంది రెండో రౌండ్‌కు చేరుకున్నారు.
  
  మూడో రౌండ్‌లో దిమిత్రోవ్
  పురుషుల సింగిల్స్ విభాగంలో సీడెడ్ క్రీడాకారుల జోరు కొనసాగుతోంది. టాప్ సీడ్ జొకోవిచ్ (సెర్బియా), ఏడో సీడ్ మిలోస్ రావ్‌నిక్ (కెనడా)లతోపాటు 11వ సీడ్ దిమిత్రోవ్ (బల్గేరియా) కూడా మూడో రౌండ్‌లోకి దూసుకెళ్లారు. రెండో రౌండ్‌లో షరపోవా ప్రియుడు దిమిత్రోవ్ 7-6 (10/8), 6-2, 7-6 (7/2)తో జాన్సన్ (అమెరికా)పై, జొకోవిచ్ 6-4, 6-2, 6-3తో నిమినెన్ (ఫిన్‌లాండ్)పై, రావ్‌నిక్ 6-0, 6-2, 6-7 (5/7), 7-6 (7/4)తో టామీ హాస్ (జర్మనీ)పై గెలుపొందారు. ఇతర మ్యాచ్‌ల్లో 14వ సీడ్ అండర్సన్ (దక్షిణాఫ్రికా) 6-7 (5/7), 7-6 (8/6), 6-4, 6-4తో ఇల్హాన్ (టర్కీ)పై, 16వ సీడ్ డేవిడ్ గాఫిన్ (బెల్జియం) 7-6 (7/3), 6-1, 6-1తో బ్రాడీ (బ్రిటన్)పై, 26వ సీడ్ నిక్ కిరియోస్ (ఆస్ట్రేలియా) 7-6 (7/5), 6-3, 6-4తో యువాన్ మొనాకో (అర్జెంటీనా)పై, 27వ సీడ్ బెర్నాడ్ టామిక్ (ఆస్ట్రేలియా) 7-6 (7/3), 6-4, 7-6 (7/5)తో హెర్బెర్ట్ (ఫ్రాన్స్)పై నెగ్గారు.
  
  వైదొలిగిన నిషికోరి
  మరోవైపు ఐదో సీడ్ కీ నిషికోరి (జపాన్) గాయం కారణంగా ఈ టోర్నమెంట్ నుంచి వైదొలిగాడు. రెండో రౌండ్‌లో సాంటియాగో గిరాల్డో (కొలంబియా)తో ఆడాల్సిన నిషికోరి బరిలోకి దిగలేదు.
  


 సఫరోవా సంచలనం
 * డిఫెండింగ్ చాంపియన్‌పై గెలుపు
 * శ్రమించి నెగ్గిన సెరెనా ఫ్రెంచ్ ఓపెన్
 పారిస్: వరుసగా నాలుగో ఏడాది ఫ్రెంచ్ ఓపెన్‌లో ఫైనల్‌కు చేరాలని ఆశించిన రెండో సీడ్ మరియా షరపోవాకు చుక్కెదురైంది. సోమవారం జరిగిన మహిళల సింగిల్స్ ప్రిక్వార్టర్ ఫైనల్లో డిఫెండింగ్ చాంపియన్ షరపోవా 6-7 (3/7), 4-6తో 13వ సీడ్ లూసీ సఫరోవా (చెక్ రిపబ్లిక్) చేతిలో అనూహ్యంగా ఓడిపోయింది.
 
 గత ఐదేళ్లలో షరపోవాపై ఒక్కసారి కూడా నెగ్గలేకపోయిన సఫరోవా అన్ని ఓటములకు ఈ ఒక్క విజయంతో లెక్క సరిచేసింది. ఇటీవల కాలంలో సఫరోవాతో ఆడిన మూడు మ్యాచ్‌ల్లోనూ మూడు సెట్‌లలో నెగ్గి ఊపిరి పీల్చుకున్న షరపోవా ఈసారి మాత్రం వరుస సెట్‌లలోనే చేతులెత్తేసింది.
  
 గంటా 49 నిమిషాలపాటు జరిగిన ఈ మ్యాచ్‌లో సఫరోవా రెండు సెట్‌లలోనూ తొలుత ఆధిక్యంలో నిలిచి ఆ తర్వాత తడబడి మళ్లీ పుంజుకోవడం విశేషం. తొలి సెట్ ఆరంభంలోనే 3-1తో ఆధిక్యంలోకి వెళ్లిన సఫరోవా ఆ తర్వాత తన సర్వీస్‌ను కోల్పోయింది. ఆ తర్వాత ఇద్దరూ తమ సర్వీస్‌లను నిలబెట్టుకోవడంతో సెట్ టైబ్రేక్‌కు దారి తీసింది. కీలకమైన టైబ్రేక్‌లో సఫరోవా చెలరేగి 6-1తో ఆధిక్యంలోకి దూసుకెళ్లి అదే ఊపులో సెట్‌ను దక్కించుకుంది.
 
 రెండో సెట్ కూడా ఇంచుమించు తొలి సెట్ మాదిరిగానే సాగింది. తొలుత సఫరోవా 3-0తో ముందంజ వేసి ఆ తర్వాత వరుసగా మూడు గేమ్‌లు కోల్పోయింది. 3-3తో స్కోరు సమమైన దశలో షరపోవా, సఫరోవా తమ సర్వీస్‌లను కాపాడుకున్నారు. సఫరోవా 5-4తో ఆధిక్యంలో ఉన్నపుడు పదో గేమ్‌లో షరపోవా సర్వీస్‌ను బ్రేక్ చేసి విజయాన్ని ఖాయం చేసుకుంది.
  
 క్వార్టర్ ఫైనల్లో 21వ సీడ్ ముగురుజా (స్పెయిన్)తో సఫరోవా ఆడుతుంది. మరో ప్రిక్వార్టర్ ఫైనల్లో ముగురుజా 6-3, 6-4తో ఫ్లావియా పెనెట్టా (ఇటలీ)పై గెలిచింది. తొలి సెట్‌లో 0-2తో, రెండో సెట్‌లో 1-4తో వెనుకబడిన దశ నుంచి ముగురుజా విజయాన్ని అందుకోవడం విశేషం. గతేడాది ప్రిక్వార్టర్ ఫైనల్లో సెరెనా విలియమ్స్‌ను ఓడించి ముగురుజా ఒక్కసారిగా వెలుగులోకి వచ్చింది.
  
 లెక్క సరిచేసిన చెల్లి
 టైటిల్ ఫేవరెట్‌గా ఉన్న టాప్ సీడ్ సెరెనా విలియమ్స్ మరోసారి కష్టపడి గెలిచి క్వార్టర్ ఫైనల్లోకి ప్రవేశించింది. ప్రిక్వార్టర్ ఫైనల్లో సెరెనా 1-6, 7-5, 6-3తో స్లోన్ స్టీఫెన్స్ (అమెరికా)పై గెలిచింది. ఈ గెలుపుతో తొలి రౌండ్‌లో తన అక్క వీనస్ విలియమ్స్‌ను ఓడించి స్టీఫెన్స్‌తో సెరెనా లెక్క సరిచేసింది. రెండు గంటలపాటు జరిగిన ఈ మ్యాచ్‌లో సెరెనా తొలి సెట్‌కే కేవలం 23 నిమిషాల్లో కోల్పోయింది. రెండో సెట్‌లో కొన్ని ఉత్కంఠభరిత క్షణాలను కాచుకొని కీలకదశలో స్టీఫెన్స్ సర్వీస్‌ను బ్రేక్ చేసి మ్యాచ్‌లో నిలి చింది. మూడో సెట్‌లో రెండుసార్లు స్టీఫెన్స్ సర్వీస్‌ను బ్రేక్ చేసిన సెరెనా గట్టెక్కింది. మరో మ్యాచ్‌లో సారా ఎరాని (ఇటలీ) 6-2, 6-2తో జూలియా (జర్మనీ)పై గెలిచింది.
  
 క్వార్టర్స్‌లో ‘ఆ నలుగురు’
 పురుషుల సింగిల్స్ విభాగంలో టాప్ సీడ్ నొవాక్ జొకోవిచ్ (సెర్బియా), రెండో సీడ్ రోజర్ ఫెడరర్ (స్విట్జర్లాండ్), మూడో సీడ్ ఆండీ ముర్రే (బ్రిటన్), ఆరో సీడ్ రాఫెల్ నాదల్ (స్పెయిన్) క్వార్టర్ ఫైనల్లోకి దూసుకెళ్లారు. ప్రిక్వార్టర్ ఫైనల్స్‌లో జొకోవిచ్ 6-1, 6-2, 6-3తో రిచర్డ్ గాస్కే (ఫ్రాన్స్)పై నెగ్గగా... ఫెడరర్ 6-3, 4-6, 6-4, 6-1తో 13వ సీడ్ గేల్ మోన్‌ఫిల్స్ (ఫ్రాన్స్)పై గెలిచాడు.
 
 ఆండీ ముర్రే 6-4, 3-6, 6-3, 6-2తో జెరెమీ చార్డీ (ఫ్రాన్స్)పై, నాదల్ 6-3, 6-1, 5-7, 6-2తో జాక్ సాక్ (అమెరికా)పై, ఏడో సీడ్ డేవిడ్ ఫెరర్ (స్పెయిన్) 6-2, 6-2, 6-4తో తొమ్మిదో సీడ్ మారిన్ సిలిచ్ (క్రొయేషియా)పై విజయం సాధించారు. క్వార్టర్స్‌లో జొకోవిచ్‌తో నాదల్; వావ్రింకా (స్విట్జర్లాండ్)తో ఫెడరర్; నిషికోరి (జపాన్)తో సోంగా (ఫ్రాన్స్), ఫెరర్‌తో ముర్రే ఆడతారు.
  
