ఆఖరి మూడో టెస్టును స్పిన్నే దున్నేస్తోంది. రెండో రోజు 15 వికెట్లు కూలాయి. ఇంతలా గింగిర్లు తిరుగుతున్న పిచ్‌పై రిషభ్‌ పంత్‌ టెస్టులో టి20 ఆట ఆడేశాడు. దీంతో తొలి సెషన్‌లో ఆతిథ్య జట్టు వేగంగా పరుగులు సాధించింది. రెండో సెషన్‌లో ఎజాజ్‌ స్పిన్‌ భారత్‌ను చుట్టేసింది. అయితే మూడో సెషన్‌లో మన స్పిన్‌ ద్వయం జడేజా, అశ్విన్‌లు చెలరేగడంతో భారత్‌ పట్టు బిగించినట్లు కనిపించింది. ప్రస్తుతం న్యూజిలాండ్‌ 143 పరుగుల ఆధిక్యంలో ఉంది. నామమాత్రమైన ఆఖరి వికెట్‌ మిగిలుంది. ఇలాంటి కఠిన పిచ్‌పై ఇది కూడా చిన్న లక్ష్యమేమీ కాదు కాబట్టి మూడో రోజూ హోరాహోరీ పోరు ఖాయం. ముంబై: చివరి టెస్టు రసవత్తర ముగింపునకు సిద్ధమైంది. అటో... ఇటో... ఎవరివైపో కానీ ఈ మ్యాచ్‌ అయితే మూడు రోజుల్లో ముగియడం ఖాయమైంది. ప్రత్యర్థి స్పిన్‌కు ఎదురీదితే భారత్‌ 1–2తో సిరీస్‌లో పరువు నిలుపుకుంటుంది. ఉచ్చులో పడితే మాత్రం సొంతగడ్డపై వైట్‌వాష్‌ అవుతుంది. రెండో రోజు ఆటలో మాత్రం భారత బ్యాటర్లే కాస్త పైచేయి సాధించారని చెప్పొచ్చు. 6 వికెట్లు సమర్పించుకున్న టీమిండియా క్రితం రోజు స్కోరుకు 177 పరుగులు జత చేసింది. శుబ్‌మన్‌ గిల్‌ (146 బంతుల్లో 90; 7 ఫోర్లు, 1 సిక్స్‌), రిషభ్‌ పంత్‌ (59 బంతుల్లో 60; 8 ఫోర్లు, 2 సిక్స్‌లు) అదరగొట్టారు. ఎజాజ్‌ పటేల్‌కు 5 వికెట్లు దక్కాయి. భారత్‌కు తొలి ఇన్నింగ్స్‌లో 28 పరుగుల కీలక ఆధిక్యం దక్కింది. అనంతరం రెండో ఇన్నింగ్స్‌లో 9 వికెట్లు చేజార్చుకున్న న్యూజిలాండ్‌ 171 పరుగులు చేసింది. విల్‌ యంగ్‌ (100 బంతుల్లో 51; 2 ఫోర్లు, 1 సిక్స్‌) రాణించాడు. జడేజా 4, అశ్విన్‌ 3 వికెట్లు తీశారు. పంత్‌ ధనాధన్‌ ఫిఫ్టీ తొలి సెషన్‌లో భారత బ్యాటర్లు రిషభ్‌ పంత్, శుబ్‌మన్‌ నిలకడగా ఆడటంతో కివీస్‌ బౌలర్ల ఆటలు సాగలేదు. సబ్‌స్టిట్యూట్‌ ఫీల్డర్‌ చాప్‌మన్‌ లాంగాన్‌లో గిల్‌ ఇచ్చిన క్యాచ్‌ను, లాంగాఫ్‌లో పంత్‌ క్యాచ్‌ను మ్యాట్‌ హెన్రీ వదిలేశారు. దీన్ని సద్వినియోగం చేసుకొన్న బ్యాటర్లు ఇద్దరూ అర్ధ సెంచరీలతో ఇన్నింగ్స్‌ను కుదుట పరిచారు. శనివారం 86/4 ఓవర్‌నైట్‌ స్కోరుతో రెండో రోజు ఆట కొనసాగించిన భారత్‌ తొలి ఇన్నింగ్స్‌లో 59.4 ఓవర్లలో 263 పరుగుల వద్ద ఆలౌటైంది.పంత్, గిల్‌ కివీస్‌ బౌలింగ్‌ను తుత్తునియలు చేస్తూ పరుగులు సాధించారు. ముఖ్యంగా రిషభ్‌ టి20 ఫార్మాటల్లే చెలరేగిపోయాడు. ఎజాజ్‌ పటేల్, ఫిలిప్స్‌ బౌలింగ్‌లో చూడచక్కని బౌండరీలు, భారీ సిక్సర్లతో వేగంగా పరుగులు రాబట్టాడు. దీంతో 29వ ఓవర్లోనే భారత్‌ స్కోరు 150 పరుగులను దాటింది. మరుసటి ఓవర్లోనే ఇద్దరి ఫిఫ్టీలు పూర్తయ్యాయి.30వ ఓవర్‌ తొలి బంతికి సింగిల్‌ తీసిన గిల్‌ 66 బంతుల్లో, నాలుగో బంతికి పరుగు తీసిన రిషభ్‌ 36 బంతుల్లో అర్ధసెంచరీలను పూర్తి చేసుకున్నారు. కాసేపటి తర్వాత ఇష్‌ సోధి... పంత్‌ను ఎల్బీగా అవుట్‌ చేయడంతో ఐదో వికెట్‌కు 98 పరుగుల భాగస్వామ్యానికి తెరపడింది. రవీంద్ర జడేజా (14) క్రీజులోకి రాగా, టీమిండియా లంచ్‌ విరామానికి 195/5 స్కోరు చేసింది. అప్పటికి ఇంకా ఆతిథ్య జట్టు 40 పరుగులు వెనుకబడే ఉంది. ఎజాజ్‌ దెబ్బ రెండో సెషన్‌లో ఎజాజ్‌ పటేల్‌ స్పిన్‌ మాయాజాలం మొదలవడంతో భారత్‌ ఇబ్బందుల్లో పడింది. జట్టు స్కోరు 200 దాటగానే జడేజాను ఫిలిప్స్‌ అవుట్‌ చేయగా, స్వల్ప వ్యవధిలో ఎజాజ్‌... సర్ఫరాజ్‌ (0), గిల్, అశ్విన్‌ (6)ల వికెట్లను పడగొట్టడంతో గిల్‌ 10 పరుగుల దూరంలో సెంచరీ అవకాశాన్ని కోల్పోగా... భారత్‌ భారీ ఆధిక్యం సాధించలేకపోయింది.ఆకాశ్‌దీప్‌ (0) రనౌట్‌ కావడంతో టీ విరామానికి ముందే భారత్‌ 263 పరుగుల వద్ద తొలి ఇన్నింగ్స్‌ ముగిసింది. అయితే వికెట్‌ పూర్తిగా స్పిన్‌కు అనువుగా మారిపోవడంతో భారత సీనియర్‌ స్పిన్‌ ద్వయం అశ్విన్‌–జడేజా కివీస్‌ రెండో ఇన్నింగ్స్‌ను ఉక్కిరిబిక్కిరి చేసింది. వన్‌డౌన్‌ బ్యాటర్‌ విల్‌ యంగ్‌ తప్ప ఇంకెవరూ చెప్పుకోదగ్గ స్కోర్లే చేయలేకపోయారు.మిచెల్‌ (21; 1 ఫోర్, 1 సిక్స్‌), ఫిలిప్స్‌ (26; 1 ఫోర్, 3 సిక్స్‌లు)ల అండతో యంగ్‌ 95 బంతుల్లో అర్ధసెంచరీ సాధించాడు. 171 పరుగుల వద్ద హెన్రీ (10)ని జడేజా బౌల్డ్‌ చేయడంతో రెండో రోజు ఆటను ముగించారు. ఆకాశ్‌దీప్, వాషింగ్టన్‌ సుందర్‌ చెరో వికెట్‌ తీశారు. ప్రస్తుతం కివీస్‌ 143 పరుగుల ముందంజలో ఉంది. స్కోరు వివరాలు న్యూజిలాండ్‌ తొలి ఇన్నింగ్స్‌: 235 భారత్‌ తొలి ఇన్నింగ్స్‌: జైస్వాల్‌ (బి) ఎజాజ్‌ 30; రోహిత్‌ (సి) లాథమ్‌ (బి) హెన్రీ 18; గిల్‌ (సి) మిచెల్‌ (బి) ఎజాజ్‌ 90; సిరాజ్‌ (ఎల్బీడబ్ల్యూ) (బి) ఎజాజ్‌ 0; కోహ్లి రనౌట్‌ 4; పంత్‌ (ఎల్బీడబ్ల్యూ) (బి) సోధి 60; జడేజా (సి) మిచెల్‌ (బి) ఫిలిప్స్‌ 14; సర్ఫరాజ్‌ (సి) బ్లన్‌డెల్‌ (బి) ఎజాజ్‌ 0; సుందర్‌ నాటౌట్‌ 38; అశ్విన్‌ (సి) మిచెల్‌ (బి) ఎజాజ్‌ 6; ఆకాశ్‌దీప్‌ రనౌట్‌ 0; ఎక్స్‌ట్రాలు 3; మొత్తం (59.4 ఓవర్లలో ఆలౌట్‌) 263. వికెట్ల పతనం: 1–25, 2–78, 3–78, 4–84, 5–180, 6–203, 7–204, 8–227, 9–247, 10–263. బౌలింగ్‌: మ్యాట్‌ హెన్రీ 8–1–26–1, విలియమ్‌ ఓ రూర్కే 2–1–5–0, ఎజాజ్‌ పటేల్‌ 21.4–3– 103–5, గ్లెన్‌ ఫిలిప్స్‌ 20–0–84–1, రచిన్‌ రవీంద్ర 1–0–8–0, ఇష్‌ సోధి 7–0–36–1. న్యూజిలాండ్‌ రెండోఇన్నింగ్స్‌: లాథమ్‌ (బి) ఆకాశ్‌దీప్‌ 1; కాన్వే (సి) గిల్‌ (బి) సుందర్‌ 22; యంగ్‌ (సి అండ్‌ బి) అశ్విన్‌ 51; రచిన్‌ (స్టంప్డ్‌) పంత్‌ (బి) అశ్విన్‌ 4; మిచెల్‌ (సి) అశ్విన్‌ (బి) జడేజా 21; బ్లన్‌డెల్‌ (బి) జడేజా 4; ఫిలిప్స్‌ (బి) అశ్విన్‌ 26; ఇష్‌ సోధి (సి) కోహ్లి (బి) జడేజా 8; హెన్రీ (బి) జడేజా 10; ఎజాజ్‌ నాటౌట్‌ 7; ఎక్స్‌ట్రాలు 17; మొత్తం (43.3 ఓవర్లలో 9 వికెట్లకు) 171. వికెట్ల పతనం: 1–2, 2–39, 3–44, 4–94, 5–100, 6–131, 7–148, 8–150, 9–171. బౌలింగ్‌: ఆకాశ్‌దీప్‌ 5–0–10–1, వాషింగ్టన్‌ సుందర్‌ 10–0–30–1, అశ్విన్‌ 16–0–63–3, జడేజా 12.3–2–52–4.

పుష్కర కాలం తర్వాత సొంతగడ్డపై టెస్టు సిరీస్‌ కోల్పోయిన టీమిండియా... ఇప్పుడు క్లీన్‌స్వీప్‌ ప్రమాదం ముంగిట నిలిచింది. సుదీర్ఘ టెస్టు క్రికెట్‌ చరిత్రలో స్వదేశంలో ఇప్పటి వరకు ఒక్క సిరీస్‌లోనూ క్లీన్‌స్వీప్‌ కాని భారత జట్టు... ఇప్పుడు న్యూజిలాండ్‌ తో అలాంటి ఇబ్బందికర పరిస్థితులు ఎదుర్కొంటోంది. మరోవైపు భారత్‌లో భారత్‌పై ఇప్పటి వరకు టెస్టు సిరీస్‌ నెగ్గని న్యూజిలాండ్‌... ఆ పని పూర్తి చేసి క్లీన్‌స్వీప్‌పై కన్నేసింది. ప్రపంచ టెస్టు చాంపియన్‌షిప్‌ (డబ్ల్యూటీసీ) ఫైనల్‌ బెర్త్‌ దక్కాలంటే ఈ మ్యాచ్‌లో విజయం అనివార్యం అయిన పరిస్థితుల్లో రోహిత్‌ బృందం ఎలాంటి ప్రదర్శన కనబరుస్తుందనేది ఆసక్తికరం! తొలి రెండు టెస్టుల్లో స్థాయికి తగ్గ ప్రదర్శన కనబర్చలేకపోయిన రోహిత్‌ శర్మ, విరాట్‌ కోహ్లి కలిసికట్టుగా కదంతొక్కాలని, భారత్‌ను గెలుపు బాట పట్టించాలని అభిమానులు ఆశిస్తున్నారు.ముంబై: అనూహ్య తడబాటుతో న్యూజిలాండ్‌ చేతిలో వరుసగా రెండు మ్యాచ్‌లు ఓడిన భారత జట్టు శుక్రవారం నుంచి వాంఖడే మైదానం వేదికగా నామమాత్రమైన మూడో టెస్టు ఆడనుంది. ఇప్పటికే 0–2తో సిరీస్‌ కోల్పోయిన టీమిండియా ... కనీసం ఆఖరి మ్యాచ్‌లోనైనా గెలిచి పరువు దక్కించుకోవాలని చూస్తుంటే... తొలిసారి భారత్‌ లో సిరీస్‌ నెగ్గిన న్యూజిలాండ్‌ దాన్ని క్లీన్‌స్వీప్‌గా మలచాలని భావిస్తోంది. ఈ సిరీస్‌కు ముందు స్వదేశంలో గత 12 సంవత్సరాలుగా భారత జట్టు టెస్టు సిరీస్‌ ఓడిపోలేదు. అంతేకాకుండా 1984 నుంచి స్వదేశంలో భారత జట్టు ఏ ద్వైపాక్షిక సిరీస్‌లోనూ మూడు టెస్టుల్లో ఓడిపోలేదు. బెంగళూరు వేదికగా జరిగిన తొలి మ్యాచ్‌లో పేస్‌ పిచ్‌ను సిద్ధం చేసి... వాతావరణ మార్పుల మధ్య తొలి ఇన్నింగ్స్‌లో బ్యాటింగ్‌ ఆర్డర్‌ కుప్పకూలడంతో ఘోర పరాజయం మూటగట్టుకున్న రోహిత్‌ జట్టు... పుణేలో జరిగిన రెండో టెస్టులో స్పిన్‌ పిచ్‌పై కూడా తడబడింది. స్పిన్‌ను సమర్థవంతంగా ఎదుర్కోగలరనే పేరున్న మన ఆటగాళ్లు పుణే టెస్టులో పార్ట్‌ టైమ్‌ స్పిన్నర్‌ లాంటి సాంట్నర్‌ను ఎదుర్కోలేక చేతులెత్తేయడం అభిమానులను కలవర పరిచింది. ఈ నేపథ్యంలో వాంఖడే పిచ్‌ను సహజసిద్ధంగా ఉంచామని... జట్టు కోసం పిచ్‌లో ఎలాంటి మార్పులు చేయలేదని భారత సహాయక కోచ్‌ అభిషేక్‌ నాయర్‌ అన్నాడు. ఈ సిరీస్‌లో ఆకట్టుకోలేకపోయిన స్టార్‌ ఆటగాళ్లు రోహిత్‌ శర్మ, విరాట్‌ కోహ్లి ఆఖరి మ్యాచ్‌లోనైనా రాణిస్తారా చూడాలి. వరుసగా రెండుసార్లు ప్రపంచ టెస్టు చాంపియన్‌షిప్‌ (డబ్ల్యూటీసీ) ఫైనల్‌ ఆడిన టీమిండియా... ముచ్చటగా మూడోసారి కూడా తుదిపోరుకు అర్హత సాధించాలంటే మిగిలిన ఆరు టెస్టుల్లో సత్తా చాటాల్సిన అవసరముంది. బ్యాటర్లపైనే భారం! కొట్టిన పిండి లాంటి స్వదేశీ పిచ్‌లపై పరుగులు రాబట్టేందుకు భారత ఆటగాళ్లు ఇబ్బంది పడుతుంటే... న్యూజిలాండ్‌ బ్యాటర్లు మాత్రం సులువుగా పరుగులు చేస్తున్నారు. 2, 52, 0, 8... ఈ సిరీస్‌లో టీమిండియా కెపె్టన్‌ రోహిత్‌ శర్మ స్కోర్లివి. టాపార్డర్‌లో ముందుండి ఇన్నింగ్స్‌ను నడిపించాల్సిన రోహిత్‌ ఇలాంటి ప్రదర్శన చేస్తుండగా... స్టార్‌ బ్యాటర్‌ కోహ్లి గత నాలుగు ఇన్నింగ్స్‌ల్లో 0, 70, 1, 17 పరుగులు చేశాడు. చాన్నాళ్లుగా జట్టు బాధ్యతలు మోస్తున్న ఈ జంట స్థాయికి ఈ ప్రదర్శన తగినది కాకపోగా... మిగిలిన వాళ్లు కూడా నిలకడలేమితో ఇబ్బంది పడుతున్నారు. యశస్వి జైస్వాల్‌ మంచి టచ్‌లో ఉండగా... శుబ్‌మన్‌ గిల్, సర్ఫరాజ్, పంత్‌ కలిసి కట్టుగా కదం తొక్కితేనే భారీ స్కోరు సాధ్యం. ఆల్‌రౌండర్లు రవీంద్ర జడేజా, అశి్వన్, వాషింగ్టన్‌ సుందర్‌ కేవలం బౌలింగ్‌పైనే కాకుండా బ్యాటింగ్‌లోనూ తమ వంతు పాత్ర పోషించాల్సిన అవసరముంది. ప్రధానంగా గత టెస్టులో టీమిండియా స్టార్‌ ఆటగాళ్లను న్యూజిలాండ్‌ స్పిన్నర్‌ సాంట్నర్‌ వణికించిన చోట... అశ్విన్‌–జడేజా జోడీ పెద్దగా ప్రభావం చూపలేకపోయింది. ఈ లోపాలను అధిగమించకపోతే టీమిండియా మూడో టెస్టులోనూ పరాభవం మూటగట్టుకోవాల్సి ఉంటుంది. మరోవైపు కేన్‌ విలియమ్సన్‌ వంటి కీలక ఆటగాడు లేకుండానే భారత్‌పై సిరీస్‌ గెలిచిన న్యూజిలాండ్‌ ఇదే జోరు చివరి మ్యాచ్‌లోనూ కొనసాగించాలని చూస్తోంది. కాన్వే, రచిన్‌ రవీంద్ర, కెపె్టన్‌ లాథమ్‌ నిలకడగా రాణిస్తుండగా... ఫిలిప్స్, మిచెల్‌ కూడా మెరుగైన ప్రదర్శన చేస్తే న్యూజిలాండ్‌కు ఈ టెస్టులోనూ తిరుగుండదు. బౌలింగ్‌ విభాగంలో సౌతీ, ఒరూర్కీ, హెన్రీ, సాంట్నర్‌ విజృంభిస్తే భారత జట్టుకు ఇబ్బందులు తప్పవు. జోరుగా సాధన తొలి రెండు టెస్టుల్లో ప్రభావం చూపలేకపోయిన టీమిండియా... కివీస్‌తో మూడో టెస్టుకు ముందు జోరుగా ప్రాక్టీస్‌ చేస్తోంది. వాంఖడే పిచ్‌ స్పిన్‌కు సహకరించే అవకాశం ఉండటంతో స్పిన్నర్లను ఎదుర్కోవడంపై మన ప్లేయర్లు దృష్టి సారించారు. రోహిత్‌ శర్మ, కోహ్లితో పాటు ప్లేయర్లందరూ సాధనలో పాల్గొన్నారు.

