ఒక మ్యూచువల్‌ ఫండ్‌ను దీర్ఘకాలానికి ఎంపిక చేసుకునే సమయంలో గత పనితీరుపై ఆధారపకుండా.. చూడాల్సిన ఇతర అంశాలు ఏవి? – వినుత్‌ రాయ్‌ కేవలం గత పనితీరుపైనే ఆధారపడడం తప్పుదోవలో పయనించడమే అవుతుంది. ఏదైనా ఒక మ్యూచువల్‌ ఫండ్‌ 100 శాతం రాబడులు ఇచి్చందంటే, అంతకంటే ముందుగానే ఆ పథకంలో ఇన్వెస్ట్‌ చేసిన వారికి అది విలువ సమకూర్చినట్టు అవుతుంది. కొత్తగా అదే పథకంలో ఇన్వెస్ట్‌ చేసే వారికి గత పనితీరు కేవలం ఒక సూచికే అవుతుంది. అంతేకానీ భవిష్యత్‌ రాబడులకు హామీ కాదు. ఒక మ్యూచువల్‌ ఫండ్‌ గత పనితీరు అన్నది మార్కెట్ల ఎత్తు, పల్లాల్లో ఎలా పనిచేసిందో తెలుసుకునేందుకు ఉపకరిస్తుంది.కొన్ని ఫండ్స్‌ నష్టాల నుంచి కోలుకోవడానికి చాలా సమయం పట్టొచ్చు. కొన్ని వేగంగా కోలుకుంటాయి. దీనికి కారణం అంతర్గతంగా అవి పెట్టుబడులకు ఎంపిక చేసుకున్న కంపెనీలే. కనుక ఒక ఫండ్‌ను ఎంపిక చేసుకునే ముందు.. పోటీ పథకాలతో పోల్చి చూస్తే పనితీరు ఎలా ఉందన్నది విశ్లేషించాలి. అదే విభాగం సగటు పనితీరు, ఆ విభాగంలోని పోటీ పథకాలతో పోల్చితే మధ్య, దీర్ఘకాలంలో రాబడులు ఎలా ఉన్నాయన్నది పరిశీలించాలి.స్వల్పకాల రాబడులు అంత ఉపయోకరం కాదు. నిర్ణీత కాలంలో పథకంలో రాబడులు స్థిరంగా ఉన్నాయా? అని కూడా చూడాలి. బుల్‌ మార్కెట్లలో నిదానంగా ర్యాలీ చేసి, మార్కెట్‌ కరెక్షన్లలో తక్కువ నష్టాలకు పరిమితం చేసే విధంగా పథకం సామర్థ్యాలు ఉండాలి. అలాంటప్పుడు ఆ పథకం రాబడుల పరంగా నిరాశ మిగల్చదు. ఫండ్‌ మేనేజర్‌ ట్రాక్‌ రికార్డు (పనితీరు) కూడా పరిశీలించాలి.పథకం పనితీరు ఫండ్‌ మేనేజర్‌ ప్రతిభ వల్లే అయితే, సదరు ఫండ్‌ మేనేజర్‌ రాజీనామా చేసి వెళ్లిపోతే అది ప్రతికూలంగా మారొచ్చు. అంతేకాదు ఇన్వెస్టర్‌ వ్యవహార శైలి కూడా దీర్ఘకాల రాబడులను ప్రభావితం చేస్తుంది. మార్కెట్ల పతనాల్లో ఆందోళన చెందకుండా, పెట్టుబడుల విధానానికి కట్టుబడి ఉండాలి. మార్కెట్‌ ఉత్థాన పతనాల్లోనూ క్రమం తప్పకుండా ఇన్వెస్ట్‌ చేయాలి. ఇలా చేస్తే మంచి ఫలితాలు వస్తాయి. గృహ రుణం, కారు రుణం, క్రెడిట్‌ కార్డు రుణాలున్నాయి. వీటి కోసం ప్రతి నెలా రూ.40,000 వరకు చెల్లించాల్సి వస్తోంది. ఈ రుణాలను తీర్చివేసే మార్గాన్ని చూపగలరు? – ప్రేమ్‌ నాయక్‌ రుణాలు భవిష్యత్‌ ఆదాయాన్ని హరించివేస్తాయి. కనుక వీలైనంత వెంటనే వాటిని వదిలించుకోవాలి. ముఖ్యంగా వీటిల్లో ఆర్థిక భారంగా మారిన రుణాన్ని మొదట తీర్చివేయాలి. ముందుగా క్రెడిట్‌ కార్డు రుణంతో మొదలు పెట్టండి. అధిక వడ్డీ రేటుతో ఖరీదైన రుణం ఇది. అవసరమైతే మీ పెట్టుబడుల్లో కొన్నింటిని ఉపసంహరించుకుని క్రెడిట్‌కార్డు రుణం తీర్చివేయాలి. లేదంటే పార్ట్‌టైమ్‌ ఉద్యోగం చేసి అయినా దీన్నుంచి బయటపడే మార్గాన్ని చూడండి. క్రెడిట్‌ కార్డ్‌ రుణం చెల్లించిన అనంతరం కారు రుణాన్ని తీర్చివేయడంపై దృష్టి పెట్టండి. ఎందుకంటే వాహనాల విలువ స్వల్పకాలంలోనే తగ్గిపోతుంది. కనుక వీలైనంత ముందుగా ఈ రుణాన్ని కూడా తీర్చివేయాలి. గృహ రుణాన్ని దీర్ఘకాలం పాటు కొనసాగించుకోవచ్చు. ఎందుకంటే దీర్ఘకాలంలో విలువ పెరిగే ఆస్తి ఇది. పైగా గృహ రుణాలపై అన్నింటికంటే తక్కువ వడ్డీ రేటుతోపాటు పన్ను ప్రయోజనాలు లభిస్తాయి.

నేను స్వయం ఉపాధిపై ఆధారపడి ఉన్నాను. రూ.4 లక్షలకు బేసిక్‌ హెల్త్‌ ఇన్సూరెన్స్‌ ప్లాన్‌ ఉంది. అదే బీమా సంస్థ నుంచి రూ.6 లక్షలకు సూపర్‌ టాపప్‌ ప్లాన్‌ కూడా ఉంది. అంటే నా ముగ్గురు సభ్యుల కుటుంబానికి మొత్తం రూ.10 లక్షల కవరేజీ ప్రస్తుతానికి ఉంది. రూ.10 లక్షల డిడక్టబుల్‌తో రూ.40 లక్షల సూపర్‌ టాపప్‌ ప్లాన్‌ను మరో బీమా సంస్థ ఆఫర్‌ చేస్తోంది. దాని ప్రీమియం చాలా తక్కువ. ఇప్పుడు రూ.40 లక్షలకు సూపర్‌ టాపప్‌ తీసుకుంటే మొత్తం కవరేజీ రూ.50 లక్షలకు పెరుగుతుందా? నేను రెండు సూపర్‌ టాపప్‌ ప్లాన్లను కలిగి ఉండొచ్చా?     – తన్మోయ్‌ పంజా  టాపప్‌ హెల్త్‌ ఇన్సూరెన్స్‌ ప్లాన్‌ అనేది డిడక్టబుల్‌కు పైన ఉన్న మొత్తానికి బీమా కవరేజీని ఇస్తుంది. డిడక్టబుల్‌ అంటే, అంత మొత్తాన్ని పాలసీదారు భరించాల్సి ఉంటుంది. అంతకు మించిన మొత్తానికి సూపర్‌ టాపప్‌ కవరేజీ అమల్లోకి వస్తుంది. సూపర్‌ టాపప్‌ ప్లాన్‌ తీసుకునేందుకు బేసిక్‌ కవరేజీ ఉండాలనేమీ లేదు. బేసిక్‌ టాపప్‌ ప్లాన్‌లో డిడక్టబుల్‌ అనేది హాస్పిటల్‌లో చేరిన ప్రతి సందర్భంలోనూ అమలవుతుంది. కానీ, సూపర్‌ టాపప్‌ ప్లాన్‌లో ఒక ఏడాది మొత్తం మీద అయిన హాస్పిటల్‌ ఖర్చులకు డిడక్టబుల్‌ అమలవుతుంది. కనుక టాపప్‌ ప్లాన్లతో పోలిస్తే సూపర్‌ టాపప్‌ ప్లాన్‌ మరింత ప్రయోజనకరం అని చెప్పుకోవాలి. ఒకే సమయంలో రెండు సూపర్‌ టాపప్‌ ప్లాన్లను కలిగి ఉండే విషయంలో ఎలాంటి నియంత్రణలు లేవు. ప్రస్తుతం ఉన్న ప్లాన్‌లో లేని మెరుగైన సదుపాయాలను కొత్త సూపర్‌ టాపప్‌ ప్లాన్‌ ఆఫర్‌ చేస్తుంటే నిస్సందేహంగా తీసుకోవచ్చు. బేసిక్‌ పాలసీలో లేని రక్షణను సూపర్‌ టాపప్‌ ప్లాన్‌ ఇస్తుంటే తీసుకోవచ్చు. బేసిక్‌ ప్లాన్‌ రూ.2 లక్షల కవరేజీని ఇస్తుంటే, రూ.2 లక్షల డిడక్టబుల్‌తో రూ.5 లక్షల సూపర్‌ టాపప్‌ ప్లాన్‌ ఉంటే.. ఇప్పుడు రూ.5 లక్షల డిడక్టబుల్‌తో రూ.10 లక్షలకు మరో సూపర్‌ టాపప్‌ ప్లాన్‌ తీసుకోవాలని అనుకుంటే తీసుకోవచ్చు. ఉదాహరణకు మీ ఆస్పత్రి బిల్లు రూ.18 లక్షలు అయిందనుకోండి. అప్పుడు బేసిక్‌ పాలసీ నుంచి రూ.2 లక్షలు, మొదటి సూపర్‌ టాపప్‌ నుంచి రూ.5 లక్షలు చెల్లింపులు లభిస్తాయి. అప్పుడు మరో రూ.11 లక్షలు మిగిలి ఉంటుంది. రెండో సూపర్‌ టాపప్‌ ప్లాన్‌ నుంచి రూ.10 లక్షలు చెల్లింపులు వస్తాయి. మిగిలిన రూ.లక్షను పాలసీదారుడు భరించాల్సి ఉంటుంది. అయితే, ఎక్కువ సూపర్‌ టాపప్‌ ప్లాన్లు ఉంటే బీమా ప్రక్రియ సంక్లిష్టంగా మారుతుంది. బేసిక్‌ పాలసీకి అదనంగా ఒక సూపర్‌ టాపప్‌ ప్లాన్‌ను కలిగి ఉండడం సూచనీయం. మూడు బీ మా సంస్థల వద్ద క్లెయిమ్‌ కోసం చేయాల్సిన పేపర్‌ పని ప్రతిబంధకంగా మారుతుంది. కనుక కవరేజీని సాధ్యమైనంత సులభంగా ఉంచుకోవాలి.    నేను 1994లో మోర్గాన్‌ స్టాన్లీ గ్రోత్‌ ఫండ్‌లో ఇన్వెస్ట్‌ చేశాను. అందుకు సంబంధించి భౌతిక సర్టిఫికెట్‌ నా వద్ద ఉంది. ఈ మొత్తాన్ని ఎలా ఉపసంహరించుకోవాలి? వీటి విలువ ఎంత?     – వచన్‌  2014లో మోర్గాన్‌ స్టాన్లీ భారత్‌ మార్కెట్‌ నుంచి వెళ్లిపోయింది. మోర్గాన్‌ స్టాన్లీ నిర్వహణలోని ఎనిమిది మ్యూచువల్‌ ఫండ్‌ పథకాలను హెచ్‌డీఎఫ్‌సీ మ్యూచువల్‌ ఫండ్‌ కొనుగోలు చేసింది. మోర్గాన్‌ స్టాన్లీ గ్రోత్‌ ఫండ్‌ హెచ్‌డీఎఫ్‌సీ లార్జ్‌క్యాప్‌ ఫండ్‌లో విలీనం అయింది. హెచ్‌డీఎఫ్‌సీ లార్జ్‌ క్యాప్‌ ఫండ్‌ 2009 వరకు హెచ్‌డీఎఫ్‌సీ లార్జ్‌ అండ్‌ మిడ్‌క్యాప్‌ ఫండ్‌గా కొనసాగింది. 15 ఏళ్ల లాకిన్‌ పీరియడ్‌ ముగిసిన అనంతరం ఇది ఓపెన్‌ ఎండెడ్‌ పథకంగా మార్పు చెందింది. ఇప్పుడు మీ పెట్టుబడులను వెనక్కి తీసుకోవాలని అనుకుంటే, హెచ్‌డీఎఫ్‌సీ అస్సె ట్‌ మేనేజ్‌మెంట్‌ కంపెనీని సంప్రదించాల్సి ఉంటుంది. మోర్గాన్‌ స్టాన్లీ గ్రోత్‌ ఫండ్‌లో మీ పెట్టుబడులకు సంబంధించి ఆధారాలను సమరి్పంచాలి. అ ప్పుడు మీ పెట్టుబడులను వెనక్కి తీసుకునే విషయమైన వారి నుంచి తగిన సహకారం లభిస్తుంది.   సమాధానాలు ధీరేంద్ర కుమార్‌, సీఈవో, వ్యాల్యూ రీసెర్చ్‌ 

నా వయసు 59 ఏళ్లు. నేను పదవీ విరమణ తీసుకున్నప్పటికీ, నా పీఎఫ్‌ ఖాతాలో ఉన్న బ్యాలన్స్‌ను ఉపసంహరించుకోలేదు. అయినప్పటికీ నా పీఎఫ్‌ బ్యాలన్స్‌పై వడ్డీ జమ అవుతూనే ఉంటుందా?  – నానీ పార్థీ పదవీ విరమణ అనంతరం, పీఎఫ్‌ ఖాతాకు వరుసగా మూడేళ్ల పాటు ఎలాంటి చందాలు జమ అవ్వకపోతే, అప్పుడు ఆ ఖాతా ఇన్‌ఆపరేటివ్‌గా మారిపోతుంది. అక్కడి నుంచి ఇక వడ్డీ జమ అవ్వడం కూడా నిలిచిపోతుంది. అంటే పదవీ విరమరణ తర్వాత మూడేళ్ల పాటే వడ్డీ జమ అవుతుంది. పదవీ విరమణ అనంతరం భవిష్యనిధి ఖాతాలోని బ్యాలన్స్‌ను పూర్తిగా వెనక్కి తీసుకోవచ్చు. ఐదేళ్లు సర్వీసు నిండిన తర్వాత ఉపసంహరించుకునే పీఎఫ్‌ బ్యాలన్స్‌ మొత్తంపై పన్ను ఉండకపోవడం అదనపు ప్రయోజనం. మరొక ముఖ్య విషయం ఏమిటంటే, రిటైర్మెంట్‌ తర్వాత పీఎఫ్‌ బ్యాలన్స్‌ను వెనక్కి తీసుకోకపోతే, జమయ్యే వడ్డీ మొత్తం పన్ను పరిధిలోకి వస్తుంది. కనుక పీఎఫ్‌ బ్యాలన్స్‌ను ఉపసంహరించుకుని, మీ లక్ష్యాలు, రాబడుల ఆకాంక్షలకు అనుగుణంగా వివిధ సాధనాల్లో ఇన్వెస్ట్‌ చేసుకోవడం మంచిది. ఏదైనా ఒక కంపెనీ షేరు ముఖ విలువ రూపాయి ఉంటే దాన్ని ఎలా విభజిస్తారు? వారి ముందున్న ఆప్షన్లు ఏంటి?  – అరుణ్‌ పాలస్‌   మన దేశంలో ఒక షేరు కనిష్ట ముఖ విలువ రూ.1గా ఉంది. దీని ప్రకారం ఒక షేరు ముఖ విలువ రూపాయిగా ఉంటే, దాన్ని విభజించడానికి అవకాశం ఉండదు. ఒక కంపెనీ ముఖ విలువను విభజించడం వెనుక ఉద్దేశ్యం ఆయా కంపెనీ షేర్ల లిక్విడిటీని (అందుబాటు) పెంచడమే. షేరు ధరను విభజించడం వల్ల మూలధనంలో ఎలాంటి మార్పు ఉండదు. కనుక ఒక ఇన్వెస్టర్‌గా ముఖ విలువను విభజించే విషయంలో పొందే ప్రయోజనం ఏమీ ఉండదు. అలాగే, నష్టపోయేదీ ఉండదు. ఉదాహరణకు ఎక్స్‌వైజెడ్‌ అనే కంపెనీ షేరు మార్కెట్‌ ధర రూ.100 ఉందనుకుందాం. మార్కెట్లో 50,000 వేల షేర్లు ఉన్నాయి. మిస్టర్‌ ఏ రూ.5,000 పెట్టి ఈ కంపెనీలో 50 షేర్లను కొనుగోలు చేశాడు. ఆ తర్వాత కంపెనీ 5:1 స్టాక్‌ స్లి్పట్‌ను ప్రకటించింది. అంటే ప్రతి ఒక్క షేరు ఐదు షేర్లుగా విభజించనున్నారు. విభజన తర్వాత మిస్టర్‌ ఏ వద్దనున్న 50 షేర్ల స్థానంలో 250 షేర్లు జమ అవుతాయి. అప్పటి వరకు రూ.10గా ఉన్న ముఖ విలువ రూ.2గా మారుతుంది. (ఇదీ చదవండి: 7లక్షలు అప్పు చేసి కారు కొన్నా.. లోన్‌ త‍్వరగా తీర్చేందుకు ఏమైనా ఫండ్స్‌ ఉన్నాయా?) విభజన తర్వాత షేరు మార్కెట్‌ ధర కూడా రూ.100 నుంచి రూ.20కు సవరణ అవుతుంది. 250 షేర్లు, రూ.20 చొప్పున వాటి మొత్తం మార్కెట్‌ విలువలో ఎలాంటి వ్యత్యాసం ఉండదు. ఒక కంపెనీ షేరు ముఖ విలువను విభజిస్తుందా, లేదా? అన్నది ముఖ్యం కాదు. స్టాక్‌ ముఖ విలువ విభజన అంచనా ఆధారంగా పెట్టుబడులు పెట్టకూడదు. స్టాక్స్‌లో పెట్టుబడులు పెట్టేందుకు తగినంత సమయం, కృషి అవసరం. ఒక కంపెనీలో పెట్టుబడి పెట్టడానికి ముందు వ్యాపార నమూనా, ఆర్థిక మూలాలు, యాజమాన్యం సమర్థత, కార్యకలాపాలను నైతికంగా నిర్వహిస్తున్నారా? వృద్ధి అవకాశాలు, వ్యాల్యూషన్‌ సహేతుక స్థాయిలోనే ఉందా? పోటీ కంపెనీలతో పోలిస్తే మెరుగైన పనితీరు చూపించగలదా? తదితర అంశాల ఆధారంగానే నిర్ణయం తీసుకోవడం సూచనీయం. ధీరేంద్ర కుమార్‌ - సీఈవో, వ్యాల్యూ రీసెర్చ్‌

నేను ఒక కంపెనీలో ఐదేళ్ల సర్వీసు పూర్తి చేసుకున్నాను. నా సోదరి వివాహం కోసం నా పీఎఫ్‌ ఫండ్‌ను వాడుకోవాలని అనుకుంటున్నాను. నా సందేహం ఏమిటంటే.. నేను కరోనా లాక్‌డౌన్‌ల సమయంలో ఒకసారి పాక్షికంగా ఉపసంహరించుకున్నాను. కనుక మరోసారి పీఎఫ్‌ ఉపసంహరణకు దరఖాస్తు చేసుకోవచ్చా? పన్ను పడుతుందా?  – వేణు ఉదత్‌  ప్రావిడెంట్‌ ఫండ్‌ నుంచి రెండు సార్లు ఉపసంహరించుకోవచ్చు. పన్నుల అంశానికంటే ముందు తెలుసుకోవాల్సిన ఇతర అంశాలు కూడా ఉన్నాయి. పలు సందర్భాల్లో పీఎఫ్‌ నుంచి ఉపసంహరణకు అనుమతి ఉంటుంది. ఇల్లు లేదా ఫ్లాట్‌ కొనుగోలు లేదా నిర్మాణం, రుణాల చెల్లింపు, కొన్ని వ్యాధులకు సంబంధించి చికిత్సా వ్యయాల చెల్లింపులకు, వివాహం లేదా పిల్లల ఉన్నత విద్య, రిటైర్మెంట్‌కు ఏడాది ముందు సందర్భాల్లో ఉపసంహరించుకోవచ్చు. (ఇదీ చదవండి: పెరగనున్న వడ్డీ రేట్లు.. మరో పావు శాతం రెపో పెంపు ఖాయం!) ఈ ప్రత్యేక సందర్భాలకు సంబంధించి ఈపీఎఫ్‌వో సభ్యుడు నిర్ణీత సర్వీసు కాలాన్ని పూర్తి చేసుకోవాల్సి ఉంటుంది. ఉదాహరణకు సభ్యుడు/సభ్యురాలి వివాహం కోసం లేదంటే కుమార్తె, కుమారుడు, సోదరుడు లేదా సోదరి వివాహం కోసం ఉపసంహరించుకోవాలంటే కనీసం ఏడేళ్ల సర్వీస్‌ పూర్తి చేసుకోవాలి. ఉద్యోగి వాటా కింద జమ అయి, దానికి వడ్డీ చేరగా సమకూరిన మొత్తం నుంచి 50 శాతాన్ని వెనక్కి తీసుకోవచ్చు. ఈ అవసరాల కోసం మూడు సార్లు ఉపసంహరణకు అనుమతిస్తారు. మీరు ఐదేళ్ల సర్వీసు పూర్తి చేసుకున్నారు. కనుక మీరు చేసే ఉపసంహరణలపై పన్ను ఉండదు. మీ సోదరి వివాహం కోసం ఉపసంహరించుకోవాలని అనుకుంటున్నారు. కనుక కనీసం ఏడేళ్ల సర్వీసు ఉండాలి. మీకు ఐదేళ్ల సర్వీసు మాత్రమే ఉంది. ఏడేళ్లు పూర్తి కాకుండా దరఖాస్తు చేసుకుంటే తిరస్కరణకు గురవుతుంది. గతంలో మీరు కోవిడ్‌ సమయంలో చేసిన ఉపసంహరణ ప్రభావం తాజా ఉపసంహరణలపై ఉండదు. ఈఎల్‌ఎస్‌ఎస్‌ ఫండ్‌ను ఒక సంస్థ నుంచి ఇంకో సంస్థకు మార్చుకోవచ్చా..?     – రాజేష్‌ షా  ఈక్విటీ లింక్డ్‌ సేవింగ్స్‌ స్కీమ్‌ (ఈఎల్‌ఎస్‌ఎస్‌) ఫండ్స్‌ మూడేళ్ల తప్పనిసరి లాకిన్‌ పీరియడ్‌తో వస్తాయి. పెట్టుబడి పెట్టిన తేదీ నుంచి ఈ లాకిన్‌ పీరియడ్‌ అమల్లోకి వస్తుంది. ఒక సంస్థ నుంచి ఈఎల్‌ఎస్‌ఎస్‌ పెట్టుబడిని మరోసంస్థకు చెందిన ఈఎల్‌ఎస్‌ఎస్‌ ఫండ్‌లోకి మార్చుకోవాలంటే ముందుగా ఉపసంహరించుకోవాలి. మూడేళ్ల లాకిన్‌ పీరియడ్‌ వరకు ఉపసంహరించుకోలేరు. (ఇదీ చదవండి: ఇంట్లో ఎక్కువ డబ్బు పెట్టుకుంటున్నారా.. ఏమవుతుందో తెలుసా?) మూడేళ్లు నిండిన తర్వాత అప్పుడు మీ పెట్టుబడులు అన్నింటినీ వెనక్కి తీసుకోవచ్చు. మీకు నచ్చిన పథకంలో ఇన్వెస్ట్‌ చేసుకోవచ్చు. ఈఎల్‌ఎస్‌ఎస్‌ కానీ, మరే ఇతర పన్ను ఆదా పథకాలు అయినా తప్పనిసరి లాకిన్‌ పీరియడ్‌తో వస్తుంటాయి. కనుక లాకిన్‌ సమయంలో ఉపసంహరణలను అనుమతించరు. ఇదీ చదవండి: Get 1 Electric Scooter: రూ.38 వేలకే ఎలక్ట్రిక్ స్కూటర్.. భారీ డిస్కౌంట్!

నేను మరో 10 - 15 ఏళ్లలో ఇల్లు కొనుగోలు చేయాలని అనుకుంటున్నాను. రూ.2.5 - 3 కోట్ల బడ్జెట్‌లో ఇల్లు కొనాలన్నది నా ఆలోచన. గృహ రుణం తీసుకునే విషయంలో నా వంతు డౌన్‌ పేమెంట్‌ను సమకూర్చుకోవాలి కదా. వచ్చే 10 - 15 ఏళ్లలో గృహ రుణం డౌన్‌ పేమెంట్‌ను సమకూర్చుకునేందుకు ఎక్కడ ఇన్వెస్ట్‌ చేసుకోవాలి? టాటా స్మాల్‌ క్యాప్‌ లేదా, మిరే అస్సెట్‌ మిడ్‌క్యాప్‌ ఫండ్‌ లేదా పీజీఐఎం ఇండియా మిడ్‌క్యాప్‌ ఫండ్‌ పథకాలు నా డౌన్‌ పేమెంట్‌కు అనుకూలమైనా..?     – ఆదిత్య బి 10 - 15 ఏళ్లలో ఇల్లు కొనుగోలు చేద్దామన్న నిర్ణయం సరైన దారిలోనే ఉంది. మీ పెట్టుబడులు వృద్ధి చెందడానికి సరిపడా సమయం మీ చేతుల్లో ఉంది. ఈ కాలంలో ఈక్విటీ పథకాల నుంచి సహేతుక రాబడులు వస్తాయని ఆశించొచ్చు. తద్వారా గృహ కొనుగోలుకు కావాల్సిన డౌన్‌ పేమెంట్‌ను సమకూర్చుకోవచ్చు. మీరు దృష్టిలో ఉంచుకోవాల్సిన విషయం ఏమిటంటే.. కొనుగోలు చేద్దామనుకుంటున్న ఇంటి బడ్జెట్‌ రూ.2.5 - 3 కోట్లు అని చెప్పారు కదా. ఇది నేటి ధరల ఆధారంగా అంచనా వేశారా? అయితే ద్రవ్యోల్బణ ప్రభావాన్ని పరిగణనలోకి తీసుకోక తప్పదు. అప్పుడు 10 - 15 ఏళ్ల తర్వాత ఇల్లు కొనుగోలుకు అసలు ఎంత అవుతుందన్న వాస్తవ అంచనాకు రావడానికి ఉంటుంది. ఆ తర్వాత నెలవారీ సిప్‌ మొత్తాన్ని రెండు ఫ్లెక్సీక్యాప్‌ పథకాల్లో ఇన్వెస్ట్‌ చేసుకోవాలి. మీరు ఒకటి నుంచి రెండు వరకు మిడ్, స్మాల్‌క్యాప్‌ పథకాలను కూడా ఎంపిక చేసుకోవచ్చు. కాకపోతే మిడ్, స్మాల్‌క్యాప్‌ అన్నవి మొత్తం పోర్ట్‌ఫోలియోలో 25 - 30 శాతం మించి ఉండకూడదు. మీ పోర్ట్‌ఫోలియోలో ఏ పథకాలు ఉండాలన్నది మీ రిస్క్‌ తీసుకునే సామర్థ్యం, ఈక్విటీ పెట్టుబడుల్లో మీకున్న అనుభవం కీలకంగా మారతాయి. ఇల్లు కొనుగోలు చేయడం అన్నది ఆర్థికంగా అతిపెద్ద నిర్ణయం. కనుక చాలా జాగ్రత్తగా దీన్ని పరిగణనలోకి తీసుకోవాలి. చాలా కేసుల్లో నివాసం ఉండేట్టు అయితే రుణంపై ఇల్లు కొనుగోలు చేయడం న్యాయమే అవుతుంది. గృహ రుణంపై పన్ను ప్రయోజనాలు ఉన్నాయి. పైగా ఇది దీర్ఘకాలం పాటు కొనసాగే రుణ బాధ్యత. అలాగే, గృహ రుణానికి మీరు చెల్లించే ఈఎంఐ అన్నది నెలవారీ నికరంగా చేతికి అందుకునే మొత్తంలో మూడింట ఒక వంతు మించకుండా చూసుకోండి. పెట్టుబడి కోణంలో అయితే రుణంపై ఇల్లు కొనుగోలు చేయడం మంచి నిర్ణయం కాబోదు. ఎందుకంటే రియల్‌ ఎస్టేట్‌లో లిక్విడిటీ తక్కువ. కొనుగోలు, విక్రయం వేగంగా సాధ్యపడదు. డబ్బులు కావాలంటే వెంటనే అడిగిన రేటుకు విక్రయించాల్సి వస్తుంది. అధిక విలువ కలిగిన ఇంటిని అమ్మడం అంత సులభమైన విషయం కాదు. నా వయసు 59 ఏళ్లు. వచ్చే నెలలో పదవీ విరమణ తీసుకోబుతున్నాను. రిటైర్మెంట్‌ తర్వాత నా వద్ద రూ.కోటి నిధి ఉంటుంది. నెలవారీ ఖర్చులు రూ.లక్ష వరకు ఉంటాయి. కనుక నా వద్ద ఉండే రూ.కోటిని నెలనెలా రూ.లక్ష వచ్చేలా ఎక్కడ ఇన్వెస్ట్‌ చేయాలో సూచించగలరు.     – భానుప్రకాశ్‌ మీరు రూ.కోటి పెట్టుబడిపై ప్రతి నెలా రూ.లక్ష ఆదాయం కోరుకుంటున్నారు. అంటే వార్షిక రాబడి 12 శాతం ఉండాలి. ఈ స్థాయి రాబడి అన్నది ఈక్విటీలలో, అదీ దీర్ఘకాలంలోనే (ఏడేళ్లకు మించి) సాధ్యపడతాయి. ఏటా ఇదే స్థాయిలో ఈక్విటీలు కూడా రాబడులు ఇస్తాయని గ్యారంటీ ఉండదు. అలాగే, ఒక ఏడాదిలో వచ్చిన రాబడులన్నింటినీ వినియోగించుకోకూడదు. మీ పెట్టుబడి నిధి ద్రవ్యోల్బణ ప్రభావం (5 - 6 శాతం) మేర ఏటా వృద్ధి చెందుతూ ఉండాలి. అప్పుడే కావాల్సినంత మొత్తం సమకూర్చుకోగలరు. ఉదాహరణకు మీ రూ.కోటి నిధి.. ఐదు, ఏడేళ్ల తర్వాత కూడా అక్కడే ఉంటే.. ద్రవ్యోల్బణం ప్రభావం వల్ల అప్పటికి నెలవారీగా రూ.లక్ష ఆదాయం సరిపోదు. పెరిగే ధరలకు అనుగుణంగా మీకు మరింత మొత్తం ఆదాయం వచ్చేంత నిధి ఉండాలి. కనుక మీ పెట్టుబడిపై వచ్చే రాబడిలో కొంత మొత్తాన్ని అక్కడే వృద్ధి చెందేందుకు వీలుగా ఉంచేయాలి. మీ విషయంలో మీరు ఆశించే రాబడి రేటు ఎక్కువగా ఉంది. దాన్ని తగ్గించుకోండి. మీరు కోరుకున్నట్టు ప్రతి నెలా రూ.లక్ష చొప్పున ఉపసంహరించుకుంటూ వెళితే.. మీ వద్దనున్న పొదుపు నిధి కూడా తగ్గిపోతుంది. ద్రవ్యోల్బణం అధిగమించి నిధి వృద్ధి చెందాలంటే.. పెట్టుబడి నుంచి రాబడి 6 శాతానికి మించి ఉపసంహరించుకోకూడదు. అంటే రూ.కోటి నిధిపై ఏటా రూ.6 లక్షల వరకే ఉపసంహరించుకోవాలి.  పెట్టుబడి నిధిలో మూడింట ఒక వంతును ఈక్విటీలకు కేటాయించుకోవాలి. మిగిలిన రెండు భాగాలకు ఫిక్స్‌డ్‌ ఇన్‌కమ్‌ సాధనాలకు (డెట్‌) కేటాయించుకోవాలి. ప్రభుత్వ హామీ ఉన్న సీనియర్‌ సిటిజన్‌ సేవింగ్స్‌ స్కీమ్‌ (ఎస్‌సీఎస్‌ఎస్‌), పోస్ట్‌ ఆఫీస్‌ నెలవారీ ఆదాయ పథకం (పీవో ఎంఐఎస్‌), ప్రధాన మంత్రి వయవందన యోజన (పీఎం వీవీవై) పథకాల్లో ఇన్వెస్ట్‌ చేసుకోవచ్చు. వీటిల్లో పీఎం వీవీవై, ఎస్‌సీఎస్‌ఎస్‌ 8 శాతం రాబడిని ఆఫర్‌ చేస్తున్నాయి. ఇందులో పీఎం వీవీవై ఈ ఏడాది మార్చితో ముగియనుంది. ఈ పథకాలకు కేటాయించుకోగా మిగిలే మొత్తాన్ని అధిక నాణ్యత కలిగిన షార్ట్‌ డ్యురేషన్‌ ఫండ్స్‌లో ఇన్వెస్ట్‌ చేసుకోవాలి. ధీరేంద్ర కుమార్ సీఈఓ, వ్యాల్యూ రీసెర్చ్

ఆర్బిట్రేజ్‌ ఫండ్స్‌ ఎంత వరకు సురక్షితం? ఇన్వెస్టర్‌ పోర్ట్‌ఫోలియోలో ఇవి ఉండాలా? ఈక్విటీలో నగదు, ఫ్యూచర్స్‌ మార్కెట్లో ధరల పరంగా ఉండే వ్యత్యాసాలను అవకాశాలుగా తీసుకుని ఇన్వెస్ట్‌ చేసే ఫండ్స్‌ ఇవి. ఈ రూపంలోనే ఇవి రాబడులను ఆర్జిస్తుంటాయి. ఉదాహరణకు ‘ఎస్‌’ అనే స్టాక్‌ ఈక్విటీ మార్కెట్లో రూ.100 వద్ద ట్రేడవుతుందనుకుందాం. ఇదే స్టాక్‌ ఫ్యూచర్‌ మార్కెట్లో రూ.101 వద్ద ట్రేడవుతుందనుకుంటే.. ఈ సందర్భంలో ఆర్బిట్రేజ్‌ ఫండ్‌ ‘ఎస్‌’ స్టాక్‌ను ఈక్విటీలో రూ.100కు కొనుగోలు చేసి.. ఫ్యూచర్‌ మార్కెట్లో రూ.101కు విక్రయిస్తుంది. దీంతో ఒక రూపాయి లాభాన్ని సొంతం చేసుకుంటుంది. సెటిల్‌మెంట్‌ తేదీనాడు (అంటే నెల చివర్లో కాంట్రాక్టుల ముగింపు) ధర నగదు, ఫ్యూచర్‌ మార్కెట్లో ఒక్కటిగా మారుతుంది. దాంతో ఆర్బిట్రేజ్‌ ఫండ్‌ అదే స్టాక్‌కు సంబంధించి మళ్లీ లావాదేవీలను పునరావృతం చేస్తుంది. ఈ సారి నగదు మార్కెట్లో విక్రయించి ఫ్యూచర్‌ మార్కెట్లో కొనుగోలు చేస్తుంది. దీంతో ఆయా లావాదేవీలు సమం అవుతాయి. ఒక్క విడత ఇలా చేసినట్టయితే ముందు గడించిన రూపాయి లాభం ఖాయమైనట్టే. అంతేకానీ, సెటిల్‌మెంట్‌ తేదీనాటికి ఆయా స్టాక్‌ ధర పెరిగిందా, తరిగిందా అన్నదానితో సంబంధం ఉండదు. ఆర్బిట్రేజ్‌ ఫండ్స్‌ ఇదే మాదిరి లావాదేవీలు నిర్వహిస్తూ ఇన్వెస్టర్లకు లాభాలను తెచ్చిపెడుతుంటాయి. ఆర్బిట్రేజ్‌ అవకాశాల్లేని సమయాల్లో ఇన్వెస్టర్ల పెట్టుబడులను ట్రెజరీ బిల్లులు, స్వల్పకాల డెట్‌ సాధనాల్లో ఇన్వెస్ట్‌ చేస్తుంటాయి. రిస్క్‌ను పరిశీలించినట్టయితే.. చాలా తక్కువ రిస్క్‌లోనే ఇవి ఉంటాయి. కాకపోతే స్వల్ప కాలంలో మాత్రం అస్థిరతలతో ఉంటుంటాయి. కనీసం మూడు నెలలు అంతకంటే ఎక్కువ కాలం కోసం అయితే నష్టాలకు అవకాశాలు చాలా తక్కువ. అదే సమయంలో ఆర్బిట్రేజ్‌ ఫండ్స్‌ నుంచి ఎక్కువ రాబడులను ఆశించరాదు. లిక్విడ్‌ ఫండ్స్‌ స్థాయిలో రాబడులను అంచనా వేసుకోవచ్చు. అంటే రాబడులు బ్యాంకు ఖాతాల కంటే మెరుగ్గా ఉంటాయని అర్థం చేసుకోవాలి. దీర్ఘకాలంలో మంచి రాబడులు, సంపద కోసం ఆర్బిట్రేజ్‌ ఫండ్స్‌ అనుకూలం కావు. కొన్ని నెలల నుంచి ఏడాది వరకు తమ నిధులను ఒక్కచోట ఇన్వెస్ట్‌ చేసుకోవాలని భావించే వారికి అనుకూలం. ముఖ్యంగా అధిక పన్ను రేటులో (30 శాతం) ఉన్న వారికి ఆర్బిట్రేజ్‌ ఫండ్స్‌ లాభదాయకం. ఎందుకంటే ఇందులో రాబడులను ఈక్విటీ రాబడులుగానే ఆదాయపన్ను చట్టం పరిగణిస్తోంది. అధిక పన్ను రేటులో లేని వారు, చాలా స్వల్పకాలం కోసం ఇన్వెస్ట్‌ చేసుకునేట్టు అయితే లిక్విడ్‌ ఫండ్స్‌ సరిపోతాయి. ఇప్పటికైతే డివిడెండ్‌ ఇచ్చే మంచి మ్యూచువల్‌ ఫండ్‌ ఏదైనా ఉందా?.. అలాగే కనీసం ఎంత ఇన్వెస్ట్‌ చేయాల్సి ఉంటుంది?  – రత్నాకర్‌ డివిడెండ్‌ కోసం మ్యూచువల్‌ ఫండ్‌ను ఎంపిక చేసుకోవడం అన్నది సరైన మార్గం కాదు. ఎందుకంటే దీనివల్ల పెద్దగా రాబడి ఉండదు. ఒక షేరును కొనుగోలు చేస్తే అది మీకు డివిడెండ్‌ ఇస్తుంది. అది స్టాక్‌ ధరలో సర్దుబాటు కాదు. అదే మ్యూచువల్‌ ఫండ్‌లో అయితే డివిడెండ్‌ చెల్లింపు ప్రభావం ఫండ్‌ యూనిట్‌ ఎన్‌ఏవీ (నికర యూనిట్‌ విలువ)లో ప్రతిఫలిస్తుంది. ఉదాహరణకు మీరు ఒక పథకంలో రూ.10 ఎన్‌ఏవీపై రూ.10,000ను ఇన్వెస్ట్‌ చేశారనుకుందాం. తర్వాత కాలంలో అది వృద్ధి చెంది ఎన్‌ఏవీ కాస్తా రూ.15కు చేరితే.. మీ పెట్టుబడి విలువ రూ.15,000 అవుతుంది. ఫండ్‌ సంస్థ రూ.2,000ను డివిడెండ్‌ కింద చెల్లించాలని నిర్ణయించినట్టయితే ఆ మొత్తం మీ బ్యాంకు ఖాతాలో జమ అవుతుంది. డివిడెండ్‌ చెల్లింపు ముగిసిన తర్వాత ఆ పథకంలో మీ పెట్టుబడి విలువ వెంటనే రూ.13,000కు తగ్గిపోతుంది. అంటే మీ పెట్టుబడుల నుంచి మీకు చెల్లింపులు చేయడం. ఫండ్స్‌లో డివిడెండ్‌ చెల్లింపుల విధానం ఇదే మాదిరిగా ఉంటుంది. కానీ, చాలా మంది ఫండ్స్‌ నుంచి వస్తున్న డివిడెండ్‌ పనితీరు కు నిదర్శనంగా పొరపడుతుంటారు. కానీ, స్టాక్‌లో అలా కాదు. లాభాల నుంచి డివిడెండ్‌ చెల్లింపులు చేయడం ఉంటుంది. ఫండ్‌ను డివిడెండ్‌ కోణం నుంచి ఎంపిక చేసుకోవడం సరికాదు. ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను ప్రతి నెలా కొంత మొత్తం యాక్సిస్‌ బ్లూచిప్‌ ఫండ్‌లో ఇన్వెస్ట్‌ చేద్దామనుకుంటున్నాను. ఇది మంచి ఫండేనా? దీంట్లో ఇన్వెస్ట్‌ చేయవచ్చా? –లావణ్య, విశాఖపట్టణం   యాక్సిస్‌ బ్లూచిప్‌ ఫండ్‌... ఆ కేటగిరీలోని అత్యుత్తమ ఫండ్స్‌లో ఒకటి. సాధారణంగా బ్లూచిప్‌ ఫండ్స్‌ అన్నీ మంచి ట్రాక్‌ రికార్డ్‌ ఉన్న లార్జ్‌ క్యాప్‌ కంపెనీ షేర్లలోనే ఇన్వెస్ట్‌ చేస్తాయి. గత ఐదేళ్లలో ఈ ఫండ్‌ సగటు రాబడి 8 శాతంగా ఉంది. గత ఏడాది కాలంలో ఈ ఫండ్‌ 4 శాతం మేర నష్టపోయింది. ఇదే కాలానికి బీఎస్‌ఈ 100 సూచీ 11 శాతం మేర నష్టపోయింది. ఇక గత ఆర్నెల్లలో ఈ ఫండ్‌ ఒకింత రికవరీ అయింది. మంచి వృద్ధి అవకాశాలున్న అత్యున్నత స్థాయి నాణ్యత గల కంపెనీల్లోనే ఈ ఫండ్‌ ఇన్వెస్ట్‌ చేస్తోంది. మార్కెట్‌ పుంజుకుంటే, ఈ ఫండ్‌ రాబడులు మరింతగా పెరుగుతాయి. ఈ ఫండ్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయండి.   షేర్లకు, బాండ్లకు మధ్య తేడా ఏమిటి? కంపెనీ బాండ్లలో ఇన్వెస్ట్‌ చేయవచ్చా? –ఫయాజ్, విజయవాడ   కంపెనీ యాజమాన్యంలో భాగస్వామ్యంగా గల వాటాలనే షేర్లుగా పరిగణిస్తారు. స్టాక్‌ ఎక్సే్ఛంజ్‌ల ట్రేడింగ్‌లో ఈ షేర్ల క్రయ, విక్రయాలు జరుపుకోవచ్చు. సాధారణంగా ఇన్వెస్టర్లు దీర్ఘకాల ఇన్వెస్ట్‌మెంట్‌ కోసం ఫండమెంటల్స్‌ పటిష్టంగా ఉన్న షేర్లను కొనుగోలు చేస్తారు. షేర్‌ ధరల్లో వృద్ధి, బోనస్‌ షేర్లు, డివిడెండ్‌లు...తదితర ప్రయోజనాలు లభిస్తాయి. ఇక  బాండ్ల జారీ ద్వారా కంపెనీ రుణాలను సమీకరిస్తుంది.  ఈ బాండ్లకు కాలపరిమితి, వడ్డీరేటు ఉంటుంది. బ్యాంక్‌ డిపాజిట్టులాంటిదే కంపెనీ బాండ్‌ కూడా. అయితే బ్యాంక్‌ డిపాజిట్లలాగా బాండ్లు సురక్షితమనే విషయం.. మీరు ఇన్వెస్ట్‌ చేసే కంపెనీపై ఆధారపడి ఉంటుంది. ఆర్థికంగా కంపెనీ ఎంత పటిష్టమో అనే విషయాన్ని బట్టే ఆ కంపెనీ బాండ్ల నష్టభయం ఆధారపడి ఉంటుంది. ఫండమెంటల్స్‌ పటిష్టంగా ఉన్న కంపెనీ తన బాండ్లపై తక్కువ వడ్డీనే ఇవ్వవచ్చు. ఇన్వెస్ట్‌మెంట్స్‌ సురక్షితంగా ఉంటాయనే ధీమానే దీనికి కారణం. ఇక ఆర్థిక స్థితిగతులు అస్తవ్యస్తంగా ఉన్న కంపెనీ అధిక వడ్డీరేటును ఆఫర్‌ చేయవచ్చు. కానీ ఇలాంటి కంపెనీల బాండ్లకు నష్ట భయం అధికంగా ఉంటుంది. కంపెనీ ఆర్థిక స్థితిగతులను కూలంకషంగా మదింపు చేసిన తర్వాతే కంపెనీ బాండ్లలో ఇన్వెస్ట్‌ చేయాలి. ధీరేంద్ర కుమార్‌, సీఈవో, వ్యాల్యూ రీసెర్చ్‌  

ప్రస్తుతం స్టాక్‌ మార్కెట్‌ అల్లకల్లోలంగా ఉంది కదా ! ఈ నేపథ్యంలో నా సిప్‌(సిస్టమేటిక్‌ ఇన్వెస్ట్‌మెంట్‌  ప్లాన్‌)లను వాయిదా వేద్దామనుకుంటున్నాను. ఇది సరైన నిర్ణయమేనా ?   –ప్రియాంక, హైదరాబాద్‌   చాలా మంది ఇన్వెస్టర్లను ప్రస్తుతం అత్యధికంగా తొలిచేస్తున్న ప్రశ్న ఇదే. స్టాక్‌ మార్కెట్‌ అల్లకల్లోలంగా ఉన్నప్పటికీ, సిప్‌లను ఆపేయాలనుకోవడం సరైన నిర్ణయం కాదు. సమీప భవిష్యత్తులో ఈ సిప్‌ల్లో ఇన్వెస్ట్‌ చేసే సొమ్ములు మీకు అవసరం లేని పక్షంలో సిప్‌లను వాయిదా వేయాలనుకోవడం మంచి నిర్ణయం కాదు. మార్కెట్‌ పుంజుకొని మళ్లీ పెరగడానికి ఎంత కాలం పడుతుందో సరైన అంచనాలు లేవు. మూడు నెలలు కావచ్చు. లేదా ఏడాది పట్టవచ్చు. మార్కెట్‌ రికవరీకి ఇంకా ఎక్కువ కాలమే పట్టినా, ఆశ్చర్యపోవలసిన పని లేదు. మార్కెట్‌ రికవరీకి ఎంత కాలం పట్టినా, మీరు మీ సిప్‌లను కొనసాగిస్తే, మీకు చౌకగా మ్యూచువల్‌ ఫండ్‌ యూనిట్లు లభించే అవకాశాలున్నాయి. కనీసం ఐదేళ్లు అంతకు మించిన కాలానికి ఇన్వెస్ట్‌ చేయాలనుకుంటే, మీ సిప్‌లను నిరభ్యంతరంగా కొనసాగించండి. మార్కెట్‌ ఇంకా పతనమవుతుందనే భయాలతో ఇప్పటికిప్పుడు మీ మ్యూచువల్‌ ఫండ్స్‌ యూనిట్లను అమ్మేస్తే, మీకు నష్టాలు రావచ్చు. మార్కెట్‌ పడుతుంది కదా అని మీ సిప్‌లను ఆపేస్తే, చౌకలో మ్యూచువల్‌ ఫండ్‌ యూనిట్లను కొనుగోలు చేసే అవకాశాన్ని మీరు కోల్పోతారు. ప్రస్తుత మార్కెట్‌ పతన సమయంలో మీ ఇన్వెస్ట్‌మెంట్స్‌ విలువలు బాగా తగ్గి, మీకు నిరాశను కలిగిస్తున్నా, మీరు మాత్రం మీ సిప్‌లను ఆపేయక, కొనసాగించండి.   నేను మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటున్నాను. ఎనిమిది నుంచి పదేళ్ల ఇన్వెస్ట్‌మెంట్‌ కాలానికి కెనరా రొబెకొ ఈక్విటీ డైవర్సిఫైడ్‌ ఫండ్‌ను ఎంచుకున్నాను. మూడేళ్ల రాబడులను పరిగణనలోకి తీసుకొని  ఈ ఫండ్‌ను ఎంపిక చేశాను. ఈ ఫండ్‌లో ఇన్వెస్ట్‌ చేయవచ్చా ? నా దగ్గర ప్రస్తుతం రూ. లక్ష ఉన్నాయి. ఈ లక్ష రూపాయలను ఒకేసారి ఇన్వెస్ట్‌ చేయాలనుకుంటున్నాను. తగిన సూచనలివ్వండి.   –నరేంద్ర, విజయవాడ   మీరు ఎంచుకున్న కెనరా రొబెకొ ఈక్విటీ డైవర్సిఫైడ్‌ ఫండ్‌ మంచిదే. ఈ కేటగిరీ ఫండ్స్‌లో మంచి రాబడులు అందిస్తున్న కొన్ని ఫండ్స్‌లో ఇది కూడా ఒకటి. అయితే ఏడాది నుంచి రెండేళ్ల కాలాన్ని పరిగణనలోకి తీసుకుంటే, ఈ ఫండ్‌ పనితీరు సంతృప్తికరంగా లేదు. స్టాక్‌ మార్కెట్‌ ఉత్థాన, పతనాలు ఈక్విటీ ఫండ్స్‌పై తీవ్రంగానే ప్రభావం చూపుతాయి. ఈ ఫండ్‌ కూడా దీనికి మినహాయింపు కాదు. ప్రస్తుతం ఈ ఫండ్‌ రాబడులు అంతంతమాత్రంగానే ఉన్నప్పటికీ, దీర్ఘకాలంలో మంచి రాబడులే పొందవచ్చు. ఎనిమిది నుంచి పదేళ్ల కాలం పాటు ఇన్వెస్ట్‌ చేయాలనుకుంటున్నారు. కాబట్టి ఈ ఫండ్‌ మీకు మంచి రాబడులనే అందించగలుగుతుంది. మార్కెట్‌లో తీవ్రమైన ఒడిదుకులు ఉన్న ప్రస్తుత పరిస్థితుల్లో ఈ ఫండ్‌లో ఇన్వెస్ట్‌ చేయడం వల్ల మీకు మరింతగా మేలు కలుగుతుందనే చెప్పవచ్చు.  ఇక మ్యూచువల్‌ ఫండ్స్‌లో ఎప్పుడూ పెద్ద మొత్తాల్లో ఒకేసారి ఇన్వెస్ట్‌ చేయకూడదు. మీ దగ్గర ఉన్న రూ. లక్షను కనీసం ఆరు నుంచి పన్నెండు సమభాగాలుగా విభజించి, నెలకు కొంత మొత్తం చొప్పున సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) ద్వారా ఇన్వెస్ట్‌ చేయండి.   నేను 2013లో క్వాంటమ్‌ ట్యాక్స్‌ సేవింగ్‌ ఫండ్‌లో కొంత మొత్తం ఇన్వెస్ట్‌ చేశాను. 2016లో ఆ ఇన్వెస్ట్‌మెంట్స్‌ను రిడీమ్‌ చేసుకున్నాను. మంచి రాబడులే వచ్చాయి. ఇప్పుడు చూస్తే, ఆ ఫండ్‌ రాబడులు ఏమంత సంతృప్తికరంగా లేవు. ఎందుకిలా ?   –శివరాం, నల్లగొండ రాబడులు కాలాన్ని బట్టి, స్టాక్‌ మార్కెట్‌ గమనాన్ని బట్టి మారుతూ ఉంటాయి. 2016లో మంచి రాబడులు ఇచ్చిన క్యాంటమ్‌ ట్యాక్స్‌ సేవింగ్‌ ఫండ్‌ ఇప్పుడు అంతంత మాత్రం రాబడులిస్తోంది.  మరో మూడేళ్ల తర్వాత పరిస్థితులు ఎలా ఉంటాయో చెప్పలేం. మూడేళ్ల కాలానికే ఇన్వెస్ట్‌ చేయాలనుకుంటే, ఈక్విటీ ఫండ్స్‌ను ఎంచుకోవద్దు. కనీసం ఐదేళ్లు, అంతకు మించిన కాలం ఇన్వెస్ట్‌ చేయాలనుకుంటేనే, ఈక్విటీ ఫండ్స్‌ను ఎంచుకోవాలి.   -ధీరేంద్ర కుమార్‌ సీఈవో, వ్యాల్యూ రీసెర్చ్‌   

నాకు రెండేళ్ల కూతురు ఉంది. తనను మంచి చదువులు చదివించాలన్న ఆలోచనతో స్మాల్‌ క్యాప్‌ ఫండ్స్‌లో ఇన్వెస్ట్‌ చేయడం మొదలు పెట్టాను. ఇది సరైన నిర్ణయమేనా?    –అనిత, విశాఖపట్టణం   మీరు మొదటిసారిగా మ్యూచువల్‌ ఫండ్స్‌లో ఇన్వెస్ట్‌ చేస్తున్నట్లయితే ఇది సరైన నిర్ణయం కాదు. ఆరంభంలో స్మాల్‌ క్యాప్‌ ఫండ్స్‌ పనితీరు ఆశించినట్లుగా ఉండకపోవచ్చు. దీంతో మొదటిసారిగా ఫండ్స్‌లో ఇన్వెస్ట్‌ చేసే ఇన్వెస్టర్లు బెంబేలు పడతారు. ఫండ్సంటే భయపడేలా నష్టాలూ రావచ్చు. మీరు స్మాల్‌ క్యాప్‌ ఫండ్స్‌లో ఇన్వెస్ట్‌ చేయడం మొదలు పెట్టి కనీసం రెండేళ్లు అయితే, వాటి పనితీరుపై మీకు ఇప్పటికే ఒక అవగాహన వచ్చి ఉండాలి. అందుకని వాటిల్లో ఇన్వెస్ట్‌మెంట్స్‌ కొనసాగించండి. మార్కెట్‌ పతన బాటలో ఉన్నా, ఈ సమయంలో వీటి పనితీరు అంతంతమాత్రంగానే ఉన్నా, కొండొకచో నష్టాలు వచ్చినా అధైర్యపడకుండా మీ ఇన్వెస్ట్‌మెంట్స్‌ను కొనసాగించండి.  ఏదైనా హైబ్రిడ్‌ లేదా మల్టీక్యాప్‌ ఫండ్స్‌లో ఇన్వెస్ట్‌ చేస్తే డైవర్సిఫికేషన్‌ ప్రయోజనాలు పొందవచ్చు. స్మాల్‌ క్యాప్‌ ఫండ్స్‌లో ఇన్వెస్ట్‌ చేయడం వల్ల మీరు డైవర్సిఫికేషన్‌ ప్రయోజనాలు పొందలేరు. అందుకని స్మాల్‌ క్యాప్‌ ఫండ్స్‌ల్లో ఇన్వెస్ట్‌ చేసే వాళ్లంతా సదా అప్రమత్తంగా ఉండాలి. స్మాల్‌ క్యాప్‌ ఫండ్స్‌ పనితీరు ఇప్పడున్నట్లుగానే మరో రెండేళ్ల తర్వాతో, మూడేళ్ల తర్వాతో అలాగే ఉంటుందనుకోకూడదు. స్మాల్‌ క్యాప్‌ ఫండ్స్‌ పనితీరు బాగా ఉంది కదాని చాలా మంది ఈ ఫండ్స్‌లో ఇన్వెస్ట్‌ చేయడం మొదలుపెడతారు. అప్పుడు ఈ ఫండ్‌లోకి ఇబ్బడిముబ్బడిగా పెట్టుబడులు వచ్చి చేరడం మొదలవుతుంది. అప్పుడు ఈ స్మాల్‌క్యాప్‌ ఫండ్‌ మేనేజర్‌కు ఈ నిధులను మేనేజ్‌ చేయడం కష్టమవుతుంది. ఆశించిన స్థాయిలో ఫండ్స్‌ పనితీరు ఉండకపోవచ్చు. మొత్తం మీద స్మాల్‌క్యాప్‌ ఫండ్స్‌లో ఇన్వెస్ట్‌చేసే ఇన్వెస్టర్లు రెండు ముఖ్య విషయాలు గుర్తుంచుకోవాలి. మొదటిది మార్కెట్‌  ఎలా ఉన్నా, స్మాల్‌ క్యాప్‌ ఫండ్స్‌లో ఇన్వెస్ట్‌మెంట్స్‌ను కొనసాగించడం. ఇక రెండవది కనీసం, ఆరు నెలల కొకసారైనా, మీరు ఇన్వెస్ట్‌ చేస్తున్న ఫండ్స్‌ పనితీరును జాగ్రత్తగా మదింపు చేయడం.  ఇక డైవర్సిఫికేషన్‌ ప్రయోజనాలు పొందడం కోసం మీ పోర్ట్‌ఫోలియోలో కనీసం ఒక్క మల్టీ క్యాప్‌ ఫండ్‌నైనా చేర్చుకోండి.   నేను మ్యూచువల్‌ ఫండ్స్‌ల్లో నెలకు కొంత మొత్తం చొప్పున ఇన్వెస్ట్‌ చేద్దామనుకుంటున్నాను. అయితే వీటిల్లో మూడు రకాలైన ప్లాన్‌లు ఉంటాయని తెలిసింది. డివిడెండ్, డివిడెండ్‌ రీఇన్వెస్ట్‌మెంట్, గ్రోత్‌ ప్లాన్‌లు–ఈ మూడింటితో దేంట్లో ఇన్వెస్ట్‌ చేస్తే మంచిది?    –అన్వర్‌ పాషా, కరీంనగర్‌ ఈ మూడు ప్లాన్‌ల్లో గ్రోత్‌ ప్లాన్‌ల్లో ఇన్వెస్ట్‌ చేయడం ద్వారా మంచి ప్రయోజనాలు పొందవచ్చు. ఒక ఇన్వెస్టర్‌కు డివిడెండ్, డివిడెండ్‌ రీ ఇన్వెస్ట్‌మెంట్‌ ప్లాన్‌లు సరైనవి కావని చెప్పవచ్చు.  ఈక్విటీ ఆధారిత మ్యూచువల్‌ ఫండ్స్‌పై డివిడెండ్‌ డిస్ట్రిబ్యూషన్‌ ట్యాక్స్‌(డీడీటీ) విధించినప్పటి నుంచి చూస్తే, గ్రోత్‌ ప్లాన్‌లే మిగిలిన రెండు ప్లాన్‌ల కన్నా మెరుగైనవి అని చెప్పవచ్చు. డెట్‌ ఫండ్స్‌ విషయంలోనూ గ్రోత్‌ ప్లాన్‌లనే ఎంచుకోవడం మంచిది. వీటిల్లో ఇన్వెస్ట్‌ చేసి, కొంత కాలం తర్వాత సిస్టమేటిక్‌ విత్‌డ్రాయల్‌ ప్లాన్‌(ఎస్‌డబ్ల్యూపీ) ద్వారా మీ ఇన్వెస్ట్‌మెంట్స్‌ను ఉపసంహరించుకోవచ్చు. పైగా ఎస్‌డబ్ల్యూపీని పాటించడం వల్ల పన్ను ప్రయోజనాలు కూడా పొందవచ్చు. ఇక ఈక్విటీ ఫండ్స్‌ విషయానికొస్తే, గ్రోత్‌ ప్లాన్‌ను ఎంచుకోవడం వల్ల, మీపై డీడీటీ భారం ఏమాత్రం పడదు.   నా వయస్సు 42 సంవత్సరాలు. నాకు ఐదేళ్ల పాప ఉంది. తన ఉన్నత చదువుల నిమిత్తం రూ.60 లక్షలు అవసరమవుతాయని అంచనా. తనకు 18 ఏళ్ల వచ్చేటప్పటి నుంచి ఈ డబ్బులు అవసరం అవుతాయి. నా ఇన్వెస్ట్‌మెంట్‌ ప్లానింగ్‌ ఎలా ఉండాలి?     –సుధీర్, హైదరాబాద్‌   ఇప్పటి పరిస్థితులను బట్టి చూస్తే, పిల్లల ఉన్నత చదువుల కోసం కనిష్టంగా రూ.20 లక్షలు, గరిష్టంగా రూ.20 కోట్లు అవసరమవుతాయని అంచనా. మీ పాప ఉన్నత చదువుల కోసం రూ.60 లక్షల మేర అవసరమవుతాయని మీరు అంచనా వేయడం సరైనదే. ఈ డబ్బులు పొందడానికి మీకు 13 ఏళ్ల సమయం ఉంది. కాబట్టి మీరు మదుపు చేయడానికి ఈక్విటీ ఫండ్స్‌ను ఎంచుకోండి. ఎంత వీలైతే అంత ఈ ఫండ్స్‌లో ఇన్వెస్ట్‌ చేయండి. గత 15–20 ఏళ్లలో చదువులకు సబంధించిన ఖర్చులు బాగా పెరిగాయి. రానున్న 10–15 ఏళ్లలో ఈ వ్యయాలు ఈ స్థాయిలో పెరగకపోయినా,  బాగానే పెరిగే అవకాశాలున్నాయి. ఈక్విటీ ఫండ్స్‌ వార్షిక రాబడులు గత కొంత కాలంగా 18–20 శాతం రేంజ్‌లో ఉన్నాయి. అయితే ద్రవ్యోల్బణాన్ని కూడా పరిగణనలోకి తీసుకుంటే 12 శాతం రాబడిని ఆశించడం సమంజసమేనని చెప్పవచ్చు. అందుకని ఈక్విటీ ఫండ్స్‌లో ఎంత వీలైతే అంత ఇన్వెస్ట్‌ చేస్తూ ఉండండి. మీకు మరో పదమూడేళ్ల తర్వాత ఈ సొమ్ములు అవసరం కాబట్టి, పదేళ్ల తర్వాత ఈక్విటీ ఫండ్స్‌ల్లో మదుపు చేసిన ఇన్వెస్ట్‌మెంట్స్‌లో కొంత భాగాన్ని స్థిరాదాయ సాధనాల్లోకి బదిలీ చేయండి. ఇలా చేయడం వల్ల అప్పటి(మీరు మీ మదుపును విత్‌డ్రా చేసేకునే సమయం నాటి) మార్కెట్‌ స్థితిగతుల ప్రభావం మీ ఇన్వెస్ట్‌మెంట్స్‌పై పెద్దగా ఉండకపోవచ్చు. ధీరేంద్ర కుమార్‌, సీఈవో, వ్యాల్యూ రీసెర్చ్‌

నేను సీనియర్‌ సిటిజెన్‌ను. గత ఏడాది కాలం నుంచి మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)మార్గంలో ఇన్వెస్ట్‌ చేస్తున్నాను. నా పోర్ట్‌ఫోలియోలో టాటా డిజిటల్‌ ఇండియా ఫండ్, ఆదిత్య బిర్లా సన్‌లైఫ్‌ డిజిటల్‌ ఇండియా ఫండ్, ఐసీఐసీఐ ప్రుడెన్షియల్‌ టెక్నాలజీ ఫండ్, ఫ్రాంక్లిన్‌ ఇండియా టెక్నాలజీ ఫండ్, యాక్సిస్‌ బ్లూచిప్‌ ఫండ్‌లు ఉన్నాయి. వీటిల్లో ఇన్వెస్ట్‌మెంట్స్‌కు కొనసాగించదగ్గ ఫండ్స్‌ ఏవి? –రవీందర్, కాకినాడ మీ పోర్ట్‌ఫోలియోలో ఉన్న మొత్తం ఐదు ఫండ్స్‌ల్లో నాలుగు ఫండ్స్‌ టెక్నాలజీ ఫండ్సే ఉన్నాయి. డైవర్సిఫికేషన్‌ ప్రయోజనాలు పొందాలంటే పోర్ట్‌ఫోలియోలో ఒక టెక్నాలజీ ఫండ్‌ ఉంటే సరిపోతుంది. కానీ మీ పోర్ట్‌ఫోలియోలో ఏకంగా నాలుగు టెక్నాలజీ ఫండ్స్‌ ఉన్నాయి. ఇది సరైన ఇన్వెస్ట్‌మెంట్‌ వ్యూహం కాదు. ముఖ్యంగా మీలాంటి సీనియర్‌ సిటిజన్‌కు ఇది పూర్తిగా సరైనది కాదు. మీలాంటి వాళ్లకు నిలకడైన ఈక్విటీ ఇన్వెస్ట్‌మెంట్స్‌ ఉండాలి. దీని కోసం హైబ్రిడ్‌ ఫండ్‌ను గానీ, మల్టీ క్యాప్‌ ఫండ్‌ను గానీ ఎంచుకోవాలి. అయితే గత రెండేళ్లుగా టెక్నాలజీ/డిజిటల్‌ ఫండ్స్‌ మంచి రాబడులను ఇచ్చాయి. కాబట్టి ఇప్పుడు ఇతర ఫండ్స్‌తో పోల్చితే టెక్నాలజీ ఫండ్సే మెరుగని అనిపిస్తూ ఉండొచ్చు. ఈ విషయంలో ఇప్పుడు మీరు అదృష్టవంతులు. అలాగని ఎప్పుడూ ఇదే అదృష్టం కొనసాగుతుందని చెప్పలేం. అందుకని నాలుగు టెక్నాలజీ ఫండ్స్‌ను ఒకటికి తగ్గించుకోండి. యాక్సిస్‌ బ్లూచిప్‌ ఫండ్‌ను కొనసాగించవచ్చు. మరో హైబ్రిడ్‌ ఫండ్‌ను గానీ, మల్టీ క్యాప్‌ ఫండ్‌ను గానీ మీ పోర్ట్‌ఫోలియోలో చేర్చుకోండి. నేను రిటైరవ్వడానికి మరో 13 ఏళ్ల సమయం ఉంది. రిటైర్మెంట్‌ అవసరాల కోసం కొన్ని మ్యూచువల్‌ ఫండ్స్‌లో నెలకు కొంత మొత్తం సిప్‌ విధానంలో ఇన్వెస్ట్‌ చేస్తున్నాను. నా పోర్ట్‌ఫోలియోలో ఐదు మల్టీ–క్యాప్‌ ఫండ్స్‌ ఉన్నాయి. ఇవి కాకుండా రెండు వేల్యూ ఫండ్స్‌–క్వాంటమ్‌ ఇండియా వేల్యూ ఫండ్, ఐసీఐసీఐ ప్రు వేల్యూ డిస్కవరీ ఫండ్స్‌ కూడా ఉన్నాయి. మల్టీ క్యాప్‌ ఫండ్స్‌ పనితీరు సంతృప్తికరంగా ఉన్నా, ఈ వేల్యూ ఫండ్స్‌ పనితీరు అంతంతమాత్రంగానే ఉంది. వీటిల్లో ఇన్వెస్ట్‌మెంట్స్‌ కొనసాగించవచ్చా ? –సుచిత్ర, హైదరాబాద్‌ మీరు రిటైరవ్వడానికి మరో 13  సంవత్సరాల సమయం ఉంది. అంటే మీరు మరో 13 ఏళ్ల పాటు ఇన్వెస్ట్‌ చేయగలరు. కాబట్టి ఈ వేల్యూ ఫండ్స్‌లో మీ ఇన్వెస్ట్‌మెంట్స్‌ను కొనసాగించవచ్చు. ఈ ఫండ్స్‌ పనితీరు ప్రస్తుతం అంతంతమాత్రంగానే ఉండొచ్చు కానీ మరీ తీసికట్టుగా ఏమీ లేదనే చెప్పవచ్చు. ఈ ఫండ్స్‌ల్లో 13 ఏళ్ల పాటు ఇన్వెస్ట్‌మెంట్స్‌ కొనసాగిస్తే, కనీసం రెండు మార్కెట్‌ సైకిల్స్‌ను ఈ ఫండ్స్‌ చూస్తాయి. ఈ కాలంలో ఈ ఫండ్స్‌ పనితీరు మెరుగు పడే అవకాశాలే చాలా అధికంగా ఉన్నాయి. మార్కెట్‌ నష్టాల్లో ఉన్నప్పుడు ఈ ఫండ్స్‌ మరీ అంతగా నష్టపోకుండా ఉండటం, మీ పోర్ట్‌ఫోలియోకు ఒకింత స్థిరత్వం ఇచ్చి ఉండటం మీరు గమనించే ఉండాలి. మల్టీ క్యాప్‌ ఫండ్స్‌తో పాటు వేల్యూ ఫండ్స్‌ ఉండటం వల్ల మీ పోర్ట్‌ఫోలియో.. డైవర్సిఫికేషన్‌ పరంగా చూస్తే, మంచి స్థితిలోనే ఉందని చెప్పవచ్చు. ఐసీఐసీఐ ప్రు వేల్యూ డిస్కవరీ ఫండ్‌ పనితీరు ఒకింత నిరాశమయంగా ఉన్నప్పటికీ, 13 ఏళ్ల కాలంలో ఈ ఫండ్‌ పుంజుకొని మంచి రాబడులు ఇచ్చే అవకాశాలే అధికంగా ఉన్నాయి. మరోవైపు ఈ ఫండ్‌ పోర్ట్‌ఫోలియో పటిష్టంగానే ఉంది. నాణ్యత గల షేర్లే ఈ ఫండ్‌ పోర్ట్‌ఫోలియోలో ఉన్నాయి. ఎలాంటి అనుమానాలు లేకుండా ఈ వేల్యూ ఫండ్స్‌ల్లో మీ సిప్‌లను కొనసాగించండి. సాధారణంగా ఈక్విటీ మ్యూచువల్‌ ఫండ్స్‌ వివిధ రంగాలకు చెందిన కంపెనీల్లో ఇన్వెస్ట్‌ చేస్తాయి కదా ! వివిధ రంగాల కంపెనీల్లో ఇన్వెస్ట్‌ చేయడం వల్ల ఆ యా రంగాల్లోని రిస్క్‌లు ఆయా కంపెనీలపై బాగానే ప్రభావం చూపుతాయి కదా! అలాంటప్పుడు  ఈక్విటీ ఫండ్స్‌ల్లో ఇన్వెస్ట్‌ చేయడం సరైనదేనా ? అసలు ఈక్విటీ ఫండ్స్‌ల్లో ఇన్వెస్ట్‌ చేసేటప్పుడు అసలు ఎలాంటి విషయాలు పరిగణనలోకి తీసుకోవాలి? –జావేద్, విజయవాడ ఈక్విటీ మ్యూచువల్‌ ఫండ్స్‌ వివిధ రంగాలకు చెందిన కంపెనీల్లో ఇన్వెస్ట్‌ చేస్తాయి. అయితే ఒక ఫండ్‌ ఏ రంగాల కంపెనీల్లో ఇన్వెస్ట్‌ చేసిందనే విషయం ప్రధానాంశంగా ఫండ్స్‌కు సంబంధించిన ఇన్వెస్ట్‌మెంట్‌ నిర్ణయాలు తీసుకోకూడదు. గతంలో ఒక ఫండ్‌ పనితీరు ఎలా ఉంది అనే విషయాన్నే పరిగణనలోకి తీసుకొని ఇన్వెస్ట్‌మెంట్‌కు సంబంధించిన నిర్ణయాలు తీసుకోవాలి. మార్కెట్‌ పెరుగుతున్నప్పుడు, అలాగే మార్కెట్‌ పతన బాటలో ఉన్నప్పుడూ సదరు ఫండ్‌ పనితీరు ఎలా ఉంది అనే విషయం కీలకం. అలాగే సదరు ఫండ్‌ను నిర్వహిస్తున్న ఫండ్‌ మేనేజర్‌ ట్రాక్‌ రికార్డ్‌ ఎలా ఉంది? దీర్ఘకాలం పాటు అతని పనితీరు సవ్యంగానే ఉందా ?అనే విషయాన్ని కూడా పరిగణనలోకి తీసుకోవాలి. చాలా ఈక్విటీ ఫండ్స్‌ పోర్ట్‌ఫోలియోలు దాదాపు ఒకేలాగా ఉన్నప్పటికీ, వాటి రాబడుల్లో మాత్రం తేడా ఉండొచ్చు.  అందుకని ఈక్విటీ ఫండ్‌లో ఇన్వెస్ట్‌ చేసేటప్పుడు సదరు ఫండ్‌ పోర్ట్‌ఫోలియోనే కీలకంగా చూడకూడదు. ఆ ఫండ్‌ పనితీరును కూడా మదింపు చేయాలి.

నేను 2017 నుంచి కొన్ని మ్యూచువల్‌ ఫండ్స్‌ల్లో ఇన్వెస్ట్‌ చేస్తున్నాను. నా పోర్ట్‌ఫోలియోలో సుందరమ్‌ రూరల్‌ అండ్‌ కంజప్షన్‌ ఫండ్, హెచ్‌డీఎఫ్‌సీ మిడ్‌–క్యాప్‌ ఆపర్చునిటీస్‌ ఫండ్, ఎల్‌ అండ్‌ టీ ఇండియా వేల్యూ ఫండ్, టాటా ఈక్విటీ పీఈ ఫండ్‌లు ఉన్నాయి. ఈ ఫండ్స్‌లో 2017 నుంచి సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌)లు ప్రారంభించాను. అయితే ఈ ఫండ్స్‌ నష్టాలు చూపడంతో 2018లో సిప్‌లు ఆపేశాను. ఈ ఏడాది కూడా ఈ ఫండ్స్‌ నష్టాల్లోనే ఉన్నాయి. ఈ ఫండ్స్‌లో ఇన్వెస్ట్‌మెంట్స్‌ కొనసాగించమంటారా ? లేకుంటే నా ఇన్వెస్ట్‌మెంట్స్‌ను వేరే ఫండ్స్‌కు మళ్లించమంటారా ?   –కళ్యాణి, విజయవాడ   మీ పోర్ట్‌ఫోలియోలో ఉన్నవన్నీ మంచి ఫండ్సే, పైగా ఇది మంచి కాంబినేషన్‌ కూడా. ఒక్కొక్క ఫండ్‌ది ఒక్కొక్క ప్రత్యేకమైన థీమ్‌. సుందరమ్‌ రూరల్‌ అండ్‌ కంజప్షన్‌ ఫండ్‌.. ప్రామిసింగ్‌ సెక్టోరియల్‌ ఫండ్‌. సాధారణంగా సెక్టోరియల్‌ ఫండ్స్‌లో ఇన్వెస్ట్‌ చేయవద్దని చెప్తుంటాను. కానీ  సుందరమ్‌ ఫండ్‌ దానికి మినహాయింపు. 2017లో మార్కెట్‌ మంచి స్థాయిలో ఉంది. ఇలాంటప్పుడు ఫండ్స్‌ పనితీరు బాగా ఉంటుంది. 2018లో మార్కెట్‌ అంతంతమాత్రంగానే ఉంది. ఫలితంగా దాదాపు ఫండ్స్‌ అన్నీ ఆశించిన స్థాయి పనితీరు కనబరచలేకపోయాయి. ఇక ఈ ఏడాది ఇప్పటివరకూ  పరిస్థితుల్లో పెద్దగా మార్పులేదు. మీరు ఎంచుకున్న ఫండ్స్‌ బాగా ఉన్నాయి. వీటన్నింటి పనితీరు పూర్తిగా మార్కెట్‌ పనితీరును బట్టే ఉంటుంది. అందుకే ఇప్పుడు నష్టాలు కనిపిస్తున్నాయి. నష్టాలు వస్తున్నా మీ ఇన్వెస్ట్‌మెంట్స్‌ను సిప్‌ల రూపంలో కొనసాగించండి. మార్కెట్లో పరిస్థితులు కుదుటపడితే, ఈ ఫండ్స్‌ మీకు లాభాలను చూపిస్తాయి. అసలు సిప్‌ల ద్వారా ఇన్వెస్ట్‌ చేయడానికి ఉన్న పరమార్థం కూడా ఇదే. మార్కెట్‌ పెరుగుతున్నప్పుడే కాకుండా మార్కెట్‌ పతనబాటలో ఉన్నప్పుడు కూడా అధైర్యపడకుండా ఇన్వెస్ట్‌ చేస్తే, దీర్ఘకాలంలో మంచి రాబడులు పొందగలరు. ఆల్ట్రా షార్ట్‌ డ్యురేషన్, లిక్విడ్‌ ఫండ్స్‌కు మధ్య తేడా ఏమిటి? వేటిల్లో రాబడులు అధికంగా వస్తాయి.?     –దామోదర్, విశాఖపట్టణం   ఆల్ట్రా షార్ట్‌ డ్యురేషన్, లిక్విడ్‌ ఫండ్స్‌లు రెండు వేర్వేరు రకాలు. వీటి మధ్య చాలా సన్నని విభజన రేఖ మాత్రమే ఉంటుంది. చట్ట ప్రకారం, లిక్విడ్‌ ఫండ్‌... 91 రోజుల మెచ్యురిటీ ఉండే మనీ మార్కెట్‌ సెక్యూరిటీల్లో ఇన్వెస్ట్‌ చేస్తుంది. అయితే సాధారణంగా చాలా మంది లిక్విడ్‌ ఫండ్‌ మేనేజర్లు 55 రోజుల నుంచి 60 రోజుల మెచ్యురిటీ ఉండే మనీ మార్కెట్‌ సెక్యూరిటీల్లో ఇన్వెస్ట్‌ చేస్తున్నారు. మరోవైపు మూడు నుంచి ఆరు వారాల మెచ్యూరిటీ ఉండే సాధనాల్లో ఆల్ట్రా–షార్ట్‌–డ్యురేషన్‌ ఫండ్స్‌ ఇన్వెస్ట్‌ చేస్తాయి. ఇక తాజా సెబీ నిబంధనల ప్రకారం, లిక్విడ్‌ ఫండ్స్‌ తమ నిధుల్లో కనీసం 20 శాతం వరకూ నగదు, ప్రభుత్వ సెక్యూరిటీలు, ట్రెజరీ బిల్లుల వంటి లిక్విడ్‌ అసెట్స్‌ల్లో ఇన్వెస్ట్‌ చేయాలి. డిజైన్‌ పరంగా చూస్తే, ఆల్ట్రా–షార్ట్‌–డ్యురేషన్‌ ఫండ్స్‌ కంటే లిక్విడ్‌ ఫండ్స్‌ ఒకింత సురక్షితమనైవని చెప్పవచ్చు. తాజా సెబీ నిబంధనల కారణంగా లిక్విడ్‌ ఫండ్స్‌ మరింత సురక్షితంగా మారాయి. ఆల్ట్రా–షార్ట్‌–డ్యురేషన్‌ ఫండ్స్‌తో పోల్చితే లిక్విడ్‌ ఫండ్స్‌ రాబడులు ఒకింత తక్కువగా ఉంటాయని చెప్పవచ్చు. మదుపు మొదలు పెట్టడానికి ముందుగా మ్యూచువల్‌ ఫండ్స్‌నే పరిగణించాలా? నేరుగా షేర్లలో ఇన్వెస్ట్‌ చేయకూడదా?  –అబ్దుల్లా, హైదరాబాద్‌   మదుపు మొదలు పెట్టడానికి మ్యూచువల్‌ ఫండ్స్‌ను ఎంచుకోవడం తెలివైన నిర్ణయం. దీర్ఘకాలిక ఆర్థిక లక్ష్యాల కోసం మ్యూచువల్‌ ఫండ్స్‌లోనే ఇన్వెస్ట్‌ చేయాలి. దీర్ఘకాలంలో ఫండ్స్‌ మంచి రాబడులనే ఇస్తాయి. ఇక నేరుగా ఈక్విటీలో ఇన్వెస్ట్‌ చేస్తే, ఒడిదుడుకులు తీవ్రంగా ఉంటాయి. తగిన అనుభవం, అవగాహన లేకపోతే నష్టాలు వస్తాయి. ఇన్వెస్ట్‌ చేయడానికి ఏ షేర్‌ను ఎంచుకోవాలి ? ఆ కంపెనీ ఫండమెంటల్స్‌ ఎలా ఉన్నాయి ? తదితర అంశాలపై సాధారణ ఇన్వెస్టర్‌ కంటే కూడా మ్యూచువల్‌ ఫండ్‌ మేనేజర్‌కు అధిక అవగాహన ఉంటుంది. మార్కెట్‌ సంబంధిత సాధనాల్లో గతంలో ఇన్వెస్ట్‌ చేసిన అనుభవం లేకుంటే, ముందుగా మ్యూచువల్‌ ఫండ్స్‌నే ఇన్వెస్ట్‌మెంట్స్‌ కోసం పరిగణించండి. మ్యూచువల్‌ ఫండ్స్‌ల్లో ఇన్వెస్ట్‌ చేస్తే, ముఖ్యంగా రెండు ప్రయోజనాలు లభిస్తాయి. మ్యూచువల్‌ ఫండ్స్‌లో ఇన్వెస్ట్‌ చేయడం వల్ల డైవర్సిఫికేషన్‌ ప్రయోజనాలు పొందవచ్చు. ఫండ్‌ మేనేజర్లు ప్రొఫెషనల్‌గా ఆలోచించి నిర్ణయాలు తీసుకుంటారు. కాబట్టి వారి అనుభవం మంచి ఫలితాలనిస్తుంది. ఇక రెండవది...మ్యూచువల్‌ ఫండ్స్‌లో చిన్న చిన్న మొత్తాల్లో కూడా ఇన్వెస్ట్‌ చేసే వీలుంటుంది. మీరు కనీసం నెలకు రూ.1,000తో మీ ఇన్వెస్ట్‌మెంట్స్‌ను మొదలు పెట్టవచ్చు. కనీసం ఐదు అంతకు మించిన కాలానికి ఇన్వెస్ట్‌ చేయాలనుకుంటే, మ్యూచువల్‌ ఫండ్స్‌కు మించిన ఇన్వెస్ట్‌మెంట్‌ సాధనం మరొకటి లేదు. ఫండ్స్‌లో ఒకేసారి పెద్ద మొత్తంలో ఇన్వెస్ట్‌ చేయకూడదు. నెలకు కొంత మొత్తం చొప్పున సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయాలి. మీకు జీతం పెరిగినా, ఇంక్రిమెంట్‌ వచ్చినా  ఈ పెరిగిన మొత్తంలో కొంత మొత్తాన్ని సిప్‌లకు జత చేయండి. ఒకవేళ మీరు స్వయం ఉపాధి లేదా వ్యాపారం చేస్తున్నట్లయితే, ఏడాదికి సిప్‌ మొత్తాన్ని కనీసం 5–10 శాతం చొప్పున పెంచండి. కనీసం ఏడాదికొకసారైనా మీ పోర్ట్‌ఫోలియోలోని ఫండ్ల పనితీరును సమీక్షించి, వాటి పనితీరు ఆధారంగా నిర్ణయాలు తీసుకోండి. 

మ్యూచువల్‌ ఫండ్స్‌కు సంబంధించి మూలధన లాభాలపై పన్నులు ఎలా  ఉంటాయో కొంత వరకూ అవగాహన ఉంది. అయితే పాక్షికంగా విత్‌డ్రాయల్స్‌ విషయంలో పన్నులు ఎలా ఉంటాయి ?  – అనురాధ, హైదరాబాద్‌   మీరు కొంత మొత్తం ఇన్వెస్ట్‌ చేసి కొన్ని మ్యూచువల్‌ ఫండ్‌ యూనిట్లు కొనుగోలు చేశారు. దీంట్లో కొంత భాగాన్ని విక్రయించారనుకుందాం.  మీరు యూనిట్లు కొనుగోలు చేసిన తేదీ, యూనిట్లను విక్రయించిన తేదీలను పరిగణనలోకి తీసుకొని మీకు వచ్చిన లాభాలు దీర్ఘకాలిక మూలధన లాభాలా ? స్వల్ప కాలిక మూలధన లాభాలా అనే విషయాన్ని నిర్దారిస్తారు. ఫస్ట్‌ ఇన్‌ ఫస్ట్‌ అవుట్‌(ఎఫ్‌ఐఎఫ్‌ఓ) సూత్రాన్ని ఇక్కడ అన్వయిస్తారు. మొదటగా కొనుగోలు చేసిన దాన్ని మొదటగా రిడీమ్‌ చేసినట్లుగా భావిస్తారు.  ఉదాహరణకు మీరు ఒక ఈక్విటీ ఫండ్‌లో రూ.5 లక్షల మేర ఇన్వెస్ట్‌ చేశారనుకుందాం. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)విధానంలో ఈ ఫండ్‌లో కొన్నేళ్లుగా ఇన్వెస్ట్‌ చేశారనుకుందాం. దీంట్లోంచి రూ. లక్ష మేర యూనిట్లను విక్రయించాలనుకున్నారనుకుందాం. వెయ్యి యూనిట్లను విక్రయించి రూ. లక్ష రిడీమ్‌ చేశారనుకుందాం. అన్నింటి కంటే ముందుగా కొన్న యూనిట్లను పరిగణనలోకి తీసుకుంటారు. ఇలాంటి సందర్భాల్లో ముందు కొన్న యూనిట్లను ముందుగా రిడీమ్‌(విక్రయించినట్లుగా) చేసినట్లుగా భావిస్తారు.  మీరు విక్రయించిన యూనిట్లలో ఏడాది క్రితం కొన్నవి కొన్ని, ఏడాది లోపల కొన్నవి కొన్ని ఉండొచ్చు. ఇలాంటి సందర్భంలో మీరు దీర్ఘకాలిక, స్వల్ప కాలిక మూలధన లాభాల పన్ను చెల్లించాల్సి రావచ్చు.   ప్ర: నేను మరో ఐదేళ్లలో రిటైర్‌ కాబోతున్నాను. రిటైర్మెంట్‌ అవసరాల కోసం ఈక్విటీ ఫండ్స్‌లో ఇన్వెస్ట్‌ చేస్తూ వచ్చాను. ఇప్పుడు ఈ మొత్తాన్ని వెనక్కి తీసుకున్నాను. రిటైరైన తర్వాత మొదటి ఐదేళ్ల ఖర్చుల నిమిత్తం ఈ రిటైర్మెంట్‌ నిధి నుంచి కొంత మొత్తాన్ని డెట్‌ ఫండ్స్‌ల్లో ఇన్వెస్ట్‌ చేద్దామనుకుంటున్నాను. ఇటీవలి ఐఎల్‌అండ్‌ఎఫ్‌ఎస్‌ ఎపిసోడ్‌ నేపథ్యంలో డెట్‌ ఫండ్స్‌లో ఇన్వెస్ట్‌ చేయడం మంచి నిర్ణయమేనా ? ఇప్పుడు నేను ఏం చేయాలి ?     –ఈశ్వర్, విశాఖపట్టణం   ఐఎల్‌అండ్‌ఎఫ్‌ఎస్‌ ఎపిసోడ్‌ నేపథ్యంలో డెట్‌ ఫండ్స్‌ పట్ల మీకే కాదు చాలా మందికి సంశయాలు ఏర్పడ్డ విషయం వాస్తవమే. అయితే ఈ భయాల నుంచి వీలైనంత త్వరగా బైటకు రండి.  అలా చేయకపోతే, మీరు డెట్‌ ఫండ్స్‌ అందించే మంచి ప్రయోజనాలు మిస్‌ చేసుకున్నవారవుతారు. కొత్తగా వచ్చిన సైడ్‌–పాకెటింగ్‌ రూల్స్‌(మ్యూచువల్‌ ఫండ్స్‌ ఇన్వెస్ట్‌ చేసిన ఏవైనా కంపెనీలు చెల్లింపుల్లో విఫలమైనా, ఆ తర్వాత రికవరీ చేసుకొని, ఆ రికవరీని ఇన్వెస్టర్లకు అందించడం(ఈ ఇన్వెస్టర్లు యూనిట్లను విక్రయించినా సరే, భవిష్యత్తులో వారికి ఆ మొత్తాన్ని అందించే వెసులుబాటు ఈ సైడ్‌ పాకెటింగ్‌ రూల్స్‌లో ఉన్నాయి) కారణంగా జరగరానిది ఏదైనా జరిగినా, మీ డబ్బులు పూర్తిగా రికవరీ అయ్యే అవకాశాలున్నాయి. డెట్‌ ఫండ్స్‌ పట్ల మీకు ఇప్పుడు సందేహాలు ఉన్నాయి. కాబట్టి మీకు ఒక విభిన్నమైన వ్యూహాన్ని సూచిస్తున్నాను. మీరు రిటైరైన తర్వాత మూడున్నరేళ్లకు కావలసిన మొత్తం ఖర్చులు ఎంతో లెక్కేయ్యండి. ఈ మొత్తాన్ని సేవింగ్స్‌ లింక్డ్‌ డిపాజిట్‌ ఖాతాలో డిపాజిట్‌ చేయండి.  బాండ్ల ఫండ్ల కన్నా ఈ ఖాతాలో రెండు నుంచి రెండున్నర శాతం తక్కువ రాబడులు వస్తాయి. అయితే మీరు ఈ సొమ్ములను ఎప్పుడు అవసరమైతే, అప్పుడు సులభంగా తీసుకోవచ్చు. ఆ తర్వాతి నాలుగేళ్ల కాలానికి అవసరమైన సొమ్ములను మంచి క్వాలిటీ ఉన్న డెట్‌ ఫండ్స్‌లో ఇన్వెస్ట్‌ చేయండి. ఇక మిగిలిన మొత్తాన్ని ఆల్ట్రా షార్ట్‌ డ్యురేషన్, లేదా షార్ట్‌ డ్యురేషన్‌ ఫండ్స్‌లో ఇన్వెస్ట్‌ చేయండి.  ప్ర: నేను గత కొంత కాలంగా మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. నా ఇన్వెస్ట్‌మెంట్స్‌ అన్నీ కలిపి రూ. కోటి దాటాయి. ఈ మొత్తాన్ని సిస్టమేటిక్‌ విత్‌డ్రాయల్‌ ప్లాన్‌ (ఎస్‌డబ్ల్యూపీ) రూపంలో రిడీమ్‌ చేసుకుందామనుకుంటున్నాను. ఎంత కాలంలో నేను ఈ డబ్బులను వెనక్కి తీసుకోవాలి ? ఈ విషయంలో ఏమైనా సలహాలు, సూచనలు ఇవ్వండి.      –రాజేశ్, విజయవాడ   ఏదైనా ఆర్థిక లక్ష్యం(ఇల్లు కొనుగోలు చేయడం, పిల్లల ఉన్నత చదువులు, తదితరాలు) కోసం మీరు ఈ ఇన్వెస్ట్‌మెంట్స్‌ చేసినట్లయితే, ఆ లక్ష్యాన్ని దృష్టిలో పెట్టుకొని మీ ఉపసంహరణ ప్రణాళిక (విత్‌డ్రాయల్‌ ప్లాన్‌)ఉండాలి. అలా కాకుండా కోటి రూపాయల నిధి ఏర్పాటు చేసుకోవడమే మీ లక్ష్యమైతే, మీ అవసరాలకు అనుగుణంగా విత్‌డ్రాయల్‌ ప్లాన్‌ ఉండాలి. ఈ డబ్బులు మీకు తక్షణం అవసరం లేని పక్షంలో ఈ మొత్తాన్ని ఫిక్స్‌డ్‌–ఇన్‌కమ్‌ ఫండ్‌లో ఇన్వెస్ట్‌ చేయండి. లేదంటే 30–50 శాతం మొత్తాన్ని ఫిక్స్‌డ్‌–ఇన్‌కమ్‌ ఫండ్‌లో ఇన్వెస్ట్‌ చేయండి. మిగిలిన మొత్తన్నా ఈక్విటీ ఫండ్‌లో ఇన్వెస్ట్‌ చేయండి. ఏదైనా కొనుగోలు నిమిత్తమో, లేదా వినియోగం నిమిత్తమే ఈ డబ్బులు ఇన్వెస్ట్‌ చేశారనుకోండి. దానికి తగ్గట్లుగా మీ ఉపసంహరణ ప్రణాళిక ఉండాలి. ఉదాహరణకు మీ పాప/ బాబు ఉన్నత విద్యావసరాలకు రూ.50 లక్షలు అవసరమవుతాయనుకుందాం. మొదటి ఏడాది రూ.12.5 లక్షలు  అవసరమనుకోండి.  ఈ సొమ్ములు అవసరమయ్యే ఒక ఏడాదికి ముందే రూ.50 లక్షల మొత్తాన్ని ఫిక్స్‌డ్‌ ఇన్‌కమ్‌ ఫండ్‌లో ఇన్వెస్ట్‌ చేయండి. మిగిలిన రూ.50 లక్షల మొత్తాన్ని 12–18 నెలల కాలంలో సిస్టమేటిక్‌ విత్‌డ్రాయల్‌ ప్లాన్‌(ఎస్‌డబ్ల్యూపీ)రూపంలో బదిలీ చేయండి. దీంతో మీ కోటి రూపాÆయలకు మార్కెట్‌ రిస్క్‌ ఉండదు. ఒకవేళ ఇప్పట్లో మీకు ఈ డబ్బులు అవసరం లేని పక్షంలో ఈ మ్యూచువల్‌ ఫండ్స్‌లో మీ ఇన్వెస్ట్‌మెంట్స్‌ను కొనసాగించండి. మరిన్ని రాబడులు వస్తాయి. ధీరేంద్ర కుమార్‌ సీఈవో, వ్యాల్యూ రీసెర్చ్‌  

త్వరలో ఎన్నికలు జరగనున్నాయి. ఈ ఎన్నికల్లో ఎవరికీ మెజారిటీ రాదని, సంకీర్ణ ప్రభుత్వం ఏర్పడే అవకాశాలే అధికంగా ఉన్నాయని మిత్రులంటున్నారు. ఈ పరిస్థితుల దృష్ట్యా రానున్న మూడేళ్లలో స్మాల్, మిడ్‌క్యాప్‌ ఫండ్స్‌ పనితీరు ఎలా ఉండబోతోంది ?   –సాగర్, హైదరాబాద్‌   ఈ ప్రశ్నకు జవాబు చెప్పడం కొంచెం కష్టసాధ్యమైన విషయమే.. స్మాల్, మిడ్‌ క్యాప్‌ ఫండ్స్‌ ఒక పూర్తి కాలపు మార్కెట్‌ సైకిల్‌లో మంచి రాబడులే సాధిస్తాయి. మార్కెట్‌ పతన సమయాల్లో మాత్రం తీవ్రమైన నిరాశకు గురి చేస్తాయి. దీర్ఘకాలం దృష్ట్యా చూస్తే, స్మాల్, మిడ్‌క్యాప్‌ ఫండ్స్‌ మంచి రాబడులేనిస్తాయి. భారత్‌ లాంటి దేశంలో చిన్న, మద్య తరహా కంపెనీలు ఎదగడానికి, లాభాలు ఆర్జించడానికి అవకాశాలు అధికంగా ఉంటాయి. అయితే రిస్క్‌ కూడా అధికంగానే ఉంటుంది. త్వరలో ఎన్నికలు రానుండడం, సంకీర్ణ ప్రభుత్వం ఏర్పడే అవకాశాలు, రానున్న మూడేళ్లలో ఎలా ఉంటాయి అనే అంశాలను పక్కన పెట్టండి. సాధారణంగా ఒక మార్కెట్‌ ఫుల్‌ సైకిల్‌ మూడు నుంచి ఐదేళ్ల వరకూ ఉంటుంది.  ఈ పూర్తి మార్కెట్‌ సైకిల్‌లో స్మాల్, మిడ్‌క్యాప్‌ ఫండ్స్‌ మంచి రాబడులే ఇస్తాయి. కాబట్టి ఐదేళ్ల పాటు ఇన్వెస్ట్‌ చేయగలిగి, ఒడిదుడుకులను ఎదుర్కొనగలిగితే స్మాల్, మిడ్‌క్యాప్‌ ఫండ్స్‌లో ఇన్వెస్ట్‌ చేయోచ్చు.    నేను గత ఏడాది నుంచి మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. అసలు ఏ కేటగిరీ ఫండ్స్‌లో ఇన్వెస్ట్‌ చేయాలి ? ఈ విషయంలో గమనంలోకి తీసుకోవలసిన అంశాలు ఏమైనా ఉన్నాయా ?    –ప్రియ దర్శిని, విశాఖపట్టణం   ఏ మ్యూచువల్‌ ఫండ్‌లో ఇన్వెస్ట్‌ చేయాలనేది కొన్ని కీలకమైన విషయాలపై ఆధారపడి ఉంటుంది. మీ ఆర్థిక లక్ష్యాలు ఏంటి ?, మీరు ఎంత మేర పెట్టుబడులు పెట్టగలరు?, ఎంత కాలం ఇన్వెస్ట్‌ చేయాలనుకుంటున్నారు ?, మార్కెట్‌ ఇన్వెస్ట్‌మెంట్స్‌ విషయంలో మీకున్న అనుభవం.. ఇలాంటి విషయాలను బట్టి ఎలాంటి కేటగిరీ మ్యూచువల్‌ ఫండ్స్‌లో ఇన్వెస్ట్‌ చేయాలో నిర్ణయించుకోవచ్చు. మీరు దీర్ఘకాలం పాటు ఇన్వెస్ట్‌ చేయాలనుకుంటే, పన్ను ఆదా మీ ఆర్థిక లక్ష్యాల్లో ఒకటైతే, మీరు ట్యాక్స్‌ సేవింగ్స్‌ మ్యూచువల్‌ ఫండ్‌ను ఎంచుకోవాలి. మీరు స్వల్పకాలమే మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటే,  లిక్విడ్‌ ఫండ్స్‌ను గాని ఆల్ట్రా–షార్ట్‌ డ్యురేషన్‌ ఫండ్‌ను ఎంచుకోవాలి.  మీరు మ్యూచువల్‌ ఫండ్స్‌లో ఇన్వెస్ట్‌ చేయడం మొదటిసారైతే, మొదటగా అగ్రెసివ్‌ హైబ్రిడ్‌ ఫండ్‌తో మొదలు పెట్టాలి. మీరు దీర్ఘకాలం పాటు ఇన్వెస్ట్‌ చేయాలనుకుంటే, మార్కెట్‌ పట్ల కొంచెం అవగాహన ఉండి ఉంటే, మల్టీక్యాప్‌ ఫండ్‌లో ఇన్వెస్ట్‌ చేయండి.   నా వయస్సు 28 సంవత్సరాలు. పన్ను మినహాయింపులకు సంబంధించి సెక్షన్‌ 80సీ పరిమితి అయిపోయింది. అదనపు పన్ను ప్రయోజనాల కోసం నేషనల్‌ పెన్షన్‌ సిస్టమ్‌(ఎన్‌పీఎస్‌)లో ఇన్వెస్ట్‌ చేయమంటారా ? లేకుంటే  దీంట్లో ఇన్వెస్ట్‌మెంట్స్‌కు కేటాయించే సొమ్ములను రెగ్యులర్‌ ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయమంటారా ? తగిన సలహా ఇవ్వండి.  – యూనస్, విజయవాడ   అదనపు పన్ను ప్రయోజనాల కోసం ఎన్‌పీఎస్‌లో ఇన్వెస్ట్‌ చేయడమే మంచిది. ఈ ఇన్వెస్ట్‌మెంట్‌ మీ ట్యాక్స్‌ స్లాబ్‌ను తగ్గించగలిగేటట్లు ఉంటే, ఎన్‌పీఎస్‌లో ఇన్వెస్ట్‌ చేసే నిర్ణయమే సరైనదే. ఆదాయపు పన్ను చట్టం సెక్షన్‌ 80 సి కింద రూ.లక్షన్నర వరకూ పన్ను మినహాయింపులు పొందవచ్చు. ఎన్‌పీఎస్‌లో రూ.50,000 వరకూ ఇన్వెస్ట్‌ చేస్తే  సెక్షన్‌ 80 సీసీడీ(1బీ) కింద అదనంగా ఈ మొత్తానికి పన్ను ప్రయోజనాలు పొందవచ్చు. గతంలో కంటే ఇప్పుడు ఎన్‌పీఎస్‌ మరింత ఆకర్షణీయంగా మారింది. రానున్న కాలంలో మరింత ఆకర్షణీయంగా మారే అవకాశాలు అధికంగా ఉన్నాయి. ఈక్విటీలపై దీర్ఘకాలిక మూలధన లాభాల పన్ను (ఎల్‌టీసీజీ) విధించడంతో ఈక్విటీల ఆకర్షణ ఒకింత తగ్గిందనే చెప్పాలి. ఇప్పుడు ఎన్‌పీఎస్‌ రెండు అంశాల్లో మెరుగుపడింది. మొదటిది మీరు రిటైరైన తర్వాత ఎన్‌పీఎస్‌లో పోగుపడిన మొత్తంలో మీరు విత్‌డ్రా చేసుకునే 60 శాతం మొత్తంపై పూర్తి పన్ను మినహాయింపు లభిస్తుంది. రెండోది ఈక్విటీ కేటాయింపులకు సంబంధించిన గరిష్ట పరిమితిని 50 శాతం నుంచి 75 శాతానికి పెంచడం, ఈ రెండు అంశాలను పరిగణనలోకి తీసుకుంటే, మీరు ఎన్‌పీఎస్‌లోనే ఇన్వెస్ట్‌ చేయండి.   ప్రస్తుతం నా పోర్ట్‌ఫోలియోలో పదికి పైగా మ్యూచువల్‌ ఫండ్స్‌ ఉన్నాయి. ఈ సంఖ్యను 5కు తగ్గిద్దామనుకుంటున్నాను. పాత  ఫండ్స్‌ నుంచి ఇన్వెస్ట్‌మెంట్స్‌ను కొత్తగా ఐదు మ్యూచువల్‌ ఫండ్స్‌ను ఎంచుకొని, వాటికి బదిలీ చేద్దామనుకుంటున్నాను. ఒకేసారి ఈ ఇన్వెస్ట్‌మెంట్స్‌ను బదిలీ చేయమంటారా? లేక సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌)ను అనుసరించమంటారా?   – జాన్సన్, నెల్లూరు   సాధారణంగా ఒక ఇన్వెస్టర్‌ పోర్ట్‌ఫోలియోలో ఐదు నుంచి ఏడు మ్యూచువల్‌ ఫండ్స్‌ ఉంటే సరిపోతుంది. డైవర్సిఫికేషన్‌ ప్రయోజనాల కోసం లార్జ్‌క్యాప్, మిడ్‌క్యాప్, మల్టీక్యాప్, స్మాల్‌క్యాప్‌ ఫండ్స్‌ సమ్మేళనంగా మీ పోర్ట్‌ఫోలియోను రూపొందించుకోవాలి. పోర్ట్‌ఫోలియో పునర్వ్యస్థీకరణలో భాగంగా పాత ఫండ్స్‌ నుంచి ఇన్వెస్ట్‌మెంట్స్‌ను కొత్త ఫండ్స్‌లోకి బదిలీ చేయడం కంటే, మీ పోర్ట్‌ఫోలియోలోనే సర్దుబాటు చేసే అవకాశాన్నీ పరిశీలించండి. మంచి రాబడులు లేని ఫండ్స్‌ నుంచి ఇన్వెస్ట్‌మెంట్స్‌ను మంచి రాబడలు వచ్చే ఫండ్స్‌కు మళ్లించండి. ఒక వేళ మీ పోర్ట్‌ఫోలియోలోని ఫండ్స్‌అన్ని సంతృప్తికరమైన రాబడులు ఇవ్వలేని పక్షంలో అన్ని కొత్త ఫండ్స్‌కు మీ ఇన్వెస్ట్‌మెంట్స్‌ను బదిలీ చేయండి. దీనికి సిస్టమేటిక్‌ ట్రాన్స్‌ఫర్‌ ప్లాన్‌(ఎస్‌టీపీ) విధానాన్ని అనుసరించండి. ధీరేంద్ర కుమార్‌ సీఈవో, వ్యాల్యూ రీసెర్చ్‌  

బాండ్‌ ఫండ్స్‌ పనితీరు గత ఏడాది కాలంలో సంతృప్తికరంగా లేదు. బాండ్ల రాబడులు పెరగడం వల్ల ఈ బాండ్‌ ఫండ్స్‌ ఎలాంటి రాబడులనివ్వలేదు. కొన్నైతే నష్టాలనూ ఇచ్చాయి. ఇప్పుడైతే అమెరికాలో బాండ్ల రాబడులు స్థిరంగా ఉన్నాయి. ఈ ప్రభావంతో భారత్‌లో కూడా బాండ్ల రాబడులు స్థిరత్వాన్ని పొందుతాయా? ఇప్పుడు బాండ్ల ఫండ్లు మంచి రాబడులనిచ్చే అవకాశాలున్నాయా? – వినయ్, హైదరాబాద్‌   సాధారణంగా ఇన్వెస్టర్లు ఆదాయం ఖచ్చితంగా వస్తుందనే అంచనాలుంటేనే బాండ్‌ ఫండ్లలో ఇన్వెస్ట్‌  చేస్తారు. ఇక ఈ ఏడాది అన్ని బాండ్ల ఫండ్లు నెగిటివ్‌ రాబడులిచ్చాయనేది నిజం కాదు. దీర్ఘకాల బాండ్‌ ఫండ్స్‌ మాత్రమే నష్టాలనిచ్చాయి. వడ్డీరేట్లు తగ్గుతాయేమోనని అందరూ అంచనాలు వేశారు. కానీ ఈ అంచనాలకు భిన్నంగా వడ్డీ రేట్లు పెరిగాయి. బాండ్‌ ఫండ్ల రాబడులు వడ్డీరేట్లకు విలోమంగా ఉంటాయి. అంటే వడ్డీరేట్లు తగ్గితే బాండ్‌ ఫండ్ల రాబడులు పెరుగుతాయి. వడ్డీరేట్లు పెరిగితే బాండ్‌ ఫండ్ల రాబడులు తగ్గుతాయి. అమెరికాలో బాండ్ల రాబడులు స్థిరంగా ఉన్నాయని, మన మార్కెట్లోనూ అలాంటి పరిస్థితే ఉంటుందని అంచనా వేయకూడదు. విదేశీ మార్కెట్ల ప్రభావం మనపై పెద్దగా ఉండదు.  ద్రవ్యోల్బణం, నగదు సరఫరా తదితర అంశాలపై బాండ్‌ ఫండ్ల రాబడులు ఆధారపడి ఉంటాయి. ఈ అంశాలను పరిగణనలోకి తీసుకొని, ఆర్‌బీఐ తీసుకునే నిర్ణయాన్ని బట్టి బాండ్‌ ఫండ్స్‌ రాబడులను అంచనా వేయొచ్చు. ఆ దృష్ట్యా చూస్తే, బాండ్‌ ఫండ్ల విషయంలో ఒక తటస్థ పరిస్థితి ఉత్పన్నమవ్వగలదని తెలుస్తోంది. ప్రస్తుతం ద్రవ్యోల్బణం పెరుగుతోంది. ఈ నేపథ్యంలో వడ్డీరేట్లు తగ్గే అవకాశాలున్నాయి. దీంతో బాండ్ల ఫండ్లకు ప్రయోజనం చేకూరుతుంది. బాండ్ల ఫండ్లలో ఇన్వెస్ట్‌  చేయడం వల్ల మన ఇన్వెస్ట్‌మెంట్స్‌కు స్థిరత్వం కలుగుతుంది. ఒకవేళ నష్టాలు రావడం సంభవించినా, మన పెట్టుబడి పెద్ద స్థాయిలో హరించుకుపోయే ప్రమాదం ఉండకపోవచ్చు. ఐఎల్‌ అండ్‌ ఎఫ్‌ఎస్‌ గ్రూప్‌ కంపెనీల వల్ల తలెత్తిన సంక్షోభం కారణంగా ఇటీవల కొన్ని లిక్విడ్, బాండ్‌ ఫండ్లకు నష్టాలు వచ్చాయి. ఇది తాత్కాలికమే. ఇది వడ్డీరేట్లపై పెద్దగా ప్రభావం చూపించకపోవచ్చు.   నా పోర్ట్‌ఫోలియోలో 10–15 వరకూ మ్యూచువల్‌ ఫండ్స్‌ ఉన్నాయి. ఏ ఫండ్‌ ఏ రేంజ్‌లో ఎంత రాబడులు ఇచ్చిందో నాకు అంతా గందరగోళంగా ఉంది. ఇప్పుడు నేనేం చేయాలి ? –ఖదీర్, విజయవాడ   దీనికి ఒకటే పరిష్కారం. మీ పోర్ట్‌ఫోలియోను ప్రక్షాళన చేయండి. మీ పోర్ట్‌ఫోలియోలో 4–5 మంచి ఫండ్స్‌ను మాత్రమే ఉంచుకోండి. మీ ఫండ్స్‌ ఇన్వెస్ట్‌మెంట్స్‌  ఏడాది దాటితే, ఆ ఫండ్స్‌ నుంచి మీ ఇన్వెస్ట్‌మెంట్స్‌ను వెనక్కి తీసుకుంటే, వాటికి ఎలాంటి ఎగ్జిట్‌ లోడ్‌ ఉండదు. ఇలా ఎలాంటి ఎగ్జిట్‌ లోడ్‌ ఉండని, పనితీరు సరిగ్గా లేని, అంతంత మాత్రం పనితీరు ఉన్న ఫండ్స్‌ను, ఒకే పోర్ట్‌ఫోలియో ఉన్న ఫండ్స్‌ నుంచి మీ ఇన్వెస్ట్‌మెంట్స్‌ను వెనక్కి తీసుకోండి. మీ పోర్ట్‌ఫోలియోలో 4–5 మంచి మల్టీక్యాప్‌ ఫండ్స్‌ ఉండేలా చూసుకోండి. ఈ 4–5 మల్టీ క్యాప్‌ ఫండ్స్‌ డైవర్సిఫైడ్‌గా ఉండాలన్న విషయాన్ని మర్చిపోకండి. ఇక కొత్త ఫండ్స్‌లో ఇన్వెస్ట్‌ చేయాలన్న కోరికను అదుపులో పెట్టుకోండి.   నేను సీనియర్‌ సిటిజన్‌ను. అమెరికా షేర్లలో నేరుగా ఇన్వెస్ట్‌ చేయవచ్చా? లేక అమెరికా, యూరప్‌ ఈక్విటీ మార్కెట్లలో ఇన్వెస్ట్‌ చేసే భారత మ్యూచువల్‌ ఫండ్స్‌ ఏమైనా ఉన్నాయా? ఉంటే, అలాంటి వాటిల్లో కొన్ని మంచి ఫండ్స్‌ను సూచించండి? – ఆనంద రావు, విశాఖపట్టణం   విదేశీ ఈక్విటీ మార్కెట్లో ఇన్వెస్ట్‌ చేయడానికి భారతీయులకు రెండు, మూడు మార్గాలున్నాయి. భారతీయులెవరైనా సరే 2 లక్షల డాలర్ల వరకూ అమెరికా షేర్లలో నేరుగా ఇన్వెస్ట్‌ చేయవచ్చు. అమెరికా షేర్లలో ఇన్వెస్ట్‌ చేయడానికి సలహా, సహకారాలు అందించే స్టాక్‌ బ్రోకర్లు ఇక్కడ చాలా మందే ఉన్నారు. ఇక మ్యూచువల్‌ ఫండ్స్‌ ద్వారా కూడా విదేశీ స్టాక్‌ మార్కెట్లో ఇన్వెస్ట్‌ చేయవచ్చు. ఇలా మీరు ఇన్వెస్ట్‌ చేయడానికి మోతిలాల్‌ ఓస్వాల్‌ నాస్‌డాక్‌ 100 ఈటీఎఫ్‌ ఫండ్‌ను పరిశీలించవచ్చు. గత ఏడాది కాలంలో ఈ ఫండ్‌ 20 శాతం వరకూ రాబ డినిచ్చింది. ఈ ఫండ్‌ ఆరంభమై... ఏడేళ్లు. ఈ ఏడేళ్లలో కూడా ఈ ఫండ్‌ మంచి రాబడులనే ఇచ్చింది. మీరు ఇన్వెస్ట్‌ చేయడానికి మరికొన్ని ఫండ్స్‌ను కూడా పరిశీలించవచ్చు. అవి ఫ్రాంక్లిన్‌ యూఎస్‌ ఆపర్చునిటీస్‌ ఫండ్, రిలయన్స్‌ యూఎస్‌ ఈక్విటీ అపర్చునిటీస్‌ ఫండ్, ఐసీఐసీఐ ప్రుడెన్షియల్‌ యూఎస్‌ బ్లూచిప్‌ ఈక్విటీ ఫండ్‌.  కొన్ని ఫండ్స్‌ తమ మొత్తం నిధుల్లో 65 శాతం వరకూ భారత షేర్లలో, మిగిలిన 35 శాతం వరకూ ఇతర దేశాల షేర్లలో ఇన్వెస్ట్‌ చేస్తున్నాయి. ఇలాంటి ఫండ్లలో పరాగ్‌ పరిఖ్‌ లాంగ్‌ టర్మ్‌ ఈక్విటీ ఫండ్‌ను పరిశీలించవచ్చు. ఈ ఫండ్‌ తన నిధుల్లో 30 శాతం వరకూ అమెరికా షేర్లలో ఇన్వెస్ట్‌ చేస్తోంది. ఒక పూర్తి మార్కెట్‌ సైకిల్‌ కాలంలో ఈ ఫండ్‌ మంచి రాబడులనే ఇచ్చింది. ఈ ఫండ్‌లో డైవర్సిఫికేషన్‌ ప్రయోజనాలు బాగా ఉన్నాయి. - ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను ఇటీవలే ఉద్యోగంలో చేరాను. మ్యూచువల్‌ ఫండ్స్‌లో 25 ఏళ్లపాటు ఇన్వెస్ట్‌ చేయాలనుకుంటున్నాను. మల్టీక్యాప్‌ ఫండ్‌ను ఎంచుకోవాలా ? స్మాల్‌ క్యాప్‌ ఫండ్‌నా లేక మిడ్‌క్యాప్‌ ఫండ్‌ను ఎంచుకోవాలా ? 25 ఏళ్ల కాలంలో మల్టీ క్యాఫ్‌ ఫండ్‌ కంటే స్మాల్‌క్యాప్‌ ఫండ్‌ అధిక రాబడులనిస్తుందా ? ఏ ఫండ్‌ను ఎంచుకోమంటారు ?   –ఉమాదేవి, విశాఖ పట్టణం   భారత్‌లాంటి దేశాల్లో 25 ఏళ్ల కాలాన్ని పరిగణనలోకి తీసుకుంటే స్మాల్‌ క్యాప్‌ ఫండ్‌ అధిక రాబడులనిస్తుంది. స్మాల్‌ క్యాప్‌ కంటే మిడ్‌ క్యాప్‌ ఫండ్‌లో తక్కువ రాబడులు వస్తాయి. మిడ్‌ క్యాప్‌ కంటే మల్టీ క్యాప్‌లో ఇంకా తక్కువగా రాబడులు వస్తాయి. మల్టీ క్యాప్‌ ఫండ్స్‌.. స్మాల్‌ క్యాప్, మిడ్‌క్యాప్, లార్జ్‌ క్యాప్‌ కంపెనీల్లో కూడా ఇన్వెస్ట్‌ చేస్తాయి. కాలం గడుస్తున్న కొద్దీ మల్టీ క్యాప్‌ మరింత విస్తరిస్తాయి. అవి పెరుగుతున్న కొద్దీ స్మాల్‌ క్యాప్‌ కంపెనీల్లో ఇన్వెస్ట్‌ చేయడం.. మల్టీ క్యాప్‌ ఫండ్స్‌కు కొంచెం సమస్యాత్మకంగానే పరిణమిస్తుంది. భారత ఆర్థిక వ్యవస్థ మారుతున్న తీరు, పరిణామం చెందుతున్న రీతిని బట్టి చూస్తే.. స్మాల్‌ క్యాప్‌ కంపెనీలే మంచి వృద్ధిని సాధిస్తాయి. భవిష్యత్తులో పెద్ద కంపెనీగా మారే చిన్న కంపెనీని ఇప్పుడే మనం గుర్తించగలిగి, ఆ స్టాక్‌లో ఇన్వెస్ట్‌ చేస్తే,  మంచి రాబడులు పొందవచ్చు. వీటిన్నింటిని దృష్టిలో పెట్టుకుంటే, స్మాల్‌ క్యాప్‌ ఫండ్స్‌లో ఇన్వెస్ట్‌ చేయడమే మంచిది అనిపిస్తుంది. అయితే స్మాల్‌ క్యాప్‌ కంపెనీల్లో ఇన్వెస్ట్‌ చేయడం చాలా రిస్క్‌తో కూడిన పని. ఒక్కోసారి భారీ నష్టాలు కూడా వచ్చే అవకాశాలున్నాయి. అయితే 25 ఏళ్ల కాలాన్ని పరిగణనలోకి తీసుకుంటే, మల్టీ క్యాప్‌ ఫండ్స్‌ కంటే మిడ్‌ క్యాప్‌ ఫండ్స్‌ అధిక రాబడులను, మిడ్‌ క్యాప్‌ ఫండ్స్‌ కంటే స్మాల్‌ క్యాప్‌ ఫండ్స్‌ మరింత అధిక రాబడులను ఇస్తాయి. అధిక రిస్క్‌ భరించలేని పక్షంలో మీ ఇన్వెస్ట్‌మెంట్స్‌ను రెండు సమాన భాగాలు చేసి, ఒక భాగాన్ని స్మాల్‌ క్యాప్‌ ఫండ్‌లో, మిగిలిన దానిని మరో రెండు భాగాలు చేసి, ఒక భాగాన్ని మల్టీ క్యాప్‌ ఫండ్‌లోనూ, మరో భాగాన్ని మిడ్‌క్యాప్‌ ఫండ్‌లోనూ ఇన్వెస్ట్‌ చేయండి.   నా వయస్సు 22 సంవత్సరాలు. క్యాంపస్‌ సెలక్షన్స్‌లోనే  ఉద్యోగం వచ్చేసింది. మూడేళ్లలో ఒక బైక్‌ను, పదిహేనేళ్లలో ఒక ఇంటిని కొనుక్కోవాలనుకుంటున్నాను.  ఏ ఫండ్స్‌లో ఇన్వెస్ట్‌ చేస్తే, నా లక్ష్యాలు నెరవేరతాయి?  నెలకు రూ.3,000 వరకూ ఇన్వెస్ట్‌ చేయాలనుకుంటున్నాను. నెలకు రూ.3,000 సరిపోతాయా ? –భార్గవ, హైదరాబాద్‌   నెలకు ఎంత మొత్తం ఇన్వెస్ట్‌ చేయాలన్నది మీరు కొనుగోలు చేయాలనుకుంటున్న బైక్, ఇంటి ధరలను బట్టి ఉంటుంది. నెలకు రూ.3,000 ఇన్వెస్ట్‌ చేయడం సరిపోవచ్చు. లేదా సరిపోకపోవచ్చు. అయితే 22 ఏళ్ల వయస్సులోనే కొన్ని ఆర్థిక లక్ష్యాలను ఏర్పాటు చేసుకొని, నెలకు ఎంతో కొంత మొత్తం పొదుపు చేయాలనుకోవడం చాలా మంచి విషయం. కొన్ని ఆర్థిక లక్ష్యాలకు నిర్దిష్టమైన కాలపరిమితి ఉంటుంది. కొన్నింటికి ఉండదు. ఉదాహరణకు పిల్లల ఉన్నత చదువుల కోసం ఇన్వెస్ట్‌ చేయాలనుకోండి. కచ్చితంగా వాళ్లు ఉన్నత విద్యాభ్యాస అవసరాలకు ఆ సొమ్ములు అంది తీరాలి. ఇక మీ రెండు ఆర్థిక లక్ష్యాలకు కాలపరిమితి కొంచెం అటూ, ఇటూ అయినా పర్లేదు. అంటే మీరు మూడేళ్లలో బైక్‌ కొనాలనుకుంటున్నారు. మీరు అనుకున్న మొత్తం రెండున్నరేళ్లకే సమకూరితే సంతోషమే కదా! లేదా మూడేన్నరేళ్లు పట్టినా ఓకే కదా! పిల్లల ఉన్నత విద్యావసరాల కోసం నిర్దిష్ట కాల పరిమితి ఉంటుంది. అలా కాకుండా మీ లక్ష్యాలకు కాలపరిమతిని ఒక ఆరు నెలలు అటూ, ఇటూ అయినా పర్లేదు. ఇక ఈ లక్ష్యం (మూడేళ్లలో బైక్‌ కొనుగోలు)కోసం ఏదైనా మంచి బ్యాలన్స్‌డ్‌ ఫండ్‌(అగ్రెసివ్‌ హైబ్రిడ్‌)లో ఇన్వెస్ట్‌ చేయండి. దీని వల్ల ఇన్వెస్ట్‌ చేసే అలవాటు మీకు అలవడుతుంది. మార్కెట్‌ ఒడిదుడుకులకు గురైనా ఆ ప్రభావం ఈ బ్యాలన్స్‌డ్‌ ఫండ్‌పై పెద్దగా ఉండదు. ఈ బ్యాలన్స్‌డ్‌ ఫండ్‌లో ఇన్వెస్ట్‌ చేసి, మీకు కావలసిన మొత్తం రాగానే ఈ మొత్తాన్ని విత్‌డ్రా చేసుకొని మీకు కావలసిన బైక్‌ను కొనుగోలు చేయవచ్చు. బైక్‌ కొనుగోలు చేయడానికి ఎప్పుడూ అప్పు చేయకండి. ఉదాహరణకు మీరు రూ.60,000–70,000 రేంజ్‌లో ఉండే బైక్‌ కొనాలనుకున్నారనుకుందాం. నెలకు రూ.3,000 చొప్పున ఇన్వెస్ట్‌ చేస్తూ పోయారనుకోండి. ఒకటిన్నర లేదా రెండేళ్లలోనే మీరు బైక్‌ కొనుక్కోగలరు. ఇదే ప్రణాళికను ఇంటి కొనుగోలు లక్ష్యం కోసం 15 ఏళ్లపాటు కొనసాగించండి. మీరు కొనుగోలు చేయాలనుకుంటున్న ఇంటికి కావలసిన మొత్తంలో కనీసం సగమైనా సమకూరవచ్చు. మిగిలిన మొత్తాన్ని రుణంగా తీసుకొని ఇంటిని కొనుగోలు చేయండి. అత్యవసరాలు, ఇంటి కొనుగోలు కోసం అప్పు చేయవచ్చు. కానీ వినియోగ వస్తువుల కోసం కాదనేది నా అభిప్రాయం.    ఈక్విటీ లింక్డ్‌ సేవింగ్స్‌ స్కీమ్‌(ఈఎల్‌ఎస్‌ఎస్‌) లాక్‌ ఇన్‌ పీరియడ్‌ మూడేళ్లు కదా ! ఈ మూడేళ్ల లాక్‌–ఇన్‌ పీరియడ్‌ను పరిగణనలోకి తీసుకుంటే ఈఎల్‌ఎస్‌ఎస్‌ల్లో సిప్‌ల ద్వారా ఇన్వెస్ట్‌ చేయడం మంచిదా ? లేకుంటే ఒకేసారి పెద్ద మొత్తంలో ఇన్వెస్ట్‌  చేస్తే మంచిదా ? –రాకేష్, ఈమెయిల్‌   మంచి రాబడులు పొందడానికి, పన్ను ఆదా కోసం ఈఎల్‌ఎస్‌ఎస్‌లు మంచి మదుపు సాధనాలు. ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయడానికి సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) ఎలా మంచి ఫలితాలనిస్తుందో, ఈఎల్‌ఎస్‌ఎస్‌లో ఇన్వెస్ట్‌మెంట్స్‌కు కూడా అలాంటి మంచి ఫలితాలనే ఇస్తుంది. మీరు ఇన్వెస్ట్‌ చేయాలనుకుంటున్న పెద్ద మొత్తాన్ని కనీసం 12 సమాన భాగాలుగా చేసి, నెలకు ఒక్కో భాగాన్ని సిప్‌ విధానంలో ఈఎల్‌ఎస్‌ఎస్‌ల్లో ఇన్వెస్ట్‌ చేయండి. దీనివల్ల మీరు మార్కెట్‌ ఒడిదుడుకుల నుంచి రక్షణ పొందగలుగుతారు.   - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను ఏడాది క్రితం డీఎస్‌పీ స్మాల్‌క్యాప్‌ ఫండ్‌లో రూ. 2 లక్షలు ఇన్వెస్ట్‌ చేశాను. ఇతర స్మాల్‌ క్యాప్‌ ఫండ్స్‌తో పోల్చితే ఈ ఫండ్‌ పనితీరు బాగా లేదు. ఈ ఫండ్‌ నుంచి మొత్తం ఇన్వెస్ట్‌మెంట్స్‌ను వెనక్కి తీసుకొని కెనరా రెబొకో లేదా రిలయన్స్‌ స్మాల్‌ క్యాప్‌ ఫండ్‌లో ఇన్వెస్ట్‌ చేయాలనుకుంటున్నాను. లేదంటే  డీఎస్‌పీ స్మాల్‌ క్యాప్‌ఫండ్‌ నుంచి వెనక్కి తీసుకున్న మొత్తాన్ని రెండు సమాన భాగాలుగా చేసి, ఈ రెండు ఫండ్స్‌లో ఇన్వెస్ట్‌ చేయమంటారా ? ఈ విషయమై తగిన సలహా ఇవ్వండి.   –రంజాన్, విశాఖపట్టణం   డీఎస్‌పీ స్మాల్‌క్యాప్‌ ఫండ్‌ గతంలో మైక్రో ఫండ్‌గా మంచి పనితీరు కనబరిచింది. గత ఏడాది కాలంలో ఈ ఫండ్‌ పనితీరు బాగా లేదంటున్నారు. కానీ ఒక స్మాల్‌ క్యాప్‌ ఫండ్‌ పనితీరును అంచనా వేయడానికి ఏడాది కాలం సరైన ప్రాతిపదిక కాదు. అసలు ఒకటి లేదా రెండేళ్ల పనితీరును బట్టి స్మాల్‌ క్యాప్‌ ఫండ్స్‌ పనితీరును అంచనా వేయకూడదు.  ఎలాంటి అంతరాయాలు లేకుండా కనీసం ఐదేళ్లపాటు ఇన్వెస్ట్‌ చేయాలనుకుంటేనే స్మాల్‌ క్యాప్‌ ఫండ్స్‌ను ఎంచుకోవాలి. స్మాల్‌క్యాప్‌ ఫండ్స్‌లో మీరు ఎదుర్కొం టున్న సమస్యలే.. అంటే.. ఏడాది, రెండేళ్ల కాలంలో పనితీరు అంతంతమాత్రంగానే ఉండటం, అశించిన స్థాయిలో రాబడులు ఇవ్వలేకపోవడం వంటి సమస్యలే ఉంటాయి. వీటన్నింటికీ సిద్ధపడే స్మాల్‌ క్యాప్‌ ఫండ్స్‌లో ఇన్వెస్ట్‌ చేయాలి. మరోవైపు మీరు ఇన్వెస్ట్‌ చేయాలనుకుంటున్న కెనరా రొబొకో లేదా రిలయన్స్‌ స్మాల్‌క్యాప్‌ వంటి ఫండ్స్‌కు ఇలాంటి సమస్య లే ఉండొచ్చు. పైగా గతంలో ఈ రెండు ఫండ్స్‌ ఇలాంటి సమస్యలనే ఎదుర్కొన్నాయి. ఏ స్మాల్‌ క్యాప్‌ ఫండ్‌ౖMðనా ఇలాంటి ఇబ్బందులు తప్పవు. అందుకని ఈ ఫండ్‌లో ఇన్వెస్ట్‌మెంట్స్‌ను కొనసాగించండి. స్మాల్‌ క్యాప్‌ ఫండ్స్‌లో వచ్చే ఇలాంటి సమస్యలను, ఒడిదుడుకులను మీరు తట్టుకోలేకపోతే, ఈ ఫండ్‌ నుంచి వైదొలగండి. మంచి బ్యాలన్స్‌డ్‌ ఫండ్‌ను ఎంచుకోండి. పనితీరుతో పనిలేకుండా కనీసం మూడేళ్ల పాటు ఈ ఫండ్‌లో ఇన్వెస్ట్‌ చేయండి.   నేను గృహరుణం తీసుకొని ఇల్లు కొనుక్కున్నాను. ఈ గృహరుణంపై వడ్డీ రేట్లు 8.9%గా ఉంది. మ్యూచువల్‌ ఫండ్స్‌లో నాకు కొన్ని ఇన్వెస్ట్‌మెంట్స్‌ ఉన్నాయి. ఈ మ్యూచువల్‌ ఫండ్స్‌ ఇన్వెస్ట్‌మెంట్స్‌ ద్వారా గృహ రుణాన్ని ముందుగానే తీర్చివేయాలనుకుంటున్నాను. నాది సరైన నిర్ణయమేనా?            –కిరణ్, ఖమ్మం   మీ నిర్ణయం దాదాపు సరైనది కాదు అనుకుంటున్నాను. దీర్ఘకాలం(కనీసం 8–10 ఏళ్లు మ్యూచువల్‌ ఫండ్స్‌లో మీరు ఇన్వెస్ట్‌ చేయగలిగితే) దృష్ట్యా చూస్తే, మీ నిర్ణయం ఒక్క శాతం కూడా కరెక్ట్‌ కాదు. మీకు నెలవారీ వచ్చే క్రమబద్ధమైన ఆదాయం ద్వారా మీరు గృహ రుణాన్ని చెల్లించడంలో ఎలాంటి ఇబ్బందులు లేనప్పుడు గృహ రుణాన్ని ముందుగానే చెల్లించాలన్న ఆలోచనను మానేయండి. అన్ని రుణాలతో(వ్యక్తిగత, వాహన, క్రెడిట్‌ కార్డ్‌ తదితర) పోల్చితే ఒక వ్యక్తి  తక్కువ వడ్డీకి తీసుకోదగ్గ ఏకైక రుణం.. గృహ రుణమే. ఈ రుణం ద్వారా ఒక ఆస్తిని ఏర్పాటు చేసుకునే వెసులుబాటు ఉంటుంది. అంతేకాకుండా, ఆ ఆస్తి విలువ కాలంతో పాటు పెరుగుతూ ఉంటుంది. మీరు కనుక ఆ ఇంట్లో నివసిస్తున్నట్లయితే, ఇది నా సొంత ఇల్లు, ఇది నా కష్టార్జితంతో సంపాదించుకున్న ఇల్లు అన్న భావనకు మించినది మరేదీ ఉండదు. మీ గృహరుణం కాలపరిమితి ఐదేళ్లకు మించి ఉన్నప్పుడు, గృహ రుణాన్ని ముందస్తుగానే చెల్లించడం సరైనది కాదు. పైగా మ్యూచువల్‌ ఫండ్స్‌లో ఇన్వెస్ట్‌మెంట్స్‌ దీర్ఘకాలం పాటు కొనసాగిస్తే, ఇప్పుడు వచ్చే రాబడుల కంటే అధికంగానే రాబడులు వచ్చే అవకాశాలు అధికంగా ఉంటాయి.   నేను లాయర్‌గా పనిచేస్తున్నాను. పన్ను ప్రయోజనాల కోసం నేను పీపీఎఫ్, ఈఎల్‌ఎస్‌ఎస్‌(ఈక్విటీ లింక్డ్‌  సేవింగ్స్‌ స్కీమ్స్‌)ల్లో ఇన్వెస్ట్‌ చేయాల్సి ఉంది. దేంట్లో ఎంతెంత ఇన్వెస్ట్‌ చేస్తే బాగుంటుంది ? ఇక ఈఎల్‌ఎస్‌ఎస్‌ల విషయానికొస్తే, ఒక ఫండ్‌లో ఇన్వెస్ట్‌ చేయడం కన్నా, రెండు ఫండ్స్‌ల్లో ఇన్వెస్ట్‌ చేయడం మంచిది కదా !   –జగన్నాధ్‌ నండూరి, హైదరాబాద్‌   దీర్ఘకాలం పాటు చూస్తే, ఈక్విటీ మంచి రాబడులనిచ్చే అసెట్‌ అని చెప్పవచ్చు. సంపద సృష్టి విషయంలో ప్రజా భవిష్యనిధి(పీపీఎఫ్‌) కన్నా, ఈఎల్‌ఎస్‌ఎస్‌(ఈక్విటీ లింక్డ్‌ సేవింగ్స్‌ స్కీమ్స్‌) చాలా ఉన్నతమైన స్థాయిలో ఉంటుంది. స్వల్ప కాలంలో ఈక్విటీ ఫండ్స్‌లో నష్టభయం ఎక్కువ. పైగా ఒడిదుడుకులు అధికంగా ఉంటాయి. ఒక్కోసారి నష్టాలు రావచ్చు కూడా. ఐదేళ్లు, అంతకు మించిన కాలానికి మంచి రాబడులనే ఇస్తాయి. ఇక పీపీఎఫ్‌ విషయానికొస్తే, వీటి రాబడులు గ్యారంటీగా ఉంటాయి. అంటే మనం ఎంత ఇన్వెస్ట్‌ చేస్తే, ఎంత మొత్తం రాబడులు వస్తాయో ముందుగానే మనకు ఒక అంచనా ఉంటుంది. అయితే ద్రవ్యోల్బణాన్ని పరిగణనలోకి తీసుకుంటే, పీపీఎఫ్‌ ఇన్వెస్ట్‌మెంట్స్‌  పెద్దగా చెప్పుకోదగిన రాబడులను ఇవ్వలేవని చెప్పవచ్చు. మీరు రెండు ట్యాక్స్‌ సేవింగ్‌ ఫండ్స్‌లో ఇన్వెస్ట్‌ చేయండి. ఇలా ఇన్వెస్ట్‌ చేస్తే, మీరు డైవర్సిఫికేషన్‌ ప్రయోజనాలు పొందవచ్చు. ఈఎల్‌ఎస్‌ఎస్‌ల్లో  ఇన్వెస్ట్‌మెంట్స్‌కు లాక్‌–ఇన్‌ పీరియడ్‌ మూడేళ్లుగా ఉంటుంది. మూడేళ్ల లాక్‌–ఇన్‌ పీరియడ్‌ ఉన్న ఇన్వెస్ట్‌మెంట్‌ సాధనాల్లో ఇన్వెస్ట్‌ చేసేటప్పుడు డైవర్సిఫికేషన్‌కు అధిక ప్రాధాన్యత ఇవ్వాల్సి ఉంటుంది. అందుకనే మీరు రెండు ఫండ్స్‌ను ఎంచుకోవాలి. - ధీరేంద్ర కుమార్‌ సీఈవో, వ్యాల్యూ రీసెర్చ్‌

ఏ ఇన్వెస్టర్‌ పోర్ట్‌ఫోలియోలో అయినా కనీసం ఒక బ్యాలన్స్‌డ్‌ ఫండ్‌ ఉంటే మంచిదని చాలా మంది విశ్లేషకులు సూచిస్తున్నారు. అసలు బ్యాలన్స్‌డ్‌ ఫండ్‌లో ఎందుకు ఇన్వెస్ట్‌ చేయాలి ? బ్యాలన్స్‌డ్‌ ఫండ్‌లో ఇన్వెస్ట్‌ చేయడం తప్పనిసరా ? –శ్రీహరి, విశాఖపట్టణం   సాధారణంగా రెండు అంశాలను దృష్టిలో పెట్టుకొని బ్యాలన్స్‌డ్‌ ఫండ్‌లో ఇన్వెస్ట్‌ చేయాలి. మొదటిది.. పోర్ట్‌ఫోలియోను ఆటోమేటిక్‌గా రీబ్యాలన్స్‌ చేయడం. మీరు కొన్ని ఆర్థిక లక్ష్యాల కోసం కొన్ని మ్యూచువల్‌ ఫండ్స్‌ల్లో ఇన్వెస్ట్‌ చేస్తారు. వీటిల్లో కొన్ని పనితీరు అధ్వానంగా ఉండవచ్చు. కొన్ని ఫండ్స్‌ పనితీరు మెరుగ్గా ఉండవచ్చు. పనితీరు బాగాలేని ఫండ్స్‌ నుంచి వేరే ఫండ్స్‌లోకి ఇన్వెస్ట్‌మెంట్స్‌ను బదిలీ చేయాలి. దీనినే పోర్ట్‌ఫోలియో  రీబ్యాలన్స్‌గా పరిగణిస్తారు. ఇది కొంచెం శ్రమతో కూడుకున్న పని. మార్కెట్లను ఎప్పటికప్పుడు గమనిస్తూ ఉండాలి. మీరు ఇన్వెస్ట్‌ చేసిన ఫండ్స్‌ పోర్ట్‌ఫోలియోలను కూడా పరిశీలిస్తూ ఉండాలి. కనీసం ఏడాదికొకసారైనా, పోర్ట్‌ఫోలియో మదింపు తప్పనిసరి. అలా కాకుండా మీ పోర్ట్‌ఫోలియోలో ఒక బ్యాలన్స్‌డ్‌ ఫండ్‌  ఉందనుకోండి. మీ పోర్ట్‌ఫోలియో ఆటోమేటిక్‌గా రీ బ్యాలన్స్‌ అవుతుంది. అయితే మీ పోర్ట్‌ఫోలియోలో బ్యాలన్స్‌డ్‌ ఫండ్‌ ఉన్నా సరే కనీసం ఏడాదికి ఒకసారైనా మీ పోర్ట్‌ఫోలియోను మదింపు చేయడం మాత్రం మరచిపోవద్దు. ఇక రెండో విషయం.. పన్ను ప్రయోజనాలు... బ్యాలన్స్‌డ్‌ ఫండ్‌లో ఇన్వెస్ట్‌ చేస్తే పన్ను ప్రయోజనాలు పొందవచ్చు. పన్ను అంశాల పరంగా బ్యాలన్స్‌డ్‌ ఫండ్‌ను ఈక్విటీ ఫండ్‌గా పరిగణిస్తారు. బ్యాలన్స్‌డ్‌ ఫండ్‌ తన మొత్తం నిధుల్లో 35 శాతం వరకూ స్థిరాదాయ సాధనాల్లో ఇన్వెస్ట్‌ చేసినప్పటికీ, ఈ 35 శాతం ఆదాయంపై ఎలాంటి పన్ను భారం పడదు.   ఆర్బిట్రేజ్‌ ఫండ్స్‌కు, ఈక్విటీ సేవింగ్స్‌ ఫండ్స్‌కు తేడా ఏమిటి ? –పల్లవి, హైదరాబాద్‌   జ: ఈ రెండు ఫండ్స్‌కు చాలా తేడా ఉంది. ఆర్బిట్రేజ్‌ ఫండ్స్‌.. లిక్విడ్‌ ఫండ్స్‌ లానే రాబడులనిస్తాయి. ఆర్బిట్రేజ్‌ ఫండ్స్‌ ఈక్విటీ డెరివేటివ్స్, ఈక్విటీల్లో ఇన్వెస్ట్‌ చేస్తాయి. అయితే వీటి రాబడులు తక్కువ స్థాయిల్లోనే ఉంటాయి. ఇక పన్ను అంశాల పరంగా చూస్తే, ఆర్బిట్రేజ్‌ ఫండ్స్‌ను లిక్విడ్‌ ఫండ్స్‌గా పరిగణిస్తారు. ఇక ఈక్విటీ సేవింగ్స్‌ ఫండ్స్‌ విషయానికొస్తే, ఈ ఫండ్స్‌ తన మొత్తం నిధుల్లో  మూడో వంతు ఈక్విటీలోనూ, మరో మూడు వంతు లిక్విడ్‌ ఫండ్స్‌ ఇన్వెస్ట్‌ చేసే సాధనాల్లో, మరో మూడో వంతు స్థిరాదాయ సాధనాల్లో ఇన్వెస్ట్‌ చేస్తాయి. అందుకని దీర్ఘకాలం రాబడుల పరంగా చూస్తే, బ్యాలన్స్‌డ్‌ ఫండ్స్‌ కంటే తక్కువ రాబడులే వస్తాయి. అయితే ఈ ఈక్విటీ సేవింగ్స్‌ ఫండ్స్‌కు స్థిరత్వం ఎక్కువ. ఇక పన్ను అంశాల పరంగా చూసినా కూడా, ఈ ఫండ్స్‌ను ఈక్విటీ ఫండ్స్‌గానే పరిగణిస్తారు. ఈక్విటీ సేవింగ్స్‌ ఫండ్స్‌లో ఇన్వెస్ట్‌ చేస్తే, రాబడులు తక్కువగా ఉన్నా, స్థిరత్వం ఎక్కువగా ఉంటుంది. మరోవైపు పన్ను ప్రయోజనాలు కూడా పొందవచ్చు.    న్యూ ఫండ్‌ ఆఫర్‌(ఎన్‌ఎఫ్‌ఓ)లో కాకుండా ప్రస్తుతమున్న ఫండ్స్‌లోనే ఇన్వెస్ట్‌ చేయమని చాలా మంది ఎనలిస్ట్‌లు సలహా ఇస్తుంటారు కదా ! ఎన్‌ఎఫ్‌ఓల్లో ఎందుకు ఇన్వెస్ట్‌  చేయకూడదు?   –కిరణ్, విజయవాడ   తెలియని దారిలో వెళ్లడం కన్నా తెలిసిన దారిలో వెళ్లడమే సులువు. అందుకని న్యూ ఫండ్‌ ఆఫర్‌(ఎన్‌ఎఫ్‌ఓ)లో ఇన్వెస్ట్‌ చేయడం కన్నా ప్రస్తుతమున్న ఫండ్స్‌లో ఇన్వెస్ట్‌ చేయడమే మంచిది. ప్రస్తుతమున్న ఫండ్స్‌ పోర్ట్‌ఫోలియో గురించి మీకు ఒక అవగాహన ఉంటుంది. ఈ ఫండ్‌ ఏయే కంపెనీల్లో ఇన్వెస్ట్‌ చేస్తుందో మీకు తెలుస్తుంది. అంతేకాకుండా గతంలో ఈ ఫండ్‌ పనితీరు ఎలా ఉంది...మార్కెట్‌ పెరిగినప్పుడు ఎలా ఉంది. మార్కెట్‌ పతన సమయాల్లో రాబడులు ఎంత ఇచ్చింది  తదితర విషయాల గురించి మీరు ఒక అవగాహన ఉంటుంది.  కానీ కొత్త ఫండ్‌ గురించి ఈ విషయాలేవీ మీకు తెలియవు. కొత్త ఫండ్‌ ఇప్పుడిప్పుడే ఇన్వెస్ట్‌మెంట్‌ మొదలు పెడుతుంది. సాధారణంగా ఒక ఫండ్‌ భవిష్యత్తు పనితీరును ఆ ఫండ్‌ గత ట్రాక్‌ రికార్డ్‌ ఆధారంగా అంచనా వేస్తారు. కొత్త ఫండ్‌ భవిష్యత్తు పనితీరు అంచనాలకు అలాంటి ట్రాక్‌ రికార్డ్‌ ఉండదు. మరోవైపు ఫండ్‌ మొదలైనప్పుడే కొనుగోలు చేస్తే, చౌకగా కొనుగోలు చేసినట్లవుతుందని చాలా మంది భావిస్తారు. కానీ అది అసలు విషయమే కాదు. ఒక కంపెనీ ఐపీఓ(పబ్లిక్‌ ఆఫర్‌)కు వచ్చినప్పుడు ఉండే ధర, ఎన్‌ఎఫ్‌ఓ ఆరంభమైనప్పుడు ఫండ్‌ ధర ఒకలాంటివేనని చాలా మంది అపోహ పడుతుంటారు. కంపెనీ ఐపీఓకు వచ్చినప్పుడు ఆ కంపెనీ పరిమిత సంఖ్యలోనే షేర్లను ఆఫర్‌ చేస్తుంది. దీంతో లిస్టింగ్‌ గెయిన్స్‌కు అవకాశం ఉంటుంది. ఇలాంటి అవకాశం ఎన్‌ఎఫ్‌ఓకు ఉండదు. ఈ ఫండ్‌ ఎన్‌ఏవీపై ఈ ఫండ్‌కు ఉండే డిమాండ్‌ ఏమీ ప్రభావం చూపించదు. కొత్త ఇన్వెస్టర్లను ఆకర్షించేందుకు గతంలో మ్యూచువల్‌ ఫండ్‌ సంస్థలు ఒకే విధంగా(పోర్ట్‌ఫోలియో పరంగా) ఉండే ఎన్‌ఎఫ్‌ఓలను ఎక్కువగా ఆఫర్‌ చేసేవి. ఈ విషయంలో సెబి కఠినమైన నిబంధనలు రూపొందించడంతో ఎన్‌ఎఫ్‌ఓల జోరు తగ్గింది. ఏ రకంగా చూసినా, ఎన్‌ఎఫ్‌ఓల కంటే ప్రస్తుతమున్న ఫండ్స్‌లోనే ఇన్వెస్ట్‌ చేయడం ఉత్తమం. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను స్వల్పకాల అవసరాల నిమిత్తం మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. రెండు మంచి  ఫండ్స్‌ సూచించండి.     – కిరణ్, విజయవాడ   సాధారణంగా దీర్ఘకాలిక ఆర్థిక లక్ష్యాల కోసం మ్యూచువల్‌ ఫండ్స్‌లో ఇన్వెస్ట్‌ చేస్తేనే మీకు మంచి రాబడులు వస్తాయి. అయితే స్వల్పకాలిక ఇన్వెస్ట్‌మెంట్స్‌ కోసం కూడా కొన్ని మ్యూచువల్‌ ఫండ్స్‌ను ఎంచుకోవచ్చు. స్వల్ప కాలానికే ఇన్వెస్ట్‌ చేయాలనుకుంటున్నారు. కాబట్టి మీరు పెద్దగా రిస్క్‌ తీసుకోవలసిన అవసరం లేదు. దీని కోసం లిక్విడ్, ఆల్ట్రా షార్ట్‌–టర్మ్‌ ఫండ్స్‌లో ఇన్వెస్ట్‌ చేయవచ్చు. మీరు 1–2 ఏళ్ల పాటు ఇన్వెస్ట్‌ చేద్దామనుకంటే, షార్ట్‌ డ్యురేషన్‌ ఫండ్స్‌ జోలికి వెళ్లవద్దు. వడ్డీ రేట్ల విషయంలో రిస్క్‌ తీసుకోకుండా ఉంటేనే మంచిది. ఈ పరిస్థితుల్లో ఎక్స్‌పెన్స్‌ రేషియో తక్కువగా ఉన్న, డైరెక్ట్‌ ప్లాన్‌ను ఎంచుకోవడం మంచిది. డైరెక్ట్‌ ప్లాన్‌ల్లో ఇన్వెస్ట్‌ చేస్తే, వ్యయాలు తక్కువగా ఉండటమే కాకుండా రాబడులు కూడా మంచిగా వస్తాయి. పిల్లల పైచదువులు, సొంత ఇల్లు సమకూర్చుకోవడం, రిటైర్మెంట్‌ నిధి ఏర్పాటు వంటి ఆర్థిక లక్ష్యాల సాధన కోసం మ్యూచువల్‌ ఫండ్స్‌లో దీర్ఘకాలం పాటు ఇన్వెస్ట్‌ చేస్తేనే మంచిది. ఇక మధ్య కాలం నుంచి దీర్ఘకాలానికి ఇన్వెస్ట్‌ చేయాలనుకుంటే, మీరు ఈక్విటీ సేవింగ్స్‌ ఫండ్స్‌ను పరిశీలించవచ్చు. ఈక్విటీ ఫండ్స్‌కు వర్తించే పన్ను నియమాలే  ఈక్విటీ సేవింగ్స్‌ ఫండ్స్‌కు కూడా వర్తిస్తాయి. ఈ ఫండ్స్‌ తమ మొత్తం నిధుల్లో మూడో వంతును పూర్తిగా ఈక్విటీలోనే ఇన్వెస్ట్‌ చేస్తాయి. అయితే ఈక్విటీ సేవింగ్స్‌ ఫండ్స్‌లో మీరు 2–3 ఏళ్ల పాటే ఇన్వెస్ట్‌ చేస్తే, మీకు లాభాల కంటే నష్టాలే వచ్చే అవకాశాలు అధికంగా ఉన్నాయి. ఈ కేటగిరిలో మీరు రెండు ఫండ్స్‌–యాక్సిస్‌ ఈక్విటీ సేవర్, హెచ్‌డీఎఫ్‌సీ ఈక్విటీ సేవింగ్స్‌ ఫండ్‌ను పరిశీలించవచ్చు.   నేను ఐటీ టెక్నాలజీ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) ద్వారా ఇన్వెస్ట్‌  చేయాలనుకుంటున్నాను. దీని కోసం టాటా ఇండియా డిజిటల్‌ ఫండ్‌ను ఎంపిక చేసుకున్నాను.  నా ఎంపిక సరైనదేనా? భవిష్యత్తులో ఈ ఫండ్‌ బాగోగులు ఎలా ఉండబోతున్నాయి?           – సలీమ్, విశాఖపట్టణం   మీరు ఏదైనా మ్యూచువల్‌ ఫండ్‌లో ఇన్వెస్ట్‌ చేశారనుకుందాం. ఆ ఫండ్‌ తన నిధుల్లో అత్యధిక మొత్తాన్ని ఏ రంగానికి చెందిన కంపెనీల్లో అయినా ఇన్వెస్ట్‌ చేసే వీలు, వెసులుబాటు ఉండాలి. కానీ సెక్టోరియల్‌ ఫండ్స్‌లో ఆ వెసులు బాటు ఉండదు. ఉదాహరణకు మీరు ఫార్మా లేదా ఐటీ లేదా ఇన్‌ఫ్రా వంటి సెక్టోరియల్‌ ఫండ్స్‌లో ఇన్వెస్ట్‌ చేశారనుకుందాం. ఈ సçదరు సెక్టోరియల్‌ ఫండ్‌ తన నిధుల్లో అత్యధిక భాగాన్ని సంబంధిత రంగానికి చెందిన కంపెనీల్లో ఇన్వెస్ట్‌ చేస్తుంది. అంటే ఐటీ ఫండ్‌  అయితే ఐటీ కంపెనీల్లో, ఫార్మా ఫండ్‌ అయితే ఫార్మా కంపెనీల్లో. అయితే మార్కెట్‌ చక్రీయం అని మీరు మరచిపోవద్దు. కొన్ని సంవత్సరాల్లో ఐటీ కంపెనీల హవా నడవవచ్చు. మరి కొన్నేళ్లు ఈ కంపెనీల షేర్లు స్తబ్ధుగా కదలాడవచ్చు. పనితీరు మందగించినప్పటికీ, వృద్ధి అవకాశాలు అంతగా లేనప్పటికీ, సదరు సెక్టోరియల్‌ ఫండ్‌ మేనేజర్లు ఆయా రంగాల కంపెనీల షేర్లలోనే బలవంతంగా ఇన్వెస్ట్‌ చేయాల్సి ఉంది. ఇది మీ రాబడులపై ప్రతికూల ప్రభావం చూపుతుంది. దీనిని అధిగమించాలంటే డైవర్సిఫికేషన్‌ అవసరం. అందుకని సెక్టోరియల్‌ ఫండ్స్‌లో ఇన్వెస్ట్‌ చేయడం సరైన నిర్ణయం కాదని చెప్పవచ్చు.   నేను గత కొంత కాలంగా నెలకు రూ.10,000 చొప్పున హెచ్‌డీఎఫ్‌సీ మిడ్‌క్యాప్, హెచ్‌డీఎఫ్‌సీ ఈక్విటీ ఫండ్‌లో ఇన్వెస్ట్‌ చేస్తూ ఉన్నాను. ఈ రెండు ఫండ్స్‌లో మొత్తం ఇన్వెస్ట్‌మెంట్స్‌ రూ.4.5 లక్షలకు చేరాయి. నా కూతురి ఉన్నత విద్యావసరాల కోసం నాకు మరో రెండేళ్లలో రూ.7–8 లక్షల వరకూ డబ్బులు అవసరమవుతాయి.  ఈ ఫండ్స్‌లో సిప్‌లను రూ.20,000కు పెంచమంటారా ? – రాబర్ట్, సికింద్రాబాద్‌   ముందుగా మీకు కచ్చితంగా ఎంత మొత్తం అవసరమో లెక్కలేయండి. వచ్చే ఏడాది మీ కూతురి ఉన్నత విద్యావసరాల కోసం మీకు రూ. 8 లక్షలు అవసరమవుతాయని అంటున్నారు.  మొదటి ఏడాదిలోనే అంత మొత్తం డబ్బులు అవసరమా? కాదా అనేది చెక్‌ చేసుకోండి. లేకుంటే మొత్తం కోర్సు పూర్తయ్యేవరకూ ఈ మొత్తం అవసరమా లేదా అనే విషయాన్ని ఒకసారి మదింపు చేయండి. ఒక వేళ ఈ మొత్తం డబ్బులు 3–4 సంవత్సరాల కాలానికి అవసరమనుకుందాం. మీకు మొదటి ఏడాది రూ. 2 లక్షల వరకూ డబ్బులు అవసరమవుతాయి. మీ ఇన్వెస్ట్‌మెంట్‌ నుంచి నెలకు కొంత చొప్పున 12 నెలల వ్యవధిలో రూ.2  లక్షలు విత్‌డ్రా చేసుకోండి. రెండో సంవత్సరంలో మీకు మరో రూ.2 లక్షలు అవసరమవుతాయి. దీని కోసం మీరు రికరింగ్‌ డిపాజిట్,  లేదా డెట్‌ మ్యూచువల్‌ ఫండ్స్‌ల్లో ఇన్వెస్ట్‌ చేయండి. ఏడాది కాలంలో మీరు రూ.2 లక్షల వరకూ ఆదా చేయగలుగుతారు. ఇది వచ్చే ఏడాది మీ పాప ఉన్నత విద్యావసరాలకు సరిపోతాయి. దీంతో ప్రస్తుత ఇన్వెస్ట్‌మెంట్‌ నిధులను మీరు వాడుకోవలసిన అవసరం లేదు.  ఈ తర్వాత మీకు ఈ ఇన్వెస్ట్‌మెంట్‌ భారీ నిధిగా మారుతుంది.    - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