 నేటి క్వార్టర్స్ సా. గం. 5.30 నుంచి నియో ప్రైమ్‌లో లైవ్


 మెల్ బోర్న్:ఆస్ట్రేలియన్ ఓపెన్ టెన్నిస్ చాంపియన్ షిప్ లో రష్యా క్రీడాకారిణి మరియా షరపోవా దూసుకుపోతోంది. మంగళవారం జరిగిన క్వార్టర్ ఫైనల్లో షరపోవా 6-3,6-2 తేడాతో ఎగునీ బౌచర్డ్ పై విజయం సాధించి సెమీస్ లో అడుగుపెట్టింది.  ప్రత్యర్థలను ఏమాత్రం తక్కువ అంచనా వేయకుండా ఈ టోర్నీలో ఆకట్టుకుంటున్న షరపోవా వరుస రెండు సెట్లను కైవశం చేసుకుని తన తిరుగులేదని మరోసారి నిరూపించింది. ఒకానొక దశలో షరపోవా సంధించిన ఏస్ లకు బౌచర్డ్ దగ్గర సమాధానమే లేకుండా పోయింది.


 అలవోక విజయంతో క్వార్టర్స్‌లోకి
  
 మెల్‌బోర్న్: ప్రత్యర్థులను తక్కువ అంచనా వేయకుండా... స్థాయికి తగ్గ ఆటతీరును ప్రదర్శిస్తున్న ప్రపంచ రెండో ర్యాంకర్ మరియా షరపోవా (రష్యా) ఆస్ట్రేలియన్ ఓపెన్‌లో దూసుకుపోతోంది. ఆదివారం జరిగిన మహిళల సింగిల్స్ ప్రిక్వార్టర్ ఫైనల్లో రెండో సీడ్ షరపోవా 6-3, 6-0తో 21వ సీడ్ పెంగ్ షుయె (చైనా)పై అలవోకగా గెలిచి క్వార్టర్ ఫైనల్లోకి అడుగుపెట్టింది. 75 నిమిషాలపాటు జరిగిన ఈ మ్యాచ్‌లో షరపోవా ప్రత్యర్థి సర్వీస్‌ను ఐదుసార్లు బ్రేక్ చేసింది. కేవలం 15 అనవసర తప్పిదాలు చేసిన ఈ రష్యా భామ నెట్ వద్దకు వచ్చిన ఐదుసార్లూ పాయింట్లు నెగ్గడం విశేషం.
 
  క్వార్టర్ ఫైనల్లో ‘కెనడా బ్యూటీ’ యూజిన్ బౌచర్డ్‌తో షరపోవా తలపడుతుంది. ఇతర ప్రిక్వార్టర్ ఫైనల్స్‌లో ఏడో సీడ్ బౌచర్డ్ 6-1, 5-7, 6-2తో ఇరీనా కమెలియా బెగూ (రుమేనియా)పై చెమటోడ్చి నెగ్గగా... మూడో సీడ్ సిమోనా హలెప్ (రుమేనియా) 6-4, 6-2తో యానినా విక్‌మాయెర్ (బెల్జియం)పై, పదో సీడ్ మకరోవా (రష్యా) 6-3, 6-2తో జూలియా (జర్మనీ)పై విజయం సాధించారు.
  
 శ్రమించిన ఆండీ ముర్రే: పురుషుల సింగిల్స్ విభాగంలో మూడుసార్లు రన్నరప్, ఆరో సీడ్ ఆండీ ముర్రే (బ్రిటన్)తోపాటు మాజీ చాంపియన్ రాఫెల్ నాదల్ (స్పెయిన్), ఏడో సీడ్ బెర్డిచ్ (చెక్ రిపబ్లిక్), ఆస్ట్రేలియా ఆశాకిరణం కియోరిస్ క్వార్టర్ ఫైనల్లోకి ప్రవేశించారు. పదో సీడ్ దిమిత్రోవ్ (బల్గేరియా)తో జరిగిన ప్రిక్వార్టర్ ఫైనల్లో నెగ్గడానికి ముర్రే తీవ్రంగానే శ్రమించాడు.
 
 3 గంటల 32 నిమిషాలపాటు జరిగిన మ్యాచ్‌లో ముర్రే 6-4, 6-7 (5/7), 6-3, 7-5తో విజయం సాధించాడు. ఇతర ప్రిక్వార్టర్ ఫైనల్స్‌లో మూడో సీడ్ నాదల్ 7-5, 6-1, 6-4తో 14వ సీడ్ అండర్సన్ (దక్షిణాఫ్రికా)పై, బెర్డిచ్ 6-2, 7-6 (7/3), 6-2తో బెర్నాడ్ టామిక్ (ఆస్ట్రేలియా)పై, కియోరిస్ 5-7, 4-6, 6-3, 7-6 (7/5), 8-6తో సెప్పి (ఇటలీ)పై గెలిచారు.
  
 పేస్ జంట శుభారంభం: మిక్స్‌డ్ డబుల్స్ తొలి రౌండ్‌లో లియాండర్ పేస్ (భారత్)-మార్టినా హింగిస్ (స్విట్జర్లాండ్) ద్వయం  6-2, 7-6 (7/2)తో థాంప్సన్-జొవనోవిచ్ (ఆస్ట్రేలియా) జోడీపై గెలిచింది. మరో మ్యాచ్‌లో రోహన్ బోపన్న (భారత్)-స్ట్రికోవా (చెక్ రిపబ్లిక్) జంట 2-6, 6-3, 4-10తో నెస్టర్ (కెనడా)-క్రిస్టినా మ్లడెనోవిచ్ (ఫ్రాన్స్) జోడీ చేతిలో ఓడిపోయింది.


 బ్రిస్బేన్: సీజన్ తొలి గ్రాండ్‌స్లామ్ టోర్నమెంట్ ఆస్ట్రేలియన్ ఓపెన్‌కు సన్నాహకంగా జరిగిన బ్రిస్బేన్ ఓపెన్‌లో రష్యా స్టార్ మరియా షరపోవా విజేతగా నిలిచింది. ఈ ఫలితంతో షరపోవా వరుసగా 13వ ఏడాది కూడా తన ఖాతాలో కనీసం ఒక్క డబ్ల్యూటీఏ టైటిల్ జమచేసుకున్నట్టయ్యింది.
 
 శనివారం హోరాహోరీగా సాగిన మహిళల సింగిల్స్ ఫైనల్లో షరపోవా 6-7 (4/7), 6-3, 6-3తో అనా ఇవనోవిచ్ (సెర్బియా)పై గెలిచింది. ఓవరాల్‌గా షరపోవా కెరీర్‌లో ఇది 34వ సింగిల్స్ టైటిల్ కావడం విశేషం. విజేతగా నిలిచిన షరపోవాకు 1,95,026 డాలర్ల ప్రైజ్‌మనీ (రూ. కోటి 21 లక్షలు)తోపాటు 470 ర్యాంకింగ్ పాయింట్లు లభిం చాయి. ప్రస్తుతం నంబర్‌వన్‌గా ఉన్న సెరెనాకు, షరపోవాకు మధ్య తేడా కేవలం 681 పాయింట్లు ఉన్నాయి.
 
  ఫెడరర్ @ 999
  బ్రిస్బేన్: స్విట్జర్లాండ్ టెన్నిస్ దిగ్గజం రోజర్ ఫెడరర్ మరో మైలురాయికి చేరువయ్యాడు. తన కెరీర్‌లో 999వ విజయాన్ని నమోదు చేసుకోవడంతోపాటు బ్రిస్బేన్ ఓపెన్‌లో ఫైనల్లోకి దూసుకెళ్లాడు. శనివారం జరిగిన సెమీఫైనల్లో ఫెడరర్ 6-2, 6-2తో దిమిత్రోవ్ (బల్గేరియా)ను ఓడించాడు. ఆదివారం జరిగే ఫైనల్లో మిలోస్ రావ్‌నిక్ (కెనడా)తో ఫెడరర్ తలపడతాడు.


 వొజ్నియాకి సంచలనం
  జంకోవిచ్ కూడా ఇంటిముఖం
  యూఎస్ ఓపెన్
  
  టెన్నిస్ సీజన్‌లోని చివరి గ్రాండ్‌స్లామ్ టోర్నమెంట్ యూఎస్ ఓపెన్ ఈసారి మహిళల సీడెడ్ క్రీడాకారిణులకు కలసిరావడంలేదు. ఇప్పటికే రెండో సీడ్ సిమోనా హలెప్, మూడో సీడ్ క్విటోవా, నాలుగో సీడ్ అగ్నెస్కా రద్వాన్‌స్కా, ఆరో సీడ్ కెర్బర్, ఎనిమిదో సీడ్ ఇవనోవిచ్ ఇంటిముఖం పట్టగా... తాజాగా ఈ జాబితాలో మరో ఇద్దరు చేరారు. మాజీ చాంపియన్, ఐదో సీడ్ మరియా షరపోవా (రష్యా), తొమ్మిదో సీడ్ జెలెనా జంకోవిచ్ (సెర్బియా) ప్రిక్వార్టర్ ఫైనల్స్‌లోనే నిష్ర్కమించారు.
  
  న్యూయార్క్: ఒక్క గ్రాండ్‌స్లామ్ టైటిల్ నెగ్గకుండానే గతంలో ప్రపంచ నంబర్‌వన్‌గా నిలిచిన కరోలైన్ వొజ్నియాకి (డెన్మార్క్)... కెరీర్‌లో కేవలం నాలుగో గ్రాండ్‌స్లామ్ ఆడుతోన్న అన్‌సీడెడ్ ప్లేయర్ బెలిండా బెన్‌సిక్ (స్విట్జర్లాండ్) యూఎస్ ఓపెన్‌లో సంచలన విజయాలు నమోదు చేశారు. మహిళల సింగిల్స్ ప్రిక్వార్టర్ ఫైనల్స్‌లో పదో సీడ్ వొజ్నియాకి 6-4, 2-6, 6-2తో షరపోవాపై... బెలిండా 7-6 (8/6), 6-3తో జంకోవిచ్‌పై నెగ్గి క్వార్టర్ ఫైనల్లోకి చేరారు.
  
