అమెరికా డాలర్‌తో పోలిస్తే రూపాయి(Rupee) మారకం విలువ ఇటీవల భారీగా క్షీణిస్తోంది. అయినా అంతర్జాతీయ మార్కెట్‌లో ఇతర పోటీ కరెన్సీలతో పోలిస్తే రూపాయి ఇంకా అధిక విలువ కలిగి ఉందని రిజర్వ్ బ్యాంక్ ఆఫ్ ఇండియా (RBI) మాజీ గవర్నర్‌ రఘురామ్‌ రాజన్(Rajan) పేర్కొన్నారు. దావోస్‌లో జరిగిన వరల్డ్ ఎకనామిక్ ఫోరం(WEF)లో రూపాయి భవిష్యత్తు గమనంపై తన అభిప్రాయాలు పంచుకున్నారు.ప్రత్యేకంగా చూడాల్సిన అవసరం లేదుఅమెరికా డాలరుతో పోలిస్తే రూపాయి మారకం విలువ క్షీణించడాన్ని ప్రత్యేకంగా చూడాల్సిన అవసరం లేదని రాజన్‌ అన్నారు. అనేక ఇతర కరెన్సీలు కూడా ఇదే ధోరణిని ఎదుర్కొంటున్నాయని తెలిపారు. ఇతర కరెన్సీలతో పోలిస్తే రూపాయి రియల్ ఎఫెక్టివ్ ఎక్స్ఛేంజ్ రేట్ (ఆర్ఈఈఆర్) ఇప్పటికీ అధిక విలువను సూచిస్తోందన్నారు. ఈ ఓవర్ వాల్యుయేషన్ రూపాయి మరింత పతనం అయ్యేందుకు అవకాశం ఉన్నట్లు సూచిస్తుందని అంచనా వేశారు. ప్రపంచవ్యాప్తంగా ఇతర కరెన్సీలతో పోలిస్తే రూపాయి అధిక విలువ కలిగి ఉండడం వల్ల భవిష్యత్తులో భారతీయ ఎగుమతులకు ప్రయోజనం చేకూరుతుందని తెలిపారు.ఆర్‌బీఐ జోక్యం తగదురూపాయి విలువను కాపాడేందుకు కరెన్సీ మార్కెట్లో ఆర్బీఐ జోక్యం చేసుకోవాల్సిన అవసరం లేదని రాజన్ అన్నారు. ప్రాథమిక ఆర్థిక సర్దుబాట్లకు ప్రతిస్పందనగా, కరెన్సీ విలువను పెంచేలా కేంద్ర బ్యాంకులు జోక్యం చేసుకోవడం మానుకోవాలని, స్వల్పకాలిక అస్థిరతను అరికట్టడానికి మాత్రమే చర్యలు తీసుకోవాలని ఆయన అభిప్రాయపడ్డారు. రూపాయి క్షీణత, అమెరికా డాలర్ బలపడటం, ఇతర ప్రపంచ ఆర్థిక అంశాలు సహజ మార్కెట్ ప్రతిస్పందనగానే భావించాలని రాజన్ తెలిపారు.ఇదీ చదవండి: ఇన్ఫీలో మూర్తి కుటుంబం కంటే రెట్టింపు వాటాఅమెరికా కరెన్సీ యుద్ధంప్రపంచ కరెన్సీలను అమెరికా ఆయుధంగా మార్చుకునే అవకాశం ఉందని రాజన్ హెచ్చరించారు. ఇతర దేశాలపై ఆర్థిక సుంకాలు విధించడానికి అమెరికా డాలర్ ఆధిపత్యాన్ని ఒక సాధనంగా ఉపయోగించుకోవచ్చని ఆయన ఆందోళన వ్యక్తం చేశారు. కరెన్సీలపై పెరుగుతున్న ఈ ఆర్థిక యుద్ధం ప్రపంచవ్యాప్తంగా కేంద్ర బ్యాంకర్లకు ఆందోళన కలిగిస్తుందన్నారు.

భారత్ అభివృద్ధి చెందుతున్నప్పటికీ.. తగినన్ని ఉద్యోగాలు సృష్టించడం లేదని రిజర్వ్ బ్యాంక్ మాజీ గవర్నర్ రఘురామ్ రాజన్ అన్నారు. ఉపాధి కల్పనకు కార్మిక ఆధారిత పరిశ్రమలను ప్రోత్సహించడంపై ప్రభుత్వం దృష్టి పెట్టాలని సూచించారు.దిగువ స్థాయిలో వినియోగం పెరుగుతున్నప్పటికీ కరోనా మహమ్మారి పూర్వ స్థాయి నుంచి పూర్తిగా కోలుకోలేకపోతున్నారు. దేశంలో నిరుద్యోగం పోవాలంటే.. ఉపాధి కల్పన తప్పకుండా జరగాలి. తయారీ రంగాలను తప్పకుండా ప్రోత్సహించాలని రాజన్ పేర్కొన్నారు.ఏడు శాతం వృద్ధి సాధిస్తున్న భారత ఆర్థిక వ్యవస్థ తగినన్ని ఉద్యోగాలను సృష్టిస్తోందా? అనే ప్రశ్నకు, రఘురామ్ రాజన్ సమాధానమిస్తూ.. ఎక్కువ పెట్టుబడితో కూడిన పరిశ్రమలు వేగంగా అభివృద్ధి చెందుతున్నాయి, కానీ శ్రమతో కూడిన పరిశ్రమలు పెరగడం లేదని అన్నారు. అంతే కాకుండా ప్రభుత్వ ఉద్యోగాల కోసం వచ్చిన దరఖాస్తుల సంఖ్యను గమనిస్తే నిరుద్యోగం ఏ స్థాయిలో ఉందో అర్థమవుతుందని పేర్కొన్నారు.ఈ ఏడాది బడ్జెట్‌లో ఆర్థిక మంత్రి ప్రకటించిన అప్రెంటిస్‌షిప్ పథకాలను స్వాగతిస్తున్నామని రాజన్ అన్నారు. ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO)లో ఎన్‌రోల్‌మెంట్ ఆధారంగా ప్రభుత్వం మూడు ఉపాధి ఆధారిత పథకాలను ప్రారంభిస్తుందని ఆర్థిక మంత్రి నిర్మలా సీతారామన్ FY25 కేంద్ర బడ్జెట్‌లో ప్రకటించారు.ఇదీ చదవండి: వివాద్‌ సే విశ్వాస్‌ పథకం 2024: రేపటి నుంచే అమల్లోకి..వియత్నాం, బంగ్లాదేశ్‌లను ఉదాహరణలుగా చెబుతూ.. వస్త్రాలు, తోలు పరిశ్రమలో వృద్ధి సాధిస్తున్నాయని రాజన్ పేర్కొన్నారు. భారత్ కూడా ఇలాంటి అవకాశాలను ఉపయోగించుకోవాలని సూచించారు. మూలధన వ్యయానికి సంబంధించినంతవరకు ప్రైవేట్ రంగం ఇంకా ఎందుకు వెనుకబడి ఉందని అడిగిన ప్రశ్నకు రాజన్, ఇది ఒక చిన్న మిస్టరీ అని అన్నారు.యుఎస్ ఫెడరల్ రిజర్వ్ బెంచ్ మార్క్ వడ్డీ రేటు తగ్గింపుపై అడిగిన ప్రశ్నకు రాజన్ స్పందిస్తూ.. ఫెడ్ 50 బేసిస్ పాయింట్ల రేటు తగ్గించడం వల్ల సెంట్రల్ బ్యాంకులు సముచితంగా భావించే వేగంతో ముందుకు సాగడానికి మరింత అవకాశం లభించిందని అన్నారు.

ఆర్‌బీఐ మాజీ గవర్నర్‌ రఘురామ్ రాజన్ త్వరలో రాజకీయాల్లోకి రానున్నారా? 2024 లోక్‌సభ ఎన్నికల నేపథ్యంలో రాజన్‌ కాంగ్రెస్‌ చేరుతున్నారంటూ వచ్చిన వార్తల్ని ఖండించారు. తాజాగా మరోమారు ఆయన రాజకీయ రంగ ప్రవేశంపై వార్తలు వస్తున్నాయి. దీనిపైన రాజన్‌ స్పందించారు. రాజకీయాల్లోకి అడుగు పెట్టడం కంటే నేను చేయగలిగిన చోట మార్గనిర్దేశం చేయాలని అనుకుంటున్నాను. ఇప్పుడు అదే ప్రయత్నిస్తున్నాని తెలిపారు. ఈ విషయాన్ని పదేపదే చెబుతున్నాను. నేను విద్యా వేత్తని. ‘మై బిజినెస్‌ ఈజ్‌ నాట్‌ కిస్సింగ్‌ బేబీస్‌’. కానీ ప్రజలు ఇప్పటికీ నా మాటల్ని నమ్మడం లేదు. పాలిటిక్స్‌ అంటే నా భార్యకు, నాకుటుంబానికి ఇష్టం లేదు. రాజకీయాల్లోకి రావడం తనకు ఇష్టం లేదన్నారు.అనంతరం భారత్, అమెరికా తదితర దేశాల్లోని ప్రస్తుత ఆర్థిక పరిస్థితులు, చిన్న పరిశ్రమల ముందున్న సవాళ్లు, ఆర్థిక అసమానతలపై రాజన్ అభిప్రాయాలను వ్యక్తం చేశారు. వచ్చే ఏడాది ఆర్ధిక ఇబ్బందులు ఎదురయ్యే అవకాశం ఉంది. ప్రపంచ దేశాల్లో యుద్ధ భయాలతో పాటు ఇతర అంశాలే అందుకు కారణం. దీనికి తోడు అధిక వడ్డీ రేట్ల ప్రభావం ప్రపంచ వృద్ది ఆశించిన స్థాయిలో ఉండదని తెలిపారు.‘మై బిజినెస్‌ ఈజ్‌ నాట్‌ కిస్సింగ్‌ బేబీస్‌’ అంటే పరోక్షంగా రాజకీయాల్లో రావడం ఇష్టం లేదు.. సేవ చేసేందుకు సిద్ధంగా ఉన్నాను అని చెప్పేందుకు ఇంగ్లీష్‌లో ఈ పదాన్ని సందర్భాన్ని బట్టి వాడుతుంటారు.

ప్రపంచంలో వేగంగా అభివృద్ధి చెందుతున్న దేశాల్లో 'భారత్' ఒకటి. అదే సమయంలో అత్యంత పేద దేశం కూడా.. అని రిజర్వ్ బ్యాంక్ ఆఫ్ ఇండియా (ఆర్‌బీఐ) మాజీ గవర్నర్ 'రఘురామ్ రాజన్' ఓ ఇంటర్వ్యూలో పేర్కొన్నారు. ఏప్రిల్ 2024లో నిరుద్యోగిత రేటు 8.1%గా ఉందని సెంటర్ ఫర్ మానిటరింగ్ ఇండియన్ ఎకానమీ (CMIE) పేర్కొన్న విషయాన్ని రాజన్ హైలైట్ చేశారు.భారతదేశంలోని శ్రామిక జనాభాలో కేవలం 37.6 శాతం మంది మాత్రమే ఉపాధి పొందుతున్నారని వివరించారు. పెద్ద సంఖ్యలో యువత శ్రామికశక్తిలోకి రావడం వల్ల భారత్‌కు మేలు జరుగుతుందన్నారు. యువకులకు కావలసిన ఉపాధి కల్పించగలిగితే.. దేశం మరింత వేగంగా డెవలప్ అవుతుందని పేర్కొన్నారు.భారత్ క్రమంగా అతి పెద్ద ఆర్థిక వ్యవస్థ కలిగిన దేశాల జాబితాలో చేరుతోంది. ప్రస్తుతం ఐదవ అతిపెద్ద ఆర్థిక వ్యవస్థ ఇండియా 2047 నాటికి జపాన్, జర్మనీలను అధిగమించి మూడవ అతిపెద్ద ఆర్థిక వ్యవస్థగా, అభివృద్ధి చెందిన దేశంగా అవతరిస్తుందని రఘురామ్ రాజన్ అన్నారు.ఇక అసలు సమస్య ఏమిటంటే.. 2047-2050 నాటికి దేశంలో వృద్ధాప్యం పెరుగుతుంది. అప్పటికి భారతీయులంతా ధనవంతులు కాగలరా? అని రాజన్ అన్నారు. ప్రస్తుత జనాభా డివిడెండ్ శాశ్వతంగా ఉండదని, జనాభా వయస్సు పెరిగే కొద్దీ.. వర్క్‌ఫోర్స్‌లో సంఖ్య తగ్గుతుందని ఆయన అన్నారు.Can India lift itself from the doldrums of a jobs crisis? Can the country grow rich before it grows old?My conversation with Raghuram Rajan, former head of India’s central bank and coauthor of “Breaking the Mold: India’s Untraveled Path to Prosperity” pic.twitter.com/hPz75GRE16— Fareed Zakaria (@FareedZakaria) May 19, 2024

Raghuram Rajan Warning: ఆర్థిక వృద్ధికి సంబంధించి "హైప్"ను నమ్మి భారత్‌ పెద్ద తప్పు చేస్తోందని ఆర్బీఐ మాజీ గవర్నర్ రఘురామ్ రాజన్ హెచ్చరించారు. దేశం దాని సామర్థ్యాన్ని చేరుకోవడానికి గణనీయమైన నిర్మాణాత్మక సమస్యలను పరిష్కరించాల్సిన అవసరం ఉందని అభిప్రాయపడ్డారు. ఎన్నికల తర్వాత కొత్త ప్రభుత్వం ఎదుర్కోవాల్సిన అతిపెద్ద సవాలు శ్రామిక శక్తి, నైపుణ్యాలను మెరుగుపరచడం అని రఘురామ్‌ రాజన్ ఒక ఇంటర్వ్యూలో అన్నారు. ఈ సవాలును పరిష్కరించకుంటే యువత ప్రయోజనాలను కాపాడటంలో కష్టాలు పడాల్సి వస్తుందన్నారు. దేశంలోని 140 కోట్ల జనాభాలో సగానికి పైగా 30 ఏళ్లలోపు యువతే ఉన్నారన్నారాయన. 2047 నాటికి భారతదేశాన్ని అభివృద్ధి చెందిన ఆర్థిక వ్యవస్థగా మార్చాలన్న ప్రధాని నరేంద్ర మోదీ ఆశయాన్ని ఈ ఆర్బీఐ మాజీ గవర్నర్‌ కొట్టిపారేశారు. డ్రాప్-అవుట్ శాతం అధికంగా ఉండి పిల్లలలో చాలా మందికి హైస్కూల్ విద్య లేకపోతే ఆ ఆశయం గురించి మాట్లాడటమే వ్యర్థం అన్నారు. భారతదేశంలో అక్షరాస్యత రేట్లు వియత్నాం వంటి ఇతర ఆసియా దేశాల కంటే తక్కువగా ఉన్నాయన్నారు. స్థిరమైన ప్రాతిపదికన 8% వృద్ధిని సాధించడానికే దేశం మరింత ఎక్కువ పని చేయాల్సి ఉందన్నారు. దేశంలో ఉన్నత విద్య కోసం కంటే చిప్‌ల తయారీకి రాయితీలపై ఎక్కువ ఖర్చు చేసేందుకు మోదీ ప్రభుత్వం తీసుకున్న విధాన నిర్ణయాలను రఘురామ్‌ రాజన్‌ తప్పుపట్టారు. భారతదేశంలో కార్యకలాపాలను స్థాపించడానికి సెమీ-కండక్టర్ కంపెనీలకు రాయితీల కింద సుమారు రూ. 76 వేల కోట్లు కేటాయించగా ఉన్నత విద్య కోసం రూ. 47 వేల కోట్లనే కేటాయించడాన్ని ఎత్తి చూపారు.

రిజర్వ్ బ్యాంక్ ఆఫ్ ఇండియా (RBI) మాజీ గవర్నర్ 'రఘురామ్ రాజన్' ఇటీవల తాను గవర్నర్‌గా పనిచేస్తున్నప్పుడు ఎంత జీతం తీసుకునే వారనే విషయాలను అధికారికంగా వెల్లడించారు. దీనికి సంబంధించిన మరిన్ని వివరాలు ఈ కథనంలో తెలుసుకుందాం. రాజ్‌ షమానీ నిర్వహించిన ఓ పాడ్‌కాస్ట్‌లో RBI గవర్నర్ల జీతాలు ఎలా ఉండేవని ఆర్‌బీఐ మాజీ గవర్నర్ 'రఘురామ్ రాజన్' (Raghuram Rajan)ను అడిగిన ప్రశ్నకు, తాను గవర్నర్‌గా పనిచేసిన రోజుల్లో ఏడాదికి రూ. 4 లక్షలను జీతభత్యాలను పొందినట్లు వివరించారు. అయితే ప్రస్తుతం గవర్నర్ల జీతాలు ఎలా ఉంటాయనే విషయం తనకు తెలియదని స్పష్టం చేశారు. రిజర్వ్ బ్యాంక్ ఆఫ్ ఇండియా గవర్నర్‌గా ఉన్నపుడు ధీరూభాయ్ అంబానీ నివాసానికి దగ్గరగా ఉన్న 'మలబార్‌ హిల్స్‌' అనే పెద్ద ఇంట్లో తనకు నివాసం కల్పించినట్లు వెల్లడించారు. అది కేంద్రం నాకు అందించిన అతిపెద్ద ప్రయోజనం అని చెప్పారు. 2013 నుంచి 2016 మధ్య RBI గవర్నర్‌గా పనిచేసిన రఘురామ్ రాజన్ క్యాబినెట్ సెక్రటరీతో సమానమైన జీతాన్ని పొందినట్లు వెల్లడిస్తూ.. గవర్నర్ పదవి నుంచి బయటకు వచ్చిన తరువాత పెన్షన్ వంటివి రాలేదని వెల్లడించారు. పెన్షన్ రాకపోవడానికి కారణం, తాను సివిల్ సర్వెంట్‌లు కావడం వల్ల, సివిల్ సర్వీస్ నుంచి అప్పటికే పెన్షన్ రావడం అని కూడా వివరించారు.  ఇదీ చదవండి: నష్టాల్లో ఇన్ఫోసిస్.. ఆ ఒక్కటే కారణమా..! రఘురామ్ రాజన్.. రిజర్వ్ బ్యాంక్ ఆఫ్ ఇండియా గవర్నర్‌గా పనిచేసి బయటకు వచ్చిన తరువాత షికాగో యూనివర్సిటీలో ప్రొఫెసర్‌గా ఫుల్‌టైమ్‌ ఉద్యోగం చేస్తున్నట్లు సమాచారం. ఇటీవలే ఈయన 'బ్రేకింగ్ ది మౌల్డ్: రీఇమేజినింగ్ ఇండియాస్ ఎకనామిక్ ఫ్యూచర్' అనే పేరుతో ఓ బుక్ కూడా లాంచ్ చేశారు.

రాయదుర్గం: మానవ వనరులపై సకాలంలో దృష్టి పెట్టడం భారతదేశ ఆర్థిక వృద్ధికి కీలకమని ఆర్‌బీఐ మాజీ గవర్నర్‌ రఘురాం రాజన్‌ అన్నారు. ఆయన ఆర్థికవేత్త రోహిత్‌ లాంబాతో కలిసి రచించిన ‘బ్రేకింగ్‌ ది మౌల్డ్‌’ పుస్తకంపై ఐఎస్‌బీ ప్రొఫెసర్‌ భగవాన్‌ చౌదరితో ప్రత్యేక చర్చా కార్యక్రమాన్ని నిర్వహించారు. ఆదివారం రాత్రి గచ్చిబౌలిలోని ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ)లోని ఖేమ్కా ఆడిటోరియంలో ఈ కార్యక్రమం జరిగింది. ఈ సందర్భంగా రఘురాం మాట్లాడుతూ, రాబోయే దశాబ్దాలలో దేశాభివృద్ధికి ఊతమిచ్చే చర్యలు తీసుకోవాల్సిన అవసరం ఉందన్నారు. భారతదేశ అత్యంత ముఖ్యమైన ఆస్తిగా మానవ వనరులని చెప్పవచ్చని, పెద్ద సంఖ్యలో వారికి సరైన శిక్షణ ఇవ్వగలిగితే దేశానికి ఎంతో మేలు చేకూరుతుందన్నారు. దేశంలో అభివృద్ధికి అనేక ప్రణాళికలు ఉన్నాయని, అయితే వాటిని అమలు చేయడంలోనే లోపం ఉందని తెలిపారు. అభివృద్ధి చెందిన ఆర్థిక వ్యవస్థలుగా మారడానికి లక్ష్యాలను నిర్దేశించుకునే ముందు ఆరోగ్య సంరక్షణ, విద్యా సౌకర్యాల కొరతపై కేంద్ర, రాష్ట్ర ప్రభుత్వాలు ప్రత్యేక దృష్టి పెట్టాలని, అప్పుడే అనుకున్న లక్ష్యాలు సాధించేందుకు వీలవుతుందని ఆయన అభిప్రాయపడ్డారు. ప్రస్తుతం జాతీయ, అంతర్జాతీయ స్థాయిలో గుర్తింపు పొందిన ఐఎస్‌బీ లాంటి విద్యాసంస్థలో చదివే విద్యార్థులు చాలా మంది ఉద్యోగాలు సృష్టించడం కంటే ఉద్యోగాలు చేయడంపైనే దృష్టి సారించారని రఘురాం రాజన్‌ పేర్కొన్నారు. విద్యార్థులంతా సంస్థలను స్థాపించి తాము ఉపాధి పొందుతూ, నలుగురికి ఉపాధి కల్పించడంపై ప్రత్యేక శ్రద్ధ పెట్టాలని సూచించారు. భారతదేశంలోని అగ్రశ్రేణి వ్యాపార పాఠశాలల్లో ఐఎస్‌బీ ఒకటని, ఈ విద్యాసంస్థ దేశంలో మరిన్ని ఉద్యోగ అవకాశాలు సృష్టించే సత్తా కలిగిన విద్యార్థులను తయారు చేయాలని ఆయన ఆకాంక్షించారు. కార్యక్రమంలో సహ రచయిత రోహిత్‌ లాంబా, పలువురు ఐఎస్‌బీ ఫ్యాకల్టి, విద్యార్థులు పాల్గొన్నారు.

సాక్షి, హైదరాబాద్‌:  ఏ దేశమైనా, రాష్ట్రమైనా ఆర్థిక వ్యవస్థ నిర్వహణలో క్రమశిక్షణ, నిశిత పరిశీలన, వ్యూహాత్మక వినియోగం కీలకమని.. ఆర్థిక నిర్వహణను బట్టే ప్రజల జీవన ప్రమాణాల్లో మార్పులు సాధ్యమవుతాయని రిజర్వు బ్యాంకు మాజీ గవర్నర్, కేంద్ర ప్రభుత్వ మాజీ ప్రధాన ఆర్థిక సలహాదారు రఘురాం రాజన్‌ రాష్ట్ర ప్రభుత్వానికి సూచించారు. తెలంగాణలో ఏర్పడిన కొత్త ప్రభుత్వం కూడా ఆ దిశలో పనిచేయాలని.. దుబారా తగ్గించుకుని, ప్రజలపై పన్ను భారం మోపకుండా ఆర్థిక వ్యవస్థను నడిపించే వ్యూహాన్ని రూపొందించుకోవాలని సలహా ఇచ్చారు. రఘురాం రాజన్‌ ఆదివారం ముఖ్యమంత్రి రేవంత్‌రెడ్డి నివాసానికి వచ్చారు. రేవంత్‌తోపాటు ఉప ముఖ్యమంత్రి మల్లు భట్టి విక్రమార్క, మంత్రి దుద్దిళ్ల శ్రీధర్‌బాబు, ఉన్నతాధికారులతో భేటీ అయ్యారు. రెండు గంటలకుపైగా జరిగిన ఈ సమావేశంలో.. రాష్ట్ర ప్రస్తుత ఆర్థిక పరిస్థితి, ఆర్థికాభివృద్ధి కోసం అనుసరించాల్సిన వ్యూహాలు, దేశంలో ఇతర రాష్ట్రాల ఆర్థిక పరిస్థితులపై చర్చించారు. ఈ సందర్భంగా రాష్ట్ర ఆర్థిక పరిస్థితిని మెరుగుపర్చేందుకు రఘురాం రాజన్‌ పలు సూచనలు చేశారు.  ఆర్థిక పరిస్థితిని బట్టి ముందుకెళ్లండి  రాష్ట్ర ప్రభుత్వ వాస్తవ ఆర్థిక పరిస్థితిని బట్టి ముందుకెళ్లాలని, ఆర్థిక మూలాలను బలోపేతం చేసుకోవడం దృష్టి పెట్టాలని రఘురాం రాజన్‌ సూచించినట్టు తెలిసింది. మైనింగ్‌తోపాటు నాలా చార్జీల్లాంటి పన్నేతర ఆదాయాన్ని పెంచుకోవాలని చెప్పినట్టు సమాచారం. కొత్త వాహనాలు కొనడం, కొత్త నిర్మాణాలు చేపట్టడం వంటి దుబారా ఖర్చుల జోలికి వెళ్లవద్దని.. సంక్షేమ పథకాల అమలు కారణంగా అభివృద్ధిపై తిరోగమన ప్రభావం పడకుండా జాగ్రత్త వహించాలని స్పష్టం చేసినట్టు తెలిసింది. పథకాల కోసం అవసరమయ్యే నిధులను సమకూర్చుకోవడంలో క్రమశిక్షణను కచ్చితంగా పాటించాలని పేర్కొన్నట్టు సమాచారం. ఈ సందర్భంగా రఘురాం రాజన్‌ తన అనుభవాలను సీఎం బృందంతో పంచుకున్నట్టు తెలిసింది. ఈ సమావేశంలో రాష్ట్ర ప్రభుత్వ ప్రధాన కార్యదర్శి శాంతికుమారి, ఆర్థిక శాఖ ప్రత్యేక ప్రధాన కార్యదర్శి కె.రామకృష్ణారావు, ముఖ్యమంత్రి ముఖ్య కార్యదర్శి శేషాద్రి తదితరులు పాల్గొన్నారు.

ప్రముఖ ఆర్థికవేత్త, భారతీయ రిజర్వ్ బ్యాంక్ (ఆర్బీఐ) మాజీ గవర్నర్ రఘురామ్ రాజన్ దేశ పురోగతికి సంబంధించి వెలుబుచ్చిన అభిప్రాయాలపై  విమర్శలు వ్యక్తమయ్యాయి. భారతదేశం అగ్రరాజ్యంగా మారుతుందనే భావనను ప్రశ్నిస్తూ రాజన్ చేసిన ప్రకటన తీవ్ర చర్చకు దారితీసింది. ఓ వార్తా సంస్థ నిర్వహించిన కార్యక్రమంలో పాల్గొన్న రాఘురామ్‌ రాజన్‌ తన అభిప్రాయాలను వ్యక్తం చేశారు. తాను దేశ ఆర్థిక మంత్రి లేదా ప్రధానమంత్రి అయితే రాబోయే దశాబ్దంలో దేశ అభివృద్ధిలో తన పాత్ర ఎలా ఉండబోతుంది అని అడిగిన ప్రశ్నకు ఆయన సమాధానమిస్తూ భారతదేశం సూపర్ పవర్ హోదాను పొందడం పట్ల ఉదాసీనతను వ్యక్తం చేశారు. జాతిపిత మహాత్మాగాంధీ దార్శనికతకు అనుగుణంగా ప్రతి భారతీయుడి ఆకాంక్షలను నెరవేర్చడంపైనే తన దృష్టి ఉందని ఆయన ఉద్ఘాటించారు. అది నాకు అసలు విషయమే కాదు.. ‘భారతదేశం సూపర్‌ పవర్‌ (అగ్రరాజ్యం)గా ఉండటం గురించి నేను పట్టించుకోను, అది నాకు అసలు విషయమే కాదు. జాతిపిత కోరుకున్నట్లు ప్రతి భారతీయుడిని సంతోషంగా ఉంచడమే నా కర్తవ్యం’ అని రఘురామ్‌ రాజన్‌ అన్నారు. రఘురామ్‌ రాజన్‌ వెలుబుచ్చిన ఈ అభిప్రాయంపై వివిధ వర్గాల నుంచి తీవ్ర విమర్శలు వెల్లువెత్తుతున్నాయి. సోషల్ మీడియా యూజర్లు రాజన్ దృక్పథాన్ని తీవ్రంగా ఖండించారు. సూపర్ పవర్ స్థితిని సాధించడం అంటే పేదరికాన్ని తగ్గించడం, ఆరోగ్య సంరక్షణను, ప్రజల జీవన ప్రమాణాలను  మెరుగుపరచడం కాదా అని ప్రశ్నించారు.   దేశ మొబైల్ ఫోన్ ఎగుమతులపైనా రఘురామ్‌ రాజన్ చేసిన వ్యాఖ్యలు వివాదాస్పదం అయ్యాయి. ఎలక్ట్రానిక్స్, ఐటీ శాఖ సహాయ మంత్రి రాజీవ్ చంద్రశేఖర్ ఆగ్రహం వ్యక్తం చేశారు. ఎలక్ట్రానిక్స్ సప్లై చెయిన్‌లు, సెమీకండక్టర్స్‌కు సంబంధించిన వ్యవహారాలపై రఘురామ్‌ రాజన్‌కు సరైన అవగాహన లేదని మండిపడ్డారు. ఇదీ చదవండి: ఎన్‌పీఎస్‌ నుంచి నెలవారీ ఆదాయం Raghuram Rajan: "I don't care about India being a superpower, to me that's not the point. It's about what the father of the nation wanted." Being a superpower means lesser poverty, healthier lives, longer life spans, less suffering for a Billion people but of course Rajan… pic.twitter.com/PxzFF9uBjI — Cogito (@cogitoiam) June 18, 2023

న్యూఢిల్లీ: భారత్‌ ప్రమాదకర హిందూ వృద్ధి రేటుకు చేరువ అవుతోందంటూ ఆర్‌బీఐ మాజీ గవర్నర్‌ రఘురామ్‌ రాజన్‌ చేసిన వ్యాఖ్యలు.. తప్పుడు భావనతో, పక్షపాతంతో, అపరిపక్వంగా ఉన్నాయని ఎస్‌బీఐ రీసెర్చ్‌ సంస్థ పేర్కొంది.1950 నుంచి 1980 వరకు భారత్‌ జీడీపీ వృద్ధి అత్యంత తక్కువగా, సగటున 3.5 శాతంగా కొనసాగింది. దీన్ని హిందూ వృద్ధి రేటుగా భారత ఆర్థికవేత్త అయిన రాజ్‌ కృష్ణ సంబోధించారు. దీంతో తక్కువ వృద్ధి రేటును హిందూ వృద్ధి రేటుగా అభివర్ణిస్తుంటారు. 

దావోస్‌: ప్రపంచ ఆర్థిక వృద్ధిని ప్రభావితం చేసే విషయంలో చైనాను భారత్‌ భర్తీ చేస్తుందని భావించడం.. తొందరపాటే (ప్రీమెచ్యూర్‌) అవుతుందని రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) మాజీ గవర్నర్‌ రఘురామ్‌ రాజన్‌ మంగళవారం అన్నారు. భారత్‌ ఎకానమీ చాలా చిన్నదని పేర్కొంటూ, ప్రపంచ ఎకనామీని ప్రభావితం చేసే స్థాయి ఇప్పుడే దేశానికి లేదని పేర్కొన్నారు. అయితే, భారతదేశం ఇప్పటికే ప్రపంచంలో ఐదవ అతిపెద్ద ఆర్థిక వ్యవస్థగా ఉన్నందున  దేశ ఎకానమీ మరింత వృద్ధి చెందుతూ, పరిస్థితి (ప్రపంచ ఆర్థిక వృద్ధిని ప్రభావితం చేసే విషయంలో) మున్ముందు మారే అవకాశం ఉందని కూడా విశ్లేషించారు. 2023లో ప్రపంచ ఆర్థిక వ్యవస్థ మాంద్యాన్నే ఎదుర్కొనే అవకాశం ఉందంటూ  ప్రపంచ ఆర్థిక వేదిక (డబ్ల్యూఈఎఫ్‌) విడుదల చేసిన ఒక నివేదిక సందర్భంగా రాజన్‌ విలేకరులతో మాట్లాడారు. చైనా ఆర్థిక వ్యవస్థలో ఏదైనా పునరుద్ధరణ జరిగితే, అది ఖచ్చితంగా ప్రపంచ వృద్ధి అవకాశాలను పెంచుతుందని  అన్నారు. ఈ సమయంలో విధాన రూపకర్తలు కార్మిక మార్కెట్‌తో పాటు హౌసింగ్‌ మార్కెట్‌ పరిస్థితులపై కూడా దృష్టి సారిస్తున్నారని  అన్నారు. అమెరికాను ప్రస్తావిస్తూ, అక్కడ గృహాల విక్రయాలు జరగడం లేదని, అయితే ధరలు కూడా తగ్గడం లేదని అన్నారు. ‘ఇదంతా అంధకారమా లేక వినాశనమా? బహుశా కాకపోవచ్చు. రష్యా అధ్యక్షుడు పుతిన్‌ యుద్ధాన్ని ముగించాలని నిర్ణయించుకుంటే, ఖచ్చితంగా పరిస్థితి అంతా మారిపోతుంది’’ అని రాజన్‌ పేర్కొన్నారు.  ‘‘2023లో ఇంకా 12 నెలల సమయం ఉంది. రష్యా యుద్ధం నిలిచిపోయినా, చైనా పురోగతి సాధించినా ప్రపంచ ఎకానమీ మెరుగుపడుతుంది’’’ అని ఆయన విశ్లేషించారు.  చైనా ఎకానమీ మార్చి, ఏప్రిల్‌ నుంచి రికవరీ సాధించే అవకాశం ఉందని కూడా రాజన్‌ అంచనా వేశారు.   

న్యూఢిల్లీ: కాంగ్రెస్‌ నాయకుడు రాహుల్‌గాంధీ భారత్‌ జోడోయాత్ర ప్రస్తుతం రాజస్తాన్‌లో కొనసాగుతుంది. ఇంతవరకు రాహుల్‌ యాత్రలో ఎంతోమంది సెలబ్రెటీలు, ప్రముఖులు పాల్గొని ప్రధాన ఆకర్షణగా నిలిచారు. అందులో భాగంగా రాహుల్‌ భారత్‌ జోడో యాత్రలో తాజాగా భారత్‌ రిజర్వ్‌ బ్యాంక్‌(ఆర్బీఐ) మాజీ గవర్నర్‌ రఘురామ్‌ రాజన్‌ పాల్గొన్నారు. ఈ మేరకు కాంగ్రెస్‌ పార్టీ ట్విట్టర్‌లో... ద్వేషానికి వ్యతిరేకంగా దేశాన్ని ఏకం చేసేందుకు సాగుతున్న ఈ యాత్రలోకి జాయిన్‌ అ‍య్యే వారి సంఖ్య క్రమ క్రమంగా పెరుగుతోంది. కాబట్టి మేము తప్పక విజయం సాధిస్తాం అని ట్వీట్‌ చేశారు. ఈ మేరకు అందుకు సంబంధించిన వీడియో నెట్టింట తెగ వైరల్‌ అవుతోంది. ఆ వీడియోలో రాహుల్‌తో రఘరామ్‌ రాజన్‌ ఏదో చర్చిస్తున్నట్లు కనిపిస్తోంది.  ఆర్‌బీఐ గవర్నర్‌ రఘురామ్‌ రాజన్‌ రాహుల్‌గాంధీ చేపట్టిన జోడోయాత్రలో పాల్గొనడంపై బీజీపీ పలు విమర్శలు ఎక్కుపెట్టింది. ఆయన తనను తాను తదుపరి మన్మోహన్‌ సింగ్‌గా అభివర్ణించుకుంటున్నారని పేర్కొంది. రఘురామ్‌ రాజన్‌ భారత్‌ ఆర్థిక వ్యవస్థపై చేసిన వ్యాఖ్యలను ప్రస్తావిస్తూ.. ఆయన్ను అవకాశవాదిగా బీజేపీ నేత అమిత్‌ మాల్వియా పేర్కొన్నారు. వచ్చే ఏడాది గణతంత్ర దినోత్సవం రోజున కాశ్మీర్‌లో ముగియునున్న భారత్‌ జోడో యాత్రలో ఇప్పటి వరకు వివిధ రంగాలు చెందిన ప్రముఖులు, స్థార్‌లు జాయిన్‌ అయ్యారు. వారిలో ఉద్యమకారిణి మేధా పాట్కర్, స్వయం-స్టైల్ గాడ్ మాన్ నామ్‌దేవ్ దాస్ త్యాగి (కంప్యూటర్ బాబాగా ప్రసిద్ధి చెందారు), నటి స్వర భాస్కర్, బాక్సర్ విజేందర్ సింగ్ తదితరులు ఉన్నారు. Former Governor of RBI, Dr. Raghuram Rajan joined Rahul Gandhi in today’s #BharatJodoYatra pic.twitter.com/BQax4O0KSF — Darshnii Reddy ✋🏻 (@angrybirddtweet) December 14, 2022 (చదవండి: పార్లమెంట్‌ సమావేశాలకు రాహుల్‌ దూరం!.. ప్రతిపక్ష నేత ఎంపికపై ఉత్కంఠ)

భారత ఆర్థిక పరిస్థితిపై ఆర్‌బీఐ(RBI) మాజీ గవర్నర్‌ రఘురామ్‌ రాజన్‌ ఆసక్తికర వ్యాఖ్యలు చేశారు. దేశంలో విదేశీ మారక ద్రవ్య (ఫారెక్స్)నిల్వలు తగినంత ఉండడంతో పాటు వీదేశి అప్పులు కూడా తక్కువగా ఉన్నాయన్నారు. అందుకే శ్రీలంక, పాకిస్తాన్‌లో ఉన్న సమస్యలు దేశంలో లేవని చెప్పారు. ఫారెక్స్‌ నిల్వల విషయంలో ఆ రెండు దేశాలు పూర్తిగా విఫలమయ్యాయని దీని కారణంగానే వారు తీవ్ర ఇబ్బందులు ఎదుర్కుంటున్నట్లు తెలిపారు.  రేట్లను పెంచడం గురించి రాజన్‌ మాట్లాడుతూ.. ప్రస్తుతం ప్రపంచవ్యాప్తంగా ద్రవ్యోల్బణం ఉందని, అది తగ్గించేందుకు ఆర్‌బీఐ వడ్డీ రేటును పెంచిందన్నారు. ప్రపంచంలో ఆహార ద్రవ్యోల్బణం తగ్గుముఖం పట్టిందని, త్వరలో భారత్‌లో కూడా తగ్గుతుందన్నారు. ఆర్‌బీఐ తాజా గణాంకాల ప్రకారం జూలై 22తో ముగిసిన వారానికి విదేశీ మారకద్రవ్య (ఫారెక్స్) నిల్వలు 571.56 బిలియన్ డాలర్లుగా ఉన్నాయి. 2022 మార్చి చివరి నాటికి, భారతదేశం విదేశి రుణం $620.7 బిలియన్లకు చేరుకుంది. జీడీపీ(GDP) నిష్పత్తికి విదేశీ రుణం 2021 మార్చి చివరి నాటికి 21.2 శాతం నుంచి 2022 మార్చి చివరి నాటికి 19.9 శాతానికి తగ్గింది.  శ్రీలంకలో వద్ద ఫారెక్స్ నిల్వలు ఇటీవల $50 మిలియన్ల కంటే తక్కువగా పడిపోయాయి. తద్వారా దేశం విదేశీ రుణాలపై చెల్లింపులను నిలిపివేయవలసి వచ్చింది. పాకిస్థాన్‌లోనూ పరిస్థితి కూడా అంతే దారుణంగా ఉంది. పాకిస్తాన్ సెంట్రల్ బ్యాంక్ తాజా డేటా ప్రకారం, జూలై 22, 2022తో ముగిసిన వారానికి పాకిస్తాన్ ఫారెక్స్ నిల్వలు $754 మిలియన్లు తగ్గి $8.57 బిలియన్లకు చేరుకున్నాయి. పాలసీ చదవండి: భారత్‌కు ఉబర్‌ గుడ్‌బై, స్పందించిన సీఈవో

దేశంలో రోజురోజుకి పెరిగిపోతున్న ద్రవ్యోల్బణం, బ్యాం‍కువడ్డీ రేట్ల పెంపు వంటి అంశాలపై రిజర్వ్‌ బ్యాంక్‌ ఆఫ్‌ ఇండియా మాజీ గవర్నర్‌ రఘురామ్‌ రాజన్‌ ఆసక్తికర వ్యాఖ్యలు చేశారు. ద్రవ్యోల్బణాన్ని అదుపు చేసేందుకు బ్యాంకులు వడ్డీ రేట్లు పెంచడం అనేది సర్వ సాధారణంగా జరిగే నిర్ణయమే. ప్రపంచ దేశాలన్నీ కూడా ఇలాగే చేస్తాయి. ఇవాళ కాకపోతే రేపయినా మనం చేయక తప్పదు. కానీ కొన్ని రాజకీయ పార్టీలు ఈ విషయాన్ని పొలిటికల్‌ మైలేజ్‌ కోసం వాడుకుంటున్నాయి. బ్యాంకులు వడ్డీ రేట్లు పెంచడాన్ని ద్రేశద్రోహం (యాంటీ నేషనల్‌) అన్నట్టుగా ప్రచారం చేస్తున్నాయంటూ లింక్‌డ్‌ఇన్‌ పోస్టులో రఘురాం రాజన్‌ తన అభిప్రాయం వ్యక్తం చేశారు.  కరోనా సంక్షోభం కారణంగా ప్రపంచ ఆర్థిక వ్యవస్థ కుదుపులకు లోనవుతోంది. ఈ సమయంలో ఉక్రెయిన్‌- రష్యా యుద్ధం రావడంతో ముడి చమురు ధరలు ఒక్కసారిగా తారాస్థాయికి చేరాయి. దీంతో మార్చిలో చిల్లర ద్రవ్యోల్బణం రికార్డు స్థాయిలో 6.95 శాతానికి చేరగా టోకు ద్రవ్యోల్బణం 14.55ని టచ్‌ చేసింది. అయితే ఆర్బీఐ వడ్డీరేట్ల పెంపుకు సుముఖంగా లేదు. దీంతో పలు బ్యాంకులు నేరుగా కాకపోయినా పరోక్ష పద్దతిలో వడ్డీ రేట్లను పెంచుతున్నాయి. దీంతో బ్యాంకుల వడ్డీ రేట్లపై వెల్లువెత్తుతున్న విమర్శలు, ఆరోపణలను ఉద్దేశించి రఘురాం రాజన్‌ తన అభిప్రాయాలను పంచుకున్నారు.    చదవండి: బిగ్‌ షాక్‌: సామాన్యుడి నెత్తిన మరో పిడుగు!

న్యూఢిల్లీ: ధరల ఒత్తిళ్లకు తగ్గట్టు భారత సెంట్రల్‌ బ్యాంకు తన విధానాన్ని మార్చుకోవాలని ఆర్‌బీఐ మాజీ గవర్నర్‌ రఘురామ్‌ రాజన్‌ అభిప్రాయపడ్డారు.  రష్యా–ఉక్రెయిన్‌ యుద్ధంతో అంతర్జాతీయంగా సరఫరా చైన్‌లో ఏర్పడిన అవరోధాల ఫలితంగా ధరల ఒత్తిళ్లకు భారత్‌ సన్నద్ధం కావాలన్నారు. ద్రవ్యోల్బణం నియంత్రణలో వైఫల్యం అయితే అది ప్రభుత్వం, సెంట్రల్‌ బ్యాంకు లక్ష్యాలకు విఘాతమన్నారు. ప్రభుత్వం ఇచ్చిన ఆదేశాలకు ఆర్‌బీఐ కట్టుబడి ఉండాలన్నారు. ద్రవ్యోల్బణాన్ని 4 శాతం స్థాయిలో కట్టడి చేయాలని.. మరీ అయితే 2 శాతం అటూ, ఇటూగా ఉండొచ్చంటూ ఆర్‌బీఐకి కేంద్ర సర్కారు ఎప్పుడో నిర్ధేశించిన లక్ష్యాన్ని రాజన్‌ పరోక్షంగా ప్రస్తావించారు. కరోనా సంక్షోభంలోనూ రేట్లను పెంచకుండా ద్రవ్యోల్బణాన్ని కట్టడి చేయడంలో ఆర్‌బీఐ చక్కని పాత్రనే పోషించినట్టు చెప్పారు. ‘‘అన్ని సెంట్రల్‌ బ్యాంకుల మాదిరే మనం కూడా ముందుకు వచ్చి నూతన సవాళ్లను ఎదుర్కోవాల్సిందే. పాత విధానం ఇప్పటికీ పనిచేస్తుందా? అని ప్రశ్నించుకోవడంతోపాటు అవసరమైతే మార్పులు చేసుకోవాలి’’ అని రాజన్‌ పేర్కొన్నారు. ఆర్‌బీఐ ఎగువ పరిమితి స్థాయి 6 శాతాన్ని రిటైల్‌ ద్రవ్యోల్బణం జనవరి నెలలో మించిపోవడంతో రాజన్‌ ఈ వ్యాఖ్యలు చేసినట్టు తెలుస్తోంది. ప్రస్తుత ద్రవ్యోల్బణ మంటలు తాత్కాలికమేనా? అన్న ప్రశ్నకు రాజన్‌ బదులిస్తూ.. ఇప్పటికే గరిష్ట స్థాయిలో ఉన్న ద్రవ్యోల్బణానికి తాజా ఒత్తిళ్లు అదనంగా పేర్కొన్నారు. యుద్ధ ప్రభావాలను కూడా కలిపి చూస్తే మరింతగా పెరిగిపోవచ్చన్న అభిప్రాయాన్ని వ్యక్తం చేశారు.   వృద్ధిపై ఆందోళన..? భారత్‌ వృద్ధి పథంపై ఆందోళనగా ఉన్నారా? అన్న ప్రశ్నకు.. ‘‘2014 తర్వాత నుంచి కనిష్ట చమురు ధరల వల్ల భారత్‌ లాభపడింది. కానీ ఇప్పుడు తిరిగి చెల్లించుకోవాల్సిన సమయం ఆసన్నమైంది. మన వృద్ధి పనితీరు కొంత కాలంగా బలహీనంగా ఉందన్నది వాస్తవం. 2016 డీమోనిటైజేషన్‌ తర్వాత నుంచి బలమైన రికవరీ లేదు. ద్రవ్యోల్బణం, కరెంటు ఖాతాలోటు, ద్రవ్యలోటు అనే మూడు సమస్యలను ఎదుర్కొంటున్నాం. ఎంతో జాగ్రత్తగా వీటిని నిర్వహించాల్సి ఉంటుంది’’ అని రాజన్‌ తన అభిప్రాయాలను వెల్లడించారు. కీలక బ్యాంకింగ్‌ వివరాలను ఎవరికీ చెప్పొద్దు: ఆర్‌బీఐ ముంబై: డిజిటల్‌ మోసాలు పెరుగుతున్న నేపథ్యంలో ఓటీపీ, సీవీవీ నంబర్లు వంటి కీలకమైన గోప్యనీయ బ్యాంకింగ్‌ సమాచారాన్ని ఎవరికీ వెల్లడించరాదని రిజర్వ్‌ బ్యాంక్‌ హెచ్చరించింది. సైబర్‌ సెక్యూరిటీ విషయంలో తగు జాగ్రత్తలు తీసుకోవా లని సూచించింది. ప్రజా ప్రయోజనార్థం ఆర్థిక మోసాల తీరుతెన్నులపై ’బి(ఎ)వేర్‌’ పేరిట రూపొందించిన బుక్‌లెట్‌లో ఈ విషయాలు వివరించింది. టెక్నాలజీ ఆధారిత ఆర్థిక సాధనాలతో అంతగా పరిచయం లేని సామాన్యులను మోసగించేందుకు నేరగాళ్లు కొంగొత్త పద్ధతులు ఉపయోగిస్తున్నారని పేర్కొంది. అపరిచితుల నుంచి వచ్చే అనుమానాస్పద లింకులపై క్లిక్‌ చేయొద్దని సూచించింది. ప్రజా ఫిర్యాదులను పరిష్కరించడానికి ఏ సంస్థకూ అధికారం ఇవ్వలేదు కాగా, తన నియంత్రణలోని సంస్థలపై ప్రజా ఫిర్యాదుల పరిష్కారానికి ఏ సంస్థకూ అధికారం ఇవ్వలేదని ఆర్‌బీఐ ప్రకటన ఒకటి స్పష్టం చేసింది. ఈ మేరకు జరుగుతున్న ప్రచారంలో ఎటువంటి వాస్తవం లేదని పేర్కొంది. నియంత్రిత సంస్థలపై ఫిర్యాదులు, విచారణకు ఎటువంటి ఫీజులూ చెల్లించనక్కర్లేదని పేర్కొంది. జ్టి్టpట:// ఠీఠీఠీ.టbజీ.ౌటజ.జీn కంప్లైంట్‌ మేనేజ్‌మెంట్‌ సిస్టమ్స్‌ను (సీఎంఎస్‌) పోర్టల్‌ ప్రజా ఫిర్యాదులకు వినియోగించుకోవచ్చని తెలిపింది.

రాబోయే పార్లమెంట్‌ శీతాకాల సమావేశాల్లో క్రిప్టోకరెన్సీపై కేంద్ర ప్రభుత్వం బిల్లును ప్రవేశ పెట్టనున్నట్లు వార్తలు వస్తున్నాయి. దీంతో క్రిప్టో మార్కెట్లలో అనిశ్చితి నెలకొంది. తాజాగా క్రిప్టోకరెన్సీపై మాజీ ఆర్బీఐ గవర్నర్‌ రఘురాం రాజన్‌ సంచలన వ్యాఖ్యలను చేశారు. ప్రపంచవ్యాప్తంగా సుమారు 6000కు పైగా క్రిప్టోకరెన్సీ చెలామణీలో ఉందని, రాబోయే రోజుల్లో కేవలం ఒకటి లేదా రెండు క్రిప్టోకరెన్సీలు మనుగడలో ఉండవచ్చుని అభిప్రాయపడ్డారు.   అంతేకాకుండా ప్రస్తుత క్రిప్టో ధరలు పూర్తిగా నీటి బుడగలాంటిదని వెల్లడించారు. ప్రపంచవ్యాప్తంగా నడుస్తోన్న క్రిప్టో క్రేజ్‌ను 17వ శతాబ్దం నాటి నెదర్లాండ్స్‌ తులిప్‌ మానియాతో అభివర్ణించారు.  చదవండి: క్రిప్టో ప్రపంచంలోనూ స్టార్టప్స్‌ హవా అన్‌ రెగ్యులేటెడ్‌ చిట్‌ ఫండ్స్‌..! క్రిప్టో కరెన్సీలను అన్-రెగ్యులేటెడ్ చిట్ ఫండ్స్‌తో రఘురాం రాజన్‌  పోల్చారు. చిట్‌ఫండ్స్‌ నుంచి డబ్బులు పొందిన వారిలాగే క్రిప్టో ఆస్తులు కలిగినవారు కూడా రాబోయే రోజుల్లో బాధపడక తప్పదని అభిప్రాయపడ్డారు. క్రిప్టో కరెన్సీకి అసలు వ్యాల్యూ లేదన్నారు. క్రిప్టోలో కొన్ని మాత్రమే చెల్లింపుల కోసం మనుగడ సాగిస్తాయని..వాటిలో కూడా  క్రాస్ బార్డర్ పేమెంట్స్ వాడతారని తెలిపారు. భారత్‌లోని 15-20 మిలియన్ల క్రిప్టో ఇన్వెస్టర్లు సుమారు 5.39 బిలియన్‌ డాలర్ల క్రిప్టో కరెన్సీను కల్గి ఉన్నారు. రానున్న పార్లమెంట్‌ శీతాకాల సమావేశాల్లో క్రిప్టో కరెన్సీ అండ్ రెగ్యులేషన్ ఆఫ్ అఫీషియల్ డిజిటల్ కరెన్సీ బిల్లు, 2021ని లోకసభలో ప్రవేశపెట్టనుంది. ఈ క్రిప్టో బిల్లులో ఆర్బీఐచే జారీ చేయబడే అధికారిక డిజిటల్ కరెన్సీ కోసం ప్రేమ్ వర్క్, దేశంలో అన్ని ప్రయివేటు క్రిప్టోల నిషేధం లేదా కఠిన నిబంధనలతో పాటు క్రిప్టో కరెన్సీ అంతర్లీన టెక్నాలజీని ప్రోత్సహించేందుకు కొన్ని మినహాయింపులను అనుమతించే అవకాశం ఉన్నట్లు తెలిపారు.  చదవండి: క్రిప్టో నియంత్రణకు సమయం ఇదే!

న్యూఢిల్లీ: భారతదేశంలో కరోనా మహమ్మారి గత ఏడాది మహమ్మరి కంటే చాలా ఘోరమైనదని రుజువు చేసింది. ఎందుకంటే కేసులు, మరణాలు సంఖ్య విపరీతమైన వేగంతో పెరుగుతున్నాయి. మంగళవారం దేశంలో 3.5 లక్షలకు పైగా కరోనా కేసులు, 3,400 మందికి పైగా మరణాలు నమోదయ్యాయి. దేశంలో వరుసగా 13 రోజులు నుంచి 3 లక్షలకు పైగా కేసులను నమోదవుతున్నాయి అంటే అర్ధం చేసుకోవచ్చు. బయట పతిస్థితులు ఎంత దారుణంగా ఉన్నాయో అని.  2020లో కరోనా మహమ్మారి గరిష్ట స్థాయికి చేరుకున్నప్పుడు కూడా దేశంలో రోజువారీ కేసుల సంఖ్య ఒక లక్షకు చేరలేదు. కానీ, ఈ సారి పరిస్థితి భిన్నంగా ఉంది. అత్యవసర హెల్త్‌కేర్ పరికరాలు, మెడికల్ ఆక్సిజన్, హాస్పిటల్ పడకలు, ఔషధాల కొరత వంటివి కరోనా మహమ్మారి మరోసారి విజృంభించడానికి కరణమయ్యాయి. దీంతో దేశంలో ఆరోగ్య పరిస్థితిని మరింత దిగజారింది. దేశంలో కొనసాగుతున్న కోవిడ్ -19 సంక్షోభం గురించి చాలా మంది నిపుణులు ఆందోళన చెందుతున్నారు. కోవిడ్ -19 వ్యాప్తిని అరికట్టడానికి ప్రభుత్వం ఇటీవల ప్రయత్నాలు ముమ్మరం చేయగా.. కరోనా మహమ్మరి విజృంభించకుండా నివారించడానికి అధికారులు సకాలంలో స్పందించలేదని నిపుణులు ఆరోపించారు. నిపుణుడు మాజీ రిజర్వ్ బ్యాంక్ (ఆర్బిఐ) గవర్నర్ రఘురామ్ రాజన్, కోవిడ్ -19 మళ్లీ ఎందుకు పుంజుకుందో కొన్ని కారణాలను మీడియాతో పంచుకున్నాడు. సరైన నాయకత్వం లేకపోవడం?  2020లో కరోనా మహమ్మారి గరిష్ట స్థాయికి చేరుకొని తిరిగి తగ్గుముఖం పట్టకపోవడానికి నాయకుల నిర్లక్ష్యమే కారణమని ఆర్బీఐ మాజీ గవర్నర్‌ రఘురామ్ రాజన్ అన్నారు.  "సరైన నాయకత్వం లేకపోవడం, దూరదృష్టి కలిగి ఉండకపోవడం" వల్లనే దేశంలో కరోనా మహమ్మరీ తిరిగి విజృంభించడానికి ప్రధాన కారణాలు అని తెలిపారు. "మీరు ఇంకా జాగ్రత్తగా ఉండి ఉంటే, మీరు కరోనా తగ్గలేదని ప్రజలను హెచ్చరించి ఉంటే, ఇంకా కరోనా తగ్గలేదని లేదని చేయాల్సిన పని పూర్తి కాలేదని గుర్తించి ఉంటే" అని బ్లూమ్బెర్గ్ ఇంటర్వ్యూలో రాజన్ పేర్కొన్నారు.  "ప్రపంచంలోని మిగిలిన ప్రాంతాలలో వైరస్ తిరిగి వచ్చిందని ఉదాహరణకు, బ్రెజిల్ వంటి దేశాల్లో మళ్లీ విస్తరించిందని, వైరస్ తిరిగి రూపాంతరం చెందినట్టు గ్రహించి ఉండాలి" అని రాజన్ తెలిపారు. కరోనా వైరస్ పై జరిగిన పోరాటంలో దేశం విజయవంతమైందని చాలా మంది భారత ప్రభుత్వ అధికారులు ఇంతకుముందు ప్రకటించినట్లు తెలిపారు. అయితే, దేశంలో కేసులు మళ్లీ తిరిగి మార్చి నుంచి పెరగడం ప్రారంభించాయి. తర్వాత నెల ఏప్రిల్‌లో వేగంగా విజృంభించింది అని అన్నారు. ప్రస్తుతం రాజన్‌ చికాగో యూనివర్శిటీలో ప్రొఫెసర్‌గా బాధ్యతలు నిర్వర్తిస్తున్నాడు.  ప్రస్తుతానికి, మీ ఆజాగ్రత్త వల్ల దేశం కోవిడ్ -19తో భాదపడుతుంది. ప్రస్తుతం కొనసాగుతున్న సంక్షోభం వల్ల కొన్ని పరిశ్రమల సంస్థలు, వైద్య నిపుణులు కొన్ని వారాలు దేశవ్యాప్తంగా లాక్‌డౌన్ చేయాలని పిలుపునిచ్చారు. గత ఏడాది విధించిన లాక్‌డౌన్ వల్ల దేశ ఆర్దిక వ్యవస్థ తీవ్రంగా నష్టపోయినట్లు కాబట్టి లాక్‌డౌన్ విధించకూడదని ప్రభుత్వం నిర్ణయించింది. కానీ ఇప్పుడు కఠినమైన చర్యలు తీసుకోకపోతే కోవిడ్ -19 పరిస్థితి చెయ్యి దాటి పోతుందని చాలా మంది నిపుణులు సూచిస్తున్నారు. చదవండి: పెట్రోల్, డీజిల్ ధరల బాదుడు మళ్లీ షురూ

న్యూఢిల్లీ: కరోనా వైరస్‌ విజృంభిస్తున్న నేపథ్యంలో దేశ ఆర్థిక వ్యవస్థపై ఆర్‌బీఐ మాజీ గవర్నర్‌ రఘురామ్ ‌రాజన్‌ కీలక వ్యాఖ్యలు చేశారు. ఆయన ఓ సమావేశంలో మాట్లాడుతూ జూన్ త్రైమాసికంలో ఆర్థిక వృద్ధి 23.9 శాతం క్షణించడంపై ఆయన తన అభిప్రాయాన్ని తెలిపారు. ప్రస్తుత సంక్షోభం నుంచి గట్టెక్కాలంటే అధికార యంత్రాంగం కీలక చర్యలు తీసుకోవాలని సూచించారు. ప్రస్తుతం రాజన్‌ చికాగో యూనివర్శిటీలో ప్రొఫెసర్‌గా బాధ్యతలు నిర్వర్తిస్తున్నాడు. కరోనాను నివారించేందుకు ప్రభుత్వం కొన్ని చర్యలు తీసుకుందని, కానీ ఆర్థిక వ్యవస్థ పుంజుకోవడానికి సరిపోదని అభిపప్రాయపడ్డారు. అయితే దేశ వృద్ధి రేటు మెరుగవ్వాలంటే యువత ఆశయాలకు అనుగుణంగా సంస్కరణలు తీసుకురావాలని తెలిపారు. అయితే ఇటీవల కొన్ని రాష్ట్రాలలో కార్మిక రక్షణ చట్టాలను రద్దు చేయడం ద్వారా పరిశ్రమ, ఉద్యోగులలో చెడ్డ పేరు వచ్చిందని అన్నారు. ప్రస్తుత పరిస్థితిలో దేశ ఎగుమతులు వృద్ధి చెందే అవకాశం లేదు. ఎందుకంటే భారత్‌ కంటే ముందే ప్రపంచం కోలుకుంటుందని తెలిపారు. మరోవైపు చిన్న కార్పొరేషన్లు అభివృద్ధి చెందాలంటే ప్రభుత్వం నిధులను వేగంగా సమకూర్చాలని పేర్కొన్నారు . బాండ్‌ మార్కెట్ల ద్వారా ప్రభుత్వం నిధులను సమకూర్చుకొని అవసరమైన రంగాలకు ఉపయోగించుకోవచ్చని తెలిపారు. అయితే మెట్రో నగరాలలో ఖాళీగా ఉన్న ప్రభుత్వ స్థలాల అమ్మకంపై ప్రభుత్వం దృష్టి పెట్టాలని, వ్యాపార సం‍స్థలకు లీజుకు ఇవ్వాలని తెలిపారు. కరోనా సంక్షోభంలో మహాత్మ గాంధీ జాతీయ గ్రామీణ ఉపాధి పథకం(ఎమ్‌ఎన్‌ఆర్‌జీఏ) ద్వారా గ్రామీణ ప్రజలకు కొంత స్వాంతన కలగనుందని, కానీ మెట్రో నగరాలలో ఆదాయం లేని వారికి ఎమ్‌ఎన్‌ఆర్‌జీఏ వర్తించదు కనుక ప్రభుత్వం వారిని ఆదుకోవాలని రఘురామ్‌ రాజన్‌ కోరారు.

ముంబై: దేశ వ్యాప్త లాక్‌డౌన్‌ నేపథ్యంలో ఆర్‌బీఐ మాజీ గవర్నర్‌ రఘురామ్ ‌రాజన్‌ కీలక వ్యాఖ్యలు చేశారు. కేంద్రం ప్రకటించిన 20 లక్షల కోట్ల ప్యాకేజీ వలస కార్మికుల ఉచిత ఆహార ధాన్యాలకు సరిపోతాయని.. ఉచిత నగదు సాయం అందించాల్సిన బాధ్యత ప్రభుత్వానిదేనని రాజన్‌ స్పష్టం చేశారు. కార్మికులకు ఆశ్రయం కల్పించాలని ప్రభుత్వాన్ని కోరారు. ఈ క్రమంలో ఇబ్బందులను ఎదుర్కొంటున్న వివిద రంగాలను ఆదుకునేందుకు ప్రభుత్వం వేగవంతమైన చర్యలు తీసుకోకపోతే.. ఏడాదిలోగా ఆర్థిక వ్యవస్థ మరింత దిగజారే ప్రమాదం ఉందని రాజన్‌ హెచ్చరించారు. ఆర్థిక వ్యవస్థ వేగంగా కోలుకునేందుకు విప్లవాత్మక సంస్కరణలు చేపట్టాలని అన్నారు. ప్రభుత్వం రేటింగ్‌ ఏజన్సీలు ఇచ్చే నివేదికలు పరిగణలోకి తీసుకోవాల్సిన అవసరం లేదని తెలిపారు. ప్రభుత్వం మౌలిక ప్రాజెక్టులు, నిర్మాణ రంగంపై ప్రత్యేక దృష్టి కేంద్రీకరించాలని తెలిపారు. బ్యాంక్‌లు, సూక్ష్మ మధ్యస్థాయి పరిశ్రమలకు ప్రభుత్వం భరోసా కల్పించే ప్రణాళికలు రచించాలని పేర్కొన్నారు.  చదవండి: కోవిడ్‌-19 షాక్‌నకు ఆర్థిక టానిక్‌ అదే!

న్యూఢిల్లీ: లాక్‌డౌన్‌ ఎత్తివేత విషయంలో భారత్‌ చాలా తెలివిగా వ్యవహరించాలని ఉద్యోగాలను కాపాడేందుకు వీలైనంత వేగంగా ఆచితూచి పునరుద్ధరించాల్సి ఉంటుందని ఆర్బీఐ మాజీ గవర్నర్‌ రఘురామ్‌ రాజన్‌ గురువారం వ్యాఖ్యానించారు. ఈ కష్టకాలంలో పేదలను ఆదుకునేందుకు రూ.65 వేల కోట్ల వరకూ ఖర్చు చేయాలని సూచించారు. కోవిడ్‌ కారణంగా భారత ఆర్థిక వ్యవస్థకు జరిగిన నష్టాన్ని, పరిణామాలపై రాజన్‌ కాంగ్రెస్‌ పార్టీ సీనియర్‌ నేత రాహుల్‌ గాంధీతో వీడియో కాన్ఫరెన్స్‌లో చర్చించారు. దేశంలోని అన్ని వర్గాల వారిని దీర్ఘకాలం సాయం అందించే సామర్థ్యం భారత్‌కు లేదని, లాక్‌డౌన్‌ పొడిగించడం ఆర్థిక వ్యవస్థకు ఏమాత్రం మంచిది కాదని రాజన్‌ స్పష్టం చేశారు. కోవిడ్‌ నుంచి బయటపడ్డార ప్రపంచం మొత్తమ్మీద ఆర్థిక వ్యవస్థలోని అన్ని విషయాల్లో పునరాలోచన ఉంటుందని, భారత్‌ దీన్ని అవకాశంగా మలుచుకుని అంతర్జాతీయ స్థాయిలో తన గొంతు వినిపించాలని రాజన్‌ సూచించారు.

సాక్షి, న్యూఢిల్లీ : లాక్‌డౌన్‌తోనే కోవిడ్‌-19 వ్యాప్తిని నిరోధించలేమని భారత్‌లో ఆర్థిక వ్యవస్థను తెరిచేముందు పెద్ద ఎత్తున ప్రజలకు వైరస్‌ టెస్ట్‌లు నిర్వహించాలని  ఆర్‌బీఐ మాజీ గవర్నర్‌, ప్రముఖ ఆర్థికవేత్త రఘురాం రాజన్‌ స్పష్టం చేశారు. పాశ్చాత్య దేశాలతో పోలిస్తే భారత్‌ వద్ద ఆర్థిక వనరులు పరిమితంగా ఉన్నందున భారత్‌ లాక్‌డౌన్‌ నుంచి వ్యూహాత్మకంగా వ్యవహరిస్తూ ఆర్థిక వ్యవస్థను తిరిగి తెరవాల్సిన అవసరం ఉందని వ్యాఖ్యానించారు. కాంగ్రెస్‌ నేత రాహుల్ గాంధీతో జరిగిన వీడియో కాన్ఫరెన్స్‌లో దేశవ్యాప్తంగా అమలవుతున్న లాక్‌డౌన్‌, ఆర్థిక వ్యవస్థపై కరోనా ప్రభావం సహా పలు అంశాలపై ఆయన విస్తృతంగా చర్చించారు.అధికార వికేంద్రీకరణతోనే కరోనా మహమ్మారితో డీలా పడిన ఆర్థిక వ్యవస్థకు పునరుత్తేజం కల్పించవచ్చని రాజన్‌ పేర్కొన్నారు.  ఉత్పత్తి ఫలాలను ప్రజలకు పంచేందుకు బదులు అవకాశాలను ప్రజల ముందుకు తీసుకురావడంపై ప్రభుత్వం దృష్టి సారించాలన్నారు. ప్రజల అవసరాలను మెరుగ్గా అవగాహన చేసుకోగలిగే స్ధానిక ప్రభుత్వాలను బలోపేతం చేయాలన్నారు. కరోనా మహమ్మారితో రాష్ట్ర ప్రభుత్వాల ఆదాయాలు పూర్తిగా పడకేసిన క్రమంలో రఘురాం రాజన్‌ చేసిన వ్యాఖ్యలు ప్రాధాన్యత సంతరించుకున్నాయి. పలు రాష్ట్ర ప్రభుత్వాలు కేంద్ర ప్రభుత్వం నుంచి మరిన్ని నిధులు కోరుతున్న సంగతి తెలిసిందే. ఇక లాక్‌డౌన్‌ నుంచి సమర్ధవంతమైన వ్యూహంతో బయటకు వచ్చిన అనంతరం ఆర్థిక వ్యవస్థను అత్యంత జాగరూకతతో తెరవాల్సిన అవసరం ఉందన్నారు. ప్రజలు ప్రభుత్వ ఉద్యోగాలపై ఆధారపడకుండా మంచి నాణ్యతతో కూడిన ఉద్యోగాలను ప్రభుత్వం సృష్టించాలని సూచించారు. చదవండి : కోవిడ్‌-19 షాక్‌నకు ఆర్థిక టానిక్‌ అదే! లాక్‌డౌన్‌ నేపథ్యంలో పేదలకు ఆహారం,సంక్షేమంపై రూ 65,000 కోట్లు వెచ్చించాల్సి ఉందని, భారత జీడీపీ 200 లక్షల కోట్లు కావడంతో ఇది ఏమాత్రం భారం కాదని వ్యాఖ్యానించారు. ఇలాంటి ఆర్థిక సంక్లిష్ట సమయాల్లో అసమానత్వాలను సరిచేయాల్సిన అవసరం ఉందని రాజన్‌ అన్నారు. నాణ్యమైన ఉద్యోగాలను సృష్టించడం ద్వారా ఈ అంతరాలకు చెక్‌ పెట్టవచ‍్చని స్పష్టం చేశారు. పేదల సంక్షేమం కోసం ప్రభుత్వం భారీగా విడుదల చేయాలని కోరారు. వీలైనంత ఎక్కువమంది పేదలకు ప్రజా పంపిణీ వ్యవస్థల ద్వారా ఆర్థిక సాయం, ఆహారం సమకూరాలని అన్నారు. భారత ఆర్థిక కార్యకలాపాలు తిరిగి ప్రారంభమయ్యే నాటికి కొత్తగా కరోనా వైరస్‌ కేసులు వెలుగుచూడకుండా నియంత్రించాలని సూచించారు. మరోసారి లాక్‌డౌన్‌ ప్రకటిస్తే అది మరింత విపరిణామాలకు దారితీస్తుందని, ప్రభుత్వం చేపట్టిన చర్యలపై ప్రజల విశ్వాసాన్ని దెబ్బతీస్తుందని రాజన్‌ హెచ్చరించారు.

సాక్షి,న్యూఢిల్లీ: రిజర్వ్ బ్యాంకు ఆఫ్ ఇండియా మాజీ గవర్నర్ రఘురామ్ రాజన్ మరోసారి కరోనా మహమ్మారి విస్తరణపై కీలక వ్యాఖ్యలు చేశారు. కరోనా విస్తరణ కారణంగా భారత ఆర్థికవ్యవస్థ  మరింత సంక్షోభంలోకి జారిపోతోందని ఆందోళన వ్యక్తం చేశారు. షికాగో బిజినెస్ విశ్వవిద్యాలయం ప్రొఫెసర్ గా ఉన్న రాజన్ దేశం స్వాతంత్ర్యం తరువాత 2009 నాటి ప్రపంచ ఆర్థిక సంక్షోభాన్ని మించి, తీవ్రమైన అత్యవసర పరిస్థితిని ఎదుర్కొంటోందన్నారు. 'ఇటీవలి కాలంలో భారతదేశపు గొప్ప సవాలు' అనే  పేరుతో తన బ్లాగులో ఈ విషయాలను పేర్కొన్నారు.  ( కరోనా : రఘురామ్ రాజన్ సూచనలు) ప్రపంచ ఆర్థిక సంక్షోభం 2008-09 నాటి కంటే నేడు తీవ్రంగా వుంది. 2008-09లో అదొక తీవ్రమైన డిమాండ్ షాక్. ఆ సమయంలో కార్మికులు యధావిధిగా పనులకు వెళ్లారు. మన దేశానికి సంబంధించి పలు సంస్థలు బలమైన వృద్ధిని సాధించాయి. ఆర్థిక వ్యవస్థ చాలా బాగుంది, ప్రభుత్వ ఆర్థిక పరిస్థితులు ఆరోగ్యంగానే ఉన్నాయి. కానీ ఇవన్నీ ఇపుడు కుదేలై ప్రస్తుతం కరోనా వైరస్ మహమ్మారితో పోరాడలేకపోతున్నాయని రఘురామ్ రాజన్ అన్నారు. ప్రస్తుత లాక్ డౌన్  పరిస్థితుల్లో కార్మికులు అనేక ఇబ్బందులు పడుతున్నారని రాజన్ ఆవేదన వ్యక్తం చేశారు. అలాగే ఈ ఆర్థిక సంక్షోభంపై పోరాడటానికి సాధ్యమైన చర్యలను కూడా ఆయన సూచించారు. లాక్ డౌన్ పరిస్థితులను ఎక్కువ కాలం కొనసాగించలేనందున తక్కువ ప్రభావం ఉన్న ప్రాంతాలలో ఆర్థిక కార్యకలాపాలను ఎలా ప్రారంభించాలనే దానిపై ప్రభుత్వం  ఇపుడు  దృష్టి పెట్టాలని రాజన్ బ్లాగులో పేర్కొన్నారు. భౌతిక దూరం లాంటి  కీలక జాగ్రత్తలతో ఆరోగ్యకరమైన యువతను, కార్యాలయానికి సమీపంలోని హాస్టళ్లలో ఉంచి కార్యకలాపాల నిర్వహణ తిరిగి ప్రారంభించాలని సూచించారు. తయారీదారులు తమ మొత్తం సరఫరా గొలుసును తిరిగి కొనసాగించడానికి, త్వరితగతిన ఉత్పత్తిని ప్రారంభించాల్సిన అవసరం చాలా ఉందన్నారు. ఆవైపుగా సంస్థలను ప్రభుత్వం ప్రోత్సహించాలని తెలిపారు. సాధ్యమైనంత తొందరగా ఈ ప్రణాళికలను రూపొందించడం, ఆమోదించడంతో పాటు సమర్ధవంతంగా అమలయ్యేలా పరిపాలన విభాగం చూడాలని పేర్కొన్నారు.  ప్రస్తుత పరిమిత ఆర్థిక వనరులపై కూడా ఆయన ఆందోళన వ్యక్తం చేశారు. అయినా  కూడా నిరుపేదల పట్ల ప్రభుత్వం శ్రద్ధ వహించాలని,  మానవత్వంతో వారిని ఆదుకోవడం సరైన పని అని రాజన్  ప్రధానంగా సూచించారు. చదవండి : కరోనా షాక్ : జూలోని పులికి పాజిటివ్ లాక్‌డౌన్: మొబైల్ యూజర్లకు ఊరట

సాక్షి, ముంబై : దేశంలో వేగంగా కరోనా వైరస్ మహమ్మారిపై రిజర్వ్ బ్యాంక్ ఆఫ్ ఇండియా(ఆర్‌బీఐ) మాజీ గవర్నరు రఘు రామ్ రాజన్ స్పందించారు.  ఈ సంక్షోభ సమయంలో ఆర్బీఐ పోషించాల్సిన పాత్రపై కొన్ని సూచనలు చేశారు. వైరస్ ప్రభావంతో దెబ్బతిన్న వ్యాపారాలకు క్రెడిట్ ఇవ్వడం అవసరం ఆయన పేర్కొన్నారు. ముఖ్యంగా ఈ కష్ట సమయంలో పేదలు మనుగడ సాగించడానికి తాత్కాలిక ఆదాయ బదిలీ పథకాన్ని అమలు చేయాలని రఘురామ్ రాజన్ సూచించారు. ఇండియా టుడే న్యూస్ తో ప్రత్యేకంగా సంభాషించిన ఆయన ఇప్పటికే బలహీనమైన భారత ఆర్థిక వ్యవస్థపై ప్రపంచ మహమ్మారి కరోనావైరస్  దెబ్బ పడిందని, ఈ ప్రభావాన్ని ఆర్బీఐ, కేంద్రం మృదువుగా డీల్ చేయాలని అభిప్రాయపడ్డారు. చిన్న మధ్యతరహా సంస్థలతో పాటు పెద్ద సంస్థలకు బ్యాంకులు రుణాలు ఇవ్వాలి. ఇందుకు ప్రభుత్వం పాక్షిక హామీలు ఇవ్వాలి. అదే సమయంలో కొన్ని ప్రోత్సాహకాలను అందించాలి, తద్వారా బ్యాంకులు క్రెడిట్ రిస్క్ తీసుకోవడానికి సిద్ధంగా ఉంటాయని పేర్కొన్నారు. అలాగే ప్రపంచ వ్యాప్తంగా ద్రవ్యత సడలింపును అనుసరిస్తున్న ఇతర  కేంద్ర బ్యాంకుల వైఖరిని ఆర్ బీఐ   కూడా అనుసరించాలని సూచించారు. అయితే  చెడురుణాల బెడద అధికంగా ఉన్నందు వల్ల ఇక్కడ జాగ్రత్తగా ఆలోచించాలి అన్నారు.  దీర్ఘకాలిక పథకాలకు ఇది సమయం కాదు, దీనికి తగినంత నిధులు కూడా లేవు కనుక, సాధ్యమైనంతవరకు  తాత్కాలిక ఆదాయ మద్దతుకు ప్రాధాన్యత ఇవ్వాలన్నారు.  ఇందులో మొదటి  ప్రాధాన్యత వైద్య సదుపాయాలకు వెళ్లాలని ఆయన అన్నారు. ఆ తరువాత ఎక్కువగా ప్రభావితమైన ప్రజలకు కొన్నినెలల పాటు నగదు సాయం చేరాలి. తద్వారా అల్పాదాయ వర్గాల  వారికి ఊరట లభించాలి. అలాగే అంతర్జాతీయ మార్కెట్ లో లభ్యమవుతున్న మెడికల్ వనరులను  అందింపుచ్చుకోవాలన్నారు. తక్షణం మనకు దొరికిన చోట అవసరమైన  అన్ని సరఫరాలను తీసుకోవాలన్నారు.  ఈ ఒత్తిడిని ఎదుర్కొనేందుకు ప్రతి దేశంలాగానే మనం కూడా  ప్రతి మార్గాన్ని అన్వేషించాలని తెలిపారు. ప్రస్తుత  క్లిష్టమైన పరిస్థితులను అధిగమించేందుకు స్వయం సమృద్ధిగా ఉన్నారా అనే ప్రశ్న సంక్షోభం లేవనెత్తుతున్నప్పటికీ, ఇది స్వల్ప కాలానికి సంబంధించిన అంశమేనని రఘురామ్ రాజన్ వెల్లడించారు. కాగా  వైరస్‌ మహమ్మారి కారణంగా ఆర్థిక వ్యవస్థ దెబ్బతినకుండా రిజర్వ్ బ్యాంక్ యుద్ధప్రాతిపదికన చర్యలు తీసుకుంటోంది. మార్చి 19 నుంచే వ్యాపార విపత్తు ప్రణాళిక (బీసీపీ)ని అమల్లోకి తెచ్చింది. ఇందులో భాగంగా ముంబైలోని ఒక రహస్య ప్రదేశంలో ప్రత్యేకంగా వార్ రూమ్ ఏర్పాటు చేసింది. కేవలం 24 గంటల వ్యవధిలో వార్ రూమ్ అందుబాటులోకి తెచ్చామని,  ప్రపంచంలోనే ఇదే మొదటిసారి. చరిత్రలో కూడా ఇదే తొలిసారి అని ఆర్‌బీఐ ప్రకటించిన సంగతి విదితమే.