మల్టీక్యాప్‌ ఫండ్స్‌ మంచివేనా? కాంట్రా, వేల్యూ ఫండ్స్‌తో పోల్చితే మల్టీక్యాప్‌ ఫండ్స్‌ ఏ విధంగా భిన్నమైనవి. ఈ మూడు రకాల ఫండ్స్‌లో దేంట్లో ఇన్వెస్ట్‌ చేస్తే మంచి రాబడులు వస్తాయి? ఎంత కాలం ఇన్వెస్ట్‌ చేస్తే తగిన రాబడులు పొందవచ్చు?  – సుమ, హైదరాబాద్‌   మల్టీక్యాప్, కాంట్రా, వేల్యూ– ఈ మూడు రకాల ఫండ్స్‌ మంచివే. ఈ ఫండ్స్‌లో కనీసం 5–6 ఏళ్లు ఇన్వెస్ట్‌ చేస్తే మంచి రాబడులు పొందవచ్చు. ఈ ఫండ్స్‌ అన్నీ ఈక్విటీ ఫండ్స్‌లోనే ఇన్వెస్ట్‌ చేస్తాయి. కానీ, ఇన్వెస్ట్‌మెంట్‌ వ్యూహాల విషయంలో తేడాలు ఉంటాయి. మల్టీ క్యాప్‌ ఫండ్స్‌ అన్నీ వృద్ధి చెందగల సత్తా ఉన్న  కంపెనీల షేర్లలో ఇన్వెస్ట్‌ చేస్తాయి. ఈ షేర్లు తక్కువ ధరల్లో కాకుండా అధిక ధరల్లో ఉన్నా కూడా ఇన్వెస్ట్‌ చేస్తాయి. ఇక వేల్యూ ఫండ్స్‌.. ప్రస్తుతం పరిస్థితులు బాగా లేని, తక్కువ ధరల్లో ట్రేడవుతున్న కంపెనీల షేర్లలో ఇన్వెస్ట్‌ చేస్తాయి. సాధారణంగా ఈ కంపెనీల షేర్ల ధరలు చాలా చౌకగా ఉంటాయనే చెప్పవచ్చు.  ఇక కాంట్రా ఫండ్‌ల విషయానికొస్తే, ఇప్పుడు పరిస్థితులు బాగా లేని కంపెనీలు, భవిష్యత్తులో టర్న్‌ అరౌండ్‌ కాగల కంపెనీల షేర్లలో  పెట్టుబడులు పెడతాయి. ఈ మూడు రకాల ఫండ్‌ మేనేజర్లు విభిన్నమైన ఇన్వెస్ట్‌మెంట్‌ వ్యూహాలను అనుసరిస్తారు. ఒక విధంగా చెప్పాలంటే ఒక సగటు ఇన్వెస్టర్‌ పోర్ట్‌ఫోలియోలో ఈ మూడు రకాల ఫండ్స్‌ ఉంటేనే మంచిది. పెట్టుబడుల డైవర్సిఫికేషన్‌లో ఈ మూడు రకాల ఫండ్స్‌ల్లో ఇన్వెస్ట్‌ చేయడం  కూడా ఒక మార్గం. మీ దగ్గర పెద్ద మొత్తంలో ఇన్వెస్ట్‌ చేయదగ్గ డబ్బులు ఉంటే రెండు మల్టీ క్యాప్‌ ఫండ్స్‌ను, ఒక వేల్యూ ఫండ్‌ను, మరో కాంట్రా ఫండ్‌ను ఎంచుకోండి. నా కూతురును ఎమ్‌బీబీఎస్‌ చదివించడం కోసం  కొంతకాలంగా కొంత మొత్తాన్ని సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌)లో ఇన్వెస్ట్‌ చేస్తూ వస్తున్నాను. మరో రెండేళ్లకు ఈ డబ్బులు నాకు అవసరమవుతాయి.  అప్పటివరకూ ఈ మొత్తాన్ని నేను ఇన్వెస్ట్‌ చేస్తున్న ఫండ్స్‌లోనే కొనసాగించమంటారా ? లేక లార్జ్‌క్యాప్‌ ఫండ్స్‌లోకి మళ్లించమంటారా ? – వీరేందర్, విజయవాడ   ఈ రెండు మార్గాలు సరైనవి కావు. మీ పాపను ఎమ్‌బీబీఎస్‌ చదివించడం కోసం మీకు తప్పనిసరిగా రెండేళ్లలో డబ్బులు అవసరమవుతాయి. కాబట్టి మీరు ఇన్వెస్ట్‌ చేస్తున్న ఫండ్స్‌ నుంచి దశలవారీగా పెట్టుబడులను ఉపసంహరించుకోండి. కనీసం 18 నెలలు లేదా 24 నెలల వాయిదాల రూపంలో మీ ఇన్వెస్ట్‌మెంట్స్‌ను ఫిక్స్‌డ్‌ ఇన్‌కమ్‌ ఫండ్‌లోకి బదిలీ చేయండి. మీరు ఇన్వెస్ట్‌ చేసేటప్పుడు సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)ను అనుసరించినట్లుగానే,  విత్‌డ్రా చేసేటప్పుడు సిస్టమేటిక్‌ విత్‌డ్రాయల్‌ ప్లాన్‌ (ఎస్‌డబ్ల్యూపీ)ని అనుసరించాలి. ఈ మొత్తాన్ని ఫిక్స్‌డ్‌ ఇన్‌కమ్‌ ఫండ్‌లోకి మార్చిన తర్వాత దాని విలువ పెద్దగా పడిపోదు. అలాగే పెద్దగా వృద్ధి కూడా ఉండదు.   ఫండ్‌ మేనేజర్లు మొత్తం నిధులను ఇన్వెస్ట్‌ చేయరని, మార్కెట్‌ పరిస్థితులను బట్టి కొంత సొమ్మును ఇన్వెస్ట్‌ చేయకుండానే ఉంచేస్తారని విన్నాను. ఇది నిజమేనా? ఒక వేళ ఇది నిజమైన పక్షంలో ఇన్వెస్ట్‌ చేయని డబ్బులను బ్యాంక్‌ల్లో ఫిక్స్‌డ్‌ డిపాజిట్‌ చేస్తారా? నగదుగానే ఉంచుతారా? వివరించండి. – మోహిసిన్, విశాఖపట్టణం    ఫండ్‌ మేనేజర్లు ఇన్వెస్టర్ల నుంచి సమీకరించిన మొత్తం నిధులను ఇన్వెస్ట్‌ చేయకపోవడం అప్పుడప్పుడూ జరుగుతూ ఉంటుంది. ఇది స్టాక్‌ మార్కెట్‌ పరిస్థితులపై ఆధారపడి ఉంటుంది. మార్కెట్‌ పరిస్థితులను బట్టి ఫండ్‌ మేనేజర్లు మొత్తం నిధుల్లో 10 శాతం లేదా 20 శాతం, లేదా 30 శాతం వరకూ పెట్టుబడులు చేయకుండా వదిలివేయవచ్చు. ఈ వెసులుబాట, విచక్షణ ఫండ్‌ మేనేజర్లకు ఉంటుంది. ఈ మొత్తాన్ని స్వల్ప కాలిక బాండ్ల రూపంలో ఇన్వెస్ట్‌ చేస్తారు. ముఖ్యంగా రాబడుల కోసం కాక పతనం నుంచి రక్షణ నిమిత్తం, మంచి అవకాశం కోసం ఎదురు చూడటం కోసం ఈ మార్గాన్ని ఫండ్‌ మేనేజర్లు ఎంచుకుంటారు.  మార్కెట్‌ పరిస్థితులు స్తబ్దుగా ఉన్నా, వాళ్లు కొనుగోలు చేయాలనుకుంటున్న కంపెనీల షేర్లు వాళ్ల అంచనాలకు తగ్గట్టుగా లేకపోయినా, మార్కెట్‌ కరెక్షన్‌ కోసం ఎదురు చూస్తారు. మార్కెట్‌ పతనమై వాళ్ల అంచనాల మేరకు కంపెనీల షేర్లు దిగొస్తే, అప్పుడు ఇన్వెస్ట్‌ చేస్తారు. నాకు తెలిసిన చాలా మంది ఫండ్‌ మేనేజర్లు సదరు ఫండ్‌ మొత్తం నిధుల్లో మూడో వంతు వరకూ నగదుగానో లేక డెట్‌ బాండ్లలోనే ఇన్వెస్ట్‌ చేసేవాళ్లు. ఫిక్స్‌డ్‌ ఇన్‌కమ్‌ సాధనాల్లో కూడా విభిన్నమైన వ్యూహాన్ని ఫండ్‌ మేనేజర్లు అనుసరిస్తారు. హైబ్రిడ్‌ ఫండ్‌ ఇన్వెస్ట్‌మెంట్‌ వ్యూహంతో పోల్చితే ఇది చాలా భిన్నంగా ఉంటుంది.   ఉదాహరణకు మల్టీ అసెట్‌ ఫండ్స్‌ ఉన్నాయనుకోండి. ఫండ్స్‌ నిధుల మొత్తాన్ని ఫండ్‌ మేనేజర్లు  ఫిక్స్‌డ్‌ ఇన్‌కమ్‌ సాధనాల్లో కానీ, ఈక్విటీ సాధనాల్లో గానీ ఇన్వెస్ట్‌ చేస్తారు. స్టాక్‌ మార్కెట్‌ పరిస్థితులను బట్టి వారు ఈ నిర్ణయం తీసుకుంటారు. అన్ని ఈక్విటీ ఫండ్స్‌ మేనేజర్లకు ఈ వెసులుబాటు ఉంటుంది. చాలా సందర్భాల్లో ఫండ్‌ మేనేజర్లు దీనిని పాటిస్తారు కూడా. - ధీరేంద్ర కుమార్‌ సీఈవో, వ్యాల్యూ రీసెర్చ్‌

స్మాల్‌ క్యాప్‌ ఫండ్స్‌లో వంద శాతం స్మాల్‌ క్యాప్‌ షేర్లు ఉండవని, కొన్ని లిక్విడ్‌ షేర్లను కూడా ఫండ్‌ మేనేజర్లు కొనుగోలు చేస్తారని విన్నాను. అది నిజమేనా ? ఎందుకలా చేస్తారు. ఫండ్‌ మేనేజర్లు తమ ఫండ్స్‌కు సంబంధించి లిక్విడిటీని ప్రతికూల పరిస్థితుల్లో ఎలా మేనేజ్‌ చేస్తారు?    – శ్రీకాంత్, విజయవాడ   లిక్విడిటీ నిర్వహణకు వివిధ రకాలైన పద్ధతులను ఫండ్‌ మేనేజర్లు అనుసరిస్తూ ఉంటారు. దాంట్లో ప్రధానమైనది లిక్విడ్‌(అమ్మకాలు, కొనుగోళ్లు అధికంగా ఉండే) స్టాక్స్‌పై ఆధారపడటం. ఉదాహరణకు స్మాల్‌ క్యాప్‌ ఫండ్స్‌ ఉన్నాయనుకుందాం. ఈ ఫండ్‌ తన నిధుల్లో వంద శాతాన్నీ స్మాల్‌ క్యాప్‌ఫండ్స్‌లో ఇన్వెస్ట్‌ చేయదు. మొత్తం నిధుల్లో 65 శాతం వరకే స్మాల్‌ క్యాప్‌ ఫండ్స్‌లో ఇన్వెస్ట్‌ చేస్తుంది. మిగిలిన నిధులను ఇతర సాధనాల్లో ఇన్వెస్ట్‌ చేస్తుంది. ఇలాంటి ఇతర సాధనాల్లో లిక్విడ్‌ స్టాక్స్‌ తప్పనిసరిగా ఉంటాయి. ఫండ్స్‌కు ఉండే మరో వెసులుబాటు... 5–10% నిధులను నగదు రూపంలో ఉంచుకోవడం. ఈ నగదును స్వల్పకాలిక రుణ, ఓవర్‌నైట్‌ కాల్‌–మనీ సాధనాల్లో ఇన్వెస్ట్‌ చేస్తారు. ఇక నగదు రూపంలో కూడా ఎంతో కొంత రాబడిని ఫండ్‌ మేనేజర్లు సాధిస్తారు. సాధారణంగా ఫండ్స్‌ లిక్విడిటీ మొత్తం ఆయా ఫండ్స్‌లో వచ్చే ఇన్వెస్ట్‌మెంట్స్‌పైననే ఆధారపడి ఉంటుంది. ఉదాహరణకు ఓపెన్‌–ఎండెడ్‌ ఫండ్స్‌ల్లో ఎప్పటికప్పుడు కొత్త పెట్టుబడులు వస్తూనే ఉంటాయి. కొద్ది మంది మాత్రమే తమ పెట్టుబడులను వెనక్కి తీసుకుంటూ ఉంటారు. ఇన్వెస్టర్లు వెనక్కి తీసుకునే పెట్టుబడుల కంటే కూడా ఇన్వెస్ట్‌ చేసే నిధులే అధికంగా ఉంటాయి.  ఇలా కాకుండా వచ్చే పెట్టుబడుల కంటే వెనక్కి తీసుకునే పెట్టుబడులే అధికంగా ఉంటే అప్పుడు ఫండ్‌ మేనేజర్లు ఆందోళన చెందుతారు. ఇలాంటి సందర్భాలు అరుదుగా ఉంటాయి. కానీ అసలు ఉండవని చెప్పలేము. ఇలాంటి సందర్భాలు వచ్చినప్పుడు అప్పుడు ఫండ్‌ మేనేజర్లు నగదును కానీ, స్వల్ప కాలిక రుణ సాధనాలపై కానీ, లిక్విడ్‌ స్టాక్స్‌పై కానీ ఆధారపడతారు. ఇలాంటి ఏర్పాటు లేకపోతే, ఫండ్‌ మేనేజర్లు ఫండ్‌ పోర్ట్‌ఫోలియోలోని షేర్లను అయినకాడికి తెగనమ్మాల్సి వస్తుంది. మార్కెట్‌ రోజూ పతనమవుతున్నప్పుడు, ఇన్వెస్టర్లు భయాందోళనలకు గురై ఫండ్స్‌ నుంచి తమ ఇన్వెస్ట్‌మెంట్స్‌ను వెనక్కి తీసుకుంటారు. అప్పుడు ఫండ్‌ పోర్ట్‌ఫోలియోలోని షేర్లను అమ్మక తప్పదు. దీంతో మార్కెట్‌ మరింతగా పతనమవుతుంది. ఇలాంటి సమస్యలన్నింటినీ అధిగమించడానికి లిక్విడ్‌ స్టాక్స్‌లోనూ, స్వల్పకాలిక రుణ సాధనాల్లోనూ ఫండ్‌ మేనేజర్లు ఇన్వెస్ట్‌ చేస్తారు.   ఏడాది క్రితం నేను ఒక క్లోజ్‌డ్‌–ఎండ్‌–మ్యూచువల్‌ ఫండ్‌లో రూ.3 లక్షల వరకూ ఇన్వెస్ట్‌ చేశాను. అయితే నా సోదరి చదువు కోసం నాకు ఇప్పుడు అత్యవసరంగా కొంత సొమ్ములు అవసరమయ్యాయి. ఈ క్లోజ్‌డ్‌–ఎండ్‌ ఫండ్‌ నుంచి నా ఇన్వెస్ట్‌మెంట్స్‌ను ఎలా వెనక్కి తీసుకోవాలి?     – విష్ణువర్థన్, విశాఖపట్టణం   ఒక క్లోజ్‌డ్‌–ఎండ్‌ ఫండ్‌లో ఆ ఫండ్‌ మెచ్యూరిటీ పూర్తయ్యే వరకూ మీరు ఇన్వెస్ట్‌మెంట్స్‌ను వెనక్కి తీసుకునే వీలు లేదు. అయితే అవి స్టాక్‌ మార్కెట్లో లిస్టై, షేర్ల మాదిరి ట్రేడవుతాయి. కాబట్టి మీ ఫండ్‌ యూనిట్లను విక్రయించుకోవచ్చు. అయితే ఇలాంటి క్లోజ్‌డ్‌ ఎండ్‌ ఫండ్‌ యూనిట్ల ట్రేడింగ్‌ పరిమాణం చాలా స్వల్పంగా ఉంటుంది. ఈ ఫండ్‌ యూనిట్లను కొనుగోలు చేసే కొనుగోలు దారులు దొరకడం కష్టసాధ్యమైన పనే. ఒక వేళ కొనుగోలుదారులు ఉన్నా, ఫండ్‌ ఎన్‌ఏవీ(నెట్‌ అసెట్‌ వేల్యూ) కన్నా తక్కువ ధరకే అవి ట్రేడవుతుంటాయి. అందుకని తక్కువ ధరకు అమ్ముకోవలసి వస్తుంది. అందుకని మీకు నష్టాలు వచ్చే అవకాశాలూ ఉంటాయి. అందుకని క్లోజ్‌డ్‌–ఎండ్‌ మ్యూచువల్‌ ఫండ్స్‌ నుంచి ఇన్వెస్ట్‌మెంట్స్‌ను వెనక్కి తీసుకోవడమనే విషయాన్ని మరచిపోండి. ఇప్పుడు పలు బ్యాంక్‌లు తక్కువ వడ్డీరేట్లకే విద్యారుణాలు ఇస్తున్నాయి. వాటిని ప్రయత్నించండి.   షేర్లను తక్కువ ధరలో కొని ఎక్కువ ధరకు అమ్మడం మంచి ఇన్వెస్ట్‌మెంట్‌ విధానమంటున్నారు. అసలు షేర్‌ కనిష్ట ధరకు చేరిందని, గరిష్ట స్థాయికి చేరిందనీ ఎలా అంచనా వేయవచ్చు?     – మాధురి, హైదరాబాద్‌ షేర్లను తక్కువ ధరలో కొని, అధిక ధరలకు అమ్మడం మంచి ఇన్వెస్ట్‌మెంట్‌ విధానమే. కానీ ఒక షేర్‌ కనిష్ట, అలాగే గరిష్ట ధరలను మీరే కాదు, కొమ్ములు తిరిగిన ఫండ్‌ మేనేజర్లూ అంచనా వేయలేరు. పడిపోతున్న షేర్‌ కనిష్ట ధరను అంచనా వేయడమంటే... పడిపోతున్న కత్తిని పట్టుకోవడానికి ప్రయత్నించడం. అలా ప్రయత్నించినప్పుడు,  మీరు సురక్షితంగా ఆ కత్తిని క్యాచ్‌ చేయవచ్చు. లేదా కత్తిని పట్టుకునే ప్రయత్నంలో మీకు స్వల్ప గాయాలు కావచ్చు లేదా భారీ గాయాలే కావచ్చు. ఒక షేర్‌ కనిష్ట ధరను  అంచనా వేయడం కూడా ఇలాంటిదే. ఒక్కోసారి మీ అంచనా కరెక్ట్‌ కావచ్చు. లేదా మీ అంచనాలకు మించి మరింత పడిపోవచ్చు. చాలా సార్లు ఇది చాలా ఫండ్‌ మేనేజర్ల విషయంలో రుజువైంది. అయితే పీఈ, పీబీ నిష్పత్తులను పరిగణనలోకి తీసుకొని అప్పటి షేర్‌ మార్కెట్‌ ధర ఆకర్షణీయంగా ఉంటే కొనుగోలు చేయవచ్చు. ఈ ధరకు మించి మరింతగా పతనమైతే, ఆ షేర్‌పై మీకు నమ్మకం ఉంటే మరింతగా కొనుగోలు చేయవచ్చు. ఇక షేర్‌ గరిష్ట ధరలనూ అంచనా వేయడం కష్టమే. ఉదాహరణకు ఒక షేర్‌ను రూ.100కు కొనుగోలు చేశారనుకుందాం. అది రూ.150, రూ.200, రూ.250 ఇలా పెరుగుతూ పోయిందనుకుందాం. ఎంత వరకూ పోతుందో మనం అంచనా వేయలేం. కానీ చాలా మంది సాధారణ ఇన్వెస్టర్లు రూ.వందకు కొనుగోలు చేసిన షేర్‌ రూ.150కు చేరగానే అమ్మేస్తారు. అది మరింతగా పెరుగుతూ ఉన్నప్పుడు తక్కువ ధరకు అమ్మేశామే అని బాధపడుతూ ఉంటారు. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను గత కొన్నేళ్లుగా మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. నేను ఇన్వెస్ట్‌ చేసిన కొన్ని ఫండ్స్‌ ఏడాదిలో 30 శాతానికి పైగా రాబడులనిచ్చాయి. మంచి రాబడులు వచ్చాయి. కాబట్టి ఈ ఫండ్స్‌ నుంచి నా పెట్టుబడులను వెనక్కి తీసుకోవచ్చా? – సరళ, హైదరాబాద్‌   ఈ డబ్బులతో వేరే ముఖ్యమైన పనులు నిర్వహించాలనుకున్న పక్షంలో.. ఏడాదిలో 30 శాతానికి పైగా  రాబడులనిచ్చిన ఫండ్స్‌ నుంచి మీ ఇన్వెస్ట్‌మెంట్స్‌ను నిరభ్యంతరంగా వెనక్కి తీసుకోవచ్చు. ప్రయోజనకరమైన పనులకు మాత్రమే ఇలాంటి లాభాలను వినియోగించాలి. అంతేకానీ, లాభాలు భారీగా వచ్చాయి కదాని మిత్రులకు, బంధువులకు భారీగా పార్టీ ఇవ్వడానికే, ఇతరత్రా వృథా ఖర్చులకు వినియోగించకూడదు. 30 శాతానికి పైగా లాభాలు వచ్చాయి కదాని ముఖ్యమైన అవసరాలు లేకపోయినా, మీరు మీ ఇన్వెస్ట్‌మెంట్‌ను వెనక్కి తీసుకున్నారనుకుందాం. తర్వాతి ఏడాది వచ్చే లాభాలను మీరు కోల్పోతారు కదా ! చాలా మంది ఇన్వెస్టర్లు దీర్ఘకాలిక ఆర్థిక లక్ష్యాల కోసమే మ్యూచువల్‌ ఫండ్స్‌ల్లో ఇన్వెస్ట్‌ చేస్తారు. కాబట్టి ఆ ఆర్థిక లక్ష్యాలు సాకారమయ్యేంత వరకూ ఇన్వెస్ట్‌మెంట్స్‌ను కొనసాగిస్తేనే మేలు. మరోవైపు ఇన్వెస్టర్లు రీ బ్యాలెన్సింగ్‌ ప్లాన్‌ను తప్పనిసరిగా అనుసరించాలి. రీ బ్యాలెన్సింగ్‌ ప్లాన్‌ అంటే..ఈక్విటీ, డెట్‌ సాధనాల్లో నిర్దిష్టమైన నిష్పత్తిలో ఇన్వెస్ట్‌ చేయడం. స్టాక్‌ మార్కెట్‌ పెరుగుతున్నప్పుడు ఈక్విటీ సాధనాల్లో పెట్టుబడులను పెంచాలి. మార్కెట్‌ పడిపోతున్నప్పుడు డెట్‌ సాధనాల్లో పెట్టుబడులను పెంచాలి. ఇలా మార్కెట్‌ స్థితిగతులను అనుసరించి ఇన్వెస్ట్‌మెంట్స్‌ వ్యూహాల్లో మార్పులు, చేర్పులు చేస్తూ ఉండాలి.   నేను డీఎస్‌పీ బ్లాక్‌రాక్‌ ట్యాక్స్‌ సేవర్, యాక్సిస్‌ లాంగ్‌ టర్మ్‌ ఈక్విటీల్లో గత ఏడాది కాలం నుంచి సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) విధానంలో ఇన్వెస్ట్‌ చేస్తూ ఉన్నాను. డీఎస్‌పీ ట్యాక్స్‌ సేవర్‌ పనితీరు సంతృప్తికరంగా లేదు. దీని నుంచి వైదొలగమంటారా ?లేక సిప్‌లను కొనసాగించమంటారా? అంతేకాకుండా నేను మరికొంత మొత్తాన్ని రెండు మల్టీక్యాప్‌ ఫండ్స్‌లో ఇన్వెస్ట్‌ చేయాలనుకుంటున్నాను. నేను ఇన్వెస్ట్‌  చేయడానికి రెండు మల్టీక్యాప్‌ ఫండ్స్‌ను సూచించండి.  -నిరంజన్, విశాఖపట్టణం   పన్ను ఆదా చేసే చాలా ఫండ్స్‌ సాధారణంగా మల్టీక్యాప్‌ ఫండ్స్‌ అయి ఉంటాయి. కేవలం ఏడాది స్వల్ప కాలాన్ని పరిగణనలోకి తీసుకొని ఫండ్‌ పనితీరును అంచనా వేసి సరైన రాబడులనివ్వడం లేదంటూ ఆ ఫండ్‌ నుంచి వైదొలగడం సరైన నిర్ణయం కాదు. మూడు నెలలకో, ఆర్నెల్లకో, ఏడాది కాలాన్నో పరిగణనలోకి తీసుకొని పెట్టుబడుల వ్యూహాన్ని, నిర్ణయాలను మార్చుకోవడం సరైన విధానం కాదు. పనితీరు బాగా లేని ఫండ్స్‌ నుంచి పెట్టుబడులను వెనక్కి తీసుకొని, పనితీరు బాగా ఉన్న ఫండ్స్‌లో ఇన్వెస్ట్‌ చేయడం.. సరైన పెట్టుబడి వ్యూహం కాదు. నిరంతరం మంచి రాబడులనివ్వడమనేది  ఏ ఫండ్‌కు సాధ్యం కాదు. మీరు ఇన్వెస్ట్‌ చేసిన రెండు ఫండ్స్‌ విషయానికొస్తే, పన్ను ఆదా ప్రయోజనాల దృష్ట్యా ఈ రెండు ఫండ్స్‌ మంచివే. యాక్సిస్‌ లాంగ్‌ టర్మ్‌ ఈక్విటీ ఫండ్‌ పోర్ట్‌ఫోలియోలో అధిక లాభాలు ఆర్జించే కంపెనీల షేర్లు ఉన్నాయి. పన్ను ఆదా ఫండ్‌కు సాధారణంగా లాక్‌–ఇన్‌–పీరియడ్‌ మూడేళ్లుగా ఉంటుంది. అంటే మీ డీఎస్‌పీ ట్యాక్స్‌ సేవర్‌ ఫండ్‌ ఇన్వెస్ట్‌మెంట్స్‌ను మూడేళ్ల దాకా వెనక్కి తీసుకునే వీలు లేదు. మీరు సిప్‌లు ప్రారంభించి ఏడాది దాటింది. కాబట్టి మరో రెండేళ్ల దాకా మీరు మీ ఇన్వెస్ట్‌మెంట్స్‌ను వెనక్కి తీసుకోలేరు.   సమీప కాలంలోనే డీఎస్‌పీ ట్యాక్స్‌ సేవర్‌ కోలుకొని మంచి రాబడులనే ఇస్తుందని నేను భావిస్తున్నాను. అందుకని మీరు నిరభ్యంతరంగా ఈ ఫండ్‌లో సిప్‌లను కొనసాగించవచ్చు. మీరు ఇన్వెస్ట్‌ చేయడానికి రెండు మల్టీ క్యాప్‌లు–మిరా అసెట్‌ ఇండియా ఈక్విటీ, మోతీలాల్‌ ఓస్వాల్‌ మల్టీక్యాప్‌ 35 ఫండ్స్‌ను పరిశీలించవచ్చు. గత కొన్ని నెలలుగా మోతీలాల్‌ ఓస్వాల్‌ మల్టీక్యాప్‌ 35 ఫండ్‌ పనితీరు బలహీనంగా ఉన్నా, భవిష్యత్తులో ఇది మంచి రాబడులనే ఇవ్వగలదని అంచనాలున్నాయి. ఐసీఐసీఐ ప్రు వేల్యూ డిస్కవరీ ఫండ్‌ను కూడా పరిశీలించవచ్చు.  కోటక్‌ స్టాండర్డ్‌ మల్టీక్యాప్, ఎస్‌బీఐ మ్యాగ్నమ్‌ మల్టీ క్యాప్‌ ఫండ్స్‌ను కూడా పరిగణనలోకి తీసుకోవచ్చు.  షేర్లలో ఇన్వెస్ట్‌ చేసేటప్పుడు మంచి పనితీరు ఉన్న కంపెనీ షేర్లను ఎంచుకోమని చెబుతారు కదా !  ఒక కంపెనీ నిర్వహణ బాగా ఉందని ఎలా తెలుసుకోవాలి?     – రియాజ్, విజయవాడ  ఒక సామాన్య ఇన్వెస్టర్‌గా మీరు కంపెనీ యాజమాన్యాన్ని కలిసి, వారితో మాట్లాడే అవకాశం ఉండదు. ఒక కంపెనీ నిర్వహణ బాగా ఉందో లేదో తెలుసుకోవడానికి ఒక చక్కని మార్గం... ఆ యాజమాన్యం చరిత్రను తెలుసుకోవడమే. ఇంటర్నెట్‌ విస్తృతంగా అమల్లోకి వచ్చాక, మీరు గూగుల్, వికీ పీడియా ద్వారా కంపెనీ యాజమాన్యంలోని కీలక వ్యక్తుల సమాచారం తెలుసుకోవచ్చు. కంపెనీ యాజమాన్యంలోని కీలక వ్యక్తులు గతంలో ఏవైనా వివాదాల్లో చిక్కుకున్నా, లేదా వారి చుట్టూ ఏవైనా వివాదాలు ముసురుకున్నా, కంపెనీ డైరెక్టర్ల బోర్డ్‌లో ఏమైనా మార్పులు, చేర్పులు జరిగినా, కంపెనీ ఆడిటర్లు తరచుగా మారుతున్నా, మీరు అప్రమత్తంగా ఉండాలి. వెంటనే మంచో, చెడో అన్న నిర్ణయానికి రావద్దు. కొంత కాలం ఎదురు చూసి, మరింత సమాచారం సేకరించి అప్పుడు ఒక నిర్ణయానికి రావాలి.    ధీరేంద్ర కుమార్‌ సీఈవో, వ్యాల్యూ రీసెర్చ్‌ 

నా ప్రజా భవిష్య నిధి(పీపీఎఫ్‌) ఖాతా మెచ్యూరిటీ దగ్గరకు వచ్చింది. దీన్ని మరో ఐదేళ్లు పొడిగించమంటారా? లేక ఈ పీపీఎఫ్‌ మొత్తాన్ని మ్యూచువల్‌ ఫండ్స్‌లో ఇన్వెస్ట్‌  చేయమంటారా?   – స్టీఫెన్సన్,  హైదరాబాద్‌ పీపీఎఫ్‌ అనేది స్థిరాదాయ సాధనంలో ఇన్వెస్ట్‌ చేసే 15 ఏళ్ల సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) అని చెప్పవచ్చు. మీరు ఉద్యోగంలో చేరగానే మీ పెద్దవాళ్లు, మిత్రులు మొదటగా ఇచ్చే సలహా.. పీపీఎఫ్‌లో ఇన్వెస్ట్‌ చేయమనే. ఇది సురక్షితమూ, రిస్క్‌ పెద్దగా లేని ఇన్వెస్ట్‌మెంట్‌ అని వారి అభిప్రాయం. పదిహేనేళ్ల కాలాన్ని పరిగణనలోకి తీసుకుంటే... ఈ మొత్తాన్ని ఈక్విటీలో ఇన్వెస్ట్‌ చేస్తే, పీపీఎఫ్‌లో ఇన్వెస్ట్‌ చేసిన మొత్తంపై వచ్చిన రాబడుల కంటే అధిక రాబడులే వస్తాయి. ఓ మోస్తరు మ్యూచువల్‌ ఫండ్‌లో కూడా ఈ మొత్తాన్ని ఇన్వెస్ట్‌ చేస్తే పీపీఎఫ్‌లో వచ్చే రాబడుల కంటే కనీసం ఒకటిన్నర మొత్తం వచ్చే అవకాశాలు అధికంగా ఉంటాయి. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఈక్విటీలో రెగ్యులర్‌గా ఇన్వెస్ట్‌ చేస్తే, నష్టభయం తగ్గడమే కాకుండా ఈక్విటీ ఇన్వెస్ట్‌మెంట్స్‌ సురక్షితం అవుతాయి. కనీసం పదిహేనేళ్లపాటు ఈక్విటీల్లో రెగ్యులర్‌గా ఇన్వెస్ట్‌ చేస్తే, ఈక్విటీ ఇన్వెస్ట్‌మెంట్స్‌ రిస్క్‌  కాదని చెప్పవచ్చు. మీలాగా పదిహేనేళ్ల పాటు పీపీఎఫ్‌లో క్రమం తప్పకుండా ఇన్వెస్ట్‌ చేసినట్లుగా, ఈక్విటీలో ఇన్వెస్ట్‌ చేస్తే, మీరు నష్టపోయే ప్రశ్నే లేదు. పీపీఎఫ్‌ ఖాతాను మరో ఐదేళ్లు పొడిగించడం కంటే కూడా ఈ మొత్తాన్ని ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయండి. అయితే పీపీఎఫ్‌ మెచ్యూరిటీ మొత్తాన్ని ఒకేసారి ఇన్వెస్ట్‌ చేయకూడదు. ఈ మొత్తాన్ని కనీసం 12 నుంచి 18 సమాన భాగాలుగా విభజించి ఆ మొత్తాన్ని సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయండి. పీపీఎఫ్‌ ఖాతా ప్రారంభించి ప్రతి ఏడాది రూ. లక్షన్నర వరకూ ఇన్వెస్ట్‌ చేయాలనుకునే ఇన్వెస్టర్లు దీనికి బదులుగా పన్ను ఆదా చేసే ఫండ్‌లో ఇన్వెస్ట్‌ చేయవచ్చు. పదిహేనేళ్లపాటు క్రమం తప్పకుండా ఇన్వెస్ట్‌ చేస్తే, పీపీఎఫ్‌లో వచ్చే రాబడుల కంటే మీకు కనీసం ఒకటిన్నర లేదా రెండు రెట్లు అధిక రాబడులు వస్తాయి.   మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. ఎంత కాలం ఇన్వెస్ట్‌ చేస్తే పన్ను భారం తప్పించుకోవచ్చు?   – హుస్సేన్, విజయవాడ   మ్యూచువల్‌ ఫండ్స్‌ యూనిట్లను ఎప్పుడు విక్రయించినా, వాటిపై వచ్చే లాభాలపై ఆదాయం పన్ను చెల్లించాల్సిందే. ఉదాహరణకు ఈక్విటీ మ్యూచువల్‌ ఫండ్స్‌ను తీసుకుంటే, ఈ ఫండ్స్‌ను మీరు కొనుగోలు చేసిన ఏడాది తర్వాత విక్రయించారనుకుందాం.  ఈ విక్రయాలపై వచ్చే లాభాలను దీర్ఘకాలిక మూలధన లాభాలుగా(ఎల్‌టీసీజీ–లాంగ్‌టర్మ్‌ క్యాపిటల్‌ గెయిన్స్‌)గా పరిగణిస్తారు. పది శాతం పన్ను చెల్లించాల్సి ఉంటుంది. అయితే ఒక ఆర్థిక సంవత్సరంలో ఈక్విటీలపై వచ్చే మూలధన లాభాలపై పన్నుకు రూ.లక్ష వరకూ మినహాయింపు ఉంటుంది. ఈక్విటీలపై వచ్చే మూలధన లాభాలు రూ. లక్ష దాటితేనే మీరు 10 శాతం పన్ను చెల్లించాల్సి ఉంటుంది. అలా కాకుండా మీరు ఇన్వెస్ట్‌ చేసిన ఈక్విటీ ఫండ్స్‌ యూనిట్లను ఏడాదిలోపే విక్రయించారనుకుందాం. ఈ విక్రయాలపై వచ్చే లాభాలను స్వల్పకాలిక మూలధన లాభాలుగా వ్యవహరిస్తారు. 15 శాతం పన్ను చెల్లించాల్సి ఉంటుంది. మీరు ఇన్వెస్ట్‌ చేసిన ఈక్విటీ ఫండ్స్‌ డివిడెండ్‌లు ఇచ్చిందనుకుందాం. 10 శాతం డివిడెండ్‌ డిస్ట్రిబ్యూషన్‌ ట్యాక్స్‌ను సర్‌చార్జీని, సెస్‌ను  కూడా కలుపుకొని, ఈ మొత్తాన్ని మినహాయించుకొని ఆ తర్వాతనే మిగిలిన మొత్తాన్ని డివిడెండ్‌గా చెల్లిస్తారు. ఇక ఈక్విటీ యేతర మ్యూచువల్‌ ఫండ్స్‌ విషయానికొస్తే, మీరు కొనుగోలు చేసిన ఈ ఫండ్స్‌ను మూడేళ్ల తర్వాత విక్రయిస్తే, వాటిపై వచ్చే లాభాలను దీర్ఘకాలిక మూలధన లాభాలుగా పరిగణిస్తారు. 20 శాతం పన్ను (ఇండెక్సేషన్‌ ప్రయోజనంతో) చెల్లించాల్సి ఉంటుంది. మూడేళ్లలోపే విక్రయిస్తే, వచ్చే లాభాలను స్వల్పకాలిక మూలధన లాభాలుగా పరిగణిస్తారు. ఈ లాభాలను మీ ఆదాయానికి కలపి మీకు వర్తించే ఆదాయపు పన్ను శ్లాబ్‌ను అనుసరించి పన్ను చెల్లించాల్సి ఉంటుంది. డెట్‌ఫండ్స్‌పై వచ్చే డివిడెండ్‌లపై 25 శాతం డివిడెండ్‌  డిస్ట్రిబ్యూషన్‌ ట్యాక్స్‌కు సర్‌చార్జీ, సెస్‌లను కూడా కలిపి ముందుగానే మినహాయించుకొని, ఆ తర్వాత మిగిలిన మొత్తాన్ని డివిడెండ్‌గా చెల్లిస్తారు. ఒక ఆర్థిక సంవత్సరంలో మీ డివిడెండ్‌ ఆదాయం రూ.10 లక్షలకు మించితే అదనంగా 10 శాతం పన్ను చెల్లించాల్సి ఉంటుంది.   నేను గత కొంత కాలంగా మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తున్నాను. ఒక  ఫండ్‌ పనితీరు ఆశించిన స్థాయిలో లేదు. దీంట్లో సిప్‌లు ఆపేద్దామనుకుంటున్నాను. ఈ ఫండ్‌లో ఇప్పటివరకూ జమ అయిన మొత్తాన్ని ఏం చేయమంటారు?     – శ్రీకాంత్, విశాఖపట్టణం ఆశించిన స్థాయిలో రాబడులు లేనప్పుడు సదరు ఫండ్‌లో సిప్‌లు ఆపేయవచ్చు. ఆ ఫండ్‌లో ఇప్పటివరకూ జమ అయిన మొత్తాన్ని మరో మంచి ఫండ్‌లోకి మార్చుకోవచ్చు. అయితే ఇలా మార్చుకునేటప్పుడు పన్ను అంశాల్లో జాగ్రత్తగా ఉండాలి. ఈ ఫండ్‌లో మీరు ఇన్వెస్ట్‌ చేసిన కాలం ఏడాదిలోపే అయితే, మీరు 15% స్వల్పకాలిక మూలధన లాభాల పన్ను చెల్లించాల్సి ఉంటుంది. ఈ ఫండ్‌లో మీ ఇన్వెస్ట్‌మెంట్‌ కాలం ఏడాది దాటితే మీరు 10% దీర్ఘకాలిక మూలధన లాభాల పన్ను చెల్లించాల్సి ఉంటుంది. మీ లాభాలు ఒక ఆర్థిక సంవత్సరంలో రూ. లక్ష దాటితేనే ఈ పన్ను భారం ఉంటుంది. ఈ అంశాలను దృష్టిలో ఉంచుకొని తగిన నిర్ణయం (పన్ను భారం తక్కువగా ఉండేలా) తీసుకోగలరు.   - ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను కొన్ని మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) విధానంలో ఇన్వెస్ట్‌ చేస్తున్నాను. వచ్చే ఏడాది ఎన్నికల జరగనున్నందున సెన్సెక్స్‌ 33,000–35,000 రేంజ్‌లో కదలాడుతుందని, స్టాక్‌ మార్కెట్లో తీవ్రమైన ఒడిదుడుకులు ఉంటాయని  అంచనా వేస్తున్నాను. ఈ కారణంగా నా ఇన్వెస్ట్‌మెంట్స్‌పై రాబడులు ఏవిధంగా ఉంటాయి ? –రాజు, విశాఖపట్టణం   ఇది చాలా ప్రాముఖ్యమైన సందేహం. అలాగే సమాధానం చెప్పడానికి అత్యంత కష్టమైన ప్రశ్న కూడా. ఈ ప్రశ్నకు సమాధానం చెప్పడం సాధ్యం కాదు. అయితే మీరు ఎంత కాలం ఇన్వెస్ట్‌ చేస్తారు అనే విషయాన్ని బట్టి ఎన్నికల సంవత్సరం అనే అంశం నుంచి ప్రయోజనం పొందవచ్చు. ఉదాహరణకు మీరు ఐదేళ్లు, అంతకు మించిన కాలానికి ఇన్వెస్ట్‌ చేయాలనుకుంటున్నారనుకుందాం. ఎన్నికలు మరో ఏడాదిలో వస్తాయి. కాబట్టి స్టాక్‌ మార్కెట్లో తీవ్రమైన ఒడిదుడుకులు చోటుచేసుకుంటాయని మీరు అంచనా వేస్తున్నారు. అందుకని మీరు సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)లను కొనసాగించవచ్చు. మీ అంచనాలకు అనుగుణంగా స్టాక్‌ మార్కెట్‌ ఒడిదుడుకులకు గురైతే, మీకు ప్రయోజనమే కలుగుతుంది. ఒకవేళ మీరు ఐదేళ్ల కంటే తక్కువ కాలానికే ఇన్వెస్ట్‌ చేయాలనుకుంటే, ఇది కొంచెం ఆందోళన కలిగించే అంశమే. మీరు  ఇన్వెస్ట్‌మెంట్స్‌ కోసం ఈక్విటీని అసలు పరిగణించాల్సిన అవసరమే లేదు. మీరు ఇప్పటికే ఈక్విటీలో ఇన్వెస్ట్‌ చేస్తున్నట్లయితే, స్టాక్‌ మార్కెట్లో ఎప్పుడూ ఒకే పరిస్థితి లేదా పరిస్థితులు ఒకేలా ఉండవన్న విషయం మీకు అర్థమై ఉంటుంది. మార్కెట్‌ చుట్లూ ఎప్పుడు టెన్షన్స్‌ ఉంటూనే ఉంటాయి. ఒకసారి చమురు ధరలు, మరోసారి ద్రవ్యోల్బణ ఒత్తిడులు. ఇలా రకరకాల ఒత్తిడులు మార్కెట్‌పై ఉంటాయి. అయితే స్టాక్‌ మార్కెట్‌కు సంబంధించి గత 20–25 ఏళ్ల పరిస్థితిని పరిగణనలోకి తీసుకుంటే, కనీసం నాలుగు నుంచి ఐదేళ్ల పాటు ఈక్విటీలో ఇన్వెస్ట్‌ చేస్తే, స్థిరాదాయ సాధనాల కంటే ఎక్కువ రాబడులే ఈక్విటీ ఇన్వెస్ట్‌మెంట్స్‌ నుంచి పొందవచ్చు. అంతేకాకుండా ద్రవ్యోల్బణాన్ని తట్టుకునే రాబడులను కూడా ఈక్విటీలు ఇస్తాయి.  స్వల్పకాలంలో మార్కెట్‌ ఎలా ఉంటుందో అంచనా వేయడం కష్టం. దీర్ఘకాలంలో.. కనీసం ఐదేళ్లు అంతకు మించిన కాలానికి మాత్రం ఈక్విటీల రాబడులు భేషుగ్గా ఉంటాయని చెప్పవచ్చు.   నేను ప్రతినెలా ఒక యూనిట్‌ గోల్డ్‌ ఈటీఎఫ్‌(ఈక్విటీ ట్రేడెడ్‌ ఫండ్‌)ను కొనుగోలు చేయాలనుకుంటున్నాను. ఇలా పదేళ్ల పాటు ఇన్వెస్ట్‌ చేయాలనుకుంటున్నాను. మంచి గోల్డ్‌ ఈటీఎఫ్‌ను ఎలా ఎంచుకోవాలి?   –జయరామ్, నెల్లూరు   మంచి గోల్డ్‌ ఈటీఎఫ్‌ను ఎంచుకోవడానికి మీకు నిపుణుల సలహా అవసరం లేదు. ఎందుకంటే గోల్డ్‌ ఈటీఎఫ్‌ల డిజైన్‌ చాలా సరళంగా ఉంటుంది. పుత్తడి ధరలను బట్టే గోల్డ్‌ ఈటీఎఫ్‌ల ధరలను నిర్ణయిస్తారు. ఈ ధరలకు వ్యయాలు అదనం. అయితే ఈ వ్యయాలు చాలా స్వల్పంగా ఉంటాయి. అయితే మీరు పదేళ్ల పాటు ఇన్వెస్ట్‌ చేయాలనుకుంటున్నారు. కాబట్టి గోల్డ్‌ ఈటీఎఫ్‌లకు ప్రత్యామ్నాయంగా మరో మార్గం ఉంది. మీరు డెట్‌ ఫండ్‌లో ఇన్వెస్ట్‌ చేయండి. దీనికి అదనంగా ప్రభుత్వం అప్పుడప్పుడు జారీ చేసే సావరిన్‌ గోల్డ్‌ బాండ్‌(ఎస్‌జీబీ)లను కొనుగోలు చేయండి. గోల్డ్‌ ఈటీఎఫ్‌ల్లో ఇన్వెస్ట్‌ చేసినా, లేదా గోల్డ్‌ ఈటీఎఫ్‌ల్లో ఇన్వెస్ట్‌ చేసే గోల్డ్‌ ఫండ్స్‌లో ఇన్వెస్ట్‌ చేసినా, కొన్ని వ్యయాలు మాత్రం మీరు భరించాల్సి ఉంటుంది. అదే సావరిన్‌ గోల్డ్‌ బాండ్స్‌లో ఇలాంటి వ్యయాల భారం ఉండదు. పైగా ఈ సావరిన్‌ గోల్డ్‌ బాండ్స్‌పై మీకు ఏడాదికి 2.5 శాతం వడ్డీ కూడా వస్తుంది. ఎనిమిదేళ్ల తర్వాత ఈ గోల్డ్‌ బాండ్స్‌ను అప్పటి పుత్తడి ధర ప్రకారం రిడీమ్‌ చేసుకోవచ్చు   నా వయస్సు 53 సంవత్సరాలు. నేను 65 ఏళ్ల వరకూ పనిచేయగలను. ఫిక్స్‌డ్‌ డిపాజిట్‌ల ద్వారా ఇప్పటివరకూ నేను రూ.50 లక్షలు పొదుపు చేయగలిగాను. రిటైర్మెంట్‌ అవసరాల కోసం ఈ మొత్తాన్ని ఇన్వెస్ట్‌ చేయాలనుకుంటున్నాను. నెలకు రూ.40,000– 50,000 చొప్పున సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయాలనేది నా ఆలోచన. నా ఇన్వెస్ట్‌మెంట్‌ ప్రణాళిక ఎలా ఉండాలి ? –ఈశ్వరరావు, హైదరాబాద్‌ జ: మీ అత్యవసరాలకు సరిపడా మొత్తాన్ని మాత్రమే స్థిరాదాయ సాధనాల్లో  ఉంచుకోవాలి. ఇలాంటి స్థిరాదాయ సాధనాల్లో ఫిక్స్‌డ్‌ డిపాజిట్‌లు ఒకటి. వీటిపై వచ్చే వడ్డీపై పన్ను ఉంటుంది. మూలం వద్ద పన్ను కోత(టీడీఎస్‌) ఉంటుంది. దీనికి బదులుగా ఫిక్స్‌డ్‌ ఇన్‌కమ్‌ ఫండ్‌లో ఇన్వెస్ట్‌ చేస్తే పన్ను ప్రయోజనాలు పొందవచ్చు. మీరు మరో పన్నేండేళ్లు పనిచేస్తారు. కాబట్టి, ఈ పన్నేండేళ్లు మీరు ఇన్వెస్ట్‌ చేయగలుగుతారు. పన్నేండేళ్లు అంటే దీర్ఘకాలం కిందే లెక్క. ఈ విషయాలన్ని పరిగణనలోకి తీసుకుంటే మీ ఇన్వెస్ట్‌మెంట్‌ ప్రణాళిక ఎలా ఉండాలంటే..., మీ అత్యవసరాలకు సంబంధించిన మొత్తాన్ని ఫిక్స్‌డ్‌ ఇన్‌కమ్‌ ఫండ్‌లో ఇన్వెస్ట్‌ చేయండి. మిగిలిన మొత్తాన్ని ఈక్విటీ లేదా బ్యాలన్స్‌డ్‌ ఫండ్స్‌లో ఇన్వెస్ట్‌ చేయండి. రెండు నుంచి మూడేళ్ల పాటు ఫిక్స్‌డ్‌ ఇన్‌కమ్, ఈక్విటీ ఫండ్స్‌లో రాబడులు మీరు ఆశించిన స్థాయిలో లేకపోయినా ఇన్వెస్ట్‌మెంట్స్‌ను కొనసాగించండి. రానురాను ఫిక్స్‌డ్‌ ఇన్‌కమ్‌ ఫండ్‌ రాబడులు కంటే ఈక్విటీ ఫండ్స్‌ రాబడులు అధికంగా ఉంటాయనే విషయం మీకు అర్థమవుతుంది.   - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నా వయస్సు 50 సంవత్సరాలు. మరో పదేళ్లలో రిటైర్‌ కాబోతున్నాను. దీర్ఘకాలం పెట్టుబడులు పెడితే మంచి రాబడులు వస్తాయని చెబుతుంటారు.  అయితే ఇలా రిటైర్మెంట్‌కు దగ్గరగా ఉన్న నాలాంటి వాళ్లకు ఇన్వెస్ట్‌మెంట్‌ పరంగా దీర్ఘకాలం అంటే అర్థవంతంగా ఉంటుందా ? రిటైర్మెంట్‌ నిధి కోసం నా ఇన్వెస్ట్‌మెంట్స్‌ ఎలా ఉండాలి ? –శ్రీధర్, విశాఖపట్టణం   ఈక్విటీల్లో దీర్ఘకాలం పాటు ఇన్వెస్ట్‌ చేస్తే మంచి రాబడులు పొందవచ్చు. అయితే రిటైర్మెంట్‌కు దగ్గరగా ఉన్న వాళ్ల విషయంలో దీర్ఘకాలిక పెట్టుబడులు కొంచెం ఆలోచించాల్సిన విషయమే. ఉదాహరణకు మీ విషయమే తీసుకుంటే,  మీ వయస్సు 50 సంవత్సరాలు. మీరు మరో పదేళ్లలో రిటైర్‌ కాబోతారు కాబట్టి, మీరు జాగ్రత్తగా ఇన్వెస్ట్‌ చేయాలి. ఈక్విటీ, బాండ్ల కలగలుపుగా మీ ఇన్వెస్ట్‌మెంట్స్‌ ఉండాలి. ఈ ఇన్వెస్ట్‌మెంట్స్‌లో మీరు ఏడాదికి 4–5 శాతం మాత్రమే విత్‌డ్రా చేసుకునేలా ఉండాలి. ఇలా చేస్తే మీ ఇన్వెస్ట్‌మెంట్స్‌ వృద్ధి చెందే అవకాశాలున్నాయి.   మనం ఇన్వెస్ట్‌ చేసిన షేర్‌ మల్టీ బ్యాగర్‌ అవుతుందా లేక మన ఇన్వెస్ట్‌మెంట్స్‌ను మట్టికరిపిస్తుందా ముందే మనకు తెలిసే వీలుందా ? అలా తెలుసుకోవడానికి ఏమైనా పద్ధతులున్నాయా ? –అవినాశ్, విజయవాడ   అలా తెలుసుకోవడం కష్టసాధ్యమైన విషయమే. మీ ఇన్వెస్ట్‌మెంట్స్‌ మట్టికరవకుండా ఉండాలంటే ఒక మార్గం ఉంది. మ్యూచువల్‌ ఫండ్స్‌లో ఇన్వెస్ట్‌ చేయడం వల్ల ఈ ప్రమాదం నుంచి బైటపడవచ్చు. మ్యూచువల్‌ ఫండ్స్‌లో క్రమం తప్పకుండా ఇన్వెస్ట్‌ చేయడం వల్ల డైవర్సిఫికేషన్‌ ప్రయోజనాలు పొంది దీర్ఘకాలంలో మంచి రాబడులే పొందవచ్చు. ఒక సాధారణ ఇన్వెస్టర్‌గా మల్టీ బ్యాగర్‌ను అంచనా వే యడం దాదాపు అసాధ్యమేనని చెప్పవచ్చు. షేర్లలో ఇన్వెస్ట్‌ చేయవచ్చు. అయితే దీని కంటే మరో మంచి మార్గం మంచి ఫండ్‌ను ఎంచుకోవడం. మంచి ఫండ్‌ను ఎంచుకొని, ఆ ఫండ్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) విధానంలో ఇన్వెస్ట్‌ చేయడం కొనసాగించండి. మీ ఆదాయం పెరిగినప్పుడల్లా ఫండ్స్‌లో మీ ఇన్వెస్ట్‌మెంట్స్‌ను కూడా పెంచండి. మ్యూచువల్‌ ఫండ్‌ను ఎంతో అనుభవమున్న ఫండ్‌ మేనేజర్‌ నిర్వహిస్తాడు. కాబట్టి ఒక సాధారణ ఇన్వెస్టర్‌ కన్నా మంచి నిర్ణయాలు తీసుకోగలడు.   నేను ఇటీవలే ఉద్యోగంలో చేరాను. భవిష్యత్తులో మంచి ఇల్లు కట్టుకోవాలనేది నా లక్ష్యం. ఈక్విటీ మ్యూచువల్‌ ఫండ్స్‌లో దీర్ఘకాలం పాటు ఇన్వెస్ట్‌ చేస్తే మంచి రాబడులు పొందవచ్చని మిత్రులు చెబుతున్నారు. అందుకని నేను ఈక్విటీ మ్యూచువల్‌ ఫండ్స్‌ల్లో ఇన్వెస్ట్‌ చేయాలనుకుంటున్నాను. ఈక్విటీ ఫండ్స్‌లో ఇన్వెస్ట్‌ చేసేటప్పుడు ఏయే అంశాలను పరిగణనలోకి తీసుకోవాలి?     –ఆనంద్, హైదరాబాద్‌ దాదాపు రెండు వేలకు పైగా ఈక్విటీ మ్యూచువల్‌ ఫండ్స్‌ ఉన్నాయి. ఇలాంటి పరిస్థితుల్లో మంచి ఈక్విటీ ఫండ్‌ను ఎంచుకోవడం కొంచెం కష్టసాధ్యమైన విషయమే. దీర్ఘకాలం అంటే కనీసం ఐదేళ్లు, అంతకు మించిన కాలానికి ఇన్వెస్ట్‌ చేయాలనుకుంటే, ఈక్విటీ ఫండ్స్‌ను ఎంచుకోవాలి. స్వల్పకాలంలో ఈక్విటీలు తీవ్రమైన ఒడిదుడుకులకు గురువుతాయి. దీర్ఘకాలం పాటు ఇన్వెస్ట్‌ చేస్తే, ఈ సమస్యను అధిగమించవచ్చు.  ఈక్విటీ ఫండ్‌లో ఇన్వెస్ట్‌ చేసేముందు మూడు  కీలకాంశాలను దృష్టిలో పెట్టుకోవాలి. మొదటిది ట్యాక్స్‌ ప్లానింగ్‌. చాలా మంది పన్ను ఆదా కోసమే ఫండ్స్‌లో ఇన్వెస్ట్‌ చేస్తారు. అందుకని మీ పోర్ట్‌ఫోలియోలో పన్ను ఆదా ఫండ్స్‌ తప్పనిసరిగా ఉండేలా చూసుకోవాలి. ఇక రెండోది మీరు ఎంత రిస్క్‌ను భరించగలరనే విషయం. డెట్‌ ఫండ్స్‌లో నష్టభయం తక్కువగా ఉంటుంది. ఈక్విటీ ఫండ్స్‌లో రిస్క్‌ రకరకాలుగా ఉంటుంది. బ్యాలన్స్‌డ్‌ ఫండ్స్‌లో రిస్క్‌ తక్కువగానూ, మిడ్, స్మాల్‌ క్యాప్‌ ఫండ్స్‌లో రిస్క్‌ అధికంగానూ ఉంటుంది. మీది ఇంకా చిన్న వయస్సే,  కాబట్టి ఎక్కువ రిస్క్‌ తీసుకోవచ్చు. ఇన్వెస్ట్‌మెంట్స్‌ కోసం స్మాల్, మిడ్‌ క్యాప్‌ ఫండ్స్‌ను పరిశీలించవచ్చు. చిన్న వయస్సులోనే ఇన్వెస్ట్‌ చేయడం వల్ల ఇన్వెస్ట్‌మెంట్‌ కాలం అధికంగా ఉండి చక్రగతి వృద్ధి రాబడులు పొందవచ్చు. ఇక చివరిది ఫండ్స్‌ పనితీరును సమీక్షించడం. కనీసం ఏడాదికొకసారైనా మీ పోర్ట్‌ఫోలియోలోని ఫండ్స్‌ పనితీరును మదింపు చేయాలి. ఆశించిన స్థాయిలో పనితీరు లేని ఫండ్స్‌ నుంచి వైదొలగి, వేరే ఫండ్స్‌లో ఇన్వెస్ట్‌మెంట్స్‌ను బదిలీ చేయాలి.   ఊరిలో పొలం అమ్మగా నా వాటా కింద రూ. 5 లక్షలు వచ్చాయి. వీటిని ఒకేసారి హైబ్రిడ్‌ ఫండ్స్‌లో ఇన్వెస్ట్‌ చేయాలనుకుంటున్నాను. తగిన సలహా ఇవ్వండి.      –లక్ష్మీ ప్రసన్న, కాకినాడ   ఫండ్స్‌లో ఎప్పుడూ పెద్ద మొత్తంలో ఇన్వెస్ట్‌ చేయకూడదు. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో నెలకు కొంత మొత్తంలో ఫండ్స్‌లో ఇన్వెస్ట్‌ చేయడం వల్ల ఈక్విటీ ఒడిదుడుకుల సమస్యను అధిగమించవచ్చు. ఒకోసారి పెద్ద మొత్తంలో సొమ్ములు సమకూరాయనుకోండి. ఆ మొత్తాన్ని బట్టి సిప్‌ల సంఖ్యను నిర్ణయించుకోవాలి. ఉదాహరణకు మీకు రూ. 50,000–1,00,000 వరకూ బోనస్‌ వచ్చిందనుకుందాం. ఈ మొతాన్ని 3–6 భాగాలుగా విభజించి సిప్‌ ద్వారా ఫండ్స్‌లో ఇన్వెస్ట్‌ చేయాలి.  స్టాక్‌ మార్కెట్‌ సైకిల్‌ సాధారణంగా మూడేళ్లు ఉంటుంది కాబట్టి పొలం అమ్మగా వచ్చిన   రూ.5 లక్షల మొత్తాన్ని  మూడు సంవత్సరాల పాటు సిప్‌ విధానంలో ఇన్వెస్ట్‌ చేయండి.    - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను గత కొంతకాలంగా మ్యూచువల్‌ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) విధానంలో ఇన్వెస్ట్‌ చేస్తున్నాను. ఇటీవలే నా వేతనం రూ.5,000 వరకూ పెరిగింది. దీంట్లో రూ.3,000 వరకూ ఫండ్స్‌లోనే ఇన్వెస్ట్‌ చేద్దామనుకుంటున్నాను. ఇప్పటికే నా పోర్ట్‌ఫోలియోలో ఎనిమిది మ్యూచువల్‌ ఫండ్స్‌ ఉన్నాయి. ఈ ఫండ్స్‌ సిప్‌లను పెంచమంటారా ? లేకుంటే కొత్తగా మ్యూచువల్‌  ఫండ్స్‌లో సిప్‌లను ప్రారంభించమంటారా ? – విక్రమ్‌ రెడ్డి, విజయవాడ   మ్యూచువల్‌ ఫండ్స్‌ల్లో సిప్‌ విధానంలో ఇన్వెస్ట్‌ చేయడం వల్ల దీర్ఘకాలంలో మంచి రాబడులు పొందే అవకాశాలు అధికంగా ఉంటాయి. సాధారణంగా డైవర్సిఫికేషన్‌ ప్రయోజనాలు పొందాలంటే గరిష్టంగా ఐదు మ్యూచువల్‌ ఫండ్స్‌లో సిప్‌ విధానంలో ఇన్వెస్ట్‌ చేస్తే సరిపోతుంది. ఇక మీ పోర్ట్‌ఫోలియోలో ఇప్పటికే ఎనిమిది మ్యూచువల్‌ ఫండ్స్‌ ఉన్నాయి. ఒక విధంగా చెప్పాలంటే మీరు ఎక్కువ ఫండ్స్‌లోనే ఇన్వెస్ట్‌ చేస్తున్నారు. ఫండ్స్‌ సంఖ్య ఎక్కువైతే, డైవర్సిఫికేషన్‌ ప్రయోజనాలు పెద్దగా రావు. ఎందుకంటే ఒక మ్యూచువల్‌ ఫండ్‌ పోర్ట్‌ఫోలియో స్టాక్స్, మరో ఫండ్‌ పోర్ట్‌ఫోలియో స్టాక్స్‌ ఒకే విధంగా ఉండే అవకాశాలు ఉంటాయి. అప్పుడు ఇలాంటి ఫండ్స్‌లో ఇన్వెస్ట్‌ చేయడం వల్ల ఎలాంటి లాభం ఉండదు. ఆరంభంలో ఇన్వెస్టర్లు ఉత్సాహంగా కొత్త ఫండ్స్‌లో ఇన్వెస్ట్‌ చేయడం ప్రారంభిస్తారు. సరైన అవగాహన లేకుండా వాటిని అలాగే కొనసాగిస్తారు. నాలుగు కంటే ఎక్కువ మ్యూచువల్‌ ఫండ్స్‌లో ఇన్వెస్ట్‌ చేసేటప్పుడు ఇన్వెస్టర్లు ముఖ్యంగా రెండు విషయాలు పరిగణనలోకి తీసుకోవాలి. మొదటిది అన్ని రంగాల కంపెనీల్లో పెట్టుబడులు పెట్టేలా ఫండ్స్‌ను ఎంచుకోవాలి. మల్టీక్యాప్‌ ఫండ్స్‌లో ఇన్వెస్ట్‌ చేయడం వల్ల దీనిని దాదాపు సాధించవచ్చు. ఇక రెండోది పోర్ట్‌ఫోలియోలోని ఫండ్స్‌కు సంబంధించిన ఫండ్‌ మేనేజర్లు కూడా వేర్వేరుగా  ఉండాలి. ఉదాహరణకు మీ పోర్ట్‌ఫోలియోలో ఒకే సంస్థ అందించే మ్యూచువల్‌ ఫండ్స్‌ నాలుగు ఉన్నాయనుకోండి. వీటన్నింటి ఇన్వెస్ట్‌మెంట్‌ స్టైల్‌ ఒకే విధంగా ఉంటాయి. ఇలా కాకుండా చూసుకోవాలి. సాధారణంగా ఒక్కో మ్యూచువల్‌ ఫండ్‌ సంస్థ నుంచి ఒక్కో కేటగిరీ ఫండ్‌లో ఇన్వెస్ట్‌ చేయడం మంచిదేనని చెప్పవచ్చు.   నేను వివిధ మ్యూచువల్‌ ఫండ్స్‌లో సిప్‌ విధానంలో ఇన్వెస్ట్‌ చేస్తున్నాను. 10–20 ఏళ్ల పాటు ఇన్వెస్ట్‌ చేయడానికి కొత్త సిప్‌ను మొదలు పెట్టాలనుకుంటున్నాను. ఏదైనా బ్యాలన్స్‌డ్‌ ఫండ్‌లో ఇన్వెస్ట్‌ చేయమంటారా ? లేక మరేదైనా ఫండ్‌లో ఇన్వెస్ట్‌ చేయమంటారా ? ఈ దీర్ఘకాలిక ఇన్వెస్ట్‌మెంట్‌కు ఏ ఫండ్‌ను ఎంచుకోవాలో సూచించండి ?          – రాగిణి, హైదరాబాద్‌   స్టాక్‌ మార్కెట్‌తో సంబంధం ఉన్న ఏ ఇన్వెస్ట్‌మెంట్‌ సాధనంలోనైనా దీర్ఘకాలం పాటు ఇన్వెస్ట్‌ చేయాలనుకుంటే, సదరు ఇన్వెస్ట్‌మెంట్‌ సాధనంపై అప్పుడప్పుడూ సమీక్ష తప్పనిసరి. ఈ సుదీర్ఘకాలంలో ఫండ్స్‌ను నిర్వహించే ఫండ్‌ మేనేజర్లు మారుతూ ఉంటారు. ఫండ్‌ మేనేజర్ల మార్పు ఆ ఫండ్‌ పనితీరుపై బాగానే ప్రభావం చూపుతుంది. అందుకని కనీసం రెండు–మూడేళ్లకొకసారైనా ఫండ్‌ సమీక్ష తప్పనిసరి. 10–20 ఏళ్ల పాటు ఇన్వెస్ట్‌ చేయడానికి బ్యాలన్స్‌డ్‌ ఫండ్‌ను ఎంచుకోవడం మంచిదే. మొదటి సారి ఫండ్స్‌లో ఇన్వెస్ట్‌ చేసేవాళ్లు బ్యాలన్స్‌డ్‌ ఫండ్స్‌నే ఎంచుకోవాలి.  అయితే మీరు ఇప్పటికే మ్యూచువల్‌ ఫండ్స్‌లో ఇన్వెస్ట్‌ చేస్తున్నారు. కాబట్టి, మ్యూచువల్‌ ఫండ్‌ ఇన్వెస్ట్‌మెంట్స్‌ తీరుతెన్నులపై మీకు ఒక అవగాహన వచ్చి ఉంటుంది. కాబట్టి మీరు బ్యాలెన్స్‌డ్‌ ఫండ్స్‌ను కాకుండా మల్టీక్యాప్‌ ఫండ్‌ను ఎంచుకోవాలి. మీరు కొంచెం రిస్క్‌ తీసుకోగలిగితే, మీ ఇన్వెస్ట్‌మెంట్‌లో కొంత భాగాన్ని మిడ్‌ క్యాప్‌ లేదా స్మాల్‌ క్యాప్‌ ఫండ్‌కు కూడా కేటాయించండి. అయితే ఈ ఫండ్స్‌లు తీవ్రమైన ఒడిదుడుకులకు గురవుతాయి. అయితే దీర్ఘకాలంలో మంచి రాబడులే పొందవచ్చు.   నేను ఇటీవలే రిటైరయ్యాను. అద్దెల ద్వారా నెలకు రూ.50,000 వరకూ ఆదాయం వస్తోంది. ఈ మొత్తాన్ని ఐదు మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. నా పోర్ట్‌ఫోలియోలో యాక్సిస్‌ లాంగ్‌ టర్మ్‌  ఈక్విటీ ఫండ్, ఎస్‌బీఐ మ్యాగ్నమ్‌ మల్టీక్యాప్, కోటక్‌ సెలెక్ట్‌ ఫోకస్, ఎల్‌ అండ్‌  టీ ఎమర్జింగ్‌ బిజినెసెస్‌ ఫండ్, ఐసీఐసీఐ ప్రుడెన్షియల్‌ బ్లూచిప్‌లు ఉన్నాయి. వీటిల్లో గత ఆరు నెలల కాలంలో రెండు ఫండ్స్‌ పనితీరు నేను ఆశించిన స్థాయిలో లేదు. ఆ ఫండ్స్‌ నుంచి వైదొలగి వేరే కొత్త ఫండ్స్‌లో ఇన్వెస్ట్‌ చేయమంటారా ? – చంద్రశేఖర్, విశాఖపట్టణం   మీ పోర్ట్‌ఫోలియోలో ఉన్న ఫండ్స్‌ అన్నీ మంచి ఫండ్సే. ఈ ఫండ్స్‌లో మీ ఇన్వెస్ట్‌మెంట్స్‌ను కొనసాగించండి. కేవలం ఆరు నెలల పనితీరు ఆధారంగా ఫండ్స్‌ పనితీరుపై ఒక అంచనాకు రాకూడదు. కనీసం ఐదు అంతకు మించిన సంవత్సరాల పాటు ఇన్వెస్ట్‌ చేయాలనుకున్నప్పుడు మాత్రమే ఈక్విటీ ఫండ్స్‌ను ఎంచుకోవాలి. స్వల్ప కాలంలో ఈక్విటీ ఫండ్స్‌ అంతంత మాత్రం రాబడులు ఇచ్చినా, దీర్ఘకాలంలో మంచి లాభాలనే అందిస్తాయి. ఒక వేళ ఫండ్స్‌ తక్కువ పనితీరు చూపించినా, సిప్‌ విధానంలో మీ ఇన్వెస్ట్‌మెంట్స్‌ను కొనసాగించారనుకోండి. మీకు ఎక్కువ యూనిట్లు వస్తాయి. అందుకని ఆరు నెలల్లో మీరు ఆశించిన రాబడులు రాలేదని సదరు ఫండ్స్‌ నుంచి వైదొలగడం సరైన నిర్ణయం కాదు. కనీసం రెండేళ్ల పాటు పరిశీలించి తగిన రాబడులు రాకపోతే అప్పుడు వైదొలగాలి. మీ పోర్ట్‌ఫోలియోలోని ఫండ్స్‌లో ఇన్వెస్ట్‌మెంట్స్‌ను నిరభ్యంతరంగా కొనసాగించవచ్చు.   - ధీరేంద్ర కుమార్‌ సీఈవో, వ్యాల్యూ రీసెర్చ్‌

నాకు ఇటీవలే బోనస్‌ వచ్చింది. మరో నాలుగు నెలల దాకా ఈ మొత్తం నాకు అవసరం లేదు. నాలుగు నెలల కాలానికైతే లిక్విడ్‌ ఫండ్‌లో ఇన్వెస్ట్‌ చేయమని మిత్రులు సలహా ఇస్తున్నారు. మంచి లిక్విడ్‌ ఫండ్‌ను ఎలా ఎంచుకోవాలి? – స్రవంతి, విజయవాడ   లిక్విడ్‌ ఫండ్స్‌ డెట్‌ మ్యూచువల్‌ ఫండ్స్‌ కేటగిరీ కిందకు వస్తాయి. సర్టిఫికెట్‌ ఆఫ్‌ డిపాజిట్స్, ట్రెజరీ బిల్స్, కమర్షియల్‌ పేపర్స్, టర్మ్‌ డిపాజిట్లు వంటి  మనీ మార్కెట్‌ సాధనాల్లో లిక్విడ్‌ ఫండ్స్‌ ఇన్వెస్ట్‌ చేస్తాయి. సాధారణంగా 91 రోజుల మెచ్యూరిటీ ఉన్న సాధనాల్లో లిక్విడ్‌ ఫండ్స్‌ ఇన్వెస్ట్‌ చేస్తాయి. నెల రోజుల నుంచి మూడు నెలల కాలానికి ఇన్వెస్టర్లు ఇలాంటి ఫండ్స్‌లో ఇన్వెస్ట్‌ చేస్తారు. సాధారణంగా ఈ లిక్విడ్‌ ఫండ్స్‌ 6.56 శాతం వరకూ రాబడిని ఇస్తాయి. మ్యూచువల్‌ ఫండ్స్‌లో అత్యంత తక్కువ నష్టభయం, తక్కువ ఒడిదుడుకులు ఈ లిక్విడ్‌ ఫండ్స్‌లోనే ఉంటాయి. లిక్విడ్‌ ఫండ్స్‌ ఎంచుకునే విషయంలో మీకు ఎవరి సలహా అవసరం లేదు. మంచి లిక్విడ్‌ ఫండ్‌కు, సాధారణ లిక్విడ్‌ ఫండ్‌కు రాబడుల్లో పెద్దగా తేడా ఉండదు. అందుకని, గత ఏడాది లేదా రెండేళ్ల పనితీరును పరిగణనలోకి తీసుకొని లిక్విడ్‌ ఫండ్స్‌ను ఎంచుకోండి. తక్కువ ఎక్స్‌పెన్స్‌ రేషియో ఉన్న ఫండ్‌కు ప్రాధాన్యత ఇవ్వండి. రాబడులను కరెక్ట్‌గా అంచనా వేయలేము. కానీ వ్యయాలపై అవగాహన ఉంటుంది. కాబట్టి తక్కువ ఎక్స్‌పెన్స్‌ రేషియో ఉన్న ఫండ్‌ను ఎంచుకోండి. సాధారణంగా తక్కువ వ్యయాలున్న ఫండ్స్‌ మంచి రాబడులనే ఇస్తాయి.   నేను ఈ మధ్య ఉద్యోగంలో చేరాను. నాకు వచ్చే జీతంలో ఖర్చులు పోను రూ. 10,000 వరకూ మిగులుతాయి. దీంట్లో రూ.8,000 మొత్తాన్ని మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటున్నాను. ఐదేళ్ల తర్వాత మా చెల్లి పెళ్లి చేయాలనుకుంటున్నాను. అప్పటివరకూ సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేసి, ఆ మొత్తాన్ని చెల్లి పెళ్లి కోసం వినియోగించాలనేది నా ఆలోచన. దీని కోసం మూడు మ్యూచువల్‌ ఫండ్స్‌ను షార్ట్‌లిస్ట్‌ చేశాను. అవి.. డీఎస్‌పీ బ్లాక్‌రాక్‌ మైక్రో క్యాప్‌ఫండ్, ఎస్‌బీఐ మ్యాగ్నమ్‌ మల్టీప్లయిర్‌ ఫండ్, ఎస్‌బీఐ మ్యాగ్నమ్‌ మిడ్‌క్యాప్‌ ఫండ్‌.. ఈ ఫండ్స్‌లో ఇన్వెస్ట్‌  చేయవచ్చా ? – సికిందర్, హైదరాబాద్‌   తొలిసారిగా మ్యూచువల్‌ ఫండ్స్‌లో ఇన్వెస్ట్‌ చేయాలనుకునేవాళ్లు ముందుగా బ్యాలన్స్‌డ్‌ ఫండ్స్‌ను ఎంచుకోవాలి. ఐదేళ్లు, అంతకు మించిన కాలానికి ఇన్వెస్ట్‌ చేయాలనుకున్నా కూడా  ముందుగా బ్యాలన్స్‌డ్‌ ఫండ్స్‌తో మొదలు పెట్టండి. ఇక గత ఏడాది పనితీరు ఆధారంగా మ్యూచువల్‌ ఫండ్స్‌ను ఎంపిక చేయడం ఒకింత రిస్క్‌తో కూడుకున్న వ్యవహారమే. అలాగే 2–3 ఏళ్ల పనితీరు ఆధారంగా కూడా మ్యూచువల్‌ ఫండ్స్‌ను ఎంపిక చేయడం సరైన ఫలితాలను ఇవ్వకపోవచ్చు. 2008–2013 కాలంలో మ్యూచువల్‌ ఫండ్స్‌లో ఇన్వెస్ట్‌ చేసిన వారికి స్వల్ప లాభాలే వచ్చాయి. ఐదేళ్లు అంతకు మించిన కాలానికి మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటే, 1 లేదా 2 మల్టీక్యాప్‌ ఫండ్స్‌ను ఎంచుకోండి. మైక్రోక్యాప్‌ ఫండ్స్‌ మంచి రాబడులే ఇస్తాయి. కానీ, స్వల్పకాలంలో 30–40 శాతం వరకూ తగ్గవచ్చు. దీంతో తొలిసారిగా మ్యూచువల్‌ ఫండ్స్‌లో ఇన్వెస్ట్‌ చేసే వాళ్లకు నిరాశే మిగులుతుంది. ఆర్థిక ప్రణాళికలు అన్నీ తల్లకిందులవుతాయి.   నేను ఇన్వెస్ట్‌ చేస్తున్న మ్యూచువల్‌ ఫండ్‌ రేటింగ్‌ ఇటీవల తగ్గింది. ఈ మ్యూచువల్‌ ఫండ్‌ రేటింగ్‌ ఫోర్‌స్టార్‌ నుంచి త్రీస్టార్‌కు పడిపోయింది. ఈ కారణంతో ఈ ఫండ్‌ నుంచి వైదొలగాలనుకుంటున్నాను. సరైన సూచన ఇవ్వండి.   – అరవింద్, విశాఖపట్టణం   మ్యూచువల్‌ ఫండ్‌ రేటింగ్‌ తగ్గడం పట్ల ఇన్వెస్టర్లు పెద్దగా ఆందోళన పడాల్సిన అవసరం లేదు. ఉదాహరణకు మీరు ఇన్వెస్ట్‌ చేస్తున్న ఫండ్‌ రేటింగ్‌ ఫైవ్‌ స్టార్‌ నుంచి ఫోర్‌ స్టార్‌కు పడిపోయిందనుకోండి. ఈ విషయం పట్టించుకోవలసిన పనిలేదు. అలా కాకుండా మీరు ఇన్వెస్ట్‌  చేస్తున్న ఫండ్‌ రేటింగ్‌ ఫోర్‌ స్టార్‌ నుంచి త్రీ స్టార్‌కు పడిపోయిందనుకోండి. మీ ఫండ్‌ పనితీరుపై ఒక కన్నేసి ఉంచాల్సిన పరిస్థితి ఏర్పడిందని గమనించండి. మీరు ఫండ్‌ నుంచి వైదొలగడానికి రేటింగ్‌ పడిపోవడం ఒక్కటే ప్రాధాన్యతా అంశంగా పరిగణించవద్దు. రేటింగ్‌ పడిపోయినప్పుడు ఫండ్‌ వయస్సును కూడా పరిగణనలోకి తీసుకోవాలి. ఉదాహరణకు మీ ఫండ్‌ వయస్సు నాలుగు లేదా ఐదేళ్లు అనుకోండి. ఈ ఫండ్‌ రేటింగ్‌ ఫైవ్‌ స్టార్‌ నుంచి ఫోర్ట్‌ స్టార్‌కు, ఆ తర్వాత ఫోర్‌ స్టార్‌ నుంచి త్రీ స్టార్‌కు ఏడాది కాలంలోనే రేటింగ్‌ పడిపోతే, అప్పుడు ఆ ఫండ్‌ నుంచి వైదొలగే విషయాన్ని ఆలోచించాలి. మూడు నెలల నుంచి ఆరు నెలల కాలంలో ఫండ్‌ పనితీరును మదింపు చేసి, మరీ అధ్వానంగా ఉంటే అప్పుడు ఆ ఫండ్‌ నుంచి వైదొలగవచ్చు. మీరు ఇన్వెస్ట్‌ చేస్తున్న ఫండ్‌ గత 15–20 సంవత్సరాల్లో మంచి పనితీరు కనబరిచి, గత ఏడాది కాలంలో ఆ ఫండ్‌ రేటింగ్‌ తగ్గిందనుకోండి. ఈ ఫండ్‌ పనితీరును 1–2 ఏళ్ల పాటు గమనించాలి. ఈ కాలంలో ఫండ్‌ పనితీరు మెరుగుపడకపోతే, అప్పుడు ఆ ఫండ్‌ నుంచి వైదొలగవచ్చు. మరోవైపు ఫండ్‌ మేనేజర్‌ అంశాన్ని కూడా పరిగణనలోకి తీసుకోవాలి. ఫండ్‌ మేనేజర్‌ ఆ ఫండ్‌ నుంచి వైదొలగాడా ? లేదా అదే ఫండ్‌లో కొనసాగుతున్నాడా? అనే విషయాన్ని కూడా పరిశీలించాలి. ఈ విషయాలన్నింటినీ పరిగణనలోకి తీసుకుని ఫండ్‌ నుంచి బయటకు రావాలా ? వద్దా ? అనే విషయాన్ని ఆలోచించాలి కానీ, రేటింగ్‌ తగ్గిందన్న ఒకే కారణంతో వైదొలగడం సరైన నిర్ణయం కాదు. - ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను మ్యూచువల్‌ ఫండ్స్‌లో 15–20 ఏళ్ల పాటు ఇన్వెస్ట్‌ చేయాలనుకుంటున్నాను. మ్యూచువల్‌ ఫండ్స్‌లో ఇన్వెస్ట్‌ చేయడం నాకిదే మొదటిసారి. మ్యూచువల్‌ ఫండ్స్‌కు సంబంధించిన ఇన్వెస్ట్‌మెంట్స్‌ విషయంలో నాకు సలహా ఇవ్వండి. నేను ఇన్వెస్ట్‌ చేయడానికి తగిన ఫండ్స్‌ను సూచించండి.? – మణికంఠ, మంగళగిరి   ఎవరైనా 15–20 ఏళ్ల పాటు ఇన్వెస్ట్‌ చేయాలనుకుంటే ఉత్తమమైన విధానం మ్యూచువల్‌ ఫండ్స్‌లో ఇన్వెస్ట్‌ చేయడమే. అయితే అద్భుతమైన రాబడులు ఆశించకూడదు. సమంజసమైన రాబడులను మాత్రమే కోరుకోవాలి. ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేస్తే మంచి రాబడితో పాటు, పన్ను ప్రయోజనాలు కూడా లభిస్తాయి. ఇక మొదటిసారిగా మ్యూచువల్‌ ఫండ్స్‌లో ఇన్వెస్ట్‌ చేసేవారు..మొదటగా మూడేళ్ల పాటు బ్యాలన్స్‌డ్‌ ఫండ్స్‌లో ఇన్వెస్ట్‌ చేయాలి. ఈ మూడేళ్లలో ఈ ఫండ్‌ మంచి పనితీరు కనబరచకపోయినా నిరాశపడవద్దు. ఈ మూడేళ్ల కాలంలో ఈ ఫండ్‌ మార్కెట్‌ ఆటుపోట్లకు తగ్గట్లుగా రాబడులనిస్తుంది. మార్కెట్‌ బాగా ఉంటే, 20–30 శాతం మేర రాబడులు వచ్చే అవకాశాలుంటాయి. మీరు ఇన్వెస్ట్‌ చేయడానికి పరిశీలించదగ్గ కొన్ని బ్యాలన్స్‌డ్‌ ఫండ్స్‌–హెచ్‌డీఎఫ్‌సీ బ్యాలన్స్‌డ్, ఐసీఐసీఐ ప్రుడెన్షియల్‌ బ్యాలన్స్‌డ్, ఆదిత్య బిర్లా సన్‌ లైఫ్‌ బ్యాలన్స్‌డ్‌95, టాటా బ్యాలన్స్‌డ్‌. వీటిల్లో నుంచి ఒకటి లేదు రెండు బ్యాలన్స్‌డ్‌ ఫండ్స్‌ను ఎంచుకోండి. వాటిల్లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయండి. కనీసం మూడేళ్ల పాటు ఇన్వెస్ట్‌ చేయండి. ఇక సిప్‌ల ద్వారా ఇన్వెస్ట్‌ చేసేమొత్తాన్ని ఏడాది తర్వాత పెంచండి. మీ ఆదాయం పెరిగినప్పుడల్లా సిప్‌ మొత్తాన్ని పెంచండి. ఇలా మూడేళ్లపాటు ఇన్వెస్ట్‌ చేసిన తర్వాత మ్యూచువల్‌ ఫండ్స్‌ ఇన్వెస్ట్‌మెంట్స్‌పై మీకు ఒక అవగాహన వస్తుంది. అప్పుడు మీరు ఎవరి సలహా అవసరం లేకుండానే మంచి ఫండ్స్‌ను ఎంచుకోగలుగుతారు.   నేను ఇప్పటికే కొన్ని ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేస్తున్నాను. మంచి రాబడులే వస్తున్నాయి. ఏదైనా  ఓవర్సీస్‌ ఫండ్‌లోనూ ఇన్వెస్ట్‌ చేస్తే బాగుంటుందని మిత్రులు చెబుతున్నారు. అంతర్జాతీయ ఫండ్స్‌లో ఇన్వెస్ట్‌ చేయడం మంచిదేనా ?  తగిన సలహా ఇవ్వండి.      – నవీన్, బెంగళూరు డైవర్సిఫికేషన్‌ విషయంలో అంతర్జాతీయ ఫండ్స్‌లో కూడా ఇన్వెస్ట్‌ చేయడం ఒక ముఖ్యమైన అంశం. భారత స్టాక్‌ మార్కెట్‌ బాగానే ఉన్న ప్రస్తుత పరిస్థితుల్లో చాలా మంది మ్యూచువల్‌ ఫండ్‌ ఇన్వెస్టర్లు ఇంటర్నేషనల్‌ ఫండ్స్‌ను పట్టించుకోరు. పైగా మన ఫండ్స్‌ కావు అన్న భావన కూడా ఇంటర్నేషనల్‌ ఫండ్స్‌పై ఒకింత అయిష్టత ఉంటుంది. అయితే డైవర్సిఫికేషన్‌ కోసమే మ్యూచువల్‌ ఫండ్స్‌లో ఇన్వెస్ట్‌ చేస్తారు. కాబట్టి. ఇంటర్నేషనల్‌ ఫండ్స్‌లో ఇన్వెస్ట్‌ చేస్తే డైవర్సిఫికేషన్‌ ప్రయోజనాలు మరింత పొందవచ్చు. ఇంటర్నేషనల్‌ ఫండ్స్‌ విషయానికొస్తే, ఇన్వెస్ట్‌ చేయడానికి ఎన్నో ఫండ్స్‌ అందుబాటులో ఉన్నాయి. పరాగ్‌ పారిఖ్‌ లాంగ్‌ టర్మ్‌ఈక్విటీ ఫండ్, నాస్‌డాక్‌ 100 ఫండ్స్‌ను పరిశీలించవచ్చు. పరాగ్‌ పారిఖ్‌ లాంగ్‌ టర్మ్‌ఈక్విటీ ఫండ్‌... తన నిధుల్లో 30 శాతం వరకూ అమెరికా కంపెనీ షేర్లలో ఇన్వెస్ట్‌ చేస్తోంది. గూగుల్‌ కంపెనీని నిర్వహించే ఆల్ఫాబెట్, ఇంకా కొన్ని మంచి ఇతర కంపెనీలు ఈ ఫండ్‌ పోర్ట్‌ఫోలియోలో ఉన్నాయి. ఇక నాస్‌డాక్‌ 100 ఫండ్‌లో దాదాపు 60 శాతం అమెరికా కంపెనీలే ఉన్నాయి. అయితే ఇంటర్నేషనల్‌ ఫండ్స్‌ను ఎంచుకునేటప్పుడు చాలా జాగ్రత్తగా ఉండాలి. ఈ ఇంటర్నేషనల్‌ ఫండ్స్‌ పోర్ట్‌ఫోలియోల్లో ఉండే  షేర్లు...వాటివాటి రంగాల్లో  అగ్రస్థానంలో ఉన్న కంపెనీల షేర్లు అయి ఉండాలి.   వివిధ మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ (సిప్‌) విధానంలో నెలకు రూ.500 చొప్పున ఇన్వెస్ట్‌ చేస్తున్నాను. మరో 10–20 ఏళ్ల ఇన్వెస్ట్‌మెంట్‌కు గాను అదనంగా మరో రెండు, మూడు సిప్‌లను ప్రారంభిద్దామనుకుంటున్నాను.ఇంత దీర్ఘకాలం పాటు ఇన్వెస్ట్‌ చేయడానికి బ్యాలన్స్‌డ్‌ ఫండ్స్‌ను ఎంచుకోవచ్చా ?  పన్ను ప్రయోజనాలు నాకు ప్రాధాన్యత కాదు.      – రవి, హైదరాబాద్‌ దీర్ఘకాలం పాటు ఇన్వెస్ట్‌ చేసే ఇన్వెస్టర్లు సాధారణంగా ఎక్కువ ఫండ్స్‌లో ఇన్వెస్ట్‌ చేస్తారు. దీని వల్ల ఇన్వెస్టర్ల పోర్ట్‌ఫోలియోల్లో ఫండ్స్‌ సంఖ్య ఎక్కువగా ఉంటుంది. కానీ, రాబడులు అంతంతమాత్రంగానే ఉంటాయి. అందుకని మంచి ఫండ్స్‌ కొన్నింటిని ఎంచుకొని, వాటిల్లోనే క్రమం తప్పకుండా ఇన్వెస్ట్‌మెంట్స్‌ను కొనసాగించాలి. అయితే కనీసం ఏడాది లేదా రెండేళ్లకొకసారి అయినా సరే, మీ పోర్ట్‌ఫోలియోను తప్పనిసరిగా సమీక్షించాలి. మార్కెట్‌తో సంబంధమున్న ఏ ఫండ్‌నన్నా ఇలా సమీక్షీంచడం తప్పనిసరి. మీరు 10–20 ఏళ్ల పాటు ఇన్వెస్ట్‌ చేయాలనుకుంటున్నారు. మరోవైపు మీరు ఇప్పటికే మ్యూచువల్‌ ఫండ్స్‌లో ఇన్వెస్ట్‌ చేస్తున్నారు. కాబట్టి మీకు ఫండ్స్‌లో పెట్టుబడుల విషయమై ఒక అవగాహన వచ్చి ఉంటుంది. అందుకని మీరు బ్యాలన్స్‌డ్‌ ఫండ్స్‌లో ఇన్వెస్ట్‌ చేయాల్సిన అవసరం లేదు. మ్యూచువల్‌ ఫండ్స్‌లో తొలిసారిగా ఇన్వెస్ట్‌ చేసే వాళ్లు బ్యాలన్స్‌డ్‌ ఫండ్స్‌ను ఎంచుకోవాలి. మీలాగా కొంత అనుభవం ఉన్నవాళ్లు బ్యాలన్స్‌డ్‌ ఫండ్స్‌ను కాక వేరే ఫండ్స్‌ గురించి ఆలోచించాలి. మీరు మల్టీక్యాప్‌ ఫండ్స్‌లో ఇన్వెస్ట్‌ చేయవచ్చు. కొంచెం రిస్క్‌ తీసుకోగలిగితే స్మాల్‌క్యాప్, మిడ్‌క్యాప్‌ ఫండ్స్‌నూ పరిశీలించవచ్చు.అయితే ఈ ఫండ్స్‌ కొంచెం ఒడిదుడుకులకు గురయ్యే అవకాశాలుంటాయి. మార్కెట్‌ పతనమవుతున్నప్పుడు కూడా సిప్‌లను కొనసాగించాలి. అందుకని మీరు రెండు లేదా మూడు మల్టీక్యాప్‌ ఫండ్స్‌లోనూ, ఒకటి లేదా రెండు స్మాల్‌క్యాప్, మిడ్‌ క్యాప్‌ ఫండ్స్‌లోనూ సిప్‌లు ప్రారంభించండి. మీ పోర్ట్‌ఫోలియోను కనీసం ఏడాది లేదా రెండేళ్లకొకసారైనా సమీక్షించడం మరచిపోకండి. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. ఒకే సంస్థకు చెందిన ఫండ్స్‌లో ఇన్వెస్ట్‌ చేయడం సరైనదేనా ?    – సంతోష్, విజయవాడ   డైవర్సిఫికేషన్‌ ప్రయోజనాల దృష్ట్యా చూస్తే, ఒకే సంస్థకు చెందిన మ్యూచువల్‌ ఫండ్స్‌లో ఇన్వెస్ట్‌ చేయడం సరైన నిర్ణయం కాదు. ఒకటికి మించిన  సంస్థల మ్యూచువల్‌ ఫండ్స్‌ల్లో ఇన్వెస్ట్‌ చేయడమే ఉత్తమం. చాలా మ్యూచువల్‌ ఫండ్స్‌ సంస్థలు  వివిధ ఫండ్స్‌కు ఒకే ఫండ్‌ మేనేజర్‌తోనూ,, ఒకే రీసెర్చ్‌ టీమ్‌తోనూ కార్యకలాపాలను కొనసాగిస్తాయి. ఒకవేళ వీరి అంచనాలు తప్పయితే, అది మీ ఫండ్స్‌ ఇన్వెస్ట్‌మెంట్స్‌ రాబడులపై ప్రతికూల ప్రభావం చూపుతాయి. మరోవైపు ఒక మ్యూచువల్‌ ఫండ్‌  సంస్థ నుంచి కీలకమైన ఫండ్‌ మేనేజర్‌  వైదొలిగారనుకోండి. ఇది కూడా ఆ సంస్థ ఫండ్స్‌ అన్నింటిపై తీవ్రంగానూ ప్రభావం చూపుతుంది. అందుకని ఇన్వెస్ట్‌ చేసేటప్పుడు ఫండ్స్‌ విషయంలోనే కాకుండా, మ్యూచువల్‌ ఫండ్‌ సంస్థల విషయంలోనూ వైవిధ్యం తప్పనిసరిగా చూపించాల్సిందే. ఈ రోజుల్లో వివిధ కేటగిరి ఫండ్స్‌లో మీరు ఇన్వెస్ట్‌ చేయడానికి వివిధ సంస్థల నుంచి మంచి ఫండ్స్‌ అందుబాటులో ఉన్నాయి. అందుకని కనీసం రెండు లేదా మూడు మ్యూచువల్‌ ఫండ్‌ సంస్థలకు చెందిన విభిన్న కేటగిరీల ఫండ్స్‌– బ్యాలన్స్‌డ్, ఈక్విటీ, మల్టీక్యాప్‌ ఫండ్స్‌ను ఎంచుకోండి. ఈ ఫండ్స్‌లో నెలకు కొంత మొత్తం చొప్పున సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తే, దీర్ఘకాలంలో మంచి రాబడులు పొందుతారు.   నేను పన్నెండేళ్లుగా ఫండ్స్‌లో ఇన్వెస్ట్‌ చేస్తున్నాను. నా పోర్ట్‌ఫోలియోలో ప్రస్తుతం ఎస్‌బీఐ బ్లూచిప్, ఐసీఐసీఐ ప్రు ఫోకస్‌డ్‌ బ్లూచిప్‌ ఈక్విటీ, ఎల్‌ అండ్‌ టీ ఈక్విటీ ఫండ్, కోటక్‌ సెలెక్ట్‌  ఫోకస్, ఐసీఐసీఐ ప్రు డైనమిక్‌ ఫండ్, ఐసీఐసీఐ ప్రు ఎక్స్‌పోర్ట్స్‌ అండ్‌ అదర్‌ సర్వీసెస్‌ ఉన్నాయి. ఈ ఫండ్స్‌ సంఖ్యను తగ్గించుకోవాలనుకుంటున్నాను. వేటి నుంచి వైదొలగాలో తగిన సలహా ఇవ్వండి.  – యాదగిరి, హైదరాబాద్‌   మీ పోర్ట్‌ఫోలియోలో ఉన్న ఫండ్స్‌ అన్నీ ఒకటి, అరా మినహా మిగిలినవన్నీ చాలా మంచి ఫండ్స్‌. ఇక ఈ ఫండ్స్‌ అన్నీ విభిన్నంగా ఉన్నాయి. వీటిల్లో కొన్ని మల్టీ–క్యాప్, కొన్ని లార్జ్‌ క్యాప్‌ ఫండ్స్‌ ఉన్నాయి. లార్జ్‌ క్యాప్‌ ఫండ్స్‌ సరైన పనితీరు కనబరచకపోయినా, మల్టీ క్యాప్‌ ఫండ్స్‌ ఆదుకుంటాయి. ఇలా కాకుండా రెండు మల్టీ క్యాప్‌ ఫండ్స్‌లో ఇన్వెస్ట్‌ చేస్తే, డైవర్సిఫికేషన్‌ ప్రయోజనాలు పొందవచ్చు. సాధారణంగా సగటున ఒక్కో ఫండ్‌ పోర్ట్‌ఫోలియోలో 30 నుంచి 40 వరకూ స్టాక్స్‌  ఉంటాయి. మీరు దాదాపు 6 ఫండ్స్‌లో ఇన్వెస్ట్‌ చేస్తున్నారు. వీటిల్లోని మొత్తం స్టాక్స్‌ సంఖ్య 200 నుంచి 250గా ఉన్నాయి. ఏ ఫండ్స్‌ను కొనసాగించాలో నిర్ణయం తీసుకోవడానికి మీరు కొన్ని అంశాలను పరిగణనలోకి తీసుకోవాలి.  ఒకే స్టాక్స్‌ ఉన్న ఫండ్స్‌ను గుర్తించండి. మీ పోర్ట్‌ఫోలియోలో ఉన్న ఫండ్స్‌ అన్నింటిలోనూ కామన్‌గా ఉన్న స్టాక్స్‌ దాదాపు 60గా ఉన్నాయి. ఎస్‌బీఐ బ్లూ చిప్, ఐసీఐసీఐ ప్రు ఫోకస్‌డ్‌ బ్లూచిప్‌ ఫండ్ల పోర్ట్‌ఫోలియోల్లో 40–45 దాకా స్టాక్స్‌ ఉన్నాయి. వీటితో పాటు ఐసీఐసీఐ ప్రు డైనమిక్, ఎల్‌ అండ్‌ టీ ఈక్విటీ ఫండ్స్‌లో ఉన్న స్టాక్స్‌ దాదాపు ఒకే విధంగా ఉన్నాయి.  ఎల్‌ అండ్‌ టీ ఈక్విటీ, ఐసీఐసీఐ డైనమిక్‌ ఫండ్స్‌ దాదాపు ఒకే రకమైనవే. మరోవైపు ఒక ప్రత్యేకమైన రంగానికే పరిమితమైన ఫండ్స్‌లో ఎప్పుడూ ఇన్వెస్ట్‌ చేయవద్దు. ఉదాహరణకు  ఐసీఐసీఐ ప్రు ఎక్స్‌పోర్ట్స్‌ అండ్‌ అదర్‌ సర్వీసెస్‌. ఈ ఫండ్‌ను నిర్వహించే ఫండ్‌ మేనేజర్‌కు మీరు పూర్తి మేనేజ్‌మెంట్‌ ఫీజు చెల్లిస్తున్నారు. కానీ, పరిమితమైన ఒక్క రంగానికే చెందిన సేవలను పొందుతున్నారు. ఒక ఫండ్‌ మేనేజర్‌ సేవలు పూర్తిగా వినియోగించుకునేలా మీ ఇన్వెస్ట్‌మెంట్‌ ఉంటే బాగుంటుంది. ఒకే రకమైన స్టాక్స్‌ ఉన్న ఫండ్స్‌ నుంచి, ఒకే రంగానికి పరిమితమైన ఫండ్‌ నుంచి వైదొలగవచ్చు.   నాకు ఒక పాప వుంది. నేను సింగిల్‌ పేరెంట్‌ను. పాపకు మంచి విద్యనందించడం కోసం మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటున్నాను. ఇన్వెస్ట్‌ చేయడానికి డైరెక్ట్‌ప్లాన్‌లను ఎంచుకోవాలా ? రెగ్యులర్‌ ప్లాన్‌లను ఎంచుకోవాలా?  – నవీన, విశాఖపట్టణం మ్యూచువల్‌ ఫండ్స్‌లో దీర్ఘకాలం పాటు పెట్టుబడి పెడితే... పిల్లల ఉన్నత చదువులు వంటి దీర్ఘకాలిక ఆర్థిక లక్ష్యాలను సునాయాసంగా చేరుకోవచ్చు. ఇక డైరెక్ట్, రెగ్యులర్‌ ప్లాన్‌ల విషయానికొస్తే, డైరెక్ట్‌ ప్లాన్‌ల్లో వ్యయాలు తక్కువగా ఉంటాయి. డైరెక్ట్‌ ప్లాన్‌ల్లో ఎలాంటి డిస్ట్రిబ్యూటర్‌ కమీషన్లు ఉండవు. ఈ రెండు ప్లాన్‌ల్లో వ్యయాల తేడా కనీసం 1% ఉంటుంది. అయితే ఇన్వెస్ట్‌మెంట్‌పై తగిన అవగాహన ఉండి, సొంతంగా ఇన్వెస్ట్‌మెంట్‌ నిర్ణయాలు తీసుకోగలిగిన వారికి డైరెక్ట్‌ ప్లాన్‌లు అనుకూలంగా ఉంటాయి. ఇక  మీరు ఫండ్స్‌లో ఇన్వెస్ట్‌ చేయడం తొలిసారి కాబట్టి ముందుగా రెగ్యులర్‌ ప్లాన్‌తో ఇన్వెస్ట్‌మెంట్స్‌ను ప్రారంభించడం మంచిది. రెగ్యులర్‌ ప్లాన్‌ల కోసం మీరు చెల్లించే ఎక్స్‌స్ట్రా వ్యయం, మీరు పొందే అనుభవంతో పోల్చితే తక్కువగానే ఉంటుందని చెప్పవచ్చు. ఒక ఏడాది పాటు రెగ్యులర్‌ ప్లాన్‌లలో ఇన్వెస్ట్‌ చేసిన తర్వాత, మీకు తగిన అనుభవం వస్తుంది. అప్పుడు మీరు డైరెక్ట్‌ ప్లాన్‌లకు మారిపోవచ్చు. - ధీరేంద్ర కుమార్‌ సీఈవో, వ్యాల్యూ రీసెర్చ్‌

గతంలో ఫిక్స్‌డ్‌ డిపాజిట్‌ చేసిన సొమ్ములు ఇప్పుడు చేతికి వస్తున్నాయి. వీటిని హెచ్‌డీఎఫ్‌సీ బ్యాలన్స్‌డ్‌ ఫండ్‌లో ఇన్వెస్ట్‌ చేద్దామనుకుంటున్నాను. ఇది సరైన నిర్ణయమేనా? ఈ ఫండ్‌లో ఒకేసారి ఈ మొత్తాన్ని ఇన్వెస్ట్‌ చేయమంటారా? లేక సిప్‌ విధానాన్ని అనుసరించమంటారా ?  – కుముదిని, విశాఖపట్టణం   మీరు మ్యూచువల్‌ ఫండ్స్‌లో ఇన్వెస్ట్‌ చేయడం ఇదే మొదటిసారి అయితే, నిరభ్యంతరంగా బ్యాలన్స్‌డ్‌ ఫండ్‌లో ఇన్వెస్ట్‌ చేయవచ్చు. బ్యాలన్స్‌డ్‌ ఫండ్స్‌లో ఇన్వెస్ట్‌ చేస్తే, మీ  ఇన్వెస్ట్‌మెంట్స్‌పై స్వల్పకాలంలో ఎలాంటి రాబడులు ఆశించకూడదు. అలాగే  ఒక క్రమబద్ధమైన ఆదాయం రావాలని కూడా కోరుకోకూడదు. బ్యాలన్స్‌డ్‌ ఫండ్‌లో ఇన్వెస్ట్‌ చేస్తే, ఒకటి లేదా రెండేళ్లలో మీ పెట్టుబడిలో ఒకింత నష్టం వచ్చినా కంగారుపడకండి. దీర్ఘకాలంలో మంచి రాబడులే పొందవచ్చు.  మీరు ఇన్వెస్ట్‌ చేయడానికి బ్యాలన్స్‌డ్‌ ఫండ్స్‌ కాకుండా మరికొన్ని మార్గాలు కూడా ఉన్నాయి. ఈక్విటీ ఇన్‌కమ్‌ ఫండ్, మంత్లీ ఇన్‌కమ్‌ ప్లాన్‌(ఎమ్‌ఐపీ)లను కూడా పరిగణనలోకి తీసుకోవచ్చు. ఇక మ్యూచువల్‌ ఫండ్స్‌లో ఎప్పుడూ ఒకేసారి పెద్ద మొత్తాల్లో ఇన్వెస్ట్‌ చేయకూడదు. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)విధానంలో ఇన్వెస్ట్‌ చేస్తే మీరు దీర్ఘకాలంలో మంచి రాబడులు పొందవచ్చు. మీ దగ్గరున్న ఫిక్స్‌డ్‌ డిపాజిట్‌ మెచ్యూరిటీ మొత్తాన్ని కనీసం ఆరు లేదా పన్నెండు భాగాలుగా చేసి, ఒక్కో భాగాన్ని నెల వారీగా ఇన్వెస్ట్‌ చేయండి.   నా వయస్సు 32 సంవత్సరాలు. ఈక్విటీ లింక్డ్‌ సేవింగ్స్‌స్కీమ్స్‌(ఈఎల్‌ఎస్‌ఎస్‌)లో ఇన్వెస్ట్‌ చేయడం వల్ల మంచి రాబడులు, పన్ను ప్రయోజనాలు పొందవచ్చని మిత్రులు చెబుతున్నారు. అయితే ఈక్విటీ మార్కెట్‌ ఒడిదుడుకులమయంగా ఉంటుంది. కాబట్టి ఈక్విటీలకు దూరంగా ఉండాలనుకుంటున్నాను. ఆదాయపు పన్ను చట్టం సెక్షన్‌ 80 సీ కింద పన్ను ప్రయోజనాలు లభించే హైబ్రిడ్‌ ఫండ్స్‌ కానీ, బ్యాలన్స్‌డ్‌ ఫండ్స్‌ కానీ ఉన్నాయా ? ఈ తరహాలో వుండే పెన్షన్‌ ఫండ్స్‌ వుంటే...వాటి వివరాలు వెల్లడించండి.   – వినోద్, హైదరాబాద్‌   మీరు పేర్కొన్న వివరాల ప్రకారం రెండు పెన్షన్‌ స్కీమ్స్‌ అందుబాటులో ఉన్నాయి.  ఒకటి ఫ్రాంక్లిన్‌ ఇండియా ఆఫర్‌ చేస్తోంది. మరొకటి యూటీఐ అందిస్తోంది. ఈ రెండు పెన్షన్‌ప్లాన్‌లు..ఈక్విటీలో 40 శాతం వరకూ ఇన్వెస్ట్‌ చేస్తాయి. మిగిలిన 60 శాతం నిధులను స్థిరాదాయ సాధనాల్లో ఇన్వెస్ట్‌ చేస్తాయి. పూర్తిగా ఈక్విటీతో ముడిపడని  ఇన్వెస్ట్‌మెంట్‌ ఆప్షన్‌ కావాలంటే, మీరు నేషనల్‌ పెన్షన్‌ సిస్టమ్‌(ఎన్‌పీఎస్‌)ను కూడా పరిశీలించవచ్చు. ఈక్విటీలో ఎన్‌పీఎస్‌ గరిష్టంగా 50 శాతం వరకూ ఇన్వెస్ట్‌ చేస్తుంది. ఆదాయపు పన్ను చట్టం సెక్షన్‌ 80 సీ కింద పన్ను ప్రయోజనాలూ లభిస్తాయి. అయితే మీ ఇన్వెస్ట్‌మెంట్స్‌ మీరు రిటైరయ్యేదాకా లాక్‌–ఇన్‌ అయిపోతాయి. ఎన్‌పీఎస్‌ ఇన్వెస్ట్‌మెంట్స్‌లో కనీసం 40 శాతం కార్పస్‌ను యాన్యూటీ కింద కొనుగోలు చేయాల్సి ఉంటుంది. ముఖ్యమైన విషయం ఏమిటంటే మీరు యువకులు. స్టాక్‌ మార్కెట్‌ అంటే భయపడాల్సిన, దూరంగా ఉండాల్సిన వయస్సు కాదు మీది. స్వల్పకాలంలో స్టాక్‌ మార్కెట్‌ ఒడిదుడుకులమయంగానే ఉంటుంది. అయితే దీర్ఘకాలంలో మంచి రాబడులు పొందవచ్చు. ఇక ఈఎల్‌ఎస్‌ఎస్‌ల విషయానికొస్తే, ఈఎల్‌ఎస్‌ఎస్‌ల్లో మీ ఇన్వెస్ట్‌మెంట్స్‌కు లాక్‌–ఇన్‌ పీరియడ్‌ మూడేళ్లు మాత్రమే. ప్రణాళికబద్ధంగా ఇన్వెస్ట్‌ చేస్తే, మూడేళ్ల కాలంలో మీరు నష్టపోయే పరిస్థితి కానీ, నిరాశపడే రాబడులు కానీ వచ్చే అవకాశాలు చాలా తక్కువగా ఉంటాయి. రిస్క్‌(నష్టభయం) తగ్గించుకోవాలంటే సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) విధానంలో ఇన్వెస్ట్‌ చేయండి. ఒడిదుడుకులు, నష్టభయం రెండూ వేర్వేరు. స్వల్పకాలం ఇన్వెస్ట్‌మెంట్స్‌ను పరిగణనలోకి తీసుకుంటే, ఒడిదుడుకులు నష్టభయంగా మారతాయి. మీలాంటి యువకులు కొంత రిస్క్‌ను భరించైనా సరే, ఈక్విటీలో ఇన్వెస్ట్‌ చేయడమే ఉత్తమం.   నేను రెండేళ్ల క్రితం ఎల్‌ఐసీ జీవన్‌ తరంగ్‌ పాలసీ తీసుకున్నాను. ఏడాదికి రూ.35,000 చొప్పున ప్రీమియమ్‌ చెల్లిస్తున్నాను. ఇది చాలా ఎక్కువగా ఉందని నా భావన. ఈ పాలసీని సరెండర్‌ చేయమంటారా ? కొనసాగించమంటారా?  – అనిల్, విజయవాడ   జీవన్‌ తరంగ్‌ అనేది హోల్‌ లైఫ్‌ ప్లాన్‌. బీమా మొత్తానికి 5.5 శాతం రేటు చొప్పున వార్షిక సర్వైవల్‌ బెనిఫిట్‌ను ఈ పాలసీ అందిస్తుంది. బీమా పాలసీ ముగిసిన తర్వాత బోనస్‌లను ఇతరత్రా మొత్తాలను చెల్లిస్తారు. ఒకవేళ పాలసీ తీసుకున్న వ్యక్తి దురదృష్టవశాత్తూ మరణిస్తే, ఈ మొత్తాలను పాలసీ ముగియక ముందే అందజేస్తారు. పాలసీకి సంబంధించిన వ్యయాలను చార్జీలను ఈ పాలసీ వెల్లడించడం లేదు. ప్రీమియమ్‌ అధికంగా ఉండటం, వ్యయాలు, చార్జీల విషయాల్లో పారదర్శకత లేకపోవడం తదితర కారణాల వల్ల  ఈ పాలసీని సరెండర్‌ చేయడమే మంచిది. మీరు పాలసీ తీసుకొని మూడేళ్లు కాలేదు కాబట్టి, ఈ పాలసీని సరెండర్‌  చేస్తే మీకు తిరిగి ఏమీ రాదు. ఆర్థిక విషయాల్లో ఎప్పుడూ సరళంగా ఉండాలి. జీవిత బీమా కోసం పూర్తి టర్మ్‌ పాలసీలు తీసుకోవాలి. వీటిల్లో ప్రీమియమ్‌ తక్కువగానూ, బీమా కవరేజ్‌ అధికంగానూ ఉంటుంది. ఇక దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయాలి. ఈక్విటీ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తే, దీర్ఘకాలంలో మీకు మంచి రాబడులు వచ్చే అవకాశాలు అధికంగా ఉంటాయి.    ధీరేంద్ర కుమార్‌ సీఈవో, వ్యాల్యూ రీసెర్చ్‌  

నా దగ్గర ప్రస్తుతం రూ.25 లక్షలు ఉన్నాయి. నాలుగేళ్ల తర్వాత సొంత ఇల్లు సమకూర్చుకోవడం నా లక్ష్యం. అందుకని ఈ నాలుగేళ్ల కాలానికి ఈ మొత్తాన్ని ఏదైనా అగ్రెసివ్‌ ఫండ్‌లో ఇన్వెస్ట్‌ చేయాలనుకుంటున్నాను. ఫలితంగా నేను కొనుగోలు చేయబోయే ఇంటికి తీసుకోవలసిన రుణ మొత్తం తగ్గుతుంది కదా ! ఒకేసారి ఈ రూ.25 లక్షలను పూర్తిగా ఏదైనా ఫండ్‌లో ఇన్వెస్ట్‌ చేయడం సరైనదేనా ? తగిన సూచనలివ్వండి.   –వైభవ్, హైదరాబాద్‌   పిల్లల ఉన్నత చదువుల కోసం, రిటైర్మెంట్‌ నిధి కోసం ఇప్పటి నుంచే ఇన్వెస్ట్‌ చేయడం... దీర్ఘకాలిక ఆర్థిక లక్ష్యాల సాధనలో మొదటి అడుగు. కానీ నాలుగేళ్లలో సొంత ఇల్లు సమకూర్చుకోవడం దీర్ఘకాల ఆర్థిక లక్ష్యం కాదు. నాలుగు లేదా ఐదేళ్లలోనే ఈ సొమ్ములు మీకు అవసరం పడతాయి. కాబట్టి ఈ సొమ్ముల ఇన్వెస్ట్‌మెంట్‌ విషయంలో మీరు చాలా అప్రమత్తంగా వ్యవహరించాల్సి ఉంటుంది. అగ్రెసివ్‌ ఫండ్‌ కంటే కూడా బ్యాలెన్స్‌డ్‌ మ్యూచువల్‌ ఫండ్‌లోనే ఇన్వెస్ట్‌ చేయడం ఉత్తమం. స్వల్పకాలంలో మార్కెట్‌ గమనాన్ని అంచనా వేయడం చాలా కష్టం. మీరు ఒకేసారి ఈ మొత్తాన్ని ఇన్వెస్ట్‌ చేస్తే, మార్కెట్‌ బాగా లేకపోతే, నాలుగేళ్లలో ఇల్లు కొనుగోలు చేయాలన్న మీ ప్లాన్‌ మొత్తం తల్లకిందులు కావచ్చు. అందుకని ఎప్పుడైనా ఒకేసారి పెద్ద మొత్తంలో ఇన్వెస్ట్‌ చేయడం సరైన వ్యూహం కాదు.  కాబట్టి మీ దగ్గర ఉన్న మొత్తాన్ని కనీసం 12 భాగాలుగా చేసి ఒక్కో భాగాన్ని ఒక నిర్దేశిత కాలానికి(నెల/మూడు నెలలు/ఆరు నెలలు) ఒక మంచి బ్యాలెన్స్‌డ్‌ ఫండ్‌లో ఇన్వెస్ట్‌ చేయండి.   నా వయస్సు 42 సంవత్సరాలు. ఇటీవల నేను ఉద్యోగం కోల్పోయాను. మిత్రులతో కలసి సొంతంగా వ్యాపారం ప్రారంభించాలనుకుంటున్నాను. వ్యాపారానికి పెట్టుబడి సమస్యలు లేవు. కాగా ఇప్పటివరకూ నా ప్రావిడెంట్‌ ఫండ్‌ మొత్తం రూ.35 లక్షలైంది. ఈ మొత్తాన్ని మరో 15 ఏళ్ల వరకూ వాడుకోకూడదనుకుంటున్నాను. ఈ మొత్తాన్ని నేను ఎక్కడ ఇన్వెస్ట్‌ చేయాలి? మంచి సలహా ఇవ్వండి.   –రవి, విశాఖపట్టణం   మరో పదిహేనేళ్ల పాటు ఈ ఈపీఎఫ్‌(ఎంప్లాయీ ప్రావిడెంట్‌ ఫండ్‌) సొమ్ములను వాడుకోకూడదని మీరు నిర్ణయించుకున్న పక్షంలో కొంచెం రిస్క్‌ తీసుకుంటే మంచిది. మీరు ఉద్యోగంలో ఉన్నంత వరకూ ఈపీఎఫ్‌లో నిల్వలు కొనసాగించడమే మంచిది. మీరు ఉద్యోగం నుంచి బయటకు వచ్చిన తర్వాత ఈపీఎఫ్‌లో ఉండే మీ మొత్తంపై వచ్చే వడ్డీఆదాయంపై పన్ను భారం పడుతుంది. అందుకని మీరు ఉద్యోగం నుంచి బయటకు వచ్చినప్పుడు ఈపీఎఫ్‌ మొత్తాన్ని తీసేసుకోవడమే మంచి నిర్ణయం. ఇటీవల కాలం నుంచే ప్రావిడెంట్‌ ఫండ్‌ నిధులను ఈక్విటీల్లో ఇన్వెస్ట్‌ చేయడం ఆరంభించారు. అయితే  ఈ ఈక్విటీ ఇన్వెస్ట్‌మెంట్స్‌పై పారదర్శకత పెద్దగా లేదు. అందుకని మీ పీఎఫ్‌ మొత్తాన్ని ఉపసంహరించి మంత్లీ ఇన్‌కమ్‌ ప్లాన్స్‌(ఎమ్‌ఐపీ)కు సంబంధించిన గ్రోత్‌ ఆప్షన్‌ స్కీమ్‌ల్లో ఇన్వెస్ట్‌ చేయండి. ఈ స్కీమ్‌లు తమ నిధుల్లో 10–15 శాతం మేర ఈక్విటీలో ఇన్వెస్ట్‌ చేస్తాయి. అయితే ఈ రూ. 35 లక్షల మొత్తాన్ని ఒకేసారి వీటిల్లో ఇన్వెస్ట్‌ చేయకండి. ఈ మొత్తాన్ని కనీసం 12 నుంచి 18 నెలల్లో ఇన్వెస్ట్‌ చేసేలా ప్లాన్‌ చేసుకోండి. మీరు ఒకేసారి ఈ మొత్తాన్ని ఇన్వెస్ట్‌ చేసిన పక్షంలో మీ స్కీమ్స్‌ విలువ 5 శాతం తగ్గినా అది పెద్దమొత్తం నష్టం కిందే లెక్క. మీరు ఇటీవలే ఉద్యోగం కోల్పోయారు. సొంతంగా వ్యాపారం ప్రారంభిస్తున్నారు. సొంత వ్యాపారంలో పూర్తి స్థాయిలో కుదురుకోకముందే మీ పీఎఫ్‌ సొమ్ములపై  నష్టాలు రావడం మంచిది కాదు కదా !   నేను కొంత మొత్తాన్ని ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)ల్లో ఇన్వెస్ట్‌ చేశాను. ఈ ఫండ్స్‌ లాక్‌–ఇన్‌ పీరియడ్‌ పూర్తయింది. ఈ ఫండ్స్‌ నుంచి ఇన్వెస్ట్‌మెంట్స్‌ను వెనక్కి తీసుకొని మరింత మెరుగైన రాబడులు వచ్చే మ్యూచువల్‌ ఫండ్స్‌లో ఇన్వెస్ట్‌ చేయాలనుకుంటున్నాను. కొంతమంది మిత్రులు ఈఎల్‌ఎస్‌ఎస్‌ల్లోనే ఈ ఇన్వెస్ట్‌మెంట్స్‌ను కొనసాగించమంటున్నారు. నేను ఇప్పుడు ఏం చేయాలి?   –కళ్యాణ్, విజయవాడ   ఈఎల్‌ఎస్‌ఎస్‌ల నుంచి మీ ఇన్వెస్ట్‌మెంట్స్‌ను వెనక్కి తీసుకొని మెరుగైన రాబడుల కోసం మరో ఫండ్స్‌లో ఇన్వెస్ట్‌ చేయడం సరైన నిర్ణయం కాదు. ఈఎల్‌ఎస్‌ఎస్‌ ఫండ్స్‌ తగిన రాబడులు ఇవ్వని పక్షంలోనే లాక్‌–ఇన్‌ పీరియడ్‌ పూర్తయిన తర్వాత ఈఎల్‌ఎస్‌ఎస్‌ల నుంచి ఇన్వెస్ట్‌మెంట్స్‌ను వెనక్కి తీసుకోవాలి.  లిక్విడిటీ సమస్య కారణంగా చాలా మంది ఇన్వెస్టర్లు ఈఎల్‌ఎస్‌ఎస్‌ల లాక్‌ ఇన్‌ పీరియడ్‌ పూర్తి కాగానే ఇన్వెస్ట్‌మెంట్స్‌ను వెనక్కి తీసుకుంటారు. ఇలా చేయడం సరైన పద్ధతి కాదు. ఈఎల్‌ఎస్‌ఎస్‌ల నుంచి వెనక్కి తీసుకున్న ఇన్వెస్ట్‌మెంట్స్‌ను తగిన విధంగా ఇన్వెస్ట్‌ చేయకపోతే, మీకు తగిన రాబడులు రావు. పైగా అధికంగా పన్ను భారం పడుతుంది. ఈఎల్‌ఎస్‌ఎస్‌ల నుంచి ఇన్వెస్ట్‌మెంట్స్‌ను కేవలం రెండు కారణాల వల్లే వెనక్కి తీసుకోవాలి. మొదటిది ఈ ఫండ్స్‌ పనితీరు సరిగ్గా లేకపోవడం, రెండవది... మీకు నగదు కొరత తీవ్రంగా ఉన్నప్పుడు.. కేవలం ఈ రెండు సందర్భాల్లోనే ఈఎల్‌ఎస్‌ఎస్‌ల్లోని ఇన్వెస్ట్‌మెంట్స్‌ను వెనక్కి తీసుకోవాలి. అలా కానప్పుడు ఇన్వెస్ట్‌మెంట్స్‌ను కొనసాగించడమే మంచిది. ఈఎల్‌ఎస్‌ఎస్‌ల్లో దీర్ఘకాలం పాటు ఇన్వెస్ట్‌మెంట్స్‌ను కొనసాగించినప్పుడు మంచి రాబడులు పొందవచ్చు.   - ధీరేంద్ర కుమార్‌ సీఈవో, వ్యాల్యూ రీసెర్చ్‌

మ్యూచువల్‌ ఫండ్స్‌కు చెందిన ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌) మెచ్యూరిటీపై పన్నులు విధించారు కదా ! అందుకని యులిప్స్‌లో ఇన్వెస్ట్‌ చేద్దామనుకుంటున్నాను. యులిప్స్‌లో పన్ను  ప్రయోజనాలు లభిస్తాయి కాబట్టి ఇప్పుడు యులిప్స్‌ బెటరని మిత్రులంటున్నారు. తగిన సలహా ఇవ్వండి ?     – రవికాంత్, కరీంనగర్‌  ఈఎల్‌ఎస్‌ఎస్‌ స్కీమ్‌ల మెచ్యూరిటీపై పన్నులున్నాయన్న ఆలోచనతో యులిప్‌(యూనిట్‌ లింక్డ్‌ ఇన్సూరెన్స్‌ ప్లాన్‌)ల్లో ఇన్వెస్ట్‌ చేయడం సరైన నిర్ణయం కాదు. ఈఎల్‌ఎస్‌ఎస్‌ యూనిట్లను విక్రయించినప్పుడు మీరు 10.4 శాతం దీర్ఘకాల మూలధన లాభాల పన్ను(ఎల్‌టీసీజీ) చెల్లించాల్సి ఉంటుంది. యులిప్స్‌ యూనిట్లను విక్రయించినప్పుడు ఎలాంటి పన్ను భారం ఉండదు. అయితే యులిప్స్‌ కంటే ఈఎల్‌ఎస్‌ఎస్‌లకే ప్రాధాన్యత ఇవ్వడానికి ప్రధానంగా మూడు పన్నేతర కారణాలున్నాయి. మొదటిది పారదర్శకత... మ్యూచువల్‌ ఫండ్స్‌ ఏ యే కంపెనీల్లో ఇన్వెస్ట్‌ చేస్తాయో వెల్లడిస్తాయి. కానీ యులిప్స్‌ ఆ విషయంలో మ్యూచువల్‌ ఫండ్స్‌ అంత పారదర్శకంగా వ్యవహరించవు. ఇతర ఫండ్స్‌తో పోల్చిచూసుకోవడానికి, బెంచ్‌ మార్కింగ్‌ విషయంలో ఫండ్స్‌ పారదర్శకత యులిప్స్‌ కంటే బాగా ఉంటుంది. రెండో కారణం వ్యయాలు. ఈఎల్‌ఎస్‌ఎస్‌ స్కీమ్స్‌తో పోల్చితే యులిప్స్‌ ఎక్కువ చార్జీలు వసూలు చేస్తాయి. పైగా ఈ యులిప్‌లు విధించే చార్జీల్లో తగిన పారదర్శకత కూడా ఉండదు. ఇక మూడో అంశం...లాక్‌ ఇన్‌ పీరియడ్‌.. యూలిప్‌ల్లో లాక్‌–ఇన్‌ పీరియడ్‌ ఐదేళ్లు కాగా, ఈఎల్‌ఎస్‌ఎస్‌ల్లో లాక్‌–ఇన్‌ పీరియడ్‌ మూడేళ్లు మాత్రమే. గత బడ్జెట్‌ల సరళిని చూస్తే, పన్ను ఆదాయం పెంపు వ్యూహంలో భాగంగా ప్రభుత్వం ఇప్పటివరకూ ఇస్తున్న రాయితీలను క్రమక్రమంగా ఎత్తేస్తున్నది. భవిష్యత్తులో యులిప్‌లపై కూడా పన్ను భారం ఉండే అవకాశాలూ లేకపోలేదు. అందుకని కేవలం పన్ను అనే ఒకే ఒక అంశం ఆధారంగా యులిప్‌ల్లో ఇన్వెస్ట్‌ చేయాలనుకోవడం సరైన నిర్ణయం కాదు.   సీనియర్‌ సిటిజన్స్‌ సేవింగ్స్‌ స్కీమ్‌(ఎస్‌సీఎస్‌ఎస్‌)లో సంయుక్తంగా రూ. 30 లక్షల వరకూ ఇన్వెస్ట్‌ చేయవచ్చని ఒక వెబ్‌సైట్‌లో చదివాను. కానీ ఇండియన్‌ పోస్ట్‌ ఆఫీస్‌ వెబ్‌సైట్‌ప్రకారం, ఎస్‌సీఎస్‌ఎస్‌లో సింగిల్‌గా కానీ, జాయింట్‌గా కానీ గరిష్టంగా ఇన్వెస్ట్‌ చేసే మొత్తం రూ.15 లక్షలని ఉంది. దీంట్లో ఏది నిజం ?      – విష్ణు, విజయవాడ   కొన్ని సార్లు కొన్ని వెబ్‌సైట్లలో లభించే సమాచారంపై తగిన స్పష్టత ఉండదు. అలాంటిదే ఇది కూడా. ఒక వ్యక్తి వ్యక్తిగతంగా సీనియర్‌ సిటిజెన్స్‌ సేవింగ్స్‌ స్కీమ్‌(ఎస్‌సీఎస్‌ఎస్‌)లో గరిష్టంగా రూ.15 లక్షల వరకూ ఇన్వెస్ట్‌ చేయవచ్చు. తన జీవిత భాగస్వామి(భార్య/భర్త)తో జాయింట్‌గా ఏర్పాటు చేసిన ఎస్‌సీఎస్‌ఎస్‌ ఖాతాలో (జీవిత భాగస్వామి ఫస్ట్‌ హోల్డర్‌గా ఉండాలి)అదనంగా మరో రూ.15 లక్షల వరకూ ఇన్వెస్ట్‌ చేయవచ్చు. అంటే జీవిత భాగస్వామితో ఏర్పాటు చేసిన జాయింట్‌ ఎస్‌సీఎస్‌ఎస్‌ ఖాతాలో గరిష్టంగా రూ.30 లక్షల వరకూ ఇన్వెస్ట్‌ చేయవచ్చు.  ఎవరైనా భార్య/భర్తతో మాత్రమే జాయింట్‌ ఖాతా తెరవాల్సి ఉంటుంది.   ప్రిన్సిపల్‌  ట్యాక్స్‌–సేవింగ్స్‌ ఫండ్‌లో కొత్త సిప్‌ను ప్రారంభిద్దామనుకుంటున్నాను. సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) విధానంలో ఇన్వెస్ట్‌ చేయడానికి ఈ ఫండ్‌ తగినదేనా? గోల్డ్‌ ఈటీఎఫ్‌లు డిస్కౌంట్‌కే ట్రేడవుతుంటాయి. ఎందుకని ?      – రషీద, హైదరాబాద్‌   ప్రిన్సిపల్‌ ట్యాక్స్‌–సేవింగ్స్‌ ఫండ్‌లో నిరభ్యంతరంగా సిప్‌ విధానంలో ఇన్వెస్ట్‌ చేయవచ్చు. సాధారణ ఇన్వెస్టర్లు ఇన్వెస్ట్‌ చేయదగ్గ మంచి ఫండ్స్‌లో ఇది కూడా ఒకటి. కొనుగోలు చేయాలనుకుంటున్న లేదా విక్రయించాలనుకుంటున్న ఇన్వెస్టర్ల సంఖ్యను బట్టి గోల్డ్‌ ఈటీఎఫ్‌(ఎక్సే్చంజ్‌ ట్రేడెడ్‌ ఫండ్‌) ఎక్కువ (ప్రీమియమ్‌)ధరకు, లేదా తక్కువ(డిస్కౌంట్‌) ధరకు ట్రేడవడం జరుగుతుంది. కొనుగోలుదార్ల కంటే అమ్మేవాళ్లు ఎక్కువగా ఉంటే గోల్డ్‌  ఈటీఎఫ్‌ తక్కువ ధరకు ట్రేడవుతుంది. కొన్ని గోల్డ్‌  ఈటీఎఫ్‌లు ఎన్‌ఏవీ కంటే తక్కువ ధరకు ట్రేడ్‌ కావడానికి కూడా ఇదే కారణం.   సుందరమ్‌ మ్యూచువల్‌ ఫండ్‌ అందిస్తున్న ఐదేళ్ల క్లోజ్‌డ్‌ ఎండ్‌ మైక్రో క్యాప్‌ ఫండ్‌లో ఇన్వెస్ట్‌ చేయాలనుకుంటున్నాను. ఇది సరైన నిర్ణయమేనా ?     – వినోద్, విశాఖపట్టణం   సాధారణంగా ఇన్వెస్టర్లు క్లోజ్‌డ్‌ ఎండ్‌ ఫండ్స్‌కు దూరంగా ఉంటేనే మంచిది. మ్యూచువల్‌ ఫండ్స్‌లో ఇన్వెస్ట్‌ చేయడానికి సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) సరైన విధానం.  ముఖ్యంగా చిన్న ఇన్వెస్టర్లు మ్యూచువల్‌ ఫండ్స్‌లో సిప్‌ల ద్వారానే ఇన్వెస్ట్‌ చేయాలి. ఇలా చేస్తేనే స్టాక్‌ మార్కెట్‌ పెరిగినప్పుడు, అదేవిధంగా తగ్గినప్పుడూ తగిన ప్రయోజనాలు వారికి లభిస్తాయి. అదే క్లోజ్‌డ్‌ ఎండ్‌ ఫండ్‌లో అయితే... మీరు ఆ ఫండ్‌ ఆరంభంలోనే ఇన్వెస్ట్‌ చేయాల్సి ఉంటుంది. అంతేకాకుండా ఈ ఫండ్స్‌లో లిక్విడిటీ కూడా పెద్దగా ఉండదు. మరోవైపు క్లోజ్‌డ్‌ ఎండ్‌ ఫండ్‌లో నిర్దేశిత సమయం వరకూ మీరు మీ ఇన్వెస్ట్‌మెంట్స్‌ను వెనక్కి తీసుకోవడానికి అవకాశం ఉండదు. మీ విషయంలో అయితే మీరు ఐదేళ్ల వరకూ మీ ఇన్వెస్ట్‌మెంట్స్‌ను వెనక్కి తీసుకోవడానికి వీలుండదు. టెక్నికల్‌గా అవి లిస్టవుతాయి. కానీ, ట్రేడింగ్‌ లావాదేవీలు పెద్దగా ఉండవు. అందుకని ఐదేళ్ల కాలం కంటే ముందుగానే మీ ఇన్వెస్ట్‌మెంట్స్‌ వెనక్కి తీసుకోలేరు. క్లోజ్‌డ్‌ ఎండ్‌ ఫండ్‌ విధానం... మైక్రో, స్మాల్‌ క్యాప్‌ ఫండ్స్‌కు తగిన విధంగానే ఉన్నప్పటికీ, సిప్‌ ఇన్వెస్ట్‌మెంట్స్‌ ద్వారా వచ్చే ప్రయోజనాలు మీకు దక్కవు. అందుకని క్లోజ్‌డ్‌ ఎండ్‌ ఫండ్స్‌ను కాకుండా వేరే ఫండ్స్‌ను ఎంచుకోండి. సిప్‌ విధానం ద్వారా ఐదేళ్లు అంతకుమించి ఇన్వెస్ట్‌మెంట్‌ చేయాలనుకుంటే ఈక్విటీ మ్యూచువల్‌ ఫండ్స్‌ను పరిశీలించవచ్చు.    ధీరేంద్ర కుమార్‌ సీఈవో, వ్యాల్యూ రీసెర్చ్‌  

బ్యాంక్‌ ఫిక్స్‌డ్‌ డిపాజిట్ల మాదిరిగా రాబడులనిచ్చే డెట్‌ ఫండ్స్‌ను సూచించండి ?      – అనిత, హైదరాబాద్‌   ఆరు నెలల కాలానికి ఇన్వెస్ట్‌ చేయాలనుకుంటే, లిక్విడ్‌ ఫండ్స్‌ను పరిశీలించండి. ఏడాది, లేదా ఏడాదిన్నర కాలం పాటు ఇన్వెస్ట్‌ చేయాలనుకుంటే, అల్ట్రా  షార్ట్‌–టర్మ్‌ డెట్‌ ఫండ్స్‌ను పరిగణనలోకి తీసుకోవచ్చు. మూడు నుంచి ఐదేళ్ల పాటు ఇన్వెస్ట్‌ చేయాలనుకుంటే, డెట్‌ ఫండ్స్‌ జోలికి వెళ్లకపోవడమే మంచిది. ఈ కాలంలో మార్కెట్లో ఉత్థానాలు, పతనాలు అధికంగా ఉంటాయి, వడ్డీరేట్లలో తరుగుదల, పెరుగుదల చోటు చేసుకోవచ్చు. బాండ్ల ధరలు పెరగవచ్చు. తరగవచ్చు.  మొత్తం మీద మీకు నష్టాలు వచ్చే అవకాశాలే అధికంగా ఉంటాయి. డెట్‌ ఫండ్స్‌లో ఇన్వెస్ట్‌ చేయడం ద్వారా స్వల్ప కాలంలో మీకు నష్టాలు రాకుండా ఉండటమనేది చాలా ముఖ్యం. అందుకని షార్ట్‌ టర్మ్‌ డెట్‌ ఫండ్స్‌కు మించి ఆలోచించవద్దు.   నేను ఒక ప్రైవేట్‌ ఉద్యోగం చేస్తున్నాను. నాకు ఇటీవలనే ఒక పాప పుట్టింది. నాకు ఆస్తిపాస్తులేమీ లేవు. నేను ఎంత మొత్తానికి బీమా తీసుకోవాల్సి ఉంటుంది.      – కిశోర్, విజయవాడ ఎంత మొత్తానికి బీమా తీసుకోవాలనే విషయమై చాలామంది బీమా ఏజెంట్లపైననే ఆధారపడతారు. ఎంత మొత్తానికి, ఎంత కాలానికి బీమా తీసుకోవాలన్న నిర్ణయానికి చాలా అంశాలనే పరిగణనలోకి తీసుకోవాలి.  మీరు రిటైర్‌ కావడానికి ఎంత సమయం మిగిలి ఉంది అనే అంశం కీలకమైనది. ఉదాహరణకు మీరు రిటైర్‌ కావడానికి 20 ఏళ్ల సమయం ఉందనుకోండి. మీరు తీసుకునే  పాలసీ కనీస  టర్మ్‌ 20 ఏళ్లు ఉండాలి. మీకు ఉన్న అప్పులు కూడా మరో కీలకాంశమే. మీరు లేని పక్షంలో మీ అప్పులు కూడా తీరిపోయేలా మీ బీమాపాలసీ ఉండాలి. అందుకని బీమా పాలసీ తీసుకునేటప్పుడు మీ అప్పులను  కూడా పరిగణనలోకి తీసుకోవాలి. మీ పిల్లల విద్యావసరాలకయ్యే ఖర్చులు, భవిష్యత్తు ఖర్చులను కూడా పరిగణనలోకి తీసుకోవాలి. భవిష్యత్తు ఖర్చులను పరిగణించడానికి ద్రవ్యోల్బణం కనీసం 5–7 శాతం రేంజ్‌లో ఉంటుందన్న అంచనాలకు  చోటివ్వాలి.  ప్రస్తుత జీవన శైలి, వార్షిక కుటుంబ ఆదాయం, వార్షిక వ్యయాలు, ప్రస్తుత పెట్టుబడులు, గృహ, విద్యా రుణాలు తదితర అంశాలను కూడా పరిగణనలోకి తీసుకోవాలి. చాలా బీమా సంస్థలు హ్యుమన్‌ లైఫ్‌ వేల్యూ కాలుక్యులేటర్‌ను తమ వెబ్‌సైట్లలో అందుబాటులోకి తెచ్చాయి. దీని ద్వారా ఎంత మొత్తానికి బీమా తీసుకోవాలో నిర్ణయించుకోవచ్చు. అధిక బీమా తీసుకుంటే అధిక ప్రీమియమ్‌ చెల్లించాల్సి ఉంటుంది. తక్కువ బీమా తీసుకుంటే, అవసరమైన పక్షంలో ఆ బీమా సరిపోకపోవచ్చు. అందుకని తగిన బీమా తీసుకోవడం తప్పనిసరి.   మ్యూచువల్‌ ఫండ్స్‌లో రిస్క్‌ తక్కువగా  ఉంటుందా ?   – జాన్సన్, కరీంనగర్‌   నష్టభయం లేని ఇన్వెస్ట్‌మెంట్‌ సాధనం దాదాపు లేదు. మ్యూచువల్‌ ఫండ్స్‌ కూడా రిస్క్‌కు అతీతం కాదు. ఈక్విటీ ఫండ్స్, డెట్‌ ఫండ్స్‌లో రిస్క్‌ కొంచెం అధికంగానే ఉంటుందని చెప్పవచ్చు. అ«ధిక రిస్క్‌ నుంచి అల్ప రిస్క్‌ ఉన్న పరంగా చూస్తే, ధీమాటిక్, లేదా సెక్టోరియల్‌ ఫండ్స్‌ అగ్రభాగాన ఉంటాయి. మిడ్, స్మాల్‌ క్యాప్‌ ఫండ్స్, బ్యాలన్స్‌డ్‌ ఫండ్స్‌ తర్వాతి స్థానాల్లో నిలుస్తాయి. మ్యూచువల్‌ ఫండ్స్‌లో ఇతర రిస్క్‌లు కూడా ఉంటాయి. అయితే సరైన నిర్ణయాలతో ఈ రిస్క్‌ను కనిష్ట స్థాయికి తగ్గించుకోవచ్చు. వివిధ మ్యూచువల్‌ ఫండ్స్‌కు చెందిన రకరకాల ఫండ్స్‌లో ఇన్వెస్ట్‌ చేయడం ద్వారా ఫండ్‌ హౌజ్, ఫండ్‌ మేనేజర్, స్కీమ్‌ స్పెసిఫిక్‌ రిస్క్‌ను తగించుకోవచ్చు. మల్టీ క్యాప్‌ ఈక్విటీ ఫండ్స్‌లో ఇన్వెస్ట్‌ చేయడం ద్వారా పోర్ట్‌ఫోలియో రిస్క్‌ను తగ్గించుకోవచ్చు.   నాకు ఇటీవలే ఉద్యోగం వచ్చింది. కొంత మొత్తాన్ని మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఐదేళ్ల పాటు ఇన్వెస్ట్‌ చేయాలనుకుంటున్నాను. విస్తృతమైన రీసెర్చ్‌ తర్వాత మూడు మ్యూచువల్‌ ఫండ్స్‌ను షార్ట్‌లిస్ట్‌ చేశాను. అవి–డీఎస్‌పీ బ్లాక్‌రాక్‌ మైక్రో క్యాప్‌ ఫండ్, ఎస్‌బీఐ మేగ్నమ్‌ మల్టీప్లయర్‌ ఫండ్, ఎస్‌బీఐ మేగ్నమ్‌ మిడ్‌క్యాప్‌ ఫండ్‌. నా ఇన్వెస్ట్‌మెంట్‌ కాలానికి ఈ ఫండ్స్‌ సరైనవేనా ?     – మెహిసిన్, విశాఖపట్టణం   మీరు ఐదేళ్లపాటు ఇన్వెస్ట్‌ చేయాలనుకుంటున్నారు. పైగా మ్యూచువల్‌ఫండ్స్‌కు కొత్త. కాబట్టి ముందుగా బ్యాలన్స్‌డ్‌ ఫండ్స్‌తో ప్రారంభించండి. గత ఏడాది పనితీరు ఆధారంగా ఈ ఏడాది ఇన్వెస్ట్‌ చేయాలనుకుంటున్న ఫండ్‌ను ఎంచుకోవడం కొంచెం రిస్క్‌తో కూడిన వ్యవహారమే. 2–3 ఏళ్ల కాలానికి కూడా తగిన రాబడులు రాకపోవచ్చు. ఉదాహరణకు 2010–13 మధ్య కాలంలో మ్యూచువల్‌ ఫండ్స్‌లో ఇన్వెస్ట్‌ చేసిన ఇన్వెస్టర్లకు చాలా స్వల్ప రాబడులే వచ్చాయి. 2005–08 మధ్య కాలానికి ఇన్వెస్ట్‌ చేసిన ఇన్వెస్టర్లకు అయితే లాభాలు రాకపోగా, నష్టాలు వచ్చాయి. ఐదేళ్లు, అంతకు మించిన కాలానికి ఫండ్స్‌లో ఇన్వెస్ట్‌ చేయాలనుకుంటే, 1–2 మల్టీ క్యాప్‌ ఫండ్స్‌ను ఎంచుకోండి. మైక్రోక్యాప్‌ ఫండ్స్‌ మంచి రాబడులే ఇస్తాయి. కానీ స్వల్ప కాలంలో 30–40 శాతం దాకా నష్టపోయే అవకాశాలూ ఉంటాయి. దీంతో తొలిసారి మ్యూచువల్‌ ఫండ్స్‌లో ఇన్వెస్ట్‌ చేసేవాళ్ల ఆర్థిక ప్రణాళికలన్నీ కకావికలమవుతాయి. అందుకని ముందుగా బ్యాలన్స్‌డ్‌ ఫండ్స్‌లో ఇన్వెస్ట్‌ చేయడం మొదలు పెట్టండి. మ్యూచువల్‌ ఫండ్స్‌ ఇన్వెస్ట్‌మెంట్‌ విధానాలు, మ్యూచువల్‌ ఫండ్స్‌కు సంబంధించి వివిధ అంశాల పట్ల అవగాహన పెరిగిన తర్వాత ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయడం మొదలు పెట్టండి. - ధీరేంద్ర కుమార్‌,సీఈవో, వ్యాల్యూ రీసెర్చ్‌

మ్యూచువల్‌ ఫండ్స్‌ నుంచి పాక్షికంగా విత్‌డ్రాయల్స్‌ జరిపితే, దీర్ఘకాల మూలధన లాభాల పన్ను (ఎల్‌టీసీజీ–లాంగ్‌టర్మ్‌ క్యాపిటల్‌ గెయిన్స్‌) వర్తిస్తుందా ? ఏ విధంగా లెక్కిస్తారు ?  – రాజేశ్వరి, విశాఖపట్టణం   మ్యూచువల్‌ ఫండ్స్‌ నుంచి పాక్షికంగా విత్‌డ్రాయల్స్‌ జరిపినా దీర్ఘకాల మూలధన లాభాల పన్ను(ఎల్‌టీసీజీ) వర్తిస్తుంది. ఫస్ట్‌–ఇన్‌–ఫస్ట్‌–అవుట్‌(ఎఫ్‌ఐఎఫ్‌ఓ) ప్రిన్సిపుల్‌ ప్రకారం ఎల్‌టీసీజీ వర్తిస్తుంది. ఉదాహరణకు మీరు కొంత కాలంగా మ్యూచువల్‌ ఫండ్స్‌లో ఇన్వెస్ట్‌ చేస్తున్నారనుకుందాం. మొదటగా మీరు కొనుగోలు చేసిన యూనిట్లను మొదటగా విక్రయించాలి. మీరు కొనుగోలు చేసినప్పటి తేదీ నుంచి విక్రయించినప్పటి తేదీని పరిగణనలోకి తీసుకుని లెక్కిస్తారు. రెండింటి మధ్య తేడా ఏడాదిని మించితే ఈ విక్రయాలపై వచ్చిన లాభాలను దీర్ఘకాలిక మూలధన లాభాలుగా పరిగణిస్తారు. ఈ తేడా 365 రోజుల లోపే ఉంటే ఈ యూనిట్ల విక్రయాలపై వచ్చిన లాభాలను స్వల్పకాలిక మూలధన లాభాలుగా లెక్కిస్తారు.   ఎల్‌టీసీజీ విధింపు కారణంగా ఈక్విటీ మ్యూచువల్‌ ఫండ్స్‌ కంటే ఇప్పుడు యులిప్‌లు ఆకర్షణీయమని మిత్రులంటున్నారు. వారి అభిప్రాయం సరైనదేనా ?                   – శేఖర్, విజయవాడ ఈక్విటీ మ్యూచువల్‌ ఫండ్స్‌ మాదిరి యులిప్‌(యూనిట్‌ లింక్డ్‌ ఇన్సూరెన్స్‌ పాలసీ)లపై ఎల్‌టీసీజీ ప్రభావం ఉండదు. ఈ ఒక్క కారణంతో యులిప్‌లు ఇన్వెస్ట్‌ చేయడానికి ఆకర్షణీయ సాధనాలని చెప్పలేము. మ్యూచువల్‌ ఫండ్స్‌లో ఇన్వెస్ట్‌ చేయడం వల్ల చాలా ప్రయోజనాలు ఉన్నాయి. మ్యూచువల్‌ ఫండ్స్‌ పారదర్శకతకు పెద్ద పీట వేస్తాయి. వీటికి లిక్విడిటీ అధికం. వీటికి వ్యయాలు కూడా తక్కువగా ఉంటాయి. ఒక ఫండ్‌ మంచి పనితీరు కనబరచలేకపోతే, మరో ఫండ్‌లోకి మన ఇన్వెస్ట్‌మెంట్స్‌ను మార్చుకోవచ్చు. యులిప్‌ల విషయా నికొస్తే, వీటి లిక్విడిటీ తక్కువగా ఉంటుంది. సరెండర్‌ చార్జీలు, ఇతర వ్యయాలు అధికంగా ఉంటాయి. యులిప్‌ల కాస్ట్‌ క్లెయిమ్‌ తక్కువగా ఉంటుంది. కానీ, యులిప్‌లు పారదర్శకంగా ఉండవని పలువురు ఇన్వెస్టర్లు ఫిర్యాదులు చేస్తూ ఉంటారు. మరోవైపు బీమాను, ఇన్వెస్ట్‌మెంట్‌ను కలగలపి మదుపు చేస్తే, ఈ రెండు అంశాల్లోనూ తగిన రాబడులను మీరు పొందలేరు. మీ బీమా అవసరాలను యులిప్‌లు పూర్తిగా తీర్చలేవు. అలాగే ఇన్వెస్ట్‌మెంట్‌ పరంగా తగిన స్థాయిలో రాబడులనూ ఇవ్వలేవు.  కొన్ని యులిప్‌లు మంచి రాబడులు ఇచ్చిన దృష్టాంతాలు ఉన్నాయి. అయితే బీమా అవసరాల దృష్ట్యా చూస్తే, యులిప్‌లు సరైన సాధనాలు కావని చెప్పవచ్చు. అందుకని ఎప్పుడూ, ఇన్వెస్ట్‌మెంట్‌ను, బీమాను కలగలపకండి. బీమా అవసరాల కోసం టర్మ్‌ బీమా పాలసీలను తీసుకోండి. వీటిల్లో బీమా కవరేజ్‌ అధికంగానూ, చెల్లించాల్సిన ప్రీమియమ్‌ తక్కువగానూ ఉంటుంది.   నా వయస్సు 63 ఏళ్లు. ఇంకా పనిచేస్తున్నాను. అదనంగా పన్ను ప్రయో జనాలు పొందొచ్చనే ఉద్దేశంతోనే  నేషనల్‌ పెన్షన్‌ సిస్టమ్‌   (ఎన్‌పీఎస్‌)లో ఇన్వెస్ట్‌ చేయాలనుకుంటున్నాను. తగిన సూచనలివ్వండి.  – వెంకట్, హైదరాబాద్‌   ఈ వయస్సులో ఎన్‌పీఎస్‌లో ఇన్వెస్ట్‌ చేయడం సరైన నిర్ణయం కాదు. 65 సంవత్సరాల వరకూ ఎన్‌పీఎస్‌లో చేరే అవకాశం ఉంది. అయితే మీరు ఇప్పుడు చేరితే మరో రెండేళ్లలోనే మీరు ఇన్వెస్ట్‌ చేసిన, ఇన్వెస్ట్‌ చేసిన మొత్తాలపై సమకూరిన రాబడుల్లో 40 శాతం మేరకు యాన్యుటీని కొనుగోలు చేయాల్సి ఉంటుంది. ఇన్వెస్ట్‌ చేసిన రెండేళ్ల కాలానికే మీరు ఇన్వెస్ట్‌ చేసే దాంట్లో 40 శాతం యాన్యుటీ రూపంలో ఆగిపోతుంది.  దీనికి బదులుగా.. మీరు ఇంకా పనిచేస్తూ ఉన్నారు. కాబట్టి ఏదైనా ఈక్విటీ ఫండ్‌లో ఇన్వెస్ట్‌ చేయండి. ఎన్‌పీఎస్‌ కంటే ఎక్కువ రాబడులు వస్తాయి. ఈక్విటీ మ్యూచువల్‌ ఫండ్స్‌ రాబడులపై 10 శాతం దీర్ఘకాల మూలధన లాభాల పన్ను చెల్లించాల్సి ఉంటుంది. అయితే మీ మొత్తం లాభాలు రూ.లక్షను మించినప్పుడు మాత్రమే ఈ 10 శాతం పన్ను భారం ఉంటుంది. ఏదైనా మంచి మల్టీ–క్యాప్‌ ఫండ్‌లో ఇన్వెస్ట్‌ చేయండి. అంతేకాని, 62 ఏళ్ల వయస్సులో ఎన్‌పీఎస్‌లో ఇన్వెస్ట్‌ చేయడం సరైన నిర్ణయం కాదు.   ఐసీఐసీఐ ఇలీట్‌ వెల్త్‌ స్కీమ్‌ టూలో ఇన్వెస్ట్‌ చేయాలనుకుంటున్నాను. బీమా అవసరాలు, పన్ను ప్రయోజనాలు కాకుండా ఇన్వెస్ట్‌మెంట్‌ ప్రాధాన్యతగా ఈ స్కీమ్‌లో ఇన్వెస్ట్‌ చేయాలనుకుంటున్నాను. ఇది ఫిక్స్‌డ్‌ డిపాజిట్‌(ఎఫ్‌డీ) కంటే మెరుగైన రాబడులను ఇస్తుందని, మ్యూచువల్‌ ఫండ్స్‌తో పోల్చితే నష్ట భయం తక్కువని మిత్రుడొకరు చెబుతున్నారు. ఈ స్కీమ్‌కు లాక్‌–ఇన్‌ పీరియడ్‌ ఐదేళ్లు, 20 ఏళ్ల పాటు ఈ స్కీమ్‌లో ఇన్వెస్ట్‌ చేయాల్సి ఉంటుంది.  పెట్టుబడికి ఈ స్కీమ్‌ను పరిశీలించవచ్చా ?   – ఆనంద్, నెల్లూరు   ఇన్వెస్ట్‌మెంట్‌ ప్రాధాన్యతా అంశమైతే, ఈ స్కీమ్‌లో ఇన్వెస్ట్‌ చేయడమనేది సరైన నిర్ణయం కాదు. ఐసీఐసీఐ ప్రు లైఫ్‌ ఇలీట్‌ వెల్త్‌ టూ అనేది ఇన్సూరెన్స్‌ కమ్‌ ఇన్వెస్ట్‌మెంట్‌ పాలసీ. ఈ స్కీమ్‌లో చార్జీలు అధికం. ఇక బీమా కోసం టర్మ్‌ ఇన్సూరెన్స్‌ పాలసీ తీసుకోండి. దీనిలో బీమా కవరేజ్‌ అధికంగానూ, చెల్లించాల్సిన ప్రీమియమ్‌లు తక్కువగానూ ఉంటాయి. ఇక ఇన్వెస్ట్‌మెంట్స్‌ కోసం మంచి రేటింగ్‌ఉన్న డైవర్సిఫైడ్‌ ఈక్విటీ మ్యూచువల్‌ ఫండ్‌ను ఎంచుకోండి.  ఒకటి, లేదా రెండు మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో కనీసం ఐదు నుంచి ఎనిమిదేళ్లు ఇన్వెస్ట్‌ చేస్తే మంచి రాబడులు పొందవచ్చు. సొంత ఇల్లు కట్టుకోవడం, రిటైర్మెంట్‌ నిధి ఏర్పాటు, పిల్లల ఉన్నత చదువులు వంటి దీర్ఘకాలిక ఆర్థిక లక్ష్యాల కోసం ఈ విధానాన్ని అనుసరిస్తే, మంచి ప్రయోజనాలు పొందవచ్చు. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

