పార్టీలంటే మహేశ్-నమ్రత ఎప్పుడూ జంటగానే వెళ్తారు. కానీ ప్రస్తుతం రాజమౌళి మూవీ వల్ల మహేశ్ బయటకు రాకూడదు కాబట్టి నమ్రత ఒక్కతే పార్టీలకు వెళ్తోంది. ఈమెకు తోడుగా చరణ్-ఉపాసన కూడా అప్పుడప్పుడూ కనిపిస్తూ ఉంటారు. తాజాగా అలాంటి మరో పార్టీ జరిగింది.(ఇదీ చదవండి: 'గేమ్ ఛేంజర్'.. ఇప్పటికీ తెగని పంచాయితీ!)నమ్రత-ఉపాసనలకు ఫ్రెండ్ అయిన షీమా నజీర్.. శుక్రవారం రాత్రి ఇఫ్తార్ పార్టీ ఇచ్చింది. ఈ వేడుకకు వీళ్లిద్దరు మాత్రమే హాజరయ్యారు. మహేశ్ ఎలానూ ఇప్పుడు రావడానికి కుదరదు. కానీ ఈసారి చరణ్ కూడా రాలేకపోయాడు. దీంతో నమ్రత-ఉపాసన మాత్రమే పార్టీకి వచ్చినట్లు కనిపిస్తుంది. తాజాగా నమ్రత.. కొన్ని ఫొటోలని తన ఇన్ స్టాలో పోస్ట్ చేసింది. వీటిలో ఈమెతో పాటు ఉపాసన.. ముస్లిం ట్రెడిషన్ కి తగ్గ లుక్స్ లో కనిపించడం విశేషం. ప్రస్తుతం రంజాన్ సీజన్ నడుస్తోందిగా. మళ్లీ పండగ రోజు వీళ్లు ఏమైనా పార్టీ చేసుకుంటారేమో చూడాలి?(ఇదీ చదవండి: యష్ 'టాక్సిక్'.. చరణ్ కి కాస్త ఇబ్బందే?)

టీమిండియా స్టార్‌ పేసర్‌ మహ్మద్‌ షమీని ప్రముఖ మతాధికారి, ఆల్ ఇండియా ముస్లిం జమాత్ అధ్యక్షుడు మౌలానా షాబుద్దీన్ రజ్వీ బరేల్వీ ఇటీవలికాలంలో తరుచూ టార్గెట్‌ చేస్తున్నాడు. ఛాంపియన్స్‌ ట్రోఫీ-2025 సందర్భంగా షమీ ఎనర్జీ డ్రింక్‌ తాగడాన్ని తప్పుబట్టిన మౌలానా షాబుద్దీన్ రజ్వీ.. తాజాగా షమీ కూతురు ఐరా హోలీ ఆడటాన్ని పెద్ద ఇష్యూ చేశాడు. హోలీ రోజు ఐరా రంగులు పూసుకొని దిగిన ఫోటో ఒకటి సోషల్‌మీడియాలో ప్రత్యక్షం కావడంతో మౌలానా షాబుద్దీన్ రజ్వీ ఫైరయ్యాడు. పవిత్ర రంజాన్ మాసంలో ఐరా హోలీ ఆడటాన్ని తప్పుబట్టాడు. ఐరాను రంగులు పూసుకునేందుకు అనుమతించిన తల్లి హసీన్‌ జహాను తిట్టి పోశాడు. రంజాన్‌ మాసంలో ముస్లింలు హోలీ ఆడటం అక్రమమని.. షరియత్‌కు ఇది వ్యతిరేకమని అన్నాడు.ఐరా లాంటి చిన్నారి రంజాన్‌ యొక్క ప్రాముఖ్యతను అర్థం చేసుకోకపోవచ్చు. రంజాన్‌ విశిష్టత తెలియకుండా ఆ చిన్నారి హెలీ ఆడి ఉంటే అది నేరం కాదు. అయితే ఐరా రంజాన్‌ పవిత్రత తెలిసి కూడా హోలీ ఆడి ఉంటే మాత్రం అది ఇస్లాం చట్టానికి విరుద్ధమని ఓ వీడియో ద్వారా సందేశాన్ని పంపాడు. ఐరా విషయంలో మౌలానా షాబుద్దీన్ రజ్వీ స్పందించిన తీరును చాలా మంది తప్పుబడుతున్నారు. చిన్నారి సరదాగా రంగులు పూసుకుంటే ఇంత రాద్దాంతం చేయాలా అని మండిపడుతున్నారు. కొందరేమో ఇందులో చిన్నారి ఐరా తప్పు లేదు కానీ, రంజాన్‌ మాసం అని తెలిసి కూడా ఆమె తల్లి హోలీ ఆడేందుకు అనుమతించడం పెద్ద నేరమని​ కామెంట్లు చేస్తున్నారు. ఈ విషయంలో ఐరా తల్లిని తీవ్ర పదజాలంతో దూషిస్తున్నారు. ఐరా తల్లి హసీన్‌ జహా మహ్మద్‌ షమీతో విడాకులు తీసుకొని ప్రస్తుతం వేరుగా ఉంటుంది. కాగా, మౌలానా షాబుద్దీన్ రజ్వీ ఛాంపియన్స్‌ ట్రోఫీ సందర్భంగా షమీ ఎనర్జీ డ్రింక్‌ తాగినప్పుడు కూడా పెద్ద రాద్దాంతం చేశాడు. రంజాన్‌ మాసంలో రోజా (ఉపవాసం) ఉండకుండా షమీ పెద్ద నేరం చేశాడని అరోపించాడు. ఇలా చేసి షమీ ఇస్లాం సమాజానికి ఏం సందేశం ఇవ్వాలని అనుకుంటున్నాడని విమర్శించాడు. మౌలానా షాబుద్దీన్ రజ్వీ వ్యాఖ్యలపై అప్పట్లో భారత క్రికెట్‌ అభిమానులు మండిపడ్డారు. షమీ ఏం తప్పు చేశాడని ఇంత పెద్ద షో చేస్తున్నావని రజ్వీని ప్రశ్నించారు. దేశం​ కోసం శ్రమించాల్సి వచ్చినప్పుడు ఉపవాసం ఉండాలని అనడం ఎంత వరకు సమంజసమని నిలదీశారు. మతోన్మాధం​ ఎక్కువైనప్పుడే ఇలాంటి వ్యాఖ్యలు చేస్తారని చురకలంటించారు.ఇదిలా ఉంటే, షమీ ఛాంపియన్స్‌ ట్రోఫీలో అద్భుతంగా రాణించి భారత్‌ టైటిల్‌ గెలవడంలో తనవంతు పాత్ర పోషించాడు. ఆ టోర్నీలో షమీ 5 మ్యాచ్‌ల్లో 9 వికెట్లు తీసి టోర్నీ లీడింగ్‌ వికెట్‌ టేకర్ల జాబితాలో నాలుగో స్థానంలో నిలిచాడు. ఈ టోర్నీలో బంగ్లాదేశ్‌తో జరిగిన మ్యాచ్‌లో 5 వికెట్లు తీసిన షమీ.. ఆసీస్‌తో జరిగిన సెమీస్‌లో 3 వికెట్లు పడగొట్టాడు. షమీ త్వరలో ఐపీఎల్‌లో ఆడనున్నాడు. ఈ సీజన్‌లో షమీని సన్‌రైజర్స్‌ హైదరాబాద్‌ కొనుగోలు చేసింది. షమీ గత సీజన్‌లో గుజరాత్‌ టైటాన్స్‌కు ఆడాడు. మెగా వేలంలో షమీని సన్‌రైజర్స్‌ రూ. 10 కోట్లకు దక్కించుకుంది.

టీమిండియా స్టార్‌ పేసర్‌ మహ్మద్‌ షమీపై ఆల్ ఇండియా ముస్లిం జమాత్‌ జాతీయ అధ్యక్షుడు మౌలానా షాబుద్దీన్‌ రజ్వీ సంచలన వ్యాఖ్యలు చేశాడు. పవిత్ర రంజాన్‌ మాసంలో షమీ పెద్ద నేరం చేశాడని ఆరోపించాడు. షమీ ఓ క్రిమినల్‌ అని సంభోదించాడు. షమీపై రజ్వీ చేసిన వ్యాఖ్యలు ప్రస్తుతం దేశవ్యాప్తంగా దూమారం రేపుతున్నాయి. అసలేం జరిగిందంటే.. ఛాంపియన్స్‌ ట్రోఫీ-2025 తొలి సెమీఫైనల్లో భారత్‌, ఆస్ట్రేలియా జట్లు తలపడ్డాయి. దుబాయ్‌ వేదికగా జరిగిన ఈ మ్యాచ్‌లో టీమిండియా ఘన విజయం సాధించింది. ఈ మ్యాచ్‌ సందర్భంగా షమీ ఎనర్జీ డ్రింక్‌ తాగుతూ కనిపించాడు. దీనిపై ముస్లిం మత పెద్ద రజ్వీ తీవ్రంగా స్పందించాడు. #WATCH | Bareilly, UP: President of All India Muslim Jamaat, Maulana Shahabuddin Razvi Bareilvi says, "...One of the compulsory duties is 'Roza' (fasting)...If any healthy man or woman doesn't observe 'Roza', they will be a big criminal...A famous cricket personality of India,… pic.twitter.com/RE9C93Izl2— ANI (@ANI) March 6, 2025పవిత్ర రంజాన్‌ మాసంలో షమీ రోజా (ఉపవాసం​) పాటించకుండా పెద్ద నేరం చేశాడని అన్నాడు. రంజాన్‌ మాసంలో ఆరోగ్యకరమైన వ్యక్తి రోజా పాటించకపోతే నేరస్థుడవుతాడని తెలిపాడు. రంజాన్‌ మాసంలో ముస్లింలంతా రోజా పాటిస్తుంటే షమీ ఇలా చేయడమేంటని ప్రశ్నించాడు. రోజా పాటించకుండా షమీ ప్రజల్లోకి తప్పుడు సందేశాన్ని పంపుతున్నాడని అన్నాడు. రోజా పాటించనందుకు షమీని క్రిమినల్‌తో పోల్చాడు. ఇలా చేసినందుకు షమీ దేవునికి సమాధానం​ చెప్పాలని ఓ వీడియో రిలీజ్‌ చేశాడు. షమీపై రజ్వీ చేసిన వ్యాఖ్యలపై క్రీడాభిమానులు మండిపడుతున్నారు. మతాన్ని క్రీడలతో ముడిపెట్టకూడదని అంటున్నారు. షమీ దేశం కోసం​ ఆడుతూ రోజా ఉండలేకపోయాడని కామెంట్లు చేస్తున్నారు. ఈ విషయంలో ముస్లిం సమాజంతో పాటు యావత్‌ దేశం​ షమీకి మద్దతుగా నిలుస్తుంది. షమీ ఈ విషయాన్ని పక్కన పెట్టి ఛాంపియన్స్‌ ట్రోఫీ ఫైనల్‌పై దృష్టి పెట్టాలని టీమిండియా అభిమానులు కోరుకుంటున్నారు.కాగా, ఆస్ట్రేలియాతో జరిగిన సెమీఫైనల్లో షమీ 48 పరుగులిచ్చి 3 వికెట్లు తీశాడు. ఈ టోర్నీలో బంగ్లాదేశ్‌లో జరిగిన తొలి మ్యాచ్‌లో షమీ ఐదు వికెట్ల ప్రదర్శన నమోదు చేశాడు. అనంతరం పాకిస్తాన్‌, న్యూజిలాండ్‌తో జరిగిన గ్రూప్‌ మ్యాచ్‌ల్లో షమీ వికెట్లు తీయలేకపోయాడు. సెమీస్‌లో ఆసీస్‌పై విజయం సాధించి భారత్‌ ఫైనల్‌కు చేరింది. మార్చి 9న జరిగే ఫైనల్లో టీమిండియా న్యూజిలాండ్‌తో అమీతుమీ తేల్చుకుంటుంది. 2000 ఎడిషన్‌ (ఛాంపియన్స్‌ ట్రోఫీ) తర్వాత భారత్‌, న్యూజిలాండ్‌ ఫైనల్లో తలపడటం ఇదే మొదటిసారి. ఐసీసీ టోర్నీల ఫైనల్స్‌లో భారత్‌తో తలపడిన రెండు సందర్భాల్లో న్యూజిలాండే విజేతగా నిలిచింది. 2000 ఎడిషన్‌ ఛాంపియన్స్‌ ట్రోఫీ, 2019-2021 డబ్ల్యూటీసీ ఫైనల్స్‌లో న్యూజిలాండ్‌ భారత్‌పై జయకేతనం ఎగురవేసి ఐసీసీ టైటిళ్లు ఎగరేసుకుపోయింది.

బిర్యానీ.. ఈ పేరు వింటే చాలు నోటిలో నీళ్లు ఊరాల్సిందే. బిర్యానీ వాసనకే సగం కడుపు నిండిపోతుంది. ఎప్పుడు రెస్టారెంట్‌కు వెళ్లినా బిర్యానీ తినకుంటే మాత్రం భోజనం అసంపూర్తిగా అనిపిస్తుంటుంది. ఇక మన హైదరాబాద్‌ బిర్యానీ గురించి ప్రత్యేకంగా చెప్పాల్సిన అవసరం లేదు. హైదరాబాద్‌ బిర్యానీ ఘుమఘుమలకు ఒక్క తెలుగు వారేంటి.. దేశవిదేశీయులు ఫిదా అవ్వాల్సిందే. అంతటి గొప్ప పేరును కలిగిన బిర్యానీని రంజాన్‌ మాసంలో హైదరాబాద్‌ వాసులు తెగ లాంగించారట.. ఈ ఒక్క నెలలోనే ఏకంగా పది లక్షలు(1 మిలియన్‌) బిర్యానీ ఆర్డర్లు వచ్చాయని ప్రముఖ ఫుడ్‌ డెలివరీ సంస్థ స్విగ్గీ వెల్లడించింది. బిర్యానీ ఆర్డర్లలో దేశవ్యాప్తంగా హైదరాబాద్ తొలి స్థానంలో నిలిచిందని పేర్కొంది. బిర్యానీతో పాటు హలీమ్ ఆర్డర్లలోనూ నగర వాసులు రికార్డు సృష్టించారని, నెల రోజుల వ్యవధిలో 5.3 లక్షల ఆర్డర్లు వచ్చినట్లు తెలిపింది. ఈ ఏడాది రంజాన్‌ మాసం మార్చి 11న ప్రారంభమైన విషయం తెలిసిందే. నేటితో(శుక్రవారం) ముగిసింది. ఈ క్రమంలో తాజాగా దేశవ్యాప్తంగా ఫుడ్‌ డెలివరీ ఆర్డర్ల గురించి వివరాలను స్విగ్గీ ప్రకటించింది. ఈ నెల రోజుల్లో దేశవ్యాప్తంగా ఏకంగా 60 లక్షల పేట్ల బిర్యానీ ఆర్డర్లు డెలివరీ చేసినట్లు తెలిపింది. మిగతా నెలలతో పోలిస్తే రంజాన్‌ నెలలో బిర్యానీ ఆర్డర్లు 15 శాతం పెరిగాయని పేర్కొంది.  రంజాన్ సందర్భంగా సాయంత్రం 5:30 నుంచి 7 గంటల మధ్య ఇఫ్తార్ ఆర్డర్‌లు 34% పెరిగినట్లు స్విగ్గీ వెల్లడించింది. ఇఫ్తార్‌ ఆర్డర్‌లలోలో చికెన్‌ బిర్యానీ, మటన్‌ హలీమ్‌, సమోసా, ఫలుదా, ఖీర్‌లు టాప్‌ ప్లేస్‌లో ఉన్నట్లు చెప్పింది. హలీమ్ ఆర్డర్లలో ఏకంగా 1454.88 శాతం పెరుగుదల నమోదైందని, దీని తర్వాతి స్థానంలో ఫిర్ని ఆర్డర్లలో 80.97 శాతం, మాల్పువా ఆర్డర్లు 79.09 శాతం, ఫలుదా 57,93 శాతం, డేట్స్‌ 48.40 శాతం ఆర్డర్లు పెరిగాయని పేర్కొంది.

సాక్షి, పుట్టపర్తి/కదిరి అర్బన్‌/బత్తలపల్లి: అందరికీ మేలు జరగాలని, ముస్లిం సోదరులందరికీ ముందస్తుగా రంజాన్‌ పండుగ శుభాకాంక్షలు (అడ్వాన్స్‌డ్‌ ఈద్‌ ముబారక్‌) తెలిపారు ముఖ్యమంత్రి వైఎస్‌ జగన్‌మోహన్‌రెడ్డి. సోమవారం సాయంత్రం శ్రీసత్యసాయి జిల్లా కదిరి పట్టణంలోని పీవీఆర్‌ ఫంక్షన్‌ హాలులో ఏర్పాటు చేసిన ఇఫ్తార్‌ విందుకు ఆయన హాజరయ్యారు. ముస్లిం సోదరులతో ఆప్యాయంగా మాట్లాడారు. విందులో డిప్యూటీ సీఎం అంజాద్‌ బాషా, మంత్రి ఉషశ్రీచరణ్, ఎమ్మెల్సీలు కల్పలతారెడ్డి, జఖియా­ఖానమ్, పుట్టపర్తి ఎమ్మెల్యే దుద్దుకుంట శ్రీధర్‌రెడ్డి, మాజీ మంత్రి షాకీర్, మాజీ ఎమ్మెల్యే అత్తార్‌ చాంద్‌బాషా, కదిరి వైఎస్సార్‌సీపీ అభ్యర్థి బీఎస్‌ మక్బుల్, సీనియర్‌ నేతలు వజ్రభాస్కర్‌రెడ్డి, పూల శ్రీనివాసరెడ్డి, పెద్దసంఖ్యలో ముస్లిం సోదరులు పాల్గొన్నారు. 

ముస్లింలు పవిత్ర మాసంగా భావించే రంజాన్‌ మాసంలో ‘సుర్మా’ ఆద్యంతం ఆధ్యాత్మిక పరిమళాలు వెదజల్లుతూ ప్రత్యేకత చాటుతోంది. ఈ మాసంలో ముస్లింలు వయోభేదం లేకుండా త్రికరణ శుద్ధితో ఉపవాసం(రోజా)ఉంటారు. ఖురాన్‌ పఠిస్తూ ఐదు పూటలా నమాజ్‌ ఆచరిస్తారు. మహ్మద్‌ ప్రవక్త బాటను అనుసరిస్తూ నిష్టగా ఉంటారు. ఈ క్రమంలో ఈ మాసంలో ముస్లింల నేత్రాలకు అలంకరించే సుర్మాకు ఎంతో విశిష్టత ఉంది. విధిగా కళ్లకు సుర్మా అలంకరించడం పవిత్ర కార్యంగా భావిస్తారు. సువాసన వెదజల్లే అత్తర్లకు ప్రాధాన్యమిస్తారు. ఇదీ.. సుర్మా ప్రశస్తి.. నిత్యం అల్లాహ్‌ నామస్మరణలో గడిపే దైవప్రవక్త హజ్రత్‌ మూసా అలైహిసలా తుస్సలాంకు అల్లా ప్రసన్నం పొంది అతడిని అల్లా ఎక్కడున్నాడో చూపించమని అనునయులు కోరుతారు. దీంతో ఈజిప్టు, సిరియా ప్రాంతాలకు చెందిన పెద్దలను సమీపంలోని కోహితూర్‌ పర్వతం వద్దకు తీసుకెళ్తారు. అక్కడ ఒక్కసారి అల్లాహ్‌ నూర్‌ (ఓ వెలుగు)ప్రత్యక్షంకావడం చూసి ఆశ్చర్యానికి గురవుతారు.అప్పుడే కోహితూర్‌ పర్వతం భస్మమై బూడిదగా(చూర్ణంగా) మారుతుంది. దైవసంకల్పం కళ్లెదుట సాక్షాత్కరించడంతో తమలోని భక్తి ఉప్పొంగి ఆ చూర్ణాన్ని వారు కళ్లకు అద్దుకుంటారు. ఈ సమయంలో తమ కళ్లకు సుదూరంలోని చీమల కదలికలను సైతం పసిగట్టే విధంగా ప్రకాశవంతం కావడం గమనించి అల్లాహ్‌ కృపవల్లనే సాధ్యపడిందని భావిస్తారు. అప్పటి నుంచి కోహితూర్‌ పర్వతానికి చెందిన రాళ్ల చూర్ణమే క్రమంగా సుర్మాగా రూపాంతరం చెందిందనేది ముస్లింల ప్రగఢ నమ్మకం.  కళ్లకెంతో మేలు..! భక్తితోపాటు వైద్యపరిభాషలోనూ ఈ సుర్మాకు ఆరోగ్యప్రదాయినిగా పేరుంది. కంటికి సంబంధించిన వ్యాధులకు నివారణగా, కళ్లకు చలువగా పనిచేస్తుంది. నమాజ్‌ చేయడానికి ముందు వజూ ఆచరించాక మహ్మద్‌ప్రవక్త కంటికి సుర్మా పెట్టుకునే వారని ప్రతీతి. రాత్రివేళ నిద్రపోయేముందు కళ్లకింద సుర్మ రాసుకోవడం సంప్రదాయంగా వస్తోంది. సుర్మాతో కంటికి సంబంధించిన వ్యాధులు రావని నిరూపి తం కావడంతో ఇతరులు కూడా సుర్మాను రా సుకోవడానికి ఆకర్షితులవుతున్నారు. మహిళలు కళ్లకు కాటుక బదులు సుర్మా వాడడానికి ఇష్టపడుతున్నారు. అతిథులకు సుర్మ, అత్త ర్లు పూయడం ద్వారా గౌరవించే సంప్రదాయాన్ని ముస్లింలు కొనసాగిస్తున్నారు. సుర్మ, అత్తర్ల విక్రయాలు..!  అనేక గ్రామాల్లో రంజాన్‌ సందర్భంగా అత్తర్లు, సుర్మా విక్రయాలకు గిరాకీ ఉంటుంది. దీనికోసం జిల్లాలో పలు అత్తర్లు, సుర్మా అమ్మకాల దుకాణాలు వెలిశాయి. సుర్మా కిలో పొడి ధర రూ.175 నుంచి రూ.550 వరకు ఉంటుంది. వీటిని చిన్న సీసాల్లో  నింపి విక్రయిస్తుంటారు. ఇవి రూ10 నుంచి రూ . 100 విక్రయిస్తున్నారు. కంపెనీని బట్టి వీటి ధరలు నిర్ణయిస్తున్నారు. సుర్మాను భద్రపరచడానికి ఆకర్షణీయమైన ఆకారాల్లో సుర్మేన్లు (భరిణె) మార్కెట్లో ఉన్నాయి.  వీటి ధర రూ.50 నుంచి రూ.300 వరకు అందుబాటులో ఉన్నాయి. ఇవి చదవండి: HOLI 2024: జీవితం వర్ణమయం

ముస్లింల పవిత్ర పండుగ రంజాన్ (ఈద్ ఉల్ ఫితర్) సందర్భంగా సినీ నటుడు అలీ చిరంజీవిని కలిశారు. ఈ సందర్భంగా ఆయనకు ప్రత్యేకంగా రంజాన్‌ శుభాకాంక్షలు తెలియజేశారు. రంజాన్ పండుగను సంతోషంగా జరుపుకోవాలని, పవిత్ర ప్రార్థనలతో అల్లా దీవెనలు పొందాలని మెగాస్టార్ ఆకాంక్షించారు. ఇక రంజాన్ పర్వదినాన్ని చిరంజీవితో  పంచుకోవడం ఎంతో అందంగా ఉందని పేర్కొన్నారు. దీనికి సంబంధించిన ఫోటోలను ఆయన షేర్‌ చేశారు. కాగా అలీని ఆంధ్రప్రదేశ్‌ ప్రభుత్వం ఎలక్ట్రానిక్‌ మీడియా ముఖ్య సలహాదారుగా నియమించిన సంగతి తెలిసిందే.

సాక్షి, చైన్నె: నెలవంక కన్పించడంతో శనివారం రంజాన్‌ పండుగను జరుపుకునేందుకు రాష్ట్రంలోని ముస్లింలు సిద్ధమయ్యారు. ప్రత్యేక ప్రార్థనలకు మసీదులు ముస్తాబయ్యాయి. ముస్లింలు అత్యధికంగా ఉండే ప్రాంతాల్లో పండుగ సందడి మిన్నంటుతోంది. మహ్మద్‌ ప్రవక్త సూక్తుల మేరకు పుణ్య కార్యాలకు, సమత మమతలకు నెలవుగా రంజాన్‌ మాసం నిలుస్తున్న విషయం తెలిసిందే. ఈ మాసంలో నరక ద్వారాలు మూసుకుని, స్వర్గ ద్వారాలు తెరచుకుంటాయన్నది ముస్లింల నమ్మకం. అందుకే పాప కర్మల నుంచి విముక్తి పొందడానికి ముస్లింలు భక్తిశ్రద్ధలతో ఈ మాసంలో ఉపవాస దీక్షల్ని (రోజా) ఆచరించారు. పేద, గొప్ప అన్న బేధం లేకుండా అల్లాకు విశ్వాసపాత్రులుగా ఉంటూ సేవల్లో నిమగ్నమయ్యారు. ధాన ధర్మాలు చేస్తూ ఈద్‌ ముబారక్‌ వేళకు సన్నద్ధమయ్యారు. నేడు పండుగ.. శుక్రవారం రాత్రి ఆకాశంలో నెలవంక కనిపించడంతో శనివారం పండుగను జరుపుకునే విధంగా ప్రభుత్వ ఖాజీ ప్రకటించారు. దీంతో పరస్పరం ముస్లింలు మసీదుల వద్ద శుభాకాంక్షలు తెలుపుకుంటూ ఆనందాన్ని పంచుకున్నారు. ఉదయాన్నే పండుగను జరుపుకునేందుకు సిద్ధమయ్యారు. పవిత్ర రంజాన్‌ కోసం కొత్త బట్టల కొనుగోళ్లను ఇప్పటికే పూర్తి చేశారు. వస్తువుల కొనుగోళ్ల నిమిత్తం షాపింగ్‌ సెంటర్లకు తరలివచ్చారు. దీంతో ముస్లింలు అత్యధికంగా ఉండే నగరాలు, పట్టణాలు, ప్రాంతాలలో పండుగ వాతావరణం మిన్నంటుతోంది. రాష్ట్ర వ్యాప్తంగా ఉదయం కొన్ని చోట్ల ఉదయం తొమ్మిది గంటలకు, మరికొన్ని చోట్ల తొమ్మిదిన్నర, పది గంటలకు రంజాన్‌ ప్రత్యేక ప్రార్థనలకు ఏర్పాట్లు చేశారు. కొన్ని చోట్ల ఈద్గా మైదానాల్లో మరికొన్ని మసీదుల్లో ప్రార్థనలు జరగనున్నాయి. రాష్ట్రంలోని అన్ని మసీదులను విద్యుద్దీప కాంతులతో అలంకరించి ఉండడం విశేషం. మరికొన్ని చోట్ల ఎండ వేడి నుంచి ఉపశమనం కల్గే విధంగా షామియానాలను, పందిళ్లను ఏర్పాటు చేశారు. అలాగే, రంజాన్‌ రోజున మాంసం విందు కోసం రాష్ట్రంలోని సంతలలో శుక్రవారం ఒక్క రోజు రూ.20 కోట్ల విలువ గల మేకలు, గోర్రెల విక్రయాలు జరిగాయి. ఇదిలా ఉండగా సౌదీ అరేబియాలో శుక్రవారం రంజాన్‌ పండుగ జరగడంతో ఆ కాలమానాన్ని అనుసరిస్తూ రాష్ట్రంలో కొన్ని మైనారిటీ సంఘాల నేతృత్వంలో ఈద్‌ ప్రార్థనలు జరిగాయి. నేతల శుభాకాంక్షలు.. రంజాన్‌ పండుగను పురస్కరించుకుని రాష్ట్రంలోని ముస్లింలకు ముఖ్యమంత్రి ఎంకే స్టాలిన్‌, ప్రధాన ప్రతి పక్ష నేత, అన్నాడీఎంకే ప్రధానకార్యదర్శి పళనిస్వామి, మాజీ సీఎం పన్నీరుసెల్వం తమ వేర్వేరు ప్రకటనలలో ముస్లింలు అందరూ ఆనందోత్సాహాలతో పండుగను జరుపుకోవాలని ఆకాంక్షించారు. రంజాన్‌ ప్రత్యేక ప్రార్థనలతో కుటుంబసమేతంగా పండుగను జరుపుకోవాలని సూచించారు. ప్రేమానురాగాలు, సోదరభావం, సమానత్వం వికసించాలని ఆకాంక్షించారు. అలాగే డీఎండీకే అధ్యక్షుడు విజయకాంత్‌, పీఎంకే నేత రాందాసు, ఎండీఎంకే నేత వైగో, వీసీకే నేత తిరుమావళవన్‌, ఎస్‌ఎంకే నేత శరత్‌కుమార్‌, ఇండియన్‌ యూనియన్‌ ముస్లింలీగ్‌ నేత ఖాదర్‌ మొహిద్దీన్‌, మనిద నేయ మక్కల్‌ కట్చి నేత జవహరుల్లా, తమిళ మానిల కాంగ్రెస్‌ అధినేత జీకే వాసన్‌, అమ్మ మక్కల్‌ మున్నేట్ర కళగం నేత దినకరన్‌, చిన్నమ్మ శశికళ, కాంగ్రెస్‌ పార్టీ రాష్ట్ర అధ్యక్షుడు కేఎస్‌ అళగిరి శుభాకాంక్షలు తెలిపిన వారిలో ఉన్నారు.

సాక్షి,చార్మినార్‌: రంజాన్‌ మాసంలో వంటలు నోరూరిస్తున్నాయి. పాతబస్తీలో సాధారణ రోజుల్లో లభించే నాన్‌కీ రోటి, పాయాషోర్వా విక్రయాలు జోరుగా కొనసాగుతున్నాయి. రంజాన్‌ మాసంలో వీటిని విక్రయించే హోటళ్లు అధికంగా ఉంటాయి. దీంతో ఈ వంటకం కోసం క్యూ కడుతున్నారు. పాతబస్తీ సంస్కృతికి ఆచార వ్యవహారాలకు నాన్‌కీ రోటి గుర్తుగా నిలుస్తోంది. ఒకప్పుడు కేవలం ముస్లింలు మాత్రమే తినేవారు. ప్రస్తుతం అన్ని వర్గాల ప్రజలు లొట్టలేసుకొని మరీ తింటున్నారు. సాధారణ రోజుల్లో చాలా ముస్లిం కుటుంబాలు ఉదయం లేవగానే బ్రేక్‌ పాస్ట్‌లో నాన్‌కీ రోటిని పాయాషోర్వాతో కలిపి తింటారు.   ► ఎలాంటి మసాలా దినుసులు, నూనె పదార్థాలు వాడకుండా కేవలం మైదా పిండితో తయారవుతుండటంతో పేదవారి దగ్గర నుంచి సంపన్న వర్గాల వరకు అందుబాటులో ఉంటుంది.  ► పర్షియా భాషలో రోటిని ‘నాన్‌’ అంటారు. 400 ఏళ్ల క్రితమే ఈ వంటకం మనకు అలవాటైంది. ఇరాన్, టర్కీ దేశాలకు చెందిన ఈ ‘డిష్‌’ అరబ్బు దేశాల నుంచి మన దేశానికి వ్యాపించింది.   ► ఎముకలకు బలాన్నిచ్చే పోషక విలువలు అధికంగా ఉండటంతో పాతబస్తీ ప్రజలు ఇష్టంగా తింటారు. ఇక్కడి ప్రముఖ హోటళ్లలో తెల్లవారు జామున 4 గంటల నుంచే అందుబాటులో ఉంటుంది. 

సాక్షి, అమరావతి : ముస్లింలకు ఎంతో పవిత్రమైన రంజాన్‌ మాసం ప్రారంభం అవుతున్న సందర్భంగా తెలుగు రాష్ట్రాల్లోని ముస్లింలకు సీఎం వైఎస్‌ జగన్‌ శుభాకాంక్షలు తెలిపారు. నెల రోజుల పాటు నియమ, నిష్టలతో కఠిన ఉపవాస వ్రతం ఆచరించే ఈ పుణ్య రంజాన్‌ మాసం ముస్లింలకు ఎంతో పవిత్రమైనదన్నారు. మహనీయుడైన మహ్మద్‌ ప్రవక్త ద్వారా దివ్య ఖురాన్‌ ఆవిర్భవించింది రంజాన్‌ మాసంలోనే కావడంతో ముస్లింలు ఈ నెలకు అత్యంత ప్రాముఖ్యతనిస్తారని తెలిపారు. ఇందులో భాగంగా ప్రతి ఒక్కరూ తమ సంపాదనలో కొంత భాగాన్ని పేదలకు దానధర్మాల ద్వారా ఖర్చు చేస్తారన్నారు. మనిషిలోని చెడు భావాల్ని, అధర్మాన్ని, ద్వేషాన్ని రూపు మాపేందుకు చేసే కఠోర దీక్షే రంజాన్‌ ఉపవాస దీక్ష అని చెప్పారు. ఈ మేరకు శనివారం సీఎం కార్యాలయం ప్రకటన విడుదల చేసింది. ఉపవాస దీక్షలు ఆచరించబోతున్న ప్రతి ఒక్కరికీ అల్లా దయతో అంతా మంచి జరగాలని మనస్ఫూర్తిగా కోరుకుంటున్నానని సీఎం జగన్‌ శనివారం ట్వీట్‌ చేశారు.  రంజాన్ నెల ప్రారంభమవుతున్న సందర్భంగా తెలుగు రాష్ట్రాల్లోని ముస్లిం సోదరులకు శుభాకాంక్షలు. నెల రోజులపాటు అత్యంత నియమనిష్టలతో ఉపవాస దీక్షలు ఆచరించబోతున్న ప్రతి ఒక్కరికీ అల్లా దయతో అంతా మంచి జరగాలని మనస్ఫూర్తిగా కోరుకుంటున్నాను. — YS Jagan Mohan Reddy (@ysjagan) April 2, 2022 కాగా, దేశవ్యాప్తంగా నెలవంక కనబడటంతో ఆదివారం నుంచి రంజాన్‌ నెల ప్రారంభమవుతుందని రుహియతే హిలాల్‌ కమిటీ (నెలవంక నిర్ధారణ కమిటీ) అధ్యక్షుడు మౌలానా ఖుబ్బుల్‌పాషా ఖుత్తారీ తెలిపారు. హైదరాబాద్‌లోని మొజాంజాహీ మార్కెట్‌లోని కమిటీ కార్యాలయంలో ఆయన విలేకరులతో మాట్లాడుతూ.. ముస్లింలు ఆదివారం నుంచి ఉపవాస దీక్షలు ప్రారంభించాలని సూచించారు  

సాక్షి, హైదరాబాద్‌: సీఎం కేసీఆర్‌ నేతృత్వంలో తెలంగాణ లౌకికవాద రాష్ట్రంగా విరాజిల్లుతోందని మంత్రులు కొప్పుల ఈశ్వర్, మహమూద్‌ అలీ, తలసాని శ్రీనివాస్‌ యాదవ్‌ అన్నారు. రంజాన్‌ మాసంలో శాంతిభద్రతల సమస్య తలెత్తకుండా, ప్రశాంత వాతావరణంలో పండుగ జరుపుకొనేలా ప్రతి ఒక్కరు సహకరించాలని సూచించారు. రంజాన్‌ మాసం సమీపిస్తున్న తరుణంలో... మంత్రులు, ఎమ్మెల్యేలు, పలు ప్రభుత్వ శాఖల అధికారులతో సమీక్ష నిర్వహించారు. ఈ సందర్భంగా వారు మాట్లాడుతూ వచ్చే నెల 3నుంచి మొదలయ్యే రంజాన్‌ మాసం సందర్భంగా ఎలాంటి అవాంఛనీయ సంఘటనలు జరగకుండా చూడాలని, మసీదులు, ఈద్గాలకు మరమ్మతులు చేసి, అన్ని సౌకర్యాలు కల్పించాలని సూచించారు. ఉపవాస దీక్షల్లో ఉండే వారికి అవసరమైన నిత్యావసరాలు అందుబాటులో ఉండేలా చూడాలని, రాత్రి వేళల్లో  హోటళ్లు, దుకాణాలను మూసేయించొద్దని సూచించారు.

సాక్షి, అమరావతి: ముస్లింలకు ఎంతో పవిత్రమైన రంజాన్‌ పండుగ సందర్భంగా ముఖ్యమంత్రి వైఎస్‌ జగన్‌మోహన్‌రెడ్డి శుభాకాంక్షలు (ఈద్‌ ముబారక్‌) తెలిపారు. అల్లా దీవెనలతో రాష్ట్ర ప్రజలకు, ప్రపంచ మానవాళికి సకల శుభాలు కలగాలని, కరోనా మహమ్మారి నుంచి బయట పడి ప్రతి ఒక్కరూ ఆయురారోగ్యాలతో జీవించాలని ఆకాంక్షించారు. క్రమశిక్షణ, దాతృత్వం, ధార్మిక చింతనల కలయికే రంజాన్‌ మాసం విశిష్టత అని పేర్కొన్నారు. పవిత్ర దివ్య ఖురాన్‌ అవతరించిన ఈ మాసంలో ముస్లిం సోదరసోదరీమణులంతా నెలరోజుల పాటు కఠోర ఉపవాస దీక్షతో నిష్టగా అల్లాను ఆరాధిస్తూ ఆధ్యాత్మిక జీవనం కొనసాగిస్తారని ముఖ్యమంత్రి అన్నారు. అల్లా రక్షణ, కరుణ పొందాలనే లక్ష్యంతో రంజాన్‌ మాసంలో ప్రత్యేక ప్రార్థనలు నిర్వహిస్తారని, ప్రతి ఒక్కరూ ఉన్నదానిలో ఎంతోకొంత దానధర్మాలు చేస్తారని, సేవా దృక్పథానికి, సహనానికి ప్రతీకగా ఈ పండుగను జరుపుకొంటారని సీఎం వైఎస్‌ జగన్‌ చెప్పారు.    చదవండి : కోవిడ్‌ సంక్షోభంలో.. రైతు కష్టమే ఎక్కువ: సీఎం వైఎస్‌ జగన్‌  సీఎం జగన్‌ లేఖతోనే కదలిక 

సాక్షి, హైదరాబాద్‌: కోవిడ్‌ నిబంధనలు పాటిస్తూ రంజాన్‌ వేడుకలు జరుపుకోవాలని డిప్యూటీ సీఎం మహమూద్‌ అలీ, ఎంఐఎం అధ్యక్షుడు అసదుద్దీన్‌ ఒవైసీ విజ్ఞప్తి చేశారు. రంజాన్‌ పండుగపై రూయత్‌ హిలాల్‌ కమిటీ కూడా పలు సూచనలు చేసింది. రంజాన్‌ వేడుకలను శుక్రవారం రోజునే జరుపుకోవాలని కోరారు. మసీదులు, ఈద్గాలలో నలుగురు కంటే ఎక్కువ మంది ప్రార్థనలు చేయొద్దని సూచించారు. 

‘రాధే’ అనుకున్నట్టుగానే రంజాన్‌కు థియేటర్స్‌లో సందడి చేయనున్నాడు. అయితే ఈ నెల 13న ఒకేసారి ఇటు థియేటర్స్‌లో అటు ఓటీటీ ప్లాట్‌ఫామ్‌లో విడుదల కానుంది ‘రాధే’. ఓటీటీ డీల్‌ దాదాపు 230 కోట్లు ఉంటుందని బాలీవుడ్‌ టాక్‌. సల్మాన్‌ఖాన్‌ హీరోగా నటించిన చిత్రం ‘రాధే: యువర్‌ మోస్ట్‌ వాంటెడ్‌ భాయ్‌’. గత ఏడాది కరోనా సమయంలో కూడా ఈ సినిమాకు ఓటీటీ ఆఫర్‌ వచ్చినా ముంబయ్‌ థియేటర్స్‌ ఓనర్స్, డిస్ట్రిబ్యూటర్స్‌ అభ్యర్ధనల మేరకు సల్మాన్‌ తన నిర్ణయాన్ని మార్చుకున్నారు. ఇప్పుడు ఒకేసారి ఓటీటీ, థియేటర్స్‌లో సినిమాను విడుదల చేస్తున్నారు. ముంబయ్‌లో థియేటర్స్‌ మూతబడటం, ఇంకా ఉత్తర, దక్షిణాదిన కొన్ని రాష్ట్రాల్లో 50 శాతం సీటింగ్‌ వంటివి ‘రాధే’ సినిమాను ఇలా థియేటర్, ఓటీటీలో రిలీజ్‌ చేయడానికి కారణం అయ్యుంటాయని ప్రత్యేకంగా చెప్పక్కర్లేదు. చదవండి: ‘రంగస్థలం’ తమిళ ట్రైలర్‌: చిట్టిబాబు చింపేశాడుగా

న్యూఢిల్లీ: దేశ రాజధానిలోని నిజాముద్దీన్‌ మర్కజ్‌ మసీదులో రంజాన్‌ మాసాన్ని పురస్కరించుకుని 50 మంది ప్రజలు రోజుకు 5 సార్లు ప్రార్థనలు చేసుకునేందుకు ఢిల్లీ హైకోర్టు అనుమతించింది. అయితే, కరోనా నేపథ్యంలో ప్రార్థనా స్థలాలను మూసివేయాలని ఢిల్లీ విపత్తు నిర్వహణ ప్రాధికార సంస్థ(డీడీఎంఏ) జారీ చేసిన నోటిఫికేషన్‌లో లేదని వివరించింది. చాలా వరకు ప్రార్థనాస్థలాలు తెరిచే ఉంటున్నాయని పేర్కొంది. ఈ విషయంలో కేంద్రం కూడా ఎలాంటి స్పష్టత ఇవ్వలేదని తెలిపింది. డీడీఎంఏ ఈనెల 10వ తేదీన విడుదల చేసిన నోటిఫికేషన్, ఇతర ప్రామాణిక కార్యాచరణ నిబంధనలకు లోబడి తమ ఆదేశాలను అమలు చేయాలని స్పష్టం చేశారు. ఈ రంజాన్‌ నెలలో నిజాముద్దీన్‌ మర్కజ్‌ ప్రాంగణంలోని బంగ్లేవాలీ మసీదులోని బేస్‌మెంట్‌ పైనున్న మొదటి అంతస్తులో 50 మందికి రోజుకు 5 పర్యాయాలు నమాజ్‌ చేసుకునేందుకు అనుమతించాలని జస్టిస్‌ ముక్తా గుప్తా నిజాముద్దీన్‌ పోలీసులను ఆదేశించారు. డీడీఎంఏ ఉత్తర్వులతోపాటు, సామాజిక, మత, రాజకీయ, ఉత్సవ సంబంధ సమావేశాలను, ప్రజలు గుమికూడటాన్ని అనుమతించే విషయంలో అఫిడవిట్‌ సమర్పించాల్సిందిగా కేంద్రాన్ని ఆదేశించింది. అయితే, మరింత మందిని అనుమతించాలనీ, మసీదులోని ఇతర అంతస్తుల్లో కూడా ప్రార్థనలు చేసుకునేందుకు వీలు కల్పించాలంటూ ఢిల్లీ వక్ఫ్‌ బోర్డు తరఫున న్యాయవాది రమేశ్‌గుప్తా కోరగా కరోనా తీవ్రత రోజురోజుకూ పెరుగుతున్న దృష్ట్యా కోర్టు నిరాకరించింది. ఈ మేరకు నిజాముద్దీన్‌ ఎస్‌హెచ్‌వోకు దరఖాస్తు చేసుకోవచ్చనీ, దీనిపై ఆయనే నిర్ణయం తీసుకుంటారని పేర్కొంది. ఇలా ఉండగా, కరోనా లాక్‌డౌన్‌ అమల్లో ఉండగా వేలాదిమందితో తబ్లిగీ జమాత్‌ నిర్వహించిన ఆరోపణలపై గత ఏడాది మార్చి 31వ తేదీ నుంచి మూతబడి ఉన్న నిజాముద్దీన్‌ మర్కజ్‌ను తిరిగి తెరిచేందుకు అనుమతివ్వాలంటూ దాఖలైన పిటిషన్‌పై జూలై 15వ తేదీన విచారణ జరపనున్నట్లు హైకోర్టు తెలిపింది. చదవండి:  ‘కుంభమేళా’పై విమర్శల వెల్లువ

సాక్షి, అమరావతి: రంజాన్‌ సందర్భంగా ముస్లిం ఉద్యోగులకు ఆంధ్రప్రదేశ్‌ ప్రభుత్వం వెసులుబాటు కల్పించింది. విధుల నుంచి గంట ముందుగా ఇంటికి వెళ్లేందుకు అనుమతి ఇచ్చింది. ఏప్రిల్‌ 14 నుంచి మే 13 వరకు గంట ముందుగా ఇంటికి వెళ్లే అవకాశం కల్పించింది. రంజాన్‌ ఉపవాస దీక్షల సందర్భంగా వెసులుబాటు కల్పించిన ప్రభుత్వం.. కోవిడ్‌ నిబంధనలతో రంజాన్‌ వేడుకలు నిర్వహించుకోవాలని సూచించింది. చదవండి: ఇ-వ్యవసాయం.. ఒక్క క్లిక్‌తో సమగ్ర సమాచారం   హోంగార్డు భార్య మృతి కేసులో ట్విస్ట్‌