సాక్షి, న్యూఢిల్లీ: ప్రముఖ ఆర్థికవేత్త, ఆర్‌బీఐ మాజీ గవర్నర్‌ రఘురామ రాజన్‌ జేఎన్‌యూ వ్యవహారంలో బాలీవుడ్‌ నటి దీపికా పదుకొనే నిరసనపై స్పందించారు. జేఎన్‌యు హింసకు స్పందించిన దీపికాకు మద్దతు తెలపడంతో పాటు, ఆమె చేసిన సైలెంట్‌ ప్రొటెస్ట్‌పై ఆయన తన అభిమానం చాటారు. అంతేకాదు తన కుటుంబానికి వేధింపులు ఉన్నప్పటికీ నిష్పాక్షికంగా తన కర్తవ్యాన్ని నిర్వర్తించిన ఎన్నికల కమిషనర్ అశోక్ లావాసాతో దీపికా పదుకొనేను పోల్చారు. కొంతమంది వ్యక్తులు తమ చర్యల ద్వారా సత్యం, స్వేచ్ఛ ,న్యాయం లాంటివే కాకుండా త్యాగం చేయవలసిన ఆదర్శాలను చూపిస్తారన్నారు భారతదేశంలోని ప్రముఖ విశ్వవిద్యాలయాలలో ఒకటైన జవహర్‌లాల్ నెహ్రూ విశ్వవిద్యాలయం(జేఎన్‌యూ) లోకి ముసుగు దుండగుల ముఠా  ప్రవేశించి, ఆపై గంటల తరబడి వినాశనం సృష్టించి, విద్యార్థులు అధ్యాపకులపై దాడి చేయడంతోపాటు, పోలీసుల నిర్లక్ష్యం అనే వార్త తీవ్ర ఆందోళన కరమైందని లింక్డిన్‌లోని ఒక బ్లాగులో రాజన్‌ వ్యాఖ్యానించారు. జేఎన్‌యూ బాధితులను కలవడం ద్వారా అటు పుష్ప గుచ్ఛాలను, ఇటు ట్రోలింగ్‌ను ఎదుర్కొన్న ఆమె మనందరికీ స్పూర్తిదాయకమని  పేర్కొన్నారు. తన తాజా చిత్రం 'ఛపాక్' ప్రమాదంలో పడుతుందని తెలిసీ కూడా జేఎన్‌యూ బాధితులకు అండగా నిలిచేందుకు ఆమె వెనుకాడలేదన్నారు. అలాగే జేఎన్‌యూ ఆందోళనలో కీలక పాత్ర పోషిస్తున్న యువతను కూడా రాజన్‌ ప్రశంసించారు. విభిన్న విశ్వాసాలు కలిగిన యువకులు ఒక్కటిగా కలిసి కవాతు చేయడం, హిందూ,ముస్లింలు మన జాతీయ జెండా వెనుక ఐక్యం కావడం సంతోషకరమన్నారు. తమ సొంత లాభం కోసం కృత్రిమ విభజనలను ప్రేరేపించే స్వార్థరాజకీయ పరులను తిరస్కరించడం చాలా ఆనందంగా ఉందని రాజన్ అన్నారు.  తద్వారా మన రాజ్యాంగ స్ఫూర్తి ప్రకాశవంతంగా నిలుస్తుందనే విషయాన్ని తేల్చి చెప్పారన్నారు. మహాత్మాగాంధీ ప్రాణత్యాగం చేసిన దేశ స్వేచ్ఛాస్వాతంత్ర్యాలకోసం యువత పోరాడుతోంది. స్వేచ్ఛను కాపాడటం కోసం వీరు కవాతు చేస్తున్నారు. ముఖ్యంగా రవీంద్రనాథ్ ఠాగూర్ కలలుగన్న స్వేచ్ఛా స్వర్గం కోసం ఉద్యమిస్తున్నారని వ్యాఖ్యానించారు. ఉన్నత విశ్వవిద్యాలయాలు కూడా అక్షరాలా యుద్ధభూమిగా మారిపోయాయి. ప్రభుత్వం అసమ్మతిని అణచివేయడానికి ప్రయత్నిస్తోందనే ఆరోపణలొస్తున్నాయి. అయితే ఈ విషయంలో వివక్ష, ఉదాసీనత రెండింటి పాత్ర ఉందనీ, నాయకత్వాన్ని నిందించడం చాలా సులభమే అయినా ప్రజాస్వామ్యంలో ప్రజలు బాధ్యత కూడా ఉందని ఆయన రాసుకొచ్చారు. ప్రజాస్వామ్యం అంటే హక్కు మాత్రమే కాదు, బాధ్యత కూడా.  స్వాత్రంత్యం అంటే ఎన్నికల రోజున మాత్రమే గుర్తుకువచ్చేది కాదు, ప్రతి రోజు రావాలి అని రాజన్‌ రాశారు.  ఈ సందర్భంగా నిజాన్ని చూపించడం కోసం కృషి చేస్తున్న మీడియా సంస్థలను,  రాజీనామా చేసిన అధి​కారులను కూడా ఆయన ప్రశంసించారు. ఎన్నికల ప్రక్రియ ఉల్లంఘనల విషయంలో ప్రధాని నరేంద్ర మోదీ, హోంమంత్రి అమిత్ షాలకు క్లీన్ చిట్ ఇవ్వడానికి నిరాకరించిన మాజీ ఎన్నికల సంఘం ఏకైక  అధికారి అని లావాసాను పరోక్షంగా గుర్తు చేసుకున్నారు రఘురామ రాజన్‌.

న్యూఢిల్లీ: పాలనాధికారాలన్నీ ప్రధాని కార్యాలయంలోనే కేంద్రీకృతమై ఉన్నాయని, మంత్రులంతా నిమిత్తమాత్రులుగానే ఉంటున్నారని రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ వ్యాఖ్యానించారు. ఇలాంటి పాలనతో ఎకానమీ తీవ్ర రుగ్మతలతో సతమతమవుతోందని .. దేశం ‘వృద్ధి మాంద్యం’ పరిస్థితుల్లో చిక్కుకుందని పేర్కొన్నారు. ఒక వార్తాపత్రికకు రాసిన వ్యాసంలో ఆయన ఈ విషయాలు పేర్కొన్నారు. ఈ నేపథ్యంలో దేశాన్ని గట్టెక్కించాలంటే పెట్టుబడులు, భూ.. కార్మిక చట్టాలపరమైన సంస్కరణలు మరిన్ని చేపట్టాల్సిన అవసరం ఉందన్నారు. దీంతో పెట్టుబడులతో పాటు వృద్ధికి కూడా ఊతం లభించగలదని రాజన్‌ తెలిపారు. దేశ సమర్థతను మెరుగుపర్చుకోవడానికి, పోటీ దేశాలకు దీటుగా ఎదగడానికి .. ఉపయుక్తంగా ఉండే స్వేచ్ఛా వాణిజ్య ఒప్పందాలు కుదుర్చుకోవడంపై భారత్‌ దృష్టి పెట్టాలని ఆయన సూచించారు. ‘ప్రస్తుత ప్రభుత్వంతో సమస్యేమిటంటే .. అధికారాలన్నీ ఒకే చోట కేంద్రీకృతమై ఉంటాయి. నిర్ణయాలే కాదు.. ఆలోచనలు, ప్రణాళికలు.. అన్నీ కూడా ప్రధాని చుట్టూ ఉండే కొద్ది మంది, ప్రధాని కార్యాలయం నుంచి వస్తుంటాయి. ఒక పార్టీ రాజకీయ, సామాజిక ఎజెండాను అమలు చేయడానికి ఇలాంటి విధానం పనికొస్తుంది కానీ.. ఆర్థిక సంస్కరణల విషయంలో ఇది పనిచేయదు. ఇందుకు రాష్ట్రాల స్థాయిలో కాకుండా జాతీయ స్థాయిలో ఎకానమీ ఎలా పనిచేస్తుందన్న దానిపై అపార పరిజ్ఞానం అవసరమవుతుంది‘ అని రాజన్‌ పేర్కొన్నారు. గత ప్రభుత్వాలు సంకీర్ణంగా నడిచినప్పటికీ.. ఆర్థిక విధానాల సరళీకరణను స్థిరంగా ముందుకు తీసుకెళ్లాయన్నారు. ‘తీవ్ర స్థాయిలో అధికార కేంద్రీకరణ, మంత్రులకు అధికారాలు లేకపోవడం తదితర అంశాల కారణంగా.. పీఎంవో దృష్టి పెట్టినప్పుడు మాత్రమే సంస్కరణలు జోరందుకుంటున్నాయి. పీఎంవో దృష్టి మిగతా అంశాలవైపు మళ్లిన మరుక్షణం.. సంస్కరణల జోరూ తగ్గిపోతోంది‘ అని రాజన్‌ అన్నారు. ముందుగా సమస్యను గుర్తించాలి.. ఆర్థిక మందగమనానికి మందు కనుగొనాలంటే.. ముందుగా సమస్య తీవ్రతను గుర్తించడం దగ్గర్నుంచి మొదలుపెట్టాల్సి ఉంటుందని రాజన్‌ తెలిపారు. ‘సమస్య పరిమాణాన్ని గుర్తించాలి. సమస్య తాత్కాలికమేనని.. ప్రతికూల వార్తలు, అననుకూల సర్వేలను తొక్కి పెట్టి ఉంచితే అది పరిష్కారమైపోతుందనే ఆలోచనల నుంచి బైటికి రావాలి. విమర్శించే ప్రతి ఒక్కరికీ రాజకీయ దురుద్దేశాలు ఆపాదించడం మానుకోవాలి. దేశం వృద్ధి మాంద్య పరిస్థితుల మధ్యలో ఉంది. గ్రామీణ ప్రాంతాల్లో గణనీయమైన ఒత్తిడి ఉంది‘ అని ఆయన పేర్కొన్నారు. భారత జీడీపీ వృద్ధి రేటు.. జూలై–సెప్టెంబర్‌ త్రైమాసికంలో ఆరేళ్ల కనిష్టమైన 4.5%కి పడిపోయిన నేపథ్యంలో రాజన్‌ వ్యాఖ్యలు ప్రాధాన్యం సంతరించుకున్నాయి. సంస్కరణలు తేవాలి..  రియల్‌ ఎస్టేట్, నిర్మాణ, ఇన్‌ఫ్రా రంగాలు.. వాటికి రుణాలిచ్చిన నాన్‌ బ్యాంకింగ్‌ ఫైనాన్స్‌ కంపెనీలు సంక్షోభంలో ఉన్నాయని రాజన్‌ చెప్పారు. బ్యాంకుల్లో మొండి బాకీలు కూడా తోడవడంతో రుణ వితరణ వృద్ధి ఉండటం లేదన్నారు. సామాన్యుల నుంచి కార్పొరేట్ల దాకా అందరి రుణభారం, యువతలో నిరుద్యోగిత పెరిగిపోతోందని పేర్కొన్నారు. ఈ నేపథ్యంలో భూ సమీకరణ, కార్మిక చట్టాలపరమైన సంస్కరణలు, స్థిరమైన పన్నులు.. నియంత్రణా వ్యవస్థల విధానాలు అమలు చేయాలని రాజన్‌ సూచించారు.

సాక్షి, న్యూఢిల్లీ : ప్రధాని కార్యాలయంలో అధికారం కేంద్రీకృతం కావడం ద్వారా దేశంలో ఆర్థిక వృద్ధి మందగమనం కొనసాగుతోందని ఆర్బీఐ మాజీ గవర్నర్‌ రఘురాం రాజన్‌ అన్నారు. మూలధనం, భూమి, కార్మిక మార్కెట్లు, పెట్టుబడులు, వృద్ధిని సరళీకరించేలా సంస్కరణలు అవసరమని ఓ పత్రికకు రాసిన వ్యాసంలో ఆయన పేర్కొన్నారు. పోటీతత్వాన్ని పెంపొందించడం, దేశీయ సమర్ధతను మెరుగుపరిచేందుకు భారత్‌ స్వేచ్ఛా వాణిజ్య ఒప్పందాల్లో చేరాలని కోరారు. ఆర్థిక వృద్ధి మందగమనం నేపథ్యంలో తప్పు ఎక్కడ జరుగుతుందనే దాన్ని ముందుగా మనం అర్ధం చేసుకోవాలని, ప్రస్తుత ప్రభుత్వంలో అధికార కేంద్రీకరణ గురించి ప్రస్తావించాలని వ్యాఖ్యానించారు. నిర్ణాయక వ్యవస్థలోనే కాదు సలహాలు ప్రణాళికలు సైతం ప్రధాని చుట్టూ, ప్రధాని కార్యాలయంలో చేరిన కొద్ది మంది నుంచే వస్తున్నాయని రాజన్‌ స్పష్టం చేశారు. ఇది పార్టీ రాజకీయ, సామాజిక అజెండాకు ఉపకరిస్తున్నా ఆర్థిక సంస్కరణల విషయంలో ఫలితాలను ఇవ్వడం లేదని పెదవివిరిచారు. రాష్ట్రస్ధాయిలో కాకుండా దేశవ్యాప్తంగా ఆర్థిక వ్యవస్థ నిర్వహణపై వీరికి పెద్దగా అవగాహన ఉండటం లేదని అన్నారు. గత ప్రభుత్వాలు సంకీర్ణ సర్కార్‌లు అయినా తదుపరి ఆర్థిక సరళీకరణను స్ధిరంగా ముందుకు తీసుకువెళ్లాయని పేర్కొన్నారు. మోదీ ప్రభుత్వం కనిష్ట ప్రభుత్వం..గరిష్ట పాలన నినాదంతో అధికారంలోకి వచ్చినా దీన్ని తప్పుగా అర్థం చేసుకుంటున్నారని వ్యాఖ్యానించారు. మోదీ సర్కార్‌ ఆర్థిక మందగమనాన్ని ఎదుర్కొనేందుకు తీసుకోవాల్సిన తొలి చర్య దాన్ని అర్థం చేసుకోవడమేనని చెప్పుకొచ్చారు. ప్రతి విమర్శకులకూ రాజకీయ దురుద్దేశం అంటగట్టడం సరికాదని, మందగమనం తాత్కాలికమనే భావనను విడనాడాలని రఘురాం​ రాజన్‌ హితవుపలికారు.

సాక్షి, ముంబై : ఆర్‌బీఐ మాజీ గవర్నర్‌ రఘురామ్‌రాజన్‌ దేశ ఆర్థిక వ్యవస్థపై మరోసారి సంచలన వ్యాఖ్యలు చేశారు. దేశంలో రియల్‌ ఎస్టేట్‌ రంగం, నిర్మాణ రంగం తీవ్ర సంక్షోభాలను ఎదుర్కోనున్నాయని హెచ్చరించారు. ఇండియా టుడే పత్రికలో ఆయన పలు కీలక విషయాలను వెల్లడించారు ముఖ్యంగా గ్రామీణ ప్రాంతాలు తీవ్ర స్థాయిలో ఇబ్బందులు ఎదుర్కుంటున్నాయని తెలిపారు. ఆర్థిక మాంద్య పరిస్థితుల్లో వృద్ధి రేటు ఆరేళ్ల కనిష్టానికి చేరిన విషయాన్ని గుర్తు చేశారు. నిరుద్యోగిత రేటు తీవ్ర స్థాయిలో ఉందని తెలిపారు.  రియల్టీ, కన్‌స్ట్రక్షన్‌, మాన్యుఫాక్చర్‌  కంపెనీలకు పెద్దమొత్తంలో రుణాలిచ్చే (నాన్‌ బ్యాంకింగ్‌ ఫైనాన్స్‌) ఎన్‌బీఎఫ్‌సీల ఆస్తుల నాణ్యతను పరిశీలించాల్సి వుందని ఆయన అభిప్రాయపడ్డారు. కేంద్ర బ్యాంకు టాప్‌ 50 నాన్‌ బ్యాంకింగ్‌ ఫైనాన్స్‌ కంపెనీల పనితీరును సమీక్షిస్తుందన్న ఆయన ఆర్‌బీఐ వాటి పనితీరును, వాటి ఎసెట్‌ క్వాలిటీని కూడా సమీక్షించాలని సూచించారు.  కాగా షాడో బ్యాంకింగ్ రంగంలో మొత్తం ఆస్తులలో 75 శాతం వాటా ఉన్న టాప్ 50 నాన్-బ్యాంక్ ఫైనాన్షియర్లను సెంట్రల్ బ్యాంక్ నిశితంగా పరిశీలిస్తుందని గవర్నర్ శక్తికాంత దాస్ గురువారం విలేకరుల సమావేశంలో పేర్కొన్నారు. అలాగే అతి ముఖ్యమైన పెద్ద ఎన్‌బీఎఫ్‌సీలు కుప్పకూలకుండా ఆర్‌బీఐ చర్యలు తీసుకుంటుందని ఆయన పునరుద్ఘాటించిన సంగతి తెలిసిందే.  కాగా నిర్మాణ రంగ ప్రాజెక్టులు ఆర్థిక ఇబ్బందులను ఎదుర్కొంటున్నాయని సుమారు యూఎస్‌డీ 66 బిలియన్ల మేర బకాయిలు ఉన్నటు ఇటీవల ఓ సర్వే తెలియజేసిందని పేర్కొన్నారు. మరోవైపు ప్రాపర్టీ కన్సల్టెంట్‌ జేఎల్‌ఎల్‌ స్పందిస్తూ సుమారు 4.54 లక్షల యూనిట్ల నిర్మాణాలు సకాలంలో పూర్తి కావడం లేదని వెల్లడించారు.

న్యూఢిల్లీ : బ్యాంకింగ్‌ రంగంలో సమస్యలకు యూపీఎ ప్రభుత్వంతో పాటు అప్పటి ఆర్బీఐ గవర్నర్‌ రఘురామ్‌ రాజన్‌లే కారణమని ఆర్థిక మంత్రి నిర్మలా సీతారామన్‌ చేసిన విమర్శలకు రఘరామ్‌ రాజన్‌ దీటుగా బదులిచ్చారు. 2013 సెప్టెంబర్‌ నుంచి 2016 సెప్టెంబర్‌ వరకూ తన పదవీకాలం సాగగా, ఎక్కువ కాలం బీజేపీ ప్రభుత్వ హయాంలోనే పనిచేశానని గుర్తుచేశారు. బ్యాంకింగ్‌ రంగ ప్రక్షాళనకు తాను చర్యలు చేపట్టి అవి అసంపూర్తిగా ఉండగానే తాను ఆర్బీఐ గవర్నర్‌గా వైదొలిగానని చెప్పారు. కాంగ్రెస్‌ హయాంలో తాను కేవలం ఎనిమిది నెలలు పనిచేస్తే ప్రస్తుత ప్రభుత్వం కిందే 26 నెలలు ఆర్బీఐ గవర్నర్‌గా వ్యవహరించానని సీఎన్‌బీసీకి ఇచ్చిన ఇంటర్వ్యూలో ఆయన పేర్కొన్నారు. మాజీ ప్రధాని మన్మోహన్‌ సింగ్‌, రఘురామ్‌ రాజన్‌ల జోడీ వల్లే ప్రభుత్వ రంగ బ్యాంకులకు ప్రస్తుత దుస్థితి దాపురించిందని నిర్మలా సీతారామన్‌ చేసిన వ్యాఖ్యలపై ఆయన ఇలా స్పందించారు. మరోవైపు ఈ అంశంపై రాజకీయ చర్చకు తాను దిగదలుచుకోలేదని స్పష్టం చేశారు. పటిష్ట ఆర్థిక వృద్ధి కోసం బ్యాంకులు, ఆర్థిక సంస్థల ప్రక్షాళన అవసరమని తాను అదే పనిచేశానని తెలిపారు. ఆర్థిక సంక్షోభానికి ముందు తీసుకున్న రుణాలు పేరుకుపోవడంతో బ్యాంకుల నిరర్ధక ఆస్తులు పెరిగాయని, వాటిని ప్రక్షాళన చేసి బ్యాంకులకు తిరిగి మూలధన సమీకరణకు తోడ్పడకుంటే సమస్యలు ఎదురవుతాయని, తాను ఈ ప్రక్రియను చేపట్టి సగంలోనే ముగించాల్సి వచ్చిందని రాజన్‌ చెప్పారు. దేశం ప్రస్తుతం ఆర్థిక మందగమనంలో ఉందని చెబుతూ వృద్ధి రేటును పెంచే చర్యలు చేపట్టాల్సిన అవసరం ఉందన్నారు.

న్యూఢిల్లీ: మాజీ ప్రధాని మన్మోహన్‌ సింగ్, మాజీ గవర్నర్‌ రఘురామ్‌రాజన్‌ హయాంలోనే ప్రభుత్వరంగ బ్యాంకులు దుర్భర పరిస్థితులను చవిచూశాయని కేంద్ర ఆర్థిక మంత్రి నిర్మలా సీతారామన్‌ వ్యాఖ్యానించారు. దెబ్బతిన్న ప్రభుత్వరంగ బ్యాంకులను బాగు చేయడమే తన ప్రాథమిక కర్తవ్యంగా భావిస్తున్నానని ఆమె పేర్కొన్నారు. అమెరికాలోని ప్రఖ్యాత కొలంబియా యూనివర్సిటీ స్కూల్‌ ఆఫ్‌ ఇంటర్నేషనల్‌ అండ్‌ పబ్లిక్‌ అఫైర్స్‌లో.. ‘భారత ఆర్థిక వ్యవస్థ: సవాళ్లు, అవకాశాలు’ అనే అంశంపై ఆమె మాట్లాడారు. యూపీఏ–2 పాలనలో 2013 సెప్టెంబర్‌ 4 నుంచి 2016 సెప్టెంబర్‌ 4 వరకు ఆర్‌బీఐ గవర్నర్‌గా, 2012 ఆగస్ట్‌ 10 నుంచి 2013లో ఆర్‌బీఐ గవర్నర్‌ అయ్యే నాటి వరకు కేంద్ర ప్రభుత్వానికి ముఖ్య ఆర్థిక సలహాదారుగా రఘురామ్‌రాజన్‌ పనిచేశారు. గత ప్రభుత్వ అసమర్థ విధానాలను మంత్రి సీతారామన్‌ తన ప్రసంగంలో ఎండగట్టారు. ‘‘ప్రభుత్వరంగ బ్యాంకులకు ప్రాణవాయువు అందించడమే భారత ఆర్థిక మంత్రి ప్రాథమిక విధి. ఈ ప్రాణవాయువు అన్నది రాత్రికి రాత్రి రాదు’’ అని మంత్రి నిర్మలా సీతారామన్‌ అన్నారు. ఇటీవల బ్రౌన్‌ యూనివర్సిటీలో రాజన్‌ మాట్లాడుతూ.. భారత ప్రభుత్వం ఆర్థిక రంగానికి సంబంధించి చెప్పుకోతగ్గది ఏదీ చేయలేదంటూ విమర్శించారు. ప్రభుత్వం పూర్తిగా కేంద్రీకృతమైందని, ఆర్థి క వృద్ధికి సంబంధించి నాయకత్వానికి స్పష్టమైన విధానం లోపించిందన్నారు. ఈ వ్యాఖ్యలపై ఎదురైన ప్రశ్నకు  సీతారామన్‌ గట్టిగానే బదులిచ్చారు.   ఫోన్‌ కాల్స్‌తో రుణాలు ‘‘ఆర్‌బీఐ గవర్నర్‌గా రాజన్‌ హయాంలో సన్నిహిత నేతల నుంచి వచ్చిన ఫోన్‌కాల్స్‌తో రుణాలు మంజూరు చేశారు. దీంతో ప్రభుత్వరంగ బ్యాంకులు నాటి ఊబి నుంచి బయటకు వచ్చేందుకు నేటికీ ప్రభుత్వం అందించే నిధులపై ఆధారపడుతున్నాయి. ఎంతో ప్రజాస్వామ్యంతో కూడిన నాయకత్వం (మన్మోహన్‌సింగ్‌) కారణంగా భారీ స్థాయి అవినీతి చోటుచేసుకుంది. భారత్‌ వంటి వైవిధ్య దేశానికి గట్టి నాయకత్వం కావాలి. మరీ ప్రజాస్వామ్యంతో కూడిన నాయకత్వం అంటే నాకు భయమే. ఎందుకంటే అవినీతి తాలూకూ దుర్గంధాన్ని అది విడిచి వెళ్లింది. దాన్ని ఈ రోజూకీ శుద్ధి చేస్తున్నాం’’ అంటూ యూపీఏ పాలనను నిర్మలా సీతారామన్‌ విమర్శించారు. రాజన్‌ను తాను ఎగతాళి చేయడం లేదని, విద్యావంతుడైన ఆయన్ను గౌరవిస్తానంటూనే, వాస్తవాలను తెలియజేస్తున్నానని పేర్కొన్నారు. బ్యాంకుల ఆస్తుల నాణ్యతను సమీక్షించినందుకు రాజన్‌కు కృతజ్ఞతలు తెలియజేస్తూ, బ్యాంకులు నేడు ఏ స్థితిలో ఉన్నాయో ప్రజలకు తెలుసునని వ్యాఖ్యానించారు. ప్రభుత్వం ఇటీవలే ప్రభుత్వరంగ బ్యాంకులకు రూ.70వేల కోట్ల సాయాన్ని ప్రకటించిన విషయం తెలిసిందే. ఈ ఏడాది మార్చి నాటికి ప్రభుత్వరంగ బ్యాంకుల ఎన్‌పీఏలు రూ.8,06,412 కోట్లుగా ఉన్నాయి. గత మార్చి నాటికి ఉన్న రూ.8,95,601 కోట్లతో పోలిస్తే రూ.89,189 కోట్లు తగ్గాయి.

న్యూఢిల్లీ: ఆర్థిక మందగమనం పట్ల రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) మాజీ గవర్నర్‌ రఘురామ్‌ రాజన్‌ తీవ్ర ఆందోళన వ్యక్తం చేశారు. విద్యుత్, బ్యాంకింగ్‌యేతర ఫైనాన్షియల్‌ రంగాల్లో సమస్యల తక్షణ పరిష్కారంపై కేంద్రం దృష్టి సారించాల్సిన అవసరం ఉందని ఆయన పేర్కొన్నారు. అలాగే ప్రైవేటు రంగ పునరుత్తేజానికి చర్యలు తీసుకోవాల్సిన అవసరం ఉందనీ సూచించారు. భారత్‌లో స్థూల దేశీయోత్పత్తి (జీడీపీ) వృద్ధి రేటు లెక్కింపు విధానంపై తాజాగా దృష్టి సారించాల్సిన అవసరం ఉందని ఆయన పేర్కొన్నారు. నరేంద్రమోదీ ప్రభుత్వంలో చీఫ్‌ ఎకనమిస్ట్‌గా పనిచేసిన అరవింద్‌ సుబ్రమణ్యం జీడీపీ లెక్కలపై చేసిన విమర్శలనూ ఆయన ఈ సందర్భంగా ప్రస్తావించారు. ఒక టీవీ చాన ల్‌కు  ఇచ్చిన ఇంటర్వ్యూలో  ముఖ్యాంశాలు... ♦ భారత్‌ వృద్ధికి సంబంధించి ప్రైవేటు సంస్థల నుంచి వేర్వేరు అంచనాలు వెలువడ్డాయి. వాటిలో అధికభాగం అంచనాలు ప్రభుత్వ అంచనాలకన్నా తక్కువగా ఉన్నా యి. మొత్తంగా చూస్తే, ఆర్థిక వ్యవస్థ తీవ్ర మందగమనంలో ఉన్నట్లు భావిస్తున్నా.   ♦ 2018–19తో భారత్‌ ఆర్థిక వృద్ధి 6.8%. 2014–15 తరువాత ఇంత తక్కువ స్థాయి ఇదే తొలిసారి. ప్రభుత్వం 2019–2020లో 7 శాతం వృద్ధి అంచనావేస్తున్నా... అంతకన్నా తక్కువగానే ఉంటుందన్నది పలు ప్రైవేటు సంస్థల అంచనా.   ♦ పలు వ్యాపారాల గురించి  ఆందోళన కలిగించే వార్తలే ఉంటున్నాయి. తమకు ఉద్దీపన చర్యలు ఏదో ఒక రూపంలో కావాలని పలు రంగాలు కోరుతున్నాయి.   ♦ అంతర్జాతీయ మార్కెట్ల నుంచి రుణాలు నిజానికి సంస్కరణగా భావించకూడదు. ఇది వ్యూహాత్మక చర్య మాత్రమే.   ♦ ప్రస్తుత వృద్ధికన్నా రెండు, మూడు శాతం అధిక వృద్ధి రేటు సాధన ఎలా అన్న అంశంపైనే మనం దృష్టి సారించాలి. దీనికి పలు రంగాలు ఎదుర్కొంటున్న సవాళ్ల తక్షణ పరిష్కారం జరగాలి. విద్యుత్, నాన్‌ బ్యాంక్‌ ఫైనాన్షియల్‌ రంగాలు ఎదుర్కొంటున్న సవాళ్ల పరిష్కారం ఇందులో కీలకం.

న్యూఢిల్లీ : రాజకీయాల్లోకి వస్తే తన భార్య వదిలేస్తుందని ఆర్‌బీఐ మాజీ గవర్నర్‌ రఘురామ్‌ రాజన్‌ తెలిపారు. సార్వత్రిక ఎన్నికల నేపథ్యంలో రాజకీయాల్లోకి వస్తున్నారనే వార్తలపై ఆయన స్పందించారు. రాజకీయాల కన్నా తనకు కుటుంబ జీవతమే ముఖ్యమన్నారు. ఓ జాతీయ మీడియాకు ఇచ్చిన ఇంటర్వ్యూలో పలు ఆసక్తికర విషయాలు వెల్లడించారు. ‘నేను రాజకీయాల్లోకి వెళ్తే.. నా భార్య నాతో సంసారం చేయనని చెప్పింది. రాజకీయాలు ఎక్కడైనా ఒకే విధంగా ఉంటాయి. బలమైన కారణం ఏది లేకపోయినప్పటికి నాకు మాత్రం రాజకీయాలపై ఎలాంటి ఆసక్తి లేదు. కొందరు తమ వ్యాక్చాతుర్యంతో ఓట్లను పొందుతారు. అలాంటి నైపుణ్యం నాకు లేదు. నేను ఏ పార్టీకి మద్దతుగా ఉండను. నా రచనలు అన్నీ పార్టీలకు అతీతంగానే ఉంటాయి. నాకు రాజకీయాలపై ఎలాంటి ఆసక్తిలేదు.  నాకు ఉద్యోగం అంటేనే ఇష్టం. ప్రస్తుతం నిర్వర్తిస్తున్న విధులతో నేను సంతోషంగా ఉన్నాను. కాంగ్రెస్‌ కనీస ఆదాయ పథకంతో ఎన్నో లాభాలున్నాయి. పేదలకు నగదు అందజేయడం వల్ల వారికి కావాల్సినవి వారే తీసుకుంటారు. కాంగ్రెస్‌ అధికారంలోకి వస్తే నాకు మంత్రి పదవి దక్కుతుందని చాలా ఊహాగాలను వస్తున్నాయి. వాటిని నేను ఆపలేను. నేనెక్కడుంటే అక్కడ వాతావరణం సంతోషంగా ఉండేలా చూసుకుంటాను’ అని చెప్పుకొచ్చారు.  2013 సెప్టెంబర్‌ నుంచి 2016 సెప్టెంబర్‌ దాకా రిజర్వ్‌ బ్యాంక్‌ 23వ గవర్నర్‌గా రాజన్‌ సేవలందించిన విషయం తెలిసిందే. రాజన్‌ పదవీకాలాన్ని పొడిగించడానికి ఎన్‌డీఏ ప్రభుత్వం నిరాకరించిన నేపథ్యంలో ఆయన ప్రస్తుతం అమెరికాలోని షికాగో విశ్వవిద్యాలయంలో భాగమైన బూత్‌ స్కూల్‌ ఆఫ్‌ బిజినెస్‌లో ఆర్థిక శాస్త్ర ప్రొఫెసర్‌గా సేవలు అందిస్తున్నారు. విపక్షాల కూటమి కేంద్రంలో అధికారంలోకి వస్తే ఆర్థిక మంత్రిగా రాజన్‌నే ఎంపిక చేసే అవకాశం ఉందంటూ రాజకీయ వర్గాల్లో చర్చ జరుగుతోంది. కనీస ఆదాయ పథక రూపకల్పన విషయంలో సలహాలు, సూచనలు తీసుకున్న ప్రముఖ ఆర్థికవేత్తల్లో రాజన్‌ కూడా ఉన్నారంటూ కాంగ్రెస్‌ అధ్యక్షుడు రాహుల్‌ గాంధీ చెప్పడం కూడా ఈ వార్తలకు ఊతమిచ్చింది. ఈ నేపథ్యంలో రాజన్‌ తాజా వివరణనిచ్చారు. తాను ప్రస్తుతం నిర్వర్తిస్తున్న విధులతో సంతోషంగానే ఉన్నానని, రాజకీయాలపై ఎలాంటి ఆసక్తి లేదని స్పష్టం చేశారు.  

న్యూఢిల్లీ: రాబోయే సార్వత్రిక ఎన్నికల్లో విపక్షాలు గానీ గెలిస్తే తాను ఆర్థిక మంత్రిగా ఎంపికయ్యే అవకాశాలున్నాయన్న వార్తలపై ఆర్‌బీఐ మాజీ గవర్నర్‌ రఘురామ్‌ రాజన్‌ స్పందించారు. తన సేవలు ఉపయోగపడతాయని భావించిన పక్షంలో, అవకాశం ఉంటే భారత్‌ తిరిగి వచ్చేందుకు సిద్ధమని స్పష్టం చేశారు. ‘ది థర్డ్‌ పిల్లర్‌’ పేరిట రాసిన పుస్తకావిష్కరణ కార్యక్రమంలో పాల్గొన్న సందర్భంగా రాజన్‌ ఈ విషయాలు తెలిపారు. 2013 సెప్టెంబర్‌ నుంచి 2016 సెప్టెంబర్‌ దాకా రిజర్వ్‌ బ్యాంక్‌ 23వ గవర్నర్‌గా రాజన్‌ సేవలందించారు. రాజన్‌ పదవీకాలాన్ని పొడిగించడానికి ఎన్‌డీఏ ప్రభుత్వం నిరాకరించిన నేపథ్యంలో ఆయన ప్రస్తుతం అమెరికాలోని షికాగో విశ్వవిద్యాలయంలో భాగమైన బూత్‌ స్కూల్‌ ఆఫ్‌ బిజినెస్‌లో ఆర్థిక శాస్త్ర ప్రొఫెసర్‌గా సేవలు అందిస్తున్నారు. విపక్షాల కూటమి కేంద్రంలో అధికారంలోకి వస్తే ఆర్థిక మంత్రిగా రాజన్‌నే ఎంపిక చేసే అవకాశం ఉందంటూ రాజకీయ వర్గాల్లో చర్చ జరుగుతోంది. కనీస ఆదాయ పథక రూపకల్పన విషయంలో సలహాలు, సూచనలు తీసుకున్న ప్రముఖ ఆర్థికవేత్తల్లో రాజన్‌ కూడా ఉన్నారంటూ కాంగ్రెస్‌ అధ్యక్షుడు రాహుల్‌ గాంధీ చెప్పడం కూడా ఈ వార్తలకు ఊతమిచ్చింది. ఈ నేపథ్యంలో రాజన్‌ తాజా వివరణనిచ్చారు. తాను ప్రస్తుతం నిర్వర్తిస్తున్న విధులతో సంతోషంగానే ఉన్నానని, అయితే కొత్త అవకాశాలను అందిపుచ్చుకునేందుకు సదా సిద్ధమని రాజన్‌ చెప్పారు.   స్వల్పకాలిక సమస్యల పరిష్కారంపై దృష్టి..  ఒకవేళ ఆర్థిక మంత్రిగా బాధ్యతలు గానీ చేపట్టిన పక్షంలో ఏయే అంశాలకు ప్రాధాన్యం ఇస్తారన్న ప్రశ్నపై స్పందిస్తూ.. ముఖ్యంగా స్వల్పకాలిక సమస్యల పరిష్కారంపై దృష్టి పెడతానని రాజన్‌ చెప్పారు. ‘నాతో సహా చాలా మంది ఆర్థికవేత్తలు.. విధానాలపరంగా తీసుకోతగిన చర్యల గురించి రాశారు. అవి పుస్తకరూపంలో రాబోతున్నాయి. ఇక నా విషయానికొస్తే.. నిల్చిపోయిన చాలా ప్రాజెక్టులు మళ్లీ ప్రారంభమయ్యేందుకు ఉపయోగపడేలా స్వల్పకాలిక సమస్యల పరిష్కారంపై ప్రధానంగా దృష్టి పెడతాను’అని ఆయన పేర్కొన్నారు. అలాగే, బ్యాంకింగ్‌ వ్యవస్థను ప్రక్షాళన చేయడం, సాధ్యమైనంత వేగంగా వాటిని మళ్లీ రుణ వృద్ధి బాట పట్టించేందుకు చర్యలు తీసుకుంటానని చెప్పారు. అటు వృద్ధికి దోహదపడేలా 2–3 కీలక సంస్కరణలను కూడా ప్రవేశపెట్టే ప్రయత్నం చేస్తానన్నారు. ‘ఈ సంస్కరణల జాబితాలో వ్యవసాయ రంగంలో ఒత్తిడిని తగ్గించేందుకు అనుసరించతగిన విధానాలు కచ్చితంగా ఉంటాయి. ఇక రెండోది.. స్థల సమీకరణ సమస్య. రాష్ట్రాల స్థాయిలో అమలవుతున్న ఉత్తమ విధానాల గురించి తెలుసుకోవడం, ఆయా రాష్ట్రాలు తమకు అనువైన విధానాలను ఎంపిక చేసుకునేందుకు స్వేచ్ఛనివ్వడం ఇందుకు ఉపయోగపడగలదు. ఇలా స్థల సమీకరణ సమస్యల పరిష్కారం, బ్యాంకుల ప్రక్షాళన, వ్యవసాయాన్ని పునరుద్ధరించేందుకు కీలక విధానాల రూపకల్పనకు అత్యధిక ప్రాధాన్యమిస్తాను’ అని రాజన్‌ చెప్పారు. 

న్యూఢిల్లీ: భారత్‌ ఏడు శాతం వృద్ధి రేటు సాధనపై రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) మాజీ గవర్నర్‌ రఘురామ్‌ రాజన్‌ తీవ్ర అనుమానాలు వ్యక్తం చేశారు. ఇందుకు సంబంధించి గణాంకాలపై ఉన్న సందేహాలను తొలగించాల్సిన అవసరం ఉందని వ్యాఖ్యానించారు. తగిన ఉద్యోగాల కల్పన జరగని పరిస్థితుల్లో 7 శాతం వృద్ధి ఎలా సాధ్యమని ప్రశ్నించారు. గణాంకాల విషయంలో నెలకొన్న అనుమానాలను తొలగించడానికి నిష్పక్షపాత కమిటీ ఏర్పాటు అవసరమనీ ఆయన సూచించడం గమనార్హం. భారత్‌ వాస్తవ వృద్ధిని కనుగొనడానికి గణాంకాల మదింపు ప్రక్రియ  పునర్‌వ్యవస్థీకరణ అవసరం అన్నారు. సెప్టెంబర్‌ 2013 నుంచి సెప్టెం బర్‌ 2016 వరకూ ఆర్‌బీఐ గవర్నర్‌గా బాధ్యతలు నిర్వహించిన రాజన్, తాజాగా ఒక వార్తా చానల్‌కు ఇచ్చిన ఇంటర్వ్యూలో కొన్ని ముఖ్యాంశాలు చూస్తే... ∙నాతో ఇటీవల ఒక మంత్రి (పేరు వెల్లడించలేదు) మాట్లాడారు.  తగిన ఉపాధి కల్పన లేనప్పుడు మనం ఎలా 7 శాతం వృద్ధి సాధించగలమని ఆయన అడిగారు. ఈ కారణాన్ని చూపిస్తే, మనం ఏడు శాతం వృద్ధిని సాధించే అవకాశం కనపించడం లేదు.  ∙వృద్ధి రేట్ల సమీక్ష అనంతరం, ఆయా గణాంకాల పట్ల అనుమానాలు పెరిగాయి. వీటిమీద సందేహాలు తొలగాలి. ఇందుకు సంబంధించి నిష్పాక్షిక కమిటీ ఏర్పడాలి. గణాంకాల పట్ల విశ్వాసం మరింత పెరగాలి. (2018 నవంబర్‌లో కేంద్ర గణాంకాల శాఖ కాంగ్రెస్‌ హయాంలోని యూపీఏ కాలంలో జీడీపీ వృద్ధిరేట్లను తగ్గించింది. మోదీ పాలనలో గడచిన నాలుగేళ్ల జీడీపీ వృద్ధి రేట్లను యూపీఏ కాలంలో సాధించిన వృద్ధిరేట్లకన్నా ఎక్కువగా సవరించింది).  ∙వివాదాస్పద పెద్ద నోట్ల రద్దు(డీమానిటైజేషన్‌) వంటి తన నిర్ణయాల వల్ల జరిగిన మంచి చెడులను ప్రభుత్వం సమీక్షించి, మున్ముందు ఎటువంటి తప్పులూ జరక్కుండా చూసుకోవాలి. 

సాక్షి, న్యూఢిల్లీ : కనీస ఆదాయ హామీ పధకంతో పేదరికంపై మెరుపు దాడులు చేస్తామని కాంగ్రెస్‌ చీఫ్‌ రాహుల్‌ గాంధీ ప్రకటించిన న్యాయ్‌ పధకంపై ఆర్బీఐ మాజీ గవర్నర్‌ రఘురామ్‌ రాజన్‌ స్పందించారు. కాంగ్రెస్‌ ప్రకటించిన కనీస ఆదాయ పధకం స్ఫూర్తి మంచిదే అయినా దేశంలో వాస్తవ ఆర్థిక పరిస్థితి పరిగణనలోకి తీసుకుంటే ఇంతటి భారీ వ్యయం సాధ్యం కాదని రఘురామ్‌ రాజన్‌ అభిప్రాయపడ్డారు. ఈ పధకం క్షేత్రస్ధాయిలో వృద్ధికి ఊతమిస్తుందని ఆయన అంగీకరించారు. ఈ పధకాన్ని భారత ఆర్థిక వ్యవస్థ ఎంతమేరకు భరిస్తుందనేది ప్రశ్నార్దకమన్నారు. న్యాయ్‌ పధకానికి ఏటా రూ 3.34 లక్షల కోట్ల నిధులు అవసరమవుతాయని, ఇది దేశ బడ్జెట్‌లో 13 శాతమని ఆయన పేర్కొన్నారు. ఈ స్ధాయిలో నిధులు అవసరం కాగా ప్రభుత్వం వాటిని ఎలా సర్దుబాటు చేస్తుందనేది చూడాలన్నారు. ఇక ప్రస్తుతమున్న సంక్షేమ పధకాలను కొనసాగిస్తూనే ఈ పధకాన్ని చేపట్టడం కష్టసాధ్యమన్నారు. ఈ పధకాన్ని సమర్ధంగా అమలు చేయగలిగితే విప్లవాత్మక ఫలితాలు చేకూరుతాయన్నారు. ప్రజలు సొంతంగా ఆర్థిక నిర్ణయాలు తీసుకోగలుగుతారన్నారు. దేశంలో ప్రస్తుతం ద్రవ్య లోటును పరిగణనలోకి తీసుకుంటే కనీస ఆదాయ హామీ పధకం సాధ్యం కాదన్నారు.

దావోస్‌ : భారత్‌ అన్ని రంగాల్లో అభివృద్ధి సాధిస్తున్నప్పటికీ విద్యావిధానంలో సమూల మార్పులు రావాల్సిన అవసరముందని ఆర్బీఐ మాజీ గవర్నర్‌ రఘురాం రాజన్‌ అన్నారు. ‘మనం యువతరాలను మాత్రమే నిర్మించగలుగున్నాం. కానీ, ప్రపంచంతో పోటీ పడేవిధంగా వారిని తయారు చేయలేకపోతున్నాం’ అని వ్యాఖ్యానించారు. దేశ భవిష్యత్‌కు అతి ముఖ్యమైన ‘మానవ వనరుల అభివృద్ధి’ అనే అంశాన్ని సరిగా పట్టించుకోవడం లేదన్నారు. మానవ వనరుల అభివృధ్ది శాఖ (హెచ్చార్డీ)కు అత్యంత సమర్థులు మంత్రిగా కొనసాగాలని ఆకాక్షించారు.  నాణ్యమైన విద్యతోనే భారత యువత అన్ని రంగాల్లో దూసుకుపోతుందని చెప్పారు. దావోస్‌లో జరుగుతున్న వరల్డ్‌ ఎకనమిక్‌ ఫోరం(డబ్ల్యూఈఎఫ్‌) లో పాల్గొనేందుకు వచ్చిన రాజన్‌ ఓ జాతీయ మీడియాతో ఈ విషయాలు వెల్లడించారు. డబ్ల్యూఈఎఫ్‌ సదస్సులో ఆయన మాట్లాడుతూ.. ‘భవిష్యత్‌లో భారత్‌ చైనా ఆర్థిక వ్యవస్థను కూడా దాటిపోవచ్చు. మౌలిక వసతుల కల్పనలో ఆ దేశం కంటే మెరుగైన స్థానంలో నిలవొచ్చునని,  దేశాల మధ్య ఇలాంటి పోటీ మంచిదే’ అని రాజన్‌ అన్నారు. ఆర్బీఐ గవర్నర్‌గా రాజన్‌ మూడేళ్ల పాటు పనిచేసిన సంగతి తెలిసిందే.

న్యూఢిల్లీ: ఆర్‌బీఐ వద్ద అధికంగా ఉన్న నిధులను కేంద్ర ప్రభుత్వానికి గనక బదిలీ చేస్తే అది కేంద్ర బ్యాంకు రేటింగ్‌ తగ్గడానికి దారితీస్తుందని మాజీ గవర్నర్‌ రఘురామ్‌ రాజన్‌ అభిప్రాయపడ్డారు. ఆర్‌బీఐకి ప్రస్తుతం ఏఏఏ రేటింగ్‌ ఉండగా, ఇది తగ్గితే నిధుల వ్యయాల భారం పెరిగి, ఆర్థిక వ్యవస్థపై ప్రభావం పడుతుందన్నారు. ఆర్‌బీఐ నుంచి అదనపు నిధుల బదలాయింపు కేంద్రానికి జరిగితే రేటింగ్‌ తగ్గడానికి దారితీస్తుందా? అని విలేకరులు ప్రశ్నించగా... ‘‘అది ఎంత మొత్తం బదలాయిస్తున్నారనే దానిపై ఇది ఆధారపడి ఉంటుంది. ప్రస్తుతానికి ఇదో అంశం కాదు. ఏదో ఒక సమయంలో మాత్రం ఇది ఓ అంశంగా మారుతుంది. ప్రభుత్వం, ఆర్‌బీఐ రెండూ కూడా చర్చల ద్వారా దీనికి ముగింపు పలకాలి. మనది ‘బీఏఏ’ దేశం. ఇన్వెస్ట్‌మెంట్‌ గ్రేడ్‌. ఏదో ఒక సమయంలో అంతర్జాతీయ లావాదేవీల నిర్వహణ కోసం అధిక క్రెడిట్‌ రేటింగ్‌ అవసరపడుతుంది’’ అని రాజన్‌ చెప్పారు. ‘మీరు గవర్నర్‌గా ఉన్న సమయంలోనూ ప్రభుత్వం నుంచి ఒత్తిళ్లు ఎదుర్కొన్నారా’ అన్న ప్రశ్నకు... ప్రభుత్వానికి మరింత మొత్తం చెల్లించాలన్న ఒత్తిడి ఎప్పుడూ ఉంటుందని బదులిచ్చారు. ‘‘ముఖ్య ఆర్థిక సలహాదారుగా ఉన్న సమయంలో నేను కూడా ఎంత మొత్తం నిధులు కలిగి ఉండాలన్న అంశంపై ఆర్‌బీఐకి లేఖ రాశాను. ఆర్‌బీఐ గవర్నర్‌గా వచ్చాక కమిటీ ఏర్పాటు చేయగా, లాభం మొత్తాన్ని పంపిణీ చేసేందుకు సరిపడా క్యాపిటల్‌ మన దగ్గర ఉన్నట్టు చెప్పింది. నేను గవర్నర్‌గా ఉన్న ఆ మూడు సంవత్సరాల్లో ఆర్‌బీఐ చరిత్రలోనే అత్యధిక డివిడెండ్‌ను ప్రభుత్వానికి చెల్లించింది. అయితే, లాభాలకు మించి చెల్లించాలన్నది డిమాం డ్‌. కానీ, అలా చెల్లించరాదని మాలేగామ్‌ కమిటీ అభిప్రాయపడింది’’ అని రాజన్‌ వివరించారు.   నోట్ల రద్దుతో ఆర్థిక వృద్ధి మందగమనం   ప్రపంచ ఆర్థిక రంగం 2017లో వృద్ధి క్రమంలో ఉంటే, నోట్ల రద్దు (డీమోనిటైజేషన్‌) కారణంగా భారత ఆర్థిక వృద్ధి కుంటుపడిందని రాజన్‌ పేర్కొన్నారు. వృద్ధి తగ్గుముఖం పట్టిందని తిరిగి నిర్ధారించిన అధ్యయనాలను తాను చూసినట్టు చెప్పారు. దీనితోపాటు జీఎస్టీ అమలు ప్రభావం కూడా వృద్ధిపై పడినట్టు అభిప్రాయపడ్డారు. 2017–18లో మన జీడీపీ వృద్ధి రేటు 6.7 శాతంగా ఉన్న విషయం తెలిసిందే. దీర్ఘకాలంలో జీఎస్టీ మంచిదేనని, స్వల్ప కాలంలో మాత్రం సమస్యలు ఉంటాయన్నారు.  తన హయాంలో నోట్ల రద్దుపై అభిప్రాయాన్ని కోరారని, ఇది చెడ్డ ఆలోచనని చెప్పినట్టు ఓ ప్రశ్నకు సమాధానమిచ్చారు. రాజన్‌ 2013 నుంచి 2016 వరకు ఆర్‌బీఐ గవర్నర్‌గా పనిచేశారు. ప్రభుత్వ ఒత్తిళ్లతో ఆర్థిక అస్థిరత   రేటింగ్‌ సంస్థ ఎస్‌అండ్‌పీ హెచ్చరిక సింగపూర్‌: ఆర్‌బీఐపై ప్రభుత్వం అదే పనిగా చేస్తున్న తీవ్ర స్థాయి ఒత్తిడి అన్నది... బ్యాంకింగ్‌ రంగం మెరుగు కోసం చేస్తున్న గట్టి ప్రయత్నాలకు విఘాతం కలిగిస్తుందని, దీర్ఘకాలంలో ఆర్థిక అస్థిరతకు దారితీస్తుందని అంతర్జాతీయ రేటింగ్‌ సంస్థ ఎస్‌అండ్‌పీ హెచ్చరించింది. 2019 జనవరిలో జరిగే ఆర్‌బీఐ సమావేశంలో బ్యాంకింగ్‌ వ్యవస్థ నియంత్రణలో ఏవైనా మార్పులు చేస్తారేమో వేచి చూస్తున్నట్టు తెలిపింది. ఆర్‌బీఐ స్వతంత్రత సహా పలు అంశాల విషయంలో ప్రభుత్వంతో పొసగక ఉర్జిత్‌ పటేల్‌ తన పదవికి రాజీనామా చేయటం తెలిసిందే. ప్రస్తుతం ఆర్‌బీఐ స్వతంత్రత విషయంలో, ముఖ్యంగా పాలసీ అమలులో ఏ మార్పూ లేదని ఎస్‌అండ్‌పీ పేర్కొంది. ఎన్‌పీఏల గుర్తింపు, రీక్యాపిటలైజేషన్, పరిష్కారం, సంస్కరణలపై సెంట్రల్‌ బ్యాంకు దృష్టి సారించి ఆర్థిక రంగాన్ని గాడిలో పెట్టే ప్రయత్నాలు చేస్తున్న క్రమంలో ఇది కచ్చితంగా రిస్క్‌ అని అభిప్రాయపడింది. ‘‘మాజీ గవర్నర్‌  రాజన్‌ ఆస్తుల నాణ్యత సమీక్ష చేపట్టిన తర్వాత నుంచి, ఆర్‌బీఐ తీసు కున్న చర్యలు బ్యాంకింగ్‌ రంగలో పారదర్శకత, జవాబుదారీతనాన్ని పెంచాయి’’అని ఎస్‌అండ్‌పీ తెలిపింది.   

న్యూఢిల్లీ: కేంద్ర ప్రభుత్వానికి, రిజర్వ్‌ బ్యాంక్‌కు మధ్య రగులుతున్న వివాదంపై ఆర్‌బీఐ మాజీ గవర్నర్‌ రఘురామ్‌ రాజన్‌ స్పందించారు. రిజర్వ్‌ బ్యాంక్‌ను కారులోని సీటుబెల్ట్‌తో పోలుస్తూ... వాహనదారు (కేంద్రం) గానీ సీట్‌ బెల్ట్‌ పెట్టుకోకపోతే ప్రమాదాలు జరిగే అవకాశాలు ఉంటాయని హెచ్చరించారు. ఇవన్నీ దృష్టిలో ఉంచుకుని రిజర్వ్‌ బ్యాంక్‌ స్వయం ప్రతిపత్తిని కచ్చితంగా గౌరవించాల్సిందేనని, ఉదారంగా వ్యవహరించాలంటూ ప్రభుత్వం ఒకవేళ ఒత్తిడి తెచ్చినా నిరాకరించేందుకు దానికి పూర్తి స్వేచ్ఛ ఉండాల్సిందేనని స్పష్టం చేశారు. దేశానికి కీలకమైన సంస్థను కాపాడటమే బోర్డు ప్రధాన లక్ష్యంగా ఉంటుంది తప్ప ఇతరుల ప్రయోజనాల కోసం పనిచేయడం కాదని ఒక మీడియా సంస్థకిచ్చిన ఇంటర్వ్యూలో ఆయన వ్యాఖ్యానించారు.   ఇటీవలి కాలంలో  పలు అంశాలపై కేంద్రం, ఆర్‌బీఐకి మధ్య తీవ్ర విభేదాలు నెలకొన్న సంగతి తెలిసిందే. కేంద్రీయ బ్యాంకు స్వతంత్రతను గౌరవించకపోతే ప్రభుత్వం.. ఆర్థిక మార్కెట్లు ఆగ్రహానికి గురికావాల్సి వస్తుందంటూ రిజర్వ్‌ బ్యాంక్‌ డిప్యూటీ గవర్నర్‌ విరాల్‌ ఆచార్య ఇటీవల బహిరంగంగానే వ్యాఖ్యానించడంతో వివాదం మరింత ముదిరింది. దీనికి ప్రతిగా గతంలో ఎన్నడూ లేని విధంగా ఆర్‌బీఐపై ప్రభుత్వం కీలకమైన ఆర్‌బీఐ చట్టంలోని సెక్షన్‌ 7ని ప్రయోగించినట్లు వార్తలు వచ్చాయి. వృద్ధికి ఊతమిచ్చే క్రమంలో బ్యాంకులు మళ్లీ రుణ కార్యకలాపాలు సజావుగా సాగించేలా కఠినమైన మొండిబాకీల కట్టడి నిబంధనలను సడలించడం తదితర అంశాలపై ఆర్‌బీఐకి సూచనలు చేసినట్లు వార్తలు వెలువడ్డాయి. ఇలా కేంద్రం, ఆర్‌బీఐ మధ్య విభేదాలు తారస్థాయికి చేరిన నేపథ్యంలో రాజన్‌ వ్యాఖ్యలు ప్రాధాన్యం సంతరించుకున్నాయి.   సీట్‌ బెల్ట్‌ లేకుంటే ప్రమాదమే .. ‘ఆర్‌బీఐ అనేది ఒక సీట్‌ బెల్ట్‌ లాంటిది. డ్రైవింగ్‌ సీట్లో ఉండే డ్రైవర్‌.. అంటే ప్రభుత్వం ఒకోసారి సీట్‌ బెల్ట్‌ పెట్టుకోకపోవచ్చు. కానీ, దీన్ని పెట్టుకోకపోవడం వల్ల ప్రమాదంలో పడే అవకాశం ఉంది. ఒకోసారి ప్రమాదాలు చాలా తీవ్రంగానూ ఉండొచ్చు‘ అని రాజన్‌ వ్యాఖ్యానించారు. ప్రభుత్వాలు ప్రధానంగా అధిక వృద్ధిపై దృష్టి పెడుతుంటాయని, ఆర్‌బీఐ మాత్రం ఆర్థిక స్థిరత్వానికే ఎక్కువ ప్రాధాన్యతనిస్తుందని రాజన్‌ చెప్పారు. ఈ రెండింటి మధ్య పొంతన కుదరక సాధారణంగానే పలు సందర్భాల్లో ప్రభుత్వం, ఆర్‌బీఐ మధ్య వివాదాలు రేగుతుంటాయని, తాజాగా కూడా అలాంటి పరిస్థితే తలెత్తిందని చెప్పారు. ‘మరింత ఉదారంగా వ్యవహరించేలా ఆర్‌బీఐపై ప్రభుత్వం ఒత్తిడి తెస్తూనే ఉంటుంది. కానీ, ఆర్థిక స్థిరత్వానికి పొంచి ఉండే రిస్కులను కూడా ఆర్‌బీఐ నిశితంగా పరిశీలించాలి. ఆర్‌బీఐకి ఆర్థిక స్థిరత్వ సాధన అనేది ఒక బాధ్యత. కాబట్టి నో చెప్పే అధికారం కూడా ఉంటుంది. అలాగని ఆర్‌బీఐ ఏదో ఊసుపోక నో చెప్పదు. పరిస్థితులన్నింటినీ కూలంకషంగా పరిశీలించి ఆర్థిక అస్థిరతకు దారి తీసే అవకాశాలు ఉన్నాయని భావించిన పక్షంలోనే తిరస్కరిస్తుంది. ప్రభుత్వం, ఆర్‌బీఐకి మధ్య ఇలాంటివి కొత్తేమీ కాదు. ప్రభుత్వం అనేక మార్లు దీన్ని పరిశీలించండి.. దాన్ని పరిగణనలోకి తీసుకోండి అంటూ ఆర్‌బీఐని కోరుతూనే ఉండొచ్చు. కానీ అంతిమంగా ఆర్థిక స్థిరత్వ నియంత్రణ సంస్థగా ఆ బాధ్యతలు మీవే కాబట్టి, మీ నిర్ణయాన్ని గౌరవిస్తాం అంటూ ఏదో ఒక సందర్భంలో ప్రభుత్వమే ఒకింత వెనక్కి తగ్గొచ్చు‘ అని రాజన్‌ పేర్కొన్నారు. ‘డిప్యూటీ గవర్నర్లు, గవర్నర్లను నియమించుకున్నప్పుడు ప్రభుత్వం వారి మాట వినాలి. వారిని నియమించుకున్నదే అందుకు కదా. వారు మీకు సేఫ్టీ బెల్ట్‌ లాంటి వాళ్లు‘ అని రాజన్‌ చెప్పారు. నవంబర్‌ 19న ఆర్‌బీఐ బోర్డు సమావేశం కానుంది.   ద్రవ్యోల్బణం మెరుగు.. ఆర్థిక వ్యవస్థ స్థితిగతుల గురించి మాట్లాడుతూ.. ద్రవ్యోల్బణ పరిస్థితి చాలా మెరుగ్గానే ఉందని, ఇందుకు ప్రభుత్వం, ఆర్‌బీఐని అభినందించవచ్చని రాజన్‌ చెప్పారు. మిగతా దేశాలతో పోలిస్తే భారత వృద్ధి రేటు అత్యధికంగా ఉంటోందని, అయితే.. ఉద్యోగాల కల్పనపై మరింత కసరత్తు చేయాల్సి ఉందని ఆయన తెలిపారు. ‘ద్రవ్యలోటు విషయాన్ని తీసుకుంటే.. కేంద్ర ప్రభుత్వ లోటు తగ్గుతున్నప్పటికీ.. రాష్ట్ర ప్రభుత్వాలది పెరుగుతోంది. గడిచిన మూడు, నాలుగేళ్లుగా స్థూలంగా ద్రవ్య లోటు పరిస్థితులు మెరుగవడం కన్నా.. మరింత దిగజారాయి‘ అని రాజన్‌ పేర్కొన్నారు. ఇక బలహీన ఎగుమతులు, భారీ ముడి చమురు ధరల కారణంగా కరెంటు అకౌంటు లోటు కూడా పెరుగుతోందని ఆయన చెప్పారు. చమురు రేట్లు ఇటీవల కాస్త తగ్గినప్పటికీ, ప్రస్తుత పరిస్థితుల్లో క్రూడ్‌పరమైన రిస్కులను పక్కన పెట్టలేమన్నారు. పరస్పరం గౌరవించుకోవాలి.. ఆర్‌బీఐ చట్టంలోని సెక్షన్‌ 7ని ప్రభుత్వం ప్రయోగించిందన్న అంశంపై స్పందిస్తూ.. రెండు పక్షాలు.. ఒకరి అభిప్రాయాలను మరొకరు పరస్పరం గౌరవించుకోవాలని రాజన్‌ చెప్పారు. ప్రభుత్వ అభిప్రాయాలను ఆర్‌బీఐ వింటూనే ఉంటుందని, కానీ అంతిమంగా తన బాధ్యతరీ త్యా జాతి ప్రయోజనాలను దృష్టిలో ఉంచుకుని నిర్ణయాలు తీసుకోవాల్సి ఉంటుందని తెలిపారు. ‘ఆర్‌బీఐ బోర్డు ప్రధాన లక్ష్యం సంస్థను పరిరక్షించడమే. ఇతరుల ప్రయోజనాలకు అనుగుణంగా పనిచేయడం కాదు. ఆర్‌బీఐ ఒకవైపు సంస్థను పరిరక్షిస్తూనే మరోవైపు విస్తృతమైన, సముచితమైన సూచనలు చేయాల్సి ఉంటుంది. కాబట్టి బోర్డు లక్ష్యం రాహుల్‌ ద్రావిడ్‌ తరహాలో వివేకవంతంగా, ఆలోచనాన్వితంగా వ్యవహరించేట్లు ఉండాలి. నవజోత్‌ సిద్ధూలా దూకుడుగా కాదు. (తప్పుగా అనుకోవద్దు.. సిద్ధూని నేను ఎంతగానో గౌరవిస్తాను)‘ అని రాజన్‌ పేర్కొన్నారు. లిక్విడిటీ సమస్యలపై ఆర్‌బీఐ దృష్టి పెట్టాలి.. నాన్‌–బ్యాంకింగ్‌ ఫైనాన్స్‌ కంపెనీలు (ఎన్‌బీఎఫ్‌సీ) నిధుల కొరత సమస్యను ఎదుర్కొంటుండటంపై మాట్లాడుతూ.. లిక్విడిటీ అంశాన్ని రిజర్వ్‌ బ్యాంక్‌ మరింత లోతుగా పరిశీలించాల్సిన అవసరం ఉందని రాజన్‌ చెప్పారు. వ్యవస్థలో తగినంత ద్రవ్యలభ్యత ఉండేలా చూడటం ద్వారా ఈ సమస్యను పరిష్కరించాలన్నారు. ‘మార్కెట్లలో కొంత ఆందోళన నెలకొన్నట్లుగా కనిపిస్తోంది. అయితే, మొత్తం అసెట్స్‌లో ఎన్‌బీఎఫ్‌సీల వాటా 17 –18% మాత్రమే కనుక.. ఇది పరిష్కరించలేనంత పెద్ద సమస్యేమీ కాదని నా అభిప్రాయం.  కాకపోతే నిధుల కొరత, దివాలా సమస్యలను కాస్త జాగ్రత్తగా పరిశీలించి చూడాలి‘ అని రాజన్‌ పేర్కొన్నారు. ‘ఒకవేళ దివాలా పరిస్థితే ఉంటే.. ప్రైవేట్‌ నిర్వహణలో ఉన్న ఆయా సంస్థలు.. గట్టెక్కించాలంటూ వెంటనే ప్రభుత్వం దగ్గరకు పరిగెత్తుకెళ్లడం కాకుండా ముందు తమ సామర్ధ్యం మేరకు నిధులు సమకూర్చుకునే ప్రయత్నాలు చేయాలి. తను జోక్యం చేసుకోవాలా లేదా అని ప్రభుత్వం ఆలోచించడానికి ముందే.. తమంతట తామే సమస్య నుంచి బైటపడేందుకు శాయశక్తులా ప్రయత్నిస్తామన్న భరోసా ఆయా సంస్థలు కల్పించగలగాలి‘ అని రాజన్‌ పేర్కొన్నారు.

నిజాన్ని నిక్కచ్చిగా చెప్పే అలవాటున్న రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ మరో సారి కుండబద్దలు కొట్టారు. బ్యాంకుల మొండి బకాయిలకు మూలాలు ప్రభుత్వ నిర్ణయాల్లో, తీరు తెన్నుల్లో ఉన్నాయని వెల్లడించారు. సార్వత్రిక ఎన్నికలు ముంచుకొస్తున్నాయి గనుక సహజంగానే అటు బీజేపీ, ఇటు కాంగ్రెస్‌ పార్లమెంటరీ కమిటీకి రాజన్‌ ఇచ్చిన నోట్‌ను తమకనుకూలంగా మలచుకునే ప్రయత్నాన్ని ప్రారంభించాయి. అత్యధిక శాతం మొండి బకాయిలకు 2006–08 మధ్యనే బీజం పడిందని నివేదికలో ఆయనన్న మాటలను ఆసరా చేసుకుని కాంగ్రెస్‌పై బీజేపీ దాడి ప్రారంభించగా... కొంపముంచే ఆస్కారమున్న ఎగవేతదార్ల జాబితాను ప్రధాని కార్యాలయానికి (పీఎంఓ) పంపానని ఆయన చెప్పడాన్ని కాంగ్రెస్‌ ఎత్తిచూపింది. ఆ జాబితాపై మోదీ సర్కారు దృష్టి పెట్టి ఉంటే ఎగవేతదార్లు దేశం విడిచి పారిపోయే పరిస్థితి ఏర్పడి ఉండేది కాదని ఆ పార్టీ అంటోంది. ఆ రెండు పార్టీలూ ఇలా పరస్పర విమర్శలకు దిగడంలో వింతేమీ లేదు. అయితే రఘురాం రాజన్‌ చెప్పిన అంశాలు అనేకం ఉన్నాయి. పాలనా వ్యవస్థలో నిర్ణయ ప్రక్రియ మంద గిస్తున్న వైనం అందులో ప్రధానమైనది. అలాగే వివిధ బ్యాంకుల చీఫ్‌లు రిటైరైన చాన్నాళ్లకుగానీ వారి స్థానంలో కొత్తవారిని నియమించకపోవటాన్ని, తిరిగొస్తాయో రావో తెలియకుండా రుణ మేళాలు నిర్వహిస్తున్న తీరును కూడా ఆయన తప్పుబట్టారు. ఇవి గత యూపీఏ ప్రభుత్వానికీ, ప్రస్తుత ఎన్‌డీఏ ప్రభుత్వానికీ కూడా సమంగా వర్తిస్తాయి.   బొగ్గు గనుల కేటాయింపులో లేదా మరే ఇతరచోట్లనో అవకతవకలు జరిగాయన్న ఆరోపణలు వచ్చేసరికి ప్రభుత్వ యంత్రాంగం స్తంభించిపోతోంది. ఆరోపణల అతీగతీ తేలడానికి ఏళ్లూ పూళ్లూ పడుతుంటే, కొత్తగా ఏ నిర్ణయం తీసుకోవటానికైనా వివిధ శాఖలు జంకుతున్నాయి. ఆ నిర్ణ యాలపై కూడా భవిష్యత్తులో ఆరోపణలు వెల్లువెత్తి దర్యాప్తు మొదలుపెడితే చిక్కుల్లో పడతామన్న భయాందో ళనలు నిర్ణయరాహిత్యానికి దారితీస్తున్నాయి. పర్యవసానంగా ప్రాజెక్టులన్నీ ఎక్కడిక క్కడ ఆగిపోతు న్నాయి. ఉత్పాదన ప్రారంభం కాకపోవడంతో తీసుకున్న అప్పులకు కనీసం వడ్డీలు కూడా చెల్లించ లేని స్థితి ఏర్పడుతోంది. ఫలితంగా అప్పులిచ్చిన బ్యాంకులు కుదేలవుతున్నాయి. ఇది ఒక పార్శ్వం కాగా, మరొకటి బ్యాంకుల సోమరితనం. తమను రుణం అడుగుతున్న సంస్థ పని తీరు, అది ప్రతిపా దిస్తున్న ప్రాజెక్టు సాధ్యాసాధ్యాలు, మార్కెట్‌లో దానికుండే విజయావకాశాలు సొంతంగా మదింపు వేసుకోకుండా ఆ సంస్థకు ప్రమోటర్‌గా వ్యవహరించే బ్యాంకు ఇస్తున్న నివేదికను విశ్వసించి రుణాలి వ్వడానికి ఉబలాటపడుతున్నాయి. ముందూ మునుపూ ఆ సంస్థ వైఫల్యం చెందితే రుణం వసూలు కాక లబోదిబో మంటున్నాయి. రఘురామ్‌ రాజన్‌ 2006–08 కాలాన్ని ప్రస్తావించి చెప్పారుగానీ నీరవ్‌ మోదీ, మెహుల్‌ చోక్సీ తదితరుల ఉదంతాలు గమనిస్తే అవి అనంతరకాలం కూడా కొనసా గాయని అర్ధమవుతుంది. కేవలం బ్యాంకుల అసమర్ధతే ఇందుకు కారణమని చెప్పటం అర్ధసత్యమే అవుతుంది. బ్యాంకుల్లో కీలక స్థానాల్లో ఉన్నవారి అవినీతి కూడా ఇందుకు దోహదపడుతోంది. సాధా రణ పౌరులు రుణం కోసం వెళ్లినప్పుడు  సవాలక్ష ప్రశ్నలు వేసి, ఇచ్చే రుణానికి రకరకాల హామీలు కోరే బ్యాంకులు బడా పారిశ్రామికవేత్తల ముందు మాత్రం మోకరిల్లుతాయి. అప్పు తీసుకున్న సంస్థ తిరిగి చెల్లిస్తున్నట్టు రికార్డుల్లో కనిపించటం కోసం వాటికి తిరిగి అప్పులిచ్చి జమ రాసుకుంటున్నారు. ఇదంతా ఎప్పటికో బద్దలయ్యాక అందరూ చేతులెత్తేస్తున్నారు. చివరకు పాలనాపరంగా తమ అస మర్ధత ఎక్కడ బయటపడుతుందో నన్న భయంతో ప్రభుత్వాలు బ్యాంకులకు వేలాది కోట్ల రూపా యలు తరలించి గండం నుంచి గట్టెక్కుతున్నాయి.  ప్రభుత్వ రంగ బ్యాంకుల బోర్డుల్లో వృత్తిగత నిపుణులు లేకపోవడాన్ని, వాటి సారథులు రిటైరై నప్పుడు వారి స్థానంలో కొత్తవారిని నియమించకపోవడాన్ని కూడా రాజన్‌ ప్రస్తావించారు. ఈ రెండు సమస్యలూ కూడా కీలకమైనవి. అధికారంలో ఉండేవారు తమకనుకూలమైనవారితో బోర్డుల్ని నింపేస్తున్నాయి. ఫలితంగా బ్యాంకుల్లో రాజకీయ జోక్యం పెరుగుతోంది. అసంబద్ధ నిర్ణ యాలు బ్యాంకుల్ని ముంచేస్తున్నాయి. ఎగవేతదార్లకు రాజకీయ నేతలతో ఉండే పరిచయాల వల్ల వారికి సులభంగా కొత్త రుణాలు వస్తున్నాయి. బోర్డులు పటిష్టంగా ఉంటే ఈ బాపతువారి ఆట కడుతుంది. 2014లో రఘురామ్‌ రాజన్‌ రిజర్వ్‌బ్యాంక్‌ గవర్నర్‌గా ఉండగా బ్యాంకింగ్‌ రంగ నిపు ణుడు పీజే నాయక్‌ ఆధ్వర్యంలో కమిటీని ఏర్పాటు చేశారు. బోర్డుల గురించి అది విలువైన సూచ నలు చేసింది. షేర్‌ హోల్డర్లు ఎన్నుకునే ఇండిపెండెంట్‌ డైరెక్టర్లు బోర్డులో ఉండాలని సూచించింది. వారిని ప్రభుత్వమే నియమించే ప్రస్తుత విధానాన్ని రద్దు చేయాలని కోరింది. బ్యాంకుల్లో ప్రభుత్వ వాటా 50 శాతానికి మించరాదన్న దాని సిఫార్సు జాతీయ బ్యాంకుల పరోక్ష ప్రైవేటీకరణకు దారి తీస్తుందన్న విమర్శలొచ్చినా బోర్డుల్లో వృత్తిరంగ నిపుణులుండాలని, నిర్ణయాలకు వారిని బాధ్యుల్ని చేయాలని నాయక్‌ కమిటీ చేసిన సిఫార్సు విలువైనది. కానీ నాలుగేళ్లు గడుస్తున్నా ఆ కమిటీ సిఫార్సుల విషయంలో ప్రభుత్వం ఎలాంటి నిర్ణయమూ తీసుకోలేదు. ఇక బ్యాంకు సార థులుగా ఉండేవారి రిటైర్మెంట్‌ ఎప్పుడో ప్రభుత్వానికి అవగాహన ఉంటుంది. కనుక చాలా ముందుగానే వారి వారసుల్ని నిర్ణయించవచ్చు. ఇందులో ఎంతో జాప్యం చోటుచేసుకుంటోంది. ఫలితంగా పాలన కుంటుపడుతోంది. కీలక నిర్ణయాలన్నీ వాయిదా పడుతున్నాయి. ఈ పరిస్థితి మరెంతకాలమో కొనసాగరాదన్న రాజన్‌ సూచన గమనించదగ్గది. బీజేపీ సీనియర్‌ నేత మురళీ మనోహర్‌ జోషి ఆధ్వర్యంలోని పార్లమెంటరీ కమిటీ నిక్కచ్చిగా మాట్లాడే రాజన్‌ను మొండి బకా యిలపై అభిప్రాయాలు కోరడం మంచిదైంది. ఆయన చెప్పిన అంశాలను పరిగణనలోకి తీసు కుంటే మన బ్యాంకుల పనితీరు గణనీయంగా మెరుగుపడుతుంది. అంతేతప్ప రాజకీయ పక్షాల పరస్పర విమర్శల వల్ల దేశానికి ఒరిగేది శూన్యం.

