సాక్షి, అమరావతి: ఖరీఫ్‌ కలిసి రాలేదు. వరుస వైపరీత్యాలకు తోడు ప్రభుత్వ నిర్లక్ష్యం కారణంగా ఖరీఫ్‌లో రైతులు దెబ్బ తిన్నారు. అతి కష్టం మీద లక్ష్యానికంటే తక్కువగా 69.70 లక్షల ఎకరాల్లో సాగు చేసినా, పంటలు దెబ్బతిన్నాయి. దీంతో రైతులు ముందస్తుగా రబీ సాగుకు సన్నద్ధమయ్యారు. ఆ మేరకు రబీ 2024–25 ప్రణాళికను వ్యవసాయ శాఖ సిద్ధం చేసింది. రబీ సాధారణ విస్తీర్ణం 56.58 లక్షల ఎకరాలు. ఈ ఏడాది సాగు లక్ష్యం 57.65 లక్షల ఎకరాలుగా నిర్దేశించారు. 19.87 లక్షల ఎకరాల్లో వరి, 11.17 లక్షల ఎకరాల్లో శనగ, 8.44 లక్షల ఎకరాల్లో మినుము, 5.23 లక్షల ఎకరాల్లో మొక్కజొన్న, 2.74 లక్షల ఎకరాల్లో జొన్న, 2.51 లక్షల ఎకరాల్లో వేరుశనగ, 2.46లక్షల ఎకరాల్లో పెసలు, 1.77లక్షల ఎకరాల్లో పొగాకు పంటలు సాగు చేయనున్నారు. కాగా ఈ ఏడాది 94.69 లక్షల టన్నుల దిగుబడులు లక్ష్యంగా వ్యవసాయ శాఖ నిర్దేశించింది. రబీకి 3.85 లక్షల క్వింటాళ్ల విత్తనం రబీ కోసం 8.88 లక్షల క్వింటాళ్ల విత్తనం అవసరం. రూ.94.96 కోట్ల సబ్సిడీతో 3.85 లక్షల క్వింటాళ్ల విత్తనాలను సబ్సిడీపై పంపిణీ చేసేందుకు అధికారులు సిద్ధం చేస్తున్నారు. సీజన్‌లో 2.64 లక్షల క్వింటాళ్ల శనగ విత్తనం అవసరం కాగా, ఇప్పటివరకు 26 వేల క్వింటాళ్లను సిద్ధం చేశారు. వరి, ఇతర విత్తనాలను ఈ నెల 25వ తేదీ నుంచి పంపిణీ చేసేందుకు ఏర్పాట్లు చేస్తున్నారు. 50,076 క్వింటాళ్ల వరి, 45,647 క్వింటాళ్ల వేరుశనగ, 16,249 క్వింటాళ్ల మినుము విత్తనాల పంపిణీకి ఏర్పాట్లు చేశారు. ఎరువుల సరఫరాలో ఆర్బీకేలకు కోత ఈ ఏడాది 20.05లక్షల టన్నుల ఎరువులు అవసరమని అధికారులు అంచనా వేశారు. ఇప్పటికే 6.95 లక్షల టన్నుల ఎరువులు ఉండగా, కేంద్రం నుంచి ఈ నెలలో 1.47 లక్షల టన్నులు వచ్చా­యి. ప్రస్తుతం 8.42 లక్షల టన్నుల ఎరువులు అందుబాటులో ఉన్నాయని చెబుతున్నారు. గత నాలుగేళ్లుగా సబ్సిడీ విత్తనం, ఎరువుల పంపిణీలో రైతు భరోసా కేంద్రాలకు (ఆర్బీకేలకు) అధిక ప్రాధాన్యతనిచ్చారు. కానీ చంద్రబాబు కూటమి ప్రభుత్వం ఆర్బీకేలకు ప్రాధాన్యత లేకుండా చేసింది. గడిచిన ఖరీఫ్‌లో అతికష్టమ్మీద 1.50 లక్షల టన్నుల ఎరువులను మాత్రమే ఆర్బీకేల ద్వారా సరఫరా చేశారు. రబీలో కూడా ఆర్బీకేలకు సరఫరాలో భారీగా కోత పెడుతున్నారు. రబీలో రూ.68వేల కోట్లు పంట రుణాలు ప్రస్తుత రబీలో రైతులకు లక్ష కోట్ల రుణ పరపతి కల్పించాలని లక్ష్యంగా నిర్దేశించారు. దాంట్లో రూ.68,060 కోట్లు పంట రుణాలు, 32,390 కోట్లు టర్మ్‌ రుణాలు ఇవ్వనున్నారు. గతేడాది 3.60 లక్షల మంది కౌలుదారులకు రూ.4,100 కోట్లు ఇవ్వగా, ఈ ఏడాది కనీసం 5 లక్షల మందికి రూ.5 వేల కోట్లు రుణాలివ్వాలని నిర్ణయించారు.

సాక్షి, హైదరాబాద్‌: పంటరుణాలకు సంబంధించి తప్పుడు సమాచారమిచ్చే బ్యాంకర్లపై కఠిన చర్యలు తీసుకుంటామని వ్యవసాయ, సహకార శాఖ మంత్రి తుమ్మల నాగేశ్వరరావు చెప్పారు. రుణమాఫీకి సంబంధించి బ్యాంకుల వారీగా క్షేత్రస్థాయి సమాచారాన్ని తెప్పిస్తున్నామని, ఒక సొసైటీ పరిధిలో ఒకే రోజు ఐదువందల మందికి రుణాలు ఇచ్చినట్లు సమాచారం వచి్చందని, ఇదే తరహాలో 7 బ్యాంకులు సమాచారం ఇచ్చాయన్నారు.వాటిపై పూర్తిస్థాయిలో విచారణ చేస్తామని, ఒకే రోజు ఇంత పెద్ద సంఖ్యలో రుణ మంజూరుకు కారణాలను పరిశీలించి నిర్ధారించుకుంటామన్నారు. తప్పుడు సమాచా రం ఇచ్చినట్లు తేలితే చర్యలు తప్పవని హెచ్చరించారు. శనివారం సచివాలయంలో వ్యవసాయ శాఖ ముఖ్యకార్యదర్శి రఘునందన్‌రావుతో కలిసి తుమ్మల మీడియాతో మాట్లాడారు.రుణమాఫీకి 25 లక్షల కుటుంబాలు అర్హత సాధిస్తా యని ప్రాథమికంగా భావించామని, అయితే, రాష్ట్రవ్యాప్తంగా 32 బ్యాంకుల ద్వారా రూ.2 లక్షలలోపు రుణాలు తీసుకున్న వారి సంఖ్య 44 లక్షలు ఉందన్నారు. కుటుంబం యూనిట్‌గా రూ.2 లక్షల వరకు రుణమాఫీ చేస్తామన్నారు. రేషన్‌ కార్డు ఆధారంగా కుటుంబ నిర్ధారణ చేస్తామని, ఈ కా ర్డు లేని వారిని పాస్‌బుక్‌ ఆధారంగా గుర్తిస్తామన్నారు.రుణమాఫీ చేయకుంటే ఉరితీయండి రాష్ట్ర ప్రభుత్వం తలపెట్టిన పంటరుణ మాఫీ చారిత్రక నిర్ణయమని తుమ్మల చెప్పారు. అన్నదాతకు లబ్ధి చేకూరే ఈ పథకంపై రాజకీయ నేతలు తప్పుగా మాట్లాడొద్దని, అర్హత ఉన్న ప్రతి రైతుకూ పంటరుణాన్ని మాఫీ చేస్తామన్నారు. నెలరోజుల్లో ఈ ప్రక్రియ పూర్తి చేసేందుకు చర్యలు వేగవంతం చేసినట్లు తెలిపారు. ఏవైనా అనుమానాలు ఉంటే రైతు వేదికల వద్ద వ్యవసాయాధికారులను సంప్రదించి నివృత్తి చేసుకోవాలని సూచించారు.ఇంకా నాలుగున్నరేళ్లపాటు తమ ప్రభుత్వం కొనసాగుతుందని, రుణమాఫీ చేయకుంటే తమను ఉరితీయాలని వ్యాఖ్యానించారు. ప్రస్తుతం రూ.లక్షలోపు రుణమాఫీ చేశామని, త్వరలో రూ.1.5 లక్షలలోపు ఉన్న రుణాలను మాఫీ చేస్తామని, ఆ తర్వాత రూ.2 లక్షల రుణాలను మాఫీ చేస్తామన్నారు. రూ.1.50 లక్షలు, రూ.2 లక్షల రుణమాఫీ లబి్ధదారులు ఎంతమంది ఉన్నారో ఇప్పుడు చెప్పలేమని, నిధులు విడుదల సమయంలో వెల్లడిస్తామని మంత్రి ఓ ప్రశ్నకు సమాధానంగా చెప్పారు.మొత్తంగా రూ.31 వేల కోట్ల మేర రుణమాఫీ జరుగుతుందని, ఇప్పటివరకు చేసిన రూ.లక్ష లోపు మాఫీ ద్వారా 11 లక్షల మంది రైతులు లబ్ధి పొందారని వివరించారు. రుణమాఫీ పొందని రైతులు సంబంధిత కలెక్టరేట్‌లో లేదా వ్యవసాయ శాఖ అధికారులను సంప్రదించి కారణాలు తెలుసుకోవచ్చన్నారు.

సాక్షి, హైదరాబాద్‌: రాష్ట్రంలో రైతుల పంట రుణాల మాఫీ రేషన్‌కార్డు ఉన్నవారికే అమలుకానుంది. ఆహార భద్రత కార్డుల ఆధారంగానే రైతు కుటుంబాలను గుర్తిస్తామని రాష్ట్ర ప్రభుత్వం స్పష్టం చేసింది. లబ్ధిదారులను తేల్చడానికి.. బ్యాంకుల్లో రైతుల రుణఖాతాలోని ఆధార్‌ను.. పట్టాదారు పాస్‌బుక్‌ డేటాబేస్‌లో ఉన్న ఆధార్‌తో, పీడీఎస్‌ (రేషన్‌) డేటాబేస్‌లోని ఆధార్‌తో అనుసంధానం చేయనున్నట్టు పేర్కొంది. అర్హులుగా తేల్చిన ఒక్కో రైతు కుటుంబానికి 2018 డిసెంబర్‌ 12 నుంచి 2023 డిసెంబర్‌ 9వ తేదీ మధ్య ఉన్న పంట రుణాల బకాయిల్లో రూ.2 లక్షల వరకు మాఫీ చేయనున్నట్టు ప్రకటించింది. తప్పుడు పత్రాలతో రుణమాఫీ పొందినట్టు తేలితే ఆ మొత్తాన్ని రికవరీ చేస్తామని తెలిపింది. ఈ మేరకు వ్యవసాయ శాఖ కార్యదర్శి రఘునందన్‌రావు సోమవారం ‘పంట రుణ మాఫీ పథకం–2024’ మార్గదర్శకాలను విడుదల చేశారు. ఈ ఉత్తర్వులను తెలుగులో విడుదల చేయడం విశేషం. పథకం అమలు ప్రక్రియ, ఏర్పాట్లు చేసేదిలా.. ⇒ వ్యవసాయ శాఖ డైరెక్టర్‌ పంటల రుణమాఫీ పథకాన్ని అమలు చేసే అధికారిగా ఉంటారు. హైదరాబాద్‌లోని నేషనల్‌ ఇన్ఫర్మేటిక్స్‌ సెంటర్‌ (ఎన్‌ఐసీ) ఈ పథకానికి ఐటీ భాగస్వామిగా ఉంటుంది. ⇒ వ్యవసాయశాఖ డైరెక్టర్, ఎన్‌ఐసీ సంయుక్తంగా ఈ పథకం అమలు కోసం ఒక ఐటీ పోర్టల్‌ను నిర్వహిస్తాయి. ఈ పోర్టల్‌లో ప్రతి రైతు కుటుంబానికి సంబంధించిన లోన్‌ అకౌంట్‌ డేటా సేకరణ, డేటా వాలిడేషన్, అర్హత మొత్తం నిర్ణయించబడుతుంది. ఈ ఐటీ పోర్టల్‌లోనే.. ఆర్థికశాఖ నిర్వహించే ఐఎఫ్‌ఎంఐఎస్‌కు బిల్లులు సమర్పించడానికి, రుణమాఫీ పథకానికి సంబంధించిన భాగస్వాములందరితో సమాచారాన్ని పంచుకోవడానికి, రైతులు ఇచ్చే ఫిర్యాదుల పరిష్కారానికి ప్రత్యేకంగా మాడ్యూల్స్‌ ఉంటాయి. ⇒ ఈ పథకం అమలుకోసం ప్రతి బ్యాంకులో ఒక అధికారిని బ్యాంకు నోడల్‌ అధికారిగా (బీఎస్‌ఐ) నియమించాలి. ఆ నోడల్‌ అధికారులు తమ బ్యాంక్‌ పంట రుణాల డేటాపై డిజిటల్‌ సంతకం చేయాలి. ⇒ ప్రతి బ్యాంకు తమ కోర్‌ బ్యాంకింగ్‌ సొల్యూషన్‌ (సీబీఎస్‌) నుంచి.. రిఫరెన్స్‌–1 మెమో, ప్రొఫార్మా– 1లో డిజిటల్‌ సంతకం చేసిన టేబుల్‌ను ప్రభుత్వానికి సమర్పించాలి. ప్రాథమిక వ్యవసాయ సహకార సొసైటీలు సీబీఎస్‌లో లేవు కాబట్టి.. ప్యాక్స్‌కు అనుబంధమైన సంబంధిత బ్యాంకు బ్రాంచ్, రిఫరెన్స్‌–2వ మెమో, ప్రొఫార్మా–2లో డేటాను డిజిటల్‌గా సంతకం చేసి సమర్పించాలి. ⇒ ఈ ప్రక్రియ ముఖ్య ఉద్దేశం తప్పుడు చేరికలు, తప్పుడు తీసివేతలను నివారించడమే.. అవసరమైతే వ్యవసాయ శాఖ డైరెక్టర్, ఎన్‌ఐసీ డేటా వ్యాలిడేషన్‌ తనిఖీలను చేపట్టాలి. ⇒ అర్హతగల రుణమాఫీ మొత్తాన్ని నేరుగా లబ్ధిదారుల బ్యాంకు ఖాతాలో (డీబీటీ పద్ధతిలో) జమ చేస్తారు. ప్యాక్స్‌ విషయంలో రుణమాఫీ మొత్తాన్ని డీసీసీబీ, బ్యాంకు బ్రాంచికి విడుదల చేస్తారు. ఆ బ్యాంకు వారు రుణమాఫీ మొత్తాన్ని ప్యాక్స్‌లో ఉన్న రైతుల ఖాతాల్లో జమచేస్తారు. ⇒ ప్రతి రైతు కుటుంబానికి రుణమొత్తం ఆధారంగా ఆరోహణ క్రమంలో మాఫీ మొత్తాన్ని జమ చేయాలి. ⇒ కటాఫ్‌ తేదీ నాటికి ఉన్న మొత్తం రుణం, లేదా రూ.2 లక్షలు.. వీటిలో ఏది తక్కువైతే ఆ మొత్తాన్ని రైతు కుటుంబం పొందే అర్హత ఉంటుంది. ⇒ ఏదైనా రైతు కుటుంబానికి రూ.2 లక్షలకుపైగా రుణం ఉంటే.. రైతులు అదనంగా ఉన్న రుణాన్ని మొదట బ్యాంకుకు చెల్లించాలి. ఆ తర్వాతే రూ.2లక్షల మొత్తాన్ని రైతు కుటుంబ సభ్యుల రుణ ఖాతాలకు బదిలీచేస్తారు. ⇒ రూ.2 లక్షల కంటే ఎక్కువ రుణమున్న పరిస్థితులలో.. కుటుంబంలో మహిళల పేరిట ఉన్న రుణాన్ని మొదట మాఫీ చేసి, మిగతా మొత్తాన్ని దామాషా పద్ధతిలో కుటుంబంలోని పురుషుల పేరిట ఉన్న రుణాలను మాఫీ చేస్తారు. వీరికి రుణమాఫీ వర్తించదు ⇒ పంట రుణమాఫీ పథకం ఎస్‌హెచ్‌జీలు, జేఎల్‌జీలు, ఆర్‌ఎంజీలు, ఎల్‌ఈసీఎస్‌లు తీసుకున్న రుణాలకు వర్తించదు. ⇒ పునర్వ్యవస్థీకరించిన లేదా రీషెడ్యూల్‌ చేసిన రుణాలకు వర్తించదు. ⇒ కంపెనీలు, సంస్థలు తీసుకున్న పంట రుణాలకు వర్తించదు. అయితే ప్యాక్స్‌ల ద్వారా తీసుకున్న పంట రుణాలకు వర్తిస్తుంది. ⇒ కేంద్ర ప్రభుత్వం అమలు చేస్తున్న పీఎం కిసాన్‌ పథకం మినహాయింపుల నిబంధనలను.. రాష్ట్ర ప్రభుత్వం రుణమాఫీని ఆచరణాత్మకంగా అమలు చేయడం కోసం వీలైనంత వరకు పరిగణనలోకి తీసుకుంటారు. మార్గదర్శకాల మేరకు బ్యాంకులు, రైతుల బాధ్యతలివీ.. ⇒ ప్రతి బ్యాంకు ప్రభుత్వం ఇచ్చిన ప్రొఫార్మాలో డేటాను ప్రభుత్వానికి సమర్పించాలి. ⇒ పథకం కోసం నిర్వహించే ప్రతి డాక్యుమెంటుపై, రూపొందించిన ప్రతి జాబితాపై బ్యాంకు బీఎన్‌వో డిజిటల్‌ సంతకం చేయాలి. నిర్ణీత మార్గదర్శకాలను ఉల్లంఘించి డేటాను సమర్పించినట్టు భవిష్యత్తులో గుర్తిస్తే చట్టప్రకారం బ్యాంకులపై చర్యలు ఉంటాయి. ⇒ ఈ పథకం కింద రుణమాఫీ పొందడానికి రైతులు తప్పుడు సమాచారం ఇచ్చినట్టు గుర్తించినా, లేదా మోసపూరితంగా పంటరుణం పొందినట్టుగానీ, అసలు పంట రుణమాఫీకి అర్హులుకారని తేలినా.. ఆ మొత్తాన్ని రికవరీ చేయడానికి వ్యవసాయశాఖ డైరెక్టర్‌కు అధికారం ఉంటుంది. ⇒ రైతుల రుణఖాతాల్లోని డేటా యదార్థతను నిర్ధారించేందుకు... సహకార శాఖ డైరెక్టర్, సహకార సంఘాల రిజి్రస్టార్, ప్రాథమిక వ్యవసాయ సహకార సంఘాల్లో ముందస్తు శాంపిల్‌ ప్రీఆడిట్‌ను చేపట్టాలి. అమలు అధికారికి ఆ వివరాలను అందజేయాలి. ⇒ రుణమాఫీ పథకంపై రైతుల సందేహాలను, ఇబ్బందులను పరిష్కరించడానికి వ్యవసాయశాఖ డైరెక్టర్‌ ఒక పరిష్కార విభాగాన్ని ఏర్పాటు చేయాలి. రైతులు తమ ఇబ్బందులపై ఐటీ పోర్టల్‌ ద్వారా లేదా మండల స్థాయిలో నెలకొల్పే సహాయ కేంద్రాల ద్వారా ఫిర్యాదు చేయవచ్చు. ప్రతి అభ్యర్ధనను సంబంధిత అధికారులు 30 రోజుల్లోపు పరిష్కరించి, దరఖాస్తుదారుకు వివరాలు తెలపాలి.

సాక్షి, హైదరాబాద్‌: తెలంగాణలో రైతుల రుణమాఫీపై తాజాగా ప్రభుత్వం మార్గదర్శకాలను విడుదల చేసింది. ఈ ‍క్రమంలో ప్రతీ కుటుంబం, రేషన్‌ కార్డును యూనిట్‌గా తీసుకోనున్నట్టు ప్రభుత్వం వెల్లడించింది.కాగా, రైతుల రుణమాఫీపై తెలంగాణ సర్కార్‌ మార్గదర్శకాలను సోమవారం విడుదల చేసింది. ఇందులో భాగంగా ప్రతీ ‍యూనిట్‌లో మొదట మహిళల పేరుతో ఉన్న రుణాలను మాఫీ చేయనున్నారు. ఆ తర్వాత ప్రాధాన్యత ప్రకారం రుణాలను మాఫీ చేయనున్నట్టు మార్గదర్శకాల్లో పేర్కొన్నారు. అయితే, రుణమాఫీ అమలుకు రేషన్‌ కార్డు తప్పనిసరి అని ప్రభుత్వం స్పష్టం చేసింది. ఇక, చిన్న మొత్తంలో రుణమాఫీలను చేసిన తర్వాతే పెద్ద అమౌంట్‌ను మాఫీ చేయనున్నారు. స్వల్పకాలిక రుణాలను కూడా మాఫీ చేయనున్నారు. అలాగే.. రెండు లక్షల పైబడి ఉన్నా రుణాలకు రైతులే డబ్బులు చెల్లించాల్సి ఉంటుంది. రెన్యువల్‌ చేసిన రుణాలకు ఈ పథకం వర్తించదు. పీఎం కిసాన్‌ జాబితాను రాష్ట్ర ప్రభుత్వం పరిగణలోకి తీసుకుంటుంది. అన్ని వాణిజ్య బ్యాంక్‌లు, గ్రామీణ బ్యాంకులు, జిల్లా సహకార బ్యాంకుల నుంచి రుణాలు తీసుకున్న రైతులకు మాఫీ వర్తిస్తుంది. ఇక, 12 డిసెంబర్‌ 2018 నుంచి 9 డిసెంబర్‌ 2023 వరకు తీసుకున్న అన్ని పంటలకు రుణమాఫీ చేయనున్నారు. ఇక, ఒకవేళ తప్పుగా ఎవరైనా రుణమాఫీ తీసుకుని ఉంటే వారికి డబ్బులు చెల్లించినట్టు అయితే, మళ్లీ డబ్బులను వారి వద్ద నుంచి ప్రభుత్వం తీసుకోనుంది.

సాక్షి, హైదరాబాద్‌: కుటుంబం యూనిట్‌గా పంటల రుణమాఫీని అమలు చేసేందుకు రాష్ట్ర ప్రభుత్వం సిద్ధమవుతోంది. ఒక కుటుంబంలోని వారి పేరిట బ్యాంకుల్లో పంట రుణాలు ఎంత ఉన్నా.. గరిష్టంగా రూ.2 లక్షల వరకు మాత్రమే మాఫీ చేయాలని ప్రభుత్వం నిర్ణయించినట్లు వ్యవసాయ శాఖ వర్గాలు వెల్లడించాయి. ఈ మేరకు కసరత్తు పూర్తయిందని.. నేడో, రేపో మార్గదర్శకాలు విడుదల కావొచ్చని తెలిపాయి. ఒక కుటుంబాన్ని ఎలా లెక్కలోకి తీసుకోవాలన్న దానిపై అధికారులు ప్రాథమికంగా నిర్ణయానికి వచి్చనట్టు తెలిసింది. రేషన్‌కార్డుగానీ, గ్రామ పంచాయతీ రికార్డుగానీ, వ్యవసాయశాఖ వద్ద ఇప్పటికే ఉన్న డేటాను ఆధారం చేసుకొనిగానీ కుటుంబాలను అంచనా వేయాలని భావిస్తున్నట్టు సమాచారం. అనంతరం ఒక రైతు కుటుంబానికి ఎన్ని బ్యాంకు ఖాతాలు, వాటిలో ఎన్ని పంట రుణాలు ఉన్నప్పటికీ.. మొత్తం రూ.2 లక్షల వరకే మాఫీ చేయనున్నారు. రుణాలు ఉన్న కుటుంబ సభ్యుల మధ్య దామాషా ప్రకారం ఈ మాఫీ సొమ్మును విభజిస్తారు. ఒక కుటుంబం అంటే.. భర్త, భార్య, వారిపై ఆధారపడి ఉన్న పిల్లలను పరిగణనలోకి తీసుకుంటారు. ఈ మార్గదర్శకాలు విడుదలైన వెంటనే గ్రామాల వారీగా రైతుల జాబితా తయారు చేస్తారు. బ్యాంకుల అధికారులతో కలసి రుణాలున్న వారి జాబితా తయారు చేస్తారు. చివరగా గ్రామసభలో చర్చించి తుది జాబితాను సిద్ధం చేయనున్నారు. పీఎం కిసాన్‌ నిబంధనల అమలు యోచన! వచ్చే నెల 15వ తేదీ నాటికి పంట రుణాలను మాఫీ చేస్తామని రాష్ట్ర ప్రభుత్వం ప్రకటించిన విషయం తెలిసిందే. ఇందుకోసం రూ.31 వేల కోట్లు అవసరమని అంచనా వేశారు. 2018 డిసెంబర్‌ 12వ తేదీ నుంచి 2023 డిసెంబర్‌ 9 వరకు ఐదేళ్లలో రాష్ట్ర రైతులు తీసుకున్న రూ.2 లక్షల మేరకు పంట రు­ణా­లను మాఫీ చేయనున్నారు. దాదాపు 47 లక్షల మంది రైతులకు దీనితో లబ్ధి జరుగుతుందని అంచనా. అయితే రుణమాఫీ కోసం పీఎం కిసాన్‌ పథకంలోని మార్గదర్శకాలను అమలు చేసే అవకాశం ఉందనే చర్చ జరుగుతోంది. పీఎం కిసాన్‌ పథకంలో మంత్రులు, ఎమ్మెల్యేలు, ఎమ్మెల్సీలు, మేయర్లు, జెడ్పీ చైర్మన్లు, రాజ్యాంగ పదవుల్లో ఉన్నవారు, కేంద్ర, రాష్ట్ర ప్రభుత్వ ఉద్యోగులు, అధిక ఆదాయం ఉండి ఐటీ పన్ను చెల్లించేవారిని మినహాయించారు. అదే తరహాలో ఇప్పుడు రుణమాఫీని మినహాయించే అవకాశం ఉందని అంటున్నారు. అయితే ఆదాయ పన్ను చెల్లించే అందరినీ కాకుండా అధిక ఆదాయం ఉన్నవారిని మాత్రమే మినహాయించే ఆలోచన ఉన్నట్టు సమాచారం. రాష్ట్ర ప్రభుత్వ ఉద్యోగుల్లో అందరినీ మినహాయించకుండా.. అటెండర్లు వంటి చిన్నస్థాయి ఉద్యోగులకు రైతు రుణమాఫీ ఇచ్చే అంశాన్ని పరిశీలిస్తున్నారు. అయితే ఈ విషయంలో ఆచితూచి వ్యవహరించాలని.. మిగిలే మొత్తం ఎక్కువగా ఉంటేనే పీఎం కిసాన్‌ నిబంధనలు అమలు చేయాలని, లేకుంటే ఉదారంగానే రుణమాఫీ ఇవ్వాలని భావిస్తున్నట్టు తెలిసింది. ఏదేమైనా పంటలు పండించే ప్రతి రైతుకు ప్రయోజనం కలిగించేలా పథకం అమలు జరుగుతుందని అధికారులు అంటున్నారు. బంగారం పెట్టి తీసుకున్న రుణాలు కూడా..! బంగారం తాకట్టు పెట్టి పంట రుణాలు తీసుకున్న రైతులకు కూడా రుణమాఫీ పథకాన్ని వర్తింపజేయాలని ప్రభుత్వం నిర్ణయించినట్లు తెలిసింది. గ్రామీణ బ్యాంకుల్లో పట్టాదారు పాస్‌బుక్‌ను జతచేసి, పంటల కోసం తీసుకున్న బంగారం రుణాలకు మాత్రమే రుణమాఫీ చేయాలని భావిస్తున్నారు. పట్టణ ప్రాంతాల్లో తీసుకున్న బంగారు రుణాలను మాఫీ నుంచి మినహాయించాలనే యోచన ఉన్నట్టు సమాచారం. గతంలోనూ ఇదే తరహా నిబంధనలు అమలు చేశారు. షెడ్యూల్డ్‌ కమర్షియల్‌ బ్యాంక్‌లు, కో–ఆపరేటివ్‌ క్రెడిట్‌ సంస్థలు (అర్బన్‌ కో–ఆపరేటివ్‌ బ్యాంకులు సహా), ప్రాంతీయ గ్రామీణ బ్యాంకులు రైతులకు పంపిణీ చేసిన రుణాలు, బంగారం తాకట్టుపెట్టి తీసుకున్న పంట రుణాలను మాఫీ చేయాలని నిర్ణయించినట్టు తెలిసింది.

సాక్షి, హైదరాబాద్‌: రాష్ట్రంలో రైతుల పంట రుణాలు మాఫీ చేయడానికి అవసరమైన లెక్క అంతా సిద్ధం చేయాలని, స్పష్టమైన ప్రణాళికతో ముందుకు రావాలని అధికారులను ముఖ్యమంత్రి ఎనుముల రేవంత్‌రెడ్డి ఆదేశించారు. మాఫీకి సంబంధించి విధివిధానాలను రూపొందించాలని సూచించారు. ఆగస్టు 15వ తేదీలోగా రుణమాఫీ చేసి తీరాల్సిందేనని పేర్కొన్నారు. పంట రుణాల మాఫీ, ఇతర అంశాలపై వ్యవసాయ, సహకారశాఖ అధికారులతో రేవంత్‌ సోమవారం సమీక్ష నిర్వహించారు. ఎన్నికల సమయంలో ఇచ్చిన హామీ మేరకు రుణమాఫీ అమలుకోసం ప్రణాళికలు సిద్ధం చేయాలని ఆదేశించారు. రూ.2 లక్షల వరకు రుణాలు ఉన్న రైతుల జాబితాను సిద్ధం చేయాలన్నారు. బ్యాంకర్ల నుంచి పూర్తిస్థాయిలో రైతుల వివరాలను సేకరించి, అర్హులను గుర్తించాలని సూచించారు. కటాఫ్‌ డేట్‌ విషయంలో సమస్యలు తలెత్తకుండా జాగ్రత్తలు తీసుకోవాలన్నారు. స్పష్టమైన ప్రణాళికతో రండి.. బ్యాంకుల నుంచే కాకుండా, పీఏసీఎస్‌ల నుంచి పంట రుణాలు తీసుకున్న రైతుల వివరాలు కూడా అందుబాటులో ఉండేలా చూడాలని అధికారులను సీఎం ఆదేశించారు. రూ.2 లక్షల వరకు రుణాల మాఫీకి సంబంధించిన డేటా, అవసరమైన నిధుల అంచనాలను సిద్ధం చేయాలని సూచించారు. రుణమాఫీకి సంబంధించి విధివిధానాలను రూపొందించి, స్పష్టమైన ప్రణాళికతో ముందుకు రావాలన్నారు. ఎట్టి పరిస్థితుల్లో ఆగస్టు 15వ తేదీ నాటికి రుణమాఫీ చేసి తీరాలని తేలి్చచెప్పారు. ఈ సమీక్షా సమావేశంలో ఉప ముఖ్యమంత్రి మల్లు భట్టి విక్రమార్క, మంత్రి తుమ్మల నాగేశ్వర్‌రావు, సీఎం సలహాదారు వేం నరేందర్‌రెడ్డి, ప్రభుత్వ ప్రధాన కార్యదర్శి శాంతికుమారి, సంబంధిత శాఖల అధికారులు పాల్గొన్నారు. ఒకేసారి మాఫీతో ఇబ్బంది అంటూ..! రుణమాఫీకి నిధుల జమ విషయంలో ఇబ్బందులను కొందరు అధికారులు సీఎం రేవంత్‌ దృష్టికి తీసుకొచి్చనట్టు తెలిసింది. సుమారు రూ.35 వేల కోట్ల వరకు నిధులను జమ చేయడం అంత సులువైన విషయం కాదని స్పష్టం చేసినట్టు సమాచారం. అయితే ఎట్టి పరిస్థితుల్లోనూ రుణమాఫీ చేసి తీరాల్సిందేనని, అందుకు మార్గాలను అన్వేషించాలని సీఎం పేర్కొన్నట్టు తెలిసింది. రుణాలున్న ప్రతీ రైతుకు లబ్ధి జరిగేలా మార్గదర్శకాలు తయారు చేయాలని కూడా సూచించినట్టు సమాచారం. ఇప్పటివరకు కొన్ని బ్యాంకుల నుంచి రైతు రుణాల సమాచారం వచి్చందని, మిగతావాటి నుంచి కూడా డేటా తీసుకోవాలని సీఎం ఆదేశించారు. అయితే రుణమాఫీకి అర్హులైన రైతులు ఎంతమంది ఉంటారనే దానిపై ఇంకా స్పష్టత రాలేదని అధికారులు అంటున్నారు.

సాక్షి, హైదరాబాద్‌: పాడి గేదెల పెంపకం కోసమో, వ్యవసాయ యంత్రాల కొనుగోలు, ఇతరత్రా అవసరాల కోసమో తీసుకున్న దీర్ఘకాలిక రుణాలను సహకార బ్యాంకులు రైతుల ముక్కుపిండి మరీ వసూలు చేస్తున్నాయి. కొన్నిచోట్ల వారు తాకట్టు పెట్టిన భూముల్ని వేలం వేసి మరీ బకాయిలను రాబట్టుకుంటున్నాయి. దీర్ఘకాలిక వ్యవసాయ రుణాలు, పంట రుణాలు తిరిగి చెల్లించాలంటూ నోటీసులు జారీ చేస్తున్న వివిధ జిల్లాల కేంద్ర సహకార బ్యాంకులు (డీసీసీబీలు).. నిస్సహాయ పరిస్థితుల్లో రుణాలు చెల్లించని వారి భూములు, ఇతర ఆస్తులను వేలం వేస్తున్నాయి. దీంతో రాష్ట్రవ్యాప్తంగా సహకార బ్యాంకుల్లో రుణాలు తీసుకున్న రైతాంగంలో ఆందోళన వ్యక్తమవుతోంది. ఫలానా రోజు ఫలానా రైతు భూమిని వేలం వేస్తున్నామంటూ గ్రామాల్లో చాటింపు వేయిస్తుండటంతో పరువు పోతోందని బాధితులు ఆవేదన వ్యక్తం చేస్తున్నారు. చెల్లించాల్సిన రుణం తక్కువగా ఉన్నా మొత్తం భూమిని డీసీసీబీలు వేలం వేస్తుండటంతో తమకు భూమి లేకుండా పోతోందని ఆగ్రహం వ్యక్తం చేస్తున్నారు.    రైతుల విషయంలోనే కఠిన వైఖరి?  రాష్ట్రంలో తెలంగాణ రాష్ట్ర సహకార అపెక్స్‌ బ్యాంకు (టెస్కాబ్‌) ప్రభుత్వ ఆధ్వర్యంలో ఉంటుంది. దాని పరిధిలో జిల్లా స్థాయిలో డీసీసీబీలు ఉంటాయి. వాటి కింద ప్యాక్స్‌ పని చేస్తుంటాయి. ఇవి ప్రధానంగా రైతుల కోసమే పనిచేయాల్సి ఉంటుంది. వీటి చైర్మన్లను, డైరెక్టర్లను రైతులే ఎన్నుకుంటారు. డీసీసీబీల చైర్మన్లు టెస్కాబ్‌ చైర్మన్‌ను ఎన్నుకుంటారు. ఈ బ్యాంకులు రైతులకు అవసరమైన పంట రుణాలు, దీర్ఘకాలిక రుణాలు ఇవ్వాల్సి ఉంటుంది. వాణిజ్య బ్యాంకుల మాదిరిగానే డీసీసీబీలు ప్రతి ఏటా వేలాది కోట్లు రైతులకు రుణాలు అందిస్తుంటాయి. రైతులతోపాటు ఇతరులకు కూడా గృహ, విద్య రుణాలు కూడా ఇస్తుంటాయి. రైతులకైతే ట్రాక్టర్లు, వ్యవసాయ పరికరాలు కొనేందుకు, భూములను చదును చేసుకునేందుకు, వ్యవసాయ అనుబంధ రంగాలైన పాడి, చేపలు, గొర్రెల పెంపకం తదితరాల ద్వారా అదనపు ఆదాయం సమకూర్చుకునేందుకు దీర్ఘకాలిక రుణాలు ఇస్తుంటారు. అయితే పలుకుబడి కలిగి కోట్ల రూపాయలు తీసుకునే వారిపై, రాజకీయ నాయకుల విషయంలో మెతక వైఖరి అవలంభించే డీసీసీబీలు రైతుల విషయంలో మాత్రం కఠినంగా వ్యవహరిస్తున్నాయనే ఆరోపణలు ఉన్నాయి. పెద్దల విషయంలో కోట్లు రికవరీ చేయలేక నష్టాలను చవిచూస్తున్న అనేక సహకార సంఘాలు, రైతులను మాత్రం ముప్పుతిప్పలు పెడుతున్నాయి. ఎలాగోలా చెల్లిస్తామని రైతులు వేడుకుంటున్నా కనికరించడం లేదు. భూములను వేలం వేస్తున్నాయి. వేలం పాటలో ఆయా గ్రామాల ఇతర రైతులు ఎవరూ పాల్గొనకపోతే డీసీసీబీలే స్వాదీనం చేసుకుంటున్నాయి. మరోవైపు చెల్లించాల్సిన రుణం కంటే ఎక్కువ విలువున్న భూములను వేలం వేయడంపై రైతన్నలు ఆవేదన వ్యక్తం చేస్తున్నారు. అదనంగా వచ్చే డబ్బును రైతులకే ఇస్తున్నామని అధికారులు అంటున్నా, కొద్దిపాటి భూమిని కూడా తమకు ఉంచడం లేదని రైతులు అంటున్నారు. అప్పుకు మించి భూమిని అమ్మే హక్కు సహకార బ్యాంకులకు ఎక్కడ ఉందని నిలదీస్తున్నారు. మరీ విచిత్రంగా కేవలం రూ.50 వేల రుణం ఉన్న రైతుల ఆస్తులను కూడా వేలం వేస్తున్నారనే ఆరోపణలు ఉన్నాయి.   ఒక్క ఉమ్మడి మహబూబ్‌నగర్‌లో 202 మందికి నోటీసులు  ఉమ్మడి మహబూబ్‌నగర్‌ జిల్లా డీసీసీబీ పరిధిలో 78 ప్యాక్స్‌ ఉన్నాయి. వీటి పరిధిలో 22 డీసీసీబీ బ్రాంచీలు ఉన్నాయి. గత ఏడాది (2023–24) పంట రుణాల కింద 62 వేల మంది రైతులకు రూ. 672 కోట్లు, దీర్ఘకాలిక రుణాల కింద 1,100 మందికి రూ.70 కోట్లు, గృహ రుణాల కింద 200 మందికి రూ.18 కోట్లు, విద్యా రుణాల కింద 180 మందికి రూ.14 కోట్లు అందజేశాయి. ఇందులో దీర్ఘకాలిక రుణాలు పెండింగ్‌లో ఉన్న 202 మందికి బ్యాంక్‌ అధికారులు లీగల్‌ నోటీసులు జారీ చేసి రూ.8 కోట్లు రికవరీ చేశారు. ఈ క్రమంలో కొందరు రైతుల భూములు, ఆస్తులను కూడా వేలం వేయడం గమనార్హం.  నిజామాబాద్‌లో 71 మందికి  ఉమ్మడి నిజామాబాద్‌ జిల్లాలో 2023–24 ఆర్థిక సంవత్సరంలో డీసీసీబీలో ఇళ్లు, వ్యవసాయ భూములు, ఇతరత్రా ఆస్తులు తాకట్టు పెట్టి కొందరు రైతులు రుణాలు తీసుకున్నారు. ఈ నేపథ్యంలో 71 మందికి డీసీసీబీ అధికారులు నోటీసులు జారీచేశారు. అయినా అప్పులు చెల్లించని రైతుల ఆస్తులను వేలం వేసే అంశాన్ని పరిశీలిస్తున్నారు.   ఖమ్మం జిల్లాలో కూడా..  ఉమ్మడి ఖమ్మం జిల్లాలో ప్రతి ఏటా వానాకాలం, యాసంగి సీజన్లలో డీసీసీబీలు పంట రుణాలు ఇస్తాయి. గడిచిన వానాకాలంలో రూ.469.82 కోట్లు, యాసంగి సీజన్‌లో రూ.126.68 కోట్లు పంట రుణాలుగా ఇచ్చాయి. అలాగే రూ. 236.38 కోట్ల దీర్ఘకాలిక రుణాలు ఇచ్చాయి. ఈ నేపథ్యంలో రుణాలు తిరిగి చెల్లించని రైతులకు నోటీసులు జారీ అయ్యాయి. రైతులు రుణాలు చెల్లించకుంటే ఆస్తులను వేలం వేస్తామని అధికారులు హెచ్చరిస్తున్నారు.   డీసీసీబీలు నిబంధనల ప్రకారమే వ్యవహరిస్తున్నాయి  రైతులు తీసుకున్న దీర్ఘకాలిక రుణాలు, పేరుకు పోయిన ఇతరత్రా రుణాలను రికవరీ చేయాల్సిన బాధ్యత డీసీసీబీలపై ఉంటుంది. రిజర్వు బ్యాంకు నిబంధనల ప్రకారం అవి పనిచేయాలి. రైతులు తమ భూములు, ఇళ్లు, ఇతరత్రా ఆస్తులను తనఖా పెట్టి దీర్ఘకాలిక రుణాలు తీసుకుంటారు. అయితే ఏళ్లుగా పేరుకుపోయిన మొండి బకాయిలను వసూలు చేసే క్రమంలో రైతులకు నోటీసులు ఇస్తున్నారు. పలు జిల్లాల్లో భూములు, ఇతర ఆస్తులు వేలం వేస్తున్నారు. నిబంధనల ప్రకారమే డీసీసీబీలు వ్యవహరిస్తున్నాయి.  – నేతి మురళీధర్‌రావు, ఎండీ, టెస్కాబ్‌   – నాగర్‌కర్నూలు జిల్లా అచ్చంపేట మండలం ఐనోలు గ్రామానికి చెందిన ఓ రైతు పాల వ్యాపారం చేసేందుకు గాను గేదెలను కొనుగోలు చేయాలని భావించి 2017 డిసెంబర్‌లో తనకున్న 2.30 ఎకరాల భూమిని తాకట్టుపెట్టి జిల్లా కేంద్ర సహకార బ్యాంకు (డీసీసీబీ)లో రూ.7.20 లక్షల దీర్ఘకాలిక రుణం తీసుకున్నాడు. మూడు కిస్తీలు కట్టాడు. ఆ తర్వాత గేదెలు చనిపోవడంతో నష్టం వాటిల్లింది. కిస్తీలు చెల్లించకపోవడంతో అసలు, వడ్డీ కలిపి రూ.9.68 లక్షలు బకాయి చెల్లించాల్సి ఉండగా.. రైతు తాకట్టు పెట్టిన భూమిని బ్యాంకు అధికారులు వేలం వేసి నగదు జమ చేసుకున్నారు.  – జోగుళాంబ గద్వాల జిల్లా మానవపాడు ప్రాథమిక వ్యవసాయ సహకార సంఘం (ప్యాక్స్‌) పరిధిలోని పెద్దపోతులపాడు గ్రామానికి చెందిన చంద్రకాంత్‌రెడ్డి తండ్రి సంజీవరెడ్డి కొన్నేళ్ల క్రితం ట్రాక్టర్‌ కోసం మూడెకరాలు తాకట్టు పెట్టి రూ.1,66,000 రుణం తీసుకున్నాడు. మూడేళ్ల అనంతరం లోన్‌ సరిగా చెల్లించడంలేదని ట్రాక్టర్‌ను సీజ్‌ చేశారు. దీంతో చంద్రకాంత్‌రెడ్డి హైకోర్టును ఆశ్రయించగా కేసు నడుస్తోంది. ఇలావుండగా పొలం వేస్తున్నామంటూ ఇటీవల ప్యాక్స్‌ అధికారులు నోటీసులు పంపించారు. దీంతో చంద్రకాంత్‌ తమ ట్రాక్టర్‌ సీజ్‌ చేశారని, పొలం ఎలా వేలం వేస్తారని నిలదీసినా ఫలితం లేకపోయింది. ఎకరం రూ.12.10 లక్షల చొప్పున మరో రైతుకు విక్రయించారు. అయితే రెవెన్యూ రికార్డుల్లో ఆ సర్వే నంబర్‌లో ఉన్న మొత్తం 4.12 ఎకరాలు రెడ్‌మార్క్‌లో పెట్టడంతో రైతు లబోదిబోమంటున్నారు.  

రైతాంగానికి చంద్రబాబు చేసిన దగా అంతా ఇంతా కాదు. అసలు వ్యవసాయమే దండగ అని చెప్పిన ఘనుడు. నేల తల్లిని నమ్ముకున్న రైతుల్ని నిట్టనిలువునా ముంచేశారు. రైతులు తీసుకున్న వ్యవసాయ రుణాలన్నింటినీ బేషరతుగా మాఫీ చేస్తానని పీఠంపైకి ఎక్కిన తర్వాత అన్నదాతల పీక నులిమేశారు. చివరికి  అధికారంలోకి రావడానికి వక్రమార్గాలన్నీ ఎంచుకుని అబద్ధాలతో ఐదేళ్లపాటు రైతుల జీవితాలతో ఆడుకున్నారు. ఆయన జీవితమంతా అబద్ధాలతోనే గడిచిపోయింది. ‘పులి–బంగారు కడియం’ కథలో మాదిరిగా బాబు గద్దెనెక్కడానికి చేయని వాగ్దానం లేదు. కుర్చీ ఎక్కగానే వ్యవసాయ రుణాల మాఫీలో కోతలకు కోటయ్య కమిటీని ఏర్పాటు చేశారు. ఫలితంగా రూ.87,612 కోట్ల రుణాలను రూ.25 వేల కోట్లకు కుదించి, చివరికి రూ.15 వేల కోట్ల లోపే మాఫీ చేసిన జిత్తులమారి ‘నారా’ కపట నాటకానికి రైతులు ఆత్మార్పణం చేసుకోవలసి వచి్చంది. ఆత్మహత్య చేసుకున్న రైతుల కుటుంబాలకు పరిహారం ఇవ్వకుండా కూడా ఎగ్గొట్టిన మోసకారి చంద్రబాబు. అలాంటాయన ఇప్పుడు మళ్లీ మన ముందుకు సరికొత్త కపట హామీలతో వస్తున్నారు. సాక్షి, అమరావతి: వ్యవసాయ రుణాలన్నీ బేషరతుగా మాఫీ చేస్తానంటూ 2014 ఎన్నికల సభల్లో హామీలు గుప్పించిన చంద్రబాబు తీరా అధికారంలోకి వచ్చాక మాట మార్చేశారు. వ్యవసాయ రుణాలన్నీ మాఫీ చేస్తానని తాను చెప్పలేదన్నారు.   తెలుగుదేశం పార్టీ ఎన్నికల మేనిఫెస్టోలో వ్యవసాయ రుణాల మాఫీ ఫైలుపై తొలి సంతకం చేస్తానని పేర్కొన్న చంద్రబాబు తీరా ప్రమాణం స్వీకారం చేసిన తరువాత  ఫైలుపై సంతకం చేయకపోగా, రుణ మాఫీలో ఎలా కోతలు పెట్టాలనే అలోచనతో  కోటయ్య కమిటీ ఏర్పాటు చేస్తూ తొలి సంతకం చేశారు. అదీ పంట రుణాల మాఫీకి మా త్రమే లబ్ధిని పరిమితం చేశారు. కోటయ్య కమిటీ లో చంద్రబాబు తనకు అత్యంత ఇషు్టడైన కుటుంబరావును చేర్చారు. అప్పటి నుంచి వ్యవసాయ రు ణాల మాఫీని ఎలా కుదించాలనే దానిపై కసరత్తు చేశారు. స్కేల్‌ ఆఫ్‌ ఫైనాన్స్‌ అంటూ కొత్త విధానా న్ని తీసుకువచ్చి రైతాంగాన్ని ఇబ్బంది పెట్టారు.  షరతులతో కత్తెరలు  రైతులకు బ్యాంకులు నిర్ధారించిన స్కేల్‌ ఆఫ్‌ ఫైనాన్స్‌ కన్నా ఎక్కువ పంట రుణాలిస్తే ఆ రుణాలు మాఫీ పరిధిలోకి రావంటూ కత్తెర పెట్టారు. ఆ తరువాత వ్యవసాయ అవసరాలకు రైతులు బ్యాంకుల్లో బంగారం తాకట్టు పెట్టి తీసుకున్న రుణాలపై ఆంక్షలు విధించారు. ఒక కుటుంబంలో ఎంత మంది ఎంత రుణం తీసుకున్నా ఆ కుటుంబం మొత్తానికి రూ.1.50 లక్షల వరకే మాఫీ అని షరతు విధించారు. బ్యాంకుల్లో  బంగారాన్ని తాకట్టు పెట్టుకునే సమయంలో పంట రుణాలని రాయకపోతే వాటిని రుణ మాఫీ నుంచి తొలగించేశారు. రైతులు ఆధార్, రేషన్‌ కార్డులు ఇస్తేనే మాఫీ వర్తిస్తుందని షరతు విధించారు. తొలుత 2014 మార్చి వరకు ఉన్న రుణాలు, వడ్డీ మాఫీ చేస్తామని చెప్పి తరువాత 2013 డిసెంబర్‌ నెలాఖరు వరకు ఉన్న రుణాలు, వడ్డీ మా త్రమే మాఫీ చేస్తామని ప్రకటించారు. ఒకే సారి రుణ మాఫీ సాధ్యం కాదని, దశల వారీగా చేస్తామ ని ఎక్కువ మంది రైతుల ఖాతాలను తప్పించేశారు.   మాట మార్చి.. రైతులను ఏమార్చి  2014 జూన్‌ 29న చంద్రబాబు అధ్యక్షతన రాష్ట్ర స్థాయి బ్యాంకర్ల కమిటీ సమావేశం జరిగింది. ఆ సమావేశంలో వ్యవసాయ రుణాలు రూ.87,612 కో ట్లు, డ్వాక్రా సంఘాల రుణాలు రూ.14,204 కోట్లు ఉన్నాయ ని బ్యాంకర్ల కమిటీ స్పష్టం చేసింది. ఒకే సారి రైతులు, డ్వాక్రా  సంఘాల రుణాలన్నీ మాఫీ చేస్తే అభ్యంతరం లేదని ఆర్‌బీఐ ఎగ్జిక్యూటివ్‌ డైరెక్టర్‌ ప్రభుత్వానికి తెలిపారు. అయితే రుణాల మాఫీ తరువాత చూద్దమని ముందుగా గత ఖరీఫ్‌లో కరువు, తుఫాను ప్రభావం గల 575 మండలాల్లో రైతుల రుణాలను రీ షెడ్యూల్‌పై ఆర్‌బీఐతో మాట్లాడాల్సిందిగా చంద్రబాబు అధికారులను ఆదేశించారు. ఆర్‌బీఐ మొత్తం మండలాల్లో రైతు ల రుణాల రీ షెడ్యూల్‌ సాధ్యం కాదని స్పష్టం చేసింది. వడపోతలు, ఏరివేతలు తరువాత మొత్తం రూ.87,612 కోట్ల వ్యవసాయ రుణాల్లో కేవలం 25 వేల కోట్లకు రుణ మాఫీని కుదించేసి నాలుగు దశల్లో చెల్లిస్తామని షరతులు విధించింది. తొలుత రూ.50 వేలలోపు చెల్లిస్తామని, రూ.50 వేలు దాటిన రుణాలకు రైతు ధ్రువీకరణ పత్రాలను చెల్లిస్తామని మోసం చేశారు. నమ్మక ద్రోహానికి ఫలితంగా ఆత్మహత్యలు  2019 ఎన్నికల ముందు నాటికి కేవలం రూ.15 వేల కోట్ల లోపు మాత్రమే రుణ మాఫీకి చంద్రబాబు సర్కారు హామీ ఇచ్చింది. అరకొర రుణ మాఫీతో రైతులు మరింత అప్పులు ఊబిలోకి కూరుకుపోయారు. వడ్డీ భారం అమాంతం పెరిగిపోయింది. మరో పక్క   2015 ఏడాది నుంచి 2016 వరకు వ్యవసాయ రుణాల కోసం బంగారం బ్యాంకుల్లో కుదువ పెట్టి 35,24,549 మంది రైతులు రూ.26,055.18 కోట్లు పంట రుణాలు తీసుకుంటే అందులో సవాలక్ష షరతులు విధించి కేవలం రూ.3,366.80 కోట్లకు మాఫీని కుదించారు. దీంతో బంగారంపై రుణాల తీసుకున్న రైతుల పేర్లతో బ్యాంకులు వేలం నోటీసులు ఇవ్వడమే కాకుండా వాటిపై పత్రికల్లో ప్రకటనలు  వేశాయి. దీంతో చాలా మంది రైతుల ఆత్మాభిమానం కోల్పోయి అవమాన భారాన్ని తట్టుకోలేక ఆవేదనతో ఆత్మహత్యలు చేసుకున్నారు.

సాక్షి, అమరావతి:  గతంలో ఎన్నడూ లేనివిధంగా కౌలురైతులకు రాష్ట్ర ప్రభుత్వం అన్ని విధాలుగా అండగా నిలుస్తుంటే రామోజీరావు జీర్ణించుకోలేకపోతున్నారు. గతంలో ఎన్నడూ లేనంతగా వారికి మేలు జరుగుతుంటే విషపురాతలతో ప్రజలను మభ్యపెట్టేందుకు ప్రయత్నించారు. గత ప్రభుత్వాలు ఆలోచన కూడా చేయని పంట సాగు హక్కుదారుల చట్టం–2019 తీసుకురావడమే కాదు.. సీసీఆర్సీల ఆధారంగా వైఎస్సార్‌ రైతు భరోసా కింద పెట్టుబడి సాయం, పంట రుణాలు, సున్నా వడ్డీ రాయితీతో పాటు వివిధ కారణాలతో చనిపోయిన రైతు కుటుంబాలకు రూ. 7 లక్షల పరిహారం అందిస్తున్నారు. అంతేకాదు కౌలురైతులకు ఈక్రాప్‌ నమోదు ప్రామాణికంగా సబ్సిడీ విత్తనాలు, ఎరువులు, పెట్టుబడి రాయితీ (ఇన్‌పుట్‌ సబ్సిడీ), ఉచిత పంటల బీమా వంటి పథకాలు అందిస్తున్నారు. ఈ క్రాప్‌లో నమోదే ప్రామాణికంగా పండించిన పంటలను ఆర్బీకేల ద్వారా అమ్ముకోగలుగుతున్నారు. చంద్రబాబు హయాంలో కౌలు రైతులకు మేలు చేసే ఊసేలేదు. వాస్తవాలకు ముసుగేసి తప్పుడు కథనాలతో రామోజీరావు నిత్యం బురదజల్లడమే పనిగాపెట్టుకున్నారు. వ్యవసాయాన్ని పండుగలామార్చిన వైఎస్‌ జగన్‌ ప్రభుత్వంపై అభాండాలు వేస్తూ ‘కౌలురైతు నోట్లో మట్టి’ అంటూ ఈనాడు పత్రికలో రోతరాతలు రాశారు.   ఆరోపణ: కౌలు రైతులను ఆదుకోవడంలో 100 శాతం విఫలం  వాస్తవం: భూయజమాని హక్కులకు ఎలాంటి నష్టం వాటిల్లకుండా, వారి హక్కుల రక్షణకల్పిస్తూనే వాస్తవ సాగుదారులకు పంట సాగుదారు హక్కు పత్రాల(సీసీఆర్సీ)ను రాష్ట్ర ప్రభుత్వం జారీ చేస్తోంది. ఇందుకోసం ఏటా ఖరీఫ్‌ సీజన్‌ ప్రారంభానికి ముందు రెవెన్యూ శాఖతో కలిసి ఆర్బీకేల ద్వారా గ్రామ స్థాయిలో అవగాహనా సదస్సులు నిర్వహిస్తోంది. 2019 నుంచి ఇప్పటివరకు 25.82 లక్షల మంది కౌలు రైతులకు సీసీఆర్సీ కార్డులు మంజూరు చేశారు.  ఆరోపణ: కౌలురైతులకు పంట రుణాలేవి  వాస్తవం: వాస్తవ సాగు దారులందరికి పంట రుణాలివ్వాలన్న సంకల్పంతో పీఏసీఎస్‌లను ఆర్బీకేలతో అనుసంధానం చేశారు. సీసీఆర్సీ కార్డులున్న వారికి రుణాలు అందిస్తున్నారు. సీసీఆర్సీ లేని కౌలు రైతులతో జాయింట్‌ లయబిలిటీ గ్రూపు (జేఎల్‌జీ)లను ఏర్పాటు చేసి ఈ గ్రూపుల ద్వారా వారికి రుణాలు అందేలా చేస్తున్నారు. ఇలా 2019 నుంచి ఇప్పటివరకు 13.49 లక్షల మంది కౌలుదారులకు రూ. 7,959.49 కోట్ల రుణాలు అందించారు.  ఆరోపణ: రైతు భరోసాకు మొండిచేయి  వాస్తవం: దేశంలోనే తొలిసారిగా ఆంధ్రప్రదేశ్‌లో మాత్రమే కౌలు రైతులకు పెట్టుబడి సాయం అందిస్తున్నారు. భూమి లేని ఎస్సీ, ఎస్టీ, బీసీ, మైనార్టీ వర్గాలకు చెందిన కౌలుదారులతో పాటు అటవీ, దేవదాయ భూమి సాగుదారులకు కూడా రూ. 13,500 చొప్పున మూడు విడతల్లో రాష్ట్ర ప్రభుత్వమే స్వయంగా అందిస్తోంది. కౌలుదారుల్లో 6 శాతం మందికి మాత్రమే రైతు భరోసా అందుతుందనడంలో వాస్తవంలేదు. మెజార్టీ కౌలు దారులు సొంత భూమి కూడా కలిగి ఉన్నారు. వీరందరికీ భూ యజమానిగా వైఎస్సార్‌ రైతు భరోసా కింద పెట్టుబడి సాయం అందుతోంది. సీసీఆర్‌సీ కార్డుల ఆధారంగా వైఎస్సార్‌ రైతు భరోసా కింద ఈ 50 నెలల్లోనే దాదాపు 5.38 లక్షల మంది కౌలు రైతులకు రూ. 697.32 కోట్లు, 3.99 లక్షల అటవీ భూములు (ఆర్‌వోఎఫ్‌ఆర్‌) సాగు చేసే గిరిజనులకు రూ. 522.36 కోట్లు కలిపి మొత్తం 9.38 లక్షల మందికి రూ. 1,219.68 కోట్లు  పెట్టుబడి సహాయంగా అందించారు.  ఆరోపణ: కౌలురైతులకు అందని సంక్షేమ ఫలాలు  వాస్తవం: కౌలుదారులకు సంక్షేమ ఫలాలు అందడం లేదనడంలో ఎంతమాత్రం వాస్తవం లేదు. వైఎస్సార్‌ రైతు భరోసాతో సహా భూయజమానులకు వర్తింçప చేసే సంక్షేమ ఫలాలన్నీ భూమిలేని ఎస్సీ, ఎస్టీ, బీసీ, మైనార్టీ సాగుదారులకు కూడా వర్తింప చేస్తున్నారు. సీసీఆర్సీ కార్డు ఉన్నా లేకున్నా కూడా అందిస్తున్నారు. ఈ క్రాప్‌ ఆధారంగా లక్ష లోపు పంటరుణాలు పొందిన కౌలుదారులకు వైఎస్సార్‌ సున్నావడ్డీ రాయితీ కూడా అందేలా చేస్తున్నారు. ఇలా ఇప్పటి వరకు 30 వేల మందికి రూ.6.26 కోట్ల సున్నా వడ్డీ రాయితీని అందించారు. అలాగే 3.55లక్షల మందికి రూ.731.08 కోట్ల పంటల బీమా పరిహారం, 2.41లక్షల మందికి 253.56 కోట్ల పంట నష్ట పరిహారం   బాబు హయాంలో కౌలురైతులను ఆదుకున్నదేది?   చంద్రబాబు హయాంలో కౌలు రైతులకు కనీసంగా అంటే కనీసంగా కూడా ఆదుకున్న దాఖలాలు లేవు. ఏటా అరకొరగా తమకు అనుకూలంగా ఉన్న వారికి మాత్రమే ఎల్‌ఈసీ కార్డులు జారీ చేయడం తప్ప ప్రభుత్వ పరంగా ఏ ఒక్క సంక్షేమ ఫలాలు అందించిన  జాడే లేదు. కౌలుదారుల్లో 80 శాతం మందికి పైగా భూయజమానులతో ఎలాంటి లిఖిత పూర్వక ఒప్పందం లేకుండా భూమిని కౌలుకు తీసుకుంటారు. అధీకృత ఒప్పందాల్లేక పోవడం వలన ప్రభుత్వ పథకాలు, ప్రోత్సహాకాలు, రాయితీలే కాదు కనీసం పంట రుణాలు కూడా దక్కేవి కావు. టీడీపీ హయాంలో ఆత్మహత్యకు పాల్పడిన రైతులకు రూ. 5 లక్షల పరిహారం ఇచ్చేవారు. కానీ దీన్లో రూ.1.5 లక్షల్ని అప్పులకు జమ చేసుకుని, మిగిలిన 3.5 లక్షలు కూడా విత్‌డ్రా చేసుకునేందుకు వీలు లేకుండా డిపాజిట్‌ చేసి, దానిపై వచ్చే వడ్డీని మాత్రమే వాడుకునే పరిస్థితి కల్పించేవారు. వైఎస్‌ జగన్‌ ప్రభుత్వం అధికారంలోకి రాగానే ఈ పరిహారాన్ని రూ.5 లక్షలనుంచి రూ.7 లక్షలకు పెంచడమే కాదు. ఆ మొత్తాన్ని నేరుగా ఆత్మహత్యలకు పాల్పడే రైతు కుటుంబాల ఖాతాలకు జమ చేస్తోంది. కౌలు రైతు అయినా వ్యవసాయ కారణాలతో చనిపోతే దేశంలో రూ.7 లక్షల పరిహారం ఇస్తున్నది ఒక్క మన రాష్ట్రంలోనే.    కౌలుదారుల కుటుంబాలకునేరుగా పరిహారం  వ్యవసాయాధారిత కారణాల వల్ల ఆత్మహత్య చేసుకున్న కౌలుదారులకు సీసీఆర్సీ కార్డు ఉంటే రూ. 7 లక్షలు, లేకుంటే వైఎస్సార్‌ బీమా కింద రూ.లక్ష పరిహారం నేరుగా బాధిత కౌలురైతు కుటుంబ సభ్యుల ఖాతాకు జమ చేస్తున్నారు. ఇలా 2019 నుంచి ఇప్పటి వరకు 1,270 కేసులకు సంబంధించి రూ.88.90 కోట్ల పరిహారం చెల్లించారు. ఇందులో 485 మంది కౌలురైతులుండగా, ఆ కుటుంబాలకు రూ. 33.95 కోట్ల ఆర్థిక సాయం అందించారు. 2014–19 మధ్య టీడీపీ ప్రభుత్వ హయాంలో జరిగిన రైతు ఆత్మహత్యలపై పునర్విచారణ జరిపి 474 మందికి రూ. 23.70 కోట్ల పరిహారం చెల్లించగా, వీరిలో కూడా 212 మంది కౌలురైతులున్నారు. వీరికి రూ. 10.60 కోట్ల పరిహారం చెల్లించారు.

సాక్షి, అమరావతి: రైతుల వ్యవసాయ, కుటుంబ అవసరాలను తీర్చడంలో సహకార బ్యాంకులు వాణిజ్య బ్యాంకులతో పోటీ పడుతున్నాయి. పంట రుణాలకే పరిమితం కాకుండా ఇతర రుణాల మంజూరులోనూ ముందుంటున్నాయి. రాష్ట్ర ప్రభుత్వ ప్రోత్సాహంతో నాలుగేళ్లలో బంగారంపై రికార్డు స్థాయిలో రూ.15,076 కోట్ల రుణాలు మంజూరు చేశాయి. ఈ ఏడాది కనీసం రూ.10 వేల కోట్ల విలువైన గోల్డ్‌ లోన్లు మంజూరు చేయాలని లక్ష్యంగా పెట్టుకున్నాయి. బంగారు ఆభరణాలపై రుణాలిచ్చే విషయంలో వాణిజ్య బ్యాంకులు, ప్రైవేటు బ్యాంకులు, కార్పొరేట్‌ ఫైనాన్స్‌ వ్యాపార సంస్థలు ముందుంటున్నాయి. మెజార్టీ జాతీయ బ్యాంకులు తమకు నిర్ధేశించిన పంట రుణ లక్ష్యాలను అధిగమించేందుకు పెద్దఎత్తున బంగారంపై రుణాలు ఇస్తూ వాటిని పంట రుణాలుగా చూపిస్తున్నాయి. కార్పొరేట్‌ ఫైనాన్స్‌ సంస్థలు రెండు నిమిషాల్లోనే బంగారు రుణాలంటూ భారీ వ్యాపారం చేస్తున్నాయి. ఇవి డిమాండ్‌ను బట్టి ఏకంగా 15 నుంచి నుంచి 36 శాతం వరకు వడ్డీ వసూలు చేస్తున్నాయి. నెల రోజులకు ఒకలా.. రెండు నెలలకు మరోలా.. ఆరు నెలలు, ఏడాది కాల పరిమితితో ఒక్కో రీతిలో వడ్డీ వసూలు చేస్తున్నాయి. నాలుగేళ్లలో రూ.15,076 కోట్ల రుణాలు నాలుగేళ్ల క్రితం ఏటా రూ.500 కోట్లకు మించి బంగారు రుణాలిచ్చే పరిస్థితి ఉండేది కాదు. అ­లాంటిది ప్రస్తుతం ఏటా రూ.3,769 కోట్లకుపైగా రుణాలు ఇస్తున్నారు. 2018–19 వరకు ఏటా వెయ్యి కోట్లకు మించి బంగారు రుణాలు మంజూరు చేసే పరిస్థితి ఉండేది కాదు. బంగారు రుణాలపై వసూలు చేసే వడ్డీ శాతాన్ని తగ్గించడంతో పాటు పీఏసీఎస్‌ స్థాయి వరకు ప్రత్యేకంగా ఫోకస్‌ పెట్టడంతో పాటు నాలు­గేళ్లలో రికార్డు స్థాయిలో రుణాలు మంజూరు చేస్తున్నారు.  సీఎం ఆదేశాలతో బంగారు రుణాలకు ప్రాధాన్యత సహకార బ్యాంకులు బలోపేతం అయ్యేందుకు బంగారు ఆభరణాలపై రుణాల మంజూరుకు ప్రాధాన్యత ఇవ్వాలన్న ముఖ్యమంత్రి వైఎస్‌ జగన్‌మోహన్‌రెడ్డి ఆదేశాల మేరకు ఆప్కాబ్‌ చర్యలు చేపట్టింది. ఈ నేపథ్యంలో సహకార బ్యాంకులు పంట రుణాలతో సంబంధం లేకుండా పెద్ద ఎత్తున గోల్డ్‌ లోన్స్‌ను సైతం ప్రోత్సహిస్తున్నాయి. ఇందుకోసం మూడేళ్ల క్రితం వడ్డీ రేట్లను సవరించడం కలిసొచ్చింది. గతంలో 2 లక్షలకు పైబడిన గోల్డ్‌ లోన్లపై 10.6 శాతం ఉన్న వడ్డీ రేటును 8.50 శాతానికి.. రూ.2 లక్షల లోపు రుణాలపై 10.1 శాతంగా ఉన్న వడ్డీ రేటును 8 శాతానికి తగ్గించాయి. ఆరు నెలలకే తిరగరాసేలా మార్పు చేశారు. ఫలితంగా బంగారు రుణాలు రికార్డు స్థాయిలో పెరిగాయి.  ప్రత్యేక దృష్టి పెట్టాం ముఖ్యమంత్రి వైఎస్‌ జగన్‌మోహన్‌రెడ్డి ఆదేశాల మేరకు రైతు­లకు అండగా నిలి­చేలా పంట రుణా­లతో పాటు వ్యవసాయ, కుటుంబ అవసరాల కోసం మంజూరు చేసే బంగారు రుణాలపై ప్రత్యేక దృష్టి పెట్టాం. రైతుల అవసరాలకు తగినట్టుగా తక్కువ వడ్డీకే బంగారు రుణాలు మంజూరు చేస్తున్నాం. ఏటా లక్ష్యాలను నిర్దేశించుకుంటూ ముందుకెళ్తున్నాం. – మల్లెల ఝాన్సీ, చైర్‌పర్సన్, ఆప్కాబ్‌

సాక్షి, హైదరాబాద్‌: రైతులు బ్యాంకుల నుంచి రెండు లక్షల రూపాయల వరకు పంట రుణాలు తీసుకోవాలని టీపీసీసీ అధ్యక్షుడు రేవంత్‌రెడ్డి పిలుపునిచ్చారు. ఆ విధంగా తీసుకున్న రుణాలను తాము అధికారంలోకి రాగానే మాఫీ చేస్తామని భరోసా ఇచ్చారు. రైతు సంక్షేమం కోసం తమ పార్టీ కట్టుబడి ఉందన్నారు. చేవేళ్ల నియోజకవర్గంలోని శంకర్‌పల్లికి చెందిన పలువురు బీఆర్‌ఎస్, బీజేపీ నాయకులు, కార్యకర్తలు మంగళవారం రేవంత్‌రెడ్డి సమక్షంలో కాంగ్రెస్‌లో చేరారు. జూబ్లీహిల్స్‌లోని తన నివాసంలో వారికి కండువాలు కప్పి పార్టీలోకి ఆహా్వనించారు. వచ్చే ఎన్నికల తర్వాత రాష్ట్రంలో ఏర్పడే ఇందిరమ్మ రాజ్యంలో నెలకు రూ.4 వేల పింఛన్‌ ఇస్తామని పునరుద్ఘాటించారు. వృద్ధులు, వితంతువులు, వికలాంగులు, బీడి కారి్మకులు, ఒంటరి మహిళలు, కల్లుగీత కార్మికులు, చేనేత కార్మికులు, ఎయిడ్స్‌ బాధితులు, పైలేరియా, డయాలిసిస్‌ పేషంట్లకు నెలకు రూ.4 వేల పింఛన్‌ ఇస్తామన్నారు.   ఒక్క హామీ నెరవేర్చని కేసీఆర్‌  తెలంగాణ వస్తే బతుకులు బాగుపడతాయని చెప్పిన కేసీఆర్, అధికారంలోకి వచ్చాక పేదల సంక్షేమాన్ని విస్మరించారని రేవంత్‌రెడ్డి మండిపడ్డారు. రైతు వ్యతిరేకి అయిన కేసీఆర్‌ సీఎం అయ్యాక రాష్ట్రంలో 88 వేల మంది రైతులు ఆత్మహత్యలు చేసుకున్నారని ఆరోపించారు. రాష్ట్ర సంపదను తన కుటుంబసభ్యులకు దోచి పెడుతున్నారని, ఎన్నికల సందర్భంగా ఇచ్చిన ఏ ఒక్క హామీని నెరవేర్చలేదని ధ్వజమెత్తారు. వేల ఎకరాల భూములను ఆక్రమించుకున్నారని, ఇదేమని ప్రశ్నిస్తే పోలీసులను పంపి కేసులు పెడుతున్నారన్నారు. రాష్ట్రంలో కాంగ్రెస్‌ అధికారంలోకి రాగానే 2 లక్షల ఉద్యోగాలు భర్తీ చేస్తామని, రూ.500కే గ్యాస్‌ సిలిండర్‌ ఇస్తామని, ఆరోగ్యశ్రీ ద్వారా పేదలకు రూ.5 లక్షల వరకు వైద్య ఖర్చులు భరిస్తామని, ఇల్లు కట్టుకునే ప్రతి పేదవాడికి రూ.5 లక్షల సాయం చేస్తామని రేవంత్‌రెడ్డి హామీ ఇచ్చారు.  

