సాక్షి, రంగారెడ్డి జిల్లా: ఫ్యూచర్‌సిటీ చుట్టూ ఉన్న గ్రామాల్లోని వ్యవసాయ భూములపై పలువురు ప్రజాప్రతినిధులు, ఐఏఎస్, ఐపీఎస్, ఇతర ఉన్నతాధికారులు దృష్టి సారించారు. తమ సన్నిహితుల ద్వారా ఆయా గ్రామాల్లోని వ్యవసాయ పట్టా భూముల ధరలపై ఆరా తీస్తున్నట్టు సమాచారం. వ్యవసాయానికి అనుకూలంగా, భూగర్భజలాలు పుష్కలంగా, ఎర్రటి నేలలున్న భూములను కొనుగోలు చేసి పెట్టాలని కోరుతున్నారు. రేవంత్‌రెడ్డి సర్కార్‌ యాచారం–కందుకూరు మండలాల సరిహద్దులో ఫ్యూచర్‌సిటీని నెలకొల్పడానికి సంకల్పించడం తెలిసిందే. కొంగరకలాన్‌ ఓఆర్‌ఆర్‌ నుంచి నిర్మించబోయే ఫ్యూచర్‌సిటీకి 300 అడుగుల రోడ్డు, మెట్రోరైలు మార్గానికి పచ్చజెండా ఊపింది. దీంతో భవిష్యత్తులో ఈ ప్రాంతం ఎంతో అభివృద్ధి చెందుతుందనే భావనతో వ్యవసాయ భూములు కొనుగోలు చేసి పెట్టుకోవాలని చూస్తున్నారు. కొద్ది రోజులుగా ఆయా గ్రామాల్లో తమ సన్నిహితులతో కలిసి వ్యవసాయ భూములను పరిశీలిస్తున్నారు. ఆ గ్రామాలపై ఫోకస్‌.. కందుకూరు మండల పరిధిలోని మీరాఖాన్‌పేట, ఆకులామైలారం, బెగరికంచె, ముచ్చర్ల, సాయిరెడ్డిగూడ, దాసర్లపల్లి, లేముర్, గూడూర్, యాచారం మండల పరిధిలోని నస్దిక్‌సింగారం, నందివనపర్తి, యాచారం, చౌదర్‌పల్లి, చింతుల్ల, కుర్మిద్ద, నానక్‌నగర్, తాడిపర్తి, నక్కర్తమేడిపల్లి గ్రామాల్లోని వ్యవసాయ భూములపై ప్రధానంగా దృష్టి సారించారు. ఇబ్రహీంపట్నం మండల పరిధిలోని ఆదిబట్ల, కొంగరకలాన్, మహేశ్వరం మండల పరిధిలోని రావిరాల, తుక్కగూడ తదితర గ్రామాల్లో వ్యవసాయ భూములకు ఎకరాకు రూ.5 కోట్ల నుంచి రూ.10 కోట్లకు పైగా డిమాండ్‌ పెరిగింది. ఈ నేపథ్యంలో ఫ్యూచర్‌సిటీకి సమీపంలోని యాచారం, కందుకూరు గ్రామాల పరిధిలోని గ్రామాల్లో ప్రస్తుతం రూ.50 లక్షల నుంచి రూ. 3 కోట్ల వరకు ధర పలుకుతోంది. చ‌దవండి: మళ్లీ ‘రియల్‌’ డౌన్‌.. తెలంగాణ‌ వ్యాప్తంగా తగ్గిన రిజిస్ట్రేషన్లు, రాబడులు ఫాంహౌస్‌లపై ఆసక్తి యాచారం, కందుకూరు మండలాల పరిధిలోని గ్రామాల్లో సారవంతమైన వ్యవసాయ భూములున్నాయి. భూగర్భ జలాలకు ఢోకా లేదు. అందుకే ఆయా గ్రామాల్లోని వ్యవసాయ భూములను కొనుగోలు చేసి ఫాంహౌస్‌లు నిర్మించుకుంటే భవిష్యత్తులో మంచి డిమాండ్‌ ఉంటుందనే నమ్మకం కొనుగోలుదారుల్లో ఉంది. అత్యధికంగా 5 నుంచి 10 ఎకరాల్లోపే కొనుగోలు చేసేలా దృష్టి సారించారు. ఫ్యూచర్‌సిటీపై భరోసాతో.. ఫ్యూచర్‌సిటీపై భరోసాతో సమీపంలోని గ్రామాల్లో వ్యవసాయ భూముల కొనుగోలుకు కొంత మంది పెద్దలు ఆసక్తి చూపిస్తున్నారు. కొందరైతే నేరుగా రైతులతోనే మాట్లాడుకుని వ్యవసాయ భూములను కొనుగోలు చేస్తున్నారు. – ప్రవీణ్‌కుమార్‌రెడ్డి, రియల్‌ వ్యాపారి, హైదరాబాద్‌

సాక్షి, రంగారెడ్డి జిల్లా: నీళ్లు, నిధులు, నియామ కాల పేరుతో సాధించుకున్న తెలంగాణలో ఉద్యమ స్ఫూర్తితో నిరుద్యోగ యువతకు ఉపాధి అవకాశాలు కలి్పంచనున్నట్లు ముఖ్యమంత్రి రేవంత్‌రెడ్డి చెప్పారు. ప్రభుత్వం కొత్తగా ఏర్పాటు చేయబోతున్న వర్సిటీలో ప్రవేశం పొందిన ప్రతి ఒక్కరికీ గ్యారంటీగా ఉపాధి లభిస్తుందని హామీ ఇచ్చారు.రంగారెడ్డి జిల్లా కందుకూరు మండలం మీర్‌ఖాన్‌పేటలో 57 ఎకరాల విస్తీర్ణంలో రూ.150 కోట్లతో నిర్మించతలపెట్టిన ‘యంగ్‌ ఇండియా స్కిల్స్‌ యూనివర్సిటీ’కి గురువారం స్పీకర్‌ గడ్డం ప్రసాద్‌కుమార్, డిప్యూటీ సీఎం భట్టి విక్రమార్క తదితరులతో కలిసి సీఎం శంకుస్థాపన చేశారు. తర్వాత నెట్‌ జీరో సిటీలో భాగంగా బేగరికంచె గ్రామ పరిధిలో అడ్వాన్స్‌డ్‌ టెక్నాలజీ సెంటర్, మోడ్రన్‌ స్కూల్, ప్రైమరీ హెల్త్‌ సెంటర్, కమ్యూనిటీ సెంటర్ల నిర్మాణాలకు కూడా శంకుస్థాపన చేశారు. అనంతరం నిర్వహించిన బహిరంగ సభలో రేవంత్‌రెడ్డి మాట్లాడారు. నాలుగో నగరంగా బేగరికంచె అభివృద్ధి ‘హైదరాబాద్‌ను నవాబులు, సికింద్రాబాద్‌ను బ్రిటిషర్లు, సైబరాబాద్‌ను చంద్రబాబు, వైఎస్సార్‌లు నిర్మిస్తే.. నాలుగో నగరంగా బేగరికంచెను మేము అభివృద్ధి చేయబోతున్నాం. నాలుగేళ్లలోనే న్యూయార్క్‌ను మించిన నగరంగా ఈ ప్రాంతాన్ని తీర్చిదిద్దుతాం. హెల్త్, స్పోర్ట్స్, ఎడ్యుకేషన్, హాస్పిటాలిటీ టూరిజంగా అభివృద్ధి చేస్తాం. ప్రపంచ స్థాయి యూనివర్సిటీలు, జాతీయ, అంతర్జాతీయ కంపెనీలను ఇక్కడికి తీసుకొస్తాం. నిరుద్యోగ యువతకు శిక్షణ ఇచ్చి ఉపాధి కలి్పస్తాం. తెలంగాణ ఉద్యమమే నిరుద్యోగ సమస్యపై కొనసాగింది. అందులో యువత కీలక పాత్ర పోషించింది.