   ఈ ఏడాది ఫ్రెంచ్ ఓపెన్ టైటిల్ నెగ్గిన షరపోవా మిగతా మూడు గ్రాండ్‌స్లామ్ టోర్నమెంట్‌లలో ప్రిక్వార్టర్ ఫైనల్లోనే ఓడిపోవడం గమనార్హం. వొజ్నియాకితో 2 గంటల 37 నిమిషాలపాటు జరిగిన మ్యాచ్‌లో షరపోవా స్వీయ తప్పిదాలతో మూల్యం చెల్లించుకుంది. 43 అనవసర తప్పిదాలు, ఎనిమిది డబుల్ ఫాల్ట్‌లు చేసిన ఈ రష్యా బ్యూటీ ప్రత్యర్థి సర్వీస్‌ను ఏడుసార్లు బ్రేక్ చేసే అవకాశం వచ్చినా నాలుగుసార్లే సద్వినియోగం చేసుకుంది. మరోవైపు తన సర్వీస్‌ను నాలుగుసార్లు కోల్పోయి ఫలితాన్ని అనుభవించింది.
  
   తీవ్రమైన ఎండ, ఉక్కబోత వాతావరణంలో జరిగిన ఈ మ్యాచ్‌లో రెండో సెట్ పూర్తయ్యాక ఇద్దరు క్రీడాకారిణులకు కాస్త విరామాన్ని ఇచ్చారు. విరామం తర్వాత వొజ్నియాకి తన జోరు కొనసాగించి నాలుగో గేమ్‌లో షరపోవా సర్వీస్‌ను బ్రేక్ చేసి 3-1తో ఆధిక్యంలోకి వెళ్లింది. ఆ తర్వాత ఈ ఆధిక్యాన్ని కాపాడుకుంటూ షరపోవాపై కెరీర్‌లో మూడోసారి గెలిచింది.
  
  ఎనిమిదోసారి యూఎస్ ఓపెన్ ఆడుతోన్న వొజ్నియాకి గతంలో నాలుగో రౌండ్ దాటిన మూడు పర్యాయాల్లో ఒకసారి ఫైనల్‌కు, రెండుసార్లు సెమీఫైనల్‌కు చేరుకుంది. ఈసారి ఈ డెన్మార్క్ భామ ప్రస్థానం ఎంతవరకు సాగుతుందో వేచి చూడాలి. క్వార్టర్ ఫైనల్లో 11వ సీడ్ ఎరాని (ఇటలీ)తో వొజ్నియాకి తలపడుతుంది.
  
  భళా... బెలిండా
  తన ప్రత్యర్థి జంకోవిచ్‌కు ఏకంగా 45 గ్రాండ్‌స్లామ్ టోర్నమెంట్‌లు ఆడిన అనుభవం ఉన్నా... కెరీర్‌లో కేవలం తొమ్మిదో గ్రాండ్‌స్లామ్ మ్యాచ్ ఆడుతోన్న 17 ఏళ్ల బెలిండా బెన్‌సిక్ ఎలాంటి బెదురులేకుండా ఆడింది. వరుసగా మూడో మ్యాచ్‌లో సంచలనం నమోదు చేసింది. రెండో రౌండ్‌లో 31వ సీడ్ కురుమి నారా (జపాన్)పై, మూడో రౌండ్‌లో ఆరో సీడ్ కెర్బర్ (జర్మనీ)పై నెగ్గిన బెలిండా ప్రిక్వార్టర్ ఫైనల్లో తొమ్మిదో సీడ్ జంకోవిచ్‌ను ఇంటిముఖం పట్టించి క్వార్టర్ ఫైనల్లో షుయె పెంగ్ (చైనా)తో పోరుకు సిద్ధమైంది. మరో మ్యాచ్‌లో షుయె పెంగ్ 6-3, 6-4తో 14వ సీడ్ లూసీ సఫరోవా (చెక్ రిపబ్లిక్)ను ఓడించింది.
  
  ఫెడరర్ ముందంజ
  పురుషుల సింగిల్స్‌లో రెండో సీడ్ ఫెడరర్ (స్విట్జర్లాండ్), ఆరో సీడ్ బెర్డిచ్ (చెక్ రిపబ్లిక్), ఏడో సీడ్ దిమిత్రోవ్ (బల్గేరియా) ప్రిక్వార్టర్ ఫైనల్‌కు చేరుకున్నారు. అయితే 12వ సీడ్ రిచర్డ్ గాస్కే (ఫ్రాన్స్), 19వ సీడ్ లోపెజ్ (స్పెయిన్) మాత్రం మూడో రౌండ్‌లో వెనుదిరిగారు. మూడో రౌండ్ మ్యాచ్‌ల్లో ఫెడరర్ 4-6, 6-1, 6-1, 6-1తో గ్రానోలెర్స్ (స్పెయిన్)పై, బెర్డిచ్ 6-3, 6-2, 6-4తో గబాష్‌విలి (రష్యా)పై, దిమిత్రోవ్ 0-6, 6-3, 6-4, 6-1తో గాఫిన్ (బెల్జియం)పై నెగ్గారు. 20వ సీడ్ మోన్‌ఫిస్ (ఫ్రాన్స్) 6-4, 6-2, 6-2తో గాస్కేను... థియెమ్ (ఆస్ట్రియా) 6-4, 6-2, 6-3తో లోపెజ్‌ను ఓడించి ప్రిక్వార్టర్ ఫైనల్లోకి ప్రవేశించారు. మిక్స్‌డ్ డబుల్స్ రెండో రౌండ్‌లో బోపన్న (భారత్)-స్రెబోత్నిక్ (స్లొవేనియా) 6-3, 6-4తో గారిగెస్ (స్పెయిన్)-క్లాసెన్ (దక్షిణాఫ్రికా)లపై గెలిచారు.
  
  క్వార్టర్స్‌లో సెరెనా, పెనెట్టా
  మాజీ చాంపియన్ షరపోవా ఓడిపోయినా... మరోవైపు డిఫెండింగ్ చాంపియన్ సెరెనా విలియమ్స్ (అమెరికా), 11వ సీడ్ ఫ్లావియా పెనెట్టా (ఇటలీ) క్వార్టర్ ఫైనల్లోకి దూసుకెళ్లారు. ప్రిక్వార్టర్ ఫైనల్స్‌లో టాప్ సీడ్ సెరెనా 6-3, 6-3తో కయి కనెపి (ఎస్తోనియా)పై, పెనెట్టా 7-5, 6-2తో కేసీ డెలాక్వా (ఆస్ట్రేలియా)పై గెలిచారు.
  


 న్యూఢిల్లీ: రష్యా టెన్నిస్ స్టార్ మరియా షరపోవా వ్యాఖ్యలపై సచిన్ టెండూల్కర్ స్పందించాడు. సచిన్ ఎవరో తెలియదంటూ షరపోవా వ్యాఖ్యానించడాన్ని తాను అగౌరవంగా భావించడలేదని ఓ టీవీ చానెల్కు ఇచ్చిన ఇంటర్వ్యూలో పేర్కొన్నాడు.  
 
 షరపోవా వ్యాఖ్యలపై సచిన్ అభిమానులు సోషల్ మీడియాలో తీవ్ర ఆగ్రహం వ్యక్తం చేసిన సంగతి తెలిసిందే. ఫేస్బుక్, ట్విట్టర్లలో మాస్టర్ అభిమానులు షరపోవాపై ఘాటైన కామెంట్లు చేశారు. వింబుల్డన్ను తిలికించేందుకు సచిన్ లండన్ వెళ్లాడు. ఇతర క్రీడా దిగ్గజాలతో కలసి మ్యాచ్ను వీక్షించాడు. అయితే ఇతర ఆటగాళ్ల గురించి ప్రస్తావించిన షరపోవా సచిన్ ఎవరో తనకు తెలియదంటూ చెప్పింది.


 సచిన్ టెండూల్కర్ ఎవరో తనకు తెలియదంటూ వ్యాఖ్యానించిన రష్యన్ టెన్నిస్ భామ మారియా షరపోవాపై సచిన్ అభిమానులు పెద్దపెట్టున విరుచుకుపడ్డారు. ఆమె ఫేస్బుక్ పేజీలోకి దూసుకెళ్లి, అసలు షరపోవా అంటే ఎవరు అంటూ మండిపడ్డారు. ఆమెకు 'జ్ఞానబోధ' చేయడానికి తమ శక్తివంచన లేకుండా ప్రయత్నించారు. దీంతో షరపోవా పేజి మొత్తం తీవ్రమైన వ్యాఖ్యలతో నిండిపోయింది. అలాగే ట్విట్టర్లో కూడా.. 'హూ ఈజ్ మారియా షరపోవా' అనేది పెద్ద ట్రెండింగ్ టాపిక్ అయిపోయింది.
 
 సచిన్.. షరపోవాల మధ్య అసలు పోలికన్నదే లేదని, షరపోవా ఫేస్బుక్ పేజీకి కేవలం 13.6 మిలియన్ల లైకులు మాత్రమే ఉంటే, టెండూల్కర్ పేజీకి 20.1 మిలియన్ల లైకులున్నాయని అభిమానులు చెబుతున్నారు. అలాగే, షరపోవా కంటే టెండూల్కర్కు ట్విట్టర్ ఫాలోయర్ల సంఖ్య కూడా 3.2 మిలియన్లు ఎక్కువ. డేవిడ్ బెక్హాం ఫుట్ బాల్ లోకి వచ్చినప్పుడే సచిన్ టెండూల్కర్ కూడా క్రికెట్లోకి వచ్చాడని, ఆయనెవరో తెలుసా అని విలేకరులు అడిగినప్పుడు.. తెలియదని షరపోవా చెప్పడంతోనే అసలు సమస్య అంతా వచ్చింది.
  
