సాక్షి, హైదరాబాద్‌: చెరువులు, కుంటల పూర్తి నీటిమట్టం స్థాయి (ఎఫ్‌టీఎల్‌) నుంచి 200 మీటర్ల లోపు ఉన్న భూముల సర్వే నంబర్ల వివరాలతోపాటు ప్రభుత్వ భూములకు సమీపంలో ఉన్న సర్వే నంబర్లను సెంటర్‌ ఫర్‌ గుడ్‌ గవర్నెన్స్‌కు పంపాలని వివిధ శాఖలు, సంస్థల అధిపతులను ప్రభుత్వం ఆదేశించింది. మున్సిపల్‌ కమిషనర్లు, పట్టణాభివృద్ధి సంస్థల వీసీలు, హెచ్‌ఎండీఏ, జీహెచ్‌ఎంసీ కమిషనర్లు, డీటీసీపీలు తమ పరిధిలోని నీటి వనరుల ఎఫ్‌టీఎల్‌ నుంచి 200 మీటర్ల లోపు ఉన్న సర్వే నంబర్లను పంపించాల్సి ఉంటుందని పేర్కొంది. ప్రభుత్వ భూములకు సమీపంలో ఉన్న భూముల సర్వే నంబర్లలో ఉన్న ఎల్‌ఆర్‌ఎస్‌ దరఖాస్తులను నీటిపారుదల, రెవెన్యూ శాఖల పరిశీలన, క్షేత్రస్థాయి తనిఖీకి పంపుతారు. డీటీసీపీ ఈ ప్రక్రియను సమన్వయం చేసుకోవాల్సి ఉంటుంది. ఈ మేరకు ప్రభుత్వం తాజాగా ముసాయిదా మార్గదర్శకాలను విడుదల చేసింది. ఇదీ ప్రక్రియ.. ⇒ ఎల్‌ఆర్‌ఎస్‌ దరఖాస్తుల పరిశీలన అనంతరం రిజిస్ట్రేషన్‌ శాఖ ద్వారా ఫీజుల చెల్లింపు ప్రక్రియ జరపాలని నిర్ణయించిన ప్రభుత్వం, ఎల్‌ఆర్‌ఎస్‌ పోర్టల్‌తో రిజిస్ట్రేషన్‌ల శాఖ సర్వర్‌ను అనుసంధానం చేస్తోంది. ఈ అనుసంధాన ప్రక్రియను పర్యవేక్షిస్తున్న సీజీజీకి సర్వే నంబర్ల వివరాలను అందిస్తే, ఆన్‌లైన్‌లో వాటిని అందుబాటులో ఉంచనుంది. తదనుగుణంగా ఎల్‌ఆర్‌ఎస్‌ దరఖాస్తులను మున్సిపల్‌ లేదా పంచాయతీ రాజ్‌ , నీటిపారుదల, రెవెన్యూ శాఖలు పరిశీలించి నిర్ణయం తీసుకుంటాయి. ⇒ ఆ తర్వాత ఆన్‌లైన్‌లోనే ఎల్‌ఆర్‌ఎస్‌ ఫీజు నిర్ణయించబడుతుంది. ⇒ ఒకవేళ దరఖాస్తు తిరస్కరణకు గురైతే, గతంలో చెల్లించిన మొత్తం ఫీజు నుంచి 10 శాతం ప్రాసెసింగ్‌ చార్జీలను మినహాయించుకుంటారు. ⇒ వెంచర్‌లోని 10 శాతం ప్లాట్లను 2020 ఆగస్టు 26కు ముందు విక్రయించి ఉంటే, మిగతా ప్లాట్ల క్రమబధ్ధీకరణ కోసం.. విక్రయించిన ప్లాట్ల వివరాలను ఈసీ రూపంలో సమర్పించాల్సి ఉంటుంది. ⇒ లేఅవుట్‌ క్రమబధ్ధీకరణ చార్జీలు, ఓపెన్‌ స్పేస్‌ చార్జీలు చెల్లించిన తర్వాత తాత్కాలిక ఫీజు నిర్ణయమవుతుందని ప్రభుత్వం తెలిపింది. ⇒ సబ్‌–రిజి్రస్టార్‌ సంబంధిత ప్లాట్‌ను నమోదు చేసి, ఎల్‌ఆర్‌ఎస్‌ దరఖాస్తు వివరాలు, సేకరించిన చార్జీలను ఎల్‌ఆర్‌ఎస్‌ పోర్టల్‌కు ప్రాసెసింగ్‌ కోసం పంపితే క్రమబధ్ధీకరణ చార్జీలు ఆన్‌లైన్‌లోనే నిర్ణయమవుతాయి.

సాక్షి ప్రతినిధి, బాపట్ల: ఇసుక, బుసక, గ్రావెల్, గ్రానైట్‌తోపాటు పచ్చ నేతల కన్ను ఇప్పుడు ప్రభుత్వ భూములపై పడింది. బాపట్ల జిల్లా చీరాల నియోజకవర్గం వేటపాలెం మండలంలోని డ్రైనేజీ (ప్రభుత్వ) భూములపై పచ్చనేతతోపాటు ఒక మాజీ ఎమ్మెల్యే అనుచరుడు, ఇన్నాళ్లూ ఆ భూములను కాపుకాసిన విశ్రాంత అధికారి కన్నూ పడింది. తలో ఇంత పంచుకున్నారు. ఎటువంటి పట్టాలు పొందే అవకాశం లేని ఆ ప్రభుత్వ భూములను ఏకంగా అమ్మకానికి పెట్టారు. అగ్రిమెంట్ల మీదనే ఎకరం రూ. 4 నుంచి 5 లక్షలకు అమ్మారు. వీటిలో ఎక్కువ భూములను మాజీ ఎమ్మెల్యే అనుచరుడు దొరకబుచ్చుకున్నారు. ఆ భూముల్లో రొయ్యల చెరువుల సాగుకు సిద్ధమయ్యారు. వేటపాలెం మండలం సంతరావూరు బ్రిడ్జి సమీపంలో ప్రధాన రహదారికి పక్కనే రొంపేరు డ్రైన్, ముసలమ్మ మురుగు నీటి కాలువల మధ్య 50 ఎకరాల ప్రభుత్వ భూములు ఉన్నాయి. డ్రైన్స్‌ నిర్మాణంలో భాగంగా వాటిని పూర్వం ప్రభుత్వం కేటాయించినట్లు స్థానికులు చెబుతున్నారు. పదేళ్ల క్రితం వరకు వేటపాలెం ప్రాంతంలో ఉన్న కుమ్మరులు (శాలివాహనులు) కుండలు, ఇతరత్రామట్టి పాత్రలు తయారు చేసేందుకు ఆ భూముల్లో ఉన్న బంకమట్టిని తీసుకువెళ్లేవారు. అప్పట్లో ఆ భూముల ఆక్రమణకు కొందరు నేతలు ప్రయత్నించగా కుమ్మరులు అడ్డుకున్నారు. ఆ తర్వాత మట్టి పాత్రలకు డిమాండ్‌ పడిపోయి తయారీ నిలిచి పోవడంతో కుమ్మరులు వాటిని వదిలేశారు. దీంతో ఆ భూములపై అక్రమార్కుల కన్నుపడింది.వాలిపోయిన పచ్చ మూకలుఇప్పుడు వాటిని పరిరక్షించే వాళ్లు లేకపోవడంతో పచ్చ మూకలు వాలిపోయాయి. చీరాల ప్రాంతానికి చెందిన టీడీపీ నేత అనుచరుడు, మాజీ ఎమ్మెల్యే అనుచరుడు, మరికొందరు ఆ భూములను ఆక్రమించారు. 10 మంది కలిసి 15 ఎకరాల్లో వరి, జొన్న పంటలు సాగు చేసేవారు. ఇంకొందరు కొన్ని భూములు వారివంటూ హద్దులు గీసుకున్నారు. వేటపాలేనికి చెందిన డ్రైనేజీ విభాగం విశ్రాంత అధికారి సైతం కొంత మేర ఆక్రమించారు. వాస్తవానికి డ్రైనేజీ, డొంక, శ్మశాన తదితర పోరంబోకు భూములకు ప్రభుత్వం పట్టాలు ఇవ్వదు. ఇక్కడ కూడా ఎవరికీ పట్టాలు ఇవ్వలేదని సమాచారం. కానీ టీడీపీ నేతల అనుచరులు ఇప్పటికే సుమారు 18 ఎకరాలు ఆక్రమించడంతో పాటు, అప్పటికే ఆక్రమించిన వారి వద్ద భూములను కూడా ఎకరం రూ. 4 నుంచి 5 లక్షలకు కొన్నారు. ఇలా ఇప్పటివరకూ 30 ఎకరాలకుపైగా డ్రైనేజీ భూములు విక్రయాలు జరిగినట్లు సమాచారం. డ్రైనేజీ విభాగం రిటైర్డ్‌ అధికారి సైతం కొన్ని భూములను అమ్మకానికి పెట్టినట్లు సమాచారం. వీటన్నింటినీ మాజీ ఎమ్మెల్యే అనుచరుడొకరు కొంటున్నారు. ఈ భూముల ఆక్రమణ, అమ్మకాలను అడ్డుకోవాల్సిన డ్రైనేజీ విభాగం అధికారులు కూడా కబ్జాదారులతో కుమ్మక్కైపోయారన్న ఆరోపణలున్నాయి. ఈ వ్యవహారంలో పెద్ద ఎత్తున ముడుపులు చేతులు మారి ఉంటాయని ఈ ప్రాంతంలో పెద్ద ఎత్తున చర్చ జరుగుతోంది. అయితే, డ్రైనేజీ భూములను కొందరు సాగు చేసుకుంటున్న విషయం తన దృష్టిలో ఉందని, ఆక్రమణలు విషయం తన దృష్టికి రాలేదని మురుగునీటిపారుదల శాఖ డీఈ వెంకట సుబ్బారావు చెప్పారు. విచారణ జరిపి క్రయవిక్రయాలు జరిగి ఉంటే చర్యలు తీసుకుంటామని చెప్పారు.

సాక్షి, హైదరాబాద్‌: కేంద్ర ప్రభుత్వ రంగ సంస్థల (పీఎస్‌యూ)లకు గతంలో కేటాయించిన భూము ల్లో.. ఏళ్ల తరబడి నిరుపయోగంగా ఉన్నవాటిని తిరిగి ఇవ్వాలని రాష్ట్రప్రభుత్వం కోరుతోంది. మొత్తంగా 10 వేల ఎకరాలకుపైగానే నిరుపయోగంగా ఉన్నాయని ఇప్పటికే గుర్తించింది. ప్రధాన ప్రాంతాల్లో ఉన్న ఈ భూములను ప్రభుత్వ ధర తీసుకుని తమకు అప్పగించాలని కోరుతోంది. ఈ మేరకు కేంద్ర ప్రభుత్వంతో సంప్రదింపులు ప్రారంభమయ్యాయని.. ఈ మేరకు రాష్ట్ర ప్రభుత్వం లేఖ రాసిందని రెవెన్యూ వర్గాల సమాచారం. మిధాని, డీఆర్‌డీవో, బీడీఎల్, ఆర్డినెన్స్‌ ఫ్యాక్టరీ, బీహెచ్‌ఈఎల్, హెచ్‌ఏ ఎల్, ఈసీఐఎల్, డీఆర్‌డీఎల్‌ వంటి సంస్థల భూములు ఈ జాబితాలో ఉన్నట్టు తెలిసింది. బీజేపీ అధికారంలో ఉన్న హరియాణా రాష్ట్రంలో కూడా ఇలాంటి డిమాండ్‌ ఉందని, దీంతో ఈ డిమాండ్ల పట్ల కేంద్రం సానుకూలంగా స్పందించే అవకాశముందని రెవెన్యూ వర్గాలు భావిస్తున్నాయి. దశాబ్దాల కింద కేటాయింపు.. రాష్ట్రంలో వివిధ ప్రభుత్వ రంగ సంస్థల ఏర్పాటు కోసం దశాబ్దాల క్రితం పెద్ద సంఖ్యలో రాష్ట్ర ప్రభుత్వ భూములను కేటాయించారు. కేంద్ర, రాష్ట్ర ప్రభుత్వాల పరస్పర అంగీకారంతోపాటు నిబంధనలకు అనుగుణంగా అప్పగించిన ఈ భూములను ఆయా సంస్థలు తమ అవసరాల కోసం వినియోగించుకుంటున్నాయి. అయితే ఆ సంస్థలు ఏ మేరకు భూములను వినియోగించుకుంటున్నాయన్న దానిపై రాష్ట్ర రెవెన్యూ శాఖ ఇటీవల వివరాలు సేకరించింది.రాష్ట్రంలోని 11 కేంద్ర ప్రభుత్వ రంగ సంస్థలకు మొత్తం 8,900 ఎకరాలు కేటాయించగా.. అందులో 2,300 ఎకరాలు మాత్రమే ఉపయోగంలో ఉన్నాయని, మిగతా భూములను నిరుపయోగంగా వదిలేశారని తేలింది. వీటితోపాటు ఇప్పటికే మూతపడిన సిమెంట్‌ కార్పొరేషన్, డ్రగ్స్‌ లిమిటెడ్, హెచ్‌ఎంటీల పరిధిలో మరో 3,300 ఎకరాల వరకు భూమి ఉందని రెవెన్యూ శాఖ గుర్తించింది. రూ.45 వేల కోట్ల విలువతో.. హైదరాబాద్‌ నగరానికి శివార్లలో, ప్రధాన ప్రాంతాల్లో ఉన్న ఈ నిరుపయోగ భూముల విలువ ప్రస్తుతం బహిరంగ మార్కెట్‌ ప్రకారం రూ.45 వేల కోట్ల వరకు ఉంటుందని రెవెన్యూ శాఖ అంచనా వేసింది. ఈ భూములను ప్రభుత్వ ధరకు తిరిగి తీసుకోవడం ద్వారా... పరిశ్రమల ఏర్పాటు, వాణిజ్య అవసరాలకు, వేలం వేసి నిధుల సమీకరణ చేసుకోవడానికి ఉపయోగపడతాయని ప్రభుత్వానికి ఇచి్చన నివేదికలో పేర్కొన్నట్టు తెలిసింది.ఆ నివేదిక ప్రకారం... ప్రభుత్వ ధరతో ఆ భూములను తిరిగి తీసుకోవాలంటే రూ.8 వేల కోట్ల వరకు అవసరమని అంచనా వేసినట్టు సమాచారం. దీనిపై కేంద్ర ప్రభుత్వ శాఖలతో సంప్రదింపులు జరపాలని సీఎం రేవంత్‌రెడ్డి అధికారులకు సూచించారని, ఈ మేరకు రాష్ట్ర ప్రభుత్వం అధికారికంగా సంప్రదింపుల ప్రక్రియ ప్రారంభించిందని రెవెన్యూ వర్గాలు చెప్తున్నాయి. గత ప్రభుత్వ హయాంలోనే కోరినా.. కేంద్ర ప్రభుత్వ సంస్థలకు చెందిన నిరుపయోగ భూములను ఇవ్వాలని గత బీఆర్‌ఎస్‌ సర్కారు కూడా కేంద్రాన్ని కోరింది. రాష్ట్ర పరిశ్రమల శాఖ మంత్రి హోదాలో బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ 2022లో కేంద్రానికి లేఖ రాశారు. పెట్టుబడుల ఉపసంహరణలో భాగంగా కేంద్ర పీఎస్‌యూల భూములను ప్రైవేటు వ్యక్తులకు అమ్మవద్దని... రాష్ట్ర ప్రభుత్వానికి ఇవ్వడం ద్వారా ఆర్థికాభివృద్ధికి సహకరించాలని కోరారు. కానీ కేంద్రం అప్పట్లో సానుకూలంగా స్పందించలేదు. ఇప్పుడు ఎలా స్పందిస్తున్నదని తేలాల్సి ఉంది. ఒకవేళ కేంద్ర ప్రభుత్వం సానుకూలంగా స్పందిస్తే రాష్ట్ర ప్రభుత్వానికి కాసుల పంట పండే అవకాశాలు ఉన్నాయని రెవెన్యూ వర్గాలు పేర్కొంటున్నాయి.

న్యూఢిల్లీ: కొన్ని రాష్ట్రాల్లో అమలవుతున్న బుల్డోజర్‌ న్యాయానికి సుప్రీంకోర్టు చెక్‌ పెట్టింది. సుప్రీంకోర్టు అనుమతి లేకుండా దేశవ్యాప్తంగా ఎలాంటి కూలి్చవేతలు చేపట్టవద్దని ఆదేశాలు జారీచేసింది. తదుపరి విచారణ జరిగే అక్టోబర్‌ ఒకటో తేదీదాకా నిందితులతో సహా ఎవరి ఇళ్లనూ కూల్చవద్దని ఆదేశించింది. అయితే రోడ్లు, ఫుట్‌పాత్‌లు, రైల్వే స్థలాలు, తదితర ప్రభుత్వ స్థలాల్లో ఆక్రమణలను నిరభ్యంతరంగా తొలగించవచ్చని తెలిపింది. తమ ఆదేశాలు ప్రభుత్వ స్థలాల్లోని అక్రమ నిర్మాణాలకు వర్తించవని జస్టిస్‌ బి.ఆర్‌.గవాయి, జస్టిస్‌ కె.వి.విశ్వనాథన్‌లతో కూడిన ధర్మాసనం స్పష్టత ఇచి్చంది. చట్టవిరుద్ధంగా ఒక్క కూలి్చవేత చోటుచేసుకున్నా.. అది రాజ్యాంగ స్ఫూర్తికి విరుద్ధమని వ్యాఖ్యానించింది. తమ అనుమతి లేకుండా ఎలాంటి కూలి్చవేతలు చేపట్టవద్దనే ధర్మాసనం ఆదేశాలపై సొలిసిటర్‌ జనరల్‌ తుషార్‌ మెహతా అభ్యంతరం వ్యక్తం చేశారు. చట్టబద్ధ సంస్థల చేతులను ఇలా కట్టేయలేరని అన్నారు. అయినా ధర్మాసనం తమ ఆదేశాలపై వెనక్కి తగ్గలేదు. కూల్చివేతలు రెండు వారాలు ఆపితే ముంచుకొచ్చే ప్రమాదమేమీ లేదని వ్యాఖ్యానించింది. 15 రోజుల్లో ఏమీ జరిగిపోదని పేర్కొంది. కార్యనిర్వాహక వర్గం న్యాయమూర్తి పాత్ర పోషించలేదని స్పష్టం చేసింది. దేశవ్యాప్తంగా అధికారవర్గాలను కూలి్చవేతలు ఆపివేయమని తాను కోరలేనని తుషార్‌ మెహతా నివేదించగా.. రాజ్యాంగంలోని ఆరి్టకల్‌ 142 కింద సంక్రమించిన ప్రత్యేక అధికారాల మేరకు.. కూలి్చవేతలు నిలిపివేయమని ఆదేశాలు జారీచేశామని తెలిపింది. పలు రాష్ట్రాల్లో క్రిమినల్‌ కేసుల్లో నిందితులుగా ఉన్న వారి ఇళ్లను, ఇతర నిర్మాణాలను కూలి్చవేస్తున్నారని దాఖలైన పిటిషన్లను సుప్రీంకోర్టు మంగళవారం విచారించింది. కూలి్చవేతలపై తప్పుడు అభిప్రాయాన్ని వ్యాప్తిలోకి తెచ్చారని ఉత్తరప్రదేశ్‌ ప్రభుత్వం తరఫున హాజరైన సొలిసిటర్‌ జనరల్‌ తుషార్‌ మెహతా అన్నారు. ‘తాను ఒక నిర్దిష్ట మతానికి చెందినందువల్లే తన నిర్మాణాలను కూలి్చవేశారని ఒకరు పిటిషన్‌ వేశారు. చట్టపరమైన ప్రక్రియను పాటించకుండా కూల్చివేతకు దిగిన ఒక్క సంఘటనను ధర్మాసనం దృష్టికి తెమ్మనండి. ప్రభావిత పక్షాలేవీ కోర్టును ఆశ్రయించలేదు. ఎందుకంటే తమకు నోటీసులు అందాయని, తమవి అక్రమ కట్టడాలని వారికి తెలుసు’ అని తుషార్‌ మెహతా వాదించారు. బుల్డోజర్లు ఆగవని ఎలా అంటారు? సెపె్టంబర్‌ 2న విచారణ సందర్భంగా కూలి్చవేతలను నిలిపివేయాలని, ఈ అంశంలో మార్గదర్శకాలు జారీచేస్తామని సుప్రీంకోర్టు చెప్పినా.. కొందరు ధిక్కార ప్రకటనలు చేయడం పట్ల జస్టిస్‌ గవాయి, జస్టిస్‌ విశ్వనాథన్‌ల ధర్మాసనం అసంతృప్తి వ్యక్తం చేసింది. ‘అయినా బుల్డోజర్లు ఆగవని, స్టీరింగ్‌ ఎవరి చేతుల్లో ఉందనే దాన్ని బట్టే ఇది నిర్ణయమవుతుందని ప్రకటనలు చేశారు. వీటిపై ఇంతకంటే ఎక్కువగా మాట్లాడకుండా సంయమనం పాటిస్తున్నాం. కూలి్చవేతలపై మార్గదర్శకాలు రూపుదిద్దుకున్నాక.. బుల్డోజర్ల సంస్కృతిని గొప్పగా, ఘనతగా చెప్పుకోవడాన్ని ఎలా నిరోధించాలనే విషయంలో మీరు మాకు సహాయపడండి’ అని తుషార్‌ మెహతాకు సూచించింది. నిందితుడు అయినంత మాత్రాన ఇళ్లు కూల్చేస్తారా? ఒకవేళ అతను దోషిగా తేలినా సరే.. చట్టపరమైన ప్రక్రియను పాటించకుండా కూలి్చవేతలకు దిగలేరు. ఇదెక్కడి బుల్డోజర్‌ న్యాయమని సెపె్టంబర్‌ 2న విచారణ సందర్భంగా ధర్మాసనం వ్యాఖ్యానించిన విషయం తెలిసిందే.

సాక్షి ప్రతినిధి, వరంగల్‌: చెరువులు, నాలాలు, ప్రభుత్వ భూములను ఆక్రమించే వారిపై ప్రభుత్వ వైఖరి ఒకేలా ఉంటుందని, ఆక్రమణదారులు ఎంతటివారైనా వదిలిపెట్టేది లేదని రెవెన్యూ, సమాచార పౌర సంబంధాల శాఖమంత్రి పొంగులేటి శ్రీనివాస్‌రెడ్డి స్పష్టంచేశారు. హైదరాబాద్‌ తర్వాత రెండో అతిపెద్ద నగరమైన వరంగల్‌ సమగ్రాభివృద్ధిపై సీఎం రేవంత్‌రెడ్డి ప్రత్యేక దృష్టిని సారించారని, హైదరాబాద్‌ తరహాలో అభివృద్ధి చేయడం కోసం అందరూ ప్రభుత్వానికి సహకరించాలని కోరారు. మంగళవారం హనుమకొండ జిల్లా కలెక్టరేట్‌లోని కాన్ఫరెన్స్‌ హాల్‌లో గ్రేటర్‌ వరంగల్‌లో అభివృద్ధి పనులపై సమీక్షా సమావేశం నిర్వహించారు.పోచమ్మకుంట మోడల్‌ గ్రేవ్‌ యార్డ్, గ్రేటర్‌ వరంగల్‌ పరిధిలోని పార్కు స్థలాల ఆక్రమణ, రీజనల్‌ సైన్స్‌ సెంటర్‌ భూమి ఆక్రమణ, నాలాల ఆక్రమణలపై మంత్రి ఆరా తీశారు. గ్రేటర్‌ వరంగల్‌ మున్సిపల్‌ కార్పొరేషన్‌ ఆధ్వర్యంలో చేపట్టిన పనులు, వాటి పురోగతిపైనా కలెక్టర్లు, అధికారులను అడిగి తెలుసుకున్నారు. అనంతరం పొంగులేటి మాట్లాడుతూ వరంగల్‌ నగర అభివృద్ధికి నిధులను కేటాయిస్తున్నామని, స్మార్ట్‌ సిటీ నిధులను కూడా విడుదలయ్యేందుకు కృషి చేస్తామన్నారు. నాలాలపై ఎలాంటి నిర్మాణాలున్నా.. ఉపేక్షించవద్దని, నాలాలపై నిరుపేదలున్నట్లయితే వారికి సరైన చోట నివాస సదుపాయం కలి్పంచాలని సూచించారు.వరంగల్‌ ఎంజీఎంలో కొందరు వైద్యులు పేషెంట్లకు మందులివ్వకుండా ప్రైవేట్‌ మెడికల్‌ షాపులకు పంపుతున్నారని ఆగ్రహం వ్యక్తంచేశారు. అక్రమ నిర్మాణాలను పట్టించుకోకుండా అనుమతులు ఇస్తుండటం పట్ల మున్సిపల్‌ అధికారులపైనా మంత్రి సీరియస్‌ అయ్యారు. పాత్రికేయులకు ఇంటి స్థలాల కేటాయింపు విషయంలో తమ ప్రభుత్వం హామీ ఇచి్చందని, అర్హులైన జర్నలిస్టులందరికీ తప్పకుండా ఇంటి స్థలాలను ఇస్తామని చెప్పారు.వరంగల్‌ పశి్చమ ఎమ్మెల్యే నాయిని రాజేందర్‌రెడ్డి మాట్లాడుతూ నగరంలో పార్కుస్థలాలు చాలాచోట్ల కబ్జాకు గురయ్యా యని, ఇక్కడ కూడా వాడ్రా ఏర్పాటు చేసి ప్రత్యేక అధికారిని నియమించాలని కోరారు. సమావేశంలో పర్యావరణ, అటవీశాఖ మంత్రి కొండా సురేఖ, నగర మేయర్‌ గుండు సుధారాణి, వరంగల్‌ ఎంపీ డాక్టర్‌ కడియం కావ్య, ఎమ్మెల్సీ బస్వరాజు సారయ్య, కుడా చైర్మన్‌ ఇనగాల వెంకట్రాంరెడ్డి, హనుమకొండ, వరంగల్‌ జిల్లాల కలెక్టర్లు ప్రావీణ్య, సత్య శారద తదితరులు పాల్గొన్నారు.

సాక్షి, హైదరాబాద్‌: పరిశ్రమల భూములను తాకట్టు పెట్టడం ద్వారా మూలధనం, ఇతర అవసరాల కోసం రుణ సేకరణ చేయాలనుకున్న రాష్ట్ర ప్రభుత్వ ప్రయత్నాలు కొలిక్కి రావడం లేదు. రుణ మార్కెట్‌ నుంచి రూ.10 వేల కోట్లు అప్పులు తెచ్చేందుకు రిజర్వు బ్యాంక్‌ ఆఫ్‌ ఇండియా నిబంధనలు, ఎఫ్‌ఆర్‌బీఎం పరిమితులు అడ్డుపడుతుండటంతో, అవాంతరాలను అధిగమించడంపై సర్కారు తర్జనభర్జన పడుతోంది. రుణ సేకరణ కోసం హైదరాబాద్‌లోని అత్యంత విలువైన సుమారు 400 ఎకరాల భూములను ప్రైవేట్‌ ఫైనాన్స్‌ సంస్థలకు తాకట్టు పెట్టాలని గతంలో నిర్ణయించారు. కోకాపేట, రాయదుర్గంలో ఉన్న ఈ భూముల విలువ బహిరంగ మార్కెట్లో రూ.20 వేల కోట్లుగా అంచనా వేశారు. అయితే గతంలో ప్రభుత్వ భూములను తనఖా పెట్టి రుణం తీసుకున్న అనుభవం లేకపోవడంతో ‘మర్చంట్‌ బ్యాంకర్ల’కు రుణ సేకరణ బాధ్యత అప్పగించాలని నిర్ణయించారు. మర్చంట్‌ బ్యాంకర్ల వివరాలపై మౌనం మర్చంట్‌ బ్యాంకర్ల ఎంపికకు ఈ ఏడాది జూలైలో శ్రీకారం చుట్టారు. రుణమార్కెట్‌ నుంచి అప్పులు తేవడంలో అనుభవం కలిగిన బ్యాంకర్ల నుంచి జూలై 5 నుంచి 12వ తేదీ వరకు బిడ్లను స్వీకరించారు. అదే నెల 15న సాంకేతిక బిడ్లను తెరిచి అర్హత కలిగిన మర్చంట్‌ బ్యాంకర్లను ఎంపిక చేశారు. అయితే ఎంపికైన బిడ్డర్ల వివరాలను వెల్లడించేందుకు ఆర్థిక, పరిశ్రమల శాఖ అధికారులు సుముఖత చూపడం లేదు. 2019 నుంచి 2023 మధ్యకాలంలో కనీసం రూ.1,500 కోట్ల నుంచి రూ.20 వేల కోట్లకు పైగా రుణాలు సేకరించిన అనుభవం కలిగిన సంస్థలను మర్చంట్‌ బ్యాంకర్లుగా ఎంపిక చేసినట్లు తెలిసింది.వీరు ఈఎండీ రూపంలో రూ.కోటి, పర్ఫార్మెన్స్‌ సెక్యూరిటీ కింద మరో రూ.4 కోట్లు కూడా ప్రభుత్వానికి చెల్లించినట్లు సమాచారం. కాగా మర్చంట్‌ బ్యాంకర్లు ఎలాంటి న్యాయపరమైన చిక్కులు లేకుండా రుణ సేకరణకు అవసరమైన ప్రక్రియను పూర్తి చేయాల్సి ఉంటుంది. రుణం ఇప్పించే మర్చంట్‌ బ్యాంకర్‌కు కనీసం ఒక శాతం చొప్పున లెక్క వేసినా రూ.100 కోట్లు కమీషన్‌ రూపంలో చెల్లించాల్సి ఉంటుంది. ఫైనాన్స్‌ సంస్థల షరతులు అప్పుల కోసం ప్రభుత్వం తరపున ఫైనాన్స్‌ సంస్థల వద్దకు వెళ్లిన మర్చంట్‌ బ్యాంకర్లకు సవాలక్ష ప్రశ్నలు ఎదురవుతున్నట్లు తెలిసింది. రూ.10 వేల కోట్ల రుణం కోసం రూ.20 వేల కోట్లు విలువ చేసే విలువైన భూములను తాకట్టు పెట్టేందుకు రాష్ట్ర ప్రభుత్వం సిద్ధమైనా, భూముల తాకట్టుతో పాటు రుణానికి రాష్ట్ర ప్రభుత్వం గ్యారంటీ ఇస్తేనే మంజూరు చేస్తామని మెలిక పెడుతున్నాయి. ఇక్కడే ప్రభుత్వానికి చిక్కొచ్చి పడింది. రుణ మొత్తానికి గ్యారంటీ ఇస్తే ‘ద్రవ్య జవాబుదారీ బడ్జెట్‌ నిర్వహణ’ (ఎఫ్‌ఆర్‌బీఎం) నిబంధనలను కేంద్రం వర్తింపజేస్తుందన్న ఆందోళన వ్యక్తమవుతోంది.రాష్ట్ర ప్రభుత్వాలు చేసే ఏ తరహా రుణాలైనా ఎఫ్‌ఆర్‌బీఎం గరిష్ట రుణ పరిమితికి లోబడే ఉండాలని రిజర్వు బ్యాంకు ఇండియా ఇదివరకే స్పష్టం చేసింది. రుణమార్కెట్‌ నుంచి తెచ్చే అప్పులకు సంబంధించిన సమాచారం ఆర్‌బీఐకి కూడా ఇవ్వాల్సి ఉంటుంది. ఈ నేపథ్యంలో ఆర్‌బీఐ అభ్యంతరాలను అధిగమించి, ఎఫ్‌ఆర్‌బీఎం నిబంధనలు వర్తించకుండా రుణ సమీకరణ విషయంలో ప్రభుత్వం మల్లగుల్లాలు పడుతోంది. ప్రభుత్వం గ్యారంటీ ఇస్తేనే అప్పులు తేవడం సాధ్యమవుతుందని మర్చంట్‌ బ్యాంకర్లు సైతం తేల్చి చెబుతున్న నేపథ్యంలో దీని సాధ్యాసాధ్యాల పరిశీలనలో అధికారులు నిమగ్నమయ్యారు.

సాక్షి, హైదరాబాద్‌: గ్రేటర్‌ హైదరాబాద్‌ సమగ్రాభివృద్ధిలో భాగంగా 352 కి.మీ. మేర రూపు దిద్దుకోనున్న రీజనల్‌ రింగ్‌రోడ్డు (ఆర్‌ఆర్‌ఆర్‌)కు చేరుకొనేందుకు వీలుగా ఔటర్‌ రింగ్‌రోడ్డు (ఓఆర్‌ ఆర్‌) నుంచి గ్రీన్‌ఫీల్డ్‌ రహదా రులను నిర్మించాలని ప్రభుత్వం నిర్ణయించింది. మొత్తంగా 216.9 కిలోమీటర్ల మేర తొమ్మిది గ్రీన్‌ఫీల్డ్‌ రోడ్లను నిర్మించనుంది.రావిర్యాల టు ఆమన్‌గల్‌ వయా ఫ్యూచర్‌ సిటీసుమారు 14 వేల ఎకరాల విస్తీ ర్ణంలో ఫ్యూచర్‌ సిటీని నిర్మించాలని నిర్ణయించినందున భవి ష్యత్తులో ఈ మార్గంలో వాహనా ల రాకపోకల సంఖ్య గణనీయంగా పెరుగుతుందని ప్రభుత్వం అంచనా వేసింది. ఈ నేపథ్యంలో ఈ మార్గాన్ని ఫ్యూచర్‌ సిటీ మీదుగా ప్రతిపాదించింది. ఓఆర్‌ఆర్‌ ఎగ్జిట్‌ నంబర్‌–13 రావిర్యాల నుంచి ఆర్‌ఆర్‌ఆర్‌ లో ని ఆమన్‌గల్‌ ఎగ్జిట్‌ నంబర్‌–13 వరకు 300 అడుగుల మేర గ్రీన్‌ఫీల్డ్‌ రేడియల్‌ రోడ్డు నిర్మించనుంది. ఈ మార్గంమొత్తం 41.5 కిలోమీటర్ల మేర ఉంటుంది. ఈ రోడ్డు 15 గ్రామాల మీదుగా సాగనుంది. మహేశ్వరం మండలంలోని కొంగరఖుర్డ్, ఇబ్రహీంపట్నంలోని కొంగరకలాన్, ఫిరోజ్‌గూడ, కందుకూరులోని లేమూర్, తిమ్మాపూర్, రాచులూర్, గుమ్మడవెల్లి, పంజగూడ, మీర్‌ఖాన్‌పేట్, ముచ్లెర్ల, యాచారంలోని కుర్మిద్ద, కడ్తాల్‌ మండలంలోని కడ్తాల్, ముద్విన్, ఆమన్‌గల్‌ మండలంలోని ఆమన్‌గల్, ఆకుతోటపల్లి గ్రామాల గుండా ఈ రోడ్డు వెళ్లనుంది.916 ఎకరాల భూసమీకరణ..గ్రీన్‌ఫీల్డ్‌ రేడియల్‌ రోడ్డు నిర్మాణానికి 916 ఎకరాల భూమిని ప్రభుత్వం సమీకరించాల్సి ఉంది. ఇందులో 8 కిలోమీటర్ల మేర 169 ఎకరాల అటవీ శాఖ భూములు ఉండగా 7 కిలోమీటర్లలో 156 ఎకరాలు టీజీఐఐసీ భూములు, కిలోమీటరులో 23 ఎకరాలు ప్రభుత్వ భూములు ఉన్నాయి. 25.5 కిలో మీటర్ల మేర పట్టా భూములు ఉన్నాయి. ఆర్‌ఆర్‌ఆర్‌ ఉత్తర భాగం సంగారెడ్డి–తూప్రాన్‌–గజ్వేల్‌–చౌటుప్పల్‌ మీదుగా కిలోమీటర్లు, దక్షిణ భాగం చౌటుప్పల్‌–షాద్‌నగర్‌–సంగారెడ్డి మీదుగా 194 కిలోమీటర్ల మేర నిర్మాణం కానుండటం తెలిసిందే.

సాక్షి, హైదరాబాద్‌: కబ్జాకు ఏ చెరువూ కాదు అనర్హం అన్నట్టుగా గ్రేటర్‌ హైదరాబాద్‌తో పాటు నగరం చుట్టుపక్కల ఉన్న అనేక చెరువులు ఆక్రమణకు గురయ్యాయి. హైదరాబాద్‌ మనుగడనే ప్రశ్నార్థకం చేస్తున్నాయి. గ్రేటర్‌ పరిధిలో ప్రస్తుతం ఓ మోస్తరు వాన కురిసినా కాలనీలను వరద ముంచెత్తుతోంది. రోడ్లే చెరువుల్ని తలపిస్తున్నాయి. ఇక భారీ వర్షం అంటే నగరజీవి బెంబేలెత్తిపోయే పరిస్థితి నెలకొంటోంది. చెరువులు, కుంటల్లాంటి జలవనరులు, నాలాలు ఆక్రమణలకు గురి కావడం వల్లే ఈ దుస్థితి ఏర్పడుతోందని పర్యావరణ పరిరక్షణ సంస్థలు, స్వచ్ఛంద సంస్థలు విమర్శిస్తున్న సంగతి తెలిసిందే. కాగా ఇప్పుడు సామాన్య ప్రజలు సైతం దీనిపై స్పందిస్తున్నారు. ఇటీవలి కాలంలో హైదరాబాద్‌ డిజాస్టర్‌ రెస్పాన్స్‌ అండ్‌ అసెట్‌ ప్రొటెక్షన్‌ ఏజెన్సీ (హైడ్రా) చెరువుల్లో ఆక్రమణలపై కొరడా ఝళిపిస్తుండటంతో ఎవరికి వారు స్వచ్ఛందంగా ముందుకు వచ్చి తమ ప్రాంతంలో చెరువుల ఆక్రమణపై హైడ్రాతో పాటు ఇతర ప్రభుత్వ విభాగాలకు ఫిర్యాదు చేస్తున్నారు. మా చెరువేదీ అంటూ ప్రశ్నిస్తున్నారు. ఆక్రమణలు తొలగించాలంటూ డిమాండ్‌ చేస్తున్నారు. ఆధారాలతో సహా.. ‘తుక్కుగూడ మున్సిపాలిటీ పరిధిలోని సర్దార్‌నగర్‌లో రికార్డుల ప్రకారం 8 ఎకరాల విస్తీర్ణంలో తుమ్మల చెరువు ఉండాలి. కానీ ప్రస్తుతం దాని అలుగు మాత్రమే కనిపిస్తోంది కానీ చెరువు కనిపించట్లేదు..’అని బీజేపీ నేత అందెల శ్రీరాములు యాదవ్‌ సోమవారం పహాడీషరీఫ్‌ పోలీసులకు ఫిర్యాదు చేశారు. ఔటర్‌ రింగ్‌ రోడ్‌ (ఓఆర్‌ఆర్‌) పరిధిలో ఉన్న జలవనరుల పరిరక్షణ కోసం.. ఫుల్‌ ట్యాంక్‌ లెవల్‌ (ఎఫ్‌టీఎల్‌), బఫర్‌ జోన్లలో ఉన్న నిర్మాణాలను హైడ్రా కూల్చివేస్తున్న సంగతి తెలిసిందే. ఇప్పటివరకు 18 ప్రాంతాల్లో ఉన్న 158 అక్రమ నిర్మాణాలను తొలగించిన ఈ ఏజెన్సీ 43.94 ఎకరాల చెరువులు, ప్రభుత్వ భూములను కాపాడింది. ఈ నేపథ్యంలో ప్రధానంగా చెరువులు, కుంటలు, నాలాల ఆక్రమణలకు సంబంధించి ఈ విభాగానికి ఇబ్బడిముబ్బడిగా ఫిర్యాదులు వస్తున్నాయి. సాధారణంగా వివిధ విభాగాలకు చేసే ఫిర్యాదులకు బాధితులు, ప్రజలు.. పలు పత్రాలు, ఫొటోలు, ఆడియో, వీడియో సీడీల్లాంటివి జత చేస్తుంటారు. కానీ హైడ్రాకు వస్తున్న ఫిర్యాదులు మాత్రం కొత్త ఒరవడిని సృష్టిస్తున్నాయి. గూగుల్‌ మ్యాప్స్, గూగుల్‌ ఎర్త్‌ తరహా శాటిలైట్‌ ఫొటోలను జత చేసి మరీ ఫిర్యాదు చేస్తుండటం గమనార్హం. కాగా ఈ ఫిర్యాదులకు సంబంధించిన వివరాలను హైడ్రా, ఇతర విభాగాలు గోప్యంగా ఉంచుతున్నాయి. అయితే హైడ్రాకు ఫిర్యాదు చేస్తున్న వారిలో బాధితులతో పాటు సామాజిక కార్యకర్తలు, రాజకీయ నాయకులు, స్వచ్ఛంద సంస్థలకు చెందిన వారు ఉంటున్నట్లు సమాచారం. మాదాపూర్‌ ఖానామెట్‌లోని తమ్మిడికుంట చెరువు ఎఫ్‌టీఎల్‌లో ఉన్నట్టుగా చెబుతున్న సినీ నటుడు నాగార్జునకు చెందిన ఎన్‌–కన్వెన్షన్‌పై.. ‘జనం కోసం’అనే సంస్థతో పాటు రాష్ట్ర మంత్రి కోమటిరెడ్డి వెంకటరెడ్డి ఫిర్యాదు చేసిన సంగతి తెలిసిందే. వాస్తవానికి ఈ కూల్చివేత తర్వాతే హైడ్రాకు లెక్కకుమిక్కిలిగా ఫిర్యాదులు వస్తున్నాయి. ప్రతి ఫిర్యాదునూ వివిధ కోణాల్లో పరిశీలించి, రికార్డులు తనిఖీ చేసిన తర్వాతే హైడ్రా చర్యలకు ఉపక్రమిస్తోంది. అన్ని అనుమతులతో దర్జాగా..! ప్రభుత్వ స్థలాలు, చెరువులు, కుంటల్లో.. అలాగే నాలాలపై నిర్మించిన కట్టడాల్లో రెండు రకాలైనవి ఉంటున్నాయి. కొన్నింటిని అసలు అనుమతులే తీసుకోకుండా నిర్మించేయగా.. మరికొన్నింటికి అవసరమైన అన్ని అనుమతులూ ఉండటం గమనార్హం. ఇరిగేషన్, హెచ్‌ఎండీఏ, జీహెచ్‌ఎంసీ తదితర శాఖల నుంచి అనుమతులు తీసుకుని మరీ నిర్మాణాలు చేపడుతున్నారు. వీటికి విద్యుత్‌ శాఖ అధికారులు కరెంట్‌ కనెక్షన్‌ ఇస్తుండగా.. ఇతర విభాగాలు రోడ్లు, డ్రైనేజీలు వంటి సదుపాయాలన్నీ కల్పిస్తున్నాయి. ఈ నేపథ్యంలోనే అనేక చోట్ల లేఔట్లు, వెంచర్లు, అపార్ట్‌మెంట్లు కూడా యథేచ్ఛగా వెలిశాయి. ఈ క్రమంలో రూ.లక్షల నుంచి రూ.కోట్ల వరకు చేతులు మారాయన్నది బహిరంగ రహస్యమేనన్న అభిప్రాయం వ్యక్తమవుతోంది. ముందే ఆక్యుపెన్సీ సర్టిఫికెట్లు జారీ! ఏదైనా భవనం నిర్మాణం పూర్తి చేసుకున్న తర్వాత జీహెచ్‌ఎంసీ అధికారులు ఆద్యంతం పరిశీలించాల్సి ఉంటుంది. నిర్మాణంలో నిబంధనలు పూర్తి స్థాయిలో పాటించారని నిర్ధారించాల్సి ఉంటుంది. ఆ తర్వాత మాత్రమే ‘నివాసానికి యోగ్యం’అంటూ ఆక్యుపెన్సీ సర్టిఫికెట్‌ (ఓసీ) జారీ చేయాల్సి ఉంటుంది. అయితే రాజధానిలోని చెరువులు, కుంటలు, బఫర్‌ జోన్లలో నిర్మితమవుతున్న కొన్ని భవనాలకు పనులు పూర్తి కాకుండానే ఓసీలు జారీ అయిపోతున్నాయనే ఆరోపణలున్నాయి. దీనికి ఆ విభాగం అధికారుల అవినీతే కారణమనే ఆరోపణలు కూడా ఉంటున్నాయి. ఇలాంటి వ్యవహారాలకు సంబంధించి ఇప్పటికే కొన్ని ఫిర్యాదులు అందుకున్న హైడ్రా అధికారులు వాటిపై లోతుగా విచారణ జరుపుతున్నారు. ఎఫ్‌టీఎల్, బఫర్‌ జోన్లలో కొన్ని నిర్మాణాలకు ప్రభుత్వ విభాగాలు అనుమతులు ఇవ్వడాన్ని గుర్తించిన హైడ్రా అధికారులు వాటిని రద్దు చేయాల్సిందిగా కోరుతూ హెచ్‌ఎండీఏకు లేఖ రాశారు. ఈ ప్రక్రియ పూర్తయిన తర్వాత ఆయా ప్రాంతాల్లో కూల్చివేతలు చేపట్టనున్నారు. ఆ అధికారుల గుండెల్లో రైళ్లు ప్రస్తుతానికి ఆయా నిర్మాణాల కూల్చివేతల పైనే హైడ్రా దృష్టి పెడుతోంది. ప్రభుత్వ భూముల పరిరక్షణ, చెరువుల కబ్జాల నిరోధం, విపత్తు స్పందన.. తదితర లక్ష్యాలతో ఏర్పాటు అయిన హైడ్రా జలవనరుల పరిరక్షణకే పెద్దపీట వేసి ముందుకు వెళ్తోంది. అయితే ఈ విభాగానికి ప్రత్యేక పోలీసుస్టేషన్‌ మంజూరైన తరువాత మరో అడుగు ముందుకు వేయనుంది. ఈ నిర్మాణాలకు అనుమతులు ఇచ్చిన ప్రతి విభాగం, ఆయా అధికారుల పైనా విచారణ జరిపి, సంబంధిత శాఖలకు నివేదికలు ఇవ్వడంతో పాటు చర్యలకు సిఫారసు చేయనుంది. దీంతో ప్రస్తుతం ఆయా విభాగాలకు చెందిన అధికారుల గుండెల్లో రైళ్లు పరుగెడుతున్నాయి. 10 వేలకు మిగిలింది 3,900 ఎకరాలే...నేషనల్‌ రిమోట్‌ సెన్సింగ్‌ సెంటర్‌ ‘గ్రేటర్‌’తో పాటు చుట్టుపక్కల ఉన్న 56 చెరువుల పరిస్థితిపై అధ్యయనం చేసింది. 1979–2023 మధ్య 44 ఏళ్లలో అవి ఏ స్థాయిలో కబ్జాలకు గురయ్యాయో తేల్చింది. అప్పట్లో 10416.8 ఎకరాల విస్తీర్ణంలో విస్తరించి ఉన్న ఈ జలవనరులు గత ఏడాది నాటికి 3,974.1 ఎకరాలకు పడిపోయాయి. ఇలా మొత్తమ్మీద 61 శాతం మాయమై కేవలం 39 శాతం మిగిలినట్లు ఎన్‌ఆర్‌ఎస్‌సీ లెక్కకట్టింది. ఇదే పరిస్థితి కొనసాగితే భవిష్యత్తులో హైదరాబాద్‌ మనుగడ ప్రశ్నార్థకంగా మారే ప్రమాదం ఉందని ఆందోళన వ్యక్తం చేసింది. ఈ పరిస్థితుల్ని మార్చాలని కోరుతూ హైడ్రాకు నివేదిక సమర్పించింది. చెక్కు చెదరని హకీంపేట.. విస్తరించిన చెన్నపురంరాజీవ్‌ రహదారికి ఆనుకుని ఉన్న డిఫెన్స్‌ ఏరియా హకీంపేటలోని 18 ఎకరాల చెరువు మాత్రం ఇప్పటికీ అలాగే ఉందని ఎన్‌ఆర్‌ఎస్‌సీ సర్వే వెల్లడించింది. అలాగే ఈ సర్వేలో వెలుగులోకి వచ్చిన మరో ఆసక్తికర అంశం చెన్నపురం చెరువుకు సంబంధించింది. సికింద్రాబాద్‌ చంద్రపురికాలనీలో ఉన్న ఈ చెరువు విస్తీర్ణం 44 ఏళ్లల్లో పెరిగింది. 1979లో ఇది 16 ఎకరాల్లో విస్తరించి ఉండగా..2023 నాటికి 15 శాతం పెరిగి 18.2 ఎకరాలకు చేరింది. దీనిపై ప్రత్యేకంగా దృష్టి సారించిన హైడ్రా..చెరువు విస్తీర్ణం అలా పెరగడానికి కారణాలను విశ్లేషించాలని నిర్ణయించింది.ఎల్‌ఆర్‌ఎస్, బీఆర్‌ఎస్‌లూ వర్తించవు.. మూడు దశల్లో కార్యాచరణ అమలుహైడ్రా పరిధిలో ఉన్న ప్రతి చెరువు, కుంట పూర్వాపరాలు అధ్యయనం చేస్తున్నాం. కూల్చివేతలు అనేవి చట్ట ప్రకారం జరుగుతాయి. ఇలాంటి చర్యలు తీసుకునే ముందు ఆద్యంతం పరిశీలిస్తాం. నీటి వనరులు, ప్రభుత్వ స్థలాలు పూడ్చే ట్రాక్టర్లు, టిప్పర్లను కూడా భవిష్యత్తులో సీజ్‌ చేయనున్నాం. చెరువు, కుంటలకు సంబంధించిన ఎఫ్‌టీఎల్, బఫర్‌ జోన్లు, పార్కు స్థలాలకు ఎల్‌ఆర్‌ఎస్, బీఆర్‌ఎస్‌లు వర్తించవు. చెరువులు, కుంటలు, నాలాలు తదితరాల పరిరక్షణ కోసం హైడ్రా మూడు దశల్లో కార్యాచరణ అమలు చేస్తోంది. మొదటి దశలో ఇకపై ఎఫ్‌టీఎల్, బఫర్‌ జోన్లలో ఒక్క చదరపు అడుగు కూడా ఆక్రమణ కాకుండా చూస్తోంది. రెండో దశలో ఇప్పటికే ఆక్రమణలకు గురైన ప్రాంతాల్లో అనుమతి ఉన్నా, అక్రమ కట్టడాలపై చర్యలు తీసుకుంటాం. మూడో దశలో ప్రస్తుతం బెంగళూరులో జరుగుతున్న మాదిరిగా చెరువుల పునరుద్ధరణ చేపడతాం. నగరంలో ఉన్నవి అన్నీ గొలుసుకట్టు చెరువులే. ఒకటి అలుగు పారితే ఆ నీరు నాలాలు, వాగుల ద్వారా మరో దాంట్లోకి వెళ్లాలి. ఆ పరిస్థితిని మళ్లీ తీసుకురావడానికి కృషి చేస్తాం. ఎఫ్‌టీఎల్, బఫర్‌ జోన్లలో ఉన్న నిర్మాణాలు, లేఔట్లలో ప్రజలు ఫ్లాట్లు, స్థలాలు ఖరీదు చేయొద్దు. త్వరలో ఈ వివరాలను వెబ్‌సైట్‌లో పెడతాం. ఇప్పటికే ఇలా ఖరీదు చేసి నష్టపోయిన వాళ్లు ఉంటే బిల్డర్‌పై కేసు పెట్టండి.– ఏవీ రంగనాథ్, హైడ్రా కమిషనర్‌

తిరుమలగిరి (సాగర్‌) మండలంలోని గోడుమడకకు చెందిన ఈయన పేరు బారు శివయ్య. ఆయనకు చింతలపాలెం రెవెన్యూ శివార్లలోని సర్వే నంబర్‌ 14లో 4.30 గుంటల భూమి ఉంది. తాతల కాలం నుంచీ వారే ఆ భూమిని సాగుచేసుకుంటున్నారు. నేటికీ రికార్డుల్లో పేరు లేకపోవడంతో పట్టాదారు పాసుపుస్తకం అందలేదు. కానీ కొందరు ఈ భూమికి సంబంధించి అక్రమంగా పట్టాలను చేయించుకుని రైతుబంధు, రైతుబీమా పథకాలు పొందుతున్నారు. బ్యాంకుల్లో రుణాలు కూడా తీసుకున్నారు. భూమి తమ స్వాదీనం (కబ్జా)లో ఉన్నా.. తమకు పాస్‌ పుస్తకం లేక ప్రభుత్వ పథకాలు అందడం లేదని శివయ్య వాపోయారు...ఈయన ఒక్కరి భూమే కాదు. కేవలం ప్రైవేటు వ్యక్తుల అదీనంలోని స్థలాలే కాదు.. వేల ఎకరాల ప్రభుత్వ భూములను కూడా అక్రమార్కులు చెరబట్టారు. భూమిని ఏళ్లకేళ్లుగా సాగుచేసుకుంటున్నవారు పట్టాలు లేక, హక్కుల్లేక ప్రభుత్వ పథకాలకు దూరమైతే... కొందరు అవే భూములపై నకిలీ పట్టాలు సృష్టించి, ప్రభుత్వం నుంచి రైతు బంధు, రైతు బీమా వంటి పథకాల సొమ్మును కాజేస్తున్నారు. ఇంకొందరైతే ఏకంగా ప్రభుత్వ భూములకే బోగస్‌ పట్టాలు సృష్టించేశారు. కృష్ణపట్టె ప్రాంతమైన నల్లగొండ జిల్లా తిరుమలగిరి (సాగర్‌) మండలంలో తాజాగా బయటపడిన బాగోతమిది. అక్రమార్కులు ఈ మండలంలో 3,900 ఎకరాలకు బోగస్‌ పట్టాలు సృష్టించినట్టు రెవెన్యూ యంత్రాంగం గుర్తించింది. తద్వారా ఏటా రూ.3.5 కోట్ల చొప్పున గత పదేళ్లలో రూ.35 కోట్లకుపైగా రైతుబంధు రూపంలోనే పొందినట్టు అధికారులు భావిస్తున్నారు. బోగస్‌ పట్టాలతో రైతుబీమా, బ్యాంకుల్లో రుణాలు పొందినట్టు తేల్చారు. సమీపంలోని దామరచర్ల మండలంలోనూ వేల ఎకరాల ప్రభుత్వ భూములు బోగస్‌ పట్టాలతో కబ్జా అయినట్టు రెవెన్యూ యంత్రాంగం ప్రాథమిక అంచనాకు వచ్చింది. ముడుపులకు అలవాటుపడిన అధికారులు, రాజకీయ నాయకుల అండదండలతోనే ఈ అక్రమాలు సాగాయని అంటున్నారు. – సాక్షి ప్రతినిధి, నల్లగొండసాక్షి ప్రతినిధి, నల్లగొండ: ధరణి సమస్యలతో రైతులు ఇబ్బందిపడుతున్న నేపథ్యంలో పరిష్కార మార్గాలపై సర్కారు దృష్టి పెట్టింది. ఈ క్రమంలో నల్లగొండ జిల్లా లోని తిరుమలగిరి (సాగర్‌) మండలంలో నెలకొన్న పరిస్థితిని జిల్లా కలెక్టర్‌ నారాయణరెడ్డి రాష్ట్ర ప్రభుత్వం దృష్టికి తీసుకెళ్లారు. దీనితో ప్రభుత్వం తిరుమలగిరి (సాగర్‌) మండలాన్ని పైలట్‌ ప్రాజెక్టుగా ఎంపిక చేసింది. భూముల సమస్య లపై విచారణ చేపట్టింది. అధికారులు ప్రాథమిక విచారణలోనే 3,900 ఎకరాలకు కొందరు బోగస్‌ పట్టాలు సృష్టించినట్టు గుర్తించారు. మండలంలోని చింతలపాలెం గ్రామంలోని 12, 222, 158, 162, 223 సర్వే నంబర్లలో, తిమ్మాయి పాలెం గ్రామంలోని 38, 39, 60, 70, 74 సర్వే నంబర్లలో అక్రమ పట్టాలు ఉన్నట్టు తేల్చారు. వీటితోపాటు తునికినూతల గ్రామంలో సర్వే నంబర్‌ 45, నెల్లికల్‌ గ్రామంలో 424 సర్వే నంబర్, జమ్మలకోట గ్రామంలో 28 సర్వేనంబర్లలో అక్రమంగా పట్టాలు పొందినట్టు గుర్తించారు. చింతలపాలెం, తిమ్మాయిపల్లి రెండు గ్రామాల్లోనే 2,800 ఎకరా లకు నకిలీ పట్టాలు సృష్టించినట్టు తేలడం గమనార్హం. ప్రభుత్వ భూములనూ బోగస్‌ పట్టాలతో చెరబట్టినట్టు గుర్తించారు. దీంతో ఈ అక్రమాలను పూర్తిస్థాయిలో నిగ్గుతేల్చేందుకు రాష్ట్ర ప్రభుత్వం చర్యలు చేపట్టింది. 14 రెవెన్యూ, సర్వే బృందాల ఆధ్వర్యంలో 80 మందికిపైగా సిబ్బంది తో క్షేత్రస్థాయి సర్వేకు శ్రీకారం చుట్టింది. నకిలీ స్వాతంత్య్ర సమరయోధుల పేరిట పట్టాలు దామరచర్ల మండలంలోని సర్వే నంబర్లు 686, 691, 1100, 735, 655, 621, 690, 714తోపాటు మరో 33 సర్వే నంబర్లలో 4,542 ఎకరాల ప్రభుత్వ భూమి ఉంది. ఈ భూములపై కబ్జాదారు ల కన్ను పడింది. దీంతో భూబకాసురులకు.. స్వాతంత్య్ర సమరయోధులు గుర్తుకొచ్చారు. నకిలీ సమర యో ధులను సృష్టించి, తమ చేతివాటం ప్రదర్శించి, అధికారులను మచి్చక చేసుకొని కోట్ల రూపాయల విలువైన భూములను దోచేశారు. వాటిపైనే ఇప్పుడు జిల్లా యంత్రాంగం ఫోకస్‌ పెట్టింది.60 ఏళ్లుగా సేద్యం చేస్తున్నా.. హక్కులు తొలగించారు నాగార్జునసాగర్‌ ప్రాజెక్టు నిర్మాణ సమయంలో మా గ్రామం ముంపునకు గురికావడంతో చిన్నాయిపా లెం తండాలో పునరావా సం కల్పించారు. 1962లో అప్పటి ప్రభుత్వం పట్టాలు అందజేసింది. 60 ఏళ్లుగా అక్కడే సేద్యం చేసుకుంటూ జీవిస్తున్నాం. ధరణికి ముందు వరకు బ్యాంకులో రుణాలు పొందాం. 2016 భూప్రక్షాళన సమయంలో మా భూములను పార్ట్‌–బీలో చేర్చడంతో కొత్త పట్టాదారు పాసుపుస్తకాలు అందలేదు. అప్పటి నుంచి ప్రభుత్వ పథకాలు అందడం లేదు. బ్యాంకు రుణం తీసుకునే అవకాశం లేకుండాపోయింది. – రమావత్‌ హనుమ, చెన్నాయపాలెంమొత్తం రీసర్వే.. అక్రమ పట్టాల తొలగింపే లక్ష్యం తిరుమలగిరి సాగర్‌ మండలంలోని అన్ని భూములపై రీసర్వే చేస్తున్నాం. అక్కడ చాలా సమస్యలు ఉన్నాయి. 100 ఎకరాల భూమి ఉంటే రికార్డుల్లో 200 ఎకరాలకు పేర్లు ఉన్నాయి. భూమి స్వా«దీనంలో ఉన్న వారి పేర్లు ధరణిలో లేవు. ధరణిలో పేర్లు ఉన్నవారి స్వాదీనంలో భూములు లేవు. ఎవాక్యూ ప్రాపర్టీని కబ్జా చేసి పట్టాలు సృష్టించారు. అటవీ భూముల హద్దుల సమస్యలు ఉన్నాయి. వాటన్నింటినీ తేల్చి.. అర్హులకు పట్టాలు అందించడమే ప్రభుత్వ ఉద్దేశం. అందుకే ఈ మండలాన్ని పైలట్‌ ప్రాజెక్టుగా ఎంపిక చేసింది. ఈ మండలంలోని ప్రతి సర్వే నంబరులోనూ విస్తృత సర్వే చేస్తున్నాం. ఆ భూమి ఎవరిదని తేల్చి, నకిలీ పట్టాలను రద్దు చేసి.. కబ్జాలో ఉన్న అసలైన అర్హుల పేరిట పట్టాలు ఇచ్చి, న్యాయం జరిగేలా చర్యలు చేపడుతున్నాం. – నారాయణరెడ్డి, నల్లగొండ జిల్లా కలెక్టర్‌

సాక్షి, అమరావతి: రాష్ట్రానికి రాజధాని పేరిట చంద్రబాబు సొంత సంస్థానాన్ని సృష్టించుకున్నారు. స్వతంత్య్ర దేశ చరిత్రలో కనీవినీ ఎరుగని భూదో­పిడీకి బాటలు వేశారు. ఆధునిక జమీందారులా మారిపోయి బడుగుల భూములకు ఎసరు పెట్టారు. ఎస్సీ, ఎస్టీ, బీసీ, పేద రైతులను భయ­భ్రాంతులకు గురి చేసి అసైన్డ్‌ భూములను లాక్కు­న్నారు. రికార్డులు తారుమారు చేసి ప్రభుత్వ భూ­ములను చెరబట్టారు. ప్రైవేట్‌ భూములను హస్త­గతం చేసు­కున్నారు. అధికారం అండతో భూ దందాలకు మార్గదర్శిగా నిలిచారు. 2014 – 19 మధ్య అధి­కారంలో ఉండగా భూసమీకరణ ప్యాకేజీ మార్కెట్‌ విలువ ప్రకారం ఏకంగా రూ.5,500 కోట్ల విలువైన భూములను కొల్లగొట్టడం దేశ చరిత్రలోనే అతిపెద్ద భూ దోపిడీగా రికార్డులకు ఎక్కింది. చంద్రబాబు బృందం అరాచకాలు సీఐడీ విచారణలో పూర్తి ఆధారాలతో నిగ్గు తేలాయి. దీనిపై సీఐడీ ఇప్పటికే న్యాయస్థానంలో చార్జ్‌షీట్‌ కూడా దాఖలు చేసింది.బెదిరించి లాక్కుని తాపీగా ప్యాకేజీ..అసైన్డ్‌ భూములను కొల్లగొట్టేందుకు టీడీపీ పెద్దలు పక్కా వ్యూహం రచించారు. అసైన్డ్‌ భూములకు పరిహారం ఇవ్వబోమంటూ బెదిరించి 814 మంది బినామీల ముసుగులో కాజేశారు. అనంతరం అసైన్డ్‌ భూములకు ప్యాకేజీని ప్రకటించడం వారి కుతంత్రానికి నిదర్శనంగా నిలుస్తోంది. భూసమీకరణ ప్యాకేజీని నిర్ణయిస్తూ 2015 జనవరి 1న టీడీపీ సర్కారు జీవో నంబరు 1 జారీ చేసింది. ఆ జీవోలో ప్రైవేట్‌ భూములకే భూసమీకరణ ప్యాకేజీ ప్రకటించారు. అసైన్డ్‌ భూములకు ఎలాంటి ప్యాకేజీ ప్రకటించలేదు. అనంతరం తమ బినామీలు, ఏజెంట్లను అమరావతి గ్రామాల్లోకి పంపి ప్రభుత్వం అసైన్డ్‌ భూములను ఎలాంటి ప్యాకేజీ ఇవ్వకుండా ఉచితంగా తీసుకుంటుందని ఎస్సీ, ఎస్టీ, బీసీ, పేద రైతులను హడలగొట్టారు. దీంతో గత్యంతరం లేక కారు చౌకగా ఎకరా కేవలం రూ.2 లక్షల నుంచి రూ.5 లక్షలకే చంద్రబాబు, నారాయణ, ఇతర టీడీపీ పెద్దల బినామీలకు అసైన్డ్‌ భూములను సేల్‌ డీడ్ల ద్వారా విక్రయించే పరిస్థితి కల్పించారు. ఆ తరువాత అసైన్డ్‌ భూములకు కూడా భూసమీకరణ ప్యాకేజీని ప్రకటిస్తూ 2016 ఫిబ్రవరి 17న తాపీగా జీవో నంబరు 41 జారీ చేశారు. అప్పటికే అసైన్డ్‌ భూములు టీడీపీ పెద్దల బినామీల పరం కావడంతో వారికే భూసమీకరణ ప్యాకేజీ దక్కేలా స్కెచ్‌ వేశారు.ఉన్నతాధికారుల అభ్యంతరాలు బేఖాతర్‌ చట్ట ప్రకారం దేశంలో 1954కు ముందు ఎస్సీ, ఎస్టీ, బీసీ, పేద రైతులకు పంపిణీ చేసిన అసైన్డ్‌ భూములను ఇతరులకు విక్రయించుకునే అవకాశం ఉంది. ఆ తరువాత పంపిణీ చేసిన అసైన్డ్‌ భూముల క్రయ విక్రయాలు చట్ట విరుద్ధం. ఈమేరకు నాటి కలెక్టర్, సీఆర్‌డీయే, రెవెన్యూ, న్యాయ శాఖ ఉన్నతాధికారులు, అడ్వకేట్‌ జనరల్‌ తమ అభ్యంతరాలను జీవో 41 నోట్‌ ఫైళ్లలో ప్రభుత్వానికి లిఖితపూర్వకంగా వెల్లడించారు. వీటిని లెక్క చేయకుండా బినామీల ద్వారా హస్తగతం చేసుకున్న భూములకు చంద్రబాబు ప్యాకేజీని ప్రకటించారు.అసైన్డ్‌ భూ దోపిడీదారులు..ఏ–1: చంద్రబాబు నాయుడుఏ–2 : పొంగూరు నారాయణఏ–3 : అన్నే సుధీర్‌బాబు (అప్పటి తుళ్లూరు మండల తహసీల్దార్‌)ఏ–4 : కేపీవీ అంజనీకుమార్‌ (ఎండీ, రామకృష్ణ హౌసింగ్‌ ప్రైవేట్‌ లిమిటెడ్‌)1,100 ఎకరాలు.. 1,336 మంది బినామీలుచంద్రబాబు బృందం అమరావతి పరిధిలో ఏకంగా 1,100 ఎకరాల అసైన్డ్‌ భూములను కొల్లగొట్టింది. మొత్తం 1,336 మంది బినామీల పేరిట ఆ భూములను హస్తగతం చేసుకున్నారు. భూ సమీకరణ ప్యాకేజీ ప్రకారం ఆ భూముల విలువ ఏకంగా రూ.5,500 కోట్లు కావడం చంద్రబాబు భారీ భూదోపిడీకి నిదర్శనం.కోర్టును మోసం చేసి మరీ...అసైన్డ్‌ భూములను కొల్లగొట్టేందుకు చంద్రబాబు ఏకంగా న్యాయస్థానాన్నే మోసం చేయడం విస్మయపరుస్తోంది. ఈ కుట్రను అమలు చేసేందుకు రెవెన్యూ కార్యాలయాల్లో అసైన్డ్‌ భూముల రికార్డులను మాయం చేశా­రు. 1954 తరువాత భూ పంపిణీ రికార్డులేవీ లేవంటూ మంగళగిరి, తుళ్లూరు, తాడికొండ మండల రెవెన్యూ అధికారులతో ఓ నివేదిక ఇప్పించి న్యాయస్థానానికి సమర్పించారు. వాస్తవానికి 1954 తరువాత పలుదఫాలు పేదలకు అసైన్డ్‌ భూముల పంపిణీ జరిగింది. దివంగత సీఎం వైఎస్‌ రాజశేఖరరెడ్డి హ­యాంలో 2004–05లో అసైన్డ్‌ భూములను పంపిణీ చేశారు. అమరావతి అసైన్డ్‌ భూములలో 1954 తరువాత పంపిణీ చేసిన భూములు ఉన్నట్లు రుజువు చేసే రికార్డులు వెలుగులోకి వచ్చాయి. వాటిలో 1987, 2004–05లో పంపిణీ చేసిన అసైన్డ్‌ భూములు ఉన్నట్లు వెల్లడైంది. సీఐడీ ప్రత్యేక దర్యాప్తు బృందం (సిట్‌) సమగ్ర విచారణలో మొత్తం భూబాగోతం బట్టబయలైంది.ఉన్నతాధికారుల వాంగ్మూలంటీడీపీ ప్రభుత్వ పెద్దల ఒత్తిడితోనే నిబంధనలకు విరుద్ధంగా అసైన్డ్‌ భూముల బదలాయింపు చేసినట్లు రెవెన్యూ ఉన్నతాధికారులు 164 సీఆర్‌పీసీ కింద న్యాయస్థానంలో వాంగ్మూలం ఇచ్చారు. ఈ కేసులో నిందితుడిగా ఉన్న కొమ్మారెడ్డి బ్రహ్మానందరెడ్డి తనను అప్రూవర్‌గా పరిగణించాలని కోరుతూ న్యాయస్థానంలో పిటిషన్‌ దాఖలు చేశారు. ఏ 1 బాబు, ఏ 2 నారాయణఅమరావతి భూ దోపిడీ కేసులో ఏ–1గా చంద్రబాబు, ఏ–2గా నారాయణ­లతో­పాటు పలువురిపై విజయవాడ ఏసీబీ న్యాయస్థానంలో సీఐడీ చార్జ్‌షీట్‌ కూడా దాఖలు చేసింది. ఐపీసీ సెక్షన్లు 420, 409, 506, 166, 167, 217, 120 (బి), 109 రెడ్‌విత్‌ 34, 35, 36, 37.. ఎస్సీ, ఎస్టీ వేధింపుల నిరోధక చట్టంలోని సెక్షన్లు 3(1),(జి), 3(2), అసైన్డ్‌ భూముల అన్యాక్రాంత నిరోధక చట్టంలోని సెక్షన్లు 13(2) రెడ్‌విత్‌ 13(1), (సి), (డి) కింద వారిపై అభియోగాలు నమోదు చేసింది.

సాక్షి ప్రతినిధి, సంగారెడ్డి: అవి పంటలు పండించుకుని జీవనాధారం పొందేందుకు పేదలకు ఇచ్చిన అసైన్డ్‌ భూములు.. క్రయ విక్రయాలు, వ్యవసాయేతర పనులు చేయడానికి వీల్లేని భూములు.. కానీ ధరణి పోర్టల్‌లో రికార్డులను తారుమారు చేశారు. అసైన్డ్‌ భూములను పట్టా భూములుగా మార్చేశారు. దీనితో ఒకటీ, రెండూ కాదు.. ఏకంగా 518 ఎకరాల అసైన్డ్‌ భూములు బడాబాబుల చేతుల్లోకి వెళ్లిపో యాయి. సంగారెడ్డి జిల్లా కంది మండలంలో చోటుచేసుకున్న ఈ భూదందా.. తాజాగా ప్రభుత్వ భూముల వెరిఫికేషన్‌ సందర్భంగా వెలుగులోకి వచ్చింది. హైదరాబాద్‌ నగరానికి సమీపంలో ఉండటం, రెండు జాతీయ రహదారులు, ఐఐటీ ఉండటంతో కంది మండలంలో భూముల ధర ఎకరా రూ.ఐదు కోట్ల వరకు పలుకుతోంది. అంటే అక్రమాలు జరి గిన 518 ఎకరాల భూముల విలువ రెండున్నర వేల కోట్లకుపైనే ఉంటుందని అంచనా. 11 గ్రామాల పరిధిలో.. సంగారెడ్డి జిల్లాలో ప్రభుత్వ భూముల వెరిఫి కేషన్‌ ప్రక్రియ కొనసాగుతోంది. ఎక్కడెక్కడ ప్రభుత్వ భూములున్నాయి, ఎక్కడైనా అన్యా క్రాంతం అయ్యాయా? వాటి రికార్డుల పరిస్థితే మిటనే అంశాలను పరిశీలిస్తున్నారు. ఇద్దరు అదనపు కలెక్టర్లు, డిప్యూటీ కలెక్టర్లు, ఆర్డీఓ స్థాయి అధికారులకు ఒక్కో మండలం చొప్పు న బాధ్యతను అప్పగించారు. ఈ క్రమంలోనే కంది మండలం పరిధిలోని 11 గ్రామాల్లో 518 ఎకరాల అసైన్డ్‌ భూములను పట్టా భూము లుగా రికార్డులను మార్చేసినట్టు తేలింది. అత్య ధికంగా బ్యాతోల్‌లో 181 ఎకరాలు, చిద్రుప్ప లో 154 ఎకరాలు, జుల్‌కల్‌లో 57 కాశీపూర్‌లో 41 ఎకరాలు, ఉత్తర్‌పల్లిలో 17 ఎకరాలు మిగ తాచోట్ల కలిపి 68 ఎకరాల అసైన్డ్‌ భూముల రికార్డులను మార్చేసినట్టు గుర్తించారు. ఈ మండలంలో మొత్తం 17 రెవెన్యూ గ్రామాలు ఉండగా.. మరో ఆరు గ్రామాల రికార్డులను వెరిఫికేషన్‌ చేయాల్సి ఉంది. వాటిలోనూ తని ఖీ పూర్తయితే.. మరిన్ని అక్రమాలు వెలుగు లోకి వస్తాయని అధికారులు చెప్తున్నారు. ధరణి పోర్టల్‌లో మార్చేసి.. అధికారులు, దళారులు కుమ్మక్కై ధరణి పోర్ట ల్‌ను ఆసరాగా చేసుకుని ఈ భూదందాకు తెరలేపారు. అసైన్డ్‌భూములను ధరణి పోర్టల్‌లో పట్టా భూము లుగా మార్చేశారు. ఈ మేరకు పట్టాదారు పాసు పుస్తకాలు కూడా జారీ చేశారు. తర్వాత ఆ పాసు పుస్తకాల ఆధారంగా.. చాలావరకు భూముల క్రయవిక్రయాలు చేతులు మారాయి. బడాబాబుల చేతుల్లోకి వెళ్లిపోయాయి. రాజకీయ నేతలు, బడాబాబులకు భూములు దక్కేలా చేసిన కొందరు రెవెన్యూ అధికారులు భారీగా దండుకున్నారని.. కోట్లకు పడగలెత్తారని ఆరోపణలు ఉన్నాయి.  వెరిఫికేషన్‌ ప్రక్రియ కొనసాగుతోంది కలెక్టర్‌ ఆదేశాల మేరకు కంది మండలంలో ప్రభుత్వ భూముల వెరిఫికేషన్‌ ప్రక్రియ చేపట్టాం. భూములకు సంబంధించిన రికా ర్డులను క్షుణ్నంగా పరిశీలిస్తున్నాం. అసైన్డ్‌ భూములను పట్టాభూములుగా మార్చి నట్టు గుర్తించాం. అన్ని గ్రామాల్లో వెరిఫి కేషన్‌ పూర్తిచేసి నివేదిక ఇస్తాం. – విజయలక్ష్మి, కంది మండల తహసీల్దార్‌. 

సాక్షి, రంగారెడ్డి జిల్లా/యాచారం: ప్రతిష్టాత్మక సంస్థలు, పారిశ్రామిక వాడలు, ప్రాజెక్టుల ఏర్పాటు సమాచారం ప్రభుత్వంలోని పెద్దలు, ఉన్నతాధికారులకు ముందే తెలియడం సహజం. అయితే దీన్ని ఆసరాగా తీసుకుని కొందరు భారీ మొత్తంలో సొమ్ము చేసుకుంటున్నారు. ఎక్కడైనా, ఏదైనా భారీ ప్రాజెక్టు/ సంస్థ రాబోతుందంటే చాలు చకాచకా పావులు కదపడం, ఆ ప్రాంతానికి చుట్టుపక్కల ఉన్న భూముల్ని గుట్టుచప్పుడు కాకుండా తక్కువ ధరకు కుటుంబసభ్యులు, బినామీల పేరిట కొనేయడం, సదరు ప్రాజెక్టుకు సంబంధించిన ప్రతిపాదనలు కార్యరూపం దాల్చగానే ఎక్కువ ధరకు ప్రభుత్వానికి అప్పగించేసి కోట్లకు పడగలెత్తడం.. విషయం తెలిసిన రైతులు లబోదిబోమనడం.. ఇదీ ఇప్పుడు రాష్ట్రంలో జరుగుతున్న తంతు. ప్రతిష్టాత్మక హైదరాబాద్‌ గ్రీన్‌ ఫార్మాసిటీ విషయంలోనూ ఇదే జరిగింది.  ఫార్మాసిటీ వాసన పసిగట్టిన ‘పెద్ద గద్దలు’ చురుగ్గా కదిలాయి. దాని చుట్టూ వాలిపోయాయి. స్థానిక రైతుల్ని కాలుష్యం పేరిట, ప్రభుత్వం భూమి సేకరించబోతుందంటూ మభ్యపెట్టాయి. ప్రభుత్వంలోని పలువురు ఉన్న తాధికారులతో పాటు పలువురు ప్రభుత్వ పెద్దలు ప్రతిపాదిత ఫార్మాసిటీ చుట్టూ పెద్ద ఎత్తున భూములు తక్కువ ధరకు కొనుగోలు చేశారు. పట్టా భూములు పక్కనే ఉన్న ప్రభుత్వ భూములను కూడా వారి ఖాతాల్లో జమ చేసుకున్నారు. ఆ తర్వా త ఈ భూములనే ఫార్మాసిటీ భూ సేకరణలో భాగంగా ప్రభుత్వానికి అధిక ధరకు అప్పగించి పెద్దెతున లబ్ధి పొందారు. అప్పటివరకు తమ చేతు ల్లో ఉన్న నల్లధనాన్ని తెల్లధనంగా మార్చేసుకున్నా రు. ఉమ్మడి మహబూబ్‌నగర్‌ జిల్లాకు చెందిన ఓ మాజీ మంత్రి, ఇప్పటి ఓ మంత్రి సైతం ఫార్మాసిటీ చుట్టూ పెద్ద ఎత్తున భూములు కొనుగోలు చేయడం గమనార్హం. భూదాన్‌ భూములకూ కొందరు ఎసరు పెట్టడం కొసమెరుపు.      కుటుంబసభ్యులు, బినామీల పేరిట దందా  2017లో హైదరాబాద్‌ గ్రీన్‌ ఫార్మాసిటీ ఏర్పాటు ప్రతిపాదనను తెరపైకి వచ్చింది. రంగారెడ్డి జిల్లా యాచారం, కందుకూర్, కడ్తాల్, ఆమన్‌గల్‌ మండలాల్లోని పది గ్రామాల పరిధిలో 19,333 ఎకరాల్లో దీన్ని ఏర్పాటు చేయాలని నిర్ణయించారు. ఆ మేరకు ఇప్పటికే 12,300 ఎకరాల భూసేకరణ కూడా పూర్తైంది. భూముల ధరలు తక్కువగా ఉండటం, ప్రభుత్వం పెద్ద ఎత్తున ప్రోత్సాహకాలు ప్రకటించడంతో దేశవిదేశాలకు చెందిన 500కు పైగా ఫార్మా కంపెనీలు ఇక్కడ పెట్టుబడులు పెట్టేందుకు ముందుకు వచ్చాయి. అయితే ఏ ఏ సర్వే నంబర్లలో ఎంత భూమిని ఫార్మాసిటీ కోసం సేకరిస్తున్నారనే విషయం అధికారులు, ప్రజాప్రతినిధులకు ముందే తెలియడంతో బినామీలను, కుటుంబ సభ్యులను రంగంలోకి దింపారు.             ఓ మాజీ ఐపీఎస్‌ రైతుల్ని బెదిరించి..!  ఓ మాజీ ఐపీఎస్‌ అధికారి నక్కర్తమేడిపల్లి, కొత్తపల్లి గ్రామాల్లో దాదాపు 400 ఎకరాలకు పైగా వ్యవసాయ భూములను బినామీల పేర్లపై కొనుగోలు చేశారు. 2012 నుంచి 2016 మధ్యకాలంలో జరిగిన లావాదేవీల్లో భాగంగా ఎకరా రూ.లక్ష నుంచి రూ.రెండున్నర లక్షల లోపే కొనుగోలు చేశారు. ఆయా గ్రామాలకు ఐదారు కిలోమీటర్ల దూరంలో ఉన్న వ్యవసాయ భూములను విక్రయించడానికి స్థానిక రైతులు కొందరు నిరాకరించినా, బినామీల ద్వారా రైతులను బెదిరింపులకు గురి చేసి భూములు అమ్మేలా ఒత్తిళ్లు తెచ్చినట్లు ఆరోపణలు ఉన్నాయి. ఆ అధికారి ఫార్మాసిటీ ఏర్పాటు ప్రక్రియ ప్రారంభమైన వెంటనే బినామీల పేరిట ఉన్న 200 ఎకరాలకు పైగా వ్యవసాయ భూమిని ఎకరం రూ.12.50 లక్షల చొప్పున ఫార్మాసిటీకి ఇచ్చేయడం గమనార్హం. కురి్మద్ద, తాడిపర్తి, నానక్‌నగర్‌ గ్రామాల్లో కూడా వ్యవసాయ భూములు కొనుగోలు చేసిన కొందరు అధికారులు, ప్రజాప్రతినిధులు వాటిని ఫార్మాసిటీకి ఇచ్చేసి నష్ట పరిహారం కింద రూ.కోట్లు సంపాదించారు. కేసీఆర్‌ సర్కార్‌లో చక్రం తిప్పిన కీలక అధికారులు కొందరు కొత్తపల్లి గ్రామ రెవెన్యూ పరిధిలో వందలాది ఎకరాల వ్యవసాయ భూములను కొనుగోలు చేశారు. అప్పట్లో కొత్తపల్లి గ్రామ రెవెన్యూ పరిధిలోని దాదాపు 300 ఎకరాలకు పైగా పట్టాభూమిని ఫార్మాసిటీకి తీసుకోవాలని రియల్‌ వ్యాపారులే స్వయంగా ప్రభుత్వాన్ని కోరుతూ లేఖలు ఇవ్వడం గమనార్హం. కాగా తక్కువ ధరలకు వ్యవసాయ భూములు కొనుగోలు చేసి, అధిక ధరలకు ఫార్మాసిటీకి అప్పగించిన ఉన్నతాధికారులు, ప్రజాప్రతినిధుల పేర్లపై మీర్‌ఖాన్‌పేటలోని హెచ్‌ఎండీఏ వెంచర్‌లో అదనంగా ఎకరాల కొద్దీ ప్లాట్లు మంజూరు అయ్యాయి.  భూదాన్‌ భూమిని కొల్లగొట్టిన నేతలు  తాడిపర్తి రెవెన్యూ సర్వే నంబర్‌ 104లో 468.34 ఎకరాల భూమి ఉంది. దాని యజమానులు అప్పట్లో 250 ఎకరాలను భూదాన్‌ బోర్డుకు ఇచ్చారు. సదరు భూమిని తమ పేరున రికార్డుల్లో నమోదు చేయాల్సిందిగా 16/11/2005 లోనే భూదాన్‌బోర్డు ప్రభుత్వానికి లేఖ రాసింది. ఆ మేరకు పహణీల్లోనూ నమోదు చేశారు. అయితే ఓ మాజీ మంత్రి, మరో మాజీ ఎంపీ ఈ భూములను తమ బినామీ పేరున కొట్టేశారు. అంతేకాదు కొండలు, గుట్టలతో కూడిన ఈ భూమి సాగులో ఉన్నట్లు చూపించారు. భూ సేకరణలో భాగంగా ఈ భూములను ఫార్మాసిటీకి అప్పగించి ఎకరానికి రూ.16 లక్షల చొప్పున నష్టపరిహారం పొందారు. ఇలా ప్రభుత్వం నుంచి రూ.40 కోట్ల వరకు కొల్లగొట్టినట్లు తెలిసింది. అంతేకాదు మీర్‌ఖాన్‌పేటలో ఎకరానికి 121 గజాల ఇంటి స్థలాన్ని కూడా పొందారు. ఈ భూములకు ప్రభుత్వం నుంచి నష్టపరిహారం పొందిన వారిలో స్థానికులు కాకుండా అంతా ఇతర ప్రాంతాలకు చెందిన నేతల బినామీలే ఉండటం గమనార్హం. ఈ అంశంపై తాడిపర్తి గ్రామస్తులు అప్పటి ఉన్నతాధికారులకు ఫిర్యాదు చేసినా పట్టించుకున్న దాఖలాలు లేవు. అప్పట్లో ఇక్కడ ఆర్డీఓగా పని చేసిన ఓ అధికారి భూసేకరణ పేరుతో ప్రభుత్వ ఖజానాను భారీగా కొల్లగొట్టినట్లు ఆరోపణలు ఉన్నాయి.  కొత్తపల్లి పరిధిలో మాజీ సీఎస్‌ కొనుగోళ్లు మాజీ సీఎస్‌ సోమేష్‌కుమార్‌ తన భార్య పేరున యాచారం మండలం కొత్తపల్లి రెవెన్యూ పరిధిలోని సర్వే నంబర్‌ 249, 260లలో 25.19 ఎకరాలు కొనుగోలు చేశారు. ఆ పక్కనే సర్వే నంబర్‌ 244 నుంచి 269 వరకు ఉన్న 125 ఎకరాలు తన కుటుంబ సన్నిహితులకు సంబంధించిన రియల్‌ ఎస్టేట్‌ సంస్థ పేరిట కొనుగోలు చేయించారు. ఈ సమయంలో ఆయన ప్రభుత్వంలో కీలకంగా (2016 నుంచి 2018 వరకు రెవెన్యూ ముఖ్య కార్యదర్శిగా, 2020 జనవరి నుంచి 2023 జనవరి వరకు సీఎస్‌గా పని చేశారు) ఉన్నారు. సాగుకు యోగ్యం లేని ఈ భూములకు రైతుబంధు పథకం కింద రూ.14 లక్షల వరకు లబ్ధి పొందినట్లు మాజీ సీఎస్‌పై ఆరోపణలు వెల్లువెత్తడం చర్చనీయాంశమయ్యింది. దీంతో ఈ భూముల కొనుగోలుపై కొత్త ప్రభుత్వం ఆరా తీస్తోంది. ఈ నేపథ్యంలోనే ఇబ్రహీంపట్నం ఆర్డీఓ బుధవారం యాచారం తహశీల్దార్‌ కార్యా లయానికి చేరుకుని పలు రికార్డులను వెంట తీసుకెళ్లినట్లు సమాచారం. కాగా తాను నిబంధనల ప్రకారమే భూములు కొన్నానని, ఎక్కడా నిబంధనల ఉల్లంఘనలకు పాల్పడ లేదని సోమేష్‌ చెబుతున్నారు.  మాజీ ఐపీఎస్‌ భూములు ఇచ్చింది వాస్తవమే  ఓ మాజీ ఐపీఎస్‌ అధికారి నక్కర్తమేడిపల్లి, కొత్తపల్తి గ్రామాల్లో దాదాపు 300 ఎకరాలు  కొనుగోలు చేశాడు. ఎకరాకు రూ.లక్ష నుంచి రూ.2 లక్షల వరకు వెచ్చించాడు. ఫార్మాసిటీ ఏర్పాటు కావడంతో నక్కర్తమేడిపల్లి గ్రామంలో కొనుగోలు చేసిన 200 ఎకరాలకు పైగా భూమిని ఎకరాకు రూ.12.50 లక్షల చొప్పున ఇచ్చేశాడు. ఆ అధికారి కొత్తపల్లి గ్రామంలో కూడా వందలాది ఎకరాల వ్యవసాయ భూమిని కొనుగోలు చేసినట్లు తెలుస్తోంది.   – పాశ్ఛ భాషా, మాజీ సర్పంచ్‌ నక్కర్తమేడిపల్లి 

ప్రభుత్వ భూముల్లో పెత్తందారులు పెత్తనం చెలాయిస్తున్నారు. అసైన్డ్‌  పట్టాలిచ్చారంటూ స్థానికులు, అధికారులను నమ్మించి దర్జాగా అనుభవిస్తున్నారు. పక్కనే ఉన్న మిగులు భూముల్లో దళితులు ఆటస్థలం కోసం చదును చేసుకుంటే వారిపై దౌర్జన్యానికి దిగారు. తిరుపతి జిల్లా వెంకటగిరి నియో జకవర్గం, బాలాయపల్లి మండల పరిధిలోని రామాపురంలో వెలుగుచూసిన టీడీపీ నేతల ఆక్రమణ పర్వంపై ‘సాక్షి’ ఫోకస్‌..  సాక్షి, తిరుపతి: రామాపురం పరిధిలో సర్వే నంబర్‌ 177లో 348.98 ఎకరాల మేతపోరంబోకు భూమి ఉంది. అదేవిధంగా సర్వే నంబర్‌ 189లో 37.7 ఎకరాల చెరువు పోరంబోకు, సర్వే నంబర్‌ 178/1, 179, 180లో ప్రభుత్వ, చెరువు పోరంబోకు భూమి ఉంది. కోట్ల రూపాయల విలువచేసే ఈ భూములపై టీడీపీ నేతల కన్నుపడింది. రామాపురం మారుమూల గ్రామం కావడంతో అప్పట్లో అధికారుల రాకపోకలు పెద్దగా ఉండేవి కావు. ఇదేఅదునుగా టీడీపీ నేతలు కొద్దికొద్దిగా ఆక్రమించుకోవడం ప్రారంభించారు. చంద్రబాబు సామాజికవర్గానికి చెందిన వారు అదే గ్రామ పరిధిలోని దళిత, గిరిజనులు ఆ భూములవైపు వెళ్లకుండా అడ్డుకుంటూ వచ్చారు. దివంగత ముఖ్యమంత్రి వైఎస్‌ రాజశేఖరరెడ్డి హయాంలో భూ పంపిణీ పథకం కింద స్థానిక దిళత, గిరిజనులను జాబితాలో చేర్చినట్లు సమాచారం. అయితే పెత్తందారులు వారి పేర్లను తొలగించినట్లు స్థానికులు ఆరోపించారు.  పెత్తందార్లను ఎదిరిస్తే సాంఘిక బహిష్కరణే!  పెత్తందారులంతా ఏకమై రామాపురం పరిధిలో ఉన్న ప్రభుత్వ, చెరువు పోరంబోకు భూమిని ఆక్రమించుకోవాలని నిర్ణయించుకున్నారు. ఎవరెవరు ఎంతెంత ఆక్రమించుకోవాలో మాట్లాడుకున్నారు. పేరు, పలుకుబడి ఉన్న వారు ఆరు ఎకరాల చొప్పున ఆక్రమించుకుంటే.. వారితో ఉన్న మరికొందరు 1, 2, 3 ఎకరాల చొప్పున ఆక్రమించుకున్నారు. ఆక్రమించుకున్న భూమిలో నిమ్మచెట్లు సాగుచేశారు. పదేళ్ల క్రితం పెట్టిన చెట్లు కావడంతో ప్రస్తుతం పెద్దవయ్యాయి. అక్రమణదారులకు స్థానిక అధికారులు పూర్తిసహాయ సహకారాలు అందిస్తున్నట్టు దళిత, గిరిజనులు ఆరోపిస్తున్నారు. వారిని కాదని ఎదురు తిరిగితే సాంఘిక బహిష్కరణకు గురికాక తప్పదని ఆవేదన వ్యక్తం చేస్తున్నారు.  ఆట స్థలం ఏర్పాటు చేసుకుంటే దౌర్జన్యం  స్థానిక యువకులు కొందరు బీడుగా ఉన్న ప్రభుత్వ భూమి రెండెకరాల్లో క్రికెట్‌ ఆడుకునేందుకు ఆటస్థలంగా తీర్చుకున్నారు. జీరి్ణంచుకోలేని పెత్తందారులు స్థానిక రెవెన్యూ అధికారులను రెచ్చగొట్టి యువకులపైకి పంపారు. ఆటస్థలాన్ని ధ్వంసం చేశారు. అదేవిధంగా దళిత, గిరిజనులు కొందరు బీడుగా ఉన్న భూమిలో నిమ్మచెట్లు పెట్టడంతో.. పెత్తందారులు అధికారుల సహకారంతో ఆ చెట్లను పీకించేశారు. సర్వే నంబర్‌ 177లో రెవెన్యూ అధికారులు హెచ్చరిక బోర్డు పెట్టారు. బీసీ, ఎస్సీ, ఎస్టీలు కొందరు ఏకమై ఇటీవల తిరుపతి కలెక్టర్‌ కార్యాలయానికి వచ్చి ఫిర్యాదు చేయడం గమనార్హం. 

సాక్షి, అమరావతి: వేలాది మందికి ఉపాధి కల్పించేలా ఒక కొత్త పరిశ్రమ వస్తుంటే ‘ఈనాడు’కు ఏడుపు ముంచుకొస్తోంది. ఈ ప్రభుత్వానికి ఎక్కడ మైలేజీ ఇంకా పెరిగిపోతోందోనని ఆందోళన చెందుతోంది. ఉన్నవి లేనివి అన్నీ కలిపి.. టన్నులకొద్దీ బురదజల్లుతూ ప్రజల్లోకి తప్పుడు సంకేతాలు పంపుతోంది. ఏదైనా ఇండస్ట్రీ రాకపోతే ఏడవడం మామూలే అనుకుంటే.. ఎంతో మందికి ఉపకరించే పరిశ్రమ మన రాష్ట్రంలో వెలుస్తోందంటే ఎందుకు ఏడుస్తున్నట్లు? ఎవరి కోసం ఏడుస్తున్నట్లో ఇట్టే అర్థమవుతోంది. ఇండస్ట్రియల్‌ హబ్‌ పేరుతో షిర్డిసాయి ఎలక్ట్రికల్‌ అనుబంధ కంపెనీ ఇండోసోల్‌ సోలార్‌ ప్రైవేట్‌ లిమిటెడ్‌కు నెల్లూరు జిల్లా రావూరు, చేవూరు గ్రామాల్లోని 4,827.04 ఎకరాల భూమిని ప్రభుత్వం కట్టబెట్టేస్తోందని మంగళవారం ‘ఈనాడు’ అక్కసు వెళ్లగక్కింది. షిర్డి సాయి ఏ విధంగా చిన్న సంస్థ? కేంద్ర ప్రభుత్వం ఇస్తున్న ప్రొడక్షన్‌ లింక్డ్‌ ఇన్సెంటివ్‌ స్కీం (పీఎల్‌ఐ)కు అర్హత సాధించిన కంపెనీ. ఆర్థిక స్థితిగతులు, కంపెనీ పనితీరు, సామర్థ్యం చూశాకే కేంద్ర ప్రభుత్వం ఎంపిక చేస్తుంది. ఇలాంటి కంపెనీని పట్టుకుని ‘ఈనాడు’ విషం కక్కడం దుర్మార్గం. కేవలం కడపకు చెందిన రెడ్డి సామాజిక వర్గానికి చెందిన వ్యక్తికి చెందిన సంస్థ కావడమే పాపమైపోయింది. విశాఖపట్నంలో అత్యంత విలువైన భూములను ఎంవీవీఎస్‌ మూర్తి ఆక్రమించినప్పుడు ఏనాడైనా ఈనాడు ఇలాంటి కథనం రాసిందా? ‘షిర్డిసాయికి 4,827 ఎకరాలు’ శీర్షికన ప్రచురించిన ఈనాడు కథనంలో అసలు వాస్తవాలు ఇలా ఉన్నాయి.  ఆరోపణ : సీఎంకు సన్నిహితుడైన వ్యక్తికి చెందినది..  వాస్తవం :  ఈ కంపెనీ కోసం ఒడిశా, రాజస్థాన్, తమిళనాడు లాంటి రాష్ట్రాలు చాలా ఆఫర్లు ఇచ్చాయి. ప్రస్తుతం పరిశ్రమల కోసం వివిధ రాష్ట్రాలు పోటీ పడుతున్న ప్రస్తుత వాతావరణంలో ఇలాంటి కంపెనీలు వస్తున్నాయంటే రెడ్‌ కార్పెట్‌ పరుస్తారు. అలాంటివేమీ అవసరం లేకుండానే వెనకబడ్డ రామాయపట్నం లాంటి ప్రాంతంలో కంపెనీ పెట్టడానికి ముందుకొచ్చింది. గతంలో కియా సంస్థకు ఇచ్చిన స్థాయిలో కూడా ఇండోసోల్‌కు రాయితీలు ఇవ్వలేదు. భూమి, కరెంట్, ఎస్‌జీఎస్‌టీ, మౌలిక సౌకర్యాల విషయంలోనూ కియా కంటే తక్కువ ప్రోత్సాహకాలే ఇచ్చారు. ఈ స్థాయిలో ఏ కంపెనీ వచ్చినా ఏ ప్రభుత్వమైనా సహకరిస్తుంది. ఇక్కడ ముఖ్య విషయం ఏమిటంటే ప్రభుత్వం ఫెసిలిటేటర్‌గా మాత్రమే వ్యవహరిస్తుండటం.  ఆరోపణ: హైదరాబాద్‌లో రిజిస్టరైన కంపెనీ  వాస్తవం : రాష్ట్రంలో పెట్టుబడులు పెట్టడానికి రాష్ట్రంలోనే రిజిస్టర్‌ అయి ఉండక్కర్లేదు. ఉదాహరణకు కియా పరిశ్రమనే తీసుకుంటే ఆ సంస్థ మన రాష్ట్రానికి చెందిందా? కియా కోసం యూనిట్‌ రూ.3 చొప్పున 100 శాతం విద్యుత్‌ను 20 ఏళ్ల పాటు ఇస్తుంది. ఇండోసోల్‌కు మాత్రం 7 సంవత్సరాల పాటు యూనిట్‌కు రూ.4.5 చొప్పున, ఆ తర్వాత 8 సంవత్సరాలకు యూనిట్‌కు రూ.4.5 చొప్పున 40% విద్యుత్‌ను మాత్రమే  కేటాయించారు. సొంత విద్యుత్‌ అవసరాల కోసం ప్రత్యేకంగా విద్యుత్‌ యూనిట్‌ ఏర్పాటుకు (క్యాప్టివ్‌ పవర్‌ ప్లాంట్‌ను) స్థలం కేటాయించాల్సిందిగా ప్రభుత్వాన్ని కోరింది. ఆ ప్రతిపాదనను పరిశీలించిన ప్రభుత్వం ఇండోసాల్‌ తన సొంత ఖర్చుతో 7.2 గిగా వాట్స్‌ విద్యుత్‌ యూనిట్ల ఏర్పాటుకు అవసరమైన భూమిని కేటాయించింది. కియాకు ఎకరా రూ.6 లక్షలతో మాత్రమే సేకరించే అవకాశం ఇచ్చింది. పైగా భూమిని చదును చేసే ఖర్చును రాష్ట్ర ప్రభుత్వమే భరించింది.      ఆరోపణ: అప్పనంగా భూములు కట్టబెట్టేస్తోంది..  వాస్తవం : ఈనాడు చెబుతున్నట్టుగా 4,827 ఎకరాల భూమిని ప్రభుత్వం ఉచితంగా ఇవ్వడం లేదు. పైగా అవి ప్రభుత్వ భూములు కావు. రామాయపట్నంలో ఏపీఐఐసీ, మారిటైమ్‌ బోర్డ్‌ ద్వారా భూ సేకరణను సులభతరం చేయడానికి ప్రభుత్వం అంగీకరించింది. ప్రస్తుతం అమల్లో విధానం ప్రకారం భూసేకరణ కయ్యే వ్యయాన్ని పూర్తిగా మార్కెట్‌ ధర ప్రకారం ఇండోసోల్‌ కంపెనీయే భరిస్తుంది. అంతే గానీ భూమి కొనుగోలు కోసం ఇండోసోల్‌కు ప్రత్యేక ప్రోత్సాహకాలు, సబ్సిడీ ఇవ్వలేదు.    ఆరోపణ: కలెక్టర్‌ లేఖ ఆధారంగా భూ సేకరణ  వాస్తవం : దేశంలోనే అతి పెద్ద పీవీ సోలార్‌ మాడ్యూల్‌ తయారీ యూనిట్‌ కోసం ఈ భూమిని సేకరిస్తున్నారు. ఈ యూనిట్‌ మొదటి దశకు కేంద్ర ప్రభుత్వం ప్రొడక్షన్‌ లింక్డ్‌ ఇన్సెంటివ్‌ స్కీమ్‌ కింద అర్హత సాధించింది. దాని ప్రకారం జాతీయ ప్రాముఖ్యతను కలిగిన ప్రాజెక్టు కోసం ప్రజా ప్రయోజనాలను దృష్టిలో పెట్టుకుని భూసేకరణ జరుగుతోంది. ఇంధన భద్రత, పునరుత్పాదక ఇంధన ఉత్పత్తికి అవసరమైన భాగాలపై ఆధార పడటాన్ని తగ్గించడం, గ్రామీణ విద్యుదీకరణ కోసం అవసరమైన విధానాలను కేంద్రం రూపొందించింది. ఇండ్రస్టియల్‌ కారిడార్లు, హబ్‌ల కోసం ఆంధ్రప్రదేశ్‌ ప్రభుత్వ విధానాల మేరకు అధిక జీతంతో కూడిన ఉద్యోగాలను సృష్టించే పారిశ్రామిక పర్యావరణ వ్యవస్థల అభివృద్ధి, గ్రామీణ ప్రాంతాల విద్యుత్‌ అవసరాలను తీర్చడం వంటి అంశాలు ఈ ప్రాజెక్టులో భాగం. రాష్ట్ర ప్రభుత్వం చట్టబద్దంగా, కేబినెట్‌ ఆమోదంతో ప్రజా ప్రయోజనాలు దృష్టిలో ఉంచుకుని ఈ ప్రాజెక్టుకు భూ సేకరణ కోసం చర్యలు చేపట్టింది.   ఆరోపణ: ఏళ్ల తరబడి కార్యకలాపాలు సాగించలేదు..  వాస్తవం : రాష్ట్రంలోని ప్రముఖ విద్యుత్‌ ఉప కరణాల తయారీ కంపెనీ షిర్డిసాయి ఎలక్ట్రికల్స్‌ లిమిటెడ్‌కు అనుబంధంగా ఇండోసోల్‌ సోలార్‌ ప్రైవేట్‌ లిమిటెడ్‌ ఏర్పాటైంది. ఇప్పటికే షిర్డిసాయి ఎలక్ట్రికల్స్‌ లిమిటెడ్‌ 2,500 మందికి పైగా ఉద్యోగాలను కల్పిస్తోంది. ఇండియన్‌ రెన్యూవబుల్‌ ఎనర్జీ డెవలప్‌మెంట్‌ ఏజెన్సీ (ఐఆర్‌ఇడిఎ) ద్వారా సమీకృత సోలార్‌ మాడ్యూల్‌ తయారీకి సంబంధించిన ప్రొడక్షన్‌ లింక్డ్‌ ఇన్సెంటివ్‌ (పిఎల్‌ఐ) బిడ్డింగ్‌లో రిలయన్స్, అదానీలతో పోటీ పడి ఎల్‌–1గా నిలిచి రూ.1875 కోట్ల రాయితీలను దక్కించుకుంది. ఈ ప్రాజెక్టు ద్వారా ఐదేళ్ల వ్యవధిలో దశల వారీగా ప్రత్యక్షంగా 11,500 మందికి, పరోక్షంగా దాదాపు 10,000 –11,000 మందికి ఉపాధి కల్పించే అవకాశం ఉంది. ప్రత్యక్షంగా 11,500 మందికి ఉపాధి కల్పిస్తుండటంతో రాష్ట్ర ఇన్వెస్ట్‌మెంట్‌ ప్రమోషన్‌ బోర్డు జాగ్రత్తగా పరిశీలించాకే ప్రోత్సాహకాలను వర్తింప చేసింది.   

రాయచోటి: ప్రజా సేవే ధ్యేయంగా తాను పనిచే­స్తానని, ప్రజల వద్ద తలదించుకునే పనిని ఎప్పుడూ చేయనని, ఆరోజు వస్తే రాజకీయాల నుంచి శాశ్వ­తంగా తప్పుకుంటానని రాయచోటి ఎమ్మెల్యే గడి­కోట శ్రీకాంత్‌రెడ్డి చెప్పారు. సాక్ష్యాధారాలు లేకుండా బుర­దజల్లే రాజకీయాలు మానుకోవాలని హితవు పలికారు. రాయచోటిలో మంగళవారం తహసీల్దార్‌ రవిశంకర్‌ రెడ్డి, సబ్‌ రిజిస్ట్రార్‌ గురుస్వామిలతో కలిసి ఆయన మీడియాతో మాట్లాడారు. జిల్లా కేంద్రం అయిన తర్వాత ఇక్కడ భూముల విలువ బాగా పెరిగి, భూ దందాలపై ఫిర్యాదులు వస్తున్నాయని చెప్పారు. అంతకు ముందే తాను ప్రభుత్వ భూములు కాపాడాలని అధి­కారులకు సూచించానన్నారు. ఇంటిగ్రేటెడ్‌ కలెక్ట­రేట్‌ భూమి రిజిస్ట్రేషన్‌ విషయంలో జరిగింది తప్పేనని, ఈ స్థలం కబ్జాకు గురైందన్న విషయం పత్రికల ద్వారానే తనకు తెలిసిందని అన్నారు. రిజి­స్ట్రేషన్లను ఎక్కడైనా చేసుకోవచ్చన్న చట్టం వల్ల రాయచోటికి సంబంధించిన 938 రిజిస్ట్రేషన్లు ఇతర ప్రాంతాల్లో జరిగాయని చెప్పారు. వీటిలో 275 రిజెక్ట్‌ అయ్యాయన్నారు. ఇలా వేరే ప్రాంతాల్లో ఎందుకు రిజిస్ట్రేషన్లు చేసుకున్నారో వాటిని చేయించుకున్న వారికే ఎరుక అన్నారు. లక్కిరెడ్డిపల్లె ఎస్సీల భూ వ్యవహారంలో మాజీ ఎమ్మెల్యేపైన కూడా తాను వ్యక్తిగత ఆరోపణలు చేయలేదని అన్నారు. ఆ ఘటనపై పూర్తి స్థాయిలో విచారించి తప్పు చేసిన వారిపై చర్యలు తీసుకోవాలని అధికారులను కోరానన్నారు. 

