సాక్షి, రంగారెడ్డి : తెలంగాణ రాష్ట్రంలో ఎన్నికలు ఎప్పుడు వచ్చినా ఉమ్మడి రంగారెడ్డి జిల్లాలో 14 అసెంబ్లీ స్థానాలు టీఆర్‌ఎస్‌ పార్టీ గెలుస్తుందని రవాణా శాఖా మంత్రి మహేందర్‌ రెడ్డి అన్నారు. బుధవారం రంగారెడ్డి జిల్లా నార్సింగిలో ‘‘నార్సింగి మార్కెట్‌ కమిటీ’’ ప్రమాణ స్వీకార కార్యక్రమంలో మంత్రి మహేందర్‌ రెడ్డి, ఎమ్మెల్యే ప్రకాష్‌ గౌడ్‌ పాల్గొన్నారు. ఈ సందర్భంగా మహేందర్‌ రెడ్డి మాట్లాడుతూ.. రాజేంద్రనగర్‌ నియోజకవర్గం నుండి భారీ మెజార్టీతో మళ్లీ ప్రకాష్‌ గౌడ్‌ గెలుపు ఖాయమని మహేందర్‌ రెడ్డి జోస్యం చెప్పారు. నార్సింగి మార్కెట్‌ కమిటీ ఛైర్మన్‌గా చంద్రశేఖర్‌ రెడ్డి, వైస్‌ ఛైర్మన్‌గా అన్నపూర్ణ, డైరక్టర్లను మహేందర్‌ రెడ్డి ప్రమాణ స్వీకారం చేయించారు. 

సాక్షి, సిద్దిపేట/గజ్వేల్‌: రాజీవ్‌ రహదారి రక్తమోడింది! నడిరోడ్డుపై మరణ మృదంగం మోగింది. బస్సు డ్రైవర్‌ నిర్లక్ష్యానికి 11 మంది నిండు ప్రాణాలు బలయ్యాయి. 30 మందికి తీవ్ర గాయాలయ్యాయి. చనిపోయిన 11 మందిలో ఒకే కుటుంబానికి చెందినవారు ఎనిమిది మంది ఉన్నారు. సిద్దిపేట జిల్లా గజ్వేల్‌ మండలం రిమ్మనగూడ వద్ద శనివారం సాయంత్రం ఈ ఘోర ప్రమాదం చోటుచేసుకుంది. తొలుత బస్సు డ్రైవర్‌ లారీని ఢీకొట్టడం.. ఆ లారీ కుడి వైపునకు ఎగిరి ఎదురుగా వస్తున్న మరో లారీని ఢీకొట్టడం.. అదే సమయంలో ఓ క్వాలిస్‌ దూసుకురావడంతో లిప్తపాటులో పెను ప్రమాదం సంభవించింది.  ఇందులో క్వాలిస్‌లో ప్రయాణిస్తున్న సంగారెడ్డి జిల్లా పెద్దమ్మగూడెం గ్రామానికి చెందిన పత్రికా విలేకరి గొర్ల లక్ష్మణ్‌ (40)తోపాటు అతని కుటుంబసభ్యులు ఏడుగురు, బస్సులో హైదరాబాద్‌ నుంచి మంచిర్యాల వెళ్తున్న ముగ్గురు అక్కడికక్కడే మృతి చెందారు. లక్ష్మణ్‌ బంధువర్గానికి చెందిన ఓ ఆరేళ్ల బాలుడు గాంధీ ఆస్పత్రిలో చికిత్స పొందుతూ మృతి చెందాడు. ప్రమాదంపై మంత్రి మహేందర్‌రెడ్డి విచారణకు ఆదేశించారు. మృతుల కుటుంబాలకు రూ.5 లక్షల చొప్పున ఎక్స్‌గ్రేషియా ప్రకటించారు. ఎలా జరిగింది?  మంచిర్యాల డిపోకు చెందిన టీఎస్‌ 19జెడ్‌ 0012 నంబర్‌ రాజధాని ఎక్స్‌ప్రెస్‌ సికింద్రాబాద్‌ జూబ్లీ బస్‌స్టేషన్‌లో మధ్యాహ్నం 3 గంటలకు మంచిర్యాలకు బయల్దేరింది. గంట తర్వాత గజ్వేల్‌ పట్టణం దాటిన తర్వాత రిమ్మనగూడ ఫార్మసీ కళాశాల సమీపంలోకి చేరుకుంది. ఇదే సమయంలో సిద్దిపేట వైపు వెళ్తున్న లారీ(ఎంపీ 28హెచ్‌1945)ని ఓవర్‌ టేక్‌ చేయబోతూ ఢీకొట్టి బోల్తా పడింది. బస్సు ఢీకొట్టడంతో లారీ డివైడర్‌ను దాటుకొని రోడ్డుకు అవతలి వైపు దూసుకొచ్చి, సిద్దిపేట నుంచి హైదరాబాద్‌ వైపు వెళ్తున్న మరో లారీ (కంటైనర్‌)ని ఢీకొట్టింది. అంతటితో ఆగకుండా సిద్దిపేట వైపు ముందుకు కదిలింది. ఇదే సమయంలో కొమురవెళ్లి గుడిలో పూజలు చేసుకొని గజ్వేల్‌ వైపు వస్తున్న క్వాలిస్‌ ఈ లారీని ఢీకొట్టింది.  ఈ ప్రమాదంలో క్వాలిస్‌ నుజ్జునుజ్జు అయింది. ఇందులో ప్రయాణిస్తున్న గొర్ల లక్ష్మణ్, తల్లి గండమ్మ (65), తండ్రి మల్లయ్య (67), కుమార్తె నిహారిక (5)తోపాటు మెదక్‌ జిల్లా తుప్రాన్‌ మండలం వెంకటరత్నాపూర్‌ గ్రామానికి చెందిన లక్ష్మణ్‌ అత్త ఇల్టం సత్తమ్మ (60), బావమరిది కుమారుడు శ్రీనివాస్‌ (8), తుఫ్రాన్‌కు చెందిన సమీప బంధువు గాజు సుశీల (62) చనిపోయారు. అలాగే బస్సు బోల్తా పడటంతో అందులో ప్రయాణిస్తున్న ఆసిఫాబాద్‌కు చెందిన పరండి రాహుల్‌ (35), గోదావరిఖని లక్ష్మీనగర్‌కు చెందిన సాయినిఖిల్‌ (25), కరీంనగర్‌కు చెందిన సింధుజ (26) మృతి చెందారు.  క్వాలిస్‌లో ప్రయాణిస్తున్న లక్ష్మణ్‌ భార్య పుష్పలత, కుమారుడు ఆకాశ్, డైవర్‌ నర్సింహులుతోపాటు బస్సులో గాయపడ్డ ప్రయాణికులకు గజ్వేల్‌ ప్రభుత్వాసుపత్రిలో ప్రథమ చికిత్స నిర్వహించి మెరుగైన వైద్యం కోసం గాంధీ, యశోద అసుపత్రులకు తరలించారు. గాంధీలో చికిత్స పొందుతూ లక్ష్మణ్‌ బంధువర్గానికే చెందిన ఓంకార్‌ (6) అనే బాలుడు మృతిచెందాడు. ఈ బాలుడి తండ్రి నర్సింహులు కూడా ఇదే ఆస్పత్రిలో చికిత్స పొందుతున్నాడు.  మంత్రి హరీశ్‌రావు పరామర్శ  సంఘటన గురించి తెలుసుకున్న మంత్రి హరీశ్‌రావు వెంటనే సిద్దిపేట జిల్లా కలెక్టర్‌ వెంకట్రామిరెడ్డి, గడా ప్రత్యేకాధికారి హన్మంతరావు కలిసి ప్రమాద స్థలికి వెళ్లారు. అనంతరం గజ్వేల్‌ ఆసుపత్రికి వెళ్లి క్షతగాత్రులను పరామర్శించారు. ప్రమాదం దురదృష్టకరమని, బాధిత కుటుంబాలను ప్రభుత్వం ఆదుకుంటుందని చెప్పారు. మృతుల కుటుంబాలకు ప్రభుత్వం నుంచి రూ.5 లక్షల చొప్పున ఎక్స్‌గ్రేషియా అందచేస్తామని ప్రకటించారు. క్షతగాత్రులకు హైదరాబాద్‌లో మెరుగైన చికిత్స అందించేందుకు చర్యలు తీసుకుంటామని హామీ ఇచ్చారు.  డ్రైవర్‌ నిర్లక్ష్యమే..!  ప్రత్యక్ష సాక్షుల కథనం ప్రకారం ప్రమాదానికి డ్రైవర్‌ నిర్లక్ష్యమేనని తెలుస్తోంది. నిజానికి ఆర్టీసీకి చెందిన ఎక్స్‌ప్రెస్, లగ్జరీ బస్సులు 75–80 కిలోమీటర్లకు స్పీడ్‌లాక్‌ చేస్తారు. కానీ ప్రమాదం సమయంలో బస్సు అంతకన్నా వేగంగా వెళ్లిందని ప్రత్యక్ష సాక్షులు చెబుతున్నారు. బస్సు లారీని ఢీకొట్టిన తర్వాత కిందకు పడబోతుండగా డ్రైవర్‌ ఇష్టానుసారంగా టర్న్‌ చేయడంతో రౌండ్‌ తిరిగి బోల్తా కొట్టిందని ప్రయాణికులు చెబుతున్నారు.  హాహాకారాలు... ఆర్తనాదాలు  ప్రమాద స్థలం హాహాకారాలు, ఆర్తనాదాలతో దద్దరిల్లింది. క్షతగాత్రుల రోదనలు అందరినీ కంటతడి పెట్టించాయి. ప్రమాదం జరిగిన కొద్దిసేపటికే గజ్వేల్‌ ఇన్‌చార్జి ఏసీపీ మహేందర్‌ చేరుకొని వాహన శకలాల నుంచి మృతదేహాలను వెలికితీసే ప్రక్రియను చేపట్టారు. సిద్దిపేట అదనపు డీసీపీ నర్సింహారెడ్డి కూడా చేరుకొని పరిస్థితిని సమీక్షించారు. ఈ ప్రమాదంతో రాజీవ్‌ రహదారి సుమారు రెండున్నర గంటలు స్తంభించిపోయింది. నాలుగు కిలోమీటర్ల మేర వాహనాలు ఎక్కడికక్కడ నిలిచిపోయాయి.  బిడ్డా భయపడకు.... నేనున్నా!  బీటెక్‌ విద్యార్థినికి హరీశ్‌ భరోసా  రిమ్మనగూడ వద్ద జరిగిన రోడ్డు ప్రమాదంలో గాయాలపాలైన బీటెక్‌ విద్యార్థిని సాహితిని గజ్వేల్‌ ప్రభుత్వాసుపత్రిలో మంత్రి హరీశ్‌రావు పరామర్శించారు. మంచిర్యాలకు చెందిన ప్రభాకర్‌–పద్మావతి దంపతుల కూతురు హైద్రాబాద్‌ బాచుపల్లిలోని ఓ కళాశాలలో బీటెక్‌ చదువుతోంది. సెలవులు కావడంతో స్వగ్రామమైన మంచిర్యాలకు బయల్దేరింది. ప్రమాదంలో తలకు గాయాలై ఆమె గజ్వేల్‌ ఆసుపత్రిలో చికిత్స పొందుతుంది. ‘‘నీకేం కాదు.. మేమున్నాం.. అధైర్యపడవద్దంటూ..’’ అంటూ మంత్రి ఆమెకు భరోసానిచ్చారు.  