దీర్ఘకాల మూలధన లాభాల పన్ను (ఎల్‌టీసీజీ–లాంగ్‌టర్మ్‌ క్యాపిటల్‌ గెయిన్స్‌) మళ్లీ అమల్లోకి వచ్చింది. ఈ నేపథ్యంలో ఈక్విటీ సేవింగ్స్‌ ఫండ్స్‌లో ఇన్వెస్ట్‌ చేయడం మంచిదేనా? – పరిమళ, సికింద్రాబాద్‌ దీర్ఘకాల మూలధన లాభాల పన్ను (ఎల్‌టీసీజీ–లాంగ్‌టర్మ్‌ క్యాపిటల్‌ గెయిన్స్‌) మళ్లీ అమల్లోకి వచ్చింది. ఈ నేపథ్యంలో ఈక్విటీ సేవింగ్స్‌ ఫండ్స్‌లో ఇన్వెస్ట్‌ చేయడం మంచిదే. ఈ  ఫండ్స్‌ తమ మొత్తం నిధుల్లో ఈక్విటీల్లో మూడో వంతు, ఆర్బిట్రేజ్‌ ఫండ్స్‌లో మరో మూడో వంతు,  ఫిక్స్‌డ్‌–ఇన్‌కమ్‌ సాధనాల్లో మరో మూడో వంతు చొప్పున ఇన్వెస్ట్‌ చేస్తాయి. ఈ ఫండ్స్‌లో ఏడాదికి మించి మీ ఇన్వెస్ట్‌మెంట్స్‌ కొనసాగితే మీరు పొందే రాబడులపై 10 శాతం మేర పన్ను చెల్లించాల్సి ఉంటుంది. ఈ ఫండ్స్‌ నుంచి స్టిస్టమేటిక్‌ విత్‌డ్రాయల్‌ ప్లాన్‌ (ఎస్‌డబ్ల్యూపీ) ద్వారా మీ ఇన్వెస్ట్‌మెంట్స్‌ను వెనక్కి తీసుకుంటే అది మరింత అర్థవంతంగా ఉంటుంది. ఈక్విటీలో పెట్టిన  మూడో వంతు పెట్టుబడిని రీ–బ్యాలెన్సింగ్‌కు వినియోగిస్తారు. దీనిపై ఎలాంటి పన్ను భారాలూ ఉండవు. అందుకని ఈక్విటీ సేవింగ్స్‌ ఫండ్‌లో ఇన్వెస్ట్‌ చేయడం కొనసాగించవచ్చు. దీంట్లో గ్రోత్‌ ప్లాన్‌ను ఎంచుకోవాలి. సిస్టమాటిక్‌ విత్‌డ్రాయల్‌ ప్లాన్‌ (ఎస్‌డబ్ల్యూపీ) ద్వారా మీ ఇన్వెస్ట్‌మెంట్స్‌ను వెనక్కి తీసుకోవాలి. రోజులు గడిచే కొద్దీ, ద్రవ్యోల్బణం కారణంగా ఈ ఈక్విటీ సేవింగ్స్‌ స్కీమ్స్‌ ఆకర్షణ కోల్పోవచ్చు. పెట్టుబడి సంబంధిత కేటాయింపులు కారణంగా వీటికి మాత్రం ప్రాధాన్యత తగ్గదనే చెప్పవచ్చు. ఈక్విటీ మ్యూచువల్‌ ఫండ్స్‌ ఇన్వెస్టర్లకు ఇచ్చే డివిడెండ్లపై  డివిడెండ్‌ డిస్ట్రిబ్యూషన్‌ ట్యాక్స్‌ (డీడీటీ) విధించారు కదా! ఈ సందర్భంలో డివిడెండ్‌ ప్లాన్‌ను ఎంచుకోవాలా ? లేకుంటే గ్రోత్‌ ఆప్షన్‌లో ఇన్వెస్ట్‌ చేయాలా? – సుధాకర్, విజయవాడ ఈక్విటీ మ్యూచువల్‌ ఫండ్స్‌ అందించే డివిడెండ్లపై డివిడెండ్‌ డిస్ట్రిబ్యూషన్‌ ట్యాక్స్‌ (డీడీటీ) విధించిన నేపథ్యంలో గ్రోత్‌ ఆప్షన్‌ను ఎంచుకోవడమే ఉత్తమం. డీడీటీ విధింపుకు ముందు కూడా గ్రోత్‌ ప్లాన్‌లే ఆకర్షణీయంగా ఉండేవి. చాలా ఈక్విటీ ఫండ్స్‌ ఇచ్చే డివిడెండ్‌లను పరిశీలిస్తే, ఆయా ఫండ్ల డివిడెండ్‌ ఈల్డ్‌ ఆరు నుంచి ఏడు శాతానికి మించి ఉండేది కాదు.  ఈక్విటీ ఫండ్స్‌ గ్రోత్‌ ఆప్షన్‌లో దీర్ఘకాలం పాటు ఇన్వెస్ట్‌ చేస్తే ఇంతకు మించి మంచి రాబడులు వచ్చే అవకాశాలు అధికంగా ఉంటాయి. ఈక్విటీల్లో ఇన్వెస్ట్‌ చేయడం ద్వారా పీరియాడిక్‌ ఆదాయం(డివిడెండ్ల ద్వారా కొంత మొత్తంలో) పొందాలనుకోకూడదు. ఉదాహరణకు రూ.10 ముఖ విలువ గల ఒక ఈక్విటీ ఫండ్‌ను తీసుకుందాం. దీని ఎన్‌ఏవీ రూ.15 ఉంది. ఇది 10 శాతం డివిడెండ్‌ను ప్రకటించింది. మీరు డివిడెండ్‌ ఆప్షన్‌లో ఇన్వెస్ట్‌ చేస్తే మీకు రూ.1 డివిడెండ్‌ లభిస్తుంది.  ఈ మేరకు ఎన్‌ఏవీ రూ.14కు తగ్గుతుంది. 10 శాతం డివిడెండ్‌ డిస్ట్రిబ్యూషన్‌ ట్యాక్స్‌ను పరిగణనలోకి తీసుకుంటే మీకు 90 పైసలే డివిడెండ్‌ వస్తుంది. అదే గ్రోత్‌ ఆప్షన్‌ను ఎంచుకుంటే, ఎన్‌ఏవీ రూ.15 అలాగే కొనసాగుతుంది. పైగా ఎలాంటి పన్ను భారం కూడా ఉండదు. నేను సీనియర్‌ సిటిజన్‌ను. నేను గతంలో ఇన్వెస్ట్‌ చేసిన ఫిక్స్‌డ్‌ డిపాజిట్‌ ఒకటి ఇటీవలే మెచ్యూర్‌ అయింది. ఈ మొత్తాన్ని  ఇన్వెస్ట్‌ చేసి నెలవారీ కొంత ఆదాయాన్ని పొందాలనేది నా ఆలోచన. దీనికి తగ్గట్టుగా మంచి పెట్టుబడి వ్యూహాన్ని సూచించండి? – ఆంజనేయులు, విశాఖపట్టణం ముందుగా  మీ జీవన వ్యయాలకు అవసరమయ్యే నెలవారీ ఖర్చులను పూర్తిగా రాసుకోండి. మీ నెలవారీ అవసరాలకు ఎంత మొత్తం అవసరమవుతుందో లెక్కించండి. ఈ అవసరాలను తీర్చే ఇతర ఆదాయాలు.. (ఉదాహరణకు మీకు ఇంటద్దెలు రావడం కానీ, పెన్షన్‌ రావడం కానీ) ఏమీ లేని పక్షంలో సీనియర్‌ సిటిజన్స్‌ స్కీమ్‌లో రూ.15 లక్షల వరకూ ఇన్వెస్ట్‌ చేయండి. ఈ స్కీమ్‌లో మీకు 8.3 శాతం వడ్డీ లభిస్తుంది. ఇది పూర్తిగా సురక్షితం. మీకు మూడు నెలలకొకసారి వడ్డీ వస్తుంది. ఎల్‌ఐసీకి చెందిన ప్రధాన మంత్రి వ్యయ వందన యోజనలో కూడా గరిష్ట పెట్టుబడి రూ.15 లక్షలు. దీనిపై కూడా 8.3 శాతం వడ్డీ వస్తుంది. ఈ రెండు స్కీమ్‌లూ సురక్షితమైనవే. ఒకటి పూర్తిగా ప్రభుత్వం ఆఫర్‌ చేస్తున్న స్కీమ్‌ కాగా, మరొకటి ప్రభుత్వం స్పాన్సర్‌చేస్తున్న స్కీమ్‌. ఇక మిగిలిన మొత్తాన్ని జాగ్రత్తగా ఇన్వెస్ట్‌ చేయాలి. ఫిక్స్‌డ్‌ డిపాజిట్లు సురక్షితమైనవే కానీ, మీ పెట్టుబడి వ్యూహానికి అవి తగవు. రిటైర్మెంట్‌ వ్యక్తులకు ద్రవ్యోల్బణంతో తట్టుకునే క్రమబద్ధమైన ఆదాయం అవసరం. స్థిరాదాయం అందించే ఫిక్స్‌డ్‌ ఇన్‌కమ్‌ సాధనాలు ప్రస్తుత అవసరాలకు తగ్గ ఆదాయాన్ని మాత్రమే ఇవ్వగలవు. మూడేళ్ల తర్వాత ద్రవ్యోల్బణంతో పాటు ధరలు కూడా పెరుగుతాయి. కాబట్టి దానికి తగ్గట్టుగా మీ ఆదాయం కూడా పెరగాలి. కానీ ఫిక్స్‌డ్‌ ఇన్‌కమ్‌ సాధనాల్లో మీ పెట్టుబడి కూడా స్థిరంగానే ఉంటుంది. కానీ వృద్ధి ఉండదు. ఐదు లేదా పదేళ్ల కాలానికి ద్రవ్యోల్బణంతో పాటే పెరిగేలా మీ రాబడులు ఉండాలి. దీనికి ఈక్విటీల్లో ఇన్వెస్ట్‌ చేయడమే సరైన మార్గం. ఈక్విటీల్లో ఇన్వెస్ట్‌ చేసేటప్పుడు కొన్ని ముఖ్యమైన విషయాలు గుర్తుంచుకోవాలి. మీ పెట్టుబడికి రక్షణ ఉండాలి. అలాగే ద్రవ్యోల్బణానికి తగ్గట్టుగానే రాబడులు ఉండాలి. ఈక్విటీల్లో ఎప్పుడూ ఒకేసారి పెద్ద మొత్తంలో ఇన్వెస్ట్‌ చేయకూడదు. వయస్సు పెరుగుతున్న కొద్దీ రిస్క్‌ను తగ్గించుకోవాలి. అందుకని మీ మొత్తం పెట్టుబడుల్లో 30 నుంచి 40 శాతం కంటే ఈక్విటీల్లో ఇన్వెస్ట్‌ చేయొద్దు. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

ఇటీవల సుందరమ్‌ రూరల్‌ ఫండ్‌ మంచి రాబడులను ఇచ్చింది. దీంతో పాటు నేను టాటా కన్సూమర్‌ ఫండ్‌లో కూడా ఇన్వెస్ట్‌ చేయాలనుకుంటున్నాను. ఇలాంటి థీమాటిక్‌ ఫండ్స్‌లో ఇన్వెస్ట్‌  చేయడం సరైనదేనా ? మరే ఇతర మ్యూచువల్‌ ఫండ్స్‌లో నేను ఇన్వెస్ట్‌ చేయడం లేదు.   – కళ్యాణ్, విజయవాడ  కేవలం థీమాటిక్‌ ఫండ్స్‌లో మాత్రమే ఇన్వెస్ట్‌ చేయడం సరైనది కాదు.  రూరల్‌ ఇండియా ఫండ్‌ గత రెండు–మూడేళ్లలో మంచి రాబడులు ఇచ్చింది. గత రెండు–మూడేళ్లలో మంచి రాబడులు వచ్చాయి కదా అని ఇప్పుడు ఇన్వెస్ట్‌ చేస్తే, ఆ తర్వాత మీరు ఆశించిన రాబడులు రాకపోవచ్చు.. థీమాటిక్‌ ఫండ్స్‌ తీవ్రమైన ‘సైక్లికల్‌’ మార్పు, చేర్పులకు గురవుతాయి. అందుకని అవి ఇస్తే భారీ రాబడులనిస్తాయి. లేకుంటే తీవ్ర స్థాయి నష్టాలను ఇస్తాయి. ఈ తరహా ఫండ్స్‌ పనితీరును స్వల్పకాలమే మదింపు చేసి ఇన్వెస్టర్లు తొందరపాటు నిర్ణయాలు తీసుకుంటారు. అందుకనే థీమాటిక్‌ ఫండ్స్‌ల్లో ఇన్వెస్ట్‌ చేసేటప్పుడు చాలా జాగ్రత్తగా వ్యవహరించాలి.  మీరు థీమాటిక్‌ ఫండ్స్‌లో ఇన్వెస్ట్‌ చేస్తున్నారంటే దానర్థం ఒక తరహా కంపెనీ షేర్లలోనే ఇన్వెస్ట్‌ చేయమని మీరు మీ ఫండ్‌ మేనేజర్‌కు ఆదేశాలు ఇస్తున్నట్లు అర్థం. ఉదాహరణకు మీ థీమాటిక్‌ ఫండ్స్‌ ఇన్వెస్ట్‌మెంట్స్‌ను తీసుకుంటే, మీరు కన్సూమర్, రూరల్‌ ఫండ్స్‌ల్లో ఇన్వెస్ట్‌ చేద్దామనుకుంటున్నారు. అంటే కన్సూమర్‌ సంబంధిత, రూరల్‌ సంబంధిత కంపెనీల్లోనే ఇన్వెస్ట్‌ చేయాలని మీరు మీ ఫండ్‌ మేనేజర్‌కు చెప్పినట్లు లెక్క. ఇలా చేస్తే డైవర్సిఫికేషన్‌ ప్రయోజనాలను మీరు పొందలేరు. మ్యూచువల్‌ ఫండ్స్‌లో ఇన్వెస్ట్‌ చేయడమంటే డైవర్సిఫికేషన్‌ కోసమే కదా ! మరో ముఖ్యమైన విషయం థీమాటిక్‌ ఫండ్స్‌లో ఎప్పుడు ఇన్వెస్ట్‌ చేయాలనేది కీలకమైన అంశం. సరైన సమయంలో ఈ థీమాటిక్‌ ఫండ్స్‌లో ఇన్వెస్ట్‌ చేస్తే మీకు మంచి రాబడులు వస్తాయి. అలా కాకుంటే నష్టాలు తప్పవు. కానీ సరైన టైమింగ్‌ ఎప్పుడనేది మనం అంచనా వేయలేం. సంబంధిత రంగంపై మీకు పూర్తిగా అవగాహన ఉన్నప్పుడు మాత్రమే, ఈ రంగానికి సంబంధించిన ఫండ్స్‌లో ఇన్వెస్ట్‌ చేయాలి. థీమాటిక్‌ ఫండ్స్‌పై మక్కువ ఎక్కువగా ఉండి, దాంట్లో ఇన్వెస్ట్‌ చేయాల్సిందేనన్న కోరిక బలీయంగా ఉన్నప్పుడు మీ మొత్తం ఇన్వెస్ట్‌మెంట్స్‌లో 10 నుంచి 15 శాతం మాత్రమే ఈ ఫండ్స్‌కి కేటాయించాలి. దీని వల్ల మీ కోరికా తీరుతుంది. థీమాటిక్‌ ఫండ్స్‌ పనితీరూ అర్థమవుతుంది. అంతే కాకుంండా అది ఒక పాఠంలా కూడా ఉంటుంది. మీ పోర్ట్‌ఫోలియోలో తప్పనిసరిగా ఈక్విటీ మ్యూచువల్‌ ఫండ్స్‌ ఉండాలి. ఈ ఫండ్స్‌లో దీర్ఘకాలం పాటు ఇన్వెస్ట్‌ చేస్తే, మంచి రాబడులు పొందే అవకాశాలు అధికంగా ఉంటాయి.  నేను ఐసీఐసీఐ ఫోకస్‌డ్‌ బ్లూచిప్‌ ఈక్విటీ, హెచ్‌డీఎఫ్‌సీ యులిప్‌ల్లో ఇన్వెస్ట్‌ చేయాలనుకుంటున్నాను. ఈ ఫండ్స్‌ల్లో ఇన్వెస్ట్‌ చేయడం ద్వారా  15  సంవత్సరాల్లో రూ.20 లక్షల రాబడి పొందగలనా ?  – సతీశ్, నెల్లూరు   ఐసీఐసీఐ ఫోకస్‌డ్‌ బ్లూచిప్‌ ఈక్విటీ అనేది మంచి లార్జ్‌క్యాప్‌ ఫండ్‌. ఇక యులిప్‌ల విషయానికొస్తే, దీంట్లో కొంత భాగం బీమాకు కేటాయించి, మిగిలిన దానిని ఇన్వెస్ట్‌ చేస్తారు. ఫలితంగా మీకు తగిన బీమా కవరేజ్‌ ఉండదు. మంచి రాబడులూ రావు. ఇక మీరు 15 సంవత్సరాల్లో రూ.20 లక్షలు పొందాలనుకుంటున్నారు.  కాబట్టి లార్జ్‌క్యాప్‌ ఫండ్‌కు బదులు ఏదైనా మల్టీక్యాప్‌ ఫండ్‌లో ఇన్వెస్ట్‌ చేయండి. మల్టీ క్యాప్‌ ఫండ్‌ మేనేజర్లకు వివిధ పరిమాణాల కంపెనీల్లో(స్మాల్, మిడ్, లార్జ్‌ క్యాప్‌ కంపెనీల్లో) ఇన్వెస్ట్‌ చేసే వెసులుబాటు ఉంటుంది. ఇక హెచ్‌డీఎఫ్‌సీ యులిప్‌కు బదులుగా మీ బీమా అవసరాలకు తగ్గట్లుగా ఉండే టర్మ్‌ ఇన్సూరెన్స్‌ పాలసీని తీసుకోండి. మీరు లేకపోయినా మీ కుటుంబ ఆర్థిక అవసరాలు ఎలాంటి ఒడిదుడుకులు లేకుండా సాఫీగా గడిచిపోయేందుకు అవసరమైన మొత్తానికి బీమా పాలసీని తీసుకోండి. టర్మ్‌ పాలసీల్లో బీమా కవరేజ్‌ ఎక్కువగానూ, చెల్లించాల్సిన బీమా ప్రీమియమ్‌ తక్కువగానూ ఉంటుంది. హెచ్‌డీఎఫ్‌సీ యూలిప్‌కు బదులుగా మరో మల్టీక్యాప్‌ ఫండ్‌లో ఇన్వెస్ట్‌ చేయండి.   నేను 2012 నుంచి ఎల్‌ఐసీ పెన్షన్‌ ప్లాన్‌లో ఏడాదికి రూ.70,000 చొప్పున ఇన్వెస్ట్‌ చేస్తున్నాను. ఈ ప్లాన్‌లో ఎక్స్‌పెన్స్‌ చార్జీలు అధికంగా ఉన్నాయి. రాబడి కూడా అంతంతమాత్రంగానే ఉంది. ఈ ప్లాన్‌ నుంచి వైదొలగాలనుకుంటున్నాను. తగిన సూచనలివ్వండి ?  – అప్జల్, హైదరాబాద్‌   ఎల్‌ఐసీ పెన్షన్‌ ప్లాన్‌ మీకు కొంత బీమా కవరేజ్‌ను ఇస్తుంది. మీరు ఇన్వెస్ట్‌ చేసే కొంత మొత్తంలో రిటైర్మెంట్‌ ఫండ్‌కోసం ఇన్వెస్ట్‌ చేస్తుంది. కానీ ఇలాంటి హైబ్రిడ్‌ ప్లాన్‌లు సమర్థవంతమైన రాబడులను ఇవ్వలేవు. ఇవి తగిన బీమా రక్షణ కూడా ఇవ్వలేవు. అందుకని ఈ తరహా ప్లాన్‌ల నుంచి వైదొలగడమే శ్రేయస్కరం. కంపెనీ సంబంధిత వ్యక్తులను సంప్రదించి సరెండర్‌ ఆప్షన్స్‌ వివరాలను తెలుసుకోండి. బీమా, ఇన్వెస్ట్‌మెంట్‌ కలగలసిన ప్లాన్‌ల్లో ఎప్పుడూ ఇన్వెస్ట్‌ చేయకూడదు. జీవిత బీమా కోసం టర్మ్‌ ఇన్సూరెన్స్‌ పాలసీ తీసుకోవడమే సరైన నిర్ణయం. ఇక దీర్ఘకాలిక ఆర్థిక లక్ష్యాల కోసం పూర్తిగా మదుపు సంబంధిత సాధనాలు.. మ్యూచువల్‌ ఫండ్స్‌లో ఇన్వెస్ట్‌ చేయడమే సరైన విధానం. పన్ను ప్రయోజనాలు కావాలనుకుంటే, ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)ల్లో ఇన్వెస్ట్‌ చేయాలి. ప్రభుత్వం నిర్వహించే రిటైర్‌మెంట్‌ ప్లాన్‌ కావాలనుకుంటే, నేషనల్‌ పెన్షన్‌ స్కీమ్‌ (ఎన్‌పీఎస్‌)ను పరిశీలించవచ్చు. ఎన్‌పీఎస్‌లో ఇన్వెస్ట్‌ చేస్తే, అదనంగా కొంత పన్ను ప్రయోజనాలు పొందవచ్చు కూడా.  - ధీరేంద్ర కుమార్‌ సీఈవో, వ్యాల్యూ రీసెర్చ్‌  

మ్యూచువల్‌ ఫండ్‌ మేనేజర్లు మ్యూచువల్‌ ఫండ్‌ ఇన్వెస్టర్ల తరçఫున షేర్ల కొనుగోళ్లు, అమ్మకాల లావాదేవీలు నిర్వహిస్తారు కదా! ఇప్పుడు తాజా గా వచ్చిన దీర్ఘకాల మూలధన లాభాల పన్ను (లాంగ్‌ టర్మ్‌ క్యాపిటల్‌ గెయిన్స్‌ ట్యాక్స్‌)ను మ్యూచువల్‌ ఫండ్‌ మేనేజర్లు కూడా  చెల్లించాలా ? ఇది మ్యూచువల్‌ ఫండ్‌ ఇన్వెస్టర్లపై ప్రభావం చూపిస్తుందా ? – రవికాంత్, విజయవాడ   పోర్ట్‌ఫోలియో తరఫున మ్యూచువల్‌ ఫండ్‌ మేనేజర్లు షేర్లు విక్రయించినా, కొన్నా...అది ఇన్వెస్టర్ల తరఫునే. ఆందుచేత ఫండ్‌ ద్వారా ఒనగూరే లాభనష్టాలు..ఫండ్స్‌ చేసే చెల్లింపులు అన్నీ ఎన్‌ఏవీలో ప్రతిబింబిస్తాయి. ఈ ఎన్‌ఏవీ ఆధారంగానే ఇన్వెస్టర్ల పెట్టుబడులు వుంటాయి. ఇక  దీర్ఘకాల మూలధన లాభాల పన్ను(ఎల్‌టీసీజీ)ను ఫండ్‌ మేనేజర్లు చెల్లించరు. మ్యూచువల్‌ ఫండ్‌ యూనిట్లను విక్రయించిన ఇన్వెస్టర్లే ఈ పన్నును చెల్లించాల్సివుంటుంది. ఇక మీరు ఎప్పుడు ఇన్వెస్ట్‌ చేశారు అనే అంశాన్ని బట్టి మీరు మూలధన లాభాల పన్ను చెల్లించాల్సి ఉంటుంది. ఈక్విటీ మ్యూచువల్‌ ఫండ్స్‌ మొత్తం నిధుల్లో 65 శాతం వరకూ ఈక్విటీల్లో ఇన్వెస్ట్‌ చేస్తాయి. ఈ ఈక్విటీ మ్యూచువల్‌ ఫండ్‌ యూనిట్లను ఏడాది లోపు విక్రయిస్తే మీరు మీకు వచ్చిన రాబడులపై 15 శాతం చొప్పున స్వల్పకాలిక మూలధన లాభాల పన్ను చెల్లించాల్సి ఉంటుంది. ఏడాది తర్వాత ఈ ఈక్విటీ మ్యూచువల్‌ ఫండ్స్‌ యూనిట్లను విక్రయిస్తే, మీరు ఎలాంటి దీర్ఘకాలిక మూలధన లాభాల పన్ను చెల్లించాల్సిన బాధ్యత ఇప్పటి వరకూ ఉండేది  కాదు. కానీ ఇప్పుడు మ్యూచువల్‌ ఫండ్స్‌ యూనిట్లను ఏడాది తర్వాత విక్రయిస్తే, మీకు లక్షకు పైగా లాభాలు వస్తే,  ఆ లాభాలపై 10 శాతం మూలధన లాభాల పన్ను చెల్లించాల్సి ఉంటుంది.   నా వయసు 50 సంవత్సరాలు. ప్రస్తుతం నా దగ్గర రూ.3 లక్షలున్నాయి. పదేళ్ల తర్వాత నెల వారీ నాకు కొంత ఆదాయం కావాలంటే ఈ మూడు లక్షలను నేను ఎలా ఇన్వెస్ట్‌ చేయాలి ?   – రియాజ్, హైదరాబాద్‌ రిటైరైన తర్వాత నెలవారీ ఆదాయం కావాలంటే రెండు మార్గాలున్నాయి. మొదటిది. ఎన్‌పీఎస్‌లో ఇన్వెస్ట్‌ చేయడం. ఇక రెండోది ఏదైనా బ్యాలన్స్‌డ్‌ మ్యూచువల్‌ ఫండ్‌లో ఇన్వెస్ట్‌ చేయడం. ఎన్‌పీఎస్‌(నేషనల్‌ పెన్షన్‌ సిస్టమ్‌)..రిటైర్మెంట్‌ అవసరాల కోసం సులభంగా ఉండే ప్లాన్‌ ఇది. ఈ మూడు లక్షలను ఎన్‌పీఎస్‌లో ఇన్వెస్ట్‌ చేయండి. అంతే కాకుండా మీరు పనిచేసినంత కాలమూ మీరు పొందే ఆదాయంలో నెలకు కొంత మొత్తాన్ని ఎన్‌పీఎస్‌కు కేటాయించండి. మీకు 65 సంవత్సరాలు వచ్చే వరకూ మీరు ఎన్‌పీఎస్‌లో ఇన్వెస్ట్‌ చేయవచ్చు. ఆ తర్వాత ఎన్‌పీఎస్‌లో జమ అయిన మొత్తం మీకు పెన్షన్‌గా లభిస్తుంది. దీంట్లో  60 శాతం మాత్రమే మీకు ఒకేసారి ఏకమొత్తంగా తీసుకోవడానికి వీలవుతుంది. మిగిలిన దాంట్లో నెలకు కొంత మొత్తం చొప్పున మీకు పెన్షన్‌గా వస్తుంది. మీకు ఎన్‌పీఎస్‌లో ఇన్వెస్ట్‌ చేయడం ఇష్టం లేకపోతే, మ్యూచువల్‌ ఫండ్స్‌ను పరిశీలించవచ్చు. మీరు మొదటిసారిగా మ్యూచువల్‌ ఫండ్స్‌లో ఇన్వెస్ట్‌ చేస్తున్నారు. కాబట్టి, ముందుగా బ్యాలన్స్‌డ్‌ ఫండ్‌ను ఎంచుకోండి. మీ దగ్గరున్న మొత్తం మూడు లక్షలను ఒకేసారి ఏక మొత్తంగా ఈ ఫండ్‌లో ఇన్వెస్ట్‌ చేయవద్దు. స్టాక్‌ మార్కెట్‌ సంబంధిత ఇన్వెస్ట్‌మెంట్‌ సాధనాల్లో ఎప్పుడూ ఒకేసారి పెద్ద మొత్తంలో ఇన్వెస్ట్‌ చేయకూడదనేది మొదటి సూత్రం. ఈ మూడు లక్షలను 12 భాగాలుగా చేసి, ఒక్కో భాగాన్ని ఒక నెల చొప్పున బ్యాలన్స్‌డ్‌ ఫండ్‌లో ఇన్వెస్ట్‌ చేయండి. ప్రతి నెలా కొంత మొత్తం చొప్పున ఈ బ్యాలన్స్‌డ్‌ ఫండ్‌లో కనీసం ఏడు నుంచి ఎనిమిదేళ్ల పాటు ఇన్వెస్ట్‌ చేయండి. ఇలా చేస్తే మీరు రిటైరైన తర్వాత తగిన మొత్తంలో పెన్షన్‌ పొందగలిగే అవకాశాలు అధికంగా ఉంటాయి. ఐసీఐసీఐ ప్రుడెన్షియల్‌ బ్యాలన్స్‌డ్, టాటా బ్యాలన్స్‌డ్, ఎస్‌బీఐ బ్యాలన్స్‌డ్‌ ఫండ్లను పరిశీలించవచ్చు.   వన్‌ టైమ్‌ మాండేట్‌(ఓటీఎమ్‌) అంటే ఏమిటి ?   – మేరీ, విజయవాడ   వన్‌ టైమ్‌ మాండేట్‌(ఓటీఎమ్‌) మ్యూచువల్‌ ఫండ్స్‌ ఇన్వెస్ట్‌మెంట్స్‌కు సంబంధించిన సొమ్ములను చెల్లించే ఒక ప్రత్యామ్నాయ విధానం. మీరు ఒక మ్యూచువల్‌ఫండ్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ప్రతి నెలా కొంత మొత్తాన్ని ఇన్వెస్ట్‌ చేస్తున్నారనుకుందాం. ఆ మొత్తానికి సరపడా చెక్కును ప్రతినెలా సదరు మ్యూచువల్‌ ఫండ్‌ సంస్థకు పంపించడమో, లేకపోతే సదరు మ్యూచువల్‌ ఫండ్‌ సంస్థకు వెళ్లి డబ్బులు చెల్లించడమో కొంత వ్యయప్రయాసలతో కూడుకున్న పని. దీనికి బదులుగా వన్‌టైమ్‌ మాండేట్‌ ద్వారా మీ సిప్‌ మొత్తాన్ని సులభంగా, సత్వరంగా సదరు మ్యూచువల్‌ ఫండ్‌ సంస్థకు చెల్లించవచ్చు.  బ్యాంక్‌ ఖాతా నుంచి ఆ సిప్‌ మొత్తాన్ని డెబిట్‌ చేసుకునే అధికారాన్ని సదరు మ్యూచువల్‌ ఫండ్‌కు ఇవ్వడమే వన్‌ టైమ్‌ మాండేట్‌. ఈ ఓటీఎమ్‌ ఫెసిలిటి కోసం  మీ బ్యాంక్‌లో నమోదు చేసుకోవాలి. మీ సిప్‌ మొత్తం రూ.10,000 లేదా రూ.5,000 ఇలా ఎంత మొత్తంలో మీరు ఇన్వెస్ట్‌ చేయాలనుకుంటున్నారో,  అంత మొత్తాన్ని సదరు మ్యూచువల్‌ ఫండ్‌ సంస్థ మీ బ్యాంక్‌ ఖాతా నుంచి డెబిట్‌ చేసుకొని ఫండ్‌ మేనేజర్‌ వ్యూహాల ప్రకారం ఇన్వెస్ట్‌ చేస్తుంది. ఓటీఎమ్‌ దరఖాస్తును తీసుకొని, సంబంధిత వివరాలు, మీ బ్యాంక్‌ ఖాతా, చెల్లించాల్సిన మొత్తం, ఎన్ని నెలలు తదితర వివరాలను నింపి, బ్యాంక్‌కు సమర్పిస్తే సరిపోతుంది.    - ధీరేంద్ర కుమార్‌ సీఈవో, వ్యాల్యూ రీసెర్చ్‌

నా ఇద్దరి పిల్లల ఉన్నత విద్యావసరాల కోసం గత కొంత కాలం నుంచి మ్యూచువల్‌ ఫండ్స్‌లో ఇన్వెస్ట్‌ చేస్తూ వచ్చాను. నేను లక్ష్యంగా నిర్దేశించుకున్న మొత్తానికి..ఈ ఇన్వెస్ట్‌మెంట్స్, వీటిపై రాబడులు చేరాయి. ఇప్పుడు ఈ ఇన్వెస్ట్‌మెంట్స్‌ను తీసేసుకోమంటారా ? –జగన్, హైదరాబాద్‌ ఒక ఆర్థిక లక్ష్యం కోసం చేసిన ఇన్వెస్ట్‌మెంట్స్‌ ఆ లక్ష్యాన్ని చేరితే, ఆ ఇన్వెస్ట్‌మెంట్స్‌ను తీసేసుకోవచ్చు. ఉదాహరణకు పిల్లల ఉన్నత చదువుల నిమిత్తం మీరు కొంత కాలం పాటు ఇన్వెస్ట్‌మెంట్స్‌ చేస్తూ ఉన్నారు. నిర్దేశిత కాలంలో కొంత రాబడితో ఆశించిన మొత్తాన్ని ఈ ఇన్వెస్ట్‌మెంట్స్‌ సాధించాయి. దీంతో మీరు అనుకున్న ఆర్థిక లక్ష్యం నెరవేరింది. ఇలాంటప్పుడు చివరి నిమిషం దాకా వేచి చూడాల్సిన పనిలేదు. మీ ఇన్వెస్ట్‌మెంట్స్‌ను పూర్తిగా వెనక్కి తీసుకోవచ్చు, మీకు ఈ డబ్బులు మరో మూడేళ్ల దాకా అవసరం లేదు అనుకుంటే ఈ మొత్తంలో కొంత భాగాన్ని వెనక్కి తీసుకోవచ్చు. మీ ఇన్వెస్ట్‌మెంట్స్‌ మీరు అనుకున్న లక్ష్యాన్ని సాధించడానికి మించిన సంతృప్తి కంటే ఎక్కువ ఏదీ కాదు. మీ పిల్లల ఉన్నత విద్యావసరాల కోసం మీరు మీ కష్టార్జితంలోంచి పొదుపు చేస్తున్నారు. కాబట్టి ఈ ఆర్థిక లక్ష్యం సాధన మీకు ఎంతగానో తృప్తినిచ్చి ఉంటుంది. అందుకని నిరభ్యంతరంగా ఈ ఇన్వెస్ట్‌మెంట్స్‌ను వెనక్కి తీసుకోండి. కానీ ఈ డబ్బులను మీ పిల్లల ఉన్నత విద్యావసరాల కోసమే వినియోగించండి. ఇతరత్రా చిల్లర, మల్లర ఖర్చులకు వాడేసి తర్వాత సర్దుబాటు చేద్దాంలే అనుకోకండి.   ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేస్తే మంచి రాబడులు వస్తాయని చెప్తున్నారు కదా! ఫండ్స్‌లో కాకుండా నేరుగా ఈక్విటీల్లోనే ఇన్వెస్ట్‌ చేయవచ్చు కదా? –లత, విశాఖపట్టణం   నేరుగా ఈక్విటీల్లో ఇన్వెస్ట్‌ చేయడం కన్నా మ్యూచువల్‌ ఫండ్స్‌లో ఇన్వెస్ట్‌ చేయడం వల్ల చాలా ప్రయోజనాలు ఉన్నాయి. మనలాంటి సాధారణ ఇన్వెస్టర్లందరి దగ్గర నుంచి పొదుపుల రూపంలో డబ్బులను సమీకరించి మ్యూచువల్‌ ఫండ్‌ సంస్థలు ఇన్వెస్ట్‌ చేస్తాయి. ఏ షేర్‌లో ఇన్వెస్ట్‌ చేయాలి లేదా ఏ బాండ్‌ను ఎంచుకోవాలి అనే నిర్ణయాన్ని మన బదులు ఫండ్‌ మేనేజర్లు ఆలోచిస్తారు. ఈక్విటీల్లో నేరుగా ఇన్వెస్ట్‌ చేయడం కొంచెం కష్టసాధ్యమైన పనే. మనం ఏ కంపెనీ షేర్‌ను కొనుగోలు చేయాలనుకుంటున్నాం? ఆ రంగం స్థితిగతులు ఎలా ఉన్నాయి? కంపెనీ ఆర్థిక పరిస్థితులు ఏ విధంగా ఉన్నాయి ? కంపెనీ ప్రమోటర్ల ట్రాక్‌ రికార్డ్‌  ఎలా ఉంది ? కంపెనీకి ఎదురువుతున్న సవాళ్లేంటి ? తదితర చాలా విషయాలను కూలంకషంగా పరిశీలించాల్సి  ఉంటుంది. అదే మ్యూచువల్‌ ఫండ్స్‌ అయితే ఇలాంటి విషయాలన్నింటినీ ఆమూలాగ్రం పరిశీలించడానికి, పరిశోధించడానిక ఒక పూర్తి స్థాయి రీసెర్చ్‌ టీమే ఉంటుంది. అంతే కాకుండా ఈక్విటీ ఇన్వెస్ట్‌మెంట్స్‌లో దశాబ్దాల అనుభవం ఉన్న వ్యక్తులు ఫండ్‌ మేనేజర్లుగా వ్యవహరిస్తారు. ఈక్విటీ ఇన్వెస్ట్‌మెంట్స్‌ విషయమై మంచి ట్రాక్‌ రికార్డ్‌ ఉన్న వ్యక్తులనే మ్యూచువల్‌ ఫండ్‌ సంస్థలు ఫండ్‌ మేనేజర్లుగా తీసుకుంటాయి. నేరుగా ఈక్విటీల్లో కంటే ఫండ్స్‌లో ఇన్వెస్ట్‌ చేయడమే ఇన్వెస్టర్ల పరంగా చూస్తే మంచి నిర్ణయం. ఫండ్స్‌లో ఇన్వెస్ట్‌ చేయడం సులభం, నేరుగా ఈక్విటీల్లో ఇన్వెస్ట్‌ చేయడం కంటే ఫండ్స్‌లో ఇన్వెస్ట్‌ చేయడానికి తక్కువ సమయం, తక్కువ ప్రయత్నాలు సరిపోతాయి. ఈక్విటీ ఇన్వెస్ట్‌మెంట్స్‌కు సంబంధించి తక్కువ అనుభవమున్నా, లేదా అసలు అనుభవం లేకున్నా అవగాహన లేకపోయినా సరే, ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేసి మంచి రాబడులు పొందవచ్చు. ఇక ఇన్వెస్ట్‌మెంట్స్‌కు సంబంధించి అత్యంత కీలకమైన అంశం డైవర్సిఫికేషన్‌. ఇది ఒక్క మ్యూచువల్‌ ఫండ్స్‌లో ఇన్వెస్ట్‌ చేయడం ద్వారానే సాధ్యమవుతుంది. మీరు నేరుగా ఈక్విటీల్లో ఇన్వెస్ట్‌ చేస్తే, మీ ఇన్వెస్ట్‌మెంట్స్‌ కొన్ని కంపెనీలకే పరిమితమవుతాయి. అదే ఫండ్స్‌లో ఇన్వెస్ట్‌ చేశారనుకుంటే ఆ ఫండ్‌ పోర్ట్‌ఫోలియోలో విభిన్న రంగాలకు చెందిన కంపెనీలుండే అవకాశాలు అధికంగా ఉంటాయి. అందుకని మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ప్లాన్‌(సిప్‌) విధానంలో ఇన్వెస్ట్‌ చేస్తే మంచి రాబడులు పొందవచ్చు. చాలా మంది ఇన్వెస్టర్లు ఏం చేస్తారంటే.. తమకు మంచి అవగాహన ఉందంటూ ఏవో కొన్ని షేర్లలో ఇన్వెస్ట్‌ చేస్తారు. తమ నైపుణ్యాలను అధికంగా అంచనా వేసుకొని బోల్తా పడుతుంటారు. పలితంగా ఖరీదైన మూల్యం చెల్లిస్తుంటారు. ఇలా జరగకుండా ఉండాలనుకుంటే ఈక్విటీల్లో నేరుగా కంటే కూడా మ్యూచువల్‌ ఫండ్స్‌లో ఇన్వెస్ట్‌ చేయడమే ఉత్తమం.   నాకు ఇద్దరు కొడుకులున్నారు. ఇద్దరి వయసులు 25, 23 సంవత్సరాలు. వీరిద్దరి పేరు మీద జీవన్‌ సరళ్, మనీ బ్యాక్‌ పాలసీల కింద ఏడాదికి రూ.25,000 ప్రీమియమ్‌ చెల్లిస్తున్నాను. ఆదాయపు పన్ను చట్టం సెక్షన్‌ 80 సీ కింద నా ఇద్దరు కొడుకుల పాలసీలకు చెల్లిస్తున్న ప్రీమియమ్‌కు నేను పన్ను మినహాయింపు పొందవచ్చా? –అనంత్, విజయవాడ   మీ ఇద్దరు కొడుకులకు మీరు చెల్లిస్తున్న పాలసీల ప్రీమియమ్‌లకు పన్ను మినహాయింపులు పొందవచ్చు. ఏ వ్యక్తి అయినా, తనకు, తన భార్యకు, తన సంతానానికి చెల్లిస్తున్న పాలసీల ప్రీమియమ్‌లకు ఒక ఆర్థిక సంవత్సరంలో రూ. లక్షన్నర వరకూ ఆదాయపు పన్ను మినహాయింపులు పొందవచ్చు.    - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నా వయస్సు 47 సంవత్సరాలు. నాకు నెలకు రూ.40,000 జీతం వస్తోంది. నాకు భార్య, ఇద్దరు పిల్లలున్నారు. నేను ఇంత వరకూ ఎలాంటి బీమా పాలసీ తీసుకోలేదు. నేను ఎంత మొత్తానికి  టర్మ్‌ ఇన్సూరెన్స్‌ తీసుకోవాలి ? నాకు తగిన టర్మ్‌ బీమా పాలసీని సూచించండి.   – శేఖర్, హైదరాబాద్‌   సాధారణంగా ఒక వ్యక్తి పదేళ్ల ఆదాయానికి సరిపడా కవరేజ్‌ ఉన్న బీమా తీసుకోవాలని బీమా నిపుణులు చెబుతుంటారు. అయితే ఎంత మొత్తానికి బీమా తీసుకోవాలి అనే విషయం మరికొన్ని ముఖ్యమైన అంశాలపై కూడా ఆధారపడి ఉంటుంది. మీ పిల్లల ఉన్నత విద్యావసరాలు. మీపై ఆర్థికంగా ఆధారపడి ఉన్న వ్యక్తుల అవసరాలు. మీ ఇతర బాధ్యతలు, తదితర అంశాలను కూడా పరిగణనలోకి తీసుకోవలసి ఉంటుంది. ఈ అంశాలన్నింటినీ పరిగణనలోకి తీసుకొని ఎంత మొత్తానికి బీమా పాలసీ తీసుకోవాలో మీరు నిర్ణయించుకోండి. ఇక మంచి టర్మ్‌ బీమా పాలసీ తీసుకోవడానికి మూడు అంశాలు ముఖ్యమైనవి. మొదటిది క్లెయిమ్స్‌ సెటిల్మెంట్‌ రేషియో..బీమా సంస్థ పరిష్కరించిన క్లెయిమ్స్‌ను బీమా సంస్థకు అందిన మొత్తం క్లెయిమ్స్‌తో భాగిస్తే వచ్చేదే క్లెయిమ్స్‌ సెటిల్మెంట్‌ రేషియో. ఇది ఎంత ఎక్కువగా ఉంటే అంత మంచిది. అందుకని అత్యధిక క్లెయిమ్స్‌ సెటిల్మెంట్‌ రేషియో ఉన్న కంపెనీ బీమా పాలసీను తీసుకోవడం ఉత్తమం. ఇక రెండో కీలకమైన అంశం.. చెల్లించాల్సిన ప్రీమియమ్‌..టర్మ్‌ బీమా అనేది తక్కువ వ్యయాలున్న సమర్థవంతమైన పాలసీ. అయితే కంపెనీ, కంపెనీకి ప్రీమియమ్‌ విషయంలో తేడాలు బాగానే ఉంటాయి. తక్కువ ప్రీమియమ్‌ ఉన్న పాలసీనే తీసుకోండి. ఇక టర్మ్‌ పాలసీ తీసుకునే విషయంలో ముఖ్యమైన మూడో అంశం.. రైడర్స్‌... బీమా పాలసీతో పాటు కొన్ని రైడర్స్‌ను కూడా తీసుకుంటే అదనపు ప్రయోజనాలు పొందవచ్చు. బీమా కవరేజ్‌ను కూడా మెరుగుపరచుకోవచ్చు. రైడర్స్‌కు కొంత అదనపు ప్రీమియమ్‌ చెల్లించాల్సి ఉంటుంది. అనుకోని, ఊహించని విషాదాలు ఎదురైన పక్షంలో ఈ రైడర్స్‌ మీకు తగిన రక్షణను ఇవ్వగలవు. మీది తరచుగా ప్రయాణాలు చేసే ఉద్యోగమైతే, యాక్సిడెంట్‌ డెత్‌ బెనిఫిట్‌ రైడర్‌ను తీసుకోవాలి. ఇలాంటి రైడర్స్‌ చాలా ఉన్నాయి. అన్నింటినీ కాకుండా మీకు తగిన రైడర్స్‌ను ఎంచుకుంటే మంచిది. వివిధ బీమా సంస్థల క్లెయిమ్‌ సెటిల్మెంట్‌ రేషియో, ప్రీమియమ్‌ తదితర అంశాలను ఇప్పుడు ఆన్‌లైన్‌లో సులభంగా పోల్చిచూసుకోవచ్చు. ఇలా పోల్చి చూసుకుని, ఎక్కువ క్లెయిమ్స్‌ సెటిల్మెంట్‌ రేషియో, తక్కువ ప్రీమియమ్‌ ఉన్న పాలసీని ఎంచుకోండి. ఇటీవల లాంగ్‌టర్మ్‌ డెట్‌ ఫండ్స్‌ సరైన రాబడులనివ్వడం లేదు. డెట్‌ ఫండ్స్‌లో ఉన్న నా ఇన్వెస్ట్‌మెంట్స్‌ను వెనక్కి తీసుకుందామనుకుంటున్నాను. ఇది సరైన నిర్ణయమేనా ?   – ప్రశాంత్, విశాఖపట్టణం   ఇటీవల కాలంలో లాంగ్‌టర్మ్‌ డెట్‌ ఫండ్స్‌ సరైన రాబడులనివ్వని మాట కరెక్టే. రాబడులు సరిగ్గా లేని కారణంగా ఈ డెట్‌ ఫండ్స్‌ నుంచి ఇన్వెస్ట్‌మెంట్స్‌ను వెనక్కి తీసుకోవడం సరైన నిర్ణయమే. మీరు స్థిర ఆదాయ ఇన్వెస్టర్‌అయిన పక్షంలోనే ఇది సరైన నిర్ణయం. ఈ తరహా ఇన్వెస్ట్‌మెంట్స్‌కు నష్ట భయం చాలా తక్కువగా ఉంటుంది. వడ్డీరేట్లు తగ్గితే ఇవి మంచి రాబడులనిస్తాయి. లాంగ్‌టర్మ్‌ డెట్‌ ఫండ్స్‌లో ఇన్వెస్ట్‌మెంట్స్‌ను 2–3 సంవత్సరాల పాటు కొనసాగిస్తే, మంచి రాబడులే పొందవచ్చు. ఇటీవల కాలంలో ఇవి సరైన రాబడులు ఇవ్వని మాట వాస్తవమే అయినప్పటికీ, వీటి పనితీరు మరీ తీసికట్టుగా ఏమీ లేదు.  అయితే రెండు నుంచి మూడేళ్లు వేచి చూడగలిగితే, మీకు మంచి రాబడులు వచ్చే అవకాశాలు అధికంగా ఉన్నాయి. భవిష్యత్తులో ఇంత గందరగోళం వద్దనుకుంటే, స్వల్పకాలిక డెట్‌ ఫండ్స్‌లో ఇన్వెస్ట్‌ చేయండి. ఈ ఫండ్స్‌ 8.5 శాతం రాబడులనిచ్చే అవకాశాలున్నాయి.   మ్యూచువల్‌ ఫండ్‌ సంస్థలు వ్యయాలను నెట్‌ అసెట్‌ వేల్యూ(ఎన్‌ఏవీ) నుంచే తగ్గిస్తాయా ? ఇది ఎలా ఉంటుంది? రోజువారీగా ఉంటుందా? నెలవారీగా ఉంటుందా ? – స్రవంతి, విజయవాడ   మ్యూచువల్‌ ఫండ్‌ సంస్థలు ఫండ్‌ నిర్వహణ వ్యయాలన్నింటీనీ ఎన్‌ఏవీ(నెట్‌ అసెట్‌ వేల్యూ) నుంచే తగ్గిస్తాయి. ఇది ఏ రోజుకారోజే జరుగుతుంది. ప్రతి రోజూ కొత్త ఇన్వెస్టర్లు ఫండ్స్‌లో ఇన్వెస్ట్‌ చేస్తారు. మరికొంత మంది ఇన్వెస్టర్లు తమ ఇన్వెస్ట్‌మెంట్స్‌ను వెనక్కి తీసుకుంటారు. ఇది ప్రతి రోజూ జరుగుతుంది. కాబట్టి మ్యూచువల్‌ ఫండ్‌ సంస్థలు ప్రతి రోజూ తమ వ్యయాలను ఎన్‌ఏవీ నుంచే తగ్గిస్తాయి. అంతేకాకుండా ఇన్వెస్టర్లు ఎన్‌ఏవీ ఆధారంగానే సదరు మ్యూచువల్‌ ఫండ్‌ యూనిట్లను కొనుగోలు చేయడం కానీ, విక్రయించడం కానీ చేస్తారు.   నేను నెలకు కొంత మొత్తాన్ని ఒక మ్యూచువల్‌ ఫండ్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తున్నాను. వచ్చే నెల నుంచి నా జీతం పెరుగుతోంది. సిప్‌ మొత్తాన్ని కూడా పెంచుదామనుకుంటున్నాను. అలా చేయమంటారా ? లేక అదే ఫండ్‌లో కొత్త సిప్‌ను ప్రారంభించమంటారా? – ఆంటోని, ఈ మెయిల్‌ ద్వారా   మ్యూచువల్‌ ఫండ్స్‌లో సిప్‌ విధానంలో ఇన్వెస్ట్‌ చేస్తే మంచి రాబడులు పొందవచ్చు. జీతం పెరిగినప్పుడల్లానో, రెండు, మూడు సంవత్సరాలకొకసారి సిప్‌ మొత్తాన్ని పెంచితే ఇంకా మంచి ఫలితాలు వస్తాయి. ఇక మీ విషయంలో మీరు మీ సిప్‌ మొత్తాన్ని పెంచుకోవచ్చు. లేదా కొత్త సిప్‌ను ప్రారంభించవచ్చు. మీరు ఎలా చేసిన ఒకటే. సాంకేతికంగా చూసినా ఎలాంటి తేడా ఉండదు.  ఎలా చేసినా పన్ను భారం ఒకే విధంగా ఉంటుంది.   - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

పన్ను ఆదా మ్యూచువల్‌ ఫండ్స్‌లో లాక్‌–ఇన్‌ పీరియడ్‌ వరకే ఇన్వెస్ట్‌ చేయడం మంచిదా ?     – వైష్ణవి, హైదరాబాద్‌ పన్ను ఆదా మ్యూచువల్‌ ఫండ్స్‌ను రెండు రకాలుగా వర్గీకరించవచ్చు. పనితీరు దూకుడుగా ఉండేవి. పనితీరు సామాన్యంగా ఉండేవి. ట్యాక్స్‌ సేవింగ్స్‌ ఫండ్స్‌ అన్నీ పూర్తిగా ఈక్విటీలోనే ఇన్వెస్ట్‌ చేస్తాయి. వీటిల్లో లార్జ్‌క్యాప్‌ కంపెనీల్లో అధికంగా ఇన్వెస్ట్‌ చేసే ఫండ్స్‌ ఉన్నాయి. కొన్ని ఫండ్స్‌ ఇన్వెస్ట్‌మెంట్స్‌ విషయంలో ప్రయోగాలు చేస్తాయి. ఈ తరహా ఫండ్స్‌ చిన్న కంపెనీల్లో ఇన్వెస్ట్‌ చేసి గరిష్ట లాభాలను సాధించాలని ప్రయత్నాలు చేస్తాయి. ట్యాక్స్‌ సేవింగ్స్‌ ఫండ్స్‌లో ఇన్వెస్ట్‌ చేయాలనుకున్నప్పుడు, మీ ఇన్వెస్ట్‌మెంట్స్‌ మూడేళ్ల వరకూ లాక్‌–ఇన్‌ అవుతాయి కాబట్టి, దూకుడుగా ఉండే ఫండ్స్‌లోనే ఇన్వెస్ట్‌ చేయడం మంచిది. మూడేళ్ల లాక్‌–ఇన్‌ పీరియడ్‌ గురించి ఆలోచించకండి. కనీసం ఐదు, అంతకు మించిన కాలానికి ఇన్వెస్ట్‌ చేయడమే సబబు. ఇక సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)ల ద్వారా ఇన్వెస్ట్‌ చేస్తే దీర్ఘకాలంలో మంచి రాబడులు పొందవచ్చు.   నేను కొన్ని ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)లో ఇన్వెస్ట్‌ చేస్తున్నాను.  ఈ ఫండ్స్‌ నుంచి ఇన్వెస్ట్‌మెంట్స్‌ను వేరే ఫండ్స్‌లోకి (వీటి లాక్‌–ఇన్‌ పీరియడ్‌ ముగిసిన తర్వాత)బదిలీ చేయాలనుకుంటున్నాను. నాది సరైన నిర్ణయమేనా?     – రాజా, విశాఖపట్టణం   ఈఎల్‌ఎస్‌ఎస్‌ల నుంచి ఇన్వెస్ట్‌మెంట్స్‌ను వేరే ఫండ్స్‌లోకి మార్చడం సరైన నిర్ణయం కాదు. మీరు ఇన్వెస్ట్‌ చేసిన ఈఎల్‌ఎస్‌ఎస్‌ మంచి పనితీరు చూపించకపోతేనే లాక్‌–ఇన్‌ పీరియడ్‌ ముగిసిన తర్వాత  ఈ ఫండ్స్‌ నుంచి ఇన్వెస్ట్‌మెంట్స్‌ను వేరే ఫండ్స్‌లోకి బదిలీ చేసుకోవచ్చు. లేదా మీకు డబ్బులు అవసరమైనప్పుడు మాత్రమే అదీనూ బయట ఎక్కడైనా అప్పు పుట్టని పరిస్థితుల్లో మాత్రమే ఈ ఫండ్స్‌ నుంచి వైదొలగవచ్చు. అలా కాని పక్షంలో ఈఎల్‌ఎస్‌ఎస్‌ల నుంచి వేరే ఫండ్స్‌లోకి ఇన్వెస్ట్‌మెంట్స్‌ను బదిలీ చేయడం పెట్టుబడుల వ్యూహం పరంగా సరైన నిర్ణయం కాదు.   నేను ఒక ప్రభుత్వ ఉద్యోగిని. నేషనల్‌ పెన్షన్‌ సిస్టమ్‌(ఎన్‌పీఎస్‌) ఖాతా మాకు తప్పనిసరి. నా వేతనంతో అనుసంధానమై ఉన్న ఎన్‌పీఎస్‌ ఖాతాను ప్రారంభించాను. అయితే ఈ ఖాతాలో ఈక్విటీ కేటాయింపులు పెంచుకోవడానికి లేదు. అందుకని నేను మరో ఎన్‌పీఎస్‌ ఖాతాను ప్రారంభించవచ్చా?     – దత్తాత్రేయ, విజయవాడ మీరు ఒకటికి మించి నేషనల్‌ పెన్షన్‌ సిస్టమ్‌(ఎన్‌పీఎస్‌) ఖాతాలు తెరవడానికి వీలు లేదు. ఈక్విటీలో 50 శాతానికి మించి ఇన్వెస్ట్‌ చేసే వెసులుబాటు ఎన్‌పీఎస్‌లో లేదు. ఈక్విటీలో ఇన్వెస్ట్‌మెంట్స్‌ పెంచుకోవాలనుకుంటే, మీరు ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేసే విషయాన్ని పరిశీలించవచ్చు. ఆదాయపు పన్ను చట్టం, సెక్షన్‌ 80 సీ కింద పన్ను మినహాయింపులు పొందాలంటే, ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)లో ఇన్వెస్ట్‌ చేయవచ్చు. సెక్షన్‌ 80 సీ కింద మీరు రూ.1.5 లక్ష వరకూ ఆదాయపు పన్ను మినహాయింపులు పొందవచ్చు. ఇప్పటికే సెక్షన్‌ 80సీ పరిమితి పూర్తయితే, ఈక్విటీ ఆధారిత బ్యాలెన్స్‌డ్‌ స్కీమ్స్‌లో గానీ, డైవర్సిఫైడ్‌ ఈక్విటీ మ్యూచువల్‌ ఫండ్స్‌లో గానీ ఇన్వెస్ట్‌ చేయవచ్చు. ఈ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తే దీర్ఘకాలంలో మంచి రాబడులు పొందవచ్చు. రిటైర్మెంట్‌ నిధి ఏర్పాటు, పిల్లల ఉన్నత చదువులు, సొంత ఇల్లు సమకూర్చుకోవడం తదితర దీర్ఘకాలిక ఆర్థిక లక్ష్యాల సాధన కోసం ఈక్విటీ మ్యూచువల్‌ ఫండ్స్‌లో సిప్‌ విధానంలో ఇన్వెస్ట్‌ చేయడమే ఉత్తమమైన విధానం.   నేను నెలకు రూ. లక్ష వరకూ ఇన్వెస్ట్‌ చేయగలను. కనీసం 15–20 ఏళ్ల వరకూ ఇన్వెస్ట్‌ చేయాలనుకుంటున్నాను. మిడ్‌ క్యాప్, స్మాల్‌–క్యాప్‌ ఫండ్స్‌నే ఇన్వెస్ట్‌మెంట్‌ కోసం ఎంచుకోవాలనుకుంటున్నాను. తగిన సలహా ఇవ్వండి.      – రంజిత్, నిజామాబాద్‌ నెలకు రూ. లక్ష చొప్పున కనీసం 15–20 ఏళ్ల పాటు మిడ్‌–క్యాప్, స్మాల్‌–క్యాప్‌ ఫండ్స్‌లో నిరభ్యంతరంగా ఇన్వెస్ట్‌ చేయవచ్చు.  మార్కెట్‌ అధ్వాన పరిస్థితుల్లో ఉన్నా కూడా చాలా మిడ్‌–క్యాప్, స్మాల్‌–క్యాప్‌ ఫండ్స్‌ మంచి పనితీరు చూపించాయి. మిడ్‌–క్యాప్, స్మాల్‌–క్యాప్‌ ఫండ్స్‌ పనితీరు భవిష్యత్తులో కూడా అదే విధంగా ఉండవచ్చు. మీరు 15–20 ఏళ్లు ఇన్వెస్ట్‌ చేయాలనుకుంటున్నారు. కాబట్టి,  మంచి రాబడులు పొందే అవకాశాలు అధికంగా ఉన్నాయి. అయితే ఇలా మిడ్‌–క్యాప్, స్మాల్‌–క్యాప్‌ ఫండ్స్‌లో ఇన్వెస్ట్‌ చేస్తున్నప్పుడు ఇన్వెస్టర్లు అప్రమత్తంగా ఉండాలి. ఆయా ఫండ్స్‌ పనితీరును కనీసం రెండేళ్లకొకసారైనా సమీక్షించాలి. ఈ రెండేళ్ల కాలంలో ఎన్నో మార్పు చేర్పులు జరుగుతుంటాయి. మీ పోర్ట్‌ఫోలియోలోని ఏ ఫండ్‌ పనితీరు, అదే కేటగిరీలోని మరే ఇతర ఫండ్‌ పనితీరు కన్నా అధ్వానంగా ఉంటే.. ఆ ఫండ్‌ నుంచి మరో ఫండ్‌లోకి మీ ఇన్వెస్ట్‌మెంట్స్‌ను  మార్చండి. ఏదైనా ఒక ఫండ్‌ను నిర్వహించే ఫండ్‌ మేనేజర్‌ మారిపోయినా, లేదా మీరు ఇన్వెస్ట్‌ చేస్తున్న ఫండ్‌ నిర్వహణ ఆస్తులు భారీగా పెరిగినా..ఫండ్‌ పనితీరు ప్రభావితం అవుతుంది. ఇలాంటి విషయాల పట్ల అప్రమత్తంగా ఉంటే, మిడ్‌–క్యాప్, స్మాల్‌–క్యాప్‌ ఫండ్స్‌లో ఇన్వెస్ట్‌ చేయవచ్చు. ఎంపిక చేసిన ఫండ్స్‌లో సిప్‌ విధానంలో ఇన్వెస్ట్‌ చేయడం ప్రారంభించండి. మార్కెట్‌ పెరుగుదల, క్షీణతలతో సంబంధం లేకుండా మీ ఇన్వెస్ట్‌మెంట్స్‌ను కొనసాగించండి. కనీసం రెండేళ్లకొకసారైనా మీ పోర్ట్‌ఫోలియోను మాత్రం సమీక్షించడం మరచిపోకండి. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను నెలకు కొంత మొత్తం సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఒక స్మాల్‌–క్యాప్‌ ఫండ్‌లో ఇన్వెస్ట్‌ చేస్తున్నాను. ఇటీవలే నాకు బోనస్‌ రూ.2 లక్షల వరకూ వచ్చాయి. దీంట్లో ఒక లక్ష వరకూ  ఒకేసారి ఈ స్మాల్‌క్యాప్‌ ఫండ్‌లో ఇన్వెస్ట్‌ చేయవచ్చా? మార్కెట్‌ రికార్డ్‌స్థాయికి చేరిన ప్రస్తుత తరుణంలో సిప్‌ ఇన్వెస్ట్‌మెంట్స్‌ కొంత కాలం ఆపేస్తే మంచిదని కొంతమంది మిత్రులు చెబుతున్నారు. మార్కెట్‌ పడిన తర్వాత మళ్లీ సిప్‌లను మొదలు పెట్టవచ్చని వారంటున్నారు. ఇది సరైనదేనా ? వారి సలహాను పాటించవచ్చా ? తగిన సూచనలు ఇవ్వండి.   – ఆనంద్, విశాఖపట్టణం స్మాల్‌ క్యాప్‌ ఫండ్‌లో సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) విధానంలోనే ఇన్వెస్ట్‌ చేయాలి.  లార్జ్‌క్యాప్‌ ఫండ్స్‌తో పోల్చితే స్మాల్‌క్యాప్‌ ఫండ్స్‌ తీవ్రమైన ఒడిదుడుకులకు గురవుతాయి. హెచ్చుతగ్గులు తీవ్రంగా ఉంటాయి. మార్కెట్‌ బాగా పెరుగుతున్నప్పుడు, లేదా బాగా పడిపోతున్నప్పుడు ఒడిదుడుకులు మరింత ఎక్కువగా ఉంటాయి. అందుకని స్మాల్‌క్యాప్‌ ఫండ్స్‌లో ఎప్పుడూ పెద్ద మొత్తాల్లో ఒకేసారి ఇన్వెస్ట్‌ చేయకూడదు. కొన్ని స్మాల్‌ క్యాప్‌ ఫండ్స్‌ పెద్ద మొత్తాల్లో ఒకేసారి ఇన్వెస్ట్‌మెంట్స్‌ను అంగీకరించడం లేదు కూడా. మీరు ఇన్వెస్ట్‌ చేయాలనుకుంటున్న పెద్ద మొత్తాన్ని ఆరు లేదా పన్నెండు భాగాలుగా విభజించండి. మీరు రెగ్యులర్‌గా ఇన్వెస్ట్‌ చేస్తున్న సిప్‌కు అదనంగా ఈ భాగాలను నెలకు ఒకటి చొప్పున జత చేసి ఆ స్మాల్‌క్యాప్‌ ఫండ్‌లో ఇన్వెస్ట్‌ చేయండి. మార్కెట్‌ పెరగడం, తగ్గడం సహజమైన విషయాలే. ఇటీవల బాగా పెరిగినందున కొంత కరెక్షన్‌ రావడం సహజం. మార్కెట్‌ మరింతగా పడేదాకా ఎదురు చూసి, అప్పటిదాకా సిప్‌లను ఆపేసి, మార్కెట్‌ పడిన తర్వాత సిప్‌లను మళ్లీ మొదలు పెట్టడం సరైనది కాదు. మార్కెట్‌ ఎక్కడిదాకా పడిపోతుందో, ఎక్కడిదాకా పెరుగుతుందో ఖచ్చితంగా అంచనా వేయడం ఎవరి వల్లా కాదు. మార్కెట్‌ పడిపోవడం ఒకందుకు మంచిదే.  అందుకని సదరు స్మాల్‌క్యాప్‌ ఫండ్‌లో మీ ఇన్వెస్ట్‌మెంట్స్‌ను నిరభ్యంతరంగా కొనసాగించండి. మార్కెట్‌ పడిపోతే, మీకు వీలైతే సిప్‌ ఇన్వెస్ట్‌మెంట్స్‌ను ఒకింత పెంచండి. మార్కెట్‌ బాగా పడిపోయినప్పుడు ఇన్వెస్ట్‌ చేసి, బాగా పెరిగినప్పుడు అమ్మకాలు జరపడం ద్వారా ఇన్వెస్టర్లు మంచి రాబడులు పొందవచ్చు. కానీ ఇలా చేయడం చాలా కష్టసాధ్యమైన పని. దీనికి మధ్యేమార్గంగా ఫండ్స్‌లో ఇన్వెస్ట్‌మెంట్స్‌ను క్రమం తప్పకుండా కొనసాగించడమే మంచిది. ఇలా రెగ్యులర్‌గా ఇన్వెస్ట్‌మెంట్స్‌ను కొనసాగిస్తే, మీరు ఇన్వెస్ట్‌ చేసే కాలంలో మార్కెట్‌ ఎన్నో గరిష్ట స్థాయిలను, మరెన్నో కనిష్ట స్థాయిలను చూడవచ్చు. అందుకని మార్కెట్‌ ఉత్ధాన, పతనాలతో సంబంధం లేకుండా మీ సిప్‌లను కొనసాగించండి. మరోవైపు స్మాల్‌ క్యాప్‌ ఫండ్స్‌ల్లో సిప్‌ల ద్వారానే ఇన్వెస్ట్‌ చేయండి.   ఈక్విటీ–ఇన్‌కమ్‌ ఫండ్స్‌లో ఒకేసారి పెద్ద మొత్తంలో ఇన్వెస్ట్‌ చేయవచ్చా? డెట్‌ ఫండ్స్‌ కన్నా ఈక్విటీ ఇన్‌కమ్‌ ఫండ్స్‌ సురక్షితమా? – సౌమ్య, హైదరాబాద్‌   ఈక్విటీ ఇన్‌కమ్‌ ఫండ్స్‌.. డెట్‌ ఫండ్స్‌ అంత సురక్షితమైనవి కావు. అయితే ఈక్విటీ ఫండ్స్‌తో పోల్చితే ఒకింత సురక్షితమేనని చెప్పవచ్చు. ఈక్విటీ ఇన్‌కమ్‌ ఫండ్స్‌ తమ నిధుల్లో మూడో వంతు ఈక్విటీలోనూ, మరో మూడవ వంతు ఆర్బిట్రేజ్‌ ఫండ్స్‌లోనూ, మరో మూడో వంతు డెట్‌ సాధనాల్లోనూ ఇన్వెస్ట్‌ చేస్తాయి. ఈ ఫండ్స్‌ ఆర్బిట్రేజ్‌ పొజిషన్‌ దాదాపు లిక్విడ్‌ ఫండ్‌లాగానే ఉంటుంది. ఎందుకంటే ఈక్విటీ ఇన్‌కమ్‌ ఫండ్‌ను నిర్వహించే ఫండ్‌ మేనేజర్, ఒక షేర్‌ను కొనుగోలు చేసి, ఈ షేర్‌ ఫ్యూచర్స్‌ను విక్రయిస్తాడు.దీంతో ఈక్విటీలో ఇన్వెస్ట్‌ చేసిన మూడో వంతు భాగానికి రిస్క్‌ ఉండదు. ఈ ఫండ్‌ ఆర్బిట్రేషన్‌ పొజిషన్‌ సాంకేతికంగా ఈక్విటీగా ఉన్నప్పటికీ, క్యారెక్టర్‌ పరంగా చూస్తే, ఫిక్స్‌డ్‌ ఇన్‌కమ్‌గా ఉంటుంది. అందుకని పన్ను పరంగా దీనిని ఈక్విటీ ఫండ్‌గానే పరిగణిస్తారు. ఇక ఈ ఫండ్‌ నిధులు 35 శాతం వరకూ ఈక్విటీల్లో ఉన్నందున డెట్‌ ఫండ్‌ అంత సురక్షితంగా ఈక్విటీ ఇన్‌కమ్‌ ఫండ్‌ ఉండదని చెప్పవచ్చు. రిస్క్‌ ఎక్కువగా వద్దనుకుంటే, మూడు నుంచి ఐదేళ్ల కాలానికి ఈక్విటీ ఇన్‌కమ్‌ ఫండ్స్‌లో ఇన్వెస్ట్‌ చేయవచ్చు. మీరు ఇన్వెస్ట్‌ చేసే దాంట్లో  మూడో వంతు మాత్రమే ఈక్విటీల్లోకి వెళుతుంది కాబట్టి, ఒకేసారి పెద్ద మొత్తాల్లో కూడా ఈ ఫండ్స్‌లో ఇన్వెస్ట్‌ చేయవచ్చు.   నేను ఒక సహకార బ్యాంక్‌లో ఐదేళ్ల కాలానికి కొంత మొత్తాన్ని ఫిక్స్‌డ్‌ డిపాజిట్‌ చేశాను. ఈ ఎఫ్‌డీలపై పన్ను మినహాయింపులు పొందే అవకాశం ఉందా ? – హఫీజ్, కరీంనగర్‌ ఐదేళ్ల కాల వ్యవధి ఉన్న ఏ ఫిక్స్‌డ్‌ డిపాజిట్‌ ఇన్వెస్ట్‌మెంట్స్‌పై మీరు పన్ను మినహాయింపులు పొందే అవకాశాలు లేవు. ట్యాక్స్‌ సేవింగ్‌/ట్యాక్స్‌ సేవర్‌ ఫిక్స్‌డ్‌ డిపాజిట్లలో ఇన్వెస్ట్‌ చేస్తేనే, అదీనూ ఐదేళ్ల కాలానికి ఇన్వెస్ట్‌ చేస్తేనే మీరు ఆదాయపు పన్ను చట్టం సెక్షన్‌ 80 సి కింద పన్ను మినహాయింపులు పొందే అవకాశం ఉంటుంది. ట్యాక్స్‌ సేవింగ్‌ ఫిక్స్‌డ్‌ డిపాజిట్లకు లాక్‌–ఇన్‌–పీరియడ్‌ ఐదేళ్లుగా ఉంటుంది. ఆదాయపు పన్ను చట్టం సెక్షన్‌ 80 సి కింద ఈ తరహా ట్యాక్స్‌–సేవింగ్‌ ఫిక్స్‌డ్‌ డిపాజిట్లపై పన్ను మినహాయింపులు రూ.1.5 లక్షల వరకూ పొందవచ్చు. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

అనుకోకుండా ఒక లావాదేవీ ద్వారా రూ. 30 లక్షలు వచ్చాయి. ఈ డబ్బులు ప్రస్తుతం నాకు అవసరం లేదు. వీటిని ఎలా ఇన్వెస్ట్‌ చేయాలో సలహా ఇవ్వండి. ? – వీరేష్, నెల్లూరు ఈ సొమ్ములను మీరు ఎలా ఉపయోగిస్తారో అనే దానిని బట్టి ఇన్వెస్ట్‌మెంట్‌  నిర్ణయాలు ఉంటాయి. మార్కెట్‌  బాగా ఉంది కదా అని గుడ్డిగా మార్కెట్లో ఇన్వెస్ట్‌  చేయడం సరైన పనికాదు. జీవితంలో ఇలాంటి అనూహ్య లాభాలు ఒక్కసారి వస్తాయి. అందుకని ఈ సొమ్ములను ఇన్వెస్ట్‌ చేయడంలో జాగ్రత్తగా వ్యవహరించండి. అనూహ్య లాభాలు కాబట్టి.. ఎలా బడితే అలా ఇన్వెస్ట్‌ చేయకండి.  సిస్టమేటిక్‌ ట్రాన్స్‌ఫర్‌ ప్లాన్‌(ఎస్‌టీపీ)ని మూడేళ్ల పాటు పాటించండి. మీరు ఇన్వెస్ట్‌ చేయాలనుకుంటున్న ఈక్విటీ మ్యూచువల్‌ ఫండ్స్‌ను నిర్వహించే  సంస్థకు చెందిన ఒకటి లేదు రెండు డెట్‌ ఫండ్స్‌ను ఎంచుకోండి. ఈ రూ.30 లక్షల మొత్తాన్ని ఈ డెట్‌ ఫండ్స్‌లో ఒకేసారి ఇన్వెస్ట్‌ చేయండి. నెలకు కొంత మొత్తం చొప్పున ఈ ఫండ్స్‌ నుంచి ఎస్‌టీపీ మార్గంలో మీరు దీర్ఘకాలం పాటు ఇన్వెస్ట్‌ చేయాలనుకుంటున్న ఈక్విటీ ఫండ్స్‌లోకి ఈ పెట్టుబడులను బదిలీ చేయండి. ఈ ఈక్విటీ ఫండ్స్‌లో ఈ ఇన్వెస్ట్‌మెంట్స్‌ను కనీసం ఐదేళ్లపాటైనా కొనసాగిస్తే, మీకు మంచి రాబడులు వస్తాయి.   నేను నా పిల్లల ఉన్నత చదువుల నిమిత్తం నెలకు రూ.3,000 నుంచి రూ.5,000 వరకూ పెట్టుబడులు పెట్టాలనుకుంటున్నాను. తగిన సూచనలు ఇవ్వండి ?     – మనోజ్, కరీంనగర్‌   పిల్లల ఉన్నత చదువులకు వివిధ దశల్లో పెద్ద మొత్తాలు అవసరమవుతాయి. పాఠశాల విద్య ముగిసిన తర్వాత వాళ్లు కాలేజీలో చేరేటప్పుడు, కాలేజీ విద్య ముగిసి, డిగ్రీలో చేరేటప్పుడు, ఆ తర్వాత పీజీ చేసేటప్పుడు మీకు డబ్బులు అవసరమవుతాయి. మొదటి దశ డబ్బులు మరో ఐదేళ్లలో అవసరమనుకుంటే, ముందుగా ఒక బ్యాలన్స్‌డ్‌ ఫండ్‌లో ఇప్పటి నుంచే ఇన్వెస్ట్‌ చేయడం ప్రారంభించండి. రెండో దశ డబ్బులు మరో పదేళ్లలో అవసరమనుకుంటే ఇప్పటి నుంచే కొంత మొత్తాన్ని మల్టీ క్యాప్‌ ఫండ్‌లో ఇన్వెస్ట్‌ చేయండి. మూడో దశకు అవసరమైన డబ్బులు మరో పదిహేనేళ్లలో అవసరమనుకుంటే ఇప్పటి నుంచే కొంత మొత్తాన్ని ఈక్విటీ ఫండ్‌లో ఇన్వెస్ట్‌ చేయండి. ఈ ఫండ్స్‌లో ప్రతి నెలా కొంత, కొంత మొత్తాన్ని సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తే మీకు మంచి రాబడులు వస్తాయి. ఆయా దశ డబ్బులు అవసరమయ్యే ఏడాదికి ముందే  ఆయా ఫండ్స్‌ నుంచి ఇన్వెస్ట్‌మెంట్స్‌ను ఉపసంహరించుకోవాలి. ఉదాహరణకు మొదటి దశ డబ్బులు మీకు ఐదేళ్లలో అవసరమనుకుంటే, నాలుగో ఏట నుంచి ఆ ఫండ్‌ నుంచి ఇన్వెస్ట్‌మెంట్స్‌ను వెనక్కి తీసుకోండి. ఐదే ఏటనే తీసుకోవాలనుకుంటే మార్కెట్‌ పతన బాటలో ఉంటే మీకు తగిన రాబడులు రావు. అందుకని ఒక ఏడాది ముందే ఇన్వెస్ట్‌మెంట్స్‌ ఉపసంహరించుకుంటే మంచిది.   నేను ఒక సెక్టోరియల్‌ ఫండ్‌లో రెండు నుంచి మూడేళ్ల పాటు ఇన్వెస్ట్‌  చేయాలనుకుంటున్నాను. తగిన ఫండ్‌ను సూచించండి? – కల్పన, హైదరాబాద్‌   మ్యూచువల్‌ ఫండ్స్‌లో ఇన్వెస్ట్‌ చేస్తున్నారంటే దానర్థం డైవర్సిఫికేషన్‌ ప్రయోజనాలు పొందాలని. అయితే సెక్టోరియల్‌ ఫండ్స్‌ దీనికి పూర్తిగా విరుద్ధం. ఈ ఫండ్స్‌ కేవలం ఒక్క రంగం కంపెనీలోనే ఇన్వెస్ట్‌ చేస్తాయి. సెక్టోరియల్‌ ఫండ్స్‌లో ఇన్వెస్ట్‌ చేయాలంటే బలమైన కారణాలుండాలి. మీ పోర్ట్‌ఫోలియోలో లేని రంగం కంపెనీల్లో ఇన్వెస్ట్‌ చేయడానికి సెక్టోరియల్‌ ఫండ్స్‌ను ఎంచుకోవచ్చు. లేకుంటే. సదరు రంగంపై మీకు అపారమైన అవగాహన, పరిజ్ఞానం ఉండి, భవిష్యత్తులో ఈ రంగం అంతులేని వృద్ధిని సాధిస్తుందనే అంచనాలు మీకు ఉంటేనే సెక్టోరియల్‌ ఫండ్స్‌లో ఇన్వెస్ట్‌ చేయాలి. ఇవేవీ లేనప్పుడు సెక్టోరియల్‌ ఫండ్స్‌ జోలికి వెళ్లకపోవడమే మంచిది.   నేను కోటక్‌ గోల్డ్‌ ఫండ్‌లో ఇన్వెస్ట్‌ చేద్దామనుకుంటున్నాను. స్టాక్‌ మార్కెట్‌ బాగా పెరిగిన ప్రస్తుత పరిస్థితుల్లో పుత్తడిపై పెట్టుబడి పెట్టడం సమంజసమేనా ? – సారథి, విజయవాడ   భారత్‌లో పుత్తడికి బాగా ప్రాధాన్యం ఉంది. కానీ దీర్ఘకాలంగా ఇది మంచి రాబడులనిస్తుందనే నమ్మకం చాలా మంది మార్కెట్‌ నిపుణుల్లో ఉండదు. కొన్ని యాదృచ్చిక కారణాల వల్ల మాత్రమే గత కొంత కాలంగా ఇది ఆకర్షణీయమైన పెట్టుబడిగా నిలుస్తోంది. అంతర్జాతీయ ఆర్థిక సంక్షోభం, పుత్తడి ఈటీఎఫ్‌లు అందుబాటులోకి రావడం వల్ల బంగారానికి డిమాండ్‌ పెరిగింది. కాదూ, కూడదు పుత్తడిలో కొంతైనా పెట్టుబడి పెట్టాల్సిందేనన్న పట్టుదల మీకు ఉంటే సావరిన్‌ గోల్డ్‌ బాండ్స్‌లో ఇన్వెస్ట్‌ చేయండి.  పుత్తడి రాబడులతో పాటు కొంత వడ్డీ కూడా మీరు పొందవచ్చు. వివిధ ఆర్థిక లక్ష్యాల సాధన కోసం ఈక్విటీ, డెట్‌ ఫండ్స్‌ను పరిశీలించవచ్చు. పుత్తడిని కాదు.   అత్యవసర నిధి పెట్టుబడులను లిక్విడ్‌ ఫండ్స్‌లో ఇన్వెస్ట్‌ చేయవచ్చా ? – వెంకట్, విశాఖ పట్టణం   ఎప్పుడు కావాలనుకుంటే అప్పుడు తీసుకోగలిగే వీలుండేలా అత్యవసర నిధి పెట్టుబడులు ఉండాలి.  ఈ తరహా అత్యవసర నిధి పెట్టుబడులపై వీలైనంత ఎక్కువగా రాబడి పొందాలనే ఆలోచన సరైనదే. సాధారణంగా అత్యవసర నిధులను చాలా మంది సేవింగ్స్‌ ఖాతాలో ఉంచేస్తారు. దీనిపై వచ్చే వడ్డీ చాలా తక్కువగా ఉంటుంది. లిక్విడ్‌ ఫండ్స్‌లో ఇన్వెస్ట్‌ చేస్తే అంతకంటే అధికంగానే రాబడులు పొందవచ్చు. అదృష్టవశాత్తూ మూడేళ్ల పాటు ఈ అత్యవసర నిధి సొమ్ములను వాడే అవసరం మీకు రాకుంటే, మూడేళ్ల పాటు ఈ ఇన్వెస్ట్‌మెంట్స్‌ను లిక్విడ్‌ ఫండ్స్‌లో కొనసాగిస్తే, మీకు పన్ను ప్రయోజనాలు కూడా లభిస్తాయి. ఈ రోజుల్లో స్మార్ట్‌ ఫోన్‌  ద్వారా రూ.50,000 దాకా    లిక్విడ్‌ ఫండ్‌లో ఇన్వెస్ట్‌ చేసి, రిడీమ్‌ చేసుకునే వెసులుబాటు కూడా అందుబాటులోకి వచ్చింది. ఆదిత్య బిర్లా సన్‌ లైఫ్‌మ్యూచువల్‌ ఫండ్‌ వంటి కొన్ని సంస్థలు ఈ సౌకర్యాన్ని అందిస్తున్నాయి. మీరు అరగంట నుంచి గంట వ్యవధిలోనే లిక్విడ్‌ ఫండ్‌ ఇన్వెస్ట్‌మెంట్స్‌ను రిడీమ్‌ చేసుకోవచ్చు.   - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

మల్టీక్యాప్‌ ఫండ్స్‌కు, డైనమిక్‌ ఫండ్స్‌కు మధ్య తేడా ఏమిటి ? – మాధురి, విజయవాడ ఈక్విటీల్లో ఇన్వెస్ట్‌ చేసే విధానాన్ని బట్టి మల్టీక్యాప్‌ ఫండ్స్‌కు, డైనమిక్‌ ఫండ్స్‌కు తేడా ఉంటుంది. ఎల్లప్పుడూ ఈక్విటీల్లోనే పూర్తిగా ఇన్వెస్ట్‌ చేసే ఫండ్స్‌ను మల్టీక్యాప్‌ ఫండ్స్‌గా చెప్పుకోవచ్చు. ఇక డైనమిక్‌ ఫండ్స్‌ కూడా దాదాపు అధిక స్థాయిల్లోనే ఈక్విటీల్లో ఇన్వెస్ట్‌ చేస్తాయి. అయితే మార్కెట్‌ స్థితిగతులను బట్టి, ఈక్విటీ, స్థిరాదాయ సాధనాలకు సంబంధించిన పెట్టుబడుల కేటాయింపుల్లో మార్పుచేర్పులు చేస్తాయి. అంటే మార్కెట్‌ బాగా పెరిగిన పరిస్థితుల్లో ఈక్విటీల్లో తక్కువగానూ, మార్కెట్‌ పతనమైన పరిస్థితుల్లో ఈక్విటీల్లో ఎక్కువగానూ ఇన్వెస్ట్‌ చేస్తాయి. అందుకే వీటిని డైనమిక్‌ ఫండ్స్‌గా వ్యవహరిస్తారు. మార్కెట్‌ పరిస్థితులను బట్టి డైనమిక్‌ ఫండ్‌ను నిర్వహించే ఫండ్‌ మేనేజర్‌ ఒక్కోసారి స్థిరాదాయ సాధనాల్లో 25 శాతం నుంచి 30 శాతం వరకూ ఇన్వెస్ట్‌ చేయవచ్చు. ఇక మల్టీక్యాప్‌ ఫండ్స్‌ అయితే వివిధ రంగాలకు చెందిన కంపెనీల షేర్లలో ఇన్వెస్ట్‌ చేసి డైవర్సిఫికేషన్‌ ప్రయోజనాలు పొందుతాయి.   నా వయస్సు 40 సంవత్సరాలు. నా నికర వేతనం రూ.40,000. ఈ రోజుల్లో గృహ రుణాలపై వడ్డీరేట్లు చౌకగా ఉన్నాయి. అందుకని వీలైనంత ఎక్కువ మొత్తానికి(రూ.30–35 లక్షల వరకూ) గృహ రుణం తీసుకోవాలనుకుంటున్నాను. ఇది సరైన నిర్ణయమేనా ? – రవి కుమార్, విశాఖపట్టణం   ఈ రోజుల్లో గృహరుణాలపై వడ్డీరేట్లు తక్కువగానే ఉన్నాయన్నది నిజమే. అయితే మీ విషయంలో ఎక్కువ మొత్తానికి గృహ రుణం తీసుకోవడమనేది సరైన నిర్ణయం కాదేమో అనిపిస్తోంది. మీకు వచ్చే ఆదాయంలో 60–80 శాతం వరకూ గృహ రుణ నెలసరి వాయిదాల చెల్లింపులకే పోవడం వల్ల మీ కుటుంబ ఇతర ఆర్థిక అవసరాలపై బాగానే ప్రభావం చూపుతుంది. అనుకోని పరిస్థితుల్లో మీరు ఉద్యోగం కోల్పోతే అప్పుడు పరిస్థితులు మరింత విషమిస్తాయి. ఉద్యోగం కోల్పోయిన కారణంగా ఈఎంఐలు చెల్లించలేక ఇల్లును కూడా కోల్పోవలసి వస్తుంది. అందుకని ఎవరైనా సరే, గృహ రుణానికి సంబంధించిన నెలసరి వాయిదా (ఈఎంఐ) వారి వారి  వేతనంలో మూడో వంతుకు మించకుండా చూసుకోవాలి. మీ విషయానికొస్తే, మీ గృహ రుణ ఈఎంఐ రూ.10,000–14,000 రేంజ్‌లోనే ఉండేలా ప్లాన్‌ చేసుకోండి. ఈ సందర్భంలో మీరు ఉద్యోగం కోల్పోయినా, గృహ రుణ ఈఎంఐ చెల్లించే స్థాయిలోనైనా వెంటనే మరో చిన్న ఉద్యోగం సంపాదించుకొని, సొంత ఇంటిని చేజారకుండా చూసుకోవచ్చు. అయితే గృహ రుణాలు చౌకగా ఉన్నందున ఎక్కువ మొత్తంలో గృహ రుణం తీసుకోవడం ఒక్కోసారి మంచి ఫలితాలే ఇవ్వవచ్చు.  గృహం విలువ  భవిష్యత్తులో పెరిగే అవకాశాలు ఎక్కువగా ఉంటాయి. ఈ పెరిగే విలువతో పోల్చితే,  గృహ రుణంపై అయ్యే  వ్యయాలు తక్కువగా ఉంటాయి. మీరు ఉద్యోగం కోల్పోయినా, విషమ పరిస్థితుల్లో ఈఎంఐ చెల్లింపులు కుంటుపడకుండా ఉండేటట్లయితే(మీ భార్య కూడా ఏదో ఒక ఉద్యోగం చేస్తూ గృహ రుణ ఈఎంఐ చెల్లింపులు చేయగలిగితే) వీలైనంత ఎక్కువ మొత్తంలో గృహ రుణం తీసుకోవచ్చు. అన్ని పరిస్థితులను బేరీజు వేసుకొని సరైన నిర్ణయం తీసుకోండి.   నేను ఎల్‌ఐసీ జీవన్‌ తరంగ్‌ పాలసీని 2011లో తీసుకున్నాను. పాలసీ వివరాలను మీకు పంపిస్తున్నాను. ఈ పాలసీని సరెండర్‌ చేద్దామనుకుంటున్నాను. ఈ పాలసీని సరెండర్‌ చేయడం వల్ల నేను ఏమైనా పన్నులు చెల్లించాల్సి ఉంటుందా ? ఈ పాలసీకి దీనికి బదులుగా టర్మ్‌ ఇన్సూరెన్స్‌ పాలసీని తీసుకోవాలనుకుంటున్నాను. తగిన సలహా ఇవ్వండి. – పవన్, హైదరాబాద్‌ జీవన్‌ తరంగ్‌ అనేది విత్‌ ప్రాఫిట్స్‌–హోల్‌ లైఫ్‌ ప్లాన్‌. మీరు పంపిన వివరాలను బట్టి చూస్తే, మీరు తీసుకున్న పాలసీకి బీమా కవరేజ్‌ రూ.9 కోట్లకు ఉంది. మీరు ఒక వేళ ఇప్పుడు ఈ పాలసీని సరెండర్‌ చేస్తే మీరు భారీగా నష్టపోతారు. మీరు ఇప్పటిదాకా చెల్లించిన ప్రీమియమ్‌ల్లో మొదటి ఏడాది ప్రీమియమ్‌ను మినహాయించి మిగిలిన దాంట్లో 30 శాతం మాత్రమే మీకు గ్యారంటీడ్‌ సరెండర్‌ వ్యాల్యూగా వస్తుంది. ఎల్‌ఐసీ ఒకోసారి స్పెషల్‌ సరెండర్‌ వ్యాల్యూని కూడా చెల్లించవచ్చు. ఇది గ్యారంటీడ్‌ సరెండర్‌ వ్యాల్యూ కంటే కొంచెం అధికంగానే ఉంటుంది. మీరు ఈ పాలసీ తీసుకుని మూడేళ్లు దాటింది కాబట్టి మీరు ఈ పాలసీని సరెండర్‌ చేయవచ్చు. ఈ పాలసీని సరెండర్‌ చేయడం వల్ల మీరు ఎలాంటి పన్నులు చెల్లించాల్సిన పనిలేదు. బీమా తీసుకోవాలనుకుంటే ప్యూర్‌ టర్మ్‌ ఇన్సూరెన్స్‌ పాలసీని తీసుకోవడమే ఉత్తమమైన విధానం. టర్మ్‌ బీమా పాలసీలకు చెల్లించాల్సిన ప్రీమియమ్‌ తక్కువగా ఉంటుంది. పైగా బీమా కవరేజ్‌ అధికంగా ఉంటుంది. తక్కువ ప్రీమియమ్‌ చెల్లించడం ద్వారా అధిక మొత్తానికి బీమా కవరేజ్‌ పొందవచ్చు. బీమా, ఇన్వెస్ట్‌మెంట్‌కు ఒకే పాలసీని ఎప్పుడూ తీసుకోకూడదు. బీమాకు, ఇన్వెస్ట్‌మెంట్స్‌కు వేర్వేరుగా ఇన్వెస్ట్‌ చేయాలి. బీమా కోసం టర్మ్‌ పాలసీని తీసుకున్నట్లుగానే, దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయాలి. సొంత ఇల్లు సమకూర్చుకోవడం, రిటైర్మెంట్‌ నిధి ఏర్పాటు, పిల్లల ఉన్నత చదువులు వంటి దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్‌ ఫండ్స్‌ను ఎంచుకోవాలి. ఈ ఫండ్స్‌లో నెలకు కొంత మొత్తం చొప్పున సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)విధానంలో ఇన్వెస్ట్‌చేస్తే దీర్ఘకాలంలో మంచి రాబడులు పొందవచ్చు. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. మంచి రాబడులనిచ్చే కొన్ని ఫండ్స్‌ను ఎంపిక చేశాను. కానీ, వాటి ఎయూఎమ్‌(అసెట్స్‌ అండర్‌ మేనేజ్‌మెంట్‌–నిర్వహణ ఆస్తులు) తక్కువ స్థాయిలో ఉన్నాయి. రాబడి బాగా ఉన్నప్పటికీ, ఏయూఎమ్‌ తక్కువగా ఉన్న మ్యూచువల్‌ ఫండ్స్‌లో ఇన్వెస్ట్‌ చేయవచ్చా ? – రామకృష్ణ, విజయవాడ   ఏయూఎమ్‌ తక్కువగా ఉన్నప్పటికీ, గతంలో మంచి రాబడులు సాధించిన మ్యూచువల్‌ ఫండ్స్‌లో నిరభ్యంతరంగా ఇన్వెస్ట్‌ చేయవచ్చు. ఒక్కోసారి భారీగా ఏయూఎమ్‌లు ఉన్న మ్యూచువల్‌ ఫండ్స్‌ కంటే కూడా తక్కువగా ఏయూఎమ్‌ ఉన్న మ్యూచువల్‌ ఫండ్స్‌ మంచి రాబడులనిచ్చే అవకాశాలుంటాయి. ఒక ఫండ్‌ మంచి పనితీరు కనబరుస్తోందని, ఇన్వెస్టర్లు ఆ ఫండ్‌లోనే అధికంగా ఇన్వెస్ట్‌ చేస్తే, ఆ ఫండ్‌ ఏయూఎమ్‌ బాగా పెరుగుతుంది. ఒక్కోసారి ఈ అధిక ఏయూఎమ్‌ ఆ ఫండ్‌ వృద్ధికి అవరోధం కూడా కాగలదు. అలాగని తక్కువ ఏయూఎమ్‌ ఉన్న ఫండ్స్‌ భవిష్యత్తులో మంచి రాబడులు ఇస్తాయన్న గ్యారంటీ కూడా ఏమీ లేదు. అయితే మీరు ఎంపిక చేసిన మ్యూచువల్‌ ఫండ్స్‌లో మంచి రాబడులు ఇచ్చిన ఫండ్స్‌.. వాటి ఏయూఎమ్‌ తక్కువగా ఉన్నా సరే వాటిల్లో ఎలాంటి శషభిషలు లేకుండా ఇన్వెస్ట్‌ చేయండి. దీర్ఘకాలంలో ఈక్విటీ మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తే మీరు మంచి రాబడులు పొందవచ్చు. పైగా పన్ను ప్రయోజనాలు కూడా లభిస్తాయి.   పోర్ట్‌ఫోలియో మేనేజ్‌మెంట్‌ సర్వీసెస్‌(పీఎమ్‌ఎస్‌) ద్వారా ఇన్వెస్ట్‌ చేయమని కొందరు మిత్రులు సలహా ఇస్తున్నారు. వీటిపై నియంత్రణ ఏ సంస్థ చూస్తుంది. ఈ సర్వీస్‌కు సంబంధించి పారదర్శకత ఎలా ఉంటుంది ?   – ఆంటోని, హైదరాబాద్‌ పోర్ట్‌ఫోలియో మేనేజ్‌మెంట్‌ సర్వీసులు(పీఎమ్‌ఎస్‌) అందించే సంస్థల్లో మంచివీ ఉన్నాయి. చెడ్డవీ ఉన్నాయి. పీఎమ్‌ఎస్‌ ద్వారా ఇన్వెస్ట్‌ చేస్తే అధిక ప్రయోజనాలు వచ్చే అవకాశాలు తక్కువే. ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేస్తే, ఏడాది తర్వాత వాటిని విక్రయిస్తే, వచ్చే రాబడులపై ఎలాంటి పన్నులు చెల్లించాల్సిన పనిలేదు. ఇది పీఎమ్‌ఎస్‌కు వర్తించదు. పీఎమ్‌ఎస్‌ విషయంలో ఫండ్‌ మేనేజర్‌ మీకు బదులుగా పెట్టుబడి నిర్ణయాలు తీసుకుంటారు. పవర్‌ ఆఫ్‌ అటార్నీ ద్వారా ఆ అధికారం ఆ వ్యక్తికి దక్కుతుంది. పీఎమ్‌ఎస్‌ రాబడులు సాధారణంగా స్వల్పకాలిక మూలధన లాభాలై ఉంటాయి. ఈ స్వల్పకాలిక మూలధన లాభాలపై స్వల్పకాలిక మూలధన లాభాల పన్ను చెల్లించాల్సి ఉంటుంది. పీఎమ్‌ఎస్‌పై నియంత్రణ సెబీ(సెక్యూరిటీస్‌ ఎక్సే్చంజ్‌ బోర్డ్‌ ఆఫ్‌ ఇండియా)కు ఉంటుంది. పీఎమ్‌ఎస్‌కు కనీస పెట్టుబడి రూ.25 లక్షలు. ఇది చిన్న ఇన్వెస్టర్లకు పనికి రాదు. నియంత్రణ, పారదర్శకత తదితర అంశాల్లో పీఎమ్‌ఎస్‌ కంటే మ్యూచువల్‌ ఫండ్స్‌ ఉత్తమంగా ఉంటాయి.     మా నాన్నగారు సీనియర్‌ సిటిజన్‌. పిల్లలందరినీ బాగా చదివించారు. అందరూ మంచి ఉద్యోగాల్లో సెటిల్‌ అయ్యారు. తన దగ్గర ఉన్న సొమ్ములను ఇన్వెస్ట్‌ చేయాలనుకుంటున్నారు. షేర్లంటే అయనకు పెద్దగా ఆసక్తి లేదు. కనీసం పదేళ్ల పాటు ఇన్వెస్ట్‌ చేసి, వచ్చిన సొమ్ములను తన మనవళ్లకు బహుమతిగా ఇవ్వాలనేది  ఆయన ఆలోచన. ప్రజా భవిష్య నిధి(పీపీఎఫ్‌–పబ్లిక్‌ ప్రావిడెండ్‌ ఫండ్‌) లేదా ఆల్ట్రా షార్ట్‌ టర్మ్, షార్ట్‌ టర్మ్‌ డెట్‌ ఫండ్స్‌లో ఇన్వెస్ట్‌ చేయవచ్చా ? – రవి కిరణ్, వైజాగ్‌   పన్ను ప్రయోజనాలతో పాటు గ్యారంటీ రాబడులు కావాలంటే డెట్‌ మ్యూచువల్‌ ఫండ్స్‌లో కంటే కూడా పీపీఎఫ్‌లో ఇన్వెస్ట్‌ చేయడమే ఉత్తమం. పీపీఎఫ్‌లో ఇన్వెస్ట్‌ చేసినప్పుడు, అలాగే వచ్చే రాబడులపై ఎలాంటి పన్ను భారం ఉండదు. అయితే పీపీఎఫ్‌ ఇన్వెస్ట్‌మెంట్స్‌కు 15 సంవత్సరాల లాక్‌ ఇన్‌ పీరియడ్‌ ఉంటుంది. అంటే మీ ఇన్వెస్ట్‌మెంట్స్‌ను పదిహేనేళ్ల దాకా మీరు వెనక్కి తీసుకునే వెసులుబాటు మీకు ఉండదు. అయితే రాబడులు తక్కువగా వస్తాయి.  ప్రభుత్వ సెక్యూరిటీలపై వచ్చే రాబడులే వస్తాయి. దీర్ఘకాలం పాటు ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేస్తే ఇంతకంటే మంచి రాబడులే పొందవచ్చు. పీపీఎఫ్‌ కంటే  కొంచెం అధిక రాబడులు, ఎప్పుడైనా డబ్బులు తీసుకునే వెసులుబాటు(లిక్విడిటీ) కావాలనుకుంటే మాత్రం డెట్‌ ఫండ్స్‌ను పరిశీలించవచ్చు. అయితే వీటిపై పన్ను భారం ఉంటుంది. మూడేళ్లలోపే డెట్‌ ఫండ్స్‌ యూనిట్లను విక్రయిస్తే, స్వల్పకాలిక మూలధన లాభాల పన్ను చెల్లించాల్సి ఉంటుంది. వ్యక్తి మొత్తం ఆదాయానికి ఈ రాబడిని కలిపి, వర్తించే ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది. మూడేళ్ల తర్వాత డెట్‌ ఫండ్స్‌ యూనిట్లను విక్రయిస్తే, దీర్ఘకాలిక మూలధన లాభాల పన్ను చెల్లించాల్సి ఉంటుంది. ఇది 20 శాతం(ఇండేక్సేషన్‌ ప్రయోజనంతో)గా ఉంటుంది. స్టాక్‌ మార్కెట్‌ లాగానే డెట్‌ మార్కెట్లో కూడా వివిధ బాండ్ల ధరలు పెరుగుతూ, తగ్గుతూ, ఒడిదుడుకులకు గురవుతూ ఉంటాయి. అందుకని డెట్‌ ఫండ్స్‌ రాబడులు ఏడాదికి ఏడాదికి మారుతూనే ఉంటాయి. స్వల్పకాలిక రాబడుల్లో కూడా తీవ్రమైన వ్యత్యాసమే ఉంటుంది.  ఈక్విటీ మ్యూచువల్‌ ఫండ్స్‌ను మంచి అనుభవం ఉన్న ఫండ్‌ మేనేజర్లు నిర్వహిస్తారు. కాబట్టి షేర్లలో ఇన్వెస్ట్‌ చేయడం రిస్క్‌ అనుకంటే  ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేసే అంశాన్నీ పరిశీలించవచ్చు. మీ నాన్నగారి ఇన్వెస్ట్‌మెంట్స్‌కు ఎలాంటి రిస్క్‌ వద్దనుకుంటే మాత్రం పీపీఎఫ్‌ను ఎంచుకోండి. - ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను నా ప్రజా భవిష్య నిధి (పీపీఎఫ్‌–పబ్లిక్‌ ప్రావిడెండ్‌ ఫండ్‌) ఖాతాను రెండు సార్లు పొడిగించాను. ఇలా పొడిగించిన పీపీఎఫ్‌ ఖాతాలపై వచ్చే రాబడులపై నేను ఏమైనా పన్నులు చెల్లించాల్సి ఉంటుందా ? లేక పన్ను మినహాయింపులు లభిస్తాయా ? – కృష్ణ, విజయవాడ ప్రజా భవిష్య నిధి (పీపీఎఫ్‌) ఖాతాను రెండు సార్లు పొడిగించినప్పటికీ, ఈ ఖాతా రాబడులపై మీరు ఎలాంటి పన్నులు చెల్లించాల్సిన పనిలేదు. పీపీఎఫ్‌ను పన్ను విషయంలో ‘ట్రిపుల్‌ ఈ’(ఎగ్జెంప్ట్, ఎగ్జెంప్ట్, ఎగ్జెంప్ట్‌) గా పరిగణిస్తారు. అంటే అన్ని దశల్లో పీపీఎఫ్‌ ఖాతాకు పన్ను మినహాయింపులు లభిస్తాయి. ఇన్వెస్ట్‌మెంట్‌ దశలోనూ, అది పెట్టుబడి కాలంలోనూ,  విత్‌డ్రాయల్‌ సమయంలోనూ పన్ను మినహాయింపులు పొందవచ్చు. ఇన్వెస్ట్‌మెంట్స్‌ చేసేటప్పుడు ఒక ఆర్థిక సంవత్సరంలో పీపీఎఫ్‌ ఇన్వెస్ట్‌మెంట్స్‌పై రూ. లక్షన్నర వరకూ పన్ను మినహాయింపులు పొందవచ్చు. ఇక పెట్టుబడి కాలంలో మీరు ఇన్వెస్ట్‌ చేసిన మొత్తంపై వచ్చే వడ్డీపై ఎలాంటి పన్ను భారం ఉండదు. మరోవైపు పీపీఎఫ్‌ ఖాతా మెచ్యురై, ఆ సామ్ములను మీరు ఉపసంహరించుకునేటప్పుడు కూడా మీరు నయాపైసా పన్ను చెల్లించాల్సిన పనిలేదు. రెగ్యులర్‌ ఖాతాలకే కాకుండా, పొడిగించబడిన పీపీఎఫ్‌ ఖాతాలకు కూడా ఇది వర్తిస్తుంది. నేను కొంత మొత్తాన్ని ఈక్విటీ లింక్డ్‌ సేవింగ్స్‌ స్కీమ్‌(ఈఎల్‌ఎస్‌ఎస్‌)ల్లో ఇన్వెస్ట్‌ చేద్దామనుకుంటున్నాను. ఈఎల్‌ఎస్‌ఎస్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయడం మంచిదా ? లేక ఒకేసారి పెద్ద మొత్తంలో ఇన్వెస్ట్‌ చేయడం మంచిదా ? తగిన సలహా ఇవ్వగలరు.   – జాన్సన్, వరంగల్‌   మంచి రాబడుల కోసం  ఇన్వెస్ట్‌చేయడానికి ఉన్న ఉత్తమ సాధనాల్లో ఈక్విటీ లింక్డ్‌ సేవింగ్స్‌ స్కీమ్‌(ఈఎల్‌ఎస్‌ఎస్‌)లు ఒకటి. ఈఎల్‌ఎస్‌ఎస్‌ల్లో ఇన్వెస్ట్‌ చేయడం వల్ల మంచి రాబడులు రావడమే కాకుండా పన్ను ప్రయోజనాలు కూడా లభిస్తాయి. ఇక ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయడానికి సిప్‌(సిస్టమేటిక్‌ ఇన్వెస్ట్‌మెంట్‌ ప్లాన్‌) అత్యుత్తమ ఇన్వెస్ట్‌మెంట్‌ విధానం. ఇదే ఈఎల్‌ఎస్‌ఎస్‌లకు కూడా వర్తిస్తుంది. మీరు నెలకు కొంత మొత్తం సిప్‌ విధానంలో ఇన్వెస్ట్‌ చేస్తేనే మార్కెట్‌ ఒడిదుడుకుల నుంచి రక్షణ పొందవచ్చు. అలా కాకుండా ఒకేసారి పెద్ద మొత్తంలో ఇన్వెస్ట్‌ చేశారనుకోండి. ఆ తర్వాత మార్కెట్‌ పతనమైతే మీకు భారీ నష్టాలు వచ్చే అవకాశాలుంటాయి.  సిప్‌ విధానంలో ఇన్వెస్ట్‌ చేస్తే ఇలాంటి ప్రతికూల పరిస్థితుల నుంచి తప్పించుకోవచ్చు. మీ దగ్గర పెద్ద మొత్తంలో ఇన్వెస్ట్‌ చేయదగ్గ సొమ్ములుంటే వాటిని కనీసం 6–12 భాగాలుగా విభజించి నెలకు కొంత మొత్తం చొప్పున సిప్‌ విధానంలో ఇన్వెస్ట్‌ చేయండి. చాలా మంది కేవలం పన్ను ఆదా కోసమే ఈఎల్‌ఎస్‌ఎస్‌ల్లో ఇన్వెస్ట్‌ చేస్తారు. కానీ, సంపద సృష్టికి ఈఎల్‌ఎస్‌ఎస్‌లు మంచి మార్గమని చెప్పవచ్చు. వీటికి లాక్‌–ఇన్‌ పీరియడ్‌ ఉండటం ప్రయోజనకరమే. ఈ తరహా ఇన్వెస్ట్‌మెంట్‌ సాధనాల్లో కనీసం 5–7 ఏళ్లపాటు ఇన్వెస్ట్‌ చేస్తే మంచి రాబడులు పొందవచ్చు. నేను షేర్లు, వివిధ రకాల మ్యూచువల్‌ ఫండ్స్‌లో గత కొన్నేళ్లుగా  ఇన్వెస్ట్‌ చేస్తున్నాను. ఈ ఆర్థిక సంవత్సరంలో షేర్ల ఇన్వెస్ట్‌మెంట్స్‌లో మూలధన నష్టాలు వచ్చాయి. అలాగే డెట్‌ మ్యూచువల్‌ ఫండ్స్‌లో స్వల్పకాలిక లాభాలు వచ్చాయి. షేర్లలో వచ్చిన నష్టాలను, మ్యూచువల్‌ ఫండ్స్‌లో వచ్చిన లాభాలతో భర్తీ చేసుకోవచ్చా? – మౌనిక, హైదరాబాద్‌ షేర్లలో వచ్చిన స్వల్పకాలిక మూలధన నష్టాలను, డెట్‌ ఫండ్స్‌లో వచ్చిన స్వల్పకాలిక మూలధన లాభాలతో భర్తీ చేసుకోవచ్చు. అంతే కాకుండా ఈక్విటీ, డెట్‌ మ్యూచువల్‌ ఫండ్స్‌లో వచ్చే దీర్ఘకాలిక మూలధన లాభాలతో కూడా భర్తీ చేసుకోవచ్చు. అయితే ఈ నష్టాల భర్తీ ప్రస్తుత ఆర్థిక సంవత్సరంలో జరగదు, ఈ నష్టాలను తర్వాతి ఆర్థిక సంవత్సరానికి క్యారీ ఫార్వార్డ్‌ చేసి, స్వల్పకాలిక లేదా దీర్ఘకాలిక మూలధన లాభాలతో భర్తీ చేసుకోవచ్చు.  ఎనిమిదేళ్ల పాటు ఇలా నష్టాలను భర్తీ చేసుకునే అవకాశం ఉంది. కానైతే మీరు సకాలంలో ఐటీ రిటర్న్‌లు దాఖలు చేయాల్సి ఉంటుంది.   నేను సాఫ్ట్‌వేర్‌ ఇంజనీర్‌గా పనిచేస్తున్నాను. మా అమ్మకు బంగారు గాజులు చేయిద్దామనుకుంటున్నాను. అలా కాకుండా గోల్డ్‌ ఈటీఎఫ్‌(ఎక్సే్చంజ్‌ ట్రేడెడ్‌ ఫండ్స్‌)ల్లో పెట్టుబడులు పెట్టమని మిత్రులు కొందరు సలహా ఇస్తున్నారు. గోల్డ్‌ ఈటీఎఫ్‌ల్లో పెట్టుబడులు పెట్టవచ్చా ? మంచి రాబడులు వస్తాయా ? – రోహిత్, విశాఖపట్టణం   భారతీయులకు బంగారం అంటే మోజు. అందుకే బంగారు అభరణాలు కొనుగోలు చేస్తుంటారు. మనం వాడుకోవడం కోసం పుత్తడి ఆభరణాలు కొంటాం కానీ, ఇదొక ఇన్వెస్ట్‌మెంట్‌ అని కూడా అంటూ ఉంటాం. నా దృష్టిలో బంగారం అనేది అనుత్పాదక ఆస్తి. మీరు సావరిన్‌ గోల్డ్‌ బాండ్స్, గోల్డ్‌ ఈటీఎఫ్‌లు, గోల్ట్‌ ఫండ్‌... ఇలా ఏ రూపంలో ఇన్వెస్ట్‌ చేసినా పెద్దగా ఒరిగేది ఏమీ ఉండదు. కీలకమైన ఆర్థికపరమైన ఇన్వెస్ట్‌మెంట్స్‌ అంటే ఈక్విటీ, లేదా స్థిరాదాయం ఇచ్చే ఫిక్స్‌డ్‌ ఇన్‌కమ్‌ సాధనాలే. సావరిన్‌ గోల్డ్‌ బాండ్‌లో రికరింగ్‌ డిపాజిట్‌ స్కీమ్‌ ప్రారంభించాలని ప్రభుత్వం యోచిస్తోంది. దీనిని పెట్టుబడులకు పరిశీలించవచ్చు. ఒక పెట్టుబడిగా పుత్తడిని ఎప్పుడూ పరిగణించవద్దు. అలాకాక మీ అమ్మగారికో, భార్యకో, తోబుట్టువుకో, లేక మీ చిన్నారికో వినియోగం కోసం అయితే బంగారం కొనుగోలు చేయండి. అంతేగాని దీనిని ఎప్పుడూ ఒక ఇన్వెస్ట్‌మెంట్‌గా చూడకండి.   - ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను ఒక మ్యూచువల్‌ ఫండ్‌లో ఇన్వెస్ట్‌ చేయాలి అనుకుంటున్నాను. ఇలా ఒక ఫండ్‌లో ఇన్వెస్ట్‌ చేసే ముందు ఆ ఫండ్‌ ఏయూఎమ్‌(అసెట్స్‌ అండర్‌ మేనేజ్‌మెంట్‌–నిర్వహణ ఆస్తుల)ను పరిగణనలోకి తీసుకోవాలా ? ఏయూఎమ్‌ ఎంత ఎక్కువగా ఉంటే అంత మంచిదా ? అసలు ఏయూఎమ్‌ ఎంత ఉంటే ఆ ఫండ్‌లో ఇన్వెస్ట్‌ చేయవచ్చు ? – రాధిక, విజయవాడ   ఏదైనా మ్యూచువల్‌ ఫండ్‌లో ఇన్వెస్ట్‌ చేయాలనుకున్నప్పుడు ఆ ఫండ్‌ ఏయూఎమ్‌(అసెట్స్‌ అండర్‌ మేనేజ్‌మెంట్‌–నిర్వహణ ఆస్తులు) ఎంత ఉందో తెలుసుకోవడం మంచిదే. అయితే మనం ఇన్వెస్ట్‌ చేయాలనుకున్నది ఏ రకం ఫండ్‌ అనే దానిని బట్టే ఏయూఎమ్‌ను పరిగణించే విషయం ఆధారపడి ఉంటుంది. ఉదాహరణకు మనం లిక్విడ్‌ ఫండ్‌లో ఇన్వెస్ట్‌ చేద్దామనుకున్నామనుకోండి. అత్యధిక ఏయూఎమ్‌ ఉన్న ఫండ్‌ ఉత్తమమైన ఫండ్‌ అని చెప్పవచ్చు. అంటే మిగిలిన లిక్విడ్‌ ఫండ్స్‌ కన్నా అధికంగా  నిర్వహణ ఆస్తులు (ఏయూఎమ్‌) ఉన్న ఫండ్‌నే ఇన్వెస్ట్‌మెంట్‌ కోసం ఎంచుకోవాలి. వడ్డీరేట్లు, లేదా రుణాలు, తదితర అంశాలకు సంబంధించి ప్రతికూల పరిస్థితులు తలెత్తినప్పుడు అధిక ఏయూఎమ్‌ ఉన్న ఫండ్‌ తట్టుకోగలుగుతుంది. ఇక  స్మాల్‌ మ్యూచువల్‌ ఫండ్‌ విషయానికొస్తే, అధిక ఏయూఎమ్‌ అనేది ఒక్కోసారి వరమవుతుంది. మరోసారి అదే గుదిబండ అవుతుంది. ఈ ఫండ్‌ పనితీరు బాగా ఉన్నప్పుడు ఇన్వెస్ట్‌మెంట్స్‌ ఇబ్బడిముబ్బడిగా వచ్చి పడతాయి. ఇలా భారీగా నిధులు వచ్చినప్పుడు నిర్వహణ కష్టమవుతుంది. లిక్విడిటీ సమస్యలు ఉండే అవకాశాలూ లేకపోలేదు. ఇక లార్జ్‌ క్యాప్‌ మ్యూచువల్‌ ఫండ్‌ విషయానికొస్తే, ఏయూఎమ్‌ను అసలు పరిగణించాల్సిన అవసరమే లేదు. లార్జ్‌క్యాప్‌ ఫండ్‌కు భారీగా  నిధులుంటాయి. ఈ లార్జ్‌క్యాప్‌ ఫండ్స్‌ను నిర్వహించే ఫండ్‌ మేనేజర్లు ప్రాధాన్యతల కారణంగా లిక్విడిటీ సమస్యలు తలెత్తే అవకాశాలూ తక్కువగా ఉంటాయి. సాధారణంగా చెప్పాలంటే మీరు ఏదైనా లార్జ్‌క్యాప్‌ ఫండ్‌లో ఇన్వెస్ట్‌ చేయాలనుకుంటున్నారనుకోండి. కనీసం రూ.35,000–40,000 కోట్ల రేంజ్‌లో ఏయూఎమ్‌ ఉన్న ఫండ్స్‌ను ఎంచుకోండి. మల్టీక్యాప్‌ ఫండ్స్‌కు అయితే ఏయూఎమ్‌ రూ.20,000 కోట్లకు తగ్గకుండా ఉండాలి. ఇక స్మాల్‌ క్యాప్‌ ఫండ్‌కైతే ఏయూఎమ్‌ రూ.3,000–5,000 కోట్లపైన ఉంటేనే మంచిది.   మ్యూచువల్‌ ఫండ్స్‌కు సంబంధించి చార్జీలు ఎలా ఉంటాయి ? మనకు కనిపించని, అర్థం కాని చార్జీల భారం మనపై ఏమైనా ఉంటుందా? – హుస్సేన్, హైదరాబాద్‌ చార్జీల విషయంలో మ్యూచువల్‌ ఫండ్స్‌ పారదర్శకంగానే ఉంటాయని చెప్పవచ్చు. మనకు కనిపించని, అర్థం కాని చార్జీల భారం దాదాపు ఉండదు. మనం మ్యూచువల్‌ ఫండ్‌లో ఇన్వెస్ట్‌ చేసేటప్పుడు ఒకే ఒక చార్జీ.. ఎక్స్‌పెన్స్‌ రేషియో ఉంటుంది. ఈ ఒక్క చార్జీలోనే అన్ని చార్జీలు కలసిఉంటాయి. మేనేజ్‌మెంట్‌ ఫీజు, అమ్మకాల వ్యయాలు, నిర్వహణ వ్యయాలు, రిజిష్ట్రార్‌ ఫీజు, కస్టోడియన్‌ ఫీజు, ఇతర వ్యయాలు.. ఇవన్నీ కలసి ఈ ఎక్స్‌పెన్స్‌ రేషియోలోనే ఉంటాయి. అయితే ఈ ఎక్స్‌పెన్స్‌ రేషియో ఫండ్‌ను బట్టి, స్కీమ్‌ను బట్టి మారుతూ ఉంటుంది. ఒకే ఫండ్‌ రెగ్యులర్‌ ప్లాన్‌కు ఒక రకంగానూ, డైరెక్ట్‌ ప్లాన్‌కు మరో రకంగానూ ఎక్స్‌పెన్స్‌ రేషియో ఉంటుంది. సాధారణంగా ఒక ఈక్విటీ ఫండ్‌ ఎక్స్‌పెన్స్‌ రేషియో 2.5–2.65% ఉంటుంది. డైరెక్ట్‌ ప్లాన్‌లకు అయితే 50–75 బేసిస్‌ పాయింట్లు తక్కువగా ఉంటుంది. డెట్‌ ఫండ్స్‌ ఎక్స్‌పెన్స్‌ రేషియో ఇంకా తక్కువగా ఉంటుంది.   మ్యూచువల్‌ ఫండ్‌ యూనిట్లను విక్రయించినప్పుడు ఎగ్జిట్‌ లోడ్‌ ఉంటుంది. ఇది కూడా ఫండ్‌ను బట్టి,  ఎంత కాలం ఇన్వెస్ట్‌ చేశారు అనే విషయాలను బట్టి ఆధారపడి ఉంటుంది. కొనుగోలు చేసిన ఏడాదిలోపే ఈక్విటీ ఫండ్‌ యూనిట్లను విక్రయిస్తే, సదరు సంస్థ ఎగ్జిట్‌ లోడ్‌ వసూలు చేస్తుంది. ఏడాది తర్వాత విక్రయిస్తే, ఎలాంటి ఎగ్జిట్‌ లోడ్‌ ఉండదు. డెట్‌ ఫండ్స్‌కైతే ఈ ‘ఇన్వెస్ట్‌మెంట్‌ పీరియడ్‌’ వేరే విధంగా ఉంటుంది. ఇక లిక్విడ్‌ ఫండ్స్‌ ఎలాంటి ఎగ్జిట్‌లోడ్‌ను వసూలు చేయవు. ఇక ఫండ్స్‌కు సంబంధించిన మరో ముఖ్యమైన చార్జీ.. సెక్యూరిటీస్‌ ట్రాన్సాక్షన్‌ ట్యాక్స్‌(ఎస్‌టీటీ). ఈక్విటీ, బ్యాలన్స్‌డ్,, ఆర్బిట్రేజ్‌ ఫండ్స్‌ విక్రయాలపై ఈ ఎస్‌టీటీని చెల్లించాల్సి ఉంటుంది.   నా ఫైనాన్షియల్‌ ప్లానింగ్‌లో ఎన్‌పీఎస్‌(నేషనల్‌ పెన్షన్‌ సిస్టమ్‌)కు తప్పనిసరిగా చోటివ్వాలా ? ఈక్విటీలు, ఫండ్స్‌ల్లో ఇన్వెస్ట్‌ చేసినా కూడా ఎన్‌పీఎస్‌లో కూడా ఇన్వెస్ట్‌ చేయాల్సిందేనని కొందరు మిత్రులంటున్నారు. తగిన సలహా ఇవ్వండి.      – కృష్ణన్, చెన్నై   మీరు బ్యాలన్స్‌డ్‌ ఫండ్‌ లేదా టర్మ్‌ బీమా పాలసీ లేదా ఆరోగ్య పాలసీలో ఇన్వెస్ట్‌ చేస్తున్నట్లయితే ఎన్‌పీఎస్‌లో ఇన్వెస్ట్‌ చేయాల్సిన అవసరం లేదు. ఎన్‌పీఎస్‌లో ఇన్వెస్ట్‌ చేసిన సొమ్ము మీరు రిటైరయ్యేదాకా లాక్‌ అయి ఉంటాయి. ఎన్‌పీఎస్‌లో ఇన్వెస్ట్‌ చేసిన పెట్టుబడులను మీరు రిటైరయ్యేదాకా తీసుకునే వెసులుబాటు దాదాపు లేదు. ఎన్‌పీఎస్‌లో ఇన్వెస్ట్‌ చేయడం ఒక క్రమశిక్షణను అలవాటు చేస్తుంది. ఆర్థిక క్రమశిక్షణ లేని చాలా మందికి ఇది నిజంగా మంచి పథకం. కానీ ఆర్థిక క్రమశిక్షణ ఉండి, పొదుపు, మదుపుల గురించి సరైన అవగాహన ఉండి, వాటి ప్రాముఖ్యత తెలిసిన వారికి, చిల్లర, మల్లర ఖర్చుల కోసం చీటికీ, మాటికీ మదుపు చేసిన డబ్బులను వాడని వాళ్లకి, ఎన్‌పీఎస్‌ అవసరం లేదు. ఒకవేళ మీరు ఎన్‌పీఎస్‌లో ఇన్వెస్ట్‌ చేయాలనుకుంటే ఈ ప్లాన్‌ విషయమై దూకుడు స్వభావమున్న ఆప్షన్లను ఎంచుకోవాలి. ఎందుకంటే ఎన్‌పీఎస్‌లో అత్యంత దూకుడు స్వభావమున్న ప్లాన్‌ కూడా ఉదార స్వభావం గలదేనని చెప్పవచ్చు. వీలైనంత ఎక్కువగా ఈక్విటీకి కేటాయింపులు జరపండి. మీరు రిటైరయ్యే ఐదేళ్లముందు వరకూ ఈ ఈక్విటీ కేటాయింపులు కొనసాగించండి. మీరు మరో ఐదేళ్లలో రిటైరవుతారు అన్న సమయానికి వీటిల్లో గరిష్ట ఇన్వెస్ట్‌మెంట్స్‌ను స్థిరాదాయ సాధనాలున్న ఆప్షన్లోకి మార్చుకోండి.   - ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఐదు మ్యూచువల్‌ ఫండ్స్‌లో నెలకు కొంత మొత్తం చొప్పున ఇన్వెస్ట్‌  చేద్దామనుకుంటున్నాను. ఒక్కో సిప్‌కు నెలలో ఒక్కో తేదీని ఎంచుకోవాలా లేక అన్ని ఫండ్స్‌ల  సిప్‌ల్లో  ఒకే తేదీన ఇన్వెస్ట్‌ చేయమంటారా ? –వాణి, హైదరాబాద్‌   మ్యూచువల్‌ ఫండ్స్‌కు సంబంధించి సిప్‌ విధానంలో ఇన్వెస్ట్‌ చేయడానికి మీరు ఈ రెండింటిలో ఏ మార్గాన్నైనా ఎంచుకోవచ్చు. మ్యూచువల్‌ ఫండ్స్‌ల్లో దీర్ఘకాలం పాటు ఇన్వెస్ట్‌ చేయడానికి, ఒక్కో సిప్‌కు ఒక్కో తేదీని ఎంచుకున్నా, లేదా అన్ని ఫండ్స్‌ సిప్‌లకు ఒకే తేదీన ఇన్వెస్ట్‌ చేసినా మీరు పొందే రాబడులపై ఎలాంటి తేడా ఉండదు. అందుకని ఈ విషయంలో ఎలాంటి ఆలోచన అవసరం లేదు. ఒక్కో సిప్‌కు ఒక్కో తేదీని ఎంచుకోవడం వల్ల ప్రతి నెలా కొంత గందరగోళం ఏర్పడే అవకాశం ఉంటుంది. మీరు కనుక నెలవారీ ఆదాయం పొందుతున్న లేదా ఉద్యోగం చేస్తున్న వారైతే ఒకే రోజు అన్ని ఫండ్స్‌లో ఇన్వెస్ట్‌ చేయడం మంచిది. సాధారణంగా చాలా మంది ఇన్వెస్టర్లు నెల మొదటి వారంలో సిప్‌ల్లో ఇన్వెస్ట్‌ చేస్తారు.   నేను ఐసీఐసీఐ ప్రు లైఫ్‌టైమ్‌ పెన్షన్‌–ఐఐ పాలసీని తీసుకున్నాను. పదేళ్ల పాటు ఏడాదికి రూ.10,000 చొప్పున వార్షిక ప్రీమియమ్‌ చెల్లించాను.  ఆరోగ్య  కారణాలను చూపుతూ ఈ పాలసీని ఇప్పుడు సరెండర్‌ చేయవచ్చా? నాకు ఎంత మొత్తం పెన్షన్‌ వస్తుంది? –చైతన్య, విజయవాడ   ఐసీఐసీఐ ప్రు లైఫ్‌టైమ్‌ పెన్షన్‌–ఐఐ పాలసీ అనేది యునిట్‌ లింక్డ్‌ పెన్షన్‌ ప్లాన్‌. ఈ తరహా పెన్షన్‌ ప్లాన్లు మెచ్యూర్‌ అయినప్పుడు, మెచ్యూరిటీ మొత్తంలో మూడో వంతు మొత్తాన్ని ఏక మొత్తంలో ఒకేసారి విత్‌డ్రా చేసుకోవచ్చు. మిగిలిన మొత్తాన్ని యాన్యుటీగా మార్చుకోవాలి. ఇక ఇప్పుడు మీరు ప్లాన్‌ను సరెండర్‌ చేసే అవకాశం లేదు. ఆరోగ్య కారణాలను చూపుతూ కూడా ఈ పాలసీని సరెండర్‌ చేసే అవకాశాలు మీకు లేవు. అందుకని మీ మెచ్యూరిటీ మొత్తంలో మూడో వంతు మొత్తాన్ని విత్‌డ్రా చేసుకోండి. మిగిలిన దానిని మీ ఛాయిస్‌ ప్రకారం యాన్యుటీ ఆప్షన్‌ను ఎంచుకోండి. మీకు దగ్గరలోని సదరు బీమా సంస్థ కార్యాలయాన్ని సంప్రదించి యాన్యుటీకి సంబంధించి మీకు లభించే ఛాయిస్‌లు, తదితర అంశాల గురించి వివరంగా తెలుసుకోండి. మీ పాలసీ మెచ్యూరిటీ తేదీని ఉన్న ఫండ్‌ విలువను బట్టి యాన్యుటీ విలువ ఆధారపడి ఉంటుంది. భవిష్యత్తులో ఇన్వెస్ట్‌మెంట్‌ కోసం ఎప్పుడు బీమా సంబంధిత పాలసీలను తీసుకోవద్దు. పెట్టుబడికి, బీమాకు వేర్వేరుగా పెట్టుబడులు పెట్టాలి. జీవిత బీమా కోసం టర్మ్‌ బీమా పాలసీ తీసుకోవాలి. టర్మ్‌ బీమా పాలసీల్లో తక్కువ ప్రీమియమ్‌తో ఎక్కువ బీమా కవరేజ్‌ పొందవచ్చు. ఇక పిల్లల ఉన్నత విద్యాభ్యాసం, రిటైర్మెంట్‌ నిధి ఏర్పాటు, సొంత ఇల్లు సమకూర్చుకోవడం తదితర దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయాలి.   నా వయస్సు 43 సంవత్సరాలు. నేను హెచ్‌డీఎఫ్‌సీ రిటైర్మెంట్‌ ఫండ్‌–హైబ్రిడ్‌ ఈక్విటీ ప్లాన్‌లో ఇన్వెస్ట్‌ చేయాలనుకుంటున్నాను. నాకు 60 సంవత్సరాల వయస్సు వచ్చిన తర్వాత ఈ ఫండ్‌ యూనిట్లను విక్రయిస్తే, నేను ఏమైనా పన్నులు చెల్లించాల్సి ఉంటుందా ? నా ఇన్వెస్ట్‌మెంట్స్‌ను ఈ ఫండ్‌లో నాకు 58 సంవత్సరాలు వచ్చే వరకూ కొనసాగించి, ఆ తర్వాత వేరే డెట్‌ ఫండ్‌లోకి మార్చుకోవాలనుకుంటున్నాను. ఇలా మార్చుకున్నందువల్ల అప్పుడు నేను ఏమైనా పన్నులు చెల్లించాల్సి ఉంటుందా ?   –చెన్న గౌడ, బెంగళూరు   హెచ్‌డీఎఫ్‌సీ రిటైర్మెంట్‌ ఫండ్‌–హైబ్రిడ్‌ ఈక్విటీ ప్లాన్‌ అనేది ఈక్విటీ ఆధారిత మ్యూచువల్‌ ఫండ్‌. ఇతర ఈక్విటీ ఫండ్‌కు వర్తించే పన్ను నిబంధనలే ఈ ఫండ్‌కు కూడా వర్తిస్తాయి. ఈక్విటీ ఫండ్స్‌లో ఏడాదికి మించి ఇన్వెస్ట్‌మెంట్స్‌ను కొనసాగిస్తే, ఎలాంటి దీర్ఘకాల మూలధన లాభాల పన్ను చెల్లించాల్సిన పనిలేదు. మీరు ఈ ఫండ్‌లో దాదాపు 17 ఏళ్లు ఇన్వెస్ట్‌ చేయాలనుకుంటున్నారు. కాబట్టి  మీరు దీర్ఘకాల మూలధన లాభాల పన్ను చెల్లించాల్సిన అవసరం లేదు. మీకు 58 సంవత్సరాలు వచ్చిన తర్వాత హెచ్‌డీఎఫ్‌సీ రిటైర్మెంట్‌ ఫండ్‌–హైబ్రిడ్‌ ఈక్విటీ నుంచి మీ ఇన్వెస్ట్‌మెంట్స్‌ ను వేరే డెట్‌ ఫండ్‌లోకి మార్చుకున్నందువల్ల మీపై ఎలాంటి పన్ను భారం ఉండదు. ఒక ఫండ్‌ నుంచి మరో ఫండ్‌లోకి ఇన్వెస్ట్‌మెంట్స్‌ను మార్చుకోవడం/బదిలీ చేయడాన్ని ఒక ఫండ్‌ నుంచి  ఇన్వెస్ట్‌మెంట్స్‌ను విక్రయించి, మరో ఫండ్‌లో ఇన్వెస్ట్‌ చేయడంగా పరిగణిస్తారు. ఏడాది దాటిన ఈక్విటీ ఫండ్స్‌ను ఇతర ఫండ్స్‌లోకి బదిలీ చేస్తే ఎలాంటి దీర్ఘకాల మూలధన లాభాల పన్ను ఉండదు. అయితే  హెచ్‌డీఎఫ్‌సీ రిటైర్మెంట్‌ ఫండ్‌–హైబ్రిడ్‌ ఈక్విటీ నుంచి ఇన్వెస్ట్‌మెంట్స్‌ను.. ఇన్వెస్ట్‌ చేసిన వ్యక్తి తనకు 59 సంవత్సరాలు రాకముందే విక్రయిస్తే, 1 శాతం ఎగ్జిట్‌ లోడ్‌ చెల్లించాల్సి ఉంటుంది. ఈ విషయాన్ని పరిగణనలోకి తీసుకొని మీరు ఇతర ఫండ్స్‌లోకి మార్చుకునే విషయంపై నిర్ణయం తీసుకోండి. ఎలాగూ మీకు 58 సంవత్సరాలు వచ్చే వరకూ ఇన్వెస్ట్‌మెంట్స్‌ కొనసాగించాలనుకుంటున్నారు. కాబట్టి, మరో ఒక్క ఏడాది కూడా కొనసాగిస్తే, మీకు ఈ 1 శాతం ఎగ్జిట్‌ లోడ్‌ భారం కూడా ఉండదు.    – ధీరేంద్ర కుమార్‌ సీఈవో, వ్యాల్యూ రీసెర్చ్‌

నేను గత కొన్నేళ్లుగా ఒక ఈక్విటీ మ్యూచువల్‌ ఫండ్‌లో సిప్‌ విధానంలో ఇన్వెస్ట్‌ చేస్తున్నాను. కానీ ఈ ఫండ్‌ పనితీరు అంచనాలకు అనుగుణంగా లేదు. ఈ ఫండ్‌ నుంచి ఇన్వెస్ట్‌మెంట్స్‌ను పూర్తిగా వెనక్కి తీసుకొని వేరే ఫండ్‌లోకి మారుద్దామనుకుంటున్నాను.  ఇలా ఒకేసారి ఒక ఫండ్‌ నుంచి మరో ఫండ్‌లోకి ఇన్వెస్ట్‌మెంట్స్‌ను మార్చుకోవచ్చా ? పన్ను బాధ్యత ఏమైనా ఉంటుందా ? –విజయ్, విశాఖపట్టణం   ఒక ఈక్విటీ ఫండ్‌లో మీరు ఇప్పటిదాకా ఇన్వెస్ట్‌ చేసిన ఇన్వెస్ట్‌మెంట్స్‌ అన్నింటినీ ఒకేసారి వెనక్కి తీసుకొని వేరే ఫండ్‌లోకి ఇన్వెస్ట్‌ చేయడంలో ఎలాంటి ఇబ్బంది లేదు. ఈక్విటీ ఫండ్స్‌లో ఇన్వెస్ట్‌ చేయడానికి సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానమే సరైనది. సాధారణంగా ఈక్విటీ ఫండ్స్‌ దీర్ఘకాలంలో మంచి రాబడులే ఇస్తాయి. కేవలం 3,4 సంవత్సరాల పనితీరును ఆధారంగా చేసుకొని వేరే ఫండ్‌లోకి ఇన్వెస్ట్‌మెంట్స్‌ను మార్చాలనుకోవడం సరికాదు. కాదు, కూడదు ఫండ్‌ను మార్చాలనేది మీ నిర్ణయమైతే, మీరు.. కొన్ని విషయాలను పరిగణనలోకి తీసుకోవాలి. ఎగ్జిట్‌ లోడ్‌ వర్తిస్తుందేమో అన్న విషయాన్ని చెక్‌ చేసుకోవాలి. మీ సిప్‌లకు ఎగ్జిట్‌ లోడ్‌ వర్తించే కాలం ముగిసిన తర్వాతే వేరే ఫండ్‌లోకి ఇన్వెస్ట్‌మెంట్స్‌ను బదిలీ చేసుకుంటే ఎగ్జిట్‌ లోడ్‌ వ్యయాలు తగ్గుతాయి.  ఇక ఒక ఫండ్‌ నుంచి వేరే ఫండ్‌లోకి మారడమంటే ఒక ఫండ్‌ నుంచి పెట్టుబడులను ఉపసంహరించుకొని, వేరే కొత్త ఫండ్‌లో ఇన్వెస్ట్‌చేయడంగా పరిగణిస్తారు. అందుకని మీ పాత ఫండ్‌ ఇన్వెస్ట్‌మెంట్స్‌పై స్వల్పకాలిక మూలధన లాభాల పన్ను వర్తిస్తుందేమో ఒక సారి చెక్‌ చేయండి.  అలా వర్తించే పక్షంలో స్వల్పకాలిక మూలధన లాభాల పన్ను భారం పడని కాలం వరకూ వేచి చూసి, ఆ తర్వాత వేరే ఫండ్‌లోకి మీ ఇన్వెస్ట్‌మెంట్స్‌ను మార్చుకోండి.   ఫిక్స్‌డ్‌ డిపాజిట్లలో చక్రవడ్డీ ప్రయోజనాలు లభిస్తాయి. అలాంటి ప్రయోజనం మ్యూచువల్‌ ఫండ్స్‌లో ఇన్వెస్ట్‌ చేస్తే లభిస్తుందా ? –మేరీ, సికింద్రాబాద్‌   చక్రవడ్డీ ప్రయోజనాలు మ్యూచువల్‌ ఫండ్స్‌లో లభిస్తాయి. మ్యూచువల్‌ ఫండ్స్‌కు సంబంధించి గ్రోత్‌ ప్లాన్‌లు ఈ తరహావే అని చెప్పవచ్చు. అయితే వీటిని ఫిక్స్‌డ్‌ డిపాజిట్లుగా పరిగణించడానికి లేదు. ఎందుకంటే, ఫిక్స్‌డ్‌ డిపాజిట్లలో ఎంత కాలం ఇన్వెస్ట్‌ చేస్తే, ఎంత మొత్తం రాబడి వస్తుందో ముందే తెలుస్తుంది. మ్యూచువల్‌ ఫండ్స్‌లో ఇన్వెస్ట్‌ చేస్తే  ఇంత మొత్తాల్లో రాబడులు వస్తాయని గ్యారంటీగా చెప్పలేము. అయితే అంతకు మించిన లాభాలు వచ్చాయని చరిత్ర చెబుతోంది. గత 20 ఏళ్లలో బీఎస్‌ఈ సెన్సెక్స్‌ 17–18 శాతం చొప్పున వృద్ధి సాధించింది. ఇది డిపాజిట్‌ రేట్‌కన్నా దాదాపు రెట్టింపు. కొన్ని మ్యూచువల్‌ ఫండ్స్‌ ఏడాదికి 20–22 శాతం చక్రగతి రాబడులను కూడా ఇచ్చాయి.   నేను దీర్ఘకాలం పాటు మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను.  కొన్ని బ్యాలన్స్‌డ్‌ ఫండ్స్‌ను షార్ట్‌లిస్ట్‌ చేశాను. ఇటీవలే కంపెనీ నుంచి రూ. లక్ష వరకూ బోనస్‌ వచ్చింది. ఈ మొత్తాన్ని  ఒకేసారి  ఇన్వెస్ట్‌ చేయమంటారా ? ఈ మొత్తాన్ని బ్యాంక్‌లో డిపాజిట్‌ చేసి నెలకు కొంత మొత్తం చొప్పున   సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయమంటారా ? –సందీప్, విజయవాడ   ఈక్విటీ గానీ, బ్యాలన్స్‌డ్‌ మ్యూచువల్‌ ఫండ్స్‌లో కానీ ఇన్వెస్ట్‌ చేయాలనుకున్నప్పుడు సిప్‌ విధానమే శ్రేయస్కరం. మీ దగ్గర ఇన్వెస్ట్‌ చేయడానికి పెద్ద మొత్తంలో డబ్బులు ఉన్నప్పుడు. ముందుగా మీరు షార్ట్‌ టర్మ్‌ డెట్‌ ఫండ్‌లో ఆ మొత్తాన్ని ఇన్వెస్ట్‌ చేయండి. ఆ తర్వాత ఒక మంచి బ్యాలన్స్‌డ్‌ ఫండ్‌ను ఎంచుకోండి. ఈ షార్ట్‌ టర్మ్‌ డెట్‌ ఫండ్‌ నుంచి సిస్టమేటిక్‌ ట్రాన్స్‌ఫర్‌ ప్లాన్‌(ఎస్‌టీపీ) ద్వారా మీ ఇన్వెస్ట్‌మెంట్స్‌ను బ్యాలన్స్‌డ్‌ ఫండ్‌కు మార్చుకోండి. ఇలా చేస్తే, మీరు బ్యాలన్స్‌డ్‌ ఫండ్‌లో ఇన్వెస్ట్‌ చేయడానికి ముందు మీరు బ్యాంక్‌లో ఉంచేదానికన్నా అధికంగానే షార్ట్‌ టర్మ్‌డెట్‌ ఫండ్‌ ద్వారా రాబడులు పొందవచ్చు. బ్యాలన్స్‌డ్‌ ఫండ్‌లో ఇన్వెస్ట్‌ చేయడాన్ని కనీసం ఏడాది, ఏడాదిన్నర కొనసాగించండి. ఈ కాలంలో మ్యూచువల్‌ ఫండ్స్‌ ఇన్వెస్ట్‌మెంట్స్‌పై మీకు తగిన అవగాహన వస్తుంది. మ్యూచువల్‌ ఫండ్స్‌ ఇన్వెస్ట్‌మెంట్స్‌పై తగిన అవగాహన వచ్చిన తర్వాత ఒకటి లేదా రెండు ఈక్విటీ మ్యూచువల్‌ ఫండ్స్‌ను ఎంచుకొని సిప్‌ విధానంలో ఆ ఫండ్స్‌లో ఇన్వెస్ట్‌మెంట్స్‌ కొనసాగించండి. రిటైర్మెంట్‌ నిధి ఏర్పాటు, సొంత ఇంటిని సమకూర్చుకోవడం, పిల్లల ఉన్నత చదువులు తదితర దీర్ఘకాలిక ఆర్థిక లక్ష్యాల సాధన కోసం ఈక్విటీ మ్యూచువల్‌ ఫండ్స్‌ మంచి సాధనాలు.   నేను గతంలో బ్యాంక్‌లో ఫిక్స్‌డ్‌ డిపాజిట్‌ చేసిన మొత్తం మరో రెండు, మూడు నెలల్లో మెచ్యూర్‌ అవుతుంది. ఈ మొత్తాన్ని మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. కనీసం ఎనిమిదేళ్ల పాటు ఇన్వెస్ట్‌ చేయాలనుకుంటున్నాను. ఈ విషయమై తగిన సలహా ఇవ్వండి ? –రియాజ్, హైదరాబాద్‌   ఎనిమిదేళ్ల పాటు ఇన్వెస్ట్‌ చేయడమంటే దీర్ఘకాలం కిందే లెక్క. ఇంత ఎక్కువ కాలం ఇన్వెస్ట్‌మెంట్స్‌పై  మంచి రాబడులు పొందాలంటే ఉన్న కొన్ని రాబడి సాధనాల్లో ఈక్విటీ మ్యూచువల్‌ çఫండ్స్‌లో ఇన్వెస్ట్‌ చేయడం ఒక మార్గం. మీరు మ్యూచువల్‌ ఫండ్స్‌ ఇన్వెస్ట్‌మెంట్స్‌కు కొత్త కాబట్టి, ముందుగా 2 లేదా 3 బ్యాలన్స్‌డ్‌ ఫండ్స్‌ ఎంచుకోండి. మీరు పన్ను బ్రాకెట్లో ఉంటే, ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)ల్లో ఇన్వెస్ట్‌ చేయండి. ఫలితంగా సెక్షన్‌ 80సీ కింద మీకు రూ. లక్షన్నర వరకూ పన్ను మినహాయింపులు లభిస్తాయి.     – ధీరేంద్ర కుమార్‌ సీఈవో, వ్యాల్యూ రీసెర్చ్‌

పెట్టుబడులకు సంబంధించి ‘హండ్రెడ్‌ మైనస్‌ మై ఏజ్‌’ రూల్‌ కరెక్టేనా ? ఈ నియామకాన్ని అనుసరించి డెట్, ఈక్విటీ సాధనాల్లో ఇన్వెస్ట్‌ చేస్తే అది సరైన పోర్ట్‌ఫోలియో అవుతుందా ?   –శశికాంత్, విజయవాడ సాధారణంగా పెట్టుబడులకు సంబంధించి ‘హండ్రెడ్‌ మైనస్‌ మై ఏజ్‌’ అనే నియమాన్ని పాటించాలని చెబుతుంటారు. అంటే ఇన్వెస్ట్‌ చేసే వ్యక్తి వయస్సును వంద నుంచి  తీసివేస్తే ఎంత సంఖ్య వస్తుందో అంత శాతం ఈక్విటీలోనూ, మిగిలినది ఇతర సాధనాల్లోనూ ఇన్వెస్ట్‌ చేయాలని ఈ సూత్రం సూచిస్తుంది. ఉదాహరణకు ఒక వ్యక్తి వయస్సు 60 సంవత్సరాలనుకుందాం. హండ్రెడ్‌ మైనస్‌ మై ఏజ్‌ ప్రకారం (100–60–40) ఆ వ్యక్తి తన పోర్ట్‌ఫోలియోలో 40 శాతం ఈక్విటీలోనూ, మిగిలిన 60 శాతం ఇతర సాధనాల్లోనూ ఇన్వెస్ట్‌ చేయాలి. అదే 40 సంవత్సరాల వ్యక్తిని తీసుకుంటే (100–40–60) ఆ వ్యక్తి తన పోర్ట్‌ఫోలియోలో 60 శాతం ఈక్విటీలోనూ, మిగిలిన 40 శాతం ఇతర సాధనాల్లోనూ ఇన్వెస్ట్‌ చేయాలి. అంటే వయస్సు పెరుగుతున్న కొద్దీ, ఈక్విటీ ఇన్వెస్ట్‌మెంట్స్‌ను తగ్గించాలని దీని అర్థం. మరో రకంగా చెప్పాలంటే వయస్సు పెరుగుతున్న కొద్దీ, జీవన వ్యయాల కోసం పెట్టుబడులపై అధికంగా అధారపడాల్సి ఉంటుంది. అందుకని ఈక్విటీపై ఇన్వెస్ట్‌మెంట్స్‌ తగ్గించుకోవాలి. కానీ ఈ రోజుల్లో పరిస్థితులు నాటకీయంగా మారిపోయాయి. అందరికీ ఒకే రకమైన ఖర్చులు ఉండటం లేదు. ఆర్థిక అవసరాలు కూడా మారిపోయాయి. అందుకని ఈ రూల్‌ను కచ్చితంగా పాటించాలని ఏమీ లేదు. మీరు రిటైరైన తర్వాత మీకు ఉండే అవసరాలకు సరిపడా స్థిర ఆదాయం ఉంచుకొని, మిగిలిన మొత్తాన్ని ఈక్విటీలో ఇన్వెస్ట్‌ చేయవచ్చు. అయితే మరీ అధిక రిస్క్‌ మాత్రం తీసుకోకండి.  ఇప్పుడు చాలా మంది ఇన్వెస్టర్లు పాటించాల్సిన ఫార్ములా ఒకటి ఉంది. ఒక వ్యక్తికి (ఎంత వయస్సున్నా సరే) 5–10 ఏళ్ల వరకూ  ఇన్వెస్ట్‌మెంట్‌ సొమ్ములు అవసరం లేదనుకోండి. ఆ ఇన్వెస్ట్‌మెంట్‌ సొమ్ములను అధిక భాగం(మొత్తం సొమ్ముల్లో 60 శాతానికి పైగా) ఈక్విటీలో ఇన్వెస్ట్‌ చేయాలి. మిగిలిన మొత్తాన్ని స్థిర ఆదాయం వచ్చే సాధనాల్లో ఇన్వెస్ట్‌ చేయాలి. కానీ ఎప్పుడూ మీ ఇన్వెస్ట్‌మెంట్స్‌లో వంద శాతం మొత్తాన్ని ఈక్విటీలో ఇన్వెస్ట్‌ చేయవద్దు. కొంత మొత్తాన్ని స్థిరాదాయం వచ్చే సాధనాల్లో కూడా ఇన్వెస్ట్‌ చేయాలి. ఇలా చేస్తే మార్కెట్లు చక్రీయంగా ఉంటాయి. కాబట్టి, మార్కెట్లు బాగా పడిన సందర్భంలో మీకు తగిన రక్షణ ఉంటుంది.   నేను గత కొంత కాలంగా రిలయన్స్‌ ట్యాక్స్‌ సేవర్‌(ఈఎల్‌ఎస్‌ఎస్‌–ఈక్విటీ లింక్డ్‌ సేవింగ్స్‌ స్కీమ్‌)లో సిస్టమేటిక్‌ ఇన్వెస్ట్‌మెంట్‌ ప్లాన్‌ (సిప్‌) విధానంలో ఇన్వెస్ట్‌ చేస్తున్నాను. ఇప్పుడు ఈ పెట్టుబడులను యాక్సిస్‌ లాంగ్‌ టర్మ్‌ ఈక్విటీ ఫండ్‌కు మార్చుకోవాలనుకుంటున్నాను. తగిన సూచనలివ్వండి.   –మహేందర్, విశాఖపట్టణం   ఈక్విటీ లింక్డ్‌ సేవింగ్స్‌ స్కీమ్‌(ఈఎల్‌ఎస్‌ఎస్‌)లో  సిప్‌ విధానంలో ఇన్వెస్ట్‌ చేస్తే, ప్రతి సిప్‌కు మూడేళ్ల లాక్‌–ఇన్‌– పీరియడ్‌ ఉంటుంది. ఈ పీరియడ్‌లో అంటే ఈ మూడేళ్ల కాలంలో మీరు పాత ఫండ్‌ నుంచి వైదొలగడం కానీ, మరో ఫండ్‌కు మారడం కానీ కుదరదు. అందుకని మీరు ప్రస్తుతం ఇన్వెస్ట్‌ చేస్తున్న సిప్‌ ఇన్వెస్ట్‌మెంట్స్‌ను ఆపేసి,  కొత్తగా ఇన్వెస్ట్‌ చేయాలనుకుంటున్న మ్యూచువల్‌ ఫండ్‌లో సిప్‌ ఇన్వెస్ట్‌మెంట్స్‌ను ప్రారంభించవచ్చు. నేను ఇటీవలే ఉద్యోగంలో చేరాను. దీర్ఘకాలం పాటు మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. కనీసం 25 ఏళ్ల పాటు ఇన్వెస్ట్‌ చేయాలనేది నా ప్రణాళిక. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో మ్యూచువల్‌ ఫండ్స్‌లో 25 ఏళ్ల పాటు ఇన్వెస్ట్‌ చేస్తే గ్యారంటీగా ఇంత మొత్తంలో రాబడులు వస్తాయని ఏమైనా ఉందా ? –కార్తీక్, హైదరాబాద్‌ మ్యూచువల్‌ ఫండ్స్‌ గ్యారంటీగా ఇంత మొత్తంలో రాబడులు ఇస్తాయని చెప్పలేము. పైగా మూలధన రక్షణ కూడా ఉండదు. అంటే మీరు ఇన్వెస్ట్‌ చేసిన ఫండ్‌కు నష్టాలు వస్తే, మీరు ఇన్వెస్ట్‌ చేసిన మొత్తంలో కొంత హరించుకుపోయే ప్రమాదం కూడా ఉంది. అయితే దీర్ఘకాలంలో మ్యూచువల్‌ ఫండ్స్‌లో ముఖ్యంగా ఈక్విటీ ఫండ్స్‌లో ఇన్వెస్ట్‌ చేస్తే, మంచి రాబడులే పొందవచ్చు. సురక్షితమైన, గ్యారంటీ రాబడులనిచ్చే బ్యాంక్‌ ఫిక్స్‌డ్‌ డిపాజిట్లు, ఇతర స్థిరాదాయ మార్గాల ద్వారా ఇన్వెస్ట్‌ చేస్తే వచ్చే రాబడుల కంటే అధిక రాబడులు పొందే అవకాశాలు ఎక్కువగానే ఉంటాయి. అయితే మీరు 25 సంవత్సరాల పాటు ఇన్వెస్ట్‌ చేయాలనుకుంటున్నారు. కాబట్టి ఇంత సుదీర్ఘ ఇన్వెస్ట్‌మెంట్‌ కాలాన్ని పరిగణనలోకి తీసుకుంటే, ఎంత అధ్వానమైన మ్యూచువల్‌ ఫండ్‌ అయినా స్థిర ఆదాయాన్నిచ్చే సాధనాల కంటే అధిక మొత్తంలోనే రాబడులను ఇవ్వవచ్చు. మీరు మ్యూచువల్‌ ఫండ్స్‌లో తొలిసారిగా ఇన్వెస్ట్‌ చేయాలనుకుంటున్నారు. కాబట్టి, ముందుగా బ్యాలన్స్‌డ్‌ ఫండ్స్‌ను ఎంచుకోండి. ఒకటి లేదా రెండు మంచి బ్యాలెన్స్‌డ్‌ ఫండ్స్‌ను ఎంచుకొని, వాటిల్లో నెలకు కొంత మొత్తం చొప్పున సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేయండి. ఇలా కనీసం రెండేళ్లు ఇన్వెస్ట్‌ చేసిన తర్వాత, మ్యూచువల్‌ ఫండ్స్‌పై, మ్యూచువల్‌ ఫండ్స్‌ ఇన్వెస్ట్‌మెంట్స్‌పై, మార్కెట్‌ పరిస్థితులపై తగిన అవగాహన వస్తుంది. అప్పుడు రెండు లేదా మూడు మంచి ఈక్విటీ ఫండ్స్‌ను ఎంచుకొని సిప్‌ ఇన్వెస్ట్‌మెంట్స్‌ను కొనసాగించండి. కనీసం ఏడాదికి ఒకసారైనా, మీ పోర్ట్‌ఫోలియోలోని ఫండ్స్‌ పనితీరును మదింపు చేయండి. మీ ఆదాయం పెరిగినప్పుడల్లా, ఎంతో కొంత మొత్తం సిప్‌లను పెంచండి. – ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను ఇటీవలే రిటైరయ్యాను. రిటైర్మెంట్‌ బెనిఫిట్స్‌ రూ.40 లక్షల వరకూ వచ్చాయి. ఇద్దరు పిల్లలకు చెరో రూ.10 లక్షలు ఇద్దామనుకుంటున్నాను. మిగిలిన రూ.20 లక్షలను నా,  నా భార్య భవిష్యత్‌ అవసరాల కోసం ఇన్వెస్ట్‌ చేద్దామనుకుంటున్నాను.  ఆదాయమూ, వృద్ధి రెండూ ఉండేలా నాకు ఇన్వెస్ట్‌మెంట్‌ ఆప్షన్స్‌ సూచించండి? –ప్రహ్లాదరావు, విజయవాడ వడ్డీరేట్లు తగ్గుతుండటం సీనియర్‌ సిటిజన్‌లకు ప్రతికూలమైన అంశం. ఇక మార్కెట్‌ సంబంధిత సాధనాల్లో ఇన్వెస్ట్‌మెంట్‌ చేద్దామంటే నష్ట భయం అధికంగా ఉంటుంది. పెట్టిన పెట్టుబడికి అధిక రాబడి వచ్చేలా  ఇన్వెస్ట్‌మెంట్‌లో ఈక్విటీ కూడా ఒక భాగంగా ఉండాలి. మీకు వచ్చిన రిటైర్మెంట్‌ బెనిఫిట్స్‌లో  రూ.20 లక్షల వరకూ ఇన్వెస్ట్‌ చేయాలనుకుంటున్నారు.. దీనిపై వచ్చే ఆదాయమే మీకు ఆధారమనుకుందాం. ప్రస్తుత వడ్డీరేట్ల పరిస్థితుల్లో ఈ డబ్బును బ్యాంక్‌లో దాచుకున్నా, దానిపై వచ్చే వడ్డీతో ఐదేళ్ల పాటు ఎలాగో అలాగా బండి నెట్టుకురావచ్చు. ఐదేళ్ల తర్వాత వచ్చే వడ్డీ మీ అవసరాలను తీర్చలేకపోవచ్చు. ద్రవ్యోల్బణం తక్కువ స్థాయిలోనే ఉన్నప్పటికీ, కాలం గడుస్తున్నకొద్దీ మీ అవసరాలు పెరుగుతూ ఉంటాయి. అందుకని మీకు అధిక ఆదాయం కావలసిందే. ద్రవ్యోల్బణాన్ని తట్టుకునే రాబడులు పొందాలంటే కచ్చితంగా ఈక్విటీలో ఇన్వెస్ట్‌ చేయాల్సిందే. మీ ఆదాయ అవసరాలను బట్టి ఎంత మొత్తం ఈక్విటీలో ఇన్వెస్ట్‌ చేయాలో నిర్ణయించుకోవాలి. దీని కోసం మంత్లీ ఇన్‌కమ్‌ ప్లాన్‌లు, సిస్టమేటిక్‌ విత్‌డ్రాయల్‌ ప్లాన్‌(ఎస్‌డబ్ల్యూపీ)లను పరిశీలించవచ్చు. మీ అవసరాలకు ఇతర మొత్తాలు(పెన్షన్, ఇంటి అద్దె, తదితరాలు) ఉండి, కొంచెం మొత్తమే మీకు ఆదాయం అవసరమైన పరిస్థితుల్లో  బ్యాలన్స్‌డ్‌ ఫండ్స్‌ను పరిశీలించవచ్చు. మార్కెట్‌ తీవ్రమైన ఒడిదుడుకులకు గురైనప్పుడు వార్షిక విత్‌డ్రాయల్స్‌ 5 శాతానికి మించి ఉండకూడదని గుర్తుంచుకోండి.   నా వయస్సు 26 సంవత్సరాలు. ఇటీవలనే ఒక ప్రైవేట్‌ కంపెనీలో ఉద్యోగిగా చేరాను. ఈ కంపెనీ తెలిసిన వారిదే అయినందున ఉద్యోగ భద్రతకు ఢోకా లేదు. మరో రెండేళ్ల తర్వాత పెళ్లి చేసుకుందామనుకుంటున్నాను. నాకు వచ్చే జీతంలో రూ.8,000 వరకూ ఇన్వెస్ట్‌ చేయగలను. ఒకే సంస్థకు చెందిన రెండు, మూడు మ్యూచువల్‌ ఫండ్స్‌లో ఇన్వెస్ట్‌ చేయడం మంచిదా? లేకుంటే, వివిధ మ్యూచువల్‌ ఫండ్‌ సంస్థలకు చెం దిన రెండు, మూడు మ్యూచువల్‌ ఫండ్స్‌లో ఇన్వెస్ట్‌ చేయడం మంచిదా? –భాస్కర్, విశాఖపట్టణం   వివిధీకరణ(డైవర్సిఫికేషన్‌) ప్రయోజనాలు పొందాలంటే ఒకే మ్యూచువల్‌ ఫండ్‌కు చెందిన రెండు, మూడు ఫండ్స్‌లో ఇన్వెస్ట్‌ చేయడం కంటే, వేర్వేరు ఫండ్‌ హౌస్‌లకు చెందిన రెండు, మూడు మ్యూచువల్‌ ఫండ్స్‌లో ఇన్వెస్ట్‌ చేయడమే మంచిది. మీరు ఒకే ఫండ్‌హౌస్‌కు చెందిన రెండు, మూడు మ్యూచువల్‌ ఫండ్స్‌లో ఇన్వెస్ట్‌ చేశారనుకుందాం. సాధారణంగా ఒకే సంస్థకు చెందిన మ్యూచువల్‌ ఫండ్స్‌  ఫండ్‌ మేనేజ్‌మెంట్, రీసెర్చ్‌ టీమ్‌లు ఒకేలా ఉంటాయి. అంటే ఒక ఫండ్‌ హౌస్‌కు చెందిన వివిధ మ్యూచువల్‌ ఫండ్స్‌.. మేనేజ్‌మెంట్, రీసెర్చ్, దాదాపు ఒకేలాగా ఉంటాయి. ఒకవేళ వీరి అంచనాలు తప్పాయనుకోండి. ఆ ప్రభావం ఈ సంస్థ మ్యూచువల్‌ ఫండ్స్‌ అన్నింటి మీదా పడుతుంది. మరోవైపు ఈ మ్యూచువల్‌ ఫండ్‌ సంస్థ నుంచి కీలకమైన ఫండ్‌ మేనేజర్‌ ఎవరైనా నిష్క్రమించారనుకోండి.. ఆ అంశం కూడా ఫండ్స్‌ పనితీరుపై ప్రతికూల ప్రభావమే చూపుతుంది. ఈ ప్రతికూలతలను అధిగమించడానికి ఒకే ఫండ్‌హౌస్‌కు చెందిన మ్యూచువల్‌ ఫండ్స్‌లో కంటే వివిధ ఫండ్స్‌హౌస్‌లకు చెందిన మ్యూచువల్‌ ఫండ్స్‌లో ఇన్వెస్ట్‌ చేయడం మంచిది. ఇప్పుడు మీరు ఎంచుకోవడానికి వివిధ కేటగిరీల్లో(ఈక్విటీ, బ్యాలన్స్‌డ్, ) వివిధ సంస్థలకు చెందిన ఎన్నో మంచి ఫండ్స్‌ అందుబాటులో ఉన్నాయి. నేను కొత్త ఏడాది నుంచి మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. రెగ్యులర్‌ ప్లాన్‌ల కన్నా డైరెక్ట్‌ ప్లాన్‌లో ప్రయోజనాలు బాగా ఉంటాయని, వాటిల్లోనే ఇన్వెస్ట్‌ చేయమని మిత్రులు చెప్తున్నారు. నా బ్యాంక్‌ అకౌంట్‌ ద్వారా ఇన్వెస్ట్‌ చేయడం మంచిదేనా? –ఫరూక్, హైదరాబాద్‌   రెగ్యులర్‌ ప్లాన్‌ల కన్నా డైరెక్ట్‌ ప్లాన్‌లు కొంచెం ఖరీదు తక్కువగా ఉంటాయి. డైరెక్ట్‌ ప్లాన్లలో డిస్ట్రిబ్యూటర్ల కమీషన్‌లు ఏమీ ఉండకపోవడమే దీనికి కారణం. డైరెక్ట్, రెగ్యులర్‌ ప్లాన్‌లకు సంబందించి వ్యయాల్లో తేడా ఏడాదికి కనీసం 1 శాతంగానైనా ఉంటుంది. అయితే మార్కెట్‌ పట్ల, మ్యూచువల్‌ ఫండ్‌ ఇన్వెస్ట్‌మెంట్స్‌ పట్ల తగిన అవగాహన ఉన్నవారికి డైరెక్ట్‌ ప్లాన్‌లు తగిన విధంగా ఉంటాయి. మీరు మ్యూచువల్‌ ఫండ్స్‌లో తొలిసారిగా ఇన్వెస్ట్‌ చేద్దామనుకుంటున్నారు. కాబట్టి, అన్నప్రాశన రోజే ఆవకాయ మంచిది కానట్లే, తొలిసారిగా మ్యూచువల్‌ ఫండ్స్‌లో ఇన్వెస్ట్‌ చేసేవారికి డైరెక్ట్‌ ప్లాన్‌లు తగినవి కావని చెప్పవచ్చు. అందుకని మీరు ఇన్వెస్ట్‌మెంట్‌ కోసం మొదటగా రెగ్యులర్‌ ప్లాన్‌లనే ఎంచుకోండి. మరోవైపు మీరు మొదటిసారిగా మ్యూచువల్‌ ఫండ్స్‌లో ఇన్వెస్ట్‌ చేస్తున్నారు. కాబట్టి, బ్యాంక్‌ ద్వారా రెగ్యులర్‌ ప్లాన్లలో ఇన్వెస్ట్‌ చేయడం మంచిదే. దీనివల్ల కొంచెం అదనంగా ఖర్చయినప్పటికీ, మీకు మ్యూచువల్‌ ఫండ్స్‌ ఇన్వెస్ట్‌మెంట్స్‌ పట్ల తగిన అవగాహన వస్తుంది. ఒక ఏడాది తర్వాత మీకు మ్యూచువల్‌ ఫండ్స్‌లో ఇన్వెస్ట్‌మెంట్స్‌ పట్ల తగిన అవగాహన, మార్కెట్‌ పరిస్థితుల పట్ల కొంత పరిజ్జానం వచ్చిన తర్వాత అప్పుడు డైరెక్ట్‌ ప్లాన్లలో ఇన్వెస్ట్‌ చేయవచ్చు. ఈక్విటీ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)విధానంలో ఇన్వెస్ట్‌ చేస్తే, దీర్ఘకాలంలో మంచి రాబడులు పొందవచ్చు. – ధీరేంద్ర కుమార్‌ ,సీఈవో, వ్యాల్యూ రీసెర్చ్‌

