ఢిల్లిలో మరోసారి చిరుతపులి సంచారం కలకలం రేపింది. ఇటీవలి కాలంలో ఢిల్లీ వాసులను వణికిస్తున్న చిరుత పట్టపగలే మరోసారి దర్శన మిచ్చింది. ఈ రోజు (సోమవారం) మధ్యాహ్నం ఉత్తర ఢిల్లిలో రూప్‌ నగర్‌లో చిరుతపులి ఓ ఇంట్లోకి చొరబడింది. ఈ క్రమంలో ముగ్గురిపై దాడిచేసినట్టు తెలుస్తోంది. దీనికి సంబంధించిన వీడియో నెటింట చక్కర్లు కోడుతుంది. స్థానికుల ద్వారా సమాచారం అందుకున్న పోలీసుల సంఘటనా స్థలానికి చేరుకున్నారు. అనంతరం అగ్నిమాపక బృందం సాయంతో ఎట్టకేలకు దానిని బంధించారు. దీంతో అక్కడి జనం, అధికారులు ఊపిరి పీల్చుకున్నారు. అయితే ఈ చిరుతను అదుపులోకి తెచ్చేందుకు అగ్నిమాపక బృందం నానా కష్టాలు పడినట్టు సమాచారం. చిరుతని గదిలో బంధించామని, గాయపడిన వారిని ఆస్పత్రికి తరలించామని ఢిల్లీ అగ్నిమాపక అధికారులు వెల్లడించారు. STORY | Leopard barges into house in Delhi's Roop Nagar, 5 injured READ: https://t.co/EbH7OulTMV VIDEO: (Source: Third Party) pic.twitter.com/7bJRdu08YH — Press Trust of India (@PTI_News) April 1, 2024

సాక్షి, హైదరాబాద్‌: నాంపల్లి బజార్‌ఘాట్‌ అగ్నిప్రమాద ఘటనపై అగ్నిమాపక శాఖ అధికారిక ప్రకటన చేసింది. బిల్డింగ్‌లో ఫైర్‌ సేఫ్టీ లేదని పేర్కొన్న ఫైర్‌శాఖ.. కెమికల్‌ డ్రమ్ముల వల్లే అగ్నిప్రమాదం జరిగిందని తేల్చి చెప్పింది. ఈ మేరకు సోమవారం సాయంత్రం ప్రకటన విడుదల చేసింది.  ‘‘అగ్నిప్రమాదం నవంబర్‌ 13 సోమవారం ఉదయం 9గం.30 నిమిషాలకు జరిగింది. ఘటనలో తొమ్మిది మంది చనిపోయారు. ప్రమాదం నుంచి 21 మందిని రక్షించగలిగాం. అక్రమంగా సెల్లార్‌లో కెమికల్‌ డ్రమ్ములు పెట్టారు. ఆ డ్రమ్ముల వల్లే అగ్నిప్రమాదం జరిగింది. బిల్డింగ్‌లో ఫైర్‌ సేఫ్టీ లేకపోవడం గుర్తించాం అని అగ్నిమాపక శాఖ ప్రకటించింది.  #WATCH | Daring rescue of a child and woman amid massive fire in a storage godown located in an apartment complex in Bazarghat, Nampally of Hyderabad pic.twitter.com/Z2F1JAL8wa — ANI (@ANI) November 13, 2023     స్థానికుల మౌనం సోమవారం ఉదయం ప్రమాదం జరిగిన వెంటనే అగ్నిమాపక శాఖ అధికారులు ఘటనా స్థలాన్ని పరిశీలించారు. ఈ కెమికల్ నిల్వలను రమేష్ జైశ్వాల్ అనే వ్యక్తి నిల్వ ఉంచినట్లు తేలింది. పెద్ద పెద్ద డ్రమ్ముల్లో నిల్వ ఉంచి అపార్ట్‌మెంట్ సెల్లార్‌లో  వ్యాపారం చేస్తున్నాడు రమేష్ జైశ్వాల్. అయితే ఇది చాలారోజులుగా నడుస్తున్న వ్యవహారమని అధికారులకు తెలిసింది. దీంతో స్థానికుల్ని ప్రశ్నించారు వాళ్లు. భారీగా కెమికల్ నిల్వలు ఉంచినప్పుడు తమకు ఎందుకు ఫిర్యాదు చేయలేదని అపార్ట్‌మెంట్‌ వాసులను అడిగారు అగ్నిమాపక శాఖ అధికారులు. అయితే స్థానికులు ఆ ప్రశ్నకు మౌనం వహించారు. మరోవైపు తనిఖీలు చేపట్టని విజిలెన్స్‌ అధికారులు, సేఫ్టీ పరిశీలనలో విఫలమైన జీహెచ్‌ఎంసీ తీరుపైనా  విమర్శలు వెల్లువెత్తుతున్నాయి.

దీపావళి రోజున దేశరాజధాని ఢిల్లీలో 208 అగ్ని ‍ప్రమాదాలు చోటుచేసుకున్నాయి. ఢిల్లీ ఫైర్ సర్వీస్‌కు అగ్ని ప్రమాదాలకు సంబంధించి లెక్కలేనన్ని ఫోన్‌ కాల్స్‌ వచ్చాయి. ఈ అగ్నిప్రమాదాల్లో 22 ఘటనలు బాణసంచా కాల్చడం కారణంగానే సంభవించాయి.  దీపావళి రోజున జరిగిన చిన్న, మధ్యతరహా,  తీవ్రమైన అగ్నిప్రమాదాలకు సంబంధించి ఇప్పటివరకు 208 ఘటనలు చోటుచేసుకున్నాయని డిపార్ట్‌మెంట్ హెడ్ అతుల్ గార్గ్ తెలిపారు. ఢిల్లీలోని సదర్ బజార్, ఈస్ట్ ఆఫ్ కైలాష్, తిలక్ నగర్‌లో భారీ అగ్నిప్రమాదాలు జరిగాయి. అయితే ఈ ఘటనల్లో ఎలాంటి ప్రాణనష్టం జరిగినట్లు అధికారిక సమాచారం రాలేదు.  అగ్నిమాపక అధికారులు తెలిపిన వివరాల ప్రకారం, సెంట్రల్ ఢిల్లీలోని సదర్ బజార్‌లోని డిప్యూటీ గంజ్ మార్కెట్‌లోని గోదాములో ఆదివారం భారీ అగ్నిప్రమాదం సంభవించింది. మంటలను అదుపు చేసేందుకు 22 అగ్నిమాపక శకటాలు శ్రమించాయి. దాదాపు 2 గంటల తర్వాత మంటలు అదుపులోకి వచ్చాయి. గోదాములో ఉంచిన వస్తువులన్నీ దగ్ధమైనట్లు తెలుస్తోంది. అయితే ఎంత మేరకు నష్టం జరిగిందన్న సమాచారం అందుబాటులో లేదు.  పశ్చిమ ఢిల్లీలోని తిలక్ నగర్ మార్కెట్ ప్రాంతంలో ఆదివారం అగ్నిప్రమాదం జరిగింది. పోలీసులు తెలిపిన వివరాల ప్రకారం మార్కెట్‌లోని కొన్ని దుకాణాలు అగ్నికి ఆహుతైనట్లు  ఢిల్లీ ఫైర్ సర్వీస్‌కు సమాచారం అందింది. వెంటనే అగ్నిమాపక సిబ్బంది సంఘటనా స్థలానికి చేరుకుని, పోలీసుల సహాయంతో మంటలను అదుపు చేశారు. ఈ ఘటనలో ఎలాంటి ప్రాణనష్టం జరిగినట్లు సమాచారం అందలేదు.  ఇది కూడా చదవండి: బీజేపీ అధ్యక్షుడు జేపీ నడ్డా ఇంట్లో విషాదం

సాక్షి, అమరావతి: అగ్ని ప్రమాదాలు సంభవిస్తే ఆకాశం నుంచి ఎగురుకుంటూ డ్రోన్లు వచ్చేస్తాయ్‌. మంటలు చెలరేగిన భవనాల్లోకి చకచకా వెళ్లి మంటల్ని అదుపుచేసే రోబోలు సైతం రా­బోతున్నాయ్‌. త్వరలో రాష్ట్ర అగ్నిమాపక శాఖ అధునాతన సాధనా సంపత్తిని సంతరించుకోనుంది. అగ్ని ప్రమాదాలకు తక్షణం చెక్‌ పెట్టే లక్ష్యంతో రాష్ట్ర అగ్నిమాపక వ్యవస్థను ఆధు­నికీకరించేందుకు ప్రభుత్వం కార్యాచరణకు ఉపక్రమిస్తోంది. అందుకోసం రాష్ట్ర విపత్తుల స్పందన దళం (ఎస్‌డీఆర్‌ఎఫ్‌), అగ్నిమాపక వ్యవస్థలకు ఆధునిక పరికరాలను సమకూర్చేందుకు ప్రణాళికను ఆమోదించింది. ఇందుకోసం కేంద్ర, రాష్ట్ర ప్రభుత్వాల సంయుక్త నిధులు రూ.295 కోట్లతో కార్యాచరణ చేపట్టింది.   ఇరుకైన ప్రదేశాలు.. ఎత్తైన భవనాల్లోకీ వెళ్లేలా..  రాష్ట్రం అభివృద్ధి చెందుతున్న కొద్దీ నగరాలు, పట్టణాల జనాభా అధికంగా పెరుగుతోంది. అందుకు అనుగుణంగా నగర, పట్టణ ప్రాంతాలు విస్తరిస్తున్నాయి. పెద్దపెద్ద ఆకాశ హార్యా్మలు, పలు కంపెనీలు నిర్మాణం సర్వసాధారణంగా మారింది. అటువంటి ఎత్తైన భవనాలు, కంపెనీల కార్యాలయాలతోపాటు నగరాలు, పట్టణాల్లో ఇరుకైన ప్రదేశాల్లో పొరపాటున అగ్ని ప్రమాదాలు సంభవిస్తే మంటలను అదుపు చేయడం సవాల్‌గా మారింది. ఫైర్‌ ఇంజిన్లు, ఇతర అగ్నిమాపక వాహనాలు, పరికరాలను ప్రమాదం సంభవించిన ప్రదేశానికి తీసుకువెళ్లి మంటలను అదుపు చేయడం అంత సులభం కాదు. అటువంటి పరిస్థితుల్లో కూడా కనిష్ట సమయంలో మంటల్ని అదుపులోకి తెచ్చేందుకు అగ్నిమాపక శాఖను ఆధునికీకరించాలని ప్రభుత్వం నిర్ణయించింది. ఈ మేరకు కేంద్ర ప్రభుత్వం ఇచ్చే 15వ ఆర్థిక  సంఘం నిధులను రాష్ట్ర ప్రభుత్వ వాటా కలిపి మొత్తం రూ.295 కోట్లతో కార్యాచరణ ప్రణాళిక రూపొందించింది. ఇందులో 50 శాతం నిధులతో ఆధునిక అగ్నిమాపక పరికరాలు కొనుగోలు చేయాలని నిర్ణయించింది. వాటిలో అగ్నిమాపక డ్రోన్లు, రోబోలతోపాటు ఎత్తైన భవనాల్లో చెలరేగే మంటలను అదుపు చేసేందుకు ఉపయోగించే హైడ్రాలిక్‌ ప్లాట్‌ఫారాలతోపాటు 16 రకాల ఆధునిక పరికరాలు ఉండటం విశేషం. మరో 30 శాతం నిధులతో కొత్త  అగ్నిమాపక కేంద్రాల నిర్మాణం, 20 శాతం నిధులతో రాష్ట్ర ప్రభుత్వం ప్రత్యేక అవసరాలుగా గుర్తించి వాటిని వినియోగించనుంది.   కొనుగోలు చేయనున్న పరికరాలు  ♦ అగ్ని మాపక డ్రోన్లు,  అగ్నిమాపక రోబోలు  ♦హైడ్రాలిక్‌ ప్లాట్‌ఫారాలు, టర్న్‌ టేబుల్‌ ల్యాడర్లు ♦ ఇరుకు ప్రదేశాల్లోకి వెళ్లగలిగే అగ్నిమాపక మోటారు సైకిళ్లతో కూడిన మిస్ట్‌ ఫైటింగ్‌ యూనిట్లు ♦ హజ్‌మత్‌ వ్యాన్లు, అత్యవసర వైద్య సహాయం అందించే మెడికల్‌ కంటైనర్లు  ♦ లైట్‌ రెస్క్యూ టెండర్లు, మినీ వాటర్‌ టెండర్లు  ♦ క్విక్‌ రెస్పాన్స్‌ మల్టీ పర్సస్‌ వాహనాలు, రెస్క్యూ బోట్లు  ♦ వాటర్‌ బ్రౌజర్లు, హై ప్రెజర్‌ పంపులతో కూడిన రెస్క్యూ వాహనాలు  ♦ ఫైర్‌ ఫైటింగ్‌ ఫిటింగ్స్, సిబ్బందికి రక్షణ కల్పించే పరికరాలు  

సాక్షి, హైదరాబాద్‌: ప్రమాదాల కారణంగా 2022లో రాష్ట్రవ్యాప్తంగా రూ.212.36 కోట్ల విలువైన ఆస్తులు అగ్నికి ఆహుతైనట్టు అగ్నిమాపకశాఖ డీజీ నాగిరెడ్డి తెలిపారు. అదే ఏడాదిలో జరిగిన ప్రమాదాల్లో 45 మంది ప్రాణాలు కోల్పోయినట్టు వెల్లడించారు. 2021, 2022లో రాష్ట్రవ్యాప్తంగా నమోదైన అగ్నిప్రమాదాలు, జరిగిన ప్రాణ, ఆస్తి నష్టం.. ఫైర్‌ సిబ్బంది కాపాడిన క్షతగాత్రులు, ఆస్తుల వివరాలను బుధవారం ఓ ప్రకటనలో తెలిపారు. ఈనెల 14న ఫైర్‌ సర్వీసెస్‌ డేను పురస్కరించుకుని వారం రోజులపాటు రాష్ట్రవ్యాప్తంగా పలు కార్యక్రమాలు చేపట్టనున్నట్టు తెలిపారు. ఈనెల 14 నుంచి 20 వరకు జరిగే కార్యక్రమాల్లో అగ్నిప్రమాదాల నుంచి బయటపడటమెలా అనే విషయమై అవగాహన కల్పించనున్నట్లు నాగిరెడ్డి తెలిపారు.    

సాక్షి, హైదరాబాద్‌: అగ్ని ప్రమాదాలతోపాటు ఇతర అత్యవసర పరిస్థితులు, విపత్తుల సమయంలో వెంటనే రంగంలోకి దిగేలా సుశిక్షితులైన 50 మంది అగ్నిమాపక శాఖ అధికారులు, సిబ్బందితో ప్రత్యేక దళాన్ని ఏర్పాటు చేయనున్నట్టు రాష్ట్ర అగ్నిమాపకశాఖ డీజీ నాగిరెడ్డి తెలిపారు. నేషనల్‌ డిజాస్టర్‌ రెస్పాన్స్‌ ఫోర్స్‌ (ఎన్‌డీఆర్‌ఎఫ్‌) తరహాలో ఉండే ఈ బృందానికి అన్నిరకాల అంశాల్లో ప్రత్యేక శిక్షణ అందిస్తామని వెల్లడించారు. ఈ బృందం హైదరాబాద్‌ కేంద్రంగా పనిచేస్తుందని తెలిపారు. అగ్నిమాపకశాఖ సిబ్బందికి ఇస్తున్న శిక్షణ, అందుబాటులో ఉన్న ఫైర్‌ ఫైటింగ్‌ పరికరాలు, అగ్నిప్రమాదాల నియంత్రణకు అగ్నిమాపక శాఖ ఆధ్వర్యంలో నిర్వహిస్తున్న అవగాహన కార్యక్రమాలు తదితర అంశాలను శనివారం ఏర్పాటు చేసిన ప్రత్యేక కార్యక్రమంలో డీజీ నాగిరెడ్డి, అగ్నిమాపక శాఖ డైరెక్టర్‌ లక్ష్మి ప్రసాద్, రీజినల్‌ ఫైర్‌ ఆఫీసర్‌ పాపయ్య, ఫైర్‌ అకాడమీ డిప్యూటీ డైరెక్టర్‌ ప్రసన్న కుమార్‌తో కలిసి వివరించారు. తొలుత అగ్నిప్రమాదం జరిగినప్పుడు మంటలను ఆర్పేందుకు వినియోగించే పరికరాలు, బ్రాంటో స్కైలిఫ్ట్‌ పనితీరును మాదాపూర్‌ ఫైర్‌ స్టేషన్‌లో అధికారులు వివరించారు. అనంతరం బహుళ అంతస్తుల్లో నిర్మితమవుతున్న అరబిందో భవనం, గోపన్‌పల్లిలోని హానర్స్‌ హోమ్స్‌ భవనంలో ఫైర్‌ సేఫ్టీ కోసం ఏ వ్యవస్థ ఏర్పాటు చేశారన్నది ప్రయోగాత్మకంగా పరిశీలించి చూపారు. వట్టినాగులపల్లి అగ్నిమాపకశాఖ శిక్షణ కేంద్రంలో సిబ్బందికి ఇస్తున్న శిక్షణ, ఏర్పాటు చేసిన వ్యవస్థను సైతం డీజీ నాగిరెడ్డి వివరించారు.   అగ్నిప్రమాదాల నియంత్రణకు సంసిద్ధం  వేసవిలో ఎదురయ్యే అగ్నిప్రమాదాలను నియంత్రించేందుకు అగ్నిమాపకశాఖ సన్నద్ధంగా ఉందని నాగిరెడ్డి మీడియాతో మాట్లాడుతూ తెలిపారు. రాష్ట్రవ్యాప్తంగా ఉన్న 137 ఫైర్‌స్టేషన్లలో అన్ని రకాలు కలిపి 400కుపైగా ఫైర్‌ వాహనాలు అందుబాటులో ఉన్నాయన్నారు. ఫైర్‌ సేఫ్టీ పరికరాలు పనిచేయకపోవడంతోనే స్వప్నలోక్‌ భవనంలో అగ్నిప్రమాదం సంభవించి ప్రాణనష్టం జరిగిందని గుర్తు చేశారు. షార్ట్‌సర్క్యూట్‌ కారణంగానే ఎక్కువ అగ్నిప్రమాదాలు జరుగుతున్నాయని తెలిపారు. ఫైర్‌ ఫైటింగ్‌ కోసం రోబోలు, డ్రోన్లను వినియోగించేలా ప్రణాళికలు ఉన్నాయని, మరో ఏడాదిలో ఇవి అమల్లోకి తెచ్చేందుకు ప్రయత్నిస్తామని వెల్లడించారు. అగ్నిప్రమాదాల నియంత్రణలో భాగంగా ప్రైవేటు సెక్యూరిటీ సిబ్బందికి సైతం శిక్షణ ఇస్తున్నట్టు తెలిపారు. అగ్నిమాపక సిబ్బందికి సైతం ఆరోగ్య భద్రత సదుపాయం కల్పించే అంశాన్ని ప్రభుత్వం దృష్టికి తీసుకెళతామని నాగిరెడ్డి వెల్లడించారు. ఈ సందర్భంగా ఫైర్‌సిబ్బంది నిర్వహించిన మాక్‌డ్రిల్‌లో పలురకాల అగ్నిప్రమాదాలను ఎలా నియంత్రిస్తారన్నది ప్రయోగాత్మకంగా చూపారు.

సాక్షి, అమరావతి: రాష్ట్రంలో అగ్నిమాపక శాఖను బలోపేతం చేసే దిశగా ప్రభుత్వం కార్యాచరణకు ఉపక్రమించింది. స్టాండింగ్‌ ఫైర్‌ అడ్వయిజరీ కౌన్సిల్‌(ఎస్‌ఎఫ్‌ఏసీ) ప్రమాణాలకు అనుగుణంగా అగ్నిమాపక వ్యవస్థను తీర్చిదిద్దాలని నిర్ణయించింది. ఎస్‌ఎఫ్‌ఏసీ ప్రమాణాల ప్రకారం రెండు లక్షల జనాభాకొకటి చొప్పున రాష్ట్రంలో 250 అగ్నిమాపక కేంద్రాలుండాలి. కానీప్రస్తుతం 190 కేంద్రాలే ఉన్నాయి. నిర్దేశిత ప్రమాణాలు సాధించేందుకు కొత్తగా 60 అగ్నిమాపక కేంద్రాలను ఏర్పాటు చేయాల్సి ఉంది. వాటిని మూడు దశల్లో ఏర్పాటు చేయాలని ప్రభుత్వం నిర్ణయించింది. మొదటి రెండుదశల కింద 47 కేంద్రాల నిర్మాణానికి ప్రణాళికను ఖరారు చేసింది. దాంతో పాటు దీర్ఘకాలంగా పెండింగ్‌లో ఉన్న కీలక ప్రతిపాదనలకు సూత్రప్రాయంగా ఆమోదించింది.    నియోజకవర్గానికొకటి చొప్పున..  ఇప్పటికే కొత్తగా ఆరు అగ్నిమాపక కేంద్రాల ఏర్పాటుకు ప్రభుత్వం చర్యలు చేపట్టింది. వేంపల్లి­లో అగ్నిమాపక కేంద్రాన్ని ప్రారంభించారు. ఇక పి.గన్నవరం, కోరుకొండ, సదూం, వెదురుకుప్పం, ముద్దనూరు, వేంపల్లిలో అగ్నిమాపక కేం­­ద్రాల నిర్మాణాల ప్రక్రియ చురుగ్గా సాగుతోంది. నెల్లిమర్ల, విశాఖ తూర్పు, విశాఖ పశ్చి­మ, అరకు, రాజమహేంద్రవరం రూరల్, గోపా­ల­పురం, ఆచంట, పోలవరం, ప్రత్తిపాడు, తాడికొం­డ, వేమూ­రు, పర్చూరు, సంత­నూతలపా­డు, నెల్లూ­రు­రూరల్, కొవ్వూ­రు, నందికొట్కూ­రు, పాణ్యం, మంత్రాలయం, సింగనమల, రాప్తా­డు ఈ 20 నియోజకవర్గాల పరిధిలో ఒక్కో అగ్నిమాపక కేంద్రాన్ని ఏర్పాటు చేయాలని సూత్రప్రాయంగా నిర్ణయించారు. ఇక పరిధి, వాణిజ్య కార్యకలాపాల విస్తృతి దృష్ట్యా రాష్ట్రంలో కొత్తగా మరో 27 అగ్నిమాపక కేంద్రాలు ఏర్పాటు చేయా­లని ప్రతిపాదించారు. ఈ మేరకు విపత్తు­ల స్పందన శాఖ ప్రణాళికను రూపొందించింది. ఒక్కో అగ్నిమాపక కేంద్రాన్ని రూ.1.90 కోట్లతో ఏర్పాటు చేయనున్నారు. ఆ మేరకు 47 కేంద్రాలను రూ.89.3 కోట్లతో ఏర్పాటు చేస్తారు. ఇక ఒక్కో కేంద్రానికి ఏటా నిర్వహణ వ్యయం రూ.1.10 కోట్లు అవుతుందని అంచనా.    ఆధునిక మౌలిక వసతులు  అగ్ని ప్రమాదాల నివారణకు విపత్తుల స్పందన శాఖకు ఆధునిక మౌలిక వసతుల కల్పనకు ప్రభుత్వం చర్యలు చేపట్టింది. రూ.10 కోట్లు వెచ్చించి జపాన్‌ నుంచి రూ.55 మీటర్ల టర్న్‌ టేబుల్‌ ల్యాడర్‌ను కొనుగోలు చేసింది. రూ.20 కోట్లతో ఫిన్‌లాండ్‌ నుంచి 90 మీటర్ల హైడ్రాలిక్‌ ప్లాటఫాంను కొనుగోలు చేశారు. కొత్తగా అగ్నిమాపక వాహనాల కొనుగోలుకు రూ.6.96 కోట్లతో ప్రతిపాదనలను ఆమోదించింది. మరోవైపు రాష్ట్రంలో రెండు రీజియన్లుగా ఉన్న అగ్నిమాపక శాఖను నాలుగు రీజియన్లుగా ఇటీవల పునర్వ్యవస్థీకరించింది. వాటితో పాటు విపత్తుల స్పందన శాఖలో ఫైర్‌మెన్, డ్రైవర్‌ ఆపరేటర్ల పోస్టుల భర్తీకి త్వరలో నిర్ణయం తీసుకోనుంది. రాష్ట్ర విపత్తుల స్పందన దళాన్ని అగ్ని మాపక శాఖ  పరిధిలోకి తెచ్చే అంశంపై కసరత్తు చేపట్టింది.   

సాక్షి, హైదరాబాద్‌: రోజుకు 20.. వారానికి 140.. నెలకు 600..ఏడాదికి 7,327... రాష్ట్రంలో 2021లో చోటు చేసుకున్న అగ్నిప్రమాదాలు ఇవి. వీటిలో అత్యధికం మానవ నిర్లక్ష్యం కారణంగానే జరిగినట్లు ఆ శాఖ గణాంకాలు స్పష్టం చేస్తున్నాయి. అగ్ని ప్రమాదాలకు కారణాల్లో కాల్చిపారేసిన బీడీ, సిగరెట్లు మొదటి స్థానంలో ఉండగా, షార్ట్‌ సర్క్యూట్‌లు రెండో స్థానంలో ఉన్నాయి.   దడపుట్టిస్తున్న వరుస ఉదంతాలు.. రాజధానిలో ఇటీవలి కాలంలో వరుసగా చోటు చేసుకుంటున్న అగ్నిప్రమాదాలు దడ పుట్టిస్తున్నాయి. సికింద్రాబాద్‌ ప్రాంతంలోని రాధా ఆర్కేడ్‌ భవనంలో ఉన్న డెక్కన్‌ కార్పొరేట్‌ కార్యాలయంలో మంటలు చెలరేగి రోజుల తరబడి తగులబడటం నగరం ఉలిక్కిపడేలా చేసింది. దీని కూల్చివేతలు కూడా కొలిక్కి రాకముందే వనస్థలిపురం, ఎల్బీనగర్‌ల్లోని గోదాములు అగ్నికి ఆహుతయ్యాయి. తాజాగా తుది మెరుగులు దిద్దుకుంటున్న కొత్త సచివాలయంలో ఫైర్‌ యాక్సిడెంట్‌ జరిగింది. ఈ ప్రమాదాలన్నిటిలోనూ ప్రాణ నష్టం లేకపోయినా భారీగా ఆస్తి నష్టం చోటు చేసుకుంది. డెక్కన్‌ కార్పొరేట్‌ ఉదంతంలో మాత్రం ముగ్గురు సజీవదహనం కాగా.. ఇద్దరి అవశేషాలు కూడా దొరకలేదు.  నగరాలు, పట్టణాల్లో షార్ట్‌ సర్క్యూటే..  కేవలం గతేడాది మాత్రమే కాదు... ఏటా జరుగుతున్న అగ్ని ప్రమాదాలకు కాల్చిపారేసిన సిగరెట్, బీడీలే ఎక్కువగా కారణమవుతున్నాయి. ఈ తరహా ఘటనలు ఎక్కువగా గ్రామీణ ప్రాంతాలు, జిల్లాల్లో జరుగుతున్నాయి. అక్కడ ఉండే గుడిసెలు తదితరాలకు వీటి వల్ల మంటలు అంటుకుని విస్తరించడంతో భారీ ఆస్తి, ప్రాణనష్టాలు చోటు చేసుకుంటున్నాయి. 2019లో మొత్తం 8,960 అగ్నిప్రమాదాలు జరగ్గా వీటిలో 4,668 కాల్చి పారేసిన సిగరెట్, బీడీల వల్లే జరిగాయి. ఇక 2020లో 7,899కి 4,187, 2021లో 7,327కి 3,927 ఈ కారణంగానే జరిగాయి. విద్యుత్‌ షార్ట్‌ సర్క్యూట్‌ వల్ల 1,866 అగ్ని ప్రమాదాలు జరిగాయి. ఇక నగరాలు, పట్టణాల వద్దకు వచ్చేసరికి విద్యుత్‌ షార్ట్‌ సర్క్యూటే ఫైర్‌ యాక్సిడెంట్లకు ప్రధాన కారణంగా ఉంటోంది. విద్యుత్‌ తదితర శాఖలు భవనాల తనిఖీ చేపట్టకపోవడం వల్లే ఇవి చోటు చేసుకుంటున్నాయనే విమర్శలున్నాయి. షార్ట్‌ సర్క్యూట్‌ కారణంగా 2019–21 మధ్య వరసగా 2,726, 1,992, 1,866 అగ్ని ప్రమాదాలు చోటు చేసుకున్నాయి. పటిష్ట చట్టం లేదు..  ఫైర్‌ సేఫ్టీ నిబంధనలు పట్టించుకోని భవనాల యాజమాన్యాలపై చర్యలు తీసుకునేందుకు అగ్నిమాపక, విపత్తు నిర్వహణ శాఖకు ఉన్న ఒకే ఒక్క ఆయు ధం ఏపీ ఫైర్‌ సర్వీసెస్‌ యాక్ట్‌. 1999లో రూపొందించిన ఈ కోరలు లేని చట్టమే ఇప్పటికీ ఉండటం గమనార్హం. అయితే ఈ విభాగం కేసు నమోదు చేసినప్పటికీ నోటీసుల జారీ మిన హా అరెస్టుకు ఆస్కారం లేదు. కేసు కూడా సివిల్‌ కోర్టుల్లో విచారణ జరుగుతుంది. దాదాపు 90% ఉల్లంఘనలకు జరిమానా , మిగిలిన వాటిలో గరిష్ట శిక్ష  3 నెలలు మాత్రమే.  అగ్నిమాపక శాఖ అధికారులు 2014 నుంచి ఇప్పటివరకు నమోదు చేసిన కేసుల్లో ఒక్క దాంట్లోనూ శిక్ష పడకపోవడం గమనార్హం. సిబ్బంది లేమి  తనిఖీలకు అడ్డంకిగా మారింది. – అగ్నిమాపక శాఖ మాజీ ఉన్నతాధికారి  అవసరం మేరకు లేని ఫైర్‌ స్టేషన్లు ఏటా అగ్నిప్రమాదాలు వేల సంఖ్యలో, ఆస్తినష్టం రూ.వందల కోట్లలో, ప్రాణనష్టం పదుల సంఖ్యలో ఉంటోంది. అయితే రాష్ట్రంలో ఈ మేరకు అవసరమైన సంఖ్యలో అగ్నిమాపక కేంద్రాలు లేవు. సిబ్బంది, శకటాలు సహా ఇతర మౌలికవసతులూ లేవు. జనాభా విస్తీర్ణం ప్రాతిపదికన తీసుకున్నా ఒక్క హైదరాబాద్‌ మహానగరంలోనే 100కు పైగా అగ్నిమాపక కేంద్రాలు, ఒక్కో కేంద్రంలో కనీసం మూడు శకటాలు, కనిష్టంగా 15 మంది సిబ్బంది అవసరం. అయితే ప్రస్తుతం రాష్ట్ర వ్యాప్తంగా ఉన్న అగ్నిమాపక కేంద్రాల సంఖ్య 110 దాటట్లేదు. వీటికి తోడు మరో 20 వరకు ఔట్‌సోర్సింగ్‌ పోస్టులు ఉన్నాయి. వీటిలోనూ 95% కేంద్రాల్లో సాధారణ ఫైర్‌ ఇంజన్లు మాత్రమే అందుబాటులో ఉన్నాయి. ఈ కారణంగానే బహుళ అంతస్తుల భవనాలు, భారీ సముదాయాలు, పరిశ్రమలు తదితరాల్లో జరిగే అగ్నిప్రమాదాలను అదుపు చేయడం కష్టసాధ్యం అవుతోంది.    

సాక్షి, హైదరాబాద్‌: బహుళ అంతస్తుల భవనాల్లో అగ్నిప్రమాదాల నియంత్రణకు ప్రభుత్వం కసరత్తు చేస్తోంది. ఫైర్‌సేఫ్టీ నిబంధనలు పాటించని భవ నాల విషయంలో కఠినంగా వ్యవహరించాలని మంత్రుల బృందం ఉన్నతాఅధికారులను ఆదేశించింది. హైదరాబాద్‌తోపాటు రాష్ట్రంలోని ఇతర అ న్ని ప్రధాన నగరాల్లోని బహుళ అంతస్తుల భవ నాల్లో అగ్ని ప్రమాదాలు జరిగినప్పుడు తీసు కునే చర్యలకు సంబంధించి ‘ఫైర్‌ సేఫ్టీ ఆడిట్‌’ నిర్వహించాలని నిర్దేశించింది. అగ్నిమాపక శాఖకు ఆధునిక సామగ్రిని అందించేందుకు ప్రభుత్వం సిద్ధంగా ఉందని, ప్రస్తుతం శాఖకు అవసరమైన అత్యవసర సా మగ్రికి సంబంధించి ప్రతిపాదనలు సిద్ధం చేయా లని సూచించింది. బహుళ అంతస్తుల భవనాల్లో అగ్ని మాపక చర్యలపై సందేహాలు తలెత్తిన నేప  థ్యంలో బుధవారం మంత్రులు కేటీఆర్, తలసాని శ్రీనివాస్‌ యాదవ్, మహమూద్‌ అలీ బీఆర్‌కేఆర్‌ భవన్‌లో ఉన్నతస్థాయి సమీక్ష నిర్వహించారు. ప్రభుత్వ ప్రధాన కార్యదర్శి శాంతికుమారి, ప్రత్యేక ప్రధాన కార్యదర్శులు అర్వింద్‌కుమార్, సునీల్‌శర్మ, జీహెచ్‌ఎంసీ కమిషనర్‌ లోకేష్‌కుమార్‌ తదితరులు హాజరయ్యారు. భవిష్యత్తులో అగ్ని ప్రమాదాలు జరిగినప్పుడు ఎలాంటి విపత్తులు సంభవించకుండా తీసుకోవలసిన చర్యలపై చర్చించారు. సికింద్రాబాద్‌లోని డెక్కన్‌ మాల్‌లో ఇటీవల జరిగిన భారీ అగ్నిప్రమాదంలో ముగ్గురు బలైన నేపథ్యంలో ప్రభుత్వం ఈమేరకు చర్యలు చేపట్టింది. డెక్కన్‌ మాల్‌లో జరిగిన అగ్ని ప్రమాదంలో మరణించిన ముగ్గురి కుటుంబాలకు రూ.5 లక్షల చొప్పున ఎక్స్‌గ్రేషియా అందించాలని నిర్ణయించింది. డ్రోన్‌ సాంకేతికతను వినియోగించండి మునిసిపల్‌ నిబంధనల ప్రకారం ఐదంతస్తులు, ఆపై నిర్మించే భవనాల విషయంలో నిబంధనలు ఉల్లంఘించి నిర్మాణాలు జర పడం వల్లనే ఇలాంటి ప్రమాదాలు జరుగుతు న్నాయని మంత్రులు అభిప్రాయపడ్డారు. ఈ నేపథ్యంలో హైదరాబాద్‌తోపాటు ఇతర నగరాలలోని వ్యాపార, వాణిజ్య భవనాలు, ఆసుపత్రులు, పాఠశాలలు, ఎత్తైన అపార్ట్‌మెంట్లలో సేఫ్టీ ఆడిట్‌ నిర్వహించాలని అధికారులను ఆదేశించారు. ఇందుకోసం ఉన్నతస్థాయి కమిటీని ఏర్పాటు చేయాలని నిర్ణయించారు. అవసరమైతే ప్రస్తుతమున్న ఫైర్‌సేఫ్టీ చట్టాలను సవరించాలని చెప్పారు. హైదరాబాద్‌లో భారీగా నిర్మాణమవుతున్న బహుళ అంతస్తుల భవనాల ఫైర్‌ సేఫ్టీకి సంబంధించి డ్రోన్లు, రోబోటిక్‌ సాంకేతికతను వినియోగించుకునే అంశాలను పరిశీలించాలన్నారు. ఈ మేరకు పాశ్చాత్య దేశాలతోపాటు దేశంలోని ఇతర నగరాల్లో ఉన్న మెరుగైన పద్ధతులపై అధ్యయనం చేసి నివేదిక ఇవ్వాలని ఆదేశించారు. ప్రస్తుతం ఉన్న అగ్నిమాపక సిబ్బందికి మరిన్ని శిక్షణ కార్యక్రమాలు నిర్వహించి, వారిని నిష్ణాతులను చేయాలని సూచించారు. ఈ కార్యక్రమంలో ఆయా భవనాల యజమానులను కూడా భాగస్వాములను చేసుకునే అంశాన్ని పరిశీలించాలన్నారు. ఈ సమావేశంలో ఇంకా జలమండలి ఎండీ దాన కిషోర్, హైదరాబాద్‌ పోలీస్‌ కమిషనర్‌ సీవీ ఆనంద్, సైబరాబాద్‌ పోలీస్‌ కమిషనర్‌ స్టీఫెన్‌ రవీంద్ర , రాచకొండ కమిషనర్‌ డీఎస్‌ చౌహాన్, హైదరాబాద్‌ కలెక్టర్‌ అమేయ్‌ కుమార్‌ పాల్గొన్నారు.

సాక్షి, హైదరాబాద్: సికింద్రాబాద్‌లోని కిమ్స్ ఆసుపత్రిలో ఓ చిన్నారి తల్లిదండ్రులను, ఆస్పత్రి సిబ్బందిని కాసేపు ఉరుకులు పరుగులు పెట్టించాడు. వాష్ రూమ్‌లోకి వెళ్లి అనుకోకుండా లాక్‌ వేసేసుకున్నాడు. దీంతో అక్కడే ఇరుక్కుపోయి ఏడ్వసాగాడు.  ఈ విషయాన్ని గుర్తించిన చిన్నారి తల్లిదండ్రులు.. ఆస్పత్రి నిర్వాహకుల దృష్టికి తీసుకెళ్లారు. తాళాలు లేకపోవడంతో ఫైర్‌ సేఫ్టీ సిబ్బందికి కాల్‌ చేశారు. వాళ్లు హుటాహుటిన అక్కడికి చేరుకున్నారు. బాలుడిని రక్షించే యత్నం చేశారు.  సుత్తి, స్క్రూడ్రైవర్‌తో తాళం పగులగొట్టి చిన్నారిని బయటకు తీసుకొచ్చారు.  ఇలాంటి ఘటనలు జరిగినప్పుడు అత్యవసర పరిస్థితుల్లో.. 101కు డయల్‌ చేయాలని తెలంగాణ ఫైర్‌ సర్వీసెస్‌ ట్విటర్‌ పేజీలో ఆ వీడియోను పోస్ట్‌ చేసింది. 

సాక్షి, హైదరాబాద్‌: సికింద్రాబాద్‌లోని రూబీ హోటల్‌ యజమాని నిర్లక్ష్యం ఎనిమిది మంది ప్రాణాలు బలిగొంది. కేవలం ఈ ఒక్క భవనమే కాదు సరిగ్గా వెతికితే నగరంలోని ప్రతి వీధికి కనీసం మూడు ఇలాంటివి కనిపిస్తుంటాయి. ఇలాంటి నిర్మాణాలు చేపట్టిన యజమానులపై చర్యలు తీసుకోవడానికి అగ్నిమాపక, విపత్తు నిర్వహణ శాఖకు ఉన్న ఒకే ఒక్క ఆధారం ఏపీ ఫైర్‌ సర్వీసెస్‌ యాక్ట్‌. 1999లో రూపొందించిన ఈ కోరలు లేని చట్టాన్నే ఇప్పటికీ వినియోగిస్తున్నారు. వాణిజ్య భవనాలు, సముదాయాల యజమానులు యథేచ్ఛగా ఉల్లంఘనలకు పాల్పడటానికి ఇదీ ఓ కారణమే అన్నది నిపుణుల మాట.  సమరీ ట్రయల్‌కు మాత్రమే అవకాశం...  ఏదైనా నేరానికి సంబంధించి పోలీసు విభాగం ఐపీసీ కింద కేసు నమోదు చేస్తుంటుంది. నేరం, నేరగాడి తీరుతెన్నుల్ని బట్టి అరెస్టుపై నిర్ణయం తీసుకుంటుంది. ఆపై జైలు, బెయిలు, కోర్టులో కేసు విచారణ తదితరాలు ఉంటాయి. అదే ఫైర్‌ సర్వీసెస్‌ యాక్ట్‌ వద్దకు వచ్చేసరికి ఆ చట్టం, అగ్నిమాపక శాఖకు ఉన్న అధికారాలు వేరు. వీళ్లు ఫైర్‌ సేఫ్టీ ఉల్లంఘనలకు సంబంధించి కేసు నమోదు చేసినప్పటికీ నోటీసుల జారీ మినహా అరెస్టుకు ఆస్కారం లేదు. ఈ కేసు కోర్టు వరకు వెళ్లినా సాధారణ కేసుల్లా విచారణ ఉండదు. అదే ఎందరి ప్రాణాలు తీసిన ఉదంతం, ఎంత తీవ్రమైన ఉల్లంఘన అయినప్పటికీ ఇదే పరిస్థితి. ఈ కేసుల విచారణ సివిల్‌ కోర్టుల్లో సమరీ ట్రయల్‌ విధానంలో జరుగుతుంది. ఒక్క మాటలో చెప్పాలంటే మద్యం తాగి వాహనాలు నడుపుతూ చిక్కిన వారిపై నమోదైన కేసుల మాదిరిగానే ఉంటుంది.   గరిష్ట శిక్ష మూడు నెలలు మాత్రమే...  ఈ చట్టంలోని అనేక సెక్షన్లు ఉన్నప్పటికీ శిక్షలు మాత్రం చాలా తక్కువ. దాదాపు 90 శాతం ఉల్లంఘనలకు జరిమానా మాత్రమే విధించే ఆస్కారం ఉంది. మిగిలిన వాటిలోనూ గరిష్ట శిక్ష కేవలం 3 నెలలు మాత్రమే. ఈ సెక్షన్లకు సంబంధించిన ఉల్లంఘనల్లోనూ పెనాల్టీ విధించే ఆస్కారం ఉంది.  రాష్ట్ర అగ్నిమాపక శాఖ అధికారులు 2014 నుంచి ఇప్పటి వరకు 689 కేసులు నమోదు చేశారు. వీటిలో కనీసం ఒక్క కేసులోనూ ఉల్లంఘనులకు జైలు శిక్ష పడలేదు. 83 కేసులు జరిమానాలతో ముగిసిపోగా... మరో 60 ఆ విభాగమే ఉపసంహరించుకుంది. మిగిలిన వాటిలో 257 కేసులను న్యాయస్థానం రిటర్న్‌ చేసి మార్పు చేర్పులు సూచించింది. ఇంకో 270 కేసులు ఇప్పటికీ వివిధ కోర్టుల్లో పెండింగ్‌లో ఉన్నాయి. అగ్నిమాపక శాఖ నిబంధనలు పాటించని 665 నిర్మాణాలకు నోటీసులు, తీవ్రమైన ఉల్లంఘనలకు పాల్పడిన మరో 636 మంది యజమానులకు షోకాజ్‌ నోటీసులు జారీ చేసింది.  హైదరాబాద్‌లోనే అత్యధికంగా కేసులు  రాష్ట్రం ఏర్పడిన నాటి నుంచి అగ్నిమాపక శాఖ నమోదు చేసిన కేసుల్లో అత్యధిక హైదరాబాద్‌కు సంబంధించివనే. మొత్తం 689 కేసులకు నగరానికి సంబంధించినవి 325, రంగారెడ్డి 154, వరంగల్‌ 70, నల్లగొండ 56, ఖమ్మం 36 కేసులు ఉన్నాయి. గతంలో అగ్నిమాపక శాఖకు సొంతంగా ప్రాసిక్యూషన్‌ సర్వీస్‌ కూడా ఉండేది కాదు. పంజగుట్టలోని మీన జ్యువెలర్స్‌లో 2006లో జరిగిన అగ్నిప్రమాదం ముగ్గురిని పొట్టన పెట్టుకుంది. ఆ కేసు నుంచి అగ్నిమాపక శాఖ ప్రాసిక్యూషన్‌ మొదలెట్టింది.  అగ్నిమాపక శాఖలో పదవీ విరమణ చేసిన ఓ ఉన్నతాధికారి ‘సాక్షి’తో మాట్లాడుతూ... ‘2000 సంవత్సరం తర్వాత అభివృద్ధి వేగం పుంజుకుంది. దీంతో అనేక భారీ నిర్మాణాలు, భవనాలు వచ్చాయి. వాణిజ్య కార్యకలాపాలూ పెరగడంతో ఉల్లంఘనలు అదే స్థాయిలో జరుగుతున్నాయి. వీటిని దృష్టిలో పెట్టుకుని ఫైర్‌ సర్వీసెస్‌ యాక్ట్‌ను మార్చాలి. కఠినమైన నిబంధనలతో పాటు శిక్షలు అమలులోకి తీసుకువస్తేనే అగ్ని ప్రమాదాల్లో అమాయకులు బలికాకుండా ఉంటారు. మీన జ్యువెలర్స్‌ కేసులో ఆ భవన యాజమాన్యానికి పడిన జరిమానా కేవలం రూ.15 వేలే’ అని అన్నారు. (క్లిక్ చేయండి:​​​​​​​ హైదరాబాద్ మెట్రో రైలు.. తప్పని తిప్పలు)

గాంధీనగర్‌ (విజయవాడ సెంట్రల్‌): అగ్నిమాపక శాఖ అమ్ముల పొదిలో అత్యాధునిక వాహనం చేరింది. టర్న్‌ టేబుల్‌ లేడర్‌ (టీటీఎల్‌)గా పిలిచే ఈ వాహనం బహుళ అంతస్తుల భవనాల్లో అగ్ని ప్రమాదాలు జరిగినప్పుడు సమర్థవంతంగా పనిచేస్తుంది. ఈ వాహనంపై ఉండే ల్యాడర్‌ (నిచ్చెన) 55 మీటర్ల ఎత్తుకు వెళ్తుంది. 18వ అంతస్తు వరకు వెళ్లి అగ్ని ప్రమాదాన్ని నివారించేందుకు దోహదం చేస్తుంది. ఈ ఫైర్‌ ఫైటర్‌ను జపాన్‌ నుంచి కొనుగోలు చేశారు. రాష్ట్రంలోనే ఇది మొదటిది.  విజయవాడ, తిరుపతి, విశాఖ వంటి నగరాల్లో బహుళ అంతస్తుల భవన నిర్మాణాలు ఊపందుకున్నాయి. చదవండి: వీటిని ఎక్కువ కాలం వాడుతున్నారా?.. అయితే డేంజర్‌లో పడ్డట్టే! జనాభా పెరగడం, నగరం ఎక్కువ విస్తరిస్తుండడంతో బహుళ అంతస్తుల నిర్మాణాలు అనివార్యంగా మారాయి. ఈ భవనాల్లో అగ్ని ప్రమాదాలు జరిగితే నివారించడం కష్ట సాధ్యంగా ఉంటోంది. వీటి నివారణకు అగ్నిమాపక శాఖ వద్ద అధునాతన యంత్రాలు లేవు. కొద్దిపాటి అపార్టుమెంట్లు, మాల్స్‌ వంటి వాటిలో ప్రమాదాలు జరిగినప్పుడు ఫైరింజన్ల సహాయంతో మంటలు ఆర్పేవారు. 5 అంతస్తులు, అంతకంటే ఎక్కువ ఎత్తు ఉన్న భవనాల్లో ప్రమాదాలు జరిగితే కొంత ఇబ్బందిగా ఉండేది. బ్రాంటో స్కై లిఫ్ట్‌ అందుబాటులో ఉన్నప్పటికీ దాని పనితీరు పరిమితంగా ఉండేది. టీటీఎల్‌ ప్రత్యేకతలివీ.. టర్న్‌ టేబుల్‌ ల్యాడర్‌ 18 అంతస్తుల భవనాల్లో సైతం ప్రమాదాలను నివారించడంలో అద్భుతంగా పనిచేస్తుంది. మంటల్లో చిక్కుకున్న వారిని రక్షించి, మంటలను ఆర్పడం దీని ప్రత్యేకత. ల్యాడర్‌ 360 డిగ్రీల వరకు తిరుగుతూ మంటల్ని ఆర్పుతుంది. 75 డిగ్రీల వాలుగా నిలవగలదు. సిబ్బంది ఓ వైపు మంటలు ఆర్పుతూనే మరో వైపు మంటల్లో చిక్కుకున్న వారిని రక్షించి ల్యాడర్‌కు అనుసంధానంగా ఉన్న లిఫ్ట్‌ ద్వారా కిందికి పంపుతారు. ల్యాడర్‌ చివర ఉన్న క్యాబిన్‌లో ఎల్‌ఈడీ స్క్రీన్‌ అమర్చి ఉంటుంది. ల్యాడర్‌ ఎంత ఎత్తులో ఉంది, గాలి వేగం ఎంత ఉంది, గాలి ఎటు వీస్తోంది వంటి విషయాలను స్క్రీన్‌ ఆధారంగా తెలుసుకుంటూ సిబ్బంది ఫైర్‌ ఫైటింగ్‌ చేస్తారు. టర్న్‌ టేబుల్‌ ల్యాడర్‌ను మూడుచోట్ల నుంచి ఆపరేట్‌ చేసే అవకాశం ఉంది. ల్యాడర్‌ చివర క్యాబిన్, లిఫ్టర్, వాహనం ఇలా 3 చోట్ల నుంచి దీన్ని ఆపరేట్‌ చేస్తూ మంటలు ఆర్పే అవకాశం ఉంది. ల్యాడర్‌లో పైకి వెళ్లిన సిబ్బంది అక్కడి పరిస్థితిని బట్టి ల్యాడర్‌ను తమకు అనుకూలంగా తిప్పుకునే అవకాశం ఉండటం ఈ వాహనం ప్రత్యేకత.    రాష్ట్రంలోనే ఇది మొదటిది అగ్నిమాపక శాఖకు అధునాతన వాహనాలను సమకూర్చుకుంటున్నాం. ఇందులో భాగంగా టీటీఎల్‌ను జపాన్‌ నుంచి దిగుమతి చేసుకున్నాం. రాష్ట్రంలోనే ఇది మొదటిది. ఇదొక ప్రత్యేకమైన ఫైర్‌ ఫైటర్‌. ఇప్పటివరకు బాధితులను రక్షించడం, మంటలను ఆర్పడం వేర్వేరుగా జరిగేవి. దీని సహాయంతో ఏకకాలంలో రెండు పనులు చేయొచ్చు.  – జి.శ్రీనివాసులు, ప్రాంతీయ అగ్నిమాపక అధికారి

సాక్షి, హైదరాబాద్‌: 21 మీటర్ల ఎత్తు భవనాలకు కూడా  అగ్నిమాపక శాఖ నిరభ్యంతర ధ్రువీకరణ పత్రం (ఎన్‌ఓసీ) నుంచి మినహాయింపు ఇవ్వాలని, ఈ మేరకు ఫైర్‌ సేఫ్టీ యాక్ట్‌లో సవరణలు చేయాలని నరెడ్కో వెస్ట్‌జోన్‌ బిల్డర్స్‌ అసోసియేషన్‌ జీహెచ్‌ఎంసీకి లేఖ రాసింది. ప్రస్తుతం 18 మీటర్ల ఎత్తు (సెల్లార్‌ + స్టిల్ట్‌ + 5 అంతస్తులు) భవనాలకు ఫైర్‌ ఎన్‌ఓసీ నుంచి మినహాయింపు ఉందని.. అదనంగా 3 మీటర్ల ఎత్తును అనుమతి ఇస్తే ట్రాన్స్‌ఫర్‌ ఆఫ్‌ డెవలప్‌మెంట్‌ రైట్స్‌ (టీడీఆర్‌)లకు డిమాండ్‌ పెరుగుతుందని అసోసియేషన్‌ జనరల్‌ సెక్రటరీ ఎం.ప్రేమకుమార్‌ తెలిపారు. ప్రస్తుతం 900 గజాలు దాటిన భవనాలు సెల్లార్‌ +  స్టిల్ట్‌ + 5 ఫ్లోర్లు వేసుకోవచ్చు. భవనం ఎత్తు పెంచడంతో టీడీఆర్‌ వినియోగించుకొని అదనంగా 6వ అంతస్తుతో పాటు సెల్లార్‌కు బదులుగా రెండు స్టిల్ట్‌లు వేసుకునే వెసులుబాటు కలుగుతుందని వివరించారు. సెల్లార్‌ తవ్వకంతో కాలుష్యం పెరగడంతో పాటూ చుట్టుపక్కల వారితో నిత్యం ఏదో ఒక గొడవలు, ఇబ్బందులు జరుగుతున్నాయని తెలిపారు.   - నేషనల్‌ బిల్డింగ్‌ కోడ్‌ (ఎన్‌బీసీ) ప్రకారం భవనం ఎత్తు 15 మీటర్లకు పరిమితి చేసిన సమయంలో ఏపీ ఫైర్‌ సర్వీస్‌ చట్టం–1999 సెక్షన్‌ 13లోని భవనం ఎత్తు 18 మీటర్ల వరకు సవరించిన విషయాన్ని గుర్తు చేశారు. పట్టణాభివృద్ధి మంత్రిత్వ శాఖ 17.5 మీటర్ల ఎత్తు ఉన్న భవనాలు కూడా హైరైజ్‌ గానే భావిస్తుందని, దీన్ని పరిగణనలోకి తీసుకొని ఫైర్‌ సేఫ్టీ యాక్ట్‌లో బిల్డింగ్‌ హైట్‌ను 21 మీటర్లకు పెంచాలని సూచించారు.  -    రోడ్డు వెడల్పును బట్టి 18 అంతస్తుల వరకు ఎకరానికి ఫ్లోర్‌ స్పేస్‌ ఇండెక్స్‌ (ఎఫ్‌ఎస్‌ఐ)ను 1.75 లక్షల చ.అ.లకు పరిమితం చేయాలని సూచించారు. అదనపు అంతస్తులు అవసరం ఉన్న వాళ్లు టీడీఆర్‌లు వినియోగించుకోవాలని సూచించారు. అలాగే ఆక్యుపెన్సీ సర్టిఫికెట్‌ (ఓసీ) వచ్చిన 6 నెలల తర్వాతి నుంచే ప్రాపర్టీ ట్యాక్స్‌ను వసూలు చేయాలని కోరారు.    చదవండి: రెరా నిబంధనలు...గృహ కొనుగోలుదారుల ప్రయోజనాలపై సుప్రీంకోర్టు కీలక వ్యాఖ్యలు..!

Mentally unstable man climbs electricity tower: మానసిక స్థితి సరిగా లేని వ్యక్తులు చేసే పనులు చాలా భయానకంగానూ, ఒక్కొసారి వికృతంగా కూడా ఉంటాయి. అచ్చం అలానే ఇక్కడొక వ్యక్తి స్వీట్లు, మొబైల్‌ ఫోన్‌ కావలంటూ ఏకంగా విద్యుత్‌ టవర్‌ పైకి ఎక్కేశాడు. (చదవండి: ఏకంగా పామునే హెయిర్‌ బ్యాండ్‌గా చుట్టుకుంది!! వైరల్‌ వీడియో) అసలు విషయంలోకెళ్లితే.....బీహార్‌లో ముజఫర్‌పూర్ జిల్లాలోని బర్మత్‌పూర్ గ్రామంలో మానసిక అనారోగ్యంతో ఉన్న వ్యక్తి హై ట్రాన్స్‌మిషన్ విద్యుత్ టవర్‌పైకి ఎక్కాడు. దీంతో ఆ ప్రాంతంలో విద్యుత్తు అంతరాయం ఏర్పడింది. పైగా వ్యక్తి పైనుంచి మొబైల్ ఫోన్, స్వీట్లు కావాలని కోరడం ఆశ్చర్యంగా కల్గించింది. విద్యుత్ శాఖ, పోలీసులు, అగ్నిమాపక శాఖ ఎంతగా ప్రయత్నించినా అతను కిందకు వచ్చేందుకు నిరాకరించాడు. అంతేకాదు ఆ వ్యక్తి హై పవర్‌ ట్రాన్స్‌మిషన్ ఎలక్ట్రిసిటీ టవర్‌లో కూర్చొని అంత ఎత్తు నుంచి కింద పడిపోతానేమో అనే భయం లేకుండా అటు ఇటు తిరుగుతున్నాడు. చలి తీవ్రంగా ఉన్నప్పటికీ వాటిని ఏమాత్రం లెక్కచేయకుండా టవర్‌ ఎక్కాడు. ఆ వ్యక్తిని రక్షించేందుకు స్టేట్ డిజాస్టర్ రెస్పాన్స్ ఫోర్స్ (ఎస్‌డీఆర్‌ఎప్‌)ని పిలిపించారు. అయితే స్థానికులు మాత్రం ఆ వ్యక్తి మానసిక వికలాంగుడని ఇంతకు ముందు కూడా చాలాసార్లు ఇలానే చేశాడని చెబుతున్నారు. అయితే అతన్ని కిందకు రప్పించేందుకు ప్రయత్నాలు మాత్రం ముమ్మరంగా జరుగుతున్నాయి. (చదవండి: ఫోన్‌ కొట్టేశాడని ఏకంగా తలకిందులుగా వేలాడదీశారు...ఐతే చివరికి!!)

