న్యూఢిల్లీ: దేశరాజధాని ఢిల్లీలో మహిళలకు మరింత రక్షణ కల్పించేందుకు ప్రభుత్వం మరో ముందడుగు వేసింది. యూపీలో అమలు చేస్తున్న యాంటీ రోమియో స్క్యాడ్‌ తరహాలో యాంటీ ఈవ్‌ టీజింగ్‌ స్క్వాడ్‌(Eve Teasing Squad)కు రూపకల్పన చేయనుంది. దీనికి సంబంధించి పోలీసు కమిషనర్‌ ఒక ప్రకటన చేశారు. ఈ స్వ్యాడ్‌కు ‘శిష్టాచార్‌ స​​్క్వాడ్‌’ అనే పేరు పెట్టారు. ఢిల్లీలోని ప్రతీ జిల్లాలో ఈ తరహాలోని రెండు స్క్వాడ్‌లు విధులు నిర్వహించనున్నాయి.ఈ ‘శిష్టాచార్‌ స్క్వాడ్‌’లో ఒక ఇన్‌స్పెక్టర్‌, ఒక సబ్‌ ఇన్‌స్పెక్టర్‌, ఎనిమిదిమంది కానిస్టేబుళ్లు, ఒక హెడ్‌ కానిస్టేబుల్‌ ఉండనున్నారు. వీరిలో నలుగురు మహిళా సిబ్బంది ఉంటారు. వీరిలో సాకేంతిక నిపుణత కలిగిన ఒకరు ఉండనున్నారు. ఈ స్క్వాడ్‌కు ఒక కారుతో పాటు ద్విచక్రవాహనాలను కూడా సమకూర్చనున్నారు. ఈ స్క్వాడ్‌ పబ్లిక్‌ ట్రాన్స్‌పోర్టు(Public transport)లో కూడా ప్రయాణించనున్నారు. బాధితులు పోలీసులకు ఫిర్యాదు చేసేవిధంగా వారిని మోటివేట్‌ చేయనున్నారు.2017లో యూపీలోని యోగి సర్కారు రాష్ట్రంలోని మహిళలపై జరిగే వేధింపులను అరికట్టేందుకు యాంటీ రోమియో స్క్వాడ్‌ను నియమించింది. వీరు స్కూళ్లు, కాలేజీల బయట జరిగే ఈవ్‌ టీజింగ్‌ను అరికడుతుంటారు. యాంటీ రోమియో స్క్వాడ్‌లో మహిళా కానిస్టేబుళ్లు సభ్యులుగా ఉంటారు. వీరు మహిళలపై వేధిపులకు పాల్పడేవారిని పట్టుకుని, చట్టపరమైన చర్యలు తీసుకుంటారు. ఇది కూడా చదవండి: Kalpana Chawla: రెండు పుట్టిన రోజుల వ్యోమగామి

హైదరాబాద్‌: బోరబండ(Borabanda)లో అందరూ చూస్తుండగానే దారుణం జరిగింది. పదిహేడేళ్ల ఓ బాలికతో కొందరు దుండగులు అనుచితంగా ప్రవర్తించారు. ఇంట్లోకి వెళ్లి మరీ ఎత్తుకెళ్లే ప్రయత్నం చేశారు. ఈ క్రమంలో ఓ ఆటో డ్రైవర్‌ వాళ్లను అడ్డుకుని.. ఆమెను రక్షించారు. అయితే.. దుండగుల దాడిలో ఆ డ్రైవర్‌కు తీవ్ర గాయాలు అయ్యాయి. దీంతో స్థానికులు 100కు(Dial 100) ఫోన్‌ చేసి సమాచారం అందించారు. రంగంలోకి దిగిన పోలీసులు(Police) ఆ కామాంధులను అదుపులోకి తీసుకున్నారు. గాయపడి డ్రైవర్‌ను చికిత్స కోసం ఆస్పత్రికి తరలించారు. ఈ ఘటనకు సంబంధించి పోలీసుల నుంచి స్పష్టమైన ప్రకటన వెలువడాల్సి ఉంది.ఇదీ చదవండి: కామాంధుడికి 20 ఏళ్ల జైలు శిక్ష

సాక్షి, క్రైమ్‌: షాద్‌నగర్‌లో దారుణం జరిగింది. బలవంతంగా యువతి నుదట దిద్దిన సింధూరం!.. ఓ యువకుడిపాలిట మరణ శాసనమైంది. ప్రేమ పేరుతో తన కూతురిని వేధిస్తున్నాడంటూ ఓ యువకుడిని హతమార్చాడు ఓ తండ్రి. సినీ ఫక్కీలో పక్కా మర్డర్‌కు ప్లాన్ వేసి మరీ కిరాతకంగా ప్రాణం తీశాడు. బీహార్‌కు చెందిన కరుణాకర్‌ కుటుంబం.. రంగారెడ్డి జిల్లా కేశంపేట మండల పరిధిలో నివాసం ఉటూ చిన్నచిన్న పనులు చేసుకుంటూ జీవిస్తోంది. ఆగష్టు 29వ తేదీ నుంచి కరుణాకర్‌ కనిపించకుండా పోయాడు. దీంతో.. అతని సోదరుడు దీపక్‌ పోలీసులకు ఫిర్యాదు చేశాడు. మిస్సింగ్‌ కేసు నమోదు చేసుకుని దర్యాప్తు చేసిన పోలీసులకు దర్యాప్తులో షాకింగ్‌ విషయాలు తెలిశాయి.  రంజిత్‌ కుమార్‌ అనే వ్యక్తి ప్లాన్‌ ప్రకారమే కరుణాకర్‌ను హత్య చేశారని పోలీసులు దర్యాప్తు ద్వారా తేల్చారు. రంజిత్‌ కుమార్‌ కూతురిపై కరుణాకర్‌ ప్రేమ పేరుతో వేధింపులకు పాల్పడ్డాడు. ఈ క్రమంలో ఆమె నుదుటిపై సింధూరం కూడా దిద్ది ఆమెను ఇబ్బందికి గురి చేశాడు. ఈ విషయం బయటకు పొక్కితే తన పరువు పోతుందని రంజిత్‌ రగిలిపోయాడు. కరుణాకర్‌ను చంపేయాలని నిర్ణయించుకున్నాడు.  ఆగష్టు 15వ తేదీన కేశంపేట మండలంలోని నిడదవెళ్లి గ్రామం నుంచి జూలపల్లి వెళ్లే  రోడ్డులో ఉన్న వరి చేను దగ్గరికి పిలిపించుకున్నాడు. విచక్షణా రహితంగా కరుణాకర్‌పై దాడికి దిగాడు. కాళ్లు చేతులు కట్టేసి వరి చేను నీటి బురద లో తలకాయ ముంచి ఊపిరాడకుండా చేసి హత్య చేసి అదే బురదలో పాతిపెట్టి వెళ్లిపోయారు. దర్యాప్తు ద్వారా ఈ కేసును చేధించామని, ప్రధాన నిందితుడు రంజిత్‌తో పాటు అతనికి సహకరించిన వాళ్లనూ అరెస్ట్‌ చేశామని శంషాబాద్ డీసీపీ నారాయణరెడ్డి మీడియాకు  వెల్లడించారు. నిందితులపై 302, 201 ,34 ఐపీసీ సెక్షన్ల కింద కేసు నమోదు చేశారు. నిందితుల్లో ఇద్దరు మైనర్లు ఉండగా.. వాళ్లను జువైనల్‌ హోంకు తరలించినట్లు తెలిపారు. 

సాక్షి, హైదరాబాద్: వినాయక చవితి నుంచి నిమజ్జనం వరకు జరిగిన నవరాత్రి ఉత్సవాలపై నగర షీ– టీమ్స్‌కు చెందిన ప్రత్యేక బృందాల డేగకన్ను ఫలితంగా 240 మంది పోకిరీలు చిక్కినట్లు అదనపు సీపీ ఏఆర్‌ శ్రీనివాస్‌ సోమవారం ప్రకటించారు. నిమజ్జనం రోజుతో పాటు విగ్రహాలను ఏర్పాటు చేసిన మండపాల దగ్గరా షీ–టీమ్స్‌ నిఘా వేశాయి. మఫ్టీల్లో, రహస్య కెమెరాలతో ఉన్న ఈ బృందాలకు మహిళలు, యువతులను వేధిస్తున్న 240 మంది పోకిరీలు చిక్కారు. వీరిని పక్కా సాక్ష్యాలతో సంబంధిత కోర్టుల్లో హాజరుపరిచినట్లు ఏఆర్‌ శ్రీనివాస్‌ తెలిపారు. పోకిరీలకు కనిష్టంగా రెండు నుంచి గరిష్టంగా పది రోజుల వరకు జైలు శిక్ష విధించినట్లు చెప్పారు. షీ–టీమ్స్‌ కృషిని కొత్వాల్‌ సీవీ ఆనంద్‌ ప్రత్యేకంగా అభినందించారు.  విద్యార్థినులపై హెచ్‌ఎం అసభ్యకర ప్రవర్తన  మహబూబాబాద్‌ రూరల్‌: విద్యార్థినుల పట్ల అసభ్యకరంగా ప్రవర్తిస్తున్న ఓ హెచ్‌ఎంను పాఠశాలకు రావద్దని.. విద్యార్థుల తల్లిదండ్రులు, తండావాసులు వెళ్లగొట్టారు. మహబూబాబాద్‌ దూదియ తండాలోని ప్రభుత్వ ప్రాథమిక పాఠశాలలో హెచ్‌ఎం షేక్‌ సర్వర్‌ పాషా కొన్నిరోజులుగా తమతో అసభ్యంగా ప్రవర్తిస్తున్నాడని ఐదుగురు విద్యార్థినులు శుక్రవారం వారి తల్లిదండ్రులకు చెప్పారు. సోమవారం వారందరూ పాఠశాలకు చేరుకుని హెచ్‌ఎంను నిలదీశారు. పిల్లలకు విద్యాభోధన చేయాల్సిన అవసరం లేదని తేల్చిచెప్పారు. అయితే, తనను క్షమించమని, ఇంకోసారి ఇలాంటి తప్పు జరగకుండా పనిచేస్తానని ఉపాధ్యాయుడు చెప్పినట్లు గ్రామస్తులు తెలిపారు. అయితే.. కొన్ని రోజులుగా మద్యం తాగి పాఠశాలకు వచ్చి హెచ్‌ఎం తమను ఇబ్బందులకు గురి చేస్తున్నాడని విద్యార్థినులు ఆరోపించారు. గతంలోనూ ఇలాగే ప్రవర్తించాడని, ఇంట్లో చెబుతామంటే వద్దన్నాడని తెలిపారు. దీంతో విద్యార్థుల తల్లిదండ్రులు పర్వతగిరి జెడ్పీ హైస్కూల్‌ హెచ్‌ఎం రాందాస్‌కు ఫిర్యాదు చేశారు. దీనిపై విచారణ జరిపించిన డీఈఓ.. ఉపాధ్యాయుడు సర్వర్‌ పాషాను సస్పెండ్‌ చేశారు. (చదవండి: హాస్టల్‌లో కామాంధుడు.. విద్యార్థులకు వీడియోలు చూపించి..)

భోపాల్‌: ఈవ్‌ టీజింగ్‌ను ప్రతిఘటించిన మహిళపై ముగ్గురు బ్లేడుతో విచక్షణారహితంగా దాడిచేసి గాయపరిచారు. ముఖమంతా రక్తమోడుతున్న ఆమెకు ఆస్పత్రిలో 118 కుట్లువేసి చికిత్స చేశారు. భోపాల్‌లో జూన్‌ 9న జరిగిన ఈ ఘటన ఆలస్యంగా వెలుగుచూసింది. రాత్రిపూట భర్తతో కలిసి బైక్‌ మీద ఇంటికొస్తున్న మహిళపట్ల ఇద్దరుబాలురు, ఒక వ్యక్తి ఈవ్‌టీజింగ్‌కు పాల్పడ్డారు. ప్రతిఘటించిన ఆమె ముఖంపై 10 సెంటీమీటర్ల మేర లోతైన గాటు పెట్టి బ్లేడుతో పలుచోట్ల దాడిచేశారు. నిందితులను పోలీసులు అరెస్ట్‌చేశారు. నిందితులకు కఠిన శిక్ష పడేలా చూడాలని పోలీసు ఉన్నతాధికారులను సీఎం శివరాజ్‌ ఆదేశించారు. బాధితురాలిని సీఎం పరామర్శించి లక్ష ఆర్థికసాయం ప్రకటించారు. మున్సిపల్‌ అధికారులు ఒక నిందితుని ఇంటిని కూల్చివేశారు.   अन्याय का प्रतिकार करना अन्य लोगों के लिए प्रेरणा का कार्य है, इस नाते बहन सीमा अन्य महिलाओं के लिए प्रेरक भी हैं। उनके बेटा और बेटी पढ़ते हैं और उनके सहयोग के लिए भी कलेक्टर भोपाल को आवश्यक निर्देश दिये हैं। pic.twitter.com/BXQ5ywPCxG — Shivraj Singh Chouhan (@ChouhanShivraj) June 12, 2022

సాక్షి, సిటీబ్యూరో: ఈవ్‌ టీజర్ల ఆగడాలు రోజురోజుకూ పెరిగిపోతున్నాయి. మహిళలు, అమ్మాయిలను నడి రోడ్డు మీదే అసభ్య పదజాలంతో దూషించడం, ఫోన్, సోషల్‌ మీడియాలలో వేధిస్తున్నారు. 319 మంది ఈవ్‌ టీజర్లకు, వారి కుటుంబ సభ్యుల సమక్షంలో సైబరాబాద్‌ షీ టీమ్స్‌ కౌన్సెలింగ్‌ ఇచ్చాయి. వీరిలో 98 మంది మైనర్లే ఉన్నారు. 19–24 ఏళ్ల వయస్కులు 112 మంది ఉండగా.. 25–35 ఏళ్ల వాళ్లు 92 మంది, 36–50 ఏళ్ల వయస్సు వారు 17 మంది ఉన్నారు. గత రెండు నెలలో సైబరాబాద్‌ షీ టీమ్‌కు వివిధ మాధ్యమాల ద్వారా 355 ఫిర్యాదులు అందాయి. వీటిలో అత్యధికంగా 299 ఫిర్యాదుల వాట్సాప్‌ ద్వారా చేయగా.. ట్విటర్‌లో 8 మంది, హ్యాక్‌ ఐలో 7 మంది, ఈ–మెయిల్‌ ద్వారా 5 మంది, ఉమెన్‌ సేఫ్టీ వింగ్‌ ద్వారా 36 మంది, భౌతికంగా 30 మంది ఫిర్యాదు చేశారు. ఫోన్‌లో మహిళలను వేధించే ఆకతాయిలే ఎక్కువ. గత రెండు నెలలలో 141 పిటీషన్లు ఈ తరహావే కావటం గమనార్హం. ఆ తర్వాత బ్లాక్‌ మెయిల్‌ చేస్తున్నారని 34 మంది, సోషల్‌ మీడియాలో 33, బెదిరింపులు 33, స్టాల్కింగ్‌ 35 మంది, పెళ్లి చేసుకుంటానని మోసం పోయిన మహిళలు 19 మంది, అసభ్యప్రవర్తన 31, వాట్సాప్‌లో వేధింపులు 11, కామెంట్లు 7 మంది, రహస్యంగా మహిళల ఫొటోలు, వీడియోల చిత్రీకరణ 3, పని ప్రదేశాలలో వేధింపులు 3, ప్రేమ సమస్యలు 2, ఫ్లాషింగ్‌ 2 మంది మహిళా బాధితులున్నారు.  7 బాల్య వివాహాలకు చెక్‌..  గత రెండు నెలల వ్యవధిలో సైబరాబాద్‌ కమిషనరేట్‌లో 7 బాల్య వివాహాలను షీ టీమ్‌లు అడ్డుకున్నాయి. 81 కేసులను నమోదు చేశాయి. వీటిలో 18 క్రిమినల్‌ కేసులు కాగా.. 63 పెట్టీ కేసులున్నాయి. బస్టాప్స్, రైల్వే స్టేషన్లు, మాల్స్, కాలేజీలు వంటి బహిరంగ ప్రదేశాలలో 1,003 డెకాయ్‌ ఆపరేషన్లను నిర్వహించారు. ఆయా ప్రాంతాలలో 248 మంది రెడ్‌ హ్యాండెడ్‌గా పట్టుబడగా.. వీటిలో 117 పెట్టీ కేసులను నమోదు చేశారు. మిగిలిన ఆకతాయిలను కౌన్సెలింగ్‌కు పంపించారు. సైబరాబాద్‌ కమిషనరేట్‌ పరిధిలో రాత్రి సమయాల్లో నిర్వహించిన డెకాయ్‌ ఆపరేషన్లలో 75 మంది రెడ్‌ హ్యాండెడ్‌గా పట్టుబడ్డారు. ఉమెన్‌ అండ్‌ చిల్డ్రన్‌ సేఫ్టీ వింగ్, సైబరాబాద్‌ షీ టీమ్‌ సంయుక్తంగా కలిసి కౌన్సెలింగ్‌ ఇచ్చాయి. 

సంతోషకరమైన జీవనం వైపుగా అడుగులు వేయడానికి భద్రమైన మార్గంలో పయనించడానికి సమాజం మనందరికీ చేదోడు వాదోడుగా నిలుస్తుంది. కానీ, ఈ సమాజంలో మహిళ రక్షణ ఎప్పుడూ ప్రశ్నార్థకంగానే ఉంటోంది. దీనికి సమాధానంగా తెలంగాణ రాష్ట్రంలో ఏర్పాటైంది ‘షీ టీమ్‌’. ఉమెన్‌ సేఫ్టీ వింగ్‌ కార్యక్రమాల్లో భాగంగా స్త్రీల రక్షణ కోసం 24 గంటలూ పనిచేస్తూ మహిళా నేస్తంగా మారిన ‘షీ టీమ్‌’ సేవలకు ఏడేళ్లు పూర్తయ్యాయి. ఈ క్రమంలో మహిళల భద్రత ఏవిధంగా ఉంది? పెరుగుతున్న నేరాలు, మారుతున్న విధానాలు తీసుకుంటున్న చర్యల గురించి పూర్తి సమాచారంతో మన ముందుంచింది తెలంగాణ ఉమెన్‌ సేఫ్టీ వింగ్‌.   వేధింపులకు చెక్‌పెట్టడమే లక్ష్యం  – స్వాతి లక్రా ► తెలంగాణలో ‘షీ టీమ్‌’ ఏర్పాటై ఏడేళ్లు పూర్తయ్యాయి. దీనికి సంబంధించిన ఫలితాలను చూసినప్పుడు మీకేమనిపించింది?  ‘షీ టీమ్‌’ గురించి 90 శాతం ప్రజల్లో ముఖ్యంగా మహిళల్లో అవగాహన రావడం చాలా సంతోషాన్ని కలిగించింది. ఒక స్వచ్ఛంద సంస్థ ద్వారా ఇదే విషయం మీద సర్వే చేశాం. దాంట్లో మంచి రేటింగ్‌ వచ్చింది. ప్రజలకు ‘షీ టీమ్‌’ సేవలు బాగా నచ్చాయి. మంచి ఫలితాలు వచ్చాయి. ప్రతి యేటా 5 వేలకు పైగా ఫిర్యాదులపై చర్యలు తీసుకుంటున్నాం. మహిళల రక్షణ, వారి భద్రతకు సంబంధించిన సమస్యల పరిష్కారానికి ఒక వేదిక ఉండాలనుకుని ప్రభుత్వం అక్టోబర్‌ 24, 2014లో హైదరాబాద్‌లో షీ టీమ్‌ను ప్రారంభించింది. ఏప్రిల్, 2015లో తెలంగాణ మొత్తంగా షీ టీమ్‌ సేవలను విస్తృతం చేసింది.  ► ఇన్నేళ్లుగా వచ్చిన మహిళలకు సంబంధించిన ఫిర్యాదులు, ఇటీవల మహిళలపై నేరాలకు పాల్పడుతున్న సంఘటనలు ఎలాంటివి? గతంలో భౌతిక దాడులు, లైంగిక వేధింపులు, ఈవ్‌ టీజింగ్‌కు సంబంధించినవి మొదటి జాబితాలో ఉండేవి. దాదాపు వందలో 60 శాతం ఫోన్‌ వేధింపులు, సామాజిక మాధ్యమాలకు సంబంధించిన ఫిర్యాదులు ఉంటున్నాయి. ఈ ఫిర్యాదుల్లో వాట్సప్‌ ద్వారా వచ్చేవి ఎక్కువ ఉండగా, డయల్‌ –100, ఫేస్‌బుక్, హ్యాక్‌ ఐ యాప్, ఇన్‌స్టాగ్రామ్, ట్విటర్‌ నుంచి కూడా ఫిర్యాదులు అందుతున్నాయి.    ► సామాజిక మాధ్యమాల ద్వారా పెరిగే వేధింపులకు అడ్డుకట్ట వేయడానికి తీసుకుంటున్న చర్యలు? మహిళలు చాలా మంది వేధింపుల బారిన పడుతున్నామని తెలిసినా ఫిర్యాదు చేయడానికి ఇంకా ముందుకు రావడం లేదు. ముందు వాళ్లలో చాలా మార్పు రావాలి. ఏ వేధింపులైనా వెంటనే మాకు తెలియజేయడం ద్వారా సత్వర పరిష్కారం లభిస్తుంది. ఉమన్‌ సేఫ్టీ వింగ్‌లో ప్రత్యేకంగా సైబర్‌ క్రైమ్‌కు సంబంధించి ‘షీ ల్యాబ్‌’ను కూడా ప్రారంభిస్తున్నాం. అపరిచితుల నుంచి వచ్చే ఫోన్‌ వేధింపులను సైబర్‌ నిపుణుల ద్వారా కనిపెట్టి, వీటికి అడ్డుకట్ట వేస్తున్నాం. ఇతర రాష్ట్రాల నుంచీ సైబర్‌ నేరస్తులు ఉంటున్నారు. ఇలాంటప్పుడు వారిని పట్టుకోవడానికి ఇతర రాష్ట్రాల పోలీసుల సాయమూ తీసుకుంటున్నాం. ఏఅగిఓ ఉ్గఉ మొబైల్‌ అప్లికేషన్‌ ఉంది. ఇది ఇప్పటికే 30 లక్షల మందికి పైగా రీచ్‌ అయ్యింది. మా వెబ్‌సైట్‌లో సోషల్‌మీడియాలో మహిళలు ఎంత జాగ్రత్తగా ఉండాలో తెలిపే విధానాలపై పూర్తి సమాచారం ఉంచాం. వాటిని చదివి తెలుసుకోవచ్చు.   ‘షీ టీమ్‌’ సమావేశం అనంతరం సభ్యులతో స్వాతి లక్రా ► షీ టీమ్‌లో మహిళా భద్రత కోసం ఎంత మంది వర్క్‌ చేస్తుంటారు? 33 శాతం మహిళలకు రిజర్వేషన్‌ వచ్చాక మహిళలు అధిక సంఖ్యలో పోలీసు విభాగంలోకి వస్తున్నారు. కానీ, ఇంకా తక్కువమంది మహిళా పోలీసులు ఈ విభాగంలో ఉండటం ఆలోచించ వలసిన విషయం. షీ టీమ్‌ బృందాలుగా రాష్ట్రవ్యాప్తంగా పనిచేస్తారు. ఒక బృందంలో 5 గురు సభ్యులు, ప్రతి బృందంలో తప్పనిసరిగా ఒక మహిళ ఉంటారు. వీళ్లు యూనిఫామ్‌లో కాకుండా సివిల్‌ డ్రెస్‌లో డిప్యూటీ సూపరిండెంట్‌ ఆఫీసర్‌ పర్యవేక్షణలో విధులను నిర్వర్తిస్తుంటారు. ఇదే విధానం తెలంగాణ మొత్తం ఉంటుంది. సుశిక్షితులైన వారే ఈ టీమ్‌లో ఉంటారు. అలాగే, సమాజంలో మహిళల స్థానం పట్ల అవగాహన, వారి పట్ల నడుచుకునే విధానం, ఆపరేషన్‌ నైపుణ్యాలు, పద్ధతులు, సాంకేతిక నైపుణ్యం, న్యాయపరమైన, చట్టపరమైన నిబంధనల పట్ల పూర్తి సమాచారం కలిగి ఉంటారు. ► మన సమాజ మూలాల్లోనే కుటుంబాల్లోనూ అమ్మాయిల పట్ల ఒక వివక్ష ఉంది. షీ టీమ్‌ ఏర్పాటై ఇన్నేళ్ల తర్వాత ఈ విధానంలో ఏమైనా మార్పు వచ్చిందంటారా? చాలా మార్పు వచ్చింది. వివక్ష లేకపోలేదు. కానీ, వివక్ష తీవ్రత తగ్గింది. 2016–17 సమయంలో అమ్మాయిలను వేధించేవారిలో చాలా మంది మైనర్‌ అబ్బాయిలను మేం పట్టుకున్నాం. వారికి కౌన్సెలింగ్‌ చేస్తూ వచ్చాం. దీంతో వారిలో మార్పు తీసుకురావడానికి జూనియర్, డిగ్రీ స్థాయి కాలేజీల్లో అవగాహన సదస్సులు ఏర్పాటు చేశాం. స్వచ్ఛంద సంస్థలతో కలిసి ప్రోగ్రామ్‌లు చేశాం. ఇప్పుడు సర్వే చేస్తే మైనర్‌ అబ్బాయిలు వేధింపులకు పాల్పడటం లేదని తెలిసింది. అవగాహన కావచ్చు. కౌన్సెలింగ్‌ కావచ్చు. అన్నీ దోహదం చేస్తున్నాయి. కాలేజీల్లో అబ్బాయిలు కూడా షీ టీమ్‌ కార్యక్రమాల సమయంలో పాల్గొనడానికి స్వచ్ఛందంగా ముందుకువస్తున్నాయి. అమ్మాయిలను ఎలా చూడాలనే ఆలోచనల్లో మార్పు రావడానికి మేం చేస్తున్న కార్యక్రమాలు దోహదం చేస్తున్నాయి. ఇళ్లలో చూస్తే ఈ మార్పు చాలా నెమ్మదిగా ఉంది. మరొక బాధాకరమైన విషయం ఏంటంటే.. బధిరులను వేధించడం, వారిపై లైంగిక దాడులకు పాల్పడటం వంటివి జరుగుతున్నాయి. బధిరుల పట్ల ఎలా నడుచుకోవాలనే విషయాల పట్ల కుటుంబాల నుంచే అబ్బాయిల్లో అవగాహన పెంచితే మరింత బాగుంటుంది. ► ఇటీవల చిన్నపిల్లలపై లైంగిక దాడుల సంఘటనలు ఎక్కువ వింటున్నాం. తెలిసినవారే నిందితులుగా ఉంటున్నారు. ఇది ఎంతవరకు వాస్తవం? నిజమే, పిల్లలపై దాడులు చేసేవారు 90 శాతం కంటే ఎక్కువ ఆ కుటుంబాలకు తెలిసినవారే ఉంటున్నారు. ఇప్పుడిప్పుడే కుటుంబాల నుంచి ఫిర్యాదు చేయడానికి ముందుకు వస్తున్నారు. ఇంట్లో, ఇంటి చుట్టుపక్కల ఉండే ‘అంకుల్స్‌’ వల్ల ఇలాంటి దాడులు జరుగుతున్నాయి. పిల్లలపై లైంగిక దాడి జరిగిందని తెలిసినప్పుడు తప్పనిసరిగా ఫిర్యాదు చేయాలి. ఆ నేరాన్ని దాచిపెట్టాలని చూసినా అది నేరమే. ఈ విషయాలు పిల్లలకు కూడా తెలియాలని పాఠశాలల్లో ‘సేఫ్‌–అన్‌ సేఫ్‌ టచ్‌’ పట్ల అవగాహన కల్పిస్తున్నాం. సమస్య తెలిసినప్పుడు టీచర్లు కూడా ఫిర్యాదు చేయాల్సిన బాధ్యత గురించి తెలియజేస్తున్నాం. ► మహిళకు సమస్య వచ్చి, మిమ్మల్ని కలిసిన తర్వాత ఆమె జీవితంలో నిలదొక్కుకోవడానికి  ఎలాంటి భరోసా కల్పిస్తున్నారు? బాధితుల్లో ఎలాంటి అండ లేనివారికి ప్రభుత్వం నుంచి పరిహారం ఉంటుంది. వారు నిలదొక్కుకోవడానికి చదువు, జీవననైపుణ్యాలను కల్పించేందుకు తగిన శిక్షణ కూడా ఉంటుంది. ► చాలా వరకు మహిళా బాధితుల్లో ఇప్పటికీ పోలీసు స్టేషన్‌కి రావాలంటే ఒక తెలియని సందిగ్ధత ఉంటుంది. షీ టీమ్‌ వచ్చాక ఈ విధానంలో మార్పు వచ్చిందంటారా? గత పోలీసు స్టేషన్లు, నేటి పోలీసు స్టేషన్లను చూస్తే ఆ తేడా మీకే అర్థమవుతుంది. ఒక మంచి వాతావరణంలో మా సిబ్బంది పనిచేస్తున్నారు. ముఖ్యంగా లింగసమానతలు, సున్నితమైన విషయాల గురించిన అవగాహనతో పనిచేస్తున్నారు. ఒక మహిళ పోలీస్‌ స్టేషన్‌కు వస్తే ఆమెతో ఎలా మాట్లాడాలి, ఎలా ఉండాలనే విషయాల పట్ల మార్పు వచ్చింది. అలాగే, ప్రతీ పోలీసు స్టేషన్‌ రిసెప్షన్‌లో ఒక మహిళ ఉంటుంది. దీని వల్ల మంచి మార్పుతోపాటు గతంలో ఉన్న సందిగ్ధతలు చాలా వరకు తగ్గాయి. ఒక మహిళ ఆన్‌లైన్‌ ద్వారా ఫిర్యాదు చేస్తే, మేం వారిని నేరుగా సంప్రదించి వివరాలన్నీ తీసుకుంటున్నాం. అంటే, మహిళ పోలీసు స్టేషన్‌కు రాకుండానే ఆమెకు న్యాయం జరిగేలా చూస్తున్నాం. ► ఇతర రాష్ట్రాల్లో ‘షీ టీమ్‌’ లాంటి మహిళా రక్షణ కోసం చేస్తున్నæ విభాగాలున్నాయా? మనం వారి నుంచి స్ఫూర్తి పొందినవి ఉన్నాయా? తప్పకుండా ఉంటాయి. మన సెంటర్స్‌ ఏ విధంగా పనిచేస్తున్నాయో తెలుసుకోవడానికి ఇతర రాష్ట్రాల పోలీసు విభాగం నుంచి వచ్చి చూస్తుంటారు. మేం కూడా మహిళా రక్షణలో ఇతర రాష్ట్రాల పోలీసు విభాగం చేస్తున్న కార్యక్రమాల గురించి తెలుసుకుంటుంటాం. ఇది రెండువైపులా ఉంటుంది. ► ఇక్కడి మహిళలు వేరే దేశాల్లో వేధింపులకు గురైన సందర్భాల్లో వచ్చిన ఫిర్యాదులు.. ఈ విధానంలో ఎలాంటి ఫలితాలు వస్తున్నాయి? ఉమెన్‌ సేఫ్టీ వింగ్‌లోనే ‘ఎన్‌ఆర్‌ఐ సెల్‌’ కూడా ఏర్పాటు చేశాం. ఎన్‌ఆర్‌ఐ లను పెళ్లి చేసుకున్న మహిళలు విదేశాలకు వెళ్లిన తర్వాత వారిని వదిలేయడం, అదనపు కట్నం కోసం వేధించడం వంటి సంఘటనలు చూస్తున్నాం. ఇలాంటి వారి కోసం ఒక టీమ్‌ పని చేస్తుంది. లాయర్‌ ద్వారా, స్వచ్ఛంద సంస్థల నుంచి, ఎంబసీస్, విదేశీ మంత్రిత్వ శాఖ, ఆర్‌పీఓ .. అందరినీ సంప్రదించి ఆ సదరు మహిళకు ఎలా సాయం అందించాలో చూస్తున్నాం. కొన్ని విషయాల్లో టైమ్‌ పడుతుంది కానీ, మంచి ఫలితాలు వస్తున్నాయి.   ► మహిళా రక్షణ విషయంలో ఇప్పటి వరకు ఉన్న చట్టాలు సరిపోతాయా? అదనంగా కొత్త చట్టాలను చేర్చాల్సిన అవసరం ఉందా? చట్టాలు చాలా ఉన్నాయి. వాటిని అమల్లో పెట్టడం ముఖ్యం. ఈ విషయంపైనే మేం దృష్టి పెడుతున్నాం. విచారణ త్వరగా పూర్తి చేయాలి. చార్జ్‌షీట్‌ ఫైల్‌ చేశాక త్వరగా బాధితులకు న్యాయం జరగాలి.. ఈ విధానంలోనే మేం పనిచేస్తున్నాం. ► సమాజంలో చోటు చేసుకోవాలనుకుంటున్న మార్పుల గురించి? దేశవ్యాప్తంగా పోలీసు విభాగంలో మహిళల సంఖ్య తక్కువే ఉంది. ఇప్పుడిప్పుడే మహిళా పోలీసుల సంఖ్య పెరుగుతోంది. మన సమాజంలో 50 శాతం మహిళలు ఉంటే అంత శాతం పోలీసు విభాగంలోనూ ఉండాలి. దీనివల్ల సమాజంలో ఉన్న మహిళలకు మరింత మేలు జరుగుతుంది. ఏ సమయంలోనైనా మహిళ ధైర్యంగా తన పనుల నిమిత్తం వెళ్లగలిగే పరిస్థితి రావాలనుకుంటున్నాను. ఆ రోజు తప్పక వస్తుంది అన్న నమ్మకమూ ఉంది. తెలంగాణ రాష్ట్రంలో మహిళల రక్షణే ధ్యేయంగా పనిచేస్తున్న ‘షీ టీమ్‌’, ఉమెన్‌ సేఫ్టీ వింగ్‌ ఇన్‌చార్జ్, అడిషనల్‌ డీజీపీ స్వాతి లక్రా, డిఐజీ సుమతి ఇంటర్వ్యూలతో షీ టీమ్‌ గురించిన సమగ్ర సమాచారం. ఎంబీయే చేస్తున్న నాకు మా కాలేజీలో చదువుతున్న సురేష్‌ (పేరు మార్చడమైనది) ప్రేమిస్తున్నానంటూ దగ్గరయ్యాడు. ఏడాదిగా బాగానే ఉన్న సురేష్‌ అనుమానంతో విసిగిస్తుండటంతో భరించలేక బ్రేకప్‌ చెప్పేశాను. ఆనాటి నుంచి తన దగ్గరున్న ఫొటోలతో నన్ను బెదిరించడం మొదలుపెట్టాడు. నా ఫోన్‌లో ఉన్న మా బంధుమిత్రుల నెంబర్లన్నీ ట్యాప్‌చేసి, తీసుకొని వారందరికీ మా ప్రేమ గురించి, ఫొటోల గురించి చెబుతానని బెదిరించేవాడు. ఇది నా భవిష్యత్తుకే ప్రమాదం అనుకున్నాను. మా ఫ్రెండ్‌ ఇచ్చిన సలహాతో ‘షీ టీమ్‌’ను వాట్సప్‌ నెంబర్‌ ద్వారా సంప్రదించాను. పోలీసులు సురేష్‌ను హెచ్చరించి, అతని వద్ద నాకు సంబంధించి ఉన్న ఫొటోలు, వీడియోలు డిలీట్‌ చేయించారు. ఇక నుంచి ఎలాంటి వేధింపు చర్యలకు పాల్పడబోనని రాతపూర్వకంగా రాయించుకొని, అతని మీద నిఘా పెట్టారు. రెండు నెలలుగా ఈ సమస్యతో నరకం చూసిన నాకు, షీ టీమ్‌ ద్వారా ఒక్క రోజులోనే పరిష్కారం దొరికింది. ఇప్పుడు హాయిగా ఉన్నాను. – బాధితురాలు మా అమ్మాయి ఏడవ తరగతి చదువుతుంది. సెలవులకు మా అమ్మ వాళ్ల ఊరు వెళ్లింది. అదే ఊళ్లో ఉంటున్న తెలిసిన వ్యక్తే మా అమ్మాయి పట్ల దారుణంగా ప్రవర్తించడమే కాకుండా, ఫొటోలు, వీడియోలు తీసి మమ్మల్ని మానసికంగా వేధించేవాడు. భరించలేక షీ టీమ్‌ను ఫోన్‌ ద్వారా సంప్రదించాం. షీ టీమ్‌ సదరు వ్యక్తి నుంచి ఎలాంటి ఇబ్బంది తలెత్తకుండా సరైన విధంగా బుద్ధి చెప్పారు. ఏడాది నుంచి సమస్యేమీ లేకుండా మనశ్శాంతిగా ఉన్నాం. – మరో బాధితురాలి తల్లి అవగాహన తీసుకొస్తున్నాం– బి. సుమతి ► మహిళల వేధింపులకు సంబంధించి రోజూ ఎన్ని కేసులు ఫైల్‌ అవుతుంటాయి? రోజూ దాదాపు 20 నుంచి 25 కేసుల వరకు ఉంటాయి. వీటిలో లైంగిక వేధింపులు ఎక్కువ. స్నేహం, ప్రేమ పేరుతో దగ్గరయ్యి ఫొటోలు, వీడియోలు నలుగురిలో పెట్టి పరువు తీస్తామనే బెదిరింపులూ ఎక్కువే. పదేళ్ల లోపు చిన్నపిల్లలకు సంబంధించిన కేసులు కూడా ఉంటున్నాయి. వీటిలో తీవ్రత శాతాన్ని బట్టి మానిటరింగ్‌ ఉంటుంది. ప్రధానంగా నేరాల తీవ్రతను బట్టి ఒక షెడ్యూల్‌ను రూపొందించాం. పిల్లలు, మహిళలపై పబ్లిక్‌గా జరిగే దాడులు, లైంగిక హింస, మనుషుల అక్రమరవాణా, సైబర్‌క్రైమ్, గృహహింస ప్రధానమైనవి.   ► షీ టీమ్‌ ఆధ్వర్యంలో పిల్లల భద్రత కోసం చేస్తున్న కార్యక్రమాలు గురించి? చిన్న పిల్లల్లో అవగాహన కల్పించడానికి రాష్ట్రస్థాయిలో స్కూళ్లను ఎంచుకున్నాం. షీ టీమ్, సైబర్‌ నిపుణులు, స్వచ్ఛంధ సంస్థ భాగస్వామ్యంతో ఇప్పటికి 1650 స్కూళ్లలో ‘సైబర్‌ కాంగ్రెస్‌’ పేరుతో ప్రత్యేక కార్యక్రమం ఏర్పాటు చేశాం. తెలంగాణలోని 33 జిల్లాల్లోనూ ప్రతి స్కూల్‌ నుంచి విద్యార్థులు పాల్గొనేలా చూస్తున్నాం.   ► టీనేజర్లు, యువతలో మహిళల భద్రతకు సంబంధించి చేస్తున్న కార్యక్రమాలు? యువతలో 19 నుంచి 25 ఏళ్ల లోపు అమ్మాయిలపై వేధింపులు ఎక్కువున్నాయి. అందుకని, కాలేజీల్లో ‘గర్ల్‌ సేఫ్టీ క్లబ్స్‌’ ఏర్పాటు చేస్తున్నాం. దీంట్లో 25 మంది విద్యార్థులను తీసుకుంటే సగం అమ్మాయిలు, సగం అబ్బాయిలు ఉండేలా చూస్తున్నాం. ఒక కాలేజీలో 25 మంది సేఫ్టీ క్లబ్‌గా ఉంటే వారి చుట్టుపక్కల, కాలేజీలో ఏదైనా సమస్య వస్తే ఎలా స్పందించాలి, అనే విషయాల పట్ల శిక్షణ ఇస్తాం. వాళ్లు పరిష్కరించలేని సమస్యలను మా దగ్గరకు తీసుకువచ్చేలా శిక్షణ ఇస్తున్నాం. ► ఆన్‌లైన్‌ మోసాలకు గురయ్యేవారిలో గృహిణులూ ఉంటున్నారు. వీరి రక్షణ కోసం చేస్తున్న కార్యక్రమాలు? గృహిణులు సైబర్‌ మోసాల బారినపడకుండా, అవగాహన కల్పించేందుకు ‘సైభర్‌’ కార్యక్రమం రూపొందించాం. ఆన్‌లైన్‌ మాధ్యమంగానే చేసిన ఈ కార్యక్రమం ద్వారా దాదాపు 50 లక్షల మందికి రీచ్‌ అయ్యాం. స్లమ్స్‌లలో కూడా అక్కడి అమ్మాయిల భాగస్వామ్యంతో గృహిణుల రక్షణ కోసం అవగాహనా కార్యక్రమాలు చేస్తున్నాం. వీటి విస్తృతి పెంచేందుకు మరికొన్ని ప్రణాళికలు సిద్ధం చేస్తున్నాం. ► గ్రామస్థాయిల్లో మహిళలకు రక్షణ కల్పించేందుకు, అవగాహన పెంచేందుకు చేస్తున్న కృషి? పట్టణ, గ్రామీణ స్థాయిలోనూ షీ టీమ్‌ ద్వారా నేరుగా దాదాపు 30 లక్షల మందికి రీచ్‌ అయ్యాం. స్థానిక జానపద కళాకారులతో కలిసి గ్రామస్థాయిలో కార్యక్రమాలు చేశాం. వీటిని మరింతగా జనంలోకి తీసుకెళ్లే ప్రయత్నం చేస్తున్నాం. షీ టీమ్‌ మీ కోసమే.. ► పబ్లిక్‌ ప్రదేశాలలో మహిళలపై లైంగిక వేధింపులు (ఈవ్‌ టీజింగ్‌.. వంటివి) జరిగినా ► ఫోన్‌కాల్, మెసేజ్‌లు, ఇ–మెయిల్స్, సోషల్‌ మీడియా వేదికగా వేధింపులకు గురిచేసినా ► మహిళ ఒంటరిగా ప్రయాణించే సందర్భాలలో వెంటనే పోలీసు సాయం అందాలన్నా షీ టీమ్‌ వెంటనే స్పందిస్తుంది. ► మహిళలపై తీవ్రమైన నేరాలను అరికట్టడానికి నిరోధక శక్తిగా పనిచేస్తుంది. ► తప్పుదారి పట్టిన యువతను బాధ్యతాయుతమైన పౌరులుగా తీర్చిదిద్దడానికి నిపుణులచే కౌన్సెలింగ్‌ ద్వారా అవగాహన కల్పింస్తుంది. వారిని తమ నిఘానేత్రంతో నిశితంగా గమనింఇస్తుంది. ► మహిళకు హక్కుల పట్ల షీ టీమ్‌ వివిధ వేదికల ద్వారా అవగాహన కలిగిస్తుంది. భద్రత... సురక్షితం ► బృందాలుగా తెలంగాణ వ్యాప్తంగా ‘షీ టీమ్‌’ పనిచేస్తుంది. ప్రతి టీమ్‌లో ఒక మహిళా పోలీస్‌ అధికారి ఉంటారు. ► బస్‌స్టాండ్లు, రైల్వేస్టేషన్లు, స్కూళ్లు–కాలేజీలు, లేడీస్‌ హాస్టల్స్, పార్కులు, ఆసుపత్రుల చుట్టుపక్కల ప్రాంతాలను హాట్‌స్పాట్‌లుగా గుర్తించి నిఘాను ఉంచుతుంది. ► చట్టం, న్యాయం, సాంకేతిక విషయాల్లో సుశిక్షితులైన వారు ఈ బృందంలో తమ విధులను నిర్వర్తిస్తుంటారు. ఎప్పటికప్పుడు షీ టీమ్‌కు నిఘా విభాగం నుంచి సమాచారం చేరుతూనే ఉంటుంది. ► మహిళలు ఆన్‌లైన్‌ వేదికల ద్వారా తమ ఫిర్యాదులను అందజేయవచ్చు. షీ టీమ్‌ బృందం సివిల్‌ డ్రెస్సులో బాధితులను నేరుగా కలిసి, తదుపరి విచారణ కొనసాగిస్తుంది. ► ఒకసారి ఒక వ్యక్తిపై మొదటిసారి నేరారోపణ వస్తే సుమోటోగా బుక్‌ చేసి, తగిన చర్యలు తీసుకుంటారు. అదే నేరసుడిపై మరోసారి ఫిర్యాదు వస్తే.. ఆ కేసును నిర్భయ యాక్ట్‌ కింద బుక్‌ చేసి, మరిన్ని కఠిన చర్యలు తీసుకుంటారు. అందుకని, బాధితులు వెనుకంజ వేయకుండా తమ సమస్యను నివేదించి, సరైన పరిష్కారం పొందవచ్చు. ► సమాజంలో మహిళలకు సంబంధించిన సమస్యలను పరువుగా చూస్తారు. పోలీసు స్టేషన్‌లో ఫిర్యాదు చేస్తే ఆ వివరాలు బయటకు వచ్చి, తమ కుటుంబ పరువు పోతుందేమో అని భయపడతారు. షీ టీమ్‌ లోబాధితుల వివరాలను అత్యంత గోప్యంగా ఉంచుతారు. సామాజిక మాధ్యమాలు, ఫోన్‌ నెంబర్, నేరుగా.. ఫిర్యాదులను స్వీకరించడమే కాకుండా, అత్యంత వేగంగా పరిష్కారం చూపుతారు. అందుకని మహిళలు తమను వేధించేవారిని ఆగడాలకు అడ్డుకట్ట వేయాలంటే వారికై వారుగా ముందుకు రావాలి. ► మహిళా రక్షణ కోసం షీ టీమ్‌ వివిధ వేదికల ద్వారా ప్రజలలో అవగాహన కలుగజేస్తుంది. ఆ కార్యక్రమాలలో పాల్గొని తమ అభిప్రాయాలనూ పంచుకోవచ్చు. ఫిర్యాదులకు వేదికలు తెలంగాణ మొత్తానికి మహిళకు రక్షణకవచంలా ఉంది షీ టీమ్‌. సమస్య వచ్చినప్పుడు సందేహించకుండా సత్వర పరిష్కారం కోసం సంప్రదించాల్సిన వేదికలు..  ఇన్‌స్టాగ్రామ్‌:telanganasheteams ఫేస్‌బుక్, ట్విటర్‌:@ts-womensafety మెయిల్‌: womensafety-ts@tspolice.gov.in య్యూట్యూబ్‌: Women Safety Wing Telangana Police వాట్సప్‌ నెం. 944 166 9988 క్యూ ఆర్‌ కోడ్‌.. వంటి వేదికల ద్వారా ఫిర్యాదు చేయచ్చు. లైంగిక వేధింపులు, దాడులు, సైబర్‌ నేరాల నుంచి ‘ఆమె’ను రక్షించడానికి నిరంతరాయంగా కృషి చేస్తున్న షీ టీమ్‌కు ‘సాక్షి’ సెల్యూట్‌.   – నిర్మలారెడ్డి, ఫొటోలు: నోముల రాజేష్‌రెడ్డి

భోపాల్‌: అక్షయ్‌ కుమార్‌–కాజల్‌ అగర్వాల్‌ సినిమా ‘స్పెషల్‌ చబ్బీస్‌’ గురించి తెలుసు.. ఈ ‘స్పెషల్‌ 40’ ఏమిటి? అనే కదా డౌటు. ఆ సినిమాలో ఒక గ్రూప్‌ సభ్యులు సీబిఐ, ఇన్‌కామ్‌టాక్స్‌ ఆఫీసర్లుగా పోలీసులను బోల్తా కొట్టిస్తుంటారు. అయితే ఈ‘స్పెషల్‌ 40’ ని మాత్రం పోలీసులే ప్రత్యేకంగా ఏర్పాటు  చేశారు. మధ్యప్రదేశ్‌లోని ఇండోర్‌లో మహిళలపై జరిగే రకరకాల అఘాయిత్యాలకు అడ్డుకట్ట వేయడానికి పోలీసులు ఏర్పాటు చేసిన గ్రూప్‌ ఇది. మురికివాడల్లో నివసించే ఆడపిల్లలపై రౌడీలు, తాగుబోతుల కన్నుపడింది. అమ్మాయిలు ఒంటరిగా కనిపిస్తే రకరకాలుగా వేధించడం, అఘాయిత్యాలకు పాల్పడటం లాంటివి జరిగేవి. ‘ఈ దేశంలో ప్రతి పౌరుడు టోపీ ధరించని పోలీసే’ అనేది మన తెలుగు సినిమా డైలాగ్‌ కావచ్చుగానీ శాంతిభద్రతల సంరక్షణ అనేది మన అందరి బాధ్యత. ‘స్పెషల్‌ 40’లో ఉన్న మహిళల్లో ఎవరూ పోలిస్‌ డిపార్ట్‌మెంట్‌కు సంబంధించిన వారు కాదు. ఎక్కడో ఏదో సంఘటన చూసి కడుపు రగిలిపోయిన వారు, ‘చూస్తూ కూడా ఏమీ చేయలేమా’ అని నిస్సహాయంగా పిడికిళ్లు బిగించిన వారు, ‘మనకెందుకులే’ అని రాజీపడి, అదో పశ్చాత్తాపమై, భారమై, బాధపడి ‘లేదు. ఏదో ఒకటి చేయాలి’ అనుకున్నవాళ్లు ఎందరో ఉన్నారు. ‘స్పెషల్‌ 40’ సభ్యులకు కరాటే, తైక్వాండోలాంటి ఆత్మరక్షణ విద్యలలో శిక్షణ ఇవ్వడంతో పాటు, చట్టం, న్యాయ సంబంధిత విషయాలపై అవగాహన కలిగిస్తున్నారు.  ఎలాంటి చర్యలు నేరాల పరిధిలోకి వస్తాయి? ఏ నేరానికి ఎలాంటి శిక్ష పడుతుంది? ముఖ్యమైన సెక్షన్‌లు ఏం చెబుతున్నాయి?... మొదలైనవి ‘స్పెషల్‌ 40’ సభ్యులకు కొట్టిన పిండి. ఎక్కడ ఎవరికి ఏ సమస్య వచ్చినా అక్కడ వాలిపోయి, ఆ సమస్య పరిష్కారానికి కృషి చేస్తున్న ‘స్పెషల్‌ 40’ సభ్యులు ‘గుడ్‌ టచ్, బ్యాడ్‌ టచ్‌’లాంటి విషయాలపై పిల్లలకు అవగాహన కలిగిస్తున్నారు. అనుకోకుండా ఆపద ఎదురైతే ముందుగా చేయాల్సిన పని ఏమిటి? తీసుకోవాల్సిన జాగ్రత్తలు ఏమిటి?... మొదలైన విషయాలను తెలియపరుస్తున్నారు. ఈ గ్రూప్‌లో 20 ఏళ్ల వయసు నుంచి మొదలు 60 పైబడి ఉన్న మహిళలు కూడా ఉన్నారు. వీరి గ్రూప్‌లో సీనియర్‌ అయిన చంద్రకాంత మాలవీయాకు 63 సంవత్సరాలు. ‘ఈ వయసులో ఇదంతా ఎందుకు తల్లీ!’ అన్నవారు లేకపోలేదు. అయితే చంద్రకాంత వారి మాటలను పట్టించుకోలేదు. ‘భగవంతుడు ఇచ్చిన గొప్ప అవకాశం గా దీన్ని భావిస్తున్నాను. ఎందరో ఆడపిల్లలు నన్ను సొంత తల్లిలా భావించి తమ సమస్యలు చెప్పుకుంటున్నారు’ అంటుంది చంద్రకాంత. ‘స్పెషల్‌ 40లో నేను సభ్యురాలిని అనే విషయం తలచుకోగానే చెప్పలేనంత ఉత్సాహం, ధైర్యం ఒంట్లోకి వచ్చి చేరుతాయి. ఆడపిల్లల రక్షణ కు అవసరమైతే ప్రాణాలు కూడా లెక్క చేయను’ అంటుంది సంధ్యా మనోజ్‌ కాస్త ఉద్వేగంగా.ఒక మురికి వాడలో నివసించే రీతి అనే అమ్మాయి ఒకరోజు పోకిరీల బారిన పడింది. ఈ విషయాన్ని ఇంట్లో చెబితే ‘ఈ సమయంలో అటు వైపు ఎందుకు వెళ్లావు?’ అని మందలించాడు నాన్న. నిజానికి అప్పుడు రాత్రి ఎనిమిది కూడా దాటలేదు. మరోసారి ఒకచోట తాగుబోతుల బెడద ఎదురైతే వెంటనే ‘స్పెషల్‌ 40’కి సమాచారం ఇచ్చింది. ‘స్పెషల్‌ 40’ ఆ తాగుబోతుల భరతం పట్టింది. ఇప్పుడు ‘స్పెషల్‌ 40’ సభ్యుల దగ్గర వాకీ–టాకీలు ఉన్నాయి. వాటికంటే మఖ్యంగా అంతులేని ధైర్యం ఉంది. ఆపదలో ఉన్న మహిళలను ఆదుకోవాలనే అపారమైన తపన ఉంది. ఇంతకంటే కావల్సింది ఏమిటి!                      

లక్నో : లైంగిక వేధింపులకు పాల్పడ్డాడన్న కారణంతో ఇద్దరు యువతులు కలిసి అందరూ చూస్తుండగానే ఒక వ్యక్తిని చెప్పులతో దేహశుద్ది చేసిన ఘటన ఆదివారం ఉత్తర్‌ప్రదేశ్‌లోని జలాన్‌లో చోటుచేసుకుంది. వివరాలు.. జలాన్‌కు చెందిన అనూజ్‌ మిశ్రా జిల్లా కాంగ్రెస్‌ అధ్యక్షుడిగా పనిచేస్తున్నాడు. కాగా ఆదివారం అనూజ్‌ మిశ్రా జలాన్‌ సమీపంలోని ఒరై రైల్వే స్టేషన్‌కు వచ్చాడు. ఇంతలో స్టేషన్‌వైపు వస్తున్న ఇద్దరు యువతులపై అనూజ్‌మిశ్రా అనుచిత వ్యాఖ్యలు చేస్తూ ఈవ్‌ టీజింగ్‌కు పాల్పడడమే గాకుండా లైంగిక వేధింపులకు గురిచేశాడు. (చదవండి : బట్టతల దాచి పెళ్లి చేసుకున్నాడని..) దీంతో ఆగ్రహించిన సదరు యువతులు అనూజ్‌ మిశ్రాను పట్టుకొని తమ చెప్పులతో దేహశుద్ది చేశారు. చివరికి అనూజ్‌మిశ్రా క్షమించమని మహిళ కాళ్లు మీద పడ్డా అ‍ప్పటికే కనికరించలేదు. అప్పటికే కోపంతో ఊగిపోతున్న వారు అతని బట్టలు చించేసి మరోసారి చితకబాదారు. ఇంతలో పోలీసులు జోక్యం చేసుకొని అనూజ్‌ మిశ్రాను విడిపించి అతనిపై కేసు నమోదు చేశారు. ప్రస్తుతం ఈ వీడియో సోషల్‌ మీడియాలో వైరల్‌గా మారింది. వీడికి ఈ శాస్తి జరగాల్సిందే అంటూ నెటిజన్లు కామెంట్లు పెడుతున్నారు. 

కర్ణాటక,మండ్య : మండ్య నగరం నుంచి పాండవపురకు వెళుతున్న కేఎస్‌ ఆర్‌టీసీ బస్సులో తన పట్ల అసభ్యంగా ప్రవర్తించిన ఓ యువకుడి చెంప వాయించింది ఓ యువతి. ప్రస్తుతం ఈ వీడియో కొందరు సోషల్‌ మీడియాలో పోస్టు చేయడంతో వైరల్‌గా మారింది. మండ్య నగరం నుంచి పాండవపురకు యువతి గురువారం బస్సులో వెళ్తుండగా అదే బస్సులో వెనక సీటులో కూర్చున్న యువకుడు యువతిని తాకడం చేశాడు. ఓపిగ్గా చూసిన యువతి పరిస్థితి శ్రుతి మించడంతో ఒక్కసారిగా ఆగ్రహంతో సదరు యువకుడి చెంప చెల్లున వాయించింది. నీ చెల్లి, తల్లి ఉంటే ఇలాగే చేస్తావా అంటూ అతడిని ప్రశ్నించింది. బస్సులో ఒక్కసారిగా ఈ ఘటన జరగడంతో ప్రయాణికులు అప్రమత్తమయ్యారు. ఆ వెంటనే యువకుడు బస్సు నుంచి కిందకు దిగి వెళ్లిపోయాడు.  

నెల్లూరు(క్రైమ్‌): ఏమాత్రం సంబంధం లేని విషయంలో ఎస్‌ఐ తన కుమారుడిని పోలీస్‌స్టేషన్‌కు తీసుకెళ్లి తీవ్రంగా కొట్టాడని ఆరోపిస్తూ ఓ తల్లి సోమవారం వేదాయపాలెం పోలీస్‌స్టేషన్‌ ఎదుట విలపించింది. సదరు ఎస్‌ఐపై చర్యలు తీసుకోవాలని ఆమె ఉన్నతాధికారులను కోరింది. బాధిత తల్లి, సేకరించిన సమాచారం మేరకు వివరాలు ఇలా ఉన్నాయి. వేదాయపాలెం పోలీసుస్టేషన్‌ పరిధిలో ఈ నెల 21వ తేదీన తెలుపురంగు స్కూటీలో వెలుతున్న యువకుడు ఓ యువతి చున్నీ పట్టుకుని లాగాడని పోలీసులకు ఫిర్యాదు అందింది. ఈ ఘటనలో అనుమానంతో ఆదివారం రాత్రి గాంధీనగర్‌కు చెందిన పవన్‌ను పోలీసులు అదుపులోకి తీసుకుని స్టేషన్‌కు తరలించారు. తనకు ఏమీ తెలియదనీ, ఎవరి చున్నీ లాగలేదని ఆ యువకుడు చెబుతున్నా పట్టించుకోకుండా ఎస్‌ఐ కొట్టడంతో అస్వస్థతకు గురయ్యాడు. స్టేషన్‌ బయట ఉన్న కుటుంబసభ్యులను పిలిచిన పోలీసులు వెంటనే అతనిని తీసుకెళ్లాలని సూచించారు. దీంతో బాధిత కుటుంబసభ్యులు అతనిని చికిత్సనిమిత్తం జీజీహెచ్‌కు తరలించి చికిత్స చేయించారు. ఎస్‌ఐ వ్యవహారశైలిని నిరసిస్తూ బాధిత తల్లి, కుటుంబసభ్యులు సోమవారం వేదాయపాలెం పోలీస్‌స్టేషన్‌ వద్దకు చేరుకున్నారు. తన కుమారుడు ఈ నెల 21వ తేదీన నెల్లూరు నగరంలోనే లేడని పనుల కోసం బయటకు వెళ్లాడని చెబుతున్నా పోలీసులు వినకుండా తీవ్రంగా కొట్టారని బాధిత తల్లి చంద్రకళ ఆరోపించింది. ఈ ఘటనపై ఉన్నతాధికారులు స్పందించి ఆ ఎస్‌ఐపై చర్యలు తీసుకోవాలని ఆమె కోరారు. ఇదే విషయాన్ని ఆమె స్థానిక వేదాయపాళెం ఇన్‌స్పెక్టర్‌ టి.వి.సుబ్బారావును సైతం కోరింది. 