ఏటా లక్ష మంది ఇంజనీరింగ్‌ పట్టభద్రులు బయటికి వస్తున్నా ఆశించిన స్థాయిలో ఉపాధి లభించడం లేదు. తల్లిదండ్రులు కష్టపడి సంపాదించిన డబ్బులు ఖర్చు పెడుతూ అశోక్‌నగర్‌ చౌరస్తాలోని కోచింగ్‌ సెంటర్లలో చేరినా, సరైన నైపుణ్యం లేక ఉద్యోగాలు దొరకడం లేదు. పీజీ, పీహెచ్‌డీ పట్టాలు పొంది కూడా నిరుద్యోగులుగా మిగులుతున్న యువతకు ఈ స్కిల్స్‌ యూనివర్సిటీలో డిప్లొమా, డిగ్రీ సరి్టఫికెట్‌ కోర్సులు అందించడంతో పాటు ఆయా సంస్థల్లో ఉపాధి కలి్పస్తాం. ఇక్కడ అడ్మిషన్‌ పొందితే చాలు.. జాబ్‌ గ్యారంటీ. జాతీయ, అంతర్జాతీయ కంపెనీల అవసరాలకు తగ్గట్లుగా శిక్షణ ఇప్పించి ఉపాధి కలి్పస్తాం..’అని సీఎం చెప్పారు. 3 నెలల్లో ఆర్‌ఆర్‌ఆర్‌ పనులు షురూ ‘రంగారెడ్డి, మహబూబ్‌నగర్‌ జిల్లాల్లో ఒకప్పుడు వేలల్లో ఉన్న భూముల ధరలు ఓఆర్‌ఆర్, ఆర్‌ఆర్‌ఆర్‌ రాకతో ప్రస్తుతం కోట్లకు చేరాయి. మరో మూడు నెలల్లో ఆర్‌ఆర్‌ఆర్‌ పనులను ప్రారంభిస్తాం. నెట్‌ జీరో సిటీ నుంచి ఓఆర్‌ఆర్‌ వరకు 200 అడుగుల ఎలివేటెడ్‌ కారిడార్‌ రోడ్డు సహా మెట్రో రైలు నిర్మాణానికి భూసేకరణ పనులు చేపడతాం. నాగోల్‌ నుంచి ఎల్‌బీనగర్, ఓవైసీ ఆస్పత్రి, చాంద్రాయణగుట్ట, ఎయిర్‌పోర్టు మీదుగా బేగరికంచె వరకు మెట్రో రైలును విస్తరింపజేస్తాం. కడ్తాల్‌ అడవుల్లో నైట్‌ సఫారీ కడ్తాల్, ఆమనగల్లు అడవుల్లో నైట్‌ సఫారీ ఏర్పాటు చేస్తాం. ఈ ప్రాంతాన్ని ప్రపంచ పర్యాటక ప్రదేశంగా తీర్చిదిద్దుతాం. ఫార్మాసిటీ కోసం భూములు త్యాగం చేసిన రైతులు అధైర్యపడొద్దు, కాంగ్రెస్‌ ప్రభుత్వం మీకు అండగా ఉంటుంది. మీ పిల్లలను చదివించి వారికి మంచి భవిష్యత్తును ఇచ్చే బాధ్యత మా ప్రభుత్వమే తీసుకుంటుంది. భవిష్యత్తులో ఈ ప్రాంతంలోనే అన్ని మౌలిక సదుపాయాలు సమకూరుతాయి. విమానం కొనాలన్నా, ఎక్కాలన్నా ఇక్కడి నుంచే అవకాశాలు ఉంటాయి.ఈ ప్రాంతానికి తాగునీరు సహా రోడ్లు, పార్కులు ఇతర మౌలిక సదుపాయాలు కలి్పంచి అత్యాధునిక నగరంగా తీర్చిదిద్దుతాం..’అని రేవంత్‌ చెప్పారు. ‘పండిట్‌ జవహర్‌లాల్‌ నెహ్రూ విద్య, నీటి పారుదలకే ప్రాధాన్యత ఇచ్చారు. ఆయన చొరవతోనే అనేక యూనివర్సిటీలు, ప్రాజెక్టులు వచ్చాయి. శ్రీశైలం, నాగార్జునసాగర్, భాక్రానంగల్‌ తదితర నీటి పారుదల ప్రాజెక్టులు నిర్మించడంతో రైతాంగానికి సాగు నీరు అందుతోంది..’అని అన్నారు. ప్రపంచానికే తలమానికం: డిప్యూటీ సీఎం భట్టి ‘స్కిల్స్‌ యూనివర్సిటీ బిల్లును అసెంబ్లీలో ప్రవేశపెట్టి ఆమోదించడమే కాకుండా శంకుస్థాపన కూడా చేసుకోవడం సువర్ణ అక్షరాలతో లిఖించదగినది. హైదరాబాద్, సికింద్రాబాద్, సైబరాబాద్‌లకు మించి ఈ ప్రాంతాన్ని అభివృద్ధి చేయబోతున్నాం. ఇది ప్రపంచానికే తలమానికం కాబోతోంది. భూములు కోల్పోయిన వారి జీవితాల్లో వెలుగులు నింపాలన్న ఆలోచనతో 600 ఎకరాల్లో అద్భుతమైన కమ్యూనిటీ భవనాలను నిర్మిస్తున్నాం. ప్లాట్లు పొందిన ప్రతి రైతు ఇక్కడే ఇల్లు కట్టుకుని జీవించే విధంగా ఈ ప్రాంతాన్ని తీర్చిదిద్దుతాం. ఇందిరమ్మ పథకం ద్వారా ఇంటిì నిర్మాణానికి ఆర్థిక సహాయం అందిస్తాం..’అని డిప్యూటీ సీఎం భట్టి విక్రమార్క తెలిపారు. మాది చేతల ప్రభుత్వం: మంత్రి కోమటిరెడ్డి తమది మాటల ప్రభుత్వం కాదు..చేతల ప్రభుత్వమని మంత్రి కోమటిరెడ్డి వెంకట్‌రెడ్డి చెప్పారు. గత ప్రభుత్వ హయాంలో వందలకొద్దీ కాలుష్య కారక ఫార్మా కంపెనీలు ఒకే చోట వస్తున్నాయని తెలిసి అప్పట్లో ఎంపీగా ఆందోళన చెందానని అన్నారు. ఫార్మాను రైతులతో పాటు తాను కూడా వ్యతిరేకించానని, అయితే కాంగ్రెస్‌ ప్రభుత్వం అధికారంలోకి వచి్చన తర్వాత ఫార్మాసిటీని రద్దు చేసి దాని స్థానంలో ఫార్మా విలేజ్‌లు చేపట్టామని తెలిపారు. కొత్త ఆలోచన, కొత్త గమ్యం: మంత్రి శ్రీధర్‌బాబు కొత్త ఆలోచన, కొత్త గమ్యం, కొత్త నగరం ఇక్కడి నుంచే ప్రారంభమవుతుందని ఐటీ, పరిశ్రమల శాఖ మంత్రి శ్రీధర్‌బాబు చెప్పారు. ఉద్యోగాలు కావాలని ఉద్యమాలు చేసిన యువత కల నెరవేరబోతోందన్నారు. ఇప్పటికే 40 వేల ఉద్యోగాలు భర్తీ చేశామని, రాష్ట్రంలో మిగిలిన మరో 30 లక్షల మంది నిరుద్యోగులకు ఉపాధి కలి్పంచాలనే ఆలోచనతో స్కిల్స్‌ యూనివర్సిటీని తీసుకొచ్చామని తెలిపారు. కార్యక్రమంలో పలువురు ఎమ్మెల్యేలు, ఎమ్మెల్సీలు, అధికారులు పాల్గొన్నారు.