సాక్షి, గాంధీఆస్పత్రి (హైదరాబాద్‌): సీఎం కేసీఆర్‌ వ్యూహం ఫలించింది. ముందు జాగ్రత్తతో చేపట్టిన ఆలోచన విధానం సత్ఫలితాలను ఇచ్చింది. వందలాది మంది రోగులు, వైద్యులు, సిబ్బంది పెను ప్రమాదం నుంచి సురక్షితంగా బయటపడ్డారు. కోవిడ్‌ సెకండ్‌వేవ్‌ విజృంభిస్తున్న సమయంలో మహారాష్ట్ర, ఆంధ్రప్రదేశ్‌తోపాటు పలు రాష్ట్రాల్లో కోవిడ్‌ ఆస్పత్రుల్లో అగ్నిప్రమాదాలు సంభవించి తీవ్రమైన ప్రాణ, ఆస్తినష్టాలు వాటిల్లాయి. దేశవ్యాప్తంగా ఆస్పత్రుల్లో జరిగిన అగ్నిప్రమాదాలను గమనించిన సీఎం కేసీఆర్‌ ముందుజాగ్రత్త చర్యలో భాగంగా తెలంగాణలోని కోవిడ్‌ ఆస్పత్రుల్లో అగ్నిమాపకలను ఏర్పాటు చేయాలని ఆదేశించారు. కేవలం ఆదేశాలు జారీ చేయడమే కాకుండా ఏర్పాటు పనులను నిరంతరం సమీక్షించారు.   ► గాంధీఆస్పత్రి ప్రాంగణంలో ఈ ఏడాది ఏప్రిల్‌ 24న అగ్నిమాపక కేంద్రం అందుబాటులోకి  వచ్చింది.   ► నాటి ఆదేశాలే నేడు ఎంతోమంది ప్రాణాలు కాపాడేందుకు దోహదపడ్డాయని పలువురు భావిస్తున్నారు.  ► సికింద్రాబాద్‌ గాంధీఆస్పత్రిలో బుధవారం జరిగిన అగ్నిప్రమాదం ఘటన నేపథ్యంలో ఫైర్‌ సిబ్బంది పనితీరుపై ప్రశంసలజల్లు కురుస్తున్నాయి.   ► సమాచారం అందిన మూడు నిమిషాల వ్యవధిలోనే అగ్నిమాపక సిబ్బంది ఘటనస్ధలానికి చేరుకుని కొన్ని నిమిషాల వ్యవధిలో మంటలను అదుపు చేశారు.  ► ఫైర్‌ సిబ్బంది సకాలంలో స్పందించడంతో పెను ప్రమాదం నుంచి బయట పడ్డామని పలువురు వైద్యులు, సిబ్బంది, రోగులు తెలిపారు.   ► ఆస్పత్రి ప్రాంగణంలో అగ్నిమాపక కేంద్రం ఏర్పాటు చేయకపోతే, ఇతర ప్రాంతాల నుంచి ఫైర్‌ ఇంజన్‌ వచ్చేందుకు కనీసం 15 నుంచి 20 నిమిషాల సమయం పట్టేదని, ఈ వ్యవధిలో మంటలు మరింత విజృంభించి ప్రమాద తీవ్రత మరింత పెరిగేదని, సీఎం కేసీఆర్‌ చేపట్టిన చర్యలే తమ ప్రాణాలు కాపాడాయని సంతోషం వ్యక్తం చేస్తున్నారు.   ► నగరంలోని పలు ఆస్పత్రుల ప్రాంగణాల్లో ఏర్పాటు చేసిన అగ్నిమాపక కేంద్రాలు తెలంగాణ సెక్రటేరియట్‌ కేంద్రంగా పనిచేస్తున్నాయి.   కార్బన్‌ స్మోక్‌  ప్రమాదకరం గాంధీ ఆస్పత్రిలో బుధవారం జరిగిన అగ్ని ప్రమాద ఘటనలో పెను ప్రమాదం తప్పింది. ఈ ఘటనలో సకాలంలో స్పందించాం, విద్యుత్‌ కేబుళ్లు వైర్లను కార్బన్‌తోపాటు పలు రకాల కెమికల్స్‌తో తయారు చేస్తారు. ఇవి కాలుతున్న సమయంలో విపరీతమైన పొగను వెలువరిస్తాచి. ఈ పొగ ఎక్కువగా పీల్చితే ప్రాణాపాయం కలుగుతుంది. మేము మూడు నిమిషాల వ్యవధిలోనే ఘటన స్థలానికి చేరుకున్నాం. అప్పటికే పలు వార్డులు పొగతో నిండి ఉంది. చిన్నారులు, గర్భిణులు, బాలింతలతోపాటు రోగ నిరోధకశక్తి తక్కువగా ఉన్న రోగులపై కార్బన్‌ పొగ తీవ్రమైన ప్రభాపం చూపించే ప్రమాదం ఉంది. ఆస్పత్రుల ప్రాంగణాల్లో ఫైర్‌ ఇంజన్లు ఏర్పాటు చేయాలనే సీఎం కేసీఆర్‌ తీసుకున్న నిర్ణయంతో పెను ప్రమాదం తప్పింది.    – కేవీ నాగేందర్, ఫైర్‌ ఆఫీసర్‌   

తిరువనంతపురం: ఇంకా భూమి మీద నూకలు రాసిపెట్టి ఉంటే ఎంత ప్రమాదం నుంచి అయినా బయట పడతాం అనే సామెతకు నిలువెత్తు ఉదాహరణననే ఈ సంఘటన. 50 అడుగుల లోతు ఉన్న బావిలో పడిపోయిన ఓ మహిళ అదృష్టవశాత్తూ ప్రాణాలతో బయటపడింది. వివరాలు.. కేరళలోని వయనాడ్ కు  చెందిన  ఓ మహిళ ప్రమాదవశాత్తు 50 అడుగుల లోతులో పడిపోయింది. అయితే దాన్ని గమనించిన స్థానికులు వెంటనే  అగ్నిమాపక శాఖవారికి సమాచారం అందించారు. హుటహుటిన వారు సంఘటనా స్థలానికి చేరుకుని ప్రాణాలకు తెగించి ఆమెను రక్షించారు. ప్రస్తుతం దీనికి సంభందించిన వీడియో సోషల్‌ మీడియోలో వైరల్‌ అవుతుంది. ఈ వీడియోలో బావిలో పడిపోయిన మహిళను  పైకి లాగడానికి అగ్నిమాపక సిబ్బంది,స్ధానికులు ఓ నిచ్చెన లాంటి తాడును బావిలోకి దింపి, ఆమెను కాపాడిన దృశ్యాలును చూడవచ్చు. చివరకు ఎలాగోలా ఆమెను బయటకు తీశారు. కానీ ఆమెకు గాయాలేమైనా అయ్యాయా అనే వివరాలు తెలియలేదు. ఈ వీడియోను చూసిన నెటిజన్లు షాక్‌కు గురవుతున్నారు. అయితే మహిళను కాపాడిన అగ్నిమాపక సిబ్బందిపై నెటిజన్లు ప్రశంశల వర్షం కురిపిస్తున్నారు. #WATCH | Kerala: Fire Department officials and locals rescued a woman after she fell into a 50-feet deep well in Wayanad (10.08) pic.twitter.com/5tG6Jq0vx3 — ANI (@ANI) August 10, 2021

సాక్షి, హైదరాబాద్‌ : ఎవరు ఎలా పోతే మాకేంటని పట్టించుకోని కాలమిది. సాటి మనుషులకు ప్రమాదం జరిగినా చూసీచూడనట్టు వెళ్లిపోయే సంఘటనలు ఎన్నో చూస్తుంటాం. మనుషులకే దిక్కులేని ఈ సమాజంలో ఇక పసుపక్షాదుల సంగతి చెప్పనక్కరలేదు. అందులోనూ కాకి లాంటి పక్షులకు దిక్కుండదు. కానీ, కొస ప్రాణంతో కొట్టుమిట్టాడుతున్న ఒక కాకిని కాపాడటానికి కొందరు యువకులు చేసిన ప్రయత్నాలు అభినందనీయం. హైదరాబాద్‌లోని సైనిక్‌పురి ప్రాంతంలో ఒక కాకి విద్యుత్‌ తీగలపై పెనవేసుకుపోయిన పతంగి మాంజాలో చిక్కుకుపోయింది. కాకి కాళ్లకు పెనవేసుకున్న మాంజా నుంచి తప్పించుకోలేక గిలగిలా కొట్టుకుంది. ఒకటికాదు రెండు కాదు. మూడు రోజులుగా అలా కొట్టుకుని నీరసించి ఇంక చేతకాక విద్యుత్‌ వైర్ల నుంచి కిందకు వేలాడింది. అప్పుడప్పుడు బలం తెచ్చుకుని అరవడం మాత్రం ఆపలేదు. మూడురోజులుగా ఈ తతంగం గమనిస్తున్న స్థానికుల్లో ఒకరు విషయాన్ని నగరంలోని వన్యప్రాణులను సంరక్షించే ఎనిమిల్ వారియర్స్ కన్సర్వేషన్ సొసైటీకి చేరవేశారు. అంతే, ఆ వారియర్స్‌ వెంటనే వాలిపోయారక్కడ. ఆ సొసైటీకి చెందిన యువకులు వచ్చి స్థానికంగా అగ్నిమాపక కేంద్రానికి వెళ్లి సహాయాన్ని అర్థించారు.  అగ్నిమాపక సిబ్బంది కూడా సానుకూలంగా స్పందించి ఫైరింజన్‌తో సహా ఘటనా స్థలానికి చేరుకొని కాకిని పరిశీలించి చూడగా అది ప్రాణాలతోనే ఉంది. ఆలస్యం చేయకుండా వెంటనే ఆ ప్రాంతంలో విద్యుత్‌ సరఫరాను నిలిపివేసి, అగ్నిమాపక సిబ్బంది కాకికి చిక్కుకున్న మంజాను తొలగించి కాకిని పట్టుకుని ఎనిమల్‌ వారియర్స్‌ సంస్థకు అందించారు. వారు దానిని జాగ్రత్తగా చేతిలోకి తీసుకొని ఒక వస్త్రాన్ని చుట్టి దానిని సంరక్షణ కేంద్రానికి తరలించారు. కాకి ప్రాణాలను కాపడానికి అక్కడ జరుగుతున్న తతంగమంతా చూస్తున్న స్థానికి ఎనిమల్‌ వారియర్స్‌ ప్రతినిధులను అభినందించారు. ‘పక్కవారికి కష్టం వచ్చినా పట్టించుకోని ఈ కాలంలో ఒక కాకి ప్రాణాల కోసం ఎనిమల్‌ వారియర్స్‌ ప్రతినిధులు పడిన తాపత్రయం అభినందనీయం​’ అంటూ స్థానిక సీనియర్‌ న్యాయవాది కే. రాజగోపాల్‌రెడ్డి ‘సాక్షి’కి తెలిపారు. ఈ సంస్థ పెంపుడు జంతువులు, ఇంకా ఇతరత్రా జంతువులు ఆపదలో ఉన్నప్పుడు సాయం అందించడానికి ముందుంటుంది.  

సాక్షి, కాకినాడ: విపత్తుల సమయంలో అగ్నిమాపక సిబ్బంది సేవలు అభినందనీయమని హోం మంత్రి మేకతోటి సుచరిత అన్నారు. ఆమె శుక్రవారం తూర్పుగోదావరి జిల్లా కాకినాడలో మీడియాతో మాట్లాడుతూ రాష్ట్రంలో 29 అగ్నిమాపక కేంద్ర భవనాల అభివృద్ధికి రూ.28 కోట్ల రూపాయల నిధులు మంజూరు చేశామని వెల్లడించారు. అగ్నిమాపక శాఖ భవనాలకు శాశ్వత నిర్మాణాలు చేపడతామని చెప్పారు. (చేతులేత్తి మొక్కుతా.. వదిలేయండి: ఎంపీ మాధవ్‌) కష్టకాలంలో కూడా నవరత్న పథకాలు అమలు.. నవరత్న పథకాలపై ముఖ్యమంత్రి వైఎస్‌ జగన్‌మోహన్‌రెడ్డి ఇచ్చిన ప్రతి హామీని కరోనా కష్టకాలంలో కూడా నెరవేరుస్తున్నారని సుచరిత తెలిపారు. ఈ విపత్తు సమయంలో సున్నా వడ్డీ కింద మహిళా సంఘాలకు రూ.1400 కోట్లు  ఇచ్చారన్నారు. ప్రతి ఏడాది మే నెలలోనే రైతు భరోసా సాయం అందిస్తున్నామని పేర్కొన్నారు. దేశంలో ఎక్కడా లేని విధంగా ఆంధ్రప్రదేశ్‌లోనే కరోనా నిర్ధారణ పరీక్షలు అధికంగా జరుగుతున్నాయని మంత్రి సుచరిత వివరించారు. (దశలవారీ మద్యనిషేధంపై కసరత్తు షురూ..)

సాక్షి, విశాఖపట్నం: కచ్చలూరు బోట్ ప్రమాద ఘటనలో ఫైర్ సిబ్బంది అందించిన సేవలు గొప్పవని హోంశాఖమంత్రి మేకతోటి సుచరిత అన్నారు. సుర్యాబాగ్‌లోని మోడల్‌ ఫైర్‌ స్టేషన్‌ను హోంమంత్రి సుచరిత ఆదివారం ప్రారంభించారు. ఈ సందర్భంగా ఆమె మాట్లాడుతూ.. అగ్నిమాపకశాఖను మరింత పటిష్టం చేసి సిబ్బంది కొరత లేకుండా చూస్తామని సుచరిత పేర్కొన్నారు. సిబ్బంది కొరత ఉంటే జనవరిలో ఉద్యోగాల భర్తీ కోసం నోటిఫికేషన్ ఇవ్వనున్నట్లు ఆమె వెల్లడించారు. ప్రమాదాలు సంభవింనప్పుడు ఆపన్నహస్తం అందిస్తున్న ఫైర్‌ సిబ్బందికి ఆమె అభినందనలు తెలిపారు. ఫైర్‌ సిబ్బందికి సమస్యలుంటే ముఖ్యమంత్రి వైఎస్‌ జగన్‌మోహన్‌రెడ్డి దృష్టికి తీసుకువెళ్లి పరిష్కరిస్తామని పేర్కొన్నారు. 1942లో స్థాపించబడిన ఫైర్స్టేషన్‌ను రూ. కోటి 24 లక్షలతో వీఎంఆర్డీఏ సహకారంతో కొత్త భవనం సమకూరిందని హోంమంత్రి సుచరిత తెలిపారు. అగ్ని ప్రమాదాలు జరిగేటప్పుడు 54 మీటర్లు ఎత్తువరకు మంటలను నియంత్రించే ఆధునిక పరికరాలు ఉన్నాయని మంత్రి సుచరిత తెలిపారు. 480 మంది ఫైర్ సిబ్బందిని నియమించామని సుచరిత పేర్కొన్నారు. అన్ని ప్రాంతాలు అభివృద్ధి చెందలనేది  సీఎం వైఎస్ జగన్ ఆలోచన అని ఆమె వ్యాఖ్యానించారు. ప్రాంతీయ వాదాలు రాకూడదనే అన్ని ప్రాంతాలు అభువృద్ధి కోసం సీఎం జగన్‌ నిర్ణయం తీసుకున్నారని గుర్తుచేశారు. నిపుణుల కమిటీ నివేదికపై సీఎం జగన్‌తో చర్చిస్తామని సుచరిత పేర్కొన్నారున. రైతుల వద్ద తీసుకున్న భూములు ఉన్న ప్రాంతాలో కూడా అభివృద్ధి జరుగుతుందని హోంమంత్రి సుచరిత పేర్కొన్నారు. ఈ సందర్భంగా విశాఖ వీఎంఆర్డీఏ చైర్మన్‌ ద్రోణంరాజు శ్రీనివాస్‌ మాట్లాడుతూ.. ప్రాణాలకు తెగించి విధులు నిర్వహించే అగ్నిమాపక సిబ్బంది సేవలు అభినందనీమని ప్రశంసించారు. అగ్నిమాపక, పోలిసు ఉద్యోగులకు కావాల్సిన మౌలిక సదుపాయాలు అందిస్తామని ఆయన అన్నారు. విశాఖపట్నం ఎంపీ ఎంవీవీ సత్యనారాయణ మాట్లాడుతూ.. ప్రజలు ప్రాణాలు కాపాడటంలో ముందుండే ఫైర్ సిబ్బంది సేవలు అభినందనీయమని కొనియాడారు. హూద్‌హూద్‌లో ఫైర్ సిబ్బంది అందించిన సేవలు మర్చిపోలేమని ఎంవీవీ సత్యనారాయణ పేర్కొన్నారు.

విశాఖపట్నం, రావికమతం (చోడవరం): గుమ్మాళ్లపాడు గ్రామంలో ఒక బావిలో కూరుకుపోయిన రైతును రావికమతం అగ్నిమాపక సిబ్బంది సురక్షతంగా తాళ్లతో బయటకు తీసి రక్షించారు. శుక్రవారం జరిగిన ఈ సంఘటన వివరాలిలా ఉన్నాయి. గుమ్మాళ్లపాడు గ్రామానికి చెందిన బంటు వెంకట రమణ(50) తన పొలానికి బావిలోని నీటిని ఇంజన్‌తో తోడుకున్నాడు. అనంతరం ఇంజన్‌ పైపు బావిలో ఉండటంతో దానిని తీసేందుకు దిగి ఊబిలో చికుక్కున్నాడు. అంతకంతకూ దిగిపోతుండటంతో గట్టిగా కేకలు వేశాడు. ఆ కేకలకు సమీప రైతులు వచ్చి తాళ్లు అందించినప్పటికీ ఫలితం లేకపోవడంతో అగ్నిమాపక సిబ్బందికి సమాచారం అందించారు. ఈ మేరకు సిబ్బంది లావేటి నాగేశ్వరరావు, రమేష్, వరహాలు రైతును సురక్షితంగా బయటకు తీశారు.

ఏనాటికైనా ఫైర్‌ ఫైటర్‌ అయి తీరాలన్న ఆమెలోని రగిలే జ్వాల ఆమె చేత ప్రొఫెసర్‌ ఉద్యోగాన్ని మాన్పించి ఆమెను ఫైర్‌ ఫైటర్‌ చేసింది. ఈ మాట మనదేశంలో ఇప్పటికే ఇద్దరు మహిళలు అనేశారు. ఇప్పుడు మరో మహిళ ప్రశ్నిస్తున్నారు. ఫైర్‌ ఫైటర్‌ ఉద్యోగంలో చేరిన తొలి మహిళ హర్షిణి కన్హేకర్‌ను ఆ ఉద్యోగంలో నియమించడానికి ఫైర్‌ డిపార్ట్‌మెంట్‌ చట్టాల్లోంచి వెసులుబాటు తెచ్చుకుంది. కన్హేకర్‌ వేసిన ఆ బాటలో మహిళల నడక మొదలైంది. కన్హేకర్, తానియా సన్యాల్‌ తర్వాత, ఏడాదిలోనే ఇప్పుడు మూడో మహిళ ఈ సాహసోపేతమైన ఉద్యోగంలోకి వచ్చారు. కేరళకు చెందిన రేమ్యా శ్రీకాంతన్‌ ఈ నెల ఒకటో తేదీన చెన్నై అంతర్జాతీయ విమానాశ్రయంలో ఫైర్‌ సర్వీస్‌ విభాగంలో జూనియర్‌ అసిస్టెంట్‌గా ఉద్యోగంలో చేరారు. చెన్నై ఎయిర్‌పోర్టులో ఈ ఉద్యోగంలో చేరిన తొలి మహిళ రేమ్యా. దక్షిణాది రాష్ట్రాలకు కూడా ఇది తొలి రికార్టే. హర్షిణి కన్హేకర్‌కి యూనిఫామ్‌ సర్వీస్‌లో చేరాలనేది కల. ఆ కలను నెరవేర్చుకోవడానికి ఆమె ఫైర్‌ ఫైటర్‌ అయ్యారు. ఇప్పుడు ఈ కేరళ అమ్మాయి రేమ్యా శ్రీకాంతన్‌కి సవాళ్లతో నిండిన ఉద్యోగంలో రాణించాలని కోరిక. తిరువనంతపురానికి చెందిన రేమ్యా స్ట్రక్చరల్‌ ఇంజనీరింగ్‌లో పోస్ట్‌ గ్రాడ్యుయేషన్‌ చేశారు. ‘ఎల్‌బిఎస్‌ (లాల్‌ బహదూర్‌ శాస్త్రి) ఇన్‌స్టిట్యూట్‌ ఫర్‌ ఉమెన్‌’లో అసిస్టెంట్‌ ప్రొఫెసర్‌గా చేరారు.ఇప్పుడు ఆ ఉద్యోగాన్ని వదిలేసి ఫైర్‌ ఫైటర్‌గా వచ్చారు. రెండేళ్ల పాపాయికి తల్లి అయిన రేమ్యా ఫైర్‌ ఫైటర్‌ అవాలన్న తన కలను నెరవేర్చుకోవడానికి కఠోరమైన శ్రమను ఎదుర్కొన్నారు. దేహదారుఢ్యం కోసం కఠినమైన ఎక్సర్‌సైజ్‌లు చేసి తనను తాను తీర్చిదిద్దుకున్నారు. ‘‘అమ్మాయిలు అన్ని ఉద్యోగాలనూ చేయగలుగుతారని చెప్పడానికి నేనొక ఉదాహరణ అయినందుకు సంతోషంగా ఉంది. ఈ బాటలో తప్పకుండా మరికొంత మంది అమ్మాయిలు నడుస్తారు’’ అంటున్నారు రేమ్యా. పాపాయిని పెంచుకుంటూ శిక్షణ తీసుకోవడం కొంచెం కష్టంగా అనిపించిన మాట వాస్తవమేనంటూ... ‘‘కొంతకాలం పాపాయిని చూసుకుంటూనే ఫిజికల్‌ ట్రైనింగ్‌ తీసుకున్నాను. ఢిల్లీ వాతావరణాన్ని తట్టుకోవడం  కష్టమని పాపాయిని తీసుకెళ్లలేదు. ఢిల్లీలో ట్రైనింగ్‌ పీరియడ్‌ నాలుగు నెలలు మాత్రం పాపాయిని పూర్తిగా నా భర్త శ్రీకాంతనే చూసుకున్నారు’’ అన్నారామె భర్త పట్ల కృతజ్ఞతగా.

సాక్షి, నెల్లూరు : జిల్లా కేంద్రంలోని ఓ భవనంలో ఆదివారం రాత్రి భారీ అగ్ని ప్రమాదం చోటుచేసుకుంది. చిన్నబజారు ప్రాంతంలోని శ్రీ కనకదుర్గా మెటల్‌ ఎంటర్‌ ప్రైజెస్‌ గోదాంలో ఈ ప్రమాదం సంభవించింది. ఈ ప్రమాదంలో కోట్లాది రూపాయల విలువ గల ప్లాస్టిక్‌ సామాన్లు అగ్నికి ఆహుతయ్యాయి. వెంటనే అప్రమత్తమైన అగ్నిమాపక సిబ్బంది భవనంలోని వారిని ఖాళీ చేయిస్తూ..రాత్రి నుంచి మంటలను అదుపులోకి తీసుకు రావడానికి ప్రయత్నిస్తున్నారు. ఈ నేపథ్యంలో జిల్లా ఎస్పీ ఐశ్వర్య రస్తోగి, కలెక్టర్‌ శేషగిరి బాబు, ఇతర అధికారులు సంఘటన స్థలాన్ని పరిశీలించారు. 

సాక్షి, అనకాపల్లి టౌన్‌: ఓ చిన్నారి చేసిన ఘనకార్యం అటు అధికారుల్ని.. ఇటు స్థానికుల్ని పరుగులు పెట్టించింది. తల్లిదండ్రులకి ముచ్చెమటలు పట్టించింది. చివరికి అగ్నిమాపక దళం ప్రవేశంతో ఉత్కంఠకు తెరపడింది.  అనకాపల్లి పట్టణంలోని చవితినవీధి ఆర్కే అపార్ట్‌మెంట్‌ ప్లాట్‌ నంబర్‌ 203లో శుక్రవారం అసలు ఏం జరి గింది. ఆ ప్లాట్‌లో  తోకల ప్రవీణ్‌రాజా, వసుధ దంపతులు నివాసం ఉంటున్నారు. వీరికి 14 నెలల మహదేవ్‌ అనే బాలుడు సంతానం. శుక్రవారం ప్రవీణ్‌రాజా ఇంట్లోని హాల్‌ పనిలో నిమగ్నపోయారు. ఆయన భార్య వసుధ వంటపనిలో బిజీగా ఉన్నారు. అక్కడే ఆడుకుంటున్న మహదేవ్‌ వంటింటి తలుపును వేశాడు. దానికి ఆటోమేటిక్‌ లాక్‌ అమర్చిన కారణంగా గడియపడింది. ఈ విషయాన్ని తల్లిదండ్రులిద్దరూ గమనించలేదు.  పనిమీద తండ్రి మెయిన్‌ డోర్‌ దగ్గరకు బయటకు వెళ్లాడు. అప్పటి వరకు ఆడుకుంటున్న చిన్నారి పక్కగదిలోకి వెళ్లి తలుపేసుకున్నాడు. దానికి కూడా ఆటోమేటిక్‌ లాక్‌ అమర్చి ఉండడంతో అది కూడా మూసుకుపోయింది. లోపలి నుంచి చిన్నారి తలుపుతీద్దామని ప్రయత్నించినా సాధ్యం కాకపోవడంతో ఏడుపు మొదలుపెట్టాడు. వంట గదిలో ఉన్న తల్లికి ఏడుపు వినిపించింది. బయటకొచ్చేందుకు యత్నించింది. తలుపు ఆటోమేటిక్‌గా లాక్‌ అయిన పరిస్థితిని తెలుసుకుంది. భయంతో కేకలు...  చిన్నారి ఏడుపు ఓ వైపు.. ఏం జరుగుతుందోనన్న ఆందోళన మరోవైపు.. భయంతో కేకలు వేయడం మొదలుపెట్టింది. అవి విన్న స్థానికులు పెద్దసంఖ్యలో అపార్టుమెంట్‌ కిందకు చేరుకున్నారు. ఏం జరుగుతుందో తెలియక ఒకటే ఉత్కంఠ. ఇంతలో బయటకెళ్లిన తండ్రి ఇంటికి చేరుకున్నారు. మెయిన్‌ డోర్‌ ఓపెన్‌ చేసి లోపలికెళ్లారు. ఆయనకు పరిస్థితి అర్థమైంది. రెండు గదుల తలుపులూ తీసేందుకు యత్నించారు. వీలుకాకపోవంతో పక్కిం టి వారి సాయంతో ఫైర్‌ సిబ్బందికి సమాచారమిచ్చారు. గంట పాటు రెస్క్యూ...  అగ్నిమాపక శాఖ జిల్లా సహాయ అధికారి మార్టిన్‌ లూథర్‌కింగ్‌ తన సిబ్బందితో సంఘటనా స్థలానికి చేరుకున్నారు. ఆపరేషన్‌ మొదలుపెట్టారు. అపార్ట్‌మెంట్‌పై నుంచి తాడు సాయంతో హోంగార్డు గోపీ నెమ్మదిగా బాలుడు ఉన్న గదిలోకి ప్రవేశించాడు.  లోపలి నుంచి లాక్‌ అయిన తలుపును తెరిచాడు. అలాగే వంటగది తలుపును కూడా ఓపెన్‌ చేశాడు. బాలుడ్ని సురక్షితంగా తల్లిదండ్రులకు అప్పగించారు. ఈ ఆపరేషన్‌కు గంట సమయం పట్టింది. అగ్నిమాపక సిబ్బంది చొరవను స్థానికులు అభినందిచారు. ఈ ఆపరేషన్‌లో అగ్నిమాపక శాఖాధికారి ఆర్‌.వెంకటరమణ, సిబ్బంది కృష్ణప్రసాద్, మదీన, గణేష్, నాయుడుబాబు పాల్గొన్నారు.

సాక్షి, విశాఖపట్నం : పిల్లలు చేసే అల్లరితో తలప్రాణం.. తోకకొచ్చింది అని కుటుంబ సభ్యులు విసుక్కుంటుంటారు. అయితే, పద్నాలుగు నెలల వయసున్న ఓ బుడతడు చేసిన పనికి అటు తల్లి దండ్రులు, ఇటు కాలనీ వాసులు, ఒక రకంగా ఆ ఊరుఊరంతా టెన్షన్‌ పడ్డారు. ఊహించని పరిణామంతో ఇంట్లో ‘బందీ’లైన తల్లీ, కొడుకు అగ్నిమాపక సిబ్బంది సాయంతో బయటపడటంతో ఊపిరిపీల్చుకున్నారు. ఈ ఘటన శుక్రవారం మధ్యాహ్నం ఒంటిగంటకు జరిగింది. వివరాలు.. అనకాపల్లి పట్టణంలోని చవితి వీధిలో గల ఆర్కే అపార్ట్‌మెంట్‌ మూడో అంతస్థులో ఓ కుంటుంబం నివాసముంటోంది. తల్లి వంట గదిలో ఉండగా.. 14 నెలల పిల్లోడు ఆ గదికి బయట గడియ పెట్టి ఆడుకుంటున్నాడు. అదేక్రమంలో ఇంకో గదిలోకి వెళ్లాడు. అయితే, అకస్మాత్తుగా ఆ రూమ్‌ డోర్‌ లాక్‌ అయింది. దీంతో బిడ్డా, తల్లి వేర్వేరు గదుల్లో చిక్కుకు పోయారు. ఆ సమయంలో ఇంట్లో ఎవరూ లేరు. దీంతో తల్లి కేకలు, పిల్లవాని ఏడుపుతో పక్క ప్లాట్లలోని వారికి విషయం తెలిసింది. వారు చిక్కుకు పోయిన ఫ్లాట్‌ మెయిన్‌ గేట్‌ కూడా లాక్‌ చేసి ఉండటంతో అగ్నిమాపక సిబ్బందికి సమాచారమిచ్చారు. తాడు సాయంతో అపార్ట్‌మెంట్‌పై నుంచి ప్లాట్‌ లోనికి ప్రవేశించిన సిబ్బంది లాక్ ఓపెన్ చేసి పిల్లవాడిని, తల్లిని కాపాడారు. ఈ రెస్క్యూ ఆపరేషన్‌లో జిల్లా అగ్నిమాపక అధికారి సీహెచ్‌ఎంఎల్‌ కింగ్, స్థానిక అగ్నిమాపక అధికారి ఆర్‌.వెంకటరమణ ఆధ్వర్యంలో సిబ్బంది కృష్ణప్రసాద్, మదిన, గణేష్, నాయుడుబాబు తదితరులు పాల్గొన్నారు. అగ్నిమాపక సిబ్బందిపై స్థానికులు ప్రశంసలు కురిపించారు.

సాక్షి, అమరావతి : రాష్ట్రంలో అవసరమైన చోట మరిన్ని ఫేర్‌ స్టేషన్లు ఏర్పాటు చేస్తామని రాష్ట్ర హోం మంత్రి సుచరిత అన్నారు. సోమవారం ఆమె అసెంబ్లీ ప్రాంగణంలో కొత్త అగ్ని మాపక వాహనాలకు జెండా ఊపి  ప్రారంభించారు. అనంతరం ఆమె మాట్లాడుతూ..రాష్ట్రంలో ప్రస్తుతం 173 ఫైర్‌ స్టేషన్లు, 5 టెంపరరీ స్టేషన్లు ఉన్నాయని, అవసరమైతే మరిన్ని స్టేషన్లను ఏర్పాటు చేస్తామన్నారు. అగ్ని ప్రమాదాల నష్టాన్ని తగ్గించేందుకు కొత్తగా 25 వాహానాలకు పర్మీషన్‌ ఇచ్చామన్నారు. రాయలసీమ సబంధించిన 5 వాహనాలు కర్నూల్‌కు తరలించారని, ఇక్కడ అవసరమైన వాహనాలు సమకూరుస్తామని స్పష్టం చేశారు. ఈ బడ్జెట్‌లో వాహానాల కొనుగోలుకు రూ.4 కోట్లు, ఫాబ్రికేషన్‌కు రూ.6 కోట్లు కేటాయించామన్నారు. నూతన వాహానాలతో పాటు మరిన్ని ఫైర్‌ స్టేషన్లు ఏర్పాటు చేసి విపత్తు నివారణకు చర్యలు తీసుకుమామని మంత్రి సుచరిత పేర్కొన్నారు.   

సాక్షి, కృష్ణా: విజయవాడ లెనిన్ సెంటర్ సమీపంలో నూతనంగా నిర్మించిన జిల్లా ఫైర్ స్టేషన్‌ను రాష్ట్ర హోంమంత్రి మేకతోటి సుచరిత శనివారం ప్రారంభించారు. ఈ సందర్భంగా ఆమె మాట్లాడుతూ.. నగరంలో కొత్తగా ఫైర్ స్టేషన్ ప్రారంభించడం సంతోషంగా ఉందన్నారు. రాష్ట్రంలో మొత్తం 184 ఫైర్ స్టేషన్‌లు ఉన్నాయని.. ఇంకా కొన్ని ప్రాంతాల్లో ఏర్పాటు చేయాలని డిమాండ్స్ వినిపిస్తున్నట్లు ఆమె తెలిపారు. ఒకప్పుడు తాటాకు ఇల్లు ఎక్కువగా ఉండటం వల్ల అగ్నిప్రమాదాలు ఎక్కువగా జరిగేవని.. దివంగత ముఖ్యమంత్రి వైఎస్ రాజశేఖర్‌ రెడ్డి ప్రతి పేదవాడికి గృహ నిర్మాణం చేపట్టడంతో ఈ సమస్య చాలా వరకు తగ్గిందని హోంమంత్రి అభిప్రాయపడ్డారు. ఓఎంజీసీ వంటి గ్యాస్ ప్రాజెక్టులు ఉన్న చోట కూడా కొత్త స్టేషన్లు ఏర్పాటు చేస్తామని సుచరిత తెలిపారు. ఏదైనా ఘటన జరిగినప్పుడు సహాయసహకారాలు అందించడానికి ఫైర్ సిబ్బంది ముందుంటారని అన్నారు. పెండింగ్‌లో ఉన్న ఫైర్‌ స్టేషన్‌లను త్వరలోనే పూర్తి చేస్తామని సుచరిత స్పష్టం చేశారు. అలాగే సిబ్బంది సమస్యలను కూడా ముఖ్యమంత్రి దృష్టికి తీసుకెళ్లి, సమస్యను పరిష‍్కరించే విధంగా చర్యలు తీసుకుంటామని తెలిపారు. సిబ్బంది కొరత ఉన్న నేపథ్యంలో వాటిని కూడా త్వరలోనే భర్తీ చేస్తామన్నారు.

న్యూఢిల్లీ: కేంద్ర దర్యాప్తు సంస్థ (సీబీఐ) అదనపు డైరెక్టర్‌ బాధ్యతల నుంచి మన్నెం నాగేశ్వరరావును తొలగిస్తూ కేంద్ర ప్రభుత్వం అనూహ్య నిర్ణయం తీసుకుంది. 1986 ఒడిశా కేడర్‌కు చెందిన ఆయనను అగ్నిమాపక దళ, పౌర రక్షణ, హోంగార్డుల డైరెక్టర్‌ జనరల్‌గా బదిలీ చేసింది. ఈ మేరకు కేంద్ర హోం శాఖ ఉత్తర్వులను జారీ చేసింది. శుక్రవారం ప్రధాని మోదీ అధ్యక్షతన జరిగిన కేబినెట్‌ నియామకాల కమిటీ సమావేశం జరిగిన కొద్ది గంటల్లోనే ఈ ఉత్తర్వులు వెలువడ్డాయి. సీబీఐతో పోలిస్తే ఫైర్‌ సర్వీసెస్‌ను తక్కువ కేటగిరీ డిపార్ట్‌మెంట్‌గా భావిస్తారు. సీబీఐ అదనపు డైరెక్టర్‌గా ఉన్న ఆయనను అదనపు డైరెక్టర్‌ జనరల్‌ స్థాయికి తగ్గించినట్లవుతుంది. అంటే ఫైర్‌ సర్వీసెస్‌ డీజీ పోస్టు.. సీబీఐలో అదనపు డైరెక్టర్‌ జనరల్‌ స్థాయికి సమానమైంది. ఒక రకంగా ఆయనకు ఇది డిమోషన్‌ లాంటిది. తాజా బదిలీతో ఆయన తన పదవీకాలం ముగిసే(జూలై 31, 2020) వరకు లేదా తదుపరి ఉత్తర్వుల వరకు ఆయన ఇదే కేడర్‌లో కొనసాగాల్సి ఉంది. ఇంతకుముందు కూడా కేంద్ర ప్రభుత్వం గత సీబీఐ చీఫ్‌ అలోక్‌ వర్మను సైతం ఇదే విధంగా ఫైర్‌ సర్వీసెస్‌ డిపార్ట్‌మెంట్‌కు బదిలీ చేయగా.. ఆయన ఆ పదవిని తీసుకునేందుకు అప్పట్లో తిరస్కరించారు. నాగేశ్వరరావు సీబీఐ తాత్కాలిక డైరెక్టర్‌గా రెండు సార్లు నియమితులయ్యారు. కాగా నాగేశ్వరరావు స్వస్థలం తెలంగాణలోని జయశంకర్‌ జిల్లా(ఉమ్మడి వరంగల్) మండపేట మండలం బోర్‌నర్సాపూర్ గ్రామం. 1986 ఒడిశా క్యాడర్‌కు చెందిన నాగేశ్వరరావు సీబీఐ తాత్కాలిక డైరెక్టర్‌గా రెండుసార్లు నియమితులయ్యారు.

బెంగళూరు/రాయచూరు రూరల్‌: తమ ఫిర్యాదుల ను ఇచ్చేందుకు రాయ్‌చూర్‌ జిల్లా యెర్మారస్‌ థర్మల్‌ పవర్‌ స్టేషన్‌ (వైటీపీఎస్‌) ఉద్యోగులు సీఎం హెచ్‌డీ కుమార స్వామి వెళ్తున్న కాన్వాయ్‌ను అడ్డుకున్నారు. దీంతో ఉద్యోగుల తీరుపై సీఎం తీవ్ర అసహనం వ్యక్తంచేశారు. ‘గ్రామ వాస్తవ్య’కార్యక్రమంలో భాగంగా కుమారస్వామి రాయ్‌చూర్‌కి వెళ్లారు. ‘మీరు నరేంద్ర మోదీకి ఓటు వేశారు. కానీ మీ పనులను నేను చేయాలనుకుంటున్నారు. నేను మీకు గౌరవం ఇవ్వాలని కోరుకుంటున్నారు. మీపై లాఠీ చార్జ్‌ చేయాలా? ఇక్కడి నుంచి వెళ్లిపోండి’అని వైటీపీఎస్‌ ఉద్యోగులపై కుమార స్వామి గట్టిగా అరిచారు. దీంతో అక్కడున్న వారంతా ఒక్కసారిగా నిర్ఘాంతపోయారు. అనంతరం కుమార స్వామి ఓ టీవీ చానల్‌లో మాట్లాడుతూ ‘ఉద్యోగుల సమస్యలను పరిష్కరించడానికి 15 రోజుల సమయం కావాలని కోరాను. అయినప్పటికీ వారు నేను వెళ్తున్న వాహనాన్ని అడ్డుకున్నారు. దీంతో నేను సహనం కోల్పోయాను’అని తెలిపారు. ఒక వేళ ప్రధాన మంత్రి కాన్వాయ్‌ను ఎవరైనా అడ్డుకుంటే ఊరుకుంటారా? అని ప్రశ్నించారు. ‘మా ప్రభుత్వం సహనంతో ఉంది. కానీ అసమర్థమైంది మాత్రం కాదు. పరిస్థితులను ఎలా ఎదుర్కోవాలో మాకు తెలుసు’అని పేర్కొన్నారు. గ్రామ వాస్తవ్య కార్యక్రమంలో భాగంగా సీఎం రాయ్‌చూర్‌ జిల్లా కరేగుడ్డలో ఉన్న ప్రభుత్వ ప్రాథమికోన్నత పాఠశాలలో రాత్రి గడపనున్నారు.  

సాక్షి,దర్మసాగర్‌:అనుమానం నిజమైంది.అర్బన్‌జిల్లా ధర్మసాగర్‌ మండల కేంద్రానికి సమీపంలోని వ్యవసాయబావిలో శనివారం గుర్తించిన టార్పాలిన్‌ కవర్‌లో ఉన్నది మృతదేహమేనని తేలింది.ఆదివారం ధర్మసాగర్‌ పల్లెబండ సమీపంలోని రైతు కొట్టె విజయభాస్కర్‌ వ్యవసాయబావిలో మృతదేహం లభ్యమవడంతో స్థానికులు ఆందోళన వ్యక్తం చేస్తున్నారు. స్థానికులు, పోలీసులు తెలిపిన వివరాల ప్రకారం.. గుర్తు తెలియని సుమారు 30– 40 సంవత్సరాల వయస్సు కలిగిన వ్యక్తిని దుండగులు పదునైన ఆయుధంతో విచక్షణ రహితంగా శరీరంలోని వివిధ భాగాలపై దాడి చేసి దారుణంగా హత్య చేశారు. అనంతరం మృతదేహాన్ని బెడ్‌షీడ్‌(చీరలతో కుట్టినబొంత)లో చుట్టి దానిపై నుంచి టార్పాలిన్‌ కవర్‌లో ప్యాక్‌ చేశారు. అనంతరం దాని వెనుక పొడవైన బరువు ఉన్న బండరాయితో కట్టి వ్యవసాయ బావిలో పడవేశారు. కాగా మృతదేహాన్ని వ్యవసాయబావిలో పడేసి వారం రోజుల పైనే అవుతుందని పోలీసులు అభిప్రాయపడ్డారు. మృతుడి ఒంటిపై ఫుల్‌హ్యాండ్స్‌ షర్ట్, మొకాలివరకు ఉన్న గుడ్డతోపాటు, మృతుడి జేబులో బీడీకట్ట, అగ్గిపెట్టె ఉన్నాయి.  ఇరవైనాలుగు గంటల తర్వాత మృదేహం వెలికి... దారుణహత్యకు గురైన గుర్తు తెలియని వ్యక్తి మృతదేహాన్ని స్థానికుల సహకారంతో పోలీసులు, ఫైర్‌ సిబ్బంది ఇరవైనాలుగు గంటల పాటు కష్టపడిపైకి తీశారు. కాజీపేట ఏసీపీ నర్సింగరావు, ఎల్కతుర్తి ఎస్సై శ్రీనివాస్‌ జీ, ఎస్సై కరీం, వేలేరు ఎస్సై వీరభద్రరావు ఉదయం ఘటనా స్థలానికి క్రేన్‌ను తెప్పించి తాళ్లతో బయటకు తీసేందుకు చేసేందుకు ప్రయత్నించి విఫలమయ్యారు. అనంతరం హన్మకొండ ఫైర్‌ స్టేషన్‌కు సమాచారం అందించగా జిల్లా ఫైర్‌ అధికారి భగవాన్‌ రెడ్డి, స్టేషన్‌ ఫైర్‌ ఆఫీసర్లు నాగరాజులు సిబ్బందితో ఘటనా స్థలానికి చేరుకున్నారు. వారి సుచనల మేరకు బావిలోని నీటిని పూర్తిగా బయటకు తోడేసి, క్రేన్‌ సాయంతో నిచ్చెనను బావిలోకి దింపారు. అనంతరం గ్రామానికి చెందిన చిలుక రవీందర్, కొట్టె ప్రభాకర్‌లను ఆక్సిజన్‌ మాస్క్‌ వేసి బావిలోకి పంపించారు. వీరిద్దరు సుమారు అరగంటపాటు కష్టపడి మృతదేహాన్ని తాళ్లతో కట్టి బయటకు తీశారు. మృతుడి వివరాలు తెలుసుకుని హత్య కేసును చేధించేందుకు అన్ని విధాలుగా ప్రయత్నిస్తామని కాజీపేట ఏసీపీ నర్సింగరావు తెలిపారు.  వరుస ఘటనలతో భయాందోళన..  ధర్మసాగర్‌ మండల పరిధిలో కొద్ది నెలల వ్యవధిలోనే వరుస హత్యలు చోటు చేసుకోవటంతో మండల వాసులు భయాందోళనలను వ్యక్తం చేస్తున్నారు. గత నెలలో ముప్పారం శివారులో హత్యతోపాటు, మండలంలోని నారాయణగిరి గ్రామానికి చెందిన మరో వ్యక్తి వేలేరు సమీపంలో పట్టపగలే దారుణహత్యకు గురయ్యారు. కాగా ప్రస్తుతం మృతదేహం బయటపడిన వ్యవసాయబావిలో మూడు కిలో మీటర్లదూరంలో సుమారు ఎనిమిది నెలల క్రితం ఓ యువతి మృతదేహం సైతం బయటపడగా ఇప్పవరకు ఆ మృతురాలి వివరాలు సైతం తెలియరాలేదు. ఇప్పటికైనా పోలీసులు ముందస్తు చర్యలు తీసుకుని మరోసారి ఇటువంటి ఘటనలు జరుగకుండా చూడాలని, ఇప్పటి వరకు జరిగిన హత్యలకు కారణమైన వారిని గుర్తించి చట్టప్రకారం కఠినంగా శిక్షించాలని స్థానికులు కోరుతున్నారు.  

ఒంగోలు: స్థానిక రిమ్స్‌ వద్ద ఉన్న డీమార్ట్‌ షోరూంలో సోమవారం మధ్యాహ్నం డేంజర్‌ అలారం మోగింది. దీనికి తోడు స్టోర్‌ గదిలో అగ్ని ప్రమాదం చోటుచేసుకుందని, వినియోగదారులు ఇన్‌గేటు, ఎగ్జిట్‌ గేటు ద్వారా సురక్షితంగా బయటకు చేరుకోవాలని అక్కడి సిబ్బంది మైక్‌లో ప్రచారం చేశారు. ఎట్టి పరిస్థితుల్లోనూ లిఫ్టు వినియోగించొద్దంటూ సిబ్బంది సూచనలు చేశారు. కొనుగోలుదారుల్లో తీవ్ర అలజడి రేగింది. ప్రమాదం ముంచుకొస్తుందనే భయంతో వారంతా మెట్ల మార్గం వైపు పరుగులు తీశారు. అంతా ఒకేసారి మెట్ల వైపునకు రావడంతో స్వల్ప తొక్కిసలాట జరిగింది. మరో వైపు బయట ఉన్న జనానికి ఏం జరుగుతుందో అర్థంగాక మరింత ఆందోళనకు గురయ్యారు. ఈ క్రమంలో మాల్‌ నుంచి బయటకు చేరుకున్న జనం మాల్‌ మేనేజర్‌ను నిలదీశారు. ఏమిటిదంతా అని ప్రశ్నించడంతో ప్రతి మూడు నెలలకోసారి తమ షోరూంలో ఫైర్‌ సేఫ్టీ కార్యక్రమంలో భాగంగా నిర్వహించే మాక్‌ డ్రిల్‌గా చెప్పుకొచ్చారు.  ప్రమాదం ఏమీ లేదని, ఒక వేళ ఫైర్‌ ఘటన వంటివి ఏవైనా జరిగితే వాటి నుంచి వినియోగదారులను సురక్షితంగా బయటకు పంపడం ఎలా అనే అంశంపై అవగాహన కార్యక్రమమని చెప్పకొచ్చారు. మీ ఇష్టం వచ్చినట్లు మీరు మాక్‌ డ్రిల్‌ అంటూ చెప్పుకుంటే సరిపోదని, ఏదైనా జరగరానిది జరిగితే బాధ్యత ఎవరంటూ వినియోగదారులు నిలదీశారు. అక్కడకు చేరుకున్న ఒంగోలు ఫైర్‌ ఆఫీసర్‌ ప్రజలకు సర్ది చెప్పారు. అనంతరం ఫైర్‌ ఆఫీసర్‌ వై.వెంకటేశ్వర్లు మీడియాతో మాట్లాడుతూ పెద్ద పెద్ద సంస్థల్లో ఫైర్‌ సేఫ్టీ మాక్‌ డ్రిల్‌ తప్పనిసరన్నారు. అందులో భాగంగా సోమవారం మాక్‌డ్రిల్‌ నిర్వహించాలని నిర్ణయించామని, అందులో భాగంగా డీమార్ట్‌ షోరూం ఫైర్‌ ఆఫీసర్‌.. జిల్లా ఫైర్‌ ఆఫీసర్‌కు సమాచారం అందించారన్నారు.  

సాక్షి, తాళ్లపూడి: మండలంలోని గజ్జరం గ్రామంలోని కాలనీ వద్ద సోమవారం జరిగిన అగ్నిప్రమాదంలో ఓ మహిళ సజీవ దహనం అయిన ఘటన చోటుచేసుకుంది. తాళ్లపూడి పోలీసులు, స్థానికులు తెలిపిన వివరాలు ఇలా ఉన్నాయి. గ్రామానికి చెందిన చిక్కాల సోమాలమ్మ (32) ఉదయం 9.30 సమయంలో ఇంట్లో వంట చేస్తుండగా ఒక్కసారిగా మంటలు వ్యాపించాయి. గ్యాస్‌ సిలిండర్‌ నుంచి మంటలు ఎగసి పడ్డాయి. ఒంటికి నిప్పంటుకోవడంతో ఆమె మంటల్లో కాలిపోయినట్టు తెలిపారు. అయితే ప్రమాదం జరిగిన సమయంలో విద్యుత్‌ షార్ట్‌ సర్క్యూట్‌ అయ్యిందా లేక గ్యాస్‌ వల్ల ప్రమాదం జరిగిందా మరేదైనా కారణమా అనేది తేలాల్సి ఉంది. ఒక్కసారిగా మంటలు వ్యాపించి బంగాళా పెంకుటిల్లుకు మంటలు అంటుకోవడంతో చుట్టుపక్కల వారు మంటలను అదుపుచేయడానికి ప్రయత్నం చేశారు. అగ్నిమాపక సిబ్బంది వచ్చి మంటలు అదుపుచేశారు. అయితే అప్పటికే సోమాలమ్మ పూర్తిగా కాలిపోవడంతో మృతిచెందడం జరిగింది. శరీరభాగాలు మొత్తం కాలిపోయాయి. సంఘటనా స్థలంలో బంధువుల రోదనలతో మారుమోగింది. మృతురాలి భర్త చిక్కాల శ్రీను లారీ డ్రైవర్‌గా పనిచేస్తున్నారు. ఇద్దరు కుమార్తెలు ఉన్నారు. మల్లిక తాళ్లపూడిలోని కళాశాలలో డీఈడీ చదువుతున్నారు. రెండో కుమార్తె తేజస్వి స్థానిక ఉన్నత పాఠశాలలో 9వ తరగతి చదువుతున్నారు. తాళ్లపూడి ఎస్సై కేవై దాస్‌ సంఘటనా స్థలంలో వివరాలు సేకరించారు. మృతదేహాన్ని పోస్టుమార్టం నిమిత్తం కొవ్వూరు తరలించారు. తహసీల్దార్‌ బి.దేవి, రెవెన్యూ సిబ్బంది వివరాలు సేకరించారు.  

హైదరాబాద్‌: సికింద్రాబాద్‌లోని ఓ కంపెనీలో పేలుడు సంభవించింది. పేలుడుతో పాటు మంటలు చెలరేగడంతో ఓ వ్యక్తి అక్కడికక్కడే సజీవ దహనమయ్యాడు. మరికొందరికి గాయాలయ్యాయి. వెస్ట్‌మారేడ్‌పల్లిలోని సయ్యద్‌ జలాల్‌ గార్డెన్‌ వద్ద ప్లాట్‌ నంబర్‌–5లో రిలయన్స్‌ ఫైర్‌సేఫ్టీ లిమిటెడ్‌ పేరుతో ఓ కంపెనీ నడుస్తోంది. కంపెనీ ఎండీగా అరుణ్‌ ఆంథోనీరాజ్‌ వ్యవహరిస్తున్నారు. చర్లపల్లిలో ఫ్యాక్టరీ ఉండగా మారేడుపల్లిలో రెండతస్తుల భవనంపై రేకుల షెడ్డును గోదాంగా వాడుతున్నారు. ఫైర్‌ సేఫ్టీ పరికరాలను ఇందులో నిల్వ ఉంచారు. బుధవారం ఉదయం 11.45 నిమిషాల ప్రాంతంలో పైఅంతస్తులో ఒక్కసారిగా భారీ శబ్దంతో పేలుడు సంభవించింది. పేలుడు ధాటికి భవనం ధ్వంసం కావడంతో పాటు స్థానికంగా ఉన్న పలువురి ఇళ్ల కిటికీల అద్దాలు పగిలిపోయాయి. రెండు బైక్‌లు ధ్వంసమయ్యాయి. ఆ తర్వాత భవనం నుంచి ఒక్కసారిగా మంటలు చెలరేగాయి. దీంతో స్థానికులు భయాందోళనకు గురయ్యారు. ఈ సంస్థలో స్టోర్‌ కీపర్‌గా పనిచేస్తున్న జంగా రాజు సజీవ దహనమయ్యాడు. రాజు పశ్చిమ గోదావరి జిల్లా దద్దులూరు గ్రామానికి చెందిన వాడు.  పలువురికి గాయాలు..  ఈ ఘటనలో మరో ఇద్దరు గాయాలపాలయ్యారు. ప్రమాదం జరిగిన సమయంలో జంగా రాజుతో పాటు అక్కడే పనిచేస్తున్న అతడి బావమరిది ఇస్మాయిల్‌ ఉన్నాడు. ఇస్మాయిల్‌ కింది అంతస్తులో ఉండగా, రాజు పైఅంతస్తులో ఉన్నాడు. పేలుడు జరిగిన వెంటనే మంటలు వచ్చాయని, మంటల్లో రాజు సజీవ దహనమయ్యాడని ఇస్మాయిల్‌ కన్నీరుమున్నీరయ్యాడు. రాజుకు భార్య, ఇద్దరు పిల్లలు ఉన్నారని చెప్పాడు. ప్రమాదం జరిగిన సమయంలో మరో వ్యక్తి పైఅంతస్తుకు వెళ్లేందుకు ప్రయత్నించగా శిథిలాలు మీద పడటంతో గాయాల పాలయ్యాడు. సమాచారం తెలుసుకున్న అగ్నిమాపక బృందం వెంటనే ఘటనాస్థలానికి చేరుకుంది. మంటలు ఆర్పుతున్న సమయంలో మరోసారి పేలుడు సంభవించడంతో అగ్నిమాపక బృందం వెంకటేశ్‌ కొద్దిదూరం ఎగిరిపడ్డాడు. వెంకటేశ్‌ తలకు హెల్మెట్‌ ఉండటంతో స్వల్పగాయాలతో బయటపడ్డాడు. కాగా, ఎన్‌డీఆర్‌ఎఫ్‌ సిబ్బంది కూడా సహాయక చర్యలు చేపట్టేందుకు రంగలోకి దిగింది. జిల్లా ఫైర్‌ అధికారి శ్రీనివాస్‌రెడ్డి సంఘటన స్థలాన్ని సందర్శించారు. కేసు నమోదు చేసి దర్యాప్తు జరుపుతున్నామని మారేడ్‌పల్లి సీఐ శ్రీనివాసులు తెలిపారు. ప్రమాదం గ్యాస్‌ సిలిండర్‌ కారణంగా జరిగిందా.. లేదా ఫైర్‌సేఫ్టీ పరికరాల వల్ల జరిగిందా అనే విషయాలు దర్యాప్తులో తెలుస్తాయని చెప్పారు. 