వైఎస్‌ఆర్‌ జిల్లా, పోరుమామిళ్ల:  టీచర్‌ ట్రైనింగ్‌ చేస్తున్న అమ్మాయిని ప్రేమిస్తున్నానంటూ ఓ యువకుడు వేధించడంతో  తట్టుకోలేక ఉరి వేసుకుని ఆత్యహత్య చేసుకున్న ఘటన బుధవారం మండలంలోని అక్కలరెడ్డిపల్లెలో జరిగింది. ఎస్‌ఐ మోహన్‌ కథనం మేరకు వివరాలిలా ఉన్నాయి. అక్కలరెడ్డిపల్లెకు చెందిన దాసరిపల్లె వెంకటయ్య, కుమారిల పెద్ద కూతురు శాంతిప్రియ పోరుమామిళ్లలోని కృష్ణశారద కళాశాలలో టీచర్‌ ట్రైనింగ్‌ చేస్తోంది. అదే గ్రామానికి చెందిన ఓబుళాపురం ఓబులేసు పోరుమామిళ్లలోని ఓ దుకాణంలో గుమస్తాగా పని చేస్తున్నాడు. రోజూ ప్రేమిస్తున్నానంటూ ఆమెను వెంటపడేవాడు. తనను వేధించవద్దని శాంతిప్రియ చెప్పినా అతను తన వైఖరి మార్చుకోలేదు. ఈ నేపథ్యంలో బుధవారం ఉదయం ఇంట్లో ఎవ్వరూ లేని సమయంలో శాంతిప్రియ ఉరి వేసుకుని ఆత్మహత్య చేసుకుంది. ఈ మేరకు అమ్మాయి తల్లి కుమారి ఇచ్చిన ఫిర్యాదుపై కేసు నమోదు చేసి దర్యాప్తు చేస్తున్నామని ఎస్‌ఐ మోహన్‌ తెలిపారు. నిందితుడిని ఉరి తీయాలి: మృతురాలి తల్లి ‘ఓబులేసు వేధిస్తున్నాడని చెబితే మేము మా అమ్మాయినే మందలించాము. అయినా ఓబులేసు మా ఇంటిపై దాడి చేసి కత్తితో బెదిరించాడు. అతని బెదిరింపులకు భయపడి మా  అమ్మాయి ఉరి వేసుకుంది’.. అని మృతురాలు శాంతిప్రియ తల్లి కుమారి బోరు న విలపించింది. దిశ చట్టం అమలు చేసి ఓబులేసును ఉరి తీయాలని ఆమె డిమాండ్‌ చేసింది. ట్రైనింగ్‌ పూర్తయితే ఉద్యోగం వస్తుందని, కుటుంబానికి ఆసరా గా ఉంటుందని ఎంతగానో ఆశలు పెట్టుకున్నాం.. ఇంతలోనే దుర్మార్గుడు పొట్టన పెట్టుకున్నాడని కన్నీరు మున్నీరైంది. 

తమ్ముడూ నిన్నే.ఎవరూ చూడటం లేదనుకుంటున్నావేమో.ఆమెకు తెలియకుండా ఫోన్‌లోబంధించాలనుకుంటున్నావేమో.చెత్త ఆలోచనలకు వాడాలనుకుంటున్నావేమో.మానుకో. మారు.నీ పనులకు శిక్షలు ఉన్నాయి.నీ చేష్టలకు బేడీలు పడతాయి.స్త్రీలు అప్రమత్తమయ్యారు.వారు నిన్ను వదలరు. తాట తీస్తారు. మెట్రోలో ప్రయాణిస్తున్నారు ముగ్గురు స్నేహితులు. ఆఫీస్‌ వేళ కావడం వల్ల రద్దీగా ఉంది ట్రైన్‌. ఈ ముగ్గురికీ సీట్‌ దొరకలేదు. కూర్చున్న లేడీస్‌కి దగ్గరగా నిలబడి ఉన్నారు. ఇంతలో మ«ధ్యలో నిలబడ్డవాడు మెల్లగా ఫోన్‌లోని కెమెరా ఆన్‌ చేశాడు. ఈ అమ్మాయిలను ఫోకస్‌ చేశాడు.  కూర్చుని ఉన్న అమ్మాయిల ఎదను చేయి పైకెత్తి కేప్చర్‌ చేసే ప్రయత్నం చేస్తున్నాడు. కూర్చున్న అమ్మాయిలు వీళ్లను గమనించట్లేదు. కాని ఆ ముగ్గురి  పక్కన నిలబడ్డ ఒక అమ్మాయి పసిగట్టి.. అతని చేతిలోంచి ఫోన్‌ లాగేసి ‘మిమ్మల్ని వీడు వీడియో తీస్తున్నాడు’ అంటూ ఆ ఫోన్‌ను ఆ అమ్మాయిల చేతికిచ్చింది. వాళ్లు అలెర్ట్‌ అయ్యేలోపు ఈ ముగ్గురూ ఆ ఫోన్‌ లాక్కునే ప్రయత్నం చేశారు. గోలగోల అయ్యింది. అందరూ కలిసి పక్కస్టేషన్‌లో ఆ ముగ్గురిని పోలీసులకు అప్పజెప్పారు. బస్టాప్‌లో ఆ కుర్రాడు. ఈ పని కోసమే వచ్చినట్టున్నాడు. బస్‌ కోసం వెయిట్‌ చేస్తున్న ఒకావిడను వెనక నుంచి వీడియో తీయడం మొదలుపెట్టాడు. దూరం నుంచి చూసేవారికి అతను మామూలుగా ఫోన్‌ పట్టుకున్నట్టు ఉంటుంది. కాని అందులో ఆమె వెనుకభాగం రికార్డ్‌ అవుతోంది. ఇంతలో ఆమె వెనక్కి తిరిగింది. అతడు కంగారు పడ్డాడు. అనుమానం కలిగించింది. వెంటనే వెళ్లి ఫోన్‌ లాక్కుంటే కెమెరా ఆన్‌లో ఉంది. మైట్రో ట్రైన్‌ వెళుతూ ఉంది. ఒక వ్యక్తి కూర్చుని ఉన్నాడు. ఎదురుగా కాలేజీ అమ్మాయి నిలబడి ఉంది. అతను ఫోన్‌లో ఒక వీడియో ఆన్‌ చేసి ఎదురుగా నిలబడి ఉన్న అమ్మాయికి కనిపించేలా  పెడ్తున్నాడు. ముందు ఆ అమ్మాయి పట్టించుకోలేదు. ఎంతసేపైనా ఆ వీడియోను ఆఫ్‌ చేయకపోయేసరికి అతనికి తెలియకుండా ఏమన్నా ఆన్‌ అయిందేమో అనుకొని అతనికి చెప్పబోతూ ఆ వీడియోను చూసి షాక్‌ అయింది. అది పోర్న్‌ వీడియో. కావాలనే.. తనకు కనిపించాలనే అతను అలా పెట్టాడు అని  అర్థమైంది ఆ అమ్మాయికి. ఇవన్నీ నిజాలే. జరిగినవే.. జరుగుతున్నవే. అయితే ఇలాంటి చర్యలకు పాల్పపడుతున్న వాళ్లకు  ఇవీ నేరాలే అది  వీటికి శిక్షలున్నాయని తెలియదు. మనల్ని ఎవరు పట్టుకుంటారు అన్న ధీమాతో ప్రవర్తిస్తుంటారు. కాని వీళ్లు ఒళ్లు దగ్గరపెట్టుకుని నడుచుకునేలా చేసే చట్టాలున్నాయి. ఈ నేరాలు ఏ చట్టం కిందకు వస్తాయి? ‘మహిళ అనుమతి లేకుండా, ఆమెకు తెలియకుండా ఆమెను, ఆమె కదలికలను,  శరీర భాగాలను చిత్రీకరిస్తే   నిర్భయ చట్టంలోని 354 (డి) కింద నేరం. మొదటిసారి చేస్తే మూడేళ్ల జైలుశిక్ష.. పదేపదే చేస్తే అయిదేళ్ల జైలు శిక్ష ఉంటుంది. ఐపీసీ 509 ప్రకారం ఇది మహిళ గౌరవమర్యాదలకు భంగం వాటిల్లే చర్య. కాబట్టి ఈ సెక్షన్‌ కింద కేసు నేరస్తుడికి మూడు నుంచి అయిదేళ్ల జైలు శిక్ష ఉంటుంది. అలాగే బహిరంగ ప్రదేశాల్లో ఇలాంటివాటికి పాల్పడినందుకు, పోర్న్‌వీడియోలు చూపించినందుకు ఐపీసీ 294 (అబ్‌సీన్‌ యాక్ట్‌) కింద మూడు నెలల నుంచి ఆరునెలల వరకు జైలు శిక్ష ఉంటుంది. వీన్నిటితోపాటు ఐటీ యాక్ట్‌ ఉండనే ఉంది. 67 ఆఫ్‌ ఐటీ యాక్ట్‌ ప్రకారం మహిళకు సంబంధించిన దృశ్యాలను కామాన్ని ప్రేరేపించేలా చిత్రీకరించి వాటిని ఇంటర్‌నెట్‌లో ప్రచురించిన, ప్రసారం చేసినా అయిదేళ్ల జైలు శిక్షతోపాటు లక్షరూపాయల జరిమానా ఉంటుంది. అమ్మాయిలే కాదు.. అబ్బాయిల తల్లిదండ్రులూ ఇవి తెలుసుకోవాలి. తమ పిల్లల కదలికల మీద నిఘా వేయాలి’ అని వివరిస్తున్నారు అడ్వకేట్, ఫ్యామిలీ కౌన్సెలర్‌ పార్వతి. కంప్లయింట్‌ ఎక్కడ ఇవ్వాలి? అయితే ఈ శిక్షలన్నీ పడాలంటే ముందు ఆ నేరం నమోదు కావాలి. అంటే నేరస్తుడిని పట్టుకోవాలి. ‘బహిరంగ ప్రదేశాల్లో ఇలా తమను ఎవరైనా వెంటాడుతున్నారు.. తమ మీద ఫోన్‌ ఫోకస్‌ అయి ఉంది అన్న అనుమానం రాగానే రియాక్ట్‌ కావాలి. వెంటనే అవతలి వ్యక్తి  చేతుల్లోంచి ఫోన్‌ లాక్కోవాలి. గట్టిగా అరిచి చుట్టూ ఉన్నవాళ్ల దృష్టిని తన వైపు తిప్పి ఆ వ్యక్తి పారిపోకుండా  చేయాలి.  100కి డయల్‌ చేస్తే షీటీమ్స్‌కి కనెక్ట్‌ అయ్యి దగ్గర్లో ఉన్న షీ టీమ్స్‌ సిబ్బంది వెంటనే సంఘటనా స్థలానికి వచ్చే అవకాశం ఉంటుంది. లేదంటే ఇప్పుడు తెలంగాణ పోలీస్‌ వాళ్ల ‘హాక్‌ – ఐ’ యాప్, ఆంధ్రప్రదేశ్‌ ప్రభుత్వం ‘దిశ’ యాప్‌లూ ఉన్నాయి అందుబాటులో. హాక్‌– ఐలోని ఎస్‌ఓఎస్‌ నొక్కితే చాలు మీరు రక్షణ వలయంలోకి వెళ్లినట్టే. దిశ యాప్‌ డౌన్‌లోడ్‌ చేసుకుంటే ప్రమాదంలో ఉన్నామనే అనుమానం కలిగితే చాలు ఆ యాప్‌ ఓపెన్‌ చేసి  ఫోన్‌ కదిలిస్తే  సమీప పోలీస్‌ సిబ్బందికి సంకేతాలు వెళ్లి నేరస్తుల వేట మొదలవుతుంది. ఇవన్నీటితోపాటు మీకు దగ్గర్లో ఉన్న ఏ పోలీస్‌ స్టేషన్‌లోనైనా జరిగిన సంఘటన గురించి ఫిర్యాదు చేయవచ్చు. మిమ్మల్ని వీడియో తీసిన కాపీ అతని ఫోన్‌లో లేకపోయినా... దాని కాపీ ఇంకా ఎక్కడ దొరికినా.. కూపీలాగి నేరస్తుడిని కటకటాల్లో తోసే వీలుంటుంది’ అని చెప్తారు తెలంగాణలోని విమెన్‌ ప్రొటెక్షన్‌ వింగ్‌ ఇన్‌స్పెక్టర్‌ కిరణ్‌. ఇంత మందిలో నన్నెవరు చూడొచ్చారులే అనే జులాయీల ధిలాసాకు వణుకు పుట్టించే టెక్నిక్స్‌  ఎన్నో ఉన్నాయి. ట్రాక్‌ యాప్‌ల నుంచి సర్వైలెన్స్‌ ఐ వరకు పోలీస్‌ రిపోర్ట్‌ నుంచి కోర్ట్‌ కొరడా దాకా బోలెడు. అందుకే మహిళల పట్ల మర్యాద పాటించడం ఒక్కటే రక్షణ కవచం. అది నేర్చుకుంటే ఇవన్నీ దూరం. ఈ పాఠం అందరికీ! – సరస్వతి రమ కొత్త యాప్‌లున్నాయి.. జాగ్రత్త కొత్త కొత్త యాప్‌లు వస్తున్నాయి వాటి గురించి అవగాహన ఉండాలి. మనకు తెలియకుండానే మనల్ని వీడియో తీస్తుంటారు. అనుమానం వచ్చి పట్టుకుంటే ఆ ఫోన్‌లో ఏమీ కనిపించదు. అలాంటి యాప్‌ను డౌన్‌లోడ్‌ చేసుకుంటారు. అందుకే ఫోన్‌ లాక్కోగానే గ్యాలరీలోకి వెళ్లి చూసే బదులు కెమెరా యాక్టివ్‌లో ఉందా అనేది చెక్‌ చేయాలి. కెమెరా యాక్టివ్‌లో ఉంటే కచ్చితంగా మిమ్మల్ని ట్రేస్‌ చేస్తున్నట్లే లెక్క. కొన్ని ఫోన్లలో టచ్‌ చేయంగానే కెమెరా ఆఫ్‌ అయిపోయేలా సెట్టింగ్స్‌ ఉంటాయి. అప్పుడు ఓపెన్‌లో ఉన్న ట్యాబ్స్‌ అన్నీ చెక్‌ చేయాలి. గ్యాలరీలో ఫీడ్‌ ఏమీ దొరక్కపోయినా తర్వాత  ఎక్కడోక్కడ కాపీ చేస్తారు.  అప్పుడు దాంతో ఇమేజ్‌ అనాలిసిస్‌ చేసి  వివరాలు తెలుసుకోవచ్చు. ఫోన్‌ లాక్కోగానే కెమెరా పొజిషన్‌ను చెక్‌ చేయడం మాత్రం మరవద్దు. ఒకవేళ ఎక్కడా ఏమీ దొరక్కపోయినా సీసీ కెమెరా ఫుటేజ్‌తో నేరస్తులు ఏం చేశారో చూడొచ్చు.  ఫేస్‌ రికగ్నినిషన్‌ కెమెరాలను అమర్చీ ఇలాంటి వాళ్ల ఆగడాలను అరికట్టొచ్చు.– సందీప్‌ ముదాల్కర్‌ సైబర్‌ క్రైమ్‌ ఇన్వెస్టిగేటర్‌ అండ్‌ ట్రైనర్‌, ఇ. పార్వతిఅడ్వకేట్, ఫ్యామిలీ కౌన్సెలర్‌

ఘట్‌కేసర్‌: తనను ప్రేమించాలని వేధించిన యువకుడిని ఘట్‌కేసర్‌ పోలీసులు రిమాండ్‌కు తరలించారు. సీఐ కథనం ప్రకారం.. పెద్దపల్లి సాగర్‌ రోడ్డుకు చెందిన ఎండీ ఇంతియాజ్‌ నగరంలోని తార్నాకలో నివాసం ఉంటూ ఆటోడ్రైవర్‌గా పనిచేస్తున్నాడు. ఇంజినీరింగ్‌ మూడో సంవత్సరం చదువుతున్న పెద్దపల్లికి చెందిన ఓ విద్యార్థినిని ప్రేమించాలని ఏడాదిగా వేధిస్తున్నాడు. వేధింపుల విషయమై అతడిపై పెద్దపల్లి పోలీస్‌స్టేషన్‌లో గతంలో రెండు కేసులు నమోదయ్యాయి. విద్యాభ్యాసం కోసం ఈ నెల 8న మండలంలోని చౌదరిగూడలోని కాలేజీకి రోడ్డుపై వెళ్తుండగా నిందితుడు బైక్‌పై వచ్చి తార్నాకలోని అతడి స్నేహితుడి గదికి తీసుకెళ్లాడు. తనను ప్రేమించని పక్షంలో అంతు చూస్తానని బెదిరించాడు. ఆమె గట్టిగా అరవడంతో తిరిగి ఆమెను కాలేజీ సమీపంలో వదిలివెళ్లాడు. ఈ విషయమై నిందితుడిపై చర్యలు తీసుకోవాలని విద్యార్ధిని పోలీస్‌స్టేషన్‌లో ఫిర్యాదు చేసింది. పోలీసులు నిందితుడిపై కేసు నమోదు చేసి రిమాండ్‌కు తరలించామన్నారు.

బంజారాహిల్స్‌: నడుచుకుంటూ ఇంటికి వెళ్తున్న తల్లీకూతుళ్లను ఇద్దరు యువకులు అడ్డగించి అసభ్యకరంగా ప్రవర్తించిన ఘటన బంజారాహిల్స్‌ పోలీస్‌స్టేషన్‌ పరిధిలో చోటుచేసుకుంది. పోలీసులు తెలిపిన వివరాల ప్రకారం.. బంజారాహిల్స్‌ రోడ్‌ నెం:13లోని గౌరీశంకర్‌ కాలనీలో నివసిస్తున్న లక్ష్మి అనే వివాహిత తన ఏడేళ్ల కూతురితో కలిసి ఆదివారం రాత్రి 11 గంటల సమయంలో  వైట్‌హౌస్‌ మీదుగా గౌరీశంకర్‌ నగర్‌ వైపు నడుచుకుంటూ వెళ్తున్నారు. వైట్‌హౌస్‌ వెనకాల రోడ్డు వద్దకు రాగానే ఇద్దరు ఆగంతుకులు స్కూటీ మీద వచ్చి అడ్డగించారు. వీరిలో ఓ యువకుడు ఆమె కూతురును బలవంతంగా స్కూటీపై ఎక్కించుకుని వెళ్లిపోయాడు. మరో యువకుడు లక్ష్మి పట్ల అసభ్యకరంగా ప్రవర్తించాడు. ఆమె అరుస్తూ చుట్టుపక్కల వారిని అప్రమత్తం చేస్తుండగానే ఆగంతుకుడు ఆమెను కిందకు నెట్టేసి పరారయ్యాడు. ఆందోళన చెందిన ఆమె కూతురు కోసం గాలిస్తూ ఇంటికి వెళ్లగాఇంట్లోనే కూతురు కనిపించింది. తన కూతుర్ని బలవంతంగా లాక్కెళ్లి తన పట్ల అసభ్యంగా ప్రవర్తించిన యువకులపై చర్యలు తీసుకోవాలంటూ బాధితురాలు బంజారాహిల్స్‌ పోలీస్‌స్టేషన్‌లో ఫిర్యాదు చేసింది. నిందితులపై ఐపీసీ సెక్షన్‌ 354, 323, 341 కింద క్రిమినల్‌ కేసు నమోదు చేసి పోలీసులు గాలింపు చేపట్టారు.

చెన్నై, తిరువొత్తియూరు: సినిమా చూస్తున్న సమయంలో మహిళ వద్ద అసభ్యంగా ప్రవర్తించిన ఇద్దరిని పోలీసులు అరెస్టు చేశారు. చెన్నై వలసరవాక్కం బెత్తానియా నగర్‌ 3వ వీధికి చెందిన జయలక్ష్మి (40) శనివారం రాత్రి వడపళణిలో ఉన్న మాల్‌లో సినిమా చూస్తున్నారు. ఆమె వెనుక సీట్లలో కూర్చొని ఉన్న ఇద్దరు యువకులు కాళ్లతో ఆమెకు అసౌకర్యం కలిగించినట్టు తెలిసింది. దీని గురించి జయలక్ష్మి వారిని ప్రశ్నించగా వారు ఆమెతో అసభ్యంగా మాట్లాడి గొడవ చేశారు. దీని గురించి జయలక్ష్మి వడపళణి పోలీసుస్టేషన్‌లో ఫిర్యాదు చేశారు. పోలీసులు కేసు నమోదు చేసి ఇద్దరిని అరెస్టు చేశారు. విచారణలో వారు సాలిగ్రామంకు చెందిన రమిష్‌ (29), రమేష్‌ (26) అని తెలిసింది. మద్యం మత్తులో ఉన్నట్టు తెలిసింది.

తాడేపల్లిరూరల్‌: తన బైక్‌ను స్నేహితులకివ్వడం.. ఆ యువకుడి ప్రాణాలనే బలిగొంది. ఆ స్నేహితులు ఓ యువతిని వేధించడం.. బైక్‌ నంబర్‌ ఆధారంగా పోలీసులు ఆ యువకుడిని స్టేషన్‌కు తీసుకెళ్లి విచారించడంతో అవమాన భారంతో ఆ యువకుడు ఆత్మహత్య చేసుకున్నాడు. తాడేపల్లి పట్టణ పరిధిలో జరిగిన ఈ ఘటన స్థానికంగా కలకలం రేపింది. ఓ చానెల్‌లో(సాక్షి కాదు) విలేకరిగా పనిచేస్తున్న తాడేపల్లి ముగ్గురోడ్డు ప్రాంతానికి చెందిన చరణ్‌రాజు తన బైక్‌ను విజయవాడలోని స్నేహితుడు శివ, అతనితోపాటు వచ్చిన మరో యువకుడికి ఈ నెల 24వ తేదీ రాత్రి ఇచ్చి విజయవాడలోని చర్చికి వెళ్లాడు. వారిద్దరూ బైక్‌పై విజయవాడ వన్‌టౌన్‌ ప్రాంతానికి వెళ్లి అక్కడ ఓ యువతిని ఈవ్‌టీజింగ్‌ చేయడంతో ఆమె వన్‌టౌన్‌ పోలీసులకు ఫిర్యాదు చేసింది. బైక్‌ నంబర్‌ ఆధారంగా పోలీసులు చరణ్‌ రాజును అదుపులోకి తీసుకుని రోజంతా పోలీస్‌స్టేషన్‌లో ఉంచి విచారించారు. ఈవ్‌ టీజింగ్‌ చేసింది చరణ్‌రాజు కాదని నిర్ధారించుకున్నాక విడిచిపెట్టారు. చేయని తప్పునకు శిక్ష అనుభవించానంటూ తీవ్ర మనస్తాపం చెందిన చరణ్‌రాజు గురువారం రాత్రి తన నివాసంలో ఉరేసుకుని ఆత్మహత్యకు పాల్పడ్డాడు.

సాక్షి, సిటీబ్యూరో:  ఏడాది క్రితం తొమ్మిదో తరగతి పిల్లాడు ఆకస్మాత్తుగా స్కూలుకెళ్లడం మానేశాడు. చదువులో పూర్తిగా వెనుకబడిపోయాడు. 24 గంటలూ తన గదిలోనే  ఉండేవాడు. ఆ పిల్లాడి ప్రవర్తనలో  మార్పును  తల్లిదండ్రులు పసిగట్టలేకపోయారు. చివరకు ఎదురుగా  ఉన్న ఓ లేడీస్‌ హాస్టల్‌లో  స్నానం చేస్తున్న అమ్మాయిల ఫొటోలను  తన మొబైల్‌ఫోన్‌లో చిత్రీకరిస్తూ  పట్టుబడిపోయాడు. అప్పుడు   ఆ తల్లిదండ్రుల కళ్లు  తెరుచుకున్నాయి. నగరంలో అప్పట్లో ఈ విషయం చర్చనీయాంశమైంది. అదొక్కటే కాదు. తల్లిదండ్రుల పెంపకంలోని లోపాలు, సామాజిక మాద్యమాలు, మీడియా, సినిమాలు వంటి అనేక కారణాలు చిన్నారుల్లో నేరప్రవృత్తికి ఆజ్యం పోస్తున్నాయి. అశ్లీల సాహిత్యం, హింసాత్మక  సినిమాలు ఎదుగుతున్న పిల్లలను నేరాల వైపు నడిపిస్తున్నాయి. మరోవైపు  స్కూళ్లు, కాలేజీల్లో  కంఫ్యూటర్‌ సైన్స్‌ వంటి కోర్సులకు ఇచ్చే ప్రాధాన్యం మోరల్‌ సైన్స్‌కు  ఇవ్వడం లేదు. నీతి కథలు బోధించే అధ్యాపకుల జాడే లేదు. ఏది మంచి, ఏది చెడు అని విడమర్చి చెప్పే చదువులు లేవు. దీంతో ఒక తరం నుంచి మరో తరానికి  వారసత్వంగా అందాల్సిన ఉన్నతమైన మానవ విలువలు అంతరించిపోతున్నాయి. విచ్ఛిన్న సంబంధాల్లోనే చిచ్చు.... ఒక్క ‘దిశ’ విషయంలోనే కాదు. గతంలో జరిగిన  అనేక లైంగిక దాడుల్లోనూ అరాచకమైన  మనస్తత్వం కలిగిన వారే నేరాలకు పాల్పడుతున్నారు.   కొన్ని చోట్ల మైనారిటీ  తీరని పిల్లలు ఉంటే, మరి కొన్ని చోట్ల అప్పుడప్పుడే మేజర్లుగా మారుతున్న వారు ఎక్కువ శాతం నేరగాళ్లుగా మారుతున్నారు. ఈ తరహా నేరాల్లో  విచ్ఛిన్నమై న కుటుంబసంబంధాలే  ప్రధాన కారణమని మానసిక నిపుణులు విశ్లేషిస్తున్నారు. ‘‘ భార్యాభర్తల మధ్య తర చూ జరిగే ఘర్షణలు, విడాకులు కోసం దారితీసే పరిస్థితులు, వివాహేతర  సంబంధాలు తదితర అంశాలు పిల్లలపై దుష్ప్రభావాన్ని చూపుతున్నాయి. ప్రశ్నించేవారు, పర్యవేక్షించే వారు లేకపోవడం వల్లనే తప్పులు చేస్తున్నా రు. ’’ అని ప్రముఖ మనస్తత్వ నిపుణులు డాక్టర్‌ కల్యాణ్‌చక్రవర్తి పేర్కొన్నారు. మరోవైపు పేదరికం కారణంగా, తల్లిదండ్రులు పట్టించుకోకపోవడం వల్లస్కూల్‌ దశలోనే  చదువు ఆపేసిన పిల్లల మెదళ్లు నేరాలకు అడ్డాలవుతున్నాయి.  ఇలాంటి వారి మెదళ్లు చదువు, విజ్ఞానానికి బదులు  శూన్యంతో ఉండి నేరపూరితమైన ఆలోచనలు, అరాచకత్వంతో నిండిపోతున్నాయి అన్నారు.   మానసిక అసమతౌల్యం... ‘‘పిల్లల్లో నేరప్రవృత్తికి సంబంధించిన లక్షణాలు చాలా స్పష్టంగా కనిపిస్తాయి. తల్లిదండ్రులు, కుటుంబసభ్యులకు దూరం కావడం, ఒంటరిగా గడపడం, చదువులో వెనుకబడిపోవడం వంటివి నేరపూరితమైన ఆలోచనలుగా భావించవచ్చు. ప్రాథమికంగా గుర్తిస్తే మార్పు తేవడం సాధ్యమే...’’ అంటారు  ప్రముఖ మానసిక నిపులు డాక్టర్‌ లావణ్య. మొదట్లోనే గుర్తించి మార్పు తేకపోవడం వల్లనే ఇలాంటి వ్యక్తులు కుటుంబాల నుంచి విడివడి నేరస్తులుగా  మారుతున్నారని, శవంపైన సైతం లైంగిక దాడికి పాల్పడే క్రూరత్వాన్ని సంతరించుకుంటున్నారని  ఆమె ఆందోళన వ్యక్తం చేశారు. మరోవైపు  అరచేతిలో అశ్లీలాన్ని చూపించే మొబైల్‌ ఫోన్‌ ఒక మహమ్మారిలా యువతను కబళిస్తోంది. టీనేజీ యువత మంచి కంటే చెడు పట్ల ఎక్కువ ఆకర్షితులవుతున్నారు. కానీ ఈ మంచి, చెడులను చెప్పే కుటుంబాలు, విద్యాసంస్థలు ఆ పని చేయకపోవడం వల్ల  నేరస్తులుగా మారుతున్నారు.  మనిషిలోని ‘బాధ’ తెలియాలి ఒక మనిషి పరిపూర్ణమైన ఉత్తమ వ్యక్తిత్వాన్ని సంతరించుకోకుండానే ఎదుగుతున్న దశలో నేరస్తుడగా మారుతున్నాడంటే సుస్థిరమైన కుటుంబం లేకపోవడమే ప్రధాన కారణం. నీతి, నైతిక విలువలు లేని విద్యాబోధన మరో కారణం. దీంతో మనుషులను గౌరవించే మనస్తత్వం అలవడడం లేదు. అలాగే తన చర్యల వల్ల ఎదుటి మనిషిని ఎలా బాధకు గురిచేస్తున్నాడో కూడా తెలుసుకోలేక పశువుగా మారుతున్నాడు. విలువలు బోధించే కుటంబం, విద్య చాలా అవసరం.–డాక్టర్‌ కల్యాణ్‌చక్రవర్తి, మానసిక వైద్య నిపుణులు

సాక్షి,సిటీబ్యూరో: నూనూగు మీసాలు రాని కుర్రాడు బాలికను అటకాయిస్తున్నాడు..విచ్చలవిడిగా తిరుగుతూ కంటి చూపుతో ఇబ్బంది పెడుతున్నాడు. ఒకేచోట పనిచేస్తున్న సహోద్యోగినిని ఫాలో అవుతూ పురుషులు వేధిస్తున్నారు.. జుట్టు నెరిసి.. వయసు మళ్లిన ఇంకొందరు పెద్దమనుషులు మహిళల అవసరాలను ఆసరాగా చేసుకుని వికృతంగా ప్రవర్తిస్తున్నారు. భయపడి కొందరు.. ఎవరికీ చెప్పుకోలేక ఎందరో మహిళలు,  యువతులు, బాలికలు వేధింపులను మౌనంగానే భరిస్తున్నారు. కొందరు ధైర్యం చేసి పోలీసులను ఆశ్రయిస్తున్నారు. అలా ఈ ఏడాది 11 నెలల్లో సైబరాబాద్, రాచకొండ పోలీసు కమిషనరేట్ల పరిధిలో 1,247 మంది ఈవ్‌ టీజర్లను షీ బృందాలు పట్టుకున్నాయి. అంటే నెలకు సగటున 113 వేధింపుల కేసులు నమోదైనట్టు గణాంకాలు చెబుతున్నాయి. ఓవైపు ఆకతాయిల ఆట కట్టిస్తున్న షీ బృందాలు ఇటు బాలికలు, అటు బాలురకు అవగాహన సదస్సులు సైతం నిర్వహించి వారి ప్రవర్తనలో మార్పు తీసుకొచ్చేందుకు కృషి చేస్తున్నాయి. ఆపద, వేధింపులు ఎదురైనప్పుడు ఏం చేయాలన్న దానిపై బాలికలు స్పష్టత ఇస్తూనే.. అమ్మాయిలను వేధిస్తే కుర్రాళ్ల కెరీర్‌ ఎలా పాడైపోతుందో.. సమాజంలో ఎంత చులకనగా మారిపోతారో చెబుతూ పోలీసులు సుతిమెత్తగా హెచ్చరిస్తున్నారు. ఇలా ఈ ఏడాది 11 నెలల్లో రెండు కమిషనరేట్లలో నాలుగు వేలకు పైగా శిబిరాలు ఏర్పాటు చేసి 6 లక్షల మందిని జాగృతి చేశారు.  ఈవ్‌ టీజర్లకు కౌన్సిలింగ్‌ ఇస్తున్న పోలీసులు ఫోన్‌తోనే పట్టించేస్తున్నారు.. బస్టాప్‌లు, ఆటో స్టాండ్‌లు, రైల్వే స్టేషన్లు, మెట్రో స్టేషన్లతో పాటు, పనిచేసే ప్రాంతాలు, విద్యాసంస్థలు.. ఇలా ఏ ప్రాంతమైనా సరే బాలికలు, యువతులు, మహిళలను వేధిస్తే షీ బృందాలను ఆశ్రయించాలని చేస్తున్న విస్తృత ప్రచారం బాగానే పనిచేస్తోంది. పోలీసు స్టేషన్లలో నేరుగా వచ్చి ఫిర్యాదు చేసేందుకు ఇబ్బంది అనిపిస్తే వాట్సాప్, ఫేస్‌బుక్, ట్విట్టర్, మెయిల్, హాక్‌ఐ ద్వారా ఫిర్యాదు చేయవచ్చని యువతులను చైతన్యం చేస్తున్న తీరు బాగానే పనిచేస్తోంది. ఇందుకనుగుణంగా వాట్సాప్, ఫేస్‌బుక్, ఈ–మెయిల్, ట్విట్టర్, డయల్‌ 100 ద్వారా మహిళల ఫిర్యాదుల శాతం పెరిగింది. అయితే ఫిర్యాదు అందిన వెంటనే మఫ్టీలో రంగంలోకి దిగుతున్న షీ బృందాలు అక్కడికి చేరుకొని ఆకతాయిల వెకిలి చేష్టలను వీడియో తీసి సాక్ష్యాలతో కోర్టుకు సమర్పిస్తుండడంతో నిందితులు కటకటాలపాలవుతున్నారు.  మేజర్లు, మైనర్లు కూడా..  జంట కమిషనరేట్లలో ఇప్పటి దాకా షీ బృందాలకు చిక్కివారిలో ఎక్కువగా 1,057 మంది మేజర్లుంటే, 190 మంది మైనర్లు ఉన్నారు. చిన్నప్పటి నుంచి సమాజంలోని స్త్రీల పట్ల గౌరవం పెంచేలా తలిదండ్రులు, గురువులు చొరవ చూపకపోవడం వల్లనే ఆకతాయిలుగా మారుతున్నారని షీ బృందం ఇచ్చే కౌన్సెలింగ్‌లో తేటతెల్లమవుతోంది. వయసుల వారీగా పరిశీలిస్తే ఎక్కువగా కౌమార దశలో ఉన్న విద్యార్థులు, యువకులు ఉండటం ఆందోళన కలిగిస్తోంది. మనవడు, మనవరాళ్లతో హాయిగా గడపాల్సిన సీనియర్‌ సిటిజన్లు కూడా మహిళలను వేధించడం సభ్య సమాజాన్ని తలదించుకునేలా చేస్తోందని పోలీసులు, కౌన్సిలర్లు అంటున్నారు. ఆ కుటుంబాల పిల్లలే ఎక్కువ యువతులను వేధిస్తూ షీ బృందాలకు పట్టుబడుతున్నవారిలో ఎక్కువగా తల్లిదండ్రులు ఇద్దరూ ఉద్యోగాలు చేసే కుటుంబాల్లోని పిల్లలే ఉంటున్నారు. పిల్లలపై వీరి పర్యవేక్షణ తక్కువగా ఉండడంతో దారి తప్పుతున్నారని కౌన్సిలింగ్‌లో గుర్తిస్తున్నారు. ఉదయం పిల్లలను స్కూలు, కాలేజీలకు పంపిన తర్వాత విధులకు వెళ్లే భార్యాభర్తలు.. తిరిగి వచ్చేసరికి రాత్రి దాటుతోంది. ఈ మధ్య పిల్లలు ఎవరితో స్నేహం చేస్తున్నారు.. ఎక్కడెక్కడ తిరుగుతున్నారు.. సెల్‌ఫోన్‌తో ఏం చేస్తున్నారనే విషయాలు కన్నవారు దృష్టి పెట్టలేకపోతున్నారు. దీంతో ఆ తరహా పిల్లలు ఈవ్‌ టీజర్లుగా మారుతున్నారు. ఇటువంటి కుటుంబాలు తమ పిల్లల ప్రవర్తనపై ప్రత్యేక శ్రద్ధ తీసుకోవాల్సిన అవసరం ఉంది.– అనసూయ,సైబరాబాద్‌ షీ–టీమ్స్‌ ఇన్‌చార్జి 

దూషణ నుంచి ఈవ్‌టీజింగ్, హెరాస్‌మెంట్, డొమెస్టిక్‌ వయొలెన్స్, దాడి, లైంగిక దాడి.. ఎంతటి తీవ్రమైన నేరాన్ని ఎదుర్కొన్నా పోలీస్‌స్టేషన్‌లో ఫిర్యాదు చేయాలంటే భయపడ్తారు మహిళలు. పోలీసులకు చెప్పేకన్నా నేరం తాలూకు బాధను భరించడమే నయమనే భావనలో ఉంటారు. పోలీసుల ప్రవర్తనపట్ల ఉన్న భయమే కారణం.  ఇలాంటి భయాన్ని పోగొట్టి.. మహిళలకు, పోలీసులకు మధ్య స్నేహాన్ని పెంపొందించి.. ఏ ఇబ్బంది ఎదురైనా ధైర్యంగా పోలీసులకు చెప్పే వాతావరణాన్ని కల్పించమని ఉత్తరప్రదేశ్‌లోని ఘజియాబాద్‌లోని అపార్ట్‌మెంట్‌ ఓనర్స్‌ అసోసియేషన్‌ ఫెడరేషన్‌.. ఉత్తరప్రదేశ్‌ డీజీపీకి లేఖ రాసింది. ఇది చాలా వైరల్‌ అయ్యి అక్కడి పోలీసులనూ ఆలోచింపచేసింది. ఓ అడుగు ముందుకేసేలా కదిలించింది కూడా. దాని పర్యవసానమే... ఆ జిల్లాల్లోని విద్యార్థినులను ఒకరోజు స్థానిక పోలీస్‌ స్టేషన్‌ ఇన్‌చార్జిగా నియమించాలని ఘజియాబాద్‌ పోలీసులు నిర్ణయించుకున్నారు. దీనికి సంబంధించిన కసరత్తులను మొదలు పెట్టారు కూడా. పోలీసులు నిర్దేశించుకున్న ప్రమాణాల ప్రకారం ఘజియాబాద్‌ జిల్లాలోని పాఠశాలల విద్యార్థినుల్లో కొంతమందిని ఎంపిక చేసుకొని పర్యవేక్షణ, మహిళల మీద జరుగుతున్న నేరాలు, అరికట్టడానికి తీసుకోవాల్సిన చర్యలు.. మొదలైన వాటి మీద శిక్షణనిస్తారు. తర్వాత సీనియర్‌ పోలీస్‌ అధికారులు  వాళ్లకు కౌన్సెలింగ్‌ ఇచ్చి స్థానిక పోలీస్‌స్టేషన్లకు ఒకరోజు ఇన్‌చార్జిగా నియమిస్తారు. దీనివల్ల పోలీసులంటే భయం పోవడమే కాకుండా.. అనుకూల పరిస్థితులను ఎలా ఎదుర్కోవాలో తెలస్తుంది, పోలీసులకు, మహిళలకు మధ్య స్నేహపూర్వక వాతావరణం ఏర్పడుతుందనే ఆశాభావాన్ని వ్యక్తం చేస్తున్నారు ప్రజలు. క్విజ్, వ్యాసరచనతో... స్కూళ్లల్లో క్విజ్, వ్యాసరచన పోటీలు పెట్టి, నెగ్గిన విద్యార్థినులను స్టేషన్‌ ఇంచార్జీలుగా ఎంపిక చేస్తే బాగుంటుందని ఘజియాబాద్‌ అపార్ట్‌మెంట్స్‌ ఓనర్స్‌ అసోసియేషన్‌ సభ్యుడొకరు పోలీసులకు సలహా ఇచ్చారు. దీని గురించి పోలీసులూ ఆలోచిస్తున్నారట. ఏమైనా పోలీసులు ఇలాంటి చొరవ తీసుకోవడం మంచి ఫలితాన్నే ఇస్తుంది అంటున్నారు నిపుణులు. ఎందుకంటే ఇటీవల జరిపిన పలు సర్వేల్లో మహిళలకు జరిగిన అన్యాయం గురించి  మహిళా పోలీస్‌ స్టేషన్లలో నమోదైన ఫిర్యాదుల సంఖ్య ఇదివరటికంటే 22 శాతం పెరిగిందని తేలింది. దీన్నిబట్టే ఘజియాబాద్‌ పోలీసులు చేపట్టిన ఈ కార్యక్రమం విజయవంతమవుతుందని అనుకుంటున్నారంతే. మన దగ్గర షీటీమ్స్‌ వగైరా ఉన్నా.. ఇలాంటి కార్యక్రమాలూ చేపడితే మరిన్ని మంచి ఫలితాలు వచ్చి.. మహిళల పట్ల జరిగే నేరాలు చాలా తగ్గిపోయే అవకాశం ఉంటుందేమో!

సాక్షి, విజయవాడ: బస్టాండు సమీపంలో యువతిని వేధిస్తున్న ఆరుగురు ఆకతాయిలను కృష్ణ లంక పోలీసులు అదుపులోకి తీసుకున్నారు. విజయవాడ బస్టాండు ప్రాంగణంలో బస్సు కోసం  వేచిచూస్తున్న  యువతిని ఆరుగురు యువకులు వేధిస్తుండగా బాధితురాలు పోలీసులకు సమాచారం అందించింది. దీంతో వేధింపులకు గురిచేస్తున్న ఆరుగురితోపాటు, స్కార్పియో వాహనాన్ని పోలీసులు స్వాధీనం చేసుకొని పలు సెక్షన్ల కింద కేసు నమోదు చేశారు. 

న్యూఢిల్లీ : ఉత్తరప్రదేశ్‌లో ప్రారంభించిన వివాదాస్పద యాంటి రోమియో స్క్వాడ్‌ బృందానికి తాజాగా మరో మద్దతుదారు దొరికారు. ఢిల్లీ బీజేపీ అధ్యక్షుడు మనోజ్‌ తివారి యాంటి రోమియో స్క్వాడ్‌ పనితీరు బాగుందని మెచ్చుకున్నారు. త్వరలోనే దీన్ని ఢిల్లీలో కూడా ప్రారంభిస్తే బాగుంటుందని ఆయన అభిప్రాయపడ్డారు. ఢిల్లీలో బీజేపీ స్టేట్‌ వర్కింగ్‌ కమిటీ ప్రారంభోత్సవానికి హాజరైన మనోజ్‌ తివారి ఈ సందర్భంగా మాట్లాడుతూ.. ‘ఉత్తరప్రదేశ్‌లో ప్రారంభమైన యాంటి రోమియో స్క్వాడ్‌ బృందాల పని తీరు చాలా బాగుంది. మహిళల రక్షణకు ఇది చాలా మంచి పద్దతి. త్వరలోనే దీన్ని ఢిల్లీలో కూడా ప్రారంభిస్తే బాగుంటుంద’న్నారు. ఈవ్‌ టీజింగ్‌కు పాల్పడే వారి పని పట్టడం కోసం 2017లో యూపీ సీఎం యోగి ఆదిత్యనాథ్‌ యాంటి రోమియో స్క్వాడ్‌ బృందాలను ఏర్పాటు చేశారు. అయితే ఈ బృందాల పని తీరు పట్ల విమర్శలు వెల్లువెత్తాయి. మహిళల రక్షణ పేరిట ఈ బృందాలు జంటలపై దాడులకు తెగబటమే కాక యువకులకు గుండు కొట్టించడం.. గుంజీలు తీయించడం వంటి దారుణాలకు పాల్పడ్డారు. దాంతో కొన్ని రోజుల పాటు ఈ బృందాల మీద నిషేధం విధించారు. కానీ తాజాగా మహిళల పట్ల నేరాలు పెరుగుతుండటంతో యోగి ఆదిత్యనాథ్‌ ఈ యాంటి రోమియో స్క్వాడ్‌ను తిరిగి పునరుద్దరించారు.

సాక్షి, అనకాపల్లి (విశాఖపట్నం) : త్వరలో జరగనున్న పంచాయతీ, మున్సిపాలిటీ, కార్పొరేషన్‌ ఎన్నికలను దృష్టిలో పెట్టుకొని గ్రామాలు, పట్టణాల్లో ఉండే రౌడీషీటర్లపై ప్రత్యేక దృష్టి పెట్టామని జిల్లా ఎస్పీ అట్టాడ బాబూజీ చెప్పారు. అనకాపల్లిలోని కొత్తూరు మహార్షి ఫంక్షన్‌ హాల్లో పోలీస్‌సబ్‌ డివిజన్‌ పరిధిలో అధికారులతో మంగళవారం జరిగిన సమావేశంలో ఆయన మాట్లాడారు. జిల్లా వ్యాప్తంగా గత ఏడాది నేరాల సంఖ్యను తగ్గించామన్నారు. పాఠశాలలు, కళాశాలల వద్ద ఈవ్‌ టీజింగ్‌కు పాల్పడకుండా ప్రత్యేక చర్యలు తీసుకుంటున్నట్టు వెల్లడించారు. పాత నేరస్తులు, రౌడీ షీటర్లపై ప్రత్యేక దృష్టి పెడుతున్నామన్నారు. అలాగే ప్రస్తుతం ఎక్కువగా గొడవలకు పాల్పడుతున్న వారిని గుర్తించి వారిపై రౌడీ షీట్‌ నమోదు చేస్తున్నట్టు పేర్కొన్నారు. ఈ ఏడాది వేసవిలో చోరీలు జరగకుండా ప్రత్యేక చర్యలు తీసుకోవడంతో క్రైం రేటు తగ్గించగలిగామన్నారు. ప్రజల సహకారంతోనే ఇది సాధ్యమైందన్నారు. రోడ్డు ప్రమాదాల నివారించేందుకు ఆర్‌అండ్‌బీ, రవాణాశాఖ, వివిధశాఖల అధికారులతో ఎప్పటికప్పుడు చర్చించి చర్యలు తీసుకుంటున్నామన్నారు. మావోస్టుల ప్రభావం ఏజెన్సీ ప్రాంతంలో తగ్గుముఖం పట్టిందని, గతంలో గిరిజనులు వారికి ఆశ్రయం ఇచ్చేవారని, ఇప్పడు ఆ పరిస్థితి లేకుండాపోయిందన్నారు. గిరిజనులు అభివృద్ధి చెందాలని రోడ్లు, సెల్‌టవర్లు ఏర్పాట్లు చేసేందుకు సహకరిస్తున్నట్లు ఆయన చెప్పారు. బెల్ట్‌షాపులపై కేసులు నమోదు చేయడం జరుగుతుందని, అటువంటి వారు తరుచూ ఏర్పాటు చేసినట్లయితే పీడీ యాక్టులు కూడా నమోదు చేస్తామని స్పష్టం చేశారు. గంజాయి రవాణా చేస్తున్న పాత నేరస్తులపై ఎప్పటికప్పుడు దృష్టిపెడుతూ, ఎక్సైజ్‌ శాఖతో  చర్చిస్తున్నామన్నారు. శాంతిభద్రతల పరిరక్షణలో ప్రజలతో ఎప్పటికప్పుడు సమావేశాలు ఏర్పాటు చేసి వారిలో చైతన్యం తీసుకురావాలన్నారు. సమావేశంలో డీఎస్పీ ఎస్‌.వి.వి.ప్రసాదరావు, సీఐలు కిరణ్‌కుమార్, తాతారావు, రామచంద్రరావు, శ్రీనివాసరావు, ఎస్సైలు పాల్గొన్నారు.

సాక్షి, సిటీబ్యూరో: ఈవ్‌టీజింగ్‌ చేస్తున్నారని ఫిర్యాదు అందితే సంఘటనా స్థలానికి చేరుకొని నిఘా వేసి నిందితులను పట్టుకునే సైబరాబాద్, రాచకొండ షీ బృందాలు పంథా మార్చాయి. ఎక్కువగా ఈవ్‌టీజింగ్‌ జరుగుతున్న ప్రాంతాలను గుర్తించి ఆయా ప్రాంతాల్లో మాటు వేసి ఆకతాయిల ఆట కట్టిస్తున్నాయి. ఇటు అమ్మాయిలు, అటు ఈవ్‌టీజర్లకు తెలియకుండానే పోకిరీల వెకిలిచేష్టలు, వేధింపులను వీడియో రికార్డు చేసి సాక్ష్యాలతో సహా పట్టుకుంటున్నాయి. వారిపై కేసులు నమోదుచేసి న్యాయస్థానంలో హాజరుపరుస్తున్నారు. వీరిలో కొందరికి తల్లిదండ్రుల సమక్షంలో కౌన్సెలింగ్‌ నిర్వహించి పరివర్తన తెచ్చేందుకు కృషి చేస్తున్నారు. బస్టాప్‌లు, మల్టీప్లెక్స్‌లు, షాపింగ్‌మాల్స్, పర్యాటక ప్రాంతాల్లో యువతులు, విద్యార్థినులను వేధిస్తున్నారంటూ ఫిర్యాదులు అందుతుండటంతో సైబరాబాద్, రాచకొండ పోలీసు ఉన్నతాధికారులు ఈమేరకు నిర్ణయం తీసుకున్నారు. నెలరోజుల్లో రెండు కమిషనరేట్ల పరిధిలో 210 కేసులు నమోదు చేశారు. 80 మందిపై క్రిమినల్, పెట్టీ కేసులు పెట్టారు. ఆకతాయిలను వెంబడిస్తూ... వివిధ పనుల నిమిత్తం ఇల్లు, వసతి గృహాల నుం చి ఒంటరిగా బయటికి వస్తున్న విద్యార్థినులు, యువతులను  టార్గెట్‌గా చేసుకుని పోకిరీలు వేధిస్తున్నారు. పోలీసులకు ఫిర్యాదు చేస్తే కేసులు, విచారణలు అంటూ ఠాణాల చుట్టూ తిరగాల్సి వస్తుందని బాధితులు వారి ఆగడాలను బరిస్తున్నారు. కొందరు పోకిరీలు గచ్చిబౌలి, కూకట్‌పల్లి, కేపీహెచ్‌బీ, ఎల్‌బీనగర్, ఉప్పల్, అల్వాల్‌ తదితర ప్రాంతాల్లో యువతులు, విద్యార్థినులను ప్రతిరోజూ వెంటపడి వేధిస్తున్నారు. బాధితులు భయపడుతుండడంతో వారు మరింత రెచ్చిపోతున్నారు. దీనిపై నిఘా వేసిన ‘షీ’ బృందాలు వెంటనే వారిని అదుపులోకి తీసుకుంటున్నాయి. ఎవరికీ ఏమాత్రం అనుమానం రాకుండా మఫ్టీలో ఉంటూ ఆకతాయిల ఆగడాలను వీడియో తీసి న్యాయస్థానంలో సాక్ష్యాలు సమర్పిస్తున్నారు.  లేడీస్‌ హాస్టళ్లలోనూ ప్రత్యేక చర్యలు...  బస్‌స్టాపులు, బహిరంగ ప్రదేశాల్లో వేధింపులను నియంత్రిస్తున్న పోలీసులు.. యువతులు, మహిళల హాస్టళ్లు పరిసర ప్రాంతాల్లో ఈవ్‌టీజింగ్‌ నివారించేందుకు చర్యలు చేపట్టారు. అపహరణలు.. అత్యాచారయత్నాలు.. వేధింపులు.. ఈవ్‌టీజింగ్‌ తదితర నేరాలను కట్టడి చేసేందుకు లా అండ్‌ అర్డర్‌ పోలీసులకూ సమాచారం ఇస్తున్నారు. హాస్టళ్ల నిర్వాహకులతో చర్చించి సీసీ కెమెరాలు, పరిసర ప్రాంతాల్లో భద్రత ఏర్పాట్లు చేపట్టాలని సూచించారు. ఎస్‌సీఎస్‌సీ మార్గదర్శనంలో ‘సేఫ్‌ స్టే’ పకడ్బందీగా అమలు చేయాలని సూచిస్తున్నారు.  హాస్టళ్లలో వైఫై సౌకర్యంతో పాటు బాధితులకు వేధింపుల ఫోన్లు రాగానే ‘షీ’ బృందం సాంకేతిక సభ్యులకు సమాచారం అందించాలని సూచించారు.  బాధితుల్లో ఎక్కువ మంది స్టేషన్‌కు వచ్చేందుకు సందేహిస్తున్న నేపథ్యంలో పోలీసులు ఈ చర్యలకు ఉపక్రమించారు. అలాగే ఆకతాయిలకు ఎలా బుద్ధి చెప్పాలి, స్వీయ ఆత్మరక్షణ, పోలీసులకు ఎలాంటి సమాచారంఇవ్వాలన్న అంశాలపై వారికి అవగాహన కల్పిస్తున్నారు.

మహిళలు, యువతుల రక్షణకు ఎన్ని చట్టాలు చేసినా  ఆకతాయిల ఆగడాలు ఆగడంలేదు. వారు ఇంటా, బయటా,ఆఫీసులో, కళాశాలలో, అడుగడుగునా వేధింపులకు గురవుతూనే ఉన్నారు. ముఖ్యంగా విజయవాడ నగరంలో పోకిరీల చేష్టలు మితిమీరిపోతున్నాయి. స్కూళ్లు, కళాశాలలకువెళ్లే యువతులే లక్ష్యంగా చెలరేగిపోతున్నారు. వీరినిఅదుపు చేసేందుకు పోలీసులుఅన్ని రకాలుగా ప్రయత్నిస్తున్నా.. పరిస్థితి అదుపులోకిరావడం లేదు. మరోవైపు ఈవ్‌టీజింగ్‌ కేసుల్లో ఎక్కువగామైనర్లే పట్టుబడుతుండటంఆందోళన కల్గించే అంశం. సాక్షి, అమరావతి బ్యూరో : బెజవాడ నగరంలో ఆకతాయిల ఆగడాలు పెచ్చుమీరుతున్నాయి. మహిళలపై వేధింపులు ఎక్కువవుతున్నాయి. పోకిరీల ఆటకట్టించి, కటకటాల వెనక్కి నెట్టడానికి ఏపీ పోలీస్‌ శాఖ ఎంతో ప్రతిష్టాత్మకంగా ‘శక్తి’ బృందాలను ఏర్పాటు చేసింది. అయినప్పటికీ వేధింపులు జరుగుతూనే ఉన్నాయి. మఫ్టీలో పోలీసులున్నా.. బస్టాపులు, రైల్వేస్టేషన్, స్కూల్స్, కాలేజీలు, మాల్స్‌ తదితర ప్రాంతాల్లో మహిళలను, అమ్మాయిలను వేధిస్తున్న పోకిరీలు, ఈవ్‌టీజింగ్‌ చేస్తున్న       ఆకతాయిల బెడద ఇటీవల ఎక్కువైంది. దీంతో పోలీసులు మఫ్టీలో ఉంటూ ఇలాంటి ఆకతాయిలఆటకట్టించే ప్రయత్నం చేస్తున్నారు. నగరంలో కమిషనరేట్‌ పరిధిలో వేధింపులకు గురవుతున్న మహిళలు వెంటనే పోలీసులను ఆశ్రయించడానికి, ఫిర్యాదులు చేయడానికి ప్రత్యేక వాట్సాప్‌ నంబరు అమల్లోకి తెచ్చారు. ఇంత వరకు బాగానే ఉన్నా.. ఇటీవల శక్తి బృందాలు, పోలీసులు అరెస్టు చేస్తున్న పోకిరీలు, ఆకతాయిల్లో ఎక్కువగా మైనర్లే పట్టుబడుతున్నారు. వారి భవిష్యత్తును దృష్టిలో పెట్టుకున్న పోలీసులు తల్లిదండ్రులను స్షేషన్‌కు పిలిపించి వారి సమక్షంలోనే కౌన్సెలింగ్‌ నిర్వహిస్తున్నారు. బాలికలను టీజింగ్‌ చేస్తున్న మైనర్లు.. బెంజి సర్కిల్‌ సమీపంలోని ప్రైవేటు కళాశాల ల విద్యార్థినులు సాయంత్రం అక్కడి బస్టాపులో ఇళ్లకు వెళ్లేందుకు వేచి ఉంటున్నారు. ఈ సమయంలో అక్కడ ఫుట్‌ ఓవర్‌ బ్రిడ్జి వద్ద కొందరు పోకిరీలు అమ్మాయిలను నిత్యం వేధింపులకు గురిచేస్తున్నారు. ఇటీవల కొందరు అమ్మాయిలు ధైర్యం చేసి వారిని పట్టుకునే ప్రయత్నం చేయగా.. క్షణంలో తప్పించుకుని బైక్‌పై ఉడాయించారు. బందరు రోడ్డు, ఏలూరు రోడ్డు, మొగల్రాజపురం, వన్‌టౌన్‌ తదితర ప్రాంతాల్లో ఇలాంటి పోకిరీల బెడద రోజు రోజుకూ పెరుగుతోంది. వీరి బారి నుంచి తమకు రక్షణ కల్పించాలని విద్యార్థినులు వేడుకుంటున్నారు. ‘శక్తి’కి ఇటీవల వచ్చిన ఫిర్యాదులు.. ⇔ కళాశాలకు వచ్చి, వెళ్లే సమయాల్లో కొందరు అబ్బాయిలు మమ్మల్ని టీజింగ్‌ చేస్తున్నారంటూ బీఆర్‌టీఎస్‌ రహదారిలో పెట్రోలింగ్‌ చేస్తున్న ‘శక్తి’ టీం సిబ్బందికి శారదా కళాశాల విద్యార్థినులు ఫిర్యాదు చేశారు. మరుసటి ఉదయం కళాశాల వద్ద ‘శక్తి’ బృంద సభ్యులు కాపు కాసి అమ్మాయిలకు ఇబ్బంది కల్గిస్తున్న  15 మందిని అదుపులోకి తీసుకుని.. కౌన్సెలింగ్‌ ఇచ్చి పంపించారు. ⇔ సింగ్‌నగర్‌లోని వివేకానంద స్కూల్‌వద్ద కొందరు పోకిరీలు అమ్మాయిలను వేధిస్తున్నారంటూ ఓ పౌరుడు వాట్సాప్‌కు మెస్సెజ్‌ చేశాడు. దీనికి స్పందించిన ‘శక్తి’ బృందం సభ్యులు మఫ్టీలో స్కూల్‌వద్ద నిఘా పెట్టి ఈవ్‌టీజింగ్‌ చేస్తున్న 5 మంది మైనర్లను అదుపులోకి తీసుకుని.. తల్లిదండ్రుల సమక్షంలో కౌన్సెలింగ్‌ ఇచ్చి వదిలేశారు. 626 మందికి కౌన్సెలింగ్‌ ఆరు నెలల కాలంలో మహిళ రక్షణ విభాగం పోలీసులు 626 మంది ఈవ్‌టీజర్లకు కౌన్సిలింగ్‌ ఇవ్వగా.. గత ఏడాది డిసెంబర్‌ 12న నుంచి శక్తి బృందాలు విధులు నిర్వర్తిస్తున్నాయి. ఈ బృందా లు వచ్చాక విజయవాడలో సినిమా హాల్స్, పార్కు లు, బస్టాపులు, కృష్ణానది ఘాట్‌లవద్ద తిరుగుతూ మహిళలను ఈవ్‌టీజింగ్‌ చేస్తున్న 190 మందిని అదుపులోకి తీసుకుని వారికి కౌన్సెలింగ్‌ ఇవ్వడం జరిగింది. 61 మంది కటకటాలు.. గత రెండేళ్లలో విజయవాడ కమిషనరేట్‌ పరిధిలో మహిళలు, విద్యార్థినుల పట్ల, వేధింపులు, అసభ్యం, అశ్లీలంగా వ్యవహరించిన కేసులు 1,958 వరకు నమోదు అయ్యాయి. అయితే వీటిలో చాలా వరకు కేసులు భార్యభర్తల మధ్య గొడవలకు సంబంధించినవి ఉన్నాయి. ఈ కేసుల్లో 90 శాతం పైగా రాజీ అయ్యారు. వీటిలో ఈవ్‌టీజింగ్‌ కేసులు, ఫొక్సో చట్టం కింద నమోదైన కేసులు, రేప్‌ అనంతరం హత్య చేసిన కేసులు నమోదయ్యాయి. ఈ కేసుల్లో న్యాయస్థానం 61 మందికి జైలు శిక్ష విధించింది. 