న్యూఢిల్లీ: బ్యాంకర్లు అతినమ్మకంతో వ్యవహరించడం, ప్రభుత్వం నిర్ణయాలు తీసుకునే ప్రక్రియ మందగించడంతో పాటు ఆర్థిక వృద్ధి ఒక మోస్తరు స్థాయికి పరిమితం కావడమే మొండిబాకీలు(ఎన్‌పీఏ) పేరుకుపోవడానికి ప్రధాన కారణాలని రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ పేర్కొన్నారు. మురళీ మనోహర్‌ జోషి సారథ్యంలోని పార్లమెంటరీ కమిటీకి పంపిన నోట్‌లో ఈ మేరకు వివరించారు. బొగ్గు గనుల కేటాయింపులు మొదలైన వాటిపై అనుమానాలు, విచారణనెదుర్కొనాల్సి రావొచ్చన్న భయాలతో.. అప్పట్లో యూపీఏ, ఆ తర్వాత ఎన్‌డీఏ ప్రభుత్వాల్లో నిర్ణయాల ప్రక్రియ మందగించిందని రాజన్‌ పేర్కొన్నారు.ఫలితంగా ప్రాజెక్టులు నిల్చిపోయి వాటి వ్యయాలు పెరిగిపోవడం, రుణాలపై వడ్డీలు చెల్లించలేని పరిస్థితి తలెత్తిందన్నారు. దేశంలో విద్యుత్‌ కొరత నెలకొన్నప్పటికీ పలు విద్యుత్‌ ప్రాజెక్టులు పెండింగ్‌లో ఉండటం.. ప్రభుత్వ నిర్ణయాల ప్రక్రియ ఇప్పటికీ వేగం అందుకోలేదనడానికి నిదర్శనమన్నారు. రాజన్‌ 2016 సెప్టెంబర్‌ దాకా మూడేళ్లపాటు రిజర్వ్‌ బ్యాంక్‌ గవర్నర్‌గా సేవలందించారు. మొండిబాకీల సమస్యను ముందుగా గుర్తించి, పరిష్కార ప్రయత్నాలు చేశారంటూ మాజీ ప్రధాన ఆర్థిక సలహాదారు అరవింద్‌ సుబ్రమణియన్‌ ఆయన్ను ప్రశంసించిన నేపథ్యంలో ఎన్‌పీఏల అంశాన్ని సంక్షిప్తంగా వివరించాలంటూ రాజన్‌ను పార్లమెంటరీ కమిటీ కోరింది. దీని ప్రకారమే ఆయన తాజా నోట్‌ రూపొందించారు. 2006–08లో బీజం.. చాలామటుకు మొండిబాకీలకు 2006–08 మధ్య కాలంలో బీజం పడిందని ఆయన చెప్పారు. అప్పట్లో విద్యుత్‌ ప్లాంట్ల వంటి ఇన్‌ఫ్రా ప్రాజెక్టులు సకాలంలో, నిర్దేశిత బడ్జెట్‌లో పూర్తయిపోవడం.. ఆర్థిక వృద్ధి పటిష్టంగా ఉండటం తదితర సానుకూల ధోరణులతో  బ్యాంకులు అత్యంత ఆశావాదంతో వ్యవహరించి రుణాలిచ్చేశాయని ఆయన పేర్కొన్నారు. ‘బ్యాంకులు ఇలాంటి సందర్భాల్లోనే తప్పులు చేస్తుంటాయి. గత కాలపు వృద్ధిని, పనితీరును భవిష్యత్‌కు కూడా అన్వయించుకుని .. ప్రమోటర్ల వాటా తక్కువ ఉన్న ప్రాజెక్టులకు కూడా భారీగా రుణాలిచ్చేందుకు సిద్ధమవుతుంటాయి. సొంతంగా తాము ప్రాజెక్టులను మదింపు చేయకుండా.. ప్రమోటర్‌కు చెందిన ఇన్వెస్ట్‌మెంట్‌ బ్యాంక్‌ నివేదిక ఆధారంగా కూడా కొన్నిసార్లు బ్యాంకులు రుణాలిచ్చాయి. మీకు ఎంత కావాలో చెప్పండి రుణమిస్తాం అంటూ బ్యాంకులు తన వెంట పడుతున్నాయంటూ ఒక ప్రమోటర్‌ స్వయంగా నాతో చెప్పడం దీనికి ఉదాహరణ‘ అని రాజన్‌ పేర్కొన్నారు. అయితే, చారిత్రకంగా చూస్తే ఆ స్థాయి వృద్ధి దశలో ఉన్న చాలామటుకు దేశాల్లో ఇలాంటి అసంబద్ధ ధోరణులు సర్వసాధారణమేనని ఆయన వివరించారు. ఎన్‌పీఏ సమస్యకు కొంత అవినీతి కూడా కారణమై ఉండొచ్చని రాజన్‌ చెప్పారు. అయితే అతివిశ్వాసం, చేతగానితనం, అవినీతి అన్నింటినీ వేర్వేరుగా చూసి.. ప్రత్యేకంగా ఇదే కారణమని చెప్పలేమని పేర్కొన్నారు. ‘ఈ బాకీల్లో కొన్నింటికి సంబంధించి బ్యాంకర్లు అతివిశ్వాసంతో వ్యవహరించారని, స్వతంత్రంగా మదింపు చేయలేదన్నది సుస్పష్టం. ఇందుకోసం ఎస్‌బీఐ క్యాప్స్, ఐడీబీఐ బ్యాంక్‌ వంటి వాటిపైనే ఎక్కువగా ఆధారపడ్డారు. ఇలా కీలకమైన విశ్లేషణలను అవుట్‌సోర్సింగ్‌ చేయడమనేది వ్యవస్థాగతమైన బలహీనతే. దీనివల్ల వర్గాలు ప్రభావితం చేసే అవకాశాలు పెరుగుతాయి‘ అని ఆయన పేర్కొన్నారు. మళ్లీ ఇలాంటివి తలెత్తకూడదంటే.. ఎన్‌పీఏల సమస్య మళ్లీ తలెత్తకూడదంటే.. తీసుకోతగిన చర్యలు కొన్నింటిని రాజన్‌ సూచించారు. ప్రభుత్వ రంగ బ్యాంకుల్లో (పీఎస్‌బీ) గవర్నెన్స్‌ను, ప్రాజెక్టుల మదింపు ప్రక్రియను మెరుగుపర్చాలని, ఎప్పటికప్పుడు ఆయా రుణాలను పర్యవేక్షిస్తుండాలని పేర్కొన్నారు. అలాగే పీఎస్‌బీలను ప్రభుత్వానికి దూరంగా ఉంచడం, రికవరీ ప్రక్రియను పటిష్టపర్చడం తదితర చర్యలు తీసుకోవాలని తెలిపారు. పీఎంవోకు ఫ్రాడ్‌ కేసుల లిస్టు.. ఎన్‌పీఏలతో పోలిస్తే తక్కువే అయినప్పటికీ ప్రభుత్వ రంగ బ్యాంకింగ్‌ వ్యవస్థలో మోసాల పరిమాణం భారీగా పెరుగుతోందని రాజన్‌ పేర్కొన్నారు. ఫ్రాడ్‌ కేసుల విషయంలో బ్యాంకులు, దర్యాప్తు సంస్థల మధ్య సమన్వయం కోసం తన హయాంలో ప్రత్యేకంగా మానిటరింగ్‌ సెల్‌ కూడా ఏర్పాటు చేయడంతో పాటు కనీసం ఒకరిద్దరిపైనైనా చర్యలు తీసుకునే అవకాశం ఉంటుందనే ఉద్దేశంతో హై ప్రొఫైల్‌ కేసుల జాబితాను ప్రధాని కార్యాలయానికి (పీఎంవో)కి కూడా పంపినట్లు ఆయన వివరించారు. అయితే, ఈ విషయంలో ఏదైనా పురోగతి ఉందా లేదా అన్నది తనకు తెలియదని, దీనిపై సత్వరం దృష్టి పెట్టాల్సిన అవసరం మాత్రం ఉందని రాజన్‌ చెప్పారు. పీఎస్‌బీల్లో ఆర్‌బీఐ నామినీ ఉన్నంత మాత్రాన అవి పూర్తిగా రిజర్వ్‌ బ్యాంక్‌ అజమాయిషీలోనే ఉందనుకోవడం అపోహేనని ఆయన పేర్కొన్నారు. కేవలం నిబంధనలకు అనుగుణంగా ఆయా బ్యాంకులు ప్రక్రియలు పాటిస్తున్నాయా లేదా అన్నది మాత్రమే నామినీలు చూస్తారే తప్ప.. వాణిజ్య రుణాల వ్యవహారాల్లో వారికి పెద్దగా అనుభవమేమీ ఉండదని రాజన్‌ తెలిపారు. 

న్యూఢిల్లీ : ఆర్‌బీఐ మాజీ గవర్నర్‌ రఘురామ్‌ రాజన్‌ అందరికి సుపరిచితమే. ఆయన పనితీరుపై ఓ వైపు నుంచి ఆరోపణలు, విమర్శలు వచ్చినా.. మరోవైపు భేష్‌ అన్నవారు ఉన్నారు. ఆర్‌బీఐ గవర్నర్‌గా రెండో సారి రాజన్‌ను కొనసాగించాలని మద్దతు కూడా తెలిపారు. కానీ రాజన్‌ ముక్కుసూటితనం, ప్రభుత్వ వ్యతిరేక నిర్ణయాలు రెండో సారి ఆయనకు ఆర్‌బీఐ గవర్నర్‌ పదవి వరించకుండా పోయింది. తాజాగా రఘురామ్‌ రాజన్‌ మరోసారి ఆరోపణలు ఎదుర్కొంటున్నారు. వృద్ధి రేటు పడిపోవడానికి కారణం రాజన్‌ అప్పట్లో తీసుకొచ్చిన విధానాలేనని నీతి ఆయోగ్‌ వైస్‌ చైర్మన్‌ రాజీవ్‌ కుమార్‌ ఆరోపించారు. బ్యాంకింగ్‌ రంగంలోని ఎన్‌పీఏలు పెరగడంతో, వృద్ధి రేటు పడిపోయిందని కుమార్‌ అన్నారు. 2015 చివరి క్వార్టర్‌ నుంచి 2016 వరకు వృద్ధి రేటు క్షీణించిందని చెప్పారు. దీనికి గల కారణం రఘురామ్‌ రాజన్‌ అనుసరించిన విధానాలేనని, పెద్ద నోట్ల రద్దు కాదని వ్యాఖ్యానించారు. ఎన్‌పీఏలను గుర్తించడానికి ఆర్‌బీఐ కొత్త మెకానిజం తీసుకొచ్చిందని, ఆ మెకానిజంతో మొండిబకాయిలు విపరీతంగా పెరిగిపోయాయని చెప్పారు. నరేంద్ర మోదీ ప్రధానిగా బాధ్యతలు చేపట్టినప్పుడు ఎన్‌పీఏలు 4 లక్షల కోట్ల రూపాయలుంటే, 2017 మధ్యకు ఇవి రూ.10.5 లక్షల కోట్లకు పెరిగినట్టు తెలిపారు. ఇక అప్పటి నుంచి పెరుగుతూనే ఉన్నాయన్నారు. కొన్ని కేసుల్లో సూక్ష్మ, చిన్న, మధ్య తరహా సంస్థల పరిశ్రమ క్రెడిట్‌ కూడా కిందకి పడిపోయిందన్నారు. కొన్నేళ్లలో నెగిటివ్‌ వృద్ధి కూడా నమోదైందని తెలిపారు. అయితే వృద్ది రేటు నెమ్మదించడానికి, పెద్ద నోట్ల రద్దుకు ఎలాంటి సంబంధం లేదని కుమార్‌ తేల్చేశారు. ఇక స్థూల తరహా పరిశ్రమ తీసుకున్నా.. వృద్ధి రేటు ఒక శాతం మేర పడిపోయిందని, కొన్ని నెలలు రెండున్నర శాతం తగ్గిందని, మరికొన్ని త్రైమాసికాలు నెగిటివ్‌ కూడా నమోదైందని చెప్పారు. పెద్ద నోట్ల రద్దుపై ఆర్‌బీఐ ఇటీవల విడుదల చేసిన రిపోర్టుపై స్పందిస్తూ... డిమానిటైజేషన్‌ను బ్లాక్‌మనీ, బినామీ లావాదేవీలను నిర్మూలించడానికి తీసుకొచ్చామని పునరుద్ఘాటించారు. 

న్యూఢిల్లీ: డాలర్‌ మారకంలో రూపాయి విలువ ఆందోళనకరమైన స్థాయిలో పడిపోలేదని రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) మాజీ గవర్నర్‌ రఘురామ్‌ రాజన్‌ పేర్కొన్నారు. అయితే ప్రభుత్వం కరెంట్‌ అకౌంట్‌ లోటు (సీఏడీ– క్యాడ్‌)పై అప్రమత్తంగా ఉండాల్సిన అవసరం ఉందని సూచించారు. ఎఫ్‌డీఐ, ఎఫ్‌ఐఐ, ఈసీబీలు మినహా దేశంలోకి ఒక నిర్దిష్ట ఆర్థిక సంవత్సరంలో వచ్చీ–పోయే విదేశీ మారక ద్రవ్య నిల్వల మధ్య నికర వ్యత్యాసమే క్యాడ్‌. ఈ పరిమాణం పెరిగిన దేశాల కరెన్సీలపై తీవ్ర ఒత్తిడి ఉంటుంది.  జూలైలో భారత్‌ వాణిజ్యలోటు (ఎగుమతులు–దిగుమతుల మధ్య నికర వ్యత్యాసం) ఐదేళ్ల గరిష్ట స్థాయి 18 బిలియన్‌ డాలర్లకు చేరడం, దీనితో క్యాడ్‌పై నెలకొన్న భయాల నేపథ్యంలో  రాజన్‌  ఇంటర్వ్యూలో ముఖ్యాంశాలు చూస్తే... ♦ ప్రభుత్వ ఆదాయాలు–వ్యయాలకు మధ్య నికర వ్యత్యాసం–ద్రవ్యలోటు కట్టడిలోనే ఉం ది. సమస్య క్యాడ్‌తోనే. చమురు అధిక ధరల ప్రతికూలత క్యాడ్‌పై పడుతోంది. దీనికి దేశం అధిక డాలర్ల బిల్లును వెచ్చించాల్సి వస్తోంది.   ♦   ద్రవ్యలోటు, ద్రవ్యోల్బణాల వంటి కీలక స్థూల ఆర్థిక అంశాలపై ప్రతిదేశం సారించాల్సిన సమయం ఇది.   ♦   ఇక ఎన్నికల సమయం అయినందున భారత్, బ్రెజిల్‌ వంటి దేశాలు ప్రభుత్వ వ్యయాలు గాడితప్పకుండా చర్యలు తీసుకోవాలి.   ♦    భారత్‌ వృద్ధి గణాంకాలను వివాదాస్పదం చేయాల్సిన అవసరం లేదు. వృద్ధి 7.5% స్థాయిలో ఉంటుందన్నది నా అభిప్రాయం.   ♦    ఇక బ్యాంకింగ్‌ మొండి బకాయిల సమస్య తీవ్రమైనది. దీని పరిష్కార దిశలో బ్యాంకింగ్‌ పాలనా యంత్రాంగాల మెరుగుదల కీలకం.   ♦    అధిక చమురు ధరలు, రూపాయి విలువ క్షీణత కారణంగా భారత కరెంటు ఖాతా లోటు (క్యాడ్‌) ప్రస్తుత ఆర్థిక సంవత్సరంలో 2.5 శాతానికి విస్తరిస్తుందని అంచనా. 2017–18లో ఇది 1.5 శాతం.   ♦    రూపాయి ఇప్పటికీ అధిక విలువలో ఉందని, డాలర్‌తో పోలిస్తే 70–71 స్థాయి రూపాయికి తగిన విలువనేది విశ్లేషకుల వాదన.

న్యూఢిల్లీ: అమెరికా, చైనా మధ్య వాణిజ్య ఘర్షణలతో రెండు విధాల నష్టపోవాల్సి ఉంటుందని ఆర్‌బీఐ మాజీ గవర్నర్‌ రఘురామ్‌ రాజన్‌ హెచ్చరించారు. పరిస్థితి వేగంగా చేజారిపోతే అది ప్రపంచ వృద్ధికి విఘాతం కలిగిస్తుందన్నారు. అల్యూమినియం, ఉక్కు దిగుమతులపై ట్రంప్‌ సర్కారు భారీ టారిఫ్‌లు వేయడంతో ఆ దేశానికి చైనా, తదితర దేశాలతో వాణిజ్య వివాదానికి దారితీసిన విషయం విదితమే. ‘‘ఈ సమయంలో అతి పెద్ద రిస్క్‌... పెరిగిపోతున్న వడ్డీరేట్లతోపాటు వాణి జ్యంపై అవాంఛనీయ పరిస్థితులే. వచ్చే కొన్ని నెలల్లో వాణిజ్య వివాదాలు దావానలంలా మారితే కచ్చితంగా అది ప్రపంచ ఆర్థిక రంగాన్ని దెబ్బతీస్తుంది. కీలకమైన ప్రశ్న ఏంటంటే... ఈ బేరసారాలు, టారిఫ్‌ల హెచ్చరికలు వాస్తవ చర్చలకు దారితీసి ఇరువురికీ లాభదాయకంగా మారతాయా అన్నదే? లేక ఎవరికి వారు తమ స్థాయిలకే పరిమితమై తలుపులు మూసేసుకుని, హెచ్చరికలనే కొనసాగిస్తే అది ఇరువైపులా నష్టపోవాల్సిన పరిస్థితికి దారితీస్తుంది’’   అని ఓ వార్తా సంస్థకు ఇచ్చిన ఇంటర్వ్యూలో రఘురామ్‌ రాజన్‌ పేర్కొన్నారు.

సాక్షి,న్యూఢిల్లీ: బ్యాంక్ ఆఫ్ ఇంగ్లండ్(బీఓఈ) గవర్నర్ గా కీలక భాధ్యతలు చేపట్టబోతున్నారన్న  వార్తలపై రిజర్వ్ బ్యాంక్ ఆఫ్ ఇండియా మాజీ గవర్నర్ రఘురామ్‌ రాజన్   స్పందించారు. బ్యాంక్ ఆఫ్ ఇంగ్లండ్ గవర్నర్ ఉద్యోగానికి దరఖాస్తు చేసుకోవాలని తాను భావించడంలేదని  రాజన్‌ స‍్పష్టం చేశారు. షికాగో యూనివర్శిటీ ఉద్యోగంలో చాలా హ్యాపీగా ఉన్నానని తెలిపారు. అంతేకాదు  వాస్తవానికి తాను  ప్రొఫెషనల్ సెంట్రల్ బ్యాంకర్ని  కాదని  వ్యాఖ్యానించారు. ప్రస్తుతం అమెరికా యూనివర్శిటీలో ప్రొఫెసర్‌గా బాధ్యతలు నిర్వహిస్తున్న రఘురామ రాజన్‌ పేరు  ఇటీవల  వార్తల్లో నిలిచింది.  బ్యాంక్ ఆఫ్ ఇంగ్లండ్(బీఓఈ) గవర్నర్ గా కీలక భాధ్యతలు చేపట్టబోతున్నారని  నివేదికలు వెలువడ్డాయి.  బీఓఈ గవర్నర్ గా మార్క్ కార్నీ పదవీకాలం వచ్చే ఏడాది ముగియనున్న ఈ నేపథ్యంలో యూనివర్శిటీ ఆఫ్ షికాగో బూత్ స్కూల్ ఆఫ్ బిజినెస్ లో ఫైనాన్స్ ఫ్రొఫెసర్ గా ఉన్న  రఘురామ్ రాజన్  పేరు   ప్రముఖంగా వినిపించిన సంగతి తెలిసిందే.

సాక్షి, ముంబై: రిజర్వ్ బ్యాంక్ ఆఫ్ ఇండియా మాజీ గవర్నర్ రఘురామ్‌ రాజన్  గుర్తున్నారా? ప్రస్తుతం అమెరికా యూనివర్శిటీలో ప్రొఫెసర్‌గా బాధ్యతలు నిర్వహిస్తున్న రఘురామ రాజన్‌ పేరు  మళ్లీ వార్తల్లో నిలిచింది.  బ్యాంక్ ఆఫ్ ఇంగ్లండ్(బీఓఈ) గవర్నర్ గా కీలక భాధ్యతలు చేపట్టబోతున్నారని తాజా నివేదికల ద్వారా తెలుస్తోంది.  లండన్ కు చెందిన ఫైనాన్షియల్ టైమ్స్ అందించిన  సమాచారం   ప్రకారం  బీఓఈ  గవర్నర్‌ పదవి రేసులో రాజన్‌ పేరు  ప్రముఖంగా  వినిపిస్తోంది.  చికాగోకి చెందిన ఎకనామిస్ట్ , రఘురామ్ రాజన్‌  టాప్‌లిస్ట్‌లో ఉన్నారని నివేదించింది.  ఆర్‌బీఐ గవర్నర్‌గా తనదైన ముద్ర వేసుకున్న రఘురామ్‌ రాజన్‌ బ్రెక్సిట్ కోసం దేశం సిద్ధపడుతున్న సమయంలో  ప్రతిష్టాత్మక బ్యాంక్ ఆఫ్  ఇంగ్లండ్‌ గవర్నర్  రేసులో..అదీ టాప్‌లో వుండటం విశేషం. ప్రస్తుతం బీఓఈ గవర్నర్ గా మార్క్ కార్నీ పదవీకాలం వచ్చే ఏడాది ముగియనుంది.  ఈ నేపథ్యంలో యూనివర్శిటీ ఆఫ్ చికాగో బూత్ స్కూల్ ఆఫ్ బిజినెస్ లో ఫైనాన్స్ ఫ్రొఫెసర్ గా ఉన్న  రఘురామ్ రాజన్  పేరు పరిశీలనలో ఉందిట. ఈ పదవిని చేపట్టటానికి అవసరమైన ప్రాసెస్ ను ప్రారంభించినట్లు  యూకే ఛాన్సెలర్ ఫిలిఫ్ హమోండ్ తెలిపారని ఎఫ్‌టీ రిపోర్ట్‌ చేసింది.   అంతేకాదు  ఈ లిస్ట్ లో భారత్ కు చెందిన మరో వ్యక్తి స్రితి వదేరా పేరు కూడా ఉంది.

న్యూయార్క్‌: మోదీ సర్కారు 2016 నవంబర్‌లో తీసుకున్న పెద్ద నోట్ల రద్దు(డీమోనిటైజేషన్‌) నిర్ణయంపై ఆర్‌బీఐ మాజీ గవర్నర్‌ రఘురామ్‌ రాజన్‌ మరోసారి విమర్శల బాణం ఎక్కుపెట్టారు. అది మంచి ఆలోచన కాదని అప్పుడే తాను ప్రభుత్వానికి స్పష్టంగా చెప్పానని వెల్లడించారు. అంతేకాకుండా వ్యవస్థలో ఉన్న 87.5 శాతం విలువైన కరెన్సీ నోట్లను రద్దు చేసే ప్రక్రియను తగిన ప్రణాళిక లేకుండా చేపట్టారని కూడా ఆయన కుండ బద్దలుకొట్టారు. విఖ్యాత హార్వర్డ్‌ కెనడీ స్కూల్‌లో జరిగిన ఒక కార్యక్రమంలో మాట్లాడుతూ ఆయన ఈ వ్యాఖ్యలు చేశారు. అయితే, డీమోనిటైజేషన్‌ నిర్ణయాన్ని అమలు చేసేముందు ప్రభుత్వం ఆర్‌బీఐని సంప్రదించలేదన్న వాదనలను రాజన్‌ తోసిపుచ్చారు. 2016 నవంబర్‌ 8న మోదీ ప్రభుత్వం రూ.500, రూ.1,000 నోట్లను రద్దు చేస్తున్నట్లు ప్రకటించిన సంగతి తెలిసిందే. వీటి స్థానంలో కొత్తగా మళ్లీ రూ.2,000, రూ.500 నోట్లను వెంటనే ప్రవేశపెట్టారు. తర్వాత రూ.200 నోటును కూడా తీసుకొచ్చారు. అయితే, తగినన్ని నోట్లు అందుబాటులో లేకపోవడంతో ప్రజలు పడరాని పాట్లుపడ్డారు. రాజన్‌ హయాంలోనే నోట్ల రద్దుపై ప్రభుత్వం కార్యాచరణను మొదలుపెట్టినప్పటికీ, 2016 సెప్టెంబర్‌లో ఆయన పదవీకాలం పూర్తయ్యాక ప్రస్తుత గవర్నర్‌ ఉర్జిత్‌ పటేల్‌ హయాంలో దీన్ని అమలు చేసింది. అప్పట్లో తాను రెండోసారి గవర్నర్‌గా కొనసాగాలని భావించినా  ప్రభుత్వం మొగ్గుచూపలేదని కూడా రాజన్‌ చెప్పడం తెలిసిందే. నోట్ల రద్దు ఇతరత్రా అంశాల్లో మోదీ సర్కారుతో తలెత్తిన విభేదాలే దీనికి ప్రధాన కారణం. ప్రస్తుతం రాజన్‌ షికాగో యూనివర్సిటీలోని బూత్‌ స్కూల్‌ ఆఫ్‌ బిజినెస్‌లో ఆర్థిక శాస్త్ర ప్రొఫెసర్‌గా తన పాత విధుల్లో కొనసాగుతున్నారు. తగినన్ని నోట్లు సిద్ధం కాకుండానే... ‘వ్యవస్థలో ఉన్న 87.5 శాతం విలువైన నోట్లను రద్దు చేయాలంటే ముందుగా దానికి తగ్గట్టుగా కరెన్సీ నోట్లను ముద్రించి చలామణీలోకి తీసుకొచ్చేందుకు సిద్ధపడాలి. ఏ ఆర్థికవేత్త అయినా ఇదే చెబుతారు. అయితే, భారత ప్రభుత్వం ఇలాంటి కసరత్తును పూర్తిగా చేయకుండానే ఆదరాబాదరాగా డీమోనిటైజేషన్‌ను ప్రకటించింది. దీనివల్ల ఆర్థిక వ్యవస్థపై తీవ్ర ప్రతికూల ప్రభావం పడింది. ఈ నిర్ణయంతో ప్రజలు నల్ల ధనాన్ని నేలమాళిగల్లోంచి బయటకు తెచ్చేసి, లెంపలేసుకొని పన్నులు కట్టేస్తారనేది ప్రభుత్వం ఆలోచన. అయితే, ఇది అవివేకమైన నిర్ణయం అనేది నా అభిప్రాయం. ఎందుకంటే ప్రజలు కొత్త వ్యవస్థలకు వేగంగా అలవాటుపడిపోయి, కొత్త దారులు వెతుక్కుంటారన్న విషయాన్ని ప్రభుత్వం మరిచిపోయింది. రద్దు చేసిన నోట్లకు సమానమైన మొత్తం వ్యవస్థలోకి మళ్లీ తిరిగివచ్చేసిందంటే, ప్రభుత్వం ఏ ఉద్దేశంతో దీన్ని చేపట్టిందో అది నెరవేరనట్టే లెక్క. ప్రత్యక్షంగా దీని ప్రభావంలేదని తేటతెల్లమైంది. కరెన్సీకి కటకటతో ప్రజలు ఇబ్బందుల పాలు కావడం ఒకెత్తు అయితే, ఆర్థిక కార్యకలాపాలు స్తంభించడంతో అసంఘటిత రంగంలో భారీగా ఉద్యోగాలు ఊడిపోయాయి. అయితే, దీర్ఘకాలంలో దీనివల్ల ఎలాంటి ప్రభావం పడుతుందనేది వేచి చూడాలి. ప్రధానంగా పన్నుల వసూళ్లపై ప్రభుత్వం గనుక సీరియస్‌గా దృష్టిసారిస్తే... ఖజానాకు ఆదాయం పెరుగుతుంది. ఇది నెరవేరిందని బలంగా నిరూపితం అయితేనే సానుకూల ప్రభావం ఉన్నట్లు లెక్క. నా వరకూ అయితే, ఆ సమయంలో నోట్ల రద్దు అనేది నిరుపయోగమని భావించా’ అని రాజన్‌ వివరించారు. జీఎస్‌టీ మంచిదే, కానీ... వస్తు, సేవల పన్ను(జీఎస్‌టీ)ను మెరుగ్గా అమలు చేయగలిగితే భారత్‌ ఆర్థిక వ్యవస్థకు మంచిదేనని రాజన్‌ వ్యాఖ్యానించారు. ‘ఇదేమీ సరిదిద్దలేనంత పెద్ద సమస్య కాదు. అయితే, మరింతగా కసరత్తు చేయాల్సి ఉంటుంది. జీఎస్‌టీపై నాకు ఇంకా విశ్వాసం ఉంది’ అని పేర్కొన్నారు.  

హైదరాబాద్, బిజినెస్‌ బ్యూరో: రిజర్వు బ్యాంకు మాజీ గవర్నర్‌ రఘురామ్‌ రాజన్‌ కొత్త బాధ్యతలు చేపట్టబోతున్నారు. కొందరు కార్పొరేట్లతో కలిసి యూనివర్సిటీ ఏర్పాటుకు శ్రీకారం చుట్టారు. వీరిలో జేఎస్‌డబ్లు్య గ్రూప్‌ చైర్మన్‌ సజ్జన్‌ జిందాల్, మహీంద్రా అండ్‌ మహీంద్రా చైర్మన్‌ ఆనంద్‌ మహీంద్రా ఉన్నారు. చిత్తూరు జిల్లా శ్రీసిటీలో రానున్న ఈ యూనివర్సిటీకి ‘క్రియా’ అని పేరు పెట్టారు. క్రియా యూనివర్సిటీకి తొలుత రూ.750 కోట్ల నిధులు సమకూరతాయని ఇండస్‌ఇండ్‌ బ్యాంక్‌ చైర్మన్, యూనివర్సిటీ సూపర్‌వైజరీ బోర్డు చైర్మన్‌ ఆర్‌.శేషసాయి ముంబైలో తెలిపారు. దాతృత్వంలో భాగంగా కార్పొరేట్లు ఈ యూనివర్సిటీకి ఖర్చు చేస్తారన్నారు. యూనివర్సిటీ గవర్నింగ్‌ కౌన్సిల్‌ సలహాదారుగా రఘురామ్‌ రాజన్‌ వ్యవహరిస్తారు. యూనివర్సిటీ ఆఫ్‌ షికాగోకు చెందిన బూత్‌ స్కూల్‌ ఆఫ్‌ బిజినెస్‌లో ఫైనాన్స్‌ సబ్జెక్టును రాజన్‌ బోధిస్తున్న సంగతి తెలిసిందే.  క్లాసులు 2019 నుంచి..: యూనివర్సిటీలో 2019 జూలై నుంచి తొలి బ్యాచ్‌ ప్రారంభమవుతుంది. హాస్టల్‌ వసతితో కలిపి ఫీజు రూ.7–8 లక్షలు ఉండనుంది. లిబరల్‌ ఆర్ట్స్, సైన్సెస్‌లో బీఏ హానర్స్, బీఎస్సీ హానర్స్‌ డిగ్రీ కోర్సులు ఆఫర్‌ చేస్తారు. మెరిట్‌ ఆధారంగానే అడ్మిషన్లుంటాయి. తాత్కాలికంగా శ్రీసిటీలోని ఐఎఫ్‌ఎంఆర్‌ క్యాంపస్‌లో క్లాసులు ప్రారంభిస్తారు. తర్వాత సొంత భవనంలోకి మారుస్తారు. 200 ఎకరాల్లో నిర్మించే క్రియా యూనివర్సిటీ సొంత భవనం 2020 నాటికి సిద్ధమవుతుంది. ప్రపంచ అభివృద్ధిలో పాలుపంచుకునే నవతరం భారతీయులను ఇక్కడ తీర్చిదిద్దుతామని ఈ సందర్భంగా రాజన్‌ వ్యాఖ్యానించారు. ఇప్పటివరకు అందుబాటులో లేని, భవిష్యత్‌కు అవసరమైన విద్యావిధానం తీసుకొస్తామని చెప్పారు. కాగా, జిందాల్, మహీంద్రాలు యూనివర్సిటీ కౌన్సిల్‌ సభ్యులుగా ఉన్నారు. పద్మభూషణ్‌ నారాయణన్‌ వఘుల్‌ కౌన్సిల్‌ చైర్మన్‌గా వ్యవహరిస్తారు. విద్యావేత్త సుందర్‌ రామస్వామి వైస్‌ చాన్స్‌లర్‌గా ఉంటారు. యూనివర్సిటీ ప్రకటన సందర్భంగా రాజన్, ఆనంద్‌ మహీంద్రా, సజ్జన్‌ జిందాల్‌ తదితరులు 

కోచి/న్యూఢిల్లీ: అమెరికా, చైనా మధ్య వాణిజ్య యుద్ధం చోటు చేసుకుంటే అది ప్రపంచ ఆర్థిక రంగ రికవరీకి విఘాతం కలిగిస్తుందని ఆర్‌బీఐ మాజీ గవర్నర్‌ రఘురామ్‌ రాజన్‌ అన్నారు. ‘‘ఈ విషయంలో ఆందోళన కలిగించే ఎన్నో అంశాలున్నాయి. దీన్ని తేలిగ్గా కొట్టిపారేయలేం’’ అని రాజన్‌ పేర్కొన్నారు. అయితే, ఒక దేశం చర్యకు, మరో దేశం ప్రతిస్పందించే విధానం నుంచి బయటపడతామనే ఆశాభావం వ్యక్తం చేశారు. ‘‘వాణిజ్య యుద్ధం అనే పదాన్ని వినియోగించడం ఇష్టం లేదు. ఎందుకుంటే వారు ఇంకా ఆ దశలో లేరు. అయితే, ఈ విధమైన చర్యలకు దూరంగా ఉండాలి. ఎందుకంటే ప్రస్తుత ఆర్థిక రంగ రికవరీకి హాని కలుగుతుంది. అమెరికా పూర్తి బలంగా ఉండి, ఉద్యోగాలు తగినన్ని ఉన్న తరుణంలో ఈ విధంగా చేయడం సరికాదని భావిస్తున్నా’’ అని రాజన్‌ అన్నారు. యూనివర్సిటీ ఆఫ్‌ చికాగో, బూత్‌ స్కూల్‌ ఆఫ్‌ బిజినెస్‌లో రాజన్‌ ప్రస్తుతం ఫైనాన్స్‌ ప్రొఫెసర్‌గా పనిచేస్తున్నారు.   ఏకపక్షంగా చర్యలు తీసుకుంటే స్పందిస్తాం: ప్రభు  అమెరికా రక్షణాత్మక చర్యలతో ప్రపంచం తీవ్ర సవాళ్లను ఎదుర్కొంటోందని, ఎగుమతుల పెంపునకు మార్గాలను అన్వేషించాలని కేంద్ర వాణిజ్య మంత్రి సురేష్‌ ప్రభు అన్నారు. చైనా సహా తన వాణిజ్య భాగస్వాములకు వ్యతిరేకంగా అమెరికా కఠిన చర్యలు చేపట్టిందన్నారు. ‘‘నిబంధనలకు లోబడి, పారదర్శక, భాగస్వామ్య వాణిజ్య విధానాన్ని భారత్‌ బలంగా విశ్వసిస్తుంది. ఒకవేళ ఏ దేశమైనా ఏకపక్షంగా చర్యలకు దిగితే దీన్ని తప్పకుండా పరిగణనలోకి తీసుకోవడం ద్వారా తగు రీతిలో ఎదుర్కొంటాం’’అని ప్రభు స్పష్టం చేశారు. ఎగుమతుల పెంపునకు ప్రభుత్వం చర్యలు తీసుకుంటోందని తెలిపారు. కొత్త మార్కెట్లు, కొత్త ఉత్పత్తులకు అవకాశాలను అన్వేషిస్తున్నట్టు చెప్పారు.  భారత్‌ చొరవ చూపాలి: ఫిక్కి  ప్రపంచ వ్యాప్తంగా దేశాల మధ్య వాణిజ్య యుద్ధ మేఘాలు ఆవరిస్తుండటంతో వాటిని తగ్గించేందుకు భారత్‌ చురుకైన పాత్ర పోషించాలని ఫిక్కి కోరింది. ప్రపంచ వాణిజ్య ప్రగతిని అవి దెబ్బతీస్తాయని ఆందోళన వ్యక్తం చేసింది. అమెరికా రక్షణ విధానాలు వాణిజ్య ఘర్షణకు తెరతీసిన నేపథ్యంలో ప్రపంచ వాణిజ్య సంస్థ (డబ్ల్యూటీవో) విధానాలను కొనసాగించాల్సిన ఆవశ్యకతను గుర్తు చేసింది. ఓ ముఖ్య దేశంగా భారత్‌కు ప్రపంచ దేశాల్లో ఆమోదం పెరుగుతున్న నేపథ్యంలో డబ్ల్యూటీవో బలోపేతానికి చర్యలు చేపట్టాలని సూచించింది. 

కొచ్చి : రిజర్వు బ్యాంకు ఆఫ్‌ ఇండియాకు 2012 జనవరి నుంచి ట్విటర్‌ యాక్టివ్‌ అకౌంట్‌ ఉంది. కానీ ఈ సెంట్రల్‌ బ్యాంకు గవర్నర్‌గా పనిచేసిన రఘురామ్‌ రాజన్‌కు మాత్రం ఇప్పటి వరకు మైక్రోబ్లాగింగ్‌ ప్లాట్‌ఫామ్‌ లేదట. అయితే తాను ఎందుకు ట్విటర్‌ అకౌంట్‌లో ఆబ్సెంట్‌గా ఉన్నారో రాజన్‌ వివరించారు. ‘నాకు సమయం లేదు. ఒకవేళ దానిలో ఎంగేజ్‌ అవ్వాలనుకుంటే, నిరంతరం దానిలో ఉనికిలో ఉండాలనేది నా అభిప్రాయం. వెంటనే ఆలోచించే సామర్థ్యం నాలో లేదు. 20 నుంచి 30 సెకన్లలో 140 క్యారెక్టర్‌ ట్వీట్‌ ద్వారా నేను స్పందించలేను’ అని రాజన్‌ చెప్పారు. కొచ్చిలో జరుగుతున్న ఫ్యూచర్‌ గ్లోబల్‌ డిజిటల్ సమిట్‌ సందర్భంగా రాజన్‌ ఈ మేరకు స్పందించారు. ప్రస్తుతం రాజన్‌  యూనివర్సిటీ ఆఫ్‌ చికాగో బూత్‌ స్కూల్‌ ఆఫ్‌ బిజినెస్‌లో ఫైనాన్స్‌ ప్రొఫెసర్‌గా చేస్తున్నారు. కేరళ ప్రభుత్వం నిర్వహిస్తున్న ఫ్యూచర్‌ డిజిటల్‌ సమిట్లో ఆయన కీలక స్పీకర్‌. రెండు రోజుల పాటు జరుగుతున్న ఈ సదస్సుకు సీఈవోలు, ఇండస్ట్రీ లీడర్లు, ప్రభుత్వ అధికారులు పాల్గొన్నారు. రాష్ట్ర ముఖ్యమంత్రి పినరాయి విజయన్‌ దీన్ని ప్రారంభించారు. ఇన్ఫోనిస్‌ సహ వ్యవస్థాపకుడు నందన్‌ నిలేకని, సిస్కో హరీష్ కృష్ణన్, హార్వడ్‌ యూనివర్సిటీ గీతా గోపినాథ్‌ వంటి పలువురు ప్రముఖులు హాజరవుతున్నారు.  

రిజర్వు బ్యాంకు ఆఫ్‌ ఇండియా మాజీ గవర్నర్‌ రఘురామ్‌ రాజన్‌ రాజకీయాల్లోకి రావడంపై క్లారిటీ ఇచ్చారు. తాను రాజకీయాల్లోకి వచ్చే ప్రతిపాదనేమీ లేదని తేల్చిచెప్పారు. ప్రొఫెసర్‌గా తాను చాలా సంతోషంగా ఉన్నానని, ఉద్యోగాన్ని ఇష్టపడుతున్నట్టు పేర్కొన్నారు. ఆమ్‌ ఆద్మీ పార్టీ తరుఫు నుంచి రాజన్‌ను రాజ్యసభకు ఎంపిక చేయాలని ఆ పార్టీ నిర్ణయించినట్టు తెలిసింది.  ప్రొఫెసర్‌గా తానెంతో సంతోషంగా ఉన్నానని, రోజుకు చాలా గంటలు పనిచేసే బ్రెయిన్‌ తనకు ఉందని, నేనే ఇష్టపడే ఉద్యోగం ఇదే అని తెలిపారు.  రాజకీయాల్లోకి ప్రవేశంపై వెనువెంటనే నో అని చెప్పేశారు. తన భార్యకు కూడా ఇష్టంలేదని, తను చాలా స్పష్టంగా వద్దని చెప్పినట్టు పేర్కొన్నారు. ఢిల్లీ నుంచి రాజ్యసభ సీటును ఆప్‌ రాజన్‌కు ఆఫర్‌ చేసింది. ఈ ఆఫర్‌ను ఆర్‌బీఐ మాజీ గవర్నర్‌ తిరస్కరించినట్టు తెలిసింది. మరో పుస్తకం కూడా తాను రాస్తున్నట్టు తెలిపారు. రాజన్‌ చివరి పుస్తకం ' ఐ డూ వాట్‌ ఐ డూ'. సెప్టెంబర్‌లో ఈ బుక్‌ విడుదలైంది. దేశీయ ఆర్థికవ్యవస్థ గురించి పలు అంశాలను ఇది స్పృశించింది.   జీఎస్టీ గురించి మాట్లాడిన రాజన్‌, దీర్ఘకాలికంగా ఇది చాలా మంచిదని, కానీ కొన్ని సమస్యలున్నట్టు తెలిపారు. ఈ ఆటుపోట్లను తొలగించాల్సినవసరం ఉందన్నారు.   

న్యూఢిల్లీ : ఆమ్‌ ఆద్మీ పార్టీ ఆఫర్‌ చేసిన రాజ్యసభ సీటును ఆర్‌బీఐ మాజీ గవర్నర్‌ రఘురామ్‌ రాజన్‌ సున్నితంగా తిరస్కరించారు. ప్రస్తుతమున్న పరిస్థితుల్లో తనకు ఎంతో ఇష్టమైన అధ్యాపక వృత్తిని వదిలిపెట్టి రాజ్యసభ సభ్యుడిగా పనిచేయలేనని రాజన్‌ పేర్కొన్నారు. ఆప్‌ పార్టీ అధినేత అరవింద్‌ కేజ్రీవాల్‌ చేసిన ఆఫర్‌పై రాజన్‌ కార్యాలయం ఒక ప్రకటన విడుదల చేసింది. ప్రస్తుతం రఘురామ్‌ రాజన్‌ అధ్యాపక వృత్తిలో మమేకమై ఉన్నారని, భారత్‌లో కూడా విభిన్న విద్యా కార్యకలాపాలు చేపట్టేందుకు ప్రణాళికలు రూపొందించుకున్నారని కార్యాలయం ప్రకటించింది. యూనివర్సిటీ ఆఫ్‌ చికాగోలో పూర్తిస్థాయి అధ్యాపకుడిగా కొనసాగేందుకే రాజన్‌ ఇష్టపడుతున్నట్లు ఆయన కార్యాలయం స్పష్టం చేసింది. కేజ్రీవాల్‌ నేతృత్వంలోని ఆమ్‌ ఆద్మీ పార్టీ ముగ్గురు సభ్యులను జనవరిలో రాజ్యసభకు పంపనుంది. ఈ మూడు స్థానాలను ఆప్‌ పార్టీ నేతలను కాకుండా.. ఆయా రంగాల్లో నిష్ణాతులను పంపాలని అరవింద్‌ కేజ్రీవాల్‌ ఆలోచిస్తున్నట్లు తెలిసింది. అందులో భాగంగానే రఘురామ్‌ రాజన్‌ను రాజ్యసభకు పంపాలని నిర్ణయం తీసుకుంది. ఇదే విషయాన్ని ఆప్‌ పార్టీ నేత ఆశిష్‌ ఖేతన్‌ ట్విటర్‌లో వెల్లడించారు. See the contrast. @narendramodi recently sent @AmitShah to Rajya Sabha. While @ArvindKejriwal wants to send Mr. Raghuram Rajan to the upper house. — Ashish Khetan (@AashishKhetan) 8 November 2017

న్యూఢిల్లీ : ఆర్‌బీఐ మాజీ గవర్నర్‌ రఘురామ్‌ రాజన్‌కు ఆమ్‌ ఆద్మీ పార్టీ (ఆప్‌) రాజ్యసభ సీటు ఆఫర్‌ చేయబోతుంది. రాజ్యసభ సభ్యుడిగా రాజన్‌ను పేరును ఆప్‌ పరిశీలిస్తున్నట్టు సంబంధిత వర్గాలు వెల్లడించాయి. 2015 ఢిల్లీ ఎన్నికల్లో ముఖ్యమంత్రి అరవింద్‌ కేజ్రీవాల్‌ ఘనవిజయం సాధించిన విషయం తెలిసిందే. కేజ్రీవాల్‌ పార్టీ నుంచి ముగ్గురు సభ్యులను త్వరలోనే రాజ్యసభకు పంపించబోతున్నారు. వీరి పదవీ కాలం జనవరి నుంచి ప్రారంభం కాబోతుంది. ఉన్న మూడు ఖాళీలకు పార్టీలో ఉన్న నేతలను కాకుండా బయట నుంచి ప్రొఫెషనల్స్‌ను రాజ్యసభకు ఎంపికచేయాలని కేజ్రీవాల్‌ నిర్ణయిస్తున్నట్టు తెలిసింది. సెంట్రల్‌ బ్యాంకుకు గవర్నర్‌గా పనిచేసిన రాజన్‌, ప్రస్తుతం చికాగో యూనివర్సిటీలో ప్రొఫెసర్‌గా పనిచేస్తున్నారు. రెండోసారి ఆర్‌బీఐ గవర్నర్‌గా రాజన్‌ కొనసాగింపును పట్టించుకోని కేంద్ర ప్రభుత్వం, ఆయన పదవిని పొడిగించలేదు. ఈ క్రమంలో ఆయన తనకు ఎంతో ఇష్టమైన అధ్యాపక వృతిని ఎంచుకున్నారు. ఖాళీ కాబోతున్న ఈ మూడు రాజ్యసభ సీట్ల కోసం పోటీ బాగానే ఏర్పడే పరిస్థితి కనిపిస్తోంది. సీనియర్‌ ఆప్‌ నేత కుమార్‌ విశ్వాస్‌ కూడా రాజ్యసభ పదవికి పోటీ పడుతున్నారు.


 న్యూఢిల్లీ: బ్యాంకింగ్‌లో తొలుత మొండిబకాయిల (ఎన్‌పీఏ) సమస్య పరిష్కారానికే ప్రాధాన్యత ఇవ్వాలని, ఆ తదుపరే విలీనాల ప్రక్రియ ప్రారంభం కావాలని రిజర్వ్‌ బ్యాంక్‌ (ఆర్‌బీఐ) ఆఫ్‌ ఇండియా మాజీ గవర్నర్‌ రఘురామ్‌ రాజన్‌ పేర్కొన్నారు. బ్యాంకుల మూలధన సమస్య పరిష్కారానికి కూడా ఇది కీలకమని ఒక ఇంటర్వ్యూలో ఆయన వివరించారు. తాను ఆర్‌బీఐ గవర్నర్‌గా ఉన్న సమయంలో ప్రారంభించిన రుణ నాణ్యాతా సమీక్ష (ఏక్యూఆర్‌) మొండిబకాయిల పరిష్కారంలో కీలక అడుగని మరో ప్రశ్నకు సమాధానంగా చెప్పారు.
 
  

ముంబయి: ఆర్బీఐ గవర్నర్‌ పదవీ కాలానికి భద్రత ఉండాలని ఆర్బీఐ మాజీ గవర్నర్‌ రఘురామ్‌ రాజన్‌ అభిప్రాయపడ్డారు. న్యాయమూర్తుల పదవీకాలానికి ఎలాంటి భద్రత ఉంటుందో అదే స్థాయి భద్రతను ఆర్బీఐ గవర్నర్‌ పదవికి కల్పించాల్సిన అవసరం ఉందన్నారు. ఆర్బీఐ గవర్నర్‌ పదవీకాలం మూడేళ్లు మాత్రమే ఉండటం చాలా స్వల్పమైనదని చెప్పారు. ఆర్బీఐ, కేంద్ర ప్రభుత్వం మధ్య కొన్నిసార్లు ఉద్రిక్త పరిస్థితులు ఏర్పడతాయని, ఒక్కోసారి చిన్నచిన్న విషయాలకే అది సమస్యగా పరిణమిస్తుందని కూడా చెప్పారు. ఇవి తీరేందుకు విలువైన సమయం వృధా అయిపోతుందని కూడా తెలిపారు. అయితే, ఒక వేళ పదవీ కాలానికి భద్రత ఉంటుందనుకొని భావించినా తిరిగి ఏదో ఒక అంశం ప్రభావం చూపుతుందని తెలిపారు. ఆయన ప్రసంగాల ఆధారంగా రూపొందించిన పుస్తకం 'ఐ డూ వాట్‌ ఐ డూ' అనే పుస్తకం ఆవిష్కరణ సందర్భంగా ఆయన ఈ వ్యాఖ్యలు చేశారు.


 ► పదేళ్లపాటు 8–10 శాతం వృద్ధి సాధించాలి...
 ► వృద్ధి జోరులో మనమే టాప్‌ అని
 ►అప్పుడు చెప్పుకుంటే బాగుంటుంది...
 ► జీడీపీపై ఆర్‌బీఐ మాజీ గవర్నర్‌ రాజన్‌ వ్యాఖ్యలు  
 
 న్యూఢిల్లీ: ఆర్థిక వృద్ధి రేటుపై మోదీ సర్కారువన్నీ డబ్బా కబుర్లేనంటూ రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ పరోక్షంగా చురకలంటించారు. ప్రపంచంలోనే అత్యంత వేగంగా వృద్ధి చెందుతున్న దేశమంటూ బాకా కొట్టుకోవడానికి ముందు వరుసగా పదేళ్లపాటు అత్యంత పటిష్టమైన స్థూల దేశీయోత్పత్తి(జీడీపీ) వృద్ధిని సాధించి చూపాలని ఆయన వ్యాఖ్యానించారు. తాజాగా ఆర్‌బీఐ గవర్నర్‌గా తన అనుభవాలపై ‘ఐ డూ వాట్‌ ఐ డూ’అనే పుస్తకాన్ని విడుదల చేసిన సందర్భంగా రాజన్‌ ఒక వార్తా సంస్థకు ఇచ్చిన ఇంటర్వ్యూలో ఈ వ్యాఖ్యలు చేశారు.
 పెద్ద నోట్ల రద్దు తర్వాత జీడీపీ వృద్ధి రేటు ఘోరంగా పడిపోయిన సంగతి తెలిసిందే. ఈ ఏడాది ఏప్రిల్‌–జూన్‌ త్రైమాసికంలో ఏకంగా మూడేళ్ల కనిష్టానికి(5.7 శాతం) పడిపోయింది. అంతక్రితం త్రైమాసికంలో 6.1 శాతంగా నమోదైంది. అయితే, ఇదే తరుణంలో చైనా మాత్రం 6.5 శాతం చొప్పున వృద్ధి సాధించి భారత్‌ను వెనక్కినెట్టింది. ఈ నేపథ్యంలో రాజన్‌ వ్యాఖ్యలు ప్రాధాన్యం సంతరించుకున్నాయి. ‘భారత్‌ తన సంస్కృతి, చరిత్ర గురించి ప్రపంచానికి ఎన్ని గొప్పలైనా చెప్పుకోవచ్చు. అయితే, ఆర్థిక వృద్ధి విషయంలో మాత్రం ఈ బాకా కుదరదు. ముందుగా పదేళ్లపాటు 8–10% మేర నిలకడైన వృద్ధి రేటును సాధించి చూపాలి. ఆ తర్వాత గొప్పలు చెబితే బాగుంటుంది’ అని రాజన్‌ సూచించారు.
 
 నా వ్యాఖ్యల తర్వాత వృద్ధి పడుతూనే ఉంది: ఇప్పటివరకూ ఆర్‌బీఐ గవర్నర్లుగా పనిచేసిన వారందరికీ రెండోవిడత అవకాశం లభించింది. అయితే, రాజన్‌ను మాత్రం మరోవిడత కొనసాగించేందుకు మోదీ ప్రభుత్వం ఇష్టపడకపోవడంతో పదవిలో ఉండగానే తాను మరోసారి గవర్నర్‌గా చేయబోనని.. తన అధ్యాపక వృత్తికి తిరిగివెళ్లిపోనున్నట్లు ఆయన ప్రకటించిన సంగతి తెలిసిందే. కాగా, ఆర్‌బీఐ అధిపతిగా ఉన్నప్పుడు కూడా రాజన్‌ మన ఆర్థిక వ్యవస్థపై నిక్కచ్చిగా కుండబద్దలుకొట్టినట్లు వ్యాఖ్యలు చేయడం తెలిసిందే.
 ప్రధా నంగా ‘గుడ్డివాళ్ల రాజ్యంలో ఒంటికన్ను ఉన్నోడే రాజు’ అంటూ భారత్‌ వృద్ధి రేటును ఆభివర్ణించారు. దీనిపై బీజేపీ రాజ్యసభ సభ్యుడు సుబ్రమణ్య స్వామి స్పందిస్తూ.. తక్షణం రాజన్‌ను ఆర్‌బీఐ గవర్నర్‌ పదవి నుంచి తొలగించాలని డిమాండ్‌ చేస్తూ ప్రధానికి లేఖకూడా రాశారు. అసలు రాజన్‌ మానసికంగా భారతీయుడు కాదని కూడా స్వామి తీవ్ర వ్యాఖ్యలు చేశారు. అయితే, దీన్ని తాను పెద్దగా పట్టించుకోలేదంటూ రాజన్‌ ఇంటర్వ్యూలో చెప్పారు.
 ‘నేను దేన్నయినా ముందుగానే ఊహించి చెప్పగలనని అనుకోవడం లేదు. అయితే, మనగురించి మనం మరీ అతిగా చెప్పుకునే విషయంలో కొంత అప్రమత్తంగా వ్యవహరించాలన్నదే నా ఉద్దేశం. నేను వృద్ధి విషయంలో ఆ వ్యాఖ్యలు 2016 ఏప్రిల్‌లో చేశాను. అప్పటి నుంచీ ప్రతి త్రైమాసికంలోనూ వృద్ధి రేటు దిగజారుతూనే వస్తోంది’ అని రాజన్‌ వివరించారు. 2008 నాటి ప్రపంచ ఆర్థిక సంక్షోభాన్ని ముందుగానే పసిగట్టి చెప్పిన ప్రపంచ ఆర్థికవేత్తల్లో రాజన్‌ కూడా ఒకరు కావడం గమనార్హం.
 
 మనది ఇంకా చిన్న ఆర్థిక వ్యవస్థే...
 చైనా ఆర్థిక వ్యవస్థతో మనకు ఎన్నటికీ పోలికే ఉండదని రాజన్‌ చెప్పారు. ‘ప్రస్తుతం 2.5 ట్రిలియన్‌ డాలర్ల పరిమాణంతో ఉన్న మన ఆర్థిక వ్యవస్థ చాలా చిన్నదికింద లెక్క. అయినప్పటికీ చాలా పెద్దదేశంగా భావిస్తాం. మనతో పోలిస్తే చైనా ఎకానమీ ఐదు రెట్లు పెద్దది. ఒకవేళ చైనా స్థాయికి భారత్‌ చేరుకోవాలంటే ఆ దేశంలో ఆర్థిక వ్యవస్థ పూర్తిగా మందగించాలి. భారత్‌ వచ్చే పదేళ్లపాటు భారీస్థాయి వృద్ధి రేటుతో దూసుకుపోవాలి’ అని పేర్కొన్నారు.
 ఇప్పుడున్న పరిస్థితుల్లో భారత్‌ వృద్ధి మళ్లీ 8–9 శాతానికి పుంజుకోవాలంటే మరిన్ని ప్రైవేటు పెట్టుబడులు, ఎగుమతులకు పునరుత్తేజం ద్వారానే సాధ్యపడుతుందన్నారు. ‘1990 దశకం నుంచి భారత్‌ 6–7–8 శాతం మేర వృద్ధి రేటు స్థాయికి నెమ్మదిగా చేరింది. అయితే, మధ్యతరగతి ప్రజలకు సైతం ఆర్థిక ప్రగతి ఫలాలు అందాలంటే 8–10 శాతం వృద్ధి కనీసం పదేళ్లపాటు స్థిరంగా కొనసాగాల్సి ఉంటుంది. అప్పుడే భారీస్థాయి ఆర్థిక వ్యవస్థగా అవతరించగలుగుతాం’ అని రాజన్‌ స్పష్టం చేశారు.


 ♦ ప్రభుత్వం స్పష్టతనివ్వాలి...
 ♦ బలహీన బ్యాంకులతో విలీనాలు మరింత జఠిలం
 ♦ కన్సాలిడేషన్‌ సులువైన ప్రక్రియేమీ కాదు
 ♦ ఆర్‌బీఐ మాజీ గవర్నర్‌ రఘురామ్‌ రాజన్‌
 
 న్యూఢిల్లీ: న్యూఢిల్లీ: ప్రభుత్వ రంగ బ్యాంకుల విలీన ప్రతిపాదనలపై కేంద్ర ప్రభుత్వ తీరును రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ ప్రశ్నించారు. కన్సాలిడేషన్‌ సహేతుకమైనదే అయినప్పటికీ.. దీనివల్ల కలిగే లాభాలేంటో ప్రభుత్వం చెప్పాలని ఆయన కోరారు. ఒక ఫైనాన్షియల్‌ డెయిలీకి ఇచ్చిన ఇంటర్వ్యూలో... బ్యాంకుల విలీనాన్ని చాలా సంక్లిష్టమైన ప్రక్రియగా రాజన్‌ వర్ణించారు. ‘కన్సాలిడేషన్‌కి బ్యాంకుల సీఈవోలు, మేనేజర్లు మొదలైన వారంతా బోలెడంత శ్రమ, సమయం వెచ్చించాల్సి వస్తుంది.
 
 ఐటీ సిస్టమ్స్‌ అనుసంధానం చేయాలి.. రెండు విభిన్న పని సంస్కృతులు, హెచ్‌ఆర్‌ వ్యవస్థలు మొదలైన వాటన్నింటి విలీనం చేయాలి. ఇదంతా అత్యంత శ్రమతో కూడుకున్నదే‘ అని ఆయన చెప్పారు. బ్యాంకులు ఇప్పటికే బలహీనంగా ఉన్న నేపథ్యంలో విలీనాలు మరింత సమస్యాత్మకంగా మారతాయని రాజన్‌ పేర్కొన్నారు. ‘ఈ ప్రక్రియంతా చాలా సులువుగా ఎలా పూర్తయిపోతుందనేది ప్రభుత్వం చెప్పాలి. ఇది సమస్య నుంచి దృష్టి మరల్చి.. సంస్థను మరింతగా కుంగదీయకుండా, ఏ విధంగా ఊతమివ్వగలదో చెప్పాలి‘ అని వ్యాఖ్యానించారు.
 
 నార్త్‌ బ్లాక్‌ ఆధిపత్యమేంటి?
 విలీన ప్రణాళికల్లో ప్రభుత్వమే కీలక పాత్ర పోషిస్తుండటాన్ని రాజన్‌ ప్రశ్నించారు. ‘ఈ ప్రణాళికలన్నింటినీ నార్త్‌ బ్లాకే (ఆర్థిక తదితర కీలక శాఖల కార్యాలయాలున్న భవంతి) నిర్ణయిస్తుందా? ఒకవేళ అదే జరిగితే.. ఇక కొత్తేం ఉంది? ఎంతో కొంత వైవిధ్యం ఉండాలన్న జ్ఞాన సంఘం నిబంధనలను చేరుకోనట్లేగా? ఒకవేళ అంతా నార్త్‌ బ్లాకే నిర్ణయిస్తే.. తేడా ఏముంటుంది?‘ అని ఆయన పేర్కొన్నారు. విలీనాలనేవి బ్యాంకులు ఆరోగ్యకరంగా ఉన్నప్పుడే చేయాలి తప్ప బలహీనంగా ఉన్నప్పుడు కాదని రాజన్‌ అభిప్రాయపడ్డారు.
 
 ఇదీ నేపథ్యం..
 ప్రభుత్వ రంగ బ్యాంకుల సంఖ్యను విలీనాల ద్వారా 21 నుంచి 15కి తగ్గించాలని కేంద్రం యోచిస్తున్న సంగతి తెలిసిందే. పటిష్టమైన పెద్ద బ్యాంకులను ఆవిష్కరించడమే దీని వెనుక ప్రధానోద్దేశమని కేంద్రం చెబుతోంది. గత ఆర్థిక సంవత్సరంలో తొమ్మిది బ్యాంకులు కలిసి సుమారు రూ. 18,066 కోట్ల మేర నష్టాలు ప్రకటించాయి. ఇక ఆరు బ్యాంకులు కార్యకలాపాల విస్తరణపై ఆంక్షలు ఎదుర్కొంటున్నాయి. ఇక విలీనాల విషయానికొస్తే.. ఏ రెండు బ్యాంకులు కలపాలని చూసినా.. చాలా మటుకు సందర్భాల్లో వాటిలో పేరుకుపోయిన మొండిబాకీల పరిమాణం నిర్దిష్ట స్థాయికి మించిపోవడం ద్వారా ఆంక్షలు విధించాల్సిన పరిస్థితి నెలకొంది. ఇతరత్రా కేటాయింపులు పోగా.. మార్చి ఆఖరు నాటికి పంజాబ్‌ నేషనల్‌ బ్యాంక్‌ మొండి బాకీలు మొత్తం రుణాల్లో 7.8 శాతంగా ఉండగా.. కెనరా బ్యాంక్‌ మొండి బాకీలు 6.3 శాతంగా నమోదయ్యాయి.
 
 విలీనాలకు అనువైనవిగా భావిస్తున్న బలహీన బ్యాంకుల గురించి పెద్ద బ్యాంకులు ఇప్పటికే ప్రభుత్వానికి తమ ఆందోళన తెలియజేశాయి. టేకోవర్‌ సామర్ధ్యమున్న బ్యాంకులుగా పరిగణిస్తున్న కెనరా బ్యాంక్, పీఎన్‌బీ, బ్యాంక్‌ ఆఫ్‌ బరోడా మొదలైనవి.. చిన్న బ్యాంకులను విలీనం చేసుకోవడానికి ముందస్తుగా కొన్ని షరతులు విధిస్తున్నాయి. టార్గెట్‌ బ్యాంకు కచ్చితంగా లాభాలార్జిస్తున్నదై ఉండాలన్నది ఇందులో ప్రధానమైనది. అలాగే, టార్గెట్‌ బ్యాంకుకు తగినంత మూలధనం ఉన్నప్పటికీ ప్రభుత్వం మరింత పెట్టుబడి సమకూర్చాలని కూడా టేకోవర్‌ సామర్ధ్యమున్న బ్యాంకులు కోరుతున్నాయి. విలీనాలనేవి బోర్డుల నిర్ణయాల ఆధారంగానే ఉండాలి తప్ప.. ప్రభుత్వం నిర్ణయాల మేరకు ఉండకూడదని బ్యాంకులు ఆశిస్తున్నాయి. బ్యాంకుల బోర్డులు విలీన ప్రతిపాదనలు ముందుకు తెస్తే.. వాటిని మంత్రుల కమిటీ పరిశీలించి, కన్సాలిడేషన్‌ ప్లాన్‌కి సూత్రప్రాయ అనుమతులు ఇస్తాయంటూ కేంద్రం ఆగస్టు నెలాఖర్లో పేర్కొంది.


 ►  చైనాతో పోటీలో భారత్‌ చేయాల్సిందిదే 
 ►  ఆర్‌బీఐ మాజీ గవర్నర్‌ రఘురామ్‌ రాజన్‌
 
 చెన్నై: ఎప్పుడైనా సరే మన సామరŠాధ్యల గురించి తక్కువగానే చెప్పి, ఎక్కువగా సాధించి చూపాలని..  ఆ తర్వాతే గొప్పలు చెప్పుకోవాలని రిజర్వ్‌ బ్యాంక్‌ మాజీ గవర్నర్‌ రఘురామ్‌ రాజన్‌ వ్యాఖ్యానించారు. వృద్ధి విషయంలో చైనా నుంచి ఇబ్బందికరమైన ప్రశ్నలు ఎదుర్కొనడం కన్నా ఈ విధానాన్ని పాటించడమే శ్రేయస్కరమని ఆయన పేర్కొన్నారు. ఆర్‌బీఐ గవర్నర్‌గా తన అనుభవాలను కూర్చి రాసిన ‘ఐ డూ వాట్‌ ఐ డూ’ పుస్తకం ఆవిష్కరణ కార్యక్రమంలో పాల్గొన్న సందర్భంగా రాజన్‌ ఈ విషయాలు చెప్పారు.
 భారత్‌కి అపరిమితమైన సామర్ధ్యముందని, అయితే సాధించడానికి ముందుగానే గొప్పలు చెప్పుకుంటూ తిరగడం శ్రేయస్కరం కాదని ఆయన సూచించారు. ‘సాధించగలమన్న సత్తా మనలో ఉందని గట్టిగా విశ్వసిద్దాం. సాధించి చూపుదాం. ఆ తర్వాతే గొప్పలు చెప్పుకుందాం. అంతే తప్ప సాధించడానికన్నా ముందుగానే గొప్పలకు పోవద్దు‘ అని రాజన్‌ పేర్కొన్నారు. వరుసగా రెండో త్రైమాసికంలో భారత వృద్ధి చైనా కన్నా వెనుకబడి ఉండటంపై తన బీజింగ్‌ పర్యటనలో.. కొన్ని ఇబ్బందికర ప్రశ్నలు ఎదుర్కొన్నట్లు రాజన్‌ తెలిపారు.
 ఇటీవలి వివాదం సంగతి ఎలా ఉన్నా భారత్‌ మెరుగ్గానే రాణిస్తోన్నప్పటికీ ప్రస్తుతం మాత్రం ప్రపంచంలోనే వేగంగా వృద్ధి చెందుతున్నది చైనాయే కదా అన్న ప్రశ్నలు వచ్చాయన్నారు. మరోవైపు, డీమోనిటైజేషన్‌ మూల్యం చాలా భారీగానే ఉంటుందని ఆయన చెప్పారు. బ్యాంకింగ్‌ రంగంలో ఒత్తిడి పరిస్థితులు, డీమోనిటైజేషన్, జీఎస్‌టీ .. ఇవన్నీ కూడా దాదాపు ఏకకాలంలో ఉండటం వల్ల దేని ప్రభావం ఎంత మేర ఉంటుందనేది ఇథమిత్థంగా చెప్పలేకపోయినప్పటికీ.. విశ్లేషకులు అంచనా వేస్తున్నట్లుగా జీడీపీ వృద్ధిపై 1–2% ప్రతికూల ప్రభావం ఉండొచ్చని రాజన్‌ పేర్కొన్నారు.


 సాక్షి, న్యూఢిల్లీ: పెద్ద నోట్ల రద్దు నిర్ణయంపై రిజర్వ్ బ్యాంక్‌ మాజీ గవర్నర్‌ రఘురామ్‌ రాజన్‌ తన పుసక్తంలో చేసిన వ్యాఖ్యలు కలకలమే రేపుతున్నాయి. ప్రత్యామ్నాయాలు సూచించిన పట్టించుకోకుండా డీమానిటైజేషన్ నిర్ణయం తీసుకున్నారంటూ రాజన్‌ తన ‘‘ఐ డు వాట్‌ ఐ డు: ఆన్‌ రీఫార్మ్స్, రెటోరిక్‌ అండ్‌ రీసాల్వ్‌’’ పుస్తకంలో వివరించిన విషయం విదితమే. 
  
 నోట్ల రద్దు ఎందుకు వద్దంటే...
  
  
 తనకేం సంబంధం లేదని రాజన్‌ తేల్చేయటంతో పలు పశ్నలు ఉద్భవిస్తున్నాయి. ఆ లెక్కన్న నోట్ల రద్దు ప్రతిపాదన కేంద్ర ప్రభుత్వం స్వతంత్ర్య ప్రతిపాదికన తీసుకున్న నిర్ణయమా? లేక వెనకాల ఎవరైనా ఉన్నారా? ఉంటే ఆర్థిక పరిస్థితిని కుదేలు చేయగలిగే నిర్ణయాన్ని ఎందుకు తీసుకున్నారు? ఒత్తిళ్లు పని చేశాయా? అన్న అనుమానాలు మొదలయ్యాయి. లాభం కన్నా నష్టమే ఎక్కువ జరుగుతుందని ఆర్బీఐ గణాంకాలతోసహా హెచ్చరించినా ఎందుకింత సాహసోపేతమైన నిర్ణయం తీసుకుంది? అన్న ప్రశ్నకు సమాధానం దొరకాల్సి ఉంది. పోనీ ఆర్బీఐ కమిటీ సూచనలను కనీసం పరిగణనలోకి తీసుకున్నారా?(లేదనే రాజన్‌ చెబుతున్నారు) అన్న కోణంలోనూ ప్రశ్నలు తలెత్తుతున్నాయి. 
  
 రాజన్ చెప్పినట్లు అసలు అంత హడావుడిగా నోట్ల రద్దు ప్రకటించాల్సిన అవసరం ఏంటి? అన్నది కీలకంగా మారింది. అన్నింటికి మించి 86 శాతం చెలామణిలో ఉన్న నోట్లను అర్థాంతరంగా వెనక్కి తీసుకోవాల్సిన అవసరం ఏంటి?... వీటన్నింటిని త్వరగతిన నివృత్తి చేసి చిత్తశుద్ధిని నిరూపించుకోవాల్సిన బాధ్యత ప్రభుత్వానికి ఉంది. అలా కానీ పక్షంలో దేశంలో అతిపెద్ద ఆర్థిక కుంభకోణం అన్న మచ్చను మోదీ ప్రభుత్వం తర్వాతి తరాల్లో కూడా మోయాల్సి ఉంటుంది.


 పెద్ద నోట్ల రద్దుపై రఘురాం రాజన్‌ సంచలన వ్యాఖ్యలు
 
 న్యూఢిల్లీ: నల్లధనం అణచివేతకు నరేంద్రమోదీ సర్కారు అమలుచేసిన పెద్దనోట్ల రద్దు.. పెద్దగా సత్ఫలితాలు ఇవ్వలేదని వాదన వినిపిస్తున్న సంగతి తెలిసిందే. ఇటీవల పెద్దనోట్ల రద్దుకు సంబంధించిన వివరాలను వెల్లడించిన ఆర్బీఐ.. 99శాతం రద్దైన కరెన్సీ తిరిగి బ్యాంకుకు చేరిందని స్పష్టం చేసింది. ఈ నేపథ్యంలో స్పందించిన ఆర్బీఐ మాజీ గవర్నర్‌ రఘురాం రాజన్‌ ఆసక్తికర వ్యాఖ్యలు చేశారు. పెద్దనోట్ల రద్దు విషయంలో నరేంద్రమోదీ సర్కారును తాను ముందే హెచ్చరించానని, నోట్ల రద్దు వల్ల కలిగే దీర్ఘకాలిక ప్రయోజనాల కన్నా స్పల్పకాలికంగా జరిగే నష్టమే ఎక్కువ అని తాను చెప్పానని తెలిపారు. నల్లధనాన్ని వెలికితీసేందుకు ఇతర ప్రత్యామ్నాయాలను తాను సూచించానని, అయినా, ప్రభుత్వం పట్టించుకోలేదని ఆయన చెప్పారు.
 
 'ఐ డూ వాట్‌ ఐ డూ: రిఫార్మ్స్‌, రెటారిక్‌, రిజాల్వ్‌' పేరిట రాజన్‌ రాసిన పుస్తకం వచ్చేవారం విడుదల కానుంది. 2016 ఫిబ్రవరిలో పెద్దనోట్ల రద్దుపై తన అభిప్రాయం తెలుపాలని ప్రభుత్వం మౌఖికంగా కోరిందని, దీంతో ప్రభుత్వం పెద్దనోట్ల రద్దును చేపడితే.. తీసుకోవాల్సిన చర్యలు, అందుకు అనువైన సమయంపై నోట్‌ను ఆర్బీఐ సర్కారుకు సమర్పించిందని తెలిపారు. ఆర్బీఐ గవర్నర్‌గా గత ఏడాది సెప్టెంబర్‌ 5న తన పదవీకాలం ముగియడంతో తిరిగి షికాగో యూనివర్సిటీ బిజినెస్‌ స్కూల్‌ అధ్యాపకుడిగా రాజన్‌ చేరిన సంగతి తెలిసిందే. పెద్దనోట్ల రద్దు గురించి తన హయాంలోనే ప్రభుత్వం సంప్రదించినా.. నిర్ణయం తీసుకోవాలని మాత్రం తనను కోరలేదని స్పష్టం చేశారు.


 సెప్టెంబర్‌ 4న మార్కెట్లోకి ’ఐ డూ వాట్‌ ఐ డూ’
 న్యూఢిల్లీ: సంక్షోభ సమయంలో రిజర్వ్‌ బ్యాంక్‌ గవర్నర్‌గా బాధ్యతలు నిర్వర్తించిన రఘురామ్‌ రాజన్‌.. కొత్తగా మరో పుస్తకాన్ని ప్రచురించారు. ’ఐ డూ వాట్‌ ఐ డూ’ పేరిట ఆయన రాసిన ఈ పుస్తకం సెప్టెంబర్‌ 4న మార్కెట్లోకి రానుంది. ఆర్‌బీఐ గవర్నర్‌గా పనిచేసిన కాలంలో రాజన్‌ రాసిన వ్యాసాలు, ప్రసంగాలు ఇందులో పొందుపర్చారు. ఆర్థిక, రాజకీయపరమైన అంశాలు దీన్లో చాలా ఉన్నాయి. 2013 సెప్టెంబర్‌లో రాజన్‌ ఆర్‌బీఐ గవర్నర్‌గా బాధ్యతలు చేపట్టే నాటికి రూపాయి పతనావస్థలో ఉండగా.. ద్రవ్యోల్బణం గరిష్ట స్థాయిలో ఉంది.
 
 కరుగుతున్న విదేశీ మారక నిల్వలు.. భారీ కరెంటు అకౌంటు లోటు దేశానికి సమస్యాత్మకంగా మారాయి. అయిదు బలహీన ఎకానమీల్లో ఒకటనే ముద్రతో భారత్‌పై నమ్మకం సడలిన పరిస్థితులను రాజన్‌ సమర్థంగా ఎదుర్కొన్నారని, దేశ ఆర్థిక వ్యవస్థ పటిష్టత... కొనసాగుతున్న సంస్కరణల గురించి ప్రపంచానికి బలమైన సంకేతాలు పంపారని ముద్రణా సంస్థ హార్పర్‌కోలిన్స్‌ ఇండియా పేర్కొంది.
 
  దీర్ఘకాలికంగా వృద్ధి, స్థిరత్వాన్ని సాధించడం, ఇన్వెస్టర్ల విశ్వాసాన్ని పునరుద్ధరించడం వంటి అంశాలపై రాజన్‌ దృష్టి పెట్టారని తెలిపింది.  దోశ ధరతో ముడిపెట్టి ఆర్థికాంశాలను రాజన్‌ వివరించిన సందర్భాన్ని ప్రస్తావిస్తూ.. ‘దోశనామిక్స్‌ లేదా రుణ సంక్షోభ పరిష్కారమార్గాలు కావొచ్చు. రాజన్‌ ఆర్థిక విషయాలను సరళంగా వివరిస్తారు‘ అని హార్పర్‌కోలిన్స్‌ వివరించింది. రాజన్‌ ఇప్పటికే సేవింగ్‌ క్యాపిటలిజం ఫ్రం క్యాపిటలిస్ట్‌తో పాటు మరో పుస్తకాన్ని కూడా రాశారు.


 గణాంకాలు సగటు మనిషిని చికాకుపరుస్తాయి. వాటి సారాంశమేమిటో తెలుసు కుని నిట్టూర్చడమో, ఊపిరిపీల్చుకోవడమో తప్ప... లోతుల్లోకి పోయి అర్ధం చేసు కోవడానికి ప్రయత్నించేంత తీరిక, ఓపిక వారికి ఉండవు. వాటి నిజానిజాలను తేల్చుకునే నైపుణ్యమూ ఉండదు. కానీ ప్రధాని నరేంద్ర మోదీ దేన్నయినా తేలిగ్గా చెప్పే ప్రయత్నం చేస్తారు. అందుకే ఉత్తరప్రదేశ్‌ అసెంబ్లీ ఎన్నికల ప్రచారం తుది దశ ప్రచారంలో ఆయన అంతకుముందు రోజు కేంద్ర గణాంకాల శాఖ(సీఎస్‌ఓ) ప్రకటించిన దేశ స్థూల దేశీయోత్పత్తి(జీడీపీ)ని ప్రస్తావించారు. జీడీపీ 7శాతం ఉన్నదని తేలింది గనుక ఆక్స్‌ఫర్డ్, హార్వర్డ్‌ యూనివర్సిటీల్లో చదివిన ‘మహా ఆర్థికవేత్తలు’ ఏమంటారని ఎద్దేవా చేశారు.
 
 హార్వర్డ్‌ కన్నా ‘హార్డ్‌వర్క్‌’(కఠోరశ్రమ) మిన్న అని చెప్పారు. ‘పెద్ద నోట్లు రద్దు వల్ల వృద్ధి రేటు 2 శాతం పడిపోతుంది... 4శాతం పడిపోతుంది’అంటూ బెదరగొట్టారని గుర్తుచేశారు. పేర్లు చెప్పకపోయినా మాజీ ప్రధాని మన్మోహన్‌సింగ్, కేంద్ర మాజీ ఆర్ధికమంత్రి చిదంబరం, నోబెల్‌ గ్రహీత అమర్త్యసేన్‌లను ఉద్దేశించే ఆయనలా అన్నారని అందరికీ అర్ధమైంది. పెద్ద నోట్ల రద్దు ప్రభావం సంగతలా ఉంచి అంతకుముందు నుంచే ఆర్థిక స్థితి బాగు లేదని పెదవి విరిచినవారున్నారు. ఎవరి వరకో ఎందుకు... రిజర్వ్‌బ్యాంక్‌ గవర్నర్‌గా ఉన్నప్పుడు రఘురాంరాజనే అలాంటి అభిప్రాయాన్ని వ్యక్తం చేసి ప్రభుత్వ పెద్దల ఆగ్రహానికి గురయ్యారు. నిరాశామయ వర్తమానంలో భారత్‌ దేదీప్య మానంగా వెలుగుతున్న దేశమని నిరుడు అంతర్జాతీయ ద్రవ్యనిధి సంస్థ (ఐఎంఎఫ్‌) అన్నప్పుడు రఘురాం రాజన్‌ పొంగిపోలేదు. ‘అంధుల దేశానికి ఒంటి కన్ను ఉన్నవాడే రాజు’ అంటూ వ్యాఖ్యానించి నిర్వేదంగా మాట్లాడారు.  
 
 నిజమే...మొన్న డిసెంబర్‌తో ముగిసిన మూడో త్రైమాసికం (అక్టోబర్‌–డిసెం బర్‌)లో జీడీపీ 7 శాతంగా నమోదైనట్టు సీఎస్‌ఓ అంచనా వేసింది. అది 6.1–6.8 మధ్య ఉండొచ్చునని అంతక్రితం అనేక ఏజెన్సీలు భావించాయి. పెద్దనోట్ల రద్దు, కొత్త నోట్ల లభ్యత సక్రమంగా లేని కారణంగా చిన్న పరిశ్రమలు మూతబడటం, రోజుకూలీలు సైతం ఉపాధి కోల్పోవడంవంటివి జరిగాయని వార్తలొచ్చిన నేప థ్యంలో సీఎస్‌ఓ గణాంకాలు నిజమేనా అన్న సందేహం ఎవరికైనా వస్తుంది. ఎన్ని ఒడిదుడుకులొచ్చినా, చివరకు పెద్దనోట్ల రద్దు లాంటి పెద్ద నిర్ణయం తీసుకున్నా వాటన్నిటినీ తట్టుకునేంత పటిష్టంగా దేశ ఆర్థికవ్యవస్థ ఉంటే అది గర్వించదగిన, సంతోషించదగిన అంశం. అయితే తయారీ, వ్యవసాయ రంగాల ఊతం కార ణంగా అది పెరిగిందని సీఎస్‌ఓ అంటున్నది.
 
 పెద్ద నోట్ల రద్దు సమయంలో హార్వర్డ్, ఆక్స్‌ఫర్డ్‌ ఆర్ధికవేత్తలు మాత్రమే కాదు... ఇతర వర్గాలవారు కూడా ఆ నిర్ణయంలోని లోటుపాట్ల గురించి చర్చించారు. విమర్శించినవారున్నట్టే మెచ్చుకున్న వారూ ఉన్నారు. కానీ రాష్ట్రీయ స్వయంసేవక్‌ సంఘ్‌(ఆరెస్సెస్‌)కు అనుబంధంగా ఉన్న భారతీయ మజ్దూర్‌ సంఘ్‌(బీఎంఎస్‌) సైతం ఆ నిర్ణయాన్ని దుయ్యబట్టింది. దానివల్ల 20 లక్షలమంది ఉద్యోగావకాశాలు కోల్పోయారని సంస్థ అధ్యక్షుడు బైజ్‌నాథ్‌ రాయ్‌ అప్పట్లో అన్నారు. అసంఘటిత రంగంలో పరిస్థితి ఇంతకన్నా దారుణంగా ఉన్నదని కూడా చెప్పారు. నోట్ల రద్దు జరిగిన నెల్లాళ్ల తర్వాత అన్న మాటలవి. ఆ నిర్ణయం వెనకున్న ఉద్దేశం మంచిదని మెచ్చుకుంటూనే ఆయన ఈ లెక్కలు చెప్పారని గుర్తుంచుకుంటే సీఎస్‌ఓ తాజా గణాంకాలు ఆశ్చర్యం కలిగిం చడంలో వింతేమీ లేదు.
  