సాక్షి, హైదరాబాద్‌: కంచె చేను మేసిన చందంగా ప్రజాప్రతినిధే సర్కారు భూమిని కబ్జా చేశాడు. పట్టా భూమి కొనుగోలు చేసి..పక్కనే ఉన్న ప్రభుత్వ భూమిలో పాగా వేశాడు. రూ.2 కోట్ల విలువైన ఈ భూమికి ఏకంగా ప్రహరీ కూడా ఏర్పాటు చేసి.. తన ఆధీనంలోకి తీసుకున్నాడు. పలుకుబడి కలిగిన ఆ ప్రజాప్రతినిధి ప్రభుత్వ భూమి కబ్జా వ్యవహారం తెలిసినా రెవెన్యూ అధికారులు అటువైపు వెళ్లేందుకు సాహసించడంలేదు. శంషాబాద్‌ మండలం పాల్మాకుల రెవెన్యూ పరిధిలోని సర్వే నంబర్‌ 13లో 32 ఎకరాల ప్రభుత్వ భూమి ఉంది. ఇందులో 28 ఎకరాలను పేద రైతులకు ప్రభుత్వం అసైన్డ్‌ చేసింది. అక్రమంగా నిర్మించిన ప్రహరీ నాలుగు ఎకరాలు మాత్రం ఖాళీగానే ఉంది. ఈ భూమిని ఆనుకుని పట్టా (సర్వేనం.28) భూములున్నాయి. ఈ భూమిలో కొంత మేర కొనుగోలు చేసిన ప్రజాప్రతినిధి కన్ను పక్కనే ఉన్న సర్కారు భూమిపై పడింది. పట్టా భూమి చుట్టూ ప్రహరీ నిర్మించిన ఆయన పనిలో పనిగా హద్దు రాళ్లను తొలగించి సర్కారు భూమిని కూడా తన ఖాతాలో కలిపేసుకున్నాడు. దీని విలువ బహిరంగ మార్కెట్‌లో రూ.రెండు కోట్లు ఉంది. ఆక్రమించిన ప్రభుత్వ భూమిలో పెద్ద గుట్ట కూడా ఉంది. ఈ బండరాళ్లను పగలగొట్టి గ్రానైట్‌ రాళ్లుగా మార్చి సొమ్ము చేసుకుంటున్నారు.    ఆక్రమణలను అడ్డుకుంటాం  ప్రభుత్వం పేదలకు అసైన్డ్‌ చేయగా మిగిలిన ప్రభుత్వ భూమి ఆక్రమణలకు గురైన విషయం ఇప్పటి వరకు మా దృష్టికి రాలేదు. ఆర్‌ఐని క్షేత్రస్థాయి పరిశీలనకు పంపుతాం. ప్రభుత్వ భూమి ఆక్రమణకు గురైనట్లు తేలితే..స్వా«దీనం చేసుకుని హెచ్చరిక బోర్డులు నాటుతాం. ఆక్రమణ దారులపై చర్యలు తీసుకుంటాం.     – శ్రీనివాసరెడ్డి, తహసీల్దార్, శంషాబాద్‌  నాడు రామోజీ.. నేడు అధికారపార్టీ నేత  సర్వే నంబరు 13 సర్కారు భూముల పక్కనే మార్గదర్శి చిట్‌ఫండ్‌ యజమాని రామోజీరావు భూములు ఉన్నాయి. నాలుగు ఎకరాలను తన భూమిలో కలిపేసి చుట్టూ ఫెన్సింగ్‌ వేశారు. 2011లో ‘సాక్షి’ ఈ భూ కబ్జాపై వరస కథనాలు ప్రచురించడంతో రెవెన్యూ అధికారులు సర్వే చేసి కబ్జాను నిర్దారించారు. దీంతో ఆక్రమణదారులు అప్పట్లో ఈ నాలుగు ఎకరాలను వదిలేసి లోపలి వైపు కడీలు పాతారు. అప్పటి నుంచి ఖాళీగా ఉన్న ఈ సర్కారు భూమిపై ఇప్పుడు స్థానిక ప్రజాప్రతినిధి కన్నుపడింది.  చదవండి: ఐబీఎస్‌ కాలేజ్‌ ర్యాగింగ్‌ ఘటన.. వెలుగులోకి సంచలన విషయాలు

ఏయూక్యాంపస్‌: రైతుల పేరుతో చేపట్టిన బూటకపు పాదయాత్రను అడ్డుకుంటామని ఆంధ్రా యూనివర్సిటీ (ఏయూ) ఆచార్యులు, ఉద్యోగులు, పరిశోధకులు నినదించారు. గతంలో హైదరాబాద్‌ను అభివృద్ధి చేసి ఎంతో నష్టపోయామన్నారు. టీడీపీ నాయకులు అమరావతిని మరో హైదరాబాద్‌గా మార్చాలని ప్రయత్నించడం ఎంతవరకు సమంజసమని ప్రశ్నించారు. దీనికి కొన్ని రాజకీయ పార్టీలు వంతపాడటం రాష్ట్రాభివృద్ధిని అడ్డుకోవడమేనని చెప్పారు. విశాఖపట్నంలోని ఏయూలో జ్యోతిరావుపూలే విగ్రహం వద్ద బుధవారం వారు సమావేశమయ్యారు. మూడు రాజధానులకే తమ మద్దతని చెప్పారు. ఈ సందర్భంగా వర్సిటీ విద్య విభాగాధిపతి డాక్టర్‌ టి.షారోన్‌రాజు విలేకరులతో మాట్లాడుతూ కొంతమంది రియల్టర్లు, పెట్టుబడిదారులు చేస్తున్న ఈ యాత్రను తాము అడ్డుకుంటామన్నారు. అధికార వికేంద్రీకరణతో రాష్ట్ర సమగ్ర వికాసం సాధ్యపడుతుందన్నారు. మూడు రాజధానులతో రాష్ట్రంలో మూడు ప్రాంతాలు ఎంతో అభివృద్ధి సాధిస్తాయని చెప్పారు. ఏయూ ఉద్యోగ సంఘం నాయకుడు డాక్టర్‌ జి.రవికుమార్‌ మాట్లాడుతూ పారిశ్రామిక, ఐటీ, వాణిజ్య, వ్యవసాయ రంగాల్లో విరాజిల్లుతున్న విశాఖను పరిపాలన రాజధానిగా చేసుకోవడం ఎంతో అవసరమని చెప్పారు. ఉత్తరాంధ్ర విద్యార్థులకు మెరుగైన అవకాశాలు రావడానికి మూడు రాజధానుల నిర్ణయం ఎంతో ఉపయోగపడుతుందన్నారు. మూడు ప్రాంతాలను సమానంగా అభివృద్ధి చేసే విధంగా రాష్ట్ర ప్రభుత్వం పనిచేస్తోందని చెప్పారు. అమరావతిలో జరుగుతున్న ఉద్యమం కేవలం తాత్కాలికంగా పెట్టుబడిదారులు నడిపిస్తున్న ఉద్యమంగా కనిపిస్తోందన్నారు. విద్యార్థి జేఏసీ కన్వీనర్‌ బి.కాంతారావు మాట్లాడుతూ రాష్ట్ర ప్రభుత్వం వెంటనే విశాఖను పరిపాలన రాజధానిగా చేయాలని కోరారు. తద్వారా ఉత్తరాంధ్ర వలసలు తగ్గి, స్థానికంగా ఉపాధి అవకాశాలు మెరుగవుతాయన్నారు. రాజధాని ఏర్పాటుకు ప్రభుత్వ భూములు అందుబాటులో ఉన్నాయని తెలిపారు. దీన్ని అడ్డుకునే విధంగా బూటకపు పాదయాత్రలు చేయడం సరికాదని చెప్పారు. టీడీపీ నాయకులు ఈ ప్రాంత ప్రజల ఓట్లతో గెలిచి వారి మనోభావాలను గౌరవించకపోవడం విచారకరమన్నారు. వారు వెంటనే స్పష్టమైన వైఖరి తెలిపాలని కోరారు. విశాఖ జిల్లాలోకి పాదయాత్రను ఎట్టిపరిస్థితుల్లోను  అడుగు పెట్టనివ్వబోమని స్పష్టం చేశారు. ఈ నెల 17న జీవీఎంసీ గాంధీ విగ్రహం వద్ద, 19వ తేదీన ఎన్‌ఏడీ కూడలి వద్ద విద్యార్థులతో నిరసన కార్యక్రమాలు నిర్వహిస్తామని ఆయన చెప్పారు. డాక్టర్‌ ఎం.కళ్యాణ్, డాక్టర్‌ శాంతారావు, మురళి, విద్యార్థులు సాయికృష్ణ, భరత్, నవీన్‌దాస్, బాలాజీ, శివ, పృధ్వీ, మాధవ్‌రెడ్డి, రామ్‌కుమార్‌రెడ్డి, జగన్, సోమశేఖర్‌ పాల్గొన్నారు.  

సాక్షి, అమరావతి: కృష్ణానది పరీవాహక ప్రాంతంలోని కరకట్టపై అక్రమ నిర్మాణాలన్నింటినీ కూల్చి వేయాల్సిందేనని హైకోర్టు స్పష్టం చేసింది. ప్రభుత్వ భూములు, గ్రామ కంఠాలు, చెరువులు, నీటి కుంటలు, ఇతర నీటి వనరులు, శ్మశానాలు తదితరాలను ఆక్రమించుకుని చేపట్టిన నిర్మాణాలను కూడా కూల్చి వేయాలని రాష్ట్ర ప్రభుత్వానికి తేల్చి చెప్పింది. 30–40 సంవత్సరాల క్రితమే భూములను ఆక్రమించుకుని చేపట్టిన నిర్మాణాలను సైతం తొలగించాలంది. తమకు ఎవరైనా ఒక్కటేనని, ఈ విషయంలో నిర్దిష్టమైన ఆదేశాలు జారీ చేస్తామని తెలిపింది. రాష్ట్ర వ్యాప్తంగా చెరువులు, నీటి వనరులు తదితరాలను ఆక్రమించి చేపట్టిన నిర్మాణాల సంగతి తేలుస్తామన్న హైకోర్టు.. ఈ వ్యవహారాన్ని సుమోటో పిల్‌గా మలిచిన విషయం తెలిసిందే. ఈ తరహా ఆక్రమణలన్నింటిపై దాఖలైన వ్యాజ్యాలన్నింటినీ ఈ సుమోటో పిల్‌కు జత చేసిన ప్రధాన న్యాయమూర్తి (సీజే) జస్టిస్‌ ప్రశాంత్‌ కుమార్‌ మిశ్రా, న్యాయమూర్తి జస్టిస్‌ డీవీఎస్‌ఎస్‌ సోమయాజుల ధర్మాసనం.. వీటిపై మంగళవారం విచారణ జరిపింది. ఈ సందర్భంగా ప్రభుత్వ ప్రత్యేక న్యాయవాది (ఎస్‌జీపీ) చింతల సుమన్‌ వాదనలు వినిపిస్తూ, కృష్ణానది పరీవాహక ప్రాంతాన్ని ఆక్రమించుకుని కరకట్ట వద్ద నిర్మాణాలు చేపట్టారని, వాటికి సంబంధించిన వ్యాజ్యాలు పెండింగ్‌లో ఉన్నాయని ధర్మాసనం దృష్టికి తీసుకొచ్చారు. ఆ నిర్మాణాల సంగతి కూడా చూస్తామని, తమకు ఎవరైనా ఒకటేనని ధర్మాసనం స్పష్టం చేసింది. ప్రభుత్వ న్యాయవాది (రెవిన్యూ) పోతిరెడ్డి సుభాష్‌ రెడ్డి స్పందిస్తూ, ప్రభుత్వ భూములను ఆక్రమించుకుని 30–40 ఏళ్ల క్రితమే చేపట్టిన నిర్మాణాల సంగతి ఏమిటని అడిగారు. అలాంటి నిర్మాణాలను సైతం కూల్చి వేయాల్సిందేనని ధర్మాసనం స్పష్టం చేసింది. అన్ని వ్యాజ్యాల్లో ఉమ్మడి ఉత్తర్వులు జారీ చేస్తామంది. ఆక్రమణదారులను ఖాళీ చేయించాల్సిందేనని, ప్రభుత్వం తీసుకొచ్చిన క్రమబద్దీకరణ పథకం ద్వారా క్రమబద్దీకరణ చేసుకున్న వారు మినహా ప్రభుత్వ భూములను ఆక్రమించుకున్న మిగిలిన వారంతా ఖాళీ చేయాల్సిందేనని తేల్చి చెప్పింది. ఈ సమయంలో న్యాయవాది యలమంజుల బాలాజీ జోక్యం చేసుకుంటూ, వినుకొండలో మునిసిపాలిటీయే డిగ్రీ కాలేజీ భూమిని ఆక్రమించుకుని నిర్మాణాలు చేపడుతోందని ధర్మాసనం దృష్టికి తీసుకొచ్చారు. దీనిపై కౌంటర్‌ దాఖలు చేయాలని మునిసిపల్‌ కార్పొరేషన్‌ తరఫు న్యాయవాదిని ఆదేశించిన ధర్మాసనం విచారణను ఈ నెల 16కి వాయిదా వేసింది. ..ఇలా కుమ్మక్కవుతారు  తామిచ్చిన ఆదేశాల ప్రకారం ఆక్రమణల తొలగింపునకు అధికారులు చర్యలు మొదలు పెట్టగానే, కొందరు హైకోర్టు సింగిల్‌ జడ్జి వద్ద పిటిషన్లు దాఖలు చేస్తారని, తామిచ్చిన ఉత్తర్వుల సంగతి సింగిల్‌ జడ్జికి చెప్పకుండా స్టే ఉత్తర్వులు పొందుతారని ధర్మాసనం తెలిపింది. అధికారులు సైతం తమ ఉత్తర్వుల సంగతిని సింగిల్‌ జడ్జి దృష్టికి తీసుకురారని, ధర్మాసనం ఇచ్చిన ఉత్తర్వుల సంగతి తెలియని సింగిల్‌ జడ్జి.. పిటిషనర్లకు అనుకూలంగా స్టే ఉత్తర్వులు ఇస్తారని వివరించింది. ఇలా పిటిషనర్లు, రెవిన్యూ అధికారులు కలిసి కుమ్మక్కవుతారని ఘాటుగా వ్యాఖ్యానించింది.  రాజ్యాంగం ఆక్రమించుకోమని చెప్పిందా? గ్రామ కంఠం భూములను ఆక్రమించుకుని 30–40 ఏళ్ల క్రితమే నిర్మాణాలు చేపట్టారని, ఇప్పుడు హైకోర్టు ఆదేశాలు ఇస్తే అధికారులు ఎలాంటి నోటీసు ఇవ్వకుండా, తమ వాదన వినకుండా ఆ నిర్మాణాలను కూల్చేస్తారని న్యాయవాది విద్యావతి ధర్మాసనం దృష్టికి తీసుకొచ్చారు. కూల్చి వేతలకు ముందు అధికారులు తప్పక వాదనలు వినిపించుకునే అవకాశం ఇస్తారని, ఆ అవకాశాన్ని సద్వినియోగం చేసుకోవాలని ధర్మాసనం తేల్చి చెప్పింది. తమ జీవనాధారాన్ని కూడా చూడాలని, రాజ్యాంగం ప్రసాదించిన జీవించే హక్కును పరిగణనలోకి తీసుకోవాలని విద్యావతి కోరారు. దీనిపై ధర్మాసనం స్పందిస్తూ.. రాజ్యాంగం ప్రభుత్వ భూములను ఆక్రమించుకోమని చెప్పిందా? అని ప్రశ్నించింది. రెవిన్యూ అధికారుల వల్లే ఆ పరిస్థితి  ప్రభుత్వ న్యాయవాది సుభాష్‌ స్పందిస్తూ.. దాదాపు 5 వేల ఎకరాల ప్రభుత్వ భూమి ఆక్రమణల్లో ఉందని తెలిపారు. ధర్మాసనం స్పందిస్తూ, ఇందులో రెవిన్యూ అధికారుల పాత్ర కూడా ఉందని తెలిపింది. రెవిన్యూ అధికారుల ఉదాసీనత, నిర్లక్ష్యం, అవినీతి కారణంగానే ప్రభుత్వ భూముల ఆక్రమణలు పెరిగిపోయాయని  స్పష్టం చేసింది. ఈ సమయంలో ఓ న్యాయవాది స్పందిస్తూ, గుంటూరులో శ్మశాన వాటికను ఆక్రమించుకుని షాపింగ్‌ కాంప్లెక్స్‌ నిర్మించారని ధర్మాసనం దృష్టికి తీసుకొచ్చారు. శ్మశానంలో షాపింగ్‌ కాంప్లెక్సా అంటూ ధర్మాసనం విస్మయం వ్యక్తం చేసింది. కాగా, వివిధ రకాల ఆక్రమణలపై దాఖలైన 55 పిటిషన్లకు సంబంధించి   తగిన ఉత్తర్వులు జారీ చేసేందుకు వీలుగా వ్యాజ్యాలను ప్రభుత్వ భూముల ఆక్రమణ, చెరువుల ఆక్రమణ, శ్మశానాల ఆక్రమణ, తదితర అంశాల వారీగా ధర్మాసనం విభజించింది. వీటిపై తదుపరి విచారణ నిమిత్తం కొన్నింటిని బుధవారం, మరి కొన్నింటిని గురువారానికి, ఇంకొన్నింటిని సోమవారానికి వాయిదా వేసింది. 

సాక్షి ప్రతినిధి, రాజమహేంద్రవరం: అవినీతి, వందల కోట్ల రూపాయల అక్రమాస్తులు పోగేసిన వ్యవహారంలో గుజరాత్‌లో కలెక్టర్‌గా పనిచేస్తున్న కంకిపాటి రాజేష్‌ సీబీఐ అధికారులకు దొరికిపోయారు. తూర్పు గోదావరి జిల్లా రాజమహేంద్రవరంలో పుట్టి పెరిగిన రాజేష్‌ 2011లో ఐఏఎస్‌ సాధించారు. గుజరాత్‌లోని సురేంద్రనగర్‌ కలెక్టర్‌గా బాధ్యతలు నిర్వహించినప్పుడు ఆయన భారీ ఎత్తున అవినీతికి పాల్పడ్డారని సీబీఐ అభియోగాలు మోపింది. మైనింగ్‌ లీజులు, తుపాకీలకు లైసెన్సులు ఇవ్వడం, బినామీ పేర్లతో ప్రభుత్వ భూములు సొంతం చేసుకోవడం, భూములను కబ్జా చేసినవారికి వాటిని క్రమబద్ధీకరించడం, ఖరీదైన బట్టల రూపంలో లంచాలు వసూలు చేయడం.. ఇలా అవినీతిలో కూరుకుపోయి భారీగా ఆస్తులు పోగేశారు. గుజరాత్‌లోని సురేంద్రనగర్‌ కలెక్టర్‌గా పనిచేసినప్పుడు వచ్చిన ఫిర్యాదులపై విచారణ జరిపిన సీబీఐ రాజేష్‌ అవినీతి గుట్టును రట్టు చేసింది.  ఏకకాలంలో సీబీఐ సోదాలు ప్రస్తుతం కంకిపాటి రాజేష్‌ గుజరాత్‌ సాధారణ పరిపాలన శాఖలో సంయుక్త కార్యదర్శి హోదాలో ఉన్నారు. కలెక్టర్‌గా ఉన్నప్పుడు పెద్దఎత్తున అవినీతి, అక్రమాలకు పాల్పడ్డట్టు వచ్చిన ఫిర్యాదులపై సీబీఐ ఏడాదిపాటు లోతైన విచారణ చేసి ఆయన అక్రమాస్తుల గుట్టును బయటపెట్టింది. కలెక్టర్‌గా ఉన్న సమయంలో ఆర్థిక అవకతవకలకు పాల్పడ్డారని గురువారం కేసు నమోదు చేసింది. రాజమహేంద్రవరం శివారు లాలాచెరువు, అహ్మదాబాద్, సురేంద్రనగర్, తదితర ప్రాంతాల్లో ఉన్న రాజేష్‌ నివాసాలు, కార్యాలయాలలో ఏకకాలంలో సోదాలు నిర్వహించింది. ఈ సోదాల్లో రాజేష్‌ అక్రమాలకు సంబంధించిన పత్రాలు, డిజిటల్‌ సాక్ష్యాలను సీబీఐ స్వాధీనం చేసుకుంది. లాకర్లలో ఇప్పటివరకు గుర్తించిన పత్రాల ప్రకారం ఆస్తుల మార్కెట్‌ విలువ రూ.300 కోట్ల పైనే ఉంటుందని తేల్చారు. ఇళ్లు, భూమి సహా ఎనిమిది రకాల ఆస్తులకు సంబంధించిన పత్రాలు లభించినట్లు సీబీఐ వర్గాలు తెలిపాయి. దీంతో రాజేష్‌తోపాటు ఆయనకు సహాయం అందిస్తున్న వ్యాపారవేత్త రఫీక్‌ మెమను సీబీఐ అదుపులోకి తీసుకుంది. ఈ ఇద్దరిపై సాక్ష్యాలను నాశనం చేయడం, నేరపూరిత కుట్రకు పాల్పడటం వంటి అభియోగాలు నమోదు చేసింది. వారిద్దరిని సీబీఐ కోర్టులో హాజరుపర్చింది. విచారణకు 10 రోజులు తమకు అప్పగించాలని సీబీఐ విజ్ఞప్తి చేయగా కోర్టు ఒక రోజు మాత్రమే అవకాశం ఇచ్చింది.  తవ్వే కొద్దీ బయటపడుతున్న అక్రమాలు.. రాజేష్‌ అక్రమాల పుట్ట తవ్వే కొద్దీ బయటపడుతోంది. సురేంద్రనగర్‌ జిల్లా కలెక్టర్‌గా ఉన్నప్పుడు ‘జిల్లా కలెక్టర్‌ ఫండ్‌’, ‘సుజలాం.. సుఫలాం’ కోసం పలువురు ఇచ్చిన చెక్కులను కూడా మార్చేసి అక్రమాలకు పాల్పడ్డట్టు గుర్తించారు. ప్రభుత్వ ఖాతాల్లో ఈ నగదును జమ చేస్తానని నమ్మబలికి స్వాహా చేసినట్టు సీబీఐ నిగ్గు తేల్చింది. రాజేష్‌ అక్రమాలకు మధ్యవర్తిగా సూరత్‌కు చెందిన బట్టల వ్యాపారి రఫీక్‌ మెమన్‌వ్యవహరించారు. ఆయుధాల లైసెన్సులు, మైనింగ్‌ లీజుల కోసం తనను సంప్రదించేవారితో రాజేష్‌ తాను అడిగినంత మొత్తాన్ని రఫీక్‌కు చెల్లించమని చెప్పేవాడని సీబీఐ పేర్కొంది. బినామీ పేర్లతో ప్రభుత్వ భూములు స్వాధీనం, ఆక్రమణలకు గురైన ప్రభుత్వ భూమిని క్రమబద్ధీకరించడం ద్వారా కోట్ల రూపాయలు కొల్లగొట్టినట్టు సీబీఐ తేల్చింది. సీబీఐతోపాటు గుజరాత్‌ అవినీతి నిరోధక శాఖ కూడా విచారణ చేపట్టి కేంద్రానికి నివేదిక పంపాయి. ఆ రాష్ట్ర మాజీ అదనపు ప్రధాన కార్యదర్శి పీకే తనేజా ప్రాథమిక విచారణలోనూ ఈ అవినీతి బండారం బయటపడటంతో గుజరాత్‌ ప్రభుత్వం సీబీఐ విచారణకు ఆదేశించింది.  

సాక్షి, అమరావతి: భూ యాజమాన్య హక్కులకు సంబంధించి మ్యుటేషన్ల ప్రక్రియను మరింత సులభతరం చేసేందుకు ప్రభుత్వం నూతన మార్గదర్శకాలు జారీ చేసింది. ఈ మేరకు పలు అంశాలపై కలెక్టర్లు, జాయింట్‌ కలెక్టర్లు, రెవెన్యూ అధికారులకు స్పష్టతనిస్తూ భూపరిపాలన ప్రధాన కమిషనర్‌(సీసీఎల్‌ఏ) సాయిప్రసాద్‌ ఆదేశాలు ఇచ్చారు.  ముందే సబ్‌ డివిజన్‌ తప్పనిసరి మ్యుటేషన్‌కు దరఖాస్తు చేసుకున్న వారు దానికి ముందే సర్వే నెంబర్‌ను సబ్‌ డివిజన్‌ చేసుకోవడాన్ని తప్పనిసరి చేశారు. సబ్‌ డివిజన్‌ ప్రక్రియ పూర్తై రికార్డుల్లో సర్వే నెంబర్లు, పేర్లన్నీ ఆ ప్రకారం ఉన్నట్లు నిర్థారించుకున్న తర్వాతే మ్యుటేషన్‌ ప్రక్రియ ప్రారంభించాలని తహశీల్దార్లకు సూచించారు. పాస్‌బుక్‌ల జారీ కూడా మ్యుటేషన్‌ సమయంలోనే పూర్తి చేయాలని పేర్కొన్నారు. మ్యుటేషన్‌తోపాటు పాస్‌బుక్‌ కోసం దరఖాస్తు స్వీకరించి రెండింటినీ ఒకేసారి పూర్తి చేయాలని స్పష్టం చేశారు.  ప్రభుత్వ భూములపై.. ప్రభుత్వ భూములను ఎట్టి పరిస్థితుల్లోనూ మ్యుటేషన్‌ చేయరాదని సూచించారు. కొన్ని ప్రత్యేక కేసుల్లో చేయాల్సి వచ్చినప్పుడు ఆ బాధ్యతను పూర్తిగా జాయింట్‌ కలెక్టర్లకు అప్పగించారు. అది కూడా కలెక్టర్ల నుంచి వచ్చిన ఫైలు ఆధారంగా చేయాలని స్పష్టం చేశారు. ఇప్పటివరకు తహశీల్దార్లకు ఉన్న ఈ అధికారాన్ని జేసీలకు బదలాయించారు. వారసత్వ వివాదాలకు సంబంధించి మ్యుటేషన్ల విషయంలో ఫ్యామిలీ సర్టిఫికెట్‌ను తహశీల్దార్‌ అదే సమయంలో ఇవ్వాలని నిర్దేశించారు. మ్యుటేషన్‌ చేసుకునే సమయంలోనే ఫ్యామిలీ సర్టిఫికెట్‌ను దరఖాస్తుదారుడు ఇచ్చినప్పుడు మళ్లీ ఆ కుటుంబం గురించి విచారణ చేయాల్సిన అవసరం లేదని పేర్కొన్నారు. చుక్కల భూములు, అసైన్డ్‌ మ్యుటేషన్‌పై స్పష్టత  చుక్కల భూముల చట్టం వచ్చే నాటికి 12 సంవత్సరాలు దాటి సంబంధిత భూములు దరఖాస్తు చేసుకున్న వారి స్వాధీనంలోనే ఉన్నట్లు రికార్డుల ప్రకారం నిర్థారణ అయితే వాటికి మ్యుటేషన్‌ చేయవచ్చని సూచించారు. తీర్పులు వెలువడిన కేసులు, కోర్టు ద్వారా వేలం పాట నిర్వహించిన ఆస్తులను కొనుగోలు చేసిన వారికి వెంటనే యాజమాన్య హక్కులు కల్పించాలని కలెక్టర్లను ఆదేశించారు. అసైన్డ్‌ భూములకు సంబంధించి రికార్డుల్లో ఉన్న వ్యక్తులే మ్యుటేషన్‌కు దరఖాస్తు చేసుకుంటే చేయాలని, మూడో వ్యక్తి ఎవరైనా దరఖాస్తు చేస్తే తిరస్కరించాలని స్పష్టం చేశారు. భూముల రీ సర్వే పూర్తయిన చోట సర్వే పూర్తయినట్లు జారీ చేసే 13 నోటిఫికేషన్‌ ఇవ్వడానికి ముందే అప్పటివరకు ఉన్న మ్యుటేషన్‌ దరఖాస్తులను క్లియర్‌ చేయాలని నిర్దేశించారు. మ్యుటేషన్‌ దరఖాస్తులను చిన్న కారణాలతో తిరస్కరించకూడదని, ఎందుకు తిరస్కరించారో స్పష్టమైన కారణాలు చూపాలని, ఇంకా ఏ డాక్యుమెంట్లు కావాలో స్పష్టంగా పేర్కొనాలని సూచించారు. మ్యుటేషన్‌ కోసం వచ్చే దరఖాస్తుల్లో 45 శాతం తిరస్కారానికి గురవుతుండడంతో పలు అంశాలపై స్పష్టత ఇస్తూ ప్రభుత్వం ఈ మార్గదర్శకాలు జారీ చేసింది. 

సాక్షి, రంగారెడ్డిజిల్లా: ప్రభుత్వ నిషేధిత జాబితాలో ఉన్న వక్ఫ్‌ భూమికి ఏకంగా హెచ్‌ఎండీఏ లే అవుట్‌ పర్మిషన్ (ఎల్పీ) ఇవ్వడం వివాదాస్పదంగా మారింది. ప్రభుత్వం రూపొందించిన ధరణి, రిజిస్ట్రేషన్‌ అండ్‌ స్టాంప్స్‌ డిపార్ట్‌మెంట్లు నిషేధిత జాబితాలో పొందుపర్చిన ఈ భూముల వివరాలను కనీసం పరిశీలించకుండా ఏకపక్షంగా అనుమతులు జారీ చేయడంపై అనుమానాలు వ్యక్తమవుతున్నాయి. ప్రభుత్వ భూములను కాపాడాల్సిన అధికారులే ఇలా వ్యవహరించడంపై సర్వత్రా విమర్శలు వెల్లువెత్తుతున్నాయి.   పాస్‌బుక్‌ను రద్దు చేసినా..  మహేశ్వరం మండలం కొంగరకుర్దు రెవెన్యూ పరిధిలోని ఔటర్‌ను ఆనుకుని సుమారు 500 ఎకరాల వక్ఫ్‌ భూమి ఉంది. 1962 నుంచి ఇప్పటి వరకు పహానీల్లో పట్టాదారు కాలంలో సయ్యద్‌ శారాజ్‌ ఖత్తాల్‌ హుస్సేన్‌సాబ్‌ దర్గా పేరిట నమోదైంది. దీన్ని వక్ఫ్‌ భూమిగా పేర్కొంటూ 2008లో ప్రభుత్వం గెజిట్‌ నోటిఫికేషన్‌ జారీ చేసింది. ఈ భూమిని సాగు చేసుకుంటున్న కొందరు రైతులు గెజిట్‌ను సవాల్‌ చేస్తూ హైకోర్టును ఆశ్రయించారు. కోర్టు స్టేటస్‌ కో విధించింది. అప్పటి నుంచి కేసు పెండింగ్‌లోనే ఉంది. అనంతరం వక్ఫ్‌భూముల రిజిస్టేషన్లు సైతం నిలిచిపోయాయి.కానీ సర్వే నంబర్‌ 82/అ/1/1లో 11.17 ఎకరాలు ఉండగా, ఇందులో ఆరు ఎకరాలకు 2018లో ఒకరి పేరిట (ఖాతా నంబర్‌ 429 టీ 0516090202) పట్టాదారు పాస్‌బుక్‌ జారీ చేయడం.. ఒకే భూమికి రెండుసార్లు ఓఆర్సీ ఇవ్వడం అప్పట్లో చర్చనీయాంశంగా మారింది. హైకోర్టులో కేసు పెండింగ్‌లో ఉండటంతో పాటు రిజిస్ట్రేషన్లు నిషేధం ఉన్న సమయంలో కొత్త పట్టాదారు పాస్‌బుక్‌ ఎలా ఇచ్చారని స్థాని కులు రెవెన్యూ అధికారులను నిలదీశారు. రికార్డుల్లో పొరపాటున పట్టాదారుగా నమోదైందని పేర్కొంటూ, సదరు పాసుపుస్తకాన్ని రద్దు చేస్తూ 2021 జనవరి 5న ఎండార్స్‌మెంట్‌ జారీ చేశారు.   వివాదాస్పదమని తేలినా..   పట్టాదారు పాస్‌బుక్‌ను ప్రభుత్వం రద్దు చేసినప్పటికీ సదరు వ్యక్తి నుంచి ఈ భూమిని నగరానికి చెందిన ఇద్దరు రియల్టర్లు కొనుగోలు చేశారు. ఈ మేరకు 20 ఏప్రిల్‌ 2021న మహేశ్వరం రిజిస్ట్రేషన్‌ ఆఫీసులో డాక్యుమెంట్‌ రిజిస్ట్రర్‌ చేయించేందుకు యత్నించగా ఇది నిషేధిత జాబితాలో ఉన్న వివాదాస్పద స్థలమని తేలింది. రిజిస్ట్రేషన్‌ ప్రక్రియను పెండింగ్‌లో పెడుతూ ఇదే అంశాన్ని సంబంధిత డాక్యుమెంట్‌పై కూడా రాసి పెట్టారు. ఇటు ధరణి, అటు రిజిస్ట్రేషన్‌ అండ్‌ స్టాంప్స్‌ వెబ్‌సైట్లలో నిషేధిత జాబితాలో ఉన్న ఈ భూమికి హెచ్‌ఎండీఏ అధికారులు తాజాగా ఎల్పీ నంబర్‌ ఎలా జారీ చేశారనేది అంతు చిక్కని ప్రశ్నగా మిగిలింది. ఫైనల్‌ లే అవుట్‌ అప్రూవల్‌ జారీ చేయాల్సిందిగా సదరు రియల్టర్లు ప్రస్తుతం తుక్కుగూడ మున్సిపల్‌ అధికారులపై ఒత్తిడి తెస్తుండడం గమనార్హం.   చాలాసార్లు ఫిర్యాదు చేశాం  వక్ఫ్‌బోర్డుకు చెందిన భూమిని అమ్మడం, కొనడం నేరం. కొంతమంది రియల్టర్లు దీన్ని ఆక్రమించి, చుట్టూ ప్రహరీ ఏర్పాటు చేసి ప్లాట్లు చేసి అమ్ముతున్నారు. అధికారులకు చాలాసార్లు ఫిర్యాదు చేశాం. కోర్టులో కేసు కూడా నడుస్తోంది. హెచ్‌ఎండీఏ అధికారులు లేఅవుట్‌ పర్మిషన్ ఎలా ఇచ్చారో అర్థం కావడం లేదు. తప్పుడు రికార్డులు సృష్టించి, అధికారులను తప్పుదోవ పట్టించి భూమిని అమ్మేందుకు యత్నిస్తున్న వారిపై.. రికార్డులు పరిశీలించకుండా అనుమతులు జారీ చేసిన అధికారులపై చర్యలు తీసుకోవాలి.   – ఎ.శ్రీనివాస్‌గౌడ్, రావిర్యాల  అది ముమ్మాటికీ వక్ఫ్‌ భూమే..  కొంగరకుర్దు రెవెన్యూ పరిధిలోని సర్వే నంబర్‌ 82లోని భూమి వక్ఫ్‌బోర్డుకు చెందినదే. కొంతమంది రియల్టర్లు ఇటీవల ఆ భూమిని చదును చేస్తున్నట్లు ఫిర్యాదులు అందాయి. వెంటనే సిబ్బందిని అక్కడికి పంపి పనులు నిలుపుదల చేయించాం. భూమికి సంబంధించిన డాక్యు మెంట్లు ఉంటే చూపించాలని కోరాం. ఇప్పటి వరకు రాలేదు. ఈ భూమికి హెచ్‌ఎండీఏ ఎల్పీ నంబర్‌ జారీ చేసిన విషయం తెలియదు. నిషేధిత జాబితాలో ఉన్న భూమికి ఎల్పీ నంబర్‌ ఎలా ఇచ్చారనేదీ అర్థం కావడం లేదు.   – జ్యోతి, తహసీల్దార్, మహేశ్వరం  

సాక్షి, హైదరాబాద్‌: ప్రభుత్వ భూముల వేలం ప్రక్రియకు హైకోర్టు గ్రీన్‌సిగ్నల్‌ ఇచ్చింది. భూములను వేలం వేసేందుకు రాష్ట్ర ప్రభుత్వం తీసుకున్న నిర్ణయాన్ని సమర్థించింది. భూములను విక్రయించడానికి వీల్లేదని చట్టంలో ఎక్కడా లేదని, ఈ నేపథ్యంలో తాము వేలం ప్రక్రియను నిలిపి వేయలేమని స్పష్టం చేసింది. అయితే టెండర్లు, ఈ వేలం లాంటి పారదర్శక పద్ధతుల్లో భూములను వేలం వేయాలని తేల్చిచెప్పింది. ప్రధాన న్యాయమూర్తి జస్టిస్‌ సతీష్‌ చంద్ర శర్మ, జస్టిస్‌ అభినంద్‌కుమార్‌ షావలిలతో కూడిన ధర్మాసనం గురువారం ఈ మేరకు తీర్పునిచ్చింది. భూముల వేలాన్ని నిలిపివేయాలంటూ మాజీ ఎంపీ, బీజేపీ నాయకురాలు విజయశాంతి శుక్లా దాఖలు చేసిన పిల్‌ను కొట్టివేసింది. కోకాపేట, ఖానామెట్‌లో ప్రభుత్వ భూములను అక్రమార్కుల నుంచి కాపాడలేకపోతున్నామని పేర్కొంటూ ప్రభుత్వం వేలం వేయడాన్ని విజయశాంతి సవాల్‌ చేశారు. అయితే ఏ చట్టం ప్రకారం ప్రభుత్వ భూములను విక్రయించరాదో చెప్పాలని పిటిషనర్‌ తరఫు న్యాయవాదిని ధర్మాసనం ప్రశ్నించింది. భూముల విక్రయ నిషేధానికి ఎలాంటి చట్టం లేనప్పుడు తాము భూముల వేలాన్ని నిలిపివేస్తూ ఎలా ఉత్తర్వులు జారీ చేయగలమని ప్రశ్నించింది.  

సాక్షి, అనంతపురం: అనంతపురంలో టీడీపీ నేతల భారీ భూ కుంభకోణం వెలుగులోకి వచ్చింది. రూ.100 కోట్ల విలువైన ప్రభుత్వ భూములను టీడీపీ నేతలు స్వాహా చేసినట్లు అధికారులు గుర్తించారు. మాజీ సైనికుల పేరిట నకిలీ డాక్యుమెంట్లు సమర్పించి టీడీపీ నేతలు భూ అక్రమాలకు పాల్పడ్డారు. చంద్రబాబు హయాంలో జరిగిన ఈ భూ బాగోతం రాచానపల్లి, ఇటుకలపల్లి, కురుగుంట గ్రామాల్లో టీడీపీ నేతలు అక్రమాలకు పాల్పడ్డారు. మాజీ మంత్రి పరిటాల సునీత వర్గీయులపై రాప్తాడు ఎమ్మెల్యే తోపుదుర్తి ప్రకాష్ రెడ్డి ఈ మేరకు రెవెన్యూ అధికారులకు ఫిర్యాదు చేశారు. అక్రమాలపై అనంతపురం ఆర్డీవో మధుసూదన్ విచారణ చేపట్టారు. ఈ క్రమంలో రూ.100 కోట్ల విలువైన 40 ఎకరాల భూమిని అధికారులు స్వాధీనం చేసుకున్నారు. కాగా, నకిలీ పత్రాలతో ప్రభుత్వ భూమిని స్వాహా చేసిన వారిపై క్రిమినల్ కేసులు నమోదు చేస్తామని అధికారులు స్పష్టం చేశారు. ఇప్పటికే అక్రమ రిజిస్ట్రేషన్లు రద్దు చేయాలని ఉన్నతాధికారులకు నివేదిక పంపినట్లు తెలిపారు. అక్రమార్కులకు సహకరించిన రెవెన్యూ సిబ్బందిపై కూడా కఠిన చర్యలు తీసుకుంటామని అనంతపురం ఆర్డీవో మధుసూదన్ తెలిపారు. మాజీ సైనికుల పేరుతో వంద కోట్ల రూపాయల విలువైన భూములు స్వాహా చేసిన టీడీపీ నేతల పై క్రిమినల్ కేసులు నమోదు చేయాలని అనంతపురం జిల్లా ప్రజలు డిమాండ్ చేస్తున్నారు. నకిలీ పత్రాలతో.. మాజీ సైనికుల పేర్లతో భూమి పట్టాలు పొంది.. ఆ వెంటనే విక్రయించి సొమ్ము చేసుకున్నారు టీడీపీ నేతలు. మాజీ మంత్రి పరిటాల సునీత వర్గీయులే ఈ అక్రమాలకు పాల్పడ్డారని.. లోతుగా విచారిస్తే వందల కోట్ల విలువైన ప్రభుత్వ భూములను టీడీపీ నేతలు ఏవిధంగా స్వాహా చేశారో తెలుస్తుందని స్థానికులు కోరుతున్నారు.  చదవండిః కన్నయ్య కుమార్‌పై దాడికి యత్నం 

సాక్షి, హైదరాబాద్‌: ప్రభుత్వ భూములను అమ్మి సేకరించిన నిధుల్లో రాష్ట్ర మౌలిక అభివృద్ధికి ఖర్చు పెట్టిందెంతో మంత్రి కేటీఆర్‌ వివరించాలని తెలంగాణ ఇంటిపార్టీ అధ్యక్షుడు చెరుకు సుధాకర్డిమాండ్చేశారు. హైదరబాద్చుట్టూ 344 క.మీ రీజినల్రింగ్రోడ్‌అలైన్మెంట్లో రింగు తిప్పుతున్నది భూ మాఫియా పెద్దలేనని ఆదివారం ఒక ప్రకనటలో ఆరోపించారు. కేంద్ర ప్రభుత్వం గ్రీన్సిగ్నల్‌ఇచ్చిన ప్రాజెక్టులు, రింగ్రోడ్డుకు అవసరమైన భూమి కంటే ఎన్నో రెట్లు రైతుల నుండి ఎందుకు సేకరించారని నిలదీశారు. తాము కొన్న భూముల జోలికి పోకుండా చూసుకుంటూ, రైతుల నుండి ఎక్కువ భూమి తమ అధీనంలోకి తీసుకోవడానికి అధికారులపై ఒత్తిడి తీసుకొస్తున్నారని ఆగ్రహం వ్యక్తం చేశారు. ఇప్పటికే మల్లన్నసాగర్, కాళేశ్వరం కాలువ పనుల్లో వేల ఎకరాల భూమి కోల్పోయిన ప్రజలకు పరిహారం అందలేదని, ఆందోళన చేస్తున్న రైతులను కేసీఆర్‌ ప్రభుత్వం నిర్భందంతో అణిచివేస్తున్నదని చెరుకు సుధాకర్‌ఆరోపించారు.     

సాక్షి, అమరావతి: విశాఖపట్నం జిల్లా సబ్బవరం గ్రామ పరిధిలోని ప్రభుత్వ భూమిలో ఎలాంటి నిర్మాణాలు చేపట్టకుండా చర్యలు తీసుకోవాలన్న తమ ఆదేశాలను అమలు చేయడంలో విఫలమైనందుకు విశాఖ జిల్లా కలెక్టర్‌ జనవరి 3వ తేదీన వ్యక్తిగతంగా హాజరై వివరణ ఇవ్వాలని హైకోర్టు ఆదేశించింది. విచారణను 3వ తేదీకి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ ప్రశాంత్‌కుమార్‌ మిశ్రా, న్యాయమూర్తి జస్టిస్‌ మల్లవోలు సత్యనారాయణమూర్తి ధర్మాసనం గురువారం ఉత్తర్వులు జారీచేసింది. సబ్బవరంలోని 255, 272, 277 సర్వే నంబర్లలో ఉన్న ప్రభుత్వ భూమిలో కె.దుర్గాప్రసాద్‌ అనే వ్యక్తి అధికారులతో కుమ్మక్కై నిర్మాణాలు చేపడుతున్నారంటూ ఎస్‌.చినవెంకటేశ్వర్లు హైకోర్టులో ప్రజాప్రయోజన వ్యాజ్యం (పిల్‌) దాఖలు చేశారు. విచారణ జరిపిన సీజే ధర్మాసనం ప్రభుత్వ భూమిలో ఎలాంటి నిర్మాణాలు చేపట్టకుండా చూడాలని కలెక్టర్‌ను ఆదేశిస్తూ గత ఏడాది ఉత్తర్వులిచ్చింది. ఈ వ్యాజ్యం గురువారం విచారణకు వచ్చింది. కోర్టు ఆదేశాలున్నా ప్రభుత్వ భూమిలో నిర్మాణాలు కొనసాగుతున్నాయని పిటిషనర్‌ న్యాయవాది ఎన్‌.హెచ్‌.అక్బర్‌ తెలిపారు. కోర్టు ఆదేశాలను అమలు చేయడంలో అధికారులు విఫలమయ్యారంటూ, అక్రమ నిర్మాణాలకు సంబంధించిన ఫొటోలను ధర్మాసనం ముందుంచారు. వాటిని పరిశీలించిన ధర్మాసనం కలెక్టర్‌పై మండిపడింది.   

‘శంషాబాద్‌ మున్సిపాలిటీ పరిధిలోని సాతంరాయిలో సర్వే నంబర్‌ 2,5,6లలోని ఫిరంగి నాలాలో అర్ధరాత్రి మట్టి తవ్వకాలు చేపడుతున్నారు. చారిత్రక ఫిరంగి నాలాను అపర్ణ, సుమధుర కన్‌స్ట్రక్షన్‌ సంస్థలు ధ్వంసం చేసి భారీ నిర్మాణాలు చేపడుతున్నాయని, ప్రభుత్వంపై ఒత్తిడి తీసుకొచ్చి వీటిని ఆపాలని కోరుతూ ఎంపీటీసీ మాజీ సభ్యుడు నరేందర్‌ రెండు రోజుల క్రితం జిల్లా కలెక్టర్, నీటిపారుదలశాఖ ఎగ్జిక్యూటివ్‌ ఇంజినీర్‌ సహా సీఎల్పీ నేత భట్టివిక్రమార్కలకు లిఖితపూర్వకంగా ఫిర్యాదు చేశారు’  ‘కొత్తూరు మున్సిపాలిటీ పరిధిలోని సర్వే నంబర్‌ 19, 20లలో నివాస గృహాల మధ్య ఎలాంటి అనుమతుల్లేకుండా గోదాములు, ఫంక్షన్‌హాళ్లు నిర్మిస్తున్నారు. పాటు కాల్వను ఆక్రమించి నిర్మాణాలు చేపడుతుండటంతో వర్షపు నీరు నిలిచిపోయి మహిళా సమాఖ్య భవనం దెబ్బతిందని, ఈ నిర్మాణాలను తక్షణమే నిలిపివేయాలని స్థానికుడు శివకుమార్‌ ఇటీవల మున్సిపల్‌ అధికారులకు ఫిర్యాదు చేయడం గమనార్హం’   సాక్షి, హైదరాబాద్‌: గ్రేటర్‌ యంత్రాంగం ఒకవైపు అక్రమార్కులపై కొరడా ఝుళిపిస్తుంటే.. మరో వైపు ఆక్రమణలు, అక్రమ నిర్మాణాలు మాత్రం ఆగడం లేదు. ప్రభుత్వ భూములు, చెరువు శిఖం, నాలాలపై నిర్మాణాలు వెలుస్తూనే ఉన్నాయి. పాత పంచాయతీల నుంచి అనుమతులు తీసుకుని, కొత్తగా నిర్మాణాలు చేపడుతూనే ఉన్నారు. వీటిని గుర్తించి అడ్డుకుంటున్న క్షేత్రస్థాయి సిబ్బందికి ప్రజాప్రతినిధుల నుంచి ఒత్తిళ్లు వస్తున్నాయి. వాటి జోలికి వెళ్లొద్ధంటూ హుకుం జారీ చేస్తున్నా.. టాస్క్‌ఫోర్స్‌ బృందాలు ఏమాత్రం వెనక్కు తగ్గడం లేదు. ఇప్పటికే శివారు జిల్లాల్లో వందకుపైగా నిర్మాణాలను నేలమట్టం చేసినట్లు తెలిసింది. అయినా అక్రమ వెంచర్లు, భవన నిర్మాణాలు ఆగకపోగా.. మరిన్ని వెలుగు చూస్తుండటం ఆందోళన కలిగిస్తోంది. వీటి వెనుక బడా కార్పొరేట్‌ సంస్థలు, ప్రజాప్రతినిధులు ఉండటమే  కా రణమని టాస్క్‌ఫోర్స్‌ బృందాలు అభిప్రాయపడుతున్నాయి.   16 మున్సిపాలిటీల పరిధిలో..   ► రంగారెడ్డి జిల్లా వ్యాప్తంగా నాలుగు వేలకుపైగా వెంచర్లు ఉన్నట్లు సమాచారం. 16 మున్సిపాలిటీల పరిధిలో 1397 లే అవుట్లు ఉండగా, వీటిలో 380 లేఅవుట్లకు మాత్రమే హెచ్‌ఎండీ అనుమతులు ఉన్నాయి. మిగిలిన వాటికి  ఎలాంటి అనుమతులు లేవు. వీటిలో రెండు వేలకుపైగా అక్రమ నిర్మాణాలు ఉన్నట్లు గుర్తించి నోటీసులు జారీ చేసినట్లు విశ్వసనీయంగా తెలిసింది.   ► వీటిలో ఎక్కువగా మణికొండ, నార్సింగి, తుర్కయాంజాల్, హయత్‌నగర్, మీర్‌పేట్, బడంగ్‌ పేట్‌ మున్సిపాలిటీల పరిధిలోనే ఎక్కువ ఉన్నట్లు సమాచారం. జీహెచ్‌ఎంసీ ఏటా 12 వేల నిర్మాణాలకు, హెచ్‌ఎండీఏ ఏటా నాలుగు వేల నిర్మాణాలకు అనుమతులు  ఇస్తున్నాయి. జీ+పోర్‌కు అనుమతులు తీసుకుని, అంతకంటే ఎక్కువ అంతస్తులు నిర్మిస్తున్నట్లు ఆరోపణలు ఉన్నాయి.   ►  ఇలా వీటి పరిధిలో అయిదు వేలకుపైగా అక్రమ నిర్మాణాలు ఉన్నట్లు అధికారులు గుర్తించడంతో కొనుగోలుదారులంతా ఆందోళన చెందుతున్నారు. జిల్లాలో ఉన్న అక్రమ నిర్మాణాలను డిసెంబర్‌ 31లోగా అక్రమ నిర్మాణాలన్నింటినీ కూల్చివేయాలని ప్రభుత్వం ఆదేశాలు జారీ చేయడంతో జిల్లా టాస్క్‌ఫోర్స్‌ అధికారులు ఆ పనుల్లో వేగం పెంచారు. ప్రభుత్వ ఆదేశాలను అమలు చేస్తున్న అధికారులకు అండగా నిలబడాల్సిన ప్రజాప్రతినిధులు కూల్చివేతలను ఆపాల్సిందిగా కోరుతూ క్షేత్రస్థాయి సిబ్బందిపై ఒత్తిడి తెస్తున్నారు.     మచ్చుకు కొన్ని కూల్చివేతలు..  ► మణికొండ మున్సిపాలిటీ అల్కాపూర్‌ రోడ్‌ నంబర్‌– 2లో అనుమతించిన దానికన్నా అదనంగా నిర్మించిన అంతస్తులను కూల్చివేశారు. పైపులైన్‌ రోడ్డులో అయిదు అంతస్తులకు అనుమతి పొంది ఆరు అంతస్తులు నిర్మిస్తుండగా, అధికారులు గుర్తించి కూల్చివేతలు చేపట్టారు.   ► నార్సింగ్‌ పరిధిలోని పంచవటి లక్ష్మీసాయి లేఅవుట్‌లో రహదారిని ఆక్రమించి నిర్మించిన ప్రహరీ సహా బుల్కాపూర్‌ నాలా బఫర్‌జోన్‌లో చేపట్టిన నిర్మాణాలను కూల్చివేశారు.   ►  శంషాబాద్‌ మున్సిపాలిటీ సహా ఆ పరిసర ప్రాంతాల్లోని గ్రామాలన్నీ 111 జీఓ పరిధిలోకి వస్తాయి. ఇక్కడ ఎలాంటి నిర్మాణాలు చేపట్టకూడదు.   ► తొండుపల్లి, ఊట్‌పల్లి, రాళ్లగూడ, గొల్లపల్లిల్లో భారీ నిర్మాణాలు, గోదాములు నిర్మించారు. కేవలం మున్సిపాలిటీ పరిధిలోనే 146 అక్రమ నిర్మాణాలు గుర్తించి, ఆ మేరకు జిల్లా టాస్క్‌ఫోర్స్‌కు నివేదించారు.   ► ఇబ్రహీంపట్నం శేరిగూడలోని వార్డు నంబర్‌ 14, 16లలో అనుమతులు లేకుండా అక్రమంగా నిర్మిస్తున్న రెండు భవనాలను అధికారులు కూల్చివేశారు.  ► శంకర్‌పల్లి మున్సిపాలిటీ పరిధిలోని శ్రీరాంనగర్‌ కాలనీలో అక్రమంగా రోడ్డును ఆక్రమించి నిర్మిస్తున్న ఓ నిర్మాణంతో పాటు అదే కాలనీలో అనుమతుల్లేకుండా నిర్మిస్తున్న మరికొన్ని భవనాలకు నాలుగు రోజుల క్రితం అధికారులు నోటీసులు జారీ చేశారు.   ► కొందుర్గు గ్రామ పంచాయతీ పరిధిలో 23 అక్రమ నిర్మాణాలతో పాటు మరో 11 అక్రమ వెంచర్లను అడ్డుకోవడంలో నిర్లక్ష్యంగా వ్యవహరించారనే కారణంతో పంచాయతీ కార్యదర్శిపై జిల్లా అధికారులు వేటువేశారు.    ► ఆదిబట్ల మున్సిపాలిటీ పరిధిలోని ఓ వెంచర్‌లో ప్రజావసరాలకోసం వదిలిన పార్కు స్థలాల స్థిరాస్తి వ్యాపారులు ఆ తర్వాత ఆ çస్థలాన్ని 44 ప్లాట్లు చేసి 12 మందికి విక్రయించినట్లు అధికారులు గుర్తించి, ఆయా ప్లాట్లకు రిజిస్ట్రేషన్లు రద్దు చేయాల్సిందిగా కలెక్టర్‌ అమయ్‌కుమార్‌ సంబంధిత శాఖకు ఆదేశాలు జారీ చేయడం గమనార్హం.     ► పెద్ద అంబర్‌పేట్‌ సర్వే నంబర్‌ 47, 48లలో ప్రహరీ సహా పసుమాములలోని సర్వే నంబర్‌ 91(పి), 96(పి)లలో అనుమతి లేని వెంచర్‌లో నిర్మిస్తున్న ప్రహరీలను  కూల్చివేశారు.    

మార్కాపురం(ప్రకాశం జిల్లా): నిబంధనలకు విరుద్ధంగా ప్రభుత్వ భూములను మ్యుటేషన్‌ చేశారన్న ఆరోపణలపై ప్రకాశం జిల్లా మార్కాపురం మండలంలోని 11 మంది వీఆర్వోలు, ఓ విలేజ్‌ సర్వేయర్‌ను సస్పెండ్‌ చేయడంతోపాటు తహసీల్దార్‌ ఆఫీస్‌లో డేటా ఎంట్రీ ఆపరేటర్‌ను ఉద్యోగం నుంచి తొలగిస్తూ జిల్లా కలెక్టర్‌ ప్రవీణ్‌కుమార్‌ మంగళవారం ఉత్తర్వులు జారీ చేశారు. అలాగే, ఇందులో ఆరోపణలు ఎదుర్కొంటున్న విశ్రాంత తహసీల్దార్‌పై క్రిమినల్‌ కేసు నమోదు చేయాల్సిందిగా ఆదేశించారు. ఈ మేరకు పూల సుబ్బయ్య వెలిగొండ ప్రాజెక్ట్‌ స్పెషల్‌ కలెక్టర్‌ ఒక ప్రకటన విడుదల చేశారు. 17 గ్రామాల్లో మొత్తం 378.89 ఎకరాల ప్రభుత్వ భూమిని అక్రమంగా పలువురికి మ్యుటేషన్‌ చేసినట్లు గుర్తించామన్నారు. సస్పెండ్‌ అయిన వారిలో మార్కాపురం–2, 3 వీఆర్వోలు ఎస్‌.శ్రీనివాసరెడ్డి, కె.రాజశేఖరరెడ్డి, గజ్జలకొండ–1, 2 వీఆర్వోలు జి.శ్రీనివాసరెడ్డి, వై.గోవిందరెడ్డి, పెద్దయాచవరం వీఆర్వో ఎస్‌కే కాశింవలి, నాయుడుపల్లి వీఆర్వో వై.కాశీశ్వరరెడ్డి, ఇడుపూరు వీఆర్వో వీవీ కాశిరెడ్డి, కోలభీమునిపాడు, జమ్మనపల్లి వీఆర్వో ఐ.చలమారెడ్డి, చింతగుంట్ల, బడేకాన్‌పేట వీఆర్వో మస్తాన్‌వలి, కొండేపల్లి, కృష్ణాపురం వీఆర్వో రామచంద్రారావు, భూపతిపల్లి, బొందలపాడు వీఆర్వో పి.మల్లిఖార్జున, చింతగుంట్ల విలేజ్‌ సర్వేయర్‌ ఎం.విష్ణుప్రసన్నకుమార్‌లు ఉన్నారు. డేటా ఎంట్రీ ఆపరేటర్‌ పి.నాగరాజును రిమూవ్‌ చేస్తూ ఆదేశాలిచ్చారు. విశ్రాంత తహసీల్దార్‌ విద్యాసాగరుడుపై క్రిమినల్‌ కేసు నమోదుకు ఆదేశించారు. ఇప్పటికే ఈ వ్యవహారంలో ఏఆర్‌ఐ గోపి, మార్కాపురం–4 వీఆర్వో కోటయ్య, రాయవరం–1 వీఆర్వో జి.సుబ్బారెడ్డిని సస్పెండ్‌ చేశారు.

సాక్షి, హైదరాబాద్‌: నగర శివారులో నిరుపయోగంగా ఉన్న మరో 117.29 ఎకరాల ప్రభుత్వ భూములను ఈ– వేలం పద్ధతిలో విక్రయించేందుకు రాష్ట్ర ప్రభుత్వం నిర్ణయించింది. ఈ మేరకు తెలంగాణ రాష్ట్ర పారిశ్రామిక మౌలికవసతుల కల్పన సంస్థ (టీఎస్‌ఐఐసీ) సోమవారం నోటిఫికేషన్‌ జారీ చేసింది. దీని ప్రకారం రంగారెడ్డి జిల్లా శేరిలింగంపల్లి మండలం ఖానామెట్‌ సర్వే నంబర్‌ 41/14లోని 22.79 ఎకరాల విస్తీర్ణంలోని 9 ప్లాట్లను విక్రయిస్తారు. దీంతో పాటు రంగారెడ్డి జిల్లా గండిపేట మం డలం పుప్పాలగూడలో 325, 326, 327, 328 సర్వే నంబర్లలోని 94.5 ఎకరాల విస్తీర్ణంలో ఉన్న మరో 26 ప్లాట్లను కూడా వేలం వేస్తారు. ఖానామెట్‌ భూములకు సెప్టెంబర్‌ 27న, పుప్పాలగూడ భూ ములకు ఆ మరుసటి రోజు ఈ– వేలం నిర్వహిస్తారు. ప్లాట్ల కొనుగోలుకు ఆసక్తి చూపే వారికి వేలం విధానంపై అవగా హన కల్పించేందుకు వచ్చే నెల 9న బషీర్‌బాగ్‌లోని టీఎస్‌ఐఐసీ కార్యాలయంలో ప్రి బిడ్‌ సమావేశం నిర్వహిస్తారు. విక్రయానికి సిద్ధంగా ఉన్న ఖానా మెట్, పుప్పాలగూడ భూములకు ఇప్పటికే లే ఔట్‌ ఖరారు చేయగా, సెప్టెంబర్‌ 1వ తేదీ నుంచి 24 వరకు ఆయా ప్లాట్లను నేరుగా సందర్శించే వీలు కల్పించారు. వచ్చే నెల 25వ తేదీ సాయంత్రం ఐదు గంటలలోగా ఈఎండీ చెల్లించి వివరాలు నమోదు చేసుకోవడం ద్వారా వేలంలో పాల్గొనవచ్చని టీఎస్‌ఐఐసీ తెలిపింది. కేంద్ర ప్రభుత్వ సంస్థ మెటల్‌ స్క్రాప్‌ ట్రేడ్‌ కార్పొరేషన్‌ లిమిటెడ్‌ (ఎంఎస్‌టీసీ) ఈ వేలం ప్రక్రియను నిర్వహిస్తుంది.  గణనీయంగా పెరిగిన అప్‌సెట్‌ ధర  ఈ ఏడాది జూలైలో కోకాపేట, ఖానామెట్‌ భూములకు నిర్వహించిన వేలంలో ఎకరా అప్‌సెట్‌ (కనీస) ధర రూ.25 కోట్లుగా, ఈఎండీని రూ.5 కోట్లుగా నిర్ణయించిన టీఎస్‌ఐఐసీ.. ప్రస్తుత వేలంలో ఖానామెట్‌ భూముల కనీస ధరను రూ.40 కోట్లకు పెంచింది. పుప్పాలగూడ భూముల అప్‌సెట్‌ ధరను రూ.35 కోట్లకు పెంచింది. జూలైలో జరిగిన వేలం పాటలో కోకాపేట భూములు ఎకరం సగటున రూ.40.05 కోట్లు, ఖానామెట్‌ భూములు రూ.48.92 కోట్లు పలకడంతో, ఈసారి అప్‌సెట్‌ ధరను పెంచాలని రాష్ట్ర ప్రభుత్వం నిర్ణయించింది. ప్రస్తుతం నిర్ణయించిన కనీస ధర ప్రకారం ప్లాట్లన్నీ అమ్ముడుబోయిన పక్షంలో ఖానా మెట్‌ భూములకు రూ.911.6 కోట్లు, పుప్పాలగూడ భూములకు రూ.3,307.5 కోట్లు కలిపి మొత్తంగా రూ.4,219.10 కోట్లు వస్తా యని ప్రభుత్వం అంచనా వేస్తోంది. అయితే వేలంలో భూములకు అధిక ధర లభిస్తే అదనంగా మరో రూ.2 వేల కోట్లు వచ్చే అవకాశముందని, అదే జరిగితే రూ.6 వేల కోట్లకు పైగా ప్రభుత్వ ఖజానాకు సమకూరే అవకాశముం దని టీఎస్‌ఐఐసీ వర్గాలు వెల్లడించాయి. గత జూలైలో 64.85 ఎకరాల వేలం రంగారెడ్డి జిల్లా కోకాపేట, ఖానామెట్‌లలోని 64.85 ఎకరాల విస్తీర్ణంలోని 13 ప్లాట్లకు గత జూలైలో రాష్ట్ర ప్రభుత్వం వేలం నిర్వహించిన సంగతి తెలిసిందే. కళ్లు చెదిరే ధరలతో రియల్‌ ఎస్టేట్, ఇన్‌ఫ్రా సంస్థలు ఈ భూములను దక్కించుకున్నాయి. కోకాపేటతో పోలిస్తే ఖానా మెట్‌ భూములకు ఎక్కువ ధర వస్తుంద ని అధికారులు ముందస్తు అంచనా వేయ గా, అదే రీతిలో వేలంలో బిడ్డర్లు భూము లు దక్కించుకునేందుకు పోటీ పడ్డారు.   

సాక్షి, చిత్తూరు: పీలేరులో ప్రభుత్వ భూముల ఆక్రమణలపై అధి​కారులు కొరడా ఝళిపిస్తున్నారు. శనివారం అక్రమ నిర్మాణాల కూల్చివేత చేపట్టారు. తిరుపతి రోడ్డులో కబ్జాదారులు భారీ ఎత్తున భవనాలు నిర్మించారు. మదనపల్లె సబ్‌కలెక్టర్ జాహ్నవి నేతృత్వంలో  ఉదయం నుంచి పోలీసుల బలగాల సమక్షంలో భవనాల కూల్చివేత చేపట్టారు. ఇప్పటికే 10 భవనాలను రెవెన్యూ సిబ్బంది కూల్చివేశారు.  

సాక్షి, అమరావతి: మధ్యతరగతి ప్రజలకు అందుబాటు ధరల్లో ప్రణాళికాబద్ధమైన ఇళ్ల స్థలాలు సమకూర్చే జగనన్న స్మార్ట్‌ టౌన్‌షిప్‌ల (ఎంఐజీ లేఅవుట్లు) నిర్మాణానికి నిరుపయోగంగా ఉన్న ప్రభుత్వ భూములు సేకరించాలని ప్రభుత్వం నిర్ణయించింది. ఇలాంటి భూములను గుర్తించి ముందస్తుగా మునిసిపల్‌ శాఖకు అప్పగించాలని జిల్లా కలెక్టర్లను ఆదేశించింది. విధివిధానాలను ఖరారు చేస్తూ మంగళవారం రెవెన్యూ శాఖ ముఖ్య కార్యదర్శి ఉషారాణి ఉత్తర్వులిచ్చారు. ప్రభుత్వ సంస్థలు, శాఖలు, ప్రభుత్వ రంగ సంస్థలు, ప్రభుత్వ కార్పొరేషన్లు, పట్టణాభివృద్ధి సంస్థలు, నగరపాలక సంస్థలు ప్రజోపయోగం కోసం గతంలో సేకరించి అందుకు ఉపయోగించకుండా ఉన్న భూములను సేకరించాలని ఆదేశించారు. స్మార్ట్‌ టౌన్‌షిప్‌ల నిర్మాణానికి ఉపయోగపడే ఇలాంటి భూములను క్రమబద్ధీకరించి మునిసిపల్, పట్టణాభివృద్ధి శాఖకు నేరుగా ఇచ్చే అధికారాలను జిల్లా కలెక్టర్లకు అప్పగించారు. అలాంటి భూముల వివరాలను సీసీఎల్‌ఏకు పంపాలని కలెక్టర్లకు సూచించారు. జగనన్న స్మార్ట్‌ టౌన్‌షిప్‌ల అభివృద్ధి కోసం మాత్రమే కలెక్టర్లకు ఈ అధికారాలు కల్పిస్తున్నట్లు స్పష్టం చేశారు. దేవదాయ, వక్ఫ్, విద్యా సంస్థలు, ఆధ్యాత్మిక సంబంధిత భూములు, పర్యావరణ సున్నితమైన భూములను ఈ సేకరణ నుంచి మినహాయిస్తున్నట్లు తెలిపారు. చెరువు, కాలువ కట్టలు, నీటి వనరులున్న భూములు, అడవులతో నిండిన కొండ ప్రాంతాలతోపాటు అభ్యంతరకరమైన ప్రభుత్వ పోరంబోకు, కమ్యూనిటీ పోరంబోకు భూములను సైతం సేకరించవద్దని ఆదేశించారు. మధ్యతరగతి వర్గాల ఆకాంక్షలకు అనుగుణంగా ప్రణాళికాబద్ధంగా, అన్ని సౌకర్యాలతో కూడిన నివాస స్థలాలను తక్కువ ధరలకు అందుబాటులోకి తెచ్చే ఉద్దేశంతో ప్రభుత్వం ఈ స్మార్ట్‌ టౌన్‌షిప్‌లను అభివృద్ధి చేయనుంది.   

కబ్జా.. కబ్జా.. కబ్జా.. మేడ్చల్‌ జిల్లాలోని దాదాపు అన్ని ప్రాంతాల్లోని ప్రజలు ఈ పదం వింటూనే ఉన్నారు. కుప్పలు తెప్పలుగా ఫిర్యాదులు.. బాధితుల నుంచి లెక్కకుమించిన వినతులు.. నిత్యం అధికారులు హెచ్చరికలు జారీ చేస్తున్నా కబ్జాదారులు మాత్రం వెనక్కి తగ్గడం లేదు. ప్రభుత్వ స్థలాలను హ్యాపీగా కబ్జా చేసేసి.. అక్రమంగా నిర్మాణాలు చేసేసి.. పేద, మధ్యతరగతి ప్రజలకు అంటగడుతూ కోట్లకు పడగెత్తుతున్నారు. పల్లె, పట్టణ ప్రగతి, సమీక్ష, సమావేశాలతో అధికారులు బిజీగా ఉండటంతో ఇదే అదనుగా పుట్టగొడుగుల్లా అక్రమ నిర్మాణాలను చేపడుతున్నారు. ఈ వ్యవహారంపై యంత్రాంగం సీరియస్‌ గా దృష్టి సారించింది. పక్కా ప్రణాళికతో రంగంలోకి దిగేందుకు సిద్ధమైనట్లు సమాచారం. సాక్షి,సిటీబ్యూరో: పుట్టగొడుగుల్లా వెలుస్తున్న అక్రమ నిర్మాణాలతో ప్రభుత్వ ఆదాయానికి భారీగా గండి పడుతోంది. అలాంటి వారిపై చర్యలు చేపట్టేందుకు జిల్లా యంత్రాంగం కసరత్తు ప్రారంభించింది. ఎల్‌ఆర్‌ఎస్‌లో భాగంగా అందిన దరఖాస్తుల ఆధారంగా క్షేత్రస్థాయి నుంచి సమాచారాన్ని తెప్పించుకున్న యంత్రాంగం ఇంకా అదనపు వివరాలు సేకరించినట్లు తెలుస్తోంది. అక్రమ కట్టడాలు, లేఅవుట్లు, రోడ్లు, పార్కులను కబ్జా చేసి నిర్మిస్తున్న భవనాలు, బహుళ అంతస్తులు, ఇండిపెండెంట్‌ ఇళ్ల విషయంలో ఉదాసీనంగా వ్యవహరిస్తున్న కొందరు ఉద్యోగులు, సిబ్బంది తీరుపై సీరియస్‌గా ఉన్న యంత్రాంగం ఎన్‌ఫోర్స్‌మెంట్‌ టీమ్‌లను రంగంలోకి దింపాలని భావిస్తోంది.  ప్రభుత్వ ఆదాయానికి భారీగా గండి..  బోడుప్పల్, పీర్జాదిగూడ, మేడ్చల్, జవహర్‌నగర్, నిజాంపేట్, కొంపల్లి, దుండిగల్, తూముకుంట, దమ్మాయిగూడ, నాగారం, ఘట్‌కేసర్, పోచారం, గుండ్లపోచంపల్లి మున్సిపాలిటీల్లో అక్రమ నిర్మాణాలు, లేఅవుట్లు, ఇండిపెండెంట్‌ ఇళ్లు విచ్చలవిడిగా వెలుస్తున్నాయి. ఈ కట్టడాలతో ప్రభుత్వ ఆదాయానికి భారీగా పడుతున్న గండిని నివారించి.. స్థానిక సంస్థలను ఆర్థికంగా బలోపేతం చేసేందుకు తీసుకోవాల్సిన చర్యలపై అధికార యంత్రాంగం దృష్టిసారిస్తోంది. కొంతమంది ఉద్యోగులు, సిబ్బందికి అక్రమ కట్టడాల పర్వాన్ని  మూడు పువ్వులు, ఆరు కాయలుగా ఉపయోగించుకుంటున్నారనే ఆరోపణలూ ఉన్నాయి. ఈ అక్రమ కట్టడాలపై ఇన్‌చార్జ్‌ కలెక్టర్‌తో పాటు సంబంధిత అధికారులకు ఫిర్యాదులు అందుతుండటంతో.. చర్యలకు ఎన్‌ఫోర్స్‌మెంట్‌ టీమ్‌లను వేయాలని నిర్ణయించినట్లు తెలుస్తోంది.   గుర్తించిన అక్రమ కట్టడాలివే..   మేడ్చల్‌ జిల్లాలో పురపాలక సంఘాలు, గ్రామ పంచాయతీల్లో గుర్తించిన అక్రమ కట్టడాలు, లేఅవుట్లు, 3,643 ఉండగా, ఘట్‌కేసర్‌ మండలంలో 656, దుండిగల్‌లో 1,950, కీసరలో 650, శామీర్‌పేట్‌లో 191, మేడ్చల్‌ మండలంలో 196 ఉన్నట్లు తెలుస్తోంది. నాగారం పట్టణంలో 12 అక్రమ లేఅవుట్లు ఉండగా, దమ్మాయిగూడలో 7, మేడ్చల్‌లో 10, నిజాంపేట్‌లో 20, కొంపల్లిలో 11, దుండిగల్‌లో 12, తూముకుంటలో 15, పోచారంలో 12,  ఘట్‌కేసర్‌లో 8 ఉన్నట్లు సమాచారం. ఇవన్నీ ఇటీవల ఎల్‌ఆర్‌ఎస్‌ దరఖాస్తుల సమాచారం ద్వారా బయటపడినట్లు తెలుస్తోంది.   మున్సిపల్‌ సర్కిళ్ల పరిధిలో ఇలా..  మేడ్చల్‌ జిల్లా పరిధిలోని జీహెచ్‌ఎంసీ మున్సిపల్‌ సర్కిళ్లలోని పార్కులు, రోడ్లు ఆక్రమించి అక్రమ కట్టడాలు వెలుస్తున్నాయి. ఉప్పల్‌ సర్కిల్‌లో 1,989 చదరపు గజాల స్థలం, కాప్రా సర్కిల్‌లో 194 చదరపు గజాల స్థలం, మల్కాజిగిరి సర్కిల్‌లో 36 చదరపు గజాలు, మూసాపేట్‌లో 20, కూకట్‌పల్లిలో 455, కుత్బుల్లాపూర్‌లో 62, గాజులరామారంలో 198, అల్వాల్‌ సర్కిల్‌లో 155 చదరపు గజాల స్థలం ఆక్రమణకు గురైనట్లు గుర్తించిన యంత్రాంగం ఆక్రమణలపై చర్యలకు సిద్ధమవుతున్నట్లు తెలుస్తోంది.    

సాక్షి, హైదరాబాద్‌: రంగారెడ్డి జిల్లాలోని కోకాపేట, ఖానామెట్‌లోని ప్రభుత్వ భూముల్ని వేలం వేయడాన్ని నిలిపివేస్తూ మధ్యంతర ఉత్తర్వులు జారీచేయలేమని హైకోర్టు స్పష్టం చేసింది. ఈ పిటిషన్‌లో తుది విచారణకు లోబడి ఆ వేలం ప్రక్రియ ఉంటుందన్న ఆదేశాలు ఇవ్వలేమని తేల్చిచెప్పింది. అటువంటి ఆదేశాలు ఇస్తే కొనేవారు భయపడతారని, అలాగే తక్కువ ధరను కోట్‌ చేస్తారని, తర్వాత ప్రభుత్వానికి ఆర్థికంగా నష్టం జరుగుతుందని అభిప్రాయపడింది. అయితే ఈ వ్యవహారంపై పూర్తి వివరాలను సమర్పించాలని ప్రభుత్వాన్ని ఆదేశిస్తూ విచారణను వాయిదా వేసింది. ఈ మేరకు ప్రధాన న్యాయమూర్తి జస్టిస్‌ హిమకోహ్లీ, జస్టిస్‌ బి.విజయసేన్‌రెడ్డిలతో కూడిన ధర్మాసనం బుధవారం ఉత్తర్వులు జారీచేసింది. ప్రభుత్వ భూములను వేలం వేయాలంటూ తీసుకున్న నిర్ణయాన్ని సవాల్‌ చేస్తూ బీజేపీ నేత, మాజీ ఎంపీ ఎం.విజయశాంతి దాఖలు చేసిన ప్రజాహిత వ్యాజ్యాన్ని ధర్మాసనం విచారించింది. ఆక్రమణల నుంచి కాపాడలేక, నిధులను సమకూర్చుకునేందుకు ఈ భూముల్ని వేలం వేస్తున్నామని అడ్వొకేట్‌ జనరల్‌ బీఎస్‌ ప్రసాద్‌ నివేదించారు.   ప్రభుత్వమే కాపాడలేకపోతే ఎలా ?  ‘ఆక్రమణదారుల నుంచి కాపాడలేక ప్రభుత్వ భూముల్ని వేలం ద్వారా విక్రయిస్తున్నామని ప్రభుత్వం పేర్కొనడం ఆశ్చర్యకరం. ప్రభుత్వమే తన భూముల్ని కాపాడుకోలేకపోతే ఇక ప్రజల భూముల్ని ఏం కాపాడుతుంది. భూముల్ని కాపాడేందుకు వాటి చుట్టూ కంచె ఏర్పాటు చేయండి. ప్రతి జిల్లాకు వెయ్యి ఎకరాల ప్రభుత్వ భూమిని గుర్తించి ల్యాండ్‌ బ్యాంక్‌ ఏర్పాటు చేయాలని ఒకవైపు చెబుతున్నారు. మరోవైపు ఉన్న భూముల్ని వేలం ద్వారా విక్రయిస్తున్నారు. ప్రభుత్వం తానిచ్చిన ఆదేశాల అమలులో పరస్పర విరుద్ధంగా వ్యవహరిస్తోంది. ప్రభుత్వ వేలం ప్రక్రియను ఎలా సమర్థించుకుంటుంది. ఈ వ్యవహారంపై పూర్తి వివరాలతో కౌంటర్‌ దాఖలు చేయండి’అని ప్రభుత్వాన్ని ఆదేశిస్తూ తదుపరి విచారణను సెప్టెంబర్‌ 8కు వాయిదా వేసింది.    

పీలేరు (చిత్తూరు జిల్లా): పీలేరు మండలంలో రూ.కోట్ల విలువైన ప్రభుత్వ భూముల్లో జరిగిన అక్రమాలపై సమగ్ర విచారణ జరిపించాలని ముఖ్యమంత్రి వైఎస్‌ జగన్‌మోహన్‌రెడ్డిని పీలేరు వైఎస్సార్‌సీపీ ఎమ్మెల్యే చింతల రామచంద్రారెడ్డి కోరారు. ఈ మేరకు తాడేపల్లి క్యాంపు కార్యాలయంలో ముఖ్యమంత్రి వైఎస్‌ జగన్‌ను కలిసి మంగళవారం వినతిపత్రం అందజేశారు. పీలేరు మండలంలోని గూడరేవుపల్లె, దొడ్డిపల్లె, ఎర్రగుంట్లపల్లె, కాకులారంపల్లె, ముడుపులవేముల, బోడుమల్లువారిపల్లె పంచాయతీల్లో అక్రమ లేఅవుట్లు వేసి అమాయకులైన ప్రజలకు విక్రయించారని పేర్కొన్నారు. 2009–2014 మధ్య అప్పటి ముఖ్యమంత్రి నల్లారి కిరణ్‌కుమార్‌రెడ్డి హయాంలో, 2014–2019 మధ్య తెలుగుదేశం ప్రభుత్వ హయాంలో రాష్ట్ర గృహ నిర్మాణ సంస్థ చైర్మన్‌గా ఉన్న నల్లారి కిషోర్‌కుమార్‌రెడ్డి అక్రమాలకు పాల్పడ్డారని తెలిపారు. ప్రభుత్వ భూముల్లో బహుళ అంతస్తుల భవనాలు, వాణిజ్య సముదాయాలు వెలిశాయని పేర్కొన్నారు. వైఎస్సార్‌సీపీ ప్రభుత్వం వచ్చిన తరువాత కూడా 2019–21 మధ్య కాలంలో పెద్ద ఎత్తున ప్రభుత్వ భూములను ప్లాట్లు వేసి అమ్ముకున్నారని టీడీపీ నాయకులు అభియోగాలు మోపినందున అన్నింటిపై సమగ్ర విచారణ జరిపించాలని కోరారు. అక్రమాల్లో ప్రత్యక్షంగా, పరోక్షంగా ప్రమేయం ఉన్న రియల్టర్లు, ప్రభుత్వ అధికారులపై క్రిమినల్‌ కేసులు నమోదు చేసి చర్యలు తీసుకోవాలని విజ్ఞప్తి చేశారు. ప్రభుత్వ భూముల్లో నిర్మించిన కట్టడాలు తక్షణమే తొలగించాలన్నారు. పీలేరు తహసీల్దార్‌ కార్యాలయంలో రికార్డుల తారుమారుకు పాల్పడ్డ అధికారులపై చర్యలు తీసుకోవాలన్నారు. అక్రమాలపై విజిలెన్స్‌ ఎన్‌ఫోర్స్‌మెంట్‌ అధికారులచే సమగ్ర విచారణ జరిపించాలని ఎమ్మెల్యే కోరారు. 

మంగళగిరి: గుంటూరు జిల్లా మంగళగిరి రత్నాలచెరువును కొల్లగొట్టిన వైనం ఇది. సాగుచేసుకోమని పేదలకు ఇచ్చిన ఈ చెరువు భూమి రియల్‌ ఎస్టేట్‌ ప్లాట్లుగా మారింది. తెలుగుదేశం పార్టీకి చెందిన పెదకూరపాడు మాజీ ఎమ్మెల్యే కొమ్మాలపాటి శ్రీధర్‌ ఈ భూముల్ని కొని వెంచర్‌వేసి విక్రయించి సొమ్ము చేసుకున్నారు. సుమారు రూ.70 కోట్ల ప్రభుత్వ భూమికి ఎసరు పెట్టారు. పట్టణంలోని 134 సర్వే నంబర్‌లో 94 ఎకరాల విస్తీర్ణంలో రత్నాలచెరువు ఉంది. కొన్నేళ్లుగా పేదలు కొందరు గుడిసెలు వేసుకుని నివసించసాగారు. ఇదే ఆక్రమణదారులకు అడ్డాగా మారింది. పేదల పేరుతో పెద్దలు సుమారు 24 ఎకరాలను ఆక్రమించి అక్రమ నిర్మాణాలు చేసి సొమ్ము చేసుకున్నారు. ఈ నేపథ్యంలో ఆత్మకూరు గ్రామంలో 2004కు ముందు పొలాలు కొని అభినందన హౌసింగ్‌ ప్రైవేట్‌ లిమిటెడ్‌ పేరుతో వెంచర్‌ వేసిన టీడీపీ మాజీ ఎమ్మెల్యే ప్లాట్లు వాయిదాల పద్ధతిలో  విక్రయించారు. వాయిదాలు కట్టిన వందలాది మందికి ఇప్పటికీ రిజిస్ట్రేషన్లు చేయకుండా తిప్పుకుంటున్నారన్న ఆరోపణలున్నాయి. అదే వెంచర్‌కు దగ్గరలో ఉన్న రత్నాలచెరువుపై ఆయన కన్నుపడింది. ఈ చెరువు భూమిని సాగుచేసుకునేందుకు ప్రభుత్వం కొంతమంది ఎస్సీలకు పట్టాలిచ్చింది. పట్టాలు ఇచ్చిన భూమిని విక్రయించకూడదని నిబంధన విధించింది. అయినా టీడీపీ మాజీ ఎమ్మెల్యే కొమ్మాలపాటి ఎస్సీల వద్ద నుంచి 7.5 ఎకరాలను రూ.35 లక్షలకు కొనుగోలు చేశారు. ఈ భూమిలో ప్లాట్లు వేసి ప్రజలకు విక్రయించారు. రిజిస్ట్రేషన్లు చేసి రూ.70 కోట్ల మేర సొమ్ము చేసుకున్నారు.   ఈ భూమిని తనకే ఇవ్వాలని కలెక్టర్‌కు వినతి  గత టీడీపీ  ప్రభుత్వ పాలనలో మంత్రి లోకేశ్‌ రత్నాలచెరువు భూమి మొత్తాన్ని ఐటీ కంపెనీల పేరుతో తమ అనుచరులకు కట్టపెట్టేందుకు ప్రయత్నించారు. ఆ సమయంలో అప్పటి ఎమ్మెల్యే కొమ్మాలపాటి శ్రీధర్‌ జిల్లా కలెక్టర్‌కు ఒక వినతిపత్రం ఇచ్చారు. చెరువులో తాను కొనుగోలు చేసిన 7.5 ఎకరాలను తనకు వదిలిపెట్టాలని కోరారు. ఆ భూమిని ప్రభుత్వం స్వాధీనం చేసుకుంటే తన వద్ద ప్లాట్లు కొన్నవారు తనను డబ్బులు తిరిగి ఇవ్వమంటారనే ఆందోళనతోనే ఆయన ఈ వినతిపత్రం ఇచ్చినట్లు తెలిసింది. ఇప్పటికీ ఆ భూమిలో కొంత కొమ్మాలపాటి చేతుల్లోనే ఉంది. రత్నాలచెరువు నకిలీ దస్తావేజుల అక్రమాలపై అధికారులు విచారణ జరుపుతుండడంతో వాస్తవాలు వెలుగుచూస్తున్నాయి. ఈ చెరువు భూమిని స్వాధీనం చేసుకునేందుకు అధికారులు సన్నాహాలు చేస్తున్నారు.  

సాక్షి, అమరావతి: కబ్జాకు గురైన ప్రభుత్వ భూములను పరిరక్షించేందుకు ప్ర యత్నిస్తుంటే కక్ష సాధింపు చర్య అంటూ టీడీపీ గగ్గోలు పెట్టడం విడ్డూరంగా ఉందని వైఎస్సార్‌సీపీ అధికార ప్రతినిధి, ఎమ్మెల్యే అంబటి రాంబాబు ధ్వజమెత్తారు. విశాఖలో ప్రభుత్వ భూములను ఆక్రమించుకోలేదని చెప్పే దమ్ము, ధైర్యం టీడీపీకి ఉందా? అని  ప్రశ్నిం చారు. చంద్రబాబు పాలనలో రూ.వేలకోట్ల విలువై న భూములను కాజేశారన్నారు. తాడేపల్లిలోని వైఎస్సార్‌సీపీ కేంద్ర కార్యాలయంలో అంబటి మంగళవారం మీడియాతో మాట్లాడారు. టీడీపీ నేతలకు చెందిన గీతం సంస్థ, తాజాగా పల్లా శ్రీనివాసరావు ప్రభుత్వ భూములను ఆక్రమించుకో లేదని టీడీపీ చెప్పగలదా? అని ప్రశ్నించారు. అంబటి ఇంకా ఏమన్నారంటే.. కబ్జా నిజమని మీ మంత్రే చెప్పలేదా? టీడీపీ హయాంలోనే వారు నమ్మే ఓ పత్రిక విశాఖ భూ కుంభకోణంపై అనేక కథనాలు వెలువరించింది. నాడు చంద్రబాబు హయాంలో మంత్రిగా ఉన్న అయ్యన్నపాత్రుడు దీనిపై స్పందిస్తూ... ‘విశాఖలో ప్రజాప్రతినిధులు, రాజకీయ నేతల అండదండలతో భూదందా యథేచ్ఛగా సాగుతోంది. భూ బకాసురులు విచ్చలవిడిగా ఆక్రమిస్తున్నారు. భూ దోపిడీదారులను తన్నడానికి విశాఖ ప్రజలు సిద్ధంగా ఉన్నారు. మంత్రి పదవినైనా వదులుకోడానికి సిద్ధపడే ఈ నిజాన్ని నిర్భయంగా చెబుతున్నా’ అని ప్రకటించారు. 379 గ్రామాలకు సంబంధించిన భూ రికార్డులు గల్లంతయ్యాయని అప్పుడు జిల్లా కలెక్టరే చెప్పారు. వాళ్ల ప్రభుత్వంలో వారే లక్ష ఎకరాలకు సంబంధించిన ఎఫ్‌ఎంబీలు గల్లంతు చేశారు. ఇది టీడీపీ హయాంలో మంత్రిగా ఉన్న వ్యక్తే చెప్పారు. విశాఖను కాజేసిన చంద్రబాబు విశాఖలో భీమిలి, హైవే పక్కన, కసింకోట, గాజువాక, ఎస్‌.రాయవరం ప్రాంతాల్లో వక్ఫ్‌ భూములను కాజేసిన చరిత్ర టీడీపీదే. పెందుర్తి, ఆనందపురం, భీమిలి ప్రాంతాల్లో ల్యాండ్‌ పూలింగ్‌ పేరుతో కబ్జాకు స్కెచ్‌ వేశారు. ఆ భూములు తమవి కావని శ్రీనివాస్‌ చెబుతుంటే చంద్రబాబుకు బాధ ఎందుకు? గతేడాదిగా 250 భూ ఆక్రమణల పై రాష్ట్ర ప్రభుత్వం ఉక్కుపాదం మోపి దాదాపు 430.80 ఎకరాలను స్వాధీనం చేసుకుంది. వీటి విలువ రూ.4,291 కోట్లు. టీడీపీ నేత శ్రీనివాస్‌ ఆక్రమణల విలువ రూ.791 కోట్లు. మొత్తం కలిపి రూ.5,082 కోట్ల విలువైన భూములను కాపాడి వెలికితీశారు. విశాఖ కబ్జా నగరంగా ఉండాలా? లేక మహానగరంగా తీర్చిదిద్దాలో చంద్రబాబు జవాబు చెప్పాలి.  

సాక్షి, అమరావతి: రాష్ట్రంలో మెరుగైన వైద్యం కోసం ప్రభుత్వాస్పత్రులతో పాటు ప్రధాన నగరాల్లో 16 హెల్త్‌హబ్‌లు నిర్మించాలని సీఎం వైఎస్‌ జగన్‌ నిర్ణయించిన నేపథ్యంలో అధికారులు స్థలాల కోసం కసరత్తు చేస్తున్నారు. ఇప్పటికే దీనిపై సీఎం జగన్‌కు ప్రాథమిక నివేదిక కూడా ఇచ్చారు. అనంతపురంలో 30 ఎకరాల ప్రభుత్వ భూమిని గుర్తించారు. తూర్పుగోదావరి జిల్లాలోని రాజమహేంద్రవరంలో 30 ఎకరాలు.. సుమారు రూ.24 కోట్లు అవుతుందని, అదే కాకినాడలో 30 ఎకరాలు రూ.27 కోట్లు అవుతుందని తేల్చారు. గుంటూరు జిల్లాలో ఒకచోట 16.54 ఎకరాలు, మరో చోట 22 ఎకరాల ప్రభుత్వ భూమిని పరిశీలించారు. కృష్ణా, ప్రకాశం, నెల్లూరు జిల్లాల్లో 20 ఎకరాల చొప్పున ప్రభుత్వ భూములను గుర్తించారు. ఇక కర్నూలు జిల్లాలో ఒక చోట 58.44 ఎకరాలు, మరోచోట 52.45 ఎకరాల ప్రభుత్వ భూములు హెల్త్‌సిటీకి అనువుగా ఉన్నాయని నిర్ధారించారు. శ్రీకాకుళం జిల్లాలో 30 ఎకరాల ప్రైవేటు స్థలం గుర్తించగా.. దీని విలువ రూ.15 కోట్లు ఉంటుందని తేలడంతో మరో చోట 10 ఎకరాల ప్రభుత్వ భూమిని చూశారు. విశాఖలో 30 ఎకరాలు, విజయనగరంలో 74.80 ఎకరాలు, పశ్చిమగోదావరి జిల్లాలో ఒకచోట 32 ఎకరాలు, మరోచోట 50 ఎకరాల ప్రభుత్వ భూములను పరిశీలించారు. ఇవి రెండూ ఏలూరు కార్పొరేషన్‌కు సమీపంలో ఉన్నవే. పైన పేర్కొన్న అన్ని స్థలాలూ ఆయా జిల్లాల కార్పొరేషన్లకు అత్యంత సమీపంలో ఉన్నాయని అధికారులు పేర్కొన్నారు. ఒకటి, రెండు చోట్ల మినహా అన్ని జిల్లాల్లో ప్రభుత్వ భూములే గుర్తించినట్లు తెలిపారు.   

సాక్షి, అమరావతి/విశాఖపట్నం: విశాఖపట్నంలో భూకబ్జాల ప్రకంపనలు కొనసాగుతున్నాయి. టీడీపీ మాజీ ఎమ్మెల్యే పల్లా శ్రీనివాసరావు కుటుంబసభ్యుల చెరలో ఉన్న భూముల్ని ప్రభుత్వం స్వాధీనం చేసుకోవడంపై తెలుగుదేశం నాయకులు గగ్గోలు పెడుతున్నారని మంత్రులు, ప్రజాప్రతినిధులు సోమవారం ధ్వజమెత్తారు. ప్రతిపక్ష నేతల తీరును ఎండగట్టారు. ఆక్రమణదారులు ఎంతటివారైనా వదిలేదిలేదని మంత్రి కన్నబాబు స్పష్టం చేశారు. కబ్జాకు గురైన భూముల్ని స్వాధీనం చేసుకునే హక్కు ప్రభుత్వానికి ఉందని మంత్రి ముత్తంశెట్టి శ్రీనివాసరావు చెప్పారు. లోకేశ్‌ తోడల్లుడికి చెందిన గీతం యూనివర్సిటీ కబ్జాచేసిన భూముల విలువే రూ.వెయ్యికోట్లని ఎమ్మెల్యే అమర్‌నాథ్‌ తెలిపారు. మరోవైపు తాను భూములు ఆక్రమించలేదన్న టీడీపీ మాజీ ఎమ్మెల్యే పల్లా శ్రీనివాసరావు.. తన తమ్ముడి ఆక్రమణలపై మీడియా ప్రశ్నకు సమాధానం చెప్పలేదు. అడ్డూఅదుపు లేకుండా ప్రభుత్వ భూముల కబ్జా విశాఖపట్నంలో వేలకోట్ల విలువైన ప్రభుత్వ భూములు ఆక్రమణలకు గురయ్యాయని ఆనాడు టీడీపీ ప్రభుత్వమే సిట్‌ వేసిందని వ్యవసాయశాఖ మంత్రి కన్నబాబు చెప్పారు. ఇప్పుడు వైఎస్సార్‌సీపీ ప్రభుత్వం దాన్ని కొనసాగిస్తోందన్నారు. ఆనాడు అధికారాన్ని అడ్డంపెట్టుకుని యథేచ్ఛగా వేలకోట్ల విలువైన ప్రభుత్వ భూముల్ని టీడీపీ నేతలు ఆక్రమించారని చెప్పారు. తాడేపల్లిలోని సీఎం క్యాంపు కార్యాలయం మీడియా పాయింట్‌ వద్ద సోమవారం ఆయన విలేఖరులతో మాట్లాడారు. ఎక్కువమంది టీడీపీ నేతలు ఆక్రమణదారులు కావటంతో అప్పటి ప్రభుత్వం చూసీచూడనట్లు వ్యవహరించిందన్నారు. విశాఖలో టీడీపీ ఆక్రమణలకు అడ్డూఅదుపు లేకుండా సాగాయన్నారు. ఆక్రమిత భూముల్ని స్వాధీనం చేసుకోవాలన్న కృతనిశ్చయంతో తమ ప్రభుత్వం పనిచేస్తోందని చెప్పారు. ఆక్రమణదారులు ఎంతటి వారైనా వదిలిపెట్టేది లేదని స్పష్టం చేశారు. విశాఖలో టీడీపీ నేతలు ఆక్రమించినవి ప్రభుత్వ భూములని రికార్డులే చెబుతున్నాయని గుర్తుచేశారు. అందుకే ప్రభుత్వం వాటిని న్యాయబద్ధంగా తన ఆధీనంలోకి తీసుకుంటోందన్నారు. టీడీపీ నేతల ఘనకార్యాలు బయటకు వస్తున్నాయని పేర్కొన్నారు. ఆక్రమిత భూముల గురించి టీడీపీ నేతలు చేస్తున్న విమర్శలు అర్థంలేనివని చెప్పారు. ఆక్రమిత భూములను స్వాధీనం చేసుకుంటే అది కక్షపూరితం ఎలా అవుతుందని ప్రశ్నించారు. ట్రస్టీగా ప్రజల ఆస్తులను కాపాడటంలో ప్రభుత్వం సమర్థంగా వ్యవహరిస్తోందని చెప్పారు. అధికారులు నిగ్గు తేల్చారు తెలుగుదేశం ప్రభుత్వ హయాంలో చంద్రబాబు అండదండలతో విశాఖ కేంద్రంగా ఆ పార్టీ నేతలు పెద్ద ఎత్తున భూకబ్జాలు, భూకుంభకోణాలకు పాల్పడ్డారని పర్యాటకశాఖ మంత్రి ముత్తంశెట్టి శ్రీనివాసరావు ధ్వజమెత్తారు. మాజీ ఎమ్మెల్యే, టీడీపీ విశాఖ పార్లమెంటు అధ్యక్షుడు పల్లా శ్రీనివాసరావు కుటుంబం ఆధీనంలో ప్రభుత్వ భూములున్నట్లు అధికారులు నిగ్గుతేల్చారని, వాటిని స్వాధీనం చేసుకునే హక్కు ప్రభుత్వానికి, అధికారులకు ఉందని చెప్పారు. విశాఖలో సోమవారం ఏర్పాటుచేసిన మీడియా సమావేశంలో ఆయన మాట్లాడారు. అర్ధరాత్రి షెడ్‌లను కూల్చేశారని కొందరు టీడీపీ నేతలు ఆక్రమణదారులకు వత్తాసుపలకడం హాస్యాస్పదంగా ఉందన్నారు. టీడీపీ నేతలు ఆక్రమించుకున్న రూ.4,776 కోట్ల విలువైన సుమారు 430 ఎకరాల ప్రభుత్వ భూములను స్వాధీనం చేసుకున్నామని చెప్పారు. ముఖ్యమంత్రి మంచి సంకల్పంతో చేపట్టిన ఆక్రమిత భూముల స్వాధీన మహాయజ్ఞానికి అన్ని పార్టీలు మద్దతు తెలపాలన్నారు. టీడీపీ అధికారంలో ఉన్నప్పుడు అప్పటి మంత్రులు గంటా శ్రీనివాసరావు, అయ్యన్నపాత్రుడు భూకుంభకోణాలపై పరస్పరం ఆరోపణలు చేసుకున్నారని గుర్తుచేశారు. విశాఖ, శ్రీకాకుళం జిల్లాల్లో ఎస్టేట్, ఈనాం భూములను టీడీపీకి చెందిన కొందరు ఆక్రమించుకున్నారని, వాటిని స్వాధీనం చేసుకుని పేదలకు పంచుతామని చెప్పారు. విశాఖను పరిపాలన రాజధాని చేసి తీరతామని స్పష్టం చేశారు. ఈ సమావేశంలో ఎమ్మెల్యే తిప్పల నాగిరెడ్డి, మాజీ ఎమ్మెల్యే మళ్ల విజయప్రసాద్, వైఎస్సార్‌సీపీ నగర అధ్యక్షుడు వంశీకృష్ణ శ్రీనివాస్, సమన్వయకర్త కె.కె రాజు, పార్టీ నాయకుడు అక్కరమాని వెంకట్రావ్‌ తదితరులు పాల్గొన్నారు.  కబ్జాకు సూత్రధారి చంద్రబాబే.. విశాఖలో భూదోపిడీ, ప్రభుత్వ భూముల కబ్జాకు సూత్రధారి టీడీపీ అధినేత చంద్రబాబేనని వైఎస్సార్‌సీపీ అధికార ప్రతినిధి, అనకాపల్లి ఎమ్మెల్యే గుడివాడ అమర్‌నాథ్‌ పేర్కొన్నారు. విశాఖలో సోమవారం ఆయన మీడియాతో మాట్లాడారు. లోకేశ్‌ తోడల్లుడికి చెందిన గీతం యూనివర్సిటీ కబ్జాచేసిన దాదాపు రూ.వెయ్యి కోట్ల విలువైన 40 ఎకరాలను ప్రభుత్వం స్వాధీనం చేసుకుందని గుర్తుచేశారు. రుషికొండలో యథేచ్ఛగా ప్రభుత్వ భూములను కబ్జా చేసిన టీడీపీ ఎమ్మెల్యే వెలగపూడి రామకృష్ణబాబు లాంటి వారు ఇప్పుడు తమ సహచరుల్ని కాపాడుకోవాలని ప్రయత్నిస్తున్నారని ఎద్దేవా చేశారు. మాజీ ఎమ్మెల్యే పల్లా శ్రీనివాసరావు, ఆయన కుటుంబసభ్యులు ఆక్రమించుకున్న భూముల్ని ప్రభుత్వం స్వాధీనం చేసుకుంటోందే తప్ప దీన్లో కక్షసాధింపు ఏమీ లేదన్నారు. హుద్‌హుద్‌ తుపాను సమయంలో విశాఖలో లక్ష ఎకరాలకు సంబంధించిన రికార్డులు పోయాయని చెబుతున్నారని, అసలు అప్పుడు గాలులే తప్ప లాకర్లలో ఉన్న భూరికార్డులు తడిసిపోయే విధంగా వర్షం పడలేదని చెప్పారు. అప్పటి భూరికార్డులు ఎలా మాయమయ్యాయో చంద్రబాబుకే తెలియాలన్నారు. ఎంపీ విజయసాయిరెడ్డి విశాఖ అభివృద్ధికి రాత్రిబంవళ్లు పనిచేస్తుంటే టీడీపీ నేతలు ఓర్వలేక విమర్శలు, ఆరోపణలు చేస్తున్నారన్నారు. నేను ఎక్కడా ఆక్రమించలేదు – టీడీపీ మాజీ ఎమ్మెల్యే పల్లా శ్రీనివాసరావు గాజువాక నియోజకవర్గంలో అధికారులు స్వాధీనం చేసుకున్న ఆక్రమిత భూములు తనవి కాదని టీడీపీ మాజీ ఎమ్మెల్యే పల్లా శ్రీనివాసరావు చెప్పారు. విశాఖపట్నంలో సోమవారం ఏర్పాటు చేసిన మీడియా సమావేశంలో ఆయన మాట్లాడారు. తాను భూములు ఆక్రమించినట్లు నిరూపిస్తే శాశ్వతంగా రాజకీయాల నుంచి తప్పుకొంటానని చెప్పారు. గాజువాక నియోజకవర్గంలోని సర్వే నం.33/4లో తన స్థలం పక్కన ఉన్న రాస్తా తనకు మాత్రమే పనికొస్తుందని, అది ఎవరికీ ఉపయోగపడదని, దాన్ని తనకు అప్పగిస్తే.. బదులుగా ఎక్కడైనా స్థలం ఇస్తానని గతంలోనే దరఖాస్తు చేసుకున్నానని, అధికారులు స్పందించలేదని పేర్కొన్నారు. అధికారులు స్పందించకపోతే.. ఆ భూముల్ని మీరెలా వినియోగించుకుంటారని మీడియా ప్రశ్నించగా.. సమాధానం దాటవేశారు. సర్వే నం.33/2లో తన స్థలం పక్కన చెరువు బంద ఉందని, దాన్ని తాను ఆక్రమించకుండానే ఆక్రమించేసినట్లు చూపించారని చెప్పారు. చట్టం ప్రకారం కుటుంబ భూముల్లో తన వాటా 1/7 మాత్రమేనన్నారు. తుంగ్లాం రెవెన్యూ గ్రామం పరిధిలో తన సోదరుడు పల్లా శంకరరావు పేరుతో ఉన్న ఆక్రమిత భూముల స్వాధీనంపై మాత్రం పల్లా శ్రీనివాసరావు నోరు మెదపకుండానే మీడియా సమావేశం ముగించేశారు.

అధికారాన్ని అడ్డంపెట్టుకుని యథేచ్ఛగా వేల కోట్ల విలువైన ప్రభుత్వ భూముల్ని ఆక్రమించారు. ప్రహరీలు కట్టేసుకున్నారు. కబ్జాదారుల్లో ఎక్కువ మంది టీడీపీ నేతలే కావటంతో అప్పటి ప్రభుత్వం అవేమీ చూడనట్లే నటించింది. దీంతో వారు చెలరేగిపోయారు. కానీ ప్రభుత్వం మారింది. సర్కారు భూముల్ని తిరిగి స్వా«దీనం చేసుకోవాలన్న కృత నిశ్చయంతో ఏడాదిగా కొరడా ఝుళిపిస్తోంది. ఎంతటివారినైనా వదిలిపెట్టేది లేదంటూ... దాదాపు రూ.4,300 కోట్ల విలువైన భూముల్ని అక్రమార్కుల చెర నుంచి విడిపించింది. దీంతో ఉత్తరాంధ్ర టీడీపీ త్రయం అచ్చెన్నాయుడు, అయ్యన్నపాత్రుడు, బండారు సత్యనారాయణ నోటికొచ్చినట్లు మాట్లాడుతున్నారు. జనాన్ని తప్పుదోవ పట్టించేందుకు విషప్రచారానికీ వెనకాడటం లేదు. దీనికి తోడు ఎల్లో మాఫియా... రోజుకో రకం అసత్య ప్రచారాలకు దిగుతోంది.  సాక్షి, విశాఖపట్నం: ఇవి ప్రభుత్వ భూములు. ఎందుకంటే రికార్డులు అబద్ధాలు చెప్పవు!. అందుకే వాటిని ప్రభుత్వం తిరిగి తన అదీనంలోకి తీసుకుంటోంది. మరి ఇప్పటిదాకా ఇవి ఎవరి అదీనంలో ఉన్నాయి? ఆ ప్రశ్నకు జవాబు తెలిస్తే... టీడీపీ నేతలు ఎంతటి ఘనులో అర్థమయిపోతుంది. తాజాగా టీడీపీ నేతలు చేస్తున్న విమర్శలు ఎంతటి అర్థం లేనివో, ఎందుకింత కడుపుమంటతో రగిలిపోతున్నారో తెలిసిపోతుంది. ఎందుకంటే ఆదివారం ఒక్కరోజే గాజువాక నియోజకవర్గంలో మూడు రెవెన్యూ గ్రామాల పరిధిలో టీడీపీ మాజీ ఎమ్మెల్యే పల్లా శ్రీనివాసరావు బంధువుల కబ్జాలో ఉన్న రూ.669.26 కోట్లు విలువైన 38.45 ఎకరాల్ని రెవెన్యూ అధికారులు స్వాదీనం చేసుకున్నారు. కొన్నేళ్లుగా ఈ భూముల్ని పల్లా సోదరుడు శంకరరావు, ఇతర బంధువులు ఆక్రమించుకోవటమే కాక... వాటిని ప్రైవేటు వ్యక్తులకు లీజుకిచ్చేసి కోట్లు సంపాదిస్తున్నారు. దీంతో వీటిని తిరిగి స్వాధీనం చేసుకుని ఆ భూముల్లో ఉన్న నిర్మాణాలను తొలగించారు. పల్లా భూకబ్జాలపై ‘సాక్షి’ ప్రచురించిన వరుస కథనాలతో రెవెన్యూ ఉన్నతాధికారులు విచారణకు ఆదేశించారు. గాజువాక మండలం తుంగ్లాం రెవెన్యూ పరిధిలోని ఆటోనగర్‌ ఎఫ్‌ బ్లాక్‌లో కబ్జాకు గురైన ప్రభుత్వ భూమిలో ఆక్రమణలను తొలగించిన రెవెన్యూ అధికారులు    నెలన్నరపాటు క్షేత్రస్థాయిలో సమగ్ర విచారణ అనంతరం పల్లా సోదరుడు శంకరరావు గాజువాక మండలం తుంగ్లాం, జగ్గరాజుపేట, కూర్మన్నపాలెం ప్రాంతాల్లో 38.45 ఎకరాలను కబ్జాచేసినట్లు గుర్తించారు. 15 ఏళ్లకు పైగా ప్రభుత్వ భూములను ఆధీనంలో ఉంచుకుని వీటిని హెచ్‌పీసీఎల్, ఎల్‌అండ్‌టీ, మరికొన్ని ప్రైవేటు కంపెనీలకు లీజులకిచ్చి భారీగా ఆర్జించినట్లు నిర్ధారణకు వచ్చారు. ఈ మేరకు నివేదిక అందటంతో ఉన్నతాధికారుల ఆదేశాల మేరకు ఆర్డీవో పి.కిశోర్, గాజువాక తహసీల్దార్‌ లోకేశ్వరరావు, ఇతర రెవెన్యూ అధికారులు ఆదివారం ఆక్రమిత భూముల స్వా«దీన ప్రక్రియను చేపట్టారు. శంకరరావుకు నోటీసులిచ్చిన అనంతరం నిర్మాణాలను జేసీబీలతో తొలగించారు. పల్లా అనుచరులు అక్కడికి వచ్చి కొంత హడావుడి చేయడానికి ప్రయత్నించగా.. పోలీసులు వారిని అదుపు చేశారు.  గతంలో ఆక్రమిత భూముల్ని స్వాధీనం చేసుకొని బోర్డులు ఏర్పాటు చేసిన రెవెన్యూ సిబ్బంది(ఫైల్‌)    430.81 ఎకరాలు.. రూ.4,291.41 కోట్లు  విశాఖ నగరంతో పాటు చుట్టుపక్కల మండలాల్లో ఆక్రమణలకు గురైన ప్రభుత్వ భూముల సంరక్షణపై జిల్లా రెవిన్యూ అధికారులు ఏడాదికాలంగా చర్యలు చేపట్టారు. కబ్జాదారులు ఏ పార్టీ వారైనా, ఎంతటి వారైనా ఉపేక్షించకూడదన్న రాష్ట్ర ప్రభుత్వ విధానం మేరకు.. ప్రత్యేక దర్యాప్తు బృందాల్ని ఏర్పాటు చేసి రికార్డుల పరంగా క్షేత్రస్థాయిలో పరిశీలనలు చేశారు. స్పెషల్‌ డ్రైవ్‌ నిర్వహిస్తూ గడిచిన ఏడాది కాలంలో ఏకంగా రూ.4,291.41 కోట్లు విలువ చేసే 430.81 ఎకరాల్ని స్వాధీనం చేసుకున్నారు. ఒక్క విశాఖ రూరల్‌ మండలంలోనే అత్యధికంగా రూ.1,691 కోట్ల విలువైన భూముల్ని స్వా«దీనం చేసుకున్నారంటే కబ్జాదారులు ఏ స్థాయిలో చెలరేగిపోయారో అర్థంచేసుకోవచ్చు. అక్కడితో ఆగకుండా పదేపదే ప్రభుత్వ భూముల ఆక్రమణలకు పాల్పడిన వారిపై క్రిమినల్‌ కేసులు సైతం నమోదు చేశారు. స్వా«దీనం చేసుకున్న భూముల్లో సింహభాగం టీడీపీ నేతల చేతుల్లో ఉన్నవే. తమ భూబాగోతం బయటపడటంతో టీడీపీ నేతలు ప్రభుత్వంపై దుష్ప్రచారానికి దిగారు. అచ్చెన్న, అయ్యన్న, బండారు ఏకంగా ఆక్రమణలు తొలగిస్తున్న అధికారుల్ని కూడా తిడుతూ శాపనార్థాలు పెట్టారు. ఐఎఎస్‌లు, రెవిన్యూ, పట్టణ ప్రణాళిక అధికారులు, పోలీసులపై నోటిదురుసుతనం ప్రదర్శించారు.   టీడీపీ నేతల కబ్జా చెర నుంచి ప్రభుత్వం తిరిగి స్వాధీనం చేసుకున్న కొన్ని భూముల వివరాలు చూస్తే...  – టీడీపీ ఎమ్మెల్సీ ఎంవీఎస్‌ మూర్తి గీతం విద్యాసంస్థల పేరుతో రుషికొండ, ఎండాడ పరిసరాల్లో సర్వే నంబర్‌ 15, 16, 17, 18, 19, 20, 55, 61లో ఉన్న 18.53 ఎకరాల్ని ఆక్రమించి దాని చుట్టూ ప్రహరీ నిర్మించేశారు. అదేవిధంగా రుషికొండలో సర్వే నం. 34, 35, 37, 38లో 20 ఎకరా>ల్లో గార్డెనింగ్, గ్రావెల్‌ బండ్‌తో పాటు వివిధ అక్రమ నిర్మాణాలు చేపట్టారు. వీటిని గుర్తించిన అధికారులు 2020 అక్టోబర్‌ 24న అక్రమ నిర్మాణాల్ని తొలగించి.. స్వా«దీనం చేసుకున్నారు.  – ఆనందపురం–శొంఠ్యాం సమీపంలో మాజీ మంత్రి, టీడీపీ ఎమ్మెల్యే గంటా బంధువు, జనసేన నాయకుడు పరుచూరి భాస్కరరావు సహా పలువురు టీడీపీ నేతలు టైటిల్‌ డీడ్‌ నం.1180లో ఆక్రమించుకున్న  రూ.256 కోట్లు విలువ చేసే 64 ఎకరాల భూముల్ని గతేడాది నవంబర్‌లో స్వాదీనం చేసుకున్నారు.   – టీడీపీ మాజీ ఎమ్మెల్యే పీలా గోవింద సత్యనారాయణ ఆనందపురం మండలం భీమన్నదొర పాలెంలో సర్వే నం.156లో సుమారు 60 ఎకరాల భూమిని ఆక్రమించేసుకోగా.. గతేడాది డిసెంబర్‌లో రెవిన్యూ అధికారులు స్వాదీనం చేసుకున్నారు. ఈ భూముల మార్కెట్‌ విలువ సుమారు రూ. 300 కోట్లు ఉంటుందని అధికారులు అంచనా వేస్తున్నారు.  – టీడీపీ ఎమ్మెల్యే వెలగపూడి రామకృష్ణబాబు ఆక్రమించిన రుషికొండ బీచ్‌రోడ్డులో సర్వే నం.21లో సుమారు రూ.3 కోట్లు విలువ చేసే 6 సెంట్ల ప్రభుత్వ స్థలాన్ని రెవిన్యూ అధికారులు స్వాదీనం చేసుకున్నారు.  – టీడీపీ మాజీ ఎమ్మెల్యే పల్లా శ్రీనివాసరావు, ఆయన బంధువర్గం పేరుతో గాజువాక నియోజకవర్గంలో మూడు రెవిన్యూ గ్రామాల పరిధిలోని సుమారు రూ.669.26 కోట్లు విలువ చేసే 38.45 ఎకరాల్ని ఆదివారం రెవిన్యూ అధికారులు స్వా«దీనం చేసుకున్నారు.  – టీడీపీ హయాంలో ప్రభుత్వ భూమిని ప్లే గ్రౌండ్‌గా మార్చి.. దర్జాగా కబ్జా చేసిన  విశ్వనాధ విద్యాసంస్థల నుంచి  ఆనందపురంలో సర్వే నంబర్‌ 122, 123లోని రూ.15 కోట్లు విలువ చేసే 2.5 ఎకరాల భూమిని గతేడాది నవంబర్‌లో రెవిన్యూ అధికారులు స్వా«దీనం చేసుకున్నారు. 