ముంబై: భారత్, న్యూజిలాండ్‌ మధ్య జరిగే మూడో టెస్టు కోసం పేస్‌ బౌలర్‌ హర్షిత్‌ రాణాను జట్టులోకి తీసుకున్నారు. బుధవారం అతను జట్టుతో చేరతాడని బీసీసీఐ వర్గాలు వెల్లడించాయి. ఈ సిరీస్‌ కోసం ఎంపిక చేసిన ట్రావెలింగ్‌ రిజర్వ్‌లలో ఢిల్లీకి చెందిన హర్షిత్‌ కూడా ఉన్నాడు. అయితే ఇప్పుడు ప్రధాన జట్టులోకి రానున్నాడని సమాచారం. నవంబర్‌ 1 నుంచి భారత్, కివీస్‌ మధ్య మూడో టెస్టు వాంఖెడే మైదానంలో జరుగుతుంది. హర్షిత్‌కు ఇప్పటికే బోర్డర్‌–గావస్కర్‌ ట్రోఫీ కోసం ఆ్రస్టేలియాకు వెళ్లే భారత టెస్టు టీమ్‌లో చోటు లభించింది. దానికి ముందు ఒక టెస్టులో అతడిని ఆడిస్తే బాగుంటుందని టీమ్‌ మేనేజ్‌మెంట్‌ భావిస్తోంది.కివీస్‌తో ఇప్పటికే సిరీస్‌ కోల్పోయిన నేపథ్యంలో మూడో టెస్టులో ప్రధాన పేసర్‌ జస్‌ప్రీత్‌ బుమ్రాకు విశ్రాంతినిచ్చే అవకాశాలు కనిపిస్తున్నాయి. అదే జరిగితే హర్షిత్‌ అంతర్జాతీయ క్రికెట్‌లోకి అడుగు పెట్టవచ్చు. బంగ్లాదేశ్‌తో టి20 సిరీస్‌లకు ఎంపికైనా... హర్షిత్‌కు మ్యాచ్‌ ఆడే అవకాశం రాలేదు. మంగళవారం అస్సాంతో ముగిసిన రంజీ మ్యాచ్‌లో 7 వికెట్లు తీసిన హర్షిత్‌...ఢిల్లీ విజయంలో కీలక పాత్ర పోషించాడు. 10 మ్యాచ్‌ల ఫస్ట్‌క్లాస్‌ కెరీర్‌లో 24.00 సగటుతో రాణా 43 వికెట్లు పడగొట్టాడు. విలియమ్సన్‌ దూరం వెలింగ్టన్‌: న్యూజిలాండ్‌ స్టార్‌ బ్యాటర్‌ కేన్‌ విలియమ్సన్‌ భారత్‌తో సిరీస్‌కు పూర్తిగా దూరమయ్యాడు. గాయం కారణంగా తొలి రెండు టెస్టులకు అందుబాటులో లేని అతను ఇప్పుడు మూడో టెస్టునుంచి తప్పుకున్నాడు. విలియమ్సన్‌ భారత్‌కు రావడం లేదని న్యూజిలాండ్‌ క్రికెట్‌ బోర్డు ప్రకటించింది. గాయం నుంచి కోలుకొని అతను ప్రస్తుతం రీహాబిలిటేషన్‌లో ఉన్నాడు. అయితే ముందు జాగ్రత్తగా బోర్డు ఈ నిర్ణయం తీసుకుంది.సంచలన ప్రదర్శనతో కివీస్‌ ఇప్పటికే సిరీస్‌ సొంతం చేసుకున్న నేపథ్యంలో హడావిడిగా విలియమ్సన్‌ను బరిలోకి దించరాదని బోర్డు భావించింది. ఈ సిరీస్‌ తర్వాత సొంతగడ్డపై ఇంగ్లండ్‌తో న్యూజిలాండ్‌ తలపడనుంది. దాని కోసం విలియమ్సన్‌ పూర్తి స్థాయిలో ఫిట్‌గా అందుబాటులో ఉండాలనేదే ప్రధాన కారణం. శ్రీలంకతో రెండు టెస్టుల సిరీస్‌ ఆడిన తర్వాత స్వదేశానికి వెళ్లిన విలియమ్సన్‌ గాయం కారణంగా భారత గడ్డపై అడుగు పెట్టనే లేదు.

రావల్పిండి: పాకిస్తాన్, ఇంగ్లండ్‌ జట్ల మధ్య నేటి నుంచి నిర్ణయాత్మక మూడో టెస్టు ప్రారంభం కానుంది. మూడు మ్యాచ్‌ల సిరీస్‌లో భాగంగా ఇరు జట్లు చెరో మ్యాచ్‌ నెగ్గగా... గురువారం నుంచి రావల్పిండిలో మూడో టెస్టు మొదలవుతుంది. పరుగుల వరద పారిన తొలి టెస్టులో ఇన్నింగ్స్‌ తేడాతో ఘనవిజయం సాధించిన ఇంగ్లండ్‌ జట్టు... స్పిన్‌కు అనుకూలించిన రెండో టెస్టులో పరాజయం పాలైంది. దీంతో మూడో టెస్టు కోసం పాకిస్తాన్‌ జట్టు మరోసారి స్పిన్‌ పిచ్‌నే సిద్ధం చేసింది. స్లో బౌలర్లకు సహకరించే విధంగా పొడి వికెట్‌ను తయారు చేసిన పాకిస్తాన్‌ గత నాలుగు రోజులుగా పిచ్‌ను ఆరబెట్టేందుకు ప్రత్యేకంగా భారీ ఫ్యాన్‌లు ఏర్పాటు చేసింది. రెండో టెస్టులో పాకిస్తాన్‌ స్పిన్నర్లు నోమాన్‌ అలీ, సాజిద్‌ ఖాన్‌ ఇద్దరే చెలరేగి ఇంగ్లండ్‌ను రెండు ఇన్నింగ్స్‌ల్లోనూ ఆలౌట్‌ చేసి 20 వికెట్లు తమ ఖాతాలో వేసుకున్న నేపథ్యంలో... మరోసారి స్పిన్‌ బలంతోనే పాకిస్తాన్‌ ఫలితం రాబట్టాలని చూస్తోంది. తొలి రోజు నుంచే బంతి గింగిరాలు తిరిగే అవకాశం ఉండటంతో మరోసారి టాస్‌ కీలకం కానుంది. సీనియర్‌ ఆటగాళ్లకు విశ్రాంతినిచ్చి... వారి స్థానంలో ఇతర ప్లేయర్లకు అవకాశం ఇచ్చిన తర్వాతే పాకిస్తాన్‌ రాత మారింది. అరంగేట్ర టెస్టులోనే సెంచరీతో ఆకట్టుకున్న కమ్రాన్‌ గులామ్‌పై అంచనాలు పెరిగిపోగా..కెప్టెన్ షాన్‌ మసూద్, అబ్దుల్లా షఫీఖ్, సౌద్‌ షకీల్, రిజ్వాన్‌ కలిసి కట్టుగా కదం తొక్కాలని టీమ్‌ మేనేజ్‌మెంట్‌ భావిస్తోంది. మరోవైపు ఇంగ్లండ్‌ అదనపు స్పిన్నర్‌గా లెగ్‌స్పిన్నర్‌ రేహాన్‌ అహ్మద్‌ను బరిలోకి దించనుంది. తొలి టెస్టులో ట్రిపుల్‌ సెంచరీతో చెలరేగిన హ్యారీ బ్రూక్‌తో పాటు జో రూట్, ఓలీ పోప్, బెన్‌ డకెట్, జాక్‌ క్రాలీ, బెన్‌ స్టోక్స్, జేమీ స్మిత్‌తో ఇంగ్లండ్‌ బ్యాటింగ్‌ లైనప్‌ బలంగా ఉంది.

టీమిండియా యువ ఆటగాడు యశస్వి జైస్వాల్‌ పేరు ప్రస్తుతం క్రికెట్‌  ప్రపంచం మొత్తం మార్మోగిపోతుంది. క్రికెట్‌కు సంబంధించి ఎక్కడ డిస్కషన్‌ జరిగినా ఇతగాడి పేరే వినిపిస్తుంది. అంతర్జాతీయ స్థాయిలో ఫార్మాట్లకతీతంగా పరుగుల వరద పారిస్తూ, సెంచరీల మీద సెంచరీలు బాదేస్తున్న యశస్వి.. తాజాగా ఇంగ్లండ్‌తో జరిగిన మూడో టెస్ట్‌లో డబుల్‌ సెంచరీతో విరుచుకుపడి భారత క్రికెట్‌ అభిమానుల పాలిట ఆరాధ్య ఆటగాడిగా మారిపోయాడు. ఈ డబుల్‌తో యశస్వి క్రేజ్‌ ఒక్కసారిగా తారా స్థాయికి చేరింది. భారత క్రికెట్‌ సర్కిల్స్‌లో ఇతను ఓవర్‌నైట్‌ హీరో అయిపోయాడు. అతడు ఆడింది ఏడు టెస్ట్‌ మ్యాచ్‌లే అయినా.. 100 టెస్ట్‌ల అనంతరం లభించే పేరును సంపాదించాడు.  రాజ్‌కోట్‌ టెస్ట్‌లో డబుల్‌ సెంచరీతో చాలా రికార్డులను బద్దలు కొట్టిన యశస్వి.. రెండు భారీ రికార్డులను సైతం తన ఖాతాలో వేసుకున్నాడు. రాజ్‌కోట్‌ టెస్ట్‌కు ముందు జరిగిన విశాఖ టెస్ట్‌లోనూ డబుల్‌ సెంచరీ చేసిన యశస్వి.. దిగ్గజ ఆటగాడు, తన ఆరాధ్య క్రికెటర్‌ అయిన విరాట్‌ కోహ్లి సరసన చేరాడు. వినోద్‌ కాంబ్లీ, విరాట్‌ కోహ్లి తర్వాత వరుస టెస్ట్‌ల్లో డబుల్‌ సెంచరీలు చేసిన మూడో భారత ఆటగాడిగా రికార్డుల్లోకెక్కాడు. అలాగే వినూ మన్కడ్‌, విరాట్‌ కోహ్లి తర్వాత ఒకే సిరీస్‌లో రెండు డబుల్‌ సెంచరీలు చేసిన ఆటగాడిగా రికార్డు నెలకొల్పాడు.  రాజ్‌కోట్‌ టెస్ట్‌ డబుల్‌తో యశస్వి సాధించిన మరిన్ని రికార్డులు.. ►టెస్టుల్లో ఇంగ్లండ్‌పై రెండు డబుల్ సెంచరీలు సాధించిన మొదటి భారత బ్యాటర్‌గా జైస్వాల్ చరిత్ర సృష్టించాడు. ►అంతర్జాతీయ టెస్ట్ క్రికెట్‌లో ఒక ఇన్నింగ్స్‌లో అత్యధిక సిక్సులు కొట్టిన పాకిస్తాన్‌ మాజీ ఆటగాడు వసీం అక్రమ్‌ రికార్డును యశస్వి సమం చేశాడు. మూడో టెస్టు సెకెండ్‌ ఇన్నింగ్స్‌లో జైశ్వాల్‌ ఏకంగా 12 సిక్స్‌లు బాదాడు. 1996లో జింబాబ్వేపై వసీం అక్రమ్ కూడా 12 సిక్స్‌లు కొట్టాడు. ►భారత్ తరపున ఒక ఇన్నింగ్స్‌లో 10కిపైగా సిక్స్‌లు బాదిన మొదటి బ్యాటర్‌గా జైశ్వాల్‌ నిలిచాడు. ►టెస్టుల్లో సెకండ్ ఇన్నింగ్స్‌లో డబుల్ సెంచరీ చేసిన ఏడో భారత బ్యాటర్‌గా జైస్వాల్ రికార్డులకెక్కాడు.  ►సెకండ్ ఇన్నింగ్స్‌లో అత్యధిక వ్యక్తిగత స్కోర్ సాధించిన నాలుగో భారత బ్యాటర్‌‌గా నిలిచాడు. ► ఓ టెస్ట్‌ సిరీస్‌లో అత్యధిక పరుగులు (545) సాధించిన భారత లెఫ్ట్‌ హ్యాండ్‌ బ్యాటర్‌గా రికార్డు.  ఇదిలా ఉంటే, రాజ్‌కోట్‌ టెస్ట్‌లో టీమిండియా 434 పరుగులు భారీ తేడాతో విజయం సాధించిన విషయం తెలిసిందే. ఈ మ్యాచ్‌ సెకెండ్‌ ఇన్నింగ్స్‌లో యశస్వి అజేయ డబుల్‌ సెంచరీతో (214 నాటౌట్) విశ్వరూపం ప్రదర్శించాడు. దీనికి ముందు టెస్ట్‌లోనూ యశస్వి డబుల్‌తో చెలరేగాడు. వైజాగ్‌ టెస్ట్‌ ఫస్ట్‌ ఇన్నింగ్స్‌లో 209 పరుగులు చేశాడు. రాజ్‌కోట్‌ టెస్ట్‌లో విజయంతో భారత్‌ ఐదు మ్యాచ్‌ల సిరీస్‌లో 2-1 ఆధిక్యంలో వెళ్లింది. ఈ సిరీస్‌లో ఇంగ్లండ్‌ తొలి మ్యాచ్‌లో గెలవగా.. భారత్‌ వరుసగా రెండు, మూడు మ్యాచ్‌ల్లో విజయం సాధించింది.  రాంచీ వేదికగా నాలుగో టెస్ట్‌ మ్యాచ్‌ ఫిబ్రవరి 23 నుంచి ప్రారంభంకానుంది.   