నేను ప్రైవేట్‌ రంగంలో పనిచేస్తున్నాను. అన్ని ఖర్చులు పోను నెలకు రూ.8,000 వరకూ ఇన్వెస్ట్‌ చేయగలను. నేను మ్యూచువల్‌ ఫండ్స్‌లో ఇన్వెస్ట్‌ చేద్దామనుకుంటున్నాను. కచ్చితంగా ఏడాదికి 12–15 శాతం మేరకు రాబడిని ఇచ్చే ఫండ్స్‌ పథకాలు ఏమైనా ఉన్నాయా ? ఉంటే అలాంటి వాటిల్లో ఇన్వెస్ట్‌ చేయాలనుకుంటున్నాను. అలాంటి ఫండ్స్‌ను కొన్ని సూచించండి.    –మధుసూధన్, విజయవాడ   దీర్ఘకాలంలో మ్యూచువల్‌ ఫండ్స్‌ మంచి రాబడులనే ఇస్తాయి. 3, 5 లేదా పదేళ్ల కాలాన్ని పరిగణనలోకి తీసుకుంటే చాలా ఫండ్స్‌ మీరు చెప్పిన 12–15 శాతం రాబడులను ఇచ్చాయి. కొన్ని ఈక్విటీ మ్యూచువల్‌ ఫండ్స్‌ అయితే అంతకంటే ఎక్కువగా రాబడులనిచ్చిన దాఖలాలు కూడా ఉన్నాయి. ఐదేళ్ల కాలాన్ని పరిగణనలోకి తీసుకుంటే కొన్ని డెట్‌–ఆధారిత హైబ్రిడ్‌ ఫండ్స్‌ కూడా 12 శాతం వరకూ రాబడులనిచ్చాయి. అయితే భవిష్యత్తులో కూడా ఇదే స్థాయి రాబడులు వస్తాయని కచ్చితంగా చెప్పలేము. ఏడాదికి కచ్చితంగా 12–15 శాతం రాబడులనిచ్చే ఫండ్స్‌ ఉన్నాయా అంటే ఉన్నాయని చెప్పలేము. ఈక్విటీ ఫండ్స్‌ రాబడులు అసాధారణంగా ఉంటాయి. ఒక్కోసారి ఈ ఫండ్స్‌ 30–35 శాతం రేంజ్‌లో, మరోసారి 9 శాతంలోపే, ఇంకోసారి ప్రతికూల రాబడులను కూడా ఇచ్చిన సందర్భాలు ఉన్నాయి. అందుకని రాబడులు ఇంత స్థాయిలోనే కచ్చితంగా ఉంటాయని చెప్పలేము. అయితే ఒక్కటి మాత్రం నిజం.. ఈక్విటీ మ్యూచువల్‌ ఫండ్స్‌లో సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో దీర్ఘకాలం పాటు ఇన్వెస్ట్‌ చేస్తే, మంచి రాబడులు పొందే అవకాశాలే అధికంగా ఉన్నాయి. ఇక మీరు ఇన్వెస్ట్‌ చేయడానికి ఈ ఈక్విటీ ఫండ్స్‌ను పరిశీలించవచ్చు. ఎస్‌బీఐ స్మాల్‌ అండ్‌ మిడ్‌క్యాప్‌ ఫండ్, మిరా అసెట్‌ ఎమర్జింగ్‌ బ్లూచిప్‌ ఫండ్, ఎల్‌ అండ్‌ టీ ఎమర్జింగ్‌ బిజినెస్‌ ఫండ్, కోటక్‌  50, డీఎస్‌పీ బ్లాక్‌ రాక్‌ ఆపర్చునిటీస్, కెనరా రెబొకొ ఎమర్జింగ్‌ఈక్విటీ ఫండ్, బీఎన్‌పీ పారిబా డివిడెండ్‌ ఈల్డ్, యాక్సిస్‌ ఈక్విటీ ఫండ్, ఆదిత్య బిర్లా సన్‌లైఫ్‌ అడ్వాంటేజ్‌ ఫండ్‌. నేను గత కొంత కాలంగా క్వాంటమ్‌ ఫండ్‌ ఆఫ్‌ ఫండ్స్, కోటక్‌ అసెట్‌ అలొకేటర్‌ ఫండ్‌ ఆఫ్‌ ఫండ్స్‌ల్లో ఇన్వెస్ట్‌ చేస్తున్నాను. ఈ తరహా ఫండ్‌ ఆఫ్‌ ఫండ్స్‌(ఎఫ్‌ఓఎఫ్‌)కు సంబంధించి పన్ను విధానాలు ఎలా ఉంటాయి ?     –రమాదేవి, విశాఖపట్టణం   డెట్‌ మ్యూచువల్‌ ఫండ్స్‌కు వర్తించే పన్ను నియమాలే ఈ ఫండ్‌ ఆఫ్‌ ఫండ్స్‌కు కూడా వర్తిస్తాయి. ఈ తరహా ఫండ్స్‌లో మీ ఇన్వెస్ట్‌మెంట్స్‌ మూడు, అంతకు మించిన సంవత్సరాలకు కొనసాగితే.. వాటిపై వచ్చే రాబడులను దీర్ఘకాలిక మూలధన లాభాలుగా పరిగణిస్తారు. ఈ దీర్ఘకాలిక మూలధన లాభాలపై 20 శాతం పన్ను చెల్లించాల్సి ఉంటుంది. ఇక ఈ ఫండ్స్‌ ఇన్వెస్ట్‌మెంట్స్‌ను మీరు మూడేళ్లలోపే వెనక్కి తీసుకుంటే మీరు స్వల్పకాలిక మూలధన లాభాల పన్ను చెల్లించాల్సి ఉంటుంది. ఈ ఇన్వెస్ట్‌మెంట్స్‌పై వచ్చిన లాభాలను మీ ఆదాయానికి కలిపి, మీకు వర్తించే అదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది.   గిల్ట్‌ ఫండ్స్‌ విలువ ఏఏ సందర్భాల్లో తగ్గుతుంది ?   –పర్వేజ్, హైదరాబాద్‌ గిల్ట్‌ ఫండ్స్‌.. ప్రభుత్వ బాండ్లలో పెట్టుబడులు పెడతాయి. ఏ రకమైన బాండ్లకైనా రెండు రకాల రిస్క్‌లు ఉంటాయి. మొదటిది. వడ్డీ రేట్లు పెరగడం, లేదా తగ్గడం, రెండోది. సకాలంలో వడ్డీని కాని, అసలును కాని చెల్లించడంలో విఫలం కావడం. అయితే ప్రభుత్వ బాండ్లకు రెండో రిస్క్‌ ఉండదు. ప్రభుత్వం బాండ్ల విషయంలో డీఫాల్ట్‌ అయ్యే అవకాశాలు దాదాపు లేవు. ఇక వడ్డీరేట్లు పెరిగితే, ఇతర ఫండ్స్‌ కన్నా గిల్ట్‌ ఫండ్స్‌ మరింతగా పడతాయి. దీర్ఘకాలం మెచ్యురిటీ ఉన్న బాండ్లలో గిల్ట్‌ ఫండ్స్‌ ఇన్వెస్ట్‌ చేస్తాయి. కాబట్టి వడ్డీరేట్ల ఒడిదుడుకులకు ఇవి బాగా ప్రభావితమవుతాయి.   నేను రిలయన్స్‌ ట్రెజరీ ఫండ్‌లో ఇన్వెస్ట్‌ చేస్తున్నాను. ఏటీఎమ్‌ ద్వారా ఇన్వెస్ట్‌ చేస్తూ, స్వల్ప వ్యవధుల్లోనే వాటిని రిడీమ్‌ చేసుకుంటూ వస్తున్నాను. ఈ ఇన్వెస్ట్‌మెంట్స్‌పై నాకు లాభాలు వస్తున్నాయి. అయితే లాభాలపై పన్నులు ఎలా ఉంటాయి. ఫ్లాట్‌గా ఒకే రేటున పన్నులు చెల్లించాలా ? ప్రస్తుతం నేను ట్యాక్స్‌ బ్రాకెట్‌లో లేను.   –ప్రభాకర్, బెంగళూరు   రిలయన్స్‌ ట్రెజరీ ఫండ్‌లో చేసే ఇన్వెస్ట్‌మెంట్స్‌పై మీరు పన్నులు చెల్లించాల్సి ఉంటుంది. ఈ లాభాలు మీ ఆదాయానికి కలిపి, మీకు వర్తించే ఆదాయపు పన్ను స్లాబ్‌ననుసరించి పన్ను చెల్లించాలి. ఉదాహరణకు మీరు రూ.100 ఇన్వెస్ట్‌ చేశారనుకుందాం. మీ ఇన్వెస్ట్‌మెంట్‌  విలువ రూ.125 అయిందనుకోండి. మీకు రూ.25 లాభం వచ్చినట్లు లెక్క. ఇలా వచ్చిన లాభాలన్నింటిపై కూడా మీరు పన్నులు చెల్లించాలి. మీరు ఇన్వెస్ట్‌చేసిన కాలం నుంచి చూస్తే, మూడేళ్లలోపే మీరు మీ మ్యూచువల్‌ ఫండ్‌ యూనిట్లను విక్రయించారనుకోండి, మీ ఆదాయపు పన్ను స్లాబ్‌ననుసరించి మీరు పన్ను చెల్లించాలి. అయితే ఈ లాభాలన్నింటీని, మీ మొత్తం ఆదాయంతో కలిపినా గానీ, మీరు ఆదాయపు పన్ను పరిధిలోకి రాకపోతే, ఈ లాభాలన్నింటిపై మీరు ఎలాంటి పన్నులు చెల్లించాల్సిన పనిలేదు. మీ ఆదాయానికి, ఈ లాభాలను కలిపితే మీరు ఆదాయపు పన్ను పరిధిలోకి వస్తేనే పన్నులు చెల్లించాల్సి ఉంటుంది.    – ధీరేంద్ర కుమార్‌ సీఈవో, వ్యాల్యూ రీసెర్చ్‌


 ఒక రిటైల్‌ ఇన్వెస్టర్‌ పోర్ట్‌ఫోలియోలో ఒక బ్యాలన్స్‌డ్‌ ఫండ్‌ తప్పనిసరిగా ఉండాలని మిత్రుడొకరు అంటున్నారు. ఇప్పుడు ఈక్విటీ మార్కెట్‌ బాగా ఉన్నప్పుడు ఈక్విటీ ఫండ్స్‌లోనే ఇన్వెస్ట్‌ చేస్తే మంచిదని మరికొందరు అంటున్నారు. నా ఇన్వెస్ట్‌మెంట్స్‌లో కొంత ఈక్విటీ ఫండ్‌లోనూ, మరికొంత బ్యాలన్స్‌డ్‌ ఫండ్‌లోనూ ఇన్వెస్ట్‌ చేద్దామనుకుంటున్నాను. అలా కాకుండా మొత్తం ఈక్విటీ ఫండ్‌లోనో, బ్యాలన్స్‌డ్‌ ఫండ్‌లోనో ఇన్వెస్ట్‌ చేయమంటారా ? ఇన్వెస్ట్‌ చేయడానికి కొన్ని మంచి బ్యాలన్స్‌డ్‌ ఫండ్స్‌ను సూచించండి. –రవీందర్, విజయవాడ  
 
 స్టాక్‌ మార్కెట్‌ చక్రీయమైనది. మార్కెట్‌ పెరుగుదల, పతనం సహజమైన అంశాలు. ఇటీవల కాలంలో ఈక్విటీ ఫండ్స్‌ మంచి పనితీరు కనబరుస్తున్నాయి. ఇప్పుడు ఈక్విటీ మార్కెట్‌ బాగా పెరిగిందనే ఒకే ఒక ఉద్దేశంతో ఈక్విటీ ఫండ్స్‌లో ఇన్వెస్ట్‌ చేయడం సరైన నిర్ణయం కాదు. సొంత ఇల్లు సమకూర్చుకోవడం, రిటైర్మెంట్‌ నిధి ఏర్పాటు, పిల్లల పైచదువులు.. తదితర దీర్ఘకాల లక్ష్యాల కోసం దీర్ఘకాలం పాటు (కనీసం ఐదేళ్లకు మించి) ఈక్విటీ ఫండ్స్‌లో ఇన్వెస్ట్‌ చేస్తే మంచి రాబడులు పొందవచ్చు. ఇక రిటైల్‌ ఇన్వెస్టర్ల పోర్ట్‌ఫోలియోలో ఒక బ్యాలన్స్‌డ్‌ ఫండ్‌ తప్పనిసరిగా ఉండాలని మీ మిత్రుడు చెప్పిన మాట నిజమే.
 దీనికి పలు కారణాలున్నాయి. బ్యాలన్స్‌డ్‌ ఫండ్స్‌ స్థిరాదాయ సాధనాల్లో 25 % వరకూ ఇన్వెస్ట్‌ చేస్తాయి. ఫలితంగా సదరు ఫండ్‌కు మరింత స్థిరత్వం వస్తుంది. ఒక ఏడాది దాటిన బ్యాలన్స్‌డ్‌ ఫండ్‌ ఇన్వెస్ట్‌మెంట్స్‌పై ఎలాంటి పన్ను భారం ఉండదు. బ్యాలన్స్‌డ్‌ ఫండ్‌ను నిర్వహించే ఫండ్‌ మేనేజర్‌ ఈ ఫండ్‌ను ప్రతి రోజూ రీబ్యాలన్స్‌ చేస్తారు. స్టాక్‌ మార్కెట్‌ కదలికలకు అనుగుణంగా ఇలా రీబ్యాలన్స్‌ చేయడం వల్ల బ్యాలన్స్‌డ్‌ ఫండ్‌ పనితీరు ఎప్పటికప్పుడు మెరుగవుతుంది. మరో ముఖ్యమైన విషయమేమిటంటే బ్యాలన్స్‌డ్‌ ఫండ్స్‌లో ఒకేసారి పెద్ద మొత్తంలో ఇన్వెస్ట్‌ చేయకూడదు. సిస్టమేటిక్‌ ఇన్వెస్ట్‌మెంట్‌ ప్లాన్‌(సిప్‌)విధానంలో ఇన్వెస్ట్‌ చేయాలి. ఇక మీరు ఇన్వెస్ట్‌ చేయడానికి... ఐసీఐసీఐ ప్రుడెన్షియల్, ప్రాంక్లిన్‌ ఇండియా, హెచ్‌డీఎఫ్‌సీ, టాటా, ఎస్‌బీఐల బ్యాలన్స్‌డ్‌ ఫండ్స్‌ను పరిశీలించవచ్చు.
 ఎన్‌పీఎస్‌ (నేషనల్‌ పెన్షన్‌ సిస్టమ్‌) ఫండ్‌ మేనేజర్‌గా ఎస్‌బీఐను ఎంచుకుందామనుకుంటున్నాను. ఎన్‌పీఎస్‌ ప్లాన్‌ల విషయమై నా ఇన్వెస్ట్‌మెంట్స్‌ను ఎలా కేటాయించాలి ?  –తులసి, విశాఖపట్టణం  
 ఎన్‌పీఎస్‌ ఫండ్‌ మేనేజర్లుగా వ్యవహరిస్తున్న వివిధ సంస్థల పనితీరుల్లో పెద్దగా తేడాలు లేవు. ఎస్‌బీఐ పనితీరు సమంజసమైన స్థాయిలోనే ఉంది. మీరు మీ ఎన్‌పీఎస్‌ ఖాతా ఫండ్‌ మేనేజర్‌గా ఎస్‌బీఐను ఎంచుకోవచ్చు. ఎన్‌పీఎస్‌లో ప్రధానంగా మూడు ప్లాన్‌లు ఉన్నాయి. ఈక్విటీ(ఈ), ప్రభుత్వ బాండ్లు(జి), కార్పొరేట్‌ బాండ్లు(సి). ఎన్‌పీఎస్‌ ఈ(ఈక్విటీ) ప్లాన్‌లో గరిష్టంగా 50 శాతం వరకూ ఇన్వెస్ట్‌ చేయవచ్చు. మీరు 15–20 ఏళ్ల పాటు ఎన్‌పీఎస్‌లో ఇన్వెస్ట్‌ చేయాలనుకుంటే, మీ ఇన్వెస్ట్‌మెంట్స్‌లో 50 శాతం వరకూ ఈ ప్లాన్‌లో ఇన్వెస్ట్‌ చేయండి. ఇక ప్రభుత్వ బాండ్లలో 25 శాతం, కార్పొరేట్‌ బాండ్లలో 25 శాతం చొప్పున ఇన్వెస్ట్‌ చేయవచ్చు.  
 
 మల్టీ క్యాప్‌ ఫండ్స్‌లో ఇన్వెస్ట్‌ చేయడం మంచిదా లేక విడివిడిగా లార్జ్, మిడ్, స్మాల్‌ క్యాప్‌ ఫండ్స్‌లో ఇన్వెస్ట్‌చేయడం మంచిదా ?
 –సిరాజ్, హైదరాబాద్‌  
 ఈక్విటీ, డెట్‌ మార్కెట్లు చక్రీయంగా ఉంటాయి. ఈ మార్కెట్లలో పెరుగుదల, తరుగుదల సహజమైన విషయాలు. అందుకని కొన్నిసార్లు లార్జ్‌ క్యాప్‌ ఫండ్స్‌ మంచి పనితీరు చూపించవచ్చు. ఒక్కోసారి మిడ్‌ క్యాప్‌ ఫండ్స్‌ మంచి లాభాలు సాధించవచ్చు. మరొక్కసారి స్మాల్‌ క్యాప్‌ ఫండ్స్‌ మనం ఊహించని రాబడులనివ్వవచ్చు. అయితే స్టాక్‌ మార్కెట్‌ పతన బాటలో ఉన్నప్పుడు మాత్రం స్మాల్‌ క్యాప్స్‌ కూడా తీవ్రంగా పతనమవుతాయి. మిడ్‌ క్యాప్‌ ఫండ్స్‌పై కూడా తీవ్రమైన ప్రభావమే ఉంటుంది. లార్జ్‌ క్యాప్స్‌ మాత్రం ఒకింత తట్టుకోగలుగుతాయి. ఒక వేళ మీరు మల్టీ క్యాప్‌ ఫండ్‌లో ఇన్వెస్ట్‌ చేసినట్లయితే,..ఈ మల్టీక్యాప్‌ ఫండ్‌ స్మాల్, మిడ్, లార్జ్‌ క్యాప్‌ కంపెనీల్లో ఇన్వెస్ట్‌ చేస్తుంది కనుక, తగిన స్థాయిలో డైవర్సిఫికేషన్‌ ఉంటుంది.
 మూడేళ్ల క్రితం మీరు కొంత, కొంత మొత్తాలను లార్జ్, మిడ్, స్మాల్‌ క్యాప్‌ల్లో ఇన్వెస్ట్‌ చేశారనుకుందాం. ఇప్పుడు వాటి రాబడులను పరిశీలిస్తే, స్మాల్, మిడ్‌ క్యాప్‌ల్లో మీ ఇన్వెస్ట్‌మెంట్స్‌ రెండు రెట్లు పెరిగి ఉండేవి. ఇక లార్జ్‌ క్యాప్‌ ఇన్వెస్ట్‌మెంట్స్‌ ఒకటిన్నర రెట్లు మాత్రమే పెరిగేవి. దీంతో స్మాల్, మిడ్‌క్యాప్‌ల్లోనే ఇన్వెస్ట్‌ చేయడానికి మీరు మొగ్గు చూపేవారు. అయితే 2008 నాటి పతనంలో మిడ్, స్మాల్‌   క్యాప్‌ ఫండ్స్‌ 70–80% వరకూ పతనమయ్యాయి. లార్జ్‌ క్యాప్‌ ఫండ్స్‌ మాత్రం 40–45% రేంజ్‌లోనే నష్టపోయాయి. ఫండ్‌ మేనేజర్‌ మంచి సమర్థత గలవాడైతే, మల్టీ క్యాప్‌ ఫండ్‌లో ఇన్వెస్ట్‌ చేయడం మంచిది. మీరు కనుక మంచి ఫండ్‌ మేనేజర్‌ను ఎంచుకోగలిగితే మీరు మల్టీ క్యాప్‌ ఫండ్‌లో నిరభ్యంతరంగా ఇన్వెస్ట్‌ చేయవచ్చు.
 మిడ్‌/స్మాల్‌ క్యాప్‌ ఫండ్స్‌లో ఇన్వెస్ట్‌ చేయాలనుకుంటే మీరు మార్కెట్‌ను ఎప్పటికప్పుడు క్షుణ్నంగా పరిశీలించాల్సి ఉంటుంది. మీ పోర్ట్‌ఫోలియోను ఎప్పటికప్పుడు రీబ్యాలన్స్‌ చేయాల్సి ఉంటుంది. రిస్క్‌ను భరించగలిగితే స్మాల్, మిడ్‌ క్యాప్‌ ఫండ్స్‌లో ఇన్వెస్ట్‌ చేయొచ్చు. మార్కెట్లో తీవ్ర ఒడిదుడుకులు చోటు చేసుకున్నప్పుడు మీరు ఇన్వెస్ట్‌ చేసిన స్మాల్, మిడ్‌ క్యాప్‌ ఫండ్స్‌ పనితీరు తీవ్రంగా ప్రభావితమవుతుందనే విషయాన్ని మీరు గుర్తు పెట్టుకోవాలి. చాలామంది సాధారణ ఇన్వెస్టర్లు డైవర్సిఫికేషన్‌ నిమిత్తం మల్టీ క్యాప్‌ ఫండ్స్‌లో ఇన్వెస్ట్‌ చేస్తారు. అన్ని విషయాలను పరిగణనలోకి తీసుకొని ఏ ఫండ్స్‌లో ఇన్వెస్ట్‌ చేయాలో నిర్ణయించుకోండి.
 – ధీరేంద్ర కుమార్‌ సీఈవో, వ్యాల్యూ రీసెర్చ్‌


 నేను కొన్నేళ్ళుగా హెచ్‌డీఎఫ్‌సీ టాప్‌ 200 ఫండ్‌లో సిస్టమాటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో ఇన్వెస్ట్‌ చేస్తున్నాను. ఇప్పుడు ఈ సిప్‌ ముగిసింది. మళ్లీ కొత్తగా దీన్లోనే సిప్‌ మొదలు పెట్టాలనుకుంటున్నాను. నాది సరైన నిర్ణయమేనా ? లేకుంటే సిప్‌ కోసం వేరే మ్యూచువల్‌ ఫండ్‌ను ఎంచుకోమంటారా?
 – భవానీ, విజయవాడ
 
 హెచ్‌డీఎఫ్‌సీ టాప్‌ 200 ఫండ్‌లో కొన్నేళ్లుగా మీరు సిప్‌ విధానంలో ఇన్వెస్ట్‌ చేస్తున్నారు. అంటే దీర్ఘకాలంలో ఈ ఫండ్‌ మంచి రాబడులే ఇచ్చి ఉంటుందనే విషయాన్ని మీరు గమనించి ఉంటారు. ఇతర పోటీ ఫండ్స్‌తో పోల్చితే కొన్ని సంవత్సరాల్లో ఈ ఫండ్‌ పనితీరు బాగాలేకపోయినా, మొత్తం మీద ఈ ఫండ్‌ సంతృప్తికరమైన పనితీరునే కనబరిచింది. అయితే ఇటీవల కాలంలో ఈ ఫండ్‌ పనితీరులో మరింత మెరుగుదల కనిపిస్తోంది. ఎలాంటి సంశయాలు పెట్టుకోకుండా ఈ ఫండ్‌లో మీ సిప్‌ను కొనసాగించండి. మార్కెట్‌ గరిష్ట స్థాయిలో ఉన్నా, పతన బాటలో ఉన్నా సిప్‌ను కొనసాగించడానికి వెనకాడవద్దు. స్వల్పకాలంలో ఈ ఫండ్‌ పనితీరు ఒడిదుడుకులమయంగా ఉన్నప్పటికీ, సిప్‌ విధానంలో ఇన్వెస్ట్‌ చేయడం ద్వారా కాంపౌండింగ్‌ ప్రయోజనాలు పొందవచ్చు. అందుకని నిరభ్యంతరంగా ఈ ఫండ్‌లో  సిప్‌ ఇన్వెస్ట్‌మెంట్స్‌ను కొత్తగా మొదలు పెట్టవచ్చు.
 
 ఎన్‌పీఎస్‌ టైర్‌–2 ఖాతా అంటే ఏమిటి ? దీంట్లో  ఇన్వెస్ట్‌ చేస్తే మంచి ప్రయోజనాలు లభిస్తాయని మిత్రులంటున్నారు. ఇది నిజమేనా?
 – శ్రీనివాస్, విశాఖపట్టణం
 
 ఎన్‌పీఎస్‌ (నేషనల్‌ పెన్షన్‌ సిస్టమ్‌) టైర్‌ వన్‌ అకౌంట్‌ ఉన్నవాళ్లే, ఎన్‌పీఎస్‌ టైర్‌–2 అకౌంట్‌ను ప్రారంభించడానికి అర్హులు. ఎన్‌పీఎస్‌ టైర్‌ –2 ఇన్వెస్ట్‌మెంట్స్‌కు ఎలాంటి లాక్‌–ఇన్‌ పీరియడ్‌ ఉండదు. కాబట్టి ఈ అకౌంట్‌ నుంచి ఎప్పుడైనా డబ్బులు విత్‌డ్రా చేసుకోవచ్చు. బ్యాంక్‌ ఫిక్స్‌డ్‌ డిపాజిట్‌ కన్నా కూడా ఇది మెరుగైన ప్రత్యామ్నాయం. అయితే బ్యాంక్‌ ఎఫ్‌డీ అయితే తక్షణం ఉపసంహరించుకోవచ్చు. ఎన్‌పీఎస్‌ టైర్‌–2 ఖాతాలో మాత్రం డబ్బుల  ఉపసంహరణకు  మూడు రోజులు పడుతుంది. ఇదొక్కటే దీనికి ఉన్న ప్రతికూలాంశం. మూడేళ్ల కాలానికి గాను ఎన్‌పీఎస్‌ టైర్‌–2 ఖాతా నుంచి 11.5 శాతం నుంచి 14 శాతం రేంజ్‌లో రాబడులు పొందవచ్చు. అయితే ఎన్‌పీఎస్‌ టైర్‌–వన్‌ ఖాతాకు లభించినట్లుగా ఈ ఎన్‌పీఎస్‌–టైర్‌–2 ఖాతా రాబడులపై ఎలాంటి పన్ను రాయితీలు లభించవు. దీంట్లో ఏడాదికి కనీసం రూ.6,000 ఇన్వెస్ట్‌ చేయాలి.  స్వల్పకాల అవసరాలకు డెట్‌ ఫండ్స్‌లో కన్నా టైర్‌ –2 ఫండ్స్‌లోనే ఇన్వెస్ట్‌ చేయడం మంచిది. దీంట్లో వ్యయాలు తక్కువగా ఉంటాయి. పైగా, రాబడులు కూడా మెరుగ్గానే ఉంటాయి. అయితే ఎన్‌పీఎస్‌ టైర్‌–2లో మీ ఇన్వెస్ట్‌మెంట్స్‌ను మూడేళ్లకు మించి కొనసాగిస్తే, ఈ ఇన్వెస్ట్‌మెంట్స్‌ను ఉపసంహరించుకున్నప్పుడు కొంత పన్ను చెల్లించాల్సి ఉంటుంది. అయితే ఈ పన్ను భారం స్వల్పంగానే ఉంటుంది.
 
 డెట్‌ ఫండ్స్‌లో ఒకేసారి పెద్ద మొత్తంలో పెట్టుబడులు పెట్టవచ్చా?
 – జగన్, ఈ మెయిల్‌ ద్వారా
 
 ఈక్విటీ మ్యూచువల్‌ఫండ్స్‌లో ఒకేసారి పెట్టుబడులు పెట్టడం సరికాదు. కానీ డెట్‌ ఫండ్స్‌లో ఒకేసారి పెద్ద మొత్తంలో పెట్టుబడులు పెట్టవచ్చు. ఈక్విటీ మ్యూచువల్‌ ఫండ్స్‌ల మాదిరి డెట్‌ ఫండ్స్‌ భారీ ఒడిదుడుకులకు గురికావు. అందుకని డెట్‌ ఫండ్స్‌లో ఒకేసారి పెద్ద మొత్తంలో పెట్టుబడులు పెట్టినా, ఎలాంటి ఇబ్బంది ఉండదు.  అయితే ఇలా ఒకేసారి డెట్‌ ఫండ్స్‌లో పెద్ద మొత్తంలో ఇన్వెస్ట్‌ చేయడం కంటే కూడా ఈక్విటీ, లేదా బ్యాలన్స్‌డ్‌ ఫండ్స్‌లో సిస్టమాటిక్‌ ఇన్వెస్ట్‌మెంట్‌ ప్లాన్‌(సిప్‌) విధానంలో దీర్ఘకాలం పాటు ఇన్వెస్ట్‌ చేస్తే మంచి రాబడులు పొందవచ్చు. డెట్‌ ఫండ్స్‌తో పోల్చితే ఈక్విటీ ఫండ్స్‌లో పన్ను ప్రయోజనాలు కూడా లభిస్తాయి.
 
 నేను గడువులోపల ఆదాయపు పన్ను రిటర్న్‌లు దాఖలు చేయలేకపోయాను. ఈ అసెస్‌మెంట్‌ ఇయర్‌(2017–18)కు ఐటీఆర్‌ దాఖలు చేసే అవకాశం లేదా?
 – నిహారిక, హైదరాబాద్‌
 
 ఈ అసెస్‌మెంట్‌ ఇయర్‌కు సంబంధించి ఐటీఆర్‌ దాఖలును ఈ ఏడాది జూలై 31లోపు దాఖలు చేయాల్సి ఉంది. అయితే ఈ గడువును కేంద్ర ప్రభుత్వం ఈ నెల 5 వరకూ పొడిగించింది. ఈ గడువులోగా కూడా ఐటీఆర్‌ను దాఖలు చేయలేని వాళ్లు  బిలేటెడ్‌ రిటర్న్‌లను  దాఖలు చేయవచ్చు.  ఈ అసెస్‌మెంట్‌ ఇయర్‌కు సంబంధించి ఈ బిలేటెడ్‌ రిటర్న్‌లను వచ్చే ఏడాది మార్చి 31లోపు దాఖలు చేసుకోవచ్చు. అయితే గడువు తేదీ తర్వాత ఐటీఆర్‌లు దాఖలు చేయని వాళ్లు.. అంటే ఈ నెల 5 లోపు ఐటీఆర్‌లను దాఖలు చేయలేనివాళ్లు  కొన్ని ప్రయోజనాలు కోల్పోతారు. కొంత జరిమానా చెల్లించాల్సి రావచ్చు. గడువులోపు ఐటీఆర్‌లు దాఖలు చేస్తే లభించే ప్రయోజనాలు గడువు తీరిన తర్వాత దాఖలు చేసే ఐటీఆర్‌లకు లభించవు. అంతకు ముందు సంవత్సరాల్లో పొందిన నష్టాలను క్యారీ ఫార్వార్డ్‌ చేసుకొని తర్వాతి  సంవత్సరాల్లో వచ్చే లాభాలతో రద్దు చేసుకునే అవకాశం కోల్పోతారు. మరోవైపు ఏమైనా పన్నులు చెల్లించాల్సి ఉంటే, వాటిపై వడ్డీకూడా చెల్లించాల్సి ఉంటుంది. అంతే కాకుండా ఒకవేళ ట్యాక్స్‌ రిఫండ్‌ వచ్చే అవకాశాలున్నట్లయితే, ట్యాక్స్‌ రిఫండ్‌ల్లో సాధారణం కంటే అధిక కాలం జాప్యం జరగవచ్చు.


 నా వయస్సు 47 సంవత్సరాలు. నాకు ముగ్గురు పిల్లలున్నారు. నేను టర్మ్‌ బీమా పాలసీ తీసుకోవాలనుకుంటున్నాను. ఎంత మొత్తానికి తీసుకోవాలి? టర్మ్‌ బీమా ఎంచుకోవడానికి ఏ అంశాలను ముఖ్యంగా పరిగణనలోకి తీసుకోవాలి?
 –విరాట్‌ సాయి విశాఖపట్టణం
 
 టర్మ్‌ బీమా ఎంత మొత్తానికి తీసుకోవాలనే విషయం వ్యక్తికి, వ్యక్తికి మారుతూ ఉంటుంది. ఒక్కో వ్యక్తి ఆదాయం, ఆర్థిక అవసరాలు, ఆ వ్యక్తిపై ఆర్థికంగా ఆధారపడి ఉన్న వ్యక్తులు, వారి ఆర్థిక అవసరాలు ఇలా వివిధ విషయాలను పరిగణనలోకి తీసుకొని ఎంత మొత్తానికి బీమా తీసుకోవాలో నిర్ణయించుకోవాలి. ఒక బండ సూత్రం ఏమిటంటే, మీ పదేళ్ల ఆదాయం ఎంత ఉంటుందో, అంత మొత్తానికి టర్మ్‌ బీమా తీసుకోవాలి. మీ విషయానికొస్తే, పదేళ్ల ఆదాయంతో పాటు, మీ ముగ్గురు పిల్లల చదువులకయ్యే ఖర్చులు, మీకు ఏమైనా రుణాలు ఉంటే వాటిని కూడా పరిగణనలోకి తీసుకోవాలి. ఇక మంచి టర్మ్‌ ప్లాన్‌ను ఎంచుకోవడానికి రెండు ముఖ్యమైన అంశాలు చూడాలి. మొదటిది క్లెయిమ్స్‌ సెటిల్మెంట్‌ రేషియా.  ఏ బీమా కంపెనీ క్లెయిమ్స్‌ సెటిల్మెంట్‌ రేషియో అధికంగా ఉంటుందో ఆ కంపెనీ నుంచి టర్మ్‌ బీమా పాలసీ తీసుకోవాలి. ఇక రెండో అంశం.. చెల్లించాల్సిన ప్రీమియమ్‌. సాధారణంగా టర్మ్‌  బీమా పాలసీల ప్రీమియమ్‌లు తక్కువగానే ఉంటాయి. ఒకే బీమా మొత్తానికి వివిధ బీమా కంపెనీల ప్రీమియమ్‌లు వేర్వేరుగా ఉంటాయి. తక్కువ ప్రీమియమ్‌తో కూడిన బీమా పాలసీలను ఆఫర్‌ చేసే కంపెనీని ఎంచుకోవాలి. వివిధ బీమా సంస్థల  క్లెయిమ్స్‌ సెటిల్మెంట్‌ రేషియో, ప్రీమియమ్‌ విషయాలను  సులభంగా పోల్చి చూసుకునే వెసులుబాటు ఇప్పుడు ఆన్‌లైన్‌లో అందుబాటులో ఉంది.  ఇలా పోల్చిచూసుకుని మీ ఆర్థిక అవసరాలకు తగ్గట్లుగా మంచి టర్మ్‌ బీమా పాలసీని ఎంచుకోండి.
 
 టర్నోవర్‌ రేషియో అంటే ఏమిటి? ఇన్వెస్ట్‌మెంట్‌ కోసం ఒక ఫండ్‌ను ఎంచుకునేటప్పుడు ఈ టర్నోవర్‌ రేషియోను కూడా పరిగణనలోకి తీసుకోవాలా ?
 –ఆనంద్, విజయవాడ
 
 ఒక మ్యూచువల్‌ ఫండ్‌..తన పోర్ట్‌ఫోలియోతో  ప్రతి ఏడాది మార్చిన షేర్‌ హోల్డింగ్స్‌ శాతాన్ని టర్నోవర్‌ రేషియోగా పరిగణిస్తారు. ఉదాహరణకు ఒక మ్యూచువల్‌ ఫండ్‌ టర్నోవర్‌ రేషియో 31 శాతంగా ఉందనుకోండి. అంటే దానర్ధం.. ఒక ఏడాది కాలంలో ఆ ఫండ్‌ షేర్‌హోల్డింగ్స్‌లో మార్పులు 31 శాతం వున్నాయని అర్థం. టర్నోవర్‌ రేషియో అధికంగా ఉంటే.., ఇన్వెస్టర్లపై వ్యయాల భారం అధికంగా ఉంటుంది. షేర్ల కొనుగోళ్లు, విక్రయాలపై కొన్ని చార్జీలు, వ్యయాలు, పన్నులు ఉంటాయి కదా! అయితే ఈక్విటీ ఫండ్స్‌ విషయానికొస్తే, సరైన ధరలో సరైన షేర్లను ఎంచుకోవడం, ఏ ధర వద్ద ఏ ఏ షేర్ల నుంచి వైదొలగడం.. ఇవన్నీ కీలకమైన అంశాలు. ఇవన్నీ సమర్థవంతంగా జరిగితే ఇన్వెస్టర్లకు మంచి రాబడులు వస్తాయి. టర్నోవర్‌ రేషియో తక్కువగా ఉండి, మంచి రాబడులు వస్తే.. అది ఒక ఫండ్‌ను ఎంచుకోవడానికి ముఖ్యమైన అంశంగా పరిగణించవచ్చు. కానీ ఒక్కోసారి టర్నోవర్‌ రేషియో ఎక్కువగా ఉండే అవకాశాలు ఉండొచ్చు. ఉదాహరణకు ఒక ఫండ్‌ను ఇన్వెస్టర్లు తరచుగా అమ్మకాలు, కొనుగోళ్లు చేస్తూ ఉంటే, ఫండ్‌ మేనేజర్స్‌ తప్పనిసరిగా ఫండ్‌ పోర్ట్‌ఫోలియోలో ఉండే షేర్లను మార్చాల్సి రావచ్చు.  అయితే ఒక మ్యూచువల్‌ ఫండ్‌లో  ఇన్వెస్ట్‌ చేయడానికి టర్నోవర్‌ రేషియో అంత కీలకమైన అంశం కాదు. ఆ ఫండ్‌ గత కొన్నేళ్లలో ఎలాంటి రాబడులు ఇచ్చింది, ఇదే కేటగిరీలోని ఇతర ఫండ్స్‌ ఎలాంటి రాబడులు ఇచ్చాయి. తదితర అంశాలను బేరీజు వేసుకొని నిర్ణయం తీసుకోవాలి.
 
 పన్ను ప్రయోజనాల కోసం పలువురు ఇన్వెస్టర్లు ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)లో ఇన్వెస్ట్‌ చేస్తారు. అయితే నాకు పన్ను ప్రయోజనాలు అవసరం లేదు. పన్ను ప్రయోజనాలు ప్రాధాన్యత అంశంగా కాకుండా ఈఎల్‌ఎస్‌ఎస్‌ల్లో ఇన్వెస్ట్‌ చేద్దామనుకుంటున్నాను. నాది సరైన నిర్ణయమేనా ?
 –నాగేశ్వరరావు, హైదరాబాద్‌
 
 పన్ను ప్రయోజనాలు ప్రాధాన్యత అంశం కానప్పుడు ఈఎల్‌ఎస్‌ఎస్‌ల్లో ఇన్వెస్ట్‌ చేయడం సరైన నిర్ణయం కాదని చెప్పవచ్చు. ఎందుకంటే ఈఎల్‌ఎస్‌ఎస్‌లకు లాక్‌ ఇన్‌ పీరియడ్‌ మూడేళ్లుగా ఉంటుంది. మూడేళ్లలోపు ఇన్వెస్టర్లు తమ పెట్టుబడులను ఉపసంహరించుకోరు, కాబట్టి  దీర్ఘకాలం దృష్టిలో పెట్టుకొని ఫండ్‌ మేనేజర్‌ పెట్టుబడి నిర్ణయాలు తీసుకుంటారు. అయితే ఇలాంటి పన్ను ఆదాయ ఫండ్స్, సాధారణ ఈక్విటీ మ్యూచువల్‌ ఫండ్స్‌ కంటే మంచి రాబడులను ఇచ్చిన దాఖలాలు అయితే లేవు. ఈఎల్‌ఎస్‌ఎస్‌ల్లో ఇన్వెస్ట్‌ చేస్తే..మీ పెట్టుబడులు అనవసరంగా మూడేళ్లు లాక్‌ అవుతాయి. మీ పెట్టుబడులకు  ఈ అనవసర లాక్‌ ఇన్‌ పీరియడ్‌ అవసరమా అని మీరు ఆలోచించుకోండి. పన్ను ఆదా, పన్ను ప్రయోజనాలు మీకు అవసరం లేనప్పుడు, మీరు ఇన్వెస్ట్‌ చేయడానికి ఈఎల్‌ఎస్‌ఎస్‌ కాకుండా మరెన్నో ఫండ్స్‌ అందుబాటులో ఉన్నాయి. ఏదైనా మంచి ఈక్విటీ లేదా బ్యాలన్స్‌డ్‌ ఫండ్స్‌ను ఎంచుకొని, దాంట్లో ఇన్వెస్ట్‌ చేయండి. సంవత్సరం దాటిన తర్వాత కావాలనుకుంటే ఈ ఫండ్‌ యూనిట్లను విక్రయించి, మీ ఇన్వెస్ట్‌మెంట్స్‌ను వెనక్కి తీసుకోవచ్చు. పైగా  ఎలాంటి పన్ను భారం ఉండదు. అదే ఈఎల్‌ఎస్‌ఎస్‌ల్లో ఇన్వెస్ట్‌ చేశారనుకోండి. మూడేళ్ల తర్వాతనే మీ ఇన్వెస్ట్‌మెంట్స్‌ మీరు తీసుకోవడానికి వీలుంటుంది.


 నేను 2004లో నా కొడుకు పేరు మీద బిర్లా సన్‌ లైఫ్‌ ఫ్లెక్సి సేవ్‌ ప్లస్‌ ఎండోమెంట్‌ ప్లాన్‌ను తీసుకున్నాను. ఏడాదికి రూ.50,000 చొప్పున 19 సంవత్సరాల పాటు ప్రీమియమ్‌ చెల్లించాల్సి ఉంటుంది. గత మూడేళ్ల నుంచి ప్రీమియమ్‌ చెల్లించడం లేదు. ఇప్పటిదాకా రూ.6 లక్షల వరకూ ప్రీమియమ్‌ చెల్లించాను. ఈ ప్లాన్‌ను సరెండర్‌ చేస్తే ఇప్పుడు నాకు రూ.6,70,000 వస్తాయి. ఈ ప్లాన్‌ను సరెండర్‌ చేయమంటారా? లేక కొనసాగించమంటారా?
 –రమేశ్, విజయవాడ
 
 బీమా తీసుకున్న వ్యక్తి మరణిస్తే, ఆ వ్యక్తిపై ఆధారపడిన కుటుంబం ఆర్థిక అవసరాలు తీర్చడం బీమా ముఖ్య ఉద్దేశం. అందుకని మీ కొడుకు పేర బీమా పాలసీ తీసుకోవడం సరైనది కాదు. బీమా కావలసినది మీకు. మీ కొడుకు ఆర్థికంగా ప్రయోజకుడు అయ్యేంత వరకూ మీ కుటుంబం, అతడి ఆర్థిక అవసరాలు తీర్చడం కోసం మీకు బీమా అవసరం. అందుకుని మీరు తక్షణం టర్మ్‌ బీమా ప్లాన్‌ తీసుకోండి. ఇక బిర్లా సన్‌లైఫ్‌ ఎండోమెంట్‌ ప్లాన్‌ విషయానికొస్తే, ఇదొక యూనిట్‌ లింక్డ్‌ ఇన్‌కమ్‌ ప్లాన్‌(యులిప్‌). ఇన్వెస్ట్‌మెంట్‌ కలగలసిన బీమా ప్లాన్‌ ఇది. ఇవి తక్కువ బీమా కవరేజ్‌ను, తక్కువ రాబడులను ఇస్తాయి. మీ విషయమై తీసుకుంటే పన్నేండేళ్ల కాలంలో మీరు ఇప్పటిదాకా రూ.6 లక్షల వరకూ ప్రీమియమ్‌ చెల్లించారు.  మీ ఇన్వెస్ట్‌మెంట్‌  విలువ రూ.6.70,000గానే ఉంది. ఇది బ్యాంక్‌ సేవింగ్స్‌ ఖాతా కంటే తక్కువ రాబడి. అందుకని ఈ పాలసీని సరెండర్‌ చేయడమే ఉత్తమం. మీరు ఈ ప్లాన్‌ తీసుకొని ఐదేళ్లు దాటినందున ఎలాంటి సరెండర్‌ చార్జీలు లేకుండానే ఈ ప్లాన్‌ను సరెండర్‌ చేయవచ్చు. మీరు సరెండర్‌ చేసేటప్పుడు ఈ ఫండ్‌ విలువ ఎంత ఉంటుందో అదే మీ సరెండర్‌ వేల్యూ అవుతుంది.  ఈ పాలసీని సరెండర్‌ చేసి దీనికి చెల్లించే రూ.50,000 మొత్తాన్ని ఈక్విటీ మ్యూచువల్‌ ఫండ్స్‌లో ఇన్వెస్ట్‌ చేయండి. ఏదైనా 2–4 డైవర్సిఫైడ్‌ మ్యూచువల్‌ ఫండ్స్‌ను ఎంచుకొని వాటిల్లో ఈ మొత్తాన్ని  ఇన్వెస్ట్‌ చేస్తే దీర్ఘకాలంలో మంచి రాబడులు పొందవచ్చు. ఇప్పుడు మీరు ఫండ్స్‌లో చేసే ఈ ఇన్వెస్ట్‌మెంట్స్‌.. రేపు మీ అబ్బాయి ఉన్నత విద్యాభ్యాసానికి, ఇతర అవసరాలకు పనికివస్తాయి.
 
 నేను నెలకు రూ.10,000 చొప్పున ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)ల్లో ఇన్వెస్ట్‌ చేద్దామనుకుంటున్నాను. అయితే వీటికి మూడేళ్ల లాక్‌–ఇన్‌ పీరియడ్‌ ఉంటుంది కదా! ఒకవేళ ఈ లాక్‌ ఇన్‌ పీరియడ్‌ కంటే ముందే నాకు డబ్బులు అవసరమైతే నేను విత్‌డ్రా చేసుకునే వీలు ఉందా?                           
 –రాఘవ, విశాఖ పట్టణం
 
 పన్ను ఆదా చేసే ప్రతి ఇన్వెస్ట్‌మెంట్‌ ప్లాన్‌కు లాక్‌–ఇన్‌ పీరియడ్‌ తప్పనిసరి. మీరు ఇన్వెస్ట్‌ చేయాలనుకుంటున్న ఈక్విటీ లింక్డ్‌ సేవింగ్స్‌ స్కీమ్స్‌(ఈఎల్‌ఎస్‌ఎస్‌)కు లాక్‌–ఇన్‌ పీరియడ్‌ మూడేళ్లుగా ఉంది. అంటే మీరు ఇన్వెస్ట్‌ చేసిన మూడేళ్ల తర్వాత మాత్రమే ఈ ఇన్వెస్ట్‌మెంట్స్‌ ఉపసంహరించుకునే వీలు ఉంది. అంతకంటే ముందే ఈ ఇన్వెస్ట్‌మెంట్స్‌ను ఉపసంహరించుకునే వీలు లేదు.
 
 
 నేను కొంత మొత్తం ప్రతి నెలా ఏదైనా ఒక లార్జ్‌ క్యాప్‌ ఫండ్‌లో ఇన్వెస్ట్‌ చేద్దామనుకుంటున్నాను. అయితే  ప్రతి లార్జ్‌ క్యాప్‌ ఫండ్స్‌ పోర్ట్‌ఫోలియో దాదాపు ఒకే విధంగా ఉంటున్నాయి. వీటిల్లోంచి ఉత్తమమైన ఫండ్‌ను ఎలా ఎంచుకోవాలి?           
  –నాని, హైదరాబాద్‌  
 
 ఏదైనా ఫండ్‌లో ఇన్వెస్ట్‌ చేయాలనుకుంటే,  ఆ ఫండ్‌ పోర్ట్‌ఫోలియోను బట్టి ఇన్వెస్ట్‌ చేయకూడదు. దీర్ఘకాలంలో ఆయా ఫండ్స్‌ ఇచ్చిన రాబడులను పరిశీలించాలి.  అంతేకాకుండా దీర్ఘకాలంలో ఆ ఫండ్స్‌ ఏ మేరకు ఒడిదుడుకులకు గురయ్యాయో చూడాలి. దాదాపు 70–80 వరకూ లార్జ్‌క్యాప్‌ ఫండ్స్‌ అందుబాటులో ఉన్నాయి. అయితే వీటిల్లో 20–30 వరకూ ఫండ్స్‌ ఇండెక్స్‌ స్థాయి రాబడులను కూడా ఇవ్వడం లేదు. కేవలం కొన్ని ఫండ్స్‌ మాత్రమే 5–10 ఏళ్ల కాలానికి 10 శాతానికి మించి రాబడులనిస్తున్నాయి. ఈ ఫండ్స్‌ పోర్ట్‌ఫోలియోలు ఒకే విధంగా ఉన్నప్పటికీ, రాబడుల్లో  తేడాలుంటున్నాయి. ఒక షేర్‌ను ఎప్పుడు కొనాలో, ఎప్పుడు అమ్మేయాలో, ఎంత కాలం పోర్ట్‌ఫోలియోలో కొనసాగించాలో.. తదితర అంశాలన్నీ ఫండ్‌ పనితీరుపై ప్రభావం చూపుతాయి. కాబట్టి ఫండ్‌ పోర్ట్‌ఫోలియోను కాకుండా, ఫండ్‌ గత కాలపు పనితీరును బట్టి ఇన్వెస్ట్‌మెంట్‌ నిర్ణయాలు తీసుకోవాలి.
 
 నేను కెనాడాలో పనిచేస్తున్నాను. ఒక ప్రవాస భారతీయుడిగా నేను భారత మ్యూచువల్‌ ఫండ్స్‌లో ఇన్వెస్ట్‌ చేయవచ్చా?
 –అగర్వాల్, ఈ మెయిల్‌ ద్వారా
 చాలా మ్యూచువల్‌ ఫండ్స్‌ అమెరికా, కెనడాల్లో పనిచేస్తున్న ప్రవాస భారతీయుల నుంచి ఇన్వెస్ట్‌మెంట్స్‌ తీసుకోవడం ఆపేస్తున్నాయి. కొన్ని శాసనపరమైన నిబంధనల వల్ల పలు మ్యూచువల్‌ ఫండ్స్‌ అమెరికా, కెనడాల్లో ఉంటున్న ప్రవాస భారతీయుల ఇన్వెస్ట్‌మెంట్స్‌ను అంగీకరించడం లేదు.    ప్రవాస భారతీయులతో సహా అమెరికా, కెనడాల్లో నివసించే వ్యక్తులు జరిపే ఆర్థిక లావాదేవీలను ప్రపంచంలోని అన్ని ఆర్థిక సంస్థలు అమెరికా, కెనడా ప్రభుత్వాలకు నివేదించాలని ఫారిన్‌ అకౌంట్‌ ట్యాక్స్‌ కంప్లయన్సెస్‌ యాక్ట్‌(ఫ్యాట్‌కా)  తప్పనిసరి చేసింది. అయితే గత ఏడాది డిసెంబర్‌ నాటికి అమెరికా, కెనడాల్లోని ప్రవాస భారతీయుల నుంచి ఇన్వెస్ట్‌మెంట్స్‌ను కొన్ని భారత ఫండ్స్‌ అంగీకరిస్తున్నాయి. ఆ ఫండ్స్‌ వివరాలు.., బిర్లా సన్‌లైఫ్‌ మ్యూచువల్‌ ఫండ్, ఎస్‌బీఐ మ్యూచువల్‌ ఫండ్, యూటీఐ మ్యూచువల్‌ ఫండ్, ఐసీఐసీఐ ప్రుడెన్షియల్‌ మ్యూచువల్‌ ఫండ్, డీహెచ్‌ఎఫ్‌ఎల్‌ ప్రమెరికా మ్యూచువల్‌ ఫండ్, ఎల్‌ అండ్‌  టీ మ్యూచువల్‌ ఫండ్, పీపీఎఫ్‌ఏఎస్‌ మ్యూచువల్‌ ఫండ్, సుందరమ్‌ మ్యూచువల్‌ ఫండ్‌.


 నా వయస్సు 22 సంవత్సరాలు. ఇటీవలే చిన్న ఉద్యోగంలో చేరాను. భవిష్యత్తు అవసరాల కోసం కొంత మొత్తం పొదుపు చేద్దామనుకుంటున్నాను.  ప్రజా భవిష్య నిధి(పీపీఎఫ్)లో ఇన్వెస్ట్ చేయమని, కొందరు, ఈక్విటీ లింక్డ్ సేవింగ్స్ స్కీమ్ (ఈఎల్‌ఎస్‌ఎస్)లో ఇన్వెస్ట్ చేయమని మరికొందరు మిత్రులు చెబుతున్నారు. దీర్ఘకాలానికి ఈ రెండింటిలో ఏది  మంచి రాబడులనిస్తుంది ? నన్ను పీపీఎఫ్‌లో ఇన్వెస్ట్ చేయమంటారా ? లేక ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో ఇన్వెస్ట్ చేయమంటారా ? తగిన సూచనలివ్వండి.                   
 - సుధీర్, హైదరాబాద్
  
 దీర్ఘకాలిక సంపదను సృష్టించడానికి ఈక్విటీ ముఖ్యమైన ఇన్వెస్ట్‌మెంట్ సాధనం. ఈ అంశాన్ని పరిగణనలోకి తీసుకుంటే ప్రజా భవిష్య నిధి(పీపీఎఫ్)కంటే కూడా ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్) మంచి ఇన్వెస్ట్‌మెంట్ సాధనమని చెప్పవచ్చు. స్వల్పకాలానికి ఈక్విటీల్లో కొంత రిస్క్ ఉంటుంది. కానీ ఐదేళ్లు అంతకు మించిన దీర్ఘ కాలానికి మంచి రాబడులు వస్తాయి.  పీపీఎఫ్‌కు ఉన్న ఒకే ఒక ఆకర్షణ. గ్యారంటీగా వచ్చే రిటర్న్‌లు.  అయితే ద్రవ్యోల్బణాన్ని పరిగణనలోకి తీసుకుంటే ఈ రాబడులు ఏమంత సంతృప్తికరంగా ఉండవని చెప్పవచ్చు. ఇక ఈఎల్‌ఎస్‌ఎస్‌ల్లో దీర్ఘకాలం పాటు ఇన్వెస్ట్ చేస్తే మంచి రాబడులు పొందవచ్చు. పైగా పన్ను ప్రయోజనాలు కూడా లభిస్తాయి.
  
 రెండేళ్ల క్రితం పది లక్షల బీమాకు గాను ఎల్‌ఐసీ జీవన్ ఆనంద్ పాలసీ తీసుకున్నాను. 16 సంవత్సరాల కాల వ్యవధి ఉన్న ఈ పాలసీకి ఏడాది ప్రీమియమ్ రూ.68వేలు. ఇప్పటివరకూ రెండేళ్ల ప్రీమియమ్‌లు చెల్లించాను. ఈ పాలసీని కొనసాగించడం కష్టంగా వుంది. ఇప్పుడు వైదొలిగితే ఎంత నష్టం వస్తుంది.                                       
 - ప్రకాశ్, విశాఖపట్టణం
  
 బీమా కవర్ కోసం టర్మ్ ఇన్సూరెన్స్ పాలసీ తీసుకోవడం ఉత్తమం.  తక్కువ ప్రీమియమ్‌కే ఎక్కువ బీమా రక్షణ పొందవచ్చు. ఇక మదుపు విషయానికొస్తే, మంచి రాబడుల కోసం మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు వస్తాయి. మీరు పాలసీ తీసుకొని రెండేళ్లే అయినందున ఈ పాలసీని సరెండర్ చేయడమే ఉత్తమం. ఈ తరహా పాలసీలను సరెండర్ చేస్తే తొలి మూడేళ్లలో ఎలాంటి డబ్బులు వెనక్కి రావు. మీరు ఇప్పటికే రెండేళ్ల ప్రీమియమ్ రూ.1,36,000 చెల్లించారు. ఈ డబ్బులు వెనక్కిరావు. నష్టాలు వచ్చినా సరే, ఈ పాలసీని సరెండర్ చేయడమే ఉత్తమం.
 
 మూడేళ్ల తర్వాత సరెండర్ చేస్తే కొంతైనా డబ్బులు వెనక్కి వస్తాయనే ఉద్దేశంతో మరో ఏడాది కూడా ఆగితే, మీ నష్టాలు మరింతగా పెరుగుతాయే కానీ తగ్గవు. ఉదాహరణకు మీరు చెల్లించే ప్రీమియమ్ మూడేళ్లకు రూ.2,04,000 అవుతుంది. దీంట్లో మొదటి ఏడాది చెల్లించిన ప్రీమియమ్‌ను మినహాయించుకొని మిగిలిన ప్రీమియమ్‌లో 30% గ్యారంటీడ్ సరెండర్ వేల్యూ(జీఎస్‌వీ)గా రూ.40,800 మీకు చెల్లిస్తారు. అంటే మీకు నికరంగా రూ.1,63,200 నష్టపోతారన్నమాట.
  
 ఈ మధ్యే నాకు ఇద్దరు కవలలు పుట్టారు. వారి ఉన్నత విద్యాభ్యాసం కోసం మదుపు చేయాలనుకుంటున్నాను. కాగా రెండేళ్ల క్రితం మా నాన్నగారు రిటైరయ్యారు. నేను ఒక్కడినే కొడుకును కాబట్టి రిటైర్మెంట్ ప్రయోజనాలన్నీ నాకు ఇచ్చి మనవల చదువుల కోసం ఖర్చు చేయమని చెప్పారు. నా పిల్లల చదువు కోసం బ్యాలెన్స్‌డ్ మ్యూచువల్ ఫండ్‌లో ఇన్వెస్ట్ చేద్దామనుకుంటున్నాను. ఈ బ్యాలెన్స్‌డ్ ఫండ్‌లో పెద్ద మొత్తం ఒకేసారి ఇన్వెస్ట్ చేయమంటారా ? లేక సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేయమంటారా ? ఏది సరైన విధానం ? వివరించండి.
 - సంపత్, విజయవాడ
  
 పిల్లల ఉన్నత చదువు వంటి దీర్ఘకాలిక ఆర్థిక లక్ష్యం కోసం మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు పొందవచ్చు.  ఈక్విటీ లేదా బ్యాలెన్స్‌డ్ ఫండ్స్‌లో ఇన్వెస్ట్ చేయాలనుకుంటే సిస్టమాటిక్ ఇన్వెస్ట్‌మెంట ప్లాన్ (సిప్)విధానమే మేలు. అయితే పెద్దమొత్తంలో ఇన్వెస్ట్ చేయడానికి మీ దగ్గర డబ్బులు అందుబాటులో ఉంటే, వాటిని షార్ట్ టర్మ్ డెట్ ఫండ్‌లో ముందుగా ఇన్వెస్ట్ చేయండి. తర్వాత సిస్టమాటిక్ ట్రాన్స్‌ఫర్ ప్లాన్(ఎస్‌టీపీ) విధానంలో బ్యాలెన్స్‌డ్ ఫండ్‌కు ఈ ఇన్వెస్ట్‌మెంట్స్‌ను బదిలీ చేయండి.
  
 సూపర్ టాప్-అప్ మెడిక్లెయిమ్ పాలసీలను ఆన్‌లైన్‌లో తీసుకోవచ్చా? కొన్ని మంచి ఆన్‌లైన్ సూపర్ టాప్ -అప్ మెడిక్లెయిమ్ పాలసీలను సూచిస్తారా ?                                     
 - కుమార్, బెంగళూరు
 
 సూపర్ టాప్-అప్ మెడిక్లెయిమ్ పాలసీలను ఆన్‌లైన్‌లో తీసుకోవచ్చు. యునెటైడ్ ఇండియా సూపర్ టాప్ అప్ పాలసీ, రెలిగేర్ ఎన్‌హాన్స్ సూపర్-టాప్, అపోలో మ్యునిక్ ఆప్టిమా సూపర్...ఈ పాలసీలను పరిగణనలోకి తీసుకోవచ్చు. ఆరోగ్య బీమా కవరేజ్‌ను మరింతగా పెంచుకోవడానికి సూపర్ టాప్-అప్ పాలసీలు మంచి మార్గం. ప్రీమియమ్‌లో స్వల్ప పెరుగుదలతోనే ఆరోగ్య బీమా రక్షణను మరింతగా పెంచుకోవచ్చు.
 
 ఉదాహరణకు ఒక వ్యక్తి  రూ.3 లక్షలకు ఆరోగ్య బీమా పాలసీ, రూ.10 లక్షలకు సూపర్ టాప్-అప్ పాలసీ కూడా తీసుకున్నాడనుకుందాం.  అ వ్యక్తి రూ.5 లక్షలకు క్లెయిమ్ చేస్తే, రెగ్యులర్ ఆరోగ్య బీమా పాలసీ రూ. 3లక్షలు, సూపర్ టాప్-అప్ ఆరోగ్య బీమా రూ. 2 లక్షలు చొప్పున చెల్లిస్తాయి.  అయితే ఈ పాలసీలను తీసుకునేటప్పుడు పాలసీ డాక్యుమెంట్‌ను, పాలసీ బ్రోచర్‌ను క్షుణ్నంగా పరిశీలించడం మాత్రం మరచిపోవద్దు. మినహాయింపులు, వెయిటింగ్ పీరియడ్ వంటి అంశాలను తప్పనిసరిగా గమనించండి.
 - ధీరేంద్ర కుమార్
 సీఈవో, వ్యాల్యూ రీసెర్చ్


 నేను 2010 నుంచి బీఎస్‌ఎల్‌ఐ డ్రీమ్ ఎండోమెంట్ ప్లాన్‌లో ఇన్వెస్ట్ చేయడం ప్రారంభించాను. ఇప్పటివరకూ రూ.3,95,000 పెట్టుబడులు పెట్టాను. వీటి ప్రస్తుత విలువ రూ.4,10,000గా ఉంది. ఆరేళ్లలో వచ్చిన రాబడులు చాలా స్వల్పంగా ఉన్నాయి. ఈ ప్లాన్‌లో కొనసాగమంటారా? వైదొలగమంటారా ?
 - రాఘవ, విజయవాడ
  
 బీఎస్‌ఎల్‌ఐ డ్రీమ్ ఎండోమెంట్ ప్లాన్.. యూనిట్ లింక్డ్ లైఫ్ ఇన్సూరెన్స్ ప్లాన్(యులిప్) కిందకు వస్తుంది. ఈ యులిప్‌లు మనకు తగిన బీమా రక్షణను ఇవ్వలేవు. అలాగే ద్రవ్యోల్బణాన్ని ధీటుగా తట్టుకునే రాబడులను ఇవ్వలేవు. పైగా ఈ తరహా ప్లాన్‌లో చార్జీల భారం అధికంగా ఉంటుంది. మీరు ఇన్వెస్ట్ చేసే దాంట్లోంచి ఈ చార్జీలను మినహాయించుకొని మదుపు చేస్తారు. ఈ పాలసీ మీకు ఏడాదికి కనీసం 1 శాతం కంటే తక్కువ రాబడినే ఇచ్చింది. సేవింగ్స్ బ్యాంక్ ఖాతాలో ఇన్వెస్ట్ చేసినా ఇంతకంటే ఎక్కువ రాబడులే వచ్చేవి. అందుకని ఈ ప్లాన్ నుంచి వైదొలగడమే ఉత్తమం.
 
 ఈ ప్లాన్‌నుంచి వైదొలగి, తగిన బీమా,  తక్కువ ప్రీమియమ్ ఉండే టర్మ్ బీమా పాలసీ తీసుకోండి.  ఇక మీరు ఈ పాలసీ తీసుకొని ఐదేళ్లు పూర్తయింది కాబట్టి, ఈ పాలసీని సరెండర్‌చేస్తే ఎలాంటి సరెండర్ చార్జీలు చెల్లించాల్సిన పనిలేదు. అంతేకాకుండా ఈ ప్లాన్‌ను సరెండర్ చేయడం ద్వారా మీరు పొందిన మొత్తాలపై ఎలాంటి పన్నులు చెల్లించాల్సిన పనిలేదు. మూడు అంతకు మించిన కాలానికి ఇన్వెస్ట్ చేయాలనుకుంటే ఈక్విటీ మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు పొందవచ్చు.
  
 అత్యవసరాల కోసం ఎంత మొత్తాన్ని కేటాయించాలి? ఇలా కేటాయించే సొమ్ములను ఎక్కడ ఇన్వెస్ట్ చేయాలి? దీని కోసం బ్యాంక్ సేవింగ్స్ ఖాతా తెరిస్తే సరిపోతుందా?
  - విజయ్, రాజమండ్రి
 
 అంచనా వేయలేని దుర్ఘటన కారణంగా ఆర్థికంగా ఇబ్బందులు పడకుండా మనల్ని సంరక్షించేలా అత్యవసర నిధిని ఏర్పాటు చేసుకోవాలి. మూడు నుంచి ఆరు నెలల ఇంటి ఖర్చులకు సరిపడేలా ఈ అత్యవసర నిధిని తయారు చేసుకోవాలి. తక్షణం సొమ్ము చేసుకునేలా ఈ నిధి ఉండాలి. బ్యాంక్ డిపాజిట్లు, స్వీప్ ఇన్ సౌకర్యమున్న సేవింగ్స్ ఖాతాలో ఇన్వెస్ట్ చేయడం లేదా లిక్విడ్ ఫండ్స్‌లో మదుపు చేయడం.. అత్యవసర నిధి ఏర్పాటు కోసం పరిశీలించదగ్గ మార్గాలు. మీ మొత్తం పెట్టుబడిలో కొంత మొత్తాన్ని ఎప్పుడు కావాలంటే అప్పుడు తీసుకునేలా స్వీప్ ఇన్ సౌకర్యంగా ఉంచుకోవాలి.  మిగిలిన మొత్తాన్ని లిక్విడ్ ఫండ్‌లో ఇన్వెస్ట్ చేయాలి. ఒక్క రోజు నోటీసు ద్వారా ఈ లిక్విడ్ ఫండ్ నుంచి మీ సొమ్ములు తీసుకోవచ్చు.
  
 నా కోడలు సాధారణ గృహిణి, అందువల్ల ఆమెకు టర్మ్ బీమా పాలసీకి అర్హత లేదు. కొన్ని బీమా కంపెనీలు ఈ పాలసీలను ఆఫర్ చేస్తున్నాయి. కానీ, వాటికి ప్రీమియమ్ అధికంగా ఉంది. ఎందుకు ఈ విచక్షణ?
 - కామేశ్వరరావు, వరంగల్
  
 చాలా కంపెనీలు గృహిణులకు టర్మ్ బీమా పాలసీలు ఆఫర్ చేయడం లేదు. గృహిణులు ఎలాంటి ఉద్యోగాలు చేయకపోయినా సరే, కుటుంబానికి సంబంధించి ఎన్నో బరువు బాధ్యతలు మోస్తుంటారు. ఈ బాధ్యతల ఆర్థిక విలువ ఎంతగానో ఉంటుంది. సంపాదించే వ్యక్తి మరణిస్తే, ఆర్థిక భరోసా కల్పించడమే బీమా ఉద్దేశమని బీమా కంపెనీల వాదన. గృహిణులకు ఎలాంటి ఆదాయం లేనందున సాంకేతికంగా టర్మ్ బీమా పాలసీలకు గృహిణులు అనర్హులని పలు బీమా కంపెనీలు భావిస్తున్నాయి.
 
 ఏగాన్ లైఫ్ వంటి  కొన్ని బీమా సంస్థలు గృహిణులకు కూడా టర్మ్ ప్లాన్‌లను ఆఫర్ చేస్తున్నాయి. కానీ ఆ గృహిణి బీమాను భర్త బీమా రక్షణతో అనుసంధానం చేసిన పాలసీలనే ఈ సంస్థ ఆఫర్‌చేస్తోంది. పలు కంపెనీలు బీమా, పెట్టుబడి కలగలపిన ఎండోమెంట్ ప్లాన్‌లు, యులిప్‌లను గృహిణులకు ఆఫర్ చేస్తున్నాయి.  ఈ యులిప్, ఎండోమెంట్ ప్లాన్‌లు స్వల్పమైన బీమాను మాత్రమే కవర్ చేస్తాయి. పెపైచ్చు వీటిపై వచ్చే రాబడులు అంతంత మాత్రంగానే ఉంటాయి. కాబట్టి వీటి జోలికి వెళ్లకపోవడమే ఉత్తమం.
  
 నేను ప్రైవేట్ రంగంలో పనిచేస్తున్నాను. నెలకు రూ.10,000 వరకూ ఇన్వెస్ట్ చేయగలను. మా పాప ఉన్నత విద్య అవసరాల కోసం ఈక్విటీ మ్యూచువల్ ఫండ్‌లో ఇన్వెస్ట్ చేద్దామనుకుంటున్నాను. దీంట్లో డివిడెండ్, గ్రోత్.. రెండు ఆప్షన్లు ఉన్నాయి. డివిడెండ్లపై ఎలాంటి పన్నులు లేనందున, డివిడెండ్ ఆప్షన్‌ను ఎంచుకుందామనుకుంటున్నాను. నా నిర్ణయం సరైనదేనా?                                         
 - రజని, హైదరాబాద్
  
 మీ నిర్ణయం సరైనది కాదు. నెల లేదా మూడు నెలలకొకసారి మీకు సొమ్ము అవసరం ఉన్నప్పుడు మాత్రమే మీరు ఈక్విటీ మ్యూచువల్ ఫండ్స్‌లో డివిడెండ్ ఆప్షన్‌ను ఎంచుకోవాలి. ఉదాహరణకు మీరు రిటైరైన తర్వాత ఇంటి ఖర్చులకు, వైద్య అవసరాలకు మీకు నెలవారీ కొంత మొత్తం అవసరమవుతుంది. ఇలాంటి అవసరాలున్నప్పుడు మాత్రమే డివిడెండ్ ఆప్షన్‌లో ఇన్వెస్ట్ చేయాలి. మీరు మీ పాప ఉన్నత విద్య అవసరాల కోసం ఇన్వెస్ట్ చేద్దామనుకుంటున్నారు. ఇది దీర్ఘకాలిక ఆర్థిక లక్ష్యం. ఇలాంటి దీర్ఘకాలిక ఆర్థిక అవసరాల కోసం గ్రోత్ ఆప్షన్‌ను ఎంచుకోవాలి. ఫలితంగా మీకు చక్రవడ్డీ ప్రయోజనాలు లభిస్తాయి.
 
 ఒక వేళ మీరు డివిడెండ్ ఆప్షన్‌ను ఎంచుకున్నారనుకుందాం. మీకు వచ్చే డివిడెండ్ ఆదాయం మీకు తెలియకుండానే ఖర్చు చేసేస్తారు. లేదా అనుదుత్పాదక అవసరాల కోసం వినియోగిస్తారు. ఈక్విటీ ఆధారిత ఫండ్స్‌లో వచ్చే డివిడెండ్లపై ఎలాంటి డివిడెండ్ డిస్ట్రిబ్యూషన్ ట్యాక్స్(డీడీటీ) లేదు. ఈక్విటీ మ్యూచువల్ ఫండ్స్‌కు సంబంధించిన డివిడెండ్ లేదా గ్రోత్.. ఏ ఆప్షన్‌ను ఎంచుకున్నా దీర్ఘకాలిక మూలధన లాభాల పన్ను భారం ఉండదు. (ఏడాది తర్వాత) అందుకని పన్ను భారం లేదన్న కారణంగా డివిడెండ్ ఆప్షన్‌ను ఎంచుకోవడం సరైన నిర్ణయం కాదు.
 - ధీరేంద్ర కుమార్
 సీఈవో, వ్యాల్యూ రీసెర్చ్


 ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్) ఫండ్స్‌పై త్వరలో రానున్న డెరైక్ట్ ట్యాక్స్ కోడ్(డీటీసీ) ప్రభావం ఏ మేరకు ఉంటుంది? మూడేళ్ల లాక్-ఇన్-పీరియడ్ కొనసాగుతుందా? డీటీసీని పరిగణనలోకి తీసుకుంటే ఈఎల్‌ఎస్‌ఎస్ ఫండ్స్‌లో ఇన్వెస్ట్ చేయడం సరైన వ్యూహమేనా?
 - రాజేంద్ర, విశాఖపట్నం
  
 డీటీసీ అమల్లోకి వస్తే ఈఎల్‌ఎస్‌ఎస్ ఫండ్స్‌ను పన్ను-ఆదా చేసే మదుపు సాధనాలుగా పరిగణించలేం. ఈ ఫండ్స్‌కు మూడేళ్ల లాక్-ఇన్ పీరియడ్ కొనసాగవచ్చు. డీటీసీ అమల్లోకి వస్తే బహుశా ఈ ఫండ్స్‌లో ఇన్వెస్ట్‌మెంట్స్ తక్కువగా రావచ్చు. పైగా ఈ ఈఎల్‌ఎస్‌ఎస్ ఫండ్స్ నుంచి  ఇన్వెస్టర్లు వైదొలిగే అవకాశాలే అధికంగా ఉంటాయి. మొత్తం మీద ఈఎల్‌ఎస్‌ఎస్ ఫండ్స్‌పై డీటీసీ ప్రతికూల ప్రభావమే చూపించే అవకాశాలున్నాయి. అయితే డీటీసీ కారణంగా ఈ ఫండ్ల పనితీరు మాత్రం ప్రభావితం కాకపోవచ్చు. దీర్ఘకాలం నుంచి ఈ ఫండ్స్‌లో ఇన్వెస్ట్‌మెంట్స్ కొనసాగుతుండడమే దీనికి కారణం.
  
 బిర్లా సన్ లైఫ్ డివిడెండ్ ఈల్డ్ ప్లస్ ఫండ్‌లో ఈ ఏడాది జనవరి నుంచి సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేస్తున్నాను. ఈ ఫండ్‌లో ఇన్వెస్ట్‌మెంట్స్‌ను కొనసాగించమంటారా? ఆపేయమంటారా?                        
 - రాధిక, విజయవాడ
 
 బిర్లా సన్‌లైఫ్ డివిడెండ్ ఈల్డ్ ప్లస్... మంచి డివిడెండ్‌లు చెల్లిస్తున్న ఫండ్స్‌ల్లో ఒకటి. ఇన్వెస్టర్లు ఇన్వెస్ట్ చేయడానికి అందుబాటులో ఉన్న 6-7 ఉత్తమ ఫండ్స్‌లో ఇది ఒకటని చెప్పవచ్చు.  గత ఐదేళ్ల నుంచే ఈ తరహా డివిడెండ్ ఈల్డ్ ఫండ్స్ అందుబాటులోకి వచ్చాయి. పలువురి ఇన్వెస్టర్ల పోర్ట్‌ఫోలియోల్లో తప్పనిసరిగా ఉండే ఫండ్స్‌ల్లో ఒకటిగా డివిడెండ్ ఈల్డ్ ఫండ్స్ ఘనత సాధించాయి. అందుకని ఈ డివిడెండ్ ఈల్డ్ ఫండ్స్‌ల్లో ఎలాంటి సందేహాలు లేకుండా మీ ఇన్వెస్ట్‌మెంట్స్‌ను కొనసాగించండి.
  
 నేను మ్యూచువల్ ఫండ్స్‌లో ఇన్వెస్ట్ చేయడం కొత్త.  పదేళ్ల పాటు మ్యూచువల్ ఫండ్స్‌లో ఇన్వెస్ట్ చేయాలనుకుంటున్నాను. నేను ఇన్వెస్ట్ చేయడానికి కొన్ని మంచి బ్యాలెన్స్‌డ్ ఫండ్స్‌ను సూచించండి?
 - రాజేశ్, కరీంనగర్
  
 మ్యూచువల్ ఫండ్స్‌లో ఇన్వెస్ట్ చేయడం ఇదే మొదటిసారి కనుక మీరు తొలిసారిగా బ్యాలెన్స్‌డ్ ఫండ్స్‌లో ఇన్వెస్ట్ చేయడం ప్రారంభించండి. అయి తే అగ్రెసివ్‌గా ఉండే బ్యాలెన్స్‌డ్ ఫండ్స్‌లో కాకుం డా కన్సర్వేటివ్‌గా ఉండే బ్యాలెన్స్‌డ్ ఫండ్స్‌లో ఇన్వెస్ట్ చేయడం సముచితంగా ఉంటుంది. మీ ఇన్వెస్ట్‌మెంట్స్ కోసం యూటీఐ బ్యాలెన్స్‌డ్, డీఎస్‌పీ బ్లాక్‌రాక్ బ్యాలెన్స్‌డ్, ఐసీఐసీఐ ప్రుడెన్షియల్ బ్యాలెన్స్‌డ్ ఫండ్స్‌ను పరిశీలించవచ్చు.
  
 నా వయస్సు 31 సంవత్సరాలు. నేను 60 ఏళ్లకు రిటైరవుతాను. నెలకు రూ.8,000 చొప్పున ఇన్వెస్ట్ చేయగలను. ఈ ఇన్వెస్ట్‌మెంట్స్‌ను ప్రతి ఏడాది 10 శాతం పెంచగలను. నేను రిటైరయ్యేటప్పటికి రూ.2.5 కోట్ల నిధి ఏర్పాటు చేసుకోవడం నా లక్ష్యం. ఏయే ఫం డ్స్‌లో ఇన్వెస్ట్‌మెంట్ చేయమంటారో తగిన సలహా ఇవ్వండి.           
 - వినోద్ కుమార్, హైదరాబాద్  
  
 మీరు ఇన్వెస్ట్ చేసే కాలం అధికంగా ఉంది. పైగా ప్రతి ఏడాది మీరు ఇన్వెస్ట్ చేసే మొత్తాన్ని 10 శాతం పెంచుతామని అంటున్నారు కూడా. అందుకని మీ రిటైర్మెంట్ నిధి విషయమై మీరు అధికంగా ఆందోళన చెందాల్సిన అవసరమేమీ లేదు. బ్యాంక్ రికరింగ్ డిపాజిట్‌లో ఇన్వెస్ట్ చేసినా సరే మీరు మీ లక్ష్యాన్ని సాధించగలరు. మీరు మీ ఇన్వెస్ట్‌మెం ట్స్‌ను బ్యాలెన్స్‌డ్ ఫండ్స్‌నుంచి మొదలు పెట్టండి. తొలి 2-3 ఏళ్లలో ఒకటి లేదా రెండు బ్యాలెన్స్‌డ్ ఫండ్స్‌లో ఇన్వెస్ట్ చేయండి. ఆ తర్వాత ఈక్విటీ మ్యూచువల్ ఫండ్స్‌లో పెట్టుబడులను  సిస్టమాటిక్ ఇన్వెస్ట్‌మెంట్ ప్లాన్ (సిప్) విధానంలో ప్రారంభిం చండి. ప్రతి ఏడాది మీ పోర్ట్‌ఫోలియోలోని ఫండ్స్ పనితీరును మదింపు చేయడాన్ని మరచిపోకండి.
  
 నా వయస్సు 44 సంవత్సరాలు. రూ. కోటికి ఐసీఐసీఐ ప్రుడెన్షియల్ ఐకేర్ టర్మ్ లైఫ్ కవర్ పాలసీ తీసుకున్నాను. ఈ పాలసీ వార్షిక ప్రీమియమ్ రూ.34,000. కుటుంబంలో నేనొక్కడినే సంపాదనపరుడిని. నేను చెల్లించాల్సిన రుణాలేమీ లేవు. గృహ, వ్య క్తిగత, వాహన,తదితర రుణాలేమీ నేను తీసుకోలేదు. జీవిత బీమా అవసరాల కోసం నేను తీసుకున్న పాలసీ సరిపోతుందా ? తగిన సలహా ఇవ్వండి.                  
 - అజయ్, సికిందరాబాద్
 
 మీ కుటుంబంలో మీరు ఒక్కరే సంపాదనపరులు కాబట్టి మీపై ఆధారపడిన వారికి రిస్క్ అధికంగా ఉంటుంది. అందుకని మీరు తగిన బీమా కవర్ తీసుకోవడం తప్పనిసరి. మీరు లేనప్పుడు  మీ కుటుంబ ఆర్థిక వ్యవహారాలు సాఫీగా సాగిపోవడానికి, పిల్లల చదువు వంటి దీర్ఘకాలిక ఆర్థిక లక్ష్యాలు నెరవేరేలా మీ జీవిత బీమా కవర్ ఉండాలి. ద్రవ్యోల్బణ గణాంకాలను పరిగణనలోకి తీసుకొని మీ నెలవారీ ఖర్చులు గణించండి.
 
 పిల్లల చదువు, వాళ్ల పెళ్లిళ్లు, మీ జీవిత భాగస్వామికి పెద్ద వయస్సులో అవసరమయ్యే వైద్య సేవలు తదితర ఖర్చులను కూడా లెక్కించి ఎంత జీవిత బీమా కవరేజ్ అవసరమో మదింపు చేయండి. దీనిని బట్టి ప్రస్తు తం మీరు తీసుకున్న బీమా కవరేజ్ సరిపోతుందో లేదో చెక్ చేసుకోండి. సరిపోకపోతే బీమా కవర్ పెరిగేలా చూసుకోండి. ఇక మీరు తీసుకున్న పాలసీ ఐసీఐసీఐ ప్రుడెన్షియల్ ఐకేర్ టెర్మ్ ప్లాన్‌ను పరిశీలిస్తే, ఈ పాలసీకి మంచి ట్రాక్ రికార్డే ఉంది. క్లెయిమ్ సెటిల్మెంట్ రేషియో 94 శాతంగా ఉంది.  అయితే ప్రీమియమ్ కొంచెం అధికంగా ఉందని చెప్పాలి.
 
 మ్యాక్స్ లైఫ్ ఆన్‌లైన్ టర్మ్ ప్లాన్‌ను మీరు పరిశీలించవచ్చు. ఈ ప్లాన్‌కు ప్రీమియమ్ తక్కువగా ఉంది. మీ వయస్సుకు రూ. కోటి బీమా కవర్‌కు మీరు చెల్లించాల్సిన ప్రీమియం రూ.17,300 (మీరు పొగతాగని వ్యక్తి అయితే) చెల్లించాల్సి ఉంటుంది. అదే  పొగ తాగే అలవాటున్న వ్యక్తికి  ప్రీమియం రూ.29,000గా ఉంటుంది. ఈ పాలసీ క్లెయిమ్ సెటిల్మెంట్ రేషియో 98.63% ఉంది.
 - ధీరేంద్ర కుమార్
 సీఈవో, వ్యాల్యూ రీసెర్చ్


 నేను 2008, మార్చిలో బజాజ్ అలయంజ్ న్యూ ఫ్యామిలీ గెయిన్ పాలసీని తీసుకున్నాను. 2011 మార్చి వరకూ రూ.36,000 ప్రీమియమ్ చెల్లించాను. ఆ తర్వాత ప్రీమియమ్‌లు చెల్లించడం ఆపేశాను. ప్రస్తుతం ఈ ఫండ్ విలువ రూ.27,443గా ఉంది. ఈ పాలసీ 2018 మార్చిలో మెచ్యూర్ అవుతుంది. గత ఏడాది వివిధ చార్జీల కింద రూ.5,013ను ఈ ఫండ్ నుంచి కోత కోశారు. ప్రీమియమ్‌లు చెల్లించడం ఆపేసినప్పటికీ, చార్జీల కోత తప్పదా? ఈ ఫండ్ నుంచి  వైదొలగమంటారా? కొనసాగమంటారా ? సలహా ఇవ్వండి.
 - సర్వేశ్, విశాఖపట్టణం
  
 బజాజ్ అలయంజ్-న్యూ ఫ్యామిలీ గెయిన్ అనేది యూనిట్ లింక్డ్ ఇన్సూరెన్స్(యూలిప్) పాలసీ. ఈ తరహా ప్లాన్‌ల్లో మీరు చెల్లించిన ప్రీమియమ్  నుంచి మెర్టాలిటీ చార్జీలు, నిర్వహణ వ్యయాలు, ఫండ్ మేనేజ్‌మెంట్ చార్జీలు,... తదితర చార్జీలను మ్యూచువల్ ఫండ్ సంస్థ మినహాయించుకొని మిగిలిన మొత్తాన్ని ఇన్వెస్ట్ చేస్తుంది. మార్కెట్ బాగా ఉన్నప్పటికీ, ఈ చార్జీల కారణంగా ఈ తరహా యులిప్‌లపై వచ్చే రాబడులు తక్కువగా ఉంటాయి.
 
 మీరు ప్రీమియమ్‌లు చెల్లించడం ఆపేసినప్పటికీ, పూర్తి కాలానికి వర్తించే ఫిక్స్‌డ్ చార్జీలను మీ ఫండ్ నుంచి మినహాయించుకుంటారు. భవిష్యత్తు నష్టాలను తగ్గించుకోవడానికి గాను ఈ ప్లాన్‌ను సరెండర్ చేయండి. మీరు సరెండర్ చేసేటప్పుడు ఫండ్ విలువ ఎంత ఉంటుందో అదే మీ సరెండర్ వాల్యూ అవుతుంది. ఇన్వెస్ట్‌మెంట్ కోసం ఎప్పుడూ బీమా, ఇన్వెస్ట్‌మెంట్ కలగలసిన ప్లాన్‌లను ఎంచుకోవద్దు. బీమా కోసం టర్మ్ పాలసీ తీసుకోవాలి. టర్మ్ పాలసీల్లో ప్రీమియమ్‌లు తక్కువగానూ, బీమా కవరేజ్ అధికంగానూ ఉంటుంది. ఇక దీర్ఘకాల ఆర్థిక లక్ష్యాల కోసం ఏదైనా డైవర్సిఫైడ్ మ్యూచువల్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయండి.
  
 నా వయస్సు 50 సంవత్సరాలు. ప్రవాస భారతీయుడిని. రూ.3 కోట్లకు టర్మ్ పాలసీని (రూ.3 కోట్ల యాక్సిడెంటల్ డెత్ బెనిఫిట్  కవర్ కూడా ఉండాలి) తీసుకోవాలనుకుంటున్నాను. ప్రవాస భారతీయులకు పాలసీలను ఆఫర్ చేస్తున్న భారత కంపెనీల వివరాలను తెలియజేయండి. అలాగే నా అవసరాలను దృష్టిలో పెట్టుకొని సర్వీస్, క్లెయిమ్స్ సెటిల్మెంట్ రేషియా, తదితర అంశాల ఆధారంగా  నాకు తగిన టర్మ్ పాలసీని సూచించండి.
 - ప్రదీప్ జైన్, ఈ మెయిల్ ద్వారా
  
 పలు భారత బీమా కంపెనీలు ప్రవాస భారతీయులకు టర్మ్ ఇన్సూరెన్స్ పాలసీలను ఆఫర్ చేస్తున్నాయి. ఈ పాలసీలను తీసుకునే ముందు మీరు రెండు విషయాలను పరిగణనలోకి తీసుకోవాలి. మొదటిది వ్యయం. మీరు ఎంచుకున్న పాలసీ విదేశాల్లో చౌకగా లభించే అవకాశాలున్నాయా? రెండోది. పన్ను వ్యవహారాలు. మీరు నివసిస్తున్న దేశంలో పన్ను చట్టాలు ఎలా ఉన్నాయి. .. ఈ రెండు అంశాలను కూడా పరిగణనలోకి తీసుకొని నిర్ణయం తీసుకోవాలి. ఇక మీరు తీసుకున్న పాలసీకి చెల్లించే ప్రీమియమ్.. అదనపు రైడర్స్‌కు  కూడా కవరవుతుందో,  లేదో చెక్ చేసుకోవాలి. లేకుంటే అదనపు రైడర్లకు అదనంగా చెల్లించాల్సి ఉంటుందా అన్న విషయం కూడా చెక్ చేసుకోవాలి. మీరు భారత్‌కు వచ్చినప్పుడు టర్మ్ పాలసీ తీసుకుంటే బావుంటుంది. దీని వల్ల విదేశాల్లో  వైద్య పరీక్షలు జరిపించుకొని, సంబంధిత రిపోర్టులను బీమా కంపెనీకి పంపించడం కొంచెం వ్యయభరితమైనది.
 
 మీరు భారత్‌లోనే ఉన్నప్పుడు టర్మ్ పాలసీ తీసుకుంటే, ఈ వ్యయం మీకు తప్పుతుంది. 50 సంవత్సరాల వయస్సున్న వ్యక్తికి 3 కోట్ల బీమా కవరేజ్‌కు కొన్ని కంపెనీలు వసూలు చేస్తున్న వార్షిక ప్రీమియమ్‌లు, వాటి క్లెయిమ్ సెటిల్మెంట్ నిష్పత్తి(గత ఆర్థిక సంవత్సరం) వివరాలు ఇస్తున్నాం. పరిశీలించి నిర్ణయం తీసుకోండి. మ్యాక్స్‌లైఫ్ వార్షిక ప్రీమియం రూ.54,960గా, క్లెయిమ్ సెటిల్మెంట్ నిష్పత్తి 96.03గా ఉంది. బిర్లా సన్‌లైఫ్ వార్షిక ప్రీమియం రూ.48,262 కాగా క్లెయిమ్ సెటిల్మెంట్ నిష్పత్తి 95.3గా ఉంది. ఇక హెచ్‌డీఎఫ్‌సీ లైఫ్ వార్షిక ప్రీమియం రూ.54,025గా ఉండగా, క్లెయిమ్ సెటిల్మెంట్ నిష్పత్తి 90.5గా ఉంది.
 
 నేను ఈ ఏడాది ఫిబ్రవరిలో ఎన్‌పీఎస్(నేషనల్ పెన్షన్ స్కీమ్) ఖాతాను ప్రారంభించాను. ఈ ఏప్రిల్ నుంచి కొత్త ఆర్థిక సంవత్సరం ప్రారంభమైంది కదా! ఇప్పుడు పెన్షన్ ఫండ్ మేనేజర్‌ను మార్చుకోవచ్చా? అలాంటి వెసులుబాటు లభిస్తుందా? వివరించగలరు.
 - మాధురి, హైదరాబాద్
  
 ఒక ఆర్థిక సంవత్సరంలో ఒకసారి పెన్షన్ ఫండ్ మేనేజర్ ఎంపికను మార్చుకునే అవకాశం ఎన్‌పీఎస్‌లో ఉంది. అంతేకాకుండా ఇన్వెస్ట్‌మెంట్ ఆప్షన్‌ను(యాక్టివ్ నుంచి ఆటో చాయిస్‌కు లేదా ఆటో చాయిస్ నుంచి యాక్టివ్‌కు) కూడా మార్చుకోవచ్చు. ప్రస్తుతానికి మీరు మీ ఎన్‌పీఎస్ ఖాతాకు సంబంధించి ఎనిమిది పెన్షన్ ఫండ్స్ నుంచి ఒకదానిని ఎంచుకోవచ్చు.
 
 ఆ ఎనిమిది పెన్షన్ ఫండ్స్‌ఏమంటే-ఐసీఐసీఐ ప్రుడెన్షియల్ పెన్షన్ ఫండ్, ఎల్‌ఐసీ పెన్షన్ ఫండ్, కోటక్ మహీంద్రా పెన్షన్ ఫండ్, రిలయన్స్ క్యాపిటల్ పెన్షన్ ఫండ్, ఎస్‌బీఐ పెన్షన్ ఫండ్, యూటీఐ రిటైర్మెంట్ సొల్యూషన్స్ పెన్షన్ ఫండ్, హెచ్‌డీఎఫ్‌సీ పెన్షన్ మేనేజ్‌మెంట్ కంపెనీ, డీఎస్‌పీ బ్లాక్‌రాక్ పెన్షన్ ఫండ్ మేనేజర్స్.. ఈ ఎనిమిది పెన్షన్ ఫండ్స్ నుంచి ఏదో ఒక దానిని మీరు ఎంచుకోవచ్చు. గతంలో ఎంచుకున్నదానిని మార్చుకోవచ్చు. ఈ మార్పును సూచిస్తూ ఒక దరఖాస్తును సమర్పించాల్సి ఉంటుంది. మీ దరఖాస్తు ప్రాసెస్‌కాగానే సెంట్రల్ రికార్డ్‌కీపింగ్ ఏజెన్సీ(సీఆర్‌ఏ) సిస్టమ్ నుంచి మీ నమోదిత ఈమెయిల్ ఐడీకి ఒక ఈ మెయిల్ వస్తుంది.
 - ధీరేంద్ర కుమార్
 సీఈవో, వ్యాల్యూ రీసెర్చ్


 నేను అమెరికాలో స్థిరపడిన ప్రవాస భారతీయుడిని. నేను భారత మ్యూచువల్ ఫండ్స్‌లో ఇన్వెస్ట్ చేద్దామనుకుంటున్నాను.  అయితే ఇక్కడి కొన్ని మ్యూచువల్ ఫండ్ సంస్థలు నా ఇన్వెస్ట్‌మెంట్స్‌ను అంగీకరించడం లేదు. దీనికి కాణమేమిటి?
  - మహేందర్, కాలిఫోర్నియా(ఈ మెయిల్ ద్వారా)
  
 అమెరికా, కెనడాల్లో స్థిరపడిన ప్రవాస భారతీయుల నుంచి దరఖాస్తులను పలు మ్యూచువల్ ఫండ్ సంస్థలు అంగీకరించడం లేదు. ఫారిన్ అకౌంట్ ట్యాక్స్ కంప్లైనన్స్ యాక్ట్(ఫ్యాట్‌కా) కారణంగానే పలు మ్యూచువల్ ఫండ్ సంస్థలు ఎన్నారైల నుంచి ఇన్వెస్ట్‌మెంట్స్‌ను అంగీకరించడం లేదు. ఈ చట్టం ప్రకారం అమెరికా జాతీయుల, అమెరికాలో స్థిరపడిన విదేశీయుల అన్ని లావాదేవీలను ప్రపంచంలోని ఆర్థిక సంస్థలు అమెరికా ప్రభుత్వానికి నివేదించాలి. అయితే ఎల్ అండ్ టీ, యూటీఐ, పీపీఎఫ్‌ఏఎస్, సుందరం, కెనరా రొబెకొ.. ఈ సంస్థలు ఎన్నారైల నుంచి మ్యూచువల్ ఫండ్ ఇన్వెస్ట్‌మెంట్స్‌ను అంగీకరిస్తున్నాయి. త్వరలో మరిన్ని మ్యూచువల్ ఫండ్ సంస్థలు కూడా ఎన్నారైల ఇన్వెస్ట్‌మెంట్స్‌ను అంగీకరించే అవకాశాలున్నాయి.
  
 నేను 2015, జూలైలో ఎల్‌ఐసీ న్యూ ఎండోమెంట్ ప్లాన్‌ను తీసుకున్నాను. ఒక ప్రీమియమ్‌ను చెల్లించాను. ఈ ఏడాది వార్షిక ప్రీమియమ్‌గా రూ.14,711 చెల్లించాల్సి ఉంది. ఈ ప్లాన్‌కు బీమా కవరేజ్ రూ.3,75,000గానూ, యాక్సిడెంటల్ డెత్ బెనిఫిట్ రూ.3,75,000 గానూ ఉంది. అయితే నేను ఇప్పటికే టాటా ఏఐఏ సంస్థ నుంచి రూ.50 లక్షలకు టర్మ్ ప్లాన్ తీసుకున్నాను. దీనిని దృష్టిలో ఉంచుకుంటే ఈ ఎల్‌ఐసీ న్యూ ఎండోమెంట్ పాలసీని కొనసాగించడం సమంజసమేనా? లేకుంటే ఈ ప్లాన్ నుంచి వైదొలగమంటారా?
 - లోకేశ్, విశాఖపట్టణం
  
 ఎండోమెంట్ ప్లాన్‌ల విషయంలో పలు సంస్థలు వ్యయాలు విషయంలో పారదర్శకంగా వ్యవహరించడం లేదు. ఎల్‌ఐసీ న్యూ ఎండోమెంట్ ప్లాన్....దీనికి మినహాయింపు కాదు. మీకు నష్టాలు వచ్చినప్పటికీ, తగిన రాబడులనివ్వలేని ప్లాన్‌ల్లో కొనసాగడం సరికాదు. ఈ ప్లాన్‌లో ఇన్వెస్ట్‌మెంట్స్ ఆపేయడం సముచితమని భావిస్తున్నాం. తొలి ఏడాది కట్టిన ప్రీమియమ్‌ను మర్చిపోండి. ఈ ప్లాన్ తీసుకొని మూడేళ్లు పూర్తికాలేదు కాబట్టి మీకు సరెండర్ ఆప్షన్ కూడా లభించదు.
 
 ఇలాంటి బీమా, ఇన్వెస్ట్‌మెంట్ కలగలసిన ప్లాన్‌లు తగిన రాబడులను ఇవ్వలేవు. అలాగే సరిఅయిన బీమా కవరేజ్‌ను ఇవ్వలేవు. అందుకని భవిష్యత్తులో ఇలాంటి బీమా, ఇన్వెస్ట్‌మెంట్ కలగలసిన ప్లాన్‌ల్లో ఇన్వెస్ట్ చేయకండి. బీమా కవరేజ్‌కి టర్మ్ ఇన్సూరెన్స్ పాలసీలు తీసుకోండి. వీటికి ప్రీమియమ్‌లు తక్కువగా ఉంటాయి. బీమా కవరేజ్ ఎక్కువగా ఉంటుంది. ప్రస్తుతమున్న మీ టర్మ్ ప్లాన్.. మీకు తగిన బీమా కవరేజ్ ఇస్తుందో లేదో పరిశీలించి తగిన నిర్ణయం తీసుకోండి.
  
 నా వయస్సు 59 సంవత్సరాలు. వచ్చే ఏడాది జనవరిలో రిటైరవుతున్నాను. రిటైర్మెంట్ ప్రయోజనాలు రూ.60 లక్షలు వస్తాయి. కుటుంబ పెన్షన్ కింద నెలకు రూ.12,000 వస్తాయి. నేను పెట్టిన పెట్టుబడులు ఇప్పటి మార్కెట్ విలువ ప్రకారం, షేర్లలో రూ.18 లక్షలు, మ్యూచువల్ ఫండ్స్‌లో రూ.13 లక్షలుగా ఉన్నాయి. రూ.5 లక్షల ఆరోగ్య బీమా ఉంది. దీనికి అదనంగా రూ.5 లక్షల బ్యాంక్ ఆఫ్ బరోడా వారి హెల్త్ ప్లాన్ ఉంది. నేను తీర్చాల్సిన అప్పులేమీ లేవు. నేను సొంత ఇంట్లోనే ఉంటున్నాను. పెన్షన్ ఆదాయం కాకుండా నెలకు రూ.60,000 వరకూ ఆదాయం వచ్చేట్లుగా ఈ డబ్బులను ఎలా ఇన్వెస్ట్ చేయాలో సూచించండి?
  - నారాయణరావు, హైదరాబాద్
  
 ముందుగా మీరు ఏం చేస్తారంటే, స్వీప్ ఇన్ సౌకర్యం ఉన్న సేవింగ్స్ ఖాతాలో కొంత మొత్తాన్ని డిపాజిట్ చేయండి. మీ నెలవారీ ఖర్చులను లెక్కించి, ఏడాదికి సరిపడేలా మొత్తాన్ని ఈ సేవింగ్స్ ఖాతాలో డిపాజిట్ చేయండి. ఇక క్రమం తప్పని ఆదాయం కోసం సీనియర్ సిటిజెన్స్ సేవింగ్స్ స్కీమ్(ఎస్‌సీఎస్‌ఎస్), పోస్ట్ ఆఫీస్ మంత్లీ ఇన్‌కమ్ స్కీమ్(పీఓఎంఐఎస్)ల్లో ఇన్వెస్ట్ చేయండి. వీటిల్లో ఇన్వెస్ట్ చేయడం వల్ల మీకు క్రమం తప్పని ఆదాయం లభిస్తుంది. అంతే కాకుండా మీ ఇన్వెస్ట్‌మెంట్స్ సురక్షితంగా కూడా ఉంటాయి. సీనియర్ సిటిజన్ సేవింగ్స్ స్కీమ్ కింద మీరు గరిష్టంగా రూ.30 లక్షలు ఇన్వెస్ట్ చేయవచ్చు.  ఈ స్కీమ్‌లో మీకు 8.6 శాతం వార్షిక వడ్డీ లభిస్తుంది. మూడు నెలలకు మీకు రూ.64,500 (నెలకు రూ.21,500) వస్తాయి.
 
 ఇక పోస్ట్ ఆఫీస్ మంథ్లీఇన్‌కమ్ స్కీమ్‌లో రూ.9 లక్షలు (జాయింట్ అకౌంట్)లో ఇన్వెస్ట్ చేయండి. ఈ ఇన్వెస్ట్‌మెంట్స్‌పై  7.8 శాతం వార్షిక వడ్డీ వస్తుంది. నెలకు రూ.5,850 ఆదాయం లభిస్తుంది. ఈ రెండు సాధనాల్లో వచ్చే ఆదాయంపై మీరు పన్ను చెల్లించాల్సి ఉంటుంది. ఈ రెండింటిపై వచ్చే ఆదాయాలను మీ ఆదాయానికి కలిపి మీ ఆదాయపు పన్ను స్లాబ్‌ననుసరించి పన్ను లెక్కిస్తారు.
 
 ఇక వీటికి అనుబంధంగా బ్యాలెన్స్‌డ్ ఫండ్స్‌లో ఇన్వెస్ట్ చేయండి. బ్యాలెన్స్‌డ్ ఫండ్స్ మంచి రాబడులనిస్తాయి. అంతేకాకుండా ఏడాది తర్వాత వీటిని విక్రయిస్తే ఎలాంటి పన్ను పోటు ఉండదు. సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో బ్యాలెన్స్‌డ్ ఫండ్స్‌లో ఇన్వెస్ట్ చేయండి. ఇలా ఇన్వెస్ట్ చేస్తే, మంచి రాబడులు వస్తాయి. అంతేకాకుండా మీ నెలవారీ ఆదాయ అవసరాలు కూడా తీర్చుకోవచ్చు.
  
 నేను ఈక్విటీ మ్యూచువల్ ఫండ్స్‌లో ఇన్వెస్ట్ చేద్దామనుకుంటున్నాను. డివిడెండ్ ఆప్షన్‌ను ఎంచుకోవాలో, గ్రోత్ ఆప్షన్‌ను ఎంచుకోవాలో తెలియక తికమకపడుతున్నాను. తగిన సూచనలివ్వండి.
 - లక్ష్మణ్, వరంగల్
  
 రెగ్యులర్‌గా డబ్బులు అవసరమైన పక్షంలో మాత్రమే డివిడెండ్ ఆప్షన్‌ను ఎంచుకోవాలి. రిటైరైన తర్వాత మీకు రెగ్యులర్‌గా డబ్బులు అవసరమవుతాయి. కాబట్టి అప్పుడు ఈక్విటీ మ్యూచువల్ ఫండ్స్‌లో డివిడెండ్ ఆప్షన్‌ను ఎంచుకోవాలి. దీర్ఘకాలిక ఆర్థిక లక్ష్యాల కోసమైతే మీరు గ్రోత్ ఆప్షన్‌ను ఎంచుకుంటేనే మంచిది. చక్రగతి వృద్ధి కారణంగా మంచి రాబడులు మీరు పొందవచ్చు.
 
 డివిడెండ్ ఆప్షన్‌ను ఎంచుకుంటే, మీకు వచ్చే డివిడెండ్‌లను మీరు ఖర్చు పెట్టేయడమో, లేదా తక్కువ రాబడులు వచ్చే వాటిల్లో ఇన్వెస్ట్ చేయడమో జరుగుతుంది. మీరు గ్రోత్ ఆప్షన్ ఎంచుకున్నా, డివిడెండ్ ఆప్షన్ ఎంచుకున్నా, మీ ఇన్వెస్ట్‌మెంట్స్ ఏడాది దాటితే  మీరు ఎలాంటి మూలధన లాభాల పన్ను చెల్లించాల్సిన అవసరం ఉండదు.
 - ధీరేంద్ర కుమార్
 సీఈవో, వ్యాల్యూ రీసెర్చ్


 మా అమ్మగారు సీనియర్ సిటిజన్. ఈక్విటీల్లో ఇన్వెస్ట్ చేయడం ఆమెకు ఇష్టం లేదు. 10-15 ఏళ్లపాటు పెట్టుబడులు పెట్టాలనుకుంటున్నారు.  పబ్లిక్ ప్రావిడెండ్ ఫండ్(పీపీఎఫ్)లో ఇన్వెస్ట్ చేయమంటారా? లేక ఆల్ట్రా షార్ట్‌టర్మ్, షార్ట్ టర్మ్ డెట్ ఫండ్స్‌లో ఇన్వెస్ట్ చేయమంటారా? దేంట్లో ఇన్వెస్ట్ చేస్తే పన్ను ప్రయోజనాలు అధికంగా లభిస్తాయి.
  - రాధాకృష్ణ, నెల్లూరు
  
 పన్ను ప్రయోజనాలతో పాటు సురక్షితమైన రాబడులు కావాలంటే డెట్ మ్యూచువల్ ఫండ్స్ కంటే పబ్లిక్ ప్రావిడెండ్ ఫండ్(పీపీఎఫ్) ఉత్తమమైన ఇన్వెస్ట్‌మెంట్ మార్గమని చెప్పవచ్చు. పీపీఎఫ్ ఇన్వెస్ట్‌మెంట్స్‌పై వచ్చే రాబడులపై ఎలాంటి పన్నులు ఉండవు. అయితే పీపీఎఫ్‌లో ఇన్వెస్ట్ చేస్తే 15 సంవత్సరాల లాక్ ఇన్ పీరియడ్ ఉంటుంది. దీనిపై వచ్చే రాబడులు ప్రభుత్వ సెక్యూరిటీలపై వచ్చే రాబడుల కన్నా కొంచెమే అధికంగా ఉంటాయి. ఎప్పుడు కావాలనుకుంటే అప్పుడు సొమ్ములను వెనక్కితీసుకోవాలి అనుకుంటే  డెట్ ఫండ్స్ ఉత్తమం.
 
 ఈ డెట్ ఫండ్స్‌లో ఇన్వెస్ట్ చేసిన మూడేళ్లలోపే ఈ ఇన్వెస్ట్‌మెంట్స్‌ను వెనక్కి తీసుకుంటే స్వల్పకాలిక మూలధన లాభాల పన్ను చెల్లించాల్సి ఉంటుంది. మీ అమ్మగారి ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది. ఒక వేళ మూడేళ్ల త ర్వాత ఈ డెట్ ఫండ్స్ నుంచి మీ ఇన్వెస్ట్‌మెంట్స్‌ను ఉపసంహరించుకుంటే దీర్ఘకాల మూలధన లాభాల పన్ను చెల్లించాల్సి ఉంటుంది. ఇది ఇండెక్సేషన్ ప్రయోజనాలతో కలిపి 20 శాతంగా ఉంటుంది.
 
 ఈక్విటీ మార్కెట్లో లాగానే డెట్ మార్కెట్లో కూడా వివిధ బాండ్ల ధరలు ఒడిదుడుకులకు లోనవుతుంటాయి. అందుకని డెట్ ఫండ్స్ ఇన్వెస్ట్‌మెంట్స్ రాబడులు, ఏడాది ఏడాదికి మారుతూ ఉంటాయి. ఇప్పుడు పీపీఎఫ్ వడ్డీరేట్లు కూడా ప్రతి మూడు నెలలకొకసారి మారుతూ ఉన్నాయి. మీ ఇన్వెస్ట్‌మెంట్స్‌పై ఎలాంటి రిస్క్ వద్దనుకుంటే, పీపీఎఫ్‌లో ఇన్వెస్ట్ చేయండి. ఇది సురక్షితమైన పెట్టుబడి సాధనం. ప్రభుత్వ దన్నుతో ఇది నడుస్తుండడమే దీనికి కారణం.
  
 నేను భారత పౌరసత్వం వదులుకొని జర్మనీ పౌరసత్వం తీసుకోవాలనుకుంటున్నాను. ఓవర్సీస్ సిటిజెన్స్ ఆఫ్ ఇండియా (ఓసీఐ) కార్డ్‌కు దరఖాస్తు చేయాలనుకుంటున్నాను. అయితే నాకు కొన్ని మ్యూచువల్ ఫండ్స్‌లో ఇన్వెస్ట్‌మెంట్స్ ఉన్నాయి. సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో కూడా కొన్ని ఇన్వెస్ట్‌మెంట్స్ ఉన్నాయి. భారత పౌరసత్వం వదులుకొని జర్మనీ పౌరసత్వం తీసుకోవడం వల్ల ఈ ఇన్వెస్ట్‌మెంట్స్‌పై ఏమైనా ప్రభావం ఉంటుందా?     - మార్గరెట్, హైదరాబాద్
  
 ఓవర్సీస్ సిటిజన్స్ ఆఫ్ ఇండియా(ఓసీఐ), నాన్ రెసిడెంట్ ఇండియన్(ఎన్నారై)తో దాదాపు సమానం. ఆర్థిక, విద్య తదితర రంగాల్లో ఈ  హోదాలు ఉన్నవారికి ఒకే విధమైన హక్కులు లభిస్తాయి. ఒక్క వ్యవసాయ, ప్లాంటేషన్ ఆస్తుల కొనుగోళ్లలో మాత్రమే తేడా ఉంటుంది. మీరు మీ మ్యూచువల్ ఫండ్స్ ఇన్వెస్ట్‌మెంట్స్‌ను నిరభ్యంతరంగా కొనసాగించవచ్చు, అయితే మీ పౌరసత్వంలో మార్పులు, చేర్పులు గురించి మీ బ్యాంక్‌కు, మ్యూచువల్ ఫండ్ సంస్థలకు సమాచారమందించడం తప్పనిసరనే విషయాన్ని మాత్రం మరచిపోకండి.
  
 నా వయస్సు 34 సంవత్సరాలు. నా కోసం ఎల్‌ఐసీ న్యూ ఎండోమెంట్ ప్లాన్, నా నాలుగేళ్ల కూతురి కోసం జీవన్ అంకుర్ పాలసీలను తీసుకున్నాను. రెండింటి మెచ్యురిటీ కాలం 20 ఏళ్లు. ఈ రెండింటి వార్షిక ప్రీమియమ్ రూ.59,000. ఇప్పటికి మూడేళ్ల ప్రీమియమ్‌లు చెల్లించాను.  దీర్ఘకాల రాబడులకు ఇవి సరైనవి కావని మిత్రులంటున్నారు. ఈ పాలసీల నుంచి బయటపడే మార్గం చెప్పండి.                  - సందేశ్, వైజాగ్
  
 ఎల్‌ఐసీ న్యూ ఎండోమెంట్ ప్లాన్‌కు సంబంధించి గ్యారంటీడ్ సరెండర్ వేల్యూ--మీరు చెల్లించిన మొత్తం ప్రీమియమ్‌లలో ఒక ప్రత్యేకమైన శాతంగా ఉంటుంది. అదనపు ప్రీమియమ్, రైడర్లకు చెల్లించిన ప్రీమియమ్‌లకు మినహాయింపు ఉంటుంది. మీరు తీసుకున్న పాలసీ కాల వ్యవధి, మీరు ఈ పాలసీని ఎప్పుడు సరెండర్ చేస్తారు అన్న విషయాలపై ఈ పర్సంటేజ్ ఆధారపడి ఉంటుంది. ఇక ఎల్‌ఐసీ జీవన్ అంకుర్ అనేది లాభాలతో కూడిన సంప్రదాయ ప్లాన్.  ఈ ప్లాన్‌లో రిస్క్ కవర్ తండ్రి/తల్లిపై ఉంటుంది.
 
 ఈ ప్లాన్‌లో కూతురు నామినీగా ఉంటుంది. ఈ పాలసీ తీసుకొని మూడేళ్లైతేనే/ లేదా మూడు పూర్తి ప్రీమియమ్‌లు చెల్లిస్తేనే  మీరు ఈ పాలసీని సరెండర్ చేయగల అవకాశముంటుంది. దీనికి సరెండర్ వేల్యూ- మీరు చెల్లించిన ప్రీమియమ్‌ల్లో 30 శాతం(మొదటి ఏడాది ప్రీమియమ్, ఆప్షనల్ రైడర్, అదనపు ప్రీమియమ్‌లను మినహాయించి)గా ఉంటుంది.  మీకు నష్టాలు వచ్చినా సరే, ఈ పాలసీలను సరెండర్ చేయడమే సముచితమని భావిస్తున్నాం.  ఇలాంటి బీమా, ఇన్వెస్ట్‌మెంట్ కలగలసిన ప్లాన్‌లు స్వల్ప మొత్తానికే బీమా కవర్‌ను ఇస్తాయి. అంతంత రాబడులు మాత్రమే వస్తాయి.
 
  ఇన్వెస్ట్‌మెంట్ కోసం ఇన్సూరెన్స్ ప్లాన్‌ను  ఎంచుకోవడం సరైనది కాదు. ఇలా చేస్తే బీమా కవర్, రాబడుల్లో రాజీ పడాల్సి ఉంటుంది. జీవిత బీమా కోసమైతే టర్మ్ ఇన్సూరెన్స్ ప్లాన్ తీసుకోవాలి. తక్కువ ప్రీమియమ్‌లు, అధిక రాబడులు వీటి ప్రత్యేకత. ఇక పాప చదువు, ఇంటి కొనుగోలు వంటి దీర్ఘకాలిక ఆర్థిక లక్ష్యాల కోసమైతే ఈక్విటీ మ్యూచువల్ ఫండ్స్‌లో ఇన్వెస్ట్ చేయాలి.
  
 నేను ఒక మ్యూచువల్ ఫండ్ ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్) రెగ్యులర్ ప్లాన్‌లో రెండేళ్ల నుంచి ఇన్వెస్ట్ చేస్తున్నాను. ఇప్పుడు ఇదే మ్యూచువల్ ఫండ్ ఈఎల్‌ఎస్‌ఎస్ స్కీమ్‌కు సంబంధించిన డెరైక్ట్ ప్లాన్‌కు మారాలనుకుంటున్నాను. అలా మారే వీలుందా? అవసరమైతే ఏమైనా పెనాల్టీ చెల్లించాల్సి ఉంటుందా ?              - అబ్దుల్లా, వరంగల్
  
 ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్) లేదా ట్యాక్స్ సేవింగ్ మ్యూచువల్ ఫండ్ స్కీమ్‌లకు తప్పనిసరిగా మూడేళ్ల లాక్-ఇన్ పీరియడ్ ఉంటుంది. ఈ లాక్ ఇన్ పీరియడ్ పూర్తయిన తర్వాతనే మీరు రెగ్యులర్ ప్లాన్ నుంచి డెరైక్ట్ ప్లాన్‌కు మారాల్సి ఉంటుంది. అంతకంటే ముందుగానే మారడానికి వీలు లేదు. జరిమానా చెల్లించి మారే వీలు ఏమీ లేదు.
 - ధీరేంద్ర కుమార్
  సీఈవో, వ్యాల్యూ రీసెర్చ్


 నేను ఓరియంటల్ ఇన్సూరెన్స్ పాలసీ తీసుకున్నాను. నా తల్లిదండ్రులకు, మా అత్తగారికి కూడా ఈ పాలసీ వర్తిస్తుందనే తీసుకున్నాను. అయితే ఒక పాలసీ కింద త ల్లిదండ్రులకు గానీ లేదా అత్తమామలకు, ఎవరికైనా ఒక జంటకే బీమా వర్తిస్తుందని మిత్రులంటున్నారు. ఇది నిజమేనా?
  - విజయ్, వరంగల్
  
 ఓరియంటల్ ఇన్సూరెన్స్ కంపెనీ వారి ద హ్యాపీ ఫ్యామిలీ ఫ్లోటర్ పాలసీ - మీకు, మీ భార్యకు, పిల్లలకు, తల్లిదండ్రులకు, అత్తామామలకు కూడా వర్తిస్తుంది. అయితే అందరూ భారత్‌లోనే నివసించాలనే షరతు ఉంది. బీమాపాలసీ విషయమై ఇతరుల అభిప్రాయాలతో ఆందోళన చెందే కంటే మీరు నేరుగా మీరు పాలసీ తీసుకున్న సంస్థనే సంప్రదించి మీ అనుమానాలను నివృత్తి చేసుకుంటే బావుంటుంది.
  
 నా వయస్సు 33 సంవత్సరాలు. నాకు భార్య, ఇద్దరు పిల్లలు ఉన్నారు. నా కుటుంబం మొత్తానికి నేను రూ. 5 లక్షల  వైద్య బీమా-ఫ్యామిలీ ఫ్లోటర్ ప్లాన్ తీసుకోవాలనుకుంటున్నాను. ఇంటిన్సివ్ కేర్ యూనిట్(ఐసీయూ), గది అద్దె తదితర అంశాలపై ఎలాంటి పరిమితులు లేని ఒక మంచి వైద్య బీమా ఫ్యామిలీ ఫ్లోటర్ ప్లాన్‌ను సూచించండి.
  - నటరాజ్, హైదరాబాద్
  
 వైద్య బీమా పాలసీ తీసుకునే ముందు కొన్ని విషయాలు పరిగణనలోకి తీసుకోవాలి. ఒకే బీమా మొత్తానికి వివిధ బీమా కంపెనీల ప్రీమియమ్‌ల్లో వ్యత్యాసాలు భారీగానే ఉంటాయి. చౌక ప్రీమియమ్ ఉన్న బీమా పాలసీలకే ఎప్పుడూ ప్రాధాన్యత ఇవ్వవద్దు. బీమా కంపెనీల వివిధ పాలసీల ఫీచర్లను క్షుణ్నంగా పరిశీలించండి. ఈ ఫీచర్లను పోల్చి ఒక నిర్ణయం తీసుకోండి. కొంత మొత్తం అదనంగా చెల్లించడం వల్ల అధిక ప్రయోజనాలు పొందే అవకాశాలుంటాయని గుర్తించండి. ఒకవేళ ఇప్పటికే మీకేమైనా రుగ్మతలుంటే వాటికి కూడా బీమా ఎన్ని సంవత్సరాల తర్వాత వర్తిస్తుందో తెలుసుకోండి.
 
 ఆ ఫీచర్ (వెయిటింగ్ పీరియడ్) ఒక్కో కంపెనీకి ఒకోలా ఉంటుంది. తక్కువ వెయిటింగ్ పీరియడ్ ఉన్న పాలసీలకే ప్రాధాన్యత ఇవ్వండి. చాలా కంపెనీలు నగదు రహిత, రీయింబర్స్‌మెంట్ ఆప్షన్లతో వైద్య బీమా పాలసీలందిస్తున్నాయి.నగదు రహిత బీమా పాలసీ తీసుకుంటేనే మంచిది. ఇలా చేస్తే ఆసుపత్రిలో చేరినప్పుడు మీరు ఎలాంటి డబ్బులు ఖర్చు చేయనక్కర లేదు. రీయింబర్స్‌మెంట్ ఫీచర్ పాలసీ తీసుకుంటే రకరకాల డాక్యుమెంట్లు సమర్పించాల్సి ఉంటుంది.
 
 ఇది కొంచెం వ్యయప్రయాసలతో కూడుకున్నది. మీ నగరంలో నగదు రహిత సౌకర్యం ఉన్న హాస్పిటల్స్ నెట్‌వర్క్‌ను కూడా చెక్ చేసుకోవాలి. ఇక ఐసీయూ, గది అద్దెలపై ఎలాంటి పరిమితులు లేని కొన్ని ఫ్యామిలీ ఫ్లోటర్ హెల్త్ ఇన్సూరెన్స్ ప్లాన్‌లు సూచిస్తున్నాం. అన్ని అంశాలు పరిగణనలోకి తీసుకొని సరైన పాలసీని ఎంచుకోండి. స్టార్ హెల్త్-స్టార్ కాంప్రహెన్సివ్, అపోలో మ్యూనిక్-ఈజీ హెల్త్ ఎక్స్‌క్లూజివ్, రెలిగేర్ హెల్త్- కేర్. ఈ ఆరోగ్య బీమా పాలసీల ప్రీమియమ్‌లు ఏడాదికి రూ.13,000-17,000 రేంజ్‌లో ఉంటాయి.
  
 నేను అవ్యవస్థీకృత రంగంలో పనిచేస్తున్నాను. నేను అటల్ పెన్షన్ యోజన(ఏపీవై)లో ఇన్వెస్ట్ చేస్తున్నాను. రిటైరైన తర్వాత నెలకు రూ.5,000 పెన్షన్ పొందడానికి గాను ఏపివైలో ఇన్వెస్ట్ చేస్తున్నాను. ఈ స్కీమ్ కింద ఎక్కువ మొత్తంలో పెన్షన్ పొందవచ్చా?  అలాగే నేషనల్ పెన్షన్ స్కీమ్ (ఎన్‌పీఎస్)లో కూడా ఇన్వెస్ట్ చేద్దామనుకుంటున్నాను. ఇలా ఒక వ్యక్తి రెండు పథకాల్లో ఇన్వెస్ట్ చేయవచ్చా?
  - రాజేష్, రాజమండ్రి
  
 అటల్ పెన్షన్ యోజన(ఏపీవై) అనేది ఎన్‌పీఎస్‌లో ఒక భాగం. అసంఘటిత రంగంలోని వారి కోసం ఉద్దేశించిన పథకం ఇది. 60 ఏళ్లు దాటిన తర్వాత నెలకు 1,000/2,000/3,000/4,000/5,000 చొప్పున పెన్షన్ పొందవచ్చు. ఈ స్కీమ్ కింద మీరు పొందగలిగే గరిష్ట పెన్షన్ రూ.5,000 మాత్రమే.
 
 ఇక ఏపీవై, ఎన్‌పీఎస్‌ల కింద ఒకే వ్యక్తి రెండు ఖాతాలు నిర్వహించడానికి లేదు. బీమా తీసుకునే వ్యక్తి వయస్సు, కోరుకునే పెన్షన్‌ను బట్టి అటల్ పెన్షన్ యోజనలో ఇన్వెస్ట్ చేసే మొత్తంపై పరిమితి ఉంటుంది. ఏపీవైలో ఆ పరిమితిని మించి అధికంగా మీరు ఇన్వెస్ట్ చేయడానికి లేదు. ఈ పరిమితిని మించి మీరు ఇన్వెస్ట్ చేయాలనుకుంటే మీరు ఏపీవై ఖాతా నిర్వహిస్తున్న బ్యాంక్‌ను సంప్రదించి మీకు లభించే ఆప్షన్ల గురించి మరిన్ని వివరాలు తెలుసుకోండి.
 - ధీరేంద్ర కుమార్
 సీఈవో, వ్యాల్యూ రీసెర్చ్


 మ్యూచువల్ ఫండ్స్, షేర్ల రాబడులకు సంబంధించి ప్రస్తుత పన్ను నిబంధనలు ఎలా ఉన్నాయి? మ్యూచువల్ ఫండ్స్, స్టాక్స్‌కు సంబంధించి దీర్ఘకాల, స్వల్పకాల  లాభాల పన్నును ఎలా నిర్ణయిస్తారు ?
 - మాన్విత, సికింద్రాబాద్
  
 మీరు కొనుగోలు చేసిన షేర్లు/మ్యూచువల్ ఫండ్స్‌ను ఏడాది తర్వాత విక్రయిస్తే, వాటిపై వచ్చిన రాబడులను దీర్ఘకాలిక మూలధన లాభాలుగా పరిగణిస్తారు.  ప్రస్తుతం షేర్లు/మ్యూచువల్ ఫండ్స్‌పై ఎలాంటి దీర్ఘకాల మూలధన లాభాల పన్ను విధించడం లేదు. అలా కాకుండా మీరు కొనుగోలు చేసిన షేర్లు/మ్యూచువల్ ఫండ్స్ యూనిట్లను ఏడాదిలోపే విక్రయిస్తే, ఈ ఇన్వెస్ట్‌మెంట్స్‌పై వచ్చిన రాబడులను స్వల్పకాలిక మూలధన లాభాలుగా వ్యవహరిస్తారు.
 
 15 శాతం చొప్పున పన్ను విధిస్తారు. అయితే డెట్ మ్యూచువల్ ఫండ్స్ యూనిట్లను మూడేళ్ల తర్వాత విక్రయిస్తేనే వాటిపై వచ్చిన లాభాలను దీర్ఘకాలిక మూలధన లాభాలుగా పరిగణించి దీర్ఘకాలిక మూలధన లాభాల పన్ను విధిస్తారు. ఈ లాభాలపై   20 శాతం(ఇండెక్సేషన్ ప్రయోజనంతో) పన్ను విధిస్తారు. ఇక ఈ డెట్ మ్యూచువల్ ఫండ్స్ యూనిట్లను మూడేళ్లలోపే విక్రయిస్తే, వాటిపై వచ్చే లాభాలను స్వల్పకాలిక మూలధన లాభాలుగా పరిగణిస్తారు. ఈ లాభాలపై మీ ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది.
  
 నేను గత నాలుగేళ్లుగా  ప్రజా భవిష్య నిధి(పీపీఎఫ్) ఖాతాలో ఇన్వెస్ట్ చేస్తున్నాను. ఎంత కాలం నుంచి ఇన్వెస్ట్ చేస్తే పీపీఎఫ్ నుంచి రుణం తీసుకోవచ్చు? వడ్డీరేట్లు ఎంత ఉంటుంది?
 - నిరంజన్, విశాఖ పట్టణం
 
 ప్రజా భవిష్య నిధి(పీపీఎఫ్)..ప్రారంభించిన 15 ఆర్థిక సంవత్సరాల తర్వాత మెచ్యూర్ అవుతుంది.  ఈ ఖాతాను ప్రారంభించిన మూడేళ్ల తర్వాత మీరు రుణం పొందవచ్చు. ఈ రుణ సౌకర్యం పీపీఎఫ్ ఖాతా ప్రారంభించిన మూడు నుంచి ఆరేళ్లలోపే ఉంటుంది. ఖాతాలో ఉన్న మొత్తంలో 25 శాతం వరకూ రుణం పొందవచ్చు. మీరు పీపీఎఫ్ ఖాతాపై పొందే వడ్డీ కంటే 2 శాతం అధికంగా వడ్డీ చెల్లించాల్సి ఉంటుంది. మీరు తీసుకున్న రుణాన్ని మూడేళ్లలోపు చెల్లించాల్సి ఉంటుంది. ఇలా చెల్లించలేకపోతే, మీరు చెల్లించాల్సిన వడ్డీరేటు మీరు పొందే వడ్డీరేటుకన్నా 6 శాతం అధికంగా ఉంటుంది. మీ ఖాతా ప్రారంభమై ఏడేళ్లు దాటితే, మీరు పాక్షికంగా సొమ్ములను తీసుకోవచ్చు.
  
 నేషనల్ పెన్షన్ స్కీమ్(ఎన్‌పీఎస్)లో 25 శాతం పాక్షిక మొత్తాన్ని ఉపసంహరించుకునే వెసులుబాటు ఉంది కదా. దీనిపై పన్నులు ఎలా ఉంటాయి?                       
 - నారాయణ రావు, కరీంనగర్
  
 నేషనల్ పెన్షన్ స్కీమ్(ఎన్‌పీఎస్)లో ఇన్వెస్ట్‌మెంట్స్ ప్రారంభించిన పదేళ్ల తర్వాత మీరు 25 శాతం మొత్తాన్ని విత్‌డ్రా చేసుకోవచ్చు. ఎన్‌పీఎస్‌లో అప్పటివరకూ ఉన్న మొత్తంలో 25 శాతం కాకుండా, మీరు ఇన్వెస్ట్ చేసిన మొత్తంలో 25 శాతాన్నే విత్‌డ్రా చేసుకోవాలి. పిల్లల ఉన్నత విద్యావసరాలు, లేదా వివాహం(చట్టబద్ధంగా దత్తత తీసుకున్న పిల్లలకు కూడా వర్తిస్తుంది), మొదటి ఇల్లు కొనుగోలు/నిర్మాణం, భార్య/పిల్లలు/ తల్లిదండ్రులకు 13 క్లిష్టమైన రుగ్మతలకు చికిత్స వంటి నిర్దేశిత అవసరాలకే 25 శాతం సొమ్ము విత్‌డ్రాకు అనుమతిస్తారు.
 
 ఒక్కో విత్‌డ్రాయల్‌కు ఐదేళ్ల విరామంతో మూడు సార్లు విత్‌డ్రా చేసుకోవచ్చు. క్లిష్టమైన జబ్బులకు  ఐదేళ్ల విరామం నిబంధన వర్తించదు. ఇక ఈ పాక్షిక విత్‌డ్రాయల్స్‌పై పన్ను విషయాల గురించి ప్రస్తావన కొత్త నియమనిబంధనల్లో లేదు. మీరు విత్‌డ్రా చేసుకునే మొత్తాన్ని మీ ఆదాయపు పన్ను స్లాబ్‌కు కలిపి పన్ను చెల్లించాల్సి రావచ్చు.
  
 నేను 2011లో ఎల్‌ఐసీ జీవన్ తరంగ్ పాలసీ తీసుకున్నాను. ఈ పాలసీని సరెండర్ చేసి టర్మ్ ఇన్సూరెన్స్ పాలసీ తీసుకుందామనుకుంటున్నాను. తగిన సలహా ఇవ్వండి.
 - మోహన్,  ఈ మెయిల్ ద్వారా
  
 జీవన్ తరంగ్ అనేది  హోల్ లైఫ్ ప్లాన్.  ఈ పాలసీని సరెండర్ చేస్తే మీకు నష్టాలు బాగానే వస్తాయి.  మీకు వచ్చే గ్యారంటీడ్ సరెండర్ విలువ ఎంత ఉంటుందంటే ... మీరు చెల్లించిన మొత్తం ప్రీమియంల్లో తొలి ఏడాది ప్రీమియంను మినహాయించిన మొత్తంలో 30 శాతంగా ఉంటుంది.  ఎల్‌ఐసీ స్పెషల్ సరెండర్ విలువను మీకు చెల్లించవచ్చు.
 
 ఇది గ్యారంటీడ్ సరెండర్ విలువ కంటే అధికంగా ఉంటుందని చెప్పవచ్చు. ఈ పాలసీ తీసుకొని మూడేళ్లు అయినందున ఈ పాలసీని మీరు సరెండర్ చేయవచ్చు.  జీవిత బీమా పాలసీ తీసుకోవాలంటే టర్మ్  బీమా ప్లాన్ తీసుకోవడమే ఉత్తమం. టర్మ్ ప్లాన్‌లకు పెద్ద మొత్తం బీమాకు తక్కువ ప్రీమియం చెల్లించవచ్చు. ఇక దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేయాలి.  
 - ధీరేంద్ర కుమార్
 సీఈవో, వ్యాల్యూ రీసెర్చ్


 నేనొక సంస్థ ఈక్విటీ మ్యూచువల్ ఫండ్‌లో ఇన్వెస్ట్ చేస్తున్నాను. ఈ ఇన్వెస్ట్‌మెంట్స్‌ను ఏడాది గడవక ముందే వేరే సంస్థ ఈక్విటీ మ్యూచువల్ ఫండ్‌లోకి మారిస్తే ఏమైనా పన్నులు చెల్లించాల్సి ఉంటుందా? ఎలాంటి పన్నుపోటు లేకుండా ఉండాలంటే ఎంత కాలం తర్వాత ఈ ఇన్వెస్ట్‌మెంట్స్‌ను బదిలీ చేయాలి?              
 - రామాచారి, విశాఖపట్టణం
  
 పన్ను అంశాల పరంగా చూస్తే, ఒక మ్యూచువల్ ఫండ్ నుంచి మరో మ్యూచువల్ ఫండ్‌లోకి ఇన్వెస్ట్‌మెంట్స్‌ను బదిలీ చేయడం అంటే...ఒక మ్యూచువల్ ఫండ్ యూనిట్లను విక్రయించి, కొత్తగా మరో మ్యూచువల్ ఫండ్ స్కీమ్ యూనిట్లను కొనుగోలు చేయడంగా పరిగణిస్తారు. ఒక ఈక్విటీ మ్యూచువల్ ఫండ్‌లో ఇన్వెస్ట్ చేసి, దాని నుంచి మీ ఇన్వెస్ట్‌మెంట్స్‌ను ఏడాదిలోపు మరో మ్యూచువల్ ఫండ్‌లోకి బదిలీ చేస్తే మీరు 15 శాతం చొప్పున స్వల్పకాలిక మూలధన లాభాల పన్ను చెల్లించాల్సి ఉంటుంది.  
 
 ఏడాది దాటిన ఈక్విటీ మ్యూచువల్ ఫండ్స్ ఇన్వెస్ట్‌మెంట్స్‌పై వచ్చే రాబడులను దీర్ఘకాలిక మూలధన లాభాలుగా వ్యవహరిస్తారు. ఈక్విటీ మ్యూచువల్ ఫండ్స్‌పై ఎలాంటి దీర్ఘకాల మూలధన లాభాల పన్ను ఉండదు. పన్ను పోటు లేకుండా ఉండాలంటే ఈక్విటీ మ్యూచువల్ ఫండ్  ఇన్వెస్ట్‌మెంట్స్‌ను  ఏడాది తర్వాత బదిలీ చేయాలి. ఇక లిక్విడ్ ఫండ్స్ విషయానికొస్తే, లిక్విడ్ ఫండ్ నుంచి మీ ఇన్వెస్ట్‌మెంట్స్‌ను మూడేళ్లలోపు వేరే ఫండ్‌లోకి మళ్లిస్తే, మీరు స్వల్పకాలిక మూలధన లాభాల పన్ను చెల్లించాల్సి ఉంటుంది.
 
 ఈ బదిలీపై వచ్చిన లాభాలను మీ ఆదాయానికి కలిపి మీ ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది.  ఒక మ్యూచువల్ ఫండ్ నుంచి మరో మ్యూచువల్ ఫండ్‌లో ఇన్వెస్ట్‌మెంట్స్ బదిలీ విషయంలో ఎగ్జిట్ లోడ్ విషయాన్ని కూడా మీరు పరిగణనలోకి తీసుకోవలసి ఉంటుంది.
  
 జీవన్ సరళ్ పాలసీ సరెండర్ చేద్దామనుకుంటున్నాను. ఈ పాలసీ సరెండర్‌పై నేనేమైనా పన్నులు చెల్లించాల్సి ఉంటుందా?
  - రమణ, నెల్లూరు
  
 మీరు పాలసీ తీసుకొని ఎన్ని సంవత్సరాలయింది, మీరు తీసుకున్న బీమా కవర్, మీరు చెల్లించిన ప్రీమియమ్ తదితర అంశాలను బట్టి పన్నుల విధింపు ఉంటుంది. కొన్ని సందర్భాల్లోనే జీవన్ సరళ్ బీమా పాలసీ సరెండర్‌పై పన్ను మినహాయింపులు పొందవచ్చు.  2012 మార్చి 31కి ముందు తీసుకున్న పాలసీలైతే, మీరు తీసుకున్న బీమా మొత్తం ,మీరు చెల్లించే వార్షిక ప్రీమియమ్‌నకు ఐదు రెట్ల కంటే అధికంగా ఉన్నప్పుడు.
 
 మీరు 2012 ఏప్రిల్ తర్వాత పాలసీలు తీసుకుంటే, మీరు తీసుకున్న బీమా మొత్తం మీరు చెల్లించే వార్షిక ప్రీమియమ్‌నకు పదిరెట్లు కంటే అధికంగా ఉన్నప్పుడు.  ఈ రెండు సందర్భాల్లో మాత్రం మీకు పన్ను మినహాయింపులు లభిస్తాయి, ఇలా కాని పక్షంలో ఎల్‌ఐసీ జీవన్ సరళ్ లాంటి ఎండోమెంట్ పాలసీలను సరెండర్ చేసినప్పుడు వచ్చిన సరెండర్ విలువను మీ ఆదాయానికి కలిపి, మీ ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది.
  
 నా కొడుకు ఒక ప్రైవేట్ కంపెనీలో చిన్న ఉద్యోగం చేస్తున్నాడు. అతని నెల జీతం రూ.11,000. తన వైద్య బీమా ప్రీమియాన్ని నేనే చెల్లిస్తున్నాను. ఈ చెల్లించే ప్రీమియమ్‌పై పన్ను మినహాయింపు పొందవచ్చా?                                            
 - క్రాంతి, గుంటూరు
  
 18 సంవత్సరాలు దాటిన పిల్లలు, ఉద్యోగస్తులైతే, వారికి చెల్లించే ప్రీమియమ్‌లకు మీరు పన్ను మినహాయింపు పొందలేరు. మీకు, మీ జీవిత భాగస్వామికి, మీపై ఆధారపడిన పిల్లలకు చెల్లించే వైద్య బీమా ప్రీమియమ్‌లకు మాత్రమే ఆదాయపు పన్ను చట్టం  సెక్షన్ 80డి ప్రకారం రూ.25 వేల వరకూ పన్ను మినహాయింపులు పొందవచ్చు.
  
 నేను 2012, జూలై నుంచి పబ్లిక్ ప్రావిడెండ్ ఫండ్(పీపీఎఫ్)లో ఇన్వెస్ట్ చేస్తున్నాను. ఈ ఖాతాలో ఇప్పటిదాకా జమ అయిన మొత్తం రూ. లక్షకు పైగా ఉంది.  దీని కంటే పన్ను ఆదా చేసే స్కీమ్‌లు ఉండటంతో ఈ ఖాతాలో ఇన్వెస్ట్ చేయడం ఆపేద్దామనుకుంటున్నాను. ఈ ఖాతాను ఆపేయడం ఎలా? ఈ ఖాతాలో ఇన్వెస్ట్ చేసిన మొత్తాన్ని నేను ఎప్పుడు తీసుకోవచ్చు?                                        - జ్యోతి, కాకినాడ
  
 పబ్లిక్ ప్రావిడెండ్ ఫండ్(పీపీఎఫ్) ఖాతాను మధ్యలో ఆపేయడానికి లేదు. ఈ ఖాతాను ప్రారంభించి పదిహేను ఆర్థిక సంవత్సరాలు పూర్తయిన తర్వాతనే ఈ ఖాతా మెచ్యూర్ అవుతుంది. ఒక ఆర్థిక సంవత్సరంలో కనీసం రూ.500 ఈ ఖాతాలో ఇన్వెస్ట్ చేయాలి. ఇలా ఇన్వెస్ట్ చేయని పక్షంలో ప్రతీ ఏడాది రూ.50 చొప్పున ఈ ఖాతా మెచ్యుర్ అయ్యేంత వరకూ  జరిమానా విధిస్తారు. పీపీఎఫ్ ఖాతా ప్రారంభించి ఆరేళ్లు దాటితే పాక్షికంగా కొంత మొత్తాన్ని విత్‌డ్రా చేసుకోవచ్చు.
 - ధీరేంద్ర కుమార్, సీఈవో,వ్యాల్యూ రీసెర్చ్


 నేను ఒక మ్యూచువల్ ఫండ్ స్కీమ్‌కు సంబంధించి రెగ్యులర్ ప్లాన్‌లో ఇన్వెస్ట్ చేస్తున్నాను. రెగ్యులర్ ప్లాన్ కంటే అదే స్కీమ్‌కు సంబంధించి డెరైక్ట ప్లాన్‌కు వ్యయాలు తక్కువగా ఉంటాయని, రాబడులు ఎక్కువగా ఉంటాయని మిత్రులంటున్నారు. నేను ఈ రెగ్యులర్ ప్లాన్ నుంచి  డెరైక్ట్ ప్లాన్‌కు మారవచ్చా? ఇలా మారడాన్ని మ్యూచువల్ ఫండ్ సలహాదారుకు తప్పనిసరిగా వెల్లడించాలా ? మారడానికి సంబంధించిన విధి విధానాలేంటి?
 - సుధాకర్, ఖమ్మం
  
 ఒక మ్యూచువల్ ఫండ్ స్కీమ్‌కు సంబంధించి  రెగ్యులర్ ప్లాన్ నుంచి డెరైక్ట్ ప్లాన్‌కు మారవచ్చు. ఈ విషయాన్ని మీ మ్యూచువల్ ఫండ్ సలహాదారుకు వెల్లడించాలా, వద్దా అనేది మీ ఇష్టం. రెగ్యులర్ నుంచి డెరైక్ట్ ప్లాన్‌కు మారేటప్పుడు ఆన్‌లైన్‌లో డెరైక్ట్ ఆప్షన్‌ను ఎంచుకోవాలి. ఇక ఆఫ్‌లైన్‌లో అయితే సదరు మ్యూచువల్ ఫండ్ స్కీమ్ పేరు తర్వాత, ఏఆర్‌ఎన్ కోడ్ దగ్గర.. ఈ రెండు చోట్లా   డెరైక్ట్ అని స్పష్టంగా తెలియజేయాలి.
 
 రెగ్యులర్ ప్లాన్ నుంచి డెరైక్ట్ ప్లాన్‌కు ఇన్వెస్టర్లు మారితే వారిపై ఎగ్జిట్ లోడ్‌ను ఇప్పుడు చాలా మ్యూచువల్ ఫండ్ సంస్థలు వసూలు చేయడం లేదు. అయినప్పటికీ, మీ మ్యూచువల్ ఫండ్ సంస్థ ఎగ్జిట్ లోడ్‌ను వసూలు చేస్తోందా లేదా అన్న విషయాన్ని ఒకసారి చెక్ చేసుకోవడం మంచిది. ఇలా ఒక ప్లాన్ నుంచి మరో ప్లాన్‌కు మారడాన్ని... ఒక మ్యూచువల్ ఫండ్ స్కీమ్ యూనిట్లు విక్రయించి, మరో మ్యూచువల్ ఫండ్ స్కీమ్‌లో ఇన్వెస్ట్ చేయడంగా భావిస్తారు. కాబట్టి ఏమైనా మూలధన లాభాల పన్నులు చెల్లించాల్సి ఉంటుందేమోనని విషయాన్ని కూడా ఒకసారి చెక్ చేసుకోవాలి.
  
 ప్రస్తుతం నేను ఎస్‌బీఐ మ్యాగ్నమ్ గ్లోబల్ ఫండ్, ఎస్‌బీఐ ఫార్మా ఫండ్, యూటీఐ టాన్స్‌పోర్టేషన్ అండ్ లాజిస్టిక్స్ ఫండ్, యూటీఐ మిడ్ క్యాప్ ఫండ్, యూటీఐ ఎంఎన్‌సీ ఫండ్, హెచ్‌డీఎఫ్‌సీ మిడ్-క్యాప్ అపర్చునిటీస్ ఫండ్‌ల్లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేస్తున్నాను. ఈ ఫండ్ ఇన్వెస్ట్‌మెంట్స్‌పై ఆదాయపు పన్ను చట్టం సెక్షన్ 80సీ ప్రకారం నేను ఏమైనా పన్ను రాయితీలు పొందవచ్చా?
  - ప్రశాంతి, గుంటూరు
  
 మ్యూచువల్ ఫండ్స్‌కు సంబంధించి ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్)ల్లో లేదా ట్యాక్స్ సేవింగ్ మ్యూచువల్ ఫండ్స్‌ల్లో ఇన్వెస్ట్ చేస్తేనే పన్ను రాయితీలు లభిస్తాయి. దురదృష్టవశాత్తూ మీరు సిస్టమాటిక్ ఇన్వెస్ట్‌మెంట్ ప్లాన్(సిప్( ద్వారా ఇన్వెస్ట్ చేస్తున్న వాటిల్లో ఏ ఒక్కటి కూడా ఈఎల్‌ఎస్‌ఎస్ ఫండ్ కాదు. అందుకని మీ మ్యూచువల్ ఫండ్ ఇన్వెస్ట్‌మెంట్స్‌పై మీకు ఎలాంటి పన్ను రాయితీలు లభించవు. ఈఎల్‌ఎస్‌ఎస్‌ల్లో ఇన్వెస్ట్ చేస్తే ఒక ఆర్థిక సంవత్సరంలో రూ.లక్షన్నర వరకూ పన్ను మినహాయింపులు పొందవచ్చు.
  