సాక్షి ప్రతినిధి, విశాఖపట్నం: ప్రభుత్వ భూములను చెరబట్టిన మాజీ ఎమ్మెల్యే, టీడీపీ విశాఖ పార్లమెంట్‌ జిల్లా అధ్యక్షుడు పల్లా శ్రీనివాసరావు భూ దందాలు, ఆక్రమణలు ఒక్కొక్కటిగా వెలుగులోకి వస్తున్నాయి. టీడీపీ హయాంలో ఏకంగా 56 ఎకరాల ప్రభుత్వ స్థలాలను పల్లా అండ్‌ కో కబ్జా చేసినట్లు రెవెన్యూ అధికారుల విచారణలో నిగ్గు తేలింది. వ్యవసాయ, వ్యవసాయేతర, పారిశ్రామిక భూములు, రోడ్లు, చెరువులు.. ఇలా కబ్జాకు కాదేదీ అనర్హం అన్నట్లుగా గాజువాక పరిసర ప్రాంతాల్లో కనిపించి న భూములన్నింటినీ పల్లా మింగేశారు.   సాక్షి వరుస కథనాలతో.. పల్లా కుటుంబం భూ దందాలు, అక్రమాలను ‘సాక్షి’ వరుస కథనాలతో ఏప్రిల్‌లోనే వెలుగులోకి తేవడంతో స్పందించిన జిల్లా అధికార యంత్రాం గం విచారణ చేపట్టింది. జాయింట్‌ కలెక్టర్‌ (ఆర్‌బీ అండ్‌ ఆర్‌) ఆదేశాల మేరకు గాజువాక తహసీల్దార్‌ ఎం.వి.ఎస్‌.లోకేశ్వరరావు సమగ్ర విచారణ జరిపా రు. రెవెన్యూ అధికారులు దాదాపు నెలన్నర పాటు మాజీ ఎమ్మెల్యే పల్లా శ్రీనివాసరావు కుటుంబం భూ కబ్జాలపై క్షేత్ర స్థాయిలో విచారణ చేపట్టారు. ఖాళీ స్థలాలతో పాటు రోడ్లు, చెరువులను సైతం ఆక్రమించినట్లు విచారణలో స్పష్టమైంది. గాజువాక మండలం తుంగ్లాంలో వివిధ సర్వే నంబర్లలో  56.07 ఎకరాలు కబ్జా చేసినట్లు గుర్తించారు. కబ్జా భూములను లీజుకిచ్చి.. పల్లా కుటుంబ సభ్యులు  రూ.కోట్ల విలువ చేసే ప్రభుత్వ భూములను కబ్జా చేయడంతో పాటు వివిధ ప్రభుత్వ, ప్రైవేట్‌ సంస్థలకు లీజులకు ఇచ్చి నట్లు అధికారుల విచారణలో నిర్ధారణ అయింది.  హెచ్‌పీసీఎల్, ఎల్‌ అండ్‌ టీ లాంటి బడా సంస్థలతో పాటు చిన్న ప్రైవేట్‌ కంపెనీలు  వ్యాపార కార్యకలాపాలు సాగిస్తున్నట్లు గుర్తించారు. ఉన్నతాధికారులకు విచారణ నివేదిక పల్లా కుటుంబ సభ్యుల భూ ఆక్రమణలపై గాజువాక తహసీల్దార్, రెవెన్యూ సిబ్బంది స్పష్టమైన నివేదికను ఉన్నతాధికారులకు సమర్పించా రు.  సర్వే నెంబర్ల ప్రకారం ఆ స్థలం ఏ విభాగం కిందకు వస్తుంది? ప్రస్తుతం అక్కడ పరిస్థితి, ఎవరి ఆధీనంలో ఉంది? అనే విషయాలతో సమగ్ర నివేదిక రూపొందించారు. పల్లా భూ కబ్జాల బాగోతం.. ► తుంగ్లాం సర్వే నంబర్‌ 9/6లో ఉన్న 56 సెంట్ల పోరంబోకు స్థలం పల్లా శ్రీనివాసరావు సోదరుడు పల్లా శంకరరావు ఆక్రమణలోనే ఉందని అధికారులు నిర్ధారించారు. ► సర్వే నంబర్‌ 10/2లో 36 సెంట్ల పోరంబోకు భూమిని పల్లా శంకరరావు కబ్జా చేశారు. ఈ స్థలంలో ఏసీసీ షెడ్లు వేసినట్లు రెవెన్యూ అధికారులు గుర్తించారు. ► సర్వే నంబర్‌ 14/1లో 14.5 ఎకరాల భూమిని పల్లా శంకరరావు ఆక్రమించినట్లు నిర్ధారించారు. ఇందులో 1.75 ఎకరాలను హెచ్‌పీసీఎల్‌కు లీజుకు ఇవ్వడంతో గోడౌన్‌ నిర్మించినట్లు గుర్తించారు. మరో 10 సెంట్ల స్థలంలో జూబ్లీ ఇంజనీరింగ్‌ పవర్‌ ప్రైవేట్‌ లిమిటెడ్‌కు చెందిన షెడ్డు ఉంది. ► సర్వే నంబర్‌ 14/2లో 28 సెంట్ల రైత్వారీ భూమి పల్లా కబ్జాలో ఉన్నట్లు తేల్చారు. ► సర్వే నంబర్‌ 28లో ఉన్న 40 ఎకరాల చెరువు పల్లా శంకరరావు ఆధీనంలో ఉన్నట్లు తేల్చారు. ఇందులో 92 సెంట్లలో కాంపౌండ్‌ వాల్‌తో షెడ్డు ఉన్నట్లు గుర్తించారు. రెవెన్యూ రికార్డుల ప్రకారం ఈ స్థలాన్ని ఏపీఐఐసీ నుంచి సేకరించగా రైల్వే శాఖకు అప్పగించినట్లు ఉంది. ► సర్వే నంబర్‌ 33/4లో 13 సెంట్ల పోరంబోకు స్థలాన్ని పల్లా కబ్జా చేశారు. ఆ స్థలంలో హెచ్‌పీసీఎల్‌ గోడౌన్‌ ఉంది. ► సర్వే నంబర్‌ 34/2లో ఉన్న 24 సెంట్ల పోరంబోకు స్థలాన్ని ఆక్రమించి హెచ్‌పీసీఎల్‌కు లీజుకు ఇచ్చారు. సదరు సంస్థ ఈ స్థలంలో షెడ్డు నిర్మించింది.

సాక్షి, తిరుపతి: టీడీపీ నేతలు ఆక్రమించిన ప్రభుత్వ భూములకు విముక్తి లభించింది. చిత్తూరు జిల్లాలో ఏళ్ల తరబడి టీడీపీ నేతల కబంధహస్తాల్లో ఉన్న 2,887.73 ఎకరాలను ప్రభుత్వ భూములుగా చిత్తూరు జాయింట్‌ కలెక్టర్‌ మార్కండేయులు ధ్రువీకరించారు. అలానే జిల్లాలోని 78 గ్రామాల్లో 538.29 ఎకరాల భూమికి సంబంధించిన అక్రమ డీకేటీ పట్టాలను రద్దు చేశారు. ఈ రెండేళ్ల కాలంలో అక్రమార్కుల చెర నుంచి కోట్లాది రూపాయల విలువైన 3,426 ఎకరాల ప్రభుత్వ భూములకు విముక్తి లభించింది. జిల్లాలో చంద్రబాబు సొంత తమ్ముడి మొదలు.. నాటి మంత్రులు, ఎంపీ, ఎమ్మెల్యే, ఎమ్మెల్సీలు, మండల, గ్రామ స్థాయి కార్యకర్తల వరకూ ప్రభుత్వ భూములను ఆక్రమించుకున్నారు. వాటిలో ముఖ్యంగా శ్రీకాళహస్తి, సత్యవేడు, పీలేరు, తిరుపతి పరిధిలోనే అధికంగా ఉన్నాయి. కర్నూలు జిల్లాకు చెందిన మాజీ మంత్రి అల్లుడు, మాజీ మంత్రి బొజ్జల గోపాలకృష్ణారెడ్డి ముఖ్య అనుచరులు, లోకేశ్‌ అనుచరులు ప్రభుత్వ, పోరంబోకు, అటవీ భూములను విచ్చలవిడిగా ఆక్రమించారు. నాటి రెవెన్యూ అధికారుల సహకారంతో ఈ దురాక్రమణలకు ఒడిగట్టారు. ఈ ఆక్రమణలను పలుమార్లు ‘సాక్షి’ వెలుగులోకి తెచ్చింది.  సోత్రియ భూములే వారి టార్గెట్‌ సత్యవేడు నియోజకవర్గంలో వైఎస్సార్‌ హయాంలో వందలాది ఎకరాల్లో శ్రీసిటీ ఏర్పాటైన విషయం తెలిసిందే. అక్కడ భారీ పరిశ్రమల ఏర్పాటుతో నియోజకవర్గ పరిధిలోని భూముల ధరలు రూ.కోట్లకు చేరాయి. వైఎస్సార్‌ మరణానంతరం సత్యవేడు పరిధిలోని ప్రభుత్వ, పోరంబోకు, కాలువ, అటవీ భూములను ఆక్రమించుకోవడం ప్రారంభించారు. అందులో భాగంగా విలువైన సోత్రియ భూములను టార్గెట్‌ చేశారు. 1956లో ఈ భూములు మద్రాస్‌ రాష్ట్రం చెంగల్‌పట్టు జిల్లా పొన్నేరు తాలూకాలో ఉండేవి. 1960లో ఎస్టేట్‌ అబాలిష్‌ యాక్ట్‌ కింద అప్పట్లో ఏపీ ప్రభుత్వం స్వాధీనం చేసుకుంది. చంద్రబాబు సీఎం అయ్యాక ఆ భూములపై టీడీపీ నేతల కన్నుపడింది. ఆ భూములను సోమయాజులు నుంచి చెంగమనాయుడు కొనుగోలు చేసినట్టు తప్పుడు పత్రాలు సృష్టించారు. అనంతరం చెంగమనాయుడు రక్తసంబంధీకుడు కృష్ణమనాయుడు ఆధ్వర్యంలో టీడీపీ ముఖ్య నాయకులు 17 మంది రంగంలోకి దిగారు. వారిలో ఓ పారిశ్రామికవేత్త కూడా ఉన్నాడు. సోత్రియ భూములకు సంబంధించి రెవెన్యూ రికార్డులను సేకరించారు. వాటికి రైత్వారీ పట్టాలు ఇప్పించేందుకు ప్రయత్నించడంతో స్థానికులు అడ్డుకున్నారు. రైత్వారీ పట్టా వీలు కాకపోవటంతో డూప్లికేట్‌ పట్టాలు సృష్టించి చెన్నైలోని ఓ బ్యాంక్‌లో ఆ భూములను తాకట్టు పెట్టి రూ.15 కోట్లు తీసుకున్నట్టు తెలిసింది. అన్యాక్రాంతమైన ప్రభుత్వ భూములను స్వాధీనం చేసుకోవాలని వైఎస్‌ జగన్‌ సీఎం అయ్యాక అధికారులకు ఆదేశాలిచ్చారు. దీంతో జేసీ మార్కండేయులు శాటిలైట్‌ ద్వారా సోత్రియ భూములను సర్వే చేసి వాటిని ప్రభుత్వ భూములుగా ప్రకటించారు.  ఆక్రమించుకున్న భూములను స్వాధీనం చేసుకున్నాం ప్రభుత్వ ఆదేశాల మేరకు చిత్తూరు జిల్లాలో ఆక్రమణకు గురైన 3,426 ఎకరాల ప్రభుత్వ, అటవీ, పోరంబోకు తదితర భూములను ప్రభుత్వ భూములుగా ధ్రువీకరించాం. వీటిని ప్రభుత్వ అవసరాలకు కేటాయిస్తాం. ఈ భూముల్లో 1052 ఎకరాల సోత్రియ భూములను ఏపీఐఐసీకి కేటాయించనున్నాం.   – మార్కండేయులు, జాయింట్‌ కలెక్టర్, చిత్తూరు. 

టీ.నగర్‌: చెంగల్‌పట్టు సమీపాన 105 ఎకరాల ప్రభుత్వ స్థలాన్ని పట్టా చేసి అందజేసిన అధికారులపై చర్యలు తీసుకోవాలంటూ రాష్ట్ర ప్రభుత్వానికి హైకోర్టు ఉత్తర్వులు జారీ చేసింది. మద్రాసు హైకోర్టులో ప్రవీణ్‌కుమార్‌ అనే వ్యక్తి పిటిషన్‌ దాఖలు చేశారు. అందులో చెంగల్‌పట్టు సమీపాన కరుంగుళిపల్లం అనే గ్రామంలోని 105 ఎకరాల ప్రభుత్వ స్థలాన్ని 53 మందికి పట్టా చేసి అందజేశారని, ఈ స్థలం అపహరణ గురించి రాష్ట్ర డీజీపీకి ఫిర్యాదు చేయగా, ఈ కేసును స్థల అపహరణ కేసులను విచారించే ప్రత్యేక విభాగానికి పంపకుండా తిరుపోరూరు పోలీసు స్టేషన్‌కు పంపినట్లు తెలిపారు. వందల కోట్ల రూపాయిలు విలువచేసే ఈ స్థలం వ్యవహారంలో మాజీ ఎమ్మెల్యే శివానందం, న్యాయవాదులు ఉన్నారని, అందుచేత తాను ఇచ్చిన ఫిర్యాదు ఆధారంగా కేసు నమోదు చేయాలని, తనకు భద్రత కల్పించేందుకు పోలీసులకు ఉత్తర్వులివ్వాలని కోరారు. ఈ కేసు ప్రధాన న్యాయమూర్తి సంజీవ్‌ బెనర్జీ, న్యాయమూర్తి సెంథిల్‌కుమార్, రామ్మూర్తి సమక్షంలో మంగళవారం విచారణకు వచ్చింది. ఈ సమయంలో ప్రభుత్వం తరఫున హాజరైన న్యాయవాది 105 ఎకరాల స్థలానికి పొరపాటున ప్రభుత్వ అధికారులు పట్టాలు అందజేశారని, ఈ పట్టాలను రద్దు చేసేందుకు అధికారులు చర్యలు తీసుకుంటున్నట్లు తెలిపారు. ఈ వాదనను న్యాయమూర్తులు నిరాకరించారు. 105 ఎకరాల ప్రభుత్వ స్థలాన్ని పొరపాటున అధికారులు పట్టా చేసి ఇచ్చారనడం సమంజసం కాదని, సంబంధిత అధికారులపై ఉన్నతాధికారులు క్రమశిక్షణా చర్యలు తీసుకోవాలని ఉత్తర్వులిచ్చారు. ఈ వ్యవహారంలో అధికారులు ప్రాథమిక విచారణ జరిపి నివేదిక దాఖలు చేయాలంటూ విచారణను జూన్‌ పదో తేదీకి వాయిదా వేశారు. చదవండి: ఆక్సిజన్‌ అందక 13 మంది మృతి

సాక్షి, అమరావతి: విశాఖపట్నంలో ప్రభుత్వ భూముల వేలం విషయంలో టెండర్ల ప్రక్రియను కొనసాగించవచ్చని, అయితే టెండర్లను మాత్రం ఖరారు చేయవద్దని అధికారులను హైకోర్టు ఆదేశించింది. మిషన్‌ బిల్డ్‌ ఏపీ డైరెక్టర్, ఎన్బీసీసీ సీఎండీ, ఏపీఐఐసీ ఎండీ తదితరులకు నోటీసులు జారీచేసింది. పూర్తి వివరాలతో కౌంటర్లు దాఖలు చేయాలని వారిని ఆదేశించింది. తదుపరి విచారణను జూలై 15కి వాయిదా వేసింది. ఈ మేరకు ప్రధాన న్యాయమూర్తి (సీజే) జస్టిస్‌ అరూప్‌కుమార్‌ గోస్వామి, న్యాయమూర్తి జస్టిస్‌ చాగరి ప్రవీణ్‌కుమార్‌లతో కూడిన ధర్మాసనం శుక్రవారం మధ్యంతర ఉత్తర్వులు జారీచేసింది. విశాఖపట్నంలో భూముల వేలాన్ని అడ్డుకోవాలని కోరుతూ విజయవాడకు చెందిన కన్నెగంటి హిమబిందు హైకోర్టులో పిల్‌ దాఖలు చేసిన విషయం తెలిసిందే.  

రాజకీయం అండగా అక్రమాలు.. కండబలంతో దౌర్జన్యాలు.. బెదిరించి అధికారుల్ని లోబరుచుకోవడం.. రికార్డులు మాయం చేయడం.. ప్రభుత్వ భూముల్ని ఆక్రమించడం.. వాటిని చూపించి బ్యాంకుల్లో కోట్ల రూపాయల రుణాలు తీసుకోవడం.. ఆ భూముల్లో నిర్మించిన గోదాములను ప్రభుత్వ సంస్థకే లీజుకివ్వడం.. అక్రమంగా కోట్లాది రూపాయలు వెనకేసుకోవడం.. ఇవీ తెలుగుదేశం పార్టీ రాష్ట్ర అధ్యక్షుడు కింజరాపు అచ్చెన్నాయుడి కుటుంబ వ్యవహారాలు. కాలువను, గోర్జి భూమిని కూడా ఆక్రమించేశారంటే వీరి తెగింపును అర్థం చేసుకోవచ్చు. అంతేకాదు.. ప్రభుత్వ భూముల్ని కూడా తమపేరుతో రిజిస్టర్‌ చేసేసుకున్నారు. పాత రికార్డులు కనిపించకుండా చేసేశారు. వీటిగురించి తెలిసినా ప్రస్తావించేందుకు కూడా ఎవరూ సాహసించరు. ఎవరైనా సాహసిస్తే.. బెదిరించో, దండించో నోరు మూయిస్తారు. సాక్షి ప్రతినిధి, శ్రీకాకుళం: తెలుగుదేశం పార్టీ రాష్ట్ర అధ్యక్షుడు కింజరాపు అచ్చెన్నాయుడు కుటుంబ అవినీతికి అంతే లేకుండాపోయింది. అచ్చెన్నాయుడు అన్నదమ్ములు వ్యూహాత్మకంగా అక్రమాలకు పాల్పడ్డారు. ఎర్రన్నాయుడు ఉన్నంతకాలం ఆయన అండతో, ఆయన తర్వాత అచ్చెన్నాయుడు అండతో సోదరుడు కింజరాపు హరిప్రసాద్‌ చేసిన అవినీతి అంతా ఇంతా కాదు. నీరు చెట్టు పనుల్లో కోట్లు తినేశారు. రోడ్ల నిర్మాణాల్లో పెద్ద ఎత్తున అక్రమాలకు పాల్పడ్డారు. శ్రీకాకుళం జిల్లా కోటబొమ్మాళి మండలంలో తన స్వగ్రామమైన నిమ్మాడ సమీపంలోని పెద్దబమ్మిడి గ్రామంలో గోడౌన్ల ద్వారా గత 12 ఏళ్లలో రూ.47 కోట్లకుపైగా అక్రమార్జనకు పాల్పడ్డారు. అక్రమార్జనకు వేదికైన గోడౌన్లను ఏకంగా ప్రభుత్వ భూమిలోనే నిర్మించారు. సర్వే నంబరు 95, 96లో గోడౌన్, సర్వే నంబరు 106లో భవాని గ్రానైట్‌ పాలిషింగ్‌ యూనిట్‌ నిర్మించారు. ప్రభుత్వ భూమి, గోర్జి (పొలాలకు వెళ్లే దారి), సాగునీటి కాలువలు సుమారు 3.15 ఎకరాలు ఆక్రమించి ఈ నిర్మాణాలు చేశారు. ఆక్రమిత భూమిలో నిర్మించిన గోడౌన్లను చూపించి వివిధ బ్యాంకుల్లో కోట్లాది రూపాయల రుణాలు తీసుకున్నారు.  ఆక్రమించిన భూములివే.. సర్వే నంబర్‌ 95–08లో 1.20 ఎకరాల నీటి కాలువ, సర్వే నంబర్‌ 95–11లో 51 సెంట్లు గోర్జి పోరంబోకు, సర్వే నంబర్‌ 96–6లో 11 సెంట్ల ప్రభుత్వ కాలువ భూమి, సర్వే నంబర్‌ 96–10లో 58 సెంట్ల ప్రభుత్వ గోర్జి భూమి, సర్వే నంబర్‌ 95–3లో 15 సెంట్ల ప్రభుత్వ కాలువ భూమి, సర్వే నంబర్‌ 96–3 లోగల 21 సెంట్లు ప్రభుత్వ గోర్జి భూమి, సర్వే నంబర్‌106–6పీలో 18 సెంట్లు, సర్వే నంబర్‌ 95–08పీలో 2 సెంట్లు, సర్వే నంబర్‌ 96–3పీలో గల 12 సెంట్లు, సర్వే నంబర్‌ 96–10పీలో 7 సెంట్లు.. మొత్తం 3.15 సెంట్లను కలిపేసుకుని గోడౌన్లను నిర్మించారు. ఈ భూములను ఆక్రమించడమే కాకుండా తన సోదరులు ఎర్రన్నాయుడు, అచ్చెన్నాయుడు, ప్రభాకర్‌ల భాగస్వామ్యంతో కోటబొమ్మాళి సబ్‌ రిజిస్ట్రార్‌ కార్యాలయంలో రిజిస్ట్రేషన్‌ చేసుకున్నారు. ఈ భూములు చూపించి 2009లో కోటబొమ్మాళి ప్రాథమిక వ్యవసాయ సహకార పరపతి సంఘానికి (పీఏసీఎస్‌కు) చైర్మన్‌గా ఉన్న కింజరాపు హరిప్రసాద్‌ కోట్ల రూపాయల రుణం తీసుకున్నారు. ఈ భూములనే చూపించి కొన్ని జాతీయ బ్యాంకుల్లో కూడా రుణాలు తీసుకున్నారు.   రికార్డులు మాయం  1989 నుంచి 2006 వరకు కోటబొమ్మాళి సబ్‌ రిజిస్ట్రార్‌ కార్యాలయంలో జరిగిన భూముల క్రయవిక్రయాల జాబితాల్లో లభించిన ఈసీల ప్రకారం పరిశీలిస్తే.. కింజరాపు హరిప్రసాద్‌ తన అన్నదమ్ముల సాయంతో సుమారు 7.86 ఎకరాలను రిజిస్ట్రేషన్‌ చేసుకున్నారు. దీన్లో 3.15 ఎకరాల ప్రభుత్వ భూమి కూడా ఉంది. ఈ ఆక్రమణల పర్వంలో రెవెన్యూ రికార్డుల్ని మాయం చేశారు. రెవెన్యూ శాఖలో అతి కీలకమైన ఎస్‌ఎల్‌ఆర్‌ రికార్డుల్ని కూడా కనిపించకుండా చేశారు. ఇరిగేషన్‌ శాఖ, స్టాంప్స్‌ అండ్‌ రిజిస్ట్రేషన్‌ శాఖ, వివిధ బ్యాంకులను మోసం చేశారు. ఈ క్రమంలో అధికారులను కూడా భయపెట్టారు. గోడౌన్ల ముసుగులో అవినీతి హరిప్రసాద్‌ 2003లో 10 వేల మెట్రిక్‌ టన్నుల సామర్థ్యంతో గోడౌన్లు నిర్మించారు. వీటిని 2004కి 20 వేల మెట్రిక్‌ టన్నుల సామర్థ్యానికి, 2014కి 30 వేల మెట్రిక్‌ టన్నుల సామర్థ్యానికి విస్తరించారు. 2007 నుంచి 2019 వరకు 12 ఏళ్లలో ఈ గోడౌన్ల నుంచి కోట్ల రూపాయలు అక్రమంగా ఆర్జించారు. టీడీపీ అధికారంలో ఉన్నంతవరకు జిల్లా పౌరసరఫరాల సంస్థ ఈ గోడౌన్లను లీజుకు తీసుకుని రైతుల నుంచి సేకరించిన ధాన్యాన్ని నిల్వచేసేది. ఒక అక్నాలెడ్జ్‌మెంట్‌ (ఏసీకే.. అనగా 580 బియ్యం బస్తాలు)కి రెండు క్వింటాళ్ల వరకు మిల్లర్ల నుంచి అనధికారికంగా తరుగు కింద తీసుకునేవారు. వాస్తవంగా ప్రభుత్వమే 1.5 శాతం తరుగు అవకాశం ఇస్తుంది. ఈ లెక్కన మిల్లర్ల దగ్గర తీసుకున్నదంతా అదనమే. మిల్లర్లు తమ గోడౌన్‌లో ధాన్యం బస్తాలు నిల్వ చేయాలంటే అనధికారికంగా అడ్వాన్సు పేరిట రూ.ఐదువేలు వసూలు చేసేవారు. గోడౌన్‌ ఫార్మాలిటీ కింద ఒక బస్తాకి రూ.1.60 పైసలు తీసుకునేవారు. వాస్తవానికి ప్రభుత్వమే బస్తాకి రూ.3.50 పైసలు అద్దె చెల్లిస్తుంది. హ్యాండ్లింగ్‌ కోసం రెండేళ్లకొకసారి టెండర్లు పిలవాల్సి ఉన్నా.. ఎప్పుడూ ఏకపక్షంగానే టెండర్‌ కొట్టేసేవారు. హ్యాండ్లింగ్‌ చార్జీలను ప్రభుత్వమే చెల్లిస్తుంది. కానీ మిల్లర్ల దగ్గరి నుంచి అనధికారికంగా వసూలు చేసేవారు. ఇవికాకండా వే బ్రిడ్జి కోసమని ఒక ఏసీకేకి రూ.250 వసూలు చేసేవారు. ఇలా అన్ని రకాలుగా సంవత్సరానికి 3 కోట్ల 96 లక్షల 60 వేల రూపాయల మేర అక్రమంగా ఆర్జించారు. ఈ రకంగా 12 సంవత్సరాలకు కలిపి 47 కోట్ల 59 లక్షల 20 వేల రూపాయల మేర కింజరాపు కుటుంబం అడ్డగోలుగా వెనకేసుకుంది. 1.80 లక్షల చదరపు అడుగుల విస్తీర్ణంలో ఉన్న ఈ గోడౌన్లు ప్రస్తుతం చదరపు అడుగుకు రూ.5 వంతున ఎఫ్‌సీఐ లీజులో ఉన్నాయి. నా దగ్గర ఆధారాలున్నాయి 1983లో రాజకీయ అరంగేట్రం చేసిన కింజరాపు కుటుంబసభ్యులకు అప్పట్లో కేవలం రెండెకరాల పొలం మాత్రమే ఉండేది. ఇప్పుడు వేలకోట్ల రూపాయలు అక్రమంగా సంపాదించారు. నిమ్మాడ గోడౌన్‌ నిర్మాణంలో ప్రభుత్వ భూమిని కబ్జా చేశారు. ఆ భూమిని సొంతగా రిజిస్ట్రేషన్‌ చేసుకుని రెవెన్యూ రికార్డులను మాయం చేశారు. ప్రభుత్వ భూముల రికార్డులను మాయం చేసి వివిధ బ్యాంకుల్లో కోట్ల రూపాయల రుణాలు కాజేశారు. ప్రధాన కారకుడైన హరిప్రసాద్‌కు సోదరులు ఎర్రన్నాయుడు, అచ్చెన్నాయుడు, ప్రభాకర్‌ అండగా ఉండటంతో కొన్ని దశాబ్దాలుగా లెక్కలేని అక్రమాలు జరిగాయి. ప్రభుత్వ భూముల ఆక్రమణ, రికార్డులు మాయం చేసి బ్యాంకుల్లో కోట్ల రూపాయలు దోచుకోవడం, గోడౌన్‌ నిర్వహణలో అక్రమ వసూళ్లకు సంబంధించి నా వద్ద అన్ని ఆధారాలు ఉన్నాయి.  – దువ్వాడ శ్రీనివాస్, వైఎస్సార్‌సీపీ టెక్కలి నియోజకవర్గ సమన్వయకర్త ఫిర్యాదు వస్తే చర్యలు తీసుకుంటాం కోటబొమ్మాళి మండలం పెద్దబమ్మిడిలో గోడౌన్‌ నిర్మాణంలో ప్రభుత్వ భూముల ఆక్రమణ జరిగినట్లు ఫిర్యాదు వస్తే కచ్చితంగా చర్యలు తీసుకుంటాం. ఇదే గోడౌన్‌లో ఏడాది కిందట మండల సర్వేయర్లతో సర్వే చేయించాం. అప్పట్లో ప్రైవేట్‌ ల్యాండ్‌ అని నివేదిక ఇచ్చారు.  – రమేష్‌బాబు, తహసీల్దారు, కోటబొమ్మాళి భౌతికంగా ఉన్న పత్రాలతో రిజిస్ట్రేషన్లు చేస్తాం భూముల రిజిస్ట్రేషన్ల విషయంలో భౌతికంగా ఉన్న పత్రాల మేరకు రిజిస్ట్రేషన్లు చేస్తాం. కొన్ని సర్వే నంబర్లకు ఆనుకుని ప్రభుత్వ భూములకు సంబంధించి సర్వే నంబర్లు ఉన్నప్పుడు అవి కూడా ప్రైవేటు భూమి యజమాని పేరుతో రిజిస్ట్రేషన్లు జరిగే అవకాశం ఉంది.  – జి.రాజు, సబ్‌రిజిస్ట్రార్, కోటబొమ్మాళి 

సాక్షి, అమరావతి: రాష్ట్రంలో భూ యాజమాన్య హక్కు పత్రాలు (ఆర్‌వోఆర్‌–అడంగల్‌) తప్పుల తడకగా.. అస్తవ్యస్తంగా తయారయ్యాయి. భూ రికార్డులను నవీకరించి నిర్వహించడానికి వీలుగా 2014లో అప్పటి ప్రభుత్వం ‘వెబ్‌ల్యాండ్‌’ కొత్త సాఫ్ట్‌వేర్‌ను ప్రవేశపెట్టింది. అది కాస్తా తప్పుల తడకగా.. లోపభూయిష్టంగా తయారైంది. ఫలితంగా భూ యజమానులు తీవ్ర ఇబ్బందులకు గురయ్యే దుస్థితి దాపురించింది. వెబ్‌ల్యాండ్‌ రికార్డులు సక్రమంగా లేకపోవడంవల్లే భూ వివాదాలు పెరిగి ఘర్షణలకు దారి తీస్తున్నాయి. కొన్ని సందర్భాల్లో హత్యలకు దారి తీసిన సందర్భాలు కూడా ఉన్నాయి. కొన్ని వివాదాల విషయంలో ఇరువర్గాలు ఏళ్ల తరబడి కోర్టుల చుట్టూ తిరుగుతున్న దృష్టాంతాలు లక్షల్లో ఉన్నాయి. అందువల్లే భూ రికార్డులను ప్రక్షాళన చేయాలని రాష్ట్ర ప్రభుత్వం నిర్ణయించింది. భూములు, పట్టణ, గ్రామీణ ఆస్తులను రీసర్వే చేసి ప్రతి సబ్‌ డివిజన్‌కు సరిహద్దు రాళ్లు నాటాలని నిర్ణయించింది. తద్వారా ల్యాండ్‌ రికార్డుల స్వచ్ఛీకరణ కార్యక్రమాన్ని పక్కాగా చేపడుతోంది. ప్రైవేట్‌ భూములు ప్రభుత్వ ఖాతాలో..  అనేకచోట్ల ప్రైవేట్‌ భూములు ప్రభుత్వ ఖాతాల్లోనూ, ప్రభుత్వ భూములు ప్రైవేట్‌ వ్యక్తుల ఖాతాల్లోను అడంగల్‌లో నమోదై ఉన్నాయి. కొందరు కిందిస్థాయి రెవెన్యూ సిబ్బంది, రిటైర్డు ఉద్యోగులు ముడుపులు తీసుకుని తప్పుడు రికార్డులు సృష్టించారు. గత ప్రభుత్వ హయాంలో టీడీపీ నాయకులు కూడా ఈ వ్యవహారంలో కీలక భూమిక పోషించారు. ఇప్పటికీ చాలా భూములు రెవెన్యూ రికార్డుల్లో అన్‌ నోన్‌ (ఎవరివో తెలియవు) అనే ఖాతాలోనే ఉన్నాయి. తప్పుల సవరణ కోసం... 2020 జూన్‌ 1 నుంచి 2021 జనవరి 29వ తేదీ వరకూ 8 నెలల్లో భూ యాజమాన్య పత్రం (ఆర్‌వోఆర్‌/అడంగల్‌)లో తప్పుల సవరణ కోసం 4,17,650 వినతులు వచ్చాయి. వెబ్‌ల్యాండ్‌ ఎంత అస్తవ్యస్తంగా.. తప్పుల తడకగా ఉందనేది ఈ గణాంకాలే చెబుతున్నాయి. వాటిలో.. 2,04,577 తప్పులను అధికారులు సరిదిద్దారు. 43,047 అర్జీలు పెండింగ్‌లో ఉండగా.. 1,70,026 అర్జీలను వివిధ కారణాల వల్ల తిరస్కరించారు.  అందుకే స్వచ్ఛీకరణ   దశాబ్దాల తరబడి సబ్‌ డివిజన్‌ కాకపోవడం, కిందిస్థాయిలో జరిగిన అక్రమాలు వంటి కారణాల వల్ల అడంగల్‌లోనూ, వెబ్‌ల్యాండ్‌ అడంగల్‌లోనూ కొన్ని తప్పులు ఉన్న మాట వాస్తవమేనని రెవెన్యూ ఉన్నతాధికారి ఒకరు అంగీకరించారు. ఈ తప్పులను సరిదిద్ది ప్రక్షాళన చేయడం కోసమే  ప్రభుత్వం రికార్డుల స్వచ్ఛీకరణ కార్యక్రమం చేపట్టిందని తెలిపారు.    

సాక్షి, అమరావతి: విశాఖ, పరిసర ప్రాంతాల్లో జరిగిన భూ కుంభకోణాలపై విచారణ నిమిత్తం ఏర్పాటైన ప్రత్యేక దర్యాప్తు బృందం (సిట్‌) గడువును ప్రభుత్వం వచ్చే నెల 28 వరకూ పొడిగించింది. జిల్లాలో భూ రికార్డులు ట్యాంపరింగ్‌ చేశారని, ప్రభుత్వ భూములను అన్యాక్రాంతం చేశారని, రికార్డులు మాయం చేశారంటూ వచ్చిన అభియోగాలపై లోతైన దర్యాప్తు నిమిత్తం 2019 నవంబర్‌ 17న ప్రభుత్వం సిట్‌ను ఏర్పాటు చేసింది. మూడు నెలల్లో నివేదిక ఇవ్వాలని ఉత్తర్వుల్లో పేర్కొంది. గతేడాది ఫిబ్రవరి 12న సిట్‌ గడువును మరో మూడు నెలలు పొడిగించింది. కరోనా, లాక్‌డౌన్‌ కారణంగా తమ బృందం గతేడాది మార్చి 15వ తేదీ వరకే పని చేసిందని, అనంతరం గతేడాది జూన్‌ 10 నుంచే పని ప్రారంభించిందని సిట్‌ చైర్మన్‌ ప్రభుత్వానికి నివేదించారు. మిగిలిన రికార్డులను పరిశీలించి, నివేదిక ఇచ్చేందుకు మరికొంత సమయం ఇవ్వాలని సిట్‌ చైర్మన్‌ ప్రభుత్వానికి విజ్ఞప్తి చేశారు. ఈ మేరకు సిట్‌ పదవీ కాలాన్ని పొడిగిస్తూ సీఎస్‌ ఆదిత్యనాథ్‌ దాస్‌ శుక్రవారం ఉత్తర్వులిచ్చారు.  

సాక్షి, మేడ్చల్‌ జిల్లా: హైదరాబాద్‌ సహా శివారు (మేడ్చల్‌ జిల్లా)లో సుమారు 8,289.62 ఎకరాల ప్రభుత్వ భూములు వివిధ కోర్టు వివాదాల్లో మగ్గుతున్నాయి. వీటి విలువ రూ.35 వేల కోట్లకుపైగానే ఉంటుందని అంచనా. ఆయా కోర్టుల్లో భూ వివాదాలకు సంబంధించిన కేసుల సంఖ్య 789 ఉండగా.. అత్యధికంగా హైకోర్టులో 545 కేసులు ఉన్నాయి. వివిధ కోర్టుల్లో మొత్తం భూముల్లో హైదరాబాద్‌ జిల్లాకు సంబంధించి 831.62 ఎకరాలు. వీటిలో వివిధ కోర్టుల్లో 83 కేసులు నడుస్తున్నాయి. నగర శివారులోని మేడ్చల్‌ జిల్లాలో వివాదాలకు సంబంధించిన భూములు 7,458 ఎకరాలు ఉన్నాయి. వీటిలో వివిధ కోర్టుల్లో 706 కేసులు కొనసాగుతున్నాయి. వివాదాల్లో ఉన్న హైదరాబాద్‌ జిల్లా పరిధిలోని భూముల విలువ రూ. 9489.16 కోట్లకుపైనే ఉంటుందని అధికారులు చెబుతున్నారు. అలాగే శివారు (మేడ్చల్‌ జిల్లా)లో వివాదాస్పద భూములు 7,458 ఎకరాలకు సంబంధించి రూ.26 వేల కోట్లకుపైగా ఉంటుందని పేర్కొంటున్నారు. వివాదాస్పద భూములన్నీ అధికంగా పలువురు రాజకీయ నాయకులు, ఉన్నతాధికారులకు సంబంధించినవి ఉన్నట్లుగా భావిస్తున్నారు. భూవివాదాల సమాచారాన్ని రెవెన్యూ అధికారులు ప్రభుత్వానికి ఇటీవల నివేదిక సమర్పించారు. దీంతో భూవివాదాలకు సంబంధించిన కోర్టు కేసుల స్టేటస్‌పై ఉన్నతస్థాయి సమీక్ష నిర్వహించిన ప్రభుత్వం సత్వర పరిష్కరానికి చొరవ చూపాలని ఆదేశించినట్లు సమాచారం. కోట్లాది రూపాయల విలువైన ప్రభుత్వ భూములకు సంబంధించిన కేసులు పలు కోర్టుల్లో ఏళ్ల తరబడి నడుస్తుండటంతో ప్రజోపయోగ కార్యక్రమాలకు వినియోగించలేకపోతున్నామన్న అభిప్రాయాలు కూడా లేకపోలేదు. ఈ పరిస్థితుల్లో అధికారులు, ప్రభుత్వ న్యాయవాదులు సమన్వయంతో పని చేసి భూ వివాదాల పరిష్కారానికి అవసరమైన కార్యాచరణ రూపొందించుకోవాలని ఆదేశించింది. ఈ నేపథ్యంలో కోర్టు వివాదాల్లో ఉన్న ప్రభుత్వ భూముల జాబితా సిద్ధం చేసి కేసుల పరిష్కారానికి అధికార యంత్రాంగం సమాయత్తమవుతోంది.

సాక్షి, విశాఖపట్నం: విశాఖ నగర పరిసరాల్లో భూ ఆక్రమణలపై రెవెన్యూ అధికారుల స్పెషల్‌ డ్రైవ్‌ కొనసాగుతోంది. అయితే ఈ డ్రైవ్‌లో టీడీపీ నాయకులు, ప్రజా ప్రతినిధులు చేసిన భూకబ్జాలు, చేసిన అక్రమ నిర్మాణాలే ఎక్కువగా వెలుగు చూస్తున్నాయి. గతంలో ‘గీతం’, మాజీ మంత్రి గంటా శ్రీనివాసరావు బంధువుల ఆక్రమణలు బయటపడగా.. తాజాగా అనకాపల్లి మాజీ ఎమ్మెల్యే పీలా గోవింద సత్యనారాయణ సుమారు 60 ఎకరాల ప్రభుత్వ భూమిని ఆక్రమించినట్లు అధికారులు గుర్తించారు. అలాగే విశాఖ తూర్పు ఎమ్మెల్యే వెలగపూడి రామకృష్ణబాబు కూడా భూ కబ్జాకు పాల్పడి అక్రమ నిర్మాణం చేపట్టినట్లు నిర్ధారించి చర్యలు చేపట్టారు.  భీమన్నదొరపాలెంలో.. ఆనందపురం మండలంలోని భీమన్నదొరపాలెం పరిధి సర్వే నంబర్‌ 156లో పీలా ఆక్రమణలో ఉన్న సుమారు 60 ఎకరాల ప్రభుత్వ భూమిని ఆదివారం విశాఖ ఆర్డీవో పెంచల కిషోర్‌ నేతృత్వంలోని రెవెన్యూ అధికారులు స్వాధీనం చేసుకున్నారు. ఆ భూమిలో హెచ్చరిక బోర్డులను ఏర్పాటు చేశారు. ప్రస్తుత మార్కెట్‌ రేట్ల ప్రకారం ఆ భూమి విలువ రూ.300 కోట్ల వరకు ఉంటుందని అంచనా. కాగా ఆ భూమిని ఆనుకొని ఉన్న డీ పట్టా భూములను కొనుగోలు చేయడంతో పాటు మరో 100 ఎకరాల వరకు ఆక్రమించినట్టు స్థానికులు ఆరోపిస్తున్నారు. ఈమేరకు రెవిన్యూ అధికారులు పూర్తి స్థాయి విచారణ జరుపుతున్నారు.  డీ పట్టా భూములపై కన్ను పీలా గోవిందు తండ్రి మహాలక్ష్మి నాయుడు టీడీపీ నాయకుడే. ఆయన పెందుర్తి మండలాధ్యక్షుడిగా పనిచేసినప్పటి నుంచే భీమన్నదొరపాలెంలో డీ పట్టా భూములపై కన్నేశారు. నిబంధనలకు విరుద్ధంగా కొనుగోలు చేసిన ఆ భూములను సక్రమం చేసుకునేందుకు గోవిందు 2014 సంవత్సరంలో అనకాపల్లి ఎమ్మెల్యేగా గెలిచినప్పటి నుంచి ప్రయత్నాలు ప్రారంభించారు. విశాఖలో భూఆక్రమణలపై ప్రత్యేక దర్యాప్తు బృందం (సిట్‌) విచారణలోనూ ఈ అక్రమాలు బయటకు రాకుండా తొక్కిపెట్టారనే ఆరోపణలు ఉన్నాయి. ఇదిగాక ఆనందపురం మండలంలోనే రామవరం గ్రామంలో 99.89 ఎకరాల ప్రభుత్వ భూమి చేతులు మారిన వ్యవహారంలో గోవిందుతో పాటు మరో 11 మందిపై పోలీసులు గతంలో క్రిమినల్‌ కేసు నమోదు చేశారు.  బొత్స బంధువుల అక్రమ నిర్మాణం తొలగింపు రాష్ట్ర మున్సిపల్‌ శాఖ మంత్రి బొత్స సత్యనారాయణ బంధువులకు చెందిన రేకుల షెడ్డును ఆదివారం రెవెన్యూ అధికారులు తొలగించారు. విశాఖ శివారు రుషికొండ పరిధిలో సర్వే నంబర్‌ 19లో ఏడు సెంట్ల విస్తీర్ణంలో ఒక షెడ్డు, రెండు సెంట్ల విస్తీర్ణంలో మరొక రేకుల షెడ్డు గెడ్డ పోరంబోకు భూమిలో ఉన్నట్లు గుర్తించిన అధికారులు వాటిని కూల్చివేశారు. అయితే ఆ నిర్మాణాల్లో రెండు సెంట్ల విస్తీర్ణంలో ఉన్నది మాత్రమే తమ బంధువులకు చెందినదని మంత్రి బొత్స ఫోన్‌లో ‘సాక్షి’కి వివరించారు. విశాఖలో అక్రమ నిర్మాణాలు ఏవైనా తొలగించాలని, తన బంధువులదైనా ఉపేక్షించవద్దని తాను ఆదివారం స్వయంగా అధికారులకు స్పష్టమైన ఆదేశాలు ఇచ్చినట్లు తెలిపారు. వెలగపూడి కబ్జా పర్వం ఎమ్మెల్యే వెలగపూడి రుషికొండ ప్రధాన రహదారిని ఆనుకొనే కబ్జా పర్వం నడిపించారు. జీవీఎంసీ 8వ వార్డు పరిధిలో సర్వే నంబర్‌ 21లోని సుమారు రూ.2 కోట్ల విలువైన 6 సెంట్ల స్థలాన్ని గత టీడీపీ ప్రభుత్వ హయాంలో వెలగపూడి ఆక్రమించారు. అందులో రేకుల షెడ్డు, ప్రహరీ నిర్మించారు. రెవెన్యూ రికార్డుల ప్రకారం అది గెడ్డ పోరంబోకు స్థలంగా గుర్తించిన అధికారులు ఆదివారం ఉదయం ఆయా అక్రమ నిర్మాణాలను కూల్చివేశారు. అది ప్రభుత్వ స్థలమని హెచ్చరిక బోర్డును ఏర్పాటు చేశారు.  

సాక్షి, అమరావతి: శ్రీకాకుళం జిల్లా నుంచి నెల్లూరు వరకు సముద్ర తీరం వెంబడి పెద్దఎత్తున రిసార్ట్స్‌ నిర్మించేందుకు ప్రణాళిక సిద్ధం చేసినట్టు పర్యాటక శాఖ ప్రత్యేక ప్రధాన కార్యదర్శి రజత్‌ భార్గవ తెలిపారు. ఆదివారం ఆయన ‘సాక్షి’తో మాట్లాడుతూ.. రిసార్ట్స్‌ నిర్మాణానికి ప్రభుత్వ భూములను గుర్తించి నివేదిక ఇవ్వాల్సిందిగా ఆయా జిల్లాల కలెక్టర్లను కోరామన్నారు. పర్యాటక రంగానికి మన రాష్ట్రం పర్యాయ పదం కావాలనే లక్ష్యంతో ప్రభుత్వం ఉందని, విదేశీ పర్యాటకులను ఆకర్షించేందుకు చర్యలు తీసుకుంటున్నామని చెప్పారు. కొత్త టూరిజం పాలసీ రూపొందించాలని సీఎం వైఎస్‌ జగన్‌మోహన్‌రెడ్డి ఆదేశించారన్నారు. పర్యాటక రంగానికి సంబంధించి ఇప్పటివరకు ఎలాంటి నియంత్రణ లేదని,  అందువల్ల ఈ రంగంలో ఉన్న టూర్‌ ఆపరేటర్లు, హోటళ్లు, వాటిలో అందుబాటులో ఉన్న గదులు, టూరిజం అడ్వెంచర్‌కు సంబంధించిన ప్రదేశాలు, సదుపాయాలు వంటివన్నీ రిజిస్ట్రేషన్‌ చేస్తున్నామని వివరించారు. 12 ప్రాంతాల్లో స్టార్‌ సదుపాయాలతో కూడిన రిసార్టులు, హోటళ్లు అభివృద్ధి చేస్తున్నామని, వాటర్‌ టూరిజం, ఎకో టూరిజం, బీచ్‌ టూరిజం, టెంపుల్‌ టూరిజంపై ప్రత్యేక దృష్టి సారించామని పేర్కొన్నారు. తెలుగు వంటకాలకు గుర్తింపు కోసం ఫుడ్‌ ఫెస్టివల్‌ తెలుగు వంటకాలకు అంతర్జాతీయంగా గుర్తింపు తెచ్చేందుకు ఫుడ్‌ ఫెస్టివల్‌ నిర్వహించనున్నామని, శాఖాహార, మాంసాహార వంటకాలను ప్రజలకు పరిచయం చేస్తామని చెప్పారు. పర్యాటకుల భద్రత కోసం ప్రభుత్వం తొలిసారిగా రాష్ట్రంలో 9 కంట్రోల్‌ రూమ్స్‌ను అందుబాటులోకి తీసుకొచ్చిందని చెప్పారు. 

సాక్షి, విశాఖపట్నం: విశాఖపట్నంలో తెలుగుదేశం ప్రభుత్వ హయాంలో కబ్జాదారుల కబంధ హస్తాల్లోకి వెళ్లిపోయిన ప్రభుత్వ భూముల్ని అధికారులు ఒక్కొక్కటిగా స్వాధీనం చేసుకుంటున్నారు. నగర శివారు ప్రాంతాల్లో భారీ స్థాయి ఆక్రమణల్ని గుర్తించిన జిల్లా రెవిన్యూ యంత్రాంగం.. ఆ భూముల్లో వెలసిన అక్రమ నిర్మాణాల్ని తొలగించింది. ఏకంగా 66.5 ఎకరాల ఆక్రమిత భూముల్ని స్వాధీనం చేసుకుంది. మరోవైపు లీజు గడువు ముగిసినా ఖాళీ చేయకుండా ప్రభుత్వ స్థలాల్లో తిష్టవేసిన వారిపైనా అధికారులు చర్యలు చేపట్టారు. గంటా బంధువు చెరలోని భూమి స్వాధీనం టీడీపీ ఎమ్మెల్యే గంటా శ్రీనివాసరావు తోడల్లుడు.. ప్రత్యూష అసోసియేట్స్‌ ప్రతినిధి, జనసేన నాయకుడు పరుచూరి భాస్కర్‌రావు ఆక్రమణలో ఉన్న భూముల్ని ఆర్డీవో పెంచల్‌ కిషోర్‌ నేతృత్వంలో అధికారులు శనివారం స్వాధీనం చేసుకున్నారు. విశాఖ రూరల్‌ మండలం అడవివరం – శొంఠ్యాం రోడ్డులో ఉన్న విజయరామపురం అగ్రహారం గ్రామంలో టైటిల్‌ డీడ్‌ నం.1180లో మొత్తం 124 ఎకరాల భూమి ఉంది. ఇందులో 64 ఎకరాలు ఆక్రమణకు గురైనట్లు అధికారులు గుర్తించారు. ఇందులో 4.86 ఎకరాలు పరుచూరి భాస్కర్‌రావుకు చెందినవని తేలింది. ఈ భూమి సహా ఇతర ఆక్రమణదారుల చేతుల్లో ఉన్న మొత్తం 64 ఎకరాల్ని స్వాధీనం చేసుకున్నారు. ఆక్రమిత భూముల్లో ఉన్న రక్షణ గోడలు, షెడ్లు, గేట్లు కూల్చి వేసి హెచ్చరిక బోర్డులు ఏర్పాటు చేశారు.  మార్కెట్‌ ధర ప్రకారం ఈ భూముల మొత్తం విలువ సుమారు రూ.256 కోట్లు పైమాటేనని అధికారులు అంచనా వేస్తున్నారు.  ఫ్యూజన్‌ ఫుడ్స్‌ హోటల్‌ని సీజ్‌ చేస్తున్న వీఎంఆర్‌డీఏ అధికారులు  ప్రైవేట్‌ స్కూల్‌ యాజమాన్యం ఆధీనంలో... ఆనందపురం మండలంలోని వేములవలస, ఆనందపురం గ్రామాల సరిహద్దులో ప్రభుత్వ భూముల్లోని కొంత జిరాయితీ భూమిని విశ్వనాథ ఎడ్యుకేషనల్‌ సంస్థ 20 ఏళ్ల క్రితం కొనుగోలు చేసి ఢిల్లీ పబ్లిక్‌ స్కూల్‌ని ఏర్పాటు చేసింది. ఆ స్కూల్‌ని ఆనుకొని ఉన్న ఆనందపురం సర్వే నంబరు 283–3 లోని 1.68 ఎకరాల గయాళు భూమిని, వేములవలస సర్వే నంబరు 123 లో 34 సెంట్లు, 122–1, 122–2, 122–3లలో 76 సెంట్లు వాగు పోరంబోకుని సంబంధిత యాజమాన్యం కబ్జా చేసి ఎలాంటి అనుమతులు లేకుండా క్రీడా ప్రాంగణంతో పాటు ఇతర నిర్మాణాలు చేపట్టింది.. శనివారం ఈ నిర్మాణాల ప్రహరీ గోడలు కూల్చివేసిన రెవెన్యూ అధికారులు ప్రభుత్వ భూమిని స్వాధీనం చేసుకొని, హద్దులు నిర్ణయించి హెచ్చరిక బోర్డులు ఏర్పాటు చేశారు. ఈ స్థలం మార్కెట్‌ విలువ సుమారు రూ.15 కోట్లు ఉంటుందని అంచనా వేస్తున్నారు. నిబంధనలకు విరుద్ధంగా సబ్‌లీజ్‌కు..  లీజు గడువు ముగిసినా ఖాళీ చెయ్యకుండా నిబంధనలకు విరుద్ధంగా నడుపుతున్న  సిరిపురంలోని ఫ్యూజన్‌ çఫుడ్స్‌ అండ్‌ రెస్టారెంట్‌ను విశాఖ మహా నగర ప్రాంత అభివృద్ధి సంస్ధ (వీఎంఆర్‌డిఏ) ఆదివారం ఉదయం స్వాధీనం చేసుకుంది. టీడీపీ నాయకుడు, ఆ పార్టీ అధినేత చంద్రబాబునాయుడుకు అత్యంత సన్నిహితుడిగా పేరొందిన టి.హర్షవర్ధన్‌ ప్రసాద్‌.. గత టీడీపీ ప్రభుత్వ హయాంలో నామినేషన్‌ పద్ధతిలో వీఎంఆర్‌డీఏ కి చెందిన 10,842 చదరపు అడుగుల స్ధలాన్ని లీజుకు తీసుకున్నారు. 2015లో ఏటా రూ.33 వేల చొప్పున చెల్లించేలా ఫ్యూజన్‌ ఫుడ్స్‌ పేరుతో తొమ్మిదేళ్ల లీజుకు తీసుకున్నారు. మున్సిపల్‌ అడ్మినిస్ట్రేషన్‌ జీవో నం.56 ప్రకారం మూడేళ్లు మాత్రమే లీజుకి ఇవ్వాల్సి ఉండగా.. అప్పటి వుడా అధికారులు టీడీపీ ప్రభుత్వ ఒత్తిడితో ఏకంగా తొమ్మిదేళ్లకు రాసిచ్చేశారు. ఇదిలావుండగా ఈ స్థలాన్ని నిబంధనలకు విరుద్ధంగా శ్రీ కన్య కంఫర్ట్స్‌ అనే సంస్థకు సబ్‌ లీజుకు ఇచ్చేశారు. మరోవైపు నిబంధనలకు విరుద్ధంగా ఇచ్చిన లీజు కారణంగా వీఎంఆర్‌డీఏకి ప్రతి నెలా లక్షల రూపాయల నష్టం వాటిల్లుతోందని భావించిన కమిషనర్‌ పి.కోటేశ్వరరావు చర్యలకు ఆదేశించారు. ఆదివారం ఉదయం వీఎంఆర్‌డీఏ కార్యదర్శి గణేష్‌కుమార్‌ ఆధ్వర్యంలో అధికారులు హోటల్‌ను సీజ్‌ చేశారు. ఆక్రమణలపై చర్యలు కొనసాగిస్తాం ప్రభుత్వ భూముల్లో ఆక్రమణలు గుర్తిస్తున్నాం. సర్వే నంబర్లు, పాత రికార్డుల ఆధారంగా క్షేత్రస్థాయిలో భూముల పరిస్థితిని పరిశీలిస్తున్నాం. ఎక్కడ ఆక్రమణలుంటే అక్కడ భూములు స్వాధీనం చేసుకునేందుకు, ఆక్రమణలు తొలగించేందుకు చర్యలు తీసుకుంటున్నారు. ప్రభుత్వ భూములు కాపాడేందుకు దీనిని ప్రత్యేక డ్రైవ్‌లా ఇకముందు కూడా కొనసాగిస్తాం.  –– ఆర్‌డీవో పెంచల్‌ కిశోర్‌

సాక్షి, విశాఖపట్నం : విశాఖలో భారీ ఎత్తున ప్రభుత్వ భూమిని రెవెన్యూ అధికారులు ఆక్రమణదారుల నుంచి స్వాధీనం చేసుకున్నారు. అడవివరం నుంచి శోత్యాం వెళ్లే మార్గంలో రామ అగ్రహారం వద్ద దాదాపు 110 ఎకరాల భూమి చుట్టూ ప్రహరీ గోడ నిర్మించి మొక్కలను పెంచుతున్నారు. ఇందులో పది ఎకరాల భూమిని మినహాయిస్తే మిగతా భూమి అంతా ప్రభుత్వానిది. టీడీపీ హయాంలో కొందరు బడా బాబులు ఈ భూమిని ఆక్రమించుకుని అనుభవిస్తున్నట్లు ఫిర్యాదులు ఉన్నాయి. ఈ దశలో రెవెన్యూ అధికారులు శనివారం ఉదయం ఆ ప్రాంతానికి వెళ్లి ప్రహరీ గోడను తొలగించి భూమిని స్వాధీనం చేసుకున్నారు. దాదాపు 70 ఎకరాల ఖరీదైన భూమిని ప్రభుత్వం స్వాధీనం చేసుకోవడం పట్ల ఆ ప్రాంతవాసులు హర్షం వ్యక్తం చేస్తున్నారు. (టీడీపీ అండతో ఇదీ ‘గీతం’ బాగోతం)

సాక్షి, ముంబై: దేశ ఆర్థిక నగరం ముంబైతోపాటు ఉప నగరాలలో, శివారు ప్రాంతాల్లో ఉన్న స్థలాలు, ఇతర ఆస్తులు ఆక్రమణకు గురికాకుండా ప్రైవేటు భద్రతా సిబ్బందిని నియమించాలని ముంబై మెట్రోపాలిటన్‌ రీజియన్‌ డెవలప్‌మెంట్‌ అథారిటీ (ఎమ్మెమ్మార్డీయే) నిర్ణయం తీసుకుంది. మూడు సంవత్సరాల కాలవ్యవధి కోసం సంబంధిత కంపెనీకి కాంట్రాక్టు ఇవ్వనుంది. సుమారు 400పైగా సెక్క్యురిటీ గార్డులతో కూడిన బృందాన్ని రంగంలోకి దించనుంది. అందుకు ఎమ్మెమ్మార్డీయే సుమారు రూ.40 కోట్లు ఖర్చు చేయనుందని అథారిటీ వర్గాలు తెలిపాయి.   (మహారాష్ట్రలో జైళ్లు ఫుల్‌) 4,350 చదరపు కిలోమీటర్లు..  ఎమ్మెమ్మార్డీయే పరిధి సుమారు 4,350 చదరపు కిలోమీటర్ల మేర విస్తరించి ఉంది. అందులో ముంబై, థానే, నవీముంబై, కల్యాణ్‌–డోంబివలి, ఉల్లాస్‌నగర్, మీరా–భాయందర్, భివండీ, వసయి–విరార్‌ తదితర కార్పొరేషన్లు ఉన్నాయి. అలాగే అంబర్‌నాథ్, బద్లాపూర్, మాథేరాన్, కర్జత్, ఖోపోలి, పన్వేల్, పేణ్, ఉరణ్, అలీబాగ్‌ తదితర మున్సిపాలిటీలు, వీటి పరిధిలోని కొన్ని గ్రామాలున్నాయి. ముంబైలో బాంద్రా–కుర్లా–కాంప్లెక్స్‌ (బీకేసీ), వడాల, ఓషివరా, గోరాయి తదితర ప్రాంతాల్లో కొన్ని వందల కోట్ల రూపాయలు విలువచేసే సొంత స్థలాలున్నాయి. వీటిపై నియంత్రణ లేకపోవడంవల్ల ఈ స్థలాలన్నీ ఆక్రమణకు గురవుతున్నాయి. పట్టించుకునే నాథుడే లేక రోజురోజుకు అక్రమణ పెరిగిపోతూనే ఉంది. అందుకు ప్రధాన కారణం ట్రాఫిక్‌ వ్యవస్థపై ఎమ్మెమ్మార్డీయే ప్రధానంగా దృష్టి కేంద్రీకరించడమే. నగరంతోపాటు ఉప నగరాలు, శివారు ప్రాంతాల్లో అనేక అభివృద్ధి పనులు జరుగుతున్నాయి. అందులో ముఖ్యంగా అక్కడక్కడ ఫ్లై ఓవర్లు, మెట్రో–2, 3, 4, 5 ప్రాజెక్టులున్నాయి. అథారిటీ అధికారులెవరు సొంత స్థలాలపై దృష్టి సారించడం లేదు. దీంతో ఈ పరిస్థితి తలెత్తిందని అధికారులు అంటున్నారు. అక్రమణలను తొలగించాలంటే ఎమ్మెమ్మార్డీయే చాలా ఇబ్బందులు ఎదుర్కోవల్సి వస్తోంది. తమ స్థలాలు సొంతం చేసుకునేందుకు బలవంతంగా అక్రమణలు తొలగిస్తే కోర్టులు, స్టే ఆర్డర్లు, పోలీసు స్టేషన్‌లో ఫిర్యాదులు, బాధితుల నుంచి దాడులు, ఆందోళనలు, రాస్తారోకోలు ఇలా అనేక సమస్యలు ఎదుర్కోవల్సి వస్తుంది. అంతేగాకుండా అక్రమణల కారణంగా ఈ ప్రాంతాల్లో అభివృద్ధి పనులు చేపట్టలేకపోతోంది. ఆలస్యంగానైన కళ్లు తెరిచిన అథారిటీ ప్రైవేటు భద్రతా సిబ్బందిని నియమించి కనీసం మిగిలిన స్థలాలను కాపాడుకోవాలనే ప్రయత్నం చేస్తోంది.  చదవండి: ముంబైలో బైడెన్‌ బంధువులు..!

సాక్షి, అమరావతి: విశాఖపట్నం గీతం విద్యాసంస్థలు దాఖలు చేసిన అప్పీల్‌పై విచారణ జరపడానికి హైకోర్టు ధర్మాసనం నిరాకరించింది. ప్రభుత్వ భూముల్లో తాము చేపట్టిన నిర్మాణాల నుంచి తమను ఖాళీ చేయించకుండా ప్రభుత్వాన్ని ఆదేశించాలన్న గీతం అభ్యర్థనను తోసిపుచ్చింది. అలాంటి ఉత్తర్వులు జారీచేయడం సాధ్యం కాదని తేల్చిచెప్పింది. సింగిల్‌ జడ్జి ఇచ్చిన ఉత్తర్వులు సబబుగానే ఉన్నాయని, అందులో ఏ రకంగానూ తాము జోక్యం చేసుకోబోమని స్పష్టం చేసింది. తదుపరి కట్టడాలు, కూల్చివేతలు వద్దంటూ సింగిల్‌ జడ్జి ఇచ్చిన ఉత్తర్వులు గీతం ప్రయోజనాలను కాపాడేలా ఉన్నాయని, అలాంటప్పుడు ఆ ఉత్తర్వులు ఎలా తప్పవుతాయని ప్రశ్నించింది. తదుపరి ఏం ఉత్తర్వులు కావాలన్నా సింగిల్‌ జడ్జి వద్దకే వెళ్లాలని గీతం యాజమాన్యానికి స్పష్టం చేసింది. గీతం దాఖలు చేసిన పిటిషన్‌ను పరిష్కరిస్తూ జస్టిస్‌ రాకేశ్‌ కుమార్, జస్టిస్‌ జె.ఉమాదేవిలతో కూడిన ధర్మాసనం మంగళవారం ఉత్తర్వులు జారీచేసింది. విశాఖ, రిషికొండ, యందాడ గ్రామాల పరిధిలోని ప్రభుత్వ భూమిని పెద్దమొత్తంలో ఆక్రమించిన గీతం యాజమాన్యం పలు నిర్మాణాలు చేపట్టింది. కొన్నింటిని రెవెన్యూ అధికారులు కూల్చివేశారు. దీనిపై గీతం హైకోర్టులో పిటిషన్‌ దాఖలు చేసింది. విచారణ జరిపిన సింగిల్‌ జడ్జి.. తదుపరి ఎలాంటి కూల్చివేతలు చేపట్టవద్దని రెవెన్యూ అధికారులను, కూల్చివేసినచోట ఎలాంటి నిర్మాణాలు చేపట్టవద్దని గీతం యాజమాన్యాన్ని ఆదేశించారు. ఈ ఆదేశాలపై గీతం యాజమాన్యం అప్పీల్‌ దాఖలు చేసింది. ఈ అప్పీల్‌పై మంగళవారం జస్టిస్‌ రాకేశ్‌ కుమార్‌ నేతృత్వంలోని ధర్మాసనం విచారణ జరిపింది.  మీకు అనుకూలంగా ఇచ్చినా అభ్యంతరమా?: గీతం తరఫు న్యాయవాది సీవీఆర్‌ రుద్రప్రసాద్‌ వాదనలు వినిపిస్తూ పెద్దసంఖ్యలో పోలీసులు వచ్చి తమ నిర్మాణాలను కూల్చేశారని తెలిపారు. ధర్మాసనం స్పందిస్తూ.. సింగిల్‌ జడ్జి మీకు అనుకూలంగా ఉత్తర్వులిచ్చారు కదా, మీకు అభ్యంతరం ఏముంది అని ప్రశ్నించింది. సింగిల్‌ జడ్జి కేవలం తదుపరి కూల్చివేతలు వద్దని మాత్రమే ఉత్తర్వులు ఇచ్చారని రుద్రప్రసాద్‌ చెప్పగా, అంతకు మించిన సానుకూల ఉత్తర్వులు ఏం ఇవ్వగలమని మళ్లీ ప్రశ్నించింది. తమ నిర్మాణాల నుంచి తమను ఖాళీచేయించేందుకు ప్రయత్నిస్తూ థర్డ్‌ పార్టీ హక్కులు సృష్టించేందుకు యత్నిస్తున్నారని, ఆ దిశగా చర్యలు తీసుకోకుండా అధికారులను నియంత్రిస్తూ ఆదేశాలివ్వాలని రుద్రప్రసాద్‌ కోరారు. ధర్మాసనం అందుకు నిరాకరించింది. తాము అలాంటి ఆదేశాలు ఇవ్వబోమని తేల్చి చెప్పింది. తదుపరి ఏం ఆదేశాలు కావాలన్నా సింగిల్‌ జడ్జి వద్దకే వెళ్లి తేల్చుకోవాలని స్పష్టం చేసింది. ఒకవేళ అప్పీల్‌పై విచారణ జరపాలంటే సింగిల్‌ జడ్జి వద్ద ఉన్న రిట్‌ పిటిషన్‌ను కొట్టేయించుకురావాలని తెలిపింది. సింగిల్‌ జడ్జి మంచి ఉత్తర్వులిస్తే, దానిపై అభ్యంతరం చెబుతూ అప్పీల్‌ దాఖలు చేయడం ఏమిటని నిలదీసింది. తాము ఈ అప్పీల్‌ను విచారించబోమని తెలిపింది. ప్రభుత్వం తరఫున ఏఏజీ పొన్నవోలు సుధాకర్‌రెడ్డి స్పందిస్తూ ప్రభుత్వ భూమిలో కట్టిన అక్రమ కట్టడాలనే కూల్చివేశామని చెప్పారు. తమ భూమిని తాము స్వాధీనం చేసుకోవడాన్ని గీతం తప్పుపడుతోందని ఆయన ధర్మాసనం దృష్టికి తీసుకెళ్లారు.  

సాక్షి , విశాఖపట్నం/కొమ్మాది:  గీతం విద్యా సంస్థల అక్రమాలపై విశాఖ జిల్లా రెవిన్యూ యంత్రాంగం ఉక్కుపాదం మోపింది. గత టీడీపీ ప్రభుత్వం అండతో అడ్డగోలుగా ఎండాడ, రుషికొండ పరిసర ప్రాంతాల భూముల్ని ఆక్రమించుకున్న ‘గీతం’కు చెక్‌ పెట్టడానికి అధికారులు శ్రీకారం చుట్టారు. భూముల్ని ఆక్రమించి గీతం విశ్వవిద్యాలయం నిర్మించిన రక్షణ గోడ, గ్రావెల్‌ బండ్, గార్డెనింగ్‌ తదితర అక్రమ నిర్మాణాల్ని శనివారం రెవిన్యూ అధికారులు తొలగించారు. ఆర్‌డీవో పెంచల్‌ కిశోర్, నార్త్‌ ఏసీపీ రవిశంకర్‌ రెడ్డి, రెవిన్యూ సిబ్బంది, పోలీసులు గీతం క్యాంపస్‌కు తెల్లవారుజామున 4 గంటలకు చేరుకుని ఉదయం 11.30 వరకు ఈ కార్యక్రమాన్ని కొనసాగించారు. 40.51 ఎకరాలు ఆక్రమణకు గురైనట్లు గుర్తించి, అందులో 38.53 ఎకరాలు స్వాధీనం చేసుకున్నారు. ఇందులో ఎండాడ పరిసరాల్లో సర్వే నంబర్‌ 15, 16, 17, 18, 19, 20, 55, 61లోని 18.53 ఎకరాలు, రుషికొండలో సర్వే నంబర్‌ 34, 35, 37, 38లో 20 ఎకరాల భూమి ఉంది. కోర్టు కేసుల పరిధిలో ఉన్నవి మినహా మిగిలిన భూముల్లోని అక్రమ నిర్మాణాల్ని కూలగొట్టారు. స్వాధీనం చేసుకున్న భూముల్లో ప్రభుత్వ భూములుగా బోర్డులు పెట్టారు.   టీడీపీ అండతో ఇదీ ‘గీతం’ బాగోతం ► రుషికొండ, ఎండాడలో సర్వే నంబర్‌ 17/1, 5, 17/7 నుంచి 28 వరకు 71.15 ఎకరాలను భూమిలేని నిరుపేదలకు ఇచ్చారు. గీతం విద్యా సంస్థను ఏర్పాటు చేసేందుకు ఈ భూములు ఇవ్వాలని 1981లో అప్పటి ప్రభుత్వాన్ని గీతం యజమాని, టీడీపీ నేత, బాలకృష్ణ వియ్యంకుడు దివంగత ఎంవీఎస్‌ మూర్తి కోరారు. ► ఈ భూములపై కోర్టులో కేసులు పెండింగ్‌లో ఉండడంతో ఆ«ధీన పత్రాలు దక్కించుకునే వరకు ఎలాంటి నిర్మాణాలు చేపట్టకూడదని నిబంధన విధిస్తూ ఆ స్థలాన్ని విద్యా సంస్థకు అప్పగించింది. ఆ తర్వాత ఈ సంస్థ కోర్టుకు వెళ్లి తమకు అనుకూలంగా తీర్పు తెచ్చుకుంది.   ► గీతం సంస్థ నిబంధనలకు విరుద్ధంగా 14 ఎకరాల్లో మాత్రమే శాశ్వత నిర్మాణాలు చేపట్టి, మిగిలిన 57.15 ఎకరాల్ని 15 ఏళ్లుగా ఖాళీగా ఉంచింది. 1996లో అప్పటి జాయింట్‌ కలెక్టర్‌ ఈ విషయాన్ని ప్రభుత్వానికి నివేదించారు. ► 1998 జూన్‌ 12న అప్పటి టీడీపీ ప్రభుత్వం కేవలం రూ.34,94,200 మాత్రమే ప్రభుత్వానికి చెల్లించేలా చక్రం తిప్పి.. కారుచౌకగా ఆ భూముల్లో 49 ఎకరాలను గీతంకు అడ్డగోలుగా కట్టబెట్టేసింది. మిగిలిన 8.15 ఎకరాల భూమి కూడా ప్రస్తుతం ‘గీతం’ ఆధీనంలోనే ఉంది.   పక్కనున్న 40 ఎకరాలపై కన్ను ► 71.15 ఎకరాలను తన చేతుల్లో ఉంచుకున్నది చాలక, పక్కనే ఉన్న 40.51 ఎకరాల ప్రభుత్వ భూమిపై ‘గీతం’ కన్ను పడింది. క్రమక్రమంగా ఆక్రమణల పర్వానికి తెరతీసింది.  ► అధికారులు ఆక్రమణలను గుర్తించిన ప్రతిసారీ.. కోర్టుకు వెళ్లి రిట్‌ పిటిషన్‌ దాఖలు చేయడం గీతం యాజమాన్యానికి పరిపాటిగా మారింది.  ► సర్వే నంబర్‌ 15, 37, 38(పీ), 15(పీ)లోని 35 ఎకరాల భూమిని ప్రభుత్వం వీఎంఆర్‌డీఏ, ఇగ్నో, సోషల్‌ వెల్ఫేర్, ఐటీడీఏ, స్టేట్‌ హౌసింగ్‌ కార్పొరేషన్, ఆదాయపు పన్ను శాఖ తదితర ప్రభుత్వ సంస్థల కార్యాలయాల కోసం కేటాయిస్తూ 2014 ఫిబ్రవరి 26న సీసీఎల్‌ఏ ఉత్తర్వులు జారీ చేసింది. గీతం సంస్థ దీనిపై కూడా కోర్టుకు వెళ్లింది.  ► మార్కెట్‌ ధర ప్రకారం ఈ భూమిని కొనుగోలు చేయొచ్చని ప్రభుత్వం సూచించినా, గీతం యాజమాన్యం స్పందించలేదు. దీంతో అధికారులు రంగంలోకి దిగి ఆ భూములను స్వాధీనం చేసుకోవాల్సి వచ్చింది.  ఐదు నెలల క్రితమే నోటీసులు గీతం క్యాంపస్‌ పరిధిలో 40.51 ఎకరాలు ఆక్రమణలకు గురైనట్లు గుర్తించాం. వారు బదలాయింపు కోసం దరఖాస్తు చేసుకున్నా, ప్రభుత్వం ఆమోదించ లేదు. ఖాళీగా ఉన్న స్థలాల్ని ముందుగా స్వాధీనం చేసుకున్నాం. 5 నెలల క్రితమే ఆక్రమణలపై యాజమాన్యం సమక్షంలో సర్వే నిర్వహించి, మార్కింగ్‌ చేసి, నోటీసులిచ్చాం. ఆక్రమించిన భూముల్లో శాశ్వత భవనాలు కూడా ఉన్నాయి. వీటికి కూడా మార్కింగ్‌ చేశాం. త్వరలో ఆ ప్రాంతాల్నీ స్వాధీనం చేసుకుంటాం.       – పెంచల్‌ కిశోర్, ఆర్‌డీవో  

వరికుంటపాడు: ఐదు సంవత్సరాలపాటు అధికారం చేతిలో ఉందని టీడీపీ నాయకులు యథేచ్ఛగా ప్రభుత్వ భూములు కబ్జా చేశారు. ఇష్టారీతిగా ప్రవర్తించారు. రూ.కోట్ల విలువైన భూమిని ఆక్రమించి సాగుకు అనువుగా తీర్చిదిద్దారు. కొందరు నాయకులు ఇంకా అదే పంథాను కొనసాగిస్తున్నారు. వరికుంటపాడు మండలంలో కబ్జాపర్వం కొనసాగుతోంది  ♦మండలంలోని బొంగరాలపాడులోని సర్వే నంబర్‌ 45లో 1,250 ఎకరాల ప్రభుత్వ భూమి ఉంది.   ♦ఇందులో కొంత భూమిపై కోర్టులో వ్యాజ్యాలు నడుస్తున్నాయి.   ♦మరికొంత భూమి ఖాళీగా ఉంది. వాటిని తమకు పంపిణీ చేయాలని 20 ఏళ్లపాటు మండలంలోని తూర్పురొంపిదొడ్ల గ్రామానికి చెందిన ఎస్టీ, ఎస్సీలతోపాటు ఇతర కులాలకు చెందిన పేదలు అధికారులకు అర్జీలిచ్చినా పట్టించుకోలేదు.   ♦2009లో సదరు భూములను పేదలకు పంపిణీ చేయాలని అప్పటి ఎమ్మెల్యే మేకపాటి చంద్రశేఖర్‌రెడ్డి నిర్ణయించారు.   ♦అర్హుల జాబితాను రూపొందించాలని అధికారులను కోరారు. ఆ తర్వాత పలు పరిణామాలతో ఈ ప్రక్రియ ముందుకు సాగలేదు.  ♦2010 సంవత్సరంలో అసైన్‌మెంట్‌ కమిటీలో ఈ భూమి పేదలకు పంపిణీ చేయాలని చంద్రశేఖర్‌రెడ్డి పట్టుబట్టినా, ఆనాటి రాజకీయ పరిస్థితుల నేపథ్యంలో వీలు కాలేదు.   ♦2014 సంవత్సరంలో టీడీపీ ప్రభుత్వం అధికారంలోకి వచ్చిన తర్వాత పేదలకు భూ పంపిణీ ఆగిపోయింది.   ♦గత ప్రభుత్వ హయాంలోనే కొంతమేర భూమి ఆక్రమణకు గురైంది. ఇటీవలి కాలంలో మరింత ఆక్రమించారు.  ♦ఆక్రమిత భూముల విలువ రూ.80 కోట్ల ఉంటుందని అంచనా.  తాజాగా..  ♦కొండాపురం మండలం కోవివారిపల్లికి చెందిన కొందరు వ్యక్తులు సుమారు 200 ఎకరాల ప్రభుత్వ భూమిని ఆక్రమించి పిచ్చిమొక్కలు, పొదలు తొలగించారు.   ♦దీంతో తూర్పురొంపిదొడ్ల గ్రామస్తులు నెలరోజుల క్రితం వరికుంటపాడు రెవెన్యూ అధికారులకు ఫిర్యాదు చేశారు.   ♦వారు ప్రభుత్వ భూమిలోకి ఎవరూ ప్రవేశించకూడదని హెచ్చరిక బోర్డులు ఏర్పాటు చేశారు.   ♦అయినా లెక్క చేయకుండా ట్రాక్టర్ల ద్వారా భూమిని దుక్కి చేశారు.  ♦ఆక్రమణదారులు మినుము సాగు చేసేందుకు సిద్ధం అవుతున్నారని తూర్పురొంపిదొడ్ల గ్రామస్తులు ఆవేదన వ్యక్తం చేస్తున్నారు. కఠిన చర్యలు తీసుకుంటాం  బొంగరాలపాడులోని ప్రభుత్వ భూమిని కొందరు వ్యక్తులు ఆక్రమించి రాత్రి వేళల్లో ట్రాక్టర్ల ద్వారా దుక్కులు దున్నుతున్నట్లు తెలిసింది. ఈ భూమిలో ఎలాంటి కార్యకలాపాలు చేపట్టినా చట్టప్రకారం చర్యలు తీసుకుంటాం. హెచ్చరికలను ఉల్లంఘిస్తే క్రిమినల్‌ కేసులు నమోదు చేస్తాం. –  చొప్పా రవీంద్రబాబు, తహసీల్దార్, వరికుంటపాడు 

సాక్షి, అమరావతి: రాష్ట్రంలో సంక్షేమ పథకాల అమలు కోసం అవసరమైన నిధులను సమీకరించే నిమిత్తం ప్రభుత్వ భూములను విక్రయించేందుకు ఈనెల 28న జరగనున్న తొలిదశ ఆన్‌లైన్‌ వేలం ప్రక్రియను నిలుపుదల చేసేందుకు హైకోర్టు నిరాకరించింది. ఈ వ్యవహారంలో ఈ దశలో ఎటువంటి ఉత్తర్వులు జారీచేయడం సాధ్యంకాదని తేల్చిచెప్పింది. అయితే, ఈ భూముల విక్రయాలు మాత్రం ఈ వ్యాజ్యంలో తాము వెలువరించే తుది తీర్పునకు లోబడి ఉంటాయని హైకోర్టు స్పష్టంచేసింది. ఈ మొత్తం వ్యవహారంలో పూర్తి వివరాలతో కౌంటర్‌ దాఖలు చేయాలని ప్రభుత్వాన్ని ఆదేశించింది. తదుపరి విచారణను ఈ నెల 28కి వాయిదా వేసింది. ఈ మేరకు న్యాయమూర్తులు జస్టిస్‌ రాకేష్‌కుమార్, జస్టిస్‌ కంచిరెడ్డి సురేష్‌రెడ్డిలతో కూడిన ధర్మాసనం మంగళవారం ఉత్తర్వులు జారీచేసింది. ప్రభుత్వం తలపెట్టిన భూముల విక్రయాన్ని అడ్డుకోవాలని కోరుతూ సామాజిక కార్యకర్త సురేష్‌బాబు హైకోర్టులో ప్రజా ప్రయోజన వ్యాజ్యం (పిల్‌) దాఖలు చేసిన విషయం తెలిసిందే. ఈ వ్యాజ్యంపై మంగళవారం జస్టిస్‌ రాకేష్‌కుమార్, జస్టిస్‌ సురేష్‌ రెడ్డిలతో కూడిన ధర్మాసనం విచారణ జరిపింది.   రాజకీయ ముసుగులో ‘పిల్‌’లు  ఈ సందర్భంగా ప్రభుత్వం తరఫున అదనపు అడ్వొకేట్‌ జనరల్‌ (ఏఏజీ) పొన్నవోలు సుధాకర్‌రెడ్డి వాదనలు వినిపిస్తూ.. అణగారిన వర్గాలు, కోర్టులను ఆశ్రయించలేని పేదలు, తదితరుల కోసం ఉద్దేశించిన ప్రజాప్రయోజన వ్యాజ్యం (పిల్‌) నేడు తీవ్రస్థాయిలో దుర్వినియోగమవుతోందని వివరించారు. రాజకీయ, వ్యక్తిగత ప్రయోజనాల ముసుగులో ‘పిల్‌’లు దాఖలు చేయడం ఇటీవల కాలంలో ఎక్కువైపోయిందన్నారు. ఇప్పుడు ప్రభుత్వ భూముల విక్రయాన్ని అడ్డుకోవాలంటూ దాఖలు చేసిన ఈ వ్యాజ్యం కూడా రాజకీయ ప్రయోజనాలను ఆశించే దాఖలు చేశారని వివరించారు. పిల్‌ను దుర్వినియోగం చేయడమంటే, అది న్యాయ ప్రక్రియను దుర్వినియోగం చేయడమేనన్నారు.   భూములమ్మే అధికారం ప్రభుత్వానికి ఉంది  ప్రభుత్వ భూములను విక్రయించడం ఇదేమీ మొదటిసారి కాదని, గత ప్రభుత్వాలు కూడా విక్రయించాయని ధర్మాసనం దృష్టికి పొన్నవోలు తీసుకొచ్చారు. ప్రభుత్వ భూములను విక్రయించే అధికారం ప్రభుత్వానికి ఉందని..  విక్రయించరాదని ఎక్కడా నిషేధం లేదన్నారు. ధర్మాసనం జోక్యం చేసుకుంటూ, లాక్‌డౌన్‌ సమయంలో ఏ రకమైన వేలం ప్రక్రియలు చేపట్టరాదని హైకోర్టు గతంలోనే ఆదేశాలిచ్చింది కదా అని గుర్తుచేసింది. వేలం విషయంలో ప్రభుత్వాన్ని నియంత్రించలేదని సుధాకర్‌రెడ్డి తెలిపారు.    అయినా.. పేద రాష్ట్రంగానే ఎందుకుంది?  అందరి వాదనలు విన్న ధర్మాసనం, మధ్యంతర ఉత్తర్వులు జారీచేయడానికి నిరాకరించింది. అయితే.. భూముల విక్రయాలు మాత్రం తుది తీర్పునకు లోబడి ఉంటాయని స్పష్టంచేసింది. పూర్తి వివరాలతో కౌంటర్‌ దాఖలు చేయాలని ప్రభుత్వాన్ని ఆదేశించింది. ఈ సమయంలో ధర్మాసనం కొన్ని ఆసక్తికర వ్యాఖ్యలు చేసింది. ‘ఆంధ్రప్రదేశ్‌లో మంచి సారవంతమైన భూములున్నాయి.. మంచి పంటలు పండుతాయి.. ఇక్కడ ప్రజలు సంపన్నులు.. అయినప్పటికీ పేద రాష్ట్రంగానే ఎందుకుంది’ అని వ్యాఖ్యానించింది. దీనికి సుధాకర్‌రెడ్డి బదులిస్తూ.. రాష్ట్ర విభజన తరువాతే ఏపీ ఆర్థికంగా బాగా నష్టపోయిందని, పరిశ్రమలన్నీ హైదరాబాద్‌లోనే ఉండిపోయాయని చెప్పారు. ప్రభుత్వం తీసుకునే ప్రతీ విధాన నిర్ణయాన్ని ఇలా రాజకీయ కారణాలతో సవాలు చేస్తూ ఉంటే తాము చేసేది ఏముంటుందని సుధాకర్‌రెడ్డి తెలిపారు. తాము రాజకీయాల జోలికి వెళ్లడంలేదంటూ ధర్మాసనం విచారణను వాయిదా వేసింది.   గతంలో లాగా జేబులు నింపుకోవడానికి అమ్మడంలేదు..  డబ్బు కోసం ఇలా ప్రభుత్వ భూములను అమ్మడం సబబేనా? అని ధర్మాసనం ప్రశ్నించింది. గతంలో లాగా జేబులు నింపుకోవడానికి భూములు అమ్మడంలేదని.. ప్రజా సంక్షేమ కార్యక్రమాల అమలుకు అవసరమైన నిధుల కోసం భూములు అమ్ముతున్నామని సుధాకర్‌రెడ్డి చెప్పారు. ఈ సమయంలో పిటిషనర్‌ తరఫున న్యాయవాది నర్రా శ్రీనివాసరావు జోక్యం చేసుకుంటూ.. గుంటూరులో మార్కెట్‌ స్థలాన్ని అమ్మేస్తున్నారని చెప్పారు. దీనిపై ప్రభుత్వ ప్రత్యేక న్యాయవాది కాసా జగన్‌మోహన్‌రెడ్డి అభ్యంతరం తెలిపారు. అక్కడ ఇప్పుడు మార్కెట్‌ లేదని, మరోచోట మార్కెట్‌ నిర్మించామని, చక్కగా అక్కడ కార్యకలాపాలు సాగుతున్నాయని చెప్పారు. ఈనెల 28న ఆన్‌లైన్‌ వేలం ఉందని, అందువల్ల వేలాన్ని అడ్డుకుంటూ మధ్యంతర ఉత్తర్వులు ఇవ్వాలని పిటిషనర్‌ తరఫు న్యాయవాది కోరగా.. ఎటువంటి మధ్యంతర ఉత్తర్వులు ఇవ్వొద్దని పొన్నవోలు అభ్యర్ధించారు. 

సాక్షి, హైదరాబాద్‌: ప్రభుత్వ స్థలాలను రక్షించలేని దుస్థితిలో అధికారులు ఉన్నారని మరోసారి హైకోర్టు ఆగ్రహం వ్యక్తం చేసింది. జీహెచ్‌ఎంసీ పరిధిలో ఆక్రమణలను అడ్డుకోలేకపోతున్నారని, జీతాలు తీసుకుని నిద్రపోతున్నారంటూ ఘాటువ్యాఖ్యలు చేసింది. మార్చి 24న జరిగే విచారణకు పురపాలక శాఖ ముఖ్య కార్యదర్శి, జీహెచ్‌ఎంసీ కమిషనర్లు హైకోర్టు ముందు హాజరుకావాలని ఆదేశించింది. ఈలోగా అక్రమ నిర్మాణాలపై తీసుకున్న చర్యలను వివరించాలని ఉత్తర్వులు జారీ చేసింది. అక్రమ నిర్మాణాలను అడ్డుకోకుండా ఐదేళ్లకోసారి వాటిని క్రమబద్ధీకరణకు జీవో జారీ చేయడం సరైంది కాదంది. సుందరమైన హైదరాబాద్‌ నగరాన్ని ఆక్రమణల నుంచి కాపాడుకోకపోతే ముంబై, పట్నా తరహాలో నరకప్రాయంగా మారుతుందని ఆందోళన వ్యక్తం చేసింది. రంగారెడ్డి జిల్లా గడ్డి అన్నారంలో అక్రమ నిర్మాణంపై జీహెచ్‌ఎంసీకి ఫిర్యాదు చేసినా అధికారులు పట్టించుకోలేదని పేర్కొంటూ శివారి మరొకరు వేర్వేరుగా ప్రజాహిత వ్యాజ్యాలను దాఖలు చేశారు. ప్రధాన న్యాయమూర్తి జస్టిస్‌ రాఘవేంద్రసింగ్‌ చౌహాన్, న్యాయమూర్తి జస్టిస్‌ అభిషేక్‌రెడ్డిల ధర్మాసనం శుక్రవారం ఈ వ్యాజ్యాలపై విచారణ జరిపారు. చెరువులు, కుంటలు, పార్కులు ఆక్రమణలకు గురవుతుంటే అధికారులు అడ్డుకోకుండా నిద్రపోతున్నారా అని వ్యాఖ్యానించిం ది. జీహెచ్‌ఎంసీలో ఆక్రమణలను అడ్డుకునేందుకు ప్రత్యేక విభాగం ఉందా అని ప్రశ్నించింది. అధికారులు తమ విధుల్ని నిర్వహించకపోతే హైకోర్టే ఆ పనులు చేయాల్సివస్తుందని తేల్చిచెప్పింది. 

నారాయణపేట జిల్లా ఊట్కూరులో ప్రభుత్వ భూ బదలాయింపు వ్యవహారంలో మరో కొత్త కోణం వెలుగుచూసింది. 21.81 ఎకరాల సర్కారు స్థలాన్ని తమ కుటుంబీకులు, బంధువుల పేరు మీద పట్టా చేసి అడ్డంగా దొరికిపోయిన ఓ వీఆర్వో, ముగ్గురు వీఆర్‌ఏలను కాపాడేందుకు ఓ అధికారి వారితో డీల్‌ కుదుర్చుకున్నారనే చర్చ రెవెన్యూ వర్గాల్లో హాట్‌ టాపిక్‌గా మారింది. అందుకోసం సదరు అధికారి ఓ ఉద్యోగిని మధ్యవర్తిగా నియమించుకున్నట్లు ఆ శాఖలో ప్రచారం జరుగుతోంది. ఆ మధ్యవర్తి సదరు అధికారికి, ఆరోపణలు ఎదుర్కొంటోన్న ఉద్యోగుల మధ్య ఆర్థిక లావాదేవీలు నడిపినట్లు విశ్వసనీయంగా తెలిసింది. అందుకే మండలంలో చర్చనీయాంశమైన భూ అక్రమ వ్యవహారాన్ని సదరు అధికారి ఉన్నతాధికారుల దృష్టికి తీసుకెళ్లలేదనే విమర్శలు వినిపిస్తున్నాయి.  సాక్షి, మహబూబ్‌నగర్‌: భూ అక్రమ బదలాయింపుపై ‘సాక్షి’ దినపత్రిక వరుస కథనాలు ప్రచురించడం.. దీనిపై కలెక్టర్‌ హరిచందన దాసరి ప్రత్యేక దృష్టి సారించడంతో తనను నమ్ముకున్న ఉద్యోగులను కాపాడేందుకు ఓ అధికారి తర్జనభర్జన పడుతున్నట్లు విశ్వసనీయంగా తెలిసింది. తనకున్న అధికారంతో వీఆర్‌ఏలు రాజప్ప, భీంరావు, బాపూర్‌ వీఆర్‌ఏ జ్యోతిను సస్పెండ్‌ చేసిన తహసీల్దార్‌ దానయ్య.. తన పరిధిలో లేకపోవడంతో వీఆర్వో భూమయ్యను సస్పెండ్‌ చేయలేదు. కానీ.. వీఆర్వోపై నివేదిక సిద్ధం చేసి ఆర్డీఓకు పంపాల్సి ఉంది. మంగళవారం సాయంత్రం వరకూ సదరు తహసీల్దార్‌ నివేదికను సిద్ధం చేయకపోవడంపై పలు అనుమానాలకు తావిస్తోంది. భూమయ్యపై నివేదిక పంపించాల్సిన తహసీల్దార్‌ ఇంత వరకు తనకు పంపలేదని.. అందుకే సస్పెండ్‌ చేయలేదని నారాయణపేట ఆర్డీఓ శ్రీనివాస్‌ చెప్పడం గమనార్హం.  ఇక్కడా అదే తీరు..  కేవలం 21.81 ఎకరాలే కాదూ.. అదే మండలంలోని బాపూర్‌లో అన్యాక్రాంతమైన సుమారు 75 ఎకరాల ప్రభుత్వ స్థలం విషయంలోనూ సదరు అధికారి అదే తీరుగా వ్యవహరించారనే విమర్శలున్నాయి. రెవెన్యూ ఉద్యోగి ఒకరు బాపూర్‌లో ప్రభుత్వ భూములను ఇతరుల పేరిట అక్రమ పట్టాలు చేశారంటూ గ్రామానికి చెందిన రాఘవారెడ్డి అనే రైతు పలువురు గ్రామస్తులతో కలిసి జూన్‌ 11, 2018లోనే అప్పటి మహబూబ్‌నగర్‌ జిల్లా కలెక్టర్‌ రొనాల్డ్‌రోస్‌కు ఫిర్యాదు చేశారు. దీంతో విచారణ చేపట్టి నివేదిక ఇవ్వాలని కలెక్టర్‌ సంబంధిత అధికారులను ఆదేశించారు. ఆ తర్వాత ఏమైందో తెలియదు కానీ ఇంత వరకు ఆ భూములకు సంబంధించిన విచారణలో ఎలాంటి పురోగతి లేదు. గ్రామస్తులు ఇచ్చిన ఫిర్యాదు మేరకు అసలు ఆ గ్రామంలో భూ అక్రమాలపై విచారణ జరిగిందా? లేదా? జరిగితే అధికారుల విచారణలో ఏం తేలింది? విచారణాధికారులు ఉన్నతాధికారులకు ఏం నివేదిక ఇచ్చారు? అనే ప్రశ్నలు మళ్లీ తలెత్తుతున్నాయి. మరోవైపు 75 ఎకరాల ప్రభుత్వ భూమి ఇతరుల పేరిట పట్టా అయినట్లు గ్రామస్తులు ఇప్పటికీ ఆరోపిస్తూనే ఉన్నారు. ఈ విషయంలో గ్రామస్తులు నిజం చెబుతున్నారా? లేక గతంలో విచారణ చేపట్టిన అధికారులు తమ ఉన్నతాధికారులను తప్పుదోవ పట్టించారా? అనేది జిల్లా కలెక్టర్‌ దృష్టిసారిస్తేనే నిగ్గు తేలుతుందని గ్రామస్తులు అభిప్రాయపడుతున్నారు. ఏదేమైనా.. పునర్విచారణ చేపడితేనే తప్ప సదరు అవినీతి అధికారి బండారం బయటపడని పరిస్థితి నెలకొంది. ఈ విషయంలో జిల్లా కలెక్టర్‌ హరిచందన ఎలాంటి చర్యలు తీసుకుంటారో అనే చర్చ జోరుగా జరుగుతోంది.   

కర్నూలు జిల్లాలో ఓ వ్యక్తికి ఐదు ఎకరాలుండగా రాత్రికి రాత్రే అతడి పేరుతో 30 ఎకరాలను వెబ్‌ల్యాండ్‌లోకి ఎక్కించారు. సదరు భూమిపై బ్యాంకులో రుణం తీసుకున్న రెండు రోజులకే ఆ భూమిని వెబ్‌ ల్యాండ్‌లో ఆయన పేరుతో లేకుండా ప్రభుత్వ ఖాతాలోకి మార్చేశారు.    సాక్షి, అమరావతి: రాష్ట్రవ్యాప్తంగా వెబ్‌ల్యాండ్‌ పేరుతో గతంలో జరిగిన భూ మోసాలను వెలికి తీయడంపై రెవెన్యూ శాఖ దృష్టి సారించింది. ప్రభుత్వ భూములను పరిరక్షించే దిశగా రికార్డుల స్వచ్ఛీకరణ, ఆటోమేటిక్‌ మ్యుటేషన్లకు నిబంధనలు రూపొందించింది. సర్వే నంబర్లవారీగా వెబ్‌ల్యాండ్‌ రికార్డులు తనిఖీ చేసి ఆర్‌ఎస్‌ఆర్‌ (రీ సెటిల్‌మెంట్‌ రిజిస్టర్‌) ఆధారంగా లావాదేవీలను తనిఖీ చేయనున్నారు. కొంతమంది రెవెన్యూ అధికారులు, సిబ్బంది ప్రభుత్వ భూములను రాత్రికి రాత్రే వెబ్‌ల్యాండ్‌లో ప్రైవేట్‌ వ్యక్తుల పేర్లతో నమోదు చేశారనే విమర్శలున్నాయి. కొంతమంది బడా నాయకులు రెవెన్యూ సిబ్బందిని ముడుపులతో సంతృప్తిపరిచి ప్రభుత్వ భూములను పెద్ద ఎత్తున తమ పేర్లతో, బినామీల పేర్లతో వెబ్‌ల్యాండ్‌లో  నమోదు చేయించుకున్నారు. ప్రభుత్వ భూములు ప్రైవేట్‌ వ్యక్తుల పేరుతో ఉండాలంటే తప్పకుండా దరఖాస్తు పట్టా (డీకేటీ) ఇచ్చి ఉండాలి. లేదంటే భూమి కేటాయించి ఉండాలి. ఇందుకు భిన్నంగా లక్షల సంఖ్యలో లావాదేవీలు జరిగాయి.   రిటైర్డ్‌ అధికారుల కీలక పాత్ర  కొందరు రిటైర్డు తహసీల్దార్లు, గ్రామ రెవెన్యూ అధికారులు, రెవెన్యూ ఇన్‌స్పెక్టర్లు ఈ వ్యవహారంలో కీలక పాత్ర పోషించారు. పదవీ విరమణ/బదిలీకి ముందు భారీగా వసూళ్లు చేసి వెబ్‌ల్యాండ్‌లో ప్రభుత్వ భూములను ప్రైవేట్‌ వ్యక్తుల పేర్లతో నమోదు చేశారు. కొందరైతే విచారణ జరిపినా బయటకు రాకుండా ఏకంగా రికార్డులు మాయం చేశారు. చాలా జిల్లాల్లో డీకేటీ రిజిస్టర్లు, భూ అనుభవ రికార్డు (అడంగల్‌), భూ యాజమాన్య హక్కుల పుస్తకం (1బి) పాతవి మాయం కావడం ఇందుకు నిదర్శనమని ఉన్నతాధికారులు అంగీకరిస్తున్నారు. విశాఖపట్నం, కర్నూలు, అనంతపురం, చిత్తూరు, వైఎస్సార్, నెల్లూరు జిల్లాల్లో ఇలాంటివి ఎక్కువగా చోటు చేసుకున్నాయి. ఇక్కడ ఎక్కువగా బంజరు భూములు ఉండటమే ఇందుకు కారణం.  ఆర్‌ఎస్సార్‌తో సరిపోల్చాలి..  రెవెన్యూ శాఖ అత్యంత ప్రామాణికంగా పరిగణించే బ్రిటిష్‌ కాలం నాటి ఆర్‌ఎస్‌ఆర్‌తో సరిపోల్చి సర్వే నంబర్లవారీగా డీకేటీ రిజిస్టర్, అడంగల్, 1 బి రికార్డులు, వెబ్‌ల్యాండ్‌ను పరిశీలిస్తే మోసాలు కచ్చితంగా వెలుగులోకి వస్తాయని ఉన్నతాధికారులు చెబుతున్నారు. ‘ఉదాహరణకు ఓ గ్రామంలోని 102 సర్వే నంబరులో 30 ఎకరాలు ఆర్‌ఎస్‌ఆర్‌లో ప్రభుత్వ భూమి అని ఉందనుకుందాం. తర్వాత ప్రభుత్వం అది ఎవరికైనా అసైన్‌మెంట్‌ (డీకేటీ) పట్టా కింద ఇచ్చి ఉంటే డీకేటీ రిజిస్టర్‌లో ఉంటుంది. ఒకవేళ డీకేటీ ఇచ్చినట్లు నమోదు కాకుండా ఈ భూమి వెబ్‌ల్యాండ్‌లో ఇతరుల పేరుతో ఉంటే అక్రమ మ్యుటేషన్‌ కింద ప్రభుత్వం స్వాధీనం చేసుకుంటుంది’ అని రాష్ట్ర భూ పరిపాలన సంయుక్త కమిషనర్‌ శ్రీధర్‌ తెలిపారు. ‘డీకేటీ పట్టాలు ఎప్పుడు ఎవరికి ఇచ్చారనే వివరాలు కలెక్టరేట్లలో ఉంటాయి. వీటి ఆధారంగా తనిఖీలు చేస్తే అక్రమాలు బయటకు వస్తాయి. అయితే అక్కడ కూడా రికార్డులు గల్లంతైతే మోసాలను వెలికి తీయడం కష్టం’ అని భూ వ్యవహారాలపై అనుభవజ్ఞుడైన ఓ రిటైర్డు ఐఏఎస్‌ అధికారి పేర్కొన్నారు.   ఆటోమేటిక్‌ మ్యుటేషన్‌ అంటే...?  ఏదైనా ఓ భూమిని కొనుగోలుదారుడు రిజిస్ట్రేషన్‌ చేసుకున్న వెంటనే ఆ సమాచారం సబ్‌ రిజిస్ట్రార్‌ నుంచి సంబంధిత తహసీల్దార్‌ కార్యాలయానికి అందుతుంది. దీనిపై అభ్యంతరాల స్వీకరణకు 15 రోజులు గడువు ఇచ్చి ఆమేరకు భూముల రికార్డులను రెవెన్యూ అధికారులు సవరిస్తారు. కొనుగోలుదారుడు తన పేరుతో భూ రికార్డులను మార్చుకునేందుకు ప్రత్యేకంగా దరఖాస్తు చేసుకోవాల్సిన అవసరం లేదు. 

ఇబ్రహీంపట్నం: నగరానికి సమీపం లోని ఇబ్రహీంపట్నంలో అతి విలువైన ప్రభుత్వ భూములు కబ్జాదారుల గుప్పిట్లోకి వెళ్తున్నాయని, దీనిపై సీబీసీఐడీతో విచారణ జరి పించాలని భువనగిరి ఎంపీ కోమటిరెడ్డి వెంకట్‌రెడ్డి డిమాండ్‌ చేశారు. ఆదివారం ఇబ్రహీంపట్నం మున్సిపాలిటీ కాంగ్రెస్‌ పార్టీ కార్యకర్తల సమావేశంలో ఆయన మాట్లాడారు. ప్రభుత్వ భూములను అక్రమంగా కాజేసి ప్లాట్లు చేస్తున్న విషయంపై గవర్నర్‌కు ఫిర్యాదు చేయనున్నట్లు చెప్పారు. ఏపీ సీఎం జగన్‌మోహన్‌రెడ్డి ఆర్టీసీని ప్రభుత్వంలో విలీనం చేసి ట్రెజరీ ద్వారా జీతాలు చెల్లిస్తుంటే..మన రాష్ట్రంలో ఆర్టీసీని కేసీఆర్‌ నాశనం చేస్తున్నారని ఆరోపించారు. మున్సిపల్‌ ఎన్నికల్లో గెలవకుంటే మంత్రులకు పదవులుండవని, ఎమ్మెల్యేలకు వచ్చే ఎన్నికల్లో టికెట్లు ఉండవని సీఎం కేసీఆర్‌ హెచ్చరించడాన్ని ఖండించారు. నిజామాబాద్‌లో ఎంపీ స్థానానికి ఆయన కూతురు కవిత ఓడిపోయినప్పుడు కేసీఆర్‌ ఎందుకు తన పదవికి రాజీనామా చేయలేదని వెంకట్‌రెడ్డి ప్రశ్నించారు. 

సాక్షి, విజయవాడ :  ప్రభుత్వ భూముల్లో నివసించే పేదలకు ఒక చక్కని శుభవార్త  అందిస్తున్నామని జిల్లా కలెక్టర్‌ ఏఎండీ. ఇంతియాజ్‌ చెప్పారు. గురువారం ఆయన తన క్యాంపు కార్యాలయంలో ఇళ్ల స్థలాల పంపిణీ, భూసేకరణ తదితర అంశాలను అధికారులతో సమీక్షించారు. కలెక్టర్‌ మాట్లాడుతూ జిల్లాలో అభ్యంతరం లేని ప్రభుత్వ భూముల్లో నివాసం ఉంటున్న పేదలు తమ ఇంటి స్థలాన్ని క్రమబద్దీకరించుకునేందుకు దరఖాస్తు చేసుకోవాలని ఆయన పేదలకు సూచించారు. దారిద్రరేఖకు దిగువన జీవిస్తున్న పేదలు ప్రభుత్వ భూముల్లో నివాసం ఉండేవారు 100 చదరపు గజాలలోపు నివాసం ఉంటే వాటిని క్రమబద్దీకరణకు రూ. 1 చెల్లించాలన్నారు. 300 చదరపు గజాల కంటే ఎక్కవ ప్రభుత్వ స్థలంలో నివాసం ఉన్న వారికి  తమ నివాస స్థలాన్ని ప్రభుత్వ నిబంధనల మేరకు నిర్ణయించిన ధరను చెల్లించి తమ స్థలాలను క్రమబద్దీకరించుకోవచ్చన్నారు. అభ్యంతరం లేని ప్రభుత్వ భూమిలో నివాసం ఉంటున్న పేదలు వారి ఇంటి క్రమబద్దీకరణ కోసం తహసీల్దార్, గ్రామ సచివాలయాల్లో తమ దరఖాస్తులు దాఖలు చేయాలన్నారు. దీనికి సంబంధించి ఈనెల 6వ తేదీ నుంచి దరఖాస్తులు స్వీకరిస్తున్నారని చెప్పారు. ఈ సదవకాశాన్ని పేదలందరు వినియోగించుకునేలా రెవెన్యూ అధికారులు గ్రామసభలు నిర్వహించి ప్రజలకు అవగాహన కల్గించాలన్నారు. వచ్చిన  దరఖాస్తులను అధికారులు పరిశీలించి 120 రోజుల్లోగా నిబంధనల మేరకు అర్హత కల్గిన పేదల స్థలాలను క్రమబద్దీకరణకు చర్యలు తీసుకుంటారన్నారు. జిల్లాలో 2,71లక్షల మంది పేదలు ఇళ్ల స్థలాల కోసం అర్హులుగా గుర్తించామన్నారు. ఇందుకోసం 4,497 ఎకరాలు భూమి అవసరమని, ప్రస్తుతం 2,132 ఎకరాల ప్రభుత్వ భూమి అందుబాటులో ఉందన్నారు. మిగిలిన ప్రవేటు భూమిని త్వరితగతిన భూసేకరణ చేపట్టాలని రెవెన్యూ అధికారులను ఆయన ఆదేశించారు. ఇళ్ల స్తలాల పంపిణీకి సంబందించి ఈనెల 16వ తేదీన అన్ని మండలాల్లోను సోషల్‌ అడిట్‌  నిర్వహించి లబి్ధదారుల జాబితాపై చర్చించి తగు నిర్ణయం తీసుకోవాలన్నారు. సమావేశంలో జిల్లా జాయింట్‌ కలెక్టర్‌ డాక్టర్‌ కె.మాధవీలత, సబ్‌–కలెక్టర్లు స్వప్నిల్‌ దినకర్, హెచ్‌.ఎం. ధ్యానచంద్ర, స్పెషల్‌ డిప్యూటీ కలెక్టర్‌ చక్రపాణి, ఆర్డీఓలు ఖాజావలి, సత్యవాణి తదితరులు పాల్గొన్నారు.   