అగ్నిమాపక కేంద్రాలకు ఆపద వచ్చింది. ప్రమా దం జరిగినప్పుడు ఆదుకునే పరిస్థితి లేకుండా పోతోంది. ఫైర్‌స్టేషన్లకు సరైన భవనాలు లేక రేకుల షెడ్లలోనే కాలం వెల్లదీస్తున్నారు. వాహనం కండీషన్‌ ఉండదు. డీజిల్‌కు బడ్జెట్‌ లేదు. కనీసం ట్యాంకర్‌లో నింపేందుకు నీరు కూడా దొరకని దుస్థితి. ఇలాంటి సమయంలో అగ్ని ప్రమాదం జరిగిందని సమాచారం వస్తే సిబ్బంది వెళ్లేలోపే పుణ్యకాలం కాస్తా అయిపోతుంది. చివరకు బూడిదే మిగులుతోంది. నర్సంపేట: ఆపదలో ఆదుకునే అగ్నిమాపక కేంద్రాలకు సౌకర్యాలు లేక సిబ్బంది ఇబ్బందుల గురవుతున్నారు.  చాలా ఏళ్ల నాటి ఫైర్‌ స్టేషన్‌లకు సరైన భవనాలు లేక రేకుల షెడ్‌లతోనే కాలం వెల్లదీస్తున్నారు. వాహనం కండీషన్‌లో ఉండదు. డీజిల్‌కు బడ్జెట్‌ కేటాయింపు ఉండదు. ట్యాంకర్‌లో నింపేందుకు నీరు దొరకదు. ఇలాంటి తరుణంలో ఏదైనా ప్రమాదం జరిగి...ఫోన్‌ చేస్తే... సిబ్బంది గంట కొట్టుకుంటూ  వచ్చే వరకు పుణ్యకాలం కాస్తా పూర్తవుతుంది. అగ్నికి ఆస్తి ఆహుతి అవుతోంది. బాధితులకు బూడిదే మిగులుతోంది. ఏళ్లుగా ఇదే పరిస్థితి. గతేడాది ఆధునిక పరికరాలు ఇచ్చారే తప్పా.. అందులో పనిచేసే సిబ్బంది సమస్యలను వదిలేశారు. వరంగల్‌ రూరల్‌ జిల్లాలో ఈ ఏడాది వర్ధన్నపేటలో ఫైర్‌ స్టేషన్‌ను ఏర్పాటు చేసి ఆధునాతన ఫైర్‌ ఇంజిన్‌ అందించడం మినహా ఏళ్ల తరబడి ఎలాంటి సౌకర్యాలు కల్పించలేదు. రానున్నది అసలే ఎండాకాలం.. ఈ నెల 23న పరకాల నియోజకవర్గంలో ఒకేరోజు ఒగ్లాపూర్, శనిగరం గ్రామాల్లో రెండు చోట్ల అగ్ని ప్రమాదాలు జరిగాయి. ఇలాంటి సంఘటనలు రానున్న రోజుల్లో జరిగే అవకాశం ఉండడంతో ప్రభుత్వం సౌకర్యాలు కల్పించి ప్రమాదాల నివారణకు ప్రత్యేక కార్యచరణ తీసుకోవాల్సిన అవపరం ఉంది. వేసవికాలం వచ్చిందంటే చాలు అగ్ని ప్రమాదాల భయం వెంటాడుతుంటుంది. జిల్లాలో ప్రతి ఏటా వేసవి కాలంలో జరిగిన అగ్ని ప్రమాదాల నివారణ కోసం కొత్తగా ఫైర్‌స్టేషన్‌లు ఏర్పాటు చేయాలనే ప్రతిపాదనలున్నా..  ఒక్క వర్దన్నపేటలోనే ఏర్పాటు చేసి మిగతా చోట్ల విస్మరించారు. దీంతో పాత అగ్నిమాపక కేంద్రాలతోనే సేవలు అందిస్తున్నారు. ప్రమాదాలు జరిగినపుడు సకాలంలో అగ్నిమాపక శకటం చేరుకున్నప్పుడే ఆస్తులు కాపాడుకోగలుగుతున్నారు. దూర ప్రాంతాల్లో ప్రమాదాలు జరిగితే అంతేసంగతులు. బాధితుల ఆస్తులు బుగ్గిపాలవుతున్నాయి నిర్లక్ష్యమే ప్రమాదాలకు కారణం..  అగ్ని ప్రమాదాలు చిన్న చిన్న తప్పిదాల వల్లే ఎక్కువగా జరుగుతుంటాయి.అగ్ని ప్రమాదం జరిగినప్పుడు వెంటనే 101కి సమాచారం అందించాలి. ఎక్కువగా అగ్ని ప్రమాదాలు వేసవి కాలంలో సంభవిస్తాయి.విద్యుత్‌ షార్ట్‌ సర్క్యూట్, గ్యాస్‌ లీకేజీల కారణంగా ఇలాంటి ప్రమాదాలు సంభవిస్తున్నాయి. గ్రామాల్లో  గడ్డివాములు, పూరిళ్లు, ఎండిన పొలాల్లో అగ్ని ప్రమాదాలు ఎక్కువగా జరుగుతాయి. జిల్లాలో మూడు కేంద్రాలు.. జిల్లాలో రెండు నెలల క్రితం వరకు రెండు అగ్నిమాపక కేంద్రాలు మాత్రమే ఉండగా వర్ధన్నపేటలో తాజాగా ఏర్పాటు చేశారు. నర్సంపేట అగ్నిమాపక కేంద్రంలోని ఫైరింజన్‌ మహబూబాబాద్‌ జిల్లాల్లోని గ్రామాలకు కూడా వెళ్లాల్సి ఉండడంతో దూర ప్రాంతాల్లో ప్రమాదం జరిగితే సమాచారం అందించిన తర్వాత బయలుదేరినప్పటికి ఆలస్యమై ఆస్తి నష్టం ఎక్కువగా కలిగేది.  కొన్ని చోట్ల కొత్తవి ఏర్పాటు చేయాలనే డిమాండ్‌ ఉంది. కనీసం మూడు మండలాల పరిధిలో ఒక అగ్నిమాపక కేంద్రం ఉంటేనే అవి సకాలంలో సంఘటన స్థలాలకు చేరుకొని సిబ్బంది మంటలు అదుపులో చేసే అవకాశం ఉంటుంది. అగ్నిమాపక శాఖకు ఇటీవల బుల్లెట్లు మంజూరు చేసింది. కేంద్రాలు, వాహనాల నిర్వహణకు బడ్జెట్‌ కొరత కారణంగా ఇబ్బందులు ఎదురవుతున్నాయి. అగ్నిమాపక ట్యాంకర్లకు నీటి సరఫరా కోసం బోర్లు అవసరం ఉంది. డీజిల్‌ కేటాయింపులు, సిబ్బంది కొరత వంటి సమస్యలు ప్రతిబింబంగా మారాయి. పట్టణాల్లో అగ్ని ప్రమాదాల తరుణంలో సిబ్బంది ప్రాణాలు పణంగా పెట్టి పనిచేయాల్సి వస్తుంది. ముఖ్యంగా బహుళ అంతస్తులు, సినిమా థియేటర్లు, వాణిజ్య భవంతులు, ప్రైవేట్‌ పాఠశాలలో ఎక్కడా కూడా అగ్ని నిరోధక పరికరాలు లేవు. పైగా అంగుళం కూడా వదలకుండా భవనాలు నిర్మిస్తున్నారు. అనుకోకుండా ప్రమాదాలు జరిగితే ఆస్తి నష్టం తీవ్రంగా ఉంటోంది.  ఇబ్బందులను అధికమించి సేవలు... అగ్ని ప్రమాదాలు జరిగిన సమయంలో సంఘటన స్థలానికి వెళ్లే సమయంలో రోడ్డుకు అడ్డుగా ఉన్న విద్యుత్‌ తీగలతో ఇబ్బందులు ఎదురవుతున్నాయి. ఐనప్పటికి సాధ్యమైనంత వరకు నష్ట నివారణ చేసేందుకు ప్రమాద స్థలానికి చేరుకునేందుకు ప్రయత్నిస్తున్నాం. విద్యుత్‌ అధికారులకు కూడా ఇదే విషయంపై సహకరించాలని కోరాం. ప్రమాదం జరిగిన వెంటనే 101కు సమాచారం అందించాలి. – పోకల రామకృష్ణ, అగ్నిమాపక అధికారి, నర్సంపేట

సాక్షి, రామాయంపేట(మెదక్‌): రామాయంపేట పట్టణశివారులో మెదక్‌ రూటులో మంగళవారం జరిగిన అగ్నిప్రమాదం ప్రజలతోపాటు అధికారులను హడలెత్తించింది. సుమారు మూడు కిలోమీటర్లమేర వ్యాపించిన మంటలతో సమీపప్రాంతంలో ఉన్న రైతులు, ప్రయాణికులు ఆందోళన వ్యక్తం చేశారు. ఈప్రమాదంలో రెండు పూరిగుడిసెల్లో కొనసాగుతున్న హోటళ్లతో పాటు  సోడాబండి, నిత్యావసర సరుకులు మంటలకు ఆహుతయ్యాయి. వివరాల్లోకి వెళ్తే.. పట్టణశివారులో మెదక్‌ రోడ్డులో ఉన్న బ్రిడ్జివద్ద రోడ్డుపక్కన అకస్మాత్తుగా మంటలు చెలరేగాయి. గాలితోపాటు మంటలు వేగంగా వ్యాపించడంతో టీహోటల్‌లో ఉన్న లంబాడి లక్ష్మి, గోపాల్‌ దంపతులు భయాందోళనతో బయటకు పరుగులుతీశారు. ఈ హోటల్‌తోపాటు పక్కనే ఉన్న మ్యాధరి సాయిలుకు చెందిన తాళంవేసి ఉన్న మరో హోటల్‌ సోడాబండి మంటలకు వారికళ్లముందే ఆహుతైనాయి. ఈ ప్రమాదంలో రెండు గుడిసెల్లో ఉన్న బియ్యం, ఫ్యాను, గ్యాస్‌ సిలిండర్, ఇతర వంటసామగ్రి మొత్తం మంటలకు ఆహుతైనాయి.దీనితో మంటలు వేగంగా మూడుకిలోమీటర్లమేర  వ్యాపించడంతో వ్యవసాయబోర్లవద్ద ఉన్న పశువులను వాటి యజమానులు ఆదరాబాదరాగా కట్లువిప్పారు. మంటల ధాటికి తట్టుకోలేక పొదల్లో ఉన్న కుందేళ్లు, ఇతర వణ్యప్రాణులు భయంతో పరుగులుతీయడం కనిపించింది. స్థానిక ఫైర్‌ఇంజన్‌ అందుబాటులో లేకపోవడంతో మెదక్‌ నుంచి వచ్చిన ఫైర్‌ఇంజన్‌ మంటలను ఆర్పివేయగా, చాలా సేపటి వరకు మంటలు అదుపులోకి రాలేదు. స్థానిక ఎస్‌ఐ మహేందర్‌ దగ్గరుండి మంటలను ట్రాఫిక్‌ను నియంత్రించి మంటలను ఆర్పించారు. స్థానిక ఆర్‌ఐ సత్యనారాయణ సంఘటనాస్థలిని సందర్శించారు. బాధితులకు ఆదుకుంటామని ఆయన హామీఇచ్చారు.

మీకు బోర్‌కొడితే ఏం చేస్తారు? వీడియో గేమ్స్‌ ఆడతారు. టైం ఉంటే సినిమాకెళ్తారు. ఇంకా ఏం చేస్తారు? తింటారు లేదా పడుకుంటారు. అయితే, ముంబైలో ఓ కుర్రాడు తనకు బోర్‌ కొడుతుందని ఏకంగా ఇళ్లకు నిప్పంటించడం మొదలు పెట్టాడు. ముంబైకి చెందిన అతని పేరు ర్యాన్‌ లుభం (19). పైగా, అతగాడు వాలంటీర్‌ ఫైర్‌ఫైటర్‌ కూడా! ఎక్కడైనా అగ్ని ప్రమాదాలు జరిగితే వెంటనే అగ్నిమాపకశాఖకు కబురందిస్తాడు. అవసరమైతే వారితో కలసి రంగంలోకి దిగి మంటలు కూడా ఆర్పడం అతని పని. గత నెల ముంబైలోని ఆగ్నేయా పిట్స్‌బర్గ్‌లో ర్యాన్‌ను పోలీసులు అరెస్టు చేశారు. డిసెంబర్‌ 3, 10 తేదీల్లో స్థానికంగా ఉన్న ఇళ్లకు నిప్పంటించిన కేసులో అతడు దోషి. ఇళ్లకు నిప్పంటించి బయటకు వచ్చి.. మళ్లీ తానే పోలీసులకు సమాచారం ఇచ్చినట్లు పోలీసులు గుర్తించారు. ఈ గుట్టు సీసీటీవీ ఫుటేజ్‌ ద్వారా బయటపడింది. నేరాన్ని అంగీకరించిన ర్యాన్‌.. బోర్‌ కొట్టడం వల్లనే ఆ పని చేసినట్లు విచారణలో చెప్పడంతో పోలీసులు అవాక్కయ్యారు. ఫైర్‌ ఫైటర్లే నిప్పంటించడం ఇప్పుడే కొత్త కాదు. అమెరికా సహా అన్ని దేశాల్లో ఏడాదికి వంద మందికి పైగా ఫైర్‌ఫైటర్లు ఇలాంటి కేసుల్లో అరెస్టవుతున్నారు. జర్మనీలో 30 అగ్ని ప్రమాదాలకు కారకుడైన ఆ దేశ ఫైర్‌ఫైటర్‌ గతేడాది అరెస్టయ్యాడు. ఇందుకు కోర్టు అతనికి 3 మిలియన్‌ డాలర్ల జరిమానా కూడా విధించింది. ఎందుకలా చేశావని అతన్ని పోలీసులు ప్రశ్నించగా.. నిప్పంటించడం తనకు సరదా అని, అందులో ఆనందం ఉందని చెప్పాడు!    

న్యూఢిల్లీ: అగ్నిమాపక శాఖలో తాను పనిచేయబోవడం లేదనీ, తనను ఇక పదవీ విరమణ పొందినట్లుగా గుర్తించాలని సీబీఐ డైరెక్టర్‌ పదవి నుంచి ఉద్వాసనకు గురైన ఆలోక్‌వర్మ కేంద్ర సిబ్బంది విభాగానికి తెలియజేశారు. తాను ఇప్పటికే పదవీవిరమణ వయసును దాటిపోయినందున ఇక తనను రిటైర్‌ అయినట్లుగానే భావించాలని ఆయన కోరారు. 2017 జూలై 31 నాటికి ఆలోక్‌ వర్మ పదవీ విరమణ వయసుకు చేరుకున్నారు. అయితే ఆయన అప్పటికే సీబీఐ చీఫ్‌గా నియమితులై ఉండటం, ఆ పదవీకాలం నిర్దిష్ట రెండేళ్లు కావడంతో ఇప్పటివరకు కొనసాగారు. అత్యున్నత స్థాయి ఎంపిక కమిటీ ఆయనను సీబీఐ డైరెక్టర్‌గా తప్పించి అగ్నిమాపక శాఖ డీజీగా బదిలీ చేయడం తెలిసిందే. తనను అబద్ధపు ఆరోపణలపై బదిలీ చేశారనీ, అవి కూడా తన విరోధి అయిన ఒకే ఒక్క వ్యక్తి దురుద్దేశంతో చేసిన ఆరోపణలు తప్ప ఇతరులెవరూ తనను వేలెత్తి చూపలేదని వర్మ ఉద్ఘాటించారు. సీబీఐ డైరెక్టర్‌ పదవికి ఆలోక్‌ వర్మను సుప్రీంకోర్టు మళ్లీ నియమించిన రెండ్రోజుల్లోనే, అత్యున్నత స్థాయి త్రిసభ్య ఎంపిక కమిటీ ఆయనను 2:1 ఆధిక్యంతో ఆ పదవి నుంచి తప్పించి, అగ్నిమాపక సేవల డీజీగా బదిలీ చేస్తూ సంచలన నిర్ణయం తీసుకోవడం తెలిసిందే. సుప్రీంకోర్టు తీర్పు తర్వాత తొలిసారి ఆయన మౌనం వీడుతూ గురువారం రాత్రి పీటీఐకి ఓ ప్రకటన పంపారు. ‘సీబీఐ దేశంలోనే అత్యున్నత దర్యాప్తు సంస్థల్లో ఒకటి. దాని స్వతంత్రతను కాపాడాలి. బయటి శక్తుల ప్రమేయం లేకుండా అది పనిచేయాలి. సీబీఐని నాశనం చేయడానికి కొందరు చూస్తున్నప్పుడు, ఆ సంస్థ నిజాయితీని, ప్రతిష్ఠను కాపాడేందుకు నేను ప్రయత్నించాను. నాకు వ్యతిరేకంగా ఉన్న ఒకే ఒక్క వ్యక్తి చేసిన అబద్ధపు ఆరోపణలపై నన్ను బదిలీ చేయడం బాధాకరం’ అని  వర్మ వాపోయారు. ప్రధాని నరేంద్ర మోదీ, సుప్రీంకోర్టు న్యాయమూర్తి జస్టిస్‌ సిక్రీ, ప్రతిపక్ష నేత మల్లికార్జున ఖర్గేల అత్యున్నత స్థాయి ఎంపిక కమిటీ ఆలోక్‌ను పదవి నుంచి బదిలీ చేసింది. ఖర్గే కూడా ఆలోక్‌ బదిలీని వ్యతిరేకిస్తూ ఆయన వాదన వినాలని పట్టుబట్టినా, మోదీ, జస్టిస్‌ సిక్రీ కలిసి ఆలోక్‌ను బదిలీ చేశారు. మళ్లీ బదిలీలన్నీ రద్దు గురువారం రాత్రి మళ్లీ సీబీఐ తాత్కాలిక డైరెక్టర్‌గా బాధ్యతలు చేపట్టిన ఎం.నాగేశ్వర రావు, సంస్థలో అంతకుముందు ఆలోక్‌ వర్మ చేసిన బదిలీలన్నింటినీ రద్దు చేశారు. గతేడాది అక్టోబర్‌లో నాగేశ్వరరావు డైరెక్టర్‌ బాధ్యతలు స్వీకరించగానే, ఆగమేఘాల మీద పలువురు అధికారులను బదిలీ చేశారు. అయితే సుప్రీంకోర్టు తీర్పు తర్వాత మళ్లీ బాధ్యతలు చేపట్టిన ఆలోక్‌వర్మ ఆ బదిలీలన్నింటినీ రద్దు చేయడం తెలిసిందే. తాజాగా, మళ్లీ నాగేశ్వరరావుకు బాధ్యతలు వచ్చాక, ఆలోక్‌ వర్మ ఇచ్చిన బదిలీ ఉత్తర్వులను అన్నింటినీ రద్దు చేశారు. ప్రభుత్వం రాజకీయ బుల్లెట్లు పేలుస్తోంది ప్రభుత్వం సీబీఐని బలహీనపరుస్తోందనీ, సీవీసీ భుజాల నుంచి రాజకీయ బుల్లెట్లను పేలుస్తోందని కాంగ్రెస్‌ ఆరోపించింది. ప్రభుత్వంతో కలిసి రాజ్యాంగాన్ని సీవీసీ ఉల్లంఘిస్తోందంది. కాంగ్రెస్‌ అధికార ప్రతినిధి అభిషేక్‌ సింఘ్వీ మాట్లాడుతూ ఊహలు, వాదనల ఆధారంగా సీవీసీ ఇచ్చిన నివేదికను అనుసరించి సీబీఐ డైరెక్టర్‌గా ఆలోక్‌ వర్మను తొలగించడాన్ని తాము ఖండిస్తున్నామని తెలిపారు. అయితే రఫేల్‌ యుద్ధ విమానాల కొనుగోలుకు సంబంధించి మాత్రం సంబంధిత పత్రాలు సమర్పించినా సీవీసీ స్పందించడం లేదని ఆరోపించారు.

సాక్షిప్రతినిధి, ఖమ్మం:  నగరంలో సోమవారం భారీ విప్ఫోటం జరిగింది. ఓ భవనం కుప్పకూలగా.. మంటల్లో చిక్కుకొని ఒకరు తీవ్రంగా గాయపడ్డాడు. సుమారు 20 దుకాణాల వరకు దెబ్బతిన్నాయి. భారీ శబ్దానికి స్థానికులు భయంతో పరుగులు తీశారు. తెల్లవారుజామున ఈ ఘటన జరగడం.. భవనంలో ఎవరూ లేకపోవడంతో ప్రాణనష్టం తప్పింది. రూ.కోటికి పైగా ఆస్తి నష్టం జరిగిందని చెబుతున్నారు. పేలుడు పదార్ధాలు నిల్వ ఉంచడంతో అవి పేలాయని పోలీసులు అనుమానం వ్యక్తం చేస్తున్నారు. నగరంలోని ప్రముఖ వ్యాపార కూడలి అయిన కమాన్‌బజార్‌లో బెందెడి రవీంద్రనాథ్‌కు చెందిన భవనంలో వరంగల్‌ రూరల్‌ జిల్లా నర్సంపేటకు చెందిన దేవాండ్ల శ్రీనివాస్‌ ‘నానో శ్రీనివాస్‌’పేరుతో గతేడాది నుంచి వస్త్ర దుకాణం నిర్వహిస్తున్నాడు. అద్దె సరిగా చెల్లించకపోవడంతో దుకాణం ఖాళీ చేయాలని యజమాని చెప్పాడు. దీంతో శ్రీనివాస్‌ మూడు రోజులుగా ఆ పనిలోనే ఉన్నాడు.   పేలుడు పదార్థాలే కారణమా?   భారీ శబ్ధానికి స్థానికులు ఏం జరిగిందో తెలియక భయంతో రోడ్లపైకి పరుగులు తీశారు. దుకాణంలో పేలుడు పదార్థాలు నిల్వ ఉంచి ఉండవచ్చని, అవి ప్రమాదవశాత్తు పేలి ఉండవచ్చని పోలీసులు భావిస్తున్నారు. విద్యుత్‌ షార్ట్‌ సర్క్యూట్‌తోగానీ, సిలిండర్లకు సైతం ఇంతటి స్థాయిలో పేలుడు జరిగే అవకాశం ఉండదని చెబుతున్నారు. ఈ భారీ విస్ఫోటానికి 30 ఏళ్ల క్రితం నిర్మించిన భవనం కుప్పకూలింది. ఆ సమయంలో భవనంలో ఎవరూ లేరు. అయితే.. వెనుక ఉన్న భవనంలో వస్త్ర దుకాణం వ్యాపారి శ్రీనివాస్‌ నిద్రిస్తున్నాడు. ఒక్కసారిగా చెలరేగిన మంటల్లో అతను చిక్కుకున్నాడు. తనను కాపాడాలని అతను గట్టిగా కేకలు వేశాడు. సమాచారం అందుకున్న పోలీసులు.. అగ్నిమాపక సిబ్బంది వెనుక భవనం నుంచి దిగి నిచ్చెన ద్వారా బయటకు తీసి.. 108 అంబులెన్స్‌లో ప్రభుత్వ ఆస్పత్రికి తరలించారు. అప్పటికే అతను 50 శాతం వరకు కాలిపోయాడు.   ఎస్పీ సందర్శన   రూ.కోట్లాది  వ్యాపారం జరిగే ఈ ప్రాంతంలో భారీ పేలుడు సంభవించడంతో ప్రజలు ఆ ప్రాంతానికి తండోప తండాలుగా చేరుకున్నారు. పోలీస్‌ కమిషనర్‌ తఫ్సీర్‌ ఇక్బాల్‌ ఘటనా స్థలానికి చేరుకుని పరిస్థితిని సమీక్షించారు. మూడు అగ్నిమాపక వాహనాలతో మంటలను అదుపులోకి తెచ్చారు. భవనం పూర్తిగా ధ్వంసం కావడంతో శకలాలను రెండు జేసీబీల ద్వారా తొలగించారు. అయితే ఘటనా స్థలం వద్ద ఏపీ లోని కడప జిల్లా రాయచోటికి చెందిన ఓ కారును పోలీసులు స్వాధీనం చేసుకున్నారు. ఆ కారులో రెండు రోజుల క్రితం నలుగురు వ్యక్తులు వచ్చి ఈ షాపులో తిరిగారని స్థానికులు ఆరోపిస్తున్నారు. పోలీసులు బాంబ్, డాగ్‌ స్క్వాడ్‌లతో క్షుణ్ణంగా పరిశీలించారు. ఈ ఘటనలపై పలు అనుమానాలు వ్యక్తమవుతుండటంతో పోలీసులు అన్ని కోణాల్లో దర్యాప్తు చేస్తున్నారు.

రాజమండ్రిలో రంభాఊర్వశీ థియేటర్‌లో శుక్రవారం మధ్యాహ్నం మ్యాట్నీ సినిమా సాగుతుండగా ఒక్కసారిగా మంటలు వ్యాపించాయి. ప్రేక్షకులు ప్రాణభయంతో థియేటర్‌ నుంచి బయటకు పరుగులు పెట్టారు. ఈ నేపథ్యంలో విజయవాడ నగరం, జిల్లా వ్యాప్తంగా సినిమా థియేటర్లలో భద్రత ఎంత? అనే ప్రశ్న ప్రజల మెదళ్లను తొలిచేస్తోంది. అగ్నిప్రమాదాల నివారణ, రక్షణ చర్యల్లో డొల్లతనం గుర్తువచ్చి చెమటలు పట్టిస్తోంది. విజయవాడ : రాజధాని ప్రాంతంగా భాసిల్లుతున్న విజయవాడ నగరంలో, జిల్లా వ్యాప్తంగా సినిమా థియేటర్లలో ఫైర్‌సేఫ్టీపై మొక్కుబడితనం భయంపుట్టిస్తోంది. పలు సినిమా థియేటర్లలో నిర్వాహకులు ప్రధానంగా అగ్నిప్రమాద నివారణకు సంబంధించి నిబంధనలను గాలికి వదిలేస్తున్నారన్న విమర్శలు గుప్పుమంటున్నాయి. కొన్ని థియేటర్లలో అగ్నిప్రమాద నివారణ పరికరాలు అలంకారప్రాయంగా మారాయి. అగ్నిమాపక, రెవెన్యూ శాఖల అధికారులు తూతూమంత్రంగా తనిఖీలు నిర్వహిస్తూ చేతులు దులిపేసుకోవడం వల్లే ఈ పరిస్థితి దాపురించిందని ప్రజలు బాహాటంగానే దుమ్మెత్తిపోస్తున్నారు. కొన్ని థియేటర్లలో ఎప్పుడో ఏర్పాటు చేసిన అగ్నిప్రమాద నిరోధక పరికరాలు మూలనపడ్డాయి. విజయవాడ నగరంలో 5 మల్టీప్లెక్స్‌లు, దాదాపు 35 వరకు సినిమా థియేటర్లు ఉన్నాయి. జిల్లా వ్యాప్తంగా నియోజకవర్గ కేంద్రాలు, ముఖ్యమైన మండల కేంద్రాల్లో దాదాపు మరో 70 వరకు సినిమా హాళ్లు ప్రేక్షకులను ఆకర్షిస్తున్నాయి. ఇలా మొత్తం జిల్లా వ్యాప్తంగా దాదాపు 110 వరకు అన్ని రకాల థియేటర్లలో ప్రతి నిత్యం వేలాది మంది ప్రేక్షకులు సినిమాలు చూస్తుంటారు. అయితే ఈ థియేటర్లలో అగ్ని ప్రమాద నివారణకు సంబంధించి తీసుకోవాల్సిన చర్యలు శూన్యంగా కనిపిస్తున్నాయి. అగ్నిమాపక పరికరాలు కొన్నిచోట్ల ఉన్నా అవి సక్రమంగా పనిచేయడం లేదు. వాటర్‌ ట్యాంకులు, పైప్‌లైన్లు శిథిలావస్థకు చేరాయి. నిబంధనల మేరకు ప్రేక్షకుల కెపాసిటీని బట్టి థియేటర్ల పైభాగంలో వాటర్‌ ట్యాంకులు, అండర్‌గ్రౌండ్‌ వాటర్‌ ట్యాంకులు, పైప్‌లైన్లు, విద్యుత్, డీజిల్‌ మోటార్లు ఏర్పాటు చేయాల్సి ఉంది. అయితే వీటి జాడ ఏ ఒక్క థియేటర్లలో కనిపించడంలేదని ఫిర్యాదులు ఉన్నాయి. ఏదైనా ప్రమాదం జరిగితే స్ప్రే ద్వారా కార్బన్‌డయాక్సైడ్‌ను వదులుతూ ప్రేక్షకులను బయటకు పంపే విధంగా ట్యూబ్‌లు ఏర్పాటు చేయాలి. అటువంటి పరికరాలు 70 శాతంపైగా థియేటర్లలో కనిపించడంలేదని తెలుస్తోంది. థియేటర్లలో ఏదైనా ప్రమాదం జరిగితే ప్రేక్షకులకు ఎటువంటి ఆపద కలుగకుండా రూపొందించిన సినిమాటోగ్రఫీ యాక్ట్‌లోని పలు నిబంధనలను పట్టించుకున్న నాథుడే లేరు.  సినిమాటోగ్రఫీ యాక్టు ప్రకారం ఫైర్‌సేఫ్టీ నిబంధనలు ఇవే.. ♦ ప్రతి థియేటర్‌లో కార్బన్‌డయాక్సైడ్‌తో కూడిన పరికరాలు ఉండాలి ♦ హాస్‌ రీల్‌ అమర్చాలి. అంటే కార్బన్‌డయాక్సైడ్‌తో ఉన్న ట్యూబ్‌లు సినిమా థియేటర్‌ గోడలకు అమర్చి ఉండాలి.   ♦ ప్రమాదం జరిగినప్పుడు ప్రేక్షకులను అప్రమత్తం చేసేందుకు ఆటోమేటిక్, మాన్యువల్‌ అలారం ఏర్పాటు చేయాలి.     ♦ 10 మీటర్ల ఎత్తుకంటే తక్కువ ఉన్న టూరింగ్‌ టాకీస్‌లో కూడా కనీసం 10 వేల లీటర్ల ట్యాంకు థియేటర్‌ టాప్‌పై ఉండాలి.   ♦ 10 మీటర్లకంటే ఎత్తు ఎక్కువ ఉన్న థియేటర్లపై కనీసం 450 ఎల్‌పీఎం కెపాసిటీతో ఎలక్ట్రికల్‌ పంపు ఏర్పాటు చేయాలి. ♦ 300 కంటే ఎక్కువ మంది ప్రేక్షకులు కూర్చొని సినిమా వీక్షించే వీలుండే థియేటర్లలో 15 వేల లీటర్ల ట్యాంకు, 900 ఎల్‌పీఎం కెపాసిటీగల ఎలక్ట్రికల్‌ పంపు ఉండాలి. ♦ 10 నుంచి 15 మీటర్ల ఎత్తుగల థియేటర్లలో 50 వేల అండర్‌ గ్రౌండ్‌ వాటర్‌ స్టోరేజీ   ఉండాలి. ఒక ఎలక్ట్రికల్, ఒక డిజిల్‌ పంపు అందుబాటులో ఉండాలి. ♦ 15 నుంచి 24 మీటర్ల ఎత్తుగల థియేటర్లలో  75 వేల లీటర్ల అండర్‌గ్రౌండ్‌ వాటర్‌ స్టోరేజీ ఉండాలి. థియేటర్‌ పైభాగంలో 25 వేల లీటర్ల కెపాసిటీ గల వాటర్‌ ట్యాంకులు ఉండాలి. ♦ 24 నుంచి 30 మీటర్లు ఆపై ఎత్తు ఉన్న థియేటర్లలో లక్ష లీటర్ల అండర్‌ గ్రౌండ్‌ ట్యాంకు, టెర్రస్‌పై 25 వేల లీటర్ల ట్యాంకు అమర్చాలి. దానికి తగ్గ పంపు సెట్‌ అందుబాటులో ఉంచాలి.

చిత్తూరు,పలమనేరు: నీటికోసం వచ్చి మెట్లు లేని బావిలో పడిన జింకను స్థానిక అగ్ని మాపకశాఖ సిబ్బంది రక్షించారు. పట్టణ సమీపంలోని టీఎస్‌ అగ్రహారంలో బావిలో జింక పడిన విషయాన్ని గమనించిన గ్రామానికి చెందిన హనుమంతురెడ్డి అగ్నిమాపక సిబ్బందికి సమాచారం అందించారు. 60 అడుగుల లోతు ఉన్న ఈ బావిలోకి అగ్నిమాపక సిబ్బంది దిగి జింకను సురక్షితంగా బయటకు తీసుకొచ్చి, అటవీ శాఖ అధికారులకు అప్పగించారు. జింక బావిలో పడిందని తెలుసుకున్న గ్రామస్తులు పెద్ద సంఖ్యలో అక్కడికి చేరుకున్నారు.

సాక్షి, సిటీబ్యూరో: నగరంలో బార్లు, పబ్‌లు, రెస్టారెంట్లు, గ్యాస్‌ గోడౌన్లతో పాటు జనసమ్మర్థం ఎక్కువగా పోగయ్యే సంస్థలన్నీ ఫైర్‌ సేఫ్టీ ఏర్పాట్లు చేసుకోవాల్సిందే. లేనిపక్షంలో వాటిపై చర్యలు తీసుకునేందుకు జీహెచ్‌ఎంసీ సిద్ధమవుతోంది. గత సంవత్సరం డిసెంబర్‌ చివరి వారంలో ముంబై పబ్‌లో జరిగిన అగ్నిప్రమాదంలో పదిమందికి పైగా మరణించారు. కనీస ఫైర్‌సేఫ్టీ ఏర్పాట్లు లేవని ప్రమాదం జరిగాక గుర్తించారు. నగరంలోనూ అదే దుస్థితి నెలకొంది. నగరంలో ఉన్న దాదాపు 500 పబ్బులు, క్లబ్బులతోపాటు మాల్స్, హాస్పిటళ్లు, ఫంక్షన్‌ హాళ్లు, గ్యాస్‌ గోడౌన్లు తదితర సంస్థల్లో ఎలాంటి ఫైర్‌సేఫ్టీ ఏర్పాట్లు లేవు. ఇటీవల సికింద్రాబాద్‌లో పెయింటింగ్, ఎలక్ట్రికల్‌ గోడౌన్‌లో జరిగిన అగ్ని ప్రమాదంలో అదృష్టవశాత్తు ప్రాణనష్టం జరగకపోయినప్పటికీ కోట్ల రూపాయల ఆస్తినష్టం జరిగింది. పలు కాలనీల్లోని నివాసాల మధ్యే గ్యాస్‌ గోడౌన్లు ఉండటాన్ని, ఏదైనా ప్రమాదం జరిగితే వెంటనే సహాయకచర్యలందే అవకాశాల్లేకపోవడాన్ని మునిసిపల్‌ శాఖ ప్రిన్సిపల్‌ సెక్రటరీ అర్వింద్‌కుమార్‌ ఇటీవల గుర్తించారు. ఈ నేపథ్యంలో నగరంలో రద్దీగా ఉండే ప్రాంతాల్లో ఫైర్‌సేఫ్టీ ఏర్పాట్లు తప్పనిసరి   అని జీహెచ్‌ఎంసీ భావించింది. గతంలో పలు సందర్బాల్లో ఫైర్‌సేఫ్టీకి సంబంధించి తగిన చర్యలు తీసుకోవాలనుకున్నప్పటికీ కార్యరూపం దాల్చలేదు. ఇటీవల విజిలెన్స్, ఎన్‌ఫోర్స్, డిజాస్టర్‌ మేనేజ్‌మెంట్‌ డైరెక్టర్‌గా ఐపీఎస్‌ అధికారి విశ్వజిత్‌ను నియమించాక,  ఫైర్‌సేఫ్టీ విభాగం బాధ్యతలు కూడా అప్పగించారు. ఫైర్‌సేఫ్టీ స్క్రూటినీ.. ఇప్పటికే నగరంలోని పలు సంస్థలకు ఫైర్‌సేఫ్టీ ఏర్పాట్లున్నప్పటికీ, వాటిల్లో ఎన్ని సక్రమంగా ఉన్నాయో లేదో తెలియదు. ఎన్‌ఓసీ తీసుకునేంతవరకు మాత్రం ఫైర్‌సేఫ్టీ ఏర్పాట్లు చేస్తున్న సంస్థలు ఆ తర్వాత నిర్వహణ పట్టించుకోవడం లేదు.  దీంతో  ఆయా సంస్థల్లో ఫైర్‌సేఫ్టీ ఏర్పాట్లను స్క్రూటినీ చేయనున్నారు. ఈమేరకు భారీ భవంతులన్నింటికీ నోటీసులు జారీ చేయనున్నారు. తొలిదశలో బార్లు, పబ్బులు, రెస్టారెంట్టు, గ్యాస్‌ గోడౌన్లతోపాటు జనసమ్మర్ధం భారీగా పోగయ్యే సంస్థలకు నోటీసులు జారీ చేయనున్నారు. వీటిల్లో అత్యంత ప్రమాదకర పరిస్థితుల్లో వెయ్యి సంస్థలున్నట్లు ఇప్పటి వరకు అంచనా వేశారు. సదరు సంస్థల్లో అగ్నిప్రమాదం జరిగితే ప్రజల ప్రాణాలకు ముప్పు ఉంటుందని గుర్తించారు.  ఈ పరిస్థితి నివారించేందుకు తొలిదశలో తగిన ఫైర్‌సేఫ్టీ ఏర్పాట్లు చేయాల్సిందిగా నిర్వాహకులకు అవగాహన కల్పించనున్నారు. తర్వాత ఫైర్‌సేఫ్టీ ఏర్పాట్లు చేసుకునేందుకు కొంత వ్యవధి ఇచ్చి..అప్పటికీ ఏర్పాటు చేసుకోనివారిపై కఠిన చర్యలు తీసుకోవాలని భావిస్తున్నారు. ఇందులో భాగంగా వచ్చే వారం నుంచి  సదరు సంస్థలకు నోటీసులు జారీ చేయనున్నారు. వారిచ్చే సమాచారంతో అధికారులు వెళ్లి స్క్రూటినీ చేస్తారు. స్క్రూటినీ సందర్భంగా ఆయా  సంస్థలు నిబంధనల మేరకు తగిన సెట్‌బ్యాక్‌లు కలిగి ఉన్నాయా, ఫైరింజన్‌ వెళ్లే వీలుందా, ప్రమాదం జరిగితే వెంటనే బయటకు వెళ్లే దారులున్నాయా తదితర అంశాలను కూడా పరిగణనలోకి తీసుకోనున్నారు. వీటితోపాటు  ట్రేడ్‌లైసెన్సులు ఉన్నదీ లేనిదీ గుర్తిస్తారు. లోపాలున్న వారికి తగిన సమయమిస్తారు. ఆ తర్వాత నిబం ధనల మేరకు తగిన చర్యలు తీసుకోనున్నారు.  తనిఖీల్లేవు.. గత జనవరిలో ముంబై ప్రమాద నేపథ్యంలో నగరంలోని పబ్బులు, క్లబ్బులు, తదితర జనసమ్మర్థం ఉండే సంస్థల్ని జీహెచ్‌ఎంసీ టౌన్‌ప్లానింగ్, ఫైర్‌సేఫ్టీ, ఆరోగ్యం–పారిశుధ్యం, రెవెన్యూ విభాగాలకు చెందిన అధికారుల బృందాలతో తనిఖీలు నిర్వహించి తగిన చర్యలు తీసుకోవాలని కమిషనర్‌ జనార్దన్‌రెడ్డి భావించారు. తనిఖీల సమయంలోనే భవననిర్మాణ అనుమతి, ట్రేడ్‌ లైసెన్సు, ఆస్తిపన్ను చెల్లింపు, తదితర అంశాలనూ తనిఖీలు చేసి తగిన చర్యలు తీసుకోవాలనుకున్నప్పటికీ, అమలుకు నోచుకోలేదు. గ్రేటర్‌ పరిధిలో ఫైర్‌సేఫ్టీ ఏర్పాట్లు చేసుకోవాల్సిన  భవనాలు నలభై  వేలకు పైగా  ఉన్నప్పటికీ దాదాపు మూడు వేల భవనాలకు మాత్రమే సంబంధిత ఎన్‌ఓసీలున్నట్లు సమాచారం. అవి కూడా భవన నిర్మాణాలకు అనుమతులిచ్చేముందు ఏర్పాటు చేసుకున్నవి.

సాక్షి, చెన్నై: కోయంబత్తూరు జిల్లా నర్సీపురంలోని కోవై కలైమగల్‌ కాలేజీ ఆఫ్‌ ఆర్ట్స్‌ అండ్‌ సైన్స్‌ కళాశాలలో నిర్వహించిన మాక్‌ డ్రిల్‌లో 19 ఏళ్ల బీబీఏ స్టూడెంట్‌ లోగేశ్వరి  ప్రమాదవశాత్తు మరణించిన సంగతి తెలిసింది. ఈ ఘటనకు బాధ్యుడైన అర్ముగం ప్రస్తుతం పోలీసులు రిమాండ్‌లో ఉన్నాడు. అయితే పోలీసుల విచారణలో ఆసక్తికర విషయాలు వెలుగులోకి వచ్చాయి. అసలు అర్ముగం ఎన్‌డీఎమ్‌ఏ(నేషనల్‌ డిజాస్టర్‌ మేనేజ్‌మెంట్‌ అథారిటి) ఉద్యోగే కాదని తెలిసింది. కళాశాల యాజమాన్యం పూర్తి వివరాలు విచారించకుండానే అతన్ని మాక్‌ డ్రిల్‌ కోసం పిలిపించారని పోలీసు అధికారులు భావిస్తున్నారు. విచారణలో భాగంగా పోలీసులు అర్ముగం వివరాలను సేకరించారు. అయితే ఇవన్ని నకిలీవని తెలింది. అంతేకాక అతని ఇచ్చిన అడ్రస్‌ ప్రూఫ్‌ కూడా నకిలేదేనని నిర్ధారించారు. అతని దగ్గర దొరికిన ఎన్‌డీఎమ్‌ఏ గుర్తింపు పత్రాలు కూడా ఫోర్జరివేనని గుర్తించారు. అంతేకాక అర్ముగం తన ఫేస్‌బుక్‌ ప్రోఫైల్‌లో తనను తాను ఎన్‌డీఎమ్‌ఏ ఉద్యోగిగా ప్రకటించుకున్నట్లు తెలిసింది. కాలేజీ యాజమాన్యం కేవలం అర్ముగం ఫేస్‌బుక్‌ ప్రొఫైల్‌ చూసి అతన్ని ఎన్‌డీఎమ్‌ఏ సభ్యునిగా భావించారని, అతని పూర్తి వివరాలను తెలుసుకోలేదని తెలిపారు. విచారణ కోనసాగుతుందని పోలీసు అధికారులు తెలిపారు. అయితే మృతురాలి తల్లితండ్రులు తమ కుమార్తె మరణానికి కారణమైన కాలేజీ యాజమాన్యంపై కూడా చర్యలు తీసుకోవాలని డిమాండ్‌ చేస్తున్నారు. అతను ఎన్‌డీఎమ్‌ఏ సభ్యుడు కాదు: ఎన్‌డీఎమ్‌ఏ అర్ముగం తనను తాను ఎన్‌ఎమ్‌డీఏ ఉద్యోగిగా చెప్పుకుని కాలేజీలో మాక్‌ డ్రిల్‌ నిర్వహించి ఒకరి మరణానికి కారణమవడంతో స్వయంగా జాతీయ విపత్తు నిర్వహణ సంస్థ(ఎన్‌డీఎమ్‌ఏ) రంగంలోకి దిగింది. మాక్‌ డ్రిల్‌ నిర్వహించిన సభ్యుడు ఎన్‌డీఎమ్‌ఏకు చెందిన వ్యక్తి కాదని ప్రకటన విడుదల చేసింది. వివరాల ప్రకారం.. ‘ఇటువంటి మాక్‌ డ్రిల్స్‌కు ఎన్‌డీఎమ్‌ఏ అనుమతివ్వదు. కాలేజీలో నిర్వహించిన మాక్‌ డ్రిల్‌లో ఎన్‌డీఎమ్‌ఏ భాగస్వామ్యం లేదు. సదరు ట్రైనీ అసలు ఎన్‌డీఎమ్‌ఏకు చెందిన వ్యక్తే కాద’ని ప్రకటించింది. సరైన జాగ్రత్తలు తీసుకోకుండా ఇటువంటి డ్రిల్స్‌ నిర్వహించకూడదని హెచ్చరించింది. ఏది ఏమైనా పొరపాటు జరిగిందని, ఒక నిండు ప్రాణం బలైందని సంతాపం తెలిపింది.

కాలేజీలో నిర్వహించిన మాక్‌ డ్రిల్‌ విషాదాంతంగా ముగిసింది. ట్రైనర్‌ నిర్లక్ష్యంగా వ్యవహరించటంతో ఓ 19 ఏళ్ల విద్యార్థిని ప్రాణాలు కోల్పోయింది. వివరాల్లోకి వెళ్తే...  సాక్షి, చెన్నై: కోయంబత్తూరు జిల్లా నర్సీపురంలోని కోవై కలైమగల్‌ కాలేజీ ఆఫ్‌ ఆర్ట్స్‌ అండ్‌ సైన్స్‌ కళాశాలలో అగ్ని ప్రమాద సమయంలో ఎలా వ్యవహరించాలన్న దానిపై అధికారులు మాక్‌ డ్రిల్‌ నిర్వహించారు. చెన్నైకి చెందిన ఫైర్‌ సేఫ్టీ బృందం.. సుమారు 20 మంది స్టూడెంట్లను ఎంపిక చేసి 40 రోజులుగా శిక్షణ కూడా ఇచ్చారు. గురువారం మధ్యాహ్నాంతో విద్యార్థులను ఒక్కోక్కరికిగా రెండో అంతస్థు నుంచి కిందకు దూకించగా.. కింద విద్యార్థులు వల సాయంతో వారిని రక్షిస్తూ వచ్చారు. ఈ క్రమంలో లోగేశ్వరి(19) అనే బీబీఏ స్టూడెంట్‌ను సహాయక సిబ్బంది కిందకు తోశాడు.  అయితే ఆ విద్యార్థిని అప్రమత్తంగా లేకపోవటంతో.. కింద ఫ్లోర్‌ సెల్ఫ్‌కు తలబలంగా తాకి కుప్పకూలిపోయింది. ఆస్పత్రికి తరలించగా అప్పటికే ఆమె మృతి చెందినట్లు వైద్యులు తెలిపారు. లోగేశ్వరి స్వస్థలం అలందూరి. ఘటన గురించి సమాచారం అందుకున్న తల్లిదండ్రులు ఆస్పత్రికి చేరుకుని బోరున విలపించారు. నిర్లక్ష్యంగా వ్యవహరించి లోగేశ్వరి మరణానికి కారణమయ్యాడంటూ ట్రైనర్‌ అర్ముగంను అదుపులోకి తీసుకుని పోలీసులు రిమాండ్‌కు తరలించారు.

సాక్షి, కర్నూలు : కర్నూలు బళ్లారి చౌరస్తాలోని అమీలియా ప్రైవేట్‌ ఆస్పత్రిలో మంగళవారం రాత్రి అగ్ని ప్రమాదం చోటుచేసుకుంది. షార్ట్‌ సర్క్యూట్‌తో భారీగా మంటలు ఎగసిపడుతున్నాయి. ఆస్పత్రి ప్రారంభమైన రెండు రోజులకే ప్రమాదం సంభవించింది. ఈ నెల 8వ తేదీన ఆస్పత్రిని ప్రారంభించారు. విషయం తెలుసుకున్న ఫైర్‌ సిబ్బంది మంటలార్పేందుకు ప్రయత్నిస్తున్నారు. రోగులు లేకపోవడంతో పెద్ద ప్రమాదం తప్పింది. పూర్తి వివరాలు తెలియాల్సి ఉంది.

సాక్షి, హైదరాబాద్‌ : నగరంలోని అగ్ని ప్రమాదం జరిగింది. ఈ ఘటన ఇందిరాపార్క్‌లో గురువారం రాత్రి చోటుచేసుకుంది. డంపింగ్‌ యార్డ్‌లో ఒక్కసారిగా మంటలు చెలరేగాయి. దీంతో స్థానికులు భయందోళనకు గురయ్యారు. విషయం తెలుసుకున్న ఫైర్‌ సిబ్బంది సంఘటన ప్రాంతానికి చేరుకున్నారు. ఫైర్‌ సిబ్బంది 5 ఫైరింజన్లతో మంటలను అర్పేశారు. పూర్తి వివరాలు తెలియాల్సి ఉంది.

సాక్షి, వరంగల్‌ (అర్బన్‌): భద్రకాళీ ఫైర్‌వర్క్స్‌లో పేలుడు ప్రమాదం జరిగి 10 మంది కార్మికులు దు​ర్మరణం పాలయ్యారు. తీవ్రంగా గాయపడిన ఎనిమిది మంది ఆస్పత్రిలో చికిత్స పొందుతున్నారు. వీరిలో అయిదుగురి పరిస్థితి విషమంగా ఉందని పోలీసులు తెలిపారు. బుధవారం మధ్యాహ్నం ఈ ప్రమాదం చోటుచేసుకుంది. కాగా, జిల్లా అగ్నిమాపక అధికారి భగవాన్‌రెడ్డి మీడియాతో మాట్లాడారు. భద్రకాళీ ఫైర్‌వర్క్స్‌కు బాణాసంచా తయారీకి పర్మిషన్‌ లేదని తెలిపారు. 2017లోనే దీని పర్మిట్‌ ముగిసిందని అన్నారు. పర్మిషన్‌ లేకుండా పేలుడు పదార్థాలు విక్రయించడం, తయారు చేయడం క్రిమినల్‌ చర్య అని అన్నారు. భారీ ఎత్తున పేలుడు పదార్థాలను నిల్వ ఉంచడం వల్ల ప్రమాద తీవ్రత పెరిగిందని చెప్పారు. ఘటనపై విచారణకు ఆదేశించామని ఉప ముఖ్యమంత్రి కడియం శ్రీహరి తెలిపారు. నివేదిక వచ్చాక బాధ్యులపై కఠిన చర్యలు తీసుకుంటామని అన్నారు. ప్రమాదంలో మృతిచెందిన వారికి 5 లక్షల రూపాయల చొప్పున రాష్ట్ర ప్రభుత్వం నష్టపరిహారం ప్రకటించిన విషయం తెలిసిందే.

సాక్షి, హైదరాబాద్‌ : నగరంలోని బహదూర్‌పురా పీఎస్‌ పరిధిలో శనివారం రాత్రి అగ్ని ప్రమాదం సంభవించింది. తాడ్‌బన్‌లోని ఒమర్‌ ట్రావెల్స్‌ పార్కింగ్‌లో ఒక్కసారిగి మంటలు చెలరేగాయి. ఈ మంటల్లో ఐదు బస్సులు సహా పలు వాహనాలు దగ్ధమయ్యాయి. విషయం తెలుసుకున్న అగ్నిమాపక సిబ్బంది ఘటన స్థలానికి చేరుకున్నారు. మూడు ఫైరింజన్లతో మంటలను అదుపులోకి తేచేందుకు ప్రయత్నిస్తున్నారు. పోలీసులు కేసు నమోదు చేసుకుని దర్యాప్తు చేపట్టారు. పూర్తి వివరాలు తెలియాల్సి ఉంది.

సాక్షి, సిటీబ్యూరో : నగరంలోని పలు వ్యాపార కేంద్రాలు నిర్లక్ష్యానికి నిలువుటద్దంగా నిలుస్తున్నాయి. ప్రభుత్వం సూచించే రక్షణ చర్యలను పెడచెవిని పెట్టి ఇష్టారాజ్యంగా వ్యవహరిస్తున్నాయి. ఏదైనా ప్రమాదం జరిగినప్పుడు హడావుడి చేసే అధికార యంత్రాంగం రెండు మూడు రోజులకు ఎలాంటి చర్యలు తీసుకోకుం డానే వదిలేయడం పరిపాటిగా మారింది. శుక్రవారం సాయంత్రం సికింద్రాబాద్‌లోని పెయిం టింగ్, ఎలక్ట్రికల్‌ గోడౌన్లలో జరిగిన అగ్నిప్రమాదం ఇందుకు ఓ ఉదాహరణ. అదృష్టవశాత్తూ ఇక్కడ ఎలాంటి ప్రాణనష్టం జరగలేదు కానీ కోట్ల రూపాయల్లో ఆస్తినష్టం వాటిల్లింది. వివిధ విభాగాల అధికార యంత్రాంగం, ఎన్డీఆర్‌ఎఫ్‌ బృందాలు ఎన్నో గంటల పాటు పోరాడి మంటలను అదుపులోకి తీసుకొచ్చారు. నగరంలో తరచూ ఇలాంటి అగ్నిప్రమాదాలు జరుగుతున్నా.. చర్యల్లో మాత్రం సంబంధిత యంత్రాంగం విఫలమవుతోంది. ప్రమాదం జరిగినప్పుడు హడావుడి చేసి ఆ తర్వాత మరచిపోతున్నారు. గోడౌన్ల నుంచి హాస్పిటళ్లు, హోటళ్లు, మాల్స్, మల్టీప్లెక్స్‌ల దాకా ఇదే పరిస్థితి. వివిధ విభాగాల అధికారులు, సిబ్బందికి పొంచి ఉన్న ప్రమాదాల గురించి తెలిసినా, చర్యలు తీసుకోలేకపోతున్నారు. పురాతన భవనాల నుంచి కొత్త బిల్డింగ్‌ల వరకు ఇదే పరిస్థితి. ఈ భవనాలకు ఫైర్‌ సేఫ్టీ ఏర్పాట్లు లేకపోవడం.. ఉన్నా పనిచేయకపోవడం ఇలాంటి ఘటనలు జరిగినప్పుడు వెలుగుచూస్తున్నాయి. ప్రమాదాలు జరిగితే ఫైరింజన్‌లు,  అంబులెన్స్‌లు సైతం వెళ్లలేని ఇరుకు గల్లీల్లో అనుమతుల్లేకుండానే గోడౌన్ల ఏర్పాటు చేసుకుంటున్నారు. మామూళ్లకు మరిగిన స్థానిక అధికారులు అనుమతుల్లేకున్నా పట్టనట్టు వ్యవహరిస్తున్నారు. ప్రమాదాలు జరిగినప్పుడు మాత్రం ఫైర్‌సేఫ్టీ  నిబంధనలు, అమలుపై కొరడా ఝళిపిస్తున్నారు. మూడేళ్ల క్రితం కూడా ఫైర్‌ ఎన్‌ఓసీలు లేని విద్యాసంస్థలకు ఈ భవనం ప్రమాదకరమని సూచిస్తూ పుర్రె బొమ్మల పోస్టర్లు అంటిస్తామని బల్దియా ప్రకటించినప్పటికీ చర్యల్లేవు. ఏటా ఆయా భవనాలను తనిఖీ చేసి నోటీసులిచ్చి తగిన చర్యలు తీసుకోవాల్సి ఉండగా దాదాపు ఏడాదిన్నర కాలంగా ఉదాసీనంగా వ్యవహరిస్తోంది.   గ్రేటర్‌ పరిధిలో ఫైర్‌సేఫ్టీ ఏర్పాట్లు చేసుకోవాల్సిన భవనాలు నలభై వేలకు పైగా ఉన్నప్పటికీ దాదాపు మూడు వేల భవనాలకు మాత్రమే ఎన్‌ఓసీలు ఉన్నట్లు సమాచారం. అవి కూడా భవన నిర్మాణాలకు అనుమతులిచ్చేముందు ఏర్పాటు చేసుకున్నవి. ఆ తర్వాత ఎన్ని భవనాల యాజమాన్యాలు ఫైర్‌సేఫ్టీ నిబంధనలను సక్రమంగా పాటిస్తున్నాయో, అసలు నిర్వహణ ఉందో లేదో తెలియని పరిస్థితి. జనసమ్మర్థం ఎక్కువగా ఉండే షాపింగ్‌ కాంప్లెక్సులు, విద్యాసంస్థలు, ప్రార్థనా మందిరాలు, ఆస్పత్రులు, హోటళ్లు, ఫంక్షన్‌హాళ్లు, హాస్టళ్లు, సినిమాహాళ్లు, పబ్బులు, క్లబ్బులు చాలామటుకు ఫైర్‌సేఫ్టీ లేకుండానే కొనసాగుతున్నాయి. వాస్తవానికి ఆయా భవనాలకు ముఖ్యంగా పాఠశాలల భవనాలకు చుట్టూ ఆరుమీటర్ల ఖాళీ స్థలం ఉంటేనే ఫైర్‌ ఎన్‌ఓసీ ఇవ్వాలని గతేడాది జూన్‌ నుంచి కొత్త నిబంధన అమల్లోకి తెచ్చారు. అయితే ఇప్పుడు అది ఎంతవరకు అమలు చేస్తున్నారనేది మిలియన్‌ డాలర్ల ప్రశ్న.   నోటీసులతో సరి.. చర్యల్లేవ్‌..   గ్రేటర్లో 500 చ.మీ. స్థలంలో లేదా ఆరు మీటర్లు ఎత్తున్న భవనాల నుంచి 15 మీటర్ల ఎత్తు వరకున్న భవనాలకు జీహెచ్‌ఎంసీ అనుమతులిస్తుంది. అంతకంటే ఎక్కువ ఎత్తున్న విద్య, వ్యాపార, వాణిజ్య, తదితర భవనాలు, గోడౌన్లు, పరిశ్రమలకు రాష్ట్ర ఫైర్‌ సర్వీసెస్‌ డైరెక్టర్‌ జనరల్‌ కార్యాలయం అనుమతులిస్తుంది. ఫైర్‌సేఫ్టీ ప్రమాణాలు పాటించనివారిపై కోర్టు ఆదేశాలకు అనుగుణంగా చర్యలు తీసుకోవడం మినహా, తనంతతానుగా చర్యలు తీసుకునేందుకు జీహెచ్‌ఎంసీకి అధికారం లేదు. దీంతో ఆయా భవన యాజమాన్యాలకు నోటీసులిస్తున్నా స్పందన కనిపించడం లేదు. ఈ నేపథ్యంలో ఫైర్‌సేఫ్టీలేని అస్పత్రులపై జిల్లా వైద్యాధికారుల ద్వారా, ప్రైవేట్‌ విద్యాసంస్థలపై విద్యాశాఖ ద్వారా, ఇతరత్రా సంస్థలపై సంబంధిత శాఖల ద్వారా ఆయా సంస్థల  అనుమతులు, లైసెన్సులు రద్దు చేయించాలని భావించినప్పటికీ ఆ తర్వాత విస్మరించారు.   మేల్కొలిపిన ముంబై పబ్‌ దుర్ఘటన  గత డిసెంబర్‌లో ముంబైలో జరిగిన అగ్నిప్రమాద దుర్ఘటన అనంతరం అక్కడి ఫైర్‌ బ్రిగేడ్‌ విభాగాన్ని రెండు భాగాలుగా చేసి ఒక విభాగం తనిఖీలు చేయాలని, మరో విభాగం ప్రమాదాలు జరిగినప్పుడు తక్షణ సహాయ చర్యలు తీసుకోవాలని నిర్ణయించారు. అన్ని సంస్థలను తనిఖీలు చేసి ఎన్‌ఓసీలు ఉండేలా చర్యలకు సిద్ధమయ్యారు. అక్కడ అప్పటికున్న 35 ఫైర్‌సేఫ్టీ నిబంధనల్ని మరింత విస్తరించాలని నిర్ణయించారు. థియేటర్లు, పబ్‌లు, రెస్టారెంట్లు, షాపులు నిర్మాణాల్లో వినియోగించే సామగ్రి నుంచి ఫర్నిచర్‌కు వరకు అగ్నికి త్వరగా కాలిపోని సామగ్రిని వాడేలా నిబంధనల్లో పొందుపరచాలని భావించారు. నిబంధనలు ఉల్లంఘించిన సంస్థలపై చర్యలు తీసుకోవడంలో విఫలమైన సంబంధిత అధికారులపై కూడా చర్యలకు సిద్ధమయ్యారు.   కానరాని తనిఖీలు..   ముంబై పబ్‌ ప్రమాద నేపథ్యంలో నగరంలోని పబ్బులు, క్లబ్బులు తదితర జనసమ్మర్థం ఉండే సంస్థలను జీహెచ్‌ఎంసీ టౌన్‌ప్లానింగ్, ఫైర్‌సేఫ్టీ, ఆరోగ్యం–పారిశుధ్యం, రెవెన్యూ విభాగాలకు చెందిన అధికారులు తనిఖీలు చేసి తగిన చర్యలు తీసుకోవాలని కమిషనర్‌ జనార్దన్‌రెడ్డి భావించారు. తనిఖీల సమయంలోనే భవన నిర్మాణ అనుమతి, ట్రేడ్‌ లైసెన్సు, ఆస్తిపన్ను చెల్లింపు వంటి అంశాలనూ తనిఖీలు చేసి చర్యలు తీసుకోవాలని నిర్ణయించారు. కానీ అవి మాత్రం అమలుకు నోచుకోలేదు.  జీహెచ్‌ఎంసీ మూడేళ్ల క్రితం నోటీసులిచ్చిన.. ఎన్‌ఓసీలు పొందిన సంస్థలిలా           సంస్థలు                     సంఖ్య     ఎన్‌ఓసీలు పొందినవి  1. ప్రైవేట్‌ ఆస్పత్రులు               1170          465  2. ప్రైవేట్‌ పాఠశాలలు               3023          899  3. ఫంక్షన్‌ హాళ్లు                    707            34  4. టింబర్‌ డిపోలు                  123              – 5. హోటళ్లు, రెస్టారెంట్లు           1608         171  6. హాస్టళ్లు                             276           11  7. వస్త్రదుకాణాలు, షోరూమ్స్‌     6124      8. ఎలక్ట్రికకల్,ఎలక్ట్రానిక్స్‌      షాపులు,షోరూమ్స్‌              4827            01      9. బాణసంచా దుకాణాలు     (పర్మినెంట్‌)                       68                –  10. ఆభరణాల దుకాణాలు          41               –  11. స్టోరేజ్‌(గోడౌన్లు)               1068               –  12. సినిమాహాళ్లు                   90               16  13. పరిశ్రమలు                       –                16  14. బ్యాంకులు                       –                 02  15. పెట్రోల్‌ బంకులు                –                 44 గత మూడేళ్లలో ఫైర్‌సేఫ్టీ ఏర్పాట్లకు జీహెచ్‌ఎంసీ  ఇచ్చిన నోటీసులు, ఎన్‌ఓసీలు..  సంవత్సరం     నోటీసులు     ఎన్‌ఓసీలు  2015            491           384  2016            400           352  2017            170           110  

సాక్షి, ముంబై: ముంబై నగరంలో భారీ అగ్నిప్రమాదం జరిగింది. నగరంలోని  పోర్ట్‌ ఏరియాలోని పటేల్‌ ఛాంబర్స్‌లో శుక్రవారం రాత్రి అగ్ని ప్రమాదం చోటుచేసుకుంది. ఐదు అంతస్తుల భవనంలో ఒక్కసారిగా మంటలు ఎగిసి పడ్డాయి. ఈ మంటలకు ఐదు అంతస్తుల భవనం ఓ వైపు కూలిపోయింది. ప్రమాదాన్ని గుర్తించిన స్థానికులు వెంటనే అగ్నిమాపక సిబ్బందికి సమాచారం అందించారు. దీంతో రంగంలోకి దిగిన సిబ్బంది 18 ఫైరింజన్లతో మంటలను ఆర్పటానికి ప్రయత్నిస్తున్నారు. ఇంకా మంటలు అదుపులోకి రాలేదని సమాచారం. దీంతో స్థానికులు భయందోళనకు గురయ్యారు.  చీఫ్‌ ఫైర్‌ అఫీసర్‌ మాట్లాడుతూ.. అగ్ని ప్రమాదంలో ఇద్దరు ఫైర్‌ సిబ్బంది గాయపడినట్లు చెప్పారు. 16ఫైర్‌ ఇంజిన్స్‌, 11 ట్యాంకర్లతో 150 మంది ఫైర్‌ సిబ్బందితో కలిసి మంటలను అదుపులోకి తెచ్చామన్నారు.  బిల్డింగ్‌ మొత్తాన్ని ఖాళీ చేయించామని ఆయన తెలిపారు.కాగాప్రమాదానికి గల కారణాలు తెలియాల్సి ఉంది.