సాక్షి, హైదరాబాద్‌: తెలుగు రాష్ట్రాల మధ్య సరుకు రవాణా వాహనాలకు సింగిల్‌ పర్మిట్‌ అమలయ్యేలా చర్యలు తీసుకుంటామని రవాణా శాఖ మంత్రి మహేందర్‌రెడ్డి పేర్కొన్నారు. లారీలకు సంబంధించిన సమస్యలపై ఏర్పాటు చేసిన కమిటీ ఇప్పటికే సమావేశమైందని, వారంలో మరోసారి సమావేశమై సింగిల్‌ పర్మిట్‌పై చర్చించనున్నట్లు తెలిపారు. అనంతరం కమిటీ ఏపీకి వెళ్లి అక్కడి అధికారులతో చర్చించనున్నట్లు పేర్కొన్నారు. సింగిల్‌ పర్మిట్‌కు సంబంధించి గతంలో ఏపీ అధికారులతో కమి టీ జరిపిన చర్చలు సఫలం కాలేదని చెప్పారు. బుధవారం సచివాలయంలో రాష్ట్ర లారీ యజమానుల సంఘం ప్రతినిధులు, అధికారులతో మంత్రి సమీక్ష సమావేశం నిర్వహించారు. అధిక వేగం, పరిమితికి మించి సరుకు రవాణా చేసే వాహనాలపై చర్యలు తీసుకుంటామని హెచ్చరించారు. మార్కెట్లు, రైతుబజార్లలో సరుకు దింపే సమయంలో లారీల డ్రైవర్లను వేధించి వసూళ్లకు పాల్పడుతున్న వారిపై చర్యలు తీసుకునేలా జిల్లా కలెక్టర్లు, కార్మిక శాఖ కమిషనర్‌ను ఆదేశిస్తున్నట్టు చెప్పారు. 

సాక్షి, రంగారెడ్డి జిల్లా : ఉమ్మడి రంగారెడ్డి జిల్లాలో రూ. 50 కోట్లతో గోదాంల నిర్మాణం చేపట్టి రైతులను ఆదుకుంటామని రవాణా శాఖ మంత్రి మహేందర్‌ రెడ్డి అన్నారు. ఈ మంగళవారం శంకర్‌పల్లిలో రూ.30 కోట్లతో నిర్మించిన రైల్వే బ్రిడ్జి, రెండు కోట్ల నిధులతో చేపట్టిన మార్కెట్‌ అభివృద్ధి పనులను ప్రారంభించిన ఆయన ఈ సందర్భంగా రైతులకు భరోసా ఇచ్చారు. రాష్ట్రంలో రోడ్లు, మౌలిక సదుపాయాల కల్పనతో గ్రామీణ ప్రాంతాలను నగరాలకు దీటుగా తీర్చిదిద్దుతున్నామన్నారు.  హైదరాబాద్ - బీజాపూర్ అంతర్ రాష్ట్ర రోడ్డు విస్తరణ పనులు వేగవంతం చేయటంతో పాటు శంకర్‌పల్లిని నగర పంచాయితీగా ఏర్పాటు చేసి ముంబై-బెంగుళూరు జాతీయ రహదారులను కలిపేలా మరో రెండు లింక్ రోడ్ల నిర్మాణాలకు నిధులు అందిస్తామని తెలిపారు. శంకర్‌పల్లిలో ప్రభుత్వ జూనియర్ కళాశాల ఏర్పాటుకు కృషి చేస్తామన్నారు. దేశంలో రైతులకు 24 గంటల కరెంటు ఇచ్చిన ఘనత తెలంగాణ సీఎం కేసీఆర్‌కే దక్కుతుందని స్పష్టం చేశారు.  

జెడ్పీసెంటర్‌(మహబూబ్‌నగర్‌): స్థానిక సంస్థల్లో కొత్త రిజర్వేషన్లు అమలు చేయాలన్న ఆలోచనలో ప్రభుత్వం ఉందని పంచాయతీరాజ్‌ మంత్రి జూపల్లి కృష్ణారావు తెలిపారు. కొత్త రిజర్వేషన్ల ప్రకారమే పంచాయతీ ఎన్నికలు జరుగుతాయని పేర్కొన్నారు. మహబూబ్‌నగర్‌ జిల్లా కేంద్రంలో శనివారం సర్పంచ్‌ల ప్రాంతీయ సమ్మేళనం నిర్వహించారు. సమ్మేళనానికి ఉమ్మడి మహబూబ్‌నగర్, రంగారెడ్డి, నల్లగొండ జిల్లాకు చెందిన వెయ్యిమంది వరకు సర్పంచ్‌లు హాజరుకాగా మంత్రులు జూపల్లి, పట్నం మహేందర్‌రెడ్డి పాల్గొన్నారు. జూపల్లి మాట్లాడుతూ త్వరలోనే కొత్త పంచాయతీరాజ్‌ చట్టం అమలులోకి రానుందని వెల్లడించారు. పంచాయతీ ఎన్నికలు ప్రత్యక్షంగా నిర్వహించాలా లేక పరోక్షంగానా అన్నది ఇంకా నిర్ణయం తీసు కోలేదన్నారు. కొత్త చట్టం ద్వారా గ్రామాభివృద్ధిలో సర్పంచ్‌లదే కీలకపాత్ర ఉంటుందన్నారు.  అనేక సమస్యలకు పరిష్కారం  ఎన్నో వినూత్న కార్యక్రమాలను అమలు చేస్తూ దేశంలోనే తెలంగాణ రాష్ట్రం ఆదర్శంగా నిలుస్తోందని మంత్రి జూపల్లి అన్నారు. నిధులు ఖర్చు చేయడమే సర్పంచ్‌ల విధిగా భావించొద్దని, ప్రజలను సంఘటితం చేసి ఆదర్శ గ్రామాలుగా తీర్చిదిద్దేందుకు కృషి చేయాలని సూచించారు. దేశంలో ఏ రాష్ట్రంలో లేనటువంటి అభివృద్ధి కార్యక్రమాలు తెలంగాణలో జరుగుతున్నాయని రవాణా మంత్రి మహేందర్‌రెడ్డి అన్నారు. పల్లెలు బాగుపడితేనే దేశం బాగుపడుతుందని ఎంపీ జితేందర్‌రెడ్డి అన్నారు.  14వ ఆర్థిక సంఘం నుంచి రాష్ట్ర వ్యాప్తంగా గ్రామపంచాయతీలకు రూ.500 కోట్ల నిధులు విడుదలయ్యాయని పంచాయతీరాజ్‌ శాఖ కమిషనర్‌ నీతూ ప్రసాద్‌ వెల్లడించారు. 

చేవెళ్ల : తాము పండించిన కూరగాయలు, పూలను ఆర్టీసీ బస్సులలో తీసుకెళ్లేందుకు డ్రైవర్లు నిరాకరించటంతో రైతులు  చేవెళ్ల బస్‌స్టేషన్‌లో ఆందోళనకు దిగారు. గురువారం ఉదయం వివిధ గ్రామాలకు చెందిన రైతులు ఉదయం  మార్కెట్‌కు కూరగాయలు, పూలను తీసుకెళ్లేందుకు చేవెళ్ల బస్‌స్టేషన్‌కు వచ్చారు. అయితే కూరగాయలు, పూల మూటలను బస్సులలో ఎక్కించేందుకు బస్సు డ్రైవర్లు అడ్డు చెప్పటంతో రైతులు ఎలా వెళ్లాలని ప్రశ్నించారు. దీంతో  రైతులకు, డ్రైవర్‌కు మధ్య వాగ్వాదం చోటు చేసుకుంది. దీంతో రైతులు బస్సులను పోనివ్వకుండా ఆందోళనకు దిగారు. దాదాపు గంట పాటు బస్సులను నిలిపివేయడంతో ప్రయాణికులు ఇబ్బందులు పడ్డారు. దీంతో ఈ విషయాన్ని స్థానిక ప్రజాప్రతినిధులు రవాణశాఖ మంత్రి మహేందర్‌రెడ్డి దృష్టికి తీసుకెళ్లారు. స్పందించిన మంత్రి పంటలను బస్సులలో అనుమతించాలని ఆర్టీసీ ఆర్‌ఎంకు ఫోన్‌ ద్వారా ఆదేశించారు. అప్పటికే మండల కేంద్రంలో ట్రాఫిక్‌ నిలిచిపోయింది. పోలీసులొచ్చి రైతులకు నచ్చజెప్పి పూలు, కూరగాయల మూటలను బస్సులలో ఎక్కించి   పంపించారు. దీంతో రైతులు ఆందోళన విరమించారు.  

తాండూరు రూరల్‌ : నిరుద్యోగ యువతకు విభిన్నరంగాల్లో శిక్షణ ఇచ్చి వారికి ఉద్యోగ అవకాశాలు కల్పిస్తామని రాష్ట్ర రవాణాశాఖ మంత్రి మహేందర్‌రెడ్డి పేర్కొన్నారు. శుక్రవారం మండలంలోని జినుగుర్తి గేటు సమీపంలో రూర్బన్‌ నిధులు రూ.2 కోట్లతో స్కిల్‌ డెవలప్‌మెంట్‌ సెంటర్‌ నిర్మాణానికి ఆయన శుక్రవారం భూమి పూజ చేశారు. ఈ సందర్భంగా మంత్రి మాట్లాడుతూ.. తాండూరు ప్రాంతంలో యువతకు స్థానికంగా ఉన్న ఫ్యాక్టరీల్లో ఉద్యోగాలు కల్పిస్తామని తెలిపారు. నిరుద్యోగ యువతీయువకులకు ఉచితంగా శిక్షణ  ఇప్పించేందుకు ఈ సెంటర్‌ను ప్రారంభిస్తున్నామని ఆయన వివరించారు.   పెళ్లికోసం అప్పు చేయొద్దు    కూతురు పెళ్లి కోసం తల్లిదండ్రులు అప్పులు చేయొద్దని మంత్రి మహేందర్‌రెడ్డి సూచించారు. శుక్రవారం ఎంపీడీఓ కార్యాలయంలో ఆయన 79 కల్యాణలక్ష్మి, షాదీముబారక్‌ చెక్కులను లబ్ధిదారులకు పంపిణీ చేశారు. ప్రతి ఇంటికి ముఖ్యమంత్రి కేసీఆర్‌ పెద్దన్న పాత్ర పోషిస్తున్నారని చెప్పారు. ఈ కార్యక్రమంలో ఆర్డీఓ వేణుమాధవ్, ఎంపీపీ లక్ష్మమ్మ, జెడ్పీటీసీ రవిగౌడ్, తహసీల్దార్‌ రాములు, జినుగుర్తి సర్పంచ్‌ పాపమ్మ, ఎంపీటీసీ సభ్యురాలు బాలమణి, నాయకులు రాంలింగారెడ్డి, శ్యామప్ప, శ్రీనివాస్‌గౌడ్, అమృత్‌రెడ్డి ఉన్నారు.    