సాక్షి, వరంగల్‌ క్రైం: మహిళలు, యువతుల రక్షణకు చట్టసభల్లో ఎన్ని చట్టాలు చేసినా  ఆకతాయిల ఆగడాలు ఆగడం లేదు. వారు ఇంట్లో, బయటా, ఆఫీసులో, కళాశాలలో, అడుగడుగునా వేధింపులకు గురవుతునే ఉన్నారు. పెరుగుతున్న సాంకేతిక పరిజ్ఞానం కూడా  వేధింపులకు మార్గం అవుతోంది. ఫోన్లలో యువతుల ఫొటోలు మార్ఫింగ్‌ చేసి బ్లాక్‌మెయిల్‌ చేస్తున్నారు. ఒంటరిగా కళాశాలకు వెళ్లే యువతుల కోసం బస్టాండ్ల వద్ద కాచుకుకూర్చుంటున్నారు. పోకిరీలు చేసే హేళన, సూటిపోటి మాటలను విద్యార్థినులు  మౌనంగా భరిస్తున్నా రు. ఏం చేయాలో తెలియక బాధను గుండెల్లోనే దాచుకుంటున్నారు. వేధింపులు శృతి మించితేనే ఫిర్యాదు వరకు వెళ్తున్నా యి. వరంగల్‌ పోలీసు కమిషనరేట్‌ పరిధిలో మహిళలు, యువతులకు రక్షణ కల్పించడానికి మూడు షీ టీమ్స్‌ పనిచేస్తున్నాయి. అయినప్పటికీ వేధింపులు ఆగడం లేదు.  పరువు కోసం..  కళాశాలలు, పనిచేస్తున్న కార్యాలయాలు, బంధువులు ఇలా అనేక రూపాల్లో యువతులు వేధింపులకు గురవుతున్నారు. అయినా వాటిని మౌనంగా భరిస్తూనే ఉన్నారు. పోలీస్‌ స్టేషన్‌కు వెళ్లి ఫిర్యాదు చేస్తే కోర్టుల చుట్టూ తిరగాల్సి వస్తుందని, పరువు పోతుందనే ఉద్దేశంతో ఎవ్వరూ ముందుకు రావడం లేదు. ఎవరైనా ముందుకు వచ్చి కేసులు పెడితే వారికి కుటుంబ సభ్యుల నుంచి, సమాజం నుంచి ఆశించిన స్థాయిలో మద్దతు దొరకడం లేదు. దీంతో ఎన్ని వేధింపులు ఎదుర్కొన్నా మనసులో కుమిలిపోతున్నారే  తప్పా బయటపడడం లేదు. ఈ పరిస్థితుల నుంచి మహిళలు, యువతులు బయటికి  రావడానికి పోలీసు శాఖ ఎన్ని కార్యక్రమాలు చేపట్టినా ఆశించిన ఫలితాలు రావడం  లేదు.   ప్రభుత్వ కార్యాలయాల్లో.. గౌరవప్రదమైన ఉద్యోగాలు చేసే చోట కూడా తోటి పురుష ఉద్యోగులు మహిళా ఉద్యోగులను ద్వంద్వార్థాలతో వేధిస్తున్నారు. వారిని ప్రతిఘటిస్తే అది చేయడం లేదు.. ఇది చేయడం లేదు  అంటూ కక్ష సాధింపునకు పాల్పడుతున్నారు. అర్బన్‌ జిల్లాలో ఇటీవల ఇద్దరు ఉన్నతాధికారులు మహిళ అధికారులను సూటిపోటి మాటలతో వేధించడంతో వారు ఏకంగా కలెక్టర్‌కు ఫిర్యాదు చేశారు. ప్రభుత్వ కార్యాలయాల్లో జరుగుతున్న వేధింపులను మహిళా అధికారులు, కింది స్థాయి మహిళా ఉద్యోగులు విధిలేని పరిస్థితుల్లో మౌనంగా భరిస్తున్నారు. అయితే వారు ఫిర్యాదు చేస్తే చాలు చర్యలు తీసుకునేందుకు షీ టీమ్స్‌ అధికారులు సిద్ధంగా ఉన్నప్పటికీ తమ పరువు బజారుకెక్కుతుందనే భయంతో వెనుకడుగు వేస్తున్నారు. ఇలాంటి దుశ్శాసనుల పీచమణచాలంటే రావల్సిందల్లా మహిళల్లో చైతన్యమే.  పెరుగుత్ను కేసులు... వరంగల్‌ పోలీసు కమిషనరేట్‌ పరిధిలో రోజురోజుకు వేధింపులు పెరుగుతున్నాయి. మహిళలు, యువతులు ఇప్పుడిప్పుడే పోలీస్‌ స్టేషన్‌ వచ్చి ధైర్యంగా ఫిర్యాదు చేయగలుగుతున్నారు. పోలీస్‌ కమిషనరేట్‌ పరిధిలో 2015లో 188 కేసులు నమోదు కాగా, 2016లో 208 కేసులు, 2017లో 185 కేసులు, 2018లో ఇప్పటి వరకు 169 కేసులు నమోదయ్యాయి. ఈవ్‌టీజింగ్‌ కేసుల్లో పట్టుబడిన బాలురపై పోలీసులు కేసులు పెట్టకుండా తల్లిదండ్రుల సమక్షంలో కౌన్సెలింగ్‌ ఇచ్చి వదిలేస్తున్నారు. పిల్లలపై తల్లిదండ్రుల పర్యవేక్షణ లేకపోవడం, చేతుల్లో వేలాది రూపాయల విలువ చేసే స్మార్ట్‌ఫోన్లు ఉండడం, ఇంటర్‌నెట్‌లో ఇష్టారాజ్యంగా లాగిన్‌ కావడం, వాట్సప్, ఫేస్‌బుక్‌  పేరిట పరిచయం లేని వ్యక్తులతో చనువుగా మాట్లాడడం, ప్రైవేట్‌ హాస్టళ్ల నిర్వాహకుల పర్యవేక్షణ లేకపోవడం తదితర కారణాలతో యువతులు అనేక రకాలుగా ఇబ్బందులు ఎదుర్కొంటున్నారు.  ఈవ్‌టీజర్లపై కఠిన చర్యలు మహిళలు, యువతులను వేధింపులకు గురిచేసే ఈవ్‌టీజర్లపై కఠిన చర్యలు తీసుకుంటున్నాం. ఎవరైనా వేధింపులకు గురైతే ధైర్యంగా ముందుకు వచ్చి ఫిర్యాదు చేయాలి. కమిషనరేట్‌ పరిధిలో మూడు బృందాలు, ఒక్కో బృందంలో నలుగురు సభ్యులు పనిచేస్తున్నారు. అందరు మఫ్టీలో ఉంటారు. కళాశాలలు, బస్టాండ్లు, రైల్వేస్టేషన్లు, షాపింగ్‌ మాల్స్‌ వద్ద షీటీమ్స్‌ పోలీసులు మఫ్టీలో ఉండి అకతాయిలను అదుపులోకి తీసుకుంటారు. ప్రతి శనివారం కుటుంబ సభ్యుల సమక్షంలో కౌన్సెలింగ్‌ నిర్వహిస్తున్నాం. ఎవ్వరికైనా ఇబ్బందులు ఉంటే క్రైం ఏసీపీ 9491089112, కమిషనరేట్‌ వాట్సప్‌ నంబర్‌ 9491089257, షీటీమ్స్‌ ఇన్‌స్పెక్టర్‌ 7382294058 నంబర్లకు సమాచారమిస్తే వెంటనే స్పందిస్తాం.  – శ్రీనివాస్‌రావు, షీ టీమ్స్‌ ఇన్‌స్పెక్టర్‌ 

కళాశాలలు.. విద్యాసంస్థలు.. బస్‌స్టాపులు.. రైల్వేస్టేషన్లు.. వాణిజ్య సముదాయాలు.. సినిమా థియేటర్ల వద్ద యువతులు, మహిళలను వేధిస్తున్న పోకిరీలకు మహిళా రక్షక్‌ బృందాలు బుద్ధి చెబుతున్నాయి. బృంద సభ్యులు మఫ్టీలో తిరుగుతూ ఈవ్‌టీజర్ల భరతం పడుతున్నారు.    సాక్షి, నెల్లూరు(క్రైమ్‌): మహిళలు సమాజంలో ధైర్యంగా తిరిగే భరోసా ఇవ్వాలి. ఆకతాయిల ఆటలు ఇక సాగవనే నమ్మకం కలిగించాలి. తమ కోసం ఓ నిఘా వ్యవస్థ అండగా ఉందనే అవగాహన తేవాలి. అప్పుడు చక్కటి సమాజం ఆవిష్కృతమవుతుందనే ఉద్దేశంతో జిల్లా ఎస్పీ ఐశ్వర్య రస్తోగి ఈ నెల 13వ తేదీన జిల్లా కేంద్రంలో తొలిసారిగా 10 మహిళా రక్షక్‌ టీంలను ఏర్పాటు చేశారు. ఇప్పుడు అవి సత్ఫలితాలిస్తున్నాయి. నగరంలో ఇప్పటి వరకు 145 మంది ఈవ్‌టీజర్లను అదుపులోకి తీసుకుని పోలీసుస్టేషన్‌కు తరలించారు. వారి పూర్తి వివరాలను సేకరించి రికార్డుల్లో నిక్షిప్తం చేస్తున్నారు. పోకిరీల తల్లిదండ్రులను స్టేషన్‌కు పిలిపించి వారి సమక్షంలో పోలీసు సిబ్బంది కౌన్సెలింగ్‌ నిర్వహిస్తున్నారు. అనంతరం తల్లిదండ్రుల పూచీకత్తుపై వారిని బయటకు విడిచి పెడుతున్నారు.  తొలిసారి కౌన్సెలింగ్‌తో సరి..  ఈవ్‌టీజింగ్‌కు పాల్పడుతూ పోలీసులకు చిక్కిన ఆకతాయిలకు తొలిసారిగా పోలీసులు తమదైన శైలిలో కౌన్సెలింగ్‌ చేస్తున్నారు. అతని గత చరిత్రను పరిశీలించి నేరచరిత్ర లేకపోతే తల్లిదండ్రుల పూచీకత్తుపై విడిచి పెడుతున్నారు. మరోసారి చిక్కితే కటకటాల  లెక్కించాల్సిందేనని వారిని హెచ్చరిస్తున్నారు. పోలీసులు కౌన్సెలింగ్‌ చేసిన వారిలో అధిక శాతం మంది 20 నుంచి 30 ఏళ్లలోపు వారే ఎక్కువగా ఉన్నారు. సత్ఫలితాలు .. మహిళల రక్షణ కోసం ఏర్పాటు చేసిన రక్షక్‌ బృందాలు సత్ఫలితాలిస్తున్నాయి. వేదాయపాళెం, హరనాథపురం తదితర ప్రాంతాల్లో పలువురు ఈవ్‌టీజర్లపై డయల్‌ 100కు ఫిర్యాదులు వెళ్లాయి. తక్షణమే స్పందించిన బృందాలు హుటాహుటిన  ఘటనా స్థలానికి చేరుకుని ఈవ్‌టీజర్ల భరతం పట్టాయి. దీంతో ఆయా ప్రాంత వాసులు బృందాల పనితీరుపై హర్షం వ్యక్తం చేస్తున్నాయి.  త్వరలో అవగాహన సదస్సులు  పోకిరీల ఆటలు కట్టిస్తున్న మహిళా రక్షక్‌ బృందాలు త్వరలో ప్రభుత్వ, ప్రైవేట్‌ కళాశాలలు, విద్యాసంస్థలకు వెళ్లనున్నాయి. ఈవ్‌టీజింగ్‌కు వ్యతిరేకంగా విద్యార్థినులకు అవగాహన సదస్సులు నిర్వహించేందుకు పక్కాప్రణాళిక సిద్ధం చేసుకున్నారు. విద్యార్థినుల మనోగతం, వేధించిన వారిపై చట్టపరంగా పోలీసులు చేపట్టే చర్యలను వివరించనున్నారు.    షీ బృందం ఏం చేస్తుందంటే..  కళాళాలలు, బస్టాండ్, రైల్వేస్టేషన్, మార్కెట్‌ తదితర ప్రాంతాల్లో సంచరిస్తూ ఈవ్‌టీజర్లను గుర్తించి వారిని అరెస్ట్‌ చేస్తారు. ఒక్కో బృందంలో నలుగురు ఉంటారు. వీరు మఫ్టీలో తిరుగుతూ ఈవ్‌టీజర్ల భరతం పడుతారు. ఎలాంటి నేర ప్రవృత్తి లేకుండా తొలిసారిగా ఈవ్‌టీజింగ్‌ చేసిన వారికి వారి తల్లిదండ్రుల సమక్షంలో కౌన్సెలింగ్‌ చేసి గట్టిగా మందలిస్తారు. కరుడుగట్టిన వారైతే కేసులు నమోదు చేస్తారు. ఎవరైనా మహిళలు తామెదుర్కొంటున్న సమస్యలపై ఫిర్యాదు చేస్తే వారి పేరు బయటకు రానివ్వకుండా విచారిస్తారు.    విద్యార్థినులు, మహిళలు ఏం చేయాలంటే..    మగవాళ్లు మాటలతో కానీ, చేష్టలతో కాని, అనుచిత రీతిలో తాకటం, అనుమతి లేకుండా ఫొటోలు, వీడియోలు తీయడం వంటి చర్యలతో ఇబ్బంది పెడుతుంటే డయల్‌ 100కు కాల్‌ చేసి తామున్న ప్రదేశాన్ని తెలియజేయాలి. లేదా పబ్లిక్‌ ఐవాట్సప్‌ నంబర్‌ 9390777727కు సమాచారం (టైప్‌చేసి గానీ, ఫొటోల రూపంలో గాని) పంపితే వెంటనే మహిళా రక్షక్‌ బృందాలు ఘటనా స్థలానికి చేరుకుని ఈవ్‌టీజర్ల భరతం పడుతాయి. ఈవ్‌టీజర్లే కాదు ఇంకా ఎవరైనా ఇబ్బందులకు గురి చేసినా పై నంబర్లకు ఫోను చేసి ఫిర్యాదు చేస్తే పోలీసులు తగిన చర్యలు తీసుకుంటారు. ఫిర్యాదుదారుల వివరాలను బృందాలు గోప్యంగా ఉంచుతాయి.    నిర్భయంగా ఫిర్యాదు చేయండి మహిళల రక్షణే ధ్యేయంగా మహిళా రక్షక్‌ టీంలను ఎస్పీ ఐశ్వర్య రస్తోగి ప్రవేశ పెట్టారు. నగరంలోని ఆరు పోలీసుస్టేషన్లలో ఆరు బృందాలు, మహిళా పోలీసుస్టేషన్‌ పరిధిలో నాలుగు బృందాలు పని చేస్తున్నాయి. మఫ్టీలో తిరుగుతూ ఆకతాయిల భరతం పడుతున్నాం. మహిళలకు, విద్యార్థినులకు అవగాహన కల్పిస్తున్నాం. ఇప్పటికే పలు ఫిర్యాదులు అందాయి. మహిళలు, విద్యార్థులు తామెదుర్కొంటున్న సమస్యలపై డయల్‌ 100, 9390777727, 94904 39561లకు ఫిర్యాదు చేయాలి. తగిన చర్యలు తీసుకుంటాం. ప్రజలు సైతం సమాచారం అందించవచ్చు.  – పి. శ్రీధర్, మహిళా రక్షక్‌టీమ్స్‌ నోడల్‌ అధికారి 

అనంతపురం, రాయదుర్గంటౌన్‌ : రాయదుర్గంలో ఈవ్‌టీజింగ్‌ అధికమవుతోంది. వారం వ్యవధిలోనే రెండు ఘటనలు చోటుచేసుకున్నాయి. తాజాగా సోమ వారం పట్టణంలోని జెడ్పీ బాలికోన్నత పాఠశాలో తొమ్మిదవ తరగతి చదువుతున్న ఓ విద్యార్థిని పట్ల గుమ్మఘట్ట మండలం వీరాపురం గ్రామానికి చెందిన రవి అనే యువకుడు ఈవ్‌టీజింగ్‌కు పాల్పడ్డాడు. అదే గ్రామానికి చెందిన విద్యార్థిని ఉదయం పాఠశాలకు వస్తున్న సమయంలో ఆ యువకుడు వెంటపడి వేధించసాగాడు. పాఠశాల సమీపంలో రద్దీ ప్రాంతంలోనే కోపంతో విద్యార్థిని చెంపపై కొట్టాడు. దీంతో విద్యార్థిని భయాందోళనకు గురై పాఠశాలకు పరుగులు తీసింది. విషయం తెలుసుకున్న ఉపాధ్యాయులు, స్థానికులు ఆ యువకుడిని పట్టుకుని పోలీసులకు అప్పజెప్పారు. గత నెల రోజుల నుంచి తనను వేధిస్తున్నట్లు విద్యార్థిని ఉపాధ్యాయులతో పేర్కొనట్లు సమాచారం. ఈ ఘటనతో పాఠశాల, కళాశాల విద్యార్థినులు ఆందోళనకు గురవుతున్నారు. ఇదిలావుండగా ఇలాంటి ఘటనే వారంరోజుల క్రితం ఇదే పాఠశాలకు చెందిన తొమ్మిదవ తరగతి చదువుతున్న మరో అమ్మాయిని ప్రేమించకపోతే చేయి చేసుకుంటానని ఓ యువకుడు వేధించినట్లు ఆలస్యంగా తెలిసింది. రద్దీ ప్రాంతమైన జెడ్పీ బాలికోన్నత పాఠశాలలోనే ప్రభుత్వ జూనియర్‌ కళాశాల కూడా నడుస్తోంది. ఈ నేపథ్యంలో ఇక్కడ తరచూ ఈవ్‌టీజింగ్‌ సమస్య ఉందని ఉపాధ్యాయులు చెబుతున్నారు.    చర్యలు తీసుకుంటాం ఇటీవల మహిళా రక్షణ టీమ్‌లు ఏర్పాటు చేశాం. ఈ టీములు గ్రామాలు కూడా తిరుగుతుండడంతో వల్ల పట్టణంలో కాస్త పర్యవేక్షణ తగ్గింది. ఉన్నతాధికారులతో చర్చించి మహిళా రక్షణ టీమ్‌ను పట్టణంలో నిరంతర పర్యవేక్షణ ఉండేలా చర్యలు తీసుకుంటాం. కళాశాల, పాఠశాల రాకపోకల వేళల్లో పోలీసు సిబ్బంది పర్యవేక్షణ కూడా ఉంచి ఈవ్‌టీజింగ్‌పై కఠిన చర్యలు తీసుకుంటాం. సోమవారం పాఠశాల వద్ద జరిగిన ఘటనపై యువకుడి బంధువులను పిలిపించి కౌన్సెలింగ్‌ ఇచ్చాం. విచారణ అనంతరం కేసు నమోదు చేస్తాం.  – నాగేంద్రప్రసాద్, ఎస్‌ఐ  

ర్యాగింగ్, ఈవ్‌టీజింగ్‌ల పేరుతో ఇతరులను హింసించి పైశాచికత్వాన్ని పొందుతున్న విద్యార్థుల ముఠాను మదురై ప్రభుత్వ వైద్య కళాశాలలో గుర్తించారు. వీరి భరతం పట్టేందుకు ఆ కళాశాల ప్రిన్సిపాల్‌ మరుదు పాండియన్‌ సిద్ధం అయ్యారు. 20 మందిని గుర్తించి సస్పెండ్‌ చేశారు. పరీక్షలకు అనుమతి ఇవ్వకూడదని నిర్ణయానికి వచ్చారు. సాక్షి, చెన్నై: వర్సిటీలు, కళాశాలల్లో  గతంలో చోటుచేసుకున్న సంఘటనల్ని పరిగణించి ర్యాగింగ్‌ను నిషేధిస్తూ పాలకులు చట్టం తీసుకొచ్చారు. అయితే, చట్టం అమల్లో విఫలమవుతున్నారన్న విమర్శలు  ఉన్నాయి. కళాశాలు ప్రారంభమయితే చాలు ఈవ్‌ టీజర్లు రంగంలోకి దిగడం సాధారణంగా మారింది. బస్టాపులు, కళాశాల సమీపాల్లో , రైల్వే స్టేషన్లలో విద్యార్థినులు కన్పిస్తే చాలు డొంకతిరుగుడు మాటలతో  వేధించే వాళ్లు ఎక్కువే. ఇలాంటి టీజర్ల భరతం పట్టేందుకు పోలీసు యంత్రాంగం రంగంలోకి దిగాల్సిందే. మహిళా పోలీసుల్ని మఫ్టీలో మాటేసినా, ఆ హడావుడి మూణ్ణాళ్ల ముచ్చటగా మారుతోంది. పోలీసుల ధోరణి ఫిర్యాదులు వస్తేనే, తాము స్పందిస్తామన్నట్టుగా ఉంది. కళాశాలల విషయానికి వెళ్తే, జూనియర్లను సీనియర్లు వేధించడం ప్రతిఏటా వెలుగు చూస్తున్నాయి. ర్యాగింగ్‌ నియంత్రణకు కళాశాల, వర్సిటీల స్థాయిలో ప్రత్యేక బృందాలు రంగంలోకి దిగినా, హాస్టళ్లు, బయటి ప్రాంతాల్లో జూనియర్లను వేధించే సీనియర్లు అనేక మంది ఉన్నారు. కొన్ని ర్యాంగింగ్‌ సంఘటనలు వెలుగులోకి వస్తుండగా, కొందరు విద్యార్థులు సీనియర్లకు భయపడి ముందుకు రావడం లేదు. ఇంకొందరు తమ ఇళ్లకు పరుగులు తీస్తున్నారు. కొన్ని చోట్ల సరదాగా సాగే టీజింగ్,వివాదాలకు సైతం దారితీస్తున్నాయి. వైద్య కళాశాలలు ప్రారంభం ‘ఒక విద్యార్థిని అవమానపర్చడం, మానసికంగా దెబ్బతీయడం,  భయందోళనకు గురిచేయడం, బెదిరించడం లేదా గాయపడే పరిస్థితి కల్పించడం.’ వంటివి ర్యాగింగ్‌గా పరిగణించవచ్చు. ఇక, ర్యాగింగ్‌ నిరోధించాల్సిన బాధ్యత కళాశాల ప్రిన్సిపాల్‌ లేక యాజమ్యాన్యానిది. చట్టం ప్రకారం ర్యాగింగ్‌ ఫిర్యాదు అందిన వెంటనే కళాశాల ప్రిన్సిపాల్‌ లేదా యాజమాన్యం స్పందించి విచారణ చేపట్టాలి. ప్రాథమిక సాక్ష్యాధారాలు లభిస్తే ర్యాగింగ్‌కు పాల్పడిన వారిని వెంటనే సస్పెండ్‌ చేయాల్సి ఉంటుంది. ఈ పరిస్థితుల్లో తాజాగా వైద్య కళాశాలలు ప్రారంభం అయ్యాయి. మొదటి సంవత్సరం విద్యార్థులను ర్యాంగింగ్‌ పేరిట వేధించే పనిలో సీనియర్లు నిమగ్నం అయ్యారా..? అన్న ప్రశ్నకు సమాధానంగా మదురైలో ఘటన వెలుగు చూసింది. ఢిల్లీకి చేరిన ఫిర్యాదు మదురై ప్రభుత్వ వైద్య కళాశాలలో సీనియర్లు జూనియర్లను ఇష్టారాజ్యంగా వేధిస్తుండడం ఆలస్యంగా వెలుగులోకి వచ్చింది. ఇక్కడ తమకు న్యాయం లభించదన్న ఆందోళనతో జూనియర్‌ ఒకరు ఏకంగా ఢిల్లీలోని ర్యాంగింగ్‌ నియంత్రణ కమిటీకి రహస్యంగా మెయిల్‌ పంపించారు. ఈ మెయిల్‌ను పరిశీలించిన కమిటీ శనివారం రంగంలోకి దిగింది. మదురై వైద్య కళాశాల ప్రిన్సిపాల్‌ మరుదు పాండియన్‌ నేతృత్వంలోని బృందంతో కలసి ర్యాగింగ్‌కు పాల్పడుతున్న సీనియర్ల భరతం పట్టే పనిలో నిమగ్నం అయ్యారు. హాస్టల్‌ గదుల్లో, కళాశాల వెలుపల సీనియర్లు జూనియర్లను హింసిస్తుండడాన్ని పసిగట్టారు. ఈ కమిటీకి పలువురు రెడ్‌ హ్యాండెండ్‌గా చిక్కారు. దీంతో పదిహేను మంది జూనియర్‌ విద్యార్థులు సాహసం చేసి సీనియర్ల వేధింపుల గురించి లిఖిత పూర్వకంగా ఆదివారం  ప్రిన్సిపల్‌కు ఫిర్యాదుచేశారు. దీంతో రెండో సంవత్సరం చదువుతున్న 20 మంది సీనియర్‌ విద్యార్థులను గుర్తించారు. వారిని ఆరు నెలల పాటు కళాశాలల నుంచి సస్పెండ్‌ చేశారు. సెమిస్టర్‌ పరీక్షలకు అనుమతి ఇవ్వకూడదని నిర్ణయించారు. అలాగే, ఈ20 మంది హాస్టల్‌లో రెండేళ్ల పాటు ప్రవేశించకుండా నిషేధం విధించారు. నిఘా నేత్రాల ఆధారంగా.. కళాశాల, హాస్టల్‌ పరిసరాల్లోని నిఘా నేత్రాల్లో నమోదైన దృశ్యాలను సమగ్రంగా పరిశీలించి, మరికొందరు సీనియర్ల భరతం పట్టే రీతిలో వైద్యకళాశాల వర్గాలు ముందుకు సాగుతున్నాయి. ఇందులో మరో ఇద్దరు విద్యార్థుల తీరును గుర్తించడంతో వారి మీద కూడా చర్యకు నిర్ణయించారు. సోమవారం జరగనున్న కళాశాల ర్యాగింగ్‌ నియంత్రణ కమిటీ సమావేశంలో వీడియో దృశ్యాలను పరిశీలించి, ర్యాగింగ్‌కు పాల్పడ్డ సీనియర్ల భరతం పట్టేందుకు నిర్ణయించామని ప్రిన్సిపాల్‌ మరుదు పాండి తెలిపారు. కాగా, మదురైలో ర్యాగింగ్‌ రక్కసి వెలుగు చూడడంతో రాష్ట్రంలోని అన్ని ప్రైవేటు, ప్రభుత్వ వైద్య కళాశాలల్లో నిఘాను పెంచారు. ఎవరైనా ర్యాంగింగ్, ఈవ్‌ టీజింగ్‌ వంటి చర్యలకు పాల్పడితే కఠిన చర్యలు తప్పవన్న హెచ్చరికల బోర్డులు ప్రత్యక్షం అయ్యాయి.

ఉదయం లేవగానే తయారై కళాశాలల వద్ద వేచి ఉండటం.. నచ్చిన అమ్మాయి కనిపిస్తే వెంటపడటం.. అసభ్యకరమాటలతో లైంగిక వేధింపులకు పాల్పడటం ఆకతాయిలకు నిత్యకృత్యంగామారుతోంది. ఎవరైనా తమకు ఎదురు తిరిగితే నేరాలకు, దాడులకు పాల్పడటానికి కూడా వెనుకాడటం లేదు. రహస్యంగా నిఘా ఉంచిన మహిళా రక్షక్‌ బృందాలు కొంతమంది ఈవ్‌టీజర్లను రెడ్‌హ్యాండెడ్‌గా పట్టుకుంటున్నారు. జిల్లా వ్యాప్తంగా గడిచిన వారం రోజుల్లో అమ్మాయిలను వేధిస్తూ వెంటబడిన 44 మంది ఈవ్‌టీజర్లకు పోలీసులు శనివారం కౌన్సెలింగ్‌ ఇచ్చారు. అనంతపురం సెంట్రల్‌: సమాజంలో మహిళలకు, బాలికలకు రక్షణ లేకుండా పోతోంది. ఎక్కడో ఒక చోట అఘాయిత్యాలు వెలుగుచూస్తున్నాయి. పా ఠశాలకు వెళ్లి చదువుకోవాలన్నా.. ఉద్యోగాలు చేయాలన్నా.. ఒంటరిగా వెళ్లాలన్నా ఎక్కడ కీచకులు మాటువేసు ఉంటారోనని భయాందోళన వ్యక్తమవుతోంది. బాలికలు, మహిళల రక్షణ కో సం ప్రత్యేక చట్టాలు అమల్లో ఉన్నా నేరాలు అదు పు కావడం లేదు. చట్టాలపై పెద్దగా అవగాహన లేకపోవడం వలన ఏమవుతుందిలే అనే ధోరణిలో మృగాళ్లు రెచ్చిపోతున్నారు. ఇటీవలి కాలంలో ఇలాంటి ఘటనలు అనేకం చోటు చేసుకున్నాయి. ప్రతి ఏడాది పదుల సంఖ్యలో పోక్సో చట్టం కింద కేసులు నమోదవుతుండడం గమనార్హం.  చట్టంపై అవగాహన శూన్యం.. ఢిల్లీలో నిర్భయ ఉదంతం అనంతరం మహిళా రక్షణ చట్టాల్లో మార్పులు చేశారు. నిర్భయ యాక్టు, పోక్సో (ప్రొటెక్షన్‌ ఆఫ్‌ చిల్డ్రన్‌ ఫ్రం సెక్సువల్‌ అఫెన్సెస్‌)యాక్టు అమల్లోకి వచ్చాయి. ఈ చట్టం ప్రకారం 12 సంవత్సరాల లోపు పిల్లలపై లైంగిక వేధింపులు, అత్యాచారం ఘటనలు జరిగితే ఏకంగా ఉరిశిక్ష పడే అవకాశం ఉంది. 18 సంవత్సరాల లోపు పిల్లలపై నేరాలు జరిగితే జీవితఖైదు శిక్ష పడే అవకాశాలున్నాయి. అయితే గ్రామీణ స్థాయి వరకు ఈ చట్టాలపై పెద్దగా అవగాహన లేకుండాపోతోంది. క్షేత్రస్థాయిలో పనిచేసే ప్రభుత్వ ఉద్యోగులు, పోలీసులు చట్టంపై అవగాహన కల్పించడంలో నిర్లక్ష్యంగా వ్యవహరిస్తున్నారు. ఫలితంగా నేరాలకు అడ్డుకట్ట పడడం లేదు.  ఉసిగొల్పుతున్న సెల్‌ఫోన్స్‌.. ఇంటర్‌నెట్‌ ప్రభావం వలన ఇలాంటి నేరాలు ఎక్కువగా జరుగుతున్నాయనే అభిప్రాయం వ్యక్తమవుతోంది. ఇటీవల కాలంలో ప్రతి ఒక్కరి చేతిలో స్మార్ట్‌ఫోన్లు హల్‌చల్‌ చేస్తున్నాయి. వీటికి తోడు పలు కంపెనీలు ఉచిత ఇంటర్‌నెట్‌ అవకాశం కల్పించడం వలన ఎక్కువశాతం యువత పెడదారి పడుతున్నారు. తల్లిదండ్రుల పర్యవేక్షణ లేకపోవడంతో నేరాలు మరింత ఎక్కువవుతున్నాయి. చేతిలో సెల్‌ఫోన్‌ లేకపోతే నిమిషం కూడా గడవదనే రీతిలో యువత వ్యవహరిస్తోంది. యువత మాత్రమే కాకుండా చదువుకున్న విజ్ఞానవంతులు, సన్మార్గంలో నడిపించాల్సిన వ్యక్తులు కూడా ఈ తరహా నేరాలకు పాల్పడుతుండడంతో సభ్యసమాజం తలదించుకోవాల్సిన పరిస్థితులు ఉత్పన్నమవుతున్నాయి.  అఘాయిత్యాలకుపాల్పడితే కఠిన చర్యలు విద్యార్థినిలు, మహి ళల రక్షణ కోసం కొత్త చట్టాలు అమల్లోకి వచ్చాయి. దీనిపై అవగాహన కల్పించేందుకు జిల్లాలో ప్రత్యేకంగా మహిళా రక్షక్‌ బృందాలు పనిచేస్తున్నాయి. ప్రతి రోజూ పాఠశాలలు, కాలేజీల్లో పోక్సో, నిర్భయ చట్టాలపై అవగాహన కల్పిస్తున్నాయి. పోలీసులు గ్రామాలకు వెళ్లినప్పుడు కూడా గ్రామసభల్లో ఈ చట్టాలపై ప్రజలకు అవగాహన కల్పిస్తున్నారు. కొత్త చట్టాలు వచ్చిన తర్వాత అత్యాచారాలు, లైంగిక వేధింపులకు పాల్పడిన వారికి కఠిన శిక్షలు పడుతున్నాయి.  – జె.వెంకట్రావ్, డీఎస్పీ అనంతపురం

కర్ణాటక, మాలూరు:  పట్టణంలోని పోకిరిలకు, ఆడపిల్లలను వేధించే వారికి పట్టణ పోలీసులు సోమవారం  వినూత్న రీతిలో బుద్ధి చెప్పారు. గత వారం విద్యార్థిని రక్షిత హత్య ఉదంతం అనంతరం మేల్కొన్న పోలీసులు భవిష్యత్తులో ఇలాంటి ఘటనలు మళ్లీ పునరావృతం కాకుండా ముందు జాగ్రత్త చర్యలు చేపట్టారు. ఈ నేపథ్యంలో పట్టణంలో పోకిరిలు, ఆడపిల్లలను వేధించే వారు, వినూత్న రీతిలో హేర్‌ కటింగ్‌ చేయించుకున్న వారు, గడ్డాలు విడిచిన వారికి తగిన హెచ్చరికలు జారీ చేసే ప్రయత్నం చేపట్టారు. ఇందులో భాగంగా ఎస్‌ఐ ఎం. ఎన్‌ మురళి నేతృత్వంలోని పోలీస్‌ సిబ్బంది సోమవారం ఉదయం పట్టణంలోని ప్రముఖ వీధులలో సంచరించి స్టైల్‌గా గడ్డం పెంచిన వారిని, చిత్ర విచిత్రంగా తల వెంట్రుకలు పెంచిన వారిని గుర్తించి వారిని నేరుగా కటింగ్‌ షాపులకు తీసుకు వెళ్లి గడ్డాలను, స్టైల్‌ కటింగ్‌లను తీయించారు. ఈ సందర్భంగా మాట్లాడిన ఎస్‌ఐ మురళి పట్టణంతో పాటు తాలూకాలోని ప్రతి గ్రామంలోను ఇలాంటి వారిని గుర్తించి గట్టిగా బుద్ధి చెబుతామన్నారు. పట్టణంలో బీట్‌ వ్యవస్థను ఏర్పాటు చేస్తామన్నారు.

లక్నో, ఉత్తరప్రదేశ్‌ : కుటుంబ, ఆరోగ్య సంక్షేమ శాఖ కేంద్ర సహాయ మంత్రి అనుప్రియా పటేల్‌కు చేదు అనుభవం ఎదురైంది. ఉత్తరప్రదేశ్‌లోని ఆమె సొంత నియోజకవర్గం మీర్జాపూర్‌కు వెళ్లిన ఆమెను కొందరు ఆకతాయిలు వేధించారు. దీనిపై ఆమె పోలీసులకు ఫిర్యాదు చేశారు. మీర్జాపూర్‌లో సోమవారం పలు అభివృద్ధి కార్యక్రమాల్లో పాల్గొన్న అనుప్రియ తిరిగివస్తున్న సమయంలో ముగ్గురు యువకులు కారులో ఆమె కాన్వాయ్‌ను ఓవర్‌ టేక్‌ చేసేందుకు ప్రయత్నించారు. దీంతో భద్రతా సిబ్బంది వారిని హెచ్చరించారు. అయినా పట్టించుకోని ఆకతాయిలు మంత్రి, సెక్యూరిటీ సిబ్బందిని ఉద్దేశించి అసభ్యంగా మాట్లాడారు. యువకుల ప్రయాణిస్తున్న కారుకు నెంబర్‌ ప్లేట్‌ లేదు. మంత్రి ఫిర్యాదుతో రంగంలోకి దిగిన పోలీసులు ఆకతాయిలను అరెస్టు చేసి, కారును స్వాధీనం చేసుకున్నారు. కాగా, మహిళల రక్షణ కోసం యోగి ఆదిత్యనాథ్‌ ప్రభుత్వం యూపీలో యాంటీ రోమియో స్క్వాడ్స్‌ను నియమించిన విషయం తెలిసిందే. అయితే, ఆశించిన స్థాయిలో ఈ స్క్వాడ్స్ ఫలితాలను ఇవ్వలేకపోతున్నాయి. ఏకంగా కేంద్రమంత్రిపైనే ఆకతాయిలు వేధింపులకు దిగడం యూపీలో ప్రస్తుతం చర్చనీయాంశంగా మారింది.

ఈవ్‌టీజింగ్‌ రక్కసిపై పోలీసులు ఉక్కుపాదం మోపుతున్నారు. కోటి ఆశలతో ఉన్నత చదువుల కోసం విద్యార్థినులు కళాశాల బాట పడుతున్నారు. పాశ్చాత్య సంస్కృతి మోజులో ఈవ్‌టీజింగ్‌ చేయడం, ప్రేమించాలని వేధించడం చేస్తూ పోలీసులకు పట్టుబడితే ఊచలు లెక్కబెట్టాల్సిందే.   అనంతపురం సెంట్రల్‌: మహానగరాల్లోనే కాకుండా అనంతపురం జిల్లాలో కూడా ఈవ్‌టీజింగ్‌ రక్కసి కొనసాగుతోంది. పలు కళాశాలల్లో ఈవ్‌టీజింగ్‌ దెబ్బకు చదువులు మానేసిన పిల్లలు కోకొల్లలుగా ఉంటే.. ప్రాణాలు తీసుకున్న వారు కూడా లేకపోలేదు. ముఖ్యంగా అమ్మాయిల చదువులకు తీవ్ర ఆటంకం కలుగుతోంది. దీనిపై ప్రత్యేక దృష్టి సారంచిన పోలీసులు గతేడాది నవంబర్‌ నుంచి ప్రత్యేకంగా మహిళా రక్షక్‌ బృందాలను ఏర్పాటు చేశారు. జిల్లా వ్యాప్తంగా పది సబ్‌డివిజన్‌ కేంద్రాల్లో ఈ మహిళా రక్షక్‌ బృందాలు పనిచేస్తున్నాయి. ముఖ్యంగా మహిళలు, అమ్మాయిలకు వేధింపుల నుంచి రక్షణ  కల్పించడమే లక్ష్యంగా విధులు నిర్వహిస్తున్నారు. కళాశాలలు, పాఠశాలలు, దేవాలయాలు, బస్టాండ్‌లు, రైల్వేస్టేషన్లు, పార్కులు, సినిమా థియేటర్లు తదితర ప్రాంతాల్లో మఫ్టీలో ఉంటూ నిఘా వేస్తున్నారు. ప్రత్యేక హెల్ప్‌లైన్‌: మఫ్టీలో ఉండడమే కాకుండా ఆపదలో ఉన్న మహిళలు, విద్యార్థినుల కోసం ప్రత్యేకంగా హెల్ప్‌లైన్‌ ఏర్పాటు చేశారు. డయల్‌ 100, 9989819191 వాట్సాప్‌ నంబర్లను ఆశ్రయిస్తే తక్షణ సాయం అందేలా చర్యలు చేపడుతున్నారు. ఇప్పటి వరకు 720 మంది పోకిరీలు పట్టుబడ్డారు. వీరిని వెంటనే ఆయా పోలీస్‌స్టేషన్‌లకు తరలిస్తారు. అనంతరం జిల్లా కేంద్రంలోని పోలీసుకార్యాలయంలో ఏర్పాటు చేసిన మహిళా గ్రీవెన్‌ సెల్‌ కార్యాలయంలో పోకిరీలకు వారి తల్లిదండ్రుల సమక్షంలో న్యాయవాదులు, మహిళా పోలీసులు, ఎన్‌జీఓలతో కూడిన బృందం ద్వారా పోలీసులు కౌన్సెలింగ్‌ ఇస్తారు. కౌన్సెలింగ్‌ ద్వారా పద్ధతి మార్చుకోని వారు, నేర తీవ్రత ఎక్కువ ఉన్న వారిపై కేసులు కూడా నమోదు చేస్తుండడం గమనార్హం. ఇప్పటి వరకూ 17 మందిపై పెట్టీ కేసులు నమోదు చేయగా, 10 మందిపై క్రిమినల్‌ కేసులు నమోదు చేశారు.  నగరంలో కలెక్టరేట్‌కు సమీపంలో ఉన్న ఓ ప్రభుత్వ పాఠశాలల్లో పదవతరగతి చదువుతున్న విద్యార్థినిని వేధిస్తున్న పోకిరీపై గతంలో నేరచరిత్ర ఉండడంతో రౌడీషీట్‌ ఓపెన్‌ చేయడం గమనార్హం.    ఉపేక్షించేది లేదు ఈవిటీజింగ్‌ను ఎట్టి పరిస్థితిలోనూ ఉపేక్షించేది లేదు. ఎస్పీ జీవీజీ అశోక్‌కుమార్‌ కఠిన చర్యలు తీసుకోవాలని ఆదేశాలు జారీచేశారు. ప్రత్యేకంగా మహిళా రక్షక్‌ బృందాలు నియమించాం. ఈవ్‌టీజింగ్‌కు పాల్పడుతూ పట్టుబడితే జైలుపాలు కావాల్సిందే. మహిళలు, విద్యార్థినుల రక్షణ కోసం కఠిన చట్టాలు అమల్లో ఉన్నాయి. అనంతపురం సబ్‌డివిజన్‌ పరిధిలోనే అనేక మందిపై క్రిమినల్‌ కేసులు కూడా నమోదు చేశాం.  – వెంకట్రావ్, డీఎస్పీ, అనంతపురం   

నెల్లూరు(క్రైమ్‌): మైనర్‌బాలికపై ఈవ్‌టీజీంగ్‌కు పాల్పడిన ఇద్దరు వ్యక్తులకు స్థానికులు దేహశుద్ధి చేశారు. అనంతరం నిందితులను పోలీసులకు అప్పగించిన ఘటన ఆదివారం రాత్రి నెల్లూరులోని మినీబైపాస్‌లో అన్నమయ్య సర్కిల్‌ వద్ద చోటుచేసుకుంది. వివరాలిలా ఉన్నాయి. డైకస్‌రోడ్డుకు చెందిన దంపతులు తమ ఇద్దరు పిల్లలతో పాటు బంధువుల కుమార్తెను ఆదివారం గొలగమూడిలోని ఫన్‌పార్క్‌కు తీసుకెళ్లారు. తిరిగి స్కూటీపై ఇంటికి బయలుదేరుతూ బంధువుల కుమార్తెను గొలగమూడి నుంచి ఆటోలో ఎక్కించి దంపతులిద్దరూ వాహనాన్ని వెంబడిçస్తూ బయలుదేరారు. అయితే కనుపర్తిపాడు సమీపంలోని మద్యం దుకాణం వద్ద సుందరయ్యకాలనీకి చెందిన పోతయ్య, గొలగమూడికి చెందిన నాగూరు అనే ఇద్దరు వ్యక్తులు మద్యం సేవించి మోటార్‌బైక్‌పై నగరంలోకి వస్తూ ఆటోలో వస్తున్న బాలికకు అసభ్యకర సైగలు చేస్తూ వెంబడించారు. ఈ విషయాన్ని వెనుక వస్తున్న దంపతులు గుర్తించి అన్నమయ్య సర్కిల్‌ వద్ద వారిని పట్టుకుని ప్రశ్నించగా ఎదురుతిరిగారు. దీంతో స్థానికులు అక్కడకు విషయం తెలుసుకున్నారు. ఈవ్‌టీజింగ్‌కు పాల్పడిన పోతయ్య, నాగూరులకు దేహశుద్ధిచేసి నాలుగోనగర పోలీసులకు సమాచారం అందించారు. పోలీసులు ఘటనా స్థలానికి చేరుకుని నిందితులను అదుపులోకి తీసుకుని పోలీసు స్టేషన్‌కు తరలించారు. బాలిక బంధువుల ఇచ్చిన ఫిర్యాదు మేరకు పోలీసులు కేసు దర్యాప్తు చేస్తున్నారు.

శ్రీనగర్‌ : తప్పతాగిన ముగ్గురు యువకులు రోడ్డు మీద వెళ్లే వారిపై అనుచిత వ్యాఖ్యలు చేస్తూ బైక్‌పై దూసుకెళ్లారు. ఇంతలో ఓ స్కూల్‌ విద్యార్థిని స్కూటీపై వెళ్తుండగా.. ఆమెను వేధించాలని డిసైడ్‌ అయ్యారు. మార్గం మధ్యలో బైక్‌ దిగిన ఒకడు ఆమెను అడ్డగించేందుకు యత్నించాడు. అయితే ఆమె వేగంగా దూసుకెళ్లటంతో బైక్‌ తగిలి బొక్కా బొర్లాపడిపోయాడు. ఆ యత్నంలో బాలిక కూడా కింద పడిపోయింది.  ఆ వెంటనే ఆమె పైకి లేవగా.. ఆ పోకిరీ మాత్రం కదలకుండా అలాగే ఉండిపోయాడు. భయంతో మిగతా ఇద్దరు అతన్ని కదలించే యత్నం చేశారు. ఈ ఘటనంతా అక్కడే ఉన్న ఓ ఇంటి సీసీ కెమెరాలో రికార్డయ్యింది. జమ్ము కశ్మీర్‌ దొడా జిల్లా భాదర్వా ప్రాంతంలో ఈ ఘటన చోటుచేసుకోగా.. బాలిక తల్లిదండ్రుల ఫిర్యాదు మేరకు కేసు నమోదు చేసుకున్నారు. ఫుటేజీ ఆధారంగా పోలీసులు దర్యాప్తు చేపట్టి ఆ ముగ్గురిని అదుపులోకి తీసుకున్నారు. ఆ వీడియో సోషల్‌ మీడియాలో వైరల్‌ అవుతుండగా.. మంచి పని అయ్యిందంటూ కొందరు కామెంట్లు పెడుతున్నారు.

సాక్షి, హైదరాబాద్‌ : ప్రేమ పేరుతో అమ్మాయిలను మోసం చేస్తూ, వారితో సీక్రెట్‌గా దిగిన ఫోటోలను ఫేస్‌బుక్‌లో పెడతానంటూ బెదిరిస్తున్న ఓ యువకుడిని  బుధవారం షీ టీం పోలీసులు అరెస్ట్‌ చేశారు. పోలీసులు తెలిపిన వివరాల ప్రకారం.. గోల్కొండ ప్రాంతానికి చెందిన అల్తాన్‌ ఖాన్‌ తరచూ అమ్మాయిలను వేధించేవాడు. వారితో రహస్యంగా దిగిన ఫోటోలు సోషల్‌ మీడియాలో పెడతానంటూ బెదిరించి డబ్బులు వసూలు చేసేవాడు. అల్తాన్‌ ఖాన్‌ చర్యలకు విసుగు చెందిన ఓ అమ్మాయి షీ టీం పోలీసులను ఆశ్రయించింది. టోలీచౌకి చౌరస్తా వద్ద మాటు వేసిన పోలీసులు అల్తాన్‌ ఖాన్‌ను రెడ్‌ హ్యాండెడ్‌గా పట్టుకున్నారు. గతంలో అమ్మాయిలను వేధించిన కేసులో అల్తాన్‌ ఖాన్‌ అరెస్టయిన్నట్లు పోలీసులు పేర్కొన్నారు.

భానుగుడి(కాకినాడ సిటీ): బాలికలు, మహిళలు ధైర్యంతో అన్ని రంగాల్లో రాణించాలని రాష్ట్ర ఉపముఖ్యమంత్రి నిమ్మకాయల చినరాజప్ప కోరారు. శనివారం స్థానిక భానుగుడి సెంటర్‌లో కాకినాడ స్మార్ట్‌సిటీలో ఈవ్‌టీజింగ్‌ నివారణకు జిల్లా పోలీస్‌ విభాగం షీ టీమ్స్‌ ఏర్పాటు సందర్భంగా నిర్వహించిన కార్యక్రమంలో బెలూన్‌లను గాలిలోకి ఎగురవేశారు. 2కే రన్‌ ర్యాలీని రూరల్‌ ఎమ్మెల్యే పిల్లి అనంతలక్ష్మి ప్రారంభించారు. జేఎన్‌టీయూకే అలుమినీ ఆడిటోరియంలో ఏర్పాటు చేసిన కార్యక్రమానికి ఆయన ముఖ్యఅతిథిగా హాజరై షీ టీమ్స్‌ లోగోను ఆవిష్కరించారు. ఈ కార్యక్రమంలో డిప్యూటీసీఎం రాజప్ప మాట్లాడుతూ మహిళల గౌరవం, హక్కుల పరిరక్షణకు తమ ప్రభుత్వం అత్యంత ప్రాధాన్యమిస్తోందని, ఇటీవల నిర్వహించిన పోలీస్‌ రిక్రూట్‌మెంట్‌లో మహిళలకు 30 శాతం ప్రాధాన్యం పాటించామన్నారు. మహిళల గౌరవాన్ని, స్వేచ్ఛను భంగపరిచే అనుచిత ప్రవర్తన, వేధింపులను నిర్మూలించేందుకు షీ టీమ్స్‌ రక్షణ వ్యవస్థను అమలులోకి తెచ్చిందన్నారు. సీసీటీవీ కెమెరాలు, మఫ్టీలో షీటీమ్‌ల నిఘాలో కాకినాడ నగరంలో మహిళలకు మరింత భద్రతంగా రూపుదిద్దినందుకు ఎస్పీ, పోలీసు యంత్రాంగాన్ని మంత్రి అభినందించారు. ఎస్పీ విశాల్‌గున్ని మాట్లాడుతూ నగరంలో ఈవ్‌టీజింగ్‌ జరిగే ప్రదేశాల్లో ఒక మహిళా ఎస్సై, ఇద్దరు మహిళా కానిస్టేబుళ్లు, మరో ఇద్దరు పురుష కానిస్టేబుళ్లతో షీ టీమ్‌ మఫ్టీలో రహస్య నిఘా ఉంచుతాయన్నారు. ఫిర్యాదులను 100 నంబర్‌కు ఫోన్‌ ద్వారాగానీ, ‘షీటీమ్‌కేడీఏ’ ఫేస్‌బుక్‌ అడ్రస్‌కు, వాట్సాప్‌ నంబర్‌ 94949 33233కు మెసేజ్‌ ద్వారా లేదా, కాకినాడ టూటౌన్‌ పోలీస్‌స్టేషన్‌ పై అంతస్తులోని డీఎస్పీకి తెలియజేస్తే 24 గంటలలోపు ఆకతాయిలపై చర్య చేపట్టి భద్రత కల్పిస్తామన్నారు. కాకినాడ సిటీ, రూరల్‌ ఎమ్మెల్యే వనమాడి వెంకటేశ్వరరావు, పిల్లి అనంతలక్ష్మి మాట్లాడుతూ నగరంలో బాలికలు, మహిళలకు ఎదురయ్యే ఆకతాయి వేధింపులను షీ టీమ్స్‌ అండతో ధైర్యంగా ఎదుర్కోవాలన్నారు. రంపచోడవరం ఏఎస్పీ అజితావేజెండ్ల మాట్లాడుతూ మహిళల రక్షణకోసం ఏర్పాటైన చట్టాల గురించి ప్రతి ఒక్కరూ తప్పక తెలుసుకోవాలని కోరారు. ఐడియల్‌ కళాశాల కార్యదర్శి డాక్టర్‌ పి.చిరంజీవినికుమారి మాట్లాడుతూ మహిళలకు నేనున్నానని ఆత్మస్థైర్యం కల్పిస్తూ పోలీస్‌ షీటీమ్స్‌ వ్యవస్థ నిలవడం ముదావహమన్నారు. ముందుగా భానుగుడి సెంటర్‌ నుంచి జేఎన్‌టీయూకే ఆడిటోరియం వరకు పెద్ద సంఖ్యలో బాలికలు, మహిళల భాగస్వామ్యంతో 2కే రన్‌ సాగింది. ఈ రన్‌లో విజేతలుగా నిలిచిన బాలికలు జి.దివ్య, పుష్పవాణి, మోహితాప్రసన్న, రామలతలకు జేఎన్‌టీయూకే ఆడిటోరియంలో జరిగిన కార్యక్రమంలో డిప్యూటీ సీఎం రాజప్ప బహుమతులు అందజేశారు. ఎస్పీ సతీమణి నేహాగున్ని, డీఎఫ్‌ఓ డాక్టర్‌ నందినీ సలారియా, ఏఎస్పీ ఏఆర్‌ దామోదర్, రంగరాయ కళాశాల ప్రిన్సిపాల్‌ డాక్టర్‌ ఆర్‌.మహాలక్ష్మి, డీఎస్పీలు, కళాశాల విద్యార్థినిలు, వివిధ రంగాల మహిళలు పాల్గొన్నారు.  

సాక్షి, న్యూఢిల్లీ : రోడ్డు మీద వెళ్తుంటే ‘కుక్కల్లా మొరుగుతుంటారు‌’.. మనమెందుకులే అని మిగతా యువతుల్లా భరించాలని ఆమె అనుకోలేదు. కొద్దిసేపు భరించింది. వెంటాడుతూ అనుచిత వ్యాఖ్యలకు దిగారు. అంతే... తట్టుకోలేకపోయింది. ఉగ్రరూపం దాల్చి  ఆ పోకిరీని గల్లా పట్టి కొట్టుకుంటూ స్టేషన్‌కు ఈడ్చుకొచ్చింది. దేశరాజధానిలో ఈ ఘటన చోటు చేసుకుంది. విషయంలోకి వెళ్తే.. ఫిబ్రవరి 25న కరోల్‌ బాగ్‌లోని గఫర్‌ మార్కెట్‌కు తన స్నేహితురాలితో ఆ యువతి వెళ్లింది. ఇంతలో ఐదుగురు వ్యక్తులు వారిని వేధించటం మొదలుపెట్టారు.  దీంతో యువతులిద్దరూ రిక్షా ఎక్కి అక్కడి నుంచి బయలుదేరారు. వారిలో ఇద్దరు బైక్‌పై వాళ్ల రిక్షాను వెంబడిస్తూ కామెంట్లు చేస్తూనే ఉన్నాడు. అందులో ఒక్క వ్యక్తి మాత్రం సదరు యువతిపై అనుచితంగా వ్యాఖ్యలు చేశాడు. దీంతో చిర్రెత్తుకొచ్చిన ఆ యువతి రిక్షా దిగి మరీ అతన్ని ఈడ్చి కొట్టింది. అంతటితో ఆగకుండా వాడి గల్లా పట్టి కొట్టుకుంటూ దగ్గర్లోని పోలీస్‌ స్టేషన్‌కు లాక్కెళ్లింది. ఈ క్రమంలో అక్కడ గుమిగూడిన స్థానికులు కొందరు ఆమెకు సాయం చేయటం విశేషం. యువతి ఫిర్యాదు మేరకు మనీష్‌, అభిషేక్‌ అనే యువకులను అరెస్ట్‌ చేశారు.   ఇదిలా ఉంటే ఢిల్లీలో గత రెండేళ్లలో లైంగిక దాడుల కేసులు అధికమైపోయాయి. సగటున రోజుకు అయిదుకు పైగా అత్యాచార కేసులు నమోదు అవుతున్నట్లు ఢిల్లీ పోలీసు గణాంకాలు చెబుతున్నాయి. గతేడాది సుమారు 3,273 కేసులు నమోదు కాగా, అందులో 650 ఈవ్‌టీజింగ్‌ కేసులు ఉన్నాయి.

సాక్షి, పశ్చిమ గోదావరి: జిల్లాలోని అచంటలో పోలీసుల ఓవరాక్షన్‌ కలకలం రేపింది. శివరాత్రి వేడుకల్లో యువతులను ఈవ్‌టీజింగ్‌ చేశారని కొంతమంది యువకులను పోలీసులు అదుపులోకి తీసుకున్నారు. అయితే ఏ విధమైనా విచారణ చేయకుండా వారిని పోలీస్‌ స్టేషన్‌కు తరలించారు. అంతటితో అగకుండా పీఎస్‌లోనే ఆ యువకులపై చేయి చేసుకున్నారు. ఈ దృశ్యాలను వీడియో చిత్రీకరిస్తున్న మీడియాపై పోలీసులు చిందులు వేశారు. ప్రస్తుతం ఈ వీడియో వైరల్‌గా మారింది. 