సిరిసిల్ల: ‘మూలిగే నక్కపై తాటిపండు పడినట్లు’ఉంది సిరిసిల్ల నేతన్నల పరిస్థితి’. రాష్ట్ర ప్రభుత్వం సిరిసిల్ల నేత కార్మికులను ఆదుకునేందుకు వివిధ పథకాల్లో వస్త్రోత్పత్తి ఆర్డర్లను ఇస్తోంది. ఈ మేరకు బట్ట ఉత్పత్తి చేస్తూ.. క్షేత్రస్థాయిలో పనిచేసే కార్మికులకు ఉపాధి కల్పిస్తూ.. వస్త్రోత్పత్తి రంగం ముందుకు సాగుతోంది. అంతా సాఫీగానే సాగుతుందని భావిస్తున్న తరుణంలో కోవిడ్‌–19 మహమ్మారి వస్త్రోత్పత్తి రంగంపై తీవ్ర ప్రభావాన్ని చూపింది. రాష్ట్ర వ్యాప్తంగా 78 వేల మరమగ్గాలు ఉండగా.. ఒక్క సిరిసిల్లలోనే 34 వేల మరమగ్గాలు ఉన్నాయి. ఇక్కడ ఉత్పత్తి అయ్యే పాలిస్టర్‌ బట్టను కొనేవారు లేక వస్త్ర పరిశ్రమ కుదేలైంది. ప్రభుత్వం ఇచ్చిన సర్వశిక్షా అభియాన్‌ (ఎస్‌ఎస్‌ఏ), రంజాన్, బతుకమ్మ చీరల ఆర్డర్ల వస్త్రాలను ఉత్పత్తి చేస్తున్నారు. వీటికి సంబంధించిన బిల్లులు అందక వస్త్రోత్పత్తిదారులు ఆర్థికంగా ఇబ్బందులు పడుతున్నారు. సిరిసిల్లకు మొత్తంగా రూ.150 కోట్ల మేరకు ప్రభుత్వం బకాయిలు చెల్లించాల్సి ఉంది  మూలకు పడిన రంజాన్‌ బట్ట   రంజాన్‌ పండుగను పురస్కరించుకొని ముస్లింలకు కానుకగా అందించేందుకు సిరిసిల్లలోని వస్త్రోత్పత్తిదారులకు 26.23 లక్షల మీటర్ల షర్టింగ్‌ బట్టకు ఆర్డర్లు ఇచ్చారు. 2020 జనవరి 3వ తేదీన ఆర్డర్లు ఇచ్చిన జౌళిశాఖ అధికారులు.. ఫిబ్రవరి 20లోగా పూర్తి చేయాలని ఆదేశించారు. ఈ మేరకు రంజాన్‌ బట్టను వస్త్రోత్పత్తిదారులు తయారు చేశారు. 10 లక్షల మీటర్ల బట్టను కొనుగోలు చేశారు. మరో 16.23 లక్షల మీటర్ల బట్ట కార్ఖానాల్లోనే ఉంది. ఈలోగా కరోనా లాక్‌డౌన్‌ రావడంతో సిరిసిల్ల టెక్స్‌టైల్‌ పార్క్‌లో ఉత్పత్తి చేసిన రంజాన్‌ బట్ట నిల్వలు పేరుకుపోయాయి. రూ.లక్షల్లో పెట్టుబడి పెట్టి నూలు, కొనుగోలు చేసి, కార్మికులకు కూలి చెల్లించి అమ్మకానికి సిద్ధంగా ఉన్న బట్టను జౌళిశాఖ కొనుగోలు చేయకపోవడంతో ఆర్థికంగా ఇబ్బందులు పడుతున్నారు. కరోనా కారణంగా ప్రభుత్వం రంజాన్‌ పండుగకు కొత్త బట్టలను పంపిణీ చేయలేదు. దీంతో సుమారు రూ.5.40 కోట్ల విలువైన నిల్వలు సిరిసిల్లలో ఉన్నాయి.   ఎస్‌ఎస్‌ఏది అదే కథ  సర్వశిక్షా అభియాన్‌ (ఎస్‌ఎస్‌ఏ)లో 1.30 కోట్ల మీటర్ల బట్టను ఉత్పత్తి చేసేందుకు ఆర్డర్లు ఇచ్చారు. వస్త్రోత్పత్తిదారులు ఆ మేరకు బట్ట ఉత్పత్తి చేశారు. పాఠశాలలు తెరిచే నాటికే విద్యార్థులకు స్కూల్‌ యూనిఫామ్స్‌ అందించాలని ప్రభుత్వం భావించి ముందే ఆర్డర్లు ఇచ్చింది. దీంతో ఉత్సాహంగా ఎస్‌ఎస్‌ఏ బట్ట ఉత్పత్తి అయింది. రూ.50 కోట్ల విలువైన బట్ట ఉత్పత్తి చేశారు. ఆరు నెలల కిందట ఈ బట్టను కొనుగోలు చేసిన జౌళిశాఖ ఇటీవల రూ.30 కోట్ల మేరకు చెల్లించింది. ఇంకా రూ.20 కోట్ల వరకు బిల్లులు రావాల్సి ఉంది. సంక్షేమ శాఖలకు సంబంధించి బట్టల బిల్లులు సైతం రూ.3 కోట్ల మేరకు ఇలాగే పెండింగ్‌లో ఉన్నాయి. దీంతో ఇప్పుడు బతుకమ్మ చీరల ఉత్పత్తి పెట్టుబడిగా వస్త్రోత్పత్తిదారులు అప్పులు చేయాల్సి వస్తుంది. సిరిసిల్లలో ఏడు కోట్ల మీటర్ల బతుకమ్మ చీరల బట్టకు ఆర్డర్లు ఇవ్వగా దీని విలువ రూ.350 కోట్లు. 25 వేల మరమగ్గాలు, వెయ్యి ఆధునిక ర్యాపియర్‌ మగ్గాలపై 225 రంగుల్లో బతుకమ్మ చీరల ఉత్పత్తి సాగుతోంది. మంత్రి కేటీఆర్‌ వస్త్రోత్పత్తి ఆర్డర్ల బిల్లులు ఇప్పించాలని వస్త్రవ్యాపారులు కోరుతున్నారు.  రూ. 30 కోట్లు ఇచ్చాం  రంజాన్‌కు సంబంధించి కొనుగోలు చేసిన వస్త్రానికి ఇటీవల రూ.30 కోట్లు ఇచ్చాం. బతుకమ్మ చీరలను ఇప్పుడే సేకరిస్తున్నాం. దానికి ఎప్పటిలాగే పేమెంట్‌ ఇస్తాం. వస్త్రం క్వాలిటీ కంట్రోల్‌ నివేదిక వచ్చిన తరువాత గతంలో కొనుగోలు చేసిన వస్త్రాలకు సంబంధించి జీఎస్టీ బిల్లులను చూసి 10 శాతం బిల్లులను అందరికీ క్లియర్‌ చేస్తాం. బట్టను తీసుకున్న ఆయా ప్రభుత్వ శాఖల నుంచి ఇంకా బిల్లులు రావాల్సి ఉన్నాయి. అవి రాగానే అన్నింటినీ క్లియర్‌ చేస్తాం.  –శైలజా రామయ్యర్, జౌళిశాఖ డైరెక్టర్‌ 

సోషల్‌ మీడియాలో యాక్టివ్‌గా ఉండే టెన్నిస్‌ స్టార్‌ సానియా మీర్జా తన వ్యక్తిగత , వృత్తిగత విషయాలకు సంబంధించిన ఫొటోలు, వీడియోలను షేర్‌ చేసి అభిమానులను అలరిస్తారు. రంజాన్‌ పర్వదినం సందర్భంగా ఆమె తన కుమారుడు ఇజాన్‌ మీర్జా మాలిక్‌తో దిగిన ఓ ఫొటోను ట్విటర్‌లో పోస్ట్‌ చేశారు. ‘రంజాన్‌ ఈద్‌ పండగ వేడుకలు’ అంటూ ఆమె క్యాప్షన్‌ జత చేశారు. కరోనా నేపథ్యంలో రంజాన్‌ పండుగను సానియా ఇంట్లోనే జరుపుకున్నారు. ఇక ముస్లిం సాంప్రదాయ వేషాధారణలో తెల్లని కుర్తాను ధరించిన సానియా.. ‘చాలా అందంగా కనిపిస్తున్నారు’అని అభిమానులు కామెంట్‌ చేస్తున్నారు. సానియా ముద్దుల కొడుకు ఇజాన్స్ కూడా సంప్రదాయ దుస్తుల్లో క్యూట్‌గా ఉన్నాడు. ‘లాక్‌డౌన్‌ సమయంలో నేను మా కుంటుంబ సభ్యులతో ఇంట్లోనే ఉంటూ రంజాన్‌ పండగ జరుపుకుంటున్నాను. దయ చేసి మీరు కూడా ఇంట్లోనే ఉండాలి’  అని సానియా మరో ట్వీట్‌లో అభిమానులకు విజ్ఞప్తి చేశారు. Eid vibes 🌙🤲🏽 #MyIzzy pic.twitter.com/O9BmeUBjql — Sania Mirza (@MirzaSania) May 25, 2020

సాక్షి, రాజ్‌భవన్:‌ క్రమశిక్షణ, దాతృత్వం, ధార్మిక చింతనల కలయికనే రంజాన్‌ పర్వదినం అని ఆంధ్రప్రదేశ్‌ గవర్నర్‌ బిశ్వభూషణ్‌ హరిచందన్‌ అన్నారు. ఆయన ఆదివారం రాజ్‌భవన్‌లో మీడియాతో మాట్లాడుతూ.. పవిత్ర రంజాన్‌ మాసం ‘ఈద్ ఉల్ ఫితర్’  ముగిసిన శుభవేళ ముస్లిం సోదరులకు శుభాకాంక్షలు తెలిపారు. పవిత్ర ఖురాన్ బోధనలు యుగ యుగాలుగా మానవాళిని ప్రభావితం చేస్తున్నాయని తెలిపారు. రంజాన్ మాస పవిత్రతతో ప్రతి వ్యక్తి మానసిక పరివర్తన చెంది ప్రేమమూర్తిగా మారుతాడని ఆయన అన్నారు. రంజాన్ మాసంలో ఆధ్యాత్మిక ఆరాధనతో అనుబంధం మరింత బలపడుతుందని గవర్నర్‌ చెప్పారు. క్రమశిక్షణను అనుసరిస్తూ శాంతి, సౌభ్రాతృత్వాన్ని లోకానికి చాటడంలో రంజాన్ మాసం ప్రత్యేకంగా నిలుస్తుందని ఆయన పేర్కొన్నారు. కఠోర ఉపవాసవ్రతం సహనాన్ని పెంచుతుందని గవర్నర్ తెలిపారు. సర్వమానవాళి సమానత్వాన్ని చాటుతూ, దాతృత్వాన్ని అలవరచే పండుగ రంజాన్ అని ఆయన చెప్పారు. రంజాన్ పండుగ వేళ ఇస్లాంను గౌరవించే ప్రతి ఒక్కరి కుటుంబంలో ఆనందం వెల్లివిరియాలని ఆకాంక్షిసస్తునన్నానని గవర్నర్ బిశ్వభూషణ్‌ హరిచందన్‌ చెప్పారు.

ప్రపంచంలో కల్మషం లేని మనుషులు ఎవరైనా ఉన్నారా అంటే వాళ్లు పిల్లలు మాత్రమే. చిన్నారులు ఏం చేసినా ముద్దుగానే ఉంటుంది. మురిపాల మూటలు కడుతూ నిర్మలమైన హృదయం కలిగి ఉండే పిల్లలను ప్రేమించనివాళ్లు ఒక్కరు కూడా ఉండరంటే అతిశయోక్తి కాదు. ప్రస్తుతం అలాంటి ఓ పిల్లాడి చేష్టలు నెటిజన్లకు ఆహ్లాదాన్ని పంచుతున్నాయి. ప్రస్తుతం కరోనా కట్టడి నేపథ్యంలో దేశ వ్యాప్తంగా లాక్‌డౌన్‌ అమల్లో ఉన్న సంగతి తెలిసిందే. దీంతో నిత్యావసరాల కోసం మినహా బయటకు వచ్చే పరిస్థితి లేదు. ముఖ్యంగా సామూహిక ప్రార్థనలు, బహిరంగ సమావేశాలు నిర్వహించేందుకు అనుమతి లేదు. ప్రతి ఒక్కరు విధిగా సామాజిక ఎడబాటు పాటించాల్సిందే.(సమ్మేళన ప్రార్థనలకు దూరంగా ఉండండి) ఇక ప్రస్తుతం పవిత్ర రంజాన్‌ మాసం ప్రారంభమైన నేపథ్యంలో ముస్లింలందరూ ఇంట్లోనే ప్రార్థన చేసుకోవాలని మత పెద్దలు, ప్రభుత్వాలు సూచిస్తున్నాయి. కరోనా మహమ్మారిని తరిమికొట్టేందుకు సహకరించాలని విజ్ఞప్తి చేస్తున్నాయి. ఈ క్రమంలో తమ ఇంట్లోని పెద్దలు నమాజ్‌ చేస్తున్న సమయంలో అక్కడికి వచ్చిన పిల్లాడు తాను సైతం ప్రార్థన చేసేందుకు ఉపక్రమించాడు. రెడ్‌ టీ షర్టు, నిక్కరు వేసుకున్న ఆ చిన్నారి... తనతో పాటు ఓ డైనోసర్‌ బొమ్మను తీసుకొచ్చి..  ప్రార్థన చేయాలన్నట్లుగా దాని మెడలు వంచుతూ కెమెరాకు చిక్కాడు. ఇందుకు సంబంధించిన వీడియోను ఓ నెటిజన్‌ సోషల్‌ మీడియాలో షేర్‌ చేయడంతో అందరినీ ఆకర్షిస్తోంది. బుడ్డోడు భలే ఉన్నాడు అంటూ అతడి చేష్టలకు నెటిజన్లు ఫిదా అవుతూ రంజాన్‌ శుభాకాంక్షలు చెబుతున్నారు.(నాన్న..ఇంకెంత దూరం!)

సాక్షి, హైదరాబాద్‌: పవిత్ర రంజాన్‌ ప్రార్థనలను ఇళ్లలోనే చేసుకోవాలని ముస్లింలకు ఎంఐఎం అధ్యక్షుడు, హైదరాబాద్‌ ఎంపీ అసదుద్దీన్‌ ఒవైసీ విజ్ఞప్తి చేశారు. తెలంగాణలో రాత్రి 7 గంటల నుంచి ఉదయం వరకు కర్ఫ్యూ ఉంటుంది కాబట్టి బయట తిరిగేందుకు ఎవరినీ అనుమతించరని తెలిపారు. కరోనా వైరస్‌ వ్యాప్తి నేపథ్యంలో ప్రతి ఒక్కరూ భౌతిక దూరం పాటించాలని ఆయన పిలుపునిచ్చారు. ఇళ్ల వద్ద కూడా సమ్మేళన ప్రార్థనలకు దూరంగా ఉండాలని కోరారు. పేదలు ఎవరూ ఆకలితో ఉండకుండా చూడాలని, ఆకలితో ఉన్నవారికి ఆహారం ఇవ్వడం అతిపెద్ద ధర్మమని ఆయన అన్నారు.  లాక్‌డౌన్‌ ముగిసిన తర్వాత వలస కార్మికులను వారి స్వస్థలాలకు పంపించే ఏర్పాటు చేయాలని కేంద్ర ప్రభుత్వానికి సూచించారు. మొత్తం లాక్‌డౌన్‌ ఎత్తివేసిన తరువాత కొన్ని ఆర్థిక కార్యకలాపాలను అనుమతించాలి కోరారు. సినిమా హాల్స్‌, బహిరంగ సభలపై ఆంక్షలు కొనసాగించాలన్నారు. (అందరికీ న్యాయం జరగడం ముఖ్యం అంటున్న అఖిలేశ్‌) ప్రధానమంత్రి నరేంద్ర మోదీ ప్రణాళిక లేకుండా లాక్‌డౌన్‌ విధించారని.. ఇది పేదలు, వలస కూలీలకు తీవ్ర ప్రభావం చూపిందన్నారు. వలస కార్మికులను ఆదుకోవడం కేంద్రం విఫలమైందని ధ్వజమెత్తారు. రేషన్ కార్డులు, బ్యాంకు ఖాతాలు లేని వారికి ప్రభుత్వ సహాయం అందలేదని తెలిపారు. ఈ సంక్షోభం కారణంగా 10 కోట్ల మంది ఉద్యోగాలు కోల్పోవచ్చని, ఈ సమస్యను పరిష్కరించే ప్రణాళికను ప్రధాని వెల్లడించాలని డిమాండ్‌ చేశారు. 90 శాతం వలసదారులకు ప్రభుత్వ రేషన్ రాలేదని, 90 శాతం మందికి జీతాలు ఇవ్వలేదని ఒక సర్వేలో తేలినట్టు వెల్లడించారు.  ఫుడ్ కార్పొరేషన్ ఆఫ్ ఇండియా (ఎఫ్‌సీఐ) గిడ్డంగులలో ఉన్న బియ్యాన్ని పేద, వలస కూలీలకు పంపిణీ చేయాలని సూచించారు. శానిటైజర్ల తయారీకి బియ్యాన్ని ఉపయోగించాలన్న ప్రభుత్వ ప్రతిపాదనను ఆయన విమర్శించారు. కోవిడ్ -19 నుంచి కోలుకున్న వారందరూ రెడ్‌క్రాస్‌కు రక్తదానం చేయాలని, ప్లాస్మా థెరపీ ద్వారా కరోనా బాధితులను కాపాడటానికి ఇది తోడ్పడుతుందని తెలిపారు.  చదవండి: కరోనా మహమ్మారిపై పోరులో అదే కీలకం

న్యూఢిల్లీ : ప్రభుత్వం ఇచ్చే సూచనలను పాటిస్తేనే కరోనా మహమ్మారిని సంపూర్ణంగా అరికట్టవచ్చని ఢిల్లీలోని జామా మసీదు షాహీ ఇమామ్‌ సయ్యద్ అహ్మద్ బుఖారీ పేర్కొన్నారు. పవిత్ర రంజాన్‌ మాసం ప్రారంభం కానున్ననేపథ్యంలో ఇంటి వద్దే భౌతిక దూరాన్ని పాటిస్తూ, ప్రార్థనలను చేయాలని పిలుపునిచ్చారు. వీటిని అనుసరించడం ద్వారా ప్రతి ఒక్కరిని రక్షించుకోగలుగుతామని పేర్కొన్నారు.

‘ఈద్‌’ ముగిసి నాలుగు రోజులు గడిచి పొయ్యాయి. నెలరోజులపాటు ఆరాధనలు, సత్కార్యాలు, సదాచారాల్లో మునిగి తేలిన ముస్లిం సమాజం, తమకంతటి పరమానందాన్ని పంచిన పవిత్ర రమజాన్‌ మాసానికి ఘనంగా వీడ్కోలు పలికింది. అయితే ఈద్‌ ముగియడంతోనే శుభాల పర్వానికి తెరపడకూడదు. రమజాన్‌ నెల్లాళ్ళూ మస్జిదులు ఏ విధంగా కళకళలాడాయో, అలాగే రమజాన్‌ తరువాత కూడా నమాజీలతో కళకళలాడేలా చూడాలి. రమజాన్‌లో కనిపించిన సేవాభావం, దాతృస్వభావం, న్యాయబద్దత, ధర్మశీలత, వాగ్దానపాలన, ప్రేమ, సోదరభావం, సహనశీలత, పరోపకారం, క్షమ, జాలి, దయ, త్యాగభావం రమజాన్‌ అనంతరమూ ఆచరణలో ఉండాలి. అసత్యం, అబద్ధం పలకకపోవడం, అశ్లీలానికి పాల్పడక పోవడం, చెడు వినకపోవడం, చూడకపోవడం, సహించకపోవడంతోపాటు, అన్నిరకాల దుర్గుణాలకు దూరంగా ఉండే సుగుణాలు నిరంతరం కొనసాగాలి. తొలకరి జల్లుతో బీడువారిన పుడమి పులకించినట్లు, రమజాన్‌ వసంతాగమనంతో నైతిక వర్తనంలో, ఆధ్యాత్మిక ప్రగతిలో గణనీయమైన వృద్ధీవికాసాలు జరిగాయి. అనూహ్యమైన మానవీయ పరివర్తనకు బీజం పడింది. ఇప్పుడది నిలబడాలి, నిరంతరం కొనసాగాలి ఈ వృద్ధీ వికాసాలు ఒక్క నెలకే పరిమితం కాకూడదు. మనిషిని మనీషిగా మార్చడానికే ఈ శిక్షణకు ఏర్పాటు చేసింది ఇస్లాం. నిజానికి ఇస్లాం బోధనలు చాలా సరళం, సంపూర్ణం, సమగ్రం, స్పష్టం, స్వచ్ఛం, నిర్మలం. మానవులు వీటిని ఆచరిస్తే, అనుసరిస్తే నైతిక, ఆధ్యాత్మిక, సాంఘిక, సాంస్కృతిక, ఆర్థిక, రాజకీయ రంగాలన్నిటినీ సమన్వయ పరచగలరు. వీటిమధ్య ఒక సమతుల్యతను సాధించగలరు. ఈ రంగాలన్నింటా దైవాభీష్టానికి అనుగుణంగా నడుచుకోవడం ద్వారా ప్రతి పనినీ ఆరాధనగా మలచుకోగలరు. మానవుల ప్రతి పనినీ ఆరాధనా స్థాయికి చేర్చిన ధర్మం ఇస్లాం. అందుకే పవిత్ర రమజాన్‌ నెలలో వారి శిక్షణ కోసం పకడ్బందీ ఏర్పాట్లు చేసింది ధర్మం. ఇక దాన్ని సద్వినియోగం చేసుకోవడమైనా, దుర్వినియోగం చేసుకోవడమైనా మన చేతుల్లోనే ఉంది. అందుకని రమజాన్‌ స్పూర్తిని కొనసాగించాలి. అప్పుడే రోజాల ఉద్దేశ్యం నెరవేరుతుంది. పండుగ ఆనందానికి పరమార్ధం చేకూరుతుంది. భావిజీవితాలు సుఖ సంతోషాలతో గడిచిపోతాయి. సమాజంలో శాంతి, సామరస్యం వెల్లివిరుస్తుంది. దోపిడీ, పీడన, అణచివేత, అసమానతలు లేని చక్కని ప్రేమపూరితమైన సుందరసమాజం ఆవిష్కృతమవుతుంది. – ముహమ్మద్‌ ఉస్మాన్‌ ఖాన్‌

సాక్షి, న్యూఢిల్లీ : రంజాన్‌ పర్వదినం సందర్భంగా షావోమి స్పెషల్‌ సేల్‌ నిర్వహిస్తోంది. రెడ్‌మి నోట్‌ 7 ప్రొ స్మార్ట్‌ఫోన్‌ను ఈద్‌ స్పెషల్‌గా ప్రత్యేకంగా విక్రయిస్తోంది.  బుధవారం సాయంత్రం నాలుగు గంటలనుంచి  ఈ సేల్‌ ప్రారంభం కానుంది. ఎంఐ.కామ్‌, ఫ్లిప్‌కార్ట్‌లో ఈ సేల్‌ మొదలవుతుంది. 48 మెగాపిక్స‌ల్ భారీ కెమెరా, ఏఐ ఫేస్ అన్‌లాక్ ఫీచ‌ర్‌, గొరిల్లా గ్లాస్ ప్రొటెక్ష‌న్‌, వెనుక భాగంలో ఫింగ‌ర్ ప్రింట్ సెన్సార్ లాంటివి ప్రధాన ఫీచర్లు. ముందు ప్రకటించిన ప్రకారం ఈ రోజు మధ్యాహ్నం 12గంటలకు సేల్‌ మొదలు కావాల్సి ఉంది. కానీ కొన్ని అనివార్య కారణాల వల్ల ఆలస్యమయిందని  షావోమి ఇండియా సీఈఓ మను కుమార్‌ జైన్‌ ట్వీట్‌ చేశారు.  రెడ్‌మీ నోట్ 7 ప్రొ ఫీచ‌ర్లు 6.3 ఇంచ్ ఫుల్ హెచ్‌డీ ప్ల‌స్ డిస్‌ప్లే 2340 ×1080 పిక్స‌ల్స్ స్క్రీన్ రిజ‌ల్యూష‌న్ ఆండ్రాయిడ్ 9.0 పై 2 గిగాహెడ్జ్ ఆక్టాకోర్ స్నాప్‌డ్రాగ‌న్ 675 ప్రాసెస‌ర్‌ 4/6 జీబీ ర్యామ్‌, 64/128 జీబీ స్టోరేజ్ 256 జీబీ ఎక్స్‌పాండ‌బుల్ స్టోరేజ్‌, 48+5  ఎంపీ డ్యుయ‌ల్ బ్యాక్ కెమెరాలు 13 ఎంపీ సెల్ఫీ కెమెరా,  4000 ఎంఏహెచ్ బ్యాట‌రీ 4 జీబీ ర్యామ్‌/ 64 జీబీ స్టోరేజ్‌  : ధర రూ. 13,999 6 జీబీ ర్యామ్‌/ 128 జీబీ స్టోరేజ్‌ : ధర రూ. 16,999 Mi fans, here's your Eidi. #RedmiNote7Pro on special sale. Get the amazing #48MPCameraBeast at 4PM from @Flipkart. pic.twitter.com/LSiihtSKxh — Redmi India (@RedmiIndia) June 5, 2019

సాక్షి, అమరావతి: దేవుడు ఏం చేసినా చాలా గొప్పగా, ఆశ్చర్యపోయేలా చేస్తాడని, గొప్పగా స్క్రిప్టు రాస్తాడని ముఖ్యమంత్రి వైఎస్‌ జగన్‌మోహన్‌రెడ్డి వ్యాఖ్యానించారు. రంజాన్‌ మాసంలో ముఖ్యమంత్రిగా బాధ్యతలు స్వీకరించిన తాను తన తండ్రి వైఎస్‌ రాజశేఖరరెడ్డిని మించి మెరుగైన పాలన అందించేలా ముస్లిం సోదరులు దువా చేయాలని కోరారు. సోమవారం గుంటూరులోని పరేడ్‌ గ్రౌండ్‌లో రాష్ట్ర ప్రభుత్వం తరఫున ఏర్పాటు చేసిన తొలి అధికారిక కార్యక్రమమైన ‘ఇఫ్తార్‌ విందు’లో సీఎం వైఎస్‌ జగన్‌ పాల్గొన్నారు. ముస్లిం సోదరుల ఉపవాస దీక్ష విరమణ కార్యక్రమంలో పాల్గొని చాలాసేపు వారితో  ఆత్మీయంగా గడిపారు. పవిత్ర రంజాన్‌ మాసంలో అందరికీ మంచి జరగాలని ఆకాంక్షించారు. హిందూపురం అసెంబ్లీ నియోజకవర్గం నుంచి వైఎస్సార్‌సీపీ అభ్యర్థిగా పోటీ చేసి ఓటమి పాలైన మహ్మద్‌ ఇక్బాల్‌కు ఎమ్మెల్సీ పదవి ఇస్తానని ముస్లిం సోదరుల హర్షధ్వానాల మధ్య జగన్‌ ప్రకటించారు. ఈ ఎన్నికల్లో వైఎస్సార్‌సీపీ ఐదుగురు ముస్లింలకు అసెంబ్లీ టికెట్లు ఇస్తే నలుగురు విజయం సాధించారని చెప్పారు. ఈ సందర్భంగా ఆయన ఇంకా ఏమన్నారంటే... అస్సలామ్‌ అలైకుమ్‌... ‘ఈరోజు రంజాన్‌ శుభమాసంలో ముస్లిం సోదరుల మధ్య ఈ కార్యక్రమంలో పాలుపంచుకోవడం నాకు చాలా సంతోషంగా, గర్వంగా ఉంది. ఈ సందర్భంగా నేను ఒకటి మనవి చేయదల్చుకున్నా. దేవుడు ఏం చేసినా కూడా ఆశ్చర్యంగా, గొప్పగా జరిగింది అనిపించే విధంగా  చేస్తాడు. దేవుడు ఎంత గొప్పగా పని చేస్తాడు, ఆయన స్క్రిప్టు రాస్తే ఎంత గొప్పగా ఉంటుందో చెప్పడానికి మొట్ట మొదటి ఉదాహరణ ఇది... ఐదేళ్ల చంద్రబాబు నాయుడు ప్రభుత్వ పాలనను మీరంతా చూశారు. ఆ సమయంలో అక్షరాలా 67 మంది వైఎస్సార్‌సీపీ ఎమ్మెల్యేలు ఉంటే... 23 మంది ఎమ్మెల్యేలను అన్యాయంగా, డబ్బులిచ్చి ప్రలోభాలకు గురి చేసి  కొనుగోలు చేశారు. అందులో నలుగురిని ఏకంగా మంత్రులనే చేశారు. ఎమ్మెల్యేలు ఫిరాయిస్తే వాళ్లను అనర్హులుగా చేయాలి. లేదా వారి చేత రాజీనామాలు చేయించి ఎన్నికల్లో వాళ్ల పార్టీ గుర్తు మీద మళ్లీ గెలిపించుకుని శాసనసభకు తెచ్చుకోవాలి. కానీ ఇవేమీ జరగలేదు. మన కళ్ల ముందే అన్యాయం, అధర్మం కనిపించింది. అన్ని రకాల మోసాలు, అబద్ధాలు కనిపించాయి. 2014 ఎన్నికల్లో వైఎస్సార్‌సీపీ టికెట్‌తో 9 మంది ఎంపీలు గెలిస్తే ముగ్గురిని ఇదే మాదిరిగా కొనుగోలు చేశారు.  రంజాన్‌ మాసంలోనే... గత నెల 23వ తేదీన ఎన్నికల ఫలితాలు వచ్చాయి. అది కూడా రంజాన్‌ మాసంలోనే. ఇక టీడీపీకి వచ్చిన ఎమ్మెల్యేల సంఖ్య అక్షరాలా 23, ఆ పార్టీకి వచ్చిన ఎంపీ సీట్లు 3. ఫలితాలు వచ్చింది రంజాన్‌ మాసంలో మే 23వ తేదీన. ఇంత కన్నా గొప్ప స్క్రిప్టు మరెవరూ రాయలేరు. అదొక్క దేవుడు మాత్రమే రాయగలుగుతాడు. రంజాన్‌ శుభమాసంలోనే జగన్‌ అనే నేను మీ అందరి చల్లని దీవెనలతో, దేవుడి ఆశీస్సులతో రాష్ట్ర ముఖ్యమంత్రిగా ప్రమాణ స్వీకారం చేశా. మళ్లీ రంజాన్‌ మాసంలోనే ముఖ్యమంత్రిగా నా మొట్టమొదటి అధికార కార్యక్రమాన్ని మీ అందరి సమక్షంలోనే ప్రారంభించి ఈ శుభ కార్యక్రమంలో పాలు పంచుకుంటున్నా. ఆ దేవుడి గొప్పతనానికి ఇంత కన్నా ఉదాహరణలు అవసరం లేదు’’  పెద్ద ఎత్తున హాజరైన ముస్లింలు.. ఇన్షా అల్లాహ్‌... ఈద్‌ ముబారక్‌ ఇన్‌ అడ్వాన్స్‌ ... మీ అందరికీ అభినందనలు అంటూ సీఎం వైఎస్‌ జగన్‌ తన ప్రసంగాన్ని ముగించారు. అనంతరం మౌలానా ఇస్మాయిల్‌ ఆధ్వర్యంలో ఇఫ్తార్‌కీ దువా, ఉపవాస దీక్షలో పాల్గొన్నారు. ఈ సందర్భంగా పార్టీ ఎమ్మెల్యేలు, షేక్‌ అంజాద్‌బాష, మహ్మద్‌ ముస్తఫా, హఫీజ్‌ఖాన్, నవాజ్‌బాష సీఎం వైఎస్‌ జగన్‌కు ఖర్జూరం తినిపించారు. జగన్‌ కూడా వారికి ఖర్జూరం తినిపించారు. అనంతరం మగరీబ్‌కీ నమాజ్‌లో వైఎస్‌ జగన్‌ ముస్లిం సోదరులతో కలిసి పాల్గొన్నారు. ఈ కార్యక్రమానికి గుంటూరు పరిసర ప్రాంతాల నుంచి పెద్ద సంఖ్యలో ముస్లింలు హాజరయ్యారు.  జగన్‌కు రుణపడి ఉన్నా: ఇక్బాల్‌ ముఖ్యమంత్రి వైఎస్‌ జగన్‌మోహన్‌రెడ్డికి తాను సర్వదా రుణపడి ఉంటానని మాజీ పోలీసు అధికారి, హిందూపురం వైఎస్సార్‌ సీపీ ఎమ్మెల్యే అభ్యర్థి మహ్మద్‌ ఇక్బాల్‌ పేర్కొన్నారు. ఎన్నికల్లో తాను ఓటమి పాలైనప్పటికీ ఆదరించి ఎమ్మెల్సీని చేస్తామని సీఎం వైఎస్‌ జగన్‌ రంజాన్‌ మాసంలో ప్రకటించడం తనకు నిజంగా శుభవార్త అని తెలిపారు. వైఎస్‌ జగన్‌ సుదీర్ఘకాలం రాష్ట్రానికి మంచి పరిపాలన అందిస్తారని తనకు సంపూర్ణంగా విశ్వాసం ఉందని చెప్పారు. మున్సిపల్‌ కార్మికుల కష్టాలపై ముఖ్యమంత్రి ఆరా! ఇఫ్తార్‌ విందు ముగించుకుని బయటకు వస్తున్న ముఖ్యమంత్రి వైఎస్‌ జగన్‌మోహన్‌రెడ్డి అక్కడ కనిపించిన మున్సిపల్‌ కార్మికులను పిలిపించి మాట్లాడారు. వారి జీత భత్యాలపై ఆరా తీశారు. ‘జీతాలు ఏమేరకు పెరగాలని ఆశిస్తున్నారు’ అని అడిగారు. ముఖ్యమంత్రి ఇలా తమను పిలిచి మాట్లాడడంతో వారు ఉబ్బితబ్బిబ్బయ్యారు. పాదయాత్ర సమయంలోనూ పలుచోట్ల మున్సిపల్‌ కార్మికులు కలిసి తమ కష్టాలు ఏకరువు పెట్టారని సీఎం గుర్తుచేసుకున్నారు. వారి సమస్యల పరిష్కారానికి కృషిచేస్తానన్నారు. ఏపీ భవన్‌లో ఇఫ్తార్‌ విందు సాక్షి, న్యూఢిల్లీ: పవిత్ర రంజాన్‌ మాసాన్ని పురస్కరించుకొని సోమవారం ఢిల్లీలోని ఏపీ భవన్‌లో ముస్లిం సోదరులకు ఆంధ్రప్రదేశ్‌ ప్రభుత్వం తరఫున ఇఫ్తార్‌ విందు ఏర్పాటు చేశారు. ఈ విందుకు హస్తినలోని ముస్లిం ప్రముఖులతోపాటు పలు దేశాల భారత రాయబార కార్యాలయాల ప్రముఖులు పాల్గొన్నారు. ముందుగా సాయంత్రం రాష్ట్ర సర్వతోముఖాభివృద్ధికి దువా చేశారు. ఇఫ్తార్‌ అనంతరం మగ్రీబ్‌ నమాజ్‌ చేశారు. ఏపీ భవన్‌ రెసిడెంట్‌ కమీషనర్‌ ప్రవీణ్‌ ప్రకాష్‌ ఆధ్వర్యంలో అధికారులు, సిబ్బంది ఇఫ్తార్‌ విందు ఏర్పాట్లను ఘనంగా చేశారు. ఈ సందర్భంగా ప్రవీణ్‌ ప్రకాష్‌ మాట్లాడుతూ.. ముఖ్యమంత్రి వైఎస్‌ జగన్‌ మోహన్‌ రెడ్డి గుంటూరులో ఇఫ్తార్‌ విందు ఇస్తుండగా వారి ఆదేశాల మేరకు ఢిల్లీలో కూడా ఏర్పాటు చేసినట్లు తెలిపారు. సంప్రదాయ తెలుగు పండుగలతోపాటు ముస్లిం, క్రిస్టియన్స్‌ పండుగలను ఏటా ఏపీభవన్‌లో ఘనంగా నిర్వహిస్తున్నామని, దీనిలో భాగంగా రంజాన్‌ మాసం సందర్భంగా ఆంధ్రప్రదేశ్‌ ప్రభుత్వం తరపున ఇఫ్తార్‌ విందు ఇచ్చినట్టు చెప్పారు. సర్వ మానవ సౌభ్రాతృత్వానికి, శాంతి సామరస్యానికి రంజాన్‌ పండుగ ప్రతీక అని ఆయన పేర్కొన్నారు. ఇఫ్తార్‌ విందులో రిపబ్లిక్‌ ఆఫ్‌ పనామా దేశ రాయబారి ముహమ్మద్‌ తల్హా హాజీ, ఇస్లామిక్‌ రిపబ్లిక్‌ ఆఫ్‌ ఇరాన్‌ దేశ రాయబార కార్యాలయ ప్రతినిధి అసఘర్‌ ఒమిది, మారిషస్‌ హై కమిషనర్‌ సీవరాజ్‌ నుందులాల్, పలువురు సీనియర్‌ ఐఏఎస్‌లు, ఇస్లామిక్‌ సెంటర్‌ ప్రతినిధులు పాల్గొన్నారు. హజరత్‌ నిజాముద్దీన్‌ ఆలియా జాఫ్ఫాదా నషీన్‌ దర్గా ప్రముఖ ఇమామ్‌ సయెద్‌ జోహాబ్‌ నిజామి ఆధ్వర్యంలో మగ్రీబ్‌ నమాజ్‌ చేశారు.

సాక్షి, సిద్దిపేట: పేద ముస్లిం మైనార్టీలను ఆర్థికంగా బలోపేతం చేసేందుకు రాష్ట్ర ప్రభుత్వం అనేక పథకాలు ప్రవేశపెట్టి వారి సంక్షేమానికి పెద్దపీట వేస్తోందని మాజీ మంత్రి, సిద్దిపేట ఎమ్మెల్యే హరీశ్‌రావు అన్నారు. రంజాన్‌ మాసం పురస్కరించుకొని శుక్రవారం సిద్దిపేట మదీనా మసీద్‌లో ఏర్పాటు చేసిన ఇఫ్తార్‌ విందుకు ఎంపీ కొత్త ప్రభాకర్‌రెడ్డితో కలిసి ఆయన హాజరయ్యారు. ఈ సందర్భంగా ముస్లిం మత పెద్దలు ప్రత్యేక ప్రార్థనలు నిర్వహించారు. హరీశ్‌రావు మాట్లాడుతూ.. తెలంగాణ సంస్కృతి, సాంప్రదాయాల్లో అన్ని మతాలు, కులాలు ఇమిడి ఉన్నాయన్నారు. రాష్ట్రం ఏర్పడిన తర్వాత ప్రజలందరి అభివృద్ధే ధ్యేయంగా ముఖ్యమంత్రి కేసీఆర్‌ సంక్షేమ పథకాలు ప్రవేశపెడుతున్నారని అన్నారు. పేద ముస్లిం అమ్మాయిల పెళ్లికి పెద్దన్నగా షాదీ ముబారక్‌ పథకం ద్వారా ఆర్థిక సహాయం అందచేస్తున్న ముఖ్యమంత్రికి దేశవ్యాప్తంగా ప్రశంసలువచ్చాయని గుర్తు చేశారు. ముస్లింలకు హజ్‌యాత్ర ఎంతో ముఖ్యమైనదని, దీనిని గౌరవించిన ప్రభుత్వం ప్రతీ సంవత్సరం పలువురు ముస్లింలను హజ్‌ యాత్రకు పంపుతున్నట్లు పేర్కొన్నారు. అలాగే వారికోసం ప్రత్యేకమైన గురుకులాలు ఏర్పాటు చేశామని అన్నారు. మెదక్‌ ఎంపీ కొత్త ప్రభాకర్‌రెడ్డి మాట్లాడుతూ.. అందరి సహకారంతోనే మరోసారి ఎంపీగా ఎన్నికయ్యానని కృతజ్ఞతలు తెలిపారు. రాష్ట్ర ముఖ్యమంత్రి కేసీఆర్‌ పాలనలో అన్ని మతాలు సుభిక్షంగా ఉన్నాయని తెలిపారు. ఈ కార్యక్రమంలో ఎమ్మెల్సీ ఫారూఖ్‌ హుస్సేన్, సిద్దిపేట జిల్లా కలెక్టర్‌ కృష్ణ భాస్కర్, జేసీ పద్మాకర్‌ తదితరులు పాల్గొన్నారు.

ఒకసారి ప్రవక్త ముహమ్మద్‌ (స) ఏదో పని మీద బజార్‌ వెళుతున్నారు. అంతలో ఒక వ్యక్తి కనబడి, ‘ఓ ప్రవక్త (స) మీతో కాస్త పని ఉంది ఇక్కడే ఉండండి ఇప్పుడే వస్తాను’ అని వెళ్లాడు.‘‘అలాగే తొందరగా రా’’ అని ప్రవక్త అక్కడే నిలబడ్డారు.వెళ్ళిన వ్యక్తి ఆ విషయం మరచిపోయాడు.ఇచ్చిన మాట ప్రకారం ప్రవక్త (స) చాలా సేపు అలాగే నిరీక్షిస్తూ నిలబడ్డారు. చాలాసేపటికి మళ్ళీ ఆ వ్యక్తి అటుగా వచ్చి, ‘‘అయ్యో! మీరు ఇంకా ఇక్కడే నిలబడి ఉన్నారా? క్షమించండి. నేను ఈ విషయం మరిచే పోయాను’’‘‘ఇచ్చిన మాట తప్పితే శిక్ష ఏమిటో తెలుస్తే, నువ్వు కూడా ఎన్ని రోజులైనా ఇలాగే నిలబడి ఉంటావు తెలుసా?’’ అన్నారు. ‘‘మీరు చేసే అర్థం లేని ప్రమాణాలను గురించి అల్లాహ్‌ మిమ్మల్ని పట్టుకోడు. కాని మీరు బుద్ధిపూర్వకంగా చేసే ప్రమాణాలను గురించి ఆయన మిమ్మల్ని తప్పకుండా ప్రశ్నిస్తాడు. ప్రమాణ భంగానికి పరిహారం ఏమిటంటే మీరు మీ ఆలుబిడ్డలకు తినిపించే మామూలు భోజనం పదిమంది పేదలకు పెట్టడం లేదా వారికి కట్టుబట్టలు ఇవ్వడం లేదా ఒక బానిసను స్వతంత్రునిగా చెయ్యడం. ఈ స్తోమత లేనివారు మూడు రోజులపాటు ఉపవాసం ఉండాలి. మీరు ప్రమాణం చేసి భంగపరిస్తే, మీ ప్రమాణాలకు పరిహారం ఇది. మీరు మీ ప్రమాణాలను కాపాడుకోండి.’(ఖురాన్‌:5:89)మనిషి సంఘజీవి. సమాజంలో ఒకరిమీద మరొకరికి నమ్మకం లేకపోతే మనుషులు నమ్మకంతో సత్సంబంధాలు కలిగి జీవించడం కష్టం. అందుకే మాట ఇచ్చేముందు ఆలోచించి ఇవ్వాలని, వాగ్దానం చేసే  ముందు ‘ఇన్షాల్లహ్‌’ అంటే అల్లాహ్‌ తలిస్తే అని అనాలని ప్రవక్త (స) తెలిపారు.నిజమే కదా. ఏ క్షణాన మృత్యువు కౌగిట్లోకి ఒదిగిపోతామో మనకు తెలియదు. మాట ఇచ్చి, నెరవేర్చకుండా మరణిస్తే? రేపు పరలోకంలో పట్టుబడిపోతాం. జవాబు దారితనాన్ని పటిష్టం చేసుకోవడానికే కదా ఈ రమజాన్‌లో కఠోర ఉపవాస దీక్ష పాటిస్తున్నాం. కనుక వాగ్దానం చేసి మరచిపోకుండా ఉండేందుకు కూడా ప్రయత్నం చేయాలి. –షేక్‌ అబ్దుల్‌ బాసిత్‌

ఒక వ్యక్తి హజ్రత్‌ జునైద్‌ బొగ్దాదీ(ర)వద్దకువచ్చి: ‘‘అయ్యా.. నేనొక నిరుపేదను. పేదరికం కారణంగా ఎవరికీ ఏమీ సాయం చేయలేక పోతున్నాను. దీనికి కారణం ఏమిటీ?’ అని ప్రశ్నించాడు. దానికి జునైద్‌ బొగ్దాదీ, ‘‘నువ్వు దానధర్మాలు చేస్తావా? ఇతరుల పట్ల ఉదారబుద్ధితో వ్యవహరిస్తావా?’’ అని ఎదురు ప్రశ్నించారు. దానికతను చిన్నబుచ్చుకుని‘‘అయ్యా.. నేనే నిరుపేదను. ఆ కారణంగానే ఏమీ చేయలేక పోతున్నానన్నదే నా బాధ. దానధర్మాలు చేయడానికి, ఉదారంగా వ్యవహరించడానికి నా దగ్గరేముందని?’’ అన్నాడా వ్యక్తి.‘‘అదేమిటీ అలా అంటావు? నీ దగ్గర గొప్ప సంపద ఉంది. పరులతో పంచుకోగల నిధులున్నాయి నీ దగ్గర’ అన్నారు బొగ్దాదీ. ఆ వ్యక్తి ‘‘అయ్యా.. నేను చాలా చిన్నవాణ్ణి. నన్ను ఆట పట్టించకండి.’’ అన్నాడు.‘‘అయ్యయ్యో..! ఆట పట్టించడం కాదు. ఇది నిజం. నేను చెబుతా విను.’’ అంటూ..‘‘నీ దగ్గర ఉన్న గొప్ప సంపద నీ ముఖారవిందం. ఎంత పేదరికమైనా, ఎన్ని కష్టాలొచ్చినా ముఖంపై చిరునవ్వును చెదరనీయకు. ఇతరులను చిరునవ్వుతో పలకరించడం ఆరాధనతో సమానం అన్నారు మన ప్రవక్త. దీనికోసం ధనం అవసరం లేదు. ఇది పూర్తిగా ఉచితం. ఇది ఇతరులపై అద్భుతమైన ప్రభావాన్ని చూపుతుంది.రెండవది కళ్ళు. ఇవి లక్షలాదిమందిని ప్రభావితం చేస్తాయి.ఆ కళ్ళతో ఒక్కసారి అమ్మ వైపు ప్రేమతో చూస్తే ఒక హజ్‌ చేసినంత పుణ్యం లభిస్తుంది.’మూడవది నోరు. నోరు మంచిదైతే ఊరు మంచిదౌతుంది. ధనం లేకపోయినా పరవాలేదు. నోరు బాగుంటే చాలు. అంతేకాదు, నోటితో ఇతరులకు మంచిని బోధించవచ్చు. మంచిని చర్చించవచ్చు. దాన్ని విలువైనదిగా భావించు. ఆనందం, సానుకూలత వ్యాప్తి చెందుతాయి.నీ దగ్గరున్న మరో నిధి నీ మనసు. మంచి ఆలోచనలతో ఉదయాన్ని ప్రారంభిస్తే, ప్రశాంతత నీ సొంతమవుతుంది. మానసిక ప్రశాంతత ప్రాప్తమైతే నీ అంత ధనవంతుడు మరెవరూ ఉండరు. తద్వారా ఇతరుల ఆనందంలో, కష్టసుఖాల్లో పాలుపంచుకోవచ్చు. వారి జీవితాలను తాకొచ్చు.మరో గొప్ప సంపద నీ శరీరం. దాంతో ఇతరులకు అనేక మంచిపనులు చేయవచ్చు. అవసరమైన వారికి సహాయం అందించవచ్చు. సహాయం చెయ్యడానికి డబ్బులే అవసరం లేదు. మంచి మనసుంటే చాలు. ఇప్పుడు చెప్పు నువ్వు పేదవాడివా?’’ అన్నారు జునైద్‌ బొగ్దాదీ రహ్మతుల్లా అలై.ఈ మాటలు విన్న ఆ వ్యక్తి పరమానందభరితుడై, ఆత్మ సంతోషంతో, ఆత్మవిశ్వాసంతో పెద్దపెద్ద అంగలు వేసుకుంటూ ముందుకు సాగిపొయ్యాడు. – తస్లీమ్‌

‘‘సమాధిలో కన్ను పొడుచుకున్నా కానరాని కటిక చీకటి. హాజీసాబ్‌ కు ఏమీ అర్థంకాక తలపట్టుకుని కూర్చున్నారు. అంతలో ఒక దైవదూత వచ్చి ‘‘హాజీ సాబ్‌ మీరు చేసిన నమాజులు, సత్కార్యాలేమీ మీ మన్నింపుకోసం సరితూగడం లేదు.’’ అంది.‘‘నా జీవితంలో మూడు సార్లు హజ్‌ యాత్ర చేశాను గదా’’ అన్నాడు.‘‘అందులో రెండు హజ్‌లు మీ సొంత డబ్బుతో చేయలేదు. ఒక హజ్‌ మాత్రం లోపభూయిష్టంగా ఉంది’’ అంది దైవదూత. దైవదూత చెప్పిన ఈ మాటలకు హాజీసాబ్‌ లో ఆందోళన మరింత ఎక్కువయ్యింది. ‘‘మీ దగ్గర ఉపవాసాలేమైనా ఉన్నాయా?’’ అని దైవదూత ప్రశ్న.‘‘నా దగ్గర మొత్తం నలభైఏళ్ల పాటు పాటించిన ఉపవాసాలున్నాయి’’ అని ఎంతో ఆతృతతో చెప్పారు హాజీసాబ్‌. దైవదూతఒక్కో ఉపవాసాన్ని పరిశీలనగా చూసింది. 40 ఏళ్లపాటు పాటించిన ఉపవాసాల్లో ఒక్క ఉపవాసమూ లోపరహితంగా లేదని తేలింది.‘ఉపవాసంలో చాడీలు, పరనింద, అబద్ధం మానుకోలేకపోయానని. నలభైఏళ్లపాటు పాటించిన ఉపవాసాలన్నీ బూడిదలో పోసిన పన్నీరయ్యాయని’ అప్పటికే కుమిలిపోతున్నారు హాజీసాబ్‌.‘‘హాజీ సాబ్‌ మీకు శుభాకాంక్షలు..’’ అంటూ దైవదూత సంతోషంగా అభినందనలు అని చెప్పడంతో హాజీసాబ్‌కు ప్రాణం లేచి వచ్చినట్లయింది.‘‘నా దగ్గర ఉన్న రికార్డును తీక్షణంగా పరిశీలిస్తే మీ కర్మల చిట్టానుంచి బంగారపు ఉపవాసం ఒకటి కనబడింది’’ అంది దైవదూత. ‘‘బంగారపు ఉపవాసమా? నేనెప్పుడూ దాన్ని పాటించలేదే’’ అని హాజీసాబ్‌ దైవదూత వైపు ఏమీ అర్థం కానట్లు చూశారు.‘మీరు ఏటా రమజాన్‌లో ఒక నిరుపేద ఉపవాసికి ఇఫ్తార్‌ చేయించే వారు. అదే ఆ బంగారపు ఉపవాసం అనిపించుకుంది’’ అని దైవదూత సమాధానం ఇచ్చింది.ఎంతో ప్రచారంలో ఉన్న ఈ కథ కల్పితమే కావచ్చు. అబద్ధాలు, చాడీలు, దుర్భాషలు, చెడుచూపు, అవినీతి సొమ్ము సంపాదించడం లాంటి వాటిని మానుకోకుండా ఉపవాసాలు పాటించే వారికి ఆకలిదప్పులు తప్ప మరేమీ ప్రాప్తించవని ప్రవక్త (స) పరోక్షంగా హెచ్చరించారు.  – ముహమ్మద్‌ ముజాహిద్‌

ధైర్యవంతులే జీవితంలో ఏదో ఒకటి సాధిస్తారు. కాని ధైర్యంగా కార్యాలు తలపెట్టడమంటే ప్రమాదాలను ఆహ్వానించడమే! అయినప్పటికీ వెరపకుండా ధర్మానికి లోబడి ముందుకు వెళుతూ ఉంటే విజయం వెన్నంటి నడుస్తుంది. ఒక ఊరిలో ఓ నిరుపేద కూలీ ఉండేవాడు. జీవితంలో అనేక ఆటుపోట్లు ఎదుర్కొన్నాడు. అనేక ఎదురుదెబ్బలు తిన్నాడు. ఎన్నోకష్టాలు భరించాడు. అయినా ఏనాడూ కుంగిపోలేదు. ఎప్పుడూ సంతోషంగా, హాయిగా, నవ్వుతూ ఉండేవాడు. చూసేవాళ్లకు చాలా ఆశ్చర్యం వేసేది. ఇన్నిన్ని బాధలు భరిస్తూ కూడా ఇంత హాయిగా ఎలా ఉండగలుగుతున్నావూ.. అని అతడిని అడిగేవారు. దానికతను ‘‘అల్లాహ్‌ ఏ ప్రాణి పైనా దాని శక్తికి మించిన బాధ్యత మోపడు. మనం వద్దని అనుకున్నంత మాత్రాన రానున్నవి రాకమానతాయా? ఇదొక్కటి తెలుసుకుంటే చాలు’’ అని చిరునవ్వుతో సమాధానం చెప్పేవాడు.అందుకే, కష్టాల కరవాలం దూసుకొస్తున్నప్పుడు ధైర్యంగా, ఒడుపుగా దాని పిడిని పట్టుకోవాలంటారు పెద్దలు. అలా కాకుండా భయపడుతూ, బెదురుతూ పట్టుకోబోతే పిడివైపుకు బదులు మరో భాగం చేతికి దొరికి గాయాలు కావచ్చు. ప్రమాదం ఏర్పడవచ్చు. ధైర్యసాహసాలు కూడా సరైన విధంగా, యుక్తిగా ప్రయోగిస్తేనే చక్కని సాధనంగా ఉపకరిస్తాయి. కష్టాలకు, కన్నీళ్లకు బెదిరిపోకుండా నిలకడను, శక్తిని ప్రసాదిస్తాయి. భయం, పిరికితనం అన్నవి మనిషిని జీవచ్ఛవంగా మారుస్తాయి. ఉత్సాహం నీరుగారి పోతుంది. ధైర్యసాహసాలంటే మరేమిటోకాదు. మనిషి ధర్మానికి కట్టుబడి జీవించడం. తన విధి, బాధ్యతలను విలువైనవిగా గుర్తించడం. ఏదీ సాధించలేకపోవడానికి, ఏదో ఒకటి సాధించడానికి మధ్యన ఉన్న బేధమే ధైర్యం. మనిషికి అటువంటి తర్ఫీదునిచ్చి ధర్మానికి బద్ధునిగా చేస్తుంది రమజాన్‌  – మదీహా 

సాక్షి, హైదరాబాద్‌: ముస్లీంల పవిత్ర పండుగ రమజాన్‌ ను తెలుగు రాష్ట్రాలు ఘనంగా జరుపుకుంటున్నాయి. కులమతాలకు అతీతంగా సోదరభావంతో ఒకరికొకరు ఈద్‌ ముబారక్‌ అంటూ శుభాకాంక్షలు తెలుపుకుంటున్నారు. హైదరాబాద్‌లోని ముస్లీం ప్రార్థనల కొసం ఈద్గా, మసీదుల వద్ద జీహెచ్‌ఎంసీ ప్రత్యేక ఏర్పాట్లు చేసింది. నగర మేయర్‌ బొంతు రాంమోహన్‌, కమిషనర్‌ జనార్దన్‌రెడ్డిలు పండగ శుభాకాంక్షలు తెలిపారు. మాసబ్‌ ట్యాంక్‌లోని హాకీ గ్రౌండ్‌ వద్ద ముస్లీం సోదరులు నమాజ్‌ చేశారు. చిన్న పెద్ద తేడా లేకుండా ఒకరినొకరు ఆలింగనం చేసుకుంటూ శుభాకాంక్షలు తెలుపుకున్నారు. అక్కడ ఎలాంటి అవాంఛనీయ ఘటనలు జరగకుండా పోలీసులు భారీ బందోబస్తును ఏర్పాటు చేశారు. సనత్ నగర్ రాంగోపాల్ పేట్ నల్లగుట్ట మజీద్లో ఏర్పాటు చేసిన రంజాన్ వేడుకల్లో మంత్రి తలసాని శ్రీనివాస్ యాదవ్, సికింద్రబాద్‌ చిలకలగూడ ఈద్గాలో మంత్రి పద్మారావు పాల్గొని ప్రత్యేక ప్రార్థనలు చేశారు. బాన్సువాడలో వ్యవసాయ మంత్రి పోచారం శ్రీనివాసరెడ్డి ప్రత్యేక ప్రార్థనలు చేశారు. నల్గొండలోని ఈద్గా వద్ద ఏర్పాటు చేసిన వేడుకల్లో శాసనమండలి డిప్యూటీ స్పీకర్‌ నేతి విద్యాసాగర్‌, ఎంపీ గుత్తా సుఖేందర్‌ రెడ్డి , జిల్లా అధికారులు పాల్గొన్నారు. విజయవాడ: రమజాన్‌ పర్వదినాన్ని పురస్కరించుకొని ఇందిరాగాంధీ మున్సిపల్‌ స్టేడియంలో ఏర్పాటు చేసిని వేడుకల్లో ముఖ్యమంత్రి చంద్రబాబునాయుడు పాల్గొన్నారు. ఈ సందర్భంగా ముస్లీంలతో కలిసి ప్రత్యేక ప్రార్థనలు చేశారు. కాగా రామవరప్పాడు రోడ్డు నిర్మాణంలో తొలగించిన మసీదును ఎందుకు నిర్మించడం లేదంటూ చంద్రబాబును ముస్లీం సోదరులు ప్రశ్నించారు. దీంతో ఏడాది లోపు మసీదు నిర్మిస్తామని సీఎం వారికి హామీ ఇచ్చారు. కడప: రాయచోటి పట్టణంలోని ఈద్గాలో జరిగిన వేడుకల్లో వైఎస్సార్‌సీపీ ఎమ్మెల్యే శ్రీకాంత్‌ రెడ్డి, పార్టీ మైనారిటీ నాయకులు పాల్గొన్నారు. ఈ సందర్భంగా ముస్లీం సోదరులతో కలిసి ప్రత్యేక ప్రార్థనలు చేశారు.