సాక్షి, తిరుమల : తిరుమల శ్రీవారి ఆలయం ముందు శుక్రవారం ఉదయం పెను ప్రమాదం తప్పింది. శ్రీవారి ఆలయానికి సమీపంలో ఉన్న కారు పార్కింగ్‌ ప్రాంతంలో కారులో నుంచి ఒక్కసారిగా మంటలు ఎగసిపడ్డాయి. బ్యాటరీలో లోపం వల్ల షాట్‌ సర్క్యూట్‌ జరిగినట్లు తెలుస్తోంది. విజిలెన్స్‌ డీఎస్పీ అంకయ్యా కారుగా అధికారులు గుర్తించారు.  ఆయన ఉదయం అభిషేకంలో పాల్గొనడానికి వచ్చినట్లు సమాచారం. ఫైర్‌ సిబ్బంది అక్కడికి చేరుకుని సకాలంలో మంటలను అదుపు చేశారు. ప్రమాదం తప్పడంతో శ్రీవారి దర్శనానికి వచ్చిన భక్తులు ఊపిరి తీసుకున్నారు.

సాక్షి, హైదరాబాద్‌: అసలే వేసవికాలం.. ఆపై 45 డిగ్రీలకు పైగా ఎండలు.. మండిపోతున్న మే నెల. ఎంత జాగ్రత్తలు తీసుకున్నా ఎండ వేడితో షార్ట్‌ సర్క్యూట్లు జరిగి అగ్నిప్రమాదాలు జరుగుతున్నాయి. వాటి నియంత్రణకు, ఆస్తి, ప్రాణనష్టం లేకుండా చేసేందుకు ప్రతీ నియోజకవర్గానికి ఒక ఫైర్‌ స్టేషన్‌ ఏర్పాటు చేస్తామని ప్రభుత్వం ప్రకటించింది. ఈ హామీ నాలుగేళ్లయినా పూర్తికాలేదు. దీంతో చాలా నియోజకవర్గాల్లో అగ్నిప్రమాదాలతో ఆస్తులు ఆహుతైపోతున్నాయి. ఇక ఒక్కో నియోజకవర్గంలో కనీసం 4 నుంచి 5 మండలాలుంటాయి. నియోజకవర్గం పేరుతో ఉన్న అర్బన్‌ ప్రాంతంలో అగ్నిమాపక కేంద్రం ఏర్పాటు చేస్తున్నారు. అయితే నియోజకవర్గ కేంద్రానికి దూరంగా ఉన్న మండలంలోని ఏదో మారుమూల ప్రాంతంలో అగ్నిప్రమాదం జరిగితే ఆ ఫైర్‌ ఇంజన్‌ వచ్చి మంటలార్పేసరికి ఆస్తులు బూడిదై పోతున్నాయి. అర్బన్‌ ప్రాంతాల్లో ఏర్పాటు చేసినట్టు పెద్ద నియోజకవర్గాలు, పైగా పారిశ్రామిక ప్రాంతాలుగా అభివృద్ధి చెందుతున్న నగరాల్లో అగ్నిమాపక కేంద్రాలు ఏర్పాటు చేయాలన్న డిమాండ్‌ ఎప్పటి నుంచో ఉంది. ప్రతీ జిల్లా హెడ్‌క్వార్టర్‌లో రెండు ఫైర్‌స్టేషన్లు, శివారు ప్రాంతాలకు రూరల్‌ స్టేషన్‌ ఒకటి ఏర్పాటు చేసుకోవాల్సి ఉంటుందని అగ్నిమాపక శాఖ అధికారులే స్పష్టం చేస్తున్నారు. కానీ దీనిపై అగ్నిమాపక శాఖ దృష్టి సారించలేదు. గత రెండేళ్లలో 242 తీవ్ర అగ్నిప్రమాదాలు జరగ్గా, ఈ ప్రమాదాల్లో రూ.48 కోట్ల విలువైన ఆస్తి అగ్నికి ఆహుతైంది. 183 మంది ప్రాణాలు కోల్పోయారు.

సాక్షి, హైదరాబాద్‌: పటాన్‌చెరు పారిశ్రామికవాడలో మంగళవారం తెల్లవారుజామున భారీ అగ్ని ప్రమాదం జరిగింది. స్థానిక అగర్వాల్‌ రబ్బరు పరిశ్రమలో షార్ట్ సర్క్యూట్ జరగడంతో పెద్ద ఎత్తున మంటలు ఎగసిపడుతున్నాయి. దీంతో కిలోమీటర్ల మేర దట్టమైన పొగలు వ్యాపించాయి. పరిశ్రమ నుంచి వస్తున్న పేలుడు శబ్దాలతో స్థానికులు తీవ్ర భయాందోళనలకు గురువుతున్నారు.  సమాచారం అందుకున్న ఫైర్‌ సిబ్బంది ఘటనా స్థలానికి చేరుకున్నారు. 5 అగ్నిమాపక యంత్రాల సాయంతో మంటలను ఆర్పే ప్రయత్నాలు చేస్తున్నారు. అయితే బలమైన ఈదురు గాలులు వీస్తుండటంతో మంటలను అదుపు చేయడానికి సిబ్బంది తీవ్రంగా శ్రమించాల్సి వస్తోంది. ఈ ప్రమాదంలో కోట్ల రూపాయల ఆస్తి నష్టం జరిగినట్లు భావిస్తున్నారు. మూడు నెలల కిందట దీనికి సంబంధించిన గోదాంలో భారీ అగ్ని ప్రమాదం జరిగింది. ఆ ప్రమాదం తట్టుకోలేక కంపెనీ చైర్మన్‌ గుండెపోటుతో మృతిచెందారు.

కంభం : తీవ్ర వర్షాభావ పరిస్థితులు అడుగంటిన భూగర్భజలాలతో ఓ వైపు రైతులు, ప్రజలు అల్లాడుతుంటే మరో వైపు అగ్నిమాపక శాఖ కూడా నీళ్ళకోసం తంటాలు పడుతుంది. వేసవి కాలంలో అగ్ని ప్రమాదాలు ఎక్కువగా సంభవిస్తుంటాయి. మంటలను ఆర్పివేయడానికి చాలా చోట్ల అగ్ని మాపక కేంద్రాల ద్వారా స్పందిస్తుంటారు. అలాంటి అత్యవసర పరిస్థితుల నుంచి ప్రాణాలును, ఆస్తులను కాపాడే అగ్ని మాపక కేంద్రంలో నీటి కోసం నానా తంటాలు పడుతున్నారు. కంభం అగ్నిమాపక కేంద్రంలో 5 సంవత్సరాల నుంచి బోరు పనిచేయక పోవడంతో  నీళ్ళ కోసం ఇబ్బందులు పడుతున్నారు. కంభం, అర్థవీడు, బేస్తవారిపేట మండలాలకు  కలిపి కంభంలో అగ్నిమాపక కేంద్రం ఉంది. తీవ్ర వేసవి దృష్ట్యా మూడు మండలాల్లో నిత్యం ఏదో ఒక ప్రమాదం జరుగుతుంటుంది. ప్రమాదం జరిగిందని సమాచారం అందుకున్న సిబ్బంది వాహనంలో నీళ్ళకోసం వెతుకులాడి అక్కడికి వెళ్ళే లోపే జరగాల్సిన నష్టం అంతా జరిగిపోతుందన్న విమర్శలు వస్తున్నాయి. భూగర్భజలాలు అడుగంటి పోవడంతో బోరు ఒట్టిపోయి ఐదేళ్ళుగా నీళ్లురాక ఇబ్బందులు పడుతున్నా ఉన్నతాధికారులు కానీ ప్రజా ప్రతినిధులు సమస్య పరిష్కారంపై దృష్టి సారించడంలేదు. కార్యాలయంలో బోరు పనిచేయక పోవడంతో నీళ్ళు నిలువ చేసే తొట్టె, మోటారు నిరుపయోగంగా పడిఉన్నాయి. తీవ్ర నీటి సమస్యకు తోడు కరెంటు కోతలు కూడా ఇష్టానుసారంగా విధిస్తుండటంతో అగ్నిమాపక సిబ్బందిబాధలు వర్ణనాతీతంగా మారాయి.ఉన్నతాధికారులు స్పందించి కార్యాలయంలో రీబోర్‌ చేయించడమో లేదా మరో చోట ఎక్కడైనా బోరువేయించి సమస్యను పరిష్కరించడమో చేయకుంటే ప్రమాదాలు జరిగినప్పుడు తీవ్రంగా నష్టపోవాల్సి వస్తుందని ప్రజలు వాపోతున్నారు. ప్రమాదాలు జరగక ముందే సమస్యను పరిష్కరించుకోవాలని స్థానికులు కోరుతున్నారు.  యన్‌ బాలచెన్నయ్య , ఫైర్‌ ఆఫీసర్, కంభం  నీటి సమస్య తీవ్రంగా ఉంది. ప్రమాదాలు జరిగినప్పుడు రోడ్లవెంట బోర్లకోసం వెతుక్కోవాల్సి వస్తుంది. బోరులేకపోవడం తో స్టోరేజ్‌ ట్యాంక్‌ నిరుపయోగంగా పడిఉంది.  

సాక్షి, హైదరాబాద్‌ : రాష్ట్ర అగ్నిమాపకశాఖలో ఏళ్ల నుంచి పెండింగ్‌లో ఉన్న ఖాళీల భర్తీకి ప్రభుత్వం గ్రీన్‌సిగ్నల్‌ ఇచ్చింది. ప్రతి నియోజకవర్గానికి ఒకటి చొప్పున అగ్నిమాపక కేంద్రాన్ని ఏర్పాటు చేస్తున్న తరుణంలో వాటికి సంబంధించిన పోస్టులను భర్తీ చేయాలని ప్రభుత్వం నిర్ణయం తీసుకుంది. ఈ మేరకు పోస్టుల మంజూరుకు అనుమతినిస్తూ ఆర్థికశాఖ జీవో విడుదల చేసింది. అగ్నిమాపకశాఖలో స్టేషన్‌ ఆఫీసర్, ఫైర్‌మెన్, డ్రైవింగ్‌ ఆపరేటర్లు, టైపిస్టులు, జూనియర్‌ అసిస్టెంట్లు, జూనియర్‌ స్టెనోలు మొత్తం కలిపి 325 పోస్టులు భర్తీ చేయాలని ఆర్థికశాఖ ముఖ్య కార్యదర్శి శివశంకర్‌ సోమవారం విడుదల చేసిన జీవోలో పేర్కొన్నారు. ఆపరేషన్స్‌ విభాగం కింద ఉన్న పోస్టులను రాష్ట్ర పోలీస్‌ రిక్రూట్‌మెంట్‌ బోర్డు, పరిపాలనా వ్యవహారాల్లో ఉన్న పోస్టులను రాష్ట్ర పబ్లిక్‌ సర్వీస్‌ కమిషన్‌ భర్తీ చేసేలా చర్యలు తీసుకోవాలని సూచించారు. వాటితో కలిపే నోటిఫికేషనా?  రాష్ట్ర పోలీస్‌ రిక్రూట్‌మెంట్‌ బోర్డు ద్వారా త్వరలో 22 వేల పోస్టులను భర్తీ చేయాలని నిర్ణయించారు. అయితే అదే నోటిఫికేషన్‌తోపాటు అగ్నిమాపకశాఖలోని ఖాళీ పోస్టులకు నోటిఫికేషన్‌ ఇస్తారా లేక ఆ నియామక ప్రక్రియ పూర్తయ్యాక విడిగా నోటిఫికేషన్‌ చేస్తారా అనే అంశంపై నియామక ఏజెన్సీలు స్పందించాల్సి ఉంది. ప్రస్తుతం పోలీస్‌ నోటిఫికేషన్‌ వ్యవహారాల్లో రిక్రూట్‌మెంట్‌ బోర్డు నిమగ్నమై ఉండగా పబ్లిక్‌ సర్వీస్‌ కమిషన్‌ పలు పరీక్షల నిర్వహణలో తలమునకలై ఉంది. అయితే టైపిస్టు, జూనియర్‌ అసిస్టెంట్, జూనియర్‌ స్టెనో పోస్టులు మొత్తం ఏడే ఉండటంతో త్వరలోనే ఆ నియామక ప్రక్రియ ప్రారంభమయ్యే అవకాశం ఉన్నట్లు పబ్లిక్‌ సర్వీస్‌ కమిషన్‌ వర్గాల ద్వారా తెలిసింది.    

సాక్షి, హైదరాబాద్‌: తెలంగాణ రాష్ట్ర పారిశ్రామిక విధానం (టీఎస్‌–ఐపాస్‌) ద్వారా ‘సింగిల్‌ విండో’లక్ష్యం నెరవేరడం లేదని కాగ్‌ విమర్శించింది. పరిశ్రమల ఏర్పాటుకు కావాల్సిన అన్ని అనుమతులకు కాకుండా.. వ్యాపారవేత్తలు కోరిన కొన్నింటికే ప్రభుత్వం అనుమతి పత్రాలు జారీ చేస్తోందని తప్పుబట్టింది. మరోవైపు అన్ని అనుమతుల కోసం దరఖాస్తు చేసుకోవాలంటూ తెలియజేసే కచ్చితమైన వ్యవస్థ కూడా లేదని పేర్కొంది. 2017 మార్చి–జూన్‌ మధ్య టీఎస్‌–ఐపాస్‌ పనితీరుపై పరిశీలన జరిపిన కాగ్‌.. అందులోని లోపాలు ఎత్తిచూపింది. ‘అన్ని రకాల అనుమతులకు దరఖాస్తు చేసుకున్నట్లు నిర్ధారించుకునేలా సాఫ్ట్‌వేర్‌లో వ్యవస్థ లేదు. నుమతులకు తరువాత దరఖాస్తు చేసుకునేందుకు ‘అప్‌లై లేటర్‌’ఆప్షనూ లేదు. 2016–17లో 1,941 దరఖాస్తులొస్తే 177 మంది దరఖాస్తుదారులే అన్ని రకాల అనుమతులు కోరారు. మిగిలిన వారు పాక్షిక అనుమతులే పొందారు. పాక్షికంగా అనుమతులు తీసుకున్న పరిశ్రమలు యూనిట్లు ఏర్పాటు చేసి కార్యకలాపాలు ప్రారంభించాయని నిర్ధారించుకునే వ్యవస్థ కూడా లేదు. కాలుష్య నియంత్రణ మండలి నుంచి రెడ్‌ కేటిగిరీ పరిశ్రమల ఏర్పాటుకు 148 పరిశ్రమలు అనుమతి పొందాల్సి ఉండగా, 85 పరిశ్రమలే దరఖాస్తు చేసుకున్నాయి. ఆరెంజ్‌ కేటగిరీ కింద 441 పరిశ్రమలకు గాను 175.. అగ్నిమాపక శాఖ నుంచి ఎన్‌ఓసీ కోసం 106 పరిశ్రమలకు గాను 9 మాత్రమే దరఖాస్తు చేసుకున్నాయి. పంచాయతీల నుంచి ఎన్‌ఓసీ కోసం 1,425 పరిశ్రమలకు గాను 147 మాత్రమే దరఖాస్తు చేసుకున్నాయి’అని కాగ్‌ పేర్కొంది.  

రాజమహేంద్రవరం క్రైం:  వ్యక్తి అనుమానాస్పదంగా మృతి చెందిన సంఘటన వన్‌టౌన్‌ పోలీస్‌స్టేషన్‌ పరి«ధిలో చోటుచేసుకుంది. వివరాల్లోకి వెళితే.. కృష్ణాజిల్లా గన్నవరం గ్రామానికి చెందిన వెంకటేశ్వరరావు(65) కొంతకాలంగా భార్య, పిల్లలతో గొడవపడి రాజమహేంద్రవరం వచ్చేశాడు. ఇతడు గోదావరి గట్టున మార్కండేయస్వామి గుడి సమీపంలో ఉన్న సులభ కాంప్లెక్స్‌ను రెండు నెలలుగా కంచిపాటి గోవింద్‌ వద్ద సబ్‌ లీజుకు తీసుకొని నిర్వహిస్తున్నాడు. శుక్రవారం మధ్యాహ్నం మూడు గంటల సమయంలో సులభ కాంప్లెక్స్‌ నుంచి మంటలు వ్యాపించడంతో స్థానికుల అగ్నిమాపకశాఖకు సమాచారం అందించారు. సంఘటన స్థలానికి చేరుకున్న అగ్నిమాపక శాఖ సిబ్బంది మంటలను అదుపు చేశారు. అప్పటికే మంటలలో చిక్కుకున్న వెంకటేశ్వరరావు పూర్తిగా కాలిపోయి మృతి చెందాడు. అగ్నిప్రమాదానికి గల కారణాలు తెలియరాలేదు. పాతకక్షల నేపథ్యంలో ఎవరైనా పెట్రోల్‌ పోసి అంటించారా? అనే అనుమానాలు వ్యక్తమవుతున్నాయి. విద్యుత్‌ షార్ట్‌ సర్క్యూటైతే సులభ కాంప్లెక్స్‌ మొత్తం మంటలు వ్యాపించి ఉండేవి. కేవలం నిర్వాహకుడు కూర్చొనే క్యాబిన్‌ మాత్రమే అంటుకోవడం, మంటలలో పూర్తిగా కాలిబూడిద కావడం బట్టి చూస్తే ఇది హత్యేననే అనుమానాలు వ్యక్తమవుతున్నాయి. మృతుడు ఎప్పుడు రాజమహేంద్రవరం వచ్చాడనేది స్థానికులు చెప్పలేకపోతున్నారు. స్థానికులకు వెంకటేశ్వరరావుగా పరిచయమయ్యాడు. ఇంటి పేరు, కుటుంబ సభ్యుల పేర్లు ఎవరికీ చెప్పలేదని స్థానికులు పేర్కొంటున్నారు. మృతుడు పూర్తిగా కాలిపోవడం బట్టి చూస్తే ఎవరైనా కావాలనే అంటించారనే అనుమానాలు వ్యక్తమవుతున్నాయి. సంఘటన స్థలాన్ని వన్‌టౌన్‌ సీఐ రవీంద్ర, ఎస్సై రాజశేఖర్‌ పరిశీలించారు. ఆధారాలు సేకరించారు. మృతదేహాన్ని పోస్టుమార్టం నిమిత్తం ప్రభుత్వ హాస్పిటల్‌కు తరలించారు. సులభ కాంప్లెక్స్‌ ప్రధాన నిర్వాహకుడు కంచిపాటి గోవింద్‌ను ప్రశ్నించి, వివరాలు సేకరించారు. కేసు నమోదు చేసి దర్యాప్తు చేస్తున్నారు.

పాలకొండ రూరల్‌: పాలకొండలోని వీరఘట్టం వెళ్లే దారిలో ఫైర్‌స్టేషన్‌ ఎదుట జరిగిన అగ్ని ప్రమాదంలో బూరి అప్పన్నమ్మకు చెందిన ఇల్లు, టీ దుకాణం కాలిబూడిదయ్యాయి. అప్పన్నమ్మ తన ఇంటి ముందు టీ దుకాణం నడుపుతూ జీవనం సాగిస్తోంది. సోమవారం సాయంత్రం రోజువారీ సరుకుల కోసం ఇంటికి తాళం వేసి బయటకు వెళ్లింది. ఈ సమయంలో ఒక్కసారిగా ఇంట్లో మంటలు వ్యాపించాయి. ఎదురుగా గ్యాస్‌ గొడౌన్‌ ఉండటంలో అక్కడి వారు అగ్నిమాపక కేంద్రానికి సమాచారం అందించారు. ఆ సమయంలో వాహనం ఫిట్‌నెస్‌ సర్టిఫికెట్‌ కోసం విశాఖకు వెళ్లిపోయింది. అక్కడి సిబ్బంది ఘటనా స్థలానికి చేరుకున్నప్పటికి ఏం చేయలేకపోయారు. దీంతో అప్పన్నమ్మ ఇంటితోపాటు రూ.20 వేలు నగదు, ఇతర సామగ్రి కాలిబూడిదయ్యాయి. విద్యుత్‌ షార్టు సర్క్యూట్‌ వల్లే ఈ ప్రమాదం సంభవించి ఉంటుందని భావిస్తున్నారు

అసలే ఎండాకాలం! ఎప్పుడు.. ఎక్కడ ఎలాంటి ప్రమాదం జరుగుతుందో ఎవరూ చెప్పలేం.. ఎక్కడైనా ప్రమాదవశాత్తు అగ్నిప్రమాదం జరిగితే ఆ వాహనం వస్తే తప్ప మంటలను అదుపు చేయలేని పరిస్థితి.. కానీ అలాంటి వాహనానికే రక్షణ కరువైంది.. కనీసం చిన్నపాటి షెడ్డు కూడా లేకపోవడంతో ఎండకు ఎండుతూ.. వానకు తడుస్తూ తుప్పుపట్టిపోతుంది.. ఇక ఆ వాహనానికి సంబంధించిన అధికారులు పనిచేసేందుకు కూడా ఒక సొంత గూడు కరువైపోయింది.. తాత్కాలికంగా ఓ అద్దె భవనంలో కాలం నెట్టుకొస్తున్నారు.. ఈపాటికే మీకు అర్థమై ఉంటుంది ఆ వాహనం.. అధికారులు ఎవరో.. అదేనండి అగ్నిమాపక (ఫైరింజన్‌) శాఖ కార్యాలయం.. ఇదెక్కడో మారుమూల ప్రాంతంలో కాదు.. మహబూబ్‌నగర్‌ జిల్లాకేంద్రంలోని దుస్థితి ఇది..  మహబూబ్‌నగర్‌ క్రైం : అగ్నిప్రమాదం బారిన పడిన ఇళ్లను, కార్యాలయాలను, పంటలను  ఇ లా ఎలాంటి వాటినైనా రక్షించే బాధ్యత అగ్ని మాపక శాఖది. కానీ వాళ్లు ఉండటానికి రక్షణతో కూడిన వసతి లేకుండాపోయింది. మహబూబ్‌నగర్‌ జిల్లా అగ్నిమాపక శాఖ నూతన భవన నిర్మాణానికి పునాది రాయి వేసి ఏళ్లు గ డుస్తున్నా నిర్మాణం  ఇంకా పూర్తికావడం లేదు. సొంత భవనాలు లేక పట్టణ ఇందిరక్రాంతి పథకం, స్వయం సహాయ మహిళా సంఘాల శిక్షణ కోసం ఏర్పాటు చేసిన భవనంలో తలదాచుకుంటున్నారు. ఇక మ హిళా సంఘాల సభ్యులకు ఎప్పుడైనా శిక్షణ, సమావే శం  ఉంటే ఆ రోజంతా ఆరుబయట పడిగాపు లు కాయాల్సిందే. అధికారుల పరిస్థితే ఇలా ఉంటే.. అగ్నిమాపక శాఖకు చెందిన ఫైరింజన్లు నిలపడానికి ఎలాంటి షెడ్డు లేకపోవడంతో ఆరుబయట ఎండలో ఓ మూలకు ఆపారు. అద్దె భవనాలే దిక్కు..    జిల్లా అగ్నిమాపక అధికారి కార్యాలయంతోపాటు అగ్నిమాపక స్టేషన్‌ అధికారి కార్యాలయం రెండు అద్దె భవనంలోనే కొనసాగుతున్నాయి. శాశ్వత భవన నిర్మాణ పనులు వేగవంతంగా పూర్తి కాకపోవడంతోపాటు ఆ దిశగా ప్రయత్నాలు జరిపే నా థుడే కరువయ్యారు. 2015 సంవత్సరంలో మ ంజూరైన భవన నిర్మాణ పనులు ఇంకా కొనసాగుతుంటే పట్టించుకునే దిక్కు లేకుండా పోయింది. పాత భవనం కూల్చిన తర్వాత అగ్నిమాపక శాఖ కార్యాలయం సొంత భవనం లేకపో వడం తో ఈ శాఖ సమస్యలను ఎదుర్కొంటుంది.   వెనక్కి వెళ్తున్న నిధులు..  పట్టణంలో అగ్నిమాపక శాఖ కార్యాలయం, అగ్నిమాపక కేంద్రం నిర్మాణానికి ప్రభుత్వం రూ.1.74 కోట్ల నిధులను కేటాయించినా వీటిని సద్వినియోగం చేసుకునే పరిస్థితి లేకుండా పోయింది. శాశ్వత భవనం లేకపోవడంతో నెలకు రూ.10 వేల వరకు అద్దె చెల్లిస్తూ డీఎఫ్‌ఓ కార్యాలయాన్ని నిర్వహిస్తున్నారు. జిల్లా అగ్నిమాపక శాఖ నూతన కార్యాలయ నిర్మాణానికి 2015 జూన్‌లో పునాది వేశారు. రెండు అంతస్థుల భవనం నిర్మాణం కోసం రూ.1.74 కోట్లను కేటాయించారు. దీని నిర్మాణ పనులను రాష్ట్ర పోలీస్‌ హౌజింగ్‌ బోర్డు చూసు కుంటుండగా.. నిర్మాణ పనులు మాత్రం ప్రైవేట్‌ కాంట్రాక్టర్‌కు అప్పగించారు. అయితే సకాలంలో నూతన భవన నిర్మాణ పనులు పూర్తికాక వచ్చిన నిధులు వెనక్కి వెళ్తున్నాయి.  ఉన్నతాధికారుల దృష్టికి..  రాష్ట్రవ్యాప్తంగా జిల్లా అగ్నిమాపక శాఖ కార్యాలయాలు నూతన భవన నిర్మాణాలను రాష్ట్ర పోలీస్‌ హౌజింగ్‌ బోర్డు వాళ్లు చూసుకుంటు న్నారు. గత మూడేళ్ల నుంచి కొత్త భవన నిర్మాణ పనులు సాగుతున్నాయి. ప్రస్తుతం డీఎఫ్‌ఓ, ఫైర్‌ ఆఫీసర్‌ కార్యాలయాలు అద్దె భవనాల్లో నడిపిస్తున్నాం. పనులు పూర్తి చేయాలనే అంశంపై ఉన్నతాధికారుల దృష్టికి తీసుకువెళ్తాం.        – శ్రీనివాసులు, జిల్లా అగ్నిమాపక శాఖాధికారి, మహబూబ్‌నగర్‌ 

ముంబై : ముంబై నగరంలో ఆదివారం ఉదయం భారీ అగ్ని ప్రమాదం చోటుచేసుకుంది. మన్‌‌ఖుర్ద్‌ ప్రాంతంలోని మాయాహోటల్‌ సమీపంలోని ఓ షాపులో భారీగా మంటలు చెలరేగాయి. ఉన్నట్టుండి  షాపులో మంటలు చెలరేగి ఇతర ప్రాంతాలకు వ్యాపించాయి. సమాచారం తెలుసుకున్న అగ్నిమాపక సిబ్బంది 12 ఫైరింజన్లతో మంటలను అదుపులోకి తెచ్చేందుకు ప్రయత్నించారు. ప్రమాదానికి గల కారణాలు తెలియరాలేదు. ఈ ప్రమాదంలో ఎలాంటి ప్రాణనష్టం సంభవించలేదని అగ్నిమాపక అధికారులు తెలిపారు.

విశాఖపట్నం : విశాఖపట్నంలో అశీలమెట్ట వద్ద లేడీస్‌ హాస్టల్‌లో అగ్ని ప్రమాదం చోటుచేసుకుంది. అశీలమెట్టలోని ఓ లేడీస్‌ హాస్టల్‌లో ఒక్కసారిగా మంటలు చెలరేగాయి. దీంతో వెంటనే హాస్టల్‌లోని అమ్మాయిలు పరుగులు తీశారు. సమాచారం అందిన అగ్నిమాపక సిబ్బంది సకాలంలో అక్కడికి చేరుకొని మంటలు అదుపు చేశారు. దీంతో ఎటువంటి నష్టం జరగలేదు. విద్యార్థుల దుస్తులు, పుస్తకాలు దగ్ధమయ్యాయి. షార్ట్‌ సర్క్యూట్‌ కావడం వల్ల మంటలు చెలరేగాయని తెలుస్తోంది. 

సాక్షి, ముంబై : అగ్ని ప్రమాదాలు సంభవించినప్పుడు అగ్నిమాపక సిబ్బందికి ప్రాణహాని జరగకుండా రోబోలు కొనుగోలు చేయాలని బృహన్ముంబై మున్సిపల్‌ కార్పొరేషన్‌ (బీఎంసీ) భావిస్తోంది. అలాగే కెమికల్‌ ఫ్యాక్టరీలలో రసాయనాలకు మంటలు అంటుకున్నప్పుడు అవి పేలిపోయే ప్రమాదం ఉంటుంది. దీంతో సిబ్బందికి ప్రాణహాని జరిగే ఆస్కారముంటుంది. ఇలాంటి సమయంలో రోబోలు ఎంతో దోహదపడతాయని బీఎంసీ భావిస్తోంది. అదేవిధంగా అగ్ని ప్రమాద తీవ్రత తెలుసుకునేందుకు డ్రోన్ల సాయం కూడా తీసుకోవాలని యోచిస్తోంది. డ్రోన్ల అనుమతికి చర్చలు.. బహుళ అంతస్తుల భవనాల్లో అగ్ని ప్రమాదాలు జరిగినప్పుడు సహాయక చర్యలు చేపట్టడానికి అనేక ఇబ్బందులు ఎదురవుతాయి. ఇటు మంటల తీవ్రతకు సంఘటన స్థలానికి దగ్గర వరకు వెళ్లలేక.. అటు అందులో చిక్కుకున్న వారిని కాపాడటానికి తమ ప్రాణాలను సైతం ఫణంగా పెట్టాల్సి వస్తుంది. దీంతో అనేక సందర్భాలలో అగ్నిమాపక సిబ్బంది గాయడటం లేదా చనిపోవడం లాంటి సంఘటనలు జరుగుతుంటాయి. వీటికి స్వస్తి చెప్పాలంటే రోబోలు ఎంతో ఉపయోగపడతాయని బీఎంసీ భావిస్తోంది. రాత్రివేళల్లో పైఅంతస్తుల్లో మంటలు అంటుకున్నప్పుడు విద్యుత్‌ సరఫరా నిలిపివేయాల్సి ఉంటుంది. ఒక పక్క చీకటి, మరోపక్క లిఫ్టులు పనిచేయవు. దీంతో ప్రమాదస్థలికి దగ్గర వరకు వెళ్లలేని పరిస్థితి నెలకొంటుంది. అలాంటి సమయంలో ప్రమాద తీవ్రతను గుర్తించి ఆ ప్రకారం వ్యూహాత్మక చర్యలు చేపట్టేందుకు డ్రోన్లు ఎంతో ఉపయోగపడతాయి. కానీ, ముంబైలో డ్రోన్ల వినియోగానికి అనుమతి లేదు. అందుకు విమానయాన శాఖ, ముంబై పోలీసు శాఖ నుంచి అనుమతి తీసుకోవాల్సి ఉంటుంది. దీనిపై వివిధ కోణాల్లో చర్చలు జరుపుతున్నారు. అనుమతి లభించగానే డ్రోన్లు కొనుగోలు చేయడానికి టెండర్లను ఆహ్వానించే ప్రక్రియ ప్రారంభించనున్నట్లు అగ్నిమాపక శాఖ చీఫ్‌ ప్రభాత్‌ రహందళే చెప్పారు. అందుకు అగ్నిమాపక శాఖకు రూ.151 కోట్ల నిధులు మంజూరు చేశారని తెలిపారు. కాగా, అగ్నిమాపక సిబ్బందికి రూ.30 లక్షల బీమా పాలసీ, విధినిర్వహణలో మృతి చెందిన జవాన్ల పిల్లల చదువులకయ్యే ఖర్చు బీఎంసీ భరించనుందని ఆయన అన్నారు.

సాక్షి, హైదరాబాద్‌: నగరంలోని రామచంద్రాపురంలో పారిశ్రామికవాడలో బుధవారం అర్ధరాత్రి భారీ అగ్ని ప్రమాదం చోటుచేసుకుంది. పెద్ద ఎత్తున మంటలు ఎగసిపడటంతో ప్రజలు భయందోళనకు గురయ్యారు. వివరాలివి.. బండ్లగూడలోని అగర్వాల్ గోడౌన్‌లో ఈ ప్రమాదం జరిగింది. సమాచారం అందుకున్న అగ్నిమాపక సిబ్బంది మంటలను అదుపు చేస్తున్నారు. పెద్ద పెత్తున ఆస్తి నష్టం జరిగి ఉండవచ్చని అంచనా వేస్తున్నారు. ఘటనకు సంబంధించి పూర్తి వివరాలు తెలియాల్సి ఉంది.

సాక్షి, ప్రతినిధి, మహబూబ్‌నగర్‌ : కొడంగల్‌ నియోజకవర్గ ప్రజలు ఎన్నో ఏళ్లుగా ఆశగా ఎదురు చూస్తున్న కోస్గి బస్‌డిపో విషయంలో కీలక పరిణామం చోటు చేసుకోనుంది. దాదాపు ఆరేళ్లుగా ఊరిస్తున్న బస్‌డిపో అంశంపై ప్రభుత్వం ఎట్టకేలకు నిర్ణయం తీసుకుంది. స్వయంగా సీఎం కేసీఆర్‌ బస్‌ డిపోకు పచ్చజెండా ఊపినట్లు సమాచారం. మంగళవారం సీఎం కేసీఆర్‌ను కొడంగల్‌ నియోజకవర్గానికి చెందిన ముఖ్యనేతలతోపాటు మాజీ ఎమ్మెల్యే గురున్నాథ్‌రెడ్డి, మంత్రులు జూపల్లి కృష్ణారావు, పట్నం మహేందర్‌రెడ్డి, ఎమ్మెల్సీ నరేందర్‌రెడ్డి తదితరులు కలిశారు. ఈ సందర్భంగా నియోజకవర్గానికి చెందిన పలు అంశాలను ప్రస్తావించారు. అందులో భాగంగానే సీఎం కోస్గి పోలీస్‌ సర్కిల్, ఫైర్‌స్టేషన్, దౌల్తాబాద్, బొంరాస్‌పేటలకు జూనియర్‌ కాలేజీల ఏర్పాటుకు అంగీకారం తెలిపారని తెలిసింది. వాటికి సంబంధించిన ఉత్తర్వులు బుధవారం వెలువడనున్నట్లు సమాచారం. కొన్నేళ్లుగా ఎదురుచూపు కోస్గి బస్‌డిపో కోసం నియోజకవర్గ ప్రజలు కొన్నేళ్లుగా ఎదురుచూస్తున్నారు. గత ఆరేళ్లుగా అనేక పరిణామాలు చోటు చేసుకున్నాయి. ఒక విధంగా ప్రస్తుతం కూడా బస్‌డిపో చుట్టూనే రాజకీయాలు తిరుగుతున్నాయి. వాస్తవానికి కొడంగల్‌ నియోజకవర్గానికి కేంద్ర బిందువైన కోస్గిలో బస్‌డిపో ఏర్పాటు చేయాలనేది ఎంతో కాలంగా డిమాండ్‌ వినిపిస్తోంది. ప్రజల్లో ఉన్న డిమాండ్‌ మేరకు ఎమ్మెల్యేగా ఉన్న రేవంత్‌రెడ్డి ఈ విషయాన్ని పలుమార్లు ప్రభుత్వం దృష్టికి తీసుకెళ్లారు. 2012లో ఉమ్మడి రాష్ట్రంలో రాజ్యసభ సభ్యుడు సీఎం రమేశ్‌ నిధుల నుంచి రూ.కోటి నిధులు కూడా మంజూరు చేయించారు. అలాగే ప్రభుత్వ స్థలం అందుబాటులో లేక 2013లో 5ఎకరాల స్థలాన్ని కొని ప్రభుత్వానికి అందజేశారు. అందుకు అనుగుణంగా అప్పట్లో ఆర్టీసీ చైర్మన్‌గా ఉన్న ఎం.సత్యనారాయణ శిలాఫలకం కూడా వేశారు. తదనంతర పరిణామాలలో బస్‌డిపో విషయం మరుగున పడిపోయింది. తెలంగాణ రాష్ట్రం ఏర్పడిన నాటి నుంచి కూడా ఎమ్మెల్యే రేవంత్‌రెడ్డి పలుమార్లు అసెంబ్లీతో పాటు పలు బహిరంగ వేధికల మీద ఈ అంశాన్ని పదే పదే ప్రస్తావించారు.   అభివృద్ధి కార్యక్రమాలకు శ్రీకారం.. కొడంగల్‌ నియోజకవర్గంలో నెలకొన్న తాజా రాజకీయ పరిణామాల నేపథ్యంలో భారీగా అభివృద్ధి కార్యక్రమాలు జరగనున్నాయి. ఎమ్మెల్యే రేవంత్‌రెడ్డి టీడీపీ నుంచి వీడి కాంగ్రెస్‌లో చేరిన నాటి నుంచి నియోజకవర్గంలో రాజకీయ పరిణామాలు చాలా వేగంగా మారుతున్నాయి. ప్రభుత్వ పెద్దలు నియోజకవర్గంపై ప్రత్యేక ఫోకస్‌ పెట్టడంతో ఎన్నడూలేని విధంగా అభివృద్ధి కార్యక్రమాలు వడివడిగా జరుగుతున్నాయి. అంతేకాదు తరచూ మంత్రులు పర్యటిస్తూ ప్రజల నుంచి వచ్చే డిమాండ్లకు ఎప్పటికప్పుడు పచ్చజెండా ఊపుతున్నారు. కేవలం 3నెలల వ్యవధిలో రూ.కోట్లాది విలువ చేసే అభివృద్ధి పనులను చేపట్టారు. అలాగే ఎన్నో ఏళ్లుగా పరిష్కారానికి నోచని వాటికి కూడా మోక్షం లభిస్తోంది. దీంతో తాజాగా రెండు వర్గాలు కూడా ఆ క్రెడిట్‌ తమ వల్లే అంటూ ఒకరికొకరు ఆదిపత్యం ప్రదర్శిస్తున్నారు.

విజయవాడ: విజయవాడలోని సురంపల్లి పారిశ్రామిక వాడలో భారీ అగ్ని ప్రమాదం జరిగింది. జీఎస్‌ ఎల్లాయిస్‌ ఫ్యాక్టరీలో బాయిలర్‌ పేలుడుతో ఒక్కసారిగా మంటలు ఎగసిపడ్డాయి. దీంతో కార్మికులు మంటల్లో చిక్కుకున్నారు. ఈ ఘటనలో ఇద్దరు మృతి చెందగా, మరో ఏడుగురి పరిస్థితి విషమంగా ఉంది. క్షతగాత్రులను విజయవాడ ప్రభుత్వ ఆసుపత్రికి తరలించారు. ఫైర్‌ సిబ్బంది రెండు ఫైరింజన్‌లతో మంటలను అదుపు చేస్తున్నారు. 

సాక్షి, హైదరాబాద్‌: నూతన ఏడాదిని పురస్కరించుకొని పోలీసు, అగ్నిమాపక, స్పెషల్‌ ప్రొటెక్షన్‌ ఫోర్స్, విజిలెన్స్, ఏసీబీ విభాగాల్లో ఉత్తమ సేవలందించిన పోలీసులకు రాష్ట్ర ప్రభుత్వం పలు అవార్డులను ప్రకటించింది. ఈ మేరకు ప్రభుత్వం ఆదివారం జీవోను విడుదల చేసింది. ప్రతిష్టాత్మకంగా భావించే తెలంగాణ స్టేట్‌ ముఖ్యమంత్రి సర్వోన్నత పోలీసు పతకం నలుగురిని వరించింది. ఈ అవార్డును టీఎస్‌ఎస్పీ ఫస్ట్‌ బెటాలియన్‌ కమాండెంట్‌ యారబట్టి శ్రీనివాసరావు, టీఎస్‌ ఐఎస్‌డబ్ల్యూ డీఎస్పీ కిరణ్‌ రాయ్, అఫ్జల్‌గంజ్‌ అడిషనల్‌ ఇన్‌స్పెక్టర్‌ ఆఫ్‌ పోలీస్‌ మాది ప్రవీణ్‌ కుమార్, శంషాబాద్‌ సెంట్రల్‌ క్రైం స్టేషన్‌ ఎస్‌ఐ కొక్కాడ బాలరాజు దక్కించుకున్నారు. పోలీసు, అగ్నిమాపక శాఖ విభాగాల్లో 11 మందికి శౌర్య పతకం, ఇద్దరికి మహోన్నత సేవా పతకం, 37 మందికి ఉత్తమ సేవా పతకం, 21 మందికి కఠిన సేవా పతకం, 165 మందికి సేవా పతకం దక్కాయి. స్పెషల్‌ ప్రొటెక్షన్‌ ఫోర్స్‌ విభాగంలో ఒకరికి మహోన్నత సేవా పతకం, ముగ్గురికి ఉత్తమ సేవా పతకం, 15 మందికి సేవా పతకాలు వరించాయి. స్టేట్‌ డిజాస్టర్‌ రెస్పాన్స్‌ అండ్‌ ఫైర్‌ విభాగంలో ఆరుగురికి శౌర్య పతకం, ఒకరికి ఉత్తమ సేవా పతకం, 14 మందికి సేవా పతకం, విజిలెన్స్‌ అండ్‌ ఎన్‌ఫోర్స్‌మెంట్‌లో ఇద్దరికి సేవా పతకాలు దక్కాయి. ఏసీబీలో ముగ్గురికి ఉత్తమ సేవా పతకం, 12 మందికి సేవా పతకాలు వచ్చాయి.

సాక్షి, హైదరాబాద్‌: రాష్ట్రంలో ఈ ఏడాది అగ్నిప్రమాదాల సంఖ్య పెరిగినట్టు అగ్నిమాపక శాఖ డైరెక్టర్‌ జనరల్‌ రాజీవ్‌ రతన్‌ వెల్లడించారు. శనివారం ఆయన ఇక్కడ మీడియాతో మాట్లాడుతూ, అగ్నిమాపక శాఖ వార్షిక నివేదిక విడుదల చేశారు. 2016లో 9,286 అగ్నిప్రమాదాలు జరిగితే ఈ ఏడాది 9,811 ప్రమాదాలు చోటు చేసుకున్నాయని చెప్పారు. గతేడాది కంటే 5.3 శాతం అధికంగా ప్రమాదాలు సంభవించాయని తెలిపారు. 499 మంది ప్రాణాలను తమ సిబ్బంది కాపాడారన్నారు. ఈ ఏడాది ప్రమాదా ల్లో రూ.154 కోట్ల ఆస్తినష్టం జరిగిందని, రూ.685 కోట్ల ఆస్తిని కాపాడామని రాజీవ్‌రతన్‌ తెలిపారు. అగ్నిప్రమాదాల నివారణపై అవగాహనకు మూడు, ఎనిమిదో తరగతుల సిలబస్‌లో పాఠ్యాంశాలను చేర్చినట్టు చెప్పారు. ఘటనాస్థలికి ఫైరింజన్లు చేరుకోవడానికి గ్రీన్‌చానల్‌ ఏర్పాటు చేశామని, ప్రమాదం జరిగిన వెంటనే క్షణాల్లో ప్రభుత్వ విభాగాలకు సమాచారం చేరుతోందన్నారు. గ్రీన్‌చానల్‌ వల్ల హైదరాబాద్‌ పోలీస్, వాటర్‌బోర్డు, జీహెచ్‌ఎంసీ, హెల్త్‌ విభాగాలు తక్షణమే స్పందిస్తున్నాయని చెప్పారు. ప్రాణాలకు తెగించి పనిచేసిన ఫైర్‌మెన్‌ అర్జున్, సుధాకర్‌కు రాష్ట్రపతి అవార్డులు సైతం వచ్చాయన్నారు. సులువుగా ఫైర్‌ ఎన్‌వోసీ పొందేందుకు ఆన్‌లైన్‌ ద్వారా అన్ని అనుమతులు మంజూరు చేస్తున్నట్టు తెలిపారు. ఈ ఏడాది 5 వేలకుపైగా అనుమతులిచ్చామని, వీటి ద్వారా రూ.14.46 కోట్ల ఆదాయం సమకూరిందని తెలిపారు. రాష్ట్రంలో త్వరలో 18 అగ్నిమాపక స్టేషన్లు ఏర్పాటు చేయనున్నట్టు వెల్లడించారు.  కాగా, ముంబై పబ్‌లో జరిగిన అగ్నిప్రమాదం వంటి ఘటనల నివారణపై డీజీని మీడియా ప్రశ్నించగా, పబ్‌లతో తమకు సంబంధంలేదని, తాము భవనాలకు మాత్రమే ఫైర్‌ ఎన్‌వోసీ ఇస్తామని స్పష్టం చేశారు. పబ్‌లకు పోలీస్, ఎక్సైజ్‌ విభాగాలు అనుమతిస్తాయన్నారు. పబ్‌ నిర్వాహకులు ఎంట్రీ, ఎగ్జిట్‌ పాయింట్లను తప్పకుండా ఏర్పాటు చేసుకోవాలని సూచించారు. 

సాక్షి, ముంబై : సాధారణంగా తమకు న్యాయం చేయాలంటూ ఫిర్యాదు చేసేందుకు పోలీస్ స్టేషన్‌కు వెళ్తే.. ఒక్కో దగ్గర బాధితులకు ఒక్కో అనుభవం ఎదురౌతుంది. తన ఫిర్యాదును పట్టించుకోలేదని తీవ్ర మనస్తాపానికి లోనైన ఓ వృద్ధుడు ఓ ఎత్తైన టవర్ ఎక్కి హడలెత్తించాడు. ఈ ఘటన మహారాష్ట్రలో గురువారం చోటుచేసుకుంది. ఆ వివరాలిలా ఉన్నాయి.. 67 ఏళ్ల ఓ వృద్ధుడు ముంబైలో నివాసం ఉంటున్నారు. ఆయనకు ఏదో సమస్య తలెత్తడంతో ఫిర్యాదు చేద్దామని స్థానిక పోలీస్ స్టేషన్‌కు వెళ్లాడు. ఆయన సమస్యను పట్టించుకోని పోలీసులు కేసు నమోదు చేయలేదు. దీంతో మనస్తాపానికి గురైన ఆ వృద్ధుడు ప్రియదర్శిని సర్కిల్ లో ఉన్న పవర్ టవర్ ఎక్కి.. కిందకి దూకేస్తానంటూ బెదిరింపులకు పాల్పడ్డాడు. సమాచారం అందుకున్న అగ్నిమాపక సిబ్బంది అక్కడికి చేరుకుని అతికష్టం మీద ఆ వ్యక్తిని కిందకి దించడంతో పోలీసులు ఊపిరి పీల్చుకున్నారు.

సాక్షి, హైదరాబాద్‌: హైకోర్టు ఆగ్రహంతో హైదరాబాద్‌ ఎగ్జిబిషన్‌ సొసైటీ దిగొచ్చింది. చెల్లించాల్సిన బకాయిలను ఎట్టకేలకు సొసైటీ చెల్లించినట్లు ఉమ్మడి హైకోర్టుకు హైదరాబాద్‌ జిల్లా అగ్నిమాపక శాఖ అధికారి ఎం. శ్రీనివాస్‌రెడ్డి తెలిపారు. ఈ విషయాన్ని పరిగణనలోకి తీసుకుని కోర్టు ధిక్కార వ్యాజ్యాన్ని మూసివేసినట్లు హైకోర్టు తాత్కాలిక ప్రధాన న్యాయమూర్తి జస్టిస్‌ రమేశ్‌ రంగనాథన్, న్యాయమూర్తి జస్టిస్‌ షమీమ్‌ అక్తర్‌లతో కూడిన ధర్మాసనం శుక్రవారం ఉత్తర్వులు జారీ చేసింది. 2011 నుంచి 2017 వరకు రూ.93.94 లక్షలకు రూ.64.96 లక్షలను గతంలోనే ఎగ్జిబిషన్‌ సొసైటీ చెల్లించిందని ప్రభుత్వ న్యాయవాది (హోం) టి.శ్రీకాంత్‌రెడ్డి తెలిపారు. ఈ నెల 7న మిగిలిన బకాయి మొత్తం రూ.28.97 లక్షలను అగ్నిమాపక శాఖకు ఎగ్జిబిషన్‌ సొసైటీ చెల్లించిందన్నారు. 2015లో అగ్నిమాపక శాఖకు నాంపల్లిలోని ఎగ్జిబిషన్‌ సొసైటీ బకాయిలు చెల్లించడం లేదని న్యాయవాది ఖాజా అజాజుద్దీన్‌ ప్రజాప్రయో జన వ్యాజ్యాన్ని దాఖలు చేశారు. 2011 నుంచి 2016 వరకు ఉన్న రూ.80.14 లక్షల బకాయిలను ఆరు నెలల్లోగా చెల్లించాలన్న హైకోర్టు ఆదేశాల్ని ఎగ్జిబిషన్‌ సొసైటీ ఖాతరు చేయలేదు. దీంతో పిటిషనర్‌ కోర్టు ధిక్కార వ్యాజ్యాన్ని దాఖలు చేయడంతో హైకోర్టు గతంలో తీవ్ర స్థాయిలో ఆగ్రహం వ్యక్తం చేసింది. బకాయిలను వాయిదాల పద్ధతిలో చెల్లించాల్సిందేనని హైకోర్టు తేల్చి చెప్పింది. ఈ నెల 7న మిగిలిన రూ.28.98 లక్షల మొత్తాన్ని చెల్లించినట్లు ప్రభుత్వ న్యాయవాది చెప్పడంతో ఎగ్జిబిషన్‌ సొసైటీపై కోర్టు ధిక్కార వ్యాజ్యాన్ని ముగిస్తున్నట్లు ధర్మాసనం ప్రకటించింది.

అగ్ని ప్రమాదం ఎక్కడ జరిగినా నష్టం అధికంగా ఉంటుంది. అదే ఆస్పత్రిలో జరిగితే అపారం. గత ఏడాది భువనేశ్వర్‌లోని ఓ ఆస్పత్రిలో జరిగిన అగ్ని ప్రమాదంలో 22 మంది మృత్యువాత పడ్డారు. ఆ ఘటన మరువక ముందే సోమవారం వరంగల్‌లోని రోహిణి ఆస్పత్రి ఘటన కలిచివేస్తుంది. ఆలాంటి ఆస్పత్రులు జిల్లాలోనూ ఉన్నాయి. దురదుృష్టవశాత్తు ప్రమాదం జరిగితే ఏ మేరకు నివారించగలం.. రోగులను ఎంత సురక్షితంగా బయటకు తరలించగలమన్న విషయం ప్రశ్నార్థకంగా మారింది. జిల్లాలోని ప్రధాన ఆస్పత్రుల్లో అగ్ని ప్రమాద నివారణ వ్యవస్థ ఎలా ఉందన్న విషయంపై సాక్షి ఫోకస్‌. రుయాలో భద్రత డొల్ల తిరుపతి(అలిపిరి): శ్రీవేంకటేశ్వర రామ్‌ నారాయణ్‌ రుయా ప్రభుత్వాస్పత్రి అగ్నిప్రమాద నివారణ వ్యవస్థకు ఆమడ దూరంలో ఉంది.  రుయాకు వై ద్యం నిమిత్తం నిత్యం 1,200 నుంచి 2 వేల మంది రోగులు వస్తుంటారు. వార్డుల్లో 850 మంది ఇన్‌పేషెంట్లు వైద్య సేవలు పొందుతున్నారు. చిన్న పిల్లల ఆస్పత్రిలో 250 మంది చిన్నారులు వైద్య సేవలు పొందుతున్నారు. ఇంతటి పెద్దాస్పత్రికి కనీ సం క్యాజువాలిటీ మొదలుకుని వార్డుల వరకు అగ్నిప్రమాద నివారణ వ్యవస్థ లేకపోవడం ఆశ్చర్యం కలిగించే విషయం. 1962లో రుయా ఆస్పత్రి ప్రారంభించినప్పటి నుంచి నేటి వరకు అగ్నిమాపక వ్యవస్థ లేకపోవడం విస్మయానికి గురిచేస్తోంది. పట్టించుకోని వైద్యఆరోగ్యశాఖ రాయలసీమ ప్రాంత పేద ప్రజల కోసం ఏర్పాటైన ఆస్పత్రిలో కనీసం అగ్నిప్రమాద నివారణ వ్యవస్థను ఏర్పాటు చేయడంతో వైద్య ఆరోగ్య శాఖ నిర్లక్ష్యంగా వ్యవహరిస్తోంది. ఆపరేష్‌ థియేటర్లలో చిన్నపాటి విద్యుదాఘాతం చోటు చేసుకున్న పెద్ద ప్రమాదం సంభవించే అవకాశం ఉంది. వరంగల్‌ హన్మకొండలోని రోహిణి ఆస్పత్రిలో జరిగిన అగ్నిప్రమాద ఘటన దృష్టిలో పెట్టుకుని రుయాలో అగ్నిప్రమాద నివారణ వ్యవస్థ ఏర్పాటు చేయాల్సిన అవసరం ఎంతైనా వుంది. అగ్నిప్రమాద నివారణ వ్యవస్థను అందుబాటులోకి తెస్తాం రుయా ఆస్పత్రిలో అగ్నిప్రమాద నివారణ వ్యవస్థను అందుబాటులోకి తీసుకురానున్నాం. ఇప్పటికే అగ్నిమాపక శాఖ డైరెక్టర్‌ జనరల్‌కు దరఖాస్తు పంపాం. త్వరలో పూర్తి స్థాయి ఫైర్‌సెప్టీ వ్యవస్థ రుయాకు అందుబాటులోకి వస్తుంది. – డాక్టర్‌ సిద్ధానాయక్, సూపరింటెండెంట్, రుయా ఆస్పత్రి   చిత్తూరు అర్బన్‌: వరంగల్‌లోని ప్రభుత్వాస్పత్రిలో ఓ వ్యక్తికి శస్త్రచికిత్స చేస్తున్న సమయంలో షార్ట్‌ సర్క్యూట్‌ జరగడంతో మంటలు వ్యాపించి, ముగ్గురు మృత్యువాత పడ్డారు. మంటలు ఆర్పడానికి సరైన అగ్నిమాప యంత్రాలు లేకపోవడంతోనే ఈ ప్రమాదం జరిగినట్లు అధికారులు ధ్రువీ కరించారు. ఈ ఘటన నగరంలోని ఆçస్పత్రులను మేలుకొల్కాల్సిన అవసరం ఎంతైనా ఉంది. జరగరానిది జరగక ముందే అ ప్రమత్తంగా కాకపోతే భారీ మూల్యం చెల్లించుకోక తప్పదు. చిత్తూరు పర్లేదు.. చిత్తూరు నగరంలోని జిల్లా ప్రభుత్వాస్పత్రిలో అగ్ని ప్రమాదాల నివారణకు తీసుకున్న చర్యలు కాస్త ఊరటనిచ్చేలా కనిపిస్తున్నాయి. ఆస్పత్రిని అపోలో సంస్థకు లీజుకు ఇచ్చిన తరువాత ఇక్కడ అగ్నిప్రమాదాలు జరగకుండా తీసుకున్న చర్యలు బాగానే ఉన్నాయి. ఆస్పత్రిలోని మొత్తం వార్డులను అనుసంధానం చేస్తూ నీటి పైపులైన్లు ఏర్పాటు చేశారు. ఇక ఆపరేషన్‌ థియేటర్లలో సెంట్రల్‌ ఫైర్‌ ఎక్విప్‌మెంట్స్‌ను ఉంచడంతో ప్రమాదం సంభవిస్తే నీటితో ఆర్పడానికి అవకాశాలున్నాయి. కానీ అదే సమయంలో ఆస్పత్రిలో అగ్నిమాపక సిలిండర్లలో చాలా వరకు కాలం చెల్లినవే ఉన్నాయి. ఇక్కడ అందుబాటులో ఉంచిన పౌడర్, గ్యాస్, ఏబీసీ సిలెండర్లలో కొన్ని ఎప్పుడో పాడైపోయాయి. గ్యాస్‌ ఉన్న పరికరాలకు మూడేళ్లు, పౌడర్‌ ఉన్న పరికరాలు ఏడాది మాత్రమే పనిచేస్తాయి. ఆస్పత్రిలోని నాలుగు అగ్నిమాపక పరికరాలకు కాలం చెల్లినా వీటిని రీఫిల్‌ చేయడంలో సిబ్బంది శ్రద్ధ చూపడం లేదని స్పష్టమవుతోంది.   ఆదమరిస్తే అంతే..!  ఆస్పత్రి ఆవరణంలో ఇబ్బడిమబ్బడిగా విద్యుత్‌వైర్లు మదనపల్లె క్రైం: ఆదమరిస్తే అంతే సంగతులు అనేందుకు ప్రభుత్వాస్పత్రిలో విద్యుత్‌ వైర్లు ఇబ్బడిమబ్బడిగా ఉన్న దృశ్యాలే నిదర్శనం. స్థానిక ప్రభుత్వాస్పత్రిలో అగ్ని ప్రమాద నివారణ వ్యవస్థ ఊసే లేదు. దీంతో   ప్రభుత్వాస్పత్రి లో అగ్ని ప్రమాదం సంభవిస్తే భారీ ప్రాణనష్టం జరిగే అవకాశం ఉంది. ఆపరేషన్‌ థియేటర్‌లో విద్యుత్‌వైర్లు వేలాడుతూ ఉండడం, థియేటర్‌ గది, వరండాలు వర్షానికి ఉరుస్తుండడంతో ఎప్పుడు ఎలాంటి ప్రమాదం సంభవిస్తోందనని ఆందోళన చెందుతున్నారు. చేతులుకాలాక ఆకులు పట్టుకోవడం కంటే అధికారులు మేల్కొని ఆస్పత్రి ఆవరణలో ఇబ్బడిముబ్బడిగా వేలాడుతున్న విద్యుత్‌వైర్లను బాగు చేసి, అగ్నిప్రమాద నివారణ వ్యవస్థను ఏర్పాటు చేసి, రోగులు, వైద్యులు, సిబ్బందికి రక్షణ కల్పిం చాల్సివుంది.