సాక్షి, సిటీబ్యూరో: రెవెన్యూ విభాగం నిర్లక్ష్యం, క్షేత్రస్థాయి అధికారులు, సిబ్బంది నిర్వాకంతో రూ.వందల కోట్ల విలువైన ప్రభుత్వ స్థలాలు కబ్జాకు గురవుతున్నాయి. వివాదాల్లో చిక్కుకొని కోర్టుకు ఎక్కుతున్నాయి. అవసరమైన ఆధారాలు, సమగ్ర వాదనలు లేక వీటికి సంబంధించిన కేసులు ఏళ్లుగా న్యాయస్థానాల్లో పెండింగ్‌లో ఉంటున్నాయి. కొన్ని కేసులకు అయితే ఏళ్ల తరబడి కౌంటర్‌ కూడా దాఖలు చేయలేని దుస్థితి నెలకొంది. దీంతో పలు కేసుల్లో ప్రతికూల తీర్పులు తప్పడం లేదు. మరోవైపు అనుకూలంగా తీర్పులు వచ్చినప్పటికీ రెవెన్యూ అధికారుల ఉదాసీన వైఖరితో ప్రతివాదులు పైకోర్టును ఆశ్రయిస్తున్నారు. ఇదీ హైదరాబాద్‌ జిల్లాలో వివాదాల్లో చిక్కుకున్న ప్రభుత్వ భూముల కేసుల పరిస్థితి. కోర్టు కేసులకు సంబంధించి జిల్లా కలెక్టరేట్‌లో ప్రత్యేక న్యాయ విభాగమూ ఉంది. స్పెషల్‌ డిప్యూటీ కలెక్టర్‌ స్ధాయి అధికారి పర్యవేక్షణలో ఈ విభాగం కేసుల పరిశీలన, కౌంటర్‌ దాఖలు, సమగ్ర వాదనలకు సరిపడా సమాచారం ప్రభుత్వ న్యాయవాదులకు అందిస్తోంది. అయినప్పటికీ కేసుల పరిష్కారంలో ఎలాంటి పురోగతి కనిపించడం లేదు. ఇదిలా ఉండగా రెండేళ్లలో మరో 20శాతం కేసులు పెరగడం గమనార్హం.  58శాతం వివాదాల్లోనే...   నగరంలో సుమారు రూ.1805 కోట్ల విలువైన ప్రభుత్వ స్థలాలు కోర్టు వివాదాల్లో చిక్కుకున్నట్లు అధికార గణాంకాలు స్పష్టం చేస్తున్నాయి. సిటీలో చదరపు గజం భూమి విలువ సుమారు రూ.40వేల నుంచి రూ.లక్ష వరకు పలుకుతోంది. హైదరాబాద్‌ జిల్లా రెవెన్యూ పరిధిలో ప్రభుత్వానికి దాదాపు 4,36,471.2 చదరపు గజాల స్థలాలున్నాయి. చదరపు గజానికి రూ.70వేల చొప్పున లెక్కిస్తే... వీటి విలువ రూ.3,055 కోట్లకు పైనే ఉంటుంది. అందులో సుమారు 58శాతం అంటే 2,57,972 చదరపు గజాల స్థలం కోర్టు వివాదాల్లో చిక్కుకున్నట్లు గణాంకాలు స్పష్టం చేస్తున్నాయి. దీని విలువ రూ.1,805 కోట్లకు పైనే ఉంటుందని అంచనా.   యోగితా హయాంలో కదిలిక...   కలెక్టర్‌ యోగితారాణా హయాంలో ప్రభుత్వ భూముల కోర్టు కేసులపై కదలిక వచ్చినా.. ఆమె బదిలీతో మళ్లీ కథే పునరావృతమవుతోంది. వాస్తవానికి గతేడాది జనవరిలో సర్కార్‌ స్థలాలను నిగ్గు తేల్చేందుకు యోగితారాణా ప్రత్యేక కార్యాచరణ రూపొందించారు. కోర్టుల్లో పెండింగ్‌లో ఉన్న కేసులపై సమగ్ర అధ్యయనం చేసి కౌంటర్‌ దాఖలు చేసేందుకు చర్యలు చేపట్టారు. మండలానికి టాప్‌ టెన్‌ చొప్పున కేసులను ఎంపిక చేసి సంబంధిత డిప్యూటీ తహసీల్దార్లతో అంతర్గత సమీక్షలు నిర్వహించారు. ప్రతి కేసును సమగ్రంగా అధ్యయనం చేసి ఆధారాలపై నివేదికలను రూపొందించారు. తొలివిడతగా అత్యంత విలువైన భూములకు సంబంధించిన సుమారు 70 కేసులను ఎంపిక చేసి యోగితారాణా ప్రభుత్వ అడ్వొకేట్‌ జనరల్‌తో సమావేశమై చర్చించారు. కొంతకాలం కేసుల్లో పురోగతి కనిపించినప్పటికీ...ఆ తర్వాత కదలిక లేకుండా పోయింది.  పెండింగ్‌ కేసులు ఇలా... జిల్లా రెవెన్యూ పరిధిలో ప్రభుత్వ స్థలాలకు సంబంధించి సుమారు 2,023 కేసులు వివిధ కోర్టుల్లో పెండింగ్‌లో ఉన్నట్లు అధికారిక రికార్డులు తెలియజేస్తున్నాయి. సివిల్‌ కోర్టులో 329, హైకోర్టులో 1,669 కేసులు పెండింగ్‌లో ఉన్నాయి. జిల్లాలో మొత్తమ్మీద 2,832 కేసులకు గాను 120 కేసుల్లో ప్రభుత్వానికి ప్రతికూల తీర్పులు రాగా... 213 కేసుల్లో అనుకూల తీర్పులు వచ్చాయి. మరో 179 కేసుల్లో ప్రతివాదులు కేసులను ఉపసంహరించుకున్నారు. 199 కేసుల్లో కోర్టు పలు డైరెక్షన్స్‌ ఇవ్వడంతో సమస్య సమసిపోయింది. కాగా సుమారు 290 ఫిర్యాదులు కొన్ని కేసులతో ముడిపడి ఉండడంతో రెవెన్యూ యంత్రాంగం మొత్తం 1,733 కేసులుగా నిర్ధారించింది. వీటిలో 646 కేసులపై కౌంటర్లు దాఖలు చేయగా, 992 కేసులకు దాఖలు చేయలేదు. 81 కేసుల సంబంధించి ఇతర ప్రభుత్వ విభాగాలు కౌంటర్‌ దాఖలు చేయాల్సి ఉంది. మరో 14 కేసులకు మాత్రం ప్రభుత్వం కౌంటర్‌ దాఖలు చేసింది.

సాక్షి, మచిలీపట్నం : అర్హులైన నిరుపేదలకు వచ్చే ఉగాది కల్లా ఇంటి జాగా కేటాయించాలన్న రాష్ట్ర ప్రభుత్వ సంకల్పం సాకారం చేసేందుకు జిల్లా యంత్రాంగం కసరత్తును వేగవంతం చేసింది. ఇళ్ల స్థలాలకు అనువైన భూముల అన్వేషణ సాగిస్తోంది. మరో వైపు అందిన దరఖాస్తుల్లో అర్హులను గుర్తించేందుకు గ్రామ, వార్డు వలంటీర్లతో సర్వేకు శ్రీకారం చుట్టింది. ఇంకా దరఖాస్తు చేయకుండా ఎవరైనా అర్హులు మిగిలి ఉంటే వారితో కూడా దరఖాస్తులు చేయించేందుకు ఏర్పాట్లు చేస్తోంది. భూముల గుర్తింపునకు కసరత్తు ఇళ్ల స్థలాల కోసం ఇప్పటి వరకు అందిన దరఖాస్తుల ఆధారంగా అవసరమైన భూములను గుర్తించేందుకు జిల్లా యంత్రాంగం ముమ్మర కసరత్తు చేస్తోంది. గడిచిన రెండు నెలలుగా నిర్వహిస్తున్న స్పందనతో పాటు ప్రజాసాధిరాక సర్వే, సోషియో ఎకనామిక్‌ సెన్సెస్, టోల్‌ ఫ్రీ నంబరు 1100 ద్వారా జిల్లా వ్యాప్తంగా మూడు లక్షల 850 దరఖాస్తులు అందినట్టుగా లెక్క తేల్చారు. ఆ మేరకు వారికి ఇంటి స్థలాలు ఇవ్వాలంటే కనీసం 2,550 ఎకరాల భూములు అవసరమవుతాయని అంచనా వేశారు. కాగా ఇళ్ల స్థలాల కోసం పంపిణీ చేసేందుకు అనువైన ప్రభుత్వ భూములు జిల్లా వ్యాప్తంగా 1000 ఎకరాలున్నట్టుగా గుర్తించారు. మరో 1550 ఎకరాల ప్రైవేటు భూములు సేకరించాల్సి ఉంటుందని లెక్కతేల్చారు. ఇందుకోసం రూ.1500 కోట్లు అవసరమవుతాయని అంచనా వేస్తున్నారు. రేపటి నుంచి క్షేత్రస్థాయి సర్వే     ఇప్పటి వరకు అందిన దరఖాస్తుల్లో అర్హులను గుర్తించే కార్యక్రమాన్ని సోమవారం నుంచి శ్రీకారం చుడుతున్నారు. ఇటీవల నియమితులైన గ్రామ, వార్డు వలంటీర్లతో క్షేత్ర స్థాయి పరిశీలన చేపడుతున్నారు. 26వ తేదీ నుంచి 31వ తేదీ వరకు వలంటీర్లు తమకు కేటాయించిన 50 కుటుంబాల్లో ఈ దరఖాస్తుదారులు ఎవరైనా ఉన్నారా? ఉంటే వారు అర్హులా? కాదా? వారిలో ఎవరికైనా ఇళ్ల స్థలం ఉంటి గృహ నిర్మాణం కోసం ఎదురు చూస్తున్నారా? లేక కనీసం ఇంటి స్థలం కూడా లేని పరిస్థితి నెలకొందా? అని గుర్తిస్తారు. తమకు కేటాయించిన 50 కుటుంబాల్లో ఇంకా ఎవరైనా ఇళ్ల స్థలాలు, గృహ రుణాల కోసం దరఖాస్తు చేసుకోని వారెవరైనా ఉన్నారా? గుర్తిస్తారు. తమ వెంట తీసుకెళ్లే ఖాళీ దరఖాస్తులతో వారి వివరాలను నింపి వాటిని తహసీల్దార్‌ కార్యాలయంలో నవరత్నాల వెబ్‌సైట్‌లో అప్‌లోడ్‌ చేస్తారు. 31వ తేదీ వరకు ఈ సర్వే జరుగనుంది. సర్వేలో అదనంగా అందిన దరఖాస్తులను కూడా పరిగణనలోకి తీసుకొని అర్హుల తుది జాబితాలను సిద్ధం  చేస్తారు. ఆ మేరకు అవసరమైన భూములపై ఒక అంచనాకొస్తారు. ఆ తర్వాత అందుబాటులో ఉన్న ప్రభుత్వ భూములను మినహాయించి ఇంకా ఎంత సేకరించాల్సి ఉంటుందో అంచనా వేస్తారు. ఆ మేరకు భూసేకరణకు అవసరమైన నిధుల కోసం ప్రభుత్వానికి ప్రతిపాదనలు పంపిస్తారు. తొలి విడతలో అందుబాటులో ఉన్న ప్రభుత్వ భూముల్లో ఇంటి స్థలాలు కేటాయించేందుకు ఏర్పాట్లు చేస్తారు. 

అర్హులైన పేదలకు స్థలం ఇచ్చి.. పక్కా ఇంటిని నిర్మించాలన్నది ప్రభుత్వ లక్ష్యం. ఆ దిశగా అధికార యంత్రాంగం కసరత్తు చేస్తోంది. భూ అన్వేషణ ప్రకియను వేగవంతంగా చేపడుతోంది. నివాస యోగ్యమైన భూములను గుర్తిస్తోంది. గ్రామాల వారీగా ఉన్న రికార్డులను పరిగణనలోకి తీసుకుని సర్వే చేస్తోంది. ఇప్పటికే రెవెన్యూ యంత్రాంగం 40 శాతం గ్రామాల్లో ప్రక్రియను ముగించి రికార్డులను సిద్ధం చేసింది. రెండు నెలల వ్యవధిలో మిగిలిన గ్రామాల్లోనూ దీనిని పూర్తి చేయనుంది. సాక్షి, నెల్లూరు:  ఎన్నికల సమయంలో వైఎస్సార్‌ కాంగ్రెస్‌ పార్టీ ఇచ్చిన హామీని నెరవేర్చే దిశగా అడుగులు పడుతున్నాయి. అధికారంలోకి వచ్చాక అర్హులకు ఇంటి పట్టాలను అందజేస్తామని ప్రకటించింది. పూర్తి హక్కులు ఉండేలా ఇంటి పట్టాలను మహిళల పేరుపై రిజిస్ట్రేషన్‌ చేసిస్తామని హామీ ఇచ్చింది. దీనికి అనుగుణంగా అధికార యంత్రాంగం జిల్లాలో పంపిణీ చేసేందుకు అనువుగా ఉన్న ప్రభుత్వ భూములను గుర్తించే ప్రక్రియను నిర్వహిస్తోంది. కలెక్టర్‌ శేషగిరిబాబు ఆదేశాలతో జేసీ నుంచి తహసీల్దార్‌ వరకు అందరూ భూ సేకరణపై దృష్టి పెట్టారు. జిల్లాలోని 940 పంచాయతీల పరిధిలో ఇంటి స్థలాలు కోరుతూ అర్హుల నుంచి దరఖాస్తులను స్వీకరిస్తున్నారు. దీంతో పాటు ప్రతి సోమవారం జరిగే స్పందన కార్యక్రమంలోనూ ఇంటి స్థలాలను కోరుతూ జిల్లా వ్యాప్తంగా వందల సంఖ్యలో అర్జీలు వస్తున్నాయి. వచ్చే ఉగాదిన మహిళ పేరుతో రిజిస్ట్రేషన్‌ చేసిన ఇంటి పట్టాలను పంపిణీ చేస్తామని ప్రభుత్వం ప్రకటించింది. దీనికి అనుగుణంగా యంత్రాంగం కసరత్తు చేస్తోంది.  మండలాలను యూనిట్‌గా.. మండలాలను యూనిట్‌గా గ్రామ రికార్డులను పరిగణనలోకి తీసుకొని తొలుత ప్రభుత్వ భూమిని గుర్తిస్తున్నారు. ఇందులో నివాసయోగ్యమైన భూమి ఎంత ఉంది.. అందుబాటులో ఉన్న సౌకర్యాలను అంచనా వేస్తున్నారు. ప్రతి గ్రామంలో సాధారణంగా కొంత ప్రభుత్వ భూమి ఉంది. అయితే ఇందులో 60 శాతం భూమి నివాసయోగ్యమైంది కాకుండా ఉంది. ఈ క్రమంలో గత నెల్లో అధికారులతో కలెక్టర్‌ సమీక్ష నిర్వహించి భూముల వివరాలను పూర్తి స్థాయిలో సిద్ధం చేయాలని ఆదేశించారు. దీంతో భూ ఆన్వేషణ ప్రక్రియ ఇప్పటి వరకు 40 శాతం పూర్తయింది. 446 గ్రామాల్లో 2,360 ఎకరాల గుర్తింపు ఇప్పటి వరకు జిల్లాలోని 446 గ్రామాల్లో 2360 ఎకరాలను గుర్తించారు. పూర్తి నివాసయోగ్యమైన భూమిగా అధికారులు గుర్తించి వాటిని అర్హులైన పేదలకు పంపిణీ చేసేందుకు వీలుగా నివేదికలను సిద్ధం చేశారు. మూడు నెలల నుంచి జిల్లాలోని పేదల నుంచి దరఖాస్తులను స్వీకరిస్తున్నారు. ప్రతి దరఖాస్తును ఆన్‌లైన్లో నమోదు చేసి వారికి రసీదును అందజేస్తున్నారు. ఇప్పటి వరకు 70 వేలకు పైగా దరఖాస్తులను స్వీకరించారు. భూమిని పంపిణీ చేసేంత వరకు దరఖాస్తుల స్వీకరణ ప్రకియ కొనసాగనుంది. క్షేత్రస్థాయిలో అధికారులు ఇప్పటి వరకు 940 గ్రామ పంచాయితీల్లో భూములను పరిశీలించారు. రికార్డుల నిర్వహణలో ఇబ్బందులు, తదితర కారణాలతో అన్ని చోట్ల ప్రకియ పూర్తిగా కొలిక్కిరాని పరిస్థితి నెలకొంది. ఈ క్రమంలో జేసీ వెట్రిసెల్వి, ఇతర అధికారులు కూడా పర్యటనలకు వెళ్లి ప్రభుత్వ భూములను పరిశీలిస్తున్నారు. కొన్ని ప్రాంతాల్లో ప్రభుత్వ భూములు పుష్కలంగా ఉన్నా, రాళ్ల గుట్టలు, గతంలో గ్రావెల్‌ కోసం తవ్విన గుంతలు ఎక్కువగా ఉన్నట్లు గుర్తించారు.  వెరిఫికేషన్‌ ప్రక్రియ ప్రారంభం సిద్ధమైన 446 గ్రామాల్లో వెరిఫికేషన్‌ ప్రక్రియను ప్రారంభించారు. స్థానిక తహసీల్దార్‌ నేతృత్వంలో వీఆర్వోలు, వలంటీర్లు క్షేత్ర స్థాయిలో దరఖాస్తులను పరిశీలిస్తున్నారు. అధికారులు స్వీకరించిన దరఖాస్తులను గ్రామాల వారీగా పంపి పరిశీలనను పూర్తి చేసి అర్హుల జాబితాను సిద్ధం చేసే పనిలో నిమగ్నమయ్యారు. సగటున ఎకరా భూమిలో రోడ్డు, ఇతర మౌలిక సదుపాయాలు కల్పించి 45 మందికి ప్లాట్లుగా పంపిణీ చేయాలని ప్రాథమికంగా నిర్ణయించారు. 

సాక్షి, హైదరాబాద్‌: పట్టాదారు పాస్‌పుస్తకాల జారీకి రాష్ట్ర ప్రభుత్వం ఆధార్‌ మెలిక పెట్టడం బడాబాబులను ఉక్కిరిబిక్కిరి చేస్తోంది. ఇబ్బడిముబ్బడిగా భూములు కొనుగోలు చేసినవారిని ఈ నిర్ణయం ఇరకాటంలోకి నెట్టింది. ఆధార్‌ నంబర్‌ను ఇస్తే ఎక్కడ తమ భూముల చిట్టా బయటపడుతుందోననే ఆందోళన వారిలో నెలకొంది. భూ రికార్డుల ప్రక్షాళనలో భాగంగా వివాదరహిత భూములకు ప్రభుత్వం కొత్త పాస్‌ పుస్తకాలను పంపిణీ చేసింది. క్షేత్రస్థాయిలో రికార్డులను పరిశీలించి సదరు రైతులకు పాస్‌బుక్కులను అందజేసింది. అయితే, వీటి ముద్రణ సమయంలోనే పట్టాదారు ఆధార్‌ నంబర్‌ను సేకరించాలని ప్రభుత్వం నిర్దేశించింది. ఆధార్‌ సమాచారం ఇవ్వకపోతే పాస్‌బుక్కును ఇవ్వకూడదని స్పష్టం చేసింది. దీంతో రాష్ట్రవ్యాప్తంగా లెక్కతేల్చిన 4,56,155 మందిలో ఆధార్‌ నంబర్‌ను సమర్పించిన 1,88,994 మందికి పాస్‌పుస్తకాలను ప్రభుత్వం పంపిణీ చేసింది. ఆధార్‌ నంబర్‌ ఇవ్వని 2,67,161 మంది పట్టాదార్ల పాస్‌ బుక్కులను పెండింగ్‌లో పెట్టింది. భూ రికార్డులు సవ్యంగానే ఉన్నప్పటికీ, ఆధార్‌ నంబర్‌ ఇవ్వని కారణంగానే వీటిని పక్కనపెట్టింది.   పార్ట్‌–బీలో 69 లక్షల ఎకరాలు  భూ రికార్డుల ప్రక్షాళనలో వ్యవసాయ, వ్యవసాయేతర భూములను వేర్వేరుగా వర్గీకరించిన సర్కారు.. వ్యవసాయేతర, అభ్యంతరకర భూములను పార్ట్‌–బీ కేటగిరీగా పరిగణించింది. ఈ నేపథ్యంలో రాష్ట్రవ్యాప్తంగా పార్ట్‌–బీ కింద 69,85,478 ఎకరాలున్నట్లు లెక్క తేల్చింది. ఇందులో ప్రభుత్వ భూములు ముఖ్యంగా అటవీ, నాలా, ప్రభుత్వ ఆస్తులు కూడా ఉన్నాయి. మరోవైపు రాష్ట్రవ్యాప్తంగా 1.59 కోట్ల ఎకరాల విస్తీర్ణంలో వ్యవసాయ భూములుండగా.. ఇందులో 1.53 కోట్ల ఎకరాల విస్తీర్ణంలోని భూములకు పాస్‌పుస్తకాలను ముద్రించి పంపించినట్లు రెవెన్యూశాఖ గణాంకాలు చెబుతున్నాయి. కాగా, క్లియర్‌ టైటిల్‌గా తేల్చినప్పటికీ ఇంకా 5,72,498 ఎకరాల విస్తీర్ణానికి సంబంధించిన డిజిటల్‌ సంతకాలు నమోదు చేయకపోవడంతో పాస్‌పుస్తకాల ముద్రణకు పంపలేదని స్పష్టమవుతోంది. మరోవైపు ప్రవాస భారతీయులకు పాస్‌ పుస్తకాలు అందుకోవడం తలనొప్పిగా మారింది. అక్కడే స్థిరపడ్డవారు ఇక్కడ ఆధార్‌ కార్డు తీసుకోవడం చట్టరీత్యానేరం. ఒకవేళ తీసుకున్నట్లు తెలిస్తే.. ఆదేశ పౌరసత్వం కూడా రద్దు కావడమేగాకుండా కఠిన శిక్షలు అనుభవించాల్సి ఉంటుంది. రాష్ట్ర ప్రభుత్వం మాత్రం పాస్‌ బుక్కుకు విధిగా ఆధార్‌ను జోడించాలనే నిబంధన విధించడం వారికి చిక్కుముడిగా మారింది. ఈ వ్యవహారంపై స్పష్టత కోరుతూ ప్రభుత్వానికి లేఖ రాసినా ఇప్పటివరకు ఎలాంటి నిర్ణయం తీసుకోకపోవడం గమనార్హం.   గుట్టు బయట పడుతుందనే?  ప్రతి క్రయ విక్రయానికి ప్రభుత్వం ఆధార్‌ను తప్పనిసరి చేసింది. దీంతో ఎక్కడ భూమి కొనుగోలు చేసినా క్షణాల్లో తెలిసిపోతుంది. అలాగే రెవెన్యూ రికార్డుల నవీకరణ సమయంలో సేకరించే ఆధార్‌తో తమ భూ చరిత్ర తెలిసిపోతుందని గుబులు బడాబాబుల్లో కనిపిస్తోంది. ఆధార్‌ వివరాలను ఇవ్వండి మహాప్రభో అని రెవెన్యూ యంత్రాంగం చెబుతున్నా వారు పెడచెవిన పెడుతున్నారు. ముఖ్యంగా వందలాది ఎకరాలు కొనుగోలు చేసిన పెద్దలు.. సీలింగ్‌ యాక్ట్‌ పరిధిలోకి వస్తామనే భయంతో వివరాలు ఇచ్చేందుకు జంకుతున్నట్లు తెలుస్తోంది. రెవెన్యూ వ్యవస్థలో విప్లవాత్మక మార్పులకు నాందిపలుకుతూ 2017లో రాష్ట్ర ప్రభుత్వం భూరికార్డుల ప్రక్షాళనకు శ్రీకారం చుట్టింది. మొత్తం 10,823 గ్రామాల్లో 2.38 కోట్ల ఎకరాల భూముల రికార్డులను పరిశీలించి.. 2.28 కోట్ల ఎకరాల భూములు వివాదరహితంగా తేల్చింది. 9.92 లక్షల ఎకరాల మేర భూముల విషయంలో అభ్యంతరాలు వ్యక్తం కావడంతో.. వాటిని వివాదాస్పద భూముల జాబితా (పార్ట్‌–బీ)లో చేర్చింది. ఈ క్రమంలోనే సర్వే నంబర్ల వారీగా రికార్డులను రూపొందించింది. 1,86,84,158 సర్వేనంబర్లలోని భూములు క్లియర్‌గా గుర్తించిన సర్కారు.. 9,13,656 సర్వేనంబర్ల పరిధిలోని భూములను వివాదాస్పదంగా పరిగణించింది.  

సాక్షి, అమరావతి: పెద్ద చేపలు చిన్న చేపల్ని తింటుంటే తిమింగలాలు పెద్ద చేపలను మింగేస్తున్న చందంగా చంద్రబాబు సర్కారులో భూదందా విచ్చలవిడిగా కొనసాగుతోంది. చట్టాలను ఏమార్చి, నిబంధనలకు పాతరేసి తెలుగుదేశం పార్టీ ‘కీలక’ నేతలు భూములను చెరపట్టి కోట్ల రూపాయలు దండుకున్నారు. గ్రామాలు, మండల కేంద్రాల్లో అధికార పార్టీ చోటామోటా నేతలు ప్రభుత్వ భూములను కైవసం చేసుకుంటే.. పట్టణాలు, నగరాల్లో విలువైన ప్రభుత్వ భూములనే కాకుండా కొన్ని ప్రైవేటు ఆస్తులను కూడా కొందరు మంత్రులు, ఎమ్మెల్యేలు స్వాహా చేశారు. గత నాలుగేళ్లలో వేల కోట్ల రూపాయల విలువైన సర్కారు భూములు మాయమయ్యాయి. దీంతోపేదలకు నివాస స్థలాలు ఇవ్వడానికి, వారి ఇళ్ల నిర్మాణానికి చాలా చోట్ల స్థలాలే లేని దుస్థితి ఏర్పడింది.  తూర్పూరబట్టిన మాజీ సీఎస్‌లు పేదలు, సన్న చిన్నకారు రైతుల నుంచి లాక్కున్న భూమిని అస్మదీయ పారిశ్రామికవేత్తలకు కారుచౌకగా కట్టబెట్టారు. సాఫ్ట్‌వేర్‌ సంస్థల ఏర్పాటు ముసుగులో రియల్‌ ఎస్టేట్‌ వ్యాపారానికి తెరతీశారు. ముఖ్యమంత్రి చంద్రబాబు ఆంధ్రప్రదేశ్‌ పారిశ్రామిక మౌలిక సదుపాయాల కల్పన సంస్థ (ఏపీఐఐసీ)ని భూదళారీగా మార్చేశారని తీవ్ర విమర్శలున్నాయి. ప్రభుత్వ భూములను ఏపీఐఐసీకి ఉచితంగా కేటాయించాలంటూ జారీ చేసిన ఉత్తర్వులు, కేంద్ర భూసేకరణ చట్టం–2013లోని రైతుల హక్కులను చట్టబండలుగా మార్చుతూ తెచ్చిన ఆంధ్రప్రదేశ్‌ భూసేకరణ చట్టం– 2018 ఈ విమర్శలకు బలం చేకూర్చుతుండటం గమనార్హం. చంద్రబాబు అండ్‌ కో బినామీ పేర్లతో భారీ వాటాలు పొందుతున్నారని ఆయన ప్రభుత్వంలోనే ప్రభుత్వ ప్రధాన కార్యదర్శులుగా పనిచేసి పదవీ విరమణ చేసిన ఐవైఆర్‌ కృష్ణారావు, అజేయ కల్లం బహిరంగంగా విమర్శించడం గమనార్హం.  ధర నిర్ణయంలో ఇష్టారాజ్యం రాజధాని కోసమంటూ అమరావతి ప్రాంతంలో రైతుల నుంచి సేకరించిన భూమిని కొన్ని కేంద్ర ప్రభుత్వ రంగ సంస్థలకు కేటాయించిన ధరలో పదో వంతు కంటే తక్కువ మొత్తానికే కొన్ని ప్రైవేటు సంస్థలకు ధారాదత్తం చేశారు. కేంద్ర ప్రభుత్వ రంగ సంస్థ.. జీవిత బీమా సంస్థ (ఎల్‌ఐసీ)కి ఎకరా రూ.4 కోట్లకు ఇచ్చి గోపీచంద్‌ బ్యాడ్మింటన్‌ అకాడమీకి మాత్రం ఎకరా రూ.12 లక్షలతోనే 12 ఎకరాలను కేటాయించింది. విద్యార్థుల నుంచి లక్షల రూపాయల్లో వార్షిక ఫీజులు గుంజుతున్న ఎస్‌ఆర్‌ఎం, విట్, అమృత తదితర కార్పొరేట్‌ విద్యాసంస్థలకు కూడా నామమాత్రపు ధరకే భూములు ఇవ్వడం గమనార్హం. ఇలా రాజధాని ప్రాంతంలో ఇప్పటికే 46 ప్రైవేటు సంస్థలకు 1260 ఎకరాలుపైగా ప్రభుత్వం కట్టబెట్టింది.  అంతూ పొంతూ ఏదీ? - విశాఖ నగరంలో రూ.400 కోట్ల విలువైన భూమిని ఫ్రాంక్లిన్‌ టెంపుల్టన్‌ సంస్థకు రూ.13 కోట్లకే ధారాదత్తం చేశారు. సినీనటుడు నందమూరి బాలకృష్ణకు బంధువైన రామారావు కుటుంబానికి చెందిన విశాఖపట్నం బాట్లింగ్‌ కంపెనీ (వీబీసీ) ఫెర్టిలైజర్స్‌ అండ్‌ కెమికల్స్‌కు కృష్ణా జిల్లా జగ్గయ్యపేట మండలంలో రూ.250 కోట్ల విలువైన 498.98 ఎకరాలను రూ.4.98 కోట్లకే కట్టబెట్టారు. ఇది చాలదన్నట్లు విశాఖ జిల్లాలో యారాడ సమీపంలో అత్యంత విలువైన 34 ఎకరాల భూమిని బాలకృష్ణ చిన్నల్లుడికి చెందిన ‘గీతం యూనివర్సిటీ’కి కట్టబెట్టేందుకు రంగం సిద్ధం చేశారు.  - తిరుపతి (కరకంబాడి)లో మంగళ్‌ ఇండస్ట్రీస్‌కు భూమి కేటాయించాలంటూ కాంగ్రెస్‌ ప్రభుత్వ హయాంలో ‘గల్లా’ కుటుంబం పెట్టుకున్న అర్జీ గల్లా అరుణకుమారి మంత్రిగా ఉండగానే రెండుసార్లు తిరస్కరణకు గురైంది. ఆమె కుటుంబానికి చెందిన ‘అమరరాజా బ్యాటరీస్‌’కు సమీపంలోనే భారీగా భూములున్నందున ఇవ్వాల్సిన అవసరం లేదని కాంగ్రెస్‌ సర్కారు భావించింది. అయితే చంద్రబాబు సర్కారు రాగానే ఆగమేఘాలపై ఈ ఫైలును తెప్పించుకుని మంగళ్‌ ఇండస్ట్రీస్‌కు భూమిని కేటాయించేశారు.  - భోగాపురంలో అంతర్జాతీయ విమానాశ్రయం పేరుతో ప్రభుత్వం 2600 ఎకరాలు సేకరించింది. విమానాశ్రయ నిర్మాణ టెండరు కేంద్ర ప్రభుత్వానికి చెందిన ఎయిర్‌పోర్టు అథారిటీ ఆఫ్‌ ఇండియాకు రావడంతో వాటాలు రావనే ఉద్దేశంతో ప్రైవేటుకు కట్టబెట్టేందుకు టెండరునే రద్దు చేసింది.  - అనంతపురం – అమరావతి ఎక్స్‌ప్రెస్‌ హైవే పేరుతో 26,890 ఎకరాలను కొత్త భూసేకరణ చట్టం ద్వారా లాక్కోవాలని చూస్తున్నారు. రోడ్డుకు అవసరమైన దానికంటే చాలా ఎక్కువ భూమిని సేకరించి రోడ్డు వెంబడి విలువైన భూమిలో వాటా పొందాలన్నదే దురాలోచన. - విశాఖపట్నం, విజయనగరం జిల్లాల్లో వేలాది ఎకరాలను ఫుడ్‌ పార్కులు, పారిశ్రామిక పార్కులకు, అనంతపురం, కర్నూలు జిల్లాల్లో వేలాది ఎకరాలను విండ్‌పవర్‌ సంస్థలకు అడ్డగోలుగా ఇచ్చేశారు. ఎక్కడా పరిశ్రమలు వచ్చిన జాడ లేకపోయినా ఇంకా పది లక్షల ఎకరాల ల్యాండ్‌ బ్యాంకును సేకరించాలని ప్రభుత్వం తహతహలాడుతోంది.

సాక్షి, అమరావతి: రాష్ట్రవ్యాప్తంగా తీవ్ర సంచలనం సృష్టించిన విశాఖ భూకుంభకోణం దర్యాప్తు పెద్ద ఫార్సుగా ముగిసింది. ప్రతిపక్షం సహా అన్ని వర్గాల నుంచి ఈ భూదందాపై తీవ్ర విమర్శలు మూటగట్టుకున్న రాష్ట్ర ప్రభుత్వం.. వాటి నుంచి గట్టెక్కేందుకు ప్రత్యేక దర్యాప్తు బృందం (సిట్‌) ఏర్పాటుచేయడం మొక్కుబడి తంతేనని తేలిపోయింది. పూర్తిస్థాయిలో విచారణ జరిగితే తమ పునాదులు ఎక్కడ కదులుతాయనే భయంతో ‘సిట్‌’కు ఎలాంటి న్యాయపరమైన అధికారాలు ఇవ్వలేదని స్పష్టమైంది. తమకు పరిమితులు విధించారని ప్రత్యేక దర్యాప్తు బృందమే ప్రభుత్వానికి సమర్పించిన నివేదికలో పేర్కొనడం ఇప్పుడు అధికార వర్గాల్లో తీవ్ర చర్చనీయాంశమైంది. విశాఖ జిల్లాలో వేల ఎకరాల ప్రభుత్వ భూములను రాష్ట్ర కేబినెట్‌లో ఓ మంత్రి దోచేశారని, ప్రభుత్వ రికార్డులను తారుమారు చేశారని, వేల కోట్ల విలువైన ప్రభుత్వ భూమి అన్యాక్రాంతం అయిపోయిందని కేబినెట్‌లోని మరో మంత్రి తీవ్ర ఆరోపణలు చేశారు. అంతేకాకుండా.. ప్రభుత్వ భూములను అధికార పార్టీకి చెందిన పెద్దలు వేల ఎకరాలను కాజేశారన్న వార్తలు పతాక శీర్షికలెక్కాయి. ఈ నేపథ్యంలో డిప్యూటి ముఖ్యమంత్రి కేఈ కృష్ణమూర్తి స్వయంగా గత ఏడాది జూన్‌ 15న ప్రజా విచారణను చేపట్టారు. అయితే, ఇది కొనసాగితే తమతో పాటు కేబినెట్‌లో సదరు మంత్రి భూ దాహం, ఆక్రమణలు ఎక్కడ బయటపడతాయోనన్న భయంతో ప్రభుత్వం ఆఘమేఘాలపై ప్రత్యేక దర్యాప్తు బృందాన్ని (సిట్‌) ఏర్పాటుచేసింది. ఇది 2017 జూన్‌ నుంచి జనవరి 2018 వరకు విచారణ చేపట్టి ఈ ఏడాది జనవరిలో తన నివేదికను ప్రభుత్వానికి సమర్పించింది. అయితే, ‘సిట్‌’కు న్యాయపరమైన ఎటువంటి అధికారాలు ఇవ్వలేదని, క్రిమినల్‌ ప్రొసీడింగ్స్‌ కోడ్‌ ప్రకారం ఏ ప్రాంతాన్నైనా తనిఖీలు చేసే అధికారంగానీ, రికార్డులను స్వాధీనం చేసుకోవడంగానీ.. ప్రైవేట్‌ వ్యక్తులను విచారణకు పిలిచే అధికారాలు కానీ ఇవ్వలేదని.. కొన్ని పరిమితులను విధించారని ‘సిట్‌’ ఆ నివేదికలోనే స్పష్టం చేసింది. దీన్నిబట్టి చూస్తే విశాఖ భూకుంభకోణంపై ‘సిట్‌’ విచారణ ఓ పెద్ద ఫార్సుగా మారిందని అధికార వర్గాలే పేర్కొన్నాయి. కేబినెట్‌ మంత్రిపై మరో కేబినెట్‌ మంత్రి చేసిన ఆరోపణలను వదిలేసి, ‘ముఖ్య’నేత సూచనలతో గతంలోనే భూ కుంభకోణం జరిగిందనే రీతిలోను ‘సిట్‌’ నివేదికను రూపొందించింది.  2015లో 18 ఎంట్రీలు ట్యాంపరింగ్‌ 2015లోనే విశాఖ రూరల్‌ పరిధిలోని ప్రభుత్వ రికార్డుల్లో 18 ఎంట్రీలు టాంపరింగ్‌ అయినట్లు గుర్తించినప్పటికీ 2017 వరకు జిల్లా కలెక్టర్‌ ఎటువంటి చర్యలను తీసుకోలేదని ‘సిట్‌’ తన నివేదికలో పేర్కొంది. అలాగే, 1995, 2005, 2007, 2013, 2015 సంవత్సరాల్లో ప్రభుత్వ రికార్డులు టాంపరింగ్‌ జరిగినట్లు ‘సిట్‌’ దర్యాప్తుల్లో తేలినట్లు పేర్కొన్నారు. అయితే, జిల్లా అధికార యంత్రాంగం పూర్తిస్థాయిలో చర్యలు తీసుకోవడంలో విఫలమైందని అందులో ప్రస్తావించారు. ప్రైవేట్‌ భూమి టైటిల్‌ నుంచి 1బి రిజిస్టర్‌లోను, వెబ్‌ ల్యాండ్‌లోను ఇతర ప్రైవేట్‌ వ్యక్తుల పేర్ల మీద మార్చేసినట్లు ‘సిట్‌’ తన నివేదికలో స్పష్టంచేసింది. అయితే, ఇలా ఎవరు చేశారనే దానికి ఆధారాల్లేవని తెలిపింది. అలాగే, ప్రభుత్వ భూముల టైటిల్‌ను ప్రైవేట్‌ వ్యక్తుల పేర్ల మీదకు మార్చేశారని, అలాంటి వారిపై క్రిమినల్, క్రమశిక్షణ చర్యలు తీసుకోవడంతో పాటు ఆ భూములను తిరిగి ప్రభుత్వం స్వాధీనం చేసుకోవాలని ‘సిట్‌’ సిఫార్సు చేసింది.  ఐఏఎస్‌లు, కలెక్టర్లు, జేసీల పాత్రపై అనుమానాలు ఇదిలా ఉంటే.. ఈ భూబాగోతం వ్యవహారంలో పలువురు ఐఏఎస్‌లు, జిల్లా కలెక్టర్లు, జాయింట్‌ కలెక్టర్లు, గ్రామ రెవెన్యూ ఆఫీసర్లు, డిప్యూటీ తహసీల్దార్లు, డిప్యూటీ కలెక్టర్లు, సబ్‌ రిజిస్ట్రార్లు, జిల్లా రిజిస్ట్రార్‌ పాత్ర ఉన్నట్లు అనుమానాలున్నాయని ‘సిట్‌’ పేర్కొంది. భూ ఆక్రమణలు, రికార్డుల ట్యాంపరింగ్‌కు సంబంధించి మొత్తం 2,875 దరఖాస్తులు వచ్చాయని.. ఇందులో ప్రజల నుంచి వచ్చినవి 333. 113 అంశాలపై వివిధ రాజకీయ పార్టీలు ఇచ్చిన 11 దరఖాస్తులు ‘సిట్‌’ పరిధిలోకి రాగా.. మిగతా 2,531 దరఖాస్తులు ‘సిట్‌’ పరిధిలోకి రాలేదని, వీటిని జిల్లా కలెక్టర్‌ పరిధిలో ఉన్నాయని నివేదికలో పేర్కొన్నారు. మాజీ సైనికులు, రాజకీయ బాధితులకు ఇచ్చిన భూములను విక్రయించేందుకు నో అబ్జెక్షన్‌ సర్టిఫికెట్లు జారీచేసిన 68 కేసులను కూడా ‘సిట్‌’ గుర్తించింది. ప్రైవేట్‌ వ్యక్తులకు ప్రభుత్వోద్యోగుల దాసోహం విశాఖ జిల్లాల్లోని 40 మండలాలకు చెందిన 1,494 కేసులు రెండు ప్రైవేట్‌ పార్టీల మధ్య భూ వివాదాలకు సంబంధించినవని, వీటిలోని 763 కేసుల్లో పరిపాలనపరమైన వైఫల్యాలున్నాయని, ఇందులో ప్రభుత్వ ఉద్యోగులు పక్కదారి పట్టించి ఇద్దరు ప్రైవేట్‌ వ్యక్తులకు ప్రయోజనం కలిగించారని, 618 కేసులు ప్రభుత్వ భూముల్లో ప్రైవేట్‌ వ్యక్తుల జోక్యం ఉందని గుర్తించినట్లు ‘సిట్‌’ తన నివేదికలో స్పష్టంచేసింది. చాలా కేసుల్లో రికార్డులు లభ్యం కాకపోవడం, అధికారులు బదిలీ కావడం, రికార్డులను ఒక ఆఫీస్‌ నుంచి మరో ఆఫీస్‌కు తరలింపులో ఆ రికార్డులు మాయం కావడం, లింక్‌లు మిస్‌ కావడంతో ‘సిట్‌’ ఏమీ చేయలేకపోయిందని నివేదికలో వివరించారు. 1,225.92 ఎకరాల ప్రభుత్వ భూమితో పాటు 4,318 చదరపు మీటర్లు, 7,136 చదరపు అడుగుల స్థలాలు ఆక్రమణకు గురయ్యాయని.. 751.19 ఎకరాల అసైన్డ్‌ భూమి అన్యాక్రాంతమైందని, అలాగే.. 109 కేసుల్లో పట్టాదారు పుస్తకాల్లో అక్రమాలు జరిగాయని ‘సిట్‌’ స్పష్టం చేసింది. ఇవీ ‘సిట్‌’ సిఫార్సులు.. – భూ ఆక్రమణలు, అక్రమాలకు సంబంధించి విశాఖ జిల్లాలో గతంలో పనిచేసిన ముగ్గురు జిల్లా కలెక్టర్లు, అలాగే.. గతంలో పనిచేసిన నలుగురు జిల్లా జాయింట్‌ కలెక్టర్లు, ముగ్గురు జిల్లా రెవెన్యూ ఆఫీసర్లు, పది మంది ఆర్డీవోలు, జిల్లా రిజిస్ట్రార్, పలువురు తహసీల్దార్లపైన, అలాగే ఓ మాజీ మంత్రితో పాటు అతని నలుగురు అనుచరులపైన క్రిమినల్, క్రమశిక్షణ చర్యలను తీసుకోవాలి. – 50 కేసులకు సంబంధించిన ప్రైవేట్‌ వ్యక్తులపై క్రిమినల్‌ చర్యలు తీసుకోవాలి. – 49 కేసులకు సంబంధించిన ప్రభుత్వ అధికారులపైనా క్రిమినల్‌ చర్యలు తీసుకోవాలి. – 134 కేసులకు సంబంధించి శాఖాపరమైన చర్యలు తీసుకోవాలి. – 20 కేసులకు సంబంధించి ప్రభుత్వ భూమిని ప్రైవేట్‌ భూమిగా పేర్కొన్న వారిపై క్రిమినల్‌ చర్యలు తీసుకోవాలి. – వెబ్‌ల్యాండ్‌లో 34 కేసులకు సంబంధించి ప్రభుత్వ భూమిగా ఉంటే రికార్డుల్లో ప్రైవేట్‌ వ్యక్తుల పేర్లుగా పేర్కొన్న వారిపై క్రిమినల్‌  చర్యలు తీసుకోవాలి. – 29 కేసులకు చెందిన రిజిస్ట్రేషన్‌ డీడ్స్‌ను రద్దు చేయాలి. – గతంలో మూసివేసిన క్రిమినల్‌ కేసులను పునరుద్ధరించాలి. – విశాఖ జిల్లాలో రెవెన్యూ, సర్వే రికార్డులు మాయమైన తరహాలోనే ఇతర జిల్లాల్లో పరిస్థితులు కూడా ఇలాగే ఉండి ఉంటాయని.. వీటిని సరిచేయడానికి ప్రభుత్వం తగిన చర్యలు తీసుకోవాలి. 

పదేళ్ల తర్వాత అధికారంలోకి వచ్చాం.. మళ్లీ తర్వాత గెలుస్తామో, లేదో.. దీపం ఉండగానే ఇళ్లు చక్కబెట్టుకోవాలి అన్నట్టు తెలుగుదేశం పార్టీ మంత్రులు, ఎమ్మెల్యేలు, ఎమ్మెల్సీలు, ద్వితీయ శ్రేణి నాయకులు, వారి అనుచరులు రాష్ట్రంలో ఖాళీగా కనిపించిన ప్రతి భూమినీ కబ్జా చేశారు. శ్మశానాలు, చెరువులు, గిరిజనుల భూములు, దళితుల భూములు, దేవుడి భూములు, ప్రభుత్వ భూములు.. ఇలా ఏదైనా కాదేదీ కబ్జాకు అనర్హం అనే రీతిలో చెలరేగిపోయారు. అధికారాన్ని అడ్డం పెట్టుకుని, ప్రభుత్వ పెద్దలు, అధికారుల అండతో రాష్ట్రంలో ప్రతి జిల్లాలోనూ కబ్జా కాండ సాగించారు. వేలాది ఎకరాల భూములను చెరపట్టారు.. వాటికి తమ పేర్లు, బినామీల పేర్లతో దొంగ పత్రాలు సృష్టించారు.. వాటిని బ్యాంకుల్లో పెట్టి వందల కోట్ల రూపాయలను రుణాలుగా పొందారు. తిరిగి చెల్లించకుండా బ్యాంకులను నిండా ముంచారు. రాష్ట్ర విభజనతో అభివృద్ధికి ఆమడదూరంలో నిలిచిన రాష్ట్రాన్ని కబ్జాంధ్రప్రదేశ్‌గా మార్చేశారు. రాష్ట్రంలో పచ్చ నేతల భూదందాలను సాక్షి క్షేత్రస్థాయిలో పరిశీలించగా విస్మయపరిచే వాస్తవాలు వెల్లడయ్యాయి. ఇవి మచ్చుకు కొన్ని మాత్రమే.. వాస్తవానికి వీటికి నాలుగింతలపైనే భూములు కబ్జాకు గురయ్యాయని బాధితులు, ప్రజలు చెబుతున్నారు.. రాజధాని పేరుతో ఇన్‌సైడర్‌ ట్రేడింగ్‌తో కొట్టేసిన భూములు, విశాఖలో రికార్డులు ట్యాంపరింగ్‌ చేసి నొక్కేసిన భూములు వీటికి అదనం... కబ్జా అన్న పదానికి అధికార తెలుగుదేశం పార్టీ నేతలు పర్యాయపదంగా మారిపోయారు.రాష్ట్రవ్యాప్తంగా వేలాది ఎకరాల భూములను తమ కబంధ హస్తాల్లోకి తీసుకున్నారు. అధికారమే అండగా కార్యకర్త స్థాయి మొదలుకొని ‘ముఖ్య’నేత వరకు భూ దోపిడీలకు పాల్పడుతున్నారు. వచ్చే ఎన్నికల్లో విచ్చలవిడి డబ్బు పంపిణీనే లక్ష్యంగా అందినకాడికి ఆరగిస్తున్నారు. రాజధాని అమరావతి సాక్షిగా మొదలైన భూముల వేట.. జిల్లాల్లోని శ్మశానాల వరకు సాగింది. ఏ మాత్రం పాపభీతి లేకుండా దేవుడి భూములనూ చెరబట్టారు. చెరువులను సైతం మింగేసి.. మిగిలిన భూ ఆకలిని తీర్చుకోవడానికి దళితులకు చెందిన అసైన్డ్‌ భూములపై పడ్డారు. మాది ప్రభుత్వం.. మరి ప్రభుత్వ భూములు మావి కాకుండా పోతాయా? అన్నట్లు చెలరేగిపోయారు. అంతటితో ఆగకుండా అవే కబ్జా భూములను బినామీల ద్వారా బ్యాంకుల్లో పెట్టి కోట్లాది రూపాయలు రుణాలుగా పొందారు. ఇలా ఒకటా రెండా.. రాష్ట్రంలో పచ్చ నేతల విపరీత చర్యలు ప్రజలకు తీవ్ర వేదన మిగిలిస్తున్నాయి. ఈ నేపథ్యంలో అన్ని జిల్లాల్లో అధికార పార్టీ నేతలు సాగిస్తున్న కబ్జాకాండపై ‘సాక్షి’ ప్రత్యేక కథనం...  1 సిక్కోలు గ్రానైట్‌ కొండను తవ్వేసిన ‘కళా’ బంధువు శ్రీకాకుళం జిల్లాలో మంత్రి కిమిడి కళా వెంకట్రావు బంధువుల చేతిలో ఒక గ్రానైట్‌ కొండే చిక్కుకుంది. వంగర మండలంలో మడ్డువలస సాగునీటి ప్రాజెక్టుకు ఆనుకొని ఇది ఉంది. కళా వెంకట్రావు మరదలు, చీపురుపల్లి ఎమ్మెల్యే కిమిడి మృణాళిని మంత్రి పదవిలో ఉన్నప్పుడు ఏడాదిన్నర క్రితం ఈ కొండ ప్రాంతంలో అక్రమంగా కొంతమంది తవ్వకాలు చేపట్టారు. కిమిడి కుటుంబానికి సమీప బంధువైన కిమిడి సీతబాబు ఈ తవ్వకాల వెనుక ఉన్నట్టు విమర్శలున్నాయి. వాస్తవానికి వంగర మండలం పటువర్థనం గ్రామ పంచాయతీ పరిధిలో ఓ కొండను వారు గ్రానైట్‌ తవ్వకాల కోసం లీజుకు తీసుకున్నారు. కానీ అక్కడకాకుండా మడ్డువలస గ్రామానికి, ప్రాజెక్టుకు సమీపంలో ఉన్న పాండవుల కొండపై తవ్వకాలు మొదలెట్టారు. సుమారు ఐదెకరాల విస్తీర్ణం కలిగిన ఈ కొండ ప్రాంతంలో తవ్వకాల గురించి ‘సాక్షి’ 2016 నవంబర్‌లోనే కథనాలు రాసింది. దీంతో మైనింగ్‌ అధికారులు స్పందించి ఆ క్వారీని సీజ్‌ చేశారు. కానీ కొండ మాత్రం కిమిడి కుటుంబీకుల గుప్పెట్లోనే ఉంది. ఇక్కడున్న గ్రానైట్‌ విలువ దాదాపు రూ.10 కోట్ల వరకూ ఉంటుందని అంచనా. మరో విషయం ఏమిటంటే.. ఈ కొండను సీజ్‌ చేసిన సమయంలో 60 వరకూ గ్రానైట్‌ బండలు ఉండేవి. ప్రస్తుతం రెండు, మూడు మాత్రమే ఉన్నాయంటే మిగతావన్నీ ఏమైపోయాయో అర్థం చేసుకోవచ్చు. అదేవిధంగా కళా వెంకట్రావు ప్రాతినిధ్యం వహిస్తున్న ఎచ్చెర్ల నియోజకవర్గంలోని కొవ్వాడ అణు విద్యుత్‌ ప్లాంట్‌ నిర్మాణం కోసం పెద్ద ఎత్తున భూసేకరణ జరుగుతోంది. ఈ నియోజకవర్గంలో టీడీపీ నాయకులు బినామీ పేర్లతో దాదాపు రూ.9 కోట్ల వరకూ పరిహారం కాజేశారు. దాదాపు వంద ఎకరాల ప్రభుత్వ భూమికి దొడ్డిదారిలో పట్టాలు సృష్టించి మార్గం సుగమం చేసుకున్నారు. ఈ వ్యవహారంలో గొర్లె విజయ్‌కుమార్, గొర్లె లక్ష్మణరావు, కలిశెట్టి సహదేవుడు పేర్లు ప్రధానంగా వినిపిస్తున్నాయి. ఎచ్చెర్ల మండలంలోనే ఎస్‌ఎం పురం కొండ ప్రాంతంలో శ్రీకాకుళం జెడ్పీ చైర్‌పర్సన్‌ చౌదరి ధనలక్ష్మి, టీడీపీ జిల్లా మాజీ అధ్యక్షుడు చౌదరి బాబ్జీ దంపతుల కుమారుడు అవినాష్‌ రూ.5 కోట్ల విలువైన ప్రభుత్వ భూమిని ఆక్రమించడానికి రంగం సిద్ధం చేశాడని విమర్శలు వ్యక్తమవుతున్నాయి. ఇక జిల్లాకు చెందిన మరో మంత్రి కింజరాపు అచ్చెన్నాయుడు ప్రాతినిధ్యం వహిస్తున్న టెక్కలి నియోజకవర్గంలోనూ మొత్తం 38 ఎకరాల వరకూ ప్రభుత్వ భూమి టీడీపీ నాయకుల ఆక్రమణలో ఉంది. వాటి విలువ సుమారు రూ.2 కోట్ల వరకూ ఉంటుంది.   2 తూర్పుగోదావరి హద్దే లేని పచ్చ నేతల భూదందా  తూర్పు గోదావరి జిల్లాలో కాకినాడ సిటీ ఎమ్మెల్యే వనమాడి కొండబాబు భూ కబ్జాలతో రెచ్చిపోతున్నారనే ఆరోపణలున్నాయి. కాకినాడకు సమీపంలోని తూరంగిలో సర్వే నంబర్‌ 231లో తన బంధువుల పేరిట ఉన్న 47 ఎకరాలను ఆనుకుని ఉన్న రూ.5 కోట్ల విలువైన భూమిని కబ్జా చేసేందుకు విశ్వప్రయత్నం చేస్తున్నారు. ఆకుల గోపయ్య ఎడ్యుకేషనల్‌ సొసైటీ సంస్థ అనకాపల్లి సెటిల్‌మెంట్‌ కోర్టు ద్వారా న్యాయపరంగా కొనుగోలు చేసిన స్థలం తనదేనంటూ ఎమ్మెల్యే తన స్వాధీనంలోకి తెచ్చుకునేందుకు అధికారాన్ని అడ్డుపెట్టి చేయని ప్రయత్నం లేదు. అదే సంస్థకు చెందిన 230/2 సర్వే నంబర్‌లోని మరో స్థలాన్ని కూడా సర్వే నంబర్లు మార్చి అనుచరుల పేరిట కట్టబెట్టేశారు. ఇక.. మహాలక్ష్మినగర్‌ ప్రాంతంలో ప్రభుత్వ నిధులతో నిర్మించిన రహదారి స్థలం తనదంటూ అల్లరి మూకలతో వెళ్లి పొక్లెయిన్‌తో తవ్వించేసిన వ్యవహారంపై ఎమ్మెల్యే వనమాడి సోదరుడు సత్యనారాయణ, ఆయన కుమారుడు, కార్పొరేటర్‌ వనమాడి ఉమాశంకర్‌పై కలెక్టర్‌ కార్తికేయ మిశ్రా ఆదేశాలతో పోలీసు కేసు కూడా నమోదవగా ప్రభుత్వ పెద్దల ఒత్తిడితో కేసును నీరుగార్చేశారు. ఇక కొవ్వూరు రోడ్డులోని మూడెకరాల అసైన్డ్‌ భూమి విషయంలో కూడా లబ్ధిదారులపై ఒత్తిడి తెచ్చి ఎకరం స్థలాన్ని స్వాహా చేసి ఇళ్ల స్థలాలుగా అమ్మేసినట్టు ఆరోపణలు ఉన్నాయి. రాజమహేంద్రవరం రూరల్‌ మండలం పరిధిలో ఉన్న కోరుకొండ లక్ష్మీనరసింహ స్వామికి చెందిన 3.73 ఎకరాల భూమి సైతం ఆక్రమణల జాబితాలో చేరిపోయింది. అలాగే కడియం మండలం వేమగిరి పంచాయితీ పరిధిలో 172 సర్వే నెంబర్‌లో 80 సెంట్ల ప్రభుత్వ భూమిని తన సొంత భూమిగా చెప్పుకుని అధికార పార్టీ నేత ఒకరు గ్రావెల్‌ తవ్వకాలు సాగించారు. ఇక తుని నియోజకవర్గం తొండంగి మండలం పి.అగ్రహారంలో ఉత్తరాది మఠం రామచంద్రస్వామికి 410 ఎకరాల భూమి ఉంది. అప్పట్లో సాగు చేసుకోవడానికి స్థానిక రైతులకు మఠం లీజుకు ఇచ్చింది. ఈ భూములపై టీడీపీ నాయకుల దృష్టి పడింది. దీంతో రెవెన్యూ అధికారులకు ముడుపులు చెల్లించి రైతులకు చెందిన భూములను తమ కుటుంబ సభ్యుల పేరిట నమోదు చేసేసుకున్నారు. తొండంగి మండలం పి.అగ్రహారం పంచాయతీ పరిధిలో సర్వే నంబర్‌ 31, 32, 33 నుంచి 59 వరకు ఉన్న 410 ఎకరాల్లో సుమారు 80 ఎకరాలను టీడీపీ మండల పార్టీ అధ్యక్షుడు, అన్నవరం దేవస్థానం ధర్మకర్త యడ్ల భేతాళుడు, టీడీపీ వాణిజ్య విభాగం మండల ఉపాధ్యక్షుడు సిద్దా ముత్యాలు కుటుంబ సభ్యుల పేర్లతో ఆన్‌లైన్‌లో నమోదు చేసుకున్నారు. మార్కెట్‌ ధర ప్రకారం భూముల విలువ రూ.25 కోట్ల పైనే ఉంటుంది. సర్వే నంబర్‌ 33/1, 33/2లో సిద్ధా ముత్యాలు భార్య గంగా భవాని 16.50 ఎకరాలు, సర్వే నంబర్‌ 33/3, 33/4లో సిద్ధా అచ్చియ్యమ్మ 42 ఎకరాలు, సిద్ధా ముత్యాలు ఏడెకరాలు కబ్జా చేశారు. సర్వే నంబర్‌ 33/1, 31/591లో యడ్ల  భేతాళుడు 8 ఎకరాలు, యడ్ల శ్రీనివాసరావు 4, గెడ్డం శ్రీకాంత్‌ 6 ఎకరాలను స్వాధీనం చేసుకున్నారు.   3 విజయ నగరం భూబకాసురులు విజయనగరం జిల్లా టీడీపీ అధ్యక్షుడి నుంచి అందరూ భూములు ఆక్రమించడంలో ఆరితేరిపోయారు. విజయనగరం, పూసపాటిరేగ, సాలూరు, నెల్లిమర్ల, చీపురుపల్లి, బొబ్బిలి ప్రాంతాల్లో పేదల భూములు, గిరిజనుల భూములతోపాటు చేపల చెరువులు, కొండలు కూడా ఆక్రమించేశారు. వాటిలో తోటలు వేసి దర్జాగా సాగుచేసుకుంటున్నారు. విజయనగరం పట్టణ శివారు ప్రాంతం బొబ్బాదిపేట మండల పరిధిలో సర్వే నెంబర్‌ 4/3లోని 5 ఎకరాల స్థలంలో ఎటువంటి అనుమతులు లేకుండా లే అవుట్‌ వేశారు. ఈ ప్రాంతం విజయనగరం మున్సిపాలిటీలో విలీనమై.. ప్రస్తుతం 26వ వార్డు పరిధిలో ఉంది. ఈ ప్రాంతంలో గజం స్థలం ధర రూ.10 వేల నుంచి రూ.15 వేల వరకు పలుకుతోంది. ఇప్పటికీ లేఅవుట్‌ను క్రమబద్ధీకరించుకోని స్థల యజమానులు అడ్డదారిలో అమ్మకాలు చేపట్టేందుకు రంగం సిద్ధం చేస్తున్నారు. ఇందుకోసం అధికార పార్టీకి చెందిన స్థానిక కౌన్సిలర్‌తో బేరం కుదుర్చుకున్నారు. లేఅవుట్‌ పక్కగుండా వెళ్లే 60 అడుగుల ఎర్రవాని చెరువు కాలువలో సింహభాగం ఆక్రమించేశారు. అంతటితో ఆగకుండా రెవెన్యూ యంత్రాంగం, మున్సిపాలిటీ అనుమతులు లేకుండానే నిబంధనలకు విరుద్ధంగా లేఅవుట్‌కి వెళ్లి వచ్చేందుకు రెండు రహదారులను నిర్మించేస్తున్నారు. ఎర్రవాని చెరువు ఆయకట్టు రైతులు ప్రతిఘటించటంతో స్థానిక కౌన్సిలర్‌ రంగంలోకి దిగి బెదిరింపులకు పాల్పడ్డారు. దీనిపై స్థానికులు కలెక్టరేట్‌ గ్రీవెన్స్‌సెల్‌లో ఫిర్యాదు చేస్తే రెవెన్యూ యంత్రాంగం వచ్చి లేఅవుట్‌కు సరిహద్దులు వేసి వెళ్లగా వాటిని అక్రమార్కులు యథేచ్చగా మార్చేసి విక్రయాలకు సిద్ధమవుతున్నారు. పార్వతీపురంలో వరహాలగెడ్డ పోరంబోకు సుమారు రెండెకరాలను ఒక రియల్‌ ఎస్టేట్‌ వ్యాపారి ఆక్రమించాడు. గెడ్డ ప్రవాహ దిశను మార్చి రూ.2 కోట్లు విలువ చేసే స్థలాన్ని రియల్‌ ఎస్టేట్‌లో కలుపుకున్నాడు. అలాగే పార్వతీపురం నడిబొడ్డున ప్రవహిస్తున్న వరహాలగెడ్డను ఆక్రమించి ఎమ్మెల్సీ ద్వారపురెడ్డి జగదీష్‌ నివాస గృహాన్ని నిర్మిస్తున్నా అధికారులు చోద్యం చూస్తున్నారు. సుమారు 20 సెంట్ల వరకు గెడ్డను ఆక్రమించి నిర్మాణం చేపడుతున్నారు. అలాగే, ఎమ్మెల్సీ సోదరుడు ద్వారపురెడ్డి రామ్మోహనరావు కూడా వరహాలగెడ్డలో సగం వరకు మట్టిని పోసి గెడ్డను చిన్న పిల్లకాలువలా తయారుచేశారు. చీపురుపల్లి మండలం కర్లాం గ్రామంలో సర్వే నంబర్‌ 383లో ఆరెకరాల ప్రభుత్వ భూమిని ఆ గ్రామ టీడీపీ ఎంపీటీసీ భర్త కెల్ల రామారావు తన ఆధీనంలో ఉంచుకుని సాగు చేసుకుంటున్నాడు. నెల్లిమర్లలో మండలపరిషత్‌ కార్యాలయాన్ని ఆనుకుని సర్వే నంబర్‌ 75లో 2.65 ఎకరాల ప్రభుత్వ భూమి ఉంది. దీని విలువ రూ.10 కోట్ల పైమాటే. కేంద్ర మాజీ మంత్రి పూసపాటి అశోక్‌ గజపతిరాజు చైర్మన్‌గా ఉన్న మాన్సాస్‌ ట్రస్టు ఈ భూమిని ఆక్రమించుకుని బోర్డులు సైతం ఏర్పాటు చేసింది. అలాగే నెల్లిమర్ల మండలం మల్యాడలో అదే గ్రామానికి చెందిన గేదెల సత్యం అనే టీడీపీ నేత ఏకంగా 1.65 ఎకరాల ప్రభుత్వ భూమిని ఆక్రమించుకున్నారు. ఆక్రమిత భూమి విలువ రూ.35 లక్షల పైనే. అలాగే పూసపాటిరేగ మండలం కొల్లాయివలసలో సుమారు 24 ఎకరాల డీపట్టా భూమిని విశాఖకు చెందిన చిట్టిరాజుతోపాటు టీడీపీ ప్రజాప్రతినిధి దర్జాగా ఆక్రమించుకున్నారు. పెదబత్తివలస రెవెన్యూ పరిధిలో దాదాపు 150 ఎకరాల డీ పట్టా భూములను అధికార పార్టీ నేతలు కబ్జా చేశారు. పెదబత్తివలస పరిధిలోని సర్వే నెంబర్‌ 1లో ఉప్పులాపుకొండ పరిధిలో గతంలో దళితులకు ఇచ్చిన సుమారు రూ.4 కోట్లు విలువైన 8 ఎకరాల డీ పట్టా భూమి వలిరెడ్డి శ్రీరాములు నాయుడు పేరుకు మారింది. నిరుపేదలకు ఇచ్చిన 18.50 ఎకరాల ప్రభుత్వ డీపట్టా భూములను జిల్లా టీడీపీ అధ్యక్షుడు మహంతి చిన్నంనాయుడు కాజేశారని స్థానికులు ఆరోపిస్తున్నారు. పూసపాటిరేగ మండలం కొల్లాయివలస రెవెన్యూ పరిధిలో సర్వే నంబర్‌ 12914పిలో 20 సెంట్లు, 12913సిలో 15.03 ఎకరాలు, 1303పిలో 0.30 సెంట్లు, 1236పిలో 3 ఎకరాలు ఆయన కబంధ హస్తాల్లో చిక్కుకోగా, ఆక్రమించిన భూములను తమ కుటుంబ సభ్యుల పేరిట కొబ్బరి, జామి తోటలును వేసి ఫలసాయం కూడా పొందుతున్నారు. పూసపాటిరేగ ఎంపీపీగా ఆయనే కొనసాగుతుండటంతో రెవెన్యూ అధికారులు సైతం ఆయన ఆక్రమించిన భూముల వైపు కనీసం కన్నెత్తి చూడటానికి కూడా సాహసించలేకపోతున్నారు. సాలూరు మాజీ ఎమ్మెల్యే ఆర్‌పీ భంజ్‌దేవ్, ఆయన సోదరుడు ఏపీ భంజ్‌దేవ్‌ 40 ఎకరాల ప్రభుత్వ, గ్రామదేవత భూముల్లో చేపల చెరువు ఏర్పాటు చేశారు. ఆర్‌పీ భంజ్‌దేవ్‌ 25 ఎకరాల ప్రభుత్వ భూమిని ఆక్రమించుకుని చేపలచెరువు సాగుచేస్తున్నట్టు రెవెన్యూ రికార్డులే ఉన్నాయి. ఆర్‌పీ భంజ్‌దేవ్‌ విశ్వనాథపురం రెవెన్యూ పరిధిలోని సర్వే నంబర్‌ 142లో 15 ఎకరాల భూమిలో చేపల చెరువు నిర్మాణానికి దరఖాస్తు చేస్తే, భంజ్‌దేవ్‌ తమ్ముడైన ఏపీ భంజ్‌దేవ్‌ కూడా అదే సర్వే నంబర్‌ భూమిలో మరో 10 ఎకరాల 46 సెంట్ల భూమిలో చేపల చెరువుకు దరఖాస్తు చేశారు. 2015 నుంచి చేపలసాగు చేస్తున్నారు. అయితే ఆ రెండు సర్వే నంబర్లలోని 25 ఎకరాల భూమి ప్రభుత్వానిదని రెవెన్యూ వెబ్‌ల్యాండ్‌ స్పష్టం చేస్తోంది. ఏపీ భంజ్‌దేవ్‌ సర్వే నంబర్‌ 121లో 6 ఎకరాల భూమిలో వ్యవసాయం చేస్తున్నారు. ఆ భూమి గ్రామదేవతకు చెందిన భూమిగా రెవెన్యూ అడంగల్‌లో నమోదై ఉండడం గమనార్హం.  4 విశాఖపట్నం కబ్జారాయుళ్ల ఖిల్లా..  టీడీపీ అధికారంలోకి వచ్చాక ప్రశాంతతకు నిలయమైన విశాఖ జిల్లా కబ్జారాయుళ్ల ఖిల్లాగా మారింది. మంత్రులు, ఎమ్మెల్యేలు, అధికార టీడీపీ నేతలు జిల్లాను చెరపట్టారు. ప్రభుత్వ, రెవెన్యూ, దేవాదాయ, ఇనాం, వక్ఫ్, అనాధీనం, అటవీ, ఎసైన్డ్‌ భూములే కాదు.. చివరకు ప్రైవేటు భూములను కూడా లిటిగేషన్‌లో పెట్టి మరీ కబ్జాలకు పాల్పడ్డారు. ప్రభుత్వ భూములను, బలహీనవర్గాల ఇళ్ల స్థలాల కోసం కేటాయించిన భూములను, జాతీయ రహదారికి ఇచ్చిన భూములను కుదవపెట్టి వందల కోట్ల రుణాలు కొల్లగొట్టి ఆపై బ్యాంకులకు ఎగనామం పెట్టారు. గత మూడేళ్లుగా ‘సాక్షి’ వెలుగులోకి తీసుకొచ్చిన కథనాల నేపథ్యంలో ప్రభుత్వం సిట్‌ ఏర్పాటు చేసింది. కానీ దర్యాప్తు నివేదిక మాత్రం ఇంతవరకు వెలుగు చూడలేదు. అనకాపల్లి టీడీపీ ఎమ్మెల్యే పీలా గోవింద్, ఆయన కుటుంబ సభ్యులకు భూముల రికార్డుల ట్యాంపరింగ్‌లో సహకరించిన తహశీల్దార్లు బీవీ రామారావు, శంకర్రావులతోపాటు ఇన్‌స్పెక్టర్‌ ఆఫ్‌ సర్వేయర్‌ గణేశ్వరరావులపై కేసులు నమోదయ్యాయి. ఈ రికార్డుల ట్యాంపరింగ్‌ కుంభకోణంలో ఎమ్మెల్యే, ఆయన కుటుంబ సభ్యులు తప్పించుకోగా మిగిలినవారంతా కటకటాలపాలయ్యారు. విశాఖ ఆర్డీవో వెంకటేశ్వర్లు సస్పెండ్‌ అయ్యారు. మాజీ సైనికులు, స్వాతంత్ర సమరయోధులు, రాజకీయ బాధితుల పేరిట జిల్లాలో గత పదిహేనేళ్లలో పంపిణీ చేసిన 312 ఎకరాల్లో సుమారు 250 ఎకరాలను నకిలీ ఎన్‌వోసీలను అడ్డం పెట్టుకుని అనర్హులకు కేటాయింపులు జరిపారు. పేదలకు ఎసైన్‌ చేసిన భూముల్లో పెందుర్తి మండలం ముదపాక, నక్కపల్లి మండలం పెదగొడ్డుపల్లిలో 700 ఎకరాలను చంద్రబాబు తనయుడు నారా లోకేశ్‌.. ఒక జిల్లా మంత్రి తనయుడు, ఓ ఎమ్మెల్యేతో కలిసి కాజేసేందుకు పక్కా స్కెచ్‌ వేసి సర్వే చేయిస్తున్నారనే ఆరోపణలున్నాయి. ముదపాకలో 350 ఎకరాల భూములకు చెందిన పట్టాదార్‌ పాస్‌పుస్తకాలు, టైటిల్‌ డీడ్స్‌ను ఎకరాకు రూ.50 వేలు అడ్వాన్స్‌ ఇచ్చి కాజేసేందుకు యత్నించారు. మంత్రి గంటా శ్రీనివాసరావు సమీప బంధువైన పరుచూరి భాస్కరరావు పద్మనాభం మండలం కృష్ణాపురంలో 20 ఎకరాల డీపట్టా భూములతోపాటు ఆనందపురంలో 11.34 ఎకరాల ప్రభుత్వ భూములను చక్కబెట్టేశారు. గంటా అనుచరుడు కాశీవిశ్వనాథ్‌ భీమిలిలో ఎస్సీలకు ఇచ్చిన 50 ఎకరాల అసైన్డ్‌ భూములను కారుచౌకగా కొట్టేశాడు. మరో అనుచరుడు ఎన్‌.స్వామి సర్వే నెం.294లో 3.76 ఎకరాలు, సర్వే నెం.294/2లో 4.40 ఎకరాలు ఆక్రమించుకుని షెడ్లు వేయిస్తున్నాడు. పద్మనాభం మండల టీడీపీ అధ్యక్షుడు సూరిశెట్టి అప్పారావు నకిలీ డాక్యుమెంట్లు పుట్టించి 130 ఎకరాల ఇనాం భూములను స్వాహా చేసేశాడు. అనకాపల్లి ఆవకండంలో 55 ఎకరాల భూమిని వ్యవసాయేతర భూమిగా మార్చి రియల్‌ ఎస్టేట్‌ వెంచర్‌ వేశారు. దీని వెనుక అనకాపల్లి ఎమ్మెల్యే పీలా గోవింద్‌ ఉన్నారని చెబుతున్నారు. అనకాపల్లి మండలం శారదా కాలనీలో చిన్నంనాయుడు అనే దివ్యాంగుడికి చెందిన 1.12 ఎకరాల స్థలాన్ని వివాదంలో పడేశారు. న్యాయం చేయాలని కోరితే రూ.8 కోట్ల విలువైన ఆ భూమిని కేవలం రూ.1.50 కోట్లకు సొంతం చేసుకున్నారు. కనీసం ఆ మొత్తం కూడా ఇవ్వకుండా బా«ధితుడ్ని మూడేళ్లుగా తిప్పించుకోవడంతోపాటు బెదిరింపులకు సైతం పాల్పడుతున్నారు. భీమిలి బీచ్‌ రోడ్‌లో రామానాయుడు స్టూడియో దిగువన మాజీ సైనికులకు చెందిన 10 ఎకరాల స్థలాన్ని విజయనగరం టీడీపీ ఎమ్మెల్యే మీసాల గీత భర్త శ్రీనివాసరావు, మంత్రి గంటా అల్లుడి పేర్లతో కబ్జా చేయడానికి ప్రయత్నాలు సాగుతూనే ఉన్నాయి.  5 పశ్చిమ గోదావరి ఖాళీ జాగా కనిపిస్తే..   పశ్చిమ గోదావరిలో ప్రభుత్వ భూములపై అధికార పార్టీ నేతల కన్ను పడింది. ఇసుక, మట్టి దందాల్లో రాష్ట్రంలోనే ఆరితేరిన అధికార పార్టీ నేతలు ఖాళీ స్థలాలను కూడా వదలడం లేదు. ఎమ్మెల్యేలు మొదలుకుని జెడ్పీటీసీలు, ఎంపీటీసీలు, టీడీపీ గ్రామ అధ్యక్షులు, సర్పంచ్‌లు, చివరకు జన్మభూమి కమిటీ సభ్యులు కూడా తమ పదవులను అడ్డుపెట్టుకుని అధికారం అండతో భూములను ఆక్రమించేస్తున్నారు. ఉంగుటూరు ఎమ్మెల్యే గన్ని వీరాంజనేయులు కన్ను ఉంగుటూరు మండలం గోపీనాథపట్నం చెరువుపై పడింది. పోలవరం కాలువ తవ్వినప్పుడు వచ్చిన మట్టితో ఈ చెరువును పూడ్చేశారు. కోట్ల రూపాయల విలువ చేసే రెండు ఎకరాల 76 సెంట్ల వ్యవసాయ భూమికి తప్పుడు డాక్యుమెంట్లు సృష్టించి దాన్ని ఒక పేద దళిత వ్యవసాయ కూలీ కొన్నట్లుగా రిజిస్ట్రేషన్‌ చేయించారు. అప్పటికే ఈ పొలాన్ని సాగు చేసుకుంటున్న రైతులపై ఎస్సీ ఎస్టీ కేసులు పెట్టించి వేధించారు. బినామీ పేర్లతో ఉన్నా ఇప్పటికీ ఎమ్మెల్యే చేతిలోనే ఈ భూమి ఉంది. చింతలపూడి మండలంలో ప్రభుత్వ విప్‌ చింతమనేని ప్రభాకర్‌ దెందులూరుకు చెందిన ఒక సామాజికవర్గం వారి బినామీ పేర్లతో 125 ఎకరాల భూమిని కొనుగోలు చేశారు. అందులో కొంత అటవీ శాఖ భూమిని కూడా కలిపేసుకున్నారు. ఏలూరు శివారులోని వెంకటాపురం వార్డు సభ్యుడు సుంకరవారితోటలోని చెరువు భూమిని కబ్జా చేశారు. విశాలమైన చెరువు గట్టును ప్లాట్లుగా విభజించి అమ్ముకున్నారు. ఏలూరు వినాయక్‌నగర్‌లో కామన్‌సైట్‌ను ఆక్రమించి భవనాలు నిర్మించి ఇతరులకు అమ్మి సొమ్ము చేసుకున్నారు. ఎన్టీఆర్‌ కాలనీ ఎంపీటీసీ స్థానిక కొత్తూరు ఇందిరా కాలనీ, సుందరయ్య కాలనీల్లో ఖాళీ భూములను ఆక్రమించారు. తప్పుడు సర్టిఫికెట్లు సృష్టించి ఒక్కొక్క ప్లాట్‌ను రూ. లక్ష నుంచి రూ.1.50 లక్షలకు అమ్ముకున్నారు. శనివారపుపేట శ్రీరామ్‌నగర్‌ 9, 10, 11 రోడ్డుల్లో రెవెన్యూ పోరంబోకు భూములను స్థానిక ప్రజాప్రతినిధి అనుచరులు కబ్జా చేసి తప్పుడు డాక్యుమెంట్లు సృష్టించారు. తంగెళ్లమూడి బీడీ కాలనీ, నల్లగట్టు ప్రాంతాల్లో రెవెన్యూ భూములను గ్రామ టీడీపీ నాయకులు ముక్కలు చేసుకుని పంచేసుకున్నారు. వెంకటాపురం ఎంపీటీసీ, జూనియర్‌ ఎన్టీఆర్‌ అభిమాన సంఘం నాయకుడొకరు కలసి ఏళ్ల తరబడి ఖాళీగా ఉన్న ఓ ప్రైవేటు వ్యక్తి భూమిని కబ్జా చేశారు. ఏలూరు శివారులో సుమారు 25 ఎకరాల విస్తీర్ణంలోని ప్రభుత్వ భూములు ఆక్రమణకు గురయ్యాయి.   6 కృష్ణా  శ్మశాన వాటికలూ మాయం కృష్ణా జిల్లాలో అధికార పార్టీ నేతలు శ్మశాన వాటికలనూ వదల్లేదు. జిల్లా ముఖ్య కేంద్రం మచిలీపట్నం బైపాస్‌ రోడ్డులో గోపాల్‌నగర్‌ ప్రాంతంలో సర్వే నెంబర్‌ 185లో 10.84 ఎకరాల్లో హిందూ శ్మశాన వాటికను ఏర్పాటు చేశారు. గతంలోనూ శ్మశాన వాటికను ఆక్రమించి నివాసాలు ఏర్పరుచుకోగా ఇటీవల రోడ్డు పక్కన ఉన్న విలువైన స్థలంలో ప్లాట్లు వేసి ముఖ్యమంత్రి అనుచరుడు, టీడీపీ ప్రజాప్రతినిధులు లక్షలాది రూపాయలకు విక్రయించారనే ఆరోపణలు ఉన్నాయి. ఈ విషయం పత్రికల్లో ప్రచురితం కావడంతో జిల్లా కలెక్టర్‌ బి.లక్ష్మీకాంతం స్పందించి దీనిపై విచారణకు ఆదేశించారు. అనంతరం ఆక్రమణదారులు కోర్టును ఆశ్రయించడంతో ఈ వ్యవహారం అలానే ఉండిపోయింది. ప్రస్తుతం ఈ భూమి విలువ రూ.36 కోట్లు ఉంది. కృష్ణా – పశ్చిమ గోదావరి జిల్లాల సరిహద్దులో ఉన్న కొల్లేరు సరస్సులోకి రెండు జిల్లాల నుంచి చేరే నీరు సముద్రంలోకి వెళ్లడానికి ఏకైక మార్గం ఉప్పుటేరు. గతంలో కలిదిండి మండలంలో ఉప్పుటేరు సమీపంలో సర్వే నెంబర్‌ 42లో ఉన్న డ్రెయినేజీ భూములను సమీప రైతులకు లీజు పద్ధతిలో ఇరిగేషన్‌ శాఖ అధికారులు కేటాయించేవారు. అయితే ఉప్పుటేరులో డ్రెజ్జింగ్‌ పనులు చేసే క్రమంలో స్థలం అవసరం కావడంతో భూములను లీజుకు ఇవ్వలేదు. అయితే టీడీపీ నేత నంబూరి లచ్చిరాజు అనే వ్యక్తి ఈ భూముల్లో 9 ఎకరాల్లో ఆక్వా సాగు చేస్తున్నాడు. ఈ తొమ్మిది ఎకరాల విలువ దాదాపు రూ. 2 కోట్లు ఉంటుంది. హనుమాన్‌ జంక్షన్‌ రూరల్‌ మండలంలోని కోడూరుపాడులో సర్వేనెంబర్‌ 133లో 44.60 ఎకరాల్లో పెద్దికుంట చెరువు ఉండగా, అందులో 40 ఎకరాలకు పైగా ఆక్రమణకు గురైంది. దీన్ని గ్రామానికి చెందిన టీడీపీ నేత షేక్‌ ఖలీషా ఆక్రమించుకున్నాడని గ్రామస్తులు అంటున్నారు. అతనికి మంత్రులు, ఎమ్మెల్యే అండగా ఉండడంతో అధికారులు సైతం నోరు మెదపడం లేదు. సదరు నాయకుడు చెరువు భూమిని ఆక్రమించి పక్కాభవనం నిర్మించినా అధికార యంత్రాంగం చోద్యం చూస్తోంది.  బెజవాడలో బొండా మాయాజాలం  విజయవాడ సింగ్‌నగర్‌లో స్వాతంత్య్ర సమరయోధుడు కేసీరెడ్డి సూర్యనారాయణ కుటుంబానికి 5.16 ఎకరాల భూమి ఉంది. దీని విలువ రూ.50 కోట్లు. కాగా, టీడీపీ కార్పొరేటర్‌ గండూరి మహేష్‌ ఓ వ్యక్తికి రుణం ఇప్పిస్తానని చెప్పి సంతకాలు సేకరించారు. అలా సేకరించిన సంతకాలతో స్వాతంత్య్ర సమరయోధుడి భూమిని ఏకంగా తన పేరిట రిజిస్ట్రేషన్‌ చేయించారు. అనంతరం విజయవాడ సెంట్రల్‌ టీడీపీ ఎమ్మెల్యే బొండా ఉమామహేశ్వరరావు భార్య సుజాత పేర రిజిస్ట్రేషన్‌ చేయించేశారు. ఇందులో కార్పొరేటర్‌ గండూరు మహేష్, ఎమ్మెల్యే అనుచరుడు మాగంటి బాబు పాత్ర ఉన్నట్లు సీఐడీ నిర్ధారించింది. ఈ భూకబ్జా వ్యవహారంలో ఎమ్మెల్యే సతీమణి బొండా సుజాతను ఏ8గా చేర్చి సీఐడీ కేసు నమోదు చేసింది.   7 గుంటూరు  కన్నుపడితే కబ్జానే.. గుంటూరు జిల్లాలో టీడీపీ నాయకులు యథేచ్ఛగా భూకబ్జాలకు పాల్పడుతున్నారు. రెవెన్యూ, పోలీసు అధికారుల అండతో కనిపించిన స్థలాన్నల్లా కబ్జా చేసేస్తున్నారు. గుంటూరు నడిబొడ్డున నగరపాలక సంస్థకు చెందిన అతి విలువైన స్థలాన్ని ఆక్రమించి అధికార టీడీపీ రాష్ట్ర కార్యాలయాన్ని నిర్మించింది. 1999లో జిల్లా పార్టీ కార్యాలయాన్ని నిర్మించారు. అప్పట్లో అరండల్‌పేటలోని పిచుకులగుంట పక్కన టీఎస్‌ నంబర్‌ 826లో నగరపాలక సంస్థకు చెందిన వెయ్యి గజాల స్థలాన్ని లీజుకు తీసుకున్నారు. కొన్నాళ్లు తర్వాత దీనిపక్కనే ఉన్న సర్వే నంబర్‌ 12/3లో మరో 1637 చదరపు గజాల స్థలాన్ని ఆక్రమించి చుట్టు ప్రహరీ నిర్మించారు. మార్కెట్‌ ధర ప్రకారం.. టీడీపీ కార్యాలయం కోసం ఆక్రమించిన స్థలం విలువ సుమారుగా రూ.40 కోట్లు. రేపల్లె నియోజకవర్గంలో ఎమ్మెల్యే అనగాని సత్యప్రసాద్‌ అనుచరుడు సురేంద్రబాబు ప్రభుత్వ భూమిని తన సొంత భూమిగా 1బీ అడంగళ్లులో నమోదు చేయించుకున్నారు. నిజాంపట్నం మండలం దిండి, కేసనవారిపాలెం, జంపనివారిపాలెం, యామినేనివారిపాలెం, పరిశావారిపాలెం, నర్రా వారిపాలెం, నక్షత్రనగరం గ్రామాల పరిధిలోని 875 సర్వే నంబర్‌లో 416.26 ఎకరాల ప్రభుత్వ భూమి ఉంది. ఈ భూమిని చెరపట్టి తమకు అనుకూలురైన టీడీపీ నేతలు, కార్యకర్తల పేరిట రికార్డుల్లో నమోదుచేశారు. చింతలరేవులో 583 సర్వే నంబర్‌లో ఉన్న 15.13 ఎకరాల అటవీ భూమిని అధికార పార్టీకి చెందిన ఆరుగురికి అక్కడి తహసీల్దారు రాసిచ్చేశారు. ’సాక్షి’లో 2014, డిసెంబర్‌ 3న అక్రమ పట్టాలు పొందిన అంశంపై వచ్చిన కథనంతో ఉలిక్కిపడ్డ అధికార యంత్రాంగం తప్పును సరిచేసుకుంటూ అక్రమంగా అటవీ భూములకు ఇచ్చిన పట్టాలను రద్దు చేస్తున్నట్లు ప్రకటించింది. అదేవిధంగా సత్తెనపల్లిలో వడ్డవల్లి రఘురామ్‌నగర్‌లోని వేణుగోపాలస్వామి దేవాలయానికి చెందిన సర్వీసుదారుల మాన్యం భూమి 25 సెంట్లలో అధికార పార్టీ ముఖ్యనేతకు ఓ కాంట్రాక్టర్‌ విలాసవంతమైన ఇల్లు నిర్మించి ఇచ్చాడు. ఇది సర్వీసుదారుల మాన్యం అని తెలిసినా అధికారులు ఎవరూ అడ్డు చెప్పలేని దుస్థితి. వ్యవసాయ అనుబంధ పాడిపరిశ్రమను అభివృద్ధి చేయాలనే లక్ష్యంతో అప్పట్లో సంగం డెయిరీని ఏర్పాటు చేస్తే దానికి సంబంధించిన పది ఎకరాల భూమిని ధూళిపాళ్ల వీరయ్యచౌదరి మెమోరియల్‌ ట్రస్టుకు స్థానిక ఎమ్మెల్యే ధూళిపాళ్ల నరేంద్ర అప్పగించి సొంతం చేసుకున్నారనే ఆరోపణలు ఉన్నాయి. పెదకాకాని మండలం నంబూరులో సర్వే నంబర్‌ 274లోని 3.89 ఎకరాల భూమి (వాగు పోరంబోకు)ని ఎమ్మెల్యే అనుచరుడు కట్టాపుల్లయ్య చౌదరి ముగ్గురు పేర్లతో జీపీ విక్రయం జరిపి సొంతం చేసుకున్నారు. ఇవి మచ్చుకు కొన్ని మాత్రమే. అధికార పార్టీకి చెందిన గ్రామస్థాయి నేత నుంచి ఎమ్మెల్యే, మంత్రులు సైతం తమ అధికారాన్ని అడ్డుపెట్టుకుని భూ కబ్జాలకు పాల్పడుతున్న సంఘటనలు అనేకం ఉన్నాయి. ప్రభుత్వ భూములను ఆక్రమించినా అధికారులు అడ్డుచెప్పలేని పరిస్థితి. ప్రైవేటు భూములను ఆక్రమించారంటూ బాధితులు ఎన్నిసార్లు అధికారులకు మొరపెట్టుకున్నా పట్టించుకునే నాథుడే లేకుండా పోయారు. అడంగళ్‌లో పేర్లు మార్చడం, తర్వాత తమ అనుచరులతో భూమిలోకి దిగి చుట్టూ ఫెన్సింగ్‌లు వేయడం, అడ్డుకోవాలని వచ్చే బాధితులను పోలీసుల ద్వారా నిలువరించడం జిల్లాలో నిత్యం జరుగుతున్నదే. తమ భూమిని ఆక్రమించారని బాధితులు కోర్టులకు వెళ్లినా వారికి ఉన్నది ఉన్నట్లుగా రికార్డులు చూపే అధికారే కరువయ్యారు. 8 ప్రకాశం అన్నదాతల భూములు పచ్చ నేతల పాలు  ప్రకాశం జిల్లాలో ప్రభుత్వ, ప్రైవేటు భూములపై అధికార పార్టీ నేతలు గద్దల్లా వాలుతున్నారు. అధికారమే అండగా అక్రమంగా  భూములను వశం చేసుకుంటున్నారు. కొందరు నేతలు ప్రభుత్వ భూములపై కన్నేసి కబ్జా చేస్తే.. మరికొందరు పేద రైతుల భూములనూ వదలడం లేదు. అధికారులను మచ్చిక చేసుకుని కబ్జా చేసిన భూములను తమ పేరిట రిజిస్ట్రేషన్‌ చేయించుకుంటున్నారు. దీంతో బాధితులు తమ భూములు కోల్పోయి లబోదిబోమంటున్నారు.  యర్రగొండపాలెం నియోజకవర్గం  యర్రగొండపాలెం నియోజకవర్గం త్రిపురాంతకం మండలం నర్సింగాపురం రెవెన్యూ పరిధిలోని వెల్లంపల్లిలో 118 ఎకరాల రైతుల భూములను అధికార పార్టీ నేతలు తమ వశం చేసుకున్నారు. వివరాల్లోకెళ్తే.. వెల్లంపల్లి పరిధిలో 110, 11డి10, 11డి 5, 1డి7, 11డి9, 1సీడీ, 16,171, 173, 18, 1818, 1853, 1856, 1డీ2, 21, 211, 2111, 213బీ, 22, 221, 238, 232, 25, 2635, 2642, 264, 3, 301, 3010బీ, 305, 306, 31, 32, 34, 35, 351, 36, 85 సర్వే నెంబర్ల పరిధిలో 118 ఎకరాల శోత్రియం భూములు ఉన్నాయి. ఈ భూములు పి.లక్ష్మీనర్సింహారావు స్వాధీనంలో ఉన్నాయి. ఈ భూముల్లో 90 ఎకరాల భూములను 1980–90 మధ్య లేళ్లపల్లి, వెల్లంపల్లి గ్రామాలకు చెందిన 70 మంది రైతులకు అమ్మి రిజిస్ట్రేషన్‌ చేశారు. అప్పటి నుంచి ఆ భూములను రైతులు సాగు చేసుకుంటున్నారు. ఏడాది క్రితం లక్ష్మీనర్సింహారావు కోడలు రమణకుమారి ఆ భూములు తమవేనని, ఆన్‌లైన్‌ చేయాలంటూ రెవెన్యూ కార్యాలయం చుట్టూ తిరిగింది. రైతుల పేరు మీద ఉన్న భూములను రమణ కుమారి పేరుమీద ఆన్‌లైన్‌ చేసేందుకు తొలుత రెవెన్యూ అధికారులు నిరాకరించారు. ఆ తర్వాత మొత్తం 118 ఎకరాల భూమిని అధికార పార్టీకి చెందిన ముఖ్యనేత రూ.50 లక్షలకు కొనుగోలు చేసినట్లు సమాచారం. ఆ భూములను తన పేర మీద రిజిస్ట్రేషన్‌ చేయించుకునేందుకు పథకం ప్రకారం ముందు రమణ కుమారి పేరున ఆన్‌లైన్‌లో నమోదు చేయించాలని నిర్ణయించారు.  ఇందుకు తొలుత త్రిపురాంతకం రెవెన్యూ అధికారులు సహకరించక పోవడంతో ఏకంగా రెవెన్యూ శాఖా మంత్రి పేషీ నుంచి జిల్లా కలెక్టర్, ఆర్డీవోకు ఫోన్‌ చేయించారు. ఒక దశలో రెవెన్యూ మంత్రి కలెక్టర్‌పై తీవ్ర ఒత్తిడి తెచ్చినట్లు తెలిసింది. జిల్లా కలెక్టర్, ఆర్డీవో ఆదేశాల మేరకు తహశీల్దార్‌ జైపాల్‌ 118 ఎకరాల భూమిని రమణ కుమారి పేరున ఆన్‌లైన్‌ చేశారు.  ఆ తర్వాత ఈ భూములను పశ్చిమ గోదావరి జిల్లా పెద్ద మీరం గ్రామానికి చెందిన సత్య కంపెనీ అధినేత వీరసత్యకు విజయవాడలో రిజిస్ట్రేషన్‌ చేశారు. విషయం తెలుసుకున్న బాధిత రైతులు తహశీల్దార్‌ కార్యాలయంతోపాటు జిల్లా కలెక్టర్, ఆర్డీవో కార్యాలయాల వద్ద గతంలో ఆందోళనలు సైతం నిర్వహించారు. ఆన్‌లైన్, రిజిస్ట్రేషన్‌ చేయడంపై బాధితులు తహశీల్దార్‌ను నిలదీయగా కలెక్టర్, ఆర్డీవోల ఒత్తిడి మేరకే తాను ఆన్‌లైన్‌ చేయాల్సి వచ్చిందని తహసీల్దార్‌ వారికి చెప్పారు. భూములు రిజిస్ట్రేషన్‌ చేసుకున్న కంపెనీ అధికార పార్టీ మంత్రి, ముఖ్యనేతకు బినామీగా ఉన్నట్లు సమాచారం. మరోవైపు రిజిస్ట్రేషన్‌ చేసుకున్న కంపెనీ.. భూములను ఆన్‌లైన్‌ చేసుకునే ప్రయత్నంలో ఉంది.    9 నెల్లూరు  అడ్డగోలుగా భూదందాలు శ్రీ పొట్టి శ్రీరాములు నెల్లూరు జిల్లాలో తెలుగు తమ్ముళ్లు ప్రభుత్వ భూములు, తీర ప్రాంతాలు, సీజేఎఫ్‌ భూములను అందిన మేరకు ఆక్రమించి రెవెన్యూ యంత్రాంగం సహకారంతో వాటికి పట్టాలు సృష్టిస్తున్నారు. కొందరు భూములను ఇతరులకు విక్రయించి సొమ్ము చేసుకుంటుండగా మరికొందరు సాగు చేసుకుంటున్నారు. ముఖ్యంగా నెల్లూరు నగరంలో జలవనరుల శాఖకు చెందిన పదుల సంఖ్యలో స్థలాలు అధికార పార్టీ నేతల కబంధ హస్తాల్లో చిక్కుకున్నాయి. జిల్లాలోని మిగిలిన ప్రాంతాల్లో కొన్ని చోట్ల ఎమ్మెల్యేలు, ఎమ్మెల్సీలే స్వయంగా రంగంలోకి దిగి భూములు ఆక్రమించి పట్టాలు సృష్టించగా మరికొన్ని చోట్ల మంత్రుల అనుచర గణం భూదందా సాగిస్తోంది. కోవూరు ఎమ్మెల్యే పోలంరెడ్డి శ్రీనివాసులురెడ్డి 21 ఎకరాల నిషేధిత ప్రభుత్వ భూమిని తన తండ్రి, అత్త పేరుతో నమోదు చేసేందుకు రికార్డులు సిద్ధం చేయించారు. ప్రస్తుతం ఈ భూమి విలువ కోట్ల రూపాయల్లో ఉంది.   ఎమ్మెల్యే పోలంరెడ్డి ఆక్రమణ ఇలా.. కోవూరు నియోజకవర్గంలోని కొడవలూరు మండలం కమ్మపాళెం పంచాయతీ బొడ్డువారిపాళెం మజరాలోని పైడేరు కట్ట పక్కన దాదాపు 200 ఎకరాల ప్రభుత్వ నిషిద్ధ భూమి ఉంది. ఇందులో 20.76 ఎకరాల భూమి కబ్జాకు గురైంది. సర్వే నంబర్‌ 664–2ఏలో 1.51 , 658–2ఏలో .500 , 651–1లో 7, 656–1ఏలో 1.55 , 664–2బీలో 0.40 సెంట్లు, 656–1బీలో 0.93, 664–1లో 1.90, 657–2లో 2.07, 656–3లో 2.13, 656–2లో 2.57 ఎకరాల నిషేధిత భూమి ఆక్రమణకు గురైంది. ప్రభుత్వ నిషేధిత భూమిని కబ్జా చేసింది సాక్షాత్తూ కోవూరు ఎమ్మెల్యే పోలంరెడ్డి శ్రీనివాసులు రెడ్డి తండ్రి పోలంరెడ్డి వెంకురెడ్డి, అత్త కోటంరెడ్డి పద్మావతి. ఆక్రమణ చేసిన భూమిలో 664–2ఏలో 1.51, 658–2ఏలో .500 , 651–1లో 7, 656–1ఏలో 1.55 ఎకరాల భూమి పోలంరెడ్డి శ్రీనివాసులు రెడ్డి తండ్రి వెంకురెడ్డి పేరిట రెవెన్యూ రికార్డుల్లో నమోదైంది. అలాగే 664–2బీలో 0.40 సెంట్లు, 656–1బీలో 0.93,  664–1లో 1.90, 657–2లో 2.07, 656–3లో 2.13, 656–2లో 2.57 ఎకరాల భూమి పోలంరెడ్డి శ్రీనివాసులురెడ్డి అత్త కోటంరెడ్డి పద్మావతమ్మ (భార్య పోలంరెడ్డి అరుణ తల్లి) పేరిట రెవెన్యూ రికార్డు 1బీలో నమోదు చేసి ఉంది. నిషేధిత భూమిని ఇరువురూ కొనుగోలు చేసినట్లుగా తహశీల్దార్‌ వెంకటేశ్వర్లు ధ్రువీకరిస్తూ ఈ ఏడాది ఏప్రిల్‌ 18న 1బీలో పొందుపరిచారు. భూమికి సంబంధించి పట్టాదారు పాసుపుస్తకాలను కూడా మంజూరు చేశారు. దీనిపై వైఎస్సార్‌ కాంగ్రెస్‌ పార్టీ రాష్ట్ర ప్రధాన కార్యదర్శి నల్లపరెడ్డి ప్రసన్నకుమార్‌ రెడ్డి న్యాయపోరాటం చేస్తున్నారు.  అలాగే ఆలూరు మండలం ఇసుకపల్లి పంచాయితీలోని పట్టపుపాలెంలో ఉన్న లబ్బీపాలెంలో టీడీపీ ఎమ్మెల్సీ బీదా రవిచంద్ర సోదరులు 30 ఎకరాల అసైన్డ్‌ భూమిని అక్రమించి ఆక్వా సాగు చేశారు. అలాగే జిల్లాలోని సూళ్లూరుపేట, కావలి, ఉదయగిరి, వెంకటగిరి, సర్వేపల్లి నియోజకవర్గాల్లోని పలు మండలాల్లో టీడీపీ నేతలు, వారి అనుచరులు కనిపించిన ఖాళీ స్థలాలను ఆక్రమించి పట్టాలు సృష్టిస్తున్నారు. ప్రస్తుతం జిల్లాలో దళితులకు కేటాయించిన 93,500 ఎకరాల సీజేఎఫ్‌ భూముల్లో 30 శాతానికిపైగా అధికార పార్టీ నేతల అధీనంలోనే ఉన్నాయి.   10 కర్నూలు యథేచ్ఛగా భూకబ్జాలు  కర్నూలు జిల్లా గోనెగండ్ల మండలంలో సర్వే నంబర్‌ 452, 106, 35, 114 సర్వే నంబర్లలోని 14 ఎకరాల ప్రభుత్వ భూములను గోనెగండ్ల మండల టీడీపీ మాజీ కన్వీనర్‌ టి.నాగేశ్వరరావు అలియాస్‌ టి.నాగేష్‌నాయుడు సహకార బ్యాంకులో తాకట్టు పెట్టి రుణాన్ని పొందాడు. ఈ విషయాన్ని పోలీసులు ఆలస్యంగా తెలుసుకొని కేసు నమోదు చేశారు. ఎమ్మిగనూరు షరాఫ్‌బజార్‌లో ఐదు దశాబ్దాల నాటి పోతురాజుస్వామి దేవాలయం ఉంది. ఈ దేవాలయానికి పట్టణ నడిబొడ్డున ఆదోని – కర్నూలు నాలుగు లైన్ల బైపాస్‌ రోడ్డుకు ఇరువైపులా 6.83 ఎకరాల భూమి ఉంది. ఇందులో 0.95 ఎకరాలు బైపాస్‌ రోడ్డు నిర్మాణంలో భాగంగా ఆర్‌ అండ్‌ బీ శాఖ స్వాధీనం చేసుకొని అందుకు పరిహారం కూడా అందజేసింది. దేవాలయానికి సంబంధించిన పరిహారం కావడంతో కోర్టులో డిపాజిట్‌ చేశారు. ప్రస్తుతం సర్వే నెం.4401లో 2.53 ఎకరాలు, 4403లో 3.35 ఎకరాల దేవాలయ భూమి మిగిలి ఉంది. ఈ భూమిని బారికి హనుమంతు, బారికి గోపాల్, బారికి భూపాల్, చిన్న గోపాల్‌ అనే వ్యక్తులు మూకుమ్మడిగా పవన్‌ డెవలపర్స్‌ అండ్‌ కన్‌స్ట్రక్షన్‌ తరఫున మేనేజింగ్‌ పార్టనర్‌ అయిన కేఈ ప్రతాప్‌కు అక్రమంగా రిజిస్ట్రేషన్‌ చేయించారు.  ముఖ్యంగా భూముల రిజిస్ట్రేషన్లకు పట్టాదారు టైటిల్‌ డీడీ, రెవెన్యూ అడంగల్, నాన్‌ అసైన్‌మెంట్‌ ల్యాండ్‌ ధ్రువీకరణలను తీసుకునే రిజిస్ట్రేషన్‌ అధికారులు దేవదాయ భూమి రిజిస్ట్రేషన్‌లో మాత్రం ఇవేమీ లేకుండానే పనికానిచ్చేశారు. అది కూడా దేవదాయ భూమిపై హైదరాబాద్‌ ఎండోమెంట్‌ ట్రిబ్యునల్‌ కోర్టులో కేసు నడుస్తుండగా చట్ట వ్యతిరేకంగా రిజిస్ట్రేషన్లు చేయించడం గమనార్హం. ఇవి కేవలం రెండు ఉదాహరణలు మాత్రమే. ఇలా చెప్పుకుంటే పోతే కర్నూలు జిల్లాలో టీడీపీ నాయకుల భూకబ్జాలకు అడ్డూ అదుపు లేకుండా పోయింది. ఎక్కడ ఖాళీ స్థలాలు, బీడు భూములు ఉంటే అక్కడ ఆక్రమించేశారు. మాన్యం, పోరంబోకు, అసైన్‌మెంట్, వక్ఫ్‌ భూములు, ప్రభుత్వ ఇలా ఏ భూమి కనిపించినా తమ జెండా పాతేశారు. జిల్లావ్యాప్తంగా 1000 ఎకరాల భూములు టీడీపీ నాయకుల అక్రమణలో ఉన్నాయని అంచనా. వీటి విలువ సుమారుగా రూ.500 కోట్లు ఉంటుందని అంచనాలు ఉన్నాయి.  11 ‘అనంత’  ఆక్రమణలు  అనంతపురం జిల్లాలో దాదాపు 30 వేల ఎకరాలు అన్యాక్రాంతమైనట్లు తెలుస్తోంది. ఈ భూములను కొందరు అధికార పార్టీ నేతలు తమ బంధువుల పేరుతో నకిలీ పట్టాలు సృష్టించి స్వాహా చేస్తే, కొందరు కార్యకర్తల పేర్లతో వందల, వేల ఎకరాల భూమిని రాయించుకున్నారు. ఈ మొత్తం భూముల విలువ రూ.వందల కోట్లలోనే ఉంటుందని అంచనా. ‘అనంత’లో ఆక్రమణలను పరిశీలిస్తే.. శింగనమల నియోజకవర్గంలోని ఆకులేడు, తరిమెల, కొరిపల్లి, జూలా కాలవలో మొత్తం 37 సర్వే నెంబర్లలో 1500 ఎకరాల ప్రభుత్వ భూమిని టీడీపీ నేతలు నకిలీ పట్టాలు సృష్టించి కబ్జా చేశారు. ఇదే తరహాలో ఉరవకొండ నియోజకవర్గం కూడేరులో కూడేరు, కమ్మూరు, మరుట్ల, గుటుకూరు, జల్లిపల్లి గ్రామాల్లో 500 ఎకరాలకుపైగా ప్రభుత్వ భూములు అన్యాక్రాంతమయ్యాయి. అనంతపురం కార్పొరేషన్‌ చుట్టూ మంత్రి పరిటాల సునీత ప్రాతినిధ్యం వహిస్తున్న రాప్తాడు నియోజకవర్గం ఉంది. ఎక్కడ చూసినా సెంటు రూ.6–రూ.10 లక్షల వరకు ఉంది. అంటే ఈ లెక్కన ఎకరా కనీసం రూ.60 లక్షల నుంచి కోటి రూపాయల వరకు ఉంటుంది. సోములదొడ్డి సమీపంలో 2013లో పేదలకు పట్టాలిచ్చిన 4.90 ఎకరాల భూమిలో మంత్రి పరిటాల సునీత అనుచరుడు పామురాయి వెంకటేశ్, పరిటాల పేరుతో ఏకంగా జెండాలు పాతారు. నిత్యం ఏదో ఒకచోట కబ్జా రాయుళ్లు విరుచుకుపడుతున్నా అధికార యంత్రాంగం అడ్డుకోలేకపోతోంది. రెవెన్యూ అధికారులు ధిక్కార స్వరం వినిపించకుండా మౌనంగా ఉండిపోతున్నారు. అధికారులు అనధికారికంగా అనుమతి ఇచ్చిన తర్వాత వారికి కొంత ముట్టజెప్పి స్వాహాకు దిగుతున్నారు. కొందరు రెవెన్యూ అధికారులు అధికారుల కబ్జాలకు రూట్‌మ్యాప్‌ ఇస్తున్నారనే ఆరోపణలు కూడా ఉన్నాయి.   12 తిరుపతి రూ.1,962 కోట్ల మఠం భూముల హాంఫట్‌  తిరుపతి రూరల్‌ మండలం అవిలాల సర్వే నెంబర్‌ 13లో 109 ఎకరాల భూమి హథీరాంజీ మఠానికి చెందిన పట్టా భూమిగా రికార్డుల్లో ఉంది. ఓ వైపు తిరుపతికి, మరోవైపు పూతలపట్టు – నాయుడుపేట జాతీయ రహదారికి అనుకుని ఉంది. ఇక్కడ అంకణం రూ.1.50 లక్షకు పైగానే పలుకుతుంది. అంటే ఈ భూమి విలువ ప్రస్తుతం 1,962 కోట్లు. అత్యంత విలువైన ఈ భూములను కళాపోషకుడు అయిన ఓ ఎంపీ బంధువులు, వేదాంతపురంకు చెందిన టీడీపీ నాయకుడు, సీఎం చంద్రబాబుకు సన్నిహితుడైన ప్రణాళిక సంఘం సభ్యుడు చెరపట్టారు. ఎవరికి అనుకూలంగా ఉన్న చోట వారు అక్రమ లేఅవుట్‌లను వేసుకున్నారు. అంకణాల చొప్పున అమ్మేసుకుని కోట్లకు పడగలెత్తారు. మఠానికి చెందిన కొందరు సిబ్బంది అక్రమార్కులకు అండగా నిలిచారనే ఆరోపణలు ఉన్నాయి. గతంలో జేసీగా పనిచేసినప్పుడు ఈ భూముల్లో ఆక్రమణలపై ఉక్కుపాదం మోపిన ప్రస్తుత కలెక్టర్‌ ప్రద్యుమ్న ఇప్పుడు చర్యలకు వెనుకాడుతున్నారు.  13 వైఎస్సార్‌  అగస్త్యేశ్వరుని ఆస్తులకు ఎసరు  వైఎస్‌ఆర్‌ జిల్లా ప్రొద్దుటూరులో అగస్త్యేశ్వరుని ఆస్తులకు అధికార పార్టీ నాయకులు ఎసరు పెట్టారు. పట్టణంలోని వినాయకనగర్‌లో సర్వే నంబర్‌ 450ఏబీ, 451ఏబీ, 452ఏబీలలో మొత్తం 25 సెంట్ల స్థలం దేవదాయ శాఖకు చెందింది. ప్రస్తుత మార్కెట్‌ విలువ ప్రకారం.. ఈ 25 సెంట్ల స్థలం దాదాపు రూ.3 కోట్లు చేస్తోంది. ఇందులో 6.25 సెంట్లను అధికార పార్టీకి చెందిన పట్టుపోగుల పుల్లయ్య ఆక్రమించి భారీ భవనం నిర్మించుకున్నాడు. ఈయన టీడీపీ నియోజకవర్గ ఇన్‌చార్జి నంద్యాల వరదరాజులరెడ్డి వర్గీయుడు. తమ స్థలంలో గృహాలు నిర్మించుకోవడంతో దేవదాయశాఖ ట్రిబ్యునల్‌లో కేసు వేసింది. ట్రిబ్యునల్‌ దేవాలయ భూముల్లో ఉన్న నిర్మాణాలను తొలగించాలని తీర్పు ఇచ్చింది. అయినా ఇప్పటివరకు దేవదాయ శాఖ అధికారులు చర్యలు తీసుకోలేదు. ఈ భూమిలో 13 మంది ఆక్రమణలకు పాల్పడగా, రాజకీయ అండ లేని సి.లక్ష్మీనారాయణమ్మ, వి.చిన్నపుల్లయ్యకు చెందిన గృహాలను మాత్రమే దేవదాయశాఖ అధికారులు స్వాధీనం చేసుకుని అధికార పార్టీకి చెందినవారిని వదిలేశారు. 