కందుకూరు: అర్ధరాత్రి ఊరికి వెళ్లేందుకు బస్టాండ్‌లో ఒంటరిగా ఉన్న మహిళపై కన్నేసిన ముగ్గురు యువకులు అఘాయిత్యానికి విఫలయత్నం చేశారు. దిశ యాప్‌లో వచ్చి న ఫిర్యాదుతో స్పందించిన పోలీసులు నిందితులను అదుపులోకి తీసుకున్నారు. వీరిలో ఇద్దరు నేపాల్‌కు చెందిన యువకులు కాగా, మరొకరు పట్టణానికి చెందిన యువకు­డు. మంగళవారం అర్ధరాత్రి నెల్లూరు జిల్లా కందుకూరు పట్టణంలోని మాచవరం రోడ్డులో ఈ ఘటన జరిగింది. డీఎస్పీ రామచంద్ర తెలిపిన వివరాల ప్రకారం.. మాచవరం గ్రామ ఎస్సీ కాలనీకి చెందిన ఓ మహిళ మంగళవారం సాయంత్రం వ్యక్తిగత పనులపై పట్టణానికి వచ్చింది. అయితే ఆల­స్యం కావడంతో రాత్రి 11 గంటల వరకు పట్టణంలోనే ఉండిపోయింది. ఆ సమయంలో తమ ఊరికి వెళ్లే బస్సు కోసం పామూరు బస్టాండ్‌లో వేచి చూస్తోంది. అదే సమయంలో కందుకూరు పట్టణంలోని గూర్ఖాలుగా పనిచేస్తున్న నేపాల్‌కు చెందిన యువకులు కరణ్, జ్యోషిలతో పాటు, పట్టణానికి చెందిన ఆటో డ్రైవర్‌ సయ్యద్‌ ఫిరోజ్‌ ముగ్గురూ మహిళ వద్దకు వచ్చారు. ఆమెను బలవంతంగా ఆటోలో ఎక్కించుకుని మాచవరం వైపు తీసుకెళుతున్నారు. ఎస్‌ఆర్‌ పెట్రోల్‌ బంకు సమీపంలో నిర్మానుష్య ప్రాంతానికి తీసుకెళ్లే ప్రయత్నం చేశారు. దీంతో అప్రమత్త­మైన ఆమె అక్కడి నుంచి తప్పించుకుని పె­ట్రోల్‌ బంకు వద్దకు చేరుకుంది. దీంతో పెట్రోల్‌ బంకులో పనిచేసే యువకుడు దిశ యాప్‌ ద్వారా పోలీసులకు సమాచారం ఇ­చ్చా­డు. వెంటనే ఘటన స్థలానికి చేరుకున్న పోలీసులు మహిళకు రక్షణ కల్పించి యువకుల కోసం గాలించారు. అయితే అప్పటికే వారు పారిపోవడంతో ఆటో ఆధారంగా బుధవారం నిందితులు ముగ్గురినీ అదుపులోకి తీసుకుని కేసు నమోదు చేశారు.

కందుకూరు: నాగుపాముతో సెల్ఫీకి  ప్రయత్నించిన ఓ యువకుడు ఆ పాము కాటేయడంతో ప్రాణాలొదిలాడు. శ్రీపొట్టి శ్రీరాములు నెల్లూరు జిల్లా కందుకూరు పట్టణంలోని కోవూరు రోడ్డులో మంగళవారం రాత్రి ఈ ఘటన చోటుచేసుకోగా.. బుధవారం వెలుగులోకి వచ్చింది. ప్రత్యక్ష సాక్షులు తెలిపిన వివరాల ప్రకారం.. ప్రకాశం జిల్లా తాళ్లూరు మండలం బొద్దికూరపాడు గ్రామానికి చెందిన పోలంరెడ్డి సాయిమణికంఠరెడ్డి (22) కందుకూరులోని జేఏ కాంప్లెక్స్‌లో షాపును అద్దెకు తీసుకుని జ్యూస్‌ షాపు నిర్వహిస్తున్నాడు. మంగళవారం రాత్రి 9.30 గంటల ప్రాంతంలో పాములు పట్టి ఆడించే వెంకటస్వామి అనే వ్యక్తి ఆ షాపు వద్దకు వచ్చాడు. ఆ పామును చూసి సంబరపడిన మణికంఠరెడ్డి పాముతో సెల్ఫీలు తీసుకునేందుకు ప్రయత్నించాడు. ఆ క్రమంలో పామును మణికంఠరెడ్డి మెడలో వేసుకోగా.. ఆ పాము జారి కిందపడిపోయింది. దీంతో మణికంఠరెడ్డి పాము తోక పట్టుకునే ప్రయత్నంలో అది ఒక్కసారిగా వెనక్కి తిరిగి కాటేసింది. వెంటనే స్నేహితులు మణికంఠను ఏరియా వైద్యశాలకు తరలించారు. చికిత్స ప్రారంభించిన కొద్దిసేపటికే మణికంఠ ఆరోగ్య పరిస్థితి విషమంగా మారింది. మెరుగైన చికిత్స కోసం ఒంగోలు తరలిస్తుండగా మార్గం మధ్యలో మృతి చెందాడు. కోరలు లేవని చెప్పడం వల్లే.. పామును ఆడించే వ్యక్తి మద్యం మత్తులో ఉండటంతో మణికంఠరెడ్డి ఫొటోల కోసం అడిగిన వెంటనే పామును ఇచ్చేశాడు. దానికి కోరలు తీసేశానని, అందువల్ల కాటేయదని చెప్పాడు. దీంతో మణికంఠరెడ్డి భయం లేకుండా పామును మెడలో వేసుకుని సరదాగా ఫొటోలు, సెల్ఫీలు తీసుకునే ప్రయత్నం చేశాడు. అది కాటేసిన తరువాత కూడా కోరలు తీసేశానని, కాటేసినా విషం ఎక్కదని దానిని ఆడించే వ్యక్తి చెప్పాడు. అయినా స్నేహితులు ఆస్పత్రికి తీసుకెళ్లగా.. కాటేసిన పాము అత్యంత విషపూరితమైన కింగ్‌ కోబ్రా జాతికి చెందినది కావడంతో ప్రాణాలు కోల్పోవాల్సి వచ్చింది. ఘటనా స్థలాన్ని కందుకూరు సీఐ వెంకట్రావ్, ఎస్సై కిశోర్‌ పరిశీలించారు. పామును తీసుకొచ్చిన వ్యక్తి కోసం గాలిస్తున్నారు. 