బషీరాబాద్‌(తాండూరు): తెలంగాణ, కర్ణాటక సరిహద్దు ప్రాంత రైతాంగం ప్రయోజనాల కోసం ప్రభుత్వాల మధ్య స్నేహపూర్వక సంబంధాలు కొనసాగిస్తామని రాష్ట్ర రవాణా శాఖ మంత్రి మహేందర్‌రెడ్డి, కర్ణాటక ఆరోగ్యశాఖ మంత్రి శరణు ప్రకాశ్‌ పాటిల్‌ వెల్లడించారు. మంగళవారం వికారాబాద్‌ జిల్లా బషీరాబాద్, కర్ణాటక సరిహద్దులోని హల్కోడ సమీపంలో కాగ్నా నదిపై అక్కడి ప్రభుత్వం రూ.5.10 కోట్లతో నిర్మించిన అంతర్‌రాష్ట్ర అనుసంధాన వంతెనను మంత్రులు ప్రారంభించారు. కర్ణాటకలోని జెట్టూరు వద్ద రూ.25.65 కోట్లతో నిర్మించతలపెట్టిన బ్రిడ్జి కంబ్యారేజీకి తెలంగాణ అనుమతులు ఇవ్వడంతో ఇద్దరు మంత్రులు శంకుస్థాపన చేశారు. మహేందర్‌రెడ్డి మాట్లాడుతూ తెలంగాణ నుంచి పొరుగు రాష్ట్రాలకు టీఎస్‌ ఆర్టీసీ 1,130 బస్సు సర్వీసులు నడుపుతోందని తెలిపారు. రాబోయే రోజుల్లో రాష్ట్ర సరహద్దులోని కర్ణాటకను అనుసంధానిస్తూ వంతెనలు, రోడ్లు నిర్మిస్తామని పేర్కొన్నారు. శరణు ప్రకాశ్‌ పాటిల్‌ మాట్లాడుతూ 371జే ఆర్టికల్‌ ప్రకారం హైదరాబాద్‌–కర్ణాటక సరిహద్దు ప్రాంత అభివృద్ధి బోర్డు ద్వారా దక్షిణ కర్ణాటకలోని గుల్బర్గా, బీదర్, యాద్గిర్, రాయ్‌చూర్, కొప్పడ్‌ జిల్లాల్లో నాలుగేళ్లలోనే రూ.4,500 కోట్లతో అభివృద్ధి పనులు జరిగాయన్నారు. 

సాక్షి, హైదరాబాద్‌: ఆర్టీసీలో పనిచేస్తున్న అద్దె బస్సు డ్రైవర్లకు కూడా ఈఎస్‌ఐ, పీఎఫ్‌ వసతి కల్పించేందుకు చర్యలు తీసుకోనున్నట్లు రాష్ట్ర రవాణా శాఖ మంత్రి పి.మహేందర్‌రెడ్డి తెలిపారు. శనివారం ఆర్టీసీ అద్దె బస్సు డ్రైవర్ల సంఘం ప్రతినిధులు తిరుపతిరెడ్డి, రాజు, ఇతర సభ్యులు మంత్రిని కలసి తమ సమస్యలు పరిష్క రించాలని కోరారు. దీనిపై మంత్రి స్పందిస్తూ సమస్యల పరిష్కారానికి చర్యలు తీసుకుంటానని హామీ ఇచ్చారు. భవిష్య త్తులో ఆర్టీసీలో డ్రైవర్ల నియామకం చేపట్టేప్పుడు అద్దె బస్సు డ్రైవర్లకు ప్రాధాన్యమివ్వనున్నట్లు వెల్లడిం చారు. ఆర్టీసీ బస్సు ప్రమాదాల్లో అద్దె బస్సుల సంఖ్య ఎక్కువగా ఉందని, వీటిని నియంత్రించేందుకు ఆ బస్సుల డ్రైవర్లు జాగ్రత్తలు తీసుకోవాలని సూచించారు. 


 సాక్షి, హైదరాబాద్‌ : ఇటీవల మంత్రి సమక్షంలో వంటిపై కిరోసిన్‌ పోసుకొని నిప్పంటించుకున్న టీఆర్‌ఎస్‌ నేత చికిత్స పొందుతూ మృతిచెందారు. వికారాబాద్‌ జిల్లా తాండూరు పట్టణ మాజీ అధ్యక్షుడు అయూబ్‌ ఖాన్‌ అపోలో ఆస్పత్రిలో చికిత్స పొందుతూ శుక్రవారం ఉదయం చనిపోయారు. ఉద్యమ కారులకు టీఆర్‌ఎస్‌ పార్టీలో సరైన గుర్తింపు దక్కడం లేదని తీవ్ర ఆవేదన వ్యక్తంచేస్తూ రాష్ట్ర మంత్రి మహేందర్‌రెడ్డి సమక్షంలోనే ఆగస్టు 30న వికారాబాద్‌ జిల్లా తాండూరులో జరిగిన పార్టీ మీటింగ్‌లో అయూబ్‌ ఖాన్‌ వంటిపై కిరోసిన్‌ పోసుకొని నిప్పంటించుకున్నారు.
 
 దీంతో ఆయన తల, ఛాతీ భాగాలు తీవ్రంగా కాలిపోయాయి. వెంటనే అక్కడున్న నాయకులు, కార్యకర్తలు, పోలీసులు మంటలను ఆర్పి జిల్లా ఆస్పత్రికి తరలించారు. స్థానిక వైద్యులు ప్రథమ చికిత్స చేసిన అనంతరం పరిస్థితి విషమంగా ఉండటంతో హైదరాబాద్‌కు ప్రత్యేక అంబులెన్స్‌లో తరలించారు. కాలిన గాయాలు తీవ్రతరం కావడంతో అపోలో ఆస్పత్రిలో గతకొన్ని రోజులుగా చికిత్స పొంతుదున్న ఆయూబ్ మృతిచెందారు. విషయం తెలుసుకున్న మంత్రి మహేందర్‌ రెడ్డి ఆస్పత్రికి చేరుకొని తన సంతాపం ప్రకటించారు. మృతిచెందిన నేత కుటుంబానికి అన్ని విధాలుగా అండగా ఉంటామని హామీ ఇచ్చారు.
 సంబంధిత కథనం
 పార్టీలో గుర్తింపు లేదని.. నిప్పంటించుకున్నారు


 - టీఆర్‌ఎస్‌ తాండూరు పట్టణ మాజీ అధ్యక్షుడి ఆత్మహత్యాయత్నం
 - మంత్రి మహేందర్‌రెడ్డి సమక్షంలోనే ఘటన పరిస్థితి విషమం.. హైదరాబాద్‌కు తరలింపు
  
 తాండూరు: పార్టీలో తనకు సరైన గుర్తింపు లేద ని.. నామినేటెడ్‌ పదవులు కూడా దక్కలేదంటూ మంత్రి మహేందర్‌రెడ్డి సమక్షంలోనే ఓ టీఆర్‌ఎస్‌ నాయకుడు ఒంటిపై కిరోసిన్‌ పోసుకొని నిప్పంటించుకున్నాడు. ఈ సంఘటన వికారాబాద్‌ జిల్లా తాండూరులో కలకలం సృష్టిం చింది. బుధవారం పట్టణంలో టీఆర్‌ఎస్‌ పార్టీ పట్టణ ముఖ్యకార్యకర్తల సమావేశం నిర్వహించారు. ఈ సమావేశానికి స్థానిక ఎమ్మెల్యే అయిన మంత్రి మహేందర్‌రెడ్డి హాజరయ్యారు. సమావేశం ప్రారంభం కాగానే.. మొదటగా తనకు మాట్లాడేందుకు అవకాశం ఇవ్వాలని పార్టీ పట్టణ మాజీ అధ్యక్షుడు అయూబ్‌ఖాన్‌ కోరగా.. ఇందుకు మంత్రి అంగీకరించారు.  
 
 అయూబ్‌ఖాన్‌ మాట్లాడుతూ టీఆర్‌ఎస్‌ పార్టీ ఆవిర్భావం నుంచి తాను కష్టపడి పనిచేశానని,  రాష్ట్రం కోసం ఎన్నో ఉద్యమాలు చేశానని,  టీఆర్‌ఎస్‌ పార్టీ పట్టణ అధ్యక్షుడిగా కూడా పని చేసినట్లు వివరించారు. తెలంగాణ రాష్ట్రం సాధించి టీఆర్‌ఎస్‌ ప్రభుత్వం ఏర్పాటైనా కూడా తమలాంటి ఉద్యమకారులకు గుర్తింపు లేదని అయూబ్‌ఖాన్‌ ఆవేదన వ్యక్తం చేశారు. కొత్తగా పార్టీలో వచ్చిన వారికి పదవులు దక్కుతున్నాయని, ఉద్యమ కారులకు నామినేటెడ్‌ పదవులు కూడా ఇవ్వడం లేదని చెప్పి తన ప్రసంగం ముగించి వెళ్లి కార్యకర్తల మధ్యలో కూర్చున్నాడు.
 
 అనంతరం సభ జరుగుతుండగా అయూబ్‌ఖాన్‌ ఒక్కసారిగా లేచి అప్పటికే తన వెంట తెచ్చుకున్న కిరోసిన్‌ను ఒంటిపై పోసుకుని నిప్పంటించుకున్నాడు. దీంతో తల, ఛాతీ భాగాలు తీవ్రంగా కాలి పోయాయి. వెంటనే అక్కడున్న నాయకులు, కార్యకర్తలు, పోలీసులు మంటలను ఆర్పి జిల్లా ఆస్పత్రికి తరలించారు. స్థానిక వైద్యులు ప్రథమ చికిత్స చేసిన అనంతరం పరిస్థితి విషమంగా ఉండటంతో హైదరాబాద్‌కు ప్రత్యేక అంబులెన్స్‌లో తరలించారు.
  