సాక్షి, అమరావతి బ్యూరో: మహిళ అర్ధరాత్రి ధైర్యంగా నడిచి వెళ్లగలిగిన రోజే దేశానికి నిజమైన స్వాతంత్య్రం వచ్చినట్లు అని మహాత్మా గాంధీ అన్నారు. అయితే రాష్ట్ర రాజధానిలో భాగమైన విజయవాడలో అర్ధరాత్రి కాదు కదా పట్టపగలే మహిళ ధైర్యంగా వెళ్లగలిగే పరిస్థితి లేదు. నగరంలో ఈవ్‌టీజర్లు, రౌడీలు చెలరేగిపోతున్నారు. నగరంలో ప్రధాన ప్రాంతాల్లోనూ మహిళలు ఒంటరిగా సంచరించే పరిస్థితుల్లేవని ఓ మహిళా మిత్ర సభ్యులే తేల్చిచెప్పడం గమనార్హం. వాసవ్య మహిళా మండలి ఆధ్వర్యంలో ‘క్లాప్‌’ కార్యక్రమంలో నిర్వహించిన సర్వేలో వెల్లడైన విస్తుగొల్పే విషయాలు రాజధానిలో మహిళల దుస్థితిని తేటతెల్లం చేస్తున్నాయి.   ఇదీ ‘క్లాప్‌’ అమెరికా కాన్సులేట్‌ కార్యాలయం సహకారంతో విజయవాడలోని వాసవ్య మహిళా మండలి ‘క్లాప్‌’ అనే కార్యక్రమాన్ని చేపట్టింది. విజయవాడ పోలీస్‌ కమిషరేట్‌లో అన్ని పోలీస్‌స్టేషన్ల పరిధిలోని మహిళల రక్షణ కోసం ఏర్పాటు చేసిన ‘మహిళా మిత్ర’ సభ్యులకు అవగాహన కల్పించడం ఈ కార్యక్రమం ఉద్దేశం. ఇందులో భాగంగా మొదటి దశలో విజయవాడలో గవర్నర్‌పేట, సూర్యారావుపేట, మాచవరం, సత్యనారాయణపురం, సింగ్‌నగర్, నున్న పోలీస్‌స్టేషన్ల పరిధిలో మహిళా మిత్ర సభ్యులకు అవగాహన సదస్సు నిర్వహించారు. ముందుగా ఈ పోలీస్‌స్టేషన్ల పరిధిలో మహిళల భద్రతపై మహిళా మిత్ర సభ్యుల అభిప్రాయం తెలుసుకోవాలని సర్వే నిర్వహించారు. నగర శివార్లలో అధ్వానం విజయవాడ నడిబొడ్డున ఉన్న ప్రదేశాల్లోనే మహిళలకు రక్షణ కరువైందని సర్వేలో తేటతెల్లమైంది. మరీ ఎక్కువగా నగర శివార్లులోని పోలీస్‌స్టేషన్ల పరిధిలో పరిస్థితి మరింత ప్రమాదకరంగా ఉందని పోలీసువర్గాలే చెబుతున్నాయి. శివారు ప్రాంతాల్లోనే కాలేజీలు, ఇతర విద్యా సంస్థలు ఎక్కువగా ఉన్నాయి. రౌడీ గ్యాంగ్‌లు, పోకిరీలు నగరంలో ఎక్కడపడితే అక్కడ ఈవ్‌టీజింగ్, వేధింపులకు పాల్పడుతున్నారు. విజయవాడ పోలీసుల అధికారిక లెక్కల ప్రకారమే గతేడాది 2,500 మంది ఈవ్‌టీజర్లను అదుపులోకి తీసుకుని కౌన్సెలింగ్‌ నిర్వహించారు. సర్వే ఇలా.. ఆరు పోలీస్‌స్టేషన్ల పరిధిలో 40 ముఖ్య ప్రదేశాలను ఎంపిక చేశారు. ఈ ప్రదేశాల పేర్లతో ప్రశ్నావళిని రూపొందించి మహిళా మిత్ర సభ్యులకు నాలుగు ఆప్షన్లు ఇచ్చారు. అవి.. ఎలాంటి అనుమతి లేకుండానే వెళ్లగలం, కుటుంబసభ్యుల అనుమతి తీసుకుంటేనే వెళ్లగలం, ఒక్కరమే వెళ్లలేం, అసలు వెళ్లలేం. ఈ నాలుగు ఆప్షన్లల్లో ఏవి ఆ 40 ప్రదేశాలకు సరిపోతాయని మహిళా మిత్ర సభ్యులను ప్రశ్నించారు. అందుకు వారు ఇచ్చిన సమాధానాలు విజయవాడలో మహిళలు ఎదుర్కొంటున్న విపత్కర పరిస్థితులను తెలిపాయి. ఆ 40 ప్రదేశాల్లో 27 మహిళలకు సురక్షితమైనవి కావని సమాధానమిచ్చారు. కేవలం 13 ప్రదేశాలకు మాత్రమే కుటుంబసభ్యుల అనుమతి లేకుండా ధైర్యంగా వెళ్లగలమన్నారు. ఇంకో 13 ప్రదేశాలకు వెళ్లాలంటే ముందుగా కుటుంబసభ్యుల అనుమతి తీసుకోవాల్సిందేనని చెప్పారు. వీటిలో కంట్రోల్‌ రూమ్, నెహ్రూ బస్టాండ్, రాజీవ్‌గాంధీ పార్క్, కాళీమాత ఆలయం, మున్సిపల్‌ కార్పొరేషన్‌ కార్యాలయం మొదలైన ప్రదేశాలు ఉండటం గమనార్హం. ఈ ప్రదేశాల్లో మహిళలు వేధింపులకు గురవడానికి అవకాశాలు ఎక్కువ ఉన్నాయని స్పష్టం చేశారు. మరో 13 ప్రదేశాలకు కుటుంబ సభ్యులు, స్నేహితులు తోడు లేకుండా వెళ్లలేమని వెల్లడించారు. వాటిలో పాత ప్రభుత్వ ఆస్పత్రి రోడ్డు, లెనిన్‌ సెంటర్, సింగ్‌నగర్‌ బ్రిడ్జ్, టైమ్‌ ఆస్పత్రి రోడ్, అలంకార్‌ థియేటర్, సదర్న్‌ హోటల్‌ రోడ్డు, రమేశ్‌ ఆస్పతి రోడ్డు మొదలైనవి ఉండటం గమనార్హం. ఈ ప్రదేశాలకు ఒంటరి మహిళలు వెళ్తే ఈవ్‌టీజింగ్, వేధింపుల బారిన పడాల్సిందేనని తేల్చిచెప్పారు. ఒక ప్రదేశానికి తోడు ఉన్నాసరే వెళ్లలేమని పేర్కొన్నారు. సర్వేకి ఎంపిక చేసిన ప్రదేశాలు 40 సురక్షితం కానివి 27

కొత్తకోట: సమాజంలోని ప్రతి ఒక్కరూ పోలీస్‌ శాఖకు సహకరించి శాంతిభద్రతల పరిరక్షణలో భాగస్వాములుకావాలని.. అప్పుడే వందశాతం నేరాలు అదుపు చేయవచ్చని ఎస్పీ రోహిణి ప్రియదర్శిని అన్నారు. మండల కేంద్రంలోని బీపీఆర్‌ గార్డెన్‌లో ఆదివారం ఆమె సీసీ కెమెరాల ఏర్పాటు ప్రారంభోత్సవ కార్యక్రమాన్ని ప్రారంభించారు. అనంతరం పట్టణంలో సీసీ కెమెరాలను ఏర్పాటు చేసుకోవడం వలన కలిగే లాభాలను ఎస్పీ వివరించారు. వీటిని ఏర్పాటు చేయడానికి ఎమ్మెల్యే ఆల వెంకటేశ్వర్‌రెడ్డి,  పట్టణవాసులు, వ్యాపారులు, వివిధ కులసంఘాల నాయకులు, గ్రామ పంచాయతీ  పాలకమండలి సభ్యులు సహకరించడం అభినందనీయమన్నారు. ఇటీవల పట్టణ కేంద్రాల్లో  ఎక్కువగా చోరీలు జరుగుతుండటం మూలంగా వాటిని అరికట్టడానికి పట్టణంలో 70కి పైగా సీసీ కెమెరాలు ఏర్పాటు చేశామన్నారు. సీసీ కెమెరాలు ఏర్పాటు చేయడం వల్ల దొంగలను గుర్తించడమే కాకుండా.. రోడ్డు ప్రమాదాలు జరిగిన వారికి ఇన్సూరెన్స్‌ కల్పించడం, అమ్మాయిలను రాగింగ్‌ చేసే వారిని గుర్తించడంతోపాటు ఇతర చట్టవ్యతిరేక సంఘటనలకు పాల్పడుతున్న దుండగులను పట్టుకోచ్చని తెలిపారు. పట్టణంలో సీసీల ఏర్పాటుకు కృషి చేసిన కొత్తకోట సీఐ సోమ్‌నారాయణŠసింగ్, ఎస్‌ఐ రవికాంత్‌రావును అభినందించారు. కార్యక్రమంలో ఏఎస్పీ సురేందర్‌రెడ్డి, జెడ్పీటీసీ డా. పీజే బాబు, ఎంపీపీ గుంత మౌనిక,  కొత్తకోట సర్పంచ్‌ చెన్నకేశవరెడ్డి, సీడీసీ చైర్మన్‌ జగన్మోహన్‌రెడ్డి, కొత్తకోట సింగల్‌విండో చైర్మన్‌ సురేంద్రనాథ్‌రెడ్డి, ఆయా సర్పంచులు, ఎంపీటీసీ సభ్యులు పాల్గొన్నారు.

చెన్నై: సంచలనాలకు కేంద్రబిందువు నటి భువనేశ్వరి. ఆమె కొడుకు కళాశాల విద్యార్థినిని పెళ్లి పేరుతో టార్చర్‌ పెట్టిన కేసులో అరెస్ట్‌ అయ్యి కటకటాలు లెక్కపెడుతున్నాడు. వివరాల్లోకెళ్లితే స్థానిక వలసరవాక్కం, తిరుమలై నగర్, ఏంజల్‌ వీధిలో నటి భువనేశ్వరి నివశిస్తోంది. ఆమె కొడుకు (23) మిథున్‌ శ్రీనివాసన్‌  లా చదువుతున్నాడు. ఇతనికి స్థానిక అన్నానగర్, తిరుమంగళంలో నివశిస్తున్న ఒక యువతికి ఫేస్‌బుక్‌ ఫ్రెండ్‌షిప్‌ ఏర్పడింది. అనంతరం ఇద్దరి మధ్య సన్నిహిత సంబంధం పెరగడంతో తనను పెళ్లి చేసుకోవాలని ఆ యువతిపై ఒత్తిడి చేయడం మొదలెట్టాడు. అందుకు ఆ యువతి నిరాకరించడంతో మిథున్‌ శ్రీనివాసన్‌ ఆ అమ్మాయి ఇంటికి వెళ్లి గొడవ చేశాడు. అంతే కాకుండా ఆ యువతి చదివే కళాశాలకు వెళ్లి పెళ్లి చేసుకోవాలని టార్చర్‌ వేధించడంతో ఈ విషయాన్ని ఆ అమ్మాలు తల్లిదండ్రులకు చెప్పింది. వారు తిరుమంగళం పోలీస్‌స్టేషన్‌లో ఫిర్యాదు చేయడంతో పోలీసులు కేసు నమోదు చేసి మిథున్‌ శ్రీనివాసన్‌ను అరెస్ట్‌ చేసి విచారిస్తున్నారు. ఇంతకు ముందు నటి భువనేశ్వరి ఇంట్లో పని కోసం శ్రీలంక నుంచి తీసుకొచ్చిన యువతితో తన కొడుకుకు పెళ్లి చేసినట్లు, ఆ అమ్మాయి తల్లిదండ్రులను బెదిరించినట్లు మద్రాసు హైకోర్టులో కేసు విచారణలో ఉందన్నది గమనార్హం.

సాక్షి, ముంబై : ఆకతాయిల వేధింపులు కంటపడితే మనకెందుకులే.. సమయం వృథా... అని కొందరు పక్కకెళ్లి పోతున్న  ఈ రోజుల్లో... ముంబైకి చెందిన దిపేష్‌ తంక్‌ చేస్తున్న పనిని మాత్రం అభినందించకుండా ఉండలేం. ఎందుకంటే రైల్వే రౌడీల భరతం పడుతున్న ఆయన ఇప్పుడు ముంబై హీరో అయిపోయాడు. ఇంతకీ ఆయన ఏం చేస్తున్నాడో చదవండి. సామాజిక వేత్త అయిన దిపేష్‌ తంక్‌ ఉదయాన్నే లేచి ముంబై రైళ్లు, రైల్వే స్టేషన్‌లలో సంచరిస్తూ కనిపిస్తుంటారు. ఎక్కడైనా ఆకతాయిలు అమ్మాయిలను వేధిస్తూ కనిపిస్తే చాలూ కాసేపు వారినే ఆయన తదేకంగా చూస్తుంటారు. ఆపై వారి దగ్గరి కెళ్లి ఆ చేష్టలను అడ్డుకుంటారు. ఈ గ్యాప్‌లోనే అసలు వ్యవహారం ఉంటుంది.  కళ్లద్దాలు పెట్టుకుని జేమ్స్ బాండ్ తరహాలో ఆయన  అక్కడి దృశ్యాలను చిత్రీకరిస్తుంటారు. ఇందుకోసం తన కళ్లజోడులో ఓ క్వాలిటీ కెమెరాను ఫిక్స్ చేసుకున్నారు. అమ్మాయిలను వేధించే వారిని మాత్రమే కాదు.. రైళ్ల నుంచి తిక్క చేష్టలు చేసే వారిని కూడా ఆయన చిత్రీకరిస్తుంటారు. వారిని అడ్డుకునే సమయంలో బుకాయిస్తే వాటిని సాక్ష్యాలుగా చూపిస్తారన్న మాట.  ఈ విధంగా 6 నెలలుగా ఈ వన్‌ మన్‌ ఆర్మీ మిషన్‌ ద్వారా సుమారు 140 మందిని సాక్ష్యాలతోసహా ఆయన పోలీసులకు పట్టించారు. ఈ క్రమంలో ఇప్పటివరకు బెదిరింపులు ఎదురు కాలేదా? అని ఆయన్ని అడిగితే.. జైలుకు వెళ్లి వచ్చిన కొందరు తనను చంపుతామని బెదిరించారని... మహిళలకు వేధింపులు ఆగేంతవరకు తాను ఎంత దూరమైన వెళ్తానని దిపేష్ చెబుతున్నారు. ఓవైపు సోషల్ మీడియా మొత్తం హర్వే వ్యవహారం తర్వాత మీటూ క్యాంపెయినింగ్‌తో నిండిపోయిన సమయంలో దీపేశ్‌ చేస్తున్న పనిపై పలువురు ప్రశంసలు కురిపిస్తున్నారు.


 సాక్షి, విజయవాడ :  ‘మా అమ్మాయిని అల్లానే కాపాడాడు. పోకిరీల వికృత చేష్టలపై ఫిర్యాదు చేసినా రైల్వే పోలీసులు స్పందించకపోవడం వల్లే ప్రమాదం జరిగిందని’  షేక్‌ నజ్‌బుల్లా తల్లిదండ్రులు షేక్‌ జాకీర్‌, నజియా బేగం పేర్కొన్నారు. పోకిరీల వికృత చేష్టలతో రైలు నుంచి దూకి గాయపడ్డ నజ్‌బుల్లా చికిత్స అనంతరం నిన్న (శుక్రవారం) రాత్రి విజయవాడలోని పెజ్జోనిపేటలోని తన ఇంటికి చేరింది.  ఈ సందర్భంగా ఆమె తల్లిదండ్రులు మాట్లాడుతూ.. వరుస సెలవులు రావడంతో బక్రీద్‌ పండుగను తమతో కలిసి జరుపుకుందామని స్నేహితులతో కలిసి నజ్‌బుల్లా చెన్నై నుంచి బయలుదేరిందన్నారు. రైలులో పోకిరీలు వేధిస్తున్నారని పలుమార్లు ఫిర్యాదు చేసినా రైల్వే పోలీసులు పట్టించుకోలేదన్నారు.
 
 కాగా సాఫ్ట్‌వేర్‌ ఇంజనీర్‌గా పని చేస్తున్న నజ్‌బుల్లా తన స్నేహితురాళ్లతో కలిసి మిలీనియం ఎక్స్‌ప్రెస్‌ రైలులో చెన్నై నుంచి విజయవాడ వస్తుండగా కొందరు పోకిరీలు అఘాయిత్యం చేయబోయారు. సూటిపోటి మాటలు.. వెకిలి చేష్టలతో అసభ్యంగా ప్రవర్తించే సరికి తట్టులేక ఆమె  ప్రకాశం జిల్లా సింగరాయకొండ వద్ద నడుస్తున్న రైలులో నుంచి దూకేసిన విషయం తెలిసిందే. ఈ ఘటనకు సంబంధించి ఉత్తరప్రదేశ్‌కు చెందిన ముగ్గురిని పోలీసులు అరెస్ట్‌ చేశారు.


 - ఈవ్‌టీజింగ్‌ కేసు విచారణలో భాగంగా నిందితుడికి ఫోన్‌కాల్‌
 - ఆ నంబర్‌కే అసభ్యకర సందేశాలు పంపిస్తూ వేధింపులు
 - ఏకంగా పోర్న్‌ వెబ్‌సైట్‌లో మహిళా కానిస్టేబుల్‌ నంబర్‌
 - ఎట్టకేలకు నిందితుడిని పట్టుకున్న రాచకొండ పోలీసులు
  
 సాక్షి, హైదరాబాద్‌: ఈవ్‌టీజర్ల ఆటకట్టించే షీ టీమ్‌లోని కానిస్టేబుల్‌నే ఎనిమిది నెలలుగా వేధింపులకు గురిచేస్తున్న యువకుడిని ఎట్టకేలకు రాచకొండ షీ టీమ్‌ బృందం పట్టుకుంది. మంగళవారం రాచకొండ షీ టీమ్స్‌ ఇన్‌చార్జ్‌ ఏసీపీ స్నేహిత వివరాలను మీడియాకు వెల్లడించారు. గుర్తు తెలియని వ్యక్తి నుంచి తన ఫోన్‌కు అసభ్యకర సందేశాలు వస్తున్నాయంటూ రంగారెడ్డి జిల్లా మంచాలలోని ప్రతిభా డిగ్రీ కాలేజీకి చెందిన అమ్మాయి రాచకొండ పోలీసు కమిషనరేట్‌కు ఫిర్యాదు చేసింది.
 
 ఈ మేరకు ఇబ్రహీంపట్నం షీ టీమ్స్‌ వాట్సాప్‌ నంబర్‌కు మెసేజ్‌ పంపింది. దీనిపై ఏఎస్‌ఐ నరసింహ నేతృత్వంలోని బృందం రంగంలోకి దిగి ఆ అమ్మాయిని సంప్రదించగా, ఎఫ్‌ఐఆర్‌ నమోదు చేసేందుకు ఆసక్తి చూపలేదు. అయితే ఎలాగైనా తన సమస్యను పరిష్క రించాలని అభ్యర్థించింది. అయితే విచారణ క్రమంలో నిందితుడి సెల్‌ నంబర్‌కు షీ టీమ్‌ సభ్యురాలు మహిళా పోలీసు కానిస్టేబుల్‌ వివరాల కోసం ఫోన్‌కాల్‌ చేసింది. ఆ తర్వాత మహిళా కానిస్టేబుల్‌ సెల్‌ నంబర్‌కు అసభ్యకర మెసేజ్‌లు పంపించడం ప్రారంభించాడు. తొలినాళ్లలో పట్టించుకోకున్నా వేధింపులు మరింత ఎక్కువ కావడంతో కానిస్టేబుల్‌ ఇబ్రహీంపట్నం పోలీసు స్టేషన్‌లో జనవరి 23న ఫిర్యాదు చేసింది.
 
 కేసు నమోదైనప్పటి నుంచి పరారీలో ఉన్న నిందితుడు మహిళా కానిస్టేబుల్‌ను వేధించడం మాత్రం మానలేదు. నెల రోజుల క్రితం మహిళా కానిస్టేబుల్‌ ఫోన్‌ నంబర్‌ను పోర్న్‌ వెబ్‌సైట్‌లో అప్‌లోడ్‌ చేయడంతో ఆమెకు గుర్తు తెలియని వ్యక్తుల నుంచి విపరీతమైన కాల్స్‌ వచ్చేవి. కేసును సీరియస్‌గా తీసుకున్న పోలీసులు నిందితుడు వరంగల్‌ జిల్లా పరకాల మండలానికి చెందిన బి.నిఖిల్‌ కుమార్‌గా గుర్తించి అరెస్టు చేశారు.


 హైదరాబాద్: రాచకొండ కమిషనరేట్ పరిధిలో అమ్మాయిల పట్ల అసభ్యంగా ప్రవర్తిస్తున్నయువకులను పోలీసులు అదుపులోకి తీసుకున్నారు. మొత్తం 50 మంది ఈవ్‌ టీజర్లకు షి-టీమ్‌ ఏసీపీ స్నేహిత కౌన్సెలింగ్‌ ఇచ్చారు. ఈ కౌన్సెలింగ్‌లో ఈవ్‌టీజర్స్‌ తల్లిదండ్రులు కూడా పాల్గొన్నారు. 


 బంజారాహిల్స్‌: తనను ప్రేమించకపోతే పెట్రోల్‌ పోసి తగలేస్తానంటూ బెదిరిస్తున్న యువకుడిపై బంజారాహిల్స్‌ పోలీస్‌ స్టేషన్‌లో క్రిమినల్‌ కేసు నమోదైంది. పోలీసులు తెలిపిన వివరాల ప్రకారం... పశ్చిమ గోదావరి జిల్లా కాళ్ల మండలం కల్లకూరు గ్రామానికి చెందిన యువతి తల్లిదండ్రులతో కలిసి బంజారాహిల్స్‌ రోడ్‌ నెం. 12లోని ఎన్బీటీ నగర్‌లో నివాసం ఉంటోంది. సమీపంలోని ఓమెగా ఆస్పత్రిలో 2014 నుంచి టెక్నికల్‌ ఆపరేటర్‌గా పని చేస్తోంది. ఆస్పత్రికి వచ్చిపోయే సమయంలో అందులోనే గతంలో ఎలక్ట్రీషన్‌గా పనిచేసిన మహేష్‌ ఏడాది కాలంగా ప్రేమించాలంటూ వెంట పడుతున్నాడు.
 
 ఈ ఏడాది ఫిబ్రవరిలో ఆమెకు ఫోన్‌ చేసి ప్రేమించకపోతే చంపేస్తానంటూ బెదిరించాడు. తనను కాకుండా ఇంకెవరినైనా పెళ్ళి చేసుకుంటే ఇద్దరినీ కలిసి పెట్రోల్‌ పోసి తగలేస్తానంటూ గత నెల మరోసారి ఎస్‌వీఆర్‌ స్కూల్‌ వద్ద అడ్డగించి బెదిరించాడు. రెండో రోజుల క్రితం మరోసారి ఫోన్‌ చేసి తనను ప్రేమిస్తావా లేకపోతే చస్తావా అంటూ హెచ్చరించాడు. తనను కాదని పెళ్ళి చేసుకుంటే అంతు చూస్తానంటూ బెదిరించడమే కాకుండా మానసికంగా వేధింపులకు గురి చేస్తానని బెదిరించాడు. దీంతో మహేష్‌ నుంచి తనకు ప్రాణహాని ఉందంటూ బాధిత యువతి ఇచ్చిన ఫిర్యాదు మేరకు బంజారాహిల్స్‌ పోలీసులు మహేష్‌పై సెక్షన్‌ 354(డి), 506 కింద కేసు నమోదు చేసి దర్యాప్తు చేస్తున్నారు.


 – గృహిణిని ఫొటోలు తీస్తూ చిక్కిన హెడ్‌కానిస్టేబుల్‌
 – సబ్‌జైలుకు తరలింపు
   
 నంద్యాల: ఆకతాయిల నుంచి మహిళలకు రక్షణ కల్పించాల్సిన పోలీస్‌ హెడ్‌ కానిస్టేబుల్‌ పోకిరి అవతారమెత్తి చివరకు జైలు పాలయ్యాడు. నంద్యాల సరస్వతి నగర్‌లో నివాసం ఉన్న హెడ్‌కానిస్టేబుల్‌ ప్రసాద్‌ నంద్యాల తాలూకా పోలీస్‌ స్టేషన్‌లో పని చేస్తూ ఇటీవల మిడుతూరుకు బదిలీ అయ్యారు. రాజమండ్రికి చెందిన ఓ పెళ్లి బృందం నందికొట్కూరుకు వివాహానికి హాజరైంది. ఈ బృందంలో ఓ మహిళ, ఆమె సోదరులు చంద్రశేఖర్, శంకర్‌ వెంట ఉన్నారు. వీరు మళ్లీ రాజమండ్రికి బయల్దేరానికి గురువారం నందికొట్కూరుకు నుంచి నంద్యాలకు ఆర్టీసీ బస్సులో బయల్దేరారు. మార్గమధ్యంలో మిడుతూరులో హెడ్‌కానిస్టేబుల్‌ ప్రసాద్‌ కూడా బస్సు ఎక్కాడు.
 
 బస్సులో ఉన్నంత సేపు పెళ్లి బృందంలోని ఓ యువతితో వెకిలిగా ప్రవర్తించాడు. బస్సు నంద్యాల ఆర్టీసీ బస్టాండ్‌ చేరాక, ఈ యువతి లగేజి తీసుకుంటూ ఉండగా హెడ్‌కానిస్టేబుల్‌ ప్రసాద్‌ సెల్‌ఫోన్‌లో ఫొటోలు తీశాడు. ఈ విషయాన్ని గ్రహించిన కుటుంబ సభ్యులు, స్థానికులు అతన్ని చితకబాది వన్‌టౌన్‌ పోలీసులకు అప్పగించారు. సీఐ ప్రవీణ్‌కుమార్‌ కేసు నమోదు చేసి అతన్ని శుక్రవారం జేఎఫ్‌సీఎం కోర్టులో హాజరు పరిచారు. జడ్జి బాబాఫకృద్దీన్‌ బెయిల్‌కు నిరాకరించి రిమాండ్‌కు తరలించాలని ఆదేశించారు. ఈ మేరకు పోలీసులు అతన్ని అదుపులోకి తీసుకొని సబ్‌జైలుకు తరలించారు. 


 అనంతపురం: ఓ యువతిని ఐదుగురు ఆటో ద్రైవర్లు గత కొంత కాలం నుంచి ఎంతగానో వేధిస్తున్నారు. చివరికి పోలీసుల చేతికి చిక్కేసరికి కేసుల భయంతో ఆత్మహత‍్యాయత్నం చేశారు. ఈ ఘటన అనంతపురంలో చోటుచేసుకుంది. పోలీసుల కథనం ప్రకారం.. స్థానిక చంద్రబాబు నగర్‌కు చెందిన ఓ యువతిని ఐదుగురు ఆటోడ్రైవర్లు కొంతకాలం నుంచి వేధింపులకు గురిచేస్తున్నారు. బాధిత యువతి ఈవ​ టీజింగ్‌ చేసిన ఐదుగురిపై ఫిర్యాదు చేసింది.
 
 ఈ క్రమంలో ఆ యువతిని ఆటో డ్రైవర్లు ఓ రహస్య ప్రాంతానికి తీసుకెళ్తుండగా పోలీసులకు రెడ్‌ హ్యాండెడ్‌గా పట్టుబడ్డారు. ఇదివరకే యువతి నుంచి ఫిర్యాదు అందుకున్న పోలీసులు ఆ ఐదుగురినీ గత మూడు రోజులుగా రహస్య ప్రాంతంలో విచారిస్తున్నారు. ఈ నేపథ్యంలోనే కేసుల భయంతో వారు పురుగుమందు తాగి ఆత్మహత్యాయత్నం చేశారు. విషయం తెలుసుకున్న పోలీసులు వారిని వెంటనే ఆస్పత్రికి తరలించి చికిత్స అందిస్తున్నారు. మరిన్ని వివరాలు తెలియాల్సి ఉంది.
  


 న్యూఢిల్లీ: ఉత్తరప్రదేశ్‌లో ఆకతాయిలకు వ్యతిరేకంగా అమలుచేస్తున్న ‘యాంటీ రోమియో’ కార్యక్రమాన్ని విమర్శిస్తూ ప్రముఖ న్యాయవాది ప్రశాంత్‌ భూషణ్‌ శ్రీకృష్ణునిపై చేసిన వ్యాఖ్యలు వివాదాస్పదమయ్యాయి. ఆయనపై పలువురు పోలీసులకు ఫిర్యాదు చేశారు. ‘రోమియో ఒక్క అమ్మాయినే ప్రేమించాడు. కానీ శ్రీకృష్ణుడు పురాణాల్లో ఈవ్‌టీజర్‌గా నిలిచిపోయాడు.
 తన అనుచరులను కృష్ణ వ్యతిరేక బృందాలు అని పిలిచేందుకు యూపీ సీఎం ఆదిత్యనాథ్‌కు ధైర్యముందా?’ అని భూషణ్‌ ట్వీట్‌ చేశారు. తర్వాత.. తన వ్యాఖ్యలను వక్రీకరించారని, హిందూ సెంటిమెంట్లను అగౌరవపరచడం తన ఉద్దేశం కాదని వివరణ ఇచ్చారు.


 నేనూ ఈవ్‌ టీజింగ్‌ బాధితురాలినే నటోంది నటి ఇలియానా. ఇంతకుముందు టాలీవుడ్‌లో క్రేజీ నటిగా వెలిగిన కథానాయకి ఇలియానా. నన్భన్‌ చిత్రంతో కోలీవుడ్‌ ప్రేక్షకులను అలరించిన ఈ గోవా బ్యూటీ ఆ తరువాత బాలీవుడ్‌ మోహంతో దక్షిణాదిలో కనుమరుగైంది. అయితే అక్కడా అమ్మడి పరిస్థితి అంతంత మాత్రంగానే ఉంది. అయితే సందర్భాన్ని బట్టి ఏదో ఒక సంఘటనతో వార్తల్లో ఉంటూ ఉనికిని కాపాడుకునే ప్రయత్నం చేస్తోంది. ఇటీవల తారల లైంగిక వేధింపుల గొడవ పెద్ద ఇష్యూగా మారడంతో తానూ అలాంటి బాధితురాలినే నంటూ మరోసారి వార్తల్లోకెక్కింది.
 
 ఇంతకీ ఇలియానా ఏం చెప్పిందనేగా మీ ఆసక్తి. ఆ జాణ మాటల్లోనే చూద్దాం. నేనూ ఈవ్‌టీజింగ్‌ బాధితురాలినే. నటిగా రంగప్రవేశం చేసిన కొత్తలో అలాంటి భయంకరమైన సంఘటనను ఎదుర్కొన్నాను. మా ఇంటి సమీపంలో నివశించే ఒక కుర్రాడు రోజూ నా వెంటపడి వేధించేవాడు. మొదట్లో నేను పెద్దగా పట్టించుకోలేదు. అలా చాలా రోజులు మౌన వేదననను భరించాను. అప్పటికి ఒక చిత్రంలోనే నటించడంతో నన్ను ఎవరూ గుర్తుపట్టలేదు. అయితే రోజు రోజుకీ అతడి ఆగడాలు మితిమీరడంతో ఒక రోజు అమ్మకు చెప్పేశాను. మా అమ్మ చాలా ధైర్యవంతురాలు. అతడిని పిలిచి గట్టిగా హెచ్చరించింది.
 
 అయినా చేతనైతే పోలీసులకు ఫిర్యాదు చేసుకో అని అతడు అనడంతో కచ్చితంగా ఫిర్యాదు చేస్తానని అమ్మ అంది. దీంతో ఆ మరుసటి రోజు నుంచి అతడి జాడ లేదు. అయితే ఆ కొద్దిరోజులు నేను భయంగానే గడిపాను. ఈవ్‌టీజింగ్‌ క్రూరమైన చర్య అని ఇలియానా పేర్కొంది.


 ముజఫర్‌నగర్‌: అమ్మాయిల పట్ల అసభ్యంగా ప్రవర్తిస్తూ ఈవ్‌టీజింగ్‌కు పాల్పడుతున్న యువకులను పోలీసులు అదుపులోకి తీసుకున్నారు. ఉత్తరప్రదేశ్‌ నూతన ముఖ్యమంత్రి యోగి ఆదిత్యానాథ్‌ ప్రవేశ పెట్టిన ఆంటీ రోమియో స్క్వాడ్‌ ఆకతాయిల పట్ల ఉక్కుపాదం మోపుతుంది. ముజఫర్‌ నగరలోని తానా భావన్‌ పట్టణంలో ఆరుగురి ఆకతాయిలను పోలీసులు గురువారం అరెస్టు చేశారు.
  
 ఉత్తరప్రదేశ్‌లో మహిళపై జరుగుతున్న దాడులను అరికట్టాలని, శాంతి నెలకొల్పాలని పోలీసులకు ప్రత్యేక అధికారాలు ఇస్తున్నట్లు సీఎం ఆదిత్యానాద్‌ ప్రకటించిన విషయం తెలిసిందే. మార్కెట్లు, మాల్స్‌, స్కూళ్లు, కాలేజీలు, కోచింగ్‌ సెంటర్ల వద్ద పోలీసులు మఫ్టిలో విధులు నిర్వహిస్తున్నారు. ఈవ్‌టీజింగ్‌ రూపుమాపడమే రోమియో స్క్వాడ్‌ లక్ష్యమని పోలీసులు ప్రకటించారు.  


 హిందీలో ‘బేబీ’, ‘పింక్‌’, ‘నామ్‌ షబానా’ సినిమాలు తాప్సీకి యాక్షన్‌ గాళ్‌ ఇమేజ్‌ తీసుకొచ్చాయి. ఈ నెల 31న విడుదల కానున్న ‘నామ్‌ షబానా’ ట్రైలర్‌లో అయితే పవర్‌ ప్యాక్డ్‌ పంచ్‌లతో చెలరేగారు. రియల్‌ లైఫ్‌లోనూ తాప్సీ తీరు పరిశీలిస్తే... ఫైర్‌ బ్రాండ్‌ను తలపిస్తుందనే చెప్పాలి.
 కానీ, ‘నేనంత ఫైర్‌బ్రాండ్‌ను కాదండీ బాబు’ అంటున్నారు తాప్సీ. కనీసం ఓ మనిషిని చెంపదెబ్బ కూడా కొట్టలేనన్నారు. ఆమె కాలేజీ రోజుల్లో జరిగిన ఓ ఘటన గురించి తాప్సీ మాట్లాడుతూ.. ‘‘కాలేజీలో ఈవ్‌ టీజింగ్‌ చేసేవారు. కొన్నిసార్లు ఎక్కడెక్కడో చేతులు వేసేవారు. అసభ్యంగా ప్రవర్తించేవారు. ఓసారి విపరీతమైన కోపం వచ్చింది. అప్పుడు ఓ అబ్బాయి చెంప గట్టిగా చెళ్లుమనేది. కానీ, నేను అంత సాహసం చేయలేకపోయా. బహుశా... భయపడి ఉంటాను’’ అన్నారు.


 ►ప్రత్యేక చట్ట మంటూ లేని ‘షీ–టీమ్స్‌’
 ►రెండేళ్ల క్రితమే ప్రతిపాదించిన వైనం
 ►తమిళనాడు తరహా ముసాయిదా సమర్పణ
 ►ఇప్పటికీ ప్రభుత్వం వద్ద పెండింగ్‌లోనే...
 
  సిటీబ్యూరో: ‘ఆ వ్యక్తి చేష్టలతో యువతులు కొన్ని నెలల పాటు విసిగిపోయారు. అనేక సందర్భాల్లో తీవ్ర ఆందోళనకు, దిగ్భ్రాంతికి, అభద్రత భావానికీ లోనయ్యారు. అయితే ఆ పోకిరీకి పడిన శిక్ష రూ.50 జరిమానా మాత్రమేనా.?’  ‘షీ–టీమ్స్‌’ ఫేస్‌బుక్‌ పేజీలో ఈ తరహా పోస్టింగ్స్‌ ఎన్నో. దీనికి పరిష్కారంగా అధికారులు రూపొందించిన ప్రతిపాదనే ‘తెలంగాణ ప్రొహిబిషన్‌ ఆఫ్‌ ఈవ్‌ టీజింగ్‌ యాక్ట్‌’. తమకో ప్రత్యేక చట్టం కావాలంటూ ‘షీ–టీమ్స్‌’ రెండేళ్ల క్రితమే ప్రభుత్వానికి ప్రతిపాదనలు పంపినా... ఇప్పటికీ స్పందన రాలేదు. ఈ ఫైల్‌ న్యాయ విభాగం వద్ద పెండింగ్‌లో ఉండిపోయింది. సరైన చట్టం లేని కారణంగా అనేక మంది పోకిరీలు స్వల్ప శిక్షలతో తప్పించుకునే పరిస్థితి నెలకొంది.
 
 మూడేళ్లవుతున్నా చట్టం లేదు...
 రోడ్లపై ఉండే పోకిరీల మొదలు ఆన్‌లైన్‌లో, సోషల్‌మీడియా ద్వారా అదును చూసి కాటు వేస్తున్న నయవంచకుల వరకు... ఎందరో మృగాళ్ళ బారినుంచి అతివల్ని రక్షిస్తున్న హైదరాబాద్‌ ‘షీ–టీమ్స్‌’ అమలులోకి వచ్చి మూడేళ్లు కావస్తోంది. ఇప్పటికే గణనీయమైన ఫలితాలు సాధిస్తున్న ఈ బృందాల పని తీరును మరింత మెరుగుపరచడంతో పాటు మహిళలు/యువతులకు పూర్తి స్థాయి భరోసా ఇవ్వడానికి ఉన్నతాధికారులు కసరత్తు చేస్తున్నారు. ఇందులో భాగంగా ఈవ్‌ టీజర్లకు కఠిన శిక్షలు పడేలా చేసేందుకు ప్రత్యేక చట్టం అవసరమని నిర్ణయించారు. తమిళనాడులో అమలులో ఉన్న ‘తమిళనాడు ప్రొహిబిషన్‌ ఆఫ్‌ ఈవ్‌ టీజింగ్‌ యాక్ట్‌’ తరహాలో రూపొందించిన ముసాయిదాను రెండేళ్ళ క్రితమే ప్రభుత్వానికి సమర్పించారు.
 
 చిక్కుతున్నా చిన్న కేసులే...
 బహిరంగ ప్రదేశాల్లో యువతులు/మహిళల్ని వేధిస్తున్న పోకిరీలను నిత్యం ‘షీ–టీమ్స్‌’ పట్టుకుంటున్నా... తీవ్రత, ఆధారాలు ఉంటే తప్ప అందరి పైనా ఇండియన్‌ పీనల్‌ కోడ్‌ (ఐపీసీ)తో పాటు నిర్భయ, యాంటీ ర్యాగింగ్‌ యాక్ట్‌ల ప్రకారం కేసులు నమోదు చేయడం సాధ్యం కావట్లేదు. దీంతో మూడేళ్లలో సీసీఎస్‌ ఆధీనంలోని ‘షీ–టీమ్స్‌’కు చిక్కిన పోకిరీల్లో దాదాపు సగం మంది చిన్న (పెట్టీ) కేసులు, నామమాత్రపు జరిమానాతో సరిపెట్టాల్సి వచ్చింది. ఈవ్‌–టీజింగ్‌కు పాల్పడుతూ రెండోసారీ చిక్కిన ఓ వ్యక్తితో పాటు తీవ్రమైన స్థాయిలో రెచ్చిపోయిన వారిపైనే కేసులు నమోదు చేయగలిగారు. పోకిరీల వేధింపులు అనేవి చూడటానికి చిన్న విషయంగా కనిపించినా యువతులు/మహిళలపై వాటి ప్రభావం తీవ్రంగా ఉండటంతో పాటు సమాజం, పోలీ సులపై ఏహ్యభావం ఏర్పడే అవకాశం ఉంటుంది.
 
 ప్రత్యేక యాక్ట్‌తోనే కట్టడి...
 ఈ పరిణామాలను దృష్టిలో పెట్టుకున్న సీసీఎస్‌ ఉన్నతాధికారులు ఈవ్‌ టీజర్లను పూర్తి స్థాయిలో కట్టడి చేయడానికి ప్రత్యేక చట్టం అవసరమని భావించారు. దీంతో పలు ప్రాంతాల్లో అమలులో ఉన్న విధానాలను అధ్యయనం చేసి... చివరకు తమిళనాడులో అమలులో ఉన్న చట్టం ఉపయుక్తంగా ఉందని నిర్థారించారు. ఈవ్‌–టీజింగ్‌ బారినపడి పలువురు అతివలు గాయపడటం, కొందరు మరణించడం సైతం జరగడంతో అక్కడి సర్కారు 1998లోనే ప్రత్యేక చట్టాన్ని తీసుకువచ్చింది. ఆ ఏడాది జూలై 30 ఆర్డినెన్స్‌ రూపంలో, కొన్ని నెలలకే చట్టంగా అమలులోకి వచ్చిన ఈ యాక్ట్‌ మంచి ఫలితాలు ఇచ్చినట్లు అధికారులు తమ పరిశీలనలో గుర్తించారు.
 
 ప్రభుత్వానికి ముసాయిదా ప్రతి...
 దీంతో అక్కడి చట్టంలోని అంశాలతో పాటు ఇతర పరిణామాలను చేరుస్తూ ఓ ముసాయిదాను రూపొం దించిన ఉన్నతాధికారులు రెండేళ్ల క్రితమే ప్రభుత్వానికి పంపారు. న్యాయ మంత్రిత్వ శాఖ వద్ద పెండింగ్‌లో ఉండిపోయిన ఈ ఫైలు ఒక్క అడుగూ ముందుకు వేయలేదు. ఈ ముసాయిదా చట్ట రూపం దాలిస్తే తెలం గాణలోనూ మంచి ఫలితాలు ఉంటాయని అధికారులు పేర్కొంటున్నారు.
 
 ముసాయిదాలోని ముఖ్యాంశాలు
 ►బహిరంగ ప్రదేశాలు, పని చేసే ప్రాంతాలు, మాల్స్‌...ఎక్కడైనా ఈవ్‌ టీజింగ్‌కు పాల్పడుతూ చిక్కిన పోకిరీపై నేరం నిరూపణైతే ఏడాది జైలు లేదా రూ.10 వేల జరిమానా లేదా రెండూ పడతాయి.
 ►ఈవ్‌ టీజింగ్‌ చేయడానికి పోకిరీలు వాహనాలను వినియోగిస్తే వాటిని పోలీసులు స్వాధీనం చేసుకునే అవకాశం ఏర్పడుతుంది.
 ►దేవాలయాలతో పాటు మాల్స్, సినిమా హాల్స్, విద్యాసంస్థలు తదితర చోట్ల జరిగే ఈవ్‌ టీజింగ్‌ను నిరోధించాల్సిన బాధ్యత వాటి నిర్వాహకులపై ఉంటుంది. అలాంటి సమాచారాన్ని తక్షణం సంబంధిత పోలీసులకు చేరవేయాల్సిందే.
 ► దీనికి భిన్నంగా వ్యవహరిస్తే ఆ నేరానికి యాజమాన్యాలనూ బాధ్యుల్ని చేయవచ్చు. వీరికి న్యాయస్థానం జరిమానా విధించే అవకాశం ఉంటుంది.


 లక్నో: వేధింపులకు గురిచేయాలని ప్రయత్నించిన ఇద్దరు వ్యక్తులకు ఓ యువతి తగిన బుద్ధి చెప్పింది. శివంగిలా వారిపై దూకి దుమ్ము దులిపింది. ఎంతలా అంటే ఆమె కోపానికి భయపడి ఏ ఒక్కరు ఆమెను ఆపే సాహసం చేయలేదు. వివరాల్లోకి వెళితే..లక్నోలో స్కూటర్‌పై ఓ యువతి వెళుతుండగా బైక్‌పై వెళుతున్న ఇద్దరు వ్యక్తులు ఆమెను ఫాలో అవుతూ అసభ్యంగా ప్రవర్తించేందుకు ప్రయత్నించారు.
 
 అనకూడని మాటలు అన్నారు. దీంతో చిర్రెత్తిపోయిన ఆ యువతి వెంటనే తన స్కూటీని ఆపేసి ఓ సెక్యూరిటీ గార్డు నుంచి కర్ర లాగేసుకుని వాళ్లను చిత్తుగా కొట్టింది. ఆమె దాడి చేసే తీరు చూసి భయంతో ఏ ఒక్కరు కూడా ఆమెను ఆపే ప్రయత్నం చేయలేదు. వారిని చితక్కొట్టిన ఆ యువతి అనంతరం మహిళా పోలీసుల హెల్ప్‌లైన్‌ నంబర్‌ 1090కు ఫోన్‌ చేసి వారిని పట్టించింది.


 ఆకివీడు :  అమ్మాయిల్ని వేధిస్తున్నాడనే ఆరోపణపై స్థానిక కోసూరు వారి వీధికి చెందిన ఎండీ ఫరూక్‌కు రెండేళ్ల సత్‌ ప్రవర్తన, రూ.10 వేల విలువైన హామీతో కూడిన జామీను ఇవ్వాలని భీమవరం ఫస్ట్‌ అడిషనల్‌ జూనియర్‌ సివిల్‌ జడ్జి జి.దీనబాబు శుక్రవారం తీర్పు చెప్పారు. ఈ ఏడాది జనవరి 3వ తేదీన ఆ ప్రాంతానికి చెందిన యువతి ఇచ్చిన ఫిర్యాదు మేరకు అప్పటి కేవీఎస్‌వి ప్రసాద్‌ కేసు నమోదు చేసి ఫరూక్‌ను రిమాండ్‌కు పంపారని ఎస్సై ఆకుల రవి చెప్పారు. వాదోపవాదాలు అనంతరం తీర్పు చెప్పారని, రెండేళ్లలో సత్‌ ప్రవర్తన కలిగి ఉండకపోతే శిక్ష వేస్తారన్నారు. ప్రాసిక్యూష¯ŒS తరపున ఏపీపీ బి.మోహనరావు వాదించారని చెప్పారు.
  


 ►  పోకిరీల ఆగడాలకు చెక్‌ పెడుతున్న షీ టీమ్స్‌ 
 ► విద్యార్థినులు, మహిళలరక్షణకు ప్రత్యేక బృందాలు 
 ► కౌన్సెలింగ్‌తో పలుసమస్యలకు పరిష్కారాలు 
 ► ఎందరికో భరోసా ఇస్తూ ముందుకు.. 
 ► సవాళ్లను ఎదుర్కొంటూనే సత్ఫలితాలు
 
  
 ఆమెకు అండగా ఓ సైన్యమే ఉంది. ఎక్కడ ఎలా నిఘా ఉంచుతారో.. ఎప్పుడు ఎవరిని పట్టుకుంటారో, ఎవరిని గమనిస్తున్నారో తెలియనంత నిఘా. ఒక్క కాల్‌చేస్తే చాలు.. క్షణాల్లో వాలిపోతారు. వ్యూహచతురతతో ఆకతాయిల పనిపడుతున్నారు. ఎన్నో సవాళ్లను ఎదుర్కొంటూనే  సత్ఫలితాలు సాధిస్తున్నారు. ఇదే షీ టీమ్‌ నిత్యకార్యాచరణ.
  
 మహబూబ్‌నగర్‌ క్రైం : జిల్లా కేంద్రంగా షీ బృందం అందిస్తున్న సేవలు సత్ఫలితాలనిస్తోంది. సవాళ్లను ఎదుర్కోవాలంటూ యువతులలో చైతన్యం నింపేందుకు పాఠశాలలు, కళాశాలల్లో విస్తృత అవగాహన కార్యక్రమాలు నిర్వహిస్తున్నారు. రాష్ట్ర ప్రభుత్వం విద్యార్థినులు, యువతులు, మహిళల రక్షణ కోసం 2015 ఏప్రిల్‌లో షీ టీమ్‌ కార్యకలాపాలను ప్రవేశపెట్టింది. నిర్ధిష్టమైన మార్గదర్శకాలతో మొదలైన ఈ వినూత్న కార్యక్రమం అతివలందరూ మెచ్చేలా మంచి ఫలితాలను సాధిస్తోంది. ఒక్క ఫోన్‌ కాల్‌ చేస్తే చాలు.. ఠక్కున వాలిపోయి కీచకుల అరాచకాలను అడ్డుకుంటారు. సమస్య తీవ్రత, బాధితుల కోరిక మేరకు అవసరమైతే నిందితులపై కేసులు నమోదు చేసి ఊచలు లెక్కించేలా చేస్తారు. ఇదే సమయంలో సమస్య నేపథ్యాన్ని విశ్లేషించడం, అవసరమైన మేరకే నిందితులపై చర్యలు తీసుకోవడంలో, మానవతా కోణాన్ని ఆవిష్కరిస్తుండటంతో జనం మెప్పుపొందుతున్నారు. ఇప్పటి వరకు షీ టీమ్‌ ఆధ్వర్యంలో జిల్లా వ్యాప్తంగా 12ఎఫ్‌ఐఆర్‌లు, 120వరకూ సాధారణ కేసులు నమోదు చేశారు. తెలిసీ తెలియని వయసులో పెడదోవ పడుతున్న యువకుల తల్లిదండ్రులను పిలిపించడం.. ప్రత్యేకంగా కౌన్సెలింగ్‌ ఇచ్చి సన్మార్గంలో పెట్టడం కూడా బాధ్యతగానే  స్వీకరిస్తున్నారు. మరో 200మందికి కౌన్సెలింగ్‌ ఇచ్చి వారిలో పరివర్తనకు కృషి చేశారు.
  
 ప్రేమ వేధింపులే అధికం: ఆకతాయి చేష్టలు, ప్రేమ పేరుతో వేధింపులు.. ఈ సమస్యలే షీ బృందాలకు ఎదురవుతున్నాయి. పాఠశాల స్థాయి నుంచి ఇంటర్‌ డిగ్రీ, పీజీ వరకు సీనియర్లు జూనియర్లను వేధిస్తున్న సందర్భాల్లో సహాయం అందించిన కేసులు చాలానే ఉన్నాయి. 
  
 సామాజిక మాధ్యమాలు: ఫేస్‌బుక్, వాట్సాప్‌ పరిచయాలు.. స్నేహం ముసుగులో ఎదురవుతున్న వేధింపుల విషయంలో బాధితులకు షీటీమ్‌ అవసరం ఎంతో ఏర్పడుతోంది. ఫేస్‌బుక్‌లో వెల్లువలా వచ్చే పోస్టింగ్‌లకు లైక్‌ కొట్టగానే మురిసిపోవడం.. క్రమక్రమంగా మెసెంజర్లలో అసభ్యకర మెస్సేజ్‌లు చేసే వరకురావడం పలు కేసులలో గుర్తించారు. ఇలాంటి పరిస్థితుల్లో బాధిత యువతులు, విద్యార్థినులను ప్రేమించాలంటూ యువకులు 
 బ్లాక్‌మెయిలింగ్‌కు దిగుతున్న సంఘటనలు జరుగుతున్నాయి. ఈ పరిణామాన్ని ఊహించని బాధిత యువతులు షీటీమ్‌ను ఆశ్రయించడం పరిపాటిగా మారుతున్నాయి. ముఖ్యంగా గుర్తుతెలియని వ్యక్తుల నుంచి ఫోన్లు, వేర్వేరు నంబర్ల నుంచి వరుసగా కాల్స్‌ రాత్రి, పగలు తేడా  లేకుండా ఫోన్‌ చేయడం మాట్లాడేటప్పుడు పెట్టేయడం.. కొన్నిసార్లు అసభ్యంగా మాటలు.. వందల సంఖ్యలో పట్టణంలో యువతులు, మహిళలు ఎదుర్కొంటున్న వేదన ఇది. పాతనంబర్‌ తీసేసి కొత్త ఫోన్‌ నంబర్‌ తీసుకున్నా చాలామందికి ఈ సమస్య పరిష్కారం కావడం లేదు. ఇంట్లో ఎవరికైనా చెబితే నీకు తెలియకుండా ఎవరు ఫోన్‌ చేస్తారు..? అర్ధరాత్రి కూడా స్నేహితులతో మాటలేంటి? అంటూ చీవాట్లు తప్పడంలేదు. ఇలాంటి వారి సమస్య పరిష్కరించేందుకు షీ బృందాలు పని చేస్తున్నాయి. 
  
 ఒంటరి మహిళలు ఒంటరిగా పనుల నిమిత్తం బయటకు వచ్చే మహిళలను లక్ష్యంగా చేసుకుని జరుగుతున్న వేధింపులూ జిల్లాలో ఎక్కువగానే ఉన్నాయి. కొన్నాళ్లు వెంటబడ డం, పరిచయం చేసుకుని మాటలు కలపడం.. కొంతకాలం తర్వాత తమ వక్రబుద్ధిని ప్రదర్శిస్తున్న ప్రబుద్ధులు చివరకు పోలీస్‌ స్టేషన్లకు చేరుకుంటున్నారు.
  
 రద్దీ ప్రాంతాలు: ముఖ్యంగా బస్టాండ్లు, రైల్వేస్టేషన్లు, కళాశాలల ఎదుట, పాఠశాలల సమీపంలో విద్యార్థినులు, యువతుల పట్ల అసభ్యకరంగా ప్రవర్తిస్తున్న సందర్భాల్లో బాధితుల నుంచి ఫోన్లు వస్తున్నాయి. ఇలా సమస్య ఏదైతేనేం ఇల్లు విడిచి బయటికి వచ్చే యువతులు, మహిళలకు షీటీమ్‌ 
  
 రక్షణ కవచంలా నిలుస్తోంది: .షీటీమ్‌కు సిబ్బంది సమస్య మహిళలకు, విద్యార్థినులకు రక్షణ కోసం పనిచేస్తున్న షీటీమ్‌ ఇప్పుడు సిబ్బంది కొరతతో ఇబ్బందిపడుతోంది. ఒక ఇన్‌చార్జ్‌ సీఐతో పాటు నలుగురు కానిస్టేబుళ్లు, మరొక హోంగార్డు పని చేస్తున్నారు. వాస్తవానికి ఈ బృందానికి మరికొంత మంది సిబ్బంది తోడుగా ఉండాలి. ముఖ్యంగా బాధితులు మహిళలు కావడంతో వారి సమస్యలను స్పష్టంగా వివరించుకునేందుకు మహిళా సిబ్బందిని ఎక్కువగా  నియమించాలి. మహబూబ్‌నగర్‌ వన్‌టౌన్‌సీఐ సీతయ్య పర్యవేక్షణలో సాగుతున్న ఈ బృందం మరింత మెరుగైన ఫలితాలను సాధించాలంటే తగిన ఆధునిక సదుపాయాలు కల్పించాల్సిన అవసరం ఉంది. 


 కోల్‌కతా: పశ్చిమబెంగాల్‌లో ఘోరం జరిగింది. ఈవ్‌టీజింగ్‌కు పాల్పడుతున్న యువకులను అడ్డుకున్నందుకు ఓ యువకుడిని దారుణంగా హత్య చేశారు. మృతుడ్ని పరగాణ జిల్లాకు చెందిన ఎండీ ముస్తాకిన్‌గా గుర్తించారు.
 
 శనివారం శివరాత్రి ఉత్సవాల్లో భాగంగా ఏర్పాటు చేసిన సాంస్కృతిక కార్యక్రమాల్లో మహిళా కళాకారులు పాల్గొన్నారు. నలుగురు యువకులు వీరిపట్ల అనుచితంగా, అసభ్యంగా ప్రవర్తించారు. వీరిని ముస్తాకిన్‌ అడ్డుకోగా.. నలుగురు యువకులు అతన్ని దారుణంగా హత్య చేసినట్లు పోలీసులు తెలిపారు. నిందితులను అదుపులోకి తీసుకొని విచారిస్తున్నామని, మృతుడు ముస్తాకిన్‌పై క్రిమినల్‌ రికార్డు ఉందని పోలీసులు పేర్కొన్నారు.


 నేనూ లైంగిక వేధింపులకు ప్రత్యక్షంగా గురయ్యానని నటి ఇలియానా అన్నారు. నిజం చెప్పాలంటే చాలా మంది హీరోయిన్లు ఇలాంటి దుశ్చర్యలకు గురవుతున్నారు. సినీ, బహిరంగ కార్యక్రమాల్లో పాల్గొనే నటీమణులు అభిమానం పేరుతో పెట్రేగిపోయే పిచ్చి వ్యామోహపరుల చిల్లర చేష్టలను భరిస్తున్నారు. మరి కొందరు మద పిచ్చిగాళ్లు ట్విట్టర్, ఫేస్‌బుక్‌ వంటి మాద్యమాలను దుర్వినియోగం చేస్తూ హీరోయిన్లపై పైశాచికత్వానికి పాల్పడుతున్నారు. ఈవ్‌ టీజింగ్‌ పేరుతో వేదనకు గురి చేస్తున్నారు.
 ప్రముఖ నటీమణులు నయనతార, తమన్నా, తాప్సీ, నమిత, శ్రియ లాంటి వాళ్లు బహిరంగ ప్రాంతాల్లో అభిమానుల పిచ్చి చేష్టల బారిన పడ్డవారే. బాలీవుడ్‌ భామ దీపికాపదుకోనే ఆ మధ్య అభిమానులకు చిక్కి బాధకు గురయ్యారు. కత్రినాకైఫ్‌ సినిమా థియేటర్‌లోనూ, సోనాక్షిసిన్హా ఒక సినీ కార్యక్రమంలోనూ దురాభిమానుల బాధింపునకు గురయ్యారు.దీంతో చాలా మంది తమకు పర్సనల్‌గా బాడీగార్డ్‌లను ఏర్పాటు చేసుకుంటున్నారు. కొందరైతే ట్విట్టర్, ఫేస్‌బక్‌ ఎకౌంట్‌లను క్లోజ్‌ చేసుకుంటున్నారు.
 మరి కొందరు అసభ్యంగా ప్రవర్తించేవారిపై పోలీసులకు ఫిర్యాదు చేసి తగిన చర్యలు తీసుకునేలా చేస్తున్నారు. మరో సెలబ్రిటి నటి ఇలియానా  తాను లైంగిక వేధింపులు ఎదర్కొన్నానని చెప్పారు.దీని గురించి తను చెబుతూ హీరోయిన్లను కొందరు చాలా చీప్‌గానూ, చులకనగానూ చూస్తున్నారన్నారు. ఈ పరిస్థితి మారాలన్నారు. తాను సోషల్‌ మీడియాలో ఈవ్‌ టీజింగ్‌కు గురయ్యానని చెప్పారు.కొందరైతే ఫోన్లు చేసి అసభ్యపదజాలాలతో హింసించేవారని అన్నారు.ఇలాంటివి తనను చాలా బా«ధించేవని, అలాంటి సమయాల్లో తన తల్లిదండ్రుల అండగా నిలబడడం ఎంతో మనశ్శాంతినిచ్చేదని చెప్పారు.


 ‘‘స్త్రీ పురుషులకు సమాన హక్కులు ఉండాలని పోరాడడమే ఫెమినిజమ్‌ అయితే నేను ఫెమినిస్ట్‌ కాదు. మగవారి కంటే మహిళలే ఎక్కువ అని నమ్ముతా’’ అన్నారు షారుక్‌ ఖాన్‌. కొత్త ఏడాది ప్రారంభ వేడుకలప్పుడు బెంగళూరులో అమ్మాయిల పై జరిగిన ఈవ్‌ టీజింగ్‌ ఘటనపై షారుక్‌ తాజా ఇంటర్వూ్యలో స్పందించారు. మహిళలకు మద్దతు పలుకుతూ తన ఇద్దరు కుమారుల పెంపకం గురించి మాట్లాడారు. ‘‘మా అబ్బాయిలు ఆర్యన్, అబ్‌రమ్‌లకు మహిళలను హర్ట్‌ చేయొద్దని చెబుతుంటా. వాళ్లను గౌరవించమని అంటుంటా. ఒకవేళ మహిళల పట్ల అభ్యంతరకరంగా ప్రవర్తిస్తే మీ తల నరికేస్తానని గట్టిగా చెప్పా’’ అని షారుక్‌ పేర్కొన్నారు.


 అతడో పాకిస్థానీ గాయకుడు. పేరు ఆతిఫ్ అస్లాం. ఓ షోలో పాట పాడుతున్నాడు. అంతలో ఒక అమ్మాయిని కొంతమంది రౌడీలు వేధిస్తుండటాన్ని చూశాడు. అంతే, వెంటనే పాట ఆపేశాడు. వాళ్ల మీద విరుచుకుపడ్డాడు. ''ఎప్పుడూ అమ్మాయిల మొఖం చూడలేదా? మీకు అక్క - అమ్మ లేరా? వాళ్లు కూడా ఇక్కడ ఉంటే ఏం చేసేవాళ్లు'' అంటూ చెడామడా వాయించేశాడు. ఈ విషయం మొత్తం అక్కడ అతడి షోను చిత్రీకరిస్తున్న వీడియోలో రికార్డయింది. 
  