వెంకటగిరి రాజావీధి తదితర ప్రాంతాల్లో చదరపు గజం స్థలం గరిష్టంగా రూ.9500 ఉండగా తాజాగా భూముల విలువ పెంపుతో రూ.10,000 దాటనుంది. మిగిలిన ప్రాంతాల్లో రూ.1600 మించని చదరపు గజం విలువ తాజా పెంపుతో రూ.1700 పై చిలుకుగా మారనుంది. గతంలో కట్టడాల రిజిస్ట్రేషన్‌ విలువ చదరపు అడుగుకు రూ.900 ఉండగా తాజాగా రూ.950కి చేరనుంది. సబ్‌రిజిస్ట్రార్‌ కార్యాలయంలో తమ పరిధిలోని సర్వేనంబర్లు, డి నంబర్ల ఆధారంగా భూములు, స్థలాల ప్రభుత్వ మార్కెట్‌ విలువలను సమీక్షిస్తున్నారు. వెంకటగిరి (నెల్లూరు): భూముల విలువ పెంచడం ద్వారా రిజిస్ట్రేషన్‌ చార్జీల మోత మోగించేందుకు ప్రభుత్వం రంగం సిద్ధం చేసింది. దీంతో పట్టణ ప్రజలకు మరోసారి భూముల రిజిస్ట్రేషన్‌ చార్జీల షాక్‌ తగలనుంది. వెంకటగిరి ప్రాంతంలో మన్నవరం భెల్‌ పరిశ్రమ ఏర్పాటుతో పెరిగిన రియల్‌భూమ్‌ ఆ పరిశ్రమ మనుగడ ప్రశ్నార్థకం కావడంతో పూర్తిగా పడిపోయింది. రెండేళ్ల క్రితం పెద్దనోట్ల రద్దు ప్రభావం, ఆదాయపన్ను శాఖ నోటీసులతో భూముల క్రయ విక్రయాలు పూర్తిగా మందగించాయి. ఇప్పుడిప్పుడే రియల్‌ఎస్టేట్‌ రంగం కోలుకుంటున్న తరుణంలో ఆగస్టు ఒకటో తేదీ నుంచి భూముల విలువ పెంపు కలకలం రేపుతోంది. ఈ నిర్ణయంపై అన్ని వర్గాల నుంచి అసంతృప్తి వ్యక్తమవుతోంది. ఇప్పటికే పట్టణ  రేపటి నుంచి స్థిరాస్తి విలువలు పెంపు  నెల్లూరు(సెంట్రల్‌): జిల్లాలోని పట్టణాల పరిధిలో రిజిస్ట్రేషన్‌కు సంబంధించి స్థిరాస్తి విలువలను ఆగస్టు ఒకటో తేదీ నుంచి పెంచుతున్నట్లు జిల్లా రిజిస్ట్రార్‌ అబ్రహం పేర్కొన్నారు. సోమవారం ఆయన విలేకరులతో మాట్లాడుతూ స్థిరాస్తి విలువ 0– నుంచి 5 శాతం పెంచుతున్నట్లు తెలిపారు. పెంచిన స్థిరాస్తి విలువ ఆధారంగా స్టాంప్‌ డ్యూటీ కట్టాల్సి ఉంటుందని పేర్కొన్నారు.  ప్రధానంగా జిల్లాలోని 10 నియోజకవర్గాల్లో కొన్ని చోట్ల  కావలి, ఆత్మకూరు ప్రాంతాల్లో పెంచడం లేదన్నారు. మిగిలిన నెల్లూరు నగరంతో పాటు పట్టణ ప్రాంతాల్లో మాత్రమే పెంచుతున్నట్లు తెలిపారు. అందు కోసం కావాల్సిన వాటిని తయారు చేసే పనిలో సబ్‌రిజిస్ట్రార్‌లకు ఆదేశాలు ఇచ్చినట్లు పేర్కొన్నారు. ఈ విషయాన్ని ప్రజలు గమనించాలని కోరారు. జిల్లా రిజిస్ట్రార్‌ అబ్రహం

సాక్షి, అమరావతి: రెవెన్యూ శాఖలో వెబ్‌ల్యాండ్‌ పేరుతో జరుగుతున్న మోసాల్లో ఇవి కొన్ని ఉదాహరణలు మాత్రమే. వెబ్‌ల్యాండ్‌లో మార్పు చేర్పులు చేయాలంటే పాస్‌వర్డ్‌ ఉండాలి. తహసీల్దార్ల వద్ద మాత్రమే ఉండాల్సిన ఆ రహస్య పాస్‌వర్డ్‌ చాలా మండలాల్లో మీసేవ కేంద్రాల దగ్గర, కంప్యూటర్‌ ఆపరేటర్ల వద్ద, మాజీ రెవెన్యూ అధికారుల వద్ద ఉన్నాయి. దీంతో వారు డబ్బు తీసుకుని రాత్రికి రాత్రే ప్రభుత్వ భూములను ప్రైవేటు వ్యక్తుల పేరుతో నమోదు చేస్తున్నారు. ఏదైనా సర్వే నంబర్‌లోని ప్రభుత్వ భూమిని ప్రైవేటు వ్యక్తి పేరుతో మార్చితే ఆ సమాచారం వెంటనే సంబంధిత అధికారులకు ఎస్సెమ్మెస్‌ రూపంలో వెళ్లాలి. అయితే ఇలా మార్చిన వారు సాంకేతిక పరిజ్ఞానం వినియోగించి మెసేజులు వెళ్లకుండా చేస్తున్నారని తెలిసింది.  తహసీల్దార్ల పాత్రపై ఆరోపణలు.. అక్రమాల్లో కొందరు తహసీల్దార్లకు కూడా పాత్ర ఉందనే ఆరోపణలు వినిపిస్తున్నాయి. అనంతపురం జిల్లాలో వేలాది ఎకరాల ప్రభుత్వ భూములు వెబ్‌ల్యాండ్‌లో ప్రైవేటు వ్యక్తుల పేరుతో చేరిపోయాయి. ఇందుకోసం కొందరు రిటైర్డు రెవెన్యూ అధికారులతో కలిసి ప్రస్తుత రెవెన్యూ అధికారులు రికార్డులను కూడా తారుమారు చేశారని తెలుస్తోంది. ‘12 – 13 ఏళ్ల అడంగళ్లను కూడా మార్చి వేశారు. ఇంత దారుణంగా పకడ్బందీగా చేస్తే ఎవరు మాత్రం పట్టుకోగలరు. గతంలో అనంపురం జిల్లాలో నకిలీ పట్టాదారు పాసు పుస్తకాల కుంభకోణం జరిగింది. ఇప్పుడు వెబ్‌ల్యాండ్‌ కుంభకోణం. పాసు పుస్తకాలు నకిలీవి ముద్రించాలంటే చాలా కష్టం. వెబ్‌ల్యాండ్లో తప్పులు చేయడం చాలా సులభం. ఈ విషయం ఎన్నిసార్లు చెప్పినా ఉన్నతాధికారులు పట్టించుకోవడంలేదు. ముఖ్యమంత్రి కార్యాలయంలో పనిచేసే ఓ అధికారి పట్టుబట్టి వెబ్‌ల్యాండ్‌ అమల్లోకి తెచ్చేలా చేశారు. ఇప్పుడు ఇదే అక్రమాలకు సులువైన మార్గంగా తయారైంది. ’ అని ఓ జిల్లా జాయింట్‌ కలెక్టరు ఆవేదన వ్యక్తం చేశారు.  - నెల్లూరు జిల్లా మర్రిపాడులో పదెకరాల ప్రభుత్వ భూమి రాత్రికి రాత్రే ఒక తెలుగుదేశం నాయకుడి పేరుతో వెబ్‌ల్యాండ్‌లోకి ఎక్కిపోయింది. వెంటనే ఆ నాయకుడు మీసేవ నుంచి భూ అనుభవపత్రం (అడంగల్‌), భూ యాజమాన్య హక్కు పత్రం (1–బి) డౌన్‌లోడ్‌ చేసుకుని బ్యాంకులో రుణం తీసుకున్నారు. - గుంటూరు జిల్లాలోని రాజధాని ప్రాంత అభివృద్ధి సంస్థ (సీఆర్‌డీఏ) పరిధిలో ప్రభుత్వ భూమినే ఓ వ్యక్తి ల్యాండ్‌ పూలింగ్‌ కింద సీఆర్‌డీఏకి ఇచ్చారు. ఇందుకోసం ప్రభుత్వ భూమిని వెబ్‌ల్యాండ్‌లో తనపేరుతో నమోదు చేయించుకుని రికార్డులు మార్పించారు. పూలింగ్‌ కింద ఇచ్చిన భూమికి ప్రతిగా సీఆర్‌డీఏ ప్లాటు కేటాయించే సమయంలో ఫిర్యాదు రావడంతో విచారణ చేస్తే వాస్తవం బయటపడింది. ఫిర్యాదు అందకపోతే ప్రభుత్వ భూమికే ఆ వ్యక్తి సీఆర్‌డీఏ నుంచి ప్లాటు పొందేవారు.  - చిత్తూరు జిల్లా చంద్రగిరి మండలం పుదిపుట్లలో ఆరు ఎకరాల ప్రభుత్వ భూమి ప్రైవేటు వ్యక్తి పేరుతో ఆన్‌లైన్‌లో నమోదైంది. ఆ భూమిపై ఆ వ్యక్తి బ్యాంకులో రుణం తీసుకున్న తర్వాత విచారణ మొదలైంది. 

సాక్షి, అమరావతి: రాష్ట్రంలో తెలుగుదేశం పార్టీ పాలనలో లక్షల కోట్ల విలువైన లక్షలాది ఎకరాల ప్రభుత్వ భూములు రెక్కలొచ్చి ఎగిరిపోయాయి. సాక్షాత్తూ అధికార పార్టీ నాయకులే రెవెన్యూ రికార్డులను తారుమారు చేసి, సర్కారు భూములను స్వాహా చేస్తున్నారు. ప్రభుత్వ స్థలాలను బినామీ పేర్లతో మింగేస్తున్నారు. ఖాళీ భూములు కనిపిస్తే చాలు గద్దల్లా వాలిపోతు న్నారు. డీకేటీ పట్టాలు ఇవ్వని భూములను కూడా ఎప్పుడో 1954కు ముందే ఇచ్చినట్లు దొంగ పట్టాలు సృష్టిస్తున్నారు. పాత రికార్డులను మార్చేసి, కొత్త రికార్డులు తయారు చేస్తున్నారు. పదవీ విరమణ చేసిన అధికారులను వాడుకుని, పాత తేదీలతో సంతకాలు చేయించి బినామీలు, బంధువుల పేర్లతో గుట్టుగా సర్కారు భూములు కొట్టేస్తున్నారు. ప్రభుత్వం గొప్పగా చెప్పుకుంటున్న రెవెన్యూ శాఖ వెబ్‌సైట్‌ వెబ్‌ల్యాండ్‌లో రాత్రికి రాత్రే పేర్లు మారిపోతున్నాయి. అసైన్డ్‌ భూముల అనుభవదారులుగా అసైనీల బదులు ఇతరుల పేర్లు దర్శనమిస్తున్నాయి. గ్రామకంఠాలను అమ్ముకున్నారు  శ్రీకాకుళం నుంచి అనంతపురం దాకా అన్ని జిల్లాల్లోనూ సర్కారు భూములు పరాధీనమైపోయాయి. రూ.లక్షల కోట్ల విలువైన లక్షలాది ఎకరాలను సొంత ఖాతాల్లో వేసుకున్నారు. విశాఖపట్నం, తిరుపతి, కర్నూలు, నెల్లూరు, గుంటూరు, విజయవాడ, రాజమహేంద్రవరం వంటి నగరాల్లో ప్రజల ఉమ్మడి అవసరాల కోసం బ్రిటిష్‌ వారు కేటాయించిన గ్రామకంఠం భూములను సైతం అధికార పార్టీ నాయకులు ఆక్రమించి, అమ్ముకుని రూ.వందల కోట్లు వెనకేసుకున్నారు. తిరుపతిలో ఓ ప్రజాప్రతినిధి కుటుంబం రూ.1,000 కోట్లకుపైగా విలువైన ప్రభుత్వ భూములను రికార్డులు మార్చేసి సొంతం చేసుకుంది. రాష్ట్ర పారిశ్రామిక రాజధాని విశాఖపట్నం నడిబొడ్డున దసపల్లా హిల్స్‌లో అత్యంత విలువైన సర్కారు భూమిని నకిలీ పత్రాలతో అధికార పార్టీ నేతలు ఆక్రమించారు. ఇంత జరుగుతున్నా ప్రభుత్వం అటువైపు కన్నెత్తి కూడా చూడకపోవడం గమనార్హం.  పీఓటీ చట్టాన్ని తుంగలో తొక్కి... బదలాయింపు నిషేధ(పీఓటీ) చట్టాన్ని తుంగలో తొక్కి పేదలకు చెందిన అసైన్డ్‌ భూములను అధికార పార్టీ నేతలు పట్టా భూములుగా మార్చుకున్నారు. నాలుగేళ్ల టీడీపీ పాలనలో అంచనాలకు అందని స్థాయిలో భూకుంభకోణాలు జరిగాయి. ఒక్క విశాఖ జిల్లాలోనే రికార్డుల మార్పిడి, ట్యాంపరింగ్‌ ద్వారా రూ.లక్ష కోట్ల విలువైన భూకుంభకోణం చోటుచేసుకుంది. ఈ విషయాన్ని అప్పట్లో స్వయంగా విశాఖ జిల్లా కలెక్టరే ధ్రువీకరించారు. ఈ కుంభకోణంపై సీబీఐ విచారణకు ఆదేశిస్తే ప్రభుత్వ పెద్దల బండారం బయటపడుతుందనే భయంతో హడావుడిగా ప్రత్యేక దర్యాప్తు బృందాన్ని(సిట్‌)ను నియమించి, తూతూమంత్రంగా దర్యాప్తును ముగించి సర్దుబాటు చేశారనే ఆరోపణలున్నాయి. రాయలసీమకు చెందిన ఇద్దరు మంత్రులు, ఒక ముఖ్యనేత అనంతపురం–బెంగళూరు జాతీయ రహదారి మార్గంలో అత్యంత విలువైన 1,000 ఎకరాల ప్రభుత్వ భూములను బినామీ పేర్లతో కొట్టేశారు. 1,400 ఎకరాల అసైన్డ్‌ భూములను అగ్రిమెంట్ల రూపంలో దూరపు బంధువుల (బినామీలు) పేర్లతో నామమాత్రపు ధరతో కొనుగోలు చేసి, వెబ్‌ల్యాండ్‌లో తమ పేర్లు ఎక్కించుకున్నారు. వైఎస్సార్‌ జిల్లాలో ఒక ప్రజాప్రతినిధి ఏకంగా 300 ఎకరాల ప్రభుత్వ భూములను ఆక్రమించుకుని, బినామీల పేర్లతో రికార్డులు మార్పించేశాడు. చుట్టూ ఫెన్సింగ్‌ వేసి తోటలు పెంచుతున్నాడు. ఇదే జిల్లాలో ఒక అధికారి రికార్డులు ట్యాంపరింగ్‌ చేసి ప్రభుత్వ, అసైన్డ్‌ భూములను ఆక్రమించుకుని చుట్టూ కోటలా ఎలక్ట్రిక్‌ ఫెన్సింగ్‌ వేయించుకున్నాడు. ఆయన అండతోనే ఒక ప్రజాప్రతినిధి బంధువుల పేర్లతో వేలాది ఎకరాల ప్రభుత్వ భూములను సొంతం చేసుకున్నాడు. అందువల్లే ఆ అధికారి సస్పెన్షన్‌ను ఎత్తివేయించి పోస్టింగ్‌ ఇప్పించారనే విమర్శలు ఉన్నాయి.  అసైన్డ్‌ భూములతో బేరం  ప్రభుత్వం ఇచ్చిన అసైన్డ్‌ భూములను అసైనీలు సాగు చేసుకోవాలే తప్ప విక్రయించడానికి వీల్లేదు. అయితే, అధికార పార్టీ నాయకులు అసైన్డ్‌ భూములను కారుచౌకగా పీఓటీ చట్టానికి విరుద్ధంగా కొనుగోలు చేశారు. ఆ భూములను భూసమీకరణలో ప్రభుత్వానికి ఇచ్చారు. పరిహారం కింద ప్రభుత్వం నుంచి అత్యంత విలువైన ఫ్లాట్లు పొందారు. విశాఖపట్నం నగరాభివృద్ధి సంస్థ (వుడా) పరిధిలో ఒక మంత్రి బినామీ పేర్లతో కొనుగోలు చేసిన అసైన్డ్‌ భూములను వుడాకు అప్పగించారు. పరిహారం కింద రూ.600 కోట్ల విలువైన స్థలాలను చట్టబద్ధంగా సొంతం చేసుకునేందుకు పావులు కదిపారు. ఈ వ్యవహారాన్ని ‘సాక్షి’ బట్టబయలు చేయడంతో తాత్కాలికంగా బ్రేక్‌ పడింది.  ‘గీతం’కు అనుచిత ప్రయోజనం  విశాఖ జిల్లాలోని రుషికొండలో ప్రభుత్వ సంస్థలకు 55 ఎకరాలు కేటాయిస్తూ గత ప్రభుత్వం జారీ చేసిన జీవోను రద్దు చేస్తూ చంద్రబాబు సర్కారు గత ఏడాది ఏప్రిల్‌ 5న ఏకంగా జీవోఎంఎస్‌ నంబరు 165ను జారీ చేసింది. రూ.వందల కోట్ల విలువైన ఈ భూమిని ముఖ్యమంత్రి సమీప బంధువు, విశాఖపట్నం మాజీ ఎంపీ ఎంవీవీఎస్‌ మూర్తికి చెందిన సంస్థకు కట్టబెట్టేందుకే ప్రభుత్వం ఈ జీవోను రద్దు చేసింది. ప్రస్తుతం ఈ భూమి ఎంవీవీఎస్‌ మూర్తికి చెందిన ‘గీతం’ సంస్థ ఆక్రమణలోనే ఉండడం గమనార్హం.  అక్రమార్కులకే పరిహారం  రాజధాని అమరావతి పరిధిలోని రెండు గ్రామాల్లో భూసమీకరణ కింద తీసుకున్న అసైన్డ్‌ భూములను నిషేధిత ఆస్తుల జాబితా నుంచి తొలగిస్తూ రెవెన్యూ శాఖ గతనెల 18వ తేదీన జీవో జారీ చేయడం అక్రమాలకు పరాకాష్టగా చెప్పొచ్చు. రాజధాని నిర్మాణం లేదా ఇతర అవసరాలకు భూసమీకరణ కింద ప్రభుత్వం ఈ భూములను తీసుకున్నప్పటికీ వాస్తవ అసైనీలకే పరిహారం, ప్లాట్లు, కౌలు, ప్యాకేజీలు ఇవ్వాలి. ఇందుకు భిన్నంగా అక్రమంగా వీటిని పొందిన వారికే ఆయా ప్రయోజనాలు కల్పించాలనే ఉద్దేశంతో ప్రభుత్వం ఈ భూములను నిషేధిత ఆస్తుల జాబితా నుంచి తొలగిస్తూ జీవో జారీ చేసింది. ఈ భూములన్నీ రాష్ట్ర మంత్రులు, అధికార పార్టీ ప్రజాప్రతినిధుల బినామీలవి కావడం వల్లే ప్రభుత్వం ఈ జీవో ఇచ్చిందని సచివాలయ వర్గాలు చెబుతున్నాయి.  అడ్డగోలుగా భూసంతర్పణలు  టీడీపీ ముఖ్యనేతల బంధువులకు, బాగా కావాల్సిన వారికి ప్రభుత్వం విలువైన భూములను కారుచౌకగా కట్టబెట్టింది.  - ముఖ్యమంత్రి చంద్రబాబు తనయుడు, మంత్రి నారా లోకేశ్‌ మిత్రుడు శ్రీధర్‌కు చెందిన ఈ–సెంట్రిక్‌ సొల్యూషన్‌ ప్రైవేట్‌ లిమిటెడ్‌కు విశాఖపట్నంలో రూ.338 కోట్ల విలువైన 50 ఎకరాలను రూ.25 కోట్లకే అప్పగిస్తూ ప్రభుత్వం జీవో ఇచ్చింది.  - తిరుపతిలో కలిసిపోయిన కరకంబాడిలో (కడప–తిరుపతి రహదారికి ఆనుకుని) రూ.50 కోట్ల విలువైన 25 ఎకరాలను కేవలం రూ.4.88 కోట్లకే మంత్రి గల్లా అరుణకుమారి కుటుంబానికి చెందిన మంగళ్‌ ఇండస్ట్రీస్‌కు కట్టబెడుతూ 2015 నవంబరు 12న ప్రభుత్వం జీవో జారీ చేసింది. కాంగ్రెస్‌ ప్రభుత్వ హయాంలో గల్లా అరుణకుమారి మంత్రిగా ఉన్నప్పుడు ఈ భూమి కోసం ప్రయత్నించారు. అయితే, అప్పుడు కాని పని టీడీపీ అధికారంలోకి రాగానే జరిగిపోయింది.  - కృష్ణా జిల్లా జగ్గయ్యపేటలో వీబీసీ కెమికల్స్‌ అండ్‌ ఫెర్టిలైజర్స్‌కు రూ.478.93 కోట్ల విలువైన 478.93 ఎకరాల భూమిని కేవలం రూ.4.78 కోట్లకే ప్రభుత్వం రాసిచ్చేసింది. వీబీసీ కెమికల్స్‌ అండ్‌ ఫెర్టిలైజర్స్‌ సంస్థ సీఎం చంద్రబాబు బంధువైన మాజీ ఎంపీ ఎంవీవీఎస్‌ మూర్తి కుటుంబానిది కావడం గమనార్హం.  - రాజధాని అమరావతి ప్రాంతంలో వెల్లూర్‌ ఇన్‌స్టిట్యూట్‌ ఆఫ్‌ టెక్నాలజీ (విట్‌)కు 200 ఎకరాలు, మాతా అమృతానందమయి విశ్వవిద్యాలయానికి 200 ఎకరాలు, ఎస్‌ఆర్‌ యూనివర్సిటీకి 200 ఎకరాలు, ఇండో యూకే ఇన్‌స్టిట్యూట్‌ ఆఫ్‌ హెల్త్‌కు 150 ఎకరాలను ప్రభుత్వం కేటాయించింది. ఇక్కడ ఎకరా ధర రూ.5 కోట్లు పలుకుతుండగా, ప్రభుత్వం మాత్రం ఎకరా రూ. 50 లక్షల చొప్పున ఇచ్చేయడం గమనార్హం. విద్యార్థుల నుంచి రూ.లక్షల్లో ఫీజులు వసూలు చేసే విద్యా, వైద్య సంస్థలకు నామమాత్రపు ధరకు భూములు ఎందుకు కట్టబెట్టారనే ప్రశ్నకు సర్కారు వద్ద సమాధానం లేదు. అనధికారిక వాటాలు ఉన్నందువల్లే ప్రభుత్వ పెద్దలు అప్పనంగా భూములు కట్టబెట్టారనేది బహిరంగ రహస్యమే.  

సాక్షి, హైదరాబాద్‌: కొత్త పాస్‌ పుస్తకాల పంపిణీ తప్పుల తడకని తేలిపోయింది. ముద్రణ సమయంలోనే 3 లక్షల పాస్‌ పుస్తకాల్లో తప్పులున్నాయని గుర్తించిన రెవెన్యూ యంత్రాంగం.. వాటిని పంపిణీ చేయకుండా నిలిపివేయడమే ఇందుకు నిదర్శనంగా నిలుస్తోంది. పేరు తప్పుల నుంచి ఆధార్‌ నంబర్ల వరకు, విస్తీర్ణంతోపాటు ఫొటోలు కూడా తప్పులు రావడంతో తప్పనిసరి పరిస్థితుల్లో ఈ పుస్తకాలను పంపిణీ చేయలేదు. ఇది ఒక ఎత్తయితే పంపిణీ చేసిన పుస్తకాల్లో కూడా అదే స్థాయిలో తప్పులు వస్తుండటం మరింత గందరగోళానికి దారితీస్తోంది. అయితే పాస్‌ పుస్తకాల్లో తప్పులకు క్షేత్రస్థాయిలో జరిగిన నిర్లక్ష్యమే కారణమని తెలుస్తోంది. అడ్డగోలుగా రికార్డులు సరిచేయడం, ఎలాంటి పరిశీలన లేకుండా ఇష్టారాజ్యంగా పాస్‌ పుస్తకాల వివరాలను ముద్రణకు పంపడమే ఇంతటి గందరగోళానికి కారణమైందని రెవెన్యూ ఉన్నతాధికారులు నిర్ధారించుకున్నారు. దీంతో ఇప్పుడు ఆ పుస్తకాలన్నింటినీ మళ్లీ ముద్రించేందుకు సిద్ధమయ్యారు.  14 రకాల తప్పులు  పంపిణీ చేయకుండా నిలిపివేసిన పుస్తకాల్లో మొత్తం 14 రకాల తప్పులున్నాయని అధికారులు గుర్తించారు. ఇందులో రైతుకు అత్యంత కీలకమైన భూమి విస్తీర్ణం నమోదులోనే ఎక్కువ పుస్తకాల్లో తప్పులు వచ్చాయి. మొత్తం 93 వేల పుస్తకాల్లో రైతుకు ఉన్న భూమి కన్నా ఎక్కువో, తక్కువో నమోదయ్యాయి. వీటికితోడు పట్టాదారుకు బదులు వేరొకరి ఫొటో ఉన్న 37 వేలకు పైగా పుస్తకాలను అధికారులు గుర్తించారు. వాటిని నిలిపివేశారు. చనిపోయిన వారి పేర్ల మీద, పాత పట్టాదారుల పేర్లతో, ఆధార్‌ తప్పులతో, పట్టాదారు పేరు, తండ్రి పేర్లలో తప్పులతో వేల సంఖ్యలో పుస్తకాలను ముద్రించారు. నాలా భూములకు, ప్రభుత్వ భూములకు కూడా పాస్‌ పుస్తకాలను సిద్ధం చేశారు. ఒక్కో రైతుకు ఒక ఖాతా ఉండాల్సి ఉండగా, ఒకే ఖాతా నంబర్‌ను ఇద్దరు, ముగ్గురు రైతులకు వచ్చేలా దాదాపు 34 వేల పుస్తకాలు ముద్రించారంటే రెవెన్యూ యంత్రాంగం నిర్లక్ష్యం ఏ స్థాయిలో ఉందో అర్థం చేసుకోవచ్చు. సర్వే నంబర్లలో తప్పులు, అసైన్డ్‌ భూములకు, అటవీ శాఖతో వివాదాలున్న భూములకు కూడా పాస్‌ పుస్తకాలు ముద్రించడం గమనార్హం.  పంపిణీ చేసిన వాటిలోనూ..  పంపిణీ చేసిన 39 లక్షల పుస్తకాల్లోనూ అదే స్థాయిలో తప్పులు రావడం రైతాంగాన్ని ఆందోళనకు గురి చేస్తోంది. భూ విస్తీర్ణం, పట్టాదారు పేర్లు, ఫొటోలు, ఆధార్‌ నంబర్లలో వచ్చిన తప్పులును రైతులను మానసిక ఆందోళనకు గురిచేస్తున్నాయి. తమకున్న భూమి మొత్తం పుస్తకాల్లో రాకపోవడంతో ఉన్న భూమి ఎటుపోతుందోననే భయం వారిలో వ్యక్తమవుతోంది. చాలా పుస్తకాల్లో కొనుగోలు చేసిన భూములు కూడా ఆనువంశికంగా వచ్చినట్లు నమోదైంది. ఇవి భవిష్యత్తులో ఎలాంటి ఇబ్బందులు తెచ్చిపెడతాయోననే సందేహాలు క్షేత్రస్థాయిలో వ్యక్తమవుతున్నాయి. మరోవైపు ఈ తప్పులను సరిచేయాల్సిన రెవెన్యూ యంత్రాంగం ఇంకా నిర్లక్ష్యంగా వ్యవహరిస్తోందనే ఆరోపణలున్నాయి. ‘తప్పులను రికార్డు చేసి వెళ్లిపోండి.. మేం కొత్త పుస్తకాలకు పంపిస్తాం. కానీ అవి ఎప్పుడు వస్తాయో చెప్పలేం’అంటూ క్షేత్రస్థాయి రెవెన్యూ సిబ్బంది చెబుతున్న మాటలు రైతులను మరింత ఆందోళనకు గురిచేస్తున్నాయి. అవినీతి ఆరోపణలు కూడా పాస్‌పుస్తకాల పంపిణీపై తీవ్ర ప్రభావాన్ని చూపుతున్నాయని క్షేత్రస్థాయి పరిస్థితులు చెబుతున్నాయి. ఈ నేపథ్యంలో సీఎం చొరవ తీసుకుని నిశిత దృష్టితో ఈ అంశాన్ని పరిష్కరించాలని రైతు సంఘాలు కోరుతున్నాయి.  విషయం సీఎం దృష్టికి  ఇటీవల జరిగిన కలెక్టర్ల సమావేశంలో రాష్ట్రంలో అసలు ఎన్ని కొత్త పాస్‌పుస్తకాలను ముద్రించారు? అందులో పంపిణీ చేసినవి ఎన్ని? పంపిణీ చేయకుండా నిలిపివేసినవి ఎన్ని? పంపిణీ ఎందుకు చేయలేదనే వివరాలను జిల్లాల వారీ గణాంకాలతో రెవెన్యూ ఉన్నతాధికారులు ముఖ్యమంత్రి కేసీఆర్‌కు వివరించారు. రాష్ట్రవ్యాప్తంగా 49.94 లక్షల కొత్త పాస్‌ పుస్తకాలను ముద్రించామని, అందులో 39.47 లక్షల పుస్తకాలను ఈనెల 23 నాటికి పంపిణీ చేశామని, 3.07 లక్షల పుస్తకాల్లో తప్పులున్నందున వాటిని నిలిపివేశామని తెలిపారు. పంపిణీ చేసిన పాస్‌ పుస్తకాల్లోనూ పెద్ద సంఖ్యలో తప్పులు వచ్చాయన్న సమాచారంతో సీఎం కేసీఆర్‌ తీవ్ర ఆగ్రహం వ్యక్తం చేశారు. వెంటనే సరిచేయాలని ఆదేశించారు.

సాక్షి, అమరావతి: రాష్ట్రంలో పరిశ్రమల ఏర్పాటుకు అడిగిన వెంటనే భూములు కేటాయించాలని ముఖ్యమంత్రి చంద్రబాబు అధికారులను ఆదేశించారు. ఆంధ్రప్రదేశ్‌ పారిశ్రామిక మౌలిక సదుపాయాల కల్పన సంస్థ (ఏపీఐఐసీ)కు కోరగానే ప్రభుత్వ భూములను అప్పగించాలన్నారు. పారిశ్రామికవేత్తలు దరఖాస్తు చేసిన తక్షణమే వారికి ఏపీఐఐసీ భూములు కేటాయించాలని, ఏమాత్రం జాప్యం చేయరాదని పేర్కొన్నారు. బుధవారం ఉండవల్లిలోని సీఎం నివాసం వద్దనున్న గ్రీవెన్స్‌ హాల్‌లో రెండోరోజు కలెక్టర్ల సదస్సులో చంద్రబాబు పలు అంశాలపై మాట్లాడారు. సంక్షోభ సమయంలో ఆంధ్రప్రదేశ్‌ అద్భుత ఫలితాలు సాధించిందని చెప్పారు. ఇదే స్ఫూర్తితో పనిచేస్తే 2029 కంటే ముందే మన రాష్ట్రం తిరుగులేని శక్తిగా ఆవిష్కృతమవుతుందని ఆకాంక్షించారు. రాష్ట్రంలో వంద శాతం డిజిటల్‌ లిటరసీ సాధించాలని సూచించారు. ‘‘పరిశ్రమలు ఏర్పాటు చేసేవారు వచ్చి మనల్ని భూములు, సౌకర్యాలు అడగడం కాదు. మనమే వారి వద్దకు వెళ్లి మేం ఇవి ఇస్తాం, మీరు పరిశ్రమలు పెట్టండి అని పిలవాలి’’ అంటూ ముఖ్యమంత్రి మార్గనిర్దేశం చేశారు. పరిశ్రమలకు ప్రోత్సాహకాల విడుదలలో జాప్యం చేయరాదన్నారు. చంద్రబాబు ప్రసంగంలో ముఖ్యాంశాలు ఆయన మాటల్లోనే...  ‘‘రాష్ట్రంలో లక్ష హోటల్‌ గదుల నిర్మాణం లక్ష్యంగా పెట్టుకోవాలి. హోటల్‌ గదులు మనం నిర్మించాలి. నిర్వహణ బాధ్యతలను ప్రముఖ సంస్థలకు అప్పగించాలి. మనం కష్టపడి రూపొందించిన ఈ–ప్రగతి, ఫైబర్‌ నెట్‌ లాంటి వాటిని మేధో హక్కుల కోసం రిజిస్ట్రేషన్‌ చేసుకోవాలి. పరిపాలనపై ప్రజల సంతృప్త స్థాయిని ప్రస్తుతం ఉన్న 75 శాతం నుంచి 80 శాతానికి పెంచాలని లక్ష్యంగా పెట్టుకున్నాం. శ్రీకాకుళం జిల్లాలో పోర్టు, ఎయిర్‌స్ట్రిప్, పరిశ్రమ కోసం 5,000 ఎకరాలు సేకరించాలి. విజయవాడ శివారులోని జక్కంపూడిలో 106 ఎకరాలు, నున్నలో 70 ఎకరాలు, త్రిలోచనపురంలో 40 ఎకరాలను సేకరించండి. టౌన్‌షిప్‌లు నిర్మిద్దాం. గోదావరి జిల్లాలోని తిమ్మాపురంలో ఎకనామిక్‌ సిటీ నిర్మిద్దాం. అనంతపురం–అమరావతి ఎక్స్‌ప్రెస్‌ హైవే నిర్మాణానికి వెంటనే భూసేకరణకు వెళ్లండి. అమరావతి ఔటర్‌ రింగ్‌ రోడ్డుకు అవసరమైన భూసేకరణపై దృష్టి పెట్టండి. కేవలం పథకాలను అమలు చేస్తే సరిపోదు. వాటి గురించి ప్రజలకు తెలియజేయాలి. ఇందుకోసం డబ్బు ఖర్చు అవుతుందని వెనుకడుగు వేయాల్సిన పనిలేదు.  200 గజాల వరకు ఉచితంగా రిజిస్ట్రేషన్‌  2019 మార్చి నాటికి 19 లక్షల ఇళ్ల నిర్మాణాలు పూర్తి చేయాలి. ఆ తరువాత మరో 20 లక్షల ఇళ్లు నిర్మించాల్సి ఉంది.  దేవాదాయ స్థలాలను వేలం వేసి, పేదలకు ఇవ్వాలి. భవిష్యత్‌లో ఎండోమెంట్‌ భూములను కాపాడలేం. ఇప్పుడే పేదలకు పంపిణీ చేస్తే బాగుంటుంది. పట్టణాల్లో పేదలు ప్రైవేట్‌ స్థలాలు కొనుగోలు చేసి రిజిస్ట్రేషన్‌ చేయించుకోలేక ఇబ్బందులు పడుతున్నారు. అటువంటి వారికి 200 గజాల వరకు ఉచితంగా రిజిస్ట్రేషన్‌ చేసి గృహాలు నిర్మించేలా చర్యలు తీసుకోవాలి. క్రీడలు నిరంతర ప్రక్రియగా ప్రజల జీవన విధానంలో భాగం కావాలి. గ్రామాలు, మండలాలు, జిల్లా కేంద్రాల్లో క్రీడా ప్రాంగణాలు నిర్మించాలి. నిరుద్యోగ భృతిని వచ్చే నెల నుంచి అందించాలని నిర్ణయించాం’’ అని చంద్రబాబు పేర్కొన్నారు. చెరువులను ఆక్రమించుకుని ఇళ్లు నిర్మించుకున్న వారి ప్రయోజనార్థం చెరువు భూమిని వేస్ట్‌ల్యాండ్‌గా మార్చడం సరికాదేమో ఒకటికి రెండుసార్లు ఆలోచించాలని కలెక్టర్ల సదస్సులో ప్రభుత్వ ప్రధాన కార్యదర్శి దినేష్‌కుమార్‌ సూచించారు. అయితే గత ఏడాది మా జిల్లాల్లో ఒక్క ఇల్లు కూడా శాంక్షన్‌ కాలేదని మంత్రి అచ్చెన్నాయుడు అన్నారు. అర్బన్‌ హౌసింగ్‌పై చర్చ జరుగుతున్నప్పుడు లక్షల ఇళ్లు మంజూరు చేస్తున్నామని మునిసిపల్‌ అర్బన్‌ అడ్మినిస్ట్రేషన్‌ ముఖ్యకార్యదర్శి కరికాలవలవన్‌ చెప్పగా మంత్రి ఈ వ్యాఖ్యాలు చేశారు. దీనిపై శ్రీకాకుళం జిల్లా కలెక్టర్‌ స్పందిస్తూ.. 2016–17కు సంబంధించి కేంద్ర ప్రభుత్వం ఇచ్చే గృహాలను జిల్లాకు కేటాయించలేదన్నారు.    మద్యం బెల్ట్‌ షాపులను నియంత్రించాలి  రాష్ట్రంలో మద్యం బెల్ట్‌ దుకాణాలు ఇంకా కొనసాగుతున్నాయని, వీటికి అడ్డుకట్ట వేయాల్సిన బాధ్యత ప్రభుత్వంపై ఉందని రెవెన్యూశాఖ ప్రత్యేక ప్రధాన కార్యదర్శి సాంబశివరావు నొక్కి చెప్పారు. బెల్ట్‌ షాపులను పూర్తిగా నియంత్రించేందుకు ఎక్సైజ్, పోలీసు అధికారులతోపాటు కలెక్టర్లు కూడా చర్యలు తీసుకోవాల్సిన అవసరం ఉందన్నారు. కలెక్టర్ల సదస్సులో, తర్వాత శాంతిభద్రతలపై కలెక్టర్లు, ఎస్పీలతో జరిగిన సమీక్షలోనూ సాంబశివరావు ఈ విషయాన్ని ప్రముఖంగా ప్రస్తావించారు.   ఆధార్‌ డేటా వాడితే క్రిమినల్‌ చర్యలు విశిష్ట గుర్తింపు సంఖ్య (ఆధార్‌) డేటాను బహిర్గతపరచడం చట్టరీత్యా తీవ్ర నేరమని ఆధార్‌ అథారిటీ ఛైర్మన్‌ జె.సత్యనారాయణ తెలిపారు. ‘‘ఆధార్‌కు సంబంధించిన డేటా ఎక్కడైనా వెబ్‌సైట్లలో ఉంటే వెంటనే తొలగించండి. ఆధార్‌ వివరాలు వెబ్‌సైట్‌లో ప్రదర్శించినా, బహిరంగ పరిచినా క్రిమినల్‌ చర్యలు ఎదుర్కోవాల్సి వస్తుంది’’ అని కలెక్టర్ల సదస్సులో సత్యనారాయణ స్పష్టం చేశారు. 

సాక్షి, హైదరాబాద్‌ : అక్రమ లే అవుట్లు, ప్లాట్ల క్రమబద్ధీకరణకు ఉద్దేశించిన లే అవుట్‌ రెగ్యులేషన్‌ స్కీమ్‌ (ఎల్‌ఆర్‌ఎస్‌)తో హైదరాబాద్‌ మహానగరాభివృద్ధి సంస్థ (హెచ్‌ఎండీఏ)పై కాసుల వర్షం కురిసింది. ఎల్‌ఆర్‌ఎస్‌ క్లియరెన్స్‌ గడువు సోమవారంతో ముగిసింది. ఇప్పటివరకు ఏకంగా రూ.928 కోట్ల ఆదాయం వచ్చింది. ఎల్‌ఆర్‌ఎస్‌ ఫీజుల రూపంలో రూ.695 కోట్లు, నాలాల ఫీజు రూపంలో రూ.233 కోట్లు హెచ్‌ఎండీఏ ఖజానాలో వచ్చి చేరాయి. ఎల్‌ఆర్‌ఎస్‌ దరఖాస్తులు క్లియర్‌ అయిన వారిలో మరో 18,500 మంది ఫీజు కట్టాల్సి ఉండటం, పరిశీలనలో ఉన్న వందల సంఖ్యలో దరఖాస్తులు క్లియర్‌ అయితే మరో రూ.150 కోట్ల ఆదాయం వచ్చే అవకాశముందని అధికారులు చెబుతున్నారు. ప్రత్యేక సాఫ్ట్‌వేర్‌ సహకారంతో ఎల్‌ఆర్‌ఎస్‌ దరఖాస్తుల స్వీకరణ, ఆమోదం అంతా పారదర్శకంగా జరిగిందని హెచ్‌ఎండీఏ కమిషనర్‌ టి.చిరంజీవులు తెలిపారు.   మరో రూ.150 కోట్లు వచ్చే అవకాశం...  హెచ్‌ఎండీఏ పరిధిలో అక్రమ లే అవుట్లు, ప్లాట్ల క్రమబద్ధీకరణకు 2015 నవంబర్‌లో ప్రభుత్వం అవకాశం కల్పించింది. మళ్లీ 2016 డిసెంబర్‌లో 20 శాతం అధిక రుసుముతో క్రమబద్ధీకరించుకునేందుకు మరోసారి అవకాశం కల్పించింది. ఇలా పాతవి, కొత్తవి కలిపి మొత్తం దరఖాస్తులు 1,75,612కు చేరాయి. టైటిల్‌ క్లియరెన్స్, టెక్నికల్‌ స్క్రూటిని, సైట్‌ ఇన్‌స్పెక్షన్, ఫైనల్‌ ప్రాసెసింగ్‌ ఇష్యూ... ఇలా నాలుగు దశల్లో లక్ష దరఖాస్తులను ఆమోదించారు. ప్రభుత్వ భూములు, సీలింగ్, శిఖం, మాస్టర్‌ ప్లాన్‌ రోడ్స్‌ తదితర స్థలాల్లో ఉన్నాయనే వివిధ కారణాలతో 75,612 దరఖాస్తులను తిరస్కరించారు. ఎల్‌ఆర్‌ఎస్‌ ఫీజు   చెల్లింపునకు సోమవారం చివరి రోజు కావడంతో చాలా మంది ఫీజు చెల్లించారు. అయితే హెచ్‌ఎండీఏకు మరో రూ.150 కోట్ల ఆదాయం వచ్చే అవకాశం ఉండటంతో ఎల్‌ఆర్‌ఎస్‌   క్లియరెన్స్‌ గడువు పెంచే అవకాశం ఉండొచ్చని   అధికారులు భావిస్తున్నారు.  

సాక్షి, హైదరాబాద్‌: మంచిర్యాల జిల్లాలో దాదాపు 2 వేల ఎకరాల వరకు ప్రభుత్వ భూములను ఆక్రమించుకుని, నకిలీ పట్టాదారు పాసు పుస్తకాలను సృష్టించి, వాటి ఆధారంగా బ్యాంకు రుణాలు పొందిన వ్యవహారంపై హైకోర్టు విస్మయం వ్యక్తం చేసింది. ఇంత జరుగుతుంటే అధికారులేం చేస్తున్నారని ప్రశ్నించింది. ఈ మొత్తం వ్యవహారం పై పూర్తి స్థాయిలో విచారణ జరపాలని జిల్లా కలెక్టర్‌ను ఆదేశించింది. విచారణలో తేలిన అంశాలతో సమగ్ర నివేదికను తమ ముందుంచాలని పేర్కొంది. తదుపరి విచారణను మార్చి 20కి వాయిదా వేసింది. ఈ మేరకు తాత్కాలిక ప్రధాన న్యాయమూర్తి (ఏసీజే) జస్టిస్‌ రమేశ్‌ రంగనాథన్, న్యాయమూర్తి జస్టిస్‌ కొంగర విజయలక్ష్మితో కూడిన ధర్మాసనం మంగళవారం ఉత్తర్వులు జారీ చేసింది. మంచిర్యాల జిల్లా, నెన్నల మండల పరిధిలోని పలు గ్రామాల్లో ఫోర్జరీ సంతకాలతో నకిలీ పాసు పుస్తకాలు సృష్టించి భారీగా ప్రభుత్వ భూములను ఆక్రమించుకున్నారని, దీనిపై ప్రభుత్వం ఎటువంటి చర్యలు తీసుకోవట్లేదంటూ గొల్లపల్లి గ్రామానికి చెందిన ఇందూరి రామ్మోహనరావు పిల్‌ దాఖలు చేశారు. ఈ వ్యాజ్యానికి ‘సాక్షి’లో వచ్చిన కథనాలను జత చేశారు. దీనిపై మంగళవారం ఏసీజే నేతృత్వంలోని ధర్మాసనం విచారణ జరిపింది. పిటిషనర్‌ తరఫు న్యాయవాది తేరా రజనీకాంత్‌రెడ్డి వాదనలు వినిపిస్తూ.. జోగాపూర్, గొల్లపల్లి, మైలారం, ఘనాపూర్, నెన్నెల తదితర గ్రామాల్లో దాదాపు 2 వేల ఎకరాల ప్రభుత్వ భూములు ఆక్రమణలకు గురయ్యాయన్నారు. స్థానిక ప్రజాప్రతినిధులు  ఫోర్జరీ సంతకాలతో తప్పుడు పాసు పుస్తకాలు సృష్టించి గ్రామీణ బ్యాంకు నుంచి భారీగా రుణాలు తీసుకున్నారని తెలిపారు. నెన్నెల మండలం ఎంపీపీ భర్త గడ్డం భీమా గౌడ్‌ 32 ఎకరాలు ఆక్రమించుకున్నారని పేర్కొన్నారు. భూముల విలువ రూ.5 వేల కోట్ల వరకు ఉంటుందని చెప్పారు.  

జవహర్‌నగర్‌ : ప్రభుత్వ భూముల పరిరక్షణకు ప్రజలు సహకరించాలని కాప్రా తహసీల్దార్‌ గౌతమ్‌కుమార్‌ అన్నారు. గురువారం జవహర్‌నగర్‌లోని మోహన్‌రావుకాలనీ, వెంకటేశ్వరకాలనీ ప్రాంతాలలోని సర్వే నం.606 పార్ట్‌లో 4 రూంలు, 8 బేస్‌మెంట్లను తొలగించారు. అనంతరం తహసీల్దార్‌ మాట్లాడుతూ... భవిష్యత్‌ తరాల కోసం ప్రభుత్వ స్థలాలను కాపాడాల్సిన బాధ్యత మనందరిపై ఉందన్నారు. పేదల నివాస స్థలాలకు హక్కులను కల్పించడమే కాకుండా ప్రభుత్వ స్థలాలను కాపాడడమే తమ లక్ష్యమన్నారు. కొందరు కబ్జాదారులు అయాయక ప్రజలకు ప్రభుత్వ స్థలాలను కట్టబెడుతున్నారని అలాంటి వారిపై క్రిమినల్‌ కేసులు నమోదు చేస్తామని హెచ్చరించారు. ఇళ్లులేని నిరుపేదల కోసం ప్రభుత్వం డబుల్‌ బెడ్రూమ్‌లను నిర్మిస్తోందని, ఇళ్లు లేని వారు ఇళ్ల కోసం మీసేవలో దరఖాస్తులు చేసుకోవాలని సూచించారు. ఈ కార్యక్రమంలో మండల రెవిన్యూ ఇన్‌స్పెక్టర్‌ చంద్రశేఖర్, మండల సర్వేయర్‌ యాదగిరి, వీఆర్‌ఓలు వెంకటేష్, స్వాతిలతో పాటు రెవిన్యూ సిబ్బంది తదితరులు పాల్గొన్నారు.  

సాక్షి, అమరావతి: పౌరులకు ఆధార్‌ నంబర్‌ కేటాయిస్తున్నట్లుగానే రాష్ట్రవ్యాప్తంగా పొలాలు, స్థలాలకు ‘భూధార్‌’ పేరుతో విశిష్ట గుర్తింపు సంఖ్యను అమలు చేసేందుకు రాష్ట్ర ప్రభుత్వం ఏర్పాట్లు చేస్తోంది. భూముల లావాదేవీల్లో అక్రమాలను నిరోధించేందుకు పట్టణ, గ్రామీణ ప్రాంతాల్లోని ప్రతి స్థిరాస్తికి దీన్ని వర్తింపచేయనున్నారు. రాష్ట్రవ్యాప్తంగా ఈ ఏడాది అక్టోబర్‌ చివరి నాటికి 4.19 కోట్ల స్థిరాస్తులకు భూధార్‌ నంబర్‌ను కేటాయించాలని ప్రభుత్వం నిర్ణయించింది. భూధార్‌ అమలు తీరు, ఉపయోగాలపై బుధవారం నిర్వహించిన సమీక్షలో అధికారులు పవర్‌పాయింట్‌ ద్వారా రెవెన్యూ మంత్రి, ఉప ముఖ్యమంత్రి కేఈ కృష్ణమూర్తికి వివరించారు.  ప్రభుత్వ భూములకు రెండు సున్నాలు ప్రభుత్వ భూములు, స్థలాలకు మొదట రెండు సున్నాలతో నంబరు కేటాయిస్తారు. జియోట్యాగింగ్‌ చేయడం వల్ల భూదార్‌ నంబరు నొక్కగానే ఆ భూమి ఎక్కడ ఉందో స్పష్టంగా తెలిసిపోతుంది. అందులోనే భూ యజమాని పేరు, భూమి విస్తీర్ణం, ఏ తరహా భూమి, మార్కెట్‌ విలువతోపాటు 20 అంశాలు కనిపిస్తాయి. ఈ భూమిని ఎవరైనా కొనుగోలు చేస్తే ఆటో మ్యుటేషన్‌ అయిపోతుంది. రుణాలు తీసుకున్నా అందులోనే డేటా కనిపిస్తుంది. క్రయ విక్రయాలకు కూడా ఎన్‌కంబరెన్స్‌ సర్టిఫికెట్లు (క్రయ విక్రయ లావాదేవీలు), దస్తావేజు నకళ్లు లాంటివి తీసుకోవాల్సిన పని ఉండదు.   జగ్గయ్యపేట, ఉయ్యూరులో పైలెట్‌ ప్రాజెక్టు కృష్ణా జిల్లా జగ్గయ్యపేట మండలంలోని 24 గ్రామాలు, ఉయ్యూరు మున్సిపాలిటీలో ఇప్పటికే చేపట్టిన భూధార్‌ పైలట్‌ ప్రాజెక్టును ఫిబ్రవరి 15 కల్లా పూర్తి చేయాలని ప్రభుత్వం నిర్ణయించింది. రాష్ట్రంలో భూములు, స్థలాలు, ఇళ్లకు భూధార్‌ నంబరు కేటాయించి డిజిటలైజ్‌ చేస్తే తప్పుడు, డబుల్‌ రిజిస్ట్రేషన్లు, మోసపూరిత రుణాలు పొందేందుకు ఆస్కారం ఉండదని అధికారులు పేర్కొన్నారు.  4.19 కోట్ల ఆస్తులకు భూధార్‌  ఈ ఏడాది అక్టోబరు నెలాఖరుకల్లా రాష్ట్రంలో 2.84 కోట్ల వ్యవసాయ భూములు, 50 లక్షల పట్టణ ఆస్తులు, 85 లక్షల గ్రామీణ ఆస్తులు కలిపి మొత్తం 4.19 కోట్ల స్థిరాస్తులకు భూధార్‌ నంబరు కేటాయించాలని ఉప ముఖ్యమంత్రి కేఈ కృష్ణమూర్తి ఆదేశించారు. ప్రజల ఆస్తులకు భద్రత కల్పించడంలో భాగంగా దేశంలోనే తొలిసారిగా భూసేవ పేరుతో భూధార్‌ కార్యక్రమం చేపడుతున్నట్లు కేఈ కృష్ణమూర్తి వివరించారు. రైతుల సమయం, డబ్బు ఆదా చేయాలనే  ఆటోమ్యుటేషన్‌కు శ్రీకారం చుట్టామని చెప్పారు. భూధార్‌ ఇలా - భూధార్‌ విధానంలో ప్రతి స్థిరాస్తికి 11 అంకెలతో కూడిన నంబరు కేటాయిస్తారు.  - ఇందులో మొదటి రెండు అంకెలు రాష్ట్రానికి సంబంధించిన సెన్సెస్‌ కోడ్‌ కాగా తర్వాత తొమ్మిది అంకెలు ఉంటాయి.  ​​​​​​​- ఒకవేళ ఈ ప్రాజెక్టును దేశమంతా చేపడితే ఇబ్బంది లేకుండా ఉండేందుకు మొదటి రెండు అంకెలు రాష్ట్ర సెన్సెస్‌ కోడ్‌ (28) కోసం కేటాయిస్తారు.  ​​​​​​​- తప్పులు దొర్లకుండా జాగ్రత్తల్లో భాగంగా తొలుత 28కి బదులు 99తో ఆరంభించి 11 అంకెల తాత్కాలిక నంబరు ఇస్తారు.  ​​​​​​​- భూ వివరాలను సమగ్రంగా విశ్లేషించి అన్నీ పక్కాగా ఉన్నాయని నిర్ధారించుకున్న తర్వాత  రాష్ట్ర సెన్సస్‌ కోడ్‌ 28తో ప్రారంభమయ్యే శాశ్వత భూధార్‌ నంబరు కేటాయిస్తారు. 

వశక్తినగర్‌ రోడ్డులోని అయ్యప్పనగర్‌లో నిర్మాణంలో ఉన్న బహుళ అంతస్తుల భవనమిది. టీడీపీ నేత అండదండలతో నిర్మిస్తున్న ఈ భవనం రెండో అంతస్తుపైన టీడీఆర్‌ పేరుతో ఇంతకుముందు పెంట్‌ హౌస్‌ నిర్మాణం చేపట్టారు. అయితే టీడీఆర్‌ అర్హత లేదు.. అనుమతులూ లేవన్న కారణంతో సీసీపీ ఆదేశాల మేరకు పెంట్‌హౌస్‌ నిర్మాణాన్ని ఇంతకుముందు టౌన్‌ ప్లానింగ్‌ అధికారులు కూలగొట్టారు.. పెంట్‌హౌసే అక్రమమంటే.. ఇప్పుడు ఏకంగా మూడో అంతస్తే నిర్మించేస్తున్నారు....మహా విశాఖ నగరంలో భవన నిర్మాణాల్లో జరుగుతున్న అక్రమాలకు ఇదో మచ్చుతునక మాత్రమే.. నగరం మొత్తం తరచి చూస్తే ఇటువంటివి వందలు, వేలల్లోనే ఉంటాయి. ప్రభుత్వ స్థలాల్లో కట్టేస్తున్నవి కొన్నయితే.. నిబంధనలు మీరి నిర్మిస్తున్నవి ఇంకొన్ని.. నిబంధనలు పాటించని నిర్మాణాల విషయంలో టౌన్‌ ప్లానింగ్‌ అధికారులు అడపాదడపా దాడులు చేసి అక్రమ నిర్మాణాలను కూలగొడుతున్నా.. కొద్దిరోజుల్లోనే మళ్లీ కట్టేస్తున్నారు.. ‘వారు కూల్చేస్తారు..మేం కట్టేస్తాం’.. అన్నట్లు అక్రమార్కులు దర్జా వెలగబెడుతున్నారు. ఇక ప్రభుత్వ స్థలాల్లో జరుగుతున్న నిర్మాణాల విషయంలో అధికారులు కళ్లకు గంతలు కట్టేసుకుంటున్నారు. సాక్షి, విశాఖపట్నం: చేతిలో అధికారం.. అడుగులకు మడుగులొత్తే అధికారుల అండదండలు.. అధికార టీడీపీ నేతలు రెచ్చిపోవడానికి ఇంకేం కావాలి. ప్రభుత్వ భూములు కనిపిస్తే చాలు కాజేస్తున్నారు. ఎలాంటి అనుమతుల్లేకుండా భారీ భవంతులు నిర్మించేస్తున్నారు. ఒకటి రెండుసార్లు కూలగొట్టినా దర్జాగా అంతస్తు మీద అంతస్తులు నిర్మించేస్తున్నారు. అడిగే వారు లేరన్న ధీమాతో నిబంధనలకు పాతరేస్తున్నారు. పేదల విషయంలో నిబంధనలను వల్లె వేసి, రోడ్డున పడేసే అధికారు అధికార పార్టీ నేతల వద్దకొచ్చేసరికి నీరుగారిపోతున్నారు. కోట్ల విలువ చేసే స్థలాలు, రోడ్లు, ప్రజోపయోగ స్థలాల్లో నిర్మిస్తున్న అక్రమ భవనాలు అధికార పార్టీ నాయకులు, వారి అనుచరులవైతే వాటి వైపు కన్నెత్తి కూడా చూడడం లేదు. పైగా ముందే వారితో మాట్లాడుకుంటే మామూళ్లు కూడా ముడతాయన్నట్లు వ్యవహరిస్తున్నారు. ఇంత జరుగుతున్నా ఉన్నతాధికారులు గానీ, అక్రమ నిర్మాణాలను అడ్డుకునేందుకు ఏర్పాటు చేసిన ఫ్లయింగ్‌ స్కాడ్‌ గానీ తమకేమీ పట్టనట్టు వ్యవహరిస్తున్నాయి. ఫలితంగా మధురవాడ, కొమ్మాది, సాగర్‌ నగర్, పీఎంపాలెం తదితర ప్రాంతాల్లోని ప్రభుత్వ స్థలాల్లో అక్రమ నిర్మాణాలు ఇష్టారాజ్యంగా సాగుతున్నాయి. తాము తీసుకుంటున్న ముడుపులు కింది నుంచి పై స్థాయి వరకు వాటాలు వేసుకుంటామని ఇటీవల అవినీతి నిరోధక శాఖకు చిక్కి ఊచలు లెక్కపెడుతున్న ఓ ఉద్యోగి అధికారుల విచారణలో వెల్లడించడం చూస్తే.. ఇక అక్రమాలు అడ్డుకట్ట పడటం కల్లేనన్న భావన వ్యక్తమవుతోంది. ఉల్లంఘనలివే.. ♦ జీవీఎంసీ 4వ వార్డు జేఎన్‌ఎన్‌యూఆర్‌ఎం కొమ్మాది కాలనీకి కనెక్టవిటీ రోడ్డుపైనే అడ్డగోలుగా నిర్మిస్తున్న భవనాన్ని గతంలో ఇక్కడ పనిచేసిన ముగ్గురు అసిస్టెంట్‌ సిటీ ప్లానర్స్‌(ఏసీపీ) మూడుసార్లు తొలగించారు. అయినా అక్కడే అదే భవనం అధికార పార్టీ మాజీ కార్పోరేటర్‌ అండతో నిర్మాణం పూర్తి చేసుకుంది. దీని పక్కనే మరో భవనాన్ని మంత్రి గంటా వద్ద పనిచేశానంటూ ఓ ఉద్యోగి నిర్మించేస్తున్నాడు. తలాతోకా లేని ఓ ప్రొసీడింగ్‌ ఆర్డర్‌ పట్టుకుని ఇంత దందా చేస్తున్నారు. అది తప్పు అని తెలిసినా మంత్రులు, ఎమ్మెల్యేల ఒత్తిడి భరించలేకపోతున్నామంటూ అధికారులు వారి అక్రమాలకు కొమ్ము కాస్తున్నారు. ♦ మరో టీడీపీ మహిళా నేత 5వ వార్డులో మాస్టర్‌ ప్లాన్‌ రోడ్డునే ఆక్రమించి భవనం నిర్మిస్తున్నారు. జెడ్సీ నుంచి అందరికీ ఇందులో పాత్ర ఉందన్న విమర్శలు విన్పిస్తున్నాయి. చర్యలు చేపడతామని చెప్పి నెలలు గడుస్తున్నా పట్టించుకోలేదు. ఇప్పుడు హౌసింగ్‌ ఫర్‌ ఆల్‌ పథకంలో వారు లబ్ధిదారులని బుకాయిస్తున్నారు. ఇదే వాస్తవమైతే 5వ వార్డు సుద్ద గెడ్డ వద్ద నిలువ నీడలేని రజకులు సుమారు 50 మంది ఇళ్ల కోసం దరఖాస్తు చేసుకుంటే వారికి ఎందుకు ఇవ్వలేదన్న ప్రశ్నలు వినిపిస్తున్నాయి. ♦ 5వ వార్డు శివశక్తినగర్‌ రోడ్డులోని అయ్యప్పనగర్‌  కాలనీ వద్ద టీడీపీ నాయకుడి ప్రోద్బలంతో అతని బంధువు రెండో అంతస్తుపై టీడీఆర్‌ సాకుతో పెంట్‌ హౌస్‌ నిర్మించాడు. టీడీఆర్‌ లేదని.. ఆ నిర్మాణం నిబంధనలకు విరుద్ధమని సీసీపీ ఆదేశాల మేరకు టౌన్‌ ప్లానింగ్‌ సిబ్బంది కొన్ని రోజుల క్రితం దాన్ని పాక్షికంగా కూల్చేశారు. శ్లాబుకు జీవీఎంసీ అధికారులు పెట్టిన కన్నాలు అలా ఉండగానే పనులు చకచకా జరిగిపోతున్నాయి. అక్కడి జన్మభూమి కమిటీ సభ్యులు, ఇతర నాయకులు అండ ఉండడంతో ఆ తర్వాత టౌన్‌ ప్లానింగ్‌ అధికారులు దాని వైపు చూడటం మానేశారు. ♦ కొమ్మాది సర్వే నెంబరు. 153/3లో జేఎన్‌ఎన్‌యూఆర్‌ఎం కాలనీకి స్థలం ఇచ్చినందుకు 2009లో ఆరుగురికి 60 గజాలు చొప్పున స్థలం ఇచ్చినట్టు ప్రొసీడింగ్‌ ఆర్డర్‌ చూపుతున్నారు. ఇది వాస్తవం అయితే ఇన్నిసార్లు జీవీఎంసీ అధికారులు ఎందుకు ఇక్కడ మొదట నిర్మించిన  భవనాన్ని అడ్డుకొని పాక్షికంగా కూలగొట్టారన్నది ప్రశ్న. సరిగ్గా అదే ప్రాంతంలో మళ్లీ నిర్మాణాలు చకచకా సాగిపోతున్నాయి. అప్పుటి అక్రమం.. ఇప్పుడు సక్రమం ఎలా అయిపోయిందన్న దానికి సమాధానం లేదు. ప్రొసీడింగ్‌ ఆర్డర్‌లో పేర్కొన్న ఏ ఒక్కరూ ప్రస్తతం ఇక్కడ లేరు. ఈ వ్యవహారంలో లక్షల రూపాయలు చేతులు మారాయన్న ♦ ♦ ఆరోపణలు బలంగా విన్పిస్తు న్నాయి. ♦ ఇక స్వతంత్రనగర్‌లో నిబంధనలకు విరుద్ధంగా ఒక భవన నిర్మాణం జరుగుతోంది. దీనికి తూర్పు ఎమ్మెల్యే అండదండలు, వార్డు అధ్యక్షుడి సిఫార్సు ఉందని సిబ్బందే సెలవిస్తున్నారు. ఇలా అన్ని చోట్లా కుమ్మక్కు వ్యవహారాలే సాగుతున్నాయి. నిర్మాణాల ముసుగులో కోట్లాది రూపాయలు చేతులు మారుతూనే ఉన్నాయి. ♦ విచారణ జరిపిస్తాం వీటిపై డీసీసీపీ ఏ.ప్రభాకరరావును వివరణ కోరగా.. 4, 5 డివిజన్లలో జరుగుతున్న అక్రమ నిర్మాణాలపై విచారణ జరిపి బాధ్యులపై చర్యలు తీసుకుంటామని చెప్పారు.

బెజవాడలో కోట్లాది రూపాయల విలువైన ప్రభుత్వ ఆస్తులను తెగనమ్మేందుకు టీడీపీ సర్కార్‌ స్కేచ్‌ వేసింది. ఇందుకు అభివృద్ధి, పర్యాటకం కలర్‌ ఇస్తోంది. చారిత్రక, వారసత్వ సంపదగా వెలుగొందుతున్న స్వరాజ్యమైదానాన్ని చైనా కంపెనీకి కట్టబెడుతున్న పాలకులు తాజాగా రివర్‌ఫ్రంట్‌ డెవలప్‌మెంట్‌ ముసుగులో కార్పొరేషన్‌ కార్యాలయంతోపాటు పరిసరప్రాంతాలను కాజేసేందుకు కుట్ర పన్నారు. సర్కార్‌ ఏకపక్ష నిర్ణయాలనునగరవాసులు నిరసిస్తుండగా, ప్రతిపక్షాలు ఆందోళన బాట పట్టాయి. విజయవాడసెంట్రల్‌ : బెజవాడలో ప్రభుత్వ ఆస్తులు అంగట్లో సరుకుగా మారాయి. నగరాభివృద్ధి, పర్యాటకం సాకుతో కోట్లాది రూపాయల విలువైన ఆస్తులను కారుచౌకగా విదేశీ, కార్పొరేట్‌ కంపెనీల పరం అవుతున్నాయి. స్వరాజ్యమైదానం, స్టేట్‌ గెస్ట్‌హౌస్, డీజీపీ క్యాంప్‌ కార్యాలయం, ట్రాన్స్‌కో కార్యాలయం, మునిసిపల్‌ కార్యాలయం, కౌన్సిల్‌ హాల్, రాజీవ్‌గాంధీ పార్కు, పూల, కూరగాయల మార్కెట్, విద్యుత్‌ సబ్‌స్టేషన్, పాతపోలీస్‌ క్వార్టర్స్, సీతమ్మవారిపాదాల స్థలం వెరసి 48.33 ఎకరాల భూమిని లీజుల ముసుగులో తెగనమ్మేందుకు పాలకులు సిద్ధమయ్యారు. ఇందుకు అవసరమైన చర్యలు చురుగ్గా సాగుతున్నాయి. భూ వినియోగమార్పిడికి సంబంధించి గత నెల 15వ తేదీన కౌన్సిల్‌ తీర్మానం చేసి ఏపీ సీఆర్‌డీఏకు పంపింది. ప్రభుత్వం అప్పనంగా అప్పగిస్తున్న స్థలాల మార్కెట్‌ విలువ సుమారు రూ.3,500 కోట్లు ఉంటుందని అంచనా. చెప్పినట్లు చేయండి కార్పొరేషన్‌ కార్యాలయం, విద్యుత్‌ సబ్‌స్టేషన్, రాజీవ్‌గాంధీ పార్కు, హోల్‌సేల్‌ ఫ్లవర్, కూరగాయల మార్కెట్‌ స్థలం కలిపి 20.04 ఎకరాల్లో విస్తరించి ఉన్నాయి. ఇందులో ప్రస్తుత కౌన్సిల్‌ హాల్, నిర్మాణంలో ఉన్న కొత్త భవనం 82 సెంట్ల స్థలంలో ఉంటాయి. ఈ 82 సెంట్లు మినహా మిగితా స్థలాన్ని రివర్‌ఫ్రంట్‌ డెవలప్‌మెంట్‌లో భాగంగా భూవినియోగ మార్పిడి చేయాలని కోరుతూ కౌన్సిల్‌లో తీర్మానం చేసి సీఆర్‌డీఏకు పంపారు. కార్పొరేషన్‌ కార్యాలయాన్ని కొత్త భవనంలోకి మార్చి పరిపాలన సాగిస్తామని, తరలింపు ఉండబోదని తీర్మానం సందర్భంగా పాలకులు స్పష్టం చేశారు. సీన్‌ కట్‌ చేస్తే ఇటీవల జరిగిన ఏడీసీ (అమరావతి డెవలప్‌మెంట్‌ కార్పొరేషన్‌) సమావేశంలో కౌన్సిల్‌ మినహాయించిన 82 సెంట్ల స్థలాన్ని కూడా సేకరించాలని నిర్ణయించారు. ఈ విషయమై మేయర్, డెప్యూటీ మేయర్, కమిషనర్‌లతో సీఎం చంద్రబాబు సమావేశం నిర్వహించి చెప్పినట్లు చేయండి అంటూ ఆదేశాలు ఇచ్చినట్లు భోగట్టా. బందరురోడ్డులోని మునిసిపల్‌ గెస్ట్‌హౌస్‌ స్థలంలో నగరపాలక సంస్థ కార్యాలయాన్ని నిర్మాణం చేసుకోవాల్సిందిగా సూచించినట్లు తెలుస్తోంది. రోడ్డున పడాలా? మునిసిపల్‌ కార్యాలయానికి 130 ఏళ్లచరిత్ర ఉంది. 1981లో నగరపాలక సంస్థగా రూపాంతరం చెందింది. మొత్తం 16 సెక్షన్లలో 400 మంది ఉద్యోగులు ఈ కార్యాలయంలో విధులు నిర్వహిస్తుంటారు. రోజూ 1,500 నుంచి 2 వేల మంది ప్రజలు వివిధ పనులపై కార్యాలయానికి వచ్చిపోతుంటారు. ఈ క్రమంలో హఠాత్తుగా కార్యాలయాన్ని మార్చడం అంటే అంత ఆషామాషీ వ్యవహారం కాదు. నగరపాకల సంస్థకు చెందిన షాపింగ్‌ కాంప్లెక్స్‌లన్నీ లీజుల్లోనే కొనసాగుతున్నాయి. వాటిలోకి తాత్కాలి కంగా కార్యాలయాన్ని మార్చే పరిస్థితి లేదు. ప్రభుత్వం సూచించిన విధంగా గెస్ట్‌హౌస్‌ స్థలంలో కార్యాలయ నిర్మాణం చేపట్టినా అది పూర్తయ్యే వరకు ఎక్కడ ఉండాలన్న ప్రశ్న ఉత్పన్నమవుతోంది.   నిబంధనలకు తూట్లు సిటీస్క్వేర్‌ పేరుతో స్వరాజ్య మైదానం స్థలం 26 ఎకరాలను చైనా కంపెనీకి కట్టబెట్టేందుకు గప్‌చుప్‌గా డీటెల్డ్‌ ప్రాజెక్ట్‌ రిపోర్టు(డీపీఆర్‌)ను సిద్ధం చేసిన టీడీపీ సర్కార్‌ కౌన్సిల్‌తో  ఆమోదముద్ర వేయించింది. రిక్రియేషన్‌ జోన్‌లో ఉన్న గ్రౌండ్‌ను కమర్షియల్‌గా మార్చే అవకాశం లేదు. అయితే  నిబంధలకు తూట్లు పొడిచి మిక్స్‌డ్‌ జోన్‌లోకి మారుస్తూ తీర్మానం చేశారు.


 - ఖాళీ స్థలాలను ఆక్రమించేస్తున్న అక్రమార్కులు
 - రిజిస్ట్రేషన్‌ అధికారులూ కుమ్మక్కు !
 - అమ్మకాలు చేస్తున్నా పట్టించుకోని అధికారులు
 
 ఇక్కడ కనిపిస్తున్న వెంచర్‌ కురుగుంట పొలం సర్వేనంబర్‌ 94లోని 42 ఎకరాల 9 సెంట్ల స్థలంలో వెలిసింది. ఈ స్థలాన్ని ముగ్గురు ముస్లీం మెనార్టీ నేతలు ఆక్రమించుకొని వెంచర్‌ వేసి ఒక్కొక్క సెంట్‌ను రూ.20 వేల చొప్పున 90 శాతం మేర  ఇప్పటికే అమ్మకాలు జరిపేశారు. తప్పుడు ఎన్‌ఓసీ (నాన్‌ అబ్జెక్షన్‌ సర్టిఫికెట్‌) సృష్టించి రిజిస్ట్రేషన్‌ అధికారులతో కలిసి ఈ వంక స్థలాన్ని కొనుగోలు చేసిన వ్యక్తులకు రిజిస్ట్రేషన్‌ సైతం చేయించి రూ. కోట్లు కొల్లగొట్టారు. అయితే వాస్తవానికి రెవెన్యూ రికార్డులలోని డైక్లాట్‌ ప్రకారం ఈ స్థలం తడకలేరు వంక స్థలంగా ఉంది. రెవెన్యూ చట్టం మేరకు వంక పోరంబోకు స్థలానికి  రెవెన్యూ అధికారులు పట్టాలను మంజూరు చేయరు.  అయితే ఈ సర్వే నంబర్‌ను 94–1, 2, 3 విభజించించారు.  అడంగల్‌ను పరిశీలిస్తే  94–1 కె.సాలమ్మకు 2.97 ఎకరాలు, 94–2లో 24.68 ఎకరాల స్థలం వంక, 94–3 ప్రమీళమ్మకు 5 ఎకరాలు, వసుంధరమ్మ పేరిట 4.32 ఎకరాల స్థలం ఉన్నట్లు ఆన్‌లైన్‌లో నమోదు చేశారు. అయితే ఆన్‌లైన్‌లోకి ప్రైవేట్‌ వ్యక్తుల పేర్లు  ఎలా వచ్చాయో ఆ లోగుట్టు మాత్రం రెవెన్యూ అధికారులకే తెలియాలి.
 
 అనంతపురం రూరల్‌: ప్రభుత్వ జాగా కనిపిస్తేచాలు కులసంఘాల పేరిట పాగ వేస్తున్నారు. నగర శివారులోని ప్రభుత్వ భూములు మొత్తం పేదల మాటున పెద్దలు హస్తగతం చేసుకున్నారు. అత్యంత విలువైన స్థలాలను కళ్లేదుటే ఆక్రమించుకొని దర్జాగా అమ్మేసుకుంటున్నారు. ఒక్క కురుగుంట గ్రామంలోనే వందల ఎకరాల ప్రభుత్వ భూములను ఆక్రమించుకున్నారు. అంతటితో ఆగకుండా వంక పోరంబోకు స్థలాలను సైతం ఆక్రమించుకొని అమ్మేసుకుంటున్నారు.
 
 ఒక్కోరికి ఒక్కో న్యాయం
 చెరువు, వంక పోరంబోకు స్థలాలకు పట్టాలను ఎట్టి పరిస్థితుల్లోనూ మంజూరు చేయరు. అందులో నిర్మించుకున్న ఇళ్లను తొలగిస్తామని అధికారులు చెబుతూనే నెల క్రితం  బుక్కరాయసముద్రం చెరువులో విజయనగరకాలనీ వాసులు నిర్మించుకున్న 200 ఇళ్లను అకాలంగా కూల్చివేశారు. అయితే కురుగుంటలోని వంకపొరంబోకు స్థలంలో నిర్మించుకున్న ఆక్రమణలు అధికారులకు కనిపించడం లేదా? అని పలువురు విమర్శిస్తున్నారు.
 
 ఉన్నతాధికారులు స్పందించాలి
 అత్యంత విలువైన ప్రభుత్వ భూములను ఆక్రమించుకొని అమ్మేసుకుంటున్న వారిపై ఉన్నతాధికారులు చర్యలు తీసుకోవాలని ప్రజలు కోరుతున్నారు.  పేదల మాటున పెద్దలు తన్నుకుపోతున్న ప్రభుత్వ భూములను కాపాడాల్సిన అవసరం ఎంతైన ఉందని అంటున్నారు.
 
 కేసులు నమోదు చేస్తాం
 - అన్వర్‌హుస్సేన్, తహసీల్దార్‌, అనంతపురం
  ప్రభుత్వ, వంక పోరంబోకు స్థలాలను ఆక్రమించుకున్న వారిపై క్రిమినల్‌ కేసులు నమోదు చేస్తాం. కురుగుంట గ్రామంలో ప్రభుత్వ స్థలాలు అన్యాక్రాంతమైన మాట వాస్తవమే. విచారణ జరిపి ప్రభుత్వ భూములకు హద్దులను ఏర్పాటు చేస్తాం.


 ప్రభుత్వ స్థలాలపై హైకోర్టు
  
 సాక్షి, హైదరాబాద్‌: రాజధానిలోని ఖాళీ ప్రభుత్వ స్థలాలను పార్కులుగా మార్చడం సరైనదేనని, ఎన్ని వీలుంటే అన్ని పార్కులు ఏర్పాటు చేయడం వల్ల లాభాలే ఎక్కువని హైకోర్టు అభిప్రాయపడింది. ప్రభుత్వ స్థలాలు ఖాళీగా ఉంటే ఆక్రమణలకు గురవుతాయని, వాటిని పార్కులుగా మార్చితే తప్పేంటని పిటిషనర్‌ను ప్రశ్నించింది. సనత్‌నగర్‌ భరత్‌నగర్‌కాలనీలో ఖాళీగా ఉన్న ప్రభుత్వ స్థలాన్ని పార్కుగా మార్చడంపై అభ్యంతరం వ్యక్తం చేస్తూ దాఖలైన ప్రజాప్రయోజన వ్యాజ్యాన్ని మంగళవారం హైకోర్టు తాత్కాలిక ప్రధాన న్యాయమూర్తి జస్టిస్‌ రమేశ్‌ రంగనాథన్, న్యాయమూర్తి జస్టిస్‌ జె.ఉమాదేవితో కూడిన ధర్మాసనం విచారించింది.
 
 ఆ స్థలాన్ని క్రీడా మైదానంగా చేసుకుని పిల్లలు ఆడుకుంటున్నారని, ఇప్పుడు ఆ స్థలాన్ని పార్కుగా మార్చేందుకు అధికారులు చేస్తున్న ప్రయత్నాలను అడ్డుకోవాలని పిటిషనర్‌ పేర్కొన్నారు. ప్రభుత్వ ఖాళీ స్థలాల్ని పార్కుగా మార్చడంపై ప్రభుత్వం నిర్ణయిస్తుందని, ఇలాంటి అంశాలపై న్యాయస్థానాలు జోక్యం చేసుకోబోవని స్పష్టం చేసింది.  


 విశాఖ భూబాగోతాలపై ‘సిట్‌’కు అయ్యన్న చిట్టా!
  - 1700 ఎకరాల భూముల కబ్జాలపై ఫిర్యాదు
  -  మరిన్ని ఆధారాలతో 19న మళ్లీ ఫిర్యాదు చేస్తానని వెల్లడి
  - పరోక్షంగా గంటా, ఆయన అనుచరులపై ఆరోపణలు
  
 సాక్షి, విశాఖపట్నం: ‘2014 నుంచే విశాఖలో భూకబ్జాలు, దందాలు మొదలయ్యాయి. అవి ఇప్పుడు తారస్థాయికి చేరుకున్నాయి.. నెల్లూ రు, ప్రకాశం జిల్లాలతోపాటు ఇతర జిల్లాల నుంచి వచ్చిన నేతలు ఇక్కడ ప్రభుత్వ భూములను కబ్జా చేయడమే కాదు.. పేద, మధ్యతరగతి ప్రజలను లక్ష్యంగా చేసుకుని రికార్డుల ట్యాంపరింగ్‌ చేసి వారి భూములను బలవంతంగా లాక్కుంటున్నారు. ఈ భూ దందాలపై నేనేమీ నిన్నా మొన్నా ఆరోపించలేదు. 2014లోనే ప్రభుత్వం దృష్టికి తీసుకెళ్లా.. త్రిసభ్య కమిటీతో విచారణ జరిపించమని సీఎం చంద్రబాబుకు, రెవెన్యూ మంత్రి కేఈ కృష్ణమూర్తి, ఆర్థిక మంత్రి యనమల రామకృష్ణుడులకు లేఖలు రాశాను’ అని రాష్ట్ర ఆర్‌అండ్‌బీ శాఖ మంత్రి సీహెచ్‌ అయ్యన్నపాత్రుడు వెల్లడించారు.
 
 ఇతర జిల్లాలకు చెందిన వారు ఇక్కడ ప్రైవేటు భూములను లిటిగేషన్‌లో పడేటట్టు చేయడం.. కొట్టేయడం లేదా తక్కువ ధరకు కాజేయడం.. ఆ తర్వాత ప్రభుత్వం వద్ద తమకున్న పలుకుబడిని ఉపయోగించి తమ పరం చేసుకుంటున్నారని పరోక్షంగా మంత్రి గంటా ఆయన అనుచరులపై ధ్వజమెత్తారు.  విశాఖ సిటీ, జిల్లాలో జరిగిన భూ కబ్జాలు, దందాలపై తన వద్దనున్న ఆధారాలను ‘సిట్‌’ చీఫ్‌ వినీత్‌ బ్రిజ్‌లాల్‌కు మంత్రి అయ్యన్నపాత్రుడు శుక్రవారం అందజేశారు. ఈ సందర్భంగా ఆయన మీడియాతో మాట్లాడారు. రికార్డుల ట్యాంపరింగ్‌పై ఆధారాలుంటే ఫిర్యాదు చేయాలని సీపీ నుంచి నిన్ననే తనకు లేఖ అందిందని, ఆమేరకు తన వద్దనున్న ఆధారాలు.. గడిచిన రెండేళ్లుగా ప్రముఖ దినపత్రికల్లో భూ కబ్జాలు, దందాలపై వచ్చిన కథనాల క్లిప్పిం గ్స్‌తో సహా ఫిర్యాదు చేశానన్నారు. సుమారు 1700 ఎకరాలకు సంబంధించిన అవకతవకలు.. కబ్జాలపై పక్కా ఆధారాలతో ఫిర్యాదు చేశానన్నారు.  
  
 మెడ్‌టెక్‌ పరిహారం .. ఓ కుంభకోణం
 పెదగంట్యాడ మండలంలో ఏర్పాటు చేస్తున్న మెడ్‌టెక్‌ పార్కుకు భూసేకరణ కోసం జరిపిన పరిహారం చెల్లింపుల్లో భారీ అవకతవకలు జరిగాయని..రూ.2 కోట్లకు పైగా బినామీల మాటున కాజేశారని మంత్రి అయ్యన్నపాత్రుడు ఆరోపించారు. జిరాయితీ, డి పట్టా రైతులతోపాటు ప్రభుత్వ భూములను ఆక్రమించుకుని ఏళ్ల తరబడి సాగు చేసుకుంటున్న వారికి పరిహారం ఇస్తే తప్పు లేదన్నారు. కానీ, ప్రభుత్వ భూముల్లో సాగుబడి లేకపోయినా కొంతమంది పేర్లు సృష్టించి మరీ ఎకరాకు రూ.12 లక్షల చొప్పున పరిహారం ఇచ్చారని.. అంటే ప్రభుత్వ భూములను ప్రభుత్వానికే అమ్మేశారని ఆరోపించారు. రూ.2 కోట్లకు పైగా బినామీల పేరిట స్వాహా చేసిన విషయాన్ని ‘సిట్‌’ దృష్టికి తీసుకెళ్లానన్నారు. 
  
 తనఖా పెట్టిన ప్రభుత్వ భూముల చిట్టా 19న ఇస్తా..
 రికార్డులను ట్యాంపర్‌ చేసి ప్రభుత్వ భూములను బ్యాంకుల్లో తనఖా పెట్టి ఓ బ్యాంకులో రూ.190 కోట్ల రుణం తీసుకుని ఎగనామం పెట్టిన వారి పేర్లు త్వరలోనే చెబుతానని మంత్రి అయ్యన్నపాత్రుడు వెల్లడించారు. ఇప్పటికే ఈ వ్యవహారంలో సంబంధిత వ్యక్తులు, సంస్థల ఆస్తులను స్వాధీనం చేసుకుంటున్నట్టు బ్యాంకు వాళ్లు ప్రకటన కూడా చేశారన్నారు. ఇవేకాకుండా.. మరికొన్ని కబ్జాలు..దందాలపై ఆధారాలతో ఈనెల 19న ‘సిట్‌’ను మరోసారి కలసి ఫిర్యాదు చేస్తానన్నారు. ‘సిట్‌’ చీఫ్‌పై తనకు విశ్వాసం ఉందని, విశాఖలో జరిగిన భూ కుంభకోణంలో వాస్తవాలు వెలుగులోకి వస్తాయన్న నమ్మకం ఉందన్నారు.


 - అడ్డగోలుగా వెనకేసుకున్న ముగ్గురు సబ్‌ రిజిస్ట్రార్లు
 - అక్రమాస్తులు రూ.100 కోట్లపైనే
 - బంధువులు, డాక్యుమెంట్‌ రైటర్లే బినామీలు
 - ఇళ్లు, భూములు, కంపెనీల్లో భారీగా పెట్టుబడులు
 - ముగిసిన ఏసీబీ కస్టడీ.. ఆస్తులు బయటపెట్టిన అధికారులు
  
 సాక్షి, హైదరాబాద్‌: ప్రభుత్వ భూములను ఇష్టారాజ్యంగా ప్రైవేట్‌ వ్యక్తులకు కట్టబెట్టిన సబ్‌ రిజిస్ట్రార్ల ఆస్తులు వందల కోట్లకు చేరాయి. మియాపూర్‌ భూ కుంభకోణంలో ఆరోపణలెదుర్కొంటున్న ముగ్గురు సబ్‌ రిజిస్ట్రార్ల బినామీలు, వారి ఆస్తులను ఏసీబీ వెలుగులోకి తెచ్చింది. ఒక్కో సబ్‌ రిజిస్ట్రార్‌ ఆస్తులు రూ.25 కోట్లు దాటిపోయాయి. ఆదాయానికి మించి ఆస్తులు కూడబెట్టిన కేసులో ముగ్గురు సబ్‌ రిజిస్ట్రార్లు శ్రీనివాస్‌ రావు, రమేశ్‌ చంద్రారెడ్డి, యూసఫ్‌లను ఏసీబీ మూడ్రోజులపాటు కస్టడీలోకి తీసుకొని విచారించింది. బుధవారం వీరి కస్టడీ ముగి యడంతో విచారణలో వెలుగులోకి వచ్చిన ఆస్తుల వివరాలను ఏసీబీ డైరెక్టర్‌ జనరల్‌ పూర్ణచందర్‌రావు మీడియాకు విడుదల చేశారు.
  
 శ్రీనివాస్‌రావు.. కళ్లు చెదిరే ఆస్తులు
 కూకట్‌పల్లి సబ్‌రిజిస్ట్రార్‌గా పనిచేసిన శ్రీనివాస్‌ రావు ఆస్తులు రూ.25 కోట్లకు పైగా ఉన్నట్లు ఏసీబీ తెలిపింది. ఆరు ఇళ్ల స్థలాలు, మెదక్‌ జిల్లాలోని నర్సాపూర్‌ మండలంలోని మూసాపేట్‌లో 11 ఎకరాల వ్యవసాయ భూమి, 12 బ్యాంకు ఖాతాలున్నాయని గుర్తిం చింది. తన కుమారుడు కనిష్కతోపాటు మరి కొందరిని ఈయన బినామీలుగా పెట్టుకు న్నట్టు తెలిపింది. హాసిని పవర్‌ ప్రాజెక్ట్, నార్త్‌ స్టార్‌ హోమ్స్, మంజీరా హోల్డింగ్స్, ఐ–కాన్‌ నిర్మాణ కంపెనీల్లో రూ.14 కోట్ల పెట్టుబడులు పెట్టినట్టు వెల్లడించింది. అలాగే మన్సూ రాబాద్‌లో రూ.15 లక్షల విలువైన ఇల్లు, సంగారెడ్డి జిల్లాలోని మల్కాపూర్‌లో 33 ఎక రాల వ్యవసాయ భూమి, సికింద్రాబాద్‌ మారేడుపల్లిలో రూ.3.65 కోట్ల కమర్షియల్‌ కాంప్లెక్స్, రూ.1.3 కోట్ల ఇన్సూరెన్స్‌ బాండ్లు, రూ.2.38 కోట్ల బ్యాంకు ఫిక్స్‌డ్‌ డిపాజిట్లు, రూ.90 లక్షల విలువైన క్రెడిట్‌ కార్డులు, రూ.14 లక్షలతో తిరిగిన విదేశీ టూర్ల వివరాలు, పెళ్లిళ్లకు చేసిన రూ.30 లక్షల ఖర్చు వివరాలను బయటకు తెచ్చింది. రూ.30 లక్ష ల విలువైన ఫార్చూనర్‌ కారు, రూ.7 లక్షల జిప్సీ కారు, రూ.లక్ష విలువైన రెండు బైకులు, రూ.10 లక్షల విలువైన బంగారు అభరణా లను ఏసీబీ గుర్తించింది. అక్రమార్జనతో షెల్‌ కంపెనీలు, షాపింగ్‌ కాంప్లెక్స్‌లు నిర్మిం చినట్టు ధ్రువీకరిం చింది. మార్కెట్‌ విలువ ప్రకారం ఈ ఆస్తుల విలువ రూ.75 కోట్ల వరకు ఉండవచ్చని అంచనా వేస్తోంది.
  
 యూసఫ్‌.. రూ.25 కోట్లపైనే..
 బాలానగర్‌ సబ్‌ రిజిస్ట్రార్‌గా పనిచేసిన మహ్మద్‌ యూసఫ్‌కు ఇప్పటికే హుమాయు న్‌నగర్, గుడిమల్కాపూర్‌లో జీ+1 ఇల్లు, బషీర్‌బాగ్‌లో ఒక ఫ్లాట్, బండ్లగూడలో ఒకటి, రాయదుర్గంలో ఒక ఇల్లు, శంకర్‌పల్లిలో 4.35 ఎకరాల వ్యవసాయ భూమి, రెండు బైకులు న్నట్టు గుర్తించారు. మూడ్రోజుల కస్టడీలో మరిన్ని ఆస్తులు బయటపెట్టినట్టు ఏసీబీ అధికారులు తెలిపారు. సంగారెడ్డి జిల్లా రామచంద్రాపురంలో రూ.కోటి విలువైన రెండెకరాల భూమి, బ్యాంక్‌ ఖాతాలో రూ.49 లక్షల నగదు, రూ.6 లక్షల ఫిక్స్‌డ్‌ డిపాజిట్లు, రూ.5 లక్షల విలువైన కారు, రూ.30 వేల విలువైన రెండు బైకులు గుర్తించారు. అక్రమంగా సంపాదించిన రూ.30 లక్షలతో తన కుమా రుడిని వైద్య విద్య చదివిస్తున్నట్టు అధికారులు తెలిపారు. తన మామను బినామీగా పెట్టుకొని యూసఫ్‌ ఈ ఆస్తులు కూడబెట్టి నట్టు ఏసీబీ తెలిపింది. యూసఫ్‌ ఆస్తులు రూ. 12 కోట్లు ఉంటుంటాయని తెలిపింది. మార్కెట్‌ విలువ ప్రకారం రూ.25 కోట్లకు పైగానే ఉండ వచ్చని అధికారులు అంచనా వేస్తున్నారు. 
  
 రైటర్లే బినామీలు
 మేడ్చల్‌ సబ్‌ రిజిస్ట్రార్‌ రమేశ్‌ చంద్రారెడ్డి కొత్త పంథాలో అక్రమార్జనకు తెరదీశాడు. డాక్యుమెంట్‌ రైటర్లను బినామీలుగా మార్చుకొని వారి పేరిట భారీ స్థాయిలో ఆస్తులు కూడబెట్టినట్టు ఏసీబీ అధికారులు బయటపెట్టారు. గతంలో సోదాలు చేసిన సమయంలో రూ.3.65 కోట్ల విలువైన రెండు ఫ్లాట్లు, పదెకరాల వ్యవసాయ భూమి, ఒక ఇంటి స్థలం, మూడున్నర కేజీల బంగారం, బ్యాంకు ఖాతాలో రూ.1.07 కోట్ల నగదు, రూ.30 లక్షల ఫిక్స్‌డ్‌ డిపాజిట్లు, రెండు ద్విచక్ర వాహనాలు గుర్తించినట్లు తెలిపారు. తాజాగా కస్టడీలో విచారించగా నాగోలులో ఒక ఇల్లు, ఎల్బీనగర్‌ రాక్‌టౌన్‌ కాలనీలో ఫ్లాట్, కర్మన్‌ఘాట్‌లోని అగ్రికల్చర్‌ కాలనీలో ఒక ఫ్లాట్‌ ఉన్నట్టు గుర్తించారు.
 
 అలాగే ఆయన తన డ్రైవర్‌ను బినామీగా పెట్టుకున్నట్టు గుర్తించి అతడి ఖాతా ద్వారా రూ.కోటి పైగా నగదు చలామణి అయినట్టు వెల్లడించారు. ఈ కోటి రూపాయలను రమేశ్‌ తన పిల్లల వైద్య విద్య కోర్సుకు ఉపయోగించినట్టు అధికారులు గుర్తించారు. ఎన్నారై బంధువుల పేరిట కూడా భారీగానే ఆస్తులు జమ చేసినట్టు ఏసీబీ తెలిపింది. రమేశ్‌ మొత్తం ఆస్తులు రూ.12 కోట్ల వరకు ఉంటాయని, అయితే మార్కెట్‌ విలువ ప్రకారం ఇవి రూ.25 కోట్ల వరకు ఉండే అవకాశం ఉందని ఏసీబీ అధికారులు తెలిపారు.


 సాక్షి, హైదరాబాద్‌: ప్రభుత్వ భూములు అన్యాక్రాంతం కాకుండా చర్యలు తీసుకోవాలని కేంద్ర హోంమంత్రి రాజ్‌నాథ్‌సింగ్‌కు సీపీఎం రాష్ట్ర కార్యదర్శి తమ్మినేని వీరభద్రం మంగళవారం లేఖ రాశారు.
 హైదరాబాద్, దాని పరిసర ప్రాంతాల్లో ఉన్న వేలఎకరాల ప్రభుత్వ భూములు ఆక్రమణకు గురవుతున్నాయని లేఖలో పేర్కొన్నారు. పలు ప్రాంతాల్లో ప్రభుత్వ, వక్ఫ్‌ భూములు అన్యాక్రాంతం అయ్యాయని తెలిపారు. వీటిపై సీబీఐ విచారణకు ఆదేశించాలని కోరారు.
  


 - మియాపూర్‌ భూముల కుంభకోణం కేసులో
 - నిర్ణయాన్ని నేటికి వాయిదా వేసిన హైకోర్టు
  
 సాక్షి, హైదరాబాద్‌: మియాపూర్‌ భూముల కుంభకోణంలో నిందితులు ట్రినిటీ ఇన్‌ఫ్రా వెంచర్స్‌ లిమిటెడ్‌ డైరెక్టర్‌ పీఎస్‌ పార్థసారథి, సువిశాల పవర్‌ జనరేషన్‌ లిమిటెడ్‌ డైరెక్టర్‌ పీవీఎస్‌ శర్మ దాఖలు చేసిన బెయిల్‌ పిటిషన్లపై ఉమ్మడి హైకోర్టులో వాదనలు ముగిశాయి. మంగళవారం ఈ మేరకు వాదనలు విన్న న్యాయమూర్తి జస్టిస్‌ ఉప్మాక దుర్గాప్రసాదరావు తన నిర్ణయాన్ని బుధవారానికి వాయిదా వేస్తూ ఉత్తర్వులు జారీ చేశారు. మియాపూర్‌ భూముల అక్రమ రిజిస్ట్రేషన్ల కుంభకోణంలో పోలీసులు పలువురిపై కేసులు నమోదు చేసి అరెస్ట్‌ చేసిన విషయం తెలిసిందే. పార్థసారథి, శర్మలకు కూకట్‌పల్లి కోర్టు బెయిల్‌ నిరాకరించడంతో.. వీరిద్దరూ హైకోర్టును ఆశ్రయించారు.
 
 పిటిషనర్ల తరఫున సీనియర్‌ న్యాయవాది వేదుల వెంకటరమణ వాదనలు వినిపిస్తూ, ఈ కేసులో ఓ సేల్‌డీడ్‌ తయారు చేశారని, అంతకుమించి ఏమీ జరగలేదని విన్నవించారు. పోలీసులు చెబుతున్నంత తీవ్రమైన కేసు కాదన్నారు. ఇప్పటికే పిటిషనర్ల కస్టడీ కూడా ముగిసిందని, అందువల్ల వారు జైలులో ఉండాల్సిన అవసరం లేదని తెలిపారు. ఈ వ్యవహారంలో ప్రభుత్వానికి జరిగిన నష్టమేమీ లేదని వివరించారు. అయితే ఈ వాదనలను పబ్లిక్‌ ప్రాసిక్యూటర్‌ సి.ప్రతాప్‌రెడ్డి తోసిపుచ్చారు. నేరపూరిత దురుద్దేశాలతో సేల్‌డీడ్‌లు తయారు చేశారని, దీని వల్ల ప్రభుత్వానికి రూ.కోట్ల మేర నష్టం వాటిల్లిందని కోర్టుకు విన్నవించారు.
 
 పెద్ద మొత్తంలో స్టాంప్‌ డ్యూటీ ఎగవేశారని తెలిపారు. ప్రభుత్వ భూములను స్వాహా చేయాలన్న దురుద్దేశంతోనే పిటిషనర్లు కుట్రపూరితంగా వ్యవహరించారని ఆరోపించారు. ఇందులో సబ్‌ రిజిస్ట్రార్ల సాయం తీసుకున్నారని వివరించారు. ఇది చాలా భారీ కుంభకోణమని తెలిపారు. ఈ సమయంలో న్యాయమూర్తి స్పందిస్తూ, చార్మినార్‌ను అమ్మినంత మాత్రాన దానిపై ఎవరికైనా హక్కులు సంక్రమిస్తాయా అంటూ ప్రశ్నించారు. వ్యక్తి వేరు, ప్రభుత్వం వేరని ప్రతాప్‌రెడ్డి తెలిపారు. ప్రభుత్వానికి నష్టం కలిగించడమంటే ప్రజలకు నష్టం కలిగించడమేనని వివరించారు.


 ప్రభుత్వ భూములకు రెక్కలు!
 - లొసుగుల ఆధారంగా రిజిస్ట్రేషన్లు
 - ప్రొహిబిటెడ్‌ లిస్టు గొడలకే పరిమితం
 - రిజిస్ట్రార్‌ కార్యాలయాల్లో కంప్యూటర్‌ ఆపరేటర్ల కీలకపాత్ర
 - అధికారులతో ప్లాట్ల బ్రోకర్ల మిలాఖత్‌
 - సెంటుకో రేటుతో వ్యాపారం
 - ఆక్రమణలపై అధికారుల ఉదాసీన వైఖరి
  
 
 కర్నూలు మండలం రుద్రవరంలో సర్వే నెం.675లోని ప్రభుత్వ భూమిని సెక‌్షన్‌ 71(కోర్టు అనుమతి) కింద రిజిస్ట్రేషన్‌ చేశారు.
 
 కర్నూలు మండలం బి.తాండ్రపాడులోని సర్వే నెం.336, 337(మంగళగిరి కాలనీ)లలో 59 ఎకరాల ప్రభుత్వ భూమి ఉంది. అయితే ఈ భూమి నగర పరిసరాల్లో ఉండటంతో రిజిస్ట్రేషన్‌ చేశారు.
 
 కల్లూరు పరిధిలోని రేడియో స్టేషన్‌ సమీపంలో 320/1ఏ వక్ఫ్‌ బోర్డు భూమి ఉంది. పరిమళనగర్‌ పేరిట ప్లాట్లు వేసి విక్రయించారు. ఇక్కడ కోర్టు కాపీని సాకుగా చూపి పని కానిచ్చేశారు.
 
 ఉల్చాల రోడ్డులోని సర్వే నెం.124లో వక్ఫ్‌ భూమి ఉంది. దీన్ని గంపగుత్తగా రిజిస్ట్రేషన్‌ చేశారు. ఇక్కడ సెంటుకు రూ.3వేలు చొప్పున తీసుకున్నట్లు తెలిసింది.
 
 కర్నూలు మండలం దిన్నెదేవరపాడు పరిధిలోని జి.పుల్లారెడ్డి ఇంజనీరింగ్‌ కళాశాల వెనుక సర్వే నెం.19లో 60 ఎకరాల వక్ఫ్‌ భూమి ఉంది. రూ.20వేల నుంచి రూ.40వేల వరకు మామూళ్లు తీసుకొని రిజిస్ట్రేషన్‌ చేసినట్లు సమాచారం.
 
 కర్నూలు శివారు బళ్లారి చౌరస్తా నుంచి కొత్త ఈద్గాకు వెళ్లే రహదారి(సంతోష్‌నగర్‌)లోని సర్వే నెం.382లో వక్ఫ్‌ స్థలం ఉంది. ఈ స్థలానికీ రిజిస్ట్రేషన్‌ జరిగిపోయింది.
 
 
  ప్రభుత్వ భూములను ఎలాంటి పరిస్థితుల్లో రిజిస్ట్రేషన్‌ చేసేందుకు అవకాశం లేకపోయినా.. లొసుగులను అవకాశంగా చేసుకొని పని కానిచ్చేస్తున్నారు.
 
  
 కర్నూలు(టౌన్‌): ప్రభుత్వ భూమి కనిపిస్తే చాలు అక్రమార్కులు అక్కడ వాలిపోతున్నారు. అధికారుల చేతులు తడిపి రిజిస్ట్రేషన్‌ తంతు పూర్తి కానిచ్చేస్తున్నారు. ఇంకాస్త సమస్యత్మకం అయితే.. మామూళ్ల రేటు కాస్త పెంచితే పని ఇట్టే అయిపోతోంది. జిల్లా వ్యాప్తంగా ఈ తంతు సాగుతున్నా.. కర్నూలు శివారు, గ్రామాల పరిధిలోని భూముల విషయంలో వ్యవహారం మితిమీరింది. స్టాంపులు, రిజిస్ట్రేషన్ల శాఖను జిల్లాకే చెందిన డిప్యూటీ సీఎం కేఈ కృష్ణమూర్తి పర్యవేక్షిస్తున్నారు.
  
 అయితే ఈ ప్రాంతంలోనే ప్రభుత్వ భూమి యథేచ్ఛగా అన్యాక్రాంతమవుతోంది. ప్రతి రిజిస్ట్రేషన్‌కు రూ.2వేలు వసూలు చేస్తుండగా.. అసైన్డు భూముల రిజిస్ట్రేషన్‌కు రూ.20వేల నుంచి రూ.40వేల వరకు డిమాండ్‌ చేస్తున్నట్లు సమాచారం. అసైన్డు.. ప్రొహిబిటెడ్‌ లిస్టులోని సర్వే నెంబర్లు.. దేవాదాయ, వక్ఫ్‌, క్రైస్తవ ఆస్తులను ఎలాంటి పరిస్థితుల్లోనూ రిజిస్ట్రేషన్‌ చేయరాదు. వాస్తవానికి ఈ భూములకు మార్కెట్‌ విలువ కూడా ఉండదు. అయితే రిజిస్ట్రేషన్‌ శాఖ అధికారులు ఆ భూములకు సమీపంలోని ప్రయివేట్‌ భూముల సర్వే నెంబర్ల మార్కెట్‌ విలువ ఆధారంగా రిజిస్ట్రేషన్‌ చేస్తున్నారు. రికార్డుల్లో మాత్రం ఈ భూములను నిషేధిత సర్వే నెంబర్లుగానే చూపుతుండటం గమనార్హం. ప్రొహిబిటెడ్‌ సర్వే నెంబర్ల విషయంలో కర్నూలు, కల్లూరు రిజిస్ట్రేషన్‌ కార్యాలయాల్లో పనిచేస్తున్న కొందరు కంప్యూటర్‌ సిబ్బంది కీలకంగా వ్యవహరిస్తున్నట్లు తెలుస్తోంది. ప్లాట్ల బ్రోకర్లు ముందుగానే అధికారులతో మాట్లాడుకుని బేరం కుదుర్చుకున్న తర్వాత చకచకా పని జరిగిపోతోంది. అడిగే నాథుడే లేకపోవడంతో ఈ దందా అడ్డూఅదుపు లేకుండా సాగుతోంది.
  
 సెంటు రిజిస్ట్రేషన్‌కు రూ.20వేల నుంచి రూ.40వేలు
 దేవాదాయ, వక్ఫ్‌ బోర్డు, క్రైస్తవ ఆస్తులతో పాటు వివాదాస్పద స్థలాల విషయంలో రిజిస్ట్రేషన్‌ అధికారులు సెంటుకు రూ.వేలల్లో వసూలు చేస్తున్నట్లు చర్చ జరుగుతోంది. సంతోష్‌నగర్‌ సమీపంలో వక్ఫ్‌ బోర్డు స్థలం రిజిస్ట్రేషన్‌ విషయంలో సెంటుకు రూ.30 వేలు వసూలు చేసినట్లు సమాచారం. రుద్రవరం మండలంలో రూ.10వేల నుంచి రూ.15వేలు.. పుల్లారెడ్డి కళశాల వెనుక(సమీపంలో) రూ.20వేల ప్రకారం వసూళ్లకు పాల్పడినట్లు తెలిసింది. ఈ భూములు ఒకప్పుడు పట్టణానికి దూరంగా ఉండటం.. ప్రస్తుతం నగర పరిధి విస్తరిస్తున్న నేపథ్యంలో అక్రమ రిజిస్ట్రేషన్లకు తెరలేచింది. అదేవిధంగా 2014 సంవత్సరంలో స్టాంటన్‌పురం, మామిదాలపాడు, మునగాలపాడు గ్రామ పంచాయతీలను కర్నూలు నగరపాలక సంస్థలో విలీనం చేశారు. దీంతో పట్టణానికి సమీపంలోని దేవాదాయ, వక్ఫ్‌ భూములపై అక్రమార్కుల కన్నుపడింది.
  
 ఆక్రమణలపై చూసీచూడనట్లుగా..!
 జిల్లాలో ప్రభుత్వ భూములతో పాటు వక్ఫ్‌, క్రిస్టియన్‌ ఆస్తులు అన్యాక్రాంతమవుతున్నా అధికారుల చూసీచూడనట్లు వ్యవహరిస్తున్నారు. ఫిర్యాదులు వస్తే తప్ప కన్నెత్తి చూసే పరిస్థితి కనిపించట్లేదు. దేవాదాయ, వక్ఫ్‌ బోర్డు, క్రైస్తవ ఆస్తులను ఆయా వర్గాల సంక్షేమం దృష్ట్యా కేటాయించినా.. ఆ దిశగా ఎలాంటి ఫలితం ఇవ్వలేని పరిస్థితి నెలకొంది. పర్యవేక్షణ కొరవడటం.. అధికారుల అవినీతి.. అక్రమార్కుల చాకచక్యం.. వెరసి కోట్లాది రూపాయల ప్రభుత్వ భూమి పెద్దల చేతుల్లోకి వెళ్లిపోతోంది.
  