విరామం తర్వాత మళ్లీ తాజాగా మొదలైన మూడో టెస్టులో యశస్వి జైస్వాల్‌ విధ్వంసం... కొత్త కుర్రాడు సర్ఫరాజ్‌ ఖాన్‌  ప్రతాపం... బౌలింగ్‌లో జడేజా మాయాజాలం... వెరసి భారత్‌ చరిత్రకెక్కే విజయం సాధించింది. మ్యాచ్‌ మొదలైన రోజు నుంచీ ప్రతీరోజు భారత్‌  ఆధిపత్యమే కొనసాగడంతో ఏ మలుపు లేకుండా ఈ టెస్టు నాలుగు రోజుల్లోనే ముగిసింది. ఈ గెలుపుతో ఐదు టెస్టుల సిరీస్‌లో భారత్‌ 2–1తో ఆధిక్యంలోకి వెళ్లింది. నాలుగో టెస్టు ఈనెల 23 నుంచి రాంచీలో జరుగుతుంది.    రాజ్‌కోట్‌: టీమిండియా బలగం ముందు ఇంగ్లండ్‌ ‘బజ్‌బాల్‌’ ఆట కుదేలైంది. మ్యాచ్‌ జరిగే కొద్దీ బ్యాటర్ల పరుగుల పరాక్రమం, బౌలర్ల వికెట్ల మాయాజాలం ప్రత్యర్థి జట్టును చిత్తు చేసింది. మరో రోజు ఆట మిగిలి ఉండగానే ఈ మ్యాచ్‌లో భారత్‌ 434 పరుగుల తేడాతో ఇంగ్లండ్‌పై బ్రహ్మాండ విజయం నమోదు చేసింది. పరుగుల తేడా పరంగా టెస్టుల్లో భారత జట్టుకిదే అతి పెద్ద విజయం. ఇంతకుముందు భారత జట్టు 2021లో ముంబైలో న్యూజిలాండ్‌పై 372 పరుగుల తేడాతో గెలిచింది. ఆట నాలుగో రోజు ఓవర్‌నైట్‌ స్కోరు 196/2తో రెండో ఇన్నింగ్స్‌ను కొనసాగించిన భారత్‌ 98 ఓవర్లలో 4 వికెట్లకు 430 పరుగులవద్ద డిక్లేర్‌ చేసింది. ఇంగ్లండ్‌కు 557 పరుగుల భారీ లక్ష్యాన్ని నిర్దేశించింది. ‘ప్లేయర్‌ ఆఫ్‌ ద మ్యాచ్‌’ రవీంద్ర జడేజా (5/41), కుల్దీప్‌ యాదవ్‌ (2/19), అశ్విన్‌ (1/19) స్పిన్‌ దెబ్బకు ఇంగ్లండ్‌ రెండో ఇన్నింగ్స్‌లో 39.4 ఓవర్లలో 122 పరుగులకే కుప్పకూలి ఓడిపోయింది.   యశస్వి ‘డబుల్‌’...  ఓవర్‌నైట్‌ బ్యాటర్లు శుబ్‌మన్‌ గిల్‌ (91; 9 ఫోర్లు, 2 సిక్స్‌లు), కుల్దీప్‌ (27; 3 ఫోర్లు, 1 సిక్స్‌) మూడో వికెట్‌కు 55 పరుగులు జోడించారు. గిల్‌ రనౌటయ్యాక శనివారం వెన్నునొప్పితో వ్యక్తిగత స్కోరు 104 పరుగులవద్ద రిటైర్డ్‌ హర్ట్‌గా వెనుదిరిగిన యశస్వి జైస్వాల్‌ మళ్లీ క్రీజులోకి వచ్చాడు. అదే దూకుడు కొనసాగిస్తూ యశస్వి జైస్వాల్‌ (236 బంతుల్లో 214 నాటౌట్‌; 14 ఫోర్లు, 12 సిక్స్‌లు) తన కెరీర్‌లో రెండో డబుల్‌ సెంచరీని పూర్తి చేసుకున్నాడు. సర్ఫరాజ్‌ ఖాన్‌ (72 బంతుల్లో 68 నాటౌట్‌; 6 ఫోర్లు, 3 సిక్స్‌లు) రెండో ఇన్నింగ్స్‌లోనూ అర్ధసెంచరీతో అదరగొట్టాడు. ప్రస్తుత టెస్టు క్రికెట్లోనే విశేషానుభవజు్ఞడు అండర్సన్‌ వేసిన ఇన్నింగ్స్‌ 85వ ఓవర్లో యశస్వి హ్యాట్రిక్‌ సిక్సర్లు అతని విధ్వంసానికి మచ్చుతునకలు కాగా... సర్ఫరాజ్‌ అంతర్జాతీయ టెస్టుకు కొత్తైన... దూకుడు నాకు పాతే అని మరో అర్ధసెంచరీతో నిరూపించుకున్నాడు. 231 బంతుల్లో జైస్వాల్‌ ద్విశతకాన్ని సాధించాడు. ఇద్దరు అబేధ్యమైన ఐదో వికెట్‌కు 172 జోడించడం విశేషం. స్పిన్‌ ఉచ్చులో పడి...  కొండత లక్ష్యం కావడంతో ఇంగ్లండ్‌ బజ్‌బాల్‌ ఆట చేతులెత్తేసింది. కలిసొచ్చిన స్పిన్‌ పిచ్‌పై జడేజా పట్టు సాధించాడు. ఆరంభంలోనే డకెట్‌ (4) రనౌటయ్యాక, క్రాలీ (11)ని బుమ్రా ఎల్బీగా పంపాడు. తర్వాత జడేజా స్పిన్‌ మాయాజాలంలో పోప్‌ (3), బెయిర్‌స్టో (4), రూట్‌ (7) తేలిగ్గానే పడిపోయారు. జట్టు స్కోరు 50 వద్దే రూట్‌తో పాటు స్టోక్స్‌ (15), రేహాన్‌ అహ్మద్‌ (0) అవుటయ్యారు. మార్క్‌ వుడ్‌ (15 బంతుల్లో 33; 6 ఫోర్లు, 1 సిక్స్‌) ఇన్నింగ్స్‌ టాప్‌ స్కోరర్‌ కావడంతో ఇంగ్లండ్‌ 100 పరుగులు దాటింది. అత్యవసర వ్యక్తిగత కారణాలరీత్యా రెండో రోజు ఆట ముగిశాక చెన్నై వెళ్లిన అశ్విన్‌ ఆదివారం మైదానంలోకి దిగి ఒక వికెట్‌ కూడా తీశాడు.   స్కోరు వివరాలు  భారత్‌ తొలి ఇన్నింగ్స్‌: 445; ఇంగ్లండ్‌ తొలి ఇన్నింగ్స్‌: 319; భారత్‌ రెండో ఇన్నింగ్స్‌: 430/4 డిక్లేర్డ్‌. ఇంగ్లండ్‌ రెండో ఇన్నింగ్స్‌: క్రాలీ (ఎల్బీడబ్ల్యూ) (బి) బుమ్రా 11. డకెట్‌ (రనౌట్‌) 4; పోప్‌ (సి) రోహిత్‌ (బి) జడేజా 3; రూట్‌ (ఎల్బీడబ్ల్యూ) (బి) జడేజా 7; బెయిర్‌స్టో (ఎల్బీడబ్ల్యూ) (బి) జడేజా 4; స్టోక్స్‌ (ఎల్బీడబ్ల్యూ) (బి) కుల్దీప్‌ 15; ఫోక్స్‌ (సి) జురేల్‌ (బి) జడేజా 16; రేహన్‌ (సి) సిరాజ్‌ (బి) కుల్దీప్‌ 0; హార్ట్‌లీ (బి) అశ్విన్‌ 16; వుడ్‌ (సి) జైస్వాల్‌ (బి) జడేజా 33; అండర్సన్‌ (నాటౌట్‌) 1; ఎక్స్‌ట్రాలు 12; మొత్తం (39.4 ఓవర్లలో ఆలౌట్‌) 122. వికెట్ల పతనం: 1–15, 2–18, 3–20, 4–28, 5–50, 6–50, 7–50, 8–82, 9–91, 10–122. బౌలింగ్‌: బుమ్రా 8–1– 18–1, సిరాజ్‌ 5–2–16–0, జడేజా 12.4–4– 41–5, కుల్దీప్‌ 8–2–19–2, అశ్విన్‌ 6–3–19–1.   3 వరుస టెస్టుల్లో రెండు డబుల్‌ సెంచరీలు బాదిన మూడో భారత బ్యాటర్‌ యశస్వి జైస్వాల్‌. ఈ వరుసలో వినోద్‌ కాంబ్లి (1993లో), కోహ్లి (2017లో) ముందున్నారు.  9 స్వదేశంలో జడేజా అందుకున్న ‘ప్లేయర్‌ ఆఫ్‌ ద మ్యాచ్‌’ అవార్డుల సంఖ్య. అనిల్‌ కుంబ్లే (9) పేరిట ఉన్న రికార్డును జడేజా సమం చేశాడు.   12  ఇన్నింగ్స్‌లో అత్యధిక సిక్స్‌లు కొట్టిన బ్యాటర్‌గా అక్రమ్‌  (12 సిక్స్‌లు) పేరిట ఉన్న రికార్డును జైస్వాల్‌ సమం చేశాడు. 28 రాజ్‌కోట్‌ టెస్టులో భారత్‌ సిక్స్‌ల సంఖ్య. ఒకే టెస్టులో  అత్యధిక సిక్స్‌లు కొట్టిన జట్టుగా 2019లో వైజాగ్‌లో దక్షిణాఫ్రికాపై నమోదు చేసిన రికార్డును భారత్‌ సవరించింది. 48 ఈ సిరీస్‌లో ఇప్పటివరకు భారత జట్టు బాదిన సిక్స్‌లు.  ఇదో కొత్త రికార్డు. దక్షిణాఫ్రికాపై 2019లో భారత్‌  47 సిక్స్‌లు కొట్టింది.

టీమిండియా యువ ఓపెనర్‌ యశస్వి జైస్వాల్‌ మరో డబుల్‌ సెంచరీ దిశగా దూసుకుపోతున్నాడు. సెంచరీ అనంతరం నిన్న రిటైర్డ్‌ హర్ట్‌గా వెనుదిరిగి ఇవాళ తిరిగి బరిలోకి దిగిన యశస్వి మెరుపు వేగంతో పరుగులు సాధిస్తున్నాడు. ప్రస్తుతం 187 పరుగుల వద్ద ఉన్న యశస్వి.. వెటరన్‌ పేసర్‌ ఆండర్సన్‌పై కనికరం లేకుండా విచుకుపడ్డాడు. నాలుగో రోజు ఆటలో లంచ్‌ విరామం తర్వాత గేర్‌ మార్చిన అతను.. ఇన్నింగ్స్‌ 85వ ఓవర్‌లో ఆండర్సన్‌కు చుక్కలు చూపించాడు. ఈ ఓవర్‌లో వరుసగా మూడు సిక్సర్లు బాది 180ల్లో​కి అడుగుపెట్టాడు. ఈ క్రమంలో పలు రికార్డులు నెలకొల్పాడు. 𝙃𝙖𝙩-𝙩𝙧𝙞𝙘𝙠 𝙤𝙛 𝙎𝙄𝙓𝙀𝙎! 🔥 🔥 Yashasvi Jaiswal is smacking 'em all around the park! 💥💥💥 Follow the match ▶️ https://t.co/FM0hVG5pje#TeamIndia | #INDvENG | @ybj_19 | @IDFCFIRSTBank pic.twitter.com/OjJjt8bOsx — BCCI (@BCCI) February 18, 2024 సౌరవ్‌ గంగూలీ తర్వాత మూడు మ్యాచ్‌ల ద్వైపాక్షిక టెస్ట్‌ సిరీస్‌లో 500 పరుగులు దాటిన రెండో భారతీయ క్రికెటర్‌గా రికార్డుల్లోకెక్కాడు. 2007లో స్వదేశంలో పాక్‌తో జరిగిన టెస్ట్‌ సిరీస్‌లో గంగూలీ 534 పరుగులు సాధించాడు.  ఓ ఇన్నింగ్స్‌లో, ఓ టెస్ట్‌ సిరీస్‌లో అత్యధిక సిక్సర్లు బాదిన భారత ఆటగాడిగా రికార్డులు నెలకొల్పాడు. ప్రస్తుత ఇన్నింగ్స్‌లో యశస్వి ఇప్పటివరకు 10 సిక్సర్లు బాదాడు. ఈ సిరీస్‌లో అతను 20 సిక్సర్లు కొట్టాడు. యశస్వికి ముందు టెస్ట్‌ సిరీస్‌లో అత్యధిక సిక్సర్ల రికార్డు రోహిత్‌ శర్మ (19) పేరిట ఉండేది. ఆండర్సన్‌ బౌలింగ్‌లో ఒకే ఓవర్‌లో మూడు సిక్సర్లు బాది ఈ ఘనత సాధించిన ఐదో భారత ప్లేయర్‌గా (2002 తర్వాత) రికార్డుల్లోకెక్కాడు. యశస్వికి ముందు ధోని (రెండు సార్లు), హార్దిక్‌ పాండ్యా, రోహిత్‌ శర్మ, ఉమేశ్‌ యాదవ్‌ ఈ ఘనత సాధించారు.  మ్యాచ్‌ విషయానికొస్తే.. యశస్వికి (194) జతగా సర్ఫరాజ్‌ ఖాన్‌ (38) క్రీజ్‌లో ఉన్నాడు. సెకెండ్‌ ఇన్నింగ్స్‌లో టీమిండియా స్కోర్‌ 378/4గా ఉంది. ప్రస్తుతం టీమిండియా 504 పరుగుల లీడ్‌లో ఉంది. స్కోర్‌ వివరాలు.. భారత్‌ తొలి ఇన్నింగ్స్‌: 445 ఆలౌట్‌ (రోహిత్‌ 131, జడేజా 112) ఇంగ్లండ్‌ తొలి ఇన్నింగ్స్‌: 319 ఆలౌట్‌ (బెన్‌ డకెట్‌ 153)  

టీమిండియాకు గుడ్‌ న్యూస్‌. తల్లి అనారోగ్య సమస్య కారణంగా మ్యాచ్‌ మధ్యలోనే చెన్నైకి వెళ్లిపోయిన రవిచంద్రన్‌ అశ్విన్‌ తిరిగి జట్టులో చేరనున్నాడు. యాష్‌ ఇవాళ (ఫిబ్రవరి 18) లంచ్‌ విరామం సమయానికంతా జట్టుతో జతకడతాడని బీసీసీఐ ప్రకటన విడుదల చేసింది.  కాగా, తల్లిని చూసేందుకు హుటాహుటిన ఇంటికి బయల్దేరిన అశ్విన్‌కు బీసీసీఐ మద్దతుగా నిలిచింది. ఆటగాళ్ల కుటుంబ సభ్యుల ఆరోగ్యం తమకెంతో ముఖ్యమని బీసీసీఐ ఉపాధ్యక్షుడు రాజీవ్‌ శుక్లా ట్విటర్‌లో పోస్ట్‌ చేశాడు.  ఇదిలా ఉంటే, మూడో టెస్ట్‌లో టీమిండియా పటిష్ట స్థితిలో ఉంది. నాలుగో రోజు తొలి సెషన్‌ సమయానికి టీమిండియా సెకెండ్‌ ఇన్నింగ్స్‌లో 3 వికెట్ల నష్టానికి 257 పరుగులు చేసింది. ప్రస్తుతం టీమిండియా 383 పరుగుల లీడ్‌లో ఉంది. ఇవాల్టి ఆటలో కుల్దీప్‌ తప్పిదం కారణంగా శుభ్‌మన్‌ గిల్‌ (91) అనవసరంగా రనౌటయ్యాడు. గాయం కారణంగా నిన్న రిటైర్డ్‌ హర్ట్‌గా వెనుదిరిగిన యశస్వి ఇవాళ తిరిగి క్రీజ్‌లోకి వచ్చాడు. ప్రస్తుతం యశస్వి (114), కుల్దీప్‌ (27) క్రీజ్‌లో ఉన్నారు. కాగా, తొలి ఇన్నింగ్స్‌లో జాక్‌ క్రాలే వికెట్‌ తీయడం ద్వారా రవిచంద్రన్‌ అశ్విన్‌ 500 వికెట్ల క్లబ్‌లో చేరిన విషయం తెలిసిందే. స్కోర్‌ వివరాలు.. భారత్‌ తొలి ఇన్నింగ్స్‌: 445 ఆలౌట్‌ (రోహిత్‌ 131, జడేజా 112) ఇంగ్లండ్‌ తొలి ఇన్నింగ్స్‌: 319 ఆలౌట్‌ (బెన్‌ డకెట్‌ 153) భారత్‌ సెకెండ్‌ ఇన్నింగ్స్‌: 257/3 (యశస్వి 115 నాటౌట్‌)    