సాక్షి, అమరావతి: కౌలు రైతులకు వెన్నుదన్నుగా నిలవాలని ప్రభుత్వం సంకలి్పంచింది. గడచిన నాలుగేళ్ల కంటే మిన్నగా ఈ ఏడాది కౌలు కార్డులు (పంట హక్కు సాగు పత్రాలు–సీసీఆర్సీ) జారీ చేసింది. అర్హులైన ప్రతి కౌలు రైతుకూ పంట రుణాలతో పాటు ప్రభుత్వ సంక్షేమ ఫలాలు అందించడమే లక్ష్యంగా పెట్టుకుంది. వైఎస్సార్‌ రైతు భరోసా కేంద్రాల (ఆర్బీకే) ద్వారా నిర్వహించిన ప్రత్యేక మేళాల్లో రికార్డు స్థాయిలో కౌలుదారులకు సీసీఆర్సీలు జారీ చేసింది. గతంలో కౌలు రైతులకు సంక్షేమ ఫలాలు అందేవి కాదు. ఎలాంటి పూచీకత్తు లేకుండా రూ.1.60 లక్షల వరకు పంట రుణం అందించే అవకాశం ఉన్నప్పటికీ ఆంక్షల పేరిట బ్యాంకులు మొండిచేయి చూపడంతో ప్రైవేటు వ్యక్తుల నుంచి రూ.3, రూ.5 వడ్డీలకు అప్పులు తెచ్చి సాగు చేసేవారు. కౌలు, వడ్డీలు కట్టలేక అప్పుల ఊబిలో కూరుకుపోయేవారు. ఈ పరిస్థితికి చెక్‌ పెడుతూ రాష్ట్ర ప్రభుత్వం 2019లో తీసుకొచి్చన పంట సాగుదారుల హక్కుపత్రాల (సీసీఆర్సీ) చట్టం కింద 11 నెలల కాల పరిమితితో కౌలు కార్డులు జారీ చేస్తున్నారు.   సీసీఆర్సీల ద్వారా సంక్షేమ ఫలాలు  సీసీఆర్సీల ద్వారా నాలుగేళ్లుగా పంట రుణాలతో పాటు అన్ని రకాల సంక్షేమ ఫలాలను కౌలు రైతులకు ప్రభుత్వం అందిస్తోంది. 2019–20 సీజన్‌లో 2,72,720 మందికి, 2020–21లో 4,14,770 మందికి, 2021–22 సీజన్‌లో 5,24,203 మందికి, 2022–23లో 5,49,513 మందికి సీసీఆర్సీ కార్డులు జారీ చేసింది. నాలుగేళ్లలో 9 లక్షల మంది కౌలుదారులకు రూ.6,668.64 కోట్ల పంట రుణాలు మంజూరు చేసింది. 3.92 లక్షల మంది కౌలుదారులకు వైఎస్సార్‌ రైతు భరోసా కింద రూ.529.07 కోట్ల పెట్టుబడి సాయం అందించింది. పంటలు దెబ్బతిన్న 2.34 లక్షల మంది కౌలుదారులకు రూ.246.22 కోట్ల ఇన్‌పుట్‌ సబ్సిడీతో పాటు 1.73 లక్షల మందికి రూ.487.14 కోట్ల ఉచిత పంటల బీమా పరిహారాన్ని అందించింది.  రికార్డు స్థాయిలో సీసీఆర్సీలు జారీ  2023–24లో కనీసం 8.81 లక్షల మందికి సీసీఆర్సీల జారీ చేయాలనే లక్ష్యంతో ఆర్బీకేల ద్వారా సీసీఆర్సీ మేళాలు నిర్వహించారు. ఈ మేళాల ద్వారా రికార్డు స్థాయిలో 7,77,417 మందికి సీసీఆర్సీలు జారీ చేశామని వ్యవసాయ శాఖ స్పెషల్‌ కమిషనర్‌ చేవూరు హరికిరణ్‌ తెలిపారు. వీరిలో ఎస్సీ, ఎస్టీ, బీసీ, మైనార్టీ వర్గాలకు చెందిన వారు 4,51,545 మంది ఉండగా.. ఇతర వర్గాలకు చెందిన 3,25,872 మంది ఉన్నారు. ఈ ఏడాది కూడా రైతు భరోసా సాయం అందించేందుకు సీసీఆర్సీలు పొందిన వారిలో ఎస్సీ, ఎస్టీ, బీసీ, మైనార్టీ వర్గాలకు చెందిన వారి వివరాలను రైతు భరోసా పోర్టల్‌లో అప్‌లోడ్‌ చేస్తున్నారు. సెప్టెంబర్‌లో వీరికి వైఎస్సార్‌ రైతు భరోసా కింద తొలి విడత సాయం అందించేందుకు ఏర్పాట్లు చేస్తున్నారు. ఈ ఏడాది కనీసం రూ.4 వేల కోట్ల పంట రుణాలు ఇవ్వాలని లక్ష్యంగా నిర్ధేశించారు.  ఏటా కౌలు కార్డు ఇస్తున్నారు  రెండున్నర ఎకరాలు కౌలుకు తీసుకుని పంటలు వేస్తున్నా. ఈ ఏడాది మినుము, వరి వేశా. ఈ ప్రభుత్వం వచ్చిన తర్వాత ప్రతి ఏటా కౌలు కార్డు ఇస్తున్నారు. గతేడాది రైతు భరోసా కింద రూ.13,500 జమయ్యాయి. ఈ ఏడాది కూడా కౌలుకార్డు తీసుకున్నా. రైతు భరోసా పోర్టల్‌లో అప్‌లోడ్‌ చేశామని చెప్పారు. చాలా ఆనందంగా ఉంది.  – కంపమళ్ల రమీజ, రుద్రవరం, కర్నూలు జిల్లా    కౌలు కార్డు ద్వారా రూ.లక్ష రుణం తీసుకున్నా  నేను రెండెకరాలు కౌలుకు చేస్తున్నా. ఈ ఏడాది వరి, మొక్కజొన్న వేశాను. కౌలు కార్డు కోసందరఖాస్తు చేశా. ఎలాంటి సిఫార్సులు లేకుండా సీసీఆర్సీ కార్డు ఇచ్చారు. ఈ కార్డు ద్వారా రూ.లక్ష పంట రుణం తీసుకున్నా. రైతు భరోసా సాయం కోసం అప్‌లోడ్‌ చేశారు. చాలా సంతోషంగా ఉంది.   – వీరంకి గోపీకృష్ణ, మోరంపూడి, దుగ్గిరాల మండలం, గుంటూరు జిల్లా 

► వికారాబాద్‌ జిల్లా ‘దోమ’కు చెందిన రైతు బాయిని వెంకటయ్య ఆరు నెలల క్రితం పంట రుణం కోసం బ్యాంకులో దరఖాస్తు చేసుకున్నారు. అధికారులు ఇతర బ్యాంకుల నుంచి నోడ్యూస్‌ సర్టిఫికెట్‌ తేవాలన్నారు. వెంకటయ్య ఇతర బ్యాంకుల చుట్టూ తిరిగి నోడ్యూస్‌ సర్టిఫికెట్‌ తీసుకువచ్చి దరఖాస్తు చేసుకున్నారు. యాసంగి సాగు మొదలైనా ఇంకా రుణం మంజూరు చేయలేదని ఆవేదన వ్యక్తం చేస్తున్నారు. పంట సాగు కోసం అప్పు చేయాల్సిన పరిస్థితి ఉందని వాపోయారు.  ► సూర్యాపేట జిల్లా మోతె మండలానికి చెందిన సావిత్రమ్మ.. యాసంగిలో పంట రుణం కోసం బ్యాంకును ఆశ్రయించారు. కానీ బ్యాంకు అధికారులు కొర్రీలు పెట్టారు. ఇతర బ్యాంకుల్లో పంట రుణం తీసుకోనట్టు/ఎలాంటి బాకీ లేనట్టుగా ‘నో డ్యూస్‌’ సర్టిఫికెట్‌ తీసుకురావాలని.. లేకుంటే రుణం ఇచ్చే మాటే లేదని చెప్పారు. దీనితో ఆమె ఆ మండలంలోని ప్రధాన బ్యాంకుల చుట్టూ తిరిగి నో డ్యూస్‌ సర్టిఫికెట్‌పై సంతకాలు చేయించుకొచ్చారు. ఆ తర్వాతే పంట రుణం అందింది.  సాక్షి, హైదరాబాద్‌: రాష్ట్రవ్యాప్తంగా పంట రుణాల కోసం రైతులు గోసపడుతున్నారు. బ్యాంకర్లు ఏదో ఓ కొర్రీ పెడుతూ రుణాలు ఇవ్వడానికి నిరాకరిస్తున్నారు. సదరు మండలంలోని ఇతర బ్యాంకులకు వెళ్లి నోడ్యూస్‌ సర్టిఫికెట్లు తేవాలని ఒత్తిడి తెస్తున్నారు. మరికొన్నిచోట్ల ఇప్పటికే ఉన్న పంట రుణా­లు మాఫీ కాకపోవడంతో కొత్తగా రుణాలు ఇవ్వబోమని తేల్చి చెప్తున్నారు. దీనితో రైతులు బ్యాంకుల చుట్టూ తిరగలేక అవస్థ పడుతున్నారు. చివరికి పంట పెట్టుబడుల కోసం అధిక వడ్డీలకు ప్రైవేటు అప్పులు చేయాల్సి వస్తోందని వాపోతున్నారు.   లక్ష్యం ఘనం.. ఇచ్చేది కొంచెం..  పంటరుణాల మంజూరుకు బ్యాంకులు, ప్రభుత్వం ఘనంగానే లక్ష్యాలు నిర్దేశించుకుంటున్నాయి. కానీ క్షేత్రస్థాయిలో బ్యాంకర్లు మాత్రం పంట రుణాల కోసం వస్తున్న రైతులకు చుక్కలు చూపుతున్నారు. ఏదో ఒక కొర్రీ పెడుతూ తిప్పుకొంటున్నారు. ఈ విషయంలో రైతులకు బాసటగా నిలవాల్సిన వ్యవసాయ శాఖ ఏమీపట్టనట్టుగా వ్యవహరిస్తోందన్న విమర్శలు వస్తున్నాయి. యాసంగి మొదలై రెండు నెలలైనా రైతులకు ఇప్పటివరకు అరకొరగానే రుణాలు అందుతున్నాయి. 2022–23 వానాకాలం సీజన్‌లో పంటరుణాల మంజూరు లక్ష్యం రూ.40,718 కోట్లుకాగా.. సీజన్‌ పూర్తయ్యే నాటికి బ్యాంకులు రూ. 21,272 కోట్లు మాత్రమే ఇచ్చాయి. అంటే లక్ష్యంలో 52 శాతమే రుణాలు అందించాయి. ప్రస్తుత యాసంగి సీజన్‌కు లక్ష్యం రూ.27,146 కోట్లుకాగా.. ఇప్పటివరకు ఇచ్చింది రూ.5వేల కోట్లలోపేనని వ్యవసాయ వర్గాలు చెప్తుండటం గమనార్హం. ధరణితో సాంకేతిక సమస్యలంటూ..  గతంలో రైతుల పట్టాదారు పాస్‌బుక్కులు తనఖాగా పెట్టుకుని బ్యాంకర్లు రుణాలు ఇచ్చేవారు. ఇప్పుడు కొత్త విధానం తీసుకువచ్చారు. ప్రతి జాతీయ బ్యాంకుకు ధరణి పోర్టల్‌లో లాగిన్‌ అయ్యేందుకు అవకాశం కల్పించారు. బ్యాంకర్లు ధరణి పోర్టల్‌లోకి లాగిన్‌ అయి సర్వే నంబర్లు, ఇతర వివరాలు సరిచూసుకుని పంట రుణాలు ఇస్తున్నారు. కానీ ధరణిలో సాంకేతిక సమస్యలతో బ్యాంకులు రుణాలు ఇవ్వడం లేదు. ఇటీవల నాలుగైదు సార్లు వ్యవసాయ శాఖతో జరిగిన సమావేశాల్లో బ్యాంకర్లు ధరణి సమస్యల వల్ల రుణాలు ఇవ్వలేకపోతున్నామని చెప్పినట్టు తెలిసింది. ధరణి పోర్టల్‌లో సాంకేతిక సమస్యల వల్ల రైతుల సర్వే నంబర్లు నమోదు కావడం లేదు. పాస్‌బుక్‌లు ఉన్నా బ్యాంకర్ల లాగిన్‌లో కనిపించడం లేదు. కొన్నింట్లో బ్యాంకర్లు ఎంట్రీ చేయడానికి ప్రయత్నించినా నమోదు కావడం లేదు. పలు గ్రామాలు ఇంకా ధరణిలో నమోదుగాకపోవడం, కొన్ని గ్రామాల్లో సర్వే నంబర్లలో ఉన్న భూమికి, ధరణిలో నమోదైన భూమికి తేడాలు ఉండటం వంటి సమస్యలు నెలకొన్నాయి. ఇలాంటి ఇబ్బందులున్న రైతులకు బ్యాంకర్లు రుణాలు ఇవ్వడానికి ముందుకు రావడం లేదు. దీనితో లక్షల మంది రైతులకు పంట రుణం అందకుండా పోతోంది.  రుణమాఫీ పూర్తిస్థాయిలో జరగక..  రైతులకు రూ.లక్ష వరకు రుణమాఫీ పూర్తి స్థాయిలో జరగకపోవడంతోనూ రైతులకు రుణాలు అందని పరిస్థితి ఉంది. ప్రభుత్వం ఇప్పటివరకు రూ.37 వేల వరకు బకాయిలున్న రైతులకే రుణమాఫీ చేసింది. ఆపై రుణాలున్న వారికి మాఫీ కావాల్సి ఉంది. రైతులు బ్యాంకు రుణాలను రెన్యువల్‌ చేసుకోవాలని, ప్రభుత్వం తర్వాత చెల్లిస్తుందని మంత్రులు ప్రకటించినా.. కొందరే అలా రెన్యువల్‌ చేసుకున్నారు. చాలా మంది రైతులు ప్రభుత్వం నుంచి రుణమాఫీ సొమ్ము వచ్చిన తర్వాతే రెన్యువల్‌ చేసుకునేందుకు ఎదురుచూస్తున్నారు. దీనివల్ల లక్షలాది మంది రైతులు డిఫాల్టర్లుగా మారిపోయారు. వారికి బ్యాంకులు పంట రుణాలు ఇవ్వడం లేదు. మరోవైపు 2018నాటికి ఉన్న బకాయిలపై వడ్డీ, చక్రవడ్డీ కలిసి తడిసి మోపెడవుతోంది. కొన్నిచోట్ల బ్యాంకు అధికారులు రైతుబంధు సొమ్మును బకాయిల కింద జమ చేసుకుంటున్నారని.. అలా చేయవద్దని ప్రభుత్వం ఆదేశించినా బ్యాంకర్ల తీరు మారడం లేదని రైతులు ఆగ్రహం వ్యక్తం చేస్తున్నారు.    నోడ్యూస్‌ సర్టిఫికెట్‌ తెస్తేనే..  సిద్దిపేట జిల్లా దౌల్తాబాద్‌ మండల కేంద్రానికి చెందిన రాజు పంటరుణం కోసం ఏపీజీవీబీని సంప్రదించారు. కానీ బ్యాంకు అధికారులు ఆయనను దొమ్మాట, చేగుంట, నార్లాపూర్‌లలోని ప్రైవేటు, ప్రభుత్వ బ్యాంకుల నుంచి ‘నోడ్యూస్‌’ సర్టిఫికెట్‌ తీసుకురావాలన్నారు. ఆయన పది రోజులు తిరిగి అన్ని బ్యాంకుల్లో సంతకాలు తీసుకొచ్చిన తర్వాతే రుణం మంజూరు చేశారు. 

వ్యవసాయరంగానికి జగన్‌ సర్కార్‌ అత్యంత ప్రాధాన్యతనిస్తోంది. పంట పెట్టుబడుల కోసం బ్యాంకుల ద్వారా రైతులకు విరివిగా రుణాలు ఇస్తోంది. అందులో భాగంగా ప్రస్తుత ఆర్థిక  సంవత్సరం(2022–23)లో అంచనాకు మించి పంట రుణాలు మంజూరు చేసింది. రూ.11,957 కోట్ల వార్షిక రుణప్రణాళిక లక్ష్యంలో రెండో త్రైమాసికం ముగిసేలోపు అంటే సెప్టెంబర్‌ నెలాఖరుకే రూ.9,077 కోట్లతో    76 శాతం సాధించిన బ్యాంకర్లు గడువులోగా వంద శాతం సాధించే దిశగా అడుగులేస్తున్నారు.  అనంతపురం అగ్రికల్చర్‌: రాష్ట్ర ప్రభుత్వం అన్నదాతకు అండగా నిలుస్తోంది. విత్తు నుంచి పంట విక్రయం వరకు తోడుగా ఉంటోంది. పంట పెట్టుబడులకు బ్యాంకుల ద్వారా రుణాలు సకాలంలో ఇప్పించి వ్యవసాయం సాఫీగా సాగేలా చూస్తోంది. ఖరీఫ్‌లో సాగుకు వీలుగా ఏటా ఏప్రిల్‌ నుంచి సెప్టెంబర్‌ వరకు బ్యాంకుల ద్వారా రైతులకు రుణాలు మంజూరు చేస్తారు. ఈ ఏడాది ఖరీఫ్‌లో రూ.3,204.24 కోట్ల పంట రుణాలు ఇవ్వాలని లక్ష్యంగా పెట్టుకోగా ఏకంగా 127 శాతంతో రూ.4,068.62 కోట్లు ఇచ్చారు. ప్రస్తుతం రూ.2,226.68 కోట్లు లక్ష్యంగా రబీ రైతులకు పంట రుణాల మంజూరు కొనసాగుతోంది. వ్యవసాయ టర్మ్‌ లోన్ల లక్ష్యం రూ.1,545.32 కోట్లు కాగా.. 121 శాతంతో రూ.1,869.81 కోట్లు మంజూరు చేశారు. ఇక అగ్రి ఇన్‌ఫ్రాస్ట్రక్చర్‌ కింద రూ.16.61 కోట్లు, వ్యవసాయ అనుబంధ రంగాల కింద రూ.92.18 కోట్లు ఇచ్చారు. ఇలా... మొత్తంగా వ్యవసాయ, అనుబంధ రంగాల కింద రైతులు, ఇతర లబ్ధిదారులకు రూ.6,047.22 కోట్లు ఇవ్వడం గమనార్హం.   ఇతరత్రా రంగాలకూ విరివిగా రుణాలు   వ్యవసాయంతో పాటు ఇతర రంగాలకూ విరివిగా రుణాలు అందించారు. అందులో సూక్ష్మ, చిన్న తరహా పరిశ్రమల ప్రోత్సాహం కింద రూ.795.15 కోట్లు, ఇతర ప్రాధాన్యత రంగాల కింద రూ.97.61 కోట్లు, నాన్‌ ప్రయారిటీ సెక్టార్‌ కింద రూ.1,780.72 కోట్లకు గానూ 116 శాతంతో ఏకంగా రూ.2,081.90 కోట్లు మంజూరు చేశారు. ఇలా రూ.11,957.94 కోట్ల వార్షిక రుణప్రణాళిక (లోన్‌ క్రెడిట్‌ప్లాన్‌–2022–23) అమలులో భాగంగా రెండో త్రైమాసికం ముగిసేనాటికే 76 శాతంతో రూ.9,077.42 కోట్లు పూర్తయింది. 2023 మార్చి 31 వరకు గడువు ఉన్నందున ఈ ఏడాది లక్ష్యాన్ని అధిగమించే అవకాశం ఉందని అంచనా వేస్తున్నారు.  పెరిగిన బ్యాంకింగ్‌ నెట్‌వర్క్‌   ప్రజల అవసరాలను దృష్టిలో పెట్టుకుని ఇటీవల జిల్లా వ్యాప్తంగా బ్యాంకింగ్‌ నెట్‌వర్క్‌ బాగా పెరిగింది. ప్రభుత్వ రంగ, ప్రైవేట్‌ బ్యాంకులతో పాటు సహకార, గ్రామీణ బ్యాంకులు దాదాపు 43 ప్రిన్సిపల్‌ బ్యాంకులు వ్యాపార లావాదేవీలు సాగిస్తున్నాయి. వ్యవసాయ, అనుబంధ రంగాల రుణాల మంజూరులో ఆంధ్రప్రగతి గ్రామీణ బ్యాంకు (ఏపీజీబీ) రూ.1,567 కోట్లు, స్టేట్‌బ్యాంకు ఆఫ్‌ ఇండియా (ఎస్‌బీఐ) రూ.1,429 కోట్లతో పోటీపడుతూ మొదటి రెండు స్థానాల్లో నిలిచాయి. ఆ తర్వాత యూనియన్‌ బ్యాంకు, కెనరాబ్యాంకు, ఇండియన్‌ బ్యాంకు, జిల్లా సహకార కేంద్ర బ్యాంకు (డీసీసీబీ), బ్యాంకు ఆఫ్‌ బరోడా, సెంట్రల్‌ బ్యాంకు ఆఫ్‌     ఇండియా, ఇండియన్‌ ఓవర్సీస్‌ బ్యాంకు, హెచ్‌డీఎఫ్‌సీ, ఐసీఐసీఐ, బ్యాంక్‌ ఆఫ్‌ ఇండియా, యాక్సిస్‌ బ్యాంకు, కరూర్‌ వైశ్యాబ్యాంకు, ఐడీబీఐ తదితర ప్రభుత్వ, ప్రైవేట్, సహకార, గ్రామీణ బ్యాంకులు ఉన్నాయి. మొత్తమ్మీద చూస్తే... ప్రభుత్వరంగ బ్యాంకుల ద్వారా రూ.4,453 కోట్లు, ప్రైవేట్‌    వాణిజ్య బ్యాంకుల ద్వారా రూ.4,201 కోట్లు ఇవ్వగా తర్వాత గ్రామీణ, సహకార   బ్యాంకుల ద్వారా రైతులు, అనుబంధ రంగాలకు విరివిగా రుణాలు అందించాయి.  రుణాల మంజూరుకు పోటీ  రైతులతో పాటు అన్ని రంగాల అభివృద్ధి, అన్ని వర్గాల పురోభివృద్ధికి ఇటీవల కాలంలో బ్యాంకర్లు పోటీ పడి రుణాలు మంజూరు చేస్తుండటం మంచి పరిణామం. దీంతో వార్షిక లక్ష్యంలో గణనీయమైన పురోగతి సాధించి గడువులోగా వంద శాతం చేరుకునే దిశగా రుణాల మంజూరు కొనసాగుతోంది. రైతులతో పాటు మహిళా సంఘాలు, విద్యా, వాహన, గృహ, పరిశ్రమలు, వ్యక్తిగత రుణాలు... ఇలా అన్నింటికీ అవసరమైన రుణాలు ఇవ్వడానికి బ్యాంకర్లు మొగ్గుచూపుతున్నారు.  – బి.నాగరాజారెడ్డి,  లీడ్‌ బ్యాంకు జిల్లా మేనేజర్‌ (ఎల్‌డీఎం)  రూ.85 వేల పంట రుణం  నాకు 2.75 ఎకరాల పొలం ఉంది. బొమ్మగానిపల్లి  కెనరా బ్యాంకులో రూ.85 వేల పంట రుణం ఇచ్చారు. దీని వల్ల సకాలంలో పంట పెట్టుబడికి ఉపయోగపడింది. 2021లో తీసుకున్న పంట రుణాలకు వైఎస్సార్‌ పంట రుణాల సున్నావడ్డీ కింద ఇటీవల రూ.3 వేల వడ్డీ రాయితీ కూడా జమ కావడం సంతోషంగా ఉంది.   – విరుపాక్షి, రైతు, ముప్పాలకుంట, బ్రహ్మసముద్రం మండలం   

బురదజల్లుడు, అబద్ధాలు అచ్చేయడం, అర్థంపర్థంలేని వార్తలు వండి వార్చడంలో తన రికార్డులను తానే బద్దలుకొట్టుకుంటున్న ఎల్లో జర్నలిస్ట్‌ రామోజీరావు ఎప్పటిలాగే టీడీపీ వైపు తన చేతివాటాన్ని మరోసారి ప్రదర్శించారు. ఈసారి ఆయన రూటు సాగువైపు మళ్లింది. ‘వడ్డీ రాయితీ పెద్ద సున్నా’ అంటూ ఆయన తాజాగా అచ్చోసిన అసత్యాల కథనం నిజంగానే నిజాల్ని దాచి వండిన వంటకం. పొగ తాగడం, మద్యం సేవించడం ఆరోగ్యానికి ఎంత హానికరమో ఈనాడు పత్రిక కూడా ఆ పాఠకులకు అంతే హానికరం.  ఎందుకంటే.. రాష్ట్రంలో చిన్న, సన్నకారు, వాస్తవ సాగుదారులు అప్పుల ఊబిలో చిక్కుకోకుండా నివారించేందుకు రాష్ట్ర ప్రభుత్వం పంట రుణాలపై వడ్డీ భారాన్ని తగ్గించడమే లక్ష్యంగా ‘వైఎస్సార్‌ సున్నా వడ్డీ పంట రుణాల పథకానికి’ 2019లో శ్రీకారం చుట్టింది. రూ.లక్షలోపు తీసుకున్న పంట రుణాలను ఏడాదిలోపు తిరిగి చెల్లించిన రైతులకు మరుసటి సీజన్‌ రాకముందే వారు చెల్లించిన వడ్డీ మొత్తాన్ని నేరుగా వారి ఖాతాల్లో జమచేస్తూ వారికి అండగా నిలుస్తోంది. కానీ, టీడీపీ ఐదేళ్లలో 40.61 లక్షల మందికి కేవలం రూ.685.46 కోట్లు చెల్లిస్తే, గడిచిన 3.5 ఏళ్లలో 73.88 లక్షల మంది వాస్తవ  సాగుదారులకు ప్రస్తుత వైఎస్‌ జగన్‌ సర్కారు రూ.1,838.61 కోట్లు చెల్లించింది. వీటిలో రూ.1,180.66 కోట్లు టీడీపీ ప్రభుత్వం ఎగ్గొట్టిన బకాయిలే. ఇలా బాబు ఎగ్గొట్టిన బకాయిలతో సహా ఏటా క్రమం తప్పకుండా అర్హతగల ప్రతీ రైతుకు అణా పైసలతో సహా వడ్డీ రాయితీని రాష్ట్ర ప్రభుత్వం చెల్లిస్తుంటే చంద్రబాబు అడుగులకు మడుగులొత్తే ఈనాడు రామోజీరావు కళ్లున్న కబోదిలా ప్రవర్తిస్తూ ఆ పత్రికల పాఠకులపై చిమ్ముతున్న విషానికి అంతులేకుండా పోతోంది. నిజానికి.. గతంలో ఇంతపెద్ద ఎత్తున, ఇంత పారదర్శకంగా డీబీటీ విధానంలో నేరుగా రైతుల ఖాతాల్లో జమయ్యేలా వడ్డీ రాయితీ పథకాన్ని అమలుచేసిన దాఖలాల్లేవు. అయినా ఇవేమీ ఎల్లో జర్నల్‌ అయిన ఈనాడుకు కన్పించవు. అర్హుల జాబితా ప్రదర్శించినా అక్కసే.. మరోవైపు.. వైఎస్సార్‌ సున్నా వడ్డీ పథకానికి మరింత మెరుగులద్ది పారదర్శకంగా రాష్ట్ర ప్రభుత్వం అమలుచేస్తోంది. వడ్డీ రాయితీ చెల్లింపుల్లో జాప్యానికి తావులేకుండా ఉండేందుకు ఏడాదిలోపు రుణం చెల్లించిన లబ్ధిదారుల డేటా బ్యాంకుల ద్వారా ఎస్వీపీఆర్‌ పోర్టల్‌లో అప్‌లోడ్‌ చేసేలా ఏర్పాటుచేశారు. ఈ డేటా ఈ–క్రాప్‌ డేటాతో ధ్రువీకరించి అర్హులైన రైతుల జాబితాను గుర్తించి సామాజిక తనిఖీ కోసం ఆర్బీకేల్లో ప్రదర్శిస్తున్నారు. అంతేకాదు.. మొబైల్‌ ద్వారా ఎస్వీపీఆర్‌ (సున్నా వడ్డీ పంట రుణాల) పోర్టల్‌ https://karshak. ap. gov. in/ ysrsvpr/లోకి వెళ్లి హోంపేజీలో ‘know your status‘ అనే విండో ఓపెన్‌ చేసి తమ ఆధార్‌ నంబరుతో చెక్‌ చేసుకునే వెసులుబాటు రైతులకు కల్పించారు. ఒకవేళ ఏడాదిలోగా రూ.లక్షలోపు రుణాలు తిరిగి చెల్లించి వడ్డీ రాయితీకి అర్హత పొంది, జాబితాలో తమ పేర్లు లేకపోతే దరఖాస్తు చేసుకునేందుకు అవకాశం కూడా కల్పించారు. ఇలా అర్హత పొందిన రైతుల ఖాతాల్లో వారు చెల్లించిన నాలుగు శాతం వడ్డీ రాయితీని రాష్ట్ర ప్రభుత్వం ఏటా క్రమం తప్పకుండా జమచేస్తున్నా ఈనాడు తట్టుకోలేకపోతోంది. అంతేకదా.. రామోజీ. ఎక్కువమంది లబ్ధి పొందేలా విస్తృత ప్రచారం ఇక రూ.లక్ష లోపు రుణం సకాలంలో చెల్లించడం ద్వారా ఈ పథకాన్ని సద్వినియోగం చేసుకుని వడ్డీ భారం నుంచి రైతులు విముక్తి పొందేందుకు వీలుగా రైతుభరోసా కేంద్రాల ద్వారా గ్రామస్థాయిలో రాష్ట్ర ప్రభుత్వం అవగాహన కల్పిస్తోంది. కరపత్రాలు, వాల్‌ పోస్టర్లు, వాట్సాప్‌ గ్రూపుల ద్వారా విస్తృతంగా ప్రచారం చేస్తున్నారు. గత నెల 28న రబీ 2020–21, ఖరీఫ్‌ 2021 సీజన్లలో అర్హత పొందిన 8.22 లక్షల మంది రైతులకు రూ.160.55 కోట్ల వడ్డీ రాయితీని సీఎం  వైఎస్‌ జగన్‌మోహన్‌రెడ్డి నేరుగా రైతుల పొదుపు ఖాతాలకు జమచేశారు. ఇలా గడిచిన మూడున్నరేళ్లలో పాత బకాయిలు కలిపి 73.88 లక్షల మందికి రూ.1,838.61 కోట్లు చెల్లించారు. పాత బకాయిలకు సంబంధించే కాదు గడిచిన మూడేళ్లకు సంబంధించి కూడా ఎలాంటి బిల్లులు పెండింగ్‌లో లేకుండా అర్హుల ఖాతాల్లోకి సున్నా వడ్డీ రాయితీ జమచేశారు. అయినా ఇవన్నీ విస్మరించి ఎందుకు రామోజీ ఈ వయస్సులో అబద్ధాల సాగుకు అంత ఆయాసం..? రూ.1,180.66 కోట్ల బకాయిలు ఈనాడుకు కన్పించవు కానీ, ఈ పరిస్థితులకు వైఎస్‌ జగన్‌ సర్కార్‌ చెక్‌ పెట్టింది. వడ్డీ రాయితీని నేరుగా రైతుల ఖాతాల్లోనే జమ (డీబీటీ) చేసేలా మార్పుచేసింది. ఎన్నికల్లో ఇచ్చిన హామీ మేరకు సీఎం వైఎస్‌ జగన్‌మోహన్‌రెడ్డి అధికార పగ్గాలు చేపట్టిన వెంటనే వైఎస్సార్‌ సున్నా వడ్డీ పంట రుణాల పథకానికి శ్రీకారం చుట్టారు. అంతేకాదు.. టీడీపీ హయాంలోని బకాయిల చెల్లింపునకూ ముందుకొచ్చి రైతులపట్ల తనకున్న చిత్తశుద్ధిని ఆయన చాటుకున్నారు. ఇలా 2014–15లో రూ.3.46 కోట్లు, 2015–16లో రూ.1.91 కోట్లు, 2016–17లో రూ.212.33 కోట్లు, 2017–18లో రూ.345.18 కోట్లు, 2018–19లో రూ.617.78 కోట్లు కలిపి మొత్తం 39.08 లక్షల మంది రైతులకు రూ.1,180.66 కోట్ల బకాయిలను చెల్లించారు. బాబు ఎగ్గొట్టిన ఈ బకాయిలపై ‘ఘనత వహించిన’ ఈనాడు ఏనాడు దీనిపై వార్త రాసిన పాపానపోలేదు. అలాగే, ఐదేళ్లలో కేవలం 40.61 లక్షల మందికి రూ.685.46 కోట్లే చెల్లిస్తే ఎందుకింత తక్కువ చెల్లించారని కూడా ప్రశ్నించడానికి రామోజీకి పెన్ను పెగలలేదు. రామోజీ.. అప్పట్లో అప్పులకు జమచేసుకోలేదా?  వాస్తవానికి ప్రతీ సీజన్‌లో వ్యవసాయ అవసరాల కోసం రైతులు బ్యాంకుల నుంచి పంట రుణాలు తీసుకుంటారు. రూ.లక్షలోపు రుణాన్ని ఏడాదిలోపు చెల్లిస్తే బ్యాంకులు వసూలుచేసే ఏడు శాతం వడ్డీలో 3 శాతం కేంద్రం రాయితీ ఇస్తుంది. మిగిలిన 4 శాతం రైతులు భరించేవారు. గతంలో ‘వడ్డీలేని రుణ పథకం’ కింద రైతులు చెల్లించిన వడ్డీ రాయితీని బడ్జెట్‌ కేటాయింపులను బట్టి ఏడాదికో.. రెండేళ్లకో వీలునుబట్టి బ్యాంకులకు అరకొరగా జమచేసేవారు. ఈ మొత్తం జమకాగానే బ్యాంకులు వెంటనే రైతులు చెల్లించాల్సిన అప్పు ఖాతాలకు సర్దుబాటు చేసేసేవారు. అలాగే, గతంలో క్లెయిమ్స్‌ డేటాను అప్‌లోడ్‌ చేయడానికి నోడల్‌ బ్రాంచీలకు మాత్రమే వీలుండేది. దీంతో ఎంతమంది అర్హత పొందారు.. వారికి ఎంత వడ్డీ రాయితీ జమైందో రైతులకే కాదు.. సంబంధిత బ్యాంకు శాఖలకు కూడా తెలిసేది కాదు. సామాజిక తనిఖీ కోసం బ్యాంకుల వద్ద కానీ, ప్రభుత్వ కార్యాలయాల వద్ద కానీ జాబితాలు ప్రదర్శించే పరిస్థితులు ఉండేవి కాదు.  

కడప సిటీ: రాష్ట్ర ప్రభుత్వం అమలు చేస్తున్న సున్నా వడ్డీ, ఇన్‌పుట్‌సబ్సిడీ రాయితీ పథకాలు అన్నదాతలకు మరింత ధీమాను ఇస్తున్నాయని కలెక్టర్‌ విజయరామరాజు, మైదుకూరు ఎమ్మెల్యే రఘురామిరెడ్డి, ఆప్కాబ్‌ చైర్‌ పర్సన్‌ మల్లెల ఝాన్సీరాణిలు సంయుక్తంగా పేర్కొన్నారు. సోమవారం తాడేపల్లి క్యాంపు కార్యాలయం నుంచి వీడియో కాన్ఫరెన్స్‌ ద్వారా 2020–21 సంవత్సరానికి రబీ సీజన్‌కు సంబంధించి, 2021 ఖరీఫ్‌ కాలానికి వైఎస్సార్‌ సున్నా వడ్డీ పంట రుణాల పథకాలు, 2022 ఖరీఫ్‌లో ఇన్‌పుట్‌ సబ్సిడీ కింద లబ్ధి మొత్తాన్ని రాష్ట్ర ముఖ్యమంత్రి వైఎస్‌ జగన్‌మోహన్‌రెడ్డి నేరుగా రైతుల బ్యాంకు ఖాతాలకు జమ చేసే కార్యక్రమానికి శ్రీకారం చుట్టారు. ఈ కార్యక్రమానికి స్థానిక కలెక్టరేట్‌లోని వీసీ హాలు నుంచి కలెక్టర్‌ విజయరామరాజుతోపాటు మైదుకూరు ఎమ్మెల్యే రఘురామిరెడ్డి, నగర మేయర్‌ సురేష్‌బాబు, ఆప్కాబ్‌ చైర్‌ పర్సన్‌ మల్లేల ఝాన్సీరాణి, జేసీ సాయకాంత్‌వర్మ, వ్యవసాయ సలహా మండలి జిల్లా అధ్యక్షుడు సంబటూరు ప్రసాద్‌రెడ్డి, డిప్యూటీ మేయర్‌ నిత్యానందరెడ్డి, పులివెందుల మార్కెట్‌యార్డు చైర్మన్‌ చిన్నప్ప, వ్యవసాయ సలహా మండలి సభ్యులు బలరామిరెడ్డి, వేణుగోపాల్‌రెడ్డి తదితరులు హాజరయ్యారు.   అన్నదాతలకు కొండంత అండ : కలెక్టర్‌ విజయరామరాజు  ఈ సందర్భంగా కలెక్టర్‌ విజయరామరాజు మాట్లాడుతూ రాష్ట్ర ప్రభుత్వం అమలు చేస్తున్న సున్నా వడ్డీ, ఇన్‌పుట్‌ సబ్సిడీ పథకాలు అన్నదాతలకు కొండంత అండగా నిలుస్తున్నాయన్నారు. వైఎస్సార్‌ సున్నా వడ్డీ పంట రుణాల పథకం ద్వారా 2020–21 రబీ సీజన్‌కు సంబంధించి రూ. లక్షలోపు పంట రుణాలు తీసుకుని సకాలంలో తిరిగి చెల్లించిన 12,112 మంది జిల్లా రైతులకు మంజూరైన రూ. 2.69 కోట్లు, 2021 ఖరీఫ్‌ సీజన్‌కు సంబంధించి 24,920 మంది రైతులకు రూ. 6.05 కోట్లు, అలాగే 2020 ఖరీఫ్‌ సీజన్‌కుగాను సున్నా వడ్డీ కింద 30233 మంది వివిధ కారణాలతో జమకాని రైతులకుగాను రూ. 7.30 కోట్లు జమ అయిందన్నారు. మొత్తంగా జిల్లాలో 67,265 మంది రైతులకు రూ. 16.04 కోట్లు లబ్ధి చేకూరిందన్నారు. అలాగే 2022 ఖరీఫ్‌ కాలానికి ఇన్‌పుట్‌ సబ్సిడీ కింద జిల్లాలో 3855 మంది రైతులకు  రూ. 4.33 కోట్లు రైతుల ఖాతాలో జమ చేశారని తెలిపారు.   మెగా చెక్కు అందజేత  ముఖ్యమంత్రి వైఎస్‌ జగన్‌మోహన్‌రెడ్డి వీసీ అనంతరం సున్నా వడ్డీ, ఇన్‌పుట్‌ సబ్సిడీకి సంబంధించిన మెగా చెక్కులను కార్యక్రమానికి హాజరైన అతిథులందరూ కలిసి లబ్ధిదారులకు అందజేశారు.  ►ఈ కార్యక్రమంలో వీరపునాయునిపల్లె ఎంపీపీ రఘునాథరెడ్డి, జిల్లా వ్యవసాయశాఖ అధికారి నాగేశ్వరరావు, పశుసంవర్థకశాఖ జేడీ శారద, డీసీఓ సుభాషిణి, వ్యవసాయ ఏడీలు నరసింహారెడ్డి, సుబ్బారావు, అధికారులు, రైతులు పాల్గొన్నారు.  రైతు పక్షపాత ప్రభుత్వం: ఎస్‌.రఘురామిరెడ్డి, మైదుకూరు ఎమ్మెల్యే  తమది రైతు పక్షపాత ప్రభుత్వమని మైదుకూరు ఎమ్మెల్యే రఘురామిరెడ్డి పేర్కొన్నారు. ప్రతి రైతు తలెత్తుకుని జీవించాలన్నదే ముఖ్యమంత్రి వైఎస్‌ జగన్‌మోహన్‌రెడ్డి లక్ష్యమన్నారు. రైతు దేశానికి వెన్నముక అని, రైతు బాగుంటేనే రాజ్యం సుభిక్షంగా ఉంటుందని ప్రభుత్వం భావించి రైతులను అన్ని విధాలా ఆదుకుంటోందన్నారు.  అన్నదాతల కోసం అమూల్య పథకాలు : సురేష్‌బాబు, నగర మేయర్‌  అన్నదాతల కోసం ముఖ్యమంత్రి వైఎస్‌ జగన్‌మోహన్‌రెడ్డి అమూల్యమైన పథకాలను అమలు చేస్తున్నారని నగర మేయర్‌ సురేష్‌బాబు తెలిపారు. వరుసగా మూడవ సంవత్సరం సజావుగా సున్నా వడ్డీ, ఇన్‌పుట్‌ సబ్సిడీలను రైతులకు అందిస్తున్న ఘనత మన ముఖ్యమంత్రిదేనన్నారు.    పథకాలను సద్వినియోగం చేసుకోవాలి :  మల్లెల ఝాన్సీరాణి,  ఆప్కాబ్‌ చైర్‌ పర్సన్‌  ప్రభుత్వం రైతు సంక్షేమం కోసం ప్రవేశపెట్టిన పథకాలను రైతన్నలు సద్వినియోగం చేసుకోవాలని ఆప్కాబ్‌ చైర్‌ పర్సన్‌ మల్లెల ఝాన్సీరాణి తెలిపారు.  రైతుల సంక్షేమం కోసం ఎన్నో పథకాలు ప్రవేశపెట్టిన ఘనత ముఖ్యమంత్రి వైఎస్‌ జగన్‌మోహన్‌రెడ్డికే దక్కుతుందని కొనియాడారు.   రైతు భరోసా కేంద్రాలు రైతులకు కల్పతరువులు : సంబటూరు ప్రసాద్‌రెడ్డి, వ్యవసాయ సలహా మండలి జిల్లా అధ్యక్షుడు  ప్రభుత్వం ఏర్పాటు చేసిన రైతు భరోసా కేంద్రాలు రైతులకు అన్ని విధాలా కల్పతరువుగా మారాయని జిల్లా వ్యవసాయ సలహా మండలి చైర్మన్‌ సంబటూరు ప్రసాద్‌రెడ్డి పేర్కొ న్నారు. ప్రభుత్వం విత్తనం నుంచి అమ్మకం వరకు రైతులకు అండగా నిలుస్తోందన్నారు. రైతు భరోసా కేంద్రాల ద్వారా రైతులకు అన్ని సేవలు అందుతున్నాయన్నారు.   రైతు బాంధవుడు ముఖ్యమంత్రి  ముఖ్యమంత్రి వైఎస్‌ జగన్‌మోహన్‌రెడ్డి రైతు బాంధవుడిగా మారి రైతుల సంక్షేమానికి పెద్దపీట వేస్తున్నారు. రైతు బాగుంటేనే రాజ్యం బాగుంటుందని నమ్మిన నాయకుడు జగనన్న. ప్రభుత్వ మద్దతు ధరతో పండించిన పంటలను ఆర్బీకేల ద్వారా విక్రయించుకోగలిగాను.      – భాస్కర్, రైతు, యల్లారెడ్డిపల్లె, కమలాపురం   జగనన్నే ముఖ్యమంత్రిగా ఉండాలి  వ్యవసాయ రంగంలో రైతుల అభ్యున్నతికి అనేక మార్పులు తెచ్చి ఆపన్నహస్తం అందిస్తున్న ముఖ్యమంత్రి వైఎస్‌ జగన్‌మోహన్‌రెడ్డి ఎప్పటికీ ఆంధ్రప్రదేశ్‌ ముఖ్యమంత్రిగానే ఉండాలని కోరుకుంటున్నాను.      – పి.వీరారెడ్డి, చౌటపల్లె, కడప   రైతు శ్రేయస్సు కోరే ముఖ్యమంత్రి  ముఖ్యమంత్రి వైఎస్‌ జగన్‌మోహన్‌రెడ్డి రైతు శ్రేయస్సు కోరే ముఖ్యమంత్రిగా ఘనత సాధించారు. అనేక పథకాలను రైతుల కోసం ప్రవేశపెట్టారు. ఇలాంటి ముఖ్యమంత్రి కలకాలం ఉండాలన్నదే మా అందరి ఆకాంక్ష.      – ఎం.సుబ్బిరెడ్డి, చౌటపల్లె, కడప 

సాక్షి, హైదరాబాద్‌: బడా పారిశ్రామికవేత్తలకు వేల కోట్ల రూపాయలను నిరర్ధక ఆస్తుల(ఎన్పీఏ) కింద రద్దు చేసే పాలకులు, ఆరుగాలం కష్టపడే రైతుకు రుణమాఫీ చేయమంటే మాత్రం వెనకాడుతారెందుకని సీఎల్పీ నేత భట్టి విక్రమార్క ప్రశ్నించారు. అంబానీ, అదానీ, ఇతర సంపన్నులు బ్యాంకుల నుంచి తీసుకున్న రూ.12 లక్షల కోట్ల రుణాలను కేంద్రంలోని బీజేపీ ప్రభుత్వం రద్దు చేసిందని ఆరోపించారు. గురువారం ఇక్కడి సీఎల్పీ కార్యాలయంలో ఆయన విలేకరులతో మాట్లాడుతూ కేంద్రంలోని బీజేపీ రైతు ప్రభుత్వమా? లేక కార్పొరేట్ల ప్రభుత్వమా? అని నిలదీశారు. తెలంగాణ పర్యటనకు వచ్చి వెళ్లిన కేంద్ర ఆర్థికమంత్రి నిర్మలా సీతారామన్‌ రైతు రుణమాఫీ గురించి చొరవ చూపితే బాగుండేదని హితవు పలికారు. బ్యాంకర్లతో సమావేశం ఏర్పాటు చేసి రైతులకు రుణాలు ఇప్పించి ఉంటే బాగుండేదన్నారు. కానీ, కేంద్రమంత్రి పర్యటన ఉపన్యాసాలకే పరిమితం కావడం విచారకరమన్నారు. తెలంగాణ ప్రభుత్వం ఏకకాలంలో రైతు రుణమాఫీ అమలు చేయకపోవడంతో రైతులకు బ్యాంకులు కొత్త రుణాలు ఇవ్వడం లేదని, దీంతో రైతులు ఎక్కువ వడ్డీకి ప్రైవేట్‌ అప్పులు చేయాల్సిన దుస్థితి ఏర్పడిందని ఆవేదన వ్యక్తం చేశారు. ప్రకృతి వైపరీత్యాలు, నకిలీ విత్తనాలతో పంట దిగుబడి రాక ప్రైవేటు అప్పులు తీర్చలేని పరిస్థితిల్లో రైతులు ఉన్నారని, ఈ దుస్థితి వారి ఆత్మహత్యలకు దారితీస్తున్నదని ఆవేదన వ్యక్తం చేశారు. వ్యవసాయ సీజన్‌ ప్రారంభానికి ముందు సీఎం కేసీఆర్, వ్యవసాయ శాఖ మంత్రి రాష్ట్ర స్థాయి బ్యాంకర్ల కమిటీ సమావేశం నిర్వహించి సమీక్ష నిర్వహించి ఉంటే ఈ దుస్థితి వచ్చేది కాదన్నారు. వెంటనే ప్రభుత్వం స్పందించి ఏకకాలంలో రైతులకు రుణమాఫీ చేయడంతోపాటు బ్యాంకర్ల నుంచి కొత్త రుణాలు ఇప్పించాలని భట్టి డిమాండ్‌ చేశారు. ఇదీ చదవండి: ‘నన్ను అవమానిస్తున్నారు’.. రాష్ట్ర ప్రభుత్వ తీరుపై గవర్నర్‌ తమిళిసై ఫైర్‌

సాక్షి, అమరావతి: సన్న, చిన్నకారు రైతులతో పాటు వాస్తవ సాగుదారులకు పంట రుణాలపై వడ్డీ భారాన్ని తగ్గించే వైఎస్సార్‌ సున్నా వడ్డీ పంట రుణాల పథకాన్ని మరింత మంది అన్నదాతలకు అందించేందుకు రాష్ట్ర ప్రభుత్వం చర్యలు చేపట్టింది. 2020–21 రబీలో రూ.లక్ష లోపు రుణాలు తీసుకొని సకాలంలో చెల్లించిన రైతులకు వచ్చే నెలలో వడ్డీ రాయితీని జమ చేయనుంది. ఇప్పటికే ఈ సీజన్‌లో 7.20 లక్షల మంది అర్హులున్నట్టుగా గుర్తించారు. వడ్డీతో సహా రుణాలు చెల్లించేందుకు ఈ నెల 31వ తేదీ వరకు గడువున్నందున మరింత మందికి పథకం కింద లబ్ధి చేకూర్చేందుకు ప్రభుత్వం చర్యలు చేపట్టింది. 31 లోగా రుణాలు చెల్లించేందుకు ఆర్బీకేల ద్వారా రైతుల్లో అవగాహన కల్పిస్తోంది. స్కేల్‌ ఆఫ్‌ ఫైనాన్స్‌ ప్రకారం తీసుకున్న పంట రుణాలపై బ్యాంకులు 7 శాతం వడ్డీని వసూలు చేస్తాయి. ఇందులో 3 శాతం వడ్డీని కేంద్రం చెల్లిస్తుంది. మిగతా 4 శాతం వడ్డీని అర్హులైన రైతులకు వైఎస్సార్‌ సున్నా వడ్డీ పంట రుణాల పథకం కింద రాష్ట్ర ప్రభుత్వమే నేరుగా వారి ఖాతాల్లో జమ చేస్తోంది. ఈ పథకం కింద 2019 ఖరీఫ్‌లో 14.27 లక్షల మంది రైతులకు రూ.289.42 కోట్లు, 2019–20 రబీలో  5.61లక్షల మందికి రూ.92.39 కోట్లు, 2020 ఖరీఫ్‌లో 6.67 లక్షల మందికి  రూ.112.70 కోట్లు చెల్లించింది. అంతేకాకుండా 2014–15 నుంచి 2018–19 మధ్య 42.32 లక్షల మంది రైతులకు గత ప్రభుత్వం చెల్లించని రూ.1180.66 కోట్ల బకాయిల్లో ఇప్పటివరకు 38.42 లక్షల మంది రైతులకు రూ.688.25 కోట్లు జమ చేసింది. 2020–21 రబీలో రికార్డు స్థాయిలో 38.76 లక్షల మంది రైతులకు రూ.72,724 కోట్ల వ్యవసాయ రుణాలు ఇచ్చారు. వీటిలో 12.70 లక్షల మందికి రూ.19 వేల కోట్లు పంట రుణాలుగా ఇచ్చారు. వీరిలో లక్ష లోపు రుణాలు తీసుకుని ఇప్పటికే తిరిగి చెల్లించిన వారు 7.20 లక్షల మంది. మిగతా వారు కూడా రుణాలు చెల్లించి,  ఈ పథకానికి అర్హత పొందేలా ప్రభుత్వం రైతులకు అవగాహన కల్పిస్తోంది. ఈ పథకం కింద  రూ.100 కోట్ల నుంచి రూ.120  కోట్ల వరకు రైతులకు లబ్ధి కలుగుతుంది. అర్హత పొందాలంటే.. ఏ పంటపై రుణం తీసుకున్నారో ఆ పంటే సాగు చెయ్యాలి. పంట వివరాలను తప్పనిసరిగా ఈ క్రా‹ప్‌లో నమోదు చేయించాలి. రుణాన్ని వడ్డీతో సహా ఏడాదిలోగా (మార్చి 31వ తేదీ) చెల్లించాలి. దీనిపై ఆర్బీకే సిబ్బంది ద్వారా రైతుల్లో చైతన్యం తీసుకొస్తున్నారు. బ్యాంకులతో సమన్వయం చేసుకుంటూ ఒక ఆధార్‌ నంబరుపై ఒక అకౌంట్‌ నంబర్‌ను మాత్రమే మ్యాప్‌ అయ్యేలా డేటాను అప్‌డేట్‌ చేస్తున్నారు. గడువులోగా  రుణాలు చెల్లించిన రైతుల జాబితాను సామాజిక తనిఖీ కోసం ఆర్బీకేల వద్ద ప్రదర్శిస్తారు. అర్హులైన రైతుల వివరాలను బ్యాంకుల ద్వారా వైఎస్సార్‌ ఎస్‌వీపీఆర్‌ పోర్టల్‌లో  ఏప్రిల్‌ 7వ తేదీలోగా అప్‌లోడ్‌ చేస్తారు. అవకాశాన్ని సద్వినియోగం చేసుకోవాలి ఈ పథకం కింద రైతులకు 4 శాతం వడ్డీ రాయితీ లభిస్తుంది, రూ.లక్ష లోపు పంట రుణాలు తీసుకొని, మార్చి 31 లోపు వడ్డీతో సహా రుణం మొత్తాన్ని చెల్లించిన వారు బ్యాంక్‌ను సంప్రదించి పోర్టల్‌లో నమోదు చేయించుకోవాలి. ఈ అవకాశాన్ని రైతులందరూ సద్వినియోగం చేసుకోవాలి. – హెచ్‌.అరుణ్‌కుమార్, వ్యవసాయ శాఖ కమిషనర్‌  

సాక్షి, అమరావతి: భూ యజమాని హక్కులకు భంగం వాటిల్లకుండా వాస్తవ సాగుదారులకు మరింత మేలు జరిగేలా రాష్ట్ర ప్రభుత్వం కార్యాచరణ సిద్ధంచేసింది. గడిచిన ఖరీఫ్‌ సీజన్‌లో ఈ–క్రాప్‌ నమోదు పగడ్బందీగా చేపట్టారు. రైతుభరోసా యూనిఫైడ్‌ డిజిటల్‌ ప్లాట్‌ఫామ్‌ (ఆర్‌బీయూడీపీ) ద్వారా తొలిసారిగా సర్వే నెంబర్ల వారీగా సాగు వివరాలను నమోదు చేశారు. కానీ, చాలాచోట్ల వాస్తవ సాగుదారుల స్థానంలో భూ యజమానుల పేర్లు నమోదైనట్లుగా గుర్తించారు. దీంతో ప్రస్తుత రబీ సీజన్‌లో సాగుచేసే ప్రతీ అసలైన రైతు వివరాలు ఈ–క్రాప్‌లో నమోదుకు చర్యలు చేపట్టారు.  నిజానికి.. ఈ–క్రాప్‌ విధానం అమలులోకి వచ్చాక ఖరీఫ్‌–2020 సీజన్‌లో 124.92 లక్షల ఎకరాల్లో 49.72 లక్షల మంది రైతులు సాగుచేస్తున్నట్లుగా నమోదు కాగా.. రబీ 2020–21లో 34.65 లక్షల మంది రైతులు 86.77లక్షల ఎకరాలు సాగుచేస్తున్నట్లుగా నమోదయ్యాయి. అలాగే, ఖరీఫ్‌–2021లో 45.02 లక్షల మంది రైతులు సాగుచేస్తున్న 102.23 లక్షల ఎకరాలు నమోదు చేశారు. వీరిలో కౌలురైతులు 2.92 లక్షల మంది ఉన్నారు. కానీ,  వాస్తవంగా రాష్ట్రంలో 16.56 లక్షల మంది కౌలుదారులున్నారు. వారిలో 60–70 శాతానికి పైగా సెంటు భూమి కూడా లేనివారే. సాగువేళ వీరిలో ప్రభుత్వ ప్రయోజనాలందుకుంటున్న వారు 10–20 శాతం లోపే ఉంటున్నారు. ఈ పరిస్థితికి చెక్‌ పెడుతూ ప్రతీ వాస్తవసాగుదారుడు లబ్ధిపొందేలా ప్రభుత్వం ప్రస్తుత రబీ సీజన్‌లో ఈ–క్రాప్‌ నమోదులో మార్పులు తీసుకొచ్చింది. వీటిపై  వాస్తవ సాగుదారులు–భూ యజమానులకు అర్ధమయ్యే రీతిలో ఆర్బీకే స్థాయిలో విస్తృత ప్రచారం నిర్వహిస్తోంది.  సాగుదారుల గుర్తింపు ఇలా..  ► విత్తిన వారంలోపు ఆర్బీకేల్లో ఆధార్, బ్యాంకు ఖాతా, ఫోన్‌ నెంబర్లతో సహా క్రాప్‌ కల్టివేషన్‌ రైట్‌ కార్డు (సీసీఆర్సీ) నకళ్లను అందజేయాలి.   ► ఒకవేళ సీసీఆర్సీ లేకున్నా, భూ యజమాని అంగీకరించకపోయినా సరే తాము ఏ సర్వే నెంబర్, ఎంత విస్తీర్ణంలో ఏఏ పంటల సాగుచేస్తున్నామో ఆ వివరాలను ఆర్బీకేలో తెలియజేసి ఈకేవైసీ (వేలిముద్రలు) చేయించుకుంటే రెండు వారాల్లోపు ఆర్బీకే సిబ్బంది పొలానికి వెళ్లి చుట్టుపక్కల రైతులను విచారించి వాస్తవ సాగుదారుడెవరో గుర్తిస్తారు. ► ఇలా నమోదైన వివరాలను సామాజిక తనిఖీలో భాగంగా ఆర్బీకేల్లో వారం రోజులపాటు ప్రదర్శిస్తారు. తప్పులుంటే సవరిస్తారు.   ► అభ్యంతరాలొస్తే మరోసారి క్షేత్రస్థాయి పరిశీలన చేసి వాస్తవ సాగుదారులను గుర్తిస్తారు.   సీసీఆర్సీ అంటే..  సీసీఆర్‌సీ పత్రం అంటే భూ యజమానికి, సాగుదారునికి మధ్య అవగాహనా ఒప్పంద పత్రం. వలంటీర్‌/వీఆర్‌ఓ వద్ద ఉండే దరఖాస్తులో వివరాలు నింపి భూ యజమాని లేదా వారి ప్రతినిధి, సాగుదారు–గ్రామ వీఆర్వోలు సంతకం చేస్తే సరిపోతుంది. పంట కాలంలో ఎప్పుడైనా ఈ పత్రాన్ని పొందవచ్చు. దరఖాస్తు చేసుకున్న 3 రోజుల్లోనే ఈ పత్రం జారీచేస్తారు. దీని కాలపరిమితి జారీచేసిన తేదీ నుంచి కేవలం 11 నెలలు మాత్రమే. ఈ కార్డుపొందిన ఎస్సీ, ఎస్టీ, బీసీ, మైనార్టీ వర్గాల రైతులు వైఎస్సార్‌ రైతుభరోసా కింద రూ.13,500 పెట్టుబడి సాయం పొందేందుకు అర్హులు.  ఈ–క్రాప్‌తో ప్రయోజనాలు..  ► దీని ఆధారంగా స్కేల్‌ ఆఫ్‌ ఫైనాన్స్‌ ప్రకారం పంట రుణం పొందవచ్చు.   ► రూ.లక్షలోపు పంట రుణం ఏడాదిలోపు చెల్లిస్తే సున్నా వడ్డీ పంట రుణాల పథకం కింద 4 శాతం వడ్డీ రాయితీ పొందవచ్చు.   ► ఉచిత పంటల బీమా సౌకర్యం వర్తిస్తుంది.   ► వైపరీత్యాల్లో పంట నష్టానికి పెట్టుబడి రాయితీ పొందొచ్చు.   ► అలాగే, పంటలను ఆర్బీకేల ద్వారా కనీస మద్దతు ధరలకు అమ్ముకోవచ్చు.   భూ యజమానులకు పూర్తి రక్షణ  ఈ–క్రాప్‌లో వాస్తవ సాగుదారుల వివరాలు నమోదు ద్వారా భూ యజమానుల హక్కులకు ఎలాంటి భంగం వాటిల్లదు. ఈ వివరాలేవీ రెవెన్యూ రికార్డుల్లో నమోదు చేయరు. కోర్టులో సాక్షులుగా కూడా చెల్లవు. ఈ–క్రాప్‌ ఆధారంగా పొందిన పంట రుణం కట్టకపోయినా, ఎగ్గొట్టినా భూ యజమాని/భూమిపై ఎలాంటి న్యాయపరమైన చర్యలు తీసుకునే అవకాశం ఉండదు. కేవలం బకాయి వసూలు సందర్భంగా ఫలసాయంపై మాత్రమే బ్యాంకులకు హక్కు ఉంటుంది.  

సాక్షి, హైదరాబాద్‌: రైతులకు పంట రుణాలు ఇవ్వడంలో బ్యాంకులు తీవ్ర నిర్లక్ష్యంగా వ్యవహరిస్తున్నాయి. ఈ ఏడాది వానాకాలం సీజన్‌ లక్ష్యంలో సగం రుణాలు కూడా ఇవ్వకపోడం విచారకరం. ఈ సీజన్‌లో రూ.35,665 కోట్లు ఇవ్వా లనేది లక్ష్యం కాగా, ఇప్పటివరకు కేవలం రూ. 15,500 వేల కోట్ల మేరకే రుణాలు మంజూరు అయ్యాయి. వాస్తవానికి సీజన్‌ ప్రారంభానికి ముందుగానే రైతులకు విరివిగా రుణాలు ఇవ్వాలి. ఆ ప్రకారం జూన్‌లో ప్రారంభమయ్యే వానాకాలం సీజన్‌కు మే నెల నుంచే రుణాలు ఇవ్వాలి. కానీ రైతులకు రుణాలు ఇవ్వడానికి బ్యాంకులు ముందుకు రాలేదు. దీంతో రైతులు గత్యంతరం లేక ప్రైవేటు వడ్డీ వ్యాపారస్తుల వద్ద అప్పులు చేయాల్సి వచ్చింది. బ్యాంకుల తీరును ఎప్పటికప్పుడు సమీక్షించి పరిస్థితిని చక్కదిద్దాల్సిన వ్యవసాయశాఖ యంత్రాంగం చూసీచూడనట్లు వ్యవహరిస్తుండటంపై రైతులు ఆగ్రహం వ్యక్తం చేస్తున్నారు. ఈ ఏడాది వానాకాలం సీజన్‌ ఐదు రోజుల క్రితం ముగిసింది. పంటల సాగు 111 శాతం ఉండగా రుణాల మంజూరు మాత్రం మరీ నిరాశాజనకంగా ఉంది. 1.19 కోట్ల ఎకరాల్లో సాగు  రాష్ట్రంలో నీటి వనరులు గణనీయంగా పెరిగాయి. సాగునీటి ప్రాజెక్టులు అందుబాటులోకి రావడంతో రెండు మూడేళ్లుగా వ్యవసాయ పంటల విస్తీర్ణం గణనీయంగా పెరుగుతుంది. రాష్ట్రంలో 63 లక్షల మంది రైతులున్నారు. వానాకాలం పంటల సాధారణ సాగు విస్తీర్ణం 1.16 కోట్ల ఎకరాలు కాగా, 1.19 కోట్ల ఎకరాల్లో పంటలు సాగయ్యాయి. అందులో వరి 61.94 లక్షల ఎకరాల్లో సాగైంది. సాధారణం కంటే వరి ఏకంగా 182 శాతం సాగైంది. వాస్తవంగా వరి రైతులే ఎక్కువగా రుణాలు తీసుకుంటారు. అయితే వరి సాగైనంత స్థాయిలో బ్యాంకులు రుణాలు ఇవ్వకపోవడం గమనార్హం. ఇక పత్తి 46.42 లక్షల ఎకరాల్లో, కంది 7.64 లక్షల ఎకరాల్లో సాగైంది. కానీ ఈ పంటలకు కూడా రుణాలు ఆ స్థాయిలో అందలేదు. (2021–22కు సంబంధించిన మొత్తాలు వానాకాలం సీజన్‌వే)  రూ. 5 వేల కోట్ల ప్రైవేట్‌ అప్పులు!  2021–22 రెండు సీజన్లలో రూ. 59,440 కోట్ల పంట రుణాలు ఇవ్వాలని బ్యాంకర్లు లక్ష్యంగా పెట్టుకున్నాయి. అందులో ఈ సీజన్‌కు రూ. 35,665 కోట్లు ఇవ్వాలనుకున్నారు. కానీ ఇప్పటివరకు అందులో 43.45% మేరకే రుణాలు ఇచ్చినట్లు వ్యవసాయశాఖ వర్గాలు తెలిపాయి. బ్యాంకుల తీరు కారణంగానే రైతులు రుణాలు పొందలేక పోయారనే విమర్శలున్నాయి. కొద్దిపాటి రుణాలు తీసుకోవడానికి రైతులు ఎలాం టి తనఖా పెట్టాల్సిన అవసరం లేదు. కానీ పా సు పుస్తకాలు తీసుకొని పంట రుణాలు ఇచ్చా యి.  నిస్సహాయ పరిస్థితుల్లో రైతులు ప్రైవేట్‌ వడ్డీ వ్యాపారస్థుల వద్ద అప్పులు చేశారు. ఒక అంచనా ప్రకారం రూ.5 వేల కోట్ల ప్రైవేట్‌ అప్పులు చేసినట్లు అంచనా. మరి ముఖ్యంగా రైతుబంధుకు కాని, బ్యాంకు రుణాలకు కాని నోచుకోని కౌలు రైతుల పరిస్థితి మరింత ఘోరంగా ఉంది. వీరికి ప్రైవేట్‌ రుణాలు తప్ప మరో ఆధారం లేదని రైతు సంఘాలు ఆవేదన వ్యక్తం చేస్తున్నాయి. ఏడాదికేడాదికీ తగ్గుతున్న రుణాలు  2011–12 ఆర్థిక సంవత్సరంలో తెలంగాణ ప్రాంతంలో బ్యాంకులు తాము నిర్దేశించుకున్న లక్ష్యానికి మించి 115 శాతం పంట రుణాలు ఇచ్చాయి. ఆ ఏడాది రూ.10,233 కోట్లు ఇవ్వాలనేది లక్ష్యం కాగా, రూ. 11,787 కోట్లు ఇచ్చాయి. ఇక 2012–13లో ఏకంగా 121 శాతం, 2013–14లో 103 శాతం ఇచ్చాయి. అయితే తెలంగాణ ఏర్పాటయ్యాక 2014–15లో పంట రుణాల లక్ష్యంలో 93 శాతమే ఇచ్చాయి. అలా క్రమంగా రుణాల మంజూరు తగ్గిస్తూ వస్తున్నాయి.  

సాక్షి, అమరావతి: వ్యవసాయం, గ్రామీణ ప్రాంతాల్లో మౌలిక వసతుల కల్పనకు జాతీయ వ్యవసాయ, గ్రామీణాభివృద్ధి బ్యాంక్‌ (నాబార్డ్‌) పెద్దపీట వేస్తోందని బ్యాంక్‌ రాష్ట్ర చీఫ్‌ జనరల్‌ మేనేజర్‌ సుధీర్‌కుమార్‌ జన్నావర్‌ చెప్పారు. ముఖ్యమంత్రి వైఎస్‌ జగన్‌మోహన్‌రెడ్డి ఆదేశాల మేరకు వ్యవసాయ రంగంలో పంట రుణాలతో పాటు దీర్ఘకాలిక రుణాలు కూడా సహకార బ్యాంకుల ద్వారా ఇప్పించేందుకు చొరవ తీసుకుంటున్నామని తెలిపారు. అతి తక్కువ వడ్డీ రేటుతో వ్యవసాయ మౌలిక వసతుల నిధి నుంచి రుణాలు తీసుకుని పంట కోతల అనంతర పనులకు, గిడ్డంగుల నిర్మాణాలకు వినియోగించుకోవచ్చని రైతులకు సూచించారు. ఆదివారం ఆయన ‘సాక్షి’ ప్రతినిధితో మాట్లాడారు. వివరాలు ఆయన మాటల్లోనే.. వ్యవసాయ మౌలిక వసతుల కల్పనకు రుణాలు వివిధ కారణాల వల్ల వ్యవసాయ రంగానికి దీర్ఘకాలిక రుణాలు ఇవ్వడంలో బ్యాంకులు వెనుకబడ్డాయి. ఈ రంగంలో మౌలిక వసతులు ఏర్పడాలంటే దీర్ఘకాలిక రుణాలు అవసరం. ముఖ్యమంత్రి వైఎస్‌ జగన్‌మోహన్‌రెడ్డి ఇటీవల బ్యాంకర్ల సమావేశంలో అదే విషయం చెప్పారు. ఆయన విజ్ఞప్తి మేరకు నాబార్డ్‌ ఏం చేయగలుగుతుందనే దానిపై చర్చిస్తున్నాం. నాబార్డ్‌ ఆధ్వర్యంలో రూ.లక్ష కోట్లతో వ్యవసాయ మౌలిక వసతుల నిధి (ఏఐఎఫ్‌) ఏర్పాటైంది. దీని నుంచి తక్కువ వడ్డీకి రుణాలు తీసుకునే వెసులుబాటు ఉంది. ఈ నిధిని పంట కోతల అనంతర కార్యకలాపాలు అంటే ధాన్యం నిల్వ కోసం గిడ్డంగులు, కోల్డ్‌ స్టోరేజీలు, వేర్‌ హౌస్‌లు, అదనపు విలువ జోడింపు గదులు వంటి వాటి కోసమే ఇస్తారు. 324 ఎఫ్‌పీవోలకు ప్రోత్సాహం... రాష్ట్రంలో ప్రస్తుతం 324 రైతు ఉత్పత్తిదారుల సంఘాలను (ఎఫ్‌పీవోలు) ప్రోత్సహిస్తోంది. వీటిలో 259 సంఘాలు రిజిస్టర్‌ అయ్యాయి. ఇవి చాలా పురోగతిని సాధిస్తున్నాయి. ఆ సంఘాలు తమ ఉత్పత్తులను తామే అమ్ముకునే దశకు వచ్చాయి. వీటికి పరపతి సౌకర్యం కూడా బాగుంది. భవిష్యత్‌ అంతా ఎఫ్‌పీవోల పైనే ఆధారపడే పరిస్థితి రావొచ్చు. వర్షాధారిత ప్రాంతాల్లో వాటర్‌ షెడ్‌ పథకాలకు నాబార్డ్‌ అండగా నిలుస్తుంది. 200 వాటర్‌ షెడ్‌ పథకాలను ప్రోత్సహిస్తున్నాం.   

సాక్షి, చేవెళ్ల( రంగారెడ్డి): రుణమాఫీ రెండో విడతకు ప్రభుత్వం ముహూర్తం ఖరారు చేసింది. ఈనెల 16వ తేదీ నుంచి రూ.50వేల రుణాలు ఉన్నవారికి మాఫీ వర్తింపచేయాలని అధికారులు కసరత్తు చేస్తున్నారు. ఇటీవల జరిగిన మంత్రల కేబినెట్‌ సమాశంలో రెండో విడత రుణమాఫీ నిధులు విడుదల చేయాలని నిర్ణయించిన సంగతి తెలిసిందే. జిల్లాలో అర్హత సాధించిన రైతుల్లో 30–40 శాతానికిపైగా రెండో విడతలో లబ్ధి పొందే అవకాశం ఉంది. ఎన్నో రోజులుగా ఊరిస్తున్న రుణమాఫీపై ప్రభుత్వం స్పష్టత ఇవ్వడంతో రైతుల్లో హర్షం వ్యక్తం అవుతోంది.  ► ప్రభుత్వం ఎన్నికలకు ముందు 2014 ఏప్రిల్‌ 1 నుంచి 2018 డిసెంబర్‌ 11 నాటికి బ్యాంకుల ద్వారా రుణాలు పొందిన రైతులకు కుటుంబానికి రూ.లక్ష వడ్డీతో కలుపుకొని నాలుగు విడుతల్లో మాఫీ చేస్తామని ప్రకటించింది.    ► దీని ప్రకారం గత ఏడాది తొలివిడత రూ.25వేల లోపు రుణం ఉన్న రైతులకు వర్తింపచేశారు.   ► ఇది జిల్లాలోని 10 శాతం మంది రైతులకు మాత్రమే వర్తించింది.  కొంతమంది అర్హులైన వారికి పలు కారణాలతో వర్తించ లేదు.  ► రుణాలు పొందిన రైతులు మాఫీ వస్తుందని బ్యాంకులకు బాకీలు కట్టడం మానేశారు.   ► ప్రభుత్వం రుణమాఫీ ఎప్పుడిస్తోందో తెలియక బ్యాంకర్లు బాకీలు కట్టాలని రైతులపై ఒత్తిడి చేయడం పరిపాటిగా మారింది.  ► రెండో విడత రుణమాఫీపై ఇదిగో అదిగో అంటూ కాలయాపన చేస్తూ వచ్చింది ప్రభుత్వం.   ► ప్రతిపక్షాలు ప్రభుత్వాన్ని నిలదీసేందుకు సిద్ధమవుతుండటంతో వెంటనే రెండో విడత రుణమాఫీ విడుదలపై నిర్ణయం తీసుకుంది.    ► ఈ నెల 16నుంచి రైతుల ఖాతాల్లోకి పంట రుణమాఫీ డబ్బులు జమ చేయనున్నట్లు ప్రకటించడంతో రైతులు ఊపిరి పీల్చుకున్నారు.   ఒకటి, రెండు రోజుల్లో స్పష్టత..   ► జిల్లాలో మొత్తం 1,46,417 మంది రైతులు రుణమాఫీ పొందేందుకు అర్హులని అధికారులు గుర్తించారు.    ► ఇందులో మొదటి విడతలో రూ.25వేల లోపు రుణాలున్న పది శాతం మందికి మాత్రమే వర్తించింది.  ► ఇప్పుడు రెండో విడతలో రూ.50వేల లోపు రుణాలున్న రైతులకు మాఫీ చేసేందుకు నిర్ణయించడంతో 30 నుంచి 40 శాతం మందికి పైగా రైతులకు లబ్ధి చేకూరనుందని అంచనా వేస్తున్నారు.   ► రూ.50 వేల లోపు ఉన్న రైతులకు సంబంధించి రెండో విడతలో అమలు చేసేందుకు బ్యాంకర్ల నుంచి పూర్తి సమాచారం సేకరిస్తున్నట్లు జిల్లా అధికారులు చెబుతున్నారు.   ► ఒకటి, రెండు రోజుల్లో జిల్లావ్యాప్తంగా పక్కా సమాచారం అందుతుందని జిల్లా వ్యవసాయాధికారి గీతారెడ్డి తెలిపారు.    ► జిల్లాలో మొదటి విడతలో రూ.25వేల లోపు రుణాలున్న వారిని 17,943 మందిగా గుర్తించగా ఇందులో 10,928 మందికిగాను రూ.16.73కోట్లు విడుదల చేసింది.   ► మిగతావారికి వివిధ కారణాలతో రుణమాఫీ వర్తించలేదు. వారికి ఇప్పుడు రెండో విడతలో వడ్డీతో కలుపుకొని రూ.50వేలలోపు రుణమాఫీ కానుందని అధికారులు చెబుతున్నారు.  

సాక్షి, అమరావతి: రైతులు అప్పుల ఊబిలో చిక్కుకోకుండా వడ్డీలేని రుణాలు ఇస్తామని ఎన్నికల ముందు ఇచ్చిన మాట మేరకు.. అధికారంలోకి వచ్చిన వెంటనే ముఖ్యమంత్రి వైఎస్‌ జగన్‌మోహన్‌రెడ్డి వైఎస్సార్‌ సున్నా వడ్డీ పంట రుణాల పథకం అమలు చేస్తున్నారు. లక్ష రూపాయల వరకు పంట రుణాలు తీసుకుని, ఏడాది లోపు ఆ రుణం తిరిగి చెల్లించిన రైతులందరికీ సున్నా వడ్డీ పంట రుణాల పథకం వర్తింపజేస్తున్నారు. రైతులకు ఇప్పటివరకు రూ.1,132.54 కోట్ల వడ్డీ రాయితీని ప్రభుత్వం అందజేసింది. ఇప్పుడు రెండో ఏడాది కూడా.. అంటే 2019–20 రబీ సీజన్‌లో లక్ష రూపాయల వరకు పంట రుణాలు తీసుకుని ఏడాదిలోపు తిరిగి చెల్లించిన 6,27,906 మంది రైతులకు వడ్డీ రాయితీ కింద రూ.128.47 కోట్లు చెల్లిస్తున్నారు. సీఎం జగన్‌ మంగళవారం తన క్యాంపు కార్యాలయం నుంచి కంప్యూటర్‌ బటన్‌ నొక్కి ఈ మొత్తాన్ని రైతుల బ్యాంకు ఖాతాల్లో జమచేస్తారు. ఈ–క్రాప్‌లో నమోదు చేసుకున్న రైతులకు మాత్రమే సున్నా వడ్డీ పంట రుణాల పథకం వర్తింపజేయాలని తొలుత నిర్ణయించారు. అయితే ఈ–క్రాప్‌లో 2,50,550 మంది రైతులు మాత్రమే నమోదు చేసుకున్నారు. మిగిలిన రైతులలో బ్యాంకర్లు అర్హులుగా గుర్తించిన వారందరికీ ఇప్పుడు సీఎం జగన్‌ ఉదారంగా ఈ పథకాన్ని వర్తింజేసి వడ్డీ రాయితీ చెల్లిస్తున్నారు. వైఎస్సార్‌ సున్నా వడ్డీ చెల్లింపుల కోసం సోమవారం ఆర్థికశాఖ నిధులు విడుదల చేయగా వ్యవసాయశాఖ పరిపాలన అనుమతి మంజూరు చేసింది. గత ప్రభుత్వం 2014–15 నుంచి 2018–19 వరకు పెట్టిన రూ.1,180 కోట్లు వడ్డీ లేని రుణాల బకాయిలను కూడా ఈ ప్రభుత్వం విడుదల చేస్తోంది. ఆ మేరకు ఇప్పటి వరకు అర్హులైన రైతులకు రూ.850.68 కోట్ల వడ్డీ రాయితీని ప్రభుత్వం చెల్లించింది. సున్నా వడ్డీ పంట రుణాల పథకం ద్వారా 2019 ఖరీఫ్‌కి సంబంధించి 14.27 లక్షల మంది రైతుల ఖాతాల్లో రూ.281.86 కోట్లు జమచేసింది. వైఎస్‌ జగన్‌ ప్రభుత్వం అధికారంలోకి వచ్చినప్పటి నుంచి రైతన్నల సంక్షేమమే ధ్యేయంగా ఇప్పటివరకు వివిధ పథకాల ద్వారా అన్నదాతలకు రూ.61,400 కోట్ల సాయం చేసింది.   (చదవండి: ప్రతి ‘పార్లమెంట్‌’ పరిధిలో ఫుడ్‌ ప్రాసెసింగ్‌ యూనిట్)

యాచారం: రైతులకు వ్యవసాయ పంట రుణాలు ఇవ్వడానికి యాచారం పీఏసీఎస్‌ దరఖాస్తులు ఆహ్వానిస్తోంది. కొత్త పట్టాదారు పాసుపుస్తకాలు కలిగి ఉండి ఏ బ్యాంకులో రుణం పొందని రైతులకు రుణాలు ఇచ్చేందుకు పీఏసీఎస్‌ పాలకవర్గం కృషిచేస్తుంది. కమర్షియల్‌ బ్యాంకులకు ధీటుగా రైతులకు పీఏసీఎస్‌ సేవలు అందేలా చూస్తున్నారు. యాచారం పీఏసీఎస్‌లో దాదాపు 7 వేలకు పైగా సభ్యులు ఉన్నారు. ఇందులో 4,985 మంది రైతులు దీర్ఘకాలిక, స్వల్పకాలిక, వ్యవసాయ తదితర పద్దుల కింద రూ.40 కోట్లకు పైగా రుణాలు పొందారు. ప్రస్తుతం దీర్ఘకాలిక రుణాల కోసం 200 మందికి పైగా అర్జీలు పెట్టుకున్నారు.  గ్రామాల్లో ముమ్మర ప్రచారం..  ఈ ఏడాది యాచారం పీఏసీఎస్‌లో రూ.2 కోట్లకు పైగా వ్యవసాయ పంట రుణాలు ఇచ్చేందుకు సంఘం నిర్ణయించింది. మండలంలోని 24 గ్రామ పంచాయతీల్లో వ్యవసాయ భూమి కలిగి ఉన్న ప్రతి రైతును పీఏసీఎస్‌లో భాగాస్వామ్యం(రుణాలు కల్పించి సభ్యత్వం ఇవ్వడం) చేసే విధంగా కృషి చేస్తున్నారు. అందులో భాగంగానే ఆయా గ్రామాల్లో పీఏసీఎస్‌ డైరెక్టర్ల ద్వారా రైతుల నుంచి అర్జీలు స్వీకరిస్తున్నారు. అప్పు పరిమితి పట్టిక(క్రెడిట్‌ లిమిట్‌) తయారు చేసి డీసీసీబీకి ప్రతిపాదనలు పంపిస్తున్నారు. ఇప్పటికే డీసీసీబీ నుంచి యాచారం పీఏసీఎస్‌కు రూ.50 లక్షలు మంజూరయ్యాయి. మరో రూ.1.50 కోట్ల నిధుల మంజూరుకు పీఏసీఎస్‌ అధికారులు అర్జీలు స్వీకరిస్తున్నారు.  వ్యవసాయ పంట రుణాలు ఇలా..(ఎకరాకు)  వరి, పత్తి తదితర మెట్ట పంటలకు రూ.30 వేలు   కూరగాయల పంటలకు రూ.38 వేలు  ప్రతి రైతుకు రుణం ఇస్తాం  మండలంలోని 24 గ్రామాల్లో వ్యవసాయ భూమి కలిగి ఉండి పట్టాదారు పాసుపుస్తకాలు ఉన్న ప్రతి రైతుకు రుణాలు ఇవ్వాలని నిర్ణయించాం. ఇందులో భాగంగా వ్యవసాయ పంట రుణాలు ఇచ్చేందుకు అర్జీలు స్వీకరిస్తున్నాం. ప్రతి రైతుకు సభ్యత్వం ఇచ్చేందుకు ప్రయత్నిస్తున్నాం.  – తోటిరెడ్డి రాజేందర్‌రెడ్డి, పీఏసీఎస్‌ చైర్మన్, యాచారం

చెన్నై : పంట రుణమాఫీలో సహకార సంఘాల్లోని సిబ్బంది మాయాజాలం ప్రదర్శించి ఉండడం వెలుగుచూసింది. రశీదు కోసం వచ్చే రైతుల వద్ద లంచం పుచ్చుకోవడమే కాదు, మాయాజాలం రూపంలో రూ. 25 లక్షల మేరకు మోసాలకు పాల్పడినట్టుగా విజిలెన్స్‌ విచారణలో తేలింది. సహకార బ్యాంకుల్లో రైతులు తీసుకున్న రుణాలను మాఫీ చేస్తూ సీఎం పళనిస్వామి ప్రకటించడమే కాదు, తక్షణంలో అమల్లోకి తెచ్చిన విషయం తెలిసిందే. రుణాల మాఫీకి సంబంధించిన రశీదులను రైతులకు అందించే పనిలో సాగుతోంది. అయితే సహకార సంఘాలు, బ్యాంకుల్లో పనిచేస్తున్న కొందరు సిబ్బంది మాయాజాలం, అవినీతి రూపంలో రుణమాఫీపై విమర్శలు బయలుదేరాయి. రశీదుల కోసం వచ్చే రైతుల వద్ద లంచం కోరడం, అధిక మొత్తంలో రుణాల్ని మాఫీ చేయాల్సి ఉంటే, అందులో మాయాజాలం ద్వారా లక్షలు దండుకునే పనిలో కొందరు సిబ్బంది ఉండడం వెలుగులోకి వచ్చింది.   ఈ మాయాజాలం వ్యవహారంలో ఓ మహిళా రైతు రూపంలో వెలుగులోకి వచ్చింది. తిరువణ్ణామలై జిల్లా వందవాసి సమీపంలోని తీర్చుర్‌ సహకార బ్యాంక్‌లో రూ. 50 వేలు రుణమాఫీకి సంబంధించిన రశీదు కోసం మహిళా రైతు శ్రీదేవి ప్రయతి్నంచారు. అయితే, అక్కడి కార్యదర్శి అన్నాదురై చేతులు తడపాల్సిందేనని పట్టుబట్టారు. తనకు రూ.5 వేలు ఇస్తేనే, రశీదు అని స్పష్టం చేయడంతో ఆ మహిళా రైతు విజిలెన్స్‌ వర్గాల్ని ఆశ్రయించారు. పథకం ప్రకారం శుక్రవారం సాయంత్రం అన్నాదురైను పట్టుకునేందుకు విజిలెన్స్‌ వర్గాలు సిద్ధమయ్యాయి. ఆయన ఆమె ఇచ్చిన డబ్బును చేతిలో తీసుకోకుండా, బల్లపై పెట్టి వెళ్లి పోవాలని సూచించడంతో రెడ్‌హ్యాండెడ్‌గా పట్టుకోలేని పరిస్థితి.  శనివారం సియామంగంలోని ఆ కార్యదర్శి ఇళ్లు, తీర్చుర్‌ కార్యాలయంలో సోదాల్లో నిమగ్నం కావడం గమనార్హం. ఒక్క తిరువణ్ణామలై జిల్లాలోనే రూ. 25 లక్షల మేరకు రుణమాఫీ పేరిట మాయ సాగినట్టు తేలడంతోనే విజిలెన్స్‌ విచారణ, సోదాలు ముమ్మరంగా సాగుతుండడం గమనార్హం. కోవైలో ఓ రైతు వద్ద లంచం పుచ్చుకుంటూ పొల్లాచ్చి మహాలింగపురం సహకార బ్యాంక్‌లో పనిచేస్తున్న సెల్వరాజ్, ఆర్ముగంలో విజిలెన్స్‌కు రెడ్‌హ్యాండెడ్‌గా పట్టుబడడంతో సహకార సంఘాలు, బ్యాంక్‌లపై విజిలెన్స్‌ పూర్తి స్థాయిలో దృష్టి కేంద్రీకరించింది. 