 ఉలిక్కిపడ్డ మంత్రి మహేందర్‌రెడ్డి
 టీఆర్‌ఎస్‌లో తనకు న్యాయం జరగడం లేదంటూ అయూబ్‌ఖాన్‌ ఒంటిపై కిరోసిన్‌ పోసుకొని నిప్పంటించుకోవడంతో అక్కడే ఉన్న మంత్రి మహేందర్‌రెడ్డి ఉలిక్కిపడ్డారు. ఒక్కసారిగా జరిగిన ఈ సంఘటనతో ఆయన షాక్‌కు గురయ్యారు. ఆ వెంటనే జిల్లా ఆస్పత్రికి చేరుకుని, వైద్యులతో మాట్లాడారు. అయూబ్‌ ఖాన్‌ పరిస్థితి విషమంగా ఉండటంతో ప్రత్యేక అంబులెన్స్‌లో హైదరాబాద్‌కు తరలించగా, మంత్రి మహేందర్‌రెడ్డి కూడా వెళ్లారు.  


 ముఖ్యమంత్రికి ప్రతిపాదిస్తాం.. మంత్రి మహేందర్‌రెడ్డి
 సాక్షి, హైదరాబాద్‌: కాలం చెల్లిన బస్సుల స్థానంలో కొత్తవి తిప్పేందుకు అదనంగా 1,500 కొత్త బస్సులను కొనుగోలు చేయనున్నట్లు రవాణా శాఖ మంత్రి మహేందర్‌రెడ్డి పేర్కొన్నారు. ఈ మేరకు సీఎం కేసీఆర్‌కు ప్రతిపాదనలు పంపిస్తామన్నారు. మంగళవారం సచివాలయంలో ఆర్టీసీ చైర్మన్‌ సోమారపు సత్యనారాయణ, రవాణా శాఖ ముఖ్య కార్యదర్శి సునీల్‌శర్మ, ఎండీ రమణారావు తదితర ఉన్నతాధికారులతో సమీక్షించారు. నష్టాలు వచ్చినా సేవలు విస్తరిస్తూనే డిపోలను లాభాల బాట పట్టించేందుకు కృషి చేయాలని అధికారులకు సూచించారు.
 
 సీఎం పలు సందర్భాల్లో ఆర్టీసీకి రూ.2 వేల కోట్లు ఇవ్వటంతో పరిస్థితి మెరుగైందన్నారు. ప్రస్తుతం 27 డిపోలు లాభాల్లో ఉన్నాయని, త్వరలో మరో 56 డిపోలు లాభాల బాట పట్టనున్నాయ న్నారు. కరీంనగర్, రంగారెడ్డి రీజియన్లు లాభాల్లో ఉండగా మహబూబ్‌నగర్, మెదక్‌ రీజియన్లలో నష్టాలొస్తున్నాయని, వాటిని సరిదిద్దాల్సిన అవసరముందన్నారు. వజ్ర బస్సుల పనితీరు మెరుగైందని, రామ గుండం, కరీంనగర్‌కు వజ్ర సేవలు విస్తరిస్తామన్నారు. ఆస్తుల అంశాలు తప్పితే 2 రాష్ట్రాల మధ్య విభజన ప్రక్రియ దాదాపు పూర్తి కావొచ్చిందని చెప్పారు.


 సిటీబ్యూరో: మెట్రో రైలు దూసుకొస్తోంది. ఎట్టకేలకు  ప్రయాణికులకు అందుబాటులోకి తెచ్చేవిధంగా హైదరాబాద్‌ మెట్రో రైల్‌ లిమిటెడ్‌ కార్యాచరణను సిద్ధం చేస్తోంది. నాగోల్‌ నుంచి  అమీర్‌పేట్‌ వరకు, మియాపూర్‌ నుంచి అమీర్‌పేట్‌ వరకు మొదటి దశ రైళ్లను పట్టాలెక్కించాలనేది హెచ్‌ఎంఆర్‌ ప్రతిపాదన. కానీ మెట్రో రైలు మార్గాలకు అనుగుణంగా బస్సులు నడిపేందుకు ఇప్పటి వరకు ఆర్టీసీ ఎలాంటి ప్రణాళికలను సిద్ధం చేయలేదు. మెట్రో రైలు అందుబాటులోకి వచ్చే నాటికి   కాలనీల నుంచి ప్రయాణికులకు మెట్రో స్టేషన్‌లకు తరలించేందుకు 100 మినీ బస్సులను ప్రవేశపెట్టనున్నట్లు రవాణాశాఖ మంత్రి మహేందర్‌రెడ్డి  స్వయంగా ప్రకటించారు. కానీ ఆ దిశగా ఒక్క అడుగు ముందుకు పడలేదు. మరోవైపు  మెట్రో, ఎంఎంటీఎస్, ఆర్టీసీల్లో ఉమ్మడి టిక్కెట్‌  వ్యవస్థపైనా  ఇప్పటి వరకు ఎలాంటి స్పష్టత లేదు. స్మార్ట్‌ కార్డు ద్వారా ప్రయాణికులు  ఆర్టీసీ, ఎంఎంటీఎస్, మెట్రో రైళ్లలో పయనించే సదుపాయాన్ని అందుబాటులోకి తెచ్చే అంశంపై కదలిక లేదు.  
 
 జాడలేని మినీ బస్సులు.....
 మెట్రో రాక  గ్రేటర్‌ ఆర్టీసీకి  అతి పెద్ద సవాల్‌గా మారనుంది. ఇప్పటికే  రోజుకు సుమారు రూ.96 లక్షల చొప్పున రూ.289 కోట్లకు పైగా ఆర్థిక నష్టాలను ఎదుర్కొంటున్న ఆర్టీసీకి ప్రయాణికుల ఉత్పత్తి మార్గాలుగా  భావించే ప్రధాన కారిడార్‌లలోనే మెట్రో రైళ్లు పరుగులు పెట్టనున్నాయి. ఈ నేపథ్యంలో మెట్రోకు అనుగుణమైన రవాణా సదుపాయాన్ని  అందజేయడమే ఆర్టీసీ ముందున్న కర్తవ్యం. ప్రస్తుతం సిటీబస్సుల్లో  ప్రతి రోజు 33 లక్షల మంది రాకపోకలు సాగిస్తున్నారు. మెట్రో రైళ్లు పూర్తిస్థాయిలో అందుబాటులోకి వస్తే సుమారు 16 లక్షల మందికి పైగా   ప్రయాణికులు మెట్రోవైపు వెళ్లనున్నారు. ఎల్‌బీనగర్‌–హైటెక్‌సిటీ, దిల్‌సుఖ్‌నగర్‌–పటాన్‌చెరు, కోఠీ–బీహెచ్‌ఈఎల్, ఉప్పల్‌– మియాపూర్, కేపీహెచ్‌బీ–సికింద్రాబాద్‌ వంటి అత్యధిక ఆదాయ మార్గాల్లోనే మెట్రో రైళ్లు అందుబాటులోకి రానున్న దృష్ట్యా  తక్షణమే ఆర్టీసీ భవిష్యత్తు కార్యాచరణకు సిద్ధం కావలసి ఉంది. ఈ  క్రమంలో  మెట్రో మార్గాలకు రెండు వైపులా ఉండే కాలనీల నుంచి ప్రయాణికులను చేరవేసేందుకు  100 మినీ బస్సులను  ప్రవేశపెట్టనున్నట్లు మంత్రి  ప్రకటించి ఏడాది దాటింది. కానీ ఇప్పటి వరకు ఒక్క బస్సు కూడా రోడ్డెక్కలేదు.  
 
 మినీయే బెటర్‌...
 మొదటి దశలో నాగోల్‌–అమీర్‌పేట్‌ (17 కి.మీ.), మియాపూర్‌–అమీర్‌పేట్‌ (13 కి.మీ.)మార్గాల్లో మెట్రో రైలు త్వరలో ప్రారంభమయ్యే అవకాశం ఉన్న దృష్ట్యా  ఈ రెండు లైన్‌లలో మెట్రో రైలుకు ప్రయాణికులను అందజేసే  ఫీడింగ్‌ రూట్‌ల (అనుసంధాన మార్గాల)పై ఆర్టీసీ  దృష్టిసారించవలసి ఉంది. నాగోల్‌–మెట్టుగూడ మార్గానికి రెండు వైపులా ఉన్న కాలనీలు, ఉద్యోగులు, విద్యార్థులు, చిరు వ్యాపారులు తదితర వర్గాల  ప్రజలు నివసించే  ప్రాంతాల నుంచి  ప్రయాణికులను మెట్రో రైలు స్టేషన్లకు చేరవేడయంలో ఈ ఫీడింగ్‌ రూట్స్‌ దోహదం చేస్తాయి. ఈ రెండు మార్గాల్లో వచ్చే ప్రతి మెట్రో స్టేషన్‌ను దృష్టిలో ఉంచుకొని ఆ స్టేషన్‌ చుట్టుపక్కల కాలనీల నుంచి ప్రయాణికులను మెట్రోకు తరలిస్తారు. దీంతో ఇప్పటి వరకు సిటీ బస్సు అందుబాటులో లేని కాలనీలకు, 40 ఫీట్ల రోడ్డు సదుపాయం ఉన్న ప్రాంతాలకు  మినీ బస్సులు ఎంతో ప్రయోజనకరంగా ఉంటాయి.  
 
 ప్రత్యామ్నాయ పరుగులు...
 ఇలా ఉండగా,  ప్రధాన కారిడార్‌లలోకి మెట్రో రైలు ప్రవేశిస్తున్నందున పొరుగు జిల్లాలకు, హెచ్‌ఎండీఏ పరిధిలోని శివారు ప్రాంతాలకు సిటీ సర్వీసులను విస్తరించే యోచనలో ఆర్టీసీ ఉంది. ప్రస్తుతం సబర్బన్‌ బస్సులు మాత్రమే వెళ్తున్న రూట్లలో  సిటీ లోకల్‌ బస్సులు తిరుగుతాయి. భువనగిరి, యాదగిరిగుట్ట, చౌటుప్పల్‌ వంటి దూర మార్గాలపై గ్రేటర్‌ ఆర్టీసీ దృష్టి సారించింది.
 