IND VS ENG 3rd Test Day 4 Updates And Highlights:  రాజ్‌కోట్‌ టెస్టులో భారత్‌ ఘన విజయం..  రాజ్‌కోట్‌ వేదికగా ఇంగ్లండ్‌తో జరిగిన మూడో టెస్టులో 434 పరుగుల తేడాతో టీమిండియా ఘన విజయం సాధించింది. 557 పరుగుల లక్ష్యంతో బరిలోకి దిగిన ఇంగ్లండ్‌ భారత బౌలర్ల దాటికి.. కేవలం 122 పరుగులకే కుప్పకూలింది. ఈ విజయంతో ఐదు టెస్టుల సిరీస్‌లో 2-1 ఆధిక్యంలోకి భారత్‌ దూసుకెళ్లింది.  భారత స్పిన్నర్‌ రవీంద్ర జడేజా 5 వికెట్లతో ఇంగ్లీష్‌ జట్టు పతనాన్ని శాసించగా.. కుల్దీప్‌ యాదవ్‌ రెండు, అశ్విన్‌ ఒక్క వికెట్‌ సాధించారు. ఒక్క వికెట్‌ దూరంలో.. రాజ్‌కోట్‌ టెస్టులో విజయానికి భారత్‌ కేవలం ఒక్క వికెట్‌ దూరంలో నిలిచింది. వరుస క్రమంలో ఇంగ్లండ్‌ రెండు వికెట్లను కోల్పోయింది. జడేజా బౌలింగ్‌లో ఫోక్స్‌ ఔట్‌ కాగా.. అశ్విన్‌ బౌలింగ్‌లో హార్ట్‌లీ పెవిలియన్‌కు చేరాడు. ఓటమి దిశగా ఇంగ్లండ్‌.. ఇంగ్లండ్‌ బ్యాటర్లు పెవిలియన్‌కు క్యూ కడుతున్నారు. రెహాన్‌ అహ్మద్‌ రూపంలో ఇంగ్లండ్‌ ఏడో వికెట్‌ కోల్పోయింది. కుల్దీప్‌ యాదవ్‌ బౌలింగ్‌లో భారీ షాట్‌కు ప్రయత్నించి సిరాజ్‌కు క్యాచ్‌ ఇచ్చి ఔటయ్యాడు. 28 ఓవర్లకు ఇంగ్లండ్‌ స్కోర్‌: 53/7 విజయం దిశగా భారత్‌.. రాజ్‌కోట్‌ టెస్టులో టీమిండియా విజయం వైపు అడుగులు వేస్తోంది.  557 పరుగుల లక్ష్యంతో బరిలోకి దిగిన ఇంగ్లండ్‌.. 50 పరుగులకే 6 వికెట్లు కోల్పోయి పీకల్లోతు కష్టాల్లో పడింది. ఇంగ్లండ్‌ కెప్టెన్‌ బెన్‌ స్టోక్స్‌ ఆరో వికెట్‌గా వెనుదిరిగాడు. భారత్‌ విజయానికి కేవలం 4 వికెట్ల దూరంలో నిలిచింది. ఐదో వికెట్‌ డౌన్‌.. జో రూట్‌ రూపంలో ఇంగ్లండ్‌ ఐదో వికెట్‌ కోల్పోయింది. 7 పరుగులు చేసిన రూట్‌.. జడేజా బౌలింగ్‌లో రూట్‌ ఎల్బీగా వెనుదిరిగాడు. 22 ఓవర్లకు ఇంగ్లండ్‌ స్కోర్‌: 50/5. క్రీజులో బెన్‌ స్టోక్స్‌, బెన్‌ ఫోక్స్‌ ఉన్నారు. పీకల్లోతు కష్టాల్లో ఇంగ్లండ్‌.. 557 పరుగుల లక్ష్యంతో బరిలోకి దిగిన ఇంగ్లండ్‌.. 28 పరుగులకే 4 వికెట్లు కోల్పోయి పీకల్లోతు కష్టాల్లో పడింది. జడేజా బౌలింగ్‌లో జానీ బెయిర్‌ స్టో.. నాలుగో వికెట్‌గా వెనుదిరిగాడు. ఇంగ్లండ్‌ విజయానికి ఇంకా 519 పరుగులు కావాలి. మూడో వికెట్‌ డౌన్‌.. 20 పరుగుల వద్ద ఇంగ్లండ్‌ మూడో వికెట్‌ కోల్పోయింది. 3 పరుగులు చేసిన ఓలీ పోప్‌.. జడేజా బౌలిం‍గ్‌లో రోహిత్‌కు క్యాచ్‌ ఇచ్చి ఔటయ్యాడు. 10 ఓవర్లకు ఇంగ్లండ్‌ స్కోర్‌: 24/3 రెండో వికెట్‌ డౌన్‌.. జాక్‌ క్రాలే రూపంలో ఇంగ్లండ్‌ రెండో వికెట్‌ కోల్పోయింది. 11 పరుగులు చేసిన క్రాలే.. బుమ్రా బౌలింగ్‌లో ఎల్బీగా వెనుదిరిగాడు. తొలి వికెట్‌ కోల్పోయిన ఇంగ్లండ్‌.. 557 పరుగుల లక్ష్యంతో బరిలోకి దిగిన ఇంగ్లండ్‌కు ఆదిలోనే బిగ్‌ షాక్‌ తగిలింది. స్టార్‌ బ్యాటర్‌ బెన్‌ డకెట్‌(4) రనౌటయ్యాడు. క్రీజులోకి ఓలీ పోప్‌ వచ్చాడు.7 ఓవర్లకు ఇంగ్లండ్‌ స్కోర్‌: 18/1 ఇన్నింగ్స్‌ను డిక్లేర్‌ చేసిన భారత్‌ భారత్‌ సెకెండ్‌ ఇన్నింగ్స్‌ను 430/4 స్కోర్‌ వద్ద డిక్లేర్‌ చేసింది. టీమిండియా.. ఇంగ్లండ్‌కు 557 పరుగుల లక్ష్యాన్ని నిర్దేశించింది. యశస్వి జైస్వాల్‌ 214, సర్ఫరాజ్‌ ఖాన్‌ 68 పరుగులతో అజేయంగా నిలిచారు.  మరో డబుల్‌ సెంచరీ చేసిన యశస్వి జైస్వాల్‌ రెండో టెస్ట్‌లో డబుల్‌ సెంచరీతో చెలరేగిన యశస్వి జైస్వాల్‌.. మూడో టెస్ట్‌లో మరో డబుల్‌ సెంచరీతో విరుచుకుపడ్డాడు. ఈ డబుల్‌ను యశస్వి 231 బంతుల్లో పూర్తి చేశాడు. ఇందులో 10 సిక్సర్లు, 14 ఫోర్లు ఉన్నాయి. ప్రస్తుతం టీమిండియా స్కోర్‌ 411/3గా ఉంది. లీడ్‌ 537 పరుగులుగా ఉంది. మరో హాఫ్‌ సెంచరీ చేసిన సర్పరాజ్‌ ఖాన్‌ తొలి ఇన్నింగ్స్‌లో 62 పరుగుల వద్ద పొరపాటున రనౌటైన సర్ఫరాజ్‌ ఖాన్‌ సెకెండ్‌ ఇన్నింగ్స్‌లో మరో హాఫ్‌ సెంచరీ చేశాడు. ఈ ఇన్నింగ్స్‌లో 66 బంతులు ఎదుర్కొన్న సర్ఫరాజ్‌.. 5 ఫోర్లు, సిక్సర్‌ సాయంతో హాఫ్‌ సెంచరీ పూర్తి చేశాడు.  మరో డబుల్‌ దిశగా దూసుకుపోతున్న యశస్వి భారత యువ ఓపెనర్‌ యశస్వి జైస్వాల్‌ మరో డబుల్‌ సెంచరీ దిశగా దూసకుపోతున్నాడు. నిన్న రిటైర్డ్‌ హర్ట్‌గా వెనుదిరిగి ఇవాళ తిరిగి బరిలోకి దిగిన యశస్వి.. ధాటిగా ఆడుతున్నాడు. ప్రస్తుతం యశస్వి 182 పరుగుల వద్ద ఉన్నాడు. అతనికి జతగా సర్ఫరాజ్‌ ఖాన్‌ (33) క్రీజ్‌లో ఉన్నాడు.  సెకెండ్‌ ఇన్నింగ్స్‌లో టీమిండియా స్కోర్‌ 359/4గా ఉంది.  440 పరుగుల ఆధిక్యంలో టీమిండియా నాలుగో రోజు లంచ్‌ విరామం సమయానికి టీమిండియా ఆధిక్యం 440 పరగులుగా ఉంది. సెకెండ్‌ ఇన్నింగ్స్‌లో టీమిండియా 4 వికెట్ల నష్టానికి 314 పరుగులు చేసింది. యశస్వి జైస్వాల్‌ (149), సర్ఫరాజ్‌ ఖాన్‌ (22) క్రీజ్‌లో ఉన్నారు. నాలుగో వికెట్‌ కోల్పోయిన టీమిండియా 258 పరుగుల వద్ద టీమిండియా నాలుగో వికెట్‌ కోల్పోయింది. రెహాన్‌ అహ్మద్‌ బౌలింగ్‌లో జో రూట్‌కు క్యాచ్‌ ఇచ్చి కుల్దీప్‌ యాదవ్‌ (27) ఔటయ్యాడు. యశస్వి జైస్వాల్‌ (115), సర్ఫరాజ్‌ ఖాన్‌ క్రీజ్‌లో ఉన్నారు.  91 పరుగుల వద్ద ఔటైన శుభ్‌మన్‌ గిల్‌ శుభ్‌మన్‌ గిల్‌ సెంచరీకి చేరువలో (91) రనౌటాయ్యడు. కుల్దీప్‌ తప్పిదం కారణంగా గిల్‌ ఔటయ్యాడు. నిన్న రిటైర్ట్‌ హర్ట్‌గా వెనుదిరిగిన యశస్వి (107) క్రీజ్‌లోకి వచ్చాడు. రాజ్‌కోట్‌ వేదికగా ఇంగ్లండ్‌తో జరుగుతున్న మూడో టెస్ట్‌లో టీమిండియా పటిష్ట స్థితిలో ఉంది. మూడో రోజు ఆట ముగిసే సమయానికి భారత్‌ స్కోర్‌ సెకెండ్‌ ఇన్నింగ్స్‌లో 192/2గా ఉంది. శుభ్‌మన్‌ గిల్‌ (65), కుల్దీప్‌ యాదవ్‌ (3) క్రీజ్‌లో ఉన్నారు. ప్రస్తుతం టీమిండియా 322 పరుగుల లీడ్‌లో ఉంది. సెకెండ్‌ ఇన్నింగ్స్‌లో యశస్వి జైస్వాల్‌ అద్బుతమైన సెంచరీతో (107) ఆకట్టుకోగా.. రోహిత్‌ శర్మ (19), రజత్‌ పాటిదార్‌ (0) నిరాశపరిచారు. యశస్వి జైస్వాల్‌ సెంచరీ అనంతరం రిటైర్డ్‌ హర్ట్‌గా వెనుదిరిగాడు. ఇంగ్లండ్‌ బౌలర్లలో జో రూట్‌, టామ్‌ హార్ట్లీ తలో వికెట్‌ పడగొట్టారు.  స్కోర్‌ వివరాలు.. భారత్‌ తొలి ఇన్నింగ్స్‌: 445 ఆలౌట్‌ (రోహిత్‌ 131, జడేజా 112) ఇంగ్లండ్‌ తొలి ఇన్నింగ్స్‌: 319 ఆలౌట్‌ (బెన్‌ డకెట్‌ 153)  

35 ఓవర్లలో 5.91 రన్‌రేట్‌తో 207 పరుగులు. పిచ్‌ను, ప్రత్యర్థిని లక్ష్య పెట్టకుండా ఇంగ్లండ్‌ మూడో టెస్టులోనూ తమ ‘బజ్‌బాల్‌’ మంత్రాన్ని చూపించింది. ఫలితంగా 445 పరుగుల భారీ స్కోరు కూడా భారత్‌కు సురక్షితం కాదనిపిస్తోంది. భారత గడ్డపై ఒక విదేశీ బ్యాటర్‌ ఆడిన అత్యుత్తమ ఇన్నింగ్స్‌లో ఒకటిగా నిలిచిపోయే శతకంతో ఓపెనర్‌ బెన్‌ డకెట్‌ చెలరేగాడు. దాంతో రెండు రోజుల ఆట తర్వాత రాజ్‌కోట్‌ టెస్టు సమంగా నిలిచింది. అశ్విన్‌ టెస్టుల్లో 500 వికెట్ల మైలురాయిని అందుకోవడం శుక్రవారం ఆటలో గుర్తుంచుకోదగ్గ మరో హైలైట్‌. మూడో రోజు ఇంగ్లండ్‌ను భారత బౌలర్లు ఎలా నిలువరిస్తారన్నదే ఆసక్తికరం.    రాజ్‌కోట్‌: భారత్‌తో మూడో టెస్టులో ఇంగ్లండ్‌ తొలి ఇన్నింగ్స్‌ దూకుడుగా సాగుతోంది. రెండో రోజు ఆట ముగిసే సమయానికి ఇంగ్లండ్‌ 2 వికెట్ల నష్టానికి 207 పరుగులు చేసింది. బెన్‌ డకెట్‌ (118 బంతుల్లో 133 బ్యాటింగ్‌; 21 ఫోర్లు, 2 సిక్స్‌లు) సెంచరీతో సత్తా చాటాడు. అంతకుముందు ఓవర్‌నైట్‌ స్కోరు 326/5తో ఆట కొనసాగించిన భారత్‌ 445 పరుగులకు ఆలౌటైంది. ధ్రువ్‌ జురేల్‌ (46), అశ్విన్‌ (37) ఎనిమిదో వికెట్‌కు 77 పరుగులు జత చేశారు. ఇంగ్లండ్‌ మరో 238 పరుగులు వెనుకబడి ఉంది.   కీలక భాగస్వామ్యం...  రెండో రోజు ఆరంభంలోనే భారత్‌ రెండు వికెట్లు కోల్పోయింది. ఓవర్‌నైట్‌ స్కోరుకు మరో ఐదు పరుగులు జోడించగానే ఒకే స్కోరు వద్ద కుల్దీప్‌ (4), జడేజా (112) వెనుదిరిగారు. ఈ దశలో అశ్విన్, జురేల్‌ భాగస్వామ్యం భారత్‌ను 400 పరుగులు దాటించింది. అశ్విన్‌ జాగ్రత్తగా ఆడగా, అరంగేట్ర ఆటగాడు జురేల్‌ కొన్ని దూకుడైన షాట్లతో ఆకట్టుకున్నాడు. అయితే తన తొలి మ్యాచ్‌లో అతను అర్ధ సెంచరీని చేజార్చుకున్నాడు. ఈ భాగస్వామ్యం తర్వాత చివర్లో బుమ్రా (28 బంతుల్లో 26; 3 ఫోర్లు, 1 సిక్స్‌) కొన్ని విలువైన పరుగులు జోడించాడు. శుక్రవారం 44.5 ఓవర్లు ఆడిన భారత్‌ మరో 119 పరుగులు జత చేసింది.  దూకుడే దూకుడు...  ఇన్నింగ్స్‌ ఆరంభంలో డకెట్‌ కాస్త తడబడ్డాడు. కానీ బుమ్రా వేసిన ఐదో ఓవర్లో రెండు ఫోర్లతో ధాటిని మొదలు పెట్టిన అతను ఏ బౌలర్‌నూ వదలకుండా చివరి వరకు దూకుడు కొనసాగించాడు. సెంచరీ వరకు కూడా ఒక్క తప్పుడు షాట్‌ లేకుండా అతని ఇన్నింగ్స్‌ అద్భుతమైన స్ట్రోక్‌లతో దూసుకెళ్లింది. టీ తర్వాత తొలి ఓవర్‌నుంచి స్పిన్నర్‌ కుల్దీప్‌తో బౌలింగ్‌ వేయించిన ప్రణాళిక ఫలించలేదు. కుల్దీప్‌ తొలి 4 ఓవర్లలో డకెట్‌ స్వీప్, రివర్స్‌ స్వీప్‌లతో 7 ఫోర్లు బాదడం విశేషం. సిరాజ్‌ ఓవర్లో కొట్టిన రెండు ఫోర్లతో 39 బంతుల్లోనే అతని అర్ధ సెంచరీ పూర్తయింది. మరో ఎండ్‌లో దాదాపు ప్రేక్షక పాత్రకే పరిమితమైన క్రాలీ (15)ని అవుట్‌ చేసి ఎట్టకేలకు అశ్విన్‌ ఈ భాగస్వామ్యాన్ని విడదీశాడు. తర్వాత వచ్చి న ఒలీ పోప్‌ (39; 5 ఫోర్లు, 1 సిక్స్‌) కూడా ఇంగ్లండ్‌ జోరును కొనసాగించాడు. అశ్విన్‌ ఓవర్లో వరుస బంతుల్లో 6, 4 కొట్టి 90ల్లోకి చేరుకున్న    డకెట్‌... సిరాజ్‌ ఓవర్లో బౌండరీతో 88 బంతుల్లోనే కెరీర్‌లో మూడో శతకాన్ని అందుకున్నాడు. చివరకు సిరాజ్‌ చక్కటి బంతికి పోప్‌ వికెట్ల ముందు దొరికిపోయాడు.   ఐదు పరుగులు పెనాల్టీ...  భారత బ్యాటర్లు నిబంధనలకు విరుద్ధంగా పిచ్‌పై పరుగెత్తడంతో అంపైర్లు చర్య తీసుకున్నారు. తొలి రోజు ఆటలో జడేజాను ఈ విషయంపై అంపైర్లు హెచ్చరించగా... రెండో రోజు అశ్విన్‌ కూడా అలాగే చేయడంతో భారత ఇన్నింగ్స్‌ 102వ ఓవర్లో 5 పరుగులు పెనాల్టిగా విధించారు. దాంతో ఇంగ్లండ్‌ ఇన్నింగ్స్‌ 5/0తో మొదలైంది.  స్కోరు వివరాలు  భారత్‌ తొలి ఇన్నింగ్స్‌: యశస్వి (సి) రూట్‌ (బి) వుడ్‌ 10; రోహిత్‌ (సి) స్టోక్స్‌ (బి) వుడ్‌ 131; గిల్‌ (సి) ఫోక్స్‌ (బి) వుడ్‌ 0; పటిదార్‌ (సి) డకెట్‌ (బి) హార్ట్‌లీ 5; జడేజా (సి) అండ్‌ (బి) రూట్‌ 112; సర్ఫరాజ్‌ (రనౌట్‌) 62; కుల్దీప్‌ (సి) ఫోక్స్‌ (బి) అండర్సన్‌ 4; జురేల్‌ (సి) ఫోక్స్‌ (బి) రేహన్‌ 46; అశ్విన్‌ (సి) అండర్సన్‌ (బి) రేహన్‌ 37; బుమ్రా (ఎల్బీ) (బి) వుడ్‌ 26; సిరాజ్‌ (నాటౌట్‌) 3; ఎక్స్‌ట్రాలు 9; మొత్తం (130.5 ఓవర్లలో ఆలౌట్‌) 445. వికెట్ల  పతనం: 1–22, 2–24, 3–33, 4–237, 5–314, 6–331, 7–331, 8–408, 9–415, 10–445.  బౌలింగ్‌: అండర్సన్‌ 25–7–61–1, వుడ్‌ 27.5–2– 114–4, హార్ట్‌లీ 40–7–109–1, రూట్‌ 16–3– 70–1, రేహన్‌ 22–2–85–2.   ఇంగ్లండ్‌ తొలి ఇన్నింగ్స్‌: క్రాసీ (సి) పటిదార్‌ (బి) అశ్విన్‌ 15; డకెట్‌ (బ్యాటింగ్‌) 133; పోప్‌ (ఎల్బీ) (బి) సిరాజ్‌ 39; రూట్‌ (బ్యాటింగ్‌) 9; ఎక్స్‌ట్రాలు 11; మొత్తం (35 ఓవర్లలో 2 వికెట్లకు) 207. వికెట్ల పతనం: 1–89, 2–182. బౌలింగ్‌: బుమ్రా 8–0–34–0, సిరాజ్‌ 10–1–54–1, కుల్దీప్‌ యాదవ్‌ 6–1–42–0, అశ్విన్‌ 7–0–37–1, జడేజా 4–0–33–0.   అశ్విన్‌ @ 500  ఇంగ్లండ్‌ ఓపెనర్‌ క్రాలీని అవుట్‌ చేయడం ద్వారా అశ్విన్‌ టెస్టుల్లో 500 వికెట్ల మైలురాయిని అందుకున్నాడు. తన 98వ టెస్టులో ఈ ఘనత సాధించిన అశ్విన్‌... ఓవరాల్‌గా 9వ ఆటగాడిగా, అనిల్‌ కుంబ్లే (619) తర్వాత రెండో భారత బౌలర్‌గా నిలిచాడు. మ్యాచ్‌లు, బంతుల పరంగా చూస్తే... అత్యంత వేగంగా 500 వికెట్ల మార్క్‌ను చేరిన బౌలర్లలో అశ్విన్‌ రెండో స్థానంలో నిలవడం విశేషం. 2011లో విండీస్‌పై టెస్టుల్లో అరంగేట్రం చేసిన అశ్విన్‌ ఇప్పటి వరకు ఇన్నింగ్స్‌లో 4 వికెట్లు 24 సార్లు... ఇన్నింగ్స్‌లో 5 వికెట్లు 34 సార్లు... మ్యాచ్‌ మొత్తంలో 10 వికెట్లు 8 సార్లు తీశాడు.  టెస్టు నుంచి తప్పుకున్న అశ్విన్‌  రాజ్‌కోట్‌ టెస్టులో అనూహ్య పరిణామం సంభవించింది. తన కుటుంబంలో ఏర్పడిన అత్యవసర పరిస్థితుల నేపథ్యంలో అశ్విన్‌ మూడో టెస్టు నుంచి మధ్యలోనే తప్పుకున్నాడు.    