 స్థలం కొనుగోలు కోసం ఎంప్లాయీస్ ప్రావిడెండ్ ఫండ్(ఈపీఎఫ్) నుంచి డబ్బులు విత్‌డ్రా చేసుకుందామనుకుంటున్నాను. దీనికి సంబంధించిన విధి విధానాలేంటి? ఏమేం డాక్యుమెంట్లు సమర్పించాల్సి ఉంటుంది ?
  - భవానీ, హైదరాబాద్
  
 నిర్దేశిత ఉద్యోగ సర్వీస్ పూర్తి చేస్తేనే మీరు ఈపీఎఫ్ నుంచి డబ్బులను విత్‌డ్రా చేసుకోవచ్చు.  స్థలం కొనుగోలు కోసం ఈపీఎఫ్ నుంచి మొత్తం కాకుండా పాక్షికంగానే డబ్బులను విత్‌డ్రా చేసుకునే వీలుంది. మీరు ఏ కారణం వల్ల డబ్బులను విత్‌డ్రా చేయాలనుకుంటున్నారో, దానికి తగ్గట్లుగా మీ సర్వీస్ ఉండాలి. ఉదాహరణకు మీ ఉద్యోగ సర్వీస్ ఐదేళ్లు పూర్తయితేనే మీరు స్థలం కోసం ఈపీఎఫ్ నుంచి డబ్బులు విత్‌డ్రా చేసుకోవచ్చు. సంబంధిత డాక్యుమెంట్లతో పాటు పార్షియల్ విత్‌డ్రాయల్ పార్మ్‌ను మీ కంపెనీకి అందజేయాలి.
 
 మీ బ్యాంక్ ఖాతా వివరాలను కూడా వెల్లడించాల్సి ఉంటుంది. మీ క్లెయిమ్‌ను వెరిఫై చేసి, డబ్బులను మీ బ్యాంక్ ఖాతాకు జమ చేస్తారు. కొత్త నిబంధనల ప్రకారం, విత్‌డ్రాయల్ దరఖాస్తును నేరుగా ఈపీఎఫ్‌ఓ కార్యాలయంలో కూడా  సమర్పించవచ్చు.
  
 నేను 2009, మార్చిలో హెచ్‌డీఎఫ్‌సీ యూనిట్ లింక్డ్ పెన్షన్ ప్లాన్-2లో ఇన్వెస్ట్ చేయడం ప్రారంభించాను. ఏడేళ్ల పాటు ఏడాదికి రూ.12,000 చొప్పున ప్రీమియమ్‌లు చెల్లించాను. ఇప్పుడు నేను ఈ పాలసీని సరెండర్ చేస్తే, ఏమైనా పన్నులు చెల్లించాల్సి ఉంటుందా?
  - ప్రకాశ్ జైన్, హైదరాబాద్
  
 హెచ్‌డీఎఫ్‌సీ యూనిట్ లింక్డ్ పెన్షన్ ప్లాన్ టూ అనేది యూనిట్ లింక్డ్ పెన్షన్ ప్లాన్(యూఎల్‌పీపీ), ఈ ప్లాన్‌ను ఇప్పుడు ఈ కంపెనీ నిలిపేసింది. ఈ పాలసీలో మీరు ఏడేళ్ల పాటు ప్రీమియమ్‌లు చెల్లించారు.  కాబట్టి మీపై ఎలాంటి సరెండర్ చార్జీల భారం ఉండదు. మీ ఆదాయపు పన్ను స్లాబ్‌ననుసరించి సరెండర్ వేల్యూపై పన్ను చెల్లించాల్సి ఉంటుంది. మీరు ఈ పాలసీని సరెండర్ చేసేటప్పుడు ఆ ఫండ్ విలువ ఎంత ఉంటుందో అదే దాని సరెండర్ వేల్యూగా పరిగణిస్తారు.
 
 యూఎల్‌పీపీలు కొంత సంక్లిష్టమైన ప్లాన్‌లే. ఈ ప్లాన్‌లపై మ్యూచువల్ ఫండ్ కంపెనీలు అధిక చార్జీలు వసూలు చేస్తాయి. ఫలితంగా రాబడులు తగ్గుతాయి. రిటైర్మెంట్ వంటి దీర్ఘకాలిక ఆర్థిక లక్ష్యాల కోసం డైవర్సిఫైడ్ ఈక్విటీ మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు పొందవచ్చు. ఇక బీమా కోసం తగిన బీమా కవరేజ్ ఉండే టర్మ్‌బీమా పాలసీ తీసుకోవాలి
 - ధీరేంద్ర కుమార్
 సీఈవో, వ్యాల్యూ రీసెర్చ్


 నేషనల్ పెన్షన్ సిస్టమ్(ఎన్‌పీఎస్)లో  ఇన్వెస్ట్ చేసిన మొత్తానికి  2016-17 ఆర్థిక సంవత్సరంలో  పన్ను ప్రయోజనం పొందవచ్చా? నాకు ఇటీవలే కూతురు పుట్టింది. తన ఉన్నత విద్య నిమిత్తం ఇప్పటి నుంచే పొదుపు చేయాలనుకుంటున్నాను. అంటే 20 ఏళ్ల పాటు పొదుపు చేస్తాను. ఈ దీర్ఘకాలిక ఆర్థిక లక్ష్యం కోసం నేషనల్ పెన్షన్ స్కీమ్‌లో ఇన్వెస్ట్ చేయాలా లేక ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో ఇన్వెస్ట్ చేయాలా? దేన్ని ఎంచుకుంటే నాకు పన్ను ప్రయోజనాలతో పాటు, అధిక రాబడులు వస్తాయి?
  - సాయి లీల, రాజమండ్రి
  
 నేషనల్ పెన్షన్ సిస్టమ్(ఎన్‌పీఎస్)లో ఇన్వెస్ట్ చేసి, 2016-17 ఆర్థిక సంవత్సరానికి సెక్షన్ 80సీసీడీ(వన్‌బి) కింద రూ.50,000 వరకూ అదనపు పన్ను మినహాయింపులు పొందవచ్చు. రిటైర్మెంట్ కోసం ఇన్వెస్ట్ చేయాలి, అదీ ప్రభుత్వం స్పాన్సర్ చేసిన పథకంలో అంటే ఎన్‌పీఎస్‌ను ఎంచుకోవచ్చు. మీరు అరవై ఏళ్లు వచ్చేవరకూ ఈ ఇన్వెస్ట్‌మెంట్స్‌ను హోల్డ్ చేయాల్సి ఉంటుంది. మీరు అరవై ఏళ్లు వచ్చి, రిటైరైన తర్వాత ఈ మొత్తం కార్పస్‌లో 40 శాతంతో యాన్యుటీని కొనుగోలు చేయాల్సి ఉంటుంది. మిగిలిన 60 శాతం మొత్తాన్ని విత్‌డ్రా చేసుకోవచ్చు.
 
 ఈ మొత్తాన్ని మీ ఆదాయానికి కలిపి మీ ఆదాయపు పన్ను స్లాబ్‌ననుసరించి మీరు ఆదాయపు పన్ను చెల్లించాల్సి ఉంటుంది. ఇక అరవై ఏళ్లకు ముందే డబ్బులను విత్‌డ్రా చేయాలనుకుంటే, మీ కార్పస్‌లో కనీసం 80 శాతం మొత్తాన్ని యాన్యుటీని కొనుగోలుకు ఉపయోగించాల్సి ఉంటుంది. మిగిలిన మొత్తం మీ ఆదాయానికి కలిపి మీ ఆదాయపు పన్నుస్లాబ్‌ననుసరించి పన్ను కట్టాల్సి ఉంటుంది.  
 
 ఇక మీ దీర్ఘకాలిక ఆర్థిక లక్ష్యం(కూతురి ఉన్నత విద్య) కోసమైతే, ఇన్వెస్ట్‌మెంట్స్ మీరే స్వయంగా చూసుకోగలిగితే, ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)ను ఎంచుకోండి. ఈ స్కీమ్స్‌కు లాక్ ఇన్ పీరియడ్ మూడేళ్లుగా ఉంటుంది. మూడేళ్ల తర్వాత వీటిని ఖచ్చితంగా విక్రయించాల్సిన అవసరం లేదు. ఈఎల్‌ఎస్‌ఎస్‌లు తమ మొత్తం కార్పస్‌ను ఈక్విటీల్లోనే ఇన్వెస్ట్ చేస్తాయి. కాబట్టి మీకు మంచి రాబడులు వస్తాయి. అదే ఎన్‌పీఎస్‌లో అయితే ఈక్విటీలో ఇన్వెస్ట్ చేసేది 50 శాతం వరకు మాత్రమే ఉంటుంది.
 
 ఏడాది కాలం తర్వాత విక్రయించే ఈక్విటీ ఇన్వెస్ట్‌మెంట్స్‌పై ఎలాంటి దీర్ఘకాలిక మూలధన లాభాల పన్ను లేనందున ఈఎల్‌ఎస్‌ఎస్‌పై వచ్చే రాబడులపై ఎలాంటి పన్నులు చెల్లించాల్సిన పనిలేదు. అందుకని దీర్ఘకాలిక ఆర్థిక లక్ష్యాల కోసం ఎన్‌పీఎస్ కంటే ఈక్విటీ లింక్డ్ సేవింగ్స్ స్కీమ్ బెటర్. పన్ను ప్రయోజనాలు లభిస్తాయి. అధిక రాబడులూ వస్తాయి.
 
 మ్యూచువల్ ఫండ్స్‌కు సంబంధించి రెగ్యులర్ ప్లాన్‌ల కంటే డెరైక్ట్ ప్లాన్‌లకు ఉండే ప్రయోజనాలు, ప్రతికూలతలను వివరించండి ?
  - క్రిష్టోఫర్, నెల్లూరు
  
 డెరైక్ట్ ప్లాన్‌ల వల్ల మీకు కమీషన్లు, మార్కెటింగ్ సంబంధిత వ్యయాల నుంచి రక్షణ లభిస్తుంది. ఇది ఎంత చిన్నమొత్తమైనా సరే దీర్ఘకాలం ఇన్వెస్ట్‌మెంట్ కారణంగా మీకు మంచి రాబడులు వస్తాయి. డెరైక్ట్ ప్లాన్‌లో ఇన్వెస్ట్ చేయడం వల్ల లభించే అతి పెద్ద ప్రయోజనం ఇది. ఇక డెరైక్ట్ ప్లాన్‌లకు సంబంధించి ఉన్న అతి పెద్ద ప్రతికూలాంశం ... మీ పెట్టుబడి నిర్ణయాలన్నింటిని మీరే స్వంతంగా తీసుకోవలసి రావడం.
 
 మీరు డెరైక్ట్ ప్లాన్‌ను మ్యూచువల్ ఫండ్ సంస్థ నుంచి నేరుగా కొనుగోలు చేస్తారు కాబట్టి. మ్యూచువల్ ఫండ్ అడ్వైజర్ సలహాలు మీకు అందుబాటులో ఉండవు. మీరే సొంతంగా రీసెర్చ్ చేసి. నిర్ణయాలు తీసుకోవలసి ఉంటుంది. మ్యూచువల్ ఫండ్స్, ఇన్వెస్ట్‌మెంట్స్‌కు సంబంధించి పూర్తి అవగాహన ఉన్నప్పుడు మాత్రమే డెరైక్ట్ ప్లాన్‌లో ఇన్వెస్ట్‌మెంట్స్‌కు సంబంధించి నిర్ణయాలు తీసుకోవాలి.
  
 నా వయస్సు 65 సంవత్సరాలు. సీనియర్ సిటిజన్ హెల్త్ ఇన్సూరెన్స్ ప్లాన్‌ను తీసుకోవాలనుకుంటున్నాను. రెలిగేర్, స్టార్, టాటా ఏఐజీ, అపోలో మ్యూనిక్ వంటి కంపెనీలవి షార్ట్‌లిస్ట్ చేశాను. వీటిల్లో దేనిని ఎంచుకోవాలో సూచిస్తారా?                         
 - కిరణ్, వరంగల్
  
 మీరు తీసుకునే హెల్త్ పాలసీ.. తగినంత కవరేజ్ ఇచ్చేదిగానూ, మీరు చెల్లించాల్సిన ప్రీమియమ్ మీ బడ్జెట్‌కు తగినట్లుగానూ ఉండాలి.  బీమా తీసుకునే వ్యక్తికి ఇంతకు ముందే ఏవైనా రుగ్మతలు ఉంటే వాటికి  సంబంధించిన కవరేజ్ క్లాజ్‌ను తప్పనిసరిగా చెక్ చేసుకోవాలి. ఇంతకు ముందే ఉన్న జబ్బులకు సంబంధించి కవరేజ్ పీరియడ్ ఒక్కో కంపెనీకి ఒక్కోలా ఉంటుంది. ఈ పీరియడ్ రెండు నుంచి నాలుగేళ్లుగా ఉంటుంది. తక్కువ వెయిటింగ్ పీరియడ్ ఉన్న పాలసీలకు ప్రాధాన్యత ఇవ్వండి.
 
 పాలసీ తీసుకున్న 30 రోజుల్లోపే మీరు చికిత్స తీసుకుంటే ఈ చికిత్సకయ్యే ఖర్చులు చాలా హెల్త్ పాలసీల్లో రీయింబర్స్ కావు. చాలా బీమా కంపెనీలు నగదు రహిత(క్యాష్‌లెస్), రీయింబర్స్‌మెంట్ ఫీచర్లున్న పాలసీలను ఆఫర్ చేస్తున్నాయి. నగదు రహిత సౌకర్యాన్నే ఎంచుకుంటే మంచిది. రీయింబర్స్‌మెంట్ ఫీచరున్న పాలసీలో అయితే మీ చికిత్సకయ్యే ఖర్చులు  మీరు ముందుగానే  చెల్లించాల్సి ఉంటుంది.
 
 ఈ డబ్బులు సమకూర్చుకోవడం కొంచెం శ్రమతో కూడుకున్న పనే. మరోవైపు రీయింబర్స్‌మెంట్ కోసం చాలా డాక్యుమెంట్లు సమర్పించాల్సి ఉంటుంది. ఇక నగదు రహిత సౌకర్యం తీసుకుంటే మీ నగరంలో ఉన్న నెట్‌వర్క్ హాస్పిటల్స్‌ను చెక్ చేసుకోవాలి. సదరు బీమా సంస్థ వెబ్‌సైట్‌లో మీరు తీసుకోవాలనుకుంటున్న ప్లాన్ బ్రోచర్‌ను క్షుణ్ణంగా పరిశీలించి తగిన నిర్ణయం తీసుకోండి.
 
 ఇక వివిధ సంస్థల పాలసీల వివరాలు చూద్దాం...  స్టార్ హెల్త్ సీనియర్ సిటిజన్స్ రెడ్ కార్పెట్ హెల్త్ ఇన్సూరెన్స్ విషయానికొస్తే,.. ఈ పాలసీలో ఇంతకు ముందే ఉన్న జబ్బుల కవరేజ్ రెండో ఏట నుంచి లభిస్తుంది. 61-75 ఏళ్ల ఏజ్‌గ్రూప్ వారికి రూ.5 లక్షల బీమాకు ప్రీమియం రూ.20,610గా ఉంది.
 
 ఇక రెలిగేర్ సీనియర్ సిటిజన్ హెల్త్ ఇన్సూరెన్స్‌లో ఇంతకు ముందే ఉన్న జబ్బులకు కవరేజ్ నాలుగో ఏడాది నుంచి లభిస్తుంది. రూ. 5 లక్షల హెల్త్ పాలసీకి ప్రీమియం 61-65 ఏళ్ల వయస్సుకు రూ.16,898-రూ.23,466 వరకూ ఉంటుంది. అపోలో మ్యూనిక్ ఆప్టిమా సీనియర్ పాలసీలోనూ ఇంతకు ముందే ఉన్న జబ్బుల కవరేజ్ 4వ ఏడాది నుంచి లభిస్తుంది. రూ. 5 లక్షల బీమాకు ప్రీమియమ్‌లు 61-65 ఏళ్లకు రూ.18,137గానూ, 66-70 ఏళ్ల వయస్సుకు రూ. 29,254గానూ, 71-75 ఏళ్ల వయస్సుకు రూ.38,136గానూ ఉన్నాయి.
 - ధీరేంద్ర కుమార్
  సీఈవో, వ్యాల్యూ రీసెర్చ్


 నేను గత ఏడాది మార్చి నుంచి ప్రజా భవిష్య నిధి(పబ్లిక్ ప్రావిడెండ్ ఫండ్ -పీపీఎఫ్)లో ఇన్వెస్ట్ చేస్తున్నాను. ఈ ఖాతా మెచ్యూరిటీ వరకూ నాకు 8.7 శాతం వడ్డీ వస్తుందా? కొత్త వడ్డీరేట్లు కొత్త పీపీఎఫ్ ఖాతాలకే వర్తిస్తాయా ? పాత వాటికి కూడా అమలవుతుందా ? ఈ విషయాలపై తగిన స్పష్టతనివ్వండి.    - రాజశేఖర్, విశాఖపట్టణం
  
 పబ్లిక్ ప్రావిడెండ్ ఫండ్ (పీపీఎఫ్) వడ్డీరేట్లు మెచ్యూరిటీ వరకూ ఒకే విధంగా ఉండకపోవచ్చు. ప్రభుత్వం పీపీఎఫ్ వడ్డీరేట్లును కాలానుగుణంగా మారుస్తూ ఉంటుంది. ఇలా మార్పు చేసినప్పుడల్లా, ఆ మారిన వడ్డీరేట్లు పాత, కొత్త పీపీఎఫ్ ఖాతాలన్నింటికీ వర్తిస్తాయి. గతంలో పీపీఎఫ్ వడ్డీరేట్లు ఆర్థిక సంవత్సరం ప్రారంభానికి ముందే నిర్ణయించేవాళ్లు. ఇక ఈ ఆర్థిక సంవత్సరం(2016-17) నుంచి వడ్డీరేట్లను ప్రతి మూడు నెలలకొకసారి సవరిస్తారు. ఈ ఏడాది మార్చి వరకూ పీపీఎఫ్ వడ్డీరేటు 8.7 శాతంగా ఉంది.  ఈ ఆర్థిక సంవత్సరం మొదటి మూడు నెలలు(ఏప్రిల్ 1 నుంచి జూన్ 30 వరకూ) 8.1 శాతంగా కేంద్ర ప్రభుత్వం నిర్ణయించింది.
 నా వయస్సు 28 సంవత్సరాలు. ఇటీవలనే ఉద్యోగ జీవితం ప్రారంభించాను.  నేను బీమా పాలసీ తీసుకోవాలనుకుంటున్నాను. నాకు తగిన పాలసీ సూచించగలరు.                      - ప్రభు, కరీంనగర్
 చిన్న వయస్సులోనే బీమా పాలసీ తీసుకుంటే వార్షిక ప్రీమియమ్ తక్కువగా చెల్లించే ప్రయోజనాన్ని పొందవచ్చు. అంతేకాకుండా తగిన ఆర్థిక క్రమశిక్షణ కూడా అలవడుతుంది. ఇక మీ వయస్సుకు తగ్గట్లుగా మూడు బీమా పాలసీలను సూచిస్తున్నాము. సంస్థ బీమా పాలసీ, రూ. కోటి బీమాకు మీరు 32 సంవత్సరాల పాటు (మీ రిటైర్మెంట్ వరకూ)చెల్లించాల్సిన వార్షిక ప్రీమియం, తదితర వివరాలను కూడా అందిస్తున్నాం. పరిశీలించి తగిన నిర్ణయం తీసుకోండి. మ్యాక్స్ లైఫ్ ఆన్‌లైన్ టెర్మ్ ప్లాన్- వార్షిక ప్రీమియమ్ రూ.6,900. ఈ సంస్థ క్లెయిమ్ సెటిల్మెంట్ నిష్పత్తి 98.63 శాతంగా ఉంది. ఇక ఏగాన్ రెలిగేర్ ఐటెర్మ్ ప్లాన్‌లోనైతే వార్షిక ప్రీమియమ్ రూ.7,866గా చెల్లించాల్సి ఉంటుంది. ఈ సంస్థ క్లెయిమ్ సెటిల్మెంట్ నిష్పత్తి 96.59 శాతంగా ఉంది. ఇక మూడో పాలసీ విషయానికొస్తే, హెచ్‌డీఎఫ్‌సీ క్లిక్2ప్రొటెక్ట్ ప్లస్ ప్లాన్‌కైతే ఏడాదికి రూ.9,380 ప్రీమియం చెల్లించాలి.   ఈ సంస్థ క్లెయిమ్ సెటిల్మెంట్ నిష్పత్తి 95.86 శాతంగా ఉంది. కొంత అదనపు ప్రీమియం చెల్లించి అదనపు రైడర్లు పొందవచ్చు. అన్ని విషయాలు సవివరంగా బీమా దరఖాస్తులో వెల్లడించండి. ఇలా చేస్తే పాలసీ క్లెయిమ్ చేసేటప్పుడు ఎలాంటి ఇబ్బందులు ఎదురవ్వవు.
 నేను గత కొంత కాలంగా మ్యూచువల్ ఫండ్స్‌లో ఇన్వెస్ట్ చేస్తున్నాను. ఇప్పుడు ఒక మ్యూచువల్ ఫండ్‌లోని ఇన్వెస్ట్‌మెంట్స్‌ను మరో మ్యూచువల్ ఫండ్‌లోకి మారుద్దామనుకుంటున్నాను. ఇలా ఒక మ్యూచువల్ ఫండ్ నుంచి మరో మ్యూచువల్ ఫండ్‌లోకి ఇన్వెస్ట్‌మెంట్స్‌ను సులభంగా బదిలీచేసుకునే మార్గాన్ని సూచించండి? - ప్రతిభ, హైదరాబాద్
 ఒక మ్యూచువల్ ఫండ్‌లోని ఇన్వెస్ట్‌మెంట్స్‌ను మరో మ్యూచువల్ ఫండ్‌లోకి మార్చుకోవడాన్ని.. ఒక మ్యూచువల్ ఫండ్ యూనిట్లను విక్రయించి, కొత్త మ్యూచువల్ ఫండ్ యూనిట్లను కొనుగోలు చేయడంగా పరిగణిస్తారు. ఇక ఒక మ్యూచువల్ ఫండ్‌లోని ఇన్వెస్ట్‌మెంట్స్‌ను మరో మ్యూచువల్ ఫండ్‌లోకి మార్చుకునేటప్పుడు చెల్లించాల్సిన పన్నులు, ఎగ్జిట్ లోడ్, తదితర అంశాలను కూడా పరిగణనలోకి తీసుకోవాల్సి ఉంటుంది. ఉదాహరణకు డెట్ మ్యూచువల్ ఫండ్‌లోని ఇన్వెస్ట్‌మెంట్స్‌ను వేరే మ్యూచువల్ ఫండ్‌లోకి మార్చాలనుకుంటున్నారనుకుందాం.... ఇన్వెస్ట్ చేసిన మూడేళ్లలోపే ఇలా మార్చాలనుకుంటే, మీరు స్వల్పకాలిక మూలధన లాభాల పన్ను(షార్ట్‌టర్మ్ క్యాపిటల్ గెయిన్స్) చెల్లించాల్సి ఉంటుంది. మీ ఆదాయపు పన్ను స్లాబ్‌ననుససరించి మీరు ఈ పన్ను చెల్లించాల్సి ఉంటుంది. ఒక వేళ మూడేళ్ల తర్వాత మార్చాలనుకుంటే మీరు దీర్ఘకాలిక మూలధన లాభాల పన్ను(ఇండేక్సేషన్ బెనిఫిట్‌తో 20 శాతం) చెల్లించాల్సి ఉంటుంది. ఈక్విటీ మ్యూచువల్ ఫండ్స్‌కైతే పన్నులు భిన్నంగా ఉంటాయి. ఈక్విటీ మ్యూచువల్ ఫండ్ యూనిట్లను ఏడాదిలోపే విక్రయిస్తే, ఆ ఇన్వెస్ట్‌మెంట్స్‌పై వచ్చిన లాభాలను స్వల్పకాలిక మూలధన లాభాలుగా భావించి 15 శాతం  పన్ను విధిస్తారు. ఏడాది తర్వాత విక్రయిస్తే, ఎలాంటి పన్నులు చెల్లించాల్సిన పనిలేదు. ఈక్విటీ మ్యూచువల్ ఫండ్ యూనిట్లను ఏడాది తర్వాత విక్రయిస్తే, వాటిని దీర్ఘకాల మూలధన లాభాలుగా పరిగణిస్తారు. ఈక్విటీ మ్యూచువల్ ఫండ్స్‌పై ఎలాంటి దీర్ఘకాల మూలధన లాభాల పన్ను చెల్లించాల్సిన పనిలేదు. ఇక కొన్ని మ్యూచువల్ ఫండ్స్ నిర్ణీత కాలానికి మ్యూచువల్ ఫండ్స్ విక్రయాలపై ఎగ్జిట్ లోడ్‌ను విధిస్తాయి.  అందుకని ఎగ్జిట్ లోడ్ పడనంత కాలం వేచి చూసి,  ఆ తర్వాత బదిలీ చేసుకుంటే ఎగ్జిట్ లోడ్ భారం తప్పించుకోవచ్చు. ఏ మ్యూచువల్ ఫండ్స్ నుంచి ఏ మ్యూచువల్ ఫండ్స్‌లోకి మీ ఇన్వెస్ట్‌మెంట్స్‌ను బదిలీ చేసుకోవాలనుకుంటున్నారో వివరాలను మీరు వెల్లడించలేదు.
 
 
 అందుకని సవివర సలహా ఇవ్వలేకపోతున్నాం. ఒక మ్యూచువల్ ఫండ్ నుంచి మరో మ్యూచువల్ ఫండ్‌లోకి ఇన్వెస్ట్‌మెంట్స్‌ను రెండు సందర్భాల్లో బదిలీ చేయాలనుకుంటారు. మొదటిది. మీరు అనుకున్న/నిర్దేశించుకున్న ఆర్థిక లక్ష్యం సాధించగలగడం, రెండోది మీరు ఇన్వెస్ట్ చేసిన మ్యూచువల్ ఫండ్, ఆ కేటగిరి ఫండ్స్‌తో పోల్చితే సరైన రాబడులను ఇవ్వలేకపోవడం. మీరు ఇన్వెస్ట్ చేసిన మ్యూచువల్ ఫండ్ ఆశించిన పనితీరు కనబరచకపోవడానికి తగిన కారణాలేంటో అన్వేషించండి. భవిష్యత్తులో కూడా ఈ ఫండ్ పనితీరు అద్వానంగా ఉంటుందని భావిస్తే, అదే కేటగిరిలో మంచి పనితీరు కనబరుస్తున్న మరో మ్యూచువల్ ఫండ్‌లోకి మీ ఇన్వెస్ట్‌మెంట్స్‌ను బదిలీ చేసుకోండి.
  
  ధీరేంద్ర కుమార్
  సీఈవో, వ్యాల్యూ రీసెర్చ్
  


 నేను  గతంలో ప్రారంభించిన సీనియర్ సిటిజన్ సేవింగ్స్ స్కీమ్(ఎస్‌సీఎస్‌ఎస్) ఖాతా గడువు తీరింది.  దీనిని పొడిగించుకోవచ్చా?  ఈ ఖాతా గడువు తీరినందును తాజాగా మరో సీనియర్ సిటిజన్ సేవింగ్స్ స్కీమ్ ఖాతా తెరవవచ్చా?- ప్రవీణ్, విజయవాడ
 
 సీనియర్ సిటిజన్ సేవింగ్స్ స్కీమ్(ఎస్‌సీఎస్‌ఎస్)  ఖాతా కాలపరిమితి ఐదేళ్లు. ఈ ఐదేళ్లు పూర్తయిన తర్వాత ఈ ఖాతాను మూసేయవచ్చు. లేదా మరో మూడేళ్ల పాటు కొనసాగించవచ్చు. పాస్‌బుక్‌ను, దరఖాస్తు ఈ ను సమర్పించి ఈ ఖాతా నుంచి సొమ్ములన్నింటినీ తీసేసుకొని ఈ ఖాతాను మూసేయవచ్చు. ఈ ఖాతా గడువు పూర్తయిన తర్వాత ఏడాదిలోపు దరఖాస్తు బి ను సమర్పించి ఈ ఖాతాను మరో మూడేళ్లపాటు కొనసాగించుకోవచ్చు. ఈ పొడిగింపు మీరు దరఖాస్తు చేసినప్పటి నుంచి కాకుండా, మీ ఖాతా గడువు పూర్తయిన తేదీ నుంచి వర్తిస్తుంది. ఈ ఖాతా గడువు పూర్తయిన తర్వాత ఖాతాను మూసేయకపోయినా, పొడిగింపు కోసం దరఖాస్తు చేయకపోయినా, ఈ ఖాతాను మూసేసినట్లుగానే పరిగణిస్తారు. పోస్ట్ ఆఫీస్ సేవింగ్స్ అకౌంట్‌పై ఎంత అయితే వడ్డీ వస్తుందో అంతే వడ్డీ గడువు  తీరిన ఖాతాకు వస్తుంది. మీరు ప్రారంభించిన సీనియర్ సిటిజన్ సేవింగ్స్ స్కీమ్ ఖాతాకు ఎనిమిదేళ్లు పూర్తయిన తర్వాత మరో సీనియర్ సిటిజన్ సేవింగ్స్ స్కీమ్‌ను ప్రారంభించవచ్చు
 
 నా వయస్సు 31 సంవత్సరాలు. నేను ప్రైవేట్ రంగంలో ఉద్యోగం చేస్తున్నాను. ఈక్విటీ లింక్డ్ సేవింగ్స్ స్కీమ్‌ల్లో ఇన్వెస్ట్ చేయమని తెగ చెబుతుంటారు కదా ! పైగా ఈ ఈఎల్‌ఎస్‌ఎస్‌ల్లో ఇన్వెస్ట్ చేస్తే లాక్ ఇన్ పీరియడ్ మూడేళ్లు ఉంటుంది. ఒక ఏడాదికి మించిన కాలానికి వేరే మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు వస్తాయి, మరో వైపు సెక్షన్ 80సీ కింద పన్ను రాయితీలు కూడా లభిస్తాయి. కదా ! మరలాంటప్పుడు మూడేళ్ల లాక్ ఇన్ పీరియడ్ ఉన్న ఈక్విటీ మ్యూచువల్ ఫండ్స్‌లో ఇన్వెస్ట్ చేయడం సరైనదేనా ? -  హిమబిందు, హైదరాబాద్
 
 మరే ఇతర మ్యూచువల్ ఫండ్‌లో ఇన్వెస్ట్ చేసినా  ఆదాయపు పన్ను చట్టం సెక్షన్ 80 సీ కింద పన్ను మినహాయింపులు పొందలేరు. ఈక్విటీ మ్యూచువల్ ఫండ్స్‌లో  ఇన్వెస్ట్ చేస్తేనే మీరు సెక్షన్ 80 సీ కింద రూ.1.5 లక్షల వరకూ పన్ను మినహాయింపులు పొందవచ్చు. పన్ను ఆదా అయ్యే ప్రతి ఇన్వెస్ట్‌మెంట్స్‌కు లాక్ ఇన్ పీరియడ్ తప్పనిసరిగా ఉంటుంది. సెక్షన్ 80 సీ కింద తక్కువ లాక్ ఇన్ పీరియడ్ ఉన్న ఇన్వెస్ట్‌మెంట్ సాధనాల్లో ఈఎల్‌ఎస్‌ఎస్ ఒకటి. అందుకని దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేయడం మంచిదని తరచూ సలహాలిస్తుంటాము.
 నా వయస్సు 52 సంవత్సరాలు. ఒక  ప్రభుత్వ రంగ సంస్థలో ఉద్యోగం చేస్తున్నాను. గత ఎనిమిదేళ్లుగా పలు మ్యూచువల్ ఫండ్స్‌లో ఇన్వెస్ట్ చేస్తున్నాను. ఎఫ్‌టీ బిల్డ్ ఇండియా, ఎఫ్‌టీ ప్రైమా, హెచ్‌డీఎఫ్‌సీ ఈక్విటీ, హెచ్‌డీఎఫ్‌సీ బ్యాలెన్స్‌డ్, ఐడీఎఫ్‌సీ ప్రీమియర్, ఐసీఐసీఐ ప్రు వేల్యూ డిస్కవరీ, యూటీఐ ఆపర్చునిటీస్, రిలయన్స్ విజన్ ఫండ్స్‌లో ఇన్వెస్ట్ చేస్తున్నాను. ఈ ఇన్వెస్ట్‌మెంట్స్ మొత్తం విలువ ఇప్పుడు రూ.16 లక్షలకు పెరిగింది. నాకు ఎలాంటి పెన్షన్ రాదు. నేను మరో ఎనిమిదేళ్లలో రిటైరవుతున్నాను. నేను రిటైరైన తర్వాత నాకు నెలకు రూ.40,000 పెన్షన్ అవసరం. ఈ మొత్తం పొందడానికి నేను ఏ పెన్షన్ ఫండ్‌లో ఎంత మొత్తం ఇన్వెస్ట్ చేయాల్సి ఉంటుంది? ఎన్‌పీఎస్, హెచ్‌డీఎఫ్‌సీ రిటైర్మెంట్ ఫండ్, హెచ్‌డీఎఫ్‌సీ స్టాండర్ట్ లైఫ్ పర్సనల్ పెన్షన్ ఫండ్.. వీటిని షార్ట్‌లిస్ట్ చేశాను. తగిన సలహా ఇవ్వండి? - సాయి సుధీర్, విశాఖపట్టణం
  
 
 మీరు రిటైరైన తర్వాత 20 ఏళ్ల కాలానికి నెలకు 40వేల చొప్పున పెన్షన్ కావాలంటే మీకు రూ.96 లక్షల కార్పస్ అవసరం. మనుష్యుల సగటు జీవిత కాలం 80 ఏళ్లు, దవ్యోల్బణం 8 శాతంగా తీసుకొని ఈ లెక్కలు వేశాము. నెలకు రూ.25,500 చొప్పున ఎనిమిదేళ్లపాటు సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేస్తే, ప్రస్తుతం మీ దగ్గరున్న రూ.16 లక్షల మొత్తంపై 12 శాతం రాబడి వస్తుందని లెక్కిస్తే మీరు ఆశించినట్లుగా నెలకు రూ.40,000 చొప్పున పెన్షన్ పొందగలరు. మీ రిటైర్మెంట్ నిధి కోసం మీకు టైలర్ మేడ్ పెన్షన్ ప్లాన్ ఏదీ అవసరం లేదని భావిస్తున్నాం. పన్ను మినహాయింపులు కావాలని కోరుకుంటే తప్ప. ఏదైనా రెండు డైవర్సిఫైడ్ ఈక్విటీ మ్యూచువల్ ఫండ్స్‌ను ఎంచుకొని, వాటిల్లో సిస్టమాటిక్ ఇన్వెస్ట్‌మెంట్ విధానం(సిప్)లో ఇన్వెస్ట్ చేయండి. ఇలా చేస్తే మీ ఇన్వెస్ట్‌మెంట్స్‌పై తగిన నియంత్రణ ఉంటుంది. సాధారణంగా జీవిత బీమా సంస్థలు ఆఫర్ చేసే పెన్షన్ ప్లాన్‌ల్లో ఇన్వెస్ట్ చేయకండి. ఈ ప్లాన్‌లు బీమాను, ఇన్వెస్ట్‌మెంట్స్ కలగలిపి ఉంటాయి. ఇవి ఖరీదైనవే కాకుండా, తగిన బీమాను, రాబడులను అందించలేవు. కొత్తగా హెచ్‌డీఎఫ్‌సీ సంస్థ హెచ్‌డీఎఫ్‌సీ  రిటైర్మెంట్ సేవింగ్స్ ఫండ్‌ను అందుబాటులోకి తెచ్చింది. దీంట్లో మూడు విభిన్నమైన ఇన్వెస్ట్‌మెంట్ ఆప్షన్లున్నాయి. అయితే దీర్ఘకాలిక పనితీరు చరిత్ర లేని ఫండ్స్‌లో  ఇన్వెస్ట్ చేయడం అంత తెలివైన పనికాదు. పన్ను రాయితీలు ఇచ్చే ప్రభుత్వ పెన్షన్ పథకం కావాలనుకుంటే, నేషనల్ పెన్షన్ స్కీమ్(ఎన్‌పీఎస్)ను పరిశీలించవచ్చు. అయితే ఎన్‌పీఎస్‌కు రెండు పరిమితులున్నాయి. ఎన్‌పీఎస్ ఇన్వెస్ట్‌మెంట్స్‌లో ఈక్విటీ కేటాయింపులు 50 శాతం కంటే మించకూడదు. అదే ఈక్విటీ మ్యూచువల్ ఫండ్స్‌లో అయితే వంద శాతం వరకూ ఇన్వెస్ట్ చేయవచ్చు. దీర్ఘకాలంలో ఈక్విటీ ఇన్వెస్ట్‌మెంట్స్ మంచి రాబడులస్తాయి. రెండోది.., రిటైర్మెంట్ తర్వాత ఎన్‌పీఎస్ కార్పస్‌లో మీరు 40 శాతంతో యాన్యుటీని కొనుగోలు చేయాలి. ఈ 40 శాతంపైననే మీకు పన్ను మినహాయింపులు లభిస్తాయి.
  
  ధీరేంద్ర కుమార్
 సీఈవో, వ్యాల్యూ రీసెర్చ్
  
  


 తాజా బడ్జెట్‌లో రూ. 10 లక్షలకు మించిన డివిడెండ్ ఆదాయంపై 10 శాతం డివిడెండ్ డిస్ట్రిబ్యూషన్ ట్యాక్స్(డీడీటీ)ను విధించారు కదా ! ఈ డివిడెండ్ డిస్ట్రిబ్యూషన్ ట్యాక్స్ మ్యూచువల్ ఫండ్ డివిడెండ్లకు కూడా వర్తిస్తుందా ? కొన్ని మ్యూచువల్ ఫండ్స్ డివిడెండ్ రీఇన్వెస్ట్‌మెంట్ ప్లాన్‌లు కూడా ఆఫర్ చేస్తున్నాయి. వీటిపై డీడీటీని ఎలా లెక్కిస్తారు?
  - హిమాంశు, హైదరాబాద్
  
 బడ్జెట్‌లో కొత్తగా ప్రతిపాదించిన డివిడెండ్ డిస్ట్రిబ్యూషన్ ట్యాక్స్(డీడీటీ) మ్యూచువల్ ఫండ్స్‌కు వర్తించదు. కంపెనీలు ఇచ్చిన డివిడెండ్లపై మాతమే ఈ ట్యాక్స్‌ను లెక్కిస్తారు. ఏడాది కాలంలో ఎవరైనా ఒక వ్యక్తి రూ.10 లక్షలకు మించి డివిడెండ్ ఆదాయం పొందినట్లయితే ఆ వ్యక్తి 10 శాతం డివిడెండ్ డిస్ట్రిబ్యూషన్ ట్యాక్స్ చెల్లించాల్సి ఉంటుంది. ఇది వ్యక్తులకు, హిందూ అవిభక్త కుటుంబాలు(హెచ్‌యూఎఫ్), సంస్థలకు వర్తిస్తుంది.
  
 నా కూతురి చదువు కోసం నెలకు రూ.5,000 చొప్పున 15 ఏళ్లపాటు ఇన్వెస్ట్ చేద్దామనుకుంటున్నాను. ఎస్‌బీఐ ఈవెల్త్ ప్లాన్‌లో ఇన్వెస్ట్ చేస్తే బావుంటుందని నా మిత్రుడొకరు సలహా ఇచ్చారు. నా కూతురి భవిష్యత్ విద్యావసరాల కోసం ఈ ప్లాన్‌లో ఇన్వెస్ట్ చేయడం సరైన నిర్ణయమేనా ? ఈ ప్లాన్‌కు బదులుగా డైవర్సిఫైడ్ మ్యూచువల్ ఫండ్స్‌లో పదేళ్ల పాటు ఇన్వెస్ట్ చేయడం సరైనదా ? ఈ మ్యూచువల్ ఫండ్‌లో ఇన్వెస్ట్ చేస్తే నాకు 10(10డి ) పన్ను ప్రయోజనాలు లభిస్తాయా ?
  - అనూష, విశాఖపట్టణం
  
 ఎస్‌బీఐ లైఫ్-ఈవెల్త్.. ఇది యూనిట్ లింక్డ్ ఇన్సూరెన్స్ ప్లాన్(యులిప్). ఇన్వెస్ట్‌మెంట్ ఎలిమెంట్ ఉన్న బీమా ప్లాన్ ఇది. ఇన్వెస్ట్‌మెంట్ కోసం ఇలాంటి ఇన్వెస్ట్‌మెంట్, ఇన్సూరెన్స్ కలగలసిన ప్లాన్‌లను ఎప్పుడూ ఎంచుకోకూడదు. ఈ తరహా ప్లాన్‌లు చాలా తక్కువ బీమా కవర్‌ను అందిస్తాయి. ఐదేళ్ల లాకిన్ పీరియడ్, లిక్విడిటీ తక్కువగా ఉండడం... ఇవన్నీ కూడా యూలిప్‌లకు ప్రతికూలాంశాలు. కూతురి విద్య వంటి దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేయడమే సరైన ఇన్వెస్ట్‌మెంట్ వ్యూహం. మీరు దీర్ఘకాలం పాటు ఈక్విటీ  మ్యూచువల్ ఫండ్స్‌లో ఇన్వెస్ట్ చేయాలనుకుంటున్నారు. కాబట్టి పన్ను అంశాల గురించి ఎలాంటి ఆందోళన చెందాల్సిన పనిలేదు.
 
 ఏడాది తర్వాత విక్రయించే ఈక్విటీ మ్యూచువల్ ఫండ్ యూనిట్లపై ఎలాంటి దీర్ఘకాలిక మూలధన లాభాల పన్ను చెల్లించాల్సిన పనిలేదు. మీ ఇన్వెస్ట్‌మెంట్స్ కోసం ఈ ఫండ్స్ పరిశీలించవచ్చు. ... ఎస్‌బీఐ బ్లూ చిప్ ఫండ్, ఎస్‌బీఐ మ్యాగ్నమ్ మల్టీప్లయర్ ఫండ్, టాటా బ్యాలెన్స్‌డ్-రెగ్యులర్ ఫండ్, యూటీఐ ఈక్విటీ ఫండ్, ఐసీఐసీఐ ప్రుడెన్షియల్ మల్టీక్యాప్ ఫండ్, ఐడీబీఐ ఇండియా టాప్ 100 ఈక్విటీ ఫండ్, ఎల్ అండ్ టీ ఇండియా ప్రుడెన్స్ ఫండ్.
  
 నేనొక ప్రభుత్వ ఉద్యోగిని. ఎన్‌పీఎస్ అకౌంట్ మాకు తప్పనిసరి. నా వేతన ఖాతాతో అనుసంధానమై ఉన్న ఎన్‌పీఎస్ అకౌంట్‌లో ఈక్విటీలకు కేటాయింపులు 50 శాతం కంటే ఎక్కువగా పెంచుకోవడానికి లేదు. అందుకని మరో ఎన్‌పీఎస్ అకౌంట్ ఓపెన్ చేయాలనుకుంటున్నాను. అలాంటి వీలు ఉందా?                            
 - భార్గవ్, కరీంనగర్
  
 ఒక వ్యక్తి ఒకటి కంటే ఎక్కువ నేషనల్ పెన్షన్ స్కీమ్ (ఎన్‌పీఎస్) ఖాతా తెరవడానికి వీలు లేదు. అంతేకాకుండా ఎన్‌పీఎస్‌లో ఈక్విటీకి కేటాయింపులు 50 శాతానికి మించి పెంచడానికి లేదు. ఈక్విటీ కేటాయింపులు పెంచాలంటే, ఈక్విటీ మ్యూచువల్ ఫండ్స్‌లో ఇన్వెస్ట్ చేయడం మంచి మార్గం. ఆదాయపు పన్ను చట్టం సెక్షన్ 80 సి ప్రకారం పన్ను తగ్గింపులు కావాలనుకుంటే ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్)లో ఇన్వెస్ట్ చేయవచ్చు. సెక్షన్ 80 సీ ప్రకారం ఈఎల్‌ఎస్‌ఎస్‌ల్లో ఇన్వెస్ట్‌మెంట్స్‌కు పన్ను తగ్గింపులు రూ.1.5 లక్షల వరకూ పొందవచ్చు. ఒకవేళ ఇప్పటికే సెక్షన్ 80 సీ పరిమితిని మీ ఇన్వెస్ట్‌మెంట్స్ మించిపోతే, ఈక్విటీ ఆధారిత బ్యాలెన్స్‌డ్ స్కీమ్స్‌ను గానీ, డైవర్సిఫైడ్ ఈక్విటీ మ్యూచువల్ ఫండ్స్‌ను గానీ పరిశీలించవచ్చు.
  
 నేను ఐసీఐసీఐ లైఫ్‌స్టేజ్ పెన్షన్ ప్లాన్‌ను సరెండర్ చేయాలనుకుంటున్నాను. మూడు ప్రీమియమ్‌లు చెల్లించాను. ఐదేళ్ల తర్వాత ఇప్పుడు ఈ ప్లాన్‌ను సరెండర్ చేయాలనుకుంటున్నాను. సరెండర్ విలువ ఎంత వస్తుంది?                                             
 - సుశీల్, నెల్లూరు
  
 ఐసీఐసీఐ లైఫ్‌స్టేజ్ పెన్షన్ ప్లాన్ అనేది యూనిట్ లింక్డ్ పెన్షన్ ప్లాన్.  బీమా, ఇన్వెస్ట్‌మెంట్స్ కలగలసిన పాలసీ ఇది. మూడేళ్ల పాటు ప్రీమియమ్‌లు చెల్లిస్తే, ఐదేళ్ల తర్వాత ఈ పాలసీని సరెండర్ చేయవచ్చు. అన్ని చార్జీలు పోను మీరు సరెండర్ చేసేటప్పుడు ఈ ఫండ్ విలువలో 96 శాతం సరెండర్ విలువగా మీకు లభిస్తుంది. ఇన్వెస్ట్‌మెంట్స్ కోసం ఎప్పుడూ ఇలా ఇన్వెస్ట్‌మెంట్, బీమా కలగలసిన పాలసీలు తీసుకోవద్దు. దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్ ఫండ్ స్కీమ్స్‌ల్లో ఇన్వెస్ట్ చేస్తే మంచి రాబడులు పొందగలుగుతారు. జీవిత బీమా పాలసీ కోసం టర్మ్ ప్లాన్‌ను తీసుకోవాలి.
 - ధీరేంద్ర కుమార్
 సీఈవో, వ్యాల్యూ రీసెర్చ్


 రానున్న బడ్జెట్‌లో ఈక్విటీ స్కీమ్స్‌పై దీర్ఘకాలిక మూలధన లాభాల పన్ను విధించే అవకాశాలున్నాయని మిత్రులంటున్నారు. అలా జరుగుతుందా ? అందుకని ఈక్విటీ మ్యూచువల్ ఫండ్స్ యూనిట్లను విక్రయించాలనుకుంటున్నాను. నాది సరైన నిర్ణయమేనా? దీర్ఘకాలిక మూలధన లాభాల పన్ను ఉన్నా కూడా ఈ మ్యూచువల్ ఫండ్స్‌లో ఇన్వెస్ట్‌మెంట్స్ కొనసాగించమంటారా? వివరించగలరు.
 - శశికాంత్, హైదరాబాద్
  
 మ్యూచువల్ ఫండ్ ఈక్విటీ స్కీమ్స్‌పై దీర్ఘకాలిక మూలధన లాభాల పన్ను విధించే అవకాశాలను అంచనా వేయలేం. బడ్జెట్ వరకూ వేచి చూడడమే మంచిది. అయితే దీర్ఘకాలిక మూలధన లాభాల పన్ను విధిస్తుందన్న అంచనాలతో ఈ మ్యూచువల్ ఫండ్ యూనిట్లను విక్రయించడం సరైన నిర్ణయం  కాదు. మీ ఇన్వెస్ట్‌మెంట్స్‌ను కొనసాగించండి. ఈ విషయమై బడ్జెట్‌లో ఒక స్పష్టత వచ్చే వరకూ ఓపికపట్టండి. పన్ను మినహాయింపులున్నాయన్న ఒకే ఒక్క కారణంతో మ్యూచువల్ ఫండ్స్‌లో ఇన్వెస్ట్ చేయకూడదన్న విషయం గుర్తించుకోండి.
 
 మీ దీర్ఘకాలిక ఆర్థిక లక్ష్యాల సాధన కోసం ఈక్విటీలో ఇన్వెస్ట్ చేయడమే ఉత్తమం. ఎందుకంటే, దీర్ఘకాలంలో మరే ఇతర ఇన్వెస్ట్‌మెంట్ సాధనాలకంటే కూడా ఈక్విటీలపైననే అధిక రాబడులు వస్తాయి. మూలధన లాభాల పన్ను మినహాయింపు లభించడమనేది అదనపు ప్రయోజనం మాత్రమే. అందుకని ప్రభుత్వం రానున్న బడ్జెట్‌లో ఈక్విటీలపై మూలధన లాభాల పన్ను విధించినప్పటికీ, ఈక్విటీ ఇన్వెస్ట్‌మెంట్స్ ప్రాధాన్యత ఏమీ తగ్గదు. అయితే ఇలా పన్ను విధిస్తే లాభాల్లో కొంత కోత  ఉంటుంది.
 
 దీర్ఘకాలిక మూలధన లాభాల పన్ను ఉండొచ్చన్న ఒకే ఒక కారణంతో ఈక్విటీ ఇన్వెస్ట్‌మెంట్స్ నుంచి వైదొలగాలనుకోవడం సరైన వ్యూహం కాదు. దీర్ఘకాలంలో మంచి రాబడులనిచ్చేలా ఈక్విటీ ఇన్వెస్ట్‌మెంట్స్‌కు ప్రత్యామ్నాయమేదీ లేదు. అందుకని పన్నులు విధించినా సరే, ఈక్విటీ ఇన్వెస్ట్‌మెంట్స్‌ను కొనసాగించండి.
  
 నేను నెలకు రూ.10,000 చొప్పున ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్)ఇన్వెస్ట్ చేస్తున్నాను. లాక్-ఇన్-పీరియడ్‌కు ముందే ఈ ఇన్వెస్ట్‌మెంట్స్‌ను ఉపసంహరించుకోవచ్చా? ఏమైనా అత్యవసర సందర్భాలు వస్తే ఎంతో కొంత జరిమానా చెల్లించి ఈ సొమ్ములను ఉపసంహరించుకునే వెసులుబాటు ఉందా ?
 - రవళి, విశాఖపట్టణం
  
 పన్ను ప్రయోజనాలు లభించే ప్రతీ ఇన్వెస్ట్‌మెంట్‌కు లాక్-ఇన్-పీరియడ్ తప్పనిసరిగా ఉంటుంది. అలాగే ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)కు మూడేళ్ల లాక్-ఇన్-పీరియడ్ ఉంటుంది. ఈ లాక్-ఇన్-పీరియడ్‌కు ముందే ఈఎల్‌ఎస్‌ఎస్ ఇన్వెస్ట్‌మెంట్స్‌ను ఉపసంహరించుకోవడం కుదరదు. జరిమానా చెల్లించి లాక్-ఇన్-పీరియడ్ కంటే ముందే మీ ఇన్వెస్ట్‌మెంట్స్‌ను వెనక్కి తీసుకునే వెసులుబాటు లేదు.
  
 నేను అక్టోబర్ 2005లో ఐసీఐసీఐ ప్రు లైఫ్‌టైమ్ పెన్షన్ ప్లాన్ టూ ను తీసుకున్నాను. వార్షిక ప్రీమియం రూ.15,000 చొప్పున చెల్లిస్తున్నాను. ఇప్పుడు నాకు డబ్బులు అవసరమయ్యాయి. మెచ్యూరిటీకి ముందే ఈ స్కీమ్‌ను క్లోజ్ చేయవచ్చా?  ఇలా క్లోజ్ చేస్తే నేనేమైనా పన్నులు చెల్లించాల్సి ఉంటుందా? లేకుంటే ఈ స్కీమ్‌లో కొనసాగమంటారా?
  - ఆనంద్, విజయవాడ
  
 ఐసీఐసీఐ ప్రు లైఫ్‌టైమ్ పెన్షన్ ప్లాన్ టూ అనేది యూనిట్ లింక్డ్ పెన్షన్ ప్లాన్(యూలిప్). మీరు క్రమం తప్పకుండా ఇన్వెస్ట్ చేసి, రిటైర్మెంట్ ఫండ్ ఏర్పాటు చేసుకోవడానికి ఈ ప్లాన్ ఉపకరిస్తుంది. మీరు రిటైర్ కావాలనుకున్నప్పుడు యాన్యుటీని కొనుగోలు చేయాలి. మీకు ఇప్పుడు ఈ ఇన్వెస్ట్‌మెంట్స్ అవసరమైన పక్షంలో, యాన్యుటీ కొనుగోలు అవసరం లేదనుకుంటే, ఈ పాలసీని సరెండర్ చేసుకోవచ్చు. మీరు ఈ స్కీమ్‌లో ఇన్వెస్ట్ చేసి పదేళ్లు దాటాయి. కనుక మీరు ఈ పాలసీని సరెండర్ చేస్తే మీరు ఎలాంటి సరెండర్ చార్జీలు చెల్లించాల్సిన పనిలేదు.
 
 మీరు సరెండర్ చేసేటప్పుడు ఫండ్ వాల్యూ ఎంత ఉంటుందో అంతే మొత్తం కూడా సరెండర్ వాల్యూగా వస్తుంది. మీకు వర్తించే ఆదాయపు పన్ను స్లాబ్ ప్రకారం, ఈ సరెండర్ విలువపై పన్ను చెల్లించాల్సి ఉంటుంది. ఇన్వెస్ట్‌మెంట్‌తో కలగలసి ఉన్న బీమా ప్లాన్‌లు తగిన రాబడులనివ్వలేవని చెబుతుంటాం. ఈ ప్లాన్‌లు ఖరీదైనవే కాకుండా, చాలా చార్జీలు వీటిల్లో ఉంటాయి.
 
 ఇవి తగినంత బీమా రక్షణ ఇవ్వలేవు. ఇన్వెస్ట్ చేయడానికి తగిన సాధనాలు కూడా కావు. అందుకనే ఇన్వెస్టర్లు ఎప్పుడూ బీమాకు, ఇన్వెస్ట్‌మెంట్స్‌కు వేర్వేరు సాధానాల్లో ఇన్వెస్ట్ చేయాలి. జీవిత బీమా కోసం టర్మ్ ప్లాన్‌లను ఎంచుకోవాలి. వీటికి ప్రీమియం తక్కువ. బీమా ప్రయోజనాలు ఎక్కువగా ఉంటాయి. ఇక దీర్ఘకాలిక ఆర్థిక లక్ష్యాల సాధన కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేయాలి.
 
 - ధీరేంద్ర కుమార్
  సీఈవో, వ్యాల్యూ రీసెర్చ్


 నా పేరు మీద పబ్లిక్ ప్రావిడెండ్ ఫండ్ ఖాతా ఒకటి ఉంది. నా ఇద్దరు కుమారుల పేరు మీద రెండు పీఎఫ్ ఖాతాలు  నిర్వహిస్తున్నాను. సెక్షన్ 80 సీ కింద పన్ను మినహాయింపు పొందే మొత్తాన్ని ఇప్పటికే ఈ మూడు పీఎఫ్ ఖాతాల్లో జమ చేశాను. పన్ను మినహాయింపుకు మించిన మొత్తాన్ని ఈ పీఎఫ్ అకౌంట్లలలో ఇన్వెస్ట్ చేయవచ్చా?  
  - అరవింద్, విశాఖపట్టణం
  
 ఒక వ్యక్తికి పబ్లిక్ ప్రావిడెండ్ ఫండ్ ఉన్నప్పటికీ, తన మైనర్ కుమారుల పేరు మీద ఖాతాలు తెరవడానికి పబ్లిక్ ప్రావిడెండ్ ఫండ్ నిబంధనలు అనుమతిస్తున్నాయి. అయితే ఒక ఆర్థిక సంవత్సరంలో అన్ని ఖాతాల్లో కలిపి గరిష్టంగా ఇన్వెస్ట్ చేయగలిగేది రూ.1.50 లక్షలు మాత్రమే. అంటే మీరు ఈ మూడు పీఎఫ్ ఖాతాల్లో రూ.లక్షన్నరకు మించి ఇన్వెస్ట్ చేయడానికి వీలు లేదు.
  
 ఇటీవల రెండు పెద్ద సంస్థలు(టాటా, యాక్సిస్) తమ మ్యూచువల్ ఫండ్ స్కీమ్‌లకు సంబంధించి డివిడెండ్లను ప్రకటించాయి. టాటా ఇథికల్ ఫండ్, యాక్సిస్ లాంగ్ టర్మ్ ఈక్విటీ ఫండ్స్  ఈ డివిడెండ్‌లను ప్రకటించాయి. అయితే ఈ ఫండ్స్ రెగ్యులర్ ప్లాన్‌లకు మాత్రమే ఈ డివిడెండ్‌లు వర్తిస్తాయి. డెరైక్ట్ ప్లాన్‌లకు మాత్రం కాదు. ఇది డెరైక్ట్ ప్లాన్‌ల్లో ఇన్వెస్ట్ చేసిన వారిని నిరుత్సాహపరచడమే అవుతుంది కదా? ఫండ్ హౌస్‌లు ఇలా ఎందుకు చేస్తాయి?        
 - పవన్, హైదరాబాద్
  
 తగినంత లాభాలు పొందలేకపోయినందున టాటా ఇథికల్ ఫండ్, యాక్సిస్ లాంగ్‌టర్మ్ ఈక్విటీ ఫండ్స్‌కు సంబంధించిన డెరైక్ట్ ప్లాన్‌లకు డివిడెండ్‌లను ఆయా మ్యూచువల్ ఫండ్ సంస్థలు ప్రకటించలేకపోయాయి. తగినంత లాభాలు పొందితేనే మ్యూచువల్ ఫండ్ సంస్థలు ఇన్వెస్టర్లకు డివిడెండ్‌లను పంపిణి చేస్తాయి. గతంలో మ్యూచువల్ ఫండ్ సంస్థలు తమ ప్రీమియం నిధుల నుంచే డివిడెండ్‌లను చెల్లించేవి. కానీ మ్యూచువల్ ఫండ్ సంస్థలు తమ పోర్ట్‌ఫోలియోలు ఆధారంగా ఆర్జించిన లాభాల నుంచే డివిడెండ్‌లను ఇవ్వాలని 2010, మార్చిలో సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా(సెబీ) ఆదేశాలు జారీ చేసింది.
 
 డెరైక్ట్ ప్లాన్‌లు 2013 నుంచి అమల్లోకి వచ్చాయి. వీటితో పోల్చితే రెగ్యులర్ ప్లాన్‌లు చిరకాలం నుంచి రంగంలో ఉంటున్నాయి. కనుక వాటికి  భారీ నిధులు, తగినంత లాభాలు  ఉంటాయి. కాబట్టి సాధారణంగా రెగ్యులర్ ప్లాన్‌లు డివిడెండ్‌లు చెల్లిస్తాయి. మరోవైపు డెరైక్ట్ ప్లాన్‌లు అమల్లోకి వచ్చి కొంత కాలమే అయినందును వీటి లాభాలు స్వల్పంగా ఉండడం వల్ల అవి డివిడెండ్‌లను చెల్లించలేకపోతున్నాయని చెప్పవచ్చు.
  
 నేను 2011 జూన్‌లో ఎల్‌ఐసీ ఎండోమెంట్ ప్లస్ పాలసీ తీసుకున్నాను. పాలసీ కాలవ్యవధి 10 సంవత్సరాలు. రూ.4 లక్షలకు బీమా రక్షణ తీసుకున్నాను. మూడు నెలలకొకసారి రూ.9,000 చొప్పున ప్రీమియం చెల్లిస్తున్నాను. ఈ పాలసీని సరెండర్ చేద్దామనుకుంటున్నాను. నాది సరైన నిర్ణయమేనా? సరెండర్ వాల్యూ ఎంత ఉండొచ్చు?ఈ పాలసీలో తక్కువ రాబడులు వస్తున్నందున మంచి రాబడులు వచ్చే మరో స్కీమ్‌లో ఇన్వెస్ట్ చేద్దామనుకుంటున్నాను. తగిన సలహా ఇవ్వగలరు?
  - మృణాళిని, బెంగళూరు
  
 ఎల్‌ఐసీ ఎండోమెంట్ ప్లస్ పాలసీ అనేది యులిప్, ఎండోమెంట్ ప్లాన్‌లను కలగలసిన పాలసీ. ఇది టూ-ఇన్-వన్ ఇన్వెస్ట్‌మెంట్-కమ్-ఇన్సూరెన్స్ పాలసీ. ఐదేళ్ల తర్వాత ఫండ్ వేల్యూ ఎంత అనేదానిపై సరెండర్ వేల్యూ ఆధారపడి ఉంటుంది. మీ ప్రశ్నను బట్టి చూస్తే ఈ పాలసీని సరెండర్ చేయాలని సీరియస్‌గానే ఉన్నట్లు తెలుస్తోంది. ఇలాంటి ఇన్సూరెన్స్-కమ్-ఇన్వెస్ట్‌మెంట్ పాలసీలు తగిన బీమా రక్షణను ఇవ్వలేవు. అంతేకాకుండా తగిన రాబడులు కూడా అందించలేవు.
 
 బీమాను, ఇన్వెస్ట్‌మెంట్స్‌ను ఎప్పుడూ కలగలపవద్దు. బీమా రక్షణ కోసం టర్మ్ ఇన్సూరెన్స్ పాలసీ తీసుకోండి. తక్కువ ప్రీమియమ్‌తో ఎక్కువ బీమా రక్షణ పొందవచ్చు. ఇక మీ దీర్ఘకాలిక ఆర్థిక లక్ష్యాల సాధన కోసం ఏదైనా ఈక్విటీ మ్యూచువల్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేయండి. ఈక్విటీ మ్యూచువల్ ఫండ్స్‌లో ఐదు, అంతకు మించిన సంవత్సరాలు ఇన్వెస్ట్ చేస్తే మీరు మంచి రాబడులు పొందగలరు.
  
 నేను 2002-13 సంవత్సరాల మధ్య ఒక కంపెనీలో ఉద్యోగం చేశాను. ఆ తర్వాత నా సొంత వ్యాపారాన్ని ప్రారంభించాను. ఉద్యోగం నుంచి వైదొలిగాక ఎంప్లాయిస్ ప్రావిడెండ్ ఫండ్ నుంచి నాకు రావలసిన సొమ్ములను తీసేసుకున్నాను. నాకు పెన్షన్ వస్తుందా?
  - సంతోష్, రాజమండ్రి
  
 మీ సర్వీస్ 10 సంవత్సరాలకు మించి ఉన్నందున మీకు 50 ఏళ్లు దాటిన తర్వాత నుంచి మీకు పెన్షన్ వస్తుంది. మీరు చివరిసారి ఉద్యోగం చేసిన కంపెనీ ద్వారా ఫారమ్-10డి ద్వారా పెన్షన్ కోసం దరఖాస్తు చేసుకోవాలి. మీరు ఎక్కడ పెన్షన్ పొందాలనుకుంటున్నారో, ఆ ప్రాంతానికి సంబంధించిన బ్యాంక్/పోస్ట్ ఆఫీస్ వివరాలను ఆ దరఖాస్తులో పేర్కొనాలి.
 - ధీరేంద్ర కుమార్
 సీఈవో, వ్యాల్యూ రీసెర్చ్


 దీర్ఘకాల ఇన్వెస్ట్‌మెంట్స్‌కు మ్యూచువల్ ఫండ్స్ మంచి రాబడులనిస్తాయా ? లేకుంటే ఎక్స్ఛేంజ్ ట్రేడెడ్ ఫండ్స్(ఈటీఎఫ్)లు ఎక్కువ రాబడులనిస్తాయా? రెండింటిలో ఏవి ఉత్తమం?
  - ఉత్తమ్, విజయవాడ
  
 ఈటీఎఫ్‌లు స్టాక్ ఎక్స్ఛేంజ్‌ల్లో ట్రేడవుతాయి. ఇన్వెస్టర్లు వీటిని బ్రోకర్ల ద్వారా కొనుగోలు చేయవచ్చు. అమ్మవచ్చు. అమెరికా వంటి అభివృద్ధి చెందిన దేశాల్లో ఇవి బాగా పాపులర్. మనలాంటి అభివృద్ధి చెందుతున్న దేశాలకు ఇప్పటివరకైతే, దీర్ఘకాల ఇన్వెస్ట్‌మెంట్స్ విషయమై, ఈటీఎఫ్‌ల కంటే ఈక్విటీ మ్యూచువల్ ఫండ్స్ మంచి రాబడులనిస్తున్నాయి. అందుకని మంచి రేటింగ్ ఉన్న ఈక్విటీ మ్యూచువల్‌ఫండ్‌ను ఎంచుకొని సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం ఉత్తమం.
  
 మ్యూచువల్ ఫండ్స్ చెల్లించే డివిడెండ్లపై పన్ను ఉంటుందా?  ఒక వేళ ఉంటే ఎంత రేటు చొప్పున పన్ను చెల్లించాల్సి ఉంటుంది.? మ్యూచువల్ ఫండ్ కంపెనీయే పన్ను మినహాయించుకొని మిగిలింది ఇన్వెస్టర్లకు చెల్లిస్తాయా?                                     
  - నిరంజన్, కరీంనగర్
  
 ఈక్విటీ, డెట్ మ్యూచువల్ ఫండ్స్ ఇచ్చే డివిడెండ్లపై ఇన్వెస్టర్లు ఎలాంటి పన్నులు చెల్లించాల్సిన పనిలేదు. అయితే డెట్ మ్యూచువల్ ఫండ్స్ ప్రకటించే డివిడెండ్‌లపై మ్యూచువల్ ఫండ్ కంపెనీలు 28.84 శాతం చొప్పున డివిడెండ్ డిస్ట్రిబ్యూషన్ ట్యాక్స్(డీడీటీ)ని చెల్లిస్తాయి. ఈ పన్ను మొత్తం పోగా మిగిలిన రాబడిని ఇన్వెస్టర్లకు చెల్లిస్తాయి. ఈక్విటీ మ్యూచువల్ ఫండ్స్ డివిడెండ్లపై ఎలాంటి డీడీటీ ఉండదు.
  
 నేను కేంద్ర ప్రభుత్వ ఉద్యోగిని. నేను పాత పెన్షన్ స్కీమ్ కిందకు వస్తాను. ఆదాయపు పన్ను చట్టం,  సెక్షన్ 80 సీసీడీ(1బీ) కింద అదనంగా రూ.50,000 పన్ను మినహాయింపు పొందడానికి నేషనల్ పెన్షన్ స్కీమ్(ఎన్‌పీఎస్)లో ఇన్వెస్ట్ చేయవచ్చా?
  - ప్రకాశ్, సికింద్రాబాద్
  
 మీరు నేషనల్ పెన్షన్ స్కీమ్(ఎన్‌పీఎస్)లో చేరి అదనంగా రూ.50,000 పన్ను రాయితీని సెక్షన్80సీసీడీ(1బీ)కింద పొందవచ్చు. మీరు ఇన్వెస్ట్ చేసే ఇతర పెన్షన్, ప్రావిడెండ్ ఫండ్‌ల పెట్టుబడులతో పోల్చితే ఎన్‌పీఎస్‌లో పెట్టే పెట్టుబడులు స్వతంత్రంగా ఉంటాయి.
  
 ఏడాది వయస్సున్న నా కొడుకుకు వాడి అమ్మమ్మ రూ.10,000 బహుమతిగా ఇచ్చింది. ఈ డబ్బులు మరో పదేళ్ల దాకా నాకు అవసరం ఉండదు.ఈ సొమ్ములను వాడి భవిష్యత్ చదువుల కోసం వినియోగిద్దామనుకుంటున్నాను. ఈ డబ్బులను బ్యాలెన్స్‌డ్ ఈక్విటీ ఫండ్స్‌లో ఇన్వెస్ట్ చేయమంటారా ? లేకుంటే హైబ్రిడ్ ఫండ్‌లో ఇన్వెస్ట్ చేయమంటారా ?
  - విజయ్, నెల్లూరు
  
 మీ పెట్టుబడి కాలపరిమితి పదేళ్లు కాబట్టి. మీరు నిరభ్యంతరంగా ఈక్విటీ ల్లో  ఇన్వెస్ట్ చేయవచ్చు. దీర్ఘకాలంలో మరే ఇతర ఇన్వెస్ట్‌మెంట్ సాధనం కన్నా ఈక్విటీలే మంచి రాబడులను ఇస్తాయి. కాబట్టి సంపద సృష్టికి ఈక్విటీల్లో ఇన్వెస్ట్ చేయడమే సరైనది. స్టాక్ మార్కెట్లో తొలిసారిగా ఇన్వెస్ట్ చేసేవారికి ఈక్విటీ ఆధారిత బ్యాలెన్స్‌డ్ ఫండ్స్‌లో ఇన్వెస్ట్ చేయమని సలహా ఇస్తుంటాం. ఈ ఫండ్స్‌లో ఈక్విటీలో కనీసం 65%, మిగిలినది డెట్‌లో ఇన్వెస్ట్ చేస్తాయి.
 
 ఇలాంటి కేటాయింపుల కారణంగా పూర్తి ఈక్విటీ మ్యూచువల్ ఫండ్స్ కన్నా ఇవి తక్కువ ఒడిదుడుకులకు గురవుతాయి. స్టాక్ మార్కెట్ తీవ్రమైన ఒడిదుడుకులుగా ఉన్నప్పుడు డెట్ విభాగం కుషన్‌గా పనిచేస్తుంది. మీరు ఇన్వెస్ట్ చేయడానికి కింది బ్యాలెన్స్‌డ్ ఫండ్స్‌ను పరిశీలించచవచ్చు. .. ఫ్రాంక్లిన్ ఇండియా బ్యాలెన్స్‌డ్ ఫండ్, హెచ్‌డీఎఫ్‌సీ బ్యాలెన్స్‌డ్ ఫండ్, హెచ్‌డీఎఫ్‌సీ చిల్డ్రన్స్ గిఫ్ట్ ఫండ్, ఐసీఐసీఐ ప్రుడెన్షియల్ బ్యాలెన్స్‌డ్ ఫండ్, ఎల్ అండ్ టీ ఇండియా ప్రుడెన్స్ ఫండ్, ఎస్‌బీఐ మ్యాగ్నమ్ బ్యాలెన్స్‌డ్ ఫండ్, టాటా బ్యాలెన్స్‌డ్ ఫండ్, టాటా రిటైర్మెంట్ సేవింగ్స్ ఫండ్,
  
 నా పుట్టింటి వారి నుంచి స్త్రీ ధనం కింద రూ. 2 లక్షల వరకూ వచ్చాయి. ఈ మొత్తాన్ని మ్యూచువల్ ఫండ్స్‌లో ఇన్వెస్ట్ చేద్దామనుకుంటున్నాను. నేను మ్యూచువల్ ఫండ్స్‌కు కొత్త. అందుకని ముందుగా ఏదైనా ఒక  లిక్విడ్ ఫండ్‌లో కొంత మొత్తం ఇన్వెస్ట్ చేయమని మిత్రుడొకరు సలహా ఇచ్చారు. ఈ లిక్విడ్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేస్తే మంచిదని సూచించాడు. ఆ తర్వాత ఇదే మ్యూచువల్ ఫండ్ సంస్థకు సంబంధించి వేరే ఫండ్‌ను ఎంచుకొని, ఈ కొత్త ఫండ్‌లోకి లిక్విడ్ ఫండ్ పెట్టుబడులను బదిలీ చేయమని సలహా ఇచ్చాడు, ఇది పెట్టుబడులకు సంబంధించి ఇది సరైన వ్యూహామేనా? ఇలా చేయడం వల్ల కలిగే ప్రయోజనాలేమిటి? వివరించండి?
  - ప్రణవి, విశాఖపట్టణం
  
 మీ మిత్రుడు చెప్పింది. బహుశా సిస్టమాటిక్ టాన్స్‌ఫర్ ప్లాన్(సీటీపీ) గురించి అయి ఉంటుంది. ఇది ఎలా పనిచేస్తుందంటే. మీ దగ్గర పెద్ద మొత్తంలో పెట్టుబడులు ఉన్నాయనుకోండి. వీటిని దశలవారీగా స్టాక్స్‌లో ఇన్వెస్ట్ చేయాలనుకున్నారు.  దీనికి రెండు రకాల పద్ధతులున్నాయి. మొదటిది... ముందుగా ఈ మొత్తాన్ని ఏదైనా ఒక బ్యాంక్ సేవింగ్స్ ఖాతాలో జమ చేస్తారు. ఈ ఖాతా నుంచి ప్రతి నెలా కొంత మొత్తాన్ని సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఏదైనా ఈక్విటీ స్కీమ్‌లో ఇన్వెస్ట్ చేస్తారు. రెండో విధానం..., మీ దగ్గరున్న పెద్ద మొత్తాన్ని ముందుగా ఏదైనా లిక్విడ్ ఫండ్‌లో ఇన్వెస్ట్ చేయాలి. ఆ తర్వాత సిస్టమాటిక్ ట్రాన్స్‌ఫర్ ప్లాన్(ఎస్‌టీపీ)ద్వారా ఈ లిక్విడ్ ఫండ్ నుంచి ఏదైనా ఈక్విటీ మ్యూచువల్ ఫండ్‌కు మీ ఇన్వెస్ట్‌మెంట్స్‌ను బదిలీ చేసుకోవాలి.
 
 మీ దగ్గర పెద్ద మొత్తంలో పెట్టుబడులు ఉన్నప్పుడు ఈ విధానం అనుసరిస్తే ఒకింత అధిక రాబడులు పొందవచ్చు. అయితే ఎస్‌టీపీ విధానాన్ని అనుసరిస్తే మీరు కొంత పన్ను భారాన్ని భరించక తప్పదు. ఒక లిక్విడ్ ఫండ్ నుంచి కొంత నిర్ణీత మొత్తంలో ఈక్విటీ ఫండ్‌కు బదిలీ చేసినప్పుడు.. లిక్విడ్ ఫండ్‌లో పెట్టుబడులను ఉపసంహరించుకొని, ఈక్విటీ ఫండ్‌లో కొత్తగా పెట్టుబడి పెట్టినట్లుగా భావిస్తారు. లిక్విడ్ ఫండ్‌లోని యూనిట్లను మూడేళ్లకు ముందే బదిలీ చేస్తే, వీటిపై వచ్చిన లాభాలను స్వల్పకాలిక మూలధన లాభాలుగా పరిగణిస్తారు. ఈ లాభాలను మీ ఆదాయానికి కలిపి, మీ ఆదాయపు పన్ను స్లాబ్‌ననుసరించి పన్ను విధిస్తారు. మూడేళ్ల తర్వాత ఈ యూనిట్లను విక్రయిస్తే, వాటిపై వచ్చే లాభాలను దీర్ఘకాలిక మూలధన లాభాల పన్నుగా పరిగణిస్తారు. 20% దీర్ఘకాలిక మూలధన లాభాల పన్ను(ఇండెక్సేషన్ బెనిఫిట్)తో చెల్లించాల్సి ఉంటుంది.
 
 - ధీరేంద్ర కుమార్
  సీఈవో, వ్యాల్యూ రీసెర్చ్


 డీమ్యాట్ అకౌంట్ ద్వారా మ్యూచువల్ ఫండ్స్‌లో మదుపు చేద్దామనుకుంటున్నాను. ఇలా చేస్తే డెరైక్ట్ ప్లాన్‌లో పెట్టుబడి పెట్టినట్లు అవుతుందా?  లేకుంటే రెగ్యులర్ ప్లాన్‌లో పెట్టుబడి పెట్టినట్లు అవుతుందా? డీ మ్యాట్ అకౌంట్ ద్వారా మ్యూచువల్ ఫండ్స్  డెరైక్ట్ ప్లాన్‌లో ఇన్వెస్ట్ చేయవచ్చా?
  - సాగర్, వరంగల్
  
 మీరు డీమ్యాట్ అకౌంట్ ద్వారా మ్యూచువల్ ఫండ్ స్కీమ్‌ల్లో మదుపు చేయవచ్చు. కానీ డెరైక్ట్ ప్లాన్‌ల్లో కాదు. మీరు మీ డీమ్యాట్ అకౌంట్‌కు సంబంధించిన వివరాలేమీ ఇవ్వలేదు. బ్యాంక్ లేదా బ్రోకింగ్ సంస్థ వంటి ఇంటర్మీడియరీ అందించే డీ మ్యాట్ అకౌంట్ ద్వారా మీరు లావాదేవీలు నిర్వహిస్తున్నారని భావిస్తున్నాను. ఇలాంటి ఇంటర్మీడియరీ ద్వారా మీరు మ్యూచువల్ ఫండ్స్ స్కీమ్‌ల్లో ఇన్వెస్ట్ చేస్తే, సదరు మ్యూచువల్ ఫండ్ సంస్థ, ఆ డీమ్యాట్ సంస్థకు కొంత కమీషన్ చెల్లిస్తుంది. వినియోగదారులు నేరుగా మ్యూచువల్ ఫండ్ సంస్థను సంప్రదించి డెరైక్ట్ ప్లాన్‌ల్లో మదుపు చేయవచ్చు. ఇన్వెస్టర్‌కు, మ్యూచువల్ ఫండ్ సంస్థకు మధ్య ఎలాంటి మధ్యవర్తులు/ఏజెంట్లు లేకుండా ఇన్వెస్ట్ చేయడం కోసం ఉద్దేశించినవే.. డెరైక్ట్ ప్లాన్‌లు.
  
 మా అమ్మ వయస్సు 58 సంవత్సరాలు. ఆమె కోసం ఇంతవరకూ ఎలాంటి ఆరోగ్య బీమా పాలసీ తీసుకోలేదు. ఆమె కోసం ఏమైనా ప్లాన్‌లు సూచిస్తారా ? ఆమెను ఫ్యామిలీ ఫ్లోటర్ ప్లాన్‌లో చేర్చమంటారా ? లేక ఆమె కోసమే ప్రత్యేకంగా ఏదైనా ప్లాన్ తీసుకోమంటారా ? తగిన సలహా ఇవ్వండి.
  - సునయన, విశాఖపట్టణం
 
  పెద్దవాళ్లను/సీనియర్ సిటిజన్‌లను ఫ్యామిటీ ఫ్లోటర్ ప్లాన్‌లో చేర్చడం సరైనది కాదు. ఇలా చేస్తే మీరు చెల్లించాల్సిన ప్రీమియమ్‌లు అనవసరంగా పెరిగిపోతాయి. సీనియర్ సిటిజన్‌లు ఈ వైద్య బీమా రక్షణను అధికంగా వినియోగించుకుంటారు. కుటుంబంలోని ఇతరులకు తక్కువ బీమా రక్షణ అందుతుంది. అందుకని మీ అమ్మగారి కోసం మీరు ప్రత్యేకంగా వేరే ప్లాన్‌ను తీసుకోవడమే ఉత్తమం. జీవిత కాల రెన్యూవల్ ఉండే ప్లాన్‌ను తీసుకోవచ్చు. మీ అమ్మగారి ఆరోగ్య బీమా పాలసీ కోసం-ఐసీఐసీఐ లాంబార్డ్ కంప్లీట్ హెల్త్ ఇన్సూరెన్స్-ఐ హెల్త్ ప్లాన్, బజాజ్ అలయంజ్ సిల్వర్ హెల్త్, అపోలో మ్యూనిక్ ఈజీ హెల్త్ ప్లాన్‌లను పరిశీలించవచ్చు. పాలసీలు తీసుకునేటప్పుడు మినహాయింపులు, వెయిటింగ్ పీరియడ్ తదితర అంశాలన్నింటినీ క్షుణ్నంగా పరిశీలించండి. 58 సంవత్సరాల వయస్సున్న వ్యక్తి కోసం ఆన్‌లైన్‌లో ఆరోగ్య బీమా పాలసీ తీసుకోకూడదు. మీ అమ్మగారి ఆరోగ్య పరిస్థితులను మీ ప్రశ్నలో ప్రస్తావించలేదు. అందుకని ప్రీమియమ్‌ల గురించి ఏమీ చెప్పలేకపోతున్నాం. పాలసీకు ముందే చేసే హెల్త్ చెకప్, కుటుంబ ఆరోగ్య చరిత్ర, ఇతర అంశాలపై ప్రీమియమ్‌లు ఆధారపడి ఉంటాయి.
 ఆర్బిట్రేజ్ ఫండ్ డివిడెండ్ ఆప్షన్‌లో మదుపు చేద్దామనుకుంటున్నాను. ఈ యూనిట్లను ఏడాదిలోపే విక్రయిస్తే నేను ఎంత మొత్తంలో పన్ను చెల్లించాల్సి ఉంటుంది?
  - ప్రసేన్ కుమార్, హైదరాబాద్
 
  పన్ను అంశాల పరంగా ఆర్బిట్రేజ్ ఫండ్స్‌ను ఈక్విటీ ఫండ్స్‌గానే పరిగణిస్తారు. ఈక్విటీ మ్యూచువల్ ఫండ్స్ అందించే డివిడెండ్లపై ఇన్వెస్టర్లు ఎలాంటి పన్నులు చెల్లించాల్సిన పనిలేదు. అంతేకాకుండా ఈక్విటీ ఫండ్ డివిడెండ్లపై మ్యూచువల్ ఫండ్ సంస్థలు కూడా ఎలాంటి పన్నులు చెల్లించవు. ఈ ఫండ్స్ యూనిట్లను ఏడాదిలోపే విక్రయిస్తే,  మీరు 15 శాతం చొప్పున స్వల్పకాలిక మూలధన లాభాల పన్ను చెల్లించాల్సి ఉంటుంది. అదే ఏడాది తర్వాత ఈ యూనిట్లను విక్రయిస్తే, మీరు ఎలాంటి పన్నులు చెల్లించాల్సిన పనిలేదు. ఈక్విటీ ఫండ్స్ యూనిట్లను ఏడాది తర్వాత విక్రయిస్తే వచ్చే లాభాలను దీర్ఘకాలిక మూలధన లాభాలుగా పరిగణిస్తారు. ఈక్విటీ ఫండ్స్‌పై ఎలాంటి దీర్ఘకాలిక మూలధన లాభాల పన్నులు చెల్లించాల్సిన పనిలేదు.
  
 ఈ ఆర్థిక సంవత్సరం మూడో త్రైమాసిక కాలంలో ఈక్విటీ పెట్టుబడులపై రూ.5,000 స్వల్పకాలిక లాభాలు పొందాను. ఈ లాభాలపై నేను ఎంత పన్ను చెల్లించాలి ? ఇలా పొందిన లాభాలను వేరే ఏ ఇతర సాధనాల్లో ఇన్వెస్ట్ చేస్తే పన్ను మినహాయింపులు పొందగలనా? నేను ఇప్పటికే నేషనల్ పెన్షన్ స్కీమ్(ఎన్‌పీఎస్), బీమా ఇన్వెస్ట్‌మెంట్స్‌పై నేను పన్ను మినహాయింపులు పొందాను. ఈ స్వల్పకాలిక మూలధన లాభాలపై పన్ను మినహాయింపునుపొందడానికి ఏమైనా మార్గాలున్నాయా ?
  - క్రాంతి, బెంగళూరు
 
  మీ ఈక్విటీ పెట్టుబడులను కొనుగోలు చేసిన  ఏడాదిలోపే విక్రయిస్తే మీరు 15 శాతం స్వల్పకాలిక మూలధన లాభాల పన్ను చెల్లించాల్సి ఉంటుంది. ఈ స్వల్పకాలిక మూలధన లాభాల పన్ను మినహాయిం పులు పొందడానికి మీకు వేరే ఎలాంటి మార్గం లేదు. ఈ ఈక్విటీ పెట్టుబడులపై వచ్చిన లాభాలను వేరే ఏ ఇతర సాధనాల్లో ఇన్వెస్ట్ చేసినా కూడా మీరు పన్ను మినహాయింపులు పొందలేరు.
 - ధీరేంద్ర కుమార్
 సీఈవో, వ్యాల్యూ రీసెర్చ్


 నా కూతురు ఏడాది వయస్సున్నప్పటి నుంచి కోమల్ జీవన్ పాలసీ ప్రీమియమ్‌లు చెల్లిస్తున్నాను. ఏడాదికి రూ.36,000 చొప్పున ఇప్పటిదాకా పదేళ్ల పాటు ప్రీమియమ్‌లు చెల్లించాను. మరో పదేళ్ల పాటు చెల్లించాల్సి ఉంది. రూ. 5 లక్షల బీమా రక్షణ తీసుకున్నాను. ఇది సరైన పాలసీయేనా? ఈ పాలసీలో కొనసాగమంటారా? సరెండర్ చేయమంటారా? తగిన సలహా ఇవ్వండి.
  - తేజస్వి, హైదరాబాద్
  
 ఎల్‌ఐసీ కోమల్ జీవన్ పాలసీ చిల్డ్రన్స్ మనీ బ్యాక్ ప్లాన్. ఇలాంటి ప్లాన్‌లు వ్యయాలను వెల్లడించవు. ఈ పాలసీ ఏడాదికి 7.5 శాతం గ్యారంటీడ్ ఎడిషన్స్‌ను అందించగలదు. ఇది దాదాపు బ్యాంక్ ఫిక్స్‌డ్ డిపాజిట్‌లపై వచ్చే రాబడికి సమానం. పాలసీ తీసుకున్న వ్యక్తి వృతి చెందినప్పుడు/పాలసీ మెచ్యూర్ అయినప్పుడు లాయల్టీ బోనస్‌లను కూడా చెల్లిస్తారు. రూ.5 లక్షల బీమా రక్షణను పరిగణనలోకి తీసుకుంటే ఈ పాలసీలో కొనసాగడం సరైనది కాదని భావిస్తున్నాం. ఇన్వెస్ట్‌మెంట్‌ను, ఇన్సూరెన్స్‌ను కలగలపవద్దని ఎప్పుడూ పాఠకులకు సూచిస్తూ ఉంటాం. బీమా అవసరాల కోసం టర్మ్ ప్లాన్ తీసుకోవాలి. అలాగే దీర్ఘకాలిక ఆర్థిక లక్ష్యాల సాధన కోసం డైవర్సిఫైడ్ ఈక్విటీ మ్యూచువల్ ఫండ్స్‌లో ఇన్వెస్ట్ చేయాలి. ఈ విషయాలన్నింటినీ పరిగణనలోకి తీసుకొని తగిన నిర్ణయం తీసుకోండి.
  ఒక వ్యక్తి ఎన్ని బీమా పాలసీలనైనా తీసుకోవచ్చా? ఇది టర్మ్ ప్లాన్‌లు/మెడిక్లెయిమ్స్‌కు కూడా వర్తిస్తుందా? ఇలా పలు పాలసీలు తీసుకున్నప్పటికీ, అన్ని పాలసీలనూ క్లెయిమ్ చేసుకోవచ్చా?
  - సురేందర్, విజయవాడ
 
  మీరు ఎన్ని ఇన్సూరెన్స్ పాలసీలైనా తీసుకోవచ్చు. చాలా మంది ఒకటి కంటే ఎక్కువ బీమా పాలసీలే తీసుకుంటారు. పెద్ద మొత్తంలో టర్మ్ కవర్ తీసుకునేటప్పుడు కనీసం  రెండు కంపెనీలవి తీసుకుంటారు. ఒకవేళ పాలసీదారుడు మరణిస్తే టర్మ్ లైఫ్ ఇన్సూరెన్స్ పాలసీలు పూర్తి మొత్తాన్ని చెల్లిస్తాయి. హెల్త్ ఇన్సూరెన్స్ పాలసీలకు ఇది వర్తించదు. మీరు తీసుకున్న బీమా రక్షణ నిష్పత్తికి లోబడి చెల్లింపులుంటాయి. ఉదాహరణకు మీరు రూ.2 లక్షలకు, రూ.5 లక్షలు చొప్పున రెండు మెడిక్లెయిమ్ పాలసీలు తీసుకున్నారనుకుందాం. ఈ హెల్త్ ఇన్సూరెన్స్ కంపెనీలు 2:5 నిష్పత్తిలో మీ క్లెయిమ్‌ను చెల్లిస్తాయి. మీ ఆర్థిక పరిస్థితిపై ప్రభావం చూపకుండా ప్రీమియమ్‌లు చెల్లించగలిగిన రీతిలో పాలసీలు తీసుకుంటే సముచితంగా ఉంటుంది.
  
 నేనొక కేంద్ర ప్రభుత్వ ఉద్యోగిని. నేషనల్ పెన్షన్ స్కీమ్(ఎన్‌పీఎస్) కింద ఏడాదికి రూ.80,000 చెల్లిస్తున్నాను. నేను ఇప్పటికే ఈక్విటీ లింక్‌డ్ సేవింగ్స్ స్కీమ్(ఈఎల్‌ఎస్‌ఎస్), పబ్లిక్ ప్రావిడెండ్ ఫండ్(పీపీఎఫ్)లో రూ. లక్షన్నర వరకూ ఇన్వెస్ట్ చేశాను. నాకు పన్ను రాయితీ ఎంత వస్తుంది ?
  - మూర్తి, విశాఖపట్టణం
  
 సెక్షన్ 80సీ, 80 సీసీడీ కింద మొత్తం పన్ను రాయితీ రూ.2 లక్షలు మాత్రమే వస్తుంది. కానీ మీ మొత్తం  ఇన్వెస్ట్‌మెంట్స్ రూ.2.3 లక్షలుగా ఉన్నాయి. (ఎన్‌పీఎస్ కింద రూ.80,000, ఈఎల్‌ఎస్‌ఎస్, పీపీఎఫ్‌ల్లో రూ. లక్షన్నర). సెక్షన్ 80 సీ కింద పీపీఎఫ్, ఈఎల్‌ఎస్‌ఎస్ ఇన్వెస్ట్‌మెంట్స్‌లో రూ.1.5 లక్షవరకూ పన్ను రాయితీ పొందవచ్చు. మీరు ఎన్‌పీఎస్‌లో ఇన్వెస్ట్ చేసిన మొత్తం రూ.80,000కు పన్ను మినహాయింపు పొందలేరు.  కేవలం రూ.50,000 మొత్తానికి మాత్రమే సెక్షన్ 80సీసీడీ(1బీ) కింద పన్ను రాయితీ పొందవచ్చు. వచ్చే ఏడాది గరిష్ట పరిమితిని మించకుండా చూసుకోండి. మీరు ఎన్‌పీఎస్‌లో రూ.80,000 ఇన్వెస్ట్ చేయదల్చుకుంటే, సెక్షన్ 80 సీ కింద మినహాయింపు కావాలంటే మిగిలిన పత్రాల్లో రూ.1.2 లక్షలు మాత్రమే ఇన్వెస్ట్ చేయాలి. ఇలా చేస్తే రెండు సెక్షన్‌ల కింద గరిష్టంగా పన్ను మినహాయింపులు పొందవచ్చు. ఎన్‌పీఎస్ ఇన్వెస్ట్‌మెంట్స్‌లో రూ.50,000 వరకూ సెక్షన్ 80సీసీడీ(1బీ) కింద పన్ను మినహాయింపులు పొందవచ్చు. అలాగే సెక్షన్ 80సీ కింద రూ.లక్షన్నర వరకూ పన్ను మినహాయింపులు పొందవచ్చు.
  
 కమోడిటీలు ప్రస్తుతం చౌకగా ఉన్నాయి. అందుకే కమోడిటీల్లో ఇన్వెస్ట్ చేసే మ్యూచువల్ ఫండ్స్‌లో పెట్టుబడులు పెట్టాలనుకుంటున్నాను. కమోడిటీ మ్యూచువల్ ఫండ్స్‌లో ఇన్వెస్ట్ చేయడానికి ఇదే సరైన తరుణమని నేను భావిస్తున్నాను. నా నిర్ణయం సరైనదేనా?
  - అభిమన్యు, బెంగళూరు
  
 దేశీయ, అంతర్జాతీయ కమోడిటీ షేర్లలో ఇన్వెస్ట్ చేసే పలు మ్యూచువల్ ఫండ్స్ ఉన్నాయి. కమోడిటీలతో సహా ధీమాటిక్ స్కీమ్‌లలో ఇన్వెస్ట్ చేయడం సరైన పెట్టుబడి వ్యూహం కాదని చెప్పడానికి ఎన్నో కారణాలున్నాయి. కమోడిటీ వ్యాపారాలు చక్రగతిన ఉంటాయి. ఆర్థిక వ్యవస్థ వివిధ దశల్లో వివిధ కమోడిటీల్లో హెచ్చుతగ్గులుంటాయి. ఒక కమోడిటీ ప్రస్తుత స్థాయి ఏమిటి అన్న విషయం నిర్ధారించడానికి ఇన్వెస్టర్‌కు తప్పనిసరిగా ఆ కమోడిటీ గురించి తగిన అవగాహన ఉండితీరాలి. కానీ సగటు ఇన్వెస్టర్‌కు అది సాధ్యం కాదు. ఈ కమోడిటీల్లో లాభం పొందేందుకు ఎప్పుడు ఇన్వెస్ట్ చేయాలో, ఎప్పుడు ఇన్వెస్ట్‌మెంట్స్ ఉపసంహరించుకోవాలో కూడా తెలిసుండాలి. ఆ కమోడిటీ పట్ల తగిన పరిజ్ఞానం ఉన్నప్పుడు మాత్రమే ఈ విషయాలు తెలుస్తాయి. ఒక సాధారణ ఇన్వెస్టర్‌కు ఇది అసాధ్యమైన విషయమే కదా ! మీరు విభిన్నమైన ఈక్విటీ మ్యూచువల్ ఫండ్స్‌లో ఇన్వెస్ట్ చేస్తే, వృద్ధిలో ఉన్న కమోడిటీ సంబంధిత కంపెనీ షేర్ ఈ ఫండ్ యూనిట్లలో ఉంటే మీరు ఆ మేరకు లాభపడే అవకాశాలున్నాయి.
  
  ధీరేంద్ర కుమార్
  సీఈవో, వ్యాల్యూ రీసెర్చ్
  


 ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్)ల్లో ఇన్వెస్ట్ చేస్తే పన్ను రాయితీలు లభిస్తాయని తెలుసు. అయితే ఈఎల్‌ఎస్‌ఎస్‌లు కాకుండా పన్ను రాయితీలు లభించే ఇతర రకాల మ్యూచువల్ ఫండ్స్ ఏమైనా ఉన్నాయా?                 - అనురాధ, హైదరాబాద్
  
 ఆదాయపు పన్ను చట్టం సెక్షన్ 80సీ ప్రకారం ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)ల్లో ఇన్వెస్ట్ చేస్తే రూ.లక్షన్నర వరకూ పన్ను రాయితీ పొందవచ్చు. సెక్షన్ 80 సీ కింద పన్ను రాయితీ పొందే అవకాశం మరే ఇతర ఈక్విటీ ఫండ్స్‌కు లేదు. అయితే ఈక్విటీ ఫండ్స్‌కు వేరే పన్ను ప్రయోజనాలున్నాయి. ఈక్విటీ  ఫండ్స్‌పై వచ్చే డివిడెండ్లకు ఎలాంటి పన్నులు చెల్లించాల్సిన పనిలేదు. ఏడాది కాలం తర్వాత ఈక్విటీ మ్యూచువల్ ఫండ్స్ యూనిట్లను వికయిస్తే, ఎలాంటి దీర్ఘకాల మూలధన  లాభాల పన్ను చెల్లించాల్సిన పనిలేదు. ఒక వేళ ఏడాదిలోపే ఆ యూనిట్లను వికయిస్తే, వచ్చిన లాభాలపై 15 % చొప్పున స్వల్పకాలిక మూలధన లాభాల పన్ను చెల్లించాల్సి ఉంటుంది.
  
 ఈపీఎఫ్, పబ్లిక్ ప్రావిడెండ్ ఫండ్(పీపీఎఫ్) ఇవి రెండూ ఒకటేనా? ఈ రెండింటికి మధ్య తేడా ఏమిటి ?                
 - రాజేష్, విజయవాడ
  
 ఎంప్లాయీ ప్రావిడెండ్ ఫండ్(ఈపీఎఫ్), పబ్లిక్ ప్రావిడెండ్ ఫండ్(పీపీఎఫ్).. రిటైర్మెంట్ అవసరాల కోసం దీర్ఘకాలం ఇన్వెస్ట్ చేసే ఇన్వెస్ట్‌మెంట్ సాధనాలు. రెండూ వేర్వేరు. వేతనం పొందే ఉద్యోగులకు ఈపీఎఫ్ అందుబాటులో ఉంటుంది. ఉద్యోగి ప్రతి నెలా తన వేతనంలో 12 శాతం వరకూ ఈపీఎఫ్‌లో ఇన్వెస్ట్ చేయవచ్చు. ఆ ఉద్యోగి పనిచేస్తున్న సంస్థ కూడా కొంత మొత్తం ఈపీఎఫ్‌లో జమ చేస్తుంది. పీపీఎఫ్ అనేది కేంద్ర ప్రభుత్వ ఆధ్వర్యంలో నడిచే ఒక స్కీమ్.
 
 స్వయం ఉపాధి పొందేవారు, అవ్యవస్థీకృత రంగంలో పనిచేసే శ్రామికులకు వృద్ధాప్యంలో ఆదాయ భద్రత కల్పించడం లక్ష్యంగా పీపీఎఫ్‌ను ఏర్పాటు చేశారు. ఈ రెండు స్కీమ్‌లూ కచ్చితమైన రాబడులనందిస్తాయి. కేంద్ర పభుత్వం ఎప్పటికప్పుడు వడ్డీరేట్లను సవరిస్తూ ఉంటుంది.
  
 నేను ఎస్‌బీఐ శుభ్ నివేశ్ లైఫ్ ఇన్సూరెన్స్ పాలసీని తీసుకున్నాను. వార్షిక ప్రీమియం రూ. లక్ష. పాలసీ టర్మ్ 15 ఏళ్లు. ఈ పాలసీ మెచ్యూర్ అయిన తర్వాత నాకు ఎంత వస్తుంది?                 - అశ్రీయ, వైజాగ్
  
 ఎస్‌బీఐ శుభ్ నివేశ్ అనేది ఎండోమెంట్ ప్లాన్. యాడ్ ఆన్ బెనిఫిట్‌గా హోల్ లైఫ్ ఇన్సూరెన్స్ ఆప్షన్ కూడా ఉంటుంది. ఇది ప్రాథమికంగా బీమా పాలసీ. బోనస్‌లు కూడా వస్తాయి. ఒక మదుపు సాధనంగా ఈ పాలసీ తీసుకున్నారని భావిస్తున్నాం. ఎండోమెంట్ ప్లాన్‌లు బీమా, మదుపు కలగలపిన ప్లాన్‌లు. ఇవి గ్యారంటీడ్ రిటర్న్‌లను ఇవ్వలేవు. పైగా వ్యయాలు, చార్జీల విషయంలో ఎలాంటి పారదర్శకత ఉండదు.
 
 ఈ పాలసీ టర్మ్ 15 ఏళ్లు ముగిసిన తర్వాత మీకు ఎంత మొత్తం నిర్దిష్టంగా వస్తుందో చెప్పలేం. ఈ ప్లాన్‌లు తగిన బీమా కవరేజ్‌ను ఇవ్వలేవు, అలాగే చెప్పుకోదగిన రాబడులనూ ఇవ్వలేవు. జీవిత బీమా పాలసీ కోసం సాధారణ టర్మ్ బీమా పాలసీని తీసుకోండి. ఇక మీ వివిధ ఆర్థిక లక్ష్యాల సాధన కోసం మంచి రేటింగ్ ఉన్న మ్యూచువల్ ఫండ్స్‌లో ఇన్వెస్ట్ చేయండి.
  
 నా వయస్సు 24 సంవత్సరాలు. ఐటీరంగంలో పనిచేస్తున్నాను. నేను 30 శాతం ట్యాక్స్ బ్రాకెట్‌లో ఉన్నాను. పన్ను ఆదా మార్గాలు తెలపండి. ఎల్‌ఐసీ న్యూ జీవన్ ఆనంద్ పాలసీ తీసుకోమంటారా? లేక ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో, లేక పబ్లిక్ ప్రావిడెండ్ ఫండ్(పీపీఎఫ్)లో ఇన్వెస్ట్ చేయమంటారా? తగిన సూచనలివ్వండి.
                    - శశికాంత్, బెంగళూరు
  
 మీ ఆదాయం ఎంత, మీరు ఎంత ఆదా చేయగలరు...తదితర వివరాలతో కూడిన మీ ఇన్వెస్ట్‌మెంట్ ప్రొఫైల్ గురించిన వివరాలేమీ మీరు వెల్లడించలేదు. అందుకని సాధారణ అంశాలపై వివరణ ఇస్తున్నాం. ఎల్‌ఐసీ న్యూ జీవన్ ఆనంద్ అనేది సేవింగ్స్/ఇన్వెస్ట్‌మెంట్‌తో కూడిన బీమా ప్లాన్. ఇవి భారీ ఇన్సూరెన్స్ కవర్‌ను ఇవ్వలేవు. అలాగే మంచి రాబడులనూ ఇవ్వలేవు. అందుకే వీటికి దూరంగా ఉండమని సూచిస్తాం. బీమా అవసరాలకు పూర్తిగా టర్మ్ బీమా పాలసీలే తీసుకోండి.
 
 మీపై ఆర్థికంగా ఆధారపడిన వాళ్లు ఉంటే, తగిన లైఫ్ కవర్ ఉండే బీమా పాలసీ తీసుకోండి. ఆన్‌లైన్ టర్మ్ బీమా పాలసీ తీసుకుంటే ప్రయోజనాలు అధికంగా ఉంటాయి. ఈక్విటీ లింక్డ్ సేవింగ్స్ స్కీమ్ (ఈఎల్‌ఎస్‌ఎస్) లేదా ట్యాక్స్ ప్లానింగ్ మ్యూచువల్ ఫండ్స్ స్టాక్స్‌లో ఇన్వెస్ట్ చేస్తాయి. అందుకని రిస్క్‌ను అధికంగా భరించగలిగే ఇన్వెస్టర్లకు మాత్రమే అవి తగినవి. దీర్ఘకాలం పాటు వీటిల్లో ఇన్వెస్ట్ చేస్తే మంచి రాబడులు పొందొచ్చు.
 
 వీటికి మూడేళ్ల లాకిన్ పీరియడ్ ఉంటుంది. అయితే మీరు కనీసం ఐదేళ్లపాటు ఇన్వెస్ట్ చేయగలిగేటట్లయితేనే వీటిల్లో ఇన్వెస్ట్‌చేయాలి. ఇక పీపీఎఫ్ అనేది కేంద్రప్రభుత్వం తోడ్పాటుతో నడిచే ప్లాన్. దీని కాలపరిమితి 15 ఏళ్లు. దీర్ఘకాలిక ఆర్థిక లక్ష్యాల కోసం ఇన్వెస్ట్ చేసేవాళ్లకు ఇదొక మదుపు సాధనం. మీరు భరించగలిగే రిస్క్, ఎంత కాలం ఎంత మొత్తాల్లో ఇన్వెస్ట్ చేయగలరు. తదితర అంశాలను పరిగణనలోకి తీసుకొని నిర్ణయాలు తీసుకోండి.
 - ధీరేంద్ర కుమార్
  సీఈవో, వ్యాల్యూ రీసెర్చ్


 నా వయస్సు 30 సంవత్సరాలు. ఐటీ రంగంలో పనిచేస్తున్నాను. నా జీతం రూ.70,000. ఏడాదికి 5 శాతం చొప్పున వేతన పెరుగుదల ఉండొచ్చని అంచనా వేస్తున్నాను. ఇటీవలనే .28 లక్షలకు  గృహ రుణం తీసుకున్నాను. నెలకు రూ.29,000 చొప్పున ఈఎంఐ చెల్లిస్తున్నాను. ఈ గృహ రుణ కాలపరిమితి 30 సంవత్సరాలు. నాకు 60 సంవత్సరాల వయస్సు వచ్చేటప్పటికి ఈ రుణం తీరుతుంది.  నా భార్య గృహిణి, నాకు ఇద్దరు చిన్న పిల్లలు, మా నాన్నగారు నా దగ్గరే ఉంటారు. వీరంతా నాపై ఆధారపడి ఉన్నవాళ్లు. పన్ను ఆదా  చేసే ఇన్వెస్ట్‌మెంట్స్‌లో మదుపు చేయాలనుకుంటున్నాను. 
 ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో ఇన్వెస్ట్ చేస్తే 14 శాతం, పీపీఎఫ్‌లో ఇన్వెస్ట్ చేస్తే 8.5 శాతం చొప్పున రాబడులు వస్తాయని మిత్రులు చెబుతున్నారు. గృహ రుణం ముందుగానే తీర్చివేసి, ఈఎల్‌ఎస్‌ఎస్‌లో ఇన్వెస్ట్ చేయాలా? గృహ రుణం చెల్లిస్తూనే ఈఎల్‌ఎస్‌ఎస్‌ల్లో ఇన్వెస్ట్ చేయమంటారా ? పీపీఎఫ్‌లో కూడా ఇన్వెస్ట్ చేయమంటారా ? తగిన సూచనలివ్వండి?
  - జీవన్ కుమార్, విశాఖపట్టణం
  
 గృహ రుణానికి సంబంధించి నెలవారీ సమాన వాయిదాలు(ఈఎంఐ)లు చెల్లించడంలో మీరు ఇబ్బందిపడుతున్నట్లయితే, ఈ గృహ రుణం అసలులో  కొంత మొత్తాన్ని తీర్చేయండి. మీరు సౌకర్యవంతంగా ఈఎంఐ చెల్లించగలిగిన స్థాయిలో గృహ రుణం అసలులో కొంత మొత్తాన్ని తీర్చేయండి. ఒకవేళ గృహరుణ ఈఎంఐలు చెల్లించడంలో ఎలాంటి ఇబ్బందులు లేనట్లయితే, ముందస్తు చెల్లింపులు విషయం మరచిపోండి. పన్ను ఆదా చేసే లేదా ఇతర ఇన్వెస్ట్‌మెంట్ సాధనాల్లో మదుపు చేయడం ప్రారంభించండి. గృహ రుణం మంచి రుణం అని చెప్పవచ్చు.
 
 ఈ రుణం వల్ల ఒక ఆస్తి మన సొంతమవుతుంది. అంతేకాకుండా పన్ను ప్రయోజనాలు కూడా లభిస్తాయి. పర్సనల్ లోన్ తదితర ఇతర అన్‌సెక్యూర్డ్ రుణాలతో పోల్చితే వడ్డీరేట్లు తక్కువగానే ఉంటాయి. అధిక వడ్డీలు చెల్లించాల్సి వచ్చే క్రెడిట్ కార్డ్, పర్సనల్ లోన్స్ మంచి రుణాలు కావు. ఒకవేళ ఇలాంటివి ఉంటే, అన్నింటికంటే ముందుగానే ఈ రుణాలను తీర్చేయాలి.  
 
 వీటిమీద 20-30 శాతం వరకూ వడ్డీ కడుతూ, 7-15 శాతం వడ్డీ వచ్చే ఇన్వెస్ట్‌మెంట్ సాధనాల్లో పెట్టుబడి పెట్టడం సరైనది కాదు. మీ గృహ రుణం మొత్తం తీరిన తర్వాత ఇతర సాధనాల్లో ఇన్వెస్ట్ చేయాలనుకోవడం సరైన విధానం కాదు. చిన్న మొత్తాలతోనైనా, చిన్న వయస్సులోనే ఇన్వెస్ట్ చేయడం వల్ల చక్రవడ్డీ కారణంగా మీ ఆర్థిక లక్ష్యాలను సులభంగా, త్వరగా సాధించగలుగుతారు. పన్ను ఆదా మార్గాల్లో ఇన్వెస్ట్ చేయాలనుకుంటే, ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)ను పరిశీలించవచ్చు.  
 
 ఆదాయపు పన్ను చట్టం సెక్షన్ 80 సీ కింద పన్ను ఆదా చేసే ఇన్వెస్ట్‌మెంట్ సాధనాల్లో తక్కువ లాక్ ఇన్ పీరియడ్ ఉన్న ఇన్వెస్ట్‌మెంట్ సాధనాలు ఇవే. ఈఎల్‌ఎస్‌ఎస్  లేదా ఇతర ఈక్విటీ సాధనాల్లో కనీసం ఐదేళ్ల పాటు ఇన్వెస్ట్ చేసేలా మీ ఆర్థిక ప్రణాళికను రూపొందించుకోండి. ఈక్విటీల్లో దీర్ఘకాలం పాటు ఇన్వెస్ట్ చేస్తే మంచి రాబడులు పొందవచ్చు.
  
 నేను రూ.8 లక్షల వరకూ మ్యూచువల్ ఫండ్స్‌లో ఇన్వెస్ట్ చేయగలను. ఒక సంవత్సరం  తర్వాత ఏడాదికి రూ.2 లక్షల చొప్పున నాకు డబ్బులు అవసరమవుతాయి. వేటిల్లో ఇన్వెస్ట్ చేయాలి. తగిన సూచనలివ్వండి.
  - సమున్నత, విశాఖపట్టణం
 
 మీరు వాస్తవదూరమైన లక్ష్యాన్ని నిర్దేశించుకున్నారు. మీరు చెప్పిన లెక్క ప్రకారం మీ ఇన్వెస్ట్‌మెంట్స్‌పై ఏడాదికి 25 శాతం రాబడి వస్తేనే మీకు సంవత్సరం  తర్వాత ఏడాదికి రూ.2 లక్షల చొప్పున పొందగలరు. ఈ తరహా రాబడులను ఏ మ్యూచువల్ ఫండ్ సంస్థా ఆఫర్ చేయడం లేదు.
  
 నా వయస్సు 63 సంవత్సరాలు. గతంలో బ్యాంకులో వేసిన ఫిక్స్‌డ్ డిపాజిట్లు మెచ్యూర్ అయ్యి రూ.6 లక్షలు ఇటీవలనే నా చేతికొచ్చాయి. వీటిని బ్యాంకులో మళ్లీ రీఇన్వెస్ట్ చేయాలనుకోవడం లేదు. వీటిపై వచ్చే రాబడులు పన్నులు పోను చాలా తక్కువగా ఉంటున్నాయి. ఈ రూ.6 లక్షలను మూడు నుంచి ఐదేళ్ల పాటు ఇన్వెస్ట్ చేయగలను. కొంత రిస్క్ భరించగలను. ఏడాదికి 9 నుంచి 10 శాతం రాబడిని ఇచ్చే మ్యూచువల్ ఫండ్స్‌ను సూచించండి. ఇప్పటికే కొన్ని డైవర్సిఫైడ్ ఈక్విటీ, బ్యాలెన్స్‌డ్ ఫండ్స్‌లో ఇన్వెస్ట్ చేశాను.                      
 - హఫీజ్, హైదరాబాద్
  
 ఐదేళ్ల కంటే తక్కువ కాలం ఇన్వెస్ట్ చేసేవారికి ఈక్విటీ ఆధారిత బ్యాలెన్స్‌డ్ ఫండ్స్‌ను రికమెండ్ చేయలేము. పన్నులు పోను తగిన రాబడులు రావాలంటే, ఆర్బిట్రేజ్ ఫండ్స్‌లో ఇన్వెస్ట్ చేయవచ్చు. పన్ను అంశాల పరంగా వీటిని ఈక్విటీ ఫండ్స్‌గా పరిగణిస్తారు. అందుకని ఏడాది దాటిన తర్వాత వీటిని విక్రయిస్తే మీరు ఎలాంటి మూలధన లాభాల పన్ను చెల్లించాల్సిన పనిలేదు. మూడేళ్ల కాలానికి మించిన ఇన్వెస్ట్‌మెంట్ కోసం డైనమిక్ బాండ్ ఫండ్స్‌ను, మంత్లీ ఇన్‌కమ్ ప్లాన్(ఎంఐపీ)లను పరిశీలించవచ్చు.
  
 గోల్డ్ ఈటీఎఫ్‌లో ఇన్వెస్ట్ చేయాలనుకుంటున్నాను. నాకున్న డీమ్యాట్ అకౌంట్ ద్వారా సిస్టమాటిక్ ఇన్వెస్ట్‌మెంట్ ప్లాన్(సిప్)లో గోల్డ్ ఈటీఎఫ్‌ల్లో ఇన్వెస్ట్ చేయవచ్చా?
  - నర్మద, గుంటూరు
 
 మీ ట్రేడింగ్ అకౌంట్ మీ డీమ్యాట్ అకౌంట్‌లో అనుసంధానమై ఉంటే, మీరు గోల్డ్ ఈటీఎఫ్‌లను కొనుగోలు చేయవచ్చు. విక్రయించవచ్చు. అయితే పుత్తడిలో పెట్టుబడులు వద్దని చెబుతాం. ఇతర ఇన్వెస్ట్‌మెంట్ సాధనాలతో పోల్చితే బంగారం భిన్నమైనది. బాండ్లలలో ఇన్వెస్ట్ చేస్తే మీకు వడ్డీ వస్తుంది. స్టాక్స్‌లో ఇన్వెస్ట్ చేస్తే డివిడెండ్‌లు, బోనస్‌లు, ధర పెరగడం.. ఇలాంటి ప్రయోజనాలుంటాయి. కానీ బంగారం విలువ మాత్రం డిమాండ్, సరఫరా అంశాలపై ఆధారపడి ఉంటుంది.
 
 2008లో  అంతర్జాతీయంగా ఆర్థిక అస్తవ్యస్త పరిస్థితులున్నప్పటినుంచి పుత్తడి పెట్టుబడులు మంచి రాబడులనిచ్చాయి. గత ఐదేళ్లలో గోల్డ్ ఈటీఎఫ్‌లు చెప్పుకోదగ్గ స్థాయి రాబడులను ఇవ్వలేదు. గత ఐదేళ్లలో ఇవి 3 శాతం కంటే తక్కువ రాబడులనే ఇచ్చాయి. ఏడాది నుంచి -మూడేళ్ల కాలానికి కొన్ని గోల్డ్ ఈటీఎఫ్‌లు నష్టాలను కూడా ఇచ్చాయి.  ఈ విషయాలన్నింటిని దృష్టిలో ఉంచుకొని గోల్డ్ ఈటీఎఫ్‌ల్లో పెట్టుబడులపై పునరాలోచన చేయండి.
 
 - ధీరేంద్ర కుమార్
  సీఈవో, వ్యాల్యూ రీసెర్చ్


 నేను ప్రైవేట్‌రంగంలో పనిచేస్తున్నాను. నా నెల జీతం రూ.25,000. నెలకు రూ.5,000-8,000 వరకూ ఇన్వెస్ట్ చేయగలను. 15 ఏళ్ల తర్వాత రూ.50-60 లక్షల నిధిని ఏర్పాటు చేసుకోవడం నా లక్ష్యం. ఈ లక్ష్య సాధన కోసం ఏ ఫండ్స్‌లో ఇన్వెస్ట్ చేయమంటారు ?
  - ఖాదర్, హైదరాబాద్
  
 నెలకు రూ.5,000-8,000 చొప్పున 15 ఏళ్లపాటు ఇన్వెస్ట్ చేస్తే, 12 శాతం వార్షిక రాబడుల చొప్పున మీరు రూ.25-40 లక్షల నిధిని ఏర్పాటు చేసుకోగలుగుతారు. మీరు దీర్ఘకాలం(15 ఏళ్లపాటు) ఇన్వెస్ట్ చేయాలనుకుంటున్నారు కాబట్టి ఈక్విటీల్లో ఇన్వెస్ట్ చేస్తే బావుంటుంది. దీర్ఘకాలికంగా ఇన్వెస్ట్ చేస్తే ఈక్విటీలు ఇచ్చినంత స్థాయిలో రాబడులను మరే ఇన్వెస్ట్‌మెంట్ సాధనం ఇవ్వలేదు. మంచి రేటింగ్ ఉన్న డైవర్సిఫైడ్ ఈక్విటీ మ్యూచువల్ ఫండ్స్‌ను ఎంచుకొని వాటిల్లో ఇన్వెస్ట్ చేయండి.
 
 మీ జీతం పెరిగినప్పుడల్లా మీరు ఇన్వెస్ట్ చేసే మొత్తాన్ని పెంచండి. ఇలా చేయడం వల్ల మీరు కావాలనుకుంటున్న నిధిని సులభంగా, త్వరగా ఏర్పాటు చేసుకోగలుగుతారు. మీ ఇన్వెస్ట్‌మెంట్స్‌కు ఈ ఫండ్స్‌ను పరిశీలించవచ్చు... బిర్లా సన్‌లైఫ్ ఫ్రంట్‌లైన్ ఈక్విటీ, బీఎన్‌పీ పారిబా డివిడెండ్ ఈల్డ్‌ఫండ్, ఫ్రాంక్లిన్ ఇండియా బ్లూ చిప్ ఫండ్, హెచ్‌డీఎఫ్‌సీ బ్యాలెన్స్‌డ్ ఫండ్, మిరా అసెట్ ఇండియా ఆపర్చునిటీస్ ఫండ్, టాటా ఇథికల్ ఫండ్.
  
 ఏదైనా మ్యూచువల్ ఫండ్ స్కీమ్‌కు సంబంధించి డెరైక్ట్, రెగ్యులర్ ప్లాన్‌ల ఎక్స్‌పెన్స్ రేషియోలో చాలా తేడా ఉంటోంది. ఉదాహరణకు ఫ్రాంక్లిన్ ఇండియా ప్రైమా ఫండ్ రెగ్యులర్ ప్లాన్ ఎక్స్‌పెన్స్ రేషియో 2.31 శాతంగా ఉండగా, అదే ఫండ్ డెరైక్ట్ ప్లాన్ ఎక్స్‌పెన్స్ రేషియో 0.82 శాతంగా ఉంది. ఈ రెండు ప్లాన్‌ల మధ్య తేడా 1.49 శాతం. చక్రగతి వృద్ధిని పరిగణనలోకి తీసుకుంటే, తేడా దీర్ఘకాలంలో చాలా ఎక్కువగా ఉంటుంది కదా ! అసలు డెరైక్ట్, రెగ్యులర్ ప్లాన్‌ల మధ్య ఎక్స్‌పెన్స్ రేషియో విషయంలో ఇంత భారీ వ్యత్యాసం ఎందుకు ఉంటుంది?
  - రఘురామ్, విజయవాడ
  
 మ్యూచువల్ ఫండ్ సంస్థలు 2013 నుంచి డెరైక్ట్ ప్లాన్‌లను ఆఫర్ చేస్తున్నాయి. ఈ డెరైక్ట్ ప్లాన్‌లలో ఇన్వెస్టర్లు నేరుగా ఇన్వెస్ట్ చేయవచ్చు. ఫలితంగా కమీషన్లు, ప్రమోషన్ల వ్యయాలు ఆదా అవుతాయి. ఈ వ్యయాలేమీ లేనందున మ్యూచువల్ ఫండ్స్ రెగ్యులర్ ప్లాన్‌ల ఎక్స్‌పెన్స్ రేషియో కన్నా డెరైక్ట్ ప్లాన్‌ల ఎక్స్‌పెన్స్ రేషియో తక్కువగా ఉంటుంది. అయితే ఇన్వెస్ట్‌మెంట్స్‌పై సొంతంగా రీసెర్చ్ చేసి, నిర్ణయాలు తీసుకోగలిగిన ఇన్వెస్టర్లు మాత్రమే డెరైక్ట్ ప్లాన్‌లలో ఇన్వెస్ట్ చేయాలి. ఇలా కుదరని పక్షంలో రెగ్యులర్ ప్లాన్‌లలో ఇన్వెస్ట్ చేయాలి.
  
 మరో రెండేళ్లలో రిటైరవుతున్నాను. కేంద్ర ప్రభుత్వ ఉద్యోగిని కాబట్టి, నెలవారీ పెన్షన్ రూ.50,000 వరకూ వస్తుంది. వైద్యపరంగా తగిన కవర్ ఉంటుంది. ఇతర ఖర్చుల కోసం నెలవారీ కొంత ఆదాయం కావాలి. దీని కోసం ఏయే స్కీముల్లో ఎంత ఇన్వెస్ట్ చేస్తే బావుంటుంది?
  - శంకర్, ఆనంతపురం
  
 మీకు నెలవారీ రూ.50,000 వరకూ పెన్షన్ వస్తుంది. ఇక నెలకు ఎంత మొత్తం ఇతర ఖర్చుల కోసం కావాలో నిర్ణయించుకోండి. దాన్ని బట్టి ఎంత ఇన్వెస్ట్ చేయాలో తెలుస్తుంది. ఇక నెలవారీ ఆదాయం కోసం ప్రభుత్వ రంగ సంస్థల పన్ను రహిత బాండ్లు, సీనియర్ సిటిజెన్స్ సేవింగ్స్ స్కీమ్ (ఎస్‌సీఎస్‌ఎస్), పోస్ట్ ఆఫీస్ మంత్లీ స్కీమ్‌ల్లో ఇన్వెస్ట్ చేయవచ్చు.
 
 ఇవి సురక్షిత ఇన్వెస్ట్‌మెంట్ సాధనాలు. పన్ను రహిత బాండ్లు మినహా మిగిలిన రెండు సాధనాల్లో ఇన్వెస్ట్ చేస్తే పన్నుపోటు తప్పదు. ఆర్బిట్రేజ్ ఫండ్స్‌లో ఇన్వెస్ట్ చేయడాన్ని కూడా పరిశీలించవచ్చు. పన్ను అంశాల దృష్ట్యా వీటిని ఈక్విటీ ఫండ్స్ గానే పరిగణిస్తారు. వీటిల్లో మీ ఇన్వెస్ట్‌మెంట్లను ఏడాదికి పైగా కొనసాగిస్తే, ఎలాంటి పన్నులు చెల్లించక్కర్లేదు. మీరు ఎంత కాలం ఇన్వెస్ట్ చేయగలరు, మీరు భరించగలిగే రిస్క్, తదితర అంశాలను పరిగణనలోకి తీసుకొని ఏ ఏ సాధనాల్లో ఇన్వెస్ట్ చేయాలో నిర్ణయించుకోండి.
  
 నా దగ్గర ప్రస్తుతం రూ.2 లక్షలున్నాయి. వీటిని 15 రోజుల కోసం ఏదైనా లిక్విడ్ ఫండ్‌లో ఇన్వెస్ట్ చేద్దామనుకుంటున్నాను. 15 రోజుల కాలానికి లిక్విడ్ ఫం డ్ నుంచి ఎంత రాబడులు వస్తాయి. మంచి లిక్విడ్ ఫండ్‌ను సూచించండి?     - వెంకట్, ప్రొద్దుటూరు
  
 లిక్విడ్ ఫండ్లో ఇన్వెస్ట్ చేస్తే ఎంత రాబడులు వస్తాయనేది కచ్చితంగా చెప్పలేము.  ఈ రాబడులు మార్కెట్ పనితీరును బట్టి ఉంటాయి. ఈ కేటగిరి ఫండ్స్ ట్రాక్ రికార్డ్‌ను పరిశీలిస్తే, ఈ ఫండ్స్ 8 శాతం వరకూ వార్షిక రాబడులను ఇస్తున్నాయి. గత ఏడు రోజుల్లో 7.3 శాతం, నెల రోజుల్లో 7.05 శాతం చొప్పున రాబడులనిచ్చాయి.
  
 సిస్టమాటిక్ ఇన్వెస్ట్‌మెంట్ ప్లాన్ (సిప్) విధానంలో మ్యూచువల్ ఫండ్స్‌లో పదేళ్లపాటు ఇన్వెస్ట్ చేద్దామనుకుంటున్నాను. ఐదేళ్ల తర్వాత పాక్షికంగా లాభాలను స్వీకరించవచ్చా? లేకుంటే పదేళ్ల వరకూ ఎలాంటి లాభాలు స్వీకరించకుండానే ఇన్వెస్ట్‌మెంట్స్‌ను కొనసాగించమంటారా? అంతర్జాతీయంగా కానీ, దేశీయంగా కానీ ఏవైనా ఆర్థిక విపత్కర పరిస్థితులు తలెత్తితే, ఎలా?
  - శశాంక్, గుంటూరు
  
 ప్రస్తుత మార్కెట్ పరస్థితులను దృష్టిలో ఉంచుకొని ఎప్పుడూ పెట్టుబడి వ్యూహాలను నిర్ణయించుకోకూడదు. మీ ఆర్థిక లక్ష్యాలను బట్టి పెట్టుబడి వ్యూహాలు ఉండాలి. మీ విషయం తీసుకుంటే, మీరు పదేళ్ల పాటు ఇన్వెస్ట్ చేయాలనుకుంటున్నారు. ఐదేళ్ల తర్వాత ఏదో జరుగుతుందన్న ఆందోళనను పక్కన పెట్టండి. దానికి బదులుగా క్రమం తప్పకుండా మీ ఇన్వెస్ట్‌మెంట్స్‌ను మదింపు చేస్తూ ఉండండి.
 
 మీరు ఇన్వెస్ట్ చేసిన ఫండ్ పనితీరు అదే కేటగిరిలోని ఇతర ఫండ్స్‌తో పోల్చితే సరైన పనితీరు కనబరచకపోతే (ఏడాది కాలంలో) దానికి కారణమేమిటో శోధించండి. పనితీరు సరిగ్గా లేకపోతే మీ ఇన్వెస్ట్‌మెంట్స్‌ను వేరే ఫండ్స్‌లోకి మార్చండి. మీ ఇన్వెస్ట్‌మెంట్ కాలం పదేళ్లు కాబట్టి, ఎనిమిదేళ్లు, లేదా తొమ్మిదేళ్ల తర్వాత ఈ ఫండ్స్‌లోని ఇన్వెస్ట్‌మెంట్స్‌ను బ్యాంక్ డిపాజిట్లు, లిక్విడ్ ఫండ్స్ తదితర సురక్షిత సాధనాల్లోకి మార్చుకోండి. ఇలా చేస్తే స్టాక్ మార్కెట్ ఒడిదుడుకుల్లో ఉంటే ఆ ప్రభావం మీ ఇన్వెస్ట్‌మెంట్లపై ఉండదు.
  
 - ధీరేంద్ర కుమార్
 సీఈవో, వ్యాల్యూ రీసెర్చ్


 గత కొంత కాలం నుంచి యాక్సిస్ లాంగ్ టర్మ్ ఈక్విటీ ఫండ్‌లో ఇన్వెస్ట్ చేస్తూ ఉన్నాను. ఈ ఫండ్‌కు లాక్ ఇన్ పీరియడ్ మూడేళ్లు. ఈ లాక్ ఇన్ పీరియడ్ పూర్తయిన తర్వాత ఈ ఫండ్‌లో ఇన్వెస్ట్‌మెంట్స్ కొనసాగించమంటారా ? లేకుంటే ఫండ్ నుంచి వైదొలగమంటారా? తగిన సూచనలివ్వండి?
  - దేవేందర్, గుంటూరు
  
 యాక్సిస్ లాంగ్‌టర్మ్  ఫండ్ వంటి ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్) లేదా ట్యాక్స్ సేవింగ్స్ మ్యూచువల్ ఫండ్స్‌కు తప్పనిసరిగా లాక్ ఇన్ పీరియడ్ మూడేళ్లుగా ఉంటుంది. ఈ లాక్ ఇన్ పీరియడ్ పూర్తయిన తర్వాత ఇన్వెస్టర్లు ఈ ఫండ్ నుంచి తప్పనిసరిగా వైదొలగాల్సిన అవసరం లేదు. ఈ ఫండ్‌లో ఇన్వెస్ట్ చేసిన డబ్బులు మీకు అవసరం లేనంత కాలం, ఈ ఫండ్ పనితీరు సంతృప్తికరంగా ఉన్నంత కాలం మీరు ఫండ్‌లో ఎలాంటి అనుమానాలు లేకుండా కొనసాగవచ్చు.
  
 ఐదేళ్ల తర్వాత నాకు నెలకు రూ.15,000 పెన్షన్ కావాలి. ఈ పెన్షన్ కనీసం పదేళ్ల పాటు అందాలి. ఇలా పొందాలంటే నేను  ఏ స్కీమ్‌లో ఎంత మొత్తం ఇన్వెస్ట్ చేయాల్సి ఉంటుంది?
  - సత్యనారాయణ, విజయవాడ
  
 మీకు నెలకు రూ.15,000 పెన్షన్ కావాలంటే రూ.20 లక్షల నిధిని ఏర్పాటు చేసుకోవాలి. బ్యాంక్ డిపాజిట్లు, సీనియర్ సిటిజెన్ సేవింగ్స్ స్కీమ్(ఎస్‌సీఎస్‌ఎస్), పోస్ట్ ఆఫీస్ మంత్లీ ఇన్‌కమ్ స్కీమ్,  ట్యాక్స్-ఫ్రీ బాండ్లు వంటివి సురక్షితమైన, భద్రమైన ఇన్వెస్ట్‌మెంట్ సాధనాలు. ఇవి అధిక రాబడులను ఇవ్వలేవు.  సీనియర్ సిటిజెన్ సేవింగ్స్ స్కీమ్ మాత్రం ఏడాదికి 9.3 శాతం రాబడిని ఇస్తుంది. మిగిలినవి  ఏడాదికి 7.5 శాతం వరకూ రాబడులను ఇస్తాయి.  
 
 ఇక మీరు ఐదేళ్ల పాటు ఇన్వెస్ట్‌చేయాలనుకుంటున్నారు. కాబట్టి ఒకటి లేదా రెండు బ్యాలెన్స్‌డ్ మ్యూచువల్ ఫండ్స్ ఎంచుకోండి. వీటిల్లో నెలకు రూ.24,000 చొప్పున ఇన్వెస్ట్ చేయడం మొదలు పెట్టండి. ఈ బ్యాలెన్సెడ్ ఫండ్స్ కనీసం ఏడాదికి 12 శాతం రాబడులను ఇస్తాయని అంచనాలతో మీకు మీరు కోరుకున్న పెన్షన్ నెలవారీ పొందగలరు. మీరు ఇన్వెస్ట్ చేయడానికి  ఈ బ్యాలెన్స్‌డ్ ఫండ్స్‌ను ఎంచుకోవచ్చు.
 
 కెనరా రెబెకొ బ్యాలెన్స్‌డ్ ఫండ్, ఫ్రాంక్లిన్ ఇండియా బ్యాలెన్స్‌డ్ ఫండ్, హెచ్‌డీఎఫ్‌సీ బ్యాలెన్స్‌డ్ ఫండ్, హెచ్‌డీఎఫ్‌సీ చిల్డ్రన్స్ గిఫ్ట్ ఫండ్, ఐసీఐసీఐ ప్రుడెన్షియల్ బ్యాలెన్స్‌డ్ ఫండ్, ఎల్ అండ్ టీ ఇండియా ప్రుడెన్షియల్ ఫండ్, ఎస్‌బీఐ మ్యాగ్నమ్ బ్యాలెన్స్‌డ్ ఫండ్, టాటా బ్యాలెన్స్‌డ్ ఫండ్ మొదలైనవి.
  
 మూడేళ్ల క్రితం ఎల్‌ఐసీ జీవన్ ఆనంద్ పాలసీ తీసుకున్నాను. ఏడాదికి రూ.68,000 చొప్పున ఇప్పటికే మూడేళ్ల ప్రీమియం చెల్లించాను. ఈ పాలసీ టర్మ్ పదేళ్లు. సమ్ అస్యూర్డ్ రూ.10 లక్షలు. ఈ పాలసీని సరెండర్ చేయమంటారా? కొనసాగమంటారా? ఒకవేళ సరెండర్ చేస్తే నాకు ఎల్‌ఐసీ నుంచి ఎంత వస్తుంది? ఈ సరెండర్ డబ్బులను ఎలా ఇన్వెస్ట్ చేయాలి?                                 - సతీష్, హైదరాబాద్
  
 ఎల్‌ఐసీ జీవన్‌ఆనంద్ అనేది ఎండోమెంట్ ఎష్యూరెన్స్, హోల్ లైఫ్ ప్లాన్‌ల సమ్మేళనంగా రూపొందిన పాలసీ. పాలసీ తీసుకున్న వ్యక్తి మరణిస్తే, బీమా మొత్తం నామినీకి వస్తుంది. లేకుంటే పాలసీ టర్మ్ పూర్తయితే మెచ్యూరిటీ ప్రయోజనాలు పాలసీ తీసుకున్న వ్యక్తికి లభిస్తాయి. టర్మ్ పూర్తయిన తర్వాత పాలసీదారుడు మరణిస్తే, నామినీకి డెత్ బెనిఫిట్స్ లభిస్తాయి. వ్యయాల వివరాలను ఈ పాలసీ వెల్లడించడం లేదు.
 
 మూడేళ్ల తర్వాత ఈ పాలసీని సరెండర్ చేయాలనుకుంటే, మీరు చెల్లించిన అన్ని ప్రీమియమ్‌ల (మొదటి ప్రీమియం మినహాయించి) మొత్తంలో 30 శాతం గ్యారంటీడ్ సరెండర్ వాల్యూగా చెల్లిస్తారు. మీ కేసులో సరెండర్ విలువ రూ.40,800గా వస్తుంది. ఎల్‌ఐసీ సంస్థ ప్రత్యేకమైన సరెండర్ విలువను చెల్లించవచ్చు.
 
 ఈ పాలసీని సరెండర్ చేసిన తర్వాత వచ్చిన మొత్తాలను మొదట్లో బ్యాలెన్స్‌డ్ ఫండ్‌లో ఇన్వెస్ట్ చేయవచ్చు. ఇక మీ దీర్ఘకాలిక ఆర్థిక లక్ష్యాల కోసం కనీసం ఐదు నుంచి ఏడేళ్ల పాటు డైవర్సిఫైడ్ ఈక్విటీ ఫండ్స్‌లో ఇన్వెస్ట్ చేస్తే మంచి రాబడులు పొందగలరు.
  
 ఫెడరల్ రిజర్వ్ వడ్డీరేట్లను పెంచిన నేపథ్యంలో ఏ కేటగిరి డెట్ ఫండ్స్(బాండ్ ఫండ్స్, ఆర్బిట్రేజ్ ఫండ్స్, డైనమిక్ బాండ్ ఫండ్స్)లో ఇన్వెస్ట్ చేయాలి?
  - జాన్సన్, సికింద్రాబాద్
 
 అమెరికా ఫెడరల్ రిజర్వ్ వడ్డీరేట్ల పెంపు వంటి సంఘటనల ఆధారంగా కాకుండా మీరు ఇన్వెస్ట్ చేయాలనుకున్న కాలాన్ని పరిగణనలోకి తీసుకొని డెట్ ఫండ్స్‌లో ఇన్వెస్ట్ చేయాలి. కొన్ని రోజులు, ఒక వారానికి మాత్రమే ఇన్వెస్ట్ చేయాలనుకుంటే, లిక్విడ్ డెట్ ఫండ్స్‌లో ఇన్వెస్ట్ చేయండి. కొన్ని నెలలు లేదా ఏడాది పాటు ఇన్వెస్ట్ చేయాలనుకుంటే, ఆల్ట్రా షార్ట్ టర్మ్ ఫండ్స్‌ల్లో ఇన్వెస్ట్ చేయడం ఉత్తమం.. మూడు నుంచి ఐదేళ్ల కాలానికి ఇన్వెస్ట్ చేయాలనుకుంటే డైనమిక్ బాండ్ ఫండ్‌లను ఎంచుకోండి.


 టాటా ఇండియా ఫార్మా అండ్ హెల్త్‌కేర్ ఫండ్‌కు సంబంధించి న్యూ ఫండ్ ఆఫర్(ఎన్‌ఎఫ్‌ఓ) ఇటీవలే ప్రారంభమైంది. ఈ ఫండ్‌లో ఇన్వెస్ట్ చేద్దామనుకుంటున్నాను. మీ అభిప్రాయం తెలపండి.
  - రసూల్ బీ, హైదరాబాద్
  
 టాటా ఇండియా ఫార్మా అండ్ హెల్త్‌కేర్ ఫండ్‌కు సంబంధించి న్యూ ఫండ్ ఆఫర్(ఎన్‌ఎఫ్‌ఓ) ఈ నెల 4 నుంచి ప్రారంభమైంది. 18వరకూ గడువు ఉంది. సాధారణంగా ఎన్‌ఎఫ్‌ఓలకు దూరంగా ఉండమని మేము ఇన్వెస్టర్లకు సూచిస్తూ ఉంటాము. ఎన్‌ఎఫ్‌ఓల్లో ఇన్వెస్ట్ చేయడం కన్నా మంచి ట్రాక్ రికార్డ్ ఉన్న ఫండ్‌ల్లో ఇన్వెస్ట్ చేయడమే సముచితంగా ఉంటుంది.
 
 టాటా ఇండియా ఫార్మా అండ్ హెల్త్‌కేర్ ఫండ్.. పేరుకు తగ్గట్లుగా ఫార్మాస్యూటికల్, హెల్త్‌కేర్ రంగాల్లో ఇన్వెస్ట్ చేస్తుంది. పూర్తిగా ఒకే రంగానికి పరిమితమైన సెక్టోరియల్ ఫండ్స్‌లో కూడా ఇన్వెస్ట్ చేయకపోవడమే మంచిది. ఇలాంటి రంగాల వారీ ఫండ్స్‌లో ఎప్పుడు ఇన్వెస్ట్ చేయాలి. ఎప్పుడు ఇన్వెస్ట్‌మెంట్స్‌ను ఉపసంహరించుకోవాలనేది కీలకమైన విషయం. ఒక సాధారణ ఇన్వెస్టర్‌కి ఇలాంటి సెక్టోరియల్ ఫండ్స్‌లో ఎప్పుడు ఇన్వెస్ట్ చేయాలో, ఎప్పుడు వైదొలగాలో నిర్ణయించుకోవడం కొంచెం కష్టసాధ్యమైన విషయమే. మరోవైపు  ఒక్కో కాలంలో ఒక్కో రంగం పనితీరు బాగా ఉంటుంది.కొంత కాలానికి మరో రంగం జోరు పెరగవచ్చు. ఈ విషయాలన్నింటినీ పరిగణనలోకి తీసుకుంటే ఎన్‌ఎఫ్‌ఓలో, అదీన్నూ ఒకే రంగానికి పరిమితమైన సెక్టోరియల్ ఫండ్స్‌కు దూరంగా ఉండడమే మంచిది.
  
 నేను ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)ల్లో ఇన్వెస్ట్ చేశాను. మూడేళ్లు దాటాయి. ఇప్పుడు వీటిని రిడీమ్ చేసుకోవాలనుకుంటున్నాను. నేను ఏమైనా పన్నులు చెల్లించాల్సి ఉంటుందా?
  - ఆనంద్, విజయవాడ
  
 ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్) లేదా ట్యాక్స్ ప్లానింగ్ మ్యూచువల్ ఫండ్స్‌లో ఇన్వెస్ట్ చేస్తే ఆదాయపు పన్ను చట్టం సెక్షన్ 80సీ ప్రకారం రూ.1.5 లక్షల వరకూ పన్ను మినహాయింపులు పొందవచ్చు. ఈఎల్‌ఎస్‌ఎస్ స్కీమ్‌కు మూడేళ్ల లాకిన్ పీరియడ్ ఉంటుంది. మూడేళ్ల తర్వాత ఈఎల్‌ఎస్‌ఎస్ మ్యూచువల్ ఫండ్స్‌ను విక్రయించుకోవచ్చు. ఇలా పొందిన లాభాలపై ఎలాంటి పన్నులు చెల్లించాల్సిన పని లేదు.
  
 మూడేళ్ల క్రితం జీవన్ ఆనంద్ పాలసీ తీసుకున్నాను. పాలసీ టర్మ్ 15 సంవత్సరాలు. సమ్ అష్యూర్డ్ రూ. 3 లక్షలు.  ప్రీమియం ఏడాదికి రూ.23,451 చొప్పున  మూడేళ్ల పాటు ప్రీమియం చెల్లించాను. ఇది ఇన్వెస్ట్‌మెంట్‌కు, అలాగే బీమాకు సరైన పాలసీ కాదని మిత్రులంటున్నారు. సరెండర్ చేయమంటారా? సరెండర్ వాల్యూ ఎంత వస్తుంది?
   - జాన్, గుంటూరు
  
 ఎల్‌ఐసీ జీవన్ ఆనంద్ అనేది బీమా, పెట్టుబడులు కలగలిపిన ప్లాన్. ఈ తరహా ప్లాన్‌ల్లో  వ్యయాలు ఎక్కువగా, రాబడులు తక్కువగా ఉంటాయి. దీర్ఘకాలిక రాబడులను పరిగణనలోకి తీసుకున్నా, ద్రవ్యోల్బణాన్ని ఎదుర్కొనే రాబడులను ఈ తరహా పాలసీలు  ఇవ్వలేవు. ఇక మీరు చాలా తక్కువ లైఫ్ కవర్ తీసుకున్నారు. మీకు ఏమైనా అయితే మీ కుటుంబ ఆర్థిక అవసరాలను తీర్చే స్థాయిలో ఈ లైఫ్ కవర్ లేదు.
 
 మీరు ఇప్పుడు మీ పాలసీని సరెండర్ చేస్తే, మీరు కట్టిన అన్ని ప్రీమియమ్‌ల్లో నుంచి మొదటి ప్రీమియమ్‌ను మినహాయించి, దాంట్లో 30 శాతాన్ని గ్యారంటీడ్ సరెండర్ వాల్యూగా కంపెనీ చెల్లిస్తుంది. మీ విషయంలో ఇది రూ.14,070గా ఉంటుంది. అయితే కంపెనీ ప్రత్యేకమైన సరెండర్ వేల్యూని ఇవ్వవచ్చు. ఇలాంటి స్కీమ్‌లు ఇన్వెస్ట్‌మెంట్‌కు సరైనవి కావు. ఈ పాలసీని సరెండర్ చేసి, జీవిత బీమా పాలసీ కోసం టర్మ్ ఇన్సూరెన్స్ పాలసీ తీసుకోండి. బీమా, పెట్టుబడులు కలగలిపిన ఇన్వెస్ట్‌మెంట్ సాధనాల్లో ఎప్పుడూ ఇన్వెస్ట్ చేయకండి.
  
 సుకన్య సమృద్ధి యోజన స్కీమ్ కింద ఇన్వెస్ట్ చేసినప్పుడు, అవి మెచ్యూర్ అయి చేతికందినప్పుడు గానీ ఏమైనా పన్నులు చెల్లించాల్సివుంటుందా?
  - ఈశ్వరి, తిరుపతి
  
 సుకన్య సమృద్ధి అకౌంట్ స్కీమ్ అనేది ఆడపిల్లల కోసం ఉద్దేశించిన చిన్న మొత్తాల డిపాజిట్ స్కీమ్. ఈ స్కీమ్ కింద డిపాజిట్ చేసిన సొమ్ములపై ఆదాయపు పన్ను చట్టం సెక్షన్ 80 సీ ప్రకారం పన్ను మినహాయింపులు పొందవచ్చు. ప్రస్తుత ఏడాది దీనిపై వడ్డీ రేటు 9.2 శాతం. వడ్డీరేటును ఎంతనేది ప్రతీ ఏడాది ప్రభుత్వం వెల్లడిస్తుంది. ఈ డిపాజిట్‌పై వచ్చే వడ్డీ, మెచ్యూరిటీ మొత్తాలపై ఎలాంటి పన్నులు చెల్లించాల్సిన పనిలేదు.
 - ధీరేంద్ర కుమార్
 సీఈవో, వ్యాల్యూ రీసెర్చ్


 ప్రస్తుతం నా దగ్గర రూ. 2 లక్షలున్నాయి. నా కూతురు ప్రస్తుతం పదవ తరగతి చదువుతోంది. ఈ డబ్బులను తన ఉన్నత విద్య కోసం  వినియోగించాలనుకుంటున్నాను. అంటే రెండు/మూడేళ్ల తర్వాత ఈ డబ్బులు నాకు అవసరం అవుతాయి. అప్పటిదాకా ఈ సొమ్ములను దేంట్లో ఇన్వెస్ట్ చేయమంటారు ? లిక్విడ్ స్కీమ్, డైనమిక్ బాండ్ ఫండ్ లేదా ఆర్బిట్రేజ్ ఫండ్‌లోనా ? తగిన సలహా ఇవ్వండి.
  - శ్రీనివాస్, గుంటూరు
 
  మీ జాబితా నుంచి లిక్విడ్ ఫండ్స్‌ను తీసేయండి. స్వల్పకాలిక పెట్టుబడుల కోసమైతేనే లిక్విడ్ ఫండ్స్‌లో ఇన్వెస్ట్ చేయాలి. కొన్ని వారాలు, లేదా నెలలు మాత్రమే ఇన్వెస్ట్ చేయాలనుకుంటే, లిక్విడ్ ఫండ్స్‌ను పరిశీలించాలి.  మూడేళ్లకు ముందే మీకు ఈ డబ్బులు అవసరమైతే, మీరు ఆర్బిట్రేజ్ ఫండ్‌లో ఇన్వెస్ట్ చేయండి. పన్ను అంశాల దృష్ట్యా ఆర్బిట్రేజ్ ఫండ్స్‌ను ఈక్విటీ ఫండ్స్‌గానే పరిగణిస్తారు. అంటే ఈ ఫండ్స్‌లో ఏడాదికి మించి మీరు మీ ఇన్వెస్ట్‌మెంట్స్‌ను కొనసాగిస్తే మీరు ఎలాంటి పన్నులు చెల్లించాల్సిన పనిలేదు. మూడేళ్ల తర్వాత మీకు  ఈ డబ్బులు అవసరమైన పక్షంలో డైనమిక్ బాండ్ ఫండ్‌లో ఇన్వెస్ట్ చేయండి. మీరు కనుక అధిక పన్ను ట్యాక్స్ స్లాబ్‌లో ఉంటే డెట్ మ్యూచువల్ ఫండ్స్‌లో ఇన్వెస్ట్ చేయడం ఉత్తమం. ఈ ఫండ్స్‌లో మీ పెట్టుబడులను మూడేళ్లకు మించి ఇన్వెస్ట్ చేస్తే మీరు 20 శాతం దీర్ఘకాలిక మూలధన లాభాల పన్ను చెల్లించాల్సి(ఇండెక్సేషన్‌తో కలిపి) ఉంటుంది. ఒకవేళ మూడేళ్లలోపే మీరు మీ ఇన్వెస్ట్‌మెంట్స్‌ను వెనక్కి తీసుకుంటే, ఈ ఇన్వెస్ట్‌మెంట్స్‌పై వచ్చిన లాభాలను స్వల్పకాలిక మూలధన లాభాలుగా పరిగణిస్తారు. వీటిని మీ మొత్తం ఆదాయానికి కలిపి మీ ఆదాయపు పన్ను ట్యాక్స్ శ్లాబ్‌ననుసరించి పన్ను లెక్కిస్తారు. వడ్డీరేట్లు తగ్గితే, డైనమిక్ బాండ్ ఫండ్స్ మంచి రాబడులనే ఇస్తాయి.
 
 నా సీనియర్ సిటిజన్ సేవింగ్స్ స్కీమ్ అకౌంట్ కాలపరిమితి వచ్చే ఏడాది ముగియనున్నది. దీనిని పొడిగించుకోవచ్చా ? పొడిగించుకోవాలంటే నేను ఏం చేయాలి?           - సౌభాగ్య, హైదరాబాద్
 
  సీనియర్ సిటిజన్ సేవింగ్స్ స్కీమ్(ఎస్‌సీఎస్‌ఎస్) అకౌంట్ కాలపరిమితి ఐదు సంవత్సరాలు. ఐదేళ్ల తర్వాత ఈ ఎస్‌సీఎస్‌ఎస్ అకౌంట్‌ను మరో మూడేళ్ల పాటు పొడిగించుకోవచ్చు. లేదా ఈ అకౌంట్ నుంచి డబ్బులు తీసుకోవచ్చు. డబ్బులు తీసుకోవాలంటే, ఫారమ్ ఈను పాస్‌బుక్‌తో పాటు సమర్పించాలి. అకౌంట్‌ను పొడిగించుకోవాలంటే ఏడాదిలోపు ఫారమ్ బిని సమర్పించాలి. అకౌంట్ పొడిగింపు మీరు దరఖాస్తు చేసినప్పటి నుంచి కాకుండా మెచ్యూరిటీ తేదీ నుంచి మరో మూడేళ్లు ఉంటుంది. ఈ రెండింటిలో ఏ ఫారమ్‌ను డిపాజిటర్ దాఖలు చేయలేకపోతే, అకౌంట్‌ను మూసివేసినట్లుగానే భావిస్తారు. పోస్ట్ ఆఫీస్ సేవింగ్స్ అకౌంట్‌కు ఎంతైతే వడ్డీరేటు వస్తుందో అంతే వడ్డీరేటు మెచ్యూరిటీ అకౌంట్‌పై వస్తుంది.
  
 పదేళ్ల క్రితం రెండు జీవన్ సరళ్ పాలసీలు తీసుకున్నాను. ఒక్కోదానికి ఏడాది ప్రీమియం రూ. 24,000గా ఉంది. ఈ పాలసీలను కొనసాగించమంటారా?                      - జాన్సన్, నెల్లూరు
 
  ఎల్ ఐసీ జీవన్ సరళ్ పాలసీ ఎండోమెంట్ పాల సీ. ఇలాంటి పాలసీలకు  వ్యయాలకు సంబంధించి పారదర్శక విధానాలుండవు. బీమా మొత్తానికి కొంత లాయల్టీ బోనస్‌ను కలిపి చెల్లిస్తారు. పదవ పాలసీ సంవత్సరం నుంచి లాయల్టీ మొత్తాలను పొందవచ్చు. మీరు ఈ పాలసీ తీసుకొని పదేళ్లయినందున మీకు లాయల్టీ బోనస్ అందిఉండాలి. కొంత మొత్తాన్ని పదేళ్ల పాటు  డిపాజిట్ చేస్తే ఏడాదికి 7.5 శాతం వడ్డీ లెక్కేసుకున్నా ఆ మొత్తం రెట్టింపవుతుంది. ద్రవ్యోల్బణాన్ని తట్టుకునే రాబడులను కూడా  ఈ పాలసీ ఇవ్వలేదనే చెప్పవచ్చు. మీరు చెల్లించే ప్రీమియమ్‌ను బట్టి చూస్తే, మీ జీవన్ సరళ్ పాలసీ రూ.5 లక్షల బీమా ఉంటుందని తెలుస్తోంది. మీపై ఆధారపడినవారికి వారి ఆర్థిక అవసరాలను ఈ మొత్తం తీర్చలేదు. ఈ విషయాలన్నింటిని పరిగణనలోకి తీసుకుంటే ఇది తగిన జీవిత బీమాను ఇవ్వలేదు. మరోవైపు ఇది ఉత్తమమైన ఇన్వెస్ట్‌మెంట్ కాదని చెప్పవచ్చు.  అందుకని ఇలా బీమా, ఇన్వెస్ట్‌మెంట్స్ కలగలసిన స్కీమ్‌లకు దూరంగా ఉండమని ఇన్వెస్టర్లకు సలహా ఇస్తాం. జీవిత బీమా కోసం టర్మ్ బీమా ప్లాన్ తీసుకోవాలి. ఇవి చాలా చౌక. తక్కువ ప్రీమియంతోనే ఎక్కువ మొత్తానికి బీమా పాలసీ తీసుకోవచ్చు. మీకు కనుక దీర్ఘకాలిక ఆర్థిక లక్ష్యాలు ఉంటే, డైవర్సిఫైడ్ మ్యూచువల్ ఫండ్స్‌లో ఇన్వెస్ట్ చేయండి. సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో నెలకు  కొంత మొత్తాన్ని ఈ ఫండ్స్‌లో ఇన్వెస్ట్ చేస్తే మంచి రాబడులు పొందవచ్చు.
  
  ధీరేంద్ర కుమార్
  సీఈవో, వ్యాల్యూ రీసెర్చ్
  


 నేను ఒక కేంద్ర ప్రభుత్వ ఉద్యోగిని. సిస్టమాటిక్ ఇన్వెస్ట్‌మెంట్ ప్లాన్ (ఎస్‌ఐపీ) విధానంలో 15 సంవత్సరాల పాటు ఇన్వెస్ట్ చేయాలనుకుంటున్నాను. సిప్ విధానాన్ని ఎలా ప్రారంభించాలి? మంచి ప్లాన్‌ను ఎలా ఎంచుకోవాలి?
  - సైరాబాను, హైదరాబాద్
  
 మీరు సిప్ విధానంలో మ్యూచువల్ ఫండ్స్‌లో 15 ఏళ్లపాటు ఇన్వెస్ట్ చేయాలనుకుంటున్నారు. కాబట్టి ఈక్విటీ మ్యూచువల్ ఫండ్ స్కీమ్స్‌ను మీ ఇన్వెస్ట్‌మెంట్స్ కోసం పరిశీలించవచ్చు. తొలిసారిగా మ్యూచువల్ ఫండ్స్‌లో ఇన్వెస్ట్ చేయాలనుకుంటున్నారు. కాబట్టి ఈక్విటీ-ఓరియంటెడ్ బ్యాలెన్స్‌డ్ ఫండ్స్‌లో ఇన్వెస్ట్ చేయమని సూచిస్తాం. ఈక్విటీ, డెట్‌ల సమ్మేళనంగా ఈ స్కీమ్స్‌ను రూపొందిస్తారు. అందుకని ఇవి ఈక్విటీ స్కీమ్స్ కంటే తక్కువ ఒడిదుడుకులమయంగా ఉంటాయి.
 