న్యూఢిల్లీ : శుక్రవారం నెలవంక కనిపించడంతో శనివారం దేశమంతటా ఈద్‌ ఉల్‌ ఫితర్‌ (రమజాన్‌) పర్వదినాన్ని ఘనంగా జరుపుకుంటున్నారు. శుక్రవారం సాయంత్రం 7.35 గంటలకు నెలవంక కనిపించిందని జమా మసీదు షాహీ ఇమామ్‌ బుఖారీ ప్రకటించారు. దేశ ప్రజలకు రమాజన్‌ సందర్భంగా హృదయపూర్వక శుభాకాంక్షలు ఆయన తెలిపారు. ఈద్‌ ఉల్‌ ఫితర్‌తో పవిత్ర రమాజాన్‌/రంజాన్‌ మాసం ముగుస్తుంది. 30 రోజులపాటు ఉపవాసం ఉంటూ భక్తిశ్రద్ధలతో ఈ పర్వదినాన్ని జరుపుకునే ముస్లింలు రమజాన్‌ సందర్భంగా తమ బంధుమిత్రులు, ఆత్మీయులకు శుభాకాంక్షలు తెలుపుతారు. మసీదులు, ఈద్గాలు, నిర్దేశిత బహిరంగ ప్రదేశాల్లో ప్రార్థనలు నిర్వహిస్తారు. కానుకలు ఇచ్చిపుచ్చుకుంటూ నిరుపేదలకు సహాయం చేస్తారు. రమజాన్‌ పర్వదినం సందర్భంగా రాష్ట్రపతి రామ్‌నాథ్‌ కోవింద్‌, ప్రధానమంత్రి నరేంద్రమోదీ దేశ ప్రజలకు శుభాకాంక్షలు తెలిపారు. ‘ఈద్‌ ముబారక్‌. దేశ పౌరులందరికీ, ప్రత్యేకంగా దేశవిదేశాల్లోని మన ముస్లిం సోదర, సోదరిమణులకు పండుగ శుభాకాంక్షలు. ఈ సంతోషకరమైన సందర్భం మన కుటుంబాల్లో ఆనందాన్ని నింపాలని, మన సమాజం పరస్పర ప్రేమానురాగాలను పెంపొందించాలని కోరుకుంటున్నాను’ అని రాష్ట్రపతి ట్వీట్‌ చేశారు. ‘ఈద్‌ ముబారక్‌, ఈ పర్వదినం సమాజంలో మన ఐక్యతను, సామరస్యాన్ని మరింత పెంపొందించాలని ఆశిస్తున్నా’ అని ప్రధాని మోదీ ట్వీట్‌ చేశారు. అంతేకాకుండా దేశ ప్రజలకు రమజాన్‌ శుభాకాంక్షలు చెప్తూ.. ఆడియో ఫైల్‌ను షేర్‌ చేశారు. పలువురు జాతీయ రాజకీయల నాయకులు, పలువురు ప్రముఖులు కూడా రమజాన్‌ శుభాకాంక్షలుత తెలిపారు.

సాక్షి, కర్నూలు(కల్చరల్‌) : ఆకాశంలో రంజాన్‌ నెలవంక కనిపించింది..ముస్లిం కుటుంబాల్లో ఆనందం వెల్లివిరిసింది. నెల రోజులుగా సహేరీ, ఇఫ్తార్‌లతో సందడి సందడిగా సాగిన ఉపవాసాల ప్రతిఫలంగా ఈదుల్‌ ఫితర్‌ వచ్చేసింది. ముస్లిం కుటుంబాల నిండా ఆనందోత్సాహాల కెరటాలు ఉప్పొంగుతున్నాయి. నూతన దుస్తులు, అత్తర్ల ఘుమఘుమలు, దూద్‌ సేమియాలు, బిర్యానీల గుబాళింపులు, ఈద్‌ ముబారక్‌ల కరచాలనాలతో సందడి చేసుకునే పండుగ ముస్లిం ఇంటి గుమ్మాలలో ఆనంద తోరణాలు కడుతోంది. కర్నూలుతోపాటు నంద్యాల, ఆదోని, ఆత్మకూరు పట్టణాల్లో శుక్రవారం సాయంత్రం ముస్లింలు రంజాన్‌ నెలవంకను దర్శించారు. కర్నూలులోని ఉస్మానియా కళాశాల సమీపంలోని మైదానంలో రంజాన్‌ మాసపు చిట్టచివరి ఔట్‌ పేలింది. ఈదుల్‌ ఫితర్‌ పండుగకు సంబంధించిన సందేశాలు మసీదుల నుంచి ముస్లింలందరికీ మతపెద్దలు అందించారు.    సిద్ధమైన ఈద్గాలు...   నగరంలోని పాత ఈద్గా, కొత్త ఈద్గాల వద్ద ఈదుల్‌ ఫితర్‌ నమాజుకు సంబంధించిన ఏర్పాట్లు జరిగాయి. కొత్తబస్టాండ్‌ సమీపంలోని పాత ఈద్గాలో ఉదయం 9 గంటలకే నమాజు ప్రారంభమవుతుంది. సంతోష్‌నగర్‌లోని కొత్త ఈద్గాలోనూ ఈదుల్‌ ఫితర్‌ నమాజుకు సంబంధించిన ఏర్పాట్లు చేశారు. ఈద్గాల వద్ద ముస్లిం సోదరులను ఆహ్వానించే ఫ్లెక్సీలు వెలిశాయి. కొత్త ఈద్గాలో ఉదయం 10 గంటలకు ఈదుల్‌ ఫితర్‌ నమాజు ప్రారంభం కానున్నది. జొహరాపురం, గడ్డ ఈద్గాలలో ఉదయం 7 గంటలకే నమాజు జరగనున్నది.   పండుగ కోలాహలం...  రంజాన్‌ పండగ కోసం ముస్లిం కుటుంబాలు చేసే కొనుగోళ్లతో కర్నూలులోని పాతబస్తీ సందడి సందడిగా కనిపించింది. శుక్రవారం సాయంత్రం బండిమెట్ట, పూలబజార్, వన్‌టౌన్, చిన్నమార్కెట్, పెద్దమార్కెట్‌ ప్రాంతాలు రంజాన్‌ పండుగ వంటకాల కోసం అమ్మే దినుసుల దుకాణాల వద్ద కోలాహలం కనిపించింది. ముస్లిం కుటుంబాలు బారులు తీరి దుకాణాల వద్ద సేమియాలు, పండుగ సామగ్రి కొనుగోలు చేశారు. కిడ్స్‌ వరల్డ్‌ సమీపంలో, అబ్దుల్లాఖాన్‌ ఎస్టేట్‌లోని దుకాణాల వద్ద బారులు తీరి జనం దుస్తులు కొనుగోలు చేయడం కనిపించింది.   గుడ్‌బై టు హలీమ్‌...   కర్నూలు నగరంలో రంజాన్‌ మాసం మొదలైనప్పటినుంచి మే  16వ తేదీ నుంచి వివిధ ప్రాంతాల్లో హలీమ్‌ అమ్మకాల జోరు కొనసాగింది. ప్రత్యేక సేమియానాలు వేసి సాయంత్రాలు హలీమ్‌ సెంటర్ల వద్ద సందడి కనిపించేది. శనివారం సాయంత్రం చివరిసారిగా వన్‌టౌన్, గడియారం ఆసుపత్రి, యుకాన్‌ ప్లాజా, మౌర్యా ఇన్‌ సర్కిల్‌ తదితర ప్రాంతాల్లో ముస్లిం సోదరులు హలీమ్‌ సేవిస్తూ దానికి గుడ్‌బై చెప్పారు.   నమాజ్‌ వేళల్లో ట్రాఫిక్‌ నియంత్రణ...  నగరంలోని పాత ఈద్గాలో ఉదయం 9 గంటలకే నమాజు ప్రారంభం కానుండటంతో ఆనంద్‌ కాంప్లెక్స్, రాజ్‌విహార్‌ మీదుగా వెళ్లే బస్సులను దారి మళ్లించారు. నేషనల్‌ హైవే వైపుగా వాహనాలను నడిపే విధంగా జాగ్రత్తలు తీసుకున్నారు. ఈద్గాల వద్ద బందోబస్తు ఏర్పాట్లను నగర పోలీసులు పర్యవేక్షిస్తున్నారు. ఈద్గాలను పరిశుభ్రం చేసి మంచినీళ్ల ఏర్పాటును నగర మున్సిపల్‌ కార్పొరేషన్‌ వారు పర్యవేక్షిస్తున్నారు. ప్రశాంత వాతావరణంలో నగరంలో ఈదుల్‌ ఫితర్‌ పండుగ చేసుకునేందుకు పోలీసులు, పురపాలక శాఖ ఏర్పాట్లను చేస్తున్నారు.    

సాక్షి, హైదరాబాద్‌: రాష్ట్ర ప్రభుత్వం పవిత్ర రంజాన్‌ ఉపవాసాల సందర్భంగా ముస్లిం సోద రులకు శుక్రవారం దావత్‌–ఏ–ఇఫ్తార్‌ విందు ఇవ్వనుంది. ఉపవాస దీక్ష విరమించే సమయంలో రాష్ట్ర వ్యాప్తంగా 800 మసీదుల్లో సుమారు 4 లక్షల మందికి ఇఫ్తార్‌ ఇచ్చేందుకు ఏర్పాట్లు చేశారు. గ్రేటర్‌ హైదరాబాద్‌ పరిధిలో 400 మసీదులు, జిల్లాల పరిధిలో 400 మసీదుల్లో కమిటీల ఆధ్వర్యంలో ఇఫ్తార్‌ ఇవ్వనున్నారు. ప్రతి నియోజకవర్గానికి నాలుగు మసీదుల చొప్పున ప్రతీ మసీదు కమిటీ ఆధ్వర్యంలో కనీసం 500 మందికి తగ్గకుండా పండ్లు, బిర్యానీ, స్వీట్లు సిద్ధంగా ఉంచేలా చర్యలు చేపట్టారు. దీని కోసం మసీదుకు రూ.లక్ష చొప్పున సుమారు రూ.8 కోట్లను ఆన్‌లైన్‌ ద్వారా కమిటీలకు అందజేశారు. హైదరాబాద్‌లో మెగా ఇఫ్తార్‌.. ఎల్బీ స్టేడియంలో శుక్రవారం ముస్లిం సోదరు లకు మెగా ఇఫ్తార్‌ ఇచ్చేందుకు అధికారులు ఏర్పాట్లు చేశారు. ముఖ్యమంత్రి కె. చంద్ర శేఖర్‌రావు ముఖ్యఅతిథిగా హాజరయ్యే ఈ కార్యక్రమంలో మంత్రులు, ప్రజా ప్రతినిధులు, రాజకీయ నేతలతో పాటు వివిధ దేశాలకు చెందిన రాయబారులు కూడా పాల్గొన నున్నారు. ఇక్కడ దాదాపు 8 వేల మందికి ఇఫ్తార్‌ విందు ఏర్పాట్లు చేశారు. రంజాన్‌ కానుకగా కొత్త బట్టలు.. ప్రభుత్వం సుమారు 4 లక్షల నిరుపేద ముస్లిం కుటుంబాలకు రంజాన్‌ కానుకగా కొత్త బట్టలు పంపిణీ చేస్తోంది. 800 మసీదు కమిటీలకు వీటి పంపిణీ బాధ్యతలు అప్పగించింది. ప్రతీ మసీదు పరిధిలో 500 చొప్పున పేద కుటుంబాలను ఎంపిక చేసి మూడు జతల కొత్త బట్టలు ఉండే ప్యాకెట్లను అందజేస్తారు. ఒక్కొక్క ప్యాకెట్‌లో రూ.525 విలువగల కుర్తా, పైజామా, సల్వారు, కమీజు, చీర, బ్లౌజ్‌ ఉండనున్నాయి.

సాక్షి, సిద్దిపేట: ‘అల్లా దయతో స్వరాజ్యం సాధించుకున్నాం. అంతా కలసికట్టుగా పనిచేసి అభివృద్ధిలో కూడా రాష్ట్రాన్ని ముందు వరుసలో ఉంచాలి’అని రాష్ట్ర నీటి పారుదల శాఖ మంత్రి హరీశ్‌రావు అన్నారు. గురువారం సిద్దిపేటలోని కొండా భూదేవి గార్డెన్‌లో 3,000 మంది పేద ముస్లిం కుటుంబాలకు ఆయన రంజాన్‌ పండుగ బహుమతులు అందచేశారు. మంత్రి మాట్లాడుతూ కరువు, కాటకాలతో అల్లాడిన ఈ ప్రాంతాన్ని సస్యశ్యామలం చేయాలన్నదే ప్రభుత్వ ధ్యేయమన్నారు. ఇందుకోసం అల్లా దీవెన కూడా అవసరమని అన్నారు. ఇదే ఏడాది కాళేశ్వరం ప్రాజెక్టు పూర్తి చేసి తెలంగాణలోని బీళ్లను గోదావరి జలాలతో తడుపుతామని స్పష్టం చేశారు. టీఆర్‌ఎస్‌ ప్రభుత్వం మైనార్టీలకు అండగా ఉంటుందని, వారిని ఆర్థికంగా అభివృద్ధి చేసేందుకు వివిధ సంక్షేమ పథకాలను అమలు చేస్తోందని పేర్కొన్నారు. ముస్లిం యువతుల వివాహానికి రూ.1,00,116 ఆర్థిక సహాయం అందచేస్తున్న ఏకైక రాష్ట్రం తెలంగాణ అన్నారు. అలాగే మైనార్టీ గురుకులాలు ప్రారంభించి కేజీ నుంచి పీజీ వరకు ఉచిత విద్య అందిస్తున్నామన్నారు. ఈ సర్పంచ్‌లు అదృష్టవంతులు.. ప్రస్తుత సర్పంచ్‌లు అదృష్టవంతులని  హరీశ్‌ అన్నారు. ప్రస్తుత సర్పంచ్‌ల పదవీకాలంలోనే ప్రత్యేక రాష్ట్రం ఏర్పాటైందని, గ్రామాలకు సమీపంలో జిల్లా కేంద్రాలు కూడా వచ్చాయని చెప్పారు. గతంలో ఏ ప్రభుత్వం చేయని విధంగా టీఆర్‌ఎస్‌ ప్రభుత్వం పలు సంక్షేమ పథకాలను ప్రవేశపెట్టిందని, దీంతో సర్పంచ్‌లకు ప్రజలకు మరింత సేవచేసే అవకాశం వచ్చిందని అన్నారు. కార్యక్రమంలో ఎమ్మెల్సీ ఫారూఖ్‌ హుస్సేన్, సిద్దిపేట మున్సిపల్‌ చైర్మన్‌ రాజనర్సు తదితరులు  పాల్గొన్నారు. 

లక్నో: జవాన్ల చేతులు ప్రభుత్వం కట్టేయలేదని కేంద్ర హోంశాఖ మంత్రి రాజ్‌నాథ్‌సింగ్‌ స్పష్టం చేశారు. రంజాన్‌ సందర్భంగా జమ్మూ-కశ్మీర్‌లో కాల్పుల విరమణ ప్రకటించాలని కేంద్ర ప్రభుత్వంపై విమర్శలు వస్తున్న నేపథ్యంలో రాజ్‌నాథ్‌సింగ్‌ మాట్లాడుతూ...భద్రతా దళాలపై ఆంక్షలు విధించలేదని పేర్కొన్నారు. కేంద్ర హోం వ్యవహారాల మంత్రిత్వ శాఖ కొద్ది రోజుల క్రితం ఓ ప్రకటనలో జమ్మూ-కశ్మీరులో రంజాన్ సందర్భంగా ఉగ్రవాద వ్యతిరేక కార్యకలాపాల్లో భద్రతా దళాలు పాల్గొనబోవని తెలిపింది. అయితే భద్రతా దళాలపై దాడి జరిగినపుడు, పౌరుల ప్రాణాలను కాపాడేందుకు అవసరమైతే కాల్పులకు పాల్పడే హక్కు భద్రతా దళాలకు ఉందని పేర్కొంది. దీనిపై రాజ్‌నాథ్ సింగ్ మంగళవారం మాట్లాడుతూ ఇది కాల్పుల విరమణ కాదన్నారు. కేవలం కార్యకలాపాలను సస్పెండ్ చేసినట్లు చెప్పారు. ఉగ్రవాద కాల్పులకు పాల్పడితే భద్రతా దళాలు కాల్పులు ప్రారంభిస్తాయని చెప్పారు. తాము భద్రతా దళాల చేతులను కట్టేయలేదని, ఇటీవల ఉగ్రవాద దాడి జరిగినపుడు ఐదుగురు ఉగ్రవాదులను మట్టుబెట్టిన విషయాన్ని గుర్తు చేశారు. 

పవిత్ర రమజాన్‌ రాకడతో శుభాల పర్వం మొదలయింది. ముస్లిములు ఎంతో ఉత్సాహంతో ఉపవాసదీక్షలు ప్రారంభించారు. భక్తిశ్రధ్ధలతో పవిత్ర ఖురాన్‌ పారాయణం చేస్తున్నారు. మసీదులన్నీ భక్తులతో నిండిపోతున్నాయి. చిన్నపిల్లలు సైతం రోజా పాటించడానికి ఉబలాటపడుతున్నారు. దీనిక్కారణం ఏమిటి? అసలు ఉపవాసం ఎందుకుండాలి? దానివల్ల కలిగే ప్రయోజనం ఏమిటి? దీనికి స్వయంగా దైవమే, ‘ఉపవాసం వల్ల మీలో భయభక్తులు జనించే అవకాశం ఉంది’ అంటున్నాడు. భయభక్తులంటే ఏమిటి? మానవుడి మనస్సు దుష్కర్మలపట్ల ఏవగింపును,అసహ్యతను ప్రకటిస్తూ, సత్కర్మల పట్ల అధికంగా మొగ్గుచూపే ఒకానొక స్థితి. ఈ స్థితిని మానవ ఆంతర్యంలో జనింపజేయడమే ఉపవాసాల అసలు ఉద్దేశం. అందుకని ఉపవాసం పాటించేవారు బాహ్య పరిశుభ్రతతోపాటు, అంతఃశ్శుధ్ధిని కూడా పాటించాలి. ఉపవాసదీక్ష పాటిస్తున్నప్పటికీ అసత్యం పలకడం, అసత్యాన్ని ఆచరించడం మానుకోనివారు నిజానికి వ్రతం పాటిస్తున్నట్లుకాదు. కేవలం పస్తులుండటంతో సమానం. ముహమ్మద్‌ ప్రవక్త(స) ఇలాచెప్పారు: ’ఉపవాసదీక్ష పాటించే చాలామందికి, తమ ఉపవాసాలద్వారా, ఆకలిదప్పుల బాధతప్ప మరెలాంటి ప్రయోజనమూ చేకూరదు’.     అంటే, ఉపవాస లక్ష్యం మనిషిని ఆకలిదప్పులతో మాడ్చిఉంచడం ఎంతమాత్రం కాదు. దైవాదేశ పాలనలో మరింత రాటుదేలే విధంగా తీర్చిదిద్దడం. దైవవిధేయతా పరిధిని ఏమాత్రం అతిక్రమించకుండా, అన్నిరకాల చెడుల నుంచి సురక్షితంగా ఉంచడం. ఏడాదికొకసారి నెలరోజులపాటు నైతిక విలువలు, దైవాదేశపాలనను అభ్యాసం చేయిం చడం. నెల్లాళ్ళ శిక్షణ అనంతరం మిగతా పదకొండు నెలలకాలం దీని సత్ప్రభావం జీవితాల్లో ప్రసరించే విధంగా ఏర్పాట్లుచేయడం. పవిత్ర రమజాన్‌లో ఏవిధంగా అన్నిరకాల చెడులకు, అవలక్షణాలకు దూరంగా సత్కార్యాల్లో, దానధర్మాల్లో, దైవధ్యానంలో, సమాజ సంక్షేమ కార్యకలాపాల్లో పాల్గొంటారో, అలాగే మిగతా కాలమంతా సమాజంలో శాంతి, న్యాయం,ధర్మం పరిఢవిల్లుతూ జీవితం సాఫీగా గడిచిపోవాలని, పరలోక సాఫల్యం సిధ్ధించాలన్నది అసలు ధ్యేయం. ఈ రమజాన్‌లో అటువంటి తర్ఫీదు పొందే భాగ్యం ప్రతి ఒక్కరికీ దక్కాలని మనసారా కోరుకుందాం. (రమజాన్‌ పర్వదినం ప్రారంభం సందర్భంగా) – యండి.ఉస్మాన్‌ ఖాన్‌  

ఇంకొకరి ఆకలి తీర్చాలంటే మనకు ఆకలి తెలియాలి. మహ్మదీయులు ఈ మాసంలోఆకలితో ఉండేది.. ప్రేమను తీర్చేందుకే.ఇతరులకు మంచి చేసే సంకల్పంలోవారికి ఆకలి బాధే తెలియదు. అంత గొప్ప నియమం ఈ మాసం.అంత గొప్ప పుణ్యం ఈ ఆకలి.మహమ్మదీయుల దగ్గర ప్రపంచంనేర్చుకోవాల్సిన ధర్మం.. ఆకలి తీర్చే ఆకలి. రమజాను మాసం అనగానే ఉపవాసాలు గుర్తొస్తాయి. దేవుడిని ఆరాధించే మార్గాల్లో ఉపవాసం కూడా ఒకటి. ముస్లింలు ఉపవాసం ఎందుకు చేస్తారు? దేవుని వాక్కు అయిన దివ్య ఖుర్‌ఆన్‌ ఈ మాసంలోనేప్రవక్త ముహమ్మద్‌ ద్వారా మానవాళికి లభించింది. దానికి కృతజ్ఞతగా ఈ మాసంలో ముస్లిములు ఉపవాసాలు పాటిస్తారు. అదొక్కటే కాదు ఈ మాసం అంతా శిక్షణాకాలం లాంటిది. ఇస్లామీయ బోధనలు, ప్రమాణాల ప్రకారం ఈ నేల అంతా ముస్లింలు జీవించడానికి నిబద్ధులవుతారు. ఈ నెల రోజుల శిక్షణ తర్వాత మిగిలిన పదకొండు నెలల జీవితాన్ని క్రమబద్ధం చేస్తుందని ముస్లింల విశ్వాసం. ‘రమజాను నెలను పొందే వ్యక్తి ఆ నెల అంతా విధిగా ఉపవాసం ఉండాలి. వ్యాధిగ్రస్తులైన వారు లేదా ప్రయాణంలో ఉన్నవారు, ఆ ఉపవాస దినాలను వేరే దినాలలో పూర్తిచెయ్యాలి’ అని ఖురానులో ఉంది. అందుకే ముస్లింలు దేవుని పట్ల భయభక్తులతో ఉపవాసాలు ఉంటారు. ఎవరు చూడని ఏకాంతంలో ఉన్నప్పటికీ పచ్చి మంచినీరు కూడా తాగకుండా నిగ్రహాన్ని పాటిస్తారు. దేవుడు చూస్తున్నాడన్న స్పృహæ దీనికి కారణం. భారతదేశంలో అయితే దాదాపు పధ్నాలుగు గంటల పాటు, ఇంగ్ల్లండు వంటి దేశాల్లో అయితే దాదాపు పద్ధెనిమిది గంటల పాటు అన్నపానీయాలకు దూరంగా ఉండడం వల్ల ఎంత సంపన్నుడైనా ఆకలి బాధ, దప్పిక బాధేమిటో అనుభవపూర్వకంగా తెలుసుకుంటాడు. పేదల కష్టాలను అర్థం చేసుకుని ఆదుకుంటాడు. అందుకే మనిషి  కడుపు నిండా తినరాదని మూడింట ఒక వంతు కడుపు ఖాళీగా ఉండాలని ప్రవక్త బోధించారు.  పంచుకునే మాసం రంజాను మాసంలో అన్నపానీయాలకు దూరంగా ఉండడమే కాదు, తమ వద్ద ఉన్న ఆహారాన్ని ఇతరులతో పంచుకోవడం ఈ నెలలో చాలా సాధారణంగా కనబడే దృశ్యం. మసీదుల్లో లేదా ఇతర ప్రదేశాల్లో ఉపవాస విరమణ (ఇఫ్తార్‌) జరుగుతున్నప్పుడు చాలా మంది తమతో పాటు ఆహారపదార్థాలు తీసుకుని వస్తారు. కొందరు ఏమీ లేకుండానే వచ్చేస్తారు. తమ పక్కన ఉన్న వ్యక్తి పరిచయస్తుడా కాదా అన్నది ఎవరు పట్టించుకోరు. తన వద్ద ఆహారం ఉన్న వ్యక్తి ఎదుటి వ్యక్తి ముందు పెడతాడు. అవతలి వ్యక్తి కూడా నిస్సంకోచంగా తీసుకుని తింటాడు. తినే ప్రతి వ్యక్తి మిగిలిన వారికి సరిపోతుందో లేదో అన్న ధ్యాసతోనే తింటాడు. ఇలా పంచుకుని తినే అందమైన వాతావరణం రమజానులో చాలా సాధారణంగా కనబడుతుంది. ఇదే పద్ధతి సంవత్సరమంతా ఉంటే ఆకలితో బాధపడే వారెవ్వరు సమాజంలో ఉండరు. రమజాను మాసంలో అన్నదానాలు, ఇఫ్తార్‌ విందులు జరుగుతూనే ఉంటాయి. అందులో పేదలు, మధ్యతరగతి, సంపన్నులు అనే తేడా లేకుండా అందరూ పాల్గొనడం కూడా చూడవచ్చు. సామాజికంగా అందరం ఒక్కటే అనే అద్భుతమైన అందమైన భావన ఆచరణాత్మకంగా కనిపిస్తుంది. పేదరికానికి జవాబు పేదరిక నిర్మూలనకు ఇస్లామ్‌ ప్రతిపాదించే సూత్రం పంపిణీ. సమాజం వద్ద వ్యక్తుల వద్ద ఉన్న సంపదలో పేదసాదలకు కూడా హక్కు ఉందని ఇస్లాం చెబుతుంది. ఈ  సంపద పంపిణీకి ఇస్లామ్‌ ప్రతిపాదించే గొప్ప నియమం జకాత్‌. ఆ మాటకు అర్థం ‘తప్పనిసరిగా చేయవలసిన దానం’.  ‘తల్లిదండ్రులను, బంధువులను, అనాథలను, నిరుపేదలను ఆదరించాలి. ప్రజలను సహృదయంతో పలుకరించాలి. జకాత్‌ ఇవ్వాలి’ అని ఖురానులో ఉంది. ఆ జకాత్‌ ఎలా ఇవ్వాలి? ‘కేవలం పరుల మెప్పును పొందటానికి ఇవ్వకండి. దెప్పిపొడిచి, గ్రహీత మనస్సును గాయపరచి ఇవ్వకండి. అలా చేస్తే మీ దానం మట్టిలో కలిసినట్టే‘ అని ఖురాన్‌లో ఉంది.  రమజాను మాసంలో అందువల్లనే ముస్లిములు ఇతోధికంగా దానధర్మాలు చేస్తుంటారు. ఖర్చుకు ఏమాత్రం వెనుకాడరు. దేవుని ప్రసన్నతతో పాటు ఇవ్వడంలో ఉన్న ఆనందాన్ని కూడా అనుభవిస్తారు.  జకాత్‌ అంటే శుభ్రం చేయడం జకాత్‌ అంటే అసలు అర్థం శుభ్రం చేయడం. మనిషి తన సంపద నుంచి తాను శుభ్రపడాలి.  ఉన్నసంపదలో రెండున్నర శాతం జకాత్‌గా చెల్లించాలి. ఎవరికి చెల్లించాలన్నది కూడా నిర్ధిష్టంగా ఉంది. రమజాను మాసంలో తప్పనిసరిగా చేసే మరో దానం ఫిత్ర్‌. ఇది పండుగ ముందు రోజు చేస్తారు. ఒక కుటుంబంలో ఎంత మంది ఉంటే, తల ఒక్కింటికి రెండున్నర కిలోల ధాన్యం లేదా దాని సమాన వెల పేదలకు ఇవ్వాలి. పండుగ రోజున ఏ పేదసాదలు ఖాళీ కడుపుతో ఉండరాదని చేసిన ఏర్పాటిది. ఇవి కాకుండా ‘సదఖా’ రూపంలో స్వచ్ఛందంగా చేయవలసిన దానాలను కూడా ఇస్లాం ప్రోత్సహించింది. అందుకే రమజాను మాసంలో విస్తృతంగా  దానధర్మాలు చేయడం మనకు కనబడుతుంది. ఇండోనేషియా, మలేషియా, ఖతర్, సౌదీ అరేబియా, ఎమన్‌ దేశాల్లో ఏటా 38,088 కోట్ల రూపాయలు జకాత్‌ పేరుతో సమీకరణం అవుతున్నాయి. ఇవి ప్రపంచ దేశాలలో అవసరమైన మానవీయ సహాయానికి తోడ్పడుతున్నాయి. మతాలతో సంబంధం లేకుండా సంవత్సరానికి ఒకసారి ప్రపంచంలోని ప్రతి ఒక్కరు తమ సంపదలో రెండున్నర శాతం దానం చేయగలిగితే అసలు పేదరికం అనేదే ఉండదు. జకాత్‌లో గొప్ప ఆర్థిక సూత్రం ఇది.  దానం వల్ల కలిగే మేలు ప్రపంచవ్యాప్తంగా మానవీయ సహకారానికి జకాత్, సదకా నిధులను ఉపయోగిస్తున్నారు. ఆర్గనైజేషన్‌ ఆఫ్‌ ఇస్లామిక్‌ కోఆపరేషన్‌ దేశాలు 2013లో అంతర్జాతీయ మానవీయ సహకారానికి అందించిన మొత్తం 14,700 కోట్ల రూపాయలు.  ముస్లిం దేశాల్లో జకాత్‌ వసూలు ప్రభుత్వ పరంగా జరుగుతుంది.  ముస్లిమేతర దేశాల్లో స్వచ్ఛంద సంస్థలు జకాత్‌ వసూలు చేసి సేవాకార్యక్రమాలకు, విద్య, వైద్యం తదితర కార్యక్రమాలకు వినియోగించడం జరుగుతోంది. జకాత్‌ ఫౌండేషన్‌ భారతదేశంలో సివిల్‌ సర్వీసు కోచింగ్‌ వంటి సేవలు కూడా అందిస్తోంది. సిరియాలో అంతర్యుద్ధంలో దాదాపు రెండున్నర లక్షల మంది మరణించారు. టర్కీ తదితర దేశాలు అక్కడ భారీస్థాయిలో మానవీయ సహకారం జకాత్‌ నిధుల నుంచే అందిస్తున్నాయి. అనేక దేశాల్లో ప్రకృతి విపత్తులు, ఎబోలా వంటి వ్యాధులు ఇలా ఎన్నెన్నో కడగండ్లు. అంతర్జాతీయ మానవ సహకారానికి నిధులు సరిపోని పరిస్థితి. దానం చేయడం అంటే ఎదుటి వాడికి ఉపకారం చేయడం కాదు. అది పుచ్చుకునేవాడి హక్కు, ఇచ్చేవాడి బాధ్యత అన్న భావన ఇస్లామ్‌లో ముఖ్యమైనది.  – వాహెద్‌ 

సాక్షి, హైదరాబాద్‌ : ముస్లింలకు ఎంతో పవిత్రమైన రంజాన్‌ మాసం ప్రారంభమైన సందర్భంగా తెలుగు రాష్ట్రాల్లోని ముస్లింలకు వైఎస్సార్‌ కాంగ్రెస్‌ పార్టీ అధ్యక్షులు వైఎస్‌ జగన్‌ మోహన్‌ రెడ్డి శుభాకాంక్షలు తెలిపారు. నెల రోజులపాటు నియమ నిష్టలతో కఠిన ఉపవాస వ్రతం ఆచరించే ఈ పుణ్య పవిత్ర మాసాన్ని ముస్లిం సోదర సోదరీమణులంతా జరుపుకుంటారని, వారికి అల్లాహ్‌ దీవెనలు లభించాలని ఆయన ఆకాంక్షించారు. మహనీయుడైన మహ్మద్‌ ప్రవక్త ద్వారా దివ్య ఖురాన్‌ ఆవిర్భవించినది రంజాన్‌ మాసంలోనే కావడంతో ముస్లింలు ఈ నెలకు అత్యంత ప్రాముఖ్యతను ఇస్తారని పేర్కొన్నారు. రంజాన్‌ అంటే ఉపవాస దీక్ష మాత్రమే కాదని, మనిషిలోని చెడు భావనల్ని, అధర్మాన్ని, ద్వేషాన్ని రూపుమాపే గొప్ప పండుగ రంజాన్‌ అని ఆయన అన్నారు. Greetings on the beginning of the Holy month of #Ramzan. — YS Jagan Mohan Reddy (@ysjagan) 17 May 2018

సాక్షి సిటీబ్యూరో: ఈసారి రంజాన్‌ మాసం ముందొచ్చినట్టు అనిపిస్తుంది కదూ! అవును దీనికి ఓ కారణముంది. ఇంగ్లిష్‌ క్యాలెండర్‌తో పోలిస్తే... ఇస్లామిక్‌ క్యాలెండర్‌లో రోజుల సంఖ్య తక్కువ. అందుకే రంజాన్‌ ముందుగానే మొదలవుతుంది. గతేడాది రంజాన్‌ మే 27న ప్రారంభమైంది. ఈసారి ఈ నెల 16న నెలవంక దర్శనమిస్తే... 17న రంజాన్‌ మొదలవుతుంది. అంటే 12 రోజులు ముందుగానే రంజాన్‌ ప్రారంభమవుతుందన్న మాట. ఒక్క రంజాన్‌ మాసమే కాదు... ఇస్లామిక్‌ క్యాలెండర్‌లో అన్ని మాసాలు ముందుగానే వస్తాయి. ఎందుకిలా అంటారా? అయితే చరిత్ర తెలుసుకోవాల్సిందే. మహ్మద్‌ ప్రవక్త మక్కా నుంచి మదీనా నగరానికి వలస (హిజ్రత్‌) వెళ్తారు. ఇది ఇస్లామిక్‌ చరిత్రలో ఓ ఘట్టం. మదీనాకు చేరుకున్న నాటి నుంచే హిజ్రీ క్యాలెండర్‌ ప్రారంభమైంది. ప్రస్తుతం హిజ్రీ 1439వ సంవత్సరం నడుస్తోంది. ఆంగ్ల సంవత్సరాదిలో ఉన్నట్టే... హిజ్రీ క్యాలెండర్‌లోనూ 12 నెలలు ఉంటాయి. మొదటి నెల మొహరంతో మొదలై వరుసగా సఫర్, రబ్బీల్‌ఆవ్వల్, రబీవుల్‌సానీ, జమాదుల్‌ఆవ్వల్, జమాదుస్సానీ, రజ్జబ్, షాబాన్, రంజాన్, షవ్వాల్, జీఖద్, జిలహజ్‌ ఉంటాయి. ఇందులో రంజాన్‌ తొమ్మిదో నెల. ప్రతి నెలలో తక్కువే...   ఇంగ్లిష్‌ క్యాలెండర్‌లో ఒక్క ఫిబ్రవరిని మినహాయిస్తే మిగతా నెలల్లో కొన్నింటిలో 30 రోజులు, మరికొన్నింటిలో 31 రోజులు ఉంటాయి. కానీ ఇస్లామిక్‌ క్యాలెండర్‌లో అలా ఉండదు. కొన్ని నెలల్లో 29 రోజులు , మరికొన్నింటిలో 30 రోజులు ఉంటాయి. ఏ నెలలోనూ 31 రోజులు ఉండవు. అంటే ఇంగ్లిష్‌ క్యాలెండర్‌తో పోలిస్తే ఇస్లామిక్‌ క్యాలెండర్‌లో ఏడాదికి 10–12 రోజులు తగ్గిపోతాయి. అందుకే రంజాన్‌ మాసం 12రోజులు ముందుగానే వస్తోంది. నెలవంక ఆధారంగా...   ఆంగ్ల సంవత్సరాది ప్రకారం అర్ధరాత్రి 12గంటలు దాటిన తర్వాత మరుసటి రోజు ప్రారంభమవుతుంది. కానీ ఇస్లామిక్‌లో అలా కాదు. సూర్యాస్తమయంతో మరుసటి రోజు మొదలవుతుంది. నెలలు కూడా అంతే... నెలవంక చూసిన తర్వాత మరుసటి నెల మొదలవుతుంది. అంటే సాయంత్రం వేళ నెలవంక దర్శమిచ్చిన మరుక్షణం నుంచే ఇస్లామిక్‌ నెల ప్రారంభమవుతుంది. సాయంత్రం వేళ నెలవంక దర్శనమిచ్చాకే రంజాన్‌ మాసం ప్రారంభమైందంటూ మసీదుల్లో సైరన్‌ మోగిస్తారు. 

సాక్షి, హైదరాబాద్‌: రంజాన్‌ను పురస్కరించుకుని మసీదుల మరమ్మతుకు రూ.5 కోట్లు కేటాయించినట్లు ఉపముఖ్యమంత్రి మహమూద్‌ అలీ వెల్లడించారు. శుక్రవారం ఆయన సచివాలయంలో హోంమంత్రి నాయిని నర్సింహారెడ్డి, మైనారిటీ సంక్షేమ శాఖ సలహాదారు ఎ.కె.ఖాన్, వక్ఫ్‌ బోర్డ్‌ చైర్మన్‌ మహ్మద్‌ సలీం, నగర శాసనసభ్యులు, వివిధ శాఖల అధికారులతో కలసి రంజాన్‌ ఏర్పాట్లను సమీక్షించారు. అనంతరం మహమూద్‌ అలీ మాట్లాడుతూ వచ్చే నెలలో రంజాన్‌ పురస్కరించుకొని రాష్ట్రవ్యాప్తంగా సుమారు నాలుగు లక్షల పేద ముస్లి కుటుంబాలకు దుస్తులు పంపిణీ చేయనున్నట్లు చెప్పారు. ప్రజలకు ఇబ్బందులు ఎదురుకాకుండా పోలీసు యంత్రాంగం 24 గంటలు పనిచేస్తుందని నాయిని అన్నారు. పండుగ సందర్భంగా ప్రభుత్వ కార్యాలయాల్లో పని చేసే ముస్లిం సోదరులు గంట ముందుగా ఆఫీసు విడిచి వెళ్లడానికి అనుమతించేందుకు చర్యలు తీసుకుంటున్నామని చెప్పారు.


 లక్నో: రోడ్లపై నమాజ్‌ చేయొద్దని ముస్లింలను ఉత్తరప్రదేశ్‌ ముఖ్యమంత్రి యోగి ఆదిత్యనాథ్ కోరారు. రంజాన్‌ పర్వదినం రోజున రోడ్లపైకి వచ్చి నమాజ్‌ చేయడం సరి కాదని యోగి వివాదాస్పద వ్యాఖ్యలు చేశారు. ముస్లింలను తాను ఇలా అడగకపోతే ఉత్తరప్రదేశ్‌ పోలీసు స్టేషన్లలో శ్రీ కృష్ణ జన్మాష్టమి వేడుకలను జరుపుకోవడం ఆపేయాలని తాను కోరలేనని అన్నారు.
 
 గత ప్రభుత్వం శ్రీ కృష్ణ జన్మాష్టమి వేడుకలను సరిగా నిర్వహించలేదని చెప్పుకొచ్చిన ఆయన.. ఇక నుంచి అంగరంగ వైభవంగా పండుగను జరుపుకుందామని అన్నారు. శాంతి భద్రతలకు విఘాతం కలుగకుండా దేశంలోని ప్రతి ఒక్కరూ తమ పండుగల రోజుల ఆరాధ్య దైవాలను పూజించుకోవచ్చని యోగి పేర్కొన్నారు. పోలీసు వ్యవస్ధలో మార్పు తెచ్చేందుకు కీర్తనలు, ప్రార్థనలు ఉపయోగపడతాయని యోగి వ్యాఖ్యానించినట్లు జాతీయ మీడియా ఓ కథనం ప్రచురించింది.


 ♦ రంజాన్‌ పండుగ రోజు విషాదం
 ♦ శరీరంపై వంద గాట్లు.. మేడ్చల్‌ జిల్లాలో ఘటన
 హైదరాబాద్‌: ఆనందంగా గడపాల్సిన రంజాన్‌ పండుగ రోజు ఆ ఇంట విషాదం నెలకొంది. మజీద్‌ బయట ఆడుకుం టున్న చిన్నారిని వీధికుక్క లు బలితీసుకున్నాయి. కళ్లెదుటే కన్నకొడుకు కానరాని లోకాలకు వెళ్లడంతో ఆ తల్లిదండ్రులు గుండెలవిసేలా విలపించారు. ఈ విషాదకర ఘటన మేడ్చల్‌ జిల్లా శామీర్‌పేట్‌ మండలం మూడు చింతలపల్లి కాశవాడలో సోమవారం చోటు చేసుకుంది. మూడు చింతలపల్లి కాశవాడకు చెందిన ఎం.డి.ఇమామ్, ఖాదర్‌బీ దంపతులకు హసీనా, ఎండీ ఫారుక్‌(7), ఎండీ హస్మీ సంతానం. రంజాన్‌ పండుగ సందర్భంగా సోమవారం ఉదయం వీరు స్థానిక మజీద్‌కు వచ్చారు. అందరూ నమాజ్‌ చేస్తుండగా ఫారూక్‌ మజీద్‌ సమీపంలో ఆడుకుంటున్నాడు.
 అదే సమయంలో పోట్లాడుకుంటూ వచ్చిన ఆరు వీధి కుక్కలు ఒక్కసారిగా ఫారూక్‌పై దాడి చేశాయి. బాలుడి తల, మెడ, వీపు, కడుపు, కాళ్లు, చేతులు ఇలా శరీరమంతా గాయాలై తీవ్ర రక్త స్రావమైంది. ‘అల్లా ,అబ్బా, అమ్మీ ముజుకో బచావో’అంటూ ఆ చిన్నారి మొత్తుకుంటున్నా కుక్కలు విడిచి పెట్టలేదు. కేకలు విన్న తండ్రి ఇమామ్‌ వెంటనే చిన్నారి వద్దకు పరుగెత్తుకుంటూ వచ్చారు. అప్పటికే తీవ్రంగా కరవడంతో బాలుడి పరిస్థితి విషమించింది. అపస్మారక స్థితికి చేరుకున్న ఫారుక్‌ను అంబులెన్స్‌లో మొదట నగరంలోని నల్లకుంట ఫీవర్‌ ఆస్పత్రికి తరలించారు. బాలుడి శరీరంపై వంద కాట్లు ఉన్నాయి. పరిస్థితి విష మంగా ఉందని వైద్యులు చెప్పడంతో నీలోఫర్‌ ఆస్పత్రికి తరలించారు. చికిత్స పొం దుతూ ఫారూక్‌ మృతి చెందాడు.
 ఫారూక్‌ మృతిని తట్టుకోలేక కుటుం బీకులు, బంధువులు కన్నీరుమున్నీరుగా విలపించారు. దీంతో ఆస్పత్రిలో విషా దఛాయలు అలుముకున్నాయి. ప్రథమ చికిత్స అనంతరం మెరుగైన వైద్యం కో సం బాలుణ్ని అంబులెన్స్‌లో నల్లకుంట ఫీవర్‌ ఆస్పత్రికి తీసుకు వచ్చారు. అక్క డి వైద్యులు బాలుని శరీరంపై ఉన్న సుమారు వందకుపైగా కుక్కగాటు గాయా లను శుభ్రం చేసి రిగ్‌ ఇంజక్షన్‌ ఇచ్చారు. నిలోఫర్‌ ఆస్పత్రికి తరలించారు.