 ఫిర్యాదులు వాస్తవమే.. విచారణ చేయిస్తా
 దేవాదాయ, వక్ఫ్‌ బోర్డు, క్రైస్తవ ఆస్తులు, భూముల విషయంలో ఫిర్యాదులు వస్తున్నాయి. నిషేధిత సర్వే నెంబర్లలో ప్లాట్లు, భూములతో పాటు అసైన్డ్‌ భూములను రిజిస్ట్రేషన్‌ చేయరాదు. ప్రొహిబిటెడ్‌ సర్వే నెంబర్ల లిస్టు కార్యాలయంలో ప్రదర్శించాం. కొనుగోలుదారులు ఒకటికి రెండు సార్లు సరిచూసుకోవాలి. ఫిర్యాదులను పరిగణనలోకి తీసుకుని విచారణ చేయిస్తాం. నిబంధనలకు విరద్ధుంగా రిజిస్ట్రేషన్లు జరిగినట్లయితే చర్యలు తీసుకుంటాం.
 – యు.వి.వి.రత్న ప్రసాద్‌, జిల్లా రిజిస్ట్రార్‌, స్టాంపులు, రిజిస్ట్రేషన్ల శాఖ 
  


 
 రాజమహేంద్రవరం నడిబొడ్డున ‘అధికారిక’ కబ్జా
 
 పేదలను ఖాళీ చేయించి కంచె వేసిన టీడీపీ నేత
 
 ‘సాక్షి’ వద్ద పక్కా ఆధారాలు
 
 రాజమండ్రి: వివాదంలో ఉన్న స్థలం లేదా ఖాళీగా ప్రభుత్వం స్థలం కనపడితే చాలు తెలుగు తమ్ముళ్లు కర్చీఫ్‌ వేసేస్తున్నారు. ఆక్రమించిన స్థలానికి కంచె వేసి ఈ స్థలం తాము కొన్నామంటూ దొంగ ఆధారాలు సృష్టించేస్తున్నారు. ప్రభుత్వ స్థలాలను రక్షించాల్సిన అధికారులు రాజకీయ ఒ›త్తిళ్ల వల్ల చూసీచూడనట్లు వదిలేస్తున్నారు. తూర్పుగోదావరి జిల్లా రాజమహేంద్రవరం నగరం నడిబొడ్డున అత్యంత విలువైన నగరపాలక సంస్థ స్థలాన్ని అధికారపార్టీకి చెందిన ఓ నాయకుడు కబ్జా చేశాడు.
 ఆ స్థలాన్ని తాను కొనుగోలు చేశాని చెబుతూ అక్కడ 50 ఏళ్లుగా గుడిసెలు, రేకుల షెడ్లు వేసుకుని నివసిస్తున్న 110 మంది పేద కుటుంబాలను ఖాళీ చేయించి కంచె వేశాడు. ఆ స్థలం విలువ రూ. 100 కోట్ల పైనే ఉంటుందని అంచనా. పేదలు నిరాశ్రయులు కావడంతో ఆ స్థలం గురించిన పూర్వాపరాలను ’సాక్షి’ శోధించింది. తీరా అది ప్రభుత్వ స్థలమని ఆధారాలతో సహా నిర్థారణ అయింది.  ఈ ‘అధికారిక’ కబ్జాకు సంబంధించిన పూర్వాపరాలు ఇలా ఉన్నాయి.
 
 ఆదెమ్మ దిబ్బ అసలు కథ ఇదీ...
 రాజమహేంద్రవరం నగర నడిబొడ్డున కంబాల చెరువు సమీపంలో 36,38 డివిజన్ల పరిధిలో కొందరు ప్రైవేటు వ్యక్తుల స్థలం ఉంది. దీనిని ఆదెమ్మ దిబ్బ ప్రాంతంగా పిలిస్తున్నారు. నగరపాలక సంస్థ పాఠశాల నిర్మాణం కోసం అప్పటి రాజమహేంద్రవరం సబ్‌కలెక్టర్‌ 1978 నవంబర్‌ 8వ తేదీన సర్వే నంబర్లు 724/1డీలో 25 సెంట్లు, 725/3ఏలో ఎకరా 81 సెంట్లు, 725/3ఈలో ఒక సెంటు, 730/2సీ2లో 3 ఎకరాల 69 సెంట్లు, 731/2లో 11 సెంట్లు వెరసి మొత్తం 5 ఎకరాల 87 సెంట్ల స్థలం సేకరణకు డ్రాఫ్ట్‌ నోటిఫికేషన్‌ జారీ చేశారు. 28.05.1980లో ఈ సేకరణకు సంబంధించి డ్రాఫ్ట్‌ డిక్లరేషన్‌ జారీ చేసి 12.06.1981లో ఆమోదించారు. ఆయా స్థలాల యజమానులకు 30.07.1985లో సబ్‌కలెక్టర్‌ ప్రదీప్‌చంద్ర అవార్డు (నంబర్‌ 6/85) ప్రకటించారు.
 
 అవార్డు ఇచ్చిన సర్వే నంబర్ల స్థలాలు, యజమానులు వీరే..
 
 ఐదు సర్వే నంబర్లలో మొత్తం 5 ఎకరాలు 87 సెంట్లకు అప్పటి కలెక్టర్‌ ప్రదీప్‌ చంద్ర (30.07.1985లో) అవార్డు (నంబర్‌6/85) ప్రకటించగా.. తర్వాత ప్రభుత్వం కొంత స్థలం సేకరణ ప్రతిపాదనను ఉపసంహరించుకుంది. మరి కొందరు న్యాయస్థానానికి వెళ్లి తమ స్థలం సేకరణపై స్టే తెచ్చుకున్నారు. వీరు పోగా మిగిలిన వారికి అవార్డు(నగదు) అందజేశారు. అవార్డు అందుకున్న వారిలో ఈపు అప్పలస్వామి (సర్వే నంబర్‌ 724/1డీలో 25 సెంట్లు), కందుల సత్యానందం, కందుల మదన మోహనరావు, కందుల రాజేంద్రప్రసాద్‌ (సర్వే నంబర్‌  725/ 3ఏ1లో ఎకరా 63 సెంట్లు), కందుల సంజీవరావు (çసర్వే నంబర్‌ 730/2సీ2పీలో సెంటు), సత్యవోలు పాపారావు అతని కుమారులు నలుగురు (సర్వే నంబర్‌ 730/2సీ2పీలో ఎకరా 81 సెంట్లు), వాడరేవు వీరభద్రరావు (సర్వే నంబర్‌ 731/2లో 9 సెంట్లు) ఉన్నారు.
 
 సర్వే నంబర్‌ 725/3ఏ2లో 7800 చదరపు అడుగులకు ప్రభుత్వం ప్రకటించిన అవార్డు వర్తించలేదు. అదే విధంగా సర్వే నంబర్‌ 730/2సీ2పీలో సత్యవోలు సత్యవతి(పాపారావు తమ్ముడు లింగమూర్తి సతీమణి)కి చెందిన ఎకరా 88 సెంట్ల స్థలానికి కూడా అవార్డు వర్తించలేదు. వీరు తమ స్థల సేకరణపై న్యాయస్థానాన్ని ఆశ్రయించగా కోర్టు స్టే(యథాతథ స్థితి) విధించింది. ఇంకా సర్వే నంబర్‌ 725/3ఏ2, సర్వే నంబర్‌ 731/2పీలోని 1083 చదరపు అడుగుల స్థలాన్ని సేకరణ ప్రతిపాదన నుంచి ప్రభుత్వం ఉపసంహరించుకుంది. ఈ  నాలుగు సర్వే నంబర్లపై కోర్టులో ఆరు కేసులు నడిచాయి.
 
 సత్యవోలు శేషగిరిరావు వద్ద  కొనుగోలు చేశానంటూ...
 
 తెలుగుదేశం పార్టీ నేత, కోలమూరు గ్రామ జన్మభూమి కమిటీ సభ్యుడు పిన్నమరెడ్డి ఈశ్వరుడు తాను ఈ స్థలం సత్యవోలు పాపారావు(లేట్‌) రెండో కుమారుడు సత్యవోలు శేషగిరిరావు వద్ద కొనుగోలు చేశానని చెబుతున్నారు. ఆదెమ్మ దిబ్బ ప్రాంతంలో సత్యవోలు కుటుంబానికి సర్వే నంబర్‌ 730/2సీ2లో 3 ఎకరాల 69 సెంట్ల స్థలం ఉంది. ఇందులో సత్యవోలు పాపారావు ఎకరా 81 సెంట్లు, అతని తమ్ముడు సత్యవోలు లింగమూర్తి సతీమణి సత్యవతి ఎకరా 89 సెంట్లు సేకరిస్తూ ప్రభుత్వం నోటిఫికేషన్‌ జారీ చేసింది.
 అయితే సత్యవోలు లింగమూర్తి సతీమణి హైకోర్టుకు వెళ్లి స్టే తెచ్చుకోవడంతో వారికి ప్రభుత్వం వారికి అవార్డు ఇవ్వకుండా సేకరణ నుంచి ఆ స్థలం ఉపసంహరించుకుంది. సత్యవోలు పాపారావు అతని కుమారులకు మాత్రం ఎకరా 81 సెంట్ల స్థలానికి అవార్డు(రూ. 2, 30, 260)ను ప్రకటించింది. దీనిని బట్టి తేలిందేమిటంటే అక్కడ ఇక సత్యవోలు పాపారావు అతని కుమారులకు సెంటు స్థలం కూడా లేదు. అయితే  టీడీపీ నేత పిన్నమరెడ్డి ఈశ్వరుడు తాను సత్యవోలు పాపారావు రెండో కుమారుడు శేషగిరిరావు వద్ద ఈ స్థలం కొనుగోలు చేశానని చెబుతూ కంచె వేయడం గమనార్హం. దీనిపై రెవెన్యూ ఉన్నతాధికారులు, నగరపాలక సంస్థ అధికారులు విచారణ జరిపాలని, ప్రభుత్వ స్థలాన్ని కాపాడాలని నగరవాసులు డిమాండ్‌ చేస్తున్నారు. పిన్నమరెడ్డి ఈశ్వరుడు ఖాళీ చేయించిన ఆ స్థలంలో ఇళ్లు కట్టించి ఇవ్వాలని గూడులేని పేదలు ప్రభుత్వాన్ని కోరుతున్నారు.
 
 70 ఏళ్లుగా ఇక్కడే ఉంటున్నాం..
 మాకు పెళ్లి అయినప్పటి నుంచి ఇక్కడే ఉన్నాం. మా అత్త, వాళ్ల అత్త కూడా ఇక్కడే ఉన్నారని మా ఆయన చెబుతున్నారు. దాదాపు 70 ఏళ్లు నుంచి ఇక్కడే ఉన్నాం. ఆవ(మడగు)ను పూడ్చి ఇళ్లు కట్టుకున్నాం. మా తర్వాత చాలా మంది పేదలు వచ్చారు. ఇప్పుడు పిన్నమరెడ్డి ఈశ్వరుడు అనే వ్యక్తి ఈ స్థలం కొన్నామంటూ ఖాళీ చేయాలంటున్నారు. అందరూ ఖాళీ చేసి వెళ్లిపోయారు. మా గుడిసెను కూడా కలుపుతూ కంచె వేశారు. మా గుడిసెను కూడా తీసేయాలని బెదిరిస్తున్నారు. మాకు ఏ ఆధారం లేదు. న్యాయం చేయండయ్యా.  – కొయ్య నాగమణి, ఆదెమ్మదిబ్బ ప్రాంత నివాసి


 కాసులు కురిపిస్తున్న వెబ్‌ల్యాండ్‌
 - రాత్రికి రాత్రి మారిపోతున్న భూమి వివరాలు
 - రెవెన్యూ కార్యాలయాల్లో దందా
 - ధనవంతుల చేతుల్లోకి ప్రభుత్వ భూములు
 - నేడు తహసీల్దార్లతో ఉప ముఖ్యమంత్రి సమీక్ష
  
 అనుగొండకు చెందిన రైతు అయ్యన్న తన కొడుకును ఫిలిపిన్స్‌లో మెడిసిన్‌ చదివిస్తున్నాడు. రెండవ సంవత్సరం వాయిదా డబ్బు కట్టేందుకు తనకున్న 3.03 సెంట్ల భూమిని అమ్ముకున్నడు. 118/1 సర్వేలో ఉండాల్సిన భూమి వివరాలు ఆన్‌లైన్‌లో 118/సి1 ,118/సి2 పేరిట నమోదయ్యాయి. ఆన్‌లైన్‌లో వివరాలు సరిగ్గా నమోదు చేయిస్తే తప్ప రిజిస్టర్‌ చేయమని సబ్‌ రిజిస్ట్రార్‌ చేప్పడంతో భూమి కొనుగొలుదారులు డబ్బివ్వకుండా వాయిదా వేశారు. ఆన్‌లైన్‌లో వివరాలు సరి చేసేందుకు రెవెన్యూ ఆ«ధికారులు డిమాండ్‌ చేశారు. అంత డబ్బు రైతు ఇవ్వలేక 6నెలల నుంచి రెవెన్యూ కార్యాలయం చూట్టూ తిరుగుతున్నడు.
  
 
  ప్యాలకుర్తిలో జర్మన్‌ యూనిస్‌బాషాకు సర్వే నెం.431/3లో పెద్దల ఆస్తి 2.18 సెంట్ల భూమి సంక్రమించింది. ఇందుకు సంబంధించి పూర్తి స్థాయి డాక్యుమెంట్లు ఉన్నాయి. రెవెన్యూ అధికారులు లక్ష రూపాయల లంచం తీసుకొని తెలుగుదేశం పార్టీ నేత జుట్ల వెంకటరాముడు 46సెంట్ల భూమి అనుభవిస్తున్నట్లు ధ్రువీకరణ పత్రం జారీ చేశారు. దిక్కుతోచని రైతు యూనిస్‌ కోర్టును ఆశ్రయించాల్సి వచ్చింది.
 
  
 - ఇవీ రెవెన్యూ లీలలు.
  
 కోడుమూరు: కోడుమూరు మండలంలో రెవెన్యూ అ«ధికారులు ఒకరి భూములను మరొకరి పరం చేస్తున్నారు. వందల ఎకరాల ప్రభుత్వ భూములు రాజకీయ నాయకులకు, రియల్‌ ఎస్టేట్‌ వ్యాపారులకు కట్టబెడుతున్నరు. తప్పు చేసిన అధికారులను శిక్షించకుండా ఉన్నతాధికారులు వదిలేస్తుండటంతో మండల స్థాయిలో ఇష్టారాజ్యం సాగుతోంది. కంప్యూటర్‌ ఆపరేటర్లు, వీఆర్వోలు కుమ్మక్కై రాత్రికి రాత్రి రైతుల పేర్లను మార్చేస్తున్నారు. వర్కూరు గ్రామంలో సర్వే నెంబర్‌ 326/ఎ2ఎ, 332/ఎలోని 1.22 ఎకరాలకు సంబంధించి సుబ్బలక్ష్మమ్మ అక్టోబర్‌ 10, 2015న ల్యాండ్‌ కన్వర్షన్‌కు దరఖాస్తు చేసుకుంది. రూ.13,176 ఫీజు(చలానా నెం.10734) చెల్లించి ల్యాండ్‌ కన్వర్షన్‌ చేయించుకొని ఆ భూమిని ప్లాట్లు వేసి విక్రయించారు. అయితే అదే భూమిని వ్యవసాయ భూమిగా ఆన్‌లైన్‌లో నమోదు చేసి పాస్‌ పుస్తకం రద్దు చేయకపోవడంతో సదరు రైతు బ్యాంకులో పంట రుణం, పంట నష్టపరిహారం పొందారు.
  
 ప్యాలకుర్తి గ్రామంలో ఆర్వి వెంకటమ్మకు 863, 862/6, 862/4, 862/3,862/1 సర్వే నెంబర్‌లలో 7.35 ఎకరాల ఏడబ్ల్యూ భూమి ఉంది. వారసత్వంగా ఇద్దరు కొడుకులకు ఇవ్వకుండా చిన్న కుమారుడి భార్య అరుంధతికి ఆగస్టు 8, 2004న గూడూరు సబ్‌ రిజిస్ట్రార్‌ కార్యాలయంలో(డాక్యుమెంట్‌ నెంబర్‌ 1423/2004) రిజిస్టర్‌ చేయించింది. వెంకటమ్మ పెద్ద కుమారుడు కోర్టును ఆశ్రయించడంతో కర్నూలు సివిల్‌కోర్టు ఆగస్టు 28, 2013న ఆ రిజస్ట్రేషన్‌ను రద్దు చేసింది. అయినప్పటికీ అరుంధతి భారీ ఎత్తున రెవెన్యూ అధికారులకు డబ్బు ముట్టజెప్పడంతో మార్చి 3, 2017న 7.35 ఎకరాలకు పట్టాదారు పాసు పుస్తకం మంజూరు చేశారు. ఈవిధంగా కోడుమూరు మండలంలో వందల ఎకరాలను ఇష్టానుసారంగా ఆన్‌లైన్‌లో మార్చేస్తూ తహసీల్దార్లు లక్షలాది రూపాయలను రైతుల నుంచి దోచుకుంటున్నా అడిగే నాథుడే కరువయ్యాడు. 
  
 ప్రక్షాళన జరిగేనా?
 కోడుమూరు మండలంలో ఇష్టానుసారంగా ఆన్‌లైన్‌లో పేర్లను తొలగిస్తున్నారనే విషయాన్ని గత జాయింట్‌ కలెక్టర్‌ హరికిరణ్‌ సాక్ష్యాధారాలతో ఉపముఖ్యమంత్రి కేఈ కృష్ణమూర్తి సమక్షంలోనే విచారణ నిర్వహించారు. అయినప్పటికీ చర్యలు కరువయ్యాయి. తాజాగా ఈ నెల 12న కర్నూలులో ఉపముఖ్యమంత్రి కేఈ కృష్ణమూర్తి అధ్యక్షతన తహసీల్దార్లతో వెబ్‌ల్యాండ్‌పై సమీక్ష నిర్వహించనున్నారు. మరి ‘సాక్షి’ సాక్ష్యాధారాల నేపథ్యంలోనైనా రెవెన్యూ ప్రక్షాళనకు డిప్యూటీ సీఎం చొరవ చూపుతారా? ఎప్పటిలానే మమ అనిపిస్తారా? చూడాలి.
  


 కర్నూలు(అగ్రికల్చర్‌): ఎలాంటి ఆక్షేపణలు లేని ప్రభుత్వ భూముల్లో అక్రమణలో ఉన్న నివాస సముదాయాలను 100 చదరపు గజాల వరకు క్రమబద్ధీకరించేందుకు ప్రభుత్వం ఉత్తర్వులు జారీ చేసిందని జిల్లా రెవెన్యూ అధికారి గంగాధర్‌గౌడు తెలిపారు. ప్రభుత్వం జారీ చేసిన నిబంధనలకు లోబడి అర్హులైన వారు మీసేవ కేంద్రాల ద్వారా తగిన ఆధారాలతో దరఖాస్తు చేసుకోవాలని ఆయన సోమవారం ఒక ప్రకటనలో తెలిపారు. 2014 జనవరి1కి ముందు జరిగిన ఆక్షేపణలు లేని నివాస గృహ సముదాయాలను మాత్రమే క్రమబద్ధీకరించబడుతుందన్నారు. దరఖాస్తులను ఆర్‌డీఓ ఆధ్వర్యంలోని కమిటీ విచారణ జరిపి నిర్ధారిస్తుందని డీఆర్‌ఓ తెలిపారు. అర్హులైన వారు ఈ అవకాశాన్ని సద్వినియోగం చేసుకోవాలన్నారు.     
  


 ‘ముఖ్య’నేత తరఫున మడ భూములను మడతేశాడు
 రూ.వందల కోట్ల భూమి హాంఫట్‌
 - గుంటూరుజిల్లాలో అధికారపార్టీ ఎమ్మెల్యే చేతివాటం
 - సంపూర్ణంగా సహకరించిన రెవెన్యూ యంత్రాంగం
 - 508 ఎకరాల సర్కారు భూమి ప్రైవేటు వ్యక్తుల పరం
 
 సాక్షి, అమరావతి బ్యూరో: ప్రభుత్వ భూములంటే ప్రజల ఆస్తి. వాటిని జాగ్రత్తగా కాపాడాల్సిన ప్రభుత్వం రికార్డులను తారుమారు చేస్తూ నిబంధనలకు విరుద్ధంగా ప్రైవేటు వ్యక్తులకు కట్టబెడుతుంటే ఏమనాలి? కంచే చేను మేస్తుంటే కాపాడేవారెవరు? అధికారపార్టీ నాయకుల చేతివాటానికి అడ్డూఅదుపూ ఉండడం లేదు. కనిపించిన భూమినల్లా కాజేస్తున్నారు. ప్రభుత్వ భూములను కాపాడాల్సిన రెవెన్యూ అధికారులు వారికి అండగా నిలుస్తూ ఈ దారుణాలకు తమవంతు సాయం చేస్తున్నారు. గుంటూరుజిల్లా తీర ప్రాంతంలోని ప్రభుత్వ భూముల వ్యవహారం చూస్తే అధికారపార్టీ నాయకులు ఎంత బరితెగిస్తున్నారో అర్ధమౌతుంది.
 
 రికార్డులను తారుమారు చేశారు.. నిబంధనలకు విరుద్ధంగా సర్వే నంబర్లను సబ్‌ డివిజన్‌ చేశారు. 313 ఎకరాలను హాంఫట్‌ చేసేశారు. అదేగాక సర్వే నెంబర్ల కొత్త ఫార్మాట్‌ పేరిట మరో 195 ఎకరాలను సొంతం చేసేసుకున్నారు. మొత్తం 508 ఎకరాలను స్వాహా చేశారు. వీటి విలువ రూ.వందల కోట్లలోనే ఉంటుంది. వీటితో పాటు తీర ప్రాంతానికి రక్షా కవచంలా ఉండే మడ అడవులనూ తెగనరికేస్తూ నేలను చదునుచేస్తూ భూమిని మింగేస్తున్నారు. రేపల్లె నియోజకవర్గ తెలుగుదేశం పార్టీ ఎమ్మెల్యే అనగాని సత్యప్రసాద్‌ ఈ భూ కుంభకోణానికి సూత్రధారి అని వినిపిస్తోంది. పాత్రధారులంతా ఆయన అనుచరులు, అనుయాయులే. వీరికి రెవెన్యూ యంత్రాంగం యథాశక్తి సహకరించి ప్రభుత్వ భూములను ప్రయివేటు పరం చేసేసింది. ఆ వివరాలు మీకోసం...
 
 విభజించు...కొల్లగొట్టు
 గుంటూరు జిల్లా నిజాంపట్నం మండలంలో సర్వే నంబర్‌ 875లో 416.26 ఎకరాల ప్రభుత్వ భూమి ఉంది. ఒకప్పుడు ఈ భూమిని వాన్‌పిక్‌ ప్రాజెక్టుకు కేటాయించేందుకు ప్రభుత్వం గుర్తించింది. కానీ ఆ ప్రాజెక్టుకు ఇంకా కేటాయించలేదు. ప్రభుత్వ అధీనంలోనే ఉంది. అందువల్ల ఆ భూముల క్రయవిక్రయాలు జరపకూడదని ఉత్తర్వులు కూడా జారీ చేసింది. క్రయవిక్రయాలు నిషేధించిన భూముల జాబితా వివరాలతో 2016లో విడుదల చేసిన 22ఏ రికార్డుల్లో ఈ విషయాన్ని పేర్కొంది. కానీ నిబంధనలకు విరుద్ధంగా రెవెన్యూ అధికారులు సర్వే నంబర్‌ 875ను ఎనిమిది సబ్‌ డివిజన్లుగా విభజించేశారు.
 
 అందులో సర్వే నంబర్‌ 875తో 231.54 ఎకరాలను అసెస్సడ్‌వేస్ట్‌ డ్రై(ఏడబ్లూడీ)గా పేర్కొని ప్రభుత్వ భూమిగా చూపించారు. సబ్‌ డివిజన్లుగా విభజించిన భూమిని ప్రైవేటు వ్యక్తుల పేరుతో 1బీ అడంగల్‌లో నమోదు చేశారు. సర్వే నంబర్‌ 875(1)లో 89.60 ఎకరాలు,  875(2)లో 61 ఎకరాలు , 875(3)లో  57.50 ఎకరాలు, 875(4)లో 52.50 ఎకరాలు, 875(5)లో 30 ఎకరాలు, 875(6)లో 12.50 ఎకరాలు, 875(7)లో 8ఎకరాలు, 875(8)లో 2.50 ఎకరాలు ఉన్నట్లు చూపించారు. అలా  313.60 ఎకరాలు పలువురు ప్రైవేటు వ్యక్తుల అధీనంలో ఉన్నట్లుగా రికార్డుల్లో నమోదు చేశారు. డీకే పట్టా, ఆక్రమణ, అనువంశిక, కొనుగోలు  చేయడం తదితర విధాలుగా ఆ భూమి అంతా ప్రైవేటు వ్యక్తులదేనని 1బీ రికార్డుల్లో నమోదు చేశారు. వీరంతా ఎమ్మెల్యే అనగాని సత్యప్రసాద్‌ అనుయాయులే. దానిని బట్టి ఇదో పెద్ద భూ కుంభకోణమని మనకు తేలిగ్గా అర్థమౌతుంది.
 
 అటవీ భూమిని కలిపేసుకునే ఎత్తుగడ..
 ఈ భూ మాయ వెనుక మరో పన్నాగం కూడా ఉంది. సర్వే నంబర్‌  875లో 416.26 ఎకరాలు ఉన్నట్లుగా 2016 రికార్డుల్లో ఉంది. తాజాగా చూపించిన రికార్డుల్లో 875 సర్వే నంబర్‌ కింద  231.54 ఎకరాలను అసెస్సడ్‌వేస్ట్‌ డ్రై(ఏడబ్లూడీ)గా ప్రభుత్వ భూమిగా చూపించారు. ఇక ఎనిమిది సబ్‌ డివిజన్ల కింద 313.60 ఎకరాలు ప్రైవేటు వ్యక్తుల అధీనంలో ఉన్నట్లుగా లెక్కతేల్చారు. ఈ రెండు కలిపితే మొత్తం 545.14 ఎకరాలు అవుతున్నాయి. అంటే 128.88 ఎకరాలు అధికంగా చూపించారు. ఆ భూముల సమీపంలో ఉన్న అటవీ భూమిని కూడా కలిపేసుకునేందుకే ఈ ఎత్తుగడ వేశారు.  ఇప్పటికే తీరప్రాంతానికి సమీపంలో ఉన్న మడ అడవులను నరికివేస్తూ భూమిని కలిపేసుకుంటున్నారు. ఆ విధంగా సర్వే నంబర్‌ 875 సబ్‌ డివిజన్ల ముసుగులో మొత్తం 313.60 ఎకరాలు కొల్లగొట్టేందుకు పక్కాగా పన్నాగం పన్నారు. ఆ ప్రాంతంలో ఎకరా మార్కెట్‌ విలువ దాదాపు రూ.20 లక్షలపైనే పలుకుతోంది.
 
 కొత్త ఫార్మాట్‌తో 195 ఎకరాలు హాంఫట్‌
 సర్వే నంబర్‌ 874లో మరో 195 ఎకరాలు హాంఫట్‌ చేశారు. 2011లో రెవెన్యూ అధికారులు విడుదల చేసిన 22ఏ( ప్రొహిబిటెడ్‌ ప్రోపర్టీస్‌)  రికార్డుల్లో సర్వే నంబర్‌ 874తో 422.84 ఎకరాలను ప్రభుత్వభూమి (మందబైలు పోరంబోకు) గా పేర్కొన్నారు. కానీ 2016లో విడుదల చేసిన 22ఏ (ప్రొహిబిటెడ్‌ ప్రోపర్టీస్‌)  రికార్డుల్లో సర్వే నంబర్‌ 874 కింద 227.84 ఎకరాలే ఉన్నట్లు చూపిస్తూ ఆ భూమిని వాన్‌పిక్‌ ప్రాజెక్టు కోసం గుర్తించినట్లు నమోదు చేశారు. మరి ఆ సర్వే నంబర్‌లోని మిగిలిన 195 ఎకరాలు ఏమయ్యాయి...!? ఇక్కడే ఉంది అసలు మాయ. ఇటీవల పాత సర్వే నంబర్ల స్థానంలో కొత్తవి అమలులోకి తీసుకువచ్చారు. నిబంధనల ప్రకారం సర్వే నంబర్లు మార్చాలంటే ఓ కమిటీని నియమించి నిర్ణయించాల్సి ఉంటుంది.
 
 కానీ కమిటీ లేకుండానే అధికారులు 874 సర్వే నంబర్‌ను కొత్త ఫార్మాట్‌ పేరిట 1126, 1128, 1129, 1132 తదితర నంబర్లుగా విభజించారు. ఆ పేరుతో 195 ఎకరాల ప్రభుత్వ భూమిని రికార్డుల నుంచి గల్లంతు చేశారు. ఆ భూమిని  పట్టాభూమిగా, ఆక్రమణ భూమిగా చిత్రీకరిస్తూ అధికార పార్టీ నేతల బినామీల పేరిట నమోదు చేస్తూ కంప్యూటర్‌ 1బీ అడంగల్‌లో పేర్కొన్నారు. ఆ భూమి విలువ రూ.39కోట్లు. బహిరంగ మార్కెట్‌లో దీని విలువ ఇంకా ఎక్కువే.
 
 అందరూ ఎమ్మెల్యే సన్నిహితులే..
 ప్రభుత్వ భూములను తమపేరుతో 1బీ అడంగల్‌లో నమోదు చేసుకున్నవారం తా రేపల్లె టీడీపీ ఎమ్మెల్యే అనగాని సత్య ప్రసాద్‌ సన్నిహితులే కావడం గమనార్హం. ఆయన కు అత్యంత సన్నిహితుడు, కూచిన పూడి మార్కెట్‌ యార్డ్‌ చైర్మన్‌ పంతాని మురళీధరరావు కుటుంబసభ్యుల పేరుతో పలు సర్వే నంబర్ల భూములను నమోదు చేశారు. ఆయన కుమారులు, కోడళ్లతోపా టు సమీప బంధువుల పేర్లు ఉన్నాయి. ఎమ్మెల్యే సత్య ప్రసాద్‌కు సన్నిహితుడైన నగరం ఎస్‌వీ ఆర్‌ఎం కళాశాల రిటైర్డ్‌ ప్రిన్సి పాల్, ప్రస్తుత డైరెక్టర్‌ కేసన సురేంద్రబాబు కుటుంబ సభ్యులకు కూడా కొన్ని భూము లపై హక్కు కల్పించారు. ఆ జాబితాలో సురేంద్రబాబు సోదరుడు, ఏపీఐఐసీలో డీఈగా విశాఖపట్నంలో పనిచేస్తున్న సత్యదేవ ప్రసాద్‌ కుటుంబసభ్యుల పేర్లు కూడా ఉండడం గమనార్హం. వాస్తవానికి వీరంతా టీడీపీ ప్రజాప్రతినిధికి బినామీలుగానే ఈ భూములు పొందారన్న ఆరోపణలు వెల్లువెత్తుతున్నాయి.


 సర్కారు భూముల విషయంలో రిజిస్ట్రేషన్‌ శాఖ నిర్ణయం
 - అక్రమాలకు పాల్పడితే తొలగిస్తామని సబ్‌ రిజిస్ట్రార్లకు హెచ్చరిక
 - ‘ఎనీవేర్‌’లో అవకతవకల నియంత్రణకు చర్యలు
 
 సాక్షి, హైదరాబాద్‌: సర్కారు భూములను ఇతరుల పేరిట రిజిస్ట్రేషన్‌ చేసిన సబ్‌ రిజిస్ట్రార్లను ఉద్యోగం నుంచి తొలగించాలని రిజిస్ట్రేషన్ల శాఖ నిర్ణయించింది. ‘ఎనీవేర్‌’ రిజిస్ట్రేషన్‌ ప్రక్రియలోని లోపాలను ఆసరాగా చేసుకొని కొందరు సబ్‌ రిజిస్ట్రార్లు అక్రమార్కులకు కొమ్ము కాస్తున్నారని రిజిస్ట్రేషన్‌ శాఖకు ఫిర్యాదులు వెల్లువెత్తాయి. ఈ నేపథ్యంలో ప్రభుత్వ భూములను అన్యాక్రాంతం చేసేందుకు ప్రయత్నించే వారిపై ఉక్కుపాదం మోపాలని అధికారులు నిర్ణయించారు. ఎనీవేర్‌లో లోపాలను సరిదిద్దడంతో పాటు, ఉల్లంఘనులపై చర్యల కోసం ప్రత్యేక కమిటీ ఏర్పాటు చేశారు. 6 నెలల అధ్యయనం తర్వాత కమిటీ పలు సిఫార్సులు చేయగా.. కొత్త ఆర్థిక సంవత్సరం నుంచి వాటిని అమలు చేయాలని నిర్ణయించారు. తొలుత హైదరాబాద్, హైదరాబాద్‌ సౌత్‌ జిల్లాల్లో ప్రయోగాత్మకంగా ప్రారంభించి అనంతరం మిగిలిన జిల్లాల్లోనూ అమలు చేయాలని భావిస్తున్నారు.
 
 కమిటీ సిఫార్సులు..
 ► రిజిస్ట్రేషన్‌ కోసం కార్యాలయానికి అందిన దస్తావేజుల వివరాలను ముందస్తుగా సబ్‌ రిజిస్ట్రార్లు తనిఖీ చేయాలి. ఆ ఆస్తి ఏ సబ్‌ రిజిస్ట్రార్‌ కార్యాలయ పరిధిలో ఉన్నదో, అక్కడి నుంచి అనుమతి తీసుకోవాలి.
 ► సర్కారు సూచించిన నిషేధిత ఆస్తుల పుస్తకం (పీవోబీ)లో సదరు భూమి నమోదైనట్లు రుజువైతే దస్తావేజును తిరస్కరించాలి. పీవోబీలో లేని ఆస్తులనే రిజిస్ట్రేషన్‌కు అనుమతించాలి.
 ► వేరొక సబ్‌ రిజిస్ట్రేషన్‌ కార్యాలయం పరిధిలోని భూమికి సంబంధించి మార్కెట్‌ విలువను నిర్ధారించే విషయమై అక్కడి సబ్‌ రిజిస్ట్రార్‌కు ఈ మెయిల్‌ ద్వారా వివరాలు పంపాలి. ఈ–మెయిల్స్‌ను అందుకున్న సబ్‌ రిజిస్ట్రార్లు 48 గంటల్లోగా స్పందించాలి.
 ► దస్తావేజులో పేర్కొన్న మార్కెట్‌ విలువలో తేడా ఉన్నా, పీవోబీలో భూమి సర్వే నంబరు ఉన్నా, సంబంధిత పత్రాలను రిప్లయ్‌తో జత చేయాలి. మార్కెట్‌ విలువలో వ్యత్యాసం ఉంటే ఆ మొత్తం చెల్లించాలని సంబంధిత వ్యక్తులకు నోటీసులు జారీ చేయాలి.
 ► అలా కాకుండా తప్పుడు మార్కెట్‌ విలువతో ఫీజు లెక్కిస్తే సదరు సబ్‌ రిజిస్ట్రార్‌పై ‘భారతీయ స్టాంపుల చట్టం 1899’ ప్రకారం కఠిన చర్యలు తీసుకుంటారు.
 ► ఏదేని గ్రామంలో సర్వే నెంబరు 10ని పీవోబీలో పేర్కొని.. 10బీ, 10సీ సర్వే నెంబర్లలోని భూములుగా దస్తావేజులో పేర్కొంటే సదరు గుర్తింపులను సబ్‌ రిజిస్ట్రార్‌ రూఢీ చేసుకోవాలి.
 ► తెలంగాణ ల్యాండ్‌ రికార్డ్స్‌ మేనేజ్‌మెంట్‌ సిస్టమ్‌లో సరిచూసుకున్నాకే దస్తావేజును అనుమతించాలి. లేదంటే రెవెన్యూ అధికారులతో పరిశీలన చేయించుకోవాలని సూచిస్తూ దస్తావేజును తిరస్కరించాలి.
 ► సెక్షన్‌ 22ఎ ప్రకారం నిషేధించిన భూములను ఏదైనా సబ్‌ రిజిస్ట్రార్‌ రిజిస్ట్రేషన్‌ చేసినట్లయితే, ప్రభుత్వ సొమ్మును అపహరించిన నేరంతో సమానంగా పరిగణిస్తారు. ఉద్దేశపూర్వకంగా వ్యవహరించిన కేసులలో సదరు అధికారులను ఉద్యోగం నుంచి తొలగించా లని రిజిస్ట్రేషన్ల శాఖ స్పష్టం చేసింది.


 – ప్రభుత్వ స్థలం కనబడితే కాసులే
 – అక్రమాల ఆద్యుడు ‘మునిసిపల్‌ పెద్ద’
 – సొంత పార్టీలోనే వెల్లువెత్తుతున్న విమర్శలు
 రాయదుర్గం : రాయదుర్గంలో మునిసిపల్‌ స్థలాలను కాపాడుకోవడంలో అధికారులు విఫలమయ్యారు. ఫలితంగా కోట్ల రూపాయలు విలువ చేసే స్థలాలు కబ్జాకు గురవుతున్నాయి. ఇప్పటికే కొన్ని స్థలాలను ఆక్రమించుకుని, బంకులు ఏర్పాటు చేసి అనధికారికంగా అద్దెలు వసూలు చేసుకుంటున్నారు. కూరగాయల మార్కెట్‌  కాంప్లెక్స్‌లో ఖాళీగా ఉన్న రూములను ఓ ప్రజాప్రతినిధి తన అధీనంలో ఉంచుకుని, బాడుగలకు ఇచ్చి సొమ్ము చేసుకుంటున్నారు. పట్టణంలోని చెరువులు, రెవెన్యూ భూములు, రోడ్లు,  డ్రెయినేజీ స్థలాలను సైతం అక్రమార్కులు వదలడం లేదు. గతంలో ఉన్న సామూహిక మరుగుదొడ్ల స్థలాలను సైతం కబ్జాలు చేసి యథేచ్ఛగా ఇళ్ల నిర్మాణాలు చేసుకున్నారు. మునిసిపల్‌ స్థలాల్లో గదులు నిర్మించి పూర్తిస్థాయిలో అద్దెకు ఇవ్వకపోవడం, మరికొన్నిచోట్ల ఖాళీస్థలాల్లో గదులు నిర్మించకపోవడంతో సంస్థ ఆదాయానికి గండిపడుతోంది. అధికారుల నిర్లక్ష్యం, పాలకుల అలసత్వంతో కోట్లాది రూపాయల ఆదాయం కోల్పోవాల్సిన దుస్థితి నెలకొంది.
 
 - పట్టణ పరిసర ప్రాంతాల్లో ఉన్న రెవెన్యూ, ఆర్‌అండ్‌బీ, మునిసిపల్‌, దేవాదాయ, అసైన్డ్, వంక పొరంబోకు భూములపై కూడా స్వార్థపరులు కన్నేసి, కొన్నింటిని ఆక్రమించుకోగా, మరికొన్నింటిని చేజిక్కించుకునేందుకు ఎత్తులు వేస్తున్నారు.
 - బళ్లారి రోడ్డులోని ఇందిరాగాంధి మునిసిపల్‌ ప్రాథమికోన్నత పాఠశాలల గేటు పక్కన ఉన్న ఆర్‌అండ్‌బీ స్థలాన్ని ‘మునిసిపల్‌ పెద్ద’ తన అనుచరులతో ఆక్రమించి, షెడ్డు ఏర్పాటు చేసి రూ.3లక్షలకు గుడ్‌విల్‌ ఇచ్చారు. స్థలం ఇరుకు కావడంతో విద్యార్థులు ఇబ్బందులు పడుతున్నారు.
 
 - అధికారం అడ్డం పెట్టుకుని అధికారులను లొంగదీసుకుని టీడీపీ నాయకులు అక్రమాలకు తెర తీస్తూనే ఉన్నారు. పాతబస్టాండులో నుంచి కూరగాయల మార్కెట్‌కు వెళ్లడానికి ఉన్న చిన్నపాటి దారిని సైతం ధరలు నిర్ణయించి అప్పణంగా దండుకుంటున్నారు. ఈ దారిలో పూలవ్యాపారం కోసం ఏర్పాటు చేసుకున్న షెడ్డు నిర్వాహకుడితో ‘మునిసిపల్‌ పెద్ద’ రూ.5 లక్షలు ఇప్పించుకుని అనుమతి ఇచ్చినట్లు టీడీపీ నాయకులే బహిరంగంగా ఆరోపిస్తున్నారు.
 
 - రోడ్డు విస్తరణలో మునిసిపల్‌ అధికారులు వేసిన మార్కింగ్‌ను మార్పించి, ఓ వ్యక్తికి వత్తాసు పలకడానికి కూడా ‘మునిసిపల్‌ పెద్ద’ రూ.3లక్షలు తీసుకున్నట్లు ఆరోపణలు వెల్లువెత్తుతున్నాయి. ఖాళీ స్థలాలతో పాటు ఆదాయం చేకూరే మార్గాలను అన్వేషించడానికి ఆ ‘పెద్ద’ ఇద్దరు వ్యక్తులను నియమించుకున్నట్లు సొంత పార్టీలోనే చర్చ జరుగుతోంది.
 
 షెడ్డు ఏర్పాటు వాస్తవమే
 ఇందిరాగాంది మునిసిపల్‌ పాఠశాల వద్ద షెడ్డు ఏర్పాటు చేసినది వాస్తవమే. టీడీపీ కార్యకర్త అస్లాంకు ఇచ్చాం. అయితే గుడ్‌విల్‌ తీసుకోలేదు. విద్యార్థులకు అడ్డంగా ఉందంటే దాన్ని తీసివేయిస్తాం. రోడ్డు విస్తరణలో మార్కింగ్‌ మార్పుల కోసం ఎవరితోనూ డబ్బు తీసుకోలేదు. పూలవ్యాపారి షెడ్డు వేసుకోవడానికి డబ్బుతీసుకున్నట్లు వస్తున్న ఆరోపణల్లో వాస్తవం లేదు.
 - వీఎం రాజశేఖర్, మునిసిపల్‌ చైర్మన్, రాయదుర్గం


 రాజధానిలో ఆ అధికారి చేయని అక్రమాలు లేవు. రికార్డులు తారుమారు చేయటం నుంచి ఒకరి భూములను మరొకరి పేరున మార్చటం. పట్టా భూములను ప్రభుత్వ భూములుగా చూపటం. రిజిస్ట్రేషన్‌కు వీల్లేని భూములను సైతం అమ్మి డాక్యుమెంట్లు సృష్టించటం. ఒకటేంటి ఆయన తలచుకుంటే కానిదంటూ ఉండదంటారు. అలాంటి అధికారికి ఇప్పుడు భయం పట్టుకుంది. బదిలీ కోసం ప్రయత్నాలు చేస్తున్నారు.
 
 సాక్షి, అమరావతి బ్యూరో : అక్రమాల అధిపతికి  కొద్దిరోజులుగా భయం పట్టుకుంది. తన అక్రమాలు బయటపడితే పరిస్థితేంటని ఆందోళన మొదలైంది. అందుకే రాజధాని ప్రాంతం నుంచి బదిలీపై వెళ్లిపోవాలని నిర్ణయించుకుని ప్రయత్నాలను ముమ్మరం చేశారు.  అయితే ‘ముఖ్య’ నేత అడ్డు చక్రం వేశారు. రాజధానిలో పనులన్నీ పూర్తయ్యే వరకు వెళ్లటానికి వీల్లేదని తేల్చిచెప్పారు. రాజధాని పరిధిలో అతి ముఖ్యమైన మండలంలో రెవెన్యూ అధికారి ఆయన. గతంలో మూడేళ్లపాటు ఇదే మండలంలో రెవెన్యూ అధికారిగా పనిచేసిన అనుభవం కూడా ఉంది. మండల పరిధిలో ప్రభుత్వ, ప్రైవేటు, మిగులు, గ్రామ కంఠాలు, దేవాదాయ, అటవీ భూములు ఎక్కడెక్కడ? ఎంతెంత? ఉన్నాయనే విషయం బాగా తెలిసిన అధికారి. అలానే రెవెన్యూ చట్టాలు, అందులో లొసుగులూ తెలుసు. ల్యాండ్‌ పూలింగ్‌ ప్రక్రియలోనూ చక్రం తిప్పారు.
 
 అక్రమాలకు సూత్రధారి ...
 రాజధాని ప్రకటన తరువాత అధికార పార్టీ నేతలకు పట్టా, ప్రభుత్వ భూములను కొనుగోలు చేయింటంలో రెవెన్యూ అధికారి ప్రధానపాత్ర పోషించారు. ప్రభుత్వ భూములను సైతం రిజిస్ట్రేషన్లు చేయించిన ఘనుడు.  పట్టా భూములను సైతం ప్రభుత్వ భూములుగా రికార్డులు తయారు చేసినట్లు సమాచారం. రాజధాని గ్రామాల్లో సెంట్లు రూపంలో భూములు మాయం చేసి అధికారపార్టీ నేతలకు కట్టబెట్టటంలో ఆయన ప్రధాన పాత్ర పోషించినట్లు చెప్పుకుంటారు. టీడీపీ నాయకులతో పాటు ఆయన కూడా బినామీ పేర్లతో భూములు కొట్టేసినట్లు రాజధానిలో ప్రచారం జరుగుతోంది. ఇదిలా ఉంటే రాజధాని నిర్మాణానికి భూములు ఇవ్వని రైతులను బదిలీపై వెళ్లిన ఓ ఆర్డీఓ, ఈ అధికారి కలిసి తీవ్రస్థాయిలో బెదిరించారని ఆరోపణలు ఉన్నాయి.
 
 అంతేకాక, రెవెన్యూ రికార్డులను తారుమారు చేసి.. వాటిని సరి చేయటానికి ఖర్చు అవుతుందని చెప్పి భారీ ఎత్తున లంచాలు తీసుకున్నట్లు ఆరోపణలు ఉన్నాయి.  ప్రతి సంతకానికి ఓ రేటు నిర్ణయించి లక్షల రూపాయలు వసూలు చేసి కోట్లకు పడగలెత్తినట్లు రాజధానిలో జోరుగా ప్రచారం జరుగుతోంది. అవినీతి అక్రమాల ద్వారా దాదాపు రూ.100కోట్లకు పైగా కూడబెట్టినట్లు తెలిసింది. ఇటీవల పెద్దనోట్ల రద్దు సమయంలో ఈ అధికారి తన కింది స్థాయిలో పనిచేసే వారి ద్వారా సుమారు రూ.27 కోట్ల మార్చినట్లు ఓ వీఆర్వో తెలిపారు.
 
 బదిలీ కోసం తీవ్ర ప్రయత్నాలు ...
 రాజధానిలో భారీగా కూడబెట్టిన సొమ్ము, అక్రమాలు బయటపడితే ప్రమాదమని భావించిన రెవెన్యూ అధికారి  ఐదు నెలల కిందట ఇక్కడి నుంచి బయటపడేందుకు ప్రయత్నాలు ప్రారంభించారు. అయితే ప్లాట్ల కేటాయింపు పూర్తయ్యాక వెళ్లొచ్చని ‘ముఖ్యనేత’ అనటంతో ఆగిపోయినట్టు తెలుస్తోంది. ప్రస్తుతం ప్లాట్ల కేటాయింపు  పూర్తి కావడంతో బదిలీ చేయాలని తన ప్రయత్నాలకు పదును పెట్టారు. తాను అనారోగ్యంతో బాధపడుతున్నట్లు కూడా చెప్పుకుంటున్నారు. దీనికి బలం చేకూర్చే క్రమంలో ఇటీవల కొద్దిరోజులు సెలవు కూడా పెట్టారు. అయినా ఆయన బదిలీకి మళ్లీ బ్రేక్‌ పడింది. రాజధాని పరిధిలో ప్రస్తుతం భూ సమస్యలు తీవ్రంగా ఉన్నాయని, వాటన్నింటినీ పరిష్కరించాకే బదిలీ అని తేల్చిచెప్పినట్లు తెలిసింది. అయినా ఆ అధికారి ఉన్నతాధికారుల వద్ద పైరవీలు చేస్తున్నట్లు విశ్వసనీయ సమాచారం.


 బొమ్మనహళ్లి : నకిలీ దాఖలాలను సృష్టించి రూ. 1000 కోట్ల విలువైన ప్రభుత్వ భూములను కబ్జా చేయడానికి యత్నిస్తున్న వారిపై దాడులు జరిపి సదరు భూమిని స్వాధీనం చేసుకున్నట్లు బెంగళూరు నగర జిల్లా కలెక్టర్‌ శంకర్‌ తెలిపారు. శుక్రవారం ఆయన వివరాలు వెల్లడించారు. నగరంలోని కెంగేరీ పరిధిలో ఉన్న మాళిగొండనహళ్లి చుట్టు పక్కల ప్రాంతాల్లో ఉన్న ప్రభుత్వ భూములను కొందరు కబ్జా చేసి తార్‌ ప్లాంటేషన్ ఇండస్ట్రీ పేరుతో సంస్థకు 55 ఎకరాల భూమిని మంజూరు చేసినట్లు నకిలీ పత్రాలు సృష్టించి షెడ్లను ఏర్పాటు చేసుకున్నారు. విషయం తెలుసుకున్న కలెక్టర్‌ రెవెన్యూ అధికారులకు అక్కడికి చేరుకుని రెండు జేసీబీ యంత్రాలు, నాలుగు టిప్పర్లు, సంస్థకు చెందిన ఇతర వస్తువులను స్వాధీనం చేసుకున్నారు. శుక్రవారం నగరంలోని వివిధ ప్రాంతాల్లో ఒక్కరోజే రూ. 1000 కోట్ల విలువైన ప్రభుత్వ భూములను స్వాధీనం చేసుకున్నట్లు అధికారులు తెలిపారు.  


 విజయవాడ: సుమారు రూ.1000 కోట్ల విలువ చేసే భూములను సిద్ధార్థ విద్యాసంస్థలకు అప్పగించడం వెనక భారీ అవినీతి జరుగుతోందని వైఎస్సార్‌సీపీ అధికార ప్రతినిధి గౌతంరెడ్డి విమర్శించారు. విజయవాడలో ఆయన గురువారం విలేకరులతో మాట్లాడుతూ.. లోకేష్ కనుసన్నల్లోనే ఈ వ్యవహారం జరుగుతోందని ఆరోపించారు.
  
 అతి తక్కువ ధరకు ఈ భూములను సిద్ధార్థ సంస్థలకు అప్పగించారన్నారు. ఏడాదికి కోటి రూపాయలు వచ్చే ఆదాయాన్ని వదులుకోవడానికి ప్రభుత్వం ఎందుకు సిద్ధపడిందని ప్రశ్నించారు. గత ఎన్నికల్లో టీడీపీ అక్రమ సొమ్ము దాచే డెన్‌గా సిద్ధార్ధ విద్యాసంస్థలు ఉపయోగపడ్డాయన్నారు. అందుకు కృతజ్ఞతగా దేవాదాయభూములను నామమాత్రపు లీజుకు ప్రభుత్వం ఇచ్చిందని విమర్శించారు.
  


 నెల్లూరు(పొగతోట) : ప్రభుత్వ భూములు పరిరక్షించేందుకు ప్రత్యేక ప్రణాళికలు రూపొందించుకోవాలని జాయింట్‌ కలెక్టర్‌ ఏ మహమ్మద్‌ఇంతియాజ్‌ ట్రైనీ ఐఏఎస్‌లకు సూచించారు. గురువారం ప్రకాశం జిల్లా బాపట్లలోని ఆంధ్రప్రదేశ్‌ మానవ వనరుల అభివృద్ధి శిక్షణ కేంద్రంలో ట్రైనీ ఐఏఎస్‌లకు ప్రభుత్వ భూముల పరిరక్షణకు తీసుకోవాల్సిన చర్యలపై శిక్షణ ఇచ్చారు. ప్రభుత్వ భూములు అన్యాక్రాంతం కాకుండా గ్రామ స్థాయి నుంచి ముందస్తు చర్యలు చేపట్టాలన్నారు. ప్రభుత్వ భూములను గుర్తించి ల్యాండ్‌ బ్యాంకింగ్‌ చేయడం ద్వారా అన్యాక్రాంతం కాకుండా చర్యలు తీసుకోవచ్చునని వివరించారు. ప్రభుత్వ భూములను అక్రమించిన వారిపై క్రిమినల్‌ కేసులు నమోదు చేసే అవకాశం ఉందని తెలిపారు.


 ఏలూరు : అధికారమే అండగా తెలుగు తమ్ముళ్లు రెచ్చిపోతున్నారు. ప్రభుత్వ భూమిలో చేపల చెరువులు తవ్వడమే కాకుండా.. రెండు గ్రామాల మధ్య చిచ్చుపెట్టారు. ఓ గ్రామానికి చెందిన దళితులు పనులను అడ్డుకోవడంతో కొల్లేరులో ఉద్రిక్త వాతావరణం నెలకొంది. వివరాల్లోకి వెళితే.. ఏలూరు మండలం కోమటిలంక పరిధిలో సుమారు 110 ఎకరాల అసైన్డ్‌ భూమి ఉంది. గతంలో ఆ భూమిలో గ్రామ ప్రజలు ఉమ్మడిగా చేపలు పెంచుకుంటూ ఆదాయం పొందేవారు. కొల్లేరు ప్రక్షాళన సందర్భంగా అధికారులు ఈ చెరువులను ధ్వంసం చేశారు. అప్పటినుంచి ఆ భూమి ఖాళీగా ఉంటోంది.
 2014 ఎన్నికల తర్వాత 
 స్థానిక ప్రజాప్రతినిధులు దీనిపై కన్నేశారు. కోమటిలంక పెద్దలకు నచ్చజెప్పి ఈ ఏడాది మే నెలలో సుమారు 70 ఎకరాల విస్తీర్ణంలో చేపల చెరువులు తవ్వారు. ఇందుకు ప్రతిఫలంగా ఆ గ్రామ ప్రజలు సాగు చేసుకుంటున్న భూములకు పట్టాలు ఇప్పిస్తామని నమ్మబలికారు. అనంతరం ఆ చెరువులను సాగు చేసుకోవడం కోసం శ్రీపర్రు గ్రామస్తులను ఉసిగొల్పారు. కోమటిలంక గ్రామ ప్రజలకు పట్టాలు ఇవ్వకుండానే మిగిలిన 40 ఎకరాల్లో చెరువు తవ్వడానికి ఎమ్మెల్యే సోదరుడు, తెలుగుదేశం పార్టీ మండల శాఖ నాయకుడు, గ్రామంలోని టీడీపీ నేతలు పనులు ప్రారంభించారు. తమకు న్యాయం చేయకపోగా చెరువులు తవ్వుకుని వేరేవారికి లీజుకు ఇవ్వడం కోసం ప్రయత్నాలు చేస్తుండటంతో కోమటిలంక దళితులంతా ఏకమయ్యారు. ఆ భూములను సాగు నిమిత్తం తమకే ఇవ్వాలని పట్టుబట్టారు. వారి డిమాండ్‌ను పట్టించుకోని టీడీపీ నేతలు పొక్లెయిన్‌తో చెరువు తవ్వకం పనులు చేపట్టారు. దీంతో ఆగ్రహించిన దళితులు సోమవారం ఆ పనులను అడ్డుకున్నారు.
 దీంతో అధికార పార్టీ నేతలు వారిపైకి పోలీసులను ఉసిగొల్పారు. కేసులు పెడతామని బెదరించడంతో ఇద్దరు యువకులు ఆత్మహత్యాయత్నం చేశారు. దీంతో గ్రామంలో తీవ్ర ఉద్రిక్త పరిస్థితులు నెలకొన్నాయి. మంగళవారం గ్రామస్తులంతా ఏలూరు తహసీల్దార్‌ కార్యాలయానికి తరలివచ్చి ధర్నాకు దిగారు. ఎన్నో ఏళ్లుగా తాము సాగు చేసుకుంటున్న భూములను మండల టీడీపీ అ««దl్యక్షుడు నేతల రవి, ఎమ్మెల్యే సోదరుడు బడేటి చంటి ఆక్రమించుకుంటున్నారని, ఈ ప్రాంతంలో చేపల చెరువు తవ్వకాలను తక్షణం అడ్డుకోవాలని కోరుతూ తహసీల్దార్‌ కుమార్‌కు వినతిపత్రం అందజేశారు. 
 శ్రీపర్రు గ్రామస్తుల పేరుచెప్పి..
 కోమటిలంక గ్రామస్తులు మద్దుల రత్తయ్య, పోసురాజు నారాయణ, పెనుగొండ జోజేశ్వరరావు తదితరులు విలేకరులతో మాట్లాడుతూ తమ గ్రామ పరిధిలో సుమారు 110 ఎకరాల అసైన్డ్‌ భూమి ఉందని చెప్పారు. ఇందులో 70 ఎకరాల భూమిని శ్రీపర్రు గ్రామస్తులకు కేటాయిస్తున్నామంటూ స్థానిక ప్రజాప్రతినిధులు మే నెలలో చేపలు చెరువులు తవ్వారన్నారు. దీనికి బదులుగా ఏళ్ల తరబడి తాము సాగు చేసుకుంటున్న భూములకు పట్టాలు ఇప్పిస్తామని నమ్మబలికారన్నారు.
 నేటికీ పట్టాలు ఇవ్వకపోగా గ్రామ పరిధిలో ఉన్న మరో 40 ఎకరాల్లో చేపల చెరువులు తవ్వుతున్నారని వివరించారు. దీనివెనుక టీడీపీ నాయకుల కుట్ర ఉందని ఆరోపించారు. అధికారులు స్పందించి చర్యలు తీసుకోవాలని డిమాండ్‌ చేశారు. కోమటిలంక దళితులు ఆందోళనకు దిగిన విషయాన్ని తెలుసుకున్న శ్రీపర్రు గ్రామ నాయకులు ఏలూరు వచ్చి తహసీల్దార్‌ను కలిశారు. కోమటిలంక ప్రజల అంగీకారంతోనే తాము భూమి పొందామని, స్థానిక ప్రజాప్రతినిధుల సూచనల మేరకే సాగు చేస్తున్నామని వివరించారు. తాము ఎవరి భూమిని ఆక్రమించలేదన్నారు.
  


 తమిళనాడులోని సత్రం భూములు స్వాహా
  
 ♦ అధికార పార్టీ నేతలే సూత్రధారులు, పాత్రధారులు
 ♦ ఎకరా రూ.13 కోట్లు ఉన్న భూమి రూ.27 లక్షలకే కైవసం
 ♦ రూ.1,000 కోట్ల విలువైన భూమి వేలంలో పలికింది రూ.22.44 కోట్లు
 ♦ భూమిని విక్రయించాలని తొలుత టీడీపీ ఎమ్మెల్యే కొమ్మాలపాటి శ్రీధర్ లేఖ
 ♦ సీఎం కార్యాలయం సహకారంతో 83.11 ఎకరాల దేవుడి మాన్యం వేలం
 ♦ అడ్డగోలుగా భూమి ధర తగ్గింపు
 ♦ కొనుగోలుదారులు కాపు కార్పొరేషన్ చైర్మన్ కుటుంబ సభ్యులు, మిత్రబృందం
 ♦ తెరవెనుక ‘ముఖ్య’ నేత  కుమారుడు, మంత్రులు
  
  శ్రీసదావర్తి సత్రం భూములున్న ప్రాంతం అత్యంత ఖరీదైన ఓల్డ్ మహాబలిపురం రోడ్డులో ఉంది. తాలంబూరు గ్రామ పరిధిలో రోడ్డు పక్కనే ఈ భూములున్నాయి. వీటి సమీపంలో సత్యభామ యూనివర్సిటీ, హిందూస్థాన్ యూనివర్సిటీ, టీసీఎస్ సహా పలు ఐటీ సంస్థలు, స్టార్ హోటళ్లు, భారీ అపార్టుమెంట్లు, రిసార్టులు, గేటెడ్ కమ్యూనిటీలు ఉన్నాయి. ఇక్కడి నుంచి సముద్ర తీరం కేవలం 10 కిలోమీటర్ల దూరంలోనే ఉంది.
 
  సాక్షి, హైదరాబాద్/చెన్నై/గుంటూరు
  సర్కారు భూములు ఆక్రమణకు గురైతే ఏం చేయాలి? అందులోనూ విలువైన దేవాలయ భూములైతే.. ఎంత జాగ్రత్త వహించాలి? కబ్జాదారులను తరిమికొట్టి వాటి కాపాడాలి కదా..! కానీ చంద్రబాబు జమానాలో అంతా రివర్స్..  భూములు కబ్జాదారుల నుంచి బడా‘బాబు’ల చేతుల్లోకి రాజమార్గంలో చేరిపోవడానికి ప్రణాళిక రచించారు. ఆగమేఘాలపై ఫైళ్లు పుట్టుకొచ్చాయి.. శరవేగంగా పరుగులు పెట్టాయి. ముందుగా వేసుకున్న స్కెచ్ ప్రకారం... ఆ భూములను అమ్మేయాలని  అధికార పార్టీ ఎమ్మెల్యే ప్రతిపాదించాడు.. ముఖ్యమంత్రి కార్యాలయం దేవాదాయ శాఖకు లేఖ రాసింది.. దేవాదాయ శాఖ వెంటనే వేలంపాటకు అనుమతించేసింది.... ఆనక రంగంలో దిగిన ముఖ్యమంత్రి సన్నిహితుడు... ఏరికోరి నియమించుకున్న కాపు కార్పొరేషన్ చైర్మన్ చలమలశెట్టి రామానుజయ మరికొంతమంది అధికారపార్టీ నాయకులే ఆ భూములను వేలంలో కొనేశారు.. విచిత్రమేమిటంటే ఎకరా రూ.13కోట్లు పలికే భూమి ఎకరా రూ.50 లక్షల చొప్పున అమ్మితే చాలని ఈవో చేత కూడా పలికించారు.
 
 ఆ రేటుకూ ఎవరూ ముందుకు రాలేదని చెబుతూ ఎకరం రూ. 27 లక్షలకు ఫైనల్ చేసేశారు. అలా చివరకు 83.11 ఎకరాల విలువైన భూములు రూ. 22 కోట్లకు అప్పనంగా అయినవారికి కట్టబెట్టేశారు. ఇదంతా ఓ పక్కా ప్రణాళిక ప్రకారం జరిగిపోయింది. ప్రభుత్వ పెద్దల డెరైక్షన్‌లో ఎవరి పాత్రను వారు యథాశక్తి రక్తికట్టించారు. గద్దల్లాంటి పెద్దల దెబ్బకు దేవుడైనా అబ్బా అనాల్సిందేనని రుజువుచేశారు... భూములు కోల్పోయిన అమరేశ్వరుడు అమరావతిలో నిస్సహాయంగా నిలబడ్డాడు... ప్రజలకు అవసరమైన ఫైళ్లపై కాకుండా ఎవరికో అవసరమైన ఫైళ్లపైనే తాను సంతకం చేస్తున్నానని ముఖ్యమంత్రి చంద్రబాబు ఇటీవల కలెక్టర్ల కాన్ఫరెన్స్‌లో వాఖ్యానించడం కొసమెరుపు.
 
  ఐదుగురు అధికారులతో కమిటీ
  గుంటూరు జిల్లా అమరావతిలో శ్రీసదావర్తి సత్రం ఉంది. స్వాతంత్య్రానికి పూర్వమే బ్రాహ్మణులకు, వేదశాస్త్రాలను అభ్యసించే పేద విద్యార్థులకు అన్నదానం నిర్వహించాలన్న లక్ష్యంతో అమరావతి జమీందారులైన రాజా వాసిరెడ్డి వెంకటాద్రినాయుడు వంశీకులు అప్పట్లో ఈ సత్రాన్ని నిర్మించారు. గుంటూరు జిల్లా అచ్చంపేట మండలం కోగంటివారిపాలెంలో తమ పేరిట ఉన్న 72 ఎకరాలను, తమిళనాడు రాజధాని చెన్నై సమీపంలో మరో 471.76 ఎకరాలను సత్రం నిర్వహణ కోసం ఇనామ్ రూపంలో దారాదత్తం చేశారు. తమిళనాడులోని కాంచీపురం జిల్లా చెంగల్పట్టు తాలూకాలో నావలూరు, తాలంబూరు, పడూరు గ్రామాల పరిధిలో ఈ భూములున్నాయి. ఈ భూముల విక్రయానికి అనుమతిస్తూ ఏపీ ప్రభుత్వం 2015 ఏప్రిల్ 6న ఉత్తర్వులు (మెమో నం. 28228) జారీ చేసింది. అందులో 83.11 ఎకరాల భూమి అమ్మకానికి ఈ ఏడాది మార్చి 28న దేవాదాయ శాఖ అధికారులు వేలం పాట నిర్వహించారు. భూమి అమ్మకం జరిపేందుకు దేవాదాయ శాఖ కమిషనర్ ఐదుగురు అధికారులతో ప్రత్యేక కమిటీని ఏర్పాటు చేశారు. కమిషనర్ కార్యాలయంలో ఎస్టేట్ సంయుక్త కమిషనర్ కృష్ణాజీరావు, ఎస్టేట్ అసిస్టెంట్ కమిషనర్ విజయరాజు, రీజినల్ జాయింట్ కమిషనర్ భ్రమరాంబ, గుంటూరు డిప్యూటీ కమిషనర్ సురేష్‌బాబు, అమరావతిలోని సత్రం ఈవో శ్రీనివాసరెడ్డిలను కమిటీలో సభ్యులుగా నియమించారు.
 
  ఎకరాకు రూ.50 లక్షలేనట!
  చెన్నై సమీపంలోని తాలంబూరులో భూముల ధరలు అధికంగా ఉండడంతో తమిళనాడు రిజిస్ట్రేషన్ శాఖ భూ లావాదేవీలలో ఎకరాకు బదులు గజా ల లెక్కన రిజిస్ట్రేషన్ చార్జీలు వసూలు చేస్తోంది. ప్రభుత్వ ధరల ప్రకారమే అక్కడ ఎకరా భూమి రూ.6 కోట్ల వరకు ఉంటుంది. మరోవైపు అక్కడ ప్రైవేట్ రియల్ ఎస్టేట్ సంస్థలు వేసిన వెంచర్లలో 200 చదరపు గజాల ఇంటి స్థలం రూ.55 లక్షల వర కు పలుకుతోంది. అంటే బహిరంగ మార్కెట్‌లో ఎక రా భూమి ధర రూ.13 కోట్ల వరకు ఉన్న ట్టు రియల్ ఎస్టేట్ వర్గాలు చెబుతున్నాయి. శ్రీసదావర్తి సత్రం భూములు పూర్తిగా ఆక్రమణలో ఉన్నాయనే సాకుతో సత్రం ఈవో ఎకరా కేవలం రూ.50 లక్షల చొప్పున అమ్మకానికి ప్రతిపాదించారు. దేవాదాయ శాఖ ఉన్న తాధికారులు వెంటనే ఆమోదం తెలిపారు. వేలం పాట ద్వారా ఎకరా భూమిని రూ.50 లక్షలకు అమ్మడానికి దేవాదాయ శాఖ కమిషనర్ అనుమతించినట్టు సత్రం ఈవో శ్రీనివాసరెడ్డి ‘సాక్షి’కి తెలిపారు.
 
  వేలం పాట కాదు.. దోపిడీ బాట
  సాధారణంగా వేలం పాటలో ప్రభుత్వం నిర్ణయిం చిన కనీస ధరకన్నా ఒక్క రూపాయి అయినా అధికంగా పోటీదారులు వేలం పాడుతుంటారు. ఒకవేళ ప్రభుత్వం నిర్ణయించిన ధరకు కొనడానికి ఎవరూ ముందుకు రాకపోతే వేలం పాటను రద్దు చేసి, మరోసారి నిర్వహించడం ఆనవాయితీ. శ్రీసదావర్తి సత్రం భూముల అమ్మకం అంతా రివర్స్. 83.11 ఎకరాల భూమి అమ్మకానికి ఈ ఏడాది మార్చి 28న మొదటి విడత వేలం పాటలో ప్రభుత్వం నిర్ణయిం చిన ధర ఎకరా రూ.50 లక్షలకు కొనడానికి ఎవరూ ముందు కు రాలేదని పేర్కొంటూ ఆ వేలంలో పాల్గొ న్న నలుగురిలో అత్యధిక ధరకు కొనడానికి ముందుకొచ్చిన వారికే భూములను కట్టబెట్టడానికి అధికారులు సిద్ధమయ్యారు. భూముల ధరను తగ్గిస్తూ అప్పటికప్పుడు నిర్ణయం తీసుకున్నారు. ఎకరం రూ.27 లక్షల చొప్పున  83.11 ఎకరాలను రూ.22.44 కోట్లకు కట్టబెట్టారు. వేలం పాట దక్కిం చుకున్న వారు సగం డబ్బులు అంటే రూ.11 కోట్లు దేవాదాయ శాఖకు చెల్లించారు. వేలం నిబంధనల ప్రకారం పాట జరిగిన 90 రోజుల్లో అంటే జూన్ 26లోగా తక్కిన మొత్తాన్ని చెల్లించి రిజిస్ట్రేషన్ చేయించుకోవాలి.
 
  అక్కడికక్కడే ధర తగ్గింపు
  చెన్నై సమీపంలో భూములు ఉన్నచోటే వేలం పాట నిర్వహించారు. దేవాదాయ శాఖ నియమించిన కమిటీలోని ఐదుగురు సభ్యులు వేలం పాట జరిగిన రోజు అప్పటికప్పుడు... అక్కడికక్కడే భూమి ధరను తగ్గిస్తూ నిర్ణయం తీసుకోవడం విచిత్రం. దీనిపై దేవాదాయ అధికారులే ఆశ్చర్యం వ్యక్తం చేస్తున్నారు.
 
  ‘ఈ-టెండర్’ మరిచారు
  దేవాదాయ శాఖలో ప్రస్తుతం ఒక చిన్న దుకాణాన్ని అద్దెకు ఇవ్వాలన్నా ‘ఈ-టెండర్’ విధానంలో అప్పగిస్తారు. 83.11 ఎకరాల సత్రం భూముల అమ్మకానికి దేవాదాయ శాఖ అధికారులు ఈ విధానాన్ని అమలు చేయలేదు. విలువైన భూములను అధికార పార్టీ ముఖ్యులకు నామమాత్రపు ధరకు కట్టబెట్టే ఉద్దేశంతోనే దేవాదాయ శాఖ ఉన్నతాధికారులు ఇందుకు అడ్డు చెప్పలేదన్న వాదన వినిపిస్తోంది.
 
  ఎకరా రూ.6 కోట్లకుపైనే అని చెప్పినా..
  తమిళనాడులో శ్రీసదావర్తి సత్రం భూములున్న ప్రాంతంలో ఎకరం ధర రూ.6 కోట్లకుపైగానే పలుకుతోందని, వేలంలో ఎకరం రూ.27 లక్షల చొప్పున అమ్మడమేమిటని దేవాదాయ శాఖ జాయింట్ కలెక్టర్ డి.భ్రమరాంబ అభ్యంతరం తెలిపారు. ఈ మేరకు దేవాదాయ శాఖ కమిషనర్‌కు ఏప్రిల్ 18న సవివరమైన లేఖ రాశారు. అయితే, ఆ అధికారి వా దనను ఏమాత్రం పట్టించుకోకుండా దేవా దాయ శాఖ కమిషనర్ అనూరాధ వేలంలో పాట దక్కించుకున్న అధికార పార్టీ నేత చలమలశెట్టి రామానుజయ కుటుంబ సభ్యులు, ఆయన మిత్ర బృందం పేరిట ఏప్రిల్ 24 సేల్ ప్రొసీడింగ్స్ జారీ చేశారు.
 
  తెరవెనుక బడా నేతలు
 
 
 
  దేవాదాయశాఖ అధికారి, శ్రీసదావర్తి సత్రం భూముల తరఫున చెన్నైలో న్యాయవాదిగా వ్యవహరించిన లాయర్ చెప్పినదాన్ని బట్టి ఎకరం రూ.6 కోట్ల చొప్పున లెక్కించినా 83.11 ఎకరాలకు రూ.500 కోట్లు అవుతుంది. బహిరంగ మార్కెట్ ధర ఎకరం రూ.13 కోట్ల వరకు ఉంది. ఈ లెక్కన 83.11 ఎకరాలకు రూ.1,080.43 కోట్లు అవుతుంది. కనీసం రూ.1,000 కోట్లకు తగ్గదని అధికారులు అంటున్నారు. రూ.1,000 కోట్ల భూ దోపిడీ వ్యవహారంలో ఒకరిద్దరు అధికార పార్టీ నేతలు, సాధారణ వ్యక్తులు కనిపిస్తున్నప్పటికీ తెరవెనుక బడా నేతలే ఉన్నారని స్పష్టమవుతోంది. దేవాదాయ శాఖలోని కీలక అధికారులు ఈ దోపిడీకి అనుకూలంగా వ్యవహరించినట్లు తెలుస్తోంది. సాధారణంగా ఆర్థిక సంవత్సరం ముగిసే మార్చి నెలాఖరులో భారీ మొత్తంలో నగదు లావాదేవీలను నిర్వహించరు. అలాంటిది కోట్లాది రూపాయలకు సంబంధించిన భూముల వేలం పాటను మార్చి 28న నిర్వహించడం ముందస్తు వ్యూహంలో భాగమేనని చెబుతున్నారు.
 
  ఆ పని ప్రభుత్వం చేయలేదా?
  శ్రీసదావర్తి సత్రం భూములు పరుల అధీనంలో ఉన్నాయని, వాటిని వేలం వేయడం ద్వారా అమరేశ్వర ఆలయానికి ఆదాయం వచ్చేలా చూడాలని ముఖ్యమంత్రి కార్యాలయానికి పెదకూరపాడు ఎమ్మెల్యే కొమ్మాలపాటి శ్రీధర్ లేఖ రాయడం పకడ్బందీ వ్యూహంలో భాగంగా కనిపిస్తోంది. దీనిపై వెనుకా ముందు ఆలోచించకుండా సీఎం కార్యాలయం ఆమోదం తెలపడం మరీ విచిత్రం. పొరుగు రాష్ట్రంలోని మన భూములు వివాదంలో ఉన్నాయని, వాటి విషయంలో ప్రభుత్వం ఏమీ చేయలేదని దేవాదాయ శాఖ అధికారులు అంటున్నారు. వివాదంలో ఉన్న భూములను ప్రైవేట్ వ్యక్తులు కొనుగోలుచేసి, అక్కడ కార్యకలాపాలు నిర్వహించుకోగలరు గానీ ప్రభుత్వం మాత్రం ఆ పని చేయలేదట. విలువైన భూములను తొలుత అనుచరుల ద్వారా కొనుగోలు చేయించి, ఆ తరువాత వాటిని సొంతం చేసుకునేందుకు ముఖ్య నేతలు భారీ కుట్రకు పాల్పడ్డారని టీడీపీ నేతలే వ్యాఖ్యానిస్తున్నారు. రాష్ట్ర ‘ముఖ్య’నేత కుమారుడు, గుంటూరు, కృష్ణా జిల్లాలకు చెందిన మంత్రులు ఈ భూ దోపిడీలో భాగస్వాములని అనుమానాలు వ్యక్తమవుతున్నాయి.
  
  సత్రం భూముల చరిత్ర
  రాజా వాసిరెడ్డి వెంకటాద్రి నాయుడు వారసులు వాసిరెడ్డి మహలక్ష్మమ్మ 1849లో అమరావతి దేవస్థానానికి చెన్నైలోని భూములను విరాళంగా ఇచ్చారు. చెన్నై సమీపంలోని తాళంబూరు ప్రాంతంలో 473 ఎకరాలను అమరేశ్వరస్వామి దేవస్థానానికి అప్పగించారు. భూములకు సంబంధించిన రికార్డులను గుడికి అందజేశారు. ఆ తరువాత జమీందారీ పాలన ముగిశాక 1969లో భూములను శ్రీసదావర్తి సత్రానికి కేటాయించారు. భూములు పక్కరాష్ట్రంలో ఉండడంతో వాటిపై పర్యవేక్షణ లోపించింది. 473 ఎకరాల్లో చాలావరకు ఆక్రమణలకు గురైంది. ఈ నేపథ్యంలో భూముల స్వాధీనం కోసం రాజా వెంకటాద్రి నాయుడు వారసులు వాసిరెడ్డి హరిప్రసాద్ న్యాయ పోరాటం ప్రారంభించారు. కోర్టులో వ్యాజ్యం దాఖలు చేశారు. అనంతరం అమరావతి దేవస్థానం కూడా న్యాయ పోరాటం కొనసాగించింది. 2010లో రోశయ్య ముఖ్యమంత్రిగా ఉన్న సమయంలో ఒక ప్రత్యేక కమిటీ తమిళనాడుకు వెళ్లి భూములను పరిశీలించింది.
 
 భూముల స్వాధీనంపై అప్పటి చెన్నై మేయర్ స్టాలిన్‌తో చర్చించింది. స్టాలిన్ నుంచి సానుకూల స్పందన రాకపోవడంతో న్యాయ పోరాటం చేయగా 2014లో దేవస్థానానికి అనుకూలంగా కోర్టు తీర్పు వెలువరించింది. 473 ఎకరాల్లో 83.11 ఎకరాలు మాత్రమే ప్రస్తుతం అనాధీనంగా(పోరంబోకు) ఉన్నట్లు గుర్తించారు. మిగిలిన భూమికి  తమిళనాడు ప్రభుత్వం 50 ఏళ్ల క్రితమే పూర్తిస్థాయిలో పట్టాలు ఇచ్చేసింది. కోర్టులో కేసు గెలిచాక తమిళనాడు సర్కారుతో చర్చలు జరిపి అనాధీనంగా ఉన్న 83.11 ఎకరాలను స్వాధీనం చేసుకోవడానికి ఏపీ ప్రభుత్వం సన్నద్ధమైంది. ఈ క్రమంలోనే దీనిపై అక్రమార్కుల కన్నుపడింది. కొల్లగొట్టేందుకు భారీ కుట్ర జరిగింది. రూ.1,000 కోట్ల విలువైన భూమిని వేలంలో రూ. 22.44 కోట్లకే దక్కించుకున్నారు.
  
  471.76 ఎకరాల్లో మిగిలింది 83.11 ఎకరాలే
  తన నియోజకవర్గంలోని శ్రీసదావర్తి సత్రానికి (అమరావతి ఆలయ పరిధిలోనిది) చెన్నై సమీపంలో భూములు ఉన్నాయని, అవి ఆక్రమణకు గురవుతున్నాయని, వాటి విక్రయానికి అనుమతించాలని కోరుతూ పెదకూరపాడు ఎమ్మెల్యే కొమ్మాలపాటి శ్రీధర్ 2014 ఆగస్టు 18న ముఖ్యమంత్రి కార్యాలయానికి లేఖ రాశారు. సీఎం కార్యాలయం వెంటనే స్పందించింది. 2014 సెప్టెంబర్ 12న ఆ లేఖను దేవాదాయ శాఖకు పంపింది. అన్ని ప్రక్రియలు పూర్తయి 2015 ఏప్రిల్‌లో భూముల అమ్మకానికి దేవాదాయ శాఖ అనుమతించింది. 471.76 ఎకరాల్లో ఆక్రమణలు పోను మిగిలి ఉన్న 83.11 ఎకరాలను విక్రయించేందుకు ఈ ఏడాది మార్చి 28న వేలం పాట నిర్వహించారు. వేలంలో కృష్ణా జిల్లా కైకలూరు ప్రాంతానికి చెందిన తెలుగుదేశం పార్టీ నాయకుడు, కాపు కార్పొరేషన్ చైర్మన్ చలమలశెట్టి రామానుజయ భార్య చలమలశెట్టి లక్ష్మీపార్వతి, కుమారుడు చలమలశెట్టి నిరంజన్‌బాబు, గుంటూరు జిల్లాకు చెందిన మందాల సంజీవరెడ్డితోపాటు ఎం.సునీతారెడ్డి, చావలి కృష్ణారెడ్డి, ఎం.సూర్యకిరణ్‌మౌళి, డి.పవన్‌కుమార్, ఆర్.శివరామకృష్ణరావులు కలిసి 83.11 ఎకరాలను దక్కించుకున్నారు.


 ► కబ్జాలో ఉన్న సర్కార్ భూముల విలువ.. 10 వేల కోట్లు
 ► షేక్‌పేటలో అన్యాక్రాంతమైన భూములు
 ► వంద ఎకరాలకు పైమాటే
  
 హైదరాబాద్ జిల్లా పరిధిలో అన్యాక్రాంతమయ్యేందుకు సిద్ధంగా ఉన్న ప్రభుత్వ భూముల విలువ అక్షరాల పదివేల కోట్ల రూపాయలు. యంత్రాంగం పట్టించుకోకపోతే ప్రైవేటు వ్యక్తుల ఖాతాల్లోకి వెళ్లే భూ విస్తీర్ణం 831.62 ఎకరాలు. ఇందులో అత్యధికంగా అతి ఖరీదైన బంజారాహిల్స్, జూబ్లీహిల్స్, నందగిరిగిరి హిల్స్ తదితర ప్రాంతాల్లోని భూములే ఉండటం విశేషం. ఒక్క షేక్‌పేట మండలంలోనే ప్రభుత్వ భూములను తమవిగా పేర్కొంటూ కోర్టులకు ఎక్కిన  భూముల విలువ ప్రస్తుతం రెండువేల కోట్ల రూపాయల పైమాటే.
 
 ఆ తర్వాత మారేడుపల్లి, తిరుమలగిరి, బండ్లగూడ, ఆసిఫ్‌నగర్ మండలాల్లోనూ ఆ స్థాయిలో భూ వివాదాలు చోటు చేసుకున్నాయి. ఈనేపథ్యంలో సర్కారు భూములను కాపాడేందుకు ప్రభుత్వ యంత్రాంగం ప్రత్యేక చర్యలు ప్రారంభించింది. కోర్టుల్లో పెండింగ్‌లో ఉన్న కేసుల పరిష్కారానికీ కార్యాచరణ రూపొందిస్తోంది. - సాక్షి, సిటీబ్యూరో    .
  
  
  సాక్షి, సిటీబ్యూరో: నగరంలో ప్రభుత్వ అవసరాలు, ఇతర వినియోగాల కోసం ఎంత భూమి అందుబాటులో ఉంది, ఎంత ఆక్రమణలకు గురైంది, కోర్టు వివాదాల్లో ఎంత ఉంది, ఏఏ కోర్టుల్లో విచారణ సాగుతోంది..తదితర వివరాలను ప్రత్యేక యాక్షన్ ప్లాన్‌తో సేకరించిన జిల్లా యంత్రాంగం ఇటీవలే సవివరణమైన నివేదికను ముఖ్యమంత్రి కేసీఆర్‌కు సమర్పించింది. నగరంలో ఖరీదైన భూముల వివాదాలు సుప్రీం, హైకోర్టులు మొదలుకుని క్రింది స్థాయి కోర్టుల్లోనూ ఏళ్ల తరబడి నానుతున్నాయి. ప్రభుత్వ పరంగా సకాలంలో పేషీలకు హాజరుకాకపోవటం, సరైన పత్రాలు, ఆధారాలు కోర్టు ముందుంచటంలో విఫలమవుతుండటంతో ప్రభుత్వ భూముల ఖాతా నుండి ప్రైవేటు ఖాతాల్లోకి వెళుతున్న భూముల సంఖ్య క్రమంగా పెరుగుతూ వచ్చింది. దీంతో ప్రభుత్వ ఆదేశం మేరకు రంగంలోకి దిగిన జిల్లా యంత్రాంగం ప్రభుత్వ భూముల పరిరక్షణకు ప్రత్యేక కార్యాచరణ అమలు చేసేందుకు సిద్ధమైంది.
 
 
  ఆ భూములూ వివాదాస్పదమే...
 సంక్షేమ శాఖల అవసరాల నిమిత్తం పలు భవనాల నిర్మాణం కోసం కేటాయించిన ప్రభుత్వ భూములూ వివాదంలోనే ఉన్నాయి. కేటాయించిన స్థలాన్ని పరిరక్షించుకోవటంలో సంక్షేమ శాఖలు నిర్లక్ష్యం చేస్తుండగా..భూ కేటాయింపులు చేసిన రెవెన్యూ శాఖ పట్టించకోకపోవటం కబ్జాదారులకు వరంగా మారింది. జిల్లాలో ఎస్సీ, బీసీ, వికలాంగుల సం క్షేమ శాఖలు తమకు కేటాయించిన స్థలా ల్లో  భవనాలు, దోబీఘాట్ల నిర్మాణాలు చేపట్టకపోగా...స్థలాలకు కనీసం ఫెన్సిం గ్ కూడా ఏర్పాటు చేయలేదు. దీంతో ఆక్రమణలు కొనసాగుతున్నాయి. ప్రభు త్వ శాఖల మధ్య నెలకొన్న సమన్వయ లోపాలను సానుకూలంగా మలచుకున్న భూ కబ్జాదారులు నకిలీ పత్రాలు, డాక్యుమెంట్లు సష్టించి కోర్టుకు వెళ్తున్నారు.
 
 
 మచ్చుకు కొన్ని....                                                                                          
 మారేడుపల్లి మండలం లీలా గార్డెన్ సమీపంలోని సర్వేనంబర్ 207లోని 2730.64 చ.మీ.స్థలాన్ని ఎస్సీ హాస్టల్ భవన నిర్మాణం కోసం కేటాయించగా, నిర్మాణం చేపట్టలేదు. స్థానికులు ఈ భూమిని కబ్జా చేయటంతోపాటు నకిలీ ధవీకరణ పత్రాలతో కోర్టుకు వెళ్లారు. తిరుమలగిరి మండలంలోని సర్వే నంబరు 112లో 508 చదరపు గజాలు ఎస్సీ హాస్టల్ భవన నిర్మాణానికి కేటాయించగా ఆక్రమణకు గురైంది. బండ్లగూడ మండలంలోని కందికల్‌లో సర్వేనంబరు 84,85లలోని 700 చదరపు గజాల స్థలం కబ్జాకు గురైంది. కాచిగూడ ఎస్సీ హాస్టల్ భవనం కోసం హయత్‌నగర్ మండలంలోని లింగంపల్లిలో 12,036 చదరపు గజాల భూమిని కేటాయించగా, ఈ స్థలం కూడా ఆక్రమణకు గురైనట్లు స్థానికులు ఫిర్యాదు చేశారు.
 
 బంజారా, క్రిస్టియన్  భవన్ స్థలాలు సైతం...
 ముఖ్యమంత్రి కేసీఆర్ ఎంతో ఆర్భాటంగా ప్రకటించి శంకుస్థాపనలు చేసిన బంజారాభవన్, క్రిస్టియన్ భవన్‌లకు సంబంధించిన స్థలాలు సైతం కోర్టు వివాదాల్లో ఉన్నాయి. ఈ భవన్‌లకు నిధులు మంజూరైనా కోర్టు వివాదాల కారణంగా నిర్మాణాలు చేపట్టడం లేదు.  
  
 అంగుళం భూమినీ వదులుకోం
  ప్రభుత్వ ఆదేశాల మేరకు ప్రభుత్వ భూముల పరిరక్షణ కోసం ప్రత్యేక కార్యాచరణ అమలు చేయనున్నాం. కోర్టు వివాదంలో ఉన్న భూముల విషయంలో ఆయా విభాగాలతో మరింత సమన్వయంతో వ్యవహరించనున్నాయి. ప్రభుత్వానికి చెందాల్సిన అంగుళం భూమిని కూడా వదులుకునేది లేదు. - రాహుల్ బొజ్జా, జిల్లా కలెక్టర్


 గుట్టలను గుల్ల..గుల్ల చేస్తున్న అక్రమార్కులు
 
 ► కేశంపేట మండలంలో 20 ఎకరాల విస్తీర్ణంలో 2గుట్టలు
 ► విచ్చలవిడిగా బ్లాస్టింగ్స్ జరుపుతున్న వ్యాపారులు
 ► ముగిసిన లెసైన్స్.. అయినా ఆగని తవ్వకాలు
 ► లోతైన గుంతలు తవ్వడంతో తరచూ ప్రమాదాలు
  
 కేశంపేట: కొండలు, గుట్టలు మాయమవుతున్నాయి.. అక్రమార్కుల చేతుల్లో నామరూపాల్లేకుండా పోతున్నాయి. విచ్చలవిడిగా బ్లాస్టింగ్‌లతో వాటి ఉనికిలేకుండా చేస్తున్నారు. కేశంపేట మండలం ఇప్పలపల్లి, దత్తాయిపల్లి శివారులోని ప్రభుత్వ భూముల్లో గుట్టలను లీజు పేరుతో కొందరు వ్యక్తులు ప్రకృతి సంపదను కొల్లగొడుతున్నారు. రాత్రివేళల్లో గ్రానైట్, పలుగు రాయిని ఇతరప్రాంతాలకు తరలిస్తున్నారు. ఈ రెండు గ్రామాల్లో గుట్టలు సుమారు 20 ఎకరాల్లో విస్తరించి ఉన్నాయి. గతంతో వీటిని పెద్దగుట్ట, బోడగుట్ట అని పిలిచేవారు. ప్రస్తుతం అవి కరిగిపోతున్నాయి.
 
 లెసైన్స్‌ల గడువు 2008లోనే ముగిసినా ఇంకా గ్రానైట్‌ను కొల్లగొడుతున్నారని ఇప్పలపల్లి గ్రామస్తులు కొందరు తెలిపారు. ఇక్కడి నుంచి విలువైన గ్రానైట్, పలుగు రాయిని హైదరాబాద్, శంషాబాద్ ప్రాంతాలకు తరలిస్తున్నారు. ఈ గుట్టల ప్రాంతంలో ఒకప్పుడు వర్షాలు కురిస్తే పశువులకు మేత విస్తారంగా లభించేది. సమీపంలోనే నీటి వనరులు ఉండడంతో పశువుల మేతకు కొంత సౌకర్యవంతంగా ఉండేది. చూపరులను మైమరిపించే గుట్టలు నేడు బ్లాస్టింగ్‌లతో నెలకొరుగుతున్నాయని ఆ రెండు గ్రామాల ప్రజలు వాపోతున్నారు. భారీ బ్లాస్టింగ్‌ల శబ్దాలతో దద్దరిల్లడమే కాకుండా బోరుబావులు కూడిపోయి నీళ్లు లేక ఎండిపోతున్నాయని పలువురు రైతులు ఆవేదన వ్యక్తంచేస్తున్నారు.
 
 
 తరచూ ప్రమాదాలు
 మైనింగ్‌దారులు తీసిన గోతుల్లో అనేకసార్లు మూగజీవాలు పడిపోయి చనిపోయిన సంఘటనలు ఉన్నాయి. అలాగే గ్రానైట్‌లోడ్‌తో లారీలు రాకపోకలు సాగిస్తుండడంతో గ్రామాల్లో విపరీతమైన దుమ్మురేగుతోంది. ఇక్కడి నుంచి రాయిని రవాణా చేస్తున్న లారీలకు నంబర్‌ప్లేట్లు సరిగా ఉండడం లేదని స్థానికులు చెబుతున్నారు. అతివేగంగా వస్తున్న లారీలు ప్రమాదాలకు కారణమవుతున్నాయని వాపోతున్నారు. ఒకరిద్దరు కూలీలు లారీల కిందపడి చనిపోయిన సంఘటనలు ఉన్నాయి.
 
 అయినప్పటికీ రెవెన్యూ, మైనింగ్ అధికారులు పట్టించుకోవడం లేదని స్థానికులు పెదవి విరుస్తున్నారు. నిబంధనలకు విరుద్ధంగా కొండలు, గుట్టలను బ్లాస్టింగ్ చేస్తున్నా చూసీచూడనట్లుగా వ్యవహరించడంపై వారు కన్నెర్రచేస్తున్నారు. ఉన్నతాధికారులు స్పందించి అక్రమార్కులపై చర్యలు తీసుకుని ప్రకృతి సంపదను కాపాడాలని కోరుతున్నారు
  
  
 అధికారులు పట్టించుకోవడం లేదు..
 నిబంధనలకు విరుద్ధంగా పనులు చేపడుతున్నా అధికారులు పట్టించుకోవడం లేదు. మైనింగ్ లీజుకు తీసుకున్నవారు తీసిన పెద్ద పెద్ద గోతుల్లో మూగజీవాలు పడి చనిపోతున్నాయి. సంబంధిత వ్యక్తులపై చర్యలు తీసుకోవాలని అధికారులకు ఎన్నిసార్లు విన్నవించినా పట్టించుకోలేదు. ప్రమాదకరంగా మారిన గోతులను వెంటనే పూడ్చివేయాలి. - వెంకటేశం గ్రామస్తులు
  
  
  మైనింగ్ అధికారుల దృష్టికి తీసుకువెళ్తా
  గ్రామంలో జరుగుతున్న మైనింగ్ పనుల గురించి సంబంధిత అధికారులు దృష్టికి తీసుకువెళ్తాం.. నిబంధనలకు విరుద్ధంగా పనులు జరిగితే వారిపై చర్యలు తీసుకుంటాం. మైనింగ్‌దారుల తీరును గ్రామస్తులు తమ దృష్టికి తెచ్చారు. అనుమతులు ఉన్నాయా? లేదా? అనే విషయాలను పరిశీలించి.. నిబంధనలకు విరుద్ధంగా వ్యవహరిస్తే చర్యలు తప్పవు. - కృష్ణకుమార్, తహసీల్దార్, కేశంపేట


 ► వినుకొండ నియోజకవర్గంలో ఇసుక దోపిడీ
 ► గుండ్లకమ్మ నదిని తోడేసిన  ఇసుకాసురులు
 ► ఇప్పుడు వల్లేరు వాగుపై మాఫియా కన్ను
 ► కోట్ల రూపాయల సొత్తు కొల్లగొడుతున్న వైనం
 ► అక్రమ రవాణాకు అంతర్గత రహదారుల నిర్మాణం
 ► ఏళ్ల తరబడి కొనసాగుతున్న దందా
 ► అయినా ఆ వైపు కన్నెత్తి చూడని అధికారులు
  
 అనుమతుల అవసరం లేదు.. అధికారుల పర్యవేక్షణ ఉంటుందన్న భయం అంతకంటే లేదు. నదులు, వాగులు అనే బేధం లేకుండా అక్రమార్కులు కోట్లాది రూపాయల సంపదను కొల్లగొట్టేస్తున్నారు. ఇసుక సీనరీలే లేని వినుకొండ నియోజకవర్గంలో ఏళ్ల తరబడి ఈ దందా నిరాటంకంగా సాగిస్తోంది. నీరు లేక ఎండిపోయిన గుండ్లకమ్మ నదిని పూర్తిగా తవ్వేసిన ఇసుకాసురుల కన్ను ఇప్పుడు వల్లేరు వాగుపై పడింది. భారీ యంత్రాలతో లారీల కొద్దీ ఇసుకను తోడేస్తూ గుట్టలుగా నిల్వ చేసుకొంటున్నారు. ఈ అక్రమ రవాణా కోసం ప్రధాన రహదారుల నుంచి అంతర్గత రోడ్లు సైతం ఇక్కడ నిర్మించారంటే దోపిడీ ఏస్థాయిలో జరుగుతుందో అర్థం చేసుకోవచ్చు
  
  
 నూజెండ్ల: వినుకొండ నియోజకవర్గ పధిలోని గుండ్లకమ్మ నదిలో ఏళ్ల తరబడి ఇసుక అక్రమ రవాణా జరుగుతోంది. అధికారుల నియంత్రణ లేకపోవటంతో ఇసుక మాఫియా యథేఛ్చగా తవ్వకాలు జరుపుతూ కోట్ల రూపాయలు కొల్లగొడుతున్నారు. రెండేళ్ల నుంచి గుండ్లకమ్మ నదికి నీరు రాక పూర్తిగా ఎండిపోయింది. ఇదే అదునుగా భారీ యంత్రలతో రేయిబంవళ్లు వందాలాది ట్రాక్టర్లతో ఇసుకను కొల్లగొట్టారు. ఇసుకను ఉచితంగా ప్రజలకు అందిస్తామని అసెంబ్లీ సాక్షిగా ప్రకటించిన ముఖ్యమంత్రి చంద్రబాబు అక్రమ రవాణాకు అడ్డుకట్టవేయకపోతే ప్రయోజనం ఏముందని సామాన్యులు సైతంఅభిప్రాయపడుతున్నారు.
 
  గోతులు తీసి.. గుట్టలుగా పోసి..
 ఎక్కడా మైనింగ్ అనుమతులు లేకున్నప్పటికీ నూజెండ్ల మండలంలోని ములకలూరు, పువ్వాడ, ఉప్పలపాడు, ఐనవోలు, వినుకొండ మండలం గోకనకొండ నుంచి ఇసుకను తరలిస్తున్నారు. గుండ్లకమ్మ నదిలో పూర్తిస్థాయిలో ఇసక తోడేయడంతో అక్కడ ఇసుకే లభించటం లేదు. నదిలో ఇసుక లభ్యత తగ్గిపోవటంతో ఇసుక అక్రమార్కులు నూజెండ్ల మండలంలోని వల్లేరు వాగుతో తవ్వకాలు ప్రారంభించారు. యంత్రాల సహాయంతో వేల ట్రక్కులు ఇసుకను తవ్వుతూ సొమ్ము చేసుకుంటున్నారు. ప్రభుత్వ భూముల్లో ఇసుక క్వారీలు పడటంతో అక్రమార్కులకు వరంగా మారింది. వినుకొండ కురిచేడు ప్రధాన రహదారిని ఆనుకుని ప్రవహిస్తున్న వల్లేరు వాగుతోపాటు, ప్రభుత్వ భూముల్లోకూడా ఇష్టానుసారంగా ఇసుక తవ్వకాలు చేపట్టారు. సుమారు వంద ఎకరాల్లో గోతులు తీసి అక్కడే వందలాది లారీల ఇసుకను గుట్టలుగా పోశారు.
 
 ఇసుకను తరలించేందుకు ప్రధాన రహదారి నుంచి ఏకంగా మూడు అంతర్గత రహదారులు నిర్మించడం ఇక్కడి అవినీతికి అద్దం పడుతోంది. ఇంత జరుగుతున్నా ఒక్క అధికారి కూడా ఆవైపు కన్నెత్తి చూసిన పాపాన పోలేదని, దీంతో అక్రమార్కులు మరింత రెచ్చిపోతున్నారని విమర్శలు వినిపిస్తున్నాయి. ఇసుక తలించేవారిపై కఠిన చర్యలు తీసుకుంటామన్న పోలీసులు ఇసుక కుప్పవద్ద మొక్కుబడిగా ఫొటోలు దిగడంతోనే సరిపెడుతున్నారు.
 
  అక్రమ రవాణాపై నియంత్రణ ఎవరిది..?
 అక్రమ ఇసుక తరలించేవారిపై చర్యలు తీసుకోవాల్సిన వారెవరు అనే విషయంపై ఇప్పటికీ స్పష్టతలేదు. ఒకవైపు రెవెన్యూ, మరోవైపు మైనింగ్, ఇంకో వైపు పోలీసులు, ఎవరికి వారు అవకాశం దొరికినప్పుడు వారి అధికారాన్ని వినియోగించుకొని సొమ్మ చేసుకుంటున్నారనే విమర్శలు వినవస్తున్నాయి. ఈ దందా వెనుక అధికార పార్టీ పెద్దలు, బడాబాబుల హస్తం ఉందనే ఆరోపణలు లేకపోలేదు.
  


 వీడియో కాన్పరెన్స్‌లో సీసీఎల్‌ఏ ఆదేశం
 
 కర్నూలు(అగ్రికల్చర్): ప్రభుత్వ భూముల జాబితాలను పక డ్బందీగా తయారు చేసి రెండు, మూడు రోజుల్లో పంపాలని రాష్ట్ర భూపరిపాలన శాఖ ముఖ్య కమిషనర్ అనిల్‌చంద్ర పునీత్ జిల్లా యంత్రాంగాన్ని ఆదేశించారు. ఈ మేరకు మంగళవారం హైద్రాబాద్ నుంచి వీడియో కాన్పరెన్స్ నిర్వహించారు. ప్రభుత్వ భూముల వివరాలను 5 రకాల జాబితాల్లో పొందుపరచాలని, ఇందులో ఎలాంటి పొరపాట్లకు తావు లేకుండా కట్టుదిట్టమైన చర్యలు చేపట్టాలన్నారు.  1 నుంచి నాలుగు జాబితాల వివరాలను సబ్ రిజిస్ట్రార్ కార్యాలయాలకు పంపేందు కు ఏర్పాట్లు చేయాలని ఆదేశించారు.
 ఆర్‌ఎస్‌ఆర్‌లో చుక్కలున్న భూములతో సహా అన్ని ప్రభుత్వ భూముల వివరాలను జాబితాల్లో చేర్చాలన్నారు. మీ ఇంటికి మీ భూమి కార్యక్రమంలో వచ్చిన అన్ని రకాల భూ సమస్యలను సత్వరం పరిష్కరించాలన్నారు. నూజివీడు హ్యూమన్ రిసోర్స్ డెవలప్‌మెంట్ సెంటర్ డెరైక్టర్ చక్రపాణి మాట్లాడుతూ కొత్తగా చేరిన వీఆర్‌ఓలను ఏప్రిల్ 11 నుంచి 3 రోజుల శిక్షణకు పంపాలన్నారు. రాయలసీమ వారికి శ్రీకాలహస్తిలో శిక్షణ ఉంటుందన్నారు. కర్నూలు నుంచి జేసీ హరికిరణ్ మాట్లాడుతూ కర్నూలు, అవుకు మండలాలు మినహా అన్ని మండలాల ప్రభుత్వ భూముల వివరాలు సిద్ధం చేసినట్లు వివరించారు. కర్నూలు నుంచి వీడియో కాన్పరెన్స్‌లో డీఆర్‌ఓ గంగాధర్‌గౌడ్, కలెక్టరేట్ ఏఓ వెంకటనారాయణ, డీ సెక్షన్ సూపరింటెండెంట్ అన్వర్ హుసేన్ తదితరులు పాల్గొన్నారు.


 ఎర్రగుంట్ల: యాబై సంవత్సరాలుగా నివసిస్తున్న తమ ఇళ్లను కూల్చేస్తామని నోటీసులు ఇవ్వడంతో ఆందోళన చెందిన ప్రజలు బుధవారం మున్సిపాలిటీ కార్యాలయం వద్ద ధర్నాకు దిగారు. ఎర్రగుంట్లలో 173 కుటుంబాల వారు యాభై ఏళ్లుగా పట్టాలు పొంది ఇల్లుకట్టుకుని ఉంటున్నారు. అయితే వాళ్లు ఉంటున్న స్థలం పొరంబోకు స్థలమని, వారంరోజుల్లోగా ఇళ్లు ఖాళీ చేయకపోతే కూల్చివేస్తామని మున్సిపల్ అధికారులు నోటీసులు జారీచేశారు. దాంతో స్థానికులుతమవద్ద పట్టాలు ఉన్నాయని, యాభై ఏళ్ల తర్వాత ఇప్పుడు ఆ భూమి పొరంబోకు భూమి అనడం విడ్డూరంగా ఉందన్నారు. తమకు ఇచ్చిన నోటీసులు వెనక్కి తీసుకోవాలని డిమాండ్ చేస్తూ వందలాది మంది స్థానికులు బుధవారం ఆందోళనకు దిగారు. అధికారులు స్పష్టమైన హామీ ఇచ్చేవరకు ధర్నా విరమించమని ఆందోళన చేపట్టారు.


 - రూ. 2కోట్ల విలువైన భూమి కాజేసేందుకు కుట్ర
 - సత్తుపల్లిలో ‘రియల్’ వ్యాపారానికి యత్నం
 సత్తుపల్లి : ఓపెన్ కాస్టు విస్తరణ పుణ్యమా అని సత్తుపల్లి బస్టాండ్ పరిసర ప్రాంతాల్లో భూములకు డిమాండ్ తగ్గుతోంది. ఓపెన్‌కాస్టు ప్రభావం లేని పాతసెంటర్‌లో భూముల రేట్లు క్రమేపీ పెరుగుతున్నాయి. దీంతో కబ్జాదారుల కన్ను ప్రభుత్వ భూములపై పడింది. పొలానికి దారి పేరుతో రూ.2కోట్ల విలువైన ప్రభుత్వ భూమిని కబ్జా చేసి కాజేసేందుకు అధికార పార్టీకి చెందిన ఓ ముఖ్యనేత చక్రం తిప్పుతున్నట్లు తెలిసింది. ‘కబ్జాకు దారి..’అనే శీర్షికన మంగళవారం ‘సాక్షి’ దినపత్రికలో కథనం ప్రచురితమైన విషయం విదితమే. దీంతో సత్తుపల్లి తహశీల్దార్ దొడ్డా పుల్లయ్య సర్వే నం.76లో అక్రమంగా దారికి మట్టిపోసిన ప్రదేశాన్ని పరిశీలించారు. ప్రభుత్వ భూమిని ప్రైవేట్ వ్యక్తుల కోసం ఇచ్చే ప్రశ్నేలేదని స్పష్టం చేశారు. సర్వే నం.75 నుంచి విడగొట్టిన ప్రభుత్వ భూమిని హైకోర్టు స్టే తొలగించిన తరువాత కంచె ఏర్పాటు చేస్తామన్నారు.
  
 భూమిని కాజేసేందుకు...
 ప్రభుత్వ భూమిని ఎలాగైనా కాజేసేం దుకు అధికార పార్టీకి చెందిన ఒక ముఖ్యనేత తన పలుకుబడి  ఉపయోగించి అధికారులపై ఒత్తిడి తెస్తున్నట్లు ప్రచారం జరుగుతోంది. దీంతో అధికారులు చట్టపరంగా ఏ చర్య తీసుకోవాలన్నా తల నొప్పి వ్యవహారంగా తయారవుతుందని ఉన్నతాధికారులకు నివేదించినట్లు సమాచారం. ఆక్రమణలకు ఎవరూ అడ్డురాకుండా.. పోలీసులకు సరైన సమాచారం ఇవ్వకుండా రోడ్డువేసే ప్రదేశంలో నిలబెట్టి భయబ్రాంతులకు గురి చేస్తున్నారని ఆరోపణలు వినిపిస్తున్నాయి.
  
 ఎమ్మెల్యే వినతిపత్రం అడ్డుపెట్టుకొని..
 ఒకప్పుడు ఈ అధికార పార్టీ నేత టీడీపీ లో కీలక నేతగా వ్యవహరించారు. మారి న రాజకీయ పరిస్థితుల్లో అధికార పార్టీ లో ముఖ్యనేతగా చలామణి అవుతున్నా రు. 2009లో సత్తుపల్లి ఎమ్మెల్యే సండ్ర వెంకటవీరయ్యకు సర్వే నం.76లోని ప్రభుత్వ భూమి నుంచి దారి ఇప్పించం డి అంటూ వినతిపత్రాన్ని అడ్డుపెట్టుకొని.. దారిపేరుతో కబ్జాకు తెరలేపినట్లు ఆరోపణలు వస్తున్నాయి. ఎమ్మెల్యే దారి ఇవ్వాలని అధికారులకు ఆదేశాలు ఇచ్చినట్లు వక్రభాష్యం చెపుతూ బురిడీ కొట్టించే ప్రయత్నం చేయటం పలు సందేహాలకు తావిస్తోంది.
  
 రియల్ ఎస్టేట్ కోసమేనట?
 సర్వే నం.24లో ఉన్న మూడెకరాల పొలానికి దారి కావాలంటూ ప్రభుత్వ భూమిని కాజేసేందుకు చేస్తున్న ప్రయత్నం వెనుక రియల్ ఎస్టేట్ వ్యాపారం ముసుగు దాగి ఉన్నట్లు ప్రచారం జరుగుతోంది. అరుుతే వేశ్యకాంతల చెరువుకు ఆనుకొని ఉన్న పొలానికి దారి లేదంటూ కొత్తవాదం తెరపైకి తేవడం పట్ల ఆయకట్టు రైతులు సైతం విస్మయం వ్యక్తం చేస్తున్నారు. చెరువు కట్టకు ఆనుకొని ఎడ్లబండ్ల దారి నక్షాలో ఉందని.. భూములన్నీ సమగ్రంగా సర్వే చేస్తే మరిన్ని ఆక్రమణలు వెలుగులోకి వస్తాయని ఆయకట్టు రైతులు అంటున్నారు.


 సాక్షి, హైదరాబాద్: ప్రజల సౌలభ్యం కోసమని ‘ఎనీవేర్ రిజిస్ట్రేషన్’ ప్రక్రియను ప్రారంభిం చింది స్టాంపులు, రిజిస్ట్రేషన్ల శాఖ. అయితే ఇది ఇప్పుడు సర్కారు భూములకే ఎసరు పెడుతూ ‘ఎనీవేర్ దందా’గా మారిపోయింది. రాష్ట్రవ్యాప్తంగా ఎనీవేర్ రిజిస్ట్రేషన్ అమలుతో నిషేధిత ఆస్తుల పుస్తకం(ప్రొహిబిటరీ ఆర్డర్ బుక్)లోని ప్రభుత్వ భూములు సైతం ప్రైవేటు వ్యక్తుల పేరిట రిజిస్ట్రేషన్ అవుతున్నాయి. కొందరు సబ్‌రిజిస్ట్రార్లు సొమ్ముకు ఆశపడి ప్రభుత్వం నిర్దేశించిన భూమి రిజిస్ట్రేషన్ విలువను సగానికి సగం తగ్గించి మరీ రిజిస్ట్రేషన్లు కాని చ్చేస్తూ ప్రభుత్వ ఖజానాకు భారీగా గండి కొడుతున్నారు.
 