 మంచి రేటింగ్ ఉన్న ఈక్విటీ ఓరియంటెడ్ బ్యాలెన్స్‌డ్ ఫండ్స్‌ను ఎంచుకొని ఇన్వెస్ట్ చేయండి. ఇక సిప్‌ను ప్రారంభించడం చాలా సులువైన విషయం. మీరు చేయాల్సిందల్లా మ్యూచువల్ ఫండ్ స్కీమ్‌కు దరఖాస్తు చేసేటప్పుడు సిప్ ఆప్షన్‌పై టిక్ చేయండి. ఇక మీ సేవింగ్స్ బ్యాంక్ అకౌంట్ నుంచిప్రతి నెలా నిర్ణీత మొత్తం ఆ స్కీమ్‌లోకి డెబిట్ అయ్యేలా బ్యాంక్‌కు ఆదేశాలు ఇస్తే సరి. సిప్ ప్రారంభమవుతుంది.
  
 నేను ఎస్‌బీఐ లైఫ్ స్మార్ట్ పెర్ఫామర్  యులిప్ పాలసీ తీసుకున్నాను. ఏడాదికి రూ.85,000 చొప్పున ఇప్పటికే మూడు వార్షిక ప్రీమియమ్‌లు చెల్లించాను. నేను చెల్లించిన ప్రీమియమ్‌ల విలువ రూ.2.55 లక్షలుగా ఉండగా, ప్రస్తుతం ఈ ఫండ్ విలువ రూ.2.94 లక్షలుగా ఉంది. ఫండ్ పనితీరు సంతృప్తికరంగా లేదు. లాకిన్ పీరియడ్ పూర్తయిన వెంటనే ఈ పాలసీని సరెండర్ చేద్దామనుకుంటున్నాను. అందుకని ఎలాంటి ప్రీమియమ్‌లు చెల్లించాలనుకోవడం లేదు. నేను చెల్లించిన ప్రీమియమ్‌లన్నింటికీ, సెక్షన్ 80 సీ కింద పన్ను మినహాయింపులు పొందాను. ఈ పాలసీని సరెండర్ చేయమంటారా? ఒక వేళ ఈ పాలసీని సరెండర్ చేస్తే నాపై పన్ను భారం అధికంగా ఉంటుందా?
  - సూర్య శేఖర్, విశాఖపట్టణం
  
 యులిప్‌లకు సాధారణంగా లాన్ ఇన్ పీరియడ్ ఐదేళ్లుగా ఉంటుంది. ఈ లాకిన్ పీరియడ్(ఐదేళ్లకు) ముందే ఈ పాలసీని సరెండర్ చేస్తే, ఇంతకు ముందు మీరు పొందిన పన్ను మినహాయింపులన్నింటినీ మీ ఆదాయానికి కలిపి మీ ట్యాక్స్ స్లాబ్ ప్రకారం ఆదాయపు పన్ను చెల్లించాల్సి ఉంటుంది. ఇక మ్యూచువల్ ఫండ్ కంపెనీ మీ సరెండర్ విలువపై టీడీఎస్ కోత వేస్తుంది.  
 
 మీ ఇన్వెస్ట్‌మెంట్స్‌ను, బీమా అవసరాలను వేర్వేరుగా చూడండి. బీమా కోసం లైఫ్ ఇన్సూరెన్స్ కవర్ ఉన్న టర్మ్ ప్లాన్ తీసుకోండి. దీర్ఘకాల ఆర్థిక లక్ష్యాల కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేయండి. సిస్టమాటిక్ ఇన్వెస్ట్‌మెంట్ ప్లాన్(ఎస్‌ఐపీ-సిప్) అంటే ఏమిటి ? రోజువారీ, వారం వారీ, నెలవారీ- ఏ సిప్‌ను అనుసరిస్తే మంచి ప్రయోజనాలు లభిస్తాయి?
  - జార్జ్, గుంటూరు
  
 నిర్ణీత కాలానికి నిర్ణీత మొత్తంలో క్రమం తప్పకుండా ఇన్వెస్ట్‌చేయడాన్ని సిస్టమాటిక్ ఇన్వెస్ట్‌మెంట్ ప్లాన్(సిప్)గా వ్యవహరిస్తారు. ఈ సిప్ విధానం వల్ల మార్కెట్ ఒడిదుడుకులను అధిగమించవచ్చు. దీర్ఘకాలంలో గరిష్ట రాబడులను పొందవచ్చు.  మీ ఇన్వెస్ట్‌మెంట్స్ మొత్తం రూ. 2 లక్షల రేంజ్‌లో ఉంటే నెలవారీ సిప్‌ను ఎంచుకుంటే సముచితంగా ఉంటుంది. రోజువారీ, వారం వారీ సిప్‌ను అనుసరిస్తే ఒక నెలలో లావాదేవీలు అధికంగా ఉండి, ఇన్వెస్ట్‌మెంట్స్ మదింపు, గణన చాలా గందరగోళంగా ఉం టుంది.
 
 మూలధన లాభాల పన్ను లెక్కించడం కూడా కష్టసాధ్యమైన పనే. పెద్ద మొత్తంలో ఇన్వెస్ట్‌మెంట్స్ ఉంటేనే రోజువారీ, వారం వారీ సిప్ విధానాన్ని అనుసరించాలి. అయితే దీర్ఘకాలం పాటు ఇన్వెస్ట్ చేయాలనుకుంటే, రోజువారీ అయినా, వారం వారీ అయినా, నెలవారీ- ఏ సిప్ విధానాన్ని అనుసరించినా, రాబడుల్లో చెప్పుకోదగ్గ తేడా ఉండదని చెప్పొచ్చు.
 - ధీరేంద్ర కుమార్
 సీఈవో, వ్యాల్యూ రీసెర్చ్


 పూర్తిగా ఫార్మా షేర్ల పోర్ట్‌ఫోలియోతో కూడిన ఫార్మా మ్యూచువల్ ఫండ్‌లో ఇన్వెస్ట్ చేద్దామనుకుంటున్నాను. నాలుగు నుంచి ఐదేళ్ల కాలానికి ఇలా ఇన్వెస్ట్ చేసి, వచ్చిన ఆ డబ్బులను నా కూతురు ఉన్నత విద్యాభ్యాసానికి వినియోగించాలనేది నా ఆలోచన. తగిన సలహా ఇవ్వండి?
 -సాంబశివ, వరంగల్
  
 సెక్టార్ ఫండ్స్‌లో ఇన్వెస్ట్ చేయడం సరైన ఇన్వెస్ట్‌మెంట్ విధానం కాదని నా అభిప్రాయం. ఒక్కొక్క కాలంలో ఒక్కొక్క రంగం షేర్లు మంచి పనితీరు కనబరుస్తాయి. అయితే ఆ రంగం పనితీరు బాగా ఉన్నా లేకున్నా సదరు సెక్టార్ ఫండ్ మేనేజర్ అదే రంగంలోని షేర్లలోనే ఇన్వెస్ట్ చేస్తారు. కాబట్టి మొత్తం మీద మీకు వచ్చే రాబడులు అంతంతమాత్రంగానే ఉంటాయని చెప్పవచ్చు.
 
 అందుకని మీరు భరించగలిగే రిస్క్, మీ పెట్టుబడుల కాలపరిమితిని పరిగణనలోకి తీసుకొని  ఏదైనా డైవర్సిఫైడ్ ఫండ్‌ను ఎంచుకొని ఇన్వెస్ట్ చేయండి. ఒకవేళ మీరు ఐదేళ్లకు మించి ఇన్వెస్ట్ చేయాలనుకుంటే ఈక్విటీ ఫండ్స్‌లో ఇన్వెస్ట్ చేసి మంచి రాబడులు పొందవచ్చు.
 
 ఒక ఈక్విటీ మ్యూచువల్ ఫండ్‌లో  నాలుగేళ్ల పాటు సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేశాను. నాలుగేళ్ల తర్వాత ఆర్థిక ఇబ్బందుల కారణంగా ఏడాది పాటు సిప్ ఇన్వెస్ట్‌మెంట్స్‌ను ఆపేయాల్సి వచ్చింది. ఇప్పుడు ఈ ఫండ్ నుంచి నా ఇన్వెస్ట్‌మెంట్స్‌ను ఉపసంహరించుకోవాలనుకుంటున్నాను. నేను ఏమైనా పన్నులు చెల్లించాల్సి ఉంటుందా?
  - రాజేశ్, కాకినాడ
  
 ఈక్విటీ మ్యూచువల్ ఫండ్స్‌లో ఇన్వెస్ట్ చేసిన మొత్తాన్ని ఏడాది తర్వాత ఉపసంహరించుకుంటే ఎలాంటి పన్నులు చెల్లించాల్సిన పనిలేదు. మీరు నాలుగేళ్ల పాటు సిప్ విధానంలో ఈక్విటీ మ్యూచువల్ ఫండ్‌లో ఇన్వెస్ట్ చేసి, ఏడాది తర్వాత ఆ ఇన్వెస్ట్‌మెంట్స్‌ను ఉపసంహరించుకున్నారు. కాబట్టి మీపై ఎలాంటి  మూలధన లాభాల పన్ను భారం ఉండదు. చివరి సిప్ ఇన్‌స్టాల్‌మెంట్ ఏడాది పూర్తయితేనే ఇది వర్తిస్తుంది.
  
 మ్యూచువల్ ఫండ్స్‌లో ఇన్వెస్ట్ చేస్తే ఆదాయపు పన్ను ఆదా చేసుకోవచ్చని నా మిత్రుడొకరు చెప్తున్నారు. రకరకాల మ్యూచువల్ ఫండ్స్ ఉన్నాయి కదా ! ఏ మ్యూచువల్ ఫండ్‌లో ఇన్వెస్ట్ చేసినా పన్ను రాయితీలు లభిస్తాయా? లేకుంటే ప్రత్యేకమైన మ్యూచువల్ ఫండ్స్‌లోనే ఇన్వెస్ట్ చేస్తే పన్ను రాయితీలు వస్తాయా? వివరించండి.
  - భాస్కర్, కరీంనగర్
  
 ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్), లేదా ట్యాక్స్ ప్లానింగ్ మ్యూచువల్ ఫండ్స్‌లో ఇన్వెస్ట్ చేస్తే ఆదాయపు పన్ను చట్టం సెక్షన్ 80 సీ ప్రకారం రూ.1.5 లక్షల వరకూ పన్ను మినహాయింపులు  పొందవచ్చు.
  నేను కొన్ని డెట్ ఫండ్స్‌లో ఇన్వెస్ట్ చేశాను. అయితే  ఈ డెట్ ఫండ్స్ ప్రభుత్వ సెక్యూరిటీల్లో ఎలాంటి పెట్టుబడులు పెట్టలేదు. ఇటీవల వడ్డీరేట్లు తగ్గుతున్న నేపథ్యంలో డెట్ ఫండ్స్ రాబడులపై ఎలాంటి ప్రభావం ఉంటుంది. ఈ ఇన్వెస్ట్‌మెంట్స్ సురక్షింగానే ఉంటాయా?
  -వెంకట్, తిరుపతి
  
 మీ డెట్ ఫండ్‌కు సంబంధించిన పూర్తి వివరాలను మీరు ఇవ్వలేదు. అందుకని డెట్ ఫండ్స్‌కు సంబంధించి సాధారణ అంశాలను వివరిస్తారు. రేట్ల కోత డెట్ ఫండ్స్‌కు ప్రయోజనకరమే. దీర్ఘకాలిక డెట్ స్కీమ్‌లకు రేట్ల కోత ఎంతో  మేలు చేస్తుంది. రేట్లను తగ్గించిన ప్రతిసారి ఈ స్కీమ్‌లు ఎన్‌ఏవీ పెరుగుతూ ఉంటుంది. డెట్ ఫండ్స్‌లో ఇన్వెస్ట్‌మెంట్స్ పూర్తిగా సురక్షితమైనవని చెప్పలేం. డెట్ ఫండ్స్ పనితీరు డెట్ మార్కెట్ పనితీరుతో అనుసంధానమై ఉంటుంది. అయితే ఇవి సాపేక్షకంగా సురక్షితమైనవని చెప్పవచ్చు.
  
 ఫ్రాంక్లిన్ ఇండియా హై గ్రోత్ కంపెనీస్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఏడు నెలలుగా ఇన్వెస్ట్ చేస్తూ ఉన్నాను. ఇప్పటివరకైతే ఇవి మంచి రాబడులను ఇవ్వలేదు. ఇన్వెస్ట్‌మెంట్స్ ఆపేసి నా డబ్బులు వెనక్కి తీసుకుందామనుకుంటున్నాను. అలా చేయమంటారా? లేక సిప్‌ను కొనసాగించమంటారా?
  - ప్రియ, సికింద్రాబాద్  
  
 స్వల్పకాలిక పనితీరు ఆధారంగా నిర్ణయాలు తీసుకోకూడదు. ఈక్విటీల్లో ఇన్వెస్ట్ చేస్తున్నప్పుడు అది సరైన పెట్టుబడి వ్యూహం కాదు. ఇక ఫ్రాంక్లిన్ ఇండియా హై గ్రోత్ కంపెనీస్ ఫండ్ అనేది ఫైవ్ స్టార్ రేటింగ్ ఉన్న మల్టీ క్యాప్ స్కీమ్. మూడు, ఐదేళ్ల కాలానికి ఈ విభాగానికి చెందిన మ్యూచువల్ ఫండ్స్‌లో మంచి పనితీరు కనబరిచిన ఫండ్ ఇదే. ఈ ఫండ్ ట్రాక్ రికార్డ్ కూడా చాలా బాగుంది. మంచి రాబడులు ఇవ్వగలిగిన సత్తా కూడా ఈ ఫండ్‌కు ఉంది. ఎలాంటి ఆందోళన, సందేహాలు, అనుమానాలు లేకుండా ఈ ఫండ్‌లో సిప్‌ను కొనసాగించండి.


 ఎస్‌బీఐ స్మాల్ అండ్ మిడ్‌క్యాప్ ఫండ్‌లో నాకు  చెప్పుకోదగ్గ స్థాయిలో ఇన్వెస్ట్‌మెంట్స్ ఉన్నాయి. ఈ కేటగిరిలో మంచి పనితీరును కనబరిచిన ఫండ్స్‌లో ఇదొకటి. అయితే ఈ ఫండ్‌లో తాజా ఇన్వెస్ట్‌మెంట్స్‌ను ఆపేశారని విన్నాను. ఒక మ్యూచువల్ ఫండ్  ఇలా పెట్టుబడులను ఆపేయవచ్చా? ఈ కేటగిరిలోని ఇతర ఫండ్స్-డీఎస్‌పీ బ్లాక్‌రాక్ మైక్రో క్యాప్ ఫండ్, తదితర ఫండ్స్‌ను తమ స్కీమ్‌లను కొనసాగిస్తున్నాయి. ఈ ఫండ్స్ తమ స్కీమ్స్‌ను కొనసాగిస్తుండగా, ఎస్‌బీఐ స్మాల్ అండ్ మిడ్‌క్యాప్ ఫండ్ తాజాగా ఇన్వెస్ట్‌మెంట్స్‌ను తీసుకోవడం ఎందుకని ఆపేసింది?               - నవీన్ సాయి, విజయవాడ
  
 ఎస్‌బీఐ స్మాల్ అండ్ మిడ్ క్యాప్ ఫండ్ తాజా ఇన్వెస్ట్‌మెంట్స్ ఆపేయడం వల్ల మీ ఇన్వెస్ట్‌మెంట్స్‌పై ఎలాంటి ప్రతికూల ప్రభావం ఉండదు. రూ.750 కోట్ల వరకూ తమ కెపాసిటీ అని ఫండ్ తన ఆఫర్ డాక్యుమెంట్‌లో పేర్కొంది. ఈ టార్గెట్‌కు ఈ ఫండ్ మెల్లగా చేరుకుంటోంది. అందుకనే ఈ స్కీమ్ తాజాగా ఇన్వెస్ట్‌మెంట్స్‌ను తీసుకోవడం ఆపేసింది.
 
 పరిమితంగా ఉండే  స్మాల్ అండ్ మిడ్‌క్యాప్ స్టాక్స్‌తో ఇంత ఇంత భారీ పెట్టుబడులతో మంచి అవకాశాలను పొందడం కొంచెం కష్టమేననని ఈ ఫండ్ భావిస్తున్నట్లు కనిపిస్తోంది. ఇలా కొన్నిమిడ్‌క్యాప్ ఫండ్స్ తాజా ఇన్వెస్ట్‌మెంట్స్‌ను తీసుకోవడం ఆపేయడం అసాధారణమేమీ కాదు. గతంలో ఐడీఎఫ్‌సీ ప్రీమియర్ ఈక్విటీ ఫండ్, ఫ్రాంక్లిన్ ప్రైమా ఫండ్, హెచ్‌ఎస్‌బీసీ మిడ్‌క్యాప్ ఫండ్, రిలయన్స్ గ్రోత్ ఫండ్‌లు ఇలానే తాజా పెట్టుబడులను తీసుకోవడం కొంత కాలం పాటు ఆపేశాయి.
  
 డెట్ ఫండ్‌కు, రికరింగ్ డిపాజిట్‌కు మధ్య తేడా ఏమిటి? దేంట్లో ఇన్వెస్ట్ చేస్తే మంచి రాబడులు వస్తాయి? ప్రస్తుతం నేను ప్రతీ నెలా రూ.3,000 చొప్పున ఆర్‌డీలో ఇన్వెస్ట్ చేస్తున్నాను. ఏడాది లేదా రెండేళ్ల కాలానికి చిన్న మొత్తాల్లో ఇన్వెస్ట్ చేద్దామనుకుంటున్నాను. మంచి రాబడులు వచ్చే మార్గాలను సూచించండి.
      - కళ్యాణి, కరీంనగర్
 
 రికరింగ్ డిపాజిట్, డెట్ మ్యూచువల్ ఫండ్స్‌ను పోల్చడానికి వీలులేదు. రికరింగ్ డిపాజిట్‌లో ప్రతి నెలా కొంత మొత్తాన్ని పొదుపు చేసుకోవచ్చు. ఈ డిపాజిట్ సురక్షితమైనది.  అంతేకాకుండా నిర్ణీత మొత్తంలో వడ్డీ కూడా వస్తుంది. డెట్ మార్కెట్‌లో ఇన్వెస్ట్ చేయడానికి డెట్ మ్యూచువల్ ఫండ్ ఒక సాధనం.
 
 డెట్ మ్యూచువల్ ఫండ్స్ ఇన్వెస్ట్‌మెంట్స్‌పై ఖచ్చితంగా వచ్చే నిర్ణీతమైన రాబడులంటూ ఏమీ ఉండవు. డెట్ మార్కెట్ పనితీరును బట్టే ఈ డెట్ మ్యూచువల్ ఫండ్ ఇన్వెస్ట్‌మెంట్స్ రాబడులు ఉంటాయి. చిన్న మొత్తమే ఇన్వెస్ట్ చేయాలనుకుంటున్నారు. కాబట్టి ఆర్‌డీ కన్నా డెట్ మ్యూచువల్ ఫండ్స్‌లో ఇన్వెస్ట్ చేస్తే వచ్చే రాబడులు చెప్పుకోదగిన స్థాయిలో ఉండవు.
 
 పన్ను భారాన్నీ కూడా దృష్టిలో పెట్టుకుంటే పెద్ద తేడా ఏమీ ఉండదు. డెట్ ఫండ్‌లో ఇన్వెస్ట్ చేసిన మొత్తాన్ని మూడేళ్లలోపే ఉపసంహరించుకుంటే పన్ను ప్రయోజనాలేమీ ఉండవు. మూడేళ్లలోపే డెట్ ఇన్వెస్ట్‌మెంట్స్‌ను ఉపసంహరించుకుంటే స్వల్పకాలిక మూలధన లాభాల పన్ను చెల్లించాల్సి ఉంటుంది.
 
 డెట్ ఇన్వెస్ట్‌మెంట్స్‌పై వచ్చే రాబడులను మీ మొత్తం ఆదాయానికి  కలిపి మీ ఆదాయపు పన్ను స్లాబ్‌ననుసరించి పన్ను చెల్లించాల్సి ఉంటుంది. ఒక వేళ డెట్ ఫండ్ ఇన్వెస్ట్‌మెంట్స్‌ను మూడేళ్ల తర్వాత ఉపసంహరించుకుంటే, 20 శాతం దీర్ఘకాల మూలధన లాభాల పన్ను (ఇండేక్సేషన్‌తో ప్రయోజనంతోకలిపి) చెల్లించాల్సి  ఉంటుంది.
  
 నాకు ఇద్దరు కూతుళ్లు. పెద్ద పాప కోసం ఎల్‌ఐసీ మ్యారేజ్ ఎండోమెంట్ పాలసీ తీసుకున్నాను. అంతేకాకుండా రెండు సిస్టమాటిక్ ఇన్వెస్ట్‌మెంట్ ప్లాన్(సిప్)లో కొంత మొత్తం ఇన్వెస్ట్ చేస్తున్నాను. ఇక నా రెండో కూతురు కోసం సాంప్రదాయ పాలసీలు తీసుకోవాలనుకోవడం లేదు. సిప్-ఎస్‌టీపీ(సిస్టమాటిక్ ట్రాన్స్‌ఫర్ ప్లాన్) ల మేళవింపుతో ఇన్వెస్ట్ చేయాలనుకుంటున్నాను. 15 ఏళ్ల కాలానికి మంచి రాబడులు సాధించాలని నా లక్ష్యం. రెండో పాపకు జీవిత బీమా తీసుకోవాలనుకుంటున్నాను. పిల్లల కోసం టర్మ్ ఇన్సూరెన్స్ వంటి పాలసీలు ఏమైనా ఉన్నాయా?
  - నందకుమార్, హైదరాబాద్
  
 పిల్లలకు బీమా కవర్ అవసరం అని మేమనుకోవడం లేదు. ఆదాయం నష్టపోతే దానికి పరిహారం అందించేదే బీమా. పిల్లలు ఏమీ సంపాదించరు. కాబట్టి వారి విషయంలో ఎలాంటి ఆదాయ నష్టం ఉండదు. బిడ్డ మరణిస్తే, కలిగే ఉద్వేగ నష్టానికి బీమా ఎలాంటి పరిహారం అందివ్వలేదు. మీ పాప కోసం పాలసీ తీసుకోవాలనుంటే, తగినంత లైఫ్ కవర్‌తో టర్మ్ ఇన్సూరెన్స్ పాలసీ తీసుకోండి. చిన్న మొత్తంలో ప్రీమియమ్‌లు చెల్లించడం ద్వారా పెద్ద మొత్తంలో బీమా కవర్‌ను పొందవచ్చు.
 
 నా కుటుంబం భవిష్యత్ అవసరాల కోసం మ్యూచువల్ ఫండ్స్‌లో ఇన్వెస్ట్ చేద్దామనుకుంటున్నాను. ఐదు నుంచి పదేళ్ల పాటు ఇన్వెస్ట్ చేయగలను.  మంచి రాబడులు పొందడం కోసం ఎలాంటి వ్యూహాలు అనుసరించాలి? ఎలాంటి జాగ్రత్తలు తీసుకోవాలి?
  - భార్గవ, విశాఖపట్టణం
  
 మ్యూచువల్ ఫండ్స్‌లో పెట్టుబడితో మంచి రాబడులు రావాలంటే... వాటిల్లో కనీసం 5-7 ఏళ్ల పాటు ఇన్వెస్ట్ చేయాల్సి ఉంటుంది. మంచి మ్యూచువల్ ఫండ్స్‌ను రెండు, లేదా మూడింటిని ఎంచుకొని సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయండి. మీకు మ్యూచువల్ ఫండ్స్ కొత్త అయితే మంచి బ్యాలెన్స్‌డ్ ఫండ్స్‌ను ఎంచుకోండి.  బ్యాలెన్స్‌డ్ ఫండ్స్ డెట్, ఈక్విటీల కాబినేషన్‌లో ఇన్వెస్ట్ చేస్తాయి. ఫలితంగా మార్కెట్ ఒడిదుడుకుల నుంచి రక్షణ ఉంటుంది.
  
 - ధీరేంద్ర కుమార్
 సీఈవో, వ్యాల్యూ రీసెర్చ్


 నా సేవింగ్స్ బ్యాంక్ అకౌంట్‌లో పెద్ద మొత్తంలోనే సొమ్ములున్నాయి. ఈ సొమ్ములను మంచి రాబడులు వచ్చే మార్గాల్లో ఇన్వెస్ట్ చేద్దామనుకుంటున్నాను. నా ఇన్వెస్ట్‌మెంట్స్‌కు భద్రత ఉండాలి. ఎలాంటి పన్నుల భారం ఉండకూడదు, లేదంటే తక్కువ పన్నులుండాలి. నా ఇన్వెస్ట్‌మెంట్స్‌ను ఎప్పుడు కావాలంటే అప్పుడు క్యాష్ చేసుకునేలా ఉండాలి.  ఈ విషయాలన్నింటిని పరిగణనలోకి తీసుకొని నాకు తగిన సూచనలివ్వండి.
  - చక్రవర్తి, గుంటూరు
  
 తక్షణం అవసరం లేని పక్షంలో బ్యాంక్‌లో డిపాజిట్ల రూపంలో ఇంత పెద్ద మొత్తం ఉంచుకోవడం సరైనది కాదు. ద్రవ్యోల్బణాన్ని పరిగణనలోకి తీసుకుంటే ఈ డిపాజిట్లపై వచ్చే రాబడులు పెద్దగా ఉండవని చెప్పవచ్చు. పైగా బ్యాంక్ డిపాజిట్లపై పన్ను ప్రయోజనాలు కూడా తక్కువగానే ఉంటాయి. ఇప్పటికిప్పుడు అవసరం లేని డబ్బులను మంచి రాబడులు వచ్చే ఇన్వెస్ట్‌మెంట్ సాధనాల్లో ఇన్వెస్ట్ చేయాలి. మీరు ఇన్వెస్ట్ చేసే మొత్తాన్ని, కాలాన్ని, మీరు భరించగలిగే రిస్క్‌ను పరిగణనలోకి తీసుకొని ఇన్వెస్ట్ చేయాలి.
 
 మీరు ఇన్వెస్ట్ చేయాలనుకుంటున్న కాలం మూడేళ్లలోపు ఉంటే, డెట్ ఇన్వెస్ట్‌మెంట్స్‌ను ఎంచుకోవాలి. ఐదేళ్లు, అంతకు మించి ఇన్వెస్ట్ చేయాలనుకుంటే షేర్లలో ఇన్వెస్ట్ చేయడాన్ని పరిశీలించవచ్చు. బ్యాంకు డిపాజిట్లలోలాగా భద్రంగా, లిక్విడిటీతో ఉండే ఇన్వెస్ట్‌మెంట్ సాధనాలు దాదాపు లేవు. లిక్విడిటీ, భద్రత కావాలనుకుంటే, మీ సొమ్ములను బ్యాంక్ డిపాజిట్లలోనే కొనసాగించండి. కొంత రిస్క్ తీసుకోగలిగితే, లిక్విడ్ స్కీమ్స్‌ను పరిశీలించవచ్చు. లిక్విడ్ స్కీమ్స్ మరీ ఏమంత రిస్క్‌గా ఉండవనే చెప్పవచ్చు. ఒక్క రోజులోనే డబ్బులను విత్‌డ్రా చేసుకోవచ్చు. మార్కెట్ రాబడులే వచ్చే అవకాశాలున్నాయి. ఒక ఏడాది పాటు ఇన్వెస్ట్ చేయాలనుకుంటే ఆల్ట్రా షార్ట్-టర్మ్ బాండ్ ఫండ్స్‌లో ఇన్వెస్ట్ చేయాలి.
  
 నాకు వచ్చే ఆదాయాన్ని పరిగణనలోకి తీసుకొని రూ.50 లక్షల టర్మ్ ఇన్సూరెన్స్‌కు మాత్రమే అర్హత ఉందని ఒక బీమా సంస్థ పేర్కొంది. నేను రూ. కోటి టర్మ్ పాలసీ చెల్లించడానికి సిద్ధంగా ఉన్నానని చెప్పినా కూడా రూ.50 లక్షల టర్మ్ ఇన్సూరెన్స్ పాలసీ మాత్రమే ఇస్తామని ఆ కంపెనీ తెలిపింది. నేను రూ.50 లక్షల టర్మ్ పాలసీలను రెండు తీసుకుందామనుకుంటున్నాను. అలా తీసుకోవచ్చా? ఇలా తీసుకున్న పక్షంలో క్లెయిమ్ చేసుకునేటప్పుడు ఏమైనా సమస్యలు వస్తాయా?
  - సాగర్, వరంగల్
  
 ఆ బీమా సంస్థను కాకుండా మరో బీమా సంస్థను సంప్రదించండి. టర్మ్ ప్లాన్‌కు దరఖాస్తు చేసేపటప్పుడు ఏ బీమా సంస్థ అయినా ప్రస్తుతం మీ దగ్గరున్న బీమా పాలసీల గురించి వాకబు చేస్తాయి. అప్పుడు మీరు మీ బీమా పాలసీల గురించి చెప్పండి. మీరు రూ.50 లక్షల టర్మ్ పాలసీ తీసుకొని ఉండి కూడా, మరో రూ.50 లక్షల టర్మ్ పాలసీ కోసం దరఖాస్తు చేస్తే, ఇవ్వాలా, వద్దా అనేది సదరు బీమా సంస్థ నిర్ణయించుకుంటుంది. ఇక క్లెయిమ్‌ల విషయానికొస్తే, క్లెయిమ్ సరిఅయినది అయితే, నామినీకి రెండు బీమా సంస్థలు బీమా మొత్తాన్ని చెల్లిస్తాయి. క్లెయిమ్ చేసేటప్పుడు ఎలాంటి సమస్యలు ఉండకూడదనుకుంటే, మీకు తెలిసిన అన్ని వివరాలను బీమా పాలసీ తీసుకునేటప్పుడు వెల్లడించడం మంచిది.
  
 నేను ఇటీవలనే మ్యూచువల్ ఫండ్స్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం ప్రారంభించాను. మ్యూచువల్ ఫండ్స్ ద్వారా వచ్చే స్వల్ప, దీర్ఘకాలిక లాభాలపై పన్నులు ఎలా ఉంటాయి. పన్నులు ఆదా చేస్తూ పటిష్టమైన పోర్ట్‌ఫోలియోను ఎలా ఏర్పాటు చేసుకోవాలో సూచిస్తారా ?                 - శ్రీవల్లి, హైదరాబాద్
  
 ఈక్విటీ మ్యూచువల్ ఫండ్స్ ద్వారా వచ్చే రాబడులపై విధించే పన్నులకు, డెట్ ఫండ్స్ ద్వారా వచ్చే రాబడులపై విధించే పన్నులకు తేడా ఉంటుంది. డెట్ ఫండ్స్‌తో పోల్చితే ఈక్విటీ ఫండ్స్‌లో ఇన్వెస్ట్ చేయడం వల్ల పన్ను ప్రయోజనాలు అధికంగా లభిస్తాయని చెప్పవచ్చు. ఈక్విటీ మ్యూచువల్ ఫండ్స్‌లో ఇన్వెస్ట్‌మెంట్స్‌ను ఏడాది తర్వాత విక్రయిస్తే మీరు ఎలాంటి పన్నులు చెల్లించాల్సిన పనిలేదు. ఈక్విటీ మ్యూచువల్ ఫండ్స్‌లో ఏడాదికి మించిన ఇన్వెస్ట్‌మెంట్స్‌పై వచ్చే లాభాలను దీర్ఘకాలిక మూలధన లాభాలుగా పరిగణిస్తారు.
 
 ఈక్విటీ ఇన్వెస్ట్‌మెంట్స్‌పై దీర్ఘకాలిక మూలధన లాభాలపై ఎలాంటి పన్ను ఉండదు. ఒకవేళ మీరు ఈక్విటీ మ్యూచువల్ ఫండ్స్‌ను ఏడాదిలోపే విక్రయిస్తే వాటిని స్వల్పకాలిక మూలధన లాభాలుగా పరిగణిస్తారు. ఈక్విటీ మ్యూచువల్ ఫండ్స్‌పై స్వల్పకాలిక మూలధన లాభాల పన్ను 15 శాతంగా చెల్లించాల్సి ఉంటుంది. ఇక డెట్ ఫండ్స్ విషయానికొస్తే మూడేళ్లలోపు ఈ ఫండ్ యూనిట్లను విక్రయిస్తే స్వల్పకాలిక మూలధన లాభాల పన్ను చెల్లించాల్సి ఉంటుంది.
 
 మీ ఆదాయపు పన్ను స్లాబ్‌నునుసరించి ఈ పన్ను ఉంటుంది. డెట్ ఫండ్స్‌లో ఇన్వెస్ట్‌మెంట్స్ మూడేళ్లు మించితే, 20 శాతం దీర్ఘకాలిక మూలధన లాభాల పన్ను (ఇండెక్సేషన్‌తో కలిపి) చెల్లించాల్సి ఉంటుంది.  ఇన్వెస్టర్లు డివిడెండ్లపై ఎలాంటి పన్నులు చెల్లించాల్సిన పనిలేదు. అయితే డివిడెండ్‌లకు సంబంధించి పన్నులు చెల్లించాల్సిన బాధ్యత మ్యూచువల్ ఫండ్ సంస్థలకు ఉంటుంది. ఆ మేరకు రాబడులపై ప్రభావం ఉంటుంది.
  
 మూడేళ్ల ఇన్వెస్ట్‌మెంట్ కాలానికి డెట్ ఫండ్స్‌లోనూ, ఐదేళ్లకు మించిన ఇన్వెస్ట్‌మెంట్ కాలానికి ఈక్విటీ ఫండ్స్‌లోనూ ఇన్వెస్ట్ చేస్తే పన్ను ప్రయోజనాలతో పాటు మంచి రాబడులు కూడా పొందవచ్చు. ఎలాంటి పన్నులు చెల్లించకపోవడం, ఒకవేళ పన్నులు చెల్లించాల్సి ఉంటే, వీలైనంత తక్కువగా పన్నులు చెల్లించడం.. మంచి ఇన్వెస్ట్‌మెంట్ వ్యూహాల్లో ఒకటి. అయితే పన్నులు ఆదా చేయడమే ప్రధాన లక్ష్యంగా ఇన్వెస్ట్‌మెంట్ నిర్ణయాలు ఉండకూడదు. మీ ఆర్థిక లక్ష్యాలు, మీరు భరించగలిగే రిస్క్‌ను కూడా పరిగణనలోకి తీసుకోవాలి.


 నేనొక ఈక్విటీ మ్యూచువల్ ఫండ్ డివిడెండ్ ఆప్షన్ స్కీమ్‌లో ఇన్వెస్ట్ చేశాను. ఇప్పుడు ఇదే స్కీమ్ గ్రోత్ ఆప్షన్ స్కీమ్‌కు మారాలనుకుంటున్నాను. ఏమైనా ఎగ్జిట్ లోడ్ చెల్లించాల్సి ఉంటుందా? అలాగే ఏదైనా ఈక్విటీ ఫండ్ గ్రోత్ ఆప్షన్ నుంచి డివిడెండ్ ఆప్షన్‌కు మారినా కూడా ఎగ్జిట్ లోడ్ చెల్లించాల్సి ఉంటుందా? వివరించగలరు ఎగ్జిట్ లోడ్ టైమ్ ఫ్రేమ్‌లోగా ఈ మార్పులు జరిగినా కూడా ఎగ్జిట్ లోడ్ చెల్లించాల్సిందేనా ?              
 - సీతారామ్, వైజాగ్
  
 ఏదైనా మ్యూచువల్ ఫండ్ స్కీమ్‌కు సంబంధించి డివిడెండ్ ఆప్షన్ నుంచి గ్రోత్ ఆప్షన్‌కు మారినా, లేక గ్రోత్ ఆప్షన్ నుంచి డివిడెండ్ ఆప్షన్‌కు మారినా... దీన్ని మ్యూచువల్ ఫండ్ స్కీమ్ నుంచి ఇన్వెస్ట్‌మెంట్స్ ఉపసంహరించి, కొత్త స్కీమ్‌లో ఇన్వెస్ట్ చేసినట్లుగా భావిస్తారు. అప్పుడు ఎగ్జిట్ లోడ్ తప్పక చెల్లించాల్సి ఉంటుంది. ఎగ్జిట్ లోడ్ టైమ్ ఫ్రేమ్ ఉన్నప్పటికీ ఈ ఎగ్జిట్ లోడ్ తప్పదు.
  
 నేనొక డెట్ ఫండ్‌లో దీర్ఘకాలం పాటు ఇన్వెస్ట్ చేద్దామనుకుంటున్నాను. నేను 20 శాతం ట్యాక్స్ బ్రాకెట్‌లో ఉన్నాను. ఆదాయపు పన్ను భారం పోను డెట్ ఫండ్స్ రాబడులు ఫిక్స్‌డ్ డిపాజిట్ల కంటే ఎక్కువగానే వస్తాయా? డెట్ ఫండ్స్‌కు ఏమైనా లాకిన్ పీరియడ్ ఉంటుందా?  
 - మహేందర్, నిజామాబాద్
  
 ప్రస్తుత పరిస్థితుల్లో దీర్ఘకాలిక డెట్ మ్యూచువల్ ఫండ్ స్కీమ్‌లు ఆకర్షణీయంగా ఉన్నాయి. మీ ఇన్వెస్ట్‌మెంట్ కాలాన్ని పరిగణనలోకి తీసుకొని డెట్ మ్యూచువల్ ఫండ్‌ను ఎంచుకోవాలి. కొన్ని రోజులు, వారాలు మాత్రమే ఇన్వెస్ట్ చేయాలనుకుంటే లిక్విడ్ మ్యూచువల్ ఫండ్‌లో ఇన్వెస్ట్ చేయాలి. కొన్ని నెలల కోసమైతే, ఆల్ట్రా షార్ట్‌టెర్మ్ మ్యూచువల్ ఫండ్‌లో ఇన్వెస్ట్ చేస్తే మంచిది. ఏడాది లేదా రెండేళ్ల కాలానికి షార్ట్-టెర్మ్ ఫండ్‌లో ఇన్వెస్ట్ చేస్తే సరిపోతుంది. 3-5 ఏళ్ల కాలానికి దీర్ఘకాలిక డెట్ మ్యూచువల్ ఫండ్‌లో ఇన్వెస్ట్ చేయాలి. ఇలా కాలాన్ని బట్టి వివిధ రకాల ఫండ్స్‌ను ఎంచుకోవాలి.
 
 అలా కాకుండా ఇన్వెస్ట్ చేస్తే మార్కెట్ ఒడిదుడుకుల కారణంగా మీకు నష్టాలు వచ్చే అవకాశాలు కూడా ఉన్నాయి. ఫిక్స్‌డ్ డిపాజిట్ల కంటే డెట్ మ్యూచువల్ ఫండ్స్ మంచి రాబడులనే ఇస్తాయని చెప్పవచ్చు. అయితే ఫిక్స్‌డ్ డిపాజిట్లలాగా డెట్ మ్యూచువల్ ఫండ్స్ నిర్దేశిత రాబడులను ఇవ్వవు. డెట్ మార్కెట్‌లో ఇన్వెస్ట్‌మెంట్స్ పనితీరు ఆధారంగా రాబడులు వస్తాయి. ఫిక్స్‌డ్ మెచ్యూరిటీ ప్లాన్స్(ఎఫ్‌ఎంపీ) కాకుండా, డెట్ మ్యూచువల్ ఫండ్స్‌కు ఎలాంటి లాక్ ఇన్ పీరియడ్ లేదు. అయితే ముందుగానే ఉపసంహరించుకుంటే, అధిక పన్నులు చెల్లించాల్సి రావచ్చు.
 
 డెట్ మ్యూచువల్ ఫండ్స్‌లో మూడేళ్లకు మించి ఇన్వెస్ట్‌మెంట్స్‌ను కొనసాగిస్తే వాటిపై వచ్చే లాభాలను దీర్ఘకాలిక మూలధన లాభాలుగా వ్యవహరిస్తారు. ఇండెక్సేషన్ బెనిఫిట్‌తో వీటిపై 20% దీర్ఘకాలిక మూలధన లాభాల పన్ను చెల్లించాల్సి ఉం టంది. మూడేళ్లలోపే డెట్ మ్యూచువల్ ఫండ్స్‌లో ఇన్వెస్ట్‌మెంట్స్‌ను ఉపసంహరించకుంటే  ఈ ఇన్వెస్ట్‌మెంట్స్‌పై వచ్చే రాబడులను స్వల్పకాలిక మూల ధన లాభాలుగా వ్యవహరిస్తారు. ఈ ఇన్వెస్ట్‌మెం ట్స్‌పై వచ్చిన రాబడులను మీ ఆదాయానికి కలిపి మీ ఆదాయపు పన్ను స్లాబ్‌ననుసరించి పన్ను విధిస్తారు.
  
 నేను ఎయిర్‌ఫోర్స్‌లో పనిచేస్తున్నాను. వచ్చే ఏడాది జూలైలో రిటైరవుతున్నాను. రిటైర్మెంట్ బెనిఫిట్స్ రూ.17 లక్షల వరకూ,  పెన్షన్ నెలకు రూ.15,999 చొప్పున వస్తాయి.  నా కొడుకు విద్యావసరాల నిమిత్తం 2012లో మ్యాక్స్ లైఫ్ లైఫ్ గెయిన్ ప్లస్ స్కీమ్‌లో చేరాను. 25 ఐదేళ్ల కాలపరిమితి (2037) వరకూ ఉన్న ఈ ప్లాన్ వార్షిక ప్రీమియం రూ.50,000. మొత్తం ఆరు వార్షిక ప్రీమియమ్‌లకు గాను ఇప్పటిదాకా నాలుగు ప్రీమియమ్‌లు చెల్లించాను. 2016 మార్చిలో ఒకటి, 2017 మార్చిలో మరొకటి చొప్పున చెల్లించాల్సి ఉంది. అయితే ఇటీవల నేను వాకబు చేస్తే నా ఇన్వెస్ట్‌మెంట్స్ విలువ ప్రస్తుతానికి రూ.75,000గా ఉన్నట్లు తెలిపారు. ఇప్పుడు నేను ఏమి చేయాలి?          
 - రామకృష్ణ, హైదరాబాద్
  
 మీరు తీసుకున్నది బీమా కమ్ ఇన్వెస్ట్‌మెంట్ ప్లాన్. ఈ తరహా ప్లాన్‌లు తగిన బీమా కవర్‌ను ఇవ్వలేవు, అలాగే సరైన రాబడులు కూడా రావు. మ్యాక్స్ లైఫ్ లైఫ్ గెయిన్ ప్లస్ అనేది ఒక ఎండోమెంట్ ప్లాన్. పరిమిత కాలం పాటు ప్రీమియమ్‌లు చెల్లించాల్సి ఉంటుంది. ఈ తరహా ప్లాన్‌లు చార్జీల వివరాలను వెల్లడించవు.  ఇన్వెస్ట్‌మెంట్ ప్రణాళికల గురించి ఇన్వెస్టర్లకు పారదర్శకమైన వివరాలేవీ ఉండవు. ఈ పాలసీని మీరు కనుక ఇప్పుడు సరెండర్ చేస్తే మీకు భారీ నష్టాలు వస్తాయి.
 
 మొత్తం చెల్లించిన ప్రీమియమ్‌ల్లో తొలి ప్రీమియమ్‌ను తీసివేయగా వచ్చే విలువలో 30% మాత్రమే సరెండర్ విలువగా మీకు లభిస్తుంది. అయితే ఈ ప్లాన్‌ను సరెండర్ చేయడం వల్ల ఒక అధ్వాన ఇన్వెస్ట్‌మెంట్ నుంచి బైటపడగలుగుతారు. అయితే ఈ ప్లాన్‌ను సరెండర్ చేసేముందు, తగిన జీవిత బీమా కవర్ ఉందో లేదో చెక్ చేసుకోండి. ఒక వేళ లేని పక్షంలో టర్మ్ జీవిత బీమా కవర్‌ను తీసుకోండి. మీ బిడ్డ విద్యావసరాలు వంటి భవిష్యత్ ఆర్థిక లక్ష్యాల కోసం బీమా కమ్ ఇన్వెస్ట్‌మెంట్ ప్లాన్‌ల్లో ఎప్పుడూ ఇన్వెస్ట్ చేయకండి. దీర్ఘకాల ఆర్థిక లక్ష్యాల కోసం ఈక్విటీ మ్యూచువల్ ఫండ్‌లో ఇన్వెస్ట్ చేస్తే మంచి రాబడులు వస్తాయి.


 నేనొక ప్రభుత్వ ఉద్యోగిని. మ్యూచువల్ ఫండ్స్ స్కీమ్స్‌లో ఇన్వెస్ట్ చేద్దామనుకుంటున్నాను. మ్యూచువల్ ఫండ్ స్కీమ్స్‌లో నేరుగా ఇన్వెస్ట్ చేయవచ్చా ? ఏజెంట్లు, బ్రోకరేజ్ చార్జీలు వంటి బాదరబందీలేమీ లేకుండా ఇలా నేరుగా ఇన్వెస్ట్ చేసే అవకాశముందా? వివరించండి?
  - మార్కండేయ, విశాఖపట్టణం
  
 మ్యూచువల్ ఫండ్ స్కీమ్స్‌కు సంబంధించి డెరైక్ట్ ప్లాన్స్‌లో నేరుగా ఇన్వెస్ట్ చేయవచ్చు. ఈ డెరైక్ట్ ప్లాన్‌లను మార్కెట్ నియంత్రణ సంస్థ సెబి 2013, జనవరిలో అందుబాటులోకి తెచ్చింది. ఈ డెరైక్ట్ ప్లాన్స్‌లో ఏజెంట్లు, దళారీల ప్రమేయం లేకుండా మీరు నేరుగా ఇన్వెస్ట్ చేయవచ్చు. ఫలితంగా ఏజెంట్లకు చెల్లించే కమీషన్ ఆదా అవుతుంది. దీంతో ఎక్స్‌పెన్స్ రేషియో తక్కువగా ఉండి ఇన్వెస్టర్లకు ఎక్కువ రాబడులు వస్తాయి. అన్ని మ్యూచువల్ ఫండ్ సంస్థలు రెగ్యులర్, డెరైక్ట్ ప్లాన్‌లను ఆఫర్ చేస్తున్నాయి.
  
 ఎస్‌బీఐ ఫార్మా ఫండ్‌లో నెలకు రూ.10,000 చొప్పున ఏడాది పాటు ఇన్వెస్ట్ చేద్దామనుకుంటున్నాను. నేను సొంతంగా ఇన్వెస్ట్ చేయడం మంచిదా ? లేక సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం మంచిదా? ఏ విధంగా ఇన్వెస్ట్ చేస్తే నాకు ప్రయోజనకరం?
  - మందాకిని, హైదరాబాద్
  
 నెలకు నిర్ణీత మొత్తం-మీరు ఎప్పుడు కావాలనుకుంటే అప్పుడు  ఇన్వెస్ట్ చేసినా, లేకుంటే సిప్ విధానంలో(ప్రతి నెలా ఒక నిర్ణీత తేదీన) ఇన్వెస్ట్ చేసినా.. ఏ విధంగా ఇన్వెస్ట్ చేసినా మీకు దక్కే ప్రయోజనాలు దాదాపు ఒక్కటే. మార్కెట్ స్థితిగతులను బట్టి నెలలో ఎప్పుడు ఇన్వెస్ట్ చేయాలో నిర్ణయించేంత తీరిక, ఓపిక సాధారణ ఇన్వెస్టర్లకు ఉండవు. అలా కాకుండా మీకు ఆసక్తి ఉండి, నెల మొత్తంలో ఎప్పుడు ఇన్వెస్ట్ చేయాలో సరైన నిర్ణయం తీసుకోగలిగితే మొదటి విధానం మంచిదే. అయితే అది కొంచెం కష్టసాధ్యమైన విషయమే. ఈ బాదరబందీలేమీ లేకుండా సిప్ విధానాన్నీ ఎంచుకోవచ్చు. మీరు ఎంచుకున్న మ్యూచువల్ ఫండ్ స్కీమ్‌కు సంబంధించి డెరైక్ట్ ప్లాన్‌లో ఇన్వెస్ట్ చేస్తే మీకు ఏజెంట్ల కమీషన్ ఖర్చు ఉండదు. తక్కువ ఎక్స్‌పెన్స్ రేషియో కారణంగా ఎక్కువ రాబడులు వచ్చే అవకాశాలుంటాయి.
  
 నెలకు రూ.5,000 చొప్పున ఫ్రాంక్లిన్ ఇన్ఫోటెక్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్ (సిప్) విధానంలో ఇన్వెస్ట్ చేయాలనుకుంటున్నాను. ఫ్రాంక్లిన్ ట్యాక్స్‌షీల్డ్ ఫండ్‌లో ఇన్వెస్ట్ చేస్తే సెక్షన్ 80సీ కింద పన్ను మినహాయింపులు లభిస్తాయి. అలాగే ఫ్రాంక్లిన్ ఇన్ఫోటెక్ ఫండ్‌లో ఇన్వెస్ట్ చేస్తే కూడా  పన్ను మినహాయింపులు లభిస్తాయా?
  - శశి, హైదరాబాద్
  
 ఫ్రాంక్లిన్ ఇన్ఫోటెక్ ఫండ్ అనేది టెక్నాలజీ (ఐటీ) స్కీమ్. ఈ మ్యూచువల్ ఫండ్ స్కీమ్‌లో ఇన్వెస్ట్ చేయడం వల్ల ఆదాయపు పన్ను చట్టం, సెక్షన్ 80సీ కింద పన్ను మినహాయింపులు లభించవు. ఫ్రాంక్లిన్ ట్యాక్స్‌షీల్డ్ అనేది ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్). ఇది ట్యాక్స్ ప్లానింగ్ మ్యూచువల్ ఫండ్ స్కీమ్ కిందకు వస్తుంది. ఈ ఫండ్‌లో ఇన్వెస్ట్ చేయడం వల్ల పన్ను మినహాయింపులు పొందవచ్చు. అయితే ఈ తరహా ట్యాక్స్ ప్లానింగ్ మ్యూచువల్ ఫండ్ స్కీమ్‌లకు మూడు సంవత్సరాల లాక్ ఇన్ పీరియడ్ ఉంటుంది.
  
 నేను ప్రైవేట్ రంగంలో పనిచేస్తున్నాను. నా వయ స్సు 35 సంవత్సరాలు. 32 సంవత్సరాల నా భార్య ఒక ప్రైవేట్ స్కూల్‌లో టీచర్‌గా పనిచేస్తోంది. మాకు రెండేళ్ల పాప ఉంది. నాకు,  నా కుటుంబానికి రూ.5 లక్షల ఫ్యామిలీ హెల్త్ ఇన్సూరెన్స్ కవర్‌ను తీసుకుందామనుకుంటున్నాను. ఈ బీమా కవర్ సరిపోతుందా? నా అవసరాలకు తగిన హెల్త్ ఇన్సూరెన్స్ పాలసీలను సూచించండి?
 - శరత్ చంద్ర, చిత్తూరు
 
  మీలాంటి యువ కుటుంబాలు లైఫ్‌టైమ్ రెన్యువల్ ఆప్షన్ ఉన్న హెల్త్ ఇన్సూరెన్స్ పాలసీని తీసుకోవాలి. దీంట్లో సబ్-లిమిట్స్, కో పేమెంట్ క్లాజ్ ఉండకూడదు. ఇక మీ అవసరాలను దృష్టిలో పెట్టుకుంటే, అపోలో మ్యూనిక్ ఈజీ హెల్త్ పాలసీ, ఐసీఐసీఐ లాంబార్డ్ ఐహెల్త్.. పాలసీలను పరిశీలించవచ్చు. మీ కుటుంబంలో పెద్ద పెద్ద వ్యాధులు ఉన్న చరిత్ర ఉంటే, క్రిటికల్ ఇల్‌నెస్ కవర్ తప్పకుండా తీసుకోవాలి. మీరు చెప్పిన రూ.5 లక్షల కవర్ ఇప్పటికి సరిపోతుంది.
 
 మీ జీవన శైలి, ప్రస్తుత ఆరోగ్య పరిస్థితులు, వ్యాధులకు సంబంధించి మీ కుటుంబ చరిత్ర, మీ ఆదాయం తదితర అంశాలను పరిగణనలోకి తీసుకొని ఎంత  మొత్తానికి బీమా కవర్ కావాలో మీరే సొంతంగా నిర్ణయించుకోవాలి. బీమా కవర్ పెంచుకోవాలనుకున్నప్పుడల్లా, సూపర్ టాప్ అప్ ప్లాన్‌ను ఎంచుకోండి. అపోలో మ్యూనిక్ ఈజీ హెల్త్ పాలసీకి ఏడాది ప్రీమియం రూ.10,523, ఐసీఐసీఐ లాంబార్డ్ ఐహెల్త్ పాలసీకి ప్రీమియం రూ.11,719గా ఉన్నాయి. రెండేళ్ల ప్రీమియం ఒకేసారి చెల్లిస్తే కొంత డిస్కౌంట్‌ను రెండు పాలసీలు ఆఫర్ చేస్తున్నాయి.


 మా మిత్ర బృందంలో పలువురు సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఆరేళ్ల నుంచి మ్యూచువల్ ఫండ్స్‌లో ఇన్వెస్ట్ చేస్తున్నారు. ఈ ఇన్వెస్ట్‌మెంట్స్‌ను పరిశీలిస్తే, చాలా ఫండ్స్‌కు సంబంధించి ఐదేళ్ల ఇన్వెస్ట్‌మెంట్స్ కంటే మూడేళ్ల ఇన్వెస్ట్‌మెంట్స్ ఎక్కువ రాబడులు వచ్చాయి. అందుకని ప్రతీ మూడేళ్లకొకసారి ఇన్వెస్ట్‌మెంట్స్‌ను ఒక ఫండ్ నుంచి మరో ఫండ్‌కు మార్చితే మంచిదని నేను అనుకుంటున్నాను. నా అభిప్రాయం సరైనదేనా ?
  - వికాస్, హైదరాబాద్
  
 ఒక నిర్దేశిత కాలంలో మ్యూచువల్ ఫండ్స్ ఇన్వెస్ట్‌మెంట్స్‌పై రాబడులు ఆ కాలంలో మార్కెట్ పని తీరును బట్టి ఉంటాయి. మీరు గమనించిన కాలం లో ఐదేళ్ల కాలంలో కంటే మూడేళ్ల కాలంలోనే స్టాక్ మార్కెట్ మంచి లాభాలు గడించి ఉండొచ్చు. అం దుకని ఐదేళ్ల ఇన్వెస్ట్‌మెంట్స్‌పై కంటే మూడేళ్ల ఇన్వెస్ట్‌మెంట్స్‌పైనే అధిక రాబడులు వచ్చి ఉం టాయి.  ఈ విషయం ఆధారం చేసుకొని ఇన్వెస్ట్‌మెంట్స్‌ను ఒక ఫండ్ నుంచి మరో ఫండ్‌కు బదిలీ చేయడం ఎంతమాత్రం సమర్థనీయమైన నిర్ణయం కాదు.
 
 మీరు ఈక్విటీ మ్యూచువల్ ఫండ్స్‌కు సంబంధించి ఇన్వెస్ట్‌మెంట్స్‌ను  బదిలీ చేయాలనుకుంటే,  కేవ లం రెండు సందర్భాలనే పరిగణనలోకి తీసుకోవాలి. మొదటిది మీరు ఇన్వెస్ట్ చేస్తున్న ఫండ్ పని తీరు కనీసం ఒక ఏడాది కాలంలో ఆ కేటగిరీ ఇతర ఫండ్స్ కన్నా చాలా తక్కువగా ఉన్నప్పుడు. ఇక రెండో సందర్భం.. మీ ఆర్థిక లక్ష్యం గడువు కన్నా ఒకటి లేదా రెండు సంవత్సరాలకు ముందు వేరే సాధనాల్లోకి బదిలీ చేయాలి. ఉదాహరణకు మీ కూతురు/కొడుకు ఉన్నత విద్య అనే ఆర్థిక లక్ష్యం కోసం పదేళ్లు ఇన్వెస్ట్ చేస్తున్నారనుకోండి. తొమ్మిది లేదా 8వ సంవత్సరంలోనే ఈ ఇన్వెస్ట్‌మెంట్స్‌ను వేరే సురక్షితమైన సాధనాల్లోకి బదిలీ చేయాలి. ఇలా చేస్తే, ఆ తర్వాత మార్కెట్లో సంభవించే ఆకస్మాత్తు ఒడిదుడుకుల నుంచి రక్షణ పొందవచ్చు.
  
 సీనియర్ సిటిజెన్ సేవింగ్స్ స్కీమ్‌పై 9.3 శాతం రాబడి వస్తోంది. ఈ రాబడులపై టీడీఎస్(మూలం వద్ద పన్ను కోత) ఏమైనా ఉంటుందా? ఈ ఇన్వెస్ట్‌మెంట్స్‌కు కనీస, గరిష్ట కాలం ఎంత ? మెచ్యూరిటీకి ముందే ఈ స్కీమ్ నుంచి వైదొలగవచ్చా?  ఇలా ముందుగానే వైదొలిగినందువల్ల ఏమైనా జరిమానా చెల్లించాలా ?              - మాధవి, విజయవాడ
  
 సీనియర్ సిటిజన్ సేవింగ్స్ స్కీమ్ ఇన్వెస్ట్‌మెంట్స్‌పై సెక్షన్ 80 సీ కింద పన్ను మినహాయింపులు పొందవచ్చు. అయితే ఈ సేవింగ్స్ స్కీమ్ ద్వారా ఆర్జించిన వడ్డీ ఏడాదికి రూ.10,000 మించితే టీడీఎస్ చెల్లించాల్సి ఉంటుంది. ఇక సీనియర్ సిటిజన్ సేవింగ్స్ స్కీమ్ మెచ్యూరిటీ పీరియడ్ 5 సంవత్సరాలు. ఈ మెచ్యూరిటీ కాలం పూర్తయిన ఏడాదిలోపు  ఈ స్కీమ్‌ను మరో మూడేళ్ల పాటు పొడిగించుకోవచ్చు.
 
 ఇలా పొడిగించుకున్న సందర్భాల్లో ఏడాది తర్వాత ఎప్పుడైనా ఈ స్కీమ్ నుంచి వైదొలగవచ్చు. ఎలాంటి జరిమానా ఉండదు. ఇక గడువు(ఐదేళ్ల) కంటే ముందుగానే ఈ స్కీమ్ నుంచి వైదొలగే అవకాశముంది. అయితే ఒక ఏడాది పూర్తయిన తర్వాతే ఈ అవకాశం ఉంటుంది. ఏడాది తర్వాత వైదొలగితే డిపాజిట్ మొత్తంలో 1.5%, రెండేళ్ల తర్వాత వైదొలిగితే డిపాజిట్ మొత్తంలో 1 శాతం చొప్పున జరిమానా చెల్లించాల్సి ఉంటుంది.
  
 నేను 1-3 ఏళ్లలో ఇల్లు కొనాలనుకుంటున్నాను. ఈ లక్ష్యం కోసం ఇప్పటిదాకా వివిధ మార్గాల్లో పొదుపు చేసిన మొత్తాన్ని డెట్ ఫండ్స్‌లో ఇన్వెస్ట్ చేద్దామనుకుంటున్నాను. అయితే మార్కెట్లో చాలా ఫండ్స్-కార్పొ బాండ్ ఫండ్స్, ఇన్‌కమ్ ఫండ్స్, లిక్విడ్ ఫండ్స్.. ఇలా రకరకాల ఫండ్స్ ఉన్నాయి.  ఎగ్జిట్ లోడ్ తక్కువగా ఉండే, మంచి ట్రాక్ రికార్డ్ ఉన్న ఫండ్స్‌ను, నా అవసరాలను దృష్టిలో ఉంచుకొని  సూచించండి?     - రమేశ్, నాయుడు పేట
  
 మీరు కనుక 10% లేదా 20% ట్యాక్స్ స్లాబ్‌లో ఉంటే డెట్ ఫండ్‌లో ఇన్వెస్ట్ చేయడం సరికాదు. ఈ ఫండ్స్‌లో మూడేళ్లపాటు ఇన్వెస్ట్ చేస్తే  వచ్చే రాబడులపై 20% మూలధన లాభాల పన్ను చెల్లించాల్సి వస్తుంది.  మీరు కనుక 30% ట్యాక్స్ స్లాబ్‌లో ఉంటే డెట్ ఫండ్స్‌లో ఇన్వెస్ట్ చేయవచ్చు. పన్ను ప్రయోజనాలు పొందవచ్చు. వడ్డీరేట్లు తగ్గుతున్న నేపథ్యంలో మూడేళ్ల కాలానికి ఇన్వెస్ట్ చేయాలనుకుంటే, ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ) లేదా బాండ్ ఫండ్‌లో ఇన్వెస్ట్ చేయొచ్చు.
 
 రిస్క్ వద్దనుకుంటే ఏదైనా మంచి మ్యూచువల్ ఫండ్ సంస్థ ఆఫర్ చేసే ఎఫ్‌ఎంపీలో ఇన్వెస్ట్ చేయండి. కొంత రిస్క్ తీసుకోగలిగితే డైనమిక్ బాండ్ ఫండ్‌లో ఇన్వెస్ట్ చేయవచ్చు. బిర్లా సన్‌లైఫ్ డైనమిక్ బాండ్ ఫండ్, టాటా డైనమిక్ బాండ్ ఫండ్, యూటీఐ డైనమిక్ బాండ్ ఫండ్‌లను పరిశీలించొచ్చు. వడ్డీరేట్లు తగ్గుతున్న నేపథ్యంలో లాంగ్ టర్మ్ డెట్ ఫండ్స్ అయిన ఇన్‌కమ్, గిల్ట్ ఫండ్స్‌లో ఇన్వెస్ట్ చేయవచ్చు.  అయితే వడ్డీరేట్ల హెచ్చుతగ్గులను బట్టి ఈ ఫండ్స్‌నుంచి ఎప్పుడు ఇన్వెస్ట్ చేయాలో, ఎప్పుడు బయటకు రావాలో సగటు ఇన్వెస్టర్లకు కొంచెం గందరగోళమైన విషయమే.


 నేను 2007లో సుందరం బీఎన్‌పీ పారిబా ఎనర్జీ ఆపర్చునిటీస్ ఫండ్-గ్రోత్‌లో రూ.10,000 ఇన్వెస్ట్ చేశాను. ఇప్పుడు ఈ ఇన్వెస్ట్‌మెంట్‌ను రిడీమ్ చేసుకోవాలనుకుంటున్నాను. ఎలా రిడీమ్ చేసుకోవాలో తెలియజేయండి?     - అరుణ్ కుమార్, కర్నూలు
  రిడంప్షన్ ఫార్మ్‌ను పూర్తిచేసి సమీపంలోని సుందరం మ్యూచువల్  ఫండ్ బ్రాంచ్ ఆఫీస్‌లో దాఖలు చేయండి. లేదా వారి వెబ్‌సైట్ ద్వారా ఆన్‌లైన్‌లో మీ ఇన్వెస్ట్‌మెంట్‌ను రిడీమ్ చేసుకోవచ్చు. ఆన్‌లైన్ రిడంప్షన్‌కు సంబంధించి ఆ సంస్థ వెబ్‌సైట్‌లో ఆన్‌లైన్ డెమో అనే ఫీచర్ ఉంటుంది. ఈ  డెమో ఫీచర్ ద్వారా మీ ఇన్వెస్ట్‌మెంట్స్‌ను ఎలా రిడీమ్ చేసుకోవచ్చో మీరు తెలసుకోవచ్చు.
 
 హెచ్‌డీఎఫ్‌సీ ఐఎస్‌ఏ అకౌంట్ ద్వారా వివిధ మ్యూచువల్ ఫండ్స్‌లో ఇన్వెస్ట్ చేశాను. ఈ ఫండ్స్ స్కీమ్‌లన్నింటినీ రెగ్యులర్ ప్లాన్స్ నుంచి డెరైక్ట్ ప్లాన్స్‌కు మార్చుకోవాలనుకుంటున్నాను. ఎలా మార్చుకోవాలో తెలియజేయండి.
  - భన్వర్‌లాల్, సికింద్రాబాద్
 
  ఈ మ్యూచువల్ ఫండ్స్ ఇన్వెస్ట్‌మెంట్స్‌కు సంబంధించి మీరు ఏదైనా సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేస్తున్నట్లయితే, మొదటగా ఆ సిప్‌ను ఆపేయండి. ఆ తర్వాత డెరైక్ట్ ప్లాన్‌కు సంబంధించి కొత్త సిప్‌ను ప్రారంభించండి. లేదా లావాదేవీ పత్రం (ట్రాన్సాక్షన్ స్లిప్)ద్వారా మీ మ్యూచువల్ ఫండ్ ఇన్వెస్ట్‌మెంట్‌ను రెగ్యులర్ నుంచి డెరైక్ట్ ప్లాన్స్‌కు మార్చుకోవచ్చు. ఈ లావాదేవీ పత్రాన్ని హెచ్‌డీఎఫ్‌సీ వెబ్‌సైట్ నుంచి గానీ, హెచ్‌డీఎఫ్‌సీ మ్యూచువల్ ఫండ్ కార్యాలయం నుంచి గాని క్యామ్స్ (కంప్యూటర్ ఏజ్ మేనేజ్‌మెంట్ సర్వీసెస్-మ్యూచువల్ ఫండ్ ట్రాన్స్‌ఫర్ ఏజెన్సీ)ఆఫీస్ నుంచి గానీ పొందవచ్చు. ఈ లావాదేవీ పత్రంలో మీ ఫోలియో నంబర్, మీ ప్రస్తుత స్కీమ్, మీరు మారాలనుకుంటున్న స్కీమ్ తదితర వివరాలను రాసి మ్యూచువల్ ఫండ్ సంస్థకు గానీ, క్యామ్స్ కార్యాలయంలో కానీ దాఖలు చేయండి.  మీ మ్యూచువల్ ఫండ్ ఇన్వెస్ట్‌మెంట్ స్కీమ్‌ను రెగ్యులర్ నుంచి డెరైక్ట్ ప్లాన్‌కు మార్చుకోవచ్చు.
  మ్యూచువల్ ఫండ్ ఇన్వెస్టర్ మరణిస్తే, ఆ యూనిట్లు నామినీ/జాయింట్ హోల్డర్‌కి బదిలీ చేస్తారా? నామినీ ఆ యూనిట్లను రిడీమ్ చేసుకోవచ్చా? ఒకవేళ యూనిట్ల బదిలీకి అవకాశం ఉంటే, వాటిని తాజాగా కొనుగోలు చేసినట్లుగా భావిస్తారా? పన్ను అంశాలు ఎలా ఉంటాయి. ?   - కిశోర్, విజయవాడ
 
  మ్యూచువల్ ఫండ్ ఇన్వెస్టర్ మరిణిస్తే ఆ యూనిట్లను నామినీ/జాయింట్ హోల్డర్‌కు సదరు మ్యూచువల్ ఫండ్ సంస్థ బదిలీ చేస్తుంది. దీని కోసం   నామినీ/జాయింట్ హోల్డర్ కొన్ని పత్రాలు సమర్పించాల్సి ఉంటుంది.
 
  1. నామినీ నుంచి ఒక అభ్యర్థన పత్రం
  2.మరణించిన వ్యక్తి మరణ ధ్రువీకరణ పత్రం జిరాక్స్. ఈ జిరాక్స్ కాపీని గెజిటెడ్ ఆఫీసర్ కానీ, బ్యాంక్ మేనేజర్‌తో కానీ అటెస్ట్ చేయించాలి. నోటరీ అయినా చెల్లుతుంది. ఒకవేళ విదేశీ ప్రభుత్వం ఈ ధ్రువీకరణ పత్రం ఇస్తే భారత ఎంబసీ దానిని సర్టిఫై చేయాల్సి ఉంటుంది. 3. నామినీకి సంబంధించిన కేవైసీ(నో యువర్ కస్టమర్) పత్రాలు.
 
  కొన్ని బ్యాంకులు మరిన్ని డాక్యుమెంట్లు అడిగినా అడగవచ్చు. ఈ బదిలీ ప్రక్రియకు 10 నుంచి నెల రోజుల సమయం పడుతుంది. యూనిట్ల బదిలీకి నామినీ/జాయింట్ హోల్డర్ ఎలాంటి పన్నులు చెల్లించాల్సిన పనిలేదు. యూనిట్లను విక్రయించినప్పుడు మాత్రమే క్యాపిటల్ గెయిన్స్ ట్యాక్స్ చెల్లించాల్సి ఉంటుంది.
 
  ఐసీఐసీఐ ప్రుడెన్షియల్ యూఎస్ బ్లూచిప్ ఈక్విటీ ఫండ్‌లో ఇటీవలనే ఇన్వెస్ట్ చేయడం ప్రారంభించాను. ఈ ఫండ్ నేరుగా అమెరికా స్టాక్స్‌లో ఇన్వెస్ట్ చేస్తుంది. ఈ ఫండ్‌తో పాటు ఫ్రాంక్లిన్ ఇండియా ఫీడర్ యూఎస్ ఆపర్చునిటీస్ ఫండ్, జేపీమోర్గాన్ యూరప్ డైనమిక్ ఆఫ్‌షోర్ ఫండ్‌లో కూడా ఇన్వెస్ట్ చేస్తున్నాను. ఇవన్నీ సెబీ వద్ద నమోదైన మ్యూచువల్ ఫండ్స్. ఈ ఫండ్స్‌లో ఇన్వెస్ట్ చేస్తే వాటిని విదేశీ ఆస్తులుగా పరిగ ణిస్తారా? ఈ ఇన్వెస్ట్‌మెంట్స్ గురించి ఆదాయపు పన్ను విభాగానికి లేదా ఆర్‌బీఐకి లేదా మరే ఇతర ప్రభుత్వ విభాగానికైనా సమాచారమివ్వాలా?         - శ్రీనివాస్, వరంగల్
 
  భారత్‌లో నమోదైన ఫండ్స్‌లో ఇన్వెస్ట్ చేస్తే వాటిని విదేశీ ఆస్తులుగా పరిగణించరు. మీరు ఇన్వెస్ట్ చేస్తున్న ఫీడర్ ఫండ్స్.. మీ ఇన్వెస్ట్‌మెంట్స్‌ను ఏదైనా విదేశీ ఫండ్‌లో రీ ఇన్వెస్ట్ చేస్తాయి. ఈ ఫండ్స్ అన్ని మీ దేశీయ ఇన్వెస్ట్‌మెంట్  పోర్ట్‌ఫోలియోకు సంబంధించినవే కాబట్టి, మీరు ఆర్‌బీఐతో సహా మరే సంస్థకూ ఎలాంటి ప్రత్యేక సమాచారం ఇవ్వాల్సిన అవసరం లేదు. ఇక పన్ను సంబంధిత అంశాల విషయానికొస్తే, తమ తమ నిధుల్లో 65 శాతం వరకూ దేశీయ ఈక్విటీల్లో నేరుగా ఇన్వెస్ట్ చేసే ఫండ్స్‌ను ఈక్విటీ ఫండ్స్‌గా పరిగణిస్తారు. క్యాపిటల్ గెయిన్స్ ట్యాక్స్‌కు సంబంధించి రాయితీలు లభిస్తాయి. ఇంటర్నేషనల్ ఫండ్స్, ఫీడర్స్ ఫండ్స్‌ను ఈక్విటీయేతర మ్యూచువల్ ఫండ్స్‌గా పరిగణిస్తారు. ఈ ఫండ్స్‌లో  ఇన్వెస్ట్‌మెంట్స్‌ను మూడేళ్లలోపే వెనక్కి తీసుకుంటే మూలధన లాభాల పన్ను మీ ట్యాక్స్ స్లాబ్‌ననుసరించి చెల్లించాల్సి ఉంటుంది. మూడేళ్లకు మించి ఇన్వెస్ట్‌మెంట్స్‌ను కొనసాగిస్తే, దీర్ఘకాలిక క్యాపిటల్ గెయిన్స్ పన్ను 20 శాతం వరకూ చెల్లించాల్సి ఉంటుంది.
  
  ధీరేంద్ర కుమార్
  సీఈవో, వ్యాల్యూ రీసెర్చ్


 ఇటీవల నాకొక ఇంక్రిమెంట్ వచ్చింది. దీంతో నా ఆదాయం పెరిగింది. ఆదాయం పెరగడంతో నా సిప్(సిస్టమాటిక్ ఇన్వెస్ట్‌మెంట్ ప్లాన్) మొత్తాన్ని కొంచెం పెంచితే బావుంటుందని నా శ్రీమతి సలహా ఇచ్చింది. అయితే ప్రస్తుత సిప్‌లో మార్పులు, చేర్పులు కుదరవని మ్యూచువల్ ఫండ్ సంస్థలు అంటున్నాయి. సిప్ మొత్తాన్ని ఎలా పెంచుకోవాలి?
  - అర్జున్, విజయవాడ
  
 ఆదాయం పెరిగినందున సిప్ మొత్తాన్ని పెంచుకోమని మీ శ్రీమతి సరైన సలహానే ఇచ్చారు. అయితే చాలా మ్యూచువల్ ఫండ్ సంస్థలు సిప్ మొత్తంలో మార్పులు, చేర్పులు చేయడాన్ని ప్రోత్సహించవు. దీనిని అధిగమించడానికి రెండు మార్గాలున్నాయి. ఎంత మొత్తం పెంచుకోవాలనుకుంటున్నారో అంత మొత్తానికి కొత్త సిప్‌ను మొదలుపెట్టండి. లేదా ప్రస్తుతమున్న సిప్‌ను క్యాన్సిల్ చేసుకొని, పెరిగిన మొత్తంతో కొత్త సిప్‌ను ప్రారంభించండి. ఏ మార్గాన్ని అనుసరించినా ప్రస్తుతమున్న మ్యూచువల్ ఫండ్‌లోనే సిప్‌ను కొనసాగిస్తే మంచిది.
  
 నా వయస్సు 32 సంవత్సరాలు. ఇటీవలే మ్యూచువల్ ఫండ్స్‌లో ఇన్వెస్ట్ చేయడం ప్రారంభించాను. పన్నుల పరంగా ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్), రెగ్యులర్ మ్యూచువల్ ఫండ్స్‌కు మధ్య ఉన్న తేడాలేంటి? నేను ప్రస్తుతం నెలకు రూ.5,000 చొప్పున సిప్ విధానంలో ఇన్వెస్ట్ చేస్తున్నాను. అయితే వీటిల్లో ఈఎల్‌ఎస్‌ఎస్ ఫండ్స్ ఏమీ లేవు. సెక్షన్ 80 సీ కింద రూ. లక్ష వరకూ పన్ను మినహాయింపు పొందుతున్నాను. సెక్షన్ 80సీ  కింద రూ. లక్షన్నర వరకూ ఉన్న పన్ను మినహాయింపులను పొందడానికి ఈఎల్‌ఎస్‌ఎస్‌ల్లో ఇన్వెస్ట్ చేయవచ్చా?
  - రాజశేఖర్, హైదరాబాద్
  
 ఈక్విటీ లింక్డ్ సేవింగ్స్ స్కీమ్స్‌ను ట్యాక్స్ ప్లానింగ్ మ్యూచువల్ ఫండ్ స్కీమ్స్‌గా కూడా వ్యవహరిస్తారు. ఆదాయపు పన్ను చట్టం సెక్షన్ 80సీ కింద  రూ. లక్షన్నర పన్ను మినహాయింపు ఆదాయం పొందే మార్గాల్లో ఈఎల్‌ఎస్‌ఎస్‌ల్లో ఇన్వెస్ట్ చేయడం కూడా ఒకటి. వీటికి మూడేళ్ల లాకిన్ పీరియడ్ ఉంటుంది. రెగ్యులర్ మ్యూచువల్ ఫండ్స్‌లో ఇన్వెస్ట్ చేస్తే సెక్షన్ 80 సీ పన్ను ప్రయోజనాలు పొందలేరు. మీరు ఇప్పుడు సెక్షన్ 80 సీ కింద రూ. లక్ష వరకూ పన్ను మినహాయింపు పొందుతున్నారు.
 
 ఈ సెక్షన్ కింద రూ. లక్షన్నర వరకూ పన్ను మినహాయింపు పొందవచ్చు. మీరు ఈ పన్ను మినహాయింపును పూర్తి స్థాయిలో పొందడం లేదు కాబట్టి ఈఎల్‌ఎస్‌ఎస్‌ల్లో ఇన్వెస్ట్ చేయడాన్ని పరిశీలించవచ్చు. సెక్షన్ 80 సీ కింద పన్ను మినహాయింపుకు అర్హమైన ఇన్వెస్ట్‌మెంట్ సాధనాల్లో అత్యంత అధిక రాబడులనిచ్చేవిగా ఈఎల్‌ఎస్‌ఎస్‌లను పేర్కొనవచ్చు.
  
 నా వయస్సు 40 సంవత్సరాలు. మ్యూచువల్ ఫండ్స్‌లో ఇన్వెస్ట్ చేయాలనుకుంటున్నాను. నెలకు రూ.5,000 చొప్పున ఐసీఐసీఐ ప్రుడెన్షియల్ మ్యాక్సిమైజర్ ఫండ్‌లో ఇన్వెస్ట్ చేయమని మిత్రుడొకరు సూచించారు. ఈ ఫండ్‌లో ఇన్వెస్ట్ చేయమంటారా?
  - మహ్మద్ జానీ. నిజామాబాద్.
  
 మీ మిత్రుడు సూచించింది బీమా ప్రొడక్ట్. ఇన్వెస్ట్‌మెంట్ కోసం ఎప్పుడూ బీమా సాధానాల్లో ఇన్వెస్ట్ చేయకూడదు. బీమా, ఇన్వెస్ట్‌మెంట్స్‌ను ఎప్పుడూ కలగలపకూడదు. ఇన్వెస్ట్‌మెంట్ ఎలిమెంట్ ఉన్న ఇన్సూరెన్స్ ప్రోడక్ట్‌లు  ఇటు బీమా అవసరాలను, ఇన్వెస్ట్‌మెంట్ లక్ష్యాలను అందుకోలేవు. బీమా అవసరాల కోసం ఎప్పుడూ టర్మ్ ప్లాన్‌లనే ఎంచుకోవాలి. ఇవి అత్యంత చౌకైనవి. బీమాకు అత్యంత మెరుగైనవి కూడా.
 
 ఇక ఇన్వెస్ట్‌మెంట్స్ అవసరాల కోసం మ్యూచువల్ ఫండ్స్‌లో ఇన్వెస్ట్ చేయండి. మీకు స్టాక్‌మార్కెట్‌తో బొత్తిగా పరిచయం లేకపోతే మంచి రేటింగ్ ఉన్న బ్యాలెన్స్‌డ్ ఫండ్‌లో ఇన్వెస్ట్ చేయండి. మ్యూచువల్ ఫండ్స్‌లో కనీసం ఐదేళ్ల పాటు ఇన్వెస్ట్ చేస్తే మంచి రాబడులు పొందవచ్చు.సాధారణ ఇన్వెస్టర్లకు బ్యాలెన్స్‌డ్ ఫండ్స్ మంచి ఎంపిక. ఇవి ఈక్విటీ, డెట్ సాధనాల్లో  మిశ్రమంగా ఇన్వెస్ట్ చేస్తాయి. ఫలితంగా మార్కెట్ ఒడిదుడుకులమయంగా ఉన్నప్పుడు మీకు రక్షణ లభిస్తుంది.
  
 నేను చెల్లించాల్సిన గృహ రుణ మొత్తం రూ. 13,50,000గా ఉంది. మరో 16 ఏళ్లపాటు నెలవారీ సమాన వాయిదా (ఈఎంఐ)లు చెల్లించాల్సి ఉంది. ఇటీవల నాకు రూ.3,00,000 వరకూ సొమ్ములొచ్చాయి. ఈ డబ్బులతో గృహ రుణంలో కొంత మొత్తం చెల్లించమంటారా ? లేదా ఏదైనా మ్యూచువల్ ఫండ్‌లో ఇన్వెస్ట్ చేయమంటారా? మ్యూచువల్ ఫండ్స్‌లో ఇన్వెస్ట్ చేయడం సరైనదైతే ఇన్వెస్ట్ చేయడానికి కొన్ని మ్యూచువల్ ఫండ్స్‌ను సూచించండి?           
  - వైదేహి, తిరుపతి
  
 నెలవారీ సమాన వాయిదాలు(ఈఎంఐలు) చెల్లించడంలో ఆర్థికపరంగా మీరు ఇబ్బందిపడుతున్నట్లయితే ఆ డబ్బులను  గృహరుణం తీర్చడానికి ఉపయోగించండి. ఈఎంఐలు చెల్లించడంలో ఎలాంటి ఇబ్బందులు లేనట్లయితే మ్యూచువల్ ఫండ్స్‌లో ఇన్వెస్ట్ చేయడం ఉత్తమం. గృహ రుణం మంచి రుణమని చెప్పవచ్చు. గృహ రుణం కారణంగా మనకు ఉండటానికి ఒక ఇల్లు ఉంటుంది. పన్ను ప్రయోజనాలూ లభిస్తాయి. అద్దె డబ్బులు మిగులుతాయి. తక్కువ వడ్డీరేట్ల ప్రయోజనాలూ ఉన్నాయి. మీరు మ్యూచువల్ ఫండ్స్‌లో ఇన్వెస్ట్ చేయడం కొత్త అయితే, ఏదైనా మంచి బ్యాలెన్స్‌డ్ ఫండ్‌ను ఎంచుకొని, దాంట్లో సిప్ విధానంలో ఇన్వెస్ట్ చేయండి.
  
 మా అమ్మగారు ఇటీవలే ప్రభుత్వ ఉద్యోగం నుంచి  రిటైరయ్యారు. రిటైర్మెంట్ ప్రయోజనాలు రూ.35 లక్షల వరకూ వచ్చాయి. వీటిని బ్యాంక్‌లో ఫిక్స్‌డ్ డిపాజిట్లుగా ఇన్వెస్ట్ చేస్తానని ఆమె అంటోంది.  మ్యూచువల్ ఫండ్స్‌లో ఇన్వెస్ట్ చేయమని నేను చెప్పాను. పెట్టుబడి సురక్షితంగా ఉంటూ, ఫిక్స్‌డ్ డిపాజిట్ల కంటే మెరుగైన రాబడులిచ్చే మ్యూచువల్ ఫండ్స్‌ను సూచించండి. రెండు నుంచి మూడేళ్ల పాటు ఇన్వెస్ట్ చేయాలని మా అమ్మగారు భావిస్తున్నారు.                
 - వెంకట్, గుంటూరు
  
 డెట్ మ్యూచువల్ ఫండ్స్‌లో ఇన్వెస్ట్ చేయడం ద్వారా ద్రవ్యోల్బణాన్ని తట్టుకుని రాబడులను పొం దలేం. ద్రవ్యోల్బణాన్ని తట్టుకునే రాబడులు కావాలనుకుంటే ఈక్విటీ ఇన్వెస్ట్‌మెంట్స్‌లో ఇన్వెస్ట్ చేయాలి. అయితే రెండు, మూడేళ్ల కాలానికి ఈక్విటీ మ్యూచువల్ ఫండ్స్‌లో ఇన్వెస్ట్ చేయడం సరైన విధా నం కాదు. ఒక వేళ డెట్ మ్యూచువల్ ఫండ్స్‌లో మూడేళ్ల కాలానికి ఇన్వెస్ట్ చేసినప్పటికీ, పన్ను ప్రయోజనాలు పొందలేరు.
 
 బ్యాంక్ ఫిక్స్‌డ్ డిపాజిట్లు సురక్షితమైనవి.  డెట్ మ్యూచువల్ ఫండ్స్ మాత్రం మంచి రాబడులను ఇస్తాయి. అయితే మార్కెట్ పనితీరును బట్టే వీటి రాబడులు ఉంటా యి. మీ అమ్మగారు అధిక పన్ను బ్రాకెట్‌లో ఉండి ఉంటే, మూడేళ్ల పాటు ఈ డబ్బులను ఇన్వెస్ట్ చేయాలనుకుంటే, డెట్ ఫండ్ స్కీమ్‌లో ఇన్వెస్ట్ చేయడం  మంచిది. మూడేళ్లలోపే డబ్బులు కావాలనుకుంటే షార్ట్-టర్మ్ డెట్ స్కీమ్‌ల్లో ఇన్వెస్ట్ చేయండి.
 - ధీరేంద్ర కుమార్, సీఈవో, వ్యాల్యూ రీసెర్చ్


 నేనొక సీనియర్ సిటిజన్‌ను. ఒక జాతీయ బ్యాంక్‌లో వేసిన ఫిక్స్‌డ్ డిపాజిట్లు మెచ్యూర్ అయ్యి చేతికొచ్చాయి. వీటిని కనీసం మూడేళ్ల పాటు ఏదైనా డెట్‌ఫండ్‌లో ఇన్వెస్ట్ చేద్దామనుకుంటున్నాను. నాకు  ప్రతి మూడు నెలలకొకసారి క్రమం తప్పకుండా ఆదాయం అవసరం. డివిడెండ్ పేమెంట్ ఆప్షన్, లేదా గ్రోత్ ఆప్షన్‌లో ఇన్వెస్ట్ చేయమంటారా? తగిన సూచనలివ్వండి.
 - సదాశివరావు, విశాఖపట్టణం
  
 ఆదాయపు పన్నుకు సంబంధించి మీరు 10 శాతం లేదా 20 శాతం ట్యాక్స్ బ్రాకెట్‌లో ఉంటే, గ్రోత్ ఆప్షన్‌లో ఇన్వెస్ట్ చేయడం ఉత్తమం. ఇలా ఇన్వెస్ట్ చేసి ప్రతీ మూడు నెలలకొకసారి నిర్ణీత మొత్తాన్ని రిడీమ్ చేసుకోవాలి.  డివిడెండ్ ఆప్షన్‌లో ఇన్వెస్ట్ చేస్తే మ్యూచువల్ ఫండ్స్ ఇచ్చే డివిడెండ్లపై 28.84 శాతం చొప్పున డివిడెండ్ డిస్ట్రిబ్యూషన్ ట్యాక్స్ చెల్లించాల్సి ఉంటుంది.  అలా కాకుండా గ్రోత్ ఆప్షన్‌లో ఇన్వెస్ట్ చేస్తే మూడు నెలలకొకసారి కొంత మొత్తాన్ని రిడీమ్ చేసుకుంటారు. కాబట్టి స్వల్పకాలిక మూలధన లాభాల పన్ను చెల్లించాల్సి ఉంటుంది. ఈ మూలధన లాభాలపై పన్ను మీరు 10 శాతం ట్యాక్స్ బ్రాకెట్‌లో ఉంటే 10.3 శాతం, 20 శాతం ట్యాక్స్ బ్రాకెట్‌లో ఉంటే 20.6 శాతం చొప్పున చెల్లించాల్సి వస్తుంది. అందుకని పన్నులను పరిగణనలోకి తీసుకుంటే, మీరు గ్రోత్ ఆప్షన్‌లోనే ఇన్వెస్ట్ చేయడం సముచితం. ఒక వేళ మీరు 30 శాతం ట్యాక్స్ బ్రాకెట్‌లో ఉంటే డివిడెండ్ ఆప్షన్‌లో ఇన్వెస్ట్ చేయడం ఉత్తమం. ఇలా చేయడం వల్ల మీకు 28.84 శాతం డివిడెండ్ డిస్ట్రిబ్యూషన్ ట్యాక్స్ మాత్రమే వర్తిస్తుంది. అలా కాకుండా గ్రోత్ ఆప్షన్‌లో ఇన్వెస్ట్ చేస్తే మూలధన లాభాల పన్ను 30.9 శాతంగా చెల్లించాల్సి వస్తుంది.
  
 ఒకే రంగంపై దృష్టిసారించే మ్యూచువల్ ఫండ్‌లో ఇన్వెస్ట్ చేయాలనుకుంటున్నాను. ఇన్వెస్ట్‌మెంట్స్ కోసం ఫార్మా, లేదా ఎఫ్‌ఎంసీజీ మ్యూచువల్ ఫండ్స్‌ను పరిశీలిస్తున్నాను. ఎస్‌బీఐ ఫార్మా, ఐసీఐసీఐ ఎఫ్‌ఎంసీజీ ఫండ్‌లను షార్ట్‌లిస్ట్ చేశాను. వీటిల్లో దేంట్లో ఇన్వెస్ట్ చేయమంటారు? మీ అభిప్రాయం ఏమిటి?
 - నర్మద, వరంగల్
  
 రంగాల వారీ ఫండ్స్ వివిధ మార్కెట్ పరిస్థితుల్లో వివిధ రకాలైన పనితీరును కనబరుస్తాయి. సంబంధిత రంగంపై అవగాహన అధికంగా  ఉన్నప్పుడు మాత్రమే ఇలాంటి రంగాల వారీ( సెక్టోరియల్ ఫండ్స్)లో ఇన్వెస్ట్ చేయాలి. ఏడాది కాలాన్ని పరిగణనలోకి తీసుకుంటే ఫార్మా కేటగిరీ ఫండ్ 24 శాతం చొప్పున, ఎఫ్‌ఎంసీజీ కేటగిరీ ఫండ్ 9 శాతం చొప్పున రాబడులనిచ్చాయి. మూడు నుంచి ఐదేళ్ల కాలాన్ని పరిగణనలోకి తీసుకుంటే ఎస్‌బీఐ ఫార్మా ఫండ్ అత్యధిక రాబడులనిచ్చింది. ఇదే కాలానికి ఐసీఐసీఐ ప్రుడెన్షియల్ ఎఫ్‌ఎంసీజీ ఫండ్ ఎస్‌బీఐ ఫార్మా ఫండ్ కంటే తక్కువ రాబడులనే ఇచ్చింది.
  
 నా వయస్సు 34 సంవత్సరాలు. సింగిల్ పర్సన్‌ను. ఇప్పటికే రెండు టర్మ్ ప్లాన్‌లు తీసుకున్నాను. 2007లో తీసుకున్న టర్మ్ ప్లాన్ 52 ఏళ్లవరకూ, 2011లో తీసుకున్న మరొక టర్మ్ ప్లాన్ 70 ఏళ్ల వరకూ కవర్ చేస్తాయి. మరో టర్మ్ ప్లాన్‌ను తీసుకోవాలనుకుంటున్నాను. మూడు టర్మ్ ప్లాన్‌లు తీసుకోవడం సరైనదేనా? 2007లో తీసుకున్న టర్మ్ ప్లాన్‌కు ఎక్కువ ప్రీమియం చెల్లించాల్సి వస్తోంది. దీని బీమా కవరేజ్ కూడా తక్కువగా ఉంది. అదీ 52 సంవత్సరాల వరకే, అందుకే దీనిని సరెండర్ చేసి, పెద్ద మొత్తానికి మరో టర్మ్ ప్లాన్ తీసుకోవాలనుకుంటున్నాను. ఇది మంచి నిర్ణయమేనా?         
 - హరిరాజ్, హైదరాబాద్
  
 డైవర్సిఫికేషన్ ఉద్దేశం ప్రకారమైతే రెండు టర్మ్ ప్లాన్‌లు సరిపోతాయి. మూడో టర్మ్ ప్లాన్ అవసరం లేదు. ఎక్కువ ప్రీమియం చెల్లిస్తున్న 2007 నాటి టర్మ్ ప్లాన్‌ను సరెండర్ చేసి, అధిక కవరేజ్ ఉండే మరో టర్మ్ ప్లాన్ తీసుకోవడం సరైన నిర్ణయమే. తక్కువ ప్రీమియానికే ఎక్కువ బీమా ఇచ్చే సంస్థల టర్మ్ ప్లాన్‌లు తీసుకోండి. ఇలా తీసుకునేటప్పుడు మంచి క్లెయిమ్ సెటిల్మెంట్ రికార్డ్ ఉన్న సంస్థ టర్మ్ ప్లాన్‌లనే ఎంచుకోండి. మీ జీవిత బీమా పాలసీ మీరు రిటైరయ్యేంత వరకూ లేదా మీ ఆర్థిక బాధ్యతలు మరొకరు చేపట్టేంత వరకూ ఉండాలి. మీపై ఆధారపడిన వాళ్ల ఆర్థిక అవసరాలను తీర్చేలా మీ బీమా కవర్ ఉండాలి. ఇన్‌క్రీజింగ్ టర్మ్ కవర్ సదుపాయం ఉన్న టర్మ్ ప్లాన్‌లను కూడా పరిశీలించవచ్చు. ఈ తరహా ప్లానుల్లో నిర్దేశిత కాలాల్లో బీమా కవర్ కొంత శాతం చొప్పున పెరిగే సౌలభ్యం ఉంటుంది. అయితే ఇవి కొంచెం ఖరీదైనవి.
  
 ధీరేంద్ర కుమార్
 సీఈవో, వ్యాల్యూ రీసెర్చ్


 నాకు ఇటీవలే ఒక కూతురు పుట్టింది. ఆమె చదువు కోసం ఇన్వెస్ట్ చేద్దామనుకుంటున్నాను. పన్ను ప్రయోజనాలు లభించేలా ఇన్వెస్ట్‌మెంట్ సలహాలు ఇవ్వగలరు.
 - ఆనంద్, విశాఖ పట్టణం
  
 చాలా మంది తల్లిదండ్రులు పిల్లల కోసం బీమా  పాలసీలు తీసుకుంటారు. దీనివల్ల పన్నులు కలిసి వస్తాయనేది వారి ఆలోచన. కానీ అతి పెద్ద ఇన్వెస్ట్‌మెంట్ తప్పుల్లో ఇదొకటి. మీ పాప విద్యావసరాల కోసం ఇన్వెస్ట్ చేయడానికి ప్రత్యేక ప్లాన్ అవసరం లేదు. పన్ను ఆదా చేసే స్కీమ్‌లతో సహా ఈక్విటీ మ్యూచువల్ ఫండ్స్‌లో ఇన్వెస్ట్ చేస్తే చాలు. దీర్ఘకాలిక ఆర్థిక లక్ష్యాల కోసం ఈక్విటీ మ్యూచువల్ ఫండ్స్‌లో ఇన్వెస్ట్ చేస్తే మంచి రాబడులు పొందవచ్చు. దీర్ఘకాలానికి ఈక్విటీ మ్యూచువల్ ఫండ్స్ మంచి రాబడులను ఇస్తాయి. ఏదైనా ఈక్విటీ మ్యూచువల్ ఫండ్‌ను ఎంచుకొని సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో క్రమం తప్పకుండా ఇన్వెస్ట్ చేయండి. మార్కెట్ పరిస్థితులను పట్టించుకోకుండా మీ ఇన్వెస్ట్‌మెంట్స్‌ను కొనసాగించండి. మీ ఇన్వెస్ట్‌మెంట్స్‌ను కనీసం ఏడాదికొకసారైనా సమీక్షించండి. మీ పాప ఉన్నత చదువులు నిమిత్తం మీకు మరో రెండు, మూడేళ్లలో డబ్బులు అవసరమవుతాయనుకున్నప్పుడు, మీరు ఇన్వెస్ట్ చేస్తున్న మ్యూచువల్ ఫండ్ నుంచి మీ ఇన్వెస్ట్‌మెంట్స్‌ను విత్‌డ్రా చేసుకుని సురక్షితమైన సాధనాల్లో ఇన్వెస్ట్ చేయండి. ఇలా చేయడం వల్ల మీకు డబ్బులు అవసరమైనప్పుడు మార్కెట్ పరిస్థితులు బాగాలేకపోతే ఆ ప్రభావం నుంచి మీరు తప్పించుకోగలుగుతారు.
  
 నా వయస్సు 27 సంవత్సరాలు. నేనొక బ్యాలెన్స్‌డ్ ఫండ్‌లో ఇన్వెస్ట్ చేయాలనుకుంటున్నాను. ఆన్‌లైన్ ద్వారా ఒక బ్యాలెన్స్‌డ్ ఫండ్‌లో ఎలా ఇన్వెస్ట్ చేయాలో తెలపండి.
 - ఖాదర్ బీ, కడప
  
 స్టాక్ మార్కెట్‌కు కొత్త అయిన ఇన్వెస్టర్లకు బ్యాలెన్స్‌డ్ ఫండ్స్ మంచి ఇన్వెస్ట్‌మెంట్ సాధనం. ఈ ఫండ్స్ తమ నిధుల్లో కొంత మొత్తాన్ని ఈక్విటీల్లో, మరికొంత మొత్తాన్ని డెట్ సాధనాల్లో ఇన్వెస్ట్ చేస్తాయి. స్టాక్ మార్కెట్ ఒడిదుడుకుల్లో ఉన్నప్పుడు డెట్ సాధనాల్లో ఇన్వెస్ట్ చేయడం వల్ల ఒడిదుడుకుల ప్రభావాన్ని కొంత మేర తట్టుకోవచ్చు. ఆన్‌లైన్‌లో బ్యాలెన్స్‌డ్ ఫండ్స్‌లో ఇన్వెస్ట్ చేయాలనుకుంటే, మ్యూచువల్ ఫండ్ వెబ్‌సైట్‌లో ఇన్వెస్ట్ ఆన్‌లైన్ అనే ఆప్షన్‌ను క్లిక్ చేయండి. ఆ తర్వాత ఒకదాని తర్వాత ఒకటిగా వచ్చే సూచనలను పాటించండి. ఆన్‌లైన్‌లో ఇన్వెస్ట్ చేయాలంటే మీకు నెట్ బ్యాంకింగ్ సౌకర్యం ఉండాలి.
  
 మిరా అసెట్ షార్ట్ టర్మ్ బాండ్ ఫండ్-డెరైక్ట్ ప్లాన్-వీక్లీ డివిడెండ్ స్కీమ్‌లో భారీ మొత్తంలో ఇన్వెస్ట్ చేశాను. ఆ తర్వాత ఈ ఇన్వెస్ట్‌మెంట్స్‌ను మిరా ఎమర్జింగ్ బ్లూచిప్ ఫండ్‌కు బదిలీ చేశాను. నాకు వచ్చిన క్యాపిటల్ గెయిన్స్ స్టేట్‌మెంట్‌లో షార్ట్‌టర్మ్ క్యాపిటల్ గెయిన్స్ వచ్చినట్లుగా ఉంది. ఇది ఎలా సాధ్యం. వీక్లీ డివిడెండ్ పేఅవుట్ స్కీమ్‌లో వచ్చే డివిడెండ్‌పై పన్ను విధించిన తర్వాతే రీ ఇన్వెస్ట్ చేస్తారు. కాబట్టి ఎలాంటి క్యాపిటల్ గెయిన్స్ ఉండవు కదా !  ఈ విషయమై తగిన సలహా ఇవ్వగలరు.                         
 - మధు, విజయవాడ
  
 వాస్తవ లాభాలపైన మాత్రమే డివిడెండ్‌ను ప్రకటించాలని సెబీ నిబంధనలు వెల్లడిస్తున్నాయి. మిరా అసెట్ షార్ట్ బాండ్ ఫండ్-డెరైక్ట్ ప్లాన్ అమల్లోకి వచ్చి రెండేళ్లు మాత్రమే అయింది. ఈ ఫండ్ మూలధన నిధులు రూ.4 కోట్లుగా ఉన్నాయి. ఇప్పటివరకూ ఇది ఎలాంటి డివిడెండ్‌లను ప్రకటించలేదు. వాస్తవ లాభాలను ఆర్జించలేకపోయినందువల్ల కావచ్చు. మరోవైపు మిరా అసెట్ షార్ట్‌టెర్మ్ బాండ్ ఫండ్-రెగ్యులర్ ప్లాన్ క్రమం తప్పకుండా డివిడెండ్‌లను చెల్లిస్తోంది. ఈ కారణం వల్ల మీ లాభాలు క్యాపిటల్ గెయిన్స్‌గా ఆ సంస్థ చూపించి ఉండవచ్చు. డెట్ ఫండ్స్‌పై వచ్చిన షార్ట్‌టర్మ్ క్యాపిటల్ గెయిన్స్‌ను మీ ఆదాయానికి జత చేసి మీ ట్యాక్స్ స్లాబ్ ప్రకారం పన్ను విధిస్తారు.
  
 నేను ఐసీఐసీఐ ప్రులైఫ్‌స్టేజ్ పెన్షన్ యాడ్(డైనమిక్ పీ/ఈ ఫండ్)లో 2010నుంచి ఇన్వెస్ట్ చేస్తున్నాను. రాబడులు సంతృప్తికరంగా లేనందున ఈ స్కీమ్ నుంచి వైదొలగాలనుకుంటున్నాను. సలహా ఇవ్వండి ?
 - రాహుల్, హైదరాబాద్
  
 మీరు తీసుకున్న పాలసీ డిఫర్డ్ యూనిట్ లింక్డ్ పెన్షన్ ప్లాన్. జీరో ప్రీమియం అలకేషన్ చార్జీలు ఉండడం ఈ ప్లాన్ ప్రత్యేకత. అయితే నిర్వహణ చార్జీలు ఏడాదికి 13.1 శాతంగా ఉన్నాయి. ఇది కాకుండా 1.35 శాతం(ఏడాదికి) ఫండ్ మేనేజ్‌మెంట్ చార్జీలు అదనం. వ్యయాలు అధికంగా ఉన్నందున రాబడులు అల్పంగా వస్తాయి. ఇప్పటికే పెద్ద మొత్తంలో వ్యయాలు చెల్లించారు. అయినప్పటికీ, ఈ పాలసీని సరెండర్ చేయడమే ఉత్తమం. ఇప్పుడు మీరు సరెండర్ చేస్తే,  సరెండర్ వాల్యూగా ఫండ్ విలువ మీకు లభిస్తుంది.  ఈ మొత్తాన్ని మీ ఆదాయానికి జత చేసి మీ ట్యాక్స్ స్లాబ్‌ననుసరించి పన్ను చెల్లించాల్సి ఉంటుంది. అంతేకాకుండా ఇప్పటివరకూ మీరు చెల్లించిన ప్రీమియమ్‌లపై మీరు పొందిన పన్ను మినహాయింపులను కూడా చెల్లించాల్సి ఉంటుంది. ఈ ఫండ్‌లో కొనసాగితే నష్టాలు మరింతగా కొనసాగుతాయి. కాబట్టి దీనిని సరెండర్ చేసి భవిష్యత్తులో తెలివిగా ఇన్వెస్ట్ చేయండి.
  
  ధీరేంద్ర కుమార్
  సీఈవో, వ్యాల్యూ రీసెర్చ్


 నేను ఈ ఏడాది మొదట్లో ఒక ఫండ్‌లో రూ.10,000 ఇన్వెస్ట్ చేశాను. ఇప్పుడు ఈ ఇన్వెస్ట్‌మెంట్ విలువ రూ.13,000కు చేరింది. అయితే ఈ ఫండ్ పనితీరుతో నేను సంతృప్తిచెందలేకపోతున్నాను. దీంతో ఇదే మ్యూచువల్ ఫండ్ సంస్థకు చెందిన మరో ఫండ్‌కు ఈ ఇన్వెస్ట్‌మెంట్‌ను బదిలీ చేద్దామనుకుంటున్నాను. ఒక ఫండ్ నుంచి మరో ఫండ్‌కు మారడం కొత్త ఇన్వెస్ట్‌మెంట్‌గా పరిగణిస్తారు కదా ! ఈ ఇన్వెస్ట్‌మెంట్‌పై నేను ఈ ఏడాది పొందిన రూ.3,000పై మూలధన లాభాల పన్ను చెల్లించాలా?
  - ప్రసాద్, విశాఖపట్టణం
  
 పన్ను విధింపు దృష్ట్యా, ఇన్వెస్ట్‌మెంట్స్‌ను ఒక మ్యూచువల్ ఫండ్ నుంచి మరో మ్యూచువల్ ఫండ్‌కు మార్చడాన్ని ఒక మ్యూచువల్ ఫండ్ నుంచి యూనిట్లు విక్రయించి, మరో మ్యూచువల్ ఫండ్ యూనిట్లను కొనుగోలు చేసినట్లుగా పరిగణిస్తారు.  మీ విషయంలో ఏడాది గడవక ముందే మీరు మీ ఇన్వెస్ట్‌మెంట్స్‌ను ఉపసంహరించుకుంటున్నారు కాబట్టి మీరు స్వల్పకాలిక మూలధన లాభాల పన్ను చెల్లించాల్సి  ఉంటుంది. ఈ ఏడాది ఆదాయపు పన్ను రిటర్న్‌లో మీరు ఈ విషయం వెల్లడించాల్సి ఉంటుంది. ఈక్విటీ ఓరియంటెడ్ మ్యూచువల్ ఫండ్స్‌పై పొందిన రాబడులపై 15 శాతం చొప్పున స్వల్పకాలిక మూలధన లాభాల పన్ను చెల్లించాల్సి ఉంటుంది.
  
 చార్జీలను పరిగణనలోకి తీసుకుంటే ఏ బీమాపాలసీలు ఉత్తమం. టర్మ్ పాలసీలు, యూనిట్ లింక్డ్ ఇన్సూరెన్స్ ప్లాన్(యులిప్), మనీ బ్యాక్, ఎండోమెంట్ .. వీటిల్లో వేటిని ఎంచుకోవాలి?
  - క్రాంతి, నెల్లూరు
  
 జీవిత బీమా కవర్ కావాలనుకుంటే టర్మ్ ప్లాన్‌లు తీసుకోవం ఉత్తమం. టర్మ్ పాలసీలు పూర్తిగా బీమా పాలసీలు. వీటిల్లో ఎలాంటి అదనపు చార్జీలు ఉండవు. అందుకనే ఇవి చౌకగా లభిస్తాయి. ఇక యూనిట్ లింక్డ్ ఇన్సూరెన్స్ ప్లాన్(యూలిప్)వివిధ రకాల చార్జీలు వసూలు చేస్తాయి. వీటికి సంబంధించిన పాలసీ బ్రోచర్‌లో చార్జీలు అనే శీర్షిక కింద అన్ని చార్జీలను ఆ యులిప్‌ను ఆఫర్ చేసే సంస్థ వెల్లడిస్తుంది. సంప్రదాయబద్ధ పాలసీలైన మనీ బ్యాక్, ఎండోమెంట్ పాలసీలు..తాము విధించే చార్జీల వివరాలను వెల్లడించవు.
  
 నేను ప్రైవేట్ రంగంలో ఉద్యోగం చేస్తున్నాను. నేషనల్ పెన్షన్ సిస్టమ్ (ఎన్‌పీఎస్)లో ఇన్వెస్ట్ చేయడం వల్ల  ఏమైనా పన్ను సంబంధిత ప్రయోజనాలున్నాయా?
  - తన్మయి, హైదరాబాద్
  
 ఉద్యోగం చేస్తున్నప్పుడే రిటైర్మెంట్ అవసరాల కోసం క్రమం తప్పకుండా ఇన్వెస్ట్ చేసే అవకాశాన్ని నేషనల్ పెన్షన్ సిస్టమ్ (ఎన్‌పీఎస్) కల్పిస్తోంది. ఇది మార్కెట్‌తో అనుసంధానమై ఉన్న స్కీమ్. మీ ఇన్వెస్ట్‌మెంట్స్‌లో 50 శాతం వరకూ ఈక్విటీల్లో ఇన్వెస్ట్ చేసే వెసులుబాటు ఉంది. దీర్ఘకాలం పాటు ఇన్వెస్ట్ చేస్తే ఈపీఎఫ్ వంటి స్థిరాదాయ ఆప్షన్స్ కన్నా ఇలా ఈక్విటీల్లో ఇన్వెస్ట్ చేసే ఆప్షన్ మంచి రాబడులను ఇస్తుంది. ఇది చాలా సరళమైన స్కీమ్. నెలకు తక్కువలో తక్కువ కనీసం రూ.500 ఈ స్కీమ్‌లో ఇన్వెస్ట్ చేయవచ్చు. సెక్షన్ 80 సీసీడీ(1) కింద ఈ స్కీమ్‌లో ఇన్వెస్ట్ చేసిన మొత్తానికి (వేతనంలో(బేసిక్ ప్లస్ డీఏ) 10 శాతానికి మించకుండా) పన్ను రాయితీలు లభిస్తాయి. సెక్షన్ 80సీసీఈ కింద లభించే మొత్తం రాయితీ రూ.1.5 లక్షల్లోనే ఇది కూడా కలిసి ఉంటుంది. అయితే కొత్త బడ్జెట్ ప్రకారం, ఎన్‌పీఎస్‌లో ఇన్వెస్ట్ చేస్తే  రూ.1.5 లక్షల రాయితీకి అదనంగా రూ.50,000 వరకూ పొందే అవకాశం ఉంది. ఇక ఎన్‌పీఎస్ విత్‌డ్రాయల్స్‌పై పన్ను చెల్లించాల్సి ఉంటంది. ఎన్‌పీఎస్ ఇన్వెస్ట్‌మెంట్స్ మెచ్యూర్ అయిన తర్వాత దాంట్లో 40 శాతం సొమ్ముతో యాన్యూటీని కొనుగోలు చేయాల్సి ఉంటుంది. ఈ యాన్యూటిపై వచ్చే వడ్డీపై కూడా పన్ను చెల్లించాల్సి ఉంటుంది. ఎన్‌పీఎస్‌లో టైర్ వన్, టైర్ టూ అని రెండు రకాల అకౌంట్లు ఉంటాయి. టైర్ వన్ అకౌంట్‌లో ఏడాదికి కనీసం రూ.6.000 ఇన్వెస్ట్ చేయాల్సి ఉంటుంది. గరిష్ట మొత్తం ఏమీ లేదు. ఎన్‌పీఎస్ ప్రారంభించేటప్పుడు టైర్ టూ అకౌంట్‌లో కనీసం రూ.1,000 జమ చేయాలి. ఏడాదిలో కనీసం ఒకసారి జమ చేయాలి. ఆర్థిక సంవత్సరం చివరినాటికి కనీస మొత్తం బ్యాలెన్స్ రూ.2,000కు తగ్గకుండా ఉండాలి. టైర్ టూ అకౌంట్ అనేది స్వచ్ఛందమైన సేవింగ్స్ అకౌంట్. మీరు ఎప్పుడు కావాలనుకుంటే అప్పుడు ఎంత కావాలనుకుంటే అంత ఈ అకౌంట్ నుంచి మీ సొమ్ములను విత్‌డ్రా చేసుకోవచ్చు.
  
 ఫిక్స్‌డ్ మెచ్యురిటీ ప్లాన్(ఎఫ్‌ఎంపీ)లో ఇన్వెస్ట్ చేయడానికి సరైన సమయం ఏది ?
 - భాస్కర్, వరంగల్
 
 ఫిక్స్‌డ్ మెచ్యురిటీ ప్లాన్(ఎఫ్‌ఎంపీ)లో ఇన్వెస్ట్ చేయడానికి ఎప్పుడూ సరైన సమయమే. అంచనా వేసిన రాబడులను నిర్దేశిత కాలానికి పొందవచ్చు. అయితే వడ్డీరేట్లలో హెచ్చుతగ్గులున్నప్పుడు ఎఫ్‌ఎంపీల నుంచి మీరు ప్రయోజనం పొందలేరు.
  
 నెలకు రూ.20,000 చొప్పున సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయాలనుకుంటున్నాను. ఈ డబ్బులు నాకు ఆరు నెలల నుంచి ఏడాది కాలానికి అవసరం. రికరింగ్ డిపాజిట్ల కంటే మెరుగైన రాబడులనిచ్చే ఫండ్స్‌ను సూచించండి.
  - సతీష్, నెల్లూరు
  
 రికరింగ్ డిపాజిట్ల కంటే కొంచెం ఎక్కువ రాబడులు కావాలనుకుంటే ఆల్ట్రా షార్ట్ డెట్ ఫండ్స్‌లో ఇన్వెస్ట్ చేయవచ్చు. ఫ్రాంక్లిన్ ఇండియా ఆల్ట్రా షార్ట్ బాండ్ ఫండ్, డీడబ్ల్యూస్ ఆల్ట్రా షార్ట్‌టెర్మ్ ఫండ్, టారస్ ఆల్ట్రా షార్ట్‌టెర్మ్ బాండ్‌ఫండ్, బరోడా పయనీర్ ట్రెజరీ అడ్వాంటేజ్ ఫండ్.. మీ ఇన్వెస్ట్‌మెంట్స్‌కు ఈ ఫండ్స్‌ను పరిశీలించవచ్చు.
 
 ధీరేంద్ర కుమార్
  సీఈవో, వ్యాల్యూ రీసెర్చ్


 మార్కెట్ రిస్క్‌ను తట్టుకోవడానికి బ్యాలెన్స్‌డ్ ఫండ్స్ మంచి మార్గమని మిత్రుడొకడు చెబుతున్నాడు. పన్ను రాయితీలు కావాలంటే ఈక్విటీ లింక్డ్ సేవింగ్స్ స్కీమ్స్(ఈఎల్‌ఎస్‌ఎస్)ల్లో ఇన్వెస్ట్ చేయాలని మరో మిత్రుడు అంటున్నాడు. బ్యాలెన్స్‌డ్ ఫండ్స్‌లో ఇన్వెస్ట్ చేయాలా? ఈఎల్‌ఎస్‌ఎస్‌ల్లో ఇన్వెస్ట్ చేయాలా? తగిన సలహా ఇవ్వండి.
  - పార్థసారథి, హైదరాబాద్
  
 మొదటిసారిగా మ్యూచువల్ ఫండ్స్‌లో ఇన్వెస్ట్ చేసేవారికి బ్యాలెన్స్‌డ్ ఫండ్స్‌లో ఇన్వెస్ట్ చేయమని సూచిస్తాం. ఈ బ్యాలెన్స్‌డ్ ఫండ్స్ తమ పెట్టుబడుల్లో 65 శాతం ఈక్విటీల్లో, మిగిలింది రుణ సాధనాల్లో ఇన్వెస్ట్ చేస్తాయి. ఇవి దాదాపు ఈక్విటీ ఫండ్స్‌లాగానే పనిచేస్తాయి. కొత్త ఇన్వెస్టర్లు మార్కెట్ ఒడిదుడుకులను తట్టుకోలేరు.   స్వల్పకాలానికి స్టాక్ మార్కెట్ తీవ్రమైన ఒడిదుడుకులకు గురవుతుంది. దీంతో ఈక్విటీ ఫండ్స్‌కు స్వల్పకాలంలో భారీగా నష్టాలు వచ్చే అవకాశాలున్నాయి. దీన్ని కొత్త ఇన్వెస్టర్లు జీర్ణించుకోలేరు. బ్యాలెన్స్‌డ్ ఫండ్స్ రుణ సాధనాల్లో కూడా ఇన్వెస్ట్ చేస్తాయి. కాబట్టి ఈక్విటీ ఫండ్స్ అంత తీవ్రస్థాయి ఒడిదుడుకులకు ఈ బ్యాలెన్స్‌డ్ ఫండ్స్ గురికావు.
 
 ఈక్విటీ ఫండ్స్‌తో పోల్చితే ఇవి కొంత స్థిరమైనవని చెప్పవచ్చు. అందుకని కొత్త ఇన్వెస్టర్లకు బ్యాలెన్స్‌డ్ ఫండ్స్ సరైన ఎంపిక అని చెప్పవచ్చు. ఇక పన్ను చెల్లించే ఇన్వెస్టర్లు పన్ను ప్రయోజనాలిచ్చే స్కీమ్‌ల్లో ఇన్వెస్ట్ చేయాలని సూచిస్తాం. ఈక్విటీ లింక్డ్ సేవింగ్స్ స్కీమ్‌కు మూడేళ్ల లాకిన్ పీరియడ్ ఉంటుంది. అయితే పలు మ్యూచువల్ ఫండ్ సంస్థల ఈఎల్‌ఎస్‌ఎస్ ఫండ్స్ ఈక్విటీల్లోనే 80% వరకూ ఇన్వెస్ట్ చేస్తున్నాయి. పన్ను ప్రయోజనాల కోసం బ్యాలెన్స్‌డ్ ఫండ్స్‌లో ఇన్వెస్ట్ చేయాలని మీరు భావిస్తున్నట్లయితే.. ఫ్రాంక్లిన్ పెన్షన్ ప్లాన్, యూటీఐ రిటైర్మెంట్ బెని ఫిట్ ప్లాన్‌లను పరిశీలించవచ్చు. ఈ రెండు ఫండ్స్ ఈక్విటీ, డెట్‌ల్లో ఇన్వెస్ట్ చేస్తాయి. సెక్షన్ 80 సీ కింద పన్ను ప్రయోజనాలు లభిస్తాయి.
  
 పలు మ్యూచువల్ ఫండ్ సంస్థలు సిస్టమాటిక్ ట్రాన్స్‌ఫర్ ప్లాన్(ఎస్‌టీపీ), సిస్టమాటిక్ ఇన్వెస్ట్‌మెంట్ ప్లాన్(సిప్)లను ఆఫర్ చేస్తున్నాయి. కొన్ని మ్యూచువల్ ఫండ్ సంస్థలు రోజువారీ సిప్‌విధానాన్ని కూడా ఆఫర్ చేస్తున్నాయి. రోజువారీ సిప్ విధానంలో ఇన్వెస్ట్ చేయడం సరైనదేనా?  వివరించగలరు.
  - సరళ, వరంగల్
  
 సిస్టమాటిక్ ట్రాన్స్‌ఫర్ ప్లాన్(ఎస్‌టీపీ), సిస్టమాటిక్ ఇన్వెస్ట్‌మెంట్ ప్లాన్(సిప్)లు ఇవి రెండూ వేర్వేరు ఉద్దేశాల కోసం మ్యూచువల్ ఫండ్ కంపెనీలు ఆఫర్ చేస్తున్నాయి. ఎస్‌టీపీని వారం, లేదా నెల ప్రాతిపదికన, సిప్‌ను నెలవారీగా మ్యూచువల్ ఫండ్ సంస్థలు ఆఫర్ చేస్తున్నాయి.  పెద్ద మొత్తంలో ఇన్వెస్ట్ చేయాలనుకునే వారికి  సిస్టమాటిక్ ట్రాన్స్‌ఫర్ ప్లాన్, ప్రతి నెలా కొంత మొత్తంలో ఇన్వెస్ట్ చేసేవారికి సిప్ విధానాలు శ్రేయస్కరం. ఎస్‌టీపీ విషయానికొస్తే, మీ దగ్గర భారీ మొత్తంలో డబ్బులున్నాయనుకోండి. వాటిని ఒకేసారి ఇన్వెస్ట్ చేయకుండా, వారానికి, లేదా నెలకింత అని ఎస్‌టీపీ విధానం కింద ఇన్వెస్ట్ చేయాలి.
 
 ఇలా చేస్తే మార్కెట్  ఒడిదుడుకుల నుంచి రక్షణ పొందవచ్చు. ఇన్వెస్ట్ చేయాలనుకున్న మొత్తాన్ని బట్టి ఎన్ని దఫాలుగా ఇన్వెస్ట్ చేయాలో నిర్ణయించుకోవచ్చు. ఇక ఒకేసారి భారీ మొత్తంలో ఇన్వెస్ట్ చేయదగ్గ డబ్బులు లేని వారికి సిప్ విధానం ఉత్తమమైనది. ఈ విధానంలో ప్రతి నెలా నిర్ణీత మొత్తాన్ని ఇన్వెస్ట్ చేయాల్సి ఉంటుంది. కొన్ని ఫండ్స్ రోజువారీ సిప్ విధానాన్ని ఆఫర్ చేస్తున్నాయి. కానీ ఈ విధానంలో లావాదేవీలు అధికంగా ఉండి ఇన్వెస్ట్‌మెంట్ మదింపు కొంత గందరగోళంగా ఉంటుంది. ఒక ఏడాదిలో దాదాపు 250 లావాదేవీలను గణించాల్సి ఉంటుంది. దీర్ఘకాలం పాటు సిప్ విధానంలో నెలవారీ కొంత మొత్తాన్ని ఇన్వెస్ట్ చేస్తే మంచి ప్రయోజనాలు పొందవచ్చు.
  
 నా వయస్సు 30 సంవత్సరాలు. నా నెలవారీ సంపాదన రూ.50,000. నాకు యాభైఏళ్లు వచ్చేసరికి రూ.2 కోట్ల రిటైర్మెంట్ నిధి ఏర్పాటు చేసుకోవడం నా లక్ష్యం. దీనికి గాను  ఇరవై ఏళ్ల పాటు మ్యూచువల్ ఫండ్స్‌లో ఇన్వెస్ట్ చేయాలనుకుంటున్నాను. ఫ్రాంక్లిన్ ఇండియా స్మాలర్ కంపెనీస్‌లో రూ.3,000, ఐసీఐసీఐ ప్రు వేల్యూ డిస్కవరీలో రూ.3,000, యాక్సిస్ లాంగ్‌టర్మ్ ఈక్విటీలో రూ.2,500, ఎస్‌బీఐ బ్లూచిప్ ఫండ్‌లో రూ.2,000 చొప్పున ఇన్వెస్ట్ చేయాలనేది నా ఆలోచన. ఇది సరిపోతుందా? నా లక్ష్యాన్ని సాధించాలంటే ఎంత మొత్తం నేను ఇన్వెస్ట్ చేయాలి?  మ్యూచువల్ ఫండ్స్‌లో ఇన్వెస్ట్ చేయడానికి డీమ్యాట్ అకౌంట్ అవసరమా?  తగిన సూచనలివ్వండి ?
  - రియాజ్, గుంటూరు
  
 మీరు చెప్పిన వివరాలను బట్టి చూస్తే మీరు నెలకు రూ.10,500 చొప్పున 20 ఏళ్లపాటు ఇన్వెస్ట్ చేయాలనుకుంటున్నారు. ఏడాదికి 12 శాతం రాబడులు వస్తాయనే అంచనాలను బట్టి చూస్తే ఈ ఇన్వెస్ట్‌మెంట్స్‌తో 20 ఏళ్లలో 2 కోట్ల రిటైర్మెంట్ నిధి ఏర్పాటు చేయడం కష్టమే. 20 ఏళ్లలో 2 కోట్ల  నిధి కావాలంటే మీరు నెలకు దాదాపు రూ.20,217 ఇన్వెస్ట్ చేయాల్సి ఉంటుంది. (12 శాతం రాబడి లెక్కన). సెక్షన్ 80 సీ కింద పన్ను ఆదా చేయడం ప్రాధాన్యాంశంగా మీ పెట్టుబడులు ఉండాలి. ఈ సెక్షన్ కింద మీరు రూ.1.5 లక్షలు పన్ను తగ్గింపులు పొందవచ్చు. దీని కోసం యాక్సిస్ లాంగ్‌టర్మ్ ఈక్విటీ ఫండ్‌లో సిప్ విధానంలో ఇన్వెస్ట్ చేయడం ప్రారంభించండి. సెక్షన్ 80సీ పరిమితి దాటిన తర్వాతనే ఇతర మ్యూచువల్ ఫండ్స్‌లో ఇన్వెస్ట్‌మెంట్స్ గురించి ఆలోచించాలి. ఇక మ్యూచువల్ ఫండ్స్‌లో ఇన్వెస్ట్ చేయడానికి డీ మ్యాట్ అకౌంట్ తప్పనిసరి ఏమీ కాదు. మ్యూచువల్ ఫండ్స్‌లో డెరైక్ట్‌గా కానీ, ఏజెంట్ల ద్వారా గానీ ఇన్వెస్ట్ చేయవచ్చు.
 
 ధీరేంద్ర కుమర్
 సిఈవో,వ్యాల్యూరీసెర్చ్
  


 ప్రస్తుతం నా వయస్సు 35 సంవత్సరాలు. సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో, మరికొంత అదనపు ఇన్వెస్ట్‌మెంట్స్‌తో టాటా బ్యాలెన్స్‌డ్ ఫండ్(గ్రోత్ ఆప్షన్)లో ఇప్పటివరకూ రూ.8 లక్షల వరకూ ఇన్వెస్ట్ చేశాను. అయితే 10 నుంచి 10 ఏళ్ల కాలానికి ఐసీఐసీఐ ప్రుడెన్షియల్ వేల్యూ డిస్కవరీ ఫండ్ ఆకర్షణీయ రాబడులనిస్తుందని నా మిత్రుడొకడు చెప్పాడు. అందుకని టాటా బ్యాలెన్స్‌డ్ ఫండ్ నుంచి నా ఇన్వెస్ట్‌మెంట్స్ ఉపసంహరించుకొని ఈ ఫండ్‌లో ఇన్వెస్ట్ చేద్దామనుకుంటున్నాను. ఇది సరైన నిర్ణయమేనా? తగిన సలహా ఇవ్వండి
  - రాజారామ్, విజయవాడ
 
 సంప్రదాయక ఇన్వెస్టర్లకు టాటా బ్యాలెన్స్‌డ్ ఫండ్ మంచి ఇన్వెస్ట్‌మెంట్ సాధనమని చెప్పవచ్చు. ముఖ్యంగా మొదటిసారిగా స్టాక్‌మార్కెట్లో ఇన్వెస్ట్ చేసేవారికి ఈ ఫండ్ మంచి ఎంపిక. ఇక ఐసీఐసీఐ ప్రుడెన్షియల్ వేల్యూ డిస్కవరీకి కూడా మంచి ట్రాక్ రికార్డ్ ఉంది. ఇది మిడ్ అండ్ స్మాల్ క్యాప్ ఫండ్. మీరు ప్రస్తుతం ఇన్వెస్ట్ చేస్తున్న బ్యాలెన్స్‌డ్ ఫండ్‌లో ఒడిదుడుకులు, నష్ట భయం తక్కువగా ఉంటాయి. మీరు మారాలనుకుంటున్న  ఐసీఐసీఐ ప్రుడెన్షియల్ వేల్యూ డిస్కవరీ ఫండ్‌కు తీవ్రమైన ఒడిదుడుకులు ఉంటాయి. రిస్క్ కూడా ఎక్కువే. 2008లో ఈ ఫండ్ 55 శాతం క్షీణించింది. ఈ స్థాయి నష్టభయాన్ని తట్టుకోగలను అనుకుంటే, ఐసీఐసీఐ ప్రుడెన్షియల్ వేల్యూ డిస్కవరీ ఫండ్‌కు నిరభ్యంతరంగా మారిపోండి. ఈ తరహా మిడ్, స్మాల్ క్యాప్ స్టాక్స్‌ల్లో ఇన్వెస్ట్ చేసే మ్యూచువల్ ఫండ్స్ మధ్య కాలానికి తీవ్రమైన ఒడిదుడుకులకు లోనవుతాయి. అయితే దీర్ఘకాలానికి మంచి రాబడులనిస్తాయి. ఉదాహరణకు నెలకు రూ.10,000 చొప్పున 2010 జూలై నుంచి సిప్ విధానంలో ఇన్వెస్ట్ చేస్తే మీ ఇన్వెస్ట్‌మెంట్స్ విలువ ఐసీఐసీఐ ప్రుడెన్షియల్‌లో అయితే రూ.12,22,192గానూ, టాటా బ్యాలెన్స్‌డ్ ఫండ్‌లో అయితే రూ.10,53,354గానూ ఉండేది.
  
 నేను వివిధ మ్యూచువల్ ఫండ్స్‌ల్లో ఇన్వెస్ట్ చేస్తున్నాను. ఈ మ్యూచువల్ ఫండ్ సంస్థలు పంపే అకౌంట్ స్టేట్‌మెంట్‌లు జాయింట్ పేర్లతో ఉన్నాయి. ఈ జాయింట్ పేర్లలో ఒక దానిని(మొదటి లేదా సెకండ్ హోల్డర్) తొలగించాలనుకుంటున్నాను. బ్యాంక్ అకౌంట్ వివరాలు కూడా మారిపోయాయి. వీటిని నా మ్యూచువల్ ఫండ్ అకౌంట్లో ఎలా అప్‌డేట్ చేయించాలి?
 - రాధిక. నిజామాబాద్
  
 యూనిట్ హోల్డర్ల పేర్లు తొలగించడానికి, మార్పు చేయడానికి వీలు లేదు. ఇన్వెస్టర్ మరణించినప్పుడు మాత్రమే సదరు వ్యక్తి పేరును తొలగించడం కుదురుతుంది. ఒక వేళ మీ మ్యూచువల్ ఫండ్ యూనిట్లు డీమ్యాట్ మోడ్‌లో ఉంటే, వేరే డీమ్యాట్ అకౌంట్‌కు ఈ యూనిట్లను బదిలీ చేసుకోవచ్చు. ఇక బ్యాంక్ అకౌంట్ వివరాలను మార్చాలనుకుంటే, మార్చాలనుకుంటున్న వివరాలను, సంబంధిత రుజువులతో ఒక రిక్వెస్ట్ లెటర్‌ను మ్యూచువల్ ఫండ్ సంస్థలకు పంపించండి. మీరు పంపిన వివరాలు, సంబంధిత రుజువుల ప్రకారం మీ మ్యూచువల్ ఫండ్ అకౌంట్‌లో అప్‌డేట్ చేస్తారు. భవిష్యత్తులో మీరు మ్యూచువల్ ఫండ్ యూనిట్లను విక్రయిస్తే, ఈ మేరకు ఎలాంటి ఇబ్బందుల్లేకుండా మీ బ్యాంకు ఖాతాలోకి సొమ్ములొస్తాయి.
  
 నేనొక రిటైర్డ్ ప్రభుత్వ ఉద్యోగిని. నా రిటైర్మెంట్ సమయంలో నేను పోస్ట్ ఆఫీస్ సీనియర్ సిటిజన్ సేవింగ్ స్కీమ్‌లో కొంత మొత్తం ఇన్వెస్ట్ చేశాను. అదిప్పుడు మెచ్యూరయింది. వీటితో కలిపి నా దగ్గర ఇప్పుడు ఇన్వెస్ట్ చేయడానికి రూ.15 లక్షలున్నాయి. కనీసం ఏడాది వరకూ నాకు ఈ డబ్బులతో అవసరం ఉండదు. నాకు 10-12% రాబడి వస్తే చాలు. నా ఇన్వెస్ట్‌మెంట్స్‌కు లిక్విడిటీ కూడా ఉండాలి. తగిన సూచనలివ్వండి.
  - సాయిసురేశ్, నెల్లూరు
  
 మీ డబ్బును మంథ్లీ ఇన్‌కం ప్లాన్(ఎంఐపీ) వంటి ఫండ్స్‌లో ఇన్వెస్ట్ చేయడం మంచిది. ఈ ఫండ్స్ ఎక్కువ మొత్తాన్ని ఫిక్స్‌డ్ ఇన్‌కమ్ సెక్యూరిటీల్లోనూ. 10-25% వరకూ ఈక్విటీల్లోనూ ఇన్వెస్ట్ చేస్తాయి. ద్రవ్యోల్బణాన్ని తట్టుకునే రాబడులను ఇవి ఇస్తాయి. వీటిల్లో మూడేళ్లకు పైగా ఇన్వెస్ట్ చేస్తే పన్ను ప్రయోజనాలు కూడా లభిస్తాయి. అయితే ఇవి పేరుకు తగ్గట్లుగా రెగ్యులర్ ఆదాయం ఇస్తాయని పొరబడకండి. మీ పెన్షన్ ఆదాయానికి అనుబంధంగా మాత్రమే ఈ రాబడులు ఉపయోగపడతాయి. సీనియర్ సిటిజెన్ సేవింగ్స్ స్కీమ్, ఎంఐపీ, బ్యాంక్ డిపాజిట్లు  మాత్రమే గ్యారంటీడ్ రెగ్యులర్ రాబడులనిస్తాయి. కానీ ద్రవ్యోల్బణాన్ని తట్టుకునే రాబడులను మాత్రం ఇవ్వలేవు.
  
 మ్యూచువల్ ఫండ్స్ కన్నా పోర్ట్‌ఫోలియో సర్వీసెస్ మేనేజ్‌మెంట్(పీఎంఎస్)లో ఇన్వెస్ట్ చేస్తే మంచి రాబడులు వస్తాయని విన్నాను. గత ఐదేళ్ల కాలాన్ని పరిగణనలోకి తీసుకుంటే మ్యూచువల్ ఫండ్స్‌లో కన్నా పీఎంఎస్‌లోనే ఎక్కువ రాబడులు వచ్చాయి. పీఎంఎస్ పనితీరును మనం ఎలా అంచనా వేయవచ్చు?
 - సుదీప్ జైన్, సికింద్రాబాద్
  
 పోర్ట్‌ఫోలియో మేనేజ్‌మెంట్ సర్వీస్(పీఎంఎస్)లో స్టాక్స్, డెట్, ఫిక్స్‌డ్ ఇన్‌కమ్ ఇన్‌స్ట్రుమెంట్స్ అన్ని కలగలిపి ఉంటాయి. పీఎంఎస్ పనితీరును వెల్లడించే వివరాలేవీ అందుబాటులో లేవు. పీఎంఎస్‌లో ఇన్వెస్ట్ చేయడానికి కనీసం రూ.25 లక్షలు కావాలి. ఒక్కో వ్యక్తి వ్యక్తిగత అవసరాలు, ఆర్థిక లక్ష్యాలను బట్టి పీఎంఎస్ సర్వీసులుంటాయి. అందుకని ఒక్క పీఎంఎస్ స్కీమ్‌తో మరొక పీఎంఎస్ స్కీమ్‌ను పోల్చడానికి వీలు లేదు. పీఎంఎస్‌తో పోల్చితే మ్యూచువల్ స్కీమ్‌లు పారదర్శకంగా ఉంటాయి. వీటి పనితీరు, ట్రాక్ రికార్డ్ అందుబాటులో ఉంటాయి. అయితే మీరు విన్నట్లుగా మ్యూచువల్ ఫండ్స్ కంటే పోర్ట్‌ఫోలియో మేనేజ్‌మెంట్ సర్వీస్‌లు మంచి రాబడులనే ఇస్తాయి.
 
 ధీరేంద్ర కుమర్


 మ్యూచువల్ ఫండ్స్‌లో డెరైక్ట్ ఆప్షన్ ద్వారా ఇన్వెస్ట్ చేద్దామనుకుంటున్నాను. దీనికి సంబంధించిన పూర్తి వివరాలు తెలపండి?
 - సమీర, విజయవాడ
 
 మ్యూచువల్ ఫండ్స్‌కు సంబంధించి డెరైక్ట్ ప్లాన్‌ల ద్వారా మ్యూచువల్ ఫండ్ సంస్థ నుంచి నేరుగా యూనిట్ల కొనుగోళ్లు/అమ్మకాలు జరపవచ్చు. మధ్యలో ఎలాంటి మధ్యవర్తులు ఉండరు. ఈ డెరైక్ట్ ప్లాన్‌ల వల్ల  డిస్ట్రిబ్యూటర్లకు/ఏజెంట్లకు చెల్లించే కమీషన్ చార్జీలు ఇన్వెస్టర్లకు ఆదా అవుతాయి. మ్యూచువల్ ఫండ్ సంస్థలు ప్రస్తుత, కొత్త స్కీమ్‌ల్లో డెరైక్ట్ ప్లాన్‌లను తప్పనిసరిగా ఆఫర్ చేయాలని సెబీ ఆదేశాలు జారీ చేసింది. ఈ ఆదేశాలు 2013, జనవరి 1 నుంచే అమల్లోకి వచ్చాయి.
 
 మీరు ఆశించే రాబడులు, మీరు భరించగలిగే రిస్క్‌లను బట్టి సరైన మ్యూచువల్ ఫండ్ స్కీమ్‌లను ఎన్నుకోగలను అన్న ధీమా ఉన్నప్పుడే మీరు డెరైక్ట్ ప్లాన్లల్లో ఇన్వెస్ట్ చేయడం మంచిది. మ్యూచువల్ ఫండ్స్‌కు సంబంధించి రెగ్యులర్ ప్లాన్లల్లో మూడు రకాలైన (మేనేజ్‌మెంట్, నిర్వహణ, డిస్ట్రిబ్యూటర్)... వ్యయాలుంటాయి. అదే డెరైక్ట్ ప్లాన్లల్లో అయితే రెండు రకాలైన వ్యయాలు మాత్రమే ఉంటాయి. డిస్ట్రిబ్యూటర్ వ్యయాలు ఉండవు. ఫలితంగా ఎక్స్‌పెన్స్ రేషియో తక్కువగా ఉండి రాబడులు ఎక్కువగా ఉంటాయి.  ఏ స్కీమ్ పోర్ట్‌ఫోలియో అయినా, డెరైక్ట్, రెగ్యులర్ ప్లాన్‌లకు ఒకే విధంగా ఉంటుంది. ఇన్వెస్ట్‌మెంట్ లక్ష్యాలు, నిధుల కేటాయింపు, ఇన్వెస్ట్‌మెంట్ వ్యూహం, ఎగ్జిట్ లోడ్, రిస్క్ అంశాలు, తదితర అంశాలన్నీ ఒకే రకంగా ఉంటాయి.
  
 డెట్ ఫండ్స్‌కు ప్రత్యామ్నాయంగా ఆర్బిట్రేజ్ ఫండ్స్‌ను పరిగణించవచ్చా? పన్ను పరంగా ఆర్బిట్రేజ్ ఫండ్స్ ఆకర్షణీయమేనా ?
 - విజయ్, కరీంనగర్
  
 పన్ను అంశాల పరంగా చూస్తే డెట్ ఫండ్స్‌కు ప్రత్యామ్నాయంగా ఆర్బిట్రేజ్ ఫండ్స్‌ను పరిగణించవచ్చు. గత బడ్జెట్‌లో డెట్ ఫండ్స్‌కు సంబంధించి పన్ను అంశాల్లో మార్పులు వచ్చాయి. డెట్ ఫండ్స్‌లో ఇన్వెస్ట్‌మెంట్స్‌ను మూడేళ్లకు మించి కొనసాగిస్తేనే వాటిపై వచ్చే రాబడులను దీర్ఘకాలిక మూలదన లాభాలుగా పరిగణించేలా పన్ను సంబంధిత అంశాల్లో మార్పులు,చేర్పులు చేశారు. దీంతో పన్ను పరంగా డెట్ ఫండ్స్‌కు ఉన్న ఆకర్షణ పోయింది. పన్ను అంశాల పరంగా చూస్తే ఆర్బిట్రేజ్ ఫండ్స్‌ను ఈక్విటీ ఫండ్స్‌గా పరిగణిస్తారు. ఏడాది తర్వాత వీటిపై లభించే రాబడులపై ఎలాంటి పన్నులు చెల్లించాల్సిన పనిలేదు. ఒకవేళ ఏడాదిలోపే విక్రయిస్తే 15 శాతం స్వల్పకాల మూలధన లాభాల పన్ను చెల్లించాల్సి ఉంటుంది. స్వల్పకాల డెట్ ఫండ్స్ లేదా లిక్విడ్ ఫండ్స్ కన్నా ఇవి తక్కువ రాబడులనే ఇచ్చినప్పటికీ, వాటికి ఇవి మంచి ప్రత్యామ్నాయ ఇన్వెస్ట్‌మెంట్ సాధనాలుగా పరిగణించవచ్చు. పైగా పలు పన్ను ప్రయోజనాల కారణంగా ఇవి ఆకర్షణీయమైన ఇన్వెస్ట్‌మెంట్ సాధనాలని చెప్పవచ్చు.
  
 నా వయస్సు 39 సంవత్సరాలు. ఆరోగ్యకరంగా ఫిట్‌గానే ఉన్నాను. నేను రూ.75 లక్షలకు గాని, రూ. కోటికి గానీ టర్మ్ ఇన్సూరెన్స్ తీసుకోవాలనుకుంటున్నాను. హెచ్‌డీఎఫ్‌సీ క్లిక్2 ప్రొటెక్ట్, మ్యాక్స్ లైఫ్ టర్మ్ పాలసీ రెండింటిల్లో దేనిని తీసుకోమంటారు ?
 - భవానీ, నెల్లూరు
 
 మ్యాక్స్ ఆన్‌లైన్ టర్మ్ ప్లాన్, హెచ్‌డీఎఫ్‌సీ క్లిక్2 ప్రొటెక్ట్ .. ఇవి రెండూ మంచి టర్మ్ పాలసీలే. కాకుంటే ప్రీమియమ్‌ల్లో తేడా ఉంది. రెండు కంపెనీలకు క్లెయిమ్‌ల సెటిల్మెంట్ విషయంలో మంచి ట్రాక్ రికార్డే ఉంది. రెండింటిలో ఏదైనా ఎంచుకోవచ్చు. అలా కాకుండా 50 లక్షలకొక టర్మ్ పాలసీ చొప్పున రెండు కంపెనీలవీ తీసుకోవచ్చు. పాలసీ తీసుకునేటప్పుడే అన్ని వ్యక్తిగత, ఆరోగ్య సంబంధిత వివరాలను తప్పనిసరిగా వెల్లడించాలి. జరగరానిది ఏదైనా జరిగితే, క్లెయిమ్‌ల విషయంలో ఎలాంటి అసౌకర్యం తలెత్తదు. మీ వయస్సును బట్టి రూ.50 లక్షల టర్మ్ పాలసీకి మ్యాక్స్ ఆన్‌లైన్ టర్మ్ పాలసీకి అయితే ఏడాదికి రూ.6,400, హెచ్‌డీఎఫ్‌సీ క్లిక్2 ప్రొటెక్ట్‌కు అయితే రూ.8,600 చొప్పున ప్రీమియం చెల్లించాల్సి ఉంటుంది.
  
 గత నాలుగు నెలల నుంచి మ్యూచువల్ ఫండ్స్‌లో ఇన్వెస్ట్ చేయడం ప్రారంభించాను. నా వార్షికాదాయం రూ.2.3 లక్షలలోపే ఉంది.నేను ఆదాయపు పన్ను రిటర్న్ దాఖలు చేయలేదు. మ్యూచువల్ ఫండ్స్‌లో ఇన్వెస్ట్ చేస్తున్నాను కాబట్టి ఆదాయపు పన్ను రిటర్న్ దాఖలు చేయడం తప్పనిసరా? ఏయే పరిస్థితుల్లో ఆదాయపు పన్ను రిటర్న్‌లు దాఖలు చేయాల్సి ఉంటుంది?
  - శ్రీకాంత్, హైదరాబాద్
 
 మ్యూచువల్ ఫండ్స్‌లో ఇన్వెస్ట్ చేసినంత మాత్రాన తప్పనిసరిగా ఆదాయపు పన్ను రిటర్న్‌లు దాఖలు చేయాలన్న నిబంధనేదీ లేదు. మీ వార్షికాదాయం రూ.2,50,000 దాటితేనే మీరు ఆదాయపు పన్ను రిటర్న్‌లు దాఖలు చేయాల్సి ఉంటుంది. ఐదు రకాల ఆదాయాలు(వేతనం, గృహాస్తి, వ్యాపారం/వృత్తి ద్వారా లాభాలు, మూలధన లాభాలు(మ్యూచువల్ ఫండ్ విక్రయాల ద్వారా లభించే లాభాలు కలుపుకొని), ఇతర మార్గాలు) మొత్తాన్ని కలిపి ఆదాయపు పన్ను లెక్కిస్తారు.
 
 ధీరేంద్ర కుమార్
 సీఈవొ,వ్యాల్యూ రీసెర్చ్


 మ్యూచువల్ ఫండ్ ఇన్వెస్ట్‌మెంట్స్‌కు సంబంధించి డెరైక్ట్ ఆప్షన్ అంటే ఏమిటి ? దీంట్లో ఎలా ఇన్వెస్ట్ చేస్తారు? ఇలా డెరైక్ట్ ఆప్షన్‌లో ఇన్వెస్ట్ చేయడం వల్ల ఇన్వెస్టర్లకు ఏమైనా ప్రయోజనం ఉంటుందా?
 - వందన, హైదరాబాద్
 
 మ్యూచువల్ ఫండ్స్‌లో పెట్టుబడులకు సంబంధించి రెండు విధానాలున్నాయి. ఒకటి డెరైక్ట్ ప్లాన్ ద్వారా ఇన్వెస్ట్ చేయడం. రెండోది రెగ్యులర్ ప్లాన్‌లో ఇన్వెస్ట్ చేయడం.  ఏదైనా మ్యూచువల్ ఫండ్ డెరైక్ట్ ప్లాన్‌లో మీరు ఇన్వెస్ట్ చేస్తే, మీరు నేరుగా సదరు మ్యూచువల ఫండ్‌తోనే లావాదేవీలు చేసినట్లు లెక్క. ఇక రెగ్యులర్ ప్లాన్‌లో అయితే డిస్ట్రిబ్యూటర్/అడ్వైజర్/ఏజెంట్ ద్వారా ఇన్వెస్ట్ చేయాల్సి ఉంటుంది. రెగ్యులర్ ప్లాన్‌లో ఇన్వెస్ట్ చేస్తే సదరు డిస్ట్రిబ్యూటర్/అడ్వైజర్/ఏజెంట్‌లకు కొంత కమీషన్‌ను మ్యూచువల్ ఫండ్ సంస్థ చెల్లిస్తుంది. ఇలాంటి కమీషన్‌లు మీకు వచ్చే రాబడులపై ప్రభావం చూపుతాయి.  డెరైక్ట్ ప్లాన్‌లో కనుక ఇన్వెస్ట్ చేస్తే ఇలాంటి కమీషన్లు ఉండవు. కాబట్టి మీకు రాబడులు అధికంగా వచ్చే అవకాశాలున్నాయి. 2012, సెప్టెంబర్‌లో సెబీ మ్యూచువల్ ఫండ్స్‌కు సంబంధించి చాలా సంస్కరణలను తెచ్చింది. వాటిల్లో డెరైక్ట్ ప్లాన్‌లు ఒకటి. ఇప్పుడు ప్రతీ మ్యూచువల్ ఫండ్ సంస్థ డెరైక్ట్ ప్లాన్‌లను ఆఫర్ చేస్తున్నాయి. రెగ్యులర్ ప్లాన్‌తో పోల్చితే డెరైక్ట్ ప్లాన్‌కు ఎక్స్‌పెన్స్ రేషియో తక్కువగా ఉంటుంది.
 
 ఎన్‌ఏవీలు కూడా డెరైక్ట్ ప్లాన్‌కు, రెగ్యులర్ ప్లాన్‌కు తేడాగా ఉంటాయి. డెరైక్ట్ ప్లాన్ అయినా, రెగ్యులర్ ప్లాన్ అయినా సదరు స్కీమ్ పోర్ట్‌ఫోలియో ఒకే విధంగా ఉంటుంది. అంతేకాకుండా, ఇన్వెస్ట్‌మెంట్ లక్ష్యం, నిధుల కేటాయింపు, మదుపు వ్యూహం, ఎగ్జిట్ లోడ్, నష్టభయ అంశాలు, ఇతర అంశాలు అన్నీ ఒకే విధంగా ఉంటాయి. ఈ అంశాలన్నింటిని పరిగణనలోకి తీసుకుంటే మ్యూచువల్ ఫండ్స్ స్కీమ్స్‌కు సంబంధించి డెరైక్ట్ ప్లాన్‌ల్లోనే ఇన్వెస్ట్ చేయడం సముచితంగా ఉంటుంది. అయితే  సరైన ఫండ్ స్కీమ్‌ను ఎంచుకోవాలంటే కొంచెం కష్టపడక తప్పదు. డెరైక్ట్, రెగ్యులర్ ప్లాన్‌లకు సంబంధించి ఒక ఉదాహరణను చూస్తే,  హెచ్‌డీఎఫ్‌సీ బ్యాలెన్స్ ఫండ్ రెగ్యులర్ ప్లాన్ ఎక్స్‌పెన్స్ రేషియో 2.07గా ఉండగా, డెరైక్ట్ ప్లాన్ ఎక్స్‌పెన్స్ రేషియో 1.2గా ఉంది. ఎలాంటి కమీషన్ల బెడద ఉండదు కాబట్టి డెరైక్ట ప్లాన్ ఎక్స్‌పెన్స్ రేషియో 42 శాతం తక్కువగా ఉంది. ఇక రాబడుల విషయానికొస్తే, రెగ్యులర్ ప్లాన్ 18 శాతం, డెరైక్ట్ ప్లాన్ 19 శాతం చొప్పున రిటర్న్‌లను ఇచ్చాయి. స్వల్పకాలానికి పెద్దగా తేడా లేకపోయినా, దీర్ఘకాలంలో మాత్రం రాబడుల్లో భారీగా వ్యత్యాసం ఉంటుందని చెప్పవచ్చు.
 చాలా మ్యూచువల్ ఫండ్ సంస్థల ఈక్విటీ ఫండ్స్ ఎక్స్‌పెన్స్ రేషియో 2 నుంచి 3 శాతంగా ఉంటోంది. మ్యూచువల్ ఫండ్ సంస్థలు ప్రకటించే రాబడుల్లో ఈ ఎక్స్‌పెన్స్ రేషియోను మినహాయిస్తారా? ఉదాహరణకు ఒక మ్యూచువల్ ఫండ్ సంస్థ 22 శాతం రాబడులు వస్తాయని పేర్కొంటే, ఎక్స్‌పెన్స్ రేషియోను మినహాయించి మిగిలింది చెల్లిస్తారా? లేకుంటే మొత్తం 22 శాతం రాబడులను పూర్తిగా చెల్లిస్తారా? ఎన్‌ఏవీలో దీనిని కలిపేసే చెబుతారా?                  
 - రాజ్, గుంటూరు
 అన్ని చార్జీలు, వ్యయాలను మినహాయించిన తర్వాతనే ఎన్‌ఏవీని నిర్ణయిస్తారు. ఏదైనా ఒక ఫండ్ రాబడులు 22 శాతం వస్తాయని మ్యూచువల్ ఫండ్ సంస్థ పేర్కొంటే అంతే మొత్తం రాబడులు మీకు వస్తాయి.
 
 నేను రెండు బీమా పాలసీలు తీసుకున్నాను. ఒకటి ఎల్‌ఐసీ న్యూ బీమా గోల్డ్ టి179(2010లో తీసుకున్నా, 16 ఏళ్ల పాలసీ, ప్రీమియం రూ.30,000 ఏడాదికి. ఇది మనీ బ్యాక్ పాలసీ) రెండోది  ఐసీఐసీఐ ప్రు లైఫ్ వెల్త్ బిల్డర్(2011లో తీసుకున్నా, 10 ఏళ్ల పాలసీ, 30 వేల ప్రీమియం ఏడాదికి). ఇక గత ఏడాది నవంబర్ నుంచి యాక్సిస్, ఐసీఐసీఐ ఈఎల్‌ఎస్‌ఎస్(ఈక్విటీ లింక్డ్ సేవింగ్స్ స్కీమ్) ఫండ్స్‌లో నెలకు రూ.1000 చొప్పున ఇన్వెస్ట్ చేయడం ప్రారంభించాను. ఈ రెండు బీమా పాలసీల్లో ఒకదానిని సరెండర్ చేసి, ఈఎల్‌ఎస్‌ఎస్‌ల్లో ఇన్వెస్ట్‌మెంట్స్‌ను పెంచాలని ఆలోచిస్తున్నాను. దేనిని సరెండర్ చేయమంటారు? సరెండర్ చేసిన పక్షంలో ఏమైనా పన్నులు చెల్లించాల్సి ఉంటుందా?
 - సతీష్, కరీంనగర్
 
 బీమాను, మదుపును కలగలిపి ఒకే దాంట్లో ఇన్వెస్ట్ చేయడం సరికాదు. మీరు తీసుకున్న రెండు బీమా పాలసీలు అలాంటివే. ఎల్‌ఐసీ న్యూ బీమా గోల్డ్ మనీ బ్యాక్ పాలసీ కాగా, ఐసీఐసీఐ ప్రుడెన్షియల్ లైఫ్ వెల్త్ బిల్డర్ యూనిట్ లింక్డ్ ప్లాన్. ఈఎల్‌ఎస్‌ఎస్‌లో ఇన్వెస్ట్‌మెంట్స్ పెంచడానికి రెండింట్లో ఏదో ఒకదానిని సరెండర్ చేయాలనేది మీ యోచన. ఎల్‌ఐసీ పాలసీని సరెండర్ చేస్తే మంచిది. కారణాలు రెండే, ఈ పాలసీకి సంబంధించిన వ్యయాలను సరైన రీతిలో ఎల్‌ఐసీ వెల్లడించడం లేదు. రెండోది పాలసీ కాలవ్యవధి(16 సంవత్సరాలు) ఎక్కువగా ఉంది. ఈ పాలసీని సరెండర్ చేస్తే మీకు బీమా రక్షణ ఉండదు. అందుకని మీరు టెర్మ్ ఇన్సూరెన్స్ పాలసీ తీసుకోవడం ఉత్తమం. పాలసీ వ్యవధి ఇంకా ఐదేళ్లు పూర్తి కాలేదు. కాబట్టి  ఈ పాలసీని సరెండర్ చేయగా వచ్చిన మొత్తాన్ని మీ ఆదాయానికి కలిపి మీ ట్యాక్స్ స్లాబ్ రేట్ ప్రకారం పన్ను విధిస్తారు.
 
 ధీరేంద్ర కుమార్
  సీఈవో, వ్యాల్యూ రీసెర్చ్


 మా నాన్నగారి వయస్సు 57 సంవత్సరాలు. ఆయన 2017 నవంబర్‌లో రిటైరవుతున్నారు. ఆయన కొంత మొత్తాన్ని న్యూ ఫండ్ ఆఫర్స్(ఎన్‌ఎఫ్‌ఓ)లో ముఖ్యంగా క్లోజ్డ్ ఎండెడ్ ఫండ్స్‌లో ఇన్వెస్ట్ చేయాలనుకుంటున్నారు. వీటికి లాకిన్ పీరియడ్ మూడేళ్లుగా ఉంది. రిటైర్మెంట్ దగ్గరగా ఉన్న నేపథ్యంలో ఇలాంటి నిర్ణయం తీసుకోవడం సరైనదేనా?
 