 హైదరాబాద్‌: రంజాన్‌ను పురస్కరించుకొని ప్రత్యేక వంటకాలు వడ్డిస్తారని ఆశపడ్డ చంచల్‌గూడ ఖైదీలకు నిరాశే మిగిలింది. సాధారణ భోజనంతో పాటు ఒక లడ్డూ మాత్రమే జైలు అధికారులు వడ్డించడంతో వారంతా ఆవేదన వ్యక్తంచేశారు. చంచల్‌ గూడ పురుషుల జైల్లో దాదాపు 350 మంది ముస్లిం ఖైదీలు నెల పాటు రంజాన్‌ ఉపవాస దీక్షలు పాటించారు.
 ప్రార్థనలకు ప్రత్యేకంగా జైల్లో ఓ బ్యారెక్‌ కూడా అధికారులు కేటా యించారు. అయితే రంజాన్‌ రోజు ప్రత్యేక వంటకాలు వడ్డిస్తారని ఊహించిన ఖైదీలకు నిరాశే ఎదురైంది. ఖైదీల సంక్షేమం, సంస్కరణలు కోసం కృషి చేస్తున్నామని ప్రచారం చేసుకునే ఉన్నతాధికారులకు పం డుగపూట ఖైదీలకు విందు భోజనం వడ్డిం చాలన్న ఆలోచన రాకపోవడం దురదృష్టక రమని పలువురు అభిప్రాయపడుతున్నారు.


 జిల్లా వ్యాప్తంగా సోమవారం మతసామరస్యం వెల్లివిరిసింది. రంజాన్‌ను పురస్కరించుకుని కులమతాలకు అతీతంగా అందరిలోనూ ఆనందోత్సాహాలు వ్యక్తమయ్యాయి. నెల రోజుల పాటు కఠిన ఉపవాస దీక్షలతో నియమాన్ని ఆచరించిన ముస్లింలు.. ఆదివారం రాత్రి నెలవంక దర్శనంతో పులకించిపోయారు. సోమవారం ఉదయమే కుటుంబసభ్యులు, బంధువులు, మిత్రులకు రంజాన్‌ శుభాకాంక్షలు తెలుపుతూ.. ప్రత్యేక ప్రార్థనల కోసం ఈద్గా మైదానాలకు చేరుకున్నారు. జిల్లా కేంద్రం అనంతపురంతో పాటు కదిరి, హిందూపురం, తాడిపత్రి, ధర్మవరం, గుంతకల్లు, ధర్మవరం తదితర ప్రాంతాల్లో భారీ సంఖ్యలో ముస్లింలు సామూహిక ప్రార్థనల్లో పాల్గొన్నారు. అనంతరం ఒకరినొకరు ఆలింగనం చేసుకుని ఈద్‌ ముబారక్‌ తెలుపుకున్నారు.
 - సాక్షి నెట్‌వర్క్‌, అనంతపురం
 
  


 హైదరాబాద్‌: రంజాన్‌ పండుగను పురస్కరించుకుని తెలుగు రాష్ట్రాల్లోని ముస్లింలకు వైఎస్సార్‌ కాంగ్రెస్‌ పార్టీ అధ్యక్షుడు వైఎస్‌ జగన్‌మోహన్‌రెడ్డి ఈద్‌ ముబారక్‌ తెలిపారు. రంజాన్‌ పండుగ సామరస్యానికి, సుహృద్భా వానికి, సర్వమానవ సమానత్వానికి, కరుణకు, దాతృత్వానికి ప్రతీక అని, ప్రజలందరికీ సుఖసంతోషాలు కలగాలని ఆయన ఆకాంక్షించారు. మనిషిలోని చెడు భావనలను, అధర్మం, ద్వేషాన్ని రూపుమాపే గొప్ప పండుగ అని జగన్‌ ఆదివారం ఒక ప్రకటనలో పేర్కొన్నారు.
 
 Pleased to have received these Ramzan wishes from the little ones. Thank you. Wishing each and everyone a very happy Ramzan. Eid Mubarak. pic.twitter.com/ofZAeux6RS
 — YS Jagan Mohan Reddy (@ysjagan) 26 June 2017


 ► రంజాన్‌ శుభాకాంక్షలు తెలిపిన గవర్నర్, సీఎం, ఏపీ సీఎం
 హైదరాబాద్‌: ముస్లిం సోదరులు పవిత్రమైన రంజాన్‌ (ఈద్‌–ఉల్‌– ఫితర్‌) పండుగను సోమవారం జరు పుకోనున్నారు. ఆదివారం రాత్రి నెల వంక దర్శనమిచ్చినట్లు హైదరాబాద్‌ రూహియత్‌–ఏ–హిలాల్‌ కమిటీ అధ్యక్షుడు మౌలానా ఖుబూల్‌ పాషా సుత్తారి ప్రకటించారు. అలాగే తెలంగాణ, ఆంధ్రప్రదేశ్‌ రాష్ట్రాల ముస్లిం సోదరులు సోమవారం ఈద్‌–ఉల్‌–ఫితర్‌ పండుగను జరుపుకోవాలని ఆయన పిలుపునిచ్చారు. దీంతో రంజాన్‌ మాసం దీక్షలు ముగిసినట్లయింది.
 రంజాన్‌ సందర్భంగా ముస్లిం సోదరులకు గవర్నర్‌ ఈఎస్‌ఎల్‌.నరసింహన్, ముఖ్యమంత్రి కె.చంద్రశేఖర్‌రావు, ఏపీ సీఎం చంద్ర బాబు, ఉప ముఖ్యమంత్రి మహమూద్‌ అలీ శుభాకాంక్షలు తెలిపారు. రంజాన్‌ పర్వదినాన్ని ఆనందోత్సాహలతో జరుపుకోవాలని వారు ఆకాంక్షించారు.


 న్యూఢిల్లీ : ఈద్‌ ఉల్‌ ఫితర్‌ (రంజాన్‌) పండు గను సోమవారం జరుపుకోవాలని ఢిల్లీ జుమా మసీ దు షాహీ ఇమామ్‌ సయ్యద్‌ అహ్మద్‌ బుఖారీ ప్రకటించారు. బిహార్, పశ్చిమ బెంగాల్, అస్సాం, ఉత్తరప్రదేశ్‌ రాష్ట్రాల్లో ఆదివారం నెలవంక కనిపించిందని తెలిపారు. రంజాన్‌ సందర్భంగా రాష్ట్రపతి ప్రణబ్‌ముఖర్జీ ప్రజలకు శుభా కాంక్షలు తెలిపారు. ప్రజలందరూ సుఖసంతోషాలతో, శాంతి సౌభాగ్యాలతో వర్ధిల్లాలని ఆకాంక్షించారు.
 దేశ ప్రజలకు శుభాకాంక్షలు తెలిపిన ఉపరాష్ట్రపతి హమీద్‌ అన్సారీ మాట్లాడుతూ..రంజాన్‌ పండుగ ప్రజల్లో సోదరభావాన్ని పెంపొందిస్తుందని తెలిపారు. లోక్‌సభ స్పీకర్‌ సుమిత్రా మహాజన్‌ ప్రజలకు రంజాన్‌ శుభాకాంక్షలు తెలిపారు. ఈద్‌ ఉల్‌ ఫితర్‌ పండుగ క్షమాగుణం, త్యా గం, దానంచేయడం లాంటి సుగుణాలను బోధిస్తుందని పేర్కొన్నారు. దేశంలో శాంతి, ప్రజల మధ్య ఐక్యత కోసం ప్రార్థనలు చేయాలని ఆమె కోరారు.


 కర్నూలు(అర్బన్‌): ప్రతినెల చివరి సోమవారం జరుగుతున్న ఎస్సీ, ఎస్టీ స్పెషల్‌ గ్రీవెన్స్‌ను ఈనెల 26న రంజాన్‌ పండుగ సందర్భంగా రద్దు చేసినట్లు జిల్లా సాంఘిక సంక్షేమ శాఖ అధికారి ప్రకాష్‌ రాజ్‌ శనివారం ఒక ప్రకటనలో పేర్కొన్నారు. జూలై నెల చివరి సోమవారం యథావిధిగా ఈ గ్రీవెన్స్‌ను నిర్వహిస్తున్నామని తెలిపారు. ఈ విషయాన్ని జిల్లాలోని వివిద దళిత సంఘాల నాయకులు, ప్రజలు, అధికారులు గమనించాలని ఆయన కోరారు. 
  


 కర్నూలు (ఓల్డ్‌సిటీ): నగరంలోని నాలుగు ఈద్గాలలో ఈదుల్‌ఫిత్ర్‌  నమాజు వేళలను ఆయా ఈద్గాల నిర్వాహకులు  ప్రకటించారు. పాత ఈద్గా ముతవల్లి అయిన ప్రభుత్వ ఖాజీ సలీంబాషా ఖాద్రి మాట్లాడుతూ నెలవంక కనిపించిన మరుసటి రోజున రంజాన్‌ పండుగ నిర్వహిస్తామన్నారు. ఈద్గాకు వెళ్లేటప్పుడు అల్లాహుఅక్బర్‌ అల్లాహుఅక్బర్, అల్లాహు అక్బర్‌ అల్లాహుఅక్బర్‌ లాఇలాహ ఇల్లల్లాహు అల్లాహుఅక్బర్‌ అల్లాహుఅక్బర్‌ వలిల్లా అల్‌హంద్‌ అని పఠించాలన్నారు. ఈద్గాకు వెళ్లే సమయంలో ఒక దారి, తిరిగి వచ్చే సమయంలో మరోదారిలో రావాలని మసీదుల్లో ప్రకటనలు జారీ చేశారు.
  
   ఈద్గా                నమాజు వేళలు 
 గడ్డా ఈద్గా              -ఉదయం 7.00 గంటలు
 జోహరాపురం ఈద్గా  ఉదయం 7.15 గంటలు
 పాత ఈద్గా              ఉదయం 9.00 గంటలు
 కొత్త ఈద్గా               ఉదయం 10.00 గంటలు
  


 కర్నూలు(అగ్రికల్చర్‌): ఈ నెల 26వ తేదీ సోమవారం  రంజాన్‌ పర్వదినం ఉన్నందున ఆ రోజు నిర్వహించాల్సిన డయల్‌ యువర్‌ కలెక్టర్, మీ కోసం( ప్రజాదర్బార్‌)కార్యక్రమాలను   రద్దు చేసినట్లు జిల్లా కలెక్టర్‌ సత్యనారాయణ తెలిపారు. ఆదే విధంగా సాయంత్రం జరిగే ఎస్సీ, ఎస్టీ ప్రత్యేక గ్రీవెన్స్‌ను కూడా రద్దుచేశామన్నారు. ఈ విషయాన్ని జిల్లా ప్రజలు గమనించాలని కలెక్టర్‌ శనివారం ప్రకటనలో తెలిపారు. 
  


 రంజాన్‌ సమీపిస్తోంది. పాతబస్తీలో సందడి పెరిగింది. గాజుల కొనుగోళ్లతో లాడ్‌ బజార్‌ గలగలలాడుతోంది. చిన్నా..పెద్దా షాపింగ్‌ సందడితో గల్లీలన్నీ కిక్కిరిసిపోతున్నాయి. కొత్త దుస్తులు, గాజులు, చెప్పులు, వాచీలు, హ్యాండ్‌బ్యాగులు, అలంకరణ వస్తువులకు గిరాకీ పెరిగింది.
 
 షీర్‌కుర్మాకు ఉపయోగించే సేమియాలు పెద్ద ఎత్తున విక్రయిస్తున్నారు. ఇకరంజాన్‌ మాసంలో చివరిది కావడంతో శుక్రవారం చార్మినార్, మక్కామసీద్, మదీనా తదితర ప్రాంతాల్లో భారీ ఎత్తున ముస్లింలు సామూహిక ప్రార్థనల్లో పాల్గొన్నారు.


 హైదరాబాద్‌: రంజాన్‌ మాసంలో వచ్చే సుమారు వెయ్యి కోట్ల రూపాయల జకాత్‌ ధనాన్ని ముస్లింల విద్య, సంక్షేమం కోసం ఖర్చు చేస్తే నగరంలో పేదరికం అంతమౌతుందని మాజీ డీజీపీ, మైనార్టీ సంక్షేమ శాఖ ప్రభుత్వ సలహదారులు అబ్దుల్‌ ఖయ్యూం ఖాన్‌ అభిప్రాయపడ్డారు. సోమవారం హైదరాబాద్‌ జకాత్‌ అండ్‌ చారిటెబుల్‌ ట్రస్టు  ఆధ్వర్యంలో బంజారహిల్స్‌లోని సంస్థ కార్యాలయంలో వార్షిక సమావేశం నిర్వహించారు.
 
 ఈ కార్యక్రమంలో  25 ఏళ్ల పూర్తి చేసుకున్న సందర్భంగా ట్రస్టు కార్యకలపాల బ్రోచర్‌ను ఆవిష్కరించారు. ఈ కార్యక్రమంలో ముఖ్యఅథితిగా  ఏకే ఖాన్‌ పాల్గొని మాట్లాడారు. జకాత్‌ నిధుల వల్ల నగరంలోని పేద ముస్లింల పరిస్థితులు బాగుపడతాయన్నారు. హైదరాబాద్‌ జకాత్‌ ట్రస్టు ద్వారా గత 25 ఏళ్లలో 11 వేల ముస్లిం కుటుంబాలు లబ్దిపొందాయని తెలిపారు. జకాత్‌ నిధులను సాముహికంగా జమ చేసి ముస్లిం విద్యార్థుల ఉన్నత విద్య కోసం ఖర్చు చేయాలని పిలుపు నిచ్చారు. ఒక కుటుంబం నుంచి ఒక వ్యక్తి ఉన్నత చదువులు చదివి మంచి ఉద్యోగంలో చేరితే అ కుటుంబం నుంచి పేదరికం దూరం అవుతుందన్నారు. ముస్లింలు ఇతర ఖర్చులను తగ్గించి పిల్లల విద్యపై డబ్బులు ఖర్చు చేయాలని కోరారు. జకాత్‌ ట్రస్టు విద్య కోసం చేస్తున్న కృషి అభినందనీయమని ఏకే ఖాన్‌ హర్షం వ్యక్తం చేశారు.


 కర్నూలు(అగ్రికల్చర్‌): రంజాన్‌ పర్వదినాన్ని పురష్కరించుకొని ముస్లిం కార్డుదారులకు రంజాన్‌ తోఫా అందజేయనున్నారు. 2.02 లక్షల మంది ముస్లిం కార్డుదారులకు తోఫా కానుకలను ఈ నెల 17 నుంచి పంపిణీ చేయనున్నారు. మండలాలు, మున్సిపాలిటీల వారీగా కార్డుల వివరాలను తహసీల్దార్లకు పంపారు. ఇందులో అనర్హులు ఉన్నారా... లేదా అర్హత కలిగిన ఏ కుటుంబమైనా లేదా అనేదానిని పరిశీలించాల్సి ఉంది. రంజాన్‌ తోఫా కింద 5కిలోల గోదుమ పిండి, 2 కిలోల చక్కెర, 1కిలో సేమియా, 100 ఎంఎల్‌ నెయ్యి ఇస్తారు. అన్ని ప్రత్యేక ప్యాకెట్లలోనే ఉంటాయి. వీటిని ఒక బ్యాగ్‌లో వేసి ఇస్తారు. ఇప్పటి వరకు స్టాక్‌ పాయింట్‌లకు 60 శాతం సరుకులు వచ్చాయని జిల్లా పౌరసరఫరాల సంస్థ మేనేజర్‌ జయకుమార్‌ తెలిపారు. ఈ– పాస్‌ మిషన్‌ల ద్వారానే కార్డుదారులకు పంపిణీ చేస్తారు. 
  


 ముంబై: వోడాఫోన్  ఇండియా తన ఖాతాదారులకోసం పవిత్ర  రంజాన్‌ సందర్భంగా స్పెషల్‌ ఆఫర్లను  ప్రకటించింది. మంగళవారం  అందుబాటులోకి తీసుకొచ్చిన ఈ ఆఫర్‌ లో అన్‌ లిమిటెడ్‌ కాలింగ్‌,  ఉచిత ప్రత్యేక   డేటా ప్లాన్లను ప్రకటించింది.  
 
 రంజాన్‌ స్పెషల్ ప్యాక్‌ లో ఒకరోజు వ్యాలిడిటీతో , 2జీ వినియోగదారులు 444 * 5 # డయలింగ్ ద్వారా రూ.5 తో  అపరిమిత డేటా ఆఫర్‌ను  పొందవచ్చు. అలాగే   3జీ కస్టమర్లు * 444 * 19 # డయలింగ్ ద్వారా రూ.19 లపై  అపరిమిత డేటా ఆఫర్ను పొందవచ్చు.  అయితే యుపి (వెస్ట్) ఉత్తరాఖండ్ ప్రాంతంలోని నివాసితులకు మాత్రమే ఈ ఆఫర్లు లభ్యం.


 ముజఫర్‌నగర్‌: ఉత్తరప్రదేశ్‌లోని ముజఫర్‌నగర్‌ జైలులో ముస్లింలతో పాటు 32 మంది హిందూ ఖైదీలు కూడా ఉపవాస దీక్ష చేపట్టారు. ‘రోజా’ పాటిస్తున్న ఖైదీల కోసం అన్ని ఏర్పాట్లు చేశామని, ఇఫ్తార్‌ విందులో భాగంగా పాలు, డ్రై ఫ్రూట్స్‌ ఇస్తున్నట్లు జైలు సూపరింటెండెంట్‌ రాకేశ్‌ సింగ్‌ చెప్పారు. జైలులో ఉన్న మొత్తం 2,600 మంది ఖైదీల్లో 1174 మంది ముస్లింలు, 32 మంది హిందువులు రంజాన్‌ మాసం సందర్భంగా ఉపవాసాలుంటున్నారు.


 వేర్వేరు రోడ్డు ప్రమాదాల్లో నలుగురు దుర్మరణం
 - ఒకరికి గాయాలు
  
 జిల్లాలోని రహదారులు రక్తసిక్తమయ్యాయి. మంగళవారం చోటుచేసుకున్న వేర్వేరు రోడ్డు ప్రమాదాల్లో రహదారులు నలుగురిని పొట్టనపెట్టుకోగా మరొకరు గాయాలతో బయటపడ్డాడు. సుంకులమ్మ దర్శనానికి వెళ్లిన దంపతులకు పుత్రశోకం మిగలగా.. రంజాన్‌ సరుకులు తీసుకొచ్చేందుకు వెళ్లిన ఓ వ్యక్తి ఇంటికి చేరకుండానే మృత్యువాత పడ్డాడు. మరో ప్రమాదంలో దుబాయ్‌ నుంచి వస్తున్న కుమారుడిని రిసీవ్‌ చేసుకునేందుకు వెళ్తున్న ఓ తండ్రిని, డ్రైవర్‌ ప్రాణాలను రహదారులు బలిగొన్నాయి.
  
 సుంకులమ్మ దర్శనానికి వెళ్లిన తల్లికి కడుపు కోత 
 బస్సు ఢీకొని ఐదేళ్ల చిన్నారి మృతి..
  
 కె.నాగులాపురం(గూడూరు): మండలంలోని కె.నాగులాపురం సుంకులమ్మ దర్శనార్థం వచ్చిన ఓ తల్లికి కడుపుకోత మిగిలింది. ఐదేళ్ల తన కుమారుడిని కళ్లముందే ఆర్టీసీ బస్సు నుజ్జునుజ్జు చేయడంతో గుండెలవిసేలా రోదించింది. గూడూరు పట్టణానికి చెందిన సింగనిగేరి కోస్గి వీరేష్, వరలక్ష్మి దంపతులు వారి బంధువులు సుంకులమ్మ ఉత్సవం చేస్తుండగా ఇద్దరు కుమారులతో వచ్చారు. బంధువులతో కలిసి అమ్మవారి ఆలయం వైపు వెళ్తుండగా ఎమ్మిగనూరు వైపు నుంచి కర్నూలు వస్తున్న ఆర్టీసీ బస్సు అతివేగంగా భక్తుల గుంపు మీదకు దూసుకెళ్లింది. ప్రమాదంలో చిన్నారి విక్రమ్‌(5)బస్సు టైర్ల కింద పడిపోయాదు. కల్ల ముందే బాలుడు మృతి చెందడంతో తల్లిదండ్రులు వీరేష్, వరలక్ష్మితో పాటు బంధువుల రోదనలతో ఆ ప్రాంతమంతా మారు మోగింది. పోలీసులు సంఘటన ప్రాంతానికి వచ్చి బస్సు డ్రైవర్‌ను అదుపులో తీసుకుని మృతదేహాన్ని పంచనామా కోసం కర్నూలు  ప్రభుత్వ ఆసుపత్రికి తరలించారు. బస్సు డ్రైవర్‌ నిర్లక్ష్యంతోనే ప్రమాదం జరిగిందని ఎస్‌ఐ మల్లికార్జున తెలిపారు. కేసు దర్యాప్తు చేస్తున్నామన్నారు.  
  
 రంజాన్‌ సరుకులు తీసుకొద్దామని వెళ్లి..
 పత్తికొండ రూరల్‌: రంజాన్‌ పండుగకు సరుకులు తీసుకొద్దామని బయల్దేరిన ఓ వ్యక్తి మృత్యుఒడికి చేరిన సంఘటన మంగళవారం మండల పరిధిలోని కొత్తపల్లి రిజర్వాయర్‌ సమీపంలో చోటుచేసుకుంది. గ్రామస్తులు తెలిపిన వివరాలు.. దేవనకొండ మండల పరిధిలోని ఎంకె కొట్టాల నుంచి పత్తికొండకు కమాల్‌సా(35), అతని బావమరిది ఖాజామొద్దీన్‌ రంజాన్‌ పండుగకు సరుకులు కొందామని, బైక్‌పై పత్తికొండకు బయలుదేరారు. కొత్తపల్లి రిజర్వాయర్‌ సమీపంలో ఎదురుగా వస్తున్న టిప్పర్‌ వారి బైక్‌ను కల్వర్టు వద్ద ఢీకొంది. దీంతో బైక్‌పై ఉన్న కమాల్‌సా కల్వర్టుపై నుంచి కింద పడి అక్కడికక్కడే మృతి చెందగా వెనక కూర్చున్న ఖాజామోద్దీన్‌ గాయాలపాలయ్యాడు. మృతదేహాన్ని పోస్టుమార్టం నిమిత్తం పత్తికొండ ప్రభుత్వాసుపత్రికి తరలించారు. ఖాజామొద్దీన్‌ పత్తికొండ ప్రభుత్వాసుపత్రిలో చికిత్స పొందుతున్నాడు. మృతుడికి భార్య ఫాతిమాబి, కుమార్తె హరిఫాబి, ఉమర్‌ఫారుఖ్‌ సంతానం ఉన్నారు.  పోలీసులు కేసు నమోదు చేసుకుని దర్యాప్తు చేస్తున్నారు.
  
 కుమారుడిని తీసుకొచ్చేందుకు వెళ్తూ..
 ఆళ్లగడ్డ: బతుకు దెరువు కోసం పరాయి దేశంలో ఉంటూ ఎన్నో ఏళ్ల తరువాత తిరిగి వస్తున్న కొడుకును స్వగ్రామానికి తీసుకు వచ్చేందుకు వెళ్తూ ఓ తండ్రి కొడుకును చూడకుండానే అనంత లోకాలకు వెళ్లిన సంఘటన ఆళ్లగడ్డ సమీపంలో చోటు చేసుకుంది. రూరల్‌ ఎస్‌ఐ రామయ్య తెలిపిన వివరాలు.. వైఎస్సార్‌ జిల్లా మండల కేంద్రం సుండుపల్లికి చెందిన నాగయ్య కుమారుడు దుబాయ్‌లో ఉద్యోగం చేస్తున్నాడు. సెలవుపై గ్రామానికి వస్తున్నానని హైదరాబాద్‌ విమానాశ్రయానికి కారు తీసుకురావాలని సూచించడంతో నాగయ్య ఇన్నోవా కారు బాడుగకు తీసుకుని మంగళవారం తెల్లవారు జామున బయలు దేరాడు. ఈ క్రమంలో పట్టణ శివారులోని ఆల్ఫా కళాశాల సమీపంలోకి వచ్చేసరికి కారు అదుపు తప్పి డివైడర్‌ను ఢీకొంది. ప్రమాదంలో నాగయ్య అక్కడిక్కడే మృతి చెందగా ఒంటిమిట్ట మండలం మండపంపల్లి గ్రామానికి చెందిన డ్రైవర్‌ శశికుమార్‌ (21) తీవ్రంగా గాయపడగా స్థానిక వైద్యశాలకు తరలిస్తుంగా మృతి చెందాడు. డ్రైవర్‌ పక్కన కూర్చున్న మరో వ్యక్తికి ఎటువంటి గాయాలు కాలేదని కేసు నమోదు చేసుకుని దర్యాప్తు చేస్తున్నామని ఎస్‌ఐ తెలిపారు 
  


 న్యూఢిల్లీ/తిరువనంతపురం: కబేళాల కోసం పశువుల క్రయవిక్రయాలను నిషేధిస్తూ కేంద్రం తీసుకున్న నిర్ణయంపై విపక్షాలు భగ్గుమన్నాయి. కేంద్ర నిర్ణయాన్ని సమాఖ్య వ్యవస్థపై దాడిగా కేరళ ముఖ్యమంత్రి పినరయి విజయన్‌ అభివర్ణించారు. రంజాన్‌ మాసం ఆరంభంలోనే కేంద్రం తీసుకున్న చర్య తమపై ప్రత్యక్ష దాడిగా మైనారిటీలు భావించే ప్రమాదం ఉందన్నారు. నోటిఫికేషన్‌ను రద్దు చేయాలని కోరుతూ ప్రధానికి లేఖ రాశారు.
 ప్రజల ఆహారపు అలవాట్లను నియంత్రించే హక్కు కేంద్రానికి లేదని పుదుచ్చేరి సీఎం వి.నారాయణస్వామి తేల్చిచెప్పారు. కేంద్ర నిర్ణయానికి వ్యతిరేకంగా కేరళలోని  ఆందోళనకారులు పలుచోట్ల బీఫ్‌ వండి తమ నిరసనను తెలియజేశారు. మోదీ ప్రభుత్వ వైఖరికి నిరసనగా సోమవారం బ్లాక్‌ డే పాటిస్తామని కాంగ్రెస్‌ నేతృత్వంలోని యూడీఎఫ్‌ ప్రకటించింది. నోటిఫికేషన్‌ను వెంటనే ఉపసంహరించుకోవాలని డీఎంకే కోరింది. మరోవైపు కబేళాలకు పశువుల తరలింపుపై నిషేధాన్ని కేంద్రం సమర్థించుకుంది. ఈ నిర్ణయం వల్ల నిబంధనలకు విరుద్ధంగా జరిగే పశువుల అమ్మకాలతో పాటు స్మగ్లింగ్‌ను అరికట్టడం వీలవుతుందని పర్యావరణ శాఖ తెలిపింది.


 బంధువులు కానీ స్నేహితులు కానీ హాస్పిటల్‌లో ఉంటే ఎవరైనా ఏం చేస్తారు? పండ్లు తీసుకెళ్లి ఆత్మీయంగా పలకరిస్తారు. ఆదరంగా మాట్లాడతారు. ఏమీ కాదని ధైర్యం చెబుతారు. త్వరగా కోలుకోవాలని ఆకాంక్షిస్తారు... ఆ తర్వాత ఇంటికి వచ్చేస్తారు. అయితే... మౌలానా గియాజ్‌ అహ్మద్‌ రషాదీ అంతటితో ఆగిపోలేదు. హైదరాబాద్, ఉస్మానియా హాస్పిటల్‌లో తన బంధువుని పరామర్శించి, మరో బెడ్‌ మీద ఏకాకిగా ఉన్న 65 ఏళ్ల పేషెంటును కూడా పలకరించాడు.
 
 కుశలం అడుగుతూ... ‘మీకు ఎవరూ లేరా? మిమ్మల్ని చూసుకోవడానికి ఎవరూ రాలేదేమిటి’? అని అడిగాడు. అప్పుడా పెద్దాయన ‘నాకు ఎవరూ లేరని, అల్లా నా కోసం నిన్ను పంపించాడు’ అన్నాడు. ఆ మాట రషాదీ మార్గాన్ని మార్చేసింది. ఇప్పుడు రషాదీ గొప్ప సమాజసేవకుడు. ఆ పెద్దాయనతో మొదలు పెట్టిన సహాయం... నేడు శాఖోపశాఖలుగా విస్తరించింది. పదకొండు రాష్ట్రాల్లో ‘సఫా బైతుల్‌ మాల్‌’ ఆపన్నులకు సేవలందిస్తోంది. రంజాన్‌ మాసంలో అన్నం పెడుతోంది. వందలాది ఇళ్లలో ఈదుల్‌ ఫిత్ర్‌ పండుగ చేస్తోంది.
 
 ఉస్మానియాతో మొదలు!
 ఉస్మానియాలో పరిచయమైన ఆ పెద్దాయనకు ఆహారం, మందులు తెచ్చి ఇచ్చాడు. హాస్పిటల్‌ నుంచి డిశ్చార్జ్‌ అయ్యే వరకు అలాగే చేశాడు. అలా సమాజంలో ఎంతమంది ఉన్నారోననే ఆలోచన. అది బీజంలా నాటుకుంది. స్నేహితులను కలుపుకుని 2006లో ‘సఫా బైతుల్‌ మాల్‌ ఎడ్యుకేషనల్‌ అండ్‌ చారిటబుల్‌ ట్రస్ట్‌’ స్థాపించాడు. ఈ పదేళ్లలో అది నగరంలోని 70 బస్తీలకు, ఆంధ్ర, కర్ణాటక, తమిళనాడ, ఒరిస్సా, బిహార్, ఉత్తరప్రదేశ్, మధ్యప్రదేశ్, మహారాష్ట్ర, జార్ఖండ్, చత్తీస్‌ఘడ్‌ రాష్ట్రాలకు విస్తరించింది.  
 
 ఎక్కడెక్కడ అవసరం?
 రషాదీ హైదరాబాద్, ఓల్డ్‌ మలక్‌పేటలో అరబిక్‌ టీచర్‌. మదర్సాలలో చదువుకునే విద్యార్థుల్లో ఈ సేవాగుణాన్ని అలవరిచి, వారినే స్వచ్ఛంద సహాయకులుగా మార్చుకున్నారు. విద్య, వైద్యంతోపాటు అనారోగ్యంతో ఉన్న వారికి మందులు, తిండి లేని వారికి దినుసులు ఇస్తారు. పిల్లల పోషణ భారంతో కుంగిపోతున్న మహిళలు, వృద్ధులకు ప్రభుత్వం ఇచ్చే రేషన్‌ కార్డును పోలిన కార్డును మంజూరు చేస్తున్నారు. నెలనెలా బస్తీల్లో 4,500 కుటుంబాలకు సరుకులను పంచుతారు. రెండొందలకు పైగా వితంతువులకు నెలకు వెయ్యి రూపాయల పింఛన్‌ ఇస్తున్నారు. మానసిక, శారీరక వికలాంగులకు వైద్యంతోపాటు పెన్షన్‌ ఇస్తున్నారు.
 ఒక వ్యక్తిలో మొదలైన ఒక మంచి ఆలోచన... మంచి ఫలాలనే ఇస్తుందని మరోసారి నిరూపితమైంది. రషాదీ ఆ పని చేసి చూపించారు.    
 –  మంజూర్‌
 
 ⇔ రంజాన్‌ నెలలో పేదవారికి బియ్యం, 15 రకాల నిత్యావసర సరుకులు ఇస్తారు. రంజాన్‌ పండగ చేసుకోవడానికి ఈద్‌ ప్యాక్‌లు ఇస్తారు.
 ⇔ ఆనాథ పిల్లల కోసం ప్రత్యేక హాస్టల్‌ కమ్‌ స్కూల్‌ ఏర్పాటు చేశారు. ఇందులో నగరంతో పాటు ఇతర జిల్లాలకు చెందిన 330 మంది పిల్లలున్నారు.
 ⇔ పేదలకు అంత్యక్రియలు, ఆనాథలైన ఆడపిల్లలకు పెళ్లిళ్లు చేస్తున్నారు.
 
 సంస్థ నిర్వహణ!
 ⇔ ఐదు వందలకు మించిన విరాళం తీసుకోరు. ఇంట్లో పాత పేపర్లు, పాత సమాను కూడా ఇవ్వవచ్చు. ఇందుకోసం జీపీఎస్‌తో అనుసంధానమైన సంస్థ వాహనాలు బస్తీల్లో తిరుగుతాయి.
 ⇔ ఇల్లు, ఊరు మారే వాళ్లు వద్దనుకున్న సామాను, దుస్తులను ఇచ్చేస్తుంటారు. ఈ సంస్థ హెల్ప్‌లైన్‌కి ఫోన్‌ చేసి సమాచారం ఇస్తే వాహనం వెళ్తుంది.
 
 వైద్యం ఒక్కటే చాలదు!
 ఈ పదేళ్లలో లక్షల మందికి విద్య, వైద్య, ఉపాధి రంగాల్లో సహయపడుతున్నాం. మొదట్లో రోగులకు మందులు ఇవ్వాలనుకున్నాం. పేదల బస్తీల్లో సర్వే చేసినప్పడు వారుపడుతున్న ఇబ్బందులను చూశాక వైద్యం ఒక్కటే చాలదనిపించింది. దాంతో విద్య, ఇతర సంక్షేమాలను కూడా చేర్చాం. రంజాన్‌ శుభ మాసం సందర్భంగా... సంస్థ ద్వారా జకాత్, సదకాత్, ఫిత్రా ఇవ్వాలంటే హెల్ప్‌లైన్‌ (09394419820). – మౌలానా గియాజ్‌ అహ్మద్‌ రషాదీ సఫా బైతుల్‌ మాల్‌ అధ్యక్షులు
 
 మందులు... పెన్షన్‌ కూడా!
 నా భర్త చనిపోయాడు. పిల్లలు లేరు. బీపీ, షుగర్, థైరాయిడ్‌తో బాధపడుతున్నాను. సఫా బైతుల్‌ మాల్‌ సభ్యులు తెల్లకార్డు ఇచ్చారు. మూడేళ్ల నుంచి ప్రతి నెలా వైద్యం చేసి మందులు, వితంతు భృతి వెయ్యి రూపాయలు ఇస్తున్నారు.
 – మహెమూద్‌ బీ  ఫలక్‌నుమా, హైదరాబాద్‌
 
 క్యాన్సర్‌కు వైద్యం!
 నేను ఆటో డ్రైవర్‌ని. రెండేళ్ల క్రితం క్యాన్స్‌ర్‌ వచ్చింది. సఫా బైతుల్‌ మాల్‌ వారు వైద్యం చేయిస్తున్నారు. నా కుటుంబాన్ని పోషిస్తున్నారు.
 – మహ్మద్‌ షుకూర్, హైదరాబాద్‌


 - పుణ్యాల మూటకట్టుకునే సీజన్‌ పవిత్ర రంజాన్‌ మాసం
 - నేటి నుంచి రంజాన్‌ ఉపవాస దీక్షలు ప్రారంభం
  
 కర్నూలు(ఓల్డ్‌సిటీ): పుణ్యాలు మూట కట్టుకునే పవిత్ర రంజాన్‌ మాసం ఇది. అల్లా ఆరాధనలో గడిపే మాసం కావడంతోనే దీనికి అత్యంత ప్రాధాన్యత ఏర్పడింది. పవిత్ర ఖురాన్‌లో పేర్కొన్న ప్రకారం రంజాన్‌ నెలలో విధిగా ఆచరించవలసిన నియమం ఉపవాస వ్రతం. దీనినే పార్సీ భాషలో రోజా, అరబ్బీలో సౌమ్‌ అంటారు. పవిత్ర ఖురాన్‌ సంపూర్ణంగా భువిపైకి అవతరించిన దినం కూడా రంజాన్‌ మాసంలోనే ఉండటం విశేషం. కలిమా, నమాజ్, రోజా, జకాత్, హజ్‌ అనేవి ఇస్లాంకు మూలస్తంభాలు. వీటిలో హజ్‌ తప్ప మిగతా నాలుగు మూల సూత్రాలు అమలయ్యేది ఒక్క రంజాన్‌ నెలలో మాత్రమే. ఆర్థిక స్థోమత కలిగిన వారు తప్పకుండా హజ్‌ యాత్ర నియమాన్ని కూడా సంపూర్ణం చేయాలి. ఇస్లాంలోకి ప్రవేశించే మార్గమే కలిమా. లాఇలాహ ఇల్లాల్లాహ్, ముహమ్మదుర్‌ రసూలుల్లాహ్‌ (సొల్లెల్లాహు అలైహివసొల్లం). ఆ సృష్టికర్తే (అల్లాయే) సమస్త సృష్టికి దైవం. ఆయన ప్రవక్త ముహమ్మద్‌ (సొ.అ.స.) అని అర్థం. ఈ సూత్రాన్ని విశ్వసించడమే కాకుండా ఆచరించాలి. రెండో మూలస్తంభం నమాజ్‌. నమాజ్‌ను నిత్యజీవితంలో రోజుకు ఐదుపూటలు పాటించాలి. రోజా, జకాత్‌ (దానధర్మాలు) వంటివాటికి రంజాన్‌ మాసంలోనే గొప్ప అవకాశం. మరో మూల సూత్రమైన నమాజు లేనిదే రోజా సంపూర్ణం కానేరదు. ప్రతి నమాజులోనూ కలిమా పఠనం జరుగుతుంటుంది. ఒక్క హజ్‌ తప్ప మిగతా మూల స్తంభాలను నిలబెట్టడంలో రంజాన్‌ మాసం ప్రముఖ పాత్ర పోషిస్తోంది. ఇందులో ఉపవాసాలకు అత్యంత ప్రాధాన్యం ఉంది. 
  
 సమయపాలన ముఖ్యం:
 ధర్మనిష్ఠతో ఉపవాసాలు ఉండాలి. నిర్ణీత సమయాల్లోనే సహెర్, ఇఫ్తార్‌లు పాటించాలి. అందరూ ఒకేసారి కచ్చితమైన వేళలు పాటించేందుకు వీలుగా కర్నూలు నగరంలో ఔటు పేల్చే విధానం ఉంది. ఉపవాసంలో శరీరానికే కాకుండా మనసుకూ కళ్లెం వేయాల్సి ఉంటుంది. మంచి దృష్టితో చూడాలి. మంచినే పాటించాలి. చెడుకు దూరంగా ఉండాలి. ఐదుపూటలా విధిగా నమాజు చేయాలి. ఖురాన్‌ పఠనం, సారాంశంపై అవగాహన, అల్లా నామస్మరణ, అల్లాచింతన వంటివి విరివిగా చేయాలి. రంజాన్‌ నెలలో చేసే ఏ పవిత్ర కార్యానికైనా 70 రెట్ల పుణ్యం అధికంగా లభిస్తుంది. దీంతో ఈ మాసంలో  దాన ధర్మాలు విరివిగా చేస్తారు. మాసపు చివర్లో ప్రతి ముస్లిం ఫిత్రా దానం చెల్లించుకోవాలి. ఆర్థికస్థోమత కలిగిన వారు జకాత్‌ దానం చేయాలి.
  
  ప్రతి మసీదులోనూ తరావీలో ఖురాన్‌ పఠనం  
 కర్నూలు నగరంలోని ప్రతి మసీదులోనూ ఇటీవల తరావీలో ఖురాన్‌ పఠనం తప్పనిసరి చేశారు. పవిత్ర ఖురాన్‌లో 30 పారాలు ఉంటాయి. రోజుకో పారా చొప్పున నెల మొత్తాన్ని పఠిస్తారు. గతంలో బహు కొద్ది మసీదుల్లో మాత్రమే తరావీలో ఖురాన్‌ పఠనం పఠించే వారు. ప్రస్తుత కాలంలో ఖురాన్‌ కంఠస్థం చేసే (హాఫిజ్‌ల) సంఖ్య మెరుగ్గా ఉండటంతో ప్రతి మసీదులోనూ రంజాన్‌ మాసంలో ఒక హాఫిజ్‌ను ఏర్పాటు చేసుకుని నెలమొత్తం మసీదుల్లో సంపూర్ణం ఖురాన్‌ పఠనంతోనే తరావీ నమాజులు పాటిస్తున్నారు. 
  
 నియమాలు..
 మతగ్రంథాల ప్రకారం వయోజనులైన స్త్రీపురుషులందరూ విధిగా రోజా దీక్ష పాటించాలి. వృద్ధులు, పిల్లలు, వ్యాధిగ్రస్థులు, ప్రయాణంలో ఉన్న వారికి మాత్రమే మినహాయింపు ఉంటుంది. అయితే వ్యాధిగ్రస్థులు కూడా ఆరోగ్యం చేకూరిన తర్వాత ఆ రోజాలను పూర్తి చేసుకోవాల్సి ఉంటుంది. రంజాన్‌ అంటే పాపాలను దహించివేయుట అనే అర్థం వస్తుంది. ఉపవాసదీక్షలు అనేవి మనిషిలోని చెడు భావనలను, అధర్మాన్ని, ద్వేషాన్ని రూపుమాపేవిగా ఉండాలి. సాధ్యమైనంత మేరకు పుణ్యకార్యాలు చేపడుతుండాలి. 
  


 కర్నూలు (ఓల్డ్‌సిటీ): ఆకాశంలో నెలవంక శుక్రవారం సాయంత్రం కనిపించకపోవడంతో.. శనివారం తప్పనిసరిగా కనిపించే అవకాశాలు ఉన్నాయని.. ఆదివారం నుంచి రంజాన్‌ మాసం ప్రారంభమవుతున్నట్లు కర్నూలు ప్రభుత్వ ఖాజీ సలీంబాషా ఖాద్రి ప్రకటించారు. హిలాల్‌ కమిటీ తీర్మానం మేరకే ఈ నిర్ణయం తీసుకున్నట్లు ఆయన ఒక ప్రకటనలో పేర్కొన్నారు. రంజాన్‌ మాసపు ఉపవాసాలు అల్లాకు అత్యంత ప్రీతిపాత్రమైనవన్నారు. ఐదుపూటలా నమాజుతో పాటు తరావీ నమాజు చేయాలని, ఉపవాసాల్లో ధర్మనిష్ఠ పాటించాలని సూచించారు.
  


 అధికారులకు ఉప ముఖ్యమంత్రి మహమూద్‌ అలీ ఆదేశాలు
 
 సాక్షి, హైదరాబాద్‌: రంజాన్‌ పండుగను పురస్కరించుకుని ముస్లిం సోదరులకు ఇబ్బందులు తలెత్తకుండా ఘనంగా ఏర్పాట్లు చేయాలని వివిధ శాఖల అధికారులను రాష్ట్ర ఉప ముఖ్యమంత్రి మహమూద్‌ అలీ ఆదేశించారు. సోమవారం సచివాలయంలో మంత్రులు నాయిని నర్సింహారెడ్డి, తల సాని శ్రీనివాస్‌యాదవ్, మైనారిటీ సంక్షేమ శాఖ సలహా దారు ఏకే ఖాన్, నగర శాసనసభ్యులు, వివిధ ప్రభుత్వ శాఖల అధికారులతో ఆయన సమీక్షించారు. రంజాన్‌ మాసం ప్రారంభమైనప్పటి నుంచి పండుగ వరకు విద్యుత్‌ సరఫరాలో ఎలాంటి అంతరాయం జరుగకుండా చర్యలు చేపట్టాలని విద్యుత్‌ శాఖ అధికారులను మహమూద్‌ అలీ ఆదేశించారు.
 
 మసీదుల వద్ద ఎప్పటికప్పుడు పరిశుభ్రంగా ఉండేలా జీహెచ్‌ఎంసీ అధికారులు చర్యలు తీసుకోవాలని తెలిపారు. పాతబస్తీలో తాగునీరు, రోడ్ల మరమ్మతులు, వీధి దీపాలు, ప్రత్యేక డంపింగ్‌ బిన్‌లను ఏర్పాటు చేయాలని అధి కారులకు సూచించారు. చార్మినార్‌ ప్రాంతంలో కంట్రోల్‌ రూమ్‌ను ఏర్పాటు చేయాలన్నారు. పండుగ సందర్భంగా 24 గంటలు హోటల్స్‌ తెరిచే ఉంటాయన్నారు. మసీద్‌ల రిపేర్ల నిమిత్తం రూ.5 కోట్లు, మక్కా మసీద్‌ రిపేరు కోసం రూ.8.48 కోట్లు కేటాయించామన్నారు.
 
 ప్రభుత్వ కార్యాల యాల్లో పని చేసే ముస్లిం ఉద్యోగులకు గంట ముందుగా ఆఫీసు విడిచి వెళ్లడానికి ప్రభుత్వం అనుమతినిచ్చిందన్నారు. సమావేశంలో వక్ఫ్‌ బోర్డ్‌ చైర్మన్‌ మహ్మద్‌ సలీం, ఎమ్మెల్యేలు చింతల రాంచంద్రారెడ్డి, అహ్మద్‌ పాషాఖాద్రి, ముంతాజ్‌ అహ్మద్‌ ఖాన్, మోజంఖాన్, మాగంటి గోపీనాథ్, జాఫర్‌ హుస్సేన్, అహ్మద్‌ బిన్‌ బలాల, జీహెచ్‌ఎంసీ డిప్యూటీ మేయర్‌ బాబా ఫసియుద్దిన్, కమిషనర్‌ జనార్దన్‌రెడ్డి, జలమండలి ఎండీ దానకిషోర్, విద్యుత్‌ శాఖ సీఎండీ రఘుమారెడ్డి, మైనారిటీ సంక్షేమశాఖ కార్యదర్శి సయ్యద్‌ ఉమర్‌ జలీల్‌ తదితరులు పాల్గొన్నారు.


 - ఒక ముష్కరుడి హతం.. మరో ఆరుగురి కోసం వేట
 
 ఢాకా: అధికారిక ఇస్లామిక్ దేశమైన బంగ్లాదేశ్ లో రంజాన్ పండుగ నాడు ముష్కరులు బీభత్సం సృష్టించారు. దాదాపు ఏడుగురు సాయుధులు.. బంగ్లాలోనే అతిపెద్ద ఈద్గా(ముస్లింల ప్రార్థనా స్థలం) అయిన షోలాకియాపై దాడి చేశారు. నమాజ్ చేసేందుకు వచ్చినవారిపై పెద్ద ఎత్తున బాంబులు, తుపాకులు, కత్తులతో విరుచుకుపడ్డారు. ఇప్పటివరకు అందిన సమాచారం మేరకు ఈ దాడిలో ఒక పోలీస్ కానిస్టేబుల్ సహా నలుగురు మరణించారు. మరో 12 మంది తీవ్రంగా గాయపడ్డారు. ముష్కరుల్లో ఒకణ్ని భద్రతాబలగాలు అంతమొందించాయి. మరొకడిని సజీవంగా పట్టుకున్నాయి. ఈద్గా సమీపంలోని స్కూల్ భవనంలో దాక్కున్న మరి కొదరు ఉగ్రవాదుల కోసం వేట కొనసాగుతోంది.
 