 దాంతో ఒక్కసారిగా జనంలో కూడా ఉత్సాహం వెల్లివిరిసింది. 'ఆతిఫ్.. ఆతిఫ్' అంటూ అరవడం మొదలుపెట్టారు. అతడిని అభినందనలలో ముంచెత్తారు. తన వ్యక్తిగత సెక్యూరిటీ సిబ్బందికి చెప్పి, రౌడీలు ఏడిపిస్తున్న అమ్మాయిని భద్రంగా ఇంటివద్ద దించిరమ్మన్నాడు. ఈవ్ టీజర్లకు అతడు బుద్ధి చెప్పిన వైనాన్ని చాలామంది సోషల్ మీడియాలో కూడా షేర్ చేసుకున్నారు. ఆతిఫ్ అస్లాం పాకిస్థాన్‌తో పాటు భారతదేశంలో కూడా బాగా సుప్రసిద్ధ గాయకుడు. ఇలియానాతో కలిసి 'పెహ్లీ దఫా' అనే ఆల్బంలో కనిపించాడు. భారత్ -పాక్ మధ్య సంబంధాలు చెడిపోవడం, పాక్ కళాకారులను ఇక్కడ నిషేధించడం లాంటి ఘటనలు జరుగుతున్న సమయంలోనే అతడి ఆల్బం విడుదలైనా, బాగానే క్లిక్ అయింది.


 న్యూఢిల్లీ: ‘ఈవ్‌ టీజింగ్‌ అన్నది చిన్న విషయం కాదు. పెద్ద నేరంగానే పరిగణించాలి. ఆకతాయిల వేధింపులకు, బెదిరింపులకు భయపడవద్దు. వారు రేపిస్ట్‌ల్లా మారకముందే మనం మేలుకోవాలి. ఈవ్‌ టీజింగ్‌ చేసేవారిపై వెంటనే పోలీస్‌ స్టేషన్‌కు వెళ్లి ఫిర్యాదు చేయాలి. నిందితులపై కఠిన చర్యలు తీసుకునేలా ఒత్తిడి చేయాలి’ అని లక్నోలో లా చదువుతున్న సౌమ్య గుప్తా తన ఫేస్‌బుక్‌ పేజీ ద్వారా తోటి అమ్మాయిలకు పిలుపునిచ్చారు.
 
 ఇటీవల ఆమెకు ఎదురైన ఓ అనుభవాన్ని అందులో వివరించారు. ‘నేను ఆ రోజు బస్సులో వెళుతున్నా. నా వెనక సీటులో కూర్చున్న వ్యక్తి వెనక నుంచి చేతులపెట్టి నా పట్ల అసభ్యంగా ప్రవర్తించాడు. నేను వెంటనే లేచి నిలబడి ఆయన్ని నిలబడమన్నాను. ఆ మనిషికి దాదాపు 40 ఏళ్లు ఉంటాయి. గుర్తింపు కార్డు చూపించమన్నాను. అందుకు ఆయన అంగీకరించలేదు. తోటి ప్రయాణికులు కూడా నాకు మద్దతు తెలపడంతో ఆయన తన ప్రర్తనకు క్షమాపణలు చెప్పాడు. అందుకు నేను ఒప్పుకోలేదు. క్షమాపణలతో ఇలాంటి వ్యక్తిని వదిలేయకూడదని భావించాను.
 
 బస్సు డ్రైవర్‌కు చెప్పి దగ్గరలో ఉన్న పోలీసు స్టేషన్‌కు తీసుకెళ్లి అక్కడ బస్సు ఆపమని చెప్పాను. బస్సు డ్రైవర్‌ అలాగే చేశారు. తోటి ప్రయాణికుల సహాయంతో నేను నిందితుడిని స్టేషన్‌లోకి తీసుకెళ్లి ఎఫ్‌ఐఆర్‌ నమోదు చేశాను. చిన్న విషయానికి పెద్ద గొడవెందుకంటూ పోలీసులు కూడా నాకు సర్ది చెప్పేందుకు ప్రయత్నించారు. అది చిన్నవిషయమా! లా చదువుతున్న నేనే ఊరుకుంటే లాభంలేదని ఎఫ్‌ఐఆర్‌ నమోదు చేయించాను. ఆ తర్వాత నా పట్ల అసభ్యంగా ప్రవర్తించిన వ్యక్తి బంధువులు, మిత్రులు నా వద్దకు వచ్చి రకరకాలుగా బెదిరించారు.
  
 ఇద్దరు పిల్లల తండ్రి అలా చేస్తారంటే ఎవరు నమ్మరని, నా పరువే పోతుందని హెచ్చరించారు. వాళ్లతో వీళ్లతో తిరుగుతూ కనిపిస్తుంటావు. నీ ప్రవర్తనే సరిగ్గా ఉండదని ప్రచారం చేస్తామని, పరువు తీస్తామని బెదిరించారు. పైగా ఆయనకు పురషత్వం లేదని కూడా సర్టిఫికెట్‌ తెస్తామన్నారు. అయినా భయపడలేదు. ఇష్టమున్నట్లు ప్రచారం చేసుకోమని చెప్పాను.  పోలీసు స్టేషన్‌కు రెండు, మూడు సార్లు వెళ్లి కేసు కోర్టు వరకు వచ్చేలా చేశాను. నాకు ఈ విషయం సహకరించిన తోటి ప్రయాణికులకు నా ధన్యవాదాలు. నాలాంటి అనుభవం ఎదురైతే ఎవరూ ఉపేక్షించరాదు. ఇవ్వాళ వారిని వదిలేస్తే రేపు వారే రేపిస్టులుగా మారుతారు’ అని సౌమ్య గుప్తా తన ఫాలోవర్లకు పిలుపునిచ్చారు.


 జైపూర్‌: భారత డిస్కస్‌ త్రో క్రీడాకారిణి కృష్ణ పూనియా నిజమైన హీరోగా నిలిచారు. రాజస్థాన్‌లోని చిరు పట్టణమైన చురులో ఆమె ముగ్గురు ఆకతాయిలను వెంటాడి.. ఒకడి భరతం పట్టారు. కొత్త సంవత్సరం సందర్భంగా ఈ ఘటన జరిగింది. ఓ రైల్వే క్రాసింగ్‌ వద్ద తన కారులో పూనియా వేచి చూస్తుండగా.. ముగ్గురు యువకులు ఇద్దరు టీనేజ్‌ అమ్మాయిలను వేధించడం ఆమె కంటపడింది. వెంటనే కారులోంచి  దిగిన ఆమె ఆకతాయిలను ఎదుర్కోవడానికి సిద్ధమయ్యారు. దీంతో బెదిరిపోయిన ముగ్గురు యువకులు బైక్‌ మీద పరారయ్యేందుకు ప్రయత్నించారు.
 
 అయినా, వారిని వదిలిపెట్టకుండా వెంటాడి మరీ బైక్‌ మీద ఒక ఆకతాయిని ఆమె పట్టుకొని పోలీసులకు అప్పగించారు. 2010 కామన్‌వెల్త్‌ క్రీడల్లో భారత్‌కు కృష్ణ పూనియా గోల్డ్‌ మెడల్‌ అందించిన సంగతి తెలిసిందే. 'అమ్మాయిలను ఆకతాయిలు వేధిస్తుండటం చూడగానే.. వారు నా కూతుళ్లయితే ఏం చేసేదాన్ని అన్న ఆలోచన వచ్చింది. వెంటనే కిందకు దిగాను. నేను ఎదురుపడటంతో వారు పరారయ్యారు' అని పూనియా 'హిందూస్తాన్‌ టైమ్స్‌'కు తెలిపింది. ఒక ఆకతాయిని పట్టుకొని పోలీసులకు ఫోన్‌ చేసినా వారు వెంటనే సంఘటనాస్థలానికి రాలేదని, ఇలా నిర్లక్ష్యంగా ప్రవర్తిస్తే.. దేశంలో మహిళలకు భద్రత ఎలా లభిస్తుందని ఆమె ఆవేదన వ్యక్తం చేశారు.


 సిరిసిల్ల: పోకిరి వేషాలు వేస్తూ.. విద్యార్థినులను ఏడిపిస్తున్న యువకుడిని పోలీసులు అదుపులోకి తీసుకున్నారు. సిరిసిల్ల రాజీవ్ నగర్‌కు చెందిన పెండ్యం రాజు గత కొంతకాలంగా కళాశాలకు వెళ్తున్న విద్యార్థినులను వేధింపులకు గురిచేస్తున్నాడు. ఈ మధ్య కాలంలో వేధింపులు ఎక్కువవడంతో.. ఓ విద్యార్థిని ఫోన్ ద్వారా పోలీసులకు సమాచారం అందించింది. దీంతో సోమవారం రంగంలోకి దిగిన స్థానిక ఎస్సై శ్రీనివాస్ విచారణ చేపట్టి పోకిరిని అరెస్ట్ చేశారు. 


 షీ టీం జిల్లా ఇన్‌చార్జి అనురాధ    
  నకిరేకల్ : ఈవ్‌టీజింగ్ పట్ల అప్రమత్తంగా ఉండాలని షీటీం జిల్లా ఇన్‌చార్జి, నల్లగొండ మహిళా పోలీస్ స్టేషన్ సర్కిల్ ఇన్‌స్పెక్టర్ అనురాధ సూచించారు. నకిరేకల్‌లోని ప్రభుత్వ బీసీ బాలికల వసతి గృహంలో ఆదివారం జరిగిన షీటీం అవగాహన సదస్సులో ఆమె ముఖ్య అతిథిగా పాల్గొని మాట్లాడారు. బాలికలు మనోధైర్యంతో ఉండాలన్నారు. ఎలాంటి ఇబ్బందులు కలి గినా షీ టీం దృష్టికి తీసుకురావాలని సూ చించారు. ఫిర్యాదు చేయడానికి వాట్సప్ సెల్‌న నంబర్ 9963393970, ఫోనరుుతే 100కు డయల్ చేయాలని కోరారు. కార్యక్రమంలో స్థానిక సీఐ సుబ్బిరామిరెడ్డి, ఎస్‌ఐ నర్సింహరావు, బాలికల కళాశాల వసతి గృహం అధికారి భాగ్యలక్ష్మి, లక్ష్మి తదితరులు పాల్గొన్నారు.   


 
 కళాశాలలు, బస్సుల్లో అల్లరిమూకల హల్‌చల్‌
 
 ఆకతాయిలపై కొరవడిన పోలీసు నిఘా
 
 ‘మేం కంకిపాడులో ఉంటున్నాం. నా కుమార్తె రోజూ విజయవాడ బెంజిసర్కిల్‌ సమీపంలోని ఓ కాలేజీలో చదువుతోంది. రోజూ సాయంత్రం కాలేజీ ముగిసిన తర్వాత వచ్చి తీసుకెళ్తున్నాను. ఇటీవల కాలంలో బెంజిసర్కిల్‌ నుంచి పటమట వరకు ఆడపిల్లలను వేధించే గ్యాంగ్‌లు పెరిగాయి. విద్యార్థినులను వెంబడిస్తూ ఇష్టమొచ్చినట్లు కామెంట్లు చేస్తున్నారు. ఇవన్నీ చూస్తూ నా కుమార్తెను ఒంటరిగా పంపడానికి భయమేస్తోంది.’ 
 – ఇదీ కంకిపాడుకు చెందిన వెంకటేశ్వరరావు ఆవేదన 
  
 విజయవాడ : నగర పోలీసు కమిషనరేట్‌ పరిధిలో ఇటీవల అల్లరిగ్యాంగ్‌ల ఆగడాలు మళ్లీ పెరిగిపోయాయి. హైస్కూళ్లు, కాలేజీల వద్ద చేరి ఆడపిల్లలను అల్లరి చేస్తున్నారు. నగరంలో ప్రయివేటు డిగ్రీ, ఇంజినీరింగ్‌ కళాశాలల వద్ద రోజురోజుకూ పెరుగుతున్న ఈవ్‌టీజింగ్‌కు విద్యార్థినులు బెంబేలెత్తిపోతున్నారు. చదువుకునేందుకు వెళ్లిన తమ బిడ్డ తిరిగి ఇంటికి వచ్చేవరకు తల్లిడండ్రులు తీవ్ర ఆందోళనకు గురవుతున్నారు. ఈవ్‌టీజింగ్, ర్యాగింగ్‌ చేసే గ్యాంగ్‌లపై పోలీసు నిఘా కొరవడిందని, అందువల్లే రెచ్చిపోతున్నారనే విమర్శలు వినిపిస్తున్నాయి. పోలీసుల నిఘా కొరడటంతో తప్పనిసరిగా తాము రోజూ వచ్చి పిల్లలను తీసుకెళ్లాల్సి వస్తోందని తల్లిదండ్రులు ఆవేదన వ్యక్తంచేస్తున్నారు. 
 చికటి పడితే వణుకే...
 పటమట ఏరియాలోని బెంజిసర్కిల్‌ నుంచి ఎన్టీఆర్‌ సర్కిల్‌ వరకు పలు కార్పొరేట్‌ కాలేజీలు ఉన్నాయి. ఈ కాలేజీల్లో తరగతులు రాత్రి ఏడు గంటలకు పూర్తవుతాయి. కళాశాలలన్నీ ఒకేసారి వదులుతున్నారు. ఒకేసారి వేలాది మంది విద్యార్థినులు కళాశాల బస్సులు, ఆర్టీసీ బస్సులు, ఆటోలు ఎక్కేందుకు బందరు రోడ్డుపైకి వస్తున్నారు. ఆ సమయంలో ఆకతాయిలు గుంపులు, గుంపులుగా అక్కడికి చేరుకుని వెకిలి చేష్టలతో ఆడపిల్లలను వేధిస్తున్నారు. కొన్నిసార్లు చీకట్లో ఆకతాయిలు శృతిమించి ప్రవర్తిస్తుండటంతో విద్యార్థినులు వణికిపోతున్నారు.
 బస్టాపుల్లో బాధలు వర్ణనాతీతం..
 బెంజిసర్కిల్, పటమట ప్రాంతంలోని విద్యా సంస్థల్లో కంకిపాడు, ఉయ్యూరు, ఇబ్రహీంపట్నం, నిడమానూరు తదితర ప్రాంతాలకు చెందిన వేలాది మంది విద్యార్థులు చదువుతున్నారు. వీరు రాత్రి 7 గంటలకు తరగతులు ముగిసిన తర్వాత తమ ఇళ్లకు వెళ్లేందుకు ఆర్టీసీ బస్సులు, ఆటోల కోసం బస్టాపుల్లో పడిగాపులు పడుతుంటారు. ఆ సమయంలో ఈవ్‌టీజర్లు రెచ్చిపోతున్నారు. నిక్‌ నేమ్‌లతో కామెంట్‌లు చేస్తూ ఇబ్బంది పెడుతున్నారు. కొందరు వింత చేష్టలతో వేధిస్తున్నారు.
 బైక్‌లపై వెంబడిస్తూ... 
 కొందరు ఈవ్‌టీజర్లు శృతిమించి ప్రవర్తిస్తున్నారు. మైలవరం, ఇబ్రహీంపట్నం, కానూరు తదితర ప్రాంతాలకు వెళ్లే ఇంజినీరింగ్‌ కళాశాలల ఆడప్లిల బస్సులను బైక్‌లపై వెంబడించి అసభ్యకరంగా మాట్లాడుతున్నారు. మరికొందరు రాత్రివేళ బస్సుల్లో వస్తున్న ఆడపిల్లలను బైక్‌పై వెంబడిస్తూ మద్యం తాగి కేకలు వేస్తూ భయాందోళనలకు గురిచేస్తున్నారు. మద్యం ఖాళీ సీసాలను బస్సులపై విసురుతూ బీభత్సం సష్టిస్తున్నారు. ఈ క్రమంలో పోలీసుల నిఘా పెంచి అల్లరిమూకల ఆగడాలకు కళ్లెం వేయాలని విద్యార్థినుల తల్లిదండ్రులు కోరుతున్నారు. 
  


 యుక్త వయసులో తానూ లైంగిక వేధింపులకు గురయ్యానని చెప్పుకొచ్చారు నటి తాప్సీ. ఇప్పటివరకూ తాను చాలా ధైర్యవంతురాలిని అంటూ చెప్పుకొచ్చిన ఈ ఢిల్లీ బ్యూటీ తన నిజజీవితంలోని మరో కోణాన్ని తాజాగా పేర్కొన్నారు. అది ఇప్పుడు టాక్ ఆఫ్ ది టౌన్‌గా సంచలనం కలిగిస్తోంది. తాప్సీకిప్పుడు తమిళం, తెలుగు భాషల్లో అవకాశాలు లేవు. హిందీలో బిగ్‌బీ అమితాబ్‌తో నటించిన పింక్ చిత్రం ఇటీవలే తెరపైకి వచ్చింది. అందులో ఈ భామ అత్యాచారానికి గురైన అమ్మాయిగా నటించారు.
  
 ఈ పాత్ర గురించి ఇప్పటికే చాలాసార్లు ప్రచారం చేసుకున్న తాప్సీ.. తాజాగా ఈ పాత్రకు, తన నిజ జీవితానికి చాలా పోలికలు ఉన్నట్టు పేర్కొన్నారు. అదేమిటో చూద్దాం. ''నేను డిల్లీలో పెరిగాను. ఏదైనా ఉత్సవాల సమయంలో జనాల కూటమి అధికంగా ఉంటుంది. అలాంటి సమయాల్లో అబ్బాయిలు అమ్మాయిలను అల్లరి చేస్తారు. కానిచోట్ల గిల్లుతూ అసభ్యంగా ప్రవర్తిస్తుంటారు. లైంగిక వేధింపులకు పాల్పడతారు. చాలా శాడిజం ప్రదర్శిస్తారు. అలాంటి క్లిష్టపరిస్థితులను నేనూ ఎదుర్కొన్నాను. ద్వంద్వార్థాలతో హింసిస్తుంటారు. వారి చూపులు కూడా చాలా క్రూరంగా ఉంటాయి. అందుకే అలాంటి చోట్లకు వెళ్లవద్దని, అలాంటి దుస్తులు ధరించవద్దని, అణిగిమణిగి ఉండాలని ఇంట్లో పెద్దలు హితవు పలికేవారు. అప్పట్లో లైంగిక వేధింపులను ఎదిరించకపోవడం నేను చేసిన తప్పు అని ఇప్పుడు అనిపిస్తోంది'' అని నటి తాప్సీ పేర్కొన్నారు. అయితే ఇప్పటివరకూ ఈ విషయాల గురించి నోరు విప్పని ఈ అమ్మడు ఇప్పుడు వీటిని బహిర్గతం చేయడంలో ఆంతర్యం ఏమిటనే భావాన్ని సినీవర్గాలు వ్యక్తం చేస్తున్నాయి.


 అందరు అమ్మాయిల మాదిరిగానే హీరోయిన్ తాప్సీ కూడా కాలేజీ రోజుల్లో ఈవ్ టీజింగ్కు గురైందట. అయితే ఇది సాధారణమైన విషయమే అంటుంది. కానీ ఇటీవల ముంబైలో తను ఫేస్ చేసిన ఓ సంఘటన మాత్రం తనకు చాలా ఆశ్చర్యాన్ని కలిగించిందంటోంది.
 
 ముంబైలో ఓ సాయంత్రం వేళ తన ఫ్రెండ్ని కలిసేందుకు బయలుదేరింది తాప్సీ.  ఫోన్లో మాట్లాడుతూ రోడ్డు మీద నడుస్తుండగా.. తనకు దగ్గరగా వచ్చి మరీ ఇద్దరు కుర్రాళ్లు నోటి దురుసును ప్రదర్శించారట. బైక్ని తాప్సీకి దగ్గరగా పోనిచ్చి ఆమెపై కామెంట్స్ చేసి వెకిలిగా నవ్వడం ప్రారంభించారు. గమనించిన తాప్సీ ఏమాత్రం తొణకకుండా వారినే సీరియస్గా చూడటం ప్రారంభించింది.
 కొన్ని సెకన్ల అనంతరం ఆ యువకుల ముఖాల్లో భయం మొదలవ్వడం స్పష్టంగా కనిపించిందని చెప్తుంది తాప్సీ. 'అప్పుడే తొలిసారి నాకర్థమయింది.. వాళ్ల కామెంట్లకి మనం సీరియస్గా స్పందించడం మొదలుపెడితే.. మగవాళ్లు మనతో సమానంగా భయపడతారని' అంటూ ఇటీవల తనకెదురైన సంఘటనను వివరించింది 'పింక్' స్టార్ తాప్సీ.
 
 లైంగిక వేధింపుల బాధితురాలిగా తాప్సి నటించిన 'పింక్' చిత్రం శుక్రవారం విడుదలైన విషయం తెలిసిందే.  తాప్సీ ఈ సినిమాలో తాను చేసిన పాత్ర.. ప్రస్తుత సమాజంలో లైంగిక దాడులకు బలైపోయిన చాలామంది యువతుల మానసిక సంఘర్షణను చూపిస్తుందని చెబుతోంది. ఈ చిత్రంలో బాలీవుడ్ సూపర్ స్టార్ అమితాబ్ కీలకమైన పాత్రలో నటించారు. ఈ చిత్రం తప్పకుండా తనకు సక్సెస్ తెచ్చిపెడుతుందని ఆమె ధీమా వ్యక్తం చేసింది.


 వరంగల్‌ : మహిళలతో అసభ్యకరంగా ప్రవర్తిస్తున్న ఆకతాయిలకు షీ టీం ఇన్‌చార్జీ ఏసీపీ ఈశ్వర్‌రావు బుధవారం కౌన్సెలింగ్‌ నిర్వహించారు. గత కొద్దిరోజులుగా వరంగల్, హన్మకొండ, రంగశాయిపేట జూని యర్‌ కాలేజీ, కేడీసీ, జిజ్ఞాస జానియర్‌ కాలేజీ, బస్టాండ్, షాపింగ్‌ కాంప్లెక్స్‌ల సమీపంలో గ్రూపులుగా ఏర్పడి కాలేజీలకు వచ్చిపోయే విద్యార్థినులను వేధింపులకు పాల్పడుతున్నట్లు షీ టీంకు సమాచారం అందిందన్నారు. ఈ ప్రాంతాల్లో ప్రత్యేక నిఘా ఏర్పాటు చేసి వేధింపులకు పాల్పడుతున్న పస్తం నాగేశ్, ఎండి.హుస్సేన్, చిన్నపల్లి అఖిల్, కావటి కరుణాకర్, విష్ణు, గండి రాహుల్, పి.విఠల్, శివకందన్, ఎండీ అంజాద్, ఎండీ అన్వర్, బాసానీ అఖిల్, జూలూరి సాయితేజ, మండ బిక్షపతి, మోరె అని ల్‌ను అదుపులోకి తీసుకున్నట్లు తెలిపారు. వీరికివారి తల్లిదండ్రుల ముం దు కౌన్సెలింగ్‌ నిర్వహించడమే కాకుండా భవిష్యత్‌లో ఇలాంటి సంఘటనలకు పాల్పడితే చట్టపరమైన కేసులు నమోదు చేస్తామన్నారు. ఈకేసులు నమోదైతే ప్రభు త్వ ఉద్యోగాలకు అనర్హులుగా పరిగణింపబడుతారని హెచ్చరించారు. కౌన్సెలింగ్‌ కార్యక్రమంలో షీటీం కానిస్టేబుళ్లు శ్రీని వాస్, బిచ్యానాయక్, రమణ, శ్రీనివాస్, రాజేశ్, వనజ, మోనికాలు పాల్గొన్నారు.  


 భువనేశ్వర్: ఒడిశా రాజధాని భువనేశ్వర్లో అమ్మాయిలు ఈవ్టీజర్కు బడితెపూజ చేశారు. అమ్మాయిలు వెదురుకర్రలతో అతణ్ని చితకబాది, మోకాలిపై నుంచోపెట్టారు. అనంతరం పోలీసులకు అప్పగించారు.
 
 భువనేశ్వర్లోని ఉత్కల్ యూనివర్శిటీలో ఎంబీఏ చదువుతున్న విద్యార్థినిపై వినోద్ కుమార్ సాహూ అనే ఓ ప్రైవేట్ ట్యూటర్ అసభ్యకర వ్యాఖ్యలు చేశాడు. వాణి విహార్ వద్ద ఉన్న వర్శిటీ క్యాంపస్ వుమెన్స్ హాస్టల్కు ఆమె వెళ్తుండగా బస్ స్టాప్ వద్ద ఈ ఘటన జరిగింది. ఆ విద్యార్థిని స్నేహితులను పిలవగా వెంటనే అక్కడకు వచ్చారు. ఆమె స్నేహితులకు విషయం చెప్పింది. ఇది గమనించిన సాహు అక్కడ నుంచి జారుకున్నాడు. అయితే అమ్మాయిలు అతని కోసం గాలించి వీఎస్ఎస్ నగర్ గేట్ వద్ద పట్టుకున్నారు. రోడ్డుపై అతణ్ని చితకబాది పోలీసులకు అప్పగించారు.


 గూర్గావ్ : "మజ్నూ రిటర్న్స్" ప్రత్యేక కార్యక్రమంలో భాగంగా మహిళలతో అసభ్యకరంగా ప్రవర్తిస్తూ.. అనుచిత వ్యాఖ్యలు చేసిన 50 మంది ఈవ్ టీజర్లను గూర్గావ్ పోలీసులు అరెస్టు చేశారు.  మేహరౌలీ-గూర్గావ్ రోడ్డులో శుక్రవారం ఉదయం 11 గంటల నుంచి శనివారం మధ్యాహ్నం ఒకటింటి వరకు మహిళా పోలీసులు సాధారణ దుస్తులతో మజ్నూ రిటర్న్స్ డ్రైవ్ను నిర్వహించారు. ఈ డ్రైవ్లో భాగంగా ఎంజీ రోడ్డులో, సహారా మాల్ బయట, మెట్రో స్టేషన్లలో మహిళలతో అసభ్యకరంగా ప్రవర్తిస్తున్న పురుషులను గుర్తించామని,  వారిని వెంటనే అదుపులోకి తీసుకున్నట్టు పోలీసులు వెల్లడించారు. 
  
 గతేడాది ఇలాంటి డ్రైవ్లతో 250 మందిని పోలీసులు అరెస్టు చేశారు. చివరి డ్రైవ్ డిసెంబర్లో జరిగింది. పోలీసులు నిర్వహించే ఈ డ్రైవ్కు పెట్టిన పేరు మజ్నూను ప్రేమకు చిహ్నమైన లైలా-మజ్నూ నుంచి ప్రతిపాదించినట్టు వారు పేర్కొన్నారు.  ప్రస్తుతం యువకులు లైంగిక ఆసక్తి, ప్రేమ పేరుతో మహిళలను వేధిస్తున్నారని, వారితో అసభ్యకరంగా ప్రవర్తిస్తున్నారని పోలీసులు తెలిపారు.  వారినుంచి మహిళలను కాపాడేందుకే ఈ డ్రైవ్లు చేపడుతున్నామని పోలీసులు తెలిపారు.


 నిన్నమొన్నటివరకు 'సాహసం', 'మొగుడు' వంటి తెలుగు సినిమాలు చేసిన తాప్సీ పన్ను 'బేబీ' సినిమాతో బాలీవుడ్‌కు వెళ్లిపోయింది. అక్కడ వరుస ఆఫర్లు అందుకుంటున్న ఆమె ప్రస్తుతం 'పింక్‌' సినిమాలో నటిస్తోంది. ఢిల్లీ మెట్రో స్టేషన్‌లో ఆమెకు ఇటీవల అనూహ్య అనుభవం ఎదురైంది.
 
 తాప్సీ రోజూ షూటింగ్‌ కోసం మెట్రోరైలులో వెళుతుంది. ఓ రోజు ఆమె షూటింగ్‌ ముగించుకొని ఇంటికి బయలుదేరింది. మెట్రో స్టేషన్‌లో దిగి తన కారు దగ్గరకు వెళుతుండగా.. ఓ అమ్మాయిని చుట్టుముట్టి ఆకతాయిలు వేధిస్తుండటాన్ని గమనించింది. వెంటనే మరో ఆలోచన లేకుండా ఆ అమ్మాయి దగ్గరికి తాప్సి పరిగెత్తుకెళ్లింది. అసభ్య ప్రేలాపనలు చేస్తున్న ఆకతాయిల నుంచి ఆ అమ్మాయిని కాపాడి.. సురక్షితంగా ఇంటికి చేర్చింది.
 
 ఈ ఘటన గురించి తాజాగా తాప్సీ వివరించింది. 'మెట్రో స్టేషన్‌ నుంచి నా కారు దగ్గరకు వెళుతుండగా కొందరు వ్యక్తులు ఒంటరిగా ఉన్న అమ్మాయిపై ప్రేలాపనలు చేస్తున్నారు. నేను వెంటనే ఆ అమ్మాయికి దగ్గరికి వెళ్లాను. మీరు ఎక్కడికి వెళ్లాలో చెబితే అక్కడ నా వాహనంలో డ్రాప్‌ చేస్తానని చెప్పాను. నేనెవరో తెలియకపోయినా.. అందుకు ఆ అమ్మాయి ఒప్పుకొంది. ఇది నాకు ఆనందం కలిగింది. అలాంటి పరిస్థితుల్లో ఉన్న వారిని ఆదుకోవడానికి ప్రతి ఒక్కరూ తమకు చేతనైనంత కృషి చేయాలి' అని  తెలిపింది.
 
 షూజిత్ సర్కార్ తాజా చిత్రం 'పింక్‌'లో తాప్సీ రేప్ బాధితురాలిగా కనిపిస్తోంది. ముగ్గురు మహిళలు ఎలా ట్రాప్ చేయబడి ఒక కేసులో చిక్కుకున్నారు? వారు ఎలా బయటపడ్డారు? అన్నది ఇతివృత్తంగా తెరకెక్కిన ఈ సినిమాలో అమితాబ్‌ బచ్చన్, కిర్తీ కుల్హరి తదితరులు నటిస్తున్నారు.


 ధన్బాద్: ఈవ్ టీజింగ్ చేసినందుకు ఒక ఐఐటీ రీసెర్చ్ ఫెలో కటకటాల పాలయ్యాడు. ఈఘటన జార్ఖండ్ లోని ధన్బాద్ జిల్లా ఐఐటీ స్కూల్ ఆఫ్ మైన్స్ లో చోటుచేసుకుంది. పెట్రోలియం ఇంజినీరింగ్ డిపార్ట్ మెంటులోని పరిశోధక విద్యార్థి ప్రకాశ్ కుమార్ తమను అసభ్య పదజాలంతో దూషించాడని తోటి విద్యార్థినులు కళాశాల యాజమాన్యాన్ని సంప్రదించారు. దీంతో  వారు పోలీసులకు ఫిర్యాదు చేశారు.  ప్రకాశ్ పై ఎఫ్ఐఆర్ ను నమోదు చేసిన పోలీసులు అతన్ని న్యాయమూర్తి ఎదుటు హాజరుపరిచారు.  న్యాయమూర్తి అతనికి  14 రోజుల రిమాండ్ ను విధించారు. ప్రకాశ్ పోలీసులను కూడా బెదిరించడం గమనార్హం.
  


  
 
  చర్యలు తీసుకోవాలన్న అధ్యాపకుడు
 
 నెల్లూరు(క్రైమ్‌):
 జిల్లా పోలీసు కార్యాలయానికి కూతవేటు దూరంలో ఈవ్‌టీజర్లు రెచ్చిపోతున్నారు. కళాశాలకు వెళ్లే విద్యార్థినులను ఇబ్బందులకు గురిచేస్తున్నారు. నిత్యం పోలీసులు సంచరించే ప్రాంతంలోనే వేధింపులకు గురవుతుండటంతో బాధిత తల్లిదండ్రులు తీవ్ర ఆవేదన వ్యక్తం చేస్తున్నారు. జిల్లా పోలీసు కార్యాలయంలో సమీపంలో డీకేడబ్ల్యూ కళాశాల ఉంది. జిల్లా నలుమూలల నుంచి పెద్ద సంఖ్యలో విద్యార్థినులు కళాశాలలో విద్యనభ్యసించేందుకు వస్తున్నారు. కళాశాల పోలీసు కార్యాలయానికి సమీపంలో ఉండటంతో తమ పిల్లలకు ఎలాంటి ఇబ్బందులు ఉండవని తల్లిదండ్రులు ఎంతో ధైర్యంతో వారిని కళాశాలకు పంపుతున్నారు. అయితే కొంతకాలంగా విద్యార్థినులు ఈవ్‌టీజర్ల వేధింపులకు గురౌతూ ఆందోళన చెందుతున్నారు.ఉదయం, మధ్యాహ్నం, సాయంత్రం కొందరు ఆకతాయిలు బైక్‌లపై కళాశాలకు సమీపంలోని బస్టాండ్ల వద్ద  విద్యార్థినులను వేధింపులకు గురిచేస్తున్నారు. ఈ విషయాన్ని విద్యార్థినులు తల్లిదండ్రులు, కళాశాల అధ్యాపకుల దృష్టికి తీసుకెళ్లారు.ఈ నేపథ్యంలో బుధవారం కళాశాలలో అధ్యాపకునిగా పనిచే స్తోన్న సుధాకర్‌రెడ్డి ఈవ్‌టీజర్‌ల బారి నుంచి విద్యార్థినిలను రక్షించాలని ట్రాఫిక్‌ విధులు నిర్వహిస్తోన్న సౌత్‌ట్రాఫిక్‌ ఎస్‌ఐ వీరనారాయణకు ఫిర్యాదు చేశారు. ఇకపై తాము సైతం ఆకతాయిలపై దృష్టిసారిస్తామన్నారు. తాము అందుబాటులోలేని సమయంలో డయల్‌ 100కు ఫిర్యాదు చేస్తే చర్యలు తీసుకుంటారన్నారు. అనంతరం సుబ్బారెడ్డి పోలీసు కంట్రోల్‌రూమ్‌కు ఫోను ద్వారా ఫిర్యాదు చేశారు. 
  
 ఈవ్‌టీజింగ్, నెల్లూరు డీకేడబ్ల్యూ కళాశాల, విద్యార్థుల ఆందోళన 


 యువతులను వేధిస్తున్న ఈవ్‌టీజర్లపై సైబరాబాద్ ఈస్ట్, వెస్ట్ షీ బృందాలు కొరడా ఝుళిపిస్తున్నాయి. వేధింపుల నుంచి అమ్మాయిలను రక్షించేందుకు సైబరాబాద్ ఈస్ట్, వెస్ట్ పరిధిలో సెలైంట్‌గా తమ పని కానిస్తున్న 60 షీ బృందాలు ఈనెల 4 నుంచి 16వ తేదీ వరకు 32 కేసుల్లో 43 మంది ఈవ్‌టీజర్లను పట్టుకున్నాయి. సైబరాబాద్ ఈస్ట్‌లో 17 కేసులు, సైబరాబాద్ వెస్ట్‌లో 15 కేసులు నమోదు చేశాయి. షీ బృందాలకు పట్టుబడిన వారిలో అత్యధికంగా 20 ఏళ్లు పైబడిన విద్యార్థులే అధికంగా ఉన్నారు.
 
 
 వీరందరికి గచ్చిబౌలిలోని సైబరాబాద్ పోలీసు కమిషనరేట్ కార్యాలయంలోని సీఏడబ్ల్యూ హాల్‌లో శనివారం కౌన్సిలింగ్ నిర్వహించారు. కార్యక్రమంలో సైబరాబాద్ ఈస్ట్ పోలీస్ కమిషనర్ మహేష్ భగవత్, షీ టీమ్స్ ఇన్‌చార్జి, ఏసీపీ శ్రీనివాసులు, ట్రాఫిక్ ఏసీపీ స్నేహిత తదితరులు పాల్గొన్నారు. - సాక్షి, సిటీబ్యూరో
  


 హైదరాబాద్: నగరంలోని వివిధ ప్రాంతాలకు చెందిన మహిళలు/యువతులు/బాలికల్ని వేధిస్తున్న 23 మంది పోకిరీలను షీ-టీమ్స్ అరెస్టు చేశాయి. పట్టుబడిన వారిలో ఓ స్కూల్ టీచర్‌తో పాటు 14 మంది మైనర్లు ఉన్నారని అదనపు సీపీ (నేరాలు) స్వాతి లక్రా గురువారం వెల్లడించారు. అనంతపురం జిల్లా ధర్మవరానికి చెందిన ఎన్.రెడ్డి కిరణ్, కె.రమేష్ వివిధ సర్వీసు ప్రొవైడర్లకు చెందిన సిమ్‌కార్డులు విక్రయించే వ్యాపారం చేస్తున్నారు. ఇలా తమ చేతిలో ఉన్న సిమ్‌కార్డుల్ని దుర్వినియోగం చేస్తున్న వీరిద్దరూ వాటిని వినియోగించి యువతులు/మహిళలకు ఫోన్లు చేస్తూ, అభ్యంతరకర సందేశాలు పంపిస్తూ వేధిస్తున్నారు.
 
 ఇద్దరు బాధితులు నుంచి ఫిర్యాదు స్వీకరించిన షీ-టీమ్స్ నిందితుల్ని అరెస్టు చేసి రిమాండ్‌కు తరలించాయి. నగరంలోని యాకత్‌పురాకు చెందిన మహ్మద్ సలీముద్దీన్ వృత్తిరీత్యా టైలర్. స్థానికంగా ఉండే మహిళ ఫోన్ నెంబర్ సేకరించిన ఇతడు ఫోన్లు, వాట్సాప్ సందేశాలతో వేధిస్తున్నాడు. ఆమె కుమారుడు, భర్త మందలించినప్పటికీ లెక్క చేయకుండా తన పంథా కొనసాగించాడు. దీనిపై ఫిర్యాదు రావడంతో కేసు నమోదు చేసుకున్న షీ-టీమ్స్ నిందితుడిని అరెస్టు చేశాయి. నగరానికి చెందిన విద్యార్థులైన ఎ.రవీందర్ యాదవ్, జి.పరమేష్ కొన్ని రోజులుగా దిల్‌సుఖ్‌నగర్ ప్రాంతంలో కాలేజీ విద్యార్థిని వెంటపడుతున్నారు. పేరు, చిరునామా తదిరాలు చెప్పాల్సిందిగా వేధిస్తున్నారు. ఆ ప్రాంతంలో కాపుకాసిన షీ-టీమ్స్ వీరిద్దరినీ రెడ్ హ్యాండెడ్‌గా పట్టుకున్నాయి. బాధితురాలి ఫిర్యాదు మేరకు కేసు నమోదు చేసి నిందితులను అరెస్టు చేశాయి.
 
 కటకటాల్లోకి చేరిన ‘టీచకుడు’...
 
 చాంద్రాయణగుట్టలోకి ఓ ప్రైవేట్ స్కూల్‌లో టీచర్‌గా పని చేస్తున్న సంతోష్‌నగర్ వాసి ఎన్.విజయ్‌కుమార్ ‘టీచకుడి’గా మారి షీ-టీమ్స్‌కు చిక్కాడు. చాంద్రాయణగుట్ట ప్రాంతానికి చెందిన ఎనిమిదో తరగతి బాలిక తన తల్లి సెల్‌ఫోన్ నుంచి రహస్యంగా ఎవరికో సందేశాలు పంపడాన్ని ఆమె సోదరి గుర్తించింది. ఈ విషయం ఆమె తల్లిదండ్రులకు చెప్పడంతో అంతా కలిసి బాలికను ఆరా తీశారు. సెల్‌ఫోన్‌ను పరిశీలించగా ఆమె చదువుతున్న పాఠశాలలో లెక్కలు బోధిస్తున్న టీచర్‌కు పంపినట్లు తేలింది.
 అతడు ఇంటికి వెళ్లిన తర్వాత ఎస్సెమ్మెస్‌లు పంపమని వేధిస్తాడని బాలిక కుటుంబీకులకు చెప్పింది. సదరు టీచర్ నుంచి వచ్చిన ఎస్సెమ్మెస్‌ల్లో కొన్ని అభ్యంతరకరంగా ఉండటంతో తల్లిదండ్రులు అవాక్కయ్యారు. ఈ విషయాన్ని షీ-టీమ్స్‌కు ఫిర్యాదు చేశారు. దీనిపై కేసు నమోదు చేసుకున్న అధికారులు ‘టీచకుడి’ని అరెస్టు చేసి రిమాండ్‌కు తరలించారు. ఇతగాడి వ్యవహారాలను స్కూలు యాజమాన్యం దృష్టికి తీసుకువెళ్లి చర్యలు తీసుకోవాల్సిందిగా ఆదేశించారు.
  
 విద్యార్థినులకూ చేదు అనుభవాలు...
 
 ఖైరతాబాద్‌లోని ఫిష్ మార్కెట్ సమీపంలో నిమ్మకాయ సోడాల విక్రేత జె.సంగప్ప ఓ ఎనిమిదో తరగతి విద్యార్థిని వెంటపడి వేధిస్తున్నాడు.  కొన్ని సందర్భాల్లో నాతో ఎందుకు మాట్లాడట్లేదు? నీ పేరు ఏంటి? అంటూ లేఖలు రాసి ఆమెపైకి విసిరాడు.  సదరు బాలిక తన వెంటపడి వేధించవద్దంటూ లేఖ రాసి తన స్నేహితురాలి ద్వారా పంపింది. అయినప్పటికీ పంథా మార్చుకోని సంగప్ప వేధింపులు కొనసాగించాడు. దీంతో భయాందోళనలకు గురైన బాలిక స్కూలుకు వెళ్లడం మానేసి ఇంట్లోనే ఉండిపోసాగింది.
 దీంతో ఆరా తీసిన తల్లిదండ్రులకు అసలు విషయం చెప్పింది. బాలిక తండ్రి షీ-టీమ్స్‌కు ఫిర్యాదు చేయడంతో కేసు నమోదు చేసుకుని సంగప్పను అరెస్టు చేశారు. కాచిగూడలోని సెయింట్ ఫ్రాన్సెస్ కాలేజ్ వద్ద ప్రత్యేక డ్రైవ్ చేపట్టిన షీ-టీమ్స్ వీడియో రికార్డింగ్‌తో నిఘా ఉంచాయి. ఆ ప్రాంతంలో ఈవ్‌టీజింగ్‌కు పాల్పడుతున్న వివేక్ సింగ్, గౌరవ్ సింగ్‌లతో పాటు మరో 11 మంది మైనర్లను పట్టుకున్నాయి. వీరిలో మేజర్లను అరెస్టు చేసి కోర్టులో హాజరుపరిచాయి. మైనర్లకు తల్లిదండ్రుల సమక్షంలో కౌన్సెలింగ్ చేశాయి. జూపార్క్ వద్ద ఈవ్‌టీజింగ్‌కు పాల్పడుతున్న చాంద్రాయణగుట్టకు చెందిన ముగ్గురు మైనర్లను షీ-టీమ్స్ పట్టుకున్నాయి.
  
  ధైర్యంగా ఫిర్యాదు చేయండి
 
  ‘నగరంలో వేధింపులు ఎదుర్కొనే వారు ధైర్యంగా తమకు ఫిర్యాదు చేయాలి. బాధితుల వివరాలు పూర్తి గోప్యంగా ఉంచుతాం. అత్యవసర సమయాల్లో ‘100’కు ఫోన్ చేసి తక్షణ సాయం పొందవచ్చు. షీ-టీమ్స్ వాట్సాప్ నెంబర్ 9490616555, ఈ-మెయిల్ ఐడీ (hydsheteam@gmail.com), ఫేస్‌బుక్ పేజ్, ట్విట్టర్ ద్వారా ఫిర్యాదులు ఇవ్వడం, సహాయం పొందడానికి అవకాశాలు కల్పిస్తున్నాం. పబ్లిక్‌గార్డెన్ సమీపంలోని హాకా భవన్‌లో ఉన్న భరోసా కార్యాలయానికీ నేరుగా రావచ్చు.’- స్వాతి లక్రా,అదనపు సీపీ


 
 పోకిరీలపై ఫిర్యాదు చేస్తున్న బాధితులు
 
 సగానికిపైగా ఫిర్యాదులు వాట్సాప్ ద్వారానే..
 
 త్వరగా స్పందిస్తున్న సైబరాబాద్   షీ టీమ్స్
 
 సిటీబ్యూరో: పోకిరీల ఈవ్‌టీజింగ్‌పై ఫిర్యాదు చేస్తే ఎక్కడ పరువుపోతుందోనని.. ఒకవేళ ధైర్యం చేసి ఫిర్యాదు చేసినా ఎన్నిసార్లు ఠాణా చుట్టూ చక్కర్లు కొట్టాల్సి వస్తుందోననే దిగులుతో బాధిత మహిళలు ఫిర్యాదు చేసేందుకు ముందుకు వచ్చేవారు కాదు... ఇదంతా గతం. మహిళల భద్రత కోసం ప్రభుత్వాలు తీసుకుంటున్న విప్లవాత్మక మార్పులు మహిళలను చైతన్యపరుస్తున్నాయి. సైబరాబాద్ పోలీసు కమిషనరేట్‌లో ఏర్పాటు చేసిన షీ బృందాల పుణ్యమా అని ఈవ్‌టీజర్లపై ఫిర్యాదు చేసే బాధితుల సంఖ్య నానాటికీ పెరుగుతోంది. వేధింపులకు గురైన క్షణంలోనే బాధిత మహిళలు పోలీసుస్టేషన్ గడప తొక్కకుండానే అరచేతిలో ఉన్న మొబైల్ సహాయంతో వాట్సాప్ ద్వారా సైబరాబాద్ వాట్సాప్ నంబర్ 9490617444కు ఫిర్యాదు చేస్తున్నారు. ఈ ఏడాది జనవరి నుంచి జూన్ వరకు వచ్చిన 376 ఫిర్యాదుల్లో దాదాపు 200 ఫిర్యాదులు వాట్సాప్ ద్వారానే రావడం విశేషం.
  
 ఒక్క ఎస్‌ఎంఎస్‌తో రంగంలోకి ...
 అభయ ఘటన తర్వాత సైబరాబాద్ పోలీసు కమిషనరేట్ పరిధిలో మహిళల భద్రత కోసం పోలీసులు అనేక చర్యలు తీసుకుంటున్నారు. ఇందులో భాగంగానే సైబరాబాద్‌లోని శంషాబాద్, మాదాపూర్, బాలానగర్, మల్కాజిగిరి, ఎల్బీనగర్ జోన్లలో  ఏడాదిన్నర క్రితం ఏర్పాటుచేసిన 60 షీ టీమ్స్ తమ పనిని నిశ్శబ్దంగా చేసుకుపోతున్నాయి.  కళాశాలలు, బస్సుస్టాప్‌లు, బస్సులు, రైల్వే స్టేషన్లు, కార్యాలయాల్లో యువతులు, మహిళలను వేధించేవారిపై నిఘా ఉంచుతున్నాయి.  సైబరాబాద్ పోలీసు వాట్సాప్ నంబర్ 9490617444కు బాధిత యువతులు ఎస్‌ఎంఎస్ పంపిన మరుక్షణం  షీ టీమ్స్ స్పందించి ఘటనా స్థలానికి చేరుకుంటున్నాయి. ఈవ్‌టీజర్ల వెకిలి చేష్టలను చిత్రీకరించి సాక్ష్యాలు పట్టుకొని షీ కార్యాలయానికి తరలిస్తున్నారు. వేధించేవాళ్లలో విద్యార్థులు, యువకులు ఉంటే వారి భవిష్యత్‌ను దృష్టిలో ఉంచుకొని మరోమారు ఇలాంటి చర్యలకు పాల్పడబోమంటూ లిఖితపూర్వకంగా రాయించుకొని పెట్టీ కేసులు పెడుతున్నారు. మళ్లీ అదే తప్పు చేసే వారిపై ఎఫ్‌ఐఆర్‌లు నమోదు చేసి జైలుకు పంపుతున్నారు.
  
 టెక్నాలజీతో ఈవ్‌టీజర్లపై ఫిర్యాదు
 ఈవ్‌టీజింగ్, వేధింపులకు గురయ్యే మహిళలు చాలా మంది సైబరాబాద్ వాట్సాప్ నంబర్‌కు ఎస్‌ఎంఎస్ పంపుతున్నారు. ఈ ఏడాది ప్రారంభం నుంచి ఇప్పటివరకు 376 కేసులు నమోదు చేశాం. వీటిలో 309 పెట్టీ కేసులు, 67 ఎఫ్‌ఐఆర్‌లున్నాయి. ఈ కేసుల్లో మొత్తం 427 మందిని పట్టుకున్నాం.  వీరిలో 18 నుంచి 30 ఏళ్ల మధ్య వయసు ఉన్న 314 మంది ఉన్నారు.  30 నుంచి 40 ఏళ్ల మధ్య వయసు వారు 51 మంది, 40 నుంచి 50 ఏళ్ల వయసు మధ్య ఉన్నవారు 18 మంది, 21 మంది మైనర్లు ఉన్నారు. 50కి పైబడినవారు ఐదుగురున్నారు. వీరందరికీ కౌన్సెలింగ్ నిర్వహించాం. మరోమారు వేధింపులకు పాల్పడవద్దని సుతిమెత్తగా హెచ్చరించాం. 
  -శ్రీనివాసులు,  ఏసీపీ, సైబరాబాద్ షీ టీ మ్స్ ఇన్‌చార్జి


 చెవిలో దూది పెట్టుకుని, చెవులు గట్టిగా మూసుకోబుద్ధేస్తోంది! అలా చేస్తే కొందరి మాటలు వినడవు. కానీ ఈ మహానుభావులకు లౌడ్ స్పీకర్లు పెట్టుకోవడానికి పోలీసు పర్మిషన్ కూడా దొరుకుతుంది. ప్రజా ప్రతినిధులూ... ప్రజా సేవకులూ మరి! ఎక్కడైనా దోషిని దుర్భాషలాడాలి కానీ... బాధితులను నిందిస్తామా? జీన్స్ తొడుక్కోవడం వల్ల, కురచబట్టలు వేసుకోవడం వల్ల... రాత్రి పూట తిరిగినందుకో, పదహారేళ్లకే పెళ్లి చేయనందుకో... రేపులు జరుగుతున్నాయట! వీళ్లది నోరా? మురిక్కాలువా? రేప్ తర్వాత రేప్ లాంటిది ఇది. మహిళలపై చిన్నచూపు కలిగేలా పురుషాధిక్య సమాజం ఆడుతున్న మైండ్ గేమ్ ఇది. మైండ్ రేప్ ఇది. మహిళల క్యారెక్టర్‌నీ, వారి మనస్థైర్యాన్నీ బజారులో ఉరి వేస్తున్నారు. వీళ్ల నాలుకలకు ముడి వెయ్యాల్సిందే!
  
 ఇటీవల శని శింగణాపూర్‌లో గర్భగుడిలోకి మహిళలు ప్రవేశించినప్పుడు.. స్వామీజీ ఒకరు స్పందిస్తూ... ‘‘ఈ పరిణామంతో మహిళలపై అత్యాచారాలు మరింత పెరిగే ప్రమాదం ఉంది’’ అని వ్యాఖ్యానించారు! ఈ వ్యాఖ్యపై దేశవ్యాప్తంగా నిరసనలు వెల్లువెత్తాయి. ఇలా ఏదో ఒక సందర్భంలో, ఎక్కడో ఒకచోట, ఎవరో ఒక ప్రముఖుడు... ‘అత్యాచారాలకు మహిళల వైఖరే కారణం’ అనే అభిప్రాయం వ్యక్తం చేస్తూనే ఉన్నారు. ఈవ్‌టీజింగ్.. హెరాస్‌మెంట్..  సెక్సువల్ అబ్యూజ్.. రేప్... సంఘటన ఏదైనా, దేశంలో ఏ మూల జరిగినా.. నేరస్థులను వదిలేసి బాధితుల ప్రవర్తనను తప్పుపట్టడం సాధారణమైపోయింది.  అసలు మహిళల నడతనే సరైంది కాదనే కామెంట్లూ చేస్తున్నారు. అలాంటి మాటలు అంటున్నది సామాన్యులు కాదు... ప్రజాప్రతినిధులు, ఉన్నత హోదాల్లోని వారు! వీళ్లు తమ మాటలతో రేప్ చేస్తున్నారు. సగం చచ్చిపడి ఉన్న మహిళలను ఆ మాటల బలత్కారాలతో పూర్తిగా చంపేస్తున్నారు! మహిళల పట్ల ఎవరెవరు ఎంతెంత నోటి దురుసుతనాన్ని...  ఇంకెంత బుద్ధిహీనతను ప్రదర్శించారో చూడండిక్కడ.
  
 పెళ్లి చేసెయ్యాలి
 అమ్మాయిలకు పదహారేళ్లకే పెళ్లిళ్లు చేసేయాలి. దేహవాంఛలు తీర్చడానికి భర్తలుంటారు కాబట్టి వాళ్లు బయట తిరగరు. దాంతో రేప్‌లూ జరగవు! - ఓమ్ ప్రకాష్ చౌతాలా,  హర్యానా మాజీ ముఖ్యమంత్రి
  
 దుస్తులే కారణం
 ఈవ్‌టీజింగ్ ఘటనలు పెరగడానికి అమ్మాయిలు వేసుకుంటున్న పొట్టి బట్టలే కారణం. వాళ్ల వస్త్ర ధారణే మగవాళ్లను రెచ్చగొడుతోంది!
  - చిరంజీత్ చక్రబర్తి,  తృణమూల్ కాంగ్రెస్ ఎమ్మెల్యే
  
 స్పష్టంగా నిర్వచించాలి
 అత్యాచారానికి, వ్యభిచారానికి మధ్య ఉన్న తేడాను స్పష్టంగా నిర్వచించడం, చెప్పడం సమాజానికి చాలా అవసరం!
 - కె. సుధాకరన్, కేరళ కాంగ్రెస్ ఎంపి.
  
 పరిహారం.. పరిహాసం!
 రేప్ బాధితులకు నష్ట పరిహారం ఇవ్వాలని ముఖ్యమంత్రికి చెప్పాం. అదీ అసెంబ్లీలో. రేప్ బాధితులకే కాదు.. రేప్‌కాని అమ్మాయిలను కూడా అడగాలి.. ఒకవేళ భవిష్యత్‌లో మీరు రేప్‌కి గురైతే  మీరు ఎంత పరిహారం తీసుకుంటారని ముందే అడగాలి!
 - అన్సూర్ రెహమాన్, సీపీయం నేత
  
 అర్ధరాత్రిళ్లు ఏం పని?
 చుట్టాలు, రక్తసంబంధీకులు కాని మగపిల్లలతో ఆడపిల్లలు అర్ధరాత్రిళ్లు తిరగాల్సిన పని, అవసరం ఏంటి? ఇలాంటి వాటిని ఆపాలి!
 - అబు ఆజ్మీ, సమాజ్‌వాది పార్టీనేత
  
 ఫోన్లు ఎందుకు?
 ఆడవాళ్లకు మొబైల్ ఫోన్లు ఎందుకు? వాటి వల్ల వాళ్లు చెడిపోతున్నారు. అసలు పిల్లలకు, స్త్రీలకు ఫోన్లు ఇవ్వకూడదు. అనవసరం కూడా! మా అమ్మ, నా భార్య, చెల్లెలికి మొబైల్ ఫోన్ లేదు. వాళ్లు బతకట్లేదా?
 - రాజ్‌పాల్ సైని,  బీఎస్‌పి నేత
  
 పాశ్చాత్య ప్రభావం
 పట్టణాల్లో తప్ప గ్రామాల్లో రేప్‌లు లేవు. పట్టణాల మీద పాశ్చాత్య ప్రభావమే దీనికి కారణం!  - మోహన్ భగవత్, ఆర్‌ఎస్‌ఎస్ చీఫ్
  
 గ్రహాలు అనుకూలంగా లేవ్..
 స్త్రీల మీద హింస పెరుగుతోంది.. ఏం చేస్తున్నారంటూ మా మీద విమర్శలు గుప్పిస్తే ఏం చెప్తాం? గ్రహాలు మాకు అనుకూలంగా లేవ్ మరి! అందుకే ఇలా జరుగుతోంది!  - నాన్కి రామ్ కన్వర్, చత్తీస్‌గఢ్ హోం మినిస్టర్
  
 ఫాస్ట్ ఫుడ్ వల్లే
 ఇవ్వాళ్టి యూత్ ఫాస్ట్‌ఫుడ్‌కి బాగా అలవాటు పడ్డారు. ఈ ఆహారం వల్లే హార్మోన్లు అసమతౌల్యానికి గురై యువతలో కోరికలను ప్రేరేపిస్తున్నాయి. అందుకే రేప్‌లు ఎక్కువయ్యాయి. - జితేందర్ ఛతర్, థువా ఖాప్ పంచాయత్ నేత
  
 ఏ రకం?
 ఈ రకమైన రేప్ జరగకుండా ఉండాల్సింది!  - సుశీల్ కుమార్ షిండే,  మాజీ హోమ్ మనిస్టర్  ( నిర్భయ రేప్ గురించి)
   
 అంటే ఇంకోరకమైన రేప్ జరగొచ్చా? అని విమర్శకుల కౌంటర్.
  
 ‘నిర్భయ’ చట్టం వచ్చింది. ఇప్పుడిక... ‘భయ’ చట్టం రావాలి! స్త్రీల సేఫ్టీ కోసం నిర్భయ. స్త్రీల రెస్పెస్ట్ కోసం భయ. చెడ్డ పనికి చట్టం ఉన్నట్టే.. చెడ్డ మాటకూ చట్టం ఉండాలి. రేప్‌లపై చీప్‌గా మాట్లాడే మహానుభావుల నోళ్లకు...  ‘భయ’ అనే తాళం పడాలి.
  
 ‘అన్నా’ అంటే చాలు!
 బాధితురాలు తన మీద దాడిచేయడానికి వచ్చిన మగవాళ్లను ‘అన్నా...’ అని పిలవాలి. రెండు చేతులు జోడించి ‘అన్నా.. నన్నేం చేయొద్దు’ అంటూ ప్రార్థించాలి!  - ఆసారామ్ బాపు, ఆధ్మాత్మిక గురువు
  
  


 మరో ఘటనలో తల్లి, కుమార్తెపై దాడి
 సహరాన్‌పూర్: ఈవ్ టీజింగ్‌ను ప్రతిఘటించినందుకు ఉత్తర్‌ప్రదేశ్‌లో ఒక బాలికకు నిప్పంటించగా.. బెంగాల్లో అదే కారణంతో మరొక బాలికను, ఆమె తల్లిని తీవ్రంగా కొట్టి గాయపర్చారు. యూపీలోని సహరాన్‌పూర్‌లో ఇద్దరు అన్నదమ్ములు తనను వేధిస్తున్నారంటూ 16 ఏళ్ల బాలిక వారిని నిలదీసింది. దీంతో వారిద్దరూ తల్లితో కలిసి ఆ బాలికకు నిప్పటించారు. బాలిక శరీరం 95 శాతం కాలిపోయి మృత్యువుతో పోరాడుతోంది. మాల్దా జిల్లా మానికచక్ గ్రామంలో తల్లీకూతుళ్లు నూర్ అలీ అనే యువకుడి ఇంటికి వెళ్లి వేధింపులపై ప్రశ్నించారు. అలీ కుటుంబసభ్యులు బాలికను, ఆమె తల్లిని రాడ్లు, కర్రలతో తీవ్రంగా కొట్టి గాయపరిచారు.