 హైదరాబాద్, రంగారెడ్డి జిల్లాల పరిధిలో కొందరు సబ్‌రిజిస్ట్రార్లు తమ పరిధిలోకిరాని భూములకు ‘ఎనీవేర్’ రిజిస్ట్రేషన్ల పేరిట  భారీ దందాకు పాల్పడుతున్నారు. సబ్ రిజిస్ట్రార్ కార్యాలయాల్లో జరుగుతున్న ఈ దందాల్లో కొందరు రాజకీయ నేతల ప్రమే యం కూడా ఉందన్న ఆరోపణలు వినిపిస్తున్నాయి. వీరి ఒత్తిడుల వల్లే ఉన్నతాధికారులు కూడా ఈ దందాలను చూసీ చూడనట్లుగా వ్యవహరిస్తున్నారనే విమర్శలు వస్తున్నాయి.
  
 సర్కారు భూమి.. ప్రైవేటు పరం
 ఎల్బీనగర్ సమీపంలో జాతీయ రహదారి పక్కన ‘సిరీస్’ అనే పరిశోధనా సంస్థకు ప్రభుత్వం 1960 ప్రాంతంలో సుమారు 20 ఎకరాల భూమిని కేటాయించింది. సర్వే నంబర్ 9/4లో కేటాయించిన ఈ భూమిని పరిశోధనా సంస్థ ప్రయోజనాలకు మాత్రమే వినియోగించుకోవాలి. ఈ భూమిని ఇతర సంస్థలకు కేటాయించేందుకుగానీ, ప్రైవేటు వ్యక్తులకు విక్రయించేందుకుగానీ వీల్లేదు. ప్రభుత్వ అనుమతి లేకుండా సదరు భూమికి సంబంధించి ఎటువంటి క్రయ, విక్రయ రిజిస్ట్రేషన్లు జరపకూడదని ప్రొహిబిటరీ ఆర్డర్ కూడా ఉంది.
 
 అయితే ఈ నిబంధనలను తుంగలో తొక్కిన ఎల్బీ నగర్ సబ్‌రిజిస్ట్రార్ కార్యాలయం అధికారులు ఈ భూమిని ప్రైవేటు వ్యక్తులకు అడ్డంగా రిజిస్ట్రేషన్ చేసేశారు. వాస్తవానికి సిరీస్ సంస్థకు కేటాయించిన భూమి సరూర్‌నగర్ సబ్‌రిజిస్ట్రార్ కార్యాలయం పరిధిలోకి వస్తుంది. అయితే ‘ఎనీవేర్’ ఆసరాగా కొందరు ప్రైవేటు వ్యక్తులు ఎల్‌బీనగర్ సబ్‌రిజిస్ట్రార్ కార్యాలయంలో రిజిస్ట్రేషన్లు కానిచ్చేశారు. సాధారణంగా ఒక్కో సబ్‌రిజిస్ట్రార్ కార్యాలయంలో రోజుకు 20 నుంచి 30 రిజిస్ట్రేషన్లు అవుతుంటాయి. కానీ, ఎల్‌బీనగర్‌లో మాత్రం కొద్దిరోజులుగా 200 నుంచి 300 వరకు రిజిస్ట్రేషన్లు జరుగుతున్నాయంటే ఇక్కడి పరిస్థితి ఎలా ఉందో అర్థం చేసుకోవచ్చు.
  
 ఖజానాకు రూ. కోట్లలో గండి..
 సర్కారు భూమిని ప్రైవేటు వ్యక్తుల పేరిట రిజిస్ట్రేషన్ చేయడాన్ని తప్పుగా భావించని ఎల్‌బీనగర్ సబ్‌రిజిస్ట్రార్ కార్యాలయ సిబ్బంది.. సదరు భూమి రిజిస్ట్రేసన్ ధరను కూడా భారీగా తగ్గించి మరీ రిజిస్ట్రేషన్ చేసేశారు. జాతీయ రహదారి పక్కనే ఉన్న ఈ భూమికి ప్రభుత్వం నిర్దేశించిన రిజిస్ట్రేషన్ ధర గజం రూ.35 వేలు. అయితే దీనిని రూ.13 వేలకు తగ్గించి పైవేటు వ్యక్తులకు కట్టబెట్టేశారు. వాస్తవానికి ఒకే డోర్ నంబర్‌తో ఉన్న భూమి మొత్తానికి ఒకేరకమైన రిజిస్ట్రేషన్ విలువను వర్తింపజేయాలి.
 
 ప్రైవేటు వ్యక్తులిచ్చే సొమ్ముకు కక్కుర్తిపడిన అధికారులు ఈ నిబంధనలను తుంగలో తొక్కేశారు. జాతీయ రహదారిని అనుకొని ఉన్న స్థలాన్ని గజం రూ.35 వేలు(కమర్షియల్) కేటగిరీగా, మిగిలిన భూమి విలువను గజం రూ.13 వేలు(రెసిడెన్షియల్)గా విభజించి.. గత వారం రోజు ల్లో కొందరు ప్రైవేటు వ్యక్తుల పేరిట సుమారు 12 వేల గజాల స్థలాన్ని అక్రమంగా రిజిస్ట్రేషన్ చేసేశారు. దీంతో స్టాంపు డ్యూటీ, రిజిస్ట్రేషన్ ఫీజు రూపంలో సుమారు రూ. 2 కోట్లు ప్రభుత్వ ఖజానాకు గండి పడింది. ఏదైనా ప్రాంతంలో భూమి రిజిస్ట్రేషన్ ధరను సవరించాలంటే ప్రభుత్వ అనుమతి తప్పనిసరి. కానీ, ఎల్‌బీనగర్ సబ్ రిజిస్ట్రార్ కార్యాలయ సిబ్బంది ఈ నిబంధనను పట్టించుకోలేదు. గత కొంతకాలంగా ఈ తరహా అక్రమాలు హైదరాబాద్, రంగారెడ్డి జిల్లాల పరిధిలో జోరుగా సాగుతున్నట్లు ఆరోపణలు వినిపిస్తున్నాయి.


 - ఎమ్మెల్యే రవీందర్‌రెడ్డికి వ్యతిరేకంగా సదస్సు
 - దళితుల భూములు ఆక్రమించుకున్నారని ఆరోపణ
 - అఖిలపక్ష నేతలను అరెస్టు చేసిన పోలీసులు
 - అన్ని దారులనూ మూసేసి ముమ్మర తనిఖీలు
 - పోలీసుల వలయాన్ని  ఛేదించుకుని వచ్చిన వివిధ పార్టీల నేతలు
 ఎల్లారెడ్డి: దళితుల భూములనూ, ప్రభుత్వ భూములనూ ఎమ్మెల్యే రవీందర్‌రెడ్డి ఆక్రమించుకున్నారని ఆరోపి స్తూ అఖిలపక్షాలు గురువారం ఎల్లారెడ్డిలో ఏర్పాటు చేయ తలపెట్టిన సదస్సు తీవ్ర ఉద్రిక్తతకు దారి తీసిం ది. నాయకుల అరెస్టుతో అర్ధంతరంగా రద్దయ్యింది. ఎల్లారెడ్డి నియోజకవర్గానికి వచ్చే దారులన్నిటిని పోలీసులు దిగ్బంధించినా మారుమూల గ్రామాల గుండా ఎల్లారెడ్డి పట్టణానికి చేరుకున్న నేతలను పోలీసులు అరెస్ట్ చేసి, అనంతరం సొంత పూచీకత్తుపై విడుదల చేశారు. అఖిలపక్ష నేతలను అరెస్ట్ చేసి తరలించే క్రమంలో ఉద్రిక్త వాతావరణం నెలకొంది. ఈ సందర్భంగా పోలీసులు ఎల్లారెడ్డిని అష్ట దిగ్బంధనం చేశారు.
  
 అసలేం జరిగింది
 ఎమ్మెల్యే రవీందర్‌రెడ్డి స్వగ్రామం ఎర్రాపహాడ్‌లో దళితుల భూములను ఆక్రమించారంటూ ఎంఆర్‌పీఎస్, వామపక్షాల ఆధ్వర్యంలో గురువారం ఎల్లారెడ్డిలోని బాలా గౌడ్ ఫంక్షన్‌హాల్‌లో అఖిలపక్ష సమావేశం నిర్వహించేందుకు సన్నాహాలు చేశారు. శాంతిభద్రతలకు విఘాతం కలుగుతుందనే కారణంతో పోలీసులు ఈ సమావేశానికి అనుమతి నిరాకరించారు. గట్టి బందోబస్తు ఏర్పాటు చేశారు. పోలీసులు అనుమతి నిరాకరించడం, దివంగత రాష్ర్తపతి అబ్దుల్ కలాం అంత్యక్రియలు జరుగుతున్న దృ ష్ట్యా అఖిలపక్ష సమావేశాన్ని రద్దు చేసి ముఖ్యనాయకులతో రౌండ్‌టేబుల్ సమావేశాన్ని ఏర్పాటు చేయూలని నేతలు భావించారు. ఈ సమావేశానికి వస్తున్న నేతలను కూడా పోలీసులు నిరోధించారు. కామారెడ్డి వైపు నుంచి వస్తున్న నేతలను అరెస్ట్ చేసి భిక్కనూరు పోలీస్‌స్టేషన్‌కు తరలించారు. ఎల్లారెడ్డి వైపు వస్తున్న ఆర్‌టీసీ బస్సు లు, వాహనాలను తనిఖీ చేసి అనుమానితులను అదుపులోకి తీసుకున్నారు.
 
 పోలీసులు గట్టి నిఘా ఉంచడంతో గాంధారి మండలంలోని మారుమూల దారుల గుండా సీపీఐ (ఎం) జిల్లా కార్యదర్శి దండు వెంకట్, సీపీఐ (ఎంఎల్) న్యూడెమోక్రసీ జిల్లా అధ్యక్షుడు ప్రభాకర్, ఎంఆర్‌పీఎస్ జిల్లా అధ్యక్షుడు నాగభూషణం, వైఎస్‌ఆర్ సీపీ జిల్లా అధికార ప్రతినిధి గైనికాడి విజయలక్ష్మి, సామాజిక కార్యకర్త బంగారుసాయిలు, జిల్లా అంబేడ్కర్ యువజన సంఘం అధ్యక్షుడు నారాయణ, టీడీపీ నియోజకవర్గ ఇన్‌చార్జి సుభాష్‌రెడ్డి, కాంగ్రెస్ ఇన్‌చార్జి నల్లమడుగు సురేందర్ తదితరులు ఎల్లారెడ్డి అంబేడ్కర్ చౌరస్తాకు చేరుకున్నారు. అంబేడ్కర్ విగ్రహానికి పూలమాల వేసి, పా లాభిషేకం చేస్తున్న నేతలను సీఐ రామకృష్ణ నేతృత్వంలో అరెస్ట్ చేసి ఎల్లారెడ్డి పోలీస్‌స్టేషన్‌కు తరలించారు. ఈ సందర్భంగా కార్యకర్తలు పోలీసులను అడ్డుకోవడంతో కొంత ఉద్రిక్తత పరిస్థితి నెలకొంది.
  
 భూములు తిరిగి ఇచ్చేదాకా పోరాటం
 పోలీసుస్టేషన్‌లోనే అఖిలపక్ష నేతలు విలేకరులతో మాట్లాడారు. రవీందర్‌రెడ్డి దౌర్జన్యపాలన జరుపుతున్నారని, అధికారం ఉంది కదా అని తన ఫాంహౌజ్ నిర్మాణం కోసం దళితుల భూములను, ప్రభుత్వ భూమిని ఆక్రమించుకుంటున్నారని ఆరోపించారు. అఖిలపక్ష సమావేశానికి పోలీసుల ద్వారా అనుమతి రాకుండా అడ్డుకున్నారని పేర్కొన్నారు. రౌండ్‌టేబుల్ సమావేశంలో పాల్గొనేందుకు వస్తున్న నేతలను అరెస్ట్ చేయడం దారుణమన్నారు. దళితుల భూములు తిరిగి వారికి అప్పగించేవరకు తమ పోరాటం ఆగదని వారు స్పష్టం చేశారు. ఎమ్మెల్యే భూములను ఆక్రమించకుంటే, అందుకు తగిన సాక్ష్యాధారాలు అందజేయాలని కోరారు. నియోజకవర్గంలో ఏ సమ స్యను గురించి అడిగినా, వారిని అక్రమంగా అరెస్ట్ చేయిస్తున్నారని, ఎమెర్జెన్సీ కాలం కంటే ఘోరంగాపరిస్థితి ఏర్పడిందని విమర్శించారు.
 
 తెలంగాణ పేరు మీద మూ డు మార్లు గెలిచిన రవీందర్‌రెడ్డి అభివృద్ధి మరిచి సొంత ఆస్తులు కూడ బెట్టుకోవడానికి అధికారాన్ని వాడు కుంటున్నారని అన్నారు. ఆయన ఎమ్మెల్యే కాకముందు ఎన్ని ఆస్తులు ఉండేవో, ప్రస్తుతం ఉన్న ఆస్తులు ఎక్కడివో సీబీఐ ద్వారా విచారణ జరిపించాలని డిమాండ్ చేశారు. ఎంఆర్‌పీఎస్ సీనియర్ నాయకుడు సిద్ధిరాములు, స్టూడెం ట్స్ జేఏసీ రాష్ర్త అధ్యక్షుడు సర్దార్‌సింగ్, ఎంఆర్‌పీఎస్ జిల్లా ఉపాధ్యక్షుడు బాలరాజు, మాలమహానాడు బాన్స్‌వాడ ఇన్‌చార్జి సంగయ్య, సీపీఎంఎల్ కామారెడ్డి నియో జకవర్గ ఇన్‌చార్జి కట్ల భూమన్న, సీఐటీయూ నాయకురాలు నూర్జహాన్, అంబేడ్కర్ యువజన సంఘం అధ్యక్షుడు బిట్ల సురేందర్, మండల ఎంఆర్‌పీఎస్ అధ్యక్షుడు పద్మారావు, మండల టీడీపీ అధ్యక్షుడు నాగం పరంధాములు తదితరులను పోలీసులు అరెస్ట్ చేసి పూచీకత్తుపై విడుదల చేశారు.


 - స్థలాల లభ్యతపై సమాచారం కోరిన ప్రభుత్వం
 - జీఓ ఆంక్షలకు లోబడి అభివృద్ధికి నిర్ణయం
 - అమ్యూజ్‌మెంట్ పార్కులు, గోల్ఫ్‌కోర్టులు..
 - సర్కారు భూముల లెక్కతీసిన యంత్రాంగం
 - 111 సవరణ కష్టమని తేలడంతోనే ఈ నిర్ణయం
 111 జీఓ పరిధి ప్రాంతాలు: మొయినాబాద్, శంషాబాద్, రాజేంద్రనగర్, శంకర్‌పల్లి, చేవెళ్ల, షాబాద్ మండలాల పరిధిలోని 82 గ్రామాలు.
 నిబంధనలు : ఈ జీఓ ప్రకారం 84 గ్రామాల పరిధిలో కొత్తగా చేసే లే అవుట్‌లలో రోడ్లతో కలుపుకొని 60 శాతం ఖాళీ స్థలం వదలాలి. ఈ ప్రాంతం భూ వినియోగంలో 90% పరిర క్షణ ప్రాంతంగా నిర్దేశించింది. కేవలం రిక్రియేషన్, ఉద్యాన, పూల తోటల పెంపకాలకే భూమిని ఉపయోగించాలి. ఉస్మాన్‌సాగర్, హిమాయత్‌సాగర్ చుట్టూ 10 కి.మీ పరిధిలో కాలుష్య ఉద్గారాలు వెదజల్లే పరిశ్రమలు అనుమతించకూడదు.
  ప్రస్తుత చర్యలు: జీఓ ఆంక్షలకు లోబడి గోల్ఫ్‌కోర్టులు, రిక్రియేషన్, డిస్నీలాండ్ తరహా అమ్యూజ్‌మెంట్ పార్కుల  స్థాపనకు చర్యలు చేపట్టేందుకు ప్రభుత్వం కసరత్తు ప్రారంభించింది.
  
 సాక్షి, రంగారెడ్డి జిల్లా ప్రతినిధి: జీవ సంరక్షణ మండలి (బయో కన్జర్వేషన్ జోన్) పరిధిలో ఉన్న భూములపై ప్రభుత్వం కన్నేసింది. నగరానికి చేరువలో ఉన్న సర్కారు భూములను వినియోగంలోకి తీసుకురావడంపై దృష్టి సారించింది. రాజధాని దాహార్తిని తీర్చే ఉస్మాన్‌సాగర్, హిమాయత్‌సాగర్ జలాశయాలను పరిరక్షించాలనే ఉద్దేశంతో ఈ జ లాశయాలకు చుట్టూరా 10 కిలోమీటర్ల పరిధిలో నిర్మాణాలు, పరిశ్రమల స్థాపనపై ఆంక్షలు విధిస్తూ 1996లో అప్పటి ప్రభుత్వం 111 జీఓను జారీ చేసింది. పరీవాహక ప్రాంతాల నుంచి వరద నీరు సులువుగా జలాశయాలకు చేరేలా, కాలుష్య జలాలను నివారించేలా ఈ జీఓ దోహదపడుతుందని భావించింది. మొయినాబాద్, శంషాబాద్, రాజేంద్రనగర్, శంకర్‌పల్లి, చేవెళ్ల, షాబాద్ మండలాల పరిధిలోని 82 గ్రామాలకు 111 జీఓ ఆంక్షలు వర్తిస్తున్నాయి. దీంతో ఆయా మండలాల్లో అభివృద్ధికి బ్రేక్ పడింది. మరోవైపు కొందరు ప్రభుత్వ పెద్దలు, బడా బాబులు మాత్రం యథేచ్ఛగా పరిశ్రమలు, కాలేజీలు, ఫాంహౌస్‌లు స్థాపించి నిబంధనలకు తూట్లు పొడిచారు. తమ ప్రగతికి నిరోధకంగా మారి న జీఓను ఎత్తివేయాలని స్థానికులు ఉద్యమం చేయడంతో జీఓ ఎత్తివేత దిశగా ప్రభుత్వం చేసిన యత్నాలకు సామాజిక, పర్యావరణ వేత్తల నుంచి అభ్యం తరం వ్యక్తమైంది. సర్వోన్నత న్యాయస్థానాన్ని ఆశ్రయించడం ద్వారా జీఓ సవరణను అడ్డుకున్నారు.
 
 కేసీఆర్ సర్కారు కూడా..
 అధికారంలోకి వస్తే 111 జీఓను ఎత్తివే స్తామని ముఖ్యమంత్రి కేసీఆర్ ఎన్నికల్లో హామీ ఇచ్చారు. దీనికి అనుగుణంగానే జీఓను సమీక్షించేందుకు సాధ్యాసాధ్యాలను పరిశీలించాలని జిల్లా యంత్రాం గాన్ని ఆదేశించారు. ఈ మేరకు క్షేత్రస్థాయిలో సర్వే చేసిన నీటిపారుదలశాఖ జీఓ అమలు తప్పనిసరని తేల్చిచెప్పింది. ఈ జీఓ రద్దుతో జంట జలాశయాల అస్తిత్వానికి ముప్పు ఏర్పడుతుందని తేల్చిచెప్పింది. జీఓ జారీలో శాస్త్రీయత పాటించలేదని, ఎఫ్‌టీఎల్ పరిధిలోకి వచ్చే శంకర్‌పల్లిలోని నాలుగు గ్రామాలను ఉద్దేశపూర్వకంగా 111 నుంచి తప్పించినట్లు గుర్తించింది. 1908లో హైదరాబాద్‌ను ముంచెత్తిన మూసీ వరదల నేపథ్యంలో మూసీ బేసిన్‌లో ఈ చెరువుల నిర్మాణాన్ని చేపట్టారని, ఈ అంశాన్ని గమనంలోకి తీసుకోవాల్సివుంటుందని పేర్కొంది. జంట జలాశయాల భంగం వాటిల్లకూడదనే పర్యావరణవేత్తల సూచనలు, సుప్రీంకోర్టు మార్గదర్శకాలను పరిగణనలోకి తీసుకోవాల్సివుంటుందని స్పష్టం చేసింది. ఇరిగేషన్ నిపుణుల అభిప్రాయంతో ఇరకాటంలో పడిన సర్కారు.. జీఓ జోలికి వెళ్లకపోవడమే మంచిదనే భావనకు వచ్చింది.
 
 ఆంక్షలకు లోబడి అభివృద్ధి
 నగరానికి సమీపంలో 111జీఓ పరిధిలోని సర్కారు భూములను వినియోగంలోకి తీసుకురావాలని ప్రభుత్వం నిర్ణయించింది. జీఓ నిబంధనలకు లోబడి భూములను అభివృద్ధి చేసే అంశంపై ఇటీవల ఉన్నతస్థాయి సమావేశంలో చర్చ జరిగింది. ఈ క్రమంలో జీఓ పరిధిలోని ఆరు మండలాల్లోని సర్కారు భూముల లభ్యతపై సమాచారాన్ని రెవెన్యూ యంత్రాంగం సేకరించింది. గ్రేటర్‌కు సమీపంలో ఉన్నందున.. ఇక్కడ పెట్టుబడులు పెట్టేందుకు పలువురు ఆసక్తి చూపుతున్నట్లు ప్రభుత్వం స్పష్టం చేసింది. అయితే, వీటిలో 111 జీఓ ఆంక్షలకు లోబడి నిర్మాణాలు, పరిశ్రమలకుగాకుండా గోల్ఫ్‌కోర్టులు, రిక్రియేషన్, డిస్నీలాండ్ తరహా అమ్యూజ్‌మెంట్ పార్కులు, స్థాపనకు ద్వారాలు తెరవాలని నిర్దేశించింది. దీంతో జిల్లా యంత్రాంగం 111 జీఓ పరిధిలో ఉన్న 31,195.6 ఎకరాల సర్కారు భూముల్లో ఎన్ని అనుకూలంగా ఉన్నాయనే అంశంపై కసరత్తు ప్రారంభించింది.


 ఆ శాఖ ప్రక్షాళనకు యంత్రాంగం నిర్ణయం
  
  మూడేళ్లుగా ఒకేచోట
  పనిచేస్తున్నవారికి స్థానచలనం
  ఆరోపణలు మూటగట్టుకున్నవారిపై బదిలీ వేటు
  జాబితాపై అధికారుల కసరత్తు
  
 రెవెన్యూశాఖ ప్రక్షాళనకు జిల్లా యంత్రాంగం కసరత్తు చేస్తోంది. సర్కారీ స్థలాలు అన్యాక్రాంతమవుతున్నా పట్టించుకోని ఇంటిదొంగలపై చర్యలతోపాటు స్థానచలనం కలిగించే దిశగా మల్లగుల్లాలు పడుతోంది. ఒకే చోట మూడు, నాలుగేళ్లుగా పనిచేస్తున్న గ్రామ రెవెన్యూ అధికారి (వీఆర్‌ఓ), రెవెన్యూ ఇన్‌స్పెక్టర్ (ఆర్‌ఐ), మండల సర్వేయర్లను బదిలీ చేయాలని నిర్ణయించింది. ఆక్రమణదారులతో కుమ్మక్కు కావడంతో విలువైన ప్రభుత్వ భూములు పరాధీనమవుతున్నాయని గుర్తించిన జిల్లా యంత్రాంగం... శివారు మండలాల్లో తిష్టవేసిన రెవెన్యూ ఉద్యోగులను సమూలంగా మార్చేయాలనే నిర్ణయానికి వచ్చింది.  
  
 సాక్షి, రంగారెడ్డి జిల్లా ప్రతినిధి : చెరువు శిఖం భూములు సహా సర్కారీ స్థలాల పరిరక్షణను పట్టించుకోకుండా.. కబ్జాదారులతో కలిసి రికార్డులు తారుమారు చేస్తున్నట్లు జిల్లా పాలనాధికారులకు ఫిర్యాదులు అందాయి. ప్రజాదర్బార్‌లోనే కాకుండా.. సామాజిక మాధ్యమాల ద్వారా కూడా వీఆర్‌ఓ, మండల సర్వేయర్ల అక్రమాల పర్వం వెలుగులోకి వచ్చింది. ఈ నేపథ్యంలో కబ్జాదారులకు కొమ్ముకాస్తున్నట్లు గుర్తించిన 10 మంది వీఆర్‌ఓలను సస్పెండ్ చేయడం రెవెన్యూ వర్గాల్లో చర్చనీయాంశంగా మారింది.
 
 సస్పెండయిన పది మంది వీఆర్‌ఓలు శివారు మండలాల్లో పనిచేస్తున్నవారే కావడం విశేషం. ల్యాండ్ మాఫియాతో చేతులు కలిపిన మరికొంతమంది ఆర్‌ఐ, మండల సర్వేయర్ల చిట్టా కూడా జిల్లా యంత్రాంగానికి అందింది. వీరిపై కూడా అంతర్గత విచారణ ప్రారంభించిన అధికారులు చర్యలకు ఫైలును సిద్ధం చే స్తున్నారు. శామీర్‌పేట, మల్కాజిగిరి, ఉప్పల్, కుత్బుల్లాపూర్, సరూర్‌నగర్ తదితర మండలాల్లో వీఆర్‌ఓలు చక్రం తిప్పుతుండడం... రెవెన్యూ పాలనావ్యవస్థ వారి కనుసన్నల్లో కొన సాగుతుందనే ఆరోపణలు వచ్చాయి. భూముల క్రమబద్ధీకరణలోనూ వీరి చేతివాటం ఉంద ని తెలియడంతో మండలస్థాయిలో ప్రక్షాళనకు జిల్లా యంత్రాంగం నడుంబిగించింది.
 
  వచ్చే నెలలో బదిలీలు!
  అవినీతి ఆరోపణలు ఎదుర్కొంటున్న ఉద్యోగుల జాబితా సిద్ధమవుతోంది. శివారు మండలాల్లో పనిచేస్తున్న 220 మంది వీఆర్‌ఓలను గ్రామీణ ప్రాంతాలకు బదిలీ చేయాలని, అక్కడి వారిని ఇక్కడకు మార్చాలని జిల్లా యంత్రాంగం నిర్ణయించింది.  ప్రస్తుతం బదిలీలపై నిషేధం ఉన్నందున.. వచ్చే నెలలో ఆంక్షలు సడలించే అవకాశముంటుంది. ఈ నేపథ్యంలో అప్పటిలోగా జాబితాకు తుదిరూపు ఇవ్వాలని నిర్ణయించింది.
 
 ఈ క్రమంలో సస్పెండయిన  వీఆర్‌ఓల్లో పలువురిని ఇప్పటివరకు తిరిగి విధుల్లోకి తీసుకోలేదు. మరోవైపు అకారణంగా తమను అధికారులు వేధింపులకు గురిచేస్తున్నారని వీఆర్‌ఓల సంఘం ఆరోపిస్తోంది. చిన్న తప్పులకు తమను బలిపశువును చేయడం ఎంతవరకు సబబని వాపోతోంది. ఉద్యోగులకు బాసటగా నిలవాల్సిన టీఎన్జీఓ సంఘం కూడా తమకు అండగా నిలవ కపోవడంపై ఆ సంఘం ప్రతినిధులు తీవ్ర ఆగ్రహం వ్యక్తం చే స్తూ పత్రికాప్రకటన విడుదల చేయడం గమనార్హం.


 మంచాల: మండలంలో రెవెన్యూ అధికారుల పనితీరు కంచే చేను మేసిన చందంగా మారింది. ప్రభుత్వ భూములను కాపాడాల్సిన అధికారులు దళారులకు, ఆక్రమణదారులకు ఆసరాగా నిలుస్తున్నారు. దీంతో విలువైన భూముల అక్రమ విక్రయాలు కొనసాగుతున్నాయి. వివరాలు.. ఖానాపూర్ గ్రామంలో భూముల ధరలకు రెక్కలు వచ్చాయి. నాగార్జున సాగర్ -హైదరాబాద్ దారి సమీపంలో ఎకరాకు రూ.40 లక్షల నుంచి రూ. 50 లక్షల వరకు ధర పలుకుతోంది.
 
 భూముల ధరలు విపరీతంగా పెరగడంతో దళారులు, రెవెన్యూ అధికారులతో మిలాఖత్ అవుతున్నారు. రికార్డులను తారుమారు చేస్తున్నారు. తిరిగి ఆ భూములను అక్రమంగా విక్రయిస్తున్నారు. ఖానాపూర్ గ్రామంలో అక్రమ విక్రయాల తంతు జోరుగా కొనసాగుతోంది. అందుకు 67 సర్వే నంబర్‌లోని భూమి  ఉదాహరణగా చెప్పుకోవచ్చు. వాస్తవంగా ఈ సర్వే నంబర్‌లో 310 ఎకరాలు భూమి ఉంది. కానీ అధికారులు గుర్తించింది మాత్రం 280 ఎకరాలు మాత్రమే.
 
 ఇంకా అధికారికంగా 30 ఎకరాల వరకు ఉంది. ఈ 30 ఎకరాల భూముల్లో అక్కడక్కడా కొంత మంది కబ్జాలో ఉన్నారు. కాని వాస్తవంగా వారికి పట్టా లేదు. రికార్డుల్లో కూడా లేరు. ఇది గమనించిన దళారులు రియల్ వ్యాపారులతో చేతులు కలిపి పట్టా భూమితో పాటు మిగులు 30 ఎకరాలను కబ్జా చేసేందుకు యత్నిస్తున్నారు. 30 ఎకరాల భూమిలో అనర్హులు సైతం తమ పేర్ల మీద పట్టా పాసు పుస్తకాలు తీసుకున్నారు. 67 సర్వే నంబర్‌ను 67/1 నుంచి 67/26 వరకు నంబర్లను పొడిగించారు.
 
 అందులో ఈ భూమికి సంబంధంలేని వ్యక్తులు, స్థానికేతరులు కూడా పట్టా పాసు పుస్తకాలు తయారు చేసుకున్నారు. వారు యథేచ్ఛగా విక్రయాలకు పాల్పడుతున్నారు. ఈ తతంగమంతా బడా రియల్ వ్యాపారుల కనుసైగలో నడుస్తోంది. విలువైన 30 ఎకరాలను ఆక్రమణలో భాగంగానే అక్రమ పట్టా పాసు పుస్తకాలు, తప్పుడు రికార్డులు తయారు చేస్తున్నారు. అటు రియల్ వ్యాపారులు, ఇటు దళారులు కలిసి ఇదంతా చేస్తున్నారని ఆరోపణలు వినిపిస్తున్నాయి.  
 
 కొంతమంది ఒకే కుటుంబంలో ముగ్గురు పేర్లపై అక్రమ పట్టాలు పొందారు. ఒక్కరే మూడు పేర్లతో మూడు అక్రమ పట్టా పాసు పుస్తకాలు పొందడం గమనార్హం. ఇలా విలువైన 30 ఎకరాల భూమిని దళారులు తప్పుడు రికార్డులు తయారుచేసి రియల్ వ్యాపారులకు కట్టబెడుతున్నారు.
 
 ఈ అక్రమాలపై స్థానికులు ఇటీవలే జిల్లా కలెక్టర్‌ను కలిసి వివవించారు. అక్రమ పట్టాల విషయంలో విచారణ చేసి దోషులపై కఠిన చర్యలు తీసుకోవాలని స్థానికులు కోరుతున్నారు. ఈ విషయమై తహసీల్దార్ టి.శ్యాంప్రకాష్ వివరణ కోరగా..  పూర్తి స్థాయిలో విచారణ చేసి బాధ్యులపై చర్యలు తీసుకుంటామని చెప్పారు.


 జాయింట్ కలెక్టర్ రజత్‌కుమార్ సైనీ
 హయత్‌నగర్/పెద్దఅంబర్‌పేట: ప్రభుత్వ భూములను ఆక్రమిస్తే చర్యలు తప్పవని జాయింట్ కలెక్టర్-1 రజత్‌కుమార్ సైనీ హెచ్చరించారు. పెద్దఅంబర్‌పేట నగర పంచాయితీ పరిధిలోని పలు వివాదాస్పద భూములను గురువారం ఆయన సందర్శించారు. తట్టిఅన్నారంలోని జంగారెడ్డికుంట ఎఫ్‌టీఎల్ పరిధిలో రోడ్డు నిర్మించారని, పెద్దఅంబర్‌పేటలో సర్వే నం-64లోని వెంకటయ్యకుంట కబ్జాకు గురవుతోందని ఫిర్యాదు రావడంతో స్పందించిన జేసీ ఇరిగేషన్, రెవెన్యూ అధికారులతో కలిసి సదరు ప్రాంతాలను సందర్శించారు. ఆయా చెరువులకు సంబంధించి వివరాలను అడిగి తెలుసుకున్నారు. తట్టిఅన్నారం జంగారెడ్డికుంట ఎఫ్‌టీఎల్ పరిధిలో నిర్మించిన రోడ్డును తొలగించాలని అధికారులను ఆదేశించారు.
 
 పెద్దఅంబర్‌పేట వెంకటయ్యకుంటకు పూర్తి హద్దులు ఏర్పాటు చేయాలని, ఎఫ్‌టీఎల్ పరిధిలో జరుగుతున్న నిర్మాణాలను నిలిపివేయాలని సూచించారు. అనంతరం హయత్‌నగర్ మండలంలోని కోహెడలో పోలీసుశాఖ సమాచార టవర్ కోసం కేటాయించిన స్థలాన్ని పరిశీలించారు. పెద్దఅంబర్‌పేటలోని సర్వే నం-64లోని ప్రభుత్వ భూమిని రక్షించాలని స్థానికులు జేసీని కోరారు. కార్యక్రమంలో ఆర్‌డీఓ యాదగిరిరెడ్డి, డిప్యూటీ కలెక్టర్ శ్రీనివాస్, ఇరిగేషన్ ఈఈ బీంప్రసాద్, డీఈ గోపాల్‌రెడ్డి, ఏఈ కనకలక్ష్మి, ఆర్‌ఐలు సుదర్శన్‌రెడ్డి, రవీంద్రసాగర్, సర్వేయర్ బుచ్చయ్య తదితరులు పాల్గొన్నారు.
  
 మీడియాపై చిర్రుబుర్రులు..
 జేసీ సందర్శించిన విషయాన్ని చిత్రీకరించేందుకు వెళ్లిన మీడియాపై జేసీ మండిపడ్డారు. మీడియా ప్రతినిధులు ఫొటోలు తీస్తుండగా అధికారులు అడ్డుచెప్పారు. పర్యటన వివరాలను మీడియాకు చెప్పేందుకు ఆయన నిరాకరించారు. దీంతో మీడియా ప్రతినిధులు తీవ్ర అసంతృప్తి వ్యక్తం చేశారు.
  
 క్రిమినల్ కేసులు నమోదు చేస్తాం..
 జవహర్‌నగర్: ప్రభుత్వ భూములను ఆక్రమిస్తే క్రిమినల్ కేసులు నమోదు చేస్తామని జిల్లా జాయింట్ కలెక్టర్-1 రజత్‌కుమార్‌సైనీ హెచ్చరించారు. జవహర్‌నగర్‌లో ప్రభుత్వ భూములు, అధికారులు నిర్వహిస్తున్న క్రమబద్ధీకరణ సర్వేను గురువారం సాయంత్రం ఆర్డీఓ ప్రభాకర్‌రెడ్డి, శామీర్‌పేట తహసీల్దార్ దేవుజలతో కలిసి పరిశీలించారు. ఈ సందర్భంగా ఆయన మాట్లాడుతూ..  ప్రభుత్వ భూముల్లో అక్రమ నిర్మాణాలు చేపడితే కఠిన చర్యలు తీసుకుంటామన్నారు. గ్రామంలో అధికారులు నిర్వహిస్తున్న క్రమబద్ధీకరణ జీవో 58,59  సర్వేను పరిశీలించి దరఖాస్తు చేసుకున్న ప్రతీ ఒక్కరి ఇళ్లను గుర్తించాలని, సర్వేను వేగవంతం చేయాలని సూచించారు. అనంతరం గ్రామంలోని  ప్రభుత్వ స్థలాలను పరిశీలించారు.  కార్యక్రమంలో మండల రెవెన్యూ ఇన్‌స్పెక్టర్ రవినాయక్, రెవిన్యూ సిబ్బంది పాల్గొన్నారు.


 ఈ భూమి విలువ రూ.350 కోట్లు
 ఇదిగో.. ఈ ఫొటోలో కనిపిస్తున్న భూమి విలువ రూ.350 కోట్లు.  అమీన్‌పుర్‌లోని 993 సర్వే నంబర్‌లో ఉంది. మొత్తం 110 ఎకరాలు. కబ్జా కబంధ హస్తాల నుంచి బయటపడి, ఇటీవలే ప్రభుత్వ రికార్డుల్లోకి ఎక్కింది. కబ్జాదారులను బలవంతంగా  వెళ్లగొట్టారు. చైనా వాల్ మాదిరిగా చుట్టూ పటిష్టమైన గోడ కట్టారు.
  
 సాక్షి ప్రతినిధి, సంగారెడ్డి: మెతుకు సీమలో ఎక్కడ చూసినా.. ప్రభుత్వ భూములే కనిపిస్తున్నాయి. ఇటీవల సీఎం కేసీఆర్ సమీక్షలో భాగంగా రాష్ట్ర ప్రభుత్వ ఆదేశాల ప్రకారం జిల్లా యంత్రాంగం స్పందించి, ప్రభుత్వ భూముల గుర్తింపు వేట ఆరంభించింది. ఒకటి కాదు రెండు కాదు ఏకంగా 1 లక్షా 59 వేల ఎకరాల ప్రభుత్వ భూమిని గుర్తించింది.
  
 ఈ భూముల విలువ సుమారు రూ.75 వేల కోట్ల వరకు ఉంటుందని అంచనా. జాయింట్ కలెక్టర్ డాక్టర్ ఎ.శరత్ ప్రత్యేక చొరవతో అనతి కాలంలోనే ఇంత భారీస్థాయిలో ప్రభుత్వ భూమిని గుర్తించడమేగాక స్వాధీనం కూడా చేసుకున్నారు. అనంతరం వీటి వివరాలను ప్రభుత్వ రికార్డుల్లో పొందుపరిచి ప్రభుత్వానికి నివేదిక అందించారు. కంది గ్రామ సర్వే నంబర్ 400 సీరీస్‌లో 12 నంబర్లతో 200 ఎకరాలు.. నర్సాపూర్ పట్టణం 76 సర్వే నెంబర్‌లో 48 ఎకరాలు.. కాజిపల్లి పారిశ్రామికవాడ సర్వే నంబర్ 181లో 25 ఎకరాలు.. ముత్తంగి గ్రామంలో 25 ఎకరాలు.. రామచంద్రాపురంలో 60 ఎకరాలు ఇలా ఒక్కొక్క ఎకరాను లెక్కగట్టి చూస్తే మెదక్ జిల్లా వ్యాప్తంగా 1 లక్షా 59 వేల ఎకరాల ప్రభుత్వ భూమి ఉన్నట్టు జాయింట్ కలెక్టర్ డాక్టర్ ఎ.శరత్ నిర్ధారించారు.
 
 దీని విలువ రూ.70 నుంచి రూ.75 వేల కోట్ల వరకు ఉంటుందని అంచనా. ఈ మేరకు ప్రభుత్వానికి నివేదిక సమర్పించారు. గ్రేటర్ హైదరాబాద్‌కు సమీపంలోని పటాన్‌చెరు, గజ్వేల్, నర్సాపూర్, సంగారెడ్డి నియోజకవర్గాల్లోనే 60 శాతం ప్రభుత్వ భూములు ఉన్నాయి. ప్రభుత్వం తన అధీనంలోకి తీసుకున్న 1 లక్షా 59 వేల ఎకరాల  భూమిలో 1,620 ఎకరాలు అత్యంత విలువైనదిగా, 3,500 ఎకరాలు జనావాసాలకు సమీపంలో ఉండి రియల్ ఎస్టేట్ వ్యాపారానికి పనికి వచ్చే విలువైన భూమిగానూ 16,551 ఎకరాలు పారిశ్రామిక వాడలకు, 35 వేల ఎకరాలు హెచ్‌ఎండీఏ అవసరాలకు, మిగిలిన భూమి వ్యవసాయానికి ఉపయోగపడేదిగానూ గుర్తించారు. ఈ భూములకు రెవెన్యూ రికార్డులు సరిగా లేకపోవడం, ఐఏఎస్ అధికారులకు రెవెన్యూ రికార్డులు, వాటి అమలు తీరుపై సమగ్రమైన పట్టు లేకపోవడం, పైగా రెవెన్యూ శాఖలోనే కింది స్థాయి అధికారులు కబ్జాదారులకు అండగా నిలబడటంతో ప్రభుత్వ భూమిపై ప్రైవేటు వ్యక్తులు పట్టుబిగిస్తూ వచ్చారు.
  
 ఓ యజ్ఞమే జరిగింది...
 ప్రభుత్వ భూముల గుర్తింపు వెనుక జాయింట్ కలెక్టర్ శరత్ ఓ యజ్ఞమే చేశారు. ఏడు రికార్డుల విధానాన్ని అమల్లోకి తెచ్చారు. ముందుగా ప్రతి రైతుకు రెవెన్యూ సహకారాన్ని అందించారు. రికార్డులన్నీ భూ యజమానులకు అందేలా చేశారు. తరువాత ఒక్కో నియోజక వర్గాన్ని  లక్ష్యంగా చేసుకున్నారు. ఎంచుకున్న  నియోజకవర్గంలోని ప్రభుత్వ భూముల సర్వే నంబర్లు, కబ్జాలో ఉన్నవారి వివరాలు, కబ్జాకు అనుకూలించిన పరిణామాలు తదితర వివరాలను ముందుగా సేకరించారు.
 
 రెండో దశలో ‘మీరు ఆక్రమణలో ఉన్నది ప్రభుత్వ భూమి కాదు అని నిరూపించడానికి మీ దగ్గర ఉన్న ఆధారాలు ఏమిటో చూపించాలి’ అని ఆయా వ్యక్తులకు నోటీసులు పంపిచారు. ఈ తంతుతో భూ బకాసురుల బండారం బయటకు వచ్చింది. ఆధారాలు చూపిన వారిని వదిలేసి మిగిలిన వారిమీద పడ్డారు.  మూడో దశలో పోలీసుల సహకారం తీసుకొని నిర్ధారించిన ప్రభుత్వ భూముల చుట్టూ కంచె వేయించారు.


 - 125 గజాల దాకా క్రమబద్ధీకరణ  
  - రెవెన్యూశాఖ ముఖ్య కార్యదర్శి బీఆర్ మీనా
  సాక్షి, హైదరాబాద్: ప్రభుత్వ భూముల్లో నివాసాలు ఏర్పరచుకున్న పేదలకు ఆయా స్థలాలను ఉచితంగా క్రమబద్ధీకరించే విషయంలో రాష్ట్ర ప్రభుత్వం స్పష్టతతో ఉందని రెవెన్యూ ముఖ్య కార్యదర్శి బీఆర్ మీనా తెలిపారు. మంగళవారం ఆయన ‘సాక్షి’తో మాట్లాడుతూ ఆక్రమిత  స్థల విస్తీర్ణం 125 గజాలకు మించినా దరఖాస్తుదారులు పేదలైతే వారికి 125 గజాల వరకు ఉచితంగానే క్రమబద్ధీకరించాలని ప్రభుత్వం నిర్ణయించిందని ఆయన స్పష్టం చేశారు.
 
 మిగిలిన స్థలం క్రమబద్ధీకరణకే నిర్దేశిత ధర మేరకు సొమ్ము చెల్లించాల్సి ఉంటుందన్నారు. కుటుంబ వార్షికాదాయం పట్టణాలు, నగరాల్లో రూ.2 లక్షల్లోపు ఉన్న వారందరినీ పేదలుగానే పరిగణిస్తామన్నారు. వీరంతా స్థానిక తహశీల్దారు నుంచి ఆదాయ ధ్రువీకరణ పత్రం పొందాల్సి ఉంటుందన్నారు. అయితే భూముల క్రమబద్ధీకరణకు సంబంధించి జీవో 59 కింద  ప్రభుత్వం పేర్కొన్న రిజిస్ట్రేషన్ ధరను తగ్గించే యోచన లేదని మీనా స్పష్టం చేశారు.
 
 పేదలకు 125 గజాల వరకు స్థలాన్ని ఉచితంగా క్రమబద్ధీకరిస్తున్నందున దరఖాస్తుదారుల్లో ఎక్కువ శాతం మందిపై భారం లేదన్నారు. మధ్యతరగతి వర్గాల కోసమే 125 గజాల నుంచి 250 గజాల వరకు రిజిస్ట్రేషన్ ధరలో 50 శాతం రాయితీని ప్రభుత్వం ఇచ్చిందన్నారు. 250 నుంచి 500 గజాల్లోపు స్థలంలో ఉంటున్న వారు స్థలం క్రమబద్ధీకరణకు రిజిస్ట్రేషన్ ధరలో 75 శాతమే చెల్లించాలని, 500 గజాలకుపైగా ఆక్రమిత స్థలంలో ఉంటున్న ప్రజలను మధ్య తరగతివారీగా పరిగణించలేమన్నారు.
  
 2 లక్షలకు చేరువైన దరఖాస్తులు..
 క్రమబద్ధీకరణకు ఇప్పటివరకూ 1.89 లక్షల దరఖాస్తులు వచ్చాయని మీనా తెలిపారు. అత్యధికంగా రంగారెడ్డి జిల్లా నుంచి 1.17 లక్షల దరఖాస్తులు రాగా, అత్యల్పంగా మహబూబ్‌నగర్ జిల్లాలో 255 దరఖాస్తులే వచ్చాయన్నారు. క్రమబద్ధీకరణ గడువు పెంచినందున మరో 3 లక్షల వరకు దరఖాస్తులు వస్తాయని ఆశిస్తున్నామన్నారు. కాగా, ప్రభుత్వ భూములతో పాటు ఆక్రమణలకు గురైన శ్మశాన స్థలాలు, మున్సిపల్ స్థలాలను కూడా క్రమబద్ధీకరించాలని నిర్ణయించినట్లు మీనా చెప్పారు.
 
 శిఖం భూములను ఆక్రమించుకొన్న వారికి కూడా ఆయా స్థలాలను క్రమబద్ధీకరించే అవకాశాలను ప్రభుత్వం పరిశీలిస్తోందన్నారు. హైదరాబాద్‌లో ఎంఎస్ మక్తా.. వంటి ప్రాంతాల్లో మూడు ద శాబ్దాలుగా హుస్సేన్ సాగర్ స్థలాన్ని ఆక్రమించుకొని ఎంతోమంది నివాసముంటున్నారని, వాటిని రెగ్యులరైజ్ చేయకపోవడంతో అభివృద్ధి కార్యక్రమాలకు ఆటంకం ఏర్పడుతుందన్నారు. తప్పనిసరి పరిస్థితుల్లో శిఖం భూములను కూడా డీనోటిఫై చేసి క్రమబద్ధీకరించేందుకు సుప్రీంకోర్టు మార్గదర్శకాలున్నాయన్నారు.
  
 క్రమబద్ధీకరణ గడువు పెంపు ఉత్తర్వులు జారీ
 భూముల క్రమబద్ధీకరణకు సంబంధించి దరఖాస్తుల సమర్పణకు గడువును పొడిగిస్తూ ప్రభుత్వం సోమవారం రాత్రి ఉత్తర్వులు జారీచేసింది. 125 గజాల్లోపు స్థలాలను ఉచిత క్రమబద్ధీకరణ నిమిత్తం దరఖాస్తులు సమర్పించేందుకు ఈ నెల 31 వరకు, రిజిస్ట్రేషన్ ధర చెల్లించి వివిధ కేటగిరీల స్థలాల క్రమబద్ధీకరణ కోసం దరఖాస్తు చేసేవారికి ఫిబ్రవరి 28 వరకు గడువు పొడిగిస్తూ జీవోఎంఎస్ నంబర్లు 5, 6 లతో వేర్వేరుగా ఉత్తర్వులు జారీ చేశారు.


 హైదరాబాద్: ప్రభుత్వ భూముల అన్యాక్రాంతంపై తెలంగాణ ప్రభుత్వం మూడు శాసన సభా సంఘాలు ఏర్పాటు చేసింది. అలాగే వక్ఫ్ భూముల అన్యాక్రాంతంపై టీఆర్ఎస్ ఎమ్మెల్యే బాజిరెడ్డి గోవర్ధన్ చైర్మన్ గా 13 మందితో కమిటీ ఏర్పాటయింది. హౌసింగ్ సొసైటీ అక్రమాలపై ఎమ్మెల్యే రమేష్ చైర్మన్ గా, ప్రభుత్వ భూముల అన్యాక్రాంతంపై ఎమ్మెల్యే సుధీర్ రెడ్డి చైర్మన్ గా కమిటీలు ఏర్పాటయ్యాయి. రాబోయే మూడు నెలల్లో ఈ కమిటీలు సభకు నివేదికలు అందజేయాలని ప్రభుత్వం ఆదేశించింది.


 యాచారం: అక్రమార్కులు చెరపట్టిన ప్రభుత్వ భూములను పరిరక్షించేందుకు రెవెన్యూ యంత్రాంగం నడుం కట్టింది. ప్రభుత్వానికి చెందిన స్థలాలను గుర్తించి వాటిలో హద్దురాళ్లు పాతారు. ఇందులోని ఆక్రమణలను వెంటనే తొలగించుకోవాలని రెవెన్యూ అధికారులు హెచ్చరికలు జారీ చేస్తున్నారు. దీంతో సర్కారు స్థలాలను ఆక్రమించుకున్నవారి గుండె ల్లో రైళ్లు పరుగెడుతున్నాయి.
 
 ఇన్నాళ్లూ మండలంలో సర్కారు స్థలాల వివరాలను రికార్డులకే పరిమితం చేసిన అప్పటి తహసీల్దార్‌లు ప్రభుత్వానికి తప్పుడు లెక్కలు సమర్పించి కాలం వెళ్లదీశారు. నాటి అధికారుల అలసత్వం అక్రమార్కులకు వరంగా మారింది. హైదరాబాద్ మహా నగరానికి యాచారం చేరువలో ఉండటంతో ఇక్కడి భూముల ధరలు రూ. కోట్లలో పలుకుతున్నాయి. దీంతో అక్రమార్కులు ఏదో ఒక రాజకీయ పార్టీ అండతో తహసీల్దార్లపై ఒత్తిడి చేయించి ఆ భూములను తమ గుప్పట్లో పెట్టుకుని కాలం వెల్లదీశారు.
 
 కానీ ప్రస్తుతం ఆ పరిస్థితులు తారమారవుతున్నాయి. రెవెన్యూ రికార్డుల్లో నమోదైన వివరాల ప్రకారం ప్రభుత్వ భూము లు ఎన్ని ఉన్నాయో.. వాటినన్నింటినీ స్వాధీనం చేసుకోవాలని తహసీల్దార్‌లకు తెలంగాణ సర్కారు ఆదేశాలు జారీ చేసింది. దీంతో స్థానిక తహసీల్దార్ వసంత కుమారి  రెవెన్యూ రికార్డుల్లో ప్రకారం సర్వే నంబర్లలో ఉన్న ప్రభుత్వ భూమిని అక్రమార్కుల నుంచి స్వాధీనం చేసుకోవడానికి ఉపక్రమించారు.  20 గ్రామాల్లో రెవెన్యూ రికార్డుల ప్రకారం వందలాది ఎకరాల ప్రభుత్వ భూమిని స్వాధీనం చేసుకొని హద్దులు పాతడానికి నిర్ణయించారు.  
  
 అక్రమార్కుల గుండెల్లో గుబులు  
 వారం రోజులుగా సర్వేయర్ నరహరి రాజు, గ్రామ రెవెన్యూ కార్యదర్శి కృష్ణ యాచారంలో ప్రభుత్వ భూమిని గుర్తిం చారు. సోమవారం తహసీల్దార్ వసంతకుమారి ఆ భూముల్లో హద్దులు పాతిం చారు. రాళ్లపై, చెట్లపై ‘ఇది ప్రభుత్వ భూమి’ అని రాయించారు. యాచారం తూర్పు దిశలో సర్వే నంబరు 242లో 1-29 ఎకరాలు, 225లో 3 ఎకరాలు,  452లో 10 గుంటల భూమికి హద్దులు పాతించారు.
 
 మండల కేంద్రంలో ఉన్న ఈ భూమి దాదాపు రూ. 2 కోట్లకుపైగా విలువ ఉంటుంది. గతంలో అధికారుల రికార్డుల ప్రకారం ఇక్కడ ప్రభుత్వ భూములు ఉన్నాయి. కానీ ఇవి ఆక్రమణకు గురయ్యాయి. రాజకీయ పక్షాల ఒత్తిళ్లతో వీటిని అధికారులు స్వాధీనం చేసుకోలేదు. ప్రస్తుతం ఈ భూముల్లో హద్దులు పాతడం, ప్రభుత్వ భూమిగా గుర్తించడంతో అక్రమార్కుల గుండెల్లో గుబులు పట్టుకొంది. ‘రికార్డుల్లో చూస్తే వందలాది ఎకరాల ప్రభుత్వ భూమి ఉంది. కానీ ఆ స్థలం వద్దకు వెళ్లి చూస్తే మాత్రం ఆక్రమణలు ఉన్నాయి. అందుకే  రికార్డుల ప్రకారం సెంటు ప్రభుత్వ భూమినైనా వదిలే ప్రసక్తి లేదు. ప్రజావసరాలుంటే కలెక్టర్ అనుమతితో ఆ భూమిని కేటాయిస్తాం’ అని తహసీల్దార్ వసంతకుమారి పేర్కొన్నారు.


 * క్రమబద్ధీకరణకు ఇదే చివరి అవకాశమన్న సీఎం కేసీఆర్
 * సర్కారు భూముల్లోని నివాసాలు, నిర్మాణాలకు దరఖాస్తు చేసుకోండి
 *  90 రోజుల్లో ప్రక్రియ పూర్తి, ఆ తర్వాత మిగిలిన భూములను స్వాధీనం చేసుకుంటాం
 * ఇకపై ఆక్రమణలను సహించం, కఠినంగా శిక్షిస్తామని ముఖ్యమంత్రి హెచ్చరిక
  
 సాక్షి, హైదరాబాద్: ప్రభుత్వ భూములను ఆక్రమించుకున్న వారిపై ముందస్తు నిర్బంధ(పీడీ యాక్టు) చట్టాన్ని ప్రయోగించేందుకూ వెనుకాడేది లేదని ముఖ్యమంత్రి కె.చంద్రశేఖర్‌రావు స్పష్టం చేశారు. జూన్ 2కు ముందు ప్రభుత్వ భూముల్లో నివాసాలు, నిర్మాణాలు ఏర్పరచుకున్న వారు, వాటిని క్రమబద్ధీకరించుకునేందుకు ప్రభుత్వం తాజాగా ఇచ్చిన వెసులుబాటును సద్వినియోగం చేసుకోవాలని సూచించారు.
  
 సర్కారు భూముల్లోని పేదల నివాసాలతో పాటు ఇతర నిర్మాణాలను కూడా క్రమబద్ధీకరించే అంశంపై సచివాలయంలో సోమవారం ఉన్నతాధికారులతో సీఎం కేసీఆర్ సమీక్షించారు. ప్రభుత్వ ప్రధాన కార్యదర్శి రాజీవ్ శర్మ, సీఎంవో ముఖ్య కార్యదర్శి నర్సింగరావు, రెవెన్యూ కార్యదర్శి బీఆర్ మీనా తదితరులు ఈ భేటీలో పాల్గొన్నారు. రాష్ట్రంలో ఇకపై ఆక్రమణలకు తావులే కుండా పూర్తిస్థాయిలో ప్రక్షాళన చేయడానికే ప్రభుత్వం క్రమబద్ధీకరణ నిర్ణయం తీసుకున్నదని ఈ సందర్భంగా ముఖ్యమంత్రి వెల్లడించారు.
  
   క్రమబద్ధీకరణకు ఇదే చివరి అవకాశమని, నిర్ణీత గడువులోగా దరఖాస్తు చేసుకోని వారిని ఆక్రమణదారులుగానే పరిగణిస్తామని స్పష్టంచేశారు. పేదలు నివాసమున్న 125 గజాల్లోపు స్థలాలను ఉచితంగానే క్రమబద్ధీకరిస్తామని, అర్హులంతా వెంటనే దరఖాస్తు చేసుకోవాలని కేసీఆర్ సూచించారు. మిగతా వారి విషయంలో ఎంత విస్తీర్ణానికి ఎంత ధర చెల్లించాలో ఇప్పటికే నిర్ణయించినందున అలాంటి వాళ్లూ క్రమబద్ధీకరణ కు దరఖాస్తులు సమర్పించాలన్నారు.
  
  ఇకపై భూముల రిజిస్ట్రేషన్లన్నీ సక్రమంగా ఉండాలని, దీన్ని మొత్తంగా ప్రక్షాళన చేయాలన్నదే ప్రభుత్వ ఉద్దేశమని సీఎం వెల్లడించారు. గత నెల 31న క్రమబద్ధీకరణకు సంబంధించి మార్గదర్శకాల తో ఉత్తర్వులు జారీ చేసిన విషయాన్ని ఆయన గుర్తుచేశారు. జీవో వచ్చిన 20 రోజుల్లోగా అందరూ దరఖాస్తు చేసుకోవాలన్నారు. దరఖాస్తులు స్వీకరించాక 90 రోజుల్లో క్రమబద్ధీకరణ ప్రక్రియను పూర్తి చేయాలని రెవెన్యూ అధికారులను సీఎం ఆదేశించారు. ఇకపై రాష్ర్టంలో భూముల దురాక్రమణకు వీల్లేకుండా కఠినంగా వ్యవహరిస్తామన్నారు. ప్రభుత్వ భూములను ఆక్రమించినవారిని కబ్జాదారులుగా పరిగణించి కఠినంగా శిక్షిస్తామని హెచ్చరించారు. ప్రభుత్వం కల్పించిన క్రమబద్ధీకరణ వెసులుబాటును వినియోగించుకోకుండా ఆక్రమణలను కొనసాగిస్తే రాజీపడేది లేదన్నారు. ప్రస్తుతం చేపట్టిన ప్రక్రియ ముగిశాక, మళ్లీ అవకాశం ఇవ్వబోమన్నారు. దరఖాస్తు చేసుకోని వారి స్థలాల్ని ప్రభుత్వం స్వాధీనం చేసుకుంటుందన్నారు. రాష్ట్రం లోని ప్రతి అంగుళం భూమికీ ధ్రువపత్రాలు (క్లియర్ టైటిల్) ఉండాలని స్పష్టం చేశారు.
  


 హైదరాబాద్: ప్రభుత్వ భూముల్లో అక్రమ నిర్మాణాలను క్రమబద్దీకరించుకోవాల్సిందేనని తెలంగాణ సీఎం కేసీఆర్ స్పష్టం చేశారు. క్రమబద్దీకరించుకోకుంటే ఖాళీ చేయిస్తామన్నారు. ఏప్రిల్ తర్వాత ప్రభుత్వ భూముల్లో ఎవర్నీ ఉండనీయబోమని హెచ్చరించారు.
 
 125 గజాలలోపు నివాసం ఉంటున్న పేదలకు ఉచితం క్రమబద్ధీకరిస్తామని కేసీఆర్ సర్కారు ప్రకటించిన సంగతి తెలిసిందే. అలాగే 125 - 250 గజాలలోపు భూముల రిజిస్ట్రేషన్కు 50 శాతం రాయితీ... 250 - 500 గజాలలోపు భూముల రిజిస్ట్రేషన్కు 75 శాతం రాయతీ... 500 నుంచి ఆపై బడిన నివాస స్థలాలకు 100 శాతం రిజిస్ట్రేషన్ ధర చెల్లించి భూమిని క్రమబద్ధీకరణ చేయించుకోవాలని ప్రభుత్వం తెలిపింది.


 హైదరాబాద్: విలువైన ప్రభుత్వ భూములు వేలం వేయాలని తెలంగాణ ప్రభుత్వం నిర్ణయించింది. వివాదాలులేని విలువైన ప్రభుత్వ భూములు గుర్తించాల్సిందిగా జిల్లా కలెక్టర్లను ఆదేశించింది.
 
 ప్రభుత్వ ప్రధాన కార్యదర్శి  రాజీవ్ శర్మ 10 జిల్లాల కలెక్టర్లతో వీడియో కాన్ఫరెన్స్ నిర్వహించారు. వీలైనంత త్వరగా భూముల గుర్తింపు ప్రక్రియ పూర్తిచేయాలని ఆయన కలెక్టర్లను కోరారు. ప్రభుత్వ భూముల వేలం విషయాన్ని అత్యంత ప్రాధాన్యం గల అంశంగా గుర్తించాలని రాజీవ్ శర్మ అన్నారు.


 దేవరకొండ: ఉరుము ఉరిమి మంగళం మీద పడ్డట్టు.. ‘థర్మల్’ దెబ్బ దేవరకొండపైనే పడనుంది. దామరచర్ల మండలంలో నిర్మించతలపెట్టిన థర్మల్‌పవర్‌ప్లాంట్‌కు అవసరయ్యే 10 వేల భూములకు ప్రత్యామ్నాయంగా మరోచోట భూములిస్తేనే అటవీశాఖ నుంచి క్లియరెన్స్ వస్తుంది. అయితే మొదట నేరేడుచర్ల, మఠంపల్లి మండలాల్లో ఉన్న ప్రభుత్వ భూములను సేకరిస్తామని భావించినా, ఇప్పుడు జిల్లాయంత్రాంగం ఆ నిర్ణయాన్ని మార్చుకున్నట్టు సమాచారం.
 
 తాజాగా దేవరకొండ నియోజకవర్గపరిధిలోని ప్రభుత్వ భూములను పరిశీలిస్తున్నట్లు తెలిసింది. థర్మల్ పవర్ ప్రాజెక్టు నిర్మాణంపై సీఎం ప్రత్యేక దృష్టి సారించడంతో, జిల్లా అధికారులు అటవీశాఖ పరిధిలోని భూముల్లో ఆగమేఘాల మీద సర్వే చేశారు. పనిలోపనిగా శుక్రవారం దేవరకొండ రెవెన్యూ అధికారులతో పాటు జిల్లా అటవీశాఖ అధికారులు చందంపేట మండలంలో పర్యటించారు.
 
 ప్రభుత్వభూమి..పదివేల ఎకరాలు
 దేవరకొండ నియోజకవర్గంలోని ప్రభుత్వ భూముల వివరాలను జిల్లా అధికార యంత్రాంగం ఇప్పటికే సేకరించింది. చందంపేట మండలంలో 3700 ఎకరాలు, దేవరకొండలో 1700 ఎకరాలు, డిండిలో 3032, పీఏపల్లి మండలంలో 988 ఎకరాలు, చింతపల్లిలో సుమారు వెయ్యి  ఎకరాల ప్రభుత్వ భూమిని అధికారులు గుర్తించారు.
 
 అయితే ప్రభుత్వం అటవీశాఖకు అప్పగించదలుచుకున్న 7500 ఎకరాల్లో  6500 ఎకరాలు దేవరకొండ నియోజకవర్గం నుంచే సేకరించాలని భావిస్తున్నట్లు విశ్వసనీయ సమాచారం. చందంపేట, డిండి మండలాల పరిధిలో నల్లమల అటవీ ప్రాంతం విస్తరించి ఉండడంతో ఈ భూమి ఫారెస్ట్ ఆధీనంలోకి తీసుకోవడానికి అటవీశాఖ అధికారులు కూడా సుముఖంగా ఉన్నట్లు తెలుస్తుంది.
  
 జనంలో.... గుబులు :
 గతంలో పీఏపల్లి మండలం పెద్దగట్టు, చందంపేట మండలం చిత్రియాల అటవీ ప్రాంతాల్లో యురేనియం నిల్వలను కేంద్రప్రభుత్వం గుర్తించింది. అక్కడ వెలికితీసే యురేనియం నిక్షేపాలను శుద్ధి చేయడం కోసం దేవరకొండ మండలంలోని శేరిపల్లి అనువైందిగా భావించింది. అక్కడున్న 500 ఎకరాల్లో యురేనియం శుద్ధి కర్మాగారం ఏర్పాటు చేయాలనియూసీఐఎల్ భావించింది. ఇందు కోసం శేరిపల్లి ప్రాంతంలో సర్వే కూడా నిర్వహించారు. జేత్యతండా సమీపంలో అధికారుల నివాసానికి రెండు ఎకరాల ప్రభుత్వ భూమిని ఇవ్వాల్సిందిగా,  జిల్లా అధికారుల నుంచి రెవెన్యూ అధికారులకు ఆదేశాలు కూడా వచ్చాయి.
 
 ప్రస్తుతం ఈ విషయం స్తబ్దుగా ఉన్నప్పటికీ, గతంలో యురేనియం ప్లాంట్‌కు వ్యతిరేకంగా ఎన్నో ఉద్యమాలు జరిగాయి. ఇదే క్రమంలో చందంపేట మండలంలో ఎస్‌ఎల్‌బీసీ సొరంగ మార్గం పనులు జరుగుతుండగా, నక్కలగండి ప్రాజెక్టు కోసం ముంపునకు గురయ్యే 3వేల ఎకరాలకు భూమిని సేకరించే పనిలో ప్రభుత్వం ఉంది. అక్కడ కేవలం 300 ఎకరాలు మాత్రమే సేకరించగా, ముంపు బాధితుల నుంచినిరసన గళం వినిపిస్తూనే ఉంది.
 
 ఇప్పటికే నాగార్జునసాగర్ ముంపునకు గురైనప్పుడు తెల్దేవర్‌పల్లిలో ఆవాసాలు కల్పించగా,  మళ్లీ  అదే ప్రాంతం నక్కలగండి ప్రాజెక్టులో ముంపునకు గురవుతుంది. వారికి ఇంకా ప్రభుత్వ భూమిని ప్రత్యామ్నాయంగా చూపించనేలేదు. నూతన భూసేకరణ చట్టం నిబంధనల ప్రకారం వారు ప్రత్యామ్నాయ ప్రభుత్వ భూములను డిమాండ్ చేస్తున్నారు. ఈ నేపథ్యంలో థర్మల్ పవర్ ప్లాంట్‌కు చందంపేట, డిండి ప్రభుత్వ భూములను ప్రత్యామ్నాయంగా భావించడం..అధికారగణం ఇందుకు సంబంధించిన సర్వేలు చేస్తుండడంతో ఈ ప్రాంతవాసుల్లో గుబులు మొదలయ్యింది.


 ఖమ్మం పరిసర ప్రాంతాల్లో వేలాది ఎకరాల ప్రభుత్వ భూమి ఉన్నా లెక్కల్లో మాత్రం వందల్లోనే కనిపిస్తోంది. ప్రభుత్వానికి చెందిన ఎన్‌ఎస్‌పీ, అసైన్డ్, ఇనాం, శిఖం భూములు, మున్సిపల్, సీలింగ్ భూముల్లో కబ్జాదారులు పాగా వేశారు.  నాయకులు, అధికారుల అండదండలతో ఎన్‌వోసీ, ఆర్‌వోసీలు లేకుండానే ఏకంగా పట్టా మార్పిడి చేసుకున్నారు. కోట్లాది రూపాయల విలువ చేసే ప్రభుత్వ భూమి అన్యాక్రాంతానికి పాల్పడ్డారని అధికారుల సర్వేలో వెల్లడవుతుండటంతో కబ్జాదారుల్లో ఆందోళన నెలకొంది.  
  
 సర్వేతో ఆక్రమణలు తేలుస్తాం..
 ఖమ్మం అర్బన్ మండలంలో ప్రభుత్వ భూములను సర్వే చేసి ఎక్కడెక్కడ ఆక్రమణలు జరిగాయో తేలుస్తాం. ప్రభుత్వ భూములు హద్దులు నిర్ణయించి, వాటి పరిరక్షణ కోసం ప్రత్యేక ఏర్పాట్లు చేస్తాం. ఈ దఫా నిర్వహించే సర్వేలో ఎవరైనా ప్రభుత్వ భూమిని ఆక్రమించినట్లు తేలితే తక్షణం నోటీసులు జారీ చేస్తాం. వారిపై చట్టపరమైన చర్యలు తీసుకుంటాం. తొలుత ఖమ్మం నగరంలో ఎన్నెస్పీ క్యాంప్‌లో ఉన్న 94 ఎకరాలు సర్వే చేస్తాం.
 - వినయ్‌కృష్ణారెడ్డి, ఖమ్మం ఆర్డీవో
  
 సాక్షి ప్రతినిధి, ఖమ్మం: జిల్లాలో ప్రభుత్వ భూముల ఆక్రమణపై సర్కారు కొరడా ఝుళిపిస్తోంది. ఖమ్మంలో ప్రభుత్వ భూముల లెక్కలు తేల్చేందుకు ప్రత్యేక సర్వే బృందాలు రంగంలోకి దిగాయి. రికార్డుల్లో వందలాది ఎకరాల ప్రభుత్వ భూమి కనపడుతున్నా  క్షేత్రస్థాయిలో ఆ భూమి ప్రభుత్వ ఆధీనంలో లేకపోవడంపై జిల్లా యంత్రాంగం సీరియస్‌గా స్పందించింది. జిల్లాకేంద్రంలో ప్రజా అవసరాలు, అభివృద్ధి కార్యక్రమాలకు సరిపడా ప్రభుత్వ భూమి ఉందా..? ఉంటే ఎక్కడ ఉంది..? వాటిని ప్రజల అవసరాలకు ఏ విధంగా ఉపయోగించుకోవచ్చు అనే అంశంపై జిల్లా యంత్రాంగం ఆరా తీస్తోంది. రాష్ట్ర మంత్రి తుమ్మల నాగేశ్వరరావు సూచనల మేరకు భారీ కసరత్తుకు శ్రీకారం చుట్టింది.
 
 కబ్జాకోరల నుంచి..
 ఈ సర్వేతో కబ్జాకోరల్లో చిక్కుకున్న వేలాది ఎకరాల ప్రభుత్వ భూమి వివరాలు, అన్యాక్రాంతమైన భూముల చిట్టా వెలుగులోకి రానుంది. దీనికోసం జిల్లా రెవెన్యూ యంత్రాంగం ఆగమేఘాల మీద సర్వేయర్ల బృందంతో క్షేత్రస్థాయి పరిశీలనకు ఉపక్రమించింది. రఘునాథపాలెం మండలం, మున్సిపాలిటీల పరిధిలో చెరువు శిఖం భూములు, సీలింగ్, ఎన్‌ఎస్‌పీ భూములు వెయ్యి ఎకరాలు ఉండగా, వాటిలో సగానికి పైగా ఆక్రమణకు గురైనట్లు ఆరోపణలు వెల్లువెత్తుతున్నాయి. జిల్లా యంత్రాంగం ఆక్రమణలపై సమగ్ర సర్వే నిర్వహించి వాటిని స్వాధీనం చేసుకునేందుకు రంగం సిద్ధం చేస్తోంది. ఇప్పటికే ‘ఆపరేషన్ భూ రైడింగ్’ పేరుతో జరిపిన సర్వేలో అనేక ఎకరాల భూములు కబ్జాకు గురైనట్లు తేలింది. అయితే అధికారులు మాత్రం వీటిపై ఎలాంటి చర్యలు చేపట్టలేదు. మంత్రి ఆదేశాలతో మళ్లీ ప్రభుత్వ యంత్రాంగం ఉరుకులు పరుగులు తీస్తోంది.
 
 రికార్డుల్లో ఫుల్..క్షేత్రస్థాయిలో నిల్
 ఖమ్మం నగర పాలక సంస్థకు వివిధ ప్రాంతాల్లో దాదాపు 300 ఎకరాలు భూమి ఉన్నట్లు రెవెన్యూ రికార్డులు చూపిస్తున్నా సంస్థకు మాత్రం అంత భూమి ఎక్కడ ఉందో..? వాటికి సంబంధించిన రికార్డులు ఏమయ్యాయో అంతుపట్టని పరిస్థితి ఉంది. త్రీ టౌన్ ప్రాంతంలో కొన్ని దశాబ్దాల క్రితం మున్సిపాలిటీ కొందరికి సుమారు 100 ఎకరాలు లీజుకు ఇచ్చింది. ఆ తర్వాత ఆ భూమిపై ఎవరికి హక్కు సంక్రమించింది? ఎలా సంక్రమించింది? అనే అంశంపై మాత్రం స్పష్టైమైన ఆధారం కానీ.. రికార్డులు కానీ లేకపోవడం గమనార్హం. ఈ నేపథ్యంలో రెవెన్యూ అధికారులు, సర్వే అధికారులు సంయుక్తంగా చేస్తున్న ఈ సర్వే అనేక ఆక్రమణలను వెలుగులోకి తెచ్చే అవకాశం ఉందని పలువురు భావిస్తున్నారు.
 
 అద్దె ఇళ్లలో ప్రభుత్వ కార్యాలయాలు..
 జిల్లాకేంద్రంలో అనేక ప్రభుత్వ కార్యాలయాలకు సొంత భవనాలు లేక అద్దె భవనాలు, ఇరుకు గదుల్లో నిర్వహించాల్సి వస్తోంది. జిల్లాకేంద్రంలో ప్రభుత్వ భూమి ఉన్నా ఎందుకు ఈ పరిస్థితి నెలకొందనే అంశంపై అధికారులు దృష్టి సారించారు. ప్రభుత్వ భూములు ఎక్కడెక్కడ ఉన్నాయో ఆరా తీస్తున్నారు. అనేక ప్రభుత్వ కార్యాలయాల భవన నిర్మాణానికి నిధులు మంజూరు చేసినా సరైన ప్రభుత్వ భూమి లభించకపోవడంతో అవి కార్యరూపం దాల్చడం లేదు. గత కొన్నేళ్లుగా జిల్లాకేంద్రంలో  నూతన కార్యాలయాల నిర్మాణం చేపట్టని పరిస్థితి ఉంది. ఖమ్మంనగర పాలక సంస్థకు వందలాది ఎకరాలు ఉన్నట్లు రెవెన్యూ రికార్డులు చెబుతున్నా వాస్తవరూపంలో మాత్రం సంస్థ కార్యాలయాన్ని నిర్మించుకోవడానికి ఎన్‌ఎస్‌పీ భూములపై ఆధారపడాల్సి వస్తుండటం ఆక్రమణలకు నిదర్శనంగా చె బుతున్నారు.
 
 పక్షం రోజుల్లో తేల్చాల్సిందే..
 ఖమ్మం నగర పాలకసంస్థ, ఖానాపురం హవేలిలో ఉన్న ప్రభుత్వ భూముల పూర్తి వివరాలు 15 రోజుల్లోగా అందించాలని జిల్లా జాయింట్ కలెక్టర్ కడవేరు సురేంద్రమోహన్ ల్యాండ్ సర్వే అధికారులను ఆదేశించారు. 15 మంది ల్యాండ్‌సర్వే ఇన్‌స్పెక్టర్లు భూములను గుర్తించి సర్వే చేసే పనిలో నిమగ్నమయ్యారు. ఖమ్మం అర్బన్, ఖానాపురం హవేలి, ఖమ్మం మున్సిపాలిటీల పరిధిలో వేలాది ఎకరాల ప్రభుత్వ భూమి కబ్జాకు గురైంది. ఇప్పటికే జిల్లా అధికార యంత్రాంగం ఈ విషయాన్ని ధ్రువీకరించింది. తాజాగా కబ్జాలకు సంబంధించిన సర్వే నివేదికలను రూపొందించే పనిలో రెవెన్యూ యంత్రాంగం నిమగ్నమైంది.
 
 ఎన్‌ఎస్‌పీ క్యాంపు పరిధిలో 94 ఎకరాలు, లకారం ట్యాంక్‌బండ్ పరిధిలోని సర్వే నంబర్ 234లో 129 ఎకరాలు, పాకబండ బజారులో 34 ఎకరాలు, త్రీటౌన్‌లో 100 ఎకరాలు, రంగనాయకుల గుట్ట వద్ద సర్వే నంబర్ 123లో 189 ఎకరాలు, 217లో 41 ఎకరాలు ఉన్నట్లు అధికారులు లెక్కల్లో పేర్కొంటున్నారు. ఈ భూముల్లో సగానికి పైగా ఆక్రమణలకు గురైనట్లు తెలుస్తోంది. ఈ వివరాలను పూర్తి లెక్కలతో అందించేందుకు ఎన్‌ఎస్‌పీ, శిఖం, ఇనాం, అసైన్డ్ భూములలో వేర్వేరుగా సర్వే చేసి పూర్తి నివేదికను అందించేందుకు అధికారులు చర్యలు చేపడుతున్నారు.
 
 కబ్జాదారుల్లో అలజడి
 ఖమ్మం పరిసర ప్రాంతాల్లో వేలాది ఎకరాల ప్రభుత్వ భూమి ఉన్నా లెక్కల్లో మాత్రం వందల్లోనే కనిపిస్తోంది. ప్రభుత్వానికి చెందిన ఎన్‌ఎస్‌పీ, అసైన్డ్, ఇనాం, శిఖం భూములు, మున్సిపల్, సీలింగ్ భూముల్లో కబ్జాదారులు పాగా వేశారు.  నాయకులు, అధికారుల అండదండలతో ఎన్‌వోసీ, ఆర్‌వోసీలు లేకుండానే ఏకంగా పట్టా మార్పిడి చేసుకున్నారు. కోట్లాది రూపాయల విలువ చేసే ప్రభుత్వ భూమి అన్యాక్రాంతానికి పాల్పడ్డారు అని అధికారుల తాజా సర్వేలో వెల్లడవుతుండటంతో కబ్జాదారుల్లో ఆందోళన నెలకొంది.
 
 లెక్కలు తేలితేనే ప్రభుత్వ అవసరాలకు భూములు
 ప్రభుత్వం అమలు చేస్తున్న పలు అభివృద్ధి, సంక్షేమ పనులకు భూమిని కేటాయించేందుకు పూర్తిస్థాయి లెక్కలు, ఆధారాలు లేవు. తాజాగా ప్రభుత్వ భూముల పూర్వాపరాలను గుర్తించే పనిలో రెవెన్యూ యంత్రాంగం తలమునకలైంది. పూర్తి వివరాలు వచ్చిన తర్వాత ఇళ్ల స్థలాలు, సైన్స్ మ్యూజియం, స్పోర్ట్స్ స్టేడియాలు, ఇతర ప్రజా అవసరాలకు ఈ భూములను వినియోగించేందుకు ప్రభుత్వం ప్రణాళికలు సిద్ధం చేస్తోంది.


 ప్రభుత్వం మాది ... ప్రభుత్వ భూమీ మాదే
 ప్రభుత్వం అంటే ప్రభుత్వ భూములు కూడా తమవే అనుకుంటున్నారేమో తెలుగు తమ్ముళ్లు ... సర్కారు జాగా కనిపిస్తే చాలు పాగా వేయడానికి పరుగులు తీస్తున్నారు. ఆచరణకు సాధ్యంకాని హామీలిచ్చి ... ఓటర్లను ఏమార్చి గద్దెనెక్కిన ఆరు నెలల కాలంలోనే జిల్లాలో  నలుదిక్కులా చెలరేగిపోతున్నారు. మంత్రి మద్దతుదారులమంటూ కొంతమంది, ఎమ్మెల్యే అనుచరులంటూ మరికొంతమంది ఏకంగా పొక్లెయిన్లతో భూములను చదును చేసేస్తున్నారు.
 
 మరీ ముక్కుసూటిగా పోవద్దు ... మా వాళ్లు ఏమి చేసినా చూసీచూడనట్టుగా వెళ్లిపోండని రాష్ట్ర ముఖ్యమంత్రి చంద్రబాబే హుకుం జారీ చేయడంతో మనకెందుకులే గొడవనుకున్నారేమో అడ్డుకోవాల్సిన రెవెన్యూ యంత్రాంగం కూడా చోద్యం చూస్తూ చర్యలకు ఉపక్రమించడం లేదు.  
  
 తాళ్లూరు: అధికారమే పరమావధిగా తెలుగు తమ్ముళ్లు రెవెన్యూ భూముల ఆక్రమణలపర్వానికి తెరలేపారు. రెవెన్యూ అధికారులు, సిబ్బంది ప్రేక్షకపాత్ర పోషించడంతో కబ్జాదారుల కోరల్లో సర్కారు భూములతోపాటు చెరువు, వాగులు సైతం చిక్కుకున్నాయి. సోమవరప్పాడు రెవెన్యూ పరధిలోని సర్వే నెం 336లో 5.25, 337లో 5.90, 339లో 6.72, 322/1లో 23.72 ఎకరాలను తూర్పు గంగవరం గ్రామానికి చెందిన పలువురు అధికార పార్టీ నేతలు ఆక్రమించారు. కొండలు, వాగులు, చెరువుల కట్టలను సైతం భారీ యంత్రాలతో చదును చేస్తున్నా పట్టించుకునే నాధుడే కరవయ్యాడు. ఎవరూ పట్టించుకోవడంలేదన్న ధైర్యంతో మరికొందరు బరి తెగించి వరి, బత్తాయి చెట్లను సైతం సాగు చేసుకున్నారు.
 
 ప్రభుత్వ భరోసాతో...
 ఆక్రమణల్లో ఉన్న భూములను క్రమబద్ధీకరించేందుకు టీడీపీ ప్రభుత్వం సమాయత్తమవుతుండడంతో తెలుగు తమ్ముళ్లు సర్కారు భూమి కనిపిస్తే చాలు కబ్జాకు దిగుతున్నారు. రెవెన్యూ సిబ్బంది నుంచే ప్రభుత్వ భూముల సమాచారం సర్వే నంబర్లతో సహా తెప్పించుకొని కంచెలు ఏర్పాటు చేసేసుకుంటున్నారు. వీరి స్పీడు చూసిన చోటామోటా నేతలుతోపాటు ఇతరులు కూడా పాగా వేయడానికి పరుగులు తీస్తున్నారు.      
  
 చట్టం వీరి చుట్టం     
 ప్రభుత్వ భూములు కబ్జా చేసిన వారిపై , ఆక్రమించిన వారిపై చర్యలు చేపట్టేందుకు 1982లో భూ కబ్జా చట్టం రూపొందింది. ఆ చట్టం ద్వారా చర్యలు తీసుకోవల్సిన ఏమీ పట్టనట్టు వ్యవహరించడం పట్ల పలు విమర్శలు వనిపిస్తున్నాయి. ప్రభుత్వ స్థలం ఆక్రమించినట్లు రుజువైతే జైలు శిక్ష, జరిమానా కూడా విధించే అవకాశం చట్టంలో ఉంది. సంబంధితాధికారులు కనీసం అటువైపు కన్నెత్తి చూడకపోవడంతో ఈ ఆక్రమణల జోరు మరింత జోరందుకుంటోంది.
  
 పరిశీలిస్తాం: కె. ఇంద్రాదేవి, తహసీల్ధార్
 భూ ఆక్రమణలు నా దృష్టికి రాలేదు. సంబంధిత సర్వే నంబర్లలో కబ్జాను పరిశీలించి వాస్తవమైతే చర్యలు తీసుకుంటాం. 


 రెవెన్యూ అధికారులపై దాడులు
 తిరుపతి రూరల్ : తిరుపతి రూరల్ మండలంలో టీడీపీ నేతలు బరితెగిస్తున్నారు. ప్రభుత్వ భూములను ఇష్టారాజ్యంగా కబ్జా చేస్తున్నారు. అడ్డుకునేందుకు వెళ్లిన రెవెన్యూ అధికారులపై దాడులకు పాల్పడుతున్నారు. మూడు రోజుల క్రితం పేరూరు పంచాయతీ తెలుగుదేశం పార్టీ అధ్యక్షులు చెంచుమోహన్‌యాదవ్ తన అనుచరులతో కలసి ఆక్రమణలను అడ్డుకోవడానికి వచ్చిన ఆర్‌ఐ శంకరయ్య, వీఆర్‌వోలు భాస్కర్, నాగరాజు, వెంకటరమణ, ఈశ్వరయ్య, నూతన్‌కుమార్‌రెడ్డిపై దౌర్జన్యానికి దిగారు.
 
 బూతులు తిడుతూ ఆర్‌ఐపై భౌతిక దాడులకు యత్నించారు. ప్రభుత్వ విధుల్లో ఉన్న అధికారులను అడ్డుకోవడానికి ప్రయత్నించడమే కాకుండా భౌతిక దాడులకు యత్నించిన టీడీపీ నాయకుడు చెంచుమోహన్‌యాదవ్, అతని అనుచరులపై కేసు నమోదుకు అనుమతి ఇవ్వాలని  ఆర్‌ఐ శంకరయ్య తహశీల్దార్ యుగంధర్‌ను కోరారు. దీనిపై మూడు రోజులుగా తహశీల్దార్ స్పందించలేదు. ఈ వ్యవహారంలో తహశీల్దార్‌పై కాసుల ప్రభావంతో పాటు మాజీ మంత్రి ఒత్తిడి ఉందని రెవెన్యూ వర్గాలు ఆరోపించాయి.
 
 ఆర్‌ఐ శంకరయ్యను ఫ్యాక్టరీకి పిలిపించి ‘ఏం నీకు పోస్టింగ్ ఇచ్చింది కేసులు పెట్టడానికా!’ అంటూ బెదిరించినట్లు తెలుస్తోంది. ఉద్యోగులకు అండగా నిలవాల్సిన రెవెన్యూ ఉద్యోగుల సంఘం నాయకులు ఒకరు ఆర్‌ఐని తీసుకుని వెళ్లి మరీ తిట్టించినట్లు ఉద్యోగులు ఆరోపిస్తున్నారు. ఈ వ్యవహారంపై రెవెన్యూ వర్గాలు ఆందోళన వ్యక్తం చేస్తుండంతో ఎట్టకేలకు టీడీపీ నేతలపై పోలీసులకు తహశీల్దార్ ఫిర్యాదు చేశారు.


 ⇒ఇళ్ల స్థలాల క్రమబద్ధీకరణకు ప్రభుత్వ నిర్ణయం
 ⇒4 లక్షల మందికి లబ్ధి చేకూరే అవకాశం
 ⇒సర్కారుకు భారీగా ఆదాయం
 ⇒సాగర్ చుట్టూ ఆకాశహర్మ్యాలకు కార్యాచరణ
 ⇒మెట్రో అలైన్‌మెంట్‌పై మరోమారు సమావేశం
 సాక్షి, సిటీబ్యూరో: నగరంలోని ప్రభుత్వ స్థలాల్లో స్థిర నివాసం ఏర్పరచుకున్న నిరుపేదలకు శుభవార్త. 80 నుంచి 125 చదరపు గజాల విస్తీర్ణంలో ప్రభుత్వ భూముల్లో నిర్మించుకున్న ఇళ్లను ఉచితంగా క్రమబద్ధీకరించాలని సర్కారు సూత్రప్రాయంగా నిర్ణయించింది. సీఎం కేసీఆర్ సమక్షంలో మంగళవారం జరిగిన అఖిల పక్ష సమావేశంలో ఈ నిర్ణయం తీసుకున్నారు. దీనివల్ల నగరంలోని సుమారు మూడు లక్షల నిరుపేద కుటుంబాలకు సాంత్వన కలగనుంది.
 
 125 గజాలు దాటిన నిర్మాణాలను సైతం నిర్ణీత రుసుంతో క్రమబద్ధీకరించాలన్న అఖిల పక్షం నిర్ణయంతో మరో లక్ష మందికి మేలు కలగనుంది. గతంలో ఉచితంగా 80 గజాల ఇళ్లను క్రమబద్ధీకరించగా... ఈ మారు దాన్ని 125 గజాలకు పెంచడం విశేషం. గతంలోని నిబంధనలు అడ్డుగా పెట్టుకుని ఒకే కుటుంబ సభ్యులు, కొంతమంది పెద్దలు వివిధ పేర్లతో 80 గజాల స్థలాలను సొంతం చేసుకున్న దాఖలాలు ఉన్నాయి.
  
 ఊపందుకోనున్న మెట్రో పనులు
 సుల్తాన్‌బజార్, అసెంబ్లీ ప్రాంతాల్లో మెట్రో అలైన్‌మెంట్ మార్పునకు విపక్షాలు అంగీకరించడంతో ఆయా ప్రాంతాల్లో మెట్రో పనులు ఊపందుకోనున్నాయి. సుల్తాన్‌బజార్ నుంచి కాకుండా కోఠి ఉమెన్స్ కళాశాల మీదుగా మెట్రో మార్గం మళ్లనుంది. అసెంబ్లీ వెనక వైపు నుంచి మెట్రో మార్గాన్ని మళ్లించేందుకు అన్ని పక్షాలూ అంగీకారం తెలిపాయి. ఇక జేబీఎస్-ఫలక్‌నుమా (కారిడార్-2) రూట్లో అలైన్‌మెంట్ మార్పు చేయాల్సిందేనంటూ ఎంఐఎం పట్టుబట్టినట్లు తెలిసింది. లేనిపక్షంలో పాత నగరంలో వెయ్యికి పైగా నిర్మాణాలకు నష్టం వాటిల్లుతుందని స్పష్టం చేసింది. ఈ విషయమై ఈనెల 16న నిర్వహించనున్న అఖిలపక్ష సమావేశంలో మరోమారు అన్ని రాజకీయ పార్టీలు తమ అభిప్రాయాలు తెలపాలని సీఎం సూచించారు. దీంతో ఈ మార్గంలో అలైన్‌మెంట్ మార్పుపై వేచిచూడక తప్పని పరిస్థితి నెలకొంది.
  
 కాసుల పంట
 నగరంలోని యూఎల్‌సీ భూములను ఆక్రమించుకొని 1400 ఎకరాల్లో నిర్మించుకున్న 33,127 ఇళ్లు, భవనాలు, 200 ఎకరాల్లోని 1927 వాణిజ్య సంస్థలను క్రమబద్ధీకరించడం ద్వారా ఆదాయం సమకూర్చుకోవాలని ప్రభుత్వం ఈ సమావేశంలో సూత్రప్రాయంగా నిర్ణయించింది. దీంతో సర్కారుకు కాసుల పంట పండనుంది. నగరంలో రెవెన్యూ శాఖ ఇప్పటికే గుర్తించిన యూఎల్‌సీ భూమి 114.22 ఎకరాలు, ప్రభుత్వ భూమి 25 ఎకరాలను విక్రయించాలని నిర్ణయించినట్లు సమాచారం. ప్రైవేటు వ్యక్తులు, సంస్థల కబంధ హస్తాల్లో ఉన్న ఆక్రమిత భూములను స్వాధీనం చేసుకోవాలని సీఎం అధికార యంత్రాగాన్ని ఆదేశించినట్లు తెలిసింది
  
 సాగర్ చుట్టూ ఆకాశ హర్మ్యాలు
 హుస్సేన్‌సాగర్ చుట్టూ బహుళ అంతస్తుల భ వన నిర్మాణానికి అన్ని పార్టీల నుంచి మద్దతు లభించడంతో ప్రభుత్వం త్వరలోనే ఈ దిశగా కార్యాచరణ ప్రణాళిక సిద్ధం చేసే అవకాశాలు ఉన్నాయి. అఖిలపక్ష సమావేశంలో ఇతర అంశాలపై కొన్ని భిన్నాభిప్రాయాలు వ్యక్తమైనప్పటికీ, సాగర్ చుట్టూ ఆకాశహర్మ్యాల నిర్మాణానికి మాత్రం ఎవరి నుంచీ వ్యతిరేకత వ్యక్తం కాలేదు. అంతేకాకుండా నగర కీర్తిని ఇనుమడింపజేసేందుకు వాటిని నిర్మించాలని అభిప్రాయపడ్డారు.  దీంతో పాటు పాటిగడ్డ, నర్సింగ్ కాలేజీ, దిల్‌కుష్ గెస్ట్ హౌస్, రాఘవ టవర్స్, లుంబినీ పార్కు, ఎన్టీఆర్ గార్డెన్స్, బుద్ధభవన్ తదితర ప్రాంతాల్లో భారీ టవర్స్ వచ్చే అవకాశాలు ఉన్నాయి.
  
 వినాయక సాగర్ నిర్మాణంపై ప్రతిష్టంభన
 హుస్సేన్‌సాగర్‌లోనే వినాయక నిమజ్జనం చేపట్టాలని బీజేపీ సహా పలు పార్టీలు అఖిలపక్ష సమావేశంలో పట్టుబట్టిన నేపథ్యంలో ఇందిరాపార్క్ దగ్గర వినాయకసాగర్ నిర్మాణంపై ప్రతిష్టంభన నెలకొంది. ఈ అంశంపైనా ఈనెల 16న జరగనున్న సమావేశంలో స్పష్టత రానుంది.


 మాచర్లరూరల్ : తెలుగుతమ్ముళ్ల భూదందాకు అంతులేకుండా పోతోంది. ప్రభుత్వ భూములే కాకుండా ఫారెస్టు భూములను సైతం కబ్జాచేసేందుకు ప్రయత్నిస్తున్నారు. కొత్తపల్లి గ్రామంలోని 534 ఎకరాల ఎద్దులబోడు భూ ఆక్రమణ మరువక ముందే అదే మండలంలో పశువేముల గ్రామంలో 340/1, 341/2, 340 సర్వేనంబర్ల సరిహద్దు ప్రాంతంలో సుమారు 50 ఎకరాల్లో జేసీబీ యంత్రాలతో భూములను చదును చేసి యథేచ్చగా భూదందా కొనసాగిస్తున్నారు. ఆ భూములకు పక్కనే ఉన్న ఫారెస్టు భూములను సైతం కబ్జా చేస్తున్నారు. వీటిపై అధికారులు ఇప్పటి వరకు కన్నెత్తి చూడకపోవటం పలు అనుమానాలకు తావిస్తోంది.
 
 మండలంలో సాగు చేసేందుకు భూమి కావాలంటే అధికారులను సంప్రదించటం కంటే ముందుగా రెవెన్యూ పొలాన్ని గుర్తించి ఆ భూముల్లో చొరబడి అనేక ఏళ్ల నుంచి సాగు చేసుకుంటున్నామనే దరఖాస్తుతో సులభంగా పట్టా పొందే మార్గాలు అన్వేషిస్తున్నారు. వీరికి అధికార పార్టీకొమ్ముకాస్తోందన్న ఆరోపణలు వినిపిస్తున్నారుు. తుళ్లూరు ప్రాంతంలో భూములు అమ్ముకునేవారు ఈ ప్రాంతానికి వచ్చి కొనుగోళ్లు చేపడుతున్నారని తెలియడంతో ఇలాంటి భూములతో కాసులు పోగేసుకోవచ్చని భావిస్తున్నారు. నాగార్జునసాగర్ ప్రాజెక్టు కుడి కాలువ పరిధిలో 40 ఎకరాల రెవెన్యూ భూమి ఇక్కడ ఉంది. దీని పై ప్రాజెక్టు అధికారులు ఎటువంటి చర్యలు తీసుకోవటం లేదు. అందుకే అవికాస్తా ఆక్రమణల బారినపడుతున్నారుు.
 
 ఈ విషయమై తహశీల్దార్ గర్నెపూడి లెవీని సాక్షి సంప్రదించగా పశువేములలో కబ్జాకు గురైన ప్రభుత్వ భూములకు గతంలోనే డీకే పట్టాలు ఇచ్చారని తెలిసిందని, అయినప్పటికి ఇంకా ఏమైన ఆ ప్రాంతంలో కబ్జాకు గురైతే వాటిని పరిశీలించి క్రిమినల్ చర్యలు తీసుకుంటామన్నారు. ఫారెస్టు రేంజ్ ఆఫీసర్ ప్రసన్నజ్యోతి మాట్లాడుతూ పశువేముల బీట్ పరిధిలో ఫారెస్టు భూములను కబ్జా చేసిన వారిని గుర్తించి తగు చర్యలు తీసుకుంటామని, ఇప్పటికే ఈ ప్రాంతం పై ప్రత్యేక నిఘా ఏర్పాటు చేశామన్నారు. గతంలో కొందరు ఆక్రమణలకు పాల్పడితే ఆ ప్రాంతంలో మొక్కలు నాటి సంరక్షిస్తున్నామన్నారు.


 25లోపు నివేదిక ఇవ్వాలని   గ్రామ కమిటీలకు ఆదేశం
 నేటి నుంచి కమిటీల పర్యటన
 
 తిరుపతి తుడా: తిరుపతి రెవెన్యూ డివిజన్ పరిధిలో 97,076 ఎకరాల ప్రభుత్వ భూములను గుర్తించారు. జిల్లాలో ఐఐటీ, ఐఐఎస్‌ఈఆర్ విద్యాసంస్థలతో పాటు పారిశ్రామికంగా అభివృద్ధి చేస్తామని ముఖ్యమంత్రి చంద్రబాబు నాయుడు ప్రకటించిన విషయం తెలి సిందే. ఈ మేరకు తిరుపతి డివిజన్ మండలాల్లో ప్రభుత్వ భూములను గుర్తించాలని గతంలో జిల్లా కలెక్టర్ ఆదేశాలు జారీ చేశారు. దీంతో తిరుపతి ఆర్డీవో వీరబ్రహ్మయ్య తూర్పు మండలాల్లో భూములను గుర్తించేందుకు చర్యలు చేపట్టారు. ఆయా మండలాల తహశీల్దార్లు ప్రభుత్వ భూములను గుర్తించారు.ఏర్పేడు, శ్రీకాళహస్తి, సత్యవేడు మండలాల్లో మొత్తం 97,076 ఎకరాలను గుర్తించి ఆర్డీవో కార్యాలయానికి నివేదికలు పంపించారు.
 
 అటవీ భూముల గుర్తింపు
 పరిశ్రమల ఏర్పాటుకు అనువుగా ఉండే అటవీ భూములను అధికారులు గుర్తించారు. అటవీ శాఖ భూములను డీనోటిఫై చేసి ప్రభుత్వం స్వాధీనం చేసుకునేందుకు వీలుగా ఉండే అటవీ భూములను గుర్తించారు. ఏర్పేడులో 958.28 ఎకరాలు, శ్రీకాళహస్తిలో 3999.66 ఎకరాలు, సత్యవేడులో 11,331.47 ఎకరాలను గుర్తించారు. అదేవిధంగా 55,714.94 ఎకరాల ప్రభుత్వ భూములు( చెరువులు, కుంటలు, వాగులు, వివిధ రకాల భూములు) గుర్తించారు.
 
 ఏర్పేడులో 784.56 ఎకరాలు, శ్రీకాళహస్తిలో 35,119.62 ఎకరాలు, సత్యవేడులో 19,810.76 ఎకరాలు అందుబాటులో ఉన్నాయని సూచించారు. అయితే నీరు నిల్వ ఉండే చెరువులు, వాగులు, కుంటలను కాకుండా మిగిలిన ప్రభుత్వ భూములను మాత్రమే గుర్తించాలని మళ్లీ ఆయా మండల అధికారులకు ఆదేశించారు. ఈ మూడు మండలాల్లో 25,072.03 ఎకరాల డీకేటీ భూములు ఉన్నాయని తేల్చారు. ఏర్పేడులో 7,043.34, శ్రీకాళహస్తిలో 15,019.66, సత్యవేడులో 3,009.03 ఎకరాలు అందుబాటులో ఉన్నాయని నివేదిక అందజేశారు.
 
 25వ తేదీ కల్లా భూముల వివరాల నివేదిక
 గ్రామ స్థాయిలో ప్రభుత్వ, డీకేటీ, అటవీ భూములను మరింత స్పష్టంగా గుర్తించేందుకు ప్రత్యేక కమిటీలను వేశారు. ఏర్పేడు, శ్రీకాళహస్తి, సత్యవేడు మండలాలతో పాటు అదనంగా మరో మూడు మండలాల్లో ప్రభుత్వ భూములను గుర్తించాలని ప్రభుత్వం నిర్ణయం తీసుకుంది. ఈ మేరకు బీఎన్ కండ్రిగ, కేవీబీ పురం, చంద్రగిరి మండలాల్లో ప్రభుత్వ, డీకేటీ, అటవీ భూములను గుర్తించాలని నిర్ణయించారు. ఇందుకోసం గ్రామస్థాయి కమిటీలు శనివారం నుంచి భూములను గుర్తించనున్నాయి. ఈ నెల 28న సీఎం చంద్రబాబు నాయుడు జిల్లాకు రానున్న నేపథ్యంలో ఈలోపు భూములను గుర్తించి నివేదికను సమర్పించాలని అధికారులు నిర్ణయించారు. ఈ నెల 25 లోపు గ్రామ స్థాయిలో ప్రభుత్వ, అటవీ, డీకేటీ భూములను గర్తించాలని అధికారులకు ఆదేశాలు అందాయి.


 * రాజధాని నిర్మాణంపై ఏకపక్షం తగదు
 * ఖాళీగా ఉన్న భవనాల్లో కార్యాలయాలు ఏర్పాటు చేయాలి
 * ప్రజాస్వామ్యంలో ప్రజల అభిప్రాయానికి విలువ ఇవ్వాలి
 * ప్రభుత్వ భూమిలో రాజధాని నిర్మించుకోవచ్చు
 * ఇవీ ఫ్యాక్ట్ ఆధ్వర్యంలో జరిగిన ‘రాజధాని-రైతు’ చర్చావేదికలో వెల్లడైన భిన్నాభిప్రాయాలు
 సాక్షి, గుంటూరు:రాజధాని నిర్మాణం ఎన్ని ఎకరాల్లో చేపడుతున్నారు, ఎక్కడెక్కడ ఏ ఏ కార్యాలయాలు ఏర్పాటు చేస్తారు, సమీకరణలో భూములు ఇచ్చే రైతులకు ఎలాంటి ప్యాకేజీలు ఇలా అన్ని విషయాలు చర్చించి చట్టం చేసిన తరువాత మాత్రమే భూ సమీకరణ జరపాలని ఎక్కువ మంది రైతులు, వక్తలు అభిప్రాయపడ్డారని ఫ్యాక్ట్ స్వచ్ఛంద సంస్థ ప్రతినిధి జంప కృష్ణకిషోర్ తెలిపారు.  
 
 గుంటూరు అరండల్‌పేటలోనివైన్ డీలర్స్ కల్యాణ మండపంలో గురువారం జరిగిన ‘రాజధాని - రైతు’ చర్చావేదిక ముగింపులో ఆయన అందరి అభిప్రాయాలను క్రోడీకరించి తీర్మానం చేశారు. ఆ వివరాలు.. రాజధాని విషయంలో ప్రభుత్వం ఏకపక్షంగా వ్యవహరించడం సమంజసం కాదని, ప్రజాభి ప్రాయం సేకరించి, నిర్మాణం చేపట్టాలని కోరారు.
 * హైదరాబాద్‌లో హుస్సేన్‌సాగర్ ఏ విధంగా అయితే కలుషితమవుతుందో, రానున్న రోజుల్లో కృష్ణానది కూడా అదే విధంగా కలుషితం కానుందని, దీని వల్ల పర్యావరణానికి ముప్పు వాటిల్లే ప్రమాదం ఉందని అభిప్రాయపడ్డారు.
 * కృష్ణా, గుంటూరు జిల్లాల్లో ఖాళీగా ఉన్న భవనాల్లో ప్రభుత్వ కార్యాలయాలు ఏర్పాటు చేయాలన్నారు.
 * ఈ అంశాలన్నీ పరిగణనలోకి తీసుకుని నూతన రాజధాని నిర్మించేలా ఫ్యాక్ట్ సంస్థ మరిన్ని చర్చా కార్యక్రమాలు నిర్వహిస్తోందని ఆ సంస్థ ప్రతినిధి జంప కృష్ణకిషోర్ వెల్లడించారు.
 * మధ్యాహ్నం 3.30 గంటలకు ప్రారంభమైన చర్చా కార్యక్రమం దాదాపు మూడు గంటల పాటు కొనసాగింది. తుళ్లూరు, మంగళగిరి, తాడేపల్లి మండలాలకు చెందిన రైతులు, కూలీలు, కౌలురైతులు, వివిధ వర్గాలకు చెందిన వారు స్వచ్ఛందంగా ఈ కార్యక్రమంలో పాల్గొని తమ అభిప్రాయాలను తెలిపారు.
 * వేదికపై ఉన్న వక్తలు, హాజరైన వివిధ వర్గాలు వారు భిన్నాభిప్రాయాలను వ్యక్తం చేశారు.
 * రాజధానిని వేరే ప్రాంతానికి తరలిస్తే నిడమర్రు గ్రామం నుంచి రూ. 25 కోట్లు వసూలు చేసి ఇస్తామని బత్తుల జయలక్ష్మి అనే మహిళ రైతు ప్రకటించడంతో సభలో హర్షాతిరేకాలు వ్యక్తమయ్యాయి.
 * కార్యక్రమానికి వ్యాఖ్యాతగా వ్యవహరించిన ‘సాక్షి’ ఎగ్జిక్యూటీవ్ ఎడిటర్ ఆర్.దిలీప్‌రెడ్డి మాట్లాడుతూ ‘కొత్తరాజధాని నిర్మాణం - భూ సమీకరణ’ అనే అంశంపై క్రియాశీల, విశ్లేషణాత్మక చర్చ జరగాలని అన్నారు. ప్రజాభిప్రాయాన్ని సేకరించి ప్రభుత్వం పారదర్శక  నిర్ణయం తీసుకోవాలని అభిప్రాయపడ్డారు. ప్రజాస్వామ్యంలో ప్రజల అభిప్రాయానికి విలువ ఇవ్వాలని కోరారు.
 * రాజ్యసభ మాజీ సభ్యులు యలమంచిలి శివాజీ మాట్లాడుతూ గుంటూరు పరిసర ప్రాంతాల్లో 21వేల ఎకరాల ప్రభుత్వ భూమి ఉంది, అందులో రాజధాని నిర్మించుకోవచ్చన్నారు.
 * వైఎస్సార్ సీపీ రాష్ట్ర రైతు విభాగం అధ్యక్షుడు ఎం.వి.ఎస్.నాగిరెడ్డి మాట్లాడుతూ  30వేల ఎకరాల్లో రాజధాని నిర్మాణం ఎలా జరుపుతారో మాస్టర్ ప్లాన్ చూపాలన్నారు.
 * మాజీ ఎమ్మెల్యే పుతుంబాక భారతి మాట్లాడుతూ అఖిల పక్షకమిటి వేయకుండా ఏకపక్షంగా నిర్ణయం తీసుకోవడం పరోక్షంగా పార్టీలు, ప్రజలను అవమాన పరచడమేనన్నారు.
 * కృష్ణా, డెల్టా పరిరక్షణ కమిటీ కన్వీనర్  కొలనుకొండ శివాజీ మాట్లాడుతూ  రాజధాని విషయంలో చంద్రబాబునాయుడు శ్వేత పత్రం విడుదల చేయాలన్నారు.
 * ఆచార్య నాగార్జున విశ్వవిద్యాలయం ప్రొఫెసర్ నరసింహారావు మాట్లాడుతూ 93 శాతం మంది రాజధాని ఇష్టమేనని చెబుతున్నారని, పరిహారం విషయంలోనే భిన్నాభిప్రాయాలు వ్యక్తమవుతున్నాయన్నారు.
  
 నష్టాల వల్లే భూములు ఇచ్చేందుకు అంగీకరిస్తున్నాం.. తుళ్లూరు మండలంలో సరిగాపండని భూములూ ఉన్నాయి. పంటల్లో నష్టం వాటిల్లడం వల్ల అప్పుల పాలై రాజధాని నిర్మాణానికి భూములు ఇచ్చేందుకు అంగీకరిస్తున్నాం.
  - పువ్వాడ సుధాకర్, రైతు నాయకులు
  
 ప్రభుత్వం ఏ మేరకు ప్రతిఫలం ఇస్తుందో  తెలుసుకుంటాం.. ఖరీదైన భూములు ఇచ్చేందుకు రైతులు నిరాకరిస్తున్నారు. పంటలు సరిగా పండని గ్రామాల రైతులు భూములు ఇచ్చేందుకు సుముఖంగా ఉన్నారు. భూములు తీసుకున్న తరువాత రైతులకు ప్రభుత్వం ఏమేరకు పరిహారం అందిస్తుందో తెలుసుకునేందుకే చర్చా కార్యక్రమంలో పాల్గొన్నా.


 ఇదివరకే నిర్మాణాలున్న భూములను గుర్తించేందుకు సర్కార్ కసరత్తు
 భూముల క్రమబద్ధీకరణ, విక్రయంతో ఖజానా నింపే యత్నం
 భూముల విక్రయంతో రూ.6,500 కోట్ల రాబడికి నిర్ణయం
  
  సాక్షి, హైదరాబాద్: ప్రైవేట్ వ్యక్తుల ఆక్రమణలో ఉన్న ప్రభుత్వ భూములను క్రమబద్ధీకరణ చేసే ఆలోచనలో తెలంగాణ రాష్ట్ర ప్రభుత్వం ఉన్నట్లు విశ్వసనీయంగా తెలిసింది. ఈ ఆర్థిక సంవత్సరంలో భూముల విక్రయంతో రూ.6500 కోట్ల ఆదాయాన్ని సమకూర్చుకోవాలని ప్రభుత్వం నిర్ణయించిన విషయం విదితమే. దీన్ని బడ్జెట్‌లోనూ పొందుపర్చింది. అయితే ఇప్పటికిప్పుడు కొత్త భూములను వేలం వేయడం వల్ల.. ఆశిం చిన ఆదాయం వచ్చే అవకాశం లేదన్న భావనలో ప్రభుత్వం ఉన్నట్లు ఉన్నతాధికార వర్గాలు వివరించాయి. ఇప్పటికే అక్రమ నిర్మాణాలు చేపట్టిన స్థలాలైతే క్రమబద్ధీకరణతో బడ్జెట్‌లో పేర్కొన్న మేరకు కాకపోయినా.. కొంతమేరకు ఆదాయం సమకూరుతుందన్న అభిప్రాయాన్ని అధికారవర్గాలు వ్యక్తం చేస్తున్నాయి.
  