సాక్షి, అమరావతి: ఆరుగాలం శ్రమించే అన్నదాతకు ప్రభుత్వం అండగా ఉండటంతో వారికి మరింత చేయూత లభిస్తోంది. గతంలో ఎన్నడూ లేని విధంగా అన్నదాతకు రుణాల మంజూరుకు బ్యాంకులు ముందుకొస్తున్నాయి. రైతులతోపాటు కౌలుదారులకు కూడా విరివిగా రుణాలు మంజూరు చేస్తున్నాయి. సీజన్‌ ఆరంభం కాగానే పెట్టుబడికి అవసరమైన రుణాల కోసం అన్నదాతల అగచాట్లు వర్ణనాతీతంగా ఉండేవి. చెప్పులరిగేలా బ్యాంకుల చుట్టూ తిరిగినా అదునుకు రుణాలందేవి కావు. దీంతో ప్రైవేటు వడ్డీ వ్యాపారులు, దళారుల వద్ద ఎక్కువ వడ్డీకి డబ్బు తీసుకోవాల్సి వచ్చేది. వచ్చిన పంటను అప్పు ఇచ్చినవాళ్ల చేతిలో పెట్టగా మిగిలిందే రైతులకు దిక్కయ్యేది. ఒకవేళ పంట విపత్తు బారిన పడితే ఆ అప్పులు తీర్చేదారి కనిపించేదికాదు. రెండేళ్లుగా ఈ పరిస్థితిలో స్పష్టమైన మార్పు కనిపిస్తోంది. సీజన్‌ ప్రారంభానికి ముందే చేతికందుతున్న వైఎస్సార్‌ రైతుభరోసాతో నారుమళ్లు పోసుకునేందుకు ఇబ్బందిలేకుండా ఉంది.   2019–20లో 94.47 లక్షల మందికి రూ.1.14 లక్షల కోట్ల రుణాలు  ప్రభుత్వం రైతుకు దన్నుగా ఉండటంతో వారికి రుణాలిచ్చేందుకు బ్యాంకులు ముందుకొస్తున్నాయి. 2019–20 వ్యవసాయ సీజన్‌లో రూ.1.15 లక్షల కోట్ల రుణాలివ్వాలన్నది లక్ష్యం కాగా.. 94,47,103 మంది రైతులకు రూ.1,13,998 కోట్ల రుణాలిచ్చాయి. ఖరీఫ్‌లో పంట రుణాలు 48.60 లక్షల మందికి రూ.52,669 కోట్లు, టర్మ్‌ రుణాలు 6,36,266 మందికి రూ.12,908 కోట్లు ఇవ్వగా.. రబీలో పంటరుణాలు 34,48,181 మందికి రూ.36,604 కోట్లు, టర్మ్‌ రుణాలు 5,02,656 మందికి రూ.11,817 కోట్లు ఇచ్చాయి.  2020–21లో రూ.1.28 లక్షల కోట్ల రుణవితరణ లక్ష్యం  2020–21 వ్యవసాయ సీజన్‌లో రూ.1,28,659 కోట్ల రుణాలు మంజూరు చేయాలని బ్యాంకులకు లక్ష్యంగా నిర్దేశించారు. బ్యాంకులు జనవరి 20 నాటికి 69,87,298 మంది రైతులకు రూ.90,558 కోట్ల రుణాలు మంజూరు చేశాయి. గడిచిన ఖరీఫ్‌లో రూ.75,237 కోట్లు ఇవ్వాల్సి ఉండగా, 56,74,500 మంది రైతులకు రూ.74,155 కోట్లు (99శాతం) ఇచ్చాయి. దీన్లో 48,19,306 మంది రైతులకు రూ.57,575 కోట్ల పంటరుణాలు, 8,55,194 మందికి రూ.16,580 కోట్ల టర్మ్‌ రుణాలు ఉన్నాయి. 2019 ఖరీఫ్‌తో పోలిస్తే గడిచిన ఖరీఫ్‌లో పంటరుణాలు రూ.4,906 కోట్లు, టర్మ్‌రుణాలు రూ.3,672 కోట్లు అదనంగా ఇచ్చాయి.  రబీలోను అదే జోరు  ప్రస్తుత రబీ సీజన్‌లో రూ.53,422 కోట్లు రుణాలు ఇవ్వాలన్నది బ్యాంకులకు లక్ష్యంకాగా.. ఇప్పటివరకు 13,12,798 మంది రైతులకు రూ.16,403 కోట్లు ఇచ్చాయి. పంటరుణాలు రూ.36,407 కోట్లు ఇవ్వాల్సి ఉండగా ఇప్పటివరకు 11,33,185 మంది రైతులకు రూ.12,584 కోట్లు అందజేశాయి. టర్మ్‌రుణాలు రూ.17,015 కోట్లు ఇవ్వాల్సి ఉండగా ఇప్పటివరకు 1,79,613 మంది రైతులకు రూ.3819 కోట్లు ఇచ్చాయి.   సీసీఆర్‌సీపై రూ.లక్ష రుణమిచ్చారు.  నాకు సొంతంగా ఎకరం ఉంది. ఆరెకరాలు కౌలుకు తీసుకున్నా. దాళ్వాలో కంద, క్యాబేజీ, మినుము సాగుచేస్తున్నా. కౌలుకార్డు (సీసీఆర్‌సీ) ఇచ్చారు. ఆ కార్డుపైనే మా గ్రామంలో సహకార బ్యాంకులో అప్పు కోసం దరఖాస్తు చేశా. రూ.లక్ష మంజూరు చేశారు. గతంలో ఇలా కార్డుపై ఎప్పుడూ రుణం పొందలేదు. చాలా సంతోషంగా ఉంది.  – పావులూరి మురళీకృష్ణ, కౌలురైతు, పెద ఓగిరాల, కృష్ణాజిల్లా  లక్ష్యానికి మించే రుణాలిస్తాం  గతేడాది మాదిరిగానే ఈ ఏడాది కూడా లక్ష్యానికి మించే రుణాలిస్తాం. ఖరీఫ్‌లో 99 శాతం రుణాలిచ్చాం. రబీలో ఇప్పటికే రూ.16 వేల కోట్ల రుణాలిచ్చాం. వచ్చే రెండు నెలల్లో లక్ష్యానికి అనుగుణంగా రైతులకు రుణాలిస్తాం.      – బ్రహ్మానందరెడ్డి, కన్వీనర్, ఎస్‌ఎల్‌బీసీ  కౌలురైతులకు విరివిగా రుణాలు  2020–21 వ్యవసాయ సీజన్‌లో బ్యాంకులు 1,81,102 మంది కౌలుదారులకు రూ.760 కోట్ల రుణాలు మంజూరు చేశాయి. 4,13,278 మంది సాగుదారులకు క్రాప్‌ కల్టివేటర్స్‌ రైట్‌ కార్డు (సీసీఆర్‌సీ) జారీచేయగా, వారిలో 58,772 మందికి వ్యక్తిగతంగా రూ.318 కోట్ల రుణాలు మంజూరయ్యాయి. ఈ కార్డుదారులతో ఏర్పాటైన 16,387 జాయింట్‌ లయబిలిటీ గ్రూప్స్‌ (జేఎల్‌జీ), రైతుమిత్ర గ్రూపు (ఆర్‌ఎంజీ)ల్లోని 1,22,330 మందికి రూ.442 కోట్ల రుణాలు మంజూరు చేశారు.  

ఇది రైతు పక్షపాత ప్రభుత్వం. సీఎం స్థానంలో మీ బిడ్డ కూర్చున్నారు. విత్తనం నుంచి పంట అమ్మకాల వరకు సహాయపడే విధంగా 10,641 రైతు భరోసా కేంద్రాలు ఏర్పాటు చేశాం. రైతులకు ఎంత చేసినా తక్కువే. దేశంలో గతంలో ఏ ప్రభుత్వం చేయని విధంగా రైతులకు మన ప్రభుత్వం భరోసా ఇచ్చింది. రైతుల పట్ల మమకారం, బాధ్యతతో గత సర్కారు బకాయి పెట్టిన సున్నా వడ్డీ సొమ్ము రూ.1,180 కోట్లు చెల్లించాం. ఈ నెలాఖరుకు ఏడాదిన్నర పాలన పూర్తవుతుంది. ఈలోగానే మేనిఫెస్టోను ఒక భగవద్గీత, బైబిల్, ఖురాన్‌లా భావించి 90 శాతం హామీలు అమలు చేశామని సగర్వంగా చెప్పగలుగుతున్నాం. ఇచ్చిన మాట నిలబెట్టుకున్నాం కాబట్టే, ప్రజా ప్రతినిధులు ధైర్యంగా తలెత్తుకుని గ్రామాల్లోకి, ప్రజల్లోకి వెళ్తున్నారు.   – సీఎం వైఎస్‌ జగన్‌మోహన్‌రెడ్డి గతంలో ధర్నాలు చేసినా పరిహారం వచ్చేది కాదు గతంలో పంట నష్టపోతే రోడ్డెక్కి ధర్నాలు చేసినా పరిహారం డబ్బులు వచ్చేవి కావు. ఇప్పుడు పంట నష్టపోయిన నెల రోజుల్లోనే పంట నష్టపరిహారం ఇవ్వడం రికార్డు. రైతుల పాలిట మీరు దేవుడు. నేను ఐదు ఎకరాల పొలంలో వేరుశనగ వేశాను. వర్షాలు సకాలంలో పడ్డాయి. అయితే అధిక వర్షాల వల్ల పంట కొంత లాస్‌ అయ్యాం. వ్యవసాయ శాఖ అధికారులు వచ్చి నష్టం అంచనా వేశారు. నెల తిరక్కుండానే పరిహారం అందింది.   – శ్రీధర్, ఆత్మకూరు, అనంతపురం జిల్లా సాక్షి, అమరావతి : ఇది రైతుల పక్షపాత ప్రభుత్వమని, రైతుల శ్రమ తెలిసిన ప్రభుత్వమని ముఖ్యమంత్రి వైఎస్‌ జగన్‌మోహన్‌రెడ్డి స్పష్టం చేశారు. సకాలంలో పంట రుణాలు చెల్లిస్తే ప్రభుత్వమే వడ్డీ చెల్లిస్తుందనే ఆత్మవిశ్వాసాన్ని, నమ్మకాన్ని రైతుల్లో కలిగించామన్నారు. 2019 ఖరీఫ్‌కు సంబంధించి 14.58 లక్షల మంది రైతులకు వైఎస్సార్‌ సున్నా వడ్డీ కింద రూ.510.32 కోట్లను మంగళవారం ఆయన తన క్యాంపు కార్యాలయం నుంచి చెల్లించారు. అలాగే రాష్ట్ర చరిత్రలో ఎన్నడూ లేని విధంగా గత నెల అక్టోబర్‌లో వరదల కారణంగా పంటలు నష్టపోయిన 1.97 లక్షల మంది రైతులకు నెల తిరగకుండానే ఇన్‌పుట్‌ సబ్సిడీ కింద రూ.132 కోట్లు చెల్లించారు. ఈ రెండు కార్యక్రమాలకు సంబంధించి కంప్యూటర్‌లో బటన్‌ నొక్కి ఆన్‌లైన్‌ ద్వారా రైతుల ఖాతాల్లో నగదు జమ చేశారు. ఈ సందర్భంగా సీఎం వైఎస్‌ జగన్‌ జిల్లాల్లో సున్నా వడ్డీ, ఇన్‌పుట్‌ సబ్సిడీ లబ్ధిదారులైన రైతులనుద్దేశించి వీడియో కాన్ఫరెన్స్‌ ద్వారా మాట్లాడారు. రైతులను ఆదుకోవడంలో ఈ రోజు నిజంగా మరో ఘట్టం అన్నారు. ఈ కార్యక్రమం వల్ల రైతులకు సకాలంలో పంట రుణాలు చెల్లించడం ఒక అలవాటు అవుతుందని చెప్పారు. గతంలో ఏ ప్రభుత్వం కూడా ఇలా భరోసా ఇవ్వలేదని, మొదటిసారిగా ఆ నమ్మకం కలిగిస్తున్నామన్నారు. రాష్ట్రంలోని ప్రతి మూడు కుటుంబాలలో ఒక కుటుంబానికి అంటే దాదాపు 50 లక్షల రైతుల కుటుంబాలకు ఏటా రూ.13,500 చొప్పున రైతు భరోసా అందుతోందని వివరించారు. సీఎం వైఎస్‌ జగన్‌ ఇంకా ఏమన్నారంటే.. వైఎస్సార్‌ సున్నా వడ్డీ సొమ్మును రైతుల ఖాతాల్లో జమ చేస్తున్న సీఎం వైఎస్‌ జగన్‌. చిత్రంలో మంత్రులు వేణుగోపాలకృష్ణ, కన్నబాబు, ముత్తంశెట్టి శ్రీనివాసరావు తదితరులు  గతంలో ఏం జరిగింది?  ► గతంలో రైతులను ఎలా మోసం చేశారో చూశాం. రుణ మాఫీ చేస్తామని చెప్పి చేయలేదు. 2015–16లో రైతులు రుణమాఫీ అవుతుందని ఆశించారు. వారు బ్యాంకులకు రుణాలు చెల్లించలేదు. కానీ వారికి నిరాశే మిగిలింది.  ► 2015–18 వరకు సున్నా వడ్డీ బకాయిలు కట్టకపోవడంతో దాదాపు రూ.1,180 కోట్లు బకాయి పడితే రైతుల మీద బాధ్యత, మమకారంతో మన ప్రభుత్వమే చెల్లించిందని గర్వంగా చెబుతున్నాను.  మనం ఏం చేస్తున్నాం?  ► ఏ సీజన్‌లో పంట నష్టాన్ని అదే సీజన్‌లో ఇస్తామని చెప్పాము. ఆ మేరకు ఈ ఏడాది ఖరీఫ్‌లో జూన్‌ నుంచి సెప్టెంబర్‌ వరకు జరిగిన పంట నష్టానికి సంబంధించి పెట్టుబడి రాయితీ (ఇన్‌పుట్‌ సబ్సిడీ)గా గత నెలలో 1.66 లక్షల రైతు కుటుంబాలకు దాదాపు రూ.136 కోట్లు వారి వారి ఖాతాల్లో జమ చేశాం. ► అక్టోబర్‌లో జరిగిన నష్టానికి సంబంధించి ఇవాళ 1,97,525 రైతు కుటుంబాలకు రూ.132 కోట్లు ఇన్‌పుట్‌ సబ్సిడీ చెల్లిస్తున్నాం. లక్ష లోపు రుణాలు తీసుకుని సకాలంలో తిరిగి చెల్లిస్తే, వారి వడ్డీ ప్రభుత్వమే కడుతోంది. ఎవరికైనా ఈ పథకాలు మిస్‌ అయితే గ్రామ సచివాలయాల్లో సంప్రదించాలి. లేదా వలంటీర్‌ను కలిసి చెప్పాలి. ► వైఎస్సార్‌ జలకళ ద్వారా ఉచితంగా బోర్ల తవ్వకం మొదలైంది. పేద రైతులకు మోటార్లు కూడా ఉచితంగా అందించబోతున్న ప్రభుత్వం మనది మాత్రమే.  రైతుల కోసం బకాయిలు చెల్లించాం ► గత ప్రభుత్వం ఎగనామం పెట్టిన రూ.8,655 కోట్లు ఉచిత విద్యుత్‌ బకాయిలు, రూ.960 కోట్లు ధాన్యం కొనుగోళ్ల బకాయిలు, రూ.384 కోట్లు విత్తనాల సబ్సిడీ బకాయిలు, సున్నా వడ్డీ రాయితీకి సంబంధించి రూ.1,180 కోట్లు ఇస్తున్నాం. ► రైతులకు పగలే నాణ్యమైన విద్యుత్‌ ఇవ్వాలంటే ఆ స్థాయిలో ఫీడర్లు లేవు. కేవలం 58 శాతం ఫీడర్లు మాత్రమే ఆ కెపాసిటీతో ఉన్నాయి. దాంతో దాదాపు రూ.1,700 కోట్లు ఖర్చు చేసి వాటి సామర్థ్యం పెంచి, దాదాపు 90 శాతం ఫీడర్లు రెడీ చేసి నాణ్యమైన విద్యుత్‌ పగటి పూటే ఇవ్వగలుగుతున్నాం. మిగిలిన 10 శాతం ఫీడర్లు కూడా ఈ నెలాఖరులోగా సిద్ధమవుతాయని అధికారులు చెబుతున్నారు. వచ్చే నెలలోనే బీమా క్లెయిమ్స్‌ ► పంటల బీమా కింద రైతులు తమ వాటాగా కేవలం రూ.1 చెల్లిస్తే, ప్రభుత్వం పూర్తి ప్రీమియమ్‌ (రైతుల వాటా రూ.506 కోట్లు సహా) దాదాపు రూ.1,031 కోట్లు చెల్లిస్తోంది. ఆ బీమాకు సంబంధించి సుమారు రూ.1,800 కోట్ల బీమా క్లెయిమ్‌ డిసెంబర్‌లో చెల్లించే కార్యక్రమం జరుగుతుంది. అన్నదాతల కోసం ఎన్నెన్నో చేస్తున్నాం  ► 13 జిల్లాలలో అగ్రి ల్యాబ్‌లు, 147 ఇంటిగ్రేటెడ్‌ ల్యాబ్‌లు ఏర్పాటు చేస్తున్నాం. రైతులు, అక్క చెల్లెమ్మలకు ఇంకా ఆదాయం వచ్చేలా, ఈ నెల 26 నుంచి అమూల్‌ ద్వారా తొలి దశగా పాల సేకరణ ప్రారంభిస్తున్నాం. ప్రకాశం, చిత్తూరు, వైఎస్సార్‌ కడప జిల్లాలలో తొలి దశ పాల సేకరణ మొదలవుతుంది.  ► పాల సేకరణ కోసం మొత్తం 9,800 బల్క్‌ మిల్క్‌ చిల్లింగ్‌ యూనిట్లు (బీఎంసీయూ) ఆర్‌బీకేల పక్కనే ఏర్పాటు చేస్తున్నాం.  ► 2019–20లో దాదాపు రూ.15 వేల కోట్లతో ధాన్యం కొనుగోలు చేశాం. కోవిడ్‌ సమయంలోనూ రూ.3,200 కోట్లతో పంటలు కొనుగోలు చేశాం. రూ.666 కోట్లు పత్తి కొనుగోలు కోసం ఖర్చు చేశాం.   ఎంతో ఆశ్చర్యపోతున్నాం సీఎంగా జగన్‌మోహన్‌రెడ్డి ఏది చెప్పినా సాధ్యం అవుతోంది. ఇది రైతులతో సహా మమ్మల్ని ఆశ్చర్య పరుస్తోంది. 2014 నుంచి 2019 వరకు చంద్రబాబు చేసిన ప్రచారానికి, ఆచరణలో చేసిన దానికి ఎక్కడా పొంతన లేదు. కానీ మీరు (వైఎస్‌ జగన్‌) వచ్చాక చెప్పింది చెప్పినట్లు జరుగుతోంది.      – కె.కన్నబాబు, వ్యవసాయ శాఖ మంత్రి  మీ హయాంలో సాగు సులభమైంది మేం వ్యవసాయం వదిలేద్దామనుకున్నాం. మీరు వచ్చాక తిరిగి సాగు సులభమైంది. నేను లక్ష రూపాయలు రుణం తీసుకున్నాను. నాకు రూ.3,218 వడ్డీ మాఫీ వచ్చింది. మా ఉమ్మడి కుటుంబంలో 8 మందికి రూ.3 వేలు చొప్పున రూ.24 వేలు వడ్డీ మాఫీ వచ్చింది. ఇప్పుడు క్రాప్‌ ఇన్సూరెన్స్‌ కూడా మీరే కడుతున్నారు. వివిధ పథకాల ద్వారా మా కుటుంబానికి రూ.2 లక్షల వరకు లబ్ధి కలిగింది.   – ఎర్రినాయుడు, పెంట శ్రీరాంపురం, గంట్యాడ మండలం, విజయనగరం జిల్లా సీఎం జగన్‌ చిత్రపటానికి క్షీరాభిషేకం చేస్తున్న గుంటూరు జిల్లా నంబూరు రైతులు  మీ పట్ల నమ్మకం పెరిగింది మనసుంటే మార్గం ఉంటుందని మీరు నిరూపించారు. నా ఖాతాలో వడ్డీ రాయితీ రూ.3,876 జమ అయింది.  మీ పనితీరు పట్ల ప్రజల్లో పూర్తిగా నమ్మకం కలిగింది. సెప్టెంబర్‌లో నా పంట దెబ్బతింది. రైతు భరోసా కేంద్రానికి వెళ్లి నమోదు చేసుకుంటే.. డబ్బులు వస్తాయంటే మా నాన్న అవేమీ రావన్నాడు. కానీ మీరు నెల రోజుల్లోనే పంట నష్టానికి డబ్బులు వేశారు. కౌలు రైతులను గుర్తించింది మీరే.     – విజయభాస్కర్‌రెడ్డి, సత్తెనపల్లి మండలం, గుంటూరు జిల్లా

ఓ సారి అధికారం ఇస్తే పది కాలాలపాటు ప్రజల సేవలో తరించాలనుకోవాలి...ప్రజల మన్ననలు పొందుతూ వారి మదిలో పదిలంగా స్థానం  సంపాదించాలని ప్రజాప్రతినిధి తపన పడాలి. కానీ టీడీపీ హయాంలో ప్రజాప్రతినిధులంటే నిధుల స్వాహాకే వచ్చినట్టుగా...అందుకే పదవిని చేపట్టినట్టుగా యథేచ్ఛగా దోపిడీకి పాల్పడ్డారు. ఆ ఐదేళ్లే కాకుండా రానున్న ఐదేళ్లలో కూడా దోపిడీకి స్కెచ్‌ వేసుకొని మరీ స్వాహాకు ఉపక్రమించడం మరీ విడ్డూరం. అదృష్టవశాత్తూ వారు అధికారానికి దూరమయ్యారు కాబట్టి సరిపోయింది గానీ లేదంటే నిలువు దోపిడీ జరిగేది. సాక్షి ప్రతినిధి, రాజమహేంద్రవరం: పచ్చ నేతల ముందు చూపుతో సహకార సంఘాల్లో కోట్ల రూపాయలను కొల్లగొట్టారు. జిల్లాలోని ఏ సహకార సంఘాన్ని కదిలించినా గత టీడీపీ ఏలుబడిలో ఎటు చూసినా అవినీతి కుంభకోణాలు బట్టబయలవుతున్నాయి. 2019 సార్వత్రిక ఎన్నికలకు ముందు అధికారంలో ఉన్న చంద్రబాబు సర్కార్‌ అండాదండా చూసుకుని తెలుగు తమ్ముళ్లు చెలరేగిపోయారు. మళ్లీ వచ్చేది మన ప్రభుత్వమనే ధీమాతో టీడీపీ నేతలు సహకార సంఘాల్లో దొంగలు పడ్డట్టుగా చొరబడి దొరికినంత దోచుకున్నారు. చంద్రబాబు మరోసారి సీఎం అవుతారు, పంట రుణాలు మాఫీ చేస్తారని ఆ పార్టీ ఏలుబడిలోని సహకార సంఘాల పాలక వర్గాలు సార్వత్రిక ఎన్నికలకు ముందు గట్టి నమ్మకంతో ఉన్నారు. అతి విశ్వాసంతోనే  బినామీ పేర్లతో కోట్లు రుణాలు లాగేశారు. తీరా ఎన్నికల్లో ప్రజలు ఆ పార్టీకి ఘోర పరాభవాన్ని రుచి చూపించారు. ఈ పరిస్థితుల్లో తెలుగు తమ్ముళ్లు పెట్టుకున్న ఆశలు గల్లంతయ్యాయి. ప్రభుత్వం వచ్చేస్తుంది, చంద్రబాబు రుణ మాఫీ అమలవుతుందనే గుడ్డి నమ్మకంతో జిల్లాలోని పలు సహకార సంఘాల ప్రతినిధులు నకిలీ పాస్‌ పుస్తకాలు, బినామీ పేర్లతో రూ.కోట్లకు పడగలెత్తారు. వైఎస్సార్‌ సీపీ అధికారంలోకి వచ్చి జిల్లా కేంద్ర సహకార బ్యాంక్‌ చైర్మన్‌గా అనంత ఉదయభాస్కర్‌ బాధ్యతలు స్వీకరించాక ఈ కుంభకోణాలను ఒకటొకటిగా ఛేదిస్తున్నారు.   గతం దొంగల దోబూచులాట  కొన్ని సంఘాలు, బ్రాంచీల్లో కోట్ల రూపాయలు కొల్లగొట్టిన కుంభకోణాలు బయటకు రాకుండా సంఘాల్లో పనిచేస్తున్న అధికారులు దాచిపెడుతున్నారు. గత పాలకవర్గాల్లో సంఘాలపై పడి నిలువునా దోచుకున్న వారే కావడం గమనార్హం. గత టీడీపీలో జిల్లా కేంద్ర సహకార బ్యాంక్‌ చైర్మన్‌ వరుపుల రాజా, సీఈఓల హయాంలో డీసీసీబీ, సహకార సంఘాలు కుంభకోణాలమయంగా మారిపోయాయి. ఈ కుంభకోణాల గుట్టును ‘సాక్షి’ వరుస కథనాలతో రట్టు చేస్తున్న సంగతి పాఠకులకు విదితమే. ఇలా ఏజెన్సీలోని మొల్లేరు, మెట్ట ప్రాంతంలో లంపకలోవ, కోనసీమలో వద్దిపర్రు...తదితర సొసైటీలపై పడి రూ.కోట్లు కొట్టేసిన వైనాన్ని సాక్షి’ వెలుగులోకి తేవడం, డీసీసీబీ చైర్మన్‌ అనంతబాబు విచారణ జరిపించి బాధ్యులపై చర్య తీసుకుంటున్నారు.  గండేపల్లిలో తాజాగా...  ఈ వరుసలోనే తాజాగా మెట్ట ప్రాంతంలోని గండేపల్లి సహకార సంఘం, గండేపల్లి డీసీసీ బ్రాంచీలో రూ.కోట్లు కొల్లగొట్టిన కుంభకోణం ఒకటి తాజాగా వెలుగులోకి వచ్చింది. 2017 నవంబరు నెల నుంచి గండేపల్లి బ్రాంచి పరిధిలోని గండేపల్లి పీఏసీఎస్‌లో నకిలీ డాక్యుమెంట్లు, నకిలీ బాండ్లు, బినామీ రైతుల పేరుతో స్వాహా బాగోతమిదీ. గండేపల్లి డీసీసీబీ బ్రాంచి సూపర్‌వైజర్‌గా నేదూరి వాసుదేవరెడ్డి గతేడాది అక్టోబరు 28న జాయినయ్యారు. 2020 జనవరి 30న జరిగిన సమావేశంలో తీసుకున్న నిర్ణయం, చైర్మన్‌ ఆదేశాల మేరకు గండేపల్లి సొసైటీ రికార్డులను బ్యాంకులో పరిశీలించేందుకు సూపర్‌వైజర్‌ ప్రయత్నించారు. అందుకు సొసైటీ, బ్రాంచిల నుంచి సహాయ నిరాకరణ ఎదురైంది. ఈ క్రమంలో 2017 నవంబరు 28 నుంచి ఇచ్చిన రుణాలకు సంబంధించి రికార్డులు బ్యాంక్‌కు ఇవ్వలేదనే విషయం గుర్తించారు. గండేపల్లి బ్రాంచిలో సైతం రికార్డులను దాచిపెట్టారు. లోతుగా పరిశీలించే క్రమంలో బ్యాంకులో ఉన్న షాడో రిజిస్టర్, సేవింగ్స్‌ బ్యాంక్‌ ఖాతాల ద్వారా కొంత సమాచారాన్ని సూపర్‌వైజర్‌ సేకరించడంతో విషయం డీసీసీబీ ఉన్నతాధికారుల దృష్టికి కూడా వెళ్లిందని విశ్వసనీయ సమాచారం.   సూపర్‌వైజర్‌ సంతకం లేకుండానే..  సూపర్‌వైజర్‌ సంతకం లేకుండా పది మంది సభ్యుల రుణాలు రెన్యువల్‌ చేసిన వైనం ఆ సందర్భంలోనే బయటపడింది. తన ప్రమేయం లేకుండా రుణాలు రెన్యువల్‌ చేయడంతో ఇందులో పెద్ద కుంభకోణమే దాగి ఉందనే అనుమానం, ఈ వ్యవహారం అటు తిరిగి ఇటు తిరిగి ఎక్కడ తన మెడకు చుట్టుకుంటుందనే భయం వెరసి సూపర్‌వైజర్‌ డీసీసీబీ ఉన్నతాధికారుల దృష్టికి  తీసుకువెళ్లారని తెలియవచ్చింది. ఈ క్రమంలోనే రికార్డులు పరిశీలించే సరికి తీగ లాగితే డొంక కదిలినట్టు గండేపల్లి సొసైటీలో కోటి రూపాయల బినామీ రుణాల బాగోతం బయటకు వచ్చిందంటున్నారు. 10 మంది సభ్యుల రుణాలకు సంబంధించి అడ్వాన్సు స్టేట్‌మెంట్, రికవరీ స్టేట్‌మెంట్‌పై సొసైటీ సూపర్‌వైజర్‌ సంతకాలు లేకపోవడం గమనార్హం. మేనేజర్‌ ఒక్క కలం పోటుతో రూ.99,93,000 లక్షలు స్వల్పకాలిక, దీర్ఘకాలిక పంట రుణాలను 2020, ఫిబ్రవరి 17న రెన్యువల్‌ చేయడం విశేషం. మొదట గుర్తించిన పది మంది సభ్యుల బినామీ రుణాలు రెన్యువల్‌ చేయడంతో మరిన్ని రుణాలు ఇదే రీతిన రెన్యువల్‌ చేశారని తెలియవచ్చింది. అలా గండేపల్లి సొసైటీలో మొత్తం 156 మంది సభ్యుల పేరుతో బినామీ పాస్‌పుస్తకాలు, నకిలీ డాక్యుమెంట్లు, నకిలీ బాండ్‌ పేపర్లతో సుమారు రూ.23 కోట్లు రుణాలు అప్పటి పాలకవర్గం హయాంలో విడుదలయ్యాయి. ఈ 156లో మొత్తం 50 మంది సభ్యుల(బినామీలు) రుణాలను రెన్యువల్‌ చేయగా, మిగిలిన 106 మంది రెన్యువల్‌ చేసే క్రమంలోనే విషయం బయటకు పొక్కడంతో బ్రేక్‌ పడిందంటున్నారు. ఈ నకిలీ పాస్‌పుస్తకాలు, డాక్యుమెంట్ల కోసం ప్రత్యేకంగా ఒక ప్రింటింగ్‌ మెషీన్‌ను గండేపల్లిలో ఏర్పాటు చేశారని, చివరకు బాండు పేపర్లను సబ్‌ రిజిస్ట్రార్‌ సీల్‌ను కూడా టేంపరింగ్‌ చేశారని విశ్వసనీయంగా తెలిసింది. ఈ బినామీ రుణాలకు సంబంధించిన మొత్తం జాబితా జిల్లా కేంద్ర సహకార బ్యాంక్‌కు కూడా చేరినట్టు తెలిసింది. ఈ జాబితా ఆధారంగా డీసీసీబీ నిష్పక్షపాతమైన విచారణ జరిపితే కుంభకోణం వెలుగులోకి రానుంది.        ఇంకా మా దృష్టికి రాలేదు గండేపల్లి బ్రాంచ్‌ పరిధిలో రుణాల అవకతవకల విషయం నా దృష్టికి రాలేదు. జిల్లాలో ఏ సొసైటీ, బ్రాంచ్‌లో అవకతవకలు జరిగినట్టు మా దృష్టికి వచ్చినా వెంటనే చైర్మన్‌ అనంతబాబు ఆదేశాల మేరకు విచారణ చేస్తున్నాం. బాధ్యులపై చర్యలు తీసుకుని రికవరీ కూడా చేస్తున్నాం. గండేపల్లి సొసైటీ విషయం చైర్మన్‌తో మాట్లాడతాను.  – ప్రవీణ్‌కుమార్, డిసీసీబీ ఇన్‌చార్జ్‌ సీఈవో 

సాక్షి, అమరావతి: గత ఆర్థిక సంవత్సరం (2019–20)లో ఖరీఫ్, రబీతో కలిపి బ్యాంకర్లు రైతులకు లక్ష్యాన్ని మించి పంట రుణాలను అందించాయి. రాష్ట్ర ప్రభుత్వం రైతులకు సున్నా వడ్డీ పథకాన్ని పునరుద్ధరించడమే కాకుండా గత ప్రభుత్వం బకాయి పెట్టిన సున్నా వడ్డీ సొమ్మును కూడా చెల్లిస్తామని ప్రకటించడంతో బ్యాంకులు లక్ష్యానికి మించి పంట రుణాలను మంజూరు చేశాయి. నిజానికి గత ఏడాది ఖరీఫ్‌ రుణాల లక్ష్యం రూ.51,240 కోట్లు కాగా.. రూ.51,511 కోట్లను అందించాయి. అలాగే.. గత రబీలో పంట రుణాలు రూ.32,760 కోట్లకుగాను రూ.37,762 కోట్లను బ్యాంకులు మంజూరు చేశాయి. ఇది లక్ష్యంలో 115.27 శాతం. మొత్తం వ్యవసాయ రంగానికి గత ఆర్థిక ఏడాది రూ.1,15,000 కోట్ల రుణాలివ్వాలని లక్ష్యంగా పెట్టుకోగా.. రూ.1,13,997 కోట్ల రూపాయల మేర  బ్యాంకులు రుణాలను మంజూరు చేశాయి. ఇది లక్ష్యంలో 99.13 శాతం.  సర్కారు దన్నుతో రుణాలకు బ్యాంకుల ఆసక్తి ఇదిలా ఉంటే.. ఈ ఆర్థిక ఏడాది ఇప్పటికే మంచి వర్షాలు పడుతుండటంతో వ్యవసాయ పనులు ఊపందుకున్నాయి. ఈ సంవత్సరం ఖరీఫ్, రబీ కలిపి రూ.94,524 కోట్లు పంట రుణాలను మంజూరు చేయాలని లక్ష్యంగా నిర్ధారించగా ఇప్పటికే రూ.18,323 కోట్లను బ్యాంకులు మంజూరు చేశాయి. అలాగే, ఖరీఫ్, రబీ కలిపి వ్యవసాయ టర్మ్‌ రుణాల కింద రూ.34,036 కోట్లను మంజూరు చేయాలని లక్ష్యంగా నిర్ధారించగా ఇప్పటికే రూ.1,639 కోట్లను మంజూరు చేశాయి. సకాలంలో పంట రుణాలను చెల్లించే రైతులకు సున్నా వడ్డీని వర్తింపజేస్తామని ప్రభుత్వం ప్రకటించడంతో బ్యాంకులు కూడా పంట రుణాలను మంజూరు చేయడానికి ఆసక్తి చూపుతున్నాయి. 

సాక్షి, అమరావతి: రైతులకు అన్నివిధాలా అండదండలు అందిస్తూనే.. కౌలు రైతులకూ పంట రుణాలు ఇచ్చేందుకు ప్రభుత్వం కట్టుబడి ఉందని ఉప ముఖ్యమంత్రి పిల్లి సుభాష్‌ చంద్రబోస్, వ్యవసాయ శాఖ మంత్రి కురసాల కన్నబాబు చెప్పారు. ఇందుకోసం ఈ నెల 20వ తేదీ నుంచి వచ్చే నెల 7వ తేదీ వరకు పంట రుణాల పక్షోత్సవాలు నిర్వహించనున్నామన్నారు. ఈ సందర్భంగా కిసాన్‌ క్రెడిట్‌ కార్డులపై అవగాహన కార్యక్రమాలు చేపడతామని తెలిపారు. కౌలు రైతులందరికీ పంట సాగు హక్కు పత్రాలు ఇప్పించేలా చర్యలు తీసుకుంటున్నట్టు వెల్లడించారు. బుధవారం సచివాలయంలో నిర్వహించిన విలేకరుల సమావేశంలో మాట్లాడుతూ ఏమన్నారంటే.. రైతుల హక్కులకు భంగం కలగదు: పిల్లి సుభాష్‌చంద్రబోస్‌ ► వ్యవసాయ రంగం అభివృద్ధిపై సీఎం వైఎస్‌ జగన్‌ దృష్టి సారించారు. ► రైతులతో పాటు కౌలుదారులకు కూడా మేలు చేయాలనే ఉద్దేశంతో నూతన సాగుదారుల చట్టాన్ని ప్రభుత్వం తీసుకొచ్చింది. ► ఈ చట్టం వల్ల భూ యజమానులైన రైతుల హక్కులకు ఎటువంటి భంగం కలగదు.  ► 11 నెలల సాగు అనంతరం కౌలు హక్కులు వీడిపోయేలా చట్టం రూపొందించాం. ► కౌలుదారుల వివరాలను అధికారులకు చెప్పాల్సిన నైతిక బాధ్యత రైతులపై ఉంది. ► కేంద్ర ప్రభుత్వం కేవలం రైతులకు మాత్రమే పంట రుణాలిస్తోంది. ఏపీలో రైతులతో పాటు కౌలుదారులకూ రుణాలు అందించాలని సీఎం నిర్ణయించారు. కౌలు రైతులకు రూ.8,500 కోట్ల రుణాలు : కురసాల కన్నబాబు ► రుణ పక్షోత్సవాల్లో భాగంగా ప్రతి గ్రామంలోనూ సమావేశాలు నిర్వహించి పంట సాగు హక్కు పత్రం (సీసీఆర్సీ) కార్డులు పొందిన కౌలు రైతులందరికీ పంట రుణాలు అందిస్తాం. ► రాష్ట్రంలో ఇప్పటివరకు 4,02,229 మందికి సీసీఆర్సీ కార్డులు అందజేశాం. మరో లక్షన్నర వరకూ కార్డులు అందిస్తాం. రూ.8,500 కోట్లను కౌలుదారులకు పంట రుణాలుగా అందజేయాలని ముఖ్యమంత్రి వైఎస్‌ జగన్‌మోహన్‌రెడ్డి లక్ష్యంగా నిర్దేశించారు. ► త్వరలో జిల్లాలు, మండల స్థాయిలో వ్యవసాయ సలహా బోర్డులు ఏర్పాటు చేయబోతున్నాం. అభ్యుదయ రైతు అధ్యక్షతన ఏర్పాటయ్యే ఈ బోర్డులు పంటల ప్రణాళికలో కీలక పాత్ర పోషిస్తాయి.  ► రైతులకు వడ్డీ లేని రుణ బకాయిల కింద రూ.1,150 కోట్ల బకాయిలను ప్రభుత్వం ఇటీవలే విడుదల చేసింది.  ► ఈ విషయంలో బ్యాంకర్లు సైతం హర్షాతిరేకాలు వ్యక్తం చేశారు. ఇది మా ప్రభుత్వ పనితీరుకు నిదర్శనం. రూ.200 కోట్లతో పొగాకు కొనుగోళ్లు ► పొగాకు కొనుగోళ్ల కోసం రాష్ట్ర ప్రభుత్వం రూ.200 కోట్లను విడుదల చేసింది. తూర్పు, పశ్చిమ గోదావరి జిల్లాల్లో కూడా అన్ని ప్లాట్‌ఫారాల్లో కొనుగోళ్లు ప్రారంభమవుతాయి. ► రాష్ట్రంలో వర్షపాతం సాధారణం కంటే 55.5 శాతం అధికంగా కురవటం శుభసూచకం. ఖరీఫ్‌ పనులు ఆశాజనకంగా ఉన్నాయి. ఇప్పటికే 32 శాతం వరి నాట్లు పూర్తయ్యాయి.  ► సీఎం జగన్‌మోహన్‌రెడ్డి దూరదృష్టితో తీసుకున్న చర్యల కారణంగా ఈ ఏడాది మే నాటికే 12.61 లక్షల మంది రైతులకు 8.43 లక్షల క్వింటాళ్ల నాణ్యమైన విత్తనాలు అందజేశాం. ఇప్పటికే రైతులకు ఇన్‌ పుట్‌ సబ్సిడీ అందజేశాం. ► ప్రస్తుత వర్షాల కారణంగా తూర్పు, పశ్చిమ గోదావరి జిల్లాల్లో కొన్నిచోట్ల నారుమడులు ముంపునకు గురైనట్టు సమాచారం అందుతోంది. వివరాలు అందజేయాలని అధికారుల్ని ఆదేశించాం. సంబంధిత రైతులను ఆదుకుంటాం. 

సాక్షి, రంగారెడ్డి జిల్లా: జిల్లాలో వానాకాలం సీజన్‌ రుణ ప్రణాళిక ఖరారు కాలేదు. పంట రుణాల పంపిణీపై ఇంకా సందిగ్ధత నెలకొంది. వర్షాలు కురుస్తుండటంతో అన్నదాతలు విత్తనాలు విత్తుతున్నారు. సీజన్‌ ఆరంభంలోనే రుణ ప్రణాళిక విడుదల చేసి వ్యవసాయ అవసరాలకు విరివిగా పంట రుణాలు ఇవ్వాల్సి ఉండగా.. ఆ దిశగా అడుగులు పడడం లేదు. కరోనా వైరస్‌ వ్యాప్తి.. లాక్‌డౌన్‌ నేపథ్యంలో పంటల సాగుకు కర్షకుల వద్ద డబ్బులు లేవు. రైతుబంధు సొమ్ము ఇంకా అందలేదు. ఇటువంటి పరిస్థితుల్లో పంట రుణాలపై రైతులు ఆశలు పెట్టుకున్నారు. వర్షాలు కురుస్తుండడంతో ఇప్పటికే జిల్లా వ్యాప్తంగా వేల ఎకరాల్లో విత్తనాలు విత్తారు. మరికొన్ని రోజుల్లో పంటల సాగు మరింత ఊపందుకోనుంది. వీలైనంత త్వరంగా ప్రణాళిక ఖరారు చేసి రుణ వితరణ చేపడితేనే రైతుకు అండ లభిస్తుంది. గతేడాది రూ.1,050.55 కోట్లతో ఖరీఫ్‌ రుణ ప్రణాళిక ఖరారు చేయగా.. ఇందులో రూ.486.34 కోట్లను మాత్రమే రైతులకు రుణంగా ఇచ్చారు. జిల్లాలో వానాకాలం సాగే కీలకమైనది. ముఖ్యంగా ఈ సీజన్‌లో పంట మార్పిడి చేయాలని ప్రభుత్వం నిర్ణయించింది. ఇందులో భాగంగా నియంత్రిత సాగు విధానాన్ని జిల్లా వ్యవసాయ శాఖ రూపొందించింది. రికార్డు స్థాయిలో పంటలు సాగవుతాయని అంచనా వేసింది. దాదాపు 4 లక్షల ఎకరాల్లో రైతులు పంటలు సాగు చేస్తారని ప్రణాళికలో పేర్కొన్నారు. ప్రధానంగా పత్తి రెండు లక్షల ఎకరాల్లో సాగవుతుందని ప్రస్తావించారు. ఇప్పటికే వర్షాలు కురుస్తుండటంతో జిల్లాలో 70వేల ఎకరాల్లో విత్తనాలు విత్తినట్లు వ్యవసాయ శాఖ లెక్కలు వెల్లడిస్తున్నాయి. ఇందులో 60వేల ఎకరాల్లో పత్తికాగా.. మరో పది వేల ఎకరాల విస్తీర్ణంలో కంది, జొన్న, పెసర తదితర పంటలు వేశారు. అంటే.. సాగు ప్రారంభమైనా రుణ ప్రణాళిక ఖరారు కాకపోవడం అన్నదాతలను ఆందోళనకు గురిచేస్తోంది. వాస్తవంగా మే నెలలోనే ప్రణాళికకు తుదిరూపు ఇచ్చి రుణ వితరణ మొదలు పెట్టాల్సి ఉంది. కోవిడ్‌ నేపథ్యలో విధించిన లాక్‌డౌన్‌ వల్ల ఆలస్యం జరిగిందని బ్యాంకర్లు వెల్లడిస్తున్నారు.   బ్యాంకుల మెలిక..: జిల్లా వ్యాప్తంగా 2.70 లక్షల మంది రైతులు ఉండగా ఇందులో సుమారు 1.60 లక్షల మంది పంట రుణాలపై ఆధారపడి వ్యవసాయం చేస్తున్నారు. రుణ ప్రణాళికతో సంబంధం లేకుండా కొన్ని బ్యాంకులు రైతులకు పంట రుణాలు పంపిణీ చేస్తున్నాయి. మిగిలిన బ్యాంకర్లు మెలిక పెట్టడం ఆనవాయితీగా వస్తోంది. ప్రభుత్వం తాజాగా పంట మార్పిడి విధానాన్ని తెరపైకి తేవడంతో వ్యవసాయ శాఖ దానిపైనే ప్రధానదృష్టి కేంద్రీకరిస్తున్న నేపథ్యంలో బ్యాంకులు విరివిగా రైతులకు పంట రుణాలు ఇవ్వాల్సిన అవసరం ఉంది. ఆర్‌బీఐ నుంచి నిబంధనలు రాకపోవడం వల్లనే రుణ ప్రణాళిక ఖరారులో జాప్యం జరిగిందని లీడ్‌బ్యాంక్‌ మేనేజర్‌ రిజ్వాన్‌ ‘సాక్షి’కి తెలిపారు. ఈ నెలాఖరులోగా ప్రణాళిక ఖరారవుతుందని చెప్పారు. ఇప్పటికే కొన్ని బ్యాంకులు రుణ వితరణ చేపట్టాయన్నారు.

సాక్షి, అమరావతి: రాష్ట్రంలో సాగు విస్తీర్ణం పెరుగుతుండటంతో ప్రస్తుత ఆర్ధిక సంవత్సరం (2020–21)లో వ్యవసాయ రుణ ప్రణాళిక రూ.1,46,302 కోట్లుగా అధికారులు తాత్కాలిక అంచనా వేశారు. ఇందులో పంట రుణాలు రూ.1,05,034 కోట్లు కాగా వ్యవసాయ టర్మ్‌ రుణాలు రూ.41,268 కోట్లున్నాయి. ఎక్కడా విత్తనాల కొరత లేకపోవడం, రైతు భరోసా ద్వారా అన్నదాతలకు క్రమం తప్పకుండా పెట్టుబడి సాయం అందుతుండటం, పుష్కలంగా నీరు అందుబాటులో ఉన్నందున గత ఖరీఫ్‌లో అంచనాలను మించి అదనంగా 17.85 లక్షల ఎకరాల సాగు విస్తీర్ణం నమోదైంది. ఈసారి ఖరీఫ్‌లో 90.15 లక్షల ఎకరాలు సాగు కావచ్చని అంచనా వేస్తున్నా రైతన్నలకు అన్ని రకాలుగా పరిస్థితులు అనుకూలంగా ఉండటంతో సాగు విస్తీర్ణం బాగా పెరిగే అవకాశం ఉందని వ్యవసాయ శాఖ అధికారులు భావిస్తున్నారు. రైతు భరోసా కేంద్రాల ద్వారా గ్రామాల్లోనే సర్టిఫైడ్‌ విత్తనాలు అందుబాటులోకి రావడం, ఎరువుల దగ్గర నుంచి రైతులకు ఏది కావాలన్నా ప్రభుత్వం సమకూరుస్తుండటంతో ఖరీఫ్‌లో సాగు విస్తీర్ణం రికార్డు స్థాయిలో నమోదయ్యే అవకాశం ఉందని పేర్కొంటున్నారు.  రికార్డు స్థాయిలో సాగు, దిగుబడులు.. అధికారం చేపట్టిన నాటి నుంచి ముఖ్యమంత్రి వైఎస్‌ జగన్‌మోహన్‌రెడ్డి వ్యవసాయానికి అత్యధిక ప్రాధాన్యం ఇవ్వడంతో రాష్ట్రంలో ఆహార ధాన్యాల దిగుబడి రికార్డు స్థాయిలో 172 లక్షల మెట్రిక్‌ టన్నులు నమోదైంది. గత ఖరీఫ్‌లో 87.80 లక్షల ఎకరాల్లో సాగు అవుతుందని అంచనా వేయగా అంచనాలను మించి 105.65 లక్షల ఎకరాల సాగు విస్తీర్ణం నమోదు కావడం విశేషం. గత ఏడాది వైఎస్సార్‌ రైతు భరోసా ద్వారా పెట్టుబడి సాయంగా రూ.6,594 కోట్లను 46.69 లక్షల మంది రైతు కుటుంబాలకు ప్రభుత్వం అందచేసింది. నేరుగా వారి ఖాతాల్లో డబ్బులు జమ అయ్యాయి. ముఖ్యమంత్రి జగన్‌ ప్రత్యేక చొరవ చూపి కౌలు రైతులకు కూడా రైతు భరోసా ఇచ్చారు. దీంతో సాగు విస్తీర్ణం గణనీయంగా పెరగడంతో పాటు రికార్డు స్థాయిలో ఆహార ధాన్యాల దిగుబడి నమోదైంది. అంతే కాకుండా కరోనా కష్ట కాలంలో రైతుల పంటలకు గిట్టుబాటు ధర కల్పించేందుకు ఏకంగా రూ.2,200 కోట్లను ధరల స్ధిరీకరణ నిధి నుంచి ప్రభుత్వం వ్యయం చేసింది.  ఆర్బీకేలతో విత్తనాలకూ ‘భరోసా’ ప్రస్తుత ఖరీఫ్‌ సీజన్‌లో భారీ, మధ్య తరహా ప్రాజెక్టులు, చిన్న తరహా ప్రాజెక్టులు, ఏపీఎస్‌ఐడీసీ కింద రాష్ట్రంలో 90.15 లక్షల ఎకరాల్లో సాగు కావచ్చని అధికారులు ముందస్తు అంచనా వేశారు. అయితే గతేడాది లెక్కలను బట్టి చూస్తే ఇది మరింత పెరిగే అవకాశం ఉంది. వ్యవసాయ రంగానికి పెద్దపీట వేస్తున్న రాష్ట్ర ప్రభుత్వం వరుసగా రెండో ఏడాది కూడా రైతు భరోసా ద్వారా ఈ సంవత్సరం తొలి విడతగా ఇప్పటికే రూ.3,675 కోట్లను నేరుగా 49.43 లక్షల మంది రైతుల ఖాతాల్లో మే 15వ తేదీనే నగదు జమ చేసింది. అంతేకాకుండా రాష్ట్ర చరిత్రలో తొలిసారిగా అన్నదాతలకు రైతు భరోసా కేంద్రాల ద్వారా సబ్సిడీపై విత్తనాల సరఫరాను ప్రభుత్వం ప్రారంభించింది. రాష్ట్రవ్యాప్తంగా ఇప్పటికే 8.43 లక్షల క్వింటాళ్ల విత్తనాలను సబ్సిడీపై గ్రామాల్లో పంపిణీ చేశారు.  ఎరువులు బఫర్‌ స్టాక్‌ రైతులందరికీ నూటికి నూరు శాతం కిసాన్‌ క్రెడిట్‌ కార్డులను అందచేయడమే కాకుండా పంట రుణాలను అందజేయాలని ప్రభుత్వం బ్యాంకర్లను ఆదేశించింది. ఈ–పంట పోర్టల్‌లో నమోదైన రైతులందరికీ బ్యాంకులు పంట రుణాలను అందజేయనున్నాయి. రైతులకు ఎరువులు కొరత లేకుండా సరఫరా చేసేందుకు అవసరానికి మించి బఫర్‌ స్టాక్‌ సిద్ధం చేయాలని మార్క్‌ఫెడ్‌ను రాష్ట్ర ప్రభుత్వం ఆదేశించింది. 17.50 లక్షల మెట్రిక్‌ టన్నుల ఎరువులకుగానూ ఇప్పటికే 11 లక్షల మెట్రిక్‌ టన్నులను సిద్ధంగా ఉంచారు. 1.39 లక్షల మెట్రిక్‌ టన్నుల యూరియా కూడా అందుబాటులో ఉంది. ఖరీఫ్‌లో రైతులకు ఎలాంటి లోటు లేకుండా ముందస్తు ఏర్పాట్లను రాష్ట్ర ప్రభుత్వం చేసింది. రుణాలకూ ఇబ్బంది లేదు.. వైఎస్సార్‌ రైతు భరోసా కేంద్రాలు ప్రారంభం కావడంతో ఇక రైతులకు అవసరమైన అన్ని  సదుపాయాలు గ్రామంలోనే అందనున్నాయి. గతంలో రైతులు విత్తనాలు కావాలన్నా, ఎరువులు కావాలన్నా, పురుగు మందులు కావాలన్నా  మండల కేంద్రాలకు, నియోజకవర్గ కేంద్రాలకు వెళ్లి రోజుల తరబడి పడిగాపులు కాయాల్సి వచ్చేది. అదునులో విత్తనాలు లభ్యం కాక అవస్థలు ఎదుర్కొనేవారు. ఇప్పుడు రైతులకు ఏది కావాలన్నా రైతు భరోసా కేంద్రాల ద్వారా వ్యవసాయ అసిస్టెంట్‌లు, ఉద్యాన అసిస్టెంట్‌లు, సెరికల్చర్‌ అసిస్టెంట్లు రైతులకు చేదోడువాదోడుగా ఉంటారు. సాగు చేస్తూ ఇప్పటివరకు రుణాలు పొందని రైతులను గుర్తించి దగ్గరలోని బ్యాంకుల్లో నమోదు చేయిస్తారు.

సాక్షి, హైదరాబాద్‌: రైతులకు కేంద్ర ప్రభుత్వం శుభవార్త అందించింది. కరోనా వైరస్‌ వణికిస్తున్నవేళ వారికి అండగా నిలవనుంది. రానున్న వానాకాలానికి రైతులు తీసుకునే పంట రుణాలకు అదనంగా 10 శాతం కలిపి ఇవ్వాలని నిర్ణయించింది. ఈ మేరకు కేంద్ర ఆదేశాలకు అనుగుణంగా రాష్ట్ర వ్యవసాయ శాఖ బ్యాంకర్లకు విన్నవించింది. రైతులు ఏ పంటలు వేస్తారో, ఆ ప్రకారం జిల్లాల వారీగా స్కేల్‌ ఆఫ్‌ ఫైనాన్స్‌ను ఖరారు చేసిన సంగతి తెలిసిందే. రైతులకు వారికున్న భూమి, పట్టాదారు పాసు పుస్తకం ఆధారంగా రుణ పరిమితి ఉంటుంది. ఆ నిర్ణీత సొమ్ముకు అదనంగా 10 శాతం ఇస్తారు. ఉదాహరణకు ఒక రైతుకు రూ.50వేల పంట రుణ అర్హత ఉందనుకుంటే, దానికి పది శాతం కలిపి రూ.55 వేలు ఇస్తారు. అలాగే రూ.లక్ష తీసుకునే రైతులకు రూ.1.10 లక్షలు ఇస్తారు. దీని ప్రకారం వానాకాలంలో పంట రుణ లక్ష్యం కూడా ఆ మేరకు పెరుగుతుందని వ్యవసాయశాఖ వర్గాలు తెలిపాయి.  మొత్తం రూ. 33,713 కోట్ల రుణం... రాష్ట్ర స్థాయి బ్యాంకర్ల సమితి (ఎస్‌ఎల్‌బీసీ) నిర్ణయం మేరకు 2020–21 రుణ ప్రణాళికలో వానాకాలానికి రూ.30,649 కోట్ల రుణ లక్ష్యం ఉంది. కేంద్ర ప్రభు త్వ ఆదేశాల మేరకు ఈ రుణ లక్ష్యానికి అదనంగా 10 శాతం అంటే రూ.3,064 కోట్లు అవుతుంది. అది కలిపితే రూ.33,713 కోట్లు అవుతుందని అంటున్నా రు. ఇది ఈ వానాకాలం సీజన్‌కే వర్తిస్తుందని వ్యవసాయశాఖ కార్యదర్శి జనార్దన్‌రెడ్డి తెలిపారు. కాగా, గతేడాది వానాకాలం సీజన్‌లో రూ.29,244 కోట్ల రు ణ లక్ష్యం ఉంటే.. రూ.18,711 కోట్లు మాత్రమే రైతులకు బ్యాంకులు పంపిణీ చేశాయి. అలాగే యాసంగి సీజన్‌లో రూ.19,496 కోట్ల లక్ష్యం పెట్టుకోగా.. రూ.14,622 కోట్లు మాత్రమే ఇచ్చాయి. ప్రతి సీజన్‌లోనూ ఏదో కారణంతో పూర్తిస్థాయిలో రుణాలివ్వకుండా బ్యాంకర్లు కొర్రీలు పెడుతున్నారు.   రుణమాఫీ లబ్ధిదారుల స్క్రీనింగ్‌... రుణమాఫీ సొమ్మును రైతుల ఖాతాల్లో వేసేందుకు రాష్ట్ర ప్రభుత్వం రంగం సిద్ధం చేసింది. మొదటి విడతగా రూ.25 వేల లోపున్న రైతులకు రూ.1,200 కోట్లు జమ చేస్తారు. లబ్ధిదారుల జాబితా స్క్రీనింగ్‌ ఇప్పటివరకు పూర్తి కాకపోవడంతో చెల్లింపుల్లో జాప్యం జరుగుతోంది. రైతులు కొందరు రెండు మూడు బ్యాంకుల్లోనూ పంట రుణాలు తీసుకొని ఉంటారన్న భావనతో స్క్రీనింగ్‌ జరుపుతున్నారు. ఇది పూర్తయ్యాక తుది జాబితా తయారుచేసి రుణమాఫీ సొమ్మును వారి ఖాతాల్లో జమ చేస్తారు. ఇక పంట రుణాల మాఫీ నిధులను రైతుల ఖాతాల్లో జమ చేయడానికి నేషనల్‌ ఆటోమేటెడ్‌ క్లియరింగ్‌ హౌస్‌ (నాచ్‌) పోర్టల్‌ను రాష్ట్ర ప్రభుత్వం ఎంచుకుంది. ప్రయోగాత్మకంగా రూ.11 కోట్లు ఈ సాఫ్ట్‌వేర్‌ సిస్టమ్‌ ద్వారా రైతుల ఖాతాల్లో జమ చేసి చూశారు. అది సక్సెస్‌ అయినట్లు అధికారులు తెలిపారు. 

సాక్షి, హైదరాబాద్‌: వడ్డీతో సహా రూ.లక్ష వరకు ఉన్న వ్యవసాయ పంటల రుణాలను ప్రభుత్వం మాఫీ చేయనుంది. గతంలోలాగే ఈసారి కూడా నాలుగు విడతల్లో రుణమాఫీ అమలు చేయనుంది. వ్యవసాయ రుణమాఫీ పథకం–2018 అమలుకు సంబంధించిన మార్గదర్శకాలను ప్రకటిస్తూ రాష్ట్ర వ్యవసాయ శాఖ కార్యదర్శి జనార్దన్‌రెడ్డి మంగళవారం ఉత్తర్వులు జారీ చేశారు. స్వల్పకాలిక పంట రుణాలు, బంగారం తాకట్టుపై గ్రామీణ ప్రాంతా ల్లో తీసుకున్న పంట రుణాలకు రుణమాఫీని వర్తింపజేసింది. కుటుంబం యూనిట్‌గా రుణమాఫీ చేయనున్నారు. దీని ప్రకారం 2014 ఏప్రిల్‌ 1 నుంచి 2018 డిసెంబర్‌ 11 వరకు రైతులు తీసుకున్న, రెన్యువల్‌ చేసుకున్న పంట రుణాలు, వడ్డీలు కలుపుకొని రూ.లక్ష మించకుండా అర్హులైన వారందరికీ రుణమాఫీ వర్తింపజేయనున్నారు. రైతులు పంటకు అవసరమైన విత్తనాలు, ఎరువుల కోసం అధిక వడ్డీకి అప్పులు తీసుకుని కొనుగోలు చేసే విధానానికి స్వస్తి చెప్పేందుకు సీఎం కేసీఆర్‌ హామీకి అనుగుణం గా సంస్థాగత రుణాలను మాఫీ చేస్తున్నట్లు ఉత్తర్వుల్లో పేర్కొన్నారు. ప్రైవేట్‌ వడ్డీ వ్యాపారుల దగ్గర తీసుకున్న వారికి ఇది వర్తించదు. రైతు కుటుంబం అంటే భర్త, భార్య వారి మీద ఆధారపడి ఉన్న పిల్లలను పరిగణనలోకి తీసుకుంటారు. రూ.లక్షలో ప్రాసెసింగ్‌ ఫీజు, లీగల్‌ చార్జీలు, ఇన్సూరెన్స్‌ వంటివి ఉండవు. ఇటీవల అసెంబ్లీలో ప్రకటించిన విధంగా రూ.25 వేల వరకు ఉన్న పంట రుణాలు తీసుకున్న రైతులకు ఒకే దశలో మాఫీ చేస్తారు. మిగతా రైతులకు మిగిలిన మొత్తాన్ని 4 దశలుగా మాఫీ చేయనున్నట్లు ఉత్తర్వుల్లో పేర్కొన్నారు. రుణమాఫీ సొమ్మును రైతులకు చెక్కుల రూపంలో చెల్లించనున్నారు.  రైతుల జాబితాల తయారీ ఇలా..  - 2018 డిసెంబర్‌ 11 నాటికి స్వల్పకాలిక పంట రుణా లు బకాయిపడిన రైతుల జాబితాల (ఏ–లిస్టు)ను గ్రామాల వారీగా ప్రభుత్వం నిర్దేశించిన నమూనాలో ప్రతి రుణ సంస్థ (బ్యాంకు) బ్రాంచీ తయారు చేయాలి.  - బంగారం తాకట్టు పెట్టి తీసుకున్న పంట రుణాల మాఫీ గ్రామీణ ప్రాంతాలకు మాత్రమే వర్తించనుంది. 2018 డిసెంబర్‌ 11 నాటికి ఇలాంటి రుణ బకాయిలు కలిగిన రైతుల జాబితాల (బీ–లిస్టు)ను ప్రభుత్వం నిర్దేశించిన నమూనాలో గ్రామాల వారీగా ప్రతి బ్యాంకు తయారు చేయాలి.  - బంగారం తాకట్టుపెట్టి అర్బన్, మెట్రోపాలిటన్‌ బ్యాంకులు/బ్యాంకు బ్రాంచీల నుంచి తీసుకున్న పంట రుణాలకు మాఫీ వర్తించదు. అయితే అర్బన్, మెట్రోపాలిటన్‌ బ్యాంకులకు సంబంధించిన గ్రామీణ బ్రాంచీల నుంచి బంగారం తాకట్టు పెట్టి తీసుకున్న పంట రుణాలకు మాఫీ వర్తించనుంది.  - స్వల్పకాలిక పంట రుణాలు, గ్రామీణ ప్రాంతాల్లో బంగారంపై తీసుకున్న పంట రుణాలకు సంబంధించిన రైతుల జాబితాలను బ్యాంకు బ్రాంచీల మేనేజర్లు పోల్చి చూసి రూ.లక్ష వరకు రుణ బకాయిలు కలిగిన రైతు తుది జాబితాల (సి–లిస్టు)ను నిర్దేశిత నమూనాలో రూపొందించాలి. స్వల్ప కాలిక పంట రుణాలు తీసుకున్న రైతుల జాబితాలు, గ్రామీణ ప్రాంతాల్లో పంట రుణాలు తీసుకున్న రైతుల జాబితాలు, తుది రైతుల జాబితాలను లీడ్‌ బ్యాంక్‌ మేనేజర్‌తో పాటు జిల్లా కలెక్టర్లకు బ్రాంచీ మేనేజర్లు పంపాలి.  - కొందరు ఒకటి కంటే ఎక్కువ బ్రాంచీల నుంచి పంట రుణాలు పొంది ఉంటారు. ఒక బ్యాంకుకు చెందిన వేర్వేరు బ్రాంచీలు లేదా ఇతర బ్యాంకుల బ్రాంచీల నుంచి రుణాలు పొంది ఉండొచ్చు. ఒక కుటుంబానికి గరిష్టంగా రూ.లక్ష వరకు మాత్రమే రుణ మాఫీ వర్తించేలా నియంత్రించడంతో పాటు డూప్లికేషన్‌/మల్టీపుల్‌ ఫైనాన్సింగ్‌ నియంత్రణకు మండల స్థాయి బ్యాంకర్ల కమిటీ (జేఎంఎల్‌బీసీ) సమావేశాన్ని నిర్వహించాలి. ఈ సమావేశంలో బ్యాంకర్లందరూ తమ బ్యాంకుల ఏ, బీ, సీ జాబితాలను తీసుకొచ్చి ఇతర బ్యాంకుల జాబితాలతో పోల్చి చూడాలి. అన్ని బ్రాం చీల తుది జాబితాలను మండల తహసీల్దార్‌ పరిశీలించి చూడాలి. నకిలీ పట్టాదారు పాసుపుస్తకాలు కలిగి ఉన్నారా? లేదా రుణ గ్రహీతలంతా వ్యవసాయ భూములు కలిగి ఉన్నారా? అన్న విషయాన్ని తహసీ ల్దార్‌ పరిశీలించి చూడాలి. పరిశీలన తర్వాత ఏవైనా తప్పుడు క్లెయిమ్స్‌ ఉంటే తొలగించాలి. ఒకటి కంటే ఎక్కువ బ్యాంకు బ్రాంచీల నుంచి రుణా లు పొందిన రైతు కుటుంబ సభ్యులను జేఎంఎల్‌బీసీ కమిటీ సభ్యులు గుర్తించాలి. వారి జాబి తాల (డీ–లిస్టు)ను నిర్దేశిత నమూనాలో తయారు చేయాలి. జిల్లా సహకార ఆడిట్‌ అధికారి పర్యవేక్షణలో సహకార శాఖ ఆడిటర్లు ప్రాథమిక సహకార సంఘాలు, డీసీసీబీల ఏ, బీ, సీ జాబితాలను డీ జాబితాలతో పోల్చి చూడాలి. జిల్లా సహకార ఆడిట్‌ అధికారి తన పరిధిలోని మండలాలకు ఆడిటర్లను కేటాయించాలి. జిల్లాస్థాయి ఆడిట్‌ నివేదిక ఇవ్వాలి. జేఎంఎల్‌బీసీ రూపొందించిన డీ–జాబితాలను మండల స్థాయిలో అన్ని బ్యాంకుల బ్రాంచీలకు అందుబాటులో ఉంచాలి.   - కుటుంబంలో ఒకటి కంటే ఎక్కువ బ్రాంచీల నుంచి రుణాలు తీసుకుని ఉంటే ఐటీ ఆధారంగా గుర్తించేందుకు బ్యాంకులు సమర్పించే తుది రైతుల జాబితా (సి–లిస్టు)ను విశ్లేషించి తుది డీ–జాబితాలను తయారు చేస్తారు.  - రైతులకు ఎన్ని బ్యాంకుల్లో ఎన్ని అప్పు ఖాతాలున్నా ఒక కుటుంబానికి ఒక లక్ష మేరకే రుణం మాఫీ చేయాలని నిర్ణయించారు.  - కుటుంబంలో ఒకరి కంటే ఎక్కువ మంది పంట రుణానికి అర్హులైతే రూ. లక్ష మొత్తంలో ఉన్నవారందరికీ సమానంగా ఇస్తారు.  - స్వల్పకాలిక పంట రుణాలు 18 నెలల చెల్లింపు కాల వ్యవధి ఉన్న వాటికే మాఫీ వర్తిస్తుంది. ఉద్యాన పంటల కోసం పొందిన స్వల్పకాల రుణాలు ఈ పథకం పరిధిలోకి వస్తాయి.  - రైతు కుటుంబాలను గుర్తించేందుకు ఏఈవో, వీఆర్‌వో, పంచాయతీ సెక్రటరీల సాయం తీసుకుంటారు. వీరికి మండల తహసీల్దార్, ఎంపీడీవో, మండల వ్యవసాయాధికారి పర్యవేక్షకులుగా ఉంటారు.  - తాత్కాలిక తుది జాబితా (జాబితా–ఈ)ను సంబంధిత గ్రామాలలో గ్రామసభ నిర్వహించి ప్రదర్శిస్తారు. ఈ సందర్భంగా సామాజిక ఆడిట్‌ నిర్వహిస్తారు. అభ్యంతరాలు ఏమైనా ఉంటే స్వీకరించి వాటిని పరిష్కరిస్తారు. ఆ తర్వాత బ్రాంచ్‌ల వారీగా అర్హు్హలైన రైతుల తుది జాబితాను లీడ్‌ బ్యాంక్‌ మేనేజర్, జిల్లా కలెక్టర్‌కు పంపుతారు.  - రైతుల వారీగా అర్హులైన వారి జాబితాను జిల్లాల్లో బ్యాంకర్ల మీటింగ్‌లో సమీక్షించి, రికార్డు చేసి దాన్ని రాష్ట్ర స్థాయి బ్యాంకర్ల కమిటీకి పంపిస్తారు. అదే ఐటీ పోర్టల్‌లో ఆప్‌లోడ్‌ చేస్తారు. రాష్ట్ర స్థాయి బ్యాంకర్ల కమిటీ తిరిగి బ్యాంకుల వారీగా రైతుల వారీగా చెల్లించాల్సిన మొత్తం వివరాలను, ప్రభుత్వం మంజూరు చేయాల్సిన మొత్తాన్ని నిర్ణయిస్తుంది. అర్హుల గుర్తింపు ఇలా..  - మొదటి సారి మాఫీ చేసినప్పుడు తీసుకున్న కటాఫ్‌ తేదీ తర్వాత 2014 ఏప్రిల్‌ 01 నుంచి 2018 డిసెంబర్‌ 11 వరకు రైతులు తీసుకున్న, రెన్యువల్‌ పంట రుణాలు, వడ్డీలు కలుపుకొని రూ.లక్ష మించకుండా మాఫీ చేస్తారు.  వీటికి వర్తించదు..  - భాగస్వామ్య (టై అప్‌) రుణాలు  - మూసేసిన పంట రుణాలు/రైటాఫ్‌ చేసిన రుణాలు  - జాయింట్‌ లయబిలిటీ గ్రూప్‌ (జేఎల్‌జీ)/రైతు మిత్ర గ్రూప్‌ (ఆర్‌ఎంజీ)/లోన్‌ ఎలిజిబిలిటీ కార్డు (ఎల్‌ఈసీ)లకు ఇచ్చిన రుణాలు  - రీస్ట్రక్చర్డ్‌/రీషెడ్యూల్డ్‌ రుణాలు  - రుణమాఫీ ప్రయోజనం రైతులకు అందించేందుకు ఐటీ వ్యవస్థ లేదా పోర్టల్‌ను వ్యవసాయ శాఖ తయారు చేయాలి. రైతుల సమాచారం కోసం, వారి రుణాల మొత్తం వంటివి ఫైనల్‌ చేసేందుకు దీన్ని వినియోగించాలి.

సాక్షి, హైదరాబాద్‌: పంట రుణాల మాఫీపై తెలంగాణ ప్రభుత్వానికి స్పష్టత లేదని ఎమ్మెల్సీ జీవన్‌రెడ్డి విమర్శించారు. శనివారం ఆయన గాంధీభవన్‌లో మీడియా సమావేశంలో మాట్లాడుతూ.. లక్ష రూపాయల వరకు మాఫీ చేస్తామని ఎన్నికల సమయంలో హామీ ఇచ్చారని.. తెలంగాణ వచ్చిన తర్వాత ఆరువేల మంది రైతులు అప్పులు బాధతో ఆత్మహత్యలు చేసుకున్నారని ఆయన ధ్వజమెత్తారు. రైతు బీమా 59 ఏళ్ల లోపు వారికి మాత్రమే వర్తింపుచేస్తున్నారని.. ఆత్మహత్య చేసుకున్న రైతుకు 6 లక్షల రూపాయలు ఇవ్వాలనే ఉత్తర్వులు అమలు చేయడం లేదని మండిపడ్డారు. రైతు బంధును నిర్వీరం చేస్తున్నారని ఆయన ఆగ్రహం వ్యక్తం చేశారు. మూడు ఎకరాల లోపు ఉన్నవారికే రైతు బంధు ఇస్తున్నారన్నారు. వడ్డీ రాయితీ కూడా ఇవ్వడం లేదని ధ్వజమెత్తారు. రైతులకు ఇచ్చిన రాయితీలు నిలిపివేయడం భావ్యం కాదని పేర్కొన్నారు. ఆంక్షలు లేకుండా రైతు బంధు అమలు చేయాలని జీవన్‌రెడ్డి డిమాండ్‌ చేశారు. కిసాన్ సెల్ ఆధ్వర్యంలో రైతుల సమస్యలపై చర్చించామని.. రాబోయే బడ్జెట్‌లో సమావేశాల్లో కూడా చర్చిస్తామని వెల్లడించారు. ఎకరానికి రెండు క్వింటాలు కందులు కొనుగోలు చేస్తామని చెప్పడం భావ్యం కాదన్నారు. పసుపు  క్వింటాలు కు 10వేల రూపాయలు మద్దతు ధర ఇవ్వాలని జీవన్‌ రెడ్డి డిమాండ్‌ చేశారు.

చండీగఢ్‌: మళ్లీ అధికారంలోకి వస్తే రైతులకు తనఖా లేకుండా రూ. 3 లక్షల వరకు వడ్డీలేని పంట రుణం, షెడ్యూల్‌ కులాల వారికి రూ. 3 లక్షల వరకు షరతుల్లేని రుణం ఇస్తామని బీజేపీ ప్రకటించింది. త్వరలో జరగనున్న హరియాణా అసెంబ్లీ ఎన్నికలకోసం ఆ పార్టీ ఆదివారం మేనిఫెస్టో విడుదల చేసింది. ‘ఇది పూర్తి నిబద్ధతలో రూపొందించిన పత్రం. సమాజంలోని అన్ని వర్గాలు ప్రయోజనం పొందేలా మేనిఫెస్టోను తయారు చేశాం’అని బీజేపీ వర్కింగ్‌ ప్రెసిడెంట్‌ జేపీ నడ్డా చండీగఢ్‌లో ప్రకటించారు. సీఎం మనోహర్‌లాల్‌ ఖట్టర్‌ మాట్లాడుతూ, అవినీతి రహిత పాలన ఇవ్వాలన్న వాగ్దానాన్ని తాము నెరవేర్చామని, భవిష్యత్తులోనూ కొనసాగిస్తామని అన్నారు. మేనిఫెస్టోలోని ముఖ్యాంశాలు.. ► రైతులకు 3 లక్షల వరకు వడ్డీ లేని పంట రుణం ► కర్షకుపంటలకు కనీస మద్దతు ధర. కిసాన్‌ కళ్యాణ్‌ ప్రధీకరణకోసం వెయ్యి కోట్ల బడ్జెట్‌ ► యువజన అభివృద్ధి, స్వయం ఉపాధి మంత్రిత్వ శాఖ ఏర్పాటు. రూ. 500 కోట్లతో 25 లక్షల మంది యువతకు నైపుణ్య శిక్షణ ► ఐదెకరాల లోపు ఉన్న 14 లక్షల మంది రైతులకు రూ. 3 వేల వృద్ధాప్య పెన్షన్‌.   ► విద్యార్థులకు ఉన్నత విద్యకోసం షరతులు లేని రుణాలు ► విద్యార్థినుల కోసం పింక్‌ బస్సు సేవలు. వారి ఆత్మరక్షణ కోసం ప్రత్యేక శిక్షణ.