జిల్లా అగ్నిమాపక శాఖ ఆన్‌లైన్‌ సేవల్లోకి అడుగుపెట్టింది. ఇకపై భవనాలు, షాపింగ్‌ కాంప్లెక్స్‌లు, సినిమా హాళ్లు, కల్యాణమండపాలు, ఫ్యాక్టరీలు, ఇతర పరిశ్రమల నో అబ్జెక్షన్‌ సర్టిఫికెట్ల(ఎన్‌ఓసీ)కు దరఖాస్తు చేసుకోవడానికి అగ్నిమాపక కార్యాలయానికి వెళ్లాల్సిన అవసరం లేదు. ఎన్‌ఓసీ కోసం ఆన్‌లైన్‌లో దరఖాస్తు చేసుకోవచ్చు. తిరుపతి క్రైం: అగ్నిమాపక శాఖ సాంకేతిక పరిజ్ఞానాన్ని అందిపుచ్చుకుని ఒక అడుగు ముందుకు వేసింది. ఆన్‌లైన్‌ ద్వారా నిరభ్యంతర సర్టిఫికెట్‌(ఎన్‌ఓసీ) అందించే కార్యక్రమానికి రూపకల్పన చేసింది. రాష్ట్ర విపత్తు స్పందన, అగ్నిమాపక శాఖ డీజీపీ ఆదేశాల మేరకు జిల్లాలోని అగ్నిమాపక శాఖ ప్రధాన కార్యాలయంతో పాటు జిల్లాలోని 16 కార్యాలయాల్లో ఈ ప్రక్రియకు సంబంధించి ఏర్పాట్లు ఇప్పటికే పూర్తి చేసింది. దరఖాస్తు చేసుకున్న తర్వాత అగ్నిమాపక శాఖ పరిశ్రమలు లేక అందుకు సంబంధించిన ప్రభుత్వ విభాగాల అధికారులు కమిటీగా ఏర్పడి వచ్చి పరిశీలిస్తారు. నిబంధనల మేరకు యజమానులు అన్ని సమకూర్చుకుని ఉంటే ఆన్‌లైన్‌ ద్వారా ఎన్‌ఓసీ పొందవచ్చు. www. fireservices.gov.in వెబ్‌సైట్‌లోకి వెళ్లి ఆ తర్వాత http://202.83.28 .165/noc/#/login కావాల్సి ఉంది. నూతన దరఖాస్తుదారులతో పాటు ప్రొవిజినల్, ఆక్యుపెన్సీ, రెన్యూవల్‌ కోసం ఎన్‌ఓసీ పొందాలన్నా కూడా ఈ వెబ్‌సైట్‌ ద్వారా దరఖాస్తు చేసుకోవచ్చు. వెబ్‌సైట్‌లో ఇలా... ♦ వెబ్‌సైట్‌లోకి వెళ్లిన తర్వాత దరఖాస్తుదారుడు మొదటగా రిజిస్టర్‌ చేసుకోవాలి. ♦ ఉత్తర ప్రత్యుత్తరాల కోసం ఈ–మెయిల్‌ అడ్రస్, మొబైల్‌ నంబర్‌ను పొందుపరచాలి. ♦ పాస్‌వర్డ్‌ ద్వారా వెబ్‌సైట్‌లోకి లాగిన్‌కావాలి. దరఖాస్తు ఫారంలో సూచించిన విధంగా ఆన్‌లైన్‌లో అప్‌లోడ్‌ చేయాలి. ♦ దరఖాస్తు ఫారాలు అప్‌లోడ్‌ చేసేటప్పుడు ఎలాంటి పొరపాట్లకూ తావివ్వకూడదు. పొరపాట్లు జరిగితే సిస్టమ్‌లోనే గుర్తు చేసేలా వెబ్‌సైట్‌లో ఏర్పాటు చేశారు. ఈ ప్రక్రియ పూర్తయినప్పటి నుంచి దరఖాస్తు పరిశీలన ఏస్థాయిలో ఉందో అగ్నిమాపక శాఖ వారు మెయిల్, సెల్‌కు మెసేజ్‌ పంపుతారు. ♦ దరఖాస్తు పరిధిని బట్టి అగ్నిమాపక శాఖ అధికారులు పరిశీలన కోసం ఓ కమిటీని నియమించి, సంబంధిత భవనాలు, నిర్మాణాలను పరిశీలిస్తారు. ♦ అన్నీ సక్రమంగా ఉంటే ఎన్‌ఓసీ మంజూరు చేస్తారు. లేదంటే ఎలాంటి సర్టిఫికెట్లు కావాలి.. సౌకర్యాలు ఏవిధంగా ఉండాలి.. అన్న వివరాలను దరఖాస్తుదారునికి ఆన్‌లైన్‌లో పంపుతారు. ♦ దరఖాస్తు చేసుకోవడానికి సంబంధించి ఎలాంటి నిబంధనలు పాటించాలి.. ప్రభుత్వానికి చెల్లించాల్సిన ఫీజులు తదితర వివరాలను ఆన్‌లైన్లో పొందుపరిచారు. సందేహాలు ఉంటే ఆన్‌లైన్‌లో నివృత్తి చేసుకోవచ్చు. అగ్నిమాపక శాఖ నుంచి నో అబ్జెక్షన్‌ పొందడంలో సందేహాలు ఉంటే ఆన్‌లైన్‌లో నివృత్తి చేసుకోవచ్చు. లేదంటే ఆన్‌లైన్‌లో ఉంచిన నంబర్‌ను  సంప్రదించి పూర్తి సమాచారం తెలుసుకోవచ్చు. ఇక నుంచి ఎన్‌ఓసీ కోసం అగ్నిమాపక శాఖకు రావాల్సిన అవసరం లేదు. – శ్రీనివాసులురెడ్డి, జిల్లా అగ్నిమాపక శాఖాధికారి


 ఏలూరు అర్బన్‌ : జిల్లాలో మరో మూడు అగ్నిమాపక కేంద్రాలు ఏర్పాటు చేయనున్నామని ఆ శాఖ అడిషనల్‌ డైరెక్టర్‌ పీవీ రమణ  తెలిపారు. స్థానిక ఫైర్‌స్టేషన్‌ కార్యాలయంలో శనివారం ఆయన విలేకరులతో మాట్లాడారు. కుక్కునూ రు, పోలవరం, కొవ్వూరులో అగ్నిమాపక కేంద్రాలు ఏర్పాటుచేయనున్నామన్నారు. జిల్లాలోని అగ్నిమాపక శాఖలో 271 శాంక్షన్‌ పోస్టులు ఉండగా 197 మంది ఉద్యోగులు మాత్రమే ఉన్నారని, 74 పోస్టులు ఖాళీగా ఉన్నాయన్నారు. సిబ్బందితో పాటు ఆధునిక యంత్ర సామగ్రి కొరత ఉద్యోగుల పనితీరుపై ప్రభావం చూపుతోందన్నారు. ఉద్యోగుల పనితీరు మరింత మెరుగుపరిచేందుకు బ్యాచ్‌ల వారీగా కమాండో తరహా ప్రత్యేక శిక్షణ కార్యక్రమాలు గోవాలో ఇప్పిస్తున్నామని చెప్పారు. 
 జిల్లాలో 108 భవనాలకు నోటీసులిచ్చాం
 జిల్లాలో నిబంధనలకు విరుద్ధంగా నిర్మించిన 108 భవనా లను గుర్తించి వాటి యజమానులకు నోటీసులు ఇచ్చామని ఆయన చెప్పారు. వాటిలో 38 భవన యజమానులపై ప్రాసిక్యూషన్‌ నిర్వహిస్తున్నామని తెలిపారు. డీఎఫ్‌వో ఏవీ శంకరరావు, ఏడీఎఫ్‌వో వై.హనుమంతరావు, ఏలూరు ఫైర్‌ ఆఫీసర్‌ వీవీ రామకృష్ణ పాల్గొన్నారు.   
  


 ♦ 13నెలల చిన్నారితో సహా తల్లిదండ్రికి గాయాలు
 ♦ గ్యాస్‌బండ పేలక పోవడంతో తప్పిన ప్రమాదం
 
 మిర్యాలగూడ అర్బన్‌ :
 గ్యాస్‌పైపు లీకై మంటలు వ్యాపించడంతో ముగ్గురికి గాయాలయ్యాయి. ఈ ఘటన పట్టణంలోని శాబూనగర్‌లో మంగళవారం చోటు చేసుకుంది. కుటుంబ సభ్యులు, పోలీసులు, స్తానికులు తెలిపిన వివరాల ప్రకారం... శాబూనగర్‌కు చెందిన వంట మేస్త్రి సన్నిది నగేష్‌ కుటుంబంతో పాటు తన కుమారుడు సతీష్, సౌజన్యలతో కలిసి ఒకే ఇంట్లో   నివాసం ఉంటున్నారు. కాగా మంగళవారం మధ్యాహ్నం వంటచేసుకునేందుకు గ్యాస్‌ లైటర్‌తో స్టౌవ్‌ను వెలిగించేందుకు ప్రయత్నించగా అప్పటికే   గ్యాస్‌ లీకవడంతో పెద్ద ఎత్తున మంటలు వ్యాపించాయి. తప్పించుకునే క్రమంలో సతీష్, సౌజన్యలకు స్వల్ప గాయాలు కాగా వారి 13నెలల కుమార్తె తన్వితకు తీవ్ర గాయాలయ్యాయి.
 మంటలను గమనించిన స్థానికులు ఫైర్‌ స్టేషన్‌కు సమాచారం అందించారు. అనంతరం  నీటిని చల్లి మంటలను అదుపులోకి తెచ్చారు. తీవ్ర గాయాలపాలైన చిన్నారిని 108 వాహనంలో పట్టణంలోని ఏరియా ఆస్పత్రికి తరలించారు. పరిస్థితి విషమంగా వుండటంతో నల్లగొండకు తరలించారు. అనంతరం మెరుగైన చిక్తిత్స నిమిత్తం హైదరాబాద్‌కు తరలించినట్లు వారు తెలిపారు. మంటల ధాటికి ఇంట్లోని వస్తువులు, ఇతర సామగ్రి పూర్తిగా కాలిపోగా సిలిండర్‌ పేలకపోవడంతో పెద్ద ప్రమాదం తప్పినట్లయింది. ఒకవేల సిలిండర్‌ పేలితే జరిగే ప్రమాదాన్ని ఊహించలేకుండా ఉండేదని స్థానికులు చర్చించుకుంటున్నారు. కాగా సంఘటన స్థలానికి వన్‌టౌన్‌ పోలీసులు, రెవెన్యూ అధికారులు సందర్శించి ప్రమాదానికి గల కారణాలను అడిగి తెలుసుకుని వివరాలు సేకరించారు.


 ► రాష్ట్ర డైరెక్టర్‌ జనరల్‌ కె.సత్యనారాయణ
 
 నర్సీపట్నం : అగ్నిమాపకశాఖలో 1051 డ్రైవర్‌ పోస్టులు భర్తీ చేస్తున్నామని విపత్తులు, అగ్నిమాపకశాఖ రాష్ట్ర డైరెక్టర్‌ జనరల్‌ కె.సత్యనారాయణ తెలిపారు. శుక్రవారం ఆయన నర్సీపట్నం వచ్చిన సందర్భంగా విలేకరులతో మాట్లాడారు. ఈ పోస్టుల భర్తీకి ప్రభుత్వం నుంచి అనుమతి లభించిందన్నారు. రాష్ట్రవ్యాప్తంగా 18 అధునాతన ఫైర్‌ వాహనాలను కొనుగోలు చేశామన్నారు. 54 మీటర్ల ఎత్తులో ప్రమాదాలు జరిగితే నిరోధించడానికి హైడ్రాలిక్‌ ప్లాట్‌ఫాంను అందుబాటులోకి తీసుకువచ్చామన్నారు. అగ్నిమాపకశాఖలో వినూత్న మార్పులు తీసుకురావటం జరిగిందన్నారు. విపత్తులు, ప్రమాదాలు జరిగినప్పుడు ప్రాణ, ఆస్తి నష్టం జరగకుండా సిబ్బందికి శిక్షణ ఇస్తున్నామన్నారు. ఇప్పటికే 50 మంది సిబ్బంది ఒరిస్సాలో శిక్షణ పొందారన్నారు. 25మంది ఫైర్‌ ఆఫీసర్లకు ప్రత్యేక శిక్షణ ఇప్పిస్తున్నామన్నారు. ప్రత్యేక శిక్షణ నిమిత్తం 50 మందిని నాగపూర్‌కు పంపిస్తున్నామన్నారు. అన్ని విధాలుగా అగ్నిమాపకశాఖను ప్రక్షాళన చేస్తున్నామని తెలిపారు.


 ►లంచం తీసుకుంటూ రెడ్‌హ్యాండెడ్‌గా పట్టుబడ్డ ఫైర్‌ ఆఫీసర్‌
 ►ప్రైవేటు ఆస్పత్రి ఎన్‌వోసీ రెన్యువల్‌ కోసం రూ.35 వేలు డిమాండ్‌
 
 ఒంగోలు క్రైం : ఏసీబీ అధికారుల చేతికి మరో లంచావతారం చిక్కాడు. ఓ ప్రైవేటు వైద్యశాల నిర్వాహకుల నుంచి రూ.35 వేలు లంచం తీసుకుంటున్న అగ్నిమాపక శాఖ అధికారిని  ఏసీబీ డీఎస్పీ తోట ప్రభాకర్‌ ఆధ్వర్యంలోని బృందం రెడ్‌ హ్యాండెడ్‌గా పట్టుకుంది. ఈ ఘటన ఒంగోలు అగ్నిమాపక శాఖ కార్యాలయంలో మంగళవారం చోటుచేసుకుంది.
 
 వివరాల్లోకి వెళితే.. ఒంగోలు నగరంలోని అరవై అడుగుల రోడ్డులో ఉన్న విజయ హాస్పటల్స్‌ నిర్వాహకులు వైద్యశాలకు సంబంధించిన అగ్ని ప్రమాదాల నివారణ కోసం ఏర్పాటు చేసుకున్న సౌకర్యాలపై అగ్నిమాపక శాఖ నుంచి నో అబ్జక్షన్‌ సర్టిఫికేట్‌(ఎన్‌ఓసీ)కోసం దరఖాస్తు చేసుకున్నారు. గతంలో ఇచ్చి ఉన్న ఎన్‌ఓసీని రెన్యూవల్‌ చేయటం కోసం 2016 డిసెంబర్‌లో దరఖాస్తు చేసుకున్నారు. జిల్లా అగ్నిమాపక శాఖాధికారి సి.పెద్దిరెడ్డితో పాటు, ఏడీఎఫ్‌ఓ, ఒంగోలు అగ్నిమాపక శాఖ అధికారితో కూడిన కమిటీ పరిశీలించి ఎన్‌ఓసీ ఇవ్వాల్సి ఉంది. అప్పటి నుంచి ఎన్‌ఓసీ ఇవ్వకుండా నాన్చుతూ వస్తున్నారు.
 
 ఎన్ని సార్లు అడిగినా సరైన సమాధానం రాకపోవటంతో గత వారం పది రోజులుగా విజయ హాస్పటల్స్‌ మేనేజర్‌ ఎంజేవీ శ్రీనివాస్‌ అగ్నిమాపక శాఖ కార్యాలయం చుట్టూ తిరుగుతున్నారు. చివరకు రూ.50 వేలు ఇస్తే కాని ఎన్‌ఓసీ ఇచ్చేది లేదని తేల్చి చెప్పారు. దీంతో బేరాలాడి రూ.35 వేలకు ఒప్పందం కుదుర్చుకున్నారు. లంచం ఇవ్వటం ఇష్టం లేని వైద్యశాల నిర్వాహకులు ఏసీబీ డీఎస్పీ తోట ప్రభాకర్‌ను ఆశ్రయించారు. ముందుగా కుదుర్చుకున్న ఒప్పందం ప్రకారం మంగళవారం మధ్యాహ్నం డబ్బులు ఇచ్చేందుకు అంగీకరించారు.
 
 ఒంగోలు అగ్నిమాపక శాఖ అధికారి ఎంవీ సుబ్బారావు మంగళవారం ఎంజేసీ శ్రీనివాస్‌ నుంచి రూ.35 వేలు తీసుకుంటుండగా రెడ్‌ హ్యాండెడ్‌గా పట్టుకున్నారు. వెంటనే కెమికల్స్‌తో ఎంవీ సుబ్బారావు పట్టుకున్న డబ్బులను, వాటిపై పడిన అధికారి వేలిముద్రలను సేకరించారు. ఈ సందర్భంగా ఏసీబీ అధికారులు డబ్బులు తీసుకోవటానికి గల కారణాలను సుబ్బారావును అడిగి తెలుసుకున్నారు. డీఎఫ్‌ఓ సి.పెద్దిరెడ్డి, నూతనంగా బాధ్యతలు చేపట్టిన ఏడీఎఫ్‌ఓలు తీసుకోమంటేనే తాను డబ్బులు తీసుకున్నానని ఏసీబీ అధికారులకు చెప్పాడు. అనంతరం విజయ హాస్పటల్స్‌కు సంబంధించిన ఎన్‌ఓసీ ఫైల్‌ను కూడా ఏసీబీ అధికారులు స్వాధీనం చేసుకున్నారు. అద్దంకి బస్టాండ్‌ సెంటర్‌లోని ఒంగోలు అగ్నిమాపక శాఖ కార్యాలయాన్ని కూడా నిశితంగా పరిశీలించారు. ఎంవీ సుబ్బారావు కార్యాలయంలోని కంప్యూటర్‌లో ఉన్న రికార్డులను కూడా పరిశీలించారు. కంప్యూటర్‌ హార్డ్‌ డిస్క్‌ను కూడా స్వాధీనం చేసుకొని విచారణ నిమిత్తం సుబ్బారావును ఏసీబీ కార్యాలయానికి తరలించారు. ఈ దాడుల్లో ఏసీబీ సీఐ టీవీవీ ప్రతాప్‌ కుమార్‌తో పాటు పలువురు అధికారులు ఉన్నారు.


 – 14 మంది సిబ్బందితో ప్రత్యేక బృందం
 – ఎలాంటి విపత్తులైనా ఎదుర్కొనేలా శిక్షణ
 – జిల్లా అగ్నిమాపకశాఖలో నూతన ఒరవడి
 
 ప్రమాదం ఎప్పుడు ఎలాగొస్తుందో తెలియదు. సామాన్యులు ప్రమాదాల్లో చిక్కుకున్నపుడు వెంటనే సాయం కోరేది పోలీసులు, అగ్నిమాపకశాఖ అధికారులనే. విపత్తులను దీటుగా ఎదుర్కొనేందుకు సుక్షితులైన సిబ్బందిని తయారుచేయడంపై జిల్లా అగ్నిమాపకశాఖ అధికారులు దృష్టి సారించారు.  
 
 అనంతపురం సెంట్రల్‌: ప్రజలకు సహాయక చర్యలు అందించడంలో పోలీసుశాఖతో పాటు అగ్నిమాపకశాఖ అధికారులు కూడా కీలకం. రోడ్డు ప్రమాదాలు జరిగినప్పుడు, మంటలు ఎగిసిపడినప్పుడు, వరదల సంభవించినప్పుడు అగ్నిమాపక శాఖ అధికారుల సేవలు ఎంతో కీలకం. భారీ భవంతుల్లో అగ్నికీలలు సంభవించినప్పుడు ప్రజలను సురక్షితంగా బయటకు చేరవేయడం చాలా కష్టం. రోప్‌ల సాయంతో భవంతులపైకి ఎక్కాల్సి వస్తుంది. ప్రజలను సురక్షిత ప్రాంతాలకు చేరవేయాల్సి ఉంటుంది. వరదల సమయంలో ముంపులో చిక్కుపోయిన ప్రజలను బయటపడేయాల్సి ఉంటుంది.  
 
 ప్రత్యేకంగా టాస్క్‌ఫోర్స్‌ విభాగం :
 విపత్తులను ఎదుర్కొనేందుకు అగ్నిమాపకశాఖలో ప్రత్యేకంగా టాస్క్‌ఫోర్స్‌ విభాగాన్ని నెలకొల్పారు. 14 మంది సిబ్బందితో రెండు బృందాలుగా ఏర్పాటు చేశారు. వీరికి వివిధ అంశాలపై తర్ఫీదు ఇస్తున్నారు. రెండు రోజులుగా జీడిపల్లి జలాశయంలో స్విమ్మింగ్‌ (ఈత), బోటింగ్‌పై శిక్షణ ఇస్తున్నారు. ఈ విభాగాల్లో కానిస్టేబుల్‌ మనోహర్‌ మొదటి స్థానంలో ఉన్నారు. దీంతో పాటు భవంతుల్లో ప్రమాదాలు జరిగినప్పుడు రోప్‌ క్లెయిమింగ్, అగ్నిప్రమాదాలు సమయాల్లో తీసుకోవాల్సిన మెలకువలు తదితర అంశాలపై వీరికి తర్ఫీదు ఇస్తున్నారు. ఇటీవల రాష్ట్ర వ్యాప్తంగా 50 మంది టాస్క్‌ఫోర్స్‌ సిబ్బందికి ఒడిశాలో శిక్షణ ఇచ్చారు. ఈ శిక్షణలో జిల్లా నుంచి ముగ్గరు అధికారులు పాల్గొన్నారు. సముద్రంలో సహాయక చర్యల్లో పాల్గొనేలా వీరికి తర్ఫీదు ఇచ్చారు.
 
 ప్రమాదాలను ధైర్యంగా ఎదుర్కొంటాం
  ప్రమాదాలను ధైర్యంగా ఎదుర్కొనేలా సిబ్బందికి శిక్షణ ఇస్తున్నాం. ఇందుకోసం ప్రత్యేకంగా 14 మంది టాస్క్‌ఫోర్సు సిబ్బందిని ఏర్పాటు చేశాం.  జిల్లా నుంచి ముగ్గురు సభ్యులు ఇటీవల ఒడిశాలో కూడా శిక్షణ తీసుకున్నారు. జిల్లాలో కూడా జీడిపల్లి జలాశయానికి తీసుకెల్లి బోటింగ్, స్విమ్మింగ్‌ శిక్షణ ఇస్తున్నాం. సుశిక్షితులైన వారు ఉండడం వలన ప్రమాదాల సమయంలో నష్టం లేకుండా ప్రజలను, ఆస్తులను కాపాడేందుకు ఆస్కారం ఉంటుంది.
 - సత్యనారాయణ, జిల్లా అగ్నిమాపకశాఖ అధికారి


 ఒంగోలు: ఒంగోలులోని వ్యవసాయ రసాయనాల తయారీ కేంద్రంలో భారీ అగ్ని ప్రమాదం సంభవించింది. స్థానిక కెమికల్స్‌ ఫ్యాక్టరీలో శనివారం తెల్లవారుజామున ఈ ఘటన చోటుచేసుకుంది. ఫ్యాక్టరీలో ఓ మూలన చిన్నగా ప్రారంభమైన మంటలు నిమిషాల్లో మూడంతస్తులకు వ్యాపించాయి. మంటలు తీవ్రతరం కావడంతో ఆ ప్రాంతంలో దట్టమైన పొగలు వెలువడ్డాయి. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చేందుకు తీవ్రంగా యత్నిస్తోంది.
 
 అయితే అప్పటికే ఆసల్యమైపోయింది. రసాయనాల ఉత్పత్తి కేంద్రం అగ్నికి పూర్తిగా ఆహుతైంది. పోలీసులు ఘటనా స్థలానికి చేరు సహాయక చర్యలు చేపట్టారు. ప్రమాదం జరిగిన సమయంలో అదే భవనంలో ఉన్న కార్మికులు ప్రాణభయంతో పరుగులు తీశారు. దీంతో ఎలాంటి ప్రాణ నష్టం జరగలేదని సమాచారం. పూర్తి వివరాలు తెలియాల్సి ఉంది.


 కర్నూలు: కర్నూలు అగ్నిమాపక కేంద్రంలో శుక్రవారం అగ్నిమాపక శాఖ వారోత్సవాలను జిల్లా ఎస్పీ ఆకే రవికృష్ణ ప్రారంభించారు. సప్తగిరి నగర్‌లో అగ్నిమాపక కేంద్రంలో నిర్వహించిన వారోత్సవాల ప్రారంభ కార్యక్రమానికి ముఖ్య అతిథిగా ఎస్పీ హాజరై సిబ్బంది గౌరవ వందనం స్వీకరించారు. అగ్నిమాపక శాఖలో పనిచేస్తూ విధి నిర్వహణలో మృతిచెందిన దేశంలోని అగ్ని మాపక సిబ్బందికి నివాళులు అర్పించారు. ప్రజ లకు అవగాహన కల్పించడం కోసం అగ్నిమాపక సిబ్బందిచే జారీ చేసిన కరపత్రాలు, ఫ్లెక్సీలు, గోడ పత్రికలను విడుదల చేసి వారోత్సవాలను ఎస్పీ ప్రారంభించారు. కర్నూలు అగ్నిమాపక స్టేషన్‌లో ఏర్పాటు చేసిన ఫైర్‌ ఎగ్జిబిషన్‌ స్టాల్‌ను ప్రారంభించారు.
 
 ప్రజల ప్రాణాలను, ఆస్తులను కాపాడే (రెస్క్యూ) పరికరాలను పరిశీలించారు. వారోత్సవాల సందర్భంగా నగరంలో ప్రజలకు అవగాహన కల్పించడం కోసం అగ్నిమాపక కేంద్రం స్టేషన్‌ నుంచి కొండారెడ్డిబురుజు వరకు అగ్నిమాపక శకటాలతో సిబ్బంది ర్యాలీ నిర్వహించారు. ఈనెల 20వ తేదీ వరకు వారోత్సవాలు నిర్వహిస్తున్నట్లు జిల్లా అగ్నిమాపక శాఖ అధికారి భూపాల్‌రెడ్డి తెలిపారు. కార్యక్రమంలో ఏపీ పొల్యూషన్‌ కంట్రోల్‌ బోర్డు రీజినల్‌ మేనేజర్‌ రాజేంద్రనాథ్‌రెడ్డి, జిల్లా సహాయక అగ్నిమాపక అధికారి బాలరాజు, అగ్నిమాపక కేంద్రాధికారి కిరణ్‌కుమార్‌రెడ్డి, మూడవ పట్టణ సీఐ మధుసూదన్‌రావు, అసిస్టెంట్‌ రిజిస్టర్లు గోపీకృష్ణ, శ్రీనివాసులు, సీనియర్‌ అసిస్టెంట్‌ బలరామ్‌ తదితరులు పాల్గొన్నారు.


 ► ఏడాదిగా ఎన్‌వోసీలు జారీ చేయని అగ్నిమాపక శాఖ
 ► న్యాయం కోసం కోర్టుకెళుతున్న డెవలపర్లు
 ► సానుకూలంగా తీర్పు వస్తే.. దాన్నీ అప్పీల్‌ చేస్తున్న శాఖ
 ► అనుమతుల కోసం 15 లక్షల చ.అ. నిర్మాణాలు ఎదురుచూపు
 ►  ఫీజులు, పన్నుల రూపంలో ప్రభుత్వానికి రావాల్సిన ఆదాయానికి గండి
 
 సాక్షి, హైదరాబాద్‌: దేశంలో ఎక్కడైనా సరే నిర్మాణ అనుమతుల నిరభ్యంతర ధ్రువీకరణ పత్రం (ఎన్‌వోసీ) జారీ కోసం ఎక్కడికెళతారంటే? ఎవరైనా టక్కున చెప్పే సమాధానం ‘సంబంధిత ప్రభుత్వ విభాగానికి అని’! కానీ, భాగ్యనగరంలో మాత్రం న్యాయస్థానం చుట్టూ తిరగాల్సి వస్తోంది! అదేంటని ఆశ్చర్యపోతున్నారా? అయితే ఈ కథనం పూర్తిగా చదవండి మరి.
 
 నగరంలో భవనాలన్నీ ఒకే ఆకారంలో కాకుండా విభిన్న డిజైన్లలో ఉండాలన్న ఉద్దేశంతో ప్రభుత్వం జీవో నం.168ను తీసుకొచ్చింది. జీవో ప్రకారం స్టెప్ట్‌/ పోడియం ఆకారంలో నిర్మాణాలకు 5వ అంతస్తు వరకు 9 మీటర్ల సెట్‌బ్యాక్, ఆపైన 5 అంతస్తుల వరకు 1 మీటర్‌ సెట్‌బ్యాక్‌ వదలాలనే నిబంధన ఉంది. అయితే ఆయా నిబంధనల ప్రకారం అగ్నిమాపక శాఖ నిరభ్యంతర ధ్రువీకరణ పత్రం (ఎన్‌వోసీ) జారీ చేయట్లేదని డెవలపర్ల వాదన.
 
 ⇒ ఒకవైపు ఎన్‌వోసీ రాక, మరోవైపు తెచ్చుకున్న అప్పుకు వడ్డీ కట్టలేక విసిగిపోయిన ఓ డెవలపర్‌ గతంలో న్యాయం కోసం కోర్టును ఆశ్రయించాడు.  జీవో నిబంధనలు, డెవలపర్‌ వాదనను విన్న నాయయస్థానం సానుకూలంగా తీర్పునిచ్చింది. ‘‘ఆహా.. నువ్వు నా మీదే కోర్టుకు వెళతావా? ఇక నీకు ఎన్‌వోసీ ఎలా వస్తుందో చూసుకుంటానని’’ వ్యక్తిగతంగా తీసుకున్న సంబంధిత అగ్నిమాపక శాఖ అధికారి ఆ ఒక్క డెవలపర్‌దే కాదు పిరమిడ్‌ ఆకారంలోని ఏ నిర్మాణాలకూ ఎన్‌వోసీ జారీ చేయట్లేదు. ఇలా గత ఏడాది కాలంగా అగ్నిమాపక శాఖలో సుమారు 20కి పైగా ఫైళ్లు పడిఉన్నాయని సమాచారం.
 
 అంతే.. నేనింతే!
 ఇక్కడ ఆశ్చర్యకరమైన విషయమేమిటంటే.. డెవలపర్‌కు సానుకూలంగా కోర్టు తీర్పునిస్తే.. దాని మీద సంబంధిత అగ్నిమాపక శాఖ అధికారి పైకోర్టుకు అప్పీల్‌కు వెళ్లడం!
 ⇒ ఎలాగోలా ఈ లొల్లి మున్సిపల్‌ పరిపాలన, పట్టణాభివృద్ధికి చేరింది. అయితే ఇప్పుడు సంబంధిత శాఖ అగ్నిమాపక శాఖకు ఎలాంటి ఆదేశాలు జారీ చేస్తుంది? అసలీ సమస్యపై ఎలాంటి వివరణ కోరుతుందని డెవలపర్లు ఆశగా ఎదురుచూస్తున్నారు. అటు కోర్టు తీర్పునూ కాదంటూ.. ఇటు ప్రభుత్వమూ పట్టించుకోకపోతే ఇక ఈ సమస్యకు పరిష్కారమెలానని డెవలపర్లు ప్రశ్నిస్తున్నారు.
 ⇒ ప్రస్తుతం నగరంలో చాలా భవంతులు పిరమిడ్‌ ఆకారంలో ఉంటాయి. మరో 15 నిర్మాణ సంస్థలు సుమారు 15–20 లక్షల చ.అ.ల్లో పిరమిడ్‌ ఆకారంలో భవంతులు నిర్మించేందుకు సిద్ధంగా ఉన్నాయి. ఒక్క అధికారి మొండి పట్టుదలతో ఫీజులు, రిజిస్ట్రేషన్‌ చార్జీలు, వ్యాట్, పన్నుల రూపంలో ప్రభుత్వానికి రావాల్సిన కోట్లాది రూపాయల ఆదాయానికి గండి పడింది. మరోవైపు వేలాది మందికి ఉద్యోగ అవకాశాలూ దూరమయ్యాయి.


 - రాష్ట్రంలో తగినన్ని లేని అగ్నిమాపక కేంద్రాలు
 - 15 నియోజకవర్గాల్లో కానరాని ఫైర్‌ స్టేషన్లు
 - పరిశ్రమల్లో ప్రమాదాల నివారణకు అందుబాటులో ఒకే ఒక్క డీసీపీ వాహనం
 - శిథిలాల తొలగింపునకు వాడుతున్నది ఒకే రెస్క్యూ టెండర్‌
 - అగ్నిమాపక శాఖలో గుబులు రేపుతున్న వేసవి  
 
 సాక్షి, హైదరాబాద్‌: రాష్ట్రంలో ఠారెత్తిస్తున్న ఎండలు అగ్నిమాపక శాఖను వణికిస్తున్నాయి. పరికరాల లేమి, సిబ్బంది కొరతతో సతమతమవుతున్న తరుణంలో ఎక్కడైనా అగ్గిరాజుకుంటే పరిస్థితి ఏమిటనే గుబులు రేపుతున్నాయి. ఉమ్మడి రాష్ట్రంలో తెలంగాణ ప్రాంతంలో 90 ఫైర్‌ స్టేషన్లు అందుబాటులో ఉండగా తెలంగాణ రాష్ట్రం ఏర్పడిన నేపథ్యంలో ప్రతి నియోజకవర్గానికీ ఒక ఫైర్‌ స్టేషన్‌ ఏర్పాటు చేస్తామని టీఆర్‌ఎస్‌ ప్రభుత్వం 2014లో ప్రకటించింది. కానీ గడిచిన మూడేళ్లలో కేవలం నాలుగు ఫైర్‌ స్టేషన్లే ఏర్పాటయ్యాయి. ఇంకా 15 నియోజకవర్గాల్లో ఫైర్‌ స్టేషన్ల అవసరముంది.
 
 ఈ నియోజకవర్గాల్లో అగ్నిప్రమాదం జరిగితే పక్క నియోజకవర్గం నుంచి ఫైరింజన్‌ వచ్చి మంటలార్పాల్సిన పరిస్థితి నెలకొంది. మరోవైపు రాష్ట్ర ఏర్పాటు వరకు ఉన్న 16 ఔట్‌ పోస్టులను అగ్నిమాపక కేంద్రాలుగా మారుస్తామని ప్రభుత్వం ప్రకటించినా అవి పూర్తిస్థాయి స్టేషన్లుగా అందుబాటులోకి రాలేదు. దీంతో చేసేదేమీ లేక అగ్నిమాపక శాఖ ఉన్నతాధికారులు ప్రతిసారీ బడ్జెట్‌కు ముందు ప్రతిపాదనలు పంపుతూనే ఉన్నారు. ప్రభుత్వం యథావిధిగా మొండిచేయి చూపిస్తూనే ఉంది.
 
 ఆందోళన కలిగిస్తున్న కీలక యూనిట్లు...
 పారిశ్రామిక ప్రాంతాల్లో అగ్నిప్రమాదాల తీవ్రత ఎంతగా ఉంటుందో గతంలో జరిగిన ప్రమాదా లు స్పష్టం చేస్తున్నాయి. పరిశ్రమల్లో ప్రమా దాలు జరిగితే ఉపయోగించే డీసీపీ టెండర్‌ (స్పెషల్‌ ఫైర్‌ ఇంజన్‌) రాష్ట్రం మొత్తం మీద ఒక్కటి ఉంది. అది కూడా కేవలం హైదరాబా ద్‌లోనే అందుబాటులో ఉంది. అలాగే భారీ భవ నాలు కూలినప్పుడు, రైలు ప్రమాదాలు చోటు చేసుకున్నప్పుడు శిథిలాల నుంచి క్షతగాత్రులను గుర్తించే సాధనం(రెస్క్యూ టెండర్‌) కూడా ఒక్కటి అందుబాటులో ఉండటం ఆందోళన కలిగిస్తోంది.
 
 అదే విధంగా కెమికల్‌ కంపెనీల్లో రియాక్టర్ల పేలుళ్లు, రసాయన పదార్థాల వల్ల జరిగే ప్రమాదాలను ఆర్పేందుకు ఉపయోగించే ఫోమ్‌ టెండర్‌ సైతం ఒకే ఒక్కటి ఉండటం అగ్నిమాపక శాఖ అధికారులు, సిబ్బందిని నిర్ఘాంతపరుస్తోంది. దీనికితోడు హై ప్రెజర్‌వాటర్‌ ట్యాంకర్స్‌ కేవలం మూడే అందుబాటులో ఉన్నాయి. భారీ భవనాల్లో ప్రమాదాలు జరిగితే ఉపయోగించేందుకు కేవలం ఒకే ఒక్క హైడ్రాలిక్‌ ఫ్లాట్‌ఫాం అందు బాటులో ఉండగా 18 ఫ్లోర్ల ఎత్త వరకు చేరుకో గలిగే బ్రాంటో హైడ్రాలిక్‌ ప్లాట్‌ఫామ్స్‌ రెండు మాత్రమే అందుబాటులో ఉన్నాయి.
 
 1,208 చదరపు కిలోమీటర్లకు ఒక్కటే...
 అగ్నిమాపక శాఖ మార్గదర్శకాల ప్రకారం రాష్ట్రంలోని గ్రామీణ ప్రాంతాల్లో ప్రతి 50 చదరపు కిలోమీటర్లకు ఒక అగ్నిమాపక కేంద్రం ఉండాలి. కానీ ప్రస్తుతం 1,208 చదరపు కిలోమీటర్లకు ఒక ఫైర్‌ స్టేషన్‌ ఉన్నట్టు రాష్ట్ర అగ్నిమాపక శాఖ నివేదికలు స్పష్టం చేస్తున్నాయి. నగరాల్లో ప్రతి 10 చదరపు కిలోమీటర్లకు ఒక ఫైర్‌ స్టేషన్‌ తప్పనిసరికాగా ఎక్కడా ఆ పరిస్థితి కనిపించడంలేదు. జనాభాను బట్టి చూసినా ప్రతి 50 వేల మందికి ఒక అగ్నిమాపక కేంద్రం అందుబాటులో ఉండాల్సి ఉం డగా ప్రస్తుతం ప్రతి 3.78 లక్షల మందికి ఒకే ఒక్క ఫైర్‌ స్టేషన్‌ ఉన్నట్లు రికార్డులు స్పష్టం చేస్తున్నాయి.


 - పోస్టులివ్వని పలు శాఖలు.. గ్రూప్‌–1 ఫలితాల్లో జాప్యం
 - న్యాయ వివాదాలతో గ్రూప్‌–2 ఫలితాలు కూడా..
 
 సాక్షి, హైదరాబాద్‌: రాష్ట్రంలో 2011 గ్రూప్‌–1లో భాగంగా గతేడాది సెప్టెంబర్‌లో నిర్వహించిన మెయిన్స్‌ రాత పరీక్ష ఫలితాలు వెల్ల డించలేని పరిస్థితి నెలకొంది. గ్రామీణాభివృద్ధి శాఖ, అగ్నిమాపక శాఖలు పోస్టులను ఇవ్వకపోవడంతో ఫలితాల వెల్లడిలో జాప్యం జరుగుతోంది. 2011లో జరిగిన గ్రూప్‌–1లో ప్రిలిమ్స్‌లో తప్పులు ఇచ్చిన వ్యవహారంలో కేసు సుప్రీంకోర్టు వరకు వెళ్లింది. దీంతో సుప్రీం కోర్టు మళ్లీ గ్రూప్‌–1 మెయిన్స్‌ పరీక్షలు నిర్వహించాలని 2014లో ఆదేశించింది. అప్పటికే రాష్ట్ర విభజన జరగడంతో మళ్లీ సుప్రీం కోర్టును ఆశ్రయించారు. దీంతో వేర్వేరుగా నిర్వహించాలని ధర్మాసనం సూచించింది.
 
 2011లో జారీ చేసిన గ్రూప్‌–1 నోటిఫికేషన్‌లో ప్రకటించిన 312 పోస్టుల్లో తెలం గాణకు 140 పోస్టులు వచ్చాయి. అందులో 2007 గ్రూప్‌–1కు సంబంధించిన 13 పోస్టులను అప్పటి అభ్యర్థులకు ఇవ్వాలని కోర్టు మరో తీర్పు ఇచ్చింది. దీంతో 140 పోస్టుల్లో 13 పోస్టులు తొలగించి 127 పోస్టులకు 2016 సెప్టెంబర్‌లో టీఎస్‌పీఎస్సీ రాత పరీక్షలు నిర్వహించింది. వాటి మూల్యాంకనాన్ని అదే ఏడాది డిసెంబర్‌లో పూర్తి చేసింది. అయితే 2011లో నోటిఫికేషన్‌లో పేర్కొన్న ప్రకారం, తెలంగాణకు కేటాయించిన పోస్టుల్లో 127 పోస్టుల్లో 117 పోస్టులకు సంబంధించిన రిజర్వేషన్లు, రోస్టర్‌ పాయింట్ల వివరాలు టీఎస్‌పీఎస్సీకి అందాయి.
 
 అందులో గ్రామీణ అభివృద్ధి శాఖ నుంచి 7 జిల్లా పంచాయతీ అధికారి పోస్టులకు రోస్టర్, రిజర్వేషన్‌ వివరాలు రావాల్సి ఉన్నా 2 పోస్టులకు సంబంధించి మాత్రమే ఆ శాఖ పంపింది. మరో 5 పోస్టుల వివరాలను పంపించాల్సి ఉంది. అయితే తమ వద్ద పోస్టుల్లేవని ఆ శాఖ చెబుతోంది. దీనిపై ప్రభుత్వ ప్రధాన కార్యదర్శి ఎస్పీ సింగ్‌ ప్రత్యేకంగా సమావేశం నిర్వహించి, సూపర్‌ న్యూమరరీ పోస్టులు క్రియేట్‌ చేసి, టీఎస్‌పీఎస్సీకి పంపించాలని నెల కిందే ఆదేశించారు. అయినా ఇంతవరకూ ఆ పోస్టుల వివరాలు రాలేదు. డివిజనల్‌ ఫైర్‌ ఆఫీసర్‌ పోస్టులు 8 ఉంటే ఆ శాఖ 3 పోస్టుల వివరాలే పంపింది. మరో 5 పోస్టులను సృష్టించి భర్తీ చేయాల్సి ఉంది. అగ్నిమాపక శాఖ నుంచి కూడా ఆ వివరాలు రాకపోవడంతో గ్రూప్‌–1 ఫలితాల వెల్లడి ఆగిపోయింది.
 
 గ్రూప్‌–2 ఫలితాల్లో తప్పని ఆలస్యం
 గ్రూప్‌–2 కేటగిరీలో 1,032 పోస్టుల భర్తీకి గత ఏడాది నవంబర్‌లో నిర్వహించిన పరీక్ష కేంద్రాల్లో ఒకరి ఓఎంఆర్‌ జవాబు పత్రాలు మరొకరికి వచ్చాయని, ఫలితంగా తప్పుడు బబ్లింగ్‌ జరిగిందని, వాటికి మార్కులు ఇవ్వాలంటూ పలువురు అభ్యర్థులు కోర్టును ఆశ్రయించారు. ప్రస్తుతం ఆ కేసు కోర్టు పరిశీలనలో ఉంది. దీంతో గ్రూప్‌–2 ఫలితాల వెల్లడి ఆగిపోయింది. గ్రూప్‌–1కు సంబంధించి రెండు శాఖల నుంచి పోస్టులు వచ్చాక, ఫలితాలను ప్రకటించి 1:2 నిష్పత్తిలో 254 మంది అభ్యర్థులకు ఇంటర్వ్యూలు నిర్వహించాల్సి ఉంది. గ్రూప్‌–2 అంశంపై కూడా కోర్టులో ఉన్న కేసు వ్యవహారం తేలాకా 1:2 రేషియోలో అభ్యర్థులకు ఇంటర్వూ్య నిర్వహించాల్సి ఉంది. దీంతో గ్రూప్‌–1, గ్రూప్‌–2 పోస్టుల భర్తీ మరింత ఆలస్యం అయ్యేలా ఉంది.


 హైదరాబాద్: సికింద్రాబాద్ లోని మంజు థియేటర్ సమీపంలో అగ్ని ప్రమాదం సంభవించింది. థియేటర్ పరిసర ప్రాంతంలో ఉన్న ఓ చెప్పుల షో రూమ్‌లో భారీగా మంటలు ఎగడిపడుతున్నాయి. దీంతో స్థానికులు, చుట్టుపక్కల షాపుల వాళ్లు భయాందోళనతో పరుగులు తీశారు. భవనం మొత్తం మంటల్లో ఉందని కొందరు అగ్నిమాపక సిబ్బందికి కాల్ చేశారు. ఫైర్ సిబ్బంది వెంటనే ఘటనా స్థలానికి చేరుకుని మంటలను అదుపులోకి తెచ్చేందుకు యత్నిస్తున్నారు. ప్రమాదానికి గల కారణాలు తెలియాల్సి ఉంది.


 అగ్నిమాపక శాఖ డీజీ సత్యనారాయణ రావు 
  
 కర్నూలు(రాజ్‌విహార్‌): మహా శివరాత్రి బ్రహ్మోత్సవాల సందర్భంగా శైవ క్షేత్రాల్లో ఎలాంటి దుర్ఘటనలు చోటు చేసుకోకుండా ప్రత్యేక దృష్టి సారించినట్లు అగ్నిమాపక శాఖ డైరెక్టర్‌ జనరల్‌ (డీజీఎఫ్‌ఎస్‌) కె. సత్యనారాయణ రావు అన్నారు. శుక్రవారం ఆయన స్థానిక జిల్లా పోలీసు కార్యాలయంలోని వ్యాస్‌ ఆడిటోరియంలో ఏర్పాటు చేసిన విలేకరుల సమావేశంలో ఆయన మాట్లాడారు. ముఖ్యంగా శ్రీశైలంలో ప్రమాదాలు జరిగే అవకాశం ఉన్న నాలుగు ప్రాంతాలను గుర్తించామన్నారు. వాటిలో కంట్రోల్‌ రూమ్‌ (ఆసుపత్రి), ఆలయం వెనుక, పాతాళగంగ రోడ్డు, కర్ణాటక గెస్టు హౌస్‌ వద్ద ఒక్కొక్క ఫైర్‌ ఇంజన్‌ను ఏర్పాటు చేయనున్నట్లు వెల్లడించారు. వీటితోపాటు ఒక బుల్లెట్‌ అగ్నిమాపక వాహనం కూడా సిద్ధంగా ఉంచనున్నట్లు తెలిపారు.
  
 పాతాళగంగ వద్ద భక్తుల రక్షణ కోసం 15 మంది రెస్క్యూ సిబ్బంది నియమిస్తామన్నారు. బ్రహ్మోత్సవాల్లో మొత్తం 75 మంది విధులు నిర్వహిస్తుండగా ఐదుగురు అధికారులుంటారని వెల్లడించారు. తమ శాఖ సిబ్బందితోపాటు పోలీసు, ఇతర అధికారులు సూచించిన నిబంధనలు, హెచ్చరికలను పాటించి సహకరించాలని కోరారు. గుజరాత్‌ రాష్ట్రంలో విపత్తు, అగ్ని మాపకంపై డిగ్రీలో కోర్సులు ఉన్నాయని, ఈ మేరకు ప్రమాద, విపత్తులను నివారణ కోసం ఎన్‌సీసీ, ఎన్‌ఎస్‌ఎస్, స్వచ్ఛంద సంస్థలు, వాలంటీర్లు, మహిళలకు అవగాహన కల్పించే కార్యక్రమాలు నిర్వహించనున్నట్లు తెలిపారు. సమావేశంలో కర్నూలు, వైఎస్‌ఆర్‌ కడప జిల్లా ఫైర్‌ అఫీసర్లు భూపాల్‌ రెడ్డి, విజయకుమార్‌ పాల్గొన్నారు.   
  


 కుషాయిగూడ: గ్యాస్‌ లీక్‌ అవుతుందనే సమాచారం అందుకున్న అగ్నిమాపక సిబ్బంది సకాలంలో సంఘటనా స్థలానికి చేరుకోవడంతో.. పెను ప్రమాదం తప్పింది. కుషాయిగూడ పోలీస్‌ స్టేషన్‌ పరిధిలోని చర్లపల్లి పారిశ్రామిక వాడలో నివాసముంటున్న దేవేందర్‌ ఇంట్లో శుక్రవారం తెల్లవారుజామున సిలిండర్ నుంచి గ్యాస్‌ లీక్‌ అయింది. ఇది గుర్తించిన ఇంటి యజమాని ఫైర్‌ సిబ్బందికి సమాచారం అందించాడు.
 
 తక్షణమే స్పందించిన అధికారులు గ్యాస్‌ సిలిండర్‌ను ఇంట్లో నుంచి బయటకు తీసుకొచ్చి గ్యాస్‌ లీకేజీని ఆపేశారు. అప్పటికే సిలిండర్‌ బాగా వేడెక్కిందని.. మరి కొంతసేపు అలాగే ఉంటే సిలిండర్ పేలి పెను ప్రమాదం జరిగి ఉండేదని అధికారులు తెలిపారు.


 యాదాద్రి : యాదాద్రి జిల్లాలో ఓ రసాయన పరిశ్రమలో అగ్ని ప్రమాదం సంభవించింది. తుర్కపల్లి మండలం పల్లెపహాడ్‌ సమీపంలోని కెమికల్‌ ఫ్యాక్టరీలో గురువారం తెల్లవారుజామున ఒక్కసారిగా మంటలు వ్యాపించాయి. మంటలు భారీగా ఎగసిపడుతున్నాయి. సమాచారం అందుకున్న అగ్నిమాపక సిబ్బంది అక్కడికి చేరుకొని మంటలను అదుపులోకి తెచ్చేందుకు యత్నిస్తున్నారు. ఘటనకు సంబంధించి పూర్తి సమాచారం తెలియాల్సి ఉంది.


 హైదరాబాద్‌: కూకట్‌పల్లిలోని జె.ఎన్.టి.యు కళాశాలలో శనివారం అగ్ని ప్రమాదం సంభవించింది. కళాశాల ఎగ్జామినేషన్ బ్రాంచ్‌లో ఒక్కసారిగా మంటలు చెలరేగటంతో సిబ్బంది అప్రమత్తమై వెంటనే ఫైర్‌స్టేషన్‌కు సమాచారం అందించారు. సంఘటన స్థలానికి చేరుకున్న ఫైర్‌ సిబ్బంది మంటలు అదుపులోకి తెచ్చేందుకు యత్నిస్తున్నారు. షార్ట్‌ సర్క్యూట్‌ కారణంగా ప్రమాదం జరిగి ఉండొచ్చునని భావిస్తున్నారు. నష్టం వివరాలు తెలియాల్సి ఉంది.


 కోల్‌కతా: పశ్చిమ బెంగాల్ ఉత్తర 24 పరిగణాల జిల్లాలో భారీ అగ్రి ప్రమాదం సంభవించింది. మధ్యంగ్రామ్ లోని కెమికల్ ఫ్యాక్టరీలో గురువారం వేకువజామున ఈ భారీ అగ్ని ప్రమాదం చోటుచేసుకుంది. సమాచారం అందుకున్న వెంటనే ఘటనాస్థలానికి 38 ఫైరింజన్లు చేరుకున్నాయి.కెమికల్ ఫ్యాక్టరీలో చెలరేగిన మంటలను అదుపులోకి తెచ్చేందుకు సిబ్బంది తీవ్రంగా యత్నిస్తోంది. అయితే సహాయక చర్యల్లో అపశ్రుతి చోటుచేసుకుంది. మంటలను అదుపులోకి తెచ్చేందుకు యత్నిస్తుండగా ముగ్గురు ఫైర్ సిబ్బందికి కాలిన గాయాలయ్యాయి. వీరిని చికిత్స నిమిత్తం దగ్గర్లోని ఆస్పత్రికి తరలించినట్లు సమాచారం. పూర్తి వివరాలు తెలియాల్సి ఉంది.


 తిరుపతి: రిలయన్స్ మార్ట్‌లో కొందరు గుర్తుతెలియని దుండగులు దోపిడీకి యత్నించారు. స్థానిక ఆర్టీసీ బస్టాండ్ సమీపంలో ఉన్న రిలయన్స్ మార్ట్‌కు కొందరు దుండగులు నిప్పుపెట్టారు. అయితే మార్ట్‌లో అలారం మోగడంతో దొంగలు అక్కడి నుంచి పారిపోయారని పోలీసులు తెలిపారు. స్థానికుల నుంచి సమాచారం అందుకున్న అగ్నిమాపక సిబ్బంది సకాలంలో ఘటనా స్థలానికి చేరుకుని మంటలను అదుపుచేయడంతో తృటిలో పెద్ద ప్రమాదం తప్పిపోయింది. కేసు నమోదు చేసిన పోలీసులు దర్యాప్తు చేస్తున్నారు.


 జగ్గయ్యపేట : గ్రామాల్లోని ప్రజలకు అగ్ని ప్రమాదాలపై పూర్తిస్థాయిలో అవగాహన కల్పించాలని రాష్ట్ర అగ్నిమాపకశాఖ డైరెక్టర్‌ జనరల్‌ కె సత్యనారాయణరావు పేర్కొన్నారు. పట్టణంలోని అగ్నిమాపక కేంద్రాన్ని శుక్రవారం ఆయన ఆకస్మిక తనిఖీ చేశారు. అగ్నిమాపక కేంద్రాన్ని క్షుణ్ణంగా పరిశీలించి సిబ్బంది, వాహనాలను తనిఖీ చేశారు. ఆయన మాట్లాడుతూ ఈ ప్రాంతం రాష్ట్ర సరిహద్దులో ఉండటంతోపాటు పరిశ్రమలు ఎక్కువగా ఉన్నాయని, అగ్ని ప్రమాదాలు జరిగే అవకాశం ఎక్కువగా ఉంటుందన్నారు. కావున సిబ్బంది నిత్యం అప్రమత్తంగా ఉండాలన్నారు. అన్ని గ్రామాల్లో అగ్నిమాపక కేంద్రం సిబ్బంది సమాచారం ఉంటే ప్రమాదాలను నియంత్రించవచ్చన్నారు. ప్రస్తుతం సాంకేతికరంగం పెరగటంతో సమాచారం కూడా త్వరితగతిన వచ్చే అవకాశం ఉందన్నారు. ఈ అగ్నిమాపక కేంద్రం రాష్ట్రంలోనే మోడల్‌ స్టేషన్‌గా ఉందన్నారు. ఈ కార్యక్రమంలో అగ్నిమాపక అధికారి ఆంజనేయులు, సిబ్బంది పాల్గొన్నారు.
 
 
 
  


 ఇద్దరు మహిళలకు తీవ్రగాయాలు
 
 కడప అర్బన్‌: వైఎస్‌ఆర్‌ జిల్లా కేంద్రం కడప నడిబొడ్డున, ఏడురోడ్ల కూడలిలో ఉన్న సుజాత హోటల్‌ భవనం శుక్రవారం మధ్యాహ్నం కుప్పకూలింది. అందులో పనిచేస్తున్న ఇద్దరు మహిళా కూలీలు తీవ్రంగా గాయపడ్డారు. శిథిలాల కింద ఉన్న పార్వతి (50)ని మొదట అగ్నిమాపకశాఖ వారు రక్షించి వెంటనే 108లో రిమ్స్‌కు తరలించారు. ఈలోపునే శిథిలాల నుంచి కేకలు విన్పించాయి.
 
 మరో మహిళ చౌడమ్మ(55) ఇరుక్కుపోయిందని గుర్తించారు. అగ్నిమాపకశాఖ, పోలీసు సిబ్బంది దాదాపు గంటకుపైగా శ్రమించి చౌడమ్మను రక్షించి రిమ్స్‌కు తరలించారు. ప్రస్తుతం వారు చికిత్స పొందుతున్నారు.


 అమరావతి : అగ్నిమాపక శాఖకు సంబంధించిన నిరంభ్యంతర(ఎన్‌ఓసీ) పత్రాలన్నీ ఇకపై ఆన్‌లైన్‌లోనే జారీ చేసే విధానాన్ని త్వరలో ప్రారంభిస్తామని ఆ శాఖ డైరెక్టర్ జనరల్ కె.సత్యనారాయణ తెలిపారు.
 
 విజయవాడలో అగ్ని మాపక శాఖకు సంబంధించిన రాష్ట్రస్థాయి సమావేశాన్ని ఆదివారం నిర్వహించారు. అనంతరం విలేకరులతో మాట్లాడుతూ అన్ని జిల్లాల నుంచి వచ్చిన అంశాలు, సమస్యలను క్రోడీకరించి యాక్షన్ ప్లాన్ తయారు చేసినట్లు తెలిపారు. భవంతులు, ఆస్పత్రులు, హోటళ్లు, మల్టీప్లెక్స్ వంటి వాటికి నిరంభ్యంతర పత్రాలను ఇకపై ఆన్‌లైన్‌లోనే జారీ చేస్తామన్నారు. ఈ-ఆఫీసు విధానాన్ని అమలు చేసి పేపర్ రహిత పరిపాలనను చేపట్టడానికి చర్యలు తీసుకుంటున్నామన్నారు.
 
 అదనపు డీజీ మురళీమోహన్ ఆధ్వర్యంలో ఇద్దరు ఆర్‌ఎఫ్‌ఓలు, ఏడుగురు డీఎఫ్‌ఓలతో ఒక కమిటీని ఏర్పాటు చేశామని, ఈ కమిటీ ఎప్పటికప్పుడు బిల్డర్లు, ఆసుపత్రులు, వాణిజ్య సముదాయాలు వంటి అన్ని రంగాల వారితో సమావేశమై వారి సమస్యలను పరిష్కరిస్తుందని తెలిపారు. తమ శాఖలో వివిధస్థాయిల్లో 30 శాతం పోస్టులు ఖాళీగా ఉన్నాయని, వాటిని దశల వారీగా భర్తీ చేస్తామని చెప్పారు. ప్రకృతి విపత్తులు వచ్చినప్పుడు వాటిని సమర్థవంతంగా ఎదుర్కొనేలాగా ప్రత్యేక బృందాలు ఏర్పాటు చేసి వారికి పూనేలో నిరంతరం శిక్షణ ఇప్పిస్తామని చెప్పారు.


 
  ఎగ్జిబిషన్ సొసైటీ తీరుపై హైకోర్టు విస్మయం
 
  బకాయిలు చెల్లించనప్పుడు ఎందుకు అనుమతినిస్తున్నారు?
 