 వలయాకార మార్గాల్లో..
 ఫీడింగ్‌ రూట్స్‌తో పాటు రేడియల్‌ (వలయాకార) మార్గాల్లో  కూడా బస్సులు నడపాల్సి ఉంది. ఒక్క మెట్రో స్టేషన్‌కే కాకుండా రెండు, మూడు మెట్రో స్టేషన్‌లకు  ప్రయాణికులను తరలించేందుకు  ఈ రేడియల్‌ రూట్స్‌ దోహదం చేస్తాయి.ఈ మేరకు ఉప్పల్, మియాపూర్, ఎస్సార్‌నగర్‌ వంటి  ప్రధాన కేంద్రాల చుట్టూ ఉన్న కాలనీలు, ఎక్కువ శాతం ప్రయాణికులు రాకపోకలు సాగించే  ప్రాంతాలపైన ఆర్టీసీ గతంలోనే దృష్టి సారించింది. ఏయే  ప్రాంతాల నుంచి  ప్రయాణికులు  ప్రధాన మార్గంలోకి వస్తున్నారనే అంచనాలకు అనుగుణంగా బస్సులను ప్రవేశపెట్టాలి.  
 
 ఉప్పల్‌లోని కల్యాణపురి, ప్రశాంత్‌నగర్, బ్యాంక్‌కాలనీ వంటి ప్రాంతాలకు ప్రస్తుతం బస్సులు చాలా పరిమితంగా ఉన్నాయి. భవిష్యత్తులో  ఆ  ప్రాంతాల నుంచి ఎక్కువ మంది ప్రయాణికులు మెట్రో రైల్లో  ఇతర ప్రాంతాలకు రాకపోకలు సాగించనున్న దృష్ట్యా...ఈ కాలనీల నుంచి మెట్రోకు ప్రయాణికులను ఫీడింగ్‌ చేసే రవాణా వ్యవస్థగా æఆర్టీసీ సేవలందజేస్తుంది. ూ అలాగే నాగోల్‌ మెట్రో స్టేషన్‌కు అటు ఎల్‌బీనగర్, సాగర్‌రింగ్‌రోడ్డు, హయత్‌నగర్, బండ్లగూడ, జైపురికాలనీ, కొత్తపేట్‌ తదితర ప్రాంతాల్లోని కాలనీల నుంచి ప్రయాణికులను తరలిస్తారు. ూ మియాపూర్, ఎస్సార్‌నగర్‌ల చుట్టుపక్కల ఉన్న కాలనీల నుంచి కూడా ఇదే తరహాలో ఫీడింగ్‌రూట్లు, రేడియల్‌ రూట్లలో ప్రయాణికులను మెట్రోకు  అనుసంధానం చేస్తారు. ూ ఈ రెండు మార్గాల్లో  ఫీడింగ్‌ రూట్లు, రేడియల్‌ రూట్లపై త్వరలో స్పష్టత వచ్చే అవకాశం ఉంది.


 - తీసుకెళ్తానని రవాణా శాఖ మంత్రి మహేందర్‌రెడ్డి హామీ
 - హన్మకొండలో ఘనంగా ఆటో డ్రైవర్ల దినోత్సవం
  
 హన్మకొండ చౌరస్తా/జనగామ/ఖిలా వరంగల్‌: తెలంగాణ ఉద్యమంలో ఆటోడ్రైవర్ల పాత్ర మరువలేనిదని.. వారి న్యాయమైన సమస్యలను సీఎం కేసీఆర్‌ దృష్టికి తీసుకెళ్లి పరిష్కారానికి కృషి చేస్తా నని రాష్ట్ర రవాణా మంత్రి మహేందర్‌రెడ్డి అన్నారు. ప్రపంచ ఆటో డ్రైవర్ల దినోత్స వాన్ని పురస్కరించుకుని మంగళవారం హన్మకొండలో భారీ బహిరంగ సభ నిర్వ హించారు. అంతకుముందు మంత్రి జన గామ, మడికొండల్లో పలు కార్యక్రమాల్లో పాల్గొన్నారు. తెలంగాణ ఆటోడ్రైవర్ల యూనియన్‌ గౌరవ అధ్యక్షుడు గుడిమల్ల రవికుమార్‌ అ«ధ్యక్షతన జరిగిన సభలో ముందుగా ఆటోడ్రైవర్లు పలు సమస్యలను మంత్రి దృష్టికి తీసుకెళ్లారు.
 
 స్పందించిన మంత్రి త్వరలో అధికారులతో సమావేశం ఏర్పాటు చేసి స్పష్టమైన ఆదేశాలు జారీ చేస్తామన్నారు. బస్సు సౌకర్యంలేని ప్రాంతాల్లో ఆటో షెల్టర్లను నిర్మించేందుకు కృషి చేస్తాన న్నారు. సభా వేదిక నుంచి యూనియన్‌ ప్రవేశపెట్టిన 11 తీర్మానాలలో తన పరిధిలో ఉన్న సమస్యలను పరిష్కరించి.. మిగిలినవి సీఎం కేసీఆర్‌ దృష్టికి తీసుకెళ తానన్నారు.  రాష్ట్రంలో రూ.350 కోట్లతో కొత్తగా 1,400 బస్సులను కొనుగోలు చేసినట్లు మంత్రి తెలిపారు. ప్రతి జిల్లాలో ఐదు ఎకరాల స్థలంలో డ్రైవర్లకు శిక్షణ ఇచ్చేందుకు రూ.5 కోట్లతో కేంద్రాలను నిర్మించాలని సీఎం నిర్ణయం తీసుకున్నట్లు ఆయన వెల్లడించారు. 


 జనగామ: జిల్లా కేంద్రాల నుంచి రాజధాని హైదరాబాద్‌కు నేరుగా బస్సులు నడుపుతామని రవాణా శాఖ మంత్రి మహేందర్‌రెడ్డి తెలిపారు.  జనగామలోని రవాణా శాఖ కార్యాలయంలో హరిత హారం కార్యక్రమంలో భాగంగా ఆయన మంగళవారం మొక్కలు నాటారు. జనగామ డిపోకు వజ్ర ఏసీ బస్సులు అందిస్తున్నట్లు చెప్పారు. రాష్ట్రంలోని ప్రజా రవాణా లేని 1200 గ్రామాలకు రోడ్లు వేసి బస్సులు నడుపుతామని చెప్పారు.
  
 ప్రజల సహకారంతో హరితహారం కార్యక్రమం సామాజిక ఉద్యమంలా సాగుతోందన్నారు. మిషన్‌ భగీరథ, మిషన్‌ కాకతీయలతోపాటు హరితహారం వంటి సీఎం కేసీఆర్‌ కార్యక్రమాలు దేశానికి ఆదర్శంగా నిలుస్తాయని మంత్రి చెప్పారు. ఈ కార్యక్రమంలో ఎంఎల్ఏ ముత్తిరెడ్డి యాదగిరిరెడ్డి, శాసనమండలిలో ప్రభుత్వ విప్‌ బోడికుంటి వెంకటేశ్వర్లు, అధికారులు పాల్గొన్నారు.


 - ఎంఐఎం నాయకుడు హాదీ వివాదాస్పద వ్యాఖ్య
 - మంత్రి మహేందర్‌రెడ్డి సమక్షంలోనే గొడవ
  
 బషీరాబాద్‌ (తాండూరు): వికారాబాద్‌ జిల్లా తాండూరు పట్టణ శివారులో ఈద్గా ప్రాంగణంలో రంజాన్‌ సందర్భంగా సోమవారం ఉద్రిక్త వాతావరణం నెలకొంది. ఎంఐఎం తాండూరు పట్టణ అధ్యక్షుడు హాదీ వివాదాస్పద వ్యాఖ్యలు చేయడంతో ముస్లిం నేతలు ఆయన వైపు దూసుకొచ్చారు. మంత్రి మహేందర్‌రెడ్డి సమక్షంలోనే గొడవ జరిగింది. పోలీసులు అప్రమత్తంగా వ్యవహరించడంతో సమస్య సద్దు మణిగింది. తాండూరు ఈద్గా వద్ద సోమవారం ఉదయం రంజాన్‌ సందర్భంగా వేల సంఖ్యలో ముస్లింలు ప్రత్యేక ప్రార్థనలు చేశారు. రవాణాశాఖ మంత్రి మహేందర్‌రెడ్డి, తాండూరు మున్సిపల్‌ చైర్‌పర్సన్‌ సునీతా సంపత్, పలువురు ప్రజాప్రతినిధులు హాజరయ్యారు.
 
 ఈద్గాలో ప్రార్థనల అనంతరం ముస్లింలకు పండగ శుభాకాంక్షల కార్యక్రమాన్ని ముగించుకొని ఈద్గా ప్రాంగణంలో ఈద్గా కమిటీ సమావేశం ఏర్పాటు చేశారు. ఈ సందర్భంగా హాదీ మాట్లాడారు. ‘తాండూరులో ముస్లింలు కొందరు కడుపులో కత్తులను గుచ్చారు.. రానున్న రోజుల్లో మేమేంటో చూపిస్తాం.. చూడండి’(ఇటీవల మున్సిపల్‌ చైర్‌పర్సన్‌ ఎన్నికల విషయంలో మోసం చేశారనే నేపథ్యంలో) అంటూ వివాదాస్పద వ్యాఖ్యలు చేశాడు. దీంతో ఆగ్రహానికి గురైన పలువురు ముస్లిం నాయకులు ఒక్కసారిగా హాదీ వైపునకు దూసుకొచ్చారు. దీంతో ఉద్రిక్తత ఏర్పడింది. అప్రమత్తమైన డీఎస్పీ రామచంద్రుడు తదితరులు గొడవ పెద్దది కాకుండా అక్కడున్న వారిని పక్కకు తీసుకెళ్లారు.


 దర్శకుడు క్రిష్‌ వద్ద కో–డైరెక్టర్‌గా పని చేసిన రజినీకాంత్‌ ‘కాలేజ్‌ డేస్‌’ చిత్రంతో దర్శకునిగా మారారు. నూతన నటీనటులతో శ్రీలత నిర్మిస్తున్న ఈ సినిమా బుధవారం ప్రారంభమైంది. ముహూర్తపు సన్నివేశానికి పటేల్‌ కెమెరా స్విచ్చాన్‌ చేయగా, నిర్మాత మల్కాపురం శివకుమార్‌ క్లాప్‌ ఇచ్చారు. తెలంగాణ రాష్ట్ర రవాణా శాఖ మంత్రి మహేందర్‌ రెడ్డి స్క్రిప్ట్‌ని చిత్ర బృందానికి అందించారు.
 
 శ్రీలత మాట్లాడుతూ– ‘‘మా బ్యానర్‌లో ఇది రెండో సినిమా. మొదటి చిత్రాన్ని త్వరలో విడుదల చేస్తాం. కళాశాల నేపథ్యంలో మంచి సందేశంతో యూత్‌ని ఆకట్టుకునే విధంగా ‘కాలేజ్‌ డేస్‌’ ఉంటుంది’’ అన్నారు. ‘‘నా కథను నమ్మి శ్రీలతగారు దర్శకునిగా అవకాశం ఇచ్చినందుకు కృతజ్ఞతలు. జూలై మొదటి వారంలో హైదరాబాద్‌ పరిసర ప్రాంతాల్లో రెగ్యులర్‌ షూటింగ్‌ ప్రారంభిస్తాం’’ అన్నారు రజినీకాంత్‌. ఈ చిత్రానికి కెమెరా: ఎ.కె. ఆనంద్, ఎగ్జిక్యూటివ్‌ ప్రొడ్యూసర్‌ : పి. ఈశ్వర్‌ రావు.