 సీఎస్‌ఓ గడిచిన త్రైమాసికంలో ఆశావహమైన స్థితి ఉన్నదని చెప్పడమే కాదు... మొత్తంగా 2016–17 ఆర్ధిక సంవత్సరానికి వృద్ధి రేటు 7.1 శాతంగా ఉంటుందని కూడా భరోసా ఇచ్చింది. అయితే పెద్దనోట్ల రద్దు తర్వాత పరోక్ష పన్నుల వసూళ్లు ముమ్మరమయ్యాయని మర్చిపోకూడదు. పాత నోట్లతో పన్నులు కట్టొచ్చునని ప్రభుత్వాలు ప్రకటించేసరికి ఏళ్ల తరబడి మొండి బకాయిలుగా ఉన్నవి కూడా వసూలయ్యాయి. ఎటూ రద్దయిన నోట్లను చేంతాడంత క్యూల్లో గంటలకొద్దీ నిలబడి మార్చుకోవాల్సి ఉంటుంది గనుక దాని బదులు బకాయిలు చెల్లిస్తే సమస్య తీరుతుందని చాలామంది భావించారు. అదే సమయంలో పలు సంస్థలు, కంపెనీలు కూడా ఉత్పాదకతకు సంబంధించిన పన్నులను పాత నోట్లలో ముందే చెల్లించాయి. అలాగే తమ దగ్గరున్న నగదు నిల్వలను విక్రయాలుగా చూపించాయి. ఇవన్నీ జీడీపీ పెరుగుదలపై ప్రభావాన్ని చూపి ఉండొచ్చు.
 
 సెంట్రల్‌ ఎక్సైజ్, సర్వీస్‌ టాక్స్, కస్టమ్స్‌ సుంకం వంటి వసూళ్లు మొన్న జనవరికి రూ. 7.03 లక్షల కోట్లకు చేరుకున్నాయి. అంతక్రితం అదే కాలంలో వసూలైన పన్ను వసూళ్లతో పోలిస్తే అది 23.9 శాతం అధికం. పైగా నోట్ల రద్దు రాబోతున్నదని తెలియక రెండు పెద్ద పండుగలకు జనం బాగా ఖర్చుపెట్టారు. వీటన్నిటి సంగతలా ఉంచి రెండేళ్లక్రితం ఎన్‌డీఏ ప్రభుత్వం ఆర్థ్ధిక కార్యకలాపాలను కొలిచే విధానాన్ని మార్చినప్పటినుంచి ఆర్థికవ్యవస్థ పెను వేగంతో కదులుతున్నట్టు కనబడటం మొదలుపెట్టిందని, ఇప్పుడు వెలువడిన గణాంకాలు కూడా ఆ వరసలోనివేనని పెదవి విరుస్తున్న వారున్నారు.
 
 ఉత్తరాదిలో తయారీ రంగ పరిశ్రమలు విస్తృతంగా ఉండే లూథియానా, ఆగ్రా, నోయిడా... తమిళనాడులోని తిరుపూర్‌ వంటిచోట్ల పరిశ్రమలు మూతబడ్డాయని, కార్మికులను రిట్రెంచ్‌ చేశారని వార్తలొచ్చాయి. నిర్మాణరంగం మందగించిందని, వాహనాల అమ్మకాలు తగ్గిపోయాయని కథనాలు వెలువడ్డాయి. తమ ఆదాయం, ఉపాధిపై గృహస్తుల్లో ఉన్న అనిశ్చితివల్ల వినియోగదారుల విశ్వాసం గణనీయంగా పడిపోయిందని రిజర్వ్‌బ్యాంక్‌ తాజా సర్వే కూడా చెబుతోంది. ఇలాంటి పరిస్థితుల్లో సీఎస్‌ఓ అందుకు భిన్నమైన స్థితిని ఆవిష్కరించడం ఒక వైచిత్రి. అయితే ఇది కేవలం ఈ త్రైమాసికానికి సంబంధించిందే. దీన్నిబట్టి అంతా బాగున్నదని మెచ్చుకోవడమో, వాస్తవాలను ప్రతిబింబించడంలేదని విమర్శిం చడమో చేయడం సరికాదు. మొత్తంగా 2016–17 ఆర్థిక సంవత్సరం వాస్తవ స్థితి 2018 జనవరిలో వెలువడే సవరించిన గణాంకాలు చెబుతాయి. అంతవరకూ ఓపిక పట్టక తప్పదు.


 న్యూఢిల్లీ: రిజర్వ్ బ్యాంక్ గవర్నర్‌ గా రాజన్ వైదొలగడం వెనుక కారణంపై కేంద్ర మాజీ ఆర్థికమంత్రి,కాంగ్రెస్‌ నేత పి. చిదంబంర సంచలన వ్యాఖ్యలు చేశారు. ప్రధానమంత్రి  నరేంద్రమోదీ  చేపట్టిన పెద్దనోట్ల రద్దును వ్యతిరేకించినందు వల్లే ఆయన రాజీనామా చేయాల్సి వచ్చిందని ఆరోపించారు. వాస్తవానికి రాజన్‌ ఆర్‌బీఐ గవర్నర్‌ గా కొనసాగాలనుకున్నారనీ, కానీ పరిస్థితులు ఆయనను రాజీనామా వైపు నడిపించాయని వ్యాఖ్యానించారు.  
  
 కేంద్ర ప్రభుత్వ పెద్దనోట్లను  తీవ్రంగా వ్యతిరేకించిన రాజన్‌   పదవీకాలం పొడించలేదని ఆరోపించారు. అలాగే రాజన్‌ రాజీనామా సందర్బంగా ఆర్‌బీఐ తరపున రాజన్‌ డీమానిటైజేషన్ను వ్యతిరేకిస్తూ 5 పేజల లేఖను ప్రభుత్వానికి సమర్పించారని పేర్కొన్నారు. డీమానిటైజేషన్ ప్రక్రియను ఎందుకు చేపట్టకూడదో వాదిస్తూ  ఈ ఐదు పేజీల లేఖను రాసినట్టు తెలిపారు.     ప్రభుత్వానికి చిత్తశుద్ధి ఉంటే  ఆ లేఖను బహిర్గతం చేయాలని ఆయన సవాల్‌ చేశారు. ప్రభుత్వం పారదర్శకంగా వ్యవహరిస్తోంటే  రాజన్‌ లేఖను  బైటపెట్టగాలని ఆయన డిమాండ్‌ చేశారు.
 
 కాగా గత ఏడాది సెప్టెంబర్‌ 4తో  రాజన్‌ పదవీకాలం ముగియనుండగా... రాజన్‌ పదవీకాలాన్ని పొడిగిస్తారా లేదా అనే చర్చ ఒక పక్క జోరుగా సాగుతుండగానే రాజన్‌ తాను రాజీనామా  చేస్తున్నట్టు ప్రకటించారు.  అనంతరం ఆర్‌బీఐ గవర్నర్‌గా ఉర్జిత్‌ పటేల్ ను  ప్రభుత్వం నియమించింది.  అలాగే నవంబర్ 8 న  ప్రధాని మోదీ 80శాతం చలామణిలోఉన్న  రూ.500, రూ.1000 నోట్లను రద్దు చేసి  ప్రకంపనలు రేపారు. మరోవైపు  అప్పట్లో ఆర్‌బీఐ గవర్నర్‌ పదవినుంచి తొలగించాలంటూ  బీజేపీ ఎంపీ  సుబ్రహ్మణియన్‌ స్వామి పలుమార్లు రాజన్‌ పై దాడికి దిగినపుడు  కూడా చిదంబరం రాజన్‌కు  మద్దతుగగా నిలిచిన సంగతి తెలిసిందే.
 
 
  


 షికాగో వర్సిటీలో చేరటంపై వ్యాఖ్యలు
 న్యూఢిల్లీ: ఆర్‌బీఐ గవర్నర్‌ బాధ్యతల అనంతరం షికాగో యూనివర్సిటీలో అధ్యాపక విధుల్లో చేరిన రఘురామ్‌ రాజన్‌... తాను వెనక్కి తిరిగి రావడం, షికాగోలో బైక్‌ రైడింగ్‌ చేయడం గొప్పగా ఉందన్నారు. ‘‘బైక్‌ను బయటకు తీసి తీరం వెంట రహదారిపై దాన్ని నడపడం నా జీవితంలో గొప్ప అనుభూతి. కోరుకున్నంత కాలం నేను ఈ పనిచేయగలనని భావిస్తున్నాను’’ అన్నారాయన. ఈ మేరకు యూనివర్సిటీ ఆఫ్‌ షికాగో బూత్‌ స్కూల్‌ ఆఫ్‌ బిజినెస్‌ మీడియా బృందానికి ఆయన ఇంటర్వూ్య ఇచ్చారు. బూత్‌ స్కూల్‌ పాతికేళ్ల పాటు తనకు ఇల్లులా ఉందన్నారు. దాన్ని ఓ అద్భుతమైన స్కూల్‌గా అభివర్ణించారు. ‘‘ఇదో గొప్ప నగరం. గొప్ప సహచరులున్నారు. ఇక్కడికొచ్చిన ప్రతిసారీ ఇది విభిన్నంగా కనిపిస్తుంది’’ అని పేర్కొన్నారు.
 
 అధ్యాపక వృత్తిలోకి తిరిగొచ్చాక దేనికోసం ఎక్కువగా ఎదురు చూస్తున్నారన్న ప్రశ్నకు స్పందిస్తూ... ‘‘వాస్తవిక ప్రపంచంలో ఉద్యోగ విధుల్లో ఉన్న వారికి కనీసం ఆలోచించేంత తీరిక కూడా దొరకదు. అదే ఇబ్బంది. ఇపుడు అధ్యాపక రంగంలో ఉన్నాను. కావాలంటే నాలుగు రోజులు ఓ గదిలో గడిపేయగలను. కూర్చుని పేపర్‌ వంక చూస్తూ బయటకు రానంటున్న ఆలోచనలతో పోరాడొచ్చు’’ అంటూ ప్రస్తుత వృత్తిలో ఉన్న వెసులుబాటును రాజన్‌ చెప్పుకొచ్చారు. పరిశోధనల గురించి చెబుతూ... దాన్నెప్పుడూ వదిలిపెట్టేది లేదని, ఆర్‌బీఐలో ఉన్నప్పుడు కూడా తాను కొన్ని పేపర్లను ప్రచురించానని తెలియజేశారు.
 అంతర్జాతీయ ఆర్థిక సంక్షోభం గురించి మాట్లాడుతూ వచ్చే 30 ఏళ్ల కాలానికి అదో పరిశోధనాంశంగా మారిందని చెప్పారు. ప్రస్తుతం రఘురామ్‌ రాజన్‌ యూనివర్సిటీ ఆఫ్‌ షికాగో బూత్‌ స్కూల్లో ఫైనాన్స్‌ ప్రొఫెసర్‌గా పనిచేస్తున్నారు. 1991లోనే ఆయన బూత్‌ స్కూల్లో ప్రొఫెసర్‌గా చేరగా... మధ్యలో 2003 నుంచి 2006 వరకు అంతర్జాతీయ ద్రవ్య నిధి సంస్థలో చీఫ్‌ ఎకనమిస్ట్, రీసెర్చ్‌ డైరెక్టర్‌గా, 2013 నుంచి 2016 వరకు మూడేళ్ల పాటు ఆర్‌బీఐ గవర్నర్‌గా సేవలందించిన విషయం తెలిసిందే.


 ► ఆర్‌బీఐ–బ్యాంకులు– కేంద్రం
 బ్యాంకులు 2017 మార్చికల్లా ఎన్ పీఏలకు పూర్తి కేటాయింపులు చేసి బ్యాలన్స్ షీట్లలో చూపించాలని రఘురామ్‌ రాజన్ షరతు పెట్టారు. నల్లధనాన్ని ఏరేయాలనుకున్న కేంద్రం రూ.500, రూ.1,000 నోట్లను రద్దు చేసి ఆర్‌బీఐపై భారీ బాధ్యతే పెట్టింది. చివరి రెండు నెలలూ తమ వ్యాపారాన్నంతా పక్కన పెట్టి బ్యాంకులు జనం నుంచి పాత నోట్లు తీసుకోవటం, కొత్త నోట్లు ఇవ్వటానికే పరిమితమయ్యాయి. ఇదో ట్రయాంగిల్‌ స్టోరీలా మారింది. బ్యాంకుల ఎన్ పీఏలు సెప్టెంబర్‌ నాటికే రూ.7 లక్షల కోట్లను దాటేశాయి. వీటిలో అధికం ప్రభుత్వ రంగ బ్యాంకులవే. వీటికి కేటాయింపులు చేయడం బ్యాంకులకు సవాలుగా మారింది. ఆస్తులు అమ్మి రుణాలు తీర్చటానికి కొన్ని కంపెనీలు ప్రయత్నిస్తున్నా అవి ఫలించటం లేదు.  ఉద్దేశపూర్వకంగా ఎగవేసిన వారూ భారీగానే ఉన్నారు. ఇవన్నీ ఎన్ పీఏలను పెంచేశాయి. అయితే, నోట్ల రద్దుతో బ్యాంకుల్లో చేరిన భారీ డిపాజిట్లు మూలధన అవసరాలు తీరుస్తాయనేది తాజా అంచనా.
 
 ద్రవ్యోల్బణమే ఆర్‌బీఐ టార్గెట్‌?
 రఘురామ్‌ రాజన్ మూడేళ్ల పదవీకాలం సెప్టెంబర్‌ 4తో ముగిసింది. తర్వాత ఉర్జిత్‌ పటేల్‌ గవర్నర్‌ అయ్యారు. ద్రవ్యోల్బణాన్ని 4 శాతానికి పరిమితం చేయాలన్న విషయంలో కేంద్రం, ఆర్‌బీఐ అంగీకారానికి వచ్చాయి. ఇక ఆర్‌బీఐ అనుమతుల మేరకు దేశంలో ఎయిర్‌టెల్‌ పేమెంట్‌ బ్యాంకు, ఈక్విటీస్‌ స్మాల్‌ బ్యాంకు పేరుతో కొత్త తరహా బ్యాంకింగ్‌ కార్యకలాపాలు అందుబాటులోకి వచ్చాయి.


 మూడేళ్ల పాటు పదవీ కాలం
 ప్రస్తుతం న్యూయార్క్‌ యూనివర్సిటీలో ఆర్థిక శాస్త్ర ప్రొఫెసర్‌
 
 న్యూఢిల్లీ: ప్రముఖ ఆర్థికవేత్త, న్యూయార్క్‌ యూనివర్సిటీలో ఆర్థిక శాస్త్ర ప్రొఫెసర్‌ విరాళ్‌ ఆచార్య తాజాగా రిజర్వ్‌ బ్యాంక్‌ కొత్త డిప్యూటీ గవర్నర్‌గా నియమితులయ్యారు. ఆచార్య (42) మూడేళ్ల పాటు ఈ పదవిలో కొనసాగుతారు. క్యాబినెట్‌ అపాయింట్‌మెంట్స్‌ కమిటీ ఆయన నియామకానికి  ఆమోదముద్ర వేసింది. ఆర్‌బీఐ గవర్నర్‌గా ఉర్జిత్‌ పటేల్‌ పదోన్నతి పొందినప్పట్నుంచీ డిప్యూటీ గవర్నర్‌ స్థానం ఒకటి ఖాళీగా ఉన్న సంగతి తెలిసిందే. ప్రస్తుతం ఆర్‌బీఐలో మరో ముగ్గురు డిప్యూటీ గవర్నర్లు (ఎస్‌ఎస్‌ ముంద్రా, ఎన్‌ఎస్‌ విశ్వనాథన్, ఆర్‌ గాంధీలు) ఉన్నారు. డీమోనిటైజేషన్‌ దరిమిలా రిజర్వ్‌ బ్యాంక్‌ పూటకో నిబంధన మార్చేస్తూ, తీవ్ర విమర్శల పాలవుతున్న తరుణంలో ఆచార్య నియామకం ప్రాధాన్యం సంతరించుకుంది.
 
 ప్రస్తుతం ఆయన న్యూయార్క్‌ యూనివర్సిటీ స్టెర్న్‌ స్కూల్‌ ఆఫ్‌ బిజినెస్‌ (ఎన్‌వైయూ–స్టెర్న్‌)లోని ఆర్థిక విభాగంలో సీవీ స్టార్‌ ఎకనమిక్స్‌ ప్రొఫెసర్‌గా ఉన్నారు.ముంబై ఐఐటీ విద్యార్థి అయిన ఆచార్య.. 1995లో బ్యాచ్‌లర్‌ ఆఫ్‌ టెక్నాలజీ ఇన్‌ కంప్యూటర్‌ సైన్స్‌ అండ్‌ ఇంజనీరింగ్‌ చదివారు. 2001లో ఎన్‌వైయూ–స్టెర్న్‌ నుంచి ఫైనాన్స్‌లో పీహెచ్‌డీ పట్టా అందుకున్నారు. 2001–08 మధ్య కాలంలో లండన్‌ బిజినెస్‌ స్కూల్‌లో వివిధ హోదాల్లో విధులు నిర్వర్తించారు. భారతీయ క్యాపిటల్‌ మార్కెట్స్‌పై ఎన్‌ఎస్‌ఈ–ఎన్‌వైయూ స్టెర్న్‌ చేపట్టిన అధ్యయనానికి డైరెక్టర్‌గా కూడా వ్యవహరించారు.
 
 ‘పేదల రఘురామ్‌ రాజన్‌’...
 ఆర్‌బీఐ మాజీ గవర్నర్‌ రఘురామ్‌ రాజన్‌ తనకు స్ఫూర్తిప్రదాతగా చెబుతుంటారు ఆచార్య. అంతే కాదు.. తనను తాను పేదల రఘురామ్‌ రాజన్‌గా అభివర్ణించుకుంటారు. 2013లో జరిగిన ఆర్థిక సదస్సులో పాల్గొన్న సందర్భంగా దీని వెనుక గల కథను ఆయన వివరించారు. తానొకసారి విమానంలో ప్రయాణిస్తున్నప్పుడు బ్యాంకింగ్, సంక్షోభాలు మొదలైన వాటికి సంబంధించి తన చేతిలో ఉన్న పత్రాలను చూసి తోటి ప్రయాణికుడు తనను రఘురామ్‌ రాజన్‌గా భావించారని ఆచార్య పేర్కొన్నారు. ’దీంతో రాజన్‌ను రోల్‌ మోడల్‌గా తీసుకుని, ఆయన సాధించిన దానిలో కనీసం 5–10 శాతం సాధించగలిగినా.. విమాన ప్రయాణాల్లో ’పేదల రఘురామ్‌ రాజన్‌’గా చలామణి అయిపోవచ్చని ఆరోజు గ్రహించాను’ అని ఆచార్య చమత్కరించారు.
 
 తన రోల్‌ మోడల్‌ రాజన్‌తో కలిసి ఆయన గతంలో మూడు పరిశోధన పత్రాలు రాశారు. ’సార్వభౌమ రుణం, ప్రభుత్వ హ్రస్వదృష్టి, ఆర్థిక రంగం’, ’కంపెనీల అంతర్గత గవర్నెన్స్‌’, ’క్రియాశీలక పరిస్థితుల్లో రుణభారం, ప్రభుత్వ హ్రస్వదృష్టి’ పేరిట ఆయన ఈ పరిశోధన పత్రాలు రూపొందించారు.  రాజన్‌ తరహాలోనే కేంద్రీయ బ్యాంకుల స్వతంత్రత కాపాడాలన్నది ఆచార్య అభిప్రాయం. కేంద్రీయ బ్యాంకులు ప్రజలకు జవాబుదారీగా ఉంటూనే, రాజకీయ ఒత్తిళ్లకు లోను కాకుండా స్వతంత్రంగా వ్యవహరించాలని అంటారాయన. న్యూయార్క్‌ యూనివర్సిటీ వెబ్‌సైట్‌లోని ఆచార్య ప్రొఫైల్‌ ప్రకారం.. ఆర్థిక రంగానికి వ్యవస్థాగతంగా ఎదురయ్యే రిస్కులు, నియంత్రణ, ప్రభుత్వ జోక్యంతో తలెత్తే సమస్యలు మొదలైన అంశాలపై ఆచార్య పరిశోధనలు చేశారు.
 
 ప్రభుత్వ బ్యాంకులకు ‘ఆచార్య’ ఔషధం?
 ఆచార్యకు భారత బ్యాంకింగ్‌ వ్యవస్థపై అపార అవగాహన ఉంది. బ్యాంకింగ్‌ ప్రమాణాలకు సంబంధించిన బాసెల్‌ 3 నిబంధనలు మరీ కఠినంగా ఉన్నాయని వాదించే వర్గాలకు ఆచార్య నియామకం రుచించకపోవచ్చని విశ్లేషకుల అభిప్రాయం.  దేశీ బ్యాంకింగ్‌ వ్యవస్థ బాగుపడాలంటే ముందుగా ప్రభుత్వ రంగ బ్యాంకులను సరిదిద్దాలని, బాసెల్‌ నిబంధనలు మరింత కఠినతరంగా ఉండాలని ఆచార్య ఒక పరిశోధన పత్రంలో పేర్కొన్నారు.  ’ప్రైవేట్‌ రంగ బ్యాంకులతో పోలిస్తే ప్రభుత్వ రంగ బ్యాంకులతోనే భారత బ్యాంకింగ్‌ వ్యవస్థకు ఎక్కువగా రిస్కులు పొంచి ఉన్నాయి. ఈ నేపథ్యంలో బాసెల్‌ 3 నిబంధనలకు అనుగుణంగా వచ్చే అయిదేళ్లలో ప్రభుత్వ రంగ బ్యాంకులు తప్పనిసరిగా గణనీయంగా మూలధనం సమకూర్చుకోవాలి లేదా తమ మూలధనానికి తగ్గట్లుగా అసెట్స్‌ అయినా తగ్గించుకోవాలి’ అని ఆయన వివరించారు. 2015లో రాజన్‌ నిర్వహించిన అసెట్‌ క్వాలిటీ సమీక్ష అనేది నిజానికి ఎప్పుడో చేసి ఉండాల్సిందని ఆచార్య వ్యాఖ్యానించారు.
 
 ఆర్‌బీఐ ప్రభుత్వ రంగ బ్యాంకులను ప్రైవేటీకరించడం లేదా మెరుగైన ప్రైవేట్‌ బ్యాంకుల్లో విలీనం చేయడం, ఆటోమేటిక్‌గా మూలధనం సమకూర్చడం, డిపాజిట్‌ బీమా పథకం ప్రవేశపెట్టి బ్యాంకుల రిస్కులను మదింపు చేయడం మొదలైన చర్యలు తీసుకోవచ్చని ఆయన సూచించారు. బాసెల్‌ వంటి నిబంధనలు ఒక్కో బ్యాంకు పాటించాల్సిన నిబంధనలే సూచిస్తున్నాయే తప్ప పూర్తి వ్యవస్థను పటిష్టం చేసేవిగా లేవన్నది ఆచార్య అభిప్రాయం. ఫలితంగా ఒక్కో బ్యాంకు దేనికదే రిస్కులను పరిమితం చేసుకునే చర్యలు తీసుకున్నా .. పెను సంక్షోభాలేవైనా వచ్చినప్పుడు మొత్తం బ్యాంకింగ్‌ వ్యవస్థకు రిస్కులు తప్పకపోవచ్చని ఆయన అంటారు. రిజర్వుబ్యాంక్‌ డిప్యూటీ గవర్నర్‌గా ఆయన నియామకంతో ప్రభుత్వ రంగ బ్యాంకింగ్‌ రంగంలో సంస్కరణల పర్వం మొదలవుతుందన్న అంచనాలు విశ్లేషకుల్లో ఉన్నాయి.


 అహ్మదాబాద్: రిజర్వ్ బ్యాంక్ ఆఫ్ ఇండియా  గవర్నర్ గా రాజీనామా  చేసిన  రఘురామ రాజన్  మొదటి సారి అహ్మదాబాద్ ఐఐఎం-ఎ ను సందర్శించారు. ఇండియన్ ఇన్స్టిట్యూట్ మేనేజ్మెంట్  అహ్మదాబాద్ క్యాంపస్ లో ప్రసంగించారు.
  చికాగో బూత్ స్కూల్ ఆఫ్ బిజినెస్  యూనివర్శిటీ విశిష్ట్ ప్రొఫెసర్ గా  'ప్రపంచ ఆర్థిక వ్యవస్థ:అవకాశాలు మరియు సవాళ్లు' అనే అంశంపై  లెక్చరిచ్చారు. కానీ పెద్ద నోట్ల రద్దుపై ఒక ముక్క కూడా మాట్లాడకపోవడం విశేషం. డీమానిటైజేషన్ పై ఎలాంటి ప్రస్తావన లేకుండానే ఆయన ప్రసంగ పాఠం ముగిసింది. డీమానిటైజేషన్ సహా దేశంలోని కొన్ని నిర్దిష్ట ఆర్థిక అంశాల ప్రస్తావన ఉంటుందని  విశ్వసించిన వారికి నిరాశే ఎదురైంది.
  రాజన్ ఉపన్యాసానికి శ్రీ రామకృష్ణ ప్రెవేట్ ఎక్స్ పోర్ట్స్  లిమిటెడ్   వ్యవస్థాపకుడు గోవింద ధోలకియా, మేనేజింగ్ డైరెక్టర్  ప్రొ.రాహుల్ ధోలకియా  ప్రొఫెసర్లు, ఆశిష్ నందా, రాకేష్ బసంత్  తదితరులు  విచ్చేసారు. వీరితోపాటు ఐఐఎం బోధనా సిబ్బంది, విద్యార్థులు , 1987 పూర్వ విద్యార్థులు బ్యాచ్ ,  ఇతర పూర్వ విద్యార్ధులు  ఈ కార్యక్రమానికి  హాజరయ్యారు.
  కాగా  కొత్త ఆలోచనలు,  కొత్త మార్గాలతో  పరిశ్రమ మరియు విద్యా సంస్థల మధ్య సహకారాన్ని బలోపేతం చేసే  లక్ష్యం తో ఈ  వార్షిక ఉపన్యాసాలను శ్రీ రామకృష్ణ నాలెడ్జ్ ఫౌండేషన్  స్పాన్సర్ చేస్తోంది. ఈ  సిరీస్ లో మొదటి ఉపన్యాసాన్ని రాఘురాజన్ ఇచ్చారు.
  


 న్యూయార్క్: ఆర్‌బీఐ గవర్నర్‌గా తనదైన ముద్రవేసి ఈ నెల 4న పదవీ విరమణ చేసిన రఘురామ్ రాజన్... తన మునుపటి వృత్తి బోధనను త్వరలోనే చేపట్టనున్నారు. అమెరికాలోని ‘యూనివర్సిటీ ఆఫ్ చికాగో బూత్ స్కూల్ ఆఫ్ బిజినెస్’లో వచ్చే ఏడాది నుంచి ఇంటర్నేషనల్ కార్పొరేట్ ఫైనాన్స్ అనే అంశంపై విద్యార్థులకు పాఠాలు చెప్పనున్నారు. ఈ మేరకు 2016-17 సంవత్సరానికి సంబంధించి రాజన్ కోర్స్ షెడ్యూల్ వివరాలను చికాగో బూత్ స్కూల్ ప్రకటించింది. ప్రపంచ ఆర్థిక రంగం మరింతగా అనుసంధామై ఉన్న పరిస్థితుల్లో కార్పొరేట్ ఫైనాన్స్, ఇన్వెస్ట్‌మెంట్ పరంగా ఎదురయ్యే సవాళ్లపై రాజన్ బోధన ఉంటుంది.


 చెన్నై: భారత రాష్ట్రపతి ప్రణబ్ ముఖర్జీ ..మాజీ రిజర్వ్ బ్యాంక్ గవర్నర్ రఘురామ్ రాజన్ పై ఆసక్తికర వ్యాఖ్యలు చేశారు.  కరూర్ వైశ్యా బ్యాంక్ శతాబ్ది ఉత్సవాల్లో ప్రసంగించిన ఆయన  రాజన్  అనుసరించిన విధానాలను ప్రశంసించారు.  బ్యాంకులకు పెరుగుతున్న మొండి బకాయిల సెగ మంచి పరిణామం కాదని పేర్కొన్న ప్రణబ్  బ్యాంకింగ్ వ్యవస్థను సరైన దిశలో నడిపించేందుకు రాజన్ తగిన చర్యలను తీసుకున్నారని ప్రశంసించారు.  అందుకు రాజన్ చాలా చర్యలు తీసుకున్నారని పేర్కొన్నారు.
 
 వరుస సంక్షోభాలతో ప్రపంచ ఆర్థికవ్యవస్థ  ప్రభావితమైందనీ,  మొత్తంగా  ప్రపంచంలో ప్రధాన ఆర్థిక వ్యవస్థల  మొత్తం పనితీరు అంత ప్రకాశంగా,  సంపన్నంగా లేదని చెప్పారు. అయితే ఈ సమయంలో దేశ ఆర్థికవ్యవస్థ, బ్యాంకింగ్ వ్యవస్థ లు సహేతుకంగా పని చేశాయని చెప్పారు .  అలాగే అంతర్జాతీయంగా ప్రధాన ఆర్థిక వ్యవస్థలు, ప్రపంచ బ్యాంకు, ఐఎంఎఫ్ సంక్షోభంలో  ఉండగా,  భారత  బ్యాంకింగ్ వ్యవస్థ  స్థిరంగా, దృఢముగా ఉండడంపై అందరూ తనను  అడిగేవారన్నారు. ప్రాథమిక పునాదులు,  దేశ స్థూల ఆర్థిక సూచీల బలంతో భారత ఆర్థిక వ్యవస్థ సహేతుకంగా,  బాగా రాణించడం తనకు  సంతోషాన్నిచ్చే అంశమని  ప్రణబ్ వ్యాఖ్యానించారు.
 కాగా ఆర్ బీఐ గవర్నర్ గా సెప్టెంబర్ 4న పదవీవిరమణ చేసిన  రాజన్ పై  మాజీ ఆర్థికమంత్రి ప్రణబ్ ముఖర్జీ  ప్రశంసలు విశేషంగా మారాయి.
  


 ముంబై : తక్కువ వడ్డీరేట్లపై మొగ్గుచూపుతున్న ప్రపంచ దేశాలను ఆర్బీఐ మాజీ గవర్నర్ రఘురాం రాజన్ హెచ్చరించారు. తక్కువ వడ్డీరేట్లు ఆర్థిక సంస్కరణలకు ప్రత్యామ్నాయం కాదని చెప్పారు. తక్కువ వడ్డీరేట్ల విధానాలు పాటిస్తున్న అతిపెద్ద ఆర్థిక దేశాలు యూఎస్, యూరప్, జపాన్లు గ్లోబల్ ఎకానమీలో ఇంకా నిదానంగానే ఉన్నాయని న్యూయార్క్ టైమ్స్కు తెలిపారు. ఎక్కడైతే మానిటరీ పాలసీ తేలికగా ఉంటుందో అక్కడ తక్కువ వడ్డీరేట్లు అవలంభించాలో లేదో నచ్చినట్టు నిర్ణయం తీసుకునే అవకాశం ఉంటుందని వెల్లడించారు. తక్కువ వృద్ది రేటు చూడాల్సి వస్తుందనే ఆందోళనతో వడ్డీరేట్లు పెంచడానికి చాలా సెంట్రల్ బ్యాంకులు భయపడుతున్నాయని వ్యాఖ్యానించారు. 
  
 కానీ ఆర్థికాభివృద్దిని పుంజుకునేలా చేయడానికి పాలసీలో ఇతర మార్గాలపై దృష్టిసారించాల్సినవసరం ఎంతైనా ఉందన్నారు. ఆర్బీఐ గవర్నర్గా రాజన్ సెప్టెంబర్ 4న పదవీ విరమణ చేశారు. ఆయన తదుపరి గవర్నర్ బాధ్యతలను ఉర్జిత్ పటేల్ సోమవారం చేపట్టారు. రాజన్ ఆర్బీఐ పదవిలో కొనసాగినంత కాలం అధిక వడ్డీరేట్లను అవలంభించారనే విమర్శలు ఎదుర్కొన్నారు. కానీ ఆ విధానాలే దేశంలో అధిక ద్రవ్యోల్బణాన్ని అదుపులోకి తీసుకురావడానికి, ఆర్థికాభివృద్ధి పరుగులు పెట్టడానికి దోహదం చేశాయని ఆర్థిక విశ్లేషకులు కొనియాడిన సంగతి తెలిసిందే.


 ఆర్బీఐ గవర్నర్‌గా అతి తక్కువకాలంలో తనదైన ముద్రవేసిన రఘురాం రాజన్‌ ఆదివారం ఆ పదవి నుంచి తప్పుకున్నారు. ఆయన వారసుడిగా రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) పగ్గాలను ఉర్జిత్‌ పటేల్‌ చేపట్టారు. రాజన్‌ నిక్కచితనం గల ఆర్థికవేత్త. ముక్కుసూటిగా అభిప్రాయాలు వ్యక్తం చేయడం ఆయన నైజం. చాలా అంశాల్లో ఆయన వ్యాఖ్యలు మోదీ ప్రభుత్వాన్ని  ఇరకాటంలో పడేశాయి. గతంలో అంతర్జాతీయ ద్రవ్యనిధి (ఐఎంఎఫ్‌) చీఫ్‌ ఆర్థికవేత్తగా పనిచేసిన రాజన్‌ మళ్లీ తన పాతవృత్తి ఉపాధ్యాయ రంగంలోకి అడుగుపెట్టాలని భావిస్తున్నారు.
 
 రాజన్‌ పలుసందర్భాల్లో చేసిన వ్యాఖ్యలివి. ఆయన మంచి బ్యాంకర్‌ కాదు.. హాస్య చతురత కలిగిన వక్త అని ఈ వ్యాఖ్యలు స్పష్టం చేస్తాయి.
 
 ఇప్పటికీ మనం సంతృప్తికరమైన స్థానాన్ని సాధించాల్సిన అవసరముంది. 'గుడ్డివాళ్ల దేశంలో ఒంటికన్నువాడే రాజు' అనే సామెత ఉంది. మనం అదే దారిలో సాగుతున్నాం.
 
 నేను వినాశకారినో, విషాద వ్యక్తినో కాదు
 
 వ్యవస్థతో మంచి సంబంధాలు కలిగిన సంపన్న అక్రమార్కులను ఎవరూ పట్టించుకోవడం లేదు. మనం నిరంతర వృద్ధి సాధించాలంటే అలాంటి వారికి రక్షణ కల్పించే సంస్కృతికి ఫుల్‌స్టాప్‌ పెట్టాలి.
 
 నన్ను మీరెలా పిలుస్తారో నాకు తెలియదు. శాంట్‌ క్లాజ్‌ అని పిలుస్తారో, లేక డేగ అని అంటారో కానీ, నా పేరు రఘురాం రాజన్‌. నేనేం చేయాలనుకుంటానో అదే చేస్తాను.
 
 జేమ్స్‌ బాండ్‌ ఇమేజ్‌ కావాలని నేను కోరుకోవడం లేదు. కానీ, ముందుకునడింపించే బ్యాంకర్‌గా ఉండాలనుకుంటున్నా.
 
 బ్యాంకర్‌ దయ వల్ల కాదు.. డబ్బును సృష్టించాలన్న అతని ఆలోచన వల్లే మనకు ప్రతిరోజు ఉదయం ఆహారం దొరుకుతోంది.
 
 మనం డేగలం కాదు. పావురాళ్లమూ కాదు. మనం నిజానికి గబ్బిలాలం.
 
 అంచనాలు చాలా ఉన్నాయి. కానీ నేనేమీ సూపర్‌మ్యాన్‌ ని కాదు. భారత్‌లో ఇలాంటి కోలాహలం ఎప్పుడూ ఉండనే ఉంటుంది.
 
  


 న్యూఢిల్లీ:  రిజర్వ్ బ్యాంక్ ఆఫ్ ఇండియా గవర్నర్ గా రఘురామ్ రాజన్  వీడ్కోలు ప్రసంగం చేశారు. ఈ  సందర్భంగా ఆయన   ప్రభుత్వానికి కొన్ని సూచనలు చేశారు. కేంద్ర బ్యాంకు స్వతంత్రాన్ని కాపాడాలన్న వాదనను మరోసారి సమర్ధించుకున్న రాజన్..  ఆర్బీఐ గవర్నర్ హోదాను పెంచాలని కోరారు. గవర్నర్కు ప్రస్తుతం కేబినెట్ సెక్రటరీ హోదా ఉంది.
 
 రిజర్వ్ బ్యాంకు స్వేచ్ఛను కాపాడాలని  ఉద్ఘాటించిన  రాజన్,  భారతదేశంలో  అసమానమైన ప్రాముఖ్యత ఉన్న స్థూల ఆర్ధిక స్థిరత్వానికి బలమైన, స్వతంత్ర రిజర్వ్ బ్యాంక్ అవసరం చాలా ఉందని పేర్కొన్నారు. బ్యాంక్  పాత్రను ప్రభుత్వం స్పష్టంగా  పేర్కొనాల్సిన అవసరం ఉందని చెప్పారు.  తద్వారా సంస్థ  సామర్థ్యాన్ని కాపాడాలన్నారు.  సంస్థలో తన మిగులునుంచి ప్రభుత్వానికి ప్రత్యేక డివిడెండ్ చెల్లిస్తోందని తెలిపారు. ప్రభుత్వం రూపొందించిన కార్యాచరణ కింద పని చేయాలి తప్ప, ఇతర అన్ని  నిరోధకాలకు, ఆటంకాలకు అనువుగా ఉండకూదన్న అభిప్రాయం వ్యక్తం చేశారు.  
 
 కాగా రేపటితో (సెప్టెంబర్ 4, ఆదివారం) రాజన్ పదవీ కాలం ముగియనుంది.  నూతన గవర్నర్ గా ఊర్జిత్ పటేల్ మంగళవారం బాధ్యతలను స్వీకరించనున్న సంగతి తెలిసిందే.


 ముంబై: రిజర్వ్ బ్యాంక్ ఆఫ్ ఇండియా ప్రస్తుత గవర్నర్ రఘురామ్ రాజన్ పదవీ విరమణకు కేవలం రెండు రోజుల ముందు సంచలన వ్యాఖ్యలు చేశారు. తాను ఆర్బీఐ గవర్నర్ గా కొనసాగాలని అనుకున్నానని కానీ,   అది సాధ్యపడలేదని జాతీయ మీడియాతో తెలిపారు. కొన్ని అంసపూర్ణ చర్యల నేపథ్యంలో తాను రెండవసారి గవర్నర్ గా కొనసాగాలని భావించానని తెలిపారు. కానీ  అది నెరవేరలేదని తెలిపారు. దీనిపై మరింత వివరించడానికి నిరాకరించిన రాజన్ తన వివాదాస్పద ప్రసంగాలను సమర్థించుకున్నారు. ఐఐటీ ఢిలీలో సహనం గురించి తాను చేసిన వ్యాఖ్యలు ఆలోచనలతో కూడిన ఆర్థిక వ్యవస్థకు సంబంధించినవి ఆయన వివరణ ఇచ్చారు.
 కొంతకాలం పాటు పబ్లిక్ స్పీక్ కు దూరంగా ఉండాలనుకుంటున్నానని చెప్పారు. తాను నిజానికి దేశంలోని కొన్ని అంశాలపై మరింత అవగాహన పెంచుకోవాలనుకుంటున్నానీ, దీనికోసం దేశం చుట్టి రావాలనుకుంటున్నానని చెప్పారు.  ఊర్జిత్ కు తాను సలహాలు ఇవ్వాల్సి అవసరం లేదన్నారు. అతనిమీద తనకు విశ్వాసం ఉందన్నారు. ప్రస్తుత అన్ని విషయాలపై ఆయనకు వివరించాననీ, ఆయన ధోరణి ఆయకుందని రాజన్ చెప్పారు. 
 ఇపుడిక మళ్లీ అకాడమీకి వెళ్లాల్సిన సమయం వచ్చిందన్నారు.  చాలాకాలం దూరంగా ఉన్న పరిశోధన, బోధన రంగానికి  వెళ్లాలన్నారు. అక్కడ ఎన్నాళ్లు అన్నదే ప్రశ్న అని రాజన్  వ్యాఖ్యానించారు.  అలాగే ఆగస్టులో  ద్రవ్యోల్బణం  మరింత దిగి వస్తుందన్నారు. జులై నెలలో ఇది అంతకంటే ఎక్కువే (6.07 శాతం) ఉంది. 6 శాతం కంటే తక్కువే ఉంచాలన్నదే తన లక్ష్యమనీ,  అది సాధించాకే  తన పదవీకాలం ముగిసిందని రాజన్‌    తెలిపారు.
 కాగా  ఈనెల (సెప్టెంబర్) 4వ తేదీన రాజన్ పదవీ కాలం ముగియనుంది.  ఆర్ బీఐ  నూతన గవర్నర్ గా  ఉర్జిత్ పటేల్  నియమితులైన సంగతి తెలిసిందే.
 
 
  


 ⇔ తదుపరి గవర్నర్‌పై రాజన్ విశ్వాసం
  ముంబై : ప్టెంబర్ 4న పదవీ విరమణ చేయనున్న ఆర్‌బీఐ గవర్నర్ రఘురామ్ రాజన్ తన వారసుడు ఉర్జిత్ పటేల్ గురించి తొలిసారిగా స్పందించారు. ద్రవ్యోల్బణం అరికట్టడానికి తాను మొదలు పెట్టిన పోరాటాన్ని పటేల్ కొనసాగిస్తారని ఆశాభావం వ్యక్తం చేశారు. ముంబైలో శుక్రవారం జరిగిన ఫారెక్స్ డీలర్స్ అసోసియేషన్ వార్షికోత్సవ సమావేశంలో రాజన్ మాట్లాడారు. ‘నేను నమ్మకంతో చెబుతున్నాను.
 మూడేళ్లుగా ద్రవ్యపరపతి విధానంపై నాతో సన్నిహితంగా కలసి పనిచేసిన ఉర్జిత్ పటేల్... ద్రవ్యోల్బణ లక్ష్యాన్ని చేరుకునేందుకు మానిటరీ పాలసీ కమిటీకి తగిన మార్గదర్శనం చేస్తారు’ అని రాజన్ చెప్పారు. ఆర్‌బీఐ తదుపరి గవర్నర్‌గా ప్రస్తుత డిప్యూటీ గవర్నర్ ఉర్జిత్ పటేల్‌ను నియమిస్తూ గత శనివారం కేంద్రం ప్రకటన జారీ చేసిన తర్వాత దీనిపై రాజన్ స్పందించడం ఇదే తొలిసారి.
 రానున్న నెలల్లో ద్రవ్యోల్బణం తగ్గుతుంది...
 2017 మార్చి నాటికి ద్రవ్యోల్బణాన్ని 5 శాతానికి తీసుకురావాలన్నది ఆర్‌బీఐ లక్ష్యం. కానీ జూలైలో ఇది 6 శాతాన్ని దాటిపోవడంపై రాజన్ స్పందిస్తూ... రానున్న రోజుల్లో ధరలు తగ్గుతాయని, దాంతో ముందు ముందు ద్రవ్యోల్బణం తగ్గుతుందన్న దానిపై తనకు ఎలాంటి సందేహం లేదన్నారు. కాగా, మౌలిక రంగానికి రుణాలు అందించడం వంటి జాతీయ ప్రాధాన్యతల దృష్ట్యా రుణాల జారీ నిబంధనలను సరళీకరించాలన్న సూచనలను రాజన్ తిరస్కరించారు. ఆర్‌బీఐ వ్యవస్థాపరమైన స్థిరత్వం విషయంలో రాజీ పడబోదని స్పష్టం చేశారు. ఆర్‌బీఐ త్యాగం చేయాలని కోరుకోవడం బదులు ప్రభుత్వమే ఇలాంటి పనులకు సబ్సిడీ అందించాలన్నారు.


 ♦ ఆర్‌బీఐ గవర్నర్ సేవలకు గుర్తింపుగా 2 ప్రత్యేక వంటకాలు...
 ♦ బెంగళూరు ఫుడ్ చైన్ ‘జంగ్రీ’ వడ్డింపు...
 బెంగళూరు: ఆర్‌బీఐ గవర్నర్‌గా మూడేళ్లపాటు పాలసీ విధానాన్ని వండి ‘వడ్డి’ంచి తనదైన ముద్రవేసిన రఘురామ్ రాజన్‌ను బెంగళూరుకు చెందిన ఫుడ్ చైన్ సంస్థ ‘జంగ్రీ’ వెరైటీ వంటకాలతో గౌరవిస్తోంది. ఆర్‌బీఐ చీఫ్‌గా రాజన్ విశిష్టసేవలకు గుర్తింపుగా రెండు ప్రత్యేక డిష్(ఒకటి స్వీట్, మరొకటి హాట్)లను వడ్డిస్తోంది. ఉలుందు కోజుకట్టాయ్, కోవా కోజుకట్టాయ్ పేర్లతో లిమిటెడ్ ఎడిషన్‌గా ఈ వంటకాలు అందుబాటులో ఉంటాయని జంగ్రీ తెలిపింది. ‘రాజన్‌తో అనుబంధం ఉన్న రెండు రాష్ట్రాలకు సంబంధించిన వంటకాలివి. ఉలుందు కోజు కట్టాయ్ రేటు రూ.100 కాగా, కోవా కోజు కట్టాయ్ రూ.150కి లభిస్తుంది.
 నేటి(26) నుంచి సెప్టెంబర్ 2 వరకూ(రాజన్ పదవీకాలం ముగింపు రోజు) మాత్రమే ఈ వంటాకాలు అందుబాటులో ఉంటాయి’ అని జంగ్రీ పేర్కొంది. డాక్టర్ రఘురామ్ రాజన్ ఆర్‌బీఐ గవర్నర్‌గా అటు సామాన్య ప్రజలతో పాటు తమలాంటి ఎంట్రప్రెన్యూర్స్‌కు అనుకూలంగా కీలక నిర్ణయాలతో ఎంతగానో ప్రభావితం చేశారని.. దీనికి గౌరవసూచకంగా ఈ ప్రత్యేక వంటకాలను ప్రవేశపెట్టినట్లు జంగ్రీ సహ వ్యవస్థాపకుడు ఆశిష్ కాల్యా పేర్కొన్నారు.
 ద్రవ్యోల్బణం కట్టడే లక్ష్యంగా పాలసీ చర్యలను తీసుకోవడంతోపాటు బ్యాంకుల్లో పేరుకుపోతున్న మొండిబకాయిలకు అడ్డుకట్టవేయడం ఇతరత్రా అనేక కీలక సంస్కరణలను రాజన్ తన పదవీకాలంలో ప్రవేశపెట్టిన సంగతి తెలిసిందే. మరోపక్క, కొన్ని వివాదాస్పద వ్యాఖ్యలతో కూడా ఆయన వార్తల్లో నిలిచారు. ‘రాక్‌స్టార్’ రాజన్‌గా పేరొందిన ఆయన స్థానంలో ప్రస్తుత డిప్యూటీ గవర్నర్ ఉర్జిత్ పటేల్‌ను కేంద్రం ఆర్‌బీఐ చీఫ్‌గా ఎంపిక చేయడం తెలిసిందే.
  ఇంతకీ ఈ వంటకాల సంగతేంటే...
 ఉలుందు కోజుకట్టాయ్ అనేది రాజన్ పుట్టిన మధ్యప్రదేశ్ రాష్ట్రానికి చెందిన ఒక వంటకాన్ని నమూనాగా తీసుకొని జంగ్రీ రూపొందించింది. ఇక కోవా కోజుకట్టాయ్ అనేది రాజన్ పూర్వీకులతో సంబంధం ఉన్న తమిళనాడు తీపి వంటకం నుంచి రూపొందించారు.


 సంఘ్‌ పరివార్‌ ఆశీస్సులున్నవారికే కీలక పదవులు ఖాయమవుతున్నాయని, రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ) గవర్నర్‌ ఎంపిక కూడా అందుకు భిన్నంగా ఉండకపోవచ్చునని వెలువడిన అంచనాలు తారుమారయ్యాయి. వచ్చే నెలలో పదవినుంచి నిష్క్రమించబోతున్న ప్రస్తుత గవర్నర్‌ రఘురాం రాజన్‌ స్థానంలో ఆర్‌బీఐ డిప్యూటీ గవర్నర్‌ ఉర్జిత్‌ పటేల్‌ ఎంపికయ్యారు. ఆర్‌బీఐ గవర్నర్‌పై ఈసారి జరిగినంత చర్చ, హడావుడి ఇంతకుముందెన్నడూ లేదు. ఆ పదవిలో ఉన్నవారు ప్రభుత్వంతో విభేదించడం కొత్తేమీ కాదు. కానీ రాజన్‌ తీరుతెన్నులే వేరు. వడ్డీ రేట్ల కోత మొదలుకొని పలు అంశాల్లో ఆయన పాలకుల ఆశలకు అనుగుణంగా వ్యవహ రించలేకపోవడమే కాదు... అన్వయానికొచ్చేసరికి అంతరార్ధమే మారిపోవచ్చునన్న భయం కూడా లేకుండా మాట్లాడారు.
 ఒక్కోసారి అసలు కంటే ఈ విసురులే అధికార పక్షాన్ని బాధించాయి. దేన్నయినా ఒక ఎజెండాగా మార్చి వెంటపడటంలో సిద్ధహస్తుడైన బీజేపీ నేత, ఎంపీ సుబ్రహ్మణ్యస్వామి తన బాణాలు రాజన్‌పై ఎక్కు పెట్టినప్పుడు దాని వెనక ప్రభుత్వంలోనివారే ఉండొచ్చునని చాలామంది భావించ డానికి కారణం అదే. ప్రధాని నరేంద్ర మోదీ ఆలస్యంగానైనా జోక్యం చేసుకుని ఆయనను అదుపు చేయడం, ఈలోగా రెండో దఫా ఈ పదవిని చేపట్టబోనని రాజన్‌ ప్రకటించడంతో ఆ అంకం సద్దుమణిగింది. అయితే రాజన్‌ ప్రకటన వాణిజ్య, పారిశ్రామిక వర్గాల్లో ఎలాంటి ప్రకంపనలు సృష్టించిందో ఎవరూ మరిచిపోలేదు. ఆయన విధానాలను విమర్శించినవారు సైతం రాజన్‌నే కొనసాగించడం దేశ ఆర్థిక వ్యవస్థకు అన్నివిధాలా శ్రేయస్కరమని అప్పటినుంచీ సందర్భం దొరికినప్పుడల్లా చెబుతూ వస్తున్నారు. ఈ విషయంలో నిర్దిష్టమైన అభిప్రాయాన్ని వెల్లడించని కేంద్రం చివరకు ఉర్జిత్‌ను ఎంపిక చేయడం ద్వారా విధానపరమైన అంశాల్లో యధా తథ స్థితి కొనసాగుతుందన్న సంకేతాలు ఇచ్చినట్టు కనబడుతోంది.
 
 రిజర్వ్‌ బ్యాంకు అన్నది మౌలికంగా ప్రభుత్వానికి చెందిన కీలక అంగం. దానికి సారధ్యంవహించేవారు ద్రవ్యపరమైన అంశాల్లో, ఇతర నియంత్రణల్లో ప్రభు త్వంతో కలిసి పనిచేయక తప్పదు. వారు సర్వ స్వతంత్రంగా వ్యవహరించలేరు. అలాగని ప్రభుత్వానికి డూడూ బసవన్నల్లా మెలిగి చెప్పిందల్లా చేయడమే తమ విధి అన్నట్టు ప్రవర్తిస్తే దేశ ఆర్థిక వ్యవస్థ అస్తవ్యస్థమవుతుంది. ఈ విషయంలో ఆర్‌బీఐ గవర్నర్లుగా గతంలో పనిచేసినవారు తగినంత అప్రమత్తతతోనే ఉన్నారు. వడ్డీ రేట్ల కోత విషయంలో యూపీఏ ప్రభుత్వ హయాంలో అప్పటి కేంద్ర ఆర్థికమంత్రి చిదంబరం తీవ్రమైన ఒత్తిళ్లు తీసుకొచ్చినా ఆ సమయంలో ఆర్‌బీఐ గవర్నర్‌గా ఉన్న దువ్వూరి సుబ్బారావు లొంగలేదు. బహిరంగంగా చిదంబరం విరుచుకుపడినా ఆయన తన నిర్ణయాన్ని మార్చుకోలేదు. అంతగాకపోయినా అలాంటి స్థితే రాజన్‌కూ ఏర్పడింది. ఆర్థిక వ్యవస్థ పుంజుకోవడానికి ప్రభుత్వ  పరంగా చేయాల్సిందంతా చేస్తున్నా...ఆర్‌బీఐ వడ్డీ రేట్లు తగ్గించని కారణంగా బండి ముందుకు కదలడం లేదని సుబ్రహ్మణ్యస్వామి నేరుగా అని ఉండొచ్చుగానీ అలాంటి అభిప్రాయమే కేంద్ర ఆర్థికమంత్రి అరుణ్‌జైట్లీలో కూడా ఉంది.
 వృద్ధి రేటు బాగున్నది గనుక ఆర్‌బీఐ చేయాల్సింది చేస్తుందన్న విశ్వాసాన్ని ఆయన చాలాసార్లు వ్యక్తం చేశారు. ఆ ‘చేయాల్సింది’ వడ్డీ రేట్ల కోతేనని వేరే చెప్పనవసరం లేదు. కానీ రాజన్‌ మాత్రం దృఢంగా ఉన్నారు. జీడీపీ గణాంకాలు ఎంతగా మెరిసి పోతున్నా ఆయన నిగ్రహం చెక్కుచెదరలేదు. భారత ఆర్థిక వ్యవస్థ ప్రపంచంలోనే గొప్పగా ఉన్నదని ఐఎంఎఫ్‌ లాంటి సంస్థ సర్టిఫికెట్‌ ఇచ్చినా మనం ఇంకా సంతృప్తికర స్థాయికి చేరుకోలేదని నిర్మొహమాటంగా చెప్పారు. దేశ పురోగతికి ఆర్థిక వృద్ధి కొలమానం కావొచ్చుగానీ అదే పూర్తిస్థాయిలో వాస్తవ స్థితిని ప్రతిబిం బించలేదని అన్నారు. ఇలా అనడం, అందుకు తగినట్టుగా విధానాలు నిర్ణయించి అమలు చేయడం ఏటికి ఎదురీదడం. మొదటినుంచీ ఆయన దృష్టంతా వృద్ధి రేటుపై కాక ద్రవ్యోల్బణంపై ఉంది. దానికి కళ్లెం వేసి ధరల స్థిరత్వాన్ని సాధిం చాలని ఆయన భావించారు. అటు కేంద్రం సైతం వచ్చే అయిదేళ్లలో ద్రవ్యో ల్బణాన్ని 4 శాతం దాటనివ్వరాదన్న లక్ష్యంతో ఉంది. మరి వైరుధ్యం ఎక్కడొ చ్చింది? వడ్డీ రేట్ల కోతతో మార్కెట్‌లోకి భారీగా పెట్టుబడులొస్తాయని, పర్యవసా నంగా కార్యకలాపాలు పుంజుకొని ఉపాధి, వినిమయం వంటివి పెరిగి జీడీపీ పరుగులు పెడుతుందని ప్రభుత్వ అంచనా. ద్రవ్యోల్బణాన్ని అదుపుచేయకపోతే వడ్డీ రేట్ల కోతతో మార్కెట్‌లోకి ప్రవేశించే పెట్టుబడులన్నీ ధరల ఉప్పెనలో కొట్టుకుపోతాయని రాజన్‌ ఆందోళన.
 
 ఇప్పుడు రాజన్‌ స్థానంలో రాబోతున్న ఉర్జిత్‌ పటేల్‌ ఇలా స్వతంత్రంగా వ్యవ హరించగలరా? ఆయన ముందు చాలా సవాళ్లున్నాయి. ముఖ్యంగా బ్యాంకింగ్‌ రంగాన్ని పీడిస్తున్న మొండి బకాయిల విషయంలో రాజన్‌ ప్రారంభించిన పోరాటాన్ని కొనసాగించాల్సి ఉంది. ఎగవేతదార్లనుంచి ముక్కుపిండి వసూలు చేయాల్సి ఉంది. రూపాయి విలువను కంటికి రెప్పలా కాపాడటం మరో ముఖ్యౖ మెన బాధ్యత. ఉర్జిత్‌ అప్పటి యూపీఏ పాలకులకైనా, ఇప్పటి ఎన్‌డీఏ పాల కులకైనా ఇష్టుడే. 2013లో ఆయన్ను రిజర్వ్‌బ్యాంక్‌ డిప్యూటీ గవర్నర్‌గా తీసుకు రాదల్చుకున్నప్పుడు అప్పటికి అమెరికా గ్రీన్‌కార్డు ఉన్న ఉర్జిత్‌కు భారతీయ పౌరసత్వమివ్వాలంటూ సిఫార్సు లేఖ రాసింది నాటి ప్రధాని మన్మోహన్‌ సింగే.
 గుజరాత్‌ మూలాలున్నాయి గనుకా, ఆయన పనితీరు తెలుసు గనుకా నరేంద్ర మోదీకి సైతం ఆయన నచ్చినట్టున్నారు. వచ్చే అయిదేళ్లలో ద్రవ్యోల్బణం 4 శాతం మించకూడదన్న నిర్ణయం వెనక సూత్రధారి ఉర్జిత్‌ పటేలే. వడ్డీ రేట్లతోపాటు అన్ని కీలకాంశాలనూ నిర్ణయించడానికి ఇకపై ఆర్‌బీఐకి ఆరుగురు సభ్యుల కమిటీని ఏర్పాటు చేయాలన్న కేంద్ర నిర్ణయం ఆయన ఇచ్చిన నివేదిక పర్యవసానంగా రూపొందిందే. అయితే అలాంటి కమిటీ ఏర్పాటైతే కొత్త పదవిలో ఉర్జిత్‌ ఏమేరకు స్వతంత్రంగా వ్యవహరించగలరో, ఎంతవరకూ తన లక్ష్యాన్ని నెరవేర్చుకోగలరో చెప్పడం కష్టమే.


 న్యూఢిల్లీ: విదేశాలతో సన్నిహితంగా మెలుగుతున్నారంటూ దిగిపోతున్న గవర్నర్‌ రఘురాం రాజన్‌ దుయ్యబట్టిన సుబ్రహ్మణ్యస్వామి.. కొత్త గవర్నర్‌గా నియమితులైన ఉర్జిత్‌ పటేల్‌ విషయంలో ఒకింత సానుకూల స్పందించారు. కెన్యాలో పుట్టినందుకు ఉర్జిత్‌ పటేల్‌ను ఎవరైనా విమర్శిస్తే.. అంతకంటే మూర్ఖత్వం ఉండదని ఆయన వ్యాఖ్యానించారు. ఈ  వ్యాఖ్యలను బట్టి కొత్త గవర్నర్‌కు బీజేపీ ఎంపీ అయిన స్వామి మద్దతు ఇస్తున్నట్టు తెలుస్తున్నదని ఆయన అభిమానులు భావిస్తున్నారు.
 
 'ఆయన కెన్యా పౌరుడు ఒకప్పుడు మాత్రమే ఇప్పుడు కాదు. కానీ ఆర్‌3 (రఘురాం రాజన్‌) మాత్రం భారత్‌లో పుట్టి, అమెరికా గ్రీన్‌ కార్డు మీద కొనసాగుతున్నారు. 2007 నుంచి భారత్‌లోనే ఉంటున్నా.. దానిని వదులుకోవడం లేదు' అని స్వామి ట్విట్టర్‌లో విమర్శించారు. రఘురాం అనగానే విమర్శలతో ఒంటికాలిపై లేచే స్వామి.. ఆయనను ఉద్దేశించి 'ఆర్‌3' అంటూ విమర్శలు గుప్పించారు. ఆయన అమెరికా అనుకూలుడంటూ దుయ్యబట్టారు.


 - ఉత్కంఠకు తెరదింపిన కేంద్రం
 - డిప్యూటీ గవర్నర్ నుంచి  పదోన్నతి
 - సెప్టెంబర్ 4న బాధ్యతలకు అవకాశం
  
  న్యూఢిల్లీ : ఎట్టకేలకు ఒక ఉత్కంఠకు కేంద్రం శనివారం తెరదింపింది. రిజర్వ్ బ్యాంక్ ఆఫ్ ఇండియా(ఆర్‌బీఐ) కొత్త గవర్నర్‌గా ఉర్జిత్ పటేల్ పేరును ఖరారు చేసినట్లు అధికార వర్గాలు తెలిపాయి. ప్రస్తుతం ఆయన ఆర్‌బీఐ డిప్యూటీ గవర్నర్‌గా బాధ్యతలు నిర్వహిస్తున్నారు. ద్రవ్య విధానం, ద్రవ్యోల్బణం విభాగాలకు ఇన్‌చార్జ్‌గా పనిచేస్తున్నారు. ద్రవ్యోల్బణంపై పోరు సాగించడంలో ‘రాజన్ ఇన్‌ఫ్లేషన్ వారియర్’గా పటేల్‌కు పేరుంది. సెప్టెంబర్4వ తేదీతో ప్రస్తుత గవర్నర్ రఘురామ్ రాజన్ పదవీకాలం పూర్తవుతుంది. అదే రోజు ఆర్‌బీఐ 24వ గవర్నర్‌గా ఉర్జిత్ పటేల్ పదవీ బాధ్యతలు చేపట్టే అవకాశం ఉంది. ఆర్‌బీఐ గవర్నర్ పదవీకాలం మూడేళ్లు. డిప్యూటీ గవర్నర్‌గా ఉంటూ... గవర్నర్ బాధ్యతలు చేపడుతున్న ఏడవ వ్యక్తి పటేల్. ఆర్‌బీఐ కొత్త గవర్నర్ నియామకంపై ఆర్థికమంత్రి అరుణ్ జైట్లీ  ప్రధాని నరేంద్ర మోదీతో ప్రత్యేక సమావేశం జరిపిన 48 గంటల లోపే తాజా వార్త వెలువడ్డం గమనార్హం.
 
  అపార అనుభవం...
  52 సంవత్సరాల పటేల్, 1963 అక్టోబర్ 28న జన్మించారు. యేల్ యూనివర్సిటీ నుంచి 1990లో ఆర్థికరంగంలో డాక్టరేట్ తీసుకున్నారు. అంతక్రితం 1986లో ఆక్స్‌ఫర్డ్‌లో ఎంఫిల్ చేశారు. 1990-1995 మధ్య అంతర్జాతీయ ద్రవ్యనిధి (ఐఎంఎఫ్)లో పనిచేసిన ఆయన, అమెరికా, భారత్, బహమాస్, మయన్మార్ ఆర్థిక అంశాలను పర్యవేక్షించారు.  రిలయన్స్ ఇండస్ట్రీస్‌లో కూడా గతంలో పనిచేశారు. డిప్యూటీ గవర్నర్‌గా బాధ్యతలు చేపట్టడానికి ముందు, బోస్టన్ కన్సల్టింగ్ గ్రూప్‌కు సంబంధించి ఎనర్జీ, ఇన్‌ఫ్రా సలహాదారుగా ఉన్నారు. 1998-2001 మధ్య భారత్ ఆర్థిక వ్యవహారాల శాఖలో కన్సల్టెంట్‌గా బాధ్యతలు నిర్వహించారు. మూడేళ్ల పదవీ కాలానికి సంబంధించి 2013 జనవరి 11న ఆయన డిప్యూటీ గవర్నర్‌గా నియమితులయ్యారు.
 
 ఈ ఏడాది జనవరిలో ఆయన పదవీ కాలాన్ని కేంద్రం పొడిగించింది.  రిజర్వ్ బ్యాంక్‌లో ప్రస్తుత సంస్కరణలకు ప్రాతిపదికగా ఉన్న  పరపతి విధాన నివేదిక  రూపకల్పన బృందానికి కూడా ఆయన నేతృత్వం వహించారు. ద్రవ్యోల్బణం లక్ష్యాల సాధన, రెపో రేటుసహా కీలక రేట్లను ఒక్క గవర్నర్ కాకుండా ఏకాభిప్రాయ ప్రాతిపదికన నిర్ణయం తీసుకునే ఆరుగురు సభ్యుల కమిటీ ఏర్పాటు వంటి కీలక సంస్కరణలకు ఈ నివేదికే ప్రాతిపదిక. అలాగే ద్రవ్యోల్బణం లక్ష్యం 4 శాతం మేర(2 శాతం ప్లస్ లేదా మైనస్) వుండాలనేది పటేల్ కమిటీ తీసుకున్న నిర్ణయమే. ఈ నిర్ణయాన్నే ఇటీవల కేంద్రం ఆమోదించింది కూడా.
  
  రాజన్‌కు వారసుడే....
  రఘురామ్ రాజన్ తరహాలోనే ద్రవ్యోల్బణంపై కఠిన వైఖరిని పటేల్ అవలంబిస్తారు. ఈ వైఖరి కారణంగానే భారత్ కరెన్సీ మార్కెట్‌కు స్థిరత్వం వుందని విశ్వసించే విదేశీ ఇన్వెస్టర్లకు ఉర్జిత్ పటేల్ నియామకం ఊరటనిస్తుంద న్నది విశ్లేషకుల అంచనా. తాజా నియామకంతో రేట్ల కోతపై ఆర్‌బీఐ సరళంగా వుండదన్న అభిప్రాయాన్ని స్టాక్ మార్కెట్ వర్గాలు వ్యక్తం చేస్తున్నాయి. భవిష్యత్తులో వడ్డీ రేట్ల నిర్ణయం ఆర్‌బీఐ కమిటీ మెజారిటీ సభ్యులదే అయినప్పటికీ, సభ్యుల ఓట్లు సరిసమానంగా వుంటే ఆర్‌బీఐ గవర్నర్ ఓటు కీలకమవుతుంది. ఈ సందర్భంలో ఉర్జిత్ పటేల్ రేట్ల కోతకు మొగ్గుచూపరన్నది మార్కెట్ వర్గాల భావన.
  
  పటేల్ ముందున్న సవాళ్లు
  కొత్త గవర్నర్‌గా బాధ్యతలు చేపట్టబోతున్న ఉర్జిత్ పటేల్‌కు తక్షణ సవాళ్లు పొంచివున్నాయి. 20-25 బిలియన్ డాలర్ల విలువైన విదేశీ కరెన్సీ బాండ్లకు రానున్న నెలల్లో భారత్ చెల్లింపులు జరపాల్సివుంది. రూపాయి విలువ అస్థిరతకు లోనుకాకుండా ఇంత పెద్ద మొత్తంలో డాలరు చెల్లింపులు చేయడం ప్రస్తుతం ఆర్‌బీఐ ముందున్న తక్షణ కర్తవ్యం. 2013లో రూపాయి విలువ నిలువునా పతనమవుతున్న సమయంలో విదేశీ కరెన్సీ బాండ్ల ద్వారా ఈ మొత్తాన్ని సేకరించాలన్న నిర్ణయాన్ని అప్పట్లో ఆర్‌బీఐ గవర్నర్ దువ్వూరి సుబ్బారావు తీసుకున్నారు. మూడేళ్ల కాలపరిమితిగల ఆ బాండ్ల పునర్‌చెల్లింపు ఈ సెప్టెంబర్ నుంచి మొదలుకానుంది. ఇక బ్యాంకింగ్ వ్యవస్థలో పేరుకుపోతున్న మొండి బకాయిల సమస్యపై పటేల్ పోరాడాల్సివుంది. బ్యాంకుల బ్యాలెన్స్ షీట్స్ శుద్దిచేసే ప్రక్రియకు శ్రీకారం చుట్టిన ప్రస్తుత గవర్నర్ రఘరామరాజన్ 2017 మార్చికల్లా దీనిని పూర్తిచేయాలన్న డెడ్‌లైన్ బ్యాంకులకు విధించారు. ఇది పరిపూర్తి చేయాల్సిన సవాలు పటేల్ ముందు వుంది.


 న్యూఢిల్లీ:  ఆర్బీఐ గవర్నర్ రఘు రామ్ రాజన్ పై బీజేపీ సీనియర్ నేత సుబ్రహ్మణ్యస్వామి  మరోసారి విమర్శలకు  దిగారు.   రాజన్ ను 'ఆర్ 3' అని పేర్కొన్న స్వామి దేశంలో  రుణాత్మక ద్రవ్యోల్బణ పరిస్థితులకు  ఆయనే కారణమంటూ నిందించారు. దీనికి ఐఎంఎఫ్ ప్రకటించిన  తాజా పత్రాన్ని ఆయన కోట్ చేశారు. రాజన్  అనుసరించిన వడ్డీ రేట్ల  విధానమే ద్రవ్యోల్బణానికి కారణమన్న సత్యాన్ని  ఐఎంఎఫ్  పత్రం తేటతెల్లం చేసిందని ట్విట్టర్ లో వ్యాఖ్యానించారు.  మరికొన్ని వారాల్లో రాజన్ పదవీ కాలం ముగియనుండగా  స్వామి తన ఘాటు వ్యాఖ్యలకు మరింత పదును పెట్టడం విశేషం.
 
 2013, సెప్టెంబర్ లో ఆర్ బీఐ  గవర్నర్ గా బాధ్యతలు స్వీకరించిన తరవాత, రాజన్ క్రమంగా స్వల్పకాలిక లెండింగ్ రేట్లను 7.25 శాతం  నుంచి 8 శాతం పెంచారు.  ఆర్థిక మంత్రిత్వ శాఖ నుండి తీవ్ర ఒత్తిడి ఉన్నప్పటికీ  ద్రవ్యోల్బణ కారణాలను చూపుతూ 2014వరకు  అదే  రేట్లను కొనసాగించారు.  అయితే జనవరి 2015 లో రేట్లు తగ్గించే  ప్రక్రియ ప్రారంభమైంది.  అప్పటి నుంచి 6.50 శాతంనుంచి  1.50శాతం మేర తగ్గించారు.
 అంతర్జాతీయ ద్రవ్యనిధి సంస్థ (ఐఎంఎఫ్) వర్కింగ్ పేపర్ ను కోట్  చేసిన స్వామి రాజన్ పై తన విమర్శలను మరోసారి సమర్థించు కున్నారు. వడ్డీరేట్లను అత్యధిక స్థాయిలో ఉంచి దేశ ఆర్థిక వృద్ధి నాశనానికి కారణమవుతున్నాడని, ఆయన మన దేశానికి   పనికిరాడంటూ  రాజన్ పై గతంలో పలుసార్లు విరుచుకుపడిన  సంగతి తెలిసిందే.
 
 
  
 
 Now IMF has in effect debunked that interest rate raising madness of R3 had a role in inflation control. Personal? pic.twitter.com/Xa2qiFjP6P
 — Subramanian Swamy (@Swamy39) August 19, 2016


 న్యూఢిల్లీ:  గత కొంతకాలంగా ఆసక్తికర చర్చకు  దారితీసిన  ఆర్బీఐ గవర్నర్ పదవిని అలంకరించే అభ్యర్థి ఎంపిక పై కేంద్ర ప్రభుత్వం నేడు (గురువారం)  ఓ నిర్ణయం తీసుకోనుంది.   ఈ మేరకు  ప్రధానమంత్రి నరేంద్ర మోదీతో కేంద్ర ఆర్థిక మంత్రి అరుణ్ జైట్లీ  ఈ సాయంత్రం సమావేశం కానున్నారు.  దీంతో కేంద్ర బ్యాంకు రిజర్వ్ బ్యాంక్ ఆఫ్ ఇండియా గవర్నర్ ఎంపికపై గురువారం ఒక ప్రకటన  వెలువడనుందని తెలుస్తోంది.   
 
 కాగా  ప్రస్తుత  గవర్నర్ రఘురామ్ రాజన్ పదవీ కాలం ఈ సెప్టెంబర్ 4 తో ముగియనుంది.  రెండవసారి గవర్నర్ పదవిని చేపట్టబోననని రాజన్ స్పష్టం చేయడంతో ఈ పదవి ఎవర్ని వరించనుందనే అంశంపై పలు అంచనాలు నెలకొన్నాయి. ఈ నేపథ్యంలో మాజీ ఆర్ బీఐ గవర్నర్ సుబీర్ గోకర్న్,   డిప్యూటీ గవర్నర్ ఉర్జిత్ పటేల్,  ఎస్ బీఐ చైర్ పర్సన్ అరుంధతి భట్టాచార్య తదితర  పేర్లు ప్రముఖంగా వినిపిస్తున్న  సంగతి తెలిసిందే.
  


 బ్యాంకుల్లో కింది వారికే ఎక్కువ జీతాలు
 ఉన్నత స్థాయి ఉద్యోగులకు తక్కువే
 ♦ నాకు కూడా తక్కువే ఇస్తున్నారు
 ♦ ఆర్‌బీఐ గవర్నర్ రఘురామ్ రాజన్ వ్యాఖ్యలు
 ♦ వేతన విధానం మారాలని సూచన
 ♦ లేకుంటే ప్రతిభావంతులను ఆకర్షించడం కష్టమని వ్యాఖ్య
 ♦ పీఎస్‌బీల్లో ప్రభుత్వ జోక్యం తగ్గాలని అభిప్రాయం
 ముంబై: ప్రభుత్వరంగ బ్యాంకుల్లో (పీఎస్‌బీలు) వేతన విధానం సరిగా లేదని రిజర్వ్ బ్యాంకు గవర్నర్ రఘురామ్ రాజన్ అభిప్రాయపడ్డారు. జీతాలైతే ఉన్నత స్థాయిలో ఉన్న వారికి తక్కువగాను, దిగువన ఉన్న వారికి ఎక్కువగాను ఉన్నాయన్నారు. ప్రభుత్వ రంగ బ్యాంకుల్లోకి ప్రతిభ గల వారిని ఆకర్షించేందుకు ఇదే పెద్ద ప్రతిబంధకమని ఆయన అభివర్ణించారు. అలాగే, మౌలికరంగ ప్రాజెక్టులకు రుణాలను విస్మరించరాదని సూచించారు. ఫిక్కీ, బ్యాంకుల ఆధ్వర్యంలో ముంబైలో మంగళవారం జరిగిన జాతీయ బ్యాంకర్ల సదస్సులో రాజన్ పలు అంశాలపై తనదైన శైలిలో సూటిగా మాట్లాడారు.
  ఇలా అయితే ఎలా...?
 ‘పీఎస్‌బీలలో దిగువ స్థాయిలో అధిక వేతనాలు చెల్లించేందుకు మొగ్గు చూపుతున్నారు. ఉన్నత స్థాయిలో వారికి మాత్రం వేతనాలు తక్కువగా ఉన్నాయి. ఎంతో మంది ప్రజల కోసం ఈ ఉద్యోగం చేస్తున్నామని మీరు భావించాలి. కానీ, దీనివల్ల అత్యున్నత నైపుణ్యం ఉన్నవారిని ఆకర్షించడం కష్టం’ అని రాజన్ అన్నారు. ‘నాక్కూడా తక్కువగానే వేతనం ఇస్తున్నారంటూ’ ఆయన చమత్కరించారు. పీఎస్‌బీల షేర్ల ధరలు తక్కువగా ఉన్నందున దాన్నో అవకాశంగా భావించి ఉద్యోగులకు ప్రైవేటు రంగం మాదిరి షేర్లను (ఈ సాప్స్) కేటాయించాలని సూచించారు. ఇచ్చేది కొద్ది మొత్తమైనా అది వారికి ఎంతో ప్రేరణ ఇచ్చి పనితీరు మెరుగుపరచడం ద్వారా బ్యాంకుల విలువను భారీగా పెంచుతుందన్నారు.
 అదే సమయంలో దిగువ స్థాయిలో మంచి వేతన స్కేళ్లు ఉండడం కూడా ఓ మంచి అవకాశంగా పేర్కొన్నారు. ‘మూడో తరగతిలో ఇంజనీర్లు, ఎంబీఏ అర్హతులున్న వారిని ఉద్యోగులుగా పొందుతున్నాం. మీరున్నది గుమస్తా ఉద్యోగానికి కాదు. మరింత విలువ సృష్టించడానికి... అని వారికి సూచించడం ద్వారా అవకాశాలను విస్తరించుకోవడంపై దృష్టి పెట్టాలి’ అని బ్యాంకర్లకు రాజన్ సూచించారు. ఈ రంగం మొత్తానికి ఒకే వేతన విధానం కాకుండా భిన్న విధానాలను అమలు చేయాలని సూచించారు. కాగా, రఘురామ్ రాజన్ 2015 జూలైలో రూ.1,98,700 వేతనంగా అందుకున్నారు. ప్రభుత్వ రంగ ఎస్‌బీఐ చైర్‌పర్సన్ అరుంధతీ భట్టాచార్య 2015-16లో పొందిన వేతనం రూ.31.1 లక్షలు. ప్రైవేటు రంగ హెచ్‌డీఎఫ్‌సీ బ్యాంకు ఎండీ ఆదిత్యపురి అందుకున్న వేతనం మాత్రం రూ.9.7 కోట్లు. 
  మౌలికరంగ రుణాలూ ముఖ్యమే
 పీఎస్‌బీలు మౌలికరంగ ప్రాజెక్టుల రుణాలు ఇవ్వకపోవడంపై రాజన్ ఆందోళన వ్యక్తం చేశారు. తక్కువ వ్యయం గల కాసా (కరెంట్, సేవింగ్స్ ఖాతా) డిపాజిట్లను పెంచుకోవడం ద్వారా బ్యాంకులు మౌలికరంగ ప్రాజెక్టులకు రుణాలు అందించాలని సూచించారు. మౌలిక రంగం వైపు నుంచి అధిక మొత్తంలో ఎన్‌పీఏల సమస్య ఉన్న విషయాన్ని పేర్కొంటూ... ఈ విషయంలో నిర్వహణ పనితీరును మెరుగుపరుచుకుని, సరైన మూలధన నిర్మాణంపై దృష్టి పెట్టాలని సూచించారు. రిటైల్ రుణాలపై కూడా రిస్క్ ఉంటుందని... కొంత కాలానికి అది బయటకు వస్తుందన్నారు.
 పీఎస్‌బీల్లో ఉన్నత స్థాయి నియామకాల్లో ప్రభుత్వ పాత్ర తగ్గాలని, పాలనాపరమైన నిర్ణయాలను స్వేచ్ఛగా తీసుకునేలా బ్యాంకు బోర్డులను బలోపేతం చేయాలని రాజన్ సూచించారు. పీఎస్‌బీల బోర్డుల నుంచి ఆర్‌బీఐ తన ప్రతినిధులను సైతం ఉపసంహరించుని నియంత్రణ పాత్రకే పరిమితం కావాలని అభిప్రాయపడ్డారు. బ్యాంకుల్లో ఉన్నత స్థాయి ఉద్యోగులను నియమించే అధికారం బ్యాంకు బోర్డు బ్యూరోలకే కల్పించాలన్నారు. సైబర్ నేరాలు పెరిగిపోయిన దృష్ట్యా బ్యాంకులు తమ వ్యవస్థను పటిష్టం చేసుకోవాలని సూచించారు.
  ఆన్‌లైన్ పరీక్షలు ఓ మార్గం
 బ్యాంకులు కొన్ని క్యాంపస్‌లలో రిక్రూట్‌మెంట్లు నిర్వహించకుండా కోర్టు తీర్పులు అడ్డుపడుతున్నందున... ఈ విషయమై బ్యాంకులు పిటిషన్లు దాఖలు చేయవచ్చని సూచించారు. మరో మార్గంలో బ్యాంకులు ఉద్యోగ ప్రవేశ పరీక్షల విధానాన్ని ఆన్‌లైన్‌లో చేపట్టడం ద్వారా ఈ ప్రక్రియను సులభతరం చేయాలని... తద్వారా ప్రతిష్టాత్మక విద్యా సంస్థల్లో చదివిన వారు సైతం పరీక్ష రాసేందుకు వీలుంటుందన్నారు. అలాగే స్థానికులను భర్తీ చేసుకోవడం ద్వారా అవకాశంగా మల్చుకోవాలని సూచించారు.