 అత్యాచారంతో గొంతు నులిమేస్తే.. ష్‌ష్‌ష్! ఆధిపత్యంతో నోరు నొక్కేస్తే.. ష్‌ష్‌ష్!  అల్పత్వంతో ఆత్మాభిమానానికి శిలువేస్తే.. ష్‌ష్‌ష్! ఏం చేయాలి?! ఏం చేస్తారు?! ఏం చేద్దాం?! ఈ దుర్మార్గాన్ని ఎలా దులపాలో? ఈ దాష్టీకం ఎలా ఆగాలో? ఎవరు ఆపాలి? మగాడే కదూ! కానీ, మగాడే మృగాడవుతున్న జాబితా క్షణక్షణం పెరుగుతోంది. ఒక అన్నయ్య, ఒక నాన్న, ఒక బాబాయి, ఒక మామయ్య. మర్చిపోయాం... ఒక తాతయ్య. ఓ... ఇంకో మగానుభావుడు ఉన్నాడు, అదేనండీ... ప్రేమికుడు. హత్ తెరికి... ఈనాటి ఒక ప్రేమికుడు వేధింపుల్లో గ్రాడ్యుయేట్ అయితే, ఒక భర్తగారేమో హింసలో పోస్ట్‌గ్రాడ్యుయేట్. ఇక వీళ్లందరికీ పాఠాలు చెప్పే టీచకులూ ఉన్నారు... కొందరు ఖాకీలూ ఉన్నారు. మరి చట్టాలు చేసేవారు... శాసనసభల్లో కూర్చునేవారూ... వీళ్లల్లో మాత్రం దుశ్శాసనులు లేరా?  ఇంకా కనపడని ఈ చీకటి పొరలలో... ఎంతమంది మృగాళ్లు దాగున్నారో!  పింప్స్, ట్రాఫికర్స్, బ్రోకర్లను నీచాతినీచులంటాం. మరి వీళ్లని...? దొంగలైతే పట్టుకోవచ్చు. మరి కాపాడాల్సినవాళ్ళే క్రూర మగాళ్ళయితే... ఎలా? ఛీఛీఛీ.. వెగటు పుడుతోంది. కడుపు తిప్పేస్తోంది. నిస్సహాయత గొంతు పిసికేస్తోంది. మన అచేతన మీద మనకే అసహ్యం కలుగుతోంది. ఉచ్ఛనీచాలు మరిచి... వావివరసలు లేకుండా... ఇంటా బయటా... పసిపాపల నుంచి ముసలివారి దాకా అందరి మీదా... ఈ నీచ్ కీచకులు కామం కక్కుతున్న వాసన... పేపర్లలో, టీవీలలో, ఇంటర్నెట్‌లో గుప్పుమంటుంటే... ‘ఏమీ చేయవేం’ అన్న ప్రశ్న వెక్కిరిస్తుంటే... ఆ బాధ గొప్పదా? పుండు పడుతున్న చెల్లి బాధ గొప్పదా? బీయింగ్ ఎ సెలైంట్ స్పెక్టేటర్ ఈజ్ ఎ బిగ్గర్ క్రైమ్.. చెడు చేసేవాడి కంటే చెడును చూస్తూ మౌనంగా ఉండేవాడే పెద్ద నేరస్థుడు. మన గొంతును ఎవరు నొక్కేశారని? మన నోటిని ఎవరు కుట్టేశారని? గుర్తుంచుకోండి! మానం దోచేవాడికి సాయం చేసేదే మన మౌనం. మన చెల్లిని కాపాడేదే... మన గళం. దీనికి మీరే సాక్షి!
  
 గృహహింస
 ఇది రకరకాల రూపంలో స్త్రీలను బాధిస్తోంది.. వేధిస్తోంది.. హింసిస్తోంది. కూరల్లో ఉప్పుకారాల మోతాదు తప్పాయన్న దగ్గర్నుంచి ఇంటిని శుభ్రంగా ఉంచట్లేదని, పిల్లలను సరిగ్గా చూడట్లేదని, అత్తామామలను గౌరవించట్లేదని, ఆడబిడ్డ అడుగులకు మడుగులు ఒత్తట్లేదని, పడకటింట్లో సరిగ్గా మసలుకోవట్లేదని, భర్తను నిర్లక్ష్యం చేస్తోందని, చుట్టాలకు మర్యాద చేయట్లేదని, ‘మంచి చీర కట్టుకొని ఎవరి కోసం సింగారించుకున్నా’వని, మంచి చీర కట్టుకోకపోతే ‘పాచిమొహందానా’ అని... ఇలా ఏమి చేసినా.. చేయకపోయినా తప్పుపట్టి ఆపాదమస్తకం భార్యను విమర్శిస్తూ, ఆమె తల్లితండ్రులను కించపరుస్తూ ఆమెకు బతుకును నరకప్రాయం చేసే శాడిజం - గృహహింస. దీనికి సాధారణ గృహిణి నుంచి బాగా చదువుకుని, ఉన్నత ఉద్యోగాల్లో స్థిరపడ్డ మహిళల దాకా అందరూ బాధితులే. అలాంటి ఒక బాధితురాలే గుల్బర్గాకు చెందిన ఓ డెంటిస్ట్. ఈమెకు 2004 జూన్‌లో హైదరాబాద్‌లోని అజీజ్‌బాగ్‌కు చెందిన ఓ యువకుడితో వివాహమైంది. అప్పట్లో ఇతగాడు ప్రముఖ సాఫ్ట్‌వేర్ కంపెనీలో టీమ్ లీడర్‌గా పని చేస్తుండేవాడు. వివాహానంతరం వీరిద్దరూ కలిసి అమెరికాలో కాపురం పెట్టారు. అక్కడ ఉండగా భర్త నుంచి తీవ్ర వేధింపులు ఎదురుకావడంతో అక్కడి పోలీసులకు ఓసారి ఫిర్యాదు చేసింది. దీంతో వారు అక్కడ అమలులో ఉన్న నిబంధనల ప్రకారం సదరు భర్తకు కౌన్సెలింగ్ చేసి విడిచిపెట్టారు. కొన్నాళ్ల క్రితం ఈ జంట హైదరాబాద్‌కు తిరిగి వచ్చేసింది. ఆ తర్వాత కొన్ని రోజులకు తన భర్త ప్రవర్తన మళ్లీ మొదటికి వచ్చేసిందని ఆ డెంటిస్ట్ వాపోయింది. అకారణంగా కొట్టడంతో పాటు శరీరంలోని అనేక ప్రాంతాల్లో కొరుకుతున్నాడంటూ మహిళా పోలీసుస్టేషన్‌ను ఆశ్రయించింది. ఆమె కాళ్లు, చేతులతో పాటు శరీరంపై భీతిగొలిపే రీతిలో ఉన్న పంటి గాట్లను పోలీసులకు చూపించింది. వాటిని చూసి పోలీసులే చలించిపోయారు.
  
 బాల్య వివాహాలు
 ఈ హైటెక్ రోజుల్లోనూ వందలాది బాల్య వివాహాలు జరుగుతున్నాయి. దీనికి ప్రత్యక్ష ఉదాహరణ - దేశంలోని ఏ మూలో కాదు.. తెలంగాణ నడిబొడ్డున ఉన్న రంగారెడ్డి జిల్లానే. ఈ మధ్య.. అంటే ఓ నెలరోజుల్లోనే  ఇక్కడ పదుల సంఖ్యలో బాల్య వివాహాలు జరిగినట్టు దాఖలాలున్నాయి. పద్నాలుగేళ్ల అమ్మాయికి 32 ఏళ్ల అబ్బాయితో వివాహం చేశారు. ఇంకో అమ్మాయి విషయంలోనూ అంతే. పదమూడేళ్ల చిన్నారికి 29 ఏళ్ల వ్యక్తితో పెళ్లి నిశ్చయం చేస్తే ఆ అమ్మాయి ఆ పెళ్లిని తప్పించుకోవడానికి రాత్రికిరాత్రే ఇంట్లోంచి పారిపోయింది. ప్రస్తుతం హైదరాబాద్‌లోని కస్తూర్బా గాంధీ ఆశ్రమంలో ఉంటూ చదువుకుంటోంది. ఈ కాలంలోనూ ఈ బాల్య వివాహాలకు విస్మయపడాల్సి వస్తోంది. రంగారెడ్డి జిల్లాలో ఇలా ఉంటే మహబూబ్‌నగర్, ఆదిలాబాద్ ప్రాంతాల్లో బాల్యవివాహాలకు కారణాలు ఇంకోరకంగా ఉన్నాయి.
  
 వలసలూ ఓ కారణమే!
 మహబూబ్ నగర్‌లో బాల్యవివాహాల నేరానికి వలసలు కారణమవుతున్నాయి. భార్యాభర్తలిద్దరూ వలసవెళ్లక తప్పని పరిస్థితి. తమ పన్నెండు, పదమూడు, పధ్నాలుగేళ్ల ఆడపిల్లల బాధ్యతను ఇంట్లో వృద్ధుల మీద వదిలి పెట్టలేక పెళ్లిచేసి వీళ్లను అత్తారింటికి పంపి వాళ్లు వలసవెళ్తున్నారు. ఇక ఆదిలాబాద్‌లాంటి చోట్ల పేదరికం బాల్యవివాహాలను ఉసిగొల్పుతోంది. ఉత్తర భారతదేశంలో ఆడపిల్లల సంఖ్య తగ్గి వధువుల కొరత ఏర్పడడంతో అక్కడినుంచి ఆడపిల్లల అన్వేషణ కోసం దక్షిణాదికి వస్తున్నారు ఉత్తర భారతీయులు. వారికి మొదటగా కనిపిస్తున్నది తెలంగాణ. ఈ రాష్ట్రానికి తలలాగా ఉన్న ఆదిలాబాద్. ఇక్కడి పేదరికం వాళ్లకు వరంగా మారుతోంది. ఆడపిల్లల తల్లితండ్రులకు కానీ ఖర్చు కానివ్వకుండా టీనేజ్ అమ్మాయిలను పెళ్లిచేసుకొని తీసుకెళ్లిపోతున్నారు. చదువు, నాగరికత - అన్నీ ఉన్న హైదరాబాద్ వంటి నగరాల్లోనూ అడపాదడపా ఈ బాల్యవివాహాల తంతు కనిపిస్తూనే ఉంది.  తెలుగు రాష్ట్రాల ఉమ్మడి రాజధాని హైదరాబాద్‌లో 2014లో అడ్డుకున్న బాల్య వివాహాల సంఖ్య 12. కాగా... 2015లో ఈ సంఖ్య రెట్టింపు అయింది. ఏకంగా 24కు పెరిగింది.
  
 వరకట్నం
 వరకట్న దురాగతానికి  బలి అవుతున్న ఆడబిడ్డలెందరో! అలాంటి వాళ్లలో ఒకరు స్వాతి. మెదక్‌జిల్లా తూప్రాన్‌కు చెందిన జగన్నాథం కుమార్తె స్వాతికి సికింద్రాబాద్ వాసి సాయిశంకర్‌తో  2013 నవంబర్ 10న వివాహమైంది. వస్త్రవ్యాపారి అయిన సాయి శంకర్ తన కుటుంబసభ్యులతో కలిసి చిలకలగూడలోని అపార్ట్‌మెంట్‌లో ఉండేవాడు. వీరికి ఏడాదిన్నర వయసున్న కొడుకు ఉన్నాడు. వ్యాపార పనులపై సాయి విజయవాడకు వెళ్లాడు. స్వాతి తన కుమారుడితో ఇంట్లో ఉంది. మరుసటి రోజు ఉదయం కుటుంబ సభ్యులు తలుపు కొట్టినా స్పందన లేదు. కొద్దిసేపటికి ఆ గదిలో నుంచి చిన్నారి ఏడుపు వినిపించింది. తలుపులు పగులకొట్టి చూస్తే... స్వాతి సీలింగ్ ఫ్యానుకు చున్నీతో ఉరి వేసుకుని కనిపించింది. విషయం తెలుసుకున్న స్వాతి పుట్టింటి వారు తమ బిడ్డను ఆమె భర్త, అతడి కుటుంబ సభ్యులు అంతా కలిసి అదనపు కట్నం కోసం వేధిస్తున్నారని తెలిపారు. ఈ విషయమై కూతురు తమకు అనేకసార్లు  ఫోన్ చేసి బాధపడిందని మృతురాలి తండ్రి జగన్నాథం చెప్పారు. ఎంఈ, బీఈడీ చేసి ఇటీవలే కొన్ని ఉద్యోగ పరీక్షలకు హజరైన తన స్వాతి ఉరివేసుకునేంత పిరికిది కాదని కన్నీటి పర్యంతమయ్యారు.
  
 విదేశీ అల్లుళ్ల ఆటలు
 వివాహ వ్యవస్థ ఆధునిక కాలంలో అనంత నేరాలకు పురుడు పోస్తోంది.ఇలాంటి వాటిల్లో ఎన్‌ఆర్‌ఐ భర్తల మోసాలు మొదటిస్థానంలో నిలుస్తాయి. కడప జిల్లాకు చెందిన ఓ ఉన్నత విద్యాధికురాలికి అదే జిల్లాకు చెందిన అమెరికా ఎన్‌ఆర్‌ఐ సాఫ్ట్‌వేర్‌తో పెళ్లి అయింది. పెళ్లయిన మూడు నెలలకు అమెరికా తీసుకెళ్లాడు. అక్కడికి వెళ్లాక తెలిసింది అప్పటికే అతనికి ఓ అమెరికా యూదు యువతితో పెళ్లయిందన్న చేదు నిజం. నిలదీయడంతో ఆమె పాస్‌పోర్ట్ లాక్కున్నాడు. కొట్టడం, తిట్టడం, తిండిపెట్టకపోవడం, ఆమెను రక్తం కారేలా హింసించి ఆ రక్తాన్ని తన పెంపుడు కుక్కతో నాకించడం వంటి ఉన్మాద చేష్టలకు పాల్పడ్డాడు. ఎలాగోలా ఆమె అక్కడినుంచి బయటపడి అతని మీద కేస్ పెట్టింది. ఇప్పుడతను అమెరికా వీసా రద్దయి.. ఇండియన్ జైల్లో ఊచలు లెక్కపెడుతున్నాడు.
 
 
 నమ్మకద్రోహం
 మోసానికి,  ద్రోహానికి తేలికగా దొరుకుతోంది అమ్మాయిలే. ప్రేమించి పెళ్లాడిన భార్యనే వెలయాలిగా చిత్రీకరించడానికి ప్రయత్నించాడో ఉన్మాది. నల్లగొండ జిల్లా  మల్కపురానికి చెందిన ఎండబెత్తుల మురళీకృష్ణ  మరదలి వరసయ్యే అమ్మాయిని ప్రేమించాడు. కృష్ణ కుటుంబీకులు డబ్బుకే ఎక్కువ విలువ ఇస్తారనే ఉద్దేశంతో యువతి కుటుంబీకులు వీరిద్దరి వివాహానికి అంగీకరించలేదు. దీంతో పథకం ప్రకారం తనతో పాటు యువతికీ మహారాష్ట్రలోని పుణేకు బదిలీ చేయించుకున్న మురళీకృష్ణ అక్కడ ఆమెతో సహజీవనం చేశాడు. ఆ అమ్మాయి ఐదు నెలల గర్భవతిగా ఉండగా హైదరాబాద్‌కి  తీసుకువచ్చి నాంపల్లిలో వదిలేసి వెళ్లిపోయాడు. ఈ మోసంపై పుణేలో మదర్‌పట్టా పోలీసుస్టేషన్‌లో ఫిర్యాదు చేయడంతో కేసు నమోదైంది. యువతి కుటుంబీకులు, పెద్దలు, పోలీసుల సమక్షంలో రాజీ కుదిర్చి రూ.3 లక్షల ఖర్చుతో స్థానికంగా ఉన్న గుడిలో ఇద్దరికీ వివాహం చేశారు. ఈ పెళ్లిని మురళీకృష్ణ కుటుంబీకులు ఒప్పుకోలేదు. అప్పుడు యువతి కుటుంబీకులే మరో రూ.50 వేలు ఇచ్చి ఇద్దరినీ పుణేకు పంపించారు. వీరికి  కొడుకు పుట్టిన తరవాత కొన్ని రోజులపాటు సజావుగానే ఉన్న మురళీకృష్ణ మళ్లీ యువతిని అక్కడి ఓ హోటల్‌లో వదిలేసి వచ్చేశాడు. దీంతో మళ్ళీ ఇరు కుటుంబాలకు చెందిన వారు పంచాయతీ పెట్టుకోవాల్సి వచ్చింది. తన కుమారుడికి ఘనంగా పెళ్ళి చేస్తేనే వాళ్ల కాపురాన్ని అంగీకరిస్తామని మురళీకృష్ణ కుటుంబీకులు చెప్పడంతో ఉంటున్న ఇంటిని అమ్మేసి, యువతి కుటుంబీకులు రూ.20 లక్షలు ఖర్చు పెట్టి ఘనంగా పెళ్ళి జరిపించారు. ఆపై కొన్ని రోజులకు  మురళీకృష్ణ మళ్లీ వేధింపులకు పాల్పడ్డాడు. పుట్టింటికి వచ్చిన యువతి రెండో సంతానానికి జన్మనిచ్చింది. అదనపు కట్నం కావాలని అత్తింటివారు ఆమెను వేధించడంతో మలక్‌పేట పోలీస్‌స్టేషన్‌లో   ఫిర్యాదు చేశారు. భార్య పై కక్షకట్టిన మురళీకృష్ణ... వివాహ సమయంలో తాము తీసుకున్న ఫోటోల్లోంచి యువతి ఫొటోలను సేకరించి  వాటితో పాటు ఆమె ఫోన్ నెంబర్‌నూ అశ్లీలవెబ్‌సైట్‌లో అప్‌లోడ్ చేశాడు. తద్వారా ఆమె వ్యక్తిత్వం మంచిది కాదని నిరూపించాలనేది ఆయన కుట్ర. కొందరి నుంచి ఫోన్లు రావడంతో అప్రమత్తమైన బాధితురాలు పోలీసులకు ఫిర్యాదు చేసింది. పరారైన మురళీకృష్ణ ఎట్టకేలకు చిక్కి జైలుకు చేరాడు.
  
 ప్రేమ పాపం ప్యార్ కియా తో మర్నా ఖాయం.  నిన్నటి ‘బాలికా వధు’ ప్రత్యూషా బెనర్జీ ఈ మోసానికే బలైంది. మొన్నటి నటి జియాఖాన్ కూడా ఆ మోసానికే ఉరేసుకొని ఉసురు తీసుకుంది. ఈ ఇద్దరికీ గ్లామర్ ప్రపంచపు మెరుగులు తెలుసు. ఆ మాయ గురించీ అవగాహన ఉంది. అక్కడ జరిగే దగా, పగలూ పరిచయమే. అయినా ప్రేమకు పడిపోయారు. పడి మోసపోయారు. తట్టుకోలేక ఇద్దరూ ఫ్యాన్‌కి ఉరిబిగించుకున్నారు. ప్రేమ పేరుతో వీళ్లను వంచించిందీ.. ప్రముఖులే. జియాఖాన్‌ను వంచించింది ప్రముఖ నటదంపతులు ఆదిత్యాపంచోలీ, జరీనా వాహబ్‌ల కొడుకు సూరజ్ పంచోలీ అయితే ప్రత్యూషా బెనర్జీని నమ్మించి మోసం చేసింది సీరియల్ ప్రొడ్యూసర్, ఈవెంట్స్ మేనేజర్ రాహుల్‌రాజ్ సింగ్. చనిపోయేటప్పటికీ ప్రత్యూషా బెనర్జీ గర్భిణి కూడా. అన్నీ తెలిసిన వాళ్లను అందరూ తెలిసిన వాళ్లే వంచిస్తుంటే ఇక సామాన్య ఆడపిల్లల పరిస్థితి ఇంకెంత ఘోరంగా ఉండొచ్చు? ఏ సంఖ్యలో ఈ నేరానికి బలవుతుండొచ్చు? మొన్నటికి మొన్న జరిగిన రీనా ఆత్మహత్యే ఇందుకు ఉదాహరణ. ప్రేమించి మొహం చాటేశాడన్న అవమానం, బాధ, వేదనతో డెల్ ఉద్యోగిని అయిన రీనా ఫ్యాన్‌కి ఉరేసుకొని ఆత్మహత్య చేసుకుంది.
  
  
 జోగినీ వ్యవస్థ
 నాగరిక సమాజాన్ని కూడా పట్టి పీడిస్తున్న దురాచారం జోగిని. ఇప్పుడు దీన్ని నేరంగా పరిగణిస్తున్నా - మహబూబ్‌నగర్, నిజామాబాద్ వంటి చోట్ల ఇంకా ఈ అనాచారం కొనసాగుతూనే ఉంది. ఈ నేరానికి మూలకారణం పేదరికం, సాంఘిక వ్యత్యాసాలే. వయసొచ్చిన ఆడపిల్లను దేవుడికి అంకితం చేయడం పేరుతో ఆమెను లెసైన్స్‌డ్ వేశ్యగా మార్చడం అన్నమాట. పల్లెల్లో ఈ నేరం బారిన పడి చాలామంది ఆడపిల్లల జీవితం నాశనమవుతోంది. దీన్ని రూపుమాపడానికి ప్రభుత్వాలు చట్టాలు తెచ్చినా, ఈ దురన్యాయం యథేచ్ఛగా రాజ్యమేలుతోంది.
 
 
 ట్రాఫికింగ్...  ప్రాస్టిట్యూషన్
 ‘పట్నంలో నీ బిడ్డకు మంచి పని ఉంది.. నెలకు పదిహేను వేల రూపాయల దాకా సంపాదించుకోవచ్చు... ఉండడానికి ఇల్లు, తిండి - అన్నీ వాళ్లే ఇస్తారు’ అంటూ  పట్నం పోయి బాగా డబ్బు సంపాదించుకున్న ఊరి కుర్రాడో, లేక ఆ ఊరి నడివయసు మహిళో పేదరికంలో మగ్గుతున్న కుటుంబాల్లో ఆశను రేకెత్తిస్తారు. అమ్మానాన్నలు ఆ ఇంటి ఆడపడచును వీళ్లతో పట్నం బస్ ఎక్కిస్తారు. ఆ పిల్ల పుణే రెడ్‌లైట్ ఏరియాలోనో, ముంబై కామాటిపురాలోనో.. కోల్‌కతా సోనాగచీలోనో తేలుతుంది. ఇవే - ట్రాఫికింగ్, వ్యభిచార నేరాలు. రెండూ ఒకదానికొకటి అనుసంధానమైన భూతాలు. ఈ రెండూ తెలుగు రాష్ట్రాలనే కాదు యావత్ భారతాన్ని పట్టిపీడిస్తున్న పిశాచాలు. వీటిని అరికట్టడానికి మన దగ్గరున్న చట్టాలకు కొదవలేదు. కానీ అమలు చేసే చిత్తశుద్ధే కరువు. అందుకే ఏటా వేలమంది ఆడపిల్లలు ఈ నేరం కోరలకి చిక్కి చీకటికూపాల్లో మగ్గుతున్నారు.
  
 సైబర్ క్రైమ్ ...టీచకుడి కథ
 పెరిగిన సాంకేతికత చూపిస్తున్న వికృతాల్లో సైబర్‌క్రైమ్ ఒకటి. మెయిల్స్, ఫేస్‌బుక్‌ను మారణాయుధాలుగా మలచుకొని రకరకాల రూపాల్లో నేరాలు చేస్తున్న వాళ్ల సంఖ్య తక్కువేమీ లేదు. ఒక ఉదాహరణ...గుంటూరు జిల్లా చిలకలూరిపేటకు చెందిన ఉపాధ్యాయుడు బాబూరావు ఫేస్‌బుక్ సహా ఇతర సామాజిక మాధ్యమాల్లో వివిధ రకాలైన ఉద్యోగాల పేరుతో ప్రకటనలు ఇచ్చాడు. అందులో తన ఈ-మెయిల్ ఐడీతో పాటు తన ఫోన్ నెంబర్ కూడా పొందుపర్చాడు. దరఖాస్తు చేసిన వారిలో యువతుల్ని, మహిళల్ని మాత్రమే ఎంచుకుంటాడు. వారి ఫోన్ నెంబర్, ఈ-మెయిల్ ఐడీలు సేకరించి ఉద్యోగాల సాకుతోనే చాటింగ్ చేశాడు. పరిచయం పెంచుకొని వారిని మాయజేస్తూ వ్యక్తిగత అంశాలతో పాటు అభ్యంతరకర, అశ్లీల సందేశాలూ పంపించాడు. కొన్నాళ్లకు తాను అడిగినంత ఇవ్వకపోతే  ఆ ‘చాటింగ్’ వివరాలను కుటుంబీకులకు చెప్తానంటూ బ్లాక్‌మెయిల్ మొదలెట్టాడు. అలా అందినంత మొత్తం బ్యాంకు ఖాతాల్లో జమ చేయించుకున్నాడు. బాబూరావు చేతిలో మోసపోయిన ఓ హైదరాబాద్ విద్యార్థిని సెంట్రల్ క్రైమ్ స్టేషన్‌లోని సైబర్‌క్రైమ్ పోలీసులకు ఫిర్యాదు చేయడంతో ఈ కీచక టీచర్ కటకటాల్లోకి చేరాడు.
  
 అసభ్యసందేశాలు
 గుంటూరుకు చెందిన సాయి, హైదరాబాద్‌కు చెందిన ఓ యువతి ఇద్దరూ స్నేహితులు. స్పర్థలు రావడంతో ఆ యువతిపై సాయి పగ పెంచుకున్నాడు. కక్షగట్టి వేధింపులు ప్రారంభించాడు. ఫేస్‌బుక్ ద్వారా దుర్భాషలాడుతూ సందేశాలు పెట్టడంతో పాటు అభ్యంతరకరమైన వ్యాఖ్యలు చేయడం మొదలుపెట్టాడు. విసుగు చెందిన ఆ యువతి పోలీసులను ఆశ్రయించింది.
  
 సైబర్ బుల్లీయింగ్
 సోషల్ నెటవర్క్ సిస్టమ్స్‌లో స్త్రీల మీద అసభ్యకరమైన కామెంట్లు చేయడం, వాళ్లతో అసభ్యంగా సంభాషించడం, అశ్లీల చిత్రాలు పంపడం వగైరా కూడా సైబర్ క్రైమ్ కిందకి వస్తాయి. ప్రముఖ స్త్రీవాది కవితాకృష్ణన్, ప్రముఖ జర్నలిస్ట్-రచయిత్రి సాగరికా ఘోష్ కూడా సైబర్ బుల్లీయింగ్ బారిన పడ్డారు. కవితాకృష్ణన్‌కైతే ఓ వ్యక్తి... ‘కండోమ్స్‌తో రమ్మంటావా? లేకుండా రమ్మంటావా?’ అని ఆమె ఫేస్‌బుక్‌లో కామెంట్ పెట్టాడు. అలాగే సాగరికా ఘోష్‌తో కూడా కొంతమంది... ‘నీ పదమూడేళ్ల కూతురు భలే ముద్దొస్తోంది...’ అంటూ అసభ్యంగా ఫేస్‌బుక్‌లో కామెంట్ చేశారు. ఈ ఇద్దరూ సమాజంలో చాలా పేరున్న మహిళలే. వాళ్లకూ సైబర్‌బుల్లీయింగ్ తప్పలేదు. ‘వాటినెలా ఎదుర్కోవాలో తెలిసినా పిల్లను స్కూల్‌కి పంపాలంటే గజగజ వణికిపోయాను’ అని వాపోయారు సాగరికా ఘోష్. ఇక మామూలు అమ్మాయిల పరిస్థితి ఏంటి మరి?
  
 షాపింగ్‌మాల్స్‌లోని ట్రయల్‌రూమ్స్‌లో...
 కేంద్ర మానవ వనరుల అభివృద్ధి శాఖ మంత్రి స్మృతీ ఇరానీ ఓ నగరంలో తన భర్తతో కలిసి పేరున్న పెద్ద షాపింగ్‌మాల్‌కి వెళ్లారు. తనకు నచ్చిన డ్రెసెస్‌ను ట్రై చేయడానికి ట్రయల్‌రూమ్‌లో అడుగుపెట్టారు. అయితే ఆ గదిలో కెమెరా ఉన్నట్టు ఆమెకు  అనుమానం వచ్చింది. బయటకు వచ్చి భర్తతో చెప్పి కంప్లయింట్ చేశారు. వెళ్లి చూస్తే నిజంగానే కెమెరాలున్నాయి. అంత పేరున్న మాల్‌లో... కేంద్ర మంత్రికే ఆ ఆగచాటు తప్పలేదంటే మిగిలిన చోట్ల సామాన్య మహిళలు ఇంకెన్ని అగచాట్లు పడాలో? అలా షాపింగ్‌మాల్స్‌లో ట్రయల్‌రూమ్స్‌లో కెమెరాలు ఉండడాన్ని కూడా ‘నిర్భయ చట్టం’ కింద నేరంగా పరిగణిస్తారు.
  
 ఈవ్‌టీజింగ్
 బస్‌స్టాప్స్, షాపింగ్ మాల్స్, పార్క్స్, సినిమాహాల్స్...ఏ పబ్లిక్ ప్లేస్‌లో అయినా కనిపిస్తోంది ఈవ్‌టీజింగ్. దీని భరతం పట్టడానికి ‘షీ టీమ్స్’ గస్తీ తిరుగుతున్నా కన్నుగప్పే ప్రయత్నాలూ జరుగుతున్నాయి. సెల్‌ఫోన్ల ద్వారా రహదారులపై మహిళల్ని, యువతుల్ని వేధిస్తున్నారు. ఈవ్‌టీజర్ల బారిపడుతున్నవారిలో అనేకమంది ప్రముఖులూ ఉంటున్నారు. ఈ మధ్యనే తన కారులో వెళ్తున్న అస్మిత అనే టీవీ కళాకారిణిని సయ్యద్ నూరుల్లా, ఇమ్రాన్ బిన్ మహ్మద్ అనే ఇద్దరు పోకిరీలు వెంబడించి వేధించారు. ఆమె ధైర్యంగా వారి చేష్టలను సెల్‌ఫోన్‌లో చిత్రీకరించి ఫేస్‌బుక్ ద్వారా ‘షీ టీమ్స్’కి  ఫిర్యాదు చేశారు. ఆ పోకీరీలు కటకటాలు లెక్కపెట్టారు. ఇలా ఈవ్‌టీజింగ్‌కు పాల్పడే వారి సంఖ్య వందల్లోనే ఉంటోంది.
  
 ప్రేమ పేరుతో వేధింపులు
 ప్రేమ అంటే.. ఇష్టపడ్డ వ్యక్తిని గౌరవించడం. ఆమెకు ఏ కష్టం కలగకుండా చూసుకోవడం. కానీ ఈ రోజు ప్రేమ నిర్వచనం మారిపోయింది. తన ఇష్టాన్ని మాత్రమే పరిగణనలోకి తీసుకొని ఇష్టపడమంటూ ఆమెను వేధించడమే ప్రేమ పరమార్థంగా మారింది. ఇష్టం లేదని చెప్తే యాసిడ్‌తో దాడి చేయడం పరిపాటి అయింది. దీనికి తోడు సినిమాల ప్రభావం నేటి యువత మీద విపరీతంగా పడుతోంది. కొన్ని సినిమాలు అసలే ఉన్మాదంగా ఉంటున్న యువతను తమ దారి సరైనదే అని ప్రోత్సహిస్తున్నట్టుగా చెప్తున్నాయి. ఒక సినిమాలో కథానాయికను ప్రేమిస్తున్నానంటే ఆమెకు ఇష్టం లేకపోయినా ఆమె వెంటపడుతుంటాడు హీరో. ఇదో హీరోయిక్ స్టంట్‌లా భావించి మగపిల్లలంతా ఆ దారినే ఆదర్శంగా తీసుకునే ప్రమాదం ఉంది. అమ్మాయిలూ తమ వెంట అబ్బాయిలు అలా పడితేనే గొప్ప అనే భావనలోకి వెళ్లే అవకాశం ఉంది. ఎందుకంటే సినిమాకున్న ప్రభావం ఎలాంటిదో వేరేగా చెప్పక్కర్లేదు. వరంగల్‌లో స్వప్నిక మీద యాసిడ్ దాడి అలాంటి ఉన్మాది చర్యే. అందుకే ఇలాంటి సున్నిత అంశాల పట్ల కాస్త బాధ్యతగా వ్యవహరిస్తే బాగుటుంది ఏ మాధ్యమమైనా. ప్రేమ పేరుతో వెంటపడి వేధించే ‘ఆర్య’ లాంటి యాంటీహీరోలు రియల్‌లైఫ్‌లోనూ  కోకొల్లలు. హైదరాబాద్‌లోని ఫిల్మ్‌నగర్ రోడ్ నెం.9లోని అంబేద్కర్‌నగర్ బస్తీలో నివసించే ఓ యువతి పోలీస్ కానిస్టేబుల్ ఉద్యోగం పొందాలనే లక్ష్యంతో కోచింగ్ తీసుకుంటోంది. అదే బస్తీలో ఉండే శివ అనే జులాయి ఆమెని వెంబడిస్తూ ప్రేమించాలని వేధించాడు. ఆమె రాకపోకల్ని గమనించి, తప్పతాగి అసభ్యంగా ప్రవర్తించాడు. దీంతో విసుగు చెందిన ఆ యువతి పోలీసులకు ఫిర్యాదు చేసింది.
 
 రేప్
 ఏ రోజు ఏ పత్రిక తిరగేసినా.. ఏ టీవీ చానల్ పెట్టినా స్త్రీల మీద లైంగిక దాడి వార్తలు సర్వసాధారణంగా కనిపిస్తున్నాయి. దేశంలో నిర్భయ ఘటన జరిగిన తర్వాత వచ్చిన నిరసన.. తద్వారా ఏర్పడిన నిర్భయ చట్టం.. ఇక అమ్మాయి మానప్రాణాలను కాపాడడంలో కంచుకవచంలా ఉంటుందని ఆశపడింది దేశం. కానీ అది వట్టి అత్యాశే అని నిరూపిస్తున్నాయి - ఇప్పటికీ జరుగుతున్న అత్యాచార సంఘటనలు. నిర్భయ తర్వాత ఢిల్లీలోనే అయిదేళ్ల గుడియా మీద ఇంకో ఘోరం జరిగింది. తర్వాత హైదరాబాద్‌లో క్యాబ్ డ్రైవర్ల చేతిలో లైంగికదాడికి బలైన సాఫ్ట్‌వేర్ ఉద్యోగిని అభయ కేస్ బయటపడింది.ముంబైలో సాఫ్ట్‌వేర్ ఉద్యోగం చేస్తున్న మచిలీపట్నం అమ్మాయి అనూహ్యను ముంబైలో టాక్సీ డ్రైవర్ రేప్ చేసి చంపేసిన వైనం ఇంకా భయపెడుతూనే ఉంది. ఇవన్నీ ప్రసార మాధ్యమాల దృష్టికి చిక్కిన నేరాలు. చిక్కకుండా భీతిగొల్పుతున్నవెన్నో!
  
  
 మ్యారిటల్ రేప్
 వివాహబంధంలో ఉన్న భర్త... తన భార్య మానసిక, శారీరక పరిస్థితి తెలుసుకోకుండా ఆమెను ఇబ్బంది పెట్టడం, బలవంతం చేయడం కూడా క్రూయల్టీ కింద పరిగణించే నేరమే. నిజానికి దీన్ని  జస్టిస్ వర్మ కమిటీ మ్యారిటల్‌రేప్‌గా పరిగణించాలని సూచించింది. కానీ దీనివల్ల భారతీయ వివాహ, కుటుంబ వ్యవస్థలు బీటలు వారుతాయని రాజకీయ పక్షాలు ఆమోదించలేదు. కానీ విడాకులు తీసుకున్న భార్యను, లేదా భర్త నుంచి విడిగా ఉంటున్న ఇల్లాలిని భర్త బలవంతం చేస్తే రేప్‌గా పరిగణించాలని మాత్రం నిర్ణయించారు. అయితే ఇంకా దీనిమీద వాదోపవాదాలు, చర్చలు కొనసాగుతూనే ఉన్నాయి.
  
 క్రైమ్ అండ్ పనిష్‌మెంట్
 గృహ హింస... డొమెస్టిక్ వయొలెన్స్ యాక్ట్‌లోని సెక్షన్ 31 కింద గృహహింస బాధితులకు ఈ చట్టం కొన్ని ఉపశమనాలను సూచిస్తోంది. వీటిలో రక్షణ, నివాస, ఆర్థిక ఉపశమనాలతోపాటు నష్టపరిహారం, పిల్లల కస్టడీ ఉత్తర్వులుంటాయి. ఈ ఉత్తర్వులను ఉల్లంఘిస్తే ఏడాది జైలుశిక్ష, 20 వేల జరిమానా.
  
 వరకట్నం... 1961 నాటి వరకట్నం నిషేధ చట్టం కింద వరకట్నం అడగడం, ఇవ్వడం రెండూ నేరాలే. కట్నం కోసం వేధిస్తే సెక్షన్ 498 (ఎ) కింద నేరస్థులకు ఏడేళ్లు జైలుశిక్ష ఉంటుంది. అలాగే కట్నం కింద తీసుకున్న డబ్బుమొత్తాన్ని తిరిగి అమ్మాయి వాళ్లకు చెల్లించాలి.
  
 బాల్యవివాహాలు... ఈ నేరానికి పాల్పడిన వాళ్లకు బాల్యవివాహాల నిరోధక చట్టం-1929 ప్రకారం లక్ష రూపాయల జరిమానా.
  
 జోగినీ వ్యవస్థ...  ఆంధ్రప్రదేశ్ దేవదాసీ నిరోధక చట్టం కిందకు వస్తుంది. రాష్ట్ర విభజన తర్వాత తెలంగాణ  కూడా దీన్ని అమలు చేస్తోంది.
  
 ట్రాఫికింగ్ అండ్ ప్రాస్టిట్యూషన్...  ఇమ్మోరల్ ట్రాఫిక్ ప్రివెన్షన్ యాక్ట్ కింద ఇది నేరం. అయితే 370 (ఎ) నిర్భయ చట్టం కింద కొత్తగా దీనికి కొన్ని సవరణలు చేశారు. వ్యభిచారం కోసం అమ్మాయిల అక్రమ రవాణాను 372, 373 సెక్షన్ల కింద నేరాలుగా పరిగణిస్తారు. నేరస్థులకు పదేళ్ల వరకు జైలుశిక్ష ఉంటుంది. అలాగే వ్యభిచార గృహ నిర్వాహకులు, అమ్మాయిలను సరఫరా చేసేవారు, వ్యభిచార గృహాల చిరునామా చెప్పేవారికి అయిదేళ్ల జైలుశిక్ష ఉంటుంది.
  
 పీసీ అండ్ పీఎన్‌డీటీ... ‘పీసీ అండ్ పీఎన్‌డీటీ (ప్రీ కన్‌సెప్షన్ అండ్ ప్రీ నాటల్ డయాగ్నస్టిక్ టెక్నిక్స్) యాక్ట్ -2002’ ప్రకారం లింగనిర్ధారణ పరీక్షలు నిర్వహించడం నేరం. ఇలాంటి పరీక్షలు చేయమని కోరినవారు, సూచించిన వైద్యులు, పరీక్షలు నిర్వహించిన వైద్యులు - అందరూ శిక్షార్హులే.
  
 సైబర్‌క్రైమ్... ఇన్ఫర్మేషన్ టెక్నాలజీ యాక్ట్ (2010) కిందకు వస్తుంది ఈ నేరం.  టెక్నాలజీని  ఆసరాగా చేసుకొని మహిళల మాన మర్యాదలకు భంగం కలిగించే ఏ చర్య అయినా సైబర్‌క్రైమ్ కిందకే వస్తుంది. ఈ నేరస్థులకు లక్షరూపాయల జరిమానా, రెండు నుంచి అయిదేళ్ల దాకా జైలు శిక్ష.
  
 వర్క్‌ప్లేస్ హెరాస్‌మెంట్.. 354, 509 సెక్షన్ల కింద నేర తీవ్రతను బట్టి ఏడాది నుంచి అయిదేళ్ల జైలుశిక్ష.
        
 ఈవ్‌టీజింగ్... ఐపీసీ సెక్షన్ 294 కింద ఈవ్‌టీజర్లకు ఆరు నెలల నుంచి ఏడాది దాకా జైలుశిక్ష.
  
 వైట్‌కాలర్ క్రైమ్... నిర్భయ చట్టం లోని 354వ సెక్షన్ కింద ఇదీ నేరమే.
  
 రేప్... నిర్భయ చట్టం సెక్షన్లు 376 ఎ, బి, సి, డి, ఇ కింద ఘోరమైన నేరం ఇది. నేర తీవ్రతను బట్టి 376 ఎ, ఇ సెక్షన్ల కిందయితే నేరస్తుడికి 20 ఏళ్ల జైలు శిక్ష, యావజ్జీవ కారాగారం, ఉరిశిక్ష, 376 బి,సి, డి కింద అయితే 20 ఏళ్ల జైలు, యావజ్జీవకాగారం.
  
 నమ్మకద్రోహం...  ఐపీసీ 406, 420 సెక్షన్ల కింద మోసం, నయవంచన, నమ్మకద్రోహం మొదలైన వాటికి ఏడేళ్ల వరకు జైలుశిక్ష.
  
  
 వైట్ కాలర్ క్రైమ్స్
 పెద ్దమనుషుల్లా ఉంటూ కిరాతకాలు చేసేవాళ్లను పట్టుకోవడం, వాళ్ల పనులను నేరాలుగా నిరూపించడం చాలా కష్టం. ఇలాంటి వాళ్లు తమ వృత్తినే నేరానికి వేదికగా చేసుకుంటారు. హైదరాబాద్‌లోని ఓ డాక్టర్ నిర్వాకం ఇందుకు ఒక ఉదాహరణ. ఇక్కడి లాల్‌బజార్‌లో ఉండే 20 ఏళ్ల యువతి ఓ రోజు చర్మ వ్యాధి చికిత్స కోసం స్థానికంగా ఉన్న ఆస్పత్రికి వెళ్లింది. ఇంజెక్షన్ ఇస్తానంటూ బెడ్ మీద పడుకోమన్నాడు డాక్టర్. ఇంజెక్షన్ ఇచ్చిన వెంటనే ఆమె మత్తులోకి జారుకుంది. తన కళ్ల ముందు జరుగుతున్న సంఘటనను గుర్తిస్తున్నప్పటికీ... ఏమీ చేయలేని అచేతన స్థితికి చేరింది. కొద్దిసేపటికి శక్తిని కూడదీసుకుని తన స్నేహితులకి ఫోన్‌చేసి ఆస్పత్రికి రప్పించింది. వాళ్లు వెళ్లే సరికి ఆస్పత్రి కుర్చీలో నీరసంగా పడి ఉన్న ఆ యువతి డాక్టర్ తనతో అసభ్యంగా ప్రవర్తించిన విషయాన్ని వివరించింది. డాక్టర్ మాత్రం ఆమె నీరసంగా ఉండటంతో ఇంజెక్షన్ ఇచ్చిన వెంటనే నిస్సత్తువకు లోనైందంటూ బుకాయించాడు. బాధితులు మాత్రం వైద్యుడిపై తిరుమలగిరి పోలీసులకు ఫిర్యాదు చేయడంతో కేసు నమోదైంది.
 
 
 వర్క్‌ప్లేస్ హెరాస్‌మెంట్
 స్త్రీలకు ఇంట్లో, బయటా భద్రత కరవైంది అనడానికి ఆఫీసుల్లో వారిపై జరుగుతున్న నేరాలే నిదర్శనం. నేరాల బారినపడకుండా ఉద్యోగిని తనను తాను కాపాడుకుంటూ విధినిర్వహణలోనూ తన సామర్థ్యాన్ని రుజువు చేసుకుంటూ విపరీతమైన ఒత్తిడికి గురికావాల్సి వస్తోంది. ఆఫీస్‌లో అలాంటి అఫెన్స్‌ను ఎదుర్కొన్న ఒక ఉద్యోగిని గురించి చెప్పుకుందాం... హైదరాబాద్‌కు చెందిన ఓ మహిళ ప్రముఖ శాఖకు చెందిన కార్యాలయంలో అటెండర్‌గా పని చేస్తోంది. ఆమె భర్త అదే శాఖలో పని చేస్తూ చనిపోవడంతో కారుణ్య నియామకం కింద ఉద్యోగం వచ్చింది. అదే శాఖకు చెందిన ఓ ఉన్నతాధికారి ఈమె పని చేస్తున్న కార్యాలయం ల్యాండ్‌లైన్‌కు ఫోన్ చేసి తన కోరిక తీరిస్తే... అండగా ఉండటంతో పాటు కుమారుడికి ఉద్యోగం ఇస్తానంటూ వేధింపులు మొదలెట్టాడు. ఆమె తిరస్కరించడంతో మరునాడే సుదూర ప్రాంతానికి బదిలీ చేశాడు. దీంతో బాధితురాలు భయపడి, దీర్ఘకాలిక సెల వుపై వెళ్లింది. సెలవు ముగిశాక తిరిగి ఉద్యోగంలో చేరాల్సి వచ్చింది. అయితే చేరితే ఏం జరుగుతుందో అని భయపడిన బాధితురాలు పోలీసులను ఆశ్రయించింది. స్పందించిన పోలీసుల వేధింపులకు పాల్పడిన అధికారిపై ‘నిర్భయ చట్టం’ కింద కేసు నమోదు చేశారు.


 బిహార్: బిహార్ లో ఓ మహిళా పోలీస్ ఆటో డ్రైవర్ దుమ్ము దులిపింది. ఈవ్ టీజింగ్కు పాల్పడిన ఓ ఆటో డ్రైవర్ను మెడపెట్టి జీపులో పడేసింది. ఇప్పుడా వీడియో అందరినీ ఆకర్షిస్తోంది. అసలే దేశంలో మహిళపై ఆకృత్యాలు ఎక్కువవుతున్నాయని పొద్దున లేచినప్పటి నుంచి చదవలేనన్న వార్తలు దర్శనమిస్తున్నాయి. వీటికి అనుగుణంగానే ఎప్పటికప్పుడు కొత్తకొత్త చట్టాలు పుట్టుకొస్తున్నాయి. ఎన్నో అవగాహన కార్యక్రమాలు ప్రభుత్వాలు, స్వచ్ఛంద సంస్థలు.. పలు విద్యార్థి సంఘాలు కల్పిస్తూనే ఉన్నాయి. అయినా, కూడా కొందరిలో మార్పు మాత్రం రావడం లేదు.
 
 ఈవ్ టీజింగ్ అంటే ఒకప్పుడు కాలేజీలకే పరిమితం కాగా.. ఇప్పుడవి రచ్చకెక్కి వీర విహారం చేస్తున్న విషయం తెలిసిందే. ముఖ్యంగా, ప్రజా రవాణ వ్యవస్థలో ఇవి ఈ మధ్య ఎక్కువవుతున్నాయి. ఈ నేపథ్యంలోనే ఎక్కడికక్కడా మహిళా పోలీసుల మోహరింపు కూడా భారీగానే ఉంటుంది. ఈ విషయం తెలిసి కూడా బిహార్లోని పాట్నాలో ఈ ఆటో డ్రైవర్ రెచ్చిపోయాడు. ఓ అమ్మాయిపట్ల ఈవ్ టీజింగ్కు పాల్పడ్డాడు. అది కాస్త వెళ్లి ఓ మహిళా పోలీసు కంట్లో పడింది. దాంతో ఆమె ఊరుకుంటుందా.. అతగాడి దుమ్ముదులిపింది. నడిరోడ్డుపైనే అపర కాలికలా మారి దెబ్బమీదదెబ్బ కొడుతూ నడవరా స్టేషన్కు అంటూ మెడపట్టి జీపులోకి ఎక్కించింది.


 ► బాధిత మహిళలు, యువతులు కాల్ చేస్తే కేసు నమోదు
 ► వైద్యం, న్యాయం, పునరావాసం కూడా..
 ► వీడియో కాన్ఫరెన్స్ ద్వారానే కోర్టులో హాజరు
 ► వేధింపులకు గురయ్యే పిల్లలకూ ఉచిత సేవలు
 ► సమాజ సేవకు మేముసైతం అంటున్న నగర పోలీసులు
  
  
 సాక్షి, సిటీబ్యూరో:  నగర పోలీసులు అతివల భద్రతకు అత్యంత ప్రాధాన్యమిస్తున్నారు. ఇప్పటికే ఈవ్‌టీజింగ్, ర్యాగింగ్ చేసే వారి ఆట కట్టించేందుకు షీ టీమ్స్ బృందాలను రంగంలోకి దింపిన వీరు.. ఒత్తిడులు, వేధింపులకు గురవుతున్న మహిళలకు మేమున్నామంటూ 24 గంటలు.. ఏడు రోజుల(24/7) ‘భరోసా’ ఇచ్చే కార్యక్రమానికి శ్రీకారం చుట్టారు. బాధితులైన, వేధింపులకు గురవుతున్న మహిళలు, పిల్లలు ఫోన్ ద్వారా ఫిర్యాదు చేస్తే క్షణాల్లో కేసు నమోదు మొదలు... న్యాయం జరిగే వరకు అంతా వీరే చూసుకుంటారు. వీరికి కావాల్సిన వైద్య ఆరోగ్య సేవలు, న్యాయ సేవలు, పునరావాస సౌకర్యం, మానసిక ఒత్తిడి లోనైన వారికి నిపుణుల కౌన్సెలింగ్, శిక్షణతో పాటు వారికి ఆత్మస్థైర్యం కలిగించే దిశగా భరోసా కల్పిస్తున్నారు.
 
 సైఫాబాద్‌లోని హకా భవన్‌లో అంతర్జాతీయ స్థాయి ప్రమాణాలతో ఏర్పాటుచేసిన భరోసా కేంద్రం శనివారం నుంచి అందుబాటులోకి వచ్చింది. ఈ ప్రారంభోత్సవంలో  హోంమంత్రి నాయిని నర్సింహారెడ్డి, డీజీపీ అనురాగ్‌శర్మ, నగర పోలీసు కమిషనర్ మహేందర్‌రెడ్డి, క్రైమ్స్ అండ్ సిట్ అదనపు పోలీసు కమిషనర్ స్వాతిలక్రా, అన్ని జోన్ల డీసీపీలు పాల్గొన్నారు.
 
  ఏకీకృత సేవలు...
  గృహహింస, కార్యాలయాల్లో వేధింపులు, ఫోన్‌లో అసభ్య సందేశాలు, అత్యాచార బాధితులు, ఒత్తిడిలో ఉన్న మహిళలు 100కి కాల్ చేస్తే ఆ కాల్‌ను భరోసా కేంద్రానికి అనుసంధానిస్తారు. ఆ కాల్‌ను రిసీవ్ చేసుకున్న ఆ సెంటర్ సోషియో కౌన్సెలర్లు(కేస్ వర్కర్లు) బాధితురాలితో మాట్లాడి సమగ్ర కేసు వివరాలను ప్రత్యేక సాఫ్ట్‌వేర్‌లో పొందుపరుస్తారు. సంబంధిత ఠాణా అధికారులకు ఆ వివరాలను పంపించి కేసు నమోదు చేసి ప్రాథమిక విచారణలో నిజనిజాలు తెలుసుకుంటారు. బాధితురాలి పరిస్థితిని బట్టి వైద్య సహాయం అందిస్తారు. ఇందుకోసం కేంద్రంలో ప్రత్యేకంగా మెడికల్ ఎగ్జామినేషన్ రూమ్‌ను ఏర్పాటుచేశారు.
 
 వేధింపులకు గురైన మహిళలకు కేంద్రంలో ప్రాథమిక వైద్య పరీక్షలు నిర్వహించిన తర్వాత వారికి మెరుగైన చికిత్స కావాలనుకుంటే సమీపంలోని ఆస్పత్రికి రెఫర్ చేస్తారు. ఇందుకోసం భరోసా అంబులెన్స్ వెహికల్‌ను ఉపయోగిస్తారు. శారీరకంగా, మానసికంగా కోలుకునేందుకు బాధితులకు కౌన్సెలింగ్ ఇస్తారు. వారి అవసరాలను బట్టి పునరావాసం కల్పించడంతో పాటు ఉపాధి కల్పించే ప్రయత్నం చేస్తారు. కేసు నమోదైన దగ్గరి నుంచి కోర్టులో సాక్ష్యాలు ప్రవేశపెట్టేంత వరకు పోలీసులతో పాటు బాధితురాలికి న్యాయం జరిగే వరకు న్యాయాధికారులు చూసుకుంటారు. ఈ సేవలన్నీ ఉచితంగానే అందేలా భరోసా సిబ్బంది చూసుకుంటుంది. ఇప్పటికే మార్చి 8న జ్ట్టిఞ://ఠీఠీఠీ.ఛజ్చిటౌట్చజిడఛీఞౌజీఛ్ఛి.ౌటజ ను ప్రారంభించారు.
 
 
  వీడియో కాన్ఫరెన్స్ సౌకర్యం...
  గృహహింసకు గురైన మహిళలు, అత్యాచారం, వేధింపులకు గురైన యువతులు కోర్టుకు వెళ్లకుండానే వారి రికార్డు స్టేట్‌మెంట్ అయ్యేలా భరోసా నిర్వాహకులు ఏర్పాట్లు చేశారు. ఈ కేంద్రంలో ఏర్పాటుచేసిన వీడియో కాన్ఫరెన్స్ ద్వారా కోర్టుకు తమ వాదనను వినిపించేలా ఏర్పాట్లు చేశారు. దేశంలోనే ఈ తొలి భరోసా సెంటర్ ఏర్పాటులో నగర పోలీసు కమిషనర్ మహేందర్ రెడ్డి, నగర క్రైమ్స్ అండ్ సిట్ అదనపు పోలీసు కమిషనర్ స్వాతిలక్రా కీలకపాత్ర పోషించారు.


 లక్నో: సోదరిని వేధించిన16 ఏళ్ల  టీనేజర్ ను ఆమె అన్నయ్య గొడ్డలితో నరికి చంపాడు. ఈ ఘటన ఉత్తర ప్రదేశ్ లో శనివారం  చోటు చేసుకుంది.
 
 పోలీసులు తెలిపిన వివరాల ప్రకారం.. బల్దియా జిల్లాలోని బన్స్ దియా నగర పంచాయతీకి చెందిన 16 ఏళ్ల టీనేజర్ గత కొద్ది రోజులుగా అదే ప్రాంతానికి చెందిన ఓ అమ్మాయిని వేధిస్తున్నాడు. విషయం తెలుసుకుని ఆగ్రహించిన అమ్మాయి అన్నయ్య ఆ కుర్రాడిని గొడ్డలితోనరికి చంపాడు. పోలీసులు కేసు నమోదు చేసుకుని నిందితుడిని అరెస్ట్ చేశారు.
  