సాక్షి, నెల్లూరు: డ్రోన్‌ షాట్ల కోసం ఇరుకు కూడలిలో టీడీపీ బహిరంగ సభను నిర్వహించడంతోపాటు భారీగా ఫ్లెక్సీలు, ద్విచక్ర వాహనాల పార్కింగ్‌తో తోపులాట చోటు చేసుకుని తొక్కిసలాట జరిగినట్లు కందుకూరు ఘటనలో ప్రత్యక్ష సాక్షులు, బాధిత కుటుంబాలు విచారణ కమిషన్‌ ఎదుట వాంగ్మూలం ఇచ్చాయి. గత నెల 28వ తేదీన ‘ఇదేం కర్మ’లో భాగంగా టీడీపీ అధ్యక్షుడు చంద్రబాబు శ్రీపొట్టిశ్రీరాములు నెల్లూరు జిల్లా కందుకూరు ఎన్‌టీఆర్‌ సర్కిల్‌లో నిర్వహించిన కార్యక్రమంలో తొక్కిసలాట జరిగి 8 మంది అమాయకులు ప్రాణాలు కోల్పోగా మరో 8 మంది తీవ్రంగా గాయపడిన సంగతి తెలిసిందే. ఈ ఘటనపై విచారణకు ఏర్పాటైన హైకోర్టు రిటైర్డ్‌ న్యాయమూర్తి జస్టిస్‌ శేషశయనారెడ్డి నేతృత్వంలోని కమిషన్‌ శుక్రవారం సంఘటనా స్థలాన్ని సందర్శించి పలువురి నుంచి వాంగ్మూలం సేకరించింది. తొక్కిసలాట ఎలా జరిగింది? ఆ సమయంలో ఎంత మంది ఉన్నారు? అనే అంశాలపై ఆరా తీసింది.   వాహనం ఎక్కడ నిలిపారు?  తొలుత ఆర్‌ అండ్‌ బీ గెస్ట్‌ హౌస్‌లో అధికారుల నుంచి వివరాలు సేకరించిన అనంతరం కమిషన్‌ ఎన్‌టీఆర్‌ సర్కిల్‌ను పరిశీలించింది. బహిరంగ సభకు ఎక్కడ అనుమతి ఇచ్చారు? చంద్రబాబు వాహనం ఎక్కడ నిలిపారు? అనే అంశాలతోపాటు ప్రమాదం జరిగిన గుండంకట్ట రోడ్డును క్షుణ్నంగా పరిశీలించింది. ఇరువైపులా ఉన్న రెండు డ్రైనే­జీలను పరిశీలించింది. కందుకూరు టీడీపీ ఇన్‌చార్జి ప్రకటించిన పరిహారం అందలేదని బాధిత కుటుంబాలు కమిషన్‌ దృష్టికి తెచ్చా­యి. దాదాపు 27 మంది నుంచి కమిషన్‌ వాంగ్మూలం నమోదు చేసిం­ది.

టీడీపీ అధినేత చంద్రబాబు కందుకూరు, గుంటూరులో నిర్వహించిన సభల్లో జరిగిన తొక్కిసలాట ఘటనలను ఏపీ ప్రభుత్వం సీరియస్‌గా తీసుకుంది. రిటైర్డ్ హైకోర్టు జస్టిస్ బి.శేష శయన రెడ్డి  నేతృత్వంలో విచారణ కమిటిని నియమించింది. చంద్రబాబు నిర్వహించిన సభలో జరిగిన తొక్కిసలాటలో 11 మంది మృతి చెందగా.. ఇందులో కందుకురులో 8 మంది, గుంటూరులో ముగ్గురు మృతి చెందారు. కాగా ఈ ఘటనలపై జస్టిస్ శేషశయన రెడ్డి కమిషన్ విచారించనుంది.

సాక్షి, నెల్లూరు/కందుకూరు: శ్రీ పొట్టి శ్రీరాములు నెల్లూరు జిల్లా కందుకూరులో జరిగిన దర్ఘటన కేసులో పోలీసులు పురోగతి సాధించారు. ప్రధాన నిందితులు ఇద్దరిని హైదరాబాద్‌లో అదుపు­లోకి తీసుకున్నారు. గత నెల 28న ఇదేం ఖర్మ రాష్ట్రా­నికి కార్యక్రమంలో భాగంగా టీడీపీ అధినేత చంద్రబాబునాయుడు కందుకూరులో పర్యటించారు. ఈ సందర్భంగా జరిగిన తోపులాటలో ఎనిమిదిమంది మృతిచెందిన సంగతి తెలిసిందే. ఈ ఘటనపై బాధితుడు పిచ్చయ్య ఇచ్చిన ఫిర్యాదు మేరకు కందుకూరు పట్టణ పోలీసులు కేసు నమోదు చేశారు.  ప్రధాన నిందితులుగా ఉన్న టీడీపీ కందుకూరు నియోజకవర్గ ఇన్‌చార్జి ఇంటూరి నాగేశ్వర­రావు, నెల్లూరు పార్లమెంట్‌ ఉపాధ్యక్షుడు ఇంటూరి రాజేష్‌లను హైదరాబాద్‌లో అదుపులోకి తీసుకుని కందుకూరు తీసుకొచ్చారు.  లోతుగా దర్యాప్తు ఈ ఘటనపై పోలీసులు సీఆర్‌పీసీ 174 సెక్షన్‌ కింద ఎఫ్‌ఐఆర్‌ నమోదు చేసి విచారణ చేపట్టారు. సభ జరిగిన ప్రాంతంలో డ్రోన్‌ ద్వారా షూట్‌ చేసిన వీడియో విజువల్స్‌ సేకరించారు. అనుమతిలేకుండా బైక్‌ ర్యాలీ నిర్వహించేందుకు ప్రోత్సహించి స్థానిక పెట్రోలు బంకు వద్ద బైక్‌లకు పెట్రోలు  పోయించిన వివరాలు తీసుకున్నారు. సభకు జనాలను తరలించేందుకు వాహనాలు సమకూర్చి నగదు పంపిణీ చేసిన వివరాలు, సభకు వచ్చిన వారికి భోజనాలు, డీజే ఏర్పాటు చేసినవారి వివరాలు సేకరించారు.   కార్యక్రమంలో కీలకంగా వ్యవహరించింది ఇంటూరి నాగేశ్వరరావు, ఇంటూరి రాజేష్‌గా గుర్తించారు.  ఎస్సీ, ఎస్టీ అట్రాసిటీ సెక్షన్లు కందుకూరు ఘటనలో మృతిచెందిన వారిలో ఐదుగురు ఎస్సీ, ఎస్టీలున్నారు. దీంతో పోలీసులు అదనంగా సెక్షన్‌ 304(2), ఎస్సీ, ఎస్టీ అట్రాసిటీ యాక్ట్‌ సెక్షన్లను కలిపారు. నిందితులను శుక్రవారం అరెస్టు చేసి న్యాయస్థానంలో ప్రవేశపెట్టనున్నట్లు డీఎస్పీ శ్రీనివాసులు వెల్లడించారు. 