 - వేద ప్రకాష్, హైదరాబాద్
 రిటైర్మెంట్‌కు దగ్గరగా ఉన్న ఈ సమయంలో ఈ నిర్ణయం సరైనది కాదు. అంతేకాకుండా ఈక్విటీల్లో ఏమైనా ఇన్వెస్ట్‌మెంట్స్ ఉంటే వాటిని డెట్ ఇన్వెస్ట్‌మెంట్స్‌ల్లోకి మార్చుకోవాలి. భారత్‌లో మార్కెట్ సైకిల్స్ 3-5 సంవత్సరాలుగా ఉంటా యి. ఒకవేళ స్టాక్ మార్కెట్ డౌన్‌ట్రెండ్‌లో ఉందనుకోండి. క్లోజ్ ఎండ్ ఫండ్‌లు మెచ్యూర్ అయితే, మీ నాన్నగారికి తక్కువ రాబడులు రావచ్చు. నష్టాలు కూడా వచ్చే అవకాశాలు ఉన్నాయి. రిటైరవుతున్నారు కాబట్టి మార్కెట్ కోలుకొని మంచి రిటర్న్‌లు వచ్చేదాకా వేచి చూసే పరిస్థితి ఉండదు. మరొక విషయమేమిటంటే, న్యూ ఫండ్ ఆఫర్స్‌లో ఇన్వెస్ట్ చేయడం ఎవరికైనా సరే ఎప్పుడూ మంచి నిర్ణయం కాదు. ఒక వేళ మీ నాన్నగారికి ఈక్విటీలపై ఆసక్తి ఉన్న పక్షంలో దీర్ఘకాలాన్ని దృష్టిలో పెట్టుకొని మంచి రేటింగ్ ఉన్న ఓపెన్ ఎండెడ్ ఈక్విటీ ఫండ్స్‌లో ఇన్వెస్ట్ చేయమనండి.
 నేను ఇంటర్నేషనల్ ఫండ్స్‌లో ఇన్వెస్ట్ చేద్దామనుకుంటున్నాను. ఎలా ఇన్వెస్ట్ చేయాలి?  ఇంటర్నేషనల్ మ్యూచువల్ ఫండ్స్‌లో ఇన్వెస్ట్ చేయడం సరైనదేనా?
 
  - అవినాశ్ జైన్, సికింద్రాబాద్
 డైవర్సిఫికేషన్ నిమిత్తం ఇంటర్నేషనల్ ఫండ్స్‌లో ఇన్వెస్ట్ చేస్తే మంచిదే. భారత కంపెనీల పనితీరు పేలవంగా ఉన్నా, మార్కెట్లు పతన బాటలో ఉన్నా, రూపాయి క్షీణిస్తూ ఉన్నా, ఈ ప్రతికూలతలను ఇంటర్నేషనల్ ఫండ్స్‌లో ఇన్వెస్ట్ చేయడం ద్వారా అధిగమించవచ్చు. భారత మార్కెట్లు అన్ని వేళలా మంచి రాబడులను ఇవ్వలేవు. ఒక్కొక్కసారి కొన్ని ఇతర దేశాల మార్కెట్లు భారత మార్కెట్ల కంటే మంచి పనితీరునే కనబరిచే అవకాశాలూ ఉండొచ్చు. మీ పోర్ట్‌ఫోలియోలో ఇంటర్నేషనల్ ఫండ్ ఉండడం వల్ల మీరు డైవర్సిఫికేషన్ ప్రయోజనాలు పొందవచ్చు. మూడు మార్గాల్లో మీరు అంతర్జాతీయ ఫండ్స్‌లో ఇన్వెస్ట్ చేయవచ్చు. మొదటిది. .. భారత కంపెనీల్లో 65 శాతం ఇన్వెస్ట్ చేసి, మిగిలిన మొత్తాన్ని విదేశీ స్టాక్స్‌లో ఇన్వెస్ట్ చేసే మ్యూచువల్ ఫండ్స్ యూనిట్లను కొనుగోలు చేయవచ్చు. ఈ ఫండ్స్‌లో ఇన్వెస్ట్ చేస్తే మీకు ఈక్విటీ ఫండ్స్‌కు లభించే పన్ను ప్రయోజనాలు కూడా లభిస్తాయి. ఈ కేటగిరి కింద వచ్చే ఫండ్స్... టెంపుల్టన్ ఇండియా ఈక్విటీ ఇన్‌కమ్ ఫండ్, బిర్లా సన్‌లైఫ్ ఇంటర్నేషనల్ ఈక్విటీ ఫండ్. రెండవది... ఏదైనా ఒక ప్రాంతాన్ని గానీ, ఏదైనా ఒక కరెన్సీని గానీ ప్రధానంగా తీసుకుని కార్యకలాపాలు నిర్వహించే ఫీడర్ ఫండ్‌లో ఇన్వెస్ట్ చేయడం. దీని కోసం మీరు ప్రస్తుతం యూఎస్ ఈక్విటీ ఫండ్స్‌ను ఎంచుకోవచ్చు. ఎందుకంటే, ఇప్పుడు అమెరికా మార్కెట్లు మంచి స్థితిలో ఉన్నాయి. అంతే కాకుండా డాలర్ కూడా బలపడుతోంది. ఈ కేటగిరిలో పరిశీలించదగ్గ ఫండ్స్... ఫ్రాంక్లిన్ యూఎస్ ఈక్విటీస్ ఫండ్, ఐసీఐసీఐ ప్రుడెన్షియల్ యూఎస్ బ్లూచిప్ ఈక్విటీ ఫండ్. అయితే వీటికి పన్ను ప్రయోజనాలు ఉండవు. ఇక మూడవది. ఎనర్జీ, అగ్రికల్చర్, కమోడిటీస్ వంటి థీమ్ ఫండ్స్‌లో ఇన్వెస్ట్ చేయడం, ఈ కేటగిరిలో పరిశీలించదగ్గ ఫండ్స్... డీఎస్‌పీ బ్లాక్‌రాక్ వరల్డ్ ఎనర్జీ, అగ్రికల్చర్ ఫండ్, ఎల్ అండ్ టీ గ్లోబల్ రియల్ అసెట్స్ ఫండ్, అయితే సంబంధిత థీమ్ పట్ల మీకు ప్రత్యేకమైన అవగాహన ఉన్నప్పుడే ఇలాంటి థీమ్ ఫండ్స్‌లో ఇన్వెస్ట్ చేయాలి.
 బ్యాలెన్స్‌డ్ ఫండ్‌లో రిటైర్మెంట్ ఇన్వెస్ట్‌మెంట్స్ కోసం ఏ ప్లాన్‌ను ఎంచుకోవాలి? డివిడెండ్ ప్లాన్‌నా లేకుంటే గ్రోత్ ప్లాన్‌నా?
 
 - బిందు మాధవి, విజయవాడ
 మీ ప్రశ్నలో స్పష్టత లేదు. మీరు ఇప్పటికే రిటైరయ్యారా ? లేకుంటే రిటైర్మెంట్ అవసరాల కోసం ఇప్పుడు ఇన్వెస్ట్ చేయాలనుకుంటున్నారా? అన్న విషయాల్లో స్పష్టత లేదు. సరే. ఒకవేళ మీరు రిటైర్మెంట్ అవసరాల కోసం ఇన్వెస్ట్ చేయాలనుకుంటే, గ్రోత్ ఆప్షన్‌ను ఎంచుకోండి. మీకు మంచి రాబడులు వస్తాయి. చక్రగతి వృద్ధి ప్రయోజనాలు పొందగలరు. ఒక వేళ డివిడెండ్ ప్లాన్‌ను ఎంచుకుంటే లభించే డివిడెండ్‌లు ఏదో విధంగా ఖర్చయిపోతాయి. ఇక మీరు ఇప్పటికే రిటైరైపోతే,  మీ ఆర్థిక అవసరాలకనుగుణంగా నిర్ణయం తీసుకోండి. మీకు క్రమబద్ధంగా సొమ్ములు అవసరమైన పక్షంలో డివిడెండ్ ఆప్షన్‌ను ఎంచుకోండి. అలాంటి అవసరం లేకపోతే గ్రోత్ ఆప్షన్‌ను ఎంచుకోవడం మంచిది.


 నేను ఏడాది క్రితం రూ.5 లక్షల విలువైన హెచ్‌డీఎఫ్‌సీ లిక్విడ్ డెరైక్ట్-జీ యూనిట్లను కొనుగోలు చేశాను. మూడేళ్లలోపు ఈ యూనిట్లను విక్రయిస్తే నేను స్వల్పకాలిక మూల ధన లాభాల పన్ను చెల్లించాల్సి ఉంటుంది. ఈ ఫండ్ యూనిట్లను హెచ్‌డీఎఫ్‌సీ ఈక్విటీ డెరైక్ట్-జీ స్కీమ్‌తో విలీనం చేయాలనుకుంటున్నాను. ఇలా చేసిన ఏడాది తర్వాత ఆ యూనిట్లను విక్రయిస్తే నేను స్వల్పకాలిక మూల ధన లాభాల పన్ను చెల్లించాల్సి ఉంటుందా?
  - అనిత, హైదరాబాద్
  
 రెండు ఫండ్ హోల్డింగ్స్‌ను ఇక సాధారణ ఇన్వెస్టర్‌గా మీరు విలీనం చేయలేరు. విలీన నిర్ణయం ఫండ్ హౌస్‌లకు మాత్రమే ఉంటుంది. సాధారణంగా ఒకే విధమైన లక్ష్యాలున్న ఫండ్ స్కీమ్‌లను ఫండ్ హౌస్‌లు విలీనం చేస్తాయి. ఈక్విటీ ఇన్వెస్టింగ్ మీకు సౌకర్యకరంగా ఉంటే,(స్వల్పకాలంలో తగినంత రిస్క్ భరించగలిగి, దీర్ఘకాలం పాటు ఇన్వెస్ట్ చేయగలిగిన ఓపిక ఉంటే) హెచ్‌డీఎఫ్‌సీ లిక్విడ్ డెరైక్ట్-జీ యూనిట్లను సిస్టమాటిక్ ట్రాన్స్‌ఫర్ ప్లాన్(ఎస్‌టీపీ)ద్వారా హెచ్‌డీఎఫ్‌సీ ఈక్విటీ డెరైక్ట్-జీ ఫండ్ స్కీమ్‌కు మార్చుకోవచ్చు. ఇలా బదిలీ చేస్తే హెచ్‌డీఎఫ్‌సీ లిక్వ్‌డ్ ఫండ్ యూనిట్లను విక్రయించినట్లుగానే పరిగణిస్తారు.
 
 మీరు స్వల్పకాలిక మూలధన లాభాల పన్ను చెల్లించాల్సి ఉంటుంది. మీ ఆదాయ పన్ను శ్లాబుననుసరించి పన్ను రేటు ఉంటుంది. హెచ్‌డీఎఫ్‌సీ లిక్విడ్ ఫండ్‌లో మూడేళ్లకు మించి మీరు మీ ఇన్వెస్ట్‌మెంట్స్‌ను కొనసాగిస్తేనే మీకు దీర్ఘకాల మూల ధన లాభాల పన్ను ప్రయోజనాలు లభిస్తాయి.
  
 నేను 2002లో బిర్లా సన్ ఫ్లెక్సీ సేవ్ ప్లస్(ఎండోమెంట్) పాలసీ తీసుకున్నాను. దీనికి ప్రీమియం 40 సంవత్సరాల పాటు చెల్లించాల్సి ఉంటుంది. నేను ఇప్పటి వరకూ (13 ఏళ్లపాటు) ప్రీమియమ్‌లు చెల్లించాను. ఇది మంచి పాలసీయేనా? దీంట్లో కొనసాగమంటారా? లేక సరెండర్ చేయమంటారా?
  - సురేందర్, గుంటూరు
  
 ఎండోమెంట్ పాలసీలు సరైన రాబడులను ఇవ్వలేవు. ద్రవ్యోల్బణాన్ని పరిగణనలోకి తీసుకుంటే ఈ పాలసీలు రాబడులు ఏమంత సంతృప్తికరంగా ఉండవని చెప్పవచ్చు. బాగా దీర్ఘకాలం పాటు ఉండే ప్లాన్ ఇది. ఈ పాలసీ వ్యయ వివరాలు కూడా ఏమంత పారదర్శకంగా ఉండవు. అందుకని ఈ పాలసీని సరెండర్ చేయడమే సముచితంగా ఉంటుంది. ఈ పాలసీని మీరు సరెండర్ చేస్తే, ఆ సరెండర్ వేల్యూ  మీరు చెల్లించిన ప్రీమియమ్ మొత్తంలో 30 శాతానికి సమానంగా ఉంటుంది. (మొదటి ఏడాది చెల్లించిన ప్రీమియం కాక)ఇక నుంచి  ఈ పాలసీ కోసం కేటాయించిన ప్రీమియం మొత్తాలను ఏదైనా ఈక్విటీ మ్యూచువల్ ఫండ్‌లో ఇన్వెస్ట్ చేయండి.
  
 నేను ఇప్పటి వరకూ మ్యూచువల్ ఫండ్స్‌లో ఇన్వెస్ట్ చేయలేదు. కానీ మ్యూచువల్ ఫండ్స్ మంచి రాబడులను ఇస్తాయని మిత్రులు చెప్పడంతో వీటిల్లో ఇన్వెస్ట్ చేయాలనుకుంటున్నాను. విస్తృతంగా రీసెర్చ్ చేసిన తర్వాత నేను కొన్ని ఫండ్స్‌ను ఎంపిక చేశాను. అవి..హెచ్‌డీఎఫ్‌సీ బ్యాలెన్స్‌డ్, హెచ్‌డీఎఫ్‌సీ మిడ్‌క్యాప్ ఆపర్చునిటీస్, రిలయన్స్ స్మాల్ క్యాప్,.. వీటిల్లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో మూడేళ్ల పాటు ఇన్వెస్ట్ చేద్దామనుకుంటున్నాను. కానీ ఈ ఫండ్స్ నెట్ అసెట్ వేల్యూ(ఎన్‌ఏవీ)లు అధికంగా ఉన్నాయి.  నేను ఎంపిక చేసిన ఫండ్స్ మంచి రాబడులనే ఇస్తాయా? ఎన్‌ఏవీ అధికంగా ఉన్నప్పటికీ, వాటిల్లో ఇన్వెస్ట్ చేయవచ్చా?                              -జాన్సన్, విశాఖపట్టణం
  
 మ్యూచువల్ ఫండ్స్‌లో సిప్ విధానంలో ఇన్వెస్ట్ చేయాలని నిర్ణయించుకోవడం మంచి నిర్ణయమే. ఇక మీరు ఎంపిక చేసిన మూడు ఫండ్స్‌లో హెచ్‌డీఎఫ్‌సీ బ్యాలెన్స్‌డ్ ఫండ్ మంచి ఎంపిక. మిగిలిన రెండు మంచి ఫండ్సే అయినప్పటికీ, మీరు మూడేళ్ల పాటు ఇన్వెస్ట్ చేయాలనుకుంటున్నారు. కాబట్టి, ఇప్పుడే మ్యూచువల్ ఫండ్స్‌లో ఇన్వెస్ట్‌మెంట్స్ ప్రారంభించిన మీలాంటి ఇన్వెస్టర్లకు ఇవి సరైనవి కావు.
 
 ఇక ఎన్‌ఏవీ విషయానికొస్తే, మ్యూచువల్ ఫండ్స్‌లో ఇన్వెస్ట్ చేయడానికి అది అసలు సమస్యే కాదు. ఒక మ్యూచువల్ ఫండ్ గతాన్ని, ప్రస్తుతంతో పోల్చడానికి మాత్రమే ఎన్‌ఏవీ ఉపయోగపడుతుంది. మ్యూచువల్ ఫండ్స్ పనితీరును బట్టి వాటిని అంచనా వేయాలి కానీ, ఎన్‌ఏవీని బట్టి కాదు. వివిధ కాలాల్లో ఆ ఫండ్ ఇచ్చిన రాబడులను, పోర్ట్ ఫోలియో వివరాలను బట్టి మ్యూచువల్ ఫండ్స్ పనితీరును మదింపు చేయాలి.


  నేను 2004 నుంచి 2007 వరకూ మ్యూచువల్ ఫండ్స్‌లో ఇన్వెస్ట్ చేశాను. పెట్టిన పెట్టుబడులపై 5-6 రెట్లు రాబడులు వచ్చాయి. 2009 నుంచి మళ్లీ మ్యూచువల్ ఫండ్స్‌లో ఇన్వెస్ట్ చేయడం మొదలు పెట్టాను. మంచి రాబడులే వస్తున్నాయి. ఇంత వరకూ వీటిని విక్రయించలేదు. వీటి నుంచి లాభాలను తీసుకొని ప్రస్తుతం మరింత రాబడులు ఇస్తున్న మ్యూచువల్ ఫండ్స్‌లో ఇన్వెస్ట్ చేయమంటారా? ఇక మా నాన్నగారు కూడా మ్యూచువల్ ఫండ్స్‌లో ఇన్వెస్ట్ చేయాలనుకుంటున్నారు. ఈక్విటీ ఫండ్స్‌లో పెట్టుబడులు పెట్టమని సలహా ఇచ్చాను. నా సలహా సరైనదేనా?
  - వాసుదేవ్, గుంటూరు
  మీరు దీర్ఘకాలం ఇన్వెస్ట్ చేశారు కాబట్టి, మీకు మంచి రాబడులు వచ్చాయి. మీరు దీర్ఘకాలం దృష్ట్యా కొన్ని మ్యూచువల్ ఫండ్స్‌లో ఇన్వెస్ట్ చేశారు. కానీ వాటిని విక్రయించలేదు.  లాభాలను తీసుకోలేదు.  షేర్లలో ఇన్వెస్ట్ చేసేవారు కాక  ట్రేడింగ్ చేసేవారు లాభాలు స్వీకరిస్తారు. మ్యూచువల్ ఫండ్స్ ఇన్వెస్టర్లకు ఇది సరికాదు. లాభాలు వస్తే, తీసుకోకుండా ఎందుకు ఉండాలనేది చాలా మంది వాదిస్తారు. దీనికి మీ అనుభవమే మంచి ఉదాహరణ. మీరు 2004లో ఇన్వెస్ట్ చేశారు. 2007లో మంచి రాబడులు వచ్చాయి. అయినా టెంప్ట్ కాకుండా మీ ఇన్వెస్ట్‌మెంట్స్‌ను కొనసాగించారు. ఒక వేళ మీరు టెంప్ట్ అయి లాభాలను బుక్ చేశారనుకోండి. ఇప్పుడున్న  రాబడులు వచ్చేవి కావు కదా? లాభాల స్వీకరణ కోసం కాకుండా మీకు డబ్బులు అవసరమైనప్పుడు మాత్రమే మీరు మ్యూచువల్ ఫండ్స్‌ను విక్రయించాలి. మీరు దీర్ఘకాలం దృష్ట్యా ఇన్వెస్ట్ చేస్తున్నారు. కాబట్టి ప్రస్తుతమున్న మ్యూచువల్ ఫండ్స్‌లోనే మీ  ఇన్వెస్ట్‌మెంట్స్‌ను కొనసాగించండి. ఇక మీ నాన్నగారి విషయానికొస్తే, ఏదైనా డైవర్సిఫైడ్ ఫండ్‌ను ఎంచుకోమనండి. ఆ ఫండ్‌లో క్రమం తప్పకుండా ఇన్వెస్ట్ చేయమనండి. మంచి రాబడులు పొందవచ్చు.
  
  నా  పుట్టింటి వారి నుంచి స్త్రీ ధనం కింద పెద్ద మొత్తం లభించింది. ఇంత పెద్ద మొత్తం మరో మూడేళ్ల వరకూ మాకు అవసరం లేదు. ఈ మొత్తాన్ని ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లో గానీ, దీర్ఘకాలం ఉండే ఇన్‌కం ఫండ్‌లో గానీ ఇన్వెస్ట్ చేద్దామనుకుంటున్నాను. భద్రత, లిక్విడిటీ, పన్ను ప్రయోజనాలు... వీటన్నింటిని దృష్టిలో పెట్టుకొని తగిన సలహా ఇవ్వగలరు.           - సరళా రాణి, విశాఖ
  భద్రత, లిక్విడిటీ, పన్ను ప్రయోజనాలు తదితర అంశాలను దృష్టిలో పెట్టుకుంటే మీరు మీ సొమ్ములను దీర్ఘకాలం ఉండే ఇన్‌కం ఫండ్స్‌లో ఇన్వెస్ట్ చేయండి. వీటి ట్రాక్ రికార్డ్‌ను బట్టి మీరు వీటిని సులభంగా ఎంచుకోవచ్చు. ఇక ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ) విషయానికొస్తే, వీటి పనితీరును అంచనా వేసే ట్రాక్ రికార్డ్ అందుబాటులో ఉండదు. అంతేకాకుండా ఎఫ్‌ఎంపీలు క్లోజ్‌డ్ ఎండెడ్ ఫండ్స్. మీరు ఎప్పుడు కావాలనుకుంటే అప్పుడు మీ ఇన్వెస్ట్‌మెంట్స్‌ను వెనక్కి తీసుకునే వెసులుబాటు ఉండదు.  మూడేళ్ల పాటు మీ ఇన్వెస్ట్‌మెంట్స్‌ను కొనసాగిస్తే, ఎఫ్‌ఎంపీకైనా, దీర్ఘకాలం ఉండే ఇన్‌కం ఫండ్‌కైనా  పన్ను ప్రయోజనాలు ఒకే విధంగా ఉంటాయి. ప్రస్తుతమున్న వడ్డీరేట్ల పరిస్థితులు ఇన్‌కం ఫండ్స్‌కే అనుకూలంగా ఉన్నాయి. ఇన్‌కం ఫండ్స్ ప్రస్తుతం  లాంగ్ టెర్మ్ గిల్ట్ సెక్యూరిటీల్లో ఎక్కువగా ఇన్వెస్ట్ చేశాయి. అందరూ అంచనా వేస్తున్నట్లుగా వడ్డీరేట్లు మరింతగా తగ్గితే ఇన్‌కం ఫండ్స్‌కు మరిన్ని రాబడులు వస్తాయి.
  
  డిస్ట్రిబ్యూటర్ల సర్వీస్ ట్యాక్స్ భారం ఇన్వెస్టర్లపైనే ఉంటుందనే వార్త విన్నాను. ఇది నిజమేనా? మ్యూచువల్ ఫండ్ డెరైక్ట్ ప్లాన్‌లలో ఇన్వెస్ట్ చేసేవారిపై కూడా ఈ భారం ఉంటుందా?
  - సదానంద, తిరుపతి.
  సర్వీస్ ట్యాక్స్‌కు సంబంధించి ఈ ఏడాది బడ్జెట్ రెండు రకాల మార్పులను తీసుకువచ్చింది. మొద టిది 12.3 శాతంగా ఉన్న సర్వీస్ ట్యాక్స్‌ను 14 శాతానికి పెంచారు. మ్యూచువల్ ఫండ్స్‌కు సంబంధించి డెరైక్ట్, రెగ్యులర్ ప్లాన్‌లు...రెండింటికి ఇది వర్తిస్తుంది. ఇక రెండోది డిస్ట్రిబ్యూటర్ల కమిషన్‌ను సర్వీస్ ట్యాక్స్ పరిధిలోనికి తెచ్చారు. ఫలితంగా డిస్ట్రిబ్యూటర్ల కమిషన్‌పై కూడా సర్వీస్ ట్యాక్స్ చెల్లించాల్సి ఉంటుంది. ఈ ట్యాక్స్‌ను డిస్ట్రిబ్యూటర్లే చెల్లించాలని సెబీ ఆదేశాలున్నప్పటికీ, ఈ భారం ఇన్వెస్టర్లపైననే పడుతుంది.  అయితే డెరైక్ట్ ప్లాన్స్ విషయంలో ఎలాంటి డిస్ట్రిబ్యూటర్లు ఉండరు కాబట్టి దీనికి మినహాయింపు ఉంటుంది.
  


 ఇటీవల స్టాక్ మార్కెట్ పతనమవుతోంది. మార్కెట్ పడిపోతున్నప్పుడే ఈక్విటీల్లో ఇన్వెస్ట్ చేయాలని కొందరంటున్నారు. ఎంత వరకూ పడుతుందో చెప్పలేం కాబట్టి, వేచి చూడమని మరికొందరంటున్నారు. ఇటువంటి పరిస్థితుల్లో ఒక రిటైల్ ఇన్వెస్టర్‌గా మేం ఏమి చేయాలి?
 - కాత్యాయని, తిరుపతి, వంశీకృష్ణ, ఈ మెయిల్
  
 మీరు క్రమం తప్పకుండా స్టాక్ మార్కెట్లో ఇన్వెస్ట్ చేస్తున్నప్పుడు, మీరు ఇన్వెస్ట్ చేసే డబ్బులు మీకు 5-10 ఏళ్లపాటు అవసరం లేదనుకున్నప్పుడు.. స్టాక్ మార్కెట్ పతనమవుతున్న ఈ సందర్భం ఇన్వెస్ట్‌మెంట్స్‌కు మంచి అవకాశమని చెప్పవచ్చు. మీకు చౌక ధరలో మంచి షేర్లు లభిస్తాయి. మనం ఇన్వెస్ట్ చేస్తున్నప్పుడు మార్కెట్ పతన బాటలోనూ, మనకు డబ్బులు అవసరమైనప్పుడు మార్కెట్ ఉచ్ఛస్థాయిలోనూ ఉండాలనుకోవడం సగటు ఇన్వెస్టర్ కోరిక, దీర్ఘకాలం ఇన్వెస్ట్ చేయాలనుకునేవాళ్లు ఈక్విటీల్లో తప్పక ఇన్వెస్ట్ చేయాల్సిందే. అయితే మార్కెట్ ఎంత వరకూ పతనమవుతుందనేది ఎవరూ ఊహించలేరు.
 
 ఇక మార్కెట్ పతనబాటలో ఉన్న ఈ పరిస్థితుల్లో ఒక రిటైల్ ఇన్వెస్టర్‌గా మీ ఇన్వెస్ట్‌మెంట్స్‌ను మీరు యావరేజ్ చేయండి. మార్కెట్లు ఎప్పుడూ మీ నియంత్రణలో ఉండవు. మీ నియంత్రణలో ఉండేవి రెండే విషయాలు... మీరు ఎంత కాలం ఇన్వెస్ట్ చేస్తారు? ఎంత క్రమ శిక్షణతో ఇన్వెస్ట్ చేస్తారనే రెండు విషయాలే మీ నియంత్రణలో ఉంటాయి.  మీరు నిర్దేశించుకున్న ఆర్థిక లక్ష్యం (ఇల్లు/కారు కొనడం, పిల్లల చదువులు.. తదితర లక్ష్యాలు) కోసం క్రమం తప్పకుండా ఇన్వెస్ట్ చేయండి.. అవసరమైనప్పుడు  మీ ఇన్వెస్ట్‌మెంట్స్‌ను క్యాష్ చేసుకోండి.
  
 నేను ఐసీఐసీఐ, డీఎస్‌పీ సంస్థలకు సంబంధించి ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లో ఇన్వెస్ట్ చేశాను. అవి ఈ నెలలోనే మెచ్యూర్ అవుతున్నాయి. వీటికి సంబంధించి పన్ను నిబంధనల్లో మార్పులు చేర్పులు జరిగాయని విన్నాం. నా ఇన్వెస్ట్‌మెంట్స్‌ను ఈ ఎఫ్‌ఎంపీల్లో కొనసాగించమంటారా? వీటిని రిడీమ్ చేసుకొని వేరే సాధనాల్లో ఇన్వెస్ట్ చేసుకోమంటారా?                      - మహేశ్, కరీంనగర్
  
 ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లను పొడిగించుకునే అవకాశం ఇన్వెస్టర్లకు లేదు. మ్యూచువల్ ఫండ్ కంపెనీలు పాత ఎఫ్‌ఎంపీలను పొడిగించాలని ఆఫర్ చేస్తేనే మీరు వీటిని కొనసాగించగలుగుతారు. ఒక వేళ మ్యూచువల్ ఫండ్ సంస్థలు ఈ ఎఫ్‌ఎంపీలను కొనసాగించాలని ఆఫర్ చేస్తే.., మీకు తక్షణం ఈ సొమ్ములు అవసరం లేనిపక్షంలో  మీరు మీ ఇన్వెస్ట్‌మెంట్స్‌ను ఈ ఎఫ్‌ఎంపీల్లోనే కొనసాగించండి. ఇక వీటికి సంబంధించి పన్ను విషయాల్లో కొన్ని మార్పులు, చేర్పులు జరిగాయి. ఎఫ్‌ఎంపీల నుంచి మూడేళ్లలోపు మీ ఇన్వెస్ట్‌మెంట్స్‌ను ఉపసంహరించుకుంటే మీరు స్వల్పకాలిక మూలధన లాభాల పన్ను చెల్లించాల్సి ఉంటుంది. మీరు ఏ ట్యాక్స్ స్లాబ్ కిందకు వస్తారో, ఈ స్లాబ్‌కు సంబంధించి పన్ను రేటు మీకు వర్తిస్తుంది.
  
 ఐసీఐసీఐ ప్రు, ఫ్రాంక్లిన్ టెంపుల్టన్, హెచ్‌డీఎఫ్‌సీలకు సంబంధించిన మంత్లీ ఇన్‌కం ప్లాన్(ఎంఐపీ) సంబంధించిన డివిడెండ్‌లపై ఏమైనా పన్నులు చెల్లించాలా?                   - క్రాంతి, గుంటూరు
  
 మ్యూచువల్ ఫండ్స్‌కు సంబంధించి మంత్లీ ఇన్‌కం ప్లాన్(ఎంఐపీ)ల డివిడెండ్‌లపై ఇన్వెస్టర్లు ఎలాంటి పన్నులు చెల్లించాల్సిన పని లేదు. మ్యూచువల్ ఫండ్ సంస్థలే డివిడెండ్ డిస్ట్రిబ్యూషన్ ట్యాక్స్ (డీడీటీ) (ఇది ప్రస్తుతం 28.33 శాతంగా ఉంది) చెల్లించి మీకు డివిడెండ్‌లను అందజేస్తాయి. మీకు వచ్చే రాబడుల నుంచే ఈ డీడీటీని సదరు మ్యూచువల్ ఫండ్ సంస్థలు ప్రభుత్వానికి చెల్లిస్తాయి.
  
 గత మూడేళ్లుగా ఐడీఎఫ్‌సీ ప్రీమియర్ ఈక్విటీ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేస్తున్నాను. అయితే ఇటీవల కాలంలో ఈ ఫండ్ పనితీరు సరిగ్గా లేదు. ఈ ఫండ్ నుంచి వేరే ఫండ్‌కు మారమంటారా? లేదా ఈ ఫండ్‌లోనే కొనసాగమంటారా?    - కిరణ్, విజయవాడ
  
 ఐడీఎఫ్‌సీ ప్రీమియర్ ఈక్విటీ ఫండ్ నుంచి మీరు వైదొలగాల్సిన అవసరం లేదు. ఏడాది కాలానికి ఇది మంచి పనితీరునే కనబరిచింది. ఈ ఫండ్ ఐదు సంవత్సరాల ట్రాక్ రికార్డ్ కూడా ఈ కేటగిరీ ఇతర ఫండ్‌ల కంటే కూడా చాలా మెరుగ్గా ఉంది. మేం ఈ ఫండ్‌కు 4 స్టార్ రేటింగ్ ఇచ్చాం. ఒక ఏడాది పనితీరు బాగాలేదన్న కారణంతో ఈ ఫండ్ నుంచి వైదొలగడం సరికాదు. స్వల్పకాలాన్ని పరిగణనలోకి తీసుకుని ఈ తరహా ఫండ్‌ల పనితీరుపై నిర్ణయం తీసుకోవడం సరైనది కాదు.


 నేను ఈక్విటీ డైవర్సిఫైడ్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ప్రతి నెలా కొంత మొత్తాన్ని 8 లేదా 10 ఏళ్ల పాటు ఇన్వెస్ట్ చేయాలనుకుంటున్నాను. ఏ ఫండ్‌ను ఎంచుకోవాలి? ఆ ఫండ్ పనితీరు, ట్రాక్  రికార్డ్ తదితర సమాచారాన్నంతటినీ సేకరించాను. అయితే నేను ఎప్పుడు ఆ ఫండ్ నుంచి వైదొలగాలో అన్న విషయం నాకు కొంచెం గజిబిజిగా ఉంది. ప్రతీ 2-3 ఏళ్లకు కొంత రాబడి లక్ష్యంగా పెట్టుకుని, ఆ రాబడులు రాగానే  వైదొలగడం మంచిదంటారా? లేకుంటే నేను లక్ష్యంగా పెట్టుకున్న ఆర్థిక లక్ష్యం(పిల్లల చదువు) కోసం అవసరమయ్యే రాబడి ఎప్పుడు వస్తే అప్పుడు వైదొలగమంటారా? తగిన సలహా ఇవ్వండి.  - మార్కండేయ, హైదరాబాద్
  సాధారణంగా ట్రేడర్లు ఒక నిర్దేశిత రాబడి లక్ష్యంగా పెట్టుకుని మ్యూచువల్ ఫండ్స్‌లో ఇన్వెస్ట్ చేస్తారు. కొంత ధరను స్టాప్ లాస్‌గా పెట్టుకుంటారు.  ఈ తరహా వ్యూహంలో లక్ష్యంగా పెట్టుకున్న రాబడి రాగానే లాభాలను స్వీకరిస్తారు. అయితే ఈ విధానం సాధారణ ఇన్వెస్టర్లకు సరిపడదు. ఈ విధానంలో క్రమం తప్పకుండా ఈక్విటీల్లో ఇన్వెస్ట్ చేయడం ద్వారా దీర్ఘకాలంలో మంచి రాబడులను పొందే అవకాశాన్ని ఇన్వెస్టర్లు కోల్పోతారు. సిప్ విధానం ఎంచుకునేది దీర్ఘకాలంలో మంచి రాబడులను పొందడానికోసమే కదా. అందుకని 2, 3 ఏళ్లకు మీరు ఆశించిన కొంత రాబడి వచ్చినప్పటికీ, ఆ ఫండ్ నుంచి వైదొలగకుండా అలాగే కొనసాగడం మంచిది. మంచి ట్రాక్ రికార్డ్ ఉన్న ఫండ్‌ను ఎంచుకోండి. దాంట్లో క్రమం తప్పకుండా సిప్ విధానంలో కనీసం మూడేళ్లకు పైగానే ఇన్వెస్ట్ చేయండి. మీరు నిర్దేశించుకున్న ఆర్థిక లక్ష్యానికి(ఇల్లు కట్టుకోవడం, పిల్లల చదువు తదితర అంశాలు)  ఎప్పుడు అవసరమైతే అప్పుడు ఆ ఫండ్ యూనిట్లన్నింటినీ విక్రయించండి.
  
  నెలా నెలా క్రమం తప్పకుండా కొంత మొత్తంలో వేతనాలు లభించే వారికి సిప్ విధానం భేషుగ్గా ఉంటుంది. అయితే వ్యాపారం చేసే నా లాంటి వాళ్లకు ప్రతి నెలా నిర్ణీత మొత్తంలో సొమ్ములు సమకూరే అవకాశం లేదు. అలాంటి వాళ్లం సిప్ విధానాన్ని అనుసరించలేం కదా. ఇప్పుడు నా దగ్గర పెద్ద మొత్తంలో డబ్బులున్నాయి. నేను మ్యూచువల్ ఫండ్ ఇన్వెస్ట్‌మెంట్స్‌కు కొత్త. నేను ఎలాంటి ఇన్వెస్ట్‌మెంట్స్ వ్యూహాన్ని అనుసరించాలి?  - దక్షిణామూర్తి, విజయవాడ
  మార్కెట్ ఒడిదుడుకులను తట్టుకోవడం కోసం సిప్ విధానాన్ని అనుసరిస్తే మంచి ప్రయోజనాలు పొందవచ్చని మేం సూచిస్తూ ఉంటాం. మార్కెట్ ఉచ్ఛస్థాయిలో మీరు పెద్ద మొత్తంలో ఇన్వెస్ట్ చేశారనుకోండి. ఆ తర్వాత మార్కెట్ పడిపోతే మీ ఇన్వెస్ట్‌మెంట్స్ విలువ బాగా తగ్గిపోతుంది. ఆర్థిక పరిస్థితులు పటిష్టంగా ఉన్నవాళ్లు ఇది తట్టుకోగలుగుతారు. చిన్న, కొత్త ఇన్వెస్టర్లకు మాత్రం ఇది అశనిపాతమే. అందుకని ఒకేసారి పెద్ద మొత్తంలో ఇన్వెస్ట్ చేయడం శ్రేయోదాయకం కాదు. అందుకని ఈక్విటీల్లో ఒకేసారి పెద్ద మొత్తంలో కాకుండా సిప్ విధానంలో ఇన్వెస్ట్ చేస్తే మంచిదని చెబుతుంటాం. ఇక మీ విషయానికొస్తే, ప్రస్తుతం మీ దగ్గర ఉన్న పెద్ద మొత్తాన్ని ముందుగా ఫిక్స్‌డ్ ఇన్‌కం ఫండ్‌లో ఇన్వెస్ట్ చేయండి. తర్వాత ఏదైనా ఈక్విటీ ఫండ్‌ను ఎంచుకొని, సిస్టమాటిక్ ట్రాన్స్‌ఫర్ ప్లాన్(ఎస్‌టీపీ)ద్వారా ఈ ఈక్విటీ ఫండ్‌లోకి మీ ఇన్వెస్ట్‌మెంట్స్‌ను తరలించండి. ఇలా చేస్తే మార్కెట్ ఒడిదుడుకుల నుంచి రక్షణ పొందడమే కాకుండా, మంచి ప్రయోజనాలు కూడా పొందవచ్చు.
  
  నేనొక ఈక్విటీ ఫండ్‌లో ఏడాది క్రితం ఇన్వెస్ట్ చేశాను. ఇప్పుడు ఈ ఇన్వెస్ట్‌మెంట్స్‌ను  ఎస్‌టీపీ(సిస్టమాటిక్ ట్రాన్స్‌ఫర్ ప్లాన్) ద్వారా ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)కు బదిలీ చేయాలనుకుంటున్నాను. ఇలా చేస్తే నేను మూలధన పన్ను లాభాలు చెల్లించాల్సిన అవసరం ఉండదు కదా. మరోవైపు ఆదాయపు పన్ను చట్టం సెక్షన్ 80 సీ కింద ఇతర పన్ను ప్రయోజనాలు ఏమైనా లభిస్తాయా? వివరించగలరు.   - సరిత, నెల్లూరు
  ఎస్‌టీపీ ద్వారా ఒక ఫండ్ నుంచి మరో ఫండ్‌కు బదిలీ చేయడం అంటే-ఒక మ్యూచువల్ ఫండ్‌లో యూనిట్లను విక్రయించి, కొత్తగా మరో మ్యూచువల్ ఫండ్‌లో యూనిట్లను కొనుగోలు చేయడమే. అందుకని ఏడాదికన్నా ముందే మీరు ఏదైనా ఈక్విటీ ఫండ్ నుంచి వైదొలిగితే, స్వల్పకాలిక మూలధన లాభాల పన్ను చెల్లించాల్సి ఉంటుంది. మీ విషయంలో మీ ఇన్వెస్ట్‌మెంట్స్ ఏడాది కాలాన్ని దాటాయి కాబట్టి మీకు ఇది వర్తించదు. ఈక్విటీ ఫండ్స్‌లో యూనిట్లను ఏడాది దాటాక విక్రయిస్తే ఎలాంటి దీర్ఘకాల మూలధన లాభాల పన్ను చెల్లిం చాల్సిన పని లేదు. ఇక మీరు బదిలీ చేయాలనుకుం టున్న ఈఎల్‌ఎస్‌ఎస్ ఫండ్‌కు సెక్షన్ 80 సీ కింద పన్ను ప్రయోజనాలు లభిస్తాయి. ఈఎల్‌ఎస్‌ఎస్ యూనిట్లకు మూడేళ్ల లాకిన్ పీరియడ్ వర్తిస్తుంది. మీరు బదిలీ చేసే ఒక్కో ఇన్‌స్టాల్‌మెంట్‌కు మూడేళ్ల లాకిన్ పీరియడ్ ఉంటుందని గుర్తుంచుకోండి.
  


 ఇల్లు కొందామని రూ.4 లక్షలు పోగేశాను. కానీ దానిని ఏడాది పాటు వాయిదా వేశాను. ఈ సొమ్మును బ్యాంక్ సేవింగ్స్ ఖాతాలో వేద్దామనుకుంటున్నాను. కానీ మిత్రుడొకరు ఆల్ట్రా షార్ట్‌టర్మ్ డెట్‌ఫండ్స్‌లో ఇన్వెస్ట్ చేయమని సూచించాడు. సేవింగ్స్ ఖాతాలో అయితే 4 శాతం మాత్రమే వడ్డీ వస్తుందని, ఈ డెట్‌ఫండ్స్‌లో అయితే అంతకంటే ఎక్కువే రాబడి వస్తుందని పేర్కొన్నాడు. అతడు చెప్పింది నిజమేనా? 
 
 ఈ డెట్‌ఫండ్స్‌కు సంబంధించి ఏమైనా పన్నులు చెల్లించాల్సి ఉంటుందా? వివరించగలరు.
 -ముక్తేశ్వర రావు, నిజామాబాద్.
 
 మీ మిత్రుడు చెప్పింది నిజమే. బ్యాంక్ సేవింగ్స్ ఖాతా కంటే ఆల్ట్రా షార్ట్‌టర్మ్  డెట్‌ఫండ్స్‌లో మంచి రాబడులే వస్తాయి. స్వల్పకాలిక వడ్డీరేట్ల ప్రయోజనాలను వినియోగించుకోవడం వల్ల ఇవి మంచి రాబడులనిస్తాయి. కార్పొరేట్, మనీ మార్కెట్ ఇన్‌స్ట్రుమెంట్స్‌లో ఈ ఫండ్స్ ఇన్వెస్ట్ చేస్తాయి. అయితే వీటికి కొంత రిస్క్ లేకపోలేదు. వడ్డీరేట్లు అధికంగా ఉన్నందున గత ఏడాది కాలంలో ఈ ఫండ్స్ చెప్పుకోదగ్గ రాబడుల (9 శాతానికి పైగా)నిచ్చాయి. వడ్డీరేట్లు తగ్గితే ఈ రాబడులు తగ్గుతాయి. అయితే బ్యాంక్ సేవింగ్స్ ఖాతా రాబడుల(4 శాతం) కంటే అధికంగానే వస్తాయని చెప్పవచ్చు.
 
 ఇక పన్ను విషయానికొస్తే, సేవింగ్స్ ఖాతా నుంచి ఆర్జించిన వడ్డీలో రూ.10,000 వరకూ ఎలాంటి పన్ను బాధ్యత ఉండదు. అయితే డెట్ ఫండ్స్ ఇన్వెస్ట్‌మెంట్స్‌ను మూడు సంవత్సరాల లోపు ఉపసంహరించుకుంటే  ఈ ఫండ్స్ రాబడులపై పన్ను మీ ఆదాయపు పన్ను స్లాబ్(10/20/30 శాతంగా)ననుసరించి ఉంటుంది. గ్రోత్ ఆప్షన్ తీసుకుంటే ఈ స్థాయి పన్ను మాత్రమే వర్తిస్తుంది. అలా కాకుండా డివిడెండ్ ఆప్షన్ తీసుకుంటే అదనంగా 28.33 శాతం డివిడెండ్ డిస్ట్రిబ్యూషన్ ట్యాక్స్(డీడీటీ) కూడా చెల్లించాల్సి ఉంటుంది. సేవింగ్స్ ఖాతాపై వడ్డీరేటు 4 శాతం, ఆల్ట్రాషార్ట్ టర్మ్ డెట్ ఫండ్ రాబడి 8 శాతంగా భావించి ఏడాది కాలానికి ఈ రెండు మార్గాల్లో వచ్చే రాబడుల వివరాలను కింది పట్టికలో పొందుపరిచాము. ఆదాయపు పన్ను స్లాబ్ 20 శాతంగా పరిగణించాం.
  
 నేను ఒకేసారి పెద్ద మొత్తాన్ని యాక్సిస్ ఈక్విటీ, యాక్సిస్ లాంగ్‌టర్మ్ ఈక్విటీ, ఐసీఐసీఐ ప్రు ఫోకస్‌డ్ బ్లూచిప్ ఈక్విటీ ఫండ్స్‌లో ఇన్వెస్ట్ చేద్దామనుకుంటున్నాను. అయితే ఏజెంట్‌కు ఎంత మొత్తం కమీకషన్ చెల్లించాల్సి ఉంటుంది. కమీషన్ చెల్లించాల్సిన అవసరం లేకుండా పెట్టుబడి పెట్టే మార్గాలేమైనా ఉన్నాయా? ఒకవేళ సిప్ (సిస్టమాటిక్ ఇన్వెస్ట్‌మెంట్ ప్లాన్)విధానాన్ని అనుసరిస్తే కంపెనీకి గానీ, ఏజెంట్‌కు గానీ ట్రయల్ కమీషన్ తప్పనిసరిగా చెల్లించాల్సి ఉంటుందా?
 - మనోరమ, విజయవాడ
  
 మీరు పేర్కొన్న స్కీమ్‌లకు సంబంధించి డెరైక్ట్ ప్లాన్స్‌లో ఇన్వెస్ట్ చేస్తే  ఏజెంట్లకు ఎలాంటి కమీషన్ చెల్లించాల్సి ఉండదు. ఒకేసారి పెద్ద మొత్తంలో  లేదా సిప్ విధానంలో గానీ ఇన్వెస్ట్ చేసినా ఇది వర్తిస్తుంది.  మ్యూచువల్ ఫండ్ సంస్థ వెబ్‌సైట్ ద్వారా కానీ, మ్యూచువల్ ఫండ్ హౌస్ బ్రాంచ్ ఆఫీస్ ద్వారా గానీ ఈ డెరైక్ట్ ప్లాన్‌లలో ఇన్వెస్ట్ చేయవచ్చు. ఇక మ్యూచువల్ ఫండ్స్ ఏజెంట్లకు మ్యూచువల్ ఫండ్ సంస్థల నుంచి రెండు రకాలైన కమీషన్‌లు లభిస్తాయి. ఒకటి అప్‌ఫ్రంట్ కమిషన్. దీనిని మ్యూచువల్ ఫండ్ సంస్థ చెల్లిస్తుంది. ఇంకొకటి ట్రయల్ కమీషన్(ఫండ్ ఎక్స్‌పెన్స్ రేషియోలోనే ఇది ఉంటుంది).. మీరు మ్యూచువల్ ఫండ్ స్కీమ్‌లో కొనసాగినంత కాలం ఇది ఏజెంట్‌కు చెల్లిస్తారు. మీరు కనుక డెరైక్ట్ ప్లాన్‌లో ఇన్వెస్ట్ చేస్తే ఇలాంటి, ఎలాంటి కమీషన్‌లు చెల్లించాల్సి ఉండదు.
  
 ఎఫ్‌ఎంపీ(ఫిక్స్‌డ్ మెచ్యూరిటీ ప్లాన్)ల ఇన్వెస్ట్‌మెంట్స్ ఏడాదికి మించితేనే దీర్ఘకాల మూలధన లాభాల పన్నును గతంలో చెల్లించాల్సి వచ్చేది. ఇప్పుడు ఈ కాలాన్ని ఏడాది నుంచి మూడేళ్లకు పెంచారు. అంటే దీర్ఘకాలిక మూలధన లాభాల పన్ను ప్రయోజనాలు పొందాలంటే ఎఫ్‌ఎంపీల్లో ఇన్వెస్ట్‌మెంట్స్‌ను ఏడాది కాలం కాక మూడేళ్లపాటు కొనసాగించాలి. అయితే బడ్జెట్‌కు ముందు మెచ్యూర్ అయ్యే వాటికి పాత నిబంధనలే వర్తిస్తాయని ఆర్థిక మంత్రి గత ఏడాది బడ్జెట్ ప్రతిపాదనల్లో పేర్కొన్నారు. నా ఎఫ్‌ఎంపీ ఇన్వెస్ట్‌మెంట్స్ 2014, జూలై తర్వాత మెచ్యూర్ అయ్యాయి. నేను దీర్ఘకాలిక మూలధన లాభాల పన్ను లేక స్వల్పకాలిక మూలధన లాభాల పన్ను.. ఏది చెల్లించాలి?
 -భవానీ శంకర్, హైదరాబాద్
  
 2014, జూలై 10కు ముందు మెచ్యూర్ అయ్యే ఎఫ్‌ఎంపీ ఇన్వెస్ట్‌మెంట్స్‌కు పాత పన్ను నిబంధనలు వర్తిస్తాయి. ఈ నిబంధనల ప్రకారం ఏడాది కాలానికి మించిన ఇన్వెస్ట్‌మెంట్స్‌పై వచ్చిన రాబడులపై దీర్ఘకాలిక మూలధన లాభాల పన్ను 10 శాతంగా చెల్లించాల్సి ఉంటుంది. 2014, జూలై 10 తర్వాత మెచ్యూర్ అయ్యే డెట్ ఫండ్స్ ఇన్వెస్ట్‌మెంట్స్‌కు కొత్త పన్ను నిబంధనలు వర్తిస్తాయి. ఈ నిబంధనల ప్రకారం ఇన్వెస్ట్‌మెంట్స్‌ను మూడేళ్లపాటు కొనసాగిస్తేనే దీర్ఘకాలిక మూలధన లాభాల పన్ను వర్తిస్తుంది.


 నా వయస్సు 28 సంవత్సరాలు. నా వార్షికాదాయం 6 లక్షలు. ఇటీవలే పెళ్లయింది. ఇంకా పిల్లలు లేరు.  ఏటా రూ.2 లక్షలు చొప్పున హెచ్‌డీఎఫ్‌సీ క్లిక్ యులిప్(యూనిట్ లింక్డ్ ఇన్సూరెన్స్ ప్లాన్)లో ఇరవై ఏళ్లపాటు ఇన్వెస్ట్ చేయాలనుకుంటున్నాను. తక్కువ చార్జీలు ఉండడం వల్ల నేను ఈ నిర్ణయం తీసుకున్నాను. ఇది సరైనదేనా? అసలు యులిప్‌లో పెట్టుబడులు పెట్టవచ్చా? కనిపించని ఖర్చులేమైనా తర్వాత హెచ్‌డీఎఫ్‌సీ చార్జ్ చేస్తుందా? హెచ్‌డీఎఫ్‌సీ క్లిక్‌ని మించి ఇంకా ఉత్తమమైనవి ఏమైనా ఉన్నాయా? తగిన సూచనలివ్వండి?
  - వెంకటేశ్వర్లు, గుంటూరు
  
 హెచ్‌డీఎఫ్‌సీ క్లిక్ 2 అనేది తక్కువ వ్యయమున్న యులిప్. మోర్టాలిటి రిస్క్, ఫండ్ నిర్వహణ వ్యయాలు(ఏడాదికి 1.35 శాతం)లను మాత్రమే వసూలు చేస్తుంది. ఇన్వెస్టర్ చెల్లించిన మొత్తంలో వీటిని మినహాయించుకొని మిగిలిన మొత్తాన్ని ఇన్వెస్ట్ చేస్తుంది. తక్కువ చార్జీలే ఉన్నప్పటికీ, ఇతర యులిప్‌లకు ఉండే ప్రతికూలాంశాలు దీనికి కూడా ఉన్నాయి. బీమాను, పెట్టుబడులను కలగలపకూడదనే నియమంతో యూలిప్‌ల్లో ఇన్వెస్ట్ చేయవద్దని చెబుతుంటాం. లైఫ్ కవర్ కోసం టెర్మ్ ఇన్సూరెన్స్ తీసుకోవాలి. ఇక ఇన్వెస్ట్‌మెంట్ అవసరాల కోసం మ్యూచువల్ ఫండ్స్‌లో ఇన్వెస్ట్ చేయాలి. వ్యయాల విషయాల్లోనే కాకుండా చాలా అంశాల్లో యూలిప్‌ల కన్నా మ్యూచువల్ ఫండ్స్‌లో ఇన్వెస్ట్ చేయడమే ఉత్తమం. యూలిప్‌లకు లాకిన్ పీరియడ్ ఐదేళ్లు ఉంటుంది. దీంతో ఓపెన్ ఎండ్ మ్యూచువల్ ఫండ్స్‌కు ఉన్నట్లుగా వీటికి లిక్విడిటీ ఉండదు.
 
 మ్యూచువల్ ఫండ్స్‌కు సంబంధించి ఎన్‌ఏవీ, పోర్ట్‌ఫోలియోలు, ఫండ్ మేనేజర్ వ్యూహాలు,... తదితర విషయాల్లో పారదర్శకత ఉంటుంది. కానీ యూలిప్‌ల్లో అలాంటి పారదర్శకత ఉండదు. మీరు చెప్పినదాన్ని బట్టి చూస్తే మీరు మ్యూచువల్ ఫండ్స్‌కు కొత్త అని తెలుస్తోంది. అందుకని మీరు ముందుగా ఏదైనా బ్యాలెన్స్‌డ్ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేయండి.  ఆ తర్వాత ఇతర ఫండ్స్‌లో ఇన్వెస్ట్ చేయడం మొదలు పెట్టండి. హెచ్‌డీఎఫ్‌సీ బ్యాలెన్స్‌డ్, ఐసీఐసీఐ ప్రుడెన్షియల్ బ్యాలెన్స్‌డ్ అడ్వాండేజ్, టాటా బ్యాలెన్స్‌డ్, కెనరా రొబెకొ బ్యాలెన్స్‌డ్ ఫండ్‌లను పరిశీలించవచ్చు.
  
 నా వయస్సు 34, నా భార్య వయస్సు 30 సంవత్సరాలు. మాకు ఏడాది బాబు ఉన్నాడు. ఇద్దరమూ సాఫ్ట్‌వేర్ ఇంజినీర్లమే. ఇద్దరి వార్షికాదాయం రూ.25 లక్షల వరకూ ఉంటుంది. గృహ, కారు,  ఇతర రుణాలు కలిసి మొత్తం రుణాలు రూ.80 లక్షల వరకూ ఉంటాయి. మాలో ఒక్కొక్కరికి రూ.20 లక్షల చొప్పున కంపెనీ బీమా రక్షణ అందిస్తోంది. దీనికి అదనంగా రూ.75 లక్షలకు టెర్మ్ ఇన్సూరెన్స్ తీసుకున్నాను. భార్యాభర్తలిద్దరికీ కలిపి జాయింట్ లైఫ్ టెర్మ్ ఇన్సూరెన్స్ పాలసీలు ఏమైనా ఉన్నాయా?
  - సాయిరామ్, హైదరాబాద్
  
 కుటుంబంలో సంపాదన పరులకు టెర్మ్ ఇన్సూరెన్స్ ఖచ్చితంగా ఉండి తీరాలి. భార్యాభర్తలిద్దరూ ఉద్యోగస్తులైతే, ఇది మరింత తప్పనిసరి. సంపాదన పరులైన భార్యాభర్తల్లో ఎవరికైనా ఒకరికి అనుకోకుండా ఏమైనా జరిగితే, కుటుంబానికి వచ్చే మొత్తం ఆదాయంపై ప్రభావం పడుతుంది. మార్కెట్లో రెండు రకాలైన జాయింట్ లైఫ్ పాలసీలు ఉన్నాయి. మొదటి రకం పాలసీలో పాలసీ తీసుకున్న భార్యాభర్తలిద్దరిలో ఎవరైనా మరణిస్తే, బీమా మొత్తం రెండో వ్యక్తికి చెల్లిస్తారు. దీంతో ఈ పాలసీ పూర్తవుతుంది. ఇలాంటి వాటికి ప్రీమియం తక్కువగా ఉంటుంది.  
 
 హెచ్‌డీఎఫ్‌సీ టెర్మ్ ఎష్యూరెన్స్ ఇలాంటిదే. ఇక రెండో రకం పాలసీల్లో ఒక వ్యక్తి మరణిస్తే బీమా మొత్తం చెల్లిస్తారు. రెండో వ్యక్తికి బీమా రక్షణ కొనసాగుతుంది. చెల్లించాల్సిన బీమా ప్రీమియం తగ్గుతుంది.  వయస్సు, పాలసీ కాల వ్యవధి, ప్రీమియం చెల్లించే గడువు, బీమా మొత్తం తదితర అంశాలను పరిగణనలోకి తీసుకొని ఎంత ప్రీమియం తగ్గించాలో నిర్ణయిస్తారు. బజాజ్ అలియంజ్ ఐసెక్యూర్ ఈ తరహా పాలసీనే.  మీపై ఆధారపడి ఉన్నవాళ్ల అవసరాలను పరిగణనలోకి తీసుకొని పాలసీని ఎంచుకోవాలి. కొన్ని బీమా కంపెనీలు జాయింట్ లైఫ్ ఎండోమెంట్ పాలసీలను ఆఫర్ చేస్తున్నాయి. వీటిని తీసుకోకండి. అలా కాకుండా పూర్తిగా టెర్మ్ పాలసీనే తీసుకోవడం ఉత్తమం.
  
 సిప్ విధానంలో మ్యూచువల్ ఫండ్స్‌ల్లో ఇన్వెస్ట్ చేద్దామనుకుంటున్నాను. పన్ను ఆదా చేయడం లక్ష్యంగా నెలకు రూ.2,000 చొప్పున  రెండు మ్యూచువల్ ఫండ్ స్కీమ్‌ల్లో ఇన్వెస్ట్ చేద్దామనుకుంటున్నాను. ఇలా కనీసం 8-10 ఏళ్లపాటు ఇన్వెస్ట్ చేయాలనేది నా ఆలోచన. తగిన సూచనలివ్వండి?
  - శ్రీలత, మంగళగిరి
  
 ఆదాయపు పన్ను(ఐటీ) చట్టం సెక్షన్ 80 సీ కింద  మీకు పన్ను రాయితీలు కావాలనుకుంటే, ట్యాక్స్ సేవింగ్ ఫండ్స్‌లో ఇన్వెస్ట్ చేయాల్సి ఉంటుంది.  ట్యాక్స్ సేవింగ్ ఫండ్స్, లేదా ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో ఇన్వెస్ట్ చేస్తే ఒక ఆర్ధిక సంవత్సరంలో రూ.1 లక్ష వరకూ పన్ను తగ్గింపు పొందవచ్చు. ఈ ఫండ్స్‌లో ఇన్వెస్ట్ చేస్తే లాకిన్ పీరియడ్ మూడేళ్లు. ఈ లాకిన్ పీరియడ్ కారణంగా ఈక్విటీ ఇన్వెస్టర్లలో ఇన్వెస్ట్‌మెంట్ డిసిప్లిన్ ఏర్పడే అవకాశాలుంటాయి. అయితే లాభాలు బాగా వచ్చినప్పటికీ, మూడేళ్ల లాకిన్ పీరియడ్ కారణంగా వీటి నుంచి బయటకు రాలేం. వేర్వేరు స్థాయి మూలధనాలున్న కంపెనీల్లో ఇన్వెస్ట్ చేస్తాయి. కాబట్టి వీటిని డైవర్సిఫైడ్ ఈక్విటీ ఫండ్స్‌గా వ్యవహరిస్తారు. దీర్ఘకాలంగా చూస్తే ఇవి మంచి రాబడులనే ఇచ్చే అవకాశాలున్నాయి.


 నేను సుందరం గ్లోబల్ అడ్వాంటేజ్ ఫండ్‌లో ఇన్వెస్ట్ చేశాను. ఇటీవలే ఈ ఫండ్ ఒక్కో యూనిట్‌కు రూ.1 డివిడెండ్‌ను ప్రకటించింది. ఆ ప్రకారం నాకు రూ.1,042 డివిడెండ్ లభించాలి. కానీ నాకు రూ.756.45 డివిడెండ్ మాత్రమే వచ్చింది. ఈ విషయమై సదరు మ్యూచువల్ ఫండ్ సంస్థను సంప్రదించాను. డివిడెండ్ డిస్ట్రిబ్యూషన్ ట్యాక్స్(డీడీటీ) పోగా మిగిలిన మొత్తాన్ని డివిడెండ్‌గా చెల్లించామని ఆ సంస్థ వెల్లడించింది. నేను చాలా సంవత్సరాలుగా మ్యూచువల్ ఫండ్ స్కీమ్‌ల్లో ఇన్వెస్ట్ చేస్తూ వస్తున్నాను. ఎలాంటి మినహాయింపులు లేకుండా పలు మ్యూచువల్ ఫండ్ సంస్థలు నాకు డివిడెండ్‌లు చెల్లించేవి. డీడీటీ కోత నాకు ఇదే మొదటిసారి. ఇప్పుడు నేను ఏం చేయాలి?
  - సాదిక్ ఆలీ, నిజామాబాద్
  
 సుందరం గ్లోబల్ అడ్వాంటేజ్ ఫండ్ సంస్థ చేసినది సరైనదే. ఈక్విటీ యేతర మ్యూచువల్ ఫండ్లు డివిడెండ్‌లు చెల్లిస్తే, వీటిపై డివిడెండ్ డిస్ట్రిబ్యూషన్ ట్యాక్స్(డీడీటీ) తప్పనిసరి. అయితే ఈక్విటీ, బ్యాలెన్స్‌డ్ ఫండ్స్ డివిడెండ్‌లపై ఎలాంటి పన్నులు చెల్లించాల్సిన పనిలేదు. మీరు ఇన్నేళ్లుగా మ్యూచువల్ ఫండ్స్‌ల్లో ఇన్వెస్ట్ చేస్తున్నప్పటికీ, ఇప్పటివరకూ మీకు డివిడెండ్ డిస్ట్రిబ్యూషన్ ట్యాక్స్ (డీడీటీ) పడలేదంటే మీ పోర్ట్‌ఫోలియోలో ఈక్విటీ, బ్యాలెన్స్‌డ్ ఫండ్స్ ఉండి ఉండాలి.  మొదటిసారిగా ఈక్విటీయేతర ఫండ్‌లో ఇన్వెస్ట్ చేసుంటారు. దీంతో డీడీటీ మీకు కొత్తగా అనిపిస్తుంది.  ఈక్విటీయేతర మ్యూచువల్ ఫండ్ డీడీటీ మదింపు గత ఏడాది బడ్జెట్ నుంచి మారింది. గతంలో ఏదైనా సంస్థ రూ.100 డివిడెండ్‌ను ప్రకటిస్తే, రూ.128.3  డివిడెండ్ చెల్లింపుల కోసం కేటాయించేది. రూ.100 ఇన్వెస్టర్‌కు, రూ.28.3 పన్నులుగా చెల్లించేది. ఇలా కాకుండా స్థూల డివిడెండ్ మొత్తంపై డీడీటీని చెల్లించాలని ఆర్థిక మంత్రిత్వ శాఖ ఆదేశించింది.  దీని ప్రకారం ఏదైనా డివిడెండ్ సంస్థ రూ.100 డివిడెండ్‌ను ప్రకటిస్తే, దానిపై 28.33 శాతం డీడీటీని ప్రభుత్వానికి, మిగిలిన దానిని ఇన్వెస్టర్‌కు మ్యూచువల్ ఫండ్ సంస్థలు చెల్లిస్తున్నాయి.
  
 నా వయస్సు 38 సంవత్సరాలు. వారం క్రితం ఈక్విటీ ఫండ్స్ నుంచి పెద్ద మొత్తమే రిడీమ్ చేశాను. మరో మూడు నెలల తర్వాత కానీ వీటి అవసరం నాకు ఉండదు. అప్పటి వరకూ ఈ పెద్ద మొత్తాన్ని బ్యాంకులో ఫిక్స్‌డ్ డిపాజిట్ చేయమంటారా? లేక డెట్ మ్యూచువల్ ఫండ్స్‌లో ఇన్వెస్ట్ చేయమంటారా ? డెట్ మ్యూచువల్ ఫండ్స్‌లో ఇన్వెస్ట్ చేస్తే ఏమైనా పన్ను ప్రయోజనాలు లభిస్తాయా? అలా అయిన పక్షంలో కొన్ని ఉత్తమమైన డెట్ మ్యూచువల్ ఫండ్స్‌ను సూచించండి. నేను 30 శాతం ట్యాక్స్ బ్రాకెట్‌లో ఉన్నాను.        - పవన్, సికింద్రాబాద్
  
 కార్పొరేట్ బాండ్లు, గిల్ట్‌ల్లో స్వల్పకాలానికి ఇన్వెస్ట్ చేసే  షార్ట్ టెర్మ్ డెట్ ఫండ్స్‌ను ఎంచుకోండి. పన్ను ప్రయోజనాల విషయానికొస్తే ఫిక్స్‌డ్ డిపాజిట్లకు, డెట్ ఫండ్స్‌కు తేడా ఏమీ లేదు. వీటిపై వచ్చే రాబడులను మీ ఆదాయానికి కలిపి మీ ట్యాక్స్ శ్లాబ్‌ననుసరించి పన్ను విధిస్తారు. పన్ను విషయాల్లో కాకుండా కొన్ని  విషయాల్లో డెట్ ఫండ్స్, బ్యాంక్ ఫిక్స్‌డ్ డిపాజిట్లకంటే మెరుగైనవి. డెట్ ఫండ్స్‌ను ఎప్పుడు కావాలంటే అప్పుడు ఉపసంహరించుకోవచ్చు. ఎలాంటి జరిమానా చెల్లించాల్సిన అవసరం లేదు. అదే ఫిక్స్‌డ్ డిపాజిట్ల విషయానికొస్తే, వాటిని మధ్యలో ఉపసంహరించుకుంటే కొంత జరిమానా చెల్లించాల్సి ఉంటుంది. కొన్ని డెట్ ఫండ్స్ 7.5 శాతం నుంచి 10 శాతం రేంజ్‌లో రాబడులు ఇస్తాయి. ఇక మీరు ఇన్వెస్ట్ చేయడానికి పరిశీలించదగ్గ కొన్ని  షార్ట్ టెర్మ్ డెట్ ఫండ్స్- పీర్‌లెస్ షార్ట్‌టెర్మ్, సుందరం సెలెక్ట్ షార్ట్‌టెర్మ్ డెట్ అసెట్ ప్లాన్, ఫ్రాంక్లిన్ ఇండియా ఆల్ట్రా షార్ట్ టెర్మ్ బాండ్ ఫండ్, టారస్ ఆల్ట్రా షార్ట్ టెర్మ్ బాండ్ ఫండ్, ఎస్‌బీఐ మ్యాగ్నమ్ ఇన్‌కమ్ ఫండ్‌లు.
  
 నేను ఇటీవలనే ఎస్‌బీఐ ఎఫ్‌ఎంసీజీ ఫండ్‌లో రూ.లక్ష వరకూ ఇన్వెస్ట్ చేశాను. ఇది మంచి నిర్ణయమేనా?                   -మేఘమాల, విజయవాడ
 
 ఆర్థిక పరిస్థితులు అస్తవ్యస్తంగా ఉన్నప్పటికీ, ఇతర రంగాలు ఏమంత మంచి పనితీరు కనబరచకపోయినప్పటికీ, ఎఫ్‌ఎంసీజీ రంగం మాత్రం  మంచి వృద్ధినే సాధించింది. అయితే ఒకేసారి పెద్ద మొత్తంలో ఎంత మంచి రాబడి ఇస్తున్న మ్యూచువల్ ఫండ్‌లోనైనా ఇన్వెస్ట్ చేయడం మంచిది  కాదు. మరీ ముఖ్యంగా ఏదైనా ప్రత్యేక రంగానికి చెందిన ఫండ్ అయితే అది అసలు మంచి నిర్ణయమే కాదు. అసలు మ్యూచువల్ ఫండ్స్‌లో ఇన్వెస్ట్ చేసేది వివిధీకరణ ప్రయోజనాలు పొందడానికే.  అందుకని మీ పెట్టుబడులను కనీసం మూడు విభిన్నమైన మ్యూచువల్ ఫండ్స్‌కు విస్తరించండి. సిస్టమాటిక్ ఇన్వెస్ట్‌మెంట్ విధానాన్ని(సిప్) అనుసరిస్తే మంచి ప్రయోజనాలు పొందగలరు.


 నేను రూ.10-15 లక్షల వరకూ మ్యూచువల్ ఫండ్ స్కీమ్‌ల్లో ఇన్వెస్ట్ చేశాను. అయితే ఇవన్నీ కాగిత రూపంలోనే ఉన్నాయి. వీటిని డీమ్యాట్ రూపంలోకి మార్చుకోవాలా? అలాచేస్తే ఏమైనా ప్రయోజనం ఉంటుందా? ప్రస్తుతం నా దగ్గర రూ.5 లక్షల వరకూ డబ్బులున్నాయి. దీనిని ఏదైనా డెట్ ఫండ్‌లో ఇన్వెస్ట్ చేసి, ఆ తర్వాత వాటిని ఏదైనా ఈక్విటీ ఫండ్‌లోకి బదిలీ చేయాలనుకుంటున్నాను. సరైన డెట్ ఫండ్‌ను సూచించండి. -ఉమశ్, వరంగల్
 
 ప్రత్యేకమైన ప్రయోజనాలు లేకపోయినప్పటికీ కాగిత రూపంలోని మ్యూచువల్ ఫండ్స్ యూనిట్లను డీమ్యాట్ అకౌంట్‌లోకి మార్చుకుంటే మంచిదే. ఇక మీ రెండో ప్రశ్నకు వస్తే..., మీరు వివిధ మ్యూచువల్ ఫండ్ స్కీమ్‌ల్లో ఇన్వెస్ట్ చేశారు. కాబట్టి వాటి వివరాలు తెలియకుండా ఏదో ఒక ఫండ్‌లో ఇన్వెస్ట్ చేయమని సలహా ఇవ్వలేను. మీరు ఇన్వెస్ట్ చేయాలనుకున్న మొత్తాన్ని ముందుగా ఏదైనా షార్ట్-టర్మ్ బాండ్ ఫండ్‌లో ఇన్వెస్ట్ చేయండి. ఆ తర్వాత సిస్టమాటిక్ ట్రాన్స్‌ఫర్ ప్లాన్ ద్వారా ఏదైనా ఈక్విటీ ఫండ్‌లోకి బదిలీ చేయండి. కాకుంటే మీరు ఇన్వెస్ట్ చేయాలనుకుంటున్న షార్ట్-టర్మ్ బాండ్ ఫండ్, బదిలీ చేసే ఈక్విటీ ఫండ్- ఈ రెండు ఒకే మ్యూచువల్ ఫండ్ కంపెనీకి చెందినవైతే మంచి ప్రయోజనాలు పొందవచ్చు.
 
 నేను ఒక ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)కు చెందిన డివిడెండ్ రీ ఇన్వెస్ట్‌మెంట్ ఫండ్‌లో కొంత మొత్తం ఇన్వెస్ట్ చేశాను. ఈ స్కీమ్ నుంచి డివిడెండ్ పే అవుట్ స్కీమ్‌కు మారాలనుకుంటున్నాను. ఎలా మారాలో వివరించండి? -అమరేశ్వరి, గుంటూరు
  
 మీరు ప్రస్తుతం డివిడెండ్ రీ ఇన్వెస్ట్‌మెంట్ ఫండ్‌లో ఇన్వెస్ట్ చేస్తున్నారు.  ఈ ఫండ్ నుంచి డివిడెండ్ పేఅవుట్(చెల్లించే) ఆప్షన్‌కు మారాలనుకుంటున్నట్లు ఒక రిక్వెస్ట్ లెటర్‌ను గానీ, చేంజ్ ఆప్షన్ స్లిప్‌ను గానీ ఆ మ్యూచువల్ ఫండ్ సంస్థకు పంపించాలి. మీ స్కీమ్‌కు లాక్-ఇన్ పీరియడ్ ఉన్నా ఇలా మార్చుకోవచ్చు. అయితే గ్రోత్ ఆప్షన్ స్కీమ్‌లైతే లాకిన్ పీరియడ్ తర్వాతనే మార్చుకోవడానికి వీలవుతుంది. మీ పెట్టుబడులను 3 ఏళ్ల లాకిన్ పీరియడ్ పూర్తయిన తర్వాత రిడీమ్ చేసుకోవచ్చు. ఇటీవలనే మార్కెట్ రెగ్యులేటర్ సెబీ ఈఎల్‌ఎస్‌ఎస్ ఫండ్స్‌కు సంబంధించి డివిడెండ్ రీ ఇన్వెస్ట్‌మెంట్ ఫండ్స్‌ను ఆపేయాలని ఆదేశాలు జారీ చేసింది.  
  
 నేను కొటక్ గోల్డ్ ఫండ్ యూనిట్లను విక్రయించాలనుకుంటున్నాను. నేనేమన్నా లాంగ్‌టెర్మ్, షార్ట్ టెర్మ్ క్యాపిటల్ గెయిన్స్ ట్యాక్స్ చెల్లించాలా? ఎన్ని సంవత్సరాల పెట్టుబడి తర్వాత లాంగ్‌టర్మ్ క్యాపిటల్ గెయిన్స్ పన్ను చెల్లించాల్సి ఉంటుంది?
  -సరళ, హైదరాబాద్
  
 ఆదాయపు పన్ను చట్టం ప్రకారం, దేశీయ ఈక్విటీల్లో 65 శాతం వరకూ ఇన్వెస్ట్ చేసే ఫండ్స్‌ను ఈక్విటీ ఫండ్స్‌గా పరిగణిస్తారు, ఇలా కాని వాటిని నాన్-ఈక్విటీ ఫండ్స్‌గా పరిగణిస్తారు. కొటక్ వరల్డ్ గోల్డ్ ఫండ్‌ను విదేశీ ఫండ్‌లో ఇన్వెస్ట్ చేస్తుంది కాబట్టి దీనిని నాన్-ఈక్విటీ ఫండ్‌గా పరిగణిస్తారు.ఈ ఫండ్ నుంచి మీరు మీ ఇన్వెస్ట్‌మెంట్స్‌ను మూడేళ్లలోపే ఉపసంహరించుకుంటే మీరు షార్ట్-టర్మ్ క్యాపిటల్ గెయిన్స్ పన్ను చెల్లించాల్సి ఉంటుంది. మీ ట్యాక్స్ శ్లాబులననుసరించి ఈ పన్ను విధిస్తారు. మూడేళ్ల త ర్వాత ఉపసంహరించుకుంటే దీర్ఘకాల క్యాపిటల్ గెయిన్స్ పన్ను చెల్లించాల్సి ఉంటుంది. ఇండెక్సేషన్‌తో కలుపుకొని ఇది 20 శాతంగా ఉంటుంది.
  
 నా కొడుకు వయస్సు 20 సంవత్సరాలు. అతడు ఇంజనీరింగ్ చదువుతున్నాడు. అతడిపేరు మీద ఒక టర్మ్ ఇన్సూరెన్స్ పాలసీ తీసుకుందామనుకున్నాను, రెండు మూడు జీవిత బీమా వెబ్‌సైట్లలో ఆన్‌లైన్ ద్వారా ఈ టర్మ్ ఇన్సూరెన్స్ పాలసీ తీసుకునే ప్రయత్నాలు చేశాను. కానీ ఈ వెబ్‌సైట్‌లన్నీ ఆదాయ ధ్రువీకరణ అడుగుతున్నాయి. నా కొడుకు ఇంకా చదువుతున్నాడు. కాబట్టి అతడికి ఆదాయ ధ్రువీకరణ లేదు. నా కొడుక్కి వేరే మార్గాల్లో టర్మ్ ఇన్సూరెన్స్ తీసుకోవచ్చా?
 -ఆంజనేయ శాస్త్రి, కర్నూలు
 
 సాధారణంగా కుటుంబంలో సంపాదించే వ్యక్తులే టర్మ్ ఇన్సూరెన్స్ తీసుకుంటారు. ఈ సంపాదించే వ్యక్తి ప్రమాదవశాత్తూ మరణిస్తే, అతడి పై ఆధారపడ్డ వారికి ఎదురయ్యే ఆర్థిక ఇబ్బందులను తట్టుకోవడానికి ఈ టర్మ్ ఇన్సూరెన్స్ ఉపయోగపడుతుంది. సంపాదన లేని వ్యక్తికి టర్మ్ ఇన్సూరెన్స్ తీసుకోవడం  సరైనది కాదు.


 వివిధ మ్యూచువల్ ఫండ్ స్కీముల్లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ప్రతినెలా కొంత మొత్తం ఇన్వెస్ట్ చేస్తున్నాను. ఈ ఫండ్స్ అన్నింటికీ నామినీగా నా భార్య పేరును సూచిం చా ను. నా భార్యకు పాన్ (పర్మనెంట్ అకౌంట్ నంబర్) కార్డ్ లేదు. ఒక వేళ ఫండ్ సొమ్ములను నా భార్య క్లెయిమ్ చేయాల్సిన పరిస్థితి వస్తే, పాన్ కార్డ్ తప్పనిసరా?                - పురుషోత్తం, కొత్తగూడెం
  
 సిక్కిమ్ రాష్ట్రంలోని ఇన్వెస్టర్లకు, సిప్ విధానంలో ఏడాది కాలంలో పెట్టిన ఇన్వెస్ట్‌మెంట్స్ రూ.50,000 కు మించని పక్షంలో.. ఈ రెండు పరిస్థితుల్లో ఫండ్ సొమ్ములను క్లెయిమ్ చేయడానికి నామినీకి పాన్ కార్డ్ అవసరం లేదు. మీరు చెప్పిన పరిస్థితులను బట్టి చూస్తే మీ భార్యకు పాన్ కార్డ్ తప్పనిసరి. అందుకని వీలైనంత త్వరగా పాన్‌కార్డ్ తీసుకోండి.
  
 మ్యూచువల్ ఫండ్స్‌లో సిప్ విధానంలో ప్రతి నెలా కొంత మొత్తం ఇన్వెస్ట్ చేస్తున్నాను. నా బ్యాంక్ అకౌంట్ నుంచి ఆ మొత్తం ప్రతినెలా డెబిట్ అయి ఆమేరకు మ్యూచువల్ ఫండ్ యూనిట్లు నాకు వస్తున్నాయి. అలాగే  నేషనల్ పెన్షన్ స్కీమ్(ఎన్‌పీఎస్)లో ఇన్వెస్ట్ చేయడానికి ఈసీఎస్(ఎలక్ట్రానిక్ క్లియరింగ్ సర్వీస్) మాండేట్ ఇవ్వాలా?
  - దేవదానం, గుంటూరు
  
 ఎన్‌పీఎస్‌లో ఇన్వెస్ట్ చేయడానికి ఈసీఎస్ సౌకర్యాన్ని ఎన్‌పీఎస్ కల్పిస్తోంది. ఈసీఎస్ ద్వారా మీ బ్యాంక్ ఖాతా నుంచి కొంత మొత్తం ఆటోమేటిక్‌గా డెబిట్ అయి ఎన్‌పీఎస్‌లోకి వెళ్లిపోతుంది. పాయింట్ ఆఫ్ ప్రెజెన్స్(పీఓపీ) వెబ్‌సైట్ నుంచి ఈసీఎస్ మాండేట్ దరఖాస్తును డౌన్‌లోడ్ చేసుకోవచ్చు. ఈసీఎస్ డెబిట్ చేసిన నాలుగో రోజున ఎంత ఎన్‌ఏవీ ఉంటుందో ఆ ధరకు ఎన్‌పీఎస్ యూనిట్లు మీకు లభిస్తాయి. ఒక వేళ నాలుగో రోజు సెలవు రోజు అయితే, తర్వాతి రోజు ఎన్‌ఏవీ ధరను పరిగణనలోకి తీసుకుంటారు.
  
 బిర్లా సన్‌లైఫ్ ఈక్విటీ పండ్ గ్రోత్ డెరైక్ట్ ప్లాన్ ఎన్‌ఏవీ గత ఏడాది డిసెంబర్ 31న ఒక్క రోజులోనే 3.28 శాతం తగ్గింది. ఒక్క రోజులోనే అంత మొత్తం తగ్గుతుందా?     - ఫరీదా, హైదరాబాద్
  
 ఒక్క రోజులోనే ఒక ఫండ్ ఎన్‌ఏవీ అంత మొత్తం తగ్గే అవకాశాలున్నాయి. ఆ ఫండ్ పోర్ట్‌ఫోలియోలో ఉన్న షేర్ల ధరలకనుగుణంగా ఆ ఫండ్ ఎన్‌ఏవీ ఉంటుంది. షేర్ల ధరలు ఒక్క రోజులో 3-5 శాతం వరకూ హెచ్చు తగ్గులకు లోను కావచ్చు. స్టాక్ మార్కెట్లంటే ఒడిదుడుకులకు పెట్టింది పేరు. ఇక మీ విషయానికొస్తే మీరు చెప్పిన బిర్లా సన్‌లైఫ్ ఈక్విటీ ఫండ్ గ్రోత్ డెరైక్ట్ ప్లాన్ ఎన్‌ఏవీ డిసెంబర్ 30న రూ.466.88గా ఉంది. డిసెంబర్ 31న ఈ ఫండ్ ఎన్‌ఏవీ రూ.469.78గా ఉంది. అంటే ఎన్‌ఏవీ 0.62గా ఉంది. దీర్ఘకాల పెట్టుబడుల నిమిత్తం మ్యూచువల్ ఫండ్స్‌లో ఇన్వెస్ట్ చేస్తారు. అందుకని రోజువారీ వచ్చే హెచ్చు తగ్గులను పట్టించుకోకండి, ఆందోళన చెందకండి.
  
 నేనొక గోల్డ్ ఈటీఎఫ్‌లో ఇన్వెస్ట్ చేద్దామనుకుంటున్నాను. కానీ వివిధ గోల్డ్ ఈటీఎఫ్‌ల ఎన్‌ఏవీలు  విభిన్నంగా ఉన్నాయి.  మంచి గోల్డ్ ఈటీఎఫ్‌ను ఎలా ఎంచుకోవాలి?
  - సికిందర్ జైన్, సికింద్రాబాద్
  
 వివిధ గోల్డ్ ఈటీఎఫ్‌ల ఎన్‌ఏవీలు వివిధ రకాలుగా ఉండటానికి చాలా కారణాలుంటాయి. గోల్డ్ ఈటీఎఫ్‌ల ఎక్స్‌పెన్స్ రేషియోలు,   తదితర కారణాల వల్ల గోల్డ్ ఈటీఎఫ్‌ల ఎన్‌ఏవీలు రకరకాలుగా ఉంటాయి. సాధారణంగా చాలా గోల్డ్ ఈటీఎఫ్‌లు ఒక గ్రామ్‌వి ఉంటాయి. కొన్ని గోల్డ్ ఈటీఎఫ్‌లు ఉదాహరణకు క్వాంటమ్ గోల్డ్ ఈటీఎఫ్ మాత్రం అరగ్రాము ఉంటుంది. ఇలాంటి కారణం వల్ల కూడా ఎన్‌ఏవీలు విభిన్నంగా ఉంటాయి. గోల్డ్ ఈటీఎఫ్‌ల ఎన్‌ఏవీలు రకరకాలుగా ఉన్నా, రాబడుల్లో మాత్రం పెద్ద తేడా ఏమీ ఉండదు. గోల్డ్ ఈటీఎఫ్‌ను ఎలా ఎంచుకోవాలంటే.., ఆ  గోల్డ్ ఈటీఎఫ్ ఎన్‌ఏవీకి, ట్రేడింగ్ ధరకు పెద్దగా తేడా ఉండకూడదు. అలాగే ట్రేడింగ్ లావాదేవీలు కూడా ఎక్కువ సంఖ్యలో ఉండాలి. గోల్డ్‌మన్ శాక్స్ గోల్డ్‌బీస్, కొటక్ గోల్డ్ ఈటీఎఫ్, యూటీఐ గోల్డ్‌షేర్.. ఈ గోల్డ్ ఈటీఎఫ్‌లను పరిశీలించవచ్చు.


 మా నాన్నగారు రిటైర్డ్ ప్రభుత్వ ఉద్యోగి. ఈ ఆర్థిక సంవత్సరంలో పన్ను ఆదా మార్గాల కోసం ఆయన చూస్తున్నారు. ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)లో ఇన్వెస్ట్ చేయాలని యోచిస్తున్నారు. ఇప్పటికే పీఎస్‌యూ ట్యాక్స్ సేవింగ్ ఎఫ్‌డీలో కొంత మొత్తం ఇన్వెస్ట్ చేశారు. ఈ విషయంలో తగిన సలహా ఇవ్వగలరు.
    - అనిరుధ్, హైదరాబాద్
 
 పన్ను ఆదా చేయడం కోసం ఈఎల్‌ఎస్‌ఎస్‌ల్లో ఇన్వెస్ట్ చేయవచ్చు. సీనియర్ సిటిజన్‌లకు ఈక్విటీల్లో ఇన్వెస్ట్ చేయడం సరైనది కాదనే అపోహ చాలా ప్రబలంగా ఉంది. ఈక్విటీల్లో పెట్టుబడులు రిస్క్‌తో కూడుకున్నవి కాబట్టి, ఇవి యువజనులకు మాత్రమే అనువైనవని, వృద్ధులకు తగినవి కావని చాలా మంది భావిస్తారు. కానీ ఇది సరైనది కాదు. ఈక్విటీల్లో పెట్టుబడులు స్వల్పకాలానికే రిస్క్ అని చెప్పవచ్చు. మూడు నుంచి ఐదేళ్ల కాలానికి, లేదా అంతకు మించిన కాలానికి ఈక్విటీల్లో పెట్టుబడులు పెట్టడం ఉత్తమం. రిస్క్ తక్కువగా, రాబడులు ఎక్కువగా ఉంటాయి. ద్రవ్యోల్బణాన్ని పరిగణనలోకి తీసుకుంటే, బ్యాంక్ ఫిక్స్‌డ్ డిపాజిట్లపై వచ్చే రాబడి స్వల్పమే.
 
 ఈఎల్‌ఎస్‌ఎస్‌ల్లో వచ్చే రాబడులపై ఎలాంటి దీర్ఘకాల మూలధన లాభాల పన్ను ఉండదు. అదే ఫిక్స్‌డ్ డిపాజిట్లపై అయితే వచ్చే రాబడిపై పన్ను ఉంటుంది. అంతే కాకుండా మూలం వద్ద పన్ను కోత(టీడీఎస్)కూడా ఉంటుంది. ఈఎల్‌ఎస్‌ఎస్‌ల్లో లిక్విడిటీ కూడా ఎక్కువ. వీటిల్లో ఇన్వెస్ట్‌మెంట్స్‌కు లాకిన్ పీరియడ్ మూడేళ్లు. కాగా, పన్ను ఆదా ఎఫ్‌డీల్లో లాకిన్ పీరియడ్ ఐదేళ్లుగా ఉంటుంది.  పన్ను ఆదా ఫిక్స్‌డ్ డిపాజిట్లలో లిక్విడిటీ ఏమాత్రం ఉండదు.  వీటిని ముందుగా తీసుకోవడానికి లేదు. అంతేకాకుండా వీటిపై రుణం కూడా తీసుకునే వీలు లేదు. ఇతర ఈక్విటీ ఇన్వెస్ట్‌మెంట్స్‌లాగానే ఈఎల్‌ఎస్‌ఎస్‌లో కూడా సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేస్తే మంచి ప్రయోజనాలు పొందవచ్చు.
  
 ఏడేళ్ల క్రితం నేను మూడు పన్ను ఆదా ఫండ్స్‌ల్లో ఇన్వెస్ట్ చేశాను. వాటిని ఎలా విక్రయించాలి?
  - కృష్ణవేణి, నిజామాబాద్
 సాధారణంగా పన్ను ఆదా ఫండ్స్‌కు లాకిన్ పీరియడ్ మూడేళ్లుగా ఉంటుంది. మీరు ఈ పన్ను ఆదా ఫండ్స్‌లో ఏడేళ్ల క్రితం ఇన్వెస్ట్ చేశారు. కాబట్టి ఎప్పుడైనా మీరు వీటిని ఉపసంహరించుకోవచ్చు. వీటిని ఉపసంహరించుకోవడం చాలా సులువు. మీకు వచ్చే అకౌంట్ స్టేట్‌మెంట్ దిగువ భాగంలో ఉండే రిడంప్షన్ ఫారమ్‌ను పూర్తి చేసి, సంతకం పెట్టి సదరు ఫండ్ సంస్థకు గానీ, సంస్థ డిస్ట్రిబ్యూటర్ కార్యాలయానికి గానీ పంపించాలి. ఇలా పంపించిన మూడు రోజుల తర్వాత మీ అకౌంట్‌లోకి డబ్బులు వచ్చేస్తాయి.
 
 ఇన్వెస్ట్‌మెంట్స్‌ను డైవర్సిఫై చేస్తే మంచి రాబడులు పొందుతారని మీరు తరచుగా చెబుతుంటారు.  ఎలా డైవర్సిఫై చేయాలి?            - వికాస్, నెల్లూరు
 మీ ఇన్వెస్ట్‌మెంట్స్‌ను విభిన్న రకాలుగా డైవర్సిఫై చేసుకోవచ్చు. డైవర్సిఫైడ్ ఫండ్‌ల నుంచి ఏదో ఒక ఫండ్‌ను ఎంపిక  చేసుకోవచ్చు. విభిన్న రంగాలపై దృష్టిసారించిన ఫండ్స్‌లో కానీ ఇన్వెస్ట్ చేసుకోవచ్చు. మీ ఆర్థిక లక్ష్యాలు, ఇన్వెస్ట్ చేసే మొత్తం, ఇన్వెస్ట్‌మెంట్ కాలం, మీరు భరించగలిగే రిస్క్... మొదలైన అంశాలను పరిగణనలోకి తీసుకొని తగిన ఫండ్స్‌ను ఎంపిక చేసుకోవచ్చు. రిస్క్ తట్టుకోలేని వారైతే లార్జ్ అండ్, మిడ్ క్యాప్, మల్టీ క్యాప్ ఫండ్స్‌లో ఇన్వెస్ట్ చేస్తే బాగుంటుంది. మీరు ఇన్వెస్ట్ చేయగల మొత్తాన్ని పరిగణనలోకి తీసుకొని కనీసం రెండు రకాలైన విభిన్న రంగాల ఫండ్స్‌ను ఎంచుకోవాలి. వీటిల్లో సిప్ విధానంలో ఇన్వెస్ట్  చేస్తే మంచి రాబడులు పొందవచ్చు.


 నేనొక ప్రభుత్వ ఉద్యోగిని, ఇప్పటివరకూ నా పీఎఫ్‌లో కనీస మొత్తం మాత్రమే జమ అయ్యేలా చూసుకుంటున్నాను. ఇక ఇప్పటి నుంచి నెలకు రూ.5,000 పీఎఫ్‌లో ఇన్వెస్ట్ చేద్దామనుకుంటున్నాను. పదేళ్ల వరకూ ఈ మొత్తాన్ని విత్‌డ్రా చేసుకునే ఆలోచనేదీ లేదు.  ఇంత మొత్తం పీఎఫ్‌లో ఇన్వెస్ట్ చేయడం మంచిదా ? లేక ఏదైనా ఈక్విటీ మ్యూచువల్ ఫండ్‌లో ఇన్వెస్ట్ చేయమంటారా? ఒకవేళ ఈక్విటీ మ్యూచువల్ ఫండ్‌లో ఇన్వెస్ట్ చేయడమే కరెక్టయితే, ఏ ఫండ్స్‌లో ఇన్వెస్ట్ చేయమంటారు?
 -రాజేశ్ బాబు, కడప
  
 నేనైతే ఈక్విటీ మ్యూచువల్ ఫండ్స్‌లోనే ఇన్వెస్ట్ చేయమని చెబుతాను. ద్రవ్యోల్బణాన్ని తట్టుకునే రాబడులు రావాలంటే పీఎఫ్‌లో కంటే ఈక్విటీ మ్యూచువల్ ఫండ్స్‌లో ఇన్వెస్ట్ చేయడమే ఉత్తమం. పీఎఫ్‌లో సొమ్ములు భద్రంగా ఉంటాయి. కానీ, ద్రవ్యోల్బణాన్ని అధిగమించే రాబడులు మాత్రం రావు. ఈక్విటీ మ్యూచువల్ ఫండ్స్‌లో ఇన్వెస్ట్ చేయడం రిస్క్‌తో కూడుకున్నది అయినప్పటికీ, పదేళ్లపాటు ఇన్వెస్ట్ చేస్తారు. కాబట్టి మంచి రాబడులే వస్తాయి. ప్రతినెలా రూ.5,000 చొప్పున ఈక్విటీ మ్యూచువల్ ఫండ్స్‌లో క్రమం తప్పకుండా ఇన్వెస్ట్ చేస్తే ద్రవ్యోల్బణాన్ని దీటుగా తట్టుకునే రాబడులు పొందవచ్చు.
 
 ఇక మీ ఇన్వెస్ట్‌మెంట్స్ విషయానికొస్తే, ఏవైనా రెండు లార్జ్ అండ్ మిడ్‌క్యాప్ కేటగిరి ఫండ్స్‌లో కానీ, లేదంటే ఒక లార్జ్‌క్యాప్ ఫండ్, మరో మిడ్‌క్యాప్ ఫండ్‌లో వేర్వేరుగా ఇన్వెస్ట్ చేయండి. మీ ఇన్వెస్ట్‌మెంట్స్‌కు పరిశీలించదగ్గ కొన్ని ఫండ్స్-హెచ్‌డీఎఫ్‌సీ క్యాపిటల్ బిల్డర్, ఫ్రాంక్లిన్ ఇండియా ఫ్లెక్సిక్యాప్, క్వాంటమ్ లాంగ్‌టెర్మ్ ఈక్విటీ, బిర్లా సన్‌లైఫ్ ఫ్రంట్‌లైన్ ఈక్విటీ ఫండ్. హెచ్‌డీఎఫ్‌సీ మిడ్-క్యాప్ ఆపర్చునిటీస్ ఫండ్, మీరు మ్యూచువల్ ఫండ్స్‌లో ఇన్వెస్ట్ చేసిన తర్వాత వాటిని ఎప్పటికప్పుడు కనీసం ఆరు నెలలకొకసారైనా సమీక్షించడం తప్పనిసరి.
  
 ఆదాయపు పన్ను చట్టం ప్రకారం ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్)కు సెక్షన్ 80 సీ కింద రూ.లక్ష వరకూ పన్ను మినహాయింపులు ఉన్నాయి. 2014 బడ్జెట్‌లో సెక్షన్ 80సీ కింద పన్ను మినహాయింపు పరిమితిని రూ.లక్షన్నర వరకూ పెంచారు. ఈ బడ్జెట్‌లో ఈఎల్‌ఎస్‌ఎస్‌ల పన్ను మినహాయింపులకు సంబంధించి ఏమైనా మార్పులు, చేర్పులు జరిగాయా? 2014-15కు పన్ను రాయితీలు పొందేందుకు ఒక్క ఈఎల్‌ఎస్‌ఎస్‌లో రూ. 1.5 లక్షలు ఇన్వెస్ట్ చేయవచ్చా?  అలా కాని పక్షంలో ఈఎల్‌ఎస్‌ఎస్‌ల నుంచి ఎంత ఇన్వెస్ట్ చేస్తే పన్ను మినహాయింపు పొందవచ్చు?     -కామేశ్, అనంతపురం
  
 ఈ ఆర్థిక సంవత్సరం బడ్జెట్‌లో సెక్షన్ 80 సీ కింద పన్ను మినహాయింపు పరిమితి రూ. లక్ష నుంచి రూ.లక్షన్నరకు పెరిగింది. అయితే పన్ను ఆదా చేసే స్కీమ్‌ల్లో ఎలాంటి మార్పులు, చేర్పులు లేవు. ఈఎల్‌ఎస్‌ఎస్‌కు గతంలో ఉన్న రాయితీలు ఇప్పుడు కూడా కొనసాగుతాయి. సెక్షన్ 80సీ కింద  రూ. లక్షన్నర పన్ను మినహాయింపు పొందడానికి ఇంత మొత్తంలో ఈఎల్‌ఎస్‌ఎస్‌లో ఇన్వెస్ట్ చేయవచ్చు. అయితే ఇది ఈక్విటీ ఇన్వెస్ట్‌మెంట్ కాబట్టి, రిస్క్ ఉంటుందనే విషయం మరచిపోవద్దు.
 
 మార్కెట్లు ఒడిదుడుకులుగా ఉంటాయి కాబట్టి ఈఎల్‌ఎస్‌ఎస్‌ల్లో నష్టాలు కూడా వచ్చే అవకాశాలున్నాయి. సురక్షితమైన, ఇతర స్థిరాదాయ రాబడులున్నప్పుడు మాత్రమే మీరు ఈఎల్‌ఎస్‌ఎస్‌ల్లో ఇన్వెస్ట్ చేయడం ఉత్తమం. మీ ఇన్వెస్ట్‌మెంట్స్‌ను ఒకే మ్యూచువల్ ఫండ్ ఈఎల్‌ఎస్‌ఎస్‌ల్లో కాకుండా విభిన్నరకాలైన మ్యూచువల్ ఫండ్ ఈఎల్‌ఎస్‌ఎస్‌ల్లో ఇన్వెస్ట్ చేయడం మంచిది. క్వాంటమ్ ట్యాక్స్ సేవింగ్స్, రిలయన్స్ ఈక్విటీ ట్యాక్స్ సేవర్, ఐసీఐసీఐ ప్రు ట్యాక్స్ ప్లాన్, యాక్సిస్ లాంగ్ టెర్మ్ ఈక్విటీలు... ఇన్వెస్ట్‌మెంట్స్‌కు పరిశీలించదగ్గ కొన్ని ఈఎల్‌ఎస్‌ఎస్‌లు.
  
 ఎలాంటి బ్రోకరేజ్ చెల్లింపులు లేకుండా మ్యూచువల్ ఫండ్ స్కీమ్‌ల్లో ఇన్వెస్ట్ చేసే అవకాశాముందా? ప్రస్తుతం నేను డీమ్యాట్ అకౌంట్ ద్వారా మ్యూచువల్ ఫండ్ స్కీమ్‌ల్లో ఇన్వెస్ట్ చేస్తున్నాను. అయితే ఒక్కో లావాదేవీకి రూ.25 ఖర్చవుతోంది. అయితే ఎలాంటి బ్రోకరేజ్ లేదా కనీస మొత్తం చెల్లింపులతో మ్యూచువల్ ఫండ్స్‌ను కొనుగోలు చేసే వీలుందా?             -ప్రగతి, విజయవాడ
  
 ఎలాంటి బ్రోకరేజ్ చెల్లింపులు లేకుండా మ్యూచువల్ ఫండ్ డెరైక్ట్ ప్లాన్‌లలో మీరు ఇన్వెస్ట్ చేయవచ్చు. మ్యూచువల్ ఫండ్ బ్రాంచ్ ఆఫీస్‌కు వెళ్లి సంబంధిత పత్రాలను నింపి ఈ ప్లాన్‌ల్లో ఎలాంటి బ్రోకరేజ్ చెల్లింపులు లేకుండా ఇన్వెస్ట్ చేయవచ్చు. లేదంటే సదరు మ్యూచువల్ ఫండ్ సంస్థ వెబ్‌సైట్ ద్వారా నేరుగా డెరైక్ట్ ప్లాన్‌ల్లో ఎలాంటి బ్రోకరేజ్ లేకుండా ఇన్వెస్ట్ చేయవచ్చు. ఈ యూనిట్లు ఎలక్ట్రానిక్ రూపంలో ఉంటాయి.  ఆన్‌లైన్ స్టేట్‌మెంట్‌లు పొందవచ్చు.    డీమ్యాట్ ద్వారా మీరు మ్యూచువల్ ఫండ్ యూనిట్లను కొన్నట్లయితే, మీ డీమ్యాట్ అకౌంట్‌ను నిర్వహించే డిస్ట్రిబ్యూటర్ బ్రోకరేజ్ ఫీజును గానీ, కమిషన్‌ను గానీ వసూలు చేస్తారు.


 మ్యూచువల్ ఫండ్స్‌కు సంబంధించిన బోనస్ యూనిట్లపై పన్ను చెల్లించాలా? బోనస్ యూనిట్లపై పన్ను అవి  ఎంత కాలం మన దగ్గర ఉన్నాయన్న విషయంపై కూడా ఆధారపడి ఉంటుందా? ఏ పన్ను (స్వల్పకాల/దీర్ఘకాల  మూలధన లాభాల పన్ను), ఎంత శాతం చెల్లించాల్సి ఉంటుంది? వివరించగలరు?                  - లక్ష్మీకాంత్, విజయనగరం
  
 మ్యూచువల్ ఫండ్స్‌కు సంబంధించిన బోనస్ యూనిట్లపై కూడా పన్ను చెల్లించాల్సి ఉంటుంది.  మ్యూచువల్ ఫండ్ సంస్థలు తాము ఆర్జించిన లాభాలను బోనస్‌ల రూపంలో ఇన్వెస్టర్లకు ఉచితంగా అందిస్తాయి. వీటిని విక్రయించినప్పుడు వీటిపై మూలధన లాభాల పన్ను చెల్లించాల్సి ఉంటుంది. అయితే అవి డెట్ మ్యూచువల్ ఫండ్స్ బోనస్ యూనిట్‌లా లేక ఈక్విటీ ఫండ్స్ బోనస్ యూని ట్‌లా అన్న అంశంపై మూలధన లాభాల పన్ను ఆధారపడి ఉంటుంది.
 
 ఇవి మీ దగ్గర ఉన్న కాలాన్ని బట్టి మీరు ఏ (దీర్ఘకాల/ స్వల్పకాల) మూలధన లాభాల పన్ను చెల్లించాలో నిర్ణయిస్తారు. ఈక్విటీ మ్యూచువల్ ఫండ్స్‌పై స్వల్పకాల మూలధన లాభాల పన్ను 15 శాతంగా ఉంటుంది. దీర్ఘకాల మూలధన లాభాల  పన్ను లేదు. అదే డెట్ ఫండ్స్ విషయంలో మీరు పొందిన యూనిట్లను మూడేళ్లలోపు ఎప్పుడైనా విక్రయిస్తే స్వల్పకాల మూలధన లాభాల పన్ను చెల్లించాల్సి ఉంటుంది.
 
 ఈ మొత్తాన్ని  మీ మొత్తం ఆదాయానికి కలిపి మీ ఆదాయపు పన్ను స్లాబ్‌ననుసరించి పన్ను విధిస్తారు. అలాకాకుండా  ఈ బోనస్ యూనిట్లను మీరు పొందిన  మూడేళ్ల తర్వాత విక్రయిస్తే దీర్ఘకాల మూలధన లాభాల పన్ను చెల్లించాల్సి ఉంటుంది. ఇది 20 శాతం (ఇండెక్సేషన్ తర్వాత) ఉంటుంది.
  
 మా మ్యూచువల్ ఫండ్‌లో ఇన్వెస్ట్ చేసి కొన్నేళ్లపాటు ఆ విషయాన్ని మీరు మరచిపోండి. ఆ తర్వాత అద్బుత రాబడులు వస్తాయని ఒక మ్యూచువల్ ఫండ్ ఏజెంట్ నన్ను ఊరిస్తున్నాడు. అతడు చెప్పింది కరెక్టేనా? ఏదైనా ఫండ్‌లో ఇన్వెస్ట్ చేస్తే, అంతా ఆ ఫండ్ సంస్థే చూసుకుంటుందా? మనం ఏమీ చెయ్యక్కరలేదా?                  - సుదర్శన్, కడప
  
 సాధారణంగా మ్యూచువల్ ఫండ్ ఏజెంట్లు అలానే తమ ఫండ్ స్కీమ్‌లను మార్కెట్ చేస్తారు. కానీ ఒక ఇన్వెస్టర్‌గా ఆ ఫండ్‌లో ఇన్వెస్ట్ చేయడంతోనే మన బాధ్యత తీరిపోదు. ఎంచుకునేటప్పుడు ఆ ఫండ్ గతంలో పనితీరు ఎలా ఉంది. మ్యూచువల్ ఫండ్ సంస్థ ట్రాక్ రికార్డ్, ఆ ఫండ్ మేనేజర్ పనితీరు, ఫండ్ పోర్ట్‌ఫోలియో, మీ ఆర్థిక లక్ష్యాలు,  తదితర అంశాలను పరిగణనలోకి తీసుకొని ఇన్వెస్ట్ చేయాలి.
 
 ఇక ఇన్వెస్ట్ చేసిన తర్వాత కనీసం రెండు నెలకొకసారైనా ఆ ఫండ్ పనితీరును గమనించాల్సి ఉంటుంది. ఇలా చేస్తే ఫండ్స్ పనితీరుపై మీకు ఒక అవగాహన వస్తుంది. ఏదైనా ఫండ్ పనితీరు సరిగ్గా లేకపోతే ఆ ఫండ్ నుంచి వైదొలిగి అదే కేటగిరీలో మంచి పనితీరు కనబరుస్తున్న ఇతర ఫండ్‌లో ఇన్వెస్ట్ చేయవచ్చు.
  
 నేను యాక్సిస్ ట్రెజరీ అడ్వాంటేజ్ ఫండ్-గ్రోత్ ప్లాన్‌లో 2013, నవంబర్‌లో ఇన్వెస్ట్ చేశాను. అప్పటి నుంచి అది 9 శాతం వార్షిక రాబడులనిచ్చింది. ఇదే కాలంలో నేను కొన్ని ఈక్విటీలను కొనుగోలు చేశాను. వాటిల్లో బాగా నష్టాలు వచ్చాయి. మ్యూచువల్ ఫండ్ విక్రయాలపై వచ్చిన లాభాలను ఈక్విటీల్లో వచ్చిన నష్టాలతో అడ్జెస్ట్ చేసుకొని పన్ను భారం తగ్గించుకోవచ్చా?          - ఆనంద్, విశాఖపట్టణం
  
 అలా అడ్జెస్ట్ చేసుకొని పన్ను భారం కొంత తగ్గించుకోవచ్చు. ఆదాయపు పన్ను చట్టం, 1961 సెక్షన్ 74 ప్రకారం అలాంటి అవకాశం ఉంది. షార్ట్ టర్మ్ క్యాపిటల్ నష్టాలను షార్ట్‌టర్మ్ క్యాపిటల్ గెయిన్స్, లాంగ్‌టర్మ్ క్యాపిటల్ గెయిన్స్‌తో కూడా  అడ్జెస్ట్ చేసుకోవచ్చు. ఒకవేళ నష్టాలు అదే ఆర్థిక సంవత్సరంలో అడ్జెస్ట్ చేసుకునే వీలు లేకుంటే తర్వాతి ఆర్థిక సంవత్సరానికి క్యారీ ఫార్వార్డ్ చేసుకోవచ్చు. ఒక వేళ నష్టాలు ఇంట్రాడే ట్రేడింగ్‌లో వస్తే, దీనిని స్పెక్యులేటివ్ నష్టాలుగా భావిస్తారు. వీటిని క్యాపిటల్ గెయిన్స్‌తో అడ్జెస్ట్  చేసుకోవడానికి లేదు. స్పెక్యులేటివ్ నష్టాలను స్పెక్యులేటివ్ లాభాలతోనే అడ్జెస్ట్ చేసుకోవాలి.


 నేను 2007 సంవత్సరంలో రిలయన్స్ ట్యాక్స్ సేవర్ డివిడెండ్ రీఇన్వెస్ట్‌మెంట్ ప్లాన్‌లో రూ.20,000 ఇన్వెస్ట్ చేశాను. ఇప్పటివరకూ డివిడెండ్‌గా రూ. 11,600 వచ్చాయి. ఈ ఫండ్‌లోనే కొనసాగమంటారా? లేక ఈ ఫండ్ నుంచి వైదొలగమంటారా?
  - సౌదామిని, విశాఖ పట్టణం
 
 రిలయన్స్ ట్యాక్స్ సేవర్ అనేది త్రీ స్టార్ రేటింగ్ ఉన్న ట్యాక్స్ సేవింగ్ ఫండ్. అన్ని ట్యాక్స్ సేవింగ్ మ్యూచువల్ ఫండ్స్‌కు లాకిన్ పీరియడ్ మూడేళ్లుగా ఉంటుంది. మీకు  అత్యవసరం అయినప్పుడు ఈ ఫండ్ నుంచి  ఇన్వెస్ట్‌మెంట్స్‌ను వెనక్కితీసుకోలేకపోవడం ఈ ట్యాక్స్ సేవింగ్ మ్యూచువల్ ఫండ్స్‌కు ఉండే ఒక ప్రధానమైన లోపం. డివిడెండ్ రీఇన్వెస్ట్‌మెంట్‌కు కూడా ఇదే(మూడేళ్ల) లాకిన్ పీరియడ్ వర్తిస్తుంది.
 
 ఒక్కో డివిడెండ్ రీ ఇన్వెస్ట్‌మెంట్‌ను ఇన్వెస్ట్ చేసిన కాలం నుంచి మూడేళ్ల కాలాన్ని లాకిన్ పీరియ డ్‌గా పరిగణిస్తారు. మీ చివరి డివిడెండ్ రీఇన్వెస్ట్‌మెంట్ ఇన్వెస్ట్ చేసి మూడేళ్లైన తర్వాతనే మీరు మీ సొమ్ములను వెనక్కి తీసుకోవచ్చు. మీరు ఈ ఫండ్ నుంచి వైదొలగాలనుకుంటే.. మీ ప్లాన్‌ను డివిడెండ్ రీఇన్వెస్ట్‌మెంట్ నుంచి డివిడెండ్ పేఅవుట్‌కు మార్చుకోండి. ఈ ప్లాన్‌లో మీకు  డివిడెండ్‌లు క్రమానుగతంగా అందుతాయి. మూడేళ్ల లాకిన్ పీరియడ్ పూర్తయిన తర్వాత మిగిలిన సొమ్ములను పొందవచ్చు.
 
 నాకు ఇటీవలనే వివాహమైంది. నా భార్య కూడా ఉద్యోగస్తురాలే. ఇప్పుడు నేను నెలకు రూ. 15,000 వరకూ ఇన్వెస్ట్ చేయగలను. యులిప్‌ల్లో ఇన్వెస్ట్‌మెంట్ చేయడం మంచిదా లేక మ్యూచువల్ ఫండ్స్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం మంచిదా? తగిన సలహా ఇవ్వగలరు.
 - బాబ్జి, కరీంనగర్
  
 ముందుగా మీ ఇద్దరి జీతాలకు సంబంధించి ఆర్నెల్ల మొత్తాన్ని అత్యవసర నిధిగా ఏర్పాటు చేసుకోండి.  ఈ నిధి సమకూరిన తర్వాత మ్యూచువల్ ఫండ్స్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం ప్రారంభించండి. ఇన్వెస్ట్‌మెంట్‌కు గానీ, బీమా అవసరాలకు గానీ యూలిప్‌లు  అనువైనవి కావు. పైగా యులిప్‌ల్లో వ్యయాలు అధికంగా ఉంటాయి. యులిప్‌లు మొదటి 5-6 సంవత్సరాల్లో  కనీసం  5-6 శాతం మొత్తాన్ని వ్యయాల కింద తీసేసుకుంటాయి. అదే మ్యూచువల్ ఫండ్స్‌లో అయితే ఈ వ్యయాల శాతం 2.25 శాతం నుంచి 2.5 శాతం వరకే ఉంటాయి.
 
 అంతే గాక పనితీరు బాగా లేకుంటే  మ్యూచువల్ ఫండ్స్ నుంచి మీరు ఎప్పుడు కావాలనుకుంటే అప్పుడు మీ ఇన్వెస్ట్‌మెంట్స్‌ను వెనక్కితీసుకోవచ్చు. యులిప్‌ల్లో అలా ఉండదు. పనితీరు బాగా ఉన్నా, బాగోలేకపోయినా యులిప్‌ల్లో కనీస లాకిన్ పీరియడ్ ఐదేళ్లు. అంతేకాకుండా మ్యూచువల్ ఫండ్స్‌కు సంబంధించి ఇన్వెస్ట్‌మెంట్ వ్యూహాలు పారదర్శకంగా ఉంటాయి. యులిప్‌లు దీనికి భిన్నం. మీ ఆర్థిక అవసరాలు, బడ్జెట్, భరించగలిగే రిస్క్ తదితర అంశాలను పరిగణనలోకి తీసుకొని మంచి రేటింగ్, పనితీరు ఉన్న ఈక్విటీ మ్యూచువల్ ఫండ్‌ను ఎంచుకోండి. వాటిల్లో సిప్ విధానంలో ఇన్వెస్ట్ చేయండి.
 
 నా మొత్తం ఇన్వెస్ట్‌మెంట్స్‌లో 70 శాతం వరకూ ఫిక్స్‌డ్ ఇన్‌కమ్ సాధనాల్లో ఉన్నాయి. మిగిలినవి ఈక్విటీల్లో ఉన్నాయి. నా ఈక్విటీ మ్యూచువల్ ఫండ్ ఇన్వెస్ట్‌మెంట్స్ విషయానికొస్తే లార్జ్, మిడ్, స్మాల్ క్యాప్ ఈక్విటీ ఫండ్స్‌లో వీటిని ఇన్వెస్ట్ చేశాను. వీటిల్లో నా ఇన్వెస్ట్‌మెంట్స్ మొత్తం విలువ రూ.30 లక్షల వరకూ ఉంటుంది. నేను త్వరలో రిటైర్ కాబోతున్నాను. ఈ  దృష్ట్యా ఈ ఈక్విటీ మ్యూచువల్ ఫండ్స్‌లోని ఇన్వెస్ట్‌మెంట్స్‌ను బ్యాలెన్స్‌డ్ ఫండ్స్‌లోకి మారుద్దామనుకుంటున్నాను. నాది సరైన నిర్ణయమేనా?
  - ఇంతియాజ్, హైదరాబాద్
 
 రిటైర్మెంట్ తర్వాత ఇన్వెస్ట్‌మెంట్స్ విషయంలో ఈక్విటీకి స్వల్పభాగమే కేటాయించాలన్న భావనతో మీరు ప్రశ్న అడిగినట్లున్నారు. కానీ ఇది సరైనది కాదు. ఈక్విటీల్లో రిస్క్ అధికంగా ఉన్నప్పటికీ, రాబడులు కూడా బాగా ఉంటాయి. వాస్తవంగా చెప్పాలంటే రిటైర్మెంట్ తర్వాతనే మీకు అధికంగా రాబడులు అవసరం. ద్రవ్యోల్బణాన్ని తట్టుకునే రాబడులను ఫిక్స్‌డ్ ఇన్‌కమ్ సాధనాలు ఇవ్వలేవు. ఈక్విటీల్లో ఇన్వెస్ట్‌మెంట్స్ ద్వారా ద్రవ్యోల్బణాన్ని దీటుగా తట్టుకునే రాబడులను పొందవచ్చు. అందుకని ఈక్విటీల్లో ఇన్వెస్ట్‌మెంట్స్ తగ్గించుకోవాలన్న మీ ఆలోచన సరైనది కాదు. వాటిని కొనసాగించండి.


 నేను గత ఏడాది సెప్టెంబర్‌లో మోర్గాన్ స్టాన్లీ మ్యూచువల్ ఫండ్‌లో గ్రోత్, డివిడెండ్ రీఇన్వెస్ట్‌మెంట్ ఆప్షన్లలో ఇన్వెస్ట్ చేశాను. ఈ ఏడాది జూన్ 27న ఇది హెచ్‌డీఎఫ్‌సీ లిక్విడ్ ఫండ్‌లో విలీనమైంది. విలీనమయ్యే రోజున గ్రోత్ ప్లాన్‌లో రూ.25,000, డివిడెండ్ రీఇన్వెస్ట్‌మెంట్ ప్లాన్‌లో రూ.4,500 చొప్పున లాభాల్లో ఉన్నాను. నేను ఈ ఫండ్స్‌లోనే కొనసాగుతున్నాను. ఈ ఫండ్స్ విలీనం కారణంగా నేనేమైనా సెక్యూరిటీస్ ట్రాన్సాక్షన్ ట్యాక్స్(ఎస్‌టీటీ) చెల్లించాలా? నా ఇన్వెస్ట్‌మెంట్ డేట్‌ను విలీనమైన తేదీనుంచి పరిగణిస్తారని అనుకుంటున్నాను. నేను ఆర్జించిన ఈ రూ. 25,000, రూ. 4,500పై నా పన్ను బాధ్యత ఎలా ఉంటుంది?
  - పావని, వైజాగ్
 
 ఫండ్‌ల విలీనమంటే ఒక ఫండ్‌లోని ఇన్వెస్ట్‌మెంట్స్‌ను మరొక ఫండ్‌లోకి బదిలీ చేయడం. దీనిని ఒక ఫండ్ నుంచి ఇన్వెస్ట్‌మెంట్స్‌ను ఉపసంహరించుకొని, మరొక ఫండ్‌లో కొత్తగా ఇన్వెస్ట్‌చేయడంగా భావిస్తారు. అంటే ఒక ఫండ్ యూనిట్స్‌ను అమ్మేసి, మరొక ఫండ్ యూనిట్స్‌ను కొనుగోలు చేయడంగా చెప్పవచ్చు. మ్యూచువల్ ఫండ్ యూనిట్ల కొనుగోళ్లు, అమ్మకాలపై సెక్యూరిటీస్ ట్రాన్సాక్షన్ ట్యాక్స్(ఎస్‌టీటీ) చెల్లించాల్సి ఉంటుంది. ఫండ్స్ విలీనమైతే ఈ విషయాన్ని ఫండ్ హౌజ్‌లే చూసుకుంటాయి. అయితే ఈ ఇన్వెస్ట్‌మెంట్స్‌పై  దీర్ఘకాల, స్వల్పకాల మూలధన  లాభాల పన్నులు మాత్రం ఇన్వెస్టరే చెల్లించాల్సి ఉంటుంది.
 
 డెట్ ఫండ్స్‌లో ఇన్వెస్ట్‌మెంట్స్‌ను మూడేళ్లను మించి మీరు కొనసాగిస్తే దీర్ఘకాల మూలధన లాభాల పన్ను 20%(ఇండెక్సేషన్ తర్వాత) చెల్లించాల్సి ఉంటుంది. ఒక వేళ మూడేళ్ల కంటే తక్కువ కాలమే మీ ఇన్వెస్ట్‌మెంట్స్ ఉంటే స్వల్పకాల మూలధన లాభాల పన్ను చెల్లించాలి. డెట్‌ఫండ్స్‌లో మీరు స్వల్పకాల మూల ధన లాభాలు గడిస్తే ఆ మొత్తాన్ని మీ ఆదాయానికి కలిపి మీ ట్యాక్స్ స్లాబ్ ప్రకారం పన్ను లెక్కిస్తారు. ఇక మీ విషయానికొస్తే, ఇన్వెస్ట్‌మెంట్స్ కాలం ఏడాది కంటే తక్కువే ఉన్నందున మీరు గ్రోత్ ప్లాన్‌లో ఆర్జిం చిన రూ.25,000పై, డివిడెండ్ రీ ఇన్వెస్ట్‌మెంట్‌పై ఆర్జించిన రూ.4,500లపై స్వల్పకాల మూలధనలాభాల పన్ను చెల్లించాలి. సెక్యూరిటీస్ ట్రాన్సాక్షన్ ట్యాక్స్(ఎస్‌టీటీ) చెల్లించాల్సిన పనిలేదు.
 
 నేను ఈ ఏడాది జూన్‌లో హెచ్‌డీఎఫ్‌సీ మిడ్-క్యాప్, హెచ్‌డీఎఫ్‌సీ బ్యాలెన్స్‌డ్ ఫండ్‌లో సిప్ విధానంలో 12 నెలల పాటు ఇన్వెస్ట్ చేశాను. వచ్చే ఏడాది జూన్‌లో వీటిని నేను ఎన్‌క్యాష్ చేసుకోవచ్చు. వచ్చే ఏడాది డిసెంబర్‌లో ఎన్‌క్యాష్ చేసుకోవాలనుకుంటున్నాను. అలా చేసుకోవచ్చా?  అలాచేస్తే నాకు జూన్, 2015 నాటి ఎన్‌ఏవీ వర్తిస్తుందా?  డిసెంబర్, 2015 నాటి ఎన్‌ఏవీ  వర్తిస్తుందా?      
 - శ్రీనివాస్, సూర్యాపేట
 
 మీరు ఏ రోజున మీ ఇన్వెస్ట్‌మెంట్స్‌ను ఉపసంహరించుకుంటారో, ఏ రోజున ఉన్న ఎన్‌ఏవీనే మీ ఇన్వెస్ట్‌మెంట్స్ తుది విలువగా పరిగణిస్తారు. మీరు మీ ఇన్వెస్ట్‌మెంట్స్‌ను 2015 జూన్ 1న ఉపసంహరించుకుంటే, ఆ రోజు ఎన్‌ఏవీ,  2015 డిసెంబర్ 1న ఉపసంహరించుకుంటే ఆ రోజు ఎన్‌ఏవీ  వర్తిస్తుంది. అయితే ఈక్విటీ మ్యూచువల్ ఫండ్స్‌లో ఇన్వెస్ట్‌మెంట్స్‌ను స్వల్పకాలం కాకుండా దీర్ఘకాలం కొనసాగిస్తే మంచిది. ఈక్విటీ మ్యూచువల్  ఫండ్స్‌లో ఇన్వెస్ట్‌మెంట్స్‌ను దీర్ఘకాలం కొనసాగిస్తేనే మీకు మంచి రాబడులు వస్తాయి. అందుకని మీకు సొమ్ము అత్యంత అవసరం అయితేనే ఈ ఇన్వెస్ట్‌మెంట్స్‌ను వెనక్కితీసుకోండి. లేదంటే మరికొంత కాలం కనీసం మూడు సంవత్సరాల పాటు మీ ఇన్వెస్ట్‌మెంట్స్ కొనసాగిస్తే, మరిన్ని ప్రయోజనాలు పొందగలరు.
 
 ఒకే రకం మ్యూచువల్ ఫండ్ల రేటింగ్‌లు రెగ్యులర్ ప్లాన్‌కు ఒక రకంగా, డెరైక్ట్ ప్లాన్‌కు మరొకరకంగా ఉంటున్నాయి. ఉదాహరణకు ఎస్‌బీఐ మ్యాగ్నమ్ గిల్ట్-లాంగ్‌టర్మ్, యూటీఐ గిల్ట్ అడ్వాండేజ్-లాంగ్‌టర్మ్ ఈ ఫండ్స్ రెగ్యులర్ ప్లాన్‌ల రేటింగ్‌లు, డెరైక్ట్ ప్లాన్‌ల రేటింగ్‌లు విభిన్నంగా ఉన్నాయి. ఈ రెగ్యులర్, డెరైక్ట్ ప్లాన్‌ల పోర్ట్‌ఫోలియోలు ఒకేవిధంగా ఉన్నప్పటికీ, రేటింగ్‌లు ఎందుకు భిన్నంగా ఉన్నాయి?
 - పర్వేజ్, హైదరాబాద్
 
 ఒకే మ్యూచువల్ ఫండ్‌ల రెగ్యులర్, డెరైక్ట్ ప్లాన్‌ల రేటింగ్‌లు భిన్నంగా ఉండడం సహజమే. వాటి ఇన్వెస్ట్‌మెంట్ పోర్ట్‌ఫోలియోలు ఒకేవిధంగా ఉన్నప్పటికీ, వాటి రేటింగ్‌ల్లో తేడాలు ఉంటాయి. రెగ్యులర్ ప్లాన్స్‌తో పోల్చితే డెరైక్ట్ ప్లాన్స్ వ్యయాలు తక్కువగా ఉంటాయి. ఫండ్‌ల పనితీరుపై వ్యయాలు కూడా చెప్పుకోదగ్గ ప్రభావం చూపుతాయి. అందుకని రెగ్యులర్  ప్లాన్‌ల రేటింగ్స్‌తో పోల్చితే డెరైక్ట్ ప్లాన్‌ల రేటింగ్స్ వాటితో సమానంగా కానీ, ఒక్కోక్కప్పుడు వాటి కంటే ఉత్తమంగా గానీ ఉంటాయి.


 నేను రూ. 2 లక్షలను ఈక్విటీ మ్యూచువల్ ఫండ్‌లో 2005లో ఇన్వెస్ట్ చేశాను. ఇప్పుడు ఈ ఇన్వెస్ట్‌మెంట్ విలువ రూ.10 లక్షలు. నేను 20 శాతం ట్యాక్స్ స్లాబ్‌లో ఉన్నాను. నేను ఈ ఇన్వెస్ట్‌మెంట్స్‌ను ఉపసంహరించుకుంటే ఎంత పన్ను చెల్లించాలి ? నా ఆదాయపు పన్ను రిటర్నుల్లో ఈ ఇన్వెస్ట్‌మెంట్స్‌ను ఎలా చూపాలి? ఈ ఇన్వెస్ట్‌మెంట్స్ మొత్తాన్ని, నా మొత్తం ఆదాయానికి కలపాలా? అలా కలిపితే నేను 30 శాతం ట్యాక్స్ స్లాబ్‌కు చేరతాను. దయచేసి నా సందేహాలను నివృత్తి చేయండి?
 -పవన్, గుంటూరు
 
 దీర్ఘకాలం పాటు ఈక్విటీల్లో ఇన్వెస్ట్ చేస్తే మంచి ప్రయోజనాలు పొందవచ్చనడానికి మీ ఇన్వెస్ట్‌మెంట్స్‌పై మీరు పొందిన లాభాలే నిదర్శనం. ఈక్విటీ మ్యూచువల్ ఫండ్స్‌ను కొన్న ఏడాది తర్వాత వాటిని విక్రయిస్తే పొందే లాభాలపై ఎలాంటి పన్నులు చెల్లించాల్సిన అవసరం లేదు. మీరు ఏ ట్యాక్స్ స్లాబ్‌లో ఉన్నా సరే ఇది వర్తిస్తుంది. ఒక వేళ ఏడాదిలోపే విక్రయిస్తే  15 శాతం షార్ట్‌టెర్మ్ క్యాపిటల్ గెయిన్స్ పన్ను చెల్లించాలి. ఇక మీ విషయానికొస్తే మీరు ఈక్విటీ మ్యూచువల్ ఫండ్స్‌లో ఇన్వెస్ట్ చేసి తొమ్మిదేళ్లయింది. కాబట్టి ఈక్విటీ మ్యూచువల్ ఫండ్స్‌పై మీరు ఎలాంటి దీర్ఘకాలిక మూలధన లాభాల పన్ను చెల్లించాల్సిన అవసరం లేదు. ఈక్విటీ మ్యూచువల్ ఫండ్స్‌పై మీరు ఆర్జించిన రూ.8 లక్షల లాభాలపై మీరు  ఎలాంటి పన్నులు చెల్లించాల్సిన పనిలేదు. మీ ఆదాయపు పన్ను రిటర్నుల్లో  ఈ ఈక్విటీ మ్యూచువల్ ఫండ్స్ లాభాలను మూలధన లాభాల ఆదాయం అనే హెడ్ కింద చూపించాలి.
 
 నేను ఇప్పుడు ఎన్‌ఎఫ్‌ఓ(న్యూ ఫండ్ ఆఫర్)లో గానీ, ప్రస్తుతమున్న ఏదేని ఫండ్‌లో గానీ ఒకేసారి రూ.50,000 ఇన్వెస్ట్ చేద్దామనుకుంటున్నాను. ఈ ఇన్వెస్ట్‌మెంట్‌పై మూడేళ్ల తర్వాత రూ.72,000 ఆశిస్తున్నాను. అప్పుడు నా సోదరి వివాహానికి ఈ సొమ్ములు అవసరం. ఈ విషయంలో నాకు తగిన సలహా ఇవ్వండి.
 -రంజని, హైదరాబాద్
 
 ఎన్‌ఎఫ్‌ఓలో ఇన్వెస్ట్ చేసే ఆలోచన పూర్తిగా మానుకోండి. ఇది సరైనది కాదు. గత కొన్నేళ్ల పనితీరును మదింపు చేసిన తర్వాతనే ఇన్వెస్ట్ చేయడానికి మ్యూచువల్ ఫండ్స్‌ను ఎంచుకోవాలి. ఎన్‌ఎఫ్‌ఓలో అలాంటి అవకాశం ఉండదు కాబట్టి. ఎన్‌ఎఫ్‌ఓలో ఇన్వెస్ట్ చేయడం సరైన నిర్ణయం కాదు. మంచి ట్రాక్ రికార్డ్ ఉన్న ఫండ్‌నే ఎంచుకోండి. ఒకేసారి ఏక మొత్తంలో ఇన్వెస్ట్ చేయడం కంటే కూడా కొంత కొంత మొత్తాల్లో క్రమం తప్పకుండా(సిప్-సిస్టమాటిక్ ఇన్వెస్ట్‌మెంట్ ప్లాన్) ఇన్వెస్ట్ చేస్తే మంచి ప్రయోజనాలు పొందుతారు. ఇక మీ విషయానికొస్తే, మీ రూ.50,000 మొత్తాన్ని ఏదైనా ఒక బ్యాలెన్స్‌డ్ ఫండ్‌లో ఇన్వెస్ట్ చేయండి.
 
 బ్యాలెన్స్‌డ్ ఫండ్స్ తమ నిధుల్లో 65 శాతం మొత్తాన్ని ఈక్విటీలో, మిగిలిన మొత్తాన్ని డెట్ మార్కెట్ సాధనాల్లో ఇన్వెస్ట్ చేస్తాయి. నిధుల కేటాయింపు సమతూకంగా ఉండేలా, మంచి రాబడులు వచ్చేలా, అదే సమయంలో ఇన్వెస్ట్‌మెంట్స్ సురక్షితంగా ఉండేలా బ్యాలెన్స్‌డ్ ఫండ్స్ పనితీరు ఉంటుంది. మీరు ఇన్వెస్ట్ చేయడానికి కొన్ని ఫండ్స్‌ను సూచిస్తున్నాం... హెచ్‌డీఎఫ్‌సీ బ్యాలెన్స్‌డ్, ఐసీఐసీఐ ప్రుడెన్షియల్ బ్యాలెన్స్‌డ్ అడ్వాండేజ్, టాటా బ్యాలెన్స్‌డ్. ఈ మూడు ఫండ్స్ గత కొన్నేళ్లుగా మంచి పనితీరును కనబరుస్తున్నాయి.
 
 నా వయస్సు 29 ఏళ్లు. ఇటీవలే నా పెళ్లైంది. నా భార్య కూడా ఉద్యోగే. ఇద్దరం కలసి నెలకు రూ.70,000 వరకూ ఆర్జిస్తాం. మేం ఇంత వరకూ ఎలాంటి  బీమా పాలసీలు తీసుకోలేదు. మా మీద ఆధారపడినవాళ్లు కూడా ఎవరూ లేరు. మాకు  బీమా పాలసీలు అవసరమా?
 -అర్జున్, కర్నూల్
 
 మీపై ఆధారపడిన వాళ్లు ఎవరూ లేనప్పటికీ, మీరు బీమా పాలసీలు తీసుకోవలసిందే. మీకు పెళ్లి అయిందంటే, మీకొక కుటుంబం ఉందన్నమాట. ఆ కుటుంబానికి బీమారక్షణ తప్పనిసరి. మీ వయస్సు చిన్నదే. ఈ వయస్సులో బీమా పాలసీ తీసుకుంటే మీరు తక్కువ ప్రీమియమే చెల్లిస్తే సరిపోతుంది. వీలైనంత త్వరగా ఆన్‌లైన్ టర్మ్ బీమా పాలసీ తీసుకోండి. ఆలస్యమైన కొద్దీ, ప్రీమియం వ్యయాలు పెరుగుతుంటాయి.


 హెచ్‌డీఎఫ్‌సీ బ్యాలెన్స్‌డ్ ఫండ్‌లో ఒకేసారి ఏకమొత్తంలో ఇన్వెస్ట్ చేయవచ్చా?
 - అమృత, హైదరాబాద్
 
 బ్యాలెన్స్‌డ్ ఫండ్స్ అంటే దాదాపు ఈక్విటీ ఫండ్స్‌లాగానే ఉంటాయి. ఈ ఫండ్స్ నిధుల్లో 65 శాతాన్ని ఈక్విటీల్లో ఇన్వెస్ట్ చేస్తారు. ఫలితంగా దీర్ఘకాలిక మూలధన లాభాల పన్ను చెల్లించాల్సిన అవసరం ఉండదు.  ఈక్విటీల్లో   65% ఇన్వెస్ట్ చేస్తామని  బ్యాలెన్స్‌డ్ ఫండ్స్ పేర్కొంటాయి. కానీ,  ఇన్వెస్ట్‌మెంట్స్ మాత్రం కనీసం 70 నుంచి 80%వరకూ ఉంటాయి. ఏతావాతా బ్యాలెన్స్‌డ్ ఫండ్స్ పనితీరు ఈక్విటీ ఫండ్స్‌లాగానే ఉంటుందని చెప్పవచ్చు.
 
 స్టాక్‌మార్కెట్లు జోరుగా ఉన్నప్పుడు ఈ ఫండ్స్ వృద్ధి బావుంటుంది. అలాగే స్టాక్ మార్కెట్లు పడిపోతే ఈ ఫండ్స్ కూడా క్షీణిస్తాయి. అందుకని ఈ ఫండ్స్‌లో ఒకేసారి ఏక మొత్తంలో ఇన్వెస్ట్ చేయకూడదు. మీరు పెద్ద మొత్తం ఇన్వెస్ట్ చేసిన తర్వాత మార్కెట్లు పతనమైతే మీకు కూడా పెద్ద మొత్తంలోనే నష్టాలు వస్తాయి. అయితే దీనికి వ్యతిరేకంగా ధర బాగా తక్కువగా ఉన్నప్పుడు ఇన్వెస్ట్ చేస్తే మంచి రాబడులు కళ్లజూడవచ్చు.
 
 కానీ ధర తక్కువ అనేదానిని ఎవరూ పసిగట్టలేరు. ధర తగ్గుతుంటే ఇంకా తగ్గుతుందని ఎదురు చూస్తూ ఉంటాం. అప్పుడు ధర క్రమ క్రమంగా పుంజుకుంటుంది. అందుకని బ్యాలెన్స్‌డ్ ఫండ్స్‌ల్లో సిస్టమాటిక్ ఇన్వెస్ట్‌మెంట్ ప్లాన్(సిప్) ద్వారా ఇన్వెస్ట్ చేస్తే మంచి ఫలితాలు పొందవచ్చు. ఇలా ఇన్వెస్ట్ చేసే ఓపిక మీకు లేకపోతే, మీ దగ్గరున్న మొత్తాన్ని కనీసం ఆరు సమాన భాగాలుగా చేసైనా ఇన్వెస్ట్ చేయండి.
 
 గోల్డ్ ఈటీఎఫ్‌ల్లో ఇన్వెస్ట్ చేద్దామనుకుంటున్నాను. నెలకు కొంత మొత్తం చొప్పున ఏదైనా గోల్డ్ ఈటీఎఫ్‌ల్లో ఇన్వెస్ట్ చేస్తే మంచి రాబడులు వస్తాయని మిత్రులంటున్నారు. ఇది సరైన నిర్ణయమేనా?
 -ప్రకాశ్, విజయవాడ
 
 ఎంత మాత్రం సరైన నిర్ణయం కాదు. పుత్తడిలో పెట్టుబడులు వద్దని చెబుతూనే ఉన్నాం. గతంలో వివిధ కారణాల వల్ల బంగారంలో పెట్టుబడులకు మంచి రాబడులే వచ్చాయి. ఈక్విటీ మార్కెట్లలో అని శ్చితి, అంతర్జాతీయ ఆర్థిక సంక్షోభం,  డిమాండ్ అధికంగా ఉండడం, సరఫరా తక్కువగా ఉండడం తదితర కారణాల వల్ల బంగారంలో పెట్టుబడులకు మంచి లాభాలు వచ్చాయి.
 
 కానీ ఇప్పుడు పరిస్థితులు మారాయి. ఆర్థిక వ్యవస్థ ఇప్పుడిప్పుడే పుంజు కుంటోంది. అంతర్జాతీయంగా ఆర్థిక పరిస్థితులు కుదుటపడుతున్నాయి.  ఈ కారణాల వల్ల చూస్తే, ఈక్విటీల్లో పెట్టుబడులకు మంచి లాభాలు వచ్చే సూచనలున్నాయి. ప్రతి నెలా కొంత మొత్తాన్ని ఇన్వెస్ట్ చేయడానికి బంగారం కంటే ఈక్విటీలే ఉత్తమం. ఈ విషయాలన్నింటినీ పరిగణనలోకి తీసుకుంటే పుత్తడిలో పెట్టుబడులు పెట్టకపోవడమే మంచిది.
 
 నేను ఇటీవలనే రిటైరయ్యాను.  గతంలో నేను వేసిన  ఫిక్సడ్ డిపాజిట్లు మరో రెండు నెలల్లో మెచ్యూర్ అవుతాయి. ఈ మొత్తాన్ని ఏవైనా మ్యూచువల్ ఫండ్స్‌లో ఇన్వెస్ట్ చేద్దామనుకుంటున్నాను. మ్యూచువల్ ఫండ్స్ ల్లో ఇన్వెస్ట్ చేస్తే  బ్యాంకు ఎఫ్‌డీల కన్నా మెరుగైన రాబడి వస్తుందా? ఏయే ఫండ్స్‌ల్లో ఇన్వెస్ట్ చేయమంటారు?               
 - సంపత్‌కుమార్, కరీంనగర్
 
 బ్యాంక్ ఫిక్స్‌డ్ డిపాజిట్లు, మ్యూచువల్ ఫండ్స్.. ఇవి రెండూ పూర్తిగా భిన్నమైన ఇన్వెస్ట్‌మెంట్ విధానాలు. ఫిక్స్‌డ్ డిపాజిట్లలో స్థిరమైన ఆదాయం గ్యారంటీగా లభిస్తుంది. ఇక మ్యూచువల్ ఫండ్స్ విషయానికొస్తే, ఇవి మార్కెట్ అనుసంధానత ఇన్వెస్ట్‌మెంట్ సాధనాలు, స్టాక్‌మార్కెట్లు ఒడిదుడుకులు కారణంగా వీటిల్లో కూడా ఒడిదుడుకులుంటాయి. బ్యాంక్ ఫిక్స్‌డ్ డిపాజిట్ల వలె  మ్యూచువల్ ఫండ్స్ నుంచి గ్యారంటీడ్ ఆదాయం పొందలేము.  ఈక్విటీలో ఇన్వెస్ట్ చేస్తే, ద్రవ్యోల్బణం నుంచి రక్షణ పొందవచ్చు.
 
 మీరు రిటైరయ్యారు కాబట్టి, మీ ఆదాయంలో వృద్ధి ఆగిపోతుంది. అందుకే మీ ఇన్వెస్ట్‌మెంట్స్‌పై వచ్చే ఆదాయంపైననే మీరు ఆధారపడాలి. మీ అసలు మొత్తం కొనుగోలు శక్తి అలాగే ఉండటంతో పాటు మీకు తగిన ఆదాయం మీ ఇన్వెస్ట్‌మెంట్స్ నుంచి రావలసి ఉంటుంది. ద్రవ్యోల్బణాన్ని తట్టుకునేలా, మీ ఖర్చులకు సరిపడేలా నెలవారీ కొంత ఆదాయం  మీకు కావాలి. ఈ విషయాలన్నింటిని పరిగణనలోకి తీసుకుంటే మీరు ఈక్విటీ ఓరియంటెడ్ బ్యాలెన్స్‌డ్ ఫండ్స్‌ల్లో ఇన్వెస్ట్ చేయడం మంచిది.


 నా కొడుకు  వయస్సు 24 సంవత్సరాలు. ఇటీవలనే ఉద్యోగంలో చేరాడు. అతనికి సంబంధించిన పీపీఎఫ్, టర్మ్ ఇన్సూరెన్స్, మెడికల్ ఇన్సూరెన్స్ సంబంధిత ఇన్వెస్ట్‌మెంట్స్ అన్నీ నేను చూస్తున్నాను. తన పొదుపు సొమ్ములను మ్యూచువల్ ఫండ్స్‌లో కూడా ఇన్వెస్ట్ చేద్దామనుకుంటున్నాను. క్వాంటమ్ లాంగ్ టర్మ్ ఈక్విటీ, ఫ్రాంక్లిన్ టెంపుల్టన్ స్మాల్-క్యాప్ ఫండ్‌లను ఎంపిక చేశాను. మూడో ఫండ్‌గా ఐడీఎఫ్‌సీ ప్రీమియర్ ఈక్విటీని పరిశీలిస్తున్నాను. కానీ ఈ ఫండ్ రేటింగ్ ఇటీవల పడిపోయింది. మీరేమంటారు?  - మహ్మద్ ఇజాజ్, హైదరాబాద్
  ఐడీఎఫ్‌సీ ప్రీమియర్ ఈక్విటీ... మంచి రాబడులనిస్తున్న ఫండ్ అనే చెప్పవచ్చు.  మీ అబ్బాయి  కెరీర్ పొదుపులు, ఇన్వెస్ట్‌మెంట్స్‌తో ప్రారంభం కావడం సంతోషించదగ్గ విషయం. మీ అబ్బాయి కోసం మీరు చేస్తున్న ఇన్వెస్ట్‌మెంట్ ప్లానింగ్ బావుంది. అయితే ఒక పెద్ద మార్పు సూచిస్తాను. మీ అబ్బాయి వయస్సు చిన్నది. పీపీఎఫ్ అకౌంట్లో 20-30 ఏళ్ల పాటు ఇన్వెస్ట్ చేయడం కంటే, ఒక మంచి ఫండ్‌ను ఎంచుకొని దాంట్లో క్రమం తప్పకుండా 15-20 ఏళ్లపాటు ఇన్వెస్ట్ చేయడం ఉత్తమం. ఇలా చేస్తే పీపీఎఫ్‌లో కన్నా అధిక రాబడులు పొందవచ్చు. మరొక మార్పు ఏమిటంటే, ఇన్వెస్ట్‌మెంట్స్ మొదలు పెట్టే వాళ్లు, మొదటగా ట్యాక్స్-సేవింగ్స్ ఫండ్‌తో ప్రారంభించాలి. ఇది మీ అబ్బాయి అనుసరిస్తే తన ఆదాయంపై పన్ను ప్రయోజనాలు పొందే అవకాశం అతడికి లభిస్తుంది. అందుకని పీపీఎఫ్ అకౌంట్‌లో తక్కువ మొత్తం ఇన్వెస్ట్ చేస్తూ, కొద్ది మొత్తాన్ని కొన్ని ట్యాక్స్ సేవింగ్స్ ఫండ్స్‌లో ఇన్వెస్ట్ చేయడం ఉత్తమం.
 
  మూడేళ్ల క్రితం ఎల్‌ఐసీ జీవన్ సరళ్ ఇన్సూరెన్స్ ప్లాన్ తీసుకున్నాను. ఇప్పటివరకూ రూ.54,000 ప్రీమియమ్‌గా చెల్లించాను. ఈ ప్లాన్ ప్రస్తుత సరెండర్ వేల్యూ రూ.30,000గా ఉంది. ఇన్సూరెన్స్‌కు ఇది సరైనదేనా?  దీనిని కొనసాగించమంటారా ? లేదా మరొక దాంట్లో ఇన్వెస్ట్ చేయమంటారా? కల్పన, తిరుపతి
  ఎల్‌ఐసీ జీవన్ సరళ్ అనేది ఎండోమెంట్ పాలసీ. అన్ని ఎండోమెంట్ పాలసీల్లాగే ఇది కూడా వ్యయాల విషయమై పారదర్శకంగా వ్యవహరించడం లేదు. ఇలాంటి ప్లాన్‌లతో ఉండే ప్రధానమైన సమస్యే ఇది. ఈ పాలసీ పదవ సంవత్సరం తర్వాత నుంచి లాయల్టీ ఆడిషన్స్ లభిస్తాయి. మీరు ఇప్పటివరకూ రూ.54,000 ప్రీమియంగా చెల్లించారు. ఈ ప్లాన్ సరెండర్ వేల్యూ రూ.30,000గా ఉంది. మీ నష్టాలను కనిష్టం చేసుకోవాలంటే మీరు ఈ ప్లాన్‌ను సరెండర్ చేయడమే ఉత్తమం. ఈ పాలసీ నుంచి వైదొలగి మంచి రాబడుల కోసం మ్యూచువల్ ఫండ్స్‌లో ఇన్వెస్ట్ చేయడం మంచిది. మీరు ఈ ప్లాన్ నుంచి వైదొలిగితే మీకు బీమా రక్షణ ఉండదు. అందుకని ఏదైనా టర్మ్ ఇన్సూరెన్స్ పాలసీ తీసుకోండి. మిగిలిన మొత్తాన్ని మంచి రేటింగ్ ఉన్న మ్యూచువల్ ఫండ్స్‌లో ఇన్వెస్ట్ చేయండి. మీ ఆర్థిక లక్ష్యాలు, అవసరాలు, వనరులు ఆధారంగా, మీరు భరించగలిగే రిస్క్‌ను బట్టి తగిన మ్యూచువల్ ఫండ్స్‌ను ఎంచుకొని ఇన్వెస్ట్ చేయండి.
 
  నా వయస్సు 60 సంవత్సరాలు. త్వరలో నా నేషనల్ పెన్షన్ స్కీమ్ (ఎన్‌పీఎస్) అకౌంట్ మెచ్యూర్ కాబోతోంది. 40% మొత్తాన్ని ఎల్‌ఐసీ నుంచి పెన్షన్ కోసం(జీవన్ ఆక్షయ్ సిక్స్‌త్) ఎంచుకున్నాను. 60% మొత్తం నా బ్యాంక్ ఖాతాలో డిపాజిట్ అయ్యేలా ఎంపిక చేసుకున్నాను. ఈ 60% మొత్తంపై ఆదాయపు పన్ను చెల్లించాల్సి ఉంటుందా? ఇండెక్సేషన్ ప్రయోజనాలు లభిస్తాయా?- మురళీ  వైజాగ్
 
  నేషనల్ పెన్షన్ స్కీమ్(ఎన్‌పీఎస్) మెచ్యూర్ అయితే ఆ మొత్తంపై పన్ను చెల్లించాల్సి ఉంటుంది. ప్రస్తుతమున్న నిబంధనల ప్రకారం ఎన్‌పీఎస్ మొత్తంలో 60 శాతం మొత్తాన్ని విత్‌డ్రా చేసుకోవచ్చు. కనీసం 40 శాతం మొత్తాన్ని యాన్యూటీ కొనుగోలు కోసం వెచ్చించాల్సి ఉంటుంది. మీరు విత్‌డ్రా చేసుకునే 60 శాతం మొత్తంపై మీ ఆదాయపు పన్ను స్లాబుననుసరించి పన్ను చెల్లించాల్సి ఉంటుంది. ఇండెక్సేషన్ ప్రయోజనాలు వర్తించవు. అంతేకాకుండా మాన్యుటీ ప్లాన్ ద్వారా నెలవారీ మీరు పొందే మొత్తాలపై కూడా పన్ను చెల్లించాల్సి ఉంటుంది.


 రెండేళ్లుగా సిస్టమాటిక్ ఇన్వెస్ట్‌మెంట్ ప్లాన్(సిప్)లో ఇన్వెస్ట్ చేస్తున్నాను. ఒక్కో ఫండ్‌లో నెలకు రూ.4,000 చొప్పున నాలుగు ఫండ్స్‌లో ఇన్వెస్ట్ చేస్తున్నాను. ఇప్పుడు చూస్తే స్టాక్ మార్కెట్లు పరుగులు పెడుతున్నాయి. దీంతో సిప్ విధానంలో కాకుండా ఒకేసారి పెద్ద మొత్తంలో(రూ. 1 లక్ష) ఇన్వెస్ట్ చేద్దామనుకుంటున్నాను. నా నిర్ణయం సరైనదేనా?
  - కార్తీక్, రాజమండ్రి
 
 మీ నిర్ణయం సరైనది కాదు. ఇన్వెస్ట్‌మెంట్స్‌కు సిప్ విధానమే సరైనది. సిప్ విధానంలో ఇన్వెస్ట్ చేయడం వల్ల యావరేజింగ్ ప్రయోజనాలు లభిస్తాయి. మీ విషయమే తీసుకుంటే, రూ. లక్ష మొత్తాన్ని నాలుగు ఫండ్స్‌ల్లో రూ.25,000 చొప్పున ఇన్వెస్ట్ చేద్దామనుకుంటున్నారు. ఇది సరైన నిర్ణయం కాదు. ఇలా ఒకేసారి ఇన్వెస్ట్ చేయడం వల్ల పొందే ప్రయోజనాల కంటే కూడా సిప్ విధానంలో ఇన్వెస్ట్ చేయడం వల్ల లభించే లాభాలే అధికం.
 
 నాకు ఇటీవలనే పెళ్లి అయింది. మ్యూచువల్ ఫండ్స్‌ల్లో ఇన్వెస్ట్ చేద్దామనుకుంటున్నాను. కానీ నాకు ఇదంతా కొత్త. ఫండ్స్‌ల్లో ఇన్వెస్ట్ చేయడానికి ఇది సరైన సమయమేనా?                    - అక్షిత, కరీంనగర్
 
  మార్కెట్లు ఉంటే బుల్ రన్‌లో లేదా బేర్ ఫేజ్‌లో గానీ ఉంటాయి. మీరు ఇన్వెస్ట్ చేయడానికి మార్కెట్లు ఎలా ఉన్నాయనేది ప్రధానాంశం కాకూడదు. ప్రస్తుత మార్కెట్ పరిస్థితులు ఎలా ఉన్నా సరే,  దీర్ఘకాల రాబడుల(కనీసం ఐదేళ్లు) దృష్ట్యానే ఈక్విటీల్లో ఇన్వెస్ట్ చేయాలి. ఒకేసారి పెద్ద మొత్తంలో ఇన్వెస్ట్ చేయడం సరైనది కాదని మరచిపోకండి. ఇన్వెస్ట్‌మెంట్స్‌కు సిస్టమాటిక్ ఇన్వెస్ట్‌మెంట్ ప్లాన్(సిప్) అన్ని విధాలా ఉత్తమం. మీరు మ్యూచువల్ ఫండ్స్‌కు కొత్త కాబట్టి. మొదటిగా బ్యాలెన్స్‌డ్ ఫండ్‌లో ఇన్వెస్ట్ చేయడం ప్రారంభించండి. బ్యాలెన్స్‌డ్ ఫండ్స్ అయితే నిలకడైన వృద్ధిని సాధిస్తాయి. మ్యూచువల్ ఫండ్స్‌పై మీకు తగినంత అవగాహన వచ్చిన తర్వాత మీ ఆర్థిక అవసరాలు, ఆర్థిక లక్ష్యాలకు అనుగుణంగా వివిధ రకాలైన మ్యూచువల్ ఫండ్స్‌ల్లో ఇన్వెస్ట్ చేయవచ్చు.
 
  నేను 2007 నుంచి మ్యూచువల్ ఫండ్స్‌లో ఇన్వెస్ట్ చేస్తున్నాను. కానీ నా మ్యూచువల్ ఫండ్స్ ఇన్వెస్ట్‌మెం ట్స్‌కు సంబంధించిన డాక్యుమెంట్లన్నీ పోయాయి. నా పర్మనెంట్ అకౌంట్ నంబర్(పాన్) లేదా నా పేరు ద్వారా ఇప్పటిదాకా చేసిన ఇన్వెస్ట్‌మెంట్ల వివరాలను పొందవచ్చా?                  - రాజేష్, గుంటూరు
 
  డాక్యుమెంట్లు పోయినప్పటికీ,  మ్యూచువల్ ఫండ్స్‌ల్లో మీ ఇన్వెస్ట్‌మెంట్ల వివరాలను పొందే వీలు ఉంది. మీరు ఏ ఫండ్‌లో ఇన్వెస్ట్ చేశారో ఆ ఫండ్ పేరు గుర్తుంటే, ఆ వివరాలు పొందవచ్చు. చాలా ఫండ్ కంపెనీలకు రిజస్ట్రార్లుగా, ట్రాన్స్‌ఫర్ ఏజెం ట్లుగా కార్వీ, క్యామ్స్ సంస్థలు పనిచేస్తున్నాయి. ఈ రెండు సంస్థలు చాలా మ్యూచువల్ ఫండ్ కంపెనీలకు అకౌంటింగ్ స్టేట్‌మెంట్లు తయారు చేస్తాయి. మీరు సదరు సంస్థ వెబ్‌సైట్‌లలోకి వెళ్లి, ఇన్వెస్టర్ సర్వీసెస్‌పై క్లిక్ చేసి, పాన్ నంబర్‌ను ఎంటర్ చేసి, కన్సాలిడేటెడ్ అకౌంట్ స్టేట్‌మెంట్ కావాలని అడగండి. మీ ఇన్వెస్ట్‌మెంట్ వివరాలు మీకు లభించే అవకాశాలున్నాయి. లేదంటే ఈ ఫండ్స్‌లో ఇన్వెస్ట్ చేయమని సలహా ఇచ్చిన మీ ఫండ్ అడ్వైజర్ ద్వారానైనా ఆ వివరాలను పొందవచ్చు.
 