సాక్షి, కర్నూలు(అగ్రికల్చర్‌): కొద్దిరోజులుగా జిల్లా వ్యాప్తంగా విస్తారంగా వర్షాలు కురుస్తున్నాయి. ఫలితంగా రబీ పంటల సాగుకు అవకాశం ఏర్పడింది. అయితే అన్నదాతలకు బ్యాంకుల నుంచి చేయూత కరువైంది. రబీ పంట రుణాల పంపిణీని  ఇంతవరకు చేపట్టలేదు. ఖరీఫ్‌లో అంతంత మాత్రంగానే   రుణాలు పంపిణీ చేశాయి. బ్యాంకు అధికారులు నిర్లక్ష్యంగా వ్యవహరిస్తున్నారు. రబీలో ప్రధానంగా శనగ, జొన్న, ధనియాలు, మినుము, వేరుశనగ, వరి సాగుచేస్తారు. శనగ 1.90 లక్షల హెక్టార్లలో, వరి 25,119, జొన్న 56,397, మొక్కజొన్న 8,248, మినుము 14294 హెక్టార్లలో సాగు కానున్నాయి. ఖరీఫ్‌ సాధారణ సాగు 6.27 లక్షల హెక్టార్లు ఉండగా, ఇప్పటి వరకు 93 శాతం విస్తీర్ణంలో పంటలు సాగు చేశారు. రబీ సీజన్‌కు వాతావరణం అనుకూలించడంతో ఉత్సాహంగా విత్తనం పనులకు శ్రీకారం చుడుతున్నారు. ప్రభుత్వం కూడా రబీ రైతులకు సకాలంలో విత్తనాలు పంపిణీ చేస్తోంది.   రుణాలకు తప్పని తిప్పలు  రైతులకు ఇతోధికంగా రుణాలు ఇవ్వాలని ముఖ్యమంత్రి వైఎస్‌ జగన్‌మోహన్‌ రెడ్డి.. రాష్ట్ర స్థాయి బ్యాంకర్ల సమావేశాల్లో పదేపదే విజ్ఞప్తి చేసినప్పటికీ బ్యాంకర్లలో మార్పు రాలేదు. ఖరీఫ్‌ పంట రుణాల పంపిణీ లక్ష్యం రూ.4,360.42 కోట్లు ఉండగా, బ్యాంకులు మాత్రం రూ.3136.07 కోట్లు పంపిణీ చేసినట్లు స్పష్టం అవుతోంది. జిల్లాలో రైతుల ఖాతాలు 6.92 లక్షలు ఉన్నాయి. వీరందరూ పంట రుణాలకు అర్హులే. ఖరీప్‌లో కేవలం 3,53,212 మంది రైతులకు మాత్రమే పంట రుణాల పంపిణీ చేశాయి. ఎస్‌బీఐ, ఆంధ్రప్రగతి గ్రామీణ బ్యాంకులు లక్ష్యాలను అధిగమించినా.. ఆంధ్రా, కెనరా , కేడీసీసీ బ్యాంకు లు నిర్లక్ష్యం వహించాయి. ఖరీఫ్‌లో ఈ నెల 10వ తేదీ నాటికి 71.92 శాతం మాత్రమే పం టరుణాల పంపిణీలో లక్ష్యాన్ని సాధించారు.     రబీలో అంతులేని నిర్లక్ష్యం..  రబీలో 3 లక్షల హెక్టార్లలో పంటలు సాగయ్యే అవకాశం ఉంది.  పంట రుణాల లక్ష్యం రూ.2749.58 కోట్లు.  జిల్లాలోని 27 బ్యాంకులకు లక్ష్యాలు ఇచ్చారు. ఏపీజీబీ రూ.562.14 కోట్లు, ఆంధ్రబ్యాంకు రూ.416.72 కోట్లు, ఎస్‌బీఐ రూ.412.70 కోట్లు, జిల్లా సహకార కేంద్రబ్యాంకు రూ.419.52 కోట్లు, సిండికేట్‌ బ్యాంకు రూ.247.80 కోట్లు, కెనరా బ్యాంకు రూ. 114.62కోట్లు, యూనియన్‌ బ్యాంక్‌ ఆఫ్‌ ఇండియా రూ.102.89 కోట్లు ప్రకారం పంపిణీ చేసే విధంగా లక్ష్యలు ఇచ్చారు. కొన్ని మండలాల్లో ఆశాజనకంగా వర్షాలు పడటంతో కొద్ది రోజులుగా రబీ పంటల సాగు చేస్తున్నా.. పంట రుణాల పంపిణీ అతీగతీ లేదు. బ్యాంకులు మానవతా దృక్పథంతో రైతులను ఆదుకోవాల్సి ఉంది. రుణం ఇవ్వడం లేదు  రైతు పేరు పెద్దమద్దిలేటి. సి.బెళగల్‌ మండలం పోలకల్‌ గ్రామవాసి. ఆరు ఎకరాల పొలం ఉంది. రబీ సీజన్‌లో శనగ వేయడానికి విత్తనాలు సిద్ధం చేసుకున్నాడు.  పంట రుణం కోసం ఆంధ్రాబ్యాంకు, పీఏసీఎస్‌ చుట్టూ తిరుగుతున్నాడు. ఎన్ని సార్లు తిరిగినప్పటికీ రుణం ఇవ్వడం లేదు.  

సాక్షి, మహబూబాబాద్‌: మానుకోట ప్రాథమిక వ్యవసాయ సహకార సంఘంలో సుమారు 70 లక్షల రూపాయల పంట రుణాలలో దుర్వినియోగం జరిగినట్లు కొంత మంది రైతులు విలేజ్‌ అధికారులకు ఫిర్యాదు చేశారు. దీంతో  అధికారులు మానుకోట పీఏసీఎస్‌ కార్యాలయంతో పాటు డీసీఓ, డీసీసీబీ బ్యాంక్‌కు వెళ్లి ఆ విషయంపై ఆరా తీశారు. దీంతో వారం రోజుల్లో నివేదిక అందజేయాలని అధికారులు ఆదేశాలు జారీ చేశారు.  జిల్లా కేంద్రంలోని ప్రాథమిక వ్యవసాయ సహకార సంఘం పరిధిలో 18 గ్రామాలు ఉన్నాయి. దానిలో సుమారు 13000 మంది సభ్యులు ఉన్నారు. వారిలో కేవలం 1545 మంది చిన్న, సన్నకారు రైతులు మాత్రమే రుణాలు తీసుకున్నారు. వారికి లక్షలోపు రుణాలు మాత్రమే ఇవ్వడం వల్ల రుణాలు తీసుకున్న వారి సంఖ్య కూడా తక్కువగా ఉంది. 2012లో నాలుగు కోట్లు, 2014లో 7 కోట్లు ఆ తర్వాత 2019 వరకు కేవలం 6 కోట్ల రుణాలు మాత్రమే ఇవ్వడం జరిగిందని కార్యాలయం సిబ్బంది తెలిపారు. రుణ విధానం పీఏసీఎస్‌లో రైతులు పట్టాదారు పాస్‌పుస్తకం, వన్‌బీ, పహానీ వాటి జిరాక్స్‌లతో పాటు ఒరిజినల్‌ పరిశీలిస్తారు. అనంతరం ఆ రైతుల రుణాల విషయంపై పరిశీలించి దానిని బట్టి క్రెడిట్‌ లిమిట్‌ ప్రకారం రుణాలు ఇస్తున్నారు. ఎకరాకు 10వేల నుంచి 20,000 వరకు ఇచ్చిన రైతులే ఎక్కువగా ఉన్నారు. 50,000లోపు రుణాలు ఇచ్చిన రైతుల సంఖ్య ఎక్కువగా ఉంది. ఎక్కువ రుణం కోసం ఇతర బ్యాంకులలో తీసుకున్నారు. డీసీసీబీ మానుకోట శాఖ బ్యాంక్‌లో సుమారు 6 కోట్లు రుణాల వరకు రైతులు తీసుకున్నారని రుణమాఫీ జరిగినప్పుడు దాని ప్రకారం కొత్త రుణాలు ఇచ్చారు. సొసైటీ నుంచి పేర్లు పంపితే బ్యాంక్‌ సూపర్‌వైజర్, మేనేజర్‌ వెరిఫికేషన్‌ చేసి వారి ఖాతాలో జమ చేయాలి. రుణాల దుర్వినియోగం జరిగినట్లు ఫిర్యాదు మానుకోట పీఏసీఎస్‌ పరిధిలో సుమారు రూ.70 లక్షల రుణాలు దుర్వినియోగం జరిగినట్లు కొంత మంది రైతులు విజిలెన్స్‌ అధికారులకు ఫిర్యాదు చేశారు. దీంతో శనివారం విలేజ్‌ అధికారి తిరుపతి మానుకోట పీఏసీఎస్‌ కార్యాలయంలో పలు రికార్డులను తనిఖీ చేసినట్లు  సమాచారం. ఆ తర్వాత డీసీసీబీ మానుకోట శాఖ బ్యాంక్‌కు వెళ్లి బ్యాంక్‌ మేనేజర్‌ అశ్రితను కలిసి ఫిర్యాదుపై నివేదిక అందచేయాలని ఆదేశించారు. వారం రోజుల్లో ఇవ్వాలని ఆదేశాలు జారీ చేయగా ఆ పనిలో ఉన్నారు. ఆ రెండు కార్యాలయాలతో పాటు జిల్లా కేంద్రంలోని డీసీఓ కార్యాలయంనకు కూడా వెళ్లి ఆరా తీçశారు. మానుకోట మండలంలోని అమనగల్‌ గ్రామానికి చెందిన రైతులు ఫిర్యాదు చేసినట్లు సమాచారం. నిధుల దుర్వినియోగమా.. కాజేశారా.. రూ 70 లక్షల రుణాల డబ్బులు దుర్వినియోగం జరిగినట్లు ఫిర్యాదు చేశారు. రైతుల పేరుతో రుణాలు కాజేశారా లేదా ఏదైనా నిధులు విషయంలో దుర్వినియోగం చేశారో తేలాల్సి ఉంది. 2012 నుంచి 2019 వరకు పీఏసీఎస్‌ ఆధ్వర్యంలో ధాన్యం కొనుగోళ్ల కమీషన్‌ డబ్బులు రాగా వాటిని వేతనాలుగా తీసుకున్నామని సిబ్బంది చెబుతున్నారు.  ఆదే నిబంధన కూడా ఉందని తెలిపారు.  బ్యాంక్‌ మేనేజర్‌ సొసైటీ సీఈఓ జియామోద్దీన్‌కు  ఉత్తర్వుల లేఖను పంపి రెండు రోజులలో నివేదిక ఇవ్వాలని ఆదేశాలు జారీ చేశారు. రైతులను ఆరా తీస్తే వాస్తవాలు వెలుగులోకి.. విలేజ్‌ అధికారులు నివేదికతో పాటు అధికారుల నేరుగా సొసైటీ, బ్యాంక్‌ రికార్డులను పరిశీలించి ఆన్‌లైన్‌ నివేదికను తీసుకొని రైతులను ఆరా తీస్తే వాస్తవాలు బయటికి వస్తాయని సభ్యులు అంటున్నారు. కేవలం 1545 మాత్రమే రుణాలు తీసుకున్నారు. మిగిలిన సభ్యులు కూడా ఆందోళనకు గురి అవుతున్నారు. తమ భూములకు సంబంధించిన పత్రాలు కూడా సొసైటీలో ఉన్నాయని తమ పేరున రుణాలు తీసుకున్నారా అనే టెన్షన్‌ వారిలో మొదలైంది. విలేజ్‌ అధికారులు పూర్తి స్థాయిలో విచారణ చేస్తేనే వాస్తవాలు బయటికి వస్తాయని అంటున్నారు. రుణాల విషయంతో పాటు వాటికి విడుదలైన నిధులు, ధాన్యం కొనుగోళ్ల  కమీషన్‌ అన్ని విషయాలపై పూర్తి స్థాయిలో విచారణ చేయాలని కోరుతున్నారు. మానుకోట మండలం మల్యాల పీఏసీఎస్‌ విషయంలో పెద్ద ఎత్తున్న ని««ధుల దుర్వినియోగం జరిగి మూత పడింది. అందులో జరిగిన అవినీతి నేటికి పూర్తి స్థాయిలో బయట పడలేదు.

పథకం ప్రకారమే ఎడపల్లి సిండికేట్‌ బ్యాంకులోఅక్రమార్కులు రెండున్నర కోట్ల రూపాయల కుంభకోణానికి తెర తీసినట్లు స్పష్టమవుతోంది. బోగస్‌ పట్టాలు, నకిలీ వన్‌బీ, పహాణీలతో రైతుల పేరిట ఖాతాలు తీసి పంట రుణాలను మంజూరు చేసి లేపుకున్నారు. ఈ రుణాలను రుణమాఫీ కింద మాఫీ చేయించి తప్పించుకుందామని స్కెచ్‌ వేశారు. అయితే పథకం వికటించి అక్కమార్కుల గుట్టు రట్టయ్యింది.  సాక్షి, నిజామాబాద్‌ : పంట రుణాల కుంభణంకోలో ఆసక్తికరమైన అంశాలు వెలుగుచూస్తున్నాయి. ఎడపల్లి మండల కేంద్రంలోని సిండికేట్‌ బ్యాంక్‌లో బోగస్‌ పట్టాలు, నకిలీ వన్‌బీ, పహాణీలతో సుమారు రూ.2.5 కోట్ల వరకు అక్రమార్కులు పంట రుణాల పేరిట లూటీ చేసిన విషయం విధితమే ! ఈ రుణాలను ప్రభుత్వ రుణమాఫీ పథకంలో మాఫీ చేయించి, గుట్టు చప్పుడు కాకుండా వ్యవహారాన్ని ముగించేసేలా పక్కా ప్రణాళికతో అక్రమాలకు పాల్పడినట్లు ప్రాథమిక విచారణ తేలింది. రుణమాఫీపై ప్రభుత్వ నిర్ణయం కాస్త జాప్యం జరిగింది. ఈలోగా ఈ బాగోతం వెలుగులోకి రావడంతో బ్యాంకు ఉన్నతాధికారులతో పాటు, బాధితులు, అధికారులు అప్రమత్తమయ్యారు. ఇప్పటికే లీడ్‌ బ్యాంకు ఉన్నతాధికారులు ప్రభుత్వం ప్రకటించిన రుణమాఫీ పథకానికి అర్హులైన రైతుల జాబితాను ఆయా బ్యాంకుల బ్రాంచీల ద్వారా సేకరించి, ప్రభుత్వానికి ప్రతిపాదనలు పంపారు. ఇలా తయారు చేసిన జాబితాలో ఈ బోగస్‌ పంటరుణాలను కూడా చేర్చేసి, చేతికి మట్టి అంటకుండా నిధులు కాజేయాలనే పక్కా ప్రణాళికతో వ్యవహారం నడిపినట్లు అధికారుల దృష్టికి వచ్చింది.  అప్రమత్తమైన రెవెన్యూ శాఖ..  సిండికేట్‌బ్యాంకులో భారీ కుంభకోణం వెలుగుచూడటంతో రెవెన్యూశాఖ అప్రమత్తమైంది. నకిలీ పట్టాదారు పాసుపుస్తకాలు, నకిలీ పహాణీలు, వన్‌బీలు తెరపైకి రావడంతో రెవెన్యూ అధికారులు కుంభకోణంపై దృష్టి సారించారు. ఇలా పంటరుణాలు పొందిన రైతుల పేర్లు, పాసుపుస్తకాలు, పహాణీలు, 1బీ రికార్డులు తమకు ఇవ్వాలని రెవెన్యూ అధికారులు బ్యాంకు అధికారులను సంప్రదించారు. ఇందుకు బ్యాంకు ఉన్నతాధికారులు అంగీకరించకపోవడంతో స్థానిక తహశీల్దార్‌ అశోక్‌ కుమార్‌ వివరాల కోసం లిఖిత పూర్వకంగా ఆదేశాలు జారీ చేసినట్లు తెలుస్తోంది. జిల్లా కలెక్టర్‌ ఎంఆర్‌ఎం రావు ఆదేశాల మేరకు స్థానిక ఆర్డీఓ కూడా ఈ వ్యవహారాన్ని అడిగి తెలుసుకున్నారు. మరోవైపు పోలీసు ఉన్నతాధికారులు కూడా కుంభకోణంపై ఆరా తీస్తున్నారు. ఇంకా లిఖిత పూర్వకంగా ఎలాంటి ఫిర్యాదులు అందకపోవడంతో ముందస్తుగా వివరాలను సేకరిస్తున్నారు.  దళారుల ముఠాగా మారి..   బ్యాంకు ఉన్నతాధికారులు, ఆయా గ్రామాల్లో ఉన్న దళారులు చేతులు కలిపి భారీ కుంభకోణానికి పాల్పడినట్లు ప్రాథమిక విచారణలో తేలింది. గ్రామాల్లో అమాయకులకు కాస్త డబ్బులను ఆశగా చూపి, వారి ఆధార్‌ కార్డులను సేకరించి వారితో ఖాతాలను తెరిపించారు. ఖాతాదారులకు భూమి ఉన్నట్లు రికార్డులు సృష్టించి రుణం మంజూరు చేశారు. ఈ రుణాన్ని సదరు బినామీ ఖాతాల్లోకి మళ్లించి ఆ ఖాతానుంచి డబ్బులు డ్రా చేసుకున్నారు. ఇలా ఏకంగా రూ.కోట్లలో బ్యాంకును లూటీ చేయడం జిల్లాలో చర్చనీయాశంగా మారింది.  అంతర్గత విచారణ కొనసాగుతోంది : రేణుక, రీజినల్‌ మేనేజర్‌..  పంట రుణాల మంజూరులో జరిగిన లోపాలపై అంతర్గత విచారణ కొనసాగుతోంది. విచారణ పూర్తయ్యే వరకు వివరాలు బయటకు చెప్పడం కుదరదు. ఈ విచారణ అనంతరం ఉన్నతాధికారులకు నివేదిక పంపుతాము.    

సాక్షి, సుల్తానాబాద్‌: కూలీల కొరత, ఎరువుల ధరలు పెరిగిపోతుండటంతో సాగు పెట్టుబడులు పెరిగిపోతున్నాయి. ప్రధానంగా పెట్టుబడుల సమయంలో బయట అప్పులు దొరకని సందర్భంలోనే సన్న, చిన్నకారు రైతులు పంటరుణాలతో పాటు బంగారు ఆభరణాలు బ్యాంకుల్లో తాకట్టు పెట్టి రుణాలు తీసుకుంటున్నారు. వీటిపై వడ్డీరాయితీని ఎత్తివేస్తుండటంతో ఆందోళన చెందుతున్నారు. పెద్దపల్లి జిల్లావ్యాప్తంగా 60,335 మంది రైతులకు రూ.570కోట్లు పంపిణీ చేశారు. గతేడాది ఖరీఫ్‌లో 17,385మంది రూ.217 కోట్లు తీసుకున్నారు. ప్రస్తుత ఖరీఫ్‌ సీజన్‌లో ఇప్పటి వరకు 374 మంది రైతులు బంగారు నగలను ఆయా బ్యాంకుల్లో తాకట్టు పెట్టి సుమారు రూ.4 కోట్ల రుణాలు తీసుకున్నారు. నవీకరణకే ప్రాధాన్యం.. బ్యాంకర్లు అయిదేళ్ల నుంచి పంట రుణాల నవీకరణకే ప్రాధాన్యమిస్తున్నారు. నిర్ధేశించిన లక్ష్యం చేరేందుకు ఈ మార్గాలు ఎంచుకున్నారు. ఇదివరకు తీసుకున్న రుణానికి చెల్లించాల్సిన వడ్డీని కలిపి కొత్తగా రుణం మంజూరు చేసినట్లు కాగితాల్లో రాసుకుంటున్నారు. ఇలా చేయడంతో రైతుల చేతికి కొత్తగా డబ్బులు రావడంలేదు. ఇక సహకార సంఘాల్లో పుస్తక సర్దుబాట్లతోనే సరిపెడుతున్నారు. కేంద్ర, రాష్ట్ర ప్రభుత్వాలు అందిస్తున్న పెట్టుబడి సాయం పంటపొలాల్లో దుక్కులు సిద్ధం చేసేందుకే సరిపోవడం లేదు. చిన్నకమతాల రైతులు తమ వద్ద ఉన్న బంగారు నగలను బ్యాంకుల్లో తాకట్టు పెట్టి పంట రుణాలు పొందుతున్నారు. బ్యాంకర్లు ఇప్పటి వరకు వీటికి వడ్డీరాయితీని వర్తింపజేసేవారు. ఇకపై ఈ విధంగా చేసే అవకాశం లేకపోవడంతో రైతుల నెత్తిన మరింత భారం పడనుంది. అమలు ఇలా.. రిజర్వు బ్యాంకు నిబంధనల మేరకు నాబార్డు రాష్ట్రస్థాయి బ్యాంకర్ల సమితి సంయుక్తంగా ఏయే పంటకు ఎంత రుణం ఇవ్వాలనేది నిర్ణయిస్తాయి. రైతులు ఎంచుకునే పంట, ప్రాంతాన్ని స్కేల్‌ ఆఫ్‌ ఫైనాన్స్‌కు అనుగుణంగా ఎకరానికి రూ.30 వేల నుంచి రూ.45 వేల వరకు ఇస్తున్నారు. సహకార సంఘాల్లోనూ ఇదే విధానం అమలు చేస్తున్నారు. ఏటా సక్రమంగా చెల్లించే రైతులకు ఇంకా ఎక్కువగా ఇస్తున్నారు. రూ.లక్ష దాకా తీసుకొన్న రుణాలపై రైతులకు వడ్డీ రాయితీ లభిస్తోంది. బ్యాంకర్లు వసూలు చేస్తున్న 7శాతం వడ్డీలో రాష్ట్ర సర్కారు 4 శాతం, కేంద్ర ప్రభుత్వం 3 శాతం భరిస్తున్నాయి. రూ.లక్షకు పైగా రుణాలు తీసుకొన్న రైతులు 3 శాతం వడ్డీని చెల్లిస్తున్నారు. నూతన నిబంధనలు ఇలా.. కేంద్రం వడ్డీ రాయితీ రుణ పరిమితిని రూ.లక్ష నుంచి రూ.3 లక్షలకు పెంచింది. ఈ మొత్తం వరకు 3శాతం వడ్డీ చెల్లించాల్సిన పని ఉండదు. ఇంత వరకు బాగానే ఉన్నా ఏడాదిలోగా చెల్లించకుంటే వడ్డీరాయితీ వర్తించదంటూ నిబ ంధన పెట్టింది. నగలను తాకట్టు పెట్టి తీసుకొనే రుణాలకు వడ్డీ రాయితీ వర్తించదన్నమాట. మార్గదర్శకాలకు అనుగుణంగానే.. రాష్ట్రస్థాయి బ్యాంకర్ల సమితి నుంచి విడుదలయ్యే మార్గదర్శకాలకు అనుగుణంగానే వడ్డీరాయితీని బ్యాంకులు వసూలు చేస్తాయి. ఇటీవల కేంద్రం పంట రుణాల మంజూరీలో పలు కొత్త నిబంధనలను ప్రవేశపెట్టింది. వీటి అమలుపై మార్గదర్శకాలు విడుదల కాలేదు. ఈ సీజన్‌ నుంచి అమలు చేసే అవకాశాలు ఉన్నాయి.  – ప్రేమ్‌కుమార్‌  లీడ్‌ బ్యాంకు మేనేజర్, పెద్దపల్లి

రైతును వరుణుడు కరుణిస్తున్నా... బ్యాంకులు మాత్రం దయ చూపడంలేదు. రాష్ట్రంలో విస్తారంగా వర్షాలు కురుస్తుండటంతో వ్యవసాయ పనులు జోరుమీదున్నాయి. పంటల సాగు విస్తీర్ణం పెరుగుతోంది. కానీ చేతిలో చిల్లిగవ్వ లేక రైతన్న లబోదిబోమంటున్నాడు. ఇటువంటి తరుణంలో బ్యాంకులు రుణాలు ఇవ్వాల్సి ఉండగా కొర్రీలు పెడుతూ రైతును ఇబ్బంది పెడుతున్నాయి. గత వారం పది రోజులుగా పంటల సాగు విస్తీర్ణం గణనీయంగా పెరుగుతోంది. ఇన్నాళ్లూ వర్షాలు లేక ఆగిన వరి నాట్లు ఇక పుంజుకోనున్నాయి. వారం రోజుల క్రితం వరకు 28 జిల్లాల్లో వర్షాభావ పరిస్థితులు ఉంటే, ఇప్పుడు ఆ సంఖ్య 17 జిల్లాలకే పరిమితమైంది.      – సాక్షి, హైదరాబాద్‌ సాగు విస్తీర్ణాలిలా...   - ఖరీఫ్‌ సాధారణ సాగు విస్తీర్ణం 1.08 కోట్ల ఎకరాలు కాగా, ఇప్పటివరకు 75.81 లక్షల (70%) ఎకరాల్లో పంటలు సాగయ్యాయి. ఇందులో అత్యధికంగా పత్తి 41.96 లక్షల (97%) ఎకరాల్లో సాగైంది.   - ఖరీఫ్‌లో వరి సాధారణ సాగు విస్తీర్ణం 24.11 లక్షల ఎకరాలు కాగా, ఇప్పటివరకు 7.90 లక్షల (33%) ఎకరాల్లోనే నాట్లు పడ్డాయి. తాజా వర్షాలతో అవి ఊపందుకోనున్నాయి.   - మొక్కజొన్న సాధారణ సాగు విస్తీర్ణం 12.52 లక్షల ఎకరాలు కాగా, ఇప్పటివరకు 8.26 లక్షల (66%) ఎకరాల్లో సాగైంది.   - పప్పుధాన్యాల సాధారణ సాగు విస్తీర్ణం 10.37 లక్షల ఎకరాలు కాగా, ఇప్పటివరకు 8.11 లక్షల (78%) ఎకరాల్లో సాగయ్యాయి. ఇందులో కంది సాధారణ సాగు విస్తీర్ణం 7.20 లక్షల ఎకరాలు, ఇప్పటివరకు 6.19 లక్షల (85%) ఎకరాల్లో సాగైంది. సోయాబీన్‌ దాని సాధారణ సాగులో 80 శాతం వేశారు.  40 లక్షల మందికి.. పెట్టుబడి సాయం.. లోక్‌సభ ఎన్నికల కారణంగా ఈసారి రైతులకు పెట్టుబడికింద ఇచ్చే రైతుబంధు సొమ్ము సరఫరా ఆలస్యమైందని అధికారులు అంటున్నారు. ఖరీఫ్‌లో దాదాపు 50 లక్షల మందికి పైగా రైతులకు పెట్టుబడి సాయం అందాల్సి ఉండగా, ఇప్పటివరకు 40 లక్షల మందికి రూ. 4,400 కోట్లు విడుదల చేసినట్లు వ్యవసాయ శాఖ వెల్లడించింది.  రైతుబంధు సొమ్ము వచ్చినట్లుగా తమకు మెసేజ్‌లు వచ్చాయని, కానీ బ్యాంకుల్లో సొమ్ము పడలేదని కొందరు రైతులు ఆందోళనతో వ్యవసాయశాఖకు ఫిర్యాదు చేశారు.   మూడో వంతే రుణాలు.. సాగు విస్తీర్ణం 70 శాతం కాగా, పంట రుణాలు మాత్రం లక్ష్యంలో దాదాపు 34 శాతానికే పరిమితమైనట్లు వ్యవసాయశాఖ వర్గాలు చెబుతున్నాయి. ఖరీఫ్‌లో పంట రుణాల లక్ష్యం రూ. 29 వేల కోట్లు కాగా, ఇప్పటివరకు కేవలం రూ.10 వేల కోట్లకే పరిమితమైందని తెలిపాయి. వాస్తవంగా పంటల సాగు కంటే అంటే మే నెల నుంచే బ్యాంకులు రైతులకు రుణాలు ఇవ్వడం మొదలుపెట్టాలి. ఇప్పటికీ సాగు శాతంలో ఇచ్చిన రుణాలు సగమే. మూడు నాలుగేళ్లుగా ఇదే పరిస్థితి. దీంతో రైతులు ప్రైవేటు వడ్డీ వ్యాపారస్తుల వద్ద అప్పులు చేయాల్సిన పరిస్థితి.   బ్యాంకుల వాదన ఇదీ..  2015–16 సంవత్సరం నుంచి 2018–19 సంవత్సరం వరకు పేరుకుపోయిన రూ.777 కోట్ల పావలా వడ్డీ, వడ్డీలేని రుణాల బకాయిలను ప్రభుత్వం తమకు చెల్లించలేదని బ్యాంకర్లు అంటున్నారు. ఇటువంటి పరిస్థితులు ఉండటంతో రిజర్వుబ్యాంకు నుంచి తమకు స్పష్టమైన ఆదేశాలు వస్తాయని అంటున్నారు. మరోవైపు పంటల రుణమాఫీపై తమకు ప్రభుత్వం ఎటువంటి స్పష్టత ఇవ్వలేదని, దీంతో రైతులు బకాయిలు చెల్లించడంలేదని చెబుతున్నారు. పాత రుణాలను రైతులు రీషెడ్యూల్‌ చేసుకోకపోతే నిబంధనల ప్రకారం తాము కొత్త రుణాలు ఇచ్చే ప్రసక్తే ఉండదంటున్నారు.  

సాక్షి, అమరావతి: అటవీ హక్కుల పరిరక్షణ చట్టాన్ని పునరుజ్జీవింపచేసి.. వాస్తవ ప్రయోజనాలను గిరిజన రైతులకు చేరువ చేసేలా ప్రభుత్వం ముందడుగు వేస్తోంది. ముఖ్యమంత్రి వైఎస్‌ జగన్‌మోహన్‌రెడ్డి ఆదేశాల మేరకు భూమిపై టైటిల్‌ పొందిన గిరిజన రైతులకు ఇతర రైతులతో సమానంగా అన్ని ప్రయోజనాలు, ప్రభుత్వపరమైన లబ్ధి చేకూరేలా గిరిజన సంక్షేమ శాఖ స్పష్టమైన కార్యాచరణను సిద్ధం చేసింది. దీనివల్ల అటవీ హక్కుల చట్టం ప్రకారం టైటిల్‌ పొందిన రాష్ట్రంలోని ప్రతి గిరిజనుడు మైదాన ప్రాంతాల్లోని రైతులతో సమానంగా పూర్తి హక్కులు పొందగలిగేలా వ్యవస్థ రూపుదిద్దుకోనుంది. అపహాస్యం పాలైన అటవీ హక్కుల చట్టం అటవీ హక్కుల గుర్తింపు చట్టం స్ఫూర్తిని, మౌలిక ఉద్దేశాన్ని గత ప్రభుత్వాలు కాలరాసిన ఫలితంగా ఎస్టీ, ఇతర సంప్రదాయక అటవీ నివాసుల (అటవీ హక్కుల గుర్తింపు) చట్టం, 2006 (నెం.2/2007) అపహాస్యమైంది. అడవిలో నివసించే ప్రజల హక్కులను గుర్తించాలనే ఉద్దేశంతో అటవీ హక్కుల గుర్తింపు చట్టం 2006లో ఆమోదం పొందింది. అటవీ హక్కుల గుర్తింపు చట్టాన్ని అన్ని అటవీ ప్రాంతాలకు వర్తింపచేశారు. గిరిజనులను గుర్తించి వారికి భూమిపై టైటిల్‌ హక్కును ఇచ్చారు. అయితే, వారికి భూమి ఉన్నా దానిపై రుణం రావటం లేదు. ఏ ప్రభుత్వ పథకం కింద గిరిజన రైతులకు లబ్ధి చేకూరటం లేదు. గత ప్రభుత్వ హయాంలో రాష్ట్రంలో దాదాపు 96 వేల మంది గిరిజనులు భూమి పొందినా, వారిలో ఐదు శాతం మందికి  కూడా సగటు రైతులకు లభించే హక్కులను పొందలేకపోతున్నారు. ముఖ్యమంత్రి వైఎస్‌ జగన్‌మోహన్‌రెడ్డి ప్రజాసంకల్ప పాదయాత్ర సందర్భంగా పోడు భూములు సాగు చేసుకునే గిరిజన రైతులకు భూమిపై అన్ని హక్కులు కల్పిస్తూ దివంగత వైఎస్‌ రాజశేఖరరెడ్డి ఇచ్చిన హామీని నెరవేరుస్తామని చెప్పారు. అధికారంలోకి వచ్చిన వెంటనే.. అటవీ హక్కుల చట్టం అమలుకు కచ్చితమైన ప్రణాళిక రూపొందించాలని అధికారులను ఆదేశించారు. దీంతో రంగంలోకి దిగిన గిరిజన సంక్షేమ శాఖ కార్యాచరణ ప్రణాళికలను సిద్ధం చేసింది. ఫలితంగా పోడు వ్యవసాయం చేసే గిరిజనులకు మైదాన ప్రాంత రైతులతో సమానంగా హక్కులు, ప్రభుత్వ పథకాలు లభిస్తాయి. ఇకపై బ్యాంకులు సైతం గిరిజనులకు పంట రుణాలు అందిస్తాయి.   

సాక్షి, జగిత్యాల: పంట రుణాల రెన్యూవల్‌ కోసం బ్యాంకులకు వెళ్తున్న రైతులు వడ్డీ చెల్లించాలనే బ్యాంకర్ల మాటలతో లబోదిబోమంటున్నారు.గతేడాది వరకు సహకార సంఘాల ద్వారా పొందిన రుణాలకు వడ్డీ వసూలు చేయలేదు. ప్రస్తుతం సహకార సంఘాలు, బ్యాంకులు అనే తేడా లేకుండా రైతుల నుంచి వడ్డీ వసూలు చేస్తున్నాయి. రైతులు తీసుకుంటున్న రుణాలపై బ్యాంకులు 7 శాతం వడ్డీ వసూలు చేస్తున్నాయి. ఇందులో కేంద్రం వాటా 3 శాతం మాఫీ చేస్తుండగా.. రాష్ట్ర ప్రభుత్వం వాటా 4 శాతం వడ్డీని రైతుల నుంచి వసూలు చేస్తున్నాయి. ఇలా జగిత్యాల జిల్లాలోని రైతుల నుంచి దాదాపుగా రూ.40కోట్లు వసూలు చేశాయి.  రుణంపై ఏడు శాతం వడ్డీ  రైతులు సహకార సంఘాల ద్వారా తీసుకుంటున్న రుణాలకు బ్యాంకులు 7 శాతం వడ్డీ వసూలు చేస్తాయి. ఏటా క్రమం తప్పకుండా పంట రుణాలు చెల్లించే రైతులకు ప్రభుత్వాలు బాసటగా నిలిచేందుకు వడ్డీ చెల్లించేందుకు గతంలో ముందుకొచ్చాయి. ఇందులో కేంద్ర ప్రభుత్వం 3 శాతం, రాష్ట్ర ప్రభుత్వం 4శాతం వడ్డీ చెల్లించేందుకు అంగీకరించాయి. ప్రస్తుతం పంటల ప్రారంభ సీజన్‌ కావడంతో కొందరు రైతులు కొత్తగా రుణాల కోసం, మరికొందరు రెన్యూవల్‌ కోసం బ్యాంకులు వెళ్తున్నారు. అయితే కేంద్రం చెల్లించే 3 శాతం మాఫీ పోనూ.. రాష్ట్ర ప్రభుత్వం చెల్లించే 4 శాతం వడ్డీని రైతుల నుంచి వసూలు చేస్తున్నాయి. వడ్డీ చెల్లించకుంటే రుణం రెన్యూవల్‌కు ససేమిరా అంటున్నాయి.   ప్రభుత్వం చెల్లించకనే తిప్పలు  రాష్ట్ర ప్రభుత్వం తన వాటా 4 శాతం వడ్డీని సకాలంలో చెల్లించకనే బ్యాంకులు రైతుల నుంచి వసూలు చేస్తున్నాయి. రెండు, మూడేళ్లుగా రాష్ట్ర ప్రభుత్వం నుంచి వడ్డీ బకాయిలు రావడం లేదని బ్యాంక్‌ అధికారులు పేర్కొంటున్నారు. ఒక్క ఏడాదికే దాదాపుగా రూ.40 కోట్ల వరకు రావాల్సి ఉందని చెబుతున్నారు. ఈక్రమంలో ఉన్నతాధికారుల నుంచి వడ్డీ వసూలు చేయాలనే ఆదేశాలు వస్తున్నట్లు మేనేజర్‌లు తెలుపుతున్నారు. రాష్ట్ర ప్రభుత్వం వడ్డీ చెల్లిస్తే.. ఆ మొత్తాన్ని తిరిగి రైతుల ఖాతాల్లో జమ చేస్తామని అధికారులు స్పష్టం చేస్తున్నారు.    ఏటా రూ.43 కోట్లు వడ్డీ చెల్లిస్తున్న రైతులు  జిల్లాలో గతేడాది 1,91,795 మంది  రైతులకు 1,35,514 మంది పంట రుణం తీసుకున్నారు. జిల్లాలోని 19 బ్యాంకులు రూ.1,055 కోట్ల పంట రుణం ఇచ్చాయి. జిల్లా రైతులే దాదాపు రూ.40–43 కోట్ల వడ్డీని గతేడాది బ్యాంకులకు చెల్లించారు. రెండు, మూడేళ్లుగా రైతులు చెల్లిస్తూనే ఉన్నారు. ఇప్పటికీ ఆ వడ్డీ డబ్బులు రైతుల ఖాతాల్లోకి జమకాలేదు. మళ్లీ ఈ ఏడాది కూడా రుణం చెల్లిస్తామని బ్యాంకుకు వెళ్తే వడ్డీని వసూలు చేస్తున్నారు. కొన్నేళ్లుగా సహకార సంఘాలు, లీడ్‌బ్యాంక్‌ ఆంధ్రాబ్యాంకు రైతుల నుంచి రాష్ట్ర ప్రభుత్వం ఇచ్చే 4 శాతం వడ్డీని వసూలు చేయలేదు. కానీ ప్రస్తుతం ఆ బ్యాంకులు సైతం ఇతర బ్యాంకుల మాదిరిగానే నాలుగు శాతం వడ్డీని వసూలు చేస్తున్నాయి.     

సాక్షి, హైదరాబాద్‌: రుణమాఫీ సొమ్మును చెక్కుల రూపంలో కాకుండా రైతుల బ్యాంకు ఖాతాల్లోనే జమ చేస్తే బాగుంటుందని బ్యాంకర్లు, అధికారులు భావిస్తున్నారు. రైతులకు చెక్కులిస్తే సమస్యలు ఏర్పడతాయన్నారు. మాఫీ సొమ్మును రైతుల ఖాతాల్లో కాకుండా, చెక్కుల రూపంలో ఇవ్వాలని యోచిస్తున్నట్లు సీఎం ఇటీవల శాసనసభలో ప్రకటించిన సంగతి తెలిసిందే. దీనిపై ప్రభుత్వ వర్గాల్లోనూ, ఇటు బ్యాంకర్లలోనూ చర్చకు దారితీసింది. మంగళవారం జరిగిన రాష్ట్రస్థాయి బ్యాంకర్ల సమితి (ఎస్‌ఎల్‌బీసీ) భేటీలో చర్చకు వచ్చినట్లు తెలి సింది. రుణమాఫీకి బడ్జెట్‌లో ఈ ఏడాది కి రూ.6 వేల కోట్లు కేటాయించారు. గతంలో రుణమాఫీ చేసినప్పుడు రైతుల బ్యాంకు ఖాతాల్లోకి సొమ్ము జమచేసింది. దీంతో చాలాచోట్ల బ్యాంకులు రైతుల నుంచి వడ్డీ సొమ్మును వసూలు చేసుకున్నాయి. దీన్ని దృష్టిలో ఉంచుకొని చెక్కులు ఇవ్వాలన్న భావనలో ఉంది.   ఎన్నికల కోడ్‌ వస్తే: 2018 ఎన్నికల హామీలో భాగంగా గత డిసెంబర్‌ 11వ తేదీని గడువుగా లెక్కించి రైతులకు లక్ష రూపాయలలోపు రుణా న్ని ప్రభుత్వం మాఫీ చేయనుంది. ఎస్‌ఎల్‌బీసీ లెక్కల ప్రకారం 40 లక్షల మంది రైతులు రుణమాఫీకి అర్హులుగా తేల్చినట్లు చెబుతున్నారు. వారందరికీ మాఫీ చేయాల్సి వస్తే దాదాపు రూ.28 వేల కోట్ల వరకు నిధులు అవసరం కావచ్చని వ్యవసాయశాఖ వర్గాలు చెబుతున్నాయి. ఈ ఏడాది ఏప్రిల్, మే నెలల్లో రుణ మాఫీ చేయాలనుకున్నా పార్లమెంట్‌ ఎన్నికల కోడ్‌ అడ్డుగా ఉంటుంది. బడ్జెట్లో నిధులు కేటాయించినందున కోడ్‌ ప్రభావం ఉండదని అధికారులు అంటున్నారు. అయితే చెక్కులను పంపిణీ చేయడానికి ఈసీ అంగీకరించదని అంటున్నారు.  అవసరాలకు ఖర్చు పెట్టుకుంటారేమో!  బ్యాంకర్లు కొందరు రైతులపై అనుమానం వ్యక్తం చేస్తున్నారు. రైతులకు రుణాన్ని చెక్కుల రూపంలో ఇస్తే తప్పనిసరిగా బకాయి చెల్లించాల్సిన అవసరం ఉండకపోవచ్చు. కొందరు రైతులకు ఇతరత్రా అవసరాలు, అప్పులు ఉండొచ్చు. ఈ సొమ్మును వ్యక్తిగత అవసరాలకు వాడుకునే పరిస్థితి ఉంటుందని అంటున్నారు. కాబట్టి రైతుకు చెక్కులివ్వడం కంటే బ్యాంకులకు చెల్లిస్తేనే ప్రయోజనమని బ్యాంకర్లు అభిప్రాయపడుతున్నట్లు వ్యవసాయ వర్గాలు తెలిపాయి.   

నల్లగొండ అగ్రికల్చర్‌ : లక్ష్యం కొండంత..ఇచ్చింది గోరంత.. ఇదీ రబీ పంట రుణాల తీరు. శాసనసభ ఎన్నికల ముందు అధికార, ప్రతిపక్ష పార్టీల హామీల పుణ్యమా అని అన్నదాతలకు పంటరుణాలు ఇచ్చేందుకు బ్యాంకర్లు ఆసక్తి చూపలేదు. అసలు బ్యాంకుల చెంతకు అన్నదాతలను చేరనివ్వని పరిస్థితి. పంటరుణం కోసం బ్యాంకుల వద్దకు వెళ్తే ఖరీఫ్‌లో తీసుకున్న రుణం వడ్డీతో సహా చెల్లించి కొత్త రుణం అడగాలని అధికారులు తిరకాసు పెట్టారు. దీంతో ఇదేమి గోల అనుకుని రైతులు వాటివైపు కన్నెత్తిచూడలేదు. జిల్లాలో గత ఖరీఫ్‌లో పంట రుణలక్ష్యం రూ.1,253.93 కోట్లు కాగా, బ్యాంకులు రైతులకు పంట రుణం ఇచ్చింది కేవలం రూ.698.22 కోట్లు. అంటే 55.68 శాతం మాత్రమే రైతులు పంటరుణాలను అందుకున్నారు. అదే విధంగా ఈ రబీలో రుణలక్ష్యం రూ.835.95 కోట్లుగా నిర్దేశించగా, రైతులకు సీజన్‌ ముగిసినప్పటికీ ఇచ్చింది  కేవలం రూ.138.32 కోట్లు. అంటే 16.55 శాతం మాత్రమే పంటరుణాలను ఇచ్చారంటే బ్యాంకులకు రైతులపై ఏమాత్రం చిత్తుశుద్ధి ఉందో అర్థం చేసుకోవచ్చు. ఎన్నికల హామీ ఎఫెక్టేనా? శాసనసభ ఎన్నికల ముందు అధికార టీఆర్‌ఎస్‌ పార్టీ లక్ష వరకు రైతుల రుణాలను మాఫీ చేస్తామని, మరోవైపు ప్రతిపక్ష కూటమి రూ.2లక్షల వరకు మాఫీ చేస్తామని ఇచ్చిన హామీల ఎఫెక్ట్‌ రబీ పంట రుణాలపై స్పష్టంగా కనిపించింది. రుణమాఫీని ఎప్పటినుంచి పరిగణనలోకి తీసుకుంటారో స్పష్టం చేయకపోవడంతో బ్యాంకులు రబీ రుణాలను ఇవ్వాలంటే ఆలోచనలో పడ్డాయి. ఇచ్చినవాటిని ఎప్పుడు ప్రభుత్వం చెల్లిస్తుందోనని,  మళ్లీ రుణాలిచ్చి ఎందుకు ఇబ్బందులు పడాలన్న ముందుజాగ్రత్తగా బ్యాంకర్లు రబీ రుణాలను ఇవ్వకుండా బ్రేక్‌ వేసినట్లు సమాచారం. ఎవరైనా రైతులు బ్యాంకులకు రుణం కోసం వెళ్తే ఖరీఫ్‌ రుణాలను చెల్లించాలని ఒత్తిడి తేవడంతో వారు అటువైపు వెళ్లలేదు. పెట్టుబడుల కోసం తిప్పలు రైతులు రబీ పెట్టుబడుల కోసం నానా తిప్పలు పడాల్సి వచ్చింది. బ్యాంకుల వారు దరిచేరనియకపోవడంతో విధిలేని పరిస్థితుల్లో వడ్డీ వ్యాపారులను ఆశ్రయించారు. అధిక వడ్డీలకు అప్పులు తెచ్చుకోవాల్సి వచ్చింది. అప్పులు పుట్టని రైతులైతే బంగారు ఆభరణాలను కుదవపెట్టి నగదు తెచ్చుకుని రబీ పంటలను సాగు చేసుకున్నారు. ఇంతటి దారుణమైన పరిస్థితులు ఎన్నడూ రాలేదని పలువురు రైతులు ఆవేదన వ్యక్తం చేస్తున్నారు. రబీ పంటల సాగు ఇలా రబీ సీజన్‌లో సాధారణ సాగు విస్తీర్ణం 76,531 హెక్లార్లు కాగా, ఇప్పటివరకు 47,674 హెక్టార్లలో రైతులు వివిధ పంటలు సాగు చేశారు. వరి 45,603 హెక్టార్లు, జొన్న 10, మొక్కజొన్న 19, పెసర 60, మినుము 35, ఉలువలు 53, శనగలు 141, వేరుశనగ 1753 హెక్టార్లు సాగు చేశారు.

న్యూఢిల్లీ: మూడు రాష్ట్రాల్లో ఓటమిపాలైన బీజేపీ రైతులకు చేరవయ్యేందుకు ప్రయత్నాలు ముమ్మరం చేసినట్లు తెలుస్తోంది. ఒక్కో పంటకాలానికి రైతులకు ఎకరాకు రూ.4 వేల చొప్పున నేరుగా వారి ఖాతాలోకే నగదును బదిలీచేసే కొత్త పథకానికి కేంద్రం సన్నాహాలు చేస్తున్నట్లు విశ్వసనీయ సమాచారం. అలాగే, ఎకరానికి రూ.50 వేల వడ్డీ రహిత (రైతుకు గరిష్టంగా రూ.లక్ష) రుణాలు అందించాలని యోచిస్తున్నట్లు తెలిసింది. ఈ రెండు పథకాల వల్ల కేంద్ర ఖజానాపై ఏటా రూ.2.3 లక్షల కోట్ల భారం పడే అవకాశాలున్నాయి. ఎరువుల సబ్సిడీ పథకాన్ని కూడా వీటిలో విలీనం చేయాలని యోచిస్తున్నట్లు తెలిసింది. వీటికి సంబంధించిన అధికారిక ప్రకటన ఈ వారంలోనే వెలువడుతుందని భావిస్తున్నారు.

సాక్షి, హైదరాబాద్‌: రైతు రుణమాఫీ కోసం వ్యవసాయశాఖ కసరత్తు ప్రారంభించింది. వచ్చే ఆర్థిక సంవత్సరంలో ప్రభుత్వం రైతులకు రూ.లక్ష వరకున్న రుణాల మాఫీ ప్రకటించేందుకు సన్నాహాలు చేస్తుండటంతో వ్యవసాయాధికారులు అందుకు సంబంధించిన ఏర్పాట్లలో నిమగ్నమయ్యారు. రాష్ట్రస్థాయి బ్యాంకర్ల సమితి (ఎస్‌ఎల్‌బీసీ)కి చెందిన బ్యాంకర్లతో వ్యవసాయ శాఖ అధికారులు శనివారం సమావేశమయ్యారు. ఈ విషయాన్ని అధికారులు గోప్యంగా ఉంచుతున్నారు. ముఖ్యమంత్రి కార్యాలయం నుంచి వచ్చిన ఆదేశాలతో రుణమాఫీ కసరత్తు వివరాలను బయటకు వెల్లడించట్లేదని చెబుతున్నారు. గతంలో రూ.లక్ష రుణమాఫీ నాలుగు విడతల ప్రక్రియ 2017 మార్చితో ముగిసింది. ఆ తర్వాతి నుంచి ఇప్పటివరకు నాలుగు సీజన్లలో ఎంతమంది రైతులు ఎంత రుణం తీసుకున్నారన్న విషయాలను అధికారులు సేకరించారు. అలాగే లక్ష రూపాయల లోపు రుణాలు తీసుకున్న రైతులెంత మందో సేకరించారు. మొత్తం రుణం తీసుకున్న రైతుల్లో వీరి శాతమెంత అనే వివరాలనూ గుర్తించారు. దాదాపు 90 శాతం పైగానే లక్ష రూపాయలు తీసుకున్న రైతులున్నట్లు నిర్ధారించినట్లు సమాచారం. గతంలో లక్ష రూపాయల రుణమాఫీ సందర్భంగా తలెత్తిన పలు సమస్యలను ఈసారి జరగకుండా చూసుకోవాలని సర్కారుకు బ్యాంకర్లు సూచించినట్లు తెలిసింది.  40 నుంచి 45 లక్షల మంది రైతులు.. ఈ సమావేశానికి హాజరైన ఒక అధికారి అంచనా ప్రకారం ఈసారి రుణమాఫీ 40 లక్షల నుంచి 45 లక్షల మంది రైతులకు చేయాల్సి వస్తుందని తెలిపారు. నాలుగు సీజన్లలో తీసుకున్న పంట రుణాలన్నింటినీ కలిపితే ఒక్కో రైతు సరాసరి రూ.50 వేల నుంచి రూ.60 వేల వరకు రుణం తీసుకొని ఉంటారని భావిస్తున్నారు. 2014లో ప్రభుత్వం 35.29 లక్షల మందికి లక్ష రూపాయలు మాఫీ చేయగా, ఈసారి అదనంగా 10 లక్షల మంది చేరే అవకాశముంది. అప్పుడు రూ.16,124 కోట్లు రుణమాఫీ చేయగా, ఈసారి రూ.20 వేల కోట్ల వరకు చేయాల్సి రావొచ్చని భావిస్తున్నారు. 2014లో ప్రభుత్వం రూ.లక్ష రుణమాఫీ చేసినప్పుడు, వాటిని నాలుగు వాయిదాల్లో చెల్లించిన సంగతి తెలిసిందే. అంటే 2017 మార్చి నాటికి వాయిదాలన్నీ చెల్లించారు. ఇప్పుడు ఆ తర్వాత నుంచి రుణాలు తీసుకున్న రైతులనే పరిగణనలోకి తీసుకుంటే 2017–18 ఖరీఫ్, రబీల్లో 39.11 లక్షల మంది రైతులు పంట రుణాలు తీసుకున్నారు. అందులో ఖరీఫ్‌లో 26.20 లక్షల మంది, రబీలో 12.90 లక్షల మంది రైతులు రుణాలు తీసుకున్నారు. ఆ ఏడాది రూ.31,410 కోట్ల రుణాలను బ్యాంకులు రైతులకు ఇచ్చాయి. 2018–19లో ఇప్పటివరకు 26.45 లక్షల మంది రైతులు పంట రుణాలు తీసుకున్నారు. వారికి బ్యాంకులు మొత్తం రూ.23,488 కోట్ల రుణాలు ఇచ్చాయి. అందులో ఈ ఖరీఫ్‌లో 22.21 లక్షల మంది రైతులు రూ.19,671 కోట్లు తీసుకున్నారు. ప్రస్తుత రబీలో ఇప్పటివరకు 4.24 లక్షల మంది రైతులు రూ. 3,816 కోట్ల రుణా లు తీసుకున్నారు. అయితే పూర్తిస్థాయిలో జిల్లాల నుంచి బ్యాంకుల వారీగా లెక్కలు తీసుకున్నాకే స్పష్టత వస్తుందని బ్యాంకర్లు అన్నట్లు సమాచారం. మార్గదర్శకాలపై వ్యవసాయశాఖ మేధోమథనం.. ప్రభుత్వం ఈసారి కూడా రుణమాఫీకి హామీ ఇవ్వడంతో మార్గదర్శకాలపై వ్యవసాయ శాఖ కసరత్తు ముమ్మరం చేసింది. సీఎం నుంచి వచ్చిన ఆదేశాల మేరకే మేధోమథనం చేస్తున్నట్లు తెలిసింది. అయితే 2014లోనూ రూ.లక్ష రుణమాఫీ చేశారు. ఇప్పుడూ రూ.లక్ష వరకే హామీ ఇచ్చారు. అయితే ఒకేసారి రుణమాఫీ ఉంటుందని సర్కారు చెప్పడంతో అమలు మార్గదర్శకాల తయారుపై తర్జనభర్జన మొదలైంది. ఒకేసారి రూ.20 వేల కోట్లు ఇవ్వాలంటే సాధ్యాసాధ్యాలపై చర్చ జరుగుతోంది. వచ్చే బడ్జెట్లో దీనికే రూ.20 వేల కోట్లు కేటాయిస్తే, రైతుబంధుకు మరో రూ.15 వేల కోట్లు కేటాయించాల్సి వస్తుంది. అంటే రుణమాఫీ, రైతుబంధుకే రూ.35 వేల కోట్లు కేటాయించాలి. ఈ నేపథ్యంలో వ్యవసాయ వర్గాలు పలువురు నిపుణులతో చర్చిస్తున్నట్లు తెలిసింది.  

గోనెగండ్ల/ నందికొట్కూరు/ గూడూరు రూరల్‌/ బొమ్మనహాళ్‌: వరుస పంట నష్టాలు వారిని అప్పుల్లోకి నెట్టాయి. ఆదుకోవాల్సిన సర్కారు చోద్యం చూస్తూ అరచేతిలో వైకుంఠం చూపిస్తూ కాల క్షేపం చేస్తోంది. దీంతో దిక్కుతోచని రైతన్నలు బలవన్మరణాలకు పాల్పడుతున్నారు. ఒక్క కర్నూలు జిల్లాలోనే ముగ్గురు రైతులు ఆత్మహత్య చేసుకోగా.. అనంతపురంలో మరొకరు తనువు చాలించారు. అన్నదాతలపై రాష్ట్ర ప్రభుత్వ చిత్తశుద్ధికి అద్దంపడుతున్న ఈ ఘటనలకు సంబంధించి పోలీసులు, కుటుంబ సభ్యులు తెలిపిన వివరాలిలా ఉన్నాయి.. కర్నూలు జిల్లా గోనెగండ్ల మండలం పెద్దనేలటూరు గ్రామానికి చెందిన బెస్త మల్లయ్యకు(58) ఐదెకరాల పొలం ఉంది. వర్షాభావంతో నాలుగేళ్లుగా పంటలు సక్రమంగా పండకపోవడంతో పాటు వాటికి గిట్టుబాటు ధర లభించలేదు. ఈ ఏడాదీ వేసిన పత్తి వర్షాల్లేక ఎండిపోయింది. దీంతో సాగుకు, కుటుంబ పోషణ నిమిత్తం చేసిన ప్రైవేట్‌ అప్పులు దాదాపు రూ.6లక్షలకు చేరాయి. రుణదాతల ఒత్తిళ్లు ఎక్కువ కావడంతో వీటిని తీర్చే మార్గం కానరాక ఆదివారం రాత్రి పురుగు మంది సేవించాడు. కుటుంబ సభ్యులు చికిత్స నిమిత్తం ఎమ్మిగనూరు ప్రభుత్వాస్పత్రికి తరలించారు. మెరుగైన వైద్యం కోసం కర్నూలుకు తరలిస్తుండగా మార్గమధ్యంలో మల్లయ్య మరణించాడు.  పంటలు పండక.. అప్పులు తీర్చలేక.. నందికొట్కూరు మండలం కొణిదేల గ్రామానికి చెందిన ఎద్దుల రాజేశ్వరరెడ్డి (26) నాలుగేళ్లుగా పంట నష్టాలను చవిచూశాడు. రెండేళ్ల క్రితం అప్పులు తీర్చేందుకు ఐదెకరాల సొంత భూమి అమ్మినా అప్పులు పూర్తిగా తీరలేదు. ఈ నేపథ్యంలో 22 ఎకరాల భూమిని కౌలుకు తీసుకుని రెండేళ్లుగా సాగు చేస్తున్నా పంటలు సక్రమంగా పండలేదు. దీంతో ప్రైవేట్‌ వ్యక్తుల వద్ద చేసిన అప్పులు రూ.8 లక్షలకు పైగా చేరాయి. బంగారు తాకట్టు పెట్టి రూ.2.50 లక్షలు కూడా తీసుకున్నాడు. అప్పులన్నీ తలకు మించిన భారం కావడంతో ఈ నెల 4వ తేదీ రాత్రి ఇంట్లో ఫ్యాన్‌కు ఉరివేసుకున్నాడు. కొనఊపిరితో ఉన్న రాజేశ్వరరెడ్డిని కుటుంబ సభ్యులు కర్నూలు ప్రభుత్వ వైద్యశాలకు తరలించారు. అక్కడ చికిత్స పొందుతూ సోమవారం మృతి చెందాడు.  పొలంలోనే పురుగుమందు సేవించి.. ఇదే జిల్లా గూడూరు మండలం గుడిపాడు గ్రామానికి చెందిన చాకలి చిన్న గిడ్డన్న (45) తనకున్న 2.25 ఎకరాల భూమితో పాటు మరో రెండు ఎకరాలను కౌలుకు తీసుకుని పంటలు సాగుచేసేవాడు. మూడేళ్లుగా ప్రైవేటు వ్యక్తుల వద్ద రూ.3 లక్షల వరకు అప్పులు చేశాడు. గత ఏడాది ఆంధ్రా బ్యాంకు నుంచి రూ.50 వేలు తీసుకున్నాడు. ఈ ఏడాది తీవ్ర వర్షాభావం కారణంగా పత్తి పంట పూర్తిగా ఎండిపోయింది. అప్పులు తీర్చే పరిస్థితి కనిపించక ఈ నెల 7న పొలంలోనే పురుగుల మందు తాగాడు. రైతులు, కూలీలు అతన్ని కర్నూలు ప్రభుత్వాస్పత్రిలో చేర్పించారు. చికిత్స పొందుతూ సోమవారం మరణించాడు. పంటను కాపాడుకోలేక... అనంతపురం జిల్లా బొమ్మనహాల్‌ మండలంలోని ఉంతకల్లు గ్రామానికి చెందిన దాసరి హనుమంతప్ప కుమారుడు దాసరి నాగరాజు(24)కు 1.5 ఎకరాల పొలం ఉంది. వరి సాగు చేస్తూ కుటుంబాన్ని పోషిస్తున్నాడు. ఇద్దరు అక్కల పెళ్లిళ్లు, క్యాన్సర్‌తో బాధపడుతున్న తండ్రి చికిత్సకు రూ.3.50 లక్షల దాకా అప్పు చేశాడు. బ్యాంకుల్లో పంట రుణం కింద రూ.2లక్షలు తీసుకున్నా వడ్డీలకే సరిపోయింది. దీంతో కొంతకాలం బళ్లారిలో కూలీగా, ఆ తర్వాత ఆటో డ్రైవర్‌గా పనిచేశాడు. ఇటీవల గ్రామం చేరుకుని వరి సాగు చేస్తున్నాడు. ఈ నేపథ్యంలో సోమవారం ఏపుగా ఉన్న పంటను కాపాడుకునేందుకు అవసరమైన డబ్బు చేతిలో లేకపోవడం.. అప్పటికే అప్పులు ఎక్కువవడంతో అప్పు దొరికే మార్గం లేక తీవ్ర మనోవేదనకు గురై పురుగుమందు తాగి ఆత్మహత్యకు పాల్పడ్డాడు. తండ్రి ఫిర్యాదు మేరకు కేసు నమోదు చేసుకున్నట్లు ఎస్‌ఐ తెలిపారు.

సాక్షి, హైదారాబాద్‌: రాష్ట్రంలో వ్యవసాయ పంట రుణాల పరిస్థితి పూర్తిగా మారిపోయింది. రాష్ట్రం ఏర్పడక ముందు తెలంగాణ ప్రాంతంలో లక్ష్యానికి మించి పంట రుణాలిచ్చిన బ్యాంకులు.. నాలుగేళ్లుగా మాత్రం ఆ లక్ష్యాలు చేరుకోవడం లేదు. 2011–12 ఆర్థిక సంవత్సరంలో లక్ష్యానికి మించి 115 శాతం, 2012–13లో 121 శాతం, 2013–14లో 103 శాతం ఇవ్వగా.. రాష్ట్రం ఏర్పడ్డాక 2014–15లో లక్ష్యంలో 93 శాతమే రైతులకు ఇచ్చాయి. అలా తగ్గుతూ వచ్చిన రుణాలు గతేడాది 79 శాతానికి చేరుకున్నాయి. 2017–18లో పంట రుణాల లక్ష్యం రూ. 39,752 కోట్లు కాగా, రూ. 31,410 కోట్లే అందించాయి. దీర్ఘకాలిక వ్యవసాయ రుణాల పరిస్థితి చెప్పనక్కర్లేదు. భూమి చదును చేయడం, బావులు తీయడం తదితర మౌలిక సదుపాయాల కోసం ఇచ్చే ఈ రుణాల విషయంలో బ్యాంకులు తీవ్ర నిర్లక్ష్యం చూపాయి. 2011లో లక్ష్యానికి మించి 205 శాతం, 2012–13లో 121 శాతం, 2013–14లో 200 శాతం రుణాలిచ్చిన బ్యాంకులు.. 2014–15లో కేవలం 62 శాతమే ఇచ్చాయి. ఇప్పటికీ అదే పరిస్థితి కొనసాగుతోంది.   కొత్త రుణమే లేదు  ప్రస్తుత ఖరీఫ్‌లో రుణాల పరిస్థితి మరీ ఘోరంగా మారింది. ఈ ఖరీఫ్‌లో 83 శాతం విస్తీర్ణంలో పంటలు సాగవగా ఇప్పటివరకు బ్యాంకులు 30 శాతానికి మించి రుణాలివ్వలేదు. ఈ ఖరీఫ్‌ పంట రుణాల లక్ష్యం రూ. 25,496 కోట్లు, కానీ తాజా లెక్కల ప్రకారం ఇప్పటివరకు బ్యాంకులు రూ. 7,300 కోట్లే ఇచ్చాయి. విచిత్రమేంటంటే ఈ ఖరీఫ్‌లో ఇప్పటివరకు రుణాలు తీసుకున్న వారంతా రెన్యువల్‌ చేసుకున్న వారే. అంటే పాత బాకీలు చెల్లించి రెన్యువల్‌ చేసుకున్నవారే. ఇతరులకు కొత్తగా రుణం ఇవ్వలేదని సర్కారుకు పంపిన బ్యాంకు నివేదికే స్పష్టం చేసింది. బ్యాంకులు సహకరించక, మరోదారి లేక ప్రైవేటు వడ్డీ వ్యాపారస్తుల వద్ద రైతులు అప్పులు చేస్తున్నారు. ఈ విషయమై ప్రభు త్వం మొత్తుకుంటున్నా, రాష్ట్ర స్థాయి బ్యాంకర్ల సమితి (ఎస్‌ఎల్‌బీసీ) సమావేశాల్లోనూ ప్రస్తావిస్తున్నా బ్యాంకుల వైఖరిలో మార్పు రావడం లేదన్న విమర్శలున్నాయి.   సర్కారు, బ్యాంకుల మధ్య దూరమే!:  భూ రికార్డుల ప్రక్షాళన తర్వాత రాష్ట్రంలో రైతుల సంఖ్య 58.33 లక్షలుంది. కానీ వారిలో 46.50 లక్షల మందికే కొత్త పట్టాదారు పాసుపుస్తకాలు వచ్చాయి. అయితే రైతుల వివరాలు ధరణి వెబ్‌సైట్‌లో సరిచూసుకొని రుణాలు ఇవ్వాలన్న సర్కారు నిబంధనే రుణాల విడుదలకు శాపమైందని చెబుతున్నారు. వెబ్‌సైట్‌ ఇప్పటికీ అమలులోకి రాకపోవడంతో రెన్యువల్‌ చేసుకున్న వారికి తప్ప కొత్త రుణం రాలేదు. ఇలా కొందరు బ్యాంకు వర్గాలు ధరణిని సాకుగా చూపిస్తుండగా.. మరికొందరు ప్రభుత్వమే కారణమంటున్నారు. సకాలంలో రుణమాఫీ చేయకపోవడం వల్ల రుణాలపై వడ్డీ ఎలా చెల్లిస్తారో చెప్పకుండా గాలికొదిలేశారన్న ఆరోపణలున్నాయి. పావలా వడ్డీ సొమ్ము కూడా చెల్లించలేదని చెబుతున్నారు. ఇలా ప్రభుత్వం, బ్యాంకుల మధ్య తీవ్రమైన అగాథమే పంట, దీర్ఘకాలిక రుణాల్లో సమస్యలకు కారణమని కొందరు విశ్లేషిస్తున్నారు.  

సాక్షి, హైదరాబాద్‌: వ్యవసాయ రుణాల పంపిణీలో బ్యాంకులు తాత్సారం చేయొద్దని గవర్నర్‌ నరసింహన్‌ అన్నారు. రుణాల పంపిణీ సకాలంలో జరిగితేనే పంటలసాగు ప్రక్రియ సులభతరమవుతుంద న్నారు. సూచించారు. గురువారం ఇక్కడ నాబార్డ్‌ కార్యాలయంలో జరిగిన 37వ వ్యవస్థాపక దినోత్సవానికి ఆయన ముఖ్యఅతిథిగా హాజరయ్యారు. ఆయన మాట్లాడుతూ వ్యవసాయ రంగాన్ని ప్రోత్సహించడంలో నాబార్డు కీలకపాత్ర పోషిస్తోందన్నారు.  మహిళ, గిరిజన రైతులను ప్రోత్సహించాలని, ఆ మేరకు వినూత్న కార్యక్రమాలు చేపట్టాలన్నారు. ప్రభుత్వాలు నీటిపారుదల ప్రాజెక్టులకు భారీ మొత్తంలో బడ్జెట్‌ కేటాయిస్తున్నా వ్యవసాయ అభివృద్ధికి అదేస్థాయిలో ప్రోత్సాహకాల రూపంలో ఖర్చు చేస్తున్నట్లు వివరించారు. వ్యవసాయ రంగంలో కొత్త ఆవిష్కరణలు వస్తున్నాయని, వీటిని క్షేత్రస్థాయిలో రైతాంగానికి తెలియజేయాలని, ఆమేరకు నిరంతరం శిక్షణ తరగతులు నిర్వహించాలని సూచించారు. వ్యవసాయంలో సాంకేతిక పరిజ్ఞానం వాడకాన్ని పెంచాలని, దీంతో తక్కువ సమయంలో అధిక దిగుబడి సాధించవచ్చని, ఖర్చు తగ్గి రైతులకు లాభాలు పెరుగుతాయన్నారు. నీటి గొడవలను సామరస్యపూర్వకంగా పరిష్కరించుకుంటే వ్యవసాయ పురోగతి వేగంగా ముందుకు సాగుతుందని పేర్కొన్నారు.  కార్యక్రమంలో నాబార్డు తెలంగాణ చీఫ్‌ జనరల్‌ మేనేజర్‌ పి.రాధాకృష్ణన్, ఏపీ చీఫ్‌ జనరల్‌ మేనేజర్‌ కె.సురేశ్‌కుమార్‌ తదితరులు పాల్గొన్నారు.   

సాక్షి, మహబూబ్‌నగర్‌ న్యూటౌన్‌ : పేదలకు ఆర్థిక తోడ్పాటునందించేందుకు ప్రభుత్వం మంజూరు చేస్తున్న రుణాల గ్రౌండింగ్‌లో బ్యాంకర్లు అవలంబిస్తున్న తీరు ఏ మాత్రం బాగోలేదని జిల్లా కలెక్టర్‌ రొనాల్డ్‌రోస్‌ అసహనం వ్యక్తం చేశారు. ఈ మేరకు రుణాలివ్వని బ్యాంకర్లపై ఎస్సీ, ఎస్టీ అట్రాసిటీ కేసులు నమోదు చేయాలని ఆయా కార్పొరేషన్ల అధికారులను ఆదేశించారు. కలెక్టరేట్‌లోని రెవె న్యూ సమావేశ మందిరంలో డీఎల్‌ఆర్‌సీ, డీసీసీ సమావేశం మంగళవారం జరిగింది. ఈ సందర్భంగా 2014 నుండి 2018 వరకు ప్రభుత్వం నుండి వివిధ కార్పొరేషన్ల ద్వారా మంజూరు చేసిన రుణాలు, గ్రౌండింగ్, సబ్సిడీలు విడుదలపై బ్యాంకర్లు, అధికారులతో కలెక్టర్‌ చర్చించారు. ఎస్సీ కార్పొరేషన్, ఎస్టీ కార్పొరేషన్, బీసీ కార్పొరేషన్ల ద్వారా ఆయా ఆర్థిక సంవత్సరాల్లో ప్రభుత్వం మంజూరు చేసిన రుణాలు, వాటి గ్రౌండింగ్, అమలులో సమస్యలపై ఆరా తీశారు. బ్యాంకర్లు రుణాల మంజూరుపై అవలంభిస్తున్న తీరు ఏ మాత్రం సరిగా లేదని, ప్రజావాణిలో ఎక్కువగా ఫిర్యాదులు వస్తున్నాయని పేర్కొన్నారు. చిన్నదర్పల్లిలో ఎస్సీ కార్పొరేషన్‌ రుణాలు ఇవ్వడం లేదని మహబూబ్‌నగర్‌ ఎమ్మెల్యే సమావేశం లో ప్రస్తావించగా స్పందించిన కలెక్టర్‌ బ్యాంకర్‌పై వెంటనే ఎస్సీ, ఎస్టీ అట్రాసిటీ కేసు నమోదు చేయాలని ఎస్సీ కార్పొరేషన్‌ అధికారులను ఆదేశించారు. బ్యాంకర్లపై కేసులను చిన్నదర్‌పల్లి నుండే ప్రారంభించాలని సూచించారు. బ్యాంకర్లు తీరు మార్చుకోకపోతే చర్యలు తప్పవ ని హెచ్చరించారు. యూనిట్లు లేకున్నా ఉన్నట్లు బ్యాంకర్లు సర్టిఫికేట్లు ఇవ్వడంతో ప్రభుత్వం సబ్సిడీలు విడుదల చేస్తుందని, జిల్లాలో 70 శాతం యూనిట్లు ఇలాంటివే ఉంటున్నాయన్నారు. ఇలాంటి పరిస్థితి మారాలని, బ్యాంకర్లు వాస్తవ పరిస్థితులకు అనుగుణంగా యూనిట్లను ధ్రువీకరించాలని కలెక్టర్‌ సూచించారు.  కాన్సెంట్, డిపాజిట్, ఇన్సూరెన్సు బిజినెస్‌ వద్దు  ‘ప్రభుత్వం మంజూరు చేసి యూనిట్లకు కాన్సెంట్‌ అవసరమే లేదు.. కాన్సెంట్‌ ఎందుకు అడుగుతున్నారు.. మండల స్థాయిలోని ఎంపిక కమిటీ నిర్ణయం ప్రకారం బ్యాంకర్లు రుణాలు మంజూరు చేయాల్సిందే’ అని కలెక్టర్‌ రొనాల్డ్‌రోస్‌ సమావేశంలో స్పష్టం చేశారు. ఆయా కార్పొరేషన్లు, ఇతర ప్రభుత్వ మద్దతు పథకాలకు సంబందించిన అధికారులు ఈ విషయాన్ని గుర్తించుకుని మాట్లాడాలని సూచించారు. జిల్లా స్థాయి అధికారులుగా ఉండి ఈ విషయం తెలియకుంటే ఎలా అంటూ అసహనం వ్యక్తం చేశారు. జిల్లాలో వివిధ బ్యాంకులు ప్రభుత్వం మంజూరు చేసిన రుణాల గ్రౌండింగ్‌కు డిపాజిట్లు సేకరిస్తున్నట్లు సమాచారముందని, అంతేకాకుండా రుణాలు విడుదల చేస్తూ ఇన్సూరెన్సు కోత విధిస్తున్నట్లు తెలిసిందని. ఇకనైనా కాన్సెంట్, డిపాజిట్, ఇన్సూరెన్స్‌ల పేరుతో బిజినెస్‌లు చేయొద్దని హెచ్చరించారు.   లక్ష్యం మేరకు పంట రుణాలు  జిల్లాలో రబీ కంటే ఖరీఫ్‌ సాగు ఎక్కువగా వేస్తారని, వర్షాలు కురుస్తున్నందున పంట రుణాలను మంజూరు చేయాలని బ్యాంకర్లకు కలెక్టర్‌ సూచించారు. టార్గెట్‌ ప్రకారం పంట రుణాలు ఇవ్వాలని స్పష్టం చేశారు. ఈ నెల 20వ తేదీ లోపు భూ ప్రక్షాళన కార్యక్రమం తప్పొప్పుల సవరణ పూర్తి కానుందని, త్వరలో ధరణి లింక్‌ను ప్రభుత్వం బ్యాంకర్లకు ఇవ్వనుందని తెలిపారు. ఆన్‌లైన్‌లో భూ రికార్డులు పక్కాగా అందుబాటులోకి రానున్నాయని, అప్పటివరకు తాము ఇచ్చే బ్యాంకు వారీగా రైతులు, ఖాతాలు, భూ వివరాల నివేదిక ఆధారంగా రుణాలు ఇవ్వాలన్నారు. సమావేశంలో మహబూబ్‌నగర్, పరిగి ఎమ్మెల్యేలు శ్రీనివాస్‌గౌడ్, రామ్మోహన్‌రెడ్డి, ఎల్‌డీఎం ప్రభాకర్‌ శెట్టి, నాబార్డు ఏజీఎం అమితాబ్‌ భార్గవ్, ఆర్‌బీఐ అధికారులు, కార్పొరేషన్లు, బ్యాంకుల ప్రతినిధులు పాల్గొన్నారు. 

భైంసా(ముథోల్‌): బ్యాంకర్లు తలుచుకుంటే రైతులకు ఇబ్బందులు ఉండవని రైతుబంధు చెక్కుల పంపిణీతో వెల్లడైంది. వారం పాటు నిర్మల్‌ జిల్లా వ్యాప్తంగా రైతులందరికీ గ్రామాల్లో పంపిణీ బృందాలు చెక్కులు అందించారు. అన్నదాతలు వీటిని నేరుగా తీసుకువచ్చి జిల్లాలోని ఆయా బ్యాంకుల్లో అందజేయగా.. ఎలాంటి ఇబ్బంది తలెత్తకుండా నగదు వారికి చేతికి అందించారు అధికారులు. దీంతో జిల్లా రైతులంతా బ్యాంకర్ల సేవకు మురిసిపోయారు. తొలిసారిగా రైతులను బ్యాంకర్లు గౌరవించడం, వారిని ఆహ్వానించడం, బ్యాంకుల ఎదుట టెంట్లు ఏర్పాటు చేసి కుర్చీలు వేసి చల్లని నీరందించి చేతికి నగదు అందించడం ఎంతో ఆనందాన్ని ఇచ్చింది.   పంట రుణాలకు సైతం  జిల్లాలో సాగు విస్తీర్ణం, రైతుల సంఖ్య ఎప్పుడూ దాదాపు ఒక్కటే.. బ్యాంకులు కూడా అవే. అయితే ఈ రైతులే పంటరుణం కోసం బ్యాంకులకు వెళితే అక్కడి సిబ్బంది ఇచ్చే మర్యాదలు వారు అందించే సేవలు పూర్తి విరుద్ధం. అయితే ప్రస్తుతం రాష్ట్ర ప్రభుత్వం ప్రతిష్టాత్మకంగా భావించిన రైతుబంధు పథకంలో జిల్లా రైతులకు బ్యాంకుల నుంచి మర్యాద దక్కింది. గతంలో పాసుపుస్తకాలను, ఇతర ప్రతులను తీసుకువెళ్లి పంట రుణాల కోసం వెళితే నానా ఇబ్బందులు పడేవారు. బ్యాంకు అధికారులను ఏడు, ఎనిమిది సార్లు కలిస్తేగాని రుణాలు ఇచ్చేవారు కాదు. నెల రోజులు తిరిగితే గాని ఈ పని అయ్యేది కాదు. మధ్యవర్తుల ప్రమేయంతో వెళ్లే రైతుల పని మాత్రం త్వరగానే పూర్తయ్యేది.    మధ్యవర్తులకే ప్రాధాన్యం...  నిర్మల్, ఖానాపూర్, కడెం, నర్సాపూర్, సారంగాపూర్, దిలావర్‌పూర్, కుంటాల, కల్లూరు, భైంసా, కుభీర్, తానూరు, లోకేశ్వరం, దేగాం, అబ్దుల్లాపూర్, వానల్‌పాడ్, బాసర, మామడ, లక్ష్మణచాంద ఇలా ఏ ప్రాంతంలోని బ్యాంకుకు వెళ్లినా అక్కడ బ్యాంకర్లు మధ్యవర్తులకే అధిక ప్రాధాన్యం ఇచ్చేవారనే ఆరోపణలున్నాయి. బ్యాంకర్ల సహకారంతో పంటరుణాల రెన్యువల్‌ పేరిట మధ్యవర్తులు అమాయక రైతులను దోచుకుంటున్నారు. రుణాలు రెన్యువల్‌ చేయాలంటే తీసుకున్న మొత్తాన్ని కట్టాలని బ్యాంకర్లు సూచిస్తున్నారు. దీంతో ఏటా తాము తీసుకున్న డబ్బును రెన్యువల్‌ చేసేందుకు మధ్య దళారుల వద్ద రెండు రోజులకు రూ.50వేలకు రూ.2వేల నుంచి రూ.3వేల వరకు అధికంగా కలిపి ఇస్తున్నారు. ఈ విధానం ఏటా జరుగుతూనే ఉంది. ఈ తతంగం బ్యాంకర్ల సహకారంతోనే ముందుకు సాగుతోంది. రైతులు తీసుకున్న రుణాలకు కేవలం వడ్డీ మాత్రమే తీసుకుంటే రైతులు మధ్య దళారులను కలవాల్సిన అవసరం ఉండదు. వడ్డీ తీసుకుని అసలు మళ్లీ క్రాప్‌లోన్‌ కింద జమ చేస్తే రైతులకు ఇబ్బందులు తలెత్తవు.   దృష్టిసారిస్తే వారం రోజుల్లోనే..  ప్రభుత్వ యంత్రాంగం పాలకులు దృష్టి సారిస్తే వారం రోజుల్లోనే పంటరుణాల ఇబ్బందులను పరిష్కరించవచ్చు. రైతుబందు చెక్కుల పంపిణీలో అధికార యంత్రాంగం తీసుకున్న నిర్ణయాలు మంచి ఫలితాలను ఇచ్చాయి. ఏటా ఖరీఫ్, రబీ సీజన్‌లలో పంటరుణాల కోసం కూడా రైతులకు ఇబ్బందులు తలెత్తకుండా ఇలాంటి నిర్ణయాలనే తీసుకోవాలని అన్నదాతలు కోరుతున్నారు. మర్యాదలు బాగున్నాయి   ఇప్పుడు బ్యాంకర్లు బాగా నే మర్యాదలు ఇస్తున్నా రు. రైతులకు ఎప్పుడూ ఇలాంటి మర్యాదలే ఇవ్వాలి. బ్యాంకుకు వెళ్లిన వారందరికీ సేవలు అందిస్తున్నారు. వెంటనే నీడపట్టున కుర్చీలో కూర్చోవాలని సూచిస్తున్నారు. క్రాప్‌లోన్‌లు ఇచ్చే సమయంలోనూ జిల్లా రైతులకు ఇలాంటి సహాయ సహకారాలే అందించాలని వేడుకుంటున్నాం. బ్యాంకర్లు తలుచుకుంటే సాధ్యపడనిది ఏది ఉండదు.  – సాయినాథ్, రైతు మహాగాం    రుణాలపై దృష్టి సారించాలి   పంటరుణాలు ఇప్పించే విషయంలోనూ ఇలాగే బ్యాంకర్లు మర్యాదలు ఇవ్వాలి. అధికారుల బృందం అంతా బ్యాంకు వద్దే ఉంచాలి. రెవెన్యూ, వ్యవసాయశాఖ అధికారులు బ్యాంకు వద్ద ఉంటే సమస్యలు తీరుతాయి. స్థానికంగా ఉన్న చోటే రైతులకు ధ్రువీకరణ పత్రాలు అందుతాయి. ఫలితంగా రుణాలు కూడా సకాలంలోనే దొరికే అవకాశం ఉంటుంది. రైతుబంధు చెక్కులకు నగదు ఇచ్చినట్లే క్రాప్‌లోన్‌లకు సైతం వెంటనే నగదు అందించాలి. బ్యాంకర్లు రైతులందరికీ ఇలాగే మర్యాదలు అందించాలని కోరుకుంటున్నాం.  – రాజ్యం, రైతు కిర్గుల్‌(బి)

హైదరాబాద్‌: రైతాంగ సమస్యలపై శుక్రవారం(23న) ‘చలో అసెంబ్లీ’నిర్వహించనున్నట్లు బీజేపీ రాష్ట్ర అధ్యక్షుడు డాక్టర్‌ కె.లక్ష్మణ్‌ తెలిపారు. బుధవారం ఇక్కడి పార్టీ రాష్ట్ర కార్యాలయంలో విలేకరులతో మాట్లాడారు. రూ.లక్షలోపు పంటరుణాలు మాఫీ చేస్తామన్న సీఎం కేసీఆర్‌ మాటలు నమ్మి అనేకమంది రైతులు బ్యాంకు రుణాలు కట్టలేదని, కానీ హామీ నెరవేర్చకుండా ప్రభుత్వం మోసం చేసిందన్నారు. రుణాలు చెల్లించకపోతే చర్యలు తీసుకుంటామని సిద్దిపేట జిల్లా దుబ్బాక ప్రాంతంలోని 1,600 మందికిపైగా రైతులకు బ్యాంకులు నోటీసులు జారీ చేశాయన్నారు. రాష్ట్రంలో 80 వేల మంది రైతులు అప్పులఊబిలో చిక్కుకొని అల్లాడుతున్నా రాష్ట్ర ప్రభుత్వం ‘నిమ్మకు నీరెత్తినట్లుగా’ వ్యవహరిస్తోందని విమర్శించారు. రైతాంగానికి దాదాపు 500 కోట్లు వడ్డీలేని రుణాలు ఇవ్వాలని, రైతులు తీసుకున్న రుణాలకు వడ్డీ కింద కేంద్రం 3 శాతం జమ చేస్తే, రాష్ట్రం 4 శాతం ఇవ్వాల్సి ఉందన్నారు. ప్రభుత్వ వాటా చెల్లించక పోవడంతో వడ్డీ పెరిగిపోయి దాదాపు 15 లక్షల మంది రైతులు ఆర్థికంగా నష్టపోయే పరిస్థితి ఏర్పడిందన్నారు. దీంతో ప్రభుత్వ వైఫల్యాలను నిరసిస్తూ ఈ నెల 23న కిసాన్‌ మోర్చా ఆధ్వర్యంలో చలో అసెంబ్లీ నిర్వహిస్తున్నట్లు తెలిపారు. సమావేశంలో బీజేపీ రాష్ట్ర ప్రధాన కార్యదర్శి ప్రేమేందర్‌రెడ్డి, అధికార ప్రతినిధి రఘునందన్‌రావ్, మహిళా మోర్చా రాష్ట్ర అధ్యక్షురాలు ఆకుల విజయ తదితరులు పాల్గొన్నారు.    