సాక్షి, గుంటూరు: టీడీపీ అధినేత చంద్రబాబునాయుడు ప్రచారపిచ్చికి  పేదప్రజలు నిలువునా ప్రాణాలు కోల్పోతున్నారు. మొన్న కందుకూరు, నిన్న గుంటూరు. కార్యక్రమం ఏదైనా సరే తను పాల్గొన్న వాటికి భారీఎత్తున ప్రజలు వచ్చారని చూపుకునేందుకు, ప్రచారం చేసుకునేందుకు గంటల కొద్దీ ఆలస్యం చేయడం బాబుకు షరా మామూలే. ఆదివారం గుంటూరులో చీరలు, సరుకులు పంచిపెడతామని చెప్పిన సమయానికి ప్రారంభించకపోగా మూడు గంటలు ఆలస్యంగా చంద్రబాబు వేదిక వద్దకు చేరుకున్నారు. గంటాపది నిమిషాలు ఉపన్యాసం చెప్పి నామమాత్రంగా పంపిణీ చేసి వెళ్లిపోయారు. ఆ తరువాత తొక్కిసలాట జరిగి ముగ్గురు ప్రాణాలు కోల్పోవడం, పలువురు గాయాలకు గురై ఆసుపత్రుల పాలైన సంగతి తెలిసిందే. చీరలు, వస్తువులు పంపిణీ చేస్తామని పేదలకు ఆశపెట్టి మధ్యాహ్నం 12 గంటల నుంచే వివిధ ప్రాంతాల నుంచి సమీకరించారు. అసలే జనవరి ఒకటో తేదీ. పండుగ వాతావరణం. ఆ సమయంలో కుటుంబ సభ్యులతో గడపాలని ఎవరైనా కోరుకుంటారు. ఉచితంగా వస్తాయన్న ఉద్దేశంతో అన్ని వయసుల పేద మహిళలు చేరుకున్నారు. అక్కడకు వచ్చిన వారికి కనీసం మంచినీటి వసతి, ఇతరత్రా సరిపడా వసతులు, ఏర్పాట్లు  చేసిన దాఖలాలే లేవని బాధితవర్గాలు ముక్తకంఠంతో వాపోయాయి. చంద్రబాబు వచ్చి ప్రసంగించి తిరిగి వెళ్లిపోయే వరకు వందలు, వేలాది మందిని నాలుగు గంటలకుపైగా కూర్చోపెట్టారు. బాబు వెనుతిరిగేప్పటికీ దాదాపు చీకటి పడుతోంది. గంటల కొద్దీ వేచి ఉన్న వారు ఇళ్లకు త్వరగా తిరిగి వెళ్లాలనే ఆతృతతో ముందుకు చొచ్చుకు రావడంతో తొక్కిసలాట జరిగిందని నిర్వాహకులు చెబుతున్నారు. ఏదైనా భారీ ఎత్తున పంపిణీ కార్యక్రమాన్ని ఏర్పాటు చేసుకున్నప్పడు సమయం చూసుకోవడం నిర్వాహకుల కనీస బాధ్యత. తనది నలభయ్యేళ్ల ఇండస్ట్రీ అని చెప్పుకునే చంద్రబాబు నాయుడు అక్కడి పరిస్థితులను కనీసమైనా అంచనా వేసుకోలేకపోయారా అనేది మొదటి ప్రశ్న. ఇదే ప్రశ్న ఇప్పుడు అన్నివైపుల నుంచి వస్తోంది.    జనం కోసం జాప్యం చేయడం అలవాటే..  ఆలస్యం అమృతం విషం.. అంటారు పెద్దలు. ఆలస్యమయ్యే కొద్దీ అనర్థాలు అధికమనేది దీనర్థం. కానీ టీడీపీ అధినేత చంద్రబాబుకు సంబంధించినంత వరకు ఇది పూర్తిగా భిన్నం. తను పాల్గొనే కార్యక్రమం ఎంత ఆలస్యమైతే అంత మంచిదనేది ఆయన నిశి్చతాభిప్రాయమనేది పరిశీలకుల మాట. అది పాదయాత్ర అయినా, రోడ్‌ షో, బహిరంగ సభ చివరకు పరామర్శ అయినా సరే లేట్‌ అంటే బాబుకు భలే మోజని ఉదహరిస్తున్నారు. మరీ ముఖ్యంగా ప్రజలు పాల్గొనే బహిరంగ సభలను ఆలస్యంగా నిర్వహించడానికి స్లీపర్‌సెల్స్‌గా ప్రత్యేక బృందాలూ ఏర్పాటై అంతర్లీనంగా పనిచేస్తుంటాయనేది పబ్లిక్‌టాక్‌. మరోవైపు లేట్‌ అయిపోతోంది, త్వరపడండనే సన్నాయినొక్కుల ‘హెచ్చరిక’లు మైకుల్లో ధ్వనిస్తుంటాయి. ఇవన్నీ పక్కా ప్లానింగ్‌తోనే అనేది పారీ్టలోని ఆయా జిల్లాల ముఖ్యులకు తెలియని రహస్యాలేమీ కావు. సమయం, సందర్భం ఏదని కూడా చూడకుండా, వాస్తవాలను వెల్లడించకుండా ప్రజలు అడగడుగునా బ్రహ్మరథం పట్టారనే పచ్చ మీడియా పైత్యపురాతలు పలుసార్లు వెగటు పుట్టిస్తుంటాయని టీడీపీ నాయకులే వాపోయి న సందర్భాలు లేకపోలేదు. ఇక టీడీపీ సోషల్‌ మీడి యా బృందాలు హైప్‌ సృష్టించడం పరాకాష్ట. ఇటీవలి కాలంలో జరిగిన కొన్ని కార్యక్రమాలను పరిశీలిస్తే..  ►బుధవారం కందుకూరు కార్యక్రమం 5.15 గంటల నుంచి రాత్రి ఏడు గంటల్లోగా ముగియాలి. కానీ సింగరాయకొండ సెంటర్‌ నుంచి 12 కిలోమీటర్ల దూరంలోని కందుకూరుకు చేరుకోవడానికి మూడు గంటల సమయం పట్టిందని పచ్చ మీడియా విశ్లేషించింది. సభ ముగించాల్సిన సమయానికన్నా మరో అరగంట ఆలస్యంగా ఇరుకు ప్రాంతంలోకి చేరుకోవడం, 8 మంది మృతికి కారణం కావడం చంద్రబాబుకే చెల్లింది.   ►చంద్రబాబు కొవ్వూరులో డిసెంబరు ఒకటో తేదీ రాత్రి 8 గంటలకు జరగాల్సిన సభను 10.30 గంటలకు ప్రారంభించి 50 నిమిషాలపాటు ప్రసంగించారు. రెండో తేదీ నిడదవోలులో మధ్యాహ్నం మూడు గంటలకు బదులు సాయంత్రం 6.30 గంటలకు మొదలెట్టి 40 నిమిషాలు మాట్లాడారు. తాడేపల్లిగూడెంకు మూడన్నర గంటలు ఆలస్యంగా రాత్రి 9.30 గంటలకు చేరుకున్నారు.    ►వర్షాలకు దెబ్బతిన్న పంటల పరిశీలన పేరిట అక్టోబరు 19న పల్నాడు జిల్లాలోని చిలకలూరిపేట, నరసరావుపేట, గురజాల నియోజకవర్గాలకు చంద్రబాబు వెళ్లారు. గురజాల నుంచి సాయంత్రం 6.15 గంటలకు ఉండవల్లికి బయలుదేరతారని షెడ్యూల్‌ ప్రకటించగా రాత్రి 12.15 గంటలకు ఉపన్యాసం ముగించారు. రాత్రి 7–11 గంటల మధ్యలో రెండుచోట్ల పొలాలను సందర్శించడం చంద్రబాబుకే సాధ్యమైంది.   ►నవంబరు 4వ తేదీ ఎన్‌టీఆర్‌ జిల్లాలో బాదుడే బాదుడు కార్యక్రమం పేరిట నందిగామ, జగ్గయ్యపేట నియోజకవర్గాల్లో చంద్రబాబు రోడ్‌షో నిర్వహించారు. ఏడు గంటలకు జరగాల్సిన మీటింగ్‌ రాత్రి 11 గంటలకు జరగడం గమనార్హం.   ►గోదావరి పుష్కరాలలో ప్రచారపిచ్చి పీక్‌కు చేరి 29 మందిని పొట్టనపెట్టుకున్న సంగతి తెలిసిందే. హుద్‌హుద్‌ తుఫాన్‌ సమయంలో విశాఖలో తిషే్టసిన చంద్రబాబు ఫొటోలకు ఫోజులిచ్చే క్రమంలో తెల్లవారుజామున 3, 4 గంటలప్పుడు కూడా తెగతిరిగేశారు. బాబు ప్రచారపిచ్చితో తమను పనులు చేసుకోనివ్వకుండా ఆటంకం కలిగిస్తూ ప్రజలకు ఇబ్బందులు పెంచేస్తున్నారని అధికారులు, సిబ్బంది వాపోయిన సందర్భాలు అనేకం. అంతేనా తుపాన్లను సైతం అడ్డుకుంటానని వల్లెవేయడం బాబు ప్రచారానికి పరాకాష్టగా పరిశీలకులు గుర్తుచేస్తుంటారు. 

సాక్షి ప్రతినిధి, నెల్లూరు/కందుకూరు: శ్రీ పొట్టి శ్రీరాములు నెల్లూరు జిల్లా కందుకూరులో 8 మంది మృతికి కారణమైన చంద్రబాబు నాయుడు రోడ్‌ షోలో నిబంధనలు ఉల్లంఘించారని గుంటూరు రేంజ్‌ డీఐజీ త్రివిక్రమ్‌ వర్మ తెలిపారు. గురువారం ఆయన  నెల్లూరు ఎస్పీ విజయారావుతో కలిసి ఘటన స్థలాన్ని పరిశీలించారు. స్థానిక పోలీసు అధికారులు, సిబ్బందితో సమీక్షించిన అనంతరం నెల్లూరులోని ఉమేష్‌చంద్ర కాన్ఫరెన్స్‌ హాలులో విలేకరులతో మాట్లాడారు. పోలీస్‌ శాఖ ఎన్టీఆర్‌ సర్కిల్‌లో చంద్రబాబు వాహనం నిలిపి మాట్లాడేందుకు అనుమతి ఇచ్చిందన్నారు. కానీ వాహనం మాత్రం సర్కిల్‌ నుంచి దాదాపు 50 మీటర్లు ముందుకు వెళ్లడంతో వెనుక వైపు ఉన్న జనం ఒక్కసారిగా ముందుకు కదిలారని తెలిపారు. వై ఆకారంలో ఉన్న ఆ ప్రాంతంలో రెండు వైపులా జనం ముందుకు చొచ్చుకు రావడంతో ఆ చిన్న ప్రదేశంలో అప్పటికే అక్కడ ఉన్న వారు ఎటూ వెళ్లలేక ప్రమాదంబారిన పడాల్సి వచ్చిందని స్పష్టం చేశారు. పోలీస్‌ శాఖ అనుమతి లేకుండానే శింగరాయకొండ హైవే నుంచి చంద్రబాబు వాహనం ముందు 1,000 – 1,500 బైకులతో ర్యాలీ నిర్వహించారన్నారు. ఒకవైపు పట్టణ సీఐ బైకు ర్యాలీ వద్దని వారిస్తున్నా లెక్క చేయలేదని తెలిపారు. అనుమతి ఇవ్వకపోయినా క్రాకర్స్‌ కాల్చారన్నారు. 7.30 గంటలలోపు సభ ముగించాలని ముందుగా స్థానిక డీఎస్పీ సృష్టం చేసినప్పటికీ, పరిగణనలోకి తీసుకోలేదన్నారు. ఇలా పలు నిబంధనలు ఉల్లంఘించారని తెలిపారు. డీఎస్పీ స్థాయి అధికారి ఈ కేసు దర్యాప్తు చేస్తారని డీఐజీ తెలిపారు.    ఘటనపై కేసు నమోదు  కందుకూరు ఘటనలో గాయపడిన స్థానికుడు పిచ్చయ్య ఇచ్చిన ఫిర్యాదు మేరకు సీఆర్‌పీసీ 174 ప్రకారం పోలీసులు కేసు నమోదు చేశారు. ప్రస్తుతానికి ఎవరినీ నిందితులుగా చేర్చలేదు. పూర్తి విచారణ తర్వాత అన్ని అంశాలు చేరుస్తామని పట్టణ ఎస్‌ఐ కిశోర్‌ తెలిపారు. ఇదిలా ఉండగా, 8 మంది మృతదేహాలకు గురువారం ఉదయం రిమ్స్‌ నుంచి వచ్చిన వైద్యులు వేణుగోపాల్‌రెడ్డి, సురేష్‌ల బృందం పోస్టుమార్టం నిర్వహించింది. ఊపిరి ఆడక పోవడం వల్లే వారంతా మృతి చెందారని నిర్ధారించినట్లు సమాచారం. పంచనామా అనంతరం మృతదేహాలను కుటుంబ సభ్యులకు అందజేశారు.   

కందుకూరు రూరల్‌: కందుకూరులో బుధవారం తన సభలో ఒకరిపై ఒకరు పడిపోయి మృతి చెందిన ఓగూరు గ్రామానికి చెందిన గడ్డం మధుబాబు కుటుంబాన్ని పరామర్శించడానికి వెళ్లిన చంద్రబాబుకు మృతుడి కుమారుడి నుంచి ఊహించని ప్రశ్న ఎదురైంది. గురువారం ఆ కుటుంబానికి ఆర్థిక సా­యం చేసేందుకు చంద్రబాబు ఆ గ్రామంలోని వారి ఇంటికి వెళ్లారు. మృతదేహానికి నివాళులర్పించి.. తల్లి చినకొండమ్మ, భార్య మాధవి, పిల్లలు కార్తికే­య, లికిత, సుశాంత్‌లతో మాట్లాడారు. వారిని ఓ­దా­ర్చుతున్న సమయంలో మధుబాబు కుమారుడు కార్తికేయ.. ‘మాకు డబ్బులు వద్దు.. నాన్నే కావాలి.. డబ్బులు ఎలాగోలా తెచ్చుకుంటాం.. నాకు నాన్న కావాలి’ అని అడిగాడు. ‘అది నా చేతుల్లో లేదు.. భగవంతుడు తీసుకెళ్లాడు. మిమ్మల్ని చదివిస్తాను. మీ బాగోగులను మేం చూసుకుంటాం’ అని చంద్రబాబు చెప్పారు. ‘చివరికి తెలుగుదేశంలో ఇలా కలిసిపోతావనుకోలేదు బిడ్డా’ అంటూ మృత­దేహం వద్ద తల్లి బోరున విలపించింది. మృతుల్లో మరొకరైన కొండముడుసుపాలెంలోని కలవకూరి యానా­ది కుటుంబాన్ని కూడా చంద్రబాబు పరామర్శించారు. యానాది భార్య కాంతమ్మ, కుమారులను ఓదార్చి, తాము అండగా ఉంటామని చెప్పారు. (క్లిక్‌ చేయండి:  కొంప ముంచిన చీప్‌ ట్రిక్స్‌.. ఈ ‘ఖర్మ’కు కర్త, క్రియ చంద్రబాబే!)