 ప్రభుత్వ రంగ బ్యాంకుల్లో పాలనను మెరుగుపర్చాలని ఆర్బీఐ గవర్నర్ రఘురామ్ రాజన్ నొక్కి వక్కాణించారు. ఈ బ్యాంకుల్లో టాప్ ఎగ్జిక్యూటివ్లను, నాన్-అఫిషియల్ డైరెక్టర్లను నియమించే అధికారం బ్యాంకు బోర్డు బ్యూరో(బీబీబీ)కే వదిలివేయాలని వ్యాఖ్యానించారు. ప్రస్తుతం చీఫ్ ఎగ్జిక్యూటివ్, ఎగ్జిక్యూటివ్ డైరెక్టర్లను, ఇతర బోర్డు సభ్యులను ప్రభుత్వమే నియమిస్తూ వస్తోంది. భారత బ్యాంకుల్లో పాలన అంశాలను పరిశీలించేందుకు ఆర్బీఐ నియమించిన పీజే నాయక్ కమిటీ ప్రతిపాదనలకే రాజన్ కూడా మొగ్గుచూపుతూ వాటిని అమలుచేసే విధంగా సూచించారు. ప్రభుత్వ రంగ బ్యాంకుల్లో పాలనను, మేనేజ్మెంట్ను మెరుగుపర్చేందుకు సమాంతరంగా చర్యలు చేపట్టాలని రాజన్ చెప్పారు. ఎఫ్ఐసీసీఐ-ఐబీఏ బ్యాంకింగ్ సెమినార్లో రాజన్ మంగళవారం ప్రసంగించారు.
 
 బ్యాంకుల్లో టాప్ ఎగ్జిక్యూటివ్లను, నాన్-అఫిషియల్ డైరెక్టర్లను నియమించే తుది నిర్ణయం బ్యాంకు బోర్డుకే వదిలివేయాలని, ఎంపిక ప్రక్రియలో బీబీబీ పూర్తి అనుభవం పొందిందని రాజన్ చెప్పారు. మాజీ కంట్రోలర్ ఆడిటర్ జనరల్ ఆఫ్ ఇండియా వినోద్ రాయ్ నేతృత్వంలో బీబీబీను ప్రభుత్వం ఈ ఏడాది ఫిబ్రవరిలో నియమించింది. ప్రభుత్వ రంగ బ్యాంకుల్లో నియమించే ఎగ్జిక్యూటివ్ల అపాయింట్మెంట్లను బీబీబీ షార్ట్లిస్టు చేస్తుంది. అనంతరం దీనిపై తుదినిర్ణయం ప్రభుత్వం చేపడుతుంది.
 
 వచ్చే ఆరు నుంచి ఏడు నెలల్లో కొత్త బ్యాంకులు తమ కార్యకలాపాలను ప్రారంభిస్తాయని రాజన్ పేర్కొన్నారు. ప్రస్తుత పరిస్థితుల్లో ఆర్థికరంగంలో ఆసక్తి, లాభదాయకతతో పాటు సవాళ్లను ఎదుర్కొనేందుకు సిద్ధంగా ఉండాలన్నారు. తీవ్రమైన పోటీ వాతావరణం నేపథ్యంలో ఆసక్తి, కొత్త టెక్నాలజీ, సమాచారం కొత్త బిజినెస్లకు, కస్టమర్లకు అవకాశంగా మారుతున్నందున్న లాభదాయకత, అనిశ్చిత పరిస్థితులను సైతం తట్టుకునే విధంగా ఛాలెంజింగ్ అవసరమని చెప్పారు.
  


 ముంబై: ఆర్‌బీఐ గవర్నర్‌కు నైతిక నియమావళి ఉండాలన్న రిజర్వ్ బ్యాంకు గవర్నర్ రఘురామ్ రాజన్ అభిప్రాయంతో మాజీ గవర్నర్ దువ్వూరి సుబ్బారావు విభేదించారు. ‘గవర్నర్ ఏ అంశాలపై మాట్లాడాలి అనే విషయంలో నైతిక నియమావళి ఉండాలని నేను అనుకోవడం లేదు. గవర్నర్ సెంట్రల్ బ్యాంకుకు సంబంధించిన అంశాలపైనే మాట్లాడాలి... ఇతర అంశాల జోలికి వెళ్లరాదు అంటూ వర్గీకరించడం సూచనీయం కాదు’ అని దువ్వూరి సుబ్బారావు ఇక్కడ జరిగిన తన పుస్తకావిష్కరణ కార్యక్రమంలో చెప్పారు.
 
 
 రాజన్‌లా ఆర్‌బీఐ గవర్నర్ మేధావి అయినప్పుడు అలాంటి అంశాలపై మాట్లాడడం మంచిదేనని, ఆమోదనీయమేనని అన్నారు. బల మైన ప్రభుత్వం ఉంటేనే ప్రజలకు మేలు... గొడ్డుమాంసం తిన్నందుకు ఓ మతానికి సంబంధించిన వ్యక్తిని హత్య చేయడాన్ని ఖండించడం వంటి ఎన్నో అంశాలపై రాజన్ తన అభిప్రాయాలను బహిరంగంగా వ్యక్తం చేసిన విషయం తెలిసిందే.
  


 న్యూఢిల్లీ: త్వరలోనే పదవి నుంచి దిగిపోతున్న ఆర్బీఐ గవర్నర్‌ రఘురాం రాజన్‌ తాజాగా ప్రధానమంత్రి నరేంద్రమోదీపై మాట్లాడేందుకు నిరాకరించారు. పలు అంశాలపై ప్రభుత్వ తీరును బాహాటంగా విమర్శించేరీతిలో గతంలో వ్యాఖ్యలు చేసిన రాజన్.. ప్రధాని మోదీపై తాను ఏం మాట్లాడినా అది సమస్యాత్మకం (ప్రాబ్లమేటిక్‌) అవుతుందని పేర్కొన్నారు.
 
 అసహనం మొదలు కేంద్రం ప్రతిష్టాత్మక పథకం 'మేకిన్‌ ఇండియా' వరకు రాజన్‌ వ్యక్తం చేసిన అభిప్రాయాలు తీవ్ర దుమారం రేపిన సంగతి తెలిసిందే. తాజాగా బీబీసీతో 'ర్యాపిడ్‌ ఫైర్‌' తరహా ఇంటర్వ్యూలో మోదీ గురించి వివరించమని అడుగగా.. 'నేను ఈ ప్రశ్నను దాటవేయాలనుకుంటున్నాను. నేనేమీ చెప్పినా అది సమస్యాత్మకమే అవుతుంది. కనుక ఈ ప్రశ్నను పాస్‌ చేస్తాను' అని చెప్పారు.
 
 షికాగో యూనివర్సటీలో ఆర్థికశాస్త్ర ప్రొఫెసర్‌ అయిన రాజన్‌ ఆర్బీఐ గవర్నర్‌ పదవి నుంచి దిగిపోయిన వెంటనే తిరిగి తన పాత అధ్యాపక వృత్తికి తరలిపోతానని తెలిపిన సంగతి తెలిసిందే. వివిధ అంశాలపై రాజన్‌ చేసిన వ్యాఖ్యల వల్ల ఇరకాటంలో పడిన ప్రభుత్వం ఆయనను మరో పర్యాయం ఆర్బీఐ గవర్నర్‌గా కొనసాగించడానికి వెనుకాముందాడింది. ఈ నేపథ్యంలో తానే స్వయంగా రెండోసారి ఈ పదవిలో కొనసాగబోనని రాజన్‌ స్పష్టం చేసిన సంగతి తెలిసిందే.


 • ఆర్‌బీఐ గవర్నర్ రాజన్ సూచన
 • తన చివరి పాలసీలో రేట్లు యథాతథం
 • ద్రవ్యోల్బణం భయాలే ప్రాతిపదిక
 ముంబై: అందరూ ఊహించినట్లే కీలక రేట్లను యథాతథంగా కొనసాగిస్తున్నట్లు రిజర్వు బ్యాంకు ప్రకటించింది. మంగళవారంనాటి ద్వైమాసిక ద్రవ్య విధాన సమీక్ష సందర్భంగా ఆర్‌బీఐ తన కీలక రుణ రేట్లు రెపో, రివర్స్ రెపో, క్యాష్ రిజర్వ్ రేషియో... మూడింటినీ మార్పులేకుండా కొనసాగించింది.  ద్రవ్యోల్బణ భయాల వల్లే రేట్లు తగ్గించలేదని ఆర్‌బీఐ గవర్నరు రఘురామ్ రాజన్ స్పష్టంచేశారు. ఇంకా ఈ ఆందోళనలు తొలగిపోలేదన్నారు. అయితే ద్రవ్యోల్బణం తగ్గే పరిస్థితి ఉంటే రేటు కోత దిశలో మున్ముందు నిర్ణయం ఉంటుందన్నారు.
 ‘‘నిజానికి ఇప్పటివరకూ తగ్గించిన దాదాపు 1.50 శాతం రేటు ప్రయోజనాన్ని బ్యాంకులు కస్టమర్లకు పూర్తిస్థాయిలో బదలాయించలేదు’’ అని పాలసీ సమీక్ష అనంతరం జరిగిన విలేకరుల సమావేశంలో రాజన్ చెప్పారు. ఇందుకు బ్యాంకులు తరచూ ఏదో ఒక కారణాన్ని చెబుతున్నాయన్నారు. తాజాగా ‘డాలర్ తరలిపోయే భయాల’ను చూపిస్తున్నాయన్నారు. ‘‘ఇలాంటి భయాలేవీ అక్కర్లేదు’’ అని భరోసా ఇచ్చారాయన. కాగా రేటు కోత ఉండదని ఊహించినప్పటికీ, సమీప భవిష్యత్తులో ఈ దిశలో ఆర్‌బీఐ నిర్ణయం ఉంటుందని నిపుణులు, పారిశ్రామిక వర్గాలు అభిప్రాయపడ్డారు.
 తక్షణం రేట్లు తగ్గించేది లేదు: బ్యాంకులు
 ఆర్‌బీఐ సూచించినప్పటికీ తక్షణం వడ్డీరేట్లు తగ్గించే అవకాశాలు ఏమీ లేవని బ్యాంకర్లు స్పష్టం చేశారు. వృద్ధి రేటు ఊపందుకుంటేనే రేటు తగ్గింపు సాధ్యమవుతుందని వారు స్పష్టం చేశారు.  మరోవైపు ఆర్‌బీఐ రేటు కోతకు ప్రస్తుతం అవకాశం ఉందని పారిశ్రా మిక వేత్తలు, నిపుణులు అభిప్రాయపడుతున్నారు. కొందరి అభిప్రాయాలను చూస్తే...
 అక్టోబర్ 4 ‘రేటు’కు మెజారిటీ బేస్..
 రాజన్‌కు ఇది చిట్టచివరి పాలసీ సమీక్ష. సెప్టెంబర్ 4తో ఆయన పదవీ బాధ్యతలు ముగుస్తాయి. సెప్టెంబర్ 2013లో ఆర్‌బీఐ గవర్నర్‌గా బాధ్యతలు చేపట్టాక రాజన్ మెల్లగా రెపో రేటును 7.25 శాతం నుంచి 8 శాతానికి పెంచారు. 2015 నుంచి మళ్లీ  6.5 శాతానికి తీసుకొచ్చారు. తదుపరి పాలసీ సమీక్ష అక్టోబరు 4న జరగనుంది. అయితే ఇప్పటిదాకా రేట్లపై గవర్నరు మాత్రమే నిర్ణయం తీసుకునే విధానం అక్టోబరు 4 నుంచి మారనుంది. ఆరుగురు సభ్యులు, ఆర్‌బీఐ గవర్నర్ కలిసి మెజారిటీ ప్రాతిపదికన ఇకపై నిర్ణయం తీసుకుంటారు. ‘రేటు నిర్ణయం’పై సభ్యులు సరిసమానంగా చీలిపోతే గవర్నర్ నిర్ణయం కీలకంగా మారుతుంది. ఆరుగురు సభ్యుల కమిటీని పరపతి విధాన కమిటీగా (ఎంపీసీ) వ్యవహరిస్తారు. వీరిలో ముగ్గురు వ్యక్తులను ప్రభుత్వం త్వరలో నియమిస్తుంది. ఆర్‌బీఐ నుంచి ముగ్గురు సభ్యులు ప్రాతినిధ్యం వహిస్తారు. కమిటీ స్వతంత్రంగా నిర్ణయాలు తీసుకుంటుందని భావిస్తున్నట్లు రాజన్ ఈ సందర్భంగా తెలిపారు.
 నా పదవీ కాలం అద్భుతం..
 తన పదవీకాలాన్ని అద్భుతమైనదనిగా రాజన్ అభివర్ణించారు. ‘విమర్శకులు కానీయండి. మద్దతుదారులు కానీయండి. ఎవరికి అనిపించింది వారు చెబుతారు. వీటన్నింటికీ నేను ప్రాధాన్యమివ్వను. సామాన్యుడికి ఏది మంచిదో అదే చేశా. నా చర్యల ఫలితాలు ఐదు నుంచి ఆరేళ్ల కాలంలో కనబడతాయి. దేశ పటిష్ట, సుస్థిర వృద్ధి, ఉపాధి కల్పన, మధ్య, సామాన్య వ్యక్తి ఆదాయం ఇవన్నీ పాలసీ లక్ష్యాలు. నేను చేయాల్సిందంతా చేశాను. వాటి ఫలి తాలు వస్తేనే తెలుస్తాయి. ఇవి ఎలా ఉన్నాయన్నది వచ్చే ఐదారేళ్లలో చూస్తారు. ఏది మంచో, ఏది చెడో చెప్పే తీర్పును ఆ తరవాత ఇద్దాం’ అని రాజన్ వ్యాఖ్యానించారు. ఎవరి వ్యాఖ్యలెలా ఉన్నా ఫలితాలే ముఖ్యమని రాజన్ అభిప్రాయపడ్డారు. సెప్టెంబర్ 4 తరువాత భవిష్యత్‌పై ఇంకా ప్రణాళికలు రూపొం దించుకోలేదని పేర్కొన్నారు. యూనివర్సిటీ ఆప్ చికాగోలో పూర్వపు బాధ్యతల నిర్వహణ నుంచి భారత్ ఆర్థిక అంశాలపై పరిశోధనల వరకూ వివిధ అంశాలు పరిశీలనలో ఉన్నట్లు సూచించారు.
 రాజన్ చివరి పాలసీ సమీక్ష సందర్భంగా నిర్వహించిన విలేకరుల సమావేశానికి వచ్చిన ఆయన కుమార్తె, కుమారుడుఊహించిందే...
  
 
 
 
 
 
 
 పాలసీ ముఖ్యాంశాలు...
 ⇔ ప్రస్తుత ఆర్థిక సంవత్సరం వృద్ధి రేటు అంచనా 7.6 శాతం.
 ⇔ 2017 జనవరి నాటికి ద్రవ్యోల్బణం రేటు అంచనా 5 శాతం. పెరిగే అవకాశాలే అధికం.
 ⇔ సాధారణ వర్షపాతం, 7వ వేతన కమిషన్ సిఫారసులు వృద్ధి రేటును పెంచుతాయి.
 ⇔ వస్తు, సేవల పన్ను అమలు పెట్టుబడులు, వ్యాపార సెంటిమెంట్‌కు సానుకూలం.
 ⇔ ఆగస్టు 5 నాటికి రికార్డు స్థాయిలో విదేశీ మారకద్రవ్య నిల్వలు. 365.7 బిలియన్ డాలర్లు.
 ⇔ జీఎస్‌టీ వస్తే ద్రవ్యోల్బణం పెరుగుతుందన్న ఆలోచనలు ఇప్పటికి ఆలోచనలే.
 ⇔ సెప్టెంబర్‌లో 26 బిలియన్ డాలర్ల ఎఫ్‌సీఎన్‌ఆర్ (బీ) రిడమ్షన్ల వల్ల బ్యాంకింగ్ ద్రవ్యలభ్యత (లిక్విడిటీ)కు ఎటువంటి విఘాతం కలుగదు. ఓపెన్ మార్కెట్ ఆపరేషన్స్ ద్వారా ఇలాంటి సమస్య ఏదీ తలెత్తకుండా ఆర్‌బీఐ జాగరూకత వహిస్తుంది.
 ⇔ బ్యాంకులు తమ రేటు ప్రయోజనాన్ని కొంతమొత్తమే కస్టమర్లకు బదలాయించాయి.
 ⇔ కేవైసీ  గురించి ఆర్‌బీఐ వెబ్‌సైట్‌లో స్పష్టంగా తెలుసుకోవచ్చు.
 ⇔ తాజా డిపాజిట్ రేటు ప్రాతిపదికన రుణ రేటుకు సంబంధించి ‘మార్జినల్ కాస్ట్ లెండింగ్ రేటు ఫ్రేమ్‌వర్క్’ను మరింత పటిష్టం.
 ⇔ బ్యాంకింగ్ మొండిబకాయిల సమస్య తీవ్రమైనదే అయినా... పరిష్కారానికి తీసుకుంటున్న చర్యలు సత్ఫలితాలను ఇస్తాయి.
 ఇవీ కీలక రేట్లు...
 ⇔ బ్యాంకులకిచ్చే స్వల్పకాలిక రుణాలపై ఆర్‌బీఐ వసూలు చేసే వడ్డీరేటు రెపో. ప్రస్తుతం ఇది 6.5 శాతం.
 ⇔ బ్యాంకులు ఆర్‌బీఐ వద్ద ఉంచే డిపాజిట్లపై వాటికి ఆర్‌బీఐ చెల్లించేది రివర్స్ రెపో. ప్రస్తుతం ఇది 6 శాతం.
 ⇔ బ్యాంకులు తమ డిపాజిట్లలో తప్పనిసరిగా ఆర్‌బీఐ వద్ద ఉంచాల్సిన నగదు నిష్పత్తే క్యాష్ రిజర్వ్ రేషియో. ప్రస్తుతమిది 4%.
 మార్కెట్ అంచనాలకు అనుగుణంగానే పాలసీ విధానం ఉంది. వృద్ధి మెరుగుపడుతూ, వచ్చే కొద్ది నెలల్లో రుణ వృద్ధి రేటు క్రమంగా పుంజుకుంటున్న పక్షంలో వడ్డీరేట్లు కూడా తగ్గే వీలుంటుందని నేను విశ్వసిస్తున్నా. ద్రవ్యలభ్యతకు గవర్నర్ హామీ బ్యాంకింగ్‌కు సానుకూల అంశం. - ఆరుంధతీ భట్టాచార్య, ఎస్‌బీఐ చీఫ్
 లిక్విడిటీపై హామీ హర్షణీయం
 బ్యాంకింగ్‌కు ఎటువంటి ద్రవ్య లభ్యత సమస్యా రాకుండా ఆర్‌బీఐ చర్యలు తీసుకుంటుందన్న హామీ స్వాగతనీయం. ద్రవ్యోల్బణం తగ్గుదల సంకేతాలతో రేట్లు తగ్గుదల చోటుచేసుకుంటుందని ఆర్‌బీఐ సూచించింది. ఇవి వృద్ధికి సత్ఫలితాలను ఇస్తుంది.
 - చందా కొచర్, ఐసీఐసీఐ బ్యాంక్ చీఫ్
 వచ్చే నెలల్లో రేటు కోత...!
 ప్రస్తుతం లేకున్నా... సమీప భవిష్యత్తులో రేటు కోత ఉంటుందని భావిస్తున్నా. తగిన వర్షపాతం, ద్రవ్యోల్బణం తగ్గడం, ప్రభుత్వ వ్యవస్థాపరమైన చర్యలు ప్రస్తుత ఆర్థిక సంవత్సరం (2016-17) 50-100 బేస్ పాయింట్ల మేర రేటు కోతకు వీలు కల్పిస్తాయని భావిస్తున్నా. త్వరలోనే ఈ ప్రక్రియ ప్రారంభం కావచ్చు. - రాణా కపూర్, యస్ బ్యాంక్
 తగిన సమయం...
 వృద్ధి వేగం పుంజుకుంటోంది. రేటు తగ్గింపునకు ఇది తగిన సమయం. సమీప భవిష్యత్తులో  నిర్ణయం ఉంటుందని భావిస్తున్నాం. వృద్ధి వేగం పుంజుకోవడానికి వడ్డీరేట్ల కోత అవసరం. ప్రభుత్వ చర్చలు, తగిన వర్షపాతంతో త్వరలో రేటు కోతకు వీలుంది.
 - హర్షవర్ధన్ నోటియా, ఫిక్కీ


 • నేడు ద్రవ్య విధాన పరపతి సమీక్ష
 • రాజన్‌కు గవర్నర్ హోదాలో ఇదే చివరిది
 • రేట్ల తగ్గింపు ఉండొచ్చని అంచనాలు
 న్యూఢిల్లీ: రిజర్వ్ బ్యాంకు గవర్నర్‌గా రఘురామ్ రాజన్ తన చిట్టచివరి ద్రవ్య, విధాన పరపతి సమీక్షా సమావేశంలో మెరుపులు మెరిపిస్తారా...? వెళుతూ వెళుతూ రేట్లను కోసేసి పారిశ్రామిక, బ్యాంకింగ్, మార్కెట్ వర్గాలను ఆశ్చర్యానికి గురి చేస్తారా..? చాలామంది ఇలాగే ఆలోచిస్తుండటంతో ఇప్పుడు అందరి కళ్లూ మంగళవారం నాటి పరపతి విధాన సమీక్షపైనే పడ్డాయి.
 సెప్టెంబర్ 4న ఆర్‌బీఐ గవర్నర్ బాధ్యతల నుంచి తప్పుకోనున్న రాజన్‌కు ఇదే చివరి పరపతి విధాన సమీక్షా సమావేశం. రిటైల్ ద్రవ్యోల్బణం అధిక స్థాయిల్లోనే కొనసాగుతున్నందున ఆర్‌బీఐ రేట్ల విషయంలో యథాతథ స్థితిని కొనసాగించే అవకాశం ఉందని నిపుణులు భావిస్తున్నారు. కానీ, అధిక వడ్డీ రేట్లను కొనసాగిస్తున్నారన్న విమర్శలను ఆయన ఎదుర్కొంటున్నారు. ఈ నేపథ్యంలో రాజన్ కీలక రేట్లలో మార్పులు చేసే అవకాశం లేకపోలేదని కొందరు అభిప్రాయపడుతున్నారు. తదుపరి సమీక్షా సమావేశం అక్టోబర్ 4న జరగనుంది. వడ్డీ రేట్ల నిర్ణయానికి మానిటరీ పాలసీ కమిటీ పేరుతో కొత్త విధానాన్ని కేంద్రం తీసుకొచ్చిన విషయం తెలిసిందే.
  రేట్ల కోతకు మూడు కారణాలు
 ఆర్‌బీఐ 0.25 బేసిస్ పాయింట్ల మేర రేట్లను తగ్గించడానికి అవకాశాలున్నాయని బ్యాంక్ ఆఫ్ అమెరికా - మెరిల్‌లించ్ బ్రోకరేజీ సంస్థ తెలిపింది. ఇందుకు మూడు కారణాలు పేర్కొంది. ‘1. రాజన్‌కు ఇదే చివరి సమీక్ష. కనుక తన కఠిన విధానాన్ని విడిచిపెట్టవచ్చు. 2. జూన్‌లో 5.7 శాతంగా ఉన్న రిటైల్ ద్రవ్యోల్బణం... మంచి వర్షాలు పడితే ఆహార ద్రవ్యోల్బణం తగ్గి ఫలితంగా మార్చి నాటికి 5.1 శాతానికి తగ్గుతుంది. అదే సమయంలో జూలైలో రిటైల్ ద్రవ్యోల్బణం 6 శాతానికి పెరగొచ్చు. 3. అధిక వడ్డీ రేట్లు రుణాల గిరాకీని తగ్గించడం ద్వారా ఆర్థిక రికవరీపై ప్రభావం చూపుతుంది. అధిక వడ్డీ రేట్ల వల్ల నిరర్థక ఆస్తులు (ఎన్‌పీఏ)లు కూడా అధికం అవుతాయి. రుణాలకు గిరాకీ పెరిగే సమయంలో రేట్లను తగ్గించడం మంచిది’ అని సంస్థ తన నివేదికలో పేర్కొంది. యూఎస్ ఫెడ్ వడ్డీ రేట్లను తగ్గిస్తుందన్న అంచనాలు ఆర్‌బీఐ వడ్డీ రేట్ల తగ్గింపును వాయిదా వేస్తుందన్న దానికి కారణంగా లోగడ చెప్పారని, ప్రస్తుతం ఫెడ్ వడ్డీ రేట్ల కోత కూడా వాయిదా పడిన విషయాన్ని బ్యాంక్ ఆఫ్ అమెరికా మెరిల్‌లించ్ గుర్తు చేసింది.
  అవకాశం లేదు!!
 కీలక వడ్డీ రేట్లను యథాతథంగా కొనసాగించవచ్చు. ద్రవ్యోల్బణం వరుసగా రెండో నెలలో 5.7శాతానికి పెరగడంతోపాటు జూలై, ఆగస్టు నెలల్లోనూ అధిక స్థాయిల్లోనే కొనసాగవచ్చు. తదుపరి వడ్డీ రేట్లలో కోత అన్నది ద్రవ్యోల్బణం తీరు, మానిటరీ పాలసీ కమిటీ ఏర్పాటుపైనే ఆధారపడి ఉంది. - డీబీఎస్
 50 పాయింట్ల మేర కోత
 బ్రిటన్ సహా చాలా దేశాల్లో రేట్లు తగ్గుముఖం పట్టాయి. స్థూల ఆర్థిక పరిస్థితులు కూడా అనుకూలంగా ఉన్నందున ఆర్‌బీఐ 50 బేసిస్ పాయింట్ల వరకు వడ్డీ రేట్లలో కోత విధించవచ్చు. - రాణా కపూర్, ఎండీ, యస్‌బ్యాంక్
  రేట్ల కోతకు అవకాశం లేదు
 రిటైల్ ద్రవ్యోల్బణం జూన్‌లో 5.77 శాతానికి చేరింది. 22నెలల్లో ఇంత వేగంగా పెరగడం ఇదే ప్రథమం. జీఎస్‌టీ అమలుతో ఇది మరింత పెరిగే వకాశం ఉంది. కనుక వడ్డీ రేట్లలో మార్పులు ఉండకపోవచ్చు.  - అరుంధతీ భట్టాచార్య, చైర్ పర్సన్, ఎస్‌బీఐ
 విభేదాలతో మంచే జరుగుతుంది: సుబ్బారావు
 బెంగళూరు: ఆర్‌బీఐ, కేంద్ర ప్రభుత్వం మధ్య విభేదాలతో నష్టం లేదని, పైగా విధానాల మెరుగునకు ఉపకరిస్తుందని ఆర్‌బీఐ మాజీ గవర్నర్ దువ్వూరి సుబ్బారావు అభిప్రాయపడ్డారు. ‘కేంద్ర ప్రభుత్వం, రిజర్వ్ బ్యాంక్ ఆఫ్ ఇండియా రెండూ తమ అభిప్రాయాలకు కట్టుబడి ఉండాలి. వారి వైపు నుంచి చూస్తే ఇదేమీ తప్పు కాదు. వాస్తవానికి ప్రజా విధానాల మెరుగునకు ఇవి దోహదం చేస్తాయి’ అని సుబ్బారావు ఒక వార్తా సంస్థతో చెప్పారు.
 గతంలో గవర్నర్‌గా పనిచేసిన సమయంలో సుబ్బారావుకు, అప్పటి ఆర్థిక మంత్రి చిదంబరంతో... ప్రస్తుత గవర్నర్ రాజన్‌కు ఆర్థిక మంత్రి జైట్లీతో ఉన్న విభేదాలపై ప్రశ్నించినప్పుడు ఈ సమాధానం వచ్చింది. అయితే, ఈ భిన్నాభిప్రాయాలను కొనసాగించేందుకు తగిన ఏర్పాట్లు, విధి విధానాలు ఉండాలన్నారు. విభేదాలు నాలుగు గోడలకే పరిమితం కావాలని, ఫైనాన్షియల్ మార్కెట్లను, ఈ రంగ నిపుణులను అయోమయానికి గురి చేయరాదని అభిప్రాయపడ్డారు.


 న్యూఢిల్లీ: బీజేపీ ఫైర్‌బ్రాండ్‌ ఎంపీ సుబ్రహ్మణ్యస్వామి మళ్లీ జులు విదిల్చారు. ద్రవ్య పరపతి పాలసీ విషయమై ఆర్బీఐ గవర్నర్‌ రఘురాం రాజన్‌పై మరోసారి విమర్శల వర్షం కురిపించారు. రాజన్‌పై స్వామి చేసిన ఆరోపణల్ని ప్రధాని నరేంద్రమోదీ కొట్టిపారేయడంతో నెలరోజులుగా ఆయన మౌనంగా ఉన్న సంగతి తెలిసిందే.
 
 మీడియా తనను రాక్షసుడిగా, రాజన్‌ను 'దేవ దూత'గా మీడియా చిత్రిస్తున్నదని స్వామి మండిపడ్డారు. 'రాజన్‌ విషయంలో ఆయనకు దేశం మద్దతు పలికేలా బయటి శక్తులు మీడియాను ప్రేరేపిస్తున్నాయి. రాజన్‌ వెళ్లిపోతే స్టాక్‌ మార్కెట్లు కుప్పకూలుతాయని భయపెడుతున్నాయి. నిజానికి రాజన్‌ పోతే మార్కెట్లు కుప్పకూలవు. అవి పైకి లేస్తాయి' అని స్వామి పేర్కొన్నారు. 'వడ్డీరేట్లను పెంచడం ద్వారా రాజన్‌ భారత ఆర్థిక వ్యవస్థకు చేటు చేస్తున్నారు. చిన్న మధ్యతరహా పరిశ్రమలకు బ్యాంకుల రుణాలు పొందడం అసాధ్యంగా మార్చారు' అని ఆయన మండిపడ్డారు.


 న్యూఢిల్లీ: రిజర్వు బ్యాంకు గవర్నర్‌గా నూతన గవర్నర్ గా ఎవర్ని ఎంపిక చేయనున్నారనే   వార్త  మరోసారి ప్రముఖంగా  నిలిచింది.  రఘురాం రాజన్‌ తర్వాత ఎవరిని నియమిస్తారనే విషయంపై తాజాగా ఊహాగానాలు మీడియాలో చక్కర్లుకొడుతున్నాయి.  ఆర్‌బిఐ మాజీ డిప్యూటీ గవర్నర్  సుబీర్‌ గోకర్న రాజన్తో  శుక్రవారం సమావేశం కావాల్సి ఉందని ఎకనామిక్ టైమ్స్  ప్రచురించింది.  ఆర్బిఐ కదలిక చర్చకు దారితీసింది.  దేశంలోని అగ్రశ్రేణి ఆర్థిక సంస్థ,  దేశ కేంద్ర బ్యాంక్ గవర్నర్ ఆయనే అనే   అంచనాలు  హాట్ టాపిక్  గా మారాయి.
  
 కాగా రాజన్‌ పదవీకాలం పూర్తి కాకముందే ఆ స్థానాన్ని ఎవరితో భర్తీ చేసేది వెల్లడిస్తామని ప్రభుత్వ వర్గాలు పేర్కొన్నాయి. దీనిపై ఎలాంటి వూహాగానాలకు తావులేదని ఇప్పటికే ఎంపిక ప్రక్రియ మొదలయ్యిందని వెల్లడించాయి. అలాగే నూతన గవర్నర్‌ ఎంపికకు ఎలాంటి ప్యానెల్‌ను ఏర్పాటు చేయలేదని స్పష్టం చేశాయి.  అటు   సెప్టెంబరు 4వ తేదీతో రాజన్‌ పదవీ కాలం ముగియనున్న సంగతి తెలిసిందే. 
  
  


 ♦ ఆర్‌బీఐ గవర్నర్ రఘురామ్ రాజన్
 ♦ అక్రమ ధనార్జనా నిరోధక పోర్టల్ ఆవిష్కరణ
 ముంబై: అక్రమ డిపాజిట్ల పెరుగుదలను అడ్డుకోవాల్సిన అవసరం ఉందని రిజర్వ్ బ్యాంక్ గవర్నర్ రఘురామ్ రాజన్ స్పష్టం చేశారు. ఒక వ్యక్తి కంపెనీని ప్రారంభించడం, కొన్ని తప్పుడు పథకాలతో కొన్ని నెలలు కంపెనీని నిర్వహించడం, భారీ డిపాజిట్లను సేకరించడం అటు తర్వాత కంపెనీ బోర్డు తిప్పేయడం (ఫ్లై-బై-నైట్ ఆపరేటర్స్) వంటి ఘటనలను ముందే అడ్డుకోడానికి తగిన చర్యలు అవసరమన్నారు. ఈ తరహా సంస్థలు ఏ నియంత్రణ సంస్థ పరిధిలోకీ రాకుండా కార్యకలాపాలు నిర్వహిస్తున్నాయని చెప్పారాయన. ‘‘ఈ  సంస్థలు డబ్బుతో ఉడాయించడానికి ముందే.
 ఫైనాన్షియల్ రెగ్యులేటర్లు, న్యాయ నిర్వహణ సంస్థలు ఉమ్మడిగా వీటిపై చర్యకు ఉపక్రమించాలి. డిపాజిటర్ల రక్షణ చట్టం, రాష్ట్ర స్థాయి సహకార కమిటీల వంటివి ఈ నకిలీ సంస్థల ఆట కట్టించడానికి తగిన ప్రయత్నాలు చేస్తూనే ఉన్నాయి. ప్రజలు కూడా ఇలాంటి సంస్థల పట్ల అప్రమత్తంగా ఉండాలి. రూ.50 లక్షలు ఇస్తానన్న వ్యక్తి నన్ను మొదట రూ.25,000 కట్టమని ఎందుకు అడిగాడు? ఇచ్చే డబ్బులో మినహాయించుకోవచ్చు కదా? అనేది ప్రతి ఒక్కరూ ఆలోచించాలి’’ అని సూచించారు.
  అక్రమాల గుట్టురట్టుకు పోర్టల్...
 అక్రమ డిపాజిట్ల సేకరణ గుట్టును రట్టు చేయడానికి ఉద్దేశించిన ఒక  పోర్టల్‌ను ఈ సందర్భంగా రాజన్ ఆవిష్కరించారు. ట్చఛిజ్ఛ్టి.టఛజీ.ౌటజ.జీ పేరుతో ఏర్పాటైన ఈ సైటు ఫిర్యాదుల నమోదుకు అవకాశం కల్పిస్తుంది. ఒక సంస్థ ఏ రెగ్యులేటర్ వద్ద రిజిస్టర్ అయ్యింది? అసలు రిజిస్ట్రేషన్ అయ్యిందా... లేదా? వంటి వివరాలను ఈ వెబ్‌సైట్ ద్వారా తెలుసుకునే వెసులుబాటుంది. కాగా చదువుకున్న వారు సైతం మోసాలకు గురవుతున్నారని కార్యక్రమంలో పాల్గొన్న ఆర్‌బీఐ డిప్యూటీ గవర్నర్ ఎస్‌ఎస్ ముంద్రా ఈ సందర్భంగా చెప్పారు.
 నకిలీ స్కీముల్లోకి నల్లధనం: రామన్
 కార్యక్రమంలో పాల్గొన్న సెబీ హోల్ టైమ్ మెంబర్ ఎస్.రామన్ మాట్లాడుతూ, దేశంలో నల్లధనం పెద్ద ఎత్తున నకిలీ, మోసపూరిత పథకాల్లోకి మళ్లుతోందన్న అభిప్రాయాన్ని  వ్యక్తం చేశారు. ఈ సందర్భంగా ఆయన సహారా ఉదంతాన్ని పేర్కొన్నారు. ఈ కేసు విషయంలో డిపాజిటర్లకు తిరిగి చెల్లించడానికి తగిన మొత్తం సెబీ వద్ద ఉన్నా... తీసుకోడానికి తగిన సంఖ్యలో ఎవ్వరూ ముందుకురావడం లేదని చెప్పారాయన. ‘‘ఆర్థిక మంత్రిత్వ శాఖ డెరైక్టరేట్ ఆఫ్ ఎన్‌ఫోర్స్‌మెంట్ భాగస్వామ్యంతో నకిలీ స్కీముల్లోకి వచ్చిన నల్లడబ్బు వివరాలను రాబట్టే ప్రయత్నం చేస్తోంది. సహారా విషయంలో భారీ ఎత్తున డాక్యుమెంట్ల పరిశీలన ద్వారా ప్రపంచంలో ఏ రెగ్యులేటర్ చేయనంత పని సెబీ చేసింది. సెబీ లక్ష్యం ఒక్కటే. డిపాజిటర్ల డబ్బు ఎవరిదివారికి చెల్లించటమే’’ అని ఆయన వివరించారు.  పెరల్ గ్రూప్ విషయంలోనూ ఇన్వెస్టర్లకు డబ్బు చెల్లించడానికి సెబీ అన్ని చర్యలూ తీసుకుంటోందని అన్నారు.


 ♦ క్షీణించిన చమురు ధరలు కారణం కాదు
 ♦ పెట్రోల్, డీజిల్ ధరలు తగ్గింది చాలా తక్కువ
 ♦ విమర్శకులకు ఆర్‌బీఐ గవర్నర్ రాజన్ చురక
 ముంబై : తన విమర్శకులపై ఆర్‌బీఐ గవర్నర్ రఘురామ్ రాజన్ మరోసారి విరుచుకుపడ్డారు. అధిక వడ్డీ రేట్లతో ఆర్‌బీఐ వృద్ధి రేటును దెబ్బతీస్తోందన్న విమర్శలు వేగంగా అభివృద్ధి చెందుతున్న భారత్ కోణంలో భాగమేనన్నారు. అయితే, ఈ ఉద్దేశ పూర్వక విమర్శలకు దూరంగా ప్రభుత్వం ఆర్‌బీఐ స్వతంత్రను తప్పకుండా కాపాడాలని సూచించారు. ఆర్‌బీఐ గవర్నర్‌గా రాజన్ సెప్టెంబర్‌లో పదవీ విరమణ చేయనున్న విషయం తెలిసిందే. సోమవారం ఇక్కడ ఆర్‌బీఐ ప్రధాన కార్యాలయంలో పదవ గణాంక దినోత్సవం సందర్బంగా జరిగిన కార్యక్రమంలో రాజన్ సూటిగా మాట్లాడారు. అదృష్టవశాత్తూ చమురు ధరలు దిగిరావడంతోనే ద్రవ్యోల్బణం తగ్గిందని, ఆర్‌బీఐ చర్యల వల్ల కాదన్న చర్చతో ఆయన విభేదించారు.
 అంతర్జాతీయంగా గణనీయ స్థాయిలో ధరలు తగ్గగా... ఆ స్థాయిలో దేశీయంగా ధరల తగ్గుదల లేదని, ప్రభుత్వం పెట్రోల్, డీజిల్‌పై ఎక్సైజ్ సుంకం పెంచిన విషయాన్ని ఆయన గుర్తు చేశారు. అధిక వడ్డీ రేట్లు సహా బ్యాంకుల మొండి బకాయిల ప్రక్షాళన విషయంలో రాజన్ తీవ్ర విమర్శలు ఎదుర్కోవడం తెలిసిందే. అధిక ద్రవ్యోల్బణం బలహీన వర్గాలకు హాని చేస్తుందన్నారు. కానీ ధరల పెరుగుదలపై ఆ వర్గాలు అంతగా ఆందోళన చెందకపోవడంపై రాజన్ ఆశ్చర్యం వ్యక్తం చేశారు. ‘ద్రవ్యోల్బణం పెరగకూడదంటే... స్థూల ఆర్థిక స్థిరత్వంతో సంస్థలు పనిచేసేలా వాటిని నిర్మించాలి. బహుశా ఈ వివేకంతోనే ప్రభుత్వాలు ఆర్‌బీఐకి కొంత స్వేచ్ఛను ఇచ్చినట్టున్నాయి’ అని రాజన్ వ్యాఖ్యానించారు.
  రెండు విరుద్ధ వాదనలు...
 ‘విమర్శకులు ద్రవ్యోల్బణంపై రెండు విరుద్ధ వాదనలు వినిపిస్తుంటారు. ఆర్‌బీఐ అధిక వడ్డీ రేట్లతో గిరాకీని, వృద్ధిని దెబ్బతీస్తోందని అంటారు. అదే సమయంలో ద్రవ్యోల్బణం నియంత్రణ విషయంలో మన విధానం పెద్దగా ప్రభావం చూపలేదంటారు. చమురు ధరలు తగ్గడం వల్లే డిఫ్లేషన్ (ద్రవ్యోల్బణం తగ్గడం) అని చెబుతారు. ఈ రెండూ అసంబద్ధం.  చమురు ధరలు క్షీణించకముందుగానే ద్రవ్యోల్బణం తగ్గుదల 2013 చివరిలో మొదలైంది. ఆ తర్వాత ప్రపంచ మార్కెట్లో చమురు ధరలు తగ్గినా, దేశీయంగా ఇంధన ధరలు అంతగా తగ్గలేదు.  2014 ఆగస్ట్, 2016 జనవరి కాలంలో దేశీయ క్రూడ్ బాస్కెట్ ధరలు 72 శాతం పతనం అయ్యాయి.
 కానీ పెట్రోల్ ధర 17 శాతమే తగ్గింది. కనుక చమురు ధరలు తగ్గడం వల్లే ద్రవ్యోల్బణం తగ్గిందన్న వాదన సరికాదు’ అని వివరించారు. బ్రిటన్, అమెరికా తదితర దేశాల్లో పరిణామాలను ఆయన ప్రస్తావిస్తూ దేశం వెలుపల జరిగిన పరిణామాల ప్రభావాలకు సంబంధించి సెంట్రల్ బ్యాంకును నిందించడం తగదన్నారు. అయితే, ఈ ప్రేరేపిత విమర్శలకు గురికాకుండా ప్రభుత్వాలు తమ సెంట్రల్ బ్యాంకుల స్వతంత్రతను కాపాడాలని, స్థిరమైన, సుస్థిర వృద్ధికి ఇది తప్పనిసరి అని రాజన్ చెప్పారు. సెంట్రల్ బ్యాంకుల పాలసీలను ఆధార రహితంగా విమర్శించడం అలవాటుగా మారిందని తప్పుబట్టారు. బ్యాంకు ఆఫ్ ఇంగ్లండ్, యూఎస్ ఫెడ్, యూరోపియన్ సెంట్రల్ బ్యాంకులలో ఎన్ని ఈ విధంగా విమర్శలు ఎదుర్కొంటున్నాయని ఆయన ప్రశ్నించారు.
  ద్రవ్యోల్బణం కట్టడి చేయకుంటే సంక్షోభం
 ద్రవ్యోల్బణాన్ని కట్టడి చేయకుంటే సంక్షోభ పరిస్థితులను ఎదుర్కోవాల్సి వస్తుందని రాజన్ హెచ్చరించారు. అధిక స్థాయిలో ద్రవ్యోల్బణంతో కరెన్సీ ఆటుపోట్లకు లోనవుతుంది. పొదుపు నిల్వలు ఆవిరవుతాయి. బంగారంపైకి పెట్టుబడులు మళ్లుతాయి. మనం పుత్తడిని ఉత్పత్తి చేయని విషయాన్ని గుర్తుంచుకోవాలి. ఫలితంగా కరెంటు ఖాతాపై ఒత్తిడి పెరుగుతుంది. దీంతో సంక్షోభం తలెత్తుతుంది’ అని రాజన్ వివరించారు.
 ఎన్‌పీఏల ప్రక్షాళన ముందే చేపట్టాల్సింది
 బ్యాంకుల నిరర్ధక ఆస్తుల (ఎన్‌పీఏ) ప్రక్షాళనను మరింత ముందుగానే చేపట్టి ఉండాల్సిందని రాజన్ అభిప్రాయపడ్డారు. ద్రవ్యోల్బణం మాదిరిగానే బ్యాంకు ఖాతాల ప్రక్షాళనకు ముందుగానే చర్యలు తీసుకోవాల్సిన బాధ్యత ఆర్‌బీఐపై ఉందన్నారు. అధిక రుణాలు తీసుకుని చెల్లించడంలో విఫలమైన 120 ఖాతాల జాబితాను 2015 డిసెంబర్‌లో ఆర్‌బీఐ వెల్లడించడం ద్వారా ప్రక్షాళన ప్రారంభించిన విషయం తెలిసిందే. ‘బ్యాంకులు తొలుత ఎన్‌పీఏల ప్రక్షాళన పట్ల విముఖత చూపాయి. కానీ, ఆ తర్వాత అదే స్ఫూర్తితో ముందడుగు వేశాయి. కొన్ని అయితే, కోరిన దాని కంటే ఎక్కువే దిద్దుబాటు చర్యలు చేపట్టాయి. రుణ నష్టాలకు సమస్యను విస్మరించడం తేలికే. కానీ ఈ ధోరణి వల్ల సమస్య పెద్దది అయిపోయి నిర్వహణ కష్టమవుతుంది. ఫలితంగా బ్యాంకింగ్ వ్యవస్థ సంక్షోభంలోకి వెళుతుంది’ అని రాజన్ వివరించారు. 2017 మార్చి నాటికి ఎన్‌పీఏల సమస్యకు ముగింపు పలకాలని ఆర్‌బీఐ లక్ష్యాన్ని నిర్ణయించిన విషయం తెలిసిందే.


 న్యూఢిల్లీ : సెంట్రల్ బ్యాంకుల స్వాతంత్ర్యాన్ని కచ్చితంగా ప్రభుత్వాలే పరిరక్షించాలని రిజర్వు బ్యాంకు ఆఫ్ ఇండియా గవర్నర్ రఘురామ్ రాజన్ అన్నారు. స్థిరమైన ఆర్థిక వృద్ధి రేటు సాధించడానికి ప్రభుత్వాలు ఈ చర్యలు తీసుకోవాలన్నారు. స్థిరమైన ఆర్థిక వృద్ధి రేటు పెంపు నేపథ్యంలో సెంట్రల్ బ్యాంకులు ఎలాంటి సాక్ష్యాలు లేని విమర్శలను ఎదుర్కోవాల్సి వస్తున్నాయని రాజన్ ఆందోళన వ్యక్తంచేశారు. బ్రెగ్జిట్ పరిణామ క్రమంలో బ్యాంకు ఆఫ్ ఇంగ్లాండ్ ఎదుర్కొన్న దాడులు, పెరిఫీరియల్ ఆర్థికవ్యవస్థను స్థిరీకరించే సమయంలో యూరోపియన్ సెంట్రల్ బ్యాంకు, ఇంటరెస్ట్-రేట్ గైడ్ లైన్స్ నేపథ్యంలో ఫెడరల్ రిజర్వు ఎదుర్కొన్న అటాక్స్ను ఆయన గుర్తుచేశారు.
 ఆయా సెంట్రల్ బ్యాంకులు తమ భూభాగ పరిధిలోనే ఎక్కువగా విమర్శలు ఎదుర్కొంటున్నాయని ముంబైలోని ప్రెస్ స్టేట్మెంట్లో రాజన్ వ్యాఖ్యానించారు. సాక్ష్యాలు లేని ఇలాంటి నిందారోపణలపై ప్రపంచవ్యాప్తంగా ఉన్న ప్రభుత్వాలు దృష్టిసారించాలని, సెంట్రల్ బ్యాంకుల స్వేచ్ఛను కాపాడాలని ఆయన పేర్కొన్నారు. ఆర్థిక వ్యవస్థలను వృద్ధి బాటలో నడిపించడానికి సెంట్రల్ బ్యాంకులు చాలా ఒత్తిడిని ఎదుర్కొంటాయని.. సెంట్రల్ బ్యాంకులపై ఎలాంటి ఆధారాలు లేని విమర్శలు చేయడం చాలా బాధాకరమన్నారు. కాగ, భారత సెంట్రల్ బ్యాంకు గవర్నర్గా రాజన్ రెండోసారి కొనసాగింపుపై, బీజేపీ ఫైర్ బ్రాండ్ సుబ్రహ్మణ్యం స్వామి నుంచి ఆయన విమర్శలు ఎదుర్కొన్న సంగతి తెలిసిందే. ఆర్బీఐ గవర్నర్ గా ఆయన పదవీ కాలం ఈ సెప్టెంబర్లో ముగియనున్న నేపథ్యంలో ఈ కామెంట్లు చేయడం గమనార్హం.


 న్యూఢిల్లీ: ఆర్‌బీఐ గవర్నర్‌గా రఘురామ్ రాజన్ కొన సాగితే బాగుంటుందని ఆర్‌బీఐ మాజీ గవర్నర్ డి.సుబ్బారావు తెలిపారు. రాజన్ కొనసాగింపు వల్ల దేశంలోని స్థూల ఆర్థిక వ్యవస్థ, దాని నిర్వహణ మరింత మెరుగుపడుతుందని అభిప్రాయపడ్డారు. ‘మరోదఫా ఆర్‌బీఐ గవర్నర్‌గా కొనసాగననే రాజన్ నిర్ణయం నాకు ఆశ్చర్యాన్ని కలిగించింది. ఆయన తన బాధ్యతలను ఎంతో బాగా నిర్వహించారు. రాజన్ గవర్నర్‌గా కొనసాగితే దేశ స్థూల ఆర్థిక నిర్వహణ ఎంతో ప్రయోజనాన్ని పొందుతుంది’ అని వివరించారు.
 ఆర్‌బీఐ తర్వాతి గవర్నర్‌గా ఎవరైతే బాగుంటుందనే ప్రశ్నకు బదులిస్తూ.. ఆర్థిక అంశాలపై పట్టులేకున్నా సరైన తెలివితేటలు, విజ్ఞానం, నాయకత్వ లక్షణాలు ఉంటే ఆర్‌బీఐని ముందుండి నడిపించవచ్చని చెప్పారు. దీనికి ఐఎంఎఫ్ చీఫ్ క్రిస్టిన్ లగార్డ్‌ను ఉదాహరణగా పేర్కొన్నారు. ఆమె ఆర్థికవేత్త కాదని, అయినా కూడా ఐఎంఎఫ్‌ను సమర్థంగా నడిపిస్తున్నారని కితాబిచ్చారు. బాధ్యతల నిర్వహణ అనేది వ్యక్తిపై ఆధారపడి ఉంటుందన్నారు.


 అధిక వడ్డీ రేట్ల విధానంపై విమర్శకులకు రాజన్ సవాల్
 పరిస్థితులు మెరుగైతే వృద్ధి అంచనాల్లో మార్పులు
 ప్రతీ గ్రామానికీ బ్యాంకు సాధ్యం కాదు
 పోస్ట్ బ్యాంకు, మొబైల్ కంపెనీల రాకతో పరిస్థితులు మారతాయని ఆశాభావం 
 ముంబై: అధిక వడ్డీ రేట్ల విధానంతో వృద్ధికి అడ్డుపడుతున్నారంటూ తనపై వస్తున్న విమర్శలను ఆర్‌బీఐ గవర్నర్ రఘురామ్ రాజన్ తిప్పికొట్టారు. తనను విమర్శించే వారు ముందుగా ద్రవ్యోల్బణం తక్కువ స్థాయిలోనే ఉందని చూపించాలంటూ సవాల్ చేశారు. అడ్డంకులున్నా దేశ జీడీపీ వృద్ధి సాధిస్తుందని ఆశాభావం వ్యక్తం చేశారు. మీ స్థానంలో గవర్నర్‌గా బాధ్యతలు చేపట్టే వ్యక్తికి ఎటువంటి సందేశం ఇవ్వాలనుకుంటున్నారన్న ప్రశ్నకు పరపతి విధానం (ఆగస్ట్ 9న) వరకు వేచి చూడాలని కోరారు. తన అనుభవాన్ని పుస్తక రూపంలో ఆవిష్కరించే ఆలోచన ప్రస్తుతానికి లేదని స్పష్టం చేశారు. పలు అంశాలపై రాజన్ మీడియా ప్రతినిధుల ముందు తన అభిప్రాయాలను ఆవిష్కరించారు.
  విమర్శకులకు సవాల్
 వడ్డీ రేట్లను అధిక స్థాయిలో ఉంచుతున్నారని, వృద్ధికి అడ్డు పడుతున్నారన్న విమర్శలపై నేను దృష్టి పెట్టను. వరుసగా నాలుగో నెల జూన్‌లోనూ వినియోగ ధరల సూచీ ఆధారిత ద్రవ్యోల్బణం పెరిగి 5.77 శాతానికి చేరుకున్న విషయం తెలిసిందే. మా పాలసీ రేటు 6.5 శాతంగానే ఉంది. ఈ అంశంపై జరిగే చర్చ ఆర్థిక ప్రాతిపదికన కాకుండా ఉండాలి’ అని అన్నారు. తనను విమర్శించే వారు... వడ్డీ రేట్లను తగ్గించేందుకు ద్రవ్యోల్బణం తక్కువగానే ఎలా ఉందో చెప్పాలని సవాల్ చేశారు. రిటైల్ ద్రవ్యోల్బణాన్ని 2 నుంచి 6 శాతం పరిధికే పరిమితం చేయాలన్నది ఆర్‌బీఐ లక్ష్యం. బీజేపీ నేత సుబ్రహ్మణ్యస్వామి సహా పలువురు ఇటీవలి కాలంలో రాజన్ విధానాలను తప్పుబట్టిన విషయం తెలిసిందే.
  వృద్ధి కోణం నుంచి...
 ‘ఆర్థిక రంగానికి సంబంధించి ప్రస్తుతమున్న సవాళ్లే కొంత కాలం పాటు కొనసాగుతాయి. ఆర్థిక పురోగతి తీరుపై ఎంతో నిరుత్సాహం నెలకొని ఉంది. కానీ, రెండేళ్ల వరుస కరువుతోపాటు అంతర్జాతీయంగా మందగమనం నెలకొని ఉంది. అలాగే, బ్రెగ్జిట్ వంటి పలు అంతర్జాతీయ పరిణామాలు సైతం ఎదురయ్యాయి. ఈ అడ్డంకులున్నా దేశీయ వృద్ధి మంచిగానే ఉంది. వర్షాలు తగినంత కురిస్తే వ్యవసాయ రంగం మెరుగుపడుతుంది. గ్రామీణ వినియోగం పెరగడం ద్వారా మొత్తం మీద ఆర్థిక రంగం ఊపందుకుంటుంది. కానీ, ఇవి అంచనాలే. వాస్తవంగా ఏం జరుగుతుందో చూడాలి’ అని రాజన్ వివరించారు. మంచి వర్షాలు కురిసి, అంతర్జాతీయ ఆర్థిక రంగం మెరుగుపడితే జీడీపీ 7.6 శాతంగా ఉంటుం దన్న తమ అంచనాల్లో మార్పు ఉంటుందన్నారు. వ్యవస్థాగత సంస్కరణల ప్రక్రియను వేగవంతం చేయాల్సి ఉందని చెప్పారు.
  బ్యాంకు శాఖలపై...
 అందరికీ ఆర్థిక సేవల అందుబాటు (ఫైనాన్షియల్ ఇంక్లూజన్) గురించి రాజన్ మాట్లాడుతూ... ‘ప్రతీ గ్రామంలో బ్యాంకు శాఖ ఉండడం అన్నది సాధ్యం అయ్యేది కాదు. చాలా ఖర్చుతో కూడిన వ్యవహారం. కొన్ని బ్యాంకులు మొబైల్ బ్రాంచ్‌లను ప్రారంభిస్తున్నాయి. వాహన రూపంలో ఉండే ఈ బ్రాంచ్ గ్రామాలలో తిరుగుతూ ప్రతీ గ్రామంలో నిర్ధిష్ట సమయం మేరకు సేవలు అందిస్తుంది. అలాగే, చిన్న, సూక్ష్మ శాఖల ఏర్పాటు కూడా పరిశీలనలో ఉంది. పోస్టల్ పేమెంట్ బ్యాంకుకు లెసైన్స్ జారీ చేశాం. మొబైల్ కంపెనీలు కూడా ఈ రంగంలోకి వస్తున్నాయి. ఓ మొబైల్ కంపెనీకి 1.5 లక్షల విక్రయ కేంద్రాలు ఉంటే వాటన్నింటి ద్వారా నగదు జమ, ఉపసంహరణకు అవకాశం ఏర్పడుతుంది. ఇది నిజంగా వ్యవస్థనే మార్చే పరిణామం. ఈ నెల చివరిలోపు రానున్న యూనివర్సల్ పేమెంట్ ఇంటర్‌ఫేస్ (యూపీఐ) ద్వారా నగదు బదిలీ సులభతరం కానుంది’ అని రాజన్ వివరించారు. 
  అనుభవాలపై పుస్తకం రాయను...
 రిజర్వ్ బ్యాంక్ గవర్నర్‌గా తన అనుభవాలకు అక్షర రూపం ఇచ్చే ఆలోచన ఇప్పటికైతే లేదని రఘురామ్ రాజన్ స్పష్టం చేశారు. ఆర్‌బీఐ మాజీ గవర్నర్ దువ్వూరి సుబ్బారావు తాజాగా తన అనుభవాలను ‘హు మూవ్డ్ మై ఇంట్రెస్ట్ రేట్’ పేరుతో పుస్తక రూపంలోకి తీసుకొచ్చిన విషయం తెలిసిందే. దీంతో విలేకరుల ప్రశ్నకు రాజన్ స్పందించారు. గవర్నర్ గిరీ నుంచి తప్పకున్న తర్వాత విద్యా సంబంధింత అంశాలపై మాత్రం పుస్తకాలు రాస్తానని చెప్పారు.
 బ్యాంకుల ఆందోళనలపై...
 రుణాల విషయంలో దర్యాప్తు సంస్థల నుంచి తమకు రక్షణ కల్పించాలన్న బ్యాంకర్ల డిమాండ్‌ను రాజన్ సమర్థించలేదు. ఈ విషయంలో నిబంధనల మేరకు నడచుకోవడమే రక్షణాత్మక విధానంగా సూచించారు. ‘రుణాల విషయంలో తాము తీసుకున్న చర్యలకు బాధ్యులను చేయరాదంటూ బ్యాంకర్లు తమ ఆందోళనను వ్యక్తం చేశారు. అయితే, రుణాలు ఇచ్చే ముందు తగిన జాగ్రత్తలు, విధానాల మేరకు నడచుకోవాలి. లేకుంటే ప్రక్షాళన సాధ్యం కాదు. రుణాల జారీలో బాధ్యతాయుతంగా వ్యవహరించి సరైన నిర్ణయాలు తీసుకుంటే... చర్యలకు వారు బాధ్యులు కారు. కానీ, ఒక్కోసారి నిర్ణయాల్లో తప్పిదం జరుగుతోంది’ అని రాజన్ తన అభిప్రాయాన్ని స్పష్టం చేశారు.


 ముంబై: ద్రవ్యోల్బణం కట్టడి చేయడంలో విఫలమయ్యారంటూ తనపై విమర్శిస్తున్న వారిపై ఆర్బీఐ గవర్నర్ రఘురాం రాజన్ తీవ్రంగా మండిపడ్డారు. తాను ద్రవ్యోల్బణం కట్టడి కన్నా ఆర్థిక వృద్ధి మీదనే ఎక్కువ దృష్టి పెట్టానని విమర్శించే ముందు.. ఎలా ద్రవ్యోల్బణాన్ని కనిష్ఠాస్థాయికి తగ్గించాలో చూపాలని ఆయన సవాల్ చేశారు. ఈ విషయంలో తనపై వస్తున్న విమర్శలు ఊసుపోని డైలాగులేనని ఆయన కొట్టిపారేశారు.
 
 ప్రభుత్వ విధానాల పట్ల తరచూ విమర్శనాత్మక వ్యాఖ్యలు చేసే రాజన్.. ఆర్థిక వ్యవస్థ వేగంగా కోలుకోవడంలో ఇలా ఇబ్బందికరమైన పరిణామాలు ఉన్నాయని, వరుసగా రెండు కరువులు, బలహీనంగా అంతర్జాతీయ ఆర్థిక వ్యవస్థ, బ్రెగ్జిట్ ఎలాంటి బహ్య పరిణామాలు ఆర్థిక వ్యవస్థ తిరిగి కోలుకోవడంలో ఆటంకాలు కలిగిస్తున్నాయని పేర్కొన్నారు. ఇలాంటి చిక్కులున్నా భారత ఆర్థిక వ్యవస్థ పనితీరు చాలా బాగుందని, రుతుపవనాలు బాగుండి, స్థూల ఆర్థిక వ్యవస్థ స్థిరత్వం కోసం నిర్మాణాత్మక సంస్కరణలు చేపడితే.. మన వృద్ధిరేటు మరింతగా పుంజుకుంటుందని ఆయన ఆశాభావం వ్యక్తం చేశారు. తన అనుభవాలను వివరిస్తూ త్వరలోనే తనకు పుస్తకం రాసే ఆలోచన లేదని రాజన్ స్పష్టం చేశారు.


 
 న్యూఢిల్లీ: రిజర్వ్ బ్యాంక్  గవర్నర్  పదవికి ప్రధానమంత్రి నరేంద్ర మోదీ ఎవరిని ఎంపిక చేయనున్నారనే దానిపై  భారీ అంచనాలు  కొనసాగుతూనే ఉన్నాయి. అటు గతంలో  కేంద్ర ప్రభుత్వం  ముగ్గురు  ప్రముఖుల పేర్లను షార్ట్ లిస్ట్ చేసినప్పటికీ ఈ  ఉత్కంఠకు తెరపడలేదు. ఈ పదవికోసం పనాగరియా ఎంపిక దాదాపు ఖాయం అన్న వార్తలు ఇటీవల ప్రముఖంగా వినిపించాయి.   కానీ ప్రభుత్వం నుంచి స్పష్టత రాలేదు.  ప్రస్తుత ఆర్బీఐ రఘురామ్ రాజన్ స్థానంలో ఎంపికయ్యే అవకాశాలున్నవారిలో ఇద్దరి పేర్లు  మరోసారి ప్రముఖంగా వినిపిస్తున్నాయి. ఈ రేస్ లో టాప్  ప్లేస్ లో దేశ ప్రధాన ఆర్థిక సలహాదారు  అరవింద్ సుబ్రమణియన్,  ఆర్బిఐ డిప్యూటీ గవర్నర్ ఊర్జిత్ పటేల్ పేర్లు  ఉన్నాయి.  త్వరలోనే  ప్రధాని నరేంద్ర మోదీ తుది నిర్ణయం తీసుకోనున్నారని ప్రభుత్వ వర్గాలు చెబుతున్నాయి.
 
  అరవింద్ సుబ్రహ్మణియన్  అహ్మదాబాద్ ఐఐఎం  పూర్వ విద్యార్ధి.  పీటర్సన్ ఇన్స్టిట్యూట్  ఫర్ ఇంటర్నేషనల్ ఎకనామిక్స్ కోసం  సీనియర్ ఫెలో గా ఉన్నారు. అలాగే అంతర్జాతీయ ద్రవ్య నిధి ఆర్థికవేత్తగా,  గ్లోబల్ డెవలప్మెంట్ సెంటర్ కు సీనియర్ ఫెలోగా పనిచేశారు.
 మరోవైపు,  ఊర్జిత్ పటేల్  ఐఐఎం అహ్మదాబాద్  పూర్వ విద్యార్థి అయిన  'ఫ్లెక్సిబుల్ ఇన్ ఫ్లేషన్ టార్గెటింగ్'  కమిటీకి నాయకత్వం   వహిస్తున్నారు. అంతర్జాతీయ ద్రవ్య నిధి ఆర్థికవేత్తగా బోస్టన్ కన్సల్టింగ్ గ్రూప్ కి పవర్ అండ్ ఇన్ఫ్రాస్ట్రక్చర్ రంగంలో మాజీ సలహాదారుగా  పనిచేసిన అనుభవం ఉంది. అమెరికాలోని యేల్ విశ్వవిద్యాలయం నుంచి పీహెచ్ డీ  చేశారు.   అంతర్జాతీయ ద్రవ్య నిధికి కూడా
 
 కాగా ఇంతకుముందు, ఎస్బీఐ ఛైర్ పర్సన్  అరుంధతి భట్టాచార్య , ఆర్థిక సలహదారు శక్తికాంత్ దాస్ పేర్లు  ఈ జాబితాలో  ప్రముఖంగా వినిపించాయ.  కేంద్ర బ్యాంకు గవర్నర్ రఘురామ  రాజన్  పదవీకాలం ఈ  సెప్టెంబర్ 4 న ముగియనుంది. మరో టర్మ్ గవర్నర్‌గా కొనసాగదలుచుకోలేదని స్వయంగా ఆయనే ప్రకటించారు. ప్రభుత్వంతో చర్చించాకే ఈ నిర్ణయం తీసుకున్నట్టు రాజన్ వెల్లడించిన సంగతి తెలిసిందే. ఆర్థిక మంత్రిత్వ శాఖలో ప్రధాన ఆర్థిక సలహాదారుగా విధులు నిర్వర్తిస్తున్న అరవింద్‌ సుబ్రమణియన్, ఆర్బీఐ గవర్నర్‌గా బాధ్యతలు స్వీకరించే అవకాశాలున్నాయని విదేశీ మీడియా  ఇటీవల పేర్కొనడం విశేషం.
 
  


 ఈ వారంలోనే ఆర్‌బీఐ కొత్త గవర్నర్ ప్రకటన!
 న్యూఢిల్లీ: రిజర్వు బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ వారసుడిగా నీతి ఆయోగ్ వైస్ చైర్మన్ అరవింద్ పనగరియా నియమితులు కానున్నారా? దీనికి సంబంధించిన ప్రకటన ఈ వారంలోనే వెలువడనున్నదా? అవుననే అంటున్నాయి ఆర్థిక వర్గాలు. విశ్వసనీయ సమాచారం మేరకు.. రాజన్ తర్వాత ఆర్‌బీఐ గవర్నర్‌గా అరవింద్ పనగరియా పేరు దాదాపు ఖరారయింది. ఈయనతోపాటు ఆర్‌బీఐ మాజీ డిప్యూటీ గవర్నర్లు సుబీర్ గోకర్ణ్, రాకేశ్ మోహన్, ఎస్‌బీఐ చీఫ్ అరుంధతీ భట్టాచార్య వంటి ప్రముఖులు కూడా పోటీలో ఉన్నా... పనగరియావైపే ప్రభుత్వం మొగ్గు చూపుతున్నట్లు తెలిసింది. ప్రధాని మోదీ విదేశీ పర్యటన ముగించుకొని స్వదేశానికి తిరిగొచ్చాక ఈ మేరకు ప్రకటన ఉంటుందని సమాచారం. రాజన్ పదవీ కాలం సెప్టెంబర్ 4న ముగుస్తుంది.
  ఏడీబీ చీఫ్ ఎకనమిస్టుగానూ....
 ♦ అరవింద్ పనగరియా గతేడాది జనవరి 5న నీతి ఆయోగ్ వైస్ చైర్మన్‌గా నియమితులయ్యారు.
 ♦ అంతకు ముందు ఆయన ఆసియా అభివృద్ధి బ్యాంకు చీఫ్ ఎకనమిస్ట్‌గా పనిచేశారు. ఐఎంఎఫ్, ప్రపంచ బ్యాంక్ వంటి సంస్థల్లో విధులు నిర్వహించారు.
 ♦ ఇంటర్నేషనల్ ట్రేడ్ అంశంలో పనగరియాకు అపార అనుభవం ఉంది.
 ♦ 2012 మార్చిలో పద్మభూషణ్ అవార్డు ప్రకటించారు. స్వస్థలం రాజస్థాన్. ప్రిన్స్‌టన్ యూనివర్సిటీ నుంచి ఎకనమిక్స్‌లో పీహెచ్‌డీ పొందారు. 


 ఆర్ బీఐ గవర్నర్ రఘురామ్ రాజన్ ఎగ్జిట్ పై జరిగిన తతంగమంతా అనవసర చర్చని మాజీ ఆర్థికమంత్రి యశ్వంత్ సిన్హా వ్యాఖ్యానించారు. కేవలం ఒకే ఒక్క వ్యక్తిపై ఇంత పెద్ద దేశం ఆధారపడదని, రెగ్జిట్ ప్రకటన కొంత వివాదస్పదకు దారితీసిందని నొక్కి చెప్పారు. రాజన్ దేశానికి ప్రధాన మంత్రేమి కాదని, కనీసం ఆర్థిక మంత్రి కూడా కాదన్నారు.  ఆర్థిక వ్యవస్థలో అతనికి కేటాయించిన బాధ్యతను అతను విజయవంతంగా నిర్వర్తించాడని సిన్హా పేర్కొన్నారు.
 చాలామంది గవర్నర్లు తమ బాధ్యతలను సమర్థవంతంగా నిర్వర్తించారని, ఎలాంటి సమస్యలు రాలేదని చెప్పారు. రఘురామ్ రాజన్ చుట్టూ జరిగిన వివాదాలు పూర్తిగా తోసిపుచ్చాల్సిన అంశాలని వ్యాఖ్యానించారు. కేవలం హైప్ క్రియేట్ చేయడానికి ఈ అనవసరం చర్చంతా జరిగిందని చెప్పారు. రెగ్జిట్ జరిగితే, భారత ఆర్థికవ్యవస్థ కుప్పకూలుతుందనే కామెంట్లను ఆయన కొట్టిపారేశారు. ఒక వ్యక్తి కంటే దేశం పెద్దదని రెగ్జిట్ ప్రభావం దేశ ఆర్థికవ్యవస్థపై ఉండదని పేర్కొన్నారు.  
 
 ఆహార ధరల ద్రవ్యోల్బణం టార్గెట్ కంటే టోకుఆధారిత ద్రవ్యోల్బణంపై పోరాడటం మంచి విధానమని, కఠిన ద్రవ్యవిధాన వైఖరి పెట్టుబడులు, ఆహార ధరలపై నెగిటివ్ ప్రభావం చూపిందన్నారు. నెగిటివ్ డబ్ల్యూపీఐ తో కఠిన ద్రవ్యవిధాన వైఖరి ఏమీ సాధించదని సిన్హా ఎకనామిక్ టైమ్స్ కి ఇచ్చిన ఇంటర్వ్యూలో పేర్కొన్నారు. వడ్డీరేట్ల పెంపు, పెట్టుబడులను తగ్గించదనే అభిప్రాయం వెల్లబుచ్చారు. కాని ఆహార కొనుగోలుల్లో ఎలాంటి ప్రభావం చూపలేదన్నారు.


 ♦ గవర్నర్ రఘురామ్ రాజన్ అభిప్రాయం
 ♦ కనీసం నాలుగేళ్లు ఉండాలని సూచన
 ♦ ఆర్థిక వ్యవస్థపై పార్లమెంటు కమిటీకి వివరణ
 ♦ ఆర్థికమంత్రి జైట్లీతోనూ భేటీ
 న్యూఢిల్లీ: రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ పదవీకాలం ప్రస్తుతం ఉన్నట్టుగా మూడేళ్లు సరిపోదని ఆర్‌బీఐ గవర్నర్ రఘురామ్ రాజన్ అభిప్రాయపడ్డారు. ఈ విషయంలో అంతర్జాతీయంగా పలు దేశాలు అనుసరిస్తున్న విధానాన్ని భారత్ కూడా అనుసరించాలనీ సూచించారు. మరో 9 వారాల్లో (సెప్టెంబర్ 4న) తన పదవీ కాలం పూర్తి చేసుకుంటున్న నేపథ్యంలో రాజన్ ఈ కీలక అభిప్రాయాన్ని వెల్లడించడం గమనార్హం. భారత్ ఆర్థిక వ్యవస్థ తీరుతెన్నులు, బ్యాంకింగ్‌లో మొండిబకాయిల తీవ్రత వంటి అంశాలపై గురువారం ఆయన పార్లమెంటరీ ఆర్థిక వ్యవహారాల స్థాయి సంఘం ముందు వివరణ ఇచ్చారు.
 ఈ సందర్భంగా కమిటీ సభ్యులడిగిన ప్రశ్నకు రాజన్ సమాధానమిస్తూ... ఆర్‌బీఐ గవర్నర్ పదవీకాలం మూడేళ్లు స్వల్ప వ్యవధి అని అభిప్రాయపడ్డట్లు అత్యున్నత స్థాయి వర్గాలు చెప్పాయి. కనీసం నాలుగేళ్లు ఈ పదవీకాలం ఉండాలని సూచించినట్లు సమాచారం. ఈ సందర్భంగా ఆయన అమెరికా ఫెడరల్ రిజర్వ్  చైర్మన్, వైస్‌చైర్మన్ పదవులకున్న నాలుగేళ్ల పదవీకాలం విషయాన్ని కూడా ప్రస్తావించినట్లు తెలిసింది. సెప్టెంబర్ 4న రిటైరవుతున్న రాజన్, ‘ చేయాల్సింది మరెంతో ఉంది’ అంటూ ఈ పదవిలో రెండవ విడత కొనసాగడానికి తొలుత ఉత్సుకత చూపించారు. అయితే బీజేపీ సీనియర్ నాయకుడు సుబ్రమణ్యస్వామి విమర్శల నేపథ్యంలో తాను రేసులో లేనని ఇటీవలే ప్రకటించారు.  తాజా సమావేశానికి సంబంధించిన మరిన్ని అంశాలను చూస్తే...
 ⇔ మూడు గంటల పాటు జరిగిన ఈ సమావేశంలో కాంగ్రెస్ సీనియర్ నాయకుడు ఎం.వీరప్ప మొయిలీ నేతృత్వంలోని కమిటీ పాల్గొంది. ఆర్థిక వ్యవస్థ, సంస్కరణలు, ఆర్‌బీఐ పునర్‌వ్యవస్థీకరణ, బ్యాంకింగ్ రంగంలో సవాళ్లు, పరిష్కారం వంటి పలు అంశాలు చర్చకు వచ్చాయి.
 ⇔ ఎన్‌పీఏల పరిష్కారానికి తీసుకుంటున్న పలు చర్యలను రాజన్ వివ రించారు. మార్చి 2016 నాటికి 7.6 శాతంగా ఉన్న ఎన్‌పీఏలు 2017 మార్చి నాటికి 9.3 శాతానికి చేరతాయని ఆర్‌బీఐ ఇప్పటికే పేర్కొంది.
 ⇔ బ్యాంకింగ్ రుణ వృద్ధి తీరు ప్రస్తావనకు వచ్చింది. రుణాల మంజూరీలో ప్రభుత్వ రంగం బ్యాంకుల కన్నా... ప్రైవేటు రంగంలో బ్యాంక్‌లు క్రియాశీలకంగా ఉన్నాయి. నిధుల కొరత లేకున్నా, ప్రభుత్వ రంగ బ్యాంకులు రుణ మంజూరీలో వెనకడుగు వేస్తున్నాయని రాజన్ వివరించారు.
 ⇔ బ్రెగ్జిట్, అంతర్జాతీయ ఆర్థిక వ్యవస్థ, భారత్‌పై ప్రభావం వంటి అంశాలు చర్చల్లో చోటుచేసుకున్నాయి.
 రెగ్జిట్ ప్రభావం ఉండదు: సీఐఐ
 ఆర్‌బీఐ గవర్నర్‌గా రాజన్ పదవీ విరమణ (రెగ్జిట్) ప్రభావం ఆర్థిక వ్యవస్థపై, ఇన్వెస్టర్ సెంటిమెంట్‌పై ప్రతికూలత ఏదీ చూపబోదని పారిశ్రామిక సమాఖ్య సీఐఐ ప్రెసిడెంట్ నౌషాద్ ఫోర్బ్స్ పేర్కొన్నారు. రాజన్ వారసుడిగా మరొక సమర్థమైన వ్యక్తి పేరును కేంద్రం త్వరలో ప్రకటిస్తుందని కూడా ఆయన ఒక ఇంటర్వ్యూలో చెప్పారు. తద్వారా ఈ విషయంలో అనిశ్చితి, సందేహాలు తొలగిపోవాలన్నది తమ ఉద్దేశమని పేర్కొన్నారు. వృద్ధికి సంబంధించి భారత్ పటిష్ట స్థానంలో ఉందని, భారత్ వంటి అతిపెద్ద, సంక్లిష్ట ఆర్థిక వ్యవస్థపై ఒక వ్యక్తి ప్రభావం ఉండబోదని వివరించారు.
 ఎంపీసీపై జైట్లీతో చర్చలు!
 పార్లమెంటరీ కమిటీతో సమావేశానికి ముందు రాజన్ ఆర్థికమంత్రి అరుణ్‌జైట్లీతో కూడా సమావేశమయ్యారు.  రెపో రేటును (బ్యాంకులకు తానిచ్చే రుణాలపై ఆర్‌బీఐ వసూలు చేసే వడ్డీరేటు) విస్తృత మెజారిటీ అభిప్రాయ ప్రాతిపదికన నిర్ణయించడంపై ఆరుగురు సభ్యుల పరపతి విధాన కమిటీ (ఎంపీసీ) ఏర్పాటుకు సంబంధించి జైట్లీతో రాజన్ చర్చించినట్లు తెలియవచ్చింది. ఈ యంత్రాంగాన్ని వీలయినంత త్వరగా ఏర్పాటు చేయాలని ఆయన సూచించారు. సమావేశం అనంతరం రాజన్ విలేకరులతో ఈ అంశంపైనే మాట్లాడుతూ, ఎంపీసీ ఏర్పాటుకు ప్రభుత్వం, ఆర్‌బీఐ కృషి చేస్తున్నట్లు తెలిపారు.
 తదుపరి పాలసీ సమీక్ష ఆగస్టు 9 నాటికి  ఈ కమిటీ ఏర్పడుతుందా? అన్న ప్రశ్నకు సమాధానం చెబుతూ, ‘‘ తగిన వ్యవస్థను ఏర్పాటు చేస్తున్నాం. ఆ పని ఎంతవరకూ జరుగుతుందో వేచి చూద్దాం’ అని అన్నారు.  ప్రస్తుతం రెపో రేటుపై టెక్నికల్ అడ్వైజరీ కమిటీ సిఫారసులు చేస్తున్నా... వీటిని తోసిపుచ్చి, ఆర్‌బీఐ గవర్నర్ దీనిపై నిర్ణయం తీసుకునే వీలుంది. కాకపోతే తాజా ప్రతిపాదనల ప్రకారం ఆరుగురు సభ్యులు ప్రతిపాదిత ఎంపీసీలో ఉంటారు. మెజారిటీ ప్రాతిపదికన రెపో రేటు నిర్ణయం ఉంటుంది. ఒకవేళ సంఖ్య సమానమైతే... ఆర్‌బీఐ గవర్నర్ ఓటుతో నిర్ణయం ఖరారవుతుంది.