సాక్షి, హైదరాబాద్‌: ఆదిలాబాద్, రంగారెడ్డి, మెదక్‌ జిల్లాల్లో రీషెడ్యూల్‌ చేసిన పంట రుణాలను మాఫీ చేయాలని బీజేఎల్పీ నేత కిషన్‌రెడ్డి ముఖ్యమంత్రి కేసీఆర్‌కి లేఖ రాశారు. 2013–14 సంవత్సరానికి రీషెడ్యూల్‌ చేసిన రుణాలను మాఫీ చేయలేదని, వెంటనే దాన్ని చేపట్టాలని పేర్కొన్నారు. గత శాసనసభ సమావేశాల్లో బీజేపీ ఈ అంశాన్ని లేవనెత్తిందన్నారు. మూడు జిల్లాల రైతులకు నష్టం జరిగిన మాట నిజమేనని, వారికి న్యాయం చేస్తామని సీఎం పేర్కొన్నప్పటికీ అమలు కాలేదన్నారు. కరువు కారణంగా పంట రుణాల రీషెడ్యూల్‌కు ఆర్‌బీఐ ఆదేశించిందన్నారు.

సాక్షి, హైదరాబాద్‌: రైతులను అన్ని విధాలా ఆదుకోవాల్సిన బ్యాంకులు వారిని చిన్నచూపు చూస్తున్నాయని విమర్శలు వస్తున్నాయి. విత్తనాలు, ఎరువుల కొనుగోలు తదితర స్వల్పకాలిక అవసరాలకు ఇచ్చే పంట రుణాలకు మాత్రమే బ్యాంకులు పరిమితమవుతున్నాయి. భూమి చదును, బావుల తవ్వకం, బోర్లు వేయడం, పంపుసెట్లు కొనడం ఇలా రైతుకు ఉపయోగపడే అనేక అవసరాలకు అందజేయాల్సిన దీర్ఘకాలిక వ్యవసాయ రుణాల నుంచి బ్యాంకులు పక్కకు జరుగుతున్నాయని వ్యవసాయరంగ నిపుణులు అంటున్నారు. స్వల్పకాలిక రుణాలతో పోలిస్తే, దీర్ఘకాలిక రుణాలకు బ్యాంకులు ఇస్తున్న ప్రాధాన్యం ఏటేటా తగ్గుతోంది. దీంతో రైతులు వ్యవసాయ పనులకు అవసరమైన డబ్బు కోసం ప్రైవేటు అప్పులు చేయాల్సిన పరిస్థితి ఏర్పడింది. ఇటీవల కాలంలో పంట రుణాలను సకాలంలో ఇవ్వడానికే బ్యాంకులు నానా యాగీ చేస్తుండటంతో దీర్ఘకాలిక వ్యవసాయ రుణాల విషయాన్ని ప్రభుత్వాలు కూడా పట్టించుకోవడంలేదు.   భూమి చదునుకు లేదు... పోడు భూముల అభివృద్ధి లేదు  వ్యవసాయం, దాని అనుబంధ రంగాల్లో రైతులు దీర్ఘకాలిక రుణాలు తీసుకుంటారు. వివిధ పథకాల కోసం రైతులు తమ వాటాగా చెల్లించాల్సిన సొమ్మును కూడా బ్యాంకు రుణం ద్వారానే చెల్లిస్తుంటారు. ఉద్యాన, పాడి, మత్స్య, కోళ్ల పరిశ్రమ వంటి రంగాలు, అలాగే సాగుకు సంబంధించి బోర్లు వేయడానికి, సూక్ష్మసేద్యం పరి కరాలు, వ్యవసాయ యంత్రాల కొనుగోలు, భూమి చదును చేయడానికి ఎక్కువగా దీర్ఘకాలిక రుణాలు తీసుకుంటారు. పోడు భూముల అభివృద్ధికి కూడా దీర్ఘకాలిక రుణాలే తీసుకుంటారు. అయితే, దీర్ఘకాలిక రుణాలు తగ్గిపోవడంతో పోడు భూములు అభివృద్ధి చేసుకునే పరిస్థితే లేకుండా పోయింది. సీజన్‌ ప్రారంభంలో భూమి చదును చేసుకునేందుకు ఆర్థికంగా ఆదుకునే దిక్కు లేకుండా పోయింది. సూక్ష్మసేద్యం కోసం రుణాలు తీసుకోవాలన్నా బ్యాంకులు ఇచ్చే పరిస్థితి లేకుండా పోయింది.   ఏడేళ్లలో 188%నుంచి 21%వరకు పతనం పంట రుణాలను ప్రతీ ఏడాది రైతులు రెన్యూవల్‌ చేసుకోవాలి. ఆ రుణాలకు ఏడు శాతం వడ్డీ చెల్లించాలి. ఈ రుణాలను రైతులు విత్తనాలు, ఎరువుల కొనుగోలు సమయంలో తీసుకుంటారు. దీర్ఘకాలిక రుణాలను బ్యాంకులు 11 శాతం వడ్డీతో రైతులకు ఇస్తాయి. మూడు నుంచి ఐదేళ్లలో ఈ రుణాలను తీర్చితే సరిపోతుంది. వివిధ వ్యవసాయ పథకాలకు రైతు వాటా కింద ఈ రుణాలను తీసుకోవచ్చు. రూ. 2 లక్షల నుంచి 3 లక్షలు.. ఇలా ఎంతైనా తీసుకునే వెసులుబాటుంది. అంతేగాక గ్రీన్‌హౌస్‌ వంటి ప్రభుత్వ పథకమైతే రైతు తన వాటా కింద ఎకరానికి రూ.10 లక్షలు చెల్లించాలి. ఈ నేపథ్యంలో రూ.10–20 లక్షలు కూడా ఇస్తారు. అయితే, బ్యాంకులు దీర్ఘకాలిక రుణాలను పెద్దగా ఇవ్వడం లేదు. గతంలో 2011–12 ఆర్థిక సంవత్సరంలో తెలంగాణలో దీర్ఘకాలిక రుణ లక్ష్యం రూ. 5,890 కోట్లు కాగా, బ్యాంకులు లక్ష్యానికి మించి రూ.11,112 కోట్ల వరకు ఇచ్చాయి. అంటే 188.65 శాతం రుణాలు ఇచ్చాయి. అలాంటిది 2017–18 ఆర్థిక సంవత్సరంలో దీర్ఘకాలిక పంట రుణాల లక్ష్యం రూ.14,512 కోట్లు కాగా, కేవలం రూ. 3,118 కోట్లే ఇచ్చినట్లు వ్యవసాయ శాఖ వర్గాలు తమ నివేదికలో వెల్లడించాయి. అంటే, లక్ష్యంలో కేవలం 21.48 శాతమే అందజేశాయి. దీర్ఘకాలిక రుణాలపై బ్యాంకుల నిర్లక్ష్యం వల్ల ప్రభుత్వం చేపట్టే అనేక పథకాల్లో రైతులకు తమ వాటా చెల్లించేందుకు డబ్బులు అందని పరిస్థితి నెలకొంది.  

సాక్షి, హైదరాబాద్‌: పంట రుణాలతో పాటు రైతులకు దీర్ఘకాలిక రుణాలివ్వడంలో బ్యాంకులు తగిన ప్రాధాన్యం ఇవ్వాలని వ్యవసాయశాఖ ముఖ్య కార్యదర్శి సి.పార్థసారథి బ్యాంకర్లకు విజ్ఞప్తి చేశారు. బుధవారం జరిగిన రాష్ట్రస్థాయి బ్యాంకర్ల సమితి (ఎస్‌ఎల్‌బీసీ) సమావేశంలో ఆయన మాట్లాడుతూ.. ఈ ఏడాది దీర్ఘకాలిక రుణ లక్ష్య సాధన చాలా తక్కువగా ఉందన్నారు. వ్యవసాయ, వ్యవసాయ అనుబంధ రంగాలలో ఎక్కడ అవకాశం ఉందో కనిపెట్టి దానికి తగినట్టు ప్రణాళికలు వేసుకోవాలని కోరారు. జిల్లా స్థాయిలో బ్యాంకర్ల సమావేశం వీలైనంత త్వరగా ఏర్పాటు చేయాలని సూచించారు.

సాక్షి, హైదరాబాద్‌: భారీగా పంట రుణాలు ఇవ్వాలని ప్రభుత్వం లక్ష్యంగా పెట్టుకున్నా క్షేత్రస్థాయిలో రైతులకు మాత్రం రుణాలు అందడం లేదు. వ్యవసాయశాఖ లెక్కల ప్రకా రం రబీ పంటల సాగు విస్తీర్ణం 85 శాతానికి చేరింది. కానీ రైతులకు బ్యాంకులు ఇచ్చిన పంట రుణాలు లక్ష్యంలో 45.66 శాతమే కావ డం గమనార్హం. అక్టోబర్‌లో ప్రారంభమయ్యే రబీ సీజన్‌కు.. నవంబర్‌కే రైతులకు రుణాలు అందాలి. కానీ సాగు చివరి దశకు చేరుకుంటున్నా బ్యాంకులు స్పందించట్లేదు. బ్యాంకర్లపై ఒత్తిడి తేవడంలో వ్యవసాయ శాఖ విఫలమవుతుండటంతో రైతులు అధిక వడ్డీలకు ప్రైవేటు అప్పులు చేయాల్సిన దుస్థితి నెలకొం  ది. గత ఖరీఫ్‌లో చేతికొచ్చిన  పంటలకు తగిన ధర రాక రైతులకు నిరాశే మిగిలింది. బ్యాంకులు కూడా మొండి చెయ్యి చూపిస్తుం  డటంతో రైతులు దిగులు పడుతున్నారు. లక్ష్యంలో సగం కూడా ఇవ్వలేదు.. రబీలో అన్ని పంటల సాధారణ సాగు విస్తీర్ణం 31,92 లక్షల ఎకరాలు కాగా...  27.07 లక్షల ఎకరాల్లో పంటలు సాగయ్యాయి. ఇందులో వరి సాధారణ సాగు విస్తీర్ణం 15.37 లక్షల ఎకరాలుకాగా.. 15 లక్షల ఎకరాల్లో నాట్లు పడ్డాయని వ్యవసాయ శాఖ తాజా నివేదికలో తెలిపింది. అంటే దాదాపుగా పంటల సాగు చివరి దశకు వచ్చిన పరిస్థితుల్లో బ్యాంకులు పంట రుణాలు మంజూరు చేయడం లేదు. రబీ పంట రుణాల లక్ష్యం రూ.15,901 కోట్లు. కానీ ఇప్పటివరకు ఇచ్చింది రూ.7,261 కోట్లేనని వెల్లడైంది. లక్ష్యంలో సగం కూడా రుణాలు ఇవ్వలేదని స్పష్టమవుతోంది. రైతుల పైనే వడ్డీ భారం రైతుల రుణాలకు సంబంధించి పావలా వడ్డీ, వడ్డీ లేని రుణాల పథకాల కింద ప్రభుత్వం బ్యాంకులకు రూ.321 కోట్లు బకాయిలు చెల్లించాల్సి ఉంది. దీని చెల్లింపులో సర్కారు చేస్తు న్న జాప్యం రైతులకు శాపంగా మారుతోంది. ప్రభుత్వం బడ్జెట్‌ రిలీజ్‌ ఆర్డర్‌లు జారీ చేసి నిధులు మాత్రం విడుదల చేయకపోతుండటంతో.. బ్యాంకులు వడ్డీల సొమ్మును రైతుల నుంచే వసూలు చేస్తున్నాయి. రైతుల నుంచి తీసుకోవద్దని, వడ్డీ సొమ్మును విడుదల చేస్తామని ప్రభుత్వం తెలిపినా.. నిధులు విడుదల చేయలేదు. రుణమాఫీ నిధులను కూడా ప్రభుత్వం నాలుగు విడతలుగా విడుదల చేయడంతో, బ్యాంకులు ఆ రుణాలపై వడ్డీని వసూలు చేశాయి. రూ.లక్షలోపు పంట రుణాలపై బ్యాంకులు వడ్డీ వసూలు చేయకూడదు. ప్రభుత్వమే దానిని రీయింబర్స్‌ చేస్తుంది. బ్యాంకులు రుణాల మంజూరు సమయంలో బుక్‌ అడ్జస్ట్‌మెంట్లు చేస్తున్నాయి. కొత్త అప్పు మంజూరు చేస్తూనే.. పాత అప్పును, వడ్డీని రికవరీ చేస్తాయి. ప్రభుత్వం చెల్లించాల్సిన వడ్డీ భారం తమపైనే పడుతుండటం, బ్యాం కులు రుణాలివ్వకుండా ఇబ్బందిపెట్టడంపై రైతులు ఆగ్రహం వ్యక్తంచేస్తున్నారు. 

సాక్షి, హైదరాబాద్‌: రాష్ట్ర రైతులకు వచ్చే ఆర్థిక సంవత్సరం (2018–19)లో రూ.46,344.61 కోట్ల మేర పంట రుణాలు అందజేయాలని నాబార్డు లక్ష్యంగా నిర్దేశించింది. మొత్తంగా అన్ని రంగాలకు కలిపి గతేడాది కంటే 17 శాతం అధికంగా రూ. 83,388.87 కోట్ల రుణాలు అందజేయాలని నిర్ణయించింది. పంట రుణాలకు అదనంగా వ్యవసాయ అనుబంధ రంగాలైన మత్స్య, పశు సంవర్థక రంగాలకు అదనంగా రుణాలివ్వాలని.. వ్యవసాయ యాంత్రీకరణకు రూ. 2,667 కోట్లు ఇవ్వాలని బ్యాంకర్లకు సూచించింది. విద్యా రుణాలకు రూ. 1,206 కోట్లు, గృహ రుణాలకు రూ.3,759 కోట్లు ఇవ్వాలని లక్ష్యంగా నిర్దేశించింది. నాబార్డు రూపొందించిన ‘2018–19 రుణ విధాన పత్రాన్ని  హరీశ్‌రావు మంగళవారం విడుదల చేశారు. జూన్‌ నాటికే పంట రుణాలివ్వాలి. బ్యాంకులు తమ వద్ద తనఖాగా పెట్టుకున్న పాస్‌ పుస్తకాలను రైతులకు తిరిగి ఇచ్చేయాలని మంత్రి హరీశ్‌రావు విజ్ఞప్తి చేశారు. ‘‘ఇక ముందు పంట రుణాలు తీసుకోవడానికి పాస్‌ పుస్తకాలు అవసరం లేదు. రైతుల పూర్తి సమాచారం ఆన్‌లైన్‌లో అందుబాటులో ఉంది. బ్యాంకులు పరిశీలన పేరుతో పాస్‌ పుస్తకాలు తీసుకుని.. ఇప్పటికీ ఇవ్వలేదు. పాస్‌ పుస్తకాలను తిరిగి వెనక్కి ఇచ్చేలా నాబార్డు ఆదేశాలు జారీచేయాలి’’అని కోరారు. బ్యాంకర్లు స్కేల్‌ ఆఫ్‌ ఫైనాన్స్‌ ప్రకారం పంట రుణాలు ఇవ్వకపోవడంపై మంత్రి అసంతృప్తి వ్యక్తం చేశారు. రైతులకు మే– జూన్‌ నెలల్లోనే లక్ష్యం మేరకు పంట రుణాలు అందజేయాలన్నారు. ప్రభుత్వం రైతులకు ఎకరాకు రూ.4 వేల చొప్పున పెట్టుబడి సాయాన్ని అందజేస్తోందన్నారు. కోల్డ్‌ స్టోరేజీలకు నాబార్డు రుణం అందజేయా లని కోరారు. ప్రభుత్వం ఎన్నికల కోసమే రైతులకు పెట్టుబడి సాయం వంటివి ఇస్తోందన్న ఆరోపణలు సరికాదని ఆర్థిక మంత్రి ఈటల రాజేందర్‌ పేర్కొన్నారు. దేశంలో 73 శాతం సంపద ఒక శాతం మంది చేతిలో ఉండటం మంచి పరిణామం కాదని.. సంపద అందరికీ చేరాల్సిన అవసరం ఉందన్నారు. కార్యక్రమంలో రిజర్వు బ్యాంకు ప్రాంతీయ డైరెక్టర్‌ ఆర్‌.సుబ్రమణ్యన్, ఎస్‌ఎల్‌బీసీ కన్వీనర్‌ మణికందన్‌ తదితరులు పాల్గొన్నారు.  

సాక్షి ప్రతినిధి, ఖమ్మం: రాష్ట్రవ్యాప్తంగా పలు ప్రాంతాల్లో ఒకేరీతిన నకిలీ పాస్‌ పుస్తకాలతో బ్యాంకుల్లో వ్యవసాయానికి పంట రుణాలు తీసుకున్న సంఘటనలు సంచలనం సృష్టిస్తున్నాయి. దీంతో ఇటు పోలీసులు.. అటు బ్యాంకు అధికారులు అప్రమత్తమై విచారణను వేగవంతం చేశారు. ఈ కేసులు విచారించేందుకు ఆయా జిల్లాల్లో టాస్క్‌ఫోర్స్‌లను ఏర్పాటు చేసి, నిందితులపై ఉక్కుపాదం మోపేందుకు పోలీసులు సిద్ధమయ్యారు. ఇందులో కొందరు నిందితులను అరెస్ట్‌ చేసి పోలీస్‌స్టేషన్‌కు తరలించగా.. కీలకమైన వ్యక్తులు మాత్రం తప్పించుకు తిరుగుతున్నారు. ఖమ్మం, భద్రాద్రి కొత్తగూడెం, మహబూబ్‌నగర్, సిద్దిపేట, జోగులాంబ గద్వాల జిల్లాల్లో ఈ వ్యవహారం వెలుగు చూసింది. ఈ ప్రాంతాల్లో కొందరు ముఠాలుగా ఏర్పడి.. పలువురిని మభ్యపెట్టి రుణం ఇప్పిస్తామని చెప్పి.. నకిలీ పాస్‌ పుస్తకాలను తయారు చేసి వాటిని బ్యాంకులో సమర్పించి పంట రుణాలు పొందారు. ఈ ఏడాది జూలై 27న ఖమ్మం జిల్లాలోని సత్తుపల్లి ఇండియన్‌ ఓవర్సీస్‌ బ్యాంక్‌లో దమ్మపేట, వేంసూరు, పెనుబల్లి, సత్తుపల్లి మండలాలకు చెందిన నకిలీ పాస్‌ పుస్తకాలతో కోట్ల రూపాయల భారీ కుంభకోణం జరిగినట్టు ప్రాథమిక విచారణలో తేలింది. రెవెన్యూ, పోలీసుశాఖల టాస్క్‌ఫోర్స్‌ దీనిపై నిగ్గుతేల్చేందుకు పోలీస్, రెవెన్యూ శాఖల సంయుక్త ఆధ్వర్యంలో టాస్క్‌ఫోర్స్‌ ఏర్పాటు చేశారు. మొత్తం 873 అకౌంట్లకు.. 731 మంది అక్రమ రుణాలు పొందినట్టు విచారణలో తేలింది. 142 మంది రెండు, మూడు బ్యాంకుల్లో అక్రమ రుణాలు తీసుకున్నట్లు గుర్తించారు. రూ.8.90 కోట్ల కుంభకోణం జరిగినట్టు ప్రాథమిక విచారణలో తేల్చారు. మహబూబ్‌నగర్‌లోని పంజాబ్‌ నేషనల్‌ బ్యాంకులో గతేడాది మహబూబ్‌నగర్, హన్వాడ మండలాల్లోని పలు గ్రామాలకు చెందిన 69 మంది రైతులకు మునిమోక్షం గ్రామానికి చెందిన శ్రీనివాస్‌ అనే ఏజెంట్‌ నకిలీ పాస్‌ పుస్తకాలు తయారు చేసి.. వాటిని బ్యాంకులో తాకట్టు పెట్టి రూ.63.79 లక్షల రుణాలు ఇప్పించారు. ఇక సిద్దిపేట జిల్లాలో నాలుగేళ్ల క్రితం నకిలీ పాస్‌పుస్తకాలతో చిన్నకోడూరు మండలం చెందలాపూర్, చెల్కలపల్లిలో నకిలీ పాస్‌ పుస్తకాలతో బ్యాంకు రుణాలు తీసుకున్నారు. రెవెన్యూ అధికారులు నకిలీ పాస్‌పుస్తకాలు తయారీదారులపై, వాటిమీద రుణాలు తీసుకున్న వారిపై కేసులు పెట్టి జైలుకు పంపించారు. రుణాలను రికవరీ కూడా చేయించారు. అలాగే, వరంగల్‌ రూరల్‌ జిల్లా సంగెం మండలంలో నకిలీ పాస్‌ పుస్తకాలతో కోట్ల రూపాయలు వ్యవసాయ రుణాలు తీసుకున్నట్లు తేలింది. 240 పాస్‌ పుస్తకాలు తయారు చేసి బ్యాంకుల్లో రూ.కోటికి పైగా పంటరుణాలు తీసుకున్నారు. జోగులాంబ గద్వాల జిల్లాలో 7 వేల నకిలీ పాస్‌ పుస్తకాలను పోలీసులు స్వాధీనం చేసుకున్నారు. ఈ నకిలీ పాస్‌ పుస్తకాలతో జోగులాంబ గద్వాల జిల్లాతోపాటు కర్ణాటక, తెలంగాణ, ఆంధ్రప్రదేశ్‌ బ్యాంకుల్లో కోట్లాది రూపాయల రుణాలు తీసుకున్నట్లు పోలీసులు తెలిపారు. కొనసాగుతున్న అరెస్ట్‌లు ఈ నకిలీ పాస్‌ పుస్తకాల వ్యవహారంలో టాస్క్‌ఫోర్స్, పోలీస్‌లు దర్యాప్తు ముమ్మరం చేశారు. ఇప్పటికే కొంతమందిని అరెస్ట్‌ చేసి జైలుకు పంపారు. నకిలీ పాస్‌పుస్తకాల అంశంలో కీలక సూత్రధారులు పట్టుపడాల్సి ఉంది. ఖమ్మంలో నకిలీ పాస్‌పుస్తకాల వ్యవహారంలో ఇద్దరు బ్యాంకు మేనేజర్లు, బ్యాంకు అటెండర్, ఇద్దరు వీఆర్వోలు, ఓ వీఆర్‌ఏతోసహా 34 మందిని అరెస్ట్‌ చేశారు. 11 మందిని రెండు దఫాలుగా కోర్టు అనుమతితో మళ్లీ విచారణ చేశారు. 60 రోజుల నుంచి నిందితులు జైలు జీవితం గడుపుతున్నారు. ఇద్దరు పరారీలో ఉన్నారు.  మహబూబ్‌నగర్‌ జిల్లాలో జరిగిన వ్యవహారంలో బ్యాంకు మేనేజర్‌ మధుసూదన్‌ పాత్ర ఉన్నట్లు విచారణలో బయటపడింది. దీనిపై విచారణ జరుగుతోంది. ఇప్పటికే 71 మందిని నిందితులుగా గుర్తించారు. అసలు సూత్రధారి అయిన శ్రీనివాస్‌ పట్టుబడితే దోషుల సంఖ్య పెరిగే అవకాశం ఉంది. వరంగల్‌ జిల్లాలో దీనిపై పోలీసులు విచారిస్తున్నారు. గద్వాల జిల్లాలో 17 మందిపై కేసు నమోదు చేసి రిమాండ్‌కు తరలించారు. పరిశీలిస్తే.. ఏ జిల్లాకు ఆ జిల్లాలో జరిగిందా.. లేకపోతే అన్ని జిల్లాల్లో జరిగిన వ్యవహారాల్లో ఎవరైనా కీలకమైన వ్యక్తులు వెనుకుండి నడిపించారా? అనే కోణంలో విచారణ చేస్తే అసలు విషయాలు బయటకు వచ్చే వీలుంది.

సాక్షి, హైదరాబాద్‌: రైతులు పంట రుణాల కోసం ఇక నుంచి తమ పాస్‌పుస్తకాలను బ్యాం కుల్లో తాకట్టు పెట్టాల్సిన అవసరం ఉండదు. వెబ్‌ల్యాండ్‌ డాటాలోని 1బీ రికార్డు ఆధారం గానే క్రెడిట్‌ ఏజెన్సీ (బ్యాంకులు) రుణాన్ని మంజూరు చేయాల్సి ఉంటుంది. ఈ మేరకు భూమి హక్కులు, పట్టాదారు పాస్‌పుస్తకాల చట్టం–1971కి సవరణలు ప్రతిపాదిస్తూ రాష్ట్ర ఉప ముఖ్యమంత్రి మహమూద్‌ అలీ సోమవారం శాసనసభలో బిల్లు ప్రవేశపె ట్టారు. ఆ బిల్లులోని ముఖ్యాంశాలివి.. ♦  భూమి హక్కుల్లో ఎలాంటి మార్పు జరిగినా మ్యుటేషన్‌ వివరాలను ఆ హక్కు పొందిన 30 రోజుల్లోగా తహసీల్దారుకు సమాచారం ఇవ్వాలి. ఈ సమాచారాన్ని పొందిన వీఆర్వో ఒక్క రోజులోనే ఆ విషయాన్ని తహసీల్దారుకు తెలియపర్చాల్సి ఉంటుంది. ఈ సమాచారానికి తహసీల్దారు రసీదు ఇవ్వాలి. ♦   పాస్‌పుస్తకాల్లో మార్పు కోసం ఎవరైనా అభ్యర్థన చేసుకుంటే వాటిని సరిచేసే అధికారం తహసీల్దార్లకే ఉంటుంది. ♦  డిసెంబర్‌ 31, 2017 వరకు దరఖాస్తు చేసుకున్న వారికి సాదాబైనామాలు లేకపోయినా స్థానికంగా విచారణ జరిపి గ్రామసభ ఆమోదం తీసుకుని సదరు క్లెయిమ్‌ను క్రమబద్ధీకరించవచ్చు. అయితే, ఆ భూమి ఐదెకరాలకు మించరాదు. ♦  పట్టాదారు పాస్‌పుస్తకం ప్రభుత్వ వెబ్‌ సైట్‌లో నిర్వహించే పట్టాదారు పాస్‌ పుస్తకంగా మారుతుంది. అందులో తాకట్టు దారు (మార్టిగేజ్‌), కౌలుదారు (టెనెంట్‌) అనే పదాలుండవు. కేవలం పట్టాదారులు అనే పదం మాత్రమే ఉంటుంది. ♦  పట్టాదారు పాస్‌పుస్తకం కోసం అడగకుండా వెబ్‌ల్యాండ్‌ డాటా ప్రకారం నిర్వహించే 1–బీ రెవెన్యూ రికార్డు ఆధారంగానే క్రెడిట్‌ ఏజెన్సీ రుణాన్ని మంజూరు చేయాలి. ♦  కేంద్ర, రాష్ట్ర ప్రభుత్వాలకు సంబంధించిన భూములకు రక్షణ కల్పించేందుకు గాను హైదరాబాద్‌ జాగీర్దార్ల రద్దు చట్టం, 1358 ఫసలీ ప్రకారం ఉన్న జాగీరు భూములన్నీ ప్రభుత్వ భూములుగా రెవెన్యూ రికార్డులలో నమోదు చేస్తారు. ♦  ఈ బిల్లు ఆమోదంలోకి వస్తే తెలంగాణ భూమిపై హక్కులు, పట్టాదారు పాస్‌ పుస్తకాల సవరణ ఆర్డినెన్స్‌ రద్దవుతుంది. ఈ బిల్లు జూన్‌17, 2017 నుంచి అమల్లోకి వచ్చినట్టు అవుతుంది. ♦  ఈ బిల్లుతో పాస్‌బుక్, టైటిల్‌డీడ్‌ ఏకీకృతంగా మారుతాయి. మ్యుటేషన్‌ కాలపరిమితి 90 రోజుల నుంచి 15 రోజులకు తగ్గిపోతుంది.


 ► 36 లక్షల మందిలో 12 లక్షల మందికే పంట రుణాలు
 ► ఖరీఫ్‌ మొదలై రెండు నెలలైనా పట్టించుకోని బ్యాంకులు
 ► చేసేదిలేక ప్రైవేటు వ్యక్తుల వద్ద అప్పులు చేస్తున్న రైతన్నలు
 
 సాక్షి, హైదరాబాద్‌: ప్రకృతి కన్నెర్ర.. బ్యాంకర్ల చిన్న చూపు రైతులను కుంగదీస్తున్నాయి. ఓవైపు వర్షాలు రాక వేసిన పంటలు కళ్ల ముందే ఎండిపోతుండటం.. మరోవైపు పత్తి పంటను గులాబీ రంగు కాయతొలుచు పురుగు సోకి నాశనం చేస్తుంటే కాపాడుకోలేని నిస్సహాయ దుస్థితిలో రైతులు కొట్టుమిట్టాడుతున్నారు.
 పంటలకు పురుగు మందులు, ఎరువులు కొనాలంటే బ్యాంకులు అప్పులివ్వడం లేదని ఆవేదన వ్యక్తం చేస్తున్నారు. ఖరీఫ్‌ మొదలై రెండు నెలలు కావస్తున్నా ఇప్పటి వరకు మూడో వంతు మంది రైతులకే బ్యాంకులు రుణాలు ఇచ్చాయి. ఖరీఫ్‌లో ప్రతీ ఏడాది సరాసరి 36 లక్షల మంది రైతులు రుణాలు తీసుకుంటారు. కానీ ఇప్పటివరకు కేవలం మూడో వంతు అంటే 12.42 లక్షల మంది రైతులకే బ్యాంకులు రుణాలిచ్చాయి. 2017–18 ఆర్థిక సంవత్సరంలో ఖరీఫ్‌ పంట రుణ లక్ష్యం రూ.23,851 కోట్లు కాగా, జూలై 31 నాటికి బ్యాంకులు రూ.10,514 కోట్లే రుణాలిచ్చినట్లు వ్యవసాయ శాఖ వర్గాలు తెలిపాయి.
 
 సర్కారు బకాయిలు రూ.271 కోట్లు
 మరోవైపు బ్యాంకర్లు ప్రభుత్వ వైఫల్యాలను ప్రస్తావిస్తున్నారు. ప్రభుత్వం నుంచి తమకు రావాల్సిన వడ్డీ లేని రుణాలు, పావలా వడ్డీ రుణాల బకాయిలు రూ.271 కోట్లు ఇంకా విడుదల చేయలేదని మండిపడుతున్నారు. నెల రోజుల క్రితం మంజూరు చేసినా ఆ సొమ్ము ఇప్పటికీ విడుదల చేయలేదని ఆరోపిస్తున్నారు. ఇలా ప్రభుత్వ నిర్లక్ష్యం, బ్యాంకుల నిర్లిప్తత రైతుల పాలిట శాపంగా మారింది. దీంతో రైతులు గత్యంతరం లేక ప్రైవేటు వడ్డీ వ్యాపారస్తుల వద్ద అప్పులు చేస్తున్నారు. కొన్నిచోట్ల రైతులకు పంట రుణాలు మంజూరు చేసినా బ్యాంకుల్లో కరెన్సీ లేక డబ్బు చేతికి ఇవ్వడం లేదు. రైతు ఖాతాల్లోనే ఆ రుణ నగదును జమ చేసి వట్టి చేతులతో పంపిస్తున్నారు. దీంతో రైతులు ఆ నగదు తీసుకోలేని పరిస్థితి ఏర్పడింది.
 
 
 23,851  కోట్ల రూపాయలు   –  ఈ ఆర్థిక సంవత్సరంలో ఖరీఫ్‌ పంట రుణ లక్ష్యం
 10,514 కోట్ల రూపాయలు – జూలై 31 నాటికి బ్యాంకులు ఇచ్చిన పంట రుణాలు
 80.42  లక్షల ఎకరాలు –  రాష్ట్రంలో ఇప్పటి వరకు సాగైంది
 
 వడ్డీ చెల్లించాల్సిందే..
 రాష్ట్రంలో ఇప్పటివరకు 80.42 లక్షల ఎకరాల్లో పంటలు సాగయ్యాయి. అందులో అత్యధికంగా 43.67 లక్షల ఎకరాల్లో పత్తి సాగైంది. 3.95 లక్షల ఎకరాల్లో సోయాబీన్, 10.70 లక్షల ఎకరాల్లో మొక్కజొన్న సాగైంది. మొత్తం ఖరీఫ్‌ పంటల సాగు 74 శాతం పూర్తి కాగా, అందులో పత్తి పంట విస్తీర్ణం 104 శాతానికి చేరుకుంది.
 అయితే ఈ స్థాయిలో పంటల సాగు జరిగితే రుణాలు మాత్రం సగానికి కూడా చేరుకోలేదు. పైగా రైతులు తీసుకున్న రుణాలకు పావలా వడ్డీ, వడ్డీ లేని రుణాల పథకం అమలవుతున్నా బ్యాంకులు పట్టించుకోవడం లేదు. కొత్త రుణం సంగతి దేవుడెరుగు, తీసుకున్న రుణాలకు వడ్డీ వసూలు చేస్తూ పీడిస్తు న్నాయి. కొన్నిచోట్ల కొత్త రుణం ఇస్తూనే, ఆ రుణం సొమ్ము నుంచే వడ్డీని ముక్కు పిండి వసూలు చేస్తున్నాయి. ఈ విషయంలో బ్యాంకులకు నచ్చజెప్పడంలో ప్రభుత్వం ఘోరంగా విఫలమైంది.


 బ్యాంకర్లకు రెవెన్యూ శాఖ సూచన
 సాక్షి, హైదరాబాద్‌: పాసు పుస్తకాలు లేకుం డానే రైతులు పంట రుణాలను పొందే సదు పాయం రెవెన్యూ శాఖ కల్పించింది. రైతుల పాస్‌పుస్తకాలు, పహాణీలు సమర్పించకున్నా పంట రుణాలను మంజూరు చేయాలని ప్రభుత్వ ప్రత్యేక ప్రధాన కార్యదర్శి బి.ఆర్‌.మీనా బ్యాంకర్లకు సూచించారు. భూముల వివరాలను కచ్చితంగా తెలిపేలా ప్రభుత్వం వెబ్‌ల్యాండ్‌ పోర్టల్‌ను అందుబా టులోకి తెచ్చిందని, ఆన్‌లైన్‌లోనే వివరాలసు సరిచూసుకుని రుణాలు ఇవ్వవచ్చని పేర్కొ న్నారు.
 ఎస్‌బీఐ తెలంగాణ సర్కిల్‌ చీఫ్‌ జనరల్‌మేనేజర్‌ హరిదయాళ్‌ ప్రసాద్‌ అధ్యక్ష తన బ్యాంకర్ల స్టీరింగ్‌ కమిటీ సమావేశం గురువారం జరిగింది. రెవెన్యూ శాఖ ప్రత్యేక ప్రధాన కార్యదర్శి బి.ఆర్‌.మీనా, వ్యవసాయ శాఖ ముఖ్యకార్యదర్శి సి.పార్థసారథి, ఐఏఎస్‌ అధికారి సందీప్‌ సుల్తానియా, ఎల్‌ఎల్‌బీసీ కన్వీనర్‌ యు.ఎన్‌.ఎన్‌.మైయా, రిజర్వు బ్యాంకు ప్రతినిధి జె.మేఘనాథ్, సుబ్బయ్య పాల్గొన్నారు. ఒకే వ్యవసాయ భూమిపై ఒకటి కంటే ఎక్కువ మంది పంట రుణాలు తీసుకోకుండా వెబ్‌ల్యాండ్‌ పోర్టల్‌ ను వినియోగించుకోవచ్చని మీనా చెప్పారు. ఇప్పటికే 21 బ్యాంకులు ఈ పోర్టల్‌ను విని యోగిస్తున్నాయన్నారు.
 ప్రస్తుత ఖరీఫ్‌ సీజ నులో ఇప్పటివరకు 8,35,748 మంది రైతులకు రూ.6,056 కోట్ల పంట రుణాలను ఇచ్చినట్లు తెలిపారు. రైతులందరికీ ప్రధాన మంత్రి ఫసల్‌బీమా యోజన వర్తించేలా బ్యాంకర్లు రుణాలు రెన్యూవల్‌ చేయాలన్నా రు. వాతావరణ ఆధారిత బీమా పథకం అమలుచేస్తున్న మిరప పంటకు ప్రీమియం చెల్లింపు తేదీని జూలై 15 వరకు, పత్తి పంట కు జూలై 31 వరకు పొడిగించినట్లు తెలిపా రు.  పత్తి సాగు రైతులు వాతావరణ ఆధారి త బీమా పథకాన్ని ఉపయోగించుకునేలా చూడాలన్నారు. బ్యాంకులన్నీ పంట రుణా లు, బీమా అమలు చేసేలా చర్యలు తీసుకుం టున్నాయని హరిదయాళ్‌ తెలిపారు. 


 అదనంగా నెలకు రూ. 2 వేల కోట్లివ్వండి
 - రిజర్వ్‌ బ్యాంకును కోరిన ఎస్‌ఎల్‌బీసీ
 - రూ. 400 కోట్లు అడిగిన ఎస్‌బీఐ
 - ఈ ఏడాది పంట రుణాల లక్ష్యం రూ. 39,752 కోట్లు
 
 సాక్షి, హైదరాబాద్‌: బ్యాంకుల్లో నగదు కొరత వేధిస్తోందని రిజర్వ్‌ బ్యాంక్‌ ఆఫ్‌ ఇండియా (ఆర్బీఐ)కు రాష్ట్ర స్థాయి బ్యాంకర్ల సమితి (ఎస్‌ఎల్‌బీసీ) మొరపెట్టుకుంది. ఖరీఫ్‌లో పంట రుణాలు ఇవ్వలేకపోతున్నామని, కాబట్టి తమ అవసరాలకు తగ్గట్లు డబ్బు అందజేయాలని కోరింది. ఎస్‌ఎల్‌బీసీ విన్నపానికి స్పందించిన ఆర్బీఐ ఎంత నగదు కావాలో బ్యాంకుల వారీగా ఇండెంట్‌ ఇవ్వాలని కోరింది. దీంతో వెంటనే ఎస్‌ఎల్‌బీసీ పంట రుణాలు అందజేసేందుకు ఇప్పుడున్న నగదుకు అదనంగా నెలకు రూ.2 వేల కోట్లు కావాలని ఆర్బీఐని కోరినట్లు వ్యవసాయ శాఖ వర్గాలు తెలిపాయి.
 
 ఉమ్మడి ఎస్‌బీఐ, ఎస్‌బీహెచ్‌ బ్యాంకే నెలకు రూ.400 కోట్లు అదనంగా ఇవ్వాలని కోరినట్లు తెలిసింది. దీంతో త్వరలో నగదు పంపిస్తామని చెప్పింది. అయితే ఎప్పటిలోగా అందజేయనుందో మాత్రం ప్రకటించలేదని వ్యవసాయ శాఖ వర్గాలు చెబుతున్నాయి. దీంతో నగదు కొరత ఎప్పుడు తీరుతుందో రైతు చేతికి ఎప్పుడు డబ్బులు వస్తాయో తెలియకుండా ఉంది.
 
 బ్యాంకుల్లోనే వేల కోట్ల రైతు డబ్బు..
 వర్షాలు పెద్ద ఎత్తున కురుస్తున్నాయి. దీంతో ఖరీఫ్‌  పనులు చురుగ్గా సాగుతున్నాయి. ఇప్పటికే 12 లక్షల ఎకరాల్లో పంటల సాగు జరిగింది. విత్తనాలు, ఎరువులు, కూలీల ఖర్చు కోసం రైతులు పంట రుణాలకు వెళ్తున్నారు. బ్యాంకుల్లో ఉన్న తమ డబ్బును తీసుకుందామనుకున్నా అక్కడ డబ్బు లేక నిరాశతో వెనుదిరుగుతున్నారు. ప్రస్తుతం రాష్ట్రంలో వరి కొనుగోళ్లు చివరి దశకు వచ్చాయి. ప్రభుత్వ లెక్కల ప్రకారం ఇప్పటి వరకు 37 లక్షల మెట్రిక్‌ టన్నుల ధాన్యం కొనుగోళ్లు జరిగాయి. విక్రయించిన ఆ ధాన్యానికి ప్రభుత్వం రూ.5,500 కోట్లు రైతుల ఖాతాలో జమ చేసింది.
 
 మొత్తం 7 లక్షల మంది రైతుల డబ్బు బ్యాంకుల్లోనే ఉంది. ఈ డబ్బులో దాదాపు రూ.1,500 కోట్లు మాత్రమే రైతులు బ్యాంకుల నుంచి తీసుకున్నట్లు సమాచారం. మిగిలిన రూ.4 వేల కోట్ల రైతు సొమ్ము బ్యాంకుల్లోనే ఉంది. అవసరాల కోసం రైతులు తమ సొమ్మును తామే తీసుకోలేని పరిస్థితి ఏర్పడింది. ఫలితంగా రాష్ట్రంలో పలు చోట్ల రైతులు బ్యాంకుల వద్ద ఆందోళనలు చేస్తున్నారు. వరి అమ్మగా వచ్చిన రూ.75 వేలను ప్రభుత్వం బ్యాంకుల్లో జమ చేసిందని, దాన్ని తీసుకోవడానికి బ్యాంకులకు వెళితే నగదు లేదంటూ చెబుతున్నారని బోధన్‌కు చెందిన రైతు లచ్చిరెడ్డి ఆవేదన వ్యక్తం చేశాడు.
 
 ఇచ్చిన పంట రుణాలు 2,573 కోట్లు
 వ్యవసాయ శాఖ లెక్కల ప్రకారం ఏటా దాదాపు 40 లక్షల మంది రైతులు రుణాలు తీసుకుంటారని అంచనా. అందులో బుధ వారం నాటికి 3.91 లక్షల మంది రైతులకు రూ. 2,573 కోట్ల పంట రుణాలు రైతులకు అందినట్లు అధికారులు తెలిపారు.
 
 రేపు పంట రుణాల ప్రణాళిక..
 ఈ ఏడాది పంట రుణాల ప్రణాళికను ఎస్‌ఎల్‌బీసీ తయారుచేసింది. ఆ ప్రణాళికను శుక్రవారం విడుదల చేయనుంది. 2017–18 ఆర్థిక సంవత్సరంలో వర్షాకాలం, యాసంగి పంటలకు రూ.39,752 కోట్లు రుణాలు ఇవ్వాలని లక్ష్యంగా నిర్ధారించినట్లు తెలిసింది. అందులో ఖరీఫ్‌కు రూ.23,852 కోట్లు, రబీకి రూ.15,900 కోట్లు నిర్ధారించినట్లు సమాచారం. 2016–17 ఆర్థిక సంవత్సరంలో వ్యవసాయ పంట రుణాల ప్రణాళిక రూ.30,140 కోట్లు.


 న్యూఢిల్లీ:  ప్రధానమంత్రి నరేంద్రమోదీ అధ్యక్షతన జరిగిన  క్యాబినెట్‌ భేటీలో పలు కీలక నిర్ణయాలను తీసుకుంది. బుధవారం నాటి కేంద్ర మంత్రివర్గ సమావేశంలో ముఖ్యంగా  రైతుల‌కిచ్చే పంట‌రుణాల కోసం  ఈ కొత్త ప‌థ‌కాన్ని  ప్రకటించింది.  ఇంట్రెస్ట్ స‌బ్‌వెన్షన్‌  స్కీమ్ అనే ప‌థ‌కం కింద  స్వల్పకాలిక ‌(సం.రం లోపు)రుణాల‌పై కేవ‌లం నాలుగు శాతం వ‌డ్డీని వ‌సూలు చేయ‌నునున్నట్టు  కేంద్రం ప్రకటించింది.  అయితే 3 లక్షల రూపాయల స్వల్పకాలిక పంట రుణాన్ని  సకాలంలో  చెల్లించిన రైతులకు  మాత్రమే 4 శాతం వడ్డీ రేటుతో అందుబాటులో ఉంచడం కొనసాగుతుందని తెలిపింది.  
 
 2017-18 సంవత్సరం కోసం ఈ కొత్త  త‌ర‌హా స్కీమ్‌ను ప్రవేశపెట్టనుంది.  ప్రస్తుత ఆర్ధిక సంవత్సరానికి రూ. 20,339 కోట్ల ఖర్చుతో స్వల్పకాలిక పంట రుణాలకు వడ్డీ సబ్సిడీగా కేబినెట్ ఆమోదం తెలిపిందని సీనియర్ ప్రభుత్వ అధికారి ఒకరు తెలిపారు. ఈ పథకం కింద సంవత్సరానికి 2 శాతం స‌బ్‌వెన్షన్‌తో  చిన్న వ్యవసాయ రుణదాతకు 3,00,000 రైతులకు అందివ్వబడుతుందని చెప్పారు.   మూడులక్షల లోపుతీసుకున్న రుణాలను సకాలంలో చెల్లించిన రైతులకు మాత్రమే  4శాతం  వడ్డీ రేటు అమలు చేయనున్నామన్నారు. లేదంటే 7శాతం  వడ్డీ రేటు కొనసాగనుందని పేర్కొన్నారు.
 
 ఏడాది పాటు కొనసాగే ఇంట్రెస్ట్ స‌బ్‌వెన్షన్‌ స్కీమ్‌ను   నాబార్డ్‌, ఆర్బీఐలు ఈ ప‌థ‌కాన్ని అమ‌లు  చేస్తాయి. ప్రైవేటు, కార్పొరేటివ్‌, రీజిన‌ల్ బ్యాంకుల‌ ద్వారా రైతుల‌కు నిధులను అందిచ‌నున్నారు. వ్యవసాయ రుణాలు క్షేత్ర స్థాయిలో రైతుల‌కు అందాల‌న్న ఉద్దేశంతోనే ఈ స్కీమ్‌ను అమలు  చేయనున్నారు.  అలాగే 2017-18 నాటికి, వ్యవసాయ రుణ లక్ష్యాన్ని 10 లక్షల కోట్ల రూపాయలకు పెంచారు. 2016-17లో ఇది రూ. 9 లక్షల కోట్లుగా ఉంది. దేశంలోని  పలు ప్రాంతాల్లో   రైతుల ఆందోళనలు మిన్నంటడడంతో రుణమాఫీ ప్రకటించిన  ముఖ్యంగా మధ్య ప్రదేశ్‌, ఉత్తరప్రదేశ్‌, మహారాష్ట్రల్లో  కూడా వర్తించనుంది.
  


 గత కొంతకాలంగా దేశంలోని వివిధ ప్రాంతాల రైతుల్లో పెల్లుబుకుతున్న అసంతృప్తిపై ఉదాసీనంగా వ్యవహరిస్తున్న పాలక పక్షాలకు మండుతున్న మధ్యప్రదేశ్‌ గట్టి హెచ్చరిక కావాలి. ఆ రాష్ట్రంలో కట్టలు తెంచుకున్న రైతన్నల ఆగ్రహాన్ని అదుపు చేసేందుకు పోలీసులు మంగళవారం జరిపిన కాల్పుల్లో ఎనిమిదిమంది మరణించారు. అయినా ఆందోళన ఆగలేదు సరిగదా బుధవారం అది కొత్త ప్రాంతాలకు విస్తరించింది. అనేకచోట్ల కర్ఫ్యూ ధిక్కరించి రాస్తారోకోలు నిర్వ హించారు. మంద్‌సౌర్‌ జిల్లా కలెక్టర్, ఇండోర్‌ ఎస్‌పీ సహా పలువురు ఉన్నతాధికారులపై దాడి చేసి కొట్టారు.
 బస్సులకూ, వాహనాలకూ నిప్పంటిం చారు. అన్నిటికన్నా వింత...24 గంటలు గడిచినా అన్నదాతల ఉసురు తీసిన తూటాలెవరివో సర్కారుకు తెలియదు! మధ్యప్రదేశ్‌ రైతుల డిమాండ్లు గొంతెమ్మ కోర్కెలేమీ కాదు. పంటలకు తగిన గిట్టుబాటు ధర కావాలంటున్నారు. సాగు రుణాలను మాఫీ చేయాలంటున్నారు. ఇందులో మొదటి డిమాండ్‌ మూడేళ్లనాటి సార్వత్రిక ఎన్నికల సందర్భంగా బీజేపీ మేనిఫెస్టోలో ఇచ్చిన హామీయే. రెండోది–ఈమధ్యే జరిగిన యూపీ ఎన్నికల్లో అదే పార్టీ అక్కడి రైతులకు వాగ్దానం చేసి అమలుకు పూనుకుంటున్నదే.
 అధిక దిగుబడి సాధిస్తున్నందుకు అయిదేళ్లుగా వ్యవసాయ రంగంలో వరసబెట్టి జాతీయ స్థాయి ఉత్తమ అవార్డును సొంతం చేసుకుంటున్న రాష్ట్రంలో రైతులకు ఒరిగిందేమీ లేకపోగా... వారి డిమాండ్లు పెడ చెవిన పెట్టడం, చివరకు పోలీసు కాల్పుల వరకూ రావడం ఎంత విషాదం!  నిజానికిది మధ్యప్రదేశ్‌ రాష్ట్రానికే పరిమితమైన ధోరణి కాదు. పాలకులెవరైనా రైతుల విషయానికొచ్చేసరికి అంతటా ఈ మాదిరి ఉదాసీనతే కనిపిస్తోంది. కడు పుమండి, సహనం కోల్పోతే మాత్రం లాఠీచార్జిలు, కర్ఫ్యూలు, కాల్పులు, కేసులు వచ్చిపడుతున్నాయి. అదనపు బలగాలు దిగుతున్నాయి. మిర్చి రైతులు గిట్టు బాటు ధర కోసం ఉద్యమించిన రైతులకు ఉభయ తెలుగు రాష్ట్రాల్లో ఎలాంటి పరాభవం ఎదురైందో అందరూ చూశారు. రైతుల ఆందోళన అరణ్యరోదనగా మిగిలిపోగా దళారులదే పైచేయి అయింది.
 
 దేశంలో అనేకచోట్ల రైతులు ఆందోళన బాట పడుతున్నారు. మధ్యప్రదేశ్, రాజస్థాన్, హర్యానా తదితర రాష్ట్రాల్లో రుణమాఫీ కావాలంటూ ఉద్యమిస్తున్నారు. వీటిని కేవలం యూపీలో రుణమాఫీ అమలు చేస్తున్న పర్యవసానంగా తలెత్తిన ఉద్యమాలుగా భావిస్తే రైతులకు అన్యాయం చేయడమే అవుతుంది. దేశ జనా భాలో 70 శాతంమంది ఆధారపడుతున్న సాగు రంగాన్ని వరస కరువులు పట్టి పీడిస్తున్నాయి. పండించిన పంటలకు గిట్టుబాటు ధరలు రావడం లేదు.
 మరో పక్క సాగు వ్యయం అపరిమితంగా పెరిగింది. చివరకు రైతులు అప్పుల్లో కూరుకు పోయి ఆత్మహత్యే శరణ్యమనుకుంటున్నారు. పత్తి, ఉల్లి, సోయాబీన్, టొమాటా, ఎండుమిర్చి...ఇలా ఏ పంట సాగుచేస్తున్న రైతులను కదిల్చినా కన్నీటి గాథలే. ఇప్పుడు అట్టుడుకుతున్న మధ్యప్రదేశ్‌ విషయమే తీసుకుంటే అక్కడ నిరుడు ఫిబ్రవరి నుంచి మొన్న ఫిబ్రవరి వరకూ 1,982మంది రైతులు ఆత్మహత్యలకు పాల్పడ్డారు. ఆ రాష్ట్రంలో గత పదిహేనేళ్లలో ఇలా ఉసురు తీసుకున్న రైతుల సంఖ్య దాదాపు 20,000. నిరుడు వాతావరణం అనుకూలించి పంటలు బాగా పండినా మార్కెట్‌కొచ్చిన దిగుబడులకు గిట్టుబాటు ధరలు లేవు.
 
 ఆ రాష్ట్రంలో మాల్వా– నిమద్‌ ప్రాంతంలో ఇప్పుడు పోలీస్‌ కాల్పులు జరిగిన మంద్‌సౌర్‌ జిల్లాతో సహా 15 జిల్లాలున్నాయి. ఆ ప్రాంతంలో వరసగా రెండోసారి కూడా ఉల్లి దిగు బడులు బాగున్నాయి. మార్కెట్‌కి తీసుకొచ్చాక దాని ధర అమాంతం పడి పోయింది. కిలో రూపాయి పలకడంతో ఆగ్రహించిన రైతులు ఉల్లిని రోడ్లపై పారబోయాల్సివచ్చింది. టొమాట, ఆలుగడ్డ రైతుల స్థితి సైతం ఇదే. ఆందోళన ఉధృతమయ్యాక చాలా ఆలస్యంగా ఉల్లి కనీస మద్దతు ధర రూ. 8గా ప్రభుత్వం ప్రకటించింది. ఇంచుమించు ఇవే పరిస్థితులు పొరుగునున్న మహారాష్ట్రలో కూడా కన బడుతున్నాయి. అక్కడ ఈ ఏడాది కంది బాగా పండిందన్న సంబరం కాస్తా ఆవిరైంది.
 దాని ధర క్వింటాల్‌కు రూ. 12,000 నుంచి ఒక్కసారిగా రూ. 3,000కు పడిపోయింది. ఎన్నో ఒత్తిళ్లు, ఆందోళనల తర్వాత కనీస ధర రూ. 5,000గా ప్రభుత్వం ప్రకటించినా సరిగా అమలు కాలేదు. అందువల్లనే ఆగ్రహించిన రైతులు మహారాష్ట్రలోని పుణే ప్రాంతంలో పాలు, కూరగాయలు నగరాలకు వెళ్లనీయరాదని అడ్డుకున్నారు. ఈ ఉద్యమం ఇతరచోట్లకు విస్తరించిన పర్యవ సానంగా రాష్ట్రంలోని 307 వ్యవసాయ సహకార మార్కెట్‌ కమిటీల్లో అధికచోట్లకు సాగు దిగుబడుల రాక పూర్తిగా నిలిచిపోయింది.
 
 పర్యవసానంగా కూరగాయల ధరలు క్రమేపీ పెరుగుతున్నాయి. కొల్హాపూర్, నాసిక్, సంగ్లి, అమరావతి జిల్లాల్లో రెవెన్యూ కార్యాలయాల ముందూ, కలక్టరేట్‌లముందూ కూరగాయలు పారబోసి రైతులు నిరసన తెలుపుతున్నారు. జూన్‌ 1 నుంచి ఆందోళన చేస్తున్నా పెద్దగా పట్టించుకోని మహారాష్ట్ర సర్కారు మంద్‌సౌర్‌ ఉదంతాన్ని గమనించాక కదిలింది. రుణమాఫీ అమలు చేస్తామని మహారాష్ట్ర సీఎం దేవేంద్ర ఫడణవీస్‌ హామీ ఇచ్చారు. అటు పంజాబ్‌ సీఎం కెప్టెన్‌ అమరీందర్‌ సింగ్‌ సైతం రుణమాఫీ ప్రతిపాదనను పరిశీలిస్తామంటున్నారు. రాజస్థాన్‌ రైతులు కూడా ఆందోళన బాటపడుతున్నారు.
 రైతు రుణమాఫీ అనారోగ్యకరమంటున్న రిజర్వ్‌బ్యాంక్‌ గవర్నర్‌ ఉర్జిత్‌ పటేల్, స్టేట్‌బ్యాంక్‌ చీఫ్‌ అరుంధతీ భట్టాచార్య వేలాది కోట్ల రూపాయల కార్పొరేట్‌ బకాయిలు ఎలా మాఫీ అవుతున్నాయో చెప్పాలి. సాగు వ్యయానికి అదనంగా 50 శాతం చేర్చి కనీస మద్దతు ధర ప్రకటించాలన్న వ్యవసాయ శాస్త్రవేత్త డాక్టర్‌ ఎంఎస్‌ స్వామినాథన్‌ చేసిన సిఫార్సును అమలు చేస్తామని సార్వత్రిక ఎన్నికల్లో బీజేపీ హామీ ఇచ్చింది. అది సాకారమైతేనే వ్యవసాయ రంగం కాస్తయినా కోలుకుంటుంది. రైతులు తెరిపిన పడతారు. పాలకుల ధోరణి మారకపోతే మాత్రం మంద్‌సౌర్‌లు అన్నిచోట్లా పునరావృత మవుతూనే ఉంటాయి.


 రైతులకు తప్పనిసరి చేస్తూ నాబార్డు ఆదేశాలు
 జిల్లాకు చేరిన కార్డులు 40 వేలు.. పంపిణీ చేసినవి 22 వేలు
 ఖరీఫ్‌ ఆసన్నమవుతున్నా ప్రారంభం కాని రుణాల ప్రక్రియ
 
 ఆదిలాబాద్‌టౌన్‌: రూపే కిసాన్‌ కార్డు ఉంటేనే జిల్లా సహకార బ్యాంకుల ద్వారా రైతులకు పంట రుణాలు ఇవ్వాలని నాబార్డు తాజాగా ఆదేశాలు జారీ చేసింది. దీంతో అన్నదాతలకు ఇబ్బందులు ఎదురయ్యే పరిస్థితి కనిపిస్తోంది. ఖరీఫ్‌ సీజన్‌ ప్రారంభమైనప్పటికీ పంట రుణాల ప్రక్రియ ఇంకా మొదలు కాలేదు. దీంతో రైతులు ఆందోళన చెందుతున్నారు. ఈయేడాది మార్చిలోనే సహకార బ్యాంకుల పరిధిలోని రైతులందరికీ రూపే కార్డులు అందజేయాలని ఆదేశాలు జారీ చేసినా ఇప్పటివరకు సగం మందికే జారీ చేశారు. గ్రామస్థాయిలో రైతులకు అందే సేవలను డిజిటల్‌ చెల్లింపుల్లో తీసుకురావడానికి కేంద్ర ప్రభుత్వం సహకార బ్యాంకులకు ఆదేశాలు జారీ చేసింది. ఈ నెలాఖరు వరకు రైతులందరికీ కార్డులు అందించాలని   నాబార్డు బ్యాంకులకు సూచించింది.
 
 ఉమ్మడి జిల్లాలో..
 ఆదిలాబాద్‌ ఉమ్మడి జిల్లా పరిధిలో 29 సహకార బ్యాంకులు ఉన్నాయి. ఈ బ్యాంకుల పరిధిలో 76 సహకార సంఘాలు పనిచేస్తున్నాయి. ఉమ్మడి జిల్లా పరిధిలో సహకార బ్యాంకుల్లో 55,626 మందికి ఖా తాలు ఉన్నాయి. రూపే కార్డుల పంపిణీ ప్రక్రియ జిల్లాలో నత్తనడకన సాగుతోంది. ఇప్పటివరకు 22 వేల మంది రైతులకు మాత్రమే పంపిణీ చేశారు. కా గా జిల్లాకు 40వేల కార్డులు వచ్చాయని డీసీసీబీ అ ధికారులు పేర్కొంటున్నారు. ఈ నెలాఖరు వరకు ఉమ్మడి జిల్లా పరిధిలోని రైతులందరికీ రూపే కార్డుల పంపిణీ చేస్తారా అనేది అనుమానంగానే ఉంది.
 
 బోగస్‌ ఖాతాలకు చెక్‌..
 రూపేకార్డులను వంద శాతం పంపిణీ చేస్తే సహకార బ్యాంకుల్లో రైతుల పేరిట తీసుకునే బడా బాబులకు చెక్‌ పడనుంది. రూపే కార్డు ఏటీఎం కార్డు లాగా పనిచేస్తుంది. రైతులకు పంట రుణ ఖాతా, పొదుపు బ్యాంక్‌ ఖాతా ఈ కార్డుకు అనుసంధానమై ఉంటాయి. రైతులకు మంజూరైన రుణాలు ఇక నగదు రూపంలో ఇవ్వకుండా రూపే కార్డును రైతు పేరుతో ముద్రించి రైతుకు అందజేస్తారు. రైతులకు కార్డులు అందించే సమయంలో ధ్రువీకరణ పత్రం ఇవ్వాలనే నిబంధన పెట్టారు. దీంతో రైతులందరి నుంచి సంతకాలు తీసుకోవడానికి మరింత జాప్యం జరగనుంది. కార్డులను రైతులకు ఇవ్వాలంటే వారి కుటుంబానికి భూమికి సంబంధించిన 17 అంశాలు ఆధార్‌ సంఖ్యను సేకరించి నమోదు చేయాల్సి ఉంటుంది.
 
  ఆదిలాబాద్‌ ఉమ్మడి జిల్లా పరిధిలో ఉన్న 76 సంఘాలకు గాను 52 సంఘాలకు మాత్రమే సేవలు అందుతున్నాయి. ఇంకా 21 సంఘాలు ఆన్‌లైన్‌లో సేవలకు సంబంధించి నమోదు కాలేదు. ఈ లావాదేవీలు పాసు పుస్తకాల్లోనే నిర్వహిస్తున్నారు. దీంతో పంట రుణాలు ఇచ్చినా ఇవ్వకపోయినా పుస్తకంలో సర్దుబాటు విధానంతో బ్యాంకులు నెట్టుకొస్తున్నాయి. రూపే కార్డు విధానం వల్ల ఈ బోగస్‌ వ్యవహారానికి అడ్డుకట్ట పడనుంది. రైతులకు అందించే రుణాల మంజూరు, చెల్లింపులు ఆన్‌లైన్‌లో జరపడం వల్ల ఉన్నతాధికారులకు ఈ విషయం తెలిసిపోతుంది. ఏవైనా అక్రమాలు జరిగితే సంబంధిత అధికారులపై చర్యలు తీసుకునే అవకాశం ఉంటుంది.
 
 ఎం–పాస్‌ యంత్రాలు ఇచ్చేందుకు..
 జిల్లా సహకార బ్యాంకుల ద్వారా నగదు రహిత లావాదేవీలకు సంబంధించి ఎం–పాస్‌ యంత్రాలు ఇచ్చేందుకు అధికారులు నిమగ్నమవుతున్నట్లు తెలుస్తోంది. రైతులకు జారీ చేసే రూపే కార్డులను సంఘాల్లో ఉపయోగించేందుకు వీలుంటుంది. వీటితో స్వైపింగ్, ఏటీఎంలో వినియోగించుకోవచ్చు. లావాదేవీలు జరుపుకోవచ్చు. త్వరలో సహకార బ్యాంకులకు సంబంధించి ఏటీఎంలను జిల్లాలోని ముఖ్య ప్రాంతాల్లో ఏర్పాటు చేయనున్నట్లు ఆ శాఖ అధికారులు పేర్కొంటున్నారు.


 స్థానిక అవసరాలకు అనుగుణంగా పంటల బీమా
 సాక్షి, హైదరాబాద్‌: సీజన్‌లో సాగుకు ముందే రైతులకు పంట రుణాలు ఇవ్వాలని ‘ఐదేళ్లలో రైతు ఆదాయం రెట్టింపు’ టాస్క్‌ఫోర్స్‌ కమిటీ సూచించింది. అప్పుడే రైతు తనకు అవసరమైన విత్తనాలు, ఎరువులు కొనుగోలుచేసి ప్రైవేటు అప్పులకు దూరంగా ఉంటారని, రెట్టింపు ఆదాయానికి మార్గం సుగమం అవుతుందని స్పష్టం చేసింది. 2022 నాటికి రైతు ఆదాయాన్ని రెట్టింపు చేయాలన్న కేంద్ర ప్రభుత్వం నిర్ణయం నేపథ్యంలో రాష్ట్రంలో వ్యవసాయ శాఖ కమిషనర్‌ జగన్‌మోహన్‌ చైర్మన్‌గా, ప్రొఫెసర్‌ రాజిరెడ్డి కన్వీనర్‌గా టాస్క్‌ఫోర్స్‌ కమిటీ ఏర్పాటైంది. ఈ కమిటీ సమావేశం మంగళవారం జరిగింది.
 ఇందులో నాబార్డు సహా వ్యవసాయ, ఉద్యాన, పశుసం వర్థక, మార్కెటింగ్‌ తదితర అనుబంధ శాఖల అధికారులు, శాస్త్రవేత్తలు పాల్గొన్నారు. రైతు ఆదాయం రెట్టింపునకు వ్యవసాయ, ఉద్యాన, పశు సంవర్థక శాఖలు తమ నివేదికలు అందజేశాయి. ప్రస్తుతం సాగు చేశాకే పంట రుణాలు ఇస్తున్నారని, ఈ పరిస్థితి మారాలని టాస్క్‌ ఫోర్స్‌ కమిటీ వివరించింది. పంట వేయడానికి ముందే వివిధ పంటలకు బీమా ప్రీమియం గడువులను స్థానిక పరిస్థితులకు అనుగుణంగా నిర్ధారించాలన్నారు. రైతులు ప్రత్యామ్నాయ ఆదాయంగా పాడి, చేపలు, గొర్రెల పెంపకం వంటి వాటిని కూడా ఎంచుకోవాలని సూచించారు.
 
 ఎరువుల వాడకాన్ని తగ్గించాలి: వచ్చే ఖరీఫ్‌ నుంచి ఎరువుల వాడకాన్ని కనీసం పావు శాతానికి తగ్గించేలా చూడాలని కమిటీ సూచించింది. రైతు ఆదాయాన్ని రెట్టింపు చేయాలన్న అంశంపై వ్యవసాయశాఖ క్షేత్రస్థాయిలో సర్వే నిర్వహించింది. నల్లగొండ, రంగారెడ్డి జిల్లాలకు రెండు బృందాలు వెళ్లి సర్వే నిర్వహించాయి.


 నవంబర్, డిసెంబర్‌లకు వర్తింపు
 ► గృహ రుణ వడ్డీ  రాయితీ పథకానికి ఓకే
 ► వరిష్ట పెన్షన్  బీమా యోజనకూ ఆమోదం
 ► కేంద్ర కేబినెట్‌ నిర్ణయాలు
 న్యూఢిల్లీ: నోట్ల రద్దుతో నగదు దొరక్క ఇబ్బందులు పడుతున్న రైతులకు ప్రభుత్వం కాస్త ఊరట కల్పించింది. సహకార బ్యాంకుల నుంచి 2016 ఏప్రిల్‌–సెప్టెంబర్‌ మధ్య తీసుకున్న స్వల్పకాలిక పంటరుణాలపై ఆ ఏడాది నవంబర్, డిసెంబర్‌ నెలలకుగాను రూ. 660.50 కోట్ల వడ్డీని మాఫీ చేసింది. ప్రధాని మోదీ అధ్యక్షతన మంగళవారం జరిగిన కేంద్ర కేబినెట్‌లో ఈ నిర్ణయం తీసుకున్నారు. నవంబర్, డిసెంబర్‌ల వడ్డీని చెల్లించిన రైతులకు ఆ మొత్తాన్ని ప్రత్యక్ష నగదు బదిలీ ద్వారా వారి బ్యాంకు ఖాతాల్లో ప్రభుత్వం జమచేస్తుందని వ్యవసాయ మంత్రి రాధామోహన్  సింగ్‌ చెప్పారు. అలాగే ప్రస్తుత ఆర్థిక సంవత్సరానికి సహకార బ్యాంకులకు 4.5 శాతం వడ్డీతో రుణంగా ఇవ్వడానికి రూ. 20 వేల కోట్ల రుణాలను తీసుకునేందుకు నాబార్డ్‌కు కేబినెట్‌ అనుమతినిచ్చింది. 1.8 శాతం వడ్డీ రాయితీ, 0.2 శాతం పాలనా వ్యయాన్ని నాబార్డ్‌ భరించేందుకు రూ. 400 కోట్ల గ్రాంట్‌ కూడా ఇవ్వాలని నిర్ణయించింది.
 
 గృహ రుణాలపై 3 శాతం వడ్డీ రాయితీ
 గ్రామీణ ప్రజలు కొత్త ఇళ్లు కట్టుకోవడానికి, లేదా ప్రస్తుత ఇళ్ల అభివృద్ధి కోసం తీసుకునే గృహ రుణాలపై 3 శాతం వడ్డీ రాయితీ ఇచ్చే పథకానికి కేబినెట్‌ ఆమోదం తెలిపింది. ప్రధానమంత్రి ఆవాసయోజన(గ్రామీణ్‌) కిందికి రాని ప్రతి కుటుంబానికీ రూ. 2 లక్షల వరకు రుణంపై ఈ రాయితీ ఇస్తారు. దీనితో పేదలకు నెల వాయిదాల(ఈఎంఐ)పై భారం తగ్గుతుందని, ఈ పథకాన్ని నేషనల్‌ హౌసింగ్‌ బ్యాంక్‌ అమలు చేస్తుందని ప్రభుత్వం వెల్లడించింది. ప్రధాని మోదీ కొత్త ఏడాది ప్రారంభం సందర్భంగా ఈ పథకాన్ని ప్రకటించడం తెలిసిందే.
 
 సీనియర్‌ సిటిజన్లకు 8 శాతం వడ్డీ
 సీనియర్‌ సిటిజన్లకు పదేళ్లపాటు ఏటా 8 శాతం వడ్డీ ఇచ్చే వరిష్ట పెన్షన్  బీమా యోజన–2017 పథకానికి కేంద్రం ఆమోదం తెలిపింది. నెల, మూడు నెలలు, ఆరు నెలలు, ఏడాది.. వీటిలో దేన్ని ఎంచుకుంటే దాని ప్రాతిపదికగా పెన్షన్ అందిస్తారు. ఎల్‌ఐసీ అమలు చేయనున్న ఈ పథకంలో 60 ఏళ్లు, ఆపై వయసున్న వారు పథకం మొదలైన నాటి నుంచి ఏడాది లోపల చేరవచ్చు.
 
 ఐఐఎంల నుంచి ఇక డిగ్రీలు
 దేశంలోని 20 ఇండియన్  ఇన్ స్టిట్యూట్‌ ఆఫ్‌ మేనేజ్‌మెంట్‌(ఐఐఎం)లు ఇకపై తమ విద్యార్థులకు పోస్ట్‌ గ్రాడ్యుయేట్‌ డిప్లమా, ఫెలో ప్రోగ్రామ్స్‌ ఇన్  మేనేజ్‌మెంట్‌లు కాకుండా ఎంబీఏ వంటి డిగ్రీలు, పీహెచ్‌డీలు ఇవ్వనున్నాయి. ఐఐఎంలను ఇకపై జాతీయ ప్రాధాన్య సంస్థలుగా గుర్తిస్తారు. దీనికి సంబంధించిన ఐఐఎం–2017 బిల్లును కేబినెట్‌ ఆమోదించింది. దీన్ని వచ్చే పార్లమెంటు సమావేశాల్లో ప్రవేశపెడతారు. ఐఐఎంలకు సంపూర్ణ స్వయంప్రతిపత్తిపై బిల్లు దృష్టి సారించిందని ప్రధాని మోదీ ట్వీట్‌ చేశారు.
 ప్రస్తుతం ఐఐఎంలు సొసైటీల చట్టం కింద రిజిస్టర్‌ అయి ఉండడంతో వీటికి డిగ్రీలు ఇచ్చే అవకాశం లేదు.  ఈ సంస్థలు ఇచ్చే  డిప్లమాలు, ఫెలో ప్రోగ్రామ్‌లు.. ఎంబీఏ, పీహెచ్‌డీలకు సమానంగా భావిస్తున్నా  వీటి సమానత్వంపై  సార్వత్రిక ఆమోదం లేదు.   కాగా, హరితవాయు ఉద్గారాల కట్టడికి కోసం క్యోటో ప్రొటోకాల్‌ రెండో దశ అమలుకు కేంద్ర కేబినెట్‌ ఆమోదం తెలిపింది. ఎన్నారైలకు ఎలక్ట్రానిక్‌ మాధ్యమంలోనూ, ప్రతినిధి ద్వారానూ ఓటు వేసే అవకాశం కల్పించాలన్న ప్రతిపాదనను వాయిదా వేసింది.


 జంగారెడ్డిగూడెం : స్టేట్‌ బ్యాంకు ఆఫ్‌ ఇండియా (ఎస్‌బీఐ), స్టేట్‌బ్యాంక్‌ ఆఫ్‌ హైదరాబాద్‌ (ఎస్‌బీహెచ్‌) అధికారులు తమను నట్టేముంచారని వర్జీనియా రైతులు తీవ్ర ఆవేదన వ్యక్తంచేశారు. శనివారం స్థానిక ఎస్‌బీఐ, ఎస్‌బీహెచ్‌ వద్ద వర్జీనియా పొగాకు రైతు సంఘం ఆధ్వర్యంలో పెద్దెత్తున ధర్నా నిర్వహించారు. ఏటా రూ.5 లక్షల నుంచి రూ.6 లక్షలు వర్జీనియా రైతులకు బ్యాంకులు రుణాలుగా ఇచ్చేవని అయితే ఈ ఏడాది రూ.3 లక్షలు ఇచ్చి మిగిలిన రుణాన్ని తర్వాత ఇస్తామని చెప్పి పంట చేతికి వచ్చే సమయంలో మోసం చేశారని ఆరోపించారు. 
  
 రెండు నెలలుగా తిరుగుతున్నా..
 గతేడాది బ్యార¯ŒSకు 25 క్వింటాళ్లు పంట అనుమతి ఇవ్వగా బ్యాంకులు ఐదు నుం చి ఆరు లక్షల రూపాయలు రుణాలు ఇచ్చాయని, ఈ ఏడాది బ్యార¯ŒSకు 30 క్వింటాళ్లు అనుమతి ఉన్నా మూడు లక్షల రూపాయలు మాత్రమే ఇచ్చి ఇబ్బందులు పెడుతున్నారని రైతులు ఆవేదన వ్యక్తం చేశారు. దీనిపై రెండు నెలలుగా బ్యాంకు ఉన్నతాధికారులతో  చర్చించినా ఫలితం లేదన్నారు. అదనపు రుణం వస్తుందని ఎదురుచూస్తున్న రైతులకు బ్యాంకు అధికారుల నిర్ణయం శరాఘాతంగా తగిలిందన్నారు. 30 ఏళ్లుగా లేని నిబంధనలు పెట్టి రైతులను నట్టేట ముంచారని ఆందోళన చెందుతున్నారు. 
  