రాజ్‌కోట్‌ వేదికగా టీమిండియాతో జరుగుతున్న మూడో టెస్ట్‌లో ఇంగ్లండ్‌ వెటరన్‌ పేసర్‌ జేమ్స్‌ ఆండర్సన్‌ అనవరమైన చెత్త రి​కార్డును తన ఖాతాలో వేసుకున్నాడు. టెస్ట్‌ క్రికెట్‌ చరిత్రలో అ‍త్యధిక పరుగులు సమర్పించుకున్న బౌలర్‌గా అవతరించాడు. ఈ చెత్త రికార్డును ఆండర్సన్‌.. భారత మాజీ స్పిన్నర్‌ అనిల్‌ కుంబ్లే ఖాతాలో నుంచి లాగేసుకున్నాడు. 2008లో రిటైరైన కుంబ్లే 132 మ్యాచ్‌ల టెస్ట్‌ కెరీర్‌లో 18, 355 పరుగులు సమర్పించుకోగా.. ఆండర్సన్‌ తన 185వ టెస్ట్‌లో కుంబ్లే రికార్డును అధిగమించాడు (18, 371). ఈ జాబితాలో లంక స్పిన్‌ దిగ్గజం ముత్తయ్య మురళీథరన్‌ మూడో స్థానంలో (133 టెస్ట్‌ల్లో 18180 పరుగులు) ఉండగా.. ఆసీస్‌ లెజెండ్‌ షేన్‌ వార్న్‌ (17995), ఇంగ్లండ్‌ మాజీ పేసర్‌ స్టువర్ట్‌ బ్రాడ్‌ (16719) నాలుగు, ఐదు స్థానాల్లో నిలిచారు. 41 ఏళ్ల ఆండర్సన్‌ ప్రస్తుతం 696 వికెట్లతో టెస్ట్‌ల్లో అత్యధిక వికెట్లు తీసిన ఆటగాళ్ల జాబితాలో మూడో స్థానంలో ఉన్నాడు. ఈ జాబితాలో మురళీథరన్‌ (800), షేన్‌ వార్న్‌ (708) తొలి రెండు స్థానాల్లో నిలిచారు. ఇదే మ్యాచ్‌లో భారత వెటరన్‌ స్పిన్నర్‌ రవిచంద్రన్‌ అశ్విన్‌ 500 వికెట్ల మైలురాయిని తాకాడు. ఈ మ్యాచ్‌ తొలి ఇన్నింగ్స్‌లో 25 ఓవర్లు వేసిన ఆండర్సన్‌ 61 పరుగులిచ్చి ఓ వికెట్‌ పడగొట్టాడు. కాగా, ఈ మ్యాచ్‌లో రెండో రోజు ఆట ముగిసే సమయానికి ఇంగ్లండ్‌ 2 వికెట్ల నష్టానికి 207 పరుగులు చేసింది. ఓపెనర్‌ బెన్‌ డకెట్‌ మెరుపు సెంచరీ (118 బంతుల్లో 133 నాటౌట్‌; 21 ఫోర్లు, 2 సిక్సర్లు) అనంతరం ఇన్నింగ్స్‌ను కొనసాగిస్తున్నాడు. అతనితో పాటు జో రూట్‌ (9) క్రీజ్‌లో ఉన్నాడు. ఇంగ్లండ్‌ ఇన్నింగ్స్‌లో జాక్‌ క్రాలే (15), ఓలీ పోప్‌ (39) ఔటయ్యారు. క్రాలే వికెట్‌ అశ్విన్‌కు దక్కగా.. పోప్‌ను సిరాజ్‌ పెవిలియన్‌కు పంపాడు. అంతకుముందు భారత్‌ తొలి ఇన్నింగ్స్‌లో 445 పరుగులకు ఆలౌటైంది. రోహిత్‌ శర్మ, రవీంద్ర జడేజా సెంచరీలతో మెరిశారు.   

రాజ్‌కోట్‌ టెస్ట్‌లో పర్యాటక ఇంగ్లండ్‌.. టీమిండియాకు ధీటుగా బదులిస్తుంది. భారత్‌ తొలి ఇన్నింగ్స్‌లో 445 పరుగులకు ఆలౌట్‌ కాగా.. రెండో రోజు ఆట ముగిసే సమయానికి ఇంగ్లండ్‌ 2 వికెట్ల నష్టానికి 207 పరుగులు చేసింది. ఓపెనర్‌ బెన్‌ డకెట్‌ మెరుపు సెంచరీ (118 బంతుల్లో 133 నాటౌట్‌; 21 ఫోర్లు, 2 సిక్సర్లు) చేసి ఇంగ్లండ్‌ ఇన్నింగ్స్‌కు జీవం పోశాడు. డకెట్‌తో పాటు జో రూట్‌ (9) క్రీజ్‌లో ఉన్నాడు. ఇంగ్లండ్‌ ఇన్నింగ్స్‌లో జాక్‌ క్రాలే (15), ఓలీ పోప్‌ (39) ఔటయ్యారు. క్రాలే వికెట్‌ అశ్విన్‌కు దక్కగా.. పోప్‌ను సిరాజ్‌ పెవిలియన్‌కు పంపాడు. ఓవర్‌నైట్‌ స్కోర్‌ 326/5 వద్ద రెండో రోజు ఆటను ప్రారంభించిన భారత్‌.. మరో 119 పరుగులు జోడించి చివరి ఐదు వికెట్లు కోల్పోయింది. ఓవర్‌నైట్‌ బ్యాటర్‌, సెంచరీ హీరో రవీంద్ర జడేజా తన వ్యక్తిగత స్కోర్‌కు మరో రెండు పరుగులు మాత్రమే జోడించి 112 పరుగుల వద్ద ఔట్‌ కాగా.. మరో ఓవర్‌నైట్‌ ఆటగాడు కుల్దీప్‌ తన స్కోర్‌ మరో 3 పరుగులు జోడించి 4 పరుగుల వద్ద ఔటయ్యాడు.  ఇవాళ క్రీజ్‌లో వచ్చిన అరంగేట్ర బ్యాటర్‌ దృవ్‌ జురెల్‌ 46 పరుగులు, అశ్విన్‌ 37, బుమ్రా 26 పరుగులు చేసి ఔటయ్యారు. సిరాజ్‌ 3 పరుగులతో నాటౌట్‌గా నిలిచాడు. ఆఖర్లో బుమ్రా బ్యాట్‌ ఝులిపించాడు. ఇంగ్లండ్‌ బౌలర్లలో మార్క్‌ వుడ్‌ 4, రెహాన్‌ అహ్మద్‌ 2, జేమ్స్‌ ఆండర్సన్‌, టామ్‌ హార్ట్లీ, జో రూట్‌ తలో వికెట్‌ పడగొట్టారు. రెండో రోజు ఆటలో జాక్‌ క్రాలేను ఔట్‌ చేయడం ద్వారా భారత వెటరన్‌ స్పిన్నర్‌ రవిచంద్రన్‌ అశ్విన్‌ 500 వికెట్ల క్లబ్‌లో చేరాడు. ఐదు మ్యాచ్‌ల ఈ సిరీస్‌లో భారత్‌, ఇంగ్లండ్‌ జట్లు చెరో మ్యాచ్‌ గెలిచిన విషయం తెలిసిందే.    

బ్యాటింగ్‌కు బాగా అనుకూలమైన పిచ్‌పై టాస్‌ గెలిచిన భారత్‌ ఒక దశలో 33/3 స్కోరు వద్ద నిలిచింది. ఈ స్థితిలో రోహిత్, జడేజా 204 పరుగుల భాగస్వామ్యంతో జట్టును ఆదుకున్నారు. అయితే గురువారం ఆటలో అందరి దృష్టినీ ఆకర్షించిన ఆటగాడు మాత్రం సర్ఫరాజ్‌ ఖాన్‌. సుదీర్ఘ కాలంగా దేశవాళీ క్రికెట్‌లో పరుగుల వరద పారిస్తూ తన అవకాశం కోసం ఎదురు చూస్తున్న అతను ఎట్టకేలకు భావోద్వేగాల నడుమ భారత క్రికెటర్‌గా అరంగేట్రం చేశాడు. అంచనాలకు తగినట్లుగా చూడచక్కటి షాట్లతో అలవోకగా అర్ధ సెంచరీని అందుకున్నాడు. జోరు మీదున్న దశలో దురదృష్టవశాత్తూ రనౌట్‌గా వెనుదిరిగినా...తానేంటో అతను నిరూపించుకున్నాడు. ఇక మిగిలిన ఐదు వికెట్లతో రెండో రోజు భారత్‌ ఇంకా ఎన్ని పరుగులు జోడిస్తుందనేది ఆసక్తికరం.   రాజ్‌కోట్‌: ఇంగ్లండ్‌తో మూడో టెస్టులో భారత్‌కు శుభారంభం లభించింది. గురువారం ఆట ముగిసే సమయానికి భారత్‌ తమ తొలి ఇన్నింగ్స్‌లో 86 ఓవర్లలో 5 వికెట్ల నష్టానికి 326 పరుగులు చేసింది. రోహిత్‌ శర్మ (196 బంతుల్లో 131; 14 ఫోర్లు, 3 సిక్స్‌లు), రవీంద్ర జడేజా (212 బంతుల్లో 110 బ్యాటింగ్‌; 9 ఫోర్లు, 2 సిక్స్‌లు) సెంచరీలు సాధించగా... సర్ఫరాజ్‌ ఖాన్‌ (66 బంతుల్లో 62; 9 ఫోర్లు, 1 సిక్స్‌) రాణించాడు. ఇంగ్లండ్‌ బౌలర్లలో మార్క్‌ వుడ్‌కు 3 వికెట్లు దక్కాయి.   ద్విశతక భాగస్వామ్యం...  అండర్సన్‌ వేసిన మ్యాచ్‌ తొలి బంతిని యశస్వి (10) ఫోర్‌గా మలచడంలో భారత్‌ ఇన్నింగ్స్‌ ప్రారంభమైంది. అయితే వుడ్‌ జోరులో భారత్‌ రెండు పరుగుల తేడాతో యశస్వి, గిల్‌ (0) వికెట్లు కోల్పోయింది. హార్ట్‌లీ బంతిని ఆడలేక రజత్‌ పటిదార్‌ (5) కూడా సునాయాస క్యాచ్‌ ఇచ్చాడు. ఈ దశలో సర్ఫరాజ్‌ వస్తే ఒత్తిడిలో మరో వికెట్‌ పోయేదేమో! కానీ జట్టు వ్యూహాత్మకంగా కుడి, ఎడమ కాంబినేషన్‌ కోసం ఐదో స్థానంలో జడేజాను పంపించడం అద్భుతంగా పని చేసింది. రోహిత్, జడేజా కలిసి జాగ్రత్తగా ఆడుతూ ఇన్నింగ్స్‌ను నిర్మించారు. 29 పరుగుల వద్ద స్లిప్‌లో రూట్‌ క్యాచ్‌ వదిలేయడంతో బతికిపోయిన రోహిత్‌ లంచ్‌కు ముందు 71 బంతుల్లో అర్ధ సెంచరీ పూర్తి చేసుకున్నాడు. విరామం తర్వాత పూర్తిగా భారత్‌ హవా సాగింది. ప్రత్యర్థి బౌలర్లకు ఏమాత్రం అవకాశం ఇవ్వకుండా రోహిత్, జడేజా స్వేచ్ఛగా బ్యాటింగ్‌ చేశారు. ఈ క్రమంలో భాగస్వామ్యం వంద పరుగులు దాటింది. 97 బంతుల్లో జడేజా అర్ధ సెంచరీ పూర్తయింది. ఈ సెషన్‌లో భారత్‌ 27 ఓవర్లలో  92 పరుగులు చేసింది. ఈ జోడీని విడదీయలేక ఇంగ్లండ్‌ తీవ్రంగా ఇబ్బంది పడింది. ఈ సిరీస్‌లో ఒక్క వికెట్‌ కూడా పడని తొలి సెషన్‌ ఇదే కావడం విశేషం. టీ తర్వాత తొలి ఓవర్లోనే రోహిత్‌ 157 బంతుల్లో తన కెరీర్‌లో 11వ సెంచరీని పూర్తి చేసుకున్నాడు. పార్ట్‌నర్‌íÙప్‌ 200 పరుగులు దాటాక ఎట్టకేలకు ఇంగ్లండ్‌కు వికెట్‌ దక్కింది. షార్ట్‌ బంతులకు వరుసగా పరుగులు రాబట్టిన రోహిత్‌ చివరకు అదే షాట్‌కు ప్రయత్నించి వెనుదిరిగాడు.   సర్ఫరాజ్‌ రనౌట్‌...  కొత్త ఆటగాడు సర్ఫరాజ్, జడేజా భాగస్వామ్యం జట్టును నడిపించింది. ముఖ్యంగా తన కెరీర్‌ తొలి ఇన్నింగ్స్‌లో సర్ఫరాజ్‌ ఇంగ్లండ్‌ స్పిన్నర్లను సమర్థంగా ఎదుర్కొంటూ స్వీప్, లాఫ్టెడ్‌ షాట్లతో వేగంగా పరుగులు రాబట్టాడు. సర్ఫరాజ్‌ క్రీజ్‌లోకి వచ్చినప్పుడు జడేజా స్కోరు 84 కాగా... సర్ఫరాజ్‌ వెనుదిరిగే సమయానికి 99 మాత్రమే! 77 పరుగుల ఈ ఐదో వికెట్‌ భాగస్వామ్యంలో జడేజా 15 పరుగులు చేయగా, సర్ఫరాజ్‌ 62 పరుగులు చేశాడంటేనే అతని జోరు అర్థమవుతుంది. 93 పరుగుల వద్ద హార్ట్‌లీ బంతి జడేజా ప్యాడ్‌ను ముందుగా తగిలినా... ఇంగ్లండ్‌ బలంగా అప్పీల్‌ చేయలేదు. రీప్లేలో అతను అవుటయ్యేవాడని తేలింది! ధాటిగా ఆడిన సర్ఫరాజ్‌ 48 బంతుల్లోనే హాఫ్‌ సెంచరీని చేరుకున్నాడు. అయితే దురదృష్టవశాత్తూ జడేజాతో సమన్వయ లోపం అతని ఆటను ముగించింది. జడేజా 99 వద్ద అండర్సన్‌ బౌలింగ్‌లో సింగిల్‌ కోసం ముందుకు వచ్చి మళ్లీ వెనక్కి తగ్గాడు. అప్పటికే ముందుకు వెళ్లిన సర్ఫరాజ్‌ వెనక్కి వచ్చేలోగా వుడ్‌ డైరెక్ట్‌ హిట్‌ వికెట్లను తాకింది. తర్వాతి బంతికే సింగిల్‌తో జడేజా టెస్టుల్లో నాలుగో సెంచరీ పూర్తయింది.  భావోద్వేగ క్షణాలు...  రాజ్‌కోట్‌ టెస్టు ద్వారా ఇద్దరు ఆటగాళ్లు సర్ఫరాజ్‌ ఖాన్, ధ్రువ్‌ జురేల్‌ అంతర్జాతీయ క్రికెట్‌లోకి అడుగు పెట్టారు. సర్ఫరాజ్‌కు అనిల్‌ కుంబ్లే, జురేల్‌కు దినేశ్‌ కార్తీక్‌ టెస్టు క్యాప్‌లు అందించారు. రెండేళ్ల వ్యవధిలో 15 ఫస్ట్‌క్లాస్‌ మ్యాచ్‌ల తర్వాత అవకాశం లభించిన వికెట్‌ కీపర్‌ జురేల్‌తో పోలిస్తే సర్ఫరాజ్‌ ప్రస్థానం భావోద్వేగభరితమైంది. అందుకే మ్యాచ్‌కు ముందు మైదానంలో అలాంటి దృశ్యాలు కనిపించాయి. ఎనిమిదేళ్ల ఫస్ట్‌క్లాస్‌ కెరీర్‌లో దేశవాళీలో 70 సగటుతో భారీగా పరుగులు సాధించిన సర్ఫరాజ్‌ భారత్‌ తరఫున ఆడేందుకు ఎంతో కాలంగా ఎదురు చూశాడు. పలుమార్లు అవకాశం వచ్చినట్లే వచ్చి చేజారింది. అందుకే అరంగేట్రం ఖాయమైన క్షణాన కోచ్, మెంటార్‌ అయిన తండ్రి నౌషాద్‌ ఖాన్‌ తన కన్నీళ్లను ఆపుకోలేకపోయాడు. చిన్నప్పటినుంచి అన్నీ తానే అయి సర్ఫరాజ్‌ను క్రికెటర్‌గా తీర్చిదిద్దిన ఆయన టెస్టు క్యాప్‌ను ముద్దాడి తన కొడుకును హత్తుకున్నాడు. సర్ఫరాజ్‌ అర్ధసెంచరీ పూర్తయినప్పుడు అన్ని వైపుల నుంచి అభినందనలు వెల్లువెత్తాయి. జడేజా కూడా ఆట ముగిసిన తర్వాత రనౌట్‌లో తనదే తప్పంటూ బాధపడుతున్నట్లు ఇన్‌స్టాగ్రామ్‌లో పోస్ట్‌ చేశాడు!    స్కోరు వివరాలు   భారత్‌ తొలి ఇన్నింగ్స్‌: యశస్వి (సి) రూట్‌ (బి) వుడ్‌ 10; రోహిత్‌ (సి) స్టోక్స్‌ (బి) వుడ్‌ 131; గిల్‌ (సి) ఫోక్స్‌ (బి) వుడ్‌ 0; పటిదార్‌ (సి) డకెట్‌ (బి) హార్ట్‌లీ 5; జడేజా (బ్యాటింగ్‌) 110; సర్ఫరాజ్‌ (రనౌట్‌) 62; కుల్దీప్‌ (బ్యాటింగ్‌) 1; ఎక్స్‌ట్రాలు 7; మొత్తం (86 ఓవర్లలో 5 వికెట్లకు) 326. వికెట్ల పతనం: 1–22, 2–24, 3–33, 4–237, 5–314.  బౌలింగ్‌: అండర్సన్‌ 19–5–51–0, వుడ్‌ 17–2–69–3, హార్ట్‌లీ 23–3–81–1, రూట్‌ 13–1–68–0, రేహన్‌ 14–0–53–0. 