 భారత ప్రధానిగా బాధ్యతలను స్వీకరించిన తర్వాత రెండేళ్లకు నరేంద్ర మోదీ తొలిసారిగా సోమవారం మీడియాతో మాట్లాడటం ఆహ్వానించదగిన మార్పు. దేశం ఎదుర్కొంటున్న వివిధ సమస్యలపైన, పలు వివాదాస్పద అంశాలపైన ప్రధాని అభిప్రాయాలను ప్రజలు తెలుసుకోవాలని కోరుకుంటున్న సమయంలో పత్రికా సమావేశాన్ని నిర్వహించడానికి బదులు ఆయన ఒక ప్రైవేటు టీవీ చానల్‌తో మాట్లాడాలని భావించడం ఆశ్చర్యకరమే. ఏది ఏమైనా ఎన్‌ఎస్‌జీ నుంచి ఉగ్రవాదం వరకు, విదేశాంగ విధానం నుంచి వివిధ సామాజిక ఆర్థిక సమస్యల వరకు పలు అంశాలు ఆ ఇంటర్వ్యూలో చర్చకు వచ్చాయి. అయితే రిజర్వ్ బ్యాంకు గవర్నర్ రఘురామ్ రాజన్‌పై బీజేపీ పార్లమెంటు సభ్యుడు సుబ్రహ్మణ్యంస్వామి చేసిన వ్యాఖ్యాలపై ప్రధాని స్పందనే పతాక శీర్షికలకు ఎక్కడం విశేషం.
 
 రాజన్ దేశభక్తిని శంకించడాన్ని మోదీ ఖండించడమేగాక, ఆర్‌బీఐ గవర్నర్‌గా ఆయన ప్రశంసనీయమైన కృషిచేశారని స్పష్టం చేశారు. రాజన్‌కు రెండో దఫా అవకాశం ఇవ్వరాదంటూ సాగిన ప్రచారానికి, తమ ప్రభుత్వానికి ఎలాంటి సంబంధమూ లేదని స్పష్టం చేయగలిగారు. యూపీఏ హయాం నాటి రాజన్‌పైనే గాక ఎన్డీఏ ప్రభుత్వం నియమించిన ముఖ్య ఆర్థిక సలహాదారు అరవింద సుబ్రహ్మణ్యం, ఆర్థిక వ్యవహారాల కార్యదర్శి శాంతికాంత దాస్‌లపైన కూడా స్వామి దాడి సాగించారు. తమ పార్టీకే చెందిన ఒక పార్లమెంటు సభ్యుడు బాధ్యతారహితంగా రాజేసిన దుమారాన్ని మోదీ కేవల ప్రచార విన్యాసాలుగా కొట్టిపారేసి, మీడియా అలాంటి వాటికి ప్రాధాన్యం ఇవ్వరాదని హితవు పలికారు. సంచలనాత్మకతకు, వివాదాస్పద వ్యాఖ్యలతో వార్తలకెక్కే ప్రముఖులకు ప్రాధాన్యాన్నిచ్చే ధోరణి మీడియాలో ఉన్న మాట వాస్తవమే. అలాంటి పెడ ధోరణులకు దూరంగా ఉండాల్సిన బాధ్యత మీడియాపై ఉన్నదనేదీ వాస్తవమే.
 కానీ నూట ఇరవై ఐదు కోట్ల ప్రజలను పాలించే ప్రభుత్వానికి నేతృత్వం వహిస్తున్న పార్టీకి తమ నేతలు, ప్రజా ప్రతినిధులు బాధ్యతాయుతంగా, క్రమశిక్షణాయుతంగా వ్యవహరించేట్టు చేయవలసిన బాధ్యత లేదా? రాజన్‌ను రెండో దఫా గవర్నర్‌గా నియమించడంపై రెండు నెలలుగా అవాంఛనీయమైన రభస జరుగుతుండగా మిన్నకుండి... మరో దఫా ఆ బాధ్యతలను స్వీకరించేది లేదని ఆయన ప్రకటించిన తర్వాత ప్రధాని నోరు విప్పడంలోని ఔచిత్యం ఏమిటనే సందేహం తలెత్తదా? ఆలస్యంగానైనా ప్రధాని ఆర్‌బీఐ గవర్నర్‌పై, ఉన్నతాధికారులపై అధికార పార్టీ నేతలు నోరు పారేసుకోరాదనే హెచ్చరికను పంపడం ఆహ్వానించదగిన పరిణామాలు.
 
 స్వామి విషయంలోలాగే మతోన్మాదాన్ని రెచ్చగొట్టే వ్యాఖ్యలను చేస్తున్న కొందరు మంత్రులు, బీజేపీ నేతల విషయంలో కూడా మీడియా వారిని పట్టిం చుకోకపోతే, వారిని హీరోలను చేయకపోతే వారే దారికి వస్తారని ప్రధాని హితవు చెప్పడం, ఈ సమస్యకు కూడా అభివృద్ధే పరిష్కారమని సరిపుచ్చడం విభ్రాం తికరం. అలాంటివారి రెచ్చగొట్టే వ్యాఖ్యలు దేశంలోని మైనారిటీలలో ప్రత్యేకించి ముస్లింలలో అభద్రతా భావాన్ని పెంచుతున్న వాస్తవాన్ని ఇలాంటి దాటవేతలు కప్పిపుచ్చలేవు. అందుకు రుజువన్నట్టుగా ఈనెల 10న హరియాణాలో గోమాం సాన్ని సరఫరా చేస్తున్న ఇద్దరు వ్యక్తులను గోసంరక్షణ కార్యకర్తలు పట్టుకుని చితగ్గొట్టి, గోమూత్రాన్ని తాగించి, పేడ తినిపించిన హేయమైన ఘటన వీడియో తాజాగా వెలుగు చూసింది. గత ఏడాది గోమాంసం తిన్నారన్న ఆరోపణపై ఒక వ్యక్తిని కొట్టి చంపేసిన దాద్రీ ఘటనపై తీవ్ర విమర్శలు వెల్లువెత్తిన తదుపరి రక్షణ స్థితిలో పడ్డట్టనిపించిన ప్రభుత్వం, బీజేపీ ఆ తదుపరి పట్టనట్టు వ్యవహరించడం వల్లనే ఇలాంటి ఘటనలు పునరావృతమౌతున్నాయి.
 
 అందుకు మీడియా కారణం గానే హీరోలవుతున్నారని ప్రధాని అంటున్న నేతలే ఆజ్యం పోస్తున్నారు. అధికార పార్టీలో అంతర్మథనం, పునరాలోచన అవసరమైన ఒక పెద్ద సమస్యను కేవలం మీడియాకు సంబంధించిన సమస్యగా చూపడం ద్వారా ప్రధాని దేశానికి అనుద్దేశ పూర్వకంగానే అయినా తప్పుడు సంకేతాలను పంపారు. యువత, ప్రత్యేకించి పట్టణ, విద్యాంతులైన యువత ఇలాంటి వైషమ్యపూరిత, సంఘర్షణాత్మక వాతా వరణాన్ని కోరుకోవడం లేదు. ప్రధానే అన్నట్టు 30 ఏళ్ల తర్వాత ప్రజలు కేంద్రంలో మెజారిటీ ప్రభుత్వానికి పట్టంగట్టారు. మోదీ తెస్తానన్న మార్పులో విశ్వాసం ఉంచారు. పట్టణ, విద్యావంతులు సహా యువత మోదీపై ఆశలను పెట్టుకుంది.
 
 2014 ఎన్నికల్లో బీజేపీ దేశ చరిత్రలోనే అత్యంత తక్కువ ఓట్లతో, కేవలం 31 శాతం ఓట్లతో లోక్‌సభలోని 520 స్థానాలలో 283 స్థానాలను గెలుచుకోగలిగింది. 18-22 ఏళ్ల ప్రాయంలోని నవ యువత 47 శాతం మోదీకి ఓటు చేశారని అంచనా. ఏటా కోటి కొత్త ఉద్యోగాలను సృష్టిస్తామన్న వాగ్దానాన్ని యువత విశ్వసించింది. అది కష్టసాధ్యమైన లక్ష్యమే అయినా  ఆ కొలబద్దతోనే వారు మోదీ పని తీరును చూస్తారు. కాగా,  2014-15లో కేవలం 5,00,000 కొత్త ఉద్యోగాలను సృష్టిస్తే,  2015-16లో ప్రథమార్థ భాగంలో మరింత అధ్వానంగా అది 95,000కు దిగజారింది. 2019 ఎన్నికల నాటికి 12.5 కోట్ల మంది కొత్త ఓటర్లు కీలక తీర్పరులుగా మారనున్నారు. విదేశీ పర్యటనలకే ప్రాధాన్యాన్నిస్తూ జాతీయ సమస్యలపై దృష్టిని కేంద్రీకరించలేకపోతున్నారనే విమర్శలను ప్రధాని తరచుగా ఎదుర్కోవాల్సి వస్తోంది.
 
 అందుకు తగ్గట్టుగానే మోదీ ఇంటర్వ్యూలో విదేశాంగ విధానం, గత ప్రభుత్వ వైఫల్యాలు ప్రధానంగా చర్చకు వచ్చాయి. దేశ ప్రజలంతా ఎదురు చూస్తున్న ఆర్థికరంగ మెరుగుదల, ఆహార ద్రవ్యోల్బణాన్ని, ప్రత్యేకించి అనూహ్యంగా పెరిగిన పప్పుల ధరలను నియంత్రించడంపై ప్రధాని భరోసాను కల్పించలేకపోయారు. విదేశాలలో దాచిన నల్లధనాన్ని రప్పించి భారత పౌరులు ఒక్కొక్కరి ఖాతాలో రూ. 15,00,000 జమ చేస్తామన్న బీజేపీ వాగ్దానంపై సైతం మోదీ సంతృప్తికరమైన సమాధానం చెప్పలేకపోయారు. పైగా గత ప్రభుత్వం వైఫల్యాలను ఏకరువు పెట్టారు. బ్యాంకుల మొండి బకాయిలవల్ల మన బ్యాంకింగ్ వ్యవస్థకు ఉన్న ముప్పు ఆరు నెలల కంటే నేడు మరింత పెరిగిందని తాజా ఆర్‌బీఐ ఫైనాన్సియల్ స్టెబిలిటీ రిపోర్ట్ పేర్కొంది. మన బ్యాంకింగ్ వ్యవస్థను కుంగదీసున్న ఈ మొండి బకాయిలపై ప్రధాని ప్రభుత్వ వైఖరిని స్పష్టపరచలేదు. ఏదిఏమైనా మీడియా ద్వారా ప్రజలతో ప్రత్యక్ష సంభాషణ దిశగా ప్రధాని మోదీ వేసిన ఈ తొలి అడుగును స్వాగతించాల్సిందే.
  


 పబ్లిసిటీ నన్నే వెంటాడుతోంది..
 
 పబ్లిసిటీ మోజుతోనే బీజేపీ ఎంపీ సుబ్రహ్మణ్యస్వామి ఆరోపణలు చేస్తున్నారంటూ ఆయన వ్యాఖ్యలను ప్రధానమంత్రి నరేంద్రమోదీ తోసిపుచ్చారు. కానీ సుబ్రహ్మణ్యస్వామి మాత్రం పబ్లిసిటీ కోసం తానేమీ చేయడం లేదని, పబ్లిసిటీనే తనను వెంటాడుతోందని చెప్తున్నారు.
 
 తనను మోదీ ఏమన్నా.. ఆయనకు తాను అండగా ఉంటానని చెప్పుకొచ్చిన స్వామి.. పనిలోపనిగా మీడియాపై మండిపడ్డారు. మీడియా కావాలనే తప్పుడు కథనాలు రాసి.. తనను రెచ్చగొట్టాలని చూస్తోందని అన్నారు. ‘పబ్లిసిటీయే స్వయంగా ఓ రాజకీయ నాయకుడిని వెంటాడటం నిజంగా కొత్త సమస్యే. నా ఇంటి ముందు 30వరకు ఓబీ లైవ్ వ్యాన్లు ఉంటాయి. రోజూ చానెళ్లు, జర్నలిస్టుల నుంచి 200కుపైగా మిస్డ్ కాల్స్‌ నాకు వస్తాయి’ అని స్వామి ట్వీట్ చేశారు.
 
 ‘నన్ను రెచ్చగొట్టాలనే ఆశతో ప్రెస్టిట్యూట్లు రోజూ ఉద్దేశపూరితంగా తప్పుడు కథనాలు రాస్తున్నారు. హా వాళ్ల ఆశ చూడండి’ అని మరో ట్వీట్ పేర్కొన్నారు. నేను ఇంతకుముందు చెప్పాను. ఇప్పుడు చెప్తున్నాను. ఏదిఏమైనా ఎన్ని కష్టాలు వచ్చినా మోదీకి నేను అండగా ఉంటాను. ఆయన ధైర్యాన్ని నేను మెచ్చుకుంటాను. ఆయనను ఏ విదేశీ శక్తి అణచలేదు’ అని స్వామి అన్నారు. ఆర్బీఐ గవర్నర్ రఘురాం రాజన్, ఆర్థిక అధికారులపై స్వామి చేసిన ఆరోపణలను ప్రధాని మోదీ నిర్ద్వంద్వంగా తోసిపుచ్చిన సంగతి తెలిసిందే.
  


 దీటుగా ఎదుర్కొనే సత్తా భారత్ ఆర్థిక వ్యవస్థకు ఉంది..
 ♦ ఆర్‌బీఐ ఫైనాన్షియల్ స్టెబిలిటీ నివేదిక
 ♦ ప్రపంచ ఆర్థిక అనిశ్చితులు, ఎన్‌పీఏలపై భయం అక్కర్లేదని భరోసా
 ముంబై: వర్థమాన దేశాల్లో భారత్ ఆర్థిక వ్యవస్థ చక్కటి పనితీరు ప్రదర్శిస్తోందని రిజర్వ్ బ్యాంక్ ఆఫ్ ఇండియా (ఆర్‌బీఐ) ఫైనాన్షియల్ స్టెబిలిటీ నివేదిక (ఎఫ్‌ఎస్‌ఆర్) పేర్కొంది. అంతర్జాతీయ ఆర్థిక అనిశ్చితి పరిస్థితులు, బ్యాంకింగ్ రంగ సమస్యలు ఉన్నప్పటికీ భారత్ ఆర్థిక వ్యవస్థకు వీటిని తట్టుకుని నిలబడే సత్తా  ఉందనీ వివరించింది. ఆర్‌బీఐ గవర్నర్ రఘురామ్ రాజన్ మంగళవారం నివేదికను విడుదల చేశారు.  నివేదికలో రాజన్ తొలి వాక్యం రాస్తూ... రుణ వృద్ధి వేగానికి తొలుత బ్యాంకింగ్ మొండిబకాయిల సమస్య పరిష్కారం అవసరమని పేర్కొన్నారు. నివేదికలోని మరిన్ని ముఖ్యాంశాలు...
 ⇔ వర్థమాన దేశాల్లో భారత్ వృద్ధి తీరు బాగుంది.  భారత్ ఫైనాన్షియల్ వ్యవస్థ స్థిరంగా కొనసాగుతోంది.
 ⇔ కమోడిటీ ముఖ్యంగా చమురు ధరలు తక్కువగా ఉండటం సానుకూల అంశం. ఇందుకు సంబంధించి జీ-20 దేశాల్లో అత్యధిక వాణిజ్య ప్రయోజనాలను పొందిన దేశం భారత్ అని అంతర్జాతీయ ద్రవ్యనిధి సంస్థ అంచనావేసింది.
 ⇔ ఆర్థిక వ్యవస్థ పటిష్ట  వృద్ధికి భారీగా పెట్టుబడులు పెరగడం, వినియోగ వృద్ధి అవసరం.
 ⇔ తగిన స్థాయిలో విదేశీ మారకద్రవ్య నిల్వలు (363.83 బిలియన్ డాలర్లు), తక్కువ స్థాయి వాణిజ్యలోటు అంతర్జాతీయంగా భారత్‌కు లాభదాయక అంశాలు.
 ⇔ రెవెన్యూ లోటును తగ్గించుకోడానికి ప్రయత్నాలు జరుగుతున్నాయి. సబ్సిడీలు దుర్వినియోగం కాకుండా ఈ విభాగంలో హేతుబద్ధీకరణకూ కృషి కొనసాగుతోంది. అయితే పన్ను ఆదాయాలు మరింత పెరగాలి. ఇందుకు ట్యాక్స్ బేస్ మరింత విస్తృతం కావాల్సి ఉంది.
 ⇔ 2016 మార్చిలో 7.6 శాతంగా ఉన్న ఎన్‌పీఏలు ప్రస్తుత ఆర్థిక సంవత్సరం ముగిసే నాటికి 8.5% నుంచి 9.3 శాతం శ్రేణిలో ఉండే అవకాశాలు ఉన్నాయి. 2015లో ఎన్‌పీఏలు 5.1 శాతం.
 ⇔ 2015-16 మధ్య కార్పొరేట్ల ఇబ్బందులు కాస్త తగ్గుముఖం పట్టాయి. రుణ ఒత్తిడిలో ఉన్న కంపెనీల రేటు మార్చి 2015లో 19 శాతంకాగా 2016 మార్చిలో ఈ రేటు 14 శాతానికి తగ్గింది.
 ⇔ జూన్ 7న రేటు నిర్ణయానికి మెజారిటీనే ప్రాతిపదిక!
 
 జూన్ 7వ తేదీన రిజర్వ్ బ్యాంక్ ఆఫ్ ఇండియా బ్యాంకులకు తానిచ్చే రుణాలపై వసూలు చేసే వడ్డీరేటు- రెపోను యథాతథంగా 6.50 వద్దే ఉంచుతూ నిర్ణయం తీసుకుంది. అయితే ఈ నిర్ణయాన్ని ఆర్‌బీఐ గవర్నర్ రఘురామ్ రాజన్ టెక్నికల్ అడ్వైజరీ కమిటీ (టీఏసీ) ఏకాభిప్రాయం ప్రాతిపదికన తీసుకున్నారు. మంగళవారంనాడు ఇందుకు సంబంధించి మినిట్స్ అంశాలు వెల్లడయ్యాయి. ఐదుగురు సభ్యుల కమిటీలో ముగ్గురు రేటు కోతకు వ్యతిరేకంగా నిర్ణయం తీసుకున్నారు, ముందు ద్రవ్యోల్బణం 5% స్థాయికి రావాలని, అటు తర్వాతే రేటు కోత సమంజసమని పేర్కొన్నారు. అప్పటికి మరో వారం రోజుల్లో వెలువడనున్న అమెరికా ఫెడ్ ఫండ్ రేటు నిర్ణయానికి వేచి చూడాలనీ వారు సూచించారు.  కాగా మరో ఇరువురు సభ్యులు మాత్రం పాలసీ రేటును పావుశాతం తగ్గించాలని సూచించారు.  మే 24-30 తేదీల మధ్య ఆన్‌లైన్ ద్వారా  టీఏసీ సభ్యులు తమ అభిప్రాయాలను తెలిపారు. ప్రస్తుత విధానం ప్రకారం... వీరి అభిప్రాయాలతో పనిలేకుండా ఆర్‌బీఐ గవర్నర్ రెపో రేటు నిర్ణయం తీసుకునే వీలుంది.
 ఎన్‌పీఏల సమస్య పరిష్కారం కీలకం: రాజన్
 మొండిబకాయిల పరిష్కారం తక్షణం కీలకాంశమని నివేదిక తొలి వాక్యంలో రాజన్ పేర్కొన్నారు. పటిష్ట దేశీయ విధానాలు, సంస్కరణలు ఇందుకు అవసరమని అన్నారు. కార్పొరేట్ రంగంలో ఉన్న ఒత్తిడికి బ్యాంకింగ్ రంగంలో మొండిబకాయిలు ప్రతిబింబమని కూడా ఆయన వ్యాఖ్యానించారు. దేశంలో వ్యాపార నిర్వహణకు ఉన్న పలు అడ్డంకుల పరిష్కారం దిశలో సంస్కరణలు మొండిబకాయిల సమస్య పరిష్కారానికీ దోహదపడతాయని వివరించారు. అంతర్జాతీయంగా ఆర్థిక ఒడిదుడుకులను తట్టుకుని నిలబడే పరిస్థితి ఉన్నా... దేశీయంగా వ్యవస్థీకృత సంస్కరణల అమలూ వృద్ధి పటిష్టతకు కీలకమని వివరించారు. అలాగే ఆర్‌బీఐ విధాన రుణ రేటు ప్రయోజనం బ్యాంకింగ్ కస్టమర్లకు బదలాయించే వెసులుబాటు కల్పించేలా చర్యలు అవసరమన్నారు.


 ప్రచార యావతో ఒరిగేదేం లేదు: ప్రధాని మోదీ
 - ఆర్‌బీఐ గవర్నర్ రఘురాం రాజన్ నిజమైన దేశభక్తుడు
 - సుబ్రమణ్య స్వామిపై పరోక్ష విమర్శలు
 - ఎన్‌ఎస్జీలో సభ్యత్వం సాధిస్తాం.. టీవీ ఇంటర్వ్యూలో వ్యాఖ్యలు
  
  న్యూఢిల్లీ: ఎన్‌ఎస్జీ (అణు సరఫరాదారుల కూటమి)లో భారత్‌కు సభ్యత్వం దక్కుతుందని, సానుకూల వాతావరణంలో చర్చలు మొదలయ్యాయని ప్రధాని  నరేంద్ర మోదీ పేర్కొన్నారు. పాక్ విషయంలో ఎప్పుడూ అప్రమత్తంగా ఉండాలని, రుణ ఎగవేతదారుల్ని చట్టముందు నిలబెడతామని చెప్పారు. బీజేపీ నేత సుబ్రమణ్య స్వామి వ్యాఖ్యల్ని పరోక్షంగా తప్పుపట్టిన ప్రధాని.. దేశభక్తిలో ఆర్‌బీఐ గవర్నర్ రఘురాం రాజన్ ఎవరికీ తక్కువ కాదన్నారు.   వ్యక్తికన్నా వ్యవస్థ గొప్పదని, ప్రచారంపై మోజుతో దేశానికి మేలు జరగదని అన్నారు. సోమవారం ‘టైమ్స్ నౌ’ చానల్ ఇంటర్వ్యూలో మోదీ ఏమన్నారో ఆయన మాటల్లోనే ..
 
  ఎన్‌ఎస్జీ సభ్యత్వంపై... ఐరాస భద్రతామండలి, షాంఘై కోఆపరేషన్ ఆర్గనైజేషన్(ఎస్‌సీఓ), క్షిపణి సాంకేతికత నియంత్రణ బృందం(ఎంటీసీఆర్), ఎన్‌ఎస్జీలో సభ్యత్వం కోసం వరుసగా ప్రభుత్వాలు నిరంతర ప్రయత్నాలు చేస్తూనే ఉన్నాయి. ఏ ప్రభుత్వం అధికారంలో ఉన్నా ప్రయత్నాల్ని కొనసాగించాయి. మా ప్రభుత్వం మాత్రమే ప్రయత్నాలు చేయడం లేదు. మా హయాంలో ఎస్‌సీఓలో సభ్యత్వం సాధించాం. ఎంటీసీఆర్‌లో స్థానం పొందడంలో విజయవంతమయ్యాం. ఎన్‌ఎస్జీలో సభ్యత్వం కోసం ప్రయత్నాలు ప్రారంభించాం. ఈ ప్రక్రియ సానుకూల వాతావరణంలో మొదలైంది. ప్రతిదీ దాని నిబంధనల మేరకు జరుగుతుంది.
 
  చైనా వ్యతిరేకతపై... విదేశాంగ విధానం ప్రకారం చర్చల్లో ఏకాభిప్రాయాలు ఉండాల్సిన అవసరం లేదు. చైనాతో విభేదాల్ని చర్చలతో పరిష్కరించే ప్రయత్నాలు కొనసాగుతున్నాయి. చర్చలు జరుగుతున్నాయి.. అలాగే కొనసాగాలి. చైనాతో మనకు ఒక్క సమస్యే కాకుండా అనేక అపరిష్కృత వివాదాలున్నాయి. ఒకదాని వెంట ఒకటి పరిష్కారమయ్యేలా నెమ్మదిగా, నిదానంగా ప్రయత్నాలు కొనసాగుతున్నాయి. చైనా కూడా సమస్య పరిష్కారం దిశగా సహకరిస్తుంది. కొన్ని అంశాల్లో చైనాతో విభేదిస్తున్నాం.. వాళ్లు కూడా మనతో విభేదిస్తున్నారు. ముఖ్యమైన విషయమేంటంటే ఇప్పుడు చైనాతో ముఖాముఖి చర్చిస్తున్నాం. భారత్ ప్రయోజనాలే ప్రాతిపదికగా చర్చల్లో అంశాల్ని లేవనెత్తుతున్నాం. మూడ్రోజుల క్రితం చైనా అధ్యక్షుడితో భారత్ ప్రయోజనాలే లక్ష్యంగా చర్చించా.
 
  లక్ష్మణరేఖపై ఎవరితో చర్చించాలి
  పాకిస్తాన్‌తో చర్చల విషయంలో లక్ష్మణరేఖ గురించి ఎవరితో చర్చించాలి. పాకిస్తాన్‌లోని ఎన్నికైన ప్రభుత్వంతోనా... లేదా ప్రభుత్వేతర శక్తులతోనా... అందుకే పాకిస్తాన్ విషయంలో భారత్ ఎప్పుడూ అప్రమత్తంగా, జాగరూకతతో ఉండాల్సి వస్తోంది. అందులో ఎలాంటి నిర్లక్ష్యం, చూసీ చూడనట్లు ఉండకూడదు. లాహోర్ పర్యటన, పాక్ ప్రధానిని ఆహ్వానించడం వంటి నిరంతర యత్నాలతో ఉగ్రవాదంపై భారత్ అభిప్రాయమేంటో ప్రపంచానికి చెప్పాం.పాక్ ఈ విషయంలో సమాధానం చెప్పడం కష్టంగా ఉంది. ఇప్పుడు ప్రపంచం మొత్తం ఉగ్రవాదంపై భారత్ చెపుతున్న దాన్ని అంగీకరిస్తుంది. ఉగ్రవాదం వల్ల భారత్‌కు జరిగిన నష్టాన్ని, మానవత్వానికి జరిగిన నష్టాన్ని ప్రపంచంఅంగీకరిస్తుంది. ఈ అంశంలో భారత్ తన వాదనను ముందుకు తీసుకెళ్తుందని నమ్ముతున్నా.
 
  సుబ్రమణ్య స్వామి వ్యాఖ్యలు సరికాదు
  అది మా పార్టీలోని వ్యక్తా? కాదా? అన్నది కాదు... ఇలాంటివి సరైనవి కావు. ప్రచారంపై ఉన్న మోజు దేశానికి ఎప్పుడూ ఎలాంటి మంచి చేయదు. ప్రజలు ఎంతో బాధ్యతతో ప్రవర్తించాలి. ఎవరైనా తాము వ్యవస్థ కంటే ఎక్కువని భావిస్తే అది తప్పు.
 
  విదేశాంగ విధానంలో సమష్టి కృషి
  కేంద్రంలో ప్రభుత్వానికి పూర్తి బలం ఉండడంతోనే విదేశాంగ విధానం బలోపేతమైంది. పూర్తి మెజార్టీ కట్టబెట్టిన ప్రజలకు కృతజ్ఞతలు చెబుతున్నా. ఇది ప్రపంచ రాజకీయాలపై ప్రభావం చూపింది. విదేశాంగ విధానంలో మా ప్రభుత్వం సమష్టిగా పనిచేస్తుంది. నాకు విదేశాంగ విధానం కొత్తే. విదేశాంగ శాఖ, ప్రధాని కార్యాలయం, వాణిజ్య, రక్షణ శాఖలు కలసి పనిచేస్తున్నాయి.
 
  పేదవాడే కేంద్ర బిందువు
  పాలనపైనే నా దృష్టంతా. కేవలం ఎన్నికల కోసమే ప్రభుత్వాలు పనిచేయడం వల్ల దేశం ఎంతో నష్టపోయింది. ప్రజల డిమాండ్లను, అంచనాల్ని నెరవేర్చేందుకు ప్రభుత్వం నిజాయితీగా ప్రయత్నించాలి. మా ప్రభుత్వ ఆర్థిక ప్రణాళికలో పేదవాడే కేంద్ర బిందువు. దేశంలోని ఓటర్లు చాలా పరిణితి చెందినవాళ్లు.. లోక్‌సభ ఎన్నికల్లో ఒకలాగా, రాష్ట్రాల ఎన్నికల్లో మరోలా తీర్పునిచ్చారు. వారి పరిణితిని మనం నమ్మి తీరాలి.
 
  పార్లమెంట్ సమావేశాలపై..
  ఎన్నో ఏళ్లు ప్రభుత్వంలో ఉన్న వాళ్లు పార్లమెంట్ సమావేశాల్ని అడ్డుకోవడం సరికాదు. కీలకమైన బిల్లులు ఆమోదం పొందనందుకు నేను బాధ పడలేదు. చర్చ బదులు గందరగో ళం చోటు చేసుకోవడంతో నేను నిరాశ చెందా.
  
  రఘురాం రాజన్ దేశభక్తిపై...
  రఘురాం రాజన్‌ను అభినందిస్తున్నా... ఆయన దేశభక్తిలో ఎవరికీ తక్కువ కాదు. రాజన్ దేశాన్ని ప్రేమించే వ్యక్తి. ఎక్కడ ఉన్నా భారతదేశం కోసం పనిచేస్తారు. యూపీఏ హయాంలోనే  రాజన్‌ను నియమించినా పదవీకాలం ముగిసేవరకూ ఆయన కొనసాగుతారు. రాజన్ ఆర్‌బీఐ గవర్నర్‌గా నియమితులైన మూడు నెలల అనంతరం 2014లో పలు మీడియా కథనాలు వెలువడ్డాయి. యూపీఏ ప్రభుత్వం నియమించిన రాజన్‌ను కొనసాగనిస్తారా? అంటూ రాశారు. నేను ఆయనను కొనసాగనివ్వనని చెప్పారు. అది తప్పని రుజువైంది.
  
  అప్పులు ఎగ్గొట్టే వారికి  చట్టం రుచి చూపిస్తా
  ఉద్దేశపూర్వకంగా రుణాలు ఎగ్గొట్టేవారికి చట్టం రుచేంటో చూపిస్తాను.  వారిని దేశానికి రప్పించి చట్టపరంగా చర్యలు తీసుకుంటాం. ఈ పని చేయగల వ్యక్తి ఎవరైనా ఉన్నారంటే అది నరేంద్ర మోదీనే అని గట్టి ప్రజలు నమ్మకంతో ఉన్నారు. నేను ఈ పని తప్పకుండా చేస్తాను.
  
  జనంలో తగ్గుతున్న హాస్యం
  నాకు హాస్యమంటే ఇష్టం. కానీ నేడు ప్రజా జీవితంలో హాస్యం అనేది తగ్గిపోతుంది. 24 గంటల వార్తా చానళ్ల యుగంలో ఎవరైనా సరే చిన్నమాటను పెద్ద సమస్యగా మార్చేయవచ్చు. ప్రజల్లో హాస్యం తగ్గిపోవడానికి కారణం భయం. ఈ భయం వల్లే ప్రజా జీవితంలో హాస్యాన్ని కోల్పోతున్నాం.
  
  అవినీతి కళలో ఘనులు
  అగస్టా సహా ఇతర రక్షణ రంగ కుంభకోణాల్లో సంబంధమున్నవారు ఇలాంటి విషయాల్లో చాలా అనుభవజ్ఞులు. వారు తప్పులు చేసే కళలో ఆరితేరినవారు. పై స్థాయిలో కాపాడే వ్యవస్థ లేకుండా ఇలాంటి కుంభకోణాలు చేయడం సాధ్యం కాదు. అగస్టా స్కామ్‌కు సంబంధించి మా ప్రభుత్వం ఎవరినీ లక్ష్యంగా చేసుకోలేదు. దీనికి సంబంధించిన దర్యాప్తు కొనసాగుతుంది. ఈ కుంభకోణం వెనుక ఎవరున్నారు? ఎంత నష్టం జరిగింది? అనే అంశాలను దర్యాప్తు సంస్థలు నిగ్గుతేలుస్తాయి.


 న్యూఢిల్లీ: బ్రెగ్జిట్ నేపథ్యంలో పరిస్థితులను ఎదుర్కొనేందుకు ఆర్‌బీఐ తగిన చర్యలు తీసుకుంటుందని గవర్నర్ రఘురామ్ రాజన్ చెప్పారు. తొలుత ఇన్వెస్టర్లలో ఆందోళన ఉన్నా... భారత్ మూలాలు పటిష్ఠంగా ఉన్న దృష్ట్యా తిరిగి దేశానికి పెట్టుబడులు వస్తాయన్న అభిప్రాయాన్ని వ్యక్తం చేశారు.  ఇతర దేశాలతో పోటీపడేందుకు ఏ దేశమూ తమ కరెన్సీ విలువను తగ్గించకూడదని సూచించారు. ‘‘కీలక పరిస్థితుల్లో ఏ దేశమూ రక్షణాత్మక చర్యలు తీసుకోకూడదు. మేమైతే అంతర్జాతీయ, దేశీ మార్కెట్లన్నిటినీ పరిశీలిస్తున్నాం. లిక్విడిటీ సమస్య రాకుండా చూస్తాం’’ అని బాసెల్ నుంచి ఒక టీవీ ఛానెల్‌తో మాట్లాడుతూ రాజన్ చెప్పారు. ఇతర ఆర్థిక వ్యవస్థలతో పోలిస్తే భారత్ నుంచి విదేశాలకు తరలిపోయే నిధులు తక్కువే ఉంటాయని పేర్కొన్నారు.


 వాషింగ్టన్: విద్యా బోధనకు తిరిగి రావాలని ఆర్‌బీఐ గవర్నర్ రఘురామ్ రాజన్‌ను ప్రతిష్ఠాత్మక షికాగో యూనివర్సిటీ ఆహ్వానించింది. ఆయనకు ఉన్న అపార అనుభవం యూనివర్సిటీకి ఎంతో ప్రయోజనం చేకూరుస్తుందని వర్సిటీ స్కూల్ ఆఫ్ బిజినెస్ డీన్ సునీల్ కుమార్ చెప్పారు. సెప్టెంబర్ 4న తన మూడేళ్ల పదవీ కాలాన్ని పూర్తిచేసుకోనున్న రాజన్, ఆ తరవాత విద్యాబోధన వైపు వెళతానని చెప్పారు. ఐఎంఎఫ్ చీఫ్ ఎకనమిస్ట్‌గా పనిచేసిన రాజన్‌కు... అంతర్జాతీయ ఆర్థిక అంశాలపై విశేష అవగాహన ఉంది. ఈయన 2008 ఆర్థిక సంక్షోభాన్ని ముందుగానే ఊహించారు.


 ముంబై:  బ్రెగ్జిట్ పరిణామాలపై  ఆర్థిక మంత్రి అరుణ్ జైట్లీ   స్పందించారు.  ఆందోళన చెందాల్సిన  అవసరం లేదని భరోసా ఇచ్చారు.  ప్రశాంతంగా ఉండాలని ఆర్థిక మార్కెట్లను కోరారు. ఇతర స్థూల సూచికలను తో పాటు భారతదేశం యొక్క ఆర్థిక మూలాల బలంగా ఉన్నాయని,  ఎలాంటి  భయాలు అవసరం లేదని  హామీ ఇచ్చారు.
 
 అటు కేంద్ర బ్యాంకు ఆర్ బీఐ  గవర్నర్ రఘురామ రాజన్ కూడా స్పందించారు.  అన్ని మార్కెట్లను నిశితంగా గమనిస్తున్నామని, రూపాయి విలువను కాపాడేందుకు జోక్యం చేసుకుంటామని   ప్రకటించారు. లిక్విడిటీ సపోర్టు ఇవ్వనున్నట్టు తెలిపారు. పరిస్థితుల కనుగుణంగా  తాము సిద్ధంగా ఉన్నామన్నారు. ఇతర కరెన్సీల తో  పోలిస్తే రూపాయి  బాగా పతనంమైందనీ, అవసరమైనప్పుడు జోక్యం చేసుకుంటామని హామీ ఇచ్చారు.
 
 మరోవైపు  డాలర్ తో పోలిస్తే  దేశీయ కరెన్సీ మరింత క్షీణించకుండా  రిజర్వు బ్యాంకు  జోక్యం చేసుకుంటుందని ఎనలిస్టులు తెలిపారు. కరెన్సీ విలువ మరింత పడిపోకుండా  డాలర్  అమ్మకాలకు  దిగొచ్చని తెలుస్తోంది. ప్రభుత్వ రంగ బ్యాంకుల సంక్షేమం దృష్ట్యా  చర్యలకు ఉపక్రమించే అవకాశం ఉందని  విశ్లేషకులు భావిస్తున్నారు.


 అధిక వడ్డీరేట్లు కారణం కాదన్న రాజన్
  బెంగళూరు: మొండి బకాయిలకు (ఎన్‌పీఏ) సంబంధించి బ్యాంకింగ్ ఎదుర్కొంటున్న ఒత్తిడే బ్యాంకింగ్ రుణ వృద్ధి మందగమనానికి  ప్రధాన కారణమని రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ బుధవారం పేర్కొన్నారు. రుణ వృద్ధి మందగమనానికి అధిక వడ్డీరేట్ల వ్యవస్థ కారణమన్న విమర్శలను ఆయన తోసిపుచ్చారు. ‘బ్యాంకింగ్ వ్యవస్థలో మొండిబకాయిల సమస్య పరిష్కారం’ అనే అంశంపై పారిశ్రామిక సంస్థ- అసోచామ్ నిర్వహించిన ఒక కార్యక్రమంలో రాజన్ మాట్లాడారు. వడ్డీరేట్లు తగ్గిస్తే... రుణ వృద్ధి బాగుంటుందని భావించడం సరికాదని పేర్కొన్నారు. 
 ఎన్‌పీఏల సమస్య ఉన్నప్పటికీ పరిశ్రమలకు ప్రత్యేకించి మౌలిక రంగానికి బ్యాంకింగ్ తగిన రుణ అవసరాలను తీర్చాల్సిన అవసరం ఉంటుందని అన్నారు. బ్యాంకింగ్ మొండిబకాయిల సమస్య పరిష్కారమయితే.. అది వడ్డీరేట్ల తగ్గింపునకూ దోహదపడుతుందని వివరించారు.  2015-16లో రుణ వృద్ధి రేటు ఆరు సంవత్సరాల కనిష్ట స్థాయిలో 8.6%కి తగ్గిన సంగతి తెలిసిందే. ఇదే సంవత్సరంలో మొండి బకాయిలు  రూ.8 లక్షల కోట్లకు చేరాయి.  సెప్టెంబర్ 2013లో ఆర్‌బీఐ గవర్నర్‌గా బాధ్యతలు చేపట్టాక రాజన్ మెల్లగా రెపో రేటును 7.25 % నుంచి 8%కి పెంచారు. 2014 మొత్తం భారత్ అధిక వడ్డీరేటు వ్యవస్థలో కొనసాగింది. ఇందుకు ద్రవ్యోల్బణాన్ని ఆయన కారణంగా చూపారు. అటు తర్వాత ఆర్థికశాఖ, పరిశ్రమల నుంచి వచ్చిన ఒత్తిడులు, ద్రవ్యోల్బణం వంటి అంశాల నేపథ్యంలో క్రమంగా రెపో రేటును 1.50% తగ్గించారు. దీనితో ఈ రేటు ప్రస్తుతం 6.5%కి దిగివచ్చింది.
  బ్యాంకింగ్ మూలధనానికి ఆర్‌బీఐ మిగులు నిధులు సరికాదు
 కాగా ప్రభుత్వ రంగ బ్యాంకుల మూలధన కల్పనకు ఆర్‌బీఐ మిగులు నిధులు సమకూర్చాలని  ప్రధాన ఆర్థిక సలహాదారు అరవింద్ సుబ్రమణ్యం రూపొందించిన ఆర్థిక సర్వే చేసిన సూచనలను రాజన్ తోసిపుచ్చారు. ఇది తగిన ఆలోచన కాదని, పరస్పర ప్రయోజనాలకు విఘాతం కల్గిస్తుందన్నారు. అయితే వీలయినంత ఎక్కువ డివిడెండ్‌ను ఆర్‌బీఐ ప్రభుత్వానికి చెల్లిస్తే.. తద్వారా ప్రభుత్వం బ్యాంకింగ్‌కు తగిన మూలధనం సమకూర్చగలుతుందనీ వ్యాఖ్యానించారు. అంతేగానీ ఆర్‌బీఐ తనకుతానుగా ప్రత్యక్షంగా బ్యాంకింగ్‌కు నిధుల సమకూర్చడం సరైన ఆలోచన కాదని వివరించారు.  2010-11లో ఆర్‌బీఐ రూ.15,009 కోట్ల మిగులును కేంద్రానికి బదలాయించింది. 2014-15కి ఇది రూ.65,896 కోట్లకు పెరిగింది.
  మోసాలపై నిఘా..: ఉద్దేశపూర్వక ఎగవేతదారులను గుర్తించేందుకు, బ్యాంకింగ్ మోసాల నివారణకు, ఆయా సమాచారాన్ని విచారణా సంస్థలకు అందించేందుకు ఒక కమిటీని ఆర్‌బీఐ ఏర్పాటు చేసినట్లు రాజన్ తెలిపారు. తప్పు చేసిన వారు ఎవ్వరూ తప్పించుకోలేరని అన్నారు.
  జాబితా నుంచి నన్ను తీసేయవద్దు..: తాను పూర్తిగా బాధ్యతల నుంచి తప్పుకున్నానన్న ధోరణిలో కొందరు రాస్తున్న వ్యాసాలను  గత కొద్ది రోజులుగా చూస్తున్నానని రాజన్ చేసిన వ్యాఖ్యలు సమావేశంలో నవ్వులు పూయిం చాయి. సెంట్రల్ బ్యాంక్ నుంచి బాధ్యతల నుంచి తప్పుకున్న తర్వాత కూడా పలు అంశాలపై దేశంతో తన అనుబంధం కొనసాగుతుందని పేర్కొన్నారు. ‘‘ఇంకా నేను బాధ్యతల్లోనే కొనసాగుతున్నాను. పదవీ విరమణ చేసిన తర్వాత కూడా ప్రపంచంలో ఎక్కడో అక్కడ ఉంటాను. బహుశా భారత్‌లోనే ఎక్కువ కాలం గడపొచ్చు. కనుక నన్ను జాబితాలోనుంచి తీసేయకండి’’ అని రాజన్ నవ్వుతూ అన్నారు.


 ‘రెగ్జిట్’పై ఎస్‌బీఐ నివేదిక...
 ముంబై: రిజర్వ్ బ్యాంక్ (ఆర్‌బీఐ) గవర్నర్‌గా రఘురామ్ రాజన్ పదవీ విరమణ.. సంస్థ కార్యకలాపాలపై ఎటువంటి ప్రభావం చూపబోదని ప్రభుత్వ రంగ బ్యాకింగ్ దిగ్గజం- స్టేట్ బ్యాంక్ ఆఫ్ ఇండియా (ఎస్‌బీఐ) ఎకనమిక్ రిసెర్చ్ వింగ్ తన తాజా పరిశీలనా పత్రంలో పేర్కొంది. రిజర్వ్ బ్యాంక్ ఒక అత్యున్నత స్థాయి సంస్థని పేర్కొన్న ఎస్‌బీఐ వ్యక్తికన్నా.. వ్యవస్థ ముఖ్యమని పేర్కొంది. రాజన్ పదవీ విరమణ ప్రకటన అనంతరం జరుగుతున్న చర్చ, ఊహాగానాలు అర్థం లేనివని సైతం పేర్కొంది.
 ఒక సంస్థ విశ్వసనీయత, స్వతంత్రతకే ప్రాముఖ్యత తప్ప మరి దేనికీ కాదని నివేదిక విశ్లేషించింది. దూరదృష్టి, ఆచరణీయత, స్వతంత్రతతో పనిచేసిన చరిత్ర ఆర్‌బీఐ సొంతమనీ పేర్కొంది. ద్రవ్యోల్బణంపై ఆర్‌బీఐ పోరాటం రాజన్ నేతృత్వంలోనే ప్రారంభంకాలేదని, ఇది 1983 నుంచీ ఈ పోరాటం కొనసాగుతూనే ఉందని పేర్కొంది. ఆర్‌బీఐ దీర్ఘకాల ద్రవ్యోల్బణం లక్ష్యం 4 శాతం కాకుండా 5 శాతంగానే ఉండాలని సైతం ఎస్‌బీఐ డాక్యుమెంట్ సూచించింది.
  47 శాతం పెరిగిన ఎస్‌బీఐ ఏటీఎం ఆదాయం
 ఎస్‌బీఐ ఏటీఎం ఆదాయం 2015-16 ఆర్థిక సంవత్సరం 2014-15 ఆర్థిక సంవత్సరంతో పోల్చితే 47 శాతం పెరిగి రూ.310.44 కోట్లకు చేరింది.


 రిజర్వ్ బ్యాంక్ ఆఫ్ ఇండియా గవర్నర్ పదవిని రెండో దఫా చేపట్టేది లేదని రఘురామ్ రాజన్ చేసిన ప్రకటన అనూహ్యమైనదేమీ కాదు. ఆ ప్రకటన సృష్టించిన ప్రకంపనలు మాత్రం అనూహ్యమైనవి. ప్రతిపక్షాలే కాదు, ఏకాభి ప్రాయానికి తావు లేదనిపించే వార్తా, వ్యాపార మీడియా నిపుణుల నుంచి ఆర్థిక నిపుణుల వరకు అంతా రాజన్ నిష్ర్కమణ భారత ఆర్థిక వ్యవస్థకు శుభప్రదం కాదంటున్నారు. అధిక వడ్డీ రేట్ల వ్యవస్థను కొనసాగిస్తూ పెట్టుబడులకు ప్రతికూల వాతావరణాన్ని సృష్టిస్తున్నారని ఆయన పట్ల తరచుగా అసంతృప్తిని వ్యక్తం చేస్తూ వచ్చిన వ్యాపార, పారిశ్రామిక సంఘాలు, ప్రముఖులు సైతం ఆయన నిష్ర్కమణ పట్ల విచారాన్ని వ్యక్తం చేయడం విశేషం.
  
  విభ్నిన్న రంగాల ప్రముఖుల నుంచి వినవస్తున్న ఇలాంటి స్పందన లన్నీ.. మూడేళ్లుగా మన ఆర్థిక వ్యవస్థ బహిర్గత, అంతర్గత ఒడిదుడుకులను ఎదుర్కొంటుండగా ఆర్‌బీఐ గవర్నర్‌గా రాజన్ చేసిన కృషి ప్రాధాన్యాన్ని, రాజకీయ ఒత్తిడులకు లొంగక స్థూల ఆర్థిక చలాంకాల వాస్తవ కదలికలను ఎప్పటి కప్పుడు అంచనా వేస్తూ ద్రవ్య విధానాన్ని నిర్దేశిస్తున్న విధానకర్తగా ఆయనకున్న అసమాన విశ్వసనీయతను ప్రతిబింబి స్తున్నాయి. సెప్టెంబర్ 4కు గానీ రాజన్ పదవీ కాలం ముగియదు. ఎన్డీఏ ప్రభుత్వం ఆయనకు రెండో దఫా అవకాశాన్ని కల్పిస్తుందా, లేదా అనే చర్చ కొంత కాలంగా జోరుగా సాగుతోంది.
  
  రాజన్‌కు వ్యతిరేకంగా ఎక్కుపెడుతూ ఈ విషయాన్ని రచ్చకెక్కించి చర్చనీయాంశంగా మార్చినది అధికార పక్ష నేతలే. ప్రధాని, ఆర్థిక మంత్రి, ఆర్‌బీఐ గవర్నర్‌లు మాత్రమే కలసి చర్చించి నిర్ణయం తీసుకోవాల్సిన అంశంపై రేగుతున్న అవాంఛనీయమైన ఈ రచ్చను మొగ్గలోనే తుంచేయకుండా ప్రధాన మంత్రి, బీజేపీ అగ్రనాయకత్వం ఉదాసీనత చూపారు. పైగా ఆర్థిక మంత్రి అరుణ్ జైట్లీ రాజన్ విధానాలపై తన అసంతృప్తిని తరచుగానే వ్యక్తంచేస్తూ వచ్చారు. 2007, 2008లలో బద్ధలైన ప్రపంచ ఆర్థిక సంక్షోభం ముప్పును గురించి రాజన్ ముందస్తుగా 2005లోనే హెచ్చరించారు. ప్రపంచం ఆయన మాట విని ఉండాల్సిందని ఐఎంఫ్ అధిపతి క్రిస్టిన్ లగార్డే సైతం ఇటీవల వ్యాఖ్యానించారు. అటువంటి ఆర్థిక నిపుణుడు రెండో దఫా ఆర్‌బీఐ పగ్గాలు చేపట్టలేనని అనడానికి కారణం కేంద్రం ఆయనకు ఆ బాధ్యతలను అప్పగించ డానికి విముఖంగా ఉండటమేననేది బహిరంగ రహస్యం.
  
  2013లో ఆర్‌బీఐ గవర్నర్ పదవిని చేపట్టేటప్పటి నుంచి ద్రవ్యోల్బణంపైకి గురిపెట్టిన ద్రవ్య విధానాన్ని రాజన్ నిలకడగా అనుసరిస్తూ వచ్చారు. 2013లో 10.7 శాతంగా ఉన్న ద్రవ్యోల్బణాన్ని 5 శాతానికి తగ్గించగలిగారు. అదే సమ యంలో ఆయన నాన్ రెసిడెంట్ ఫారిన్ కరెన్సీ డిపాజిట్ల పెంపుదలకు చర్యలు చేపట్టారు. మన విదేశీ మారక ద్రవ్య నిల్వలు జూన్ 10 నాటికి రికార్డు స్థాయిలో 36,32,300 కోట్ల డాలర్లకు చేరాయి. వ్యాపార, పారిశ్రామిక వర్గాల నుంచి, ఆర్థిక మంత్రి నుంచి వడ్డీ రేట్లను తగ్గించాలని కోరుతున్నా రాజన్ ప్రజల నిజ ఆదాయాలను ఆవిరిచేసే అధిక ద్రవ్యోల్బణం తగ్గనిదే రేట్ల తగ్గింపు ఉండదనే వైఖరిని సడలించలేదు. ఈ విష యంలో అమెరికా వంటి దేశాలతో పోలికలను తెచ్చే విమర్శకులు తరచుగా రెండు వాస్తవాలను విస్మరిస్తుంటారు.
  
  ఒకటి, అమెరికాకు ద్రవ్యోల్బణం సమస్య లేదు. రెండు, అమెరికాలో 2012 నుంచి కనిపించిన వృద్ధిలోని పెరుగుదలకు కారణం అల్ప వడ్డీ రేట్లు కాదు, ప్రభుత్వ వ్యయం ఉద్యోగిత, ఉత్పత్తులకు కల్పించిన ప్రోత్సాహం వల్ల. అల్ప వడ్డీ రేట్లు కొనసాగుతున్నా ఆ వృద్ధి సైతం సుస్థిరంగా కొనసాగే స్థితి లేకనే ఫెడరల్ రిజర్వ్... వడ్డీ రేట్లను పెంచి, ఆర్థిక వ్యవస్థలోకి అధికంగా ప్రవేశపెట్టిన డబ్బును ఉపసంహరించాలనే నిర్ణయాన్ని ఇటీవలనే నిలుపదల చేసింది. రాజన్ తన నిష్ర్కమణ ప్రకటనలో సైతం ‘‘వృద్ధిపై దృష్టిని కేంద్రీకరించడం కోసం మనం ఎన్నటికీ ద్రవ్యోల్బణాన్ని వదిలేయరాదు’’ అని హెచ్చరించారు.
  
   ద్రవ్య విధానాన్ని దీర్ఘకాలిక వృద్ధి వ్యూహానికి ప్రత్యామ్నాయంగా భావించరాదనేది ప్రపంచ ఆర్థిక నిపుణులంతా చెప్పే మాటే. కానీ ఎన్డీఏ మాత్రం అధికంగా డబ్బును ప్రవేశ పెట్టడం ద్వారా ద్రవ్యోల్బణాన్ని పెంచే పద్ధతుల్లో అధిక వృద్ధిని సాధించడమనే అవాస్తవిక విధానాన్ని ఎంచుకుంది. అందుకు రాజన్ అడ్డంకి కావడాన్నే ప్రజలు ఎన్నుకున్న ప్రభుత్వం పట్ల ‘ధిక్కారం’గా తప్పు పట్టడం హాస్యాస్పదం. చైనా స్థానంలోకి భారత్ ప్రవేశించనుందని, ప్రపంచంలోనే అత్యధిక వృద్ధి రేట్లను సాధించామనే అవాస్తవికమైన, బాధ్యతారహితమైన ప్రకటనలను చేయడం రాజకీయవేత్త అయిన ఆర్థిక మంత్రి చేయగలరు. అంతర్జాతీయ స్థాయి విశ్వసనీ యతగల ఆర్థికవేత్తగా, ఆర్‌బీఐ గవర్నర్‌గా అలాంటి ప్రకటనలను రాజన్ సమర్థిం చలేకపోవడం సహజమే. అందుకే ఆయన ‘‘మనం ఎగుమతి ఆధార వృద్ధి మార్గాన్ని అనుసరించి వస్తు తయారీపై దృష్టిని కేంద్రీకరించాలని భావిస్తుండ టంలో ప్రమాదం ఉంది. ప్రపంచానికి మరో ఎగుమతి ఆధార చైనాను భరించే శక్తిలేదు.
  
  ఎగుమతి మార్కెట్లలో పెరుగుదల లేకపోయే అవకాశం ఉన్న దృష్ట్యా మనం దేశీయ మార్కెట్‌కోసం ఉత్పత్తి చేయాల్సి ఉంటుంది’’ అని ఆయన గత ఏడాది కేంద్ర ప్రభుత్వ మేక్ ఇన్ ఇండియా నినాదాన్ని ప్రస్తావిస్తూ హెచ్చరించారు.  2015-16లో ప్రభుత్వ బ్యాంకుల నష్టాలు మొత్తం రూ. 17,995 కోట్లు. కాగా, మొండి బకాయిలు లేదా క్రియాశీలంగా లేని ఆస్తులు రూ. 6 లక్షల కోట్లకు చేరాయి. ప్రభుత్వ రంగ బ్యాంకింగ్ వ్యవస్థను కుంగదీస్తున్న మొండి బకాయిల విషయంలో రాజన్ చేపట్టిన వైఖరి పట్ల పారిశ్రామిక, వ్యాపార వర్గాల నుంచి, ప్రభుత్వం నుంచి తీవ్ర వ్యతిరేకత వచ్చింది.
  
  సంపన్న ప్రపంచం సంతృప్తికర మనదగిన స్థాయి వృద్ధిని సాధించడం సమీప భవిష్యత్తులో సాధ్యం కాదనే అంచనాపై ఆధారపడి రాజన్ బ్యాంకింగ్ రంగాన్ని పటిష్టం చేయడానికి చేపట్టిన ప్రయత్నాన్ని సైతం వివాదంగా చేయడం దురదృష్టకరం. ఏదిఏమైనా రాజన్ స్థానంలో మరొకరిని ఆర్‌బీఐ గవర్నర్‌గా ఎంపిక చేయడం ప్రభుత్వానికి కత్తి మీద సామే అవుతుంది. ఈయూ నుంచి బ్రిటన్ నిష్ర్కమణ జరిగే  ప్రమాదం ఉన్న తక్షణ నేపథ్యంలో రాజన్ సేవలు మరో మూడేళ్లపాటు అందుబాటులో లేకపో వడం దేశానికి తీరని లోటనడం నిస్సందేహం.


 ఆర్బీఐ గవర్నర్ పదవిలో రెండో టర్మ్ కొనసాగబోనని రఘురామ్ రాజన్ స్పష్టంచేయడంతో ఈ విషయమై ఆన్ లైన్ లో పెద్ద చర్చే నడుస్తోంది. రఘురాం రాజన్ నిర్ణయంపై నెటిజన్లు అసంతృప్తి వ్యక్తం చేస్తున్నారు. రెండో పర్యాయం కూడా ఆయన ఆర్బీఐ గవర్నర్ గా కొనసాగాలన్న నెటిజన్లకు తాజాగా బాలీవుడ్ నటి సోహ ఆలి ఖాన్ గొంతు కలిపింది. రాజన్ నిర్ణయం దేశానికి తీవ్ర నష్టమని పేర్కొంది.
 
 'ఆర్బీఐ గవర్నర్ పదవి నుంచి రాజన్ తప్పుకునేలా బలవంత పెట్టారు. ఇది దేశానికి తీవ్ర నష్టం. ఇది సిగ్గుపడాల్సిన విషయం' అంటూ సైఫ్ ఆలిఖాన్ సోదరి అయిన సోహ ట్వీట్ చేసింది. ఆమె వ్యాఖ్యలను నెటిజన్లు తీవ్రంగా తప్పుబట్టారు. సోహా ఆలిఖాన్ కు ఆర్థిక శాస్త్రంపై అవగాహన ఉందా? కనీసం ఆమెకు ఆర్బీఐ పూర్తి పేరు (ఫుల్ ఫామ్) అయినా తెలుసా? ఎలాంటి పరిజ్ఞానం, సమాచారం లేకుండా రాజన్ ను ఆర్బీఐ గవర్నర్ పదవి నుంచి తప్పుకునేలా బలవంతపెట్టారని విమర్శించడం ఎంతవరకు సబబు అని పలువురు నెటిజన్లు ప్రశ్నించారు.
 
 దేశ ఆర్థిక వ్యవస్థ గురించి సోహాకు ఏం తెలుసు అని పలువురు ప్రశ్నించగా.. మరికొందరు నెటిజన్లు ఆమెకు అండగా నిలిచారు. లండన్ స్కూల్ ఆఫ్ ఎకానమిక్స్ లో మాస్టర్ డిగ్రీ చేసిన సోహాకు దేశ ఆర్థిక వ్యవస్థపై మాట్లాడే అర్హత ఉందని, ఆమె వ్యాఖ్యలను విమర్శించడం సరికాదని ఆమెకు మద్దతు పలికారు.


 న్యూఢిల్లీ.  బీజేపీ ప్రభుత్వంపై కాంగ్రెస్ సీనియర్ నేత, మాజీ మంత్రి  జై రాం రమేష్ నిప్పులు చెరిగారు.  వేలకోట్లరుణాలను  ఎగవేసిన విజయ్ మాల్యాను, కుంభకోణానికి పాల్పడిన  లలిత్ మోడీని భారతదేశానికి రప్పించే ఉద్దేశం ప్రభుత్వానికి లేదని మండిపడ్డారు. మాల్య ఫంక్షన్ లకు హాజరవుతూంటే.. ప్రభుత్వం ఆయన్ని వెనక్కి  రప్పించడంపై ఆసక్తి  చూపడంలేదని విమర్శించారు.
 
 విదేశీ  ప్రత్యక్ష పెట్టుబడుల విధానంపై  స్పందించిన  ఆయన ఎఫ్డీఐలకు 100 శాతం అనుమతిలిస్తూ  చేసిన ప్రకటన ఆందోళన కలిగించేదిగా ఉందన్నారు. భారతదేశం యొక్క పర్యావరణ సమస్యలకు సమాధానంగా  ఎఫ్డీఐ విధానాన్ని చూపించడం  హాస్యాస్పదంగా ఉందన్నారు. అటు  చేతన్ చౌహాన్ నియామకంపై కూడా విమర్శించిన  జైరాం రమేష్ ..ఇలా  ఆర్బీఐ గవర్నర్ గా రఘురాజన్  కి ఇలా ఉద్వాసన పలుకుతూ..అలా ప్రతిష్ఠాత్మకమైన నేషనల్‌ ఇన్‌స్టిట్యూట్‌ ఆఫ్‌ ఫ్యాషన్‌ టెక్నాలజీ(నిఫ్ట్‌) ఛైర్మన్‌గా భాజపా మాజీ ఎంపీ చేతన్ కు ఆహ్వానం పలికారని ఆరోపించారు.
 
  


 న్యూఢిల్లీ: ఆర్‌బీఐ గవర్నర్ రఘురామ్ రాజన్‌పై బీజేపీ నాయకుడు సుబ్రమణ్య స్వామి దాడి కొనసాగిస్తూనే ఉన్నారు. తానెప్పుడూ అనుమానించినట్టుగానే రాజన్‌ కాంగ్రెస్ ఏజెంట్ గా పనిచేశారని ఆరోపించారు. బీజేపీ అధికారంలోకి వచ్చినప్పటి నుంచి రాజన్ కాంగ్రెస్ ఏజెంట్ గా వ్యవహరిస్తున్నారని అన్నారు. చిన్న, మధ్య తరహా పరిశ్రమలను దెబ్బతీయడం ద్వారా ఆర్థిక వ్యవస్థకు వెన్నుపోటు పొడిచారని తీవ్రస్థాయిలో మండిపడ్డారు.
 
 రెండోసారి ఆర్‌బీఐ గవర్నర్ గా కొనసాగే ఉద్దేశం లేదని రాజన్ చేసిన ప్రకటనను ఆయన స్వాగతించారు. గతంలో పలుమార్లు రాజన్ పై స్వామి విరుచుకుపడ్డారు. పత్రికాముఖంగా, ట్విటర్‌ వేదికగా విమర్శలు చేయడంతోపాటు స్వయంగా ప్రధానికి సైతం రెండుసార్లు లేఖలు రాశారు.


 న్యూఢిల్లీ: ఆర్బీఐ గవర్నర్ రఘురాం రాజన్ రెండో  సారి పదవి చేపట్టనని ప్రకటించడం దురదృష్టకరమని ప్రముఖ ఆర్ధిక వేత్త, నోబెల్ అవార్డు గ్రహీత అమర్త్య సేన్ పేర్కొన్నారు. భారతదేశం, ప్రపంచం ఒక అత్యంత నైపుణ్యంతో ఆలోచించగల ఆర్థిక నిపుణున్ని కోల్పోనుందని సేన్ అవేదన వ్యక్తం చేశారు. ఇది దేశానికి, ప్రభుత్వానికి చాలా ఇబ్బందికరమని ఆయన అన్నారు. ఆర్బీఐ అనేది పూర్తి స్వతంత్ర సంస్థ కాదని సేన్ అన్నారు. ఒక టీవీ ఛానల్ కు ఇచ్చిన ఇంటర్వ్యూలో  ఆయన ఈ వ్యాఖ్యలు చేశారు.
  
 కొంత మంది అధికార పార్టీకి చెందిన వారు రాజన్ ను వ్యతిరేకించడం అత్యంత దురదృష్టకరమైన విషయం అని అన్నారు. రాజన్ నరేంద్రమోదీని ఆరాధించేవారు కాదని అన్నారు. రెండో సారి ఆర్బీఐ గవర్నర్ గా పదవీ బాద్యతలు చేపట్టనని తన పదవీకాలం పూర్తియిన తర్వాత పాఠాలు బోధిస్తానని రాజన్ ప్రకటించిన విషయం తెలిసిందే.
  
  
  
  


 న్యూఢిల్లీ: త్వరలో ఆర్బీఐ గవర్నర్ బాధ్యతల నుంచి రఘురాం రాజన్ తప్పుకోనున్న నేపథ్యంలో ఆయన తర్వాత ఆ బాధ్యతలు ఎవరు చేపట్టనున్నారని విషయం ఇప్పుడు సర్వత్రా చర్చ జరుగుతోంది. తనకు మరోసారి ఆర్బీఐ గవర్నర్ బాధ్యతలు చేపట్టే ఉద్దేశం లేదని, బోధనా రంగంలోకి వెళ్లాలనుకుంటున్నట్లు రాజన్ కూడా స్పష్టం చేసిన ఈ నేపథ్యంలో ఆ చర్చ మరింత వేడెక్కింది. అయితే, ఆ బాధ్యతలు అప్పగించే విషయంలో ప్రభుత్వం వద్ద పెద్ద జాబితానే ఉందంట.
 
 ముఖ్యంగా ఏడుగురు వ్యక్తులతో తదుపరి ఆర్బీఐ గవర్నర్ కోసం జాబితా సిద్ధం చేసినట్లు అధికార వర్గాల సమాచారం. అందులో ముఖ్యంగా విజయ్ కేల్కర్, రాకేశ్ మోహన్, అశోక్ లాహిరి, ఉర్జిత్ పటేల్, అరుంధతి భట్టాచార్య, సుబిర్ గోఖర్న్, అశోక్ చావ్లా పేర్లు ఈ పదవి కోసం సిద్ధం చేసినట్లు వినికిడి. అయితే, తొలిసారి ఆర్బీఐ గవర్నర్ పదవిని ఒక మహిళకు అందించాలని, ఆ నేపథ్యంలోనే అరుధతి భట్టాచార్యకు ఆ బాధ్యతలు అప్పగిస్తారని చర్చలు ఊపందుకున్నాయి. ఈ ఊహాగానాలకు తెరపడేందుకు మరికొద్ది రోజులు ఆగాల్సిందే.


 - గవర్నర్ రఘురామ్ రాజన్ స్పష్టీకరణ
 - సెప్టెంబర్ 4 తర్వాత మళ్లీ అధ్యాపక వృత్తిలోకి
 - బ్రెగ్జిట్ ముప్పు ఎదుర్కొనేందుకు తగిన ఏర్పాట్లు
 - ద్రవ్యోల్బణ  కట్టడి, బ్యాంకుల ప్రక్షాళన ఇంకా ఉందని వ్యాఖ్య
 - ఆయన నిర్ణయం దేశానికి నష్టం: పారిశ్రామిక వేత్తలు
 - ప్రభుత్వం కావాలనే సాగనంపుతోంది: చిదంబరం
  
  ముంబై: రిజర్వ్ బ్యాంకు గవర్నర్ పదవిని రఘురామ్ రాజన్ రెండోసారి చేపడతారా!! లేదా!! అన్న విషయమై సస్పెన్స్‌కు తెరపడింది. మరోసారి ఆ పదవిలో కొనసాగలేనని ప్రస్తుత గవర్నర్ రఘురామ్ రాజన్ స్వయంగా ప్రకటించారు. రాజన్‌పై బీజేపీ నేత సుబ్రహ్మణ్యం స్వామి సంచలన ఆరోపణలు చేయటంతో... ఆయన రెండోసారి పదవీ బాధ్యతలు చేపడతారా, లేదా? ప్రభుత్వం కొనసాగమంటుందా, లేదా? అనే అంశంపై చర్చోపచర్చలు సాగుతున్నాయి. ఈ నేపథ్యంలో తాజాగా రాజన్ ఆర్‌బీఐ ఉద్యోగులకు లేఖ రాస్తూ... తాను రెండోసారి గవర్నర్ బాధ్యతలు చేపట్టబోవటం లేదని స్పష్టంచేశారు.
 
 ఈ ఏడాది సెప్టెంబర్ 4న గవర్నర్‌గా పదవీకాలం ముగిశాక తిరిగి షికాగో వర్సిటీలో అధ్యాపక వృత్తిని చేపడతానని అందులో తెలిపారు. ‘ప్రభుత్వంతో మాట్లాడాకే ఈ విషయాన్ని మీతో పంచుకుంటున్నాను. అవసరమైనప్పుడు స్వదేశానికి సేవలందించటానికి నేను సిద్ధంగా ఉంటా’ అని లేఖలో తెలిపారు. ద్రవ్యోల్బణ నియంత్రణ, బ్యాంకుల ఖాతా పుస్తకాలను ప్రక్షాళణ చేయడం అన్న రెండు లక్ష్యాలనూ ఇంకా పూర్తి చేయాల్సి ఉందనిపేర్కొన్నారు. యూరోపియన్ యూనియన్ నుంచి బ్రిటన్ వైదొలగుతుందన్న (బ్రెగ్జిట్) వార్తల నేపథ్యంలో రాజన్ ఆర్‌బీఐ నుంచి నిష్ర్కమించడం దేశ ఆర్థిక వ్యవస్థపై తీవ్ర ప్రభావం చూపిస్తుందన్న ఆందోళనలుండడం తెలిసిందే. అయితే, బ్రెగ్జిట్ ముప్పు వంటి అస్థిరతలను ఎదుర్కొనేందుకు ఆర్‌బీఐ వద్ద తగిన వనరులున్నాయని రాజన్ తెలియజేశారు.
 
 నాన్ రెసిడెంట్ డిపాజిట్ల కాలపరిమితి సెప్టెంబర్-అక్టోబర్లోతీరనుండడంతో విదేశీ మారక నిల్వలపై ఒక్కసారిగా ఒత్తిడి పడొచ్చన్న ఆందోళనలనుకొట్టిపారేశారు. ‘‘నాన్ రెసిడెంట్ డిపాజిట్లను తిరిగి చెల్లించేందుకు తగిన ఏర్పాట్లు చేశాం. నా తర్వాత గవర్నర్‌గా బాధ్యతలు చేపట్టేవారు రిజర్వ్ బ్యాంకును మరింత ముందుకు తీసుకెళతారనే నమ్మకం నాకుంది. దేశంలో స్థూల ఆర్థిక, సంస్థాగత స్థిరత్వం కోసం ఓ వేదిక ఏర్పాటు చేయడానికి మూడేళ్లుగా ప్రభుత్వంతో కలసి పనిచేశాం. ద్రవ్యోల్బణం పరిధిలోనే ఉంది. ద్రవ్యపరపతి విధాన కమిటీ  ఏర్పాటు కావాల్సి ఉంది. స్వల్పకాలంలో మాత్రం అంతర్జాతీయ పరిణామాల నుంచి సవాళ్లు పొంచి ఉన్నాయి’ అని పేర్కొన్నారు.
 
  మార్కెట్లు ఎలా స్పందిస్తాయో..?
  రాజన్ ప్రకటన ప్రభావం సోమవారం స్టాక్, బాండ్ మార్కెట్లపై కనిపించనుంది. ఐఎంఎఫ్ ఆర్థికవేత్తగా 2008 ప్రపంచ ఆర్థిక సంక్షోభాన్ని ముందే పసిగట్టిన రాజన్‌ను 2013 సెప్టెంబర్లో యూపీఏ ప్రభుత్వం ఆర్‌బీఐ గవర్నరుగా నియమించింది. వడ్డీ రేట్ల విషయంలో పీడించే వైఖరితో రాజన్ ఆర్థిక వ్యవస్థను నాశనం చేస్తున్నారని ఇటీవల సుబ్రమణ్యం స్వామి సంచలన ఆరోపణలు చేశారు. అమెరికా పౌరసత్వం కలిగిన రాజన్ మానసికంగా పరిపూర్ణ భారతీయుడు కాదని కూడా ఆయన విమర్శించారు. అయితే స్వామి వ్యాఖ్యలను బీజేపీ నేతలెవ్వరూ సమర్థించకపోవటం గమనార్హం.
  
  మోదీకి అన్నీ తెలుసు!: రాహుల్  
  రాజన్ ప్రకటనపై కాంగ్రెస్ ఉపాధ్యక్షుడు రాహుల్ గాంధీ వ్యంగ్యంగా స్పందించారు. ‘ప్రధాని మోదీకి అన్నీ తెలుసు. ఆయనకు రాజన్‌లాంటి నిపుణుల అవసరం లేదు’ అని ట్వీట్ చేశారు.
  
  స్వాగతించిన జైట్లీ, స్వామి
  రాజన్ నిర్ణయాన్ని కేంద్ర ఆర్థిక మంత్రి అరుణ్ జైట్లీ స్వాగతించారు. ఆయన నిర్ణయాన్ని గౌరవిస్తామన్నారు. ఉత్తమ సేవలందించారంటూ ప్రభుత్వం తరఫున అభినందనలు తెలుపుతూ..  రాజన్ స్థానంలో వచ్చేదెవరన్నది త్వరలోనే ప్రకటిస్తామన్నారు. రాజన్ నిర్ణయం మంచి పరిణామమని బీజేపీ నేత సుబ్రమణ్యం స్వామి చెప్పారు. రాజన్ విషయంలో తాను చెప్పినవి వాస్తవాలన్నారు. అయితే రాజన్ నిర్ణయం దేశానికి నష్టమని ప్రతిపక్ష కాంగ్రెస్, వాణిజ్య వర్గాలు పేర్కొన్నాయి. ఆయన నిర్ణయం తనను నిరాశకు గురిచేసిందని కేంద్ర మాజీ ఆర్థిక మంత్రి చిదంబరం చెప్పారు. ప్రభుత్వమే పథకం ప్రకారం తప్పుడు నిందలు, నిరాధార ఆరోపణలతో రాజన్‌పై దాడి చేయించి ఈ పరిణామాన్ని ఆహ్వానించినట్టుగా కనిపిస్తోందన్నారు.


 తనకు రెండోవిడత రిజర్వు బ్యాంకు గవర్నర్ పదవి దక్కకపోవచ్చని రఘురామ్ రాజన్‌కు ముందే తెలిసిపోయినట్లుంది. తాను మళ్లీ అధ్యాపక వృత్తిలోకి వచ్చి, పాఠాలు చెప్పుకొంటానని ఆయన వ్యాఖ్యానించడం చూస్తుంటే అలాగే అనిపిస్తోంది. భారతీయ రిజర్వు బ్యాంకు గవర్నర్‌గా  తన పదవీకాలం సెప్టెంబర్ 4వ తేదీతో ముగుస్తుందని, ఆ తర్వాత మళ్లీ పాఠాలు చెప్పుకొంటానని ఆయన తన సహచరుల వద్ద వ్యాఖ్యానించారు. తన తర్వాత ఆ పదవి చేపట్టేవాళ్లు దేశాన్ని మరింత ఎత్తులకు తెస‍్తాడన్న నమ్మకం తనకుందని, మరో రెండు నెలలు అందరితో పనిచేస‍్తానని ఆయన అన్నారు.
 
 దాంతో అసలు రాజన్‌కే ఆ పదవి రెండోసారి చేపట్టడం ఇష్టం లేదా, లేక మోదీ సర్కారు తనను కొనసాగించడానికి సముఖంగా లేదన్న విషయం ఏమైనా ఆయనకు తెలిసిందా అనే అనుమానాలు వ్యక్తమవుతున్నాయి. రాజన్‌ను గవర్నర్‌గా కొనసాగించకూడదని, ఆయన అచ్చంగా అమెరికా మనిషని, ఆయన ఆలోచనలన్నీ అటువైపే ఉంటాయని బీజేపీ సీనియర్ నేత, ప్రముఖ న్యాయవాది సుబ్రమణ్యం స్వామి ఎప్పటినుంచో చెబుతున్నారు. అయితే కేంద్ర ఆర్థికమంత్రి అరుణ్ జైట్లీ మాత్రం రాజన్‌ను కొనసాగించడానికి మొగ్గు చూపినట్లు కథనాలు వచ్చాయి. ఈ నేపథ్యంలో రాజన్ తాజా వ్యాఖ్యలు సంచలనం సృష్టించాయి.


 ♦ సుబ్రమణ్యస్వామి మరోసారి విసుర్లు
 ♦ డిసెంబర్‌లో  పేలుతుందని వ్యాఖ్య
 న్యూఢిల్లీ: ఆర్‌బీఐ గవర్నర్ రఘురామ్ రాజన్‌పై బీజేపీ నాయకుడు సుబ్రమణ్య స్వామి మరోసారి తీవ్ర విమర్శలకు దిగారు. అంతర్జాతీయ ద్రవ్య నిధి (ఐఎంఎఫ్) మాజీ ఆర్థికవేత్త భారత్ ఆర్థిక వ్యవస్థలో టైమ్ బాండ్ పెట్టారని, ఇది డిసెంబర్‌లో పేలుతుందని వ్యాఖ్యానించారు. రాజన్‌పై పత్రికాముఖంగా విమర్శలు చేయడంతోపాటు గత నెల స్వయంగా ప్రధానికిసైతం రెండుసార్లు లేఖలు రాసిన స్వామి, తన తాజా విమర్శలకు ఈ సారి ట్విటర్‌ను ఎంచుకున్నారు. ‘‘భారత్ ఆర్థిక వ్యవస్థలో ఆర్3 (రఘురామ్ రాజన్) 2013లో ఒక టైమ్‌బాంబ్  పెట్టారు. డిసెంబర్ 2016లో ఇది పేలుతుంది. బ్యాంకులు 24 బిలియన్ డాలర్లను ఎఫ్.ఈ.ల్లో చెల్లించాల్సి ఉంటుంది’’ అని ట్వీట్ చేశారు. అయితే ఇంతకుమించి ఆయన ఇంకేమీ వివరించలేదు. ‘ఎఫ్.ఈ.’ అన్న పదం విదేశీ మారకద్రవ్యం (పారిన్ ఎక్స్ఛేంజ్) అని అర్థం. 
  ఆరోపణలో పసలేదా?
 2013లో విదేశీ కరెన్సీ బాండ్లు జారీ ద్వారా బ్యాంకులు 24 బిలియన్ డాలర్ల విదేశీ నిధులను సమీకరించాయి. ఈ ఏడాది చివరకు ఆ బాండ్ల మెచ్యూరిటీ ఉంది. అప్పట్లో రూపాయి విలువను పటిష్టపర్చేదిశగా దేశంలోకి విదేశీ మారకాన్ని తేవాలన్న లక్ష్యంతో విదేశీ కరెన్సీ బాండ్ల జారీకి రిజర్వుబ్యాంక్ అనుమతినిచ్చింది. ఈ విషయాన్ని ఇటీవలే రాజన్ ప్రస్తావిస్తూ... ఈ బాండ్ల చెల్లింపులు బ్యాంకులకు ఇబ్బంది ఏదీ కాదని, అవసరమైతే బ్యాంకులకు తగిన విదేశీ కరెన్సీని ఆర్‌బీఐ సర్దుబాటు చేస్తుందన్నారు. స్వామి ఆరోపణలు బహుశా ఈ అంశానికే సంబంధించినది అయితే ఈ విమర్శలో పసలేదన్నది నిపుణుల విశ్లేషణ.