 మెడలో తుపాకులు, ఓ చేతిలో నాటు బాంబులు, మరో చేతిలో కత్తులు చేతబట్టుకున్న దాదాపు ఏడుగురు.. షోలాకియా ఈద్గా ప్రధాన ద్వారం వద్దకు చేరుకుని, పోలీస్ చెక్ పోస్టుపై బాంబులు విసిరారని, వెంటనే తేరుకున్న పోలీసులు ముష్కరులపై కాల్పులు జరిపారని, ప్రతిదాడిలో ఒక ఉగ్రవాది చనిపోగా, మరొకడు సజీవంగా పట్టుబడ్డాడని కిశోర్ గంజ్ జిల్లా పోలీస్ డిప్యూటీ చీఫ్ తౌఫజల్ హుస్సేన్ తెలిపారు. పోలీసు కాల్పులతో పారిపోయిన ముష్కరులు ఈద్గా సమీపంలోని ఓ స్కూల్ భవనంలోకి చొరబడి, లోపలినుంచి కాల్పులు చేస్తున్నారని, వారి కోసం వేట కొనసాగుతోందని పేర్కొన్నారు.
 
 రంగంలోకి భారత ఎన్ఎస్జీ
 రంజాన్ పర్వదినాన పొరుగు దేశంలో చోటుచేసుకున్న భీకర పరిణామాలపై భారత ప్రభుత్వ స్పందించింది. బంగ్లా ప్రభుత్వ అభ్యర్థన మేరకు నలుగురు నేషనల్ సెక్యూరిటీ గార్డ్(ఎన్ఎస్ జీ) అధికారులను కిశోర్ గంజ్ కు పంపనుంది. 26/11 ముంబై, గుర్ దాస్ పూర్, పఠాన్ కోట్ ఎయిర్ బేస్ వంటి ఉగ్రదాడుల సమయంలో సమర్థవంతంగా పనిచేసి, ముష్కరులను అంతం చేయడంతో ఎన్ఎస్జీది కీలక పాత్ర. ప్రస్తుతం షోలాకియా ఈద్గా సమీపంలో దాక్కున్న ముష్కరులను మట్టుపెట్టడంతోపాటు, దర్యాప్తులో మన ఎన్ఎస్ జీ అక్కడి సిబ్బందికి సహకరిస్తుంది.


 ఢాకా: ఇసుక వేస్తే రాలనంతగా కిక్కిరిన జనం.. కిలోమీటర్ల మేర వరుసలు కట్టి నమాజ్ కు నడుం వంచుతోన్న ముస్లింలు.. అంతకంతా లోపలికి వస్తోన్న వేలదిమంది.. రంజాన్ పర్వదినమైన గురువారం ఉదయం 9 గంటలకు బాంగ్లాదేశ్ లోనే అతిపెద్దదైన షోలాకియా ఈద్గా వద్ద కనిపించిన దృశ్యాలు. బంగ్లా న్యూస్ చానెళ్ల కథనం ప్రకారం ప్రార్థనలు జరుగుతున్న సమయంలోనే, అంటే 9:30 గంటలకు ఈద్గా ప్రవేశ ద్వారం వద్ద పెద్ద చప్పుడైంది. తుపాకులు ధరించి, నాటు బాంబులు చేతబట్టుకున్న కొందరు ముష్కరులు.. పోలీసులు, నమాజ్ చేస్తున్నవారిపై బాంబులు విసిరారు. ఒక పోలీసు, మరో పౌరుడు అక్కడికక్కడే కుప్పకూలారు. క్షణాల్లో కలకలం మొదలైంది. హాహాకారాలు చేస్తూ జనం పరుగులు తీశారు. బాంబులు విసిరి పరుగెత్తిన ముష్కరులు ఓ ఇంట్లోకి చొరబడి దాక్కున్నారు.
 
 షోలాకియా ఈద్గాలో పేలుడు జరిగిన నిమిషాల వ్యవధిలోనే అక్కడికి చేరుకున్న భద్రతా బలగాలు ముష్కరులు దాక్కొన్న ఇంటిని చుట్టుముట్టాయి. లోపలి ముష్కరులు భద్రతా బలగాలపై కాల్పులు జరుపుతున్నారు. ఇటువైపు నుంచి ప్రతికాల్పులూ జరుగుతున్నాయి. ముష్కరుల ఏరివేత ఆపరేషన్ ఎన్నిగంటలు పడుతుందనే విషయం ఇంకా తెలియరాలేదు. కాగా, బంగ్లాదేశ్ సమాచార శాఖ మంత్రి హసన్ ఉల్ హక్ పేలుళ్లపై భిన్నంగా స్పందించారు. ఈద్గాలో బాంబులు విసిరింది దయేష్ ఉగ్రవాదులు కాదని, రాజకీయ ప్రత్యర్థులేనని ట్వీట్ చేశారు. బంగ్లాలో అధికార, విపక్ష పార్టీ మధ్యల మధ్య హింసాత్మక దాడులు జరుగుతోన్న సంగతి తెలిసిందే. జులై 1న ఢాకాలోని ఓ రెస్టారెంట్ లోకి చొరబడ్డ ఐసిస్ ఉగ్రవాదులు 20 మందిని పొట్టనపెట్టుకున్న విషాదం నుంచి తేరుకోకముంతే రంజాన్ పండుగనాడు ఈద్గాలో పేలుళ్లు జరగడం బంగ్లాదేశీల్లో విషాదం నింపింది.


 ఢాకా: ముస్లింలు పర్వదినాన్ని ఆనందోత్సాహల మధ్య జరుపుకొంటోన్న తరుణంలో ఉగ్రమూకల కళ్లుకుట్టాయి. ప్రార్థనలు చేస్తున్నవారే లక్ష్యంగా దాడులకు తెగబడ్డాయి. బంగ్లాదేశ్ లోనే అతి పెద్ద ఈద్గా వద్ద గురువారం ఉదయం ముష్కరులు బాంబులు పేల్చారు. ఇప్పటివరకు తెలిసిన సమాచారం మేరకు పేలుళ్లలో ఒక పోలీసు, పౌరుడు మృతి చెందారు. 12 మందికి పైగా గాయపడ్డారు. ఈద్గాకు సమీపంలోని ఓ ఇంట్లోకి చొరబడ్డ ముష్కరులు.. లోపలినుంచి కాల్పులు జరుపుతున్నారు. రంగంలోకి దిగిన భద్రతా బలగాలు ఉగ్రవాదులను మట్టుపెట్టే ఆపరేషన్ ను ప్రారంభించారు. కాల్పుల మోతతో ఈద్గా పరిసరాలు భీతావాహంగా మారాయి.
 
 బంగ్లా రాజధాని ఢాకాకు 100 కిలోమీటర్ల దూరంలోని కిశోర్ గంజ్ పట్టణ శివారులో గల షోలాకియా ఈద్గా.. ఆ దేశంలోనే అతిపెద్ద ప్రార్థనా స్థలం. పర్వదినంనాడు దాదాపు 4 లక్షల మంది ముస్లింలు అక్కడ ప్రార్థనలు చేస్తారు. పెద్ద సంఖ్యలో జనం గుమ్మికూడటాన్ని అవకాశంగా తీసుకున్న ఉగ్రవాదులు బాంబు పేలుళ్లకు పాల్పడ్డారు. ఈద్గా ప్రవేశ ద్వారం వద్ద చోటుచేసుకున్న పేలుడులో ఇప్పటివరకు అందిన సమాచారం మేరకు ఒకరు మరణించగా, ఐదుగురికి గాయాలయ్యాయి. మృతుల సంఖ్య పెరిగే అవకాశం ఉన్నట్లు తెలుస్తోంది. గత వారం ఢాకాలోని ఓ రెస్టారెంట్ లోకి చొరబడ్డ ఐసిస్ ఉగ్రవాదులు 20 మందిని పొట్టనపెట్టుకున్న సంఘటన నుంచి తేరుకోకముందే పండుగనాడు పేలుడు జరగడం బాగ్లాదేశీల్లో విషాదం నింపింది.


 న్యూఢిల్లీ : దేశవ్యాప్తంగా రంజాన్‌ వేడుకలు ఘనంగా జరుగుతున్నాయి. లక్షలాది మంది ముస్లింలు సంప్రదాయ దుస్తులు ధరించి తమకు సమీపంలో ఉన్న మసీదులకు వెళ్లి ప్రత్యేక ప్రార్థనలు చేశారు. ఢిల్లీ జమామసీదులో గురువారం జరిగిన సామూహిక ప్రార్థనల్లో ముస్లిం సోదరులు భారీ సంఖ్యలో పాల్గొన్నారు. పిల్లలు, పెద్దలంతా ఈ ప్రార్థనలకు హాజరయ్యారు. ఒకరినొకరు హత్తుకుని ఈద్‌ ముబారక్‌ చెప్పుకున్నారు. ఢిల్లీ, ముంబై, కోల్కతా, చెన్నై, బెంగళూరు, హైదరాబాద్ లాంటి నగరాలతో పాటు అన్ని రాష్ట్రాల్లో ఉన్న ముస్లింలు తమ ఉపవాస దీక్షలను విరమించి పండగ చేసుకుంటున్నారు.
 
 పవిత్ర రంజాన్ పర్వదినాన్ని పురస్కరించుకుని హైదరాబాద్ మక్కామసీద్‌లో ముస్లిం సోదరులు ప్రత్యేక ప్రార్థనలు నిర్వహించారు. నెలరోజుల పాటు అత్యంత భక్తి శ్రద్ధలతో ఉపవాసదీక్షలు నిర్వహించిన ముస్లిం సోదరులు.. దీక్షలకు పరిపూర్ణ ఫలితం లభించే రంజాన్ పండుగ రోజున సంబరాలు జరుపుకుంటున్నారు. చిన్నాపెద్దా తేడా లేకుండా ఆలింగనాలు, కరచాలనాలు చేసుకుంటూ శుభాకాంక్షలు తెలుపుకుంటున్నారు.
 
 మధ్యప్రదేశ్‌ రాజధాని భోపాల్‌లోనూ ఈద్‌ సందర్భంగా ప్రత్యేక ప్రార్థనలు నిర్వహించారు. సీఎం శివరాజ్‌సింగ్‌ చౌహాన్‌ ఈ కార్యక్రమంలో పాల్గొని... ముస్లిం సోదరులకు రంజాన్‌ శుభాకాంక్షలు తెలిపారు. సంప్రదాయ దుస్తులు ధరించిన పిల్లలు ప్రార్థనా మందిరం వద్ద సందడి చేశారు.


 న్యూఢిల్లీ : ముస్లింల పవిత్ర పండుగ రంజాన్‌ను దేశవ్యాప్తంగా గురువారం భక్తిశ్రద్ధలతో జరుపుకోనున్నారు. దేశంలోని ముస్లింలకు రాష్ట్రపతి ప్రణబ్ ముఖర్జీ,  ప్రధాని నరేంద్ర మోదీ  తదితరులు శుభాకాంక్షలు తెలిపారు. సర్వమత ఐకమత్యానికి, ప్రపంచశాంతికి ఈ పండుగ ప్రతీక అని అభివర్ణించారు. అలాగే వివిధ దేశాల నాయకులకు శుభాకాంక్షలు తెలిపారు. కశ్మీర్, కేరళ రాష్ట్రాల్లో ఈద్-ఉల్-ఫితర్‌ను బుధవారమే జరుపుకున్నారు.  మసీదులు, ఈద్గాలకు వెళ్ళి భక్తి శ్రద్దలతో ప్రత్యేకప్రార్థనలు చేశారు. ఒకరినొకరు ఆలింగనం చేసుకొని ఈద్ శుభాకాంక్షలు తెలుపుకున్నారు. రంజాన్ సందర్భంగా శ్రీనగర్‌లోని హాజరత్‌బల్ మసీదులో 50 వేల మంది ప్రార్థనలు చేశారు. దీని తరువాత శ్రీనగర్ పాతబస్తీలోని ఈద్గాలో  40 వేల మంది ప్రార్థనలు చేశారు.
 
  శ్రీనగర్‌లో ఉద్రిక్త పరిస్థితులు
  శ్రీనగర్ :  శ్రీనగర్‌లోని సఫక్‌దల్‌లోని ఈద్గా వద్ద రంజాన్ ప్రార్థనలు చేసుకుంటున్న వారిపై  దుండగులు రాళ్లు రువ్వడంతో ఉద్రిక్త పరిస్థితులు చోటుచేసుకున్నాయి. ఘర్షణల్లో 30 మంది గాయపడ్డారు. పోలీస్ అధికారితో పాటు, 20 మంది భద్రతా సిబ్బంది గాయపడ్డ వారిలో ఉన్నారు. వేర్పాటువాద నేతలు గిలానీ, ఉమర్ ఫరూఖ్, యాసీన్ యాసీన్‌లను పోలీసులు గృహనిర్బంధంలో ఉంచారు.


 రంజాన్ పర్వదినం సందర్భంగా  ముస్లిం సోదరులకు గవర్నర్ ఈఎస్‌ఎల్ నరసింహన్ శుభాకాంక్షలు తెలిపారు. దేవుడు సూచించిన మార్గంలో క్రమశిక్షణతో జీవితం సాగించాలని గుర్తు చేయడమే రంజాన్ పండుగ ఉద్దేశమన్నారు. మానవత్వం, పవిత్రతతో అన్ని మతాలను గౌరవించే దృక్పథానికి కట్టుబడి ఉన్నామని రంజాన్ పర్వదినాన్ని పురస్కరించుకొని ప్రతి ఒక్కరు ప్రతిజ్ఞ చేయాలన్నారు.
 
 సీఎం కేసీఆర్ ఈద్ ఉల్ ఫితర్ శుభాకాంక్షలు
  ఈద్ ఉల్ ఫితర్ పర్వదినం సందర్భంగా ముస్లిం సోదరులకు ముఖ్యమంత్రి కె.చంద్రశేఖర్‌రావు శుభాకాంక్షలు తెలిపారు. మానవత్వం, దైవ చింతనతో జరుపుకునే పండుగగా ఈద్ ఉల్ ఫితర్‌ను అభివర్ణించారు. ఉపవాస దీక్షలు, ప్రార్థనల ద్వారా మన హృదయాన్ని, శరీరాన్ని పునీతం చేసుకోవటంతో పాటు ప్రాపంచిక సుఖాలపై నియంత్రణ సాధించవచ్చని అన్నారు. ఈద్ ఉల్ ఫితర్ సంబరాల్లో ముస్లిం సోదరులతో పాటు తెలంగాణ ప్రభుత్వం సైతం పాలు పంచుకుంటుందని పేర్కొన్నారు. బంగారు తెలంగాణ సాధనకు ప్రతి ఒక్కరం అల్లాను ప్రార్ధిద్దామన్నారు.
 
  


 డమాస్కస్: పవిత్ర రంజాన్ పర్వదినాన్ని పురస్కరించుకుని 72 గంటలపాటు కాల్పులు జరపకూడదని సిరియా ఆర్మీ నిర్ణయించుకుంది. దేశ వ్యాప్తంగా ఈ కాల్పుల విరమణ నిర్ణయం అమలులో ఉంటుందని ఓ అధికారి వెల్లడించారు. జూలై 6 వేకువజామున ఒంటి గంట నుంచి జూలై 8 అర్ధరాత్రి వరకు కాల్పులు నిషేధించారు. ముస్లింలు రంజాన్ పండుగ నేపథ్యంలో ఆయుధాలకు దూరంగా ఉండాలని ఆర్మీ భావించిందని, అందుకే అధికారికంగా తమ నిర్ణయాన్ని ప్రకటించారు.
 అయితే గత ఫిబ్రవరిలో రష్యా, అమెరికా ఆర్మీ కాల్పుల విరమణ ప్రకటించినా.. అనివార్య కారణాల వల్ల ఆర్మీ కాల్పులు జరిపిన విషయం అందరికీ విదితమే. తిరుగుబాటు దారులపై కాల్పులకు తాత్కాలికంగా గుడ్ బై చెప్పారా.. లేక ఐఎస్ఐఎస్ ఉగ్రవాదులపై కాల్పులకు ఈ నిషేధ ఆజ్ఞలు వర్తిస్తాయా అనే అంశంపై స్పష్టత లేదు.


 ఈద్-ఉల్-ఫిత‌ర్ (రంజాన్) సెలవును ఈ నెల 7వ తేదీన ప్రకటిస్తున్నట్లు కేంద్ర ప్రభుత్వ ఉద్యోగుల సంక్షేమ స‌మ‌న్వయ సంఘం కార్యదర్శి ఎల్.సురేశ్ తెలిపారు. దీనికి అనుగుణంగా.. కేంద్ర ప్రభుత్వ ప‌రిపాల‌నా కార్యాల‌యాల‌న్నింటికీ ఇంత‌కు ముందు నోటిఫై చేసిన‌ట్లుగా ఈ నెల 6వ తేదీన కాకుండా, ఈ నెల 7వ తేదీకి సెల‌వు దినాన్ని మార్చాల‌ని నిర్ణయించింది.
 
 సిబ్బంది మ‌రియు శిక్షణ విభాగం (డీఓపీటీ) ఒక ఆఫీస్ మెమొరాండ‌మ్‌లో ఈ విష‌యాన్ని స్పష్టం చేసింది. దీనితో రంజాన్ సెల‌వును ఈ నెల 6కు బ‌దులు 7వ తేదీకి మార్చినట్లయింది.


 
 జిల్లాలో 1,310 ముస్లిం కుటుంబాలకు అందని రంజాన్ తోఫా సరుకులు
 
 ఆన్‌లైన్‌లో కొన్ని పేర్లు గల్లంతు
 
 మండలాల వారీగా మరోసారి జాబితాలు పంపిన అధికారులు
 
  
 రంజాన్ తోఫా పేరిట పేద ముస్లింలను రాష్ట్ర సర్కారు మరోసారి దగా చేసింది. గత ఏడాది రంజాన్ సందర్భంగా నాసిరకం సరుకులు అందించి అభాసు పాలైన సర్కారు ఆ తరువాత అయినా పాఠాలు నేర్చుకోలేదు. ఈసారి కూడా పాత పద్ధతిలోనే పలువురికి నాసిరకం సరుకులను అంటగడుతోంది. కొందరికి సరుకులే లేకుండా చేసింది. మరీ ముఖ్యంగా.. ముస్లింలు ఆవునెయ్యి ఉపయోగించరని తెలిసి కూడా దానిని సరఫరా చేసి మరీ వారి మనోభావాలను దెబ్బతీసింది.
  
 కొవ్వూరు/దేవరపల్లి/ఏలూరు (ఆర్‌ఆర్ పేట) : రంజాన్ పండగ సమీపిస్తున్న నేపథ్యంలో పేద ముస్లింలకు రంజా న్ తోఫా పేరిట రాష్ట్ర ప్రభుత్వం ఇస్తామన్న సరుకులు సక్రమంగా అంద టం లేదు. జిల్లాలో తెల్లరేషన్ కార్డులు గల 26,749 పేద ముస్లిం కుటుంబాలకు ‘చంద్రన్న తోఫా’ పేరిట నాలుగు నిత్యావసర సరుకులతో కూడిన గిఫ్ట్ ప్యాక్ అంది స్తామని సీఎం చంద్రబాబు ఘనంగా ప్రకటించారు. జూలై 1వ తేదీన వీటిని అందించాల్సి ఉండగా, శనివారం నాటికి కనీసం 10శాతం మందికి కూడా సరుకులు అందలేదు.
  
 మరోవైపు 1,310 మంది కార్డుదారులకు అసలు సరుకులే కేటాయించలేదు. ఒక్కొక్క కుటుంబానికి ఐదు కేజీల గోధుమ పిండి, రెండు కేజీల పంచదార, కేజీ సేమియా, 100 గ్రాముల నెయ్యి చొప్పున ఒక సంచిలో వేసి అందించాల్సి ఉంది. కొన్ని మండలాల్లో కొందరి పేర్లు ఆన్‌లైన్‌లో రాకపోవడంతో సరుకులు పొందే అవకాశం లేకుండాపోయింది. తహసీల్దార్ కార్యాలయాల నుంచి పంపిన జాబితాల్లో కొందరు లబ్ధిదారుల పేర్లు లేకపోవడంతో వారికి సరుకులు కేటాయించలేదు. దేవరపల్లి మండలంలో 450 మంది కార్డుదారులకు గాను 132 మందికి అందలేదు.
  
 గోపాలపురం నియోజకవర్గ పరిధిలోని నాలుగు మండలాల్లో 2,144 పేద ముస్లిం కుటుంబాలు ఉండగా, 168 కుటుంబాలకు సరుకులు కేటాయించలేదు. కొవ్వూరులో 21 కార్డుదారులకూ ఇదే పరిస్థితి ఎదురైంది. శనివారం దేవరపల్లి మండలం లక్ష్మీపురంలో శనివారం రంజాన్ తోఫా సరుకుల పంపిణీకి వెళ్లిన ఎమ్మెల్యే ముప్పిడి వెంకటేశ్వరరావు, స్థానిక ప్రజాప్రతినిధులను ముస్లిం మహిళలు నిలదీశారు.
 కొంతమందికే సరుకులు మంజూరు చేశారని, మిగిలిన వారికి తర్వాత ఇస్తామని చెబుతున్నారని, పండగ వేళ ఇదేం దారుణమని ప్రశ్నించారు. దీనిపై సివిల్ సప్లైస్ డెప్యూటీ తహసీ ల్దార్ పోతురాజును ఎమ్మెల్యే ముప్పిడి వెంకటేశ్వరరావు ప్రశ్నిం చగా, ప్రభుత్వానికి పంపించిన జాబితా ప్రకారం సరుకులు విడుదల కాలేదని చెప్పారు. శుక్రవారమే వీటిని పంపిణీ చేయాల్సి ఉండగా, జిల్లాలో చాలాచోట్ల శనివారం మొదలుపెట్టారు. సోమ, మంగళవారాల్లో సరుకుల పంపిణీ పూర్తి చేస్తామని అధికారులు చెబుతున్నారు.
  
  ఆవు నెయ్యి ఇస్తున్నారు
  ఇదంతా ఒక ఎత్తయితే రేషన్ దుకాణాల ద్వారా ఆవునెయ్యి సరఫరా చేశారు. ఆవు నెయ్యిని ముస్లిం లెవరూ ఆహార పదార్థాల్లో కనీస మాత్రంగానైనా వినియోగించరని తె లిసి కూడా దీనిని సరఫరా చేసి తమ మనోభావాలను దెబ్బతీశారని పలువురు ఆగ్రహం వ్యక్తం చేస్తున్నారు.
  
  నాణ్యత లేని సరుకులు
  కొన్ని మండలాల్లో పంపిణీ చేసిన సరుకులు కొంత బాగానే ఉన్నప్పటికీ చాలాచోట్ల నాసిరకం సరుకులు ఇచ్చారని ముస్లింలు ఆవేదన చెందుతున్నారు. గోధుమ పిండిలో పొట్టు అధికంగా ఉందని, అందులో కల్తీ జరిగిందని పలువురు తెలిపారు. గోధుమ పిండిలో మైదా కలిసి ఉందని చెబుతున్నారు. సేమియా కూడా నాణ్యంగా లేదని పెదవి విరుస్తున్నారు. రెండో రకం పంచదార సరఫరా చేశారని విమర్శిస్తున్నారు.
  
  రెండు రోజుల్లో ఇస్తాం
  జిల్లాలో ఇంకా 1,310 కార్డుదారులకు తోఫా
  సరుకులు అందలేదని మాకు సమాచారం అందింది.
  తహసీల్దార్లు పంపిం చిన జాబితాల్లో కొందరి పేర్లు లేకపోవడంతో ఈ పరిస్థితి తలెత్తింది. సరుకులు అందని వారి వివరాలను సేకరించి ఉన్నతాధికారులకు నివేదించాం. వారందరికీ  సోమవారం నాడు సరుకులు పంపిణీ అయ్యేలా చర్యలు తీసుకుంటున్నాం.
  -పి.శివశంకర్‌రెడ్డి, డీఎస్‌వో
  


 ► ఉగ్రవాదుల తొలి ప్లాన్ ఇదే
 ► ఐసిస్ ప్రతినిధి అబ్ మహ్మద్ ఆదేశాలతో మార్పు
 ► రంజాన్‌కు ముందు..  శని, ఆదివారాల్లో విధ్వంసం సృష్టించేందుకు ఏర్పాట్లు చేసుకున్న ముష్కరులు
 ► ఎన్‌ఐఏ విచారణలో వెలుగుచూస్తున్న అంశాలు
 సాక్షి, హైదరాబాద్: రాష్ట్ర రాజధాని హైదరాబాద్‌లో రంజాన్ తర్వాత మారణహోమం సృష్టించేందుకు ఉగ్రమూకలు ప్లాన్ వేశాయా? కానీ అంతర్జాతీయ ఉగ్రవాద సంస్థ(ఐసిస్) నుంచి వచ్చిన ఆదేశాల మేరకు వ్యూహం మార్చుకొని రంజాన్‌కు ముందే పేలుళ్లకు సిద్ధమయ్యారా? అవుననే అంటున్నాయి జాతీయ దర్యాప్తు బృందం (ఎన్‌ఐఏ) వర్గాలు! ముష్కరులు వాస్తవానికి రంజాన్ తర్వాత నగరంలో విధ్వంసానికి కుట్ర పన్నారని ఎన్‌ఐఏ దర్యాప్తులో వెలుగుచూసింది. అయితే ఐసిస్ ప్రతినిధి అబ్ మహ్మద్ అల్ అద్నానీ సూచన మేరకు పేలుళ్లను వారం రోజుల ముందుకు మార్చారు.
  
  హైదరాబాద్‌లో పేలుళ్లకు స్కెచ్ వేసిన ఐదుగురు ఉగ్రవాదులను ఎన్‌ఐఏ అధికారులు శనివారం దాదాపు ఎనిమిది గంటల పాటు ప్రశ్నించారు. ఒక్కొక్కరిగా, బృందాలుగా కూర్చోబెట్టి వారిని విచారించారు. ముఖ్యంగా కుట్రలో కీలకంగా భావిస్తున్న మహ్మద్ ఇబ్రహీం యాజ్దానీ, హబీబ్ మహ్మద్ అలియాస్ యూసఫ్ గుల్షన్‌లను సుదీర్ఘంగా ప్రశ్నించారు. ఈ సందర్భంగానే ఐసిస్ ఉగ్రవాది అబ్ మహ్మద్ అల్ అద్నానీ పాత్ర వెలుగు చూసింది. ఇతడి ప్రోద్బలంతోనే పేలుళ్లను వారం రోజుల ముందుకు మార్చినట్లు ఎన్‌ఐఏ అధికారులకు ముష్కరులు వెల్లడించారు.
  
  వాస్తవానికి రంజాన్ తర్వాత పేలుళ్లు జరపాలని భావించగా.. అబ్ మహ్మద్ మాత్రం తీవ్రంగా వాదించి వారం రోజులు ముందుగా అది కూడా శని, ఆదివారాల్లో జరపాలని ఆదేశించినట్లు తెలిపారు. అందుకు అతడు 30 నిమిషాల నిడివి గల ఆడియోను ‘ఆన్‌లైన్’ ద్వారా పంపినట్లు అధికారులు గుర్తించారు. పేలుళ్లకు మొదట్లో విముఖత చూపిన వారు కూడా ఆ ఆడియో విన్న తర్వాత ఆసక్తి కనబర్చారు. దీంతో ఆ ఆడియోలో మహ్మద్ ప్రస్తావించిన అంశాలను క్షుణ్ణంగా పరిశీలిస్తున్నారు.
  
  ఆర్మర్ కనుసన్నల్లో రిక్రూట్‌మెంట్లు
  సిరియాలో ఉన్న ఐసిస్ ఉగ్రవాది షఫీ ఆర్మర్ కనుసన్నల్లో పెద్దఎత్తున రిక్రూట్‌మెంట్లు జరిగినట్లు ఎన్‌ఐఏ అనుమానిస్తోంది. కర్ణాటకలోని భత్కల్ ప్రాంతానికి చెందిన షఫీ ఆర్మర్ ఐసిస్‌లో కీలక పాత్ర పోషిస్తున్నాడు. ఇతడు ఐసిస్‌కు అనుబంధంగా అన్సార్ ఉల్ తవ్హిద్ పి బిలాద్ అల్ హింద్ (ఏయూటీ)ని ఏర్పాటు చేసి యువతను ఆకర్షిస్తున్నాడు. ముఖ్యంగా సామాజిక మాధ్యమాలైన ఫేస్‌బుక్, వాట్సప్ ద్వారా ఎప్పటికప్పుడు సందేశాలు పంపుతూ వారిని ప్రోత్సహిస్తున్నాడు. వీడియో కాలింగ్ ద్వారా బాంబుల తయారీ విధానంపై కూడా తర్ఫీదు ఇస్తున్నాడు. హైదరాబాద్‌తో పాటు కర్ణాటక, మహారాష్ట్ర, రాజస్థాన్, ఉత్తరప్రదేశ్, పశ్చిమబెంగాల్‌లో కొందరిని ఐసిస్ దిశగా దృష్టి మళ్లించినట్లు ఎన్‌ఐఏ వర్గాలు భావిస్తున్నాయి.
  
  ఎఫ్‌ఎస్‌ఎల్‌కు చేరిన ఫోన్లు, ల్యాప్‌టాప్‌లు
  ఉగ్రవాదుల నుంచి స్వాధీనం చేసుకున్న ఫోన్లు, ల్యాప్‌టాప్‌లను ఫోరెన్సిక్ సైన్స్ ల్యాబొరేటరీ (ఎఫ్‌ఎస్‌ఎల్)కు పంపించారు. బుధవారం పాతబస్తీలో పట్టుబడిన వారి నుంచి దాదాపు 40 సెల్‌ఫోన్లు, సిమ్‌కార్డులు, ల్యాప్‌టాప్‌లతో పాటు పెద్ద మొత్తంలో రసాయన పదార్థాలను అధికారులు స్వాధీనం చేసుకున్న సంగతి తెలిసిందే. ఎలక్ట్రానిక్ పరికరాలలో నిక్షిప్తమైన సమాచారాన్ని వెలికితీయాలని ఎఫ్‌ఎస్‌ఎల్ అధికారులకు సూచించారు. అలాగే కోడింగ్ విధానంలో జరిగిన  సంభాషణలపైనా అధ్యయనం చేయాలని ఎఫ్‌ఎస్‌ఎల్‌ను కోరారు.
  
  ఇబ్రహీం సౌదీ టూర్‌పై ఆరా
  మహ్మద్ ఇబ్రహీం యాజ్దానీ 2 నెలల కిత్రం సౌదీ అరేబియా వెళ్లి వచ్చినట్లు ఎన్‌ఐఏ అధికారులు గుర్తించారు. ఆ పర్యటనలో ఎవరెవరితో సమావేశమయ్యాడనే అంశంపై ఆరా తీస్తున్నారు. మారుపేర్లతో సౌదీకి వచ్చిన షఫీ ఆర్మర్.. ఇబ్రహీంతో చర్చించినట్లు సమాచారం. అక్కడి నుంచి ఇటీవల ఎవరైనా హైదరాబాద్ వ చ్చారా? కశ్మీర్‌లోని వేర్పాటు వాదులతో ఏమైనా సంబంధాలున్నాయా అని ముష్కరులను ప్రశ్నించారు.
 
  నేడు మహారాష్ట్రకు ఉగ్రవాదులు!
  తమ కస్టడీలో ఉన్న ఐదుగురు ఉగ్రవాదులను ఆదివారం మహారాష్ట్రకు తీసుకువెళ్లాలని ఎన్‌ఐఏ అధికారులు యోచిస్తున్నారు. ఇబ్రహీం యాజ్దానీ మహారాష్ట్రలోని నాందేడ్‌కు వెళ్లి ఆయుధాలు కొనుగోలు చేసినట్లు గుర్తించారు. అతడికి సహకరించిన వారితో పాటు అక్కడున్న పరిచయాలపై ఆరా తీయనున్నారు. అక్కడ్నుంచి ఇబ్రహీం రాజస్థాన్ లో పర్యటించిన ప్రాంతాలకు వెళ్లనున్నారు.
  


 ఇది వ్యాపారం చేసే బాజారు కాదు ఆప్తులు తప్పిపోయే ‘మేళా’ కాదు అత్తరు చల్లుకొనే కమ్మని ఆలింగనం ‘బతాసులు’ దొరికే స్వప్నలోకం హైద్రాబాదంటే రాఖీలు పేర్చిన దీపాల షామియాన - రాజా హైదరాబాదీ
 వీధి దీపాల వెలుగులో మాత్రమే చూడగలిగే విచిత్రాలు.. పగటిపూట రద్దీకి పూర్తి విరుద్ధంగా అరకొర వాహనాలతో రహదారులు.. ఫ్లాస్క్‌లో టీ, కాఫీ, డబ్బాలో సిగరెట్ ప్యాకెట్లు రోడ్లకు వారగా పెట్టుకొని విక్రయించే చిరు వ్యాపారులు.. చీకటి వెలుగుల మాటున రాత్రిని ఎంజాయ్ చేస్తూ సిటీలో సంచరించే నైట్ లవర్స్..  గతంలోనూ ఉండేవారు. అయితే ఇప్పుడు ఇలాంటి అభిరుచి కలిగిన వారంతా గ్రూపులు కట్టారు. ‘నైట్ వాక్స్’ పేరుతో బృందాలుగా నగర సంచారం చేస్తున్నారు. రంజాన్ పండుగ సంబరాల నేపథ్యంలో వీరి ‘వాక్స్’ మరింత ‘పీక్స్’కి చేరాయి.  - ఓ మధు
 వాక్.. సాగేదిలా..
 హైదరాబాద్‌లోని చార్మినార్ ప్రాంతంలో ఎప్పుడూ సందడే ఉంటుంది. రంజాన్ సమయంలో ఈ సందడి పదింతలవుతుంది. రాత్రులు కూడా పగళ్లను మరిపిస్తూ సందర్శకుల తాకిడితో ఆ పరిసరాలన్నీ కలర్‌ఫుల్‌గా మారుతాయి. అందుకే ఇప్పుడు నగరంలోని నైట్ వాకర్స్ అంతా అదే ప్రాంతాన్ని ఎంచుకుంటున్నారు. వాట్సాప్, ఫేస్‌బుక్‌ల ద్వారా సమాచారం అందించుకుంటూ బృందాలుగా నైట్ వాక్‌లు నిర్వహిస్తున్నారు. గత కొన్ని రోజులుగా పాతబస్తీలో వీరి సందడి ఊపందుకుంది.
 స్థానికంగా నయాబ్ హోటల్ దగ్గర మొదలుకొని కనీసం 2 కి.మీ దూరంలో చార్మినార్ పరిసరాల్లోని హైలైట్స్ అన్నీ టచ్ చేస్తారు. పాతబస్తీ ప్రత్యేకతలు, ఆర్ట్, క్రాఫ్ట్ విషయాల్ని మాట్లాడుకుంటూ గల్లీగల్లీ చుట్టేస్తారు. చార్మినార్, మక్కా మసీదుల చరిత్ర పంచుకుంటారు. కాస్త సమయం చిక్కితే సిటీ కల్చర్ గురించి స్థానికులతో పిచ్చాపాటీ జరుపుతారు. ఇరానీ ఛాయ్ తాగి చార్మినార్ సందుల్లో తిరిగి.. హలీం రుచుల్ని ఆస్వాదిస్తారు. లాడ్‌బజార్, మదీనా షాపుల్లో తిరుగుతూ షాపింగ్ చేస్తారు.
 చీకటి నడకల వెలుగులెన్నో..
 వేర్వేరు ప్రాంతాల నుంచి నగరానికి కొత్తగా వచ్చిన వారిని ఈ నైట్ వాక్ ఈవెంట్‌లు విశేషంగా ఆకట్టుకుంటున్నాయి. సిటీ కల్చర్, పండుగ స్పెషల్స్ అన్నీ ఈ వాక్ అండ్ టాక్‌లో భాగమయ్యాయి. ఉదాహరణకు ఈ టైమ్‌లో రంగుల్లో వెలిగిపోయే చార్మినార్, దాని చుట్టూ అంతకన్నా కలర్‌ఫుల్‌గా సాగే రంజాన్ నైట్ బజార్.. గాజుల మెరుపులు, ఇరానీ ఛాయ్ ఘుమఘుమలు, హలీం రుచులు, దాని విశిష్టత.. ఇలా నగర సంస్కృతీ సంప్రదాయాలన్నీ ఒక్క పూటలోనే అవగతమయ్యేందుకు వీరికి అవకాశం లభిస్తోంది. పని తప్ప మరో ప్రపంచం తెలియని నగర ఉద్యోగులకు ఇవి ఎంతగానో ఉపకరిస్తున్నాయి.
 ఇక నగర సంస్కృతిపై అవగాహన కల్పించేందుకు సందర్భానుసారంగా నైట్ వాక్‌లు నిర్వహిస్తూ పండుగలు, ఈవెంట్ల ప్రత్యేకతలు తెలియజేస్తున్న ‘హైదరాబాద్ ట్రెయిల్స్’ సంస్థ లాంటివి కూడా ఉన్నాయి. రంజాన్ సందర్భంగా ఈ సంస్థ ఈ నెలలో ఐదు సార్లు వాక్ నిర్వహించింది. ఈ సంస్థ ఆధ్వర్యంలో ప్రతి వీకెండ్‌లో 20-25 మంది గ్రూపుగా వెళ్లి సిటీ హెరిటేజ్‌కి షోకేస్ లాంటి ప్రదేశాల్ని విజిట్ చేస్తున్నారు. వందల ఏళ్ల నాటి నగర చారిత్రక వైభవాన్ని ఆస్వాదిస్తూ సాగుతున్నాయి ఈ నైట్‌వాక్స్. సిటీ కల్చర్‌కి కేరాఫ్‌గా నిలిచే చార్మినార్ ప్రాంతంలో వాక్ పూర్తయిన తర్వాత ఓ చక్కని ఫీలింగ్‌తో ఇళ్లకు చేరుతున్నారు వాకర్స్.
 మంచి అవకాశం..
 ఈ వాక్ రాత్రి 9:30 గంటలకు ప్రారంభమై 12:30 వరకు కొనసాగుతుంది. చార్మినార్ దగ్గర నైట్ వాక్  అంటే కేవలం ఒక పండుగ గురించి తెలిపేదే కాదు.. హైదరాబాద్ చరిత్ర, వైభవాన్ని తట్టి చూపే ఒక చక్కటి అవకాశం. - గోపాల కృష్ణ, హైదరాబాద్ ట్రెయిల్స్
 ఎంజాయ్ చేశా..
 పగటి పూట జరిగే జాతరలు, మార్కెట్లు ఎన్నో చూశాం. నైట్ వాక్స్‌లోనూ పాల్గొన్నాం. కానీ ఫెస్టివ్ మూడ్‌తో ఉండే నైట్ బజార్‌ని సందర్శించడం ఇదే తొలిసారి. బాగా ఎంజాయ్ చేశాను.  -స్వాతి,ఐటీ ఉద్యోగి,బెంగళూర్
 ఇల్లు గుర్తుకు రాదు..
 నైట్ వాక్స్ వెరైటీ ఎక్స్‌పీరియన్స్. రాత్రి పూట దొరికేవి తినడం ఇంట్రెస్టింగ్. నాన్‌వెజ్ మాత్రమే కాదు..  దోసెలు, స్వీట్లు, సమోసాలకు సైతం లోటుండదు. కళ్లు, కాళ్లు అలిసిపోయి.. కడుపు ఆయాస పడుతుంటే గానీ ఇళ్లకు వెళ్లాల్సిన సమయమైందని గుర్తు రాదు.
 - రాజేశ్, టూరిస్ట్


 ♦ ‘రంజాన్ ’ నిధులు ఇంకా బ్యాంకు ఖాతాలోనే
 ♦ దగ్గర పడుతున్న పండగ
 ♦ గతేడాది నిధుల్లో రూ.30లక్షలు ఖర్చు చేయని వైనం
 ♦ ముందస్తు ప్రణాళికలో మైనార్టీ శాఖ విఫలం
 ♦ ఆందోళన వ్యక్తం చేస్తున్న ముస్లింలు
 రంజాన్ పండగకు ప్రభుత్వం నిధులు విడుదల చేస్తున్నా, ఖర్చు చేయడంలో సంబంధిత శాఖ నిర్లక్ష్యంగా వ్యవహరిస్తుందనే ఆరోపణలున్నారుు. పండగకు నాలుగైదు రోజులున్నా...నిధుల ఖర్చుకు ఇప్పటి వరకూ ప్రణాళిక సిద్ధం చేయలేదు. రంజాన్ పండగను పురస్కరించుకొని  ప్రతి జిల్లాకు ప్రభుత్వం ఏటా రూ. 50 లక్షలు కేటారుుస్తున్నది. గతేడు విడుదలైన నిధుల్లో  రూ. 30లక్షలు మిగిలారుు. ఈఏడు విడుదలైన నిధులను ఎలా ఖర్చు చేస్తారో అధికారులకే తెలియూలి.  
 పాల్వంచ : జిల్లాలోని 41 మండలాల్లో సుమారు 327 మసీదులు, 70 పైగా ఈద్గాలు, 258 దర్గాలు ఉన్నాయి. రంజాన్ మాసం పురస్కరించుకుని మసీదుల్లో, ఈద్గాల్లో మౌలిక వసతులు కల్పనకు రూ.50 లక్షల నిధులు విడుదలయ్యాయి. ఈ నిధులు జిల్లా కలెక్టర్, జిల్లా మైనార్టీ సంక్షేమ అధికారి జాయింట్ ఖాతాలోకి ఇప్పటికే వచ్చి ఉన్నాయి. మసీదుల్లో నెలకొన్న అవసరాలను గుర్తించడం కోసం మున్సిపాలిటీల్లో కమిషనర్లకు, మండలాల్లో ఎంపీడీఓలకు జిల్లా మైనార్టీ సంక్షేమ శాఖాధికారులు ప్రపోజల్స్ పంపాలని సర్క్యూలర్‌ను జారీ చేయాల్సి ఉంది. స్థానిక మసీదుల కమిటీలతో సమావేశం నిర్వహించి మసీదులకు కావాల్సిన తాగునీరు, మరుగుదొడ్ల నిర్మాణాలు, రంగులు వేయడం, విద్యుత్ దీపాలు అలంకరణ, చిన్న చిన్న మరమ్మతులు తదితర పనులపై నివేదిక తయారు చేయాలి. ఇలా కమిషనర్లు, ఎంపీడీఓలు రూపొందించిన నివేదికలు జిల్లా యంత్రాంగానికి చేరాలి. రంజాన్ వేడుకలకు మరో నాలుగు రోజులే మిగిలి ఉండగా, నేటికీ నివేదికలు తెప్పించుకోలేక పోయారు.
  గతేడాది మిగిలిపోయిన రూ.30 లక్షలు
 గతేడాది జిల్లాకు రూ.50 లక్షల నిధులు విడుదల కాగా అందులో రూ.20 లక్షలు మాత్రమే ఖర్చు చేశారు. ఇంకా రూ.30లక్షల నిధులు మిగిలే ఉన్నాయి. వాటికి తోడు ఈ సారి మరో రూ.50 లక్షల నిధుల విడుదలయ్యాయి. రంజాన్ నెల కంటే నెల రోజుల ముందే తయారు చేయాల్సిన ఈ నివేదికను, పండుగ దగ్గరపడుతున్నా అధికారులు తమకేమీ పట్టనట్లు వ్యవహరిస్తున్నారు.  జిల్లా మైనారిటీ సంక్షేమాధికారి కుముదిని సింగ్‌ను వివరణ కోరగా.. గత వారమే నిధులు వచ్చాయని, మసీదుల్లో మౌలిక అవసరాలను గుర్తించాలని సర్క్యూలర్ జారీ చేస్తామని తెలిపారు. గతేడాది పది మండలాల నుంచే ప్రపోజల్స్ రావడంతో నిధులు మిగిలిపోయాయని పేర్కొన్నారు.


 హైదరాబాద్ : రంజాన్ మాసం పురస్కరించుకుని రాష్ట్ర గవర్నర్ నరసింహన్ శుక్రవారం రాజ్‌భవన్‌లో ఇఫ్తార్ విందు ఇచ్చారు. ఈ కార్యక్రమానికి తెలంగాణ ముఖ్యమంత్రి కేసీఆర్ హాజరయ్యారు. ఆయనతో పాటు కేంద్ర మంత్రి బండారు దత్తాత్రేయ, ఆంధ్రప్రదేశ్, తెలంగాణ శాసన మండలి చైర్మన్లు చక్రపాణి, స్వామిగౌడ్, ఉప ముఖ్యమంత్రి మహమూద్ అలీ, కాంగ్రెస్ ఎమ్మెల్సీ షబ్బీర్ అలీ, బీజేపీ ఎమ్మెల్యే కిషన్ రెడ్డితో పాటు మంత్రులు నాయిని నర్సింహారెడ్డి, హరీశ్ రావు, ఇంద్రకరణ్ రెడ్డి, ఎంపీలు జితేందర్ రెడ్డి, డీ శ్రీనివాస్, ఎమ్మెల్యేలు, వివిధ పార్టీ నేతలు, రాష్ట్ర హజ్ కమిటీ అధికారి, మత పెద్దలు ఈ విందులో పాల్గొన్నారు.
 ఈ సందర్భంగా గవర్నర్ ముస్లిం సోదరులకు రంజాన్ శుభాకాంక్షలు తెలిపారు. రెండు రాష్ట్రాలు అభివృద్ధిలో ముందుండాలని ...తెలుగు రాష్ట్రాల ప్రజలు సుభిక్షంగా బతకాలని గవర్నర్ ఆకాంక్షించారు.
 మరోవైపు ఆంధ్రప్రదేశ్ ప్రభుత్వం కూడా గుంటూరులో ఇఫ్తార్ విందు ఇచ్చింది. ఈ ఇఫ్తార్ విందులో ముఖ్యమంత్రి చంద్రబాబు నాయుడు పాల్గొన్నారు.


 పవిత్ర రంజాన్ మాసాన్ని పురస్కరించుకోని రేపు (ఈ 24న) రాజ్‌భవన్‌లో గవర్నర్ ఈఎస్‌ఎల్ నరసింహన్ ఇఫ్తార్ విందు ఇవ్వనున్నారు. శుక్రవారం సాయంత్రం ప్రారంభమయ్యే ఈ విందులో తెలంగాణ, ఏపీ ముఖ్యమంత్రులు కేసీఆర్‌, చంద్రబాబులకు ఆహ్వానాలు వెళ్లాయి. వీరితో పాటు ఇరు రాష్ట్రాల మంత్రులు, ప్రజాప్రతినిధులు, అధికారులు హాజరు కానున్నారు. ఇప్పటికే ఇఫ్తార్‌లో పాల్గొనాలని ప్రముఖులకు రాజ్‌భవన్ నుంచి అధికారులు ఆహ్వానాలను పంపారు.
 
 గవర్నర్ ఆహ్వానంపై చంద్రబాబు ఒక్కసారిగా మీమాంసలో పడిపోయారు. ఇప్పుడు ఇదే అంశం రాజకీయ వర్గాల్లో హాట్ టాపిక్ గా మారింది. 'ఓటుకు కోట్లు' కేసు తర్వాత హైదరాబాద్ ను వదిలిపెట్టడమే కాకుండా కేసీఆర్ కు వ్యతిరేకంగా నోరు విప్పని చంద్రబాబు తాజా అవకాశాన్ని సద్వినియోగం చేసుకుంటారని తెలుస్తోంది.
 
 
 ఇక తెలంగాణ ప్రభుత్వం ఈ నెల 26న ఇఫ్తార్ విందు ఇవ్వనుంది. 1,95,050 మందికి నూతన వస్త్రా‌లు పంపిణీ చేయనుంది. అదే రోజు హైదరాబాద్‌ లోని 1000 ప్రాంతాల్లో లక్ష మందికి ఇఫ్తార్‌ విందు ఇస్తారు. 100 మసీదుల వద్ద 1000 మందికి చొప్పున నూతన వస్త్రా‌లు పంపిణీ చేస్తారు. 95 నియోజకవర్గాల్లో ఒక్కో చోట 1000 మందికి చొప్పున విందు, 95 వేల కు టుంబాలకు రూ.500 విలువైన వస్త్రా‌లు అందజేస్తారు.