 
 RT if you want to Hear Below statement from sharapova. Sachin , who is Maria Sharapova ? pic.twitter.com/qGnGXcDTf4
 — Virat Kohli (@imviratkohlifan) July 4, 2014
  
 
 Who is Maria Sharapova? This is Sachin Tendulkar who respects his game. Learn from him. pic.twitter.com/3sCZ8Ir8qN
 — Sir Ravindra Jadeja (@SirJadeja) July 2, 2014
  
 
 You shout 4 ur every shot but whole world shouted 4 his every stroke. thtz the diffrnce b/w God nd a common player #Who is Maria Sharapova
 — Shivani Singh (@SinghShivi28) July 3, 2014
  


 మాస్టర్ తెలియదన్న షరపోవా
  లండన్: క్రికెట్ ప్రపంచంలో దేవుడిగా కీర్తించబడుతున్నా... సచిన్ టెండూల్కర్ ఎవరో తనకు మాత్రం తెలీదని రష్యా టెన్నిస్ స్టార్ మారియా షరపోవా చెప్పింది.
 వింబుల్డన్‌లో రాయల్ బాక్స్‌లో కూర్చున్న సచిన్, బెక్‌హామ్‌తో కలిసి షరపోవా మ్యాచ్ చూశాడు. మీ మ్యాచ్ చూసేందుకు క్రికెట్ దిగ్గజం వచ్చిన సంగతి తెలుసా అని మీడియా షరపోవాను ప్రశ్నించగా...‘ఆయనెవరో నాకు తెలీదు’ అని స్పష్టం చేసింది. బెక్‌హామ్‌ను గతంలో కలిశానని, అయితే అతని పక్కన కూర్చున్న వ్యక్తిని తాను గుర్తు పట్టనని సమాధానమిచ్చింది.
  


 సచిన్ టెండూల్కర్.. క్రికెట్ ప్రపంచానికి పరిచయం అక్కర్లని పేరు. సామాన్యుల నుంచి సినీ తారలు, బడా వ్యాపారవేత్తుల, రాజకీయ నాయకులు, ఇతర క్రీడా దిగ్గజాలు సైతం మాస్టర్ అభిమానుల జాబితాలో ఉన్నారు. పరుగుల వీరుడు ఉసేన్ బోల్ట్, టెన్నిస్ కెరటం ఫెదరర్ల ఫేవరేట్ క్రికెటర్ సచినే. అయితే రష్యా టెన్నిస్ అందాల భామ మరియా షరపోవాకు సచిన్ అంటే ఎవరో తెలియదట! సచిన్ ఎవరు అంటూ ప్రశ్నించింది.
 
 సచిన్ తీరికున్నప్పుడల్లా వింబుల్డన్ గ్రాండ్ స్లామ్ పోటీలను తిలకిస్తుంటాడు. ఈసారి కూడా భార్య అంజలితో కలసి లండన్ వెళ్లాడు. శనివారం ఇంగ్లండ్ ఫుట్బాలర్ డేవిడ్ బెక్హామ్, గోల్పఱ్ ఇయాన్ పౌల్డర్, ఇంగ్లండ్ క్రికెట్ మాజీ కెప్టెన్ ఆండ్రూ స్ట్రాస్ తదితరులతో కలసి సచిన్ రాయల్ బాక్స్లో దర్శనమిచ్చాడు. మ్యాచ్ అనంతరం వీరి పేర్లు ప్రస్తావనకు వచ్చినపుడు సచిన్ గురించి తెలుసా అంటూ ఓ విలేఖరి షరపోవాను అడిగాడు. 'నాకు తెలియదు. సచిన్ టెండూల్కర్' అంటూ సమాధానమిచ్చింది. అయితే ఫుట్బాలర్ బెక్హామ్ తనకు పరిచయమంటూ షరపోవా చెప్పింది.


 ఫ్రెంచ్ ఓపెన్ విజేత షరపోవా
  కెరీర్‌లో రెండోసారి ఈ ఘనత
  ఫైనల్లో సిమోనా హలెప్‌పై గెలుపు
  
  ‘‘నా కెరీర్‌లో ఆడిన అత్యంత కఠినమైన గ్రాండ్‌స్లామ్ ఫైనల్ ఇదే. నాకెంతో ఇష్టమైన ఫ్రెంచ్ ఓపెన్‌ను రెండోసారి గెలవడమంటే కల నిజమైనట్టే. భావోద్వేగంలో మాటలు కూడా రావడంలేదు’’     
  - షరపోవా
  
  షరపోవా ప్రైజ్ మనీ
  రూ. 13.29 కోట్లు
  
  హలెప్ ప్రైజ్‌మనీ
  రూ. 6.64 కోట్లు
  
  
  ఏడేళ్లుగా కొనసాగుతున్న ఆనవాయితీ మారింది. ఫ్రెంచ్ ఓపెన్‌లో మళ్లీ పాత చాంపియన్‌కు కిరీటం దక్కింది. మట్టి కోర్టుపై మెరుపు ఆటతీరుతో అలరించిన రష్యా సుందరి మరియా షరపోవా మళ్లీ ఫ్రెంచ్ ఓపెన్ క్వీన్‌గా నిలిచింది. రుమేనియా భామ సిమోనా హలెప్‌తో 3 గంటల 2 నిమిషాలపాటు జరిగిన హోరాహోరీ సమరంలో ఈ మాజీ చాంపియన్ పైచేయి సాధించింది. కెరీర్‌లో ఐదో గ్రాండ్‌స్లామ్ టైటిల్‌ను కైవసం చేసుకుంది.
  
  పారిస్: మట్టి కోర్టులపై మరోసారి తన ఆధిపత్యాన్ని నిరూపించుకున్న ‘రష్యా బ్యూటీ’ మరియా షరపోవా రెండోసారి ఫ్రెంచ్ ఓపెన్ టైటిల్‌ను దక్కించుకుంది. శనివారం నాలుగో సీడ్ సిమోనా హలెప్ (రుమేనియా)తో నువ్వా నేనా అన్నట్టు సాగిన ఫైనల్లో ఏడో సీడ్ షరపోవా 6-4, 6-7 (5/7), 6-4తో విజయం సాధించింది. 2007 నుంచి గతేడాది వరకు ఫ్రెంచ్ ఓపెన్‌లో ప్రతి ఏడాది కొత్త చాంపియన్ అవతరించింది. అయితే ఆ ఆనవాయితీని 27 ఏళ్ల షరపోవా ఈసారి బ్రేక్ చేసింది.
  
  2012లో తొలిసారి ఈ టైటిల్ నెగ్గిన షరపోవా కెరీర్‌లో ఓవరాల్‌గా ఇది ఐదో గ్రాండ్‌స్లామ్ టైటిల్. గతంలో సిమోనాతో ఆడిన మూడు మ్యాచ్‌ల్లో గెలిచిన షరపోవాకు ఈసారి విజయం అంత సులభంగా లభించలేదు. కెరీర్‌లో తొలి గ్రాండ్‌స్లామ్ ఫైనల్ ఆడుతున్న సిమోనా... పదేళ్ల క్రితమే తొలి గ్రాండ్‌స్లామ్ టైటిల్ నెగ్గిన షరపోవా ప్రతి పాయింట్‌కూ పోరాడారు.
  
  
   ఇద్దరూ కళ్లు చెదిరే ఫోర్‌హ్యాండ్ షాట్‌లు, బ్యాక్‌హ్యాండ్ షాట్‌లతో అలరించారు. దాంతో ప్రతి గేమ్ సుదీర్ఘంగా సాగింది. మ్యాచ్ మొత్తంలో షరపోవా తన ప్రత్యర్థి సర్వీస్‌ను 9 సార్లు బ్రేక్ చేసి తన సర్వీస్‌ను 7 సార్లు కోల్పోయింది. 12 డబుల్ ఫాల్ట్‌లు, 52 అనవసర తప్పిదాలు చేసినా... 46 విన్నర్స్‌తో షరపోవా మ్యాచ్ ఫలితాన్ని శాసించింది.
  
  తాజా విజయంతో షరపోవా టెన్నిస్ క్రీడాకారిణుల ఆల్‌టైమ్ ప్రైజ్‌మనీ జాబితాలో రెండో స్థానానికి చేరుకుంది. సెరెనా విలియమ్స్ (అమెరికా) అగ్రస్థానంలో ఉంది.
  
   షరపోవా గెలిచిన ఐదు గ్రాండ్‌స్లామ్ టైటిల్స్ సరిసంఖ్య సంవత్సరాల్లో (2004-వింబుల్డన్; 2006-యూఎస్ ఓపెన్; 2008-ఆస్ట్రేలియన్ ఓపెన్, 2012, 2014-ఫ్రెంచ్ ఓపెన్) రావడం విశేషం.
  
  2010 నుంచి క్లే కోర్టులపై మూడు సెట్‌లపాటు జరిగిన మ్యాచ్‌ల్లో షరపోవాకు పరాజయం ఎదురుకాలేదు. ఈ తరహా మ్యాచ్‌ల్లో ఆమెకిది వరుసగా 20వ విజయం కావడం విశేషం.
  
  13 ఏళ్ల తర్వాత మరోసారి ఫ్రెంచ్ ఓపెన్ ఫైనల్ మూడు సెట్‌లపాటు జరిగింది. 2001లో జెన్నిఫర్ కాప్రియాటి (అమెరికా) 1-6, 6-4, 12-10తో కిమ్ క్లియ్‌స్టర్స్ (బెల్జియం)పై గెలిచింది.
  