రాజ్‌కోట్‌ వేదికగా ఇంగ్లండ్‌తో జరుగుతున్న మూడో టెస్ట్‌ తొలి రోజు ఆటలో టీమిండియా పైచేయి సాధించింది. సీనియర్‌ బ్యాటర్లు రోహిత్‌ శర్మ (131), రవీంద్ర జడేజా (110 నాటౌట్‌) బాధ్యతాయుతమైన సెంచరీలు చేసి భారత జట్టును ఆదుకున్నారు. వీరికి అరంగేట్రం ఆటగాడు సర్ఫరాజ్‌ ఖాన్‌ మెరుపు అర్దశతకం తోడైంది. ఈ ముగ్గురు కలిసి టీమిండియాను పటిష్ట స్థితికి చేర్చారు. తొలి రోజు ఆట ముగిసే సమయానికి టీమిండియా స్కోర్‌ ఐదు వికెట్ల నష్టానికి 326 పరుగులుగా ఉంది. యువ బ్యాటర్లు, రెండో టెస్ట్‌ హీరోలు యశస్వి జైస్వాల్‌ (10), శుభ్‌మన్‌ గిల్‌ (0) నిరాశపరిచారు. మరో యువ ఆటగాడు రజత్‌ పాటిదార్‌ (5) అందివచ్చిన అవకాశాన్ని జార విడుచుకున్నాడు. జడేజాతో పాటు కుల్దీప్‌ యాదవ్‌ (1) క్రీజ్‌లో ఉన్నాడు. ఇంగ్లండ్‌ బౌలర్లలో మార్క్‌ వుడ్‌ 3, టామ్‌ హార్ల్టీ ఓ వికెట్‌ పడగొట్టగా.. సర్ఫరాజ్‌ ఖాన్‌ రనౌటయ్యాడు. ఈ మ్యాచ్‌లో టీమిండియా టాస్‌ గెలిచి బ్యాటింగ్‌ ఎంచుకుంది.  హిట్‌మ్యాన్‌ షో.. 33 పరుగులకే 3 వికెట్లు కోల్పోయి కష్టాల్లో ఉన్న టీమిండియాను రోహిత్‌ శర్మ బాధ్యతాయుతమైన సెంచరీతో ఆదుకున్నాడు. హిట్‌మ్యాన్‌ 157 బంతుల్లో 11 ఫోర్లు, 2 సిక్సర్ల సాయంతో సెంచరీ పూర్తి చేసి ఔటయ్యాడు. రోహిత్‌ చాలాకాలం తర్వాత టెస్ట్‌ల్లో అద్భుతమైన ఇన్నింగ్స్‌ ఆడాడు. అతనికిది 11వ టెస్ట్‌ సెంచరీ. హిట్‌మ్యాన్‌ దాదాపు ఏడాది తర్వాత స్వదేశంలో టెస్ట్‌ సెంచరీ చేశాడు. రోహిత్‌ ఈ సెంచరీతో భారత్‌ తరఫున సెంచరీ చేసిన అత్యంత పెద్ద వయస్కుడైన సారధిగా రికార్డుల్లోకెక్కాడు. హిట్‌మ్యాన్‌ 36 ఏళ్ల 291 రోజుల వయసులో సెంచరీ చేశాడు. మెరుపు ఇన్నింగ్స్‌తో ఆకట్టుకున్న సర్ఫరాజ్‌ .. ఈ మ్యాచ్‌తో టెస్ట్‌ అరంగేట్రం చేసిన సర్ఫరాజ్‌ ఖాన్‌ తొలి ఇన్నింగ్స్‌లోనే మెరుపు అర్దశతకం బాది ఆకట్టుకున్నాడు. ఈ మ్యాచ్‌లో కెప్టెన్‌ రోహిత్‌ శర్మ ఔటయ్యాక ఆరో స్థానంలో బరిలోకి దిగిన సర్ఫరాజ్‌ కేవలం 48 బంతుల్లోనే అర్దసెంచరీ బాది అభిమానులకు కనువిందు చేశాడు. ఈ ఇన్నింగ్స్‌లో సర్ఫరాజ్‌ 7 ఫోర్లు, సిక్సర్‌ బాదాడు. దేశవాలీ టోర్నీల్లో ఘనమైన రికార్డు ఉన్న సర్ఫరాజ్‌.. సుదీర్ఘ నిరీక్షణ తర్వాత భారత జట్టులో చోటు దక్కించుకుని, తొలి ఇన్నింగ్స్‌లోనే తన మార్కు ప్రభావం చూపాడు. సర్ఫరాజ్‌కు దేశవాలీ క్రికెట్‌లో చిచ్చరపిడుగుగా పేరుంది. ఆ బిరదును సర్ఫరాజ్‌ తన తొలి టెస్ట్‌ ఇన్నింగ్స్‌లోనే నిజం​ చేశాడు. సర్ఫరాజ్‌ క్రీజ్‌లోకి వచ్చినప్పటి నుంచి ఏమాత్రం బెరుకు లేకుండా షాట్లు ఆడి, అనుభవజ్ఞుడైన ఆటగాళ్లను తలపించాడు. జడ్డూ బాధ్యతాయుతమైన సెంచరీ.. జట్టు కష్టాల్లో (33/3) ఉన్నప్పుడు కెప్టెన్‌ రోహిత్‌ శర్మతో జతకట్టిన జడ్డూ.. కెరీర్‌లో నాలుగో సెంచరీతో చెలరేగాడు. 198 బంతుల్లో 7 ఫోర్లు, 2స సిక్సర్ల సాయంతో సెంచరీ మార్కును తాకాడు. జడ్డూ బాధ్యతాయుతమైన సెంచరీతో కదంతొక్కడంతో టీమిండియా పటిష్ట స్థితి​​కి చేరింది. జడ్డూ.. కెప్టెన్‌ రోహిత్‌ శర్మతో కలిసి నాలుగో వికెట్‌కు రికార్డు స్థాయిలో 234 పరుగులు జోడించాడు.  పాపం సర్ఫరాజ్‌.. అరంగేట్రం మ్యాచ్‌లోనే ఏ బెదురు లేకుండా యదేచ్చగా షాట్లు ఆడుతూ మెరుపు వేగంతో అర్దసెంచరీ పూర్తి చేసుకున్న సర్ఫరాజ్‌ ఖాన్‌.. జడేజా చేసిన పొరపాటు కారణంగా రనౌటయ్యాడు. జడేజా 99 పరుగుల వద్ద ఉన్నప్పుడు లేని పరుగుకు కోసం సర్ఫరాజ్‌ను పిలిచి రనౌట్‌ చేయించాడు. సర్ఫరాజ్‌ను అనవసరంగా ఔట్‌ చేయించానన్న బాధలో జడేజా సెంచరీ సెలబ్రేషన్స్‌ కూడా చేసుకోలేదు.  కోపంతో ఊగిపోయిన హిట్‌మ్యాన్‌.. జడేజా కారణంగా సర్ఫరాజ్‌ ఖాన్‌ అనవసరంగా రనౌట్‌ కావడంతో డ్రెస్సింగ్‌ రూమ్‌లో ఉన్న రోహిత్‌ శర్మ కోపంతో ఊగిపోయాడు. క్యాప్‌ను నేలకేసి కొట్టి తన అసహనాన్ని ప్రదర్శించాడు. రోహిత్‌ కోపపడిన విధానాన్ని చూస్తే అతనికి సర్ఫరాజ్‌పై భారీ అంచనాలు ఉన్నాయన్న విషయం అర్దమవుతుంది.   

తొమ్మిది రోజులు...భారత్, ఇంగ్లండ్‌ రెండో, మూడో టెస్టు మ్యాచ్‌ల మధ్య విరామం! చూస్తుంటే ఒక సిరీస్‌ 1–1తో ముగిసిపోయింది. ఇప్పుడు కొత్తగా మూడు టెస్టుల సిరీస్‌ మొదలవుతున్నట్లుగా అనిపిస్తోంది. ఐదు టెస్టుల సుదీర్ఘ సిరీస్‌ ఆడుతున్న నేపథ్యంలో కొత్త ఉత్సాహంతో, కొత్త వ్యూహాలతో బరిలోకి దిగేందుకు ఇది పనికొచ్చింది. ఇప్పుడు సిరీస్‌లో ఆధిక్యం ప్రదర్శించేందుకు మరో పోరుకు రంగం సిద్ధమైంది. విరామం తర్వాత పైచేయి ఎవరిదనేది ఆసక్తికరం.  రాజ్‌కోట్‌: టెస్టు సిరీస్‌లో 1–1తో సమంగా ఉన్న స్థితిలో మళ్లీ ఆధిక్యంలోకి వెళ్లేందుకు భారత్, ఇంగ్లండ్‌ తలపడనున్నాయి. నేటినుంచి జరిగే మూడో టెస్టులో ఇరు జట్లు హోరాహోరీగా తలపడేందుకు సిద్ధమయ్యాయి. ఉత్కంఠభరితంగా సాగిన తొలి టెస్టులో ఇంగ్లండ్‌ విజయం సాధించగా...రెండో టెస్టులో భారత్‌కు భారీ విజయం దక్కింది. అయితే గత పర్యటనతో పోలిస్తే ఇంగ్లండ్‌ కాస్త మెరుగైన ప్రదర్శన కనబర్చగా...భారత్‌ కోణంలో చూస్తే అనూహ్యంగా గట్టి పోటీ ఎదురైంది. బుధవారం జరిగిన కార్యక్రమంలో రాజ్‌కోట్‌ మైదానాన్ని  ‘నిరంజన్‌ షా స్టేడియం’గా బీసీసీఐ పేరు పెట్టింది. సర్ఫరాజ్‌ అరంగేట్రం!   రెండో టెస్టుతో పోలిస్తే భారత తుది జట్టులో మార్పులు ఖాయమయ్యాయి. గాయంతో వైజాగ్‌ టెస్టుకు దూరమైన రవీంద్ర జడేజా తిరిగి జట్టులోకి వస్తున్నాడు. తన సొంత మైదానంలో అతడు చెలరేగిపోతే ఇంగ్లండ్‌కు కష్టాలు తప్పవు. అయ్యర్‌పై వేటు పడటంతో అతని స్థానంలో బ్యాటర్‌గా సర్ఫరాజ్‌ ఖాన్‌కు తొలి అవకాశం దక్కవచ్చు. వికెట్‌ కీపర్‌గా ఆంధ్ర ఆటగాడు కేఎస్‌ భరత్‌ను తప్పించి ధ్రువ్‌ జురేల్‌ను ఎంపిక చేయవచ్చని కూడా తెలుస్తోంది. అయితే జురేల్‌ను ఆడిస్తారా లేక భరత్‌కు చివరి చాన్స్‌ ఇస్తారా చూడాలి. మిడిలార్డర్‌లో అనుభవలేమి కనిపిస్తుండటంతో బ్యాటింగ్‌ భారం ప్రధానంగా టాప్‌–3పైనే ఉంది. గత మ్యాచ్‌లో జైస్వాల్‌ తానేంటో నిరూపించుకోగా, గిల్‌ కూడా కీలక సెంచరీ సాధించాడు. రోహిత్‌ చెప్పుకోదగ్గ ఇన్నింగ్స్‌ ఇప్పుడైనా ఆడాల్సి ఉంది. బౌలింగ్‌లో అశ్విన్, కుల్దీప్‌లను ఇంగ్లండ్‌ ఎలా ఎదుర్కొంటుందో చూడాలి. బుమ్రా స్థాయి ప్రత్యేకంగా చెప్పనవసరం లేదు. ముకేశ్‌ స్థానంలో సిరాజ్‌ వస్తాడు.   ఇద్దరు పేసర్లతో...  తొలి రెండు టెస్టుల్లో ఒకే ఒక పేసర్‌కే పరిమితమైన ఇంగ్లండ్‌ ఈ సారి వ్యూహం మార్చింది. రెండో పేసర్‌గా అండర్సన్‌తో పాటు వుడ్‌ తుది జట్టులోకి వచ్చాడు. స్పిన్నర్లలో హార్ట్‌లీ ఇప్పటికే సత్తా చాటగా, రేహన్‌ పర్వాలేదనిపించాడు. వుడ్‌ రాకతో ఆఫ్‌స్పిన్నర్‌ బషీర్‌పై వేటు పడింది. అయితే రూట్‌ ఆఫ్‌ స్పిన్‌ జట్టుకు అదనపు బలంగా మారింది కాబట్టి సమస్య ఉండకపోవచ్చు. ఓడినా, గెలిచినా ఆ జట్టు బ్యాటింగ్‌ శైలిలో మార్పు ఉండకపోవచ్చు. ఓపెనర్లు క్రాలీ, డకెట్‌లతో పాటు పాటు పోప్‌ దూకుడు కొనసాగిస్తున్నాడు. ఇంకా ప్రభావవంతమైన ఇన్నింగ్స్‌ ఆడని రూట్, బెయిర్‌స్టో రాణించాల్సి ఉంది. స్టోక్స్‌ బ్యాటింగ్‌లో ఎలా చెలరేగుతాడో చూడాలి. అతని నాయకత్వ ప్రతిభకు కూడా ఈ మ్యాచ్‌ పరీక్ష కానుంది.   పిచ్, వాతావరణం  ఎప్పటిలాగే ఈ పిచ్‌ బ్యాటింగ్‌కు బాగా అనుకూలం. పరుగుల వరదకు అవకాశం ఉంది. అయితే జడేజా చెప్పినదాన్ని బట్టి చూస్తే మ్యాచ్‌ సాగిన కొద్దీ పగుళ్లు ఏర్పడి స్పిన్‌ను అనుకూలిస్తుంది. కాబట్టి టాస్‌ గెలిచిన జట్టు ముందుగా బ్యాటింగ్‌ తీసుకోవడం సరైన నిర్ణయం అవుతుంది. మంచి వాతావరణం, వర్షసూచన లేదు.   జట్ల వివరాలు  భారత్‌ (అంచనా): రోహిత్‌ (కెప్టెన్), యశస్వి, గిల్, రజత్, సర్ఫరాజ్, జడేజా, భరత్‌/ జురేల్, అశ్విన్, కుల్దీప్, బుమ్రా, సిరాజ్‌.   ఇంగ్లండ్‌: స్టోక్స్‌ (కెప్టెన్), క్రాలీ, డకెట్, పోప్, రూట్, బెయిర్‌స్టో, ఫోక్స్, రేహన్, హార్ట్‌లీ, వుడ్, అండర్సన్‌.   100  500  700  ఈ టెస్టులో పలు ఆటగాళ్లకు వ్యక్తిగతంగా ఇది చిరస్మరణీయ మ్యాచ్‌ కానుంది. ఇంగ్లండ్‌ కెప్టెన్‌ బెన్‌ స్టోక్స్‌ కెరీర్‌లో ఇది 100వ టెస్టు మ్యాచ్‌. ఈ ఘనత సాధించిన 16వ ఇంగ్లండ్‌ ఆటగాడిగా స్టోక్స్‌ నిలుస్తాడు. మరో వికెట్‌ తీస్తే భారత స్పిన్నర్‌ అశ్విన్‌ 500 వికెట్ల ఘనతను అందుకుంటాడు. ఈ మైలురాయిని చేరిన 9వ ఆటగాడిగా నిలుస్తాడు. మరో 5 వికెట్లు తీస్తే అండర్సన్‌ 700 వికెట్ల ఘనతను అందుకుంటాడు.     2024 టి20 ప్రపంచకప్‌లో భారత జట్టుకు రోహిత్‌ శర్మనే కెప్టెన్‌గా వ్యవహరిస్తాడు. బోర్డు కార్యదర్శి జై షా ఈ విషయాన్ని నిర్ధారించారు. 