 - రూ.12 కోట్లతో 2లక్షల కుటుంబాలకు దుస్తుల పంపిణీ
 - రంజాన్ ఏర్పాట్లపై మంత్రి తలసాని సమీక్ష
 
 హైదరాబాద్: రాష్ట్రవ్యాప్తంగా 195 మసీదుల్లో రాష్ట్ర ప్రభుత్వం తరఫున ఇఫ్తార్ విందులను ఏర్పాటు చేస్తున్నామని పశు సంవర్ధక శాఖ మంత్రి తలసాని శ్రీనివాస్‌ యాదవ్ చెప్పారు. రంజాన్ పండుగ ఏర్పాట్లపై గురువారం అధికారులతో సమీక్ష అనంతరం వివరాలను ఆయన మీడియాకు వెల్లడించారు. మంత్రి తలసాని మాట్లాడుతూ.. ముస్లిం సోదరులు ఎంతో పవిత్రంగా భావించే రంజాన్ మాసంలో రాష్ట్ర ప్రభుత్వం గతేడాది నుంచి ఇఫ్తార్ విందులను ఇస్తోందని, దేశంలోనే ప్రప్రథమంగా ప్రభుత్వం తరఫున ఇఫ్తార్ విందులను ఏర్పాటు చేసిన ఘనత ముఖ్యమంత్రి కేసీఆర్‌కే దక్కుతుందన్నారు. ఈ ఏడాది ఇఫ్తార్ విందుల కోసం రూ.4 కోట్లు వెచ్చిస్తున్నామని, దాదాపు 2 లక్షల ముస్లిం కుటుంబాలకు రూ.12 కోట్లు వెచ్చించి దుస్తులు పంపిణీ చేయాలని నిర్ణయించినట్లు మంత్రి వివరించారు. సమీక్ష సమావేశంలో వక్ఫ్‌బోర్డ్ సీఈవో అసదుల్లా, ఈవో మునావర్, పలువురు ముస్లిం మతపెద్దలు, ప్రజాప్రతినిధులు పాల్గొన్నారు.


 దుబాయ్: మధ్యప్రాచ్యానికి చెందిన ప్రఖ్యాత ఎడారి దేశం దుబాయ్‍ లో రంజాన్ పర్వదినం సందర్భంగా అనూహ్య నిర్ణయం తీసుకున్నారు. రంజాన్ సందర్భంగా పగటిపూట మద్యాన్ని అమ్మకూడదన్న నిబంధనలను తాజాగా సడలిస్తూ దుబాయ్ ప్రభుత్వం నిర్ణయం తీసుకుంది. రంజాన్ నెలలో మద్యం అమ్మకాల నిబంధనలను సడలించడం దుబాయ్ లో తొలిసారి కావడం గమనార్హం.
 
 గతంలో రంజాన్ సందర్భంలో మద్యం కొనుగోలు చేయాలంటే సూర్యాస్తమయం అయ్యేవరకు వేచిచూడాల్సి వచ్చేది. ముస్లింలు రంజాన్ ఉపవాసాన్ని నీటితో విరమించి.. ఇఫ్తార్ విందు స్వీకరించిన అనంతరమే మద్యం అమ్మకాలు జరిపేవారు. ముస్లింలకు పవిత్రమైన మాసం కావడంతో దుబాయ్ లోని బార్లు, హోటళ్లలో రాత్రిపూట రహస్యంగా మాత్రమే మద్యం అమ్మకాలు జరిగేవి.
 
 అయితే, తాజాగా దుబాయ్ పర్యాటక, వాణిజ్య మార్కెటింగ్ విభాగం.. పర్యాటకులు, మద్యం అమ్మకాలపై వచ్చే పన్ను ఆదాయాన్ని దృష్టిలో పెట్టుకొని అనూహ్య నిర్ణయం తీసుకుంది. ఎమిరెట్స్ అంతటా ఉన్న హోటళ్లు, బార్లకు ఓ నోటీసు జారీ చేసింది. మే 31న జారీచేసిన ఈ నోటీసులో రంజాన్ మాసంలోనూ మద్యం అమ్మకాల విషయంలో సాధారణ నిబంధనలే వర్తిస్తాయని, గతంలో మాదిరిగా పరిమిత సమయంలోనే అమ్మకాలు జరుపాలన్న నిబంధనలు ఉండబోవని తెలియజేసింది. ఈ నోటీసు ప్రతిని సంపాదించిన మీడియా.. దీని గురించి దుబాయ్ పర్యాటక, వాణిజ్య మార్కెటింగ్ విభాగాన్ని వివరణ కోరగా.. ప్రపంచస్థాయి పర్యాటక స్థలంగా ఉన్న దుబాయ్ కి వచ్చే పర్యాటకులను దృష్టిలో పెట్టుకొని ఈ నోటీసు జారీచేసినట్టు తెలిపింది.


 సాక్షి, హైదరాబాద్ః రంజాన్ పండుగ సందర్భంగా రాష్ట్రంలోని పేద ముస్లింలకు నాలుగు రకాల సరుకులను ఉచితంగా పంపిణీ చేసేందుకు పౌరసరఫరాల శాఖ కమిషనర్ జి.జయలక్ష్మి బుధవారం ఉత్తర్వులు జారీ చేశారు. తెల్లరేషన్ కార్డున్న ప్రతి కుటుంబానికి 2 కిలోల చక్కెర, 5 కిలోలు గోధుమ పిండి, ఒక కిలో సేమియా, 100 గ్రాముల నెయ్యి పంపిణీ చేయనున్నారు. రాష్ట్ర వ్యాప్తంగా 11 లక్షల మంది పేద ముస్లిం కుటుంబాలు లబ్ది పొందనున్నట్లు ఉత్తర్వుల్లో ఆమె పేర్కొన్నారు.


 జైసల్మీర్: గణపతి ఉత్సవాల సంబరాల్లో పాల్గొంటూ ముస్లింలు.. రంజాన్ మాసంలో హిందువులు ఉపవాసం ఉంటూ రాజస్థాన్ లోని ఓ ప్రాంతం మతసామరస్యానికి ప్రతీకగా నిలుస్తోంది. రాష్ట్రంలోని బర్మర్, జైసల్మీర్ జిల్లాల్లో ముస్లింలు దీపావళి జరుపుకొంటూ పాటలు ఆలపిస్తారు. మరికొందరు గణేశ్ ను పూజిస్తారు. తమ తోటి హిందువులతో ఆచారాలను పాటిస్తారు. అలాగే ముస్లింలు అతి పవిత్రంగా భావించే రంజాన్ నెలలో హిందువులు వారితో పాటే ఉపవాసం చేస్తారు. మరికొందరు రోజుకు అయిదు సార్లు నమాజు చేస్తున్నారు. కాగా, ఈ ఆచార సంప్రదాయం ఎలా వచ్చిందో ఎవరికీ తెలియదు. భారత్ నుంచి పాకిస్తాన్ విడిపోయాక సింధ్ నుంచి చాలా హిందూ కుటుంబాలు రాజస్థాన్ కు వచ్చి స్థిరపడ్డాయి. అక్కడి గ్రామాల్లో ప్రజలు ధరించే వేషధారణ సైతం ఇంచుమించు అందరిదీ ఒకేలాగ ఉండటంతో హిందువులెవరో.. ముస్లింలు ఎవరో? చెప్పలేని పరిస్థితి కనిపిస్తోంది.
 దీనిపై గోహడ్ కా తల అనే గ్రామంలో నివసించే డా. మేఘారామ్ గద్ వీర్ మాట్లాడుతూ.. గ్రామంలోని ప్రతి ఒక్కరి ఆనందాలు, బాధలను అందరూ పంచుకుంటారని, కుల, మత, వర్గ తారతమ్యాలకు ఇక్కడ చోటు లేదని తెలిపారు. పాకిస్తాన్ భారత్ నుంచి విడిపోయిన తర్వాత ఇక్కడికి వచ్చినట్లు చెప్పారు. పాక్ తో యుద్ధ సమయంలో కూడా ఇలానే జీవించాం అని వివరించారు. బర్మార్ జిల్లాలోని గోహడ్ కా తల, రబసర్, సట, సిన్హానియా, బఖాసర్, కెల్నోర్ గ్రామాల్లోని ఎక్కువమంది ప్రజలు దీనిని పాటిస్తున్నారు. వివాహాల సమయంలో హిందూ దేవుళ్ల పాటలను పాడుతూ… గణేశుడి పూజతో ప్రారంభిస్తున్నారు.


 సాక్షి, హైదరాబాద్: రంజాన్ ఉపవాసాలను పురస్కరించుకుని సీఎం కేసీఆర్.. రాష్ట్ర ప్రభుత్వం తరఫున ఈ నెల 26న ముస్లిం సోదరులకు దావత్-ఏ-ఇఫ్తార్(ఇఫ్తార్ విందు) ఇవ్వనున్నారు. దీనికి సంబంధించిన మార్గదర్శకాలను విడుదల చేస్తూ రాష్ట్ర మైనారిటీ సంక్షేమ శాఖ శనివారం ఉత్తర్వులు జారీ చేసింది. కేసీఆర్ హైదరాబాద్‌లోని నిజాం కళాశాల మైదానంలో 6 వేల మందికి స్వయంగా ఇఫ్తార్ విందు ఇవ్వనున్నారు. అలాగే జీహెచ్‌ఎంసీ పరిధిలోని 100 మసీదుల్లో లక్ష మందికి, రాష్ట్రంలోని ప్రతి అసెంబ్లీ నియోజకవర్గ కేంద్రంలోని ఒక్కో మసీదులో 1,000 మందికి ఇఫ్తార్ విందు ఇచ్చేందుకు ఏర్పాట్లు చేయనున్నారు.
 
 ఒక్కో మసీదు ద్వారా 1,000 మంది పేద కుటుంబాలకు దుస్తులను సైతం పంపిణీ చేయనున్నారు. అనాథ చిన్నారులకు ఇఫ్తార్ విందుతో పాటు దుస్తులు పంపిణీ చేయనున్నారు. దీనికి సంబంధించి రూ.14 కోట్లను ప్రభుత్వం విడుదల చేసింది. నగరంలో ఇఫ్తార్ విందు ఏర్పాట్లను హైదరాబాద్, సైబరాబాద్ పోలీసు కమిషనర్లతో పాటు జీహెచ్‌ఎంసీ కమిషనర్, వక్ఫ్ బోర్డు అధికారులు పర్యవేక్షించనున్నారు. జిల్లాల్లో కలెక్టర్ల ఆధ్వర్యంలో ఈ కార్యక్రమాలు జరగనున్నాయి. దుస్తుల పంపిణీ బాధ్యతలను మసీదు కమిటీలు, ఇమాంలకు అప్పగించింది.


 ♦ అధికారిక ఏర్పాట్లపై ముఖ్యమంత్రి కేసీఆర్ సమీక్ష
 ♦ 2 లక్షల ముస్లిం పేద కుటుంబాలకు దుస్తుల పంపిణీ
 సాక్షి, హైదరాబాద్: తెలంగాణ వ్యాప్తంగా రంజాన్‌ను ఘనంగా నిర్వహించాలని సీఎం కేసీఆర్ అధికారులను ఆదేశించారు. ప్రభుత్వపరంగా ఈద్గా, మసీదుల దగ్గర కావాల్సిన ఏర్పాట్లు చేయాలన్నారు. రంజాన్ సందర్భంగా 2 లక్షల పేద ముస్లిం కుటుంబాలకు కొత్త దుస్తులు పంపిణీ చేయాలని, ఈ నెల 17 నుంచి 22 వరకు హైదరాబాద్‌లోని 100 ప్రాం తాల్లో, జిల్లాల్లోని 95 అసెంబ్లీ నియోజకవర్గాల్లో ఈ కార్యక్రమం నిర్వహించాలన్నారు. మదర్సాలు, అనాథ శరణాలయాల్లో కూడా దుస్తులు పంపిణీ చేయాలన్నారు. వచ్చే నెలలో జరిగే రంజాన్ సందర్భంగా ప్రభుత్వం తరఫున చేయాల్సిన కార్యక్రమాలపై క్యాంపు కార్యాలయంలో మంగళవారం ముఖ్యమంత్రి సమీక్షించారు.
 సీఎం మాట్లాడుతూ రంజాన్‌ను పురస్కరించుకుని ముస్లిం సోదరులకు రాష్ట్రవ్యాప్తంగా అధికారికంగా ఇఫ్తార్ విందు ఇవ్వాలని అధికారులను ఆదేశించారు. 26న హైదరాబాద్‌లోని నిజాం కాలేజీ మైదానంలో సాయంత్రం ప్రత్యేక ప్రార్థన చేసి ఇఫ్తార్ విందు ఏర్పా టు చేయాలని, నగరంలోని ప్రజాప్రతినిధులు, వివిధ రంగాల ప్రముఖులు, మత పెద్దలు, రాయబారులు, కాన్సులేట్లను ఆహ్వానించాలని సీఎం సూచించారు. నిజాం కాలేజీలో జరిగే ప్రధాన కార్యక్రమంలో తాను పాల్గొంటానని సీఎం వెల్లడించారు. అదే రోజు రాష్ట్రవ్యాప్తంగా ఇఫ్తార్ విందులు జరగాలని చెప్పారు. జిల్లా కేంద్రంలో జరిగే ప్రధాన కార్యక్రమానికి కలెక్టర్లు సమన్వయకర్తలుగా వ్యవహరించాలని సూచించారు. రంజాన్ సందర్భంగా ముస్లింల ప్రార్థనా స్థలాల వద్ద కావాల్సిన కనీస వసతులు కల్పించాలని సీఎం చెప్పారు.
 సమీక్షలో డిప్యూటీ సీఎం మహమూద్ అలీ, ప్రభుత్వ ప్రధాన కార్యదర్శి రాజీవ్‌శర్మ, సీఎంవో ముఖ్య కార్యదర్శి నర్సింగ్‌రావు, సీనియర్ ఐపీఎస్ అధికారి ఏకే ఖాన్, మైనారిటీ సంక్షేమ శాఖ కార్యదర్శి ఉమర్ జలీల్, సీఎం ప్రత్యేక కార్యదర్శి భూపాల్‌రెడ్డి తదితరులు పాల్గొన్నారు. కాగా, పేద ముస్లింలు, మైనారిటీల విద్య, ఉపాధికి ప్రభుత్వం చేపట్టిన కార్యక్రమాలను కూడా ముఖ్యమంత్రి ఈ సందర్భంగా సమీక్షించారు. రాష్ట్రవ్యాప్తంగా 3 లక్షల మంది మైనారిటీలకు ప్రభుత్వపరంగా భూ పంపిణీ జరిగినట్లు లెక్కలున్నాయని, అవి ఏ పరిస్థితుల్లో ఉన్నాయో విచారణ జరపాలని ఇప్పటికే అధికారులకు ఆదేశాలిచ్చామని చెప్పారు. వివరాలు అందిన వెంటనే సదరు భూములన్నీ మైనారిటీలకు వంద శాతం ఉపయోగపడే విధంగా చర్యలు తీసుకోవాలన్నారు.


 రజనీ కాంత్ హీరోగా తెరకెక్కుతున్న లేటెస్ట్ యాక్షన్ ఎంటర్టైనర్ కబాలి. ఈ సినిమాకు సంబంధించి రోజుకో వార్త అభిమానులకు షాక్ ఇస్తుంది. ఇప్పటికే ఆన్లైన్లో, ప్రీ రిలీజ్ బిజినెస్లో సంచలనాలు నమోదు చేస్తున్న ఈ సినిమా కోసం అభిమానులు ఆసక్తిగా ఎదురు చూస్తున్నారు. అయితే కోలీవుడ్ సర్కిల్స్లో వినిపిస్తున్న వార్తలు మాత్రం అభిమానుల ఆశలపై నీళ్లు చల్లుతున్నాయి.
 
 ఇప్పటికే భారీగా జరుగుతుందనుకున్న ఆడియో ఫంక్షన్ లేదన్న వార్త అభిమానులను తీవ్రంగా నిరాశపరిచింది. ఆ షాక్ నుంచి కోలుకోకముందే సినిమా రిలీజ్ విషయంలో కూడా భిన్న వాదనలు వినిపిస్తున్నాయి. గతంలో ఎన్నడూ లేని విధంగా భారీగా కబాలి రిలీజ్కు ప్లాన్ చేశారు చిత్రయూనిట్. అందులో భాగంగా పలు ముస్లిం దేశాల్లో కూడా ఈ సినిమాను గ్రాండ్గా రిలీజ్ చేస్తున్నారు.
 
 అయితే ప్రస్తుతం ముస్లింలకు పవిత్ర రంజాన్ మాసం కొనసాగుతుండటంతో అదే సమయంలో కబాలిని రిలీజ్ చేయటం కరెక్ట్ కాదన్న వాదన వినిపిస్తోందట. ఈ సమయంలో ముస్లింలు సినిమాలు చూడటానికి పెద్దగా ఆసక్తి చూపించరు కాబట్టి, రంజాన్ మాసం పూర్తయిన తరువాత కబాలిని రిలీజ్ చేయాలన్న ఆలోచన చేస్తున్నారట. ఇప్పటి వరకు సినిమా వాయిదాపై యూనిట్ సభ్యులు ప్రకటన చేయకపోయినా.. తమిళనాట కబాలి రిలీజ్పై రకరకాల వార్తలు వినిపిస్తున్నాయి.


 ప్రపంచ పరిణామాలపై చర్చ
 - పురాతన భారత కళాఖండాలను  తిరిగి అప్పగించిన అమెరికా
 - కల్పనాచావ్లాకు మోదీ నివాళులు..
  
  వాషింగ్టన్: మూడు రోజుల అమెరికా పర్యటన కోసం సోమవారం వాషింగ్టన్ చేరుకున్న మోదీ ఆ దేశానికి చెందిన పలు ప్రముఖ మేధో సంస్థల(థింక్ ట్యాంక్స్)తో భేటీ అయ్యారు. ప్రపంచ పరిణామాలను, సవాళ్లను ఆయా సంస్థలు ఎలా చూస్తున్నాయి.. ప్రపంచానికి భారత్, అమెరికాలు కలసి ఏం చేయగలవని భావిస్తున్నాయి అనేది తెలుసుకునేందుకు మోదీ ఈ భేటీలో పాల్గొన్నారు. బ్రూకింగ్స్ ఇన్‌స్టిట్యూట్, కౌన్సిల్ ఫర్ ఫారిన్ రిలేషన్స్, సెంటర్ ఫర్ అమెరికన్ ప్రోగ్రెస్, అట్లాంటిక్ కౌన్సిల్, సెంటర్ ఫర్ నేషనల్ ఇంటరెస్ట్, కార్నెగీ ఎండోమెంట్, ది యూఎస్ ఇన్‌స్టిట్యూట్ ఆఫ్ పీస్ తదితర సంస్థల ప్రతినిధులు పాల్గొన్నారు. ‘అగ్రగామి మేధో సంస్థలతో అద్భుతమైన సమావేశం జరిగింది’ అని మోదీ భేటీ తర్వాత ట్వీట్ చేశారు. ప్రపంచ అంశాలకు సంబంధించి స్వల్ప, దీర్ఘకాలికకసరత్తుపై చర్చించినట్లు తెలిపారు.
 
  అంతకుముందు..ఆర్లింగ్టన్ నేషనల్ సిమెటరీలో.. టోంబ్ ఆఫ్ ది అన్‌నోన్ సోల్జర్స్ (గుర్తుతెలియని సైనికుల సమాధి) వద్ద పుష్పగుచ్ఛం ఉంచి నివాళులర్పించారు. భారతీయ అమెరికన్ వ్యోమగామి కల్పనా చావ్లా సమాధి వద్దా మోదీ నివాళులర్పించారు. స్పేస్ షటిల్ కొలంబియా మెమోరియల్ వద్ద (స్మారక కేంద్రం) కల్పన భర్త, కుటుంబ సభ్యులతో పాటు.. నాసా అధికారులు, భారతీయ అమెరికన్ వ్యోమగామి సునీతా విలియమ్స్, ఆమె తండ్రి తదితరులను కలసి ముచ్చటించారు. మోదీతో పాటు అమెరికా రక్షణ మంత్రి ఆష్టన్ కార్టర్ కూడా ఉన్నారు.  
 
  పురాతన కళాఖండాలు భారత్‌కు అప్పగింత
  భారత్ నుంచి దొంగిలించిన 200 పురాతన కళాఖండాలను అమెరికా భారత్‌కు తిరిగి అప్పగించింది. వీటి విలులవ పది కోట్ల డాలర్లు బ్లెయిర్ హౌస్‌లో కార్యక్రమంలో మోదీ మాట్లాడుతూ.. ఈ సాంస్కృతిక సంపద భారత్ - అమెరికాల ద్వైపాక్షిక సంబంధాన్ని బలోపేతం చేసే శక్తి అని అభివర్ణించారు. వీటిని తిరిగి అప్పగించినందుకు.. ఒబామాకు కృతజ్ఞతలు తెలియజేశారు.  ఈ కళాఖండాల్లో చాలా వరకూ ‘అమెరికాలో ఆపరేషన్ హిడెన్ ఐడల్’ పేరుతో చేపట్టిన సోదాల్లో స్వాధీనం చేసుకున్నవని ఆ దేశ అధికారులు తెలిపారు. వీటిని స్మగుల్ చేసినట్లు ఆరోపణలు ఎదుర్కొంటున్న న్యూయార్క్ ‘ఆర్ట్ ఆఫ్ ది పాస్ట్ గ్యాలరీ’ యజమాని సుభాష్‌కపూర్ భారత్‌లో విచారణ ఎదుర్కొంటూ జైలులో ఉన్నాడు.
 
  ముస్లింలకు మోదీ రంజాన్ శుభాకాంక్షలు
  రంజాన్ ఆరంభాన్ని పురస్కరించుకుని ముస్లింలకు మోదీ శుభాకాంక్షలు తెలియజేశారు. పవిత్రమైన నెల సోదర బంధాన్ని, సమాజంలో సామరస్య స్ఫూర్తిని  బలోపేతం చేస్తుందని ఓ ప్రకటనలో పేర్కొన్నారు.


 ఆకాశంలో నెలవంక దర్శనం
 
  న్యూఢిల్లీ/హైదరాబాద్: ముస్లిం సోదరులకు పవిత్రమైన రంజాన్ మాసం మంగళవారం నుంచి దేశవ్యాప్తంగా ప్రారంభమైంది. సోమవారం రాత్రి ఆకాశంలో నెలవంక కనిపించడంతో రుయత్ హిలాల్ కమిటీ సదర్ మజ్లీస్ ఉలేమా ఈ దక్కన్‌తో పాటు పలు హిలాల్ కమిటీలు ఈ మేరకు ప్రకటించాయి. రంజాన్ మాసపు మొదటి ఉపవాస దీక్ష మంగళవారం తెల్లవారుజామున సహార్‌తో మొదలైంది.
 
 హైదరాబాద్‌లో చారిత్రక మక్కా మసీదులో ముస్లిం సోదరులు సోమవారం రాత్రి ఇషా నమాజ్, అనంతరం రాత్రి తరావీ సందర్భంగా ఖురాన్ పఠనం చేశారు. మంగళవారం తెల్లవారుజామున 4.09 గంటల సహార్‌తో రంజాన్ ఉపవాస దీక్షలు ప్రారంభమయ్యాయి. సాయంత్రం6.55 గంటలకు ఉపవాస దీక్ష విరమించి ఇఫ్తార్ విందులో పాల్గొంటారు.


 సాక్షి, హైదరాబాద్: పవిత్ర రంజాన్ మాసం ప్రారంభమైన సందర్భంగా తెలుగు రాష్ట్రాల్లోని ముస్లింలందరికీ వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి శుభాకాంక్షలు తెలిపారు. మహనీయుడైన మహ్మద్ ప్రవక్త ద్వారా దివ్య ఖురాన్ ఆవిర్భవించింది కూడా రంజాన్ మాసంలోనే కావడంతో ముస్లింలు ఈ నెలకు అత్యంత ప్రాముఖ్యతను ఇస్తారని తెలిపారు.
 
 ఐకమత్యంతో మెలగడం, క్రమశిక్షణ కలిగి ఉండటం, పేదలకు తోడ్పాటు అందించడం, రంజాన్ మానవాళికి ఇచ్చే సందేశమని ఆయన సోమవారం ఒక ప్రకటనలో పేర్కొన్నారు. సొంత లాభం కొంత మానుకుని పొరుగువారికి సాయపడాలన్న ఆశయం రంజాన్ పండుగలో అంతర్లీనంగా ఉన్న సందేశమని జగన్ పేర్కొన్నారు.


 బీజింగ్: ముస్లిం మైనారిటీలైన ఉయిఘర్లు అధికంగా ఉండే జిన్‌జియాంగ్‌లో ప్రభుత్వ ఉద్యోగులు, చిన్న పిల్లలు, విద్యార్థులు పవిత్ర రంజాన్ మాసంలో ఉపవాస దీక్షలో ఉండటంపై ఈ ఏడాదీ చైనా నిషేధం విధించింది. నాస్తికత్వాన్ని అధికారికంగా పాటించే అధికార కమ్యూనిస్ట్ పార్టీ ఈ ప్రాంతంలో వారిపై రంజాన్ ఉపవాసాలపై కొన్నేళ్లుగా నిషేధం విధిస్తూ వస్తోంది.


 ► మసీదుల్లో ఏర్పాట్లు పూర్తి
 ►నేటి నుంచి ఉపవాసదీక్షలు
 ►నెలంతా తరావీహ్
 ►పగలు ఉపవాసం.. రాత్రి ప్రత్యేక ప్రార్థనలు
 
 సాక్షి, మంచిర్యాల : ముస్లింల పవిత్ర రమజాన్ మాసం ప్రారంభమైంది. జిల్లాలోని అన్ని మసీదుల్లో... సోమవారం రాత్రి నుంచి ముస్లింల ప్రత్యేక ప్రార్థనలు(తరావీహ్) ప్రారంభమయ్యాయి. నెల పొడవునా ఇవి కొనసాగుతాయి. నేటి నుంచి ఉపవాస దీక్షలు మొదలవుతారుు. సూర్యోదయం నుంచి సూర్యస్తమయం వరకు నెల మొత్తం కఠిన ఉపవాసం, రాత్రి ప్రత్యేక ప్రార్థనలతో ముస్లింలు అల్లాహ్‌కు దగ్గరవుతారు. ప్రార్థనల కోసం వచ్చే ముస్లింలకు ఎలాంటి ఇబ్బందులు కలగకుండా.. కమిటీలు జిల్లా వ్యాప్తంగా ఉన్న మసీదుల్లో అన్ని ఏర్పాట్లు చేశారు. ప్రతి రోజు తరావీహ్‌లో ఖురాన్ విని.. పగలు దీక్షలో మంచి కార్యాలు చేయాలని ఇస్లాం ప్రబోధిస్తుంది. ఉపవాస దీక్ష చేపట్టే వారిపై అల్లాహ్ కరుణ ఎల్లవేళలా ఉంటుంది. ‘
 
 బాలిగ్’ అయిన ప్రతి ముస్లిం యువతీ, యువకులు ఈ దీక్షలు చేపట్టడం తప్పనిసరి. ఈ నెలలో.. ఒక పుణ్యకార్యం చేస్తే అల్లాహ్ 70 పుణ్యకార్యాలు చేసినంత పుణ్యం ప్రసాదిస్తారు. ఒక సున్నత్ కార్యం చేపడితే ఒక ఫర్జ్‌కు తగ్గ పుణ్యం లభిస్తుంది. అదే ఒక నఫీల్ కార్యానికి అల్లాహ్ సున్నత్‌కు తగ్గ ప్రతిఫలం అందజేస్తారు. అబద్దాలాడడం.. చాడీలు చెప్పడం.. ఇతరులపై ద్వేషం పెంచుకోవడం.. తగువులాడడం.. ఈ నెలలో నిషిద్ధం. మనిషిలో ఉన్న చెడు అలవాట్లు.. దుర్గుణాలు పారద్రోలేందుకు అల్లాహ్ ఈ నెలను ప్రసాదిస్తారు. ఉపవాస దీక్షలు.. మంచి నడవడికతో మనిషిలో సహనం ఏర్పడుతుంది.
 
 సహనాన్ని పాటించిన వ్యక్తికి స్వర్గంలో చోటు కల్పిస్తానని అల్లాహ్ పవిత్ర ఖురాన్‌లో చెప్పారు. ఈ నెలలో ముస్లింలు ముఖ్యంగా పేదల సంక్షేమంపై దృష్టి సారిస్తారు. అన్న, వస్త్ర.. డబ్బుల వంటి దానధర్మాలు చేపడతారు. దీక్ష విరమణ సమయంలో ఇఫ్తార్ విందులు.. ఉదయం 4గంటల ప్రాంతంలో సహర్ విందులు ఏర్పాటు చేసి అల్లాహ్ కృపకు పాత్రులయ్యేందుకు ముస్లింలు ప్రయత్నిస్తారు. షవ్వాల్(రమజాన్ తర్వాత నెల)కు ఒక రోజు ముందు ముస్లింలు రమజాన్ పర్వదినాన్ని ఘనంగా జరుపుకుంటారు.
  


 సాక్షి, హైదరాబాద్: రంజాన్ మాసంలో ఉపవాస దీక్షలు, ప్రార్థనలకు వీలుగా ప్రభుత్వం ముస్లిం ఉద్యోగులకు పని వేళలను కుదించింది. అన్ని కార్యాలయాలు, పాఠశాలల్లో పని చేస్తున్న ప్రభుత్వ ఉద్యోగులు, ఔట్ సోర్సింగ్ ఉద్యోగులందరూ గంట ముందుగా విధుల నుంచి వెళ్లేందుకు అనుమతిచ్చింది.
 
 ఈ మేరకు శనివారం అన్ని కార్యాలయాలకు సాధారణ పరిపాలన విభాగం ముఖ్య కార్యదర్శి అదర్ సిన్హా సర్క్యులర్ జారీ చేశారు. రంజాన్ మాసంలో ముస్లిం ఉద్యోగులను ప్రభుత్వ పనిదినాలన్నింటా సాయంత్రం 4 గంటలకు విధుల నుంచి వెళ్లేందుకు అనుమతించాలని అందులో పేర్కొన్నారు. నెలవంకను బట్టి రంజాన్ మాసం ప్రారంభమయ్యే జూన్ 6 లేదా 7వ తేదీ నుంచి జూలై 5వ తేదీ వరకు ఈ వెసులుబాటును ఇస్తున్నామన్నారు.


 అచ్చ తమిళంలో 'అమ్మా..' అని పిలిచినా, ఉర్దూ, హిందీల్లో 'అమ్మీ..'అన్నా ఇట్టే కరుణించి వరాలు కురిపించే పురచ్చితలైవి జయలలిత తమిళనాడులోని ముస్లింలకు ఖీర్ తిన్నంత తీపికబురు చెప్పారు. వచ్చే వారం నుంచి ప్రారంభం కానున్న రంజాన్ మాసం మొత్తం మసీదులకు ఉచితంగా బియ్యం సరఫరా చేయనున్నట్లు ప్రకటించారు.
 
 వక్ఫ్ బోర్డు గుర్తింపు పొందిన 3000 మసీదులకు రంజాన్ మాసంలో ఉచిత బియ్యం పపిణీకి చర్యలు తీసుకోవాలని గురువారం ముఖ్యమంత్రి కార్యాలయం ఉత్తర్వులు జారీచేసింది. ఈ మేరకు 4,600 మెట్రిక్ టన్నుల బియ్యాం సిద్ధంగా ఉన్నట్లు పేర్కొంది. 2001లో ఏఐడీఎంకే అధికారంలో వచ్చాక ఈ పథకం ప్రారంభమైంది. రంజాన్ మాసంలో మసీదులకు నిరంతర విద్యుత్ సరఫరాతోపాటు, గట్టి బందోబస్తు కల్పించేందుకు ప్రభుత్వం చర్యలకు ఉపక్రమించింది.


 కర్నూలు: రంజాన్ పర్వదినాన్ని ముస్లింలు శనివారం ఘనంగా జరుపుకున్నారు. ఉదయం 7 గంటల నుంచే ముస్లింలు ఈద్గాలకు బయలుదేరారు. నగరంలోని పాత ఈద్గాలో ఉదయం 9 గంటలకు ఈదుల్ ఫితర్ నమాజు ప్రారంభమైంది. ఇక్కడ ఖాజీ సలీం బాషా నమాజు చేయించారు.
  
   ఈద్గా లోపల స్థలం సరిపోక.. ఆనంద్ టాకీస్ బ్రిడ్జి వరకు ముస్లింలు రోడ్లపైనే నమాజు చేశారు. ఈ సందర్భంగా ఖాజీ సలీం బాషా ఈదుల్ ఫితర్ ప్రత్యేక సందేశాన్నిస్తూ.. రంజాన్ పండుగ ముస్లింలలో చక్కని క్రమశిక్షణకు, నియమబద్ధమైన జీవనానికి ప్రతీకగా నిలుస్తుందన్నారు. నెల రోజుల కఠినమైన ఉపవాస దీక్షలు ముస్లింలకు మానవీయ దృక్పథంతో పాటు సేవాభావాన్ని అలవరుస్తుందన్నారు. ప్రపంచ మానవాళికి శాంతి సౌభాగ్యాలు కలగాలని దువా చేశారు. కొత్త ఈద్గాలో ఉదయం 10 గంటలకు ఈదుల్ ఫితర్ నమాజు ప్రారంభమైంది. ఈ యేడాది భారీ సంఖ్యలో ముస్లింలు నమాజులో పా ల్గొన్నారు. మౌలానా జుబేర్ పేష్ ఇ మాంగా వ్యవహరించి ప్రత్యేక నమాజు చేయించారు. పాత ఈద్గాలో 9 గంటలకే నమాజు ప్రారంభం కావడంతో.. కొత్త ఈద్గాకు తాకిడి పెరిగింది.
  
  నమాజులో పాల్గొన్న ఎమ్మెల్యే ఎస్వీ
  ఈదుల్ ఫితర్ ప్రత్యేక నమాజులో కర్నూలు ఎమ్మెల్యే ఎస్.వి.మోహన్‌రెడ్డి పాల్గొన్నారు. ఉదయం 9 గంటలకు నగరంలోని పాత ఈద్గాలో ప్రారంభమైన ఈదుల్ ఫితర్ నమాజులో పాల్గొన్న ఆయన.. అనంతరం ముస్లింలకు రంజాన్ శుభాకాంక్షలు తెలిపారు. స్థానిక వన్‌టౌన్ పరిధిలోని రెండు ఈద్గాల్లోఉదయం 7 గంటలకే ఈదుల్ ఫితర్ నమాజు ప్రారంభమైంది. ముస్లిం మహిళలు కూడా నమాజులో పాల్గొన్నారు. హిందూ ముస్లింలు ఆలింగనం చేసుకుంటూ రంజాన్ శుభాకాంక్షలు తెలుపుకోవడం విశేషం.
  
  ట్రాఫిక్ మళ్లింపు
  ఉదయం 8 గంటల నుంచి పాత, కొత్త ఈద్గాల వద్ద  ట్రాఫిక్‌ను మళ్లించారు. సి.క్యాంప్ నుంచి కొత్త బస్టాండ్‌కు వెళ్లే ట్రాఫిక్‌ను రాజ్‌విహార్ సెంటర్ నుంచి వెంకటరమణ కాలనీ నుంచి హైవే వైపు మళ్లించారు. కొత్త ఈద్గా వద్ద ఉదయం 10 నుంచి 11 గంటల వరకు లారీలు బస్సులను నిలిపేశారు. నమాజు అనంతరం అన్ని వాహనాల రాకపోకలను పునరుద్ధరించారు.
  


 ముస్లింలకు పవిత్రమైన రంజాన్ మాసం ముగింపుతో జిల్లా వ్యాప్తంగా ఈద్ ఉల్ ఫిత్‌న్రు శనివారం భక్తిశ్రద్ధలతో జరుపుకున్నారు. ఆయా ప్రాంతాల్లోని మసీదులు, ఈద్గాలలో ప్రత్యేక ప్రార్థనలు నిర్వహించారు. నగరంలోని బారా షహీద్ దర్గా, ఈద్గా మైదానంలో పదివేల మందికి పైగా ముస్లింలు ఉదయం 10 గంటలకంతా చేరుకుని ప్రత్యేక నమాజ్‌ను పూర్తిచేశారు. అనంతరం స్నేహితులు, కుటుంబీకులను ఆలింగనం చేసుకుని రంజాన్ శుభాకాంక్షలను  తెలుపుకున్నారు.
  
  నెల్లూరు (కల్చరల్) : రంజాన్ ప్రార్థనల్లో భాగంగా ఈద్గా ఇమామ్ ఖతీబ్ సయ్యద్ అబూబకర్ అషఫ్రి సాబిరి జిల్లా ప్రజలకు సందేశం ఇచ్చారు. రంజాన్ నెలలో ఉపవాస దీక్షలు పాటించి, ప్రత్యేక తరహా నమాజులలో పాల్గొన్న ప్రతి ఒక్కరికీ ఆ అల్లా దయ కలుగుతుందన్నారు. దైవాజ్ఞ మేరకు తమ సంపాదనలో నిర్ణీత జకాత్‌ను చెల్లించడంలో ప్రతిఒక్కరూ ఆసక్తి చూపాలన్నారు. మనుషులు చేసుకున్న పాపాలను అల్లాహ్ క్షమించి, నరకాగ్ని నుంచి విముక్తి కలిగించి జీవితాన్ని సన్మార్గంలో నడిపించాలని కోరుకున్నారు. దేశశాంతి, విశ్వశాంతి కోసం అల్లాహ్‌ను వేడుకుని ప్రత్యేక దువా చేశారు. ఇస్లాం ఆవిర్భవించింది సర్వమానవాళి సన్మార్గంలో నడిపేందుకు, విశ్వశాంతి స్థాపించేందుకు అని పేర్కొన్నారు.
  
   సర్వమానవుల పట్ల పరస్పర సోదరభావం పెంచేందుకు ఇస్లాం కృషి చేస్తోందన్నారు. దుర్మార్గం, హింస, దురాచారాలు, తోటిమానవులపై దౌర్జన్యాలను ఇస్లాం సహించదు అని తెలిపారు. పరమత ద్వేషంతో మానవ ఐక్యతకే పెను ప్రమాదం వాటిల్లుతుందన్నారు. ప్రాంతీయత అనే అంశంతో దేశ ఐక్యతను, జాతి శక్తిని దెబ్బతీస్తున్నారని అభిప్రాయపడ్డారు. ఇలాంటి సమస్యలన్నింటికీ ఇస్లాంలో పరిష్కారమార్గాలు ఉన్నాయని, ప్రతి ఒక్కరూ ఇస్లాంను తెలుసుకుని విశ్వాసపరులుగా మారినపుడు విశ్వశాంతి చేకూరుతుందని తెలిపారు.
  
  ప్రత్యేక ప్రార్థనల్లో ఎమ్మెల్యేలు..
  బారాషహీద్ దర్గా ఈద్గాలో శనివారం జరిగిన ఈద్ ఉల్ ఫితర్ నమాజులో నెల్లూరు నగర, రూరల్ ఎమ్మెల్యేలు పోలుబోయిన అనిల్‌కుమార్ యాదవ్, కోటంరెడ్డి శ్రీధర్‌రెడ్డి, మాజీ ఎమ్మెల్యే ఆనం వివేకానందరెడ్డి పాల్గొన్నారు. ప్రతి ఒక్కరూ సుఖసంతోషాలతో ఉండాలని ఆశిస్తూ దువా చేశారు. ఈ సందర్భంగా ఎమ్మెల్యేలు మాట్లాడుతూ రంజాన్ ప్రతి ఒక్కరిలో మంచి గుణాలను పెంచి, చెడు అలవాట్లను దూరం చేసే పవిత్రమైన ఈద్‌గా అని తెలిపారు. ప్రార్థనల అనంతరం ముస్లింలను ఆలింగనం చేసుకుని ఆనందోత్సాహాలు మధ్య పండగ శుభాకాంక్షలను తెలిపారు.
  
  నగర మేయర్ అజీజ్, నగర పాలక సంస్థ కమిషనర్ ఈద్గాకు విచ్చేసిన భక్తుల సౌకర్యాలను పర్యవేక్షించారు. నగర డీఎస్పీ మగ్బూల్ ఆధ్వర్యంలో ఈద్గా ప్రాంగణంలో పోలీసులు ప్రత్యేక రక్షణ చర్యలు చేపట్టారు. ట్రాఫిక్ నియంత్రణ పటిష్టంగా ఉండడంతో నగరంలో ఎక్కడా ఎలాంటి సమస్యలు ఉత్పన్నం కాలేదు.


 మహబూబ్‌నగర్ అర్బన్: ముస్లింలు రంజాన్ సందర్భంగా శనివారం ‘ఈద్- ఉల్- ఫితర్(రంజాన్)’ పండుగను జిల్లాలో భక్తిశ్రద్ధలతో జరుపుకున్నారు. ఉదయం నుంచే ఆనందోత్సాహాలతో మసీదులు, ఈద్గాల వద్ద ప్రత్యేక నమాజులు ఆచరించారు. ప్రత్యేక పండుగ నమాజ్‌ను చదివి సర్వమానవాళి  క్షేమంకోసం అల్లాను వేడుకున్నారు. అనంతరం హిందూ, ముస్లింలు ఒకరినొకరు ఆలింగనం చేసుకుని రంజాన్ పండుగ శుభాకాంక్షలు చెప్పుకున్నారు.
  
  ఆర్థికస్థోమత కలిగిన కొందరు ముస్లింలు దానధర్మాలు చేశారు. జిల్లా మంత్రులు జూపల్లి కృష్ణారావు, సి.లక్ష్మారెడ్డి, ప్లానింగ్ బోర్డు వైస్‌చైర్మన్ సింగిరెడ్డి నిరంజన్‌రెడ్డితో పాగటు పలువురు ఎమ్మెల్యేలు, ప్రజాప్రతినిధులు, కలెక్టర్ టీకే శ్రీదేవి, ఎస్పీ సి.విశ్వప్రసాద్ ముస్లింలకు ఈద్ ముబారక్ తెలిపారు. రంజాన్ సందర్భంగా జిల్లా కేంద్రంలోని వానగట్టు వద్దనున్న ఈద్గాలో ముస్లింలు ప్రత్యేక ప్రార్థనలు నిర్వహించారు. ఈ సందర్భంగా జామియా మసీదు ప్రధాన ఇమామ్ మౌలానా హాఫిజ్ ఇస్మాయిల్ ఉదయం 10 గంటలకు ప్రత్యేకప్రార్థనలు జరిపించారు.
  
  ఈద్ ముబార క్ ..
  రంజాన్ పవిత్రమాసం అనంతరం ఈద్‌ఉల్ ఫితర్‌ను పురస్కరించుకుని పలువురు ప్రముఖులు ముస్లింలకు ఈద్‌ముబారక్ చెప్పారు. ఖ్వామీ ఏక్తా కమిటీ తరఫున ఈద్గా ఆవరణలో ఏర్పాటుచేసిన వేదిక వద్ద పలువురు ప్రజాప్రతిని ధులు, అధికారులు ము స్లింలకు శుభాకాంక్షలు తెలిపారు.
  
   కేంద్రమాజీ మంత్రి ఎస్.జైపాల్‌రెడ్డి, ఎంపీ జితేందర్‌రెడ్డి, కలెక్టర్ శ్రీదేవి, ఎమ్మెల్సీ జగదీశ్వర్‌రెడ్డి, ఎమ్మెల్యే వి.శ్రీనివాస్‌గౌడ్, మునిసిపల్ చైర్‌పర్సన్ రాధాఅమర్, డీసీసీ అధ్యక్షుడు ఒబేదుల్లా కొత్వాల్, గ్రంథాలయ సంస్థ చైర్మన్ పెద్దిరెడ్డి సాయిరెడ్డి, వైఎస్‌ఆర్ సీపీ నేతలు హైదర్‌అలీ, వాజిద్, శేఖ్ అబ్దుల్లా, వివిధ పార్టీలు, ప్రజాసంఘాల నేతలు సత్తూరు చంద్రకుమార్‌గౌడ్, ఎన్‌పీ వెంకటేశ్, సయ్యద్ ఇబ్రహీం, బెనహర్, బెక్కెం జనార్ధన్,  డీఎస్పీ కృష్ణమూర్తి, గోపాల్‌యాదవ్, రిటైర్డు డీసీహెచ్‌ఎస్ డా క్టర్ శ్యామ్యూల్, సీహెచ్ చంద్రయ్య తదితరులు పండుగ శుభాకాంక్షలు తెలిపారు.
  
  భారీ బందోబస్తు..
  రంజాన్‌ను పురస్కరించుకుని జిల్లాకేంద్రం తో పాటు అన్ని మండలాలు, గ్రామాల్లో ఎలాంటి అవాంఛనీయ ఘటనలు జరుగకుండా పోలీసులు భారీ బందోబస్తు నిర్వహించారు. ఈద్గాల వద్ద ప్రత్యేక పోలీసు బలగాలను మోహరించారు. అన్ని నియోజకవర్గ కేంద్రాల్లో కూడా పోలీసులు పహారా కాశారు. పోలీసులు, ఆ శాఖ అధికారులు కూడా ముస్లింలకు పండుగ శుభాకాంక్షలు తెలిపారు.
  


 ఈద్గాలు, మసీదుల వద్ద  లక్షలాది మంది ముస్లింల ప్రత్యేక ప్రార్థనలు
 సాక్షి, హైదరాబాద్: నగరంలో రమజాన్ వేడుకలు శనివారం ఘనంగా జరిగాయి. లక్షలాది మంది ముస్లిం సోదరులు ఈద్గాలు, మసీదుల వద్ద సామూహిక ప్రత్యేక ప్రార్థనలు చేశారు. మీరాలం ఈద్గా, చార్మినార్ మక్కామసీదు, అంబర్‌పేట్, మాసాబ్‌ట్యాంక్ తదితర ప్రాంతాల్లో భారీ సంఖ్యలో ముస్లింలు ప్రార్థనల్లో పాల్గొన్నారు. మసీదులు, ఈద్గాల వద్ద ఎలాంటి ఇబ్బందులు తలెత్తకుండా పోలీసులు భద్రతా ఏర్పాట్లను చేపట్టారు.
  
  పాతబస్తీతో పాటు నగరంలోని వివిధ ప్రాంతాల్లో ట్రాఫిక్ రద్దీ నెలకొంది. దీంతో పలు మార్గాల్లో పోలీసులు వాహనాలను  దారిమళ్లించారు. ప్రార్థనల అనంతరం  ఒకరినొకరు ఆలింగనం చేసుకొని శుభాకాంక్షలు తెలుపుకున్నారు. నగర పోలీస్ కమిషనర్ మహేందర్‌రెడ్డి భద్రతా ఏర్పాట్లను స్వయంగా పర్యవేక్షించారు. ఈ సందర్భంగా ఆయన ముస్లిం సోదరులకు రమజాన్ శుభాకాంక్షలు  తెలిపారు.


 నెల్లూరు (కల్చరల్) : శుక్రవారం సాయంత్రం జిల్లాలో మబ్బుల చాటున దోబూచులాడుతూ నెలవంక కనిపించడంతో శనివారం ఈద్ ఉల్ ఫిత్‌ర్  పండుగ అని జిల్లా వ్యాప్తంగా ఆన్ని మసీదుల్లో ఇమామ్‌లు ప్రకటించారు. ప్రముఖ మసీదులు, ఈద్గాలు రంజాన్ ప్రార్థనల కోసం సిద్ధమయ్యాయి.
  
  ఈద్ సందర్భంగా ప్రత్యేక ప్రార్థనలు చేస్తారు.  ఉదయాన్నే వంటపనులు పూర్తిచేసుకుని సామూహికంగా నమాజ్ చదివేందుకు సిద్ధమవుతారు. ప్రార్థనలు పూర్తయిన తర్వాత ఒకరిని ఒకరు ఆలింగనం చేసుకుని పండుగ శుభాకాంక్షలు తెలుపుకుంటారు.
  
  సంబరాల రంజాన్....
  బంధువులను, స్నేహితులను ఆప్యాయంగా కలుసుకునేందుకు రంజాన్ పండుగ అవకాశం కల్పిస్తుంది. నగరంలోని షాపులన్నీ శుక్రవారం కిటకిటలాడాయి. నెలవంక కన్పించడంతో యువకులు టపాసులు కాల్చి సందడి చేశారు. నగరంలో కోలాహలం నెలకొంది.
  


  స్టేషన్ మహబూబ్‌నగర్: రంజాన్ పర్వదినానికి మసీదులు, ఈద్గాలు సుందరంగా ముస్తాబయ్యాయి. శుక్రవారం రాత్రి షవ్వాల్ నెలవంక దర్శనమివ్వడంతో ముస్లింలు 29రోజుల పాటు చేపట్టిన ఉపవాసాలను విరమించారు. చంద్రుడు కనిపించడంతో పరస్పరం ఈద్ ముబారక్ చెప్పుకున్నారు. శనివారం జిల్లావ్యాప్తంగా ఈదుల్ ఫితర్ పండగను జరుపుకుని, మానవకల్యాణం కోసం ప్రత్యేక నమాజులు చేస్తారు.
  