  హలెప్‌తో అమీతుమీ
   ఫ్రెంచ్ ఓపెన్
  
  పారిస్: రష్యా అందాల తార మరియా షరపోవా... ఫ్రెంచ్ ఓపెన్‌లో దూసుకెళ్తోంది. అద్వితీయమైన ఆటతీరుతో వరుసగా మూడోసారి ఫైనల్లోకి ప్రవేశించింది. గురువారం జరిగిన మహిళల సింగిల్స్ సెమీస్‌లో ప్రపంచ ఎనిమిదో ర్యాంకర్, ఏడోసీడ్ షరపోవా 4-6, 7-5, 6-2తో 18వ సీడ్ యూబిన్ బౌచర్డ్ (కెనడా)పై విజయం సాధించింది. గంటా 27 నిమిషాల పాటు జరిగిన ఈ మ్యాచ్‌లో రష్యా ప్లేయర్ తొలి సెట్‌ను చేజార్చుకుని పుంజుకుంది. ఆరంభంలో మెరుగ్గా ఆడిన బౌచర్డ్ తొలి సెట్‌లో 3-1 ఆధిక్యంలో నిలిచింది. అయితే షరపోవా బేస్‌లైన్ షాట్లతో స్కోరును 4-4తో సమం చేసింది. ఈ దశలో ప్రత్యర్థి సర్వీస్‌ను బ్రేక్ చేసిన బౌచర్డ్... తన సర్వీస్‌ను నిలబెట్టుకుని సెట్‌ను సొంతం చేసుకుంది. రెండోసెట్‌లో దూకుడును ప్రదర్శించిన షరపోవా 4-1, 5-2 ఆధిక్యాన్ని సంపాదించినా కీలక సమయంలో సర్వీస్‌ను చేజార్చుకుంది. ఇదే క్రమంలో నాలుగు సెట్ పాయింట్లను కోల్పోయి, రెండు డబుల్ ఫాల్ట్‌లు చేసింది. దీంతో బౌచర్డ్ 5-5తో స్కోరును సమం చేసింది. ఇక పట్టు వదలకుండా పోరాడిన రష్యన్ సర్వీస్‌ను నిలబెట్టుకోవడంతోపాటు ఆరో సెట్ పాయింట్‌ను గెలుచుకుని సెట్‌ను చేజిక్కించుకుంది. నిర్ణయాత్మక మూడోసెట్‌లో బౌచర్డ్ ఆట గతి తప్పింది. దీన్ని ఆసరాగా చేసుకున్న షరపోవా మూడో గేమ్‌లో బ్రేక్ పాయింట్ సాధించి 4-1 ఆధిక్యాన్ని సంపాదించింది. తర్వాత వరుస పాయింట్లతో సెట్‌ను, మ్యాచ్‌ను కైవసం చేసుకుంది.
  
  హలెప్ జోరు...
  రెండో సెమీస్‌లో నాలుగోసీడ్ సిమోనా హలెప్ (రొమేనియా) 6-2, 7-6 (7/4)తో 28వ సీడ్ ఆండ్రియా పెట్కోవిచ్ (జర్మనీ)ను ఓడించింది. తొలి సెట్‌లో పెద్దగా ఆకట్టుకోలేకపోయిన పెట్కోవిచ్ రెండోసెట్‌లో గట్టిపోటీ ఇచ్చింది. గంటా 30 నిమిషాల పాటు జరిగిన ఈ మ్యాచ్‌లో పెట్కోవిచ్ అనవసర తప్పిదాలతో మూల్యం చెల్లించుకుంది.
  
   మూడు డబుల్ ఫాల్ట్‌లు చేసిన ఈమె ఒకే ఒక్క బ్రేక్ పాయింట్ అవకాశాన్ని సద్వినియోగం చేసుకుంది. మూడు ఏస్‌లు సంధించిన హలెప్.. ఐదు బ్రేక్ పాయింట్లలో మూడింటిని కాపాడుకుంది. మిక్స్‌డ్ డబుల్స్ ఫైనల్లో అనా గ్రేన్‌ఫీల్డ్ (జర్మనీ)-జీన్ రోజర్ (నెదర్లాండ్స్) జోడి 4-6, 6-2 (10-7)తో జూలియా జార్జెస్ (జర్మనీ)-నెనద్ జిమోన్‌జిక్ (సెర్బియా)పై గెలిచి టైటిల్‌ను సొంతం చేసుకుంది.
  


 రష్యన్ అందాల టెన్నిస్ తార మారియా షరపోవా తెలుసు కదూ.. ఆమె మంచి టీ బ్యాగ్ లాంటిదని, వేడి వేడి నీళ్లలో ఆమెను వేస్తే ఆమె ఎంత స్ట్రాంగో తెలుస్తుందని ఆండీముర్రే తల్లి జూడీ ముర్రే వ్యాఖ్యానించారు. అయితే దీనిపై షరపోవా మండిపడింది. అసలు జూడీ ముర్రే ఎవరో కూడా తనకు తెలియదని చెప్పేసింది.
 
 రోలండ్ గారోస్ మైదానంలో ఫ్రెంచి ఓపెన్ సెమీఫైనల్లోకి వెళ్లిన తర్వాత విలేకరులతో మాట్లాడుతున్నప్పుడు ఈ ప్రస్తావన రాగా.. ఆమె ఈ రకంగా సమాధానమిచ్చింది. తాను టీ బాగానే తాగుతానని, అయినా ఆమె అసలు ఏం చెప్పాలనుకుందో తనకు అర్థం కాలేదని అంది.
  
 
 Sharapova is like a tea bag. Put her into hot water and ul find out how strong she is.
 — judy murray (@judmoo) June 3, 2014
  


 రాకెట్ ప్రయోగించినప్పుడు...  విమానం టేకాఫ్ అయినప్పుడు... డిస్కోథెక్ లేదా లౌడ్ మ్యూజిక్ (స్పీకర్) విన్నప్పుడు... టపాసులు పేలినప్పుడు... సబ్‌వే నుంచి రైలు వెళ్లినప్పుడు... సిటీలో ట్రాఫిక్ జామ్ అయినప్పుడు... ఇలా పలు సందర్భాల్లో వెలువడే శబ్దాలను విన్నప్పుడు చెవులు చిల్లులు పడ్డాయేమోనని ఎవరికైనా అనిపిస్తుంది. కానీ సరదాగా టెన్నిస్ చూద్దామని వెళితే ఇలాంటి శబ్దాలు వినిపిస్తే..? కాస్త ఇబ్బందిగానే ఉంటుంది. కానీ ఇవే కేకలు, అరుపులను ఒక ఆయుధంగా టెన్నిస్ క్రీడాకారులు ఉపయోగించుకుంటున్నారు. దీనిని ‘గ్రంటింగ్’గా వ్యవహరిస్తారు. ఒకరిని మించి మరొకరు ‘కేక’ల్లో రికార్డులు బద్దలు కొడుతున్నారు.      
  - శ్యామ్ తిరుక్కోవళ్లూరు
  
  టెన్నిస్ క్వీన్.. అరుపులో నంబర్ వన్...
 
 మరియా షరపోవా.. ఆటతో పాటు అందంతోనూ అభిమానులను కట్టిపడేస్తుంది. అయితే ఈ రష్యా అందాల భామ మ్యాచ్ ఆడుతున్న సమయంలో చెవుల్లో దూది పెట్టుకుని మరీ మ్యాచ్‌లు చూడాల్సిన పరిస్థితి.. ఎందుకంటే షరపోవా అరుపు అలా ఉంటుంది మరి. టెన్నిస్ క్వీన్‌గా పేరొందిన షరపోవా అరుపులోనూ క్వీన్ అనిపించుకుంటోంది. ఈమె మ్యాచ్‌లు ఆడుతున్న సమయంలో గట్టిగా అరుస్తుంది. అప్పుడు ఆమె అరుపు గరిష్టంగా 101.2 డెసిబుల్స్(శబ్దాన్ని డెసిబుల్స్‌లో కొలుస్తారు)గా నమోదైంది.
 
 జెట్ టేకాఫ్ అయినప్పుడు (120 డెసిబుల్స్)  సింహం గర్జించినప్పుడు (110 డెసిబుల్స్), లౌడ్ స్పీకర్ విన్నప్పుడు(110 డెసిబుల్స్) ఎలా ఉంటుందో షరపోవా మ్యాచ్‌లు ఆడేప్పుడు అరిచే అరుపు దాదాపుగా అలాగే ఉంటుందట. ఇక పోర్చుగల్‌కు చెందిన 21 ఏళ్ల మిచెల్లీ లార్చర్ డి బ్రిటో అయితే అనధికారికంగా షరపోవాను అధిగమించేసింది. ఓ టోర్నీలో మ్యాచ్ ఆడుతూ బ్రిటో 109 డెసిబుల్స్ శబ్దంతో కేక పెట్టింది. బ్రిటో అరుపు భరించలేక కొందరు అభిమానులు నిర్వాహకులకు ఫిర్యాదు చేశారట..ఇక టెన్నిస్ స్టార్లలో విక్టోరియా అజరెంకా (బెలారూస్), సెరెనా విలియమ్స్, వీనస్ విలియమ్స్  (అమెరికా), ఎలెనా బొవినా, అన్నా కోర్నికోవా, ఎలెనా దెమెంతియేవా (రష్యా), కిమ్ క్లియ్‌స్టర్స్ (బెల్జియం) తమ అరుపులతో ప్రత్యర్థులకు, అభిమానులకు దడ పుట్టించారు. అయితే మొట్టమొదటి మహిళా గ్రంట్ ప్లేయర్  మోనికా సెలెస్.. తన అరుపుతో అప్పట్లో బాగా గుర్తింపు పొందింది.
  
 ప్రత్యర్థులను దెబ్బతీసే ఆయుధం..!
 
 ఏదైనా మ్యాచ్‌లో విజయం సాధించాలంటే ప్రతిభ ఒక్కటే సరిపోదు. ప్రత్యర్థిని దెబ్బకొట్టాలంటే ప్రతిభతో పాటు మానసికంగా పైచేయి సాధించడం కూడా ముఖ్యమే. క్రికెట్ లాంటి కొన్ని క్రీడల్లో స్లెడ్జింగ్‌తో ప్రత్యర్థులను రెచ్చగొడతారు. తద్వారా ఎదుటివాళ్లు చేసే పొరపాట్లను తమకు అనుకూలంగా మలుచుకుంటారు. టెన్నిస్ లాంటి కొన్ని క్రీడల్లో అది సాధ్యం కాదు కాబట్టి కొందరు ప్లేయర్లు కోర్టులో అరుపు అనే ఆయుధాన్ని తమకు అనుకూలంగా మలుచుకుంటు న్నారు. గట్టిగా అరుస్తూ ప్రత్యర్థికి చికాకు పుట్టేలా చేస్తున్నారు. . ఇటీవలి కాలంలో కొందరు ప్లేయర్లు కావాలనే ఎదుటివారి ఏకాగ్రతను దెబ్బతీసేలా అరుస్తున్నారని వింబుల్డన్ మాజీ మ్యాచ్ రిఫరీ అలెన్ మిల్స్ వెల్లడించారు. ‘ఈ మధ్య గట్టిగా అరవడం ప్లేయర్లకు బాగా అలవాటైంది. ప్రత్యర్థిపై మానసికంగా పైచేయి సాధించేందుకు గట్టిగా అరుస్తూ చికాకు పెట్టిస్తున్నారు’అని అలెన్ మిల్స్ అనే అంపైర్ చెప్పారు.
  