 ఆర్‌బీఐ గవర్నర్ రఘురామ్ రాజన్
 ♦ విద్యాబోధనవైపు వెళ్లాలన్నది కోరికని వెల్లడి
 ♦ బ్యాంకింగ్‌లో ప్రభుత్వ జోక్యం లేకుండా
 ♦ చేశారని ప్రధాని మోదీపై ప్రశంసలు
 ♦ ఆర్థిక రంగం సరైన దారిలో ఉందని విశ్లేషణ
 న్యూఢిల్లీ: ఆర్థికమంత్రి అరుణ్‌జైట్లీతో సుహృద్భావ సంబంధాలున్నాయని ఆర్‌బీఐ గవర్నర్ రఘురామ్ రాజన్ బుధవారం చెప్పారు. కీలక అంశాలపై భిన్నాభిప్రాయాలు ఎప్పుడూ లేవన్నారు. సెప్టెంబర్ 4 తరువాత తన పదవీకాలాన్ని పొడిగించే అంశంపై వస్తున్న ఊహాగానాలపై స్పందించేందుకు మాత్రం ఆయన నిరాకరించారు. ప్రకటన వచ్చే వరకూ నిరీక్షించమని సూచించారు. ‘‘విద్యా బోధన వైపు వెళ్లాలన్నది నా చిరకాల కోరిక. ఆలోచన, పరిశోధనా, విద్యాబోధన నాకు అత్యున్నతమైన అంశాలు’’ అని ఒక టీవీ చానెల్‌కిచ్చిన ఇంటర్వ్యూలో వ్యాఖ్యానించారు. ప్రభుత్వ రంగ బ్యాంకుల్లో ప్రభుత్వ జోక్యానికి ప్రధాని నరేంద్ర మోదీ ముగింపు పలికారని రాజన్ ప్రశంసించారు. ద్రవ్యోల్బణం తగ్గుదల ధోరణి ఉంటేనే.. తదుపరి రేటు కోత ఉంటుందనీ ఈ సందర్భంగా స్పష్టం చేశారు.
  ఆ ఆరోపణల్లో పసలేదు...
 మానసికంగా తాను భారతీయుడిని కాదని బీజేపీ పార్లమెంటు సభ్యుడు సుబ్రమణ్యస్వామి చేసిన ఆరోపణల గురించి అడిగిన ఒక ప్రశ్నకు రాజన్ సమాధానం చెబుతూ, ఈ ఆరోపణల్లో అసలు అర్థంలేదని, నిరాధారమైనవని అన్నారు. ‘ఆధారాల్లేని ఆరోపణల గురించి మాట్లాడితే... ఆయా అంశాలకు మరింత బలం చేకూర్చినట్లు అవుతుంది. దేశం గురించి ఆలోచించేవారికి దేశం పట్ల ప్రేమ కూడా ఉంటుంది. కర్మయోగి (స్వలాభం చూసుకోకుండా... ఆదర్శవంతంగా నడుచుకునే వ్యక్తి)  తన పనితాను చేసుకుపోతాడని మా అత్తగారు చెబుతుంటారు’’ అని రాజన్ ఈ సందర్భంగా అన్నారు. వ్యక్తిగత ఆరోపణలను అసలు తాను పట్టించుకోనని, విధానపరమైన అంశాల్లో తప్పులు ఎత్తిచూపితే... వాటిని పరిశీలించి, తగిన నిర్ణయం తీసుకోడానికి వెనుకాడనని కూడా ఈ సందర్భంగా అన్నారు.
  రాజకీయ జోక్యం లేదు...
 మొండిబకాయిలకు సంబంధించి రాజకీయ జోక్యం చెదురుమదురు అంశంగా ఆయన పేర్కొన్నారు. మొండిబకాయిల సమస్యకు ప్రపంచ మందగమన పరిస్థితులు సహా పలు అంశాలు కారణమన్నారు. ప్రభుత్వ కార్యక్రమాల్లో భాగస్వామ్యం కావాలని మాత్రమే కేంద్రం కోరుకుంటోందని, మిగిలిన అంశాలకు సంబంధించి రాజకీయ జోక్యం, ఫోన్ల ప్రశ్నే ఉండదని రెండేళ్ల క్రితం బ్యాంకింగ్‌కు సంబంధించి జ్ఞాన్‌సంఘంలో ప్రధాని మోదీ చేసిన ప్రకటనను ఆయన ఈ సందర్భంగా ప్రస్తావించారు. మొత్తంమీద రుణ బకాయిల విషయంలో రాజకీయ జోక్యం పోయిందన్నది తన అభిప్రాయమని వివరించారు.
  తగిన దిశలో ఆర్థిక వ్యవస్థ...
 భారత్ ఆర్థిక వ్యవస్థ తగిన దిశలో నడుస్తోందని రాజన్ పేర్కొన్నారు. తగిన వర్షపాతం, వినియోగ డిమాండ్ పెంపుసహా, ముందస్తు ప్రణాళికలతో దేశ వృద్ధి మరింత పునరుత్తేజం అవుతుందన్న విశ్వాసాన్ని ఆయన వ్యక్తం చేశారు. ప్రైవేటు పెట్టుబడుల్లో వృద్ధి ప్రస్తుతం కీలక ముఖ్య అంశమని వివరించారు.
 తగిన సమయంలో నిర్ణయం: సిన్హా
 ఆర్‌బీఐ గవర్నర్‌గా రఘురామ్ రాజన్‌నే కొనసాగించాలా... లేక కొత్త వారిని నియమించాలా... అన్న అంశంపై ప్రధాని నరేంద్రమోదీ, ఆర్థికమంత్రి అరుణ్‌జైట్లీలు  తగిన సమయంలో ఒక నిర్ణయం తీసుకుంటారని ఆర్థికశాఖ సహాయమంత్రి జయంత్ సిన్హా బుధవారం విలేకరులకు తెలిపారు. మోదీ నేతృత్వంలో భారత్ ప్రతిష్ట, గుర్తింపు మరింత ఉన్నత స్థాయికి చేరిందని ప్రధాని అమెరికా పర్యటనను ఉద్దేశించి సిన్హా పేర్కొన్నారు.


 ♦ వర్షాలు పడి ధరలు తగ్గితే మేమూ తగ్గిస్తాం
 ♦ కీలక రేట్లపై ఆర్‌బీఐ గవర్నర్ రఘురామ్ రాజన్ వ్యాఖ్య
 ♦ ప్రస్తుత నిర్ణయానికి ద్రవ్యోల్బణం ఒత్తిళ్లే కారణమని వెల్లడి
 ♦ 2016-17లో వృద్ధి రేటు 7.6% ఉండొచ్చని అంచనా...
 ముంబై: ఆర్థిక నిపుణులు ఊహించినట్లుగానే... రిజర్వ్ బ్యాంక్ ఆఫ్ ఇండియా (ఆర్‌బీఐ) తన కీలక రేట్లలో ఎలాంటి మార్పులూ చేయలేదు. ద్రవ్యోల్బణం ఒత్తిళ్ల కారణంగా రేట్లను యథాతథంగా కొనసాగిస్తున్నట్లు మంగళవారంనాటి ద్రవ్యపరపతి విధాన సమీక్ష సందర్భంగా ఆర్‌బీఐ గవర్నరు రఘురామ్ రాజన్ స్పష్టంచేశారు. ‘‘కఠినమైన, తటస్థ ద్రవ్య విధానం అనుసరించాల్సిన అవసరం ఇప్పుడు లేదు. సరళతర విధానానికే అవకాశం ఉంది. తగిన వర్షపాతం నమోదై... ద్రవ్యోల్బణం కట్టడిలో ఉండే పరిస్థితులు గనక ఏర్పడితే... ఈ ఆర్థిక సంవత్సరంలోనే రేట్ల కోతకు అవకాశం ఉంది’’ అని రాజన్ వివరించారు.
  యథాతథ రేట్లు...
 తాజా నిర్ణయంతో... బ్యాంకులకు తానిచ్చే స్వల్పకాలిక రుణాలపై ఆర్‌బీఐ వసూలు చేసే వడ్డీరేటు రెపో... యథాతథంగా 6.5 శాతంగా కొనసాగుతుంది. బ్యాంకులు తన వద్ద ఉంచే అదనపు నిధులకు ఆర్‌బీఐ చెల్లించే వడ్డీ (రివర్స్ రెపో) రేటు 6 శాతంగా ఉంటుంది. బ్యాంకులు తమ మొత్తం డిపాజిట్లలో ఆర్‌బీఐ వద్ద డిపాజిట్ చేయాల్సిన నగదు నిల్వల నిష్పత్తి (సీఆర్‌ఆర్) 4 శాతంగా కొనసాగుతుంది. 2013న ఆర్‌బీఐ గవర్నర్‌గా మూడేళ్ల బాధ్యతలు చేపట్టిన తర్వాత క్రమంగా  రుణ బెంచ్‌మార్క్ రేటు- రెపోను 7.25 శాతం నుంచి 8 శాతానికి పెంచారు. 2014 మొత్తం భారత్ అధిక వడ్డీరేటు వ్యవస్థలో కొనసాగింది. ఇందుకు ద్రవ్యోల్బణాన్ని ఆయన కారణంగా చూపారు. అటు తర్వాత ఆర్థికశాఖ, పరిశ్రమల నుంచి వచ్చిన ఒత్తిళ్లు, ద్రవ్యోల్బణం, ద్రవ్యలోటు కట్టడికి ప్రభుత్వం తీసుకుంటున్న చర్యల నేపథ్యంలో క్రమంగా రెపో రేటును 1.50 శాతం తగ్గించారు. దీనితో ఈ రేటు ప్రస్తుతం 6.5 శాతానికి దిగివచ్చింది.
  కొన్ని ముఖ్యాంశాలు చూస్తే...
 ♦ ఈ ఏడాది(2016-17) వృద్ధి  రేటు అంచనా 7.6 శాతం.
 ♦ 2017 జనవరికి ద్రవ్యోల్బణం లక్ష్యం 5 శాతం. అయితే పెరుగుదల వైపే మొగ్గు ఉంది.
 ♦ ఏప్రిల్ నుంచీ బ్యాంకులు అనుసరిస్తున్న మార్జినల్ కాస్ట్ లెండింగ్ రేటు (నిధుల సమీకరణ భారం ఆధారిత రుణ రేటు) విధానంపై త్వరలో సమీక్ష.
 ♦ క్రూడ్ ధరల పెరుగుదల, 7వ వేతన సంఘం సిఫారసుల అమలు ప్రభావాలు ఎలా ఉంటాయన్నది చూడాల్సి ఉంది.
 ♦ రిజర్వ్ బ్యాంక్ ఇప్పటికే తగ్గించిన రెపో రేటు ప్రయోజనాన్ని బ్యాంకులు కస్టమర్లకు బదలాయించాలి. వృద్ధి పునరుత్తేజానికి ఇది దోహదపడుతుంది.
 ♦ ప్రభుత్వ రంగ బ్యాంకుల రుణాల్లో వృద్ధిఅవసరం. ప్రభుత్వం తగినంత మూలధనం ఇస్తే రుణ వృద్ధి సాధ్యమవుతుంది.
 ♦ ప్రభుత్వ పెట్టుబడులు పటిష్టమవుతున్నాయి. అయితే ప్రైవేటు రంగంలో పెట్టుబడులు ఇంకా బలహీనంగా కొనసాగుతుండడం ఆందోళన కలిగిస్తోంది.
  ఇప్పుడు తగ్గించే పరిస్థితి లేదు...
 రేట్ల కోతపై రాజన్ వ్యాఖ్యానిస్తూ... ‘‘ప్రస్తుతానికి  పలు కారణాలు రేటు కోతకు అనుకూలంగా లేవు. ఏప్రిల్‌లో రిటైల్ ద్రవ్యోల్బణం (5.39 శాతం) ఊహించినదానికన్నా అధికంగా ఉంది. రుతు పవనాల పరిస్థితి ఎలా ఉంటుంది? నిత్యావసరాలపై ప్రభావం ఏమిటి? అనేది చూడాలి. అలాగే ప్రభుత్వ సరఫరాల పరిస్థితినీ గమనించాలి. ఇలాంటి పలు అంశాలు రేటుకోతకు ప్రస్తుతం అనుమతించడం లేదు. మా విధానాలు సరళమా? కఠినమా? అని చెప్పటానికి పావురం-డేగల తో పోల్చటం నాకిష్టం లేదు. నిర్ణయాలేవైనా వాస్తవ గణాంకాల ప్రాతిపదికనే ఉంటాయి. మొండి బకాయిల పరిష్కారానికి ప్రభుత్వం- ఆర్‌బీఐ కలసి పనిచేస్తున్నాయి. మొండిబకాయిల్ని పరిష్కరించటం, ఆర్థిక వ్యవస్థలో అందరికీ భాగం కల్పించటం మా ఎజెండాలో కీలకం’’ అని వివరించారు.
  బ్యాడ్ బ్యాంక్ ప్రతిపాదనపై అభ్యంతరాలు...
 బ్యాడ్ బ్యాంక్ ఏర్పాటు ప్రతిపాదనను రాజన్ వ్యతిరేకించారు. ఎన్‌పీఏల కోసం ఒక బ్యాడ్ బ్యాంక్ లేదా అసెట్ రీకన్‌స్ట్రక్షన్ ఫండ్ ఏర్పాటుపై కేంద్రం కసరత్తు చేస్తున్నట్లు వార్తలొస్తున్న నేపథ్యంలో రాజన్ వ్యాఖ్యలు ప్రాధాన్యం సంతరించుకున్నాయి. ‘‘ఎన్‌పీఏల కోసం ఏర్పాటు చేసే ఏ ఫండ్స్‌లోనైనా రుణదాతల వాటా తక్కువ ఉండాలి. బ్యాంకులకు మెజారిటీ యాజమాన్యం ఇవ్వటమూ సరికాదు. బ్యాంకులు లేదా ప్రభుత్వం అసెట్ రీకన్‌స్ట్రక్షన్ కంపెనీల్ని ఏర్పాటు చేయటం నైతికంగా సరికాదు. దీనివల్ల బ్యాంకులు రుణ మంజూరులో మరింత నిర్లక్ష్యంగా వ్యవహరించే వీలుంది. ప్రభుత్వంతోపాటు ఇతరత్రా సంస్థలకు మైనారిటీ వాటా ఇస్తే బాగుంటుంది’’ అని రాజన్ చెప్పారు.
 సరళ విధానం హర్షణీయం పాలసీపై బ్యాంకర్ల స్పందన
 సరళతర విధానమే కొనసాగుతుందన్న ఆర్‌బీఐ ప్రకటన పట్ల బ్యాంకులు హర్షం వ్యక్తం చేశాయి. తగిన వర్షపాతం రేట్ల తగ్గుదలకు దారి తీస్తుందని పేర్కొన్నాయి. ప్రస్తుత నిర్ణయం ఊహించిందేనని ఎస్‌బీఐ చీఫ్ అరుంధతీ భట్టాచార్య చెప్పారు. విధాన నిర్ణయాలు సమతౌల్యంగా, ముందుచూపుతో ఉన్నట్లు విశ్లేషించారు. సరళతర విధానం, లిక్విడిటీ (ద్రవ్య లభ్యత) పరిస్థితులు తగిన విధంగా ఉండే దిశలో ఆర్‌బీఐ నిర్ణయాలు ఉన్నట్లు ఐసీఐసీఐ బ్యాంక్ చీఫ్ చందాకొచర్ పేర్కొన్నారు. ఆర్‌బీఐ ఆచితూచి నిర్ణయం తీసుకుందని, ఆగస్టులో అరశాతం కోత ఉంటుందని భావిస్తున్నామని యస్ బ్యాంక్ చైర్మన్ రాణాకపూర్ అభిప్రాయపడ్డారు. విధాన నిర్ణయాలు ఊహించిన విధంగానే ఉన్నాయని హెచ్‌డీఎఫ్‌సీ బ్యాంక్ చీఫ్ ఎకనమిస్ట్ అబీక్ బారువా పేర్కొన్నారు.
 రేటు కోత తప్పదు: పరిశ్రమలు
 రాజన్ నిర్ణయం తమకు నిరాశ కలిగించిందని, రెపో రేటు తగ్గించి ఉంటే పెట్టుబడుల ప్రక్రియ ఊపందుకోడానికి దోహదపడేదని పారిశ్రామిక వర్గాలు పేర్కొన్నాయి. సీఐఐ డెరైక్టర్ జనరల్ చంద్రజిత్ బెనర్జీ మాట్లాడుతూ, తదుపరి పాలసీ విధాన సమీక్షలో రేటు కోత ఉంటుందన్న అభిప్రాయాన్ని వ్యక్తం చేశారు. ఫిక్కీ కూడా ఇదే తరహా అభిప్రాయాన్ని వ్యక్తం చేసింది.  రెపో రేటును యథాతథ స్థితిలో కొనసాగించడం ద్వారా ఆర్‌బీఐ పరిశ్రమకు ఎటువంటి ఆశ్చర్యం కలిగించ లేదని అసోచామ్ ప్రెసిడెంట్ సునిల్ కనోరియా అన్నారు.
 ఇకపై పాలసీ నిర్ణయం కమిటీదా?
 ప్రస్తుతం రెపో రేటుపై ఆర్థిక నిపుణులతో కూడిన టెక్నికల్ అడ్వైజరీ కమిటీ ఒకటి సలహా ఇస్తున్నప్పటికీ... ఆర్‌బీఐ గవర్నర్ ఈ సలహాలను వీటో చేసే అధికారం ఉంది. అయితే రెపో నిర్ణయానికి సంబంధించి తనకు తానుగా నిర్ణయం తీసుకుని ప్రకటించడం ఆర్‌బీఐ గవర్నర్‌కు ఇదే బహుశా చివరిసారి అవుతుందని కొన్ని వర్గాలు భావిస్తున్నాయి. ఇందుకు సంబంధించి చట్టప్రకారం ఏర్పాటవుతున్న కమిటీ... వచ్చే సమీక్షలో ఏకాభిప్రాయం ప్రాతిపదికన రేటు నిర్ణయాన్ని వెలువరించవచ్చునని సమాచారం.
  మీడియా సరదాను పాడుచేయను..!
 సెప్టెంబర్ 4 తరవాత తన కొనసాగింపుపై వివరణ ఇస్తే మీడియా తమాషాను పాడుచేసి, కఠినంగా వ్యవహరించినట్లే అవుతుందని రాజన్ చమత్కరించారు.  ఇలాంటి సందర్భాల్లో ప్రభుత్వం-అధికారంలో ఉన్న వ్యక్తి మధ్య చర్చల అనంతరం ఒక నిర్ణయం ఉంటుందని ఆయన వ్యాఖ్యానించారు. ప్రస్తు తం ఈ విషయంపై వస్తున్న వ్యాఖ్యలన్నీ ఊహాగానాలేనన్న రాజన్... ‘వార్త వచ్చినప్పుడు మీకు(మీడియా) తెలుస్తుంది కదా’ అన్నారు. ప్రధాన మంత్రి,  ఆర్థిక మంత్రి ప్రకటనలకన్నా... అధికంగా తాను ఏమీ చెప్పలేనని రాజన్ పేర్కొన్నారు.


 ముంబై: రిజర్వ్ బ్యాంక్ ఆఫ్ ఇండియా (ఆర్‌బీఐ) మంగళవారం ప్రస్తుత ఆర్థిక సంవత్సరం మొట్టమొదటి ద్వైమాసికద్రవ్య, పరపతి విధాన సమీక్ష జరపనుంది. బ్యాంకులకు తానిచ్చే రుణాలపై వసూలు చేసే వడ్డీరేటు- రెపో ప్రస్తుతం 6.5 శాతం ఉండగా,  ఈ రేటును గవర్నర్ రఘురామ్ రాజన్ తక్షణం తగ్గించకపోవచ్చని మెజారిటీ అంచనా. అయితే ఆగస్టులో పావుశాతం కోత ఉంటుందన్నదీ ప్రస్తుతం మెజారిటీ అభిప్రాయంగా ఉంది. అయితే  యస్ బ్యాంక్ ఎండీ రాణా కపూర్ మాత్రం జూన్ 7న పావుశాతం రేటు కోత ఉండొచ్చన్నారు. తక్కువ స్థాయిలో ఉన్న ద్రవ్యోల్బణం, వర్షపాతంపై తగిన సానుకూల అంచనాలు వంటివి ఇందుకు రాణా కారణంగా చూపారు.
 రుణాలకు సంబంధించి ముఖ్యమైన సీజన్ నేపథ్యంలో ఆగస్టులో కూడా పావుశాతం కోత ఉండవచ్చనీ ఆయన పేర్కొంటున్నారు.  సెప్టెంబర్ 2013న ఆర్‌బీఐ గవర్నర్‌గా మూడేళ్ల బాధ్యతలు చేపట్టిన తర్వాత క్రమంగా  రుణ బెంచ్‌మార్క్ రేటు- రెపో రేటును 7.25 శాతం నుంచి 8 శాతానికి పెంచారు. అటుతర్వాత ఆర్థికశాఖ, పరిశ్రమల నుంచి వచ్చిన ఒత్తిడులు, ద్రవ్యోల్బణం, ద్రవ్యలోటు కట్టడికి ప్రభుత్వం తీసుకుంటున్న చర్యల నేపథ్యంలో క్రమంగా రెపో రేటును 1.50 శాతం తగ్గించారు. దీనితో ఈ రేటు ప్రస్తుతం 6.5 శాతానికి దిగివచ్చింది. అమెరికా సెంట్రల్ బ్యాంక్- ఫెడ్ ఫండ్ రేటుపై ఈ నెల 15-16 తేదీల్లో నిర్ణయం తీసుకోనున్న నేపథ్యంలో ఆర్‌బీఐ తాజా సమీక్ష జరుగుతుండటం విశేషం.


 న్యూఢిల్లీ: ఆర్‌బీఐ గవర్నర్‌గా రెండోసారి రఘురామ్ రాజన్‌కు అవకాశం ఇవ్వడంపై ఒకపక్క రాజకీయంగా దుమారం చెలరేగుతుండగా... ఆయనకు నెటిజన్ల నుంచి అంతకంతకూ మద్దతు పెరుగుతోంది. ఆన్‌లైన్ పిటిషన్ ప్లాట్‌ఫామ్ ఛేంజ్.ఆర్గ్ ద్వారా ఇప్పటివరకూ రాజన్ సెకెండ్ ఇన్నింగ్స్‌ను కోరుతూ ప్రధాని నరేంద్ర మోదీకి 60 వేల మంది విజ్ఞప్తి చేశారు. గడిచిన నెల రోజుల వ్యవధిలో ఈ వెబ్‌సైట్ ద్వారా కనీసం ఏడు పిటిషన్లు ప్రారంభం కాగా, వీటిపై 60 వేల మంది సంతకాలు చేయడం గమనార్హం.
 దేశ ఆర్థిక వ్యవస్థకు రాజన్ తూట్లు పొడిచారని, ఆయనను తక్షణం పదవి నుంచి తొలగించాలంటూ బీజేపీ నేత సుబ్రమణ్య స్వామి తీవ్రమైన ఆరోపణలు చేసిన సంగతి తెలిసిందే. దీనిపై ఆయన ప్రధాని మోదీకి లేఖ కూడా రాశారు. అయితే, ప్రధాని మాత్రం ఆర్‌బీఐ గవర్నర్ పోస్టుకు సంబంధించి చర్చ అనవరమని, సెప్టెంబర్‌లోనే(రాజన్ పదవీ కాలం సెప్టెంబర్ 3తో ముగియనుంది) దీనిపై నిర్ణయం ఉంటుందని స్పష్టం చేయడం గమనార్హం. రాజన్‌కు మరో చాన్స్ ఇచ్చేందుకుకే మోదీ సుముఖంగానే ఉన్నారంటూ ఊహాగానాలు ఇటీవల జోరందుకున్నాయి. అటు పారిశ్రామిక వర్గాల నుంచి కూడా రాజన్ రెండో విడత పగ్గాలకు మద్దతు లభిస్తుండటం దీనికి బలం చేకూరుస్తోంది.


 ఆర్‌బీఐ గవర్నర్‌గా కొనసాగింపు ఖాయమంటూ విశ్లేషణలు...
 న్యూఢిల్లీ: అది 2014 సంవత్సరం. బ్యాంకులకు తానిచ్చే రుణ రేటు అయిన రెపో రేటును తగ్గించడానికి, తద్వారా దిగువస్థాయికి వడ్డీ రేటు వ్యవస్థను తీసుకురావడానికి రిజర్వ్ బ్యాంక్ గవర్నర్‌గా రాజన్ ససేమిరా అంటున్న రోజులవి. ఇందుకు రాజన్ చూపుతున్న కారణం... ‘ద్రవ్యోల్బణం.’ వడ్డీరేట్లను తగ్గించి వ్యవస్థలో వృద్ధి రేటు పెంపునకు కృషి చేయాల్సిన తరుణమంటూ ప్రభుత్వం నుంచి వస్తున్న ఒత్తిడికి ఆయన ససేమిరా అంటున్న తీరును ఆర్థికశాఖలోని కొందరు సీనియర్ అధికారులే అప్పట్లో తీవ్రంగా తప్పుపట్టేవారు. తమ కోపాన్ని ప్రధాని నరేంద్రమోదీ నిర్వహించిన సమావేశంలోనే వారు బహిరంగంగా వెల్లడించారు.
 అయితే వారి కోపాన్ని మోదీ సముదాయించారు. సెంట్రల్ బ్యాంక్ ప్రతిష్టకు భంగం కలిగేట్టు బహిరంగ ప్రకటనలు చేయరాదనీ సూచించారు. ఈ సంఘటన తర్వాత క్రమంగా మోదీ-రాజన్ మధ్య సాన్నిహిత్యం పెరిగింది. అప్పట్నుంచి ఆర్థిక వ్యవస్థకు సంబంధించి వారివురూ కలిసి పనిచేస్తూవస్తున్నారు. నిజానికి రాజన్ లాంటి అంతర్జాతీయ ప్రముఖ ఆర్థికవేత్త ఆర్‌బీఐ గవర్నర్‌గా... తన హయాంలో పనిచేయడాన్ని మోదీ గొప్పగా భావించే వరకూ పరిస్థితి మారిపోయింది. రాయిటర్స్ వార్తా సంస్థతో ఉన్నతాధికారి ఒకరు ఈ వివరాల్ని పంచుకున్నారు. ఈ అంశాల నేపథ్యంలో రాజన్ పదవీకాలాన్ని మోదీ పొడిగించడానికే మొగ్గుతారని తాజా వార్తా కథనం సారాంశం.
  సన్నిహిత సహకారం...
 ప్రతి విషయాన్నీ మోదీతో రాజన్ చర్చించేవారనీ, ఇందుకు ఆయన తరచూ న్యూఢిల్లీ వచ్చేవారనీ, అయితే ఈ సమావేశాల గురించి పెద్దగా బయటకు తెలిసేదికాదని, ఈ పరిణామాన్ని గమనిస్తున్న సీనియర్ అధికారి ఒకరు తెలిపారు. ఆర్థికశాఖ సహాయమంత్రి జయంత్ సిన్హా... రాజన్‌కు కాలేజ్ ఫ్రెండ్ అన్న విషయమూ ఇక్కడ గమనార్హం.  మొండిబకాయిలతో సతమతమవుతున్న బ్యాంకుల్ని... ఈ సమస్య నుంచి గట్టెక్కించడంలో సహాయపడ్డానికి, సూచనలు చేయడానికి రాజన్‌కు మరోసారి తిరిగి అవకాశం లభించడం ఖాయమని కూడా సన్నిహిత వర్గాలు విశ్లేషిస్తున్నాయి.
 ఇటీవల ప్రధాని కార్యాలయం ఆర్థికశాఖ అధికారులకు ఒక స్పష్టమైన సూచనచేస్తూ... ప్రభుత్వం-ఆర్‌బీఐ మధ్య ఏకాభిప్రాయం మేరకే విధాన నిర్ణయాలు ఉండాలని నిర్దేశించినట్లు సమాచారం.  స్వయంగా కొందరు బీజేపీ నాయకులు చేస్తున్న ప్రచారం సైతం మోదీ నిర్ణయంపై ప్రభావం చూపదని వారు విశ్లేషిస్తున్నారు.  రాజన్ పునర్‌నియామకంపై మోదీ మాట్లాడుతూ, దీనిపై నిర్ణయం సెప్టెంబర్‌లోనే ఉంటుందని స్పష్టంచేశారు.
  మళ్లీ తథ్యం: మయారామ్
 రాజన్‌తో కలసి పనిచేసిన భారత ఆర్థికశాఖ కార్యదర్శి అరవింద్ మయారామ్  ఈ విషయమై మాట్లాడుతూ, ‘‘రాజన్‌కు ఆర్‌బీఐ గవ ర్నర్‌గా మరో దఫా అవకాశం ఉంటుంది. దీన్ని రాజన్ కూడా ఆమోదిస్తారు. భారత్ రాజకీయ ఆర్థిక వ్యవస్థ పట్ల ఆయనకు మంచి పట్టు ఉంది’’ అని అన్నారు.  ఐఎంఎఫ్ చీఫ్ ఎకనమిస్ట్‌గా పనిచేసిన రాజన్‌కు... అంతర్జాతీయ ఆర్థికాంశాలపై విశేష అవగాహన ఉంది. 2008 ఆర్థిక సంక్షోభాన్ని ముందుగానే ఊహించిన ఘనత ఆయనకు సొంతం.
 సెకండ్ ఇన్నింగ్స్‌కు విముఖత?
 రాజన్ సన్నిహితులను ఉటంకిస్తూ.. బెంగాలీ డెయిలీ కథనం..
 న్యూఢిల్లీ: రిజర్వ్ బ్యాంక్ గవర్నర్ రఘురామ్ రాజన్ సన్నిహితులను ఉటంకిస్తూ... కీలక అంశం మీడియాలో వెల్లడయ్యింది. దీని ప్రకారం సెప్టెంబర్ 4 తరువాత రెండవదఫా బాధ్యతల పొడిగింపును తాను కోరుకోవడం లేదని రాజన్ కేంద్రానికి స్పష్టం చేశారు. ప్రముఖ బెంగాలీ డెయిలీ ‘ఆనందబజార్ పత్రిక’ రాజన్ సన్నిహితులను ఉటంకిస్తూ... ఈ మేరకు వార్త రాసింది.  ‘‘నా బాధ్యతలు పూర్తయిన తర్వాత అమెరికా వెళ్లిపోతాను’ అని రాజన్ పేర్కొన్నట్లు బెంగాలీ పత్రిక పేర్కొంది. అమెరికా యూనివర్సిటీలో చేరి భారత్ ఆర్థిక వ్యవస్థపై పరిశోధన చేయాలని రాజన్ భావిస్తున్నట్లు కూడా తెలిపింది. అయితే రాజన్‌ను రెండవ దఫా బాధ్యతల్లో కొనసాగించాలని ప్రధాని నరేంద్ర మోదీ భావిస్తున్నట్లు కూడా పత్రిక పేర్కొనడం గమనార్హం.
  స్వామి ఆరోపణలకు విలువ లేదు!
 ‘చేయాల్సింది చాలా ఉంది.’ అంటూ  రెండవ విడత బాధ్యతల్లో కొనసాగడానికి  గతంలో రాజన్  సానుకూల సంకేతాలు ఇవ్వడం.. అలా జరగడానికి వీల్లేదంటూ బీజేపీ సీనియర్ నాయకుడు సుబ్రమణ్యస్వామి వ్యక్తిగత విమర్శలు.. ఆర్థికమంత్రి అరుణ్‌జైట్లీ ఖండన, అసలు ఈ అంశంపై మీడియా ఉత్సుకత తగదని ప్రధానమంత్రి సూచన వంటి అంశాల నేపథ్యంలో రాజన్ సన్నిహితులను ఉటంకిస్తూ వచ్చిన వార్తలకు ప్రాధాన్యత ఏర్పడింది. 2013 సెప్టెంబర్‌లో బాధ్యతలు చేపట్టిన రాజన్ మూడేళ్ల పదవీ కాలం సెప్టెంబర్ మొదటివారంలో ముగియనుంది. కాగా స్వామి ఆరోపణలను పలువురు బీజేపీ నాయకులే ప్రశ్నిస్తున్నట్లు తెలుస్తోంది.
 ముఖ్యంగా బీజేపీ అధ్యక్షుడు అమిత్ షా కూడా రాజన్ కొనసాగింపునకే మద్దతు నిస్తున్నట్లు డెయిలీ పేర్కొంది. కనీసం రెండేళ్లు ఆయన పదవీకాలాన్ని పొడిగించాలని మోదీ భావిస్తున్నట్లు తెలిపింది. ఆర్థికమంత్రి అరుణ్‌జైట్లీ మద్దతు కూడా ఆయనకు ఉందని, ఈ మేరకు ఆయన ప్రధానికి తన అభిప్రాయాన్ని తెలిపారని వెల్లడించింది. రాజన్‌ను కొనసాగించకపోతే... ప్రపంచ వ్యాప్తంగా తప్పుడు సందేశాన్ని పంపినట్లవుతుందని కూడా ఆర్థికమంత్రి భావిస్తున్నట్లు తెలిపింది.  పలువురు పారిశ్రామికవేత్తలు సైతం రాజన్‌కు ఇప్పటికే మద్దతు ప్రకటించారు.
 రూపాయిపై ‘రాజన్’ ఎఫెక్ట్!
 ముంబై: ఇంటర్‌బ్యాంక్ ఫారిన్ ఎక్స్ఛేంజ్ (ఫారెక్స్)లో డాలరుతో రూపాయి మారకపు విలువ వరుసగా మూడవరోజూ పడింది. మంగళవారం ముగింపుతో పోల్చితే 19 పైసలు నష్టపోయి 67.45 వద్ద ముగిసింది. డాలర్ బలపడ్డం.. క్యాపిటల్ అవుట్‌ఫ్లోస్ దీనికి కొన్ని కారణాలుకాగా, రెండవసారి బాధ్యతలు చేపట్టడానికి ఆర్‌బీఐ గవర్నర్ రఘురామ్ రాజన్ నిరాకరిస్తున్నారన్న వార్తలు సైతం ఫారెక్స్ ట్రేడింగ్‌పై ప్రభావం చూపినట్లు మార్కెట్ వర్గాలు పేర్కొన్నాయి.


 ♦ ఆర్థికమంత్రి జైట్లీ స్పష్టీకరణ
 ♦ వ్యక్తిగత విమర్శలు సరికాదని హితవు
  టోక్యో: రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్‌పై బీజేపీ సీనియర్ నాయకుడు సుబ్రమణ్యస్వామి చేస్తున్న తీవ్ర ఆరోపణలను ఆర్థికమంత్రి అరుణ్‌జైట్లీ మరింత స్పష్టంగా ఖండించారు. వ్యక్తులపై వ్యక్తిగతంగా విమర్శలు ఎంతమాత్రం తగవని పేర్కొన్న ఆయన, విధానాల్లో తప్పులపై మాత్రమే చర్చ జరపాల్సి ఉంటుందని సూచించారు. అయితే ఆయన సెప్టెంబర్ 4 తర్వాత ఆయన పదవీకాలాన్ని పొడిగిస్తారా? లేదా? అన్న అంశంపై సమాధానాన్ని మాత్రం దాటవేశారు. ‘‘వ్యక్తిగత అంశాలకు సంబంధించినంతవరకూ ఎవరి విమర్శలనూ నేను సమర్థించను. ఎందుకంటే... ఆర్‌బీఐ, దానికి గవర్నర్‌గా బాధ్యతలు నిర్వహిస్తున్న వ్యక్తి భారత్ ఆర్థిక వ్యవస్థలో కీలకం.’’అని చెప్పారు. జపాన్‌లో ఆరు రోజుల పర్యటనలో ఉన్న జైట్లీ ఒక వార్తా సంస్థకు ఇచ్చిన ఇంటర్వ్యూలో ఆర్‌బీఐ గవర్నర్‌పై వస్తున్న విమర్శలపై ఈ విధంగా స్పందించారు.
  ‘స్పెషల్ విండో’ను వినియోగించుకోండి
 కాగా నల్లడబ్బు పోగేసుకున్న వారికి ఆర్థికమంత్రి తీవ్ర హెచ్చరిక చేశారు. అప్రకటిత ఆస్తుల వెల్లడికి సంబంధించిన వెసులుబాటు (విండో) జూన్ 1 నుంచీ ప్రారంభంకానున్న అంశాన్ని జైట్లీ ప్రస్తావిస్తూ... ఈ అవకాశాన్ని నల్లడబ్బు వెల్లడికి వినియోగించుకోవాలన్నారు. లేదంటే తీవ్ర పరిణామాలను ఎదుర్కోవాల్సి వస్తుందని జైట్లీ అన్నారు.
  పెట్టుబడుల ఆకర్షణే లక్ష్యం
 భారత్‌లో వృద్ధి అవకాశాలను వివరించి జపాన్ పెట్టుబడిదారులను ఆకర్షించడమే లక్ష్యంగా తన పర్యటన జరుపుతున్నట్లు ఆర్థికమంత్రి పేర్కొన్నారు. ముఖ్యంగా భారత్‌లో మౌలిక రంగం వృద్ధిపై కేంద్రం దృష్టి సారిస్తున్నట్లు పేర్కొన్నారు. ప్రస్తుతం భారత్‌లో వెయ్యి జపాన్ కంపెనీలు కార్యకలాపాలు నిర్వహిస్తున్నాయని, ఈ సంఖ్యను రెట్టింపు చేయాలన్నది లక్ష్యంగా తెలిపారు.
  ఆంధ్రప్రదేశ్‌వైపు సాఫ్ట్‌బ్యాంక్ దృష్టి...
 జపాన్ ప్రధాని షింజో అబీ ఇతర సీనియర్  అధికారులతో జైట్లీ తన రెండవరోజు పర్యటనలో సమావేశమయ్యారు. సాఫ్ట్‌బ్యాంక్ తమ సోలార్ విద్యుత్ ప్రాజెక్టు ఏర్పాటుకు ఆంధప్రదేశ్‌ను గుర్తించినట్లు వెల్లడించారు. పర్యటనలో తొలి రోజు జైట్లీ సాఫ్ట్‌బ్యాంక్ గ్రూప్ సీఈఓ మసయోషీ సన్‌తో సమావేశమయిన సంగతి తెలిసిందే.


 ♦ రాజన్ పదవీకాలం పొడిగింపుపై మౌనం వీడిన ప్రధాని
 ♦ ఈ నియామకం పాలనాపరమైన వ్యవహారమని వ్యాఖ్య
 ♦ ఈ అంశంలో రాజకీయ నాయకుల జోక్యం తగదన్న అసోచామ్
 ♦ మరోసారి రాజన్‌పై స్వామి విమర్శలు
  వాషింగ్టన్/న్యూఢిల్లీ: రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ పదవీకాలం పొడిగింపు అంశంపై మీడియాలో వస్తున్న ఊహాగానాలు, రాజకీయ విమర్శల నేపథ్యంలో ప్రధాని నరేంద్రమోదీ మొట్టమొదటిసారి ఈ అంశంపై పెదవి విప్పారు. ఇది పూర్తిగా పాలనాపరమైన నిర్ణయం, వ్యవహారం అనీ, దీనిపై మీడియా ఉత్సుకత తగదని వ్యాఖ్యానించారు. కాగా అసలు ఈ వ్యవహారంలో రాజకీయ నాయకుల వ్యాఖ్యలు సరికాదని అసోచామ్ వ్యాఖ్యానించింది. ఇవేమీ పట్టించుకోని బీజేపీ సీనియర్ నాయకుడు సుబ్రమణ్యంస్వామి మామూలుగానే మరోసారి రాజన్‌పై విమర్శనాస్త్రాలు సంధించారు.
  సెప్టెంబర్‌లోనే నిర్ణయం: మోదీ
 వాల్‌స్ట్రీట్ జర్నల్‌కు ఇచ్చిన ఒక ఇంటర్వ్యూలో మోదీ ఈ అంశంపై మాట్లాడుతూ,  ‘‘ పాలనా పరమైన అంశం మీడియా ఉత్సుకత చూపే అంశంగా ఉండాలని నేను భావించడం లేదు. ఈ అంశాన్ని సెప్టెంబర్‌లోనే చేపట్టడం జరుగుతుంది’’ అని  స్పష్టంచేశారు.  రాజన్ మూడేళ్ల బాధ్యతలు సెప్టెంబర్ మొదటివారంలో ముగియనున్నాయి. రాజన్‌పై  స్వామి విమర్శలు... రాజన్ బాధ్యతల పొడిగింపునకు సంబంధించి అడిగిన ఒక ప్రశ్నకు ఇటీవలే ఆర్థికమంత్రి అరుణ్‌జైట్లీ సమాధానం ఇస్తూ ‘‘ప్రభుత్వం-ఆర్‌బీఐ మధ్య పరిపక్వతతో కూడిన సంబంధాలు ఉన్నాయి’’ అని వ్యాఖ్యానించారు. వ్యక్తిగత ఆరోపణలను అంగీకరించబోమని కూడా స్పష్టం చేశారు.   అంతర్జాతీయ ద్రవ్యనిధి సంస్థ చీఫ్ ఎకనమిస్ట్‌గా పనిచేసిన రాజన్‌కు... అంతర్జాతీయ ఆర్థిక అంశాలపై విశేష పట్టు ఉంది.
 2008 ఆర్థిక సంక్షోభాన్ని ముందుగానే ఊహించిన ఘనత ఆయనకు సొంతం. ప్రతిష్టాత్మక చికాగో యూనివర్సిటీ బూత్ స్కూల్ ఆఫ్ బిజినెస్ (ఫైనాన్స్)లో ‘ఆన్‌లీవ్’ ఫ్రొఫెసర్‌గా ఉన్నారు. సెప్టెంబర్ 2013లో ఆర్‌బీఐ గవర్నర్‌గా బాధ్యతలు చేపట్టిన తర్వాత క్రమంగా  రుణ బెంచ్‌మార్క్ రేటు- రెపో రేటును 7.25 శాతం నుంచి 8 శాతానికి పెంచారు. 2014 మొత్తం భారత్ అధిక వడ్డీరేటు వ్యవస్థలో కొనసాగింది. ఇందుకు ద్రవ్యోల్బణాన్ని ఆయన కారణంగా చూపారు. అటుతర్వాత ఆర్థికశాఖ, పరిశ్రమల నుంచి వచ్చిన ఒత్తిడులు, ద్రవ్యోల్బణం, ద్రవ్యలోటు కట్టడికి ప్రభుత్వం తీసుకుంటున్న చర్యల నేపథ్యంలో క్రమంగా రెపో రేటును 1.50 శాతం తగ్గించారు. దీనితో ఈ రేటు ప్రస్తుతం 6.5 శాతానికి దిగివచ్చింది. చేయాల్సింది చాలా ఉందని ఇటీవలే పేర్కొన్న రాజన్.. బాధ్యతల్లో రెండోసారి కొనసాగడానికి సిద్ధమని ఇటీవలే సంకేతాలు ఇచ్చారు.
 స్వామి మాటలు షరా మామూలే!
 యథాపూర్వం బీజేపీ నాయకుడు సుబ్రమణ్యం స్వామి శుక్రవారమూ రాజన్‌పై ప్రతికూల వ్యాఖ్యలు చేశారు. ఆయన విధానాలు వ్యవసాయ రంగానికి వ్యతిరేకమని వ్యాఖ్యానించారు. బ్యాంకింగ్ విధానాలు వ్యవసాయ రంగానికి ప్రతికూలంగా ఉన్నాయని విమర్శించారు.  అమెరికా బహుళజాతి కంపెనీలకు సహాయం చేసే విధంగా.. దేశంలో చిన్న, మధ్య తరహా పరిశ్రమల ప్రయోజనాలను రాజన్ దెబ్బతీసినట్లు భారతీయ కిసాన్ అభియాన్ నిర్వహించిన ఒక కార్యక్రమంలో పేర్కొన్నారు. ‘రాజన్ బాధ్యతల పొడిగింపులో మీడియా ఉత్సుకత అనవసరం అని మాత్రం ప్రధాని ఒక ఇంటర్వ్యూలో పేర్కొన్నారు’ అని సైతం స్వామి ఈ సందర్భంగా పేర్కొన్నారు.
 రాజకీయ నాయకులకు అనవసరం: అసోచామ్
 రాజన్ బాధ్యతలు రెండవ విడత పొడిగింపు అంశం రాజకీయ నాయకులకు అనవసరమని పారిశ్రామిక ప్రాతినిధ్య సంస్థ అసోచామ్ ఒక ప్రకటనలో పేర్కొంది. ఈ అంశంపై వ్యాఖ్యలు రాజకీయ నాయకులకు తగదని అభిప్రాయపడింది. సంబంధిత వ్యక్తి తీవ్ర తప్పిదం చేస్తేతప్ప, ఆర్‌బీఐ గవర్నర్ వంటి పదవిని రాజకీయాల్లోకి లాగడం సరికాదని స్పష్టంచేసింది.  ఇతర వర్ధమాన దేశాలతో పోల్చిచూస్తే భారత్ స్థూల ఆర్థిక వ్యవస్థ స్థిరత్వంలో రిజర్వ్ బ్యాంక్ పాత్ర కీలకమని వ్యాఖ్యానించింది. ఆర్‌బీఐ గవర్నర్ వంటి అత్యున్నత స్థాయి నియామకాలు ప్రభుత్వ నిర్ణయ పరిధికి లోబడిన వ్యవహారమని, దీనిపై అనవసర మీడియా ప్రకటనలు తగదని పేర్కొంది.


 న్యూఢిల్లీ:  రిజర్వ్ బ్యాంక్  ఆఫ్ ఇండియా గవర్నర్  రఘురామ రాజన్  పునర్నియామకంపై భారత ప్రధానమంత్రి నరేంద్ర మోదీ తొలిసారి    మౌనం వీడారు.  ఆర్ బీఐ గవర్నర్ గా రాజన్  రెండవసారి ఎంపికను  సమర్థిస్తారా అని అడిగినపుడు.. ఈ విషయం  పరిపాలనకు సంబంధించిన విషయమన్నారు.  దీంట్లో  మీడియాకు సంబంధంలేదని వ్యాఖ్యానించారు.  రాజన్ పై  బీజేపీ ఎంపీ, సీనియర్ నాయకుడు సుబ్రహ్మణ్య స్వామి వరుస సంచలన వ్యాఖ్యల   నేపథ్యంలో  ప్రధాని స్పందించడం  ఇదే మొదటిసారి.
 రాజన్ నియామకం  ఎడ్మినిస్ట్రేషన్ కు  సంబంధించిన  వ్యవహారమని  మోదీ తేల్చి చెప్పారు. ఈ విషయంలో మీడియాకు అంత  ఆసక్తి అవసరం లేదనుకుంటున్నానంటూ ప్రధాని  వ్యాఖ్యానించారు. మరోవైపు సెప్టెంబర్ లోనే ఈ విషయాన్ని పరిశీలిద్దా మని ది వాల్ స్ట్రీట్ జర్నల్ తో  చెప్పారు.  ఆయన పదవీకాలం  సెప్టెంబర్లో ముగుస్తుంది కనుక  అప్పుడు  చూద్దామన్నట్టు  చెప్పారు. 
 అయితే  ఆర్బీఐ గవర్నర్ గా రఘురామ రాజన్ ను  తక్షణమే తొలగించాలంటూ సుబ్రహ్మణ్య  స్వామి   డిమాండ్ చేయడంతో వివాదం మొదలైంది. రాజన్  ఉద్దేశపూర్వకంగానే  దేశ ఆర్థిక వ్యవస్థను నష్టపరుస్తున్నారని, దేశంలో నిరుద్యోగం పెరిగిందంటూ తీవ్రమైన ఆరోపణల పరంపర ను కొనసాగించారు. ఈ  విషయంలో  పట్టువీడని స్వామి ..మోదీకి   ఇప్పటికే రెండుసార్లు లేఖలు  కూడా రాశారు.
 కాగా  రఘురామ్ రాజన్ ఆర్బీఐ గవర్నర్గా రెండోసారి అర్హుడని కాంగ్రెస్  సీనియర్ నాయకులు  దిగ్విజయ్ సింగ్ అభిప్రాయం వ్యక్తం చేశారు. అటు నెటిజన్లు రాజన్ సమర్థతతపై అనేక సర్వేల్లో సానుకూలంగా స్పదించారు. రాజన్ మూడేళ్ల  పదవీకాలం ఈ సెప్టెంబర్ ముగియనుంది.
  


 న్యూఢిల్లీ: ఒకవైపు ఆర్బీఐ గవర్నర్ పదవి నుంచి రఘురామ్ రాజన్ను తొలగించాలంటూ బీజేపీ సీనియర్ నేత, ఎంపీ సుబ్రమణ్యం స్వామి డిమాండ్ చేస్తుంటే.. ఆర్థిక మంత్రి అరుణ్ జైట్లీ మాత్రం రాజన్ను వెనకేసుకు రావడం చర్చనీయాంశంగా మారింది. ఒక వ్యక్తిపై ఒకే పార్టీకి చెందిన ఇద్దరు నేతలు భిన్నమైన అభిప్రాయాలను వ్యక్తం చేస్తుండటం కాస్త గందరగోళానికి తావిస్తోంది. ఆర్బీఐ గవర్నర్‌గా రాజన్ తీసుకునే నిర్ణయాలు ఆర్థికవృద్ధి రేటుకు విఘాతం కల్గిస్తున్నాయని పేర్కొంటూ సుబ్రమణ్యం స్వామి ప్రధాని నరేంద్ర మోదీకి తాజాగా మరోసారి లేఖ రాయడంపై అరుణ్ జైట్లీ అసంతృప్తి వ్యక్తం చేశారు.ఒక అంశంపై కాకుండా ఒక వ్యక్తిని ప్రత్యేకంగా టార్గెట్ చేయడం ఎంత మాత్రం సమంజసం కాదని జైట్లీ పేర్కొన్నారు. ఏ ఒక్కరిపైనా వ్యక్తిగత విమర్శలకు దిగడాన్ని తాను ఎంతమాత్రం ఆమోదించనని తెలిపారు.
 'ఆర్బీఐ అనేది ప్రముఖసంస్థ. ఆ సంస్థకు స్వతంత్ర నిర్ణయాలు తీసుకునే అవకాశం ఉంది. వారి నిర్ణయం ఆమోదయోగ్యం లేకపోతే దానిపై చర్చ జరగాలి. అంతేగానీ ప్రజావేదికగా ఇలా రచ్చకెక్కడం తగదనేది నా అభిప్రాయం'అని జైట్లీ తెలిపారు. రఘురామ్ రాజన్ ను తొలగించాలని సుబ్రమణ్యం స్వామి రెండో సారి లేఖ రాసిన సంగతి తెలిసిందే. చిన్న, మధ్య తరగతి పరిశ్రమలకు అధిక వడ్డీ రేట్లను అమలు చేసి వృద్థిరేటును అడ్డుకున్న రాజన్ ఎట్టిపరిస్థితుల్లోనూ ఆర్బీఐ అత్యున్నత పదవిలో ఉండటానికి అర్హుడు కాదన్నారు. అవసరం లేకపోయినా అధిక వడ్డీ రేట్లను దీర్ఘ కాలం అమల్లో ఉంచి దేశ వ్యతిరేక విధానాలకు తెరలేపిన రాజన్ ను ఆ పదవి నుంచి తొలగించాలని డిమాండ్ చేశారు. రాజన్ మానసికంగా పూర్తి భారతీయుడు కాని కారణంగానే దేశ ఆర్ధికాభివృద్ధి వేగాన్ని అడ్డుకున్నారన్నారు. ప్రస్తుతం గ్రీన్ కార్డ్ను రెన్యువల్ చేయించుకునే పనిలో ఉన్న రాజన్ తరచు అమెరికా పర్యటనలు కొనసాగిస్తున్నారని సుబ్రమణ్యం స్వామి తన లేఖలో విమర్శించారు.


 న్యూఢిల్లీ: భారతీయ జనతా పార్టీ(బీజేపీ) సీనియర్ నాయకుడు, పార్లమెంట్ సభ్యుడు  సుబ్రమణ్య స్వామి మరోసారి రిజర్వ్ బ్యాంక్ ఆఫ్ ఇండియా(ఆర్బీఐ) గవర్నర్ రఘురామ్ రాజన్పై మండిపడ్డారు. చిన్న, మధ్య తరగతి పరిశ్రమలకు అధిక వడ్డీ రేట్లను అమలు చేసి వృద్థి రేటును అడ్డుకున్న రాజన్ ఎట్టిపరిస్థితుల్లోనూ ఆర్బీఐ అత్యున్నత పదవిలో ఉండటానికి అర్హుడు కాదన్నారు.
  
 ఈ మేరకు ప్రధాని నరేంద్ర మోదీకి రెండోసారి లేఖ రాశారు. అవసరం లేకపోయినా అధిక వడ్డీ రేట్లను దీర్ఘ కాలం అమల్లో ఉంచి దేశ వ్యతిరేక విధానాలకు తెరలేపిన రాజన్ ను ఆ పదవి నుంచి తొలగించాలని డిమాండ్ చేశారు. రాజన్ మానసికంగా పూర్తి భారతీయుడు కాని కారణంగానే దేశ ఆర్ధికాభివృద్ధి వేగాన్ని అడ్డుకున్నారన్నారు. ప్రస్తుతం గ్రీన్ కార్డ్ను రెన్యూవల్ చేయించుకునే పనిలో ఉన్న రాజన్ తరచు అమెరికా పర్యటనలు కొనసాగిస్తున్నారని సుబ్రమణ్య స్వామి విమర్శించారు.


 న్యూఢిల్లీ: రిజర్వ్ బ్యాంక్  గవర్నర్ రఘురామ రాజన్ పదవీకాలం పొడిగింపు పై  కేంద్ర ప్రభుత్వం సానుకూలంగా ఉన్నట్టు కనిపిస్తోంది.  ఇప్పటివరకు ఆయనపై నిప్పులు చెరుగుతున్న బీజేపీ సీనియర్ నాయకుడు, ఎంపీ  వ్యాఖ్యల ప్రభావం ప్రభుత్వం నిర్ణయాన్ని ప్రభావితం చేయనుందా అంటే లేదనే సంకేతాలు వెలువడుతున్నాయి.  ఆయన్ని రెండవసారి గవర్నర్ గా కొనసాగించేందుకు మోదీ ప్రభుత్వం  నిర్ణయం తీసుకున్నట్టు   విశ్వసనీయ వర్గాల సమాచారం. ఈ ఆగస్టులోనే  ప్రభుత్వం నిర్ణయం ప్రకటించనుందని  ప్రభుత్వ సీనియర్ అధికారి ఒకరు చెప్పారు.
 
 దీంతోపాటుగా  రాజన్ పై బీజేపీ ఎంపీ సుబ్రహ్మణ్య స్వామి  వివాదాస్పద వ్యాఖ్యల ప్రభావం   ఉండకపోవచ్చని ఆయని  పేర్కొన్నారు.   రాజన్ ను   కేంద్ర బ్యాంకు ఉత్తమ గవర్నర్ గా వరల్డ్ బ్యాంక్ మ్యాగజీన్ గుర్తించిందన్నారు. ఈ కారణాల నేపథ్యంలో ఆయన్ను రెండవ సారి  కేంద్ర బ్యాంకు గవర్నర్ గా నియమించే అవకాశ ఉందని తెలిపారు. ఈ నేపథ్యంలో త్వరలోనే తన నిర్ణయాన్ని  ప్రకటించనుందని తెలుస్తోంది. ఈ  సెప్టెంబర్ లో  మూడు సంవత్సరాల రాజన్ పదవీకాలం ముగియనుండగా..ఒక నెల ముందుగా ఆగస్టు నెలలో  ప్రభుత్వం నిర్ణయం వెలువడే అవకాశాలున్నాయని    చెప్పారు.
 
 
 కాగా యూపీఏ  ప్రభుత్వం  2013సెప్టెంబర్ 4 న   రఘురామ రాజన్ ఆర్బీయై గవర్నర్ గా నియమించింది.  అధికారంలోకి వచ్చీ రాగానే తనదైన సంస్కరణలతో బ్యాకింగ్  రంగంలో  మంచి  దూకుడును తీసుకొచ్చారు. అటు నెటిజన్లు కూడా ఆయనక సానుకూలంగా స్పందించారు. అయితే రాజన్ ను  తక్షణమే పదవి తొలగించి, చికాగో పంపించమంటూ వివాదాస్పద వ్యాఖ్యలు చేశారు. ఈనేపథ్యంలో రాజన్ ఉద్దేశ పూర్వకంగానే దేశ ఆర్థిక వ్యవస్థను నష్టాల బాట పట్టిస్తున్నారని మోదీకి ఒక లేఖ కూడా రాశారు.అయితే  రాజన్ పనితీరుపై ప్రధానమంత్రి నరేంద్ర మోదీ  ఇటీవల ప్రశంసలు కురింపించగా,  రఘురామ్ రాజన్ కాలాన్ని పొడిగించే విషయమై మీడియా ప్రశ్నల్ని ఆర్థిక మంత్రి అరుణ్ జైట్లీ దాటవేశారు. ఇది మీడియాతో చర్చించే విషయమా అంటూ.. అసహనం ప్రదర్శించారు.  ఈ క్రమంలో ఇపుడు  ప్రభుత్వం రాజన్ పట్ల సానుకూల ధోరణితో ఉందనే వార్తలకు ప్రాధాన్యత  చేకూరింది.
 
 
  


 * రాజకీయంగా అనేక అడ్డంకులున్నాయి...  
 * ఆర్‌బీఐ గవర్నర్ రాజన్ వ్యాఖ్యలు
 భువనేశ్వర్: భారత్‌లో నిర్మాణాత్మక సంస్కరణలను వేగవంతం చేయడం రాజకీయంగా కష్టతరమైన అంశమేనని రిజర్వ్ బ్యాంక్(ఆర్‌బీఐ) గవర్నర్ రఘురామ్ రాజన్ పేర్కొన్నారు. బ్యాంకుల మొండిబకాయిల సమస్యను పరిష్కరించడం, ద్రవ్యోల్బణానికి కళ్లెం వేయడం ద్వారా వృద్ధిని పరుగులు పెట్టించవచ్చని చెప్పారు. అదేవిధంగా కార్మిక సంస్కరణలు కూడా వృద్ధి జోరుకు దోహదం చేస్తాయని, అయితే దీనికి రాజకీయంగా తీవ్ర వ్యతిరేకత ఉండొచ్చని రాజన్ అభిప్రాయపడ్డారు.
 
 ‘ప్రపంచ ఆర్థిక వ్యవస్థ-భారత్’ అనే అంశంపై ఆయన చేసిన ఒక ఉపన్యాసంలో ఈ వ్యాఖ్యలు చేశారు. అంతర్జాతీయ ద్రవ్య విధానానికి సంబంధించి కొత్త నిబంధనలను తీసుకురావాల్సిన అవసరం ఉందని, ఈ విషయంలో భారత్ వంటి వర్ధమాన దేశాలు తమ గొంతును మరింత బలంగా వినిపించాల్సిందేనని రాజన్ పేర్కొన్నారు. ప్రపంచ ఆర్థిక వ్యవస్థ అనిశ్చితి ప్రభావం నుంచి భారత్ సురక్షితంగానే ఉందని చెప్పారు. ‘వరుసగా రెండేళ్లు కరువు, ప్రపంచ మార్కెట్లో డిమాండ్ బలహీనతలు వంటి ప్రతికూలతలు ఉన్నప్పటికీ... మనం 7.5 శాతం వృద్ధి రేటును సాధిస్తున్నాం.
 
 దీనికి స్థూల ఆర్థిక పరిస్థితుల్లో స్థిరత్వమే కారణం. అయితే, దీన్ని ఇదేవిధంగా కొనసాగించాలంటే ద్రవ్యోల్బణాన్ని అదుపులో ఉంచడం, బ్యాంకుల మొండిబకాయిల సమస్యకు తగిన పరిష్కారం చూపడం వంటివి కీలకం. అదేవిధంగా సంస్కరణల కొనసాగింపు ద్వారా దేశీ, విదేశీ ఇన్వెస్టర్లను ఆకర్షించేందుకు వీలవుతుంది. ఆర్థిక వ్యవస్థను మరింతగా పుంజుకునేలా చేయాలంటే నిర్మాణాత్మక సంస్కరణలే శరణ్యం. అయితే, రాజకీయంగా ఇది కష్టసాధ్యమైన విషయమే’ అని రాజన్ వివరించారు.
  
 రాజన్‌కు మరో అవకాశం ఇవ్వాలి: ఆది గోద్రెజ్
 మరికొద్ది నెలల్లో ఆర్‌బీఐ గవర్నర్ బాధ్యతల గడువు ముగియనున్న నేపథ్యంలో రఘురామ్ రాజన్‌కు పారిశ్రామిక వర్గాల నుంచి మద్దతు లభిస్తోంది. రాజన్‌ను స్ఫూర్తిదాయకమైన వ్యక్తిగా అభివర్ణించిన దిగ్గజ పారిశ్రామిక వేత్త ఆది గోద్రెజ్.. ఆయన్ను గవర్నర్‌గా మరోవిడత కొనసాగిస్తే భారత్‌కు మంచి జరుగుతుందని అభిప్రాయపడ్డారు. 2013 సెప్టెంబర్‌లో బాధ్యతలు స్వీకరించిన రాజన్ మూడేళ్ల పదవీ కాలం ఈ ఏడాది సెప్టెంబర్‌తో ముగియనుంది.
 
 కాగా, దేశ ఆర్థిక వ్యవస్థను రాజన్ ఉద్దేశపూర్వకంగానే దెబ్బతీశారని, ఆయనను తక్షణం పదవి నుంచి తొలగించాలంటూ బీజేపీ నాయకుడు సుబ్రమణ్య స్వామి తీవ్ర ఆరోపణలు చేసిన సంగతి తెలిసిందే. దీనిపై స్వామి ప్రధానికి లేఖ కూడా రాశారు. అయితే, ఈ వివాదంపై స్పందించేందుకు గోద్రెజ్ నిరాకరించారు. ‘ఇతర వ్యక్తులు ఏమన్నారన్నదానిపై నేను వ్యాఖ్యానించను.
 
 ప్రపంచవ్యాప్తంగా రాజన్‌కు అత్యంత గౌరవమర్యాదలు ఉన్నాయి. అనేక బిజినెస్ మ్యాగజీన్స్ ఆయనను అత్యుత్తమ సెంట్రల్ బ్యాంకర్‌గా ఎంపికచేశాయి. ఆయన గవర్నర్ బాధ్యతలను చాలా చక్కగా నిర్వర్తించారు. మరోసారి అవకాశం ఇవ్వడం దేశానికే మంచిది. అందుకే నేను ఆయన బాధ్యతల పొడిగింపునకు మద్దతిస్తున్నా’ అని గోద్రెజ్ వ్యాఖ్యానించారు.


 భువనేశ్వర్ : స్టార్టప్ లకు మెరుగైన వ్యాపార అవకాశాలు పెంపొందించాలని రిజర్వు బ్యాంకు ఆఫ్ ఇండియా గవర్నర్ అభిప్రాయం వ్యక్తంచేశారు. దేశంలో లైసెన్స్ రాజ్ అవతరించినప్పటికీ, ఇన్స్పెక్టర్ రాజ్ మరికొంతకాలం కొనసాగుతోందని తెలిపారు. రెగ్యులేషన్లు పరిశ్రమలకు అవకాశాలను పెంపొందించే విధంగా ఉండాలని, నిరుత్సాహపరిచే లాగా కాదని పేర్కొన్నారు. పరిశ్రమలకు సెల్ఫ్ సర్టిఫికేషన్ సిస్టమ్ లో దుర్వినియోగాలను నియంత్రించడానికి అథారిటీలు కొన్ని తనిఖీలను మాత్రమే కలిగి ఉండాలని ఆయన సూచించారు. చిన్న,మధ్యతరగతి పరిశ్రమలకు నిబంధనలను ఎలా సులభతరం చేయాలో తెలుపుతూ యూకే, ఇటలీ దేశాలను ఉదాహరణగా తీసుకుని వివరించారు. యునిటైడ్ కింగ్ డమ్ లో నిబంధనలు చాలా సులభతరంగా ఉంటాయి. ఇటలీలో అవే నిబంధనలు చాలా కఠినతరం. ఇటలీతో పోల్చుకుంటే యూకేలో స్టార్టప్ లు వేగంగా అభివృద్ధి చెందుతున్నాయని తెలిపారు.
 4వ ఒడిశా నాలెడ్జ్ హబ్ లో బ్యాంకర్లు, మంత్రులు, అధికార ప్రతినిధులను, పెట్టుబడిదారులను ఉద్దేశించి రాజన్ ప్రసంగించారు. భారత ఆర్థికవ్యవస్థ రికవరీ అవుతుందని, కానీ కొన్ని పరిశ్రమలు ఇంకా ఒత్తిడిలోనే కొనసాగుతున్నాయని ఆవేదన వ్యక్తంచేశారు. ఆ పరిశ్రమలను అభివృద్ధి బాటలో నడిపించడానికి ప్రభుత్వాలు, ఏజెన్సీలు దృష్టిసారించాలని తెలిపారు. చిన్న, మధ్య తరగతి పరిశ్రమలు, స్టార్టప్ లపై ఎక్కువగా దృష్టిసారించి, వారికి సులభతరంగా నిధుల చేకూర్చడంలో ఫైనాన్సియల్ ఇన్ స్టిట్యూషన్లు తోడ్పడ్డాలని చెప్పారు. అలాగే ఈ పరిశ్రమలకు మౌలిక సదుపాయాలు కల్పించడం వల్ల, ఆ పరిశ్రమల్లో పోటీతత్వానికి ప్రోత్సాహం పెరిగి, వృద్ధిని నమోదుచేస్తాయన్నారు. మంచి రుతుపవనాలు ఆర్థికవ్యవస్థను వృద్ధి బాటలో నడిపించడానికి సహకరిస్తాయని పేర్కొన్నారు.


 ♦ ప్రధానికి సుబ్రమణ్యస్వామి లేఖ
 ♦ ఉద్దేశపూర్వకంగా ఆర్థిక వ్యవస్థను
 ♦ ముందుకు వెళ్లనీయలేదని విమర్శ
  న్యూఢిల్లీ: భారతీయ జనతా పార్టీ (బీజేపీ) నాయకుడు, పార్లమెంటు సభ్యుడు సుబ్రమణ్యస్వామి మరోసారి రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్‌పై విమర్శనాస్త్రాలు సంధించారు. అమెరికా గ్రీన్ కార్డ్ పొందిన రాజన్... మానసికంగా పూర్తి భారతీయుడు కాదని, భారత ఆర్థిక వ్యవస్థ వృద్ధి పథంలో మరింత ముందుకు దూసుకుపోకుండా ఉద్దేశపూర్వకంగా అడ్డుకున్నారని తీవ్రంగా ఆరోపించారు. తక్షణం ఆయనను ఆర్‌బీఐ గవర్నర్ బాధ్యతల నుంచి తొలగించాలని ప్రధానమంత్రి నరేంద్రమోదీకి ఒక లేఖ రాశారు. రాజన్‌ను చికాగో తిరిగి పంపేయాలని స్వామి గతవారం చేసిన వ్యాఖ్యలు చర్చనీయాంశమైన సంగతి తెలిసిందే. 
 ఈ నేపథ్యంలోనే ఆయన ప్రధానికి తాజాగా లేఖ రాశారు. కాంగ్రెస్ నేతృత్వంలోని యూపీఏ ప్రభుత్వం నియమించిన వ్యక్తిని ఇప్పుడూ కీలక బాధ్యతల్లో కొనసాగించడం సరికాదని అన్నారు. ఆర్‌బీఐ చీఫ్ బాధ్యతలు నిర్వహించడానికి దేశానికి చెందిన అనేకమంది నిపుణులు ఉన్నారని పేర్కొన్నారు. జాతీయ ప్రయోజనాల రీత్యా రాజన్‌ను తక్షణం తొలగించాలని లేఖలో పేర్కొన్నారు. దేశాన్ని అధిక వడ్డీరేట్ల  వ్యవస్థలో దీర్ఘకాలం ఉంచడం వల్ల ఆర్థికాభివృద్ధి వేగం మందగించడం తన డిమాండ్‌కు ప్రధాన కారణమని వివరించారు. కేవలం రెండేళ్లలో ప్రభుత్వ రంగ బ్యాంకుల్లో మొండిబకాయిలు రెట్టింపై రూ.3.5 లక్షల కోట్లకు చేరడం దారుణమని పేర్కొన్నారు.
  సెప్టెంబర్‌లో ముగియనున్న బాధ్యతలు...
 రాజన్ మూడేళ్ల బాధ్యతలు సెప్టెంబర్ మొదటివారంలో ముగియనున్నాయి. అంతర్జాతీయ ద్రవ్యనిధి సంస్థ చీఫ్ ఎకనమిస్ట్‌గా పనిచేసిన రాజన్‌కు... అంతర్జాతీయ ఆర్థిక అంశాలపై విశేష పట్టు ఉంది. 2008 ఆర్థిక సంక్షోభాన్ని ముందుగానే ఊహించిన ఘనత ఆయనకు సొంతం. ప్రతిష్టాత్మక చికాగో యూనివర్సిటీ బూత్ స్కూల్ ఆఫ్ బిజినెస్ (ఫైనాన్స్)లో ‘ఆన్‌లీవ్’ ఫ్రొఫెసర్‌గా ఉన్నారు. సెప్టెంబర్ 2013లో ఆర్‌బీఐ గవర్నర్‌గా బాధ్యతలు చేపట్టిన తర్వాత క్రమంగా  రుణ బెంచ్‌మార్క్ రేటు- రెపో రేటును 7.25 శాతం నుంచి 8 శాతానికి పెంచారు.
 2014 మొత్తం భారత్ అధిక వడ్డీరేటు వ్యవస్థలో కొనసాగింది. ఇందుకు ద్రవ్యోల్బణాన్ని ఆయన కారణంగా చూపారు. అటు తర్వాత ఆర్థికశాఖ, పరిశ్రమల నుంచి వచ్చిన ఒత్తిడులు, ద్రవ్యోల్బణం, ద్రవ్యలోటు కట్టడికి ప్రభుత్వం తీసుకుంటున్న చర్యల నేపథ్యంలో క్రమంగా రెపో రేటును 1.50% తగ్గించారు. దీనితో ఈ రేటు 6.5%కి దిగివచ్చింది. చేయాల్సింది చాలా ఉందని ఇటీవలే పేర్కొన్న రాజన్.. రెండోసారి కొనసాగడానికి సిద్ధమని ఇటీవలే సంకేతాలు ఇచ్చారు.


 న్యూఢిల్లీ: బీజేపీ ఎంపీ సుబ్రహ్మణ్య స్వామి రిజర్వ్ బ్యాంక్ గవర్నర్ రఘురామ్ రాజన్ పై విమర్శలకు మరింత పెదును పెడుతున్నారు. ఆయన్ను ఆర్బీఐ గవర్నర్ గా  తొలగించాల్సిందేనని పట్టుబడుతున్నారు. ఈ క్రమంలో ఆయన  ప్రధానమంత్రి నరేంద్ర మోదీకి ఒక లేఖ రాశారు. భారతదేశ ఆర్థిక వ్యవస్థను నష్టాల బాట పట్టిస్తున్న రాజన్ వెంటనే  తొలగించాలని స్వామి డిమాండ్ చేశారు.
 
 నిన్న ( సోమవారం) ప్రధానికి రాసిన  లేఖలో రాజన్  మానసికంగా పూర్తి  భారతీయుడు కాదని  స్వామి వ్యాఖ్యానించారు. అమెరికా ప్రభుత్వం రాజన్  కు జారీ చేసిన గ్రీన్ కార్డ్  ను పొడిగించడమే దీనికి ఉదాహరణ అని పేర్కొన్నారు.  ఉద్దేశపూర్వకంగానే భారత ఆర్ధిక వ్యవస్థకు నష్టం కలిగించే చర్యలు చేపడుతున్నారని ఆరోపించారు.  రాజన్ తీసుకున్న నిర్ణయాల మూలంగా సూక్ష్మ, చిన్న, మధ్యతరహా పరిశ్రమలు బాగా దెబ్బతిన్నాయని దేశంలో నిరుద్యోగం పెరిగిపోయిందంటూ తన దాడిని కొనసాగించారు.
 
 కాగా ప్రధాని నరేంద్ర మోదీ గత ఏడాది ఆర్బీఐ గవర్నర్ పై బహిరంగంగానే  పొగడ్తలు కురిపించారు.  సంక్లిష్ట ఆర్థిక సమస్యలను పెర్ ఫెక్ట్ గా విశ్లేషించారని ఒక సమావేశంలో ప్రశంసించారు. అటు  కేంద్ర బ్యాంకునకు,  ప్రభుత్వానికి మధ్య  గౌరవప్రదమైన సంబంధంగా  నిలిచారనే ఖ్యాతిని రాజన్ దక్కించుకున్నారు.  మరోవైపు స్వామి ఆరోపణలపై రాజన్ మౌనం వహించారు. అటు రెండవసారి ఆయనకు  ఆర్ బీఐ గవర్నర్ గా బాధ్యతలు  అప్పటించడంపై నిర్వహించిన సర్వేలో  రాజన్  పెర్ ఫెక్ట్ అంటూ నెటిజన్లు కితాబిచ్చారు.  మరి ఈ విభిన్నాల నేపథ్యంలో ఎంపీ లేఖపై బీజీపీ ప్రభుత్వం ఎలా స్పందిస్తుందో చూడాలి.
 
  


 రెండో విడత బాధ్యతలకు సిద్దమేనని ఆర్‌బీఐ గవర్నర్ రాజన్ సంకేతాలు
 చేయాల్సింది చాలా ఉందని వ్యాఖ్య
  లండన్: రిజర్వ్ బ్యాంక్ గవర్నర్‌గా రెండవ విడత బాధ్యతలు చేపట్టడానికి సిద్ధమన్న సంకేతాలను రఘురామ్ రాజన్ ఇచ్చారు. వచ్చే సెప్టెంబర్‌తో మూడేళ్ల పదవీకాలాన్ని పూర్తిచేసుకుంటుండడం... ఆయన పదవీకాలాన్ని పొడిగించరాదని సుబ్రమణ్యస్వామిసహా పలువురు బీజేపీ నాయకులు డిమాండ్ చేస్తుండడం వంటి అంశాల నేపథ్యంలో.. రాజన్ లండన్‌లో ఒక వార్తచానెల్‌కు ఇంటర్వ్యూ ఇచ్చారు. ఈ మూడేళ్లూ ఉద్యోగ బాధ్యతలను పూర్తి సంతృప్తికరంగా నిర్వహించానని అన్నారు. తన పదవీకాలాన్ని పొడిగించరాదని పలువురు బీజేపీ నాయకులు డిమాండ్ చేస్తున్నప్పటికీ,  ఇంకా చేయాల్సింది చాలా ఉందని రాజన్ ఈ సందర్భంగా పేర్కొన్నారు. ఆర్థికవృద్ధి పథంలో తగిన చొరవల ద్వారా కొంత ముందడుగు వేయగలిగామని ఆయన అన్నారు.
 ‘ఒక వేళ మీ బాధ్యతలను పొడిగించకపోతే... సెంట్రల్ బ్యాంకర్‌గా మీ అజెండా మధ్యలో ఆగిపోతుంది కదా? అన్న ప్రశ్నకు రాజన్ సమాధానం చెబుతూ, ‘ఇది మంచి ప్రశ్న. చాలా చేశామని నేను భావిస్తున్నాను.  చేయాల్సింది సైతం ఎంతో ఉంటుందిక్కడ’ అని అన్నారు. పలు అధికారిక కార్యక్రమాల్లో ప్రసంగించేందుకు ప్రస్తుతం రాజన్ లండన్‌లో పర్యటిస్తున్నారు. అంతర్జాతీయ ద్రవ్యనిధి సంస్థ చీఫ్ ఎకనమిస్ట్‌గా పనిచేసిన రాజన్‌కు... అంతర్జాతీయ ఆర్థిక అంశాలపై విశేష పట్టు ఉంది. 2008 ఆర్థిక సంక్షోభాన్ని ముందుగానే ఊహించిన ఘనత ఆయనకు సొంతం. ప్రతిష్టాత్మక చికాగో యూనివర్సిటీ బూత్ స్కూల్ ఆఫ్ బిజినెస్ (ఫైనాన్స్)లో ‘ఆన్‌లీవ్’ ప్రొఫెసర్‌గా ఉన్నారు.
 సెప్టెంబర్ 2013లో ఆర్‌బీఐ గవర్నర్‌గా బాధ్యతలు చేపట్టిన తర్వాత క్రమంగా కీలక రెపో రేటును 7.25 శాతం నుంచి 8 శాతానికి పెంచారు. 2014 మొత్తం భారత్ అధిక వడ్డీరేటు వ్యవస్థలో కొనసాగింది. ఇందుకు ద్రవ్యోల్బణాన్ని ఆయన కారణంగా చూపారు. అటుతర్వాత ఆర్థికశాఖ, పరిశ్రమల నుంచి వచ్చిన ఒత్తిడులు, ద్రవ్యోల్బణం, ద్రవ్యలోటు కట్టడికి ప్రభుత్వం తీసుకుంటున్న చర్యల నేపథ్యంలో క్రమంగా రెపో రేటును 1.50 శాతం తగ్గించారు. దీనితో ఈ రేటు ప్రస్తుతం 6.5 శాతానికి దిగివచ్చింది.
  ఎన్‌పీఏల సమస్య పరిష్కారమవుతుంది...
 కాగా భారత్‌లో అమెరికా తరహా ‘లెహ్‌మాన్ మూమెంట్’ రుణ సంక్షోభ సమస్య తలెత్తే ప్రశ్నేలేదని రాజన్ అన్నారు. ఇందుకు తగిన పటిష్ట ఏర్పాట్లు ఉన్నాయని పేర్కొన్నారు. మొండిబకాయిల (ఎన్‌పీఏ)ల సమస్య పరిష్కారమవుతుందని ఆయన అన్నారు. ఇక అంతర్జాతీయ అనిశ్చితి పరిస్థితుల నుంచి భారత్ ఆర్థిక వ్యవస్థకు మూడు రక్షణ వలయాలు ఉన్నట్లు వివరించారు. చక్కటి ఆర్థిక విధానాలు, తగిన స్థాయి నిర్వహణలో ఉన్న రుణ భారం, సరిపడా విదేశీ మారకద్రవ్య నిల్వలుగా వీటిని అభివర్ణించారు.  ప్రభుత్వరంగ బ్యాంకుల ప్రైవేటీకరణకు తక్షణ ఆలోచన ఏదీ లేదని ఆయన స్పష్టంచేశారు.
  ద్రవ్యోల్బణం ఇంకా తీవ్రమే...!
 ద్రవ్యోల్బణం ఇంకా తగిన స్థాయికి దిగిరాలేదని రాజన్ వ్యాఖ్యానించారు. దీనితో తదుపరి రేటు కోతకు ఇప్పట్లో అవకాశం లేదని ఆయన సంకేతాలు ఇచ్చినట్లయ్యింది.