 హైదరాబాద్‌: జ్ఞాన్‌పీఠ్ అవార్డు గ్రహీత, సాహితీ దిగ్గజం డాక్టర్‌ సి.నారాయణ రెడ్డి అంత్యక్రియలకు ప్రభుత్వం  ప్రత్యేక బస్సులు నడుపుతుందని రవాణా మంత్రి పట్నం మహేందర్ రెడ్డి తెలిపారు. సీఎం కేసీఆర్ ఆదేశాల మేరకు రాష్ట్రంలోని 31 జిల్లా కేంద్రాల నుండి హైదరాబాద్‌లోని దర్గా పరిసర మహాప్రస్థానానికి వచ్చే సినారే అభిమానుల కోసం ఈ ఏర్పాట్లు చేస్తున్నామన్నారు. ఈమేరకు రాష్ట్రంలోని అన్ని జిల్లాల ఆర్టీసీ ఆర్ఎంలకు ఆదేశాలు జారీ చేశామని మంత్రి పేర్కొన్నారు.


 అభివృద్ధి పనుల ప్రగతిపై సమీక్ష
 ► సమస్యలపై గళం విప్పిన ప్రజాప్రతినిధులు
 ► పరిష్కరించాలని అధికారులకు సూచన
 ► నిర్లక్ష్యం వీడి చిత్తశుద్ధితో పనిచేయాలని హితవు
 ► ఇకపై 3 నెలలకోసారి అభివృద్ధిపై సమీక్షిస్తాం  
 ► మంత్రి మహేందర్‌రెడ్డి వెల్లడి
 
 జిల్లా అభివృద్ధిపై వాడీవేడిగా చర్చ జరిగింది. మూడు గంటలకుపైగా ప్రజా ప్రతినిధులు, అధికారులు సుదీర్ఘంగా సమీక్షించారు. కేసీఆర్‌ కిట్, గొర్రెల పంపిణీ, ఒంటరి మహిళలకు ఆర్థిక భృతి, గ్రామీణ ప్రాంతాల్లో తాగునీరు, రైతు సమగ్ర సర్వే, విద్యుత్‌ సరఫరా, పాఠశాలల్లో మౌలిక వసతుల కల్పన తదితర అంశాలపై లోతుగా చర్చించారు. మంత్రి మహేందర్‌ రెడ్డి అధ్యక్షతన జెడ్పీ సమావేశ మందిరంలో జరిగిన ఈ కార్యక్రమంలో ఎమ్మెల్సీలు, ఎమ్మెల్యేలు ప్రజాసమస్యలు లేవనెత్తారు. వాటి పరిష్కారంలో జాప్యం, నిర్లక్ష్యం, అధికారుల వైఖరిని ఎండగట్టారు. వచ్చే సమావేశంలోగా పనులు యుద్ధప్రాతిపదికన పూర్తి చేయాలని అధికారులకు సూచించారు. లోటుపాట్లను సవరించి పునరావృతం కాకుండా జాగ్రత్త వహించాలన్నారు. ఇకపై ప్రతి మూడు నెలలకోసారి అభివృద్ధి పనుల పురోగతిపై సమావేశాలను క్రమం తప్పకుండా నిర్వహిస్తామని మంత్రి మహేందర్‌ రెడ్డి ప్రకటించారు.  
 
 రంగారెడ్డి జిల్లా : జిల్లాలో అభివృద్ధి పనులను పరవళ్లు తొక్కించాలని ప్రజాప్రతినిధులు ఆకాంక్షించారు. ఏ శాఖలోనూ ఆలస్యానికి తావివ్వకుండా సకాలంలో పనులు పూర్తిచేసి ప్రజలకు అందుబాటులోకి తేవాలన్నారు. సంక్షేమ ఫలాలు అర్హులకు సత్వరం అందేలా చర్యలు తీసుకోవాలని అధికారులకు – మిగతా 6లోuసూచించారు. మంగళవారం ఖైరతాబాద్‌లోని జెడ్పీ కార్యాలయంలో జిల్లాలో జరుగుతున్న అభివృద్ధి కార్యక్రమాల ప్రగతిపై సమీక్ష నిర్వహించారు. జిల్లా ఇన్‌చార్జి మంత్రి పట్నం మహేందర్‌రెడ్డి అధ్యక్షతన జరిగిన ఈ సమావేశానికి చేవెళ్ల ఎంపీ కొండా విశ్వేశ్వర్‌రెడ్డి, ఎమ్మెల్సీలు కసిరెడ్డి నారాయణరెడ్డి, కాటేపల్లి జనార్దన్‌రెడ్డి, ఎమ్మెల్యేలు తీగల కృష్ణారెడ్డి, మంచిరెడ్డి కిషన్‌రెడ్డి, వంశీచంద్‌రెడ్డి, అంజయ్య యాదవ్, కాలె యాదయ్య, అరికెపూడి గాంధీ తదితరులు పాల్గొని అభివృద్ధి కార్యక్రమాలపై శాఖల వారీగా విస్తృతంగా చర్చించారు. అక్కడక్కడా చోటుచేసుకుంటున్న లోటుపాట్లను సమావేశం దృష్టికి తీసుకొచ్చారు. ప్రభుత్వం ప్రతిష్టాత్మకంగా తీసుకొస్తున్న కేసీఆర్‌ కిట్, గొర్రెల పంపిణీ పథకాల అమలుకు కొన్ని సలహాలు అందిచ్చారు. గొర్రెల పంపిణీ పథకాన్ని గొల్ల, కురుమ, యాదవులకే కాకుండా.. వాటి పెంపకంపై ఆధారపడిన ఇతర కులాల కుటుంబాలకూ వర్తింపజేసే దిశగా ఆలోచించాలని ఎంపీ విజ్ఞప్తి చేశారు.
 
 అయితే ఎంపీ సూచనపై ఎమ్మెల్యే అంజయ్య అభ్యంతరం వ్యక్తం చేశారు. యాదవ కుటుంబాలకు కేటాయించిన నిధులను ఇతరులకు మళ్లిస్తే ఒప్పుకోబోమన్నారు. ఇతర కులాల వారికి పంపిణీ చేస్తామంటే తమకు ఎటువంటి ఇబ్బందీ లేదని.. కాకపోతే వేరే నిధులను ఖర్చు చేయాలన్నారు. దీనిపై మంత్రి మహేందర్‌రెడ్డి మాట్లాడుతూ ఇతరులకు గొర్రెలను అందజేయాలని ఇప్పటికే తమకు వినతులు అందాయని, ఈ విషయాన్ని ప్రభుత్వం దృష్టికి తీసుకెళ్తామని ఆయన సమాధానమిచ్చారు. గ్రామ పంచాయతీని యూనిట్‌గా కాకుండా ఆవాసాల వారీగా గొర్రెకాపరుల సహకార సంఘాలు ఏర్పాటు చేయాలని పలువురు ఎమ్మెల్యేలు సూచించారు. అయితే అలా చేయడం వల్ల తీవ్ర ఇబ్బందులు, సమస్యలు తలెత్తుతాయని పశుసంవర్థక శాఖ రీజినల్‌ జాయింట్‌ డైరెక్టర్‌ వరప్రసాద్‌రెడ్డి వివరించారు. గొర్రెల లభ్యతపై ఎటువంటి సందేహాలూ వద్దని, జిల్లాకు సరిపడా అందుబాటులో ఉన్నాయని చెప్పారు. అవసరమైతే మరో జిల్లా నుంచి తెప్పించే ప్రయత్నం చేస్తామన్నారు. కార్యక్రమంలో జేసీ సుందర్‌ అబ్నార్, సీపీఓ వైఆర్‌బీ శర్మ, జెడ్పీ సీఈఓ వెంకటరమణారెడ్డి తదితరులు పాల్గొన్నారు.
 
 అంశాల వారీగా సమీక్ష..
 చాలా గ్రామాల్లో తాగునీటి సమస్య అధికంగా ఉందని ఎమ్మెల్యేలు సభ దృష్టికి తెచ్చారు. దీంతో ప్రజలు బిందెలు చేతబట్టి దూర ప్రాంతాలకు వెళ్లాల్సి వస్తోందని ఆవేదన వ్యక్తం చేశారు. ట్యాంకర్ల ద్వారా సరఫరా అరకొరగానే జరుగుతోందన్నారు. కొన్ని ఊళ్లకు అది కూడా లేదని చెప్పారు. ఈ సమస్యపై అధికారుల దృష్టికి తీసుకెళ్లినా పరిష్కారం కావడం లేదని అసంతృప్తి వ్యక్తం చేశారు. ‘కల్వకుర్తి నియోజకవర్గంలో కృష్ణా మూడో దశ కింద పనులు పూర్తయ్యాయి. కాంట్రాక్టర్లకు డబ్బులు చెల్లించారు. అయినా గ్రామాలకు నీరు సరఫరా కావడం లేదు. ట్రయల్‌ రన్‌ పేరిట కాలం గడుస్తున్నా కడ్తాల్, ఆమన్‌గల్‌ మండలాలకు నీళ్లు దిక్కులేవు’ అని ఎమ్మెల్యే వంశీచంద్‌రెడ్డి సమావేశం దృష్టికి తీసుకొచ్చారు. ఈ సమస్యలను అధికారులు సైతం గుర్తించడం లేదన్నారు. ‘మిషన్‌ భగీరథ నీరు వచ్చే వరకు దాదాపు ఏడెమినిది నెలలు పడుతుంది.
 
 అప్పటివరకు గ్రామీణ నీటి సరఫరా నిర్వహణకు నిధులు ఉన్నాయా’ అని ఎమ్మెల్యే కిషన్‌రెడ్డి ప్రశ్నించారు. ప్రధాన పైపులైన్లు మినహా ఇస్తే.. గ్రామాల్లో ఏర్పాటు చేయాల్సిన పైపులైన్ల పనులపైనే సందేహాలు వ్యక్తమవుతున్నాయని చెప్పారు. గడువులోగా పనులు పూర్తి చేస్తేనే ప్రజలకు నీరందుతుందున్నారు. తన నియోజకవర్గంలోని చించోడు గ్రామంలో తప్ప అన్ని పల్లెల్లో నీటి కరువు ఉందని షాద్‌నగర్‌ ఎమ్మెల్యే అంజయ్య అన్నారు. అధికారులు మౌనం పాటిస్తున్నారే తప్ప ప్రభుత్వానికి నివేదించడం లేదన్నారు. మిషన్‌ భగీరథలో భాగంగా డిసెంబర్‌ నెలాఖరులోగా ట్యాంకుల నిర్మాణం, భూగర్భ పైపులేన్లు వేయడం పూర్తి చేస్తామని అధికారులు సమాధానమిచ్చారు.
 