 కోచింగ్‌లో అరుపు ‘ఫ్రీ’
 
 టెన్నిస్ కోచింగ్‌లో ఇప్పుడు ఆటలో మెళకువలతో పాటు ప్రత్యర్థులను దెబ్బ తీసేందుకు ఎలా అరవాలో కూడా నేర్పిస్తున్నారట.. నమ్మశక్యంగా లేకపోయినా ఇది నిజం.. ప్రపంచ వ్యాప్తంగా కొందరు కోచ్‌లు తమ కోచింగ్‌లో అరుపులను కూడా భాగం చేస్తున్నారట. ప్రత్యర్థులను దెబ్బకొట్టేందుకు అరుపులను ఆయుధాలుగా చేసుకుంటున్నప్పటికీ.. ఆటలో నైపుణ్యం ఉన్న ప్లేయర్లపై అరుపు ప్రభావం తక్కువగా ఉంటున్నట్లు సైకాలజిస్టుల పరిశోధనలో తేలింది.
  
 గాడ్ ఫాదర్... జిమ్మీ కానర్స్..
 
 అమెరికా టెన్నిస్ దిగ్గజం, ఎనిమిదిసార్లు గ్రాండ్‌స్లామ్ విజేత, ఏడుసార్లు రన్నరప్‌గా నిలిచిన జిమ్మీ కానర్స్ టెన్నిస్‌లో అరుపులకు ఆద్యుడుగా చెబుతారు. 70, 80 దశకాల్లో టెన్నిస్ కోర్టులో తన ఆటతోనే కాదు.. అరుపుతోనూ ప్రత్యర్థుల్ని బెంబేలెత్తించాడు. ప్రస్తుతం పురుషుల టెన్నిస్‌లో కార్లోస్ బెరాక్, రఫెల్ నాదల్, డేవిడ్ ఫై తమ అరుపులతో ప్రత్యర్థులకు, అభిమానులకు దడ పుట్టిస్తున్నారు.
  
 వీళ్లని ఆపేదెలా...
 
 టెన్నిస్ కోర్టులో అరుపులపై అటు ప్లేయర్ల నుంచి, ఇటు అభిమానుల నుంచి ఫిర్యాదులు వెల్లువెత్తుతున్నాయి. దీనిపై మహిళల టెన్నిస్ సంఘం స్పందించింది. టెన్నిస్ కోర్టులో అరుపులపై ధ్వని పరీక్షలు మొదలు పెట్టింది. ఇన్‌డోర్, అవుట్‌డోర్, గ్రాస్ కోర్టులు, క్లే కోర్టులు, హార్డ్ కోర్టులు, సింథటిక్ కోర్టులు ఇలా విభిన్నమైన వేదికలు, పరిసరాల్లో ఆటగాళ్ల అరుపులు ఎలా ఉంటున్నాయో పరీక్షిస్తోంది. ఇక 2012 వింబుల్డన్‌లో ప్లేయర్ల అరుపులను నిరోధించేందుకు ప్రయత్నించారు. అంపైర్లకు గ్రంటో మీటర్లను కూడా ఇచ్చారు. అయితే దీనిపై అరిచే ప్లేయర్ల నుంచి తీవ్ర వ్యతిరేకత వ్యక్తమయింది. చివరికి అరుపులను తేలిగ్గా తీసుకోవాల్సి వచ్చింది.
  


 ఇదే టోర్నీ మహిళల సింగిల్స్ విభాగంలో ప్రపంచ తొమ్మిదో ర్యాంకర్ మరియా షరపోవా (రష్యా) వరుసగా మూడో ఏడాది టైటిల్ సాధించి ‘హ్యాట్రిక్’ నమోదు చేసింది. ఫైనల్లో షరపోవా 3-6, 6-4, 6-1తో మాజీ నంబర్‌వన్ అనా ఇవనోవిచ్ (సెర్బియా)పై గెలిచింది.
  
   షరపోవా కెరీర్‌లో ఇది 30వ అంతర్జాతీయ సింగిల్స్ టైటిల్ కావడం విశేషం. విజేతగా నిలిచిన షరపోవాకు రూ. కోటీ 25 లక్షలు విలువచేసే ‘పోర్షె 911 టార్గా 4ఎస్’ మోడల్ కారుతోపాటు 96,774 యూరోలు (రూ. 81 లక్షల 17 వేలు) ప్రైజ్‌మనీగా లభించాయి.
  


 వాళ్లంతా విజేతలు. తమ కలలను నెరవేర్చుకొన్న వారు. అత్యున్నత లక్ష్యాలను సాధించిన వారు. ప్రపంచ వ్యాప్తంగా గుర్తింపు ఉన్నవారు. ప్రత్యేకించి నేటి యువతకు అత్యంత ఇష్టులు. సక్సెస్‌కు ప్రతి రూపాల్లాంటి వారు. మరి వారు తమ అనుభవసారంతో సక్సెస్ గురించి, దాన్ని సాధించడం గురించి ఎలాంటి సలహాలు ఇచ్చారంటే...  
  
  రిస్క్‌లేనిదే లైఫ్ లేదు!
 
  ఎలాంటి రిస్క్ తీసుకోకపోవడమే జీవితంలో చేసే రిస్క్. సర్దుకుపోయే మనస్తత్వంతో, సేఫ్‌సైడ్ ఉండాలనే తీరుతో జీవితంలో చాలా వాటిని కోల్పోతాం. రిస్క్ చేసినప్పుడే జీవితంలో మార్పు ఖాయం.
  - మార్క్ జుకర్‌బర్గ్, ఫేస్‌బుక్ వ్యవస్థాపకుడు
  
  నిజాయతీగా ఉండాలి
 
  మనకు మనం నిజాయితీగా ఉండటం విజయానికి సోపానం. శ్రమ విషయంలో, చేయాల్సిన పని విషయంలో లోపాలను గుర్తించగలిగితే, మనకు మనం సమాధానపడితే విజయానికి దారిలో ఉన్నట్టే..
  - రఫెల్ నాదల్,టెన్నిస్ ఆటగాడు
 
  ఆత్మవిశ్వాసంతో...
 
  గుడ్‌లుకింగ్‌కు ప్రాధాన్యం ఇవ్వండి. అది మీకు హాయినిస్తుంది. ఆత్మవిశ్వాసాన్ని ప్రోది చేస్తుంది. అలాంటి ఆత్మవిశ్వాసం ఉంటే ఇతర ఒత్తిళ్లన్నింటినీ మరిచి మీరు అనుకొన్నది సాధించగలరు...
  - మారియా షరపోవా ,  టెన్నిస్ ప్లేయర్
  
  సుఖాలపై దృష్టిపెట్టొద్దు...
 
  లక్ష్యాన్ని సాధించాలి అని బలంగా నిర్ణయించుకొన్నాకా మరో ఆలోచన వద్దు. కలలను నిజం చేసుకోవడానికి పోరాడాలి. చాలా వాటిని త్యాగం చేయక తప్పవచ్చు. పరిస్థితులకు అనుగుణంగా వ్యవహరించి శ్రమిస్తేనే లక్ష్యాన్ని చేరుకోగలవు..
  - లియోనల్ మెస్సీ, అర్జెంటీనా ఫుట్‌బాల్ ఆటగాడు.
  


 టెన్నిస్ అంటేనే అందం...అందులోనూ షరపోవా అంటే అందానికి ప్రతిరూపం...మరి అలాంటి గ్లామర్ క్వీన్ కొత్తగా వ్యాపారం చేయాలంటే... ఆ ఆలోచన కూడా ఆమె అంత అందంగా, ఆకట్టుకునేలా ఉండాలి. అందుకే ఆమె అందరికంటే భిన్నంగా, కొత్త తరహాలో బిజినెస్ చేస్తోంది. తనకెంతో ఇష్టమైన చాక్లెట్లు, క్యాండీల వ్యాపారంలోకి అడుగు పెట్టింది. ఇప్పుడు టెన్నిస్ ప్రపంచం అంతా షరపోవా పంచుతున్న తీపి గురించే చర్చ జరుగుతోంది.
  
 షుగర్‌పోవా...
  
 ‘నాకు చిన్నప్పటినుంచి చాక్లెట్లంటే అమిత ఇష్టం. ఎన్ని తిన్నా తనివి తీరకపోయేది. టెన్నిస్ కోర్టులో ప్రాక్టీస్ పూర్తి కాగానే మమ్మీ లాలీపాప్‌తో సిద్ధంగా లేకపోతే ఏడ్చేసేదాన్ని. వయసు పెరిగినా, ఆటలో ఉన్నా క్యాండీలు చప్పరిస్తూనే ఉంటాను. నాకిష్టమైనదాన్నే అందరితో పంచుకోవాలని క్యాండీలు అమ్ముతున్నానోచ్’...అంటూ ఈ రష్యా బ్యూటీ ప్రకటించింది. మరి తనకు ఇష్టమైన వ్యాపారానికి బ్రాండింగ్ చేయాలంటే ఒక కొత్త పేరు కావాలి కదా...తనంటే ఇష్టపడే వారు లొట్టలేసుకుంటూ తింటుంటే తాను గుర్తుకు రావాలి కదా. అందుకే తీపిని, షరపోవాను కలిపి షుగర్‌పోవా చేసేసింది. అవును ఆమె క్యాండీలు, చాక్లెట్ల బ్రాండ్ పేరు షుగర్‌పోవా. అభిమానులకు ఓ తీపి ముద్దు ఇస్తున్నట్లు ఉండే పెదాల ముద్రే ఈ బ్రాండ్‌కు లోగో కావడం విశేషం.
  