చంద్రబాబు సభ వాస్తవంగా జరగాల్సిన కూడలి ప్రదేశం ఎన్టీఆర్‌ సర్కిల్‌. కానీ జనం పలుచగా ఉండడంతో డ్రోన్‌ కెమెరాలతో తీసే ఫొటోలలో బాగా కనిపించడానికి గాను అందరినీ ఎదురుగా ఇరుకుగా ఉన్న రోడ్డులోకి తరలించారు. రోడ్‌షో వాహనాన్నీ అటువైపు మళ్లించారు. ఉక్కిరిబిక్కిరైన జనంలో కొందరు ఆ వాహనాన్ని ఎక్కడానికి ప్రయత్నించారు. సిబ్బంది వారిని కిందకు తోసేశారు. ఆ గందరగోళంలో ఏం జరుగుతుందో తెలియని జనం హాహాకారాలు చేస్తూ ఒక్క సారిగా కిందకు పడిపోయారు. చంద్రబాబు ప్రచార కండూతి అలా 8 మంది ప్రాణాలు బలిగొనడానికి కారణమయ్యింది.   సాక్షి, అమరావతి: చంద్రబాబు ప్రచారార్భాటం మరో­సారి సామాన్యుల ప్రాణాలు హరించింది. లేని ప్రజాదరణను ఉన్నట్టుగా కనికట్టు చేసేందుకు వేసిన చవకబారు ఎత్తుగడ అమాయకుల పాలిట యమపాశమైంది. చిన్నపాటి సభకు వచ్చిన జనాన్ని అంతకంటే ఎక్కువగా చూపించేందుకు చేసిన చీప్‌ ట్రిక్‌ 8 మందిని బలితీసుకుంది. శ్రీపొట్టి శ్రీరాములు నెల్లూరు జిల్లా కందుకూరులో టీడీపీ బహిరంగ సభ నిర్వహించేందుకు తొలుత నిర్ణయించిన విశాలమైన ఎన్టీఆర్‌ సర్కిల్‌కు చేరుకున్న చంద్రబాబుకు అక్కడ జనం పలుచగా కనిపించారు. దీంతో డ్రోన్‌ కెమెరాల షూటింగ్‌లో జనం కిక్కిరిసినట్టు కనిపిస్తారన్న ఎత్తుగడతో బాబు వెంటనే తన వాహనాన్ని ఎదురుగా ఉన్న ఇరుకు ప్రదేశంలోకి పోనిచ్చారు. ఎన్‌టీఆర్‌ సర్కిల్‌ వద్ద ఉన్నవారిని కూడా ఆ ఇరుకు సందు వద్దకు తరలించారు. దీంతో అప్పటికే ఆ ఇరుకు రోడ్డులో ఉన్న వారు ఊపిరాడక ఉక్కిరి బిక్కిరయ్యారు. ఒకరి మీద ఒకరు పడిపోయి, అమా­యక జనం హాహాకారాలు చేస్తుంటే.. చంద్రబాబు వాహనం ఉన్నట్లుండి కొంచెం వెనక్కి వెళ్లింది. అక్కడ మరింత గందరగోళం చోటుచేసుకుంది. ఏం జరుగుతుందో తెలియక ప్రాణ భయంతో ఎవరంతకు వారు అక్కడినుంచి బయట పడాలనే ఆతృతే 8మంది మృతికి కారణమైంది.    ఎన్టీఆర్‌ సర్కిల్‌లో సభ ఎందుకు పెట్టలేదు?  ముందు నిర్ణయించిన షెడ్యూల్‌ ప్రకారం కందుకూరులోని ఎన్టీఆర్‌ సర్కిల్‌లో బుధవారం రాత్రి చంద్రబాబు  బహిరంగ సభ నిర్వహించాలి. ఈ మేరకు చంద్రబాబు ప్రైవేటు కార్యదర్శి ఆర్‌.కృష్ణ కాపర్థి ముందుగా విడుదల చేసిన పర్యటన షెడ్యూల్‌లో స్పష్టంగా తెలిపారు. దాంతో పోలీసులు ఎన్టీఆర్‌ సర్కిల్‌ వద్ద తగిన బందోబస్తు ఏర్పాట్లు చేశారు. అక్కడ నాలుగు వైపులా కాస్త విశాలంగా ఉంటుంది. దాంతో బహిరంగ సభ నిర్వహణ సజావుగా సాగుతుందని అంతా భావించారు. కందుకూరు­లోని టీడీపీ శ్రేణులు ముందుగానే ఎన్టీఆర్‌ సర్కిల్‌కు చేరుకున్నాయి. కానీ తన ప్రచార వాహనంలో బుధవారం రాత్రి 7.30 గంటలకు కందుకూరు ఎన్టీఆర్‌ సర్కిల్‌కు చేరుకున్న చంద్రబాబు.. అక్కడ జనం తక్కువగా ఉన్నట్టు గుర్తించారు. కందుకూరులో జనం ఎక్కువగా రారని టీడీపీకి ముందుగానే తెలుసు. అందుకే ఇతర ప్రాంతాల నుంచి తరలించిన జనం చంద్రబాబు వాహనాన్ని అనుసరిస్తూ వచ్చేలా చేశారు. ఎన్టీఆర్‌ సర్కిల్‌లో సభ నిర్వహిస్తే జనం తక్కువగా ఉన్నారనే విషయం వెల్లడవుతుందని చంద్రబాబు భావించారు. అక్కడకు 50 మీటర్ల దూరంలో రోడ్డు కాస్త ఇరుకుగా ఉన్నట్టు గమనించిన చంద్రబాబు.. తన వాహనాన్ని అక్కడకు తీసుకువెళ్లాలని చివరి నిమిషంలో డ్రైవర్‌ను ఆదేశించినట్టు సమాచారం. దాంతో ఎన్టీఆర్‌ సర్కిల్‌లో నిలపాల్సిన వాహనాన్ని డ్రైవర్‌ మరో 50 మీటర్లు ముందుకు తీసుకువెళ్లి ఇరుకుగా ఉన్న రోడ్డులో నిలిపారు.   పూల మాల వేసేందుకు నిలిపినా సరిపోయేది  ముందుగా నిర్ణయించిన షెడ్యూల్‌ ప్రకారం ఎన్టీఆర్‌ సర్కిల్‌లో ఉన్న ఎన్టీఆర్‌ విగ్రహానికి చంద్రబాబు పూల మాల వేసి నివాళి అర్పించాలి. విగ్రహం వద్ద వాహనం నిలిపి ఉంటే అక్కడ ఉన్న జనంతోపాటు వాహనం వెంట ఇతర ప్రాంతాల నుంచి వచ్చిన జనం నలువైపులా సర్దుకునేందుకు అవకాశం ఉండేది. అనంతరం చంద్రబాబు వాహనాన్ని ఎదురుగా 50 మీటర్లు ముందుకు పోనిచ్చినా సరిపోయేది. అప్పటికే ఎక్కడికక్కడ సర్దుకున్న జనం.. ఉన్న చోటు నుంచే చంద్రబాబు ప్రసంగాన్ని వినేవారు. కానీ అలా చేస్తే వాహనం చుట్టూ జనం భారీగా ఉన్నట్టు కనిపించరని చంద్రబాబు భావించారు. అందుకే ఎన్టీఆర్‌ విగ్రహానికి పూల మాల వేయడాన్ని కూడా రద్దు చేసుకుని, తన వాహనాన్ని ముందుకు పోనిచ్చారు.   