  వైఖరి చెబుతూ కౌంటర్ వేయాలని ప్రభుత్వానికి ఆదేశం
 
 సాక్షి, హైదరాబాద్: అగ్నిమాపక శాఖకు చెల్లించాల్సిన రూ.80 లక్షలకు పైగా బకాయిలను చెల్లించకుండానే హైదరాబాద్‌లోని ఎగ్జిబిషన్ సొసైటీ ఏటా ఎగ్జిబిషన్ సందర్భంగా ఆ శాఖ సేవలను వినియోగించుకుంటుండటంపై హైకోర్టు విస్మయం వ్యక్తం చేసింది. బకాయిలు చెల్లించనప్పుడు ఎగ్జిబిషన్ నిర్వహణకు ప్రభుత్వం ఎందుకు అనుమతిస్తోందని ప్రశ్నించింది. పైగా బకాయిల చెల్లింపు విషయంలో ఎగ్జిబిషన్ సొసైటీ మినహాయింపు కోరడంపై ఆశ్చర్యం వ్యక్తం చేసింది. బకాయిల వసూలు, ఎగ్జిబిషన్ నిర్వహణకు అనుమతిపై వైఖరి తెలియచేయాలని, పూర్తి వివరాలతో కౌంటర్ దాఖలు చేయాలని ప్రభుత్వాన్ని ఆదేశించింది. తదుపరి విచారణను రెండు వారాలకు వాయిదా వేసింది. ఈ మేరకు తాత్కాలిక ప్రధాన న్యాయమూర్తి జస్టిస్ రమేశ్ రంగనాథన్, న్యాయమూర్తి జస్టిస్ అంబటి శంకర నారాయణలతో కూడిన ధర్మాసనం మంగళవారం ఉత్తర్వులు జారీ చేసింది. అగ్నిమాపక శాఖకు ఎగ్జిబిషన్ సొసైటీ రూ.68 లక్షల మేర బకాయి ఉందని, దీన్ని వడ్డీతో సహా సొసైటీ నుంచి వసూలు చేసేలా చర్యలు తీసుకోవాల్సిందిగా ప్రభుత్వాన్ని ఆదేశించాలని కోరుతూ హైదరాబాద్‌కు చెందిన ఖాజా అయాజుద్దీన్ వేసిన ప్రజా ప్రయోజన వ్యాజ్యాన్ని ఏసీజే ధర్మాసనం మంగళవారం మరోసారి విచారించింది.
 
 ఇప్పటి వరకు అగ్నిమాపక శాఖకు రూ.68 లక్షల మేర బకాయి ఉందని, వసూలుకు ప్రభుత్వం ఎటువంటి చర్యలు తీసుకోవడం లేదని పిటిషనర్ తరఫు న్యాయవాది కుమార్ అన్నారు. వడ్డీతో సహా రూ.80 లక్షలకు పైగా చెల్లించాల్సి ఉందని హోంశాఖ తరఫు న్యాయవాది హెచ్.వేణుగోపాల్ చెప్పారు. ఏటా ఎగ్జిబిషన్ సందర్భంగా నామమాత్రంగా లక్ష రూపాయలు చెల్లించి అగ్నిమాపక సేవలను వాడుకోవడం సొసైటీ అలవాటుగా చేసుకుందన్నారు. బకాయిల మినహాయింపును ప్రభుత్వం తిరస్కరించిందని తెలిపారు. ఎగ్జిబిషన్ సొసైటీ ప్రజాధనం చెల్లించకుండా సాకులు చెబుతుంటే మీరేం చేస్తున్నారంటూ ప్రభుత్వాన్ని ధర్మాసనం ప్రశ్నించింది. బకాయిలు చెల్లించనప్పుడు ఎగ్జిబిషన్ నిర్వహణకు ఎందుకు అనుమతినిస్తున్నారని నిలదీసింది. 2017 జనవరిలో నిర్వహించబోయే ఎగ్జిబిషన్‌కు అనుమతినిచ్చే విషయంలో వైఖరి ఏమిటో తెలియచేయాలని కూడా ప్రభుత్వాన్ని ఆదేశించింది.


 సాక్షి, హైదరాబాద్: రాష్ట్ర పోలీసు శాఖలో కానిస్టేబుల్ (సివిల్/ఏఆర్/ఎస్‌ఏఆర్/టీఎస్‌ఎస్‌పీ)పోస్టులతో పాటు ఎస్పీఎఫ్‌లో కానిస్టేబుల్, అగ్నిమాపక శాఖలో ఫైర్‌మెన్ పోస్టుల భర్తీకి నిర్వహించిన తుది రాత పరీక్షలో కనీస అర్హత మార్కులు సాధించిన అభ్యర్థుల ఆన్‌లైన్ దరఖాస్తులు, దేహ దారుఢ్య పరీక్ష వివరాలను విడుదల చేశారు.
 
 తెలంగాణ స్టేట్ లెవల్ పోలీస్ రిక్రూట్‌మెంట్ బోర్డు చైర్మన్ పూర్ణచందర్ రావు బుధవారం ఓ ప్రకటనలో తెలిపారు. www.tslprb.in నుంచి అభ్యర్థులు  ఆన్‌లైన్ దరఖాస్తులను డౌన్‌లోడ్ చేసుకొని, వివరాలను సరిచూసుకోవాలన్నా రు. దరఖాస్తు సమాచారంలో వ్యత్యాసాలుంటే 040-23150362/ 23150462 లలో లేదా support@tslprb.in కు మెరుుల్ ద్వారా సంప్రదించాలన్నారు.


 సాక్షి, హైదరాబాద్: రాష్ట్ర పోలీసు శాఖ పరిధిలో పోలీస్ కానిస్టేబుల్ (సివిల్/ఏఆర్/ఎస్‌ఏఆర్/టీఎస్‌ఎస్‌పీ), స్పెషల్ ప్రొటెక్షన్ ఫోర్స్ (ఎస్‌పీఎఫ్)లో కానిస్టేబుల్ (పురుష), అగ్నిమాపక శాఖలో ఫైర్‌మెన్ పోస్టుల భర్తీకి ఆదివారం నిర్వహించిన రాత పరీక్షకు సంబంధించిన ప్రశ్న పత్రం బుక్‌లెట్లు, ప్రాథమిక కీను తెలంగాణ స్టేట్ లెవల్ పోలీస్ రిక్రూట్‌మెంట్ బోర్డు (టీఎస్‌ఎల్‌పీఆర్‌బీ) మంగళవారం విడుదల చేసింది. www.tslprb.in వెబ్‌సైట్ నుంచి డౌన్‌లోడ్ చేసుకోవాలని బోర్డు చైర్మన్ డాక్టర్ జె.పూర్ణచంద్రరావు తెలిపారు. ఈ నెల 28 సాయంత్రం 5 లోగా ప్రాథమిక కీపై ఆన్‌లైన్‌లో అభ్యంతరాలు స్వీకరిస్తామన్నారు


 • అగ్నిమాపక శాఖ అదనపు డీజీ లక్ష్మీప్రసాద్
 • దీపావళి టపాసులతో జాగ్రత్తగా వ్యవహరించాలని సూచన
  సాక్షి, హైదరాబాద్: రాష్ట్రంలో ఆరు ఆస్పత్రులు ఫైర్ సేఫ్టీ నిబంధనలను ఉల్లంఘించినట్లు తనిఖీల్లో తేలడంతో వాటిపై చట్టపర విచారణ చేపట్టామని రాష్ట్ర అగ్నిమాపక, విపత్తుల నిర్వహణ శాఖ అదనపు డెరైక్టర్ జనరల్ లక్ష్మీప్రసాద్ వెల్లడించారు. అగ్నిప్రమాదాల నుంచి రక్షణ కోసం ఆస్పత్రుల్లో ఏర్పాటు చేసిన సదుపాయాలపై క్రమం తప్పకుండా తనిఖీలు నిర్వహిస్తున్నామన్నారు. రాష్ట్ర వ్యాప్తంగా 68 ఆస్పత్రులను తనిఖీ చేసి, నిరభ్యంతర పత్రాలు (ఎన్‌వోసీ) జారీ చేశామన్నారు. భువనేశ్వర్‌లోని ఎస్‌యూఎం ఆస్పత్రిలో సోమవారం రాత్రి జరిగిన అగ్నిప్రమాదంలో 24 మంది మృత్యువాత పడిన ఘటనపై ఆయన స్పందించారు.
 రాష్ట్రంలో చాలా సురక్షిత పరిస్థితి ఉందని, ఇప్పటి వరకు ఎలాంటి పెద్ద దుర్ఘటన జరగలేదన్నారు. దీపావళి రోజున టపాసులు కాల్చే సమయంలో పాటించాల్సిన సురక్షిత పద్ధతులపై ప్రజల్లో అవగాహన కల్పించేందుకు ఆయన మంగళవారం తన కార్యాలయంలో పోస్టర్లు, కరపత్రాలను ఆవిష్కరించారు. అనంతరం విలేకరులతో మాట్లాడుతూ.. చిన్న జాగ్రత్తలతో పెద్ద ప్రమాదాలను నిలువరించవచ్చన్నారు. పెద్దవాళ్ల సమక్షంలోనే చిన్నపిల్లలు టపాసులు పేల్చాలన్నారు. గత దీపావళి రోజున రాష్ట్రంలో 30 చోట్ల అగ్నిప్రమాదాలు జరిగాయన్నారు. చైనా టపాసుల విక్రయాలపై నిషేధముందని, ఎవరైనా విక్రయిస్తే వారి లెసైన్స్‌ను రద్దు చేస్తామన్నారు. ఈ కార్యక్రమంలో డిప్యూటీ డెరైక్టర్ నారాయణ రావు తదితరులు పాల్గొన్నారు.


 రాయదుర్గంలోని ఓ ఫర్నిచర్ షాపులో శుక్రవారం వేకువజామున అగ్ని ప్రమాదం సంభవించింది. సెవెన్ సీజన్స్ దుకాణంలో ఒక్కసారిగా మంటలు చెలరేగటంతో సెక్యూరిటీ సిబ్బంది ఫైర్ స్టేషన్‌కు సమాచారం అందించారు. అరగంట తర్వాత అక్కడికి చేరుకున్న అగ్నిమాపక సిబ్బంది మంటలను అదుపులోకి తెచ్చారు. పండగల సీజన్ సందర్భంగా దుకాణంలో రూ.4 కోట్లకు పైగా సామగ్రిని అందుబాటులో ఉంచామని, అది పూర్తిగా తగులబడిపోయిందని యజమాని అఖ్తర్ తెలిపారు. అయితే, తమకు 3.15 గంటలకు సమాచారం అందగా 3.30 గంటలకు సంఘటన స్థలానికి చేరుకుని గంటలో అదుపులోకి తెచ్చామని ఫైర్ అధికారి వెంకటేశ్ తెలిపారు. దుకాణంలో ఎలాంటి ముందు జాగ్రత్త చర్యలు లేకపోవటంపై కేసు నమోదు చేయనున్నట్లు వివరించారు.
  


 తిరుమల కొండల్లో మళ్లీ కారుచిచ్చు రగులుకుంది. శ్రీవారి పాదం వద్ద గల నారాయణగిరి పర్వత పాదం సమీపంలో బుధవారం ప్రమాదవశాత్తు మంటలు చెలరేగాయి. ఇది గుర్తించిన టీటీడీ అధికారులు అటవీశాఖ సిబ్బంది, అగ్నిమాపక అధికారుల సాయంతో మంటలను అదుపు చేయడానికి యత్నిస్తున్నారు.
  


 కొత్త బ్యాటరీలతో మార్చి ఇచ్చిన తర్వాత కూడా ఫోన్లు పేలిపోతుండటంతో తాము ప్రతిష్ఠాత్మకంగా ప్రవేశపెట్టిన గెలాక్సీ నోట్ 7 ఫోన్ల ఉత్పత్తిని శాంసంగ్ కంపెనీ తాత్కాలికంగా నిలిపివేసిందని తెలుస్తోంది. చాలా ఫోన్లను రీకాల్ చేసి, వాటి బదులు కొత్త ఫోన్లు ఇచ్చినా, బ్యాటరీలో సమస్యను పరిష్కరించినట్లు చెప్పినా.. ఇప్పటికీ మళ్లీ మళ్లీ ఫోన్లలోంచి మంటలు వస్తుండటంతో తాత్కాలికంగా వీటి ఉత్పత్తిని ఆపేయాలని శాంసంగ్ నిర్ణయించిందని 'యోన్‌హాప్' అనే మీడియా సంస్థ తెలిపింది.  తమ విమానాల్లో ఈ ఫోన్లను తీసుకెళ్లడానికి వీల్లేదంటూ అమెరికాకు చెందిన రెండు విమానయాన సంస్థలు ప్రయాణికులకు తెలిపాయి. అయితే, ఉత్పత్తి నిలిపివేతపై శాంసంగ్ మాత్రం అధికారికంగా ఇంకా స్పందించలేదు. అమితాబ్ బచ్చన్ లాంటి దిగ్గజాలు కూడా తమ శాంసంగ్ ఫోన్‌లో సమస్యలు ఉన్నాయని, దాన్ని మార్పించుకున్నాను కాబట్టి కొంతవరకు పర్వాలేదని భావిస్తున్నానని చెప్పిన విషయం తెలిసిందే.
 
 అమెరికాలో మొబైల్ ఫోన్ల వ్యాపారంలో రెండో స్థానంలో ఉన్న ఏటీఅండ్ టీ సంస్థ, మూడో స్థానంలో ఉన్న టి-మొబైల్ కూడా తాము శాంసంగ్ నోట్ 7 ఫోన్లను ఎక్స్చేంజి చేయడం ఆపేస్తున్నట్లు ప్రకటించాయి.  అమెరికా సహా పది దేశాల్లోని దాదాపు 25 లక్షల నోట్ 7 ఫోన్లను రీకాల్ చేస్తున్నట్లు శాంసంగ్ కంపెనీ సెప్టెంబర్ 2వ తేదీన ప్రకటించింది. బ్యాటరీలలో సమస్య కారణంగా ఆ ఫోన్లలోంచి మంటలు వస్తున్నాయని పలుమార్లు ఫిర్యాదులు వచ్చాయి. ఇటీవలే అమెరికాలోని ఒక విమానంలో మార్చిన నోట్ 7 ఫోన్‌లోంచి కూడా మంటలు రావడంతో.. అప్పటికప్పుడు విమానం నుంచి ప్రయాణికులందరినీ కిందకు దింపేశారు.


 కోల్కతా: కోల్కతాలోని అతిపురాతన సింగిల్ స్క్రీన్ థియేటర్ జ్యోతీలో అగ్నిప్రమాదం సంభవించింది. జ్యోతీ థియేటర్లో ఆదివారం తెల్లవారు జామున ప్రమాదవశాత్తు మంటలు అంటుకొని హాలు మొత్తం వ్యాపించాయని అగ్నిమాపక సిబ్బంది తెలిపారు. మొత్తం 26 ఫైర్ ఇంజిన్లను మంటలు ఆర్పడానికి ఉపయోగించినట్టు పేర్కొన్నారు. ఈ ప్రమాదంలో ఎలాంటి ప్రాణనష్టం జరగలేదని అధికారులు పేర్కొన్నారు.  
 
 సెంట్రల్ కోల్కతాలోని ఎస్ప్లనేడ్లో 1930 దశకంలో జ్యోతీ థియేటర్ ప్రారంభించారు. తిరిగి 2008లో మూసివేశారు. 1970వ దశకంలో 70ఎమ్ఎమ్ చిత్రాల ప్రదర్శనతో ఈ థియోటర్ పేరు మారుమోగింది. ఆ రోజుల్లో బాలీవుడ్ చిత్రాలతో పాటూ హాలీవుడ్ చిత్రాలను కూడా ఈ థియేటర్లో ఎక్కువగా ప్రదర్శించే వారు. 


 కరీంనగర్‌ క్రై ం: జిల్లాల పునర్విభజన నేపథ్యంలో అగ్నిమాపక శాఖలో ఇప్పటికే విభజన ప్రక్రిక పూరై ్తనట్లు సమాచారం. కరీంనగర్‌ కేంద్రంగా జిల్లా అగ్నిమాపక అధికారి ఆధ్వర్యంలో జిల్లాలోని వివిధ ప్రాంతాల్లో ఉన్న అగ్నిమాపక కేంద్రాలు పనిచేస్తున్న విషయం తెలిసిందే. విభజన జరుగుతున్న క్రమంలో అగ్నిమాపక శాఖలో మార్పులు లేకుండా ఆయా జిల్లాల్లోని ఫైర్‌స్టేషన్లు, అక్కడి సిబ్బంది అదేవిధంగా కొనసాగుతారని తెలిసింది. డీఎఫ్‌వో పోస్టులను అప్‌గ్రేడ్‌ చేసి ప్రాంతీయ అగ్నిమాపక అధికారిగా మార్చి ఒకే అధికారికి మూడు జిల్లాల బాధ్యతలు అప్పగించనున్నట్లు తెలిసింది. ఇప్పటికే ఉన్నతాధికారులకు నివేదికలు కూడా పంపారని, రెండు రోజుల్లో ఉత్తర్వులు వెలువడనున్నాయని తెలిసింది. 
 జిల్లాలోని ఫైర్‌ స్టేషన్లు: 
 జగిత్యాల : జగిత్యాల, మెట్‌పల్లి (ధర్మపురి, రాయికల్‌ ఔట్‌సోర్సింగ్‌) 
 పెద్దపల్లి : పెద్దపల్లి, మంథని, గోదావరిఖని 
 కరీంనగర్‌ : కరీంనగర్, సిరిసిల్ల. 
  
  


 
 ఇదోరకం ఎత్తిపోతల పధకం
 
 అగ్నిమాపక శాఖ అధికారదుర్వినియోగం
 
 ఫైర్‌ ఇంజన్లతో పంటలకు నీరు
 
  
  
 పిఠాపురం : 
 అగ్నిప్రమాదం జరిగితే గంటల తరబడి రాని రెండు ఫైర్‌ ఇంజిన్లు ... 20 మంది సిబ్బంది ... ఉరుకులు పరుగులతో సైరన్‌ మోగించుకుంటూ రయ్యిన దూసుకుపోయాయి. ఆ హడావుడి చూసినవారు ఎక్కడో ఏదో పెద్ద అగ్నిప్రమాదం జరిగి ఉంటుందని కంగారుపడిపోయారు. ఇంతకూ ఆ ఫైర్‌ ఇంజిన్లు వెళ్లింది మంటలు ఆర్పడానికి కాదు ... పంటలకు నీరు తోడుకోడానికి. ఇదేమిటీ ఫైర్‌ ఇంజిన్లు పంట పొలాలకు నీరు తోడడమేమిటీ అని అనుకుంటున్నారా...! అదేనండి పిఠాపురం ఎమ్మెల్యే ఎస్వీస్‌ వర్మ రచించిన ఇదో కొత్తరకం ‘ఎత్తిపోతల... పథకం’. తన అనుచరుల పంట పొలాలకు నీరు అవసరం పడడంతో ఈ పథకానికి తెరదీశారు. ఎక్కడైనా అగ్నిప్రమాదం జరిగితే వెళ్లాల్సిన అగ్నిమాపక శకటాలు  ... సిబ్బందిని తన అధికార దుర్వినియోగంతో బలవంతంగా తన సొంత ప్రయోజనాలకు వాడుకోవడం పట్ల ఈ ప్రాంతవాసుల్లో ఆగ్రహం వ్యక్తమవుతోంది. తన నియోజకవర్గంలో నదుల అనుసంధానం ద్వారా నీటి ఎద్దడి నివారణకు చర్యలు తీసుకుంటున్నానంటూ ప్రకటనలు గుప్పించిన సదరు ఎమ్మెల్యే చెప్పే మాటలకు ... చేసే పనులకు పొంతన లేదనడానికి ఈ సంఘటనే తార్కాణం. పిఠాపురం నియోజకవర్గంలో నీటి ఎద్దడి ఎదురై ఇప్పటికే నాట్లు పడక రైతులు పాట్లు పడుతున్నారు. ఈ నేపధ్యంలో ఇటీవల కురిసిన వర్షాలతో అక్కడక్కడా నాట్లు పడ్డాయి. గత ఐదు రోజులుగా ఎండలు మండిపోవడంతో నాట్లు వేసిన పంటలు బీటలు వారడం ప్రారంభించాయి. ఏలేరు, పీబీసీల ద్వారా నీటి సరఫరాకు చర్యలు తీసుకోవాల్సిన ఎమ్మెల్యే ఆ దిశగా నీరు రప్పించలేక చివరకు అత్యవసర వాహనాలైన ఫైర్‌ ఇంజిన్లను రప్పించి పీబీసీలో నీటిని తోడించి పైపుల ద్వారా పంటలకు నీరు మళ్లించడం చూసిన ప్రతి ఒక్కరూ ముక్కున వేలేసుకుంటున్నారు. ఇటీవలే సాగునీటి ఎద్దడి ఉన్న రైతులు కాలువల్లో నీరు తోడుకునేందుకు వీలుగా ఇదే ఎమ్మెల్యే రాయితీపై ఆయిల్‌ ఇంజిన్లు పంపిణీ చేశారు. వాటిని పక్కన పెట్టి కాలువ పక్కనే (పీబీసీ) ఉన్న పంట పొలాలకు ఫైర్‌ ఇంజిన్లతో భారీగా నీరు తోడించడముమిటని రైతులు ఆగ్రహం వ్యక్తం చేస్తున్నారు. 
 అంతా ఎమ్మెల్యే ఆదేశానుసారమే...
 మంటలు ఆర్పాల్సిన మీరు పంటలకు నీరు తోడడమేమిటని అక్కడున్న అగ్నిమాపక అధికారి వీవీఎస్‌ భావనారాయణను ‘సాక్షి’ ప్రశ్నించగా ఎమ్మెల్యే వర్మ ఆదేశాల మేరకు తాము ఇలా చేయవలసి వచ్చిందని చెప్పారు. మరి ఏదైనా ప్రమాదం సంభవిస్తే మి చేస్తారని అడగ్గా ‘వీలుకుదిరితే వెళతాం లేకపోతే మేమేం చేయలేం’ అంటూ తన అసక్తతను చెప్పుకొచ్చారు.  
  


 ఘాట్లలో క్లీనింగ్‌
 పుష్కర నగర్‌లో నిరంతర కాపలా
 సేవల్లో ఫైర్‌ సిబ్బంది
 సాక్షి, అమరావతి : 
 కృష్ణా పుష్కరాల్లో అగ్నిమాపక సిబ్బంది విస్తృత సేవలందిస్తున్నారు. ఘాట్లను నిరంతరం కంటికి రెప్పలా కాపలా కాస్తున్నారు. ప్రతి ఘాటులోను ఫైర్‌ సిబ్బంది క్లీనింVŠ లోనూ, వీవీఐపీల ప్రోటోకాల్, పుష్కర నగర్‌ల్లో యాత్రికుల భద్రత పరంగా తమవంతు సేవలు అందిస్తున్నారు. పోలీసుల్లా ఘాట్ల పరిధిలో భక్తులను సూచనలు, సలహాలు అందిస్తూ వయసు మీరిన వారికి  చేదోడుగా,తప్పిపోయిన పిల్లల విషయంలో చేయూత నిస్తూ సేవలు అందిస్తున్నారు. పర్యాటకశాఖ ఏర్పాటు చేసినా బోటు షికారులో ఘాట్లలో భక్తులకు ఏలాంటి ప్రమాదాలు లేకుండా ఫైర్‌ రెస్కూ్య టీం పర్యవేక్షిస్తోంది.
 విధుల్లో 1050 మంది సిబ్బంది..
 కృష్ణా, గుంటూరు జిల్లాల పరిధిలోని పుష్కర సేవల్లో 1050 మంది ఫైర్‌సిబ్బంది నిమగ్నమయ్యారు. రాష్ట్ర వ్యాప్తంగా అన్ని ఫైర్‌ స్టేషన్ల నుంచి సిబ్బంది, అ«ధికార యంత్రాంగాన్ని పుష్కర సేవలకు వినియోగిస్తున్నారు. ప్రధానంగా ఘాట్ల క్లీనింగ్‌లో వీరి పాత్ర కీలకంగా ఉంది. శానిటేషన్‌ విభాగంతో సమన్వయం చేసుకుంటూ 40 ఫోర్టబుల్‌ పంపులతో పరిశుభ్రత చేస్తున్నారు. గంట, గంటకు పంపులతో శుభ్రం చే స్తుండడంతో ఘాట్లలో పరిశుభ్రత తాండవిస్తుండడంతో భక్తులు ఆనందంగా వెళ్తున్నారు. పుష్కరాలకు ఐదు రోజుల ముందు నుంచే వీరు ఘాట్ల శుభ్రత విషయంలో శ్రద్ధ పెట్టారు.
 నిరంతర నిఘా..
 పోలీసులు భక్తుల భద్రత విషయంలో కాపలా ఉంటే ఫైర్‌ సిబ్బంది అగ్ని ప్రమాదాల బారినపడకుండా నిరంతరం అప్రమత్తంగా వ్యవహరిస్తున్నారు. మొత్తం 45 పుష్కర నగర్‌ల్లో 30 వాహనాలను వుంచారు. పుష్కర నగర్‌ ఏర్పాటు చేయకముందే వీరు విద్యుత్‌ శాఖతో సమన్వయం చేసుకుని నిబంధనల మేర విద్యుత్‌ సదుపాయం కల్పించారు. రాత్రి సమయాల్లో నిద్రించే సమయాల్లో ఏలా వ్యవహరించాలి అనే దానిపై భక్తులకు అవగాహన కల్పిస్తున్నారు. ఇక వీవీఐపీల ప్రోటోకాల్‌ ,హెలిప్యాడ్‌ వద్ద వీరి పాత్ర కీలకంగా ఉంది. ఘాట్ల పరిధిలో ¿¶ క్తుల భద్రత విషయంలో రెస్కూ్య టీంలు పనిచేస్తున్నాయి. మొత్తం 8 బోట్లు ద్వారా ఫైర్‌ సిబ్బంది అప్రమత్తంగా ఉంటూ కాపలా కాస్తున్నారు. ఫెర్రి ఘాట్‌లో 1, దుర్గాఘాట్‌ లో 2, అమరావతిలో 2, పున్నమి ఘాట్‌ లో 2, భవానీ ఘాట్‌లో 1 వంతున బోట్లుల్లో కాపలా కాస్తున్నారు. మరో రెండు అదనంగా ఉన్నాయి. ఏక్కడ భక్తులు ప్రమాదం జరిగినా వెంటనే ఆ రెస్కూ్యటీంలు వారిని వెంటనే రక్షించి వైద్య శిబిరాలకు తరలించేందుకు చర్యలు తీసుకుంటున్నారు.
 పోలీసు తరహాలో సేవలు..
 పోలీసు తరహాలో ఫైర్‌ సిబ్బంది సేవలు అందిస్తున్నారు.ప్రతి ఘాట్‌ లో ఓ స్టేషన్‌ అధికారి ఆధ్వర్యంలో పర్యవేక్షణ వుంటుంది అలాగే ప్రధాన ఘాట్లలో జిల్లా ఫైర్‌ అధికారి పర్యవేక్షణ చేస్తున్నారు. ఘాట్ల వద్దకాపలాతో పాటు వయస్సు మీరిన వారిని ఆసరాగా నిలచి స్నానలకు తీసుకెళ్లడం, చిన్నారులు తప్పిపోకుండా ట్యాగింగ్‌ వేయించడం, అనారోగ్యంగా ఉన్న ఉన్నవారిని వైద్య శిబిరాలకు తరలించండం ఇలాంటి సేవల్లో వీరు భాగస్వాములు అవుతున్నారు.
  


 బెంగళూరు: ఓపక్క ఎడతెరిపి లేకుండా కురుస్తున్న వర్షాల కారణంగా ఢిల్లీకి సమీపంలోని గుర్గావ్ లోని రోడ్లన్ని వరద నీటిలో మునిగి రాకపోకలకు తీవ్ర అంతరాయం కలగగా ఇప్పుడు తాజాగా బెంగళూరులో అలాంటి పరిస్థితే తలెత్తింది. రాత్రికి రాత్రే కురిసిన భారీ వర్షం కారణంగా బెంగళూరులోని పలు ఐటీ కంపెనీలు వర్షపు నీటిలో చిక్కుకున్నాయి. ఇన్ఫోసిస్, ఎలక్ట్రానిక్ సిటీ, పలు నివాసాలకు వెళ్లే మార్గం లేకుండా అయింది.
 
 కనీసం నిత్యావసరాలు కూడా తెచ్చుకునే పరిస్థితి లేకుండా వరద నీరు వచ్చి చేరింది. దీంతో అగ్నిమాపక సిబ్బంది బోట్లను రంగంలోకి దించింది. వాటి సహాయంతో ప్రమాద పరిస్థితుల్లో ఉన్నవారిని సురక్షిత ప్రాంతాలకు తరలిస్తుంది. దీనికి తోడు ఎక్కడికక్కడ విరిగిపోయిన చెట్ల కారణంగా వాహనాల రాకపోకలకు తీవ్ర అంతరాయం ఏర్పడుతోంది. విద్యుత్ సమస్య కూడా మొదలైంది. ఎక్కడ చూసిన వరద నీరు మీటర్ల పరిధిలో వ్యాపించి ఉండటంతో అధికారులు ఆందోళన చెందుతున్నారు.


 థానే: కొత్త షూ కొనిస్తానని ఆశచూపి చిన్నారిని బయటకు తీసుకెళ్లి నదిలో  విసిరేశాడు  సవతి తండ్రి. అయితే అందులో పేరుకుపోయిన గుర్రపు డెక్క పాపను కాపాడింది. థానేకి చెందిన తులసీరాం కొత్త షూ కొనిపెడతానని ఆరే ళ్ల కూతురు ఏక్తా తులసీ సైనీని బుధవార ం రాత్రి 8 గంటలకు బయటకు తీసుకెళ్లాడు. ఏం దుర్బుద్ధి పుట్టిందోగానీ ఇక్కడి బద్లాపూర్ వాలివ్లీ వంతెన పైనుంచి పాపను నదిలోకి నెట్టెశాడు.  గురువారం ఉదయం అక్కడే పనిచేస్తున్న సెక్యూరిటీ గార్డు పాప ఏడుపు గమనించి పోలీసులు, అగ్ని మాపక సిబ్బందికి సమాచారం అందించాడు. అగ్నిమాపక సిబ్బంది పాపను రక్షించారు.
 
 గుర్రపు డెక్క ఉండటంతోనే ఆమెకు ప్రమాదం తప్పిందని పోలీసులు తెలిపారు. 11 గంటలు గుర్రపుడెక్కలపైనే ఉన్న పాప క్షేమంగా బయటపడింది. బయటకు వచ్చాక పాపను ప్రశ్నిస్తే...తన తండ్రే రాత్రి నీటిలో పడేశాడని చెప్పింది.తన కూతురు కనిపించట్లేదని ఆమె తల్లి బుధవారం రాత్రి పోలీసులకు ఫిర్యాదు చేసింది. పోలీసులు పాప తండ్రి కోసం వెతుకుతున్నారు.


 నాచారం పారిశ్రామికవాడలో ఘటన
 అగ్నికి ఆహుతైన ఫ్యాక్టరీ.. కోట్లలో ఆస్తి నష్టం
  
  హైదరాబాద్: హైదరాబాద్‌లోని నాచారం పారిశ్రామికవాడలో శుక్రవారం భారీ అగ్నిప్రమాదం చోటు చేసుకుంది. ఓ కెమికల్ ఫ్యాక్టరీలో రసాయనాలతో నింపిన 250 డ్రమ్ములు పేలిపోయాయి. ఉదయం నుంచి సాయంత్రం వరకు పెద్దఎత్తున మంటలు ఎగిసిపడ్డాయి. మరో రెండ్రోజులపాటు పొగలు వెలువడుతాయని అధికారులు తెలిపారు. ఈ ఘటనలో ప్రాణాపాయం తప్పినా.. రూ.కోట్లలో ఆస్తినష్టం వాటిల్లింది. నాచారం పారిశ్రామికవాడలోని రోడ్ నెం.18లో ‘సాలికలేట్స్ అండ్ కెమికల్స్’ ఫ్యాక్టరీలో ఈ ప్రమాదం జరిగింది. ఈ ఫ్యాక్టరీలో అగ్నిప్రమాదం జరగడం ఇది రెండోసారి. యాజమాన్యం నిర్లక్ష్యం వల్లే ప్రమాదం చోటుచేసుకుందని పోలీసులు పేర్కొంటున్నారు.
 
  భయభ్రాంతులకు గురైన స్థానికులు
  ఎనిమిది గంటలపాటు మంటలు, పొగలు వెలువడడంతో స్థానికులు ప్రాణాలు అరచేతిలో పెట్టుకుని పరుగులు పెట్టారు. పేలుళ్ల ధాటికి గాల్లోకి ఎగురుతున్న డ్రమ్ములు మీద ఎక్కడపడతాయో తెలీక ఆందోళనకు గురయ్యారు. అగ్నిమాపక శాఖ అధికారులు మంటలను ఆర్పడానికి నాచారం, చర్లపల్లి, మౌలాలి అగ్నిమాపక కేంద్రాల నుంచి పది ఫైరింజన్లతో పాటు రెండు ఫోమ్ ఫైరింజన్లు, ల్యాడర్, 40 వాటర్ ట్యాంకర్లను తరలించారు. సాయంత్రం 5 గంటల సమయంలో మంటలు అదుపులోకి వచ్చాయి. కెమికల్స్ కారణంగా మరో 48 గంటల పాటు పొగలు వస్తాయని, స్థానికులు అప్రమత్తంగా ఉండాలని సూచించారు.
 
 ప్రమాదం విషయం తెలియగానే జీహెచ్‌ఎంసీ మేయర్ బొంతు రామ్మోహన్, జీహెచ్‌ఎంసీ కమిషనర్ జనార్ధన్‌రెడ్డి, ఉప్పల్ ఎమ్మెల్యే ఎన్‌వీఎస్‌ఎస్ ప్రభాకర్, పోలీసు ఉన్నతాధికారులు ఘటనా స్థలికి చేరుకొని పరిస్థితిని సమీక్షించారు. మేయర్, జీహెచ్‌ఎంసీ కమిషనర్ దాదాపు నాలుగు గంటల పాటు అక్కడే ఉన్నారు. కాగా ఫ్యాక్టరీ యాజమాన్యంపై కేసు నమోదు చేసిన నాచారం పోలీసులు దర్యాప్తు ప్రారంభించారు. ప్రమాదంలో దాదాపు రూ.5 కోట్ల ఆస్తినష్టం జరిగినట్లు జీహెచ్‌ఎంసీ ఫైర్ వింగ్ అదనపు కమిషనర్ వెంకట్‌రావు ప్రకటించగా... యాజమాన్యం మాత్రం రూ.50 కోట్ల వరకు నష్టం జరిగిందని చెబుతోంది.
  
  ప్రమాదం ఎలా జరిగింది?
  ఈ ఫ్యాక్టరీలో వైద్యరంగంలో వినియోగించే వివిధ మందులతోపాటు సౌందర్య సాధనాల్లో వినియోగించే ప్రిజర్వేటివ్స్ తయారు చేస్తారు. ప్రధానంగా పారా హైడ్రాక్సీ బెంజాయిక్ యాసిడ్‌తో పాటు వివిధ రకాల కెమికల్స్ నిల్వ ఉంటాయి. శుక్రవారం నాటికి సైక్లో ఎగ్జేన్, ఎథిలిటేట్, మిథనాయిల్, టోలిన్, ఎసిటోన్, ఎన్-బ్యూటేన్, ఎథిలిన్, ఎన్-ప్రొఫనైల్, టూ-ఈహెచ్ రసాయనాలతో కూడిన 250 డ్రమ్ములు నిల్వ ఉన్నాయి. ఉదయం విధులకు హాజరైన కార్మికులు పనులు ప్రారంభించగానే ఒక్కసారిగా మంటలంటుకున్నాయి. కార్మికులు వెంటనే ఇతరులను కూడా అప్రమత్తం చేసి అక్కడ్నుంచి బయటకు వచ్చేయడంతో ప్రాణనష్టం తప్పింది.
 
 కొద్ది నిమిషాల్లోనే మంటలు ఎగిసిపడుతూ చుట్టూ వ్యాపించాయి. మొత్తం 250 డ్రమ్ములకు అంటుకోవడంతో అవి పెద్ద శబ్దాలతో పొగలు విరజిమ్ముతూ పేలిపోయాయి. ఆకాశంలో దట్టంగా వ్యాపించిన నల్లటి పొగ నాచారం, మల్లాపూర్ ప్రాంతాలను కమ్మేసింది. పొగమబ్బులు దిల్‌సుఖ్‌నగర్ వరకు కనిపించాయి. రసాయనాలన్నీ ఒక్కసారిగా కాలిపోవడంతో దాదాపు 1500 డిగ్రీల వేడి ఉత్పత్తి అయింది. దీంతో ఫ్యాక్టరీ మొత్తం అగ్నికి ఆహుతైంది. రసాయనాలున్న ఇనుప డ్రమ్ములను దొర్లిస్తుండగా రసాయనం లీకైందని, ఇనుప డ్రమ్ముల రాపిడికి నిప్పు రవ్వలు వచ్చి ప్రమాదం జరిగిందని కొందరు అంటుండగా.. రసాయనాల పైప్‌లైన్లకు సంబంధించిన గేట్‌వాల్వ్ తెరిచే సమయంలో మంటలు చెలరేగాయని మరికొందరు చెబుతున్నారు. రసాయనాల రియాక్టర్ పేలుడే కారణమని ఇంకొందరు పేర్కొంటున్నారు.


  శృంగవరపుకోట : స్థానిక అగ్నిమాపక శాఖ కార్యాలయంలో పనిచేస్తున్న ఓ హోంగార్డు ఆత్మహత్య చేసుకున్నాడు. పోలీసులు తెలిపిన వివరాల ప్రకారం... శృంగవరపుకోటలోని మునసబు వీధిలో నివాసముంటున్న వసంత ఎరుకునాయుడు(28) అగ్నిమాపక శాఖ కార్యాలయంలో హోంగార్డుగా పనిచేస్తున్నాడు. ఆయన మంగళవారం మధ్యాహ్నం 3.15 గంటలకు ఫైర్ ఆఫీసర్ రామచంద్రకు ఫోన్‌చేసి ‘సార్ నేను చనిపోతున్నా. పురుగుల మందు తాగి ఆత్మహత్య చేసుకుంటున్నా..’ అని చెప్పాడు. ఎక్కడున్నావని రామచంద్ర ప్రశ్నించడంతో పుణ్యగిరి కొండపై ఆశ్రమం వద్ద ఉన్నానని తెలిపాడు.
  
  వెంటనే ఇద్దరు ఫైర్‌మెన్లను పుణ్యగిరికి పంపగా, వారు ఎరుకునాయుడిని గుర్తించి సాయంత్రం ఐదు గంటల సమయంలో ప్రభుత్వాస్పత్రికి తీసుకెళ్లారు. అతని పరిస్థితి విషమంగా ఉండటంతో విశాఖపట్నంలోని కేజీహెచ్‌కు పంపారు. ఫైర్ సిబ్బంది సమాచారం మేరకు ఎస్‌ఐ రవికుమార్ వచ్చి ఎరుకునాయుడు వద్ద ఉన్న సూసైడ్ నోట్‌ను స్వాధీనం చేసుకున్నారు. కేజీహెచ్‌లో చికిత్స పొందుతూ ఎరుకునాయుడు మరణించాడు. సూసైడ్ నోట్ ఆధారంగా కేసు నమోదు చేశామని ఎస్‌ఐ తెలిపారు. ఎరుకునాయుడుకు భార్య మణి, కుమార్తె సౌజన్య ఉన్నారు.
  
  మనశ్శాంతి లేక చనిపోతున్నా..
  తల్లి కాంత తనను తప్పుడుమార్గంలో పెంచిందని, తాగుడు నేర్పించిందని, తండ్రిని కొట్టించిందని మనశ్శాంతి లేక మరణిస్తున్నానని ఎరుకునాయుడు సూసైడ్ నోట్‌లో పేర్కొన్నాడు. తల్లి కాంత, మరో ముగ్గురు తనపై తప్పుడు కేసులు బనాయించి, గౌరవంగా బతకనీయకుండా చేస్తున్నారని, స్టేషన్లు, కోర్టుల చుట్టూ తిప్పుతున్నారని, వారి వేధింపుల వల్లే చనిపోతున్నానని రాశాడు. తన కూతురిని చిన్నమామకు అప్పగించాలని, భార్యకు మరో పెళ్లి చేయాలని కోరాడు. ఆస్తిని తన తల్లి, భార్య, కుమార్తెకు సమానంగా పంచాలని పేర్కొన్నాడు. తన తండ్రి దహన సంస్కారాలకు ఎవరూ రాకపోవడం బాధించిందని రాశాడు. తన దహన సంస్కారాలకు బంధువులు, కుటుంబ సభ్యుల మొత్తం హాజరుకావాలని ఆ లేఖలో విన్నవించాడు.  
  


 డీఎఫ్‌వో సందన్న
 ► ముగిసిన అగ్నిమాపక వారోత్సవాలు
 ► రక్తదానం చేసిన అధికారులు, సిబ్బంది
 ► విశ్రాంత ఉద్యోగులకు సన్మానం
  
 ఆదిలాబాద్ క్రైం : రక్తదానం చేయడం సామాజిక బాధ్యతగా తీసుకోవాలని అగ్నిమాపక శాఖ జిల్లా అధికారి(డీఎఫ్‌వో) సారంగి సందన్న అన్నారు. వారం రోజులుగా జిల్లాలో నిర్వహిస్తున్న అగ్నిమాపక శాఖ వారోత్సవాలు బుధవారంతో ముగిసాయి. చివరి రోజు జిల్లా కేంద్రంలోని అగ్నిమాపక శాఖ కార్యాలయంలో ఏర్పాటు చేసిన రక్తదాన శిబిరాన్ని డీఎఫ్‌వో ప్రారంభించారు. జిల్లా వ్యాప్తంగా అన్ని అగ్నిమాపక కేంద్రాల అధికారులు, సిబ్బంది రక్తదానం చేశారు.
 
 ఈ సందర్భంగా డీఎఫ్‌వో మాట్లాడుతూ ప్రస్తుతం ఉన్న అత్యవసర పరిస్థితుల్లో రక్తం అవసరాన్ని దృష్టిలో ఉంచుకుని ఈ శిబిరం ఏర్పాటు చేసినట్లు తెలిపారు. రక్తదానానికి ముందుకు రావడం అభినందనీయమని అన్నారు. చాలామందికి రక్తదానంపై అపోహాలు ఉన్నాయని, రక్తదానం చేస్తే ఎలాంటి అనారోగ్య సమస్యలు రావనే విషయాన్ని గుర్తుంచుకోవాలని తెలిపారు. అగ్నిప్రమాదాల నివారణపై ప్రజల్లో చైతన్యం తీసుకొచ్చేందుకు పలు అవగాహన కార్యక్రమాలు చేపట్టామని తెలిపారు. కార్యక్రమంలో ఏడీఎఫ్‌వో ధర్మ, ఆదిలాబాద్ ఫైర్ అధికారి అనిల్‌కుమార్, అగ్నిమాపక సిబ్బంది పాల్గొన్నారు.
 
 
  విశ్రాంత ఉద్యోగులకు సన్మానం
  అగ్నిమాపక శాఖ వారోత్సవాల ముగింపు సందర్భంగా అగ్నిమాపక శాఖ విశ్రాంత ఉద్యోగులకు జిల్లా అగ్నిమాపక కేంద్రంలో సన్మాన కార్యక్రమం ఏర్పాటు చేశారు. జిల్లాలోని 20 మంది ఉద్యోగులకు పుష్పగుచ్చం అందజేసి శాలువాతో సత్కరించారు. విశ్రాంత ఉద్యోగులు చుట్టుపక్కల వారికి తమవంతుగా అగ్నిప్రమాదాల నివారణపై వివరిస్తూ ఉండాలని పేర్కొన్నారు.


 ♦ బహుళ అంతస్తుల భవనాల్లో మంటలార్పేందుకు వినియోగం
 ♦ రూ.20 కోట్లతో ఆరు కొత్త వాహనాల కొనుగోలుకు నిర్ణయం
  
  సాక్షి, హైదరాబాద్: బహుళ అంతస్తుల భవనాల్లో అగ్ని ప్రమాదాలు జరిగితే.. నేరుగా మంటలార్పేందుకు తోడ్పడే హైడ్రాలిక్ ప్లాట్‌ఫాం వాహనాలు అందుబాటులోకి వస్తున్నాయి. 14 అంతస్తులకన్నా పెద్ద భవనాల్లోనూ సహాయక చర్యలకు తోడ్పడే ఈ అత్యాధునిక వాహనాలను అగ్నిమాపకశాఖ సమకూర్చుకుంటోంది. రూ.20 కోట్లు వెచ్చించి ఆరు హైడ్రాలిక్ వాహనాల కొనుగోలుకు రంగం సిద్ధం చేసింది. వేసవి నేపథ్యంలో షార్ట్ సర్క్యూట్ల వంటి కారణాలతో ప్రమాదాలు తలెత్తే అవకాశం ఉండడంతో ఈ నెలాఖరు నాటికి నూతన వాహనాలను అందుబాటులోకి తీసుకొచ్చేందుకు యత్నిస్తోంది. వీటిలో నాలుగింటిని హైదరాబాద్‌కు, వరంగల్, కరీంనగర్‌లకు ఒక్కోటి కేటాయించనున్నారు.
 
  గంటల వ్యవధిలో అదుపులోకి..
  రాష్ట్రంలో ఏటా అగ్నిప్రమాదాల ఘటనలు పెరుగుతున్నాయి. అంతేస్థాయిలో ఆస్తి, ప్రాణ నష్టం కూడా జరుగుతోంది. గతేడాది రాష్ట్రవ్యాప్తంగా 5వేల అగ్నిప్రమాదాలు జరుగగా... అందులో బహుళ అంతస్తుల భవనాల్లో చోటు చేసుకున్నవి 1,650. ఇక బహుళ అంతస్తుల భవనాల్లో ప్రమాదాలు జరిగినప్పుడు సాంప్రదాయ ఫైరింజన్లతో గంటల తరబడి ప్రయత్నించినా మంటలు అదుపులోకి రావడం లేదు. పైగా ఫైర్ సిబ్బంది తీవ్ర ఇబ్బందులు ఎదుర్కొంటున్నారు.
 
 హైదరాబాద్‌లోని సీతారాంబాగ్‌లో ఓ భారీ భవనంలో ఆదివారం జరిగిన అగ్నిప్రమాదాన్ని అదుపు చేయడానికి 36 గంటల పాటు శ్రమించాల్సి వచ్చింది. అలాంటి చోట్ల హైడ్రాలిక్ వాహనాలను ఉపయోగిస్తే తక్కువ వ్యవధిలోనే మంటలను అదుపు చేయవచ్చని అగ్నిమాపకశాఖ అధికారులు పేర్కొంటున్నారు. హైడ్రాలిక్ వాహనాలకు ఉండే క్రేన్ సహా యంతో నేరుగా 14వ అంతస్తుకైనా సులభం గా చేరుకుని నీటిని, ఫోమ్ గ్యాస్‌ను పంపవచ్చు. అక్కడ చిక్కుకున్నవారిని సులభంగా రక్షించవచ్చు. అందువల్ల నగరాలు, పట్టణాల్లో ఈ వాహనాలను అందుబాటులో ఉంచాలని అగ్నిమాపకశాఖ నిర్ణయించింది.


  ఆదిలాబాద్ క్రైం : అగ్నిప్రమాదాలపై ప్రజలు అప్రమత్తంగా ఉండాలని జిల్లా అగ్నిమాపక శాఖ అధికారి సందన్న అన్నారు. గురువారం అగ్నిమాపక శాఖ వారోత్సవాలు జిల్లా కేం ద్రంలో ఘనంగా ప్రారంభమయ్యాయి. ముందుగా స్థానిక ఫైర్‌స్టేషన్ ఎదుట అమరవీరులకు నివాళులు అర్పించారు. జెండా ఆవిష్కరించి రెండు నిమిషాలు మౌనం పాటించారు.
 
 స్టాల్స్ ఏర్పాటు చేసి అగ్నిమాపక పరికరాల ప్రదర్శన చేపట్టారు. అనంతరం ఆదిలాబాద్ బస్టాండ్ ఎదుట డెమోస్ట్రేషన్ ( నీటీ విన్యాసాలు) నిర్వహించారు. ప్రమాదాలకు సంబంధించిన సూచికలు, జాగ్రత్తలతో కూడిన కరపత్రాలను స్థానికులు అందజేశారు. కార్యక్రమంలో ఏడీఎఫ్‌వో ధర్మ, స్టేషన్ అధికారి అనిల్‌కుమార్, సిబ్బంది ఉన్నారు.


 ప్రమాదాలపై అగ్నిమాపక శాఖ అప్రమత్తం
 ♦ పోలీసు, జలమండలి, ఆరోగ్య, విద్యుత్ శాఖలతో సమన్వయం
 ♦ నీటి సమస్య తలెత్తకుండా ట్యాంకర్లతో ఒప్పందం
 ♦ భారీగా అందుబాటులో ఉంచుకున్న ఫోమ్ సిలిండర్లు
 ♦  హైదరాబాద్‌లో అందుబాటులో 20 మోటార్ సైకిళ్లు
  
  సాక్షి, హైదరాబాద్: అగ్నిప్రమాదాలపై అగ్నిమాపక శాఖ అప్రమత్తమైంది. సత్వరమే ఘటనాస్థలానికి వెళ్లే విషయంపై కసరత్తు చేస్తోంది. ప్రమాదం చోటు చేసుకున్న పదిహేను నిమిషాల వ్యవధిలో సంఘటనా స్థలానికి ఫైరింజన్ వెళ్లేవిధంగా చర్యలు తీసుకుంటోంది. దీనికి ఆటంకంగా ఉన్న ట్రాఫిక్, నీటి సమస్యలను అధిగమించేందుకు పోలీసు, జలమండలి శాఖలతో సమన్వయం చేసుకుంటోంది. నీటి సమస్య పరిష్కారానికి ట్యాంకర్ యజమానులతో ఒప్పందం కుదుర్చుకుంది. ఘటనాస్థలానికి ఫైరింజన్‌ను నీటి ట్యాంకర్లు కూడా అనుసరించనున్నాయి.
 
 హైదరాబాద్ నగరంతోపాటు చుట్టుపక్కల ఎక్కడైనా అగ్ని ప్రమాదం జరిగితే వెంటనే ఫైర్ ఇంజన్‌ను జలమండలికి చెందిన ట్యాంకర్లు అనుసరించేలా ప్రణాళిక రూపొందించారు. అలాగే ఇతర ముఖ్య పట్టణాలలో కూడా ప్రైవేటు ట్యాంకర్లలతో ఒప్పందం కుదుర్చుకుంది. అదే విధంగా పరిశ్రమలతోపాటు పెద్ద పెద్ద షాపింగ్ మాల్స్ వద్ద నీరు అందుబాటులో ఉండే విధంగా చూసుకోవాలని అగ్నిమాపక శాఖ ఆదేశాలిచ్చింది. వేసవి ప్రారంభంలోనే రాష్ట్రవ్యాప్తంగా ప్రతీరోజూ 70 నుంచి 80 వరకు అగ్నిప్రమాదాల ఫిర్యాదులు వస్తుండటంతో శాఖ డెరైక్టర్ జనరల్ రాజీవ్ రతన్ సిబ్బందిని అప్రమత్తం చేస్తున్నారు.
  
  నాలుగు శాఖలతో సమన్వయం..
  అగ్ని ప్రమాదం జరిగిన వెంటనే పరిస్థితిని అదుపు చేయడంతోపాటు నష్టనివారణ చర్యలు చేపట్టడం కోసం అగ్నిమాపకశాఖ నాలుగు విభాగాలతో సమన్వయం చేసుకుంది. పోలీసు, జలమండలి, ఆరోగ్యశాఖ, విద్యుత్‌శాఖలతో సమన్వయం చేసుకుంది. ఎక్కడైన ప్రమాదం జరిగిన వెంటనే నాలుగు విభాగాలకు ఒకేసారి సమాచారం అందేలా కంట్రోల్ రూమ్ వ్యవస్థను ఏర్పాటు చేసింది. గాయపడిన వారిని వెంటనే ఆస్పత్రికి తరలించడం కోసం 108 అంబులెన్స్ కూడా వెంటనే ఘటనాస్థలానికి చేరుకోనుం ది. వాటర్ ట్యాంకర్ల అందజేయడం కోసం జలమండలి, విద్యుత్ సరఫరా విషయమై అంచనా వేయడానికి ఆ శాఖ అధికారులు వెంటనే రంగంలోకి దిగనున్నారు. ఇలా నాలుగు శాఖలను సమన్వయం చేయడం కోసం కంట్రోల్ రూమ్ వద్ద 24 గంటలపాటు అందుబాటులో ఉంచేలా వ్యవస్థను రూపొందించారు.
  
  అందుబాటులోకి ఫైర్ మోటార్ సైకిళ్లు
  చిన్న, చిన్న ప్రమాదాలు తలెత్తితే మహానగరాల్లో వెంటనే సంఘటనాస్థలానికి చేరుకునేందుకు అగ్నిమాపకశాఖ మోటార్ సైకిళ్లు అందుబాటులోకి తీసుకొచ్చింది.ప్రమాదం తలెత్తితే వెంటనే ఫోమ్ సిలిండర్లు అమర్చిన మోటార్ సైకిళ్లు రంగంలోకి దిగనున్నాయి. ఒక్క హైదరాబాద్‌లోనే 20 మోటార్ సైకిళ్లను సిద్ధంగా ఉంచారు. వరంగల్, కరీంనగర్‌లలో కూడా ఈ వాహనాలను ఏర్పాటు చేశారు.


 పిడుగురాళ్ల (గుంటూరు జిల్లా) : పిడుగురాళ్ల ఫైర్ ఆఫీసులో ఓ వ్యక్తి నుంచి రూ.20 వేలు లంచం తీసుకుంటూ ఫైర్ ఆఫీసర్ శివశంకర్ ఏసీబీ అధికారులకు చిక్కాడు. పిడుగురాళ్లలో ఇటీవల ఓ అగ్ని ప్రమాదంలో నరేంద్ర అనే వ్యక్తికి చెందిన దుకాణం తగలబడిపోయింది. దీనికి సంబంధించిన ఇన్సూరెన్స్ కోసం ఫైర్ ఆఫీసర్ దగ్గరకు వెళితే ఆయన రూ.30 వేలు లంచం డిమాండ్ చేశాడు. దీంతో నరేంద్ర ఏసీబీ అధికారులను ఆశ్రయించాడు. ఫైర్ ఆఫీసర్ శివశంకర్ బాధితుడి నుంచి రూ.20 వేలు తీసుకుంటుండగా పథకం ప్రకారం గురువారం పట్టుకున్నారు. కేసు నమోదు చేసి దర్యాప్తు చేస్తున్నారు.


 సాక్షి, హైదరాబాద్: రాష్ట్ర అగ్నిమాపకశాఖలో 139 మంది హోంగార్డుల నియామకానికి హోంశాఖ పచ్చజెండా ఊపింది. ఈ మేరకు హోంశాఖ కార్యదర్శి అనితా రాజేంద్ర శనివారం ఉత్తర్వులు జారీ చేశారు. రాష్ట్రవ్యాప్తంగా 16 ఫైర్ అవుట్ పోస్టుల్లో ఖాళీగా ఉన్న హోంగార్డుల పోస్టులను భర్తీ చేయాల్సిందిగా అగ్నిమాపకశాఖ డెరైక్టర్ జనరల్ (డీజీ)కి సూచించారు. ప్రస్తుతం వివిధ విభాగాల్లో ఔట్ సోర్సింగ్ పద్ధతిన పనిచేస్తున్న 117 మందిని హోంగార్డులుగా పరిగణిస్తున్నట్లు ఉత్తర్వుల్లో పేర్కొన్నారు.
  


 వాళ్లంతా పొట్ట చేతపట్టుకుని బతుకుబండి ఈడ్చుకుంటూ ఎక్కడెక్కడినుంచో వచ్చారు. నిత్యం మురుగుతో సహవాసం చేస్తూ చీకట్లోనే మగ్గిపోతుంటారు. ఉదయం కూలికి పోతే పొద్దుగూకాకే ఇల్లు చేరేది. రైలుబళ్ల రణగొణ ధ్వనులు, ముక్కుపుటాలదరగొట్టే దుర్వాసనలు అలసిసొలసిన   ఆ  ప్రాణాలకు అస్సలు తెలీవు. జీవితం సజావుగా సాగిపోతోందనుకుంటున్న తరుణంలో ఆ బడుగులపై ‘అగ్గి’ పిడుగు పడింది. కష్టపడి సంపాదించిన నగదు, వస్తువులు సర్వం భస్మీపటలం కావడంతో కట్టుబట్టలతో మిగిలారు. కళ్లముందే ఇళ్లు కాలి పోతుంటే  దిక్కెవరు దేవుడా అని గుండెలవిసేలా రోదించారు. విజయవాడ రాజీవ్‌గాంధీ పార్క్   సమీపంలో బుధవారం జరిగిన ఘోర అగ్ని ప్రమాదం ఎన్నో కుటుంబాలను రోడ్డున పడేసింది.   - విజయవాడ సెంట్రల్
  
 బాధితులకు పునరావాసం కల్పిస్తాం - కలెక్టర్ బాబు.ఏ
 విజయవాడ : నగరంలో బుధవారం జరిగిన అగ్నిప్రమాద సంఘటనలో నష్టపోయినవారందరిని ఆదుకుంటామని కలెక్టర్ బాబు.ఏ ఓ ప్రకటనలో తెలిపారు. ప్రభుత్వం నుంచి సహాయ పునరావాస కార్యక్రమాలను చేపట్టామన్నారు. సంఘటన జరిగిన వెంటనే తమ సిబ్బంది హుటాహుటిన ఆ ప్రదేశానికి వెళ్లి సహాయక చర్యలను స్వయంగా పర్యవేక్షించారని తెలి పారు. ఈ ప్రమాదంలో గాయాలకు గురైన వారిని వెంటనే ఆస్పత్రులకు తరలించి వైద్యసహాయం అందించామన్నారు. అగ్ని ప్రమాద కుటుంబాలను పునరావాస కేంద్రాలకు తరలించినట్లు కలెక్టర్ పేర్కొన్నారు. వారికి భోజన వసతి, తాగునీరు కల్పిస్తున్నామన్నారు. నష్టపోయిన కుటుంబాలను గుర్తించి వారికి ప్రభుత్వం అన్ని విధాల ఆదుకుంటుందని ఆయన చెప్పారు. గతంలో ఇదే ప్రాంతంలో పలుమార్లు అగ్నిప్రమాదం జరిగినట్లు తన దృష్టికి వచ్చిందని, ఇకపై ఇటువంటి సంఘటనలు జరగకుండా ఈ ప్రాంతంలో నివసిస్తున్న నిరుపేదలకు పునరావాసం కల్పిస్తామని కలెక్టర్ హామీ ఇచ్చారు. కలెక్టర్ వెంట విజయవాడ సబ్‌కలెక్టర్ డాక్టర్ జి.సృజన, మున్సిపల్ కమిషనర్ జి.వీరపాండియన్, అర్బన్ తహశీల్దార్, ఆర్.శివరావు తదితరులు ఉన్నారు.
  