  జిల్లా కేంద్రంలోని జామీయ మసీదు నుంచి ఉదయం 9 గంటలకు ముస్లిం సామూహికంగా గడియారం చౌరస్తా మీదుగా స్థానిక వానగట్టు రహెమానియా ఈద్గా వద్దకు చేరుకుంటారు. అక్కడ10గంటలకు జామియా మసీదు ప్రధాన ఇమామ్ హాఫిజ్ ఇస్మాయిల్ ప్రత్యేక నమాజు ప్రార్థనలు చేయిస్తారు. మదీనా మసీదులో ఉదయం 9.30 గంటలకు, సిరాజుల్ ఉలుమ్‌లో 8 గంట లకు, మునీర్ మసీదులో 9 గంటలకు ప్రత్యేకనమాజు నిర్వహించనున్నారు.
  
  ఖౌమీ ఏకతా కమిటీ ఆధ్వర్యంలో శుభాకాంక్షలు
  ఈద్ ముబారక్ చెప్పడానికి ప్రజాప్రతిని ధులు, అధికారులు ఈద్గా వద్దకు చేరుకుని పట్టణ ఖౌమీ ఏకతా కమిటీ ఆధ్వర్యంలో ఏర్పాటుచేసే శిబిరంవద్దముస్లింలకు పండ గ శుభాకాంక్షలు తెలుపనున్నారు.
  
   ఎంపీ జితేందర్‌రెడ్డి, ఎమ్మెల్యే శ్రీనివాస్‌గౌడ్, కలెక్టర్ టీకే శ్రీదేవి, మాజీ కేంద్ర మంత్రి ఎస్. జైపాల్‌రెడ్డి, వైఎస్‌ఆర్ సీపీ జిల్లా అధ్యక్షుడు మామిడి శ్యాంసుందర్‌రెడ్డి మునిసిపల్ చైర్‌పర్సన్ రాధాఅమర్‌పాటు ఆయా పార్టీల నేతలు పండుగ వేడుకల్లో పాల్గొనున్నారు. ఈద్ నమాజ్ సందర్భంగా ఎలాం టి ఆవాంఛనీయ సంఘటనలు జరగకుం డా పోలీసు అధికారులు పట్టణంలో ముం దస్తుగా బందోబస్తు ఏర్పాటుచేశారు.
  
  ఈద్గా వద్ద ప్రత్యేక నమాజు
  ఈదుల్ ఫితర్ ప్రత్యేకనమాజుకు వేలాది సంఖ్యలో ముస్లింలు వక్ఫ్ రహెమానియా ఈద్గా వద్ద రానుండటంతో ఈద్గా కమిటీ ఆధ్వర్యంలో ఏర్పాట్లు చేశారు. టెంట్లు, తాగునీటి తదితర సౌకర్యాలు ఏర్పాట్లు చేశారు. మునిసిపాలిటీ సిబ్బం ది వారం రోజుల నుంచి ఈద్గా వద్ద మరమ్మతులు చేపట్టింది.
  


 సాక్షి, సిటీబ్యూరో: రంజాన్ నెల చివరి శుక్రవారమైన జుమా ఉల్ విదా ప్రార్థనల నేపథ్యంలో మక్కా మసీద్, సికింద్రాబాద్‌లోని జామే మసీద్‌లకు వెళ్లే రహదారుల్లో ట్రాఫిక్ ఆంక్షలు విధిస్తున్నట్టు హైదరాబాద్ పోలీసు కమిషనర్ మహేందర్ రెడ్డి బుధవారం ఒక ప్రకటనలో పేర్కొన్నారు. శుక్రవారం ఉదయం 9 నుంచి మధ్యాహ్నం 3 గంటల వరకు చార్మినార్, మదీనా, ముర్గిచౌక్, మొఘుల్‌పుర కమాన్ మార్గాల్లో ఎలాంటి వాహనాలనూ అనుమతించబోమని తెలిపారు. ప్రధాన పాయింట్ల వద్ద ట్రాఫిక్ మళ్లింపు ఉంటుందన్నారు.
 
 సౌత్‌జోన్...
 
 నయాపూల్ నుంచి చార్మినార్‌కు వెళ్లే వాహనాలను మదీనా వద్ద మళ్లించి సిటీ కాలేజీ మీదుగా అనుమతిస్తారు.
 
 నాగుల్‌చింత, శాలిబండ నుంచి ట్రాఫిక్‌ను హిమ్మత్‌పురా జంక్షన్ వద్ద మళ్లించి హరిబౌలీ, వోల్గా హోటల్ మీదుగా మళ్లిస్తారు.
 
 కోట్ల అలీజా నుంచి చార్మినార్‌కు వెళ్లే వాహనాలను బీబీ బజార్ వద్ద మళ్లిస్తారు.
 
 పేట్లబుర్జు మూసాబౌలీ నుంచి చార్మినార్‌కు వెళ్లే ట్రాఫిక్‌ను మోతీగల్లీ నుంచి మళ్లించి ఖల్వత్ మీదుగా అనుమతిస్తారు.
 
 ఎతేబార్ చౌక్ నుంచి వచ్చే వాహనాలను అక్కడే మళ్లించి మీరాలంమండి మార్కెట్, లేదంటే బీబీ బజార్ మీదుగా పంపిస్తారు.
 
 మిట్టి కా షేర్ నుంచి వచ్చే వాహనాలను గుల్జార్ హౌస్‌కు వెళ్లనివ్వరు. ఘన్సీబజార్ వద్ద మళ్లిస్తారు.
 
 ఆంధ్రప్రదేశ్ అడ్మినిస్ట్రేటివ్ ట్రిబ్యునల్ నుంచి వచ్చే ట్రాఫిక్‌ను లక్కడ్ కోట్ (పాత సీపీ కార్యాలయ జంక్షన్) వద్ద మళ్లించి మీరాలంమండి మార్కెట్ మీదుగా అనుమతిస్తారు.
 
 ఖిల్వత్ మైదానం నుంచి వచ్చే వాహనాలను పంచమొహల్లా లేన్‌లో అనుమతించరు. చౌమహల్లా ప్యాలెస్ బస్టాప్ వద్ద మళ్లించి ఖిల్వత్ గ్రౌండ్స్, మోతీగల్లీ టీ-జంక్షన్ మీదుగా ట్రాఫిక్‌ను అనుమతిస్తారు.
 
 
 నార్త్‌జోన్...
 
 ఉదయం 9 నుంచి మధ్యాహ్నం 1 గంట వరకు సికింద్రాబాద్‌లోని సుభాష్ రోడ్డు (మహంకాళి పోలీసు స్టేషన్, ఎంజీ రోడ్డులోని రాంగోపాల్‌పేట రోడ్డు జంక్షన్)లో ఏ వాహనాన్ని అనుమతించరు. రోచా బజార్ నుంచి రాణిగంజ్ వరకు వాహనాలను అనుమతి ఉంటుంది.
 
 బాటా ఎక్స్ రోడ్డు నుంచి సుభాష్‌నగర్ వెళ్లే వాహనాలను మహంకాళి పోలీసుస్టేషన్ వద్ద మళ్లించి ఎడమలేన్ మీదుగా లాలాగుడి మీదుగా అనుమతిస్తారు.


 శ్రీనగర్: జమ్మూకాశ్మీర్లోని వేర్పాటువాదులు దాదాపు 25 సంవత్సరాల తర్వాత తొలిసారి జూలై 13న సమ్మెకు పిలుపునివ్వకుండా వదిలేశారు. రంజాన్ మాసం సందర్భంగా వారంతా ఉపవాస దీక్షలు చేస్తున్న నేపథ్యంలోనే ఎలాంటి స్ట్రైక్ చేయకుండా ఆగారని తెలుస్తోంది. 1931 జూలై 13న శ్రీనగర్ సెంట్రల్ జైలు బయట జరుగుతున్న ఆందోళనను నిలువరించేందుకు ఆర్మీ జరిపిన కాల్పుల్లో దాదాపు 21 మంది నిరసన కారులు చనిపోయారు.
 
 అప్పటి నుంచి అక్కడ జూలై 13న సెలవు దినంగా పాటిస్తుండగా.. కొందరు వేర్పాటు వాదులు మాత్రం ఆర్మీ చర్యకు నిరసనగా ఆ రోజు సమ్మె చేస్తారు. అమరుల దినంగా పాటిస్తారు. కాగా, ఈ సారి మాత్రం హుర్రియత్ కాన్ఫరెన్స్ ఫ్యాక్షన్స్ అధినేత సయ్యద్ అలీ షా జిలానీ, మిర్వాయిజ్ ఉమర్ ఫారూక్, జమ్మూకాశ్మీర్ లిబరేషన్ ఫ్రంట్ చైర్మన్ మహ్మద్ యాసిన మాలిక్ కలిసి ఈ సారి ఎలాంటి సమ్మె నిర్వహించకూడదని నిర్ణయించారు. రంజాన్ ఉపవాస దీక్షల నేపథ్యంలో తాము నిర్ణయం తీసుకున్నట్లు ఉమ్మడి ప్రకటన విడుదల చేశారు.


 ఢాకా: పవిత్ర రంజాన్ మాసం సందర్భంగా  ముస్లింలు నిర్వహించే జకాత్ విషాదానికి దారి తీసింది.  బంగ్లాదేశ్లోని మైమెన్ నగరంలో  శుక్రవారం నిర్వహించిన జకాత్లో జరిగిన తొక్కిసలాటలో 20 మంది ప్రాణాలు కోల్పోయారు. మరో యాభైమంది తీవ్రంగా గాయపడ్డారు.
 
 ఇస్లాం సాంప్రదాయం ప్రకారం  ప్రతి ముస్లిం తన సంవత్సరిక ఆదాయంలో కొంత భాగాన్ని పేదలకు, ఆపదలో ఉన్నవారిని దానం చేయడం ఆనవాయితీ. దీన్నే జకాత్ అని వ్యవహరిస్తారు.  ఈ నేపథ్యంలో స్థానికంగా  అవసరం ఉన్నవారికి లేదా పేదవారికి బట్టలు పంపిణీ చేస్తుండగా ఒక్కసారిగా జనం ఎగబడ్డారు. దీంతో ఈ విషాదం చోటు చేసుకుంది. గాయపడిని వారిని ఆసుపత్రికి తరలించినట్లు స్థానిక పోలీసులు వెల్లడించారు.
 
 కాగా ఇస్లాం ఐదు మూలస్తంభాలలో నాలుగోది  జకాత్.   దీనినే  "శుద్ధి" అని కూడా అంటారు. అంటే తన ఆదాయాన్ని శుద్ధి చేసుకోవడం, అనగా తన ఆదాయంలో కొంత భాగాన్ని పేదలకు పంచాలి, లేదా సాయం చేయాలి . ఈధార్మిక విధానాన్ని జకాత్ అంటారు. ఈ జకాత్ను రంజాన్ మాసంలో లెక్కగట్టి చెల్లిస్తారు.


 రెండు తెలుగు రాష్ట్రాల్లోని ప్రధాన నగరాల్లో రంజాన్ వేళలను 'సాక్షి' పాఠకుల కోసం అందిస్తున్నాం..
 
 
 
 నగరం
 
 ఇఫ్తార్
 
 సహరీ
 
 
 
 హైదరాబాద్
 
 సా.7.01
 
 ఉ. 4.16
 
 
 
 విజయవాడ
 
 సా.6.49
 
 ఉ. 4.15
 
 
 
 విశాఖపట్నం
 
 సా. 6.43
 
 ఉ. 3.57
 
 
 
 తిరుపతి
 
 సా. 6.48
 
 ఉ. 4.23
 
 
 
 నెల్లూరు
 
 సా. 6-44
 
 ఉ. 4.17
 
 
 
 కాకినాడ
 
 సా. 6.50
 
 ఉ. 4.04
 
 
 
 రాజమండ్రి
 
 సా. 6.50
 
 ఉ. 4.06
 
 
 
 కర్నూలు
 
 సా. 6.58
 
 ఉ. 4.23
 
 
 
 వరంగల్
 
 సా. 7.01
 
 ఉ. 4.16
 
 
 
 కరీంనగర్
 
 సా. 7.01
 
 ఉ. 4.16
 
 
 
 నిజామాబాద్
 
 సా. 6.59
 
 ఉ. 4.16
 
 
 
 నల్లగొండ
 
 సా. 7.01
 
 ఉ. 4.16
 
 
 
  


 హైదరాబాద్: పవిత్ర రంజాన్ మాసాన్ని ముస్లిం సోదరులు భక్తి శ్రద్ధలతో ఆచరిస్తారు. ప్రముఖ నటి టబు రంజన్ నెల మొత్తం ఉపవాస దీక్ష చేస్తున్నారు. టాలీవుడ్ 'దృశ్యం' చిత్రం హిందీ రీమేక్ చేస్తున్న సంగతి తెలిసిందే. ఈ చిత్రంలో పోలీస్ ఉన్నతాధికారి పాత్రలో టబు నటిస్తుంది. ఈ చిత్ర షూటింగ్ సమయంలో కూడా ఎలాంటి ఆహారం తీసుకోకుండా టబు ఉపవాస దీక్ష చేస్తున్నారు.
  
 ఒకవేళ సాయంత్రం సమయంలో విలేకర్లతో ముఖాముఖి నిర్వహించాల్సి వస్తే ఆ కార్యక్రమాన్ని పూర్తి చేసిన తర్వాతే టబు ఉపవాసం(రోజా) విరమిస్తుంది.  దృశ్యం హిందీ వెర్షన్ జులై నెలాఖరున విడుదల చేయడానికి యత్నాలు చేస్తున్నారు.


  న్యూఢిల్లీ: ముస్లింలు పవిత్రంగా భావించే రంజాన్ లేదా రందాన్ మాసం శుక్రవారం ప్రారంభమైంది. ముస్లిం క్యాలెండర్ ప్రకారం తొమ్మిదవ నెలలో వచ్చే ఈ మాసాన్ని రంజాన్ అని పిలవాలా లేక రందాన్ అని పిలవాలా? అన్న సంశయం సగటు ముస్లింలకే కాకుండా విద్యావేత్తలకు కూడా కలుగుతోంది. భారతీయ ముస్లిం సంస్కృతి ప్రకారం గతంలో రంజాన్ అనే పిలిచేవారు.
 కానీ ఇటీవల కాలంలో ఖురాన్‌లో రందాన్ అనే ఉన్నది కనుక అలాగే పిలవాలనే వాదనలు పెరిగి భారత ఉపఖండంలో కూడా అలాగే పిలుస్తున్నారు. మూలం ఒకటే అయినప్పుడు ఉచ్ఛారణ ఎలా ఉంటే మాత్రమేమిటనే ప్రశ్నించేవారు లేకపోలేదు. ఎలా ఉన్న ఒప్పుకునేవారుంటే ఫర్వాలేదుగానీ ఇలాగే ఉచ్ఛరించాలంటూ ఓ రూలుగా మాట్లాడినప్పుడే ఆ పదం మూలాల్లోకి వెళ్లాల్సిన అవసరం వస్తుంది. ఏ పదం ఉచ్ఛారణపైనా స్థానిక సాంస్కృతిక ప్రభావం తప్పకా ఉంటుంది.
 
 భాషా శాస్త్రవేత్తల పరిశోధనల ప్రకారం రంజాన్ లేదా రందాన్ పదం మూలాల్లోకి వెళితే రందాన్ అరబిక్ పదం. రంజాన్ పదం పర్షియన్ పదం. ఖురాన్‌లో రందాన్ అని ఉన్నది కనుక అలాగే ఉచ్ఛరించాలని ఢిల్లీ రచయిత రణ సఫ్వీ వాదిస్తున్నారు. ఇక్కడ మరో విచిత్రమేమిటంటే ఖురాన్ లిఖించిన సమయంలో 'డీ'కి ఉన్న ఉచ్ఛారణ ఇప్పటి అరబికుల్లో లేదు. వారి ఉచ్ఛారణ ఇప్పటికే ఎంతో మారిపోయింది. ఎక్కడైనా స్థానిక సంస్కృతినిబట్టే వారి ఉచ్ఛారణలు ఉంటాయని చరిత్రకారులు ఎప్పుడో సూత్రీకరించారు. ఆ లెక్కన భారతీయ ముస్లింలపై పర్షియన్ల ప్రభావమే ఎక్కువ. అందుకే ఇంతకాలం ఇక్కడ రంజాన్ అని పిలుస్తూ వచ్చారు.
 
 ప్రపంచంలో అరబిక్ ప్రభావం ఎక్కువగా ఉన్న ప్రాంతాల్లో మొదటి నుంచి రందాన్ అని పిలుస్తూ వచ్చారు. సరే అరబిక్ ప్రకారమే రందాన్‌ను ఉచ్ఛరిద్దామనే సూత్రీకరణకు మనమూ వచ్చామనుకుద్దాం. ‘నమాజ్’ అనే పదం పర్షియన్ భాష నుంచి వచ్చిందే. అరబిక్‌లో దీన్ని 'సలాహ్' అని పిలుస్తారు. రోజా కూడా పర్షియన్ పదమే, దీన్ని అరబిక్‌లో సామ్ (ఎస్‌ఏడబ్లూఎం) అని పిలుస్తారు. అంతెందుకు ‘ఖుదా’ అనే పదం ఫార్సీ నుంచి వచ్చింది. మరీ ఈ పదాల ఉచ్ఛారణను అలాగే ఉంచవచ్చా? అరబిక్ పదం 'రందాన్'లాగా వీటిని కూడా మార్చుకోవచ్చా? భారత్‌లోని బెంగాలీ భాషలోనే 'జెడ్' అనే ఆంగ్ల అక్షరానికి సమానమైన ఉచ్ఛారణ పదమే లేదు. మరి వారెలా పలకాలి అన్నది కూడా ప్రశ్నే కదా!.
 
  భారత ఉపఖండంలోనే ఉన్న పాకిస్తాన్‌లో కూడా ప్రజలు గతంలో రంజాన్ అనే పిలిచేవారు. అక్కడి టీవీ జర్నలిస్టులు ఆంగ్ల భాష యాసలో స్టైలిష్‌గా పలకడం కోసం 'రందాన్' అనడం మొదలుపెట్టారట. కాలక్రమంలో అక్కడ అరబిక్  'రందాన్'  ఉచ్ఛారణ స్థిరపడిపోయింది. పొరుగునే ఉన్నాం కనుక మనంపై కూడా ఆ ప్రభావం పడిందిమో!
 
  (గమనిక: రంజాన్ లేదా రందాన్ పదంపై సామాజిక వెబ్‌సైట్లలో చర్చ నడుస్తున్న నేపథ్యంలో ఈ వార్త ఇవ్వడం సముచితమని భావిస్తున్నాం-సాక్షి డాట్ కామ్)
  


 ముకరంపుర : రంజాన్ మాసంలో ముస్లింలకు ఎలాంటి అసౌకర్యం కలుగకుండా అన్ని ఏర్పాట్లు చేయాలని కలెక్టర్ నీతూప్రసాద్ సంబంధిత అధికారులను ఆదేశించారు. శుక్రవారం కలెక్టరేట్ సమావేశ మందిరంలో ముస్లిం మతపెద్దలు, ప్రతినిధులు, అధికారులతో రంజాన్  మాసంలో చేయూల్సిన ఏర్పాట్లపై సమావేశం నిర్వహించారు. ఈద్గా, మసీదులకు మరమ్మతులు చేయించి పెయింటింగ్ వేయించాలని సూచించారు. వర్షాకాలంలో రంజాన్ మాసం వస్తున్నందున ఆహారం కల్తీ కాకుండా తనిఖీలు చేయాలని ఆదేశించారు. నిత్యావసర సరుకులు, పండ్ల ధరల నియంత్రణకు తనిఖీలు చేయాలన్నారు.
  
  అన్ని పట్టణాలు, నగరాలు, గ్రామాల్లో నీటి సరఫరా సరిగా చేయాలని, ఇబ్బందులుంటే ట్యాంకర్ల ద్వారా సరఫరా చేయాలన్నారు. పారిశుధ్యానికి అధిక ప్రాధాన్యత ఇవ్వాలని, ఏ రోజు చెత్త అదే రోజు తొలగించాలని, వీధిదీపాలు అమర్చాలని సూచించారు. రంజాన్ మాసంలో ముస్లింలు కోరిన వెంటనే గ్యాస్ సిలిండర్ సరఫరా చేయాలన్నారు. తెల్లరేషన్ కార్డుదారులకు 5కిలోల చక్కెర పంపిణీ చేయాలని కోరగా.. వెంటనే ప్రభుత్వానికి లేఖ రాయాలని అధికారులను ఆదేశించారు. అలాగే 24 గంటల విద్యుత్ సరఫరా చేయాలని ట్రాన్స్‌కో అధికారులకు సూచించారు. మసీదులకు వెళ్లే డ్రైనేజీలు మరమ్మతులుంటే వెంటనే చేయాలని, దోమల నివారణకు ఫాగింగ్ చేయాలన్నారు.
  
  కలెక్టరేట్‌లో టోల్‌ఫ్రీ ఏర్పాటు
  రంజాన్ మాసంలో ఏమైనా సమస్యలుంటే తెలుపుటకు కలెక్టరేట్‌లో టోల్‌ఫ్రీ నెంబర్ 18004254731 ఏర్పాటు చేశామని కలెక్టర్ తెలిపారు. ఇది కార్యాలయం పనివేళల్లో పని చేస్తుందన్నారు. అత్యవసర పరిస్థితుల్లో 9490163835 నెంబర్‌కు ఫోన్ చేస్తే.. అధికారులు వెంటనే స్పందించి సమస్యలను పరిష్కరిస్తారని తెలిపారు. విద్యుత్ సరఫరాకు సంబంధించి 8331017552 నెంబర్‌కు ఫోన్ చేస్తే కరీంనగర్ కార్పొరేషన్ పరిధిలో సమస్యను పరిష్కరిస్తారని, ఇతర ప్రాంతాలలో సంబంధిత డీఈలను సంప్రదించాలని సూచించారు.
  
  ట్రాఫిక్ టీంల ఏర్పాటు : ఎస్పీ
  ఎస్పీ జోయల్ డేవిస్ మాట్లాడుతూ జిల్లాలో శాంతిభద్రత సమస్యలు లేకుండా గత తగిన చర్యలు తీసుకుంటామని తెలిపారు. ట్రాఫిక్ టీంలను ఏర్పాటు చేసి నమాజ్‌కు వెళ్తున్న వారికి ఇబ్బందులు లేకుండా చూస్తామన్నారు. సమస్యలుంటే 100 నెంబర్‌కు ఫోన్ చేయాలని సూచించారు. ప్రజలు ఎలాంటి వదంతులు నమ్మకూడదని కోరారు. ఈ సమావేశంలో డీఆర్‌వో టి.వీరబ్రహ్మయ్య, జగిత్యాల సబ్‌కలెక్టర్ కృష్ణభాస్కర్, డీఎస్‌వో చంద్రప్రకాశ్, కరీంనగర్ కార్పొరేషన్ కమిషనర్ రమణాచారీ, ఆర్‌డబ్ల్యూఎస్ ఎస్‌ఈ శ్రీనివాస్, డీపీవో కుమారస్వామి, మైనార్టీ కార్పొరేషన్ ఈడీ హమీద్, సంబంధిత అధికారులు, ముస్లిం నాయకులు మహ్మద్ ఆరిఫ్, ఎస్‌ఏ.మోసిన్, అబ్బాస్‌షమీ, మహ్మద్ షకీర్, సయ్యద్ అక్బర్ హుస్సేన్, మహ్మద్ తాజ్, సయ్యద్ బర్కత్ అలీ, ఖమ్రెద్దీన్, సిరాజ్ హుస్సేన్, సాజిత్ అలీ, బాబుజానీ, సలీం, షాహెద్ నిహాల్ తదితరులు పాల్గొన్నారు.
  


 చార్మినార్ : రంజాన్ కు జానిమాజ్‌లు మార్కెట్లోకి వచ్చేశాయి. ముస్లింలు నమాజ్ చేసే సమయంలో నేలపై పరిచే పవిత్ర వస్త్రం జానిమాజ్. ముఖ్యంగా రంజాన్ మాసంలో జానిమాజ్‌లపై కూర్చుని ప్రార్థనలు చేయడం ఆనవాయితీగా వస్తోంది. రంజాన్ మాసం మరో 12 రోజుల్లో ప్రారంభం కానుంది. రంజాన్ షాపింగ్ అంటే దుస్తులు, టోపీలు, సుర్మా,డ్రైఫ్రూ ట్స్‌తో పాటు ఇతర అన్ని అవసరాలు కలగలిసి ఉంటాయి. జానిమాజ్‌లను కూడా కొనుగోలు చేసే సంస్కృతి రానురాను నగరంలో కూడా పెరిగింది. ఎంతో మంది తమ ఇళ్లలోకి, మసీదుల్లోకి జానిమాజ్‌లను కొనుగోలు చేయడాన్ని పుణ్యకార్యంగా భావిస్తున్నారు. ఆత్మీయుల స్మృత్యర్థం వాటిని మసీదులకు అందజేస్తున్నారు.
 
 నెల పాటు కొనసాగనున్న ప్రదర్శన..
 సౌదీ అరేబియాలోని పవిత్ర మక్కా, మదీనాలలోని మసీదుల్లో ఉన్నటు వంటి జానిమాజ్‌లపై తమ నమాజ్‌ను పూర్తి చేయాలని ప్రతి ముస్లిం కోరుకుంటారు. ప్రపంచ వ్యాప్తంగా విశేష ప్రాచుర్యంలో ఉన్న జానిమాజ్‌లను మదీనా సర్కిల్‌లోని మహ్మద్ క్యాప్ మార్ట్ ఒకే వేదికపైకి తీసుకు వచ్చి నెల రోజుల పాటు కొనసాగే అంతర్జాతీయ ఎగ్జిబిషన్‌ను ఏర్పాటు చేసింది. ఈ అంతర్జాతీయ జానిమాజ్‌ల ఎగ్జిబిషన్‌ను మౌలానా సుల్తాన్ అహ్మద్ ఆదివారం ప్రారంభించారు. దాదాపు 108 సంవత్సరాల నుంచి వ్యాపార రంగంలో ఉన్న మహ్మద్ క్యాప్ మార్ట్ నాలుగో అంతస్తులో 3 వేల చదరపు అడుగుల స్థలాన్ని జానిమాజ్‌ల ప్రదర్శనకు కేటాయించింది. బ్లూ, బీజ్, లేత, ఎరుపు, ఆకుపచ్చలతో పాటు మరె న్నో వర్ణాలలో ఇవి అందుబాటులోకి వచ్చాయి. ఈ సందర్బంగా మహ్మద్ క్యాప్ మార్ట్ యజమాని మహ్మద్ ఇలియాస్ బుకారి విలేకరులతో మాట్లాడుతూ... ఇస్లాం సంస్కృతిని, ఆచార వ్యవహారాలను ప్రతిబింబించే విధంగా మృదువైన వస్త్రంతో రూపొం దించిన అందమైన జానిమాజ్‌లను మహమ్మద్ క్యాప్ మార్ట్ రూపొందించిందన్నారు.
 
 సౌదీ అరేబియా, టర్కీ, ఇరాక్, బెల్జియం, మలేషియా, భారత్‌లలో లభ్యమయ్యే జానిమాజ్‌లను ఈ ప్రదర్శనలో ఏర్పాటు చేసామన్నారు. తమ వద్ద రూ.360 నుంచి రూ.1200 వరకు అందుబాటులో ఉన్నాయన్నారు.
  


 మహబూబ్‌నగర్ అర్బన్: గత 29 రోజులుగా ఉపవాసాలు చేసిన ముస్లింలు రంజాన్ ముగింపు సందర్భంగా మంగళవారం ఈద్ ఉల్ ఫితర్ (రంజాన్)పండుగను ఘనంగా జరుపుకున్నారు. జిల్లావ్యాప్తంగా వేకువజాము నుంచే ఆనందోత్సాహాలతో మసీదులు, ఈద్గాలు తదితర ప్రార్థనస్థలాల వద్దకు చేరుకొని ప్రత్యేకప్రార్థనలు చేశారు. కొత్త వస్త్రాలు ధరించిన ముస్లింలు ప్రత్యేక పండుగ నమాజ్‌ను చదివి సర్వమానవాళి  క్షేమం కోరుతూ అల్లాహ్‌ను వేడుకున్నారు. హిందూ, ముస్లింలు పరస్పరం రంజాన్ పండుగ శుభాకాంక్షలు చె ప్పుకున్నారు.
  
  ఆర్థికస్తోమత కలిగిన కొందరు ముస్లింలు ఫిత్రా(దానధర్మాలు)చేశారు. పలువురు ప్రజాప్రతినిధులు, అధికారులు, వివిధ పార్టీలకు చెందిన నాయకులు ఈద్గాల వద్దకు వెళ్లి ముస్లింలకు ఈద్ ముబారక్  తెలిపారు. దీంతో జిల్లాలోని అన్ని మసీదులు, ఈద్గాల వద్ద పండుగ వాతావరణం నెలకొంది. రంజాన్ పర్వదినాన్ని పురస్కరించుకొని జిల్లా కేంద్రంలోని వానగట్టు వద్దనున్న ఈద్గాలో ముస్లింలు ప్రత్యేక ప్రార్థనలు నిర్వహించారు. ఈ సందర్భంగా జామియా మసీదు ప్రధాన ఇమామ్ మౌలానా హాఫిజ్ ఇస్మాయిల్ ఉదయం 10 గంటలకు ప్రత్యేక ప్రార్థనలు జరిపించారు.
  
  ప్రముఖుల శుభాకాంక్షలు
  రంజాన్ పవిత్రమాసం అనంతరం మంగళవారం ఈద్‌ఉల్ ఫితర్‌ను పురస్కరించుకొని పలువురు ప్రముఖులు ముస్లింలకు ఈద్ ముబారక్ తెలిపారు. ఖ్వామీ ఏక్తా కమిటీ తరఫున ఈద్గా ఆవరణలో ఏర్పాటుచేసిన వేదిక వద్ద పలువురు ప్రజాప్రతినిధులు, అధికారులు ముస్లింలకు శుభాకాంక్షలు తెలిపారు.
  
  కేంద్రమాజీ మంత్రి ఎస్.జైపాల్‌రెడ్డి, మాజీ ఎంపీ ఏపీ జితేందర్‌రెడ్డి, కలెక్టర్ ఎం.గిరిజాశంకర్, ఎమ్మెల్సీ జగదీశ్వర్‌రెడ్డి, ఎమ్మెల్యే వి.శ్రీనివాస్‌గౌడ్, మునిసిపల్ చైర్‌పర్సన్ రాధాఅమర్, డీసీసీ అధ్యక్షుడు ఒబేదుల్లా కొత్వాల్, వైఎస్‌ఆర్ సీపీ జిల్లా కన్వీనర్ ఎడ్మ కిష్టారెడ్డి, మాజీ మంత్రి పి. చంద్రశేఖర్, టీఆర్‌ఎస్ జిల్లా అధ్యక్షుడు విఠల్‌రావుఆర్యా, జేపీఎన్‌సీఈ చైర్మన్ కేఎస్.రవికుమార్, వివిధ పార్టీల నేతలు సత్తూరు రాములుగౌడ్, ఎన్‌పీ వెంకటేశ్, బెనహర్, డీఎస్పీ మల్లికార్జున్ తదితరులు పాల్గొన్నారు.
  
  భారీ బందోబస్తు..
  రంజాన్‌ను పురస్కరించుకుని జిల్లా కేం ద్రంతో పాటు అన్ని మండలాలు, గ్రా మాల్లో ఎలాంటి అవాంఛనీయ ఘట నలు చోటుచేసుకోకుండా పోలీసులు భారీ బందోబస్తు నిర్వహించారు. ఈద్గాల వద్ద ప్రత్యేక పోలీసు బలగాలను మోహరించారు. అన్ని నియోజకవర్గ కేంద్రాల్లో కూడా పోలీసులు పహరా కాశారు. పోలీసులు, ఆ శాఖ అధికారులు కూడా ముస్లింలకు పండుగ శుభాకాంక్షలు తెలిపారు.
  


 జిల్లా వ్యాప్తంగా మంగళవారం ముస్లింలు రంజాన్‌ను ఘనంగాజరుపుకున్నారు. కడపలోని బిల్టప్ ఈద్గా మైదానంలో ఎమ్మెల్యే అంజాద్ బాషాతో పాటు వేలాదిమంది ముస్లింలు ప్రార్థనలుచేశారు. ఒకరికొకరు శుభాకాంక్షలు తెలుపుకున్నారు. మత పెద్ద ముఫ్తీ న్యాయమతుల్లా సాహేబ్ పండుగ సందేశం ఇచ్చారు. ఎలాంటి ఇబ్బందులు కలుగకుండా పోలీసులు పటిష్ట బందోబస్తు నిర్వహించారు.
  


 జిల్లావ్యాప్తంగా మంగళవారం రంజాన్ కోలాహలం నెలకొంది.. ముస్లింలు భక్తిశ్రద్ధలతో, సంప్రదాయబద్ధంగా పండుగను జరుపుకున్నారు.. ఈద్గాల వద్ద ప్రత్యేక ప్రార్థనలు చేశారు.. 
 
 మసీదులు ముస్లింలతో కిక్కిరిశాయి.. ముస్లిం మతగురువులు మహ్మద్ ప్రవక్త సందేశాలు బోధించారు.. ప్రవక్త సందేశాలు అనుసరించి, ఆచరించాలన్నారు. దైవానుసారంగా జీవించిన వారికి అల్లాహ్ కరుణ లభిస్తుందన్నారు.. ఒకరినొకరు రంజాన్ శుభాకాంక్షలు తెలుపుకున్నారు.. ప్రజాప్రతినిధులు ముస్లింలకు శుభాకాంక్షలు తెలిపేందుకు తరలివచ్చారు..
  
 రంజాన్ వేడుకలను ముస్లింలు జిల్లావ్యాప్తంగా మంగళవారం ఘనంగా జరుపుకున్నారు. కొత్త దుస్తులు ధరించి చిన్నా, పెద్ద తేడా లేకుండా పెద్ద సంఖ్యలో మసీదులకు చేరుకుని ప్రత్యేక ప్రార్థనలు చేశారు. ఈ సందర్భంగా మత పెద్దలు మహ్మద్ ప్రవక్త సందేశాలను బోధించారు. సక్రమార్గంలో నడిచే వారికే అల్లాహ్ కరుణ లభిస్తుందని సందేశం ఇచ్చారు. తదుపరి ఒకరి నొకరు అలాయ్‌బలాయ్ ఇచ్చుకుంటూ శుభాకాంక్షలు తెలుపు కున్నారు. ఆదిలాబాద్‌లో మంత్రి జోగు రామన్న, గుడిహ త్నూర్‌లో ఎంపీ నగేష్, ఆయా నియోజకవర్గ కేంద్రాల్లో ఎమ్మెల్యేలు మసీదులకు వచ్చి ముస్లింలకు పండుగ శుభాకాంక్షలు తెలిపారు. ఆద్యంతం జిల్లా అంత టా రంజాన్ పండుగ వాతావరణం కనిపించింది.


 రాష్ట్రీయ స్వయం సేవక్ సంఘ్.. నూటికి నూరుశాతం హిందూ సంస్థ. అందులోనూ గుజరాత్ లాంటి రాష్ట్రాల్లో దీని ప్రభావం ఎంత ఉంటుందో వేరే చెప్పనక్కర్లేదు. అలాంటిది, గుజరాత్లో నిర్వహించిన ఇఫ్తార్ పార్టీకి ఆర్ఎస్ఎస్ సీనియర్ నాయకులు హాజరయ్యారు!! ముస్లిం రాష్ట్రీయ మంచ్ (ఎంఆర్ఎం) నిర్వహించిన ఇఫ్తార్ పార్టీలకు ఆర్ఎస్ఎస్ నేతలు వెళ్తున్నారు. 2002 సంవత్సరంలో నాటి ఆర్ఎస్ఎస్ సర్సంఘ్ చాలక్ కేఎస్ సుదర్శన్ సూచనల మేరకు ఎంఆర్ఎం సంస్థ ప్రారంభమైంది. ఈ సంస్థ ఆధ్వర్యంలో ఈ ఏడాది గుజరాత్లో ఇప్పటివరకు ఏడు ఇఫ్తార్ పార్టీలు నిర్వహించారు. వడోదరలో ఈనెల 21న నిర్వహించిన ఇఫ్తార్ పార్టీకి బీజేపీ సీనియర్ నాయకుడు జయంతి బారోత్, ఆర్ఎస్ఎస్ సీనియర్ నాయకుడు ఇంద్రేష్ కుమార్ హాజరయ్యారు.
 
 వడోదరలోని పురుషోత్తం హాల్లో నిర్వహించిన ఇఫ్తార్ విందుకు దాదాపు 800 మంది హాజరయ్యారని, ఇలాంటి వాటి వల్ల రాష్ట్రంలో మత సామరస్యం వెల్లివిరుస్తోందని ఎంఆర్ఎం రాష్ట్ర సమన్వయకర్తల గనీ ఖురేషీ అన్నారు.  ఆగస్టు మూడో తేదీన మెగా ఈద్ మిలన్ సంబరాన్ని కూడా ఏర్పాటు చేయనున్నారు. అయితే ఆర్ఎస్ఎస్ అధికారులు మాత్రం తమంతట తాముగా ఈ విందులకు వెళ్లడంలేదు. ఆర్ఎస్ఎస్ తనంతట తానుగా ఎలాంటి ఇఫ్తార్ విందులు నిర్వహించడంలేదని గుజరాత్ ఆర్ఎస్ఎస్ చీఫ్ డాక్టర్ జయంతి భదేషియా తెలిపారు. ఎంఆర్ఎంతో తమకు సంబంధం లేదని కూడా అన్నారు.


 ఈద్ ముబారక్
 బాన్సువాడ : 29 రోజుల ఉపవాసాలు ముగిశాయి. ముస్లింలు అత్యంత భక్తి శ్రద్ధలతో జరుపుకొనే పండగ (ఈద్-ఉల్-ఫితర్) రంజాన్, షవ్వాల్ మాసంలోని మొదటి రోజు వస్తుంది. సోమవారం సాయంత్రం ఆకాశంలో నెలవంక కనిపించడంతో మంగళవారం నాడు రంజాన్ పండగను జరుపుకోవాలని మత గురువులు ప్రకటించారు. ఈ పండగ జిల్లా లో మత సామరస్యానికి ప్రతీకగా నిలుస్తోంది. ఈద్-ఉల్-ఫిత ర్ సందర్భంగా జిల్లావ్యాప్తంగా నిజామాబాద్, బోధన్, ఆర్మూ ర్,  కామారెడ్డి, బాన్సువాడ, ఎల్లారెడ్డి పట్టణాల్లోని ఈద్‌గాహ్‌లలో ప్రార్థనలు చేయడానికి ప్రత్యేక ఏర్పాట్లు చేస్తున్నారు.


 నెలవంక కనిపించడంతో మంగళవారం రంజాన్ పండుగను జరుపుకునేందుకు ముస్లింలు సిద్ధమయ్యారు. రాష్ట్ర వ్యాప్తంగా మసీదులు ముస్తాబయ్యాయి. ముస్లిం సోదరులకు రాష్ట్రంలోని పార్టీల నేతలు పండుగ శుభాకాంక్షలు తెలియజేశారు.
  
 సాక్షి, చెన్నై: మహ్మద్ ప్రవక్త సూక్తుల మేరకు పుణ్యకార్యాలకు, సమతమమతలకు నెలవుగా రంజాన్ మాసం నిలుస్తోది. ఈ మాసంలో నరక ద్వారాలు మూసుకుని, స్వర్గ ద్వారాలు తెరచుకుంటాయి. అందుకే పాప కర్మల నుంచి విముక్తి పొందడానికి  ముస్లింలు భక్తి శ్రద్ధలతో ఈ మాసంలో ఉపవాస దీక్షల్ని (రోజా) ఆచరిస్తుంటారు. శక్తి మేరకు సత్కార్యాలు, దాన ధర్మాలతో ప్రార్థనల్లో లీనమయ్యారు.
  
 పేద, గొప్ప తేడా లేకుండా అల్లాకు విశ్వాస పాత్రులుగా ఉంటూ భక్తి భావంలో మునిగారు. నెలరోజులు కఠోర ఉపవాస దీక్షను ఆచరించిన ముస్లింలు అత్యంత పవిత్రమైన ఈద్ ముబార్ వేళకు సన్నద్ధమయ్యారు. సోమవారం రాత్రి ఆకాశంలో నెలవంక కనిపించడంతో మంగళవారం ఆనందోత్సాహాలతో పండుగను జరుపుకునేందుకు రాష్ట్రంలోని ముస్లింలు సిద్ధమయ్యారు.
  
 పండుగ సందడి: పవిత్ర రంజాన్ కోసం కొత్త దుస్తుల కొనుగోళ్లను ఇప్పటికే ముస్లింలు పూర్తి చేశారు. ఇక పండుగ రోజు ప్రత్యేక ప్రార్థనల కోసం టోపీలు, అత్తర్లు, బిర్యాని, తీపి పదార్థాల తయారీకి ఉపయోగించే వస్తువుల కొనుగోళ్ల నిమిత్తం షాపింగ్ సెంటర్లకు తరలి వచ్చారు. దీంతో ముస్లింలు అత్యధికంగా ఉండే చెన్నైలోని ట్రిపిక్లేన్, మన్నడి, తండయార్ పేట, పూందమల్లి, అన్నానగర్, పురసైవాక్కం, పడప్పై, తాంబరం, అరుంబాక్కం, మణ్ణివాక్కం,  అన్నా సాలై, ఎంఎండీఏ, ఆవడి, పూందమల్లి పరిసరాల్లో సందడి వాతావరణం నెలకొంది. ఇక, మదురై, తిరునల్వేలి, కోయంబత్తూరు, రామనాధపురం, వేలూరు తదితర పట్టణాల్లో రంజాన్ ఉత్సాహం కనిపిస్తోంది.
  
 నేడే సంబరం : నెల రోజులు దీక్షను ఆచరించడంతో పాటుగా రేయింబవళ్లు అల్లా ఆశీస్సుల కోసం ప్రార్థనల్లో నిమగ్నమైన ముస్లింలు పండుగ ప్రత్యేక ప్రార్థనకు రెడీ అయ్యారు. రాష్ట్ర వ్యాప్తంగా మంగళవారం ప్రత్యేక ప్రార్థనలకు ఏర్పాట్లు చేశారు. ఈద్గా మైదానాల్లో కొన్ని చోట్ల, మిగిలిన చోట్ల మసీదుల్లో ఈ ప్రార్థనలు జరగనున్నాయి. ఇందు కోసం మసీదులు ముస్తాబయ్యాయి. కొన్ని పెద్ద మసీదుల్లో ప్రత్యేక ఏర్పాట్లు చేశారు. ఆ పరిసరాల్లో పోలీసులు గట్టి భద్రతా ఏర్పాట్లు చేసి ఉన్నారు. ప్రత్యేక ప్రార్థన అనంతరం ముస్లింలు అత్యధికంగా వెళ్లే మార్గాల్లో ట్రాఫిక్ ఆంక్షలతో పాటుగా గట్టి భద్రతా చర్యలు తీసుకున్నారు.
  
 నేతల శుభాకాంక్షలు: రంజాన్ పండుగను పురస్కరించుకుని రాష్ట్రంలోని ముస్లింలకు నేతలు శుభాకాంక్షలు తెలియజేశారు. రాష్ట్ర గవర్నర్ కొణిజేటి రోశయ్య తన ప్రకటనలో ముస్లింలకు హృదయ పూర్వక శుభాకాంక్షలు తెలిపారు. రాష్ట్ర ముఖ్యమంత్రి జే జయలలిత తన ప్రకటనలో ముస్లింలందరూ సుఖ సంతోషాలతో, ఆనందోత్సాహలతో జీవించాలని ఆకాంక్షించారు. పవిత్ర రంజాన్‌తో భక్తి భావం మరింతగా వికసించాలని పేర్కొంటూ ఈద్ ముబారక్ తెలియజేశారు. తమ ప్రభుత్వం ముస్లింలకు అందిస్తున్న సహకారాన్ని వివరించారు.
  
 డీఎంకే అధినేత ఎం కరుణానిధి తన ప్రకటనలో మహ్మద్ ప్రవక్త అడుగు జాడల్లో నడుస్తూ, ఆయన సూక్తులను తూచా తప్పకుండా పాటిస్తూ వస్తున్న ముస్లింలలో స్నేహ భావం మరింత పెంపొందాలని కాంక్షించారు. అలాగే, డీఎండీకే అధినేత విజయకాంత్, పీఎంకే అధినేత రాందాసు, ఎండీఎంకే నేత వైగో, టీఎన్‌సీసీ అధ్యక్షుడు జ్ఞాన దేశికన్, కేంద్ర మాజీ మంత్రి జీకే వాసన్, తిరునావుక్కరసు, వీసీకే నేత తిరుమావళవన్, ఎస్‌ఎంకే నేత శరత్‌కుమార్, ఇండియన్ యూనియన్ ముస్లిం లీగ్ నేత ఖాదర్ మొహిద్దీన్, మనిద నేయ మక్కల్ కట్చి నేత జవహరుల్లా తదితరులు శుభాకాంక్షలు తెలియజేసిన వారిలో ఉన్నారు.


 చార్మినార్/బహదూర్‌పురా/సాక్షి, సిటీబ్యూరో: ఈద్-ఉల్-ఫితర్‌ను ఘనంగా జరుపుకొనేందుకు ముస్లింలు సిద్ధమవుతున్నారు. ఇందుకోసం ప్రభుత్వం అన్ని ఏర్పాట్లు చేస్తోంది. ప్రార్థనలను పురస్కరించుకుని ఈద్గాలను ము స్తాబు చేస్తున్నారు. పాతబస్తీలోని మీరాలం, మాదన్నపేట్, గోల్కొండ, సికింద్రాబాద్‌లోని ఈద్గాలతోపాటు నగరంలోని ఇతర ప్రాంతాల్లోని  ఈద్గాలు, మసీదులను ముస్తాబు చేశారు. ఆ యా ప్రాంతాల్లో సామూహిక ప్రార్థనలు చేయనున్నారు. ఇందుకోసం సంబంధిత అధికారులు ఏర్పాట్లు పూర్తి చేశారు. పాతబస్తీ మీరాలం ఈద్గాను అన్ని హంగులతో ప్రార్థనలకు అనుకూలంగా తీర్చిదిద్దారు.
  
 పండుగరోజు ఆంక్షలు..
  
 సామూహిక ప్రార్థనల దృష్ట్యా మీరాలం ఈద్గా తదితర ప్రాంతాల్లో పండుగ రోజు ట్రాఫిక్ ఆం క్షలు విధించనున్నారు. మీరాలం ఈద్గా వైపు వచ్చే వాహనాలను పురానాపూల్, బహదూర్‌పురా పోలీస్ స్టేషన్ల మీదుగా దారి మళ్లించనున్నారు. మీరాలం ఈద్గా క్రాస్ రోడ్డు నుంచి ఈద్గా వైపు ఎటువంటి వాహనాలను అనుమతించరు. శివరాంపల్లి, ఎన్‌పీఏ నుంచి బహదూర్‌ఫురా వైపు వచ్చే వాహనాలను దానమ్మ హట్స్ టీ జంక్షన్ నుంచి అలియాబాద్ వైపు దారి మళ్లిస్తారు.
  
 బ్యాగులు, సెల్‌ఫోన్లు, వాటర్ బాటిళ్లు వద్దు: డీసీపీ
  
 ఈద్గాలో సామూహిక ప్రార్థనలకు వచ్చే ముస్లిం లు తమ వెంట బ్యాగులు, సెల్‌ఫోన్లు, వాటర్ బాటిళ్లు తదితర వస్తువులు తీసుకు రాకూడదని దక్షిణ మండలం డీసీపీ ఎస్‌ఎస్ త్రిపాఠీ కోరారు. ఈద్గా వద్ద మెటల్ డిటెక్టర్లు ఏర్పాటు చేసి తనిఖీలను నిర్వహించిన అనంతరమే సామూహిక ప్రార్థనలకు అనుమతిస్తామన్నారు.
  