  
  


 
 మై డియర్ మమ్మీ అండ్ డాడీ...
 ఇంట్లో టీనేజ్ అబ్బాయి ఉంటే బీ కేర్‌ఫుల్.
 ఇంట్లో టీనేజ్ అమ్మాయి ఉంటే బహు కేర్‌ఫుల్.
 ఈవ్ టీజింగ్ (ఆడపిల్లల్ని ఏడిపించడం)
 స్టాకింగ్ (ఆడపిల్లల వెంట పడడం)
 సినిమాల్లో చూడ్డానికి బాగానే ఉంటాయి కానీ...
 సీసీ కెమెరాల్లో పడితే మాత్రం లైఫ్ ‘వి’చిత్రం అయిపోతుంది.
 పేరెంట్స్‌కి చిత్రహింస అయిపోతుంది. 
 అమ్మాయిల్ని అలవాటుగా వేధించేవాళ్ల మీద
 రౌడీషీట్ ఓపెన్ చెయ్యాలని చట్టసభల్లో చర్చ మొదలైంది!
 అదే జరిగితే...
 ఈవ్ టీజర్లకు రేపు పాస్‌పోర్టులు రావు. ఉద్యోగాలు రావు.
 సమాజం మొత్తానికీ ‘టార్గెట్’ అయిపోతారు!
 రీల్ లైఫ్‌లో ఈవ్ టీజింగ్... ఆకతాయిగా, అల్లరిగా, చిల్లరగా...
 అతిగా, వింతగా, విడ్డూరంగా ఉన్నా... అదేంటో..!
 మమ్మీ డాడీలు... సన్‌లు, డాటర్లు ఎంజాయ్ చేస్తున్నారు.
 రియల్ లైఫ్‌లో అలా ఉండదు.
 అర్జెంటుగా అలెర్ట్ కాకపోతే డేంజర్ లైట్ వెలిగినట్లే.
 ఎందుకంటే...
 వారానికి, నెలకి, సంవత్సరానికి..
 అమ్మాయి పడినా పడకపోయినా...
 అబ్బాయికి మాత్రం కనీసం ఒక రోజు నుంచి మూడేళ్ల వరకు
 జైలు శిక్ష పడడం ఖాయం.
 రాపోలు తిరుపతమ్మ మాచర్లలోని ఓ కళాశాలలో ఇంటర్ చదువుతోంది. ఆకతాయిల వేధింపులు తట్టుకోలేక ఉరేసుకుని ఇటీవల ఆత్మహత్య చేసుకుంది. కాలేజీకి బస్సులో వెళుతున్న సమయంలో అదే బస్సులో ప్రయాణించే ఆరుగురు సహ విద్యార్థులు తనను నిత్యం వేధిస్తున్నారని, వారి బెదిరింపులను తట్టుకోలేక ఆత్మహత్య చేసుకుంటున్నానని, మూడు పేజీల లేఖ రాసి మరీ చనిపోయింది. ఆ లేఖలో తనను వేధింపులకు గురిచేసిన వారి వివరాలను రాయడమే కాక వారిని ఏ విధంగా చంపాలో కూడా వివరించింది. అంతగా ఆ అమ్మాయిని టార్చర్ పెట్టారు వాళ్లు! పొలం నుండి వచ్చిన తల్లిదండ్రులు ఫ్యానుకు వేలాడుతున్న తిరుపతమ్మను చూసి కన్నీరుమున్నీరయ్యారు.
 ♦ ఆకతాయి వేధింపులు తాళలేక భార్గవి అనే పదవ తరగతి విద్యార్థిని కిరోసిన్ పోసుకొని, తనను తాను తగలబెట్టుకుంది. నల్లగొండ జిల్లాలో ఈ దారుణం జరిగింది. సహ విద్యార్థి ప్రేమించ మని వేధిస్తుండటంతో ఆత్మహత్య చేసుకుంది.
 ♦ తన ప్రేమను నిరాకరించిందనే ఉన్మాదం... రెండేళ్లుగా ఉన్న పరిచయాన్ని పట్టించుకోలేదనే ఆగ్రహం.. తనకు దక్కకపోతే ఇక బతకొద్దన్న రాక్షసత్వం కలిసి ఓ ఉన్మాది... ప్రేమించిన యువతి గొంతు కోయడానికి ప్రయత్నించాడు. బ్లేడుతో విచక్షణారహితంగా దాడి చేశాడు. ఆ యువతి కేకలు వేయడంతో పారిపోవడానికి ప్రయత్నించాడు. గ్రామస్తులు ఆ ఉన్మాదిని పట్టుకుని పోలీసులకు అప్పగించారు. నల్లగొండ జిల్లా నాంపల్లి మండలం బండ్లగూడెంలో ఇటీవల ఈ ఘటన జరిగింది.
 ♦ నలుగురు వ్యక్తులు.. అందులో మహబూబ్‌నగర్‌కి చెందిన 50 ఏళ్ల ఓ వ్యక్తి. ఈ నలుగురు ఒకే రోజు బస్‌స్టాప్‌లో రెడ్‌హ్యాండెడ్‌గా సైబరాబాద్ షీ టీమ్స్‌కు ఈవ్ టీజింగ్ చేస్తూ దొరికిపోయారు. ఆరామ్‌ఘర్ ఎక్స్ రోడ్స్ మైలార్‌దేవ్‌పల్లి పోలీసు స్టేషన్ పరిధిలో ఇటీవల ఈ సంఘటన. ఆ వ్యాపారి అరామ్‌ఘర్ ఎక్స్ రోడ్స్‌కి  ఏదో పనిమీద వచ్చాడు. కూకట్‌పల్లికి వెళ్లే బస్సు కోసం ఎదురుచూస్తున్నాడు. అక్కడే ఉన్న ఓ యువతి పట్ల అసభ్యకరంగా ప్రవర్తించడం మొదలుపెట్టాడు. వెంటనే యాక్షన్ తీసుకున్న ఆ యువతి  అతన్ని అరెస్ట్ చేసి కస్టడీలోకి తీసుకుంది. ఆమె షీ టీమ్ సభ్యురాలు. 
 ♦ పోకిరీలకు చెలగాటం... ఆడవాళ్లకు ప్రాణసంకటం... ఈవ్ టీజింగ్! ఇదొక సామాజిక బెడదగా మారింది. ఒకప్పుడు ఈ ధోరణి నగరాల్లోనే ఎక్కువగా ఉండేది. ఇప్పుడిది చిన్న చిన్న పట్టణాలకు, చివరకు పల్లెలకూ పాకింది. ప్రభుత్వాలు ఉన్నాయి. చట్టాలు ఉన్నాయి. చట్టాలను అమలు చేసే కోర్టులూ, పోలీసు యంత్రాంగమూ ఉన్నాయి. అయినా, మన సమాజంలో ఈవ్ టీజింగ్ ఏమాత్రం తగ్గకపోగా మరింతగా వేళ్లూనుకుంటోంది. వయసు చాపల్యం ఒకవైపు, సినిమాల ప్రోద్బలం మరోవైపు కుర్రాళ్లను శతమర్కటాలుగా మార్చేస్తున్నాయి.
 నాన్‌స్టాప్ సతాయింపు!
 బస్టాపులు, కిక్కిరిసిన సిటీబస్సులు, రద్దీగా ఉండే బజార్లు, షాపింగ్ మాల్స్, సినిమా హాల్స్... ఇవన్నీ పోకిరీల అడ్డాలే. ఇలాంటి ప్రదేశాల్లో మహిళలకు బొత్తిగా భద్రత లేకుండా పోతోంది. వెకిలి చూపులు... అసభ్యమైన మాటలు... ఇంకా చొరవ చేసి శరీరాన్ని తాకే ప్రయత్నాలు... ఇలాంటి నీచ నికృష్ట వికృత చేష్టలు మహిళలకు మనశ్శాంతి కరువు చేస్తున్నాయి. జనసమ్మర్దం ఎక్కువగా ఉండే బహిరంగ ప్రదేశాలు మాత్రమేనా... చివరకు స్కూళ్లు, కాలేజీలు, యూనివర్సిటీల్లోనూ ఇదే తతంగం. ఇదంతా ఇక్కడితో సరిపోతుందా..? ఇంకొందరు మరీ వికృత మనస్కులు ఉంటారు. ప్రేమా దోమా అంటూ వెంటపడతారు. ఇంటి చుట్టూ చక్కర్లు కొడతారు. మొబైల్ నంబర్లు, ఫేస్‌బుక్, ఈ-మెయిల్ ఐడీలు సంపాదిస్తారు. వద్దు వద్దని వారిస్తున్నా కంటికి కునుకు పట్టనివ్వనంతగా నాన్‌స్టాప్‌గా సతాయిస్తారు.
 
     ♦ ఈవ్ టీజింగ్‌కి గురవుతున్న వాళ్లలో 98 శాతం మంది చదువులో రాణించలేకపోతున్నారనీ,  తాము ఏర్పరచుకున్న భవిష్యత్ లక్ష్యాలను సాధించలేకపోతున్నారని మానసిక చికిత్సా నిపుణులు చెబుతున్నారు.
  ఢిల్లీ కోర్టు అక్షింతలు
 ‘‘ఈవ్ టీజింగ్ సామాజిక బెడదగా మారింది... ఈ దుర్మార్గం వల్ల మహిళల జీవించే హక్కుకు భంగం కలుగుతోంది’’ అంటూ ఢిల్లీ కోర్టు ఒకటి ఇటీవలే ఆందోళన వ్యక్తం చేసింది. ఈ అఘాయిత్యాలను అరికట్టలేని పోలీసు యంత్రాంగంపైన అక్షింతలు వేసింది. ఇలాంటి వ్యవహారాల్లో అక్షింతలు వేయడం మన కోర్టులకు ఎంతగా పరిపాటో... సామాజిక సమస్యలపై మొద్దునిద్ర వీడకపోవడం మన ప్రభుత్వాలకూ అంతే పరిపాటి.
  రెండు రోజుల క్రితమే వరంగల్ (తూర్పు) ఎమ్మెల్యే కొండా సురేఖ ఈవ్ టీజింగ్ సమస్యను తెలంగాణా అసెంబ్లీలో లేవనెత్తారు. ఈవ్ టీజింగ్‌ను నిరోధించడానికి, నిర్మూలించడానికి అవసరమైన సూచనలు చేశారు. సలహాలు ఇచ్చారు. వీటిల్లో ఇప్పటికీ షీ టీమ్ కొన్నిటిని పాటిస్తోంది. మరికొన్నిటిని అమలు చేయబోతోంది.
 ♦ ఈవ్ టీజింగ్‌కి, స్టాకింగ్‌కి పాల్పడే వాళ్లకు ముందే చట్టపరంగా అడ్డుకట్ట వెయ్యకపోతే మున్ముందు మహిళలపై జరిగే నేరాలను నిరోధించడం కష్టం అవుతుందని ‘నేషనల్ క్రైమ్ రికార్డ్స్ బ్యూరో’ తన తాజా నివేదికలో హెచ్చరించింది.
 మారే వరకు హాజరు తప్పదు
 ఈవ్‌టీజింగ్ కేసులో అరెస్టయిన వారి మీద నిఘా ఉంటుంది. వారం వారం పోలీస్‌స్టేషన్‌కు వచ్చి హాజరు వేయించుకోవాలి. వారిలో పరివర్తన వచ్చినట్లు విశ్వాసం కలిగేంత వరకు ఇది కొనసాగుతుంది. మూడు కేసుల్లో అయితే ప్రతిరోజూ హాజరు వేయించుకోవాల్సిన నియమాన్ని పెట్టాం. సాధారణంగా 99.9 శాతం మంది ఒక దఫా అరెస్టు, కేసు పెట్టడంతోనే దారిలోకి వస్తున్నారు. రిపీటెడ్ కేసులు అతి స్వల్పంగానే ఉంటున్నాయి. ఒక వ్యక్తి ఏకకాలంలో వందల మంది మహిళలను వేధించాడు. అతడి మీద సైబర్ యాక్ట్, నిర్భయ, పి.డి యాక్ట్ కింద కేసు పెట్టాం. అంతకంటే ముందు మహిళలను వేధిస్తే శిక్షించే చట్టం ఉందని, అది చురుగ్గా పని చేస్తోందనే సమాచారం ప్రతి ఒక్కరికీ చేరాలి. ఇందుకు మీడియా సహకారం కూడా అవసరమే.  - దారా కవిత, ఎసిపి, షీ టీమ్స్, హైదరాబాద్ సిటీ పోలీస్
 పాఠాల్లో నేర్పిస్తే పరివర్తన వస్తుంది
 విద్యావ్యవస్థలో మార్పు తీసుకురాకుండా, స్త్రీల పట్ల గౌరవాన్ని కలిగించే పాఠ్యాంశాలను సిలబస్‌లో చేర్చకుండా... ఆడవాళ్ల మీద జరుగుతున్న దాడులను అరికట్టడానికి ప్రభుత్వాలు దగ్గర దారులు వెదుక్కుంటున్నాయి. కఠిన చట్టాలు తెచ్చి చేతులు దులుపుకోవాలని చూస్తున్నాయి. సమాజంలో మార్పు రావాలి. అంతేకాని తక్షణ పరిష్కారాలు కాదు. ఆడపిల్లల సంఖ్య విపరీతంగా తగ్గిపోతోంది. దానిని అరికట్టే చట్టాలు ఉన్నాయి కదా మన దగ్గర. అయినా ఎందుకు తగ్గిపోతుంది? ఇప్పుడేమో ఈవ్‌టీజింగ్ చేసిన వాళ్లపై రౌడీషీట్ ఓపెన్ చేయాలి అంటున్నారు! అంటే  మగవాళ్లందరినీ ఆడవాళ్లకు శత్రువులను చేయడమే కదా! ఇలాంటి పరిష్కారం ఎవరికి కావాలి? ఆడ, మగ ఇద్దరినీ సమంగా చూడండి.. ఒకరినొకరు గౌరవించుకునే వాతావరణాన్ని కల్పించండి.. అలాంటి సంస్కారాన్ని పెంపొందించండి.   - దేవి, సామాజిక కార్యకర్త
 
 ♦ స్త్రీలను గౌరవించడం మన సంప్రదాయం. స్త్రీలను గౌరవించేలా మన మగపిల్లలను పెంచడం కూడా మన సమాజంలో ఒక సంప్రదాయం కావాలి.


 రాయవరం : బయటికెళ్తే చాలు.. పలుచోట్ల బాలికలను, యువతులను, మహిళలను ఆకతాయిలు వేధింపులకు గురి చేస్తున్న ఘటనలు అనేకం కనిపిస్తున్నాయి. పాఠశాలలు, కళాశాలలకు వెళ్లే సమయంలో బాలికలు, యువతులే కాదు.. రోడ్డుపై వెళ్తున్నప్పుడు ఏదో ఒక రూపంలో అనేకమంది మహిళలు కూడా ఈవ్‌టీజింగ్‌తో ఇబ్బందులు పడుతున్నారు. ఈ నేపథ్యంలో ఈవ్‌టీజింగ్‌కు పాల్పడినవారికి కఠిన శిక్షలు అమలయ్యేలా ఇటీవల చట్టాలను సవరించారు. వీటి ప్రకారం ఈవ్‌టీజింగ్‌కు పాల్పడినవారు కటకటాలపాలు కాక తప్పదు.
 
 వేధింపులకు గురయ్యే మహిళలు మౌనంగా ఉండాల్సిన అవసరం లేదని, పోలీసులకు ఫోన్ చేసి ఫిర్యాదు చేస్తే ఈవ్‌టీజింగ్ కేసు నమోదు చేస్తామంటున్నారు రాయవరం ఎస్సై సురేష్ చావా. బాధితులకు చట్టం అండగా నిలబడుతుందని ఆయన భరోసా ఇస్తున్నారు.
  
 ఈవ్‌టీజింగ్ అంటే..
 యువతి లేదా మహిళను మాటలు, చేతల ద్వారా కానీ, చేష్టలు, సైగల ద్వారా కానీ, స్త్రీత్వానికి అవమానకర రీతిలో ప్రవర్తించడం ఈవ్‌టీజింగ్ కిందకు వస్తుంది. మాటలతో వేధించడం, వెంటపడడం, లైంగికంగా వేధించడం, స్త్రీ వ్యక్తిగత వ్యవహారాల్లో ఆమె ఇష్టం లేకుండా కల్పించుకుని వేధించడం, బలప్రయోగం చేయడం, అసభ్యకర సైగలవంటివి కూడా ఈవ్‌టీజింగ్ నేరాల కిందకు వస్తాయి.
  
 ఇవీ సెక్షన్లు..
 మహిళలపై వేధింపులకు సంబంధించిన చట్టంలో భారత ప్రభుత్వం 2013లో మార్పులు, చేర్పులు చేసింది. ఐపీసీ 354 సెక్షన్‌ను విస్తరించి 354ఎ, 354బి, 354సి, 354డిగా వర్గీకరించింది.
  
 సెక్షన్ 354ఎ
 స్త్రీని లైంగికంగా వేధిస్తే సెక్షన్ 354ఎ ప్రకారం పోలీసులు కేసు నమోదు చేస్తారు. ఈ సెక్షన్ కింద నేరం రుజువైతే నిందితునికి ఏడాది జైలుశిక్ష లేదా జరిమానా, కొన్ని సందర్భాల్లో రెండూ విధిస్తారు.
  
 సెక్షన్ 354బి
 వేధింపుల సమయంలో బలప్రయోగం చేస్తే సెక్షన్ 354బి ప్రకారం కేసు నమోదు చేస్తారు. ఈ సెక్షన్ కింద నేరం రుజువైతే ఏడేళ్ల జైలుశిక్ష లేదా జరిమానా లేదంటే రెండూ విధించే అవకాశం ఉంది.
  
 సెక్షన్ 354సి
 స్త్రీ వ్యక్తిగత వ్యవహారాల్లో కల్పించుకుని, ఆమెను వేధింపులకు గురి చేస్తే సెక్షన్ 354సి ప్రకారం కేసు నమోదు చేస్తారు. ఈ సెక్షన్ కింద నేరం రుజువైతే నిందితునికి మూడు నుంచి ఏడేళ్ల జైలుశిక్ష  లేదా జరిమానా విధిస్తారు. కొన్ని సందర్భాల్లో రెండూ విధించే అవకాశం ఉంది.
  
 సెక్షన్ 354డి
 వెంటపడి వేధిస్తే సెక్షన్ 354డి ప్రకారం కేసు నమోదు చేస్తారు. నేరం రుజువైతే ఏడాదికి తక్కువ కాకుండా, గరిష్టంగా మూడేళ్లపాటు జైలుశిక్ష లేదా జరిమానా విధిస్తారు. ఒక్కో సందర్భంలో జైలుశిక్ష, జరిమానా రెండూ విధిస్తారు.
  
 జరిమానా మొత్తం బాధితురాలికి..
 ఈవ్‌టీజింగ్ నేరాల్లో నిందితునికి విధించే జరిమానా మొత్తాన్ని సెక్షన్ 357 ప్రకారం బాధితురాలికి చెల్లిస్తారు. ఆమెకు ఈ హక్కు కల్పిస్తూ చట్టంలో ఇటీవల మార్పు చేశారు.


 సీతాపూర్‌: ఓ మైనర్ బాలికను తరచూ వేధిస్తున్న ఓ ఆకతాయి.. ఆమెను కాల్చిచంపిన ఘటన ఉత్తరప్రదేశ్‌లోని జరిగింది. ఈ ఘటనకు సంబంధించిన ఇద్దరు నిందితులను పోలీసులు అరెస్టు చేశారు. ఒకడు పరారీలో ఉన్నాడు. యూపీలోని సీతాపూర్‌లో ఇంటి పనులు చేస్తూ కుటుంబాన్ని నెట్టుకొస్తుంది 15 ఏళ్ల ప్రింకీ. ఆమెను కుల్‌దీప్‌ తరచూ వెంటపడి వేధిస్తుండేవాడు.
 
 ఈ క్రమంలో మంగళవారం ప్రింకి తన చెల్లెలితో కలిసి ఇంటికి వస్తుండగా.. మాటువేసిన కులదీప్, అతని ఇద్దరు స్నేహితులు పుజారీ, లోకేష్ వాళ్లను అడ్డగించారు. ఈసారి కూడా బాలికను మళ్లీ వేధించిన కులదీప్.. ఏకంగా ఆమెను తనతో తెచ్చుకున్న తుపాకీతో కాల్చాడు. అక్కడికక్కడే ఆమె మృతి చెందింది. ప్రింకీ సోదరి, తండ్రి ఇచ్చిన ఫిర్యాదు మేరకు ఘటనపై కేసు నమోదు చేసుకున్న పోలీసులు కులదీప్, పుజారీలను అరెస్ట్ చేశారు. పరారీలో ఉన్న లోకేష్ కోసం గాలిస్తున్నారు.


 మొరదాబాద్: ఈవ్ టీజింగ్కు పాల్పడిన ఓ ప్రబుద్ధుడికి ఇద్దరు  అక్కా చెల్లెళ్లు బుద్ధి చెప్పారు. తమ జోలికి ఇంకోసారి రాకుండా అతడికి చుక్కలు చూపించారు. ఉత్తరప్రదేశ్లోని మోరదాబాద్ నగరంలో ఈ ఘటన చోటుచేసుకుంది. వెకిలి చేష్టలకు పాల్పడిన ఆ వ్యక్తిని కాలర్ పట్టుకొని ఆ చెంపా ఈచెంపా వాయించడమే కాకుండా కాలర్ పట్టుకొని ఈడ్చుకెళ్లి పోలీస్ స్టేషన్కు తీసుకెళ్లారు. మొరదాబాద్లో పోలీసు ఉద్యోగాలపై అభిరుచి ఉన్న ఇద్దరు అక్కా చెల్లెల్లు ప్రతి రోజు ఉదయాన్నే రన్నింగ్కు వెళుతుంటారు.
 
 అదే సమయంలో రోడ్డుపక్కనే ఓ తోపుడుబండి పెట్టుకొని వ్యాపారం చేసుకుంటున్న ఓ వ్యక్తి వారిని అభ్యంతరమాటలు అనేవాడు. అలా కొద్ది రోజులుగా అతడిని సహించిన ఆ ఇద్దరు యువతులు చివరకు తమ ఆగ్రహం ఆపుకోలేక అతడిని ఈడ్చి తన్నారు. చెంపలు వాయించి, కాళ్లతో తన్నారు. దీంతో వారి దెబ్బలు తాళలేక తనను వదిలిపెట్టమని అతడు బ్రతిమాలికున్నాడు. అయినా, వదిలిపెట్టని ఆ అక్కా చెల్లెళ్లు అతడిని కాలర్ పట్టుకొని తీసుకెళ్లి పోలీసులకు పట్టించారు.


 లక్నో: ఈవ్ టీజింగ్ నిరోధానికి పోలీసు యంత్రాంగం కట్టుదిట్టమైన చర్యలు తీసుకుంటున్నా కొందరి ప్రవర్తనలో మార్పు రావడం లేదు. ఈవ్‌ టీజింగ్‌ కారణంగా ఓ బాలిక ఆత్మహత్యకు పాల్పడింది. ఈ ఘటన మధ్యప్రదేశ్‌లోని లక్నోలో శనివారం వెలుగుచూసింది. ఎంత చెప్పినా వినిపించుకోకుండా తనను పదే పదే ఈవ్ టీజింగ్ చేస్తున్నారంటూ బాలిక పోలీస్‌ స్టేషన్‌లో ఫిర్యాదు చేసింది.
 
 అయినా తనను పదేపదే ఈవ్‌ టీజింగ్‌ చేయడంతో ఆ అవమానాన్ని తట్టుకోలేక ఆమె బలవర్మణానికి పాల్పడినట్టు పోలీసులు తెలిపారు. అయితే తమ కూతురి ఫిర్యాదును నమోదు చేయెద్దంటూ బాలిక తల్లిదండ్రులు పోలీసులకు చెప్పినట్టు తెలిసింది. పూర్తి వివరాలు తెలియాల్సి ఉంది.


 పోలీసుశాఖ కీలక నిర్ణయం 
 ►నిందితులపై ఐపీసీకి బదులు  పీడీ చట్టం కింద కేసులు
 ►ఈవ్ టీజింగ్‌కు అడ్డుకట్టపై  ప్రత్యేక చట్టానికి ప్రతిపాదన
 ► తమిళనాడు తరహాలో  ఏడాది జైలుశిక్ష సబబని భావన
  
  సాక్షి, హైదరాబాద్: రాష్ట్రంలో పెరిగిపోతున్న మహిళల అక్రమ రవాణాకు అడ్డుకట్ట వేసేం దుకు పోలీసులు కీలక నిర్ణయం తీసుకున్నా రు. ఈ నేరాలకు పాల్పడే వారిపై కఠిన నిబంధనలుండే పీడీ యాక్టు ప్రయోగించేందుకు సిద్ధమయ్యారు. మహిళల అక్రమ రవాణా నిందితులపై ప్రస్తుతం ఐపీసీ సెక్షన్ 370 కింద నమోదు చేస్తున్న కేసులను ఇకపై పీడీ యాక్టు కింద (ఈ చట్టం కింద కేసులు నమోదైతే నిందితులకు కనీసం ఆరు నెలలపాటు బెయిల్ లభించదు) నమోదు చేయాలని నిర్ణయించారు. 
  
  రాష్ట్రంలో గతేడాది యువతుల అక్రమ రవాణాకు సంబంధించి నమోదైన 554 కేసుల్లో పోలీసులు 808 మంది యువతులను రక్షించారు. వారిలో 308 మంది బాలికలున్నారు. మహారాష్ట్రలోని చంద్రాపూర్‌లో గతేడాది రాష్ట్ర నేర విచారణ విభాగం (సీఐడీ) ప్రత్యేక బృందాలు చేసిన దాడుల్లో రాష్ట్రానికి చెందిన యువతులతోపాటు పొరుగు రాష్ట్రాలకు చెందిన వారిని కూడా మహిళా బ్రోకర్లు ఉద్యోగాల పేరుతో ఆకర్షించి వ్యభిచార రొంపిలోకి దించినట్లు బయటపడింది. 
  
  చంద్రాపూర్ ఘటనలో పోలీసులు 46 మంది నిందితులను అరెస్టు చేస్తే అందులో 32 మంది మహిళలే ఉండటం గమనార్హం. అంతేకాదు ఈ ఘటన తర్వాత పోలీసుల విచారణలో విస్తుగొలిపే విషయాలు వెలుగుచూశాయి. ఉద్యోగాల పేరుతో తీసుకెళ్తున్న యువతులను వ్యభిచార కూపంలో దిగకపోతే వారిపై అనేక రకాలుగా హింసకు పాల్పడుతున్నట్లు తెలిసింది. యువతులను తమ చెప్పు చేతుల్లోకి తీసుకునేందు కు వ్యభిచార నిర్వాహకులు వారిని నగ్నంగా బాత్రూంలలో బంధించడం, ఆ తర్వాత నాగుపాములను వదిలి తలుపులకు తాళాలు వేసి భయపెట్టడం వంటి దారుణాలకు పాల్పడిన ఉదంతాలు సీఐడీ అధికారుల దర్యాప్తులో వెలుగుచూశాయి.
  
   ఈ నేపథ్యంలో నిందితులపై ఐపీసీ సెక్షన్ 370కు బదులు ఇకపై పీడీ యాక్టు కింద కేసులు పెట్టాలనే నిర్ణయానికి పోలీసులు వచ్చారు. ఇప్పటికే అన్ని జిల్లా కేంద్రాల్లో ప్రత్యేకంగా యాంటీ ఉమెన్ ట్రాఫికింగ్ యూనిట్లను ఏర్పాటు చేయాలని కూడా సీఐడీ నిర్ణయించింది. మరోవైపు ఈవ్ టీజిం గ్‌కు పాల్పడే వారికి తమిళనాడు తరహాలో ఏడాదిపాటు జైలు శిక్ష, రూ.10 వేల జరిమా నా విధించేలా ప్రత్యేకచట్టం తేవాలని పోలీసు శాఖ ప్రభుత్వానికి విజ్ఞప్తి చేసింది. ఈవ్ టీజర్ల ఆగడాలను అరికట్టేందుకు ప్రస్తుతం ‘షీ’ టీమ్స్ చేస్తున్న ప్రయత్నాలు పూర్తిస్థాయిలో రోమియోల ఆగడాలను అరికట్టలేకపోతున్నాయి.
  
   గతేడాది రాష్ట్రవ్యాప్తంగా 660 కేసులు నమోదు చేసి 825 మంది ఈవ్ టీజర్లను కటకటాల్లోకి నెట్టారు. అయితే ప్రస్తుత చట్టాల ప్రకారం ఈ నేరాలకు పాల్పడే వారిపై పోలీసులు పెట్టీ కేసులు తప్ప ఐపీసీ, నిర్భయ వంటి కేసులు నమోదు చేయలేకపోతున్నారు. దీంతో కేసుల సంఖ్య ఏటా పెరుగుతోంది. ఈ నేపథ్యంలో తమిళనాడులో సత్ఫలితాలిస్తున్న చట్టం తరహాలో దీనికోసం ప్రత్యేక చట్టం అవసరమని పోలీసులు భావిస్తున్నారు. 
  


 మహిళలు అసభ్యంగా దుస్తులు వేసుకుంటేనే వాళ్లను మగాళ్లు ఏడిపిస్తుంటారని, తేరిపార చూస్తారని ఇన్నాళ్లూ అందరూ చెబుతూ వచ్చారు. కానీ, అదంతా తప్పని ప్రముఖ నటి, దర్శకురాలు రేణు దేశాయ్ తేల్చిపారేసింది. ఆడవాళ్లు వేసుకునే దుస్తులతో ఏమాత్రం సంబంధం లేదని, మగాడి చూపులు ఎప్పుడూ అలాగే ఉంటాయని స్పష్టం చేసింది. ఇందుకోసం ఆమె ఒక ఫొటోను కూడా ట్వీట్ చేసింది.
 
 బురఖాలు వేసుకుని వెళ్తున్న ఇద్దరు అమ్మాయిలను.. ఆ పక్కనే బైకు మీద ఉన్న ఇద్దరు అబ్బాయిలు కళ్లు పెద్దవి చేసుకుని చూడటం ఆ ఫొటోలో స్పష్టంగా ఉంది. దాన్ని బట్టి చూస్తే.. అమ్మాయిల వస్త్రధారణకు, అబ్బాయిల ప్రవర్తనకు ఏమాత్రం సంబధం లేదని, వాళ్లు తమ బుద్ధిని ప్రదర్శిస్తూనే ఉంటారని అన్నట్లుగా రేణు దేశాయ్ చెప్పింది.
  
 
 It's never about her clothes!It's always the eyes of the man! Always! pic.twitter.com/GPPhVmThzp
 — renu (@renuudesai) December 26, 2015
  
  


 కాలేజీ నుంచి ఇంటికి వెళ్తున్న అమ్మాయిలను వేధిస్తున్న ఐదుగురు ఆకతాయిలను షీటీమ్స్ అదుపులోకి తీసుకున్నారు. తాండూరులోని ఓ ప్రభుత్వ కళాశాల, మరో ప్రైవేటు కళాశాలల వద్ద బైక్‌మీద వచ్చిన ఐదుగురు యువకులు, అమ్మాయిలను ఆటపట్టిస్తుండగా పోలీసులు పట్టుకున్నట్లు స్థానిక సీఐ వెంకట్రామయ్య తెలిపారు. అనంతరం వారిని స్థానిక పోలీస్‌స్టేషన్‌కు తరలించారు.
 
  


 - వారిలో మార్పు తీసుకొస్తున్న పోలీసులు
 -  సైబరాబాద్‌లో ఏడాది పూర్తి చేసుకున్న ‘షీ టీమ్స్’
      ఏడాది గణాంకాలివి...
  - దొరికిన ఈవ్‌టీజర్లు , మైనర్లు 118
 -  మేజర్లు 707 (50 నుంచి 60 ఏళ్ల మధ్యవారు 16, 60పైబడినవారు 4)
 -  మొత్తం 660 కేసులు, పెట్టీ కేసులు..550, ఎఫ్‌ఐఆర్ కేసులు...110
      ఇలా ఫిర్యాదు చేయొచ్చు...
 -   డయల్ 100, ఫేస్‌బుక్ షీటీమ్ సైబరాబాద్, వాట్సాప్ 9490617444  
  
  సాక్షి, హైదరాబాద్: ‘షీ టీమ్స్’... మిహ ళలకు రక్షణ కవచం... ఈవ్ టీజర్లకు సింహస్వప్నం.. వారి భరతం పట్టే  సైన్యం. ఈవ్ టీజింగ్‌కు గురైన వారు పోలీసు స్టేషన్‌కు వెళ్లి ఫిర్యాదు చేసేందుకు ఒకప్పుడు ఒకటికి పదిసార్లు ఆలోచించేవారు. కుటుం బం పరువుపోతుందేమోనని కొందరు, ఠాణా చుట్టూ ప్రదక్షిణలు చేయాల్సి వస్తుందని మరికొందరు ఫిర్యాదు చేసేందుకు వెనుకంజ వేసేవారు. మహిళల రక్షణ కోసం గతేడాది ప్రారంభించిన షీ-టీమ్స్‌తో పరిస్థితి పూర్తిగా మారిపోయింది. షీ టీమ్స్ నీడలా తమను వెంటాడుతుండటంతో పోకిరీలు మహిళలను టీజింగ్ చేసేందుకు భయపడుతున్నారు. బాధితులకు షీమ్స్ అండగా ఉండటంతో ధైర్యంగా ఫిర్యాదు చేసేందుకు ముందుకొస్తున్నారు.
 
 మరోవైపు తమకు రెడ్‌హ్యాండెడ్‌గా చిక్కిన వారికి షీటీమ్స్ వారి తల్లిదండ్రుల సమక్షంలోనే కౌన్సెలింగ్ చేసి మళ్లీ అలాంటి ఉదంతానికి పాల్పడకుండా వారిలో మార్పు తీసుకొస్తోంది.  ఆదివారంతో ఏడాది పూర్తి చేసుకున్న సైబరాబాద్ షీ టీమ్స్‌కు ప్రజలు హ్యాట్సాఫ్ అంటున్నారు. షీ టీమ్ పట్టుకున్న ఆకతాయిలకు ఇచ్చే కౌన్సెలింగ్‌ను గచ్చిబౌలిలోని సైబరాబాద్ పోలీసు కమిషనరేట్‌లో ప్రత్యక్షంగా మీడియాకు చూపించారు.
 
  గతేడాది శ్రీకారం...
  ఈవ్‌టీజింగ్, మహిళలపై వేధింపులను అరికట్టేందుకు ప్రభుత్వ నిర్ణయం మేరకు సైబరాబాద్ పోలీసు కమిషనర్ సీవీ ఆనంద్ షీ టీమ్స్‌కు గతేడాది శ్రీకారం చుట్టారు. కార్యాలయాలు, కళాశాలలు, రైల్వేస్టేషన్లు, బస్టాప్‌లుతో పాటు బహిరంగప్రదేశాల్లో మహిళలను, విద్యార్థులను వేధించే వారి భరతం పట్టేందుకు షీ టీమ్స్‌ను రంగంలోకి దింపుతున్నారు. తమిళనాడులో ఉన్న ప్రొహిబిషన్ ఆఫ్ ఈవ్ టీజింగ్, ఏపీ యాంటీ ర్యాగింగ్  మార్గదర్శకాలను అనుసరించి నిందితులపై కేసులు నమోదు చేస్తున్నారు. ఏడాదిళక్ష 660 కేసులు నమోదు చేశారు.
 
  మఫ్టీలో పట్టేస్తారు...
  ఈవ్‌టీజర్లను పట్టుకోవడంతో పాటు వ్యవహరించాల్సిన తీరుపై షీ టీమ్ సభ్యులు ప్రత్యేక తర్ఫీదు నిచ్చారు.  వీరు బస్‌స్టాపులు, బస్సులు, ఎంఎంటీఎస్ రైళ్లలో అమ్మాయిలను వేధిస్తున్న వారిని కనిపెడతారు. రహస్య కెమెరాలతో ఆకతాయిల ఆగడాలను షూట్ చేసి పట్టేస్తారు. దాదాపు 60 టీమ్‌లు బహిరంగ ప్రదేశాల్లో పని చేస్తున్నాయి.
 
  ఈవ్‌టీజింగ్ వ్యతిరేక కమిటీలు...
  ప్రభుత్వ, ప్రైవేటు, కార్పొరేట్ కళాశాలల్లో షీటీమ్ సభ్యులు ఈవ్‌టీజింగ్ వ్యతిరేక ప్రచారం చేపట్టారు. ఇందువల్ల తలెత్తే పరిణామాలపై విద్యార్థులకు అవగాహన కల్పిస్తున్నారు.  ప్రతి కళాశాలలో ఈవ్‌టీజింగ్ వ్యతిరేక కమిటీలు ఏర్పాటుచేస్తున్నారు. ఇప్పటివరకు ఈవ్‌టీజింగ్ వ్యతిరేకంగా 496 అవగాహన కార్యక్రమాలు నిర్వహించారు.
 
  హాట్‌స్పాట్‌లపై దృష్టి
  మల్కాజిగిరి, ఎల్‌బీనగర్, మాదాపూర్, ఐటీ కారిడార్, బాలానగర్, శంషాబాద్ జోన్‌లో 400కు పైగా ఉన్న హాట్‌స్పాట్స్ (ఆకతాయిల వేధింపులపై ఎక్కువ ఫిర్యాదు వచ్చే ప్రాంతాలు)పై  షీ టీమ్స్ ప్రత్యేక దృష్టి కేంద్రీకరించాయి. అక్కడ పోలీసులు ఉదయం సాయంత్రం వేళల్లో పెట్రోలింగ్ పెంచారు. మరో పక్క ఫోన్‌లో వేధింపులకు గురవుతున్న మహిళలు పోలీసుల భరోసాతో నేరుగా ఠాణాలకు వెళ్లి ఫిర్యాదు చేస్తున్నారు.  
 
  ‘ఈయర్’తో ఈవ్‌టీజర్లలో మార్పు...
  ఈయర్ (ఎగ్జామిన్, అక్సెప్ట్, రిజెక్ట్) పద్ధతితో ఈవ్‌టీజర్ల పరివర్తనలో మార్పు తీసుకొస్తున్నారు.  షీ టీమ్ సభ్యులు, కౌన్సెలర్లు (మానసిక నిపుణులు) ఈవ్‌టీజర్ల వ్యక్తిత్వాన్ని తెలుసుకునేందుకు వారి ఫ్యామిలీ బ్యాక్ గ్రౌండ్ తో పాటు స్నేహితులకు సంబంధించిన విషయాలపై ప్రశ్నావళి ఇచ్చి పూర్తి చేయమంటారు. దీని ఆధారంగానే అతడిని ఎగ్జామిన్ చేస్తున్నారు కౌన్సెలర్లు. అతడు ఈవ్ టీజింగ్ చేశానని ఒప్పుకోకపోతే షీ టీమ్ బృందాలు షూట్ చేసిన వీడియో ను వారి తల్లిదండ్రుల సమక్షంలోనే చూ పిస్తున్నారు.
 
   ఆ దృశ్యాలను చూసిన త ర్వాత సారీ సార్   తప్పైపోయిందని నిం దితుడు కన్నీళ్ల పర్యంతమవుతున్నారు. మరోమారు ఈవ్‌టీజింగ్  చేయమని వారితో పోలీసులు   ప్రతిజ్ఞ చేయిస్తున్నారు. దీంతో ఆకతాయిల్లో మా ర్పు వస్తోందని అధికారులు భావిస్తు న్నారు.
  
  ఆకతాయిలు భయపడుతున్నారు
  విద్యార్థినులు, యువతులు, మహిళలు నిత్యం ఎదుర్కొంటున్న వేధింపులు, ఈవ్‌టీజింగ్‌ను అరికట్టడంలో మా కృషి ఫలించింది.  ఏడాదిలో మేం నిర్దేశించుకున్న లక్ష్యాన్ని ఛేదించినా...కొంతమాత్రమే సాధించామని అనుకుంటున్నాం. అమ్మాయిల్ని వేధిస్తే పోలీసులు పట్టుకుంటారన్న భయాన్ని పోకిరీల్లో కలిగించాం. బాధిత మహిళలు 100కు డయల్ చేయాలి. సైబరాబాద్‌లో మహిళలకు ఎక్కడా, ఎలాంటి వేధింపులు లేకుండా చేయాలన్నదే మా తదుపరి లక్ష్యం’.    - సీవీ ఆనంద్
  


 విద్యార్థినులను వేధిస్తున్న ముగ్గురు ఆకతాయిలను పోలీసులు అదుపులోకి తీసుకున్నారు. గుంటూరు జిల్లా వినుకొండ పట్టణంలోని ఓ ప్రైవేట్ బీఈడీ కాలేజి వద్ద శనివారం ఈ ఘటన చోటుచేసుకుంది. కళాశాల వద్ద ఉండి అక్కడికి వచ్చే విద్యార్థినులతో వీరు వెకిలి చేష్టలకు పాల్పడుతున్నారు. బాధితుల ఫిర్యాదు మేరకు పోలీసులు శనివారం ఉదయం వారిని కాపుకాసి పట్టుకున్నారు.
 
 
  


 భోపాల్: ఆకతాయిలు పిచ్చి పిచ్చి కామెంట్లు చేస్తే  ఎవరికైనా ఒళ్లు మండుతుంది. ఈ వేధింపులను  చాలామంది యువతులు, మహిళలు  మౌనంగా సహిస్తారే తప్ప,  ఫిర్యాదు దాకా వెళ్లరు. గొడవెందుకులే అని  మిన్నకుండిపోయేవాళ్లే ఎక్కువమంది. కానీ  ఆ సంఘటన, ఆ  అవమానం మళ్ళీ మళ్లీ  గుర్తొచ్చి  మనసును బాధిస్తూనే ఉంటుంది.  అయితే ఆకతాయిల చేష్టలు శ్రుతిమించితే ఒక్కోసారి చిర్రెత్తుకొస్తుంది.
  
 అలాంటప్పుడు వాళ్లు చేతికి చిక్కితేనా అనిపిస్తుంది కదా... అలా చేతికి చిక్కిన  కాదు..కాదు.. తన పట్ల అనుచితంగా  ప్రవర్తించిన ఈవ్ టీజర్లను దొరకబుచ్చుకుని మరీ ఉతికి ఆరేసిందో యువతి. మధ్యప్రదేశ్ తికాంగ్రా జిల్లాలో ఈ ఘటన చోటు చేసుకుంది. వెకిలి చేష్టలతో వేధిస్తున్న  ఇద్దరు యువకులపై స్థానిక పోలీస్ స్టేషన్ లో ఫిర్యాదు చేసింది. దీంతో రంగంలోకి దిగిన పోలీసులు వారిని పట్టుకొచ్చారు.  ఆకతాయిలను చూడగానే ఆవేశంగా రగిలిపోయిన ఆ యువతి  చెప్పుతో ఎడాపెడా వాయించేసింది.   పోలీసుల సమక్షంలోనే ఇద్దరినీ ఉతికి ఆరేసింది. ఈ వీడియో ఇపుడు  నెట్లో హల్చల్ చేస్తోంది.


 మాచర్ల టౌన్ (గుంటూరు) : పాఠశాలకు వెళ్లే విద్యార్థినిని నిత్యం వేధిస్తున్న ఓ వివాహితుడికి దేహశుద్ధి జరిగింది. గుంటూరు జిల్లా మాచర్ల పట్టణంలో శుక్రవారం ఉదయం ఈ ఘటన చోటుచేసుకుంది. పట్టణంలోని 18వ వార్డుకు చెందిన కర్రా దానం(22) వివాహితుడు. అతడు స్థానిక బాలికల ఉన్నత పాఠశాలలో 8వ తరగతి చదువుకుంటున్న విద్యార్థినిని రోజూ వేధిస్తున్నాడు. వెకిలి చేష్టలతో ఏడిపిస్తున్నాడు. దీంతో ఆమె తల్లిదండ్రులకు విషయం తెలిపింది. వారు శుక్రవారం కాపు కాసి బాలికను వేధిస్తున్న దానంను పట్టుకుని దేహశుద్ధి చేశారు. పోలీస్‌ స్టేషన్‌కు తీసుకెళ్తుండగా అతడు తప్పించుకుని పారిపోయాడు. అనంతరం వారు పోలీస్‌స్టేషన్‌కు వెళ్లి దానంపై ఫిర్యాదు చేశారు.


 విజయవాడ: సామాన్య ప్రజలకు, ఆడవాళ్లకు రక్షణ కల్పించే మహిళా కానిస్టేబుళ్లను సైతం కొందరు పోకిరీలు ఈవ్ టీజింగ్ పేరుతో వేధింపులకు గురిచేస్తున్నారు. తాజాగా ఇటువంటి ఘటన కృష్ణా జిల్లా విజయవాడలో బుధవారం ఉదయం చోటుచేసుకుంది. పోలీసుల కథనం ప్రకారం... ఇద్దరు మహిళా కానిస్టేబుళ్లు విధులు నిర్వహించడానికి బైక్పై బయలుదేరారు. అయితే, ఇద్దరు ఆకతాయిలు తమ ఆగడాలను ప్రదర్శించాలని చూశారు. బైక్పై వెళ్తున్న మహిళా కానిస్టేబుళ్లను నానా మాటలు అంటూ వారిని టీజ్ చేయడం మొదలుపెట్టారు.
 వీరు సమాచారం అందించడంతో రంగంలోకి దిగిన మరికొంతమంది పోలీసులు ఇద్దరు పోకిరీలను అదుపులోకి తీసుకున్నారు. నిందితులను రంగారెడ్డి, సునీల్ కుమార్లుగా గుర్తించారు. నిందితులపై విచారణ ప్రారంభించినట్లు సమాచారం. రాష్ట్రంలో విద్యార్థినులు, మహిళా ఉద్యోగులపై దాడులు, వేధింపులు జరుగుతున్నప్పటికీ వారి విషయంలో ప్రభుత్వం చిన్నచూపు చూస్తుండటంతో ఇటువంటి ఘటనలు చోటుచేసుకుంటున్నాయని తెలుస్తోంది.


 పోలీసులకు అప్పగింత
  
 మాచర్లటౌన్: పట్టణంలోని పలనాడు జూనియర్ కళాశాలకు చెందిన ఓ విద్యార్థినిని వేధిస్తున్న ఈవ్‌టీజర్‌ను కళాశాల యాజమాన్యం వారు అదుపులోకి తీసుకుని దేహశుద్ధి చేసి పోలీసులకు అప్పగించారు. సోమవారం సాయంత్ర ఆరు గంటల సమయంలో కళాశాలకు చెందిన ఇంటర్ ద్వితీయ సంవత్సరం విద్యార్థినిని పట్టణంలో నడిచి వెళుతుండగా వెల్దుర్తి మండలం మండాది గ్రామానికి చెందిన తాడి రమణయ్య ఆమెపట్ల అసభ్యకరంగా వ్యవహరిస్తూ వాహనం ఎక్కాలంటూ వేధించాడు. అంతకు ముందు కూడా తనను వేధిస్తున్న ఆ యువకుడి తీరు పట్ల ఆవేదన చెందిన విద్యార్థిని కళాశాలకు వెళ్లి డెరైక్టర్ కావూరి శ్రీరాములుకు విషయం చెప్పింది.
 
 స్పందించిన ఆయన విద్యార్థులను తీసుకుని పట్టణంలో ఆ యువకుడి కోసం గాలించారు. పార్కు సెంటర్‌లో ఉన్న రమణయ్యను విద్యార్థిని చూపించగానే వారు పట్టుకుని కళాశాలకు తీసుకొచ్చి దేహశుద్ధి చేసి పోలీసులకు అప్పగించారు. సైకో తీరులో మాట్లాడుతున్న ఆ యువకుడిని పోలీసులు స్టేషన్‌కు తీసుకువెళ్లి కౌన్సెలింగ్ ఇచ్చారు. కేసు నమోదు చేసినట్టు పట్టణ ఎస్‌ఐ జయకుమార్ తెలిపారు. విద్యార్థుల వేధింపులు తాళలేక తిరుపతమ్మ ఆత్మహత్య చేసుకున్న విషయం మరువకముందే ఇలాంటివి జరగడంతో విద్యార్థినుల తల్లిదండ్రులు ఆందోళన చెందుతున్నారు.
  
  


 కాకినాడ : ఓ మహిళతో సెల్‌ఫోన్ సంభాషణలో అసభ్యకరంగా మాట్లాడుతున్న ఓ ఈవ్‌టీజర్‌ను ఆమె గురువారం కలెక్టరేట్ వద్ద చెప్పుతో కొట్టింది. బాధితురాలి కథనం ప్రకారం.. కాకినాడ సంజయ్‌నగర్‌కు చెందిన చిన్న పెయింటర్‌గా పనిచేస్తున్నాడు. అతడు తన సెల్‌ఫోన్ నుంచి కాకినాడకు చెందిన ఓ మహిళకు ఫోన్ చేశాడు. ఆమె రాంగ్ నంబర్ అని చెప్పి పెట్టేసినా అతడు తరచూ ఫోన్ చేస్తూ అసభ్యకరంగా సంభాషిస్తున్నాడు.  
  
  ఈ విషయాన్ని తన స్నేహితురాలి కి చెప్పింది. ఆ మహిళ గురువారం కాకినాడ కలెక్టరేట్ వద్ద పనిచేసుకుంటోంది. ఇంతలో చిన్నా ఆమెకు ఫోన్ చేశాడు. తన స్నేహితురాలి సూచన మేరకు ఆ మహిళ చిన్నతో ఫోన్‌లో మాట్లాడి కలెక్టరేట్ వద్ద టిఫిన్ తీసుకుని రమ్మంది. దూరం నుంచి అతడు ఫోన్ చేయడాన్ని గమనించి స్నేహితురాలితో కలిసి అతడి వద్దకు చేరుకుని చెప్పుతో కొట్టింది.  స్థానికంగా ఉన్న పోలీసులు అక్కడకు చేరుకుని చిన్నను వన్‌టౌన్ స్టేషన్‌కు తరలించారు.
  
  


 నగరంలో పోకిరీల బెడద రోజురోజుకు పెరిగిపోతోంది. సిటీ బస్సు కోసం వేచి ఉంటున్న యువతులు, మహిళలే లక్ష్యంగా రెచ్చిపోతున్నారు. తాజాగా నగరంలో అత్యంత రద్దీగా ఉండే బంజారాహిల్స్ రోడ్ నెంబర్ 1లో ఉన్న ఓ బస్ స్టాపులో బస్సు కోసం వేచి చూస్తున్న యువతిని నవీన్ అనే యువకుడు వేధించాడు.
 
 కొంతసేపటి వరకు ఎందుకులే అని ఊరుకున్నా, తర్వాత భరించలేని ఆమె గట్టిగా ఎదురు తిరిగింది. దాంతో స్థానికులు కూడా అతడిని పట్టుకుని, దేహశుద్ధి చేశారు. అనంతరం పోకిరీ నవీన్‌ను పోలీసులకు అప్పగించారు.


 ‘షీ-టీమ్స్’కు ఏడాది పూర్తి
 12 నెలల్లో 281 మంది ఆటకట్టు
 చిక్కిన వారిలో మైనర్లే అధికం
  
 సిటీబ్యూరో: ఈవ్ టీజర్ల పీచమణచడంతో పాటు అతివలకు ఎదురవుతున్న ఇబ్బందులను పరిష్కరించేందుకు పోలీసు విభాగం ఏర్పాటు చేసిన ‘షీ-టీమ్స్’ ఏడాదిలో ఎన్నో విజయాలను సాధించింది. నగరంలో ఇవి పని చేయడం ప్రారంభించి సోమవారం నాటికి ఏడాది పూర్తయింది. బస్సుల్లో మహిళలు, పురుషులు కూర్చునే/నిల్చునే ప్రాంతాలకు మధ్య మెష్ ఏర్పాటు ‘షీ-టీమ్స్’ సిఫార్సుతోనే అమలైంది. నగర అదనపు పోలీసు కమిషనర్ (నేరాలు) స్వాతి లక్రా నేతృత్వంలో పని చేస్తున్న ఈ బృందాలు ఇప్పటి వరకు 281 మంది పోకిరీల ఆటకట్టించాయి. ఇందుకుగాను బహిరంగ ప్రదేశాల్లో మఫ్టీల్లో మాటువేయడంతో పాటు డెకాయ్ ఆపరేషన్లు సైతం నిర్వహించాయి. వీరికి చిక్కిన వారిలో 129 మంది మైనర్లు కావడం గమనార్హం.
 
 మొత్తం 281 మందిలో 126 మందిపై చిన్న కేసులు నమోదు చేసి పూచీకత్తుపై విడిచిపెట్టగా మరో 19 మందిని జైలుకు పంపాయి. 101 మందికి జరిమానా విధించగా... 28 మందికి కౌన్సిలింగ్ ఇచ్చాయి. మితిమీరిన స్థాయిలో వేధింపులకు దిగిన 12 మందిపై నిర్భయ చట్టం కింద కేసు నమోదు చేశాయి. ‘షీ-టీమ్స్’ పట్టుకున్న సంచలనాత్మక కేసుగా నయావంచకుడు మధు కేసు రికార్డులకెక్కింది. ఫిర్యాదు అందుకున్నది మొదలు దాదాపు నాలుగు నెలల పాటు నిర్విరామంగా శ్రమించిన ప్రత్యేక బృందం ఎట్టకేలకు గురువారం అరెస్టు చేయగలిగింది. నగరంలో ప్రారంభమై, రాష్ట్రం మొత్తానికే ఆదర్శంగా మారిన ‘షీ-టీమ్స్’ పనితీరును మెరుగు పరచడంతో పాటు అతివల రక్షణకు మరిన్ని చర్యలు చేపట్టడానికి ఉన్నతాధికారులు కసరత్తు చేస్తున్నారు.
  


 ఆకతాయిల్లో మార్పునకు షీ టీమ్ సభ్యులు, కౌన్సెలర్ల కృషి
 వారి వీడియోను వారికే చూపించి
 తప్పు ఒప్పుకునేలా చేస్తున్న వైనం..
 తల్లిదండ్రుల సమక్షంలోనే మైనర్లకు హితబోధ
  
 సిటీబ్యూరో: విద్యాసంస్థలు, బస్సులు, బస్టాప్‌లు, ట్యూషన్ కేంద్రాలు, సినిమా హాళ్లు, షాపింగ్ మాల్స్ ఇలా.. సైబరాబాద్ పోలీసు కమిషనరేట్‌లో విద్యార్థినులు, యువతులు ఎక్కడ కన్పిస్తారో.. అక్కడ పనీపాటా లేని యువకులు ప్రత్యక్షమవుతున్నారు. వెకిలిగా ప్రవర్తిస్తూ.. అసభ్యంగా వ్యాఖ్యానాలు చేస్తూ వేధింపులకు పాల్పడుతున్నారు. ఈ పోకిరీల బాధపడలేక బాధితుల నుంచి ఫిర్యాదులు రావడంతో ఈవ్‌టీజింగ్‌ను అరికట్టేందుకు షీ టీమ్‌లు అంతటా జల్లెడపడుతున్నాయి. పదుల సంఖ్యలో ఈవ్‌టీజర్లను పట్టుకుంటున్నాయి. వీరిలో మైనర్లు ఉంటున్నారు. వారిపై కేసులు నమోదు చేస్తే భవిష్యత్ పాడవుతుందనే ఉద్దేశంతో అధికారులు మానసిక వైద్య నిపుణులతో కౌన్సెలింగ్ నిర్వహించి పంపుతున్నారు. ఆరు నెలల వ్యవధిలో దాదాపు 500 మంది బాలురకు వారి తల్లిదండ్రుల సమక్షంలో అధికారులు పాఠాలు చెప్పారు.
 
 సత్ఫలితాలిస్తున్న ‘ఈయర్’..
  సైబరాబాద్ పోలీసు కమిషనరేట్ పరిధిలో ఈవ్‌టీజర్ల ప్రవర్తనలో మార్పు తీసుకొచ్చేందుకు షీ టీమ్‌లు వినూత్న కార్యక్రమానికి శ్రీకారం చుట్టాయి. ఈయర్ (ఎగ్జామిన్, అక్సెప్ట్, రిజెక్ట్) పద్ధతితో షీ టీమ్ పోలీసులు, కౌన్సిలర్లు (మానసిక నిపుణులు) సంయుక్తంగా ఆకతాయిల్లో అనూహ్య మార్పును తీసుకొస్తున్నాయి. ఈవ్‌టీజర్ల వ్యక్తిత్వాన్ని తెలుసుకునేందుకు వారి ఫ్యామిలీ బ్యాక్ గ్రౌండ్ విషయాలతో పాటు స్నేహితులతో వారు గడిపే సమయంలో విషయాలపై ప్రశ్నావళి ఇచ్చి పూర్తి చేయమంటున్నారు. దీని ఆధారంగానే వారిని ఎగ్జామిన్ చేస్తున్నారు కౌన్సిలర్లు. అయినా అతడు ఈవ్ టీజింగ్ చేశానని ఒప్పుకోకపోతే షీ టీమ్‌లు షూట్ చేసిన వీడియోను చూపిస్తున్నారు. ఆ దృశ్యాలను చూసిన ఆకతాయిలు తప్పు ఒప్పుకుంటున్నారు. అప్పుడు వారికి బంగారు భవిష్యత్‌కు ఏర్పడే అడ్డంకులను వివరిస్తున్నారు. క్రిమినల్ రికార్డుల్లో పేరెక్కితే ఉద్యోగాలు రావని సుతిమెత్తగా హెచ్చరిస్తున్నారు. మరోమారు ఈవ్‌టీజింగ్ చేయమని వారితో అక్కడే ప్రతిజ్ఞ చేయిస్తున్నారు సైబరాబాద్ షీటీమ్ సభ్యులు, కౌన్సిలర్లు. దాదాపుగా నెలకు 127 ఈవ్‌టీజింగ్ కేసులు సైబరాబాద్ షీ టీమ్ లెక్కల్లోకి వెళ్తున్నాయి.
 
 అయ్యో.. ఇలా చేస్తున్నారా..?
 అమ్మాయిలను వేధిస్తున్న మైనర్లలో 80 శాతం మంది ఇళ్లలో మాత్రం బుద్ధిమంతులు.. తల్లిదండ్రులు చెప్పిన మాటలను జవ దాటరని కౌన్సెలింగ్ సమయంలో వారి తల్లిదండ్రుల ద్వారా వెల్లడైంది. మిగిలిన 20 శాతం మంది కట్టుతప్పారని వారి తల్లిదండ్రులకు తెలుసు. చెడు స్నేహాలు చెయ్యొద్దు.. పార్టీలు, సినిమాలంటూ అర్ధరాత్రి వరకు రోడ్లపై తిరగొద్దంటూ హెచ్చరిస్తూనే ఉన్నారు. ఈ క్రమం లో కొందరు ప్రవర్తన మార్చుకుంటూ ఉండగా.. మరికొందరు పిల్లలు ఎదురు తిరుగుతున్నారు. మానసిక నిపుణులు, పోలీసులు కౌన్సెలింగ్ నిర్వహించిన 330 మంది పిల్లల తల్లిదండ్రులకు తమ పిల్లలు ఈవ్‌టీజింగ్ చేస్తున్నట్లు ఏ మాత్రం తెలి యదు. వారి పిల్లలకు సంబంధించిన వీడియోల్ని తల్లిదండ్రులకు చూపించడంతో అవాక్కవుతున్నారు. వీరికి కౌన్సెలింగ్ ఇవ్వాల్సిందేనని ఒప్పుకుంటున్నారు.  
  
  ఈవ్‌టీజర్లపై కఠిన చర్యలు..
  బహిరంగ ప్రాంతాల్లో అమ్మాయిలను వేధించే వారి పట్ల కఠినంగా వ్యవహరిస్తున్నాం. ఇప్పటికే సైబరాబాద్ కమిషనరేట్ పరిధిలో 350 ప్రాంతాల్లో 60 బృందాలు చురుగ్గా పనిచేస్తున్నాయి. స్పై కెమెరాలతో వివిధ ప్రాంతాల్లో సంచరిస్తూ ఆకతాయిల ద ృశ్యాలను చిత్రీకరిస్తున్నాం. ఇటువంటి ఘటనల్లోనే మూడుసార్లు దొరికితే కఠిన చర్యలు ఉంటాయి.     -రమా రాజేశ్వరి, మల్కాజిగిరి డీసీపీ, షీ టీమ్ నిర్వాహకురాలు
  


 జాతీయ రహదారి దిగ్బంధం
 లాఠీచార్జి, 15మందికి గాయాలు
  
 కోహీర్: ఈవ్‌టీజింగ్‌పై గ్రామస్తులు ఆగ్రహం వ్యక్తం చేశారు. ఓ విద్యార్థిని పట్ల అసభ్యంగా ప్రవర్తించిన యువకులపై తక్షణం చర్యలు తీసుకోవాలని కోరుతూ గురువారం చేసిన రాస్తారోకో ఉద్రిక్తతకు దారి తీసింది.  మెదక్ జిల్లా కోహీర్ మండలం చింతల్‌ఘాట్‌కు చెందిన ఓ విద్యార్థిని జహీరాబాద్‌లోని ప్రైవేట్ కళాశాలలో ఇంటర్ చదువుతోంది. సోమవారం బస్సులో అదే గ్రామానికి చెందిన ఓ యువకుడితో ఆమెకు గొడవ జరిగింది. అదే రోజు సాయంత్రం విద్యార్థిని కోహీర్ పోలీస్‌స్టేషన్‌లో ఫిర్యాదు చేసింది. బుధవారం ఉదయం ఆ యువకుడు మిత్రులతో కలసి చింతల్‌ఘాట్ బస్టాప్ వద్దకు వచ్చి దూషిస్తూ సదరు విద్యార్థిని వెంట్రుకలు పట్టుకొని లాగారు.
 
 వారింటికి వెళ్లి అంతు చూస్తామని బెదిరించారు. పోలీసులు సకాలంలో చర్యలు తీసుకొని ఉంటే ఆకతాయిలు రెచ్చిపోయే వారు కాదని కోపోద్రిక్తులైన విద్యార్థిని కుటుంబ సభ్యులు గ్రామస్తుల సహకారంతో చింతల్‌ఘాట్ చౌరస్తా వద్ద 65 నంబరు జాతీయ రహదారిని దిగ్బంధించారు. దీంతో 2 గంటలపాటు ట్రాఫిక్ పూర్తిగా స్తంభింది. పోలీసులు లాఠీచార్జి చేయగా 15 మంది గాయపడ్డారు. మనస్తాపం చెందిన విద్యార్థిని సోదరుడు రమేష్ ఒంటిపై కిరోసిన్ పోసుకొని ఆత్మహత్యకు యత్నించాడు.
  
  
 
  


 ముజఫర్నగర్: ఓ బాలికను కొందరు ఆకతాయి యువకులు అల్లరి పెట్టడంతో అది కాస్త రెండు వర్గాల మధ్య ఘర్షణగా మారింది. ఈ ఘటన ఉత్తరప్రదేశ్లోని ముజఫర్నగర్లోగల హైబత్ పూర్లో చోటుచేసుకుంది. పోలీసులు వివరాల ప్రకారం ఈ ఘటనకు ముందు బాలిక ఓ బస్సులో వస్తుండగా మరో వర్గానికి చెందిన ఇద్దరు యువకులు కించపరిచేలా మాట్లాడారు.
 