 ఫైరింజన్ల రాకలో జాప్యం!
 విజయువాడ సిటీ: అగ్నిమాపక వాహనాల రాకలో జాప్యమే ఎక్కువ పూరిళ్లు దగ్ధం కావడానికి కారణమనే విమర్శలు వినబడుతున్నాయి. ఉదయం 11.30 గంటలకు ప్రమాదం జరి గిన వెంటనే నగరపాలక సంస్థ అధికారులు అక్కడికి చేరుకొని అగ్నిమాపక శాఖ అధికారులకు సమాచారం ఇచ్చారు. కంట్రోల్ రూమ్ అగ్నిమాపక శకటం ముఖ్యమంత్రి క్యాంపు కార్యాలయంలో ఉంది. అజిత్‌సింగ్‌నగర్ అగ్నిమాపక యంత్రాన్ని రప్పించారు. దీని రాకలో జాప్యం జరిగిందని అక్కడి వారు ఆరోపిస్తున్నారు. ఒకే వాహనం రావడంతో మంటలు ఆర్పడం సాధ్యం కాక మరో వాహనం రప్పించారు. కలెక్టర్ అక్కడికి చేరుకొని పరిస్థితిని సమీక్షించారు. అగ్నిమాపక వాహనాల కొరతను దృష్టిలో ఉంచుకొని సీఎం క్యాంపు కార్యాలయంలోని వాహనం కూడా రప్పించాలంటూ ఆదేశించారు. అప్పటికే భారీ ఆస్తి నష్టం సంభవించింది. ఈ పరిస్థితికి అగ్నిమాపక శాఖ ఉన్నతాధికారులు అందుబాటులో లేకపోవడమే కారణమని చెబుతున్నారు. జగ్గయ్యపేటలో నూతన అగ్నిమాపక కేంద్రం ప్రారంభోత్సవానికి జిల్లా అగ్నిమాపక అధికారి డి.నిరంజన్‌రెడ్డి సహా కొందరు అధికారులు వెళ్లారు. సమన్వయ సమస్యఎదురై వాహనాల రాకలో జాప్యం జరిగిందని అధికారులు చెబుతున్నారు.  మధ్యాహ్నానికి  నిరంజన్‌రెడ్డి ఘటనాస్థలికి చేరుకొని పరిస్థితిని సమీక్షించారు.
  


 పాముల బెడదతో చేవెళ్ల పైర్‌స్టేషన్ సిబ్బంది భయపడిపోతున్నారు. మండల కేంద్రంలోని ఎంపీడీఓ క్వార్టర్స్‌లో ఉన్న పైర్‌స్టేషన్‌కు పాముల బెడద పట్టుకుంది. గత వారం రోజుల నుంచి ఫైర్ సిబ్బంది ఐదు పాములను చంపారు.  స్వంత భవనంలో లేకపోవటంతో తాత్కాలికంగా ఎంపీడీఓ క్వార్టర్స్‌లో ఫైర్‌స్టేషన్ కొనసాగుతోంది. ఈ క్వార్టర్స్ శిధిల భవనాలతో నిండి ఉండటంతో నిత్యం పాములు స్టేషన్ పరిసరాల్లో తిరుగుతున్నాయి.  స్వంత భవనం త్వరగా ఏర్పాటు చేస్తే ఈ ఇబ్బందులు తప్పుతాయని, లేదంటే స్టేషన్ పరిసరాలను శుభ్రం చేయాలని కోరుతున్నారు.
  


  అనంతపురం అర్బన్ : గురువారం ఉదయం 11:30 గంటలు... ఒక్క సారిగా కలెక్టర్ కార్యాలయంలో కలకలం. కలెక్టర్ చాంబర్ నుంచి నల్లటిపొగలు దట్టంగా వస్తున్నాయి. సిబ్బందిలో ఆందోళన... ఏమి జరిగిందో అర్థం కాలేదు. చాంబర్ వద్దకు వెళ్లలేనంతగా లోపలి నుంచి పొగలు వెలువడుతున్నాయి. ఏఓ శివరామకృష్ణ అప్రమత్తయ్యారు. చాంబర్‌లో షార్ట్ సర్క్యూట్ జరిగినట్లు గుర్తించి అగ్నిమాపక శాఖకు సమాచారం ఇచ్చారు.. ఐదు నిమిషాల వ్యవధిలో ఆ శాఖ అధికారులు, సిబ్బంది అక్కడికి చేరుకుని మంటలు ఆర్పివేసి, పరిస్థితిని అదుపులోకి తెచ్చారు.
 
  చాంబర్‌లోని ఏసీ మిషన్ షార్ట్ సర్క్యూట్‌తో కాలిపోయింది. దాని పక్కనే ఉన్న ప్రధాన తలుపు కొంత కాలింది. సకాలంలో అగ్నిమాపక శాఖ అసిస్టెంట్ డిస్ట్రిక్ట్ ఫైర్ అధికారి శ్రీధర్, స్టేషన్ ఫైర్ అధికారి లింగమయ్య, తమ సిబ్బందితో అక్కడికి చేరుకున్నారు. అప్పటికే చాంబర్ మొత్తం పొగ చూరింది. దట్టంగా వెలువడుతున్న పొగలోంచి వెళ్లి కలెక్టర్ చాంబర్ తలుపులు పగులకొట్టారు. పొగ బయటికి వెళ్లేందుకు వీలుగా చాంబర్ వెలుపల వెంటిలేటర్లకు ఉన్న అద్దాలను పగులగొట్టారు.  
 
  పరిస్థితి సమీక్షించిన డీఆర్‌ఓ
  సమాచారం అందుకున్న డీఆర్‌ఓ హేమసాగర్ అక్కడికి చేరుకుని పరిస్థితిని సమీక్షించారు. ఏఓ శివరామకృష్ణ ద్వారా ఘటనకు సంబంధించి నివేదిక సిద్ధం చేయించారు. ఈ సందర్భంగా డీఆర్‌ఓ మాట్లాడుతూ ఏసీ మిషన్ వద్ద షార్ట్ సర్క్యూట్ జరగడంతో ప్రమాదం చోటు చేసుకుందన్నారు. ఇతర సామగ్రికి ఎలాంటి నష్టం వాటిల్లలేదన్నారు. ఏసీ మిషన్ కాలడంతో వెలువడిన పొగల కారణంగా చాంబర్‌లో కుర్చీలు, గోడలు పొగచూరినట్లు తెలిపారు.


 - ఆర్మూర్‌లో అపార్ట్‌మెంట్ల జోరు
 - నిబంధనలు తుంగలో తొక్కి నిర్మాణాలు
 - అగ్నిమాపక శాఖ అనుమతులకు మంగళం
 - పట్టించుకోని అధికారగణం, షోకాజ్‌లతో సరి..
 - అక్రమాల బాగోతం వెనుక భారీ మంత్రాంగం
 సాక్షి ప్రతినిధి, నిజామాబాద్ : ఆర్మూర్‌లో అక్రమ బహుళ అంతస్థుల (అపార్ట్‌మెంట్ల్) నిర్మాణాలు కొనసాగుతున్నాయి. నిబంధనలను ఏ మాత్రం లెక్కచేయకుండా ఈ నిర్మాణాలు జోరుగా కొనసాగుతున్నాయి. కొందరు నిర్మాణదారులు అధికారులను సైతం బుట్టలో వేసుకొని ఇష్టారాజ్యంగా వ్యవహరిస్తున్నారు. రియల్ ఎస్టేట్ వ్యాపారులు సైతం ఈ నిర్మాణాల జోరు పెంచారు. రోజు రోజుకు విస్తరిస్తున్న ఆర్మూర్ పట్టణంలో అక్రమ నిర్మాణాలకు అంతులేకుండా పోతోంది. సెట్‌బ్యాక్‌లు వదలకుండా.. కనీసం అగ్నిమాపకశాఖ అనుమతులు సైతం లేకుండా నిర్మిస్తున్నారు. నివాస గృహాల పేరిట అనుమతి పొంది ఏకంగా వ్యాపార సముదాయాలను కట్టేస్తున్నారు.
 
 ఆర్మూరు ఆర్‌అండ్‌బీ గెస్ట్‌హౌస్  ఎదురుగా మంతని బ్లాక్ పేరిట నివాసగృహాల సముదాయూనికి అనుమతి పొంది ఏకంగా 150 మడిగెల వాణిజ్య సముదాయాన్ని నిర్మించారు. ఈ వ్యవహారంలో మధ్యవర్తిత్వం వహించిన ఓ మాజీ కార్పొరేటర్‌కు 10 శాతం వాటా ఇవ్వడం అప్పట్లో ఆర్మూరులో చర్చనీయాంశమైయింది. మామిడిపల్లి చౌరస్తా దగ్గర నీటి పారుదలశాఖ స్థలాన్ని కొంత ఆక్రమించి షాపింగ్ కాంప్లెక్స్‌తో కూడిన ఓ అపార్టుమెంట్ నిర్మించడం ఇప్పటికీ వివాదాస్పదంగానే ఉంది. ఇంత జరుగుతున్నా... ఇటు మున్సిపల్, అటు పంచాయతీ అధికారుల పనితీరు నామమాత్రంగా ఉండటంపై విమర్శలు వెల్లువెత్తుతున్నాయి.
  
 ఇదీ పరిస్థితి...
 ఆర్మూర్ పట్టణంలోని అక్రమ నిర్మాణాల జోరు ఆందోళనకరంగా ఉంది. నిబంధనలను పట్టించుకోకుండా నిర్మాణాలు చేపట్టడం, భవిష్యత్తు జాగ్రత్తలపై కూడా కనీసం ముందుచూపు లేకపోవడం ఆందోళన కలిగిస్తోంది. నిబంధనలు ఉల్లంఘించిన వారిపై అధికారులు నోటీసులతో సరిపుచ్చారు తప్ప చర్యలేమీ లేవు. ఆర్మూర్ పట్టణంలో మొదలైన ఈ సంస్కృతి పక్కనే ఉన్న  పెర్కిట్ గ్రామ పంచాయతీకి కూడా విస్తరించింది. పెర్కిట్ పరిధిలో నివాస గృహాల నిర్మాణాలు వేగంగా పెరుగుతున్నాయి.
 
 అలాగే ఆపార్ట్‌మెంట్లు సైతం నిర్మిస్తున్నారు. ఇక్కడ ఎనిమిది అపార్ట్‌మెంట్లు ఉన్నాయి. ఇందులో ఏ ఒక్కటీ  నిబంధనలకు అనుగుణంగా లేవు. ఈ గ్రామ పంచాయతీ పరిధిలో జీ ప్లస్-2కు మాత్రమే అనుమతి ఉంది. కానీ ఇక్కడ 5, 6 అంతస్తుల వరకు నిర్మాణాలు కొనసాగుతున్నాయి. ఇందులో మూడవ అంతస్తు పైబడి ఏ ఒక్క అపార్ట్‌మెంట్‌కూ అనుమతి లేదు. అపార్టమెంట్ కింద సెల్లార్లకు బదులు  కొన్నింటిలో దుకాణాలను ఏర్పాటు చేశారు. అంతేకాక ప్రతి అపార్ట్‌మెంట్‌కు సెల్లార్ పక్కన ప్రత్యేకంగా స్థలం వదిలిపెట్టారు. కానీ ఎక్కడా నిబంధనలు పాటించడం లేదు. నిర్మాణాల జోరు పెంచేసి విక్రయాలు కూడా చేపట్టారు.
  
 ముడుపుల బాగోతం...
 అపార్టుమెంట్ల అక్రమ నిర్మాణం వెనుక ముడుపుల బాగోతం కొనసాగుతోందనే ఆరోపణలు వస్తున్నారుు. ఒక అపార్ట్‌మెంట్ నిర్మాణం వెనుక సంబంధిత అనుమతిదారులకు నిర్మాణదారులు ఒక ఫ్లాట్‌ను నజరానాగా ఇస్తున్నారనే ప్రచారం కూడా ఉంది. ఇంత జరుగుతున్నా అధికారులు చూసీ చూడనట్లుగా వ్యహరించడంలో పరమార్థం ఇదే అంటున్నారు. దీంతో అపార్ట్‌మెంట్లు ఇష్టారాజ్యంగా నిర్మిస్తున్నా పట్టించుకునే వారే కరువయ్యారు. స్థానికులు, మరికొందరు అక్రమ నిర్మాణాలపై గ్రామ పంచాయతీకి పలుమార్లు ఫిర్యాదు చేసినా.. స్పందించిన దాఖలాలు లేవు. ముడుపులు అందుకొని అక్రమ నిర్మాణాల వైపు చూడటం లేదన్న విమర్శలు వెల్లువెత్తుతున్నాయి.
 
 కొందరు అధికారులకు ఈ అక్రమ నిర్మాణాలు వరంగా మారాయి. కింది స్థాయి నుంచి ఉన్నతాధికారుల వరకు ముడుపులు ముట్టచెపుతున్నామని రియల్‌ఎస్టేట్ వ్యాపారులే ఖర్చుల ఖాతాలో చూపుతున్నారు. ఎవరైనా ఫిర్యాదు చేయడానికి వస్తే వారి చిరునామాను అక్రమ నిర్మాణదారులకు చేరవేసి.. ఫిర్యాదు వెనక్కి తీసుకొనేలా అధికారులే చేయడం గమనార్హం. వేల్పూరు రోడ్డులో చేపట్టిన రెండు అపార్టుమెంట్ల నిర్మాణాలు నిబంధనలకు విరుద్ధమని నోటీసులు ఇచ్చిన అధికారులు ఆ తర్వాత చేతులు దులుపుకున్నారు. దీనిపై స్థానికంగా కొందరు గ్రామ పంచాయతీకి ఫిర్యాదు చేయగా,  వారినే అధికారులు నిర్మాణదారులతో బెదిరించినట్లు ఆరోపణలు ఉన్నాయి.  అధికారులు అక్రమ నిర్మాణాలపై కఠిన చర్యలు తీసుకోవాలని స్థానికులు డి మాండ్ చేస్తున్నారు. నిబంధనల ప్రకారం ని ర్మించాలని, లేదంటే భవిష్యత్తులో ఇబ్బందు లు తప్పవని ఆందోళన వ్యక్తం చేస్తున్నారు.


 ఎస్‌ఆర్ నగర్ ఎస్‌బీఐలో ఘటన
 హైదరాబాద్: ఎస్‌ఆర్ నగర్ ఎస్‌బీఐ కస్టమర్ వెయిటింగ్ హాల్‌లో ఆదివారం అర్ధరాత్రి అగ్ని ప్రమాదం సంభవించింది. బ్యాంక్ నుంచి భారీగా పొగలు రావడంతో పరిసర ప్రాంతాల్లోని ప్రజలు పోలీసులు, అగ్నిమాపక సిబ్బందికి సమాచారం అందించారు. అక్కడికి చేరుకున్న సిబ్బంది మంటలను అదుపులోకి తీసుకువచ్చారు. రాత్రి 11.30 గంటల ప్రాంతంలో ఎస్‌బీఐ నుంచి పొగలు రావడాన్ని గుర్తించిన స్థానికులు పోలీసులకు సమాచారం ఇచ్చారు. మూడు ఫైరింజన్లు రంగంలోకి దిగి మంటలను అదుపులోకి తీసుకువచ్చాయి.
 
 వెంటనే అప్రమత్తం కావడంతో భారీ నష్టం తప్పింది. సంఘటనా స్థలాన్ని డీఐజీ మురళీ కృష్ణ, ఏసీపీ వెంకటేశ్వర్లు సందర్శించారు. ప్రమాదానికి గల కారణాలు, ఆస్తినష్టం వివరాలు ఇప్పుడే చెప్పలేమని వారు తెలిపారు.


 ♦ అగ్నికి ఆహుతైన మరమ్మతులో ఉన్న టాన్స్‌ఫార్మర్స్
 ♦ వాటితోపాటు ఆయిల్ డ్రమ్ములు
 ♦ తృటిలో తప్పిన ప్రాణాపాయం
 ♦ రూ.10 లక్షల మేర నష్టం
 ♦ {పమాద స్థలానికి చేరుకున్న విద్యుత్ శాఖ ఎస్‌ఈ జయకుమార్
  
  ఒంగోలు క్రైం : ఒంగోలు నగరంలోని కర్నూలు రోడ్డులో ఉన్న పవర్ ఆఫీసులో బుధవారం రాత్రి మంటలు చెలరేగాయి. పనులు ముగించుకొని సిబ్బంది 6.30 గంటలకల్లా ఉద్యోగులు బయటకొచ్చిన కొంత సేపటికే ట్రాన్స్‌ఫార్మర్స్ మరమ్మతు విభాగంలో ఒక్క సారిగా మంటలు ఎగిసిపడ్డాయి. ఆయిల్ ఫిల్టర్ నుంచి మంటలు చెలరేగాయి. ఇది గమనించిన వాచ్‌మెన్ వెంటనే అక్కడున్న విద్యుత్ అధికారులకు, ఒంగోలు అగ్నిమాపక శాఖ అధికారులకు సమాచారం అందించారు. అప్పటికే మరమ్మతుకు సిద్ధంగా ఉన్న మూడు ట్రాన్స్‌ఫార్మర్లకు అంటుకున్నాయి.
 
 వాటితోపాటు ఐదు ఆయిల్ డ్రమ్ములకు కూడా మంటలు వ్యాపించాయి. ఈలోగా అగ్నిమాపక శాఖకు చెందిన రెండు ఫైర్ ఇంజన్లు వచ్చి మంటలను అదుపు చేశాయి. లేకుంటే పెను ప్రమాదమే సంభవించేది. ఎందుకంటే చుట్టూ మరమ్మతు చేసిన ట్రాన్స్‌ఫార్మర్లు కూడా ఉన్నాయి. మరోవైపు ట్రాన్స్‌ఫార్మర్ల స్క్రాప్ కూడా ఉంది. ప్రస్తుతం జరిగిన అగ్ని ప్రమాదంతో రూ.10 లక్షల మేర నష్టం వాటిల్లింది. విద్యుత్ శాఖ ఎస్‌ఈ  ఎ.జయకుమార్ హుటాహుటిన ప్రమాద స్థలానికి చేరుకున్నారు. నష్టం ఏవిధంగా జరిగిందీ సిబ్బందిని అడిగి తెలుసుకున్నారు.


 రాజమండ్రి క్రైం : పుష్కరాలకు అగ్నిమాపక శాఖ సిద్ధమైంది. జిల్లాలో 172 ఘాట్లలో 700 మంది సిబ్బందిని రక్షణ చర్యలకు వినియోగించనున్నారు. ఘాట్లను ఏ, బీ, సీ జోన్లుగా విభజించి రక్షణ ఏర్పాట్లు చేస్తున్నారు. ఏ ఘాట్లలో బోట్లు, పంపు క్లీనింగ్, లైఫ్ బాయ్స్ లైఫ్ జాకెట్లతో సిద్ధంగా ఉంటారు. బీ కేటగిరి ఘాట్లలో పంపు క్లీనింగ్, లైఫ్ బాయ్స్ లైఫ్ జాకెట్లతో విధులు నిర్వహిస్తారు. సీ కేటగిరి ఘాట్లలో లైఫ్ జాకెట్లతో లైఫ్‌బాయ్స్ విధులు నిర్వహిస్తారు. వీటితోపాటు ఎనిమిది అగ్నిమాపక శకటాలు, మరో ఎనిమిది మిస్ట్ జీపులు అత్యవసర పరిస్థితులలో సేవలు అందించేందుకు సిద్ధంగా ఉంటాయి.
  
  బోట్లతో ఘాట్లులో నిఘా
  జిల్లా వ్యాప్తంగా ఏ కేటగిరి ఘాట్లలో బోట్లతో నిఘా ఏర్పాటు చేస్తున్నారు. మత్స్యశాఖ సమన్వయంతో అగ్నిమాపక సిబ్బంది ఏ కేటగిరి ఘాట్లు అయిన కోటిలింగాలు, పుష్కర, సరస్వతి, ధవళేశ్వరంలోని వీఐపీ, రామపాదాల ఘాట్లలో రోప్స్, పంప్స్, బోట్లు, అగ్నిమాపక శకటాలతో సేవలు అందిస్తారు. ఈ నెల 12 నుంచి అగ్నిమాపక సిబ్బంది విధులలో చేరేందుకు సిద్ధంగా ఉన్నారు.  
  
  2 షిఫ్టులలో సిబ్బంది సేవలు
  రోజూ రెండు షిఫ్టులుగా సిబ్బంది సేవలు అందిస్తారు. ప్రతి 100 మీటర్లకు ఒకరు ఉండేలా చర్యలు చేపట్టారు.  నదిలో బోట్లలో ఉంటూ సేవలు అందించడంతోపాటు ఘాట్లలో సంచరిస్తూ భక్తులకు సేవలందిస్తారు.  ఏ కేటగిరి ఘాట్‌లో 50 మంది సిబ్బందిని, బీ కేటగిరి ఘాట్‌లో 10 మందిని, సీ కేటగిరి ఘాట్‌లో ఇద్దరిని నియమించారు.  
  


 ఆళ్లగడ్డటౌన్ : పట్టణ శివారులోని ఎంవీనగర్ సమీపంలోని జాతీయ రహదారిపై మంగళవారం భారీ గ్యాస్ ట్యాంకర్ బోల్తా పడిన ఘటనతో స్థానికులు, అధికారులు, పోలీసులు భయంభయంగా గడిపారు. భారత్ గ్యాస్ కంపెనీ ట్యాంకర్ దాదాపు 18 టన్నుల గ్యాస్ నింపుకుని చెన్నై నుంచి కర్నూలు వైపు వెళ్తూ బోల్తా పడింది. ఇంజిన్ రోడ్డుకు15 అడుగుల దూరం వరకు దూసుకుపోయింది. ట్యాంకర్ రోడ్డుపై పల్టీలు కొట్టింది. అయితే అదృష్ట వశాత్తు గ్యాస్ లీక్ కాకపోవడంతో పెనుప్రమాదం తప్పింది. రూరల్ పోలీస్ స్టేషన్, అగ్నిమాపక శాఖ కార్యాలయం, మండల పరిషత్, వ్యవసాయ, విద్య త దితర అనేక శాఖల కార్యాలయాలు ప్రమాదం జరిగిన స్థలానికి కూత వేటు దూరంలో ఉండడంతో ఎప్పుడు ఏంజరుగుతుందోనన్న ఆందోళనతో గడపాల్సి వచ్చింది.
 
  కాలనీని ఖాళీ చేసిన ప్రజలు
  ప్రమాదం జరిగిన వెంటనే ఏఎస్పీ శశికుమార్, సీఐ ఓబులేసు, ఎస్‌ఐలు శ్రీనివాసులు, చంద్రశేఖర్‌రెడ్డి ఘటనాస్థలానికి చేరుకుని పరిశీలించారు. అగ్నిమాపక శా ఖ వాహనాన్ని రప్పించారు. ఎంవీనగర్ కాలనీ వాసులు జాగ్రత్తగా ఉండాలని, వీలైతే ట్యాంకరును అక్కడి నుంచి తరలించే వరకు ఇళ్లు ఖాళీ చేసి వెళ్లాలని పో లీసులు సూచించడంతో స్థానికులు మొ త్తం ఇతర ప్రాంతాలకు వెళ్లిపోయారు.
 
  పోలీసులు అక్కడే మకాం..
  ట్యాంకర్ బోల్తా ఘటన కారణంగా జాతీయ రహదారిపై వాహనాలు తిరక్కుండా దారి మళ్లించిన పోలీసులు అక్కడే ఉండి పరిస్థితిని సమీక్షించారు. ఉదయం ప్రమాదం జరిగినప్పటి నుంచి పోలీస్ బందోబస్తుతో రాత్రంతా అక్కడే మకాం వేశారు. ట్యాంకర్‌ను తరలించేందుకు మరో రోజు పడుతుందని సమాచారం.
 
  సరిపడా పరికరాలు లేవు :  శ్రీనివాసులు, ఎస్‌ఐ
  బోల్తా పడిన ట్యాంక ర్ బరువుకు తగ్గ క్రేన్‌లు ఆళ్లగడ్డ పరిశర ప్రాంతాల్లో లేవు. కర్నూలు నుంచి రెండు క్రేన్‌లను తెప్పిస్తున్నాం.  చీకట్లో పనులు జరక్కపోవచ్చు. బుధవారం ఉదయానికంతా ట్యాంకర్‌ను పక్కకు తరలించేందుకు చర్యలు తీసుకుంటాం.


 - గంటపాటు ఉత్కంఠ
 - మద్యం మత్తులో కొండ శిఖరానికి చేరుకున్న యువకుడు
 - ఆత్మహత్య చేసుకుంటానని బెదిరింపు
 - చాకచక్యంగా కిందకు దింపిన ఫైర్ సిబ్బంది
 ఇంద్రకీలాద్రి: మద్యం మత్తులో ఉన్న ఓ యువకుడు ఇంద్రకీలాద్రి ఘాట్‌రోడ్డుపై గురువారం బీభత్సం సృష్టించాడు. అమ్మవారి దర్శనం చేసుకునేందుకు తనను అనుమతించలేదంటూ ఘాట్‌రోడ్డులోని మొదటి మలుపు వద్ద కొండ శిఖరానికి ఎక్కి దూకేస్తానంటూ బెదిరించాడు. అగ్నిమాపక శాఖ సిబ్బంది హుటాహుటిన ఘటనాస్థలానికి చేరుకుని కిందకు దింపడంతో పరిస్థితి సద్దుమణిగింది. వివరాల్లోకి వెళితే.. విజయనగరం జిల్లా పార్వతీపురానికి సమీపంలోని కొమ్మరాడకు చెందిన అంపిరి గౌరీశంకర్ (26) గురువారం దుర్గమ్మ దర్శనానికి వచ్చాడు. మద్యం మత్తులో ఉన్న గౌరీశంకర్‌ను సెక్యూరిటీ సిబ్బంది క్యూలైన్‌లోకి అనుమతించలేదు.
 
 దీంతో గౌరీశంకర్ ఘాట్‌రోడ్డులోని మొదటి మలుపు వద్ద నుంచి కొండ శిఖరానికి చేరుకున్నాడు. అక్కడి నుంచి కేకలు వేయడంతో భక్తులు గమనించి ఆలయ ప్రాంగణంలోని పోలీస్ అవుట్‌పోస్ట్ సిబ్బందికి సమాచారం ఇచ్చారు. విషయం తెలుసుకున్న అగ్నిమాపకశాఖ అధికారి బి.శ్రీనివాసరావు నేతృత్వంలోని సిబ్బంది వి.శివనాగిరెడ్డి, వి.శ్రీనివాసరావు, పి.శివకృష్ణ కొండ ఎక్కి గౌరీశంకర్‌కు కిందకు దింపే ప్రయత్నం చేశారు. ఇది గమనించిన గౌరీశంకర్ తాను ఆత్మహత్య చేసుకుంటానని బెదిరింపులకు దిగగా, బుజ్జగించి కిందకు దింపారు. అయితే, గౌరీశంకర్ మానసిక స్థితి సరిగ్గా లేదని పోలీసులు అనుమానిస్తున్నారు. అతడిని వన్‌టౌన్ పోలీసులు అదుపులోకి తీసుకున్నారు.


 - బావిలో పడిన వ్యక్తిని రక్షించిన ఫైర్ సిబ్బంది
 - ఆందోళనకరంగా బాధితుడి ఆరోగ్యం
 సాక్షి, తిరుమల: తిరుమలలో శనివారం ఫైర్ విభాగం రెస్క్యూ ఆపరేషన్ విజయవంతంగా నిర్వహించింది. బావిలో పడిన సామగ్రి పైకి ఎత్తేందుకు వెళ్లి పైకిరాక జారిపడిన వ్యక్తిని ప్రాణాలతో రక్షించారు. ఆలయ ఉత్తరమాడ వీధిలో అహోబిలం మఠం  లక్ష్మీనారాయణ స్వామి ఆలయంలో 120 అడుగుల బావి ఉంది. అందులో పడేసిన వస్తు సామగ్రి కోసం సికింద్రాబాద్‌కు చెందిన భవన నిర్మాణ కార్మికుడు శంకర్ (32) తాడు, నిచ్చెన సాయంతో దిగాడు. సామగ్రిని పైకి చేర్చాడు. తిరిగి పైకి వస్తూ జారి బావిలో పడి తీవ్రంగా గాయపడ్డాడు. సమాచారంతో ఫైర్ సిబ్బంది రాజా, శేఖర్ సంఘటన స్థలికి చేరుకుని బావిలోకి దిగారు. అపస్మారక స్థితిలో పడి ఉన్న శంకర్‌ను పైకి తీసుకొచ్చారు. శంకర్ పరిస్థితి ఆందోళనకరంగా ఉంది. వెంటనే అశ్వినీ ఆస్పత్రికి తరలించి వైద్యం చేయించారు. అనంతరం రుయా ఆస్పత్రికి తరలించారు.


 అగ్నిమాపకశాఖ వెబ్‌సైట్ ఆవిష్కరణలో హోంమంత్రి నాయిని
 
 హైదరాబాద్: ఉస్మానియా విశ్వవిద్యాలయం భూములు ఎవడబ్బ సొత్తు కాదని, ఆ భూములను ఎవరూ తీసుకోబోరని హోంమంత్రి నాయిని నర్సింహారెడ్డి వ్యాఖ్యానించారు. తామంటే గిట్టనివారు చేస్తున్న ఆరోపణల్లో విద్యార్థులు చిక్కుకోవద్దని ఆయన సూచించారు.  ఓయూ పక్కనే ఆ యూనివర్సిటీకి చెందిన భూముల్లో కొందరు పెద్ద పెద్ద కాంప్లెక్స్‌లు కట్టి వ్యాపారాలు చేస్తుంటే వాటిపై విద్యార్థులు ఎందుకు మాట్లాడడం లేదని ఆయన ప్రశ్నించారు. 
 
 శనివారం అగ్నిమాపకశాఖకు సంబంధించిన http://fire.telangana.gov.in వెబ్‌సైట్‌ను నాయిని ఆవిష్కరించారు. అనంతరం మాట్లాడుతూ ఈ వెబ్‌సైట్ ప్రజలకు బాగా ఉపయోగపడుతుందన్నారు.  ఈ వెబ్‌సైట్‌లో ఫైర్ స్టేషన్లు ఎక్కడెక్కడ ఉన్నాయి, అధికారుల ఫోన్ నంబర్లతో సహా అన్ని వివరాలు ఉన్నాయన్నారు. అనంతరం సచివాలయంలో అగ్నిమాపక సిబ్బంది నిర్వహించిన మాక్ డ్రిల్ ఆకట్టుకుంది.  
  
  


 పోరుమామిళ్ల : తగలబడిపోయిన ఆటోకు సంబంధించి సర్టిఫికెట్ ఇవ్వడానికి లంచం తీసుకుంటూ పోరుమామిళ్ల అగ్నిమాపక శాఖ అధికారి నారాయణ ఏసీబీకి దొరికిపోయారు. తిరుపతి రేంజి ఏసీబీ డీఎస్పీ శంకరరెడ్డి కథనం మేరకు.. చింతకొమ్మదిన్నెకు చెందిన వి.నరసింహులు జనవరి 18న బ్రహ్మంగారి మఠం నుండి పోరుమామిళ్లకు మాక్స్ క్యాబ్ ఆటోలో ప్రయాణికులను తీసుకెళుతుండగా అమగంపల్లెకు సమీపంలో షార్ట్‌సర్క్యూట్ కారణంగా ఆటో తగలబడిపోయింది.
 
 స్థానికుల సమాచారం మేరకు పోరుమామిళ్ల ఫైర్ ఇంజన్ అక్కడకు వెళ్లి మంటలు ఆర్పింది. షార్ట్ సర్క్యూట్‌తో ఆటో తగలబడినట్లు సర్టిపికెట్ ఇవ్వాల్సిందిగా ఆటో యజమాని నరసింహులు ఫైర్ ఆఫీసర్ నారాయణను కోరాడు. సర్టిఫికెట్ ఇచ్చేందుకు ఆయన రూ.10 వేలు డిమాండ్ చేశాడు. తాను అంత డబ్బు ఇచ్చుకోలేనని ఎంతగా చెప్పుకున్నా ఫలితం లేకపోయింది. జనవరి నుంచి మే నెల వరకు ఫైర్ ఆఫీసర్ చుట్టూ తిరిగినా డబ్బు ఇవ్వందే సర్టిఫికెట్ ఇవ్వనని తేల్చి చెప్పడంతో రూ.8 వేలు ఇచ్చేందుకు అంగీకారం కుదిరింది.
 
 నరసింహులు నేరుగా ఏసీబీ అధికారులను కలిసి వారి సూచన మేరకు బుధవారం రాత్రి పోరుమామిళ్ల ఫైర్ ఆఫీసులో ఫైర్ ఆఫీసర్ నారాయణకు రూ.8 వేలు అందజేశాడు. ఏసీబీ అధికారులు దాడి చేసి నారాయణను రెడ్ హ్యాండెడ్‌గా పట్టుకున్నారు. ఏసీబీ కడప ఇన్‌స్పెక్టర్లు పార్థసారథిరెడ్డి, శివశంకర్ నాయక్, తిరుపతి ఇన్‌స్పెక్టర్లు చంద్రశేఖర్, లక్ష్మికాంత్, సుధాకరరెడ్డి ఈ దాడిలో పాల్గొన్నారు. కాగా, అగ్నిమాపక శాఖలో అవినీతిపై ‘ఇచ్చుకుంటే ఓకే’ శీర్షికన బుధవారం ‘సాక్షి’లో కథనం ప్రచురితమైన నేపథ్యంలో ఓ అధికారి ఏసీబీకి దొరకడం గమనార్హం.


 ►  నిబంధనలకు అగ్నిమాపక శాఖ తిలోదకాలు
 ►  ముందు జాగ్రత్త చర్యలను నీరుగారుస్తున్న వైనం
 ►  నిబంధనల మేరకు భవనాలున్నా చేయి తడిపితేనే ఎన్‌ఓసీ
 ►  ఆమ్యామ్యాలకే ప్రాధాన్యత
  
  సాక్షి ప్రతినిధి, కడప : అక్రమార్జనకు కాదేదీ అనర్హం అన్నట్లుగా అగ్ని మాపక శాఖ వ్యవహరిస్తోంది. ప్రమాదాల నివారణకు ముందస్తు చర్యలు కట్టుదిట్టం చేయాల్సిందిపోయి నిబంధనలను నీరు గారుస్తోంది. నిబంధనల మేరకు భవనాలు నిర్మిస్తే ఒకరేటు, ఇష్టానుసారం కట్టుకుంటే మరో రేటు నిర్ణయించి ఎన్‌ఓసీలు జారీ చేస్తున్నారు. ఇదేమని ప్రశ్నిస్తే వేధింపులు సర్వసాధారణమయ్యాయి. పాఠశాలలు, ఆస్పత్రులు, కాంప్లెక్సు, భారీ భవంతుల నిర్మాణంలో మున్సిపల్ ఫ్లాన్ అప్రూవల్ తప్పనిసరి.
 
 దానితోపాటు అగ్నిమాపక శాఖ నో అబ్జక్షన్ సర్టిఫికేట్ (ఎన్‌ఓసీ) ఇవ్వాల్సి ఉంటుంది. అగ్ని ప్రమాదాలు చోటు చేసుకున్నప్పుడు తప్పించుకోడానికి వీలుగా నిర్మాణాలు ఉన్నాయని నిర్ధారించుకున్న తర్వాతే ఈ శాఖ ఎన్‌ఓసీ ఇవ్వాల్సి ఉంటుంది. అయితే మామూళ్లు మత్తులో ఈ శాఖ నిబంధనలను గాలికి వదిలేసింది. పెపైచ్చు నిబంధనల మేరకు నిర్మాణాలున్నా మామూళ్లు ఇవ్వందే ఎన్‌ఓసీలు జారీ కావడం లేదు. డబ్బు కోసం వేధిస్తూ కాలయాపన చేస్తున్నారనే ఆరోపణలు విన్పిస్తున్నాయి.  
 
  అవినీతి ఊబిలో యంత్రాంగం
  మున్సిపల్ ప్లాన్ అప్రూవల్ చెల్లింపులతో సంబంధం లేకుండా ఆరు అంతస్తుల నిర్మాణ భవనాలు చదరపు మీటరుకు రూ.10 చలానా చెల్లించి అగ్నిమాపక శాఖ అనుమతి పొందాల్సి ఉంది. అలాంటి భవనాల్లో ఐదు వేల లీటర్ల కెపాసిటీ కలిగిన ఓవర్ హెడ్ ట్యాంకు, 450 ఎల్పీఎం పంపు, హోస్ పైపు రీల్ ఏర్పాటు చేయాలి. పాఠశాలల్లో అయితే అటోమేటిక్ స్ప్రింక్లర్లు ఏర్పాటు తప్పనిసరి. 25 వేల లీటర్లు కెపాసిటీ కలిగిన ఫైర్ లెస్ ట్యాంకు, అందులో 900 లీటర్స్ ఫర్ మినిట్ పంపు ఉండాలి.
 
 ఇవన్నీ ఏర్పాటు చేస్తామని అంగీకరిస్తూ ముందుగా ప్రొవిజనల్ ఎన్‌ఓసీ తీసుకోవాలి. సైట్, ఫ్లోర్ వైజ్ ప్లాన్ ఇచ్చిన తర్వాత అన్నీ పరిశీలించి.. అగ్నిమాపక శాఖ సర్టిఫికెట్ జారీ చేయాల్సి ఉంటుంది. ఆ సర్టిఫికెట్ ప్రతి సంవత్సరం విధిగా రెన్యువల్ చేయించుకోవాలి. ఇవేమి పట్టించుకునే స్థితిలో అగ్ని మాపక శాఖ లేదు. అన్ని నిబంధనలు పాటించిన వారికి గౌరవంగా సర్టిఫికెట్ మంజూరు చేసిన దాఖలాలు కూడ లేవని తెలుస్తోంది.
 
 నిబంధనల మేరకు నిర్మాణాలున్నా భారీగా సొమ్ము ముట్టజెప్పితే తప్ప ఎన్‌ఓసీ దక్కడం లేదు. నిబంధనలకు విరుద్ధంగా భవనాలుంటే వారు అడిగినంత సమర్పించుకోక తప్పదనే ఆరోపణలు ఉన్నాయి. జిల్లా కేంద్రంలో అగ్నిమాపక శాఖ ఎన్‌ఓసీ జారీ చేసిన భవనాలల్లో 70 శాతం నిబంధనలకు విరుద్ధంగా నిర్మాణాలున్నట్లు తెలుస్తోంది.  
 
 నిబంధనల మేరకే అనుమతులు
  ‘పక్కాగా నిబంధనలున్న భవనాలకు మాత్రమే అనుమతులు ఇస్తున్నాం. నా దృష్టికి వచ్చిన వాటిలో పక్కాగా పరిశీలన చేశాకే సర్టిఫికెట్ ఇస్తున్నాం. ఇప్పటి వరకు ఒక్కటి మాత్రమే నిబంధనల మేరకు నిర్మించలేదని తిరస్కరణకు ప్రతిపాదనలు చేశామ’ని జిల్లా అగ్నిమాపక శాఖ అధికారి విజయ్‌కుమార్ ‘సాక్షి’కి వివరించారు. ప్రక్రియ కొనసాగేందుకు కొద్ది రోజులు పడుతుంది తప్ప ఉద్దేశ పూర్వకంగా ఆలస్యం చేయడం లేదని ఆయన తెలిపారు.


 హైదరాబాద్ సిటీ: రాష్ట్ర సచివాలయంలో అగ్నిమాపక సిబ్బంది గురువారం మాక్ డ్రిల్ నిర్వహించారు. అగ్నిప్రమాదం వంటి విపత్కర పరిస్థితుల్లో వెంటనే స్పందించి నష్టాన్ని వీలైనంత తగ్గించే దిశగా సాధన చేశారు. అగ్నిప్రమాదం సమయంలో సమయస్ఫూర్తిగా వ్యవహరించి తమను తాము ఎలా రక్షించుకోవాలనే దానిపై ఉద్యోగులకు అగ్నిమాపక సిబ్బంది తగు సూచనలు చేశారు. వేసవి కాలం కావడంతో అకస్మాత్తుగా సంభవించే అగ్నిప్రమాదాల నిర్వహణపై సిబ్బందిని సమాయత్తం చేసేందుకు మాక్‌డ్రిల్ నిర్వహించినట్టు అధికారులు తెలిపారు.


 ఆదివారం కావడంతో తప్పిన ముప్పు
  
 న్యూఢిల్లీ : దేశ రాజధాని నగరంలోని  కొరియర్ ఫ్యాక్టరీలో ఆదివారం భారీ అగ్నిప్రమాదం చోటు చేసుకుంది. దక్షిణ ఢిల్లీలోని ఓఖ్లా ఫేస్-2లో ఉదయం 8 గంటల సమయంలో ఈ సంఘటన జరిగింది. కాగా, ఆదివారం ఈ ఘటన జరగడంతో భారీ ప్రమాదం తప్పింది. ఈ సంఘటనలో ఎవరూ గాయపడలేదని ఢిల్లీ అగ్నిమాపక అధికారి ఎ.కె.శర్మ తెలిపారు. ‘ఉదయం 8:15 సమయంలో ఈ సంఘటన జరిగింది. ప్రమాద విషయం తెలియగానే 14 అగ్నిమాపక శకటాలను ఘటనాస్థలికి పంపించాం’ అని చెప్పారు.


 తన పవిత్రతను నిరూపించుకోవడానికి నాడు అగ్నిపరీక్షకు తల వంచింది సీతాదేవి. తమ సామర్థ్యాన్ని రుజువు చేసుకోవడానికి నేడు రోజూ అగ్నికి ఎదురెళ్తున్నారు జైపూర్ మహిళలు. మగవాళ్లు మాత్రమే చేయగలరు అనుకునే ఫైర్ ఫైటింగ్‌ని తామూ చేయగలమంటూ బరిలోకి దిగుతున్నారు. అందరినీ ఆశ్చర్యపరుస్తున్నారు!
 ఎక్కడ కాస్త నిప్పు ఎగసినా వెంటనే ఫైర్ స్టేషన్లో ఫోన్ మోగుతుంది.
 
 తక్షణం నలుగురైదుగురు పురుషులు ఫైరింజన్‌తో ప్రమాద స్థలానికి పరుగులు తీస్తారు. ఇది ఎన్నో యేళ్లుగా అందరూ చూస్తున్న దృశ్యం. రాజస్థాన్ రాజధాని జైపూర్‌లో ఉన్న ఓ స్టేషన్‌లో కూడా ఇలాంటి దృశ్యమే కనిపిస్తుంది. కానీ అక్కడ పురుషుల స్థానంలో మహిళలు ఉంటారు. కబురు అందిందే తడవుగా అగ్నితో చెలగాట మాడటానికి సమాయత్తమై వెళ్తారు.
  
 సాహసమే ఊపిరిగా...
 ఇటీవల రాజస్థాన్ ప్రభుత్వం 155 మంది ఫైర్ సిబ్బందిని నియమించుకుంది. అయితే వాళ్లందరూ మహిళ లే కావడం విశేషం. మహిళలకు పురుషులతో సమాన హక్కులు కల్పించి, వారికి జీననభృతిని ఏర్పరచాలనే ఉద్దేశంతో పాటు... తలచుకుంటే మహిళలు ఏ పని అయినా చేయగలరు అని నమ్మడం వల్లే వారిని ఈ ఉద్యోగాల్లోకి తీసుకున్నామని రాజస్థాన్ ప్రభుత్వం సగర్వంగా ప్రకటించింది. వారి నమ్మకం నిజమే అయ్యింది. ఫైర్ విభాగంలో నియమితులైన మహిళలంతా తమ సత్తా చాటుతున్నారు. ప్రాణాలకు తెగించి అగ్నిప్రమాదాలను అరికట్టేందుకు కృషి చేస్తున్నారు.
  
 నిజానికి ఫైర్ విభాగంలో పని చేయడం అంత తేలికేమీ కాదు. బరువైన పరికరాలను ఎత్తాల్సి ఉంటుంది. వాటిని పట్టుకుని పరుగులు తీయాల్సి ఉంటుంది. మంటల వేడిని తట్టుకుని పని చేయాల్సి ఉంటుంది. ఎవరైనా మంటల్లో చిక్కుకుపోతే, వారిని కాపాడేందుకు రిస్క్ తీసుకోవాల్సి వస్తుంది. ఆ క్రమంలో భవంతులు ఎక్కడం, ప్రమాదకర పరిస్థితుల్లో పైనుంచి దూకడం వంటి సాహసాలు కూడా చేయాల్సి వస్తుంది.
 
 ఇవన్నీ చేయాలంటే శరీరం దృఢంగా ఉండాలి. కానీ మహిళలేమో సున్నితత్వానికి ప్రతీకలాయె. అందుకే తొలుత విధులు కాస్త కష్టంగానే ఉండేవి అంటారు సునీత. ‘‘విధులేంటి... అసలు మా శిక్షణే చాలా కఠినంగా అనిపించేది. కొందరైతే ఆయాసపడిపోయేవారు. కష్టంగా ఫీలయ్యేవారు. వదిలేసి వెళ్లిపోదామనుకున్నవారూ ఉన్నారు. కానీ మా విధుల నిర్వహణకు అవసరమైన దృఢత్వాన్ని సంపాదించాలన్నా, మేమేంటో చూపించాలన్నా అలాంటివన్నీ అధిగమించక తప్పదు కదా’’ అంటారామె.
  
 నిజమే. అవరోధాలను అధిగమిస్తేనే అనుకున్నది సాధించేది. అలా అధిగమించారు కాబట్టే ఈ మహిళలందరి గురించీ ఈరోజు ప్రపంచం మాట్లాడుకుంటోంది. సీత, సునీత, మనోజ్, నిర్మా, నిర్మల తదితరులను చూసి శభాష్ అంటోంది. ‘‘మా మహిళా ఉద్యోగులంతా ఎంతో చక్కగా పని చేస్తున్నారు. నిజాయతీతో, నిబద్దతతో వ్యవహరిస్తారు. పెద్ద పెద్ద ప్రమాద సమయాల్లో సైతం నిర్భయంగా నడచుకోవడం చూస్తే ఆశ్చర్యమేస్తుంది’’ అంటారు చీఫ్ ఆఫీసర్ ఈశ్వర్. అందుకే కదా మరి... ఈ లేడీ ఫైర్ ఫైటర్స్‌ని చూసి మిగతా రాష్ట్రాలు కూడా మహిళలకు పెద్దపీట వేయాలని ఆలోచిస్తున్నాయి! వారి ఆలోచన ఆచరణలోకి వస్తే బహుశా త్వరలో అన్ని రాష్ట్రాల్లోనూ మహిళా ఫైర్ ఫైటర్స్ దర్శనమి స్తారు. ఆడది అబల కాదన్న నానుడిని బల్లగుద్ది చెబుతారు!


 ఐటీఐ గిల్డ్‌లో ప్రమాదం
 - భీతిల్లిన జనం
 - కోట్ల రూపాయల ఆస్తినష్టం
 మెహిదీపట్నం: నగరం నడిబొడ్డున భారీ అగ్ని ప్రమాదం సంభవించడంతో సిటీ ఉలిక్కిపడింది. గంటల పాటు ఎగిసిపడుతున్న మంటలు, దట్టమైన పొగ వ్యాపించడంతో స్థానికులు, పోలీసులు ఆందోళనకు గురయ్యారు.  కిలోమీటర్ల మేర పొగలు వ్యాపిస్తూ మంటలు ఎగిసి పడటంతో సమీప ప్రాంతవాసులు కలవర పడ్డారు.
 
 ఎగిసిపడుతున్న మంటలను అదుపుచేసేందుకు అగ్నిమాపక అధికారులు ఉరుకులు,పరుగులు తీశారు. పదహారు అగ్నిమాపక వాహనాలను తీసుకొచ్చి, ఐదు గంటలు శ్రమించి మంటలను అదుపుచేశారు. ఆదివారం సాయంత్రం విజయనగర్‌కాలనీ మల్లేపల్లి ఐటీఐ గిల్డ్ స్థలంలో ఈ ప్రమాదం జరిగింది. ఇక్కడ చాలా కాలం నుంచి చిన్న చిన్న వాహనాల రిపేర్ షెడ్లతో పాటు వెల్డింగ్ దుకాణాలు, డెంటింగ్ షెడ్లు వంటి వర్క్‌షాప్‌లు నిర్వహిస్తున్నారు.
 
 కాగా ఆదివారం విజయనగర్‌కాలనీ చౌరస్తా వైపు ఓ మూలన చిన్న షెడ్డులో మధ్యాహ్నం 3:30 గంటల సమీపంలో చిన్న అగ్ని ప్రమాదం సంభవించింది. దాదాపు మంటలు కొద్ది కొద్దిగా వ్యాపిస్తూ మిగతా షెడ్లలోకి వ్యాపించాయి. షెడ్లలో దాదాపు రసాయనాలు, పాత టైర్లు ఉండడంతో మంటలు వేగంగా చెలరేగాయి. ఈ ప్రారంతం ఎప్పుడూ ర ద్దీగా ఉంటుంది. ఆదివారం సెలవు కావడంతో షాపులు మూతపడ్డాయి. దీంతో ప్రాణనష్టం, పెనుప్రమాదం తప్పింది.
  
 స్పందించిన ఎస్బీ కానిస్టేబుల్...
 ఘటనా స్థలం నుంచి బైక్‌పై వెళ్తున్న స్పెషల్‌బ్రాంచ్ కానిస్టేబుల్ టి.దిగంబర్‌సింగ్ వెంటనే స్పందించి ఉన్నతాధికారులకు సమాచారం ఇవ్వడంతో అందరూ సకాలంలో వచ్చి సహాయక చర్యల్లో పాల్గొన్నారు.
  
 16 ఫైరింజన్లు 20 నీళ్ల ట్యాంకర్లు...
 మాదాపూర్, మొగల్‌పురా,సికింద్రాబాద్,హైకోర్టు, మలక్‌పేట, మౌలాలీ, సనత్‌నగర్, ఇంబ్రహీంపట్నం, లంగర్‌హౌస్, అసెంబ్లీ, గౌలిగూడ, ఫిలింనగర్, ముషీరాబాద్, సాలార్‌జంగ్ మ్యూజియం ఫైర్ స్టేషన్‌ల నుంచి వాహనాలు వచ్చాయి. మరో 20 నీళ్ల ట్యాంకర్లు(ప్రైవేట్) రప్పించారు. సహాయక చర్యల్లో ఫైర్ డెరైక్టర్ పి.వెంకటేశ్వర్, డీఎఫ్‌ఓ మహేందర్‌రెడ్డి, ఫైర్ ఆఫీసర్ విజయ్‌కుమార్‌లతో పాటు ఆయా ఫైర్ స్టేషన్ల అధికారులు, సిబ్బంది పాల్గొన్నారు.
  
 ఆదివారం కావడంతో తప్పిన ప్రాణ నష్టం...
 ఆదివారం సెలవు దినం కావడంతో ఎలాంటి ప్రాణ నష్టం సంభవించలేదు. కేవలం రూ.కోట్లలో ఆస్తి నష్టం మాత్రమే జరిగింది. ఇక్కడ 110 షాపులలో (కారు మెకానిక్, కార్పెంటర్, డెంటర్, పెయింటర్ తదితర కార్ఖానాలు) కనీసం మూడు వేల మంది కార్మికులు పని చేస్తుంటారు. సాధారణ రోజుల్లో ఇక్కడ అగ్నిప్రమాదం జరిగి ఉంటే పెద్ద సంఖ్యలో ప్రాణ నష్టం జరిగేదని అధికారులు తెలిపారు.
  
 నిల్వ ఉన్న ఆయిల్ కొంప ముంచింది...
 ఐటీఐ గిల్ సుమారు ఐదేకరాల స్థలంలో ఉం ది. ఈ ప్రభుత్వ భూమిని కొందరు లీజ్‌కు తీసుకుని మొటారు మెకానిక్ వర్క్‌షాపులను నిర్వహిస్తున్నారు. ఈ గిల్‌లోని అన్ని దుకాణాలలో ఇంజన్ ఆయిల్ నిల్వలు ఉండటం కూడా మంటలు అదుపు రాకపోవడానికి ఒక కారణం. దీనికి తోడు కార్లకు ఉపయోగించే పెయింట్స్ కూడా ఉండటంతో మంటలు క్షణాల్లో చుట్టుపక్క దుకాణాలకు పాకాయి.


 ⇒ అగ్నిప్రమాదాల నివారణలో అధికారుల వైఫల్యం
 ⇒ అరకొర వసతులతో ఫైర్ విభాగం సతమతం
 ⇒ సకాలంలో స్పందించలేకపోతున్న సిబ్బంది
 ⇒ 45 కిలోమీటర్ల దూరం నుంచి ఫైరింజన్ల రాక
 ⇒ అప్పటికే బుగ్గిపాలవుతున్న ఆస్తులు
 మెహదీపట్నం: అగ్ని ప్రమాదాల విషయంలో అధికారులు నిర్లక్ష్యం వీడడం లేదు. ఎన్నిమార్లు ప్రమాదాలు చోటుచేసుకుంటున్నా..
 
 ముందు జాగ్రత్తలు తీసుకోవడంలో శ్రద్ధ చూపడం లేదు. తాజాగా ఆదివారం విజయ్‌నగర్‌కాలనీలోని ఐటీఐ గిల్డ్‌లో చోటుచేసుకున్న భారీ అగ్ని ప్రమాదం ఫైర్, జీహెచ్‌ఎంసీ, ఎలక్ట్రిసిటీ, కార్మిక శాఖ విభాగాల నిర్లక్ష్యానికి నిలువుటద్దంగా చెప్పుకోవచ్చు.  
 
 ప్రమాదం చోటుచేసుకోక ముందే ఇలాంటి వర్క్‌షాపుల వద్ద పాటించాల్సిన భద్రతా చర్యలపై ఏ ప్రభుత్వ శాఖ కూడా స్పందించలేదు. గౌడాన్స్‌లు, వర్క్‌షాపుల యజమానులు పాటించాల్సిన కనీస నిబంధనలను సైతం కనిపెట్టలేకపోయారు. కనీసం ప్రమాదం చోటుచేసుకున్న కొద్ది నిముషాలలో మంటలు ఆర్పేందుకు సరైన వసతులు ఫైర్ విభాగం వద్ద లేవు. చాలిచాలనీ సిబ్బంది, అరకొర ఫైరింజన్లతో కుంటుతున్న ఫైర్ విభాగం దీనస్థితిలో కొట్టుమిట్టాడుతుంది. ఫైర్ విభాగానికి సరైన సదుపాయాలు, సౌకర్యాలు కల్పిస్తే తగిన సమయంలో తగిన విధంగా సిబ్బంది స్పందించి వేగవంతంగా మంటలను ఆర్పేస్తారు.
 
 ఆదివారం సాయంత్రం 4.45 గంటలకు చిన్నపాటి అగ్నిప్రమాదమే చోటుచేసుకుంది. ఫైర్ సిబ్బంది సకాలంలో సంఘటనా స్థలానికి వచ్చినా, వారివద్ద తగినన్ని  వాహనాలు లేకపోవడంతో మంటలను ఆర్పడం కష్టమైంది. ఒక మూలన మంటలను అదుపు చేస్తుంటే మరో వైపునుంచి మంటలు ఎగిసిపడుతున్నాయి. దీంతో రాత్రి 8.45 గంటలకు మంటలు పూర్గిగా అదుపులోకి వచ్చాయి. తగినన్ని ఫైరింజన్లు నగరంలోనే ఉంటే గంట వ్యవధిలో మంటలను అదుపులోకి తేవచ్చు. విజయ్‌నగర్ కాలనీలోని ఘటనా స్థలానికి నగరానికి 45 కిలో మీటర్ల దూరంలో నున్న స్టేషన్ల నుంచి ఫైరింజన్లను రప్పించాల్సి వచ్చింది.
 
 నగరం నడిబొడ్డున ఫైరింజన్లు లేకపోవడంతో సనత్‌నగర్, ఇబ్రహీంపట్నం నుంచి కూడా ఫైరింజన్లను రప్పించాల్సిన దుస్థితి ఏర్పడింది. ప్రమాదం చోటుచేసున్న నిముషాల వ్యవధిలోనే నాలుగైదు ఫైరింజన్లు వచ్చివుంటే ఇంత పెద్ద భారీ స్థాయిలో ప్రమాదం చోటుచేసుకునేది కాదు. ఇక అదృష్టవశాత్తు ఐటీఐ గిల్డ్‌కు నాలుగు వైపులా రహదారులే ఉన్నాయి. రహదారి దాటిన తరువాతనే కాలనీలు, బస్తీలు ఉన్నాయి. ఐటీఐ గిల్డ్‌కు ఈ బస్తీలు ఆనుకుని ఉంటే నాలుగు గంటల పాటు ఎగిసిన మంటలకు బస్తీలు కూడా బుగ్గిపాలయ్యేవి. ఐటీఐ గిల్డ్‌కు ఆనుకునే చిన్న పిల్లల స్పెషాల్టీ దవాఖానా ఉంది. ఘటన సమయంలో ఇందులో ఉన్న రోగులు బయటికి పరుగులు తీశారు. పొగతో సిబ్బంది ఇబ్బందులకు గురయ్యారు. ముందు జాగ్రత్త చర్యగా సిబ్బంది స్పందించి తగిన చర్యలు తీసుకున్నారు.


 సమస్యల వలయంలో అగ్నిమాపక కేంద్రాలు
 చాలీచాలని సిబ్బంది.. అరకొర వసతులు
 పెరగని ఫైర్ స్టేషన్లు
 నాలుగేళ్లలో 4,861ప్రమాదాలు
 రూ.141 కోట్ల ఆస్తినష్టం
 65 మంది మృత్యువాత
  
 ఒక చోట నీరుండదు. ఒక చోట సమయానికి వాహనం ముందుకు కదలదు. మరోచోటు నుంచి సకాలంలో ప్రమాద స్థలికి వాహనం చేరుకోదు. ఇంకోచోట సిబ్బంది కూర్చోడానికి కూడా సదుపాయాలు ఉండవు. సిబ్బంది సంఖ్యా అంతంతే... ఒకేసారి ఒకటి...రెండు చోట్ల ప్రమాదాలు సంభవిస్తే ‘సర్దుకుపోతున్నారు’. పొరపాటున  ఈ సంఖ్య నాలుగైదుకు చేరుకుంటే ప్రేక్షక పాత్ర పోషించాల్సిందే. ఇదీ నగరంలోని అగ్నిమాపక శాఖ దుస్థితి. ఈ సమస్యలు ఉన్నాయి కదా అని ప్రమాదాలు రాకుండా ఉంటాయా? ప్రాణ, ఆస్తి నష్టం
  సంభవించకుండా ఉంటాయా అనేది వేల కోట్ల ప్రశ్న.
  