  నా రిటైర్మెంట్‌కు ఇంకా పదిహేనేళ్ల సమయం ఉంది. నా రిటైర్మెంట్ అవసరాల కోసం ఎన్ని మ్యూచువల్ ఫండ్స్‌లో నేను ఇన్వెస్ట్ చేయాలి?
  - సుజాత, హైదరాబాద్
 
  మ్యూచువల్ ఫండ్ ఇన్వెస్ట్‌మెంట్స్ విషయానికొస్తే, రాశి కంటే కూడా వాసి ముఖ్యమనే విషయం గుర్తుం చుకోవాలి. మ్యూచువల్  ఫండ్స్ ద్వారా మంచి రాబడులు పొందాలంటే డైవర్సిఫికేషన్ కీలకం. డైవర్సిఫికేషన్ ప్రయోజనాల కోసం 4 లేదా 5 ఫండ్స్‌ను ఎంచుకుంటే సరిపోతుంది. అంతకంటే ఎక్కువ ఫండ్స్‌ను ఎంచుకుంటే వాటి పనితీరును, తరచూ మీరు చెక్ చేయాల్సి ఉంటుంది. ఫలితంగా మీ సమయం వృథా అవుతుంది. విభిన్న ఫండ్ మేనేజర్లు నిర్వహించే విభిన్నమైన ఫండ్లలో ఇన్వెస్ట్ చేయడం మంచిది. ఇన్వెస్ట్ చేస్తున్న మ్యూచువల్ ఫండ్ల సంఖ్య కూడా మరీ ఎక్కువగా కాకుండా చూసుకోవాలి.
  
  ధీరేంద్ర కుమార్
  సీఈవో, వ్యాల్యూ రీసెర్చ్
  


 మిరా అసెట్ ఇండియా ఆపర్చునిటీస్ ఫండ్‌లో డెరైక్ట్ ప్లాన్‌లో డివిడెండ్ పేఅవుట్ ఆప్షన్‌లో ఇన్వెస్ట్ చేశాను. ఈ ప్లాన్‌కు సంబంధించి డెరైక్ట్, రెగ్యులర్ ప్లాన్‌ల ఎన్‌ఏవీల మధ్య రూ. 4 తేడా ఉంది. ఇన్వెస్ట్ చేసేటప్పుడు ఎన్‌ఏవీ అధికంగా ఉండటంతో నాకు యూనిట్లు తక్కువగా వచ్చాయి. డెరైక్ట్ ప్లాన్, రెగ్యులర్ ప్లాన్‌లలో ఏది ఇన్వెస్టర్లకు మంచిదో వివరించండి?
 - కుమార్, మంగళగిరి
 
 ఇన్వెస్ట్ చేసేటప్పుడు ఎన్‌ఏవీ అధికంగా ఉందని ఆందోళన చెందాల్సిన అవసరం లేదు. రెగ్యులర్ ప్లాన్‌తో పోల్చితే డెరైక్ట్ ప్లాన్ రాబడులు అధికంగా ఉన్నాయా లేదా అన్నది అసలు విషయం. ఏ ఇతర ప్లాన్‌లతో పోల్చినా కూడా డెరైక్ట్ ప్లాన్ ద్వారా వచ్చే రాబడి అధికంగా ఉంటాయి. వ్యయాలు తక్కువగా ఉండటమే దీనికి కారణం.
 
 మ్యూచువల్ ఫండ్స్‌ను విక్రయించే దళారీలకు చెల్లించే కమిషన్, ఇతర ఖర్చులు డెరైక్ట్ ప్లాన్‌లలో ఉండవు. ఇలా ఆదా అయిన వ్యయాలను సదరు మ్యూచువల్ ఫండ్ కంపెనీ ఇన్వెస్టర్లకే అందిస్తాయి. అందుకే ఈ డెరైక్ట్ ప్లాన్‌ల ఎన్‌ఏవీ, రాబడులు అధికంగా ఉంటాయి.  ఏ ఫండ్‌ను కొనుగోలు చేయాలో అన్న విషయంపై మీకు పూర్తి స్థాయిలో స్పష్టత ఉన్నప్పుడే మీరు డెరైక్ట్ ప్లాన్‌లో ఇన్వెస్ట్‌చేయడం మంచిది. ఇలా కాని పక్షంలో రెగ్యులర్ ప్లాన్‌లో ఇన్వెస్ట్  చేయడం ఉత్తమం. డెరైక్ట్ ప్లాన్‌లో ఇన్వెస్ట్ చేయడం వల్ల రాబడులు అధికంగా వస్తాయనేది కాదనలేని సత్యం. అయితే ఈ డెరైక్ట్ ప్లాన్‌ను ఎంచుకునేందుకు బాగా రీసెర్చ్ చేయాల్సి ఉంటుంది.
 
 ఏడాది క్రితం నేనొక ఈక్విటీ ఫండ్‌లో ఇన్వెస్ట్ చేశాను. ఇప్పడు ఈ ఫండ్‌లోని ఇన్వెస్ట్‌మెంట్స్‌ను ఈక్విటీ లింక్డ్ సేవింగ్స్ స్కీమ్ (ఈఎల్‌ఎస్‌ఎస్)లో సిస్టమాటిక్ ట్రాన్స్‌ఫర్ ప్లాన్(ఎస్‌టీపీ)లోకి మళ్లిద్దామనుకుంటున్నాను.  సెక్షన్ 80సీ కింద నాకు ఏమైనా పన్ను రాయితీలు లభిస్తాయా?            
 - మల్లిక, హైదరాబాద్
  
 ఒక ఫండ్ నుంచి మరో ఫండ్‌లోకి ఇన్వెస్ట్‌మెంట్స్‌ను మళ్లించడాన్ని -ఒక ఫండ్‌లో ఇన్వెస్ట్‌మెంట్స్‌ను ఉపసంహరించుకొని మరో ఫండ్‌లో కొత్తగా ఇన్వెస్ట్‌చేయడంగా పరిగణిస్తారు. ఈక్విటీ ఫండ్ నుంచి ఏడాది కాలంలోపు మీ ఇన్వెస్ట్‌మెంట్స్‌ను మళ్లిస్తే మీరు షార్ట్‌టెర్మ్‌క్యాపిటల్ గెయిన్స్ పన్ను, ఏడాది దాటిన తర్వాత అయితే లాంగ్‌టెర్మ్ క్యాపిటల్ గెయిన్స్ పన్ను చెల్లించాల్సి ఉంటుంది. అయితే ఈక్విటీ ఫండ్స్‌పై ఏడాది దాటితే ఎలాంటి లాంగ్‌టెర్మ్ క్యాపిటల్ గెయిన్స్‌చెల్లించాల్సిన అవసరం లేదు.
 
 ఇక మీ విషయానికొస్తే, మీ ఈక్విటీ ఫండ్ ఇన్వెస్ట్‌మెంట్స్‌కు ఏడాది పూర్తయినందున మీరు ఎలాంటి లాంగ్‌టెర్మ్ క్యాపిటల్ గెయిన్స్ చెల్లించాల్సిన పని లేదు. ఇక ఈఎల్‌ఎస్‌ఎస్‌లో ఇన్వెస్ట్ చేయడం వల్ల మీరు సెక్షన్ 80 సీ కింద పన్ను ప్రయోజనాలు పొందవచ్చు. ఈ ఫండ్‌లో ఇన్వెస్ట్‌చేసిన తేదీ నుంచి  లాకిన్ పీరియడ్ మూడేళ్లుగా ఉంటుంది. మీరు ఈఎల్‌ఎస్‌ఎస్‌లో ఎస్‌టీపీ విధానంలో మళ్లించిన ప్రతీ ఇన్‌స్టాల్‌మెంట్‌కు అప్పటి నుంచి మూడేళ్ల లాకిన్ పీరియడ్ వర్తిస్తుంది.
 
 నా నెలజీతానికి ఆరురెట్లు మొత్తాన్ని అత్యవసర నిధి కింద ఏర్పాటు చేయాలని భావిస్తున్నాను. నేను 30 శాతం పన్ను పరిధిలోకి వస్తాను. మిత్రులు లిక్విడ్  మ్యూచువల్  ఫండ్‌లో ఇన్వెస్ట్ చేయమని చెబుతున్నారు. ఈ అత్యవసర నిధి ఇన్వెస్ట్‌మెంట్స్ సురక్షితంగా ఉండాలి, ఎప్పుడు అవసరమైతే అప్పుడు తీసుకునేలా ఉండాలి. మరోవైపు ఫిక్స్‌డ్ డిపాజిట్ల కంటే అదనపు వడ్డీని అందించగలగాలి. తగిన సలహా ఇవ్వండి.  
 - అబ్రహాం, గుంటూరు
  
 అత్యవసర నిధి కోసం ఇన్వెస్ట్‌మెంట్స్ కోసం కొన్ని విషయాలను పరిగణనలోకి తీసుకోవాలి. తక్కువ రిస్క్, ఎక్కువ లిక్విడిటీ...వాటిల్లో కొన్ని. అత్యవసర నిధి కోసం ఇన్వెస్ట్ చేయడానికి ఎక్కువ మంది లిక్విడ్ ఫండ్స్‌ను ఎంచుకుంటారు. 91 రోజుల కంటే తక్కువ వ్యవధిలో మెచ్యూరిటీ అయ్యే సెక్యూరిటీల్లో ఈ లిక్విడ్‌మ్యూచువల్ ఫండ్స్ ఇన్వెస్ట్ చేస్తాయి. మనీ మార్కెట్ ఇన్ స్ట్రుమెంట్స్, స్వల్ప కాలిక కార్పొరేట్‌డిపాజిట్లు, ట్రెజరీ సాధనాల్లో ఇవి ఇన్వెస్ట్ చేస్తాయి. 
 
 ఈ ఫండ్స్‌ల్లోని ఇన్వెస్ట్‌మెంట్స్‌ను ఉపసంహరించుకుంటే ఆ మొత్తం ఇతర మ్యూచువల్ ఫండ్‌ల్లా కాకుండా ఒక బిజినెస్ డేలోనే మీ చేతికి అందుతాయి. తక్కువ రిస్క్, అధిక లిక్విడిటీ కారణంగా అత్యవసర నిధి కోసం వీటికి ప్రాధాన్యత ఇస్తారు. వీటిపై వడ్డీ 6-8 శాతం వరకూ వస్తుంది. అయితే మీరు మీ అత్యవసర నిధి ఇన్వెస్ట్‌మెంట్స్ మొత్తాన్ని కొంత నగదుగా మీ దగ్గర, కొంత సేవింగ్స్‌బ్యాంక్ అకౌంట్‌లోనూ, మిగిలినది లిక్విడ్ ఫండ్స్‌లోనూ ఇన్వెస్ట్ చేయడం సమంజసంగా ఉంటుంది.


 నేనొక డైవర్సిఫైడ్ ఈక్విటీ ఫండ్‌లో ఇన్వెస్ట్ చేస్తున్నాను. సిస్టమాటిక్ ట్రాన్స్‌ఫర్ ప్లాన్(ఎస్‌టీపీ) ద్వారా నా ఇన్వెస్ట్‌మెంట్స్‌ను ఈ ఫండ్ నుంచి ఈక్విటీ లింక్డ్ సేవింగ్స్ స్కీమ్(ఈఎల్‌ఎస్‌ఎస్) ఫండ్‌లోకి మళ్లిద్దామనుకుంటున్నాను. ఇలాచేస్తే నాకు పన్ను ప్రయోజనాలు లభిస్తాయా? సాంకేతికంగా చూస్తే ఇది కొత్త ఇన్వెస్ట్‌మెంట్ కాదు కాబట్టి పన్ను ప్రయోజనాలు లభించవని నేను అనుకుంటున్నాను. ఈఎల్‌ఎస్‌ఎస్ ఫండ్‌లో ఇన్వెస్ట్‌మెంట్స్‌కు  మూడేళ్ల లాకిన్ పీరియడ్ ఉంటుంది.  అలా అయితే పన్ను ప్రయోజనాలు లభిస్తాయి కదా. ఈ విషయంలో నాకు తగిన సలహా ఇవ్వండి.
  - రవీందర్, వరంగల్
 ఒక ఫండ్ నుంచి మరో ఫండ్‌కు ఇన్వెస్ట్‌మెంట్స్‌ను మార్చుకోవచ్చు. ఒకేసారి కానీ, సిస్టమాటిక్ ట్రాన్స్‌ఫర్ ప్లాన్(ఎస్‌టీపీ) ద్వారా మార్చుకోవచ్చు. ఎస్‌టీపీ ద్వారా మార్చుకుంటేనే ఉత్తమం. ఇక ఇలా ఒక ఫండ్ నుంచి మరో ఫండ్‌లోకి ఇన్వెస్ట్‌మెంట్స్‌ను మార్చుకుంటే, ఒక ఫండ్ నుంచి ఇన్వెస్ట్‌మెంట్స్‌ను ఉపసంహరించుకొని, మరో ఫండ్‌లో కొత్తగా ఇన్వెస్ట్ చేసినట్లుగా పరిగణిస్తారు. మీరు డైవర్సిఫైడ్ ఈక్విటీ ఫండ్ ఇన్వెస్ట్‌మెంట్స్‌ను ఈఎల్‌ఎస్‌ఎస్ ఫండ్‌లోకి మళ్లిద్దామనుకుంటున్నారు. ఈఎల్‌ఎస్‌ఎస్ ఫండ్‌లో ఇన్వెస్ట్‌మెంట్స్‌కు మూడేళ్ల లాకిన్ పీరియడ్ ఉంటుంది. మీరు ఇన్వెస్ట్‌మెంట్స్‌ను మార్చినప్పటి నుంచి లాకిన్ పీరియడ్ వర్తిస్తుంది. మీరు సెక్షన్ 80సీ కింద పన్ను ప్రయోజనాలు పొందవచ్చు.
 
 నా తల్లిదండ్రుల కోసం యునెటైడ్ ఇండియా సూపర్ టాపప్ హెల్త్ ఇన్సూరెన్స్ పాలసీ తీసుకున్నాను. ఈ పాలసీకి సంబంధించిన ప్రీమియమ్‌ను నగదు రూపంలో చెల్లించాను. ప్రీమియమ్‌ను చెక్కు ద్వారా గానీ, నెట్‌బ్యాంకింగ్ ద్వారా కానీ చెల్లించనందున ఈ ప్రీమియమ్‌కు ఆదాయపు పన్ను ప్రయోజనాలు లభ్యం కావని నా మిత్రుడొకరు చెప్పాడు. అయితే ప్రీమియమ్ చెల్లించిన రసీదుతో పన్ను ప్రయోజనాలు పొందవచ్చని బీమా ఏజెంట్ ఒకరు చెప్పారు. ఈ రెండింటిలో ఏది కరెక్టు?
  - సోమసుందర్, విశాఖపట్టణం
 తల్లిదండ్రుల కోసం తీసుకున్న ఆరోగ్య పాలసీల ప్రీమియమ్‌కు ఆదాయపు పన్ను  చట్టం సెక్షన్ 80డీ ప్రకారం పన్ను ప్రయోజనాలు పొందవచ్చు. అయితే ఈ ప్రీమియమ్‌ను చెక్కు ద్వారా గానీ, నెట్ బ్యాంకింగ్ ద్వారా గానీ చెల్లించాలి. నగదు రూపంలో చెల్లిస్తే పన్ను ప్రయోజనాలు లభ్యం కావు. ఈ విషయంలో మీ మిత్రుడే కరెక్టు. మీరు పన్ను ప్రయోజనాలు పొందలేరు.
  
 రిటైర్మెంట్ అవసరాల నిమిత్తం నెలకు రూ.40,000 చొప్పున ఇన్వెస్ట్ చేద్దామనుకుంటున్నాను. ఈ మొత్తాన్ని పోస్ట్ ఆఫీస్ నేషనల్ సేవింగ్స్ సర్టిఫికెట్(ఎన్‌ఎస్‌సీ)లో ఇన్వెస్ట్ చేయమని మిత్రుడొకరు సలహా ఇచ్చారు. ఇలా ఇన్వెస్ట్ చేస్తే రిటైర్మెంట్ తర్వాత క్రమం తప్పకుండా ఆదాయం పొందవచ్చనేది అతని అభిప్రాయం.  కానీ  ఇంత మొత్తం కొన్నేళ్లపాటు ఈ స్కీమ్‌లో నిరుపయోగంగా ఉండిపోతుందనేది నా అభిప్రాయం? మీరేమంటారు?
  - ఆనంద్,  హైదరాబాద్
 రిటైర్మెంట్ అవసరాల కోసం ఇన్వెస్ట్ చేయడమనేది పలు అంశాలపై ఆధారపడి  ఉంటుంది. మీ వయస్సు, మీ రిటైర్మెంట్ అవసరాలు, మీ ప్రస్తుత సంపాదన ఇలా పలు అంశాలను పరిగణనలోకి తీసుకొని రిటైర్మెంట్ కోసం చేసే ఇన్వెస్ట్‌మెంట్స్‌ను ప్లాన్ చేసుకోవాలి. మీరు మీ వయస్సును వెల్లడించలేదు. కాబట్టి, మూడు రకాలైన పరిస్థితుల్లో మీరు ఎలా ఇన్వెస్ట్ చేయవచ్చో సూచించాం. మీకు సరిపోయినది ఎంచుకోండి.
  
 మొదటిది: మీరు రిటైర్మెంట్‌కు దగ్గరగా ఉంటే ఎన్‌ఎస్‌సీల్లో ఇన్వెస్ట్ చేయడమే ఉత్తమం. ప్రతి నెలా అంత మొత్తానికి నేషనల్ సేవింగ్స్ సర్టిఫికెట్‌లు కొనుగోలు చేస్తే, అవి మెచ్యూరిటీ అయి రిటైర్మెంట్ తర్వాత క్రమం తప్పని ఆదాయం పొందవచ్చు.అయితే ఎన్‌ఎస్‌సీ వంటి స్థిరాదాయ మార్గాల్లో ఇన్వెస్ట్ చేయడం వల్ల పెరుగుతున్న ద్రవ్యోల్బణం నుంచి రక్షణ పొందలేరు.
 
 రెండోది: మీ  రిటైర్మెంట్ ఇంకా ఎక్కువ సంవత్సరాలున్నట్లయితే, ఈక్విటీల్లో కూడా  ఇన్వెస్ట్ చేయడం ఉత్తమం. మొత్తం ఇన్వెస్ట్‌మెంట్స్‌లో కనీసం 10 శాతాన్ని ఈక్విటీ ఫండ్స్‌లో ఇన్వెస్ట్ చేయాలి. ఏదైనా మంచి రేటింగ్ ఉన్న బ్యాలెన్స్‌డ్ ఫండ్‌ను ఎంచుకొని, సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో పెట్టుబడులు పెట్టాలి. మిగిలిన మొత్తాన్ని ఎన్‌ఎస్‌సీల్లో ఇన్వెస్ట్ చేయవచ్చు.
  
 మూడవది: మీకు 30లోపు వయస్సుండి, రిటైర్మెంట్ అవసరాల కోసం చూస్తున్నట్లయితే, మొత్తం ఇన్వెస్ట్‌మెంట్స్‌లో 60 శాతాన్ని డైవర్సిఫైడ్ ఫండ్స్‌లో ఇన్వెస్ట్ చేసి, మిగిలిన మొత్తాన్ని ఎన్‌ఎస్‌సీల్లో ఇన్వెస్ట్ చేయవచ్చు.
  
  ధీరేంద్ర కుమార్ సీఈవో, వ్యాల్యూ రీసెర్చ్


 మ్యూచువల్ ఫండ్ యూనిట్ల విక్రయాలపై విధించే ఎగ్జిట్ లోడ్ ద్వారా వచ్చిన సొమ్ములను ఫండ్ హౌస్ ఏంచేస్తుంది? ఎక్స్‌పెన్స్ రేషియో అంటే ఏమిటి?  సదరు ఫండ్ మొత్తం వ్యయాలను ఇది సూచిస్తుందా? ఇవి కాకుండా మ్యూచువల్ ఫండ్ కంపెనీలు వసూలు చేసే ఇతర చార్జీలేమైనా ఉన్నాయా? -ప్రణీత, గుంటూరు
  
 ఇన్వెస్టర్లు మ్యూచువల్ ఫండ్స్ నుంచి తమ ఇన్వెస్ట్‌మెంట్స్‌ను ముందే ఉపసంహరించుకోవడాన్ని నిరోధించడానికి మ్యూచువల్ ఫండ్ కంపెనీలు ఈ ఎగ్జిట్ లోడ్‌ను విధిస్తాయి. గతంలో ఫండ్ మేనేజర్ల వ్యయాలకు గాను ఎగ్జిట్ లోడ్‌ను మ్యూచువల్ ఫండ్ కంపెనీలు వసూలు చేసేవి. ఇప్పుడు ఈ ఎగ్జిట్ లోడ్‌ను మ్యూచువల్ ఫండ్ కంపెనీలు తిరిగి ఆ ఫండ్ స్కీమ్‌లోనే రీ ఇన్వెస్ట్ చేస్తున్నాయి. ఫలితంగా ఇన్వెస్టర్లకు వచ్చే రిటర్న్‌లు పెరుగుతాయి. ఇక ఎక్స్‌పెన్స్ రేషియో విషయానికొస్తే కంపెనీ నిర్వహణ, వ్యవస్థాపన  సంబంధిత వ్యయాలన్నింటినీ ఎక్స్‌పెన్స్ రేషియో ప్రతిబింబిస్తుంది.
 
 ఇంకా ఎక్స్‌పెన్స్ రేషియోలో ఇన్వెస్ట్‌మెంట్ మేనేజ్‌మెంట్ అండ్ అడ్వైజరీ ఫీజు, ట్రస్టీ ఫీజు, ఆడిట్ ఫీజు, కస్టోడియన్ ఫీజు, రిజిస్ట్రార్ అండ్ ట్రాన్స్‌ఫర్ ఏజెంట్, మార్కెటింగ్ అండ్ సెల్లింగ్ ఎక్స్‌పెన్సెస్(ఏజెంట్ కమిషన్‌తో కలిపి), ఇన్వెస్టర్ కమ్యూనికేషన్స్‌కు సంబంధించి వ్యయాలు, ఫండ్ ట్రాన్స్‌ఫర్ వ్యయాలు, అకౌంట్ స్టేట్‌మెంట్ వ్యయాలు, డివిడెండ్ రిడంప్షన్ చెక్‌లు, వారంట్ల వ్యయాలు, ప్రకటనల వ్యయాలు, ఇన్వెస్టర్ల అవగాహన వ్యయాలు, బ్రోకరేజ్ వ్యయాలు, సర్వీస్ ట్యాక్స్‌లు, లిస్టింగ్ వ్యయాలు, వంటి ఇతర వ్యయాలు ఉంటాయి. ఫండ్ వ్యయాలన్నీ కవర్ అయ్యేలా నిర్దేశిత పరిమితికి లోబడి ఎక్స్‌పెన్స్ రేషియోను వసూలు చేసుకోవచ్చని సెబీ మ్యూచువల్ ఫండ్ కంపెనీలకు అనుమతిచ్చింది. టాప్ 15 నగరాలు కాకుండా ఇతర నగరాల ఇన్వెస్టర్ల నుంచి వచ్చే ఇన్వెస్ట్‌మెంట్స్‌పై అదనంగా 0.30% అదనపు చార్జీ విధించవచ్చని సెబీ ఇటీవలనే మ్యూచువల్ ఫండ్ కంపెనీలకు అనుమతిచ్చింది.
  
 మ్యూచువల్ ఫండ్స్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడం మంచిదా? యూలిప్‌లలో మంచిదా? నేను బిర్లా సన్‌లైఫ్ ఫ్రంట్‌లైన్ ఈక్విటీ ప్లాన్‌లో ఇన్వెస్ట్ చేద్దామనుకుంటున్నాను. ఇది సరైనా నిర్ణయమేనా? ఐటీ చట్టం, సెక్షన్ 80 సీ ప్రకారం పన్ను ప్రయోజనాలు ఆశించడంలేదు. కేవలం ఇన్వెస్ట్‌మెంట్స్‌పైనే నా దృష్టి. సరైన సూచనలివ్వండి.
 - సంతోష్ కుమార్, హైదరాబాద్
  
 యూలిప్‌ల్లో ఇన్వెస్ట్ చేయడం కన్నా కూడా మ్యూచువల్ ఫండ్స్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయడమే మంచిది. ఇన్వెస్ట్‌మెంట్‌కే కాదు బీమాకు కూడా పెట్టుబడులకు యూలిప్‌లను పరిగణించకూడదు. యూలిప్‌లకు వ్యయాలు ఎక్కువగా ఉండడమే దీనికి కారణం. యూలిప్ పాలసీ తీసుకున్న పక్షంలో మీరు 4,5 ఏళ్ల పాటు అధిక వ్యయాలు చెల్లించాల్సి ఉంటుంది. యూలిప్‌లతో పోల్చితే మ్యూచువల్ ఫండ్ కంపెనీలు చార్జీలు తక్కువగా ఉంటాయి. మ్యూచువల్ ఫండ్ కంపెనీలు గరిష్టంగా ఈక్విటీ ఫండ్స్‌పై 2.5%, డెట్‌ఫండ్స్ 2.25 శాతం చొప్పున ఎక్స్‌పెన్స్ రేషియోను వసూలు చేస్తాయి.
 
 యూలిప్‌లు తొలి ఏడాదిలోనే విధించే చార్జీ కనీసం 5-6 %. మ్యూచువల్ ఫండ్స్ తమ ఇన్వెస్ట్‌మెంట్ వ్యూహాన్ని, పోర్ట్‌ఫోలియోలను పారదర్శకంగా ఉంచుతాయి. ఎప్పుడు కావాలనుకుంటే అప్పుడు  ఫండ్స్ నుంచి వైదొలగవచ్చు. అదే యూలిప్‌ల విషయంలో అయితే లాకిన్ పీరియడ్ ఐదేళ్ల వరకూ ఉంటుంది. ఇక ఈక్విటీ ఫండ్ ఎంపిక విషయానికొస్తే, మీ అవసరాలు, భరించగలిగే రిస్క్ వంటి అంశాలను ఆధారంగా చేసుకుని ఈక్విటీ ఫండ్‌ను ఎంచుకోవాలి. బిర్లా సన్‌లైఫ్ ఫ్రంట్‌లైన్ ఈక్విటీ ఫండ్ లార్జ్ అండ్ మిడ్ క్యాప్ ఈక్విటీ ఫండ్. దీనికి మా వేల్యూ రీసెర్చ్ ఫోర్ స్టార్ రేటింగ్ ఇచ్చింది. నిరభ్యంతరంగా దీనిలో ఇన్వెస్ట్ చేయవచ్చు.
  
 నేనొక ఈక్విటీ మ్యూచువల్ ఫండ్‌లో ఇన్వెస్ట్ చేశాను. ఈ ఫండ్ పోర్ట్‌ఫోలియోలోని షేర్లు డివిడెండ్‌లు ఇస్తే, వాటిని మ్యూచువల్ ఫండ్ కంపెనీ ఏం చేస్తుంది? ఇలాంటి డివిడెండ్‌ను ఏ ఫండ్ ఎంత ఆర్జించిందో ఎలా తెలుసుకోవచ్చు? - బిస్మిల్లా, నిజామాబాద్
  
 ఈక్విటీ మ్యూచువల్ ఫండ్ తాను ఇన్వెస్ట్ చేసిన స్టాక్స్ నుంచి పొందిన డివిడెండ్ వివరాలను వెల్లడించే నిబంధనలేవీ లేవు.  డివిడెండ్స్ చెల్లించే షేర్లలోనే డివిడెండ్ ఈల్డ్ ఫండ్స్ ఇన్వెస్ట్ చేస్తాయి. మ్యూచువల్ ఫండ్స్ తమ స్కీమ్‌ల పోర్ట్‌ఫోలియోల వివరాలను నెలవారీ పద్ధతిన వెల్లడిస్తాయి. మ్యూచువల్ ఫండ్స్ ఎన్‌ఏవీ(నెట్ అసెట్ వేల్యూ) మదింపు, పోర్ట్‌ఫోలియో వేల్యూయేషన్, స్వీకరించిన డివిడెండ్ల తాలూకు అకౌంటింగ్...ఇవన్నీ కఠినమైన నియమ నిబంధనలతో గణించాల్సి ఉంటుంది. అందుకని ఈక్విటీ ఫండ్స్ పొందే డివిడెండ్స్ విషయమై మీరు  ఆందోళన చెందాల్సిన అవసరం లేదు. ఏ ఈక్విటీ ఫండ్ అయినా డివిడెండ్‌లు పొందితే, మీ రాబడులు, ఎన్‌ఏవీ కూడా పెరుగుతాయి.


 నేను రూ.15 లక్షలను 45 రోజుల నుంచి 90 రోజుల కాలానికి ఇన్వెస్ట్ చేద్దామనుకుంటున్నాను. బ్యాంక్‌లో ఫిక్స్‌డ్ డిపాజిట్ చేస్తే 7.25 శాతం, సేవింగ్స్ అకౌంట్ అయితే 6 శాతం చొప్పున రాబడులు వస్తాయి. ఇక మ్యూచువల్ ఫండ్స్ ఎలాంటి రాబడులు ఇస్తాయోనని మీ వెబ్‌సైట్ ఆధారంగా మదింపు చేశాను. 3 శాతం రాబడి అని తేలింది. అయితే ఇది వార్షిక రాబడా ? లేక చక్రగతిన వస్తుందా? అనేది స్పష్టం చేయగలరు. స్వల్పకాలానికి  లిక్విడ్ ఫండ్స్‌లో పెట్టుబడులు పెడితే మంచి రాబడులు వస్తాయని మిత్రులంటున్నారు. తగిన సలహా ఇవ్వండి.
 - జగన్నాథ్, నిజామాబాద్
  
 మ్యూచువల్ ఫండ్స్ విషయమై మీరు మదింపు చేసిన 3 శాతం రాబడి వార్షికమైనది కాదు. మూడు నెలలకు వచ్చే రాబడి. ఫిక్స్‌డ్ డిపాజిట్లపై 7.25 శాతం, బ్యాంక్ సేవింగ్స్ అకౌంట్‌పై 6 శాతం చొప్పున వార్షిక రాబడులు వస్తాయి. ఈ ఏడాది మే 22 నాటికి లిక్విడ్ ఫండ్స్ వార్షిక రాబడి 9.05 శాతంగా ఉంది. రాబడుల పరంగా ఎక్కడ ఇన్వెస్ట్ చేయాలన్నదే ప్రాధాన్యతా అంశమైతే, స్వల్పకాలానికి లిక్విడ్ ఫండ్స్ ఉత్తమం. ఇక మీరు పన్ను విషయాలను కూడా పరిగణనలోకి తీసుకోవాలి.
  
 ఒక ఆర్థిక సంవత్సరంలో బ్యాంక్ ఫిక్స్‌డ్ డిపాజిట్లపై రాబడి రూ.10,000 మించితే మీ ట్యాక్స్‌స్లాబ్‌ను అనుసరించి పన్ను చెల్లించాల్సి ఉంటుంది. లిక్విడ్ ఫండ్స్‌లో ఇన్వెస్ట్ చేసి సంవత్సరంలోనే సొమ్మును ఉపసంహరించుకుంటే షార్ట్‌టెర్మ్ గెయిన్స్ పన్ను చెల్లించాల్సి ఉంటుంది. డివిడెండ్ రీ ఇన్వెస్ట్‌మెంట్ ఆప్షన్‌ను ఎంచుకుంటే, డివిడెండ్లను తాజా ఇన్వెస్ట్‌మెంట్స్‌గానే పరిగణిస్తారు. దీంతో మీ రాబడి తక్కువగానే ఉంటుంది. ఈ అంశాలన్నింటినీ పరిగణనలోకి తీసుకుంటే లిక్విడ్ ఫండ్స్ ఉత్తమమైన ఆప్షన్ అని నిస్సందేహంగా చెప్పవచ్చు.
  
 కొన్ని మ్యూచువల్ ఫండ్స్ అప్పుడప్పుడు ఒక ఫండ్ లక్ష్యాలు/ఉద్దేశాలు/బెంచ్‌మార్క్‌ను మారుస్తుంటాయని విన్నాను. అలా ఎందుకు చేస్తాయి? ఇలా మార్చడానికి సెబీ/ఏఎంఎఫ్‌ఐల నుంచి ముందస్తు అనుమతులు తీసుకుంటాయా? ఇలా మార్చే విషయాన్ని ఇన్వెస్టర్లకు కూడా తెలియజేస్తారా? మార్పు, చేర్పుల విషయం నచ్చకపోతే ఇన్వెస్టర్లు సదరు ఫండ్ నుంచి వైదొలగడానికి కొంత సమయం ఇస్తారా?
  - పర్వీన్, హైదరాబాద్
  
 సెబీ నియమనిబంధనల ప్రకారమే మ్యూచువల్ ఫండ్ కంపెనీలు ఏదైనా ఫండ్ లక్ష్యాలు/ఉద్దేశాలు/బెంచ్‌మార్క్‌ల విషయంలో మార్పులు, చేర్పులు చేస్తాయి. ఈ మార్పుల విషయాలను మ్యూచువల్ ఫండ్ కంపెనీలు ఇన్వెస్టర్లకు తప్పనిసరిగా రాతపూర్వకంగా తెలియజేస్తాయి. రెండు మ్యూచువల్ ఫండ్ సంస్థలు విలీనమైనా, లేదా ఒకే మ్యూచువల్ ఫండ్ సంస్థలోని రెండు స్కీమ్‌లను విలీనం చేసినా ఇలాంటి మార్పులు, చేర్పులు జరుగుతాయి. ఒకవేళ ఎలాంటి విలీనం జరగకపోయినా కూడా మ్యూచువల్ ఫండ్ సంస్థలు ఇలాంటి మార్పులు, చేర్పులు చేయవచ్చు. ఇక ఈ మార్పులు నచ్చని ఇన్వెస్టర్లు తమ ఇన్వెస్ట్‌మెంట్లను ఉపసంహరించుకోవడానికి మ్యూచువల్ ఫండ్ సంస్థలు కొన్ని రోజుల గడువునిస్తాయి. ఎలాంటి ఎగ్జిట్ లోడ్‌ను వసూలు చేయరు. అయితే పన్ను అంశాలు షరా మామూలుగానే ఉంటాయి. వీటికీ, మ్యూచువల్ ఫండ్ సంస్థలకూ ఎలాంటి సంబంధం లేదు.
 
 నేను మ్యూచువల్ ఫండ్స్‌లో రూ. లక్ష వరకూ పెట్టబడులు పెట్టగలను. సగటు స్థాయి రిస్క్‌ను భరించగలను, కానీ నాకు అధిక రాబడులు కావాలి. దీని కోసం నేను బిర్లా సన్‌లైఫ్ ప్యూర్ వాల్యూ ఫండ్‌ను షార్ట్‌లిస్ట్ చేశాను. ఇప్పుడు ఈ ఫండ్ ఎన్‌ఏవీ ఆల్‌టైమ్ హైలో ఉంది. ఇప్పుడే ఇన్వెస్ట్ చేయమంటారా ? లేదా మార్కెట్ కొంత కరెక్షన్‌కు గురైన తర్వాత ఇన్వెస్ట్ చేయమంటారా?
  - డేనియల్, గుంటూరు
 
 ఇటీవల మార్కెట్ పెరిగిన ఫలితంగా బాగా ప్రయోజనం పొందిన కొన్ని ఫండ్స్‌లో బిర్లా సన్‌లైఫ్ ప్యూర్ వాల్యూ ఫండ్ ఒకటి. మిడ్, స్మాల్ క్యాప్ కంపెనీల్లో ఇన్వెస్ట్ చేయడం వల్ల ఈ ఫండ్ బాగా వృద్ధి సాధించింది. గత ఏడాది కాలంలో ఈ ఫండ్ 88 శాతం వృద్ధి సాధించింది. అయితే ఇదే మాదిరి రాబడులు భవిష్యత్‌లో కూడా వస్తాయని ఆశించకూడదు. ఏదైనా ఫండ్‌లో ఇన్వెస్ట్ చేసేటప్పుడు ఆ ఫండ్ ఇటీవలి పనితీరునే పరిగణనలోకి తీసుకోకూడదు. ఏది ఏమైనా ఇన్వెస్ట్ చేయడానికి ఇది మంచి ఫండ్ అనే చెప్పవచ్చు. ఇది మీ పోర్ట్‌ఫోలియోలో ఒక భాగంగా ఉండాలి. ఒకే ఫండ్‌లో ఇన్వెస్ట్ చేయాలని మీరు భావిస్తే మాత్రం ఇది సరైన ఫండ్ కాదని చెప్పవచ్చు. అంతేకాకుండా ఒకేసారి పెద్ద మొత్తంలో ఇన్వెస్ట్ చేయడం సరైన పద్ధతి కాదు. మీ ఇన్వెస్ట్‌మెంట్ మొత్తాన్ని 6-8 నెలల కాలానికి విస్తరిస్తే సముచితంగా ఉంటుంది.


  హెచ్‌డీఎఫ్‌సీ ఈక్విటీ, యూటీఐ ఈక్విటీ, ఐడీఎఫ్‌సీ ప్రీమియర్ ఈక్విటీ, సుందరం సెలెక్ట్ మిడ్‌క్యాప్, రిలయన్స్ డైవర్సిఫైడ్ పవర్ సెక్టార్.... ఈ మ్యూచ్‌వల్ ఫండ్స్‌లో ఇన్వెస్ట్ చేస్తున్నాను. ఇప్పుడు అదనంగా ఐసీఐసీఐ ప్రుడెన్షియల్ డిస్కవరీలో కూడా ఇన్వెస్ట్ చేద్దామనుకుంటున్నాను. మీ అభిప్రాయం తెలుపగలరు?                        - హితేష్, నిజామాబాద్
  
 ఐసీఐసీఐ ప్రుడెన్షియల్ డిస్కవరీ ఫండ్ అనేది వాల్యూ-ఓరియెంటెడ్ ఫండ్. మీ పోర్ట్‌ఫోలియోలో తప్పనిసరిగా ఉంచుకోదగ్గ ఫండ్ ఇది. ఈ ఫండ్‌కు మంచి ట్రాక్ రికార్డ్ ఉంది. గత కొన్నేళ్లుగా ఇది మంచి పనితీరును కనబరుస్తోంది. ఈ ఫండ్‌లో నిరభ్యంతరంగా ఇన్వెస్ట్ చేయవచ్చు. మీరు రిలయన్స్ డైవర్సిఫైడ్ పవర్ సెక్టార్‌లో ఇన్వెస్ట్ చేయకపోవడమే మంచిది. ఇది సెక్టోరియల్ ఫండ్. వ్యవస్థాగత మార్పులకు, తీవ్ర ఒడిదుడుకులకు గురువుతుండే ఫండ్ ఇది. ఇప్పటికైతే ఈ ఫండ్ ద్వారా మీకు మంచి లాభాలే వచ్చి ఉంటాయనుకుంటున్నాను. అందుకే ఈ ఫండ్ నుంచి వైదొలగడానికి ఇదే సరైన సమయం. ఈ ఫండ్ నుంచి మీ ఇన్వెస్ట్‌మెంట్స్‌ను ఉపసంహరించి ఏదైనా డైవర్సిఫైడ్ ఈక్విటీ  ఫండ్‌లో ఇన్వెస్ట్ చేయండి.
  
 స్టాక్ మార్కెట్లు భారీగా పెరుగుతున్నాయి. విదేశీ సంస్థాగత ఇన్వెస్టర్లు పెద్ద ఎత్తున పెట్టుబడులు పెడుతున్నారు. కానీ రిటైల్ ఇన్వెస్టర్లు మాత్రం పెద్దగా ఆసక్తి చూపడం లేదు. 2008 భారీ పతనం తర్వాత రిటైల్ ఇన్వెస్టర్లు స్టాక్ మార్కెట్‌కేసే చూడడం లేదు. ఎందుకని? - భువనేశ్వరి, గుంటూరు
  
 ప్రస్తుతం స్టాక్ మార్కెట్లలో వచ్చింది చిన్న ర్యాలీ మాత్రమే. చిన్న ఇన్వెస్టర్లు స్టాక్ మార్కెట్లకు దూరంగా ఉన్నారన్న మీ అభిప్రాయం సరైనదే. భారత మార్కెట్లు ఆకర్షణీయమైనవని విదేశీ సంస్థాగత ఇన్వెస్టర్లు నమ్ముతున్నారు. ఈ విషయంపై చిన్న ఇన్వెస్టర్లకు ఇంకా నమ్మకం కుదరడం లేదు. బ్యాంక్, ఫిక్స్‌డ్ డిపాజిట్లపై 10% రాబడి వస్తుండటంతో చిన్న ఇన్వెస్టర్లు.. వాటిపై ఆసక్తి చూపుతున్నారు. గత కొన్నేళ్లుగా మార్కెట్లు బాగా లేకపోయినప్పటికీ, వడ్డీరేట్లు పెరిగిపోవడంతో తమ రాబడులు బాగానే ఉన్నాయని వారనుకుంటున్నారు. ద్రవ్యోల్బణం అధికంగా ఉన్నా ఇన్వెస్టర్లకు దక్కే నికర రాబడులు స్వల్పమే అయినప్పటికీ, అదే పదివేలు అనుకుంటున్నారు. సాధారణంగానే భారత ఇన్వెస్టర్లు స్టాక్ మార్కెట్లలో ఇన్వెస్ట్ చేయడం తక్కువే.
 
  నేను ఒక మిత్రుడి సలహా ప్రకారం అవైవా-సేవ్‌గార్డ్ యులిప్ స్కీమ్‌లో 2006లో ఇన్వెస్ట్ చేశాను. ఈ స్కీమ్‌లో ఇన్వెస్ట్ చేసిన తర్వాతనే నేను ఈ స్కీమ్ గురించి పూర్తి వివరాలు తెలుసుకోలిగాను. ప్రతీ ఏడాది ఈ సంస్థ పెద్ద మొత్తంలో చార్జీలు వసూలు చేస్తోంది. మరోవైపు సరెండర్ పెనాల్టీ భారీగా ఉండటంతో ఈ స్కీమ్‌ను బలవంతంగా కొనసాగించాల్సి వస్తోంది.
  
 ఎనిమిదేళ్లుగా ప్రీమియం చెల్లిస్తూ వచ్చినప్పటికీ, సంతృప్తికరమైన రాబడులు లేవు. ఇలాంటి సంస్థలు ఇలాంటి స్కీమ్‌లను నిర్వహించడానికి నియంత్రణ సంస్థలు ఎలా అనుమతిస్తున్నాయో నాకు అర్థం కావడం లేదు. చిన్న ఇన్వెస్టర్లు కష్టపడి సంపాదించిన సొమ్ములు ఇలాంటి సంస్థల పాలు కావల్సిందేనా? ఈ పరిస్థితుల నుంచి తక్కువ నష్టాలతో బయటపడే మార్గాన్ని సూచించండి.              - హఫిజ్, హైదరాబాద్
  
 అవైవా సేవ్‌గార్డ్ అనేది నాన్-పార్టిసిపేటింగ్ యూనిట్ లింక్డ్ ఎండోమెంట్ ప్లాన్. ఇది చాలా పాత పాలసీ. ఈ సంస్థ పెద్ద మొత్తంలో చార్జీలను వసూలు చేస్తుందనే విషయం వాస్తవమే. ఈ ప్లాన్‌కు సంబంధించి ప్రీమియం అలొకేషన్ చార్జ్ అనేది ప్రతీ ఏడాది 4 నంచి 6 శాతంగా ఉంటోంది. ఇక ఫండ్ మేనేజ్‌మెంట్ చార్జీలు 0.75 శాతం నంచి 1.75 శాతం రేంజ్‌లో ఉంటున్నాయి. ఇవి కాక పాలసీ అడ్మినిస్ట్రేషన్ చార్జీ, మోర్టాలిటీ చార్జీలను కూడా వసూలు చేస్తున్నారు. చార్జీలు అధికంగా ఉండటంతో రాబడులు తక్కువగా ఉంటున్నాయి.
  
 ఇలాంటి సంప్రదాయక బీమా పాలసీలు మంచి రాబడులను ఇవ్వలేవు. సదరు సంస్థలు మీ సొమ్ములను సురక్షితమైన రుణసాధనాల్లో ఇన్వెస్ట్ చేస్తుండడమే దీనికి కారణం. మరోవైపు అధికంగా ఉండే చార్జీలు మీ లాభాలను తినేస్తాయి. ఈ ప్లాన్ మీరు చెల్లించే వార్షిక ప్రీమియానికి ఐదు రెట్లు లైఫ్ కవర్‌ను మాత్రమే అందిస్తోంది. ఇది ఏ మాత్రం సరిపోదు. టెర్మ్ లైఫ్ ఇన్సూరెన్స్ పాలసీని తీసుకోండి. ఇవి తక్కువ ప్రీమియానికే ఎక్కువ బీమాను అందిస్తున్నాయి. మీకు ఏమైనా అయితే మీ కుటుంబ అవసరాలకు ఎంత మొత్తం కావాలో లెక్కించి, ఆ మేరకు టెర్మ్ లైఫ్ ఇన్సూరెన్స్ పాలసీ తీసుకోండి. ఇక ఇన్వెస్ట్‌మెంట్స్ విషయానికొస్తే, మంచి రేటింగ్ ఉన్న బ్యాలెన్స్‌డ్ మ్యూచువల్ ఫండ్స్‌ను ఎంచుకోండి. హెచ్‌డీఎఫ్‌సీ బ్యాలెన్స్‌డ్, టాటా బ్యాలెన్స్‌డ్, బిర్లా సన్‌లైఫ్ 95.. ఈ ఫండ్స్‌ల్లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయండి.
  
 ఇక మీ అవైవా పాలసీ విషయానికొస్తే, మీరు ఈ పాలసీని సరెండర్ చేయండి. మీరు ఏడేళ్లపాటు ప్రీమియమ్‌లు చెల్లించి ఉంటే, ముఖ విలువలో 1 శాతంగా సరెండర్ చార్జీలు ఉంటాయి. ఒకవేళ మీరు ఎనిమిదేళ్లకు మించి ప్రీమియమ్‌లు చెల్లించి ఉంటే ఎలాంటి సరెండర్ చార్జీలు ఉండవు.  ఈ పాలసీని సరెండర్ చేసి నష్టాలను పరిమితం చేసుకోండి.


 నేను ప్రస్తుతం క్వాంటమ్ లాంగ్ టెర్మ్ ఈక్విటీ ఫండ్‌లో సిప్ విధానంలో ఇన్వెస్ట్ చేస్తున్నాను. అయితే ఇటీవల సెబి మ్యూచువల్ ఫండ్లకు రూ.50 కోట్ల నెట్‌వర్త్ పరిమితిని విధించింది. ఈ నేపథ్యంలో చిన్న ఇన్వెస్టర్లపై ఏమైనా ప్రభావం పడుతుందా ? నా సిప్ ఇన్వెస్ట్‌మెంట్స్‌ను కొనసాగించమంటారా ?         - మరియన్న, నెల్లూరు
  
 క్వాంటమ్ లాంగ్‌టెర్మ్ ఈక్విటీ ఫండ్‌కు ఫైవ్ స్టార్ రేటింగ్ ఉంది. మీ ఇన్వెస్ట్‌మెంట్స్‌ను నిరభ్యంతరంగా కొనసాగించండి. గత ఐదేళ్ల కాలంలో కేవలం 2013లో మాత్రమే ఈ ఫండ్ మంచి పనితీరును కనబరచలేకపోయింది. ప్రస్తుతం ఈ ఫండ్ ఎక్స్‌పెన్స్ రేషియో 1.25 శాతంగా ఉంది. ఇతర ఈక్విటీ ఫండ్స్ ఎక్స్‌పెన్స్ రేషియో 1.25 నుంచి 1.5 శాతంగా ఉంది. ఈ ఫండ్ పనితీరు బాగా ఉండడం, ఎక్స్‌పెన్స్ రేషియో తక్కువగా ఉండడం వల్ల ఇన్వెస్టర్లకు మంచి రాబడులు వస్తున్నాయి.
  
 ఫండమెంటల్స్ పరంగా చూసినా, ఈ కేటగిరి ఫండ్స్‌లో ఇన్వెస్ట్‌మెంట్ చేయదగ్గ ఫండ్ ఇది. ఇక క్వాంటమ్ అసెట్ మేనేజ్‌మెంట్ కంపెనీ ప్రస్తుత నెట్‌వర్త్ రూ.25.74 కోట్లుగా ఉంది. నెట్‌వర్త్ అవసరాలను సెబి రూ.50 కోట్లకు పెంచింది. నెట్‌వర్త్ తక్కువగా ఉన్న మ్యూచువల్ ఫండ్స్ నిర్దేశించిన రూ.50 కోట్ల నెట్‌వర్త్ పరిమితిని అందుకోవడానికి మూడేళ్ల సమయాన్నిచ్చింది. మీ క్వాంటమ్ ఫండ్ సెబి నెట్‌వర్త్ నిబంధనను అందుకోవడానికి మరో మూడేళ్ల సమయముంది. కాబట్టి ఆందోళన చెందకుండా సదరు మ్యూచువల్ ఫండ్‌లో నిరభ్యంతరంగా ఇన్వెస్ట్ చేయొచ్చు.
  
  నేను యూటీఐ ఆపర్చునిటీస్, ఐడీఎఫ్‌సీ ప్రీమియర్ ఈక్విటీ, రిలయన్స్ ఈక్విటీ ఆపర్చునిటీస్ ఫండ్స్‌లో ఇన్వెస్ట్ చేస్తు ఉన్నాను. దీర్ఘకాలంలో ఈ ఫండ్స్ నాకు మంచి రాబడులనిస్తాయా? - నందిని, తిరుపతి
  
  మీరు చాలా మంచి ఫండ్స్‌నే ఎంచుకున్నారు. ఇవన్నీ డైవర్సిఫైడ్ ఈక్విటీ ఫండ్స్. వివిధ రకాల మార్కెట్ క్యాపిటలైజేషన్లు, వివిధ రంగాల కంపెనీల్లో ఇవి ఇన్వెస్ట్ చేస్తాయి. గత 5-6 ఏళ్లలో మార్కెట్లు అనిశ్చితిగా ఉన్నప్పటికీ, ఈ ఫండ్స్ మంచి పనితీరునే కనబరిచాయి. ప్రస్తుతం మార్కెట్లు మంచి రైజింగ్‌లో ఉన్నాయి. ఈ పరిస్థితుల్లో  ఫండ్స్ మంచి రాబడులనే అందించగలవు. ఎలాంటి శషభిషలు లేకుండా ఈ ఫండ్స్‌ల్లో ఇన్వెస్ట్‌మెంట్స్‌ను కొనసాగించండి.
  
  నేను ప్రస్తుతం హెచ్‌డీఎఫ్‌సీ  టాప్ 200 ఫండ్‌లో సిప్ విధానంలో ఇన్వెస్ట్ చేస్తున్నాను.  ఏదైనా ఒక షార్ట్‌టెర్మ్ డెట్ ఫండ్‌లో ఒకేసారి రూ.రెండున్నర లక్షలు ఇన్వెస్ట్ చేద్దామనుకుంటున్నాను. అంతేకాకుండా  మరో  మిడ్-క్యాప్ ఫండ్‌లో కూడా కొంత మొత్తం ఇన్వెస్ట్ చేద్దామనుకుంటున్నాను. నాకు కొన్ని మంచి ఫండ్స్‌ను సూచించండి.                         - జుబేదా బేగం, హైదరాబాద్
  
 మిడ్-క్యాప్ ఫండ్‌లో కొంత మొత్తం ఇన్వెస్ట్ చేద్దామనుకోవడం మంచి ఆలోచన. మీరు ఎంచుకోవడానికి కొన్ని మంచి మిడ్-క్యాప్ ఫండ్స్- బీఎన్‌పీ పారిబస్ మిడ్ క్యాప్, రెలిగేర్ ఇన్వెస్కో మిడ్ ఎన్ స్మాల్‌క్యాప్ ఫండ్. వీటిల్లో ఏదైనా ఒక ఫండ్‌ను ఎంచుకోండి. అంతేకాకుండా ఇదే ఫండ్ ఫ్యామిలీ నుంచి ఏదైనా షార్ట్-టెర్మ్ డెట్ ఫండ్‌ను ఎంచుకోవచ్చు.  
  
 నేను కొన్ని ఫండ్స్ డెరైక్ట్ గ్రోత్ స్కీముల్లో సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేస్తూ వచ్చాను. ఈ ఇన్వెస్ట్‌మెంట్స్‌పై 15-20 శాతం రాబడులను ఆర్జించగలిగాను. వచ్చిన లాభాలను ఇదే మ్యూచువల్ ఫండ్స్‌కు చెందిన లిక్విడ్ ఫండ్స్‌కు మళ్లిద్దామనుకుంటున్నాను.  నా ఆలోచనా విధానం కరెక్టేనా?         -అనంతరామ్, వరంగల్
  
 మార్కెట్ల ఒడిదుడుకులను పరిగణనలోకి తీసుకోకుండా దీర్ఘకాలం పాటు ఇన్వెస్ట్ చేయడమే సిస్టమాటిక్ ఇన్వెస్ట్‌మెంట్ ప్లాన్(సిప్) ముఖ్య ఉద్దేశం.  మీరు ఇన్వెస్ట్ చేస్తున్న సొమ్ములు 2 లేదా 3 ఏళ్లలో మీకు అవసరమైన పక్షంలో  వచ్చిన లాభాలను డెట్ ఫండ్స్‌కు మళ్లించుకోవచ్చు. అలా కాకుండా  మీరు ఇన్వెస్ట్ చేస్తున్న సొమ్ములు మీకు పదేళ్లలోపు అవసరం లేదనుకోండి.. ఈ స్కీమ్‌ల్లోనే మీ ఇన్వెస్ట్‌మెంట్స్‌ను కొనసాగించండి. మార్కెట్లు ఎప్పుడూ అనిశ్చితిగా ఉంటాయి. ఎప్పుడు ఎంత వరకూ పడతాయో, ఎంత వరకూ పెరుగుతాయో ఎవరూ చెప్పలేరు. ప్రస్తుత పరిస్థితుల్లో అంతా సానుకూలంగా ఉంటే మార్కెట్లు మరిన్ని కొత్త రికార్డులను సృష్టించగలవు. అందుకని మీరు మీ ఆర్థిక లక్ష్యాలను సాధించడానికి తగినంత సమయముంటే, మీ ఇన్వెస్ట్‌మెంట్స్‌ను ప్రస్తుతమున్న విధానంలోనే కొనసాగించండి.


  నేను గతంలో మ్యూచువల్ ఫండ్స్‌లో ఇన్వెస్ట్ చేశాను. తర్వాతి కాలంలో నా బ్యాంక్ అకౌంట్‌ను మూసేశాను. ఇప్పుడు నాకు మ్యూచువల్ ఫండ్స్ నుంచి ఎలాంటి డివిడెండ్లు అందడం లేదు? దీనికి కారణమేమిటి?
  - అభినయ్, హైదరాబాద్
 
 మీరు ఏవో కారణాల వల్ల బ్యాంక్ అకౌంట్‌ను మూసేసి, కొత్తగా వేరే బ్యాంక్ అకౌంట్ తెరిచినట్లున్నారు. ఈ విషయాన్ని మీరు మీ మ్యూచువల్ ఫండ్ సంస్థకు వెల్లడించాల్సి ఉంటుంది. అలా చేయకపోవడం వల్ల మ్యూచువల్ ఫండ్ సంస్థ మీకు ఎలాంటి డివిడెండ్‌లు చెల్లించడం లేదని భావిస్తున్నాం. మోసాలను నివారించడానికి మ్యూచువల్ ఫండ్ పెట్టుబడుల ఉపసంహరణ, డివిడెండ్‌ల చెల్లింపు మొదలైనవన్నీ తప్పనిసరిగా బ్యాంక్ అకౌంట్‌ల ద్వారానే జరపాలనే ఆదేశాలున్నాయి. అందుకని మీరు మీ పాత బ్యాంక్ అకౌంట్‌ను మూసివేసిన విషయాన్ని, కొత్త బ్యాంక్ అకౌంట్ వివరాలను మీ మ్యూచువల్ ఫండ్ సంస్థకు వీలైనంత త్వరగా తెలపండి.
 
  తక్కువ ఆదాయం ఉన్న వ్యక్తులకు సరియైన ఇన్వెస్ట్‌మెంట్ సాధానాలేంటి?       
 - పల్లవి, మంగళగిరి
 
 సాధారణ ప్రజలు ఈక్విటీ మార్కెట్లలో ఇన్వెస్ట్ చేయడం కోసమే మ్యూచువల్ ఫండ్స్‌ను ప్రవేశపెట్టారు. నిర్ణీత కాలంలోగా మీకు ఇన్వెస్ట్‌మెంట్స్, దానిపై రాబడులను పొందాలని  మీరు భావిస్తే, మ్యూచువల్ ఫండ్స్‌లో ఇన్వెస్ట్ చేయకపోవడమే ఉత్తమం. నిర్దేశిత గడవులోగా ఇన్వెస్ట్‌మెంట్స్, దానిపై రాబడులు కావాలనుకుంటే,, బ్యాంకుల్లో ఫిక్స్‌డ్ డిపాజిట్లు చేయడం మంచిది. దీర్ఘకాలానికి పెట్టుబడులు పెట్టాలనుకుంటే, మీరు ఇన్వెస్ట్ చేయాలనుకున్న మొత్తం ఇప్పట్లో మీకు అవసరం లేనట్లయితే, ఒకేసారి పెద్ద మొత్తంలో ఇన్వెస్ట్ చేయలేకపోతే... ఇలాంటి పరిస్థితుల్లో  మీకు మ్యూచువల్ ఫండ్స్ సరైన ఇన్వెస్ట్‌మెంట్ విధానం. అయితే ఇలాంటి పరిస్థితుల్లో సెక్టోరియల్, లేదా థీమాటిక్ ఫండ్స్‌ల్లో ఇన్వెస్ట్ చేయకండి. సిస్టమాటిక్ ఇన్వెస్ట్‌మెంట్ ప్లాన్(సిప్) విధానంలో ఇన్వెస్ట్ చేయండి. మ్యూచువల్ ఫండ్స్‌లో మొదటిసారిగా ఇన్వెస్ట్ చేస్తున్నట్లయితే, ఏదైనా ఒక బ్యాలెన్స్‌డ్ ఫండ్‌ను ఎంచుకోండి. మీకు అసంతృప్తి కలగని రీతిలోనే ఈ ఫండ్స్ రాబడులుంటాయి.
 
  బాగా పేరున్న మ్యూచువల్ ఫండ్ పథకాల్లో తెలిసిన డిస్ట్రిబ్యూటర్ ద్వారా 2005లో ఇన్వెస్ట్ చేశాను. నా ఫోలియోలో నా వివరాలు. నంబర్లతో పాటు సదరు డిస్ట్రిబ్యూటన్ నంబర్ కూడా ఉంటోంది. ఈ నంబర్‌ను తొలగించమని ఎన్నోసార్లు సదరు సంస్థను కోరాను. కానీ ఫలితం లేకపోయింది. ఎందుకిలా?  
 - క్రిష్టోఫర్, గుంటూరు
 
  మ్యూచువల్ ఫండ్ కంపెనీ పంపించే అకౌంట్ స్టేట్‌మెంట్‌లో డిస్ట్రిబ్యూటర్ వివరాలు కూడా ఉంటాయి. ఇక మీ విషయానికొస్తే, ఆ నంబర్ డిస్ట్రిబ్యూటర్‌దని, దానిని తొలగించమని మరో సారి విజ్ఞప్తి చేయండి. కానీ సదరు నంబర్ మీ ఫోలియోలో ఉండడం వల్ల ఎలాంటి సమస్యా ఉండదని నేను భావిస్తున్నాను. మ్యూచువల్ ఫండ్ సంస్థ నుంచి మీకు ఎప్పటికప్పుడు సమాచారం అందుతున్నప్పుడు, ఆ నంబర్‌తో ఎలాంటి లావాదేవీలు జరిగే అవకాశమే లేదు. మీరు ఆందోళన చెందాల్సిన అవసరం లేదు.
 
 మనం మ్యూచువల్ ఫండ్స్‌లో ఇన్వెస్ట్ చేస్తాం. మరి మన ఇన్వెస్ట్‌మెంట్స్‌కు భద్రత ఉం టుందా? ఒక వేళ మ్యూచువల్ ఫండ్ సంస్థ బిచాణా ఎత్తేస్తే పరిస్థితి ఏమిటి? సహారా గందరగోళం నేపథ్యంలో ఇన్వెస్టర్లు ఎలాంటి జాగ్రత్తలు తీసుకోవాలి?
  - ప్రకాశ్ జైన్, సికింద్రాబాద్.
 
  సహారా మొత్తం సమస్య ఏమిటంటే, ఆ సంస్థ సెబి పరిధిలోకి రాదు. కానీ మ్యూచువల్ ఫండ్స్ విషయం అలా కాదు. వీటిపై నియంత్రణ ఉంది. మ్యూచువల్ ఫండ్స్ ఆస్తులపై నియంత్రణ సంస్థలకు పూర్తి నియంత్రణ ఉందని చెప్పవచ్చు. మీరు ఇన్వెస్ట్ చేసిన పెట్టుబడులు మీ ఫండ్ అకౌంట్‌లోకి వెళతాయి. అంతేకాని మీ పెట్టుబడులు మ్యూచువల్ ఫండ్ సంస్థకు వెళ్లవు. ఈ సొమ్ములతో కొనుగోలు చేసిన సెక్యూరిటీలు ఈ అకౌంట్‌లోనే ఉంటాయి.  పైగా మీ ఇన్వెస్ట్‌మెంట్స్‌కు మేనేజర్ కూడా ఉంటారు. ఈ సెక్యూరిటీలను కస్టోడియన్ అనే నియంత్రణ సంస్థ పర్యవేక్షిస్తుంది. ఈ అకౌంట్‌లోని సొమ్ములను మ్యూచువల్ ఫండ్ సంస్థ యాక్సెస్ చేయలేదు. మొత్తం మీద మ్యూచువల్ ఫండ్ సంస్థకు చెందిన అన్ని ఆస్తులపై సెబి నియంత్రణ ఉంటుంది. ఫండ్ మేనేజర్ల అంచనాల తప్పటం వల్ల ఫండ్స్‌కు నష్టాలు వచ్చి మీ ఇన్వెస్ట్‌మెంట్స్ తరిగిపోతాయే కానీ, మరో విధంగా కాదు.


 మ్యూచువల్ ఫండ్ పెట్టుబడులకు సంబంధించి రెగ్యులర్ ఆప్షన్‌నా లేదా డెరైక్ట్ ఆప్షన్‌నా దేనిని ఎంచుకోవాలి? దీర్ఘకాలిక పెట్టుబడులకు సంబంధించి ఏరకమైన ఫండ్స్‌ను ఎంచుకోవాలో సూచించండి?
  - సుకుమార్, హైదరాబాద్
  
 ఒక మ్యూచువల్ ఫండ్ ప్లాన్‌కు సంబంధించి రెగ్యులర్, డెరైక్ట్ ప్లాన్‌లలో  డెరైక్ట్ ప్లాన్‌కే వ్యయం తక్కువ. ఫలితంగా రిటర్న్‌లు అధికంగా వస్తాయని చెప్పవచ్చు. ఈ డెరైక్ట్ ప్లాన్‌లను మ్యూచువల్ ఫండ్ కంపెనీ ప్రత్యక్షంగా విక్రయిస్తున్నందున రెగ్యులర్ ప్లాన్‌తో పోల్చితే ఇది చౌకగా లభ్యమవుతుంది. మీ ఆర్థిక లక్ష్యాలకు తగ్గ ఫండ్ ఏదో మీరు ఎంచుకోగలిగితే డెరైక్ట్ ప్లాన్‌లోనే పెట్టుబడులు పెట్టడం సముచితం.
  
 ఇక దీర్ఘకాలిక పెట్టుబడుల విషయానికొస్తే మీరు కొన్ని అంశాలను పరిగణనలోకి తీసుకోవాలి.  ఒకేసారి పెద్ద మొత్తంలో పెట్టుబడులు పెట్టకూడదు. మార్కెట్ ఒడిదుడుకులను తట్టుకోవాలంటే, సిస్టమాటిక్ ఇన్వెస్ట్‌మెంట్ ప్లాన్(ఎస్‌ఐపి) విధానాన్ని అనుసరించడం ఉత్తమం. సెక్టోరియల్ లేదా థీమాటిక్ ఫండ్స్‌ల్లో ఇన్వెస్ట్ చేయకండి. విభిన్న రంగాల్లో ఇన్వెస్ట్ చేసే డైవర్సిఫైడ్ ఫండ్స్‌ను ఎంచుకోవాలి. దీర్ఘకాలిక పెట్టుబడుల కోసం కింది ఫండ్స్‌ను పరిశీలించవచ్చు. .. క్వాంటమ్ లాంగ్‌టెర్మ్ ఈక్విటీ, ఐసీఐసీఐ ప్రుడెన్షియల్ డైనమిక్, యూటీఐ ఈక్విటీ, ఫ్రాంక్లిన్ ఇండియా ప్రైమా ప్లస్‌లు.
  
 ప్రస్తుతం రెండేళ్ల వయస్సున్న నా కూతురు చదువు, వివాహం కోసం రూ. కోటి నిధిని ఏర్పాటు చేయాలనుకుంటున్నాను. దీని కోసం నెలకు రూ.10,000 ఇన్వెస్ట్ చేయాలనుకుంటున్నాను. నా పెట్టుబడులు ఎలా ఉండాలి? ప్రస్తుతం ఎల్‌ఐసీ జీవన్ ఆనంద్ పాలసీ తీసుకున్నాను. అలాగే పీపీఎఫ్‌కు కొంత మొత్తం చెల్లిస్తున్నాను. వీటన్నింటిని పరిగణనలోకి తీసుకొని తగిన  సూచనలివ్వండి.
  - శరణ్య, ఈ మెయిల్ ద్వారా
  
  పీపీఎఫ్, మీరు ఇన్వెస్ట్ చేస్తున్న యూలిప్.. ఇవి ఈ రెండు తక్కువ రాబడులనిచ్చే స్థిరాదాయ మార్గాలు. మీ ఆర్థిక లక్ష్యాలకు ఇవి సరిపోవు. మీరు మొదటగా చేయాల్సింది ఏమిటంటే మీ జీవన్ ఆనంద్ పాలసీ డాక్యుమెంట్‌ను పరిశీలించి ఈ పాలసీ నుంచి వైదొలిగే మార్గాలను చూడండి. అలాగే పీపీఎఫ్‌లో కనీస మొత్తమే ఇన్వెస్ట్ చేయండి. మిగిలిన మొత్తాన్ని మీరు ఇన్వెస్ట్ చేయాలనుకుంటున్న రూ.10,000కు జత చేయండి. ఈ మొత్తాన్నంతటిని మ్యూచువల్ ఫండ్స్‌ల్లో ఇన్వెస్ట్ చేయండి.
  
 మీరు మొదటిసారిగా మ్యూచువల్ ఫండ్స్‌ల్లో ఇన్వెస్ట్ చేస్తున్నారు కాబట్టి, మొదటగా రెండు బ్యాలెన్స్‌డ్ ఫండ్స్‌ను ఎంచుకోండి. మ్యూచువల్ ఫండ్స్ పనితీరు తదితర అంశాలపై మీకు కొంచెం అవగాహన వచ్చిన తర్వాత ఈక్విటీ ఫండ్స్‌ల్లో ఇన్వెస్ట్ చేయండి. ప్రస్తుతానికైతే ఐసీఐసీఐ ప్రుడెన్షియల్ బ్యాలెన్స్‌డ్ అడ్వాంటేజ్,  కెనరా రొబెకొ బ్యాలెన్స్‌డ్ ఫండ్స్‌ను పరిశీలించవచ్చు.
  
 నేనొక సీనియర్ సిటిజన్‌ను. 12-18 నెలల కాలానికి ఏదైనా ఒక గిల్ట్‌ఫండ్‌లో ఇన్వెస్ట్ చేయాలనుకుంటున్నాను. ఈ విషయమై తగిన సలహా ఇవ్వండి.  - రామకృష్ణయ్య, ఏలూరు
 
 ప్రభుత్వ సెక్యూరిటీల్లోనే గిల్ట్‌ఫండ్స్ ఇన్వెస్ట్ చేస్తాయి. అందుకే వీటికి ఎలాంటి క్రెడిట్ రిస్క్ ఉండదు. భద్రత ఎక్కువగా ఉంటుంది. కానీ ఇవి ఒడిదుడుకులకు గురవుతుంటాయి. వడ్డీరేట్లు పెరుగుతున్న పరిస్థితుల్లో ఈ ఒడిదుడుకులు మరీ తీవ్రంగా ఉంటాయి. గత సంవత్సరంన్నర కాలంలో డెట్ ఫండ్ కేటగిరిలో అత్యంత అధ్వాన పనితీరు కనబరిచింది ఈ గిల్ట్‌ఫండ్సే.
 
 ద్రవ్యోల్బణం అదుపులోకి రాకపోతే, వడ్డీ రేట్లను తగ్గించబోమని ఆర్‌బీఐ గవర్నర్ ఇటీవలనే పేర్కొన్న సంగతి తెలిసిందే. గిల్ట్‌ఫండ్స్‌ల్లో పెట్టుబడులు పెట్టేముందు ఈ విషయాలన్నీ పరిగణనలోకి తీసుకోవాలి. గిల్ట్‌ఫండ్స్‌కు బదులుగా డైనమిక్ బాండ్ ఫండ్‌లో గానీ ఫిక్స్‌డ్ మెచ్యూరిటీ ప్లాన్‌లో గానీ ఇన్వెస్ట్ చేయడాన్ని పరిశీలించండి.
  
 నేను ప్రస్తుతం హెచ్‌డీఎఫ్‌సీ బ్యాలెన్స్‌డ్ ఫండ్‌లో నెలకు రూ.1,000 చొప్పున ఇన్వెస్ట్ చేస్తున్నాను. మూడేళ్ల కాలానికి మరి కొంత ఇన్వెస్ట్ చేద్దామనుకుంటున్నాను. ఈ ఇన్వెస్ట్‌మెంట్స్ కోసం ఐసీఐసీఐ ప్రుడెన్షియల్ డైనమిక్, ఐసీఐసీఐ ప్రుడెన్షియల్ డిస్కవరీ, ఐసీఐసీఐ ప్రుడెన్షియల్ ఫోకస్‌డ్ బ్లూచిప్‌లను షార్ట్‌లిస్ట్ చేశాను. తగిన సలహా ఇవ్వండి.
 - రామ్మూర్తి, అనంతపురం
  
 మూడేళ్ల ఇన్వెస్ట్‌మెంట్‌కు ఈక్విటీ ఫండ్స్‌ను పరిశీలించడం సమంజసం కాదు. ఐసీఐసీఐ ప్రుడెన్షియల్ డైనమిక్, ఐసీఐసీఐ ప్రుడెన్షియల్ డిస్కవరీ ఫండ్స్ మీరు నిర్దేశించుకున్న మూడేళ్ల కాలానికి సరైన రాబడులనివ్వలేవు. స్వల్పకాలంలో వీటి నుంచి మీరు ఆశించే రాబడులు రావు. అందుకని బ్యాలెన్స్‌డ్ ఫండ్స్‌ను ఎంచుకోవడం ఉత్తమం.
  
 మూడేళ్ల కాలానికి వీటిల్లో రిస్క్ తక్కువగా ఉంటుందని చెప్పవచ్చు. మీరు ఇప్పటికే పెట్టుబడులు పెడుతున్న  హెచ్‌డీఎఫ్‌సీ బ్యాలెన్స్‌డ్ ఫండ్‌లో మీ ఇన్వెస్ట్‌మెంట్స్‌ను మరింతగా పెంచవచ్చు. లేదంటే ఐసీఐసీఐ ప్రుడెన్షియల్ బ్యాలెన్స్‌డ్ అడ్వాంటేజ్ ఫండ్‌ను పరిశీలించవచ్చు.


  డీఎస్‌పీ బ్లాక్ రాక్ ఈక్విటీ ఫండ్‌లో మూడేళ్ల సిప్ ఇన్వెస్ట్‌మెంట్స్‌ను పూర్తి చేశాను. ఇటీవలే ఆ మొత్తాన్ని రిడీమ్ చేసుకున్నాను. రూ.3.10 లక్షలు ఇన్వెస్ట్ చేయగా, రూ.3.40 లక్షలు వచ్చాయి. నేను ఎంత పన్ను చెల్లించాల్సి ఉంటుంది?
  - ప్రసన్న, విశాఖ పట్టణం.
  
  ఒక ఏడాది లోపు ఇన్వెస్ట్‌మెంట్స్‌పై పొందిన లాభాలను స్వల్పకాలిక మూలధన లాభాలు(షార్ట్‌టెర్మ్ గెయిన్స్)గానూ, అంతకు మించిన కాలానికి ఇన్వెస్ట్‌మెంట్స్‌పై పొందిన లాభాలను దీర్ఘకాలిక మూలధన లాభాలు(లాంగ్‌టెర్మ్ గెయిన్స్)గానూ పరిణిస్తారు. ఈక్విటీ, ఈక్విటీ ఫండ్స్‌పై పొందిన దీర్ఘకాలిక మూలధన లాభాలపై ఎలాంటి పన్నులు ఉండవు. స్వల్పకాలిక మూలధన లాభాలపై మాత్రం 15 శాతం పన్ను చెల్లించాల్సి ఉంటుంది. ఇక సిప్ ఇన్వెస్ట్‌మెంట్ విషయానికొస్తే, పన్ను బాధ్యత ప్రతీ ఇన్‌స్టాల్‌మెంట్‌కు విడివిడిగా లెక్కిస్తారు. ఇన్వెస్ట్ చేసిన తేదీ నుంచి రిడంప్షన్ తేదీ మధ్య ప్రతీ ఇన్‌స్టాల్‌మెంట్ కాలం, పొందిన లాభాలను పరిగణనలోకి తీసుకొని పన్ను లెక్కిస్తారు. అయితే ఇదంతా మీరు పెన్నూ, పేపరూ తీసుకొని లెక్కించాల్సిన పని లేదు.  
  
 మీ ఇన్వెస్ట్‌మెంట్స్‌పై క్యాపిటల్ గెయిన్స్ స్టేట్‌మెంట్‌ను డీఎస్‌పీ బ్లాక్‌రాక్ కంపెనీని మీరు అడగవచ్చు. లేదా ఫండ్‌హౌజ్ వద్ద మీరు మీ ఈ మెయిల్ ఐడీని నమోదు చేసుకున్నట్లైతే, మీరు డబ్ల్యూడబ్ల్యూడబ్ల్యూడాట్‌కామ్స్‌ఆన్‌లైన్‌డాట్‌కామ్ వెబ్‌సైట్‌ను విజిట్ చేయండి. దీంట్లో ఇన్వెస్టర్ సర్వీసెస్, మెయిల్‌బాక్ సర్వీసెస్, కన్సాలిడేటెడ్ రియలైజ్‌డ్ గెయిన్ స్టేట్‌మెంట్‌పై క్లిక్ చేస్తే మీ మెయిల్‌కు ఆ స్టేట్‌మెంట్ వచ్చేస్తుంది. వాల్యూ రీసెర్చ్ ఆన్‌లైన్‌లో మీరు మీ పోర్ట్‌ఫోలియోను మెయింటైన్ చేస్తున్నట్లయితే ఆ లెక్కలను ఈ వెబ్‌సైట్ నుం చి కూడా పొందవచ్చు. అయితే పన్ను సంబంధిత అంశాలకు అధీకృత క్యామ్స్ స్టేట్‌మెం ట్‌ను మాత్రమే రుజువుగా ఉపయోగించాలి.
  
  నా మైనర్ కూతురి పేరు మీద నేను గార్డియన్‌గా పీపీఎఫ్ అకౌంట్ ఓపెన్ చేయవచ్చా? నేను నా పీపీఎఫ్ అకౌంట్‌లో ఒక లక్ష, నా కూతురి పీపీఎఫ్ అకౌంట్‌లో మరో లక్ష చొప్పున ఇన్వెస్ట్ చేస్తే, సెక్షన్ 80 సీ కింద నాకు వచ్చే పన్ను ప్రయోజనాలు ఎలా ఉంటాయి.              - కుమార్, విజయవాడ
  మీరు మీ మైనర్ కూతురి కోసం మీరు గార్డియన్‌గా పీపీఎఫ్ అకౌంట్ ఓపెన్ చేయవచ్చు.  మీ పీపీఎఫ్ అకౌంట్‌లో రూ. 1 లక్ష, మీ కూతురి పీపీఎఫ్ అకౌంట్‌లో రూ. 1 లక్ష, లేదా ఈ రెండు అకౌంట్లలో అంతకు మించి గానీ  ఇన్వెస్ట్ చేసినప్పటికీ, ఆదాయపు పన్ను సెక్షన్ 80సీ ప్రకారం, ఒక ఏడాదిలో ఒక వ్యక్తి పొందగలిగే పన్ను ప్రయోజనాలు రూ. 1 లక్ష మాత్రమే.
  రాజీవ్ గాంధీ ఈక్విటీ సేవింగ్స్ స్కీమ్(ఆర్‌జీఈఎస్‌ఎస్) కింద ఏ ఈటీఎఫ్‌ను ఎంచుకోవాలి?
  - వంశీకృష్ణ, బెంగళూరు
  రాజీవ్ గాంధీ ఈక్విటీ సేవింగ్స్ స్కీమ్‌కు అర్హమైన స్కీమ్‌లు చాలా ఉన్నాయి. ఈ స్కీమ్ కింద ఉత్తమమైన ఫండ్స్‌ల్లో నిఫ్టీ ఈటీఎఫ్ ఒకటి. దీనికి సంబంధించిన సమగ్రమైన జాబితా కోసం వాల్యూరీసెర్చ్ వెబ్‌సైట్‌ను చూడండి. ముందు ఇన్వెస్టర్లు ఈ స్కీమ్‌ను బాగా అర్థం చేసుకోవాలి. ఈక్విటీ మార్కెట్లో తొలిసారిగా ఇన్వెస్ట్ చేసే ఇన్వెస్టర్లకు ప్రోత్సహించేందుకు ఈ స్కీమ్‌ను డిజైన్ చేశారు. వార్షికాదాయం రూ.12 లక్షల లోపు ఉన్న కొత్త ఇన్వెస్టర్లకు ఈ స్కీమ్ వర్తిస్తుంది. సెక్షన్ 80సీ కింద లభించే రూ. లక్ష పన్ను మినహాయింపులకు ఇది అదనం. ఒక వ్యక్తికి ఈ స్కీమ్ కింద ఇన్వెస్ట్ చేసే పరిమితిని రూ.50,000గా నిర్ణయించారు. ఇన్వెస్ట్ చేసిన మొత్తంలో 50 శాతానికి పన్ను రాయితీ పొందవచ్చు. ఈ ఇన్వెస్ట్‌మెంట్స్‌కు మూడేళ్ల లాకిన్ పీరియడ్ ఉంటుంది. అయితే ఒక ఏడాది పూర్తయిన తర్వాత కొన్ని షరతులకు లోబడి ట్రేడింగ్ చేయొచ్చు. మొత్తం మీద ఈ స్కీమ్ కొంచెం సంక్లిష్టమైనదే. ఎంచుకోవడానికి పరిమితమైన ఫండ్స్, షేర్లు అందుబాటులో ఉంటాయి. పన్ను ప్రయోజనాలూ ఓమోస్తరుగానే ఉంటాయి. బాగా ఆలోచించి నిర్ణయం తీసుకోండి.
  
  6.
  
  ఈ ఏడాది 5% స్థాయిలో జీడీపీ: నోమురా
  
  ముంబై: ఈ ఆర్థిక సంవత్సర ం(2013-14)లో దేశ ఆర్థిక వ్యవస్థ(జీడీపీ) అనూహ్య వృద్ధిని సాధించే అవకాశాల్లేవని జపనీస్ బ్రోకింగ్ దిగ్గజం నోమురా అంచనా వేసింది. ఇందుకు రిజర్వ్ బ్యాంక్ అనుసరిస్తున్న క ఠిన పరపతి విధానాలు, మందగమన పరిస్థితులు వంటివి కారణంగా నిలుస్తాయని నివేదికలో నోమురా పేర్కొంది. వెరసి ఈ ఏడాది జీడీపీ 4.5-5% స్థాయిలో నమోదు కావచ్చునని అభిప్రాయపడింది. అయితే 2014లో ఆర్థిక స్థిరీకరణకు అవకాశమున్నదని, పెట్టుబడుల వాతావరణం చక్కబడేందుకు ఆస్కారమున్నదని వివరించింది. అయితే ప్రస్తుతం అనూహ్య పురోభివృద్ధి సాధించేందుకు సరైన కారణాలు కనిపించడంలేదని వ్యాఖ్యానించింది.
  
 ఈ ఏడాది తొలి రెండు క్వార్టర్లలో జీడీపీ 4.4%(ఏప్రిల్-జూన్), 4.8%(జూలై-సెప్టెంబర్) చొప్పున పుంజుకున్న సంగతి తెలిసిందే. కాగా, గడిచిన ఏడాది(2012-13) జీడీపీ 4.5%కు పరిమితమైంది. ప్రధానంగా అధిక వడ్డీ రేట్లు, డిమాండ్ పడిపోవడం వంటి దేశీయ అంశాలు ఇందుకు ప్రభావం చూపాయి.
  


 
 నా వయస్సు 37 సంవత్సరాలు. నేను నెలకు రూ.10,000 చొప్పున పదేళ్ల పాటు ఇన్వెస్ట్ చేయగలను. ఏడాదికి 15-18 శాతం రాబడి ఆశిస్తున్నాను. నాకు సముచితమైన పెట్టుబడి మార్గాలు సూచించండి?  - నవీన్, హైదరాబాద్
 
  పదేళ్ల కాలానికి మీరు ఆశించిన రాబడులు రావాలంటే ఈక్విటీల్లో పెట్టుబడి పెట్టడం ఉత్తమమని చెప్పవచ్చు. 12-13% రాబడి కావాలనుకుంటే బ్యాలెన్స్‌డ్ ఫండ్స్‌ను పరిశీలించవచ్చు. మీరు రిస్క్ ఎక్కువగా భరించలేని వాళ్లు, మీ పెట్టుబడి విలువ కొంత వరకూ తగ్గినా, ఆందోళనకు గురయ్యే మనస్తత్వం ఉన్నవాళ్లైతే ఒకటి లేదా రెండు బ్యాలెన్స్‌డ్ ఫండ్స్‌లో పెట్టుబడులు పెట్టండి. స్వల్పకాలంలో ఒడిదుడుకులను తట్టుకోగలిగితే లార్జ్, లేదా మిడ్-క్యాప్ లేదా మల్టీ-క్యాప్ ఫండ్స్‌ను పరిశీలించవచ్చు.
 
  నేను ఇటీవలనే రిటైరయ్యాను. నా పోర్ట్‌ఫోలియోలో డీఎస్‌పీ బ్లాక్‌రాక్ టాప్ 100, ఐసీఐసీఐ ప్రుడెన్షియల్ ఫోకస్డ్ బ్లూ చిప్, ఐడీఎఫ్‌సీ ప్రీమియర్ ఈక్విటీ, హెచ్‌డీఎఫ్‌సీ ఈక్విటీ, హెచ్‌డీఎఫ్‌సీ ప్రుడెన్స్, డైనమిక్ బాండ్ ఫండ్, క్యాష్ మేనేజ్‌మెంట్ ఫండ్, సూపర్ సేవర్ ఇన్‌కమ్ ఫండ్, రిలయన్స్ ఎంఐపీ, రిలయన్స్ గోల్డ్ సేవింగ్స్ ఫండ్  తదితర ఫండ్స్ ఉన్నాయి.
 
  ఇప్పటిదాకా ఈ ఫండ్స్‌లో రూ.12 లక్షలు పెట్టుబడులు పెట్టాను. కానీ ఈ ఫం డ్స్ పనితీరు నిరాశాజనకంగా ఉంది.  ఈ ఫండ్స్‌లో మరో ఐదేళ్ల పాటు నా పెట్టుబడులను కొనసాగిద్దామనుకుంటున్నాను. నా నిర్ణయం సరైనదేనా ? - మహ్మద్ ఇక్బాల్, కరీంనగర్
 
  మీరు మంచి ఫండ్స్‌లోనే పెట్టుబడులు పెడుతున్నారు. అయితే మీ పెట్టుబడులు, పెట్టుబడుల వ్యూహం పట్ల మీకు సరైన అవగాహన లేదని తెలుస్తోంది. రానున్న మూడు, నాలుగేళ్లలో మీకు ఎంత సొమ్ములు అవసరమవుతాయో ముందు ఒక అవగాహన ఏర్పర్చుకోండి. అంత మొత్తానికి ఒక ఫిక్స్‌డ్ ఇన్‌కమ్ ఫండ్‌లో(ఒకటి కంటే ఎక్కువ వద్దు, ఒకటి చాలు) ఇన్వెస్ట్ చేయండి.
 
  ఒక వేళ మీరు సరైన ఫిక్స్‌డ్ ఇన్‌కమ్ ఫండ్‌ను ఎంచుకోలేకపోతే, ఆ కాలానికి ఏదైనా బ్యాం క్‌లో ఫిక్స్‌డ్ డిపాజిట్ చేయండి. ఇక ఐదేళ్ల కాలానికి తక్కువ నిర్వహణ పోర్ట్‌ఫోలియోను ఏర్పాటు చేసుకోండి. దీని కోసం అధిక పన్ను ప్రయోజనాలిచ్చే బ్యాలెన్స్‌డ్ ఫండ్స్‌ను ఎంచుకోండి. సాధారణంగా ఈ బ్యాలెన్స్‌డ్ ఫండ్స్ 70% ఈక్విటీల్లోనూ, 30% ఫిక్స్‌డ్ ఇన్‌కమ్ సాధనాల్లోనూ ఇన్వెస్ట్ చేస్తాయి. బ్యాలెన్స్‌డ్ ఫండ్స్‌పై వచ్చే రాబడులపై ఎలాంటి పన్ను చెల్లించాల్సిన అవసరం లేదు.
 
  ఇటీవల వచ్చిన స్టాక్ మార్కెట్ ర్యాలీని  నాలాంటి చిన్న ఇన్వెస్టర్లు చాలా మంది మిస్ అయ్యారు. గత ఐదేళ్లలో ఎన్నడు లేనట్లుగా స్టాక్ మార్కెట్ల కదలికలున్నాయి. ఈ నేపథ్యంలో స్టాక్ మార్కెట్లకు దూరంగా ఉన్న మాలాంటి చిన్న ఇన్వెస్టర్లకు మీరు ఎలాంటి సలహా, సూచనలిస్తారు? - అరవింద్ జైన్, సికిందరాబాద్
 
  గత ఐదేళ్లలో స్టాక్ మార్కెట్లు చెప్పుకోదగ్గ స్థాయి రాబడులనివ్వనప్పటికీ, చిన్న ఇన్వెస్టర్లు మాత్రం రెగ్యులర్‌గా ఇన్వెస్ట్ చేయాల్సి ఉంది. స్టాక్ మార్కెట్లు నిలకడగా వృద్ధి సాధించలేకపోతున్నప్పటికీ, మీరు స్టాక్ మార్కెట్లకు దూరంగా ఉండడం సమంజసం కాదు. రానున్న 3 లేదా ఐదేళ్లలో స్టాక్ మార్కెట్లు మంచి పనితీరు కనబరుస్తాయని అంచనాలున్నాయి. సరైన రాబడులు రాకపోవడంతో ఇన్వెస్టర్లు స్టాక్ మార్కెట్ల పట్ల పెద్దగా ఆసక్తి చూపడం లేదు.
 
  స్టాక్ మార్కెట్లు 2007లో శిఖర స్థాయిల్లో ఉన్నప్పుడు ఇన్వెస్టర్లు పొలోమని ఇన్‌ఫ్రాస్ట్రక్చర్ ఫండ్స్‌లో భారీగా పెట్టుబడులు పెట్టి చేతులు కాల్చుకున్నారు. ఆ అనుభవంతో వాళ్లు ఇప్పుడు స్టాక్ మార్కెట్లంటే ఆమడ దూరం ఉంటున్నారు. కానీ ఒకేసారి పెద్ద మొత్తంలో ఈక్విటీల్లో ఇన్వెస్ట్ చేయకూడదు. స్టాక్ మార్కెట్లలో పెట్టుబడులకు రెండు సాధారణ సూత్రాలున్నాయి.
 
  మొదటిది ఒకేసారి పెద్ద మొత్తంలో కాకుండా కొద్ది మొత్తాల్లో క్రమం తప్పకుండా పెట్టుబడులు పెట్టడం, రెండోది. ఒకే రంగం కంపెనీల్లో కాకుండా విభిన్నమైన రంగాల కంపెనీల్లో పెట్టుబడులు పెట్టడం. కానీ చాలా మంది ఇన్వెస్టర్లు ఈ రెండు నియమాలను అనుసరించరు.
 
  నేను నెలకు రూ.2 లక్షల చొప్పున ఆరు నెలల పాటు పెట్టుబడులు పెట్టగలను. 11% వార్షిక రాబడిని ఆశిస్తున్నాను. ఎప్పుడు కావాలంటే అప్పుడు నా డబ్బులు తీసుకోగలిగే వీలుండాలి. తగిన సూచనలివ్వండి.  - జాన్సన్, నెల్లూరు
 
  మీరు ఎప్పుడు కావాలనుకుంటే అప్పుడు మీ పెట్టుబడులను వెనక్కితీసుకోవాలంటే తక్కువ రాబడితో  సంతృప్తి చెందాల్సి ఉంటుంది. లిక్విడ్ ఫండ్ లేదా ఆల్ట్రా షార్ట్-టెర్మ్ బాండ్ ఫండ్‌లో పెట్టుబడులు పెడితే మీరు కోరుకున్నట్లు ఎప్పుడు పడితే అప్పుడు మీ పెట్టుబడులను తీసుకోవచ్చు. అయితే 11% కంటే తక్కువ రాబడులు(8-9%) వస్తాయి.
 
 61 రోజుల మెచ్యూరిటీ ఉండే రుణ పత్రాల్లో లిక్విడ్ ఫండ్స్ పెట్టుబడులు పెడతాయి. ఆల్ట్రా షార్ట్‌టెర్మ్ ఫండ్స్ సగటు మెచ్యూరిటీ కాలం ఒక ఏడాది వరకూ ఉంటుంది. వీటిల్లో ఇన్వెస్ట్ చేస్తే మీకు ఎప్పుడు కావాలనుకుంటే అప్పుడు  పెట్టుబడులను వెనక్కు తీసుకోవచ్చు. అంతేకాకుండా మీ ఇన్వెస్ట్‌మెంట్స్ సురక్షితంగానూ ఉంటాయి.


  నేను టాటా ఇండో గ్లోబల్ ఇన్‌ఫ్రాస్ట్రక్చర్ ఫండ్‌లో ఇన్వెస్ట్ చేశాను. కానీ ఈ ఫండ్ పనితీరు బాగా లేదు. ప్రస్తుతం ఈ ఫండ్ ఎన్‌ఏవీ రూ. 6.58గా ఉంది. ఈ ఫండ్‌లో కొనసాగమంటారా? వైదొలగమంటారా? ఒక వేళ వైదొలిగితే ఆ పెట్టుబడులను దేంట్లో ఇన్వెస్ట్ చేయాలో తెలుపగలరు.
  - నాని, హైదరాబాద్
  
  చాలా ఇన్‌ఫ్రాస్ట్రక్చర్ ఫండ్స్ ఇన్వెస్టర్లను బాగా నిరాశ పరుస్తున్నాయి. అందుకే ఇన్‌ఫ్రాస్ట్రక్చర్ ఫండ్స్ నుంచి వైదొలగమని సూచిస్తున్నాం. ఇక మీ విషయానికొస్తే, తక్షణం ఈ ఫండ్ నుంచి బయటకు వచ్చేయండి. ఈ ఫండే కాదు, మరే ఇతర ఇన్‌ఫ్రాస్ట్రక్చర్ ఫండ్స్‌కైనా  ఇది వర్తిస్తుంది. ఇన్‌ఫ్రా ఫండ్స్‌కు మంచి రోజులు ముగిశాయి. ఇప్పట్లో ఈ ఫండ్స్ కోలుకునే సూచనలు లేవు. ఇన్‌ఫ్రా కంపెనీలు మంచి ఆదాయాన్ని ఆర్జించే పరిస్థితులైతే ఇప్పుడు లేవు. ఇన్‌ఫ్రాస్ట్రక్చర్ ఫండ్స్ ఫార్మా, టెక్నాలజీ, ఎఫ్‌ఎంసీజీ మినహా ఇతర రంగాల్లో ఇన్వెస్ట్ చేస్తాయి. కానీ గత కొన్నేళ్లుగా ఫార్మా, టెక్నాలజీ, ఎఫ్‌ఎంసీజీ కంపెనీల షేర్లే మంచి ఆదాయాన్నిస్తున్నాయి. మీ పెట్టుబడులను నార్మల్ డైవర్సిఫైడ్ ఫండ్‌కు మళ్లించవచ్చు.
  
  ఆరు నెలల కాలానికి రూ. 2లక్షలు ఇన్వెస్ట్ చేద్దామనుకుంటున్నాను. 11 శాతం రాబడి ఆశిస్తున్నాను. నేను ఎప్పుడు కావాలనుకుంటే అప్పుడు నా డబ్బులను తీసుకునే వీలుండాలి. తగిన పెట్టుబడి మార్గాలు సూచించండి.
  - అనిత, కాకినాడ
  
  మీరు కోరుకుంటున్న విధానాల్లో 11 శాతం రాబడి ఆర్జించడం సాధ్యమయ్యే అవకాశాలు తక్కువ. ఆర్నెల్ల కాలానికి రూ.2 లక్షలు ఇన్వెస్ట్‌మెంట్‌పై ఎప్పుడు కావాలనుకుంటే అప్పుడు డబ్బులు వెనక్కి తీసుకునే పరిస్థితుల్లో రాబడి 11 శాతం కంటే తక్కువగానే వచ్చే అవకాశాలున్నాయి. ఒక్క రాబడి విషయంలో తప్ప మీరు కోరుకున్న ఇన్వెస్ట్‌మెంట్ ఆప్షన్లు లిక్విడ్ ఫండ్స్(వీటిని ఆల్ట్రా షార్ట్-టెర్మ్ బాండ్ ఫండ్‌గా వ్యవహరిస్తారు)లో ఉన్నాయి. ఈ లిక్విడ్ ఫండ్స్ 61 రోజుల మెచ్యూరిటీ ఉండే రుణ పత్రాల్లో ఇన్వెస్ట్ చేస్తాయి. కాగా ఆల్ట్రా షార్ట్‌టెర్మ్ ఫండ్స్ సగటు మెచ్యురిటీ కాలం ఒక సంవత్సరంగా ఉంటుంది. 8-9 శాతం రాబడులు రావచ్చు. ఎప్పుడు కావాలనుకుంటే అప్పుడు మీ సొమ్ములు తీసుకోవచ్చు. ఇది సమంజసమైన సురక్షిత పెట్టుబడి విధానం కూడా.
  
  యాక్సిస్ లాంగ్-టెర్మ్ ఈక్విటీ ఫండ్‌లో ఇన్వెస్ట్ చేద్దామనుకుంటున్నాను. ఈ ఫండ్ ప్రారంభమై నాలుగేళ్లే అయినప్పటికీ, మంచి పనితీరు కనబరుస్తోంది. ఈ స్వల్ప కాలిక ట్రాక్ రికార్డ్‌ను దృష్టిలో పెట్టుకొని ఈ ఫండ్‌లో ఇన్వెస్ట్ చేయవచ్చంటారా?
  - ప్రవీణ్, తిరుపతి
  
  ఈ ఫండ్ చెప్పుకోదగిన రాబడిని ఇచ్చింది. ఈ ఫండ్‌కు ఫైవ్-స్టార్ రేటింగ్ ఉంది. ఈ ఫండ్ జనవరి, 2012-జనవరి, 2013 కాలానికి అత్యుత్తమ రాబడిని(దాదాపు 35 శాతం) ఇన్వెస్టర్లకు అందించింది. ఇప్పటికీ ఈ ఫండ్ మంచి పనితీరునే కనబరుస్తోంది. అత్యుత్తమ కంపెనీలపైననే ఈ ఫండ్ దృష్టి పెడుతోంది. ప్రస్తుతమున్న గడ్డు పరిస్థితుల్లో పాత ఫండ్స్ పనితీరు అంతంత మాత్రంగానే ఉన్న నేపథ్యంలో మంచి ఆదాయాన్ని ఈ ఫండ్ అందించింది. ఈ అంశాలన్నింటినీ పరిగణనలోకి తీసుకుంటే పెట్టుబడుల కోసం ఈ ఫండ్‌ను పరిశీలించవచ్చు.
 
 -ధీరేంద్ర కుమార్
 సీఈఓ ,వేల్యూ రీసెఅర్చ్


 నా పోర్ట్‌ఫోలియోలో ఐదు ట్యాక్స్ సేవింగ్ ఫండ్స్ ఉన్నాయి. వీటిల్లో ఆరేళ్ల నుంచి ఇన్వెస్ట్ చేస్తున్నాను. వీటికి మూడేళ్ల లాకిన్ పీరియడ్ పూర్తయింది. వీటి  నుంచి పెట్టుబడులను  రెగ్యులర్ డైవర్సిఫైడ్ ఫండ్స్‌కు మళ్లించమంటారా? రెగ్యులర్ ఈక్విటీ ఫండ్స్‌లాగానే ఇవి కూడా మంచి పనితీరును కనబరుస్తాయా?
  -ఈశ్వర్, తిరుపతి
 
  ట్యాక్స్ సేవింగ్ ఫండ్‌కు లాకిన్ పీరియడ్ పూర్తయితే, అవి సాధారణ ఈక్విటీ ఫండ్స్‌లాగానే పనిచేస్తాయి. ఇతర ఓపెన్-ఎండెడ్ ఫండ్స్‌లాగానే యాక్టివ్‌గా ట్రేడవుతాయి. క్లోజ్‌డ్ ఎండెడ్ ఫండ్స్ విషయానికొస్తే, ఒకేసారి డబ్బులు వస్తాయి. దీని నిర్వహణ నిమిత్తం ఈ ఫండ్ మేనేజర్లకు ఎలాంటి ఇన్సెంటివ్‌లు లభించవు. అందుకనే క్లోజ్‌డ్ ఎండెడ్ ఫండ్స్‌పై ఫండ్ మేనేజర్లకు అంతగా ఆసక్తి ఉండదు. కానీ ట్యాక్స్ సేవింగ్స్ ఫండ్స్‌కు మినహాయింపు ఉంటుంది.  పన్ను ఆదా నిమిత్తం ఎప్పటికప్పుడు కొత్త ఇన్వెస్టర్లు పెట్టుబడులు పెడతారు కాబట్టి ఇవి ఆకర్షణీయంగానే ఉంటాయి.  మీరు ఇన్వెస్ట్ చేసిన ఫండ్స్‌ల్లో ఏ ఫండ్ అయినా సరైన పనితీరు కనబరచకపోతే మెథాడికల్ వేలో ఈ ఫండ్స్ నుంచి వైదొలగవచ్చు.
  
  ఎస్‌బీఐ డైనమిక్ బాండ్ ఫండ్ ఎలా ఉంటుంది? ఈ ఫండ్ పనితీరు నానాటికీ దిగజారుతోంది. అయినప్పటికీ పెట్టుబడులను కొనసాగించమంటారా?
  -పావని, ఖమ్మం
  డైనమిక్ బాండ్ ఫండ్స్‌ను ఫ్లెక్సి డెట్ బాండ్స్‌గా వ్యవహరిస్తారు. భవిష్యత్ వడ్డీరేట్ల అవుట్‌లుక్ ఆధారంగా మెచ్యూర్ అయ్యే పేపర్లలో ఇవి ఇన్వెస్ట్ చేస్తాయి. వడ్డీరేట్లు అనుకోకుండా పెరగడంతో ఈ ఏడాది జూన్‌లో  ఈ ఫండ్స్‌కు నష్టాలొచ్చాయి. వడ్డీరేట్లు తగ్గుతాయని అందరూ భావించిన తరుణంలో ఆర్‌బీఐ ఆశ్చర్యకరంగా వడ్డీరేట్లను పెంచేసింది. మీరు ఇన్వెస్ట్ చేసే డైనమిక్ బాండ్ ఫండ్స్ కాలపరిమితి ఏడాదికి మించినట్లయితే, వీటిల్లోనే కొనసాగడం ఉత్తమం. జూన్‌లో వచ్చిన నష్టాలను ఇప్పటికే చాలా బాండ్ ఫండ్స్ రికవరీ చేసుకున్నాయి. చాలా బాండ్ ఫండ్స్ తమ పోర్ట్‌ఫోలియో ప్రొఫైల్స్‌ను మార్చేశాయి కూడా.  ఎస్‌బీఐ డైనమిక్ బాండ్ ఫండ్‌కు 2011 నుంచి 4/5 స్టార్ రేటింగ్ ఉంటోంది. ఈ ఏడాది ఆగస్టు తర్వాతనే ఈ ఫండ్ రేటింగ్ 3 స్టార్‌కు తగ్గింది. ఈ ఫండ్ రేటింగ్, పనితీరు పడిపోవడం కొనసాగుతున్నట్లయితే, ఇదే కేటగిరిలోని మరో ఫండ్‌కు మారిపోవడం ఉత్తమం. ఒకటి లేదా రెండేళ్ల కాలానికి అధిక రిటర్న్‌లు కావాలనుకునే ఇన్వెస్టర్లు ఇలాంటి డైనమిక్ బాండ్ ఫండ్స్‌ను ఎంచుకుంటారు. అయితే గత 3-4 నెలల్లో ఈ ఫండ్స్ పనితీరు  బాగాలేని విషయం వాస్తవమే. ఎక్కువ కాలం ఇన్వెస్ట్‌మెంట్స్‌ను కొనసాగించాలనుకుంటే, మీరు ఎలాంటి ఆందోళన  చెందాల్సిన అవసరం లేదు. మీకు అత్యవసరంగా డబ్బులు అవసరమైనప్పుడే ఈ ఫండ్స్ నుంచి వైదొలగండి.
  
  నా వయస్సు 45 సంవత్సరాలు. నాకు తొమ్మిదేళ్ల కొడుకున్నాడు. నా నెలసరి సంపాదన రూ.20,000. నేను ఇంతవరకూ ఎలాంటి బీమా పాలసీ తీసుకోలేదు. ఏదైనా ఉత్తమమైన టెర్మ్ పాలసీనొకదానిని సూచించండి?     
                    - రవీందర్, కడప
  బీమా అవసరాన్ని గుర్తించినందుకు అభినందనలు. మీరు లేనప్పుడు మీ కుటుంబానికి ఆర్థిక స్థిరత్వాన్ని బీమానే అందిస్తుంది.మీ ప్రస్తుత ఖర్చులు, మీ కుటుంబానికున్న ఆస్తులు, అప్పులు, ఆర్థిక లక్ష్యాలు తదితర అంశాలపై అధారపడి ఎంత మొత్తానికి బీమా తీసుకోవాలో నిర్ణయించుకోవాలి. అయితే ఎంత మొత్తానికి బీమా తీసుకోవాలనే విషయంలో ఎలాంటి నిర్దిష్ట నియమం లేదు. ఎంత మొత్తానికి బీమా తీసుకోవాలో నిర్ణయించాలంటే,,, ముందుగా మీరు చెల్లించాల్సిన అప్పులు, రోజువారీ వ్యయాలు, పిల్లాడి చదువు ఖర్చు, తదితర అంశాలను లెక్కించండి. ఆ తర్వాత మీ ఆస్తులు, మీకు లభించే ఆదాయాన్ని గణించాలి. మీ ఆర్థిక లక్ష్యాలకు అవసరమయ్యే మొత్తానికి మీ  అప్పులను కూడి దాని నుంచి మీ ఆస్తులను తీసేయండి. అలా వచ్చేదే మీకు అవసరయ్యే బీమా మొత్తం. ద్రవ్యోల్బణ ప్రభావాన్ని కూడా పరిగణనలోకి తీసుకోవాలి.
 
  అవైవా ఐ-లైఫ్, ఎస్‌బీఐ లైఫ్ ఈషీల్డ్, హెచ్‌డీఎఫ్‌సీ లైఫ్ క్లిక్2ప్రొటెక్ట్,... ఇవి కొన్ని ఉత్తమమైన ఆన్‌లైన్ జీవిత బీమా పాలసీలు.  ఈ ఆన్‌లైన్ విధానం  సౌకర్యంగా లేదని మీరు భావిస్తే,  అవైవా లైఫ్‌షీల్డ్ ప్లాటినమ్ ప్రొటెక్షన్, ఎస్‌బీఐ లైఫ్ స్మార్ట్ షీల్డ్-లెవల్ టెర్మ్..ఈ ఆఫ్‌లైన్ పాలసీలను పరిశీలించవచ్చు.  ఏజెంట్లు ఉండరు కాబట్టి  ఆఫ్‌లైన్ పాలసీల కంటే ఆన్‌లైన్ పాలసీలు చౌకగా ఉంటాయి. ఎంత మొత్తానికి బీమా పాలసీ తీసుకోవాలో నిర్ణయించుకున్న తర్వాత ఆయా పాలసీల ప్రీమియంలు ఎంత ఉన్నాయో పరిశీలించి మీ బడ్జెట్‌కు సరిపోయే పాలసీ తీసుకోండి.
 ధీరేంద్ర కుమార్
 సీఈవో,వ్యాల్యూ రీసెర్చ్


 నేను ప్రైమరీ హోల్డర్‌గా నా భార్య సెకండరీ హోల్డర్‌గా కొన్ని మ్యూచువల్ ఫండ్ యూనిట్లు కొనుగోలు చేశాను. నా భార్య గృహిణి మాత్రమే. ఎలాంటి ఆదాయ వనరులు లేవు.  ఫండ్ సంస్థ నివేదించిన వార్షిక సమాచార నివేదిక(యాన్యువల్ ఇన్ఫర్మేషన్ రిపోర్ట్-ఏఐఆర్) ఆధారంగా ఆదాయపు పన్ను అధికారులు  సెకండరీ హోల్డర్‌గా ఉన్న మా ఆవిడ ఫండ్స్ విషయమై వివరణ అడుగుతున్నారు. నేను ఏం చేయాలి? 
  - పవన్ కుమార్, వరంగల్
  ఒక ఆర్థిక సంవత్సరంలో ఎవరైనా కనీసం రూ.2 లక్షలు ఇన్వెస్ట్ చేసినప్పుడు సంబంధిత ఇన్వెస్ట్‌మెంట్ వివరాలను మ్యూచువల్ ఫండ్ సంస్థ వార్షిక సమాచార నివేదిక(యాన్యువల్ ఇన్ఫర్మేషన్ రిపోర్ట్-ఏఐఆర్)ను ఆదాయపు పన్ను అధికారులకు పంపించాల్సి ఉంటుంది. ప్రత్యక్ష పన్ను ఎగవేతలను నివారించడానికి ప్రభుత్వం ఈ నిబంధన విధించింది. ఇన్వెస్టర్ సమర్పించే ఇన్‌కం ట్యాక్స్ రిటర్న్ (ఐటీఆర్)లో, ఐటీ అధికారులకు అందే ఏఐఆర్‌లో ఏమైనా తేడాలుంటే దానికి సదరు ఇన్వెస్టర్‌దే బాధ్యత. మ్యూచువల్ ఫండ్ యూనిట్లను మీరు ప్రైమరీ హోల్డర్‌గా, మీ భార్య సెకండరీ హోల్డర్‌గా కొనుగోలు చేసిన పక్షంలో, సెకండరీ హోల్డర్‌గా ఉన్న మీ భార్య తాను కేవలం మ్యూచువల్ ఫండ్స్ నిర్వహణకు సంబంధించి కేవలం జాయింట్ సెకండరీ హోల్డర్‌ని మాత్రమేనని ఆదాయపు పన్ను అధికారులకు తప్పనిసరిగా వెల్లడించాల్సి ఉంటుంది. ఈ మ్యూచువల్ ఫండ్ యూనిట్‌లను ప్రైమరీ హోల్డర్ పెట్టుబడులతోనే కొనుగోలు చేయడం జరిగిందని వారికి తెలపాల్సి  ఉంటుంది. 
  
  నేను రిటైరై ఏడాదవుతోంది. ఎలాంటి నష్టభయం లేని, ఏడాదికి 15% రాబడినిచ్చే మ్యూ చువల్ ఫండ్స్‌లో కొంత సొమ్ము ఇన్వెస్ట్ చేద్దామనుకుంటున్నాను. తగిన సూచనలివ్వండి. 
  - సింహాచలం, విశాఖ పట్టణం
  నష్ట భయం లేని ఇన్వెస్ట్‌మెంట్స్ నుంచి 15% వార్షిక రాబడి ఆశించడం కొంచెం ఎక్కువేనని చెప్పాలి. మీ పెట్టుబడుల్లో కొంత భాగాన్ని స్థిరాదాయాన్నిచ్చే మార్గాల్లో, మిగిలిన మొత్తాన్ని ఈక్విటీల్లో మదుపు చేయండి. ఒకేసారి కాకుండా కొద్ది కొద్దిగా పెట్టుబడులు పెట్టడం సముచితం.  రిటైరైన తర్వాత క్రమం తప్పకుండా మీకు కొంత ఆదాయం కావాలి. ఎంత ఆదాయం కావాలో అంత మొత్తానికి స్థిరాదాయాన్నిచ్చే  స్కీముల్లో పెట్టుబడులు పెట్టాలి. మిగిలిన మొత్తాన్ని ఈక్విటీల్లో మదుపు చేయాలి. ఉదాహరణకు మీకు రిటైర్మెంట్ సొమ్ము రూ.25 లక్షలు వచ్చిందనుకుందాం. దీంట్లో రూ.15 లక్షలను 9% రాబడినిచ్చే సీని యర్ సిటిజన్స్ సేవింగ్స్ స్కీమ్‌లో పొదుపు చేయవచ్చు. మిగతా మొత్తాన్ని ఈక్విటీల్లో కొద్ది మొత్తాల్లో క్రమం తప్పక ఇన్వెస్ట్ చేయవచ్చు. ఇన్వెస్ట్‌మెంట్స్ అన్నీ ఒకే కేటగిరీ ఈక్విటీల్లో కాకుండా, వివిధ రంగాలకు చెందిన ఈక్విటీల్లో డైవర్సిఫై చేయడాన్ని మరువకండి. 
  
  నేను కొంత మొత్తాన్ని 366 రోజుల ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లో ఇన్వెస్ట్ చేశాను. దీనిపై వచ్చే రాబడిని ఫిక్స్‌డ్ డిపాజిట్‌పై వచ్చే రాబడిని లెక్కించినట్లుగా మా ఆడిటర్ లెక్కించాడు. ఎఫ్‌ఎంపీలకు ఉండే ఇండెక్సేషన్ ప్రయోజనాలను మా ఆడిటర్‌కు తెలిపాను. దీనికి సంబంధించిన చట్టం, తదితర వివరాలు కావాలని ఆయన అడుగుతున్నారు. దయచేసి ఆ వివరాలు వెల్లడిస్తారా?              - సమీర, హైదరాబాద్
  ఆదాయపు పన్ను(ఐటీ) చట్టం, 1961లో సెక్షన్ 112లో ఈ వివరాలన్నీ ఉన్నాయి. అన్ని ఫిక్స్‌డ్ మెచ్యూరిటీ ప్లాన్స్ స్కీమ్ ఇన్ఫర్మేషన్ డాక్యుమెంట్స్‌లో కూడా ఈ సమాచారం ఉంటుంది. పన్ను ఆదాలకు ఇండెక్సేషన్ తోడ్పడుతుంది. 
  
  


 
 ఎన్‌ఏవీపై దాని ప్రభావం ఎలా ఉంటుంది?  
 
 -మురళీధర్, హైదరాబాద్
 
  ఇన్వెస్టర్ల పెట్టుబడులను నిర్వహించినందుకుగాను మ్యూచువల్ ఫండ్ సంస్థలు కొన్ని చార్జీలను వసూలు చేస్తాయి. నిర్వహణలో ఉన్న ఆస్తుల్లో కొంత శాతంగా ఈ చార్జీలు ఉంటాయి. ఇన్వెస్టర్ల ఇన్వెస్ట్‌మెంట్స్‌కు సంబంధించి నిర్వహణ, మార్కెటింగ్, తదితర వ్యయాలు కూడా ఈ చార్జీల్లో కలిసి ఉంటాయి. ఇక మ్యూచువల్ ఫండ్స్‌లో ప్రవేశించినప్పుడు 30 బేసిస్ పాయింట్లు, వైదొలగినప్పుడు 20 బేసిస్ పాయింట్ల చొప్పున చార్జీలను వసూలు చేసుకోవడానికి మ్యూచువల్ ఫండ్ సంస్థలను నియంత్రణ సంస్థ సెబీ అనుమతించింది. (టాప్ 15 నగరాలకు ఇది వర్తించదు) అంతేకాకుండా అడ్వైజరీ ఫీజుపై సర్వీస్ చార్జీ కూడా అదనం. వీటిన్నటింటిని కలిపి ఎక్స్‌పెన్స్ రేషియోగా పరిగణిస్తారు. ఇక మ్యూచువల్ ఫండ్ ఎన్‌ఏవీ(నెట్ అసెట్ వాల్యూ)లో ఈ వ్యయాలన్నీ(ఎక్స్‌పెన్స్ రేషియో) కలిసి ఉంటాయి.   అసెట్ మేనేజ్‌మెంట్  కంపెనీ(ఏఎంసీ) ఫండ్ ఎన్‌ఏవీ నుంచి  ఈ ఎక్స్‌పెన్స్ రేషియోను మినహాయించి ప్రతిరోజూ ఎన్‌ఏవీని ప్రకటిస్తుంది. ఒక ఫండ్ ఎన్‌ఏవీ రూ.10 ఉందనుకోండి. ఆ ఫండ్ ఎక్స్‌పెన్స్ రేషియో 1.5 శాతం, లాభం 1.5 శాతం అయితే ఎన్‌ఏవీ రూ. 10 ఉంటుంది. లాభాలు 2.5 శాతమైతే ఎన్‌ఏవీ రూ.11.5గా ఉంటుంది. లాభాలు ఏమీలేకపోతే, ఎన్‌ఏవీ రూ.8.5గా ఉంటుంది. 
 
  
 
  క్వాంటమ్ లాంగ్‌టర్మ్ ఈక్విటీ ఫండ్‌లో సిస్టమాటిక్ ఇన్వెస్ట్‌మెంట్ ప్లాన్(సిప్) ద్వారా  మదుపు చేయాలనుకుంటున్నాను. కానీ ఈ ఫండ్‌లో డెరైక్ట్ ప్లాన్ లేదు. ఈ క్వాంటమ్ లాంగ్‌టర్మ్ ఈక్విటీ ఫండ్‌లో డెరైక్ట్ ప్లాన్ ఎందుకు లేదు?              
 
  - షాజహానా, నిజామాబాద్
 
  ఏఎంసీ(అసెట్ మేనేజ్‌మెంట్ కంపెనీ)ల పంపిణీ వ్యయాలు ఆదా చేసి వినియోగదారులకు తక్కువ వ్యయంతో ప్రయోజనం కలి గించడమే డెరైక్ట్ ప్లాన్ స్కీమ్‌ల ముఖ్య ఉద్దేశం. డిస్ట్రిబ్యూటర్ల సర్వీసులను ఉపయోగించుకోకుండా ఇన్వెస్టర్లతోనే నేరుగా లావాదేవీలు నిర్వహిస్తున్న తొలి, ఏకైక మ్యూచువల్ ఫండ్ క్వాంటమ్ సంస్థ మాత్రమే. దీంతో సహజంగానే ఈ సంస్థ స్కీమ్‌లన్నీ కూడా డెరైక్ట్  ప్లాన్‌లే. పోటీ కంపెనీల స్కీమ్‌లతో పోల్చితే ఎక్స్‌పెన్స్ రేషియో తక్కువగా ఉంటాయి. ఎలాంటి డిస్ట్రిబ్యూషన్ వ్యయాలు ఉండవు. అందుకే క్వాంటమ్‌కు డెరైక్ట్ ప్లాన్‌లు ఏమీ లేవు. ఈ సంస్థ తన స్కీమ్‌లన్నింటినీ నేరుగా ఇన్వెస్టర్లకే అమ్మేస్తోంది. క్వాంటమ్ లాంగ్‌టెర్మ్ ఈక్విటీ ఫండ్ ఎక్స్‌పెన్స్ రేషియో 1.25 శాతంగా ఉంది. లార్జ్, మిడ్ క్యాప్ ఫండ్స్‌కు సంబంధించిన డెరైక్ట్ ప్లాన్స్‌లో ఇంత కంటే తక్కువ ఎక్స్‌పెన్స్ రేషియో ఉన్న స్కీమ్ ఇంకొకటి లేదు.
 
  మంచి ఈక్విటీ ఫండ్ పోర్ట్‌ఫోలియోను నిర్వహిస్తున్నాను. 
 
  
 
 డైవర్సిఫికేషన్ నిమిత్తం డెట్‌ఫండ్‌లో ఇన్వెస్ట్ చేయాలనుకుంటున్నాను. ఐడీఎఫ్‌సీ జీఎస్‌ఎఫ్ ఇన్వెస్ట్‌మెంట్ రెగ్యులర్, బిర్లా సన్‌లైఫ్ మీడియం టెర్మ్ ఫండ్‌లను షార్ట్‌లిస్ట్ చేశాను. వీటిల్లో దేనిని ఎంచుకోమంటారు? 
 
  - శ్రీనివాస్, విజయనగరం
 
  ఐడీఎఫ్‌సీ జీఎస్‌ఎఫ్ ఇన్వెస్ట్‌మెంట్ ఫండ్ అనేది గిల్ట్ ఫండ్, ఇది మాధ్యమిక కాలం నుంచి దీర్ఘకాలం వరకూ ఉండే ప్రభుత్వ సెక్యూరిటీల్లో ఇన్వెస్ట్ చేస్తుంది. ఈ తరహా స్కీమ్‌లలో ఎలాంటి క్రెడిట్ రిస్క్ ఉండనప్పటికీ, ప్రభుత్వ సెక్యూరిటీలు తరచూ ట్రేడింగ్ జరగడం వల్ల  కొంతమేరకు రిస్క్ ఉంటుందని చెప్పవచ్చు. ప్రస్తుతమున్న వడ్డీరేట్లపై ఆధారపడి ఈ సెక్యూరిటీల విలువ ఆధారపడి ఉంటుంది. వడ్డీరేట్లు మారితే సెక్యూరిటీల విలువ, ఎన్‌ఏవీ కూడా  మారుతుంది. సందర్భోచితంగా ఈ తరహా ఫండ్స్‌లో ఇన్వెస్ట్ చేయాలి. వడ్డీరేట్లు గరిష్ట స్థాయిలో ఉన్నప్పుడు ఇలాంటి ఫండ్స్‌లో ఇన్వెస్ట్ చేయడం ద్వారా బాగా ప్రయోజనాలు పొందవచ్చు. వడ్డీరేట్లు తగ్గుతున్నప్పుడు వీటినుంచి బయటపడాలి. బిర్లా సన్‌లైఫ్ మీడియం టెర్మ్ ప్లాన్‌కు ఫైవ్ స్టార్ రేటింగ్ ఉంది. ఏడాది నుంచి ఐదేళ్ల కాలపరిమితి ఉన్న సెక్యూరిటీల్లో ఈ ఫండ్ ఇన్వెస్ట్ చేస్తోంది. దీర్ఘకాలంలో ఈ ఫండ్స్ మంచి రాబడులనిస్తాయి. దీర్ఘకాలం పెట్టుబడులు పెట్టాలనుకుంటే ఈ ఫండ్‌ను పరిశీలించవచ్చు. 
 
  
                                                                                                                                                                                                                                                                               
  
  
                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                        


  గత ఏడాది రిలయన్స్ ట్యాక్స్ సేవర్ ఫండ్‌లో రూ.30,000 ఇన్వెస్ట్ చేశాను. ఈ ఫండ్ లాకిన్ పీరియడ్ మూడేళ్లు. ప్రస్తుతం ఈ ఫండ్ పనితీరు సరిగ్గా లేదు. పన్ను ఆదా కోసం ఈ ఫండ్‌లో పెట్టుబడులు కొనసాగించమంటారా? లేక మరో ఫండ్‌లో పెట్టుబడి పెట్టమంటారా? 
  - శ్రీనివాసరావు, నెల్లూరు
  ఈ ఏడాది ఈ ఫండ్ పనితీరు బాగా లేదు. ఈ కేటగిరీ ఫండ్స్ సగటు క్షీణత 12 శాతంగా ఉండగా, ఈ ఫండ్ 21.45 శాతం క్షీణించింది. ఈ ఫండ్ -మిడ్, స్మాల్ క్యాప్ స్టాక్స్‌లో ఎక్కువగా (మొత్తం పోర్ట్‌ఫోలియోలో 84 శాతం) ఇన్వెస్ట్ చేయడం ఇంత అధ్వాన పనితీరుకు కారణం. ఈ ఏడాది సెన్సెక్స్ 5 శాతం క్షీణించగా, బీఎస్‌ఈ మిడ్ క్యాప్, బీఎస్‌ఈ స్మాల్ క్యాప్‌లు 25 శాతం నుంచి 30 శాతం వరకూ క్షీణించాయి. అందుకే ఈ ఫండ్ రేటింగ్‌ను ఫోర్ స్టార్ నుంచి త్రీ స్టార్‌కు తగ్గించాం. మిడ్, స్మాల్ క్యాప్ షేర్లలో ఎక్కువ పెట్టుబడులు వద్దనుకుంటే లార్జ్ క్యాప్ షేర్లలో అధికంగా ఇన్వెస్ట్ చేసే ఫండ్స్‌ను పరిశీలించవచ్చు. కెనరా రొబెకో ఈక్విటీ ట్యాక్స్ సేవర్, ఫ్రాంక్లిన్ ఇండియా ట్యాక్స్ షీల్డ్ ఫండ్స్ లార్జ్ క్యాప్ స్టాక్స్‌లో ఎక్కువగా ఇన్వెస్ట్ చేస్తున్నాయి. ఇవి స్థిరమైన రాబడులనిస్తున్నాయి. 
  
  నా వయస్సు 26 సంవత్సరాలు. నేను ఐటీ ప్రొఫెషనల్‌గా పనిచేస్తున్నాను. నెలకు రూ.15,000 ఇన్వెస్ట్ చేద్దామనుకుంటున్నాను. ఇదే నా మొదటి మదుపు.  కనిష్ట రిస్క్, గరిష్ట ప్రయోజనాలు లభించే ఉత్తమమైన ఇన్వెస్ట్‌మెంట్ ఆప్షన్‌ను సూచించండి?
  - కాత్యాయిని, విశాఖ పట్టణం
  మ్యూచువల్ ఫండ్స్ విషయంలో ఈక్విటీ ఫండ్స్ అధిక రాబడులనిస్తాయి. దీర్ఘకాలానికి పెట్టుబడులు పెడితేనే ఈ స్థాయి రాబడులు వస్తాయి. స్టాక్  మార్కెట్ల రోజువారీ కదలికలకు అనుగుణంగా ఈ ఫండ్స్ కూడా తీవ్రమైన ఒడిదుడుకులకు గురవుతుంటాయి. మీరు తొలిసారిగా ఇన్వెస్ట్ చేస్తున్నందున, రిస్క్ తక్కువగా ఉండాలనుకుంటున్నందున హైబ్రిడ్ ఈక్విటీ ఓరియంటెడ్, లేదా బ్యాలెన్స్‌డ్ ఫండ్స్‌ను పరిశీలించవచ్చు. ఈ ఫండ్స్ తమ నిధుల్లో కనీసం 65 శాతం వాటాను ఈక్విటీల్లో, మిగిలిన వాటాను డెట్ ఇన్‌స్ట్రుమెంట్స్‌లో పెట్టుబడి పెడతాయి. స్టాక్ మార్కెట్లు పెరిగినప్పుడు ఈ ఈక్విటీ వాటా అధిక వృద్ధిని అందిస్తుంది. స్టాక్‌మార్కెట్లు కుదేలైనప్పుడు డెట్ ఇన్‌స్ట్రుమెంట్స్ కుషన్‌గా పనిచేస్తాయి. అయితే స్టాక్ మార్కెట్లు కదం తొక్కుతున్నప్పుడు మామూలు ఈక్విటీ ఫండ్స్‌తో పోల్చితే  ఈ హైబ్రిడ్ ఈక్విటీ ఓరియంటెడ్, లేదా బ్యాలెన్స్‌డ్ ఫండ్స్  కొంచెం డల్‌గా అనిపిస్తాయి. అయితే పెట్టుబడి వృద్ధి, రాబడి, భద్రత వంటి అంశాల పరంగా చూసినప్పుడు ఇవి ఉత్తమమైనవని చెప్పవచ్చు. అందుకని రెండు ఉత్తమమైన బ్యాలెన్స్‌డ్ ఫండ్స్‌ను ఎంచుకోండి. వాటిల్లో సిప్ ద్వారా మదుపు చేయండి. 
  
  నేను ఒకేసారి పెద్ద మొత్తంలో పెట్టుబడి పెట్టాలనుకుంటున్నాను. ఈ సొమ్ములు నాకు నా కొడుకు విద్యావసరాల నిమిత్తం 2015 జూన్‌కల్లా అవసరం. బ్యాంక్ ఫిక్స్‌డ్ డిపాజిట్‌లాగా సురక్షితమైన ఇన్వెస్ట్‌మెంట్ మార్గాలను సూచించండి. నేను 30 శాతం ట్యాక్స్ స్లాబ్‌లో ఉన్నాను?
  - శ్రీకాంత్ రెడ్డి, కరీంనగర్
  బ్యాంక్ ఫిక్స్‌డ్ డిపాజిట్లలాగా పెట్టుబడులకు భద్రతను, వృద్ధిని ఇస్తామని ఏ మ్యూచువల్ ఫండ్ గ్యారంటీనివ్వదు. సాధారణంగా అయితే ఇలాంటి ప్రశ్నలకు డైనమిక్ బాండ్ ఫండ్స్ లేదా షార్ట్‌టర్మ్ ఫండ్స్‌లో ఇన్వెస్ట్ చేయమని సూచిస్తాం. కానీ గత కొద్ది నెలలుగా విదేశీ సంస్థాగత ఇన్వెస్టర్లు ఈ ఫండ్స్ నుంచి నిధులు వెనక్కి తీసుకుంటున్నందున ఈ ఫండ్స్ ఎన్‌ఏవీ రుణాత్మకంగా ఉంటోంది. ఇలాంటి పరిస్థితుల్లో ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లను పరిశీలించవచ్చు. పన్ను ప్రయోజనాల నిమిత్తం బ్యాంక్ ఫిక్స్‌డ్ డిపాజిట్లకు ప్రత్యామ్నాయంగా వీటిని పరిగణిస్తారు. ఎఫ్‌ఎంపీలు క్లోజ్డ్ ఎండెడ్ ఫండ్స్. న్యూఫండ్‌ఆఫర్(ఎన్‌ఎఫ్‌ఓ) ద్వారానే వీటిల్లో పెట్టుబడులు పెట్టాలి. నిర్దేశిత గడువు తర్వాతనే వీటిని రిడీమ్ చేసుకోవాలి. వీటి రాబడులను ముందే అంచనా వేయవచ్చు.
  
   స్వల్పకాలిక రాబడులు కావాలనుకునే ఇన్వెస్టర్లు వీటిల్లో పెట్టుబడులు పెడతారు. ఎఫ్‌ఎంపీలు తమ మెచ్యూరిటీ కాల వ్యవధి ఉండే సాధనాల్లోనే ఇన్వెస్ట్ చేస్తాయి. అంటే పది నెలల మెచ్యూరిటీ ఉండే ఎఫ్‌ఎంపీలు అదే కాలవ్యవధి ఇన్‌స్ట్రుమెంట్స్‌లో, మూడు నెలల మెచ్యూరిటీ ఉండే ఎఫ్‌ఎంపీలు అదే కాలవ్యవధి ఉండే ఇన్‌స్ట్రు మెంట్స్‌లో ఇన్వెస్ట్ చేస్తాయి. వడ్డీరేట్లలో తేడాలు ఉన్నప్పటికీ, ఇవి ఇచ్చే రాబడులను ముందే అంచనా వేయవచ్చు. ప్రస్తుతానికి ఈ ఫండ్స్ 9.75 శాతం నుంచి 10 శాతం రాబడులనిస్తున్నాయి. ఎఫ్‌ఎంపీల్లో లాంగ్ టర్మ్ గెయిన్స్ కనుక మీరు పొందితే ఇండెక్సేషన్ ప్రయోజనాలు కూడా మీకు అందుతాయి. అందుకే ఇవి బ్యాంక్ ఫిక్స్‌డ్ డిపాజిట్ల కంటే కూడా పన్ను పరంగా ప్రయోజనకరమైనవని చెప్పవచ్చు. మీకు సొమ్ములు కావలసిన కాలవ్యవధి ఉండే ఎఫ్‌ఎంపీని ఎంచుకొని, దాంట్లో పెట్టుబడులు పెట్టండి. 
  


  గత ఏడాది రిలయన్స్ ట్యాక్స్ సేవర్ ఫండ్‌లో రూ.30,000 ఇన్వెస్ట్ చేశాను. ఈ ఫండ్ లాకిన్ పీరియడ్ మూడేళ్లు. ప్రస్తుతం ఈ ఫండ్ పనితీరు సరిగ్గా లేదు. పన్ను ఆదా కోసం ఈ ఫండ్‌లో పెట్టుబడులు కొనసాగించమంటారా? లేక మరో ఫండ్‌లో పెట్టుబడి పెట్టమంటారా? 
  - శ్రీనివాసరావు, నెల్లూరు
  ఈ ఏడాది ఈ ఫండ్ పనితీరు బాగా లేదు. ఈ కేటగిరీ ఫండ్స్ సగటు క్షీణత 12 శాతంగా ఉండగా, ఈ ఫండ్ 21.45 శాతం క్షీణించింది. ఈ ఫండ్ -మిడ్, స్మాల్ క్యాప్ స్టాక్స్‌లో ఎక్కువగా (మొత్తం పోర్ట్‌ఫోలియోలో 84 శాతం) ఇన్వెస్ట్ చేయడం ఇంత అధ్వాన పనితీరుకు కారణం. ఈ ఏడాది సెన్సెక్స్ 5 శాతం క్షీణించగా, బీఎస్‌ఈ మిడ్ క్యాప్, బీఎస్‌ఈ స్మాల్ క్యాప్‌లు 25 శాతం నుంచి 30 శాతం వరకూ క్షీణించాయి. అందుకే ఈ ఫండ్ రేటింగ్‌ను ఫోర్ స్టార్ నుంచి త్రీ స్టార్‌కు తగ్గించాం. మిడ్, స్మాల్ క్యాప్ షేర్లలో ఎక్కువ పెట్టుబడులు వద్దనుకుంటే లార్జ్ క్యాప్ షేర్లలో అధికంగా ఇన్వెస్ట్ చేసే ఫండ్స్‌ను పరిశీలించవచ్చు. కెనరా రొబెకో ఈక్విటీ ట్యాక్స్ సేవర్, ఫ్రాంక్లిన్ ఇండియా ట్యాక్స్ షీల్డ్ ఫండ్స్ లార్జ్ క్యాప్ స్టాక్స్‌లో ఎక్కువగా ఇన్వెస్ట్ చేస్తున్నాయి. ఇవి స్థిరమైన రాబడులనిస్తున్నాయి. 
  
  నా వయస్సు 26 సంవత్సరాలు. నేను ఐటీ ప్రొఫెషనల్‌గా పనిచేస్తున్నాను. నెలకు రూ.15,000 ఇన్వెస్ట్ చేద్దామనుకుంటున్నాను. ఇదే నా మొదటి మదుపు.  కనిష్ట రిస్క్, గరిష్ట ప్రయోజనాలు లభించే ఉత్తమమైన ఇన్వెస్ట్‌మెంట్ ఆప్షన్‌ను సూచించండి?
  - కాత్యాయిని, విశాఖ పట్టణం
  మ్యూచువల్ ఫండ్స్ విషయంలో ఈక్విటీ ఫండ్స్ అధిక రాబడులనిస్తాయి. దీర్ఘకాలానికి పెట్టుబడులు పెడితేనే ఈ స్థాయి రాబడులు వస్తాయి. స్టాక్  మార్కెట్ల రోజువారీ కదలికలకు అనుగుణంగా ఈ ఫండ్స్ కూడా తీవ్రమైన ఒడిదుడుకులకు గురవుతుంటాయి. మీరు తొలిసారిగా ఇన్వెస్ట్ చేస్తున్నందున, రిస్క్ తక్కువగా ఉండాలనుకుంటున్నందున హైబ్రిడ్ ఈక్విటీ ఓరియంటెడ్, లేదా బ్యాలెన్స్‌డ్ ఫండ్స్‌ను పరిశీలించవచ్చు. ఈ ఫండ్స్ తమ నిధుల్లో కనీసం 65 శాతం వాటాను ఈక్విటీల్లో, మిగిలిన వాటాను డెట్ ఇన్‌స్ట్రుమెంట్స్‌లో పెట్టుబడి పెడతాయి. స్టాక్ మార్కెట్లు పెరిగినప్పుడు ఈ ఈక్విటీ వాటా అధిక వృద్ధిని అందిస్తుంది. స్టాక్‌మార్కెట్లు కుదేలైనప్పుడు డెట్ ఇన్‌స్ట్రుమెంట్స్ కుషన్‌గా పనిచేస్తాయి. అయితే స్టాక్ మార్కెట్లు కదం తొక్కుతున్నప్పుడు మామూలు ఈక్విటీ ఫండ్స్‌తో పోల్చితే  ఈ హైబ్రిడ్ ఈక్విటీ ఓరియంటెడ్, లేదా బ్యాలెన్స్‌డ్ ఫండ్స్  కొంచెం డల్‌గా అనిపిస్తాయి. అయితే పెట్టుబడి వృద్ధి, రాబడి, భద్రత వంటి అంశాల పరంగా చూసినప్పుడు ఇవి ఉత్తమమైనవని చెప్పవచ్చు. అందుకని రెండు ఉత్తమమైన బ్యాలెన్స్‌డ్ ఫండ్స్‌ను ఎంచుకోండి. వాటిల్లో సిప్ ద్వారా మదుపు చేయండి. 
  
  నేను ఒకేసారి పెద్ద మొత్తంలో పెట్టుబడి పెట్టాలనుకుంటున్నాను. ఈ సొమ్ములు నాకు నా కొడుకు విద్యావసరాల నిమిత్తం 2015 జూన్‌కల్లా అవసరం. బ్యాంక్ ఫిక్స్‌డ్ డిపాజిట్‌లాగా సురక్షితమైన ఇన్వెస్ట్‌మెంట్ మార్గాలను సూచించండి. నేను 30 శాతం ట్యాక్స్ స్లాబ్‌లో ఉన్నాను?
  - శ్రీకాంత్ రెడ్డి, కరీంనగర్
  బ్యాంక్ ఫిక్స్‌డ్ డిపాజిట్లలాగా పెట్టుబడులకు భద్రతను, వృద్ధిని ఇస్తామని ఏ మ్యూచువల్ ఫండ్ గ్యారంటీనివ్వదు. సాధారణంగా అయితే ఇలాంటి ప్రశ్నలకు డైనమిక్ బాండ్ ఫండ్స్ లేదా షార్ట్‌టర్మ్ ఫండ్స్‌లో ఇన్వెస్ట్ చేయమని సూచిస్తాం. కానీ గత కొద్ది నెలలుగా విదేశీ సంస్థాగత ఇన్వెస్టర్లు ఈ ఫండ్స్ నుంచి నిధులు వెనక్కి తీసుకుంటున్నందున ఈ ఫండ్స్ ఎన్‌ఏవీ రుణాత్మకంగా ఉంటోంది. ఇలాంటి పరిస్థితుల్లో ఫిక్స్‌డ్ మెచ్యూరిటీ ప్లాన్(ఎఫ్‌ఎంపీ)లను పరిశీలించవచ్చు. పన్ను ప్రయోజనాల నిమిత్తం బ్యాంక్ ఫిక్స్‌డ్ డిపాజిట్లకు ప్రత్యామ్నాయంగా వీటిని పరిగణిస్తారు. ఎఫ్‌ఎంపీలు క్లోజ్డ్ ఎండెడ్ ఫండ్స్. న్యూఫండ్‌ఆఫర్(ఎన్‌ఎఫ్‌ఓ) ద్వారానే వీటిల్లో పెట్టుబడులు పెట్టాలి. నిర్దేశిత గడువు తర్వాతనే వీటిని రిడీమ్ చేసుకోవాలి. వీటి రాబడులను ముందే అంచనా వేయవచ్చు.
  
   స్వల్పకాలిక రాబడులు కావాలనుకునే ఇన్వెస్టర్లు వీటిల్లో పెట్టుబడులు పెడతారు. ఎఫ్‌ఎంపీలు తమ మెచ్యూరిటీ కాల వ్యవధి ఉండే సాధనాల్లోనే ఇన్వెస్ట్ చేస్తాయి. అంటే పది నెలల మెచ్యూరిటీ ఉండే ఎఫ్‌ఎంపీలు అదే కాలవ్యవధి ఇన్‌స్ట్రుమెంట్స్‌లో, మూడు నెలల మెచ్యూరిటీ ఉండే ఎఫ్‌ఎంపీలు అదే కాలవ్యవధి ఉండే ఇన్‌స్ట్రు మెంట్స్‌లో ఇన్వెస్ట్ చేస్తాయి. వడ్డీరేట్లలో తేడాలు ఉన్నప్పటికీ, ఇవి ఇచ్చే రాబడులను ముందే అంచనా వేయవచ్చు. ప్రస్తుతానికి ఈ ఫండ్స్ 9.75 శాతం నుంచి 10 శాతం రాబడులనిస్తున్నాయి. ఎఫ్‌ఎంపీల్లో లాంగ్ టర్మ్ గెయిన్స్ కనుక మీరు పొందితే ఇండెక్సేషన్ ప్రయోజనాలు కూడా మీకు అందుతాయి. అందుకే ఇవి బ్యాంక్ ఫిక్స్‌డ్ డిపాజిట్ల కంటే కూడా పన్ను పరంగా ప్రయోజనకరమైనవని చెప్పవచ్చు. మీకు సొమ్ములు కావలసిన కాలవ్యవధి ఉండే ఎఫ్‌ఎంపీని ఎంచుకొని, దాంట్లో పెట్టుబడులు పెట్టండి. 
  


 నా వయస్సు 43 సంవత్సరాలు. నా వార్షిక వేతనం రూ.12 లక్షలు. రూ. కోటి టెర్మ్‌ప్లాన్‌లో పెట్టుబడులు పెట్టాలనుకుంటున్నాను. చౌకలో దొరికే ఉత్తమ టెర్మ్‌ప్లాన్‌ను సూచించండి. 
  - రామస్వామి, భద్రాచలం
  
  చిన్న వయస్సులోనే బీమా పాలసీలు తీసుకోవడం ఉత్తమం. ఎందుకంటే ప్రీమియం తక్కువగా ఉంటుంది. అయితే ఆలస్యమైనా సరే బీమా పాలసీ తీసుకోవడం మాత్రం మరువద్దు. ఇక మీ విషయానికొస్తే, వ్యయాలు ఆదా చేయడం కోసం టెర్మ్ పాలసీని ఆన్‌లైన్‌లో కొనుగోలు చేయడం మంచిది. ఏజెంట్ల ప్రమేయం ఉండదు. కాబట్టి వారి కమీషన్లు తదితర ఖర్చులుండవు ప్రీమియం తక్కువగా ఉంటుంది.  హెచ్‌డీఎఫ్‌సీ క్లిక్2ప్రొటెక్ట్, అవైవా ఐ-లైఫ్, ఐసీఐసీఐ ప్రు ఐకేర్ ఇవి కొన్ని ఉత్తమమైన ఆన్‌లైన్ టెర్మ్ పాలసీలు. ఇక వేర్వేరు బీమా సంస్థల నుంచి వేర్వేరు టర్మ్ (కనీసం రెండు)పాలసీలు తీసుకోవడం ఉత్తమం. మీ రిటైర్మెంట్ వరకూ లేదా మీ కొడుకో, కూతురో సంపాదనా పరుడయ్యేంత వరకూ మీరు ప్రొటక్షన్ తీసుకోవాలి. సింగిల్ ప్రీమియం పాలసీ బదులు రెగ్యులర్ ప్రీమియం పాలసీ తీసుకోవడం మంచిది. ఎందుకంటే రెగ్యులర్ ప్రీమియం పాలసీతో పోల్చితే సింగిల్ ప్రీమియం పాలసీ ఖరీదెక్కువ. మీరు సంపూర్ణ ఆరోగ్యవంతుడై ఉండి, పొగ తాగని వారైతేనే ఈ ప్రీమియంలు వర్తిస్తాయి. ఒకవేళ వేరే ఏమైనా ఆరోగ్య సమస్యలున్నట్లయితే ప్రీమియం పెరిగే అవకాశాలుంటాయి. 
  
  ఎఫ్‌ఎంపీల నెట్ అసెట్ వాల్యూ(ఎన్‌ఏవీ) రుణాత్మకంగా ఉన్న సందర్భాల్లో ఏం చేయాలి?                                
  -పద్మిని, బెంగళూరు
  ఫిక్స్‌డ్ మెచ్యూరిటీ ప్లాన్స్(ఎఫ్‌ఎంపీ)లు దాదాపు బ్యాంక్ ఫిక్స్‌డ్ డిపాజిట్లలాంటివే. బ్యాంక్ ఎఫ్‌డీలకు ఎంత వడ్డీనిచ్చేదీ బ్యాంకులు ముందుగానే వెల్లడిస్తాయి. ఈ ఎఫ్‌ఎంపీల ఈ రిటర్న్‌లు సూచనాత్మకంగానే ఉంటాయి. కచ్చితంగా ఇంత ఇస్తామని మ్యూచువల్ ఫండ్ సంస్థలు వెల్లడించకపోయినప్పటికీ,  ఇన్వెస్టర్లకు ఏడాదికి 9.75 శాతం నుంచి 10 శాతం వరకూ రిటర్న్‌లు  వచ్చే అవకాశాలున్నాయి. 2008 సంక్షోభానికి ముందు ఫండ్ కంపెనీలు ఇండికేటివ్ రిటర్న్‌లు ఆఫర్ చేసేవి. దీనిని ప్రస్తుతం సెబీ రద్దు చేసింది. ఏది ఏమైనా ఇన్వెస్టర్లకు ఏడాదికి 9.75 శాతం నుంచి 10 శాతం వరకూ రిటర్న్‌లు గ్యారంటీగా వస్తాయి.
  
   ఎఫ్‌ఎంపీలు ఫిక్స్‌డ్ ఇన్‌కమ్ సెక్యూరిటీస్‌లో ఇన్వెస్ట్ చేస్తాయి. సర్టిఫికెట్ ఆఫ్ డిపాజిట్స్(సీడీ), కమర్షియల్ పేపర్స్(సీపీ), మనీ మార్కెట్ ఇన్‌స్ట్రుమెంట్స్, కార్పొరేట్ బాండ్స్, ఒక్కోసారి బ్యాంక్ ఫిక్స్‌డ్ డిపాజిట్లలో కూడా ఎఫ్‌ఎంపీలు ఇన్వెస్ట్ చేస్తాయి. ఎఫ్‌ఎంపీల మెచ్యూరిటీ కాలాన్ని బట్టి పై ఇన్‌స్ట్రుమెంట్స్‌లో కలిపిగాని, విడివిడిగా కానీ ఫండ్ సంస్థలు ఇన్వెస్ట్ చేస్తాయి. సాధారణంగా వీటి మెచ్యూరిటీ ఒక నెల నుంచి మూడేళ్ల వరకూ ఉంటుంది. చాలా మంది ఇన్వెస్టర్లు స్వల్పకాలిక రాబడుల కోసం ఎఫ్‌ఎంపీల్లో పెట్టుబడులు పెడతారు. వీటితో పాటు పన్ను ప్రయోజనాలు కూడా బాగానే ఉంటాయి.  ఎఫ్‌ఎంపీలు క్లోజ్డ్ ఎండ్ స్కీమ్‌లు కాబట్టి వీటిని న్యూ ఫండ్ ఆఫర్(ఎన్‌ఎఫ్‌వో) సమయంలోనే కొనుగోలు చేయాల్సి ఉంటుంది. ఇవి మెచ్యూరిటీ అయ్యేదాకా వీటినుంచి వైదొలిగే అవకాశం లేదు.  ఎక్స్ఛేంజ్ ద్వారా మాత్రమే వైదొలిగే అవకాశం ఉంటుంది. ఫిక్స్‌డ్ మెచ్యూరిటీ ప్లాన్స్(ఎఫ్‌ఎంపీ) ఇన్వెస్ట్ చేసిన రుణ పత్రాలు మార్క్-టు-మార్కెట్‌గా మారిన పరిస్థితుల్లో ఎఫ్‌ఎంపీల ఎన్‌ఏవీలు రుణాత్మకంగా ఉంటాయి. సంబంధిత ఎఫ్‌ఎంపీ అసలైన విలువను ఈ ఎన్‌ఏవీ వెల్లడిస్తుంది. ఎఫ్‌ఎంపీల ఎన్‌ఏవీలు రుణాత్మకంగా మారినప్పటికీ, ఇన్వెస్టర్లు ఎలాంటి ఆందోళన చెందాల్సిన పనిలేదు. 
  
  టెర్మ్ ప్లాన్ వార్షిక ప్రీమియం(రూ.)
  హెచ్‌డీఎఫ్‌సీ లైఫ్ క్లిక్2ప్రొటెక్ట్ రూ. 17,712
  ఐసీఐసీఐ ప్రు ఐకేర్ రూ. 16,450
  అవైవా ఐ-లైఫ్ రూ. 9,275
   (రూ.50 లక్షల పాలసీ, 20 ఏళ్ల టెర్మ్ ప్లాన్)
  


 సిప్ విధానంలో 2011 నుంచి 5 ఫండ్స్‌లో పెట్టుబడులు పెడుతున్నాను. అవి హెచ్‌డీఎఫ్‌సీ గ్రోత్, హెచ్‌డీఎఫ్‌సీ చిల్డ్రన్స్ గిఫ్ట్, రిలయన్స్ గ్రోత్, యూటీఐ డివిడెండ్ ఈల్డ్, ఫ్రాంక్లిన్ ఇండియా బ్లూ చిప్ ఫండ్. దీర్ఘకాలిక పెట్టుబడులకు ఈ ఫండ్స్ సరైనవేనా? మీ అభిప్రాయం చెప్పండి? 
  - నరసింగరావు, వరంగల్
  
  మీరు పెట్టుబడులు పెడుతున్న మొత్తం 5 ఫండ్స్‌లో మూడింటికి-యూటీఐ డివిడెండ్ ఈల్డ్, ఫ్రాంక్లిన్ ఇండియా బ్లూచిప్, హెచ్‌డీఎఫ్‌సీ చిల్డ్రన్ గిఫ్ట్ ఫండ్‌లకు 4/5 స్టార్ రేటింగ్ ఉంది. ఇక మిగిలిన రెండింటికి-రిలయన్స్ గ్రోత్, హెచ్‌డీఎఫ్‌సీ గ్రోత్‌లకు 2/3 స్టార్ రేటింగ్ ఉంది. గత ఐదేళ్లుగా రిలయన్స్ గ్రోత్ ఫండ్ సగటు వార్షిక రాబడి 3.78 శాతంగా ఉంది. ఈ కేటగిరి ఫండ్స్ 6.16 శాతం రాబడులనిచ్చాయి. ఈ ఫండ్ పనితీరు ఆశాజనకంగా లేనందున ఈ ఫండ్ నుంచి వైదొలగవచ్చు. గత ఏడాది కాలాన్ని పరిగణనలోకి తీసుకుంటే మొత్తం 73 లార్జ్ అండ్  మిడ్‌క్యాప్ ఈక్విటీ ఫండ్స్‌ల్లో హెచ్‌డీఎఫ్‌సీ గ్రోత్ ఫండ్ 51వ స్థానంలో ఉంది. ఈ కేటగిరి ఫండ్స్ 13 శాతం క్షీణిస్తే ఈ ఫండ్ 17 శాతం క్షీణించింది. 
  
 ఈ ఫండ్ తన పెట్టుబడుల్లో 64 శాతం వాటాను లార్జ్ క్యాప్ స్టాక్స్‌లో ఇన్వెస్ట్ చేసింది. స్టాక్ మార్కెట్లు ఒడిదుడుకులుగా ఉండడమే దీనికి కారణం. గత ఐదేళ్ల పనితీరును పరిగణనలోకి తీసుకుంటే, మంచి రాబడినే ఆర్జించినట్లు లెక్క. ఈ ఫండ్ పనితీరు మరింత దిగజారితే ఈ ఫండ్ నుంచి వైదొలగవచ్చు. మీ పోర్ట్‌ఫోలియోలో 91% పెట్టుబడులు ఈక్విటీలోనూ, 4% డెట్ ఇన్‌స్ట్రు మెంట్స్‌లోనూ, మిగిలినవి నగదు, సంబంధిత విభాగాల్లో ఉన్నాయి. ఇక మీ ఈక్విటీ పోర్ట్‌ఫోలియోలో 63% లార్జ్ క్యాప్ స్టాక్స్‌లోనూ, 24% మిడ్‌క్యాప్ స్టాక్స్‌లోనూ,12% స్మాల్‌క్యాప్ స్టాక్స్‌లోనూ ఉన్నాయి. మొత్తం మీ పోర్ట్‌ఫోలియోలో 156 స్టాక్స్ ఉన్నాయి. 
  
  ఇతర మ్యూచువల్ ఫండ్స్ నుంచి పెట్టుబడులను ఆర్బిట్రేజ్ ఫండ్‌కు మార్చాలనుకుంటున్నాను.  ఆర్బిట్రేజ్ ఫండ్స్ వల్ల ఏమైనా ప్రయోజనాలుంటాయా?  అలా మారితే ఎలాంటి పన్ను వ్యవహారాలు ఎలా ఉంటాయి. 
 - నందిని, హైదరాబాద్
  
  ఇతర మ్యూచువల్ ఫండ్స్ నుంచి  పెట్టుబడులను ఆర్బిట్రేజ్ ఫండ్‌కు సిస్టమాటిక్ ట్రాన్స్‌ఫర్ ప్లాన్ ద్వారా బదిలీ చేయడం మంచి ఐడియా. ఫలితంగా డెట్ ఫండ్స్‌లాగా భద్రత, ఈక్విటీ ఫండ్స్‌లాగా పన్ను ప్రయోజనాలు లభిస్తాయి. ఆర్బిట్రేజ్ ఫండ్స్ షేర్లను కొనుగోలు చేయడం, అమ్మకం చేస్తూ ఉంటాయి. ఈ కొనుగోళ్లు, అమ్మకాల లావాదేవీల్లో తేడా ద్వారా, క్యాష్, డెరివేటివ్స్ మార్కెట్‌ల మధ్య ఉండే ధరల్లో తేడా ద్వారా ఈ ఫండ్స్ ప్రయోజనాలు పొందుతాయి. 
  
 ఈక్విటీ ఫండ్స్ కేటగిరిలోకి వచ్చే ఈ ఫండ్స్ కారణంగా ఈక్విటీ పన్ను ప్రయోజనాలు లభిస్తాయి. అర్బిట్రేజ్ ఫండ్స్ డెట్ ఇన్‌స్ట్రుమెంట్స్‌ల్లోనూ కొంతవరకూ  పెట్టుబడులు పెడతాయి కాబట్టి, స్టాక్ మార్కెట్ ఒడిదుడుకుల ప్రభావం పెద్దగా ఉండదు. వీటన్నింటి దృష్ట్యా వీటి నుంచి మంచి రాబడులే వస్తాయి. ట్రేడింగ్ కార్యకలాపాలు అధికంగా ఉన్నందున వీటికి చార్జీలు కూడా అధికంగానే ఉంటాయి. డివిడెండ్ ఆదాయం, దీర్ఘకాలిక క్యాపిటల్ గెయిన్స్ ఈ రెండింటిపై పన్నుల్లేనందున ఈక్విటీ ఫండ్స్‌కు పన్ను ప్రయోజనాలు బాగా ఉంటాయి. స్టాక్ మార్కెట్లు తీవ్ర ఒడుదుడుకులకు లోనవడం, ఒకోసారి మనం పెట్టిన పెట్టుబడులు హరించుకు పోవడం వంటి నష్టాలున్నాయి. వీటన్నింటినీ పరిగణనలోకి తీసుకుంటే ఆర్బిట్రేజ్ ఫండ్స్ ఉత్తమమే. 
  
  నేను ప్రవాస భారతీయుణ్ని. గత 13 ఏళ్లుగా మ్యూచువల్ ఫండ్స్‌లో పెట్టుబడులు పెడుతున్నాను. నేను భారత్‌కు వచ్చి స్థిరపడుదామనుకుంటున్నాను. ఎన్నారై హోదా నుంచి నివాసిత భారతీయుడిగా మారిన విషయాన్ని మ్యూచువల్ ఫండ్ సంస్థలకు తెలియజేయాల్సి ఉంటుందా?   వివరించగలరు. 
  - అన్వేష్, కాకినాడ
  
  మీరు ఎన్నారై హోదా నుంచి నివాసిత భారతీయుడి హోదాకు మారితే ఆ విషయాన్ని మీరు పెట్టుబడులు పెడతున్న మ్యూచువల్ ఫండ్ సంస్థలకు తెలియజేయాల్సి ఉంటుంది. మీ అసెట్ మేనేజ్‌మెంట్ కంపెనీ(ఏఎంసీ)కి ఒక దరఖాస్తు రాస్తే సరిపోతుంది. ఈ దరఖాస్తును జతచేసి మీ ఏఎంసీ మీ బ్యాంక్ అకౌంట్‌ను అప్‌డేట్ చేస్తుంది. నో యువర్ కస్టమర్ దరఖాస్తులో కూడా మీ రెసిడెంట్ స్టేటస్‌ను మార్చుకోవలసి ఉంటుంది.