 ఎగుమతుల వృద్ధికి కరెన్సీ విలువ తగ్గింపు సరికాదు: రాజన్ వ్యాఖ్యలు
  లండన్: వ్యాపార రంగంలో నిర్ధిష్టంగా కొన్ని పరిశ్రమలకు మాత్రమే ప్రోత్సాహకాలు, రాయితీలు కల్పించడాన్ని ఆర్‌బీఐ గవర్నర్ రఘురామ్ రాజన్ తీవ్రంగా తప్పుబట్టారు. ఈ విధంగా ప్రోత్సాహకాలు ఇవ్వడం వల్ల ఆ పరిశ్రమ నాశనానికే దారితీయొచ్చని ఆయన వ్యాఖ్యానించారు. ఎగుమతుల మందగమనం నుంచి బయటపడటం కోసం కరెన్సీ విలువను తగ్గించడం వంటి చర్యలు తీసుకోవాలంటూ పారిశ్రామిక చాంబర్లు పదేపదే కోరుతుంటాయని.. అయితే, ఇది ఏమాత్రం సరైన విధానం కాదని ఆర్‌బీఐ గవర్నర్ పేర్కొన్నారు. ‘ప్రాజెక్ట్ సిండికేట్’కు రాసిన ఒక ఆర్టికల్‌లో ఆయన ఈ అభిప్రాయాలను వ్యక్తం చేశారు.
 ‘భారత్ ఎగుమతులు పడిపోవడానికి కరెన్సీ విలువ ఒక్కటే కారణం కాదు. అంతర్జాతీయంగా పలు అంశాలు దీన్ని ప్రభావితం చేస్తున్నాయి. ముఖ్యంగా డిమాండ్‌ను పెంచుకోవడం కోసం ధనిక దేశాలు తీసుకుంటున్న పాలసీ చర్యలు భారత్ వంటి వర్థమాన దేశాలకు రిస్కులు తెచ్చిపెడుతున్నాయి. ఏ పరిశ్రమలను ప్రోత్సహించాలంటూ చాలామంది అడుగుతుంటారు. అసలు నిర్ధిష్టంగా ఏదైనా రంగానికి రాయితీలు ఇవ్వడమంటే, ఆ పరిశ్రమ నాశనాన్ని కోరుకున్నట్లే. విధానకర్తలుగా మా పని కేవలం వ్యాపార కార్యకలాపాలు పెరిగేలా చూడటం. అంతేతప్ప వ్యాపార ప్రక్రియలను శాసించడం కాదు’ అని రాజన్ అభిప్రాయపడ్డారు.
 కరువు, అంతర్జాతీయ అనిశ్చితి ఉన్నా...
 వరుసగా రెండేళ్లు కరువు పరిస్థితులు నెలకొనడం, అంతర్జాతీయంగా ఆర్థిక అనిశ్చితి వెంటాడుతున్నప్పటికీ భారత్ 7 శాతం పైగా వృద్ధిరేటుతో నిలదొక్కుకోగలిగిందని గవర్నర్ పేర్కొన్నారు. ‘స్థూల ఆర్థిక స్థిరత్వం కోసం ఒక దేశీయ ప్లాట్‌ఫామ్‌ను రూపొందించేందుకు భారత్ ప్రయత్నిస్తోంది. దీని ఆధారంగా వృద్ధిని పెంచుకోవాలనేది లక్ష్యం. తద్వారా ఇక్కడి మార్కెట్లు విదేశీ ప్రతికూల అంశాలను సమర్థంగా తట్టుకునేందుకు వీలవుతుంది’ అని రాజన్ వివరించారు.
  రాజన్‌ను తొలగించాలి: స్వామి
 భారత్‌లో నిరుద్యోగం పెరిగిపోవడానికి, పారిశ్రామిక రంగ పతనానికి ఆర్‌బీఐ గవర్నర్ రాజన్ కారణమని... ఆ పదవి నుంచి ఆయన్ను తొలగించాల్సిందిగా బీజేపీ నేత సుబ్రమణ్య స్వామి పేర్కొన్నారు. ‘ఆర్‌బీఐ గవర్నర్‌గా ఆయన పనికిరాడనేది నా అభిప్రాయం. ద్రవ్యోల్బణాన్ని కట్టడి చేస్తున్నామని చెబుతూ.. వడ్డీరేట్లను పెంచేశారు. దేశాన్ని ఇది తీవ్రంగా డెబ్బతీసింది. ఆయనను ఎంత తొందరగా షికాగోకు పంపేస్తే అంత మంచిది’ అని స్వామి వ్యాఖ్యానించారు. షికాగో యూనివర్సిటీ.. బూత్ స్కూల్ ఆఫ్ బిజినెస్‌లో ఆర్థిక శాస్త్ర ప్రొఫెసర్ అయిన రాజన్.. ప్రస్తుతం అక్కడ సెలవులో ఉన్నారు.


 ♦ ఆర్‌బీఐ గవర్నర్ రఘురామ్ రాజన్
 ♦ కేంద్ర బ్యాంకుల మధ్య చర్చకు పిలుపు
 లండన్: ‘హెలికాప్టర్ మనీ’ విధాన అవసరం నిగ్గుతేలాల్సి ఉందని రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ పేర్కొన్నారు. దీనిపై సెంట్రల్ బ్యాంకుల మధ్య చర్చ జరగాల్సి ఉందని పిలుపునిచ్చారు. ‘హెలికాప్టర్ మనీ’ విధానానికి సంబంధించి రాజకీయ సంబంధ అంశాలు... ఆర్థిక ప్రయోజనాలు అన్నింటిపై చర్చ జరగాలని అన్నారు. లండన్ స్కూల్ ఆఫ్ ఎకనమిక్స్‌లో చేసిన ఒక ప్రసంగం సందర్భంగా రాజన్ ఈ విషయాన్ని ప్రస్తావించారు. ఆర్థిక సమస్యను మరింత తీవ్రతరం చేస్తుందా? లేక సంక్షోభాలకు సమాధానం లభిస్తుందా? అన్న అంశంపై లోతైన చర్చ జరగాల్సి ఉందని అంతర్జాతీయ ద్రవ్యనిధి సంస్థ ఆర్థికవేత్తగా పనిచేసిన రాజన్ అన్నారు.
  హెలికాప్టర్ మనీ అంటే...
 ప్రస్తుత సంపద, నిర్దిష్టకాలంలో వృద్ధి అవకాశాలు వంటి పలు పటిష్ట అంశాల ప్రాతిపదికన తగిన స్థాయిలో కరెన్సీ ముద్రణ జరుగుతుంది. వీటన్నింటినీ పట్టించుకోకుండా... సెంట్రల్ బ్యాంకులు భారీగా ద్రవ్య ముద్రణ చేసి... దానిని వ్యవస్థలోకి వెదజల్లడమే‘హెలికాప్టర్ మనీ’ విధానంగా పేర్కొంటున్నారు. 2008 ఆర్థికమాంద్యం నేపథ్యంలో అమెరికా సెంట్రల్ బ్యాంక్ భారీగా నిధులను ముద్రించి దానిని వ్యవస్థలోకి పంపింది. తక్కువ వడ్డీరేట్లతో మార్కెట్లలోకి భారీ నిధులు కుమ్మరించడం ద్వారా పలు రంగాల్లో తాజా పెట్టుబడులు జరిగేలా చూడటం, దీంతో ఉపాధి అవకాశాలు పెంపొందించడం... ‘హెలికాప్టర్ మనీ’ విధానం ఉద్దేశం.
 అయితే దీనివల్ల పలు దేశాల్లో కరెన్సీ విలువలు భారీగా పడిపోవడం, ద్రవ్యోల్బణం వంటి పలు ఆర్థిక సవాళ్లు ఏర్పడ్డాయి. ఇలా ముద్రించిన డబ్బును తిరిగి వ్యవస్థలోంచి వెనక్కు తీసుకుంటే తలెత్తే పరిణామాలు సానుకూలంగా ఉంటాయా? లేక ప్రతికూలంగా ఉంటాయా? అన్న అంశం కూడా ఇప్పుడు చర్చనీయాంశమయ్యింది. ఈ ‘హెలికాప్టర్ మనీ’ విధానాన్ని  1969లో అమెరికా ఆర్థికవేత్త మిల్టన్ ఫ్రెడ్‌మన్ మొట్టమొదటిసారిగా ప్రతిపాదించారు. 2002లో మరో అమెరికా ఆర్థికవేత్త, ఫెడరల్ రిజర్వ్ మాజీ చైర్మన్ బెన్ బెర్నాకీ దీనిని ప్రస్తావించడంతో ఈ పదం తిరిగి వెలుగులోకి వచ్చింది. 2006లో ఆయన అమెరికా ఫెడరల్ బ్యాంక్ (సెంట్రల్ బ్యాంక్) గవర్నర్‌గా బాధ్యతలు చేపట్టిన తర్వాత ఈ విధానాన్ని ఆయన అమల్లోకి సైతం తీసుకువచ్చారు.
  ‘ట్రాఫిక్ సిగ్నల్’ వ్యవస్థ!
 ఒక దేశం ద్రవ్య విధానం... ఇతర దేశాల ద్రవ్య విధానాలపై ప్రతికూల ప్రభావం  పడకుండా సెంట్రల్ బ్యాంకులకు సంబంధించి ఒక ‘ట్రాఫిక్ సిగ్నల్’ తరహా వ్యవస్థ ఉండాలని రాజన్ ఈ సందర్భంగా ప్రతిపాదించారు.


 పెద్ద మొత్తాల్లో ఎడ్యుకేషన్ లోన్స్ తీసుకుని బడా సంస్ధల్లో డిగ్రీలు చేయడం వల్ల ఏం ప్రయోజనం కలగదనీ.. అందువల్ల విద్యార్ధి అప్పుల పాలవుతారని రిజర్వు బ్యాంకు గవర్నర్ రఘురాం రాజన్ అన్నారు. శివనాదర్ యూనివర్సిటీలో స్నాతకోత్సవం సందర్భంగా ముఖ్య అతిథిగా హాజరైన రాజన్.. ఈ పై వ్యాఖ్యలు చేశారు. పెద్ద సంస్థల్లో చేరడం వల్ల ఏమీ ఉపయోగం లేదని, విద్యార్థి డిగ్రీని అందుకునే క్రమంలో అందుకు తగ్గ కృషి చేయాలని ఆయన అన్నారు. ఖరీదైన కాలేజీలు ఇస్తున్నవాటిలో చాలావరకు డిగ్రీలు పనికిమాలినవేనని.. వాటి వల్ల ఉద్యోగాలు రాక, తీసుకున్న విద్యారుణాలు తిరిగి చెల్లించలేక విద్యార్థులు, వాళ్ల తల్లిదండ్రులు అప్పుల పాలు అవుతున్నారని ఆయన వివరించారు.
 
 ప్రస్తుతం అందుబాటులో ఉన్న ప్రైవేటు విద్య ఖరీదు ఎక్కువగా ఉందనీ.. రాబోయే కాలంలో ఇది మరింతగా పెరగనుందని అన్నారు. ఈ విద్యాసంస్థలు వెనుకబడిన విద్యార్ధుల వైపు కన్నెత్తి కూడా చూడవనీ.. ఆఖరి అతను పనికిరాని డిగ్రీ, అప్పులతో సతమతం కావాల్సిన పరిస్థితి ఉంటుందని తెలిపారు. ఇలా స్నాతకోత్సవంలో చెప్పిన మాటలను పిల్లలు త్వరగానే మర్చిపోతారని కానీ, ఇప్పటి నుంచి ఐదేళ్ల తర్వాత విద్యార్థులకు ఉన్న నైపుణ్యాలను బట్టి మంచి ఉద్యోగాలు వస్తాయని అన్నారు.


 ♦ ఆర్‌బీఐ గవర్నర్ రఘురామ్ రాజన్
 ♦ దీనిపై ఐఎంఎఫ్ వైఖరి మారాలని సూచన
 ముంబై: వర్థమాన దేశాలు అనుసరించే ద్రవ్య విధానాల పట్ల అంతర్జాతీయ ద్రవ్యనిధి (ఐఎంఎఫ్) సంస్థ వంటి బహుళజాతి సంస్థలు తమ ధోరణిని మార్చుకోవాలని రిజర్వ్ బ్యాంక్ గవర్నర్ రఘురామ్ రాజన్ సూచించారు. అభివృద్ధి చెందిన దేశాల్లో ద్రవ్య, పరపతి విధానాలు పటిష్టంగా అన్నీ ఆలోచించి తగిన విధంగా తీసుకుంటారని, వర్థమాన దేశాల్లో అలాకాకుండా ప్రభుత్వం లేదా గవర్నర్ల ‘తిక్క’ నిర్ణయాలు ఉంటాయని బహుళజాతి సంస్థలు భావిస్తుంటాయని, ఈ ధోరణి సరికాదని రాజన్ ఇక్కడ జరిగిన ఒక కార్యక్రమంలో పేర్కొన్నారు. పటిష్ట రీతిలో రాజకీయ, ఆర్థిక పరిస్థితులన్నింటినీ పరిగణనలోకి తీసుకునే వర్థమాన దేశాల్లో కూడా ద్రవ్య పరపతి విధానాలు ఉంటాయని వివరించారు.
  ఏప్రిల్5 రేటు కోతలో మెజారిటీ నిర్ణయానికే రాజన్ ఓటు!
 ఆర్‌బీఐ ఈ నెల 5వ తేదీన బ్యాంకులకు తానిచ్చే రుణ రేటు రెపోను పావుశాతం తగ్గించింది. దీనితో ఈ రేటు 6.5 శాతానికి చేరింది.  ఈ సందర్భంగా గవర్నర్ రఘురామ్ రాజన్, ఇందుకు సంబంధించి టెక్నికల్ అడ్వైజరీ కమిటీ మెజారిటీ అభిప్రాయానికే ఓటు చేశారు. ఈ విషయంలో ఆయన ప్రస్తుతం తనకుతానుగా నిర్ణయం తీసుకునే అవకాశం ఉన్నా... మెజారిటీ ప్రాతిపదికన రేటు కోత నిర్ణయం తీసుకున్నట్లు నేడు విడుదలైన నాటి సమావేశం మినిట్స్ వివరాలు తెలిపాయి.


 న్యూఢిల్లీ: ఇళ్ల ధరల తగ్గింపునకు ఇక ఎలాంటి అవకాశం లేదని రియల్టర్ల సమాఖ్య క్రెడాయ్ పేర్కొంది. కాగా ఆర్‌బీఐ గవర్నర్ రఘురామ్ రాజన్ సోమవారం ఒకానొక సందర్భంలో చాలా మంది ప్రజలు ప్రాపర్టీని కొనుగోలు చేయడానికి అనువుగా రియల్ ఎస్టేట్ డెవలపర్లు ఇంటి ధరలను తగ్గించాలని కోరారు. దేశంలోని రియల్టీ ధరలు దాదాపు 20-30 శాతంమేర తగ్గాయని, ఇక అంతకు మించి ఇంకా ధరలు తగ్గే అవ కాశం లేదని క్రెడాయ్ పేర్కొంది. మళ్లీ ఏమైనా ధర తగ్గింపు జరిగితే ఎన్‌పీఏలు పెరిగే అవకాశముందని, ప్రాజెక్టుల డె లివరీ నిలిచిపోవచ్చని అభిప్రాయపడింది.


 న్యూఢిల్లీ: రఘురామ్ రాజన్.. పేరుకు తగ్గట్టే రాజులా ఆర్‌బీఐ లో అత్యంత శక్తివంతమైన వ్యక్తి కావొచ్చు. కానీ ఆయన మాత్రం అందరికన్నా ఎక్కువ వేతనం తీసుకోవడం లేదు. ఆర్‌టీఐ చట్టం కింద ఆర్‌బీఐ విడుదల చేసిన వివరాల ప్రకారం.. ఆర్‌బీఐ గవర్నర్  రాజన్ నెలవారీ వేతనం కింద రూ.1,98,700 (బేసిక్-రూ.90,000, డీఏ-రూ.1,01,700, ఇతర అలవెన్సులు-రూ.7000) తీసుకుంటున్నారు. ఆర్ బీఐ అధికారులైన గోపాలకృష్ణ సీతారామ్ హెగ్దే(రూ.4 లక్షలు), అన్నామలై అరపులి గౌండర్(రూ.2,20,355), వి కందసామి(రూ.2.1 లక్షలు)లు రాజన్ కన్నా ఎక్కువగా నెలవారీ వేతనం తీసుకుంటున్నారు.


 న్యూఢిల్లీ: ప్రస్తుతం రిజర్వ్ బ్యాంక్ ఆఫ్ ఇండియా (ఆర్బీఐ)లో అత్యంత శక్తిమంతమైన వ్యక్తి ఎవరంటే అందరూ చెప్పే పేరు ఆ బ్యాంకు గవర్నర్ రఘురాం రాజన్. కానీ, ఆయనకు నెలవారీ అందే జీతం మాత్రం మిగిలిన ఉద్యోగులతో పోలిస్తే చాలా తక్కువేనని చెప్పాలి.
 
 ఆర్బీఐ తాజాగా తన వైబ్సైట్లో ప్రచురించిన వివరాల ప్రకారం.. రాజన్ అందుకునేది నెలకు రూ.1,98,700 వేతనం. ఇందులో రూ. 90 వేలు బేసిక్ పే కాగా, లక్షా పదిహేడొందలు డీఏ (కరువు భత్యం), మరో 7 వేలు ఇతర భత్యాల కింద రాజన్కు అందుతోంది. ఇక ఆర్బీఐలో పనిచేసే ఇతర ఉద్యోగులకు ఇంతకన్నా ఎక్కువ జీతమే అందుతోంది. ఆర్బీఐలో పనిచేసే గోపాలకృష్ణ సీతారామ్ హెగ్డే నెలవారీ జీతం కింద రూ. 4 లక్షల అందుకొంటుండగా.. ఆ తర్వాత అన్నామలై అరప్పులి గౌండర్ రూ. రెండు లక్షల ఇరవై వేలకు (రూ.  2,20,355)పైగా, వీ కందస్వామి రూ. రెండు లక్షల ఒక వెయ్యి వేతనంగా అంందుకుంటున్నారు. హెగ్డే, కందస్వామిలకు అందజేస్తున్న జీతభత్యాలలో కరువుభత్యం వివరాలను, వారు సంస్థలో ఏయే హోదాల్లో పనిచేస్తున్నారనే అంశాన్ని ఆర్బీఐ వెల్లడించలేదు.


 చూడబోతే కేంద్రంలోని ఎన్‌డీఏ ప్రభుత్వానికి వివాదాల్లో ఉన్న ఆసక్తి మరెందులోనూ ఉన్నట్టు లేదు. లేకపోతే రిజర్వు బ్యాంకు గవర్నర్ రఘురామ్ రాజన్ మన  ఆర్థిక వృద్ధి వేగం సాపేక్షిక స్వభావం గురించి చేసిన వ్యాఖ్యలపై ఇంత దుమారం రేగి ఉండేది కాదు. ఆర్థికంగా అత్యంత నిరాశామయమైన స్థితిలోని వర్తమాన ప్రపంచంలో భారత ఆర్థిక వ్యవస్థ ‘దేదీప్యమానమైన ప్రాంతాలలో ఒకటి’ అని ఐఎమ్‌ఎఫ్ వంటి అంతర్జాతీయ సంస్థలు ఇటీవల తరచుగా అభివర్ణి స్తున్నాయి. భారత్ అలాంటి స్థానంలో ఉండటానికి కారణమైన రహస్య ఔషధం ఏమిటని గత వారం చివర్లో ఒక విదేశీ పత్రిక విలేకరి సంధించిన ప్రశ్నకు సమాధానంగా రాజన్.. భారత్ ఇంకా సంతృప్తికరమైనదిగా భావించగల స్థానానికి చేరలేదని, ‘అంధుల దేశానికి ఒంటి కన్ను ఉన్నవాడే రాజు’ అనే  నానుడిలాంటిదే ఇది అని వ్యాఖ్యానించారు.
 
 ఆయన చేసిన వ్యాఖ్యలో వివాదాస్పదమైనది, అభ్యం తరకరమైనది ఏమైనా ఉందంటే అది ఆ వ్యాఖ్య అంధులను చిన్నబుచ్చేదిగా ఉన్నదనేదే. అందుకు ఆయన ఆ తర్వాత క్షమాపణలు చెప్పారు. కేంద్రంలోని బీజేపీ ప్రభుత్వానికి ఆయన వ్యాఖ్యలు ఆగ్రహం కలిగించాయనేది స్పష్టమే. ఆర్థిక మంత్రి సహా ముగ్గురు కేంద్ర మంత్రులు రాజన్ వ్యాఖ్యలపట్ల వెలిబుచ్చిన ఆగ్రహమే అందుకు నిదర్శనం. రాజన్ సరైన మాటలను ఎంచుకోవాల్సిందన్నారు వాణిజ్య మంత్రి నిర్మలా సీతారామన్. కానీ, ఆర్‌బీఐ గవర్నర్‌పై కలిగిన ఆగ్రహానికి కారణం ఆయన ప్రయోగించిన పదాలు కాదు, వాటి అర్థాలు, అంతరార్థాలే.
 
 దేశ పురోగతికి ఆర్థిక వృద్ధి ఎప్పుడూ సాపేక్షిక కొలమానమే తప్ప, అదే వాస్తవ స్థితిని తెలియజేయదని రాజన్ అన్నారు. వివాదాస్పదంగా మారిన ఆ ఇంటర్వ్యూలోనూ, ఆ తదుపరి ఇచ్చిన వివరణలోనూ కూడా ఆ విషయాన్నే స్పష్టం చేశారు. ఒక ఆర్థిక నిపుణుడిగా, కేంద్ర బ్యాంకు అధిపతిగా అది తప్పక గుర్తు చేయాల్సిన వాస్తవం కూడా. ప్రపంచ వృద్ధి, ప్రత్యేకించి చైనా వృద్ధి సైతం మందకొడిగా సాగుతున్న నేపథ్యంలోనే భారత్‌కు ‘అత్యంత వేగంగా వృద్ధి చెందు తున్న ఆర్థిక వ్యవస్థ’ ఖ్యాతి దక్కింది. 1960లలో మనకంటే వెనుకబడి ఉన్న చైనా, మన దేశం కంటే పది రెట్లు అభివృద్ధిని సాధించిందని, మనం దానికంటే ఒక దశాబ్ది వెనుకబడి ఉన్నామనేది తిరుగులేని వాస్తవం. వస్తు తయారీ రంగంలో దాదాపు 50 శాతం ఉత్పత్తి సామర్థ్యం నిరుపయోగంగా ఉన్న దుస్థితి మనది.
 
 ఇలాంటి పరిస్థితిలో 7.5 శాతం వృద్ధిని మరే దేశం సాధించగలదని? ఆర్థిక మంత్రి అరుణ్ జైట్లీ నిలదీయడం రాజకీయం అవుతుందే గానీ, ఆర్థిక నీతి కాజాలాదు. రాజన్ అన్నట్టే వృద్ధి రేట్ల కంటే తలసరి స్థూల జాతీయోత్పత్తి దేశ వాస్తవ ఆర్థిక స్థితిని  కొంత మేరకు సరిగ్గా ప్రతిబింబిస్తుంది. భారత్ ప్రపంచంలోనే అతి పెద్ద సంఖ్యలో పేదలున్న దేశంగానే మిగిలి ఉన్నదనే చేదు వాస్తవం దాచేస్తే దాగేది కాదు. పైగా ప్రభుత్వాలు, విధాన కర్తలు ఆ వాస్తవాన్ని విస్మరించడం ప్రమాద కరం. భారత్ ‘దేదీప్యమానమైన ప్రాంతం’, ‘అతి వేగంగా వృద్ధి చెందుతున్న ఆర్థిక వ్యవస్థ’ అంటూ అంతర్జాతీయ ఆర్థిక సంస్థలు చేస్తున్న వర్ణనలు మనల్ని సరిగ్గా ఆ ప్రమాదంలోకి నెట్టే అవకాశం ఉంది. కాబట్టే వృద్ధి రేట్ల వంటి సాపేక్షిక ప్రమాణాల వెనుక ఉన్న వాస్తవాలను ఎన్నడూ విస్మరించడానికి వీల్లేదు. ఆ మాటే రాజన్ చెప్పారు.
    
 వివాదాస్పాదంగా మారిన ఆ వ్యాఖ్యలతో పాటూ రాజన్, మోదీ ప్రభుత్వం సహా వివిధ ప్రభుత్వాలు ఆర్థిక రంగంలో సాధించిన విజయాలను, భారత ఆర్థిక వ్యవస్థలోని బలమైన అంశాలను, వృద్ధికి ఉన్న అవకాశాలను కూడా ఆ ఇంట ర్వ్యూలో ఏకరువు పెట్టారు. అయినా కేంద్ర మంత్రులకు అవేవీగాక భారత వృద్ధిపై ఆయన చేసిన వ్యాఖ్యలే పట్టడంలో ఆశ్చర్యం లేదు. ముక్కుకు సూటిగా మాట్లాడే రాజన్ కు ఆర్థిక నీతే  తప్ప రాజకీయ నీతి గురించి తెలిసినట్టు లేదు. లేకపోతే కీలకమైన ఐదు రాష్ట్రాల శాసనసభల ఎన్నికల పోరులో బీజేపీ ప్రభుత్వం తలమునకలవుతున్న సమయంలో ఆర్‌బీఐ నోటి నుంచి ఇలాంటి చేదు నిజాలు ఓటరు చెవిన పడరాదనే రాజనీతి సూక్ష్మాన్ని ఆయన గ్రహించి ఉండేవారేమో.
 
 రిజర్వు బ్యాంకు గవర్నర్, ఆర్థిక నిపుణులుగా ఆర్థిక వ్యవస్థ వాస్తవ స్థితిని దృష్టిలో ఉంచుకుని స్వతంత్రంగా ద్రవ్య విధానాన్ని నియంత్రిస్తారు. ఈ స్వయం ప్రతి పత్తికి ఎసరు పెట్టాలని గత ప్రభుత్వాలే కాదు, నేటి ప్రభుత్వమూ తీవ్రంగా ప్రయ త్నిస్తూనే ఉంది. ఆ ప్రయత్నంలో భాగంగానే గత ఏడాది కేంద్ర ఆర్థిక మంత్రి త్వశాఖ కింద పనిచేసే ఆర్థిక రంగ చట్ట సంస్కరణల కమిషన్ తయారు చేసిన దంటూ భారత ఫైనాన్స్ కోడ్ (ఐఎఫ్‌సీ) అనే వివాదాస్పద విధాన పత్రాన్ని విడు దల చేసింది. ఆ వివాదం పలు మలుపులు తిరిగాక చివరికి ఆ ప్రతిపాదనను  ఉపసంహరించుకోవాల్సి వచ్చింది. అయినా ఆర్‌బీఐ చేతిలోని ద్రవ్య విధానాన్ని రాజకీయ అవసరాలకు వాడుకోవాలనే దుగ్ధ కేంద్రాన్ని వీడటం లేదు. అది నేటి ఎన్‌డీఏ ప్రభుత్వానికే పరిమితమైన కాంక్ష కాదు.
 
 గత ప్రభుత్వ హయాంలో రెండంకెలు పైబడ్డ ద్రవ్యోల్బణం ఉండగా వడ్డీ రేట్ల తగ్గింపు కోసం ఆర్థిక మంత్రి చిదంబరంనాటి ఆర్‌బీఐ గవర్నర్ దువ్వూరి సుబ్బారావుపై తీవ్రమైన ఒత్తిడి తేవడమే కాదు, బహిరంగంగానే ఆగ్రహం వ్యక్తం చేశారు. ఈ ప్రభుత్వం అధికా రంలోకి వచ్చినప్పటి నుంచి ఆర్‌బీఐ గవర్నర్‌కు, ప్రభుత్వానికి మధ్య ఈ ఘర్షణ సాగుతూనే ఉంది. రాజన్ బహిరంగ వ్యాఖ్యలు ఎన్‌డీఏ ప్రభుత్వానికి ఆగ్రహం కలిగించడం ఇదే మొదటిసారి కాదు.
 
 చైనా ఆర్థిక వృద్ధి మందగించిన సందర్భంగా ఆర్థిక మంత్రి జైట్లీ, ప్రపంచ వృద్ధికి చోదక శక్తిగా చైనా స్థానంలో భారత్ ప్రవేశిస్తుందని జోస్యం చెప్పారు. ఆ సందర్భంగా కూడా రాజన్ మనం చైనా కంటే వేగంగా వృద్ధి చెందినా, దాని ఆర్థిక వ్యవస్థలో నాలుగో వంతుగా ఉన్న మనకు, దానికి అంతరం చాలానే ఉంటుందనీ, దాన్ని అధిగమించడానికి చాలా కాలమే పడుతుందని ఉన్న వాస్తవాన్ని నిర్మొహమాటంగా చెప్పి జైట్లీని ఇరకాటంలో పెట్టారు. దాద్రీ హత్యాకాండ తదుపరి దేశంలో పెరుగుతున్న అసహనం నేపథ్యంలో ఆయన.. ప్రశ్నించడానికి, సవాలు చేయడానికి హక్కు ఉండటం వృద్ధి చెందడానికి ఆవశ్యకమని అన్నారు. ఎలాంటి లౌక్యం ప్రదర్శించకుండా నిర్మొహ మాటంగా మాట్లాడే ఆర్‌బీఐ గవర్నర్‌పై మండిపడి రభస చేయడం కంటే, మిన్నకుండటమే మేలని మోదీ ప్రభుత్వం గుర్తించేదెన్నడు?


 ఆర్‌బీఐ గవర్నర్ రఘురామ్ రాజన్
 ♦ తలసరి ఆదాయంలో బ్రిక్స్ దేశాలకన్నా
 ♦ వెనుకబడి ఉన్నామని వ్యాఖ్య
 ♦ తగిన వృద్ధి ఫలాలు అందేవరకూ
 ♦ జాగ్రత్త అవసరమని సూచన
  పుణే: భారత్ వృద్ధి తీరుపై  ఆర్‌బీఐ గవర్నర్ రఘురామ్ రాజన్ మరోసారి తనదైన శైలిలో వ్యాఖ్యానించారు. ‘వేగంగా అభివృద్ధి చెందుతున్న దేశం’ భావనపై అధిక ఉత్సాహం అక్కర్లేదని అన్నారు. భారత్ మరెంతో సాధించాల్సిన అవసరం ఉందని అన్నారు. ఆచరణాత్మకంగా ఆలోచించే ఒక సెంట్రల్ బ్యాంకర్‌గా... ‘వేగవంతమైన ఆర్థిక వ్యవస్థ అన్న’ వాక్యంపై తనకేమీ వ్యామోహం లేదన్నారు. ఆర్‌బీఐ నియంత్రణలోని నేషనల్ ఇన్‌స్టిట్యూట్ ఆఫ్ బ్యాంక్ మేనేజ్‌మెంట్ 12వ స్నాతకోత్సవ కార్యక్రమంలో ఆయన మాట్లాడారు.  బ్రిక్స్ (బ్రెజిల్, రష్యా, ఇండియా, చైనా, దక్షిణాఫ్రికా)  దేశాలకన్నా భారత్ తలసరి ఆదాయం తక్కువగా ఉందని ఈ సందర్భంగా అన్నారు.
 భారత్ పౌరుడి అత్యున్నత జీవన ప్రమాణాల సాధనకు ప్రస్తుత తరహా వృద్ధి రేటు ఇంకా 20 సంవత్సరాలు కొనసాగాల్సి ఉంటుందని వివరించారు. దేశంలో పలు వ్యవస్థాగత సంస్కరణల అమలు జరగాల్సి ఉందన్నారు ‘మనం తరచూ చైనాతో పోల్చుకుంటుంటాం. 1960ల్లో మనకన్నా చిన్నస్థాయిలో ఉన్న చైనా ఆర్థిక వ్యవస్థ ఇప్పుడు మనతో పోల్చుకుంటే... ఐదు రెట్లు ఎక్కువగా ఉంది. సగటు భారతీయుని సంపదకన్నా... చైనా సగటు పౌరుని సంపద ఐదు రెట్లు అధికం’ అని రాజన్ అన్నారు.  అయితే ఇక్కడ తాను చులకన భావంతో మాట్లాడుతున్నానని భావించవద్దని కోరారు. ‘ పటిష్ట, సుస్థిర వృద్ధికి కేంద్రాలు, రాష్ట్రాలు తగిన వేదికను సృష్టిస్తున్నాయి. వాటి ఫలితాలు అందడానికి సిద్ధంగా ఉన్నాయన్న విశ్వాసమూ నాకుంది. అయితే ఇదే దారిలో మనం కొంత సమయం ఉండాలి. ఈ అంశంపై సదా జాగ్రత్తగా వ్యవహరించాలి’ అని ఈ సందర్భంగా అన్నారు.
  ఎన్‌పీఏల సమస్యపై భూతద్దం వద్దు: రాయ్
 కాగా మొండిబకాయిల సమస్యను ప్రతి సందర్భంలోనూ తీవ్ర ఆందోళనకర అంశంగా చూపించడం తగదని బ్యాంక్స్ బోర్డ్ బ్యూరో(బీబీబీ) చైర్మన్ వినోద్ రాయ్ స్నాతకోత్సవ కార్యక్రమంలో పేర్కొన్నారు. తాజా రుణాలపై, రుణ బకాయిలు తీర్చడంపై ఈ తరహా ధోరణి ప్రతికూలత చూపుతుందని అన్నారు. బ్యాంకింగ్ ఎగ్జిక్యూటివ్‌ల విధాన నిర్ణయ సామర్థ్యాలపై సైతం అపోహల వ్యాప్తి సరికాదని పేర్కొన్నారు. అంతర్జాతీయంగా తగిన ఆర్థిక పరిస్థితులు లేనందున ఇబ్బందులు నెలకొంటున్నట్లు పేర్కొన్నారు.
 ఈ సమస్యలను అత్యంత ఆందోళనకరమైన అంశాలుగా చూపించడం తగదని వ్యాఖ్యానించారు. గతంలో బ్యాంకింగ్ వ్యవస్థ కొన్ని ఇబ్బందులు ఎదుర్కోవడం వాస్తవమైనా.. ప్రస్తుతం పటిష్టంగా మారిందని రాయ్ అన్నారు. రుణ బకాయిదారులందరూ ఉద్దేశపూర్వక ఎగవేతదారులు కాబోరని పేర్కొన్నారు. రుణ లావాదేవీలన్నీ నేరపూరితమైనవి కాదనీ అన్నారు. ఒకరిద్దరు కార్పొరేట్లు చేసిన పనికి అందరినీ ఒకేగాటన కట్టడం సరికాదన్నారు. దురదృష్టవశాత్తూ మొండిబకాయిలకు సంబంధించి సమస్య సత్వర పరిష్కారంలో న్యాయ పరమైన అడ్డంకులూ ఎదరవుతున్నాయని చెప్పారు. ఉద్దేశ్యపూర్వక ఎగవేతదారులపై ఎప్పటికైనా కఠిన చర్యలు ఉంటాయని వివరించారు.
  పదాలపైకాదు... పరమార్థంపై చర్చ జరగాలి
 కాగా భారత ఆర్థిక వ్యవస్థ గుడ్డివాళ్ల లోకంలో ఒంటి కన్నురాజులా ఉందన్న తన వ్యాఖ్యలపై వివాదం నెలకొనడంపై రాజన్ స్నాతకోత్సవంలో స్పందించారు. ఈ పదాలపై చర్చ సరికాదని, ఇందులో ప్రధాన భావనపై చర్చ ముఖ్యమని ఆయన వ్యాఖ్యానించారు. రాజన్ తన వ్యాఖ్యలకు క్షమాపణలు చెప్పాలని అహ్మదాబాద్ అంధుల సంఘం ఒక లేఖ రాసినట్లు వార్తలు వచ్చాయి. తన పదాలకు ఆయన క్షమాపణ చెబుతూ... ఉద్దేశం భిన్నమైనదే అయినప్పటికీ, అందుకు వినియోగించిన పదాలు ఇతరులను ఎంత స్థాయిలో ఇబ్బంది పెడితే అంత స్థాయిలో తగిన క్షమాపణలను కోరతానన్నారు.
 ‘మాట్లాడేటప్పుడు వక్తలు జాగ్రత్తగా వ్యవహరించాలనడంలో సందేహం లేదు. అయితే  కొన్ని సందర్భాల్లో భావం తప్ప,  అవమానించారని భావించడం తగదని’ కూడా అన్నారు. ఇటీవల రాజన్ చేసిన వ్యాఖ్యలపై ఆర్థికమంత్రి అరుణ్‌జైట్లీ, వాణిజ్యశాఖ మంత్రి నిర్మలాసీతారామన్ సహా పలువురి నుంచి విమర్శలు వచ్చిన సంగతి తెలిసిందే. ‘కంటికి కన్ను భావన ప్రపంచం మొత్తాన్ని చీకటి చేస్తుంది’ అన్న మహాత్ముని అహింసా సిద్ధాంతం చాలా అత్యున్నతమైనది తప్ప, దీనిని ఒక అంగవైకల్యానికి సంబంధించిన అంశంగా చూడలేముకదా అని సైతం ఆయన పేర్కొన్నారు. తాను వినియోగించిన ‘నానుడి’ కొత్తది కూడా కాదని పేర్కొన్న ఆయన, డచ్ ఫిలాసఫర్ ‘ఎరాస్‌ముస్’ దీనిని తొలిసారి వినియోగించినట్లు ఆధారాలు ఉన్నాయని అన్నారు.


 దీనికి అనేక కారణాలున్నాయ్.. ఆర్‌బీఐ గవర్నర్ రాజన్
 న్యూయార్క్: బ్యాంకింగ్ మొండిబకాయిల సమస్య తీవ్రమయిన నేపథ్యంలో రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ దీనిపై కీలక వ్యాఖ్య చేశారు. ఒక అకౌంట్ మొండిబకాయిగా మారడానికి పలు కారణాలు ఉంటాయని పేర్కొన్న ఆయన, ఈ అకౌంట్ల న్నింటికీ నైతికతను జోడించడం సరికాదని అభిప్రాయపడ్డారు. మొండిబకాయిల సమస్యల్లో ఇరుక్కున్నవారిలో మంచి వారూ, చెడ్డవారూ... ఇద్దరూ ఉంటారని విశ్లేషించారు. న్యూయార్క్‌లో కొలంబియా లా స్కూల్‌లో జరిగిన ఒక కార్యక్రమంలో ఆయన మాట్లాడారు.
 
 మొండిబకాయిల సమస్యను పరిష్కరించే క్రమంలో... దీనిని ‘నేరపూరిత అంశానికి’ దూరంగా ఉంచాలని సూచించారు. ఒక కంపెనీ మొండిబకాయి సమస్యలో కూరుకుపోవడంలో పలు కారణాలు ఉంటాయని అన్నారు. ‘మీ భాగస్వామి సరిగా పనిచేయకపోవచ్చు. తగిన సమయంలో అనుమతులు రాకపోవచ్చు. మీ లెసైన్సులను రద్దు చేసి ఉండవచ్చు. ఇవన్నీ మీకు ప్రతికూలంగా మారవచ్చు. ఇలా ఒకరు చేసిన తప్పుకూ మీరు నష్టపోయే వీలుంది. వీటిని నేరపూరితంగా పరిగణించలేం’ అని ఈ సందర్భంగా రాజన్ అన్నారు.
  
 ప్రభుత్వ ప్రకటన సానుకూలం...
 రుణ మంజూరు ప్రక్రియలో ఎట్టి పరిస్థితుల్లోనూ జోక్యం ఉండబోదని ప్రభుత్వం స్పష్టం చేయడం పట్ల రాజన్ హర్షం వ్యక్తం చేశారు. ఇది కీలకమైన అంశంగా పేర్కొన్న ఆయన, బ్యాంకుల్లో నిర్వహణా వ్యవస్థ మెరుగుదలపై తదుపరి దృష్టి పెట్టనున్నట్లు తెలిపారు. ఎన్‌పీఏల సమస్య పరిష్కారంలో ఇది కీలక అంశమని సైతం అభిప్రాయపడ్డారు. సమస్య పరిష్కారంలో తగిన చట్ట నిబంధనల వ్యవస్థ కూడా అవసరమని వివరించారు. ఈ అంశంపై ఇప్పుడు న్యాయవ్యవస్థ కూడా పటిష్టంగా పనిచేస్తోందని పేర్కొన్న ఆయన, గతంలో ఇలాంటి పరిస్థితి లేదన్నారు.
  
 వర్షపాతం, ద్రవ్యోల్బణం కీలకం..
 తదుపరి వడ్డీరేటు కోత నిర్ణయం వర్షపాతం, ద్రవ్యోల్బణం వంటి అంశాలపై ఆధారపడి ఉంటుందని రాజన్ అన్నారు. భారత్‌కు ఈ ఏడాది భారీ ఎత్తున విదేశీ ప్రత్యక్ష పెట్టుబడులు (ఎఫ్‌డీఐ) వచ్చాయని అన్నారు.


 ♦ పరస్పర సహకారానికి భారత్,
 ♦ అమెరికాల మధ్య అంగీకారం
  వాషింగ్టన్: పరస్పర ఆర్థిక, వాణిజ్య లావాదేవీలకు సంబంధించి పన్ను ఎగవేతలు, మనీ ల్యాండరింగ్ వంటివి నిరోధించడానికి భారత్-అమెరికాలు ఒక అంగీకారానికి వచ్చాయి. ఇందులో భాగంగా పరస్పర సమాచార మార్పిడి, సంయుక్త ఆడిటింగ్ నిర్వహించాలని గురువారం ఇక్కడ జరిగిన ‘భారత్-అమెరికా ఆర్థిక భాగస్వామ్యం’(ఈఎఫ్‌పీ) ఆరో వార్షిక సమావేశంలో ఇరు దేశాలూ అంగీకరించాయి. తద్వారా అక్రమ నిధుల వలసను ఉగ్రవాదులకు అందుతున్న నిధులకు అడ్డుకట్ట వేయాలని నిర్ణయించాయి. ఈ అంశంపై అధికారిక చర్చలు జరపాలని భారత ఆర్థిక శాఖ మంత్రి అరుణ్‌జైట్లీ, అమెరికా ఆర్థిక మంత్రి జాకబ్ జే ల్యూలు ఒక అంగీకారానికి వచ్చారు.
 ఇరు దేశాలకు చెందిన సంబంధిత శాఖల అధికారులు కలసి ఈ సమస్యల పరిష్కారానికి కృషిచేస్తారని సమావేశం అనంతరం విడుదలైన సంయుక్త ప్రకటనలో వెల్లడించింది. దీంతోపాటు భారత్ మౌలిక సదుపాయాల్ని వృద్ధిపర్చుకోవడానికి నెలకొల్పిన నేషనల్ ఇన్వెస్ట్‌మెంట్ అండ్ ఇన్‌ఫ్రాస్ట్రక్చర్ ఫండ్ (ఎన్‌ఐఐఎఫ్)కు తమ మద్దతు కొనసాగుతుందని అమెరికా పేర్కొంది. అమెరికా కేంద్ర బ్యాంక్ ఫెడరల్ రిజర్వ్ చైర్‌పర్సన్ జెనెట్ యెలెన్, భారత రిజర్వ్ బ్యాంకు గవర్నర్ రఘురామ్ రాజన్ తదితరులు కూడా ఈ సమావేశంలో పాల్గొన్నారు.
  కరెన్సీ విలువ తగ్గింపునకు స్వస్తిచెప్పాలి: జైట్లీ
 అంతర్జాతీయ వృద్ధిని పెంచేందుకు జీ20 దేశాల మధ్య మరింత సహకారం అవసరమని, ఆయా దేశాలు వాణిజ్య రక్షణాత్మక చర్యల్ని నివారించాలని, పోటీపడి కరెన్సీ విలువ తగ్గించడం మానుకోవాలని భారత్ ఆర్థిక మంత్రి అరుణ్ జైట్లీ సూచించారు. జీ20 దేశాల ఆర్థిక మంత్రులు, కేంద్ర బ్యాంకుల గవర్నర్ల సమావేశంలో మాట్లాడారు. పరపతి విధాన సాధనాల సామర్థ్యం.. పరిమితిని చేరిందని, ఇక ప్రభుత్వ పెట్టుబడులపై దేశాలు దృష్టినిలపాలన్నారు.
  అంతా బాగుంటే మరోసారి రేటు కోత: రాజన్
 వాషింగ్టన్: మంచి వర్షపాతం, తక్కువ స్థాయిలో ద్రవ్యోల్బణంపై ఆధారపడి తదుపరి రెపో రేటు (బ్యాంకులకు తానిచ్చే రుణాలపై ఆర్‌బీఐ వసూలు చేసే వడ్డీరేటు(ప్రస్తుతం 6.5 శాతం-ఐదేళ్ల కనిష్ట స్థాయి) నిర్ణయం ఆధారపడి ఉంటుందని ఆర్‌బీఐ గవర్నర్ రఘురామ్ రాజన్ పేర్కొన్నారు. 2015 జనవరి నుంచీ ఈ రేటు 1.5 శాతం తగ్గిన నేపథ్యంలో  వాల్ స్ట్రీట్ జర్నల్‌కు ఇచ్చిన ఇంటర్వ్యూలో ఆయన ఈ వ్యాఖ్యలు చేశారు.


 వాషింగటన్ : రాబోయే రోజుల్లో ఆర్బీయై వడ్డీ రేట్లు మరింత తగ్గించనుందని ఆర్బీయై గవర్నర్ రఘురామ్ రాజన్ తెలిపారు.  ఈ ఖరీఫ్ సీజన్ లో మంచి వానలుకురుస్తాయన్న వాతావరణ శాఖ అంచనాలు ఫలిస్తే,  ద్రవ్యోల్బణం   మరింత దిగి వస్తే  వడ్డీ  రేట్లు  మరింత దిగివచ్చే అవకాశం ఉందని అభిప్రాయపడ్డారు. అంతర్జాతీయ ద్రవ్య నిధి సంస్థ, ప్రపంచ బ్యాంకు సమావేశాలకు హాజరైన   రాజన్ స్థానిక మీడియాతో మాట్లాడారు.  భారత్ లో ద్రవ్యోల్బణ నియంత్రణ పై దృష్టిపెట్టామని,  దాని క్షీణత ముందుకూడా కొనసాగి అన్నీ  మంచిగా జరిగితే,  భవిష్యత్తులో కేంద్ర బ్యాంకు వడ్డీరేట్లను  తగ్గించేందుకు  యోచిస్తోందన్నారు. దేశంలో రాబోయే నైరుతి  రుతు పవనాల సానుకూల సంకేతాలపై ఆశాభాభావాన్ని వ్యక్తం  చేశారు. దురదృష్టవశాత్తు, గత రెండేళ్లుగా  ఎదుర్కొంటున్న వర్షాభావ పరిస్థితులు ఆహార ధాన్యాల ఉత్పత్తిపై తీవ్ర  ప్రభావాన్ని చూపించాయన్నారు.
 
 దీంతో పాటుగా అమెరికా ఫెడ్ రిజర్డ్  వడ్డీ రేట్లపై   సంతృప్తి వ్యక్తం చేసిన రాజన్  ఫెడ్ అధిపతి జానెట్ ఎలెన్ పై ప్రశంసలు కురిపించారు.   ఇప్పటివరకు  అమెరికా ఫెడ్ విధానాలు భారతదేశం,  చైనా సహా అభివృద్ధి చెందుతున్న మార్కెట్లపై  ప్రతికూల ప్రభావాన్ని పడేవేస్తున్నాయన్న విమర్శలు ఉండేవన్నారు.  కానీ ప్రస్తుత ఎలెన్ నాయకత్వంలో ఆ పరిస్థితి మారిందన్నారు. ఆయన తీసుకున్న చర్యల మూలంగా ఇటీవల ఫెడ్ రిజర్వ్  విధానాలు కరెన్సీ ఒడుదుడుకులు, ఇతర వస్తువుల ధరలు దిగిరావడానికి దోహదపడ్డాయన్నారు.  అభివృద్ధి చెందుతున్న దేశాలను దృష్టిలో పెట్టుకొని విధానాలను రూపొందించడం ఆహ్వానించదగిన పరిణామమని కొనియాడారు.
 కాగా ఇటీవలి ద్రవ్య పరపతి విధాన సమీక్ష లో  రెపోరేటను  పావు శాతం తగ్గించి,  రివర్స్ రెపో రేటును పావుశాతం పెంచిన  ఆర్బీయై నగదు నిల్వల నిష్ఫత్తిని  యధాతథంగా  ఉంచిన సంగతి తెలిసిందే. 
 
  


 గవర్నర్ రఘురామ్ రాజన్ హెచ్చరిక
 ముంబై: రిజర్వ్ బ్యాంక్(ఆర్‌బీఐ) పేరుతో జరిగే మోసాల పట్ల అప్రమత్తంగా ఉండాలని స్వయంగా బ్యాంకింగ్ రెగ్యులేటర్ చీఫ్ రఘురామ్ రాజన్ పేర్కొన్నారు. రాజన్ సోమవారం నాడు ఇక్కడ ఆర్థిక లావాదేవీల సరళీకరణకు ఉద్దేశించిన- నేషనల్ పేమెంట్ కార్పొరేషన్ ఆఫ్ ఇండియా (ఎన్‌పీసీఐ) యూనిఫైడ్ పేమెంట్స్ ఇంటర్‌ఫేస్(యూపీఐ) యాప్ ప్రారంభించారు. ఈ సందర్భంగా ఆయన మాట్లాడుతూ, తన పేరుతో, సెంట్రల్ బ్యాంక్ పేరుతో కొన్ని ఈ-మెయిల్స్‌ను పంపుతూ... తప్పుడు మార్గంలో డబ్బును పొందేందుకు మోసపూరిత శక్తులు ప్రయత్నిస్తున్న ఘటనలు రెగ్యులేటర్ దృష్టికి వచ్చినట్లు తెలిపారు.
 ఆయా మోసపూరిత చర్యల పట్ల ప్రజలు అప్రమత్తంగా ఉండాలని సూచించారు. ‘మీరు  ఒక లాటరీలో ఎంపికయ్యారు. మీ కోసం డబ్బు ఇప్పటికే విడుదలై... ఆర్‌బీఐ వద్ద సిద్ధంగా ఉంది. రూ.20,000  ప్రాసెస్ ఫీజు పంపితే  రూ. 50 కోట్లు మీ వశం అవుతాయి’ అంటూ నా నుంచి మీకు ఏదైనా మెస్సేజ్ వస్తే దానిని కచ్చితంగా మోసపూరితమైనదిగా భావించండి. మా వద్ద 360 బిలియన్ డాలర్ల విలువైన విదేశీ మారకపు నిల్వలు ఉన్నాయి. 8 లక్షల కోట్ల విలువైన ప్రభుత్వ బాండ్లను నిర్వహిస్తున్నాం. మీ డబ్బును మేము కోరుకోవడం లేదు. మీ డబ్బు మాకు అక్కర్లేదు.’ అని హాస్యోక్తిగా అన్నారు.


 ♦ అక్రమ-సక్రమ సంపాదనల్ని ఒకేలా చూడొద్దు
 ♦ ఆర్‌బీఐ గవర్నర్ రఘురామ్ రాజన్ వ్యాఖ్యలు
  ముంబై: కష్టపడి సంపాదించిన ఆస్తుల చట్టబద్ధతను ప్రశ్నించడం సరికాదని రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ చెప్పారు. దీన్నొక ప్రమాదకర ధోరణిగా అభివర్ణించారాయన. ‘‘అక్రమ ఆర్జనకు, కష్టపడి సంపాదించిన దానికి తేడా ఉంటుంది. వంశపారంపర్యంగా వచ్చిన సంపద కూడా కష్టార్జితమే. వీటిని గురించి వెల్లడించేటపుడు ఈ తేడాలు గమనించాల్సిన అవసరం ఉంది’’ అని రాజన్ పేర్కొన్నారు. పనామా పత్రాలు సృష్టిస్తున్న ప్రకంపనల నేపథ్యంలో రాజన్ వ్యాఖ్యలకు ప్రాధాన్యం ఏర్పడింది. భారత పరిశ్రమల సమాఖ్య (సీఐఐ) గురువారమిక్కడ నిర్వహించిన ‘2016 సింగపూర్ సింపోజియం’లో  ఆయన మాట్లాడారు. ‘ఒక వ్యక్తి సంపద ఏ తరహాది అయినప్పటికీ (అక్రమం లేదా సక్రమం) అది  అక్రమమైనదేనన్న వాదన బలంగా వినపడుతోంది.
 పనామా తరహా ఘటనలు వెలుగుచూసినపుడు ఈ అభిప్రాయాలు మరింత బలపడుతున్నాయి. అయితే అక్రమ-సక్రమ ఆర్జనలు రెండింటినీ ఒకేగాటన కట్టి చర్చించడం చాలా ప్రమాదకరమైన ధోరణి అన్నది నా అభిప్రాయం’ అని రాజన్ వివరించారు. ఇలాంటి సందర్భాల్లో ఆయా వ్యక్తులకు తమ సంపద సరైనదేనని నిరూపించుకోడానికి తగిన అవకాశాలివ్వాలని రాజన్ చెప్పారు. పూర్తి స్థాయి పారిశ్రామిక దేశాల్లో ఈ తరహా వ్యవస్థ పటిష్టంగా ఉందని చెప్పారాయన. ‘‘ఒకప్పుడు బ్యాంకర్లు, పారిశ్రామిక వర్గాలు అక్రమ మార్గంలో డబ్బు సంపాదిస్తారనే ఆలోచన ఉండేది. ఇపుడు కష్టపడి డబ్బు సంపాదించుకుంటున్న వారిపైనా ఇలాంటి అభిప్రాయం తలెత్తుతోంది’’ అని చెప్పారాయన. అక్రమ ఆస్తులను దాచిపెట్టేవారిని ఆర్‌బీఐ ఒక కంట కనిపెడుతూనే ఉంటుందని, వారిపై తగిన చర్యలను తీసుకుంటుందని ఆర్‌బీఐ చీఫ్ స్పష్టం చేశారు.
 సింగపూర్ డిప్యూటీ ప్రధాని తార్‌మన్ షణ్ముగరత్నం కూడా ఈ కార్యక్రమంలో పాల్గొన్నారు. కొత్త బ్యాంకులతో సేవలు మరింత విస్తరిస్తాయని రాజన్ అభిప్రాయపడ్డారు. 11 పేమెంట్ బ్యాంకులకు, 10 స్మాల్ ఫైనాన్స్ బ్యాంకులకు గత ఏడాది ఆర్‌బీఐ సూత్రప్రాయంగా అనుమతివ్వటం తెలిసిందే. కాగా బ్యాంకులు తమ బ్యాలెన్స్ షీట్లను మెరుగుపరుచుకోవడానికిచ్చిన ‘2017 మార్చి’ గడువును పొడిగించే ప్రతిపాదన లేదని చెప్పారు.
  కాగా ద్రవ్య, పరపతి విధానాలకు ప్రపంచ వ్యాప్తంగా నిర్దిష్ట మార్గదర్శకాలు అవసరమన్న రాజన్ అభిప్రాయంతో సింగపూర్ డిప్యూటీ ప్రధాని ఏకీభవించారు. ఆర్థిక ఏకీకరణ ప్రపంచంలో ఈ తరహా వ్యవస్థను అనుసరించాల్సిన  అవసరం ఎంతో ఉందన్నారు.


 ముంబై: ప్రస్తుతం జరుగుతున్న ఐదు రాష్ట్రాల అసెంబ్లీ ఎన్నికల్లో డబ్బుల పంపకం విపరీతంగా పెరిగిందని ఆర్బీఐ గవర్నర్ రఘరాం రాజన్ అన్నారు. సుమారు రూ.60 వేల కోట్లు చలామణిలో ఉందని చెప్పారు. మంగళవారం ద్రవ్య, పరపతి విధాన సమీక్ష ప్రకటన తర్వాత విలేకరులతో ఆయన మాట్లాడారు.
 
 ‘ఎన్నికల సమయంలో ప్రజల వద్ద డబ్బుల గలగల ఎక్కువగా ఉంటుంది. ఎందుకో మీకూ తెలుసు.. నాకు తెలుసు’ అని అన్నారు. పశ్చిమ బెంగాల్, అసోం, కేరళ, తమిళనాడు, పుదుచ్చేరిలో అసెంబ్లీ ఎన్నికల నేపథ్యంలో రాజన్ వ్యాఖ్యలు ప్రాధాన్యం సంతరించుకున్నాయి.


 రెపో రేటు పావు శాతం తగ్గింపు; ఇక 6.5 శాతం
 ♦ అంచనాలకు అనుగుణంగానే ఆర్‌బీఐ నిర్ణయం
 ♦ ఆరు నెలల తర్వాత తొలి రేట్ల కోత ఇదే...
 ♦ ఎంఎస్‌ఎఫ్ రేటు ముప్పావు శాతం తగ్గింపు...
 ♦ దీంతో బ్యాంకులకు తగ్గనున్న నిధుల సమీకరణ భారం
 ♦ సీఆర్‌ఆర్ యథాతథంగా 4 శాతంగా కొనసాగింపు...
 ♦ రెపో, రివర్స్ రెపోల మధ్య వ్యత్యాసం  అర శాతానికి కుదింపు
 ♦ భవిష్యత్తులో మరిన్ని కోతలు ఉంటాయని సంకేతం
 ♦ తదుపరి పాలసీ సమీక్ష జూన్ 7న...
  ముంబై: ప్రస్తుత ఆర్థిక సంవత్సరం(2016-17)లో చేపట్టిన తొలి ద్రవ్య, పరపతి విధాన సమీక్షలో రిజర్వ్ బ్యాంక్(ఆర్‌బీఐ) చర్యలు మెజారిటీ అంచనాలకు అనుగుణంగానే వెలువడ్డాయి. కీలకమైన పాలసీ వడ్డీరేటు రెపోను పావు శాతం తగ్గించి 6.5 శాతానికి చేర్చింది. నగదు నిల్వల నిష్పత్తి(సీఆర్‌ఆర్)ని యథాతథంగా 4 శాతంగానే కొనసాగిస్తున్నట్లు ప్రకటించింది. మార్జినల్ కాస్ట్ ఆఫ్ ఫండ్స్ ఆధారిత రుణ రేటు(ఎంసీఎల్‌ఆర్) వ్యవస్థను ఆర్‌బీఐ ఇప్పటికే అమల్లోకి తీసుకొచ్చిన నేపథ్యంలో తాజా రెపో కోత ప్రయోజనాన్ని బ్యాంకులు తప్పనిసరిగా రుణగ్రహీతలకు బదలాయించాల్సిన పరిస్థితి నెలకొంది.
 దీంతో త్వరలోనే బ్యాంకులు కూడా తమ రుణాలపై వడ్డీరేట్లను తగ్గించే అవకాశం ఉంది. ఇటీవల కేంద్ర ప్రభుత్వం చిన్న మొత్తాల పొదుపు పథకాలపై వడ్డీ రేట్లను 1.3 శాతం వరకూ తగ్గించడం, బడ్జెట్‌లో ప్రభుత్వం ద్రవ్యలోటు కట్టడి లక్ష్యాలకు కట్టుబడే ఉంటామంటూ స్పష్టతనివ్వడం వంటి చర్యలతో పాటు ద్రవ్యోల్బణం కూడా అదుపులోనే కొనసాగుతుండటం కూడా ఆర్‌బీఐ రేట్ల తగ్గింపునకు దోహదం చేసిన అంశాల్లో ప్రధానంగా ఉన్నాయి.
  ఐదేళ్ల కనిష్టానికి రెపో...
 కాగా, తాజా రెపో రేటు ఐదేళ్ల కనిష్టం కావడం గమనార్హం. అంతక్రితం 2011 జనవరిలో రెపో ఈ స్థాయిలో ఉంది. మరోపక్క, గతేడాది జనవరి నుంచి చూస్తే ఆర్‌బీఐ ఇప్పటివరకూ రెపో రేటును 1.5% తగ్గించినట్లు లెక్క. ఇక గడచిన ఆరు నెలల్లో ఇదే తొలి పాలసీ రేట్ల కోత కావడం విశేషం. గతేడాది సెప్టెంబర్‌లో చివరిగా ఆర్‌బీఐ రెపోను 0.5% తగ్గించింది.
  ఇతర లిక్విడిటీ పెంపు చర్యలు కూడా...
 బ్యాంకులకు లిక్విడిటీ(ద్రవ్య సరఫరా) పెంపునకు వీలుగా ఆర్‌బీఐ ఇతరత్రా కొన్ని చర్యలను చేపట్టింది. ప్రధానంగా మార్జినల్ స్టాండింగ్ ఫెసిలిటీ(ఎంఎస్‌ఎఫ్) రేటును మాత్రం ముప్పావు శాతం తగ్గించడం ద్వారా బ్యాంకులకు నిధుల సమీకరణ భారం మరింత తగ్గేలా చేసింది.  దీనివల్ల ప్రాధాన్య రంగాలకు మరిన్ని రుణాలను ఇచ్చేవిధంగా చర్యలు తీసుకుంది. ఆర్‌బీఐ వద్ద బ్యాంకులు రోజువారీగా ఉంచాల్సిన నగదు పరిమాణాన్ని కూడా 5 శాతం తగ్గించడం ద్వారా లిక్విడిటీ పెంచేందుకు తోడ్పాటునందించింది. ఇక ఇప్పటివరకూ రెపో రేటు, రివర్స్ రెపో రేటుల మధ్య వ్యత్యాసం ఒక శాతంగా ఉండగా.. దీన్ని అర శాతానికి కుదిస్తున్నట్లు ఆర్‌బీఐ ప్రకటించింది. దీంతో ప్రస్తుతం రివర్స్ రెపో రేటు 6 శాతానికి పెరగనుంది.
  
 పాలసీ, నివేదికలో ముఖ్యాంశాలివీ...
 ♦ సాధారణ రుతుపవన వర్షపాతం గనుక నమోదైతే... ఈ ఏడాది(2016-17) స్థూల దేశీయోత్పత్తి(జీడీపీ) వృద్ధి రేటు 7.6 శాతంగా ఉండొచ్చు (కేంద్ర ప్రభుత్వ అంచనా 7-7.75 శాతం).
 ♦ ఏడో వేతన సంఘం సిఫార్సుల అమలు కారణంగా వినియోగం పెరిగి జీడీపీ వృద్ధి రేటుకు అదనంగా 0.4% జతయ్యేందుకు వీలవుతుంది. మరోపక్క, రిటైల్ ద్రవ్యోల్బణాన్ని కూడా 1-1.5% వరకూ ఎగదోసే అవకాశం ఉంది.
 ♦ బ్యాంకింగ్ లావాదేవీల్లో మరింతగా డిజిటల్ పరిజ్ఞానాన్ని ఉపయోగించేలా చేయడం ద్వారా క్యాష్ వినియోగాన్ని భారీగా తగ్గించేందుకు చర్యలు తీసుకుంటాం. ఈ దిశగా పేమెంట్ అండ్ సెటిల్‌మెంట్ వ్యవస్థపై విజన్-2018 డాక్యుమెంట్‌ను ఈ నెలాఖరుకల్లా అందుబాటులోకి తెస్తాం.
 ♦ బంగ్లాదేశ్ సెంట్రల్ బ్యాంకుపై సైబర్ దాడుల కారణంగా చోటుచేసుకున్న 95 కోట్ల డాలర్ల భారీ స్కామ్ నేపథ్యంలో సైబర్ సెక్యూరిటీని పెంచేందుకు మరిన్ని చర్యలు తీసుకుంటున్నాం.
 ♦ త్వరలో ఐదు రాష్ట్రాల్లో జరగనున్న అసెంబ్లీ ఎన్నికల కారణంగా నగదు ప్రవాహం పెరిగేందుకు దారితీస్తోంది. ఈ పరిస్థితులను నిశితంగా గమనిస్తున్నాం. ప్రస్తుతం ప్రజల చేతిలో అదనంగా రూ.60 వేల కోట్ల వరకూ క్యాష్ చలామణి అవుతోంది. మార్చి 18తో ముగిసిన పక్షం రోజులకు చూస్తే అంతక్రితం ఇదే వ్యవధితో పోలిస్తే కరెన్సీ చలామణి 48 శాతం పెరిగి రూ. 2 లక్షల కోట్లకు పెరగడమే దీనికి నిదర్శనం.
   తదుపరి పాలసీ సమీక్ష జూన్ 7న ఉంటుంది. డిఫాల్టర్ల పేర్లన్నీ బయటపెడితే  వ్యాపారాల మూతే...
 మొండిబకాయిల(ఎన్‌పీఏ)కు సంబంధించిన కేసుల్లో ప్రస్తుతం జరుగుతున్న దర్యాప్తుల ప్రధానోద్దేశం.. నిబంధనలకు విరుద్ధంగా, ఉద్దేశపూర్వకంగా జరిగిన మోసాలను(క్రిమినాలిటీ) బట్టబయలు చేయడమేనని రాజన్ స్పష్టం చేసేవారు. అంతేకానీ, ఆర్థిక వ్యవస్థపై ప్రతికూల ప్రభావం పడేవిధంగా బ్యాంకు రుణాలకు ఎలాంటి ఆటంకం ఉండకూడదన్నదే ఆర్‌బీఐ, ప్రభుత్వం ఆలోచన అని కూడా ఆయన చెప్పారు. ‘డిఫాల్లర్ల(రుణ ఎగవేతదారులు) పేర్లన్నీ బయటపెట్టడం కుదరదు. దీనివల్ల వ్యాపార కార్యకలాపాలు పూర్తిగా మూతపడేందుకు, అనవసర కల్లోలానికి దారితీస్తుంది.
 ఇటీవల తాము ఇచ్చిన డిఫాల్టర్ల లిస్టులోని పేర్లను బయటపెట్టాల్సిందిగా సుప్రీం కోర్టు ఆర్‌బీఐని ఆదేశిస్తుందని నేను భావించడం లేదు. పేర్లను రహస్యంగా ఉంచాలని మేం కోరాం. అయితే, ఇందులో కొన్ని అంశాలను వెల్లడించవచ్చుకానీ, ఇప్పుడు మేం చెప్పడం కుదరదు’ అని రాజన్ పేర్కొన్నారు. బ్యాంకుల్లో  మొండిబకాయిలు తీవ్రంగా ఎగబాకిన నేపథ్యంలో రూ. 500 కోట్లకు మించిన ఎన్‌పీఏలు ఉన్న డిఫాల్టర్ల జాబితాను ఇవ్వాల్సిందిగా సుప్రీం ఆదేశించడం, ఆర్‌బీఐ దీన్ని సీల్డు కవర్‌లో సమర్పించడం తెలిసిందే.
 రుణగ్రహీతలకు ఆర్‌బీఐ తీపి కబురు తెచ్చింది. గృహ, వాహన, ఇతరత్రా రుణాలపై వడ్డీరేట్లు దిగొచ్చేవిధంగా పాలసీ రేట్లను తగ్గిస్తూ నిర్ణయం తీసుకుంది. దీంతో అటు సామాన్యులతో పాటు కార్పొరేట్ రంగానికి కూడా వడ్డీరేట్ల ఊరట లభించనుంది. అంతేకాదు రానున్న కాలంలోనూ సరళ పాలసీనే కొనసాగిస్తామని చెప్పడం ద్వారా అవసరమైతే మరిన్ని రేట్ల కోతలు ఉంటాయని ఆర్‌బీఐ గవర్నర్ రఘురామ్ రాజన్ సంకేతాలిచ్చారు. పాలసీ నిర్ణయంపై కేంద్రం, కార్పొరేట్ వర్గాలు హర్షం వ్యక్తం చేశాయి.
 సరళ పాలసీనే కొనసాగిస్తాం...
 ఎంసీఎల్‌ఆర్ విధానం వల్ల పాలసీ రేట్ల తగ్గింపు ప్రయోజనాన్ని బ్యాంకులు కచ్చితంగా రుణగ్రహీతలకు అందిస్తాయి. ఇప్పటికే బ్యాంకులు 0.25-0.5 శాతం మేర రుణ రేట్లను తగ్గించాయి. తాజా రెపో కోత కారణంగా రుణాలు మరింత చౌక కానున్నాయి.  మేం అనుసరిస్తున్న సరళ పాలసీ విధానాన్ని కొనసాగిస్తాం. వచ్చే ఏడాది మార్చినాటికి రిటైల్ ద్రవ్యోల్బణాన్ని 5 శాతానికి కట్టడి చేయాలన్నదే మా లక్ష్యం. ఇది కాస్త అటూఇటుగా సాకారం అయ్యే అవకాశం ఉంది. అయితే, ఏడో వేతన సంఘం సిఫార్సు మేరకు ఉద్యోగుల జీతాలు పెరిగితే రానున్న రెండేళ్లలో ద్రవ్యోల్బణాన్ని 1.5 శాతం వరకూ ఎగదోసే అవకాశం ఉంది. ఇక కొత్త బ్యాంకింగ్ లెసైన్సుల విషయానికొస్తే.. విభిన్న తరహా సేవలు ముఖ్యంగా కస్టోడియన్ బ్యాంకులు; హోల్‌సేల్, దీర్ఘకాలిక ఫైనాన్సింగ్‌పై దృష్టిపెట్టే తరహా బ్యాంకుల ఆవిర్భావానికి ఆర్‌బీఐ అవకాశాలను అన్వేషిస్తుంది.
 పావు శాతం రెపో రేటు కోతను మార్కెట్ ముందుగానే అంచనావేసింది. ద్రవ్య సరఫరా పెంపునకు వీలుగా తీసుకున్న చర్యలు నిజంగా ఊహించని బహుమతే. దీనివల్ల ఆర్‌బీఐ కల్పించిన రేట్ల కోత ప్రయోజనాన్ని రుణ గ్రహీతలకు వేగంగా బదలాయించేందుకు వీలవుతుంది.  - అరుంధతీ భట్టాచార్య, ఎస్‌బీఐ చీఫ్
  లిక్విడిటీ పెంపు, నిర్వహణకు సంబంధించి ఆర్‌బీఐ తీసుకున్న చర్యలు బ్యాంకులకు సానుకూలంగా ఉన్నాయి. దీంతో రుణాలపై వడ్డీరేట్ల తగ్గింపునకు వీలుగా బ్యాంకులకు వెసులుబాటు లభిస్తుంది. - చందా కొచర్, ఐసీఐసీఐ బ్యాంక్ సీఈఓ, ఎండీ
 వృద్ధికి ఊతం: పరిశ్రమ
 ఆర్‌బీఐ పావు శాతం రేట్ల తగ్గింపును పారిశ్రామిక రంగం స్వాగతించింది. రుణాలు చౌక కావడంతో వృద్ధి పుంజుకోవడానికి దోహదం చేస్తుందని అభిప్రాయపడింది. ‘వాస్తవానికి ఇప్పుడున్న ఆర్థిక పరిస్థితుల్లో వ్యాపార విశ్వాసాన్ని పెంచేందుకు రెపో రేటును కనీసం అర శాతం తగ్గించి ఉండాల్సింది. ఈ ఏడాది సాధారణ వర్షపాతం అంచనాలు, అంతర్జాతీయంగా కమోడిటీ ధరల తగ్గుదల, చిన్న మొత్తాల పొదుపు రేట్లను కేంద్రం తగ్గించడం, బడ్జెట్‌లో ప్రభుత్వం తీసుకున్న ఆర్థిక క్రమశిక్షణ చర్యలు ఆర్‌బీఐని రేట్ల కోత దిశగా ప్రోత్సహించాయి’.
   - చంద్రజిత్ బెనర్జీ, సీఐఐ డెరైక్టర్ జనరల్
  ఆర్థిక వ్యవస్థలో భారీ రంగాలు... ముఖ్యంగా తయారీ, నిర్మాణం, ఇన్‌ఫ్రా రంగాల్లో నెలకొన్న తీవ్ర మందగమనాన్ని చూస్తే, రెపో రేటు తగ్గింపు మరింత అధికంగా ఉండాల్సింది.  - సునిల్ కనోరియా, అసోచామ్ ప్రెసిడెంట్
  ఆర్‌బీఐ ఊరటతో పెట్టుబడులు పుంజుకునేలా ఇక బ్యాంకులు కూడా రుణ రేట్లను తగ్గిస్తాయని భావిస్తున్నాం.
 - హర్షవర్ధన్ నోతియా, ఫిక్కీ ప్రెసిడెంట్
  ఆర్‌బీఐ రెపో కోత కారణంగా గృహ రుణాలపై వడ్డీరేట్లు దిగిరావడం ద్వారా ఇళ్ల అమ్మకాలు పుంజుకునే ఆస్కారం ఉంది. గృహ కొనుగోలుదారులకు అర శాతం వడ్డీరేటు ఊరట ఉంటుందని భావిస్తున్నాం.  - గీతాంబర్ ఆనంద్, క్రెడాయ్ ప్రెసిడెంట్
  ఆర్థిక వ్యవస్థకు ఉత్తేజం...
 ఆర్‌బీఐ రెపో రేట్ల కోత ఆర్థిక వ్యవస్థకు మంచి ఉత్తేజాన్నిస్తుంది. ఆర్‌బీఐ చర్యలకు అనుగుణంగా ప్రభుత్వం కూడా ఇక ద్రవ్య, పరపతి పరమైన చర్యల అమలుకు నడుంబిగిస్తుంది. అంతిమంగా ఆర్థిక వ్యవస్థ వృద్ధికి అవసరమైన తోడ్పాటునందించడమే ఆర్‌బీఐ, ప్రభుత్వం తక్షణ కర్తవ్యం. - జయంత్ సిన్హా, ఆర్థిక శాఖ సహాయ మంత్రి
  ఇక బ్యాంకులు అనుసరిస్తాయి...
 ఆర్‌బీఐ పాలసీ నిర్ణయంతో ఇక బ్యాంకులు కూడా దీన్ని అనుసరించాల్సి ఉంటుంది. ఎంసీఎల్‌ఆర్ విధానం ఆధారంగా ఇప్పటికే కొన్ని బ్యాంకులు తమ రుణ రేట్లను సవరించాయి. ఇప్పుడు రెపో కోతతో వడ్డీరేట్లను మరింతగా తగ్గించాల్సిన అవసరం ఉంది.
 - శక్తికాంత్ దాస్, కేంద్ర ఆర్థిక సేవల విభాగం కార్యదర్శి


 ♦ ఆర్‌బీఐ గవర్నర్ రాజన్ సూచన
 ♦ లేదంటే... ప్రతికూల పరిణామలకు
 ♦ అవకాశం ఉంటుందని విశ్లేషణ
  ముంబై: ద్రవ్య పరపతి విధానాలకు సంబంధించి అంతర్జాతీయంగా కొన్ని మార్గదర్శకాలు అవసరమని రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ రఘురామ్ రాజన్ పేర్కొన్నారు. అంతర్జాతీయ బాధ్యతాయుత ద్రవ్య విధాన ప్రవర్తన దిశలో ఇది కీలకమని అన్నారు. ప్రస్తుత పరిస్థితుల్లో వృద్ధే లక్ష్యంగా ఒక దేశం తీసుకునే దూకుడు నిర్ణయాలు... అంతర్జాతీయంగా మరో దేశంపైనా ప్రభావం చూపే అవకాశం ఉన్నందున, దీనిపై సమగ్ర మార్గదర్శకాలు అవసరమని అన్నారు. 
 అంగీకృత మార్గదర్శకాలు పాలసీ విధాన నిర్ణయాల్లో పాటిస్తే...  ఏకీకృత సానుకూల ఫలితాలను మెరుగుపరచుకునే అవకాశం ఉంటుందని వివరించారు. ‘రూల్స్ ఆఫ్ మానిటరీ పాలసీ’ అన్న శీర్షికన రాసిన ఒక వర్కింగ్ పేపర్‌లో ఆయన తన అభిప్రాయాలను వెలిబుచ్చారు. అనుసరించే విధానాలు తాత్కాలిక ప్రయోజనాలను కల్పించే విధంగా కాకుండా... దీర్ఘకాలిక ఫలితాలు ఇచ్చేట్లు ఉండాలని అన్నారు. ఒక విధానం దేశీయంగా అంతర్జాతీయ సానుకూల ఫలితాన్ని ఇస్తే.. అది దీర్ఘకాలంలో ప్రపంచ సంక్షేమానికి దోహదపడుతుందని వివరించారు. విధానాల అసమర్థత అనే పదానికి ఎక్కడా తావులేని పరిస్థితిని తద్వారా సృష్టించవచ్చని అన్నారు. సిగ్మా పేరుతో ఇలాంటి ఒక విధానాన్ని ఇప్పుడు అమెరికా ఫెడరల్ రిజర్వ్ కూడా అభివృద్ధి చేసింది.