 వేసవి వచ్చిందంటే మండే ఎండలతో పాటు అగ్ని ప్రమాదాలూ నగర వాసులను భయపెడుతుంటాయి.ఏటా ఏదో ఒక ప్రాంతంలో భారీ అగ్ని ప్రమాదాలు సంభవిస్తున్నాయి. అదే స్థాయిలో ఆస్తి, నష్టాలు ఉంటున్నాయి. దీన్ని నివారించడానికి అగ్నిమాపక శాఖ సామర్థ్యం సరిపోవడం లేదు. ముందు జాగ్రత్త చర్యలూ అలాగే ఉంటున్నాయి. సిబ్బంది కొరత... వసతుల లేమి...నీరు దొరక్కపోవడం వంటివి ఆ శాఖను వేధిస్తున్నాయి. జీహెచ్‌ఎంసీ పరిధిలో నాలుగేళ్లలో 4,861 అగ్ని ప్రమాదాలు చే టుచేసుకున్నాయి. రూ.141 కోట్ల ఆస్తినష్టంతో పాటు 65 ప్రాణాలు అగ్నికి ఆహుతైపోయాయి.
 
 మెట్రోలతో పోలిస్తే...
 
 కోల్‌కతా, ముంబయి, చెన్నై, ఢిల్లీ మెట్రో నగరాల్లో అగ్ని మాపక శాఖకు ఉన్న ఆర్థిక వనరులు, ఫైరింజన్లు, సిబ్బందితో పోలిస్తే హైదరాబాద్ బాగా వెనుకబడి ఉందనడంలో సందేహం లేదు. నిబంధనల మేరకు 50 వేల  ఠమొదటిపేజీ తరువాయి
  జనాభాకు ఒక ఫైర్ స్టేషన్ ఉండాలి. నగరంలో ప్రస్తుతం 16 స్టేషన్‌లే ఉన్నాయి. ఎప్పుడో 1970 నాటి జనాభాను దృష్టిలో పెట్టుకుని ఏర్పాటు చేసినవి. ప్రస్తుత జనాభాకు కనీసం 17 స్టేషన్‌లు అదనంగా అవసరం. 228 మంది ఫైర్‌మెన్ కావాల్సి ఉండగా... 149 మంది మాత్రమే ఉన్నారు. వీరితో పాటు 50 డ్రైవర్ పోస్టులు అవసరం.ఇతర మహా నగరాలతో పోలిస్తే అత్యాధునిక పరికరాలు మాత్రం సమానంగానే ఉన్నాయి. సిబ్బంది, స్టేషన్ల కొరత వల్ల ఉన్న వారిపైనే అధిక భారం పడుతోంది. ఇప్పుడున్న  స్టేషన్ పరిధి ప్రకారం ట్రాఫిక్ రద్దీలో వెళ్లేసరికి నష్టం జరిగిపోతోంది.
 
 ఆ నాలుగు నెలలే కీలకం...
 
 గత మూడేళ్లలో అగ్ని ప్రమాదాలను పరిశీలిస్తే మార్చి, ఏప్రిల్, మే, జూన్ నెలల్లోనే అత్యధిక అగ్ని ప్రమాదాలు సంభవిస్తున్నాయి. గత ఏడాది మొత్తంలో 1,094 ప్రమాదాలు చోటుచేసుకోగా... ఈ నాలుగు నెలల్లోనే 539 ప్రమాదాలు నమోదయ్యాయి.  
  
 ప్రతిపాదనలు బుట్టదాఖలు
 
 జీహెచ్‌ఎంసీ పరిధిలో 50 వేల జనాభాకు ఒక స్టేషన్ ఉండాలనేది నిబంధన. ఏటా ఆరు కొత్త స్టేషన్‌లు నెలకొల్పాలని హైపవర్ కమిటి మూడేళ్ల క్రితం ప్రతిపాదించింది. ఈ లెక్కన ఇప్పటికే 17 కొత్త స్టేషన్లు అందుబాటులోకి రావాల్సి ఉంది. ఒక్క స్టేషన్ కూడా కొత్తగా రాకపోవడం గమనార్హం.
 
 ఈ ప్రాంతాలలో తప్పనిసరి...
  
 ఎల్బీనగర్, మేడ్చల్, జూబ్లీహిల్స్, టోలిచౌకి, ఉప్పల్ నంచి భువనగిరి వరకు ఏదైనా ప్రాంతంలో ఫైర్ స్టేషన్‌లు ఏర్పాటు చేస్తే మిగిలిన స్టేషన్లపై భారం తగ్గుతుంది.
 
 ఆర్టీఓ అనుమతిస్తేనే...
 
 అరకొర సిబ్బందితో కొట్టుమిట్టాడుతున్న ఈ శాఖలో అగ్నిమాపక వాహనాల మరమ్మతులు తలనొప్పిగా మారాయి. చిన్నపాటి మరమ్మతులకైనా రోజుల తరబడి వేచి ఉండాల్సిందే. సంబంధిత ప్రాంతీయ రవాణాధికారి (ఆర్టీఓ) అనుమతిస్తేనే  ఆ వాహనం మరమ్మతులకు నోచుకుంటుంది. ఈలోగా ప్రమాదాలు సంభవిస్తే అంతే సంగతులు. అగ్నిమాపక శాఖతో ఎలాంటి సంబంధంలేని ఆర్టీఓ అనుమతి తీసుకోవాల్సి వస్తుంది. దీనికి స్వస్తి చెప్పి... వాహన మరమ్మతులకు ప్రత్యేకంగా నగరంలో వర్క్‌షాప్ ఏర్పాటు చేస్తే ఇబ్బందులు తప్పుతాయి.
 
 శాశ్వత భవనాలు లేక...
 
 హైదరాబాద్, రంగారెడ్డి జిల్లాలలో 23 కేంద్రాలకు గాను 14 చోట్ల మాత్రమే శాశ్వత భవనాలు ఉన్నాయి. తాత్కాలిక భవనాలలో... అరకొర సౌకర్యాలతో ఇబ్బందులు పడుతున్నామని సిబ్బంది వాపోతున్నారు. మరుగుదొడ్లు, విశ్రాంతి గదులు లేకపోవడంతో సమస్యలు ఎదుర్కొంటున్నామని చెబుతున్నారు. శాశ్వత భవనాల్లోనూ సదుపాయాలు అంతంత మాత్రమే.
  
  నీళ్లెక్కడ?
 
  గ్రేటర్ పరిధిలోని దాదాపు అన్ని ఫైర్ స్టేషన్‌లలో నీటి కొరత ఉంది. వాహనంలో నీళ్లు నింపేందుకు వారు కిలో మీటర్ల దూరం వెళ్లాల్సి వస్తోంది. సొంత భవనాలు ఉన్న చోట సైతం బోర్‌వెల్స్ లేవు. ఎక్కడో ఉన్న వాటర్ వర్క్స్ విభాగంపై ఆధారపడుతున్నారు. కొన్నిచోట్ల ట్యాంక్‌లే దిక్కు.
  
  
  కనిపించని రక్షణ చర్యలు
 
 నగరంలోని వివిధ ముఖ్యప్రాంతాలు, కార్యాలయాల్లో అగ్ని ప్రమాదాల నుంచి రక్షించే ఏర్పాట్లు లేవు. ప్రమాదం సంభవిస్తే భారీ స్థాయిలో నష్టాన్ని చవి చూడాల్సి వస్తుంది.
 
 1170 ప్రైవేట్ ఆస్పత్రుల్లో కేవలం 465 ఆస్పత్రులకు మాత్రమే ఫైర్‌సేఫ్టీ ఏర్పాట్లున్నాయి.   707 ఫంక్షన్ హాళ్లకుగాను 34 చోట్ల మాత్రమే ఫైర్‌సేఫ్టీ ఏర్పాట్లు చేసి జీహెచ్‌ఎంసీ నుంచి ఎన్‌ఓసీ పొందాయి. మిగతావాటికి ఫైర్‌సేఫ్టీ ఏర్పాట్లే లేవు. 123 టింబర్ డిపోలకుగాను కనీసం ఒక్కచోట కూడా అగ్ని ప్రమాదాల నివారణ చర్యలు లేవు. 6124 వస్త్ర దుకాణాలు, ఇత ర షో రూమ్‌లలో ఒక్క చోట కూడా ఫైర్‌సేఫ్టీ ఏర్పాట్లు లేవు.
  
 ఫైర్‌సేఫ్టీ ఏర్పాట్లు లేని సంస్థలపై చర్యలు తీసుకుంటామని ఉన్నతాధికారులు ఏటా ప్రకటనలు చేస్తున్నప్పటికీ, ఇంతవరకు ఎవరిపైనా ఎలాంటి చర్యలు లేకపోవడంతో సంబంధిత యాజమాన్యాలు దీన్ని పట్టించుకోవడం లేదు.  
  
 నోటీసులిచ్చినా ..
  
 ఫైర్‌సేఫ్టీ నిబంధనలు పాటించని భవన యజమానులపై కోర్టులో కేసులు న మోదు చేయడం..న్యాయస్థానం ఆదేశాలకు అనుగుణంగా చర్యలు తీసుకోవడం మినహా జీహెచ్‌ఎంసీకి అధికారాల్లేవు. దీంతో సంబంధిత అధికారుల ప్రకటనలకు స్పందిస్తున్న వారు లేరు.  అంతేకాదు నోటీసులు, తుది నోటీసులతో హెచ్చరికలు జారీ చేస్తున్నా స్పందించడం లేదు. మరోవైపు నగరంలో బ్యాంకులు, పెట్రోలు బంక్‌లు, పరిశ్రమలు ఎన్ని ఉన్నాయో జీహెచ్‌ఎంసీ వద్ద లెక్కలు లేకపోవడం గమనార్హం. దీని వల్ల సమస్య అలాగే ఉండిపోతోంది.
  
 వాహనాల  ప్రత్యేకతలు
  
 మలక్‌పేట, మొగల్‌పురా, చందులాల్ బారాదారి, లంగర్‌హౌస్, ఫిలింనగర్, గౌలిగూడ, ముషీరాబాద్, మౌలాలి, సికింద్రాబాద్, సనత్‌నగర్, హైకోర్టు, సచివాలయం, అసెంబ్లీ, సాలర్‌జంగ్ మ్యూజియం, పంజగుట్టలలో ఫైర్ స్టేషన్‌లు ఉన్నాయి. స్నారికల్ (సికింద్రాబాద్)లో బహుళ అంతస్థులలో ప్రమాదాలు నివారించే స్టేషన్ ఉంది. వీటిలో ఫోమ్ టెండర్, డీసీపీ టెండర్, స్నారికల్ (100 ఫీట్ల ఎత్తు), అజ్మత్, బ్రాంటో స్కై లిఫ్ట్ (54 మీటర్ల ఎత్తు) వాహనాలు ఉన్నాయి. ఇరుకు ప్రాంతాల్లో ప్రమాదాలను అరికట్టడానికి  మల్కాజిగిరి ఐడీఏ నాచారం అగ్నిమాపక కేంద్రానికి మిస్ట్‌జిప్ ఫైర్‌ఇంజన్ (మినీ) అందుబాటులోకి వచ్చిందని స్థానిక ఇన్‌చార్జి స్టేషన్ ఫైర్ ఆఫీసర్ రాములు తెలిపారు. 300 లీటర్ల నీరు, 50 లీటర్ల ఫోమ్, పెద్ద ఫైర్ ఇంజన్ సామర్థ్యంతో ఈ మినీ ఫైరింజన్ పని చేస్తుంది.
 
 వాటర్ టెండర్.... (పెద్ద ఫైరింజన్)
 
 వాటర్ టెండర్ 4500 నీటి సామర్ధ్యం కలిగి ఉంటుంది. పెద్ద అగ్ని ప్రమాదాల సమయంలో దీన్ని ఉపయోగిస్తారు. రసాయనాల కారణంగా ప్రమాదాలు జరిగితే ఫోమ్ బ్రాంచిని ఉపయోగిస్తారు. ఒక కేంద్రంలో ఒక వాటర్ టెండర్‌తో పాటు మొత్తం 16 మంది సిబ్బంది ఉంటారు. అందులో స్టేషన్ ఫైర్ ఆఫీసర్-1, డ్రైవర్లు-3, లీడింగ్ ఫైర్‌మెన్-2, ఫైర్‌మెన్-10 మంది ఉంటారు.  
  
 బ్రాంటో స్కై లిఫ్ట్
 
 ఈ వాహనాన్ని 2009లో సికింద్రాబాద్ స్టేషన్‌కు తెచ్చారు.   ఫిన్‌ల్యాండ్‌కు చెందిన వోల్వో కంపెనీ దీన్ని తయారు చేసింది. 54 మీటర్ల పొడవైన నిచ్చెన దీని ప్రత్యేకత.18 అంతస్తుల్లో అగ్ని ప్రమాదం సంభవించినా...మంటలను అదుపు చేయవచ్చు. ఈ నిచ్చెనకు కేజ్ ఉంటుంది. పై అంతస్తులో మంటల్లో చిక్కుకున్న ఇద్దరిని ఒకేసారి రక్షించి  తీసుకుని రావచ్చు.ఇందులో నీళ్లు ఉండవు. మరో ఫైరింజన్‌లోని నీటితో మంటలను అదుపులోకి తెస్తారు.మంటల వేడి నుంచి, రసాయన చర్యల నుంచి రక్షించే ఫైర్ సూట్ ఇందులో అందుబాటులో ఉంటుంది.  ఇలాంటి వాహనాలు రాష్ట్రంలో మూడు ఉన్నాయి. (రంగారెడ్డి, సికింద్రాబాద్, విజయవాడ.)
  
 స్నారికల్ వాహనం
  
 ఇందులో 18 మీటర్ల ఎత్తులో జరిగే అగ్ని ప్రమాదాలను నివారించేలా నిచ్చెన ఉంటుంది .6 అంతస్తుల వరకు పనిచేస్తుంది.ఇద్దరు వ్యక్తులను ఒకేసారి రక్షించవచ్చు. రాష్ట్రంలో ఈ వాహనం ఒకటి మాత్రమే ఉంది.
  


 హైదరాబాద్ సిటీ: మలక్‌పేట రైల్వేస్టేషన్ ఎదురుగా  ఉన్న లైటింగ్ స్తంభానికి షార్ట్ సర్క్యూట్ వస్తోందని ఆదివారం తెల్లవారు జామున 2 గంటలకు స్థానికులు అగ్నిమాపక సిబ్బందికి సమాచారం అందించడంతో హుటాహుటిన అక్కడికి చేరుకున్న అగ్నిమాపక సిబ్బంది విద్యుత్ ను ఆపి మంటలను అదుపులోకి తెచ్చారు.


 జిల్లాలో అగ్ని ప్రమాదాలపై అప్రమత్తత అంతంతమాత్రమే...
  
  ఫైర్ స్టేషన్లలో పీడిస్తున్న సిబ్బంది లేమి
 మూలకుపడ్డ ఫైరింజన్లు.. నీటి కొరత  కానరాని ప్రత్యామ్నాయ చర్యలు
  
 వేసవి కాలం వచ్చేసింది... ఇప్పటికే మధ్యాహ్నం వేళ ఎండ తీవ్రత ఎక్కువగా ఉంటోంది. ఈ కాలంలో అగ్ని ప్రమాదాలు జరిగే అవకాశం ఎక్కువ. అరుుతే మన జిల్లా యంత్రాంగం ఇంకా మేల్కొన్నట్లు లేదు. ఫైరింజన్ల కొరత... ఫైర్ స్టేషన్లలో సిబ్బంది లేమి పీడిస్తుండగా... నీటి తిప్పలు వెక్కిరిస్తున్నారుు. జిల్లావ్యాప్తంగా ఫైర్ స్టేషన్లు, ఫైరింజన్ల (అగ్నిమాపక యంత్రాలు) దుస్థితి, నీటి తిప్పలపై ‘సాక్షి’ ఫోకస్...
  
  
 భూపాలపల్లి : పారిశ్రామిక ప్రాంతమైన  భూ పాలపల్లి నియోజకవర్గంలో అగ్నిమాపక కేంద్రం లేదు.  పరకాల వాహనమే దిక్కు.
 
 ► స్టేషన్ ఘన్‌పూర్ : స్టేషన్‌ఘన్‌పూర్‌లో కూడా ఫైర్‌స్టేషన్ లేదు. ఏదైనా ప్రమాదం జరిగితే జనగామ లేదా హన్మకొండ నుంచి ఫైర్ ఇంజన్ రావాల్సిందే.
 
 ► వర్ధన్నపేట టౌన్ : వర్ధన్నపేటలో అగ్నిమాపక కేంద్రం నిర్మాణానికి స్థలాన్ని కేటాయించినా పనులు మొదలుకాలేదు.
 
 ►పాలకుర్తి : ఈ నియోజకవర్గంలో కూడా ఫైర్ స్టేషన్ లేదు.
  
  నియోజకవర్గాల వారీగా ఫైర్ స్టేషన్ల దుస్థితి
  
 ► డోర్నకల్ : ఈ నియోజకవర్గంలో నాలుగు మండలాలు ఉండగా.. మరిపెడలో ఫైర్‌స్టేషన్ ఉంది. ఇక్కడి నుంచి 2 మండలాలకు మాత్రమే సేవలందుతున్నాయి. మిగతా మండలాలకు మహబూబాబాద్ నుంచి అగ్నిమాపక వాహనం రావా ల్సి వస్తోంది. సకాలంలో చేరకపోవడంతో నష్టం ఎక్కువగా ఉంటోంది.
 
 ► జనగామ : నియోజకవర్గ కేంద్రంలో అగ్నిమాపక కేంద్రం ఉండగా.. దీని పరిధిలో 11 మండలాలు వస్తున్నా యి. 16 మంది సిబ్బందికి 11 మందే ఉన్నారు. నీటిని బయట నింపుకోవాల్సి వస్తోంది.
 
 ► మహబూబాబాద్ : 7 మండలాలకు మానుకోటలోని ఫైరింజనే దిక్కు. నీటి సమస్య కూడా తీవ్రంగా ఉంది.
 
 ►  నర్సంపేట : నర్సంపేటలోని ద్వారకపేటలో ఫైర్‌స్టేషన్ ఉంది. ఎక్కడైనా ప్రవూదం జరిగితే.. వూర్గవుధ్యలో నీరు నింపుకోవాల్సిన  దుస్థితి.
 
 ► పరకాల : పరకాలలోని అగ్నిమాపక కేంద్రంలో అన్నీ సమస్యలే. నీటి సమస్య తీవ్రంగా ఉండగా.. 15మందికి గాను పది మంది సిబ్బందే ఉన్నారు. వాహనం కూడా తరచూ మరమ్మతులకు వస్తోంది.
 
 ►  ములుగు : ములుగు వ్యవసాయశాఖ కార్యాలయంలో ఫైర్‌స్టేషన్ ఉంది. ఈ నియోజకవర్గంలోని ఆరు మండలాలతోపాటు భూపాలపల్లి నియోజకవర్గంలోని గణపురం మండలం చెల్పూరు వరకు ఇక్కడి నుంచే వాహనం వెళ్లాల్సి వస్తోంది.
 
 ►తూరు, పశ్చిమ : వరంగల్ తూర్పు నియోజకవర్గ పరిధిలోని ఫైర్ స్టేషన్‌లో 21 మందికి ఆరుగురు, పశ్చిమ సెగ్మెంట్ పరిధిలోని హన్మకొండ బాలసముద్రంలోని స్టేషన్‌లో 10 మందికి ఏడుగురే విధులు నిర్వర్తిస్తున్నారు. వాహనాల్లో కూడా ఒకటి మూలన పడింది.
  
 ఫైర్‌స్టేషన్ లేక కష్టాలు
  
 పాలకుర్తి: పాలకుర్తి నియోజకవర్గంలో ఐదు మండలాలు 101 రెవెన్యూ గ్రామాలున్నాయి. సగటున ఏటా నియోజకవర్గంలో 10 కి పైగా అగ్ని ప్రమాదాలు జరుగుతున్నాయి. కానీ ఫైర్‌స్టేషన్ లేకపోవడంతో వీటి నివారణ సాధ్యం కావడం లేదు. అగ్ని ప్రమాదాలు జరిగితే తొర్రూరు మండలానికి.. మహబూబాబాద్ నుంచి, రాయపర్తి మండలానికి వరంగల్ నుంచి, పాలకుర్తి, కొడకండ్ల, దేవరుప్పుల మండలాలకు జనగామ నుంచి ఫైర్ ఇంజిన్ రావాల్సి ఉంటుంది. సుమారు 40 - 50 కి.మీ దూరం నుంచి ఫైర్ ఇంజిన్ వచ్చే సరికి జరగాల్సిన నష్టం జరిగిపోతోంది. పాలకుర్తి నియోజకవర్గ కేంద్రంలో ఫైర్ స్టేషన్ ఏర్పాటు చేస్తే తొర్రూరు. రాయపర్తి, కొడకండ్ల, దేవరుప్పుల మండలాలకు 20-25  కి.మీ దూరం మాత్రమే ఉంటుంది. ఏ మండలంలో ప్రమాదం జరిగినా సమయానికి ఫైర్ ఇంజిన్ చేరుకునే అవకాశం ఉంటుంది.  
  
 పరిధి పెద్దది.. బండి పాతది
  
 పరకాల : పరకాల అగ్నిమాపక కేంద్రంలో అన్ని సమస్యలే. వాటర్ లెండర్ వాహనం పాతది. దీన్ని నింపేందుకు నాలుగు గంటలు పడుతోంది. వాటర్ సంప్‌ల్లో నీరు నింపితే ఇంకిపోతోంది. ఫైరింజన్ పికప్‌కే పావుగంట పడుతోంది. ఏయిర్ నింపడానికి వీలుకావట్లేదు. సరిపడా నీళ్లు లేవు. మంటలార్పేందుకు తగినంత సిబ్బంది లేరు. పరకాల పరిధిలో ఆత్మకూరు, రేగొండ, శాయంపేట, మొగుళ్లపల్లి, చిట్యాల, భూపాలపల్లి మండలాలున్నారుు. 15మంది సిబ్బందికి పది మంది మాత్రమే ఉన్నారు. అందులో ఇద్దరు డిప్యూటేషన్‌పై ఇక్కడ పనిచేస్తున్నారు. ఇద్దరు డ్రైవర్ ఆపరేటర్, నాలుగు ఫైర్‌మెన్ పోస్టులు భర్తీ చేయూల్సి ఉంది.
  
 రాజయ్య హామీ.. నెరవేరదేమీ..
  
 స్టేషన్‌ఘన్‌పూర్ : జిల్లాలో పెద్ద నియోజకవర్గం స్టేషన్‌ఘన్‌పూర్‌లో ఫైర్ స్టేషన్ ఏర్పాటుకు నేటి కీ సన్నాహాలు చేపట్టడం లేదు. ఎమ్మెల్యే డాక్టర్ తాటికొండ రాజయ్య డిప్యూటీ సీఎంగా బాధ్యతలు చేపట్టాక స్టేషన్‌ఘన్‌పూర్‌లో ఫైర్ స్టేషన్ ఏర్పాటు చేయిస్తానని హామీ ఇచ్చారు. తహ శీల్దార్ రామ్మూర్తి తన కార్యాలయ ఆవరణలో భూసర్వే నిర్వహించినా జిల్లా అధికారుల నుంచి ఆదేశాలు నేటికీ రాలేదు. అగ్ని ప్రమాదం జరిగితే 28 కిలోమీటర్ల దూరంలోని జనగామ నుంచి లేదా 30 కిలో మీటర్ల దూరంలో ఉన్న హన్మకొండ నుంచి ఫైరింజన్ రావాల్సి వస్తోంది.  
  
  అరకొరగా సిబ్బంది..
  
 జనగామ: జనగామ అగ్నిమాపక కేంద్రంలో వసతులు కరువయ్యూరుు. 11 మండలాలకు పెద్దిదిక్కుగా ఉన్న ఇక్కడ సిబ్బంది కొరత వేధిస్తోంది. ఫైర్ ఆఫీసర్‌తో కలిపి 16 మంది సిబ్బంది ఉండాలి. కానీ 11 మందే ఉన్నారు. 10 మంది ఫైర్‌మెన్లకు గాను నాలుగు పోస్టులు ఖాళీగా ఉన్నారుు. ముగ్గురు డ్రైవర్ కమ్ ఆపరేటర్లు ఉండాల్సి ఉండగా ఒక పోస్టు ఖాళీగా ఉంది. సిబ్బందికి అదనపు పని భారం పడుతోంది. నీటి సౌకర్యం లేదు.  బయటకు వెళ్లి ఫైర్‌ట్యాంకర్‌ను నింపుకోవాల్సి వస్తోంది. వేసవిలో వచ్చిపోయే కరెంటుకు ఏ బావి వద్ద నింపుదామన్నా ఇబ్బందే. కార్యాలయ భవనం శిథిలావ స్థకు చేరింది. వర్షాకాలంలో ఉరుస్తోంది. సిబ్బంది విశ్రాంతి గది చాలా చిన్నగా ఉంది. ప్రహరీ నిర్మాణం, నీటి ట్యాంకు మరమ్మతుకు నిధులు మంజూరైనట్లు సమాచారం ఉందని ఫైర్ ఆఫీసర్ బుచ్చి ఎల్లయ్య తెలిపారు. స్టేషన్‌ఘన్‌పూర్, పాలకుర్తిలలో ఫైర్ స్టేషన్‌ల ఏర్పాటుకు ప్రతిపాదనలు
  ఉన్నాయన్నారు. సిబ్బందిని పూర్తిస్థాయిలో నియమించాలని కోరారు.  
  
 ములుగులో  వసతుల లేమి
  
 ములుగు : స్థానిక అగ్నిమాపక కేంద్రం ప్రస్తుతం వ్యవసాయశాఖ గోదాంలో కొనసాగుతోంది. ములుగు నుంచి మంగపేట అకినపల్లి మల్లారం వరకు సుమారు 80 కిలో మీటర్ల పరిధి ఉండడం.. ఒకే ఫైర్‌స్టేషన్ ఉండడంతో పూర్తిస్థారుులో సేవలు అందడం లేదు. నియోజకవర్గంలోని ఆరు మండలాలతోపాటు భూపాలపల్లిలోని గణపురం మండలం చెల్పూరు వరకు అష్టకష్టాలతో సేవలందిస్తున్నారు. 16 మందికి 12 మంది సిబ్బందే ఉన్నారు. 2013లో డిగ్రీ కళాశాల ఆవరణలో 20 గుంటల స్థలం కేటాయించారు. కానీ నిధుల్లేక పనులు ముందుకు సాగలేదు. వర్షాభావ పరిస్థితులతో చెరువులు, కుంటలు ఎండిపోయాయి. అగ్ని ప్రమాదాల నివారణకు నీటి కష్టాలు తప్పేలా లేవు.
  
 సకాలంలో అందని సేవలు
  
 డోర్నకల్ : నియోజకవర్గంలో మరిపెడలో మాత్రమే ఫైర్‌స్టేషన్ ఉంది. డోర్నకల్, కురవి మండలాలతో పాటు నర్సింహులపేటలోని కొన్ని గ్రామాలకు మహబూబాబాద్ ఫైర్ స్టేషన్ సేవలు అందుతున్నా.. ఫలితమైతే ఉండట్లేదు. మరిపెడ తహసీల్దార్ కార్యాలయ ఆవరణలో 2007లో అగ్నిమాపక కేంద్రం కాంటాక్ట్ పద్ధతిన ఔట్ సోర్సింగ్ స్టేషన్‌గా ఏర్పాటు చేశారు. ఫైరింజన్‌ను అద్దెకు తీసుకుని 14 మంది సిబ్బందిని కాంటాక్ట్ పద్ధతిన నియమించారు. వరంగల్ లాంటి ప్రాంతాల నుంచి వచ్చి చాలీచాలని వేతనం(రూ. 5000)తో పనిచేయడం కష్టమవుతోందని సిబ్బంది చెబుతున్నారు. అగ్నిమాపక వాహనం కూడా పాత మోడల్ కావడంతో తలుపులు సక్రమంగా పడట్లేదు. నీటి కోసం మూడు కిలోమీటర్ల దూరంలోని చెరువుకు లేదా ఖమ్మం జిల్లా తిరుమాలాయపాలెం సమీపంలోని కెనాల్‌కు ఫైరింజన్ వెళ్లాల్సి వస్తోంది. ప్రతీ ఆదివారం మరిపెడలో సంత నిర్వహించడం మెయిన్ రోడ్డు నుంచి తహసీల్దారు కార్యాలయం వరకు రోడ్లపై దుకాణాలు ఏర్పాటు చేస్తుండటంతో ఆ రోజు అగ్నిమాపక వాహనాన్ని వేరే ప్రాంతంలో నిలుపుతున్నారు. అగ్నిమాపక కేంద్రం నిర్వహణను ప్రభుత్వ పరిధిలోకి తెచ్చి పూర్తిస్థాయి వసతులు కల్పించాలని, వేతనాలు పెంచాలని సిబ్బంది కోరుతున్నారు.
  
 ఏడు మండలాలకు  ఒక్కటే..
  
 మహబూబాబాద్ : పట్టణంలోని ఫైర్‌స్టేషన్ పరిధిలో మానుకోట, కురవి, డోర్నకల్, తొర్రూరు, నెల్లికుదురు, కేసముద్రం, నర్సింహులపేట మండలాలున్నాయి. మానుకోట నుంచి నర్సింహులపేటకు దూరభారం ఉండడంతో సేవలు సమర్థంగా అందడం లేదు. ఈ కార్యాలయంలో బోర్ వేసినా సమృద్ధిగా నీరు లేదు. పట్టణ శివారులోని మున్నేరువాగు, మండలంలోని ఈదులపూసపల్లి చెరువులో నీటి మట్టం తగ్గడంతో ట్యాంకు నింపుకోవడం సమస్యగా మారుతోంది. మున్సిపాలిటీ సిబ్బంది కూడా ట్యాంక్ నింపడానికి ఇబ్బందులు పెడుతున్నారని సిబ్బంది చెబుతున్నారు. ఫైరింజన్ కండీషన్ అంతంతమాత్రమే. కార్యాలయంలో మరో డ్రైవర్, ఫైర్ మెన్ సిబ్బందిని భర్తీ చేయూల్సి ఉంది.
  
 గడువులోగా ఏర్పాటయ్యేనా?
  
 వర్ధన్నపేట టౌన్: ఈనెల 11న స్థానిక ఎంపీడీఓ కార్యాలయ ఆవరణలో అగ్నిమాపక భవన నిర్మాణానికి 694 చదరపు గజాల స్థలాన్ని ఎమ్మెల్యే అరూరి రమేష్ చేతుల మీదుగా అందచేశారు. మూడు నెలల్లో నిర్మాణం పూర్తి చేసి కార్యాలయూన్ని ప్రారంభిస్తామని అధికారులు స్పష్టంచేశారు. ఇప్పటి వరకైతే పనులేవీ ప్రారంభం కాలేదు. మరి గడువులోగా పనులు పూర్తయ్యేనా అనే అనుమానాలు వ్యక్తమవుతున్నారుు. వేసవిలో వర్ధన్నపేట పిరంగి గడ్డ ప్రాంతంలో వరి పొలం అంటుకుని అగ్రిమాపక శకటం సంఘటనా స్థలానికి వచ్చేలోగా బూడిదే మిగిలింది. వరంగల్ నుంచి ఎంత వేగంగా వచ్చినా ట్రాఫిక్ ఇబ్బందులతో గంట సమయం పడుతుంది.
  
 కాలితే బూడిదే..
  
 భూపాలపల్లి : కోల్‌బెల్ట్ పారిశ్రామిక ప్రాంతంగా అభివృద్ధి చెందుతున్న భూపాలపల్లి నియోజకవర్గంలో అగ్నిమాపక కేంద్రం లేకపోవడం విచిత్రమే. ఏటా వేసవిలో విద్యుత్ షార్ట్ సర్క్యూట్, అగ్ని ప్రమాదాలతో తీవ్ర ఆర్థిక నష్టం వాటిల్లుతోంది. భూపాలపల్లి, గణపురం, రేగొండ, శాయంపేట, చిట్యాల, మొగుళ్లపల్లి మండలాల్లో ఎక్కడ అగ్నిప్రమాదం జరిగినా పరకాల అగ్నిమాపక కేంద్రాన్ని ఆశ్రయించాల్సి వస్తోంది. ఫైరింజన్ వచ్చేలోగా ఆస్తులు బుగ్గిపాలవుతున్నారుు. 2010లో భూపాలపల్లి మండలం జంగేడు ప్రభుత్వ ఉన్నత పాఠశాలలో అగ్ని ప్రమాదం జరిగి విద్యార్థుల సర్టిఫికెట్లు, విలువైన కాగితాలు కాలిబూడిదయ్యాయి. 2011లో రాంపూర్ వద్ద దేవాదుల ఎత్తిపోతల పథకానికి చెందిన నాలుగు మోటార్లు కాలిపోగా రూ. కోట్లలో నష్టం వాటిల్లింది. ఇలా ఏటా జరుగుతున్నా ఫైర్‌స్టేషన్ ఏర్పాటు చేయకపోవడం విమర్శలకు తావిస్తోంది.
  
 ఒకేసారి రెండు ప్రమాదాలు జరిగితే..
  
 పోచమ్మమైదాన్: వరంగల్ ట్రైసిటీలోని లక్షల జనాభాకు తగినట్లుగా వ్యాపారాలు విస్తరిస్తున్నారుు. కానీ, ఏదైనా ఉపద్రవం సంభవిస్తే దాన్ని అరికట్టడం మాట అటుంచి నష్టనివారణ చర్యలకూ సిబ్బంది సరిపడా లేరు.  ట్రైసిటీ మొత్తంగా వరంగల్ మట్టెవాడ, హన్మకొండ బాలసముద్రంలో ఫైర్ స్టేషన్లు మాత్రమే ఉన్నారుు. మట్టెవాడలో మూడు అగ్నిమాపక నిరోధక వాహనాలు ఉండగా ఇందులో ఒకటి మూలన పడింది. ఇక్కడ 21మందికి గాను ఆరుగురు సిబ్బందే ఉన్నారు. హన్మకొండ బాలసముద్రంలోని ఫైర్ స్టేషన్‌లో ఒకటి పెద్దది, ఇంకోటి చిన్న వాహనం ఉంది. ఇక్కడ పది మందికి ఏడుగురు సిబ్బందే విధుల్లో ఉన్నారు. నగరంలో రెండు చోట్ల ఒకేసారి ప్రమాదాలు జరిగితే మాత్రం సేవలందించడం కష్టతరమవుతోంది.  అగ్నిమాపక కేంద్రాల సంఖ్య పెంచడంతో పాటు సరిపడా వాహనాలు కేటారుుంచాలని ప్రజలు కోరుతున్నారు. పోస్టులు భర్తీ చేసి తమపైభారం తగ్గించాలని సిబ్బంది విజ్ఞప్తి చేస్తున్నారు. వేసవి నేపథ్యంలో  అధికారులు తక్షణం స్పందించాల్సిన అవసరం ఎంతైనా ఉంది.  


 కమలాపూర్: కరీంనగర్ జిల్లా కమలాపూర్ మండలంలోని ఊడూరు శివారులో అగ్నిప్రమాదం చోటు చేసుకుంది. ఈ ఘటనలో సుమారు 600 తాటి చెట్లు దగ్ధమయ్యాయి. స్థానికులు సమాచారాన్ని అగ్నిమాపక సిబ్బందికి తెలియజేయడంతో వారు హుటాహుటిన వచ్చి మంటలను ఆర్పుతున్నారు.
 
 అగ్నిమాపక సిబ్బంది వచ్చి మంటలు ఆర్పడం మొదలుపెట్టేలోపే చాలా చెట్లు కాలిపోయాయి. అయితే ఈ ఘటన ఎవరైనా కావాలని చేసిందా? లేక ప్రమాదవశాత్తూ జరిగిందా అనేది తెలియాల్సి ఉంది. తాటి చెట్ల నుంచి వచ్చే కల్లు అమ్ముకుని జీవనోపాధి కొనసాగిస్తున్నామని, ప్రభుత్వం ఎలాగైనా తమను ఆదుకోవాలని గీతకార్మికులు కోరారు. ప్రమాద స్థలాన్ని స్థానిక తహశీల్దార్ రవీందర్, ఎక్సైజ్ ఎస్‌ఐ రాబర్ట్‌లు పరిశీలించారు. పోలీసులు కేసు నమోదు చేసి దర్యాప్తు ప్రారంభించారు.
  


 బీరువాల తయారీ దుకాణంలో అగ్నిప్రమాదం సంభవించింది. ఈ సంఘటన ఖమ్మం జిల్లా భద్రాచలం పట్టణంలో ఆదివారం రాత్రి జరిగింది. వివరాలిలా... భద్రాచలంలో కోనవరం రోడ్డులో ఉన్న ఒక బీరువాల దుకాణంలో రాత్రి 7 గంటలకు షార్ట్ సర్క్యూట్ కారణంగా మంటలు వ్యాపించాయి. మంటల్లో ఒక టాటా మినీ వాహనంతో పాటు, పెద్ద సంఖ్యలో బీరువాలు పూర్తిగా దగ్ధమయ్యాయి. సంఘటనా స్థలానికి చేరుకున్న అగ్నిమాపక సిబ్బంది మంటలను అర్పేశారు. ఈ ప్రమాదంలో రూ.30 లక్షల వరకు ఆస్తినష్టం జరిగినట్లు అంచనా వేశారు.
 
  


 హైదరాబాద్: తార్నాకలోని మౌలాలి అగ్నిమాపక కేంద్రంలో సిబ్బంది మందేసి... చిందేసిన ఘటన ఆలస్యంగా వెలుగులోకి వచ్చింది. నూతన సంవత్సర వేడుకల సందర్బంగా అగ్నిమాపక కేంద్రంలోని ఫైర్ మెన్లు అమరనాథ్ గౌడ్, ఏ మల్లేష్, ఓం నమశ్శివాయలతోపాటు ఫైరింజన్ డ్రైవర్ వీరాస్వామి మందు వేశారు. అనంతరం పాటలు పెద్దగా పెట్టుకుని చిందేశారు. ఆ విషయాన్ని ఆగంతకులు ఫోటోలు తీసి.. మీడియా వారికి అందజేశారు. ఆ ఫోటోలు మీడియాలో హల్చల్ చేశాయి.
 ఈ ఘటనపై వివరణ కోరేందుకు మీడియా ప్రతినిధులు మౌలాలి అగ్నిమాపక కేంద్రం ఉన్నతాధికారి చంద్రశేఖర్ను సంప్రదించేందుకు ప్రయత్నించారు. వారికి సెల్ఫోన్ స్విచ్చాఫ్ అని సమాధానం వస్తుంది. అలాగే మందేసి చిందేసిన సదరు నలుగురు మందుబాబుల సెల్ఫోన్లు కూడా మూగబోయాయి. నగరమంతా  నూతన సంవత్సర వేడుకల్లో ఉండగా ఎక్కడైనా అగ్నిప్రమాదం సంభవిస్తే... తమను రక్షించేది ఎవరని ప్రజలు ప్రశ్నిస్తున్నారు.


 ఏలూరు (ఫైర్‌స్టేషన్ సెంటర్) :జిల్లాలో నిట్ (ఎన్‌ఐసి) ఏర్పాటు చేయాలని డిమాండ్ చేస్తూ నిట్ పరిరక్షణ సమితి ఆధ్వర్యంలో ఏలూరులోని పలు విద్యాసంస్థల విద్యార్థులు భారీఎత్తున బుధవారం ఆందోళన నిర్వహించారు. ముఖ్యమంత్రి చంద్రబాబునాయుడు ఇచ్చిన హామీ ప్రకారం జిల్లాలో నిట్ ఏర్పాటు చేసి మాట నిలబెట్టుకోవాలని నినాదాలు చేశారు. ఈ ఆందోళన సమైక్యాంధ్ర ఉద్యమాన్ని నగర ప్రజలకు మరోసారి గుర్తు చేసే విధంగా నిర్వహించారు. ఇండోర్ స్టేడియం నుంచి పలు పాఠశాలల, కళాశాల విద్యార్థులు భారీ ర్యాలీ నిర్వహించి ఫైర్‌స్టేషన్ సెంటర్‌కు చేరుకున్నారు. అక్కడ మానవహారం నిర్వహించి నినాదాలు  చేశారు. అనంతరం కలెక్టరేట్ వద్దకు ర్యాలీగా వెళ్లి ఆందోళన చేశారు. ఈ ఆందోళననుద్దేశించి నిట్ పరిరక్షణ సమితి నాయకులు, శ్రీశ్రీ విద్యాసంస్థల అధినేత ఎంబీఎస్ శర్మ మాట్లాడుతూ వ్యవసాయ పరంగా అభివృద్ధి సాధించిన పశ్చిమగోదావరి జిల్లా పారిశ్రామికంగా కూడా అభివృద్ధి చెందేందుకు నిట్ సహాయ పడుతుందన్నారు. నిట్‌ను కృష్ణాజిల్లాలో ఏర్పాటు చేయడం జిల్లా ప్రజలను మోసగించడమేనన్నారు.
  
  జిల్లాలో 15 ఎమ్మెల్యే, రెండు ఎంపీ పదవులను టీడీపీకి ప్రజలు కట్టబెట్టారని , భావితరాల వారి కోసం నిట్‌ను ఏర్పాటు చేయాలని డిమాండ్ చేశారు. ప్రజా ప్రతినిధులందరూ నిట్‌ను జిల్లాలో ఏర్పాటు చేసేలా ప్రభుత్వంపై వత్తిడి చేయాలని కోరారు. ప్రైవేటు పాఠశాలల యాజమాన్యాల సంఘ జిల్లా కమిటీ సభ్యులు, సిద్దార్థ విద్యా సంస్థల అధినేత కోనేరు సురేష్‌బాబు మాట్లాడుతూ జిల్లాలో నిట్ సాధనే లక్ష్యంగా ప్రతి ఒక్కరూ పోరాడాలని సూచించారు. సంఘ నగర శాఖ గౌరవాధ్యక్షుడు ఎంఎల్‌ఎన్ శ్రీకాంత్ మాట్లాడారు.
  
  ఆందోళన అనంతరం కలెకక్టర్ కె.భాస్కర్‌కు వినతిపత్రం సమర్పించారు. ఈ కార్యక్రమానికి సమితి అధ్యక్షులు బూరుగుపల్లి వేణుగోపాలరావు, ప్రైవేట్ పాఠశాలల యాజమాన్యాల సంఘ నాయకులు జేఎస్ బాలాజీ, వివిధ విద్యాసంస్థల ప్రతినిధులు విజయలక్ష్మి, విజయకుమార్, ఎండీ సలీమా, ప్రగతిరాజు, జి.సత్యనారాయణ, సుబ్బరాజు, నల్లా వేణుగోపాలరావు, సంఘం మహేష్, తదితరులు నాయకత్వం వహించారు. శ్రీశ్రీ, సిద్దార్థ, చైతన్య, సూర్య న్యూజనరేషన్, భాష్యం, నారాయణ, శ్రీభారతి తదితర విద్యాసంస్థల విద్యార్థులు పాల్గొన్నారు.
  


 విశాఖలో తరచూ ఎక్కడో ఓ చోట కొండలపై మంటలు చెలరేగుతున్నాయి. ఆయా ప్రాంతీయులను భయాం దోళనలకు గురిచేస్తున్నాయి. అగ్నిమాపక శాఖ సిబ్బందిని పరుగులు పెట్టిస్తున్నాయి. హుద్‌హుద్ తుఫాన్‌కు చెట్లు నేలకొరిగి బాగా ఎండిపోవడంతో చిన్నపాటి నిప్పురవ్వ పడినా అగ్నికీలలు ఎగిసిపడుతున్నాయి.
 
 సీతమ్మధార కొండపై మంగళవారం రాత్రి ఒక్కసారిగా మంటలు వ్యాపించాయి. ఆ ప్రాంత ప్రజలు భయంతో పరుగులు తీశారు. అగ్నిమాపక శాఖ సిబ్బంది వచ్చినా వెళ్లడానికి దారిలేకపోవడంతో కిందనుంచే పరిస్థితిని గమనించాల్సి వచ్చింది.       
 
 - విశాఖపట్నం


 * తెలంగాణ, ఏపీల మధ్య మరో వివాదం
 * కళాశాలలకు ‘ఫైర్ సేఫ్టీ’ సర్టిఫికెట్ తప్పనిసరి చేసిన హైకోర్టు
 * ఆ సర్టిఫికెట్లు లేకుండానే గుర్తింపు పొడిగించిన తెలంగాణ విద్యాశాఖ..
 * ప్రవేశాల సమయంలో ధ్రువపత్రాలు తీసుకోవాలని డైట్ కన్వీనర్‌కు సూచన
 * దానితో తమకు సంబంధం లేదంటున్న ‘డైట్’ కన్వీనర్
 * ఇలాగైతే కౌన్సెలింగ్ నిర్వహించలేమని స్పష్టీకరణ
 * తెలంగాణ, ఏపీ అధికారుల భిన్నవాదనలు.. ఆందోళనలో 2.19 లక్షల విద్యార్థులు
 
 సాక్షి, హైదరాబాద్: ఇప్పటికే ఎంసెట్, ఇంటర్ పరీక్షల వ్యవహారాల్లో తెలంగాణ, ఆంధ్రప్రదేశ్ రాష్ట్రాల మధ్య పచ్చగడ్డి వేస్తే భగ్గుమంటుండగా... తాజాగా డైట్‌సెట్ కౌన్సెలింగ్ అంశంతో మరో వివాదం మొదలైంది. హైకోర్టు ఆదేశాల మేరకు డైట్ కళాశాలలకు ‘ఫైర్‌సేఫ్టీ’ సర్టిఫికెట్ లేకుంటే కౌన్సెలింగ్ నిర్వహించలేమంటూ ఆంధ్రప్రదేశ్ రాష్ట్ర విద్యాశాఖ పరిధిలో పనిచేస్తున్న డైట్‌సెట్ కన్వీనర్ చేతులెత్తేశారు. అసలు తెలంగాణలోని 253 డైట్‌కళాశాలల్లో ఏ ఒక్క కళాశాలకు కూడా ‘ఫైర్‌సేఫ్టీ’ సర్టిఫికెట్ లేకపోవడంతో ఈ వివాదం రేకెత్తింది.
 
 డైట్‌సెట్ రాతపరీక్ష జరిగి ఆరు నెలలు గడిచినా ఇంకా కౌన్సెలింగ్ షెడ్యూల్‌ను ప్రకటించలేదు. ఇరు రాష్ట్రాల పాఠశాల విద్యాశాఖల నుంచి కళాశాలల జాబితాలు డైట్‌సెట్ కన్వీనర్‌కు అందించడంలో జరుగుతున్న జాప్యమే దీనికి కారణమని బయటకు పేర్కొంటున్నా... కళాశాలలకు అనుమతుల జారీలో లోగుట్టుపై అనుమానాలు వ్యక్తమవుతున్నాయి. రాష్ట్ర విభజన తర్వాత డైట్‌సెట్ కన్వీనర్‌గా వ్యవహరిస్తున్న సురేందర్ రెడ్డిని ఆంధ్రప్రదేశ్ రాష్ట్ర పాఠశాల విద్యాశాఖకు కేటాయించారు.
 
 ఏపీలో 476, తెలంగాణలో 257 కళాశాలలు కలిపి ఇరు రాష్ట్రాల్లో 733 డైట్ కళాశాలలు ఉండగా.. వాటిల్లో మొత్తం 38,850 సీట్లు అందుబాటులో ఉన్నాయి. ఉమ్మడి కౌన్సెలింగ్ ద్వారానే ఇరు రాష్ట్రాల్లోని సీట్లను భర్తీ చేయాల్సి ఉంది. ఈ కాలేజీల్లో సౌకర్యాలపై ఏటా కౌన్సెలింగ్‌కు ముందు రాష్ట్ర విద్యా పరిశోధన శిక్షణా సంస్థ (ఎస్‌సీఈఆర్‌టీ) నేతృత్వంలోని అఫిలియేషన్ కమిటీ తనిఖీలు నిర్వహిస్తుంది. ఈ కమిటీ సిఫారసుల ఆధారంగా ఆయా కాలేజీల గుర్తింపును పొడిగిస్తారు.
 
 రాష్ట్ర విభజన అనంతరం తాజాగా ఏపీ ప్రభుత్వం ఆ రాష్ట్రంలోని 413 కళాశాలల గుర్తింపును పునరుద్ధరిస్తూ కొద్దిరోజుల కింద ఉత్తర్వులు జారీ చేసింది. ఈ కళాశాలల జాబితా ఇంకా డైట్ కన్వీనర్‌కు అందకపోయినా... వీటిలో దాదాపు అన్ని కాలేజీలకూ ‘ఫైర్ సేఫ్టీ’ సర్టిఫికెట్ ఉందని సంబంధిత అధికారులు చెబుతున్నారు. ఈ నేపథ్యంలో... తెలంగాణలోని 253 కళాశాలల గుర్తింపును పునరుద్ధరించిన ఇక్కడి పాఠశాల విద్యాశాఖ... ఆ కళాశాలల జాబితాను శని వారం సాయంత్రం డైట్ కన్వీనర్‌కు పంపించింది. అయితే అందులో ఏ ఒక్క కళాశాలకు ‘ఫైర్ సేఫ్టీ’ సర్టిఫికెట్ లేదు.
 
 విద్యార్థుల భద్రత దృష్ట్యా ఫైర్ సేఫ్టీ సర్టిఫికెట్ ఉంటేనే కళాశాలలకు అనుమతులు జారీ చేయాలని హైకోర్టు గతంలో ఉత్తర్వులు జారీ చేసింది. ఈ ఆదేశాల నేపథ్యంలో కౌన్సెలింగ్ సమయంలోనే ఆయా కళాశాలల యాజమాన్యాల నుంచి ‘ఫైర్ సేఫ్టీ’ సర్టిఫికెట్ తీసుకుని ప్రవేశాలు జరపాలని తెలంగాణ విద్యా శాఖ డైట్‌సెట్ కన్వీనర్‌కు సూచించింది. కానీ దీనిపై డైట్‌సెట్ కన్వీనర్ సురేందర్‌రెడ్డి అభ్యంతరం వ్యక్తం చేశారు. ఇలాగైతే కౌన్సెలింగ్ నిర్వహించలేమని స్పష్టం చేశారు.
 
 ఎవరి వాదన వారిదే!
 ‘ఫైర్ సేఫ్టీ’ వివాదంపై తెలంగాణ ఎస్‌సీఈఆర్‌టీ డెరైక్టర్ జగన్నాథరెడ్డి, డైట్‌సెట్ కన్వీనర్ సురేందర్‌రెడ్డి భిన్న వాదనలు వినిపిస్తున్నారు. అగ్నిమాపకశాఖ ఎన్‌వోసీ లేకపోయినా కళాశాలలకు గుర్తింపు పొడిగింపుతో తమకు సంబంధం లేదని, బెంగళూరులోని జాతీయ ఉపాధ్యాయ శిక్షణ సంస్థ (ఎన్‌సీటీఈ) ఈ అఫిలియేషన్లు జారీ చేసిందని జగన్నాథరెడ్డి చెబుతున్నారు. కానీ ఈ వాదనను డైట్‌సెట్ కన్వీనర్ సురేందర్‌రెడ్డి తోసిపుచ్చారు. కొత్త డైట్ కళాశాలలు ప్రారంభించడానికే ఎన్‌సీటీఈ అనుమతులు జారీ చేస్తుందని.. మరుసటి ఏడాది నుంచి గుర్తింపు పునరుద్ధరణను ఆయా రాష్ట్రాల విద్యాశాఖల నేతృత్వంలోని అఫిలియేషన్ కమిటీలే చూడాల్సి ఉంటుందని పేర్కొంటున్నారు. పరీక్షల నిర్వహణ, కౌన్సెలింగ్ జరపడం వరకే తమ బాధ్యత అని... కళాశాలల అనుమతులకు సంబంధించిన అంశాలతో తమకు సంబంధం లేదన్నారు. ఈ వ్యవహారంలో న్యాయ నిపుణుల సలహా తీసుకుని తెలంగాణ విద్యాశాఖకు తెలియజేస్తామని సురేందర్‌రెడ్డి చెప్పారు.
 
 విద్యార్థుల ఎదురుచూపులు..
 డైట్‌సెట్‌కు ఏప్రిల్ 29న ప్రకటన జారీకాగా జూన్ 29న పరీక్ష నిర్వహించారు. దాదాపు 3.47 లక్షల మంది అభ్యర్థులు ఈ పరీక్ష రాయగా.. జూలై 1న ప్రకటించిన ఫలితాల్లో 2.19 లక్షల మంది అభ్యర్థులు ఉత్తీర్ణత సాధించారు. వీరి ర్యాంకులను సైతం జూలై 31వ తేదీనే ప్రకటించారు. అయితే.. ఉమ్మడి రాష్ట్రంలో కళాశాలల గుర్తింపు పునరుద్ధరణ విషయంలో ఉన్నతస్థాయి వర్గాలు ప్రైవేటు కళాశాలల యాజమాన్యాలతో బేరసారాలు నడిపినట్లు ఆరోపణలు వచ్చాయి. అందువల్లే గుర్తింపు పునరుద్ధరణ ప్రక్రియను సాగదీస్తున్నారనే విమర్శలూ వచ్చాయి.
 
 కానీ, రాష్ట్ర విభజన జరిగి ఇరు రాష్ట్రాల్లో వేర్వేరు ప్రభుత్వాలు ఏర్పడినా కళాశాలలకు గుర్తింపు జారీ ప్రక్రియలో మాత్రం మార్పు రాలేదు. ఇరు రాష్ట్రాల విద్యాశాఖలు తమ రాష్ట్రాల్లోని కళాశాలల గుర్తింపు పొడిగింపు ప్రక్రియను సాగదీయడంతో ఇప్పటి వరకు కౌన్సెలింగ్ జరగలేదు. దీంతో రెండు లక్షల మందికిపైగా విద్యార్థులు ఆందోళన చెందుతున్నారు. వీరిలో చాలా మంది విద్యార్థులు డిగ్రీ కోర్సుల్లో చేరకుండా డైట్ ప్రవేశాల కోసమే ఎదురుచూస్తున్నారు.


  మహేశ్వరం: మండలంలో పలు అభివృద్ధి పనులు ముందుకు సాగడం లేదు. మాజీ హోంమంత్రి సబితారెడ్డి గతంలో మంజూరు చేసిన పలు అభివృద్ధి పనులు నిధులు కొరత, స్థల సేకరణలో జాప్యంతో ముందుకు సాగడం లేదు. ప్రధానంగా  2012లో ఇందిరమ్మ బాట కార్యక్రమంలో అప్పటి సీఎం  కిరణ్‌కుమార్‌రెడ్డి రూ.8 కోట్ల అంచనా వ్యయంతో మండల కేంద్రంలో  100 పడకల ఆస్పత్రికి శంకుస్థాపన చేశారు.
 
 అలాగే మండల కేంద్రంలో రూ.6 కోట్ల నిధులతో ఆర్టీసీ డిపో, రూ.76 లక్షలతో ప్రభుత్వ జూనియర్ కళాశాల, రూ.55 లక్షలతో ఫైర్‌స్టేషన్, రూ.65 లక్షలతో తహసీల్దార్ కార్యాలయానికి నూతన భవనం తదితర అభివృద్ధి పనులకు శంకుస్థాపనలు చేశారు. ఈ పనులకు గతంలో కొన్ని నిధులు మంజూరయ్యాయి. అయితే 2014లో ప్రభుత్వం మారినప్పటినుంచి వీటికి నిధులు మంజూరు కాకపోవడంతో అభివృద్ధి పనులన్ని అర్ధంతరంగా ఆగిపోయాయి. ఈ అభివృద్ధి పనులు పూర్తయితే తమ కష్టాలు తీరుతాయని భావించిన మండల ప్రజలు ప్రస్తుత పరిస్థితులతో తీవ్ర నిరాశకు గురవుతున్నారు.
  
  బంక్ లేక ఆగిన డిపో పనులు
  మండల కేంద్రంలోని  కేసీ తండా సమీపంలో సర్వే నెంబరు 306లో మాజీ హోంమంత్రి సబితారెడ్డి  అప్పట్లో రూ.6 కోట్ల నిధులతో ఆర్టీసీ బస్ డిపో పనులకు శంకుస్థాపన చేశారు. పనులు 90 శాతం పూర్తయ్యాయి. అయితే డి పోలో డీజిల్ ట్యాంకు పనులు అసంపూర్తిగా ఉ న్నాయి. దీంతో ఇక్కడినుంచి బస్సుల రాకపోకలు నిలిచిపోయాయి. ఇటీవల రాష్ట్ర, రోడ్డు రవాణాశాఖ మంత్రి మహేందర్‌రెడ్డి ఈ డిపోను పరిశీలించారు. 2015లో డిపో నుంచి బస్సులు నడిపించేలా చర్యలు తీసుకుంటానన్నారు.
 
  అద్దె భవనంలో అగ్నిమాపక కేంద్రం
  సబితారెడ్డి రూ.55ల క్షలు మంజూరు చేయించి  మండలకేంద్రంలో ఫైర్ స్టేషన్‌కు అప్పట్లో శిలాఫలకం వేశారు. స్థలం ఉన్నా  ఉమ్మడి ఆంధ్రప్రదేశ్ ప్రభుత్వంలో విడుదలైన నిధులు తెలంగాణ ప్రభుత్వంలో నిలిచిపోయాయయి. ప్రస్తుతం ఎంపీడీఓ కార్యాలయం ముందు అద్దె భవనంలో ఫైర్ స్టేషన్ కొనసాగుతోంది.
  
 నిర్మాణానికి నోచుకొని జూనియర్ కళాశాల
  మండల కేంద్రంలోని భారత్ పెట్రోల్‌బంకు పక్కన అప్పటి కేంద్రమంత్రి ఎస్. జైపాల్‌రెడ్డి,సబితారెడ్డిలు కలిసి  రూ.76 లక్షల అంచనా వ్యయంతో ప్రభుత్వ జూనియర్ కళాశాల నిర్మాణానికి శంకుస్థాపన చేశారు. స్థలం ఉన్నా కొత్త ప్రభుత్వంలో నిధులు నిలిచిపోయాయి. నిధులు రాగానే పనులు ప్రారంభిస్తామని అధికారులు చెబుతున్నారు. ప్రస్తుతం ప్రభుత్వ పాఠశాలలో  జూనియర్ కళాశాల కొనసాగుతోంది.
  
 100 పడకల ఆస్పత్రికి స్థలం కొరత
  మండల కేంద్రంలోని పాత ప్రభుత్వ ఆస్పత్రి ఆవరణలో రూ.8 కోట్ల అంచనా వ్యయంతో అప్పటి సీఎం ఎన్. కిరణ్‌కుమార్‌రెడ్డి ఇందిరమ్మబాటకు వచ్చి 100 పడకల ఆస్పత్రి పనులకు శంకుస్థాపన చేశారు.  ప నులకు టెండర్ పక్రియ పూర్తయింది. స్థలం లేదని అధికారులు పనులను నిలిపివేశారు. ప్రస్తు తం స్థలం చూపిస్తే ఆస్పత్రి పనులను ప్రారంభిస్తామని అధికారులు చెబుతున్నారు.