 ఈద్గాల అభివృద్ధి: డిప్యూటీ సీఎం
  
 రాష్ట్రంలోని ఈద్గాలను అభివృద్ధి పరిచేందుకు తమ ప్రభుత్వం ప్రణాళికలను రూపొందించిందని తెలంగాణ రాష్ట్ర ఉప ముఖ్యమంత్రి మహమూద్ అలీ అన్నారు. ఈద్-ఉల్-ఫితర్‌ను పురస్కరించుకొని పాతబస్తీ మీరాలం ఈద్గాను ఆదివారం ఉదయం ఆయన జీహెచ్‌ఎంసీ, పోలీసు, ఇతర విభాగాల అధికారులతో కలిసి సందర్శించారు. అక్కడ జరుగుతోన్న అభివృద్ధి పనులను పరిశీలించారు. ఈ సందర్భంగా డిప్యూటీ సీఎం మాట్లాడుతూ... తాడ్‌బన్ మీరాలం ఈద్గాలో అభివృద్ధి పనులను వేగవంతం చేయాలని అధికారులు ఆదేశించారు.
 
 మీరాలం ఈద్గా ముఖద్వారం వద్ద శాశ్వత కమాన్, మీరాలం ఈద్గా లోపల శాశ్వత షెడ్‌ను త్వరలో నిర్మిస్తామన్నారు. ఆయన వెంట బహదూర్‌పురా ఎమ్మెల్యే మోజాం ఖాన్, నగర పోలీసు కమిషనర్ ఎం.మహేందర్ రెడ్డి, జీహెచ్‌ఎంసీ స్పెషల్ కమిషనర్ ప్రత్యూమ్నా, పోలీసు, జీహెచ్‌ఎంసీ, జలమండలి, విద్యుత్ అధికారులు, కార్పొరేటర్లు మహ్మద్ మోబీన్, ఎంఏ గఫార్, అజీజ్ బేగ్, టీఆర్‌ఎస్ బహదూర్‌పురా నియోజకవర్గ ఇన్‌చార్జి ఎస్‌ఏ ఖైసర్, మహ్మద్ అబ్దుల్ గఫార్ ఖాన్ తదితరులు ఉన్నారు.
  


 హైదరాబాద్ రంజాన్ కళతో కళకళలాడుతోంది. ప్రత్యేకమైన వంటకాల తయారీతో హోటళ్ల నుంచి వ్యాపించే ఘుమఘుమలు... దుకాణాల బయట రంగు రంగుల విద్యుద్దీపాల ధగధగలు... గుట్టల కొద్దీ పండ్లతో నిండుగా కనిపిస్తున్న బజారులు... కొత్త కొత్త వెరైటీ వస్త్రాలు, ఆభరణాలతో ఆకట్టుకుంటున్న షోరూమ్‌లు... ప్రార్థనలతో ఆధ్యాత్మిక శోభను సంతరించుకున్న మసీదులు... నగరంలో రోజూ సాయంత్రం ఇలాంటి సందడితో మొదలవుతోంది. రాత్రులన్నీ పట్టపగటి వేళలాగే వెలిగిపోతున్నాయి. పాతబస్తీ గురించి ప్రత్యేకంగా చెప్పనక్కర్లేదు. రంజాన్ మాసంలో పాతబస్తీ అంతా పండుగ వాతావరణం కనిపిస్తుంది. దాదాపు నెల్లాళ్లు ముందుగానే ఇక్కడి మార్కెట్లు, మసీదులు రంజాన్‌కు సిద్ధమవుతాయి. వీధుల్లో నోరూరించే కబాబ్‌లు, పత్థర్ కా గోష్, దహీబడే, హలీం వంటి వంటకాలు చవులూరిస్తాయి.
  
  రకరకాల దుకాణాలు పాతబస్తీకి కొత్త శోభను తెస్తాయి. కులమతాలకు అతీతంగా నగర వాసులందరికీ పాతబస్తీనే షాపింగ్ గమ్యస్థానంగా మారుతుంది. తినుబండారాలతో పాటు దుస్తులు, పాదరక్షలు, టోపీలు, మహిళల అలంకరణ సామగ్రి విక్రయించే దుకాణాలు, ఒకే ధరకు రకరకాల వస్తువులు విక్రయించే ‘హర్ ఏక్ మాల్’ దుకాణాలు ఎక్కువగా సాయంత్రం వేళల్లోనే తెరుచుకుంటాయి. ఏటా కొత్త కొత్త ఉత్పత్తులతో రంజాన్ నెలలో ఏర్పడే సీజనల్ దుకాణాలు... ఉపవాస దీక్షలు ముగిసే నాటికి సరుకును దాదాపు పూర్తిగా విక్రయించేస్తాయి. ప్రారంభంలో ధరలు కాస్త ఎక్కువగానే ఉన్నా, రోజులు గడుస్తున్న కొద్దీ తగ్గుముఖం పడతాయి. ఈద్-ఉల్-ఫితర్ ఇక రెండు రోజులుందనగా, ఉన్న స్టాక్‌ను క్లియర్ చేసుకునేందుకు కొనుగోలుదారులు అడిగినంత ధరకు దుకాణదారులు ఇచ్చేస్తుంటారు. దీంతో రంజాన్ నెల చివరి రోజుల్లో బజారులన్నీ జనంతో కిటకిటలాడుతూ కనిపిస్తాయి.
 -  ముహ్మద్ మంజూర్
  ఫొటోలు: వెంకట్, రాజేష్


  ఇస్లాం వెలుగు
  
 సంవత్సరంలోని పన్నెండు మాసాల్లో అత్యంత శుభప్రదమైన, మంగళప్రదమైన విశిష్ట మాసం రమజాన్. ఇందులోని ప్రారంభ దశ, అంటే మొదటి రోజులు కారుణ్యభరితమైనవి. ఈ దశలో దైవ కారుణ్యం విశేషంగా వర్షిస్తుంది. రెండవ దశ క్షమాపణ, మన్నింపునకు సంబంధించినది. ఈ దశలో దైవం తన దాసుల తప్పుల్ని మన్నిస్తాడు. వారి పాపాలను క్షమించి తన కారుణ్య ఛాయలో చోటు కల్పిస్తాడు. ఇక మూడవది నరకాగ్ని నుండి విముక్తి దశ.
  
 ఈ చివరి దశలో దైవం అసంఖ్యాక మానవులకు నరక జ్వాలల భయం నుండి విముక్తి కల్పిస్తాడు. ఇది చాలా కీలకమైన దశ. దీని ప్రాశస్త్యం చాలా గొప్పది. సంవత్సరంలోని పన్నెండు మాసాల్లో రమజానుకు ఎంతటి ప్రాముఖ్యం ఉందో ఈ మాసంలోని మూడు భాగాల్లో చివరి భాగానికి అలాంటి ప్రత్యేకత ఉంది. ఈ చివరి పది రోజుల్లోని ఒక రాత్రిలోనే ‘షబెఖద్’్ర ఉంది. దీన్నే ‘లైలతుల్‌ఖద్’్ర అని కూడా అంటారు. ఇది వేయి మాసాలకన్నా ఎక్కువ విలువైన రాత్రి. ఈ రాత్రిలోనే పవిత్ర ఖురాన్ గ్రంథం అవ తరించింది.
  
 ఈ విషయాన్ని దైవం ఇలా ప్రకటించాడు: మేము ఈ ఖుర్ ఆన్ గ్రంథాన్ని ఒక విలువైన రాత్రిలో అవతరింపజేశాము. ఆ రాత్రి ఘనత ఏమిటో మీకు తెలుసా? అది వేయి మాసాలకన్నా అత్యంత విలువైన రాత్రి. దైవ దూతలు, ఆత్మ.. తమ ప్రభువు అనుమతితో, ప్రతి అనుజ్ఞతో ఆ రాత్రికి దిగివస్తారు. ఆ రాత్రి శుభోదయం వరకు శాంతియుతమైన రాత్రి (ఖుర్‌ఆన్ 97-1,5).
  
 అందుకే రమజాన్ చివరి పది రోజుల్లో ఆరాధనలు ఎక్కువగా చెయ్యాలని, ఇందులోనే ఈ శుభరాత్రి ఉంది కనుక దానిని పొందాలని ప్రవక్త మహనీయులు ఉపదేశించారు. అయితే ఇక్కడ ఆ రాత్రి ‘ఫలానా రాత్రి’ అని కచ్చితంగా నిర్థారించబడలేదు. కానీ దానిని ఖచ్చితంగా ఎలా పొందవచ్చో ప్రవక్త మహనీయులు స్పష్టంగా వివరించారు. చివరి పది రోజుల్లోని బేసి రాత్రులలో దానిని అన్వేషించమని ఆయన ఉపదేశించారు.
 
 అంటే 21, 23, 25, 27, 29 రాత్రులన్న మాట. ఎవరైతే ఆత్మ సంతోషంతో, పరలోక ప్రతిఫలాపేక్షతో ఆ రాత్రి ఆరాధనలో గడుపుతారో వారి పాపాలన్నీ మన్నించబడతాయి. ముఖ్యంగా వారు పవిత్ర ఖురాన్‌తో సంబంధాన్ని పెంచుకోవాలి. ఎందుకంటే మానవ మనుగడకు దైవం ఈ ప్రపంచంలో చేసిన ఏర్పాట్లనీ ఒక ఎత్తయితే, పవిత్ర ఖురాన్ అవతరణ మరో ఎత్తు. ఈ ప్రబోధనా జ్యోతి మానవులకు జీవితంలోని అన్ని రంగాల్లో మార్గ దర్శనం చేసింది.
 
 సామాజిక, సాంస్కృతిక , కౌటుంబిక, ఆర్థిక, ఆధ్యాత్మిక, రాజకీయ తదితర సమస్త రంగాల్లో మానవుడు ఏ విధమైన జీవన విధానాన్ని అవలంబించాలో, ఎలాంటి వైఖరిని కలిగి ఉండాలో సవివరంగా తెలియజేసింది. అందుకని ఈ పవిత్రమాసంలో ఖురాన్‌ను అధ్యయం చేయడానికి, అర్థం చేసుకోవడానికి, దాని ప్రకారం ఆచరించడానికి శక్తివంచన లేని ప్రయత్నం చేయాలి. అల్లా సమస్త మానవులకూ పవిత్ర ఖురాన్ బోధనలు అర్థంచేసుకునే భాగ్యాన్ని ప్రసాదించుగాక.    
  
 - యం.డి.ఉస్మాన్‌ఖాన్
  


 మతాలకు అతీతమైనది. వయసు తేడా లేనిది. అప్పుడు ఇప్పుడు ఎప్పుడూ మగువ మనసుకు ముచ్చట కలిగించేది... గోరింట. ఈ మాసం ఆషాఢం. ఓ వైపు రంజాన్, మరో వైపు తెలుగు పండగలు వరసగా వస్తున్నాయి. అతివ చేతుల్లో గోరింట మందారంలా పూసి, మెరిసి, మురిసిపోయే రోజులే ఇక ముందన్నీ... అందుకే ఎర్రన్ని గోరింట ముస్తాబు... ఈ వారం...
  
 గోరింట చెట్టు వర్షాకాలంలో కొత్త చిగుళ్లు తొడుక్కుంటుంది. ఈ చెట్టు లేత ఆకులను ముద్దగా నూరి, కావలసిన ఆకారంలో చేతులకు పెట్టి, రెండు నుంచి ఆరు గంటల సేపు ఉంచితే చేతులు ఎరుపు రంగులోకి మారతాయి. ఔషధ గుణాలు మెండుగా ఉండే గోరింటాకును చేతులు, పాదాలకు అలంకరించుకోవడం వల్ల వర్షాకాలంలో వచ్చే చర్మ సమస్యలు దరిచేరవని చెబుతుంటారు పెద్దలు. ప్రాచీన కాలం నుంచి సౌందర్య సాధనాలలో గోరింటాకు ప్రధాన భూమిక పోషిస్తూ వస్తోంది. చర్మసంరక్షణలో మరొకటి సాటిలేదనిపించే ఈ ఆకు నుంచి అందమైన డిజెన్లైన్నో సృష్టించారు సృజనకారులు.  వీటిని మగువలతో పాటు మగవారూ తమ భుజాలు, వీపు, ఛాతీ భాగాలలో టాటూగా వేయించుకోవడానికి ఇష్టపడుతున్నారు.
  
 తెలుగింటి పల్లెపడుచు చేతుల్లో నిండుగా... క్రిస్టియన్ పెళ్లి వేడుకలలో కాంతిమంతంగా... ముస్లిమ్ మగువ ముంజేతులలో ఆకర్షణీయంగా.. గోరింట రూపురేఖలు మార్చుకొని మెహెందీ డిజైన్లుగా ఆకట్టుకుంటోంది. హిందూ, ముస్లిమ్, క్రిస్టియన్,.. ఏ మతమైనా మెహెందీ విషయంలో భేద భావం లేదు. మనసుకు నచ్చిన డిజైన్ అయితే చాలు.
     
 ప్రపంచం మొత్తమ్మీద గోరింటతో శారీరక అలంకరణలో రకరకాల ప్రయోగాలు చేసేది ఇండియా, అరబ్ దేశాలు మాత్రమే. అదృష్టానికి, ఆరోగ్యానికి ప్రతీకగా అరబ్‌దేశాలలో ఐదు వేల ఏళ్ల క్రితమే గోరింటను వాడినట్టు, హెన్నా పదం అక్కడి నుంచే వచ్చినట్టు చారిత్రక ఆధారాలు ఉన్నాయి. గోరింట చెట్టు ఇంట్లో ఉంటే దుష్టశక్తులు దరిచేరవని, మంచి ఆలోచనలు వస్తాయని నమ్మేవారు. కొన్ని తరాల తర్వాత గోరింట ఆకులను ఎండబెట్టి, పొడి చేసి చేతులు, పాదాలపై రేఖాగణిత నమూనాలలో డిజైన్లు వేసుకునేవారు. వీటివల్ల సంతానోత్పత్తి సామర్థ్యం పెరుగుతుందని, అండాశయాల పనితీరు మెరుగవుతుందని భావించేవారు. ఇప్పటికీ మన దేశ గ్రామీణ ప్రాంతాలలో ఈ నమ్మకం ఉంది. ఈజిప్ట్ ‘మమ్మీ’ల జుట్టు, గోళ్లు ముదురు గోధుమ రంగులోకి రావడానికి గోరింటాకును వాడేవారని ఒక వివాదాస్పద వార్త కూడా ఉంది. క్రీ.పూ 700 కాలంలో గోరింట మొక్క ఈజిప్ట్ నుంచి భారతదేశంలో అడుగుపెట్టిందని, అప్పటి నుంచి అతివల చేతులు, పాదాలపై గోరింట ఎర్రగా పూయడం మొదలుపెట్టిందని వృక్షశాస్త్రజ్ఞులు చెబుతున్నారు. చారిత్రకపరంగా చూస్తే మనుషులకు గోరింటాకు ఔషధంగా... వస్త్రం, లెదర్, కేశాలు రంగు మారడానికి ‘డై’గా వాడేవారని తెలుస్తోంది.
    
 ఉత్తరాదిన కడ్వాచౌత్, దీపావళి, దక్షిణాదిన అట్లతద్ది వంటి పండగలలో గోరింట ప్రధాన భూమిక పోషిస్తోంది. ఉత్తరభారత వివాహ సంప్రదాయం ఇటీవల దక్షిణాదినీ ఆకట్టుకుంటోంది. అందులో భాగంగానే వివాహానికి ముందు మెహిందీ కోసం ప్రత్యేకంగా వేడుకలు జరుపుతున్నారు.
            
 బాలీవుడ్ సినిమాలలో ‘మెహెందీ వేడుక’ ఒక ప్రధానాంశం. ఈ సినిమాల వల్ల నేపాల్, పాకిస్థాన్, బంగ్లాదేశ్, మాల్దీవులలో వివాహవేడుకల సమయాలలో అలంకరణలో భాగంగా మెహెందీ ప్రథమస్థానంలో నిలిచింది. ఆ విధంగా 1990 నుంచి మెహెందీ అలంకరణలలో నూతన పోకడలు వచ్చి చేరాయి. నాటి నుంచి ఈ డిజైన్లను ‘హెన్నా టాటూస్’గా పిలవడం ప్రారంభించారు. ప్రస్తుత కాలంలో పాకిస్థాన్, గల్ఫ్ దేశాలు హెన్నా డిజైన్స్‌లో కొత్త పుంతలు తొక్కుతున్నాయి. ఈ డిజైన్లని ముస్లిమ్ మహిళలు అలవోకగా వేయడం అక్కడి నుంచే మొదలైంది.        
  
 వేదాలలో గోరింటరంగును సూర్యునికి ప్రతీకగా చె ప్పారు. అందుకే  అరచేతుల్లో సూర్యుని ఆకారాన్ని పోలి ఉండే గుండ్రటి డిజైన్ వేసేవారు.  మనిషి లోపల ఉన్న జ్ఞాన కాంతిని గోరింట ద్వారా మేలుకొలపడంగా భావించేవారు.
  
 డిజైన్లలో వైవిధ్యం
 
 ఇటీవల కాలంలో బ్రైడల్, ఇండియన్, అరబిక్... మెహెందీ డిజైన్లు పోటీ పడుతున్నాయి.  వీటిలోనే షేడెడ్, ఫ్లోరల్, మోటిఫ్స్... ఇలా తీర్చిన డిజైన్లలో రంగురంగుల రాళ్లు, పూసలు, గ్లిట్టర్ (మెరుపుతో ఉండే పచ్చని రంగు)ను కూడా ఉపయోగిస్తున్నారు. మరికొందరు నేరుగా అచ్చులతో రంగు డిజైన్లను నిమిషాలలో ఒంటి మీద ముద్రించుకుంటున్నారు. ఇంకొందరు ప్లాస్టిక్ డిజైన్ల్‌లో వచ్చిన స్టిక్కర్స్‌నీ అతికించుకుంటున్నారు. జీవనశైలి వేగవంతంగా మారుతుండటంతో ఈ డిజైన్లలోనూ ఆధునిక పోకడలు వేగం పుంజుకుంటున్నాయి.
 
 మెహెందీ.. ఇలా మేలు..
 
 మెహెందీ కోన్‌లు మార్కెట్లో విస్తృతంగా లభిస్తున్నాయి. వీటితో డిజైన్  వేసుకోవడానికి ముందు ఆ మెహెందీ మన చర్మానికి సరి పడుతుందా లేదా అనేది పరీక్షించుకోవడం  తప్పనిసరి. చెవి వెనుక భాగంలో (చెవి వెనుక భాగం చర్మం చాలా సున్నితంగా ఉంటుంది. అందుకని ఏ రియాక్షన్ అయినా త్వరగా తెలిసిపోతుంది) లేదా మోచేతి దగ్గర మెహెందీ రాసుకొని, 3-4 రోజుల తర్వాత కూడా ఎలాంటి రియాక్షన్ లేదంటే అప్పుడు డిజైన్ వేయించుకోవడం ఉత్తమం. మరీ ముఖ్యంగా బ్లాక్ మెహెందీలో ఎక్కువ అలెర్జీ కారకాలు ఉంటున్నాయి. డిజైన్ నల్లగా రావడానికి వీటిలో హానికారక రసాయనాలు కలుపుతున్నారు. మెరుపులు వచ్చే గ్లిట్టర్ తరహా మెహెందీలు సైతం చర్మానికి పడక చాలా మంది ప్రమాదకరమైన స్థితిలో ఆసుపత్రికి వస్తుంటారు. ముఖంతో పాటు గాలి పీల్చుకునే శ్వాసవాహిక కూడా ఉబ్బి పోతుంది. చేతులు, పాదాలపై మెహెందీ డిజైన్ ఉన్న చోట చర్మం ఎర్రగా కందిపోయి, పొక్కులు, చీము కనిపిస్తుంటుంది. కాబట్టి ప్రకృతి సిద్ధంగా లభించే గోరింటాకును ఉపయోగించడాన్నే ప్రోత్సహించాలి.
  - శైలజ సూరపనేని, కాస్మటిక్ డెర్మటాలజిస్ట్
 - నిర్మలారెడ్డి
 
  


 న్యూఢిల్లీ: ఎందరో కరడుగట్టిన నేరస్తులకు నిలయమైన తీహార్ జైలు మతసామరస్యానికి కేంద్రంగా నిలుస్తోంది. రంజాన్ పర్వదినం సందర్భంగా తీహార్‌లోని 2,300 మంది ముస్లిం ఖైదీలు రోజా ఆచరిస్తుండగా, వీరి సహచర ఖైదీలైన 150 మంది హిందువులు కూడా ఇదే బాట పట్టారు. రంజాన్ మాసంలో సూర్యోదయం నుంచి సూర్యాస్తమయం దాకా ఉపవాస దీక్ష పాటించడాన్ని రోజా అంటారు. ఈ ఏడాది గత నెల 29 నుంచి రంజాన్ మాసం మొదలయింది. హిందూ ఖైదీలు రంజాన్ మాసం తొలిరోజు నుంచే ఉపవాసాలు ఆచరిస్తున్నారని, చివరిదాకా రోజాను కొనసాగిస్తామని చెబుతున్నారని జైలు అధికారవర్గాలు వెల్లడించాయి.
  
  ‘మతాలు వేరైనా తమ మధ్య గట్టి అనుబంధం ఉందని ఖైదీలు చాటిచెబుతున్నారు. ఇది నిజంగా అభినందనీయం. ఖైదీల ఉపవాస దీక్షలకు ఎలాంటి ఆటంకమూ కలగకుండా మేం తగిన చర్యలు తీసుకుంటున్నాం’ అని తీహార్ జైలు ప్రజాసంబంధాల అధికారి సునీల్ గుప్తా అన్నారు. రోజా ఆచరించే ఖైదీలు సూర్యోదయానికి ముందే ‘సెహ్రీ’ భోజనం తీసుకోవడం, సూర్యాస్తమయం తరువాత ఇఫ్తార్ విందులో పాల్గొనడం, ప్రార్థనలు చేయడానికి కూడా తగిన ఏర్పాట్లు చేశారు. సెహ్రీ, ఇఫ్తార్ కోసం పళ్లు, జిలేబీ, ఎండుపళ్లు, ఇతర ఫలహారాలను అందజేస్తున్నారు.
  
  ఇఫ్తార్ ముగిసిన తరువాత ఖైదీలంతా తమ గదుల బయట నమాజ్ చేస్తున్నారు. విశేషమేమంటే 70 మందికిపైగా మహిళా ఖైదీలు కూడా రోజాను పాటిస్తున్నారు. ఇస్లామిక్ చాంద్రాయణ క్యాలెండర్ ప్రకారం వచ్చే తొమ్మిదో నెలలో రంజాన్ జరుపుకుంటారు. ఈ నెల చంద్రుడు కనిపించిన తొలి రోజు నుంచి రంజాన్ మాసం మొదలయినట్టుగా భావిస్తారు. సూర్యోదయం నుంచి సూర్యాస్తమయం వరకు పచ్చి మంచినీళ్లు కూడా ముట్టుకోకుండా ఉపవాసాలు ఆచరిస్తారు. ఇందుకోసం తెల్లవారుజామునే లేచి సెహ్రీ భోజనం చేసి దీక్ష మొదలుపెడతారు. సాయంత్రం భోజనాన్ని ఇఫ్తార్‌గా పిలుస్తారు.
  
  


 సుదీర్ఘ ఉపవాసం తర్వాత సత్వర శక్తినిచ్చే
  ఉపాహారం కావాల్సిందే.
  శక్తినివ్వడంతో పాటు అది రుచినీ ఇస్తే...
  ఇంక అంతకంటే కావలసిందేముంది.
  అందుకే రోజా దీక్షలో ఉన్నవారూ, లేనివారూ
  అందరూ కోరి తినే కమ్మటి వంటకం ‘హలీమ్’!
  ఆకలైనా రుచినెరుగుతుందో ఎరగదో గానీ...
  మతం రుచినెరగదని నిరూపించినందుకు,
  మతాల హద్దులను చెరిపినందుకు హలీమ్‌కు సలామ్!
  వెజిటబుల్ హలీమ్
  
  కావలసినవి:
  క్యారట్ తరుగు, బీట్ రూట్ తరుగు, బీన్స్ తరుగు - పావు కప్పు చొప్పున; బంగాళదుంప ముక్కలు - అర కప్పు; బఠాణీలు - పావు కప్పు; పచ్చి మిర్చి తరుగు - 2 టీ స్పూన్లు; గోధుమరవ్వ - అర కిలో; నెయ్యి - 200 గ్రా; జీడిపప్పు పలుకులు - పావు కప్పు; పిస్తా పప్పు - పావు కప్పు; బాదం పలుకులు - పావు కప్పు; మిరియాలు - టీ స్పూను; ఏలకులు - 4; పసుపు - 2 టీ స్పూన్లు; ఉప్పు - తగినంత; పుదీనా ఆకులు - అర కప్పు; నిమ్మ చెక్కలు - 4; పాలు - అర కప్పు; అరటిపండు - 1 (చిన్న చిన్న ముక్కలుగా తరగాలి)
  
  తయారీ:
  కూరగాయ ముక్కలకు తగినన్ని నీళ్లు జత చేసి ఉడికించి, నీళ్లను తీసి పక్కన ఉంచాలి  
  
 బాణలిలో నెయ్యి వేసి కరిగాక జీడిపప్పు, బాదం పప్పు, పిస్తా పప్పు ముక్కలు వేసి వేయించి తీయాలి  
  
  ఉల్లితరుగు వేసి వేయించాలి  
  
  మందపాటి గిన్నెలో సగం నెయ్యి వేసి ఏలకులు, మిరియాలు, ఉడికించిన కూరగాయ ముక్కలు, పచ్చి మిర్చి వేసి వేయించాలి  
  
  పసుపు, గోధుమరవ్వ వేసి పది నిమిషాలు వేయించాలి  
  
  కూరగాయలు ఉడికించిన నీళ్లు, ఉప్పు వేసి అరగంట సేపు ఉడికించి, ముక్కలను పప్పు గుత్తితో మెదపాలి
  
  వేయించి ఉంచుకున్న బాదం, పిస్తా, జీడిపప్పు పలుకులు, అరటిపండు ముక్కలు జత చేయాలి
  
  నిమ్మ రసం కలపాలి   
  
  వేయించిన ఉల్లి ముక్కలు, కొత్తిమీర, పుదీనా, నిమ్మచెక్కలతో అలంకరించి వేడివేడిగా అందించాలి.
  
  మటన్ హలీమ్
  
  కావలసినవి:
  బోన్‌లెస్ మటన్ - కేజీ; గోధుమరవ్వ - అర కేజీ (నానబెట్టాలి); శనగపప్పు - అర కేజీ (నానబెట్టాలి); పెరుగు - ఒకటిన్నర కప్పులు; అల్లం వెల్లుల్లి ముద్ద - టేబుల్ స్పూను; ఉల్లి తరుగు - ఒకటిన్నర కప్పులు; పచ్చి మిర్చి పేస్ట్ - టీ స్పూను; కొత్తిమీర ముద్ద - 2 టీ స్పూన్లు; నిమ్మరసం - పావు కప్పు; ఏలకులు - 4; దాల్చినచెక్క - చిన్న ముక్క; మిరప్పొడి - టీ స్పూను; నూనె - అర కప్పు; ఉప్పు - 2 టీ స్పూన్లు
  
  తయారీ:
  ఒక పాత్రలో పెరుగు, నిమ్మరసం, పచ్చి మిర్చి ముద్ద, కొత్తిమీర ముద్ద, ఏలకులు, దాల్చిన చెక్క, మిరప్పొడి, అల్లం వెల్లుల్లి ముద్ద, ఉప్పు వేసి బాగా కలిపి, ఈ మిశ్రమాన్ని మటన్‌కు పట్టించి సుమారు నాలుగు గంటలు ఊరనివ్వాలి    
  
  ఒక పాత్రలో తగినన్ని నీళ్లు, నానబెట్టి మెత్తగా చేసుకున్న శనగపప్పు, నానబెట్టిన గోధుమరవ్వ వేసి స్టౌ మీద ఉంచి మెత్తగా ఉడికించాలి  
  
  చల్లారాక బ్లెండర్‌లో వేసి మెత్తగా చేయాలి  
  
  బాణలిలో కొద్దిగా నూనె వేసి కాగాక ఉల్లి తరుగు వేసి గోధుమరంగులోకి వచ్చేవరకు వేయించి తీసేయాలి   
  
  అదే బాణలిలో కొద్దిగా నూనె వేసి కాగాక ఊరబెట్టి ఉంచుకున్న మటన్ మిశ్రమం వేయాలి   
  
  మంట బాగా తగ్గించి, తగినన్ని నీళ్లు పోసి మూత పెట్టి ఉడికించాలి   
  
  ఉడికించి ఉంచుకున్న గోధుమరవ్వ మిశ్రమం జత చేసి, సుమారు 20 నిమిషాలు ఉడికించాలి   
  
  నిమ్మ చెక్క, కొత్తిమీర, పుదీనా, వేయించి ఉంచుకున్న ఉల్లి తరుగుతో అలంకరించి వేడివేడిగా అందించాలి (చికెన్, ఈమూ, ఒంటెల మాంసంతోను, చేపలతో కూడా హలీమ్ తయారు చేయవచ్చు)
  
  ఆ రుచి చాలా ఇష్టం..!
 
  నాకు హైదరాబాద్‌లో బాగా నచ్చినవి - చాయ్, సమోసా, బిర్యానీ, హలీమ్. హలీమ్ మాటను నేను హైదరాబాద్ వచ్చాకే విన్నాను. ఇప్పటికి 24 సంవత్సరాలుగా హలీమ్ తింటున్నాను. మొదటిసారి తిన్నప్పుడే ఆ రుచి బాగా నచ్చేసింది. ఎలా వండుతారో చూశాను. రంజాన్ సమయంలోనే తింటారు కనుక, ఆ మాసం ఎప్పుడెప్పుడు వస్తుందా అని నిరీక్షిస్తుంటాను. హలీమ్ అంటే బాంబేలో చాలామందికి తెలియదు. దుబాయ్‌కి ఇక్కడ నుంచే హలీమ్ పంపిస్తారు. మా ఆవిడ ఇక్కడే పుట్టి పెరగడం వల్ల ఆవిడకు హలీమ్ చేయడం వచ్చు. అప్పుడప్పుడు చేసి పెడుతుంది కూడా. ఓల్డ్ సిటీ నుంచి ఎర్రగడ్డ వరకు చాలా షాపులలో హలీమ్ తిన్నాను. ఇది హెల్త్‌కి చాలా మంచిది. రోజంతా ఫాస్టింగ్ చేసేవాళ్లకి ఆ మాత్రం క్యాలరీలు ఉండాలి. నాలాంటి వాళ్లకి మాత్రం క్యాలరీలు ఎక్కువే.
  - పూరి జగన్నాథ్, దర్శకుడు
  
  హలీమ్ తినకుండానా..!
  
  హలీమ్ రుచి తెలుసా? మీరు చెన్నయ్ అమ్మాయి కదా!
  సమంత: చెన్నయ్‌లో కూడా హలీమ్ దొరుకుతుంది. అయితే హైదరాబాద్ హలీమే హలీమ్. చూస్తుండగానే రంజాన్ నెల వచ్చేసింది. నేనేమో వ్రతంలో ఉన్నాను... ప్చ్.
  
 వెజ్ హలీమ్ తినొచ్చుగా?
 సమంత: వెజ్ హలీమా? హలీమ్ అంటే... మటన్ హలీమే. రంజాన్ నెలలో హైదరాబాద్‌లో ఉంటే... హలీమ్ తినకుండా ఉండను.
  
  ఎందుకు హలీమ్ అంటే అంత ఇష్టం?
  సమంత: నాన్‌వెజ్ ప్రియులను అసలు ఈ ప్రశ్నే అడక్కూడదు. హలీమ్‌ని ఇష్టపడని వారు ఎవరండీ. స్వచ్ఛమైన నెయ్యితో, సుగంధ ద్రవ్యాల మేళవింపుతో తయారయ్యే హలీమ్ ప్రతి ఒక్కరికీ ప్రత్యేకమైనదే.
  
  మీ వ్రతానికి ముగింపు ఎప్పడు?
  సమంత: త్వరలోనే! వ్రతం పూర్తవ్వగానే చేసే పని హలీమ్ తినడమే. దానికి తగ్గట్టు వర్కవుట్లు చేస్తే సరిపోతుంది. అంతే..
  
 ఆ క్షణాలంటే చాలా ఇష్టం..!
 
 పదిహేను ఇరవై సంవత్సరాలుగా నేను ప్రతి సంవత్సరం హలీమ్ తింటున్నాను. నాకు మటన్ హలీమ్ అంటే చాలా ఇష్టం. హైదరాబాద్‌లో ఎక్కడ బాగుంటుందని తెలిస్తే అక్కడ తప్పనిసరిగా తింటాను. మా వారు రకరకాల  ప్రదేశాల నుంచి ఈ రమజాన్ మాసంలో హలీమ్ తెస్తుంటారు. ఉపవాసం పూర్తయ్యాక అందరం ఇంట్లో కూర్చుని హలీమ్ తింటాం. ఆ క్షణాలంటే నాకు చాలా ఇష్టం. హలీమ్ వలన కావలసినంత ఎనర్జీ వస్తుంది. చాలామంది హలీమ్‌లో ఫ్యాట్ ఉంటుందనుకుంటారు. కానీ అదేమీ ఉండదు. ఇది చాలా హెల్తీ ఫుడ్.
  - సన, సినీ నటి
  
 ఇలా కూడా...
 
 హలీమ్ మీద... పుదీనా ఆకులు, నిమ్మరసం, కరివేపాకు, వేయించిన ఉల్లితరుగు, అల్లం తురుము, పచ్చి మిర్చి తరుగు... వీటిని కూడా జత చేసి తింటారు. పాకిస్థాన్‌లో హలీమ్‌ను నాన్, బ్రెడ్, అన్నం... వీటితో కలిపి తింటారు.
  
  ఇదీ లెక్క...
 
  ఏటా రంజాన్ మాసంలో 1.2 బిలియన్ల విలువ చేసే హలీమ్ అమ్మకాలు సుమారు 5000 కౌంటర్లలో జరుగుతాయి. ఇందుకోసం సుమారు 25000 మంది  పనిచేస్తారు.  హైదరాబాద్ నుంచి 50 దేశాలకు హలీమ్‌ను ఎగుమతి చేస్తారు. రమజాన్ మాసంలో హలీమ్ వ్యాపారం 1000 కోట్ల పైమాటే! ప్రముఖ చెఫ్ సంజీవ్ కపూర్ తన పుస్తకం లో హలీమ్ గురించి రాస్తూ ‘ఇది కూడా
  హైదరాబాదీ బిర్యానీ లాంటిదే’ అన్నారు.
  
  సేకరణ
  డా. వైజయంతి
  


 కడప కల్చరల్ : సకల పుణ్యప్రదాయిని, సమస్త రుగ్మతల నాశిని, ఆరోగ్య ప్రదాయిని, పవిత్ర ఖురాన్ అవతరించిన పవిత్ర మాసం రమజాన్. సద్భావన, సామరస్య భావనకు, సర్వమానవ సమతకు ఎత్తిన విశ్వాస కేతనం రంజాన్. మానవుడు తనలోని పశుత్వాన్ని పారద్రోలి, నిండైన మానవత్వాన్ని సంతరించుకొని దైవానికి కృతజ్ఞతలు చెల్లించే అవకాశం కల్పించే శుభాల వరాల మాసం ఇది.
  
  ఆదివారం రాత్రి ఆకాశంలో నెలవంక కనిపించడంతో ముస్లింలందరూ సంతోషంతో రంజాన్ ఉపవాసాల నిర్వహణకు సన్నాహాలు ప్రారంభించారు. చంద్రోదయం అయిందని అందరికీ తెల్పుతూ మసీదుల వద్ద నిర్వాహకులూ, భక్తులూ, ముస్లిం స్వచ్ఛంద సంస్థల ప్రతినిధులు   టపాసులు పేల్చారు. మసీదుల్లో  ఇప్పటికే నిర్వాహకులు ఉపవాస దీక్షలు చేపట్టనున్న భక్తులకు అన్ని వసతులతో ఏర్పాట్లు చేశారు. అలాగే కడప నగరంలోని కొన్ని మసీదుల్లో భక్తుల కోసం సెహరీ (ఉపవాస దీక్ష చేపట్టే ముందు తీసుకునే ఆహారం) ఏర్పాట్లు చేశారు.
  
  సోమవారం నుండి రంజాన్ ఉపవాస దీక్షలు ప్రారంభం కానున్నాయి. ప్రతి ఒక్కరూ అల్లాహ్ ఆదేశానుసారం రోజా (ఉపవాసం) ఉంటూ ఆయన చూపిన మార్గంలో పయనించడానికి శక్తి వంచన లేకుండా కృషి చేస్తారు. నెల ప్రారంభం నుంచి ప్రతిరోజు తెల్లవారుజామున మూడు గంటల నుంచి ఉపవాస దీక్ష ప్రారంభానికి అవసరమైన ఆహార పదార్థాలను సిద్ధం చేసుకుంటారు.
  
  కుటుంబ సభ్యులు అందరూ ఒకచోట చేరి భక్తి పూర్వకంగా సెహరీ స్వీకరిస్తారు. దీక్ష ప్రారంభ సమయం ముగియగానే ప్రార్థనల కోసం సమీప మసీదులకు వెళ్లి తమ పాపాలను క్షమించాలని, తమ ఉపవాసాలకు తగిన ప్రతిఫలం ఇవ్వాలని, రంజాన్ నెల పుణ్యఫలాలను దక్కేలా చూడాలని వేడుకుంటారు. సాయంత్రం ఇఫ్తార్ (ఉపవాస దీక్ష విరమణ), రాత్రి ఇషా నమాజ్ తర్వాత తరావీ ప్రత్యేక ప్రార్థనలకు ఆయా మసీదు నిర్వహణ కమిటీ సభ్యులు ఏర్పాట్లు పూర్తి చేశారు.
  
  ఉత్తమ జీవన విధానం...
  రంజాన్ మాసం మానవులకు ఉత్తమ జీవన విధానాన్ని అలవాటు చేస్తుంది. ఈ సందర్భంగా చేపట్టే ఉపవాసాలు దైవం పట్ల భక్తి పెరిగేందుకు దోహదం చేస్తాయి.
  
  నిర్ణీత సమయానికి మేల్కోవడం, సూర్యోదయానికి పూర్వమే పరిమితంగా, సమతుల ఆహారం స్వీకరించడం, సూర్యాస్తమయం వరకూ కనీసం మంచి నీళ్లయినా తీసుకోకుండా ఐదుమార్లు దైవారాధనతో గడిపి, ఆ తర్వాత ఉపవాస దీక్షను విరమించి మితాహారం తీసుకోవడం, కొద్దిసేపు విశ్రాంతి, ఆ వెంటనే అనందంగా ఆరాధనలు (తరావీ) చేయడం ఈ పవిత్ర మాసంలో అలవడుతుంది.
  
   పవాసాలు పేదల ఆకలిని తెలుసుకొనేందుకు, ఆరోగ్యాన్ని పెంచుకునేందుకు ఉపయోగపడితే, నిర్ణీత సమయంలో నిద్ర మేల్కొనడం క్రమబద్ధమైన జీవితాన్ని అలవాటు చేస్తాయి.
  ఐదుమార్లు దైవారాధన దైవం పట్ల భక్తిని పెంచి మానవుల్లో ఉన్నత విలువలు, ఉత్తమ గుణాలు పెంచేందుకు తోడ్పడతాయి. ఈ పండుగ సందర్భంగా చెల్లించే జకాత్, ఫిత్రాల వల్ల దానగుణం అలవడుతుంది.    
  


 
 నేటి నుంచి ఉపవాసాలు
 
  తెల్లవారుజాము సహర్ నుంచే ప్రారంభం
 
  పాతబస్తీలో మొదలైన సందడి
 
  వినియోగదారులతో కిటకిటలాడుతున్న మార్కెట్లు
 
  దీపకాంతుల్లో మక్కా మసీద్
 
 సాక్షి, సిటీబ్యూరో: సకల శుభాల మాసం రంజాన్ నెల ప్రారంభమైంది. సోమవారం తెల్లవారు జామున 4.13 గంటలకు ముస్లింలు సహర్‌తో కఠోర ఉపవాస దీక్షలను ప్రారంభించనున్నారు. ఫజర్, జోహర్, అసర్, మగ్రీబ్, ఇషా నమాజులు రోజుకు ఐదు సార్లు చేస్తారు. సూర్యోదయానికి ముందు సహర్‌తో ఉపవాస దీక్షను చేపట్టి సూర్యస్తమయం అనంతరం రోజాను విరమించి ఇఫ్తార్ విందులో పాల్గొంటారు. మతసామరస్యాన్ని చాటేలా అన్ని వర్గాల వారిని ఆహ్వానించి ఇఫ్తార్ విందులు నిర్వహిస్తారు.
  
 దర్శనమిచ్చిన నెలవంక
 
 రంజాన్ మాసం ప్రారంభాన్ని సూచించే నెలవంక ఆదివారం సాయంత్రం దర్శనమివ్వడంతో ఉపవాస దీక్షలకు ముస్లింలు సిద్ధమయ్యారు. నగరంలోని మసీదుల్లో  సైరన్లు మార్మోగాయి. పరస్పరం ఆత్మీయ శుభాకాంక్షలు తెలుపుకొంటూ.. రంజాన్ పవిత్ర మాసాన్ని ఆహ్వానించారు. నగరంలోని మసీదులన్నీ ఇప్పటికే ముస్తాబయ్యాయి. పవిత్ర ప్రార్థనలతో ఆధ్యాత్మిక శోభ సంతరించుకున్నాయి. చారిత్రక మక్కామసీదులో సామూహిక ప్రార్థనల కోసం అన్ని ఏర్పాట్లు చేశారు. నగరంలోని అన్ని మసీదుల్లో పటిష్టమైన భద్రతతోపాటు నిరంతరం మంచినీరు, విద్యుత్ సరఫరా ఏర్పాట్లు చేశారు.
  
 సందడిగా మార్కెట్లు..
 
 ఈ మాసంలో అవసరమైన సేమియా, కర్జూరతోపాటు ఇతర పండ్లను ఖరీదు చేయడంలో ముస్లింలు నిమగ్నమయ్యారు. చార్మినార్, మక్కా మసీదు, మెహిదీపట్నం, నాంపల్లి, టౌలిచౌకీ తదితర ప్రాంతాల్లో వ్యాపార కేంద్రాలన్నీ వినియోగదారులతో కిటకిటలాడుతున్నాయి. ఎక్కడ చూసినా పండుగ వాతావరణం కన్పిస్తోంది. వ్యాపార సంస్థలనూ అలంకరించారు.


 రంజాన్ వూసం వచ్చిందంటే చాలు.. హైదరాబాద్ నగరం హలీమ్ ఘుమఘుమలతో గుమ్మెత్తిపోతుంది. రుచికి రుచి.. ఆరోగ్యానికి ఆరోగ్యం.. అద్భుత శక్తిసావుర్థ్యాలు కలగలిపి అందించే పసందైన వంటకమిది. అందుకే ముస్లింల పవిత్ర వంటక ంగా మొదలైన హలీమ్... ప్రస్తుతం వుతాలకతీతంగా చిన్నాపెద్దా ఆడావుగా తేడా లేకుండా అంతా లొట్టలేసుకుంటూ తినే ఫేవరేట్ డిష్‌గా వూరిపోరుుంది. హైదరాబాద్ బిర్యానీ తరహాలో నగరానికి ఓ బ్రాండ్‌గా అరుుపోరుుంది. భౌగోళిక సూచీ (జియోగ్రాఫికల్ ఇండెక్స్) గుర్తింపు దక్కించుకుంది. దాదాపు 50 దేశాలకు ఎగువుతి అయ్యే హలీమ్ అవ్ముకాల విలువ దాదాపు రూ.150 కోట్లకు పైమటేనట. ఇదీ హైదరాబాద్ హలీమ్ రేంజ్.  
  
 అవి రంజాన్ మాసం తొలిరోజులు.. ఆరో నిజాం మహబూబ్ అలీఖాన్ దర్బారు కొలువు దీరింది.. నిజాం రాష్ట్రంలో పోలీసు వ్యవస్థను మరింత బలోపేతం చేసేందుకు కీలక సమావేశం జరుగుతోంది... దీనికి పర్షియా నుంచి ప్రత్యేక ఆహ్వానితులు వచ్చారు.. రంజాన్ ఉపవాసదీక్ష విరమణకు వడ్డించిన వంటకాల సందర్భంగా ఓ ప్రత్యేక పదార్థం ప్రస్తావన వచ్చింది. నిజాం వెంటనే షాహీ దస్తర్‌ఖానా (వంటిల్లు) సిబ్బందిని పిలిపించి పర్షియా ప్రతినిధులు సూచించిన పదార్థాన్ని సిద్ధం చేరుుంచారు.
  
 అదే హలీమ్... ఇది దాదాపు 85 ఏళ్ల క్రితం నాటి సంగతి. హైదరాబాదీ ప్రత్యేకతలుగా ప్రపంచ ఖ్యాతిని పొందిన బిర్యానీ, హలీమ్, మిర్చీ కా సాలన్ లాంటి వంటకాలు పర్షియా నుంచి ఇక్కడికి వచ్చినవే. కానీ... వాటి అసలు రుచి వేరు, ప్రపంచం లొట్టలేసుకుంటూ తినేలా రూపొందిన ప్రస్తుత రుచులు వేరు. హలీమ్‌ను హైదరాబాద్ గొప్ప వంటకంగా మార్చేసింది. బిర్యానీని పరిచయం చేసిన పర్షియా ఇప్పుడు హైదరాబాద్ హలీమ్ అంటే పడిచస్తుంది.
 
  స్పైసీ వున స్పెషాలిటీ
  ఇప్పటికీ ఇరాన్, ఇరాక్, ఇతర ఎడారి దేశాల్లో హలీమ్‌ను వండి వడ్డిస్తున్నారు. అందులో గోధుమలు, మాంసం, పప్పు, ఉప్పు, నూనె మాత్రమే ఉంటుంది. అది హైదరాబాదీ వంటకమయ్యాక తొలుత నెయ్యి తోడైంది. ఆ తర్వాత కారం, షాజీరా, లవంగాలు, అల్లం, వెల్లుల్లి, పచ్చిమిరపకాయల రుచి చేరింది. ఆరో నిజాం హయాంలో నగరానికి హలీం పరిచయమైనా... దా ని రూపురేఖలు మారింది మాత్రం ఏడో నిజాం జమానాలోనే. అప్పట్లోనే ఈ స్పైసీ హలీం మొదలైంది. అప్పటి నుంచి దానికి ఎక్కడలేని డిమాండ్ మొదలైంది. ఆ తర్వాత విదేశాల గడప తొ క్కింది. ముఖ్యంగా పాకిస్థాన్, బంగ్లాదేశ్, ఇరాన్, ఇరాక్, సింగపూర్. ఇండోనేషియా, యెమన్, యూఏఈ, యూఎస్, యూకేల లో హైదరాబాదీ హలీమ్‌కు ఉన్న ప్రాధాన్యం అంతాఇంతా కాదు.
  
  మరికొన్ని విశేషాలివీ...
  
 * యెమన్ ప్రాంతం నుంచి వచ్చి ఇక్కడ స్థిరనివాసం ఏర్పాటు చేసుకున్నవారు నిత్యం బ్రేక్‌ఫాస్ట్‌గా హలీమ్ తింటారు.
 * వారి ఇళ్లల్లో స్వీట్ హలీమ్, ఖారా హలీమ్‌లను బ్రేక్‌ఫాస్ట్‌గా లాగించేస్తుంటారు.
 * హలీమ్‌లో ముఖ్యమైంది కవ్ముటి నెయ్యి.
 * ఆరోగ్య రీత్యా కొన్ని ప్రాంతాల్లో నెరుు్యకి బదులు ఆలీవ్ ఆయిల్‌ను వాడుతున్నారు.
 * లో కొలెస్ట్రాల్ కోసం పొట్టేలు మాంసం,
 *కోడి మాంసం బదులు కొన్నిచోట్ల ఈము మాంసంతో హలీమ్ తయారు చేస్తున్నారు.
 * హలీమ్‌లాగే ఉండే మరో పదార్థం హరీస్. ఇందులో మాంసం కంటే గోధుమలశాతం ఎక్కువ.
 * కేరళలో బిర్యానీకి ముందు (ఇళ్లల్లో) హరీస్‌ను వడ్డిస్తారు.
 * కొన్ని అరబ్ దేశాల్లో హలీమ్‌ను మగవారు తినే పదార్థంగా, హరీస్‌ను మహిళల వంటగా భావిస్తారు.
 * హలీమ్‌ను పోలిన ఖిచ్చా అనే వంటకాన్ని పాకిస్థాన్‌లో ఇష్టంగా తింటారు.
 * నార్త్ ఇండియూలోనూ ఇది దొరుకుతుంది.