 బకాయిలకు జమ
 రైతులకు మంజూరు చేసిన రూ.3 లక్షలూ గత బకాయిలకు బ్యాంకులు జ మచేసుకున్నాయని, దీంతో రైతు చేతికి కనీసం రూ.25 వేలు కూడా అందలేదని అన్నారు. పంట చేతికి వచ్చే సమయం లో ఎక్కువ ఖర్చులు ఉంటాయని కూ లీలకు పండుగ అడ్వాన్సులు ఇవ్వాల్సి ఉంటుందని, ఇటువంటి సమయంలో బ్యాంకర్లు అమానుషంగా ప్రవర్తిస్తున్నారని ధ్వజమెత్తారు. ధర్నా అనంతరం ఎస్‌బీహెచ్‌ చీఫ్‌ మేనేజర్‌ ఎంవీ సీతారామన్, ఎస్‌బీఐ చీఫ్‌ మేనేజర్‌ శ్రీరాములుకు వినతిపత్రం అందజేశారు. అనంతరం ఆర్డీవో కార్యాలయానికి చేరుకుని అక్కడ ఏవో పి.సత్యనారాయణకు తమకు న్యాయం చేయాలని వినతిపత్రం అందజేశారు. పొగాకు బోర్డు సభ్యులు గడ్డమణుగు సత్యనారాయణ, గంటశాల గాంధీ, జి.రవికుమార్, చెరుకూరి సందరరావు, వేగేశ్న రాధాకృష్ణరాజు, తెల్లం వెంకటేశ్వరరావు, గద్దే వీరకృష్ణ తది తరులు పాల్గొన్నారు.
  
 మభ్యపెట్టి మోసం చేశారు
 ఎస్‌బీఐ, ఎస్‌బీహెచ్‌ బ్యాంకులు వర్జీనియా రైతులను నట్టేట ముంచాయి. రుణాలు పెంచి ఇస్తామని మభ్యపెడుతూ ఇప్పుడు అకస్మాత్తుగా రుణం పెంచేది లేదని చేతులెత్తేశాయి. వర్జీనియా తోటలు మధ్యరకంగా ఉండటంతో రైతులకు ఇబ్బందులు తప్పవు. మధ్యస్థంగా ఉన్న, చేతికి వచ్చే పంట దశలో ఉన్న  రైతులు నష్టపోతారు. –గడ్డమణుగు సత్యనారాయణ, పొగాకుబోర్డు సభ్యుడు
  
 ఆత్మహత్యలే శరణ్యం
 వర్జీనియా రైతులకు ఆత్మహత్యలే శరణ్యం. ఇప్పటివరకు రుణాలు పెంచి ఇస్తామని నమ్మించి మోసం చేశారు. ఇప్పుడు ఇవ్వలేమని ప్రకటించారు. దీంతో వర్జీనియా రైతులంతా తీవ్రంగా నష్టపోయి ఆత్మహత్యలు చేసుకునే పరిస్థితి. ఇప్పటికే లక్షల రూపాయలు పెట్టుబడి పెట్టాం. అదంతా కోల్పోవాల్సి వస్తోంది.   
 –గంటశాల గాంధీ, వర్జీనియా పొగాకు రైతు 
  


 ⇒ మూడో విడతలో రెండో సగం నిధులు విడుదల చేసిన ప్రభుత్వం
 ⇒ వచ్చే ఏడాది ఒకేసారి ఆఖరి విడత చెల్లింపునకు యోచన
  
 సాక్షి, హైదరాబాద్: రైతుల రుణమాఫీకి సంబంధించి మూడో విడత నిధులను రాష్ట్ర ప్రభుత్వం విడుదల చేసింది. మూడో విడతకు సంబంధించిన రెండో సగం నిధులు రూ.2,019.19 కోట్లను విడుదల చేస్తూ మంగళవారం ఉత్తర్వులు జారీ చేసింది. దీంతో రైతులకు సంబంధించి మూడు వంతుల రుణాన్ని ప్రభుత్వం తిరిగి బ్యాంకులకు చెల్లించినట్లైంది. మొత్తం 36 లక్షల మంది రైతులకు సంబంధించి రూ.17 వేల కోట్ల రుణాల మాఫీ పథకాన్ని టీఆ ర్‌ఎస్ ప్రభుత్వం అధికారంలోకి వచ్చిన వెంటనే అమలు చేసింది. 4 విడతల్లో మాఫీ నిధులను బ్యాంకులకు చెల్లించేందుకు ప్రభుత్వం ఒప్పందం చేసుకుంది.
 
 తొలి ఏడాది రూ.4,250 కోట్లు ఒకే సారి విడుదల చేసింది. గతేడాది జూన్, సెప్టెంబ ర్‌లో 2 దశల్లో రూ.4,086 కోట్లు చెల్లించింది. ఈ ఏడాది నిధుల విడుదల  ఆలస్యమైంది. జూలై 1న మొదటి దఫాగా రూ.2,019 కోట్లు చెల్లిం చింది. 3 నెలల తర్వాత మిగతా రూ.2,019 కో ట్లు విడుదల చేసింది. వచ్చే ఏడాది నాలుగో విడ త చెల్లింపులతో ఈ పథకం ముగియనుంది. బ్యాంకులకు నిధులు చేరటం ఆలస్యమవటంతో కొన్ని జిల్లాల్లో బ్యాంకర్లు రైతుల నుంచి వడ్డీ వసూలు చేసినట్లు విమర్శలు చుట్టుముట్టారుు. అందుకే వచ్చే ఏడాది చివరి విడత నిధులను ఒకేసారి విడుదల చేయాలని ఇటీవలే కేబినెట్ భేటీలో సీఎం కేసీఆర్ ఆర్థిక శాఖ అధికారులను ఆదేశించారు.
  
 లెక్కతేలింది రూ.16,160 కోట్లు..
 రైతు రుణమాఫీకి సంబంధించిన లెక్కతేలింది. మొత్తం రూ.17 వేల కోట్ల రుణాలను మాఫీ చేస్తున్నట్లు ప్రభుత్వం ఆరంభంలో ప్రకటించింది. 36 లక్షల మంది రైతులు లబ్ధి పొందుతారని వ్యవసాయ శాఖ అంచనా వేసింది. ఈ పథకం అమల్లో భాగంగా రెండో ఏడాది బోగస్ రైతులు, రెండేసి ఖాతాలున్న రైతులు కొందరిని ప్రభుత్వం ఏరివేసింది. దీంతో మాఫీ మొత్తం రూ.16,160 కోట్లకు చేరినట్లు ఆర్థిక శాఖ తాజాగా అంచనాకు వచ్చింది. ఇప్పటివరకు  రూ.12,375 కోట్లను ప్రభుత్వం చెల్లించింది. మొత్తం 35.30 లక్షల రైతుల రుణాలు మాఫీ అయ్యాయని, బ్యాంకుల బ్రాంచీల వారీగా లబ్ధిదారుల జాబితాలను వ్యవసాయ శాఖ సిద్ధం చేసింది. వచ్చే ఏడాది మిగతా రూ.3,785 కోట్లు విడుదల చేస్తే ఈ పథకం సంపూర్ణంగా విజయవంతమవుతుందని ప్రభుత్వ వర్గాలు వెల్లడించారుు.
  
  దశలవారీగా చెల్లింపులు
  2014 సెప్టెంబర్:     రూ.4,250 కోట్లు
  2015 జూన్:        రూ.2,043 కోట్లు
  2015 జూలై:        రూ.2,043 కోట్లు
  2016 జూలై:        రూ.2,019 కోట్లు
  2016 నవంబర్:    రూ.2,019 కోట్లు


 ► రైతన్నకు నయా పైసా అందని రబీ రుణం
 ► కాలం కలిసొచ్చినా కరుణించని బ్యాంకులు
 ► రుణ లక్ష్యం రూ.11,640 కోట్లు.. ఇచ్చింది శూన్యం
 ► ప్రభుత్వం ముందు సై.. రైతుల ముందు నై
 ► పుష్కలంగా నీళ్లున్నా సొమ్ము లేక అన్నదాత విలవిల
 ► పెట్టుబడుల కోసం అప్పులు.. తప్పని ‘ప్రైవేటు’ తిప్పలు
 ► బ్యాంకులపై ఒత్తిడి తేవడంలో వ్యవసాయ శాఖ విఫలం
  
  
 సాక్షి, హైదరాబాద్‌: కాలం కలిసొచ్చింది.. వర్షాలు దండిగా కురిశాయి.. చెరువులు, బావులు, బోర్లలో పుష్కలంగా నీళ్లున్నాయి.. గింజ వేస్తే చాలు చేలన్నీ పైర్లతో కళకళలాడుతాయి... కానీ రైతన్న చేతిలో చిల్లిగవ్వ లేదు.. విత్తుకు విత్తం(సొమ్ము) లేదు.. రైతులకు రుణాలిచ్చేందుకు బ్యాంకులు మొండికేస్తున్నాయి. రబీ సీజన్‌ మొదలై నెల  కావస్తున్నా పంట రుణం కింద నయా పైసా ఇవ్వలేదు. రైతులు గత్యంతరం లేక పెట్టుబడుల కోసం ప్రైవేటు వడ్డీ వ్యాపారుల వద్ద మళ్లీ చేయి చాచాల్సి వస్తోంది.
 
 అక్కడ అలా.. ఇక్కడ ఇలా..
 2016–17 ఖరీఫ్, రబీ సీజన్లకు రూ. 29,101 కోట్ల పంట రుణాలు ఇవ్వాలని రాష్ట్రస్థాయి బ్యాంకర్ల కమిటీ (ఎస్‌ఎల్‌బీసీ) నిర్ణయించింది. అందులో ఖరీఫ్‌కు రూ.17,460 కోట్లు, రబీకి రూ.11,640 కోట్లు ఇవ్వాలని లక్ష్యంగా పెట్టుకుంది. ఖరీఫ్‌ లక్ష్యంలో బ్యాంకులు కేవలం రూ. 11,546 కోట్లే ఇచ్చాయి. రబీలో రైతులకు విరివిగా రుణాలిస్తామని ఇటీవల ప్రభుత్వం ఏర్పాటు చేసిన సమావేశంలో బ్యాంకర్లు హామీ ఇచ్చారు. రుణమాఫీకి సంబంధించి రాష్ట్ర ప్రభుత్వమే బాధ్యత తీసుకున్నందున మాఫీకి సంబంధించిన సొమ్ముపై రైతులను బలవంతం చేయొద్దని వ్యవసాయ శాఖ మంత్రి పోచారం, ఆర్థిక మంత్రి ఈటల బ్యాంకర్లకు గట్టిగా చెప్పారు. అయినా బ్యాంక్‌లు తమ వైఖరి మార్చుకోలేదు. ఈ నెల ఒకటో తేదీ నుంచి రబీ సీజన్‌ మొదలైనా ఇప్పటివరకు రైతులకు ఒక్కపైసా పంట రుణాలు ఇవ్వలేదని వ్యవసాయశాఖ అధికారి ఒకరు తెలిపారు.
 
 మాఫీ బూచీ చూపి..
 రుణమాఫీ సొమ్ము పూర్తిగా చెల్లించకపోవడం వల్లే పంట రుణాలు ఇవ్వలేకపోతున్నామంటూ బ్యాంకులు చేస్తున్న వాదనను రాష్ట్ర ప్రభుత్వం కొట్టిపారేస్తోంది. వడ్డీ సహా తామే చెల్లిస్తామని హామీ ఇచ్చినా బ్యాంకర్లు దాన్నే బూచీగా చూపడం సరికాదని కాదని మంత్రి పోచారం అన్నారు.  మూడో విడత రుణమాఫీలో సగమే (రూ.2,020 కోట్లు) విడుదల చేశారని.. మిగతా రూ.2,020 కోట్ల విడుదలపై ఇప్పటికీ స్పష్టత లేదని బ్యాంకర్లు వాదిస్తున్నారు. అయితే ఈ ఏడాది చెల్లించాల్సిన సగంతో పాటు వచ్చే ఏడాది చెల్లించాల్సిన బకాయిలను కూడా ముందుగానే చెల్లిస్తామని బ్యాంకర్లకు ఇప్పటికే సమాచారం ఇచ్చామని వ్యవసాయ శాఖ ఉన్నతాధికారి ఒకరు చెప్పారు.
 
 సాగు లక్ష్యం 30 లక్షల ఎకరాలు..
 ఈ సెప్టెంబర్‌లో రాష్ట్రంలో కుండపోత వర్షాలు కురిశాయి. ఆ నెలలో సాధారణంగా 129.2 మిల్లీమీటర్ల వర్షపాతం కురవాల్సి ఉండగా... 361.5 మి.మీ. కురిసింది. ఏకంగా 180 శాతం అధిక వర్షపాతం నమోదైంది. దీంతో రాష్ట్రంలో 30 వేల చెరువులు నిండాయి. నాగార్జునసాగర్‌ మినహా గోదావరి, కృష్ణా బేసిన్‌లోని అన్ని ప్రాజెక్టులు నీటితో కళకళలాడుతున్నాయి. భూగర్భ జలాలు పైకి ఉబికి వచ్చాయి. గతేడాది సెప్టెంబర్‌లో భూగర్భ జలాలు 11.74 మీటర్ల లోతులో ఉండగా... ఈ ఏడాది సెప్టెంబర్‌లో 8.98 మీటర ్లలోనే అందుబాటులో ఉన్నాయి. అంటే 2.76 మీటర్లు పైకి వచ్చాయి. ఈ నేపథ్యంలో ప్రభుత్వం రబీలో 31 లక్షల ఎకరాలకు పక్కాగా నీరివ్వాలని నిర్ణయించింది. ఇందులో భారీ, మధ్య తరహా ప్రాజెక్టుల కింద 25 లక్షల ఎకరాలు, చిన్న నీటి వనరుల కింద మరో 6 లక్షల ఎకరాలకు నీరివ్వాలని సంకల్పించింది. వాస్తవంగా రబీ సాగు లక్ష్యం 30.45 లక్షల ఎకరాలు. అందులో ఆహారధాన్యాల సాగు లక్ష్యం 27.07 లక్షల ఎకరాలు. అందులో వరి 17.33 లక్షల ఎకరాల్లో, పప్పుధాన్యాలు 3.70 లక్షల ఎకరాల్లో వేయాలని నిర్ణయించారు. అలాగే ఈ సీజన్‌లో 42.85 లక్షల టన్నుల ఆహారధాన్యాలను పండించాలని లక్ష్యంగా ప్రకటించారు. అందులో ధాన్యం ఒక్కటే 31.4 లక్షల టన్నులు పండించాలని లక్ష్యంగా నిర్దేశించుకున్నారు. ఇక పప్పుధాన్యాలు 1.73 లక్షల టన్నులు పండించాలని నిర్ణయించారు. అయితే ఇప్పటివరకు వరకు మొత్తంగా అన్ని రకాల పంటలు కలిపి 2.27 లక్షల ఎకరాల్లో రబీ పంటలు సాగైనట్లు వ్యవసాయశాఖ తాజాగా వెల్లడించింది. రబీ లక్ష్యాల మేరకు ఏర్పాట్లు చేయడంలో బ్యాంకులు, వ్యవసాయశాఖ విఫలమయ్యాయి. వ్యవసాయశాఖ ఇప్పటికీ శనగ విత్తనాలను కూడా అందించలేని పరిస్థితి నెలకొందంటే పరిస్థితి ఎంత దారుణంగా ఉందో అర్థం చేసుకోవచ్చు.
  
 పాత జిల్లాల వారీగా 2016–17 రబీ రుణాల లక్ష్యం (రూ.కోట్లలో..)
 జిల్లా లక్ష్యం
 ఆదిలాబాద్‌          1,174.99
 కరీంనగర్‌            1,724.24
 వరంగల్‌             1,286.55
 ఖమ్మం              1,100.93
 నల్లగొండ            1,289.86
 మహబూబ్‌నగర్‌  1,874.41
 రంగారెడ్డి              836.69
 మెదక్‌               1,123.64
 నిజామాబాద్‌      1,229.24
 ––––––––––––––––
 మొత్తం           11,640.55
 ––––––––––––––––


 కేంద్ర మంత్రి దత్తాత్రేయ
 సాక్షి, హైదరాబాద్: ఈ ఏడాది ఖరీఫ్ సీజన్లో రాష్ట్రంలోని రైతులకు పంట రుణాల రూపంలో రూ.13వేల కోట్లు పంపిణీ చేసినట్లు కేంద్ర కార్మిక, ఉపాధి కల్పన మంత్రి బండారు దత్తాత్రేయ తెలిపారు. తాజా రబీ సీజన్లో నిర్దేశించిన లక్ష్యాలను అధిగమించాలని బ్యాంకర్లను ఆదేశించారు. గురువారం ఇక్కడ జరిగిన రాష్ట్ర స్థాయి బ్యాంకర్ల సమావేశంలో దత్తాత్రేయ మాట్లాడుతూ.. రైతుల ఆదాయాన్ని రెట్టింపు చేసేలా కేంద్ర ప్రభుత్వం ముందుకు సాగుతోందని చెప్పారు. రైతులు పండించిన పంట దిగుబడులను మార్కెట్‌కు తరలించేందుకు సదుపాయాలు కల్పించడంతో పాటు కనీస మద్దతు ధరపై కేంద్రం ప్రత్యేక దృష్టి సారించిందన్నారు.
 రైతుకు ప్రయోజనం కలిగించే ఫసల్ బీమా పథకం కింద రాష్ట్రంలో 25 లక్షల మందికిగాను 8 లక్షల మంది మాత్రమే నమోదు చేసుకున్నారని అసంతృప్తి వ్యక్తం చేశారు. భూ స్వస్థత కార్డులు 31 శాతం మందికే జారీ అయ్యాయని, ఈ ప్రక్రియపై శ్రద్ధ తీసుకోవాలన్నారు. రాష్ట్రంలో నూనెగింజలు, పప్పుధాన్యాలు ఉత్పత్తిని పెంచాలని, ప్రస్తుతం రూ.40 వేల కోట్ల నూనె, పప్పుధాన్యాలను దిగుమతి చేసుకుంటున్నామని తెలిపారు. బడుగు, బలహీన వర్గాలకు లబ్ధి చేకూర్చే శిశు కేటగిరీలో లక్ష్యాలను పెంచి ఎక్కువ మందికి లాభం చేకూర్చేలా చర్యలు తీసుకోవాలని బ్యాంకర్లకు సూచించారు.


 హైదరాబాద్: రాష్ట్రంలోని రైతులకు పూర్తి స్థాయిలో రుణమాఫీ చేసి, ఆదుకోవాల్సి బాధ్యత రాష్ట్ర సర్కారుపై ఉందని వైఎస్సార్ కాంగ్రెస్ పార్టీ తెలంగాణ రాష్ట్ర శాఖ అధ్యక్షుడు గట్టు శ్రీకాంత్ రెడ్డి డిమాండ్ చేశారు. అకాల వర్షాలకు వేల ఎకరాల్లో పంట నష్టం జరిగి రైతులు లబోదిబోమంటున్నారని పేర్కొన్నారు. బుధవారం లోటస్ పాండ్‌లోని వైఎస్సార్ సీపీ కేంద్ర కార్యాయలంలో పార్టీ తెలంగాణ రాష్ట్ర ప్రధాన కార్యదర్శులు, అన్ని జిల్లాల అధ్యక్షులు, జిల్లాల పరిశీలకులతో సమావేశం నిర్వహించారు. ఈ సందర్భంగా ఆయన మాట్లాడుతూ ప్రచార ఆర్భాటాలకు వందల కోట్లు ఖర్చు చేసే సీఎం కేసీఆర్ రైతుల విషయంలో మాత్రం మానవతా దృక్పథంతో వ్యవహరించటం లేదని ఆరోపించారు. ఇప్పటికైనా రైతులకు పూర్తి స్థాయిలో రుణమాఫీ చేసి తిరిగి రుణాలు వచ్చేలా రీషెడ్యూల్ చేయాలని డిమాండ్ చేశారు.
 
 వర్షాలు సకాలంలో పడనందున రైతులు విత్తిన విత్తనాలు మెలకెత్తలేదని, కొన్ని చోట్ల అరకొర మొలకెత్తిన ఆకాల వర్షాలకి నీట ముగిపోయాయని తెలిపారు. ఆకారణంగా నష్టపోయిన రైతాంగానికి ఇన్‌ఫుట్ సబ్సిడీ కింద ఎకరాకు రూ.10 వేలు చెల్లించాలని తెలిపారు. వేలాది ఎకరాలు నీట మునిగి రైతుల కన్నీరు పెడుతున్నారని చెప్పారు. 2004 తర్వాత దివంగత ముఖ్యమంత్రి వైఎస్సార్ ప్రారంభించిన అన్ని ప్రాజెక్టులను తక్షణమే పూర్తి చేయాలని కోరారు. ప్రాజెక్టు విషయంలో ప్రభుత్వం దిగిరాకపోతే అతిత్వరలో వైఎస్సార్ సీపీ ఆధ్వర్యంలో ప్రాజెక్టుల యాత్ర చేయనున్నట్లు చెప్పారు. జిల్లాల వారిగా ప్రభుత్వ ప్రజా వ్యతిరేక విధానాలపై అలుపెరగని పోరాటాలు చేయాలని పిలుపు నిచ్చారు. ప్రతి నెలా జిల్లాల, మండలాల కార్యవర్గ సమావేశాలు తప్పక నిర్వహించాలని చెప్పారు.
 
 పార్టీ నిర్మాణ విషయాలపై దృష్టి సారించాలి...
 రాష్ట్రంలోని జిల్లాల అధ్యక్షులు, పార్టీ జిల్లా పరిశీలకులు, ప్రధాన కార్యదర్శులు ఇక నుంచి గ్రామ స్థాయి నుంచి జిల్లా స్థాయి వరకు పార్టీని బలోపేతం చేసేందుకు తీవ్రంగా కృషి చేయాలని గట్టు శ్రీకాంత్ రెడ్డి విజ్ఞప్తి చేశారు. ఇకపై అందరూ పార్టీ నిర్మాణంపై దృష్టి సారించాలని సూచించారు. అక్టోబర్ 15 లోగా గ్రామ స్థాయి కమిటీలు, పార్టీ అన్ని అనుబంధ విభాగాల కమిటీలు ఏర్పాటు పూర్తి చేయాలని కోరారు.
 
 వీర జవానులకు సలాం...
 సభ ప్రారంభంలో ఉరీలో సైనిక శిబిరంపై ఆదివారం జరిగిన తీవ్రవాద దాడి ఘటనలో అమరులైన జవాన్లకు సమావేశం ఘన నివాళులర్పించింది. వారి ఆత్మకు శాంతి కలగాలని ప్రార్థించారు. వారి కుటుంబాలకు ప్రగాఢ సానుభూతిని ప్రకటించారు. దేశం యావత్తు ఇలాంటి సమయంలో ఒకటై ముందుకు సాగాల్సి ఉందని సమావేశం అభిప్రాయపడింది. ఈ కార్యక్రమంలో పార్టీ జాతీయ కార్యదర్శి నల్లా సూర్యప్రకాశ్, ప్రధాన కార్యదర్శులు కొండా రాఘవరెడ్డి, కె. శివకుమార్, జి. మహేందర్ రెడ్డి, మతిన్, కె. రాంభూపాల్ రెడ్డి, జిల్లాల అధ్యక్షులు మాదిరెడ్డి భగవంత్‌రెడ్డి (మహబూబ్ నగర్), గౌరెడ్డి శ్రీధర్ రెడ్డి (మెదక్), బెంబడి శ్రీనివాసరెడ్డి( రంగారెడ్డి), బొడ్డు సాయినాథ్ రెడ్డి( గ్రేటర్ హైదరాబాద్), ఎం. శాంతకుమార్( వరంగల్), అక్కెనపల్లి కుమార్ ( కరీంనగర్), నాయుడు ప్రకాశ్ (నిజామాబాద్), తుమ్మలపల్లి భాస్కర్ (నల్లగొండ), మహిళ విభాగం రాష్ట్ర అధ్యక్షురాలు అమృత సాగర్, కార్మిక విభాగం రాష్ట్ర అధ్యక్ష నర్రా బిక్షపతి, శేఖర్ రెడ్డి పాల్గొన్నారు.


 బ్యాంకుల తీరుపై పోచారం మండిపాటు
 
  సాక్షి, హైదరాబాద్: ‘రుణ మాఫీ పూర్తిస్థాయిలో అమలుచేయలేదంటూ మెదక్ జిల్లా కల్హేర్ మండలంలోని ఎస్‌బీహెచ్‌కు చెందిన రెండు బ్రాంచీల్లో పంట రుణాలు ఇవ్వబోమని చెబుతున్నారు. జహీరాబాద్ గ్రామీణ వికాస బ్యాంకులో కూడా పంట రుణాలు ఇవ్వడంలేదు’ అని వ్యవసాయ శాఖ మంత్రి పోచారం శ్రీనివాసరెడ్డి మండిపడ్డారు. ప్రభుత్వం హామీ ఇచ్చినా... బ్యాంకు ఉన్నతాధికారులు స్పష్టం చేస్తున్నా కొన్ని బ్యాంకు శాఖలు రైతులకు పంట రుణాలు ఇవ్వకపోవడంపై మంత్రి తీవ్ర అసహనం వ్యక్తం చేశారు. సోమవారం ఆయన రాష్ట్ర స్థాయి బ్యాంకర్ల సమితి (ఎస్‌ఎల్‌బీసీ) సమావేశం... ఆ తర్వాత సచివాలయంలో విలేకరులతోనూ మాట్లాడారు.
 
 ఎస్‌ఎల్‌బీసీలో ఆర్థిక మంత్రి ఈటల కూడా పాల్గొన్నారు. పోచారం మాట్లాడుతూ.. ఖరీఫ్‌లో రూ.17,460కోట్ల రుణాలు ఇవ్వాల్సి ఉండగా, ఇప్పటివరకు బ్యాంకులు రూ.11,545 కోట్లు ఇచ్చాయన్నారు. ఈ నెలాఖరులోగా మిగిలిన ఖరీఫ్ రుణాలు ఇవ్వాలని కోరారు. వ్యవసాయ శాఖలో ఉద్యాన, పట్టుపరిశ్రమ శాఖలను విలీనం చేయబోమన్నారు. రుణమాఫీలో మూడో విడతలో మిగిలిన సగం రూ.2,020 కోట్ల నిధులను వీలైనంత త్వరగా విడుదల చేయాలని ఈటలను పోచారం కోరారు.


 సాక్షి, హైదరాబాద్: ఖరీఫ్ సీజన్ మరో నెల రోజుల్లో పూర్తి కానుంది. కానీ రైతులను ఆదుకోవడంలో ప్రభుత్వం, బ్యాంకులు విఫలమయ్యాయి. ఖరీఫ్‌లో ఇవ్వాల్సిన పంటరుణ లక్ష్యంలో సగం కూడా బ్యాంకులు పూర్తి చేయలేదు. ప్రభుత్వం మూడో విడత రుణమాఫీ బకాయి రూ. 2,020 కోట్లు విడుదల చేయకపోవడంతో బ్యాంకులు పంట రుణాలు ఇవ్వడానికి వెనుకంజ వేశాయి. ఫలితంగా అన్నదాతలు ప్రైవేటు అప్పుల ఊబిలో కూరుకుపోయారు. ప్రస్తుతం వర్షాలు పూర్తిస్థాయిలో పడక పంటలు ఎండిపోతుండటంతో తీవ్ర ఆందోళనలో పడిపోయారు. అప్పుల భారం పెరిగి ఆత్మహత్యల వైపు వెళ్తున్న భయానక పరిస్థితి తెలంగాణ రాష్ట్రంలో నెలకొంది.
 
 రుణమాఫీ సొమ్ముకు పంట రుణాల విడుదలకు ఏమాత్రం సంబంధం లేదని ప్రభుత్వం చెప్పినా బ్యాంకులు నమ్మలేదని అర్థమవుతోంది. ఈ ఖరీఫ్‌లో రూ. 17,489 కోట్ల పంట రుణాలు ఇవ్వాలని రాష్ట్రస్థాయి బ్యాంకర్ల సమితి లక్ష్యంగా పెట్టుకున్న సంగతి తెలిసిందే. కానీ బ్యాంకులు ఇప్పటివరకు రూ. 8,060 కోట్లే రైతులకు ఇచ్చాయి. రాష్ట్రంలో 81 శాతం విస్తీర్ణంలో పంటలు సాగు కాగా బ్యాంకులు మా త్రం రుణ లక్ష్యంలో కనీసం 50 శాతం కూడా ఇవ్వలేదు. సాగు విస్తీర్ణం పెరిగినా బ్యాంకులు స్పందించకపోవడంతో అన్నదాతలు ప్రైవేటు అప్పులవైపు మొగ్గు చూపాల్సిన పరిస్థితి ఏర్పడింది. ఒక అంచనా ప్రకారం రాష్ట్రంలో రైతులు రూ.10 వేల కోట్ల మేరకు ప్రైవేటు వడ్డీ వ్యాపారుల వద్ద అప్పులు చేసినట్లు అంచనా.
  
 ఇన్‌పుట్ సబ్సిడీపై నీలినీడలు
 కేంద్ర ప్రభుత్వం గతేడాది కరువు నేపథ్యంలో రాష్ట్రానికి ఆర్థికసాయం చేసింది. కానీ ఆ నిధులను రైతులకు అందజేయడంలో సర్కారు నాలుగు నెలలుగా మీనమేషాలు లెక్కిస్తోంది. 2015 ఖరీఫ్‌లో కరువుదెబ్బకు 30.58 లక్షల ఎకరాలకు తీవ్రంగా నష్టం జరిగిన సంగతి తెలిసిందే. కరువు ప్రభావంతో 20.91 లక్షల మంది రైతులు నష్టపోయారు. కరువు సాయంగా కేంద్రం రాష్ట్రానికి నాలుగు నెలల కిందట రూ.712 కోట్లు, రాష్ట్ర విపత్తు నిధికి రూ.108 కోట్లు మొత్తంగా రూ.820 కోట్లు కేటాయించింది. ఈ సొమ్ము రాష్ట్ర ప్రభుత్వ ఖజానాలో మూలుగుతోంది. ఈ సొమ్ముకు రాష్ట్ర ప్రభుత్వ వాటా రూ.198 కోట్లు కలిపి రూ. 1,018 కోట్లను ఇన్‌పుట్ సబ్సిడీగా ఖరీఫ్ ప్రారంభానికి ముందే  పంపిణీ చేయాల్సి ఉం డగా రేపు మాపు అంటూ జాప్యం చేస్తోంది.


 
 బ్యాంక్‌ మేనేజర్‌ ఫిర్యాదుతో వెలుగులోకి..
 
 వర్ధన్నపేట టౌన్‌ : నకిలీ పహణీలు తయారు చేసి రుణాల కోసం రైతులకు అందించిన ముగ్గురిని గురువారం అరెస్టు చేసినట్లు వర్ధన్నపేట సీఐ ఆదినారాయణ తెలిపారు. ఇల్లందలోని మీసేవ కేంద్రం కంప్యూటర్‌ ఆపరేటర్‌ ఆడెపు కేశవ్, చంద్రుతండాకు చెందిన మధ్య దళారి మాలోతు వీరస్వామి, నకిలీ పహణీ తీసుకున్న మూడుగుళ్ల తండాకు చెందిన రైతు బానోతు దేసునాయక్‌ అరెస్ట్‌ను పోలీస్‌ సర్కిల్‌ కార్యాలయంలో విలేకరుల ఎదుట చూపారు. సీఐ కథనం ప్రకారం.. ఇల్లందలోని కేజీవీబీలో దేసునాయక్‌ పంట రుణం ఎక్కువగా కావాలని బ్యాంకు మేనేజర్‌ను కోరాడు. భూ విస్తీర్ణాన్ని బట్టి లోన్‌ ఇస్తామని మేనేజర్‌ చెప్పారు. గతంలో అతడికి రూ. 35 వేల రుణం ఉంది. ఇది గమనించిన మధ్యదళారి, ప్రస్తుతం రాంధన్‌తండా మహిళా సంఘాల సీఏగా పని చేస్తున్న వీరస్వామి.. ఎక్కువ రుణం ఇప్పిస్తానని, అందుకు కొంత డబ్బు ఖర్చవుతుందని చెప్పగా దేసునాయక్‌ ఒప్పుకున్నాడు. ఆ తర్వాత వీరస్వామి రైతు వద్ద పహణీ కాపీలు తీసుకుని ఇల్లంద మీసేవా కేంద్రం ఆపరేటర్‌ కేశవ్‌ను కలిసి పహణీలో భూమి విస్తీర్ణాన్ని పెంచాలని కోరాడు. పర్వతగిరి మండలం రోళ్లకల్లు శివారులో దేసునాయక్‌కు 121/ఎ సర్వే నంబర్‌లో 0.12 ఎకరాలు ఉండగా దానిని 2.12 ఎకరాలుగా, 137/బిలో 0.16 ఎకరాలు ఉండగా దానిని 1.16 ఎకరాలుగా మార్చాడు. ఈ నకిలీ పహణీతో బ్యాంకుకు వెళ్లిన దేసునాయక్‌ రుణం పెంచాలని మేనేజర్‌ను కోరాడు. దీంతో అనుమానం వచ్చిన మేనేజర్‌ తహసీల్దార్‌ను సంప్రదించగా రికార్డులు, కంప్యూటర్‌ పహణీలను పరిశీలించగా నకిలీవని గుర్తించారు. దీంతో వర్ధన్నపేట రెవెన్యూ అధికారులు మీ సేవా కేంద్రాన్ని సీజ్‌ చేశారు. బ్యాంకు మేనేజర్‌ దాసునాయక్‌ గత నెల 28న వర్ధన్నపేట పోలీస్‌ స్టేషన్‌లో ఫిర్యాదు చేశారు. విచారణ చేసి పై ముగ్గురిని నిందితులుగా గుర్తించి అరెస్టు చేసి గురువారం రిమాండ్‌కు తరలించారు. ఈ కేసుపై లోతుగా దర్యాప్తు కొనసాగిస్తున్నట్లు సీఐ తెలిపారు. ఆయన వెంట వర్ధన్నపేట ఎస్సై రవిరాజు తదితరులు ఉన్నారు. 


 వైఎస్సార్‌సీపీ జిల్లా ప్రధాన కార్యదర్శి మాదగోని జంగయ్య గౌడ్‌
 మంచాల: రైతులకు ఇచ్చిన హామీ మేరకు పంట రుణాలు వెంటనే మాఫీ చేయాలని వైఎస్సార్‌సీపీ జిల్లా ప్రధాన కార్యదర్శి మాదగోని జంగయ్య గౌడ్‌ డిమాండ్‌ చేశారు. మంచాలలో ఆదివారం విలేకరుల సమావేశంలో మాట్లాడారు.  టీఆర్‌ఎస్‌ ప్రభుత్వం కేవలం కూతల ప్రభుత్వమని విమర్శించారు. ఆచరణలో ఏ ఒక్క హామీ అమలు చేయలేదని పేర్కొన్నారు. అధికారంలోకి రాగానే రైతులకు పంట రుణాలు మాఫీ చేస్తామని హామీ ఇచ్చిన ప్రభుత్వ పెద్దలు రెండేళ్లయినా మాఫీ చేయలేదని చెప్పారు. పంట రుణాల కోసం రైతులు కాళ్లకు చెప్పులు అరిగేలా తిరుగుతున్నారని తెలిపారు. పంట రుణాల మాఫీ విషయంలో ప్రభుత్వం స్పష్టత ఇవ్వాలని కోరారు. రైతులను మోసం చేసిన ప్రభుత్వాలను భవిష్యత్‌లో పుట్టగతులు ఉండవని విమర్శించారు. పంట రుణాలపై స్పష్టమైన హామీ ఇవ్వాలని డిమాండ్‌ చేశారు. సమావేశంలో ఆ పార్టీ జిల్లా కార్యదర్శి నల్లప్రభాకర్, నాయకులు బకున రమేష్, శ్రీకాంత్, లోంగారి యాదగిరి, సంగం భాస్కర్, దాసరమోని సురేష్, ఎన్నుదుల మహేష్‌ పాల్గొన్నారు.
  


 
 ప్రభుత్వ ఆదేశాలను పాటించని బ్యాంకర్లు
 
 రుణాలను రెన్యూవల్‌ చేసుకునే సమయంలో వడ్డీని చెల్లించాలంటున్న బ్యాంకర్లు
 
 వడ్డీ మాఫీని ప్రభుత్వం నిధులు ఇచ్చిన తరువాత..
 
 రీయింబర్స్‌మెంట్‌ రూపంలో ఖాతాల్లో జమ చేస్తామంటున్న బ్యాంకర్లు
 
 ఇబ్బందులు పడుతున్న రైతులు
 
 మోర్తాడ్‌ : ‘పంట రుణాలు పొందిన రైతుల నుంచి బ్యాంకర్లు ఎలాంటి వడ్డీ వసూలు చేయవద్దు, రూ. లక్షలోపు రుణం పొందిన వారికి జీరో వడ్డీ వర్తిస్తుంది. రూ. 3 లక్షల వరకు రుణం తీసుకున్న వారికి పావలా వడ్డీ వర్తిస్తుంది. బ్యాంకర్లు సహకరించి రైతుల నుంచి ఎలాంటి వడ్డీ వసూలు చేయవద్దు. వడ్డీకి సంబంధించిన నిధులను ప్రభుత్వం త్వరలో బ్యాంకులకు అందిస్తుంది. రైతులను బ్యాంకర్లు ఇబ్బంది పెట్టవద్దు’ అని రాష్ట్ర వ్యవసాయ శాఖ మంత్రి పోచారం శ్రీనివాస్‌రెడ్డి ఇటీవల నిర్వహించిన బ్యాంకర్ల సమావేశంలో స్పష్టం చేసిన మాట. కాని క్షేత్ర స్థాయిలో ప్రభుత్వ ఆదేశాలకు భిన్నంగా బ్యాంకర్లు వ్యవహరిస్తున్నారు. పంట రుణాలను రెన్యూవల్‌ చేసుకునే రైతుల నుంచి వడ్డీని రైతులు ముక్కుపిండి వసూలు చేస్తున్నారు. పంట రుణాలపై రిజర్వు బ్యాంకు నిబంధనల ప్రకారం బ్యాంకులు 7 శాతం వడ్డీని వసూలు చేస్తాయి. ఇందులో కేంద్రం 3 శాతం, రాష్ట్ర ప్రభుత్వం 4 శాతం వడ్డీ భారాన్ని మోస్తుంది. రూ. లక్షలోపు పంట రుణం పొందిన రైతుకు జీరో వడ్డీ వర్తిస్తుంది. రూ. 3 లక్షల వరకు పంట రుణం పొందిన రైతులకు పావలా వడ్డీ వర్తిస్తుంది. కేంద్ర, రాష్ట్ర ప్రభుత్వాలు పంట రుణాలకు సంబంధించిన వడ్డీ కోసం ప్రతియేటా నిధులు విడుదల చేస్తా యి. అయితే పంట రుణాల మాఫీకి ముందు రైతులు బ్యాంకుల్లో తీసుకున్న పంట రుణాలను చెల్లించి మళ్లీ తీసుకున్న తరువాత వడ్డీకి సంబంధించిన సొమ్ము రీయింబర్స్‌మెంట్‌ రూపంలో వాపసు వచ్చేది. రూ. లక్షలోపు పం ట రుణం మాఫీ అయిన తరువాత రైతులు బ్యాంకుల్లో రుణాలను రెన్యూవల్‌ చేసుకుంటున్నారు. కాగా సకాలంలో పంట రుణాలను రెన్యూవల్‌ చేసుకున్న వారికి మాత్రమే రుణమాఫీకి సంబంధించిన సొమ్ము ఖాతాల్లో జమ అవుతుందని బ్యాంకర్లు గ్రామాల్లో ప్రచారం నిర్వహిస్తున్నారు. కాగా పంట రుణాలను రె న్యూవల్‌ చేసుకునే రైతులు వడ్డీని చెల్లించాలని బ్యాంకర్లు ఆదేశిస్తున్నారు. రూ. లక్ష వరకు ఉన్న పంట రుణానికి సంబంధించి రైతులు రెన్యూవల్‌ చేసుకుంటే రూ. 5 వేల నుంచి రూ. 7 వేల వరకు వడ్డీ భారం మోయాల్సి వస్తుం ది. రూ. లక్షకు మించిన పంట రుణం ఉంటే రూ. 10వేలకు పైగా వడ్డీ చెల్లించాల్సి వస్తుంది. ఈ వడ్డీ మొత్తం రైతుల ఖాతాల్లో జమ కావడానికి కొంత సమయం పడుతుంది. అయితే రా ష్ట్రంలో రెండేళ్ల నుంచి కరువు పరిస్థితులు నెల కొనడంతో రైతులు తీవ్ర ఇబ్బందుల్లో ఉన్నా రు. బ్యాంకుల్లో రెన్యూవల్‌ చేసుకునే పంట రుణాలకు వడ్డీ చెల్లించలేని పరిస్థితి ఉంది. ప్రభుత్వం మూడో విడత రుణ మాఫీకి సంబంధించిన నిధులను బ్యాంకులకు విడుదల చేయకపోవడంతో రైతులు వడ్డీ భారం మోయడం తప్ప చేతికి మాఫీ సొమ్మును అందుకోలేక పోతున్నారు. రుణమాఫీకి సంబంధించిన సొమ్మును విడుదల చేయడంలో ప్రభుత్వం జాప్యం చేస్తుండడంతో రైతులకు మాఫీ సొమ్ము అందలేకపోతుంది. జిల్లా వ్యాప్తంగా 4.73 లక్షల మంది పట్టాదారులు ఉండగా ఇందులో 3.79 లక్షల మంది పంట రుణాలను పొందారు. పంట రుణాలు పొందిన వారి నుం చి రెన్యూవల్‌ సమయంలో వడ్డీని రిజర్వు బ్యాంకు నిబంధనల ప్రకారం వసూలు చేస్తున్నామని బ్యాంకర్లు స్పష్టం చేస్తున్నారు. వడ్డీ వసూలు చేయవద్దని ప్రభుత్వం ఆదేశించినప్పటికీ తమకు రిజర్వు బ్యాంకు నుంచి ఆదేశాలు అందితేనే వడ్డీ వసూలు నిలిపివేస్తామని బ్యాం కర్లు పేర్కొంటున్నారు. ప్రభుత్వం సకాలంలో వడ్డీ సొమ్ముతోపాటు, మాఫీ నిధులు విడుదల చేస్తే రైతులకు ఇబ్బందులు తప్పుతాయని బ్యాంకర్లు చెబుతున్నారు. కాగా ప్రభుత్వం ఇ స్తున్న ఆదేశాలకు బ్యాంకుల్లో పరిస్థితికి భిన్నమైన తేడాలు ఉండడంతో రైతులు ఇక్కట్లు ప డుతున్నారు. ప్రభుత్వం స్పందించి సమస్యను పరిష్కరించాలని రైతులు కోరుతున్నారు. 


 జిల్లా వ్యవసాయాధికారులు, బ్యాంకు మేనేజర్లకు పోచారం ఆదేశం
 
  సాక్షి, హైదరాబాద్ : రైతులందరికీ బ్యాంకులు పంట రుణాలు ఇచ్చేలా వ్యవసాయాధికారులు, లీడ్ బ్యాంకు మేనేజర్లు చూడాలని వ్యవసాయ శాఖ మంత్రి పోచారం శ్రీనివాసరెడ్డి ఆదేశించారు. మంగళవారం ఆయన సచివాలయంలో వీడియో కాన్ఫరెన్స్ ద్వారా జిల్లా అధికారులతో సమీక్ష నిర్వహించారు. విత్తనాలు, ఎరువుల సరఫరా, విత్తన గ్రామ కార్యక్రమం, ఇప్పటివరకు జరిగిన పంటల సాగు, హరితహారంపై ఆయన వివరాలు అడిగి తెలుసుకున్నారు. ఈ నెలాఖరు నాటికి పంట రుణాల రెన్యువల్స్ పూర్తిచేయాలని లీడ్ బ్యాంకు మేనేజర్లకు సూచించారు. వడ్డీ లేని రుణాల కింద రైతుల నుంచి ఎటువంటి వడ్డీ వసూలు చేయకూడదని ఆదేశించారు.
 
 ఈ మేరకు అన్ని జిల్లా బ్యాంకులకు మార్గదర్శకాలు పంపించామన్నారు. హరితహారం కింద రైతులు తమ పొలాల గట్లమీద, ఇతరత్రా పెద్దఎత్తున మొక్కలు నాటేలా చూడాలన్నారు. పసుపు పంటకు కొత్త విత్తనం తీసుకున్న రైతులు... పంట పండాక దాన్నే విత్తనంగా వాడుకోవాలని సూచించారు.


 రైతులకు 4 శాతం వడ్డీతో స్వల్పకాలిక రుణాలు
 - కేంద్ర కేబినెట్ భేటీలో పలు నిర్ణయాలు
  
  న్యూఢిల్లీ : స్వల్పకాలిక పంట రుణాలకు వడ్డీ రాయితీ పథకం అమలు చేయాలని కేబినెట్ నిర్ణయించింది. ఈ మేరకు ప్రధానమంత్రి అధ్యక్షతన మంగళవారం జరిగిన కేంద్ర కేబినెట్  సమావేశంలో నిర్ణయం తీసుకున్నారని కేంద్ర మంత్రి రవిశంకర్ ప్రసాద్ వెల్లడించారు. ఈ పథకం ప్రకారం ఏడాది కాలానికి రైతులకు స్వల్పకాలిక రుణం కింద రూ. 3 లక్షల వరకు 4 శాతం వడ్డీ రేటుపై పంట రుణం లభిస్తుందన్నారు. దీనికి ప్రభుత్వం 5 శాతం వడ్డీ రాయితీ ఇస్తుందన్నారు. ఇందులో రైతులందరికీ 2 శాతం వడ్డీ రాయితీ ఇస్తున్నామని.. రుణాన్ని సకాలంలో చెల్లించినవారికి అదనంగా మరో మూడు శాతం వడ్డీ రాయితీ అందజేస్తున్నామని తెలిపారు. రైతులు ఏడాదిలోపు రుణం చెల్లించకుంటే ఏడు శాతం వడ్డీయే చెల్లించాలన్నారు.
 
  తీసుకున్న మరిన్ని నిర్ణయాలు...
  8 ఢిల్లీలో ప్రభుత్వ వసతి లేమిని దృష్టిలో ఉంచుకున్న ప్రభుత్వం ఏడు హౌసింగ్ కాలనీలను పునర్నిర్మించాలని నిర్ణయం. 8 2007-13లో రిటైరైన 1.88 లక్షల బీఎస్‌ఎన్‌ఎల్  ఉద్యోగులకు పింఛన్‌ను 9% పెంపు 8 పప్పు ధరలను నియంత్రించేందుకు మొజాంబిక్ దేశం నుంచి ఏడాదికి రెండు లక్షల టన్నుల కంది, ఇతర పప్పు దినుసులను ఐదేళ్ల పాటు దిగుమతి చేసుకోవాలని నిర్ణయించింది.  
  
  బాంబే, మద్రాస్ హైకోర్టుల పేర్ల మార్పు
  బాంబే, మద్రాస్ హైకోర్టుల పేర్లు మార్చుతూ కేంద్ర కేబినెట్ నిర్ణయం తీసుకుంది. న్యాయ మంత్రిత్వ శాఖ చేసిన ప్రతిపాదన మేరకు మంగళవారం ఈ రెండు హైకోర్టుల పేర్లను కేంద్ర కేబినెట్ మార్చింది. ఇకపై బాంబే హైకోర్టును ముంబై హైకోర్టుగా, మద్రాస్ హైకోర్టును చెన్నై హైకోర్టుగా పిలుస్తారు. ఈ మేరకు కేబినెట్ నిర్ణయించినట్టు మంత్రి రవిశంకర్ మీడియాకు తెలిపారు. కలకత్తా హైకోర్టు పేరు కూడా కోల్‌కతా హైకోర్టుగా మారనుందని తెలిపారు.  సమగ్ర అధ్యయనం అనంతరం రూపొందిన బిల్లు.. ఇటీవలే న్యాయశాఖ ఆమోదం పొందిందని ఆయన చెప్పారు.


 ♦ మూడో విడత రుణమాఫీ కోసం చూడొద్దు
 ♦ బ్యాంకర్లకు ఏజేసీ వెంకటేశ్వర్లు ఆదేశం
  సాక్షి, సంగారెడ్డి: రైతులందరికీ పంట రుణాలు రెన్యువల్ చేయాలని అదనపు జాయింట్ కలెక్టర్ వాసం వెంకటేశ్వర్లు బ్యాంకర్లను ఆదేశించారు. గురువారం కలెక్టరేట్‌లో జరిగిన బ్యాంకర్ల సమావేశంలో ఆయన మాట్లాడారు. మూడో విడత రుణమాఫీ నిధుల కోసం ఎదురుచూడకుండా ఖరీఫ్ పంట రుణాలు అందజేయాలన్నారు. పంట నష్టాల కింద బ్యాంకర్లు అందించిన సబ్సిడీని రైతులకు అందించాలని, లేనిపక్షంలో తిరిగి పంపించాలన్నారు. కేంద్రం స్టాండప్ ఇండియా పథకం కింద ప్రతి బ్యాంకు తప్పనిసరిగా ఇద్దరు ఎస్సీ, ఎస్టీ మహిళలను ఎంపిక చేసి రుణాలు మంజూరు చేయాలని సూచించారు.
 ఐదువేల జనాభా  దాటిన గ్రామాల్లో కొత్త బ్రాంచీని ఏర్పాటు చేసేందుకు ప్రతిపాదలను సిద్ధం చేయాలన్నారు. బ్యాంకుల ప్రా రంభోత్సవాలు, రుణమేళాలకు తప్పనిసరిగా స్థానిక ప్రజాప్రతినిధులను ఆహ్వానించాలని కోరారు. ఎస్సీ కార్పొరేషన్ ఈడీ చరణ్‌దాస్ మాట్లాడుతూ... ఎస్సీ కార్పొరేషన్ కింద సబ్సిడీ విడుదలైన యూనిట్లను వెం టనే గ్రౌండింగ్ చేయాలని బ్యాంకర్లను కోరారు. బీసీ కార్పొరేషన్ ఈడీ రాంరెడ్డి మాట్లాడుతూ... 2015-16 సంవత్సరానికి  సంబంధించి 95 శాతం లబ్ధిదారుల ఖాతాలు ప్రారంభించినట్టు తెలిపారు. సబ్సిడీని 15 రోజుల్లో విడుదల చేస్తామన్నారు. గిరిజన సంక్షేమశాఖ అధికారి జగ్మాల్‌సింగ్ మాట్లాడుతూ... 2016-17 సం వత్సరానికి 421 యూనిట్లను లక్ష్యంగా నిర్దేశించుకోవటం జరిగిందన్నారు. వీటి గ్రౌండింగ్‌కు సహకరించాలని కోరారు.
 జిల్లా గ్రామీణాభివృద్ధి సంస్థ ప్రతినిధి మాట్లాడుతూ.. 2016-17 సంవత్సరానికి జిల్లాలో రూ.695 కోట్ల బ్యాంకు రుణాలు మహిళా సంఘాలకు ఇవ్వాల్సి ఉందన్నారు. లక్ష్యం మేరకు బ్యాంకర్లు రుణా లు ఇవ్వాల్సిందిగా కోరారు. కొన్ని బ్యాంకులు మహిళా గ్రూపుల పొదుపు ఖాతాల నుంచి డబ్బులు డ్రా చేయనివ్వటంలేదని, ఈ సమస్యను పరిష్కరించాలని కోరా రు. ఆర్‌బీఐ డీడీఎం గణేశన్ మాట్లాడుతూ.. సొలార్ ఎనర్జీ, లాంగ్ టైమ్ ఏరియా బేస్‌డ్ పథకాల కింద డెయిరీ, వెజిటబుల్, గొర్రెల పెంపకం యూనిట్ల కోసం జిల్లాకు రూ.వెయ్యి కోట్లు కేటాయించటం జరి గిందన్నారు.
 ఈ పథకాలను ఎప్పటికప్పుడు సమీక్షిస్తూ అర్హులకు రుణాలు అందించాలన్నారు. పంటల బీమా కంపెనీ ప్రతినిధి మాట్లాడుతూ.. ఖరీఫ్‌లో నూనెగిం జలు, పప్పు ధాన్యాలపై బీమా ప్రీమియం రెండు శాతంగా కేంద్ర ప్రభుత్వం నిర్ణయించినట్టు చెప్పారు. కూరగాయలు, వాణిజ్య పంటలపై ఐదు శాతం, రబీలో అన్ని పంటలకు 1.5 శాతం బీమా ప్రీమియం నిర్ణయించినట్లు వివరించారు. సమావేశంలో ఎల్‌డీఎం రఘురాం, నాబార్డు డీడీఎం జి.రమేశ్, బ్యాంకు కోఆర్డినేటర్లు, మేనేజర్లు పాల్గొన్నారు.


 దుప్పెల్లిలో ఆలస్యంగా వెలుగులోకి...
 ఆత్మకూరు (ఎం) :  నకిలీ పట్టాదారు పాస్‌పుస్తకాలతో సుమారు రూ.40 లక్షల పంటల రుణా లు పొందిన ఘటన మండలంలోని దుప్పెల్లిలో ఆదివారం ఆలస్యంగా వెలుగులోకి వచ్చింది. గ్రామంలోని ప్రధాన రాజకీయ నాయకుడితో పాటు మరో 22 మంది రైతులు వలిగొండ మండలం అర్రూరులోని కెనరా బ్యాంక్ నుంచి ఈ పంట రుణాలను పొందారు. బ్యాంక్ నుంచి పంట రుణాలు కావాల్సి ఉండటంతో ఆ రైతులు ప్రధాన నాయకుడి అండదండలతో నకిలీ పాస్‌పుస్తకాలతో పాటు పహణీ  అడంగల్‌లను సృష్టించారు. ఇందుకు అక్కడి అధికారుల సంతకాలను కూడా ఫోర్జరీ చేసినట్లు సమాచారం.  
  
 వెలుగులోకి వచ్చింది ఇలా...
 ఈనెల 1న దుప్పెల్లి గ్రామానికి చెందిన గుర్తు తెలియని వ్యక్తులు సంబంధిత బ్యాంక్ హెడ్ ఆఫీస్ వరంగల్‌కు విచారణ నిమిత్తం ఫిర్యాదు చేసినట్లు తెలిసింది. ఆ ఫిర్యాదుతో అర్రూర్ బ్రాంచీ మేనేజర్ శుక్రవారం గ్రామాన్ని సందర్శించారు. పంట రుణాలు తీసుకున్న వారి జాబితాను గ్రామంలోని ఒక వ్యక్తికి అందజేయగా జాబితాలో ఉన్న వారిలో కొందరికి ఎటువంటి వ్యవసాయ భూములు లేనప్పటికీ రుణాలను పొందినట్లు, మరి కొందరు తక్కువ భూమి ఉండటంతో పాస్ పుస్తకం మీద ఎక్కువ భూమిని వైట్‌నర్‌ను ఉపయోగించి నమోదు చేసినట్లు తెలిసింది.
 
 ఇందుకు అప్పటి తహసీల్దార్లు, ప్రస్తుత తహసీల్దార్ సంతకాలను ఫోర్జరీ చేసినట్లు తెలుస్తోంది. ఇందిలా ఉండగా డ్యాక్యుమెంటనేషన్‌పైనే రుణాలు ఇచ్చినట్లు  అర్రూరు బ్రాంచీ మేనేజర్ నళిని తెలిపారు. దీనిపై రెవెన్యూ శాఖకు లేఖ ఇస్తామన్నారు.
  
 విచారణ జరిపిస్తాం... : అలివేలు, తహసీల్దార్
 ఫోర్జరీ సంతకాలతో పాసు పుస్తకాలను సృష్టించిన ఉదంతంపై విచారణ జరుపుతాం. మాకు బ్యాంక్ నుంచి ఇంత వరకు ఎలాంటి సమాచారం లేదు.


 ► పీసీసీ రాష్ట్ర ప్రధాన కార్యదర్శి నరేష్ జాదవ్
 ► సమావేశంలో మాట్లాడుతున్న నరేష్‌జాదవ్
  
  
 ఆదిలాబాద్ క్రైం : కేంద్ర ప్రభుత్వం రైతులను నిలువునా మంచుతోందని పీసీసీ రాష్ట్ర ప్రధాన కార్యదర్శి నరేష్ జాదవ్ అన్నారు. సోమవారం జిల్లా కేంద్రంలో ఏర్పాటు చేసిన విలేకరుల సమావేశంలో ఆయన మాట్లాడారు. పంట రుణాలపై 3 శాతం ఉన్న ప్రీమియంను 5 శాతానికి పెంచి రైతులను మరింత దెబ్బతీస్తోందన్నారు. ఎన్నికల సమయంలో రైతులను ఆందుకుంటామని ప్రలోభాలు పలికిన కేంద్రం ప్రస్తుతం కార్పోరేట్ వ్యాపారులకు ప్రీమీయాన్ని తగ్గిస్తూ రైతులకు పెంచడం దారుణమన్నారు.
 
 ఆదిలాబాద్ పత్తికి ఎంతో డిమాండ్ ఉందని, గతంలో కేంద్ర ప్రభుత్వం పత్తిని ఇతర దేశాలకు ట్రాన్స్‌పోర్టు చేసేందుకు రాయితీ ఇచ్చేదని, ఇప్పుడు దానిని ఎత్తివేయడంతో ఆభారం తమపై ఎక్కడ పడుతుందనే ఉద్దేశంతోనే పత్తిసాగు చేయకూడదని ముఖ్యమంత్రి చెబుతున్నారని పేర్కొన్నారు. సమావేశంలో మాజీ మంత్రి రాంచంద్రారెడ్డి, మాజీ మార్కెట్ కమిటీ చెర్మైన్‌లు సంజీవ్‌రెడ్డి, నర్సింగ్‌రావు, కాంగ్రెస్ మైనార్టీ సెల్ జిల్లా అధ్యక్షుడు సాజీద్‌ఖాన్, పట్టణ అధ్యక్షుడు షకీల్, మున్సిపల్ ఫ్లోర్ లీడర్ అలాల్ అజయ్, మున్సిపల్ మాజీ చెర్మైన్ దిగంబర్‌రావు పాటిల్ తదితరులు ఉన్నారు.
  


  గతేడాది కంటే ఈ సారి 10శాతం అదనం
  పదేళ్లలో పదింతలు పెరిగిన లక్ష్యం
  కలెక్టర్ ముందుకు  తాజా ప్రతిపాదనలు
  నేడోరేపో రుణప్రణాళిక ఆవిష్కరణ
  
  మహబూబ్‌నగర్ వ్యవసాయం: జిల్లా వ్యవసాయ వార్షిక ప్రణాళిక సిద్ధమైంది. ఈ ఏడాది రూ.4542.90కోట్ల పంట రుణాలు ఇవ్వాలని బ్యాంకర్లు నిర్ణయించినట్లు తెలిసింది. ఇప్పటికే జిల్లాస్థాయి బ్యాంకర్ల సమావేశంలో ఈ మేరకు నిర్ణయం తీసుకున్నారు. లీడ్ బ్యాంకు అధికారులు కసరత్తు పూర్తిచేసిన అనంతరం ప్రతిపాదనలను కలెక్టర్ ముందుంచారు. ఆమె ఆమోదం తెలపగానే వార్షిక ప్రణాళిక  విడుదలయ్యే అవకాశం ఉంది.
  
  జిల్లాలో గతేడాది రూ.4129.91కోట్ల పంటరుణాల ఇవ్వాలని లక్ష్యం నిర్ణయించగా.. ఈ ఏడాది 10శాతం అదనంగా రూ.412.99కోట్లు కలుపుకుని మొత్తం రూ.4542.90కోట్ల పంటరుణాలను ఇవ్వాలని బ్యాంకర్లు నిర్ణయించారు. గతేడాది ఖరీఫ్‌లో రూ.2522.40కోట్లు, రబీలో రూ.1607.51కోట్ల రుణాలను ఇవ్వాలని నిర్ధేశించుకున్నారు. ఈ ఏడాది ఖరీఫ్‌లో రూ.2774.64కోట్లు, రబీలో రూ.1768.26కోట్ల వ్యవసాయ పంట రుణాలు ఇచ్చే అవకాశం ఉంది. కాగా, వ్యవసాయ టర్మ్, పరిశ్రమలకు ఇచ్చే రుణాలపై ఓ స్పష్టత రాలేదు.
  
  స్కేల్ ఆఫ్ ఫైనాన్స్ ఖరారు
  రైతులు సాగుచేసిన పంటలపై ఇచ్చే వ్యవసాయ పంట రుణాల స్కేల్ ఆఫ్ ఫైనాన్స్ ఇప్పటికే ఖరారైంది. నీటిపారుదల కింద సాగుచేసే వరి పంటకు ఎకరాకు రూ.27వేల నుంచి. రూ.30వేల వరకు రైతులు పంటరుణం పొందవచ్చు.. పత్తి పంటకు వర్షధారం కింద రూ.24వేల నుంచి  రూ.28వేలు, నీటి పారుదల కింద రూ.29,500 నుంచి రూ.32500 తీసుకోవచ్చు. అలాగే విత్తనపత్తికి రూ.85వేల నుంచి రూ.1.12లక్షల వరకు పొందే అవకాశం ఉంది. అలాగే వర్షాధారిత  జొన్న పంటకు రూ.15వేల నుంచి రూ.17వేలు, కందికి రూ.16వేల నుంచి రూ.18వేలు, ఆముదం పంటకు రూ.19వేల నుంచి రూ.22వేల పంట రుణం తీసుకునే అవకాశం కల్పించారు. ఇలా పంటలపై ఇచ్చే రుణాల పరిమితిని అధికారులు ఇప్పటికే ప్రకటించారు.
  
  పదేళ్లలో పదింతలు
  2005-06వ వార్షిక ఏడాదిలో రూ.418కోట్ల పంట రుణలు ఇవ్వాలని లక్ష్యాన్ని నిర్ధేశించగా రూ.355.86కోట్లు పంపిణీచేశారు. గతేడాది రూ.4129.91కోట్లు ఇవ్వాలని నిర్ణయించారు. ప్రస్తుత వార్షిక ఏడాదిలో రూ.4542.99కోట్ల పంటరుణాలు ఇవ్వాలని బ్యాంకర్లు లక్ష్యంగా నిర్ధేశించారు.   
  
  వార్షిక ప్రణాళిక విడుదలయ్యేనా?
  మరో 15రోజులు దాటితే ఖరీఫ్ సీజన్ వచ్చేస్తోంది. కాగా, ఖరీఫ్ కాలం ముంచుకొస్తున్నా ఇంకా రుణాల వార్షిక ప్రణాళిక ఖరారు కాకపోవడంపై రైతులు ఆందోళన వ్యక్తం చేస్తున్నారు. ఇప్పటికే కరువుతో అలమటిస్తున్న తమకు వచ్చే ఖరీఫ్‌లో పెట్టుబుడుల పెట్టేందుకు బ్యాంకర్లు సకాలంలో రుణాలు ఇవ్వకపోతే  సాగుచేయడం కష్టతరమని ఆందోళన వ్యక్తం చేస్తున్నారు. రుణ ప్రణాళికను ప్రకటించి రుణాలు ఇచ్చేలా చూడాలని వారు కోరుతున్నారు.
  
  ప్రధాన పంటల స్కేల్ ఆఫ్ ఫైనాన్స్ ఇలా...(ఎకరాకు)
  క్ర.స    పంట    పొందేరుణం(రూ..)
  1    వరి     27000- 30000
  2    జొన్న     15000- 17000
  3    మొక్కజొన్న     18500- 22000
  4    పత్తి(వర్షాధారం)    24000- 28000
  5    పత్తి(నీటి పారుదల)     29500- 32500
  6    వేరుశనగ     24000- 29000
  7    కంది     13000- 14500
  8    ఆముదం     19000- 22000
  9    పొద్దుతిరుగుడు    12000- 14000
  10    పెసర     12000- 13000


 * దీర్ఘకాలిక  వ్యవసాయ రుణాల లక్ష్యం రూ.13,009 కోట్లు
 * రాష్ట్రస్థాయి బ్యాంకర్ల కమిటీ కసరత్తు దాదాపు పూర్తి
 సాక్షి, హైదరాబాద్: ఈసారి ఖరీఫ్, రబీ సీజన్‌లలో పంట రుణాల మంజూరు లక్ష్యం రూ.30,435 కోట్లుగా ఖరారైంది. ఈ మేరకు తెలంగాణ రాష్ట్రస్థాయి బ్యాంకర్ల కమిటీ (ఎస్‌ఎల్‌బీసీ) తుది కసరత్తు చేస్తోంది. నాబార్డు ప్రతిపాదనల ప్రకారం ఈ రుణ లక్ష్యాన్ని ఖరారు చేసినట్లు ఎస్‌ఎల్‌బీసీ వర్గాలు తెలిపాయి. గతేడాది ఖరీఫ్, రబీ సీజన్‌లలో రుణ లక్ష్యం రూ.27,800 కోట్లు కాగా... ఈసారి రూ.2,635 కోట్లు అదనంగా నిర్ణయించారు. ఇక దీర్ఘకాలిక వ్యవసాయ రుణాలు, అనుబంధ రుణాల లక్ష్యాన్ని రూ.13,009 కోట్లుగా నిర్ధారించారు.
 
 గతేడాది దీర్ఘకాలిక రుణాల లక్ష్యం రూ.7,494.30 కోట్లు మాత్రమే కావడం గమనార్హం. రిజర్వు బ్యాంకు మార్గదర్శకాల ప్రకారమే ఈసారి దీర్ఘకాలిక రుణ లక్ష్యాన్ని పెంచుతున్నారని ఎస్‌ఎల్‌బీసీ అధికారి ఒకరు పేర్కొన్నారు. రైతులకు ఇచ్చే పంట రుణాలతో బ్యాంకులకు అనేక తలనొప్పులు వస్తున్నాయని పేర్కొన్నారు. పావలా వడ్డీ, వడ్డీ లేని రుణాలు, రుణమాఫీ అంటూ ప్రభుత్వాలు అనేక పథ కాలు ప్రకటించడంతో తమకు ఆర్థికపరమైన చిక్కులు వస్తున్నాయనేది బ్యాంకర్ల ప్రధాన ఆరోపణ. అంతేకాదు పంట పండకపోయినా, గిట్టుబాటు ధర రాకపోయినా రుణాలు పూర్తిగా వసూలయ్యే పరిస్థితి కనిపించడంలేదు.
 
 అందువల్లే పంట రుణాలను వీలైనంత తగ్గించే ప్రయత్నాలు చేస్తున్నారన్న ఆరోపణలు వస్తున్నాయి. మరోవైపు బోర్లు, బావులు, ఇతర వ్యవసాయ మౌలిక సదుపాయాల కోసం తీసుకొనే దీర్ఘకాలిక రుణాలకు ప్రభుత్వ పథకాలేవీ వర్తింప చేయడంలేదు. పైగా మధ్య స్థాయి, ధనిక రైతులే ఎక్కువగా దీర్ఘకాలిక వ్యవసాయ రుణాలు తీసుకుంటారు. కాబట్టి వారి నుంచి వసూలు చేసుకోవడం ఇబ్బందేమీ కాదని, అందుకే దీర్ఘకాలిక రుణాలపైనే ఎక్కువగా దృష్టి సారించాలని భావిస్తున్నట్లు తెలుస్తోంది.
  
 కరువులో మొండిచెయ్యి..
 రాష్ట్రంలో ఓవైపు కరువు విలయ తాండ వం చేస్తోంటే... మరోవైపు బ్యాంకులు రుణాల్వికుండా చేతులెత్తేశాయి. 2015-16లో తెలంగాణలో పంట రుణ లక్ష్యం రూ.27,800 కోట్లుకాగా.. ఇచ్చింది రూ.17,492 కోట్లే (62.92%)నని ఎస్‌ఎల్‌బీసీ నివేదికే తెలియజేసింది. అందులో ఖరీఫ్ రుణ లక్ష్యం రూ.18,092.68 కోట్లకుగాను రూ. 12,938.74 కోట్లు (71.51%)... రబీ లక్ష్యం రూ.9,707.48 కోట్లకుగాను రూ.4,553.56 కోట్లు (46.91శాతం) ఇచ్చారు. ఇదే సమయంలో దీర్ఘకాలిక వ్యవసాయ రుణాలు పెరగడం గమనార్హం. 2015-16లో దీర్ఘకాలిక రుణ లక్ష్యం రూ.7,494.30 కోట్లు కాగా... బ్యాంకులు రూ.5,541.67 కోట్లు (73.95%) ఇచ్చాయి.


 పంట రుణాలపై సీఎంకు ఉత్తమ్ బహిరంగ లేఖ 
 సాక్షి, హైదరాబాద్: రైతుల పంట రుణాలను ఒకేసారి మాఫీ చేయాలని పీసీసీ అధ్యక్షుడు ఎన్.ఉత్తమ్‌కుమార్‌రెడ్డి డిమాండ్ చేశారు. ఈ మేరకు సీఎం కేసీఆర్‌కు బుధవారం బహిరంగ లేఖ రాశారు. అసెంబ్లీలో సీఎం కేసీఆర్ ఇచ్చిన హామీ మేరకు వెంటనే ఒకేసారి రుణమాఫీ చేసి రైతాంగాన్ని ఆదుకోవాలని కోరారు. ‘కేంద్ర ప్రభుత్వం ఎఫ్‌ఆర్‌బీఎం పరిమితిని 3 నుంచి 3.5 శాతానికి పెంచింది. దీనివల్ల తెలంగాణ ప్రభుత్వం రూ.3వేల కోట్లు అదనంగా పొందడానికి అవకాశం వ చ్చింది.
 కేంద్ర ప్రభుత్వం ఎఫ్‌ఆర్‌బీఎం పరి మితి పెంచితే రైతులకు ఒకేసారి రుణమాఫీ చేస్తామని అసెంబ్లీలో ఇచ్చిన హామీ నిలుపుకోవాలి. రాష్ట్రంలో మొత్తం రుణమాఫీ బకాయిలు రూ.17వేల కోట్లు ఉండగా ఇప్పటివరకు రూ.4250 కోట్లు మాత్రమే విడుదల చేశారు. మిగిలి న బకాయిలను వెం టనే విడుదల చేసి, రైతులను పంట రుణాల నుంచి విముక్తి చేయాలి. రాష్ట్రంలో తీవ్ర కరువు ఉంది. కరువు సహాయక చర్యల్లో ప్రభుత్వం విఫలమైంది. రాష్ట్రంలోని 443 మండలాల్లో తీవ్ర దుర్భిక్షం నెలకొంటే... కేవలం  231 మండలాలనే కరువు ప్రాంతాలుగా ప్రకటించారు. అన్నింటినీ కరువు మండలాలుగా గుర్తించాలి’ అని ఉత్తమ్ ఆ లేఖలో డిమాండ్ చేశారు.


 న్యూఢిల్లీ: రూ. మూడు లక్షలు దాటిన స్వల్పకాలిక పంట రుణాలపై రైతులకు వడ్డీ సబ్సిడీ ఇవ్వరాదని వ్యవసాయ రుణ పథకం మార్గదర్శకాల రూపకల్పనకు ఏర్పాటు చేసిన ప్రభుత్వ కమిటీ సిఫార్సు చేసింది. అలాగే వడ్డీ సబ్సిడీ రైతులకు ఇచ్చేందుకు ఏడాది లోపు రుణం చెల్లించాలనే నిబంధన సరికాదని పేర్కొంది. ఈ కాలవ్యవధి ఏడాదికి మించి ఉంటే బాగుంటుందని సూచించింది. ఈ ఏడాది ప్రభుత్వం బడ్జెట్‌లో పంట రుణాల లక్ష్యాన్ని రూ. 9 లక్షల కోట్లకు పెంచింది. వడ్డీ సబ్సిడీ అందించేందుకు రూ. 15 వేల కోట్లను కేటాయించింది.
 
 ఈ నేపథ్యంలో పంట రుణాలు అవసరమైన చిన్న, సన్నకారు రైతులకు అందించేందుకు, వడ్డీ సబ్సిడీ పథకం సమర్థంగా అమలయ్యేందుకు తగిన మార్గదర్శకాల రూపకల్పనకు నాబార్డ్ మాజీ చైర్మన్ వీసీ సారంగి నేతృత్వంలోని ఓ కమిటీ ఏర్పాైటె ంది. ప్రభుత్వానికి పలు కీలక సిఫార్సులు చేసిన ఈ కమిటీ.. ఇటీవల తన నివేదికను ప్రభుత్వానికి సమర్పించింది. 2006-07లో వడ్డీ సబ్సిడీ పథకాన్ని ప్రవేశపెట్టిన తర్వాత వ్యవసాయ రుణాల్లో పెరుగుదల కనిపించిందని కమిటీ తన నివేదికలో పేర్కొంది. ముఖ్యంగా రైతుకు స్వల్పకాలిక రుణం రూ. 3 లక్షలకు మించరాదని.. అంతకు మించి ఇస్తే వడ్డీ సబ్సిడీ ఇవ్వరాదని సూచించింది.