 ఈవ్ టీజింగ్కు పాల్పడ్డారు. ఆ విషయం సదరు అమ్మాయి వాళ్ల వర్గంతో చెప్పడంతో అది కాస్త రెండు వర్గాల ఘర్షణకు దారి తీసి గొడవలు జరిగాయి. ఈ నేపథ్యంలో అక్కడికి వచ్చిన పోలీసులు ఇరు వర్గాల నుంచి చెరో ఇద్దరిని అదుపులోకి తీసుకున్నారు. మొత్తం 13మందిపై కేసులు నమోదు చేశారు.


 ఉత్తరప్రదేశ్లో కొంతమంది యువకులు తనను పదే పదే ఈవ్ టీజింగ్ చేస్తుండటంతో ఆ వేధింపులు భరించలేని యువతి (20) ఉరేసుకుని ఆత్మహత్య చేసుకుంది. ఈ ఘటన చార్పాన్ ఖుర్ద్ గ్రామంలో జరిగింది. ఇటీవలే ఆమె బీఎస్ఎఫ్ ప్రిలిమినరీ పరీక్షలలో ఉత్తీర్ణత పొంది, మెయిన్స్ కోసం ప్రిపేరవుతోంది.
 
 గత శుక్రవారం నాడే ఆమె తనను ఇద్దరు యువకులు పదే పదే వేధిస్తున్నారంటూ పోలీసులకు ఫిర్యాదు చేసింది. దాంతో వాళ్లను కస్టడీలోకి తీసుకుని, తర్వాత వదిలిపెట్టినట్లు పోలీసులు తెలిపారు. అయినా వాళ్ల వేధింపులు ఆగకపోవడంతో ఆదివారం రాత్రి ఆమె ఉరేసుకుని మరణించింది. దోషులపై కఠినాతి కఠినమైన చర్యలు తీసుకుంటామని ఇన్స్పెక్టర్ జనరల్ ఆఫ్ పోలీస్ అమితాబ్ యశ్ తెలిపారు. నలుగురు వ్యక్తులపై కేసు దాఖలు చేశామని, ఒకరిని అరెస్టు చేశామని ఎస్పీ బ్రిజేశ్ సింగ్ చెప్పారు.


 యలమంచిలి : కళాశాల విద్యార్థినిపట్ల అనుచితంగా ప్రవర్తించిన యువకునికి యలమంచిలిలో శుక్రవారం దేహశుద్ధి చేశారు. ఒక ప్రైవేట్ కళాశాల నుంచి ఇంటికి వెళ్తున్న విద్యార్థినిని విజయనగరం జిల్లా బొబ్బిలికి చెందిన గేదెల గణేష్ అనే యువకుడు అడ్డగించి సైకిల్ తాళం తీసుకున్నాడు. తనతో మాట్లాడాలని ఒత్తిడి తెచ్చాడు. ఇది గమనించిన ఒక పత్రికా విలేకరి ఫొటో తీయబోగా పరుగున వెళ్లిపోయాడు. కొక్కిరాపల్లి పీఏసీఎస్ సమీపంలో అతడ్ని పట్టుకున్నారు.
 
 సమాచారం మేరకు అక్కడికి చేరుకున్న విద్యార్థిని తల్లిదండ్రులు, బంధువులు అతడికి దేహశుద్ధి చేశారు. అనంతరం పట్టణ పోలీసులకు అప్పగించారు. వారు కూడా తమదైన శైలిలో యువకుడికి కోటింగ్ ఇచ్చారు. ఇక ముందు ఇలాంటి చర్యలకు పాల్పడనని రాతపూర్వకంగా యువకుడు హామీ తీసుకుని యువకుడ్ని విడిచి పెట్టారు.  
  
  


 కొన్నాళ్ల క్రితం సీనియర్ల వేధింపులు తట్టుకోలేక ఆంధ్రప్రదేశ్లోని నాగార్జున విశ్వవిద్యాలయం హాస్టల్లో రిషితేశ్వరి ఆత్మహత్య చేసుకుంది. ఇప్పుడు మహారాష్ట్రలో దాదాపు అలాంటి ఘటనే మరోటి చోటుచేసుకుంది. ఎంత చెప్పినా వినిపించుకోకుండా తనను ఓ వ్యక్తి పదే పదే ఈవ్ టీజింగ్ చేస్తుండటంతో.. ఆ అవమానాన్ని తట్టుకోలేక 18 ఏళ్ల అమ్మాయి విషం తాగి ఆత్మహత్య చేసుకుంది. ఈ ఘటన ఉత్తర మహారాష్ట్రలోని జల్గావ్ జిల్లాలో జరిగింది. పచోరా పట్టణంలోని ఓ కాలేజిలో ఆ అమ్మాయి చదువుతోంది. శరద్ పాటిల్ (25) అనే  వ్యక్తి ఆమెను పదే పదే వెంబడిస్తూ వేధించేవాడు.
 
 ఎంత చెప్పినా వదలకుండా.. అతడు ఈవ్ టీజింగ్ చేయడంతో ఆమె తట్టుకోలేకపోయింది. ఆగస్టు 17వ తేదీన ఆమె ఎలుకలను చంపేందుకు వాడే మందు తినేసి ఆత్మహత్య చేసుకుంది. శరద్ పాటిల్ను పోలీసులు అదేరోజు అరెస్టు చేశారు. ఆమె ఎక్కడికి వెళ్లినా అతడు వెంటపడేవాడని తెలిపారు.


 కొత్తూరు(మహబూబ్‌నగర్): విద్యార్థినుల పట్ల అసభ్యంగా మాట్లాడుతున్న యువకులను పోలీసులు అదుపులోకి తీసుకున్నారు. మహబూబ్‌నగర్ జిల్లా కొత్తూరు మండలం నందిగామ గ్రామంలో బుధవారం జరిగింది. గ్రామానికి చెందిన లారీ డ్రైవర్లు రాము(24), చెన్నయ్య(22), బీటెక్ విద్యార్థులు మహేష్(22), రాకేష్(21) ఉదయం గ్రామంలోని బస్టాప్ వద్ద నిలబడి... విద్యార్థినులు, యువతులను చూసుకుంటూ తమ సెల్‌ఫోన్లలో అసభ్యకరంగా మాట్లాడుతున్నారు.
 
 ఈ విషయాన్ని అక్కడే ఉన్న షీ టీం సభ్యులు సుమారు అర్థగంట పాటు గమనించారు. మాటలతో ఆగకుండా వారి అగడాలు మితిమీరడంతో నలుగురినీ అదుపులోకి తీసుకుని స్టేషన్‌కు తరలించారు. వారిని షాద్‌నగర్ కోర్టులో హాజరుపరుచనున్నట్లు సీఐ గంగాధర్ వెల్లడించారు.


 ఎతాహ్(ఉత్తరప్రదేశ్): తనపై ఈవ్ టీజింగ్కు పాల్పడుతున్న కొంతమంది వ్యక్తులను నిరోధించేందుకు ప్రయత్నించిన మహిళపై కాల్పులు జరిపారు. దీంతో ఆమె గాయాలపాలయింది. ఈ ఘటన ఉత్తరప్రదేశ్లోని కొత్వాలీ మలాన్ జిల్లాలోగల సెంధారిలో చోటుచేసుకుంది. ఇంట్లో పనిముగించుకుని ఆరుబయట కూర్చున్కన మహిళ వద్దకు ముందుగా సునీల్ అనే వ్యక్తి వచ్చాడు.
 
 ఆతర్వాత మరో ముగ్గురు అక్కడికి చేరుకుని లైంగిక వేధింపులకు పాల్పడే ప్రయత్నం చేశారు. దీంతో ఆమె వారిని తీవ్రంగా అడ్డుకుంది. ఆ క్రమంలో సునీల్ తన చేతిలోని తుపాకీతో కాల్పులు జరిపారు. బాధితురాలిని ఆస్పత్రికి తరలించగా ప్రాణాపాయం తప్పింది కానీ, ఇంతవరకు నిందితులనెవరినీ అరెస్టు చేయలేదు. వారు పరారీలో ఉన్నట్లు సమాచారం.


 ఆకతాయిల ఆగడాలకు చెక్
 కఠిన శిక్షలు.. భారీ జరిమానా
 {పొహిబిషన్ ఆఫ్ ఈవ్ టీజింగ్ బిల్లు సిద్ధం
 అనుమతి కోరుతూ కేంద్ర ప్రభుత్వానికి నివేదన
 {Xన్ సిగ్నల్ వస్తే అసెంబ్లీ ఆమోదానికి...
  
 సిటీబ్యూరో: అమ్మాయిలను వేధించే ఆకతాయిలూ... తస్మాత్ జాగ్రత్త. బుద్ధిగా ఉండకపోతే... భారీ మూల్యం చెల్లించుకోవాల్సి వస్తుంది. బస్టాండ్లు, రైల్వేస్టేషన్ల వంటి పబ్లిక్ ప్రదేశాలతో పాటు కాలేజీలు, వ్యాపార సముదాయాల్లో యువతులు, మహిళల వెంటపడే పోకిరీలకు పూర్తి స్థాయిలో చెక్ చెప్పే దిశగా హైదరాబాద్ పోలీసు విభాగం కసరత్తు చేస్తోంది. ఇందులో భాగంగా ఈవ్ టీజర్లకు కఠిన శిక్షలు పడేలా రూపొందించిన ‘తెలంగాణ ప్రొహిబిషన్ ఆఫ్ ఈవ్‌టీజింగ్ బిలు’్ల కేంద్రానికి చేరింది. అక్కడ ఆమోదముద్ర పడిన వెంటనే అసెంబ్లీలో ప్రవేశపెట్టి చట్టాన్ని రూపొందించడానికి సన్నాహాలు చేస్తున్నారు. ఇది అమలులోకి వస్తే... ఈవ్ టీజర్ నేరం రుజువైతే గరిష్టంగా రూ.లక్ష జరిమానా విధించే అవకాశం ఉంటుంది. అంతేకాదు... రెండేళ్ల వరకూ జైలు శిక్ష విధించేందుకు ఆస్కారం ఏర్పడుతుంది. తమిళనాడులో అమలులో ఉన్న ప్రొహిబిషన్ ఆఫ్ ఈవ్‌టీజింగ్ ఆర్డినెన్స్ తరహాలోనే రాష్ట్ర ప్రభుత్వం ‘తెలంగాణ స్టేట్ ప్రొహిబిషన్ ఆఫ్ ఈవ్ టీజింగ్ అండ్ హరాస్‌మెంట్ ఆఫ్ ఉమెన్’ ముసాయిదా బిల్లు రూపొందించి కేంద్రానికి పంపింది. 1998లో చెన్నైలో కాలేజీ విద్యార్థి సారిక ఈవ్‌టీజింగ్‌కు బలవడంతో తమిళనాడు ప్రభుత్వం ప్రొహిబిషన్ ఆఫ్ ఈవ్ టీజింగ్ ఆర్డినెన్స్‌ను తీసుకొచ్చింది. 1992 నుంచి ఢిల్లీలోనూ ఇదే విధానం అమలులో ఉంది. అదే తరహాలో తెలంగాణలో సమకాలీన అవసరాలకు తగ్గట్టు బిల్లు రూపొందించారు.
 
  ఇదీ ‘ఈవ్‌టీజింగ్’...
 మహిళలతో అసభ్యకరంగా వ్యవహరించినా... వారిని భయపెట్టేలా చేసినా, గాయాలకు కారణమైనా...ఆ వ్యక్తిని ‘ఈవ్ టీజింగ్’ పరిధిలోనే చూస్తారు.విద్యాసంస్థలు, ఆలయాలు, ఇతర ప్రార్థన స్థలాలు, బస్ స్టాప్‌లు, రోడ్డు, రైల్వే స్టేషన్, సినిమా థియేటర్లు, పార్కులు, బీచ్, పండుగ ప్రాంతాలు, ప్రజా రవాణా వాహనం, ఇతర ఏ ప్రాంతంలోనైనా మహిళలను ఈవ్ టీజింగ్ చేస్తే జైలుకెళ్లాల్సిందే.ఒకవేళ విద్యాసంస్థల్లో జరిగితే అక్కడి ఇన్‌చార్జి ఈ విషయాన్ని పోలీసులకు తెలపాల్సి ఉంటుంది.{పజా రవాణా వాహనంలో ఈవ్‌టీజింగ్ జరిగితే బాధితురాలు ఆ విషయాన్ని సిబ్బందికి చెబితే సమీపంలోని పోలీసు స్టేషన్‌కు వాహనాన్ని తీసుకెళ్లాలి. లేదంటే పోలీసులకు సమాచారాన్ని అందించాలి. అలా చేయకపోతే సిబ్బందికి కూడా జరిమానా విధిస్తారు.
 
  ఇవీ శిక్షలు
 ఈవ్‌టీజింగ్/వేధింపులు: రెండేళ్ల వరకు జైలు శిక్షతో పాటు రూ.30 వేల నుంచి రూ.లక్ష వరకు జరిమానా.బాధితురాలు మరణిస్తే: నిందితుడికి పదేళ్ల వరకు జైలు శిక్ష. అవసరమనుకుంటే శిక్షా కాలం పెరుగుతుంది. రూ.30 వేల నుంచి రూ.రెండు లక్షల వరకు జరిమానా. ఆత్మహత్య చేసుకుంటే: నిందితుడికి పదేళ్ల వరకు జైలు శిక్ష. రూ.50 వేల నుంచి రెండు లక్షల వరకు జరిమానా.
  గాయపడితే: నిందితుడికి మూడేళ్ల నుంచి పదేళ్ల వరకు జైలు శిక్ష. రూ.30 వేల నుంచి రూ.రెండు లక్షల వరకు జరిమానా.
  
 కేంద్రంతో సంప్రదిస్తున్నాం
  ‘తెలంగాణ స్టేట్ ప్రొహిబిషన్ ఆఫ్ ఈవ్ టీజింగ్ అండ్ హరాస్‌మెంట్ ఆఫ్ ఉమెన్’ ముసాయిదా బిల్లు విషయంలో కేంద్ర ప్రభుత్వంతో సంప్రదిస్తున్నాం. వేధింపులకు గురవుతున్న మహిళల రక్షణ కోసం ఈ బిల్లును కేంద్రానికి పంపాం. తమిళనాడుతో పోల్చుకుంటే ఇక్కడ నేర తీవ్రతను పెంచడంతో పాటు జరిమానాను కూడా భారీ మొత్తంలో పెంచాం. దీనివల్ల మహిళలపై వేధింపులు తగ్గే అవకాశముంది. ప్రధానంగా నగరంలో ఈవ్‌టీజింగ్ తరహా వేధింపులకు అడ్డుకట్ట వేయవచ్చు. ఇప్పటికే షీటీమ్‌లు సమర్థంగా పని చేస్తుండటంతో పోకిరీల ఆగడాలు గణనీయంగా తగ్గాయి.     
   -స్వాతి లక్రా,
  హైదరాబాద్ నగర అదనపు పోలీసు కమిషనర్ (నేరాలు)
  
  


 న్యూఢిల్లీ: దేశ రాజధానిలో అత్యంత దారుణం చోటుచేసుకుంది. ఈవ్ టీజింగ్ను అడ్డుకున్న ఓ యువతిని అత్యంత కిరాతకంగా హత్య చేశారు. దాదాపు 35 సార్లు ఆమెను కత్తితో పొడిచి ప్రాణాలు తీశారు. ఢిల్లీలోని ఆనంద్ పర్బాత్ ఏరియాలో గురువారం రాత్రి ఈ ఘటన చోటుచేసుకుంది. గత కొంతకాలంగా ఓ ఇద్దరు సోదరులు పందోమ్మిదేళ్ల యువతిని ర్యాగింగ్ చేస్తూ వచ్చారు. ఆమె ప్రతిఘటించిన ప్రతిసారి అసభ్యకరంగా ప్రవర్తించారు. కాగా, గురువారం సాయంత్రం మార్కెట్కు వెళ్లిన యువతిని ఫాలో అయిన ఆ ఇద్దరు ముందు టార్చర్ పెట్టే ప్రయత్నం చేశారు.
 
 ఆమె వారి నుంచి తప్పించుకోని కొంచెం ముందుకు పరుగెత్తగా వెంటపడి మరీ బందించి మొత్తం 35 సార్లుకుపైగా కసాయివారిలా మారిపోయి కత్తితో పొడిచేశారు. దీంతో ఆ బాలిక అపస్మారక స్థితిలోకి పోయింది. అయినప్పటికీ వారు విడిచిపెట్టకుండా మరోసారి హింసించేందుకు ప్రయత్నించారు. ఈ విషయాన్ని అక్కడి ప్రత్యక్ష సాక్షులే తెలిపారు. గతంలో ఆ యువతి వారిపై పోలీసులకు ఫిర్యాదు కూడా చేసింది. కానీ, పోలీసులు ఆ ఫిర్యాదును పట్టించుకోలేదని, పెడచెవిన పెట్టడం వల్లే తమ బిడ్డ బలైందని తల్లిదండ్రులు, బంధువులు రోధిస్తున్నారు. నిందితులను పోలీసులు ఇప్పటికే అరెస్టు చేసి హత్య కేసు నమోదు చేశారు.


 హైదరాబాద్: తనను వేధించిన పోకిరీలపై తాను ఫిర్యాదు చేయకపోయినా పోలీసులు స్పందించడం అభినందనీయమని టీవీ నటి అస్మిత అన్నారు. తనను వేధించిన ఇద్దరు ఆకతాయిలు అరెస్ట్ అయ్యారన్న సంగతి మీడియా ద్వారానే తెలిసిందని ఓ టీవీ చానల్ తో చెప్పారు. తనను వేధించిన పోకిరీలను తన కారులోంచి ఫోటోలు తీసి సోషల్ మీడియాలో పోస్టు చేశానని ఆమె వెల్లడించారు. అలాగే 'షీ' వెబ్ సైటులోనూ పెట్టానని చెప్పారు. అవేర్ నెస్ పెంచాలనే ఉద్దేశ్యంతోనే అలా చేశానని అన్నారు.
 
 ఇంతకుముందు రెండుమూడు సార్లు పోకిరీల బారిన పడ్డానని అప్పుడు ఏమీ చేయలేకపోయానని వెల్లడించారు. గత అనుభవాల దృష్ట్యా అప్రమత్తంగా ఉంటున్నానని చెప్పారు. ఈ క్రమంలో బైకుపై వెళుతూ తనను వేధించిన ఇద్దరు ఆకతాయిల ఫోటోలు తీశానని వివరించారు. తాను ఫోటోలు తీస్తున్నానన్న భయం లేకుండా నవ్వుతూ ఫోజులు పెట్టారని, అందుకే వారి ఫోటోలు సోషల్ మీడియాలో పెట్టానని తెలిపారు.
 
 దీనిపై పోలీసులు వెంటనే స్పందించి చర్యలు తీసుకున్నారని అన్నారు. తమవైపు నుంచి కూడా తప్పు ఉందని వ్యాఖ్యానించారు. పోకిరీల బారిన పడుతున్న మహిళలు ఫిర్యాదు చేయకపోవడంతో వారి ఆటలు సాగుతున్నాయని ఆవేదన వ్యక్తం చేశారు. బాధితులు ధైర్యంగా ఫిర్యాదు చేయాలని అస్మిత సూచించారు.


 అస్మిత అనే తెలుగు టీవీ నటిని వేధిస్తూ, ఆమె కారును ఫాలో చేసిన కేసులో ఇద్దరు వ్యాపారులను పోలీసులు అరెస్టు చేశారు. ఇమ్రాన్ బిన్ మహ్మద్, సయ్యద్ నూరుల్లా హుస్సేని అనే ఇద్దరు ఆమె కారును ఓ బైకులో ఫాలో అవుతూ.. ఆమె దారిని అడ్డగించడమే కాక.. కారువైపు దూసుకొస్తూ, అసభ్యకరమైన చేష్టలు చేశారు.
 
 అస్మిత వెంటనే వాళ్లిద్దరినీ ఫొటో తీసి, దాన్ని 'షీటీం' ఫేస్బుక్ పేజీలో పోస్ట్ చేశారు. అప్పటికే నగరంలో తిరుగుతూ ఉన్న షీ టీం సభ్యులు ఆ ఫొటో, బైకు ఆధారంగా వాళ్లను వెంటనే అరెస్టు చేసినట్లు అదనపు సీపీ స్వాతి లక్రా తెలిపారు. వాళ్లిద్దరి మీద పెట్టీకేసు పెట్టి.. తర్వాత విడిచిపెట్టినట్లు ఆమె చెప్పారు.


 అమ్మాయిల వెంట పోకిరీలు పడటం.. ఈవ్‌టీజింగ్ వంటివి సాధారణమైపోయాయి. మరి దీనికి పరిష్కారమెలా? ఈ చిత్రంలోని వ్యక్తి వీటికో వినూత్న పరిష్కారాన్ని కనుగొన్నాడు. ఓ టీ షర్ట్‌పై తన ఫొటోతో పాటు ‘బాయ్స్ జాగ్రత్త.. వీడు మా నాన్న’ అన్న వాక్యాలు ప్రింట్ చేయించి.. తన కుమార్తెకు వేసుకోమని ఇచ్చాడు.
 
 వాళ్ల నాన్న ఫొటో చూశారుగా.. ఒక్క గుద్దుకే చంపేసేటట్లున్నాడు. అబ్బాయిలు వెంట పడటం సంగతి అలా ఉంచితే.. కన్నెత్తి చూడ్డానికే భయపడేలా ఉందా బాడీ.. వీరు ఎక్కడివారు అన్న విషయం తెలియకపోయినా.. ప్రస్తుతం ఈ ఫొటో ఫేస్‌బుక్‌లో హల్‌చల్ చేస్తోంది. ఆస్ట్రేలియాలోని మెల్‌బోర్న్‌కు చెందిన జుజిట్సూ(ఇదో మార్షల్ ఆర్ట్) ప్రపంచ చాంపియన్ కిట్ డేల్ తొలిసారిగా ఈ చిత్రాన్ని ఫేస్‌బుక్‌లో పోస్ట్ చేశారు. తెలివైన నాన్న అంటూ కామెంట్ పెట్టారు. అక్కడ్నుంచి ఇది లక్షలాది లైకులు, కామెంట్లతో దూసుకుపోతోంది.
  
  


 ఎన్ని చట్టాలు తెచ్చినా, చర్యలు చేపడుతున్నా మహిళలపై వేధింపులు ఆగడం లేదు. ఆధునిక సమాజంలోనూ అతివలపై అకృత్యాలకు అడ్డుకట్ట పడడం లేదు. నవ నాగరిక లోకంలోనూ నారీమణులకు నగుబాటు తప్పడం లేదు. సామాజిక కట్టుబాట్లను తెంచుకుని విద్యాఉద్యోగ రంగాల్లో రాణిస్తున్న 'ఆమె'ను కీచక సంతతి కాల్చుకు తింటూనే ఉంది.  నాటి నుంచి నేటి వరకు సమాజం ఎంతగా పురోగమించినా మగాళ్ల మైండ్ సెట్ మారకపోవడం విస్తుగొల్పుతోంది.
 
 'నేను మగాణ్ని, ఏమైనా చేస్తా' అనే ధోరణి ఇంకా కొనసాగుతుండడం శోచనీయం. ఇదే విషయం మరోసారి రుజువైంది. వనితలను వేధింపులకు గురిచేసే పోకిరీలకు ముకుతాడు వేసేందుకు తెలంగాణ ప్రభుత్వం 'షీ' బృందాలు ఏర్పాటు చేసింది. సైబరాబాద్ పరిధిలో ఆడవాళ్లను అల్లరి పెడుతూ 250 మందిపైగా జులాయిలు ఈ బృందానికి చిక్కారు.  చేసిన తప్పుకు పశ్చాత్తాపం ప్రకటించకపోగా వేధింపులు తప్పనిపించలేదంటూ ఈ 'ఇడియట్స్' లో 80 శాతం మంది దబాయించడం మగాడి మైండ్ సెట్ మారలేదనడానికి ప్రబల తార్కాణం.
 
 అబ్బాయిలతో అమ్మాయిలు చనువుగా మెలగడం వల్లే వేధింపులు పెరుగుతున్నాయని సూత్రీకరించిన ఈవ్ టీచర్లు... తమ ఇంట్లో అమ్మాయిల జోలికి ఎవరైనా వస్తే తోలు ఒలుస్తామని హుంకరించడం హాస్యాస్పదంగా కనబడుతోంది.  కొంచెం అటుఇటుగా దేశమంతా ఇదే పరిస్థితి ఉందని చెప్పడానికి సంకోచించాల్సిన పనిలేదు. సాంకేతికంగా శిఖరస్థాయి చేరామని చంకలు గుద్దుకుంటున్న సమాజంలో స్త్రీలపై వేధింపులు లెక్కకు మిక్కిలిగా పెరుగుతుండడం చూస్తుంటే పితృస్వామ్య పెత్తందారీ పోకడలు పూర్తిగా పోలేదని అర్థమవుతోంది. తమ ఆధిపత్యాన్ని చూపించుకునేందుకు మగాళ్లు అబలలపై వేధింపుల పర్వాన్ని కొనసాగిస్తున్నారు. ఉమ్మడి కుటుంబ వ్యవస్థ ఛిన్నాభిన్నం కావడం కూడా పరిస్థితి చేయిదాటడానికి కారణమన్న వాస్తవం విస్మరించరానిది.
 
 సమాజం పురోగమిస్తున్న కొద్దీ అనాగరిక పోకడలు పతనం కావాలి. అదేం విచిత్రమో ఆడవాళ్లపై అకృత్యాలు నానాటికీ అధికమవుతున్నాయి. కారణాలు ఏమైనా కానీ కాంతలపై కిరాతకాలు కొనసాగుతూనే ఉన్నాయి. ఆధునిక పటాటోపంతో మిడిసిపడుతున్న నేటి సమాజం.. స్త్రీల పట్ల పురుషుడి ఆలోచనా ధోరణిలో మాత్రం గతకాలంలోనే ఆగిపోయిందన్న భావన కలుగుతోంది.  నిజంగా సమాజం మారివుంటే ఫుణ్య ధరిత్రిలో పడతులపై అకృత్యాలు ఎందుకు పెరుగుతాయి. తామేం చేసినా చెల్లుబాటు అవుతుందనే మగాడి ఆలోచనా విధానం మారనంత కాలం అతివలకు కష్టాలు తప్పవు.
 
 -పి. నాగశ్రీనివాసరావు
 (సాక్షి వెబ్ ప్రత్యేకం)


 ముజఫర్ నగర్: తమ ఆకతాయి చేష్టలను అడ్డుకున్నాడని ముగ్గురు వ్యక్తులు కలసి ఓ ట్రావెలింగ్ ఏజెన్సీ యజమానిని కొట్టిపడేశారు. ఓ ట్రావెలింగ్ ఏజెన్సీని నడుపుతున్న హుస్సేన్ అహ్మద్ తన ఏజెన్సీలో పనిచేస్తున్న ఇద్దరు మహిళలపై ముగ్గురు యువకులు ఈవ్ టీజింగ్కు పాల్పడటం గమనించాడు. అలాంటి చేష్టలు తప్పని వారిని  మందలించి వదిలేశాడు.
 
 కానీ, అతడి మాటలను పెడచెవినపెట్టిన యువకులు హుస్సేన్ ఏజెన్సీ వద్దకు వచ్చి తొలుత రాళ్లు రువ్వారు. అనంతరం అతడిపై అమాంతం దాడి చేసి పిడిగుద్దులు గుప్పించారు. ఘటన ప్రాంతానికి చేరుకున్న పోలీసులు పరిస్థితిని అదుపులోకి తెచ్చి యువకులను అరెస్టు చేశారు.


 అది భద్రాచలం రోడ్ రైల్వేస్టేషన్. రైలు కోసం ఓ యువతి వేచి చూస్తోంది. ఇదే అదనుగా భావించాడు ఓ పోకిరీ.. అమ్మాయి పట్ల అసభ్యంగా ప్రవర్తించటమే కాదు... మీద చేయి కూడా వేశాడు. అయితే ఒంటరిగా ఉన్న ఆమె.. ఏమి చేయాలో అర్థం కాలేదు. బాధను మౌనంగా భరించింది. కానీ.. పోకిరి వెకిలి చేష్టలు మాత్రం తగ్గలేదు. దీంతో.. కోపాన్ని తట్టుకోలేకపోయిన ఆమె... అతనికి నాలుగు తగిలించింది.
 
 ఈ ఘటన ఖమ్మం జిల్లా భద్రాచలం రోడ్ రైల్వేస్టేషన్‌లో జరిగింది. రామవరానికి చెందిన ఓ యువతి... హైదరాబాద్‌ వెళ్లేందుకు.. మణుగూరు ఎక్స్‌ప్రెస్‌ కోసం వేచి ఉంది. రైల్లో రద్దీ ఎక్కువగా ఉండటంతో మరో రైలు ఎక్కేందుకు ఫ్లాట్‌ ఫాంపై కూర్చుంది. ఇది గమనించిన ఓ యువకుడు మద్యం మత్తులో ఆమెతో అసభ్యంగా ప్రవర్తించటం మొదలుపెట్టాడు. ఆమెపై చేయి వేశాడు. దీంతో ఆగ్రహించిన అమ్మాయి.. పోకిరీపై తిరగబడింది. నాలుగు మాటలు అని.. నాలుగు ఉతుకులు ఉతికింది.
 
 ఈ విషయాన్ని గమనించిన  స్థానికులు కూడా యువతికి మద్దతుగా నిలిచారు. మందుబాబును.. మత్తు దిగేలా చితక్కొట్టారు. ఈ విషయం తెలుసుకున్న అమ్మాయి తల్లి... రైల్వేస్టేషన్‌కు చేరుకుని.. పోకిరికి నాలుగు తగిలించింది. మద్యం మత్తులో ఉన్న పోకిరీ బాబు... రైల్వే పోలీసులతో కూడా వాదులాటకు దిగాడు. దీంతో చిర్రెత్తుకొచ్చిన పోలీస్‌ బాబాయ్‌లు.. కాళ్లు, చేతులకు పని చెప్పారు.


 బస్టాప్‌లో ఈవ్‌టీజింగ్‌కు పాల్పడుతూ దొరికిన ఘనుడు
  
 ఈవ్‌టీజింగ్‌కు పాల్పడుతూ ఓ కళాశాల ప్రిన్సిపాల్ గురువారం షీ-టీమ్‌కు దొరికాడని క్రైమ్స్ అదనపు పోలీసు కమిషనర్ స్వాతిలక్రా తెలిపారు. నిజాంపేట్‌కు చెందిన మాల్గి ధన్‌శెట్టి (38) బాచుపల్లిలోని గాయత్రి జూనియర్ కళాశాలకు ప్రిన్సిపాల్. ఇతను ప్రతిరోజూ తన బైక్‌పై లక్డీకాపూల్ బస్టాప్‌కు వచ్చి.., అక్కడ తన బైక్‌ను పార్క్ చేస్తున్నాడు. ఒంటరిగా బస్టాప్‌లో ఉన్న మహిళలను తన బైక్‌పై రమ్మని చెప్పి.. ఈవ్ టీజింగ్‌కు పాల్పడుతున్నాడు.  ఇదే విధంగా గురువారం ఈవ్ టీజింగ్‌కు పాల్పడుతుండగా ఆ దృశ్యాలను షీ-టీమ్ వీడియో తీసి.. రెడ్‌హ్యాండెడ్‌గా పట్టుకుంది. ఎవరు ఈవ్‌టీజింగ్‌కు పాల్పడినా ఉపేక్షించేది లేదని అదనపు పోలీసు కమిషనర్ స్వాతిలక్రా హెచ్చరించారు.
 
 స్కూల్ విద్యార్థులను వేధిస్తూ...
 
 ఇద్దరు ఇంటర్ విద్యార్థులు (బాలలు) తార్నాక బస్టాప్‌లో కూర్చుని స్కూల్ పిల్లలను ఈవ్‌టీజింగ్ చేస్తూ షీ-టీమ్‌కు చిక్కారు. వీరిని అదునపులోకి తీసుకున్న పోలీసులు వారి కుటుంబ సభ్యులను పిలి   పించి.. వారి సమక్షంలో కౌన్సెలింగ్ ఇచ్చి వదిలేశారు.
  
 మాసెల్‌కు కాల్ చేయండి...
 
 విద్యార్థినులకు సెల్‌నెంబర్ ఇచ్చి తమకు ఫోన్ చేయాలని వేధిస్తున్న ఇద్దరు ఇంటర్ విద్యార్థులను షీ-టీమ్ పట్టుకుంది. మలక్‌పేట్‌కు చెందిన విద్యార్థులు మెహిదీపట్నంలోని డెక్కన్ బేకరీలో కూర్చున్న యువతులకు ఒక కాగితంపై తమ సెల్‌నెంబర్లు రాసి ఫోన్ చేయాలని వేధిస్తున్నారు. సమాచారం అందుకున్న షీ-టీమ్ సభ్యులు వీడియో ఆధారంగా వారిద్దరినీ రెడ్‌హ్యాండెడ్‌గా పట్టుకున్నారు.


 వెంటపడి.. ఫోన్ నెంబర్ కావాలని వేధిస్తున్న యువకుడి చెంప చెళ్లుమన్పించిందో యువతి.  హైదరాబాద్ నగరం, శివారు ప్రాంతాల్లో షీ-టీమ్‌లు రంగంలోకి దిగి పోకిరీల ఆట కట్టిస్తుండగా, అదే రీతిలో మహిళల్లోనూ చైతన్యం వచ్చింది.
  
 పేట్‌బషీరాబాద్ అంగడిపేట గడిమైసమ్మ ఆలయ సమీపంలో ఓ యువకుడు అటుగా వెళ్తున్న యువతి వెంటపడి ఫోన్‌నెంబర్ ఇవ్వాలని కోరాడు. దీంతో ఆగ్రహం కట్టలు తెంచుకున్న ఆమె పరిచయం లేని ఆ యువకుడి చెంప చెళ్లుమనిపించి అక్కడ నుంచి వెళ్లిపోయింది. అటు వైపు వెళ్తున్న 'సాక్షి' కెమెరాకు ఈ దృశ్యం చిక్కింది.


 కరీమాబాద్: కేరళ ఎక్స్‌ప్రెస్‌లో ప్రయాణిస్తూ బుధవారం రాత్రి ఆకతాయి వేధింపులకు గురైన దంత వైద్యురాలు నుంచి వరంగల్ జీఆర్పీ పోలీసులు గురువారం మధ్యాహ్నం ఫిర్యాదు స్వీకరించారు. కేరళలోని కొట్టాయం ప్రాంతానికి చెందిన దంత వైద్యురాలు కేరళ ఎక్స్‌ప్రెస్‌లో ప్రయాణిస్తుండగా బుధవారం రాత్రి 1 గంట సమయంలో తమిళనాడులోని సేలం సమీపంలో ఓ ఆకతాయి వేధింపులకు పాల్పడినట్టు ఆమె తన ఫిర్యాదులో పేర్కొన్నారు.
 సెల్‌ఫోన్ తీసుకోవడంతో పాటు మాటలతో వేధించడం, అసభ్యకరంగా ప్రవర్తించినట్టు ఫిర్యాదు చేశారు. రైలు గురువారం ఉదయం విజయవాడ స్టేషన్‌కు చేరుకున్న వెంటనే వేధింపులకు పాల్పడిన వ్యక్తి దిగి వెళ్లిపోయినట్లు ఆమె వివరించారు. ఆకతాయి వేధింపులపై బాధిత వైద్యురాలు సెల్‌ఫోన్ ద్వారా పోలీసులకు సమాచారం అందించడంతో.. కేరళ ఎక్స్‌ప్రెస్ వరంగల్ స్టేషన్‌కు చేరుకున్న అనంతరం పోలీసులు బాధితురాలి నుంచి ఫిర్యాదు తీసుకుని విచారణ ప్రారంభించారు.
 
 
  


 ఈవ్‌టీజర్లకు డీసీపీ రమారాజేశ్వరి హెచ్చరిక
 11 మంది ఈవ్‌టీజర్లకు కౌన్సెలింగ్
 హైదరాబాద్: షీ-టీమ్స్‌కు పట్టుబడిన ఈవ్‌టీజర్లు కౌన్సెలింగ్ తర్వాత తమ పద్ధతి మార్చుకోకపోతే వారిపై ఐపీసీ సెక్షన్ల కింద కేసులు నమోదు చేసి జైలుకు పంపిస్తామని మల్కాజిగిరి డీసీపీ, షీ-టీమ్స్ నోడల్ అధికారి రమారాజేశ్వరి హెచ్చరించారు. సోమవారం 11 మంది ఈవ్‌టీజర్లను అరెస్టు చేసిన సందర్భంగా సైబరాబాద్ పోలీసు కమినరేట్‌లో ఏర్పాటు చేసిన విలేకరుల సమావేశంలో షీ-టీమ్స్ పని తీరును ఆమె వివరించారు. కేపీహెచ్‌బీ, ఉప్పల్, జీడిమెట్ల ప్రాంతాలలో ఈవ్‌టీజింగ్ ఎక్కువగా ఉందన్నారు. సైబరాబాద్‌లో ఈవ్‌టీజింగ్‌ను అరికట్టేందుకు గతనెల 24న 60 షీ-టీమ్స్ బృందాలను ఏర్పాటు చేశామన్నారు. ఇప్పటి వరకు ఈస్ట్‌జోన్‌లో 5, వెస్ట్‌జోన్‌లో 11 ప్రాంతాలల్లో  45 మంది పట్టుబడ్డారన్నారు. వీరంద రిపై సిటీ పోలీసు యాక్ట్ కింద కేసు నమోదు చేసి క్రైమ్ ఎగనెస్ట్ ఉమెన్ (కావ్) సెల్‌లో నిపుణులతో వారి కుటుంబ సభ్యుల ముందే కౌన్సెలింగ్ ఇప్పిస్తున్నామన్నారు. వీరు తమ పద్ధతి మార్చుకుని మంచిగా ఉంటే సరేనని, మరోసారి ఈవ్‌టీజింగ్‌కు పాల్పడితే మాత్రం ఐపీసీ సెక్షన్ల కింద కేసులు నమోదు చేసి జైలుకు పంపిస్తామన్నారు.
 ముఖ్యంగా ఐటీ జోన్ అయిన మాదాపూర్, హైటెక్‌సిటీ, రాయదుర్గం, మియాపూర్, చందానగర్‌లలో 10 షీ-టీమ్స్ తిరుగుతున్నాయన్నారు. బస్టాపులు, షాపింగ్ మాల్స్, హాస్టళ్లు, సినిమా థియేటర్లు, రైల్వేస్టేషన్ల వద్ద ఈవ్‌టీజింగ్‌పై గట్టి నిఘా వేశామన్నారు. ఈవ్‌టీజింగ్‌కు పాల్పడిన వారిని సాక్ష్యాలతో సహా వీడియో తీస్తున్నామన్నారు.  మహిళా కానిస్టేబుళ్లతో డెకాయి ఆపరేషన్ కూడా నిర్వహిస్తున్నామన్నారు. ఈవ్‌టీజింగ్‌ను ఎదుర్కొన్న బాధితులు 100 డయల్‌కు ఫోన్ చేస్తే.. పది నిమిషాల్లోనే షీ-టీమ్ అక్కడికి చేరుకొని పోకిరీల భరతం పడుతుందన్నారు.  సమావేశంలో క్రైమ్స్ ఏసీపీ ఉష, సైబర్‌క్రైమ్స్ ఏసీపీ స్నేహిత పాల్గొన్నారు. తాజాగా పట్టుబడిన ఈవ్‌టీజర్లు షీ-టీమ్స్ ప్రచారంలో పాలు పంచుకుంటారని చెప్పారు. కళాశాలకు వెళ్లి ఈవ్‌టీజింగ్ దుష్ఫలితాలపై వివరిస్తారన్నారు.  షీ-టీమ్స్ మహిళా కానిస్టేబుళ్లు విలేకరుల సమావేశానికి ‘షీ-టీమ్స్ సైబరాబాద్’ మాస్క్‌ను ధరించి వచ్చి అందరినీ ఆకట్టుకున్నారు.
  
  


 జోథ్ పూర్(రాజస్థాన్): మహిళా ఉద్యోగులతో అసభ్యంగా ప్రవర్తించిన కారణంగా ముగ్గురు విద్యార్థులను సస్పెండ్ చేసిన ఘటన జోథ్ పూర్ లోని ఎంబీఎమ్ ఇంజనీరింగ్ కళాశాలలో చోటు చేసుకుంది. ఆ కళాశాలలో ఫైనలియర్ చదువుతున్న ముగ్గురు వేర్వేరు బ్యాచ్ లకు చెందిన విద్యార్థులు మహిళా ఉద్యోగినితో పాటు కొంతమంది విద్యార్థినులను ఈవ్ టీజింగ్ చేస్తూ పట్టుబట్టారు. దీనిపై స్పందించిన కళాశాల యాజమాన్యం క్రమశిక్షణా చర్యలు చేపట్టింది.
  
 కళాశాల నుంచి బహిష్కరించబడిన వారిలో కేమ్ రాజ్ మీనా(ఎలక్ట్రానిక్స్), మోహిత్ కుమార్(సివిల్), శైలేష్ మీనా(మెకానికల్) విద్యార్థులు ఉన్నారు. ఈ ఘటనపై వారి తల్లి దండ్రులకు సమాచారం అందివ్వడమే కాకుండా, పోలీస్ ఫిర్యాదు చేసినట్లు కళాశాల క్రమశిక్షణా కమిటీ పేర్కొంది.  ప్రస్తుతం ఇద్దరు విద్యార్థులు పోలీసుల అదుపులో ఉండగా.. మరో విద్యార్థి ఆ కేసును బయటపడేందకు యత్నిస్తున్నట్లు తెలుస్తోంది.


 బంజారాహిల్స్: షాపింగ్ మాల్‌లో ఈవ్‌టీజింగ్‌కు పాల్పడుతున్న ఓ యువకుడిని స్థానికులు పట్టుకొని బంజారాహిల్స్ పోలీసులకు అప్పగించారు. మరో ఆరుగురు  పరారీలో ఉన్నట్లు పోలీసులు తెలిపారు. శుక్రవారం మధ్యాహ్నం ఓల్డ్‌సిటీకి చెందిన ఇద్దరు యువతులు సిటీ సెంటర్ మాల్‌లో షాపింగ్ చేస్తుండగా ఏడుగురు యువకులు వారిని అనుసరిస్తూ అసభ్యకరంగా ప్రవర్తించారు. ఈ విషయాన్ని బాధిత యువతులు అక్కడ ఉన్న సెక్యూరిటీకి ఫిర్యాదు చేశారు.
 
 సెక్యూరిటీ సిబ్బందితో పాటు వ్యాపారులు ఆ యువకులను పట్టుకోవడానికి ప్రయత్నించగా ఆరుగురు పరారీ కాగా.. ఉమర్ అనే యువకుడు దొరికాడు. అతడిని చితక్కొట్టి పోలీసులకు అప్పగించారు. బాధితుల ఫిర్యాదు మేరకు పోలీసులు ఉమర్‌పై ఈవ్‌టీజింగ్ కేసు నమోదు చేశారు. మిగతా వారి కోసం గాలిస్తున్నారు.
  


 హైదరాబాద్: రాజధానిలో ఈవ్ టీజర్లు రెచ్చిపోతున్నారు. వెకిలి చేష్టలతే వనితలను వేధిస్తున్నారు. నగరం నడిబొడ్డున ఉన్న బంజారాహిల్స్ సిటీ సెంటర్ లో శుక్రవారం పోకిరీలు రెచ్చిపోయారు. ఇద్దరు యువతులను వేధింపులకు గురిచేశారు. దీంతో కలత చెందిన యువతులు తమ కుటుంబ సభ్యులకు ఫోన్ లో సమాచారం అందించారు.
 
 వెంటనే సిటీ సెంటర్ కు చేరుకున్న యువతి బంధువులు పోకిరీలకు బుద్ధి చెప్పేందుకు యత్నింగా వారు ఎదురు తిరిగారు. దీంతో ఒకరికి దేహశుద్ధి చేసి పోలీసులకు అప్పగించారు. మరో ఆరుగురు పారిపోయారు.  ప్రభుత్వం ఎన్ని చర్యలు తీసుకుంటున్నా మహిళలపై వేధింపులు ఆగకపోవడం పట్ల ఆందోళన వ్యక్తమవుతోంది.


 21 రోజులుగా నమోదు కాని టీజింగ్ కేసు
 షీట్‌మ్ ఏర్పాటే కారణం
  
 సిటీబ్యూరో: నగరంలో ఈవ్‌టీజింగ్ బంద్ అయ్యిందా? ఈవ్‌టీజర్లు పారిపోయారా? లేక ప్రవర్తన మార్చుకున్నారా ?... గత 21 రోజుల నుంచి షీ టీమ్ పోలీసులకు ఒక్క ఈవ్ టీజర్ దొరక్కపోవడం.. ఒక్క కేసు కూడా నమోదు కాకపోవడమే ఇందుకు నిదర్శనం.  ఈవ్‌టీజింగ్‌కు పేరుగాంచిన మెహిదీపట్నం, సికింద్రాబాద్, దిల్‌సుఖ్‌నగర్, కోఠి, మలక్‌పేట తదితర ప్రాంతాల్లో సైతం ఈవ్ టీజింగ్ జాడలు కనుమరుగయ్యాయి. నగరంలోని బస్టాపు, రైల్వేస్టేషన్లు, కళాశాలలు, షాపింగ్ మాల్స్, మార్కెట్ల వద్ద మహిళలు ఎదుర్కొంటున్న ఈవ్‌టీజింగ్ సమస్యకు చెక్ పెట్టేందుకు రెండు నెలల క్రితం అదనపు పోలీసు కమిషనర్ స్వాతిలక్రా నేతృత్వంలో నగరంలో 100 షీటీమ్‌లను కమిషనర్ ఎం.మహేందర్‌రెడ్డి రంగంలోకి దింపిన విషయం తెలిసిందే. ఉదయం 8 నుంచి 11 గంటల వరకు, సాయంత్రం 3 నుంచి 6 గంటల వరకు ఈ ప్రత్యేక పోలీసు బృందాలు ఆయా ప్రాంతాలలో సివిల్ దుస్తుల్లో కాపు కాశాయి. ఈవ్‌టీజింగ్‌కు పాల్పడుతున్న వారిని వీడియోలో బంధించి, రెడ్‌హ్యాండెడ్‌గా పట్టుకున్నాయి. ఇలా వీరు రెండు నెలల్లో సుమారు 82 కేసులు నమోదు చేశారు. వీరిలో 11 మందిని జైలుకు కూడా పంపారు.
 
 కౌన్సెలింగ్ చేయడం ద్వారా ప్రవర్తన మార్చుకున్న 20 మంది విద్యార్థులు తాము సైతం ఈవ్‌టీజింగ్‌కు చెక్ పెట్టేందుకు కళాశాలలు, బస్టాప్‌ల వద్ద ప్రచారం చేశారు. బస్సులు, ఆటోలు, ఎంఎంటీఎస్ రైళ్లలో సైతం పోలీసులు విస్తృతంగా ఈవ్ టీజింగ్ కలిగే అనర్థాలపై ప్రచారం చేసి మహిళలకు భరోసా ఇచ్చారు. ఎవరైనా ఈవ్‌టీజింగ్‌కు పాల్పడితే 100 నెంబర్‌కు ఫోన్ చేయాలని ప్రచారం చేయడంతో పాటు 10 నిముషాలలో ఘటనా స్థలానికి చేరుకునేలా పోలీసులు పక్కా ప్రణాళిక సిద్ధం చేశారు. ఈ రెండు నెలల్లో 100 నెంబర్‌నుంచి వచ్చిన ఫిర్యాదులను ఏసీపీలు కవిత, శ్రీనివాస్‌లు స్వీకరించి వెంటనే రంగంలో ఉన్న షీ టీమ్స్ ఎస్‌ఐలు ముత్యాలు, రాజేందర్‌గౌడ్, రమేష్‌గౌడ్, రమేష్, బ్రహ్మచారి, హరికృష్ణలను అప్రమత్తం చేసి పది నిముషాల్లో ఘటనా స్థలానికి చేరుకునేలా చేశారు. షీ టీమ్స్ ప్రచారం వల్ల నగరంలో ఈవ్‌టీజింగ్ జాడ లేకుండా పోయింది.
  
 అప్రమత్తంగా ఉన్నాం:  
 
 ఈవ్‌టీజింగ్ కోసం మేము తీసుకున్న చర్యలు సత్ఫలితాలిచ్చాయి. రెండు నెలల పాటు టాస్క్‌ఫోర్, సీసీఎస్ పోలీసులు చాలా కృషి చేశారు. 21 రోజుల నుంచి ఈవ్‌టీజింగ్ కేసులు ఒక్కటి కూడా నమోదు కాలేదు. ఈవ్‌టీజింగ్ బంద్ అయ్యిందని అనుకుంటున్నాం. అయినా మేము   అప్రమత్తంగానే ఉన్నాం. షీ టీమ్స్ కూడా నిరంతరం రంగంలో ఉంటాయి. ఈవ్‌టీజింగ్ చేస్తున్నట్టు అనిపిస్తే వెంటనే 100కు ఫోన్ చేయాలి. మహిళల నుంచి కూడా తమకు మంచి స్పందన వచ్చింది.
  
 -స్వాతిలక్రా, అదనపు పోలీసు కమిషనర్
  


 సిటీ బస్సులు... కాలేజీ సెంటర్లు... ఎంఎంటీఎస్‌లు... ఏరియా ఏదైనా ఈవ్ టీజింగ్ మాత్రం కామనయిపోయింది. అమ్మాయిలను వేధించి ఆనందించే ఆకతాయిలకు అడ్డూ అదుపూ లేకుండా పోతోంది. చట్టాలు... వ్యవస్థలు... ఎన్ని ఉన్నా రోజూ ఎక్కడో అక్కడ ఈవ్ టీజర్లు రెచ్చిపోతూనే ఉన్నారు. మరి దీనికి ఫుల్‌స్టాప్ పెట్టేదెవరు..? అమ్మాయిలను రక్షించేదెవరు? ఇవే ఇప్పుడు అందర్నీ వేధిస్తున్న ప్రశ్నలు. ఎవరో వస్తారని.. ఏదో చేస్తారని ఎదురు చూసే కంటే.. మనల్ని మనం రక్షించుకొనే ప్రయత్నం చేస్తే వీటి నుంచి చాలా వరకు తప్పించుకోవచ్చని చూపారు హర్యానా సిస్టర్స్. బస్సులో వెంటాడిన ఈవ్ టీజర్లను బెల్టు తీసి భరతం పట్టిన వీరిలా అందరూ తెగువ చూపాలంటున్నారు మాదాపూర్ శ్రీవెంకటేశ్వర కాలేజ్ ఆఫ్ ఆర్కిటెక్చర్ విద్యార్థినులు. వారి చర్చే ఈ వారం ‘క్యాంపస్ కబుర్లు’...    
  
  మానస:  హర్యానాలో జరిగిన బస్సు సంఘటన వీడియో చూసి హ్యాపీగా ఫీలయ్యా. ఒక్క క్షణం ఇది నిజమేనా అనిపించింది. నిజంగా భారతి, పూజ ప్రతి ఒక్క భారతీయ మహిళకు ఆదర్శం.
   స్నేహ:  యా మానస.. ఆ సీన్ చూడగానే నేను బస్సులో ఎదుర్కొన్న సంఘటనలన్నీ కళ్ల ముందు తిరిగాయి. ఓసారి బస్సులో కాలేజీకి వస్తుంటే... మా ఫాదర్ ఏజ్ ఉంటుంది అతనికి. పక్కనే నిలబడ్డాడు. కావాలని నా చేతిని టచ్ చేస్తున్నాడు. రెండు మూడుసార్లు చూసి ‘ఏం కావాలి?’ అంటూ అరిచాను. బస్ బాగా రష్‌గా ఉందంటూ చెప్పాడు.
   నిశ్చల:  బస్సుల్లో ఇవి కామనయిపోయాయి. అయితే ఎంతమంది అమ్మాయిలు ఎదురుతిరుగుతున్నారనేది ప్రశ్న. ఈ మధ్యనే మా ఫ్రెండ్ బస్‌లో వెళుతుంటే ఓ యాభై ఏళ్ల వ్యక్తి తనను బాగా ఇబ్బంది పెట్టాడు. నలుగురిలో అతన్ని ఎదిరిస్తే తనెక్కడ అల్లరి అవుతుందోననే భయంతో బస్సు దిగేసింది.  
   టీనా:  ఇట్స్ టూ బ్యాడ్. కనీసం ఆమె అతన్ని కొట్టక్కర్లేదు... గట్టిగా నాలుగు మాటలంటే... చుట్టుపక్కలవారికి భయపడైనా దూరంగా జరిగేవాడు కదా!
   నిశ్చల:  నో... టీనా ఇలాంటి సందర్భాల్లో అమ్మాయినే తప్పుపట్టేవారున్నారు.
   హరిణి:  యస్... ఆ అమ్మాయి కాస్త మోడ్రన్ డ్రెస్ వేసుకుందనుకో... సపోర్ట్ చేయకపోగా కామెంట్ చేసేవారూ ఉన్నారు.  
   టీనా:  అఫ్‌కోర్‌‌స.. కాలం మారింది. బస్సులో ఆకతాయిలతో పాటు మనలాంటి పిల్లలున్న అమ్మానాన్నలు కూడా ఉంటున్నారు కదా.. వారు తప్పకుండా సపోర్ట్ చేస్తారు.
   హరిణి:  హర్యానా బస్సు ఇన్సిడెంట్‌లో అక్కాచెల్లెళ్లు తమకు ఇబ్బంది అనిపించగానే... చుట్టుపక్కలవారు ఏమనుకుంటారని ఆలోచించలేదు. బెల్టు తీసి బుద్ధి చెప్పడానికి సిద్ధపడ్డారు. మనమైనా అలాగే ఆలోచించాలి.  
   సౌందర్య:  ఎగ్జాట్లీ... నాకూ ఇలాంటి అనుభవం ఒకటుంది. అయితే ఇక్కడ టీజ్ చేసింది బస్ కండక్టరే. టికెట్లు తీసుకున్న తర్వాత కూడా కావాలని వెనక్కి, ముందుకీ ఓ పదిపదిహేను సార్లు మమ్మల్ని తోసుకుంటూ తిరుగుతున్నాడు. ఇక లాభం లేదని... నా దగ్గరికి రాగానే వాడి కాలుని నా హైహీల్స్‌తో గట్టిగా తొక్కా. దెబ్బకు కిక్కురుమనకుండా వెనక్కి వెళ్లిపోయాడు.  
   అనూష:  ఒక్క బస్సు సంఘటనలే కాదు... మిగతా చోట్లా ఆడవాళ్లను వేధిస్తున్నారు. అలాంటి సందర్భాల్లో కూడా తెలిగా వారికి బుద్ధి చెప్పే ప్రయత్నం చేయాలి.
   స్నిగ్ధ:  యస్... మనం ఆ పని చేయాలే గానీ సొసైటీ తప్పనిసరిగా పాజిటివ్‌గా రెస్పాన్స్ అవుతుంది. 
  టీనా: ఇక్కడ సొసైటీ ఎవరు స్నిగ్ధ? మనం ఇంకా ఎవరో వస్తారని, ఏదో చేస్తారనే లోకంలోనే ఉన్నాం. ఫర్ ఎగ్జాంపుల్ భారతి, పూజ సంఘటన చూడు. ఎపిసోడ్ మొత్తంలో ఆ అక్కాచెల్లెళ్ల రియాక్షన్ మాత్రమే ఉంది. బస్సు నిండా పదుల సంఖ్యలో ఆడవాళ్లు, మగవాళ్లు ఉన్నారు. వారెవరూ స్పందించలేదు.  
  అస్మిత: వాళ్లిద్దరూ టీజర్లని చితకబాదింది చుట్టూ ఉన్నవారిని చూసి కాదు... వారిలో ఉన్న ధైర్యం, అందుబాటులో ఉన్న బెల్టుని చూసుకుని. అంటే ఆత్మరక్షణే ఈ సమస్యకు పరిష్కారం.
  
  గుణపాఠం
  భారతి, పూజని ఆ రాష్ట్ర ప్రభుత్వం ప్రత్యేకంగా సన్మానించాలనుకున్న నిర్ణయం చాలా గొప్పది. పాఠాలు వేరు, గుణపాఠాలు వేరు. ఈ రోజు వారు మగవారి వంచనకు గురవుతున్న మహిళలకు ఆదర్శంగా నిలిచారు. ఎలాంటి సందర్భంలోనూ మగవారి వేధింపులను భరించాల్సిన అవసరం లేదు. అందుబాటులో ఉన్న ఏ చిన్న వస్తువునైనా ఆయుధంగా మలచుకుని
  ఎదురుతిరగాలి.    
  - అజిత సురభి,
  డెరైక్టర్ శ్రీ వెంకటేశ్వర కాలేజ్ ఆఫ్ ఆర్కిటెక్చర్
   భువనేశ్వరి
  ఫొటోలు: రాజేష్‌రెడ్డి


 మహిళలను వేధిస్తున్న అంశంపై కళ్లు తెరిపించేలా తీసిన ఓ షార్ట్ ఫిలిం ప్రస్తుతం సోషల్ మీడియాలో హల్చల్ చేస్తోంది. యూట్యూబ్లో ఇప్పటికి దీనికి 3.30 లక్షలకు పైగా హిట్లు వచ్చాయి. తాము చేసిన చిన్న ప్రయత్నానికి ఇంత భారీగా ఆదరణ రావడంతో దర్శకులు ఉబ్బి తబ్బిబ్బవుతున్నారు. ఖలీల్ హేరేకర్ దర్శకత్వం వహించిన ఈ సినిమాను పాకెట్ ఫిలింస్ ప్రమోట్ చేసింది. ఇందులో నలుగురు వ్యక్తులు రోడ్డుమీద మద్యం తాగుతుంటారు. అంతలో ఓ మహిళ అటువైపు వెళ్తుండగా వాళ్లు ఆమెను వేధిస్తారు. అయితే, ఆమె అక్కడక్కడే తిరగడంతో వాళ్లు షాకవుతారు.
 
 నవంబర్ 20వ తేదీన ఈ వీడియోను యూట్యూబ్లోకి అప్లోడ్ చేస్తే ఇప్పటికి దాదాపు 3.30 లక్షలకు పైగా హిట్లు వచ్చాయి. ఈవ్ టీజింగ్ పట్ల మనిషి ఆలోచనా విధానం ఎలా ఉంటుందో, వివిధ పరిస్థితుల్లో ఎలా ప్రవర్తిస్తారో తమ షార్ట్ ఫిలిం చూపిస్తుందని పాకెట్ ఫిలింస్ ఎండీ సమీర్ మోదీ అన్నారు. ఈ సినిమా తాము ఏదో ఊరికే తీసింది కాదని, ఇది తమ గుండె లోతుల్లోంచి వచ్చిందని దర్శకుడు హేరేకర్ అన్నారు. ఈవ్ టీజింగ్, వేధింపులు, అత్యాచారాలపై తమ ఆవేదనను ఈ సినిమా రూపంలో తీశామని చెప్పారు. ఇంటర్నెట్లో దీనికి ప్రజల నుంచి బ్రహ్మాండమైన ఆదరణ రావడంతో.. ఇలాంటివి మరిన్ని తీయాలని నిర్ణయించుకున్నామన్నారు.