 కలెక్టరేట్‌ ఏర్పాటుపై తర్వలో సమావేశం
 బెంగళూరు రహదారి వెంట వ్యవసాయ యూనివర్సిటీ స్థలంలో కొత్త కలెక్టరేట్‌ ఏర్పాటు చేసే అంశాన్ని ఎంపీ, ఎమ్మెల్సీలు, ఎమ్మెల్యేలు తిరస్కరించారు. జిల్లా భౌగోళిక పరిస్థితులకు ఆ ప్రాంతం ఏమాత్రం అనువైంది కాదని తేల్చేశారు. కలెక్టరేట్‌ ఏర్పాటుకు అనువైన స్థలాల కోసం ప్రభుత్వ ప్రధాన కార్యదర్శి ఎస్పీ సింగ్, రెవెన్యూ శాఖ ముఖ్య కార్యదర్శి బీఆర్‌ మీనా సోమవారం జిల్లాలో పర్యటించి.. వ్యవసాయ వర్సిటీ స్థలం పట్ల కాస్త సానుకూలత వ్యక్తం చేసిన విషయం తెలిసిందే. లక్డీకపూల్‌లో ప్రస్తుతం ఉన్న కలెక్టరేట్‌కు.. వర్సిటీ స్థలాలు కనీసం పది కిలోమీటర్ల దూరంలో కూడా లేవని, అక్కడ ఏర్పాటు చేస్తే హైదరాబాద్‌లోనే ఉన్నట్లు భావన కలుగుతుందని ఎమ్మెల్యే కిషన్‌రెడ్డి ప్రస్తావించారు. కొత్త కలెక్టరేట్‌కు అన్ని ప్రాంతాలు 30 నుంచి 35 రేడియస్‌ దూరంలో ఉండేలా చూడాలన్నారు. వర్సిటీలో నిర్మిస్తే.. చాలా మండలాలకు వ్యయప్రయాసాలు తప్పవన్నారు. కలెక్టరేట్‌ చేరుకోవాలంటే కొందరు ప్రజలు దాదాపు 100 కిలోమీటర్లు, ఇంకొందరు 35 కి.మీ మేర ప్రయాణించాల్సి ఉండడం ఇబ్బందికరమన్నారు.
 
 దీనిపై స్పందించిన మంత్రి.. ఎంపీ, ఎమ్మెల్సేలు, ఎమ్మెల్యేలతో త్వరలో సమావేశం ఏర్పాటు చేస్తామన్నారు. సమావేశంలో వచ్చే ఏకాభిప్రాయం మేరకే కొత్త కలెక్టరేట్‌ నిర్మించేలా ప్రభుత్వానికి నివేదిద్దామని వారికి నచ్చజెప్పారు. ఒకవేళ ఏకాభిప్రాయం కుదరకపోతే.. వర్సిటీ స్థలంలో బదులు జెడ్పీ కార్యాలయంలోనే నిర్మిస్తేనే సౌకర్యవంతంగా ఉంటుందని కిషన్‌రెడ్డి పేర్కొన్నారు.
 
  


 - ఆది నుంచి ఉన్నవారిపై కక్ష సాధిస్తున్నారని సూసైడ్‌ నోట్‌
 - మంత్రి కేటీఆర్‌ ప్రత్యేక శ్రద్ధపెట్టి పరిష్కరించాలని విజ్ఞప్తి
 
 హైదరాబాద్‌: ‘‘టీఆర్‌ఎస్‌ పార్టీలో సముచి తమైనా స్థానం దక్కడం లేదు. మొదటి నుంచి పనిచేసినవారికి కాకుండా ఇతర పార్టీల నుంచి వచ్చినవారికి ప్రాధాన్యం ఇస్తున్నారు. మాపై వారి కక్ష సాధింపు చర్యలు ఎక్కువయ్యాయి. కేటీఆర్‌ సారూ.. ఎన్నికల సమయంలో చెప్పిన మాటలు వట్టిమాటలుగానే మిగిలిపోయాయి’ అని సూసైడ్‌ నోట్‌ రాసి అధికార టీఆర్‌ఎస్‌ పార్టీ కార్యకర్త  ఆత్మహత్య చేసుకున్నాడు. ఈ సంఘటన హైదరాబాద్‌ రాజేంద్రనగర్‌ పోలీస్‌స్టేషన్‌ పరిధిలో ఆదివారం చోటుచేసుకుంది. రాజేంద్రనగర్‌ మైలా ర్‌దేవ్‌పల్లికి చెందిన మహిపాల్‌రెడ్డి(42) రియల్‌ ఎస్టేట్‌ వ్యాపారం చేస్తూనే టీఆర్‌ఎస్‌ పార్టీలో చురు గ్గా వ్యవహరిస్తున్నారు.
 
 ఇతర పార్టీల నుంచి టీఆర్‌ఎస్‌లోకి వచ్చిన నేతల తీరుతో కొంత కాలంగా అసంతృప్తితో ఉన్నాడు. ఈ క్రమంలో రోజు మాదిరిగానే ఆదివారం ఉదయం వాకింగ్‌ కోసమని బయటకు వెళ్లాడు. రాజేంద్రనగర్‌లోని  ప్రొఫెసర్‌ జయశంకర్‌ వ్యవసాయ వర్సిటీ ప్రాంగణంలోని డీ హాస్టల్‌ వద్ద ఉరేసుకున్నాడు. స్థానికుల సమాచారం మేరకు రాజేంద్రనగర్‌ పోలీసులు వచ్చి మృతదేహాన్ని పరీశీలించగా ఓ సూసైడ్‌ నోట్‌ లభించింది. ‘పార్టీకి అంతగా ఆదరణ లేని సమయంలో మైలార్‌దేవ్‌పల్లిలో కష్టపడి టీడీపీ ధీటుగా పార్టీని నిలబెట్టిన  టి.శ్రీశైలంరెడ్డి అన్నగారికి ఎమ్మెల్యేకు సమానమైన పదవి ఇచ్చి గౌరవించగలరు. ఇదే నా చివరి కోరిక’ అంటూ సూసైడ్‌ నోట్‌లో పేర్కొన్నారు.
 
 ఆత్మస్థైర్యం కోల్పోవద్దు: మంత్రి మహేందర్‌రెడ్డి
 కార్యకర్తలు ఆత్మస్ధైర్యాన్ని కోల్పోవద్దని రాష్ట్ర రోడ్డు రవాణా శాఖ మంత్రి మహేందర్‌రెడ్డి సూచించారు. మహిపాల్‌రెడ్డి కుటుంబాన్ని పరామర్శించారు. అనంతరం మంత్రి విలేకరులతో మాట్లాడుతూ మహిపాల్‌రెడ్డి కుటుంబాన్ని ఆదుకుంటామని, రూ.5 లక్షల ఎక్స్‌గ్రేషియా అందిస్తామని, ప్రభుత్వం తరఫున ఆయన పిల్లలకు చదువు చెప్పిస్తామని వెల్లడించారు. సూసైడ్‌ నోటు గురించి ప్రశ్నించగా దానిపై పూర్తిస్థాయి విచారణ జరపనున్నట్లు తెలిపారు.


 - ప్రైవేటు స్కూళ్ల యాజమాన్యాలకు మంత్రి కేటీఆర్‌ సూచన
 - మంత్రి మహేందర్‌ రెడ్డితో కలసి హైదరాబాద్‌లో కైరో గ్లోబల్‌ స్కూల్‌ను ప్రారంభించిన కేటీఆర్‌
 
 సాక్షి, హైదరాబాద్‌: విద్యార్థులు చదువుకునే దశ నుంచి చదువు కొనే దిశగా విద్యారంగం పయని స్తోందని... విద్య అనగానే వ్యాపార మన్న భావన కలిగించే దుస్థితి నెలకొందని రాష్ట్ర పరిశ్రమలు, ఐటీ, పురపాలక శాఖ మంత్రి కె.తారకరామారావు ఆవేదన వ్యక్తం చేశారు. ప్రస్తుత తరుణంలో విద్య ప్రాధాన్యతను గుర్తించి ప్రపంచస్థాయి బోధనా పద్ధతులతో విద్యార్థులను తీర్చిదిద్దాల్సిన అవసర ముందన్నారు. విద్యా ప్రమాణాల విషయంలో రాజీ పడకుండా, సేవా దృక్పథాన్ని వీడకుండా, విద్య–వ్యాపారాల మధ్య సమతూకం, సమన్వ యం పాటిస్తూ ఫీజుల విషయంలో స్వీయ నియం త్రణ పాటించాలని ప్రైవేటు స్కూళ్ల యాజమాన్యాలకు కేటీఆర్‌ సూచించారు.
 
 పాఠశాలలు, విద్యాలయాల ఏర్పాటు వ్యయం బాగా పెరిగిందని, మంచి ఉపాధ్యాయులు కావాలంటే మంచి జీతభత్యాలు కూడా ఇవ్వాల్సి ఉంటుందన్నారు. విద్యాసంస్థల ఏర్పాటు, బోధన కత్తి మీద సాములా మారిందన్న విషయాన్ని అందరూ అంగీకరించక తప్పదన్నారు. హైదరా బాద్‌లోని చిత్రపురి కాలనీలో కొత్తగా ఏర్పాటు చేసిన కైరో గ్లోబల్‌ స్కూల్‌ను రవాణాశాఖ మంత్రి పట్నం మహేందర్‌రెడ్డితో కలసి కేటీఆర్‌ ప్రారంభించారు. అనంతరం ఆయన మాట్లాడుతూ విద్య కేవలం విజ్ఞానాన్నే కాకుండా ఉన్నత జీవన ప్రమాణాలనూ అందించేలా ఉండాలన్నారు. ఎప్పటికీ మంచి ప్రమాణాలతో విద్యను అందించాలన్నారు. రాష్ట్ర ప్రభుత్వం జయశంకర్‌ బడి బాటను ప్రారంభించిన రోజే కైరో స్కూల్‌ని ప్రారంభించడం సంతోషకరమన్నారు.
 