 ♦ రూ.15,573 కోట్లకు ఇచ్చింది రూ.786 కోట్లు మాత్రమే
 ♦ విడతలవారీ విడుదలతో రైతుల్లో అసంతృప్తి
 ♦ మరో రెండు విడతల కోసం ఎదురు చూపులు
 ♦ లక్ష్యాన్ని అందుకోని కొత్త రుణాలు
  ఇందూరు : రైతులు బ్యాంకు ద్వారా తీసుకున్న రూ. లక్ష లోపు పంట రుణాలను పూర్తిగా మాఫీ చేస్తామని ప్రకటించిన రాష్ట్ర ప్రభుత్వం అమలులో విఫలమవుతోంది. 2014-15, 2015-16 సంవత్సరాలకు సంబంధించిన రైతన్నల బాకీని బ్యాంకులకు సగం మాత్రమే చెల్లించింది. తమ రుణాలు మాఫీ అవుతాయని ఆశతో ఉన్న రైతులు ప్రభుత్వ తీరుతో దిగులు చెందుతున్నారు. జిల్లాలో మొత్తం 3 లక్షల 79 వేల 520 మంది రైతులు రూ. లక్ష లోపు రుణాలు తీసుకున్నారు. అయితే ఈ పంట రుణాలకు వడ్డీని 3 శాతం కేంద్ర ప్రభుత్వానికి, 4 శాతం రాష్ట్ర ప్రభుత్వానికి మొత్తం 7 శాతం వడ్డీని రైతులు బ్యాంకు ద్వారా చెల్లించారు.
 రైతులు చెల్లించిన వడ్డీని ప్రభుత్వం తిరిగి రైతులకు చెల్లించింది. రాష్ట్ర ప్రభుత్వం రుణ మాఫీ ప్రకటన తరువాత జిల్లాకు రూ.1,573 కోట్ల 60 లక్షలు మంజూరు చేయాల్సి ఉండగా ఇప్పటి వరకు 25 శాతం చొప్పున రెండు సార్లు మొత్తం 50 శాతం మాత్రమే నిధులు విడుదల చేసి రుణ మాఫీ చేసిం ది. అంటే రూ. లక్ష రుణం తీసుకున్న రైతుకు రూ.50 వేలు చెల్లించింది. ఇంకా యాభై శాతం రుణ మాఫీ నిధులు జిల్లా కు రావాల్సి ఉంది. వీటిని ప్రభుత్వం మరో రెండు విడతలుగా మంజూరు చేయనున్నట్లు వ్యవసాయ శాఖ అధికారులు చెబుతున్నారు.
 అప్పుడు కొద్దిగా, ఇప్పుడు కొద్దిగా మాఫీ నిధులు విడుదల చేసేకంటే పూర్తిగా ఒకేసారి రుణ మాఫీ చేయాలని రైతులంటున్నారు. పూర్తిగా రుణం చెల్లిస్తేగానీ బ్యాంకులు కొత్త రుణాలు ఇవ్వడం లేదని పేర్కొంటున్నారు. కరువు నేపథ్యంలో పంటలు వేసేందుకు పెట్టుబడి లేక భూములను బీడుగానే వదిలేయాల్సిన పరిస్థితి నెల కొందని రైతులు వాపోతున్నారు.ప్రస్తుతం అసెంబ్లీ బడ్జెట్ సమావేశాల అనంతరం మూడో విడత రుణ మాఫీ నిధు లు జిల్లాకు విడుదలయ్యే అవకాశం ఉంది.
  లక్ష్యం చేరని కొత్త రుణాలు
 రైతుల పంట రుణల మాఫీ విషయం ఇలాగుంటే కొత్త రు ణాల పరిస్థితి కూడా సగం వరకే పరిమితమైంది. 2015- 16 సంవత్సరానికి గాను ప్రభుత్వ లక్ష్యం రూ.3,012 కోట్లు ఉండగా, కొత్తవి, రెన్యూవల్ కలిపి రూ.1,921 కోట్లు మాత్రమే రైతులకు పంట రుణాలు అందించారు. దాదాపు 4 లక్షల మంది రైతులు పంట రుణాలు పొందారు. లక్ష్యం లో ఇంకా రూ.1,091 కోట్ల పంట రుణాలను రైతులకు అందించాల్సి ఉంది. అయితే రైతులు గతంలో తీసుకున్న రుణాలు  పూర్తి గా కట్టకపోవడం, ప్రభుత్వం రుణ మాఫీ పూర్తిగా చెల్లించకపోవడంతో బ్యాంకర్లు రైతులకు రుణాలివ్వడానికి ముం దుకు రాలేదు. రైతులు బ్యాంకుల చుట్టూ చెప్పులరిగేలా తిరిగినా పాత రైతులకే రుణాలు అందాయి. అంతే తప్పా కొత్త రైతులకు రుణాలు ఇవ్వలేదు. రైతులు రుణాలు తీసుకోకపోవడానికి కరువు కూడా ఒక ప్రధాన కారణంగా చెబుతున్నారు. అయితే రైతులు తీసుకున్న కొత్త రుణాలకు కూడా 7 శాతం వడ్డీని ప్రభుత్వానికి బ్యాంకు ద్వారా చెల్లిస్తున్నారు.
 బడ్జెట్ సమావేశాల తరువాత..
 జిల్లాకు అవసరమున్న రుణ మాఫీ నిధుల్లో ఇప్ప టి వరకు ప్రభుత్వం రెండు విడతలుగా కలిపి 50 శా తం నిధులను బ్యాంకులకు చెల్లించింది. మరో రెండు విడతల్లో నూటికి నూరు శాతం రుణ మాఫీ కానుంది. అ సెంబ్లీలో బడ్జెట్ సమావేశాల అనంతరం మూడో విడత రుణ మాఫీ నిధుల ను ప్రభుత్వం విడుదల చేసే అవకాశం ఉంది. అలాగే కొత్త రుణాల లక్ష్యంలో 60 శాతం లక్ష్యం చేధించాం. జిల్లాలో కరువు పరిస్థితులు ఉన్నందున రైతులు పంటలు వేసేం దుకు ఎవరు ముందుకు రాలేదు. అందుకే పంట రుణాలు కూడా రైతులు అంతగా పొందలేదు.     - నర్సింహ, వ్యవసాయ శాఖ, జేడీఏ


 పంట రుణాలపై రాష్ట్ర సర్కారు నిర్లక్ష్యం
  సాక్షి, హైదరాబాద్: ఏడాదికిపైగా పంట రుణాలకు సంబంధించిన వడ్డీ చెల్లించకుండా మొం డికేసిన రాష్ట్ర సర్కారు మరోసారి అదే పం థాను ఎంచుకుంది! తాజాగా ప్రవేశపెట్టిన  బడ్జెట్‌లో వడ్డీ లేని రుణాలకు రూ.150 కోట్లే కేటాయించింది. దీంతో కరువు కాలంలో రైతులకు పంట రుణాల పంపిణీ ప్రశ్నార్థకమైంది. గతేడాది పంట రుణాల వడ్డీకి సంబంధించి ప్రభుత్వం బ్యాంకులకు రూ.250 కోట్లకుపైగా బాకీ పడింది. పాత బకాయిలను పక్కనపెట్టినా.. 2015-16 వార్షిక రుణ ప్రణాళిక లక్ష్యం ప్రకారం ఈ ఏడాది పంట రుణాలపై వడ్డీ చెల్లింపులకు కనీసం రూ.500 కోట్లు కావాలి. కానీ అదేమీ పట్టించుకోకుండా అందులో మూడో వంతు కంటే తక్కువగా బడ్జెట్ కేటాయింపులుండటం విస్మయపరుస్తోంది.
  నిరుటి నుంచి నిర్లక్ష్యం
 రాష్ట్రంలో వడ్డీ లేని పంటరుణాల పథకం కింద దాదాపు 30 లక్షల మందికి పైగా రైతులు లబ్ధి పొందుతున్నారు. ఈ పథకం ప్రకారం రైతులు తీసుకున్న పంట రుణాలపై చెల్లించాల్సిన 7% వడ్డీలో కేంద్రం 3%, రాష్ట్ర ప్రభుత్వం మిగతా నాలుగు శాతం బ్యాంకులకు చెల్లిస్తాయి. కానీ నిరుటి నుంచి ఈ వడ్డీ చెల్లించకుండా రాష్ట్ర ప్రభుత్వం నిర్లక్ష్యంగా వ్యవహరిస్తోంది. నిబంధనల ప్రకారం బ్యాంకులు క్లెయిమ్ చేసిన మూడో రోజున ప్రభుత్వం ఆ నిధులు రీయింబర్స్ చేయాలి. కేంద్రం ఎప్పటికప్పుడు తన వాటాను విడుదల చేస్తున్నా.. రాష్ట్ర ప్రభుత్వం బ్యాంకులకు మొండిచేయి చూపిస్తోంది. గతేడాది దాదాపు రూ.250 కోట్లు బాకీ పడింది. వడ్డీ సొమ్ము చెల్లించాలని బ్యాంకులు వరుసగా లేఖలు రాసినా ప్రయోజనం లేకుండా పోయింది. దీంతో బ్యాంకర్లు రైతులకు రుణాలివ్వకుండా తిప్పుకుంటున్నారు.
  రుణం పెరిగితే వడ్డీ పెరగదా?
 ఈ ఏడాది పంట రుణాల పంపిణీ లక్ష్యం ఎంతో ప్రభుత్వానికి తెలియంది కాదు! రైతుల ప్రయోజనాల దృష్ట్యా బడ్జెట్‌లో స్పష్టమైన అంచనాలు, కనీసం దరిదాపు కేటాయింపులు చేసుకోవటం తప్పనిసరి. కానీ అవేమీ పట్టిం చుకోకుండా వడ్డీకి నామమాత్రంగా విదిలింపులు చేయటం గమనార్హం. దీంతో పంట రుణాల పంపిణీకి చిక్కులు తలెత్తనున్నాయి. గతేడాది రూ.18,420 కోట్ల పంట రుణాలు పంపిణీ చేయగా.. 2015-16 వార్షిక రుణ ప్రణాళిక ప్రకారం ఈ ఏడాది రూ.27,799 కోట్ల రుణాలు పంపిణీ చేస్తామని ప్రభుత్వం ప్రకటించింది. ఇం దులో రూ.25 వేల కోట్ల మేరకు లక్ష్యం నెరవేరుతుందని అంచనా వేసినా.. అదే స్థాయిలో వడ్డీ పెరుగుతుంది. గడువులోగా పంట రుణాలు తిరిగి చెల్లించిన వారికే వడ్డీ లేని రుణ పథకం వర్తిస్తుంది. ఈ నిబంధన పరిధిలో అర్హత పొందే రుణ మొత్తం 50 శాతానికి మించదని అంచనా వేస్తోంది. ఈ లెక్కన దాదాపు రూ.12,500 కోట్లకు వడ్డీ చెల్లించటం తప్పనిసరి. అందులో 4% (రూ.500 కోట్లు) రాష్ట్ర ప్రభుత్వం బ్యాంకులకు తన వాటాగా రీయింబర్స్ చేయాల్సి ఉంటుంది. కానీ బడ్జెట్‌లో తూతూ మంత్రంగా రూ.150 కోట్లు కేటాయించి చేతులు దులుపుకున్నారు.
 రబీ రుణాలపై ప్రభావం
 రాష్ట్ర సర్కారు తీరు రబీ రుణాల పంపిణీపై ప్రభావం చూపుతోంది. పంట రుణాల పంపిణీకి బ్యాంకులు నిరాసక్తత ప్రదర్శిస్తున్నాయి. రుణాల కోసం వచ్చే రైతులను బ్యాంకులు రకరకాల కుంటిసాకులతో తిప్పి పంపుతున్నాయి. కరువు దుర్భిక్ష పరిస్థితులకు తోడు బ్యాంకర్ల వైఖరి రైతులకు అశనిపాతంగా మారింది. బ్యాంకు రుణాలకు నోచుకోని రైతులు పెట్టుబడుల కోసం ప్రైవేటు వడ్డీ వ్యాపారులను ఆశ్రయిస్తున్నారు. వార్షిక రుణ ప్రణాళిక ప్రకారం రూ.27,799 కోట్ల పంట రుణాలు పంపిణీ చేయాల్సి ఉంటే ఇప్పటివరకు రూ.18 వేల కోట్ల రుణ పంపిణీ జరిగింది. ఖరీఫ్‌లో రూ.18,092 కోట్ల పంట రుణ లక్ష్యం కాగా.. రూ. 12,938 కోట్లు ఇచ్చారు. రబీ పంట రుణ లక్ష్యం రూ.9,707 కోట్లు కాగా.. రూ.5 వేల కోట్లు దాటలేదు. రబీ పంట రుణాల పంపిణీ ఇంచుమించు సగానికే ఆగిపోవడం గమనార్హం.


 రోజురోజుకో నిబంధన
 జిల్లాలో బంగారం తాకట్టు రుణాల రైతులు 2,60,737 మంది
 రుణాలు రూ. 3,276 కోట్లు
 కొలమానంతో కోత
  
 మచిలీపట్నం :   ‘బంగారం తాకట్టు పెట్టి పంట రుణాలు తీసుకున్న రైతులెవరూ తిరిగి చెల్లించవద్దు. మేం అధికారంలోకి వచ్చిన వెంటనే ఈ తరహా రుణాలన్నీ మాఫీ చేసి అక్కచెల్లెమ్మల బంగారు పుస్తెల తాళ్లను ఇంటికే తీసుకువచ్చి ఇస్తా’మంటూ ఎన్నికల ప్రచారంలో చంద్రబాబునాయుడు హామీలతో ఊదరగొట్టారు. తీరా ముఖ్యమంత్రి అయ్యాక ఎన్నో కొర్రీలు పెట్టారు. నగల వేలానికి నోటీసులిచ్చారు. అయితే వ్యవసాయ శాఖ మంత్రి ప్రత్తిపాటి పుల్లారావు మాత్రం బుధవారం అసెంబ్లీలో మాట్లాడుతూ బంగారు రుణాలు పొందినవారెవరికీ  నోటీసులు పంపలేదంటూ చెప్పుకొచ్చారు. అవన్నీ పచ్చి అబద్ధాలంటూ పలువురు జిల్లా రైతులు ధ్వజమెత్తారు. కానీ పంట రుణాలు పూర్తిస్థాయిలో రద్దు కాలేదు. బంగారం  తాకట్టుపెట్టి తీసుకున్న పంట రుణా లకు స్కేల్ ఆఫ్ ఫైనాన్‌‌స (కొల మానం)ను అమలు చేశారు. రైతులు తీసుకున్న రుణానికి, ప్రభుత్వం ప్రకటించిన రుణమాఫీకి భారీ వ్యత్యాసం ఉండడంతో ప్రభుత్వం ఇచ్చిన నగదు బంగారు తాకట్టు పెట్టి తీసుకున్న పం ట రుణాలు వడ్డీకే చాలీచాలని పరిస్థితి నెలకొంది. జిల్లాలో బంగారం తాకట్టు పెట్టి రూ.3,276 కోట్లను 2,60,737 మంది రైతులు పంట రుణాలు తీసుకున్నట్లుగా అధికారులు లెక్క తేల్చారు.
 
 అధికారం చేపట్టిన తరువాత తాకట్టు పెట్టి తీసుకున్న రుణాలను మాఫీ చేయటంలో ప్రభుత్వం తన పంథాను మార్చడంతో వడ్డీ కొండలా పెరిగింది. దీంతో బ్యాంకు అధికారులు నగలను వేలం పాటలను కొనసాగిస్తున్నారు. బుధవారం జరిగిన అసెంబ్లీ సమావేశాల్లో వ్యవసాయ శాఖ మంత్రి ప్రత్తిపాటి పుల్లారావు బంగారం తాకట్టు పెట్టి రుణాలు తీసుకున్న రైతుల బంగారు నగలు వేలం వేయడం లేదని ప్రకటించడంపై రైతులు విస్మయం వ్యక్తం చేస్తున్నారు. ఎవరైనా రైతు బంగారం తాకట్టు పెట్టి పంట రుణం తీసుకుంటే మొదటి సంవత్సరంలో పావలా వడ్డీ చెల్లించాల్సి వచ్చేది. ఈ వడ్డీని వైఎస్ రాజశేఖరరెడ్డి ముఖ్యమంత్రిగా ఉన్న సమయంలో ప్రభుత్వమే చెల్లించింది. చంద్రబాబు ఎన్నికల ముందు ఇచ్చిన హామీతో రైతులు రుణాలు చెల్లించకపోవటంతో ఏడాది దాటిన తరువాత 7 శాతం వడ్డీ అనంతరం 14 శాతం వడ్డీ పెరిగింది. 2013 నుంచి ఇప్పటి వరకు మూడేళ్లు కావటంతో రుణమాఫీలో రూ.50వేల కన్నా పైబడి పంట రుణం తీసుకున్న వారికి 20 వేలు మాత్రమే ప్రభుత్వం జమ చేయడంతో ఈ నగదు వడ్డీకే చాలని పరిస్థితి నెలకొందని రైతులు చెబుతున్నారు. జిల్లాలో మూడు విడతల్లో రుణమాఫీ చేశారు.
 
 జిల్లాలో అన్ని రకాల వ్యవసాయ రుణాలకు 4,04 ,402 మంది రైతులకు రూ.1490 కోట్లు  మాఫీ జరిగినట్లు ప్రభుత్వం లెక్కలు చెబుతోంది. ఇప్పటి వరకు రూ. 573 కోట్లు రైతుల బ్యాంకు ఖాతాల్లో జమ చేసినట్లు అధికారులు చెబుతున్నారు. తాకట్టు పెట్టి రుణం తీసుకుని ఏడాది గడిస్తే గడువు మీరిందనే కారణంతో బ్యాంకు అధికారులు నోటీసులు జారీ చేస్తున్నారని వడ్డీ చెల్లించి రుణాన్ని రెన్యువల్ చేసుకుంటున్నామని రైతులు చెబుతున్నారు. రుణం అధికంగా ఉం టే అధికారులు బంగారు నగలు వేలం వేస్తున్నామని పత్రికల్లో ప్రకటనలు ఇస్తుండటంతో పరువు బజారున పడుతోందని రైతులు వాపోతున్నారు.
  
 ఏడాది గడవకముందే నోటీసు
 సంవత్సరం కిందట బ్యాంక్‌లో రూ.35 వేలు రుణం తీసుకున్నాను. ఏడాది కూడా గడవక ముందే బ్యాంక్ అధికారులు అప్పు చెల్లించాలని నోటీసులు జారీ చేశారు.  ఏం చేయాలో దిక్కుతోచడం లేదు.
  -ఎన్ శివనాగేంద్రం, కొలకలూరు, గుంటూరు జిల్లా
  
  


 టీపీసీసీ అధ్యక్షుడు ఉత్తమ్
 రేపటి బంద్ వ్యూహంపై  టీపీసీసీ ముఖ్యుల భేటీ
  
 హైదరాబాద్: పంట రుణాలను ఒకేసారి మాఫీ చేసేదాకా ప్రభుత్వాన్ని వదిలిపెట్టబోమని టీపీసీసీ అధ్యక్షుడు ఎన్.ఉత్తమ్‌కుమార్ రెడ్డి పేర్కొన్నారు. రైతుల రుణమాఫీ, ఆత్మహత్యలపై ప్రభుత్వ నిర్లక్ష్యానికి నిరసనగా ఈ నెల 10న నిర్వహించనున్న బంద్ విజయవంతానికి అనురించాల్సిన వ్యూహంపై గురువారం టీపీసీసీ ముఖ్యనేతలు సమావేశమయ్యారు. అనంతరం నేతలతో కలసి ఉత్తమ్ విలేకరులతో మాట్లాడారు. అప్పుల బాధలతో రైతులు ఆత్మహత్యలకు పాల్పడుతున్నా ప్రభుత్వం రుణమాఫీ చేయకుండా నిర్లక్ష్యంగా వ్యవహరిస్తోం దని విమర్శించారు. రెవెన్యూ మిగులు ఉన్న రాష్ట్రమని, ధనిక రాష్ట్రమని చెబుతున్న కేసీఆర్‌కు రైతుల కష్టాలు కన్పించడం లేదన్నారు. లక్ష కోట్ల బడ్జెట్‌లో రైతుల రుణమాఫీ చేయడానికి ఆయనకు చేతులు రావడం లేదని మండిపడ్డారు. విద్యుత్ ఉత్పత్తి కోసం 90 వేల కోట్లు, వాటర్ గ్రిడ్‌కోసం 30 వేల కోట్లు, సాగునీటి ప్రాజెక్టులకు మూడేళ్లలో 75 వేల కోట్లు ఖర్చుచేస్తామంటున్నారు... కానీ, రైతుల కోసం కేవలం 8 వేల కోట్లు ఖర్చుచేయలేరా అని ప్రశ్నించారు.
 
 ఆత్మహత్య చేసుకున్న రైతుల సంఖ్యను తక్కువ చేసి చూపించే యత్నాలు జరుగుతున్నాయని, గ్రామసభలు ఏర్పాటుచేసి వాటిని నిర్దారించాలని డిమాండ్ చేశారు. ప్రభుత్వ నిర్లక్ష్య వైఖరికి నిరసనగా ప్రతిపక్ష పార్టీలన్నింటితో కలసి ఈనెల 10న పెద్ద ఎత్తున బంద్ నిర్వహిసున్నట్టు ఉత్తమ్ చెప్పారు. సమావేశంలో టీపీసీసీ కార్యనిర్వాహక అధ్యక్షుడు మల్లు భట్టివిక్రమార్క, శాసనమండలిలో ప్రతిపక్షనేత షబ్బీర్ అలీ, పార్టీ నేతలు దానం నాగేందర్, ఎం.అంజన్‌కుమార్ యాదవ్ తదితరులు పాల్గొన్నారు.
 
  నేడు భారీ ప్రదర్శన
  10న జరిగే బంద్‌ను విజయవంతం చేయాలని కోరుతూ శుక్రవారం హైదరాబాద్‌లో భారీ ప్రదర్శన నిర్వహించనున్నట్టు ఉత్తమ్, గ్రేటర్ కాంగ్రెస్ అధ్యక్షుడు దానం నాగేందర్ తెలిపారు. బంద్ ఏర్పాట్లు, వ్యూహంపై గ్రేటర్ హైదరాబాద్ కాంగ్రెస్ పార్టీ నేతలతో ఉత్తమ్ సమావేశమయ్యారు.
  


 భూత్పూర్ : పంటరుణాల పేర రైతుల నుంచి  అక్రమవసూళ్లకు పాల్పడుతూ ఓ బ్యాంకు అధికారి కోట్లకు పడగలెత్తాడు. భూత్పూర్ ఆంధ్రప్రదేశ్ గ్రామీణ వికాస్ బ్యాంకులో పనిచేసిన ఓ అధికారి అన్నదాతలకు పంటరుణాలు మంజూరుచేస్తూ వారి నుంచి కమీషన్ పేర అక్రమంగా వసూలుచేశాడు. బాధితరైతులు కొందరు ఇటీవల బ్యాంకు ఉన్నతాధికారులకు ఫిర్యాదుచేయడంతో అసలు బాగోతం వెలుగుచూసింది. దీంతోఆయనను ఇక్కడినుంచి బదిలీచేసిన ఉన్నతాధికారులు విచారణ మొదలుపెట్టారు. కొన్నిరోజుల క్రితం ఏపీజీవీబీ విజిలెన్స్ విభాగం బృందం కొత్తమొల్గర, పాతమొల్గర, కప్పెట తదితరగ్రామాల్లో రైతుల నుంచి వివరాలు సేకరించింది.
 
  మధ్యవర్తులు చెబితినే పంటరుణం
  బ్యాంకులో గతంలో పనిచే సిన సంబంధిత అధికారి ప్రతి గ్రామానికి ఒకరు చొప్పున మధ్యవర్తులను నియమించుకుని వసూళ్ల పర్వం సాగించాడు. ఈ బ్రాంచ్ పరిధిలోని కొత్తమొల్గర, పాతమొల్గర, కర్వెన, కొత్తూరు, తాటిపర్తి గ్రామాల ప్రజలకు బ్యాంకుసేవలు అందిస్తోంది. కొత్తమొల్గరకు చెందిన ఓ వ్యక్తి ఈ వ్యవహారంలో కీలకపాత్ర పోషిస్తున్నట్లు బాధిత రైతులు పేర్కొంటున్నారు. రైతులు కొత్తరుణాలు పొందడానికి, రుణాల రెన్యూవల్ చేసుకోవడానికి బ్యాంకుకు వెళ్తే వాయిదావేస్తూ తిప్పుకునేవారు.
 
 పక్షంరోజుల తరువాత మేనేజర్ సూచనలతో మధ్యవర్తులు రంగప్రవేశం చేసి రైతులతో ఒప్పందం కుదుర్చుకునేవారు. మధ్యవర్తులు గ్రీన్‌సిగ్నల్ ఇచ్చిన వెంటనే మేనేజర్ రుణాలు మంజూరుచేసేవారు. రైతులు ఖాతానుంచి డబ్బులు తీసుకున్న వెంటనే మధ్యవర్తులు వారినుంచి 10 నుంచి 15శాతం వరకు కమీషన్ వసూలుచేసేవారు.
 
   ఈ బ్రాంచ్ పరిధిలో ఆరు గ్రామాలకు సంబంధించి వ్యవసాయపంట రుణాలకు చెందిన రెండువేల రైతుల ఖాతాలు ఉన్నాయి. స్కేల్ ఆఫ్‌ఫైనాన్స్‌తో సంబంధం లేకుండా రుణమొత్తాన్ని అమాంతం పెంచేసి రైతుల నుంచి నేరుగా 15శాతం వరకు డబ్బులు తీసుకునేవారని ఆరోపణలు ఉన్నాయి.
 
   వ్యవసాయ టర్మ్‌లోన్స్, డెయిరీ, పౌల్ట్రీ, వాణిజ్య రుణాలు, హౌసింగ్ రుణాలు వంటి వాటిని మంజూరు చేయాలంటే చేయి తడపాల్సిందేనని లబ్ధిదారులు ఆగ్రహం వ్యక్తం చేస్తున్నారు. కొత్తమొల్గర గ్రామస్తులు చేసిన ఫిర్యాదుతో స్పందించిన ఏపీజీవీబీ ఉన్నతాధికారుల బృందం ఇప్పటికే బ్రాంచ్ కార్యాలయంలో అంతర్గత విచారణ చేపట్టింది. సదరు అధికారిని వరంగల్ జిల్లాకు సాధారణ బదిలీచేశారు. అతడిపై వేటు వేయకుండా సంబంధితశాఖ ఉన్నతాధికారులు కూడా సహకరిస్తున్నారనే ఆరోపణలు ఉన్నాయి.  
  
  విచారణ కొనసాగుతోంది..
   రైతులకు పంటరుణాలు మంజూరు చేసేందుకు మధ్యవర్తుల నుంచి డబ్బులు వసూలు చేస్తున్నారని గతంలో ఇక్కడ పనిచేసిన బ్రాంచ్ మేనేజర్ రత్నాకర్‌పై భూత్పూర్ మండలంలోని కొత్తమొల్గరకు చెందిన కొందరు రైతులు ఫిర్యాదుచేయగా.. ఉన్నతాధికారులకు నివేదించాం. ఇప్పటికే బ్రాంచ్ కార్యాలయంలో తనిఖీలు నిర్వహించాం. మా ఉన్నతాధికారుల ఆదేశాల మేరకు విజిలెన్స్ విచారణ కొనసాగుతోంది. అక్రమాలు జరిగినట్లు తేలితే చర్యలు తీసుకుంటాం.
   - రాజు, ఏపీజీవీబీ రీజినల్ మేనేజర్
 
  రూ.3వేలు ఇచ్చాం..
  నాకు రెండేకరాల పొలం ఉంది. పంటరుణం కోసం భూత్పూర్‌లోని గ్రామీణ బ్యాంకుకు వెళ్తే 15రోజులు తిరిగినా లోను మంజూరుచేయలేదు. మేనేజర్‌ను అడిగితే ఇంకా టైం పడుతుందని చెప్పాడు. చివరకు కొత్తమొల్గరకు చెందిన ఓ వ్యక్తితో మాట్లాడుకోమన్నాడు. ఆయనతో మాట్లాడిన రోజే రుణం మంజూరుచేసిండు. తీసుకుని బయటికి వచ్చిన వెంటనే నా వద్ద నుంచి రూ.3వేలు తీసుకున్నాడు.
    - ఎర్రకాశన్న, రైతు, పాత మొల్గర, భూత్పూర్ మండలం


  కొవ్వూరు : కొవ్వూరు మండలంలో వాడపల్లి, దొమ్మేరు, పశివేదలలోని బ్యాంక్ ఆఫ్ ఇండియాలో బంగారంపై పంట రుణాలు తీసుకున్నవారికి నోటీసులు జారీ చేశారు. ఆరికిరేవుల బరోడా బ్యాంకు, కొవ్వూరు, ధర్మవరం ఆంధ్రాబ్యాంకులు, సిండికేట్ బ్యాంకు రుణాలు తీసుకున్న రైతులకు నోటీసులు ఇచ్చాయి. చాగల్లు మండలంలోని ప్రక్కిలంక ఎస్‌బీఐ గతంలో బంగారంపై వ్యవసాయ రుణాలు తీసుకున్న రైతులకు నోటీసులు జారీ చేసింది. అన్నదేవరపేట, మలకపల్లి సహకార సంఘాలు బంగారు రుణాలు తీసుకున్న రైతులకు నోటీసులు జారీ చేశాయి. అన్నదేవరపేట సొసైటీలో 2012-2014 వరకు బంగారంపై 500 మంది రైతులు రూ.1.50 కోట్లు రుణాలు తీసుకున్నారు. బంగారంపై రుణాలు తీసుకున్న వారిలో వందమందికి నోటీసులు ఇచ్చారు.
  
   తాడిపూడి సొసైటీ నుంచి 2013-14 సంవత్సరానికిగాను 398 మంది రైతులు రూ.2.33 కోట్లు రుణాలుగా తీసుకున్నారు. రాగోలపల్లి సొసైటీ ద్వారా 507 మంది రైతులు రూ.2.16 కోట్లు పంట రుణాలుగా తీసుకున్నారు. మలకపల్లి సొసైటీ నుంచి, ప్రక్కిలంక ఎస్‌బీఐ నుంచి 2011-12లో బంగారంపై 611 మంది రైతులకు రూ.4.11 కోట్లు, 2012-13లో 511 మందికి రూ.3.19 కోట్లు, 2012-13లో పంట రుణాలు కింద 431 మంది రూ.2.67 కోట్లు రుణాలుగా తీసుకున్నారు. బంగారంపై తీసుకున్న రుణాలకు నోటీసులు జారీ చేశారు.  తాళ్లపూడి ఆంధ్రాబ్యాంకులో 2011-14 వరకు బంగారంపై వ్యవసాయ రుణాలు రూ.7.98 కోట్లు ఇచ్చారు. గత నెల మార్చిలో సుమారు 50 మందికి నోటీసులు జారీ చేసింది.
  
   తాళ్లపూడి మండలం వేగేశ్వరపురం గ్రామానికి చెందిన ఎనిమిది మంది బగారు నగలను వేలం వేశారు.  చాగల్లు ఆంధ్రాబ్యాంకులోను శనివారం 142 మంది బంగారంపై పంట రుణం తీసుకున్న వారి పేర్లను పేపర్‌లో ప్రకటించారు. సొమ్ము చెల్లించపోతే వేలం వేస్తామని ప్రకటన ఇచ్చారు. తాళ్లపూడి మండలం ఆంధ్రాబ్యాంకు రుణాలు చెల్లించని వారిపై చట్టపరమైన చర్యలు తీసుకుంటామని ఆటో ద్వారా గ్రామాల్లో ప్రచారం నిర్వహించారు. దీంతో రైతులు బ్యాంకు ఎదుట ధర్నాకు చేశారు.
  
  బంగారం వేలం వేశారు
  తాళ్లపూడి ఆంధ్రాబ్యాంకులో 2013 మార్చిలో రెండున్నర కాసులు పుస్తెలతాడు తాకట్టు పెట్టి  బంగారంపై రూ. 34 వేలు  పంట రుణం తీసుకున్నాను. రుణాలు చెల్లించాలని బ్యాంకు నుంచి నోటీసులు ఇవ్వకుండానే బంగారం వేలం వేశారు. ప్రభుత్వం రుణమాఫీ చేస్తుందని బాకీ చెల్లించలేదు. ముందస్తు సమాచారం లేండా వేలం వేయడం దారుణం.
  -ఉన్నమాటి పుల్లారావు, కౌలు రైతు, వేగేశ్వరపురం.
  
  బ్యాంకు అధికారులు నోటీసులు ఇచ్చారు
  తాళ్లపూడి ఆంధ్రాబ్యాంకులో మూడున్నర కాసుల బంగారు నగలు తాకట్టు పెట్టి రూ.46 వేలు రుణం తీసుకున్నాను. 2015 ఫిబ్రవరిలో రూ.10 వేలు వడ్డీ చెల్లించాను. బంగారం వేలం వేశామని మిగిలిన సొమ్ము తీసుకువెళ్లాలని మార్చిలో  నోటీసు వచ్చింది.                  -బుద్దాల లక్ష్మి, వేగేశ్వరపురం
  


 బెంగళూరు: గిట్టుబాటు ధరలు, పంటరుణాలు దక్కక ఇటీవల ఆత్మహత్యలకు పాల్పడిన రైతుల కుటుంబాలను పరమార్శించడానికి ఏఐసీసీ ఉపాధ్యక్షుడు రాహుల్‌గాంధీ త్వరలో కర్ణాటక వ్యాప్తంగా పర్యటిస్తారని ఆ పార్టీ సీనియర్ నాయకుడు, కాంగ్రెస్ పార్టీ రాష్ట్ర శాఖ రాజకీయ వ్యవహారాల ఇన్‌ఛార్జ్ దిగ్విజయ్ సింగ్ స్పష్టం చేశారు. బెంగళూరులోని పార్టీ కార్యాలయంలో కేపీసీసీ అధ్యక్షుడు పరమేశ్వర్‌తో కలిసి  శుక్రవారం జరిగిన మీడియా సమావేశంలో ఆయన మాట్లాడారు.
 
 కొన్ని కారణాల వల్ల పర్యటన తేదీలు ఖరారు కాలేదని అయితే రాహుల్ గాంధీ పర్యటనపై త్వరలో స్పష్టత వస్తుందని దిగ్విజయ్ సింగ్ తెలిపారు. ప్రధాని నరేంద్రమోదీ నేతృత్వంలోని ఎన్‌డీఏ ప్రభుత్వం వైఫల్యాలు ఏడాదిలోపే తేటతెల్లమయ్యిందన్నారు. అనేక అక్రమాలకు పాల్పడిన లలిత్‌మోదీని ఎందుకు రక్షించడానికి ప్రయత్నిస్తున్నారని ఈ సందర్భంగా బీజేపీ నాయకులను దిగ్విజయ్ సింగ్ ప్రశ్నించారు. బెంగళూరు నగరం అభివృద్ధి పథంలో పయనించాలంటే కాంగ్రెస్ పార్టీ అభ్యర్థులను గెలిపించాలని ఈ సందర్భంగా ప్రజలకు ఆయన విజ్ఞప్తి చేశారు.
  
  


 బ్యాంకులకు ఆర్‌బీఐ ఆదేశం
  
  ముంబై : వడ్డీ రాయితీతో రైతులకు స్వల్పకాల పంట రుణాలను అందించాలని ఆర్‌బీఐ బ్యాంకులను ఆదేశించింది. ఈ రుణాలకు రూ.3 లక్షల వరకు 2 శాతం వడ్డీ రాయితీ ఇవ్వాలని సూచించింది. కేంద్ర ప్రభుత్వం 2015-16 బడ్జెట్‌లో ప్రస్తుత ఆర్థిక సంవత్సరంలో స్వల్పకాల రుణాలకు రూ.3 లక్షల వరకు 2 శాతం వడ్డీ రాయితీ కల్పించే పథకాన్ని అమలు చేయాలని ప్రతిపాదించిన విషయం తెలిసిందే. పంట రుణం రైతుకు పంపిణీచేసిన నాటి నుంచి ఆ రుణాన్ని రైతు తిరిగి చెల్లించే తేదీ లేక పంట రుణం చెల్లించాల్సిన గడువు తేదీ ఆధారంగా 2 శాతం వడ్డీ రాయితీ లెక్కింపు జరుగుతుందని ఆర్‌బీఐ పేర్కొంది.
 
 రాయితీ కారణంగా క్షేత్రస్థాయిలో రైతులకు పంట రుణాలు 7 శాతం వడ్డీకి లభిస్తాయని తెలిపింది. ఇది కాక సకాలంలో పంట రుణాలను చెల్లించే రైతులకు 3 శాతం అదనపు వడ్డీ రాయితీ అందుబాటులో ఉంటుందని తెలిపింది. అంటే సకాలంలో పంట రుణాలను చెల్లించే రైతులకు మాత్రమే పంట రుణం 4 శాతం వడ్డీకి లభిస్తుందని పేర్కొంది.
 
  సకాలంలో చెల్లించని రైతులకు ఈ 3 శాతం వడ్డీ ప్రయోజనం ఉండదని వివరించింది. గిట్టుబాటు ధరల లభించన ప్పుడు పంట ఉత్పత్తులను గిడ్డంగుల్లో నిల్వ ఉంచుకునేందుకు, కిసాన్ క్రెడిట్ కార్డులను కల్గిన చిన్న, సన్నకారు రైతులకు 2 శాతం వడ్డీ రాయితీ ప్రయోజనాలను మరో ఆరు నెలల వరకు పొందవచ్చని తెలిపింది. ప్రకృతి వైపరిత్యాల నుంచి రైతులను ఆదుకోవడానికి పునర్వ్యవస్థీకరించిన రుణాలకు తొలి ఏడాది ఈ 2 శాతం వడ్డీ రాయితీ ఉంటుందని, తర్వాతి సంవత్సరం నుంచి సాధారణ వడ్డీయే వర్తిస్తుందని పేర్కొంది.
  
  ప్రభుత్వానికి రూ.65,896 కోట్ల మిగులు
  ఆర్‌బీఐ గురువారం తన మిగులు లాభాన్ని కేంద్ర ప్రభుత్వానికి బదలాయించింది. ఈ మొత్తం రూ.65,896 కోట్లు. గత ఏడాది బదలాయింపులకన్నా ఇది 25 శాతం (రూ.52,679 కోట్లు) అధికం. గురువారం జరిగిన ఆర్‌బీఐ సెంట్రల్ బోర్డ్ డెరైక్టర్ల సమావేశం ఈ మేరకు ఒక నిర్ణయం తీసుకుంది. ఈ 553వ   ఆర్‌బీఐ సెంట్రల్ బోర్డ్ సమావేశానికి గవర్నర్ రఘురామ్ రాజన్ అధ్యక్షత వహించారు. సెంట్రల్ బోర్డ్‌లో ప్రభుత్వ నామినీ డెరైక్టర్లు, ప్రధాన ఆర్థిక సలహాదారు అరవింద్ సుబ్రమణియన్ కూడా సమావేశానికి హాజరయ్యారు.  
  
  పావుశాతం రెపో కోత: బ్యాంకర్ల అంచనా
  ఆర్‌బీఐ రెపోను సెప్టెంబర్ 29 సమీక్ష సందర్భంగా మరో పావు శాతం తగ్గించే అవకాశం ఉందని (ప్రస్తుతం 7.25 శాతం)బ్యాంకర్లు అభిప్రాయపడుతున్నారు.   వినియోగ ధరల ఆధారిత రిటైల్ ద్రవ్యోల్బణం జూలైలో రికార్డు స్థాయి  కనిష్ట స్థాయి 3.78 శాతానికి పడిపోవడం ఇందుకు కారణమని  హెచ్‌డీఎఫ్‌సీ బ్యాంక్ మేనేజింగ్ డెరైక్టర్ ఆదిత్య పురి  గురువారం ఇక్కడ విలేకరులతో అన్నారు. బ్యాంక్ ఆఫ్ ఇండియా చీఫ్ ఎగ్జిక్యూటివ్ అండ్ మేనేజింగ్ డెరైక్టర్ బీపీ శర్మ మాట్లాడుతూ, రేటు కోతను బ్యాంకర్లు కోరుతున్నారన్నారు. ద్రవ్యోల్బణం కనిష్ట స్థాయి ఈ ఆశలు పెంచుతోందన్నారు.
 
 ఆర్‌బీఐ బోర్డ్ సమావేశం సందర్భంగా జరిగిన విందు కార్యక్రమం అనంతరం పురి, శర్మలు విలేకరులకు తమ అభిప్రాయాలను తెలిపారు. ఈ కార్యక్రమంలో స్టేట్ బ్యాంక్ ఆఫ్ ఇండియా చైర్మన్ అరుంధతీ భట్టాచార్య, ఐసీఐసీఐ బ్యాంక్ చందా కొచర్, యాక్సిస్ బ్యాంక్ శిఖా శర్మ తదితరులు పాల్గొన్నారు.
 
  విశ్లేషణా సంస్థలదీ ఇదే మాట...: కాగా పలు ఆర్థిక విశ్లేషణా సంస్థలు కూడా సెప్టెంబర్ సమీక్ష సందర్భంగా రెపో రేటును తగ్గించవచ్చనే అంచనాల్లోనే ఉన్నాయి. రిటైల్ ద్రవ్యోల్బణం జూలైలో తక్కువగా ఉండడం దీనికి కారణంగా చూపుతూ, ఆగస్టు నెలలో కూడా రిటైల్ ద్రవ్యోల్బణం మరింత తగ్గే అవకాశం ఉందని అంచనా వేస్తున్నాయి.  బ్యాంక్ ఆఫ్ అమెరికా-మిరిలించ్, డీబీఎస్, ఎస్‌బీఐ రిసెర్చ్‌లు విడుదల చేసిన నివేదికల్లో తమ అభిప్రాయాలను తెలియజేశాయి. ఈ ఏడాది ఆర్‌బీఐ రెపోను ముప్పావుశాతం తగ్గించింది.


 సాక్షి, హైదరాబాద్: పంట రుణాలు తీసుకునే రైతుల నుంచి బీమా ప్రీమియం సొమ్మును మినహాయించుకుని పెద్ద మొత్తంలో తమ వద్దే దాచిపెట్టుకున్న బ్యాంకులు తక్షణమే ఆ సొమ్మును బీమా కంపెనీలకు చెల్లించాలని రాష్ట్ర వ్యవసాయశాఖ ఆదేశించింది. వ్యవసాయ మంత్రి పోచారం శ్రీనివాసరెడ్డి రాష్ట్రస్థాయి బ్యాంకర్లు, బీమా కంపెనీలతో శుక్రవారం ప్రత్యేకంగా సమావేశం నిర్వహించారు. రైతులు రుణాలు తీసుకునే సమయంలో పంటల బీమా ప్రీమియాన్ని మినహాయించుకుని బ్యాంకులు రుణాలు ఇస్తాయి.
 
 ఆ సొమ్మును జాతీయ వ్యవసాయ బీమా కంపెనీ (ఏఐసీ)కి చెల్లించాలి. కానీ కొన్నేళ్లుగా పెద్ద మొత్తంలో ప్రీమియం సొమ్మును బ్యాంకులు తమ వద్దే దాచుకుంటున్నాయని సర్కారు నిర్ధారణకు వచ్చింది. ఇప్పటికే ఈ అంశంపై విచారణ జరపాలని జిల్లా కలెక్టర్లకు ఆదేశాలు వెళ్లాయి. ఈ నేపథ్యంలో మంత్రి సమీక్షా సమావేశం ఏర్పాటు చేశారు. కాగా, జిల్లాల్లో ప్రతీ బ్యాంకు బ్రాంచీలో ఎంత ప్రీమియం సొమ్మును ఈ రకంగా దాచిపెట్టుకున్నారో వెంటనే తెలపాలని మంత్రి ఆదేశించినట్లు తెలిసింది. దీనిపై ఆయన తీవ్ర అసంతృప్తి వ్యక్తంచేసినట్లు సమాచారం.
  
 బ్యాంకుల ద్వారానే చెల్లించాలి...
 ఇప్పటివరకు పంట రుణాలు తీసుకునే రైతుల నుంచి ప్రీమియం సొమ్మును బ్యాంకులు మినహాయించి బీమా సంస్థలకు చెల్లిస్తున్నాయి. ఇకనుంచి బ్యాంకు రుణాలు తీసుకోని రైతుల నుంచి బ్యాంకులు ప్రీమియాన్ని వసూలు చేసి బీమా కంపెనీలకు చెల్లించాలని..ఆమేరకు చర్యలు తీసుకోవాలని మంత్రి అధికారులను ఆదేశించారు.
  
 కొత్త రుణాల ఆలస్యంపై అసంతృప్తి...
 ప్రభుత్వం రుణమాఫీ సొమ్మును విడతల వారీగా ఇస్తున్నప్పటికీ బ్యాంకులు మాత్రం అనుకున్న స్థాయిలో రైతులకు కొత్త రుణాలు ఇవ్వడం లేదని మంత్రి పోచారం అసంతృప్తి వ్యక్తంచేసినట్లు తెలిసింది. ఈ సారి పంట రుణాల లక్ష్యం రూ. 15 వేల కోట్లు పైగా ఉండగా... ఇప్పటివరకు 35 శాతానికి మించి రుణాలు ఇవ్వలేకపోయాయని మంత్రి పేర్కొన్నారు. తక్షణమే కొత్త రుణాలు ఇవ్వాల్సిందిగా ఆయన ఆదేశాలు ఇచ్చారు. ఈ సమావేశంలో వ్యవసాయశాఖ కార్యదర్శి పార్థసారధి తదితరులు పాల్గొన్నారు.


 పంట రుణాల లక్ష్యం నెరవేరేనా?
 రెన్యువల్ చేస్తేనే మళ్లీ అప్పు
  రైతులపై రుణమాఫీ ప్రభావం
  ఈ నెల 30తో ముగియనున్న ప్రీమియం గడువు
 పంట బీమా చెల్లింపు గడువు దగ్గర పడుతోంది. బ్యాంకర్ల నుంచి పంట రుణాలు ఇంకా మంజూరు కాలేదు. రుణాల కోసం వెళ్లిన అన్నదాతలను రెన్యువల్ చేయించుకోవాలని బ్యాంకర్లు స్పష్టం చేస్తున్నారు. రెన్యువల్ చేస్తున్నవారికి కొత్త రుణాలు మంజూరు చేసినట్లు నమోదు చేస్తున్నారు. ఈ ఏడాది ఖరీఫ్ రుణ లక్ష్యంలో సగం కూడా పూర్తికాలేదు. దీంతో రైతుల పరిస్థితి అగమ్యగోచరంగా మారింది. ఈ ఏడాది బీమా ధీమా దక్కదని ఆందోళన చెందుతున్నారు.
  
 మచిలీపట్నం : ప్రభుత్వ సాచివేత ధోరణి రైతుల పాలిట శాపంగా మారింది. సకాలంలో పంట రుణాలు అందక అన్నదాతలు సతమతమవుతున్నారు. ఒకటి, రెండు రోజులుగా వాతావరణం అనుకూలించటంతో వ్యవసాయ పనుల్లో రైతులు నిమగ్నమయ్యారు. అయితే పంట రుణాలు సకాలంలో అందకపోవటంతో రైతులు వడ్డీ వ్యాపారుల చుట్టూ తిరగాల్సిన దుస్థితి నెలకొంది. ఈ ఏడాది ఖరీఫ్ సీజన్‌లో రూ.2,396 కోట్లను పంట    రుణాలుగా అందజేయాలని లక్ష్యంగా నిర్ణయించారు. ఇప్పటివరకు రూ.1,260 కోట్లు మాత్రమే అందజేసినట్లు అధికారులు చెబుతున్నారు. జిల్లాలో నాలుగు లక్షల మంది రైతులు ఉండగా 1.78 లక్షల మందికి వీటిని అందజేసినట్లు అధికారిక లెక్కలు చెబుతున్నాయి. ఈ నెల 30 నాటికి పంట బీమా ప్రీమియం చెల్లించేందుకు తుది గడువుగా ఉంది. పూర్తిస్థాయిలో రుణాలు అందకపోవటంతో రైతులు పంట బీమా ప్రీమియం చెల్లించలేని పరిస్థితి నెలకొంది.
 
  మాఫీ మాయ.. అప్పుల్లో అన్నదాత
  టీడీపీ ప్రభుత్వం అధికారం చేపట్టిన తరువాత జిల్లాలో 7.03 లక్షల మంది రైతులు రూ.9,137 కోట్ల పంట రుణాలు తీసుకున్నారని గుర్తించారు. వీటన్నింటినీ రుణమాఫీ కింద రద్దు చేస్తామని ఎన్నికల ముందు హామీ ఇచ్చారు. అనంతరం వివిధ కారణాలు చూపి రుణాలు రద్దు చేయకుండా నిలిపివేశారు. ప్రభుత్వం ప్రకటించిన మొదటి విడత రుణమాఫీ జాబితాలో 2 లక్షల 84 వేల మంది రైతులకు రూ.997 కోట్లు మాఫీ జరిగినట్లు చూపారు. అందులోనూ రూ.326 కోట్లు విడుదల చేశారు. రెండో విడత జాబితాలో లక్షా 40 వేల మంది రైతులకు రూ.440 కోట్లు రుణమాఫీ జరిగినట్లు చూపారు. అందులో రూ.188 కోట్లు విడుదల చేసినట్లు తెలిపారు. ఒకటి, రెండు జాబితాల్లో రుణమాఫీ జరగని రైతుల నుంచి దరఖాస్తులు స్వీకరించగా 70 వేలకు పైగా వచ్చాయి. ఈ నెలాఖరు నాటికి మూడో విడత రుణమాఫీ జాబితాను ప్రకటిస్తామని ప్రభుత్వం ప్రకటించింది. తొలుత రుణాలు మొత్తం మాఫీ చేస్తామని ప్రకటించిన ప్రభుత్వం.. ఆ తర్వాత రూ.50 వేల లోపు ఉన్న రుణాలే పూర్తిగా మాఫీ చేస్తామని పేర్కొంది. ఆచరణలో అనేకమంది రైతులకు అదీ అమలు కాలేదు. రూ.50 వేల కన్నా పైబడి రుణం ఉంటే మొదటి విడతగా 20 శాతం రైతు ఖాతాలో జమ చేసి మిగిలిన బకాయిని రానున్న నాలుగు సంవత్సరాల్లో మాఫీ చేస్తామని ప్రభుత్వం ప్రకటించింది. ఈ ప్రక్రియ వలన రైతులకు ఒనగూరే ప్రయోజనం లేకపోగా వడ్డీ రూపంలో అదనపు భారం పడుతోంది.
  
 కాగితాల పైనే రెన్యువల్
  టీడీపీ ప్రభుత్వం పూర్తిస్థాయిలో రుణమాఫీ చేస్తామని ఇచ్చిన హామీని నమ్మి రుణాలు సకాలంలో చెల్లించని రైతులంతా ఇబ్బందుల్లో చిక్కుకున్నారు.  బ్యాంకుల వద్దకు పంట రుణం కోసం వెళితే పాత బకాయి చెల్లిస్తే.. వెంటనే రుణం మంజూరు చేస్తామని బ్యాంకు అధికారులు ఖరాకండీగా చెబుతున్నారు. రుణం చెల్లించకున్నా రెన్యువల్ చేయించుకోవాలని సలహా ఇస్తున్నారు. రెన్యువల్ చేయించాలంటే 10-1 అడంగల్ కాపీ, శిస్తు రసీదు కావాలని కోరుతున్నారు. రైతు తాను తీసుకున్న రుణం చెల్లించకపోవటంతో రెన్యువల్ చేసినట్లు చూపి ఈ ఏడాది కొత్తగా రుణం ఇచ్చినట్లు కాగితాలపై రాస్తున్నారు. అంతే తప్ప రైతులకు ఒక్క రూపాయి నగదు ఇచ్చిన దాఖలాలు ఎక్కడా లేవు. అధికారులు అందజేసినట్లు చెబుతున్న రూ.1,260 కోట్ల రుణాల్లో 90 శాతం ఈ తరహావేనని రైతులు అంటున్నారు. ఉదాహరణకు చిన్నాపురం కేడీసీసీ బ్యాంకు పరిధిలో ఐదు పీఏసీఎస్‌లు ఉన్నాయి. ఈ సంఘాల్లో పంట రుణాల కింద రూ.11 కోట్ల మేర బకాయిలు ఉన్నాయి. గురువారం ఈ బ్రాంచిని సందర్శించిన ఓ ఉన్నతాధికారి ఈ రూ.11 కోట్లలో రూ.10 కోట్లను రెన్యువల్ చేసి రైతులకు పంట రుణాలు ఇచ్చినట్లుగా చూపాలని చెప్పినట్లు విశ్వసనీయ సమాచారం. పీఏసీఎస్‌లతో పాటు వాణిజ్య బ్యాంకుల్లోనూ ఇదే పరిస్థితి కొనసాగుతోందని రైతులు అంటున్నారు. పంట రుణాల మంజూరులో జాప్యం జరిగితే ఈ ఏడాది చాలా మంది రైతులు పంట బీమా ప్రీమియం చెల్లించే అవకాశాన్ని కోల్పోతారని, ఈ అంశాన్ని దృష్టిలో ఉంచుకుని పంట బీమా ప్రీమియం చెల్లింపు గడువును పెంచాలని రైతులు కోరుతున్నారు.
  
  


 * రుణమాఫీ సొమ్ము విడుదలలో సర్కారు జాప్యం
 * సగం మాత్రమే ఇచ్చి చేతులు దులుపుకొన్న వైనం
 * రైతులకు ఖరీఫ్ రుణాలిచ్చేందుకు బ్యాంకుల విముఖత
  
 సాక్షి, హైదరాబాద్: రాష్ట్ర సర్కారు తీరుతో రైతన్న పరిస్థితి అగమ్యగోచరంగా మారుతోంది. రెండో విడత రుణమాఫీ సొమ్ములో సగం మాత్రమే విడుదల చేసి మిగిలిన సగంపై ప్రభుత్వం నిర్లక్ష్యం చూపుతోంది. రెండో విడత రూ.4,086 కోట్లు విడుదల చేయాల్సి ఉన్నా.. రూ.2,043 కోట్లు మాత్రమే విడుదల చేసింది. మిగిలిన మొత్తం ఎప్పుడు విడుదల చేస్తారో ఇప్పటికీ స్పష్టత ఇవ్వడం లేదు. దీంతో బ్యాంకులు రైతులకు పూర్తిస్థాయిలో కొత్త రుణాలు ఇవ్వడం లేదు. ఫలితంగా పెట్టుబడులకు చేతిలో చిల్లిగవ్వ లేక రైతులు దిక్కులు చూస్తున్నారు.
  
 ప్రైవేటు అప్పులే దిక్కు..
  తెలంగాణ ప్రభుత్వం రూ.లక్షలోపు పంట రుణాలు మాఫీ చేస్తామని ప్రకటించింది. రూ.17 వేల కోట్ల రుణాలను మాఫీ చేయాలని నిర్ణయించింది. 35.82 లక్షల రైతు ఖాతాలను గుర్తించింది. మొదటి విడతగా గత ఏడాది రూ.4,230 కోట్లు రుణ మాఫీ ప్రకటించింది. ఆ మొత్తం జిల్లాల్లోని బ్యాంకులకు అందజేసింది. ఆ సొమ్ములో బ్యాంకులు ఇప్పటివరకు రూ.4,086.22 కోట్ల రైతు రుణాలను మాఫీ చేశాయి. ఇంతవరకు బాగానే ఉన్నా.. రెండో విడతకు కొర్రీ పెట్టింది. మాఫీ సొమ్ము సగమే విడుదల చేసినందున రైతులందరికీ రుణాలివ్వలేమని బ్యాంకులు చేతులెత్తేస్తున్నాయి. చేసేది లేక రైతులు ప్రైవేటు వడ్డీ వ్యాపారులను ఆశ్రయిస్తున్నారు.
  


 సాక్షి, హైదరాబాద్: రాష్ట్ర ప్రభుత్వం వ్యవసాయ రంగాన్ని దారుణంగా దెబ్బతీస్తోంది. ముఖ్యమంత్రి చంద్రబాబునాయుడు నిర్వాకం కారణంగా రాష్ట్ర రైతాంగానికి ఈ ఏడాది పంట రుణాలు చాలినంత అందని దుస్థితి నెలకొంది. ఎక్కడైనా రైతులకు ఇచ్చే రుణాల మంజూరు లక్ష్యం ప్రతిఏటా పెరుగుతూ రావడం పరిపాటి. రాష్ట్రంలో సైతం ఇటీవలి రెండేళ్లలో ఏటా సుమారు రూ.10 వేల కోట్ల చొప్పున పెరుగుదల చోటు చేసుకుంది. అంతేకాదు 2012-13, 2013-14 ఆర్థిక సంవత్సరాల్లో లక్ష్యాలను మించి రుణాలు మంజూరయ్యాయి.
 2012-13లో రుణాల లక్ష్యం రూ.35,654 కోట్లు కాగా లక్ష్యాన్ని మించి ఏకంగా రూ.50,060 కోట్ల మేరకు రుణాలు ఇచ్చారు. 2013-14 లోనూ లక్ష్యానికన్నా సుమారు రూ.3 వేల కోట్లు అధికంగానే రుణాలు మంజూరయ్యాయి. కానీ ఈ ఏడాది ఇందుకు విరుద్ధంగా బ్యాంకులు ఇచ్చే రుణాల లక్ష్యం తగ్గడం గమనార్హం. రాష్ట్ర ముఖ్యమంత్రి రుణ మాఫీ పేరుతో కనీసం వడ్డీలకు సరిపడా డబ్బులు కూడా ఇవ్వకుండా స్కేల్ ఆఫ్ ఫైనాన్స్ మెలిక పెట్టడం వల్ల రుణాల లక్ష్యం ఈసారి దాదాపు రూ.2 వేల కోట్లు తగ్గిపోయింది.
 
 గత ఆర్థిక సంవత్సరం ఖరీఫ్, రబీలో రైతులకు రూ.56,019 కోట్ల రుణాలు ఇవ్వాలని నిర్ణయించగా ప్రస్తుత ఆర్థిక సంవత్సరంలో రూ.53,925 కోట్లు మాత్రమే ఇవ్వాలని నిర్ణయించడం గమనార్హం. మరోవైపు ఎన్నికల్లో ఇచ్చిన హామీ మేరకు చంద్రబాబు వ్యవసాయ రుణాలన్నింటినీ మాఫీ చేయకపోవడం, ప్రభుత్వం విధించిన రకరకాల ఆంక్షలు, రైతుల పాత రుణాలు తీరకపోవడం తదితర కారణాల వల్ల గతేడాది బ్యాంకులు లక్ష్యం మేరకు రుణాలు మంజూరు చేయకుండా గణనీయంగా కోత విధించాయి. ఆ ఏడాది ఖరీఫ్, రబీ రుణ లక్ష్యంలో ఏకంగా రూ.16 వేల కోట్లు తక్కువగా రైతులకు రుణాలు అందాయి.
 
 అంటే పరోక్షంగా ప్రభుత్వమే రైతులను వడ్డీ వ్యాపారస్తుల హస్తాల్లోకి నెట్టేసిందన్నమాట. గతేడాది ఖరీఫ్ రుణ లక్ష్యంలో సగం కూడా రైతులకు మంజూరు చేయలేదు. అంతకు ముందు ఏడాది కంటే గతేడాది బ్యాంకుల ద్వారా రైతులకు అందిన రుణాల్లో ఏకంగా రూ.10 వేల కోట్ల తగ్గుదల చోటుచేసుకుంది. కౌలు రైతుల పరిస్థితి దారుణం : ఇక రాష్ట్రంలో కౌలు రైతుల పరిస్థితి మరింత దిగజారింది. గతంలో లక్షల సంఖ్యలో కౌలు రైతులకు బ్యాంకులు రుణాలు మంజూరు చేసేవి. గతేడాది కేవలం 36,543 మంది కౌలు రైతులకు బ్యాంకుల నుంచి రూ.63.36 కోట్ల రుణాలే అందాయి.
 
 ప్రస్తుత ఆర్థిక సంవత్సరం వ్యవసాయ రుణ పరపతి ప్రణాళికపై గత నెలలోనే రాష్ట్ర స్థాయి బ్యాంకర్ల కమిటీ (ఎస్‌ఎల్‌బీసీ) సమావేశం జరగాల్సి ఉంది. అయితే సీఎం సమయం ఇవ్వలేదు. ఎస్‌ఎల్‌బీసీ విజ్ఞప్తి మేరకు సోమవారం సాయంత్రం 4 గంటలకు చంద్రబాబు సమయం కేటాయించారు. సచివాలయంలో సీఎం అధ్యక్షతన కమిటీ సమావేశం జరగనుంది. ఈ సమావేశంలో ప్రస్తుత ఆర్థిక సంవత్సర రుణ పరపతి ప్రణాళికను సీఎం విడుదల చేయనున్నారు. 2015-16లో ఖరీఫ్, రబీ కలిపి పంట రుణాల కింద రూ.40 వేల కోట్లు, వ్యవసాయ టర్మ్ రుణాల కింద రూ.13,925 కోట్ల మేర రుణాలు ఇవ్వాలని లక్ష్యంగా పెట్టుకున్నారు.


 కలిగిరి : కలిగిరిలోని ఆంధ్రప్రగతి గ్రామీణ బ్యాంక్‌లో 10 నకిలీ పాసుపుస్తకాలు, అడంగళ్, 1బీలతో రుణాలు పొందినట్లు తహశీల్దార్ లావణ్య గుర్తించారు. కలిగిరిలో ఏపీజీబీలో తీసుకున్న పంట రుణాలపై శనివారం తహశీల్దార్ విచారణ జరిపారు. ఇటీవల ఏపీజీబీలో నకిలీ పాసుపుస్తకాలతో రుణాలు పొందడానికి ప్రయత్నిస్తుండగా బ్యాంకుమేనేజర్‌కు అనుమానంవచ్చి పట్టుకున్న విషయం తెలిసిందే. దీనిపై తహశీల్దార్ విచారణ చేపట్టారు. అందులో భాగంగా 2014 నవంబర్ నుంచి మంజూరు చేసిన 150 పంట రుణాలకు సంబంధించిన ధ్రువీకరణ పత్రాలను పరిశీలించారు. వాటిలో 10 మంది నకిలీ పాసుపుస్తకాలు, అడంగల్, 1బీలతో రుణాలు పొందినట్లు గుర్తించారు.
 
 ఈ సందర్భంగా తహశీల్దార్ లావణ్య మాట్లాడుతూ 10 మందికి సంబంధించిన పాసుపుస్తకాలు, అడంగళ్, 1బీలు పూర్తిస్థాయిలో రెవెన్యూ రికార్డుల్లో పరిశీలిం చి, నిర్ధారించుకున్న అనంతరం సంబంధిత వ్యక్తులపై కేసులు పెడతామన్నారు. బ్యాంక్‌ను మోసం చేసి రుణాలు పొందినందుకు బ్యాంకు తరుఫున కూడా కేసు పెట్టాలని మేనేజర్ వీరరాఘవులుకు సూచించారు. ఈ టెక్నాలజీకి సంబంధించిన అడంగళ్, 1బీలను ఫోర్జరీ చేయడాన్ని ఉన్నతాధికారుల దృష్టికి తీసుకువెళతామన్నారు. నకిలీ పాసుపుస్తకాల సూత్రధారులను పట్టుకుంటే పూర్తివిషయాలు వెలుగులోకి వస్తాయన్నారు. 10 మంది నకిలీ పాసుపుస్తకాలు, అడంగళ్, 1బీల వివరాలను నమోదు చేసుకున్నారు.


 * నాబార్డ్ ప్రతిపాదన
 * రబీ, టర్మ్ రుణాలూ ఖరారు
 * జిల్లాల వారీగా కేటాయింపు
 సాక్షి, హైదరాబాద్:  వ్యవసాయ ఉత్పత్తుల పెంపులో కీలక భూమిక పోషించే రుణ ప్రణాళిక ఖరారైంది. ప్రస్తుత ఖరీఫ్ కాలానికి రూ.30,587.59 కోట్ల పంట రుణాలు ఇచ్చేలా ‘నాబార్డ్’ ప్రణాళికను ప్రతిపాదించింది. ఖరీఫ్‌తో పాటు రబీకి, వ్యవసాయానుబంధ రంగాలకు ఇచ్చే కాల పరిమితి (టర్మ్) రుణాలనూ ఖరారు చేసింది.
 
 2015 ఆర్థిక సంవత్సరానికి వ్యవసాయ శాఖ ప్రకటించిన వార్షిక రుణ ప్రణాళిక ప్రకారం రూ.69,548 కోట్లను బ్యాంకర్లు రైతులకు రుణాలుగా ఇస్తారు. ఈనెల 29న హైదరాబాద్‌లో జరిగే రాష్ట్ర స్థాయి బ్యాంకర్ల సమావేశంలో దీనికి ఆమోదముద్ర పడుతుంది. రుణ ప్రణాళిక అమలుకు సహకార సంస్థలు, వాణిజ్య, ప్రాంతీయ గ్రామీణ బ్యాంకులు సహకరించాలని ప్రభుత్వం విజ్ఞప్తి చేసింది. ప్రస్తుత ఆర్థిక సంవత్సరంలో ఖరీఫ్‌లో పంట రుణాలుగా రూ.30,587.59 కోట్లు, రబీలో రూ.20,391.73 కోట్లు, వ్యవసాయానుబంధరంగాలు సహా కాల పరిమితి రుణాలుగా రూ.18,569.51 కోట్లు ఇవ్వాలని నాబార్డ్ ప్రతిపాదించింది. ఏయే జిల్లాలకు ఎంతెంత మొత్తంలో కేటాయించిందీ ప్రకటించింది.
  
 ఈ ఏడాదికీ పావలా వడ్డీ..
 చిన్న, సన్నకారు రైతులు రూ.లక్ష నుంచి రూ.మూడు లక్షల లోపు తీసుకునే రుణానికి పావలా వడ్డీ ఈ ఏడాది కూడా వర్తిస్తుంది. తీసుకున్న రుణాన్ని సకాలంలో చెల్లించే రైతులకు ఈ పథకం వర్తిస్తుంది. నిర్ణీత గడువులోపు చెల్లించే రైతులు 3 శాతం వడ్డీని చెల్లిస్తే మిగతా మొత్తాన్ని కేంద్ర, రాష్ట్ర ప్రభుత్వాలు చెల్లిస్తాయి. ఇందుకోసం రాష్ట్ర ప్రభుత్వం ప్రస్తుత ఆర్థిక సంవత్సరానికి రూ.పది కోట్లను కేటాయించింది.
  
 వడ్డీ లేని రుణాలకు.. : రూ.లక్షలోపు రుణం తీసుకునే కౌల్దారులు, సన్నకారు రైతులు.. రుణాన్ని ఏడాదిలోపు చెల్లిస్తే ఎటువంటి వడ్డీని బ్యాంకులు వసూలు చేయవు. ఇందుకోసం ఈ ఏడాది బడ్జెట్‌లో రూ.17.2 కోట్లను కేటాయించింది. ఈ పథకాలన్నింటికీ టీడీపీ ప్రభుత్వ రుణమాఫీ పెద్ద ఆటంకంగా నిలిచింది.  కొత్తరుణాలు ఇవ్వలేమని, కనీసం పాతవాటిని పునరుద్ధరించుకోవడమైనా చేయాలని బ్యాంకర్లు రైతులపై ఒత్తిడి చేస్తున్నారు. ఖరీఫ్ ప్రారంభమైనా ఇంతవరకు కొత్త అప్పులు పుట్టకపోవడం రైతుల్ని తీవ్రంగా కుంగదీస్తోంది. దీంతో అనివార్యంగా ప్రైవేటు వడ్డీ వ్యాపారులను ఆశ్రయించాల్సి వస్తోంది.


 సంగారెడ్డి క్రైం: సహకార బ్యాంకుల ద్వారా ఈ ఏడాది రూ.250 కోట్ల పంట రుణాలివ్వనున్నట్టు డీసీసీబీ చైర్మన్ చిట్టి దేవేందర్‌రెడ్డి అన్నారు. శనివారం కలెక్టరేట్‌లోని ఆడిటోరియంలో జిల్లాలోని 105 సహకార సంఘాల అధ్యక్షులు, సీఈఓలతో నిర్వహించిన సమావేశంలో ఆయన మాట్లాడారు. జిల్లాలో 105 సంఘాలుండగా కేవలం ఐదు మాత్రమే లాభాల్లో ఉన్నాయన్నారు. ఈ మధ్యనే మరో 60 సంఘాలు లాభాల బాటలోకి వచ్చాయని తెలిపారు. పెండింగ్‌లో ఉన్న రూ.40 కోట్ల దీర్ఘకాలిక రుణాలను రైతుల నుంచి వసూలు చేసేందుకు చర్యలు తీసుకోవాలన్నారు.
  
  ఐదెకరాలున్నా ట్రాక్టర్ లోన్..
  రైతు దరఖాస్తు చేసుకున్న 20 రోజుల్లోగా రుణం మంజూరు చేసేలా చర్యలు తీసుకుంటున్నామని చైర్మన్ తెలిపారు. గతంలో 12 ఎకరాల భూమి ఉన్న వారికి ట్రాక్టర్ రుణం ఇచ్చే వారమని, ఇప్పుడు 5 ఎకరాల భూమి ఉన్న వారికి కూడా ఇస్తామన్నారు. గతంలో అన్ని రకాల రుణాలు రూ.350 కోట్ల మేర అందించామని, ఈ ఏడాది రూ.500 కోట్ల వరకు రుణాలిస్తామన్నారు. ఐదు నుంచి వేయి మెట్రిక్ టన్నుల సామర్థ్యం గల గోదాములను ప్రభుత్వ సహకారంతో నిర్మిస్తామన్నారు. సహకార సంఘాలు ఆకాశమే హద్దుగా వ్యాపారం చేసేందుకు కొత్త ప్రణాళికలు సిద్ధం చేస్తున్నామని అన్నారు.
  
  సిద్ధంగా ఎరువులు : జేసీ
  ఖరీఫ్‌లో రైతులకు సకాలంలో అందించేందుకు వీలుగా 95 వేల మెట్రిక్ టన్నుల ఎరువులను సిద్ధంగా ఉంచినట్టు జేసీ వెంకట్‌రాంరెడ్డి తెలిపారు. ఈ ఖరీఫ్‌లో రైతులకు ఎలాంటి ఇబ్బందులు రాకుండా వారి నుంచి పెద్ద ఎత్తున దానయ సేకరించేందుకు పకడ్బందీ ప్రణాళికలు తయారు చేసినట్లు వివరించారు.
  
  రేక్ పాయింట్‌ను మార్చాలి..
  రైతుల నుంచి సహకార సంఘాలు పది శాతం మార్జిన్‌మనీ సేకరిస్తే ఆ డబ్బును కేంద్ర బ్యాంకు దగ్గర పెట్టుకోవడం వల్ల అవి నష్టాల పాలవుతున్నట్టు కోనాపూర్ సహకార సంఘం అధ్యక్షుడు దేవేందర్‌రెడ్డి అన్నారు. జహీరాబాద్‌లో ఉన్న రేక్ పాయింట్‌ను జిల్లా మధ్యలోకి మార్చాలని కోరా రు. సమావేశంలో వ్యవసాయ శాఖ జేడీ హుక్యా నాయక్, జిల్లా సహకార ఇన్‌చార్జి అధికారి సత్యనారాయణరెడ్డి, మార్క్‌ఫెడ్ ప్రతినిధులు, సహకార బ్యాంకు అధికారులు, పీఏసీఎస్ అధ్యక్ష, కార్యదర్శులు, డీఎల్‌సీఓలు పాల్గొన్నారు.
  


 - వేలకోట్లలో రుణాలు, వందల కోట్లలో కేటాయింపులు
 - అన్ని అర్హతలూ ఉన్నా జాబితాలో పేరు లేదు
 - రుణమాఫీ ఫిర్యాదు కేంద్రాలకు భారీ క్యూలు
 - అయినా పట్టించుకోని ప్రభుత్వం
 ఓటరు దేవుడి ‘రుణం’ తీర్చుకుంటానన్నారు. డబ్బు కోసం ఆశించకుండా రుణ విముక్తుల్ని చేస్తానని నమ్మబలికారు. అధికారం చేతికందాక దా‘రుణం’గా మోసం చేశారు. అరకొర నిధులు విదిల్చి సరిపెట్టుకోమన్నారు.  రుణమాఫీ దరఖాస్తు కేంద్రాలు రణరంగాలను తలపిస్తున్నా పట్టించుకోలేదు. నిండా మోసపోయిన రైతన్న అప్పులు తెచ్చి బ్యాంకులకు వడ్డీలు చెల్లిస్తున్నాడు. జిల్లాలో ప్రతి పల్లెలో ఇదే పరిస్థితి. రుణమాఫీకి అర్హత కలిగిన 7.03లక్షల రైతుల బ్యాంకు ఖాతాలకు గానూ పూర్తిగా రుణమాఫీ అయ్యింది ఒక్కటీ లేదంటే  నమ్మితీరాల్సిందే.
 
 సాక్షి, విజయవాడ : జిల్లాలో వేలకోట్ల రూపాయల పంట రుణాలు, బంగారం కుదవ పెట్టి లక్షల సంఖ్యలో రైతులు వ్యవసాయ రుణాలు తీసుకున్నారు. కానీ, వందల మందికి కూడా పూర్తిగా రుణమాఫీ జరగలేదు. జిల్లాలో 2013 సంవత్సరం డిసెంబర్ 31 నాటికి 7.03 లక్షల రైతులు బ్యాంకు ఖాతాలకు సంబంధించి రూ.9,137 కోట్లు మొత్తం బకాయిలుగా ఉన్నాయి. వీటన్నింటినీ పూర్తిగా మాఫీ చేస్తామని ప్రభుత్వం ప్రకటించి జాబితా కూడా సిద్ధం చేసింది. చివరకు కమిటీల పేరుతో కాలయాపన చేసి రుణమాఫీ నాలుగు విడతల్లో చేపడతామని చెప్పి కొద్దినెలల కిందట మొదటి విడత మాఫీ ప్రకటించారు.
 
 మొదటి విడతలో 2.84 లక్షల మంది రైతులకు రూ.997 కోట్ల బకాయిలు మాఫీ చేశామని బ్యాంకర్లు ప్రకటించారు. కానీ, వాస్తవ పరిస్థితి వేరేలా ఉంది. 2.84 లక్షల మంది రైతులకు రూ.326 కోట్లు మాత్రమే మాఫీ అయ్యింది. రెండో జాబితాలో కూడా దాదాపు ఇదే పరిస్థితి. రెండో జాబితాలో 1.40 లక్షల మంది రైతులకు రూ.440 కోట్ల రుణమాఫీ జరిగిందని బ్యాంకర్లు ప్రకటించినా ఇప్పటివరకు రూ.188 కోట్లు మాత్రమే మంజూరయ్యాయి. వచ్చే నాలుగేళ్లలో మిగిలినది మంజూరవుతుందని బ్యాంకర్లు చెబుతున్నారు. అయితే, అసలు కన్నా వడ్డీలే అధికంగా పెరిగి ప్రభుత్వం ఇస్తున్న వేల రూపాయల రుణమాఫీ కనీసం వడ్డీకి కూడా చాలని పరిస్థితి తలెత్తింది. రూ.9,137 కోట్ల బకాయిల్లో రెండు విడతల్లో కలిపి కేవలం ఐదుశాతం మాత్రమే రుణం మాఫీ అయ్యిందంటే జిల్లాలో రుణమాఫీ ఎంత పకడ్బందీగా అమలవుతుందో తెలుస్తోంది.
 
 రుణమాఫీకి సంబంధించిన సమస్యల పరిష్కారం కోసం ఏర్పాటుచేసిన ఫిర్యాదుల కేంద్రానికి ఇప్పటి వరకు 14,500 దరఖాస్తులు వచ్చాయంటే జిల్లాలోని పరిస్థితి ఏమిటో అర్థమవుతుంది. రూ.50వేలు రుణం తీసుకున్న వారికి మాత్రమే మొదట విడతలో పూర్తిగా రుణమాఫీ జరిగింది. ఆపై మొత్తం తీసుకున్న వారికి సులభ వాయిదాల పద్ధతిలో విడతలవారీగా మంజూరవుతుంది. ఉదాహరణకు ఒక రైతు రూ.లక్ష రుణమాఫీ కావాల్సి ఉంటే.. అన్ని అర్హతలు ఉండి మొదటి విడత జాబితాలో పేరు ఉంటే ఏటా రూ.25వేల చొప్పున నాలుగు విడతల్లో బాకీ మాఫీ అవుతుంది. అయితే, బాకీ మాఫీ అయ్యే నాటికి మరో రూ.30వేలు వడ్డీ పడుతుంది.
 
 ఉద్యానవన పంటలకు మాఫీ నిల్
 జిల్లాలో ఉద్యానవన పంటల సాగు అధికంగా ఉంది. పశ్చిమ కృష్ణాలోని జగ్గయ్యపేట, నందిగామ, నూజివీడు, తిరువూరు, మైలవరం, జి.కొండూరు, చాట్రాయి తదితర ప్రాంతాల్లో ఉద్యానవన పంటల సాగు అధికంగా ఉంది. మామిడి మూడు లక్షల ఎకరాల విస్తీర్ణంలో ఉంది. ఇదికాకుండా జామ, సపోట, పసుపు, జామాయిల్, కూరగాయలు తదితర పంటల సాగు ఎక్కువగా జరుగుతోంది. ఈ పంటలకు రుణమాఫీ వర్తించకపోవటంతో జిల్లాలో వేలాదిమంది రైతులు ఇబ్బందులు పడుతున్నారు.
 
 పంటకో రుణం
 స్కేల్ ఆఫ్ ఫైనాన్స్ కింద ఒక్కో పంటకు రుణం రేట్లు నిర్ణయించి ఆ మేరకు బ్యాంకర్లు మంజూరు చేస్తున్నారు. అయితే, అవి కూడా ఖరీఫ్‌లో ఒక విధంగా, రబీలో మరో విధంగా ఉంటాయి. ఉదాహరణకు పత్తికి గరిష్టంగా రూ.28వేలు, వరికి రూ.22వేలు, మిర్చికి రూ.42వేలు, చెరుకు పంటకు రూ.40వేలే బ్యాంకర్లు రుణాలు మంజూరు చేస్తారు. ఖరీఫ్ కంటే రబీ సీజన్‌కు సగటున రూ.2వేలు తక్కువ రుణం మంజూరు చేస్తారు.
 
 స్కేల్ వడ్డీ
 బ్యాంకర్ల వడ్డీ బాదుడు తీవ్రంగా ఉంటోంది. అసలు మీద వడ్డీ, వడ్డీ మీద ఏడాదికి ఒకసారి సీజనల్ ఇంట్రెస్ట్ పేరుతో వడ్డీ విధిస్తుంటారు. రూ.1000 నుంచి రూ.మూడు లక్షల వరకు తీసుకునే రుణాలకు వడ్డీరేటు ఏడాదికి ఏడు శాతంగా ఉంది. రుణం తీసుకున్న ఏడాదిలో చెల్లిస్తే ఏడు శాతం వడ్డీలో మూడు శాతం తగ్గిస్తారు. అంటే.. నాలుగు శాతం మాత్రమే వడ్డీ పడుతుంది. అదే.. ఏడాది దాటితే వడ్డీశాతం భారీగా పెరుగుతుంది. 14.5 శాతం వడ్డీ చెల్లించాల్సి ఉంటుంది. ఇది కాకుండా రెండు శాతం పీనల్ ఇంట్రస్ట్ పడుతుంది. అలాగే, రూ.లక్షలోపు రుణానికి ఏడాదికి ఏడు శాతం, ఏడాది దాటితే 12 శాతం, దీంతో పాటు 2శాతం పీనల్ ఇంట్రెస్ట్ పడుతుంది. రుణమాఫీ రైతులందరికీ పీనల్ ఇంట్రెస్ట్ వర్తిస్తుంది.


 ప్రణాళిక అమలులో బ్యాంకర్ల నిర్లిప్తత
  - భారీ అంచనాలతో ప్రారంభం.. తుదకు కొర్రీలు
 - యేటా లక్ష్యాన్ని
 - సాధించలేకపోతున్న వైనం
 - గత యేడాది ప్రగతి 83.86 శాతమే
 సాక్షి, రంగారెడ్డి జిల్లా:  వార్షిక సంవత్సరం ప్రారంభంలో అట్టహాసంగా రూపొందించే రుణప్రణాళికలు.. గడువు ముగిసే నాటికి అబాసుపాలవుతున్నాయి. భారీతనం కోసం వేల కోట్లతో ప్రణాళికలు తయారుచేస్తున్న బ్యాంకర్లు.. ఏడాది ముగిసే నాటికి కొర్రీలు, నిబంధనలు సాకుగా చూపుతూ నిర్దేశించిన లక్ష్యాన్ని సాధించడంలో విఫలమవుతున్నారు.
 
 గతేడాది వార్షిక ప్రణాళిక లక్ష్యసాధనలో జిల్లా బ్యాంకుల పురోగతి అంతంత మాత్రం గానే ఉంది. రూ.4,558.95 కోట్ల రుణాల పంపిణీకి గాను రూ.3,823.14 కోట్లు రుణాలిచ్చినట్లు లెక్కల్లో చూపారు. మొత్తంగా 83.86శాతం పురోగతి సాధిం చినట్లు వెల్లడించారు. ఇవికాకుండా ఇతర కేటగిరీల్లో ఇచ్చిన రూ.657.51 కోట్లు కూడా లక్ష్యసాధనలో చూపి చేతులు దులుపుకున్నారు. లక్ష్యసాధన ఘనంగా ఉన్నట్లు పేర్కొంటూ.. ఈ ఏడాది ప్రణాళికలో మరో రూ.350.64 కోట్లు అదనంగా చేర్చి ఘనతను చాటారు.
 
  తిరగరాసిన లెక్కలు
 గతేడాది ఖరీఫ్, రబీ సీజన్లలో రూ.714.66 కోట్ల పంటరుణాలిచ్చేలా యంత్రాంగం ప్రణాళిక సిద్ధం చేసింది. అయితే కరువు నేపథ్యంలో ఆయా సీజ న్లలో రైతులను ఇబ్బంది పెట్టొందంటూ పంటరుణాలను రీషెడ్యూల్ చేయాల్సిం దిగా ఆర్‌బీఐ ఆదేశాలు జారీ చేసింది. ఈ క్రమంలో జిల్లాలో దాదాపు రూ.550 కోట్ల మేర రుణాలను రీషెడ్యూల్ చేశారు. కానీ బ్యాంకులు మాత్రం ఈ మొత్తాన్ని లక్ష్యసాధనలో చూపాయి. అదేవిధంగా భూఅభివృద్ధి కోసం రూ.26.15 కోట్ల రుణాలివ్వాలని లక్ష్యాన్ని నిర్దేశించుకోగా..
 
 కేవలం రూ. 17.57 కోట్లు మాత్రమే ఇచ్చారు. పాడి పరిశ్రమల, కోళ్లు, గొర్రెలు, మేకల పెంపకం కోసం రూ.318.49 కోట్ల రుణాలివ్వాల్సిం దిగా ప్రణాళికలో పేర్కొన్నారు. కానీ రూ.275.11 కోట్లు రుణాలిచ్చినట్లు నివేదికలో పేర్కొన్నారు. ఇలా అన్ని కేటగిరీల్లో లక్ష్యసాధన చివరకు మిగిలి పోయింది. ఇతర అనుభంధ రుణాలు రూ.50.38 కోట్లు ఇవ్వాల్సి ఉండగా.. రూ.708.34 కోట్లు ఇచ్చినట్లు లెక్కలు చూపారు. ఈ మొత్తాన్ని లక్ష్యసాధనకు జతచేయడంతో పురోగతిలో భారీ మా ర్పులు చోటుచేసుకోవడం గమనార్హం.


 హైదరాబాద్: ఆంధ్రప్రదేశ్ ముఖ్యమంత్రి చంద్రబాబు నాయుడు రుణమాఫీ ప్రకటనతో రైతులు బ్యాంకు రుణాల రాక సమస్యలు ఎదుర్కొంటున్నారు. ఏపీలో రైతులకు రుణాల మంజూరులో భారీ కోత విధించారు. గతేడాది రుణాల లక్ష్యం 56,019 కోట్ల రూపాయలకు గాను 22,443 కోట్లు మాత్రమే మంజూరు చేశారు. ఆంధ్రప్రదేశ్ 189వ ఎస్ఎల్బీసీ నివేదికను లీడ్ బ్యాంక్ ప్రకటించింది. శుక్రవారం రాష్ట్ర స్థాయి బ్యాంకర్ల సమావేశం జరుగుతోంది.
 