  షుగర్‌పోవా కోసం పెట్టిన పెట్టుబడి 3 లక్షల పౌండ్లు
      
  ఒక్క ఏడాదిలోనే 20 లక్షలకు పైగా షుగర్‌పోవా క్యాండీ బ్యాగ్‌లు అమ్ముడుపోయాయి.
      
  స్మిటెన్ సోర్, క్వార్కీ, స్ప్లాషీ, స్పోర్టీ తదితర పేర్లతో 12 రకాల ఫ్లేవర్స్ ఇందులో ఉన్నాయి. ఇంద్రధనుస్సులోని అన్ని రంగులతో ఉండే క్వార్కీ ఫ్లేవర్ షరపోవాకు అత్యంత ఇష్టమైంది.  
      
  ప్రస్తుతం సొంత దేశం రష్యాతో పాటు అమెరికా, కెనడాలలో ఈ క్యాండీలకు డిమాండ్ ఎక్కువగా ఉంది. ఇటీవలే గల్ఫ్‌లో కూడా అడుగు పెట్టిన షుగర్‌పోవా త్వరలోనే ఆస్ట్రేలియా, భారత్‌లలో అందుబాటులోకి రానుంది.
      
  గత ఏడాది యూఎస్ ఓపెన్ పోటీల్లో షుగర్‌పోవా పేరుతో బరిలోకి దిగాలని కూడా రష్యా భామ భావించింది. టోర్నీ కాగానే అసలు పేరును మార్చుకునేందుకు వీలుగా ఫ్లోరిడా సుప్రీంకోర్టుకు కూడా దరఖాస్తు చేసింది కూడా. అయితే ఇతర టోర్నీల్లో సమస్య వచ్చే అవకాశం ఉండటంతో ఆఖరి నిమిషంలో ఆలోచన విరమించుకుంది.


 సీజన్ తొలి గ్రాండ్‌స్లామ్ టోర్నమెంట్‌లో సంచలనాల పరంపర కొనసాగుతోంది. టాప్ సీడ్ సెరెనా విలియమ్స్ బాటనే అనుసరిస్తూ మరో ఫేవరెట్ షరపోవా ఇంటిముఖం పట్టింది. తనదైన రోజున అద్భుతంగా ఆడే స్లొవేకియా అమ్మాయి డొమినికా సిబుల్కోవా ధాటికి మూడో సీడ్ షరపోవా ప్రిక్వార్టర్స్‌లోనే నిష్ర్కమించింది.
  
  మెల్‌బోర్న్: ఈసారి అగ్రశ్రేణి క్రీడాకారిణులకు ఆస్ట్రేలియన్ ఓపెన్ కలసి రావడంలేదు. టైటిల్ ఫేవరెట్స్ ఒక్కొక్కరూ చేతులెత్తేస్తున్నారు. ఆదివారం టాప్ సీడ్ సెరెనా విలియమ్స్ అనూహ్య ఓటమిని మర్చిపోకముందే మూడో సీడ్ షరపోవా రూపంలో మరో స్టార్ పరాజయం పాలైంది. భుజం గాయం నుంచి కోలుకున్న ఈ రష్యా భామ ప్రిక్వార్టర్స్ అడ్డంకిని అధిగమించడంలో విఫలమైంది.
 
  సోమవారం జరిగిన మహిళల సింగిల్స్ ప్రిక్వార్టర్స్‌లో 20వ సీడ్ డొమినికా సిబుల్కోవా (స్లొవేకియా) 3-6, 6-4, 6-1 తో షరపోవాను బోల్తా కొట్టించి తన కెరీర్‌లో తొలిసారి ఆస్ట్రేలియన్ ఓపెన్‌లో క్వార్టర్ ఫైనల్లోకి అడుగుపెట్టింది. తొలి సెట్‌లో దూకుడుగా ఆడిన షరపోవా ఆ తర్వాత తడబడింది. సిబుల్కోవా చెలరేగి రెండో సెట్‌లో 5-0తో దూసుకెళ్లింది. ఆ తర్వాత గాడితప్పి నాలుగు గేమ్‌లు కోల్పోయినా కీలకదశలో రాణించి సెట్‌ను నెగ్గి మ్యాచ్‌లో నిలిచింది. నిర్ణాయక మూడో సెట్‌లో సిబుల్కోవా హడలెత్తించి షరపోవా సర్వీస్‌ను మూడుసార్లు బ్రేక్ చేసి సంచలన విజయాన్ని ఖాయం చేసుకుంది.
 
  మ్యాచ్ మొత్తంలో షరపోవా ఎనిమిది డబుల్ ఫాల్ట్‌లు, 45 అనవసర తప్పిదాలు చేయడం గమనార్హం. ‘షరపోవాను ఓడిస్తాననే వంద శాతం నమ్మకంతో కోర్టులోకి అడుగుపెట్టాను. గతంలోనూ ఆమెను గ్రాండ్‌స్లామ్ టోర్నీలో ఓడించాను. ఏడో ప్రయత్నంలో ఈ టోర్నీలో క్వార్టర్స్ దశకు చేరినందుకు చాలా ఆనందంగా ఉంది’ అని సిబుల్కోవా వ్యాఖ్యానించింది.
  
  మహిళల సింగిల్స్ ప్రిక్వార్టర్స్ ఫలితాలు
      రెండో సీడ్ అజరెంకా (బెలారస్) 6-3, 6-2తో 13వ సీడ్ స్లోన్ స్టీఫెన్స్ (అమెరికా)పై...
      11వ సీడ్ సిమోనా హలెప్ (రుమేనియా) 6-4, 2-6, 6-0తో ఎనిమిదో సీడ్ జంకోవిచ్ (సెర్బియా)పై...
      ఐదో సీడ్ అగ్నెస్కా రద్వాన్‌స్కా (పోలండ్) 6-1, 6-3తో గార్బిన్ ముగురుజా (స్పెయిన్)పై గెలిచారు.
  
       {శమించిన నాదల్...
  పురుషుల సింగిల్స్ విభాగంలో టాప్ సీడ్ రాఫెల్ నాదల్ (స్పెయిన్)కు తొలిసారి గట్టిపోటీ ఎదురైంది. 3 గంటల 17 నిమిషాలపాటు జరిగిన ప్రిక్వార్టర్ ఫైనల్లో నాదల్ 7-6 (7/3), 7-5, 7-6 (7/3)తో 16వ సీడ్ నిషికోరి (జపాన్)పై కష్టపడి గెలిచాడు. బుధవారం జరిగే క్వార్టర్ ఫైనల్లో ‘షరపోవా బాయ్‌ఫ్రెండ్’ గ్రిగోర్ దిమిత్రోవ్ (బల్గేరియా)తో నాదల్ తలపడతాడు. మరో ప్రిక్వార్టర్ ఫైనల్లో 22వ సీడ్ దిమిత్రోవ్ 6-3, 3-6, 6-2, 6-4తో అగుట్ (స్పెయిన్)ను ఓడించి కెరీర్‌లో తొలిసారి  గ్రాండ్‌స్లామ్ క్వార్టర్స్‌కు చేరాడు.
  
       ఫెడరర్ ఫటాఫట్...
  కొత్త రాకెట్‌తో ఆడుతోన్న ఆరో సీడ్ రోజర్ ఫెడరర్ (స్విట్జర్లాండ్) తన విజయపరంపర కొనసాగిస్తూ ఆస్ట్రేలియన్ ఓపెన్‌లో వరుసగా 11వ ఏడాది క్వార్టర్ ఫైనల్లోకి దూసుకెళ్లాడు. 10వ సీడ్ జో విల్‌ఫ్రైడ్ సోంగా (ఫ్రాన్స్)తో జరిగిన ప్రిక్వార్టర్ ఫైనల్లో ఫెడరర్ 6-3, 7-5, 6-4తో గెలిచాడు.  మంగళవారం జరిగే క్వార్టర్ ఫైనల్లో నాలుగో సీడ్ ఆండీ ముర్రే (బ్రిటన్)తో ఫెడరర్ తలపడతాడు.
      మరో ప్రిక్వార్టర్ ఫైనల్లో ఆండీ ముర్రే 6-1, 6-2, 6-7 (6/8), 6-2తో ‘లక్కీ లూజర్’ స్టీఫెన్ రాబర్ట్ (ఫ్రాన్స్)పై విజయం సాధించాడు.
  
       క్వార్టర్స్‌లో సానియా జోడి
  భారత స్టార్ సానియా మీర్జా మహిళల డబుల్స్ విభాగంలో, మిక్స్‌డ్ డబుల్స్ విభాగంలో క్వార్టర్ ఫైనల్లోకి చేరింది. మహిళల డబుల్స్ మూడో రౌండ్‌లో సానియా-కారా బ్లాక్ (జింబాబ్వే) జంట 6-4, 6-3తో వెరా దుషెవినా (రష్యా)-యూజిన్ బౌచర్డ్ (కెనడా) ద్వయంపై గెలిచింది. ఆ తర్వాత మిక్స్‌డ్ డబుల్స్ మూడో రౌండ్‌లో సానియా-హొరియా టెకావ్ (రుమేనియా) జంట 6-2, 6-2తో రొడియోనోవా (ఆస్ట్రేలియా)-కొలిన్ ఫ్లెమింగ్ (బ్రిటన్) జోడిని ఓడించింది.
 
 మిక్స్‌డ్ డబుల్స్ ఇతర మూడో రౌండ్ మ్యాచ్‌ల్లో లియాండర్ పేస్ (భారత్)-హంతుచోవా (స్లొవేకియా) జంట 6-0, 2-6, 10-6తో మహేశ్ భూపతి (భారత్)-ఎలీనా వెస్నినా (రష్యా) ద్వయంపై... రోహన్ బోపన్న (భారత్)-కాటరీనా స్రెబోత్నిక్ (స్లొవేనియా) జంట 7-6 (7/5), 7-5తో యాష్లీ బార్టీ-జాన్ పీర్స్ (ఆస్ట్రేలియా) జోడిలపై నెగ్గి క్వార్టర్ ఫైనల్లోకి అడుగుపెట్టాయి.
  