భారత్‌-ఇంగ్లండ్‌ జట్ల మధ్య రాజ్‌కోట్‌ వేదికగా రేపటి నుంచి ప్రారంభంకాబోయే మూడో టెస్ట్‌ మ్యాచ్‌ ముగ్గురు ఆటగాళ్లకు చాలా ప్రత్యేకంగా మారింది. రేపటి మ్యాచ్‌లో భారత వెటరన్‌ రవిచంద్రన్‌ అశ్విన్‌ మరో వికెట్‌ తీస్తే టెస్ట్‌ల్లో 500 వికెట్ల అరుదైన మైలురాయిని చేరుకోనుండగా.. ఇదే మ్యాచ్‌లో ఇంగ్లండ్‌ వెటరన్‌ పేసర్‌ జిమ్మీ​ ఆండర్సన్‌ మరో ఐదు వికెట్లు తీస్తే టెస్ట్‌ల్లో 700 వికెట్ల అత్యంత అరుదైన మైలురాయిని చేరుకుంటాడు. రేపటి మ్యాచ్‌ ఇంగ్లండ్‌ కెప్టెన్‌ బెన్‌ స్టోక్స్‌కు 100వ టెస్ట్‌ కావడంతో ఈ మ్యాచ్‌ అతనికి చిరకాలం గుర్తిండిపోతుంది. ఈ మూడు ప్రత్యేకతలే కాకుండా  రేపటి మ్యాచ్‌ ఇద్దరు టీమిండియా ఆటగాళ్లకు చిరస్మరణీయంగా మారే అవకాశం ఉంది. రాజ్‌కోట్‌ టెస్ట్‌తో యువ ఆటగాళ్లు సర్ఫరాజ్‌ అహ్మద్‌, దృవ్‌ జురెల్‌ టెస్ట్‌ అరంగేట్రం చేయడం దాదాపుగా ఖరారైపోయింది. ఆఖరి నిమిషంలో ఏదైనా జరిగితే తప్ప ఈ ఇద్దరి టెస్ట్‌ అరంగేట్రాన్ని ఎవ్వరూ ఆపలేరు. ఇలా  రేపటి నుంచి ప్రారంభంకాబోయే రాజ్‌కోట్‌ టెస్ట్‌ మ్యాచ్‌ ఐదుగురు ఆటగాళ్లకు చాలా ప్రత్యేకంగా మారనుంది.  ఇదిలా ఉంటే, భారత్‌-ఇంగ్లండ్‌ జట్ల మధ్య ఐదు మ్యాచ్‌ల సిరీస్‌లో ఇరు జట్లు చెరో మ్యాచ్‌లో గెలిచిన విషయం​ తెలిసిందే. హైదరాబాద్‌ వేదికగా జరిగిన మ్యాచ్‌లో ఇంగ్లండ్‌ గెలువగా.. విశాఖ వేదికగా జరిగిన రెండో టెస్ట్‌లో టీమిండియా విజయం​ సాధించింది. ఈ సిరీస్‌లో ఇరు జట్లు సమంగా ఉండటంతో రాజ్‌కోట్‌ మ్యాచ్‌ ఆసక్తికరంగా మారింది. ఈ మ్యాచ్‌లో గెలిచి ఆధిక్యతను పెంచుకోవాలని ఇరు జట్లు భావిస్తున్నాయి. టీమిండియాను సీనియర్ల గైర్హాజరీ సమస్య కలవరపెడుతున్నప్పటికీ యువ ఆటగాళ్లు ఉత్సాహంగా కనిపిస్తూ గెలుపుపై ఆశలు సజీవంగా ఉంచారు. మరోపక్క ఇంగ్లండ్‌ టీమ్‌​.. భారత్‌ను దెబ్బకొట్టేందుకు ఇదే సరైన సమయమని భావిస్తూ ప్రణాళికలు రచిస్తుంది. మరి రేపటి నుంచి ప్రారంభంకాబోయే మ్యాచ్‌లో ఏ జట్టు పైచేయి సాధిస్తుందో వేచి చూడాలి.

రాజ్‌కోట్‌: కీలక ఆటగాళ్లు గాయాల పాలవడం... కోహ్లి విశ్రాంతి కొనసాగిస్తుండటం... యువ బ్యాటర్లు సర్ఫరాజ్‌ ఖాన్, ధ్రువ్‌ జురెల్‌లకు వరంగా మారనుంది. మూడో టెస్టులో వీరిద్దరు బరిలోకి దిగడం దాదాపు ఖాయమైంది. మంగళవారం ప్రాక్టీస్‌ సెషన్‌లో వీరిద్దరు మాత్రం గంటల తరబడి చెమటోడ్చడం చూస్తుంటే వారి అరంగేట్రానికి సూచనగా కనిపిస్తోంది. కెప్టెన్‌ రోహిత్‌ శర్మ వారి ప్రాక్టీస్‌ను దగ్గరుండి పరిశీలించాడు. శ్రేయస్‌ అయ్యర్‌ను మిగతా మూడు టెస్టుల నుంచి తప్పించగా, ఎంపిక చేసిన కేఎల్‌ రాహుల్‌ పూర్తి ఫిట్‌గా లేకపోవడంతో అతనూ రాజ్‌కోట్‌ మ్యాచ్‌కు దూరమయ్యాడు. ఇవన్నీ కూడా సర్ఫరాజ్, జురెల్‌లకు రాచబాటను పరిచింది.     ఆంధ్ర వికెట్‌ కీపర్‌ శ్రీకర్‌ భరత్‌ వరుసగా విఫలమవడం కీపర్‌ జురెల్‌కు కలిసి రానుంది. గత మ్యాచ్‌ ఆడిన రజత్‌ పటిదార్‌తోపాటు సర్ఫరాజ్, జురెల్‌ మిడిలార్డర్‌లో బరిలోకి దిగుతారు. ఫామ్‌లో ఉన్న శుబ్‌మన్‌ గిల్‌ ప్రాక్టీస్‌ చేయలేదు. అతని కుడిచేతి చూపుడు వేలు నొప్పి కారణంగా ట్రెయినింగ్‌కు దూరంగా ఉన్నాడు. అయితే అతని గాయం ఏమాత్రం తీవ్రమైంది కాదని  జట్టు వర్గాలు వెల్లడించాయి. ఆల్‌రౌండర్‌ జడేజా స్పిన్‌ బౌలింగ్‌ కంటే బ్యాటింగ్‌ ప్రాక్టీసే ఎక్కువ చేశాడు. పేసర్లు బుమ్రా, ఆకాశ్‌దీప్‌లు బౌలింగ్‌లో శ్రమించారు.  భారత్,    ఇంగ్లండ్‌ల మధ్య గురువారం నుంచి మూడో టెస్టు జరుగుతుంది. 

రాజ్‌కోట్‌: భారత సీనియర్‌ బ్యాటర్‌ కేఎల్‌ రాహుల్‌ మూడో టెస్టుకూ దూరమయ్యాడు. గాయంతో అతన్ని రెండో టెస్టు నుంచి తప్పించి... ఇటీవలే మూడో టెస్టుకు ఎంపిక చేశారు. ఫిట్‌నెస్‌ సంతరించుకుంటేనే తుది జట్టుకు ఆడతాడని సెలక్షన్‌ సమయంలోనే స్పష్టం చేశారు. తాజాగా అతను పూర్తిగా కోలుకునేందుకు మరికొంత సమయం పట్టనుండటంతో మూడో టెస్టు నుంచి తప్పించారు. అతని స్థానంలో కర్ణాటక ఎడంచేతి వాటం బ్యాటర్‌ దేవదత్‌ పడిక్కల్‌ను ఎంపిక చేశారు. ‘రాహుల్‌ వందశాతం ఫిట్‌నెస్‌తో ఉంటేనే తుది జట్టుకు పరిగణిస్తామని ఇదివరకే చెప్పాం. అతను 90 శాతం కోలుకున్నట్లు తెలియడంతో రాజ్‌కోట్‌ టెస్టుకూ పక్కన బెట్టాం. అతని పరిస్థితిని బోర్డు మెడికల్‌ టీమ్‌ ఎప్పటికప్పుడు సమీక్షిస్తుంది’ అని బీసీసీఐ అధికారి ఒకరు చెప్పారు. బెంగళూరులోని జాతీయ క్రికెట్‌ అకాడమీ (ఎన్‌సీఏ)లో పునరావాస శిబిరంలో ఉన్న రాహుల్‌ నాలుగో టెస్టుకల్లా కోలుకుంటాడని ఆశాభావంతో ఉన్నట్లు ఆయన చెప్పారు. భారత్, ఇంగ్లండ్‌ జట్ల మధ్య మూడో టెస్టు 15 నుంచి రాజ్‌కోట్‌లో జరుగుతుంది. రాజ్‌కోట్‌కు ఇంగ్లండ్‌ స్వల్ప విరామం కోసం అబుదాబి వెళ్లిన ఇంగ్లండ్‌ క్రికెట్‌ జట్టు సోమవారం తిరిగి భారత్‌ చేరుకుంది. వారంపాటు అక్కడ సేదతీరిన పర్యాటక జట్టు మూడో టెస్టు కోసం రాజ్‌కోట్‌ వేదికకు వచి్చంది. మంగళవారం సౌరాష్ట్ర క్రికెట్‌ అసోసియేషన్‌ (ఎస్‌సీఏ) గ్రౌండ్‌లో ఇంగ్లండ్‌ ఆటగాళ్లు నెట్‌ ప్రాక్టీస్‌ చేస్తారని స్థానిక వర్గాలు తెలిపాయి. స్పిన్నర్‌ జాక్‌ లీచ్‌ మోకాలి గాయంతో మిగతా టెస్టు సిరీస్‌కు దూరమయ్యాడు. అతను అబుదాబి నుంచే స్వదేశానికి పయనమయ్యాడు. స్పిన్‌ త్రయం హార్ట్‌లీ, రేహాన్‌ అహ్మద్, బషీర్‌లతో పాటు పార్ట్‌టైమ్‌ స్పిన్‌ పాత్ర పోషించే జో రూట్‌ అందుబాటులో ఉండటంతో లీచ్‌ స్థానంలో ఇంగ్లండ్‌ క్రికెట్‌ బోర్డు (ఈసీబీ) ఇంకెవరినీ ఎంపిక చేయలేదు. నిజానికి అతను తొలిటెస్టు మాత్రమే ఆడాడు. లీచ్‌ రెండు ఇన్నింగ్స్‌ల్లో కలిపి 2 వికెట్లే తీశాడు. తర్వాతి రెండో టెస్టుకు దూరమయ్యాడు.     

ఇంగ్లండ్‌తో మూడో టెస్ట్‌కు ముందు టీమిండియాను ఓ అంశం తీవ్ర కలవరానికి గురి చేస్తుంది. వివిధ కారణంగా చేత సీనియర్‌ బ్యాటర్లు ఒక్కొక్కరుగా వైదొలగడంతో టీమిండియా బ్యాటింగ్‌ లైనప్‌లో అనుభవలేమి కొట్టొచినట్లు కనిపిస్తుంది. వ్యక్తిగత కారణాల చేత 100కు పైగా టెస్ట్‌లు ఆడిన విరాట్‌ కోహ్లి, ఫిట్‌నెస్‌ సమస్య కారణంగా కేఎల్‌ రాహుల్‌, గాయం కారణంగా శ్రేయస్‌ అయ్యర్‌ మూడో టెస్ట్‌కు దూరమయ్యారు. ఈ ముగ్గురు స్టార్‌ బ్యాటర్లు దూరం కావడంతో భారత బ్యాటింగ్‌ లైనప్‌ గతంలో ఎన్నడూ లేనంత ఢీలాగా కనిపిస్తుంది. ఇక్కడ ఓ ఆసక్తికర విషయం ఏంటంటే.. ఇంగ్లండ్‌ స్టార్‌ బ్యాటర్‌ జో రూట్‌ ఒక్కడు ఆడినన్ని టెస్ట్‌లు టీమిండియా బ్యాటింగ్‌ లైనప్‌ అంతా కలిపి కూడా ఆడలేదు. రూట్‌ ఇప్పటివరకు 137 టెస్ట్‌ మ్యాచ్‌లు ఆడగా.. భారత బ్యాటర్లంతా కలిపి అతను ఆడిన మ్యాచ్‌ల్లో 75 శాతం కూడా ఆడలేదు. భారత బ్యాటింగ్‌ లైనప్‌ అంతా కలిపి ఇప్పటివరకు కేవలం 92 టెస్ట్‌లు మాత్రమే ఆడారు.  Experience of Indian batters in the 3rd Test vs England: Rohit - 56 Tests. Jaiswal - 6 Tests. Gill - 22 Tests. Patidar - 1 Test. Bharat - 7 Tests. Sarfaraz - Yet to make the debut. Padikkal - Yet to make the debut. Jurel - Yet to make the debut. pic.twitter.com/lcx0HXc0Nw — Johns. (@CricCrazyJohns) February 12, 2024 ఇందులో కెప్టెన్‌ రోహిత్‌ శర్మకు మాత్రమే కనీసం 50 టెస్ట్‌లు ఆడిన అనుభవం​ ఉంది. రోహిత్‌ తర్వాత శుభ్‌మన్‌ గిల్‌ అత్యధికంగా 22 మ్యాచ్‌లు ఆడాడు. జట్టులో నెక్స్‌ సీనియర్‌ కేఎస్‌ భరత్‌. అతడికి ఏడు మ్యాచ్‌లు ఆడిన అనుభవం ఉంది. ఆతర్వాత యశిస్వి జైస్వాల్‌ 6, రజత్‌ పాటిదార్‌ ఒక్క టెస్ట్‌ మ్యాచ్‌ ఆడారు. దృవ్‌ జురెల్‌, సర్ఫరాజ్‌ ఖాన్‌, రాహుల్‌ స్థానంలో ఎంపికైన రజత్‌ పాటిదార్‌ ఇంకా  అరంగేట్రం చేయాల్సి ఉంది. రవీంద్ర జడేజా 69, అశ్విన్‌ 97 టెస్ట్‌లు ఆడినప్పటికీ వీరిద్దరిని స్పెషలిస్ట్‌ బ్యాటర్లుగా పరిగణిలేము. ఈ పరిస్థితుల్లో టీమిండియా బ్యాటింగ్‌ లైనప్‌ ఎలా నెట్టుకొస్తుందో వేచి చూడాలి. భారత్‌-ఇంగ్లండ్‌ మధ్య మూడో టెస్ట్‌ రాజ్‌కోట్‌ వేదికగా ఫిబ్రవరి 15 నుంచి ప్రారంభంకానుంది. ఐదు మ్యాచ్‌ల ఈ సిరీస్‌లో ఇరు జట్లు చెరో మ్యాచ్‌ గెలిచి సమంగా ఉన్నాయి.

ఇంగ్లండ్‌తో మూడో టెస్ట్‌కు ముందు టీమిండియాకు మరో భారీ షాక్‌ తగిలింది. స్టార్‌ మిడిలార్డర్‌ ఆటగాడు కేఎల్‌ రాహుల్‌ బీసీసీఐ మెడికల్‌ టీమ్‌ నిర్వహించిన ఫిట్‌నెస్‌ టెస్ట్‌లో విఫలమయ్యాడని సమాచారం. దీంతో రాహుల్‌  మూడో టెస్ట్‌కు దూరంగా ఉంటాడని తెలుస్తుంది. మరోవైపు రాహుల్‌తో పాటు జట్టులోకి రీఎంట్రీ ఇచ్చిన రవీంద్ర జడేజా ఫిట్‌నెస్‌ టెస్ట్‌ క్లియర్‌ చేశాడని సమాచారం. రాహుల్‌కు ప్రత్యామ్నాయంగా అతని కర్ణాటక సహచరుడు దేవ్‌దత్‌ పడిక్కల్‌ను ఎంపిక చేశారని ప్రచారం జరుగుతుంది. ప్రస్తుతం జరుగుతున్న రంజీ ట్రోఫీలో పడిక్కల్‌ పరుగుల వరద పారిస్తున్నాడు. ఈ సీజన్‌లో అతను ఇప్పటివరకు ఆడిన 4 మ్యాచ్‌ల్లో 92.67 సగటున 3 సెంచరీల సాయంతో 556 పరుగులు చేశాడు.  ఇప్పటికే వివిధ కారణాల చేత స్టార్‌ ఆటగాళ్లు విరాట్‌ కోహ్లి, శ్రేయస్‌ అయ్యర్‌, మొహమ్మద్‌ షమీ సేవలు కోల్పోయిన టీమిండియాకు రాహుల్‌ గైర్హాజరీ మరింత ఇ‍బ్బందికరంగా పరిగణించబడుతుంది. తొలి టెస్ట్‌ సందర్భంగా గాయపడిన రాహుల్‌ రెండో టెస్ట్‌ కూడా ఆడలేదు. వారం తర్వాత రాహుల్‌కు మరోసారి ఫిట్‌నెస్‌ పరీక్ష నిర్వహిస్తారని సమాచారం. సీనియర్లంతా ఒక్కొక్కరుగా జట్టుకు దూరమవుతుండటంతో టీమిండియా అభిమానులు కలవరపడుతున్నారు. ఐదు మ్యాచ్‌ల ఈ సిరీస్‌లో ఇంగ్లండ్‌, భారత్‌ చెరో మ్యాచ్‌ గెలిచి సమంగా ఉన్నారు. మూడో టెస్ట్‌ రాజ్‌కోట్‌ వేదికగా ఫిబ్రవరి 15 నుంచి ప్రారంభమవుతుంది.  ఇదిలా ఉంటే,ఇంగ్లండ్‌తో చివరి మూడు టెస్ట్‌లకు భారత జట్టును రెండ్రోజుల కింద ప్రకటించారు. జట్టును ప్రకటించే సమయంలోనే ఆటగాళ్లంతా ఫిట్‌నెస్‌ టెస్ట్‌ క్లియర్‌ చేయాల్సి ఉంటుందని సెలెక్టర్లు చెప్పారు. గాయాల కారణంగా రెండో టెస్ట్‌కు దూరమైన రాహుల్‌, జడేజాను దృష్టిలో ఉంచుకునే సెలెక్టర్లు ఈ విషయాన్ని ప్రస్తావించారు. 