మిగిలింది 38 అడుగులే   నిజానికి చంద్రబాబు వాహనం నిలిపింది 100 అడుగుల రోడ్డు. కానీ ఆయన పర్యటన కోసం టీడీపీ నేతలు నిబంధనలకు విరుద్ధంగా ఫ్లెక్సీలతో ఆ రోడ్డును ఆక్రమించేశారు. రోడ్డుకు అటూ 30 అడుగులు, ఇటు 30 అడుగుల మేర ఫ్లెక్సీలు ఏర్పాటు చేశారు. వాటితోపాటు పెద్ద పెద్ద సౌండ్‌ బాక్సులు పెట్టారు. దాంతో రాకపోకలకు కేవలం 38 అడుగుల రోడ్డే మిగిలింది. (కందుకూరు మున్సిపల్‌ అధికారులు గురువారం ఆ రోడ్డులో కొలతలు కొలిచారు. ఫ్లెక్సీలు, సౌండ్‌ బాక్సులు పోగా మిగిలింది 38 అడుగుల రోడ్డే) అందులో కూడా టీడీపీ నేతలు అడ్డదిడ్డంగా బైకులు పార్క్‌ చేశారు. అలాంటి ప్రాంతంలోకి చంద్రబాబు వాహనం వచ్చి నిలుచొంది. చంద్రబాబు వాహనం ఎన్టీఆర్‌ సర్కిల్‌ను దాటి ఎదురుగా ప్రయాణించడంతో ఆ ప్రదేశంలో ఉన్న జనం వాహనంతోపాటు ముందుకు కదిలారు. అప్పటికే అక్కడ ఉన్న జనంతోపాటు వాహనాన్ని అనుసరించి వచ్చిన వారు, వెనుక ఉన్న వారితో ఆ ప్రాంతం ఇబ్బందికరంగా మారింది. ఘటన సమయంలో ప్రాణ భయంతో చంద్రబాబు వాహనం పైకి ఎక్కడానికి ప్రయత్నిస్తున్న జనం  దుర్ఘటనకు దారితీసిందిలా.. కేవలం 38 అడుగుల రోడ్డులో చంద్రబాబు వాహ­నం నిలపడంతో అప్పటికే ఉన్న జనానికి వాహనంతో పాటు వచ్చిన వారు తోడయ్యారు. ఒక్క­సారిగా జనం గుమిగూడటంతో ఊపిరి తీసుకునేందుకు కూడా సాధ్యం కాక హాహాకారాలు చేశా­రు. ప్రాణభయంతో అక్కడి నుంచి బయట పడ­టానికి ఎవరికివారు యత్నించారు. ఇందులో భాగంగా కొందరు చంద్రబాబు వాహనం ఎక్కేందుకు యత్నించగా, చంద్రబాబు వ్యక్తిగత సిబ్బంది అనుమతించలేదు. పరిస్థితిని గమనించి, చంద్రబాబు తక్షణమే స్పందించనూ లేదు. పైగా డ్రైవర్‌ వాహనాన్ని కొంచెం వెనక్కు జరపడంతో వెనుక ఉన్న వారు బెంబేలెత్తిపోయారు. ఏం జరుగుతుందో తెలీక భయంతో కేకలు వేశారు. కందుకూరులో చంద్రబాబు సభ నిర్వహించాల్సిన ఎన్టీఆర్‌ సర్కిల్‌(కింద) చివరి నిముషంలో 50 అడుగులు ముందుకు వెళ్ళి సభ నిర్వహించిన ప్రదేశం(పైన)  ప్రా­ణా­లు కాపాడుకునేందుకు ఒక్కసారిగా వారూ వేగంగా వెనక్కి జరగడంతో ఒకరిపై ఒకరు పడిపోయారు. కొందరు ఆ ప్రదేశంలో పార్క్‌ చేసిన బైకులపై పడ్డారు. దీంతో జనం ఊపిరి ఆడక ఉక్కిరిబిక్కిరవుతూ సమీపంలోని గుండంకట్ట వీధిలోకి చేరారు. ఆ వీధి కేవలం 15 అడుగుల వెడల్పు మాత్రమే ఉంది. పక్కనే కాలువ ఉంది. చంద్రబాబు వాహనం చుట్టూ ఉన్న జనం అప్పటికే ఆ వీధిలోకి చొచ్చుకు రావడంతో పలువురు కాలువలో పడిపోయారు. మరికొందరు నలిగిపోయారు. దీంతో మొత్తంగా 8 మంది మృత్యువాత పడగా, మరో 8 మంది తీవ్రంగా గాయపడ్డారు. నాడు గోదావరి పుష్కరాల్లో 29 మంది దుర్మరణం  గతంలో చంద్రబాబు ముఖ్యమంత్రిగా ఉన్నప్పుడు రాజమహేంద్రవరంలో గోదావరి పుష్క­రాల సమయంలోనూ అదే రీతిలో వ్యవహరించి 29 మంది మృతికి కారణమయ్యారు. తాను పుష్కర స్నానం చేస్తు­న్న­ప్పుడు చుట్టూ భారీగా జనం ఉన్న­ట్టుగా వీడియోలు చిత్రీకరించాలని ఆయన భావించారు. అందుకోసం సినీ దర్శకుడు బోయపాటి నేతృత్వంలో ఏకంగా సినిమా షూటింగ్‌ స్థాయిలో హడావుడి చేశారు. అంత భారీ స్థాయిలో జనం రావడం కష్టమని భావించి, పుష్కర ఘాట్ల గేట్లను కొన్ని గంటలపాటు మూసి వేశారు. దాంతో గేట్ల వద్దకు జనం భారీగా చేరుకోగానే, ఒక్కసారిగా గేట్లు తీశారు. వారంతా నీటిలో స్నానం చేయడానికి పరుగెత్తి వస్తుంటే.. తనను చూసేందుకే వారు అలా వస్తున్నారనేలా చిత్రీకరించాలన్నది బాబు ఎత్తుగడ. దాంతో తొక్కిస­లాట జరిగి 29 మంది దుర్మరణం చెందారు.