  ఇదే విషయంపై ఆక్రమణలకు గురైన భూములను గుర్తించే పనిలో ప్రభుత్వం నిమగ్నమైనట్లు వివరించారు. హైదరాబాద్ పరిసరాల్లోనే పెద్దఎత్తున భూములు ఆక్రమణకు గురైనట్లు ప్రభుత్వం పదేపదే చెబుతున్న విషయం విదితమే. అనుమతి లేకుండా ప్రభుత్వ భూములను ఆక్రమించుకోవడం, నిర్మాణాలు భారీగా కొనసాగినట్లు ప్రభుత్వం భావిస్తోంది, గురుకుల్ ట్రస్ట్ భూములు, అస్సైన్డ్ భూములు, నగరం చుట్టూరా ఉన్న ప్రభుత్వ భూములు పెద్దసంఖ్యలో అన్యాక్రాంతం అయ్యాయని ప్రభుత్వం ఇదివరకే అధికారికంగా పేర్కొంది.
  
  ప్రస్తుత మార్కెట్ ధరల ప్రకారం ఈ భూములను క్రమబద్ధీకరించాలని నిర్ణయించింది. అయితే దీనికి గతంలో అనుసరించిన విధానాన్నే అమలు చేయాలా.. లేక మరే విధంగా ముందుకు సాగాలా? అన్న దానిపై ప్రస్తుతం కసరత్తు చేస్తున్నారు. అలాగే అర్బన్‌ల్యాండ్ సీలింగ్ భూములను కొనుగోలు చేసిన వారికి కూడా ఆ భూములను క్రమబద్ధీకరించే అంశాన్ని కూడా ప్రభుత్వం పరిశీలిస్తోంది. ఖాళీగా ఉన్న ప్రభుత్వ భూములను ఇప్పటికిప్పుడు విక్రయించడం వల్ల ఆశించిన మేరకు ఆదాయం సమకూరదనే  అభిప్రాయంలో అధికారులు కూడా ఉన్నారు. హుడాకు అప్పగించిన భూములను కూడా విక్రయించాలని నిర్ణయించింది. భూముల విక్రయంలో ఎంత చేసినా రూ.6500 కోట్ల నిధులు ఖజానాకు జమ చేయడం సాధ్యమయ్యేది కాద న్న అభిప్రాయానికి అధికారులు వచ్చారు. అయి తే ఒక ప్రయత్నం చేస్తున్నామని, ఎంతవరకు సఫలీకృతం అవుతామన్నది చూడాల్సిన అవసరం ఉందని ఓ అధికారి వ్యాఖ్యానించారు.


 ►రఘునాథపాలెం మండలంలో వేల ఎకరాల ప్రభుత్వ భూములు హాంఫట్
 ►ఖమ్మం మున్సిపాలిటీకి చెందిన 100 ఎకరాల భూమి హుష్‌కాకి
 ► ఎన్నెస్పీ భూమి కనిపిస్తే కబ్జానే..
 ►చెరువు శిఖం, సీలింగ్, ఇనాం భూముల్లోనూ ఉల్లంఘనలు
 ►లక్ష్మీనర్సింహస్వామి,ఆంజనేయస్వామి గుడి భూములూ స్వాహా
 ►అనుమతుల్లేకుండానే కేటగిరీల మార్పు
 ► ఏకంగా ఇంటి నంబర్లే ఇచ్చేసిన మున్సిపల్ అధికారులు
 ►రిజిస్ట్రేషన్ల కోసం చేతులు మారిన కోట్ల రూపాయలు
 ►‘ఆపరేషన్ భూరైడింగ్’లో వెల్లడయిన ప్రాథమిక సమాచారం
   సాక్షి ప్రతినిధి, ఖమ్మం: అది గుడి భూమి అయినా.. బడి భూమి అయినా.. ఇనాం భూమి అయినా.. సీలింగ్ భూమి అయినా... చెరువు శిఖమయినా... మున్సిపాలిటీదైనా, నాగార్జునసాగర్ కాల్వదైనా... కబ్జాకు కాదేదీ అనర్హం అనుకున్నారో ఏమో... జిల్లా కేంద్రానికి ఆనుకుని ఖమ్మం మున్సిపల్ కార్పొరేషన్‌లో కూడా భాగమై ఉన్న రఘునాథపాలెం మండలంలో భూమి కనిపిస్తే చాలు కబ్జా చేసేశారు. ప్రభుత్వ భూములంటే మరీ అలుసన్నట్టు ఎక్కడ చిన్న అవకాశం వచ్చినా ఉల్లంఘనలు జరిగాయి. ఇదేదో సాదాసీదాగా చెపుతున్నది కాదు...
 
 జిల్లా జాయింట్ కలెక్టర్ కె.సురేంద్రమోహన్ నేతృత్వంలో గత నెల 26, 27 తేదీల్లో రెవెన్యూ సిబ్బంది మూకుమ్మడిగా నిర్వహించిన సర్వేలో ప్రాథమికంగా వెల్లడయిన వాస్తవమిది. ఈ సర్వేలో వెల్లడయిన అంశాల్లోని విశ్వసనీయ వివరాల ప్రకారం ఒక్క రఘునాథపాలెం మండలంలోనే దాదాపు 1000 ఎకరాలకు పైగా ప్రభుత్వ భూమిలో ఉల్లంఘనలు కనిపిస్తున్నాయి. ఇందులో పేదలకు అసైన్ చేసిన భూముల నుంచి ఇనాం భూముల వరకు ఉన్నాయి. ఎలాంటి ఎన్‌వోసీలు, ఓఆర్‌సీలు లేకుండా ఏకంగా పట్టాదారుల పేర్లు మారిపోవడం, ఒక కేటగిరీ నుంచి మరో కేటగిరికి భూ మార్పిడి చేయడం.. చెరువు భూముల్లో ఇళ్లు కట్టుకున్నా మున్సిపల్ అధికారులు ఇంటి నెంబర్లు ఇవ్వడం బట్టి చూస్తే ఇక్కడ జరుగుతున్న భూదందా ఏపాటిదో అర్థమవుతోంది.
 
 అసలు ప్రభుత్వ రికార్డుల్లో ఒకటి ఉంటే వాస్తవంగా ఆ భూమిలో మరో రకమైన కార్యకలాపాలు జరుగుతుండడం గమనార్హం. మిగితా భూములను రిజిస్టర్ చేసిన దాని కన్నా ఇలాంటి స్థలాలను రిజిస్టర్ చేసుకోవడం మామూలు విషయం కాదని, ఈ రిజిస్ట్రేషన్ల వ్యవహారంలో కోట్ల రూపాయలు చేతులు మారి ఉంటాయని రెవెన్యూ వర్గాలే అంటున్నాయి. మొత్తం మీద కేవలం రెండు రోజుల పాటు కొందరు సిబ్బంది కలిసి ప్రాథమికంగా నిర్వహించిన సర్వేలోనే పెద్ద ఎత్తున ఉల్లంఘనలు వెలుగులోకి వస్తే, ఈ వివరాల సేకరణను ఒక ప్రాజెక్టుగా తీసుకుని సర్వే చేస్తే ఇంకా ఎంత భూమి బయటకు వస్తుందో, ఎంతమంది కబ్జాసురులు, రెవెన్యూ, రిజిస్ట్రేషన్ అధికారుల లీలలు వెలుగులోనికి వస్తాయోనని పలువురు అభిప్రాయపడుతున్నారు.
  
 త్వరలోనే నోటీసులు...
 ఆపరేషన్ భూరైడింగ్ పేరిట రెండు రోజుల పాటు నిర్వహించిన ఈ సర్వేలో ఉల్లంఘనలుగా తేలిన భూముల్లో ఉన్న వారికి త్వరలోనే నోటీసులు అందజేస్తామని రెవెన్యూ వర్గాలు ‘సాక్షి’కి చెప్పాయి. ఇది కేవలం ప్రాథమికంగా తెప్పించిన సర్వేనేనని, దీనిలో చాలా భూములపై మరోసారి తనిఖీ ఉంటుందని, ఇందుకోసం త్వరలోనే డిప్యూటీ కలెక్టర్ నేతృత్వంలో ప్రత్యేక సెల్‌ను ఏర్పాటు చేస్తున్నామని వెల్లడించాయి. ఈ భూముల సర్వేకు సంబంధించి వచ్చిన సమాచారాన్నంతటినీ క్రోఢీకరించి విభాగాలు, కేటగిరీల ద్వారా విభజించి అసలు వాస్తవమేంటనే దాన్ని మరోసారి నిర్ధారించుకుంటామని తెలిపాయి.
 
 ఉల్లంఘన జరిగిందని ప్రాథమికంగా నిర్ధారణ అయిన తర్వాతే నోటీసులిస్తామని,  ఈ సర్వేలో వెల్లడైన ఉల్లంఘనకు సంబంధించిన భూములను అనుభవిస్తున్న సంస్థలు, వ్యక్తులు భయపడవద్దని, పూర్తిస్థాయిలో నిర్ధారణ అయిన తర్వాతే చర్యలు తీసుకుంటామని, ఇప్పటివరకు నిర్వహించింది ప్రాథమిక విచారణ మాత్రమేనని రెవెన్యూ అధికారులంటున్నారు.రెవెన్యూ రికార్డుల ప్రకారం నిర్వహించిన సర్వేకు సంబంధించి విశ్వసనీయ సమాచారం ప్రకారం గ్రామాల వారీగా ఉల్లంఘనలు ఇలా ఉన్నాయి....
  
 రఘునాథపాలెం:
 సర్వే నెంబర్ 11లో నర్సింహులకుంట చెరువులోని 2 ఎకరాలను కబ్జా చేసి రోడ్డు వేశారు. 218లో ఉన్న 2 ఎకరాల కుంట భూమిని వ్యవసాయేతర పనులకు వినియోగిస్తున్నారు. 407లో ఉన్న ఏడెకరాల శిఖం భూమిలో ఏకంగా కాలనీ ఏర్పాటయింది. దాని వివరాలు లభించడం లేదు. 351లో పేదలకు ఇళ్ల స్థలాల కోసం సేకరించిన ఏడెకరాల భూమిని కబ్జా చేసి వ్యవసా యం చేస్తున్నారు. 355లో శారదా కళాశాల సమీపం లో ఉన్న సీలింగ్ ల్యాండ్‌లో 8 మందికి 2 ఎకరాల భూమిని వ్యవసాయం కోసం అసైన్ చేశారు. దానిలో ఎలాంటి అనుమతులు లేకుండా వ్యవసాయేతర కార్యకలాపాలు సాగుతున్నాయి. 30లో ఎకరం అసైన్డ్ భూమిని కబ్జా చేశారు. 93లో ఎస్సీ కాలనీకి అసైన్ చేసిన 8ఎకరాల 33గుంటల భూమిని వే రే వ్యక్తి అనుభవిస్తున్నారు. 111,112లోని మూడెకరాల గుడి భూమికి సంబంధించి ప్రైవేటు వ్యక్తుల పేర్ల మీద పాస్‌పుస్తకాలున్నాయి. 371 సర్వే నంబర్‌లోని 10 ఎకరాల 35 గుంటల ఇనాం భూములను ప్లాట్లు చేశారు.
  
 బల్లేపల్లి:
  సర్వే నెంబర్ 41లో ఉన్న శ్మశానవాటికలో అర ఎకరం కబ్జాకు గురయింది.
  
 పాపటపల్లి:
 సర్వే నెంబర్ 149లోని 110 ఎకరాల అసైన్డ్ భూమి సేల్‌డీడ్ చేసి వేరే వ్యక్తులు కొనుక్కున్నారు. వారు పేదలయితే అసైన్డ్ కమిటీ ద్వారా నిర్ధారించి వారికే రెగ్యులరైజ్ చేసే అవకాశం ఉంది. 118లో ఉండాల్సిన చెరువులో 12 ఎకరాల భూమి కనిపించడం లేదు. 89 లో ఉండాల్సిన ఏడెకరాల చెరువు ప్రభుత్వ రికార్డుల్లో ఓ రకంగా ఉంటే వాస్తవంగా వేరే రూపంలో ఉంది.
  
 ధంసలాపురం:
 సర్వే నెంబర్ 178లో 128 ఎకరాల్లోని చెరువులో 40 ఎకరాల భూమి కబ్జాకు గురయింది. శ్రీరాంహిల్స్‌లోని సర్వే నెంబర్ 49లో హౌసింగ్‌బోర్డుకిచ్చిన స్థలాన్ని బహిరంగ వేలం ద్వారానే విక్రయించినా అందులో 10 శాతం భూమిని పేద వర్గాలకు ఇవ్వాలన్న నిబంధన ను పాటించలేదు.
 
 కోయచెలక:
 సర్వే నెంబర్ 192లో 119 ఎకరాల 20 గుంటల భూమిని పేదలకు ఇళ్ల స్థలాల కోసం అసైన్‌చేశారు. కానీ ఆ భూమిలో ఎలాంటి ఇళ్లు నిర్మించలేదు. అందులో 4ఎకరాల భూమిని వ్యవసాయేతర పనులకు వినియోగిస్తున్నారు. ఆరు ప్లాట్లను కబ్జా చేసి పత్తి పండిస్తున్నారు. 149లో ఉన్న 80 ఎకరాల పెద్ద చెరువు శిఖం భూమిలో 7.5 ఎకరాలు కబ్జాకు గురయింది. 150,151, 229 సర్వే నెంబర్లలోని 5ఎకరాల 31 కుంటల ఇనాం భూమిని ఓఆర్‌సీలు లేకుండా అమ్ముకున్నారు.
 
 చిమ్మపూడి:
 సర్వే నెంబర్ 48లోఉన్న 195 ఎకరాల అసైన్ భూమిలో 80 శాతం అమ్ముకున్నారు. 20 ఎకరాలు కబ్జా అయింది. 512లోని మూడెకరాలు ఖాళీ జాగా ఉంది. 163లోని 71 ఎకరాల చెరువులో 2 ఎకరాలు కబ్జాకు గురయింది.
 
 మంచుకొండ:
 సర్వే నెంబర్ 338లో ఉన్న 211 ఎకరాల ప్రభుత్వ భూమిలో 168 ఎకరాలు అసైన్ చేశారు. దీనిలో 73 ఎకరాల్లో ఉల్లంఘనలున్నాయి. సర్వే నెంబర్ 37లోని 37 ఎకరాల సీలింగ్ భూమి అన్యాక్రాంతమైంది. 282లోని ఎర్రచెరువులో 16 ఎకరాల 60 గుంటల భూమిని 18 మంది కబ్జా చేశారు. 354లో ఉన్న భూమిని ప్రభుత్వం పేదలకు ఇళ్లస్థలాల కోసం సేకరించినా.. ఇప్పటికీ ఆ భూమిని అసలు పట్టాదారుడే అనుభవిస్తున్నాడు.
 
 వెలుగుమట్ల:
 సర్వే నెంబర్ 548 లోని 2 ఎకరాల ప్రభుత్వ భూమి కబ్జాకు గురయింది. దీనిపై సమగ్ర సర్వే జరపనున్నారు. 564లో ఉన్న 22 కుంటల కారిజ్‌ఖాతా ఇనాం భూమిని ముగ్గురు వ్యక్తులు కబ్జా చేశారు. 565లోని శిఖం భూమిలో 8 ఎకరాలు కబ్జాకు గురయింది. 396 లో ఉన్న రెండెకరాల ఎన్నెస్పీ స్థలంలో రోడ్డు వేసి వెం చర్లు చేస్తున్నారు. 138, 140లో ఉన్న దాదాపు 5 ఎకరాల ఎన్నెస్పీ భూమి కూడా కబ్జాకు గురయింది. దీని ని జాయింట్ సర్వే చేయనున్నారు. 135, 137లో ఉన్న మూడెకరాల ఎన్నెస్పీ భూమిని ఎవరో అమ్ముకున్నారు.
 
 ఖమ్మం రెవెన్యూ:
 సర్వే నెంబర్ 123లో ఉన్న 189.33 కుంటల భూమిలో 100 ఎకరాలు మున్సిపాలిటీకి కేటాయిం చారు. అందులో అన్నీ ప్రైవేటు సముదాయాలు వెలి శాయి. థియేటర్లు, కల్యాణమండపాలు నిర్మించారు.
 
 పాకబండ:
 సర్వే నెంబర్ 66లోని 34 ఎకరాల 11 కుంటల భూమిని 144 మంది కబ్జా చేశారు. సర్వే నెంబర్ 4లోని 4,500 గ జాల భూమిని దాసాంజనేయస్వామి గుడి కోసం ప్రైవేటు వ్యక్తుల నుంచి కొనుగోలు చేశారు. అందులో ప్రైవేటు వ్యక్తులు ఇళ్లు కట్టుకున్నారు. మున్సిపాలిటీ వారు ఇంటి నెంబర్లు కూడా ఇచ్చారు.
 
 బుర్హాన్‌పురం:
 సర్వే నెంబర్ 105లో ఉన్న లక్ష్మీనర్సింహస్వామి గుడి భూమిలో 23 ఎకరాలను 400 మంది కబ్జా చేశారు. అందులో ఉన్న ఐదెకరాల ఎన్నెస్పీ భూమి కూడా కబ్జాకు గురయింది. 292,293లోని 4 ఎకరాల 28 కుంటల శిఖం భూమి కూడా కబ్జా అయింది. 5లో మూడెకరాలు ఖబర్‌స్థాన్ కోసమని రికార్డుల్లో ఉంటే అక్కడ పక్కాఇళ్లున్నాయి. ఎస్పీ కార్యాలయం సమీపంలోని 489లో అన్నీ ప్రైవేటు భవంతులు వెలిశాయి. 217లో ఉండాల్సిన 41.25 ఎకరాల ప్రభుత్వ భూమిలో 10 ఎకరాల్లో ఉల్లంఘనలు జరగ్గా 15 ఎకరాలు కబ్జాకు గురయింది. 35, 38, 39, 40 సర్వే నెంబర్లలోని గుంటి మల్లేశ్వరి దేవస్థానంలో 3 ఎకరాలు కబ్జా అయింది.
 
 ఈర్లపూడి:
 సర్వే నెంబర్ 554లోని 300 ఎకరాల అసైన్ భూమిని 43 మంది కొనుక్కున్నారు. 73లోని మూకుడికుంట చెరువులో 19 ఎకరాలు కబ్జాకు గురయింది.
 
 వేపకుంట్ల:
 సర్వే నెంబర్ 196,197లోని 50 ఎకరాల చెరువు భూముల్లో 20 ఎకరాలను కబ్జా చేశారు. 26లోని ఇనాం భూమిని ఓఆర్‌సీలు లేకుండానే 41 మంది కొనుగోలు చేశారు.
 
 చింతగుర్తి:
 సర్వే నెంబర్ 56లో 28 ఎకరాల 30 కుంటల చెరువు శిఖం భూమి ఉంది. ఇందులో 10.28 ఎకరాలు అసైన్ చేశారు. ఈ శిఖం భూమిని ఎలా అసైన్ చేశారు, ఎవరు చేశారనేది తేలాల్సి ఉంది. 266లో ఉన్న 941 ఎకరాల భూమి వివాదంలో ఉంది. ఇందులో సీలింగ్, పట్టా, అసైన్ భూములున్నాయి. దీనిని రీసర్వే చేయనున్నారు.
 
 రేగుల చెలక:
 సర్వే నెంబర్ 85లో ఉన్న 25 ఎకరాల్లో మూడు గ్రానైట్ కంపెనీలకు భూమిని లీజుకిచ్చారు. ఈ భూమిలో గ్రానైట్ కంపెనీలు బ్లాస్టింగ్‌లు చేస్తుండడంతో వ్యవసాయం కోసం అసైన్ చేసిన భూముల్లో వ్యవసాయం చేసుకోలేకపోతున్నారు. 57,58,60 సర్వే నెంబర్లలో బల్వత్‌ఇనాం భూములను ఓఆర్‌సీ లేకుండా వ్యవసాయం నుంచి వ్యవసాయేతరానికి బదలాయించారు. 9లో ఉన్న 1.15 కుంటల శిఖం భూమిని 14 మందికి ఇళ్ల స్థలాల కోసం కేటాయించారు. 145లో ఎకరం భూమి కబ్జాకు గురయింది.
 
 ఖానాపురం:
 37 సర్వే నెంబర్‌లోని 153 ఎకరాల భూమిలో 86 ఎకరాల 29 కుంటల భూమిని మూడువేల మంది బీపీఎల్ కుటుంబాలు, స్వాతంత్య్ర సమరయోధులకు కేటాయించారు. ఇందులో కేవలం 80 ఇళ్లు మాత్రమే కట్టి ఉన్నాయి. మిగిలిన 67 ఎకరాల భూమిని రెండు మినరల్స్‌కు 20 ఏళ్ల లీజుకిచ్చారు. 94లో ఉన్న ఎకరం భూమి రికార్డుల్లో శ్మశానవాటిక అని ఉండగా, అది ఖాళీగానే ఉంది. 321లో 45 ఎకరాల 39 కుంటల్లో 10 ఎకరాలు టీఎన్జీవోలకు కేటాయించగా, అందులో 90శాతం ఖాళీగానే ఉన్నాయి. అదే సర్వేనెంబర్‌లో 15.39 ఎకరాలను ఇతర జిల్లాల నుంచి వచ్చిన వారు కబ్జా చేసి నివసిస్తున్నారు. 94లోన్న 15 కుంటల ఊరచెరువు స్లూయిజ్ కూడా కబ్జాకు గురయింది. మూడెకరాలు ఒయాసిస్ రిక్రియేషన్ క్లబ్‌కు కేటాయించినా క్లబ్ పనిచేయడం లేదు. 234లో ఉన్న 129 ఎకరాల 4 కుంటల లకారం చెరువు శిఖం భూమిపై డీటైల్డ్ సర్వే చేయనున్నారు.
 
 వి.వి.పాలెం:
 సర్వే నెంబర్ 101లో ఉన్న 150 ఎకరాలకు గాను 111 ఎకరాలు అసైన్ చేశారు. అందులో 34 ఎకరాల్లో ఉల్లంఘనలుండగా, 37 ఎకరాలు కబ్జా అయింది. 158లో ఉన్న ఎకరం సీలింగ్ భూమిని కబ్జా చేశారు. 66లో ఉన్న ఆంజనేయస్వామి గుడికి చెందిన 24 గుంటల భూమి ప్రైవేటు వ్యక్తులకు అమ్మేశారు. అదే గ్రామంలోని 9 ఎకరాల 23 కుంటలు కబ్జాకు గురయింది.


 ఖమ్మం అర్బన్: ప్రభుత్వ భూములను గుర్తించే ప్రక్రీయలో భాగ ంగా రెవెన్యూ యంత్రాంగం ఆదివారం సాయంత్రం వదరకు సమగ్ర సర్వే నిర్వహించారు. మొత్తం 17 రెవెన్యూ గ్రామాల్లో 102 మంది  అధికారులతో రెండురోజులు పాటు నిర్వహించారు. పలు గ్రామాల్లో ప్రభుత్వ, అసైన్డ్, చెరువులకు సంబంధించిన భూములు ఆక్రమణలో ఉన్నట్లు గుర్తించి ఆ నీవేదికలను ఆర్డీఓ సంజీవరెడ్డికి అందజేశారు. సర్వేలో  మొత్తం 17 రెవెన్యూ గ్రామాల పరిధిలో 102 మంది సిబ్బంది పాల్గొన్నారు. శనివారం చేపట్టిన సర్వేలో వీవీపాలె లో ఒక ఎకరం ప్రభుత్వ భూమిని  సర్వే అధికారులు గుర్తించారు.
 
 చిమ్మపుడిలో 11 ఎకరాలు, శివాయిగూడెంలో ఐదెకరాలకు పైగా, రేగులచెలకలో ఇనాం భూమికి సంబంధించి సుమారు 30 ఎకరాల వరకు ఆక్రమణలకు గురైనట్లు తేల్చారు. ఖమ్మం కార్పొరేషన్ పరిధితో పాటు అనుకొని ఉన్న రెవెన్యూ గ్రామాలైన వీవీపాలెం, బల్లేపల్లి, రఘునాథపాలెం, కోయచెలక, వెలుగుమట్ల, ధంసలాపురం, ఖానాపురం తదితర రెవెన్యూ గ్రామాల్లో అత్యంత విలువైన భూముల ఆక్రమణలు కొన్ని వెలుగులోకి వస్తున్నట్లు తెలిసింది.
  
 దీంతో ఇప్పటి వరకు ప్రభుత్వ భూములలో ఆక్రమణ చేసి నిర్మాణాలు చేసిన వారిలో సర్వేతో భయం పట్టుకుంది. ఈసర్వే కోసం జిల్లా వ్యాప్తంగా వివిధ మండలాల్లో పని చేసే రెవెన్యూ ఉద్యోగులను రెండురోజుల  సర్వే కోసం రప్పించి సర్వేను  చేయించారు. జేసీ సురేంద్రమోహన్, ఆర్డీఓ సంజీవరెడ్డి, తహశీల్దార్ వెంకారెడ్డి, స్పెషల్ డిప్యూటీ కలెక్టర్‌లు సర్వే తీరును గ్రామాల్లోకి పరిశీలించారు.


 * మెదక్ జిల్లా రామచంద్రాపురంలో ఉన్నతాధికారుల భూ దందా
 * వందల కోట్ల విలువైన ప్రభుత్వ భూముల స్వాహా
 * ఐఏఎస్ అధికారి పాత్రపైనే అనుమానాలు
 * బినామీ పేర్లతో 30 ఎకరాలు స్వాధీనం
 * తక్షణ నివేదికకు నెల కిందటే ఆదేశించిన సీఎం
 * జిల్లా యంత్రాంగం బేఖాతర్.. సర్కారు ఆగ్రహం
 * పటాన్‌చెరు, జిన్నారం మండలాల్లోనూ స్కాం
 * భూములను ఆక్రమించుకున్న జిల్లా రెవెన్యూ యంత్రాంగం
 * రాష్ర్ట ప్రభుత్వం వద్ద ఆధారాలు, దృష్టి సారించిన కేసీఆర్
  
 సాక్షి, హైదరాబాద్: కంచే చేను మేసింది! సర్కారు భూములను కాపాడాల్సిన అధికారులే వాటిని మింగేశారు. రాష్ట్ర రాజధానికి ఆనుకుని ఉన్న ప్రాంతాల్లో జరిగిన ఈ  వ్యవహారం తాజాగా వెలుగులోకి వచ్చింది. హైదరాబాద్‌కు సమీపంలోని ఎకరాలకొద్దీ భూములు అన్యాక్రాంతమైనట్లు రాష్ర్ట ప్రభుత్వానికి ఇటీవలే నిర్దిష్ట సమాచారం అందినట్లు సమాచారం. అసైన్డ్ భూములతో పాటు ఇతర అవసరాల కోసం కేటాయించిన భూములను కూడా ఉన్నతాధికారులే స్వాహా చేసినట్టు సర్కారు ప్రాథమికంగా గుర్తించింది.
  
   మెదక్ జిల్లా పరిధిలోని రామచంద్రాపురం, పటాన్‌చెరు, జిన్నారం మండలాల్లో జరిగిన ఈ కుంభకోణంలో జిల్లా స్థాయిలో భూముల వ్యవహారాలపై పూర్తి అధికారాలున్న ఓ ఐఏఎస్ అధికారి కీలకపాత్ర పోషించినట్టు ప్రభుత్వం అనుమానిస్తోంది. దీనిపై విచారణ జరిపి, తక్షణమే సమగ్ర నివేదిక ఇవ్వాలంటూ నెల రోజుల కిందటే మెదక్ జిల్లా కలెక్టర్‌ను ఆదేశించింది. ఈ వ్యవహారంపై ఆగస్టు ఐదో తేదీనే తక్షణ నివేదిక కోరినప్పటికీ జిల్లా యంత్రాంగం ఇప్పటికీ పట్టించుకోకపోవడాన్ని ప్రభుత్వం తీవ్రంగా పరిగణిస్తోంది.
  
  ఉన్నతాధికారిదే కీలక పాత్ర!
  హైదరాబాద్‌కు ఆనుకుని ఉన్న మెదక్ జిల్లా రామచంద్రాపురం మండలం కొల్లూరు పరిధిలోని 106, 191, 203, 297 సర్వే నంబర్లలోని భూములను వేర్వేరు అవసరాల కోసం ప్రభుత్వం గతంలో చాలా మందికి అసైన్డ్ చేసింది. ఇలా చేయగా కూడా మరికొన్ని ఎకరాల భూమి ఇక్కడ మిగిలే ఉంది. అయితే ఈ భూములను గతంలో పేర్కొన్న అవసరాలకు కాకుండా ఇతరత్రాలకు వినియోగించడం, అసైన్డ్ భూములపై క్రయవిక్రయాలు జరపడం, ఖాళీగా ఉన్న భూములను కబ్జా చేయడం వంటి అక్రమాలు జరిగినట్లు తాజాగా రాష్ర్ట ప్రభుత్వం గుర్తించింది.
  
  దీనికి సంబంధించిన వ్యవహారాల్లో ఆ జిల్లాలోని ఓ ఐఏఎస్ అధికారి ముఖ్య పాత్ర పోషించినట్లు భావిస్తోంది. ఇక్కడి భూముల్లో దాదాపు 30 ఎకరాలను ఆయన బినామీ పేర్లతో ఆక్రమించినట్టు అనుమానిస్తోంది. ఇక్కడ ఎకరానికి సుమారు రూ. 3 నుండి రూ. 6 కోట్లదాకా ధర ఉంది. దీనికి సంబంధించి క్షేత్ర స్థాయిలో విచారణ జరపాలని... సూత్రధారులను, పాత్రధారులను గుర్తించాలని ముఖ్యమంత్రి కె.చంద్రశేఖర్‌రావు రెవెన్యూ శాఖను ఆదేశించారు. దీంతో ఈ వ్యవహారాన్ని అత్యంత ముఖ్యమైన విషయంగా భావించి వెంటనే నివేదిక ఇవ్వాలని మెదక్ జిల్లా కలెక్టర్‌కు రెవెన్యూ శాఖ ముఖ్య కార్యదర్శి బి.ఆర్.మీనా ఆదేశాలు పంపారు.
  
  ఈ మేరకు గత నెల ఐదో తేదీన 3062 మెమో ద్వారా ఉత్తర్వులను జారీ చేశారు. అయితే ఇప్పటికి నెల రోజులవుతున్నా కలెక్టర్ కార్యాలయం నుంచి రాష్ట్ర ప్రభుత్వానికి ఎలాంటి నివేదిక అందలేదు. దీంతో ఇప్పటి దాకా జిల్లా స్థాయి ఐఏఎస్ అధికారి పాత్రపై వచ్చిన అనుమానాలు మరింత బలపడ్డాయి. సీఎం కేసీఆర్ కూడా ఈ అంశాన్ని మరోసారి గుర్తుచేయడంతో రెవెన్యూ శాఖ తన ఉత్తర్వులను కలెక్టర్‌కు మరోసారి రిమైండర్‌గా పంపడానికి సిద్ధమైంది.  
  
  మరో 2 మండలాల్లోనూ
  అదే జిల్లా పటాన్‌చెరు(అమీన్‌పూర్), జిన్నారం మండలాల్లోనూ పెద్ద ఎత్తున ప్రభుత్వం భూమి అన్యాక్రాంతమైనట్టుగా ప్రభుత్వం గుర్తించింది. ఈ మండలాల్లో అసైన్డ్, శిఖం, లావణి పట్టాలు జారీ అయిన వందల ఎకరాల భూమి ఇతరుల చేతుల్లోకి వెళ్లడంలో జిల్లాకు చెందిన వివిధ స్థాయిల్లోని రెవెన్యూ అధికారులు కీలకంగా వ్యవహరించినట్లు తెలుస్తోంది. రెవెన్యూ చట్టంలోని సెక్షన్ 22(ఎ) కింద ప్రభుత్వ భూముల రిజిస్ట్రేషన్, నోటిఫై, డీనోటిఫై చేయడానికి జిల్లా రెవెన్యూ యంత్రాంగానికి ఉన్న అధికారాన్ని అడ్డుపెట్టుకుని ఈ భూ దందాకు దిగినట్టు అనుమానిస్తున్నారు.
  
   మండల, డివిజన్ స్థాయి ఉన్నతాధికారులను ఏజెంట్లుగా పెట్టుకుని ఈ వ్యవహారాన్ని చక్కబెట్టుకున్నట్లు తెలుస్తోంది. ముందుగా ప్రభుత్వ భూముల బదలాయింపును రద్దుచేస్తున్నట్టుగా జిల్లా అధికారులు నోటిఫై చేస్తారు. దీంతో ఆ భూములను కొనడానికి ఎవరూ ముందుకురాక ధర తగ్గిపోతుంది. వాటిని తక్కువ ధరకు రెవెన్యూ అధికారులే బినామీ పేరిట కొంటారు. ఆ తర్వాత డీనోటిఫై చేసుకుని, అవే భూములను ఎక్కువ ధరకు అమ్ముకుని వ్యాపారం చేసుకుంటారు. ఇందుకు సంబంధించిన ఆధారాలు ప్రభుత్వానికి అందినట్లు తెలుస్తోంది. దీనిపై సమగ్ర నివేదిక ఇవ్వాలని రెవెన్యూ శాఖను సీఎం ఆదేశించారు.


 రాజధానిపై బాబు తీరును తప్పుబట్టిన జగన్ 
  సాక్షి, హైదరాబాద్: రాజధానిపై ముఖ్యమంత్రి  ఒక ప్రకటన చేసాక చర్చించేందుకు ఇంకేముంటుందని ప్రతిపక్షనేత వై.ఎస్.జగన్‌మోహన్‌రెడ్డి ప్రశ్నించారు. కీలక అంశంపై ప్రకటన చేసే విధానం ఇదేనా అని  నిలదీశారు.అసెంబ్లీలో సీఎం  చేసిన ప్రకటన అనంతరం  జరిగిన చర్చలో జోక్యం చేసుకుని జగన్ మాట్లాడారు. ‘‘అధ్యక్షా.. ముఖ్యమంత్రి ప్రకటన ఇస్తారంటున్నారు. ప్రకటన చేసిన తర్వాత చర్చకు అర్థం ఏముంటుంది? ముందు చర్చ, ఆ తర్వాత ప్రకటన రావాలి. 1953లో కూడా అదే జరిగింది. ఆనాడు రాజధాని నగరాన్ని ఎక్కడ పెట్టాలనే దానిపై ఐదు రోజుల చర్చ జరిగింది. ప్రతి ఎమ్మెల్యే అభిప్రాయం చెప్పారు. కానీ, ఇప్పుడేం జరుగుతోంది? ప్రజాస్వామ్యం ఉందా? లేదా? ప్రకటన తర్వాత చర్చ జరుపుతామంటున్నారు.
  
  ఇది ఎంతవరకు న్యాయం? రాజధాని నిర్మాణానికి ప్రభుత్వానికి సులభమవుతుందని 30 వేల ఎకరాలు ఎక్కడ ప్రభుత్వ భూములు అందుబాటులో ఉంటే అక్కడ పెట్టడం మంచిదన్నాం. వాళ్లు పెడతామన్న చోట గజం రూ.లక్ష పలుకుతోంది. ఇంత ఖరీదైన ప్రాంతంలో భూసేకరణ ఎలా చేస్తారు? ఇప్పటికే అద్దెలు విపరీతంగా పెరిగి సామాన్యుడికి అందకుండా పోతున్నాయి.  ఇలాంటి విషయాల్లో ప్రతి ఒక్కరూ మాట్లాడాలి. అందరి అభిప్రాయాలను తీసుకోవాలి. కానీ ప్రభుత్వం కాదంటోంది? ప్రకటన చేస్తామంటోంది. దయచేసి బుల్‌డోజ్ చేయవద్దు’’ అంటుండగా స్పీకర్ అభ్యంతరం చెప్పారు. ఆ తర్వాత సందర్భంలో మరోసారి జగన్ జోక్యం చేసుకుంటూ.. తమ న్యాయబద్ధమైన డిమాండ్‌ను అనుమతించాలని కోరారు.  
  
 మనస్ఫూర్తిగా ఆహ్వానిస్తున్నాం
  విజయవాడను రాజధానిగా ప్రకటించడాన్ని మనస్ఫూర్తిగా ఆహ్వానిస్తున్నామని ప్రతిపక్ష నేత, వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి చెప్పారు. కానీ ప్రకటన చేసిన తీరు భయం కలిగించిందని అన్నారు. రాజధానిపై ముఖ్యమంత్రి చేసిన ప్రకటనపై సభలో జరిగిన చర్చలో జగన్ మాట్లాడారు. రాజధాని విషయంలో ప్రాంతాల మధ్య చిచ్చుపెట్టడం ఇష్టం లేదన్నారు. రాజధాని ఎక్కడ పెట్టినా అభ్యంతరం లేదని,  సామాన్యులకు అందుబాటులో ఉండాలని చెప్పారు.
 
 భయపడిందే జరిగిందన్నారు. చర్చ తర్వాత ప్రకటన రావాలని కోరుకున్నామని చెప్పారు. ప్రకటన చేసిన తర్వాత చర్చ పెట్టుకోండని చెబితే.. ఇదేం ప్రజాస్వామ్యమని ప్రశ్నించారు. ‘‘విభజన తర్వాత 13 జిల్లాల చిన్న రాష్ట్రమయింది. ఒక ప్రాంతానికి, మరో ప్రాంతానికి మధ్య చిచ్చుపెట్టడం ఇష్టం లేదు. రాజధాని ఎక్కడ పెట్టినా అభ్యంతరం లేదు. కానీ.. కనీసం 30 వేల ఎకరాల ప్రభుత్వ భూములు అందుబాటులో ఉన్న ప్రాంతాన్ని ఎంపిక చేస్తే బాగుంటుందని చెప్పాం. అలా అయితే భూముల ధరలను ప్రభుత్వమే నిర్ణయించడానికి అవకాశం ఉంటుంది. సభలో చర్చ లేకుండా చంద్రబాబు నిర్ణయం తీసుకొని నేరుగా ప్రకటించడం ప్రజాస్వామ్యం కాకపోయినా, రాష్ట్రంలో భావోద్వేగాలకు చోటు ఇవ్వకూడదని చర్చలో పాల్గొంటున్నాం. నిర్మాణాత్మక సలహాలు ఇస్తాం’’ అని జగన్ చెప్పారు.


 మహబూబ్‌నగర్ టౌన్: ప్రభుత్వం తమకు గంటెడు జాగా ఇస్తే దున్నుకొని దర్జాగా బతకవచ్చని భావించిన పేదలకు అంతలోనే నిరాశే ఎదురైంది. ఎంపికచేసిన గ్రామాల్లో అర్హులందరికీ పంపిణీచేస్తామని చెప్పిన ప్రభుత్వం.. కొందరికి మాత్రమే పంపిణీ చేయడంతో మిగతావారిలో నైరాశ్యం నెలకొంది. పంద్రాగస్టు రోజున పట్టాలు అందుకోవచ్చని ఆశించిన వారి ఆశలు ఆవిరయ్యాయి. జిల్లాలోని 14 నియోజకవర్గాల్లో 14 గ్రామాలను భూపంపిణీకి ఎంపికచేశారు. ఆయా గ్రామాల్లో అర్హులను గుర్తించి వారిలో ఒక్కో కుటుంబానికి మూడెకరాల చొప్పున భూమిని పంపిణీ చేసేందుకు అధికారులు నెలరోజుల పాటు కసరత్తుచేశారు.
 
 తీరా ఈనెల 15న స్వాతంత్య్ర దినోత్సవం సందర్భంగా కేవలం ఆరు గ్రామాల్లో 20మందికి మాత్రమే 60 ఎకరాలను పంపిణీచేసి చేతులు దులుపుకున్నారు. మిగతా ఎనిమిది నియోజకవర్గాల్లోని ఎంపికచేసిన ఆ ఎనిమిది గ్రామాల ప్రజలకు నిరాశే మిగిలింది. ఇక పంపిణీచేసిన గ్రామాల్లో కూడా అందరికీ ఇవ్వలేకపోయారు. దీంతో అర్హులు ఒకింత అసహనానికి గురయ్యారు.
  
 నిధులు ఖాతాకే పరిమితం
 ప్రభుత్వ భూములు ఉంటే సరేసరి.. లేకపోతే జిల్లాలో భూమిని కొనుగోలు చేసైనా దళితులకు పంపిణీ చేసేందుకు ప్రభుత్వం జిల్లాకు రూ.24కోట్లు మంజూరుచేసింది. అయితే కేవలం రూ.1.55కోట్లు వెచ్చించి 60 ఎకరాలను కొనుగోలుచేసిన అధికారులు 20 మంది లబ్ధిదారులకు మాత్రమే పంపిణీ చేయగలిగారు. మిగతా రూ.22.45కోట్లను ఖాతాకే పరిమితంచేశారు. వీటిని కూడా వినియోగిస్తారా? లేదా? అన్నది అయోమయం నెలకొంది.
  
 పంపిణీచేయని గ్రామాలు
 జిల్లాలో ఎంపికచేసినా.. కొన్ని గ్రామాల్లో భూమిని పంపిణీ చేయలేదు. వాటిలో కొల్లాపూర్ నియోజకవర్గం ఎల్లూరు, కల్వకుర్తి మండలం వెల్దండ శేరి అప్పారెడ్డిపల్లి, తిమ్మాజిపేట మండలం పోతిరెడ్డిపల్లి, గద్వాల నియోజకవర్గంలోని మల్దకల్ మండలం పాల్వాయి, కొడంగల్ నియోజకవర్గంలోని మద్దూరు మండలం నందిపాడు, మక్తల్ నియోజకవర్గంలోని కర్నె, వనపర్తి నియోజకవర్గం పెద్దమందడి మండలం దొడగుంటపల్లి, నారాయణపేట నియోజకవర్గంలోని ధన్వాడ మండలం పెద్దచింతకుంట గ్రామాలు ఉన్నాయి. ఈ గ్రామాల్లో 29 మంది లబ్ధిదారులను గుర్తించారు. కాగా, భూ పంపిణీకి సంబంధించి అధికారులు కేవలం 20 మందికి మాత్రమే పంపిణీచేసి.. మిగతావారికి ఎప్పుడు పంపిణీచేస్తారనే విషయమై మౌనం దాల్చారు.


  టెక్కలి : ప్రాంతం ఏదైనా ప్రభుత్వ స్థలం ఖాళీగా ఉంటేచాలు దాన్ని సొం తం చేసుకోవడానికి చాలామంది పోటీపడుతుంటారు. ఒకప్పుడు పెద్ద పట్టణాలకే పరిమితమైన రియల్ ఎస్టేట్ వ్యాపారం క్రమేపీ గ్రామీణ ప్రాంతాలకు సైతం పాకడంతో ఈ పరిస్థితి మరీ ఎక్కువైంది. చిన్న పట్టణాలకు ఆనుకుని ఉన్న గ్రామాల్లో సైతం బంగారం లాంటి పంట పొ లాలను ప్లాట్లుగా మార్చేస్తున్నారు. ఇలాంటి పరిస్థితిలో ప్రభుత్వ భూములపై సైతం కన్నేసి రాజకీయ నాయకు ల అండదండలతో వాటిని కైంకర్యం చేసేం దుకు పావులు కదుపుతున్నారు.
  
  గుట్టు చప్పుడు కాకుం డా వారికి అనుకూలంగా మలుచుకోవడానికి ప్రయత్నిస్తున్నా రు. దీన్ని అరికట్టాల్సిన అధికారులు మౌనంగా ఉంటుం డడంతో కబ్జాదారులు తమ ఇష్టారాజ్యంగా వ్యవహరిస్తున్నారు. ఇదే పరిస్థితి రెవెన్యూ డివిజన్ కేంద్రమైన టెక్కలిలో ప్రస్తుతం కనిపిస్తోంది. పాత జాతీయ రహదారి సమీపంలో ప్రభుత్వ డిగ్రీ కళాశాలకు ఆనుకుని స్వర్ణకారుల సంఘం పేరుతో ఇండస్ట్రియల్ శాఖ ఆధీనంలో ఉన్న స్థలంపై కబ్జాదారులు కన్నేశారు. రాజకీయ నాయకుల అండతో విలువైన ఈ స్థలాన్ని ఎలాగైన సొంతం చేసుకొని రియల్ ఎస్టేట్ వ్యాపారానికి అనుకూలంగా మార్చుకోవాలని కొంతమంది ప్రయత్నాలు ప్రారంభించారు.
  
  విలువైన ఈ స్థలం వివరాలను పరిశీలిస్తే.. 1966 సంవత్సరంలో టెక్కలిలో జగద్దాత్రి స్వర్ణకారుల సొసైటీ కోసం సర్వే నంబర్ 520/1లో 34 సెంట్ల స్థలం, 520/3లో 1.66 ఎకరాల భూమిను ఖాతా నంబర్ 101288 పేరుతో కొనుగోలు చేసుకున్నారు. అప్పట్లో 38 మంది సభ్యులకు మొత్తం 38 వేల రూపాయల రుణాలను మంజూరు చేస్తూ ఈ స్థలంలో సిమెంట్ పైపుల తయారీ పరిశ్రమలను నిర్వహించుకోవాలని అధికారులు ఉత్తర్వులు జారీ చేశారు. అయితే కొంతకాలం తరువాత రుణా లు మాఫీ కావడంతో పైపుల తయారీ పరిశ్రమలు కూడా నిలిపివేశారు. ఆ తరువాత సొసైటీ తమ కార్యక్రమాల కు దూరమైంది. ఇదే స్థలంలో కొన్నేళ్లు ఇండస్ట్ట్రియల్ ఇన్‌స్పెక్టర్ కార్యాల యం, మత్స్యశాఖ కార్యాలయాలను నిర్వహించారు. ఆ తరువాత ఆ కార్యాలయాలను కూడా ఇతర ప్రాంతాలకు తరలించేశారు. దీంతో ఖాళీగా ఉన్న స్థలాన్ని కబ్జా చేయాలని అప్పట్లో కూడా చాలామంది ప్రయత్నించారు. స్థలాన్ని ఎలాగైనా దక్కించుకోవాలని చాలామంది పోటీ పడడంతో పాటు కొంతస్థలాన్ని ఆక్రమించారు.
  
  ఈ విషయం తెలుసుకున్న స్వర్ణకారుల సంఘ సభ్యులు జిల్లా అధికారులకు ఫిర్యాదు చేశారు. స్పందించిన అధికారులు 2005 సంవత్సరంలో స్థలాన్ని సర్వే చేయించారు. 520/1లో సుమారు 10 సెంట్లు కబ్జాకు గురైనట్లు గుర్తించారు. ఇదే విషయాన్ని అప్పటి కలెక్టర్ కోటేశ్వరరావుకు సర్వే సిబ్బంది నివేదించారు. దీంతో స్వర్ణకారుల సంఘ సభ్యులతో కలెక్టర్ మాట్లాడి సంఘాన్ని బలోపేతం చేయాలని సూచించారు. అయితే సంఘ కార్యకలాపాలు ఇటీవల నిలిచిపోయాయి. దీన్ని అనుకూలంగా మలుచుకున్న కబ్జాదారులు ఈ స్థలాన్ని ఎలాగైనా ఆక్రమించుకోవాలని చూస్తున్నారు. ఇప్పటికే కొంత స్థలంలో ఓ వ్యక్తి దర్జాగా ఇళ్ల నిర్మాణాలు కూడా చేపట్టి అద్దెలకు ఇచ్చేశారు. అయినా అధికారులు పట్టించుకోకపోవడంతో మిగి లిన స్థలాన్ని కూడా ఆక్రమించుకోవడానికి చాలామంది ప్రయత్నాలు ముమ్మ రం చేసినట్టు తెలిసింది. రాజకీయ అండతో పాగా వేసేందుకు చూస్తున్నారు. ప్రస్తుతం టెక్కలిలో సెంటు స్థలం లక్షల రూపాయలు పలుకుతుం డడంతో కబ్జాదారుల మధ్య కూడా పోటీ పెరిగింది.   ఇప్పటికైనా ఇండస్ట్రిరియల్, రెవెన్యూ అధికారులు స్పందించకపోతే కోట్లాది రూపాయల విలువైన ఈ స్థలం ఆక్రమణదారుల గుప్పిట్లోకి వెళ్లడం ఖాయమని స్థానికు లు ఆందోళన వ్యక్తం చేస్తున్నారు.
  


 
 రుణాల రీ షెడ్యూల్‌కు మరోసారి ఆర్‌బీఐ వద్దకు
 
   నిధుల సమీకరణకు ఉన్న అవకాశాలపై కసరత్తు
 
   రుణమాఫీ ఫైలుపై సీఎం సంతకం
 
  
  సాక్షి, హైదరాబాద్: రుణమాఫీకి కావలసిన నిధుల కోసం తెలంగాణ ప్రభుత్వం మల్లగుల్లాలు పడుతోంది. రూ.15 వేల కోట్లకుపైగా సేకరించాల్సి రావడంతో అధికార యంత్రాంగం భూములు విక్రయించాలనే నిర్ణయానికి వచ్చింది. ప్రస్తుతం వివాదాల్లో ఉన్న, కబ్జాఅయిన భూములను విక్రయించడం వల్ల ఆదాయాన్ని సమకూర్చుకోవడంతోపాటు, బాండ్లు, సెక్యూరిటీల విక్రయం ద్వారా నిధులు తెచ్చుకోవడంపై దృష్టి పెట్టనున్నట్టు సమాచారం. అదేవిధంగా కేంద్ర ప్రభుత్వం నుంచి రావాల్సిన ప్రణాళిక నిధులను అడ్వాన్స్‌గా ఇవ్వాలని కోరనున్నట్టు తెలిసింది. అలాగే, రిజర్వ్‌బ్యాంకు ప్రస్తుతం అంగీకరించిన వంద మండలాల్లో రుణాల రీ షెడ్యూల్‌ను, అన్ని మండలాలకు వర్తింప చేయడంతోపాటు, ఖరీఫ్ రుణాలకే కాకుండా ఇతర రుణాలకు వర్తింప చేయాలని మరోసారి విజ్ఞప్తి చేయనుంది. సోమవారం జరిగిన మంత్రి మండలి అత్యవసర భేటీలోనూ...రైతులకు ఇచ్చిన  హామీ మేరకు రుణ మాఫీని అమలు చేయాల్సిందేనని ముఖ్యమంత్రితోపాటు, మంత్రులు అభిప్రాయపడ్డారు. అవసరమైతే రుణాలు తెచ్చుకునే అంశాన్ని కూడా పరిశీలిస్తున్నారు. ఆర్‌బీఐ గవర్నర్‌ను మరోసారి కలవాలని ఆర్థికశాఖ ముఖ్యకార్యదర్శిని మంత్రిమండలి ఆదేశించిన సంగతి విదితమే.
  
  రుణమాఫీపై సంతకం చేసిన ముఖ్యమంత్రి
  మంత్రివర్గ సమావేశంలో తీసుకున్న నిర్ణయం మేరకు రుణ మాఫీ ఫైలుపై సీఎం కేసీఆర్ మంగళవారం సంతకం చేశారు. దీనిపై వ్యవసాయ శాఖ నేడోరేపో రుణమాఫీతోపాటు, మార్గదర్శకాలు జారీ చేయనుంది. రూ. లక్ష వరకు పంట రుణాలు మాఫీ చేస్తామని సీఎం కార్యాలయం మంగళవారం ఒక ప్రకటనలో పేర్కొంది.
  


  తుమృకోట (రెంటచింతల):  తుమృకోట గ్రామ సమీపంలో ఉన్న అన్ సర్వే లాండ్ పోరంబోకు భూములను శుక్రవారం గురజాల ఆర్డీవో అరుణబాబు, జిల్లా సర్వే అధికారి కెజియాకుమారి, తహశీల్దార్ ఎన్‌వీ ప్రసాద్, అటవీ అధికారులు సందర్శించారు. సుమారు 1500ఎకరాల్లో సోలార్ విద్యుత్తు ప్రాజెక్టును ఏర్పాటు చేసేందుకుగాను కలెక్టర్ కాంతిలాల్ దండే ఆదేశాల మేరకు ఈ భూములను పరిశీలించారు. గ్రామపరిసరాల్లో సుమారు రెండు వేల ఎకరాలు సర్వే చేయకుండా ఉన్న భూములను నలుగురు సర్వేయర్లు, మరో నలుగురు అటవీ సిబ్బందితో కలసి రెండు బృందాలుగా ఏర్పడి మూడు రోజుల్లో ఆ భూములను కొలిపించి నివేదిక అందించాలని ఆర్డీవో కోరారు.
  
 సోలార్ విద్యుత్తు ప్రాజెక్టును ఇక్కడ ఏర్పాటుచేసినట్లయితే మండలంలోని అన్ని గ్రామాల్లో నిరంతరాయంగా విద్యుత్‌ను అందించవచ్చన్నారు. ఈ ప్రభుత్వ పోరంబోకు భూముల్లో ఈ ఏడాది పంటలను సాగు చేయవద్దని గ్రామంలో దండోరా వేయించారు. భారీ ప్రాజెక్టును ఇక్కడే ఏర్పాటు చేసినట్లయితే మండల ంతోపాటు పలనాడు ప్రాంతానికి మేలు జరిగే అవకాశం ఉంది. కార్యక్రమంలో వీఆర్వో ఎస్‌విఎన్ మల్లికార్జునరావు, సర్వేయర్ శ్రీనివాస్ తదితరులు ఉన్నారు.


 సాక్షి, గుంటూరు:  రాష్ట్రంలో గుంటూరు జిల్లా ‘సోలార్ పవర్ రీజియన్’గా మారబోతోంది.  ఈ మేరకు నిర్మాణానికి అవసరమైన ప్రభుత్వ భూములను గుర్తిస్తున్నట్టు జిల్లా కలెక్టర్ కాంతిలాల్ దండే తెలిపారు. శుక్రవారం జిల్లా కలెక్టరేట్ కార్యాయలంలోని తన చాంబర్‌లో ఆయన విలేకరులతో మాట్లాడుతూ జిల్లా కలెక్టర్లతో ముఖ్యమంత్రి చంద్రబాబునాయుడు నిర్వహించిన సదస్సు వివరాలను వెల్లడించారు.
 
 అవి...
 * సోలార్‌పవర్ రీజియన్‌ను గుంటూరు జిల్లాలో ఏర్పాటు చేసేందుకు  గురజాల- రెంటచింతల మధ్యలో ప్రభుత్వ భూములను గుర్తించాలి.
 * ప్రతి సంక్షేమ పథకానికి ఆధార్ లింక్ చేయాలి.
 * మీ సేవల్లో మొత్తం 283 సేవలుండగా ఇందులో 112 సేవలను అసలు ప్రజలు వినియోగించుకోవడం లేదు. మీసేవల్లో అందే అన్ని సేవలను సద్వినియోగం చేసుకొనేలా ప్రణాళికలు రూపొందించాలి.
 * పట్టాదారు పాసుపుస్తకాల జారీ, పాసుపుస్తకాల్లో మార్పులు, చేర్పులు, టైటిల్ డీడ్స్ జారీ చేయడంలో జిల్లా పదవ స్థానంలో ఉంది. దీన్ని మెరుగుపరుచుకొని త్వరితగతిన పాసు పుస్తకాలు జారీ అయ్యేలా చూడాలి.
 * జిల్లాలో వరి, పత్తి పంటలను అభివృద్ధి చేయాలి. అలాగే మిరప, అరటి, చేపల పెంపకం, పాడి, పౌల్ట్రీ పరిశ్రమలను అభివృద్ధి చేయాలన్నారు.
 * నాగార్జునసాగర్ నీటిని తాగు, సాగుకు వినియోగించుకోవాలని సూచించారు.
 * పులిచింతలప్రాజెక్టులో 11 టీఎంసీల నీటిని నిల్వ ఉంచేలా చూడాలి.
 * పులిచింతల నిర్వాసితులకు పరిహారం విషయంలో తగు జాగ్రత్తలు తీసుకోవాలి.
 * అలాగే నగరాలు, పట్టణాల్లో సాలిడ్‌వేస్ట్‌మేనేజ్‌మెంట్, తాగునీరు, పచ్చదనం వంటి అంశాలపై దృష్టి సారించాలి.
 * గుంటూరు నగరాన్ని స్మార్ట్ సిటిగా అభివృద్ధి చేసేందుకు అవసరమైన ప్రణాళికలు రూపొందించాలి.
 * మంచినీటి సమస్య, పారిశుధ్యం, అండర్‌గ్రౌండ్‌డ్రైనేజీ వంటివి ఏర్పాటు చేసేందుకు చర్యలు తీసుకోవాలి.
 * జిల్లాలో టూరిజంను సర్వీస్‌సెక్టారుగా పెట్టుకొని అందుకోసం కొన్ని భూములను గుర్తించాలి. అమరావతిలో బుద్ధస్తూపంతో పాటు, బీచ్ రీసార్ట్స్‌ను అభివృద్ధి చేసేందుకు ప్రణాళికలు సిద్ధం చేయాలి.
 * నిజాంపట్నం ఓడరేవును పోర్టుగా అభివృద్ధి చేసేందుకు తగిన చర్యలు తీసుకోవాలి.
 * జిల్లాలో ప్రభుత్వ సంస్థల ఏర్పాటుకు వీలుగా భూములు గుర్తించాలి.
 * జిల్లాలో టెండర్లు నిర్వహించిన రెండురీచ్‌లు మినహా మిగతా వాటిని డ్వాక్రా గ్రూపులకు అప్పగించి కలెక్టర్, ఎస్పీలు వారికి సపోర్టుగా ఉండాలి.
 * చెన్నై-కోల్‌కతా జాతీయ రహదారిని పది లేన్లుగా విస్తరించేందుకు భూసేకరణ చేపట్టాలి.
 * సీజనల్ వ్యాధులపై అధికారులు అప్రమత్తంగా ఉండటంతో పాటు ప్రజలకు అవగాహన కల్పించాలని సీఎం ఆదేశించినట్టు కలెక్టర్ కాంతిలాల్‌దండే వివరించారు.


  ‘‘ఒకప్పటి రాజధానిని త్యాగం చేయడంతో అభివృద్ధిలో వెనుకబడ్డాం. ప్యాకేజీలు, పదవులకు ఆశపడి మరోసారి మోసపోకూడదు. రాజధాని ద్వారానే అభివృద్ధి సాధ్యం. కర్నూలును రాజధానిగా ప్రకటించే వరకు సమష్టి పోరాటం సాగిద్దాం. ఒక్కటై గళం వినిపిద్దాం.’’ అని కర్నూలు ఎమ్మెల్యే ఎస్వీ మోహన్‌రెడ్డి పిలుపునిచ్చారు. శుక్రవారం నగరంలోని బిర్లా కాంపౌండ్‌లో ఉన్న శ్రీలక్ష్మి ఫంక్షన్ హాల్‌లో ఎస్వీ అధ్యక్షతన రౌండ్ టేబుల్ సమావేశం నిర్వహించారు.
  
  తెలుగుదేశం పార్టీ మినహా అన్ని రాజకీయ పార్టీల నాయకులు, విద్యార్థి, యువజన, ఉద్యోగ, ఉపాధ్యాయ, కార్మిక, కర్షక, బీసీ, ఎస్సీ, ఎస్టీ, మైనార్టీ సంఘాల నాయకులు హాజరై సంఘీభావం ప్రకటించారు. కర్నూలు రాజధానిని కోల్పోవడం వల్ల రాయలసీమకు జరిగిన నష్టంపై సుదీర్ఘంగా చర్చించి కర్నూలు రాజధాని సాధన కమిటీని ఎన్నుకున్నారు. ప్రైవేట్ విద్యా సంస్థల యాజమాన్యాల సంఘం రాష్ట్ర అధ్యక్షుడు వల్లపురెడ్డి జనార్ధన్‌రెడ్డి కమిటీ కన్వీనర్‌గా ఎన్నికయ్యారు.
  
  రాజధాని సాధన కోసం రాజకీయాలకు అతీతంగా అన్ని వర్గాల వారు ఉద్యమబాట పట్టాలని కర్నూలు రాజధాని సాధన కమిటీ పిలుపునిచ్చింది. శుక్రవారం స్థానిక బిర్లా కాంపౌండ్‌లోని శ్రీలక్ష్మీ ఫంక్షన్ హాల్‌లో కర్నూలు ఎమ్మెల్యే ఎస్వీ మోహన్‌రెడ్డి అధ్యక్షతన రౌండ్ టేబుల్ సమావేశం నిర్వహించారు. సమష్టిగా పోరాటం చేసి రాజధానిని సాధించుకుందామని ఎస్వీ మోహన్‌రెడ్డి పిలుపునిచ్చారు. రాజధాని ఏర్పాటుకు అవసరమైన అన్ని హంగులు కర్నూలులో ఉన్నాయని గుర్తు చేశారు. వేలాది ఎకరాల ప్రభుత్వ భూములు కర్నూలు చుట్టూ అందుబాటులో ఉన్నాయన్నారు. సమావేశంలో వక్తల ప్రసంగాలు యథాతథంగా..
  - కర్నూలు
  
  రాజధాని ద్వారానే అభివృద్ధి సాధ్యం
  రాజధాని ద్వారానే రాయలసీమ అభివృద్ధి సాధ్యమవుతుంది. అందుకోసం రాజకీయాలకు అతీతంగా ఉద్యమాన్ని కొనసాగించాల్సిన అవసరం ఉంది. రాజధాని కోల్పోవడంతో జరిగిన నష్టంపై రాయలసీమ ప్రజల్లో చైతన్యం తీసుకురాలి.
  - గౌరు చరితారెడ్డి, పాణ్యం ఎమ్మెల్యే
  
  ప్రభుత్వంపై ఒత్తిడి తేవాలి
  ముఖ్యమంత్రి చంద్రబాబు నాయుడు రాయలసీమ వాసి అయి ఉండి కూడా ఈ ప్రాంతాన్ని విస్మరిస్తున్నారు. కోస్తా ప్రాంతం అభివృద్ధి చెందిందని, అక్కడ రాజధాని అవసరం లేదు.  కర్నూలులో రాజధాని ఏర్పాటుకు ప్రభుత్వంపై ఒత్తిడి తేవాలి.
  - మణిగాంధీ, కోడుమూరు ఎమ్మెల్యే
  
  లక్షగళ ఘోష తరహాలో ఉద్యమం సాగాలి...
  రాజధాని సాధన కోసం  లక్షగళ ఘోష తరహాలో ఉద్యమం నిర్వహించాలి. అందుకోసం ప్రైవేటు విద్యా సంస్థల జేఏసీ అండదండలు ఎల్లప్పుడు ఉంటాయి.
  - వల్లపురెడ్డి జనార్దన్‌రెడ్డి, కర్నూలు రాజధాని సమితి కమిటీ కన్వీనర్
  
  జాతీయ స్థాయిలో ఒత్తిడి తేవాలి..
  రాజధాని సాధన కోసం జాతీయ స్థాయిలో ఒత్తిడి తెచ్చే విధంగా ఆందోళనలు ఉద్ధృతం చేయాలి. విద్యార్థి సంఘాలు మొదలుకొని వృద్ధుల సంఘాల వరకు అందరూ కూడా ఆందోళనలో పాలు పంచుకోవడం ద్వారా ప్రభుత్వంపై ఒత్తిడి తెవాలి.
  - చెన్నయ్య, లెక్చెరర్
  
  ప్రణాళికాబద్ధంగా ఉద్యమాలు...
  కర్నూలు రాజధాని సాధన కోసం ప్రణాళికాబద్ధంగా ఉద్యమాలు నిర్వహించాలి. రాష్ట్రాన్ని సమైక్యంగా ఉంచాలని గతంలో నిర్వహించిన ఆందోళన కార్యక్రమాల తరహాలోనే ఉద్యమించాల్సిన అవసరం ఉంది.
  - హేమలత, న్యాయవాదుల సంఘం జేఏసీ నాయకురాలు
  
  రాజధాని సాధనే లక్ష్యంగా ఉద్యమం....
  రాజధాని సాధనే లక్ష్యంగా ఉద్యమం సాగాలి. అందుకోసం జిల్లా కాంగ్రెస్ పార్టీ సంపూర్ణ మద్దతు ఉంటుంది. రాజధాని సాధన  కమిటీ పిలుపులో భాగంగా ఈనెల 11వ తేదిన తెలుగుతల్లి విగ్రహం వద్ద నుంచి కలెక్టరేట్ వరకు నిర్వహించే మహా ర్యాలీలో అన్ని వర్గాల ప్రజలు భారీ ఎత్తున పాల్గొనాలి.
  - సుధాకర్‌బాబు, ఎమ్మెల్సీ
  
  చారిత్రక అవసరం...
  పోగొట్టుకున్న రాజధానిని తిరిగి పొందడమనేది ఈ ప్రాంత ఆర్థిక, సాంఘిక, రాజకీయ అభ్యున్నతికి తోడ్పడుతుంది. అందుకే రాజధాని సాధన ఒక చారిత్రక అవసరం. జిల్లాలో ఆగస్టు 15న నిర్వహించే స్వాతంత్య్ర వేడుకల్లో కర్నూలును రాజధాని ప్రకటించాలి.
  - ఓంకార్, లోక్‌సత్తా నాయకులు
  
  కర్నూలు బంద్‌కు వ్యాపారుల మద్దతు
  కర్నూలు రాజధాని సాధన కోసం ఈనెల 13వ తేదీన చేపట్టనున్న కర్నూలు నగర బంద్‌కు వ్యాపార సంస్థల సంపూర్ణ సహకారం ఉంటుంది. స్వచ్ఛందంగా దుకాణాలు మూసుకుని ఉద్యమంలో పాలు పంచుకుంటాం.
  - విజయ్‌కుమార్ రెడ్డి, చాంబర్ ఆఫ్ కామర్స్ ఛైర్మన్
  
  ఎన్‌జీఓల సంపూర్ణ మద్దతు
  రాయలసీమ ప్రాంతాన్ని వదిలేసి గుంటూరు, విజ యవాడ ప్రాంతాన్ని రాజధానిగా చేయాలని ప్రయత్నించడం సమంజసం కాదు. కర్నూలు రాజధాని సాధన కోసం ఎన్‌జీఓల సంపూర్ణ మద్దతు ఉంటుంది. - వెంగళ్‌రెడ్డి, ఉద్యోగ ఉపాధ్యాయ కార్మిక జేఏసి ఛైర్మన్
  
  రాయలసీమ వ్యాప్తంగా ఉద్యమాలు...
  రాజధాని సాధన కోసం ఉద్యమం కర్నూలుకే పరిమితం కాకుండా సీమ వ్యాప్తం చేయాలి. ప్రభుత్వ ఉద్యోగులు కూడా రాజధాని కోసం ఉద్యమంలో పాల్గొనాలి.
  - లీలమ్మ, టౌన్ స్కూల్స్ అసోసియేషన్ నాయకురాలు
  
  అన్ని రాజకీయ పార్టీలు కలిసి రావాలి
  కర్నూలు రాజధానితో పాటు రాయలసీమ సమగ్రాభివృద్ధి కోసం పోరాటం తీవ్రతరం చేయాల్సిన అవసరం ఆసన్నమైంది. ఇందుకోసం అన్ని రాజకీయ పార్టీలు కలిసి రావాలి.
  - ప్రభాకర్‌రెడ్డి,
  సీపీఎం జిల్లా కార్యదర్శి
  
  రాజధానితో కూడిన స్వాతంత్య్ర వేడుకలు జరగాలి...
  కర్నూలులో జరిగే స్వాతంత్య్ర వేడుకలను రాజధానితో కూడిన వేడుకలుగా జరపాలి. కర్నూలు రాజధాని కోసం చేపట్టే ప్రతి ఆందోళన కార్యక్రమానికి జిల్లా కాంగ్రెస్ పార్టీ సంపూర్ణ మద్దతు ఉంటుంది.
  - బీవై.రామయ్య, డీసీసీ అధ్యక్షుడు
  
  ఉద్యమాన్ని ఉద్ధృతం చేద్దాం
  రాజధాని సాధన కోసం రాజకీయాలకు అతీతంగా ప్రజా ప్రతినిధులు, విద్యార్థులు, యువకుల భాగస్వామ్యంతో ఉద్యమాన్ని ఉద్ధృతం చేద్దాం. ప్రభుత్వంపై ఒత్తిడి తెచ్చేందుకు అన్ని వర్గాల ప్రజలు ఆందోళనకు కలిసి రావాలి.
  - కేవీ సుబ్బారెడ్డి, కేవీ సుబ్బారెడ్డి విద్యా సంస్థల చైర్మన్
  


 ►నియోజకవర్గానికి ఒకే గ్రామం
 ►ఎంపిక బాధ్యత ఎమ్మెల్యేలదే..
 ►వ్యవసాయ రంగంలోని పేదలకే లబ్ధి
 ►ప్రభుత్వం నుంచి ఆదేశాలు జారీ
 ►మళ్లీ మొదటికొచ్చిన ప్రక్రియ
 ముకరంపుర : గతంలో ప్రభుత్వం నుంచి వచ్చిన ఆదేశాల మేరకు జిల్లా అధికారయంత్రాంగం ఆగమేఘాలపై భూ పంపిణీ కార్యక్రమానికి కసరత్తు కొనసాగించింది. ఎస్సీ సబ్‌ప్లాన్ ప్రకారం నలభై శాతం ఎస్సీ జనాభా ఉన్న గ్రామాలను గుర్తించింది. కరీంనగర్ మినహా 48 మండలాల్లో గ్రామాలను ఎంపిక చేసి ప్రభుత్వ, ప్రైవేట్ భూములను గుర్తించింది. కేవలం ఎనిమిది మండలాల్లోనే సర్కారు భూములు అందుబాటులో ఉన్నట్టు తేల్చింది. మిగిలిన మండలాల్లో ప్రైవేట్ భూము లు కొనుగోలు చేయాలని నివేదిక సిద్ధం చేసింది. ఆయా గ్రామాల్లో అందుబాటులో ఉన్న ప్రైవేట్ భూములను ప్రస్తుత మార్కెట్  రేటు ప్రకారం కొనుగోలు చేయాలని పేర్కొంది. ఇందుకోసం సుమారు రూ.397.47 కోట్ల నిధులు అవసరమవుతాయని లెక్కగట్టింది.
 
 ఈ మేరకు ప్రభుత్వానికి ఒక ప్రాథమిక నివేదిక సమర్పించింది. సాధ్యాసాధ్యాలను గమనించిన సర్కారు మొదటి విడతగా నియోజకవర్గానికో గ్రామంతో సరిపెట్టాలని నిర్ణయించింది. ఈ మేరకు సోమవారం హైదరాబాద్ నుంచి ప్రభుత్వ ప్రత్యేక కార్యదర్శి ప్రదీప్‌చంద్ర, ముఖ్యమంత్రి కార్యాలయం జాయింట్ సెక్రటరీ స్మితాసబర్వాల్, పరిశ్రమల కమిషనర్ జయేష్‌రంజన్ జిల్లా అధికారులతో వీడియో కాన్ఫరెన్స్ నిర్వహించారు. భూ పంపిణీ ప్రక్రియలో చోటుచేసుకున్న పరిణామాల గురించి వివరించారు. ఆయా గ్రామాల్లో సాగుయోగ్యమైన భూమిని గుర్తించి తక్కువ ధరలో కొనుగోలు చేసేలా చర్యలు తీసుకోవాలని సూచించారు.
 
 ప్రభుత్వ మార్గదర్శకాల ప్రకారం భూ పంపిణీలో వ్యవసాయ రంగంలో ఉన్నవారినే లబ్ధిదారులుగా ఎంపిక చేయాలని స్పష్టం చేశారు. దీంతో అధికారయంత్రాంగం ఇప్పటిదాకా కొనసాగించిన కసరత్తుకు బ్రేక్‌పడింది. గ్రామాల వారీగా లబ్ధిదారులను గుర్తించడానికి ముగ్గురితో కూడిన బృందానికి డివిజన్ల వారీగా ఇస్తున్న శిక్షణను ఆపేశారు. దీంతో గ్రామాల ఎంపిక, లబ్ధిదారుల గుర్తింపు ప్రక్రియ మళ్లీ మొదటికి వచ్చింది.
  
 ఎంపిక బాధ్యత ఎమ్మెల్యేలదే..
 నియోజకవర్గానికో గ్రామానికి ఎంపిక చేయాల్సిన బాధ్యతను సర్కారు ఆయా నియోజకవర్గ ఎమ్మెల్యేలకు అప్పగించింది. దీంతో వారు ఒక గ్రామాన్ని ఎంపిక చేస్తే.. ఇతర గ్రామాల ప్రజల నుంచి వ్యతిరేక వచ్చే ప్రమాదముందని భావిస్తున్నారు. ఇప్పటివరకు ఎంపిక చేసిన గ్రామాల్లో ఎలాంటి మార్పులు ఉండవని అధికారులు పేర్కొంటున్నారు. ఆయా గ్రామాల్లో మలివిడతలో భూ పంపిణీ జరుగుతుందంటున్నారు.


 సాక్షి, రంగారెడ్డి జిల్లా ప్రతినిధి: ఐటీ కంపెనీలు, బహుళ జాతి సంస్థల పెట్టుబడులను ప్రోత్సహించేలా నూతన పారిశ్రామిక విధానాన్ని రూపొందిస్తున్న తెలంగాణ సర్కారు.. రాజధానికి చేరువలో ఉన్న మన జిల్లాపై ప్రత్యేక దృష్టి సారించింది. అంతర్జాతీయ విమానాశ్రయం, ఔటర్‌రింగ్ రోడ్డు, రైలు మార్గాలు అందుబాటులో ఉండడం జిల్లాకు ప్లస్‌పాయింట్‌గా మారింది. ఇదే అభిప్రాయాన్ని పారిశ్రామికవర్గాలు కూడా ప్రభుత్వం దృష్టికి తేవడంతో జిల్లాలో పరిశ్రమల స్థాపనకు అనువైన భూములను గుర్తించడంలో జిల్లా యంత్రాంగం తలమునకలైంది. ప్రతిష్టాత్మక ఐటీఐఆర్ ప్రాజెక్టు కూడా జిల్లాలోనే కొలువుదీరుతుండడంతో వీటన్నింటికి సరిపడా ల్యాండ్‌బ్యాంక్‌ను సమకూర్చుకునే బాధ్యత అధికార యంత్రాంగంపై పడింది.
 
 ఈ నేపథ్యంలోనే నెలరోజులుగా క్షేత్రస్థాయిలో సర్వే నిర్వహించిన రెవెన్యూ అధికారులు.. వివిధ సంస్థలు అట్టిపెట్టుకున్న ప్రభుత్వ భూములు, ఇప్పటి కీ వినియోగించుకోని భూముల జాబితాను కొలిక్కి తెచ్చారు. జిల్లాలో వివిధ కంపెనీలు/శాఖలకు బదలాయించిన, కేటాయించిన 39వేల ఎకరాల్లో సుమారు 10,852 ఎకరాల మేర నిరుపయోగంగా ఉన్నట్లు గుర్తించారు. హెచ్‌ఎండీఏ, ఏపీఐఐసీ, దిల్ తదితర సంస్థల వద్ద వృధాగా ఉన్న ఈ భూమి పరిశ్రమల తక్షణ కేటాయింపులకు వీలుగా ఉందని తేల్చారు.
 
  అదనంగా 6,706.34 ఎకరాలు
  ఆయా సంస్థలు వద్ద భూములను గుర్తించిన యంత్రాంగం.. జిల్లాలో ఎవరికీ కేటాయించని ప్రభుత్వ భూములపై సర్వే నిర్వహించింది. దీంతో జిల్లావ్యాప్తంగా 4,300 ఎకరాల మేర భూమి అందుబాటులో ఉన్నట్లు గుర్తించింది. అంతేగాకుండా మరో 7,986.36 ఎకరాలను కూడా క్షేత్రస్థాయిలో పరిశీలించగా.. ఈ రెండింటిలో 6,706.34 మేర ఎకరాలు పారిశ్రామిక అవసరాలకు అనువుగా  ఉందని టీఐఐసీ (తెలంగాణ పారిశ్రామిక  మౌలిక సదుపాయాల కల్పన సంస్థ) లెక్కతేల్చింది. 50ఎకరాల పైబడిన వాటిని మాత్రమే పరిగణనలోకి తీసుకొని ఈ మేరకు జాబితా రూపొందించింది. చాలా మండలాల్లో 50 ఎకరాల లోపు భూములు ఉన్నా, భవిష్యత్తు అవసరాల దృష్ట్యా ప్రజోపయోగాల కోసం నిర్ధేశించారు. జిల్లాలో మరో 20వేల ఎకరాలకుపైగా భూములు ఉండగా, దీంట్లో ఎక్కువశాతం కొండలు, గుట్టలతో ఉన్నట్లు పరిశీలనలో గుర్తించారు.


 * రాజధాని అంశం మరో విభజనకు బీజం కారాదు
 * మాజీ మంత్రి మైసూరారెడ్డి సూచన
  
 సాక్షి ప్రతినిధి, కడప: యాభై వేల ఎకరాల ప్రభుత్వ భూమి లభ్యమయ్యే ప్రాంతంలోనే నవ్యాంధ్రప్రదేశ్ రాజధాని ఏర్పాటు చేయాలని మాజీ మంత్రి డాక్టర్ ఎంవీ మైసూరారెడ్డి ప్రభుత్వానికి సూచించారు. రాష్ట్ర పునర్విభజన చట్టంలో కల్పించిన సౌలభ్యం వల్ల ప్రభుత్వ, అటవీ భూములు సేకరించడం సులభమన్నారు. కొత్త భూసేకరణ చట్టం వల్ల ప్రైవేట్ భూములను సేకరించడం తలకు మించిన భారమవుతుందన్నారు. రాష్ర్ట ఖజానా అంత భారాన్ని మోసే పరిస్థితుల్లో లేదని, కేంద్రం కూడా నిధులు సమకూర్చదని చెప్పారు.
  
 రాజధాని అంశం తెలుగుజాతి మరో విభజనకు బీజం కారాదన్నారు. రాజధాని అంశంపై ప్రధాన మంత్రి మోడీ,  ముఖ్యమంత్రి చంద్రబాబులకు ఈనెల 14న తాను రాసిన లేఖలను గురువారం కడప ప్రెస్‌క్లబ్‌లో ఏర్పాటుచేసిన విలేకరుల సమావేశంలో మైసూరారెడ్డి విడుదల చేశారు. ‘సింగపూర్ లాంటి రాజధాని నిర్మించుకుందామంటూ చంద్రబాబు పదేపదే చెబుతున్నారు.
 
 సింగపూర్ నగర వైశాల్యం లక్షా 50వేల ఎకరాలు. అంతటి మహానగరం కాకపోయినా అందులో సగం నిర్మించాలన్నా 50వేల ఎకరాల ప్రభుత్వ స్థలం అవసరమవుతుందని’ మైసూరారెడ్డి  పేర్కొన్నారు. ఆమేరకు భూములున్న చోట రాజధాని ఏర్పాటు చేయడం అమోదయోగ్యంగా ఉంటుందని చెప్పారు.


 * దేవాదాయశాఖపై సీఎం కేసీఆర్ ఆగ్రహం
 * దేవుడిమాన్యాలు కబ్జా అవుతుంటే ఏం చేస్తున్నారు ?
 * ఆస్తులు కాపాడేందుకు చర్యలు తీసుకోవాలి
  
  సాక్షి, హైదరాబాద్: ‘దేవుడి భూములు యథేచ్ఛగా అన్యాక్రాంతమవుతుంటే మీరేం చేస్తున్నారు... కళ్లు మూసుకున్నారా.. మీ నిర్లక్ష్యం వల్లే కదా.. వేల ఎకరాలు కబ్జా అయింది. వాటిని కాపాడలేనప్పుడు దేవాదాయశాఖకు కమిషనర్, ఇంత పెద్ద వ్యవస్థ ఎందుకు, అసలు దేవాదాయశాఖ చట్టాలుండి లాభమేంటి’ తెలంగాణ ముఖ్యమంత్రి చంద్రశేఖరరావు దేవాదాయశాఖ అధికారులపై ఆగ్రహం వ్యక్తం చేశారు. ప్రభుత్వ భూముల కబ్జాపై కొన్ని రోజులుగా తీవ్రంగా స్పందిస్తున్న కేసీఆర్ తాజాగా దేవాలయ భూములపై దృష్టి సారించారు.
  
  ఈ మేరకు ఆయన సోమవారం దేవాదాయశాఖ కార్యదర్శి వెంకటేశ్వరరావు, ఇన్‌ఛార్జి కమిషనర్ జ్యోతిలను పిలిపించి చర్చించారు. గతంలో మం త్రులు దేవాదాయశాఖను పూర్తిగా విస్మరించడం, అధికారుల అవినీతి ఫలితంగా దేవుడి భూములు అన్యాక్రాంతమయ్యాయి. తెలంగాణలో దేవాదాయశాఖకు దాదాపు 84 వేల ఎకరాల భూమి ఉన్నట్టు రికార్డులు చెబుతున్నాయి. వీటిల్లో చాలావరకు లీజులు, ఇతరత్రా వినియోగంలో ఉండ గా, ఖాళీగా ఉన్నవాటిల్లో దాదాపు 17 వేల ఎకరాల భూమి కబ్జాకు గురైంది. దీన్ని  సీఎం తీవ్రంగా తీసుకున్నారు. రెండు మూడు రోజుల్లో  ఆలయాలవారీగా పూర్తి సమాచారం తన ముందుంచాలని ఆదేశించారు.
  
  
  దేవాలయాల ఆదాయం పెంచేందుకు చర్యలు తీసుకోవడంలో విఫలమవుతూ వచ్చారని, కనీసం దేవుడి భూములను కాపాడుకోవాలనే స్పృహ కూడా ఎందుకు లేదో తనకర్థం కావడంలేదని అసహనం వ్యక్తం చేశారు. అసలు ఏ గుడి పరిధిలో ఎంత భూమి ఉందో తెలుసా అంటూ ప్రశ్నించారు. దీంతో ఇన్‌ఛార్జి కమిషనర్ జ్యోతి ఆయనకు దేవాలయాల ఆస్తుల గురించి వివరించారు. దేవాదాయశాఖ నిర్వహిస్తున్న రికార్డుల్లో ఇప్పటికీ కొన్ని భూముల వివరాలు నమోదు కాలేదని, రెవెన్యూ విభాగంతో సరైన సమన్వయం లేకపోవడమే దీనికి కారణమని ఆమె వివరించారు. రికార్డుల్లో దేవాలయ భూములుగా స్పష్టంగా పేర్కొనకపోవడాన్ని ఆసరా చేసుకుని కొందరు దేవుడి భూములను కబ్జా చేస్తున్నారని చెప్పారు. రెండు విభాగాల మధ్య సమన్వయం తెచ్చి దేవుళ్ల స్థలాలను కాపాడాల్సిన అవసరం ఉందని సీఎం పేర్కొన్నారు. ఆ భూములకు సంబంధించి గుళ్లకు పట్టాదారుపాసుపుస్తకాలు అందించాలన్నారు.
  
  త్వరలో ధార్మిక పరిషత్తు ఏర్పాటు...
  ధార్మిక పరిషత్తు ఏర్పాటు చేయాలని సీఎం కేసీఆర్ అధికా రులను ఆదేశించారు. ఈ మేరకు చర్యలు తీసుకోవాలని ముఖ్యకార్యదర్శి వెంకటేశ్వరరావుకు సూచించారు. దేవాలయ కమిటీలను పరిషత్తు పరిధిలోకి తెచ్చే అంశాన్ని పరిశీలిస్తున్నారు.


 ఎర్రబల్లి(భీమదేవరపల్లి): కరీంనగర్, వరంగల్ జిల్లాల సరిహద్దుల్లోని వందలాది ఎకరాల ప్రభుత్వ భూములు కబ్జాకు గురవుతున్నాయి. భీమదేవరపల్లి మండలం ఎర్రబల్లి, కొత్తకొండ, గట్లనర్సింగపూర్ తదితర గుట్టలను కొల్లగొట్టేందుకు ఇప్పటికే బడా పారిశ్రామికవేత్తలు, రాజకీయ నాయకులు దరఖాస్తులు సమర్పించుకున్నారు. తాజా గా వరంగల్ జిల్లా ధర్మసాగర్ మండలం దేవునూర్, భీమదేవరపల్లి మండలం ఎర్రబల్లి గ్రామాల సరిహద్దులోని భూములును ఆక్రమించుకుంటున్నారు.
  
  భీమదేవరపల్లి మండలం ఎర్రబల్లి, కొత్తపల్లి, ఎల్కతుర్తి మండలం దామెరతో పాటు వరంగల్ జిల్లా ధర్మాసాగర్ మండలం దేవునూర్, నాగారం, సోమదేవరపల్లి గ్రామాల శివారులో వేలాది ఎకరాల భూముల్లో విలువైన ఇనుపరాతి గుట్టలు విస్తరించి ఉన్నాయి. ఇనుపరాతి గుట్టలను విశాఖ ఉక్కు పరిశ్రమకు కేటాయిస్తూ అప్పటి సీఎం కిరణ్‌కుమార్‌రెడ్డి ఉత్తర్వులు జారీ చేశా రు. దాంతో ఆగ్రహించిన టీజేఏసీ నాయకులు ప్రభు త్వ నిర్ణయాన్ని వ్యతిరేకిస్తూ జేఏసీ చైర్మన్ కోదండరామ్ నేతృత్వంలో గతేడాది మండలంలోని ఎర్రబల్లి ఇనుపరాతి గుట్టల వద్ద నుంచి బస్సుయాత్ర చేపట్టారు. అనంతరం జరిగిన పరిణామాల నేపథ్యంలో ప్రభుత్వం త మ నిర్ణయాన్ని తాత్కాలికంగా పక్కనపెట్టింది.
  
  ఇనుపరాతి గుట్టలను ఉక్కు పరిశ్రమకు కేటాయిస్తారనే విష యం తెలువడంతో కొందరు బడా పారిశ్రామికవేత్తల చూపు ఈ గుట్టలపై పడింది. ఎర్రబల్లి, కొత్తపల్లి శివారులోని గుట్టల కింద గల వందలాది ఎకరాల భూముల ను తక్కువ ధరకు రైతుల వద్ద నుంచి కొనుగోలు చేసి.. గుట్టల సమీపం వరకు ఆక్రమిస్తున్నా రు. ఇదే తరహా లో ఇటీవల మండలంలోని ఎర్రబల్లి, వరంగల్ జిల్లా ధర్మసాగర్ మండలం దేవునూర్ ప్రాంతాల్లోని సుమా రు 500 ఎకరాల భూమిలో వరంగల్‌కు చెందిన ఓ వ్యాపారి ట్రస్ట్‌ను నెలకొల్పేందుకు ప్రణాళికలు సిద్ధం చేసుకున్నాడు. ఇటీవలే ఆ భూమిని రాత్రికి రాత్రే జేసీబీతో చదును చేయించాడు.
  
  విషయం తెలుసుకున్న ఎర్రబెల్లి గ్రామస్తులు సర్పంచ్ కాలేరు చినబాబుకు చె ప్పడంతో ఆయన చదును చేసే పనులను నిలిపివేయిం చారు. అనంతరం తిరిగి చదును చేసే పనులు కొనసాగాయి. అయితే.. ఈ భూములను తాము కొనుగోలు చే శామని, ఇక్కడ ట్రస్ట్‌ను నెలకొల్పాతామని సద రు వ్యా పారి చెబుతున్నాడు. కానీ ఈ భూమి ఎక్కడిది, ఏ సర్వేనంబర్లది అనే విషయంపై ఇప్పటికీ రెవెన్యూ అధికారు లు విచారణ జరపకపోవడం పలు అనుమానాలకు తా విస్తోంది. సదరు వ్యాపారి చదును చేసింది పట్టా భూ ములా.. ప్రభుత్వ భూమాలా..? అనేది తేలాల్సింది.
  


 సాక్షి, రంగారెడ్డి జిల్లా ప్రతినిధి: ప్రభుత్వ భూములు అన్యాక్రాంతం కాకుండా కొత్త ప్రభుత్వం ప్రత్యేక చొరవ తీసుకుంటోంది. ఒకవైపు నిర్దేశిత అవసరాలకు కేటాయించిన భూములను వినియోగించుకోకుండా అట్టిపెట్టుకున్నవాటిని వెనక్కి తీసుకుంటూనే.. మరోవైపు విలువైన సర్కారు స్థలాలు అక్రమార్కుల గుప్పిట్లోకి వెళ్లకుండా చర్యలు చేపడుతోంది. ఇప్పటికే జిల్లా వ్యాప్తంగా అసైన్డ్, సీలింగ్, యూఎల్‌సీ భూములు సహా వివిధ సంస్థలకు కేటాయించిన స్థలాల వివరాలను సేకరించింది.
 
 వీటిని కాపాడేందుకు సమగ్ర ప్రణాళిక రూపొందిస్తున్న యంత్రాంగం... కొత్త పరిశ్రమలకు ఈ భూములను కేటాయించాలని నిర్ణయించింది. నూతన పారిశ్రామిక విధానంతో పెట్టుబడులు వెల్లువలా వస్తాయని తెలంగాణ ప్రభుత్వం భావిస్తోంది. రాయితీలు, భూ కేటాయింపుల్లో సరళీకృత విధానాలు అవలంబిస్తే పారిశ్రామికంగా అభివృద్ధి సాధించవచ్చని ఆశిస్తోంది. ఈ నేపథ్యంలో ప్రభుత్వ భూముల స్థితిగతులపై సమీక్షించేందుకు మంగళవారం భూ పరిపాలన ప్రధాన కమిషనర్ ఎస్.కె.సిన్హా జిల్లా కలెక్టరేట్‌కు రానున్నారు.
 
 జిల్లావ్యాప్తంగా 5.21 లక్షల ఎకరాల ప్రభుత్వ భూమి ఉండగా, వీటిలో భూమిలేని నిరుపేదలకు సుమారు 1.76లక్షల ఎకరాలను పంపిణీ చేశారు. మరో 39వేల ఎకరాలను పారిశ్రామిక అవసరాలు, ప్రతిష్టాత్మక సంస్థల ఏర్పాటు, ప్రజోపయోగాలకుగాను ఏపీఐఐసీ, హెచ్‌ఎండీఏ, రాజీవ్ స్వగృహ, దిల్ తదితర సంస్థలకు బదలాయించారు. ఇలా జరిగిన భూ పందేరంలో ఎంత మేర వినియోగంలోకి వచ్చింది.. ఎంత చేతులు మారింది.. ఎంత మేర న్యాయ వివాదంలో చిక్కుకుంది..  కబ్జాలో ఉన్నదెం త.. క్లియర్‌గా ఉన్నదెంత..? తది తర అంశాలపై జిల్లా యంత్రాంగం  పక్షం రోజులుగా కసరత్తు చేస్తోంది.  క్షేత్రస్థాయిలో సర్వే నిర్వహించి ఖాళీగా ఉన్న భూముల వివరాలను లెక్కగట్టింది.
 
  10వేల ఎకరాలు క్లియర్!
  నగర శివార్లలో వివిధ సంస్థలకు 39వేల ఎకరాల భూమిని కేటాయించారు. దీంట్లో సుమారు 23వేల ఎకరాలు ఆయా సంస్థలు వినియోగించుకుంటున్నట్లు తాజాగా తేల్చింది. మిగతా దాంట్లో 16వేల ఎకరాలు అట్టిపెట్టుకోగా.. ఆరు వేల ఎకరాల న్యాయపరమైన చిక్కుల్లో ఉందని సర్వేలో గుర్తించింది. కాగా, తక్షణ కేటాయింపులకు అనువుగా 10,916 ఎకరాలు ఉన్నట్లు స్పష్టమైంది.
 
  ఐటీ ఆధారిత, పరిశ్రమల తాకిడికి అనుగుణంగా తొలి దశలో వీటిని కేటాయించాలని, మలి విడతలో మిగతా చోట్ల ఖాళీగా ఉన్న సర్కారు భూములను గుర్తించాలని జిల్లా యంత్రాంగం నిర్ణయించింది. కేసీఆర్ సర్కారు రంగారెడ్డి జిల్లాలోని భూములపై నజర్ పెట్టడంతో అధికారులు ఇతర పనులు పక్కనపెట్టి.. వీటిని గణించే పనిలో నిమగ్నమయ్యారు.


 
     బంజర్, పోరంబోకు భూముల వద్ద బోర్డుల ఏర్పాటు
 
      రెవెన్యూ అధికారులకు కలెక్టర్ ఆదేశం
 
 విశాఖ రూరల్  : ప్రభుత్వ భూములకు రక్షణ కల్పించాలని కలెక్టర్ సాల్మన్ ఆరోఖ్యరాజ్ రెవెన్యూ అధికారులను ఆదేశించారు. కలెక్టరేట్ సమావేశ మం దిరంలో రెవెన్యూ అధికారులతో బుధవారం సమీక్షా సమావేశం నిర్వహిం చారు. ప్రభుత్వ భూములు ఆక్రమణలకు గురికాకుండా, రక్షణ కల్పించాలని చెప్పి ఏడాది అవుతున్నా కొన్ని మండలాల్లో సర్వేలు నిర్వహించకపోవడంపై అసంతృప్తి వ్యక్తం చేశారు. రెవెన్యూ అధికారులు జాబ్ చార్ట్ విధిగా నిర్వర్తించాలని చెప్పారు. గ్రా మాల్లోని బంజర, పోరంబోకు భూములను గుర్తించి, అక్కడ ప్రభు త్వ భూమి అని బోర్డులు పెట్టాలని సూచించారు.
  
 ఆర్‌ఐలు గ్రామాలను సందర్శించాలి
 
 ప్రతీ నెలా ఆర్‌ఐలు గ్రామాలను సందర్శించి ఆక్రమణలపై పీరియాడికల్ రిపోర్టును పంపించాలని చెప్పారు. భూ ఆక్రమణలకు సంబంధించి పేపర్లలోను, నేరుగా ఫిర్యాదు వస్తే తప్పా ఆర్‌ఐలు ముందుగా గుర్తించడం లేదని ఆగ్రహం వ్యక్తం చేశారు. లేఅవుట్లకు సంబంధించి ప్రభుత్వానికి రావాల్సిన పన్నులను వసూలు చేయాలన్నారు. మండలాల వారీగా ప్రస్తుతం ఉన్నవి, కొత్తగా వేసిన లేఅవుట్ల సంబంధించి వివరాలను ఈ నెల 15లోగా సమర్పించాలని ఆదేశించారు.
 
  ‘భూ’ ఫిర్యాదులే ఎక్కువ
 
  ప్రజావాణి, డయల్ యువర్ కలెక్టర్ కార్యక్రమానికి భూ తగాదాలు, పట్టాదారు పాస్‌పుస్తకాలు తదితర సమస్యలపై పదే పదే ఫిర్యాదులు వస్తున్నాయని జేసీ ప్రవీణ్‌కుమార్ తెలిపారు. తహశీల్దార్ల కార్యాలయాల్లో ఉన్న ఫిర్యాదులను పరిశీలించి వెంటనే పరిష్కరించాలని ఆదేశించారు. సర్కారు భూముల రక్షణకు సర్వే పూర్తి చేసి అడంగల్ అప్ డేట్ చేయాలని సూచించారు. జమాబంది, నీటి తీరువా వసూళ్లలో నిర్దేశించిన లక్ష్యాలను పూర్తి చేయాలన్నారు. ప్రభుత్వ భూముల ఆక్రమణకు సంబంధించిన వివరాలు ఈనెల 17లోగా సమర్పించాలని ఆదేశించారు. గ్రామాల్లో ప్రభుత్వ భూములను గుర్తించినపుడు వీఆర్వో వద్ద సర్టిఫికెట్ తీసుకోవాలని చెప్పారు. సమావేశంలో ఏజేసీ వై.నరసింహారావు తదితరులు పాల్గొన్నారు.
  


 ప్రభుత్వ నిరుపేదలకు పంపిణీ చేసిన భూములు పెద్దల వశమవుతున్నాయి. పేదలను ఆర్థికంగా, సామాజికంగా ముందుకు తీసుకెళ్లాలనే బృహత్తర ఆశయం గాడి తప్పుతోంది. పేదల అవసరాన్ని ఆసరగా చేసుకుని చౌకగా సర్కారు భూముల్ని కొట్టేస్తున్నారు. సిరిసిల్ల శివారులో రూ.15కోట్ల విలువైన ప్రభుత్వ భూములు పరాధీనమయ్యాయి. పేదలు పేదలుగానే ఉండిపోగా పెద్దలు మాత్రం ప్రభుత్వ భూములను దక్కించుకొని దర్జాగా వ్యవసాయం చేస్తున్నారు.
  
 సిరిసిల్ల : మండలంలోని పెద్దూరులో పధ్నాలుగేళ్ల క్రితం 700ఎకరాల ప్రభుత్వ భూములను 180మంది పేదలకు పంచారు. సర్వే నంబరు 405లో 400 ఎకరాలు, సర్వేనంబరు 408లో 300ఎకరాలను పంపిణీ చేసి పట్టాలు ఇచ్చా రు. భూములు పొందిన వారిలో పెద్దూరుకు చెందిన దళితులు, సిరిసిల్ల పట్టణానికి చెంది నవారు కొందరున్నారు. చిన్నబోనాల శివారులోని సర్వే నంబరు 164లో 210 ఎకరాల అసైన్డ్ భూముల్ని భూమి లేని పేదలకు అందించారు. అంకుసాపూర్‌లో సర్వే నంబరు 1129లో రెండెకరాలు పరాధీనమయ్యాయి.
 
 ఈ భూములన్నీ సిరిసిల్ల పట్టణానికి శివారులోనే ఉండడం విశేషం. పేదలు ఈ భూముల తో ఆర్థికంగా స్థిరపడాలనే సర్కారు లక్ష్యం గాడితప్పింది. సాగుకు యోగ్యంగా లేని భూముల్ని ప్రభుత్వం ఇవ్వడంతో పేదలు ఆ భూముల్ని సాగుచేసుకునే ఆర్థిక స్థోమత లేక వదిలేశారు. ఇదే అదనుగా కొందరు ఆర్థికం గా ఉన్నవారు రూ.5000 నుంచి రూ.10వేల వరకు చెల్లిస్తూ... పేదల ఆర్థిక అవసరాన్ని ఆసరగా చేసుకునే ఆ భూముల్ని చౌకగా కొనుగోలు చేశారు.
 
 పెద్దూరు పెద్దచెరువు పైభాగం లో లచ్చయ్య అనే వ్యక్తి తన పేరిట, భార్య పేరిట, తమ్ముడి పేరిట, బావ పేరిట, చెల్లెలు పేరిట ఇలా 30 ఎకరాలు కొనుగోలు చేశారు. బోర్లు వేసి సాగు చేస్తున్నారు. ఇలా పేదల భూములను పెద్దలు కబ్జా చేశారు. చిన్నబోనాలలో కోలపురం ఎల్లయ్య, భూంపేరు నాగ య్య, పూడురి రాజయ్య, దువ్వ అంజయ్య, గుర్రం రామస్వామి, బాలయ్య, రాజయ్యల భూములు పెద్దలకు చేరిపోయాయి. గుట్టల దగ్గర ఉన్న భూమిని సిరిసిల్లకు చెందిన ఓ వ్యక్తి కొనుగోలు చేసి బోర్లువేసి సాగుచేస్తున్నాడు. పట్టణ శివారుల్లో ఈ భూములుండడంతో ఒక్కో ఎకరం విలువ ఇప్పుడు రూ.5 నుంచి రూ.10లక్షల పలుకుతోంది. పరాధీమైన భూముల విలువ ఇప్పుడు రూ.పదిహేనుకోట్ల మేరకు ఉంటుందని అంచనా.
  
 చట్టం వారికి చుట్టమే..
  ప్రభుత్వ భూములను కొనడం, అమ్మడం నేరం. కానీ రెవెన్యూ అధికారుల అండదండలతో అక్రమాలన్నీ సక్రమాలైపోతున్నాయి. పట్టాలు పొందిన పేదలే ఆ భూమి మాకు వద్దంటూ రాజీనామా చేస్తూ... కొనుగోలు చేసిన వారికి విరాళంగా అందించినట్లు రికార్డులు సృష్టిస్తున్నారు. కొందరు అధికారులు నిబంధనలు పేర్కొంటూ భూములు కొన్న వారికి నోటీసులిచ్చి కాసులు దండుకున్నట్లు ఆరోపణలున్నాయి. ఆ భూములకు పాస్‌బుక్కులు పొంది, బ్యాంకు రుణాలు పొందినట్లు సమాచారం.
  
 విచారణ జరిపి చర్యలు తీసుకుంటాం
 ఆ భూముల సర్వేనంబర్ల వారీగా విచారణ చేస్తాం. మండలంలోని ప్రభుత్వ భూములను ఈ మధ్య పరిశీలించాను. భూముల వివరాలను పూర్తిస్థాయిలో సేకరిస్తున్నాం. పేదలకు ఇచ్చిన పట్టాల వివరాలను పరిశీలించి కబ్జాలో ఎవరున్నారో తెలుసుకుని, పూర్తి స్థాయిలో విచారణ జరిపి తప్పకుండా చర్యలు తీసుకుంటాం.        - మన్నె ప్రభాకర్, తహశీల్దార్


 
       సబ్‌కలెక్టర్ ఆదేశాలు జారీ
 
      ఖాదర్‌షరీఫ్ హయాంలో ఇచ్చిన పట్టాలపై విచారణ
 
      పీలేరు తహశీల్దార్ కార్యాలయ అధికారులు, సిబ్బందిపై ఆగ్రహం
 
      స్థానికేతరులకు ఖరీదైన స్థలాలు ఎలా ఇస్తారు?
 
      అధికారికంగా వెయ్యి, అనధికారికంగా వందల్లో పట్టాలు పంపిణీ
 
      ఆక్రమణదారులు, దళారుల్లో ఆందోళన
 
      భూ సంతర్పణను తీవ్రంగా వ్యతిరేకించిన వైఎస్సార్‌సీపీ
 
  పీలేరు, న్యూస్‌లైన్: నిబంధనలకు వ్యతిరేకంగా అధికారం మాటున కోట్లాది రూపాయలు విలువచేసే ప్రభుత్వ భూముల సంతర్పణపై  మదనపల్లె సబ్‌కలెక్టర్ భరత్ నారాయణగుప్త విచారణకు ఆదేశించారు. శుక్రవారం సబ్‌కలెక్టర్ పీలేరు తహశీల్దార్ కార్యాలయాన్ని అకస్మికంగా సందర్శించారు. ఈ సందర్భంగా ఆయన పలువురు అధికారులు, సిబ్బందిపై తీవ్ర ఆగ్రహం వ్యక్తం చేశారు. కోట్లు విలువ చేసే ప్రభుత్వ భూములను అనర్హులు, స్థానికేతరులకు ఎలా పంపిణీ చేశారని నిలదీశారు.
 
 నిబంధనలను పట్టించుకోకుండా ఇష్టానుసారం వ్యవహరించడమేంటని మండిపడ్డారు. ఇప్పటి వరకూ పంపిణీచేసిన పట్టాలపై విచారణ జరిపి నివేదిక ఇవ్వాలని ఆదేశించారు. రెండు సంవత్సరాల్లో పీలేరు మండలంలో దాదాపు వంద కోట్ల ప్రభుత్వ స్థలాలు అన్యాక్రాంతమయ్యాయని వైఎస్సార్ కాంగ్రెస్ పార్టీ తరపున రాజంపేట ఎంపీగా గెలుపొందిన పెద్దిరెడ్డి మిథున్‌రెడ్డి, పీలేరు ఎమ్మెల్యేగా ఎన్నికైన చింతల రామచంద్రారెడ్డి, మాజీ మంత్రి, పుంగనూరు ఎమ్మెల్యేగా ఎన్నికైన పెద్దిరెడ్డి రామచంద్రారెడ్డి తదితరులు గతంలో ఆరోపించారు.
 
 పీలేరులో జరిగిన భూ సంతర్పణపైనా జిల్లా ఉన్నతాధికారులతోపాటు లోకాయుక్తలో కేసువేశారు.   ఇళ్ల స్థలాలు. భూ పంపిణీలపై పూర్తి స్తాయి విచారణ చేసి నివేదిక ఇవ్వాలని మదనపల్లె సబ్‌కలెక్టర్ భరత్ నారాయణగుప్త అధికారులను ఆదేశించారు. పీలేరుకు వచ్చిన సబ్‌కలెక్టర్‌ను పంచాయతీ కార్మికులు, పలువురు బాధితులు కలిశారు.  తమకు కాకుండా వేరేవారికి పట్టాలు ఇచ్చారని ఫిర్యాదు చేశారు.
  
 ఆరోపణలు ఇవే..
 
 మాజీ సీఎం నల్లారి కిరణ్‌కుమార్‌రెడ్డి హయాంలో పీలేరు తహశీల్దార్‌గా ఎం ఖాదర్‌షరీఫ్ జూలై 16, 2012 నుంచి ఫిబ్రవరి 20, 2014 వరకు పనిచేశారు. ఈ కాలంలో గతంలో ఎన్నడూ లేని విధంగా కోట్లు  విలువ చేసే ప్రభుత్వ భూములు కర్పూర హారతిలా కరిగిపోయాయని  తీవ్ర స్థాయిలో ఆరోపణలు వచ్చాయి. నిబంధనలకు విరుద్ధంగా పీలేరు పట్టణంతోపాటు చుట్టుపక్కల ఖరీదైన ప్రభుత్వ భూములు అన్యాక్రాంతమయ్యాయి. తీవ్ర స్థాయిలో ఆరోపణలు వచ్చినా మొక్కుబడి చర్యలతో సరిపెట్టారు.
 
 పీలేరు పట్టణంతో పాటు, పట్టణ శివారు ప్రాంతమైన నాగిరెడ్డి కాలనీలో కోట్లాది రూపాయల విలువైన ప్రభుత్వ భూములు రాత్రికి రాత్రే అప్పటి అధికార పార్టీ నేతలు, వారి అనుచరులు ఆక్రమించుకున్నారు. మరోవైపు మండలస్థాయిలో అధికారులు, వారి కుటుంబ సభ్యులు, బంధువుల పేరిట బినామీ పట్టాలు మంజూరు చేశారని ఆరోపణలు ఉన్నాయి.   క ళ్లముందు అక్రమ కట్టడాలు వెలుస్తున్నా అధికారుల చేతివాటంతో ఏమీచేయలేక మిన్నకుండిపోయారు. అలాగే తిరుపతి మార్గంలో జాతీయ రహదారికిరువైపులా  ఆక్రమణలు జరిగాయని ఆరోపణలు వచ్చాయి.
  
 చిత్తూరు మార్గంలో ఆటోనగర్, కోళ్లఫారం మిట్టన వెలసిన ఇందిరమ్మ కాలనీలో ఇళ్ల స్థలాలు ఆక్రమణకు గురైనా పట్టించుకోలేదు. మదనపల్లె మార్గంలో పెద్దిరెడ్డి రామచంద్రారెడ్డి కాలనీలో అడ్డూ అదుపులేకుండా స్థలాలు ఆక్రమణకు గురయ్యాయి. పలువురు నిరుపేదలకు ఇచ్చిన స్థలాలను సైతం ఇక్కడ ఆక్రమించుకున్నారని ఆరోపణలు వచ్చినా రెవెన్యూ అధికారులు పట్టించుకోలేదు. పట్టణానికి సమీపంలో ఖరీదైన ప్రభుత్వ భూములకు బినామీ పట్టాలు సృష్టించి ఆక్రమించుకున్నారని వైఎస్సార్ కాంగ్రెస్ పార్టీ నేతలు ఆరోపించారు. కుల సంఘాలు పేరిట మంజూరు చేసిన ఇళ్ల స్థలాల్లో స్థానికేతరులకు ఇచ్చారనే ఆరోపణలు వచ్చాయి.
    
 అధికారికంగా దాదాపు వెయ్యి పట్టాలు పంపిణీ చేయగా, అనధికారికంగా వందల సంఖ్యలో అక్రమంగా పట్టాలు పుట్టుకొచ్చాయని ఆరోపణలు లేకపోలేదు. వీవర్స్, రజకులు, నాయిబ్రాహ్మణులు, వెలుగు, ఐకేపీ, ఎమ్మార్పీఎస్, పంచాయతీ వర్కర్లు, ఆటో వర్కర్లు, తదితరులకు మంజూరు చేసిన పట్టాల్లో అర్హులైన స్థానికులకు కాదని,  స్థానికేతరులు ఎక్కువగా ఇచ్చారని ఆరోపిస్తూ జిల్లా ఉన్నతాధికారులకు ఫిర్యాదు చేశారు.