 ప్రైవేటును ప్రోత్సహిస్తూనే ప్రభుత్వ విద్య బలోపేతం...
 కేవలం ప్రభుత్వమే మొత్తం విద్యా వ్యవస్థను నడపగలిగినా ఇప్పటికే ఏర్పడిన అనేక ప్రైవేటు విద్యా సంస్థలు వేలాది మందికి ఉపాధి కల్పిస్తున్నాయని కేటీఆర్‌ గుర్తుచేశారు. ఈ నేపథ్యంలో ప్రైవేటు రంగంలో విద్యను ప్రోత్సహిస్తూనే అందుకు దీటుగా ప్రభుత్వ రంగంలో విద్యను అందిస్తున్నామని తెలిపారు. సీఎం కేసీఆర్‌ నేతృత్వంలో రాష్ట్ర ప్రభుత్వం విద్యా ప్రమాణాలు పెంచే దిశగా ప్రభుత్వ విద్యను నడిపిస్తోందన్నారు. సర్కారు 500కుపైగా గురుకుల పాఠశాలలు ప్రారంభించి అందరికీ విద్య అందిస్తోందన్నారు. చిత్ర రంగం విచిత్రమై నదని, ఇక్కడ బళ్లు ఓడలు... ఓడలు బళ్లవడం సాధారణమన్నారు.
 
 చిత్ర సీమలో పని చేసే వాళ్ల జీవితాలూ ఒడిదుడుకులతో ఉంటాయన్నారు. చిత్రపురి కాలనీలోనే కైరో గ్లోబల్‌ స్కూల్‌ను పెట్టినందున కాలనీ వాసులకు ఫీజుల్లో రాయితీ ఇవ్వాలని యాజమాన్యాన్ని మంత్రి కోరారు. దీనిపై స్పందించిన స్కూల్‌ చైర్మన్‌ వెంకట్‌రెడ్డి 50 శాతం రాయితీ హామీని చిత్రపురి హౌసింగ్‌ సొసైటీకి ఇచ్చామన్నారు. కార్యక్రమం లో ఎంపీ కొండా విశ్వేశ్వర్‌రెడ్డి, ఎమ్మెల్సీలు కర్నె ప్రభాకర్, శంభీపూర్‌ రాజు, రాజేంద్రనగర్‌ ఎమ్మెల్యే ప్రకాశ్‌గౌడ్, జీహెచ్‌ఎంసీ మేయర్‌ బొంతు రామ్మోహన్, సినీ రచయిత, నటుడు పరుచూరి వెంకటేశ్వరరావు తదితరులు పాల్గొన్నారు.


 - గురువారం ఉదయం 6 గంటల నుంచి లారీలు బంద్‌
 - దక్షిణాది రాష్ట్రాల లారీ యజమానుల సంఘం సమ్మె ప్రభావం
 - నగరానికి నిలిచిపోనున్న నిత్యావసర వస్తువుల సరఫరా
 - పాలు, కూరగాయలు, మంచినీరు, మందులు, పెట్రోల్‌కు మినహాయింపు
 
 సాక్షి, హైదరాబాద్‌: భారీగా పెంచిన బీమా ప్రీమియాన్ని తగ్గించాలనే ప్రధాన డిమాండ్‌తో దక్షిణాది రాష్ట్రాల లారీ యజమానుల సంఘం చేపట్టిన సమ్మెతో లారీలకు బ్రేక్‌ పడింది. సరుకు లోడింగ్, అన్‌లోడింగ్‌ వంటి పనులు బుధవారం అర్ధరాత్రి నుంచి నిలిచిపోయాయి. గురువారం ఉదయం 6 గంటల నుంచి లారీల బంద్‌ చేపట్టనున్నట్లు ఇప్పటికే పలు లారీ యాజమాన్య సంఘాలు ప్రకటించిన సంగతి తెలిసిందే. ఆటో గూడ్స్‌ వాహనాలు మినహా అన్ని రకాల తేలికపాటి, మధ్యతరహా, భారీ సరుకు రవాణా వాహనాలన్నీ బంద్‌లో పాల్గొంటాయని తెలంగాణ లారీ ఓనర్స్‌ అసోసియేషన్‌ అధ్యక్షుడు భాస్కర్‌రెడ్డి తెలిపారు. దీంతో తెలంగాణ అంతటా సుమారు 2.5 లక్షల వాహనాలు, గ్రేటర్‌ హైదరాబాద్‌లో 70 వేల వాహనాలు నిలిచిపోనున్నాయి.
 
 ప్రతి రోజు బియ్యం, పప్పులు, అల్లం, వెల్లుల్లి, ఉల్లి, పసుపు, సిమెంట్, ఐరన్, బొగ్గు వంటి వివిధ రకాల వస్తువులను హైదరాబాద్‌కు తరలించే సుమారు 5 వేల లారీల రాకపోకలు నిలిచిపోనున్నాయి. అత్యవసర వస్తువులైన పాలు, కూరగాయలు, మంచినీరు, మందులు, పెట్రోల్, డీజిల్, వంటగ్యాస్‌ సరఫరాను మాత్రం ప్రస్తుతం సమ్మె నుంచి మినహాయించారు. వారం రోజుల్లో ప్రభుత్వం నుంచి ఎలాంటి స్పందనా కనిపించకపోతే అత్యవసర సరుకుల రవాణాను సైతం నిలిపివేయనున్నట్లు లారీ సంఘాలు పేర్కొన్నాయి. డీసీఎంలు వంటి వాహనాలు కూడా సమ్మెకు మద్దతిస్తున్న దృష్ట్యా దక్షిణాది రాష్ట్రాల నుంచే కాక రాష్ట్రంలోని వివిధ ప్రాంతాల మధ్య సరుకు రవాణాపైనా ప్రభావం కనిపించే అవకాశం ఉంది. తెలుగు రాష్ట్రాలకు వర్తించేలా సింగిల్‌ పర్మిట్‌ విధానాన్ని అమలు చేయాలని, టోల్‌ ట్యాక్స్‌ను తగ్గించాలని, త్రైమాసిక పన్నును హేతుబద్ధీకరించాలని స్థానిక లారీ సంఘాలు డిమాండ్‌ చేస్తున్నాయి.
 
 ప్రత్యామ్నాయంపై దృష్టి సారించని సర్కార్‌
 లారీల సమ్మె నేపథ్యంలో ప్రభుత్వం ఇప్పటివరకు ఎలాంటి ప్రత్యామ్నాయ చర్యలు తీసుకోలేదు. రవాణా మంత్రి మహేందర్‌ రెడ్డితో జరిపిన చర్చలు అసంపూర్తిగా ముగిసి సమ్మె అనివార్యమైన దశలో ప్రత్యామ్నాయంపై దృష్టి సారించకపోవడం గమనార్హం. నగరానికి ప్రతిరోజూ సరఫరా అయ్యే సుమారు 500 లారీల బియ్యం, 200 లారీల ఉల్లి, అల్లం వెల్లుల్లి తదితర వస్తువులు నిలిచిపోనున్నాయి. కర్నూలు, నాందేడ్, మధ్యప్రదేశ్‌ తదితర ప్రాంతాల నుంచి నగరానికి ఉల్లి సరఫరా.. ఏపీ నుంచి బియ్యం రవాణా నిలిచిపోనుంది. నగర శివార్ల లోని కెమికల్‌ ఫ్యాక్టరీలకు అవసరమయ్యే 200 లారీల బొగ్గు రవాణాకూ బ్రేక్‌ పడనుంది.


 ⇒ పరిస్థితి విషమం.. హైదరాబాద్‌కు తరలింపు
 ⇒ నిందితునికోసం గాలింపు
 
 తాండూరు టౌన్‌: ఓ దుండగుడు ఆస్పత్రిలోంచి ఏడేళ్ల్ల బాలికను తీసుకెళ్లి అత్యాచారానికి పాల్పడ్డాడు. వికారాబాద్‌ జిల్లాలోని తాండూరు జిల్లా ఆస్పత్రిలో శనివారం రాత్రి ఈ దారుణ జరిగింది. సీఐ వెంకట్రామయ్య కథనం ప్రకారం.. తాండూరు మండలం ఎల్మకన్నె కుచెందిన బాలిక (7) తన అమ్మమ్మ ఆరోగ్యం బాగా లేకపోవడంతో శనివారం సాయంత్రం మేనమామతో కలసి తాండూరు ప్రభుత్వ జిల్లా ఆస్పత్రికి వచ్చింది. కాస్త చీకటి పడుతుండగా బాలిక మేనమామ తిని వస్తానని బయటకు వెళ్లాడు.
 
 అమ్మమ్మ వద్ద ఉన్న బాలిక కూడా ఆకలిగా ఉందని చెప్పడంతో అక్కడే ఉన్న ఓ గుర్తుతెలియని వ్యక్తి తాను బయటకు తీసుకెళ్లి ఏమైనా తినిపించుకొని వస్తానని చెప్పి తీసుకెళ్లాడు.ఎంతసేపటికి బాలిక రాకపోవడం తో ఆమె మేనమామ  పట్టణంలో వెతికాడు. అర్ధరాత్రి వేళ విధుల్లో ఉన్న మున్సిపల్‌ పారిశుద్ధ్య కార్మికుడు హుసేనప్ప తాండూరు ఫ్లై ఓవర్‌ వద్ద ముఖానికి కర్చీఫ్‌ చుట్టుకుని ఉన్న ఓ వ్యక్తి బాలికను తీసుకుని అటుగా వెళ్తుండడం గమనించాడు. అనుమానంతో ప్రశ్నించాడు. దీంతో అతడు ఆమెను వదిలేసి పారిపోయాడు. వెంటనే హుసేనప్ప పారిశుద్ధ్య సూపర్‌వైజర్‌ రమేష్‌కు ఫోన్‌లో సమాచారం ఇచ్చాడు.
 
 కార్మికులు బాలికను ఠాణాకు తరలించారు. సాయంత్రం తప్పిపోయిన బాలిక అయి ఉంటుందనే అనుమానంతో రమేష్‌ తన ఫోన్‌లో ఫొటో తీసి ఆస్పత్రిలో ఉన్న బంధువులకు చూపగా బాలికను గుర్తించారు. తీవ్ర రక్తస్రావంతో బాలిక సొమ్మసిల్లి పడిపోయింది. ఆమెపై అత్యాచారం జరిగి ఉంటుందని అనుమానించిన పోలీసులు ఆమెను చికిత్స నిమిత్తం తాండూరులోని జిల్లా ఆస్పత్రికి తరలించారు.నిందితుడి కోసం గాలించినా ఫలితం లేకుండా పోయింది. బాలిక పరిస్థితి విషమంగా మారడంతో హైదరాబాద్‌కు తరలించారు. ఆస్పత్రిలోనూ, పట్టణంలోని ముఖ్య కూడళ్ల వద్ద ఏర్పాటు చేసిన సీసీ కెమెరాల పుటేజీలను పోలీసులు పరిశీలించారు.   బాలిక మేనమామ ఫిర్యాదు మేరకు కేసు దర్యాప్తు చేస్తున్నట్లు పోలీసులు తెలిపారు. ఈ ఘటనను మంత్రి మహేందర్‌రెడ్డి ఖండించారు. నిందితుడిని పట్టుకోవాలని ఆదేశించారు.