      {బయాన్ బ్రదర్స్‌కు షాక్
  పురుషుల డబుల్స్ విభాగంలో టాప్ సీడ్, డిఫెండింగ్ చాంపియన్స్ బాబ్ బ్రయాన్-మైక్ బ్రయాన్ (అమెరికా) జోడికి మూడో రౌండ్‌లో చుక్కెదురైంది. అన్‌సీడెడ్ జోడి క్లాసెన్  (దక్షిణాఫ్రికా)- బుటోరాక్ (అమెరికా) 7-6 (11/9), 6-4తో బ్రయాన్ బ్రదర్స్‌ను కంగుతినిపించి క్వారర్స్‌కి చేరారు.
  
  
  


 మెల్‌బోర్న్: ఆస్ట్రేలియన్ ఓపెన్‌లో మరో సంచలనం నమోదయింది. రష్యా స్టార్ క్రీడాకారిణి మారియా షరపోవాకు షాక్ తగిలింది. నాలుగుసార్లు మహిళల సింగిల్స్ టైటిల్ గెలిచిన షరపోవా నాలుగు రౌండ్లో ఇంటిముఖం పట్టింది. స్లోవెకియా క్రీడాకారిణి డొమినిక సిబుల్కోవా చేతిలో 3-6 6-4 6-1 పరాజయం పాలయింది. తొలి రౌండ్లో ఆధిక్యం కనబరిచిన షరపోవా తర్వాతి రెండు రౌండ్లలో వెనుకబడిపోయింది.
 
 నిర్ణాయక చివరి రెండు రౌండ్లలో పుంజుకుని డొమినిక సంచలనం సృష్టించింది. షరపోవాను మట్టికరిపించింది. తాను తుంటి ఎముక గాయంతో బాధపడుతున్నానని మ్యాచ్ ముగిసిన తర్వాత షరపోవా వెల్లడించింది. అయితే ఓటమికి దీన్ని సాకుగా చూపదలచుకోలేదని పేర్కొంది. భీకరమైన ఫామ్‌లో ఉన్న అమెరికా నల్లకలువ సెరెనా విలియమ్స్‌కు ఊహించని విధంగా అనా ఇవనోవిచ్ చేతిలో ఆదివారం ఓటమిపాలయింది.


 ఓ వైపు మండిపోతున్న ఎండ... ఏకంగా 43.5 డిగ్రీల ఉష్ణోగ్రత... మరోవైపు ప్రత్యర్థి నుంచి పోరాటం... ఏకంగా మూడు గంటల 28 నిమిషాల పాటు మ్యాచ్... ఇందులో ఒక్క ఆఖరి సెట్ రెండు గంటల పాటు జరిగితే... ఎంతటి  ఫిట్‌నెస్ ఉన్న ఆటగాళ్లకైనా సాధ్యమా..? పాపం... రష్యన్ బ్యూటీ షరపోవా ఇలాంటి క్లిష్ట పరిస్థితుల్లో ఆస్ట్రేలియన్ ఓపెన్‌లో రెండో రౌండ్ మ్యాచ్ ఆడి గెలిచింది. ఎండ కారణంగా మిగిలిన మ్యాచ్‌లన్నీ ఆపేసినా... షరపోవా మ్యాచ్ మాత్రం సెట్ మధ్యలో ఉన్న కారణంగా ఆపలేదు. అంటే ఎండలో ఆట సాధ్యంకాని పరిస్థితుల్లోనూ సుమారు గంటసేపు షరపోవా ఆడింది.
  
  గురువారం జరిగిన మహిళల సింగిల్స్‌లో మూడోసీడ్ షరపోవా 6-3, 4-6, 10-8తో కరిన్ క్నాప్ (ఇటలీ)పై విజయం సాధించి మూడో రౌండ్‌లోకి దూసుకెళ్లింది. మూడు గంటలా 28 నిమిషాల పాటు జరిగిన ఈ మ్యాచ్‌లో షరపోవా 20 బ్రేక్ పాయింట్ అవకాశాల్లో కేవలం ఏడింటిని మాత్రమే సద్వినియోగం చేసుకుంది. తొలిసెట్‌లో డబుల్ ఫాల్ట్ చేసినా కీలక సమయంలో బేస్‌లైన్ ఆటతీరుతో పాయింట్లు గెలిచి సెట్‌ను దక్కించుకుంది. అయితే రెండోసెట్‌లో క్నాప్.. ఫోర్‌హ్యాండ్, బ్యాక్‌హ్యాండ్ షాట్లతో చెలరేగింది. స్కోరును 2-2తో సమం చేసి... ఆ తర్వాత మూడు సెట్ పాయింట్లను కాచుకుని మ్యాచ్‌లో నిలిచింది. నిర్ణయాత్మక మూడోసెట్‌కు ముందు 10 నిమిషాలు బ్రేక్ తీసుకున్న షరపోవా క్రాస్‌కోర్టు విన్నర్‌తో 1-0 ఆధిక్యంలో నిలిచింది.
  
  అయితే సర్వీస్‌ను చేజార్చుకోవడంతో క్నాప్ చెలరేగింది. వరుసగా పాయింట్లు కొడుతూ 3-3తో స్కోరును సమం చేసింది. చివరకు ఓ బ్రేక్ పాయింట్‌ను కాపాడుకున్న షరపోవా తర్వాత సర్వీస్‌ను నిలబెట్టుకుంది. మరో మూడు మ్యాచ్ పాయింట్లనూ కాచుకుని ఆధిక్యాన్ని కనబర్చింది. 17వ గేమ్‌లో క్నాప్ సర్వీస్‌ను బ్రేక్ చేసిన షరపోవా  తన సర్వీస్‌ను నిలబెట్టుకుని మ్యాచ్‌ను సొంతం చేసుకుంది.
  
  నాదల్ సులువుగా...
  టాప్‌సీడ్ రాఫెల్ నాదల్ (స్పెయిన్) అలవోకగా మూడోరౌండ్‌లోకి దూసుకెళ్లాడు. పురుషుల సింగిల్స్ రెండోరౌండ్‌లో నాదల్ 6-2, 6-4, 6-2తో తన్సాయ్ కొకినాకిస్ (ఆస్ట్రేలియా)పై నెగ్గాడు. రెండు గంటలపాటు సాగిన ఈ మ్యాచ్‌లో స్పెయిన్ బుల్ ఎలాంటి ఇబ్బంది పడలేదు. బలమైన ఏస్‌లు సంధించిన అతను తన సర్వీస్‌లో 74 శాతం పాయింట్లు గెలిచాడు. 10 బ్రేక్ పాయింట్లలో ఐదింటిని సద్వినియోగం చేసుకున్నాడు. మ్యాచ్ మొత్తంలో 39 విన్నర్లు కొట్టిన ఈ స్పెయిన్ స్టార్ 19సార్లు అనవసర తప్పిదాలు చేశాడు. కొకినాకిస్ ఒక్క బ్రేక్ పాయింట్‌ను కూడా రాబట్టలేకపోయాడు. 24సార్లు అనవసర తప్పిదాలు చేసి మూల్యం చెల్లించుకున్నాడు.
  
  మహిళల ముఖ్య మ్యాచ్‌ల రెండో రౌండ్ ఫలితాలు
  రెండో సీడ్ విక్టోరియా అజరెంకా (బెలారస్) 6-1, 6-4తో బార్బోరా స్ట్రైకోవా (చెక్)పై
  ఐదో సీడ్ రద్వాన్‌స్కా (పొలెండ్) 6-0, 7-5తో ఓల్గా గౌరోత్సవ్ (బెలారస్)పై
  ఎనిమిదవ సీడ్ జంకోవిచ్ (సెర్బియా) 6-2, 6-0తో అయూమి మోరిటా (జపాన్)పై
   పదో సీడ్ కరోలిన్ వోజ్నియాకి (డెన్మార్క్) 6-0, 1-6, 6-2తో మెక్‌హాలే (అమెరికా)పై గెలిచారు.
  
  పురుషుల ముఖ్య మ్యాచ్‌ల రెండో రౌండ్ ఫలితాలు
   నాలుగోీ సడ్ ఆండీ ముర్రే (బ్రిటన్) 6-2, 6-2, 7-5తో విన్సెంట్ మిల్లోట్ (ఫ్రాన్స్)పై
   ఆరో సీడ్ ఫెడరర్ (స్విట్జర్లాండ్) 6-2, 6-1, 7-6 (4)తో బ్లాజ్ కవిచ్ (స్లోవేనియా)పై
   పదో సీడ్ సోంగా (ఫ్రాన్స్) 7-6 (6), 6-4, 6-4తో తోమజ్ బెలుచి (బ్రెజిల్)పై గెలిచారు.
  
  డెల్‌పొట్రోకు నిరాశ
  హోరాహోరీగా సాగిన పురుషుల రెండో రౌండ్ మ్యాచ్‌లో ఐదోసీడ్ యువాన్ మార్టిన్ డెల్‌పొట్రో (అర్జెంటీనా)కు చుక్కెదురైంది. రాబెర్టో బటిస్టా అగుట్ (స్పెయిన్) 4-6, 6-3, 5-7, 6-4, 7-5తో డెల్‌పోట్రోపై విజయం సాధించి మూడోరౌండ్‌లోకి అడుగుపెట్టాడు.
  
   అనవసర తప్పిదాల (59)తో మూల్యం చెల్లించుకున్న డెల్‌పోట్రో 53 విన్నర్లు సాధించాడు. 17 బ్రేక్ పాయింట్లలో ఎనిమిదింటిని మాత్రమే కాచుకోగా, ప్రత్యర్థి 8 అవకాశాల్లో ఐదింటిని సద్వినియోగం చేసుకున్నాడు. అయితే 28 ఏస్‌లు సంధించిన అర్జెంటీనా ప్లేయర్ ఎక్కువసార్లు సర్వీస్‌ను కోల్పోయాడు.