ప్రస్తుత ఆస్ట్రేలియా పర్యటనలో పాకిస్తాన్‌కు ఓ ఆణిముత్యం లభించింది. ఈ పర్యటనలో తొలి టెస్ట్‌తో సుదీర్ఘ ఫార్మాట్‌లోకి ఎంట్రీ ఇచ్చిన 27 ఏళ్ల పేస్‌ బౌలింగ్‌ ఆల్‌రౌండర్‌ ఆమిర్‌ జమాల్‌.. ఆసీస్‌ గడ్డపై ఆల్‌రౌండ్‌ ప్రదర్శనతో ఇరగదీస్తున్నాడు. పెర్త్‌లో జరిగిన తొలి టెస్ట్‌లో 6 వికెట్ల ప్రదర్శనతో (మొత్తంగా 7 వికెట్లు, 10 పరుగులు) చెలరేగిన జమాల్‌.. ఆ తర్వాత మెల్‌బోర్న్‌లో జరిగిన రెండో టెస్ట్‌లో 5 వికెట్లు, 33 పరుగులు చేసి ఆకట్టుకున్నాడు.  ప్రస్తుతం జరుగుతున్న మూడో టెస్ట్‌లో ఆకాశమే హద్దుగా చెలరేగిపోతున్న జమాల్‌.. తొలి ఇన్నింగ్స్‌లో తొమ్మిదో స్థానంలో బ్యాటింగ్‌కు వచ్చి మెరుపు అర్ధ సెంచరీ (97 బంతుల్లో 82; 9 ఫోర్లు, 4 సిక్సర్లు) బాదాడు. ఈ ఇన్నింగ్స్‌ ద్వారా తన జట్టుకు గౌరవప్రదమైన స్కోర్‌ అందించిన జమాల్‌.. ఆతర్వాత బౌలింగ్‌లోనూ విజృంభించి (6/69) ఆసీస్‌ బ్యాటింగ్‌ లైనప్‌ను తునాతునకలు చేశాడు. జమాల్‌ ప్రదర్శన కారణంగా పాక్‌ ఈ పర్యటనలో తొలిసారి మ్యాచ్‌ గెలిచే అవకాశం దక్కించుకుంది.  అయితే పాక్‌ సెకెండ్‌ ఇన్నింగ్స్‌ 68 పరుగులకే 7 వికెట్లు కోల్పోయి జమాల్‌ అందించిన సువర్ణావకాశాన్ని చేజార్చుకుంది. ఈ ఇన్నింగ్స్‌లో జమాల్‌ (0) ఇంకా క్రీజ్‌లోనే ఉండటంతో పాక్‌ అతనిపై భారీ అంచనాలే పెట్టుకుంది. అతనికి జతగా రిజ్వాన్‌ (6) క్రీజ్‌లో ఉన్నాడు. మూడో రోజు ఆట ముగిసే సమయానికి పాక్‌ 82 పరుగుల ఆధిక్యంలో ఉంది. చేతిలో మూడు వికెట్లు ఉన్నాయి. ఈ మ్యాచ్‌ తొలి ఇన్నింగ్స్‌లో జమాల్‌ సహా రిజ్వాన్‌ (88), అఘా సల్మాన్‌ (53) రాణించడంతో పాక్‌ 313 పరుగులు చేసింది. అనంతరం జమాల్‌ ధాటికి ఆసీస్‌ తొలి ఇన్నింగ్స్‌లో 299 పరుగులకు ఆలౌటైంది.  ఇయాన్‌ బోథమ్‌, వసీం అక్రమ్‌ సరసన చేసిన పాక్‌ సంచలన ఆల్‌రౌండర్‌ పాక్‌ సంచలన ఆల్‌రౌండర్‌ ఆమిర్‌ జమాల్‌.. దిగ్గజ ఆల్‌రౌండర్లైన ఇయాన్‌ బోథమ్‌, వసీం అక్రమ్‌ సరసన చేరాడు. ఆస్ట్రేలియా గడ్డపై మూడు మ్యాచ్‌ల టెస్ట్‌ సిరీస్‌లో 125 అంత కంటే ఎక్కువ పరుగులు చేయడంతో పాటు 15 అంతకంటే ఎక్కువ వికెట్లు తీసిన పర్యాటక జట్టు ఆటగాడిగా రికార్డుల్లోకెక్కాడు. గతంలో బోథమ్‌, వసీం అక్రమ్‌ మాత్రమే ఈ ఫీట్‌ను సాధించారు.    స్కోర్‌ వివరాలు.. పాకిస్తాన్‌ తొలి ఇన్నింగ్స్‌: 313 ఆలౌట్‌ (రిజ్వాన్‌ 88, జమాల్‌ 82, కమిన్స్‌ 5/61) ఆస్ట్రేలియా తొల ఇన్నింగ్స్‌: 299 ఆలౌట్‌ (లబూషేన్‌ 60, మిచెల్‌ మార్ష్‌ 54, జమాల్‌ 6/69) పాకిస్తాన్‌ సెకెండ్‌ ఇన్నింగ్స్‌: 68/7 (సైమ్‌ అయూబ్‌ 33, రిజ్వాన్‌ 6 నాటౌట్‌, జమాల్‌ 0 నాటౌట్‌, హాజిల్‌వుడ్‌ 4/9) మూడో రోజు ఆట ముగిసే సమయానికి 82 పరుగుల ఆధిక్యంలో పాక్‌ మూడు మ్యాచ్‌ల ఈ టెస్ట్‌ సిరీస్‌లో ఆసీస్‌ తొలి రెండు మ్యాచ్‌లను నెగ్గి ఇదివరకే సిరీస్‌ను కైవసం చేసుకుంది.

సౌతాఫ్రికాతో జరిగిన రెండో టెస్ట్‌ తొలి ఇన్నింగ్స్‌లో టీమిండియా తమ చివరి ఆరు వికెట్లు ఒకే స్కోర్‌ వద్ద (153) కోల్పోయిన ఘటన మరువక ముందే.. దాయాది పాకిస్తాన్‌ దాదాపుగా ఇలాంటి సీన్‌నే మరోసారి రిపీట్‌ చేసింది.  ఆస్ట్రేలియాతో జరుగుతున్న నామమాత్రపు మూడో టెస్ట్‌ రెండో ఇన్నింగ్స్‌లో పాక్‌ తొమ్మిది పరుగుల వ్యవధిలో ఆరు వికెట్లు కోల్పోయి, ఏ విషయంలోనైనా వారు భారత్‌నే ఫాలో అవుతారనే విషయాన్ని మరోసారి రుజువు చేశారు.   ఈ మ్యాచ్‌లో తొలుత బ్యాటింగ్‌ చేసిన పాక్‌.. లోయర్‌ ఆర్డర్‌ ఆటగాళ్ల పుణ్యమా అని తొలి ఇన్నింగ్స్‌లో 313 పరుగులు చేసింది. ఆరో నంబర్‌ ఆటగాడు మొహమ్మద్‌ రిజ్వాన్‌ (88), ఏడో నంబర్‌ ఆటగాడు అఘా సల్మాన్‌ (53), తొమ్మిదో నంబర్‌ ప్లేయర్‌ ఆమిర్‌ జమాల్‌ (82) అర్ధసెంచరీలు చేసి పాక్‌ను ఆదుకున్నారు.  అనంతరం ఆమిర్‌ జమాల్‌ అద్భుత బౌలింగ్‌ ప్రదర్శనతో (6/69) తొలి ఇన్నింగ్స్‌లో ఆసీస్‌ను 299 పరుగులకే పరిమితం చేసి, ప్రస్తుత సిరీస్‌లో పాక్‌కు తొలి గెలుపుపై ఆశలు రేకెత్తించాడు. అయితే పాక్‌ బ్యాటర్లు ఈ అవకాశాన్ని ఒడిసిపట్టుకోవడంలో దారుణంగా విఫలమయ్యారు.  సెకెండ్‌ ఇన్నింగ్స్‌లో 58 పరుగుల వద్ద రెండో వికెట్‌ కోల్పోయిన పాక్‌.. ఆతర్వాత తొమ్మిది పరుగుల వ్యవధిలో ఆరు వికెట్లు కోల్పోయి మ్యాచ్‌పై పట్టు కోల్పోయింది. మూడో రోజు ఆట ముగిసే సమయానికి ఆ జట్టు స్కోర్‌ 67/7గా ఉంది. ప్రస్తుతం ఆ జట్టు కేవలం 82 పరుగుల ఆధిక్యంలో ఉంది. చేతిలో మూడు వికెట్లు మాత్రమే ఉన్నాయి. ఈ పరిస్థితుల్లో పాక్‌ ఈ మ్యాచ్‌ను కాపాడుకోవడం చాలా కష్టం. సెకెండ్‌ ఇన్నింగ్స్‌లో హాజిల్‌వుడ్‌ అద్భుతమైన బౌలింగ్‌ ప్రదర్శనతో (5-2-9-4) పాక్‌ను కష్టాల ఊబిలోకి నెట్టాడు. ఈ సిరీస్‌లో తొలి రెండు మ్యాచ్‌లను గెలిచిన ఆసీస్‌ ఇదివరకే సిరీస్‌ను కైవసం చేసుకున్న విషయం తెలిసిందే. పాక్‌ ఈ మ్యాచ్‌ కూడా ఓడితే ఆసీస్‌ సిరీస్‌ను క్లీన్‌ స్వీప్‌ చేసినట్లవుతుంది.

సిడ్నీ వేదికగా ఆసీస్‌తో జరుగుతున్న మూడో టెస్ట్‌లో టాస్‌ గెలిచి తొలుత బ్యాటింగ్‌ చేసిన పాకిస్తాన్‌ గౌరవప్రదమైన స్కోర్‌ చేసింది. ఆ జట్టు తొలి ఇన్నింగ్స్‌లో 313 పరుగులకు ఆలౌటైంది. 96 పరుగులకే సగం వికెట్లు కోల్పోయిన దశ నుంచి పాక్‌ అద్భుతంగా తేరుకుంది. లోయర్‌ ఆర్డర్‌ ఆటగాళ్లు మొహమ్మద్‌ రిజ్వాన్‌ (88), అఘా సల్మాన్‌ (53), ఆమిర్‌ జమాల్‌ (82) వీరోచితంగా పోరాడి పాక్‌ పరువు కాపాడారు. ఓపెనర్లు అబ్దుల్లా షఫీక్‌, సైమ్‌ అయూబ్‌ డకౌట్లు కాగా.. షాన్‌ మసూద్‌ (35), బాబర్‌ ఆజమ్‌ (26) కాసేపు ఆసీస్‌ బౌలర్లను నిలువరించారు. ఆతర్వాత స్వల్ప వ్యవధిలో వీరిద్దరితో పాటు సౌద్‌ షకీల్‌ (5) ఔట్‌ కావడంతో పాక్‌ కష్టాల్లో పడింది. ఈ దశలో రిజ్వాన్‌.. అఘా సల్మాన్‌, ఆమిర్‌ జమాల్‌ సహకారంతో పాక్‌కు ఫైటింగ్‌ టోటల్‌ను అందించాడు. తొమ్మిదో స్థానంలో బ్యాటింగ్‌కు దిగిన ఆమిర్‌ జమాల్‌ ఆసీస్‌ బౌలర్లపై ఎదురుదాడికి దిగి 97 బంతుల్లో 9 ఫోర్లు, 4 సిక్సర్ల సాయంతో 82 పరుగులు చేసి ఆకట్టుకున్నాడు. ఆసీస్‌ కెప్టెన్‌ పాట్‌ కమిన్స్‌ మరోసారి అద్భుతమైన బౌలింగ్‌ ప్రదర్శనతో (5/61) చెలరేగి పాక్‌ వెన్నువిరచగా.. స్టార్క్‌ (2/75), హాజిల్‌వుడ్‌ (1/65), లయోన్‌ (1/74), మార్ష్‌ (1/27) మిగతా పనిని కానిచ్చేశారు. అనంతరం తొలి ఇన్నింగ్స్‌ మొదలుపెట్టిన ఆసీస్‌ తొలి రోజు ఆట ముగిసే సమయానికి వికెట్‌ నష్టపోకుండా 6 పరుగులు చేసింది. కెరీర్‌లో చివరి టెస్ట్‌ ఆడుతున్న డేవిడ్‌ వార్నర్‌ 6, ఉస్మాన్‌ ఖ్వాజా 0 పరుగులతో క్రీజ్‌లో ఉన్నారు. కాగా, మూడు మ్యాచ్‌ల ఈ సిరీస్‌ను ఆసీస్‌ ఇదివరకే 2-0 తేడాతో కైవసం​ చేసుకుంది. 

యాషెస్‌ సిరీస్‌-2023లో భాగంగా లీడ్స్‌ వేదికగా నిన్న (జులై 6) మొదలైన మూడో టెస్ట్‌ మ్యాచ్‌లో ఆసీస్‌ ఆల్‌రౌండర్‌ మిచెల్‌ మార్ష్‌ మెరుపు సెంచరీతో కదం తొక్కిన విషయం తెలిసిందే. ఈ మ్యాచ్‌లో టాస్‌ ఓడి తొలుత బ్యాటింగ్‌ చేసిన ఆసీస్‌.. మార్ష్‌ సూపర్‌ సెంచరీతో ఆదుకోవడంతో తొలి ఇన్నింగ్స్‌లో 263 పరుగులకు ఆలౌటైంది. దాదాపు నాలుగేళ్ల తర్వాత టెస్ట్‌ల్లోకి రీఎంట్రీ ఇచ్చిన మార్ష్‌ వచ్చీ రాగానే సెంచరీతో విరుచుకుపడి ఆస్ట్రేలియాను ఆదుకున్నాడు. ఈ ఇన్నింగ్స్‌లో 118 బంతులను ఎదుర్కొన్న మార్ష్‌.. 17 ఫోర్లు, 4 సిక్సర్ల సాయంతో 118 పరుగులు చేశాడు. ఆసీస్‌ ఇన్నింగ్స్‌లో మార్ష్‌ మినహా మిగతావారెవ్వరూ కనీస పరుగులు కూడా చేయలేకపోయారు. ట్రవిస్‌ హెడ్‌ (39), స్టీవ్‌ స్మిత్‌ (22), లబూషేన్‌ (21), ఉస్మాన్‌ ఖ్వాజా (13), టాడ్‌ మర్ఫీ (13) రెండంకెల స్కోర్లు చేయగా.. మిగతా వారు సింగిల్‌ డిజిల్‌ స్కోర్లకే పరిమితమయ్యారు. ఆసీస్‌ ఇన్నింగ్స్‌ను మార్క్‌ వుడ్‌ (5/34) నిలువునా కూల్చాడు. మార్క్‌ వుడ్‌ సైతం​ దాదాపు ఏడాది తర్వాత టెస్ట్‌ల్లోకి రీఎంట్రీ ఇచ్చి, చెలరేగిపోయాడు. అతనికి క్రిస్‌ వోక్స్‌ (3/73), స్టువర్ట్‌ బ్రాడ్‌ (2/58) సహకరించడంతో ఆసీస్‌ తొలి ఇన్నింగ్స్‌లో 263 పరుగులకు చాపచుట్టేసింది. అనంతరం తొలి రోజే తొలి ఇన్నింగ్స్‌ ప్రారంభించిన ఇంగ్లండ్‌ను పాట్‌ కమిన్స్‌ (2/28), మార్ష్‌ (1/9) దెబ్బకొట్టారు. ఫలితంగా ఇంగ్లండ్‌ తొలి రోజు ఆట ముగిసే సమయానికి తొలి ఇన్నింగ్స్‌లో 3 వికెట్ల నష్టానికి 68 పరుగులు చేసింది. ఆ జట్టు ఆసీస్‌ తొలి ఇన్నింగ్స్‌ స్కోర్‌కు ఇంకా 195 పరుగులు వెనుకపడి ఉంది. రూట్‌ (19), బెయిర్‌స్టో (1) క్రీజ్‌లో ఉన్నారు. యాషెస్‌ సిరీస్‌ అంటే మార్ష్‌కు పూనకం వస్తుంది.. చెలరేగిపోతాడు..! దాదాపు నాలుగేళ్ల సుదీర్ఘ విరామం తర్వాత టెస్ట్‌ల్లోకి రీఎంట్రీ ఇ​చ్చిన మార్ష్‌కు యాషెస్‌ సిరీస్‌ అంటే పూనకం వస్తుంది. ఈ ప్రతిష్టాత్మక సిరీస్‌లో అతనికి మంచి రికార్డు ఉంది. యాషెస్‌లో అతను ఆడిన చివరి 7 ఇన్నింగ్స్‌ల్లో ఏకంగా 3 సెంచరీలు (118, 24, 17, 101, 29*, 9, 181) చేశాడు. 33 టెస్ట్‌ల కెరీర్‌లో తాను సాధించిన 3 శతకాలు యాషెస్‌లో సాధించినవే కావడం విశేషం. ప్రస్తుతం జరుగుతున్న మూడో టెస్ట్‌లో సెంచరీతో కదం తొక్కిన మార్ష్‌.. బౌలింగ్‌లోనూ సత్తా చాటాడు. తొలి రోజు తాను వేసిన 3 ఓవర్లలో కేవలం 9 పరుగులు మాత్రమే ఇచ్చి కీలకమై జాక్‌ క్రాలే (33) వికెట్‌ పడగొట్టాడు.