 ఏపీలో 40 శాతం మాత్రమే రుణాలు ఇవ్వగలిగామని బ్యాంకులు వెల్లడించాయి. ఈ ఏడాది ఖరీఫ్లో 13,789 కోట్లు, రబీలో 8,684 కోట్ల రూపాయల రుణాలు ఇచ్చినట్లు ప్రకటించాయి.  చంద్రబాబు రణమాఫీ చేస్తానని ప్రకటించడంతో రైతులు రుణాలు చెల్లించలేదని ఎస్ఎల్బీసీ నివేదికలో పేర్కొన్నారు. దీంతో బకాయిలు గణనీయంగా పెరిగిపోయాయని, నిధులు, బ్యాంకుల లావాదేవీలను తీవ్రంగా దెబ్బతీశాయని వెల్లడించింది. ప్రస్తుత ఆర్థిక సంవత్సరం మరో మూడు రోజులు ముగుస్తోందని, రైతులు బకాయిలు చెల్లించి రుణాలకు అర్హత పొందాలని సూచిస్తున్నట్టు ఎస్ఎల్బీసీ పేర్కొంది.


 నేడు కుప్పంకు చంద్రబాబు రాక
 అధికారం చేపట్టి 8 నెలలు
 జిల్లాకు ఇచ్చిన హామీలు 25 పైనే
 ఒక్క హామీ నెరవేర్చని వైనం
 ఆగ్రహం వ్యక్తం చేస్తున్న జిల్లావాసులు
  
 చిత్తూరు: చంద్రబాబు ముఖ్యమంత్రి పదవి చేపట్టి 8 నెలలు గడిచిపోయింది. అధికారం చేపట్టిన తరువాత ఆయన జిల్లాకు రావడం ఇది ఆరోసారి. ఎన్నికల ప్రచారంలో, ముఖ్యమంత్రి పదవీ బాధ్యతలు చేపట్టిన తరువాత రాష్ట్ర ప్రజలతో పాటు జిల్లా ప్రజలకు చంద్రబాబు వందల కొద్దీ హామీలిచ్చారు. అందులో జిల్లాకు సంబంధించినవి 25కు పైగా ఉన్నాయి. కానీ జిల్లాకు సంబంధించి ఏ ఒక్క హామీని నెరవేర్చిన పాపాన పోలేదు. జిల్లాలో అడుగుపెట్టిన ప్రతిసారీ పుట్టిన ఊరికి అన్నీ చేసేస్తానంటూ బాబు మాటలతో జనాన్ని మభ్యపెడుతున్నారు. జిల్లాలో ప్రధానంగా ఉన్న తాగునీటి సమస్య పరిష్కారానికి ముఖ్యమంత్రి తీసుకునే చర్యలు కానరావడం లేదు. నీటి సమస్య పరిష్కారం కావాలంటే హంద్రీ-నీవా, కండలేరు పథకాలు పూర్తికావడం మినహా మరో మార్గం లేదు. కానీ ప్రభుత్వం ఆ పథకాలకు నామమాత్రపు నిధులు కూడా కేటాయించలేదు. ఇక జిల్లాలో రైతు, డ్వాక్రా రుణమాఫీ హామీలనే బుట్టదాఖలు చేసిన చంద్రబాబు ఆ తరువాత ఇదే పంథాను కొనసాగిస్తున్నారు. సొంత నియోజకవర్గం కుప్పం రైతులు ఏనుగుల వరుస విధ్వంసాలకు తీవ్రంగా నష్టపోతున్నా వారికి సరైన పరిహారమూ ఇచ్చే పరిస్థితి లేదు. సీఎం అయిన తరువాత సొంత జిల్లాకు పలుమార్లు వస్తున్నా ఒక పనీ నేరవేర్చకపోవడంతో ప్రజలు ఆగ్రహం వ్యక్తం చేస్తున్నారు.
 
 బాబు హామీలను పరిశీలిస్తే....
 
 జిల్లాలో 40 జాతీయ, ప్రాంతీయ, సహకార బ్యాంకుల పరిధిలోని 478 బ్రాంచుల పరిధిలో 2013 డిసెంబర్ 31వనాటికి 8,70,321 మంది రైతులు 11,180.25 కోట్ల పంట రుణాలను తీసుకోగా, వారిలో 3.73లక్షల మంది  రైతులు మాత్రమే రుణమాఫీకి అర్హులంటూ బ్యాంకులు ప్రభుత్వానికి నివేదించి చేతులు దులుపుకున్నా యి. రుణమాఫీ చేస్తారని కోటి ఆశలతో ఓట్లు వేసి గెలిపించిన జనానికి చంద్రబాబు నిరాశ కల్పించారు.
      
 డ్వాక్రా రుణాలన్నీ మాఫీ చేస్తానని ఎన్నిక ల్లో హామీ ఇచ్చారు. తరువాత ఒక్కొక్క డ్వాక్రా మహిళకు రూ.10వేల చొప్పున ఇస్తానంటూ మా టమార్చారు. జిల్లాలో 7.8లక్షల మంది సభ్యులున్నారు. ఈ లెక్కన రూ.780 కోట్లు చెల్లించాలి. ఇంతవరకు పైసా ఇచ్చిన పాపాన పోలేదు.
      
 ఎన్నికల ముందు చెరకు రైతుల బకాయిలు చెల్లిస్తానని పదేపదే చెప్పిన బాబు  చిత్తూరు, గాజులమండ్యం సహకార చక్కెర ఫ్యాక్టరీల పరిధిలో దాదాపు రూ.30 కోట్లు బకాయిలున్నా పట్టించుకోలేదు.
      
 మేర్లపాక వద్ద ఐఐటీ ఏర్పాటుకు ప్రభుత్వం హామీ ఇచ్చినా అది ఆచరణ దాల్చలేదు. 450 ఎకరాల భూమిని గుర్తించి అధికారులు ప్రభుత్వానికి నివేదించారు. వచ్చే విద్యాసంవత్సరం తరగతులు ప్రారంభిస్తామని కేంద్ర మానవవనరుల శాఖ మంత్రి ప్రకటించినా ఆ దిశగా చర్యలు చేపట్టలేదు.
      
 రేణిగుంట విమానాశ్రయాన్ని అంతర్జాతీయ ఎయిర్‌పోర్టుగా చేస్తామని చంద్రబాబు హామీ ఇచ్చినా ప్రతిపాదనలేవీ కేంద్రానికి చేరని దాఖలాలు లేవు.  
      
 కుప్పంలో ఎయిర్‌పోర్టు ఏర్పాటు చేస్తామని బాబు చెప్పినా సెప్టెంబర్‌లో పర్యటించిన ఎయిర్‌పోర్టు అథారిటీ ఆఫ్ ఇండియా (ఐఐఏ) చైర్మన్ అలోక్ సిన్హా ఇక్కడ ఎయిర్‌పోర్టు ఏర్పాటు చేయలేమని, అవసరమైతే ఎయిర్‌స్ట్రిప్‌ను ఏర్పాటు చేస్తామని చెప్పారు. దీనిపై ప్రభుత్వ చర్యలేవీ లేవు
      
 సెంట్రల్ యూనివర్శిటీ హామీ గాలిలో కలిసింది. యూనివర్శిటీని అనంతపురం జిల్లాకు తరలించారు.
      
 తిరుపతి మెగాసిటీ ప్రతిపాదన ముందుకు సాగడం లేదు. రంగంపేట సమీపంలో అటవీ భూములను డీ - నోటిఫై చేసి తిరుపతి మెగాసిటీ ఏర్పాటు చేయాలని ప్రతిపాదిస్తూ ప్రభుత్వానికి నివేదిక పంపారు. దీనిపై నిర్ణయం వెలువడలేదు.
      
 విజయవాడ, గుంటూరు, తెనాలి, మంగళగిరి మె ట్రోరైలు ప్రాజెక్టు మంజూరు చేస్తూ ప్రభుత్వం నాలు గు నెలల క్రితం ఉత్తర్వులు జారీ చేసింది. ఆ ఉత్తర్వు ల్లో తిరుపతి ప్రస్తావన లేదు. తిరుపతిలో మెట్రోరైలు ప్రాజెక్టు సాధ్యసాధ్యాలను పరిశీలించే బాధ్యత శ్రీధరన్‌కు అప్పగించారు. అది ఏమైందో మరి.
      
 జిల్లాను హార్టికల్చర్ హబ్ చేస్తానని నవంబర్ 5న పర్యటనలో చంద్రబాబు మరోమారు హామీ ఇచ్చారు. ఆ హామీ అమలుకు చర్యలు లేవు.
      
 తిరుపతి, శ్రీకాళహస్తి, కాణిపాకంను ఆధ్యాత్మిక కారిడర్ చేస్తామన్న హామీ కార్యరూపం దాల్చలేదు.
      
 హాంద్రీనీవా రెండవ దశ పనులకు సంబంధించి 2015-16లో రూ.2,500 కోట్లు కేటాయించాలని త్రిసభ్య కమిటీ ప్రతిపాదించింది. కానీ 2015 బడ్జెట్‌లో రూ.100 కోట్లు మాత్రమే కేటాయించారు.
    
 టమాట రైతులకు రుణమాఫీని అమలుచేస్తానని తొలుత హామీ ఇచ్చిన చంద్రబాబు, ఆ తరువాత ఎకరాకు రూ.10వేల చొప్పున మాఫీ చేస్తామంటూ మాటమార్చారు. ఇప్పటికీ ఒక్క రైతుకు కూడా పైసా ఇవ్వలేదు.
  


 * అరకొరగానైనా రుణ మాఫీ పొందిన కౌలు రైతు అరుదే
 * కౌలు రైతులకు బ్యాంకులు పంట రుణాలు ఇచ్చిందే అతి తక్కువ
 * తొలుత కౌలు రైతుల రుణాలే మాఫీ అంటూ చంద్రబాబు ఆర్భాటం
 * కానీ కౌలు రైతుకు రూపాయి కూడా మాఫీ అయిన దాఖలాలే లేవు
 * నిలువునా మోసపోయామంటున్న కౌలురైతులు
 * బ్యాంకు నోటీసులు, ప్రయివేటు అప్పులతో కుదేలు
 * కాడి కింద పడవేయక తప్పదంటున్న కౌలు రైతులు
 * సాక్షి నెట్‌వర్క్ క్షేత్రస్థాయిలో నిర్వహించిన కేస్ స్టడీస్‌లో వాస్తవాలు
  
 చంద్రబాబు సర్కారు రుణ మాఫీ మాయాజాలంలో ఇది మరో కోణం! అరకొరగా విదిల్చిన రుణ మాఫీ సొమ్ము.. రైతులు తమ సొంత భూములపై తీసుకున్న అప్పులకు ఇప్పటివరకూ అయిన వడ్డీకి కూడా ఏ మూలకూ రాలేదు. వ్యవసాయం కోసం తాకట్టు పెట్టిన పుస్తెలు, తాళిబొట్లు విడిపించి తెస్తానన్న మాట.. నీటి మూటగానే మిగిలిపోయింది. ఒక్కటంటే ఒక్క పుస్తెల తాడు కూడా విడిపించలేదు. ఇక.. ‘ఒక పొలంపై భూ యజమాని, కౌలు రైతు ఇద్దరూ రుణం పొంది ఉంటే మాఫీ కౌలురైతుకే వర్తిస్తుంద’ని చంద్రబాబు ప్రభుత్వం గంభీరమైన ప్రకటనలు చేసింది.
  
  ఆచరణలో చూస్తే.. కౌలురైతు అనాథగానే మిగిలిపోయాడు. వారు తీసుకున్న రుణాల్లో శ్రీకాకుళం నుంచి అనంతపురం వరకూ ఏ ఒక్కరికీ ఒక్క రూపాయి కూడా మాఫీ కాలేదు. రుణాలు మాఫీ చేస్తానంటూ ఎన్నికల్లో ఊరూ వాడా హామీలు గుప్పించిన చంద్రబాబు అందలం ఎక్కాక ఇంత మోసం చేస్తాడనుకోలేదంటూ కౌలు రైతులు బిక్కమొహం వేస్తున్నారు. ‘‘మాకు బ్యాంకులు రుణాలు ఇవ్వడమే తక్కువ.. ఆ తక్కువ రుణాలను కూడా మాఫీ చేయకుండా మమ్మల్ని బ్యాంకులు, రెవెన్యూ ఆఫీసులు, జిరాక్సు సెంటర్ల చుట్టూ చంద్రబాబు తిప్పుతున్నాడు’’ అని వారు ఆవేదన వ్యక్తంచేస్తున్నారు. రుణమాఫీ అమలులో కౌలు రైతుల స్థితిగతులను ‘సాక్షి’ క్షేత్ర స్థాయిలో పరిశీలించింది. రుణమాఫీ వల్ల సంతృప్తి చెందిన ఒక్క కౌలు రైతు కుటుంబమూ కనిపించలేదు. కనీసం పేద కౌలు రైతులకున్న రూ. 10 వేలు, రూ. 15 వేలు రుణాలు కూడా మాఫీకి నోచుకోలేదంటే పరిస్థితిని అర్థం చేసుకోవచ్చు.
  
  కౌలు రైతు కార్డులు, ఆధార్ కార్డులు వంటి అవసరమైన పత్రాలన్నీ సమర్పించినా రుణ మాఫీ ఎందుకు కాలేదని వారు అడిగితే.. సమాధానం చెప్పే వారే కరువయ్యారు. అదేమంటే ఆ ఆఫీసుకు వెళ్లు, ఈ ఆఫీసుకు వెళ్లు అని వాళ్లు కాళ్లరిగేలా తిప్పుతున్నారు. రెండు మూడేళ్లుగా అధిక వర్షాలు, తుపానుల తాకిడికి, వర్షాభావ పరిస్థితుల్లో పంటలు చేతికందక అప్పుల్లో మిగిలిన కౌలు రైతుల పరిస్థితి ఇప్పుడు అగమ్యగోచరంగా మారింది. భూ యజమానులకు ముందస్తు కౌలు చెల్లించలేక, బయట ప్రైవేటు అప్పులు పుట్టక, బ్యాంకులు జారీ చేసే నోటీసులతో.. ఉక్కిరిబిక్కిరి అవుతున్నారు. మాఫీ చేస్తానన్న చంద్రబాబు మాటను నమ్మి నిలువునా మోసపోయామని వాపోతున్నారు.
  - సాక్షి నెట్‌వర్క్
  
  ప్రభుత్వ నిర్లక్ష్యం.. బ్యాంకుల నిరాదరణ...
  ప్రభుత్వాల నిర్లక్ష్యం, బ్యాంకుల నిరాదరణ కారణంగా కౌలు రైతులు చాలా కాలంగా వ్యవస్థాగత రుణాలకు (బ్యాంకు) దూరంగానే ఉన్నారు. ఉదాహరణకు 2013-14 ఆర్థిక సంవత్సరంలో ఉమ్మడి రాష్ట్రంలో 14.55 లక్షల మంది కౌలురైతులకు ‘ఎల్‌ఈసీ’ల (రుణ ఆర్హత కార్డులు) జారీ లక్ష్యంగా అప్పటి రాష్ట్ర ప్రభుత్వం పేర్కొంది.
  
  అయితే చివరకు జారీ చేసింది మాత్రం 4.39 లక్షల మందికే. పోనీ వీరికైనా బ్యాంకు రుణాలు అందాయా అంటే అదీలేదు. వీరిలో కేవలం 1.14 లక్షల మందికి మాత్రమే బ్యాంకులు రుణాలు ఇచ్చాయి. 2013-14 ఖరీఫ్‌లో రూ. 31,996 కోట్ల పంట రుణాలు ఇవ్వాలని బ్యాంకులు లక్ష్యాన్ని నిర్దేశించుకుంటే, అందులో రూ. 26,609 కోట్లు (83 శాతం) పంట రుణాలిచ్చారు. ఇందులో కౌలురైతులకు ఇచ్చిన రుణ మొత్తం రూ. 231.70 కోట్లు మాత్రమే. 2013-14 ఖరీఫ్‌లో బ్యాంకులు ఇచ్చిన మొత్తం పంటరుణాల్లో కౌలు రైతులకు దక్కింది కేవలం 0.87 శాతం మాత్రమే. ఈ కొద్దిపాటి రుణాలను మాఫీ చేయడానికి కూడా చంద్రబాబుకు చేతులు రావడంలేదు. ఇదమిత్థమైన కారణాలు ఏమీ తెలపకుండానే వీరు మాఫీ మాఫీకి అర్హులు కాదంటున్నారు. మేం ఎందుకు అర్హులం కాదన్న కౌలు రైతుల ప్రశ్నకు అటు బ్యాంకులు కానీ, ఇటు రెవెన్యూ అధికారులు కానీ, ప్రభుత్వం కానీ సమాధానం చెప్పడం లేదు.  
  
  రైతుల ఆగ్రహాన్ని బ్యాంకులపైకి మళ్లించే ఎత్తుగడ...
  కౌలు రైతులకు రుణమాఫీ వర్తింప చేయడంలో ఇన్ని అవకతవకలు చోటుచేసుకుంటుంటే వాటిని సరిదిద్దాల్సిన ప్రభుత్వం ఆ పని చేయకుండా.. బ్యాం కులపై తిరగబడమంటూ రైతులకు సలహాలిస్తోంది. సాక్షాత్తు వ్యవసాయ శాఖ మంత్రే ‘రుణాలు మాఫీ చేయకపోతే బ్యాంకుల ముందు ఆందోళనలు చేయండి. పోలీసు కేసులు లేకుండా మేం చూసుకుంటాం’ అనడంలోని పరమార్థం ఇప్పుడిప్పుడే రైతులకు అర్థమవుతోంది.రుణమాఫీలోని డొల్లతనం కారణంగా వ్యక్తమయ్యే ఆగ్రహావేశాలను ప్రభుత్వం వైపు కాకుండా బ్యాంకుల వైపు మళ్లించే చౌకబారు ఎత్తుగడే ఇది అని విశ్లేషకులు వ్యాఖ్యానిస్తున్నారు. రుణమాఫీ వర్తించక, బ్యాంకుల్లో కొత్త రుణాలు పుట్టకపోతే కాడి కిందపడేయాల్సిందే అని కౌలు రైతు అంటున్నాడు.  
  
  పేరు: శేఖన్న
  ఊరు: కర్నూలు జిల్లా  బేవినహాల్
  కౌలు పొలం: 5 ఎకరాలు
  రుణం: రూ. 10,000,
  మాఫీ: ఒక్క పైసా కూడా కాలేదు
  కారణం: తెలీదు
  
  బాబు వచ్చాక అప్పుపోతుందనుకున్నా..
  ‘‘మూడేళ్ల కిందట.. నాతో సహా ఐదుగురు కౌలు రైతులను గ్రూపుగా చేసి ఒక్కొక్కరికి రూ. 10,000 చొప్పున హాలహర్వి ఇండియన్ బ్యాంకు వారు రూ. 50,000 అప్పు ఇచ్చారు.  మూడేళ్లుగా  చెల్లిస్తూ వచ్చాం. చంద్రబాబు వచ్చాక అప్పు పోతుందని కట్టలేదు.  అన్ని పత్రాలను బ్యాంకుకు ఇచ్చాను. అయినా అప్పు పోలేదు. ఇప్పుడేమో అసలు,వడ్డీ కూడా కట్టమంటున్నారు.  .’’  
  
  పేరు: యనమదల సత్యనారాయణ
  ఊరు: తూ.గో. జిల్లా మామిడికుదురు,
  కౌలు భూమి: 70 సెంట్లు
  రుణం: రూ. 10,000
  మాఫీ: పైసా కూడా కాలేదు
  కారణం: ఎవరూ చెప్పటం లేదు
  
  మాఫీ హామీని నమ్మి మోసపోయా
  ‘‘నేను 70 సెంట్లు భూమి కౌలుకు తీసుకుని వరి వేశాను.  మా ఉళ్లో ఉన్న కో ఆపరేటివ్ బ్యాంకులో రూ. 10 వేలు రుణం తీసుకున్నాను. మాఫీ అయిపోతుందన్న నమ్మకంతో రుణం చెల్లించలేదు. అన్ని పత్రాలిచ్చినా మాఫీ కాలేదు. ఇప్పుడు కొత్తగా రుణం పొందే అవకాశం లేదని బ్యాంకు అధికారులు అంటున్నారు. రుణ మాఫీ హామీని నమ్మి మోసపోయాను. కొత్తగా అప్పు తీసుకుని వ్యవసాయం చేసుకునే వాడిని.’’
  
  పేరు: బెలగాపు చిన పండయ్య
  ఊరు: విజయనగరం జిల్లా
  జియ్యమ్మవలస మండలం మరువాడ
  కౌలు రుణం: రూ. 50,000
  (మరో నలుగురు రైతులతో కలిసి)
  వడ్డీ: రూ. 10,000, మాఫీ: కాలేదు
  
  అన్నిపత్రాలిచ్చినా.. పైసా మాఫీ కాలేదు!
  ‘‘నాతోపాటు మాగ్రామానికి చెందిన బెలగాం సోములు, రాములు, మండంగి నర్శింహులు, పారయ్య తదితరులంతా కలిపి ఉమ్మడి కౌలు కార్డుతో జియ్యమ్మవలస వికాస్ గ్రామీణ బ్యాంకులో 2012-13లో  రూ. 50,000 వ్యవసాయ రుణం తీసుకున్నాం. రూ. 10,000 వడ్డీ అయ్యింది. చంద్రబాబు ప్రకటనతో అప్పు తీరిపోతుందని ఆశించి ఓటేశాం. పత్రాలన్నీ ఇచ్చాం. అయితే మాకు పైసా కూడా రుణ మాఫీ కాలేదు. ’’
  
  పేరు: పల్లంరెడ్డి సాయిమోహన్‌రెడ్డి
  ఊరు: నెల్లూరు జిల్లా కొడవలూరు మండలం గుండాలమ్మపాలెం
  కౌలు పొలం: 7 ఎకరాలు
  రుణం: రూ. 50వేలు,
  మాఫీ:  కాలేదు, కారణం:తెలియదు
  
  విముక్తి పత్రం ఇచ్చి.. మాఫీ కాలేదన్నారు!
  ‘‘ఏడెకరాల పొలం కౌలు తీసుకున్నాను. నాలుగెకరాల కు రూ.50 వేల రుణం తీసుకొని వరి పంట వేశాను. ఇటీవల రుణవిముక్తి పత్రమిచ్చారు. కానీ  గతనెల 25న నోటీసు పంపారు. ఆధార్ వివరాలు సక్రమంగా లేవని.. మాఫీ వర్తించలేదని బ్యాంకు అధికారులు చెప్పారు. కానీ వివరాలు సక్రమంగానే ఉ న్నాయి. అప్పు చెల్లించకపోతే కోర్టుకు వేస్తామంటున్నారు.’’
  
  పేరు: కలిగినీడి దుర్గాదత్
  ఊరు: పశ్చిమగోదావరి జిల్లా
  నరసాపురం
  రుణం: రూ. 15,000
  మాఫీ: రూపాయి కూడా కాలేదు
  కారణం: తెలియదు
  
  ఎంత తిరిగినా.. ప్రయోజనం లేదు
  ‘‘2012 సెప్టెంబర్‌లో నరసాపురం సహకార వ్యవసాయ పరపతి సంఘంలో రూ. 15,000 అప్పు తీసుకున్నాను. మాఫీ అవుతుందని ఆశగా ఎదురు చూసాను. అయితే పైసా కూడా రుణ మాఫీ జరగలేదు. ఆరా తీస్తే.. పాస్‌బుక్ నెంబర్ తప్పుగా ఉందన్నారు.  ఏదోరకంగా రుణ మాఫీ చేయకూడదనే ఇదంతా చేస్తున్నట్టుగా కనిపిస్తోంది. రుణ మాఫీ పేరుతో మమ్మల్ని మోసం చేసారు.  
  
  పేరు: శనివాడ అప్పారావు.
  ఊరు: విశాఖ జిల్లా బుచ్చెయ్యపేట
  కౌలు పొలం: 2.5 ఎకరాలు
  రుణం: రూ. 40,000
  వడ్డీ: రూ. 12,000
  మాఫీ: రూపాయి కూడా కాలేదు
  
  ఎంతో ఆశపడ్డాను.. ఏమీ తీరలేదు...
  ‘‘నా సొంత పొలం అర ఎకరాతో పాటు, రెండున్నర ఎకరాల మెరక భూమిని ఆరేళ్లుగా కౌలు చేస్తున్నాను. కౌలు రైతు కార్డు మీద బంగారాన్ని తాకట్టుపెట్టి 2013లో రూ. 40,000 పంట రుణం తీసుకున్నాను. చెరకే పంట వేస్తే వర్షాలు, తుపాను దెబ్బతీశాయి.  ఇప్పుడు వడ్డీతో కలిసి రూ. 52,000 కట్టాలని, లేకపోతే బంగారం వేలం వేత్తామంటున్నారు బ్యాంకోళ్లు.’’
  
  పేరు: పెరుమాళ్ల కోటయ్య
  ఊరు: గుంటూరు జిల్లా క్రోసూరు మండలం ఊటుకూరు ఎస్సీ కాలనీ
  కౌలు భూమి: 1.99 ఎకరాలు
  రుణం: రూ. 35వేలు,
  వడ్డీ: రూ. 5,347, మాఫీ: కాలేదు
  
  అప్పు ఎలా తీర్చాలో అర్థం కావటంలేదు
  ‘‘నేను 1.99 ఎకరాల కౌలు భూమిలో మిర్చి సాగుచేసా ను. నేను ఆదర్శరైతుగా కూడా పనిచేసాను.  2012 ఆగస్టులో బంగారం తాకట్టు పెట్టి రూ. 35,000 వ్యవసాయ రుణం తీసుకున్నా. వడ్డీతో రూ. 40,347 అయింది. రుణమాఫీ జాబితాల్లో నాకు మాఫీ కాలే దని వచ్చింది. దీంతో బంగారం బయటకు తెచ్చుకోలేని పరిస్థితి ఏర్పడింది. ఇక  ప్రైవేట్, బ్యాంకు అప్పు ఎలా తీరుదుందో ఏమో.’’  
  
   పేరు: ఈరమ్మ
  ఊరు: కర్నూలు జిల్లా తుంబళబీడు
  కౌలు పొలం: 6 ఎకరాలు
  రుణం: రూ. 15,000
  మాఫీ: రూపాయి కూడా కాలేదు
  కారణం: ఎందుకో తెలియదు
  
  మాఫీ కాలేదు.. పంట రాలేదు..
  ‘‘పదేళ్లుగా గ్రామంలో మా బంధువులకు చెందిన ఆరు ఎకరాల భూమిని నా భర్త, కుటుంబ సభ్యులతో కలిసి కౌలుకు చేస్తున్నాం.  2012-13లో ఆలూరు ఆంధ్రప్రగతి గ్రామీణ బ్యాంకులో రూ. 15,000 వేలు అప్పు ఇచ్చారు. ఆ అప్పును తిరిగి వడ్డీతో సహా ప్రతి ఏటా చెల్లిస్తున్నాం. రుణమాఫీ అవుతుందని ఈ యేడాది కట్టలేదు. కానీ బాకీ మాఫీ కింద పోలేదు. ఇప్పుడేం చేయాలో ఏమో’’
  


 
 34 లక్షల మంది రైతుల్లో... 23 లక్షల మంది రుణాలే రె న్యువల్  
 
  ఖరీఫ్ రుణ లక్ష్యం రూ. 14 వేల కోట్లు... ఇచ్చింది రూ. 11 వేల కోట్లు
 
  రబీ సీజన్‌కు సంబంధించి కూడా లక్ష్యానికి దూరంగా రుణాల మంజూరు
 
  నెలాఖరులోగా ‘రెన్యువల్’ పూర్తి చేసి రుణాలివ్వాలని తెలంగాణ ప్రభుత్వఆదేశం
 
  రైతులే ముందుకు రావడం లేదంటున్న బ్యాంకర్లు
 
  లక్ష్యాల మేరకు ప్రాధాన్య, అప్రాధాన్య రంగాలకు రుణాలిచ్చామని వెల్లడి
 
 సాక్షి, హైదరాబాద్: తెలంగాణలో ఇంకా దాదాపు 11 లక్షల మంది రైతులకు చెందిన పంట రుణాలు రెన్యువల్ కాలేదు. ఖరీఫ్ సీజన్‌లో మొత్తంగా రూ. 14 వేల కోట్ల మేరకు కొత్త రుణాలు ఇవ్వాలని లక్ష్యంగా పెట్టుకోగా... రూ.11 వేల కోట్లు మాత్రమే ఇచ్చారు. ఇక రబీలో పెట్టుకున్న రుణ మంజూరు లక్ష్యం రూ. 6,300 కోట్లు కాగా... ఇప్పటికీ ఈ రుణ పంపిణీ క్షేత్ర స్థాయిలో ఆశించిన మేరకు ముందుకు సాగడం లేదు.
 
 బుధవారం సచివాలయంలో ఆర్థిక శాఖ మంత్రి ఈటెల రాజేందర్ అధ్యక్షతన జరిగిన రాష్ట్రస్థాయి బ్యాంకర్ల సమావేశంలో ఈ వివరాలు వెల్లడయ్యాయి. రాష్ట్రంలో రుణమాఫీ కోసం ప్రభుత్వం రూ. 4,250 కోట్లను విడుదల చేయడంతో... మొత్తం 34 లక్షల రైతుల రుణాలను రెన్యువల్ చేసి, కొత్త రుణాలు ఇవ్వాలని నిర్ణయించారు. కానీ ఇప్పటి వరకు 23 లక్షల ఖాతాలు మాత్రమే రెన్యువల్ అయ్యాయి.
 
 ఖరీఫ్‌లో రైతులకు మొత్తం రూ. 11 వేల కోట్ల రుణాలు ఇచ్చినట్లు బ్యాంకర్లు ప్రభుత్వం దృష్టికి తీసుకుని వచ్చారు. దీంతో మిగతా 11 లక్షల మంది రైతుల రుణాలు రెన్యువల్ చేసి, వెంటనే వారికి కొత్త రుణాలు ఇవ్వాలని మంత్రి ఈటెల రాజేందర్, ప్రభుత్వ సీఎస్ రాజీవ్‌శర్మ బ్యాంకర్లను కోరారు. అయితే వర్షాల్లేక, క్షేత్రస్థాయిలో వ్యవసాయానికి అనుకూల పరిస్థితులు లేక రైతులు రుణాలు తీసుకోవడానికి ముందుకు రావడం లేదని బ్యాంకర్లు ప్రభుత్వానికి వివరించినట్లు సమాచారం.
 
 తెలంగాణ రాష్ట్ర రుణ ప్రణాళిక ప్రకారం ప్రాధాన్య, అప్రాధాన్య రంగాలకు లక్ష్యం మేరకు రుణాలు పంపిణీ చేసినట్లు వారు తెలిపారు. ప్రాధాన్యతా రంగానికి 40 శాతం రుణాలు ఇవ్వాల్సి ఉంటే.. ఇప్పటికే 33 శాతం మేరకు ఇచ్చినట్లు వివరించారు. కాగా.. రబీ సీజన్‌లో రూ. 6,300 కోట్ల రుణాలివ్వాలని నిర్ణయించినా... క్షేత్రస్థాయిలో ఆశించిన స్థాయిలో ముందుకు సాగడం లేదని ప్రభుత్వ అధికారులు బ్యాంకర్ల దృష్టికి తీసుకువచ్చారు. రుణాల రెన్యువల్‌కు సంబంధించి ఎక్కడ ఇబ్బంది ఉందో బ్యాంకులు వివరిస్తే దానిని సరిచేయడానికి వీలవుతుందని సూచించారు.
 
 ఈ సందర్భంగా మంత్రి ఈటెల రాజేందర్ మాట్లాడుతూ... ప్రభుత్వం సంక్షేమ రంగానికి పెద్దపీట వేస్తోందని, అందుకు అనుగుణంగా బ్యాంకర్లు రుణాలు ఇవ్వాల్సిన అవసరం ఉందని పేర్కొన్నారు. స్వయం ఉపాధి పథకాల కింద ఇచ్చే రుణాలు ఆ కుటుంబాన్ని నిలబెట్టే విధంగా ఉండాలని, అందుకు అవసరమైన సూచనలు, సలహాలను ఇవ్వాలని బ్యాంకులను కోరారు. ఇదివరకే మంజూరైన వారికి ఈ మూడు నెలల కాలంలో రుణాలన్నీ ఇవ్వాలని విజ్ఞప్తి చేశారు. సీఎస్ రాజీవ్‌శర్మ మాట్లాడుతూ.. పంట రుణాల రెన్యువల్‌లో కొద్దిరోజులుగా ఎలాంటి పురోగతి కనిపించడం లేదన్నారు. ఈ నెలాఖరులోగా దానిని పూర్తి చేయాలని కోరారు.
 
 సంతృప్తస్థాయిలో బ్యాంకు ఖాతాలు..
 
 తెలంగాణ రాష్ట్రంలో 97 శాతం కుటుంబాలకు బ్యాంకు ఖాతాలు ఇచ్చామని, ఈ నెల 20వ తేదీ నాటికి అందరికీ ఖాతాలు కల్పించినట్లు ప్రకటించనున్నామని బ్యాంకర్లు సమావేశంలో వెల్లడించారు. జన్ ధన్ యోజన కింద 36 లక్షల ఖాతాలు తెరిపించినట్లు చెప్పారు. వారందరికీ ‘రూపే’ కార్డులను పంపిణీ చేశామని... వారికి రూ. 30 వేల జీవిత బీమా, రూ. లక్ష ప్రమాద బీమా పాలసీ ఇస్తున్నామని తెలిపారు. తెలంగాణలో దాదాపు కోటి బ్యాంకు ఖాతాలున్నట్లు చెప్పారు.
 
 ఎస్‌ఎల్‌బీసీ కన్వీనర్, ఎస్‌బీహెచ్ ఎండీ శంతన్ ముఖర్జీ మాట్లాడుతూ... ప్రభుత్వం చేపట్టిన పలు పథకాలను అభినందించారు. రాష్ట్రంలో బ్యాంకు శాఖల సంఖ్య 4,682కు చేరిందని ఆయన చెప్పారు. రాష్ట్రంలో ఏప్రిల్-సెప్టెంబర్ మధ్యకాలంలో రూ. 10,531 కోట్ల డిపాజిట్లు వచ్చాయని, దీనితో మొత్తం డిపాజిట్లు రూ. 2,97,422 కోట్లకు చేరాయని తెలిపారు. దేశంలో రుణ నిష్పత్తి అత్యధికంగా 113 శాతం ఉన్నట్లు తెలిపారు.
  


 బేస్తవారిపేట:  పంట రుణాలు, వ్యవసాయ బంగారు రుణాలు పొందిన రైతులు రుణమాఫీ వర్తించలేదంటూ బేస్తవారిపేట మండలంలోని పిటికాయగుళ్ల స్టేట్ బ్యాంక్ వద్ద మంగళవారం ధర్నా చేశారు. మండలంలోని పిటికాయగుళ్ల, వంగపాడు, జేసీ అగ్రహారం గ్రామాల నుంచి అధిక సంఖ్యలో రుణాలు తీసుకున్న రైతులు రైతు సాధికారత సదస్సుకు వచ్చారు. రుణమాఫీ వర్తించకపోవడంతో అర్జీలు ఇవ్వడానికి సదస్సుకు హాజరయ్యారు. మీ సేవలో అర్జీలు పెట్టుకోవాలని డీటీ  కె.నాగేశ్వరరావు రైతులకు సూచనలిచ్చారు.
 
 బ్యాంక్‌లో ఆధార్, రేషన్‌కార్డు, పాస్ పుస్తకాల జిరాక్స్ కాపీలను సకాలంలో అందజేసిన వందల మంది రైతులకు రుణమాఫీ వర్తించలేదని, బ్యాంక్ అధికారులు సక్రమంగా నమోదు చేయలేదని ఆవేదన చెందిన రైతులు సదస్సు పక్కనే ఉన్న బ్యాంక్ వద్దకు వెళ్లి ఆందోళనకు దిగారు. ఒకసారి బ్యాంకులో, రెండోసారి వీఆర్వోకు రుణమాఫీకి సంబంధించిన పత్రాలన్నీ అందించినా ఫలితం లేకుండా పోయిందన్నారు.
 
 రుణమాఫీ పత్రాలు పంపిణీకి సిబ్బంది సిద్ధం కావడంతో ‘వీటితో ఏమి చేసుకోవాలని’ పలువురు రైతులు ఎద్దేవా చేశారు. ఒక్క రూపాయి అకౌంట్‌లో పడలేదు, పత్రాలు పూజ చేసుకోవడానికా, ఎవరు చెప్పారు నగదు జమైందంటూ ఎదురు తిరిగారు. ఆ పత్రాలు పట్టుకొని వీరంతా బ్యాంకు వద్దకు వెళ్లి సిబ్బందితో వాగ్వాదానికి దిగారు.


 కేంద్ర కేబినెట్ నిర్ణయం
 నాబార్డ్‌కు రూ. 4399 కోట్లు
 విద్యుత్ చట్ట సవరణకు ఓకే
  
 న్యూఢిల్లీ: స్వల్పకాలిక పంట రుణాల వడ్డీపై సబ్సిడీ సదుపాయాన్ని కొనసాగించాలని కేంద్ర ప్రభుత్వం నిర్ణయించింది. రూ. 3 లక్షల వరకు రుణంపై సంవత్సరానికి 7% వడ్డీ, అలాగే 2014-15 సంవత్సరానికి రుణం తీసుకున్నవారు సమయానికి రుణం చెల్లిస్తే.. వారికి అదనంగా 3% వడ్డీ తగ్గింపు సదుపాయం అందించాలన్న ప్రతిపాదనకు బుధవారం ప్రధాని మోదీ అధ్యక్షతన జరిగిన కేబినెట్ భేటీలో ఆమోదం లభించింది. ఇందుకోసం రూ. 18,583 కోట్లను విడుదల చేసేందుకు అంగీకరించింది. అందులో రూ. 4,399 కోట్ల ఆర్థిక సాయాన్ని సహకార బ్యాంకులకు, ప్రాంతీయ గ్రామీణ బ్యాంకులకు రీఫైనాన్స్ కోసం నాబార్డ్‌కు అందించనుంది. కిసాన్ క్రెడిట్ కార్డ్ ఉన్న చిన్న రైతులకు వడ్డీపై సబ్సీడీ ఇవ్వనున్నారు.
 
  కబినెట్ తీసుకున్న మరికొన్ని నిర్ణయాలు..
 
 ► లోక్‌పాల్ చైర్మన్, సభ్యుల నియామక కమిటీలో లోక్‌సభలో అత్యధిక స్థానాలున్న ప్రతిపక్ష పార్టీ నేతకు స్థానం కల్పించే ప్రతిపాదనకు ఆమోదం.
 ► 500 మెగావాట్ల సామర్ధ్యంతో వివిధ రాష్ట్రాల్లో 25 సోలార్ పార్క్‌ల ఏర్పాటుకు రూ. 4050 కోట్ల ఆర్థిక సాయం .
 ►  మెట్రో రైలు ప్రాజెక్టుల కోసం భూ బదిలీ వేగవంతంగా జరిగేలా చర్యలు. ప్రాజెక్టు కోసం తీసుకున్న భూమికి ఇకపై నగదు పరిహారమే
 ►  సంస్కరణలకు ఊతమిచ్చేలా విద్యుత్ చట్టంలో సవరణలకు అంగీకారం.
 ►  చక్కెర మిల్లులకు శుభవార్త. ఇథనాల్ సేకరణ రేటును లీటరుకు రూ. 48.50 నుంచి రూ. 49.50 మధ్యగా నిర్ణయించారు.
 ►  తమిళనాడులో రూ. 1593 కోట్లతో అంతర్రాష్ట్ర విద్యుత్ సరఫరా వ్యవస్థ ఏర్పాటుకు ఆర్థిక వ్యవహారాల కేబినెట్ కమిటీ ఆమోదం.
  
  


 చంద్రబాబు అదే అర్థంలో చెప్పారు: పరకాల భాష్యం
 ప్రతిపక్ష నేత జగన్‌కు స్పష్టత లేకపోవడం వల్లే ఆరోపణలు
 ఈ నెల 10వ తేదీ లోగా 71 శాతం మంది రైతులకు రుణ విముక్తి
 శనివారం రాత్రికి అర్హులైన రైతుల జాబితా ఆన్‌లైన్‌లో పెడతాం
  
  సాక్షి, హైదరాబాద్: బ్యాంకుల పరిభాషలో.. సెరీకల్చర్, హార్టికల్చర్, ఆక్వాకల్చర్, గొర్రెల పెంపకం, ట్రాక్టర్లు, టిల్లర్లు, ఇతర వ్యవసాయ పనిముట్ల కొనుగోలుకు ఇచ్చిన అన్ని రకాల రుణాలను వ్యవసాయ రుణాలుగా పేర్కొంటారని.. అయితే చంద్రబాబు మాత్రం పంట రుణాలనే అర్థంలో మాత్రమే వ్యవసాయ రుణాలను మాఫీ చేస్తామని ఎన్నికల హామీల్లో చెప్పారని.. టీడీపీ ఎన్నికల మేనిఫెస్టోలోని హామీకి కూడా ఇదే అర్థమని ప్రభుత్వ మీడియా సలహాదారు పరకాల ప్రభాకర్ సరికొత్త భాష్యం చెప్పారు.
  
  బాబు వ్యవసాయ రుణాలని చెప్పినా ప్రజలు పంట రుణాలనే అర్థం చేసుకున్నారని ఆయన చెప్పుకొచ్చారు. పరకాల శనివారం సచివాలయంలో విలేకరులతో మాట్లాడారు.  వ్యవసాయ రుణాలు రూ. 87,612 కోట్లని, దీనికి ఆధారంగా రాష్ట్రస్థాయి బ్యాంకర్ల సంఘం (ఎస్‌ఎల్‌బీసీ) నివేదికను ప్రతిపక్ష నేత వై.ఎస్.జగన్‌మోహన్‌రెడ్డి చూపిస్తున్నారని ఆయన పేర్కొన్నారు. ‘‘అదే నివేదికలో ఏడో పేరాలో అన్ని రకాల వ్యవసాయ రుణాలు రూ. 87,612 కోట్లు ఉంటుంది. కానీ 10వ పేరా వరకు ప్రతిపక్ష నేత ఓపిగ్గా చదివితే వ్యవసాయ రుణాలు రూ. 49,774 కోట్లు కూడా కనిపించేది. ప్రతిపక్ష నేతకు సరైన సమాచారం లేక పొరపడ్డారు’’ అని ఆయన వ్యాఖ్యానించారు.
  
  రాష్ట్రంలో రైతు కుటుంబాలు 32 లక్షలే...
  2011 జనాభా లెక్కల ప్రకారం రాష్ట్రంలో రైతు కుటుంబాలు 32 లక్షలే ఉన్నాయని పరకాల పేర్కొన్నారు. ‘‘చంద్రబాబు ఎన్నికల హామీ ఇచ్చినప్పుడు మీరు (పరకాల ప్రభాకర్) టీడీపీతో లేరు కాబట్టి.. వ్యవసాయ రుణాలు, పంట రుణాలకు  తేడా తెలియక, స్పష్టత లేకపోవడం వల్ల పంట రుణాలనే వ్యవసాయ రుణాలని బాబు పొరబడ్డారని మీరు భావిస్తున్నారా?’’ అని విలేకరులు అడిగినప్పుడు..ఆయనకు చాలా స్పష్టత ఉందని, వ్యవసాయ రుణాలంటే పంట రుణాలేనని ప్రజలూ అర్థం చేసుకున్నారని ఆయన సమాధానం చెప్పారు.
  
  తొలి దశలో 22.79 లక్షల (71 శాతం) మంది రైతులను రుణాల నుంచి విముక్తి చేయనున్నామని, ఈ నెల 10 లోగా వారి బ్యాంకు ఖాతాలకు సొమ్ము జమ చేస్తామని పరకాల చెప్పారు. శనివారం రాత్రికి రుణ విముక్తికి అర్హులైన రైతుల జాబితాను ఆన్‌లైన్‌లో ఉంచుతామని తెలిపారు. 22.79 లక్షల మంది రైతులకు ఉపశమనం కల్పించడానికి చెల్లిస్తున్న రుణాల మొత్తం ఎంత అనే విషయం మీద విలేకరులు గుచ్చిగుచ్చి ప్రశ్నించినా.. ఆయన సమాధానం చెప్పలేదు.  ‘‘మీరు ప్రశ్నలు అడుగుతున్నట్లుగా లేదు. నన్ను పరీక్షిస్తున్నట్లుగా ఉంది’’ అని ఆయన ఒక దశలో అభ్యంతరం చెప్పారు. మరో 45 రోజుల్లో రెండో దశ రుణ విముక్తి కూడా పూర్తి చేస్తామని పరకాల పేర్కొన్నారు.
  
  రాజ్యాంగాన్ని 100 సార్లు సవరించాం...
  రుణమాఫీకి సంబంధించి జారీ చేసిన జీఓలో 2014 మార్చి వరకు తీసుకున్న రుణాలను చెల్లిస్తామని ఉందని, కానీ తీరా అమలు చేస్తున్న సమయంలో 2013 డిసెంబర్ వరకు తీసుకున్న రుణాలనే చెల్లిస్తున్నారని, ఇది మాట తప్పడం కాదా? అని విలేకరులు ప్రశ్నించినప్పుడు..  రాజ్యాంగాన్ని 100 సార్లు సవరించామనీ  అంటే అన్ని సార్లు మాట తప్పినట్లా? అని ప్రశ్నించారు.


 రుణమాఫీపై చంద్రబాబు విధాన ప్రకటన
  రెండు దశలుగా మాఫీ ప్రక్రియ
  50 వేల లోపుంటేనే ఒకేసారి, ఆ పైన ఎంతున్నా ఐదేళ్లలో మాఫీ
  శాస్త్రీయ పద్ధతిలో రైతుల ఖాతాల వడపోత
  తొలి విడత జాబితా రేపు విడుదల
  22.79 లక్షల రైతు కుటుంబాలకు లబ్ధి
  ఇంకా తేలని కౌలు రైతుల లెక్క
  10వ తేదీ నుంచి బ్యాంకులకు నగదు బదిలీ
  రెండో విడత జాబితాపై ఈ నెల 9 నుంచి కసరత్తు
  అప్పుడు కూడా ధ్రువపత్రాలు ఇవ్వకుంటే చేయగలిగిందేమీ లేదన్న సీఎం
  డ్వాక్రా సంఘాలు మరికొంత కాలం ఆగాల్సిందేనని వెల్లడి
  
 సాక్షి, హైదరాబాద్: రుణమాఫీపై ముఖ్యమంత్రి చంద్రబాబునాయుడు గురువారం విధాన ప్రకటన చేశారు. ప్రభుత్వం ప్రకటించిన లక్షన్నర రూపాయల మాఫీలో వడ్డీ కూడా కలిసి ఉందని స్పష్టం చేశారు. తొలిదశలో రుణమాఫీకి అర్హమైన 40.43 లక్షల ఖాతాలను గుర్తించినట్లు తెలిపారు. 22.79 లక్షల రైతు కుటుంబాలకు లబ్ధి చేకూర్చుతున్నట్టు ప్రకటించారు. మిగిలిన 42.23 లక్షల ఖాతాలను పరిశీలించి ఎంతమంది అర్హులో త్వరలో ప్రకటిస్తామని చంద్రబాబు చెప్పారు. రూ.50 వేల లోపు రుణాలను ఒకేదఫాలో మాఫీ చేస్తామని, మిగతా వాటిని ఐదేళ్లలో మాఫీ చేస్తామని హామీ ఇచ్చారు. ముందుగా రుణాలు చెల్లించేసిన వారందరికీ మాఫీ వర్తించకుండా మెలిక పెట్టారు.
 గతేడాది డిసెంబర్ 31 వరకు తీసుకున్న రుణాలను మాత్రమే మాఫీ పరిధిలోకి తీసుకున్నామంటూ.. డిసెంబర్ చివరివరకు చెల్లించకుండా, ఆ తర్వాత (జనవరి నుంచి ఏప్రిల్ వరకు) చెల్లించి ఉంటే వారికి మాత్రమే మాఫీ వర్తింపజేసి నగదు తిరిగి చెల్లిస్తామన్నారు. డ్వాక్రా, చేనేత సంఘాలు రుణమాఫీకి మరికొంత కాలం ఆగాలని ఈ సందర్భంగా తన నివాసంలో ఏర్పాటు చేసిన విలేకరుల సమావేశంలో చెప్పారు.
 
  ఈ విధానం ఏమి చెబుతున్నదంటే...
  రుణమాఫీ రెండు దశల్లో జరుగుతుంది. తొలి విడత జాబితా ఈ నెల 6వ తేదీన విడుదలవుతుంది. రూ.50 వేల లోపు రుణాలున్న వారికి తొలిదశలో ఒకేసారి మాఫీ జరుగుతుంది. రూ.50 వేలకు పైన ఎంతున్నా 20 శాతం చొప్పున ఐదేళ్లలో ప్రభుత్వం చెల్లిస్తుంది. తొలి విడత 20 శాతం మొత్తాన్ని ఈ నెల 9న చెల్లిస్తారు. ఈ నెల 10వ తేదీ నుంచి బ్యాంకులకు నగదు సర్దుబాటు ప్రారంభమవుతుంది. రెండో విడత జాబితా తయారీ ప్రక్రియ ఈ నెల 9న ప్రారంభమై వచ్చే నెల 8న ముగుస్తుంది. నగదు బదిలీ సహా ఈ ప్రక్రియ అంతా వచ్చే జనవరి 22లోగా ముగుస్తుంది. ఈ వ్యవహారంలో ఏవైనా అనుమానాలుంటే తీర్చడానికి ఓ విభాగం, కాల్‌సెంటర్ ఏర్పాటవుతుంది. తొలి విడతలో ఎంతమంది కౌలు రైతులు లబ్ధిపొందారో ఇంకా లెక్క తేలలేదు. రుణ అర్హత పత్రాలుండి బ్యాంకుల నుంచి అప్పు తీసుకున్న వారికి మాఫీ వర్తిస్తుందని సీఎం చెప్పారు.
 
  మళ్లీ పేరు మారిందా!..
  చంద్రబాబు ఇంకా ఏమన్నారంటే.. ఇది చారిత్రాత్మకమైన రోజు. రుణ ఉపశమన పథకాన్ని అమలు చేస్తున్నాం. (ముందు రుణమాఫీ, ఆ తర్వాత రుణ విముక్తి, ఇప్పుడు రుణ ఉపశమనం) కాంగ్రెస్ పదేళ్ల పాలనలో రైతుల కష్టాలు చూసి చలించిపోయా. రుణమాఫీ హామీ ఇచ్చా. రాష్ట్రం రెండుగా చీలినా, రూ.16 వేల కోట్ల లోటు బడ్జెట్ ఉన్నా మాటకు కట్టుబడ్డా. తొలి సంతకం పెట్టానంటూ చెప్పుకొచ్చారు. శాస్త్రీయ పద్ధతిలో ఖాతాలను వడపోశామన్నారు. ‘తొలి జాబితా తయారు చేశాం. వాళ్లందరి ఖాతాలకు ఇప్పుడు నగదు బదిలీ చేస్తున్నాం. ఈ జాబితాలో లేని వారికి 4 వారాల గడువిచ్చి ఆధార్, రేషన్ కార్డులు ఇమ్మని అడుగుతాం. వచ్చిన వాటిని పరిశీలించి తుది జాబితా తయారు చేసి వారి ఖాతాలకు నగదు బదిలీ చేస్తాం..’ అని వివరించారు. ఉద్యానవన రైతులకు కూడా ఎకరానికి పది వేల రూపాయల చొప్పున ఇవ్వాలని నిర్ణయించామన్నారు.
 
  రైతులకు లేఖలు...
  ‘ఈనెల పది నుంచి రుణ విముక్తి మొదలవుతుంది. రైతు సాధికార సంస్థకు బదలాయించిన రూ.5 వేల కోట్ల నుంచి నిధులు బ్యాంకులకు జమ అవుతాయి. ఈ మేరకు రైతులందరికీ లేఖలు ఇస్తాం. బ్యాంకుల వాళ్లు ఇక వాళ్ల వద్దకు వెళ్లకూడదు. రూ.50 వేల పైన అప్పుంటే వాళ్లకు 20 శాతం చెల్లిస్తూ లేఖలు ఇస్తాం. మిగతా నాలుగేళ్లకూ వడ్డీని కడతాం. ఈ మేరకు రైతులకు విధాన (పాలసీ) పత్రాలు ఇస్తాం. 10 నుంచి ఒక వారం పాటు రాష్ట్రంలోని అన్ని గ్రామాలలో జన్మభూమి గ్రామ సభలు నిర్వహించి రుణ విముక్తిపై అవగాహన కల్పిస్తాం. రెండో విడత జాబితాలు ప్రకటించి ధ్రువపత్రాలు కోరతాం.
 అప్పుడు కూడా ఇవ్వకపోతే చేయగలిగిందేమీ లేదు. రాష్ట్రంలో 2011 జనాభా లెక్కల ప్రకారం 32,04,295 వ్యవసాయ కుటుంబాలున్నాయి. వీటిలో 22.79 లక్షల కుటుంబాలకు రుణ విముక్తి కల్పిస్తున్నాం. రైతుల పరంగా చూస్తే ఆ సంఖ్య 26.77 లక్షలుగా ఉంటుంది. జనవరి 22 లోపల రుణమాఫీని పూర్తి చేస్తాం..’ అని చంద్రబాబు చెప్పారు. కాంగ్రెస్ పార్టీని దుమ్మెత్తిపోశారు. పేరు ప్రస్తావించకుండా వైఎస్సార్ కాంగ్రెస్ పార్టీ తీరును విమర్శించారు.ి రుణమాఫీ విధివిధానాలపై జీవో
  సీఎం గురువారం చేసిన రుణమాఫీ విధాన ప్రకటనకు అనుగుణంగా రాష్ట్ర ప్రభుత్వం ఉత్తర్వులు జారీ చేసింది.
  
  ప్రక్రియ సాగిందిలా..
  ఆన్‌లైన్, ఆఫ్‌లైన్ ద్వారా సమాచారాన్ని సేకరించారు
  ఆధార్, రేషన్ కార్డు ఆధారంగా ఖాతాల సమాచారాన్ని పరిశీలించారు.
  అనంతరం బ్యాంకులు, గ్రామ జన్మభూమి కమిటీలతో (వీజేసీలు) తనిఖీలు
  తొలి విడత జాబితా ఖరారు, నిధుల విడుదలకు కసరత్తు
  మిగిలిపోయిన ఖాతాదారుల గుర్తింపు రెండో దశలో
  4 వారాల గడువు, ఒక వారం పాటు అధికారులు, జేఏసీల తనిఖీలు
  అర్హమైనవి ఉంటే ఆ తర్వాత చెల్లింపులు
  
  
  విధివిధానాలు ఇలా...
  రుణమాఫీకి పరిగణనలోకి తీసుకున్న పత్రాలు: ఆధార్, రేషన్ కార్డులు (రేషన్‌కార్డు లేకుంటే ఓటరు గుర్తింపు కార్డు)
  రుణమాఫీ కాలం: 2007 ఏప్రిల్ 1 నుంచి 2013 డిసెంబర్ 31 వరకు
  పంట రుణాలు, అనుబంధ రుణాలకు మాత్రమే వర్తింపు
  ఈ పథకం కింద ఉన్న పంటకు మాత్రమే అర్హత
  చెల్లుబాటయ్యే భూమి పత్రం ఉండాలి
  ఒకే సర్వే నంబర్ భూమిపై యజమాని, కౌలురైతు ఇద్దరూ రుణం తీసుకుని ఉంటే కౌల్దారుకు ప్రాధాన్యత
  ఒకే కుటుంబంలో ఒకరికి మించి రుణం తీసుకుని ఉంటే రద్దయ్యే లక్షన్నర రూపాయల మొత్తం దామాషా (ప్రొరేటా) ప్రాతిపదికన పంపిణీ
  వివిధ రకాల రుణాలున్నప్పుడు పంట రుణానికి తొలి ప్రాధాన్యత. ఆ తర్వాతి స్థానం- మార్చుకున్న పంట రుణానికి, ఆ తర్వాత బంగారు రుణానికి..
  ఒకే రైతు వివిధ బ్యాంకుల నుంచి అప్పు తీసుకుని ఉంటే పట్టాదారు పాస్ పుస్తకం ఎక్కడ తాకట్టు పెట్టారో ఆ బ్యాంకుకు ప్రాధాన్యత
  రూ.50 వేల లోపు రుణాలకు పరిమితి (స్కేల్ ఆఫ్ ఫైనాన్స్) వర్తించదు. ఈ తరహా రుణాలన్నీ పూర్తిగా రద్దవుతాయి.
  రూ.50 వేల పైన ఉన్న రుణాలకు ఇప్పుడు 20 శాతం, మిగతా 80 శాతాన్ని 20 శాతం చొప్పున నాలుగు విడతలుగా చెల్లిస్తారు.
  అత్యధికంగా రద్దయ్యే మొత్తానికి లోబడి ఉద్యానవన రైతులకు ఎకరానికి పది వేల రూపాయల సాయాన్ని అందిస్తారు.
  
  
  బాబు చెప్పిన ప్రకారం ఖాతాలు
  బ్యాంకుల్లో నమోదైన ఖాతాలు:    82.66 లక్షలు
  తొలిదశ రుణమాఫీకి గుర్తించిన ఖాతాలు: 40.43 లక్షలు
  గుర్తించిన రైతుల సంఖ్య: 26.77 లక్షలు
  గుర్తించిన కుటుంబాలు:     22.79 లక్షలు
  రెండోదశలో పరిశీలించే ఖాతాలు:
  42.23 లక్షలు
  
  మాఫీ షెడ్యూల్ ఇదీ
  తొలిదశ జాబితా ప్రకటన:ఈ నెల 6న
  బ్యాంకులకు నగదు సర్దుబాటు ప్రారంభం: ఈనెల 10 నుంచి
  రెండో దశలో ఖాతాలకు నగదు సర్దుబాటు:జనవరి 17 నుంచి 22 మధ్య
  సమస్యల పరిష్కార విభాగం ప్రారంభం: డిసెంబర్ 9 నుంచి
  


 కర్నూలు (అగ్రికల్చర్) : రబీ సీజన్ ముందుకు సాగడం లేదు. రబీ సీజన్ మొదలై రెండు నెలలు గడుస్తున్నా అంతంతమాత్రంగానే పంటలు సాగు అయ్యాయి. రైతుల్లో అసంతృప్తి, నిరుత్సాహం, ఆందోళన వ్యక్తమవుతున్నాయి. రబీలో సాధారణ సాగు 4,12,490 హెక్టార్లు ఉంది. గత ఏడాది ఇదే సమయానికి 2,98,797 హెక్టార్లలో పంటలు సాగు అయ్యాయి.
 
 ఈసారి మాత్రం కేవలం 1,84,451 హెక్టార్లకే సాగు పరిమితం అయింది. సాధారణ సాగులో 44.72 శాతం మాత్రమే పంటలు సాగు అయ్యాయి. ఖరీఫ్ సీజన్‌లో వర్షాభావం వల్ల పంటలు పూర్తిగా దెబ్బతిన్నాయి. బ్యాంకులు పంట రుణాలు ఇవ్వలేదు. ప్రభుత్వం ప్రకటించిన రుణ మాఫీ అందని పండు చందం అయింది. జిల్లా యంత్రాంగం జిల్లాలో 34 మండలాలను కరువు ప్రాంతాలుగా గుర్తించాలని ప్రతిపాదనలు పంపినా ఇంతవరకు ప్రభుత్వం వీటిని పట్టించుకున్న దాఖలాలు లేవు.
 
 ఖరీఫ్ కష్టాలు వెంటాడుతుండటం వల్లనే రబీ పంటల సాగు పట్ల రైతులు నిరుత్సాహం వ్యక్తం చేస్తున్నారు. రబీ సీజన్ ఆరంభం అయి 2 నెలలు గడుస్తున్నా ఇంతవరకు బ్యాంకులు ఒక్క రైతుకు కూడా పంటరుణాలు ఇచ్చిన దాఖలాలు లేవు. 2013 ఖరీఫ్ సీజన్‌కు సంబంధించి పంటల బీమా పథకం కింద మంజూరు అయిన పరిహారాన్ని కూడా ప్రభుత్వమే జమ చేసుకోవడంతో రైతుల ఆందోళన అంతా ఇంతా కాదు. ప్రభుత్వం ఇంతవరకు రుణాలు మాఫీ చేయకపోగా రైతులపై వడ్డీ భారాన్ని మోపడం పట్ల సర్వత్రా నిరసన వ్యక్తమవుతోంది. పంట రుణాలు ఇవ్వకపోగా గత ఏడాది తీసుకున్న రుణాలకు సంబంధించి వడ్డీ చెల్లించాలని రైతులపై ఒత్తిడి పెంచుతున్నాయి. దీంతో రైతులు దిక్కుతోచని పరిస్థితిని ఎదుర్కొంటున్నారు.
 
 భారీగా తగ్గిన శనగ సాగు...
 రాయలసీమ జిల్లాలోనే శనగ సాగులో జిల్లా మొదటి స్థానంలో ఉంది. సాధారణ సాగు 2,15,493 హెక్టార్లు ఉండగా గత ఏడాది ఇదే సమయానికి 2,06,258 హెక్టార్లు సాగు అయింది. ఈసారి మాత్రం 1,12,119 హెక్టార్లకే పరిమితం అయింది. ఖరీఫ్‌లో రికార్డు స్థాయిలో పత్తి సాగు అయింది. గతంలో ఎప్పుడూ లేని విధంగా 3 లక్షల హెక్టార్లలో రైతులు పత్తి సాగు చేశారు. ఈ పంట జనవరి నెల వరకు ఉంటుంది. ప్రధానంగా పత్తి నల్లరేగడి భూముల్లో సాగు అవుతుంది. రబీ పంటలు కూడా నల్లరేగడి నేలల్లోనే సాగు అవుతాయి. ఖరీఫ్‌లో పత్తి సాగు భారీగా పెరగడం వల్లనే రబీ పంటల సాగు అంతంతమాత్రంగా ఉందని వ్యవసాయాధికారులు పేర్కొంటున్నారు. రబీ సీజన్‌కు సంబంధించి కాల్వల కింద పంటల సాగుకు ఇంతవరకు నీళ్లు వదలలేదు. రబీ సాగు పెరగకపోవడానికి ఇది కూడా ఒక కారణమనే అభిప్రాయం వ్యక్తమవుతోంది.
 
 పెరిగిన ధనియాల సాగు...
 ఈ రబీలో ధనియాలు సాగు పెరిగింది. సాధారణ సాగు 3,924 హెక్టార్లు ఉండగా, 7,472 హెక్టార్లలో పంటలు వేయడం గమనార్హం. రబీలో శనగ తర్వాత అత్యధికంగా జొన్న సాగు చేస్తారు. ఈసారి జొన్న సాగు కూడా తగ్గిపోయింది. సాధారణ సాగు 60,119 హెక్టార్లు ఉండగా, ఈసారి కేవలం 35,868 హెక్టార్లలో(59.66 శాతం) మాత్రమే జొన్న సాగు అయింది. గత ఏడాది ఇదే సమయానికి 45,350 హెక్టార్లలో జొన్న వేయడం గమనార్హం.


 నోటితో పలకరించి నొసటితో వెక్కిరించడమంటే ఇదే..! వర్షాభావంతో ఖరీఫ్‌లో నిండా మునిగిన రైతన్నకు రబీలో సాంత్వన చేకూర్చతామని ప్రభుత్వం ప్రకటించింది. జిల్లాలో వరికి గ్రామం యూనిట్‌గానూ.. వేరుశెనగ, మిర్చి పంటలకు మండలం యూనిట్‌గానూ సవరించిన పంటల బీమా పథకం(ఎమ్‌ఎన్‌ఏఐఎస్) వర్తింపజేస్తూ శనివారం ప్రభుత్వం ఉత్తర్వులు జారీచేసింది. బీమా ప్రీమియం డిసెంబర్ 31లోపు చెల్లించాలని పేర్కొంది. కానీ.. బ్యాంకర్లు పంట రుణాలు ఇచ్చేందుకు నిరాకరిస్తుండడంతో ప్రీమియం చెల్లించలేని దుస్థితిలో రైతులు కొట్టుమిట్టాడుతున్నారు.
  
 ⇒ రబీలో వరికి గ్రామం యూనిట్‌గా ‘సవరించిన పంటల బీమా’ అమలు
 ⇒ వేరుశెనగ, మిర్చి పంటలకు మండలం యూనిట్‌గా బీమా వర్తింపునకు ఉత్తర్వులు
 ⇒ బ్యాంకర్లు పంట రుణాలు ఇవ్వకపోవడంతో రైతులు ప్రీమియం చెల్లించలేని దుస్థితి
 
 సాక్షి ప్రతినిధి, తిరుపతి: ఖరీఫ్ తరహాలోనే రబీలోనూ రైతులకు బీమా ధీమా దక్కకుండా పోతోంది. జిల్లాలో రబీలో 36,338 హెక్టార్లలో వరి, 14,092 హెక్టార్లలో వేరుశెనగ, 1,936 హెక్టార్ల లో మిర్చి పంటలను రైతులు సాగుచేస్తారని వ్యవసాయ అధికారులు అంచనావేశారు. రబీలో 1,77,386 మంది రైతులకు రూ.920.7 కోట్లను పంట రుణాలుగా పంపిణీ చేయాలని బ్యాంకర్లకు ప్రభుత్వం నిర్ధేశించింది. కానీ.. ఇప్పటిదాకా కేవలం 14,232 మంది రైతులకు రూ.42 కోట్ల రుణాలను మాత్రమే పంపిణీ చేసి బ్యాంకర్లు చేతులు దులుపుకున్నారు. నీటి లభ్యతను సాకుగా చూపి తెలుగుగంగ ఆయకట్టులో ప్రభుత్వం ఇప్పటికే క్రాప్ హాలిడే ప్రకటించింది. వర్షాభావ పరిస్థితుల నేపథ్యంలో చెరువులు, చిన్న, మధ్య తరహా ప్రాజెక్టులకు జలకళ కొరవడింది. బోరు బావులు ఎండి ఖరీఫ్‌లో నష్టపోయిన రైతన్న ఆర్థిక సంక్షోభంతో రబీ పంటల సాగుకు సాహసించలేని దుస్థితి నెలకొంది.
 
 పంట రుణాలను మాఫీచేసి, కొత్త రుణాలతో రబీ సాగుకు ఊతమివ్వాల్సిన ప్రభుత్వం అందుకు భిన్నంగా వ్యవహరిస్తోంది. రుణ మాఫీపై ప్రభుత్వం పాత పాటే పాడుతోంది. కొత్త రుణాలు ఇచ్చేలా అధికారులపై ఒత్తిడి తేవడంలో ప్రభుత్వం ఘోరంగా విఫలమవుతోంది. బ్యాంకర్ల నుంచి పంట రుణాలు ఇప్పిం చలేని ప్రభుత్వం.. రబీలో వరి పంటకు గ్రామం యూనిట్‌గా, వేరుశనగ, మిరప పంటలకు మండలం యూనిట్‌గా సవరించిన పంటల బీమా పథకాన్ని వర్తింపజేస్తూ శనివారం ఉత్తర్వులు జారీచేయడం గమనార్హం. పంట రుణాలు బ్యాంకర్లు ఇచ్చేటపుడే బీమా ప్రీమియం మినహాయించుకోవడం ఆనవాయితీ.
 
 రుణాలే బ్యాంకర్లు ఇవ్వని నేపథ్యంలో.. రైతులు ప్రీమియం ఎలా చెల్లిస్తారన్నది సర్కారుకే ఎరుక. ప్రభుత్వ చిత్తశుద్ధిలోపం.. బ్యాంకర్ల సహాయ నిరాకరణ వల్ల రబీ సాగు విస్తీర్ణం ఘోరంగా పడిపోయింది. వరి పంట కేవలం 14,169 హెక్టార్లు, వేరుశనగ 3,763 హెక్టార్లు, మిరప పంట 306 హెక్టార్లకే పరిమితమైంది. 2011 వరకూ ఖరీఫ్‌లో వేరుశనగ పంటకు జిల్లాలో గ్రామం యూనిట్‌గా పంటల బీమా పథకం అమలయ్యేది. దీనిని రద్దు చేసి, వాతావరణ బీమా పథకాన్ని అమల్లోకి తెచ్చింది. దీంతో  రైతులు తీవ్రంగా నష్టపోతోండటంతో పంటల బీమా పథకంలోనే మార్పులు చేసి సవరించిన పంటల బీమా పథకాన్ని రబీలో అమల్లోకి తెచ్చింది.
 
 సవరించిన పంటల బీమా పథకంలో త్రెష్‌హోల్డ్ ఈల్డ్(ఐదేళ్ల సగటు దిగుబడిలో 80 శాతం కన్నా తక్కువ నష్టం వాటిల్లితే.. ఆ నష్టానికి పరిహారం చెల్లించడం) 80 శాతానికి పెంచారు. ఇది వర్షాభావ ప్రాంతంలోని రైతులకు అనుకూలమైన నిర్ణయమని వ్యవసాయ శాస్త్రవేత్తలు స్పష్టీకరిస్తున్నారు. రబీ తరహాలోనే ఖరీఫ్‌లో వేరుశనగ పంటకు గ్రామం యూనిట్‌గా సవరించిన పంటల బీమా పథకాన్ని అమలుచేయాలనే డిమాండ్ ఊపందుకుంటోంది.


 అనంతపురం సెంట్రల్ :  ఎన్నికల సమయంలో ఇచ్చిన హామీ మేరకు అర్హులందరికీ రుణమాఫీ చేస్తామని రాష్ట్ర పౌరసంబంధాల శాఖ మంత్రి పల్లె రఘునాథరెడ్డి, ఎక్సైజ్‌శాఖ మంత్రి కొల్లు రవీంద్ర స్పష్టం చేశారు. గురువారం డ్వామా హాలులో ఎమ్మెల్యేలతో కలిసి రుణమాఫీ అమలుపై సమీక్షించారు. మంత్రులు మాట్లాడుతూ జిల్లాలో వ్యవసాయ, బంగారు, స్వయం సహాయక సంఘాలకు సంబంధిం చి 8,96,177 ఖాతాలు ఉన్నాయని, రూ. 4944 కోట్లు మాఫీ చేయబోతున్నామన్నారు.
 
 అయితే మొత్తం ఖాతాల్లో 2.80 లక్షల మంది ఇప్పటి కీ ఆధార్, రేషన్‌కార్డులు సమర్పించలేదన్నారు. వీరికి డిసెంబర్ 25 వరకూ అవకాశం ఉందని తెలిపారు.  పంట రుణాలు లేకున్నా వ్యవసాయం కోసం బంగారు తాకట్టు పెట్టి రూ. 1.50 వేల వరకూ అప్పు తీసుకున్నా మాఫీ వర్తిస్తుందని స్పష్టం చేశారు.  పండ్లతోటల రైతులకు కూడా రుణమాఫీ వర్తిం చేందుకు ముఖ్యమంత్రితో మాట్లాడతామన్నారు.   
 
 దీంతోపాటు 2011-12లో ఇన్‌పుట్ సబ్సిడీ, పంట నష్టపరిహారం కలిపి రూ. 675 కోట్లు రావాల్సి ఉందని, త్వరలో ఈ మొత్తం తీసుకువచ్చేందుకు కృషి చేస్తామన్నారు. ఇటీవల 53 మండలాలకు రూ. 227 కోట్లు వాతావరణబీమా మంజూరైందన్నారు. ఈ మొత్తం రైతు అప్పులకు జమ చేయరాదని బ్యాంకర్లను ఆదేశించారు. దీనిపై ప్రభుత్వం నుంచి ఉత్తర్వులు తెప్పిస్తామన్నారు.
 
  మంత్రి కొల్లు రవీంద్ర మాట్లాడుతూ  మద్యం సిండికేట్ల వ్యవహారంపై సీబీసీఐడి విచారణ జరుగుతోందన్నారు. జూన్‌నాటికి నూతన పాలసీ విధానం తీసుకొచ్చి మద్యం నియంత్రిస్తామని వివరించారు. వీలైనన్ని చెక్‌పోస్టులు ఏర్పాటు చేసి బయట రాష్ట్రాల నుంచి అక్రమ మద్యం రాకుండా చర్యలు తీసుకుంటామన్నారు. చేనేత కార్మికుల సంక్షేమం కోసం రాష్ట్ర వ్యాప్తంగా మూడు క్లస్టర్‌లు ఏర్పాటు చేస్తున్నామని,  ఎక్కడెక్కడ వీటిని ఏర్పాటు చేయాలనేది త్వరలో నిర్ణయిస్తామన్నారు.   
 
 చేనేత కార్మికులకు హెల్త్ ఇన్సూరెన్స్ కార్డులు, క్రెడిట్‌కార్డులు మంజూరు చేస్తామన్నారు. సమావేశంలో ప్రభుత్వ చీఫ్ విప్ కాలువ శ్రీనివాసులు, ఎమ్మెల్యేలు ప్రభాకర్‌చౌదరి, వరదాపురం సూరి, ఉ న్నం హనుమంతరాయచౌదరి, వీరన్న, ఎమ్మెల్సీలు గేయానంద్, శమంతకమణి, గుండుమల తిప్పేస్వామి, మేయర్ స్వరూ ప, కలెక్టర్ సొలమాన్ ఆరోగ్యరాజ్, జా యింట్ కలెక్టర్ సత్యనారాయణ, ఎల్‌డీఎం జయశంకర్, వ్యవసాయశాఖ జేడీ శ్రీరామమూర్తి తదితరులు పాల్గొన్నారు.
 
  రాష్ట్రంలో మూడు మెగా క్లస్టర్లు
  అనంతపురం ఎడ్యుకేషన్ :చేనేత రంగాన్ని అభివృద్ధి చేసేందుకు రాష్ట్రంలో మూడు మెగా క్లస్టర్లను ఏర్పాటు చేయనున్నట్లు రాష్ట్ర చేనేత శాఖ మంత్రి కొల్లు రవీంద్ర తెలిపారు.  గురువారం రాత్రి స్థానిక డ్వామా హాలులో చేనేత, జౌళి శాఖ అధికారులతో మంత్రి సమీక్షించారు. చేనేత కార్మికులకు హెల్త్‌ఇన్సూరెన్స్, క్రిడెట్‌కార్డుల జారీ, సబ్సిడీపై దారం సరఫరాకు ప్రత్యేక శ్రద్ధ తీసుకుంటున్నామన్నారు.
 
 జిల్లాలో పెద్దపప్పూరు, రాయదుర్గం, సోమదేవరపల్లిలో ఏర్పాటు చేసిన మినీక్లస్టర్ల ద్వారా చేనేత కార్మికుల జీవన స్థితిగతులను మెరుగుపరుస్తామన్నారు. చేనేత, జౌళిశాఖ ఏడీ జగన్నాథశెట్టిపై మంత్రులు కొల్లు రవీంద్ర, పల్లె రఘునాథరెడ్డి ఆగ్రహం వ్యక్తం చేశారు. శాఖలో అవినీతి పెరిగిపోయిందని, మామూళ్లు ఇస్తేనే పనులు చేస్తున్నారంటూ ధర్మవరం ఎమ్మెల్యే వరదాపురం సూరి ఆధారాలతో మం త్రుల దృష్టికి తీసుకొచ్చారు. దీంతో మంత్రులు ఏడీపై మండిపడ్డారు.


  మంచాల: ప్రభుత్వం పంట రుణాలు ఇస్తుండడంతో మండల రెవెన్యూ కార్యాలయం, బ్యాంకులు రైతన్నలతో కిటకిటలాడుతున్నాయి. గత రెండు,మూడు వారాలుగా   రెవెన్యూ శాఖ అధికారులు గ్రామాల్లో కుటుంబ సమగ్ర సర్వే తదితర పనులల్లో  ఉండడంతో  పహాణీలు ఇవ్వలేకపోతున్నారు. తహసీల్దార్ కార్యాలయమే అధికారులు రాక  బోసిపోయింది. ఇంక బోడకొండ,లింగంపల్లి వంటి  కొన్ని గ్రామాల్లో సర్వే పనులు కొనసాగుతూనే  ఉన్నాయి.
 
 ఈ నేపథ్యంలో రైతులు పహాణీల కోసం తహసీల్దార్ కార్యాలయం చుట్టూ తిరుగుతూనే ఉన్నారు.
  సర్వే పూర్తయిన రెవెన్యూ కార్యదర్శులు  తహసీల్దార్ కార్యాలయంలో ఆయా గ్రామాలకు సం బంధించిన పహాణీలు రాసి ఇస్తున్నారు. దీంతో  బ్యాంకుల్లో రుణాలు తీసుకోవడాన్నికి  రైతులు పెద్ద సంఖ్యలో పహా ణీల కోసం వస్తున్నారు. తహసీల్దార్ కార్యాలయం సోమవారం  రైతులతో కిటకిట లాడింది. రెవెన్యూ కార్యదర్శులకు తీరిక లేకుండా పోయింది.  
 
 అదే విధంగా  బ్యాంకుల్లోకి  కూడా రైతులు అధిక సంఖ్యలో రావడంతో బ్యాంకు అధికారులకు తీవ్ర ఇబ్బందిగా మా రింది. దీంతో  బ్యాంకు అధికారులు  రుణాలు తీసుకోవడానికి వస్తున్న  రైతులకు వరుసక్రమంలో దరఖాస్తు ఫారాలు  అందజేస్తున్నారు. ఎక్కువ సంఖ్యలో రాకుండా  రోజుకు పరిమితి సంఖ్యలో మాత్రమే దరఖాస్తు ఫారాలు ఇచ్చి  ఇబ్బందులు కలుగకుండా జాగ్రతలు తీసుకుంటున్నారు.       
      
  తప్పని తిప్పలు..
  బ్యాంకు రుణాలు తీసుకోవడానికి  రెవెన్యూ కార్యాలయం వచ్చే రైతులకు  ఇబ్బందులు తప్పడం లేవు. రైతులు పట్టాలో ఉండి రికార్డుల్లో ఉన్నా  కూడా కంఫ్యూటర్ పహణీలో మాత్రం రావడం లేదు. మరికొంత మంది పట్టాల్లో ఉండి ఆ భూమిని సాగు చేస్తున్నా రికార్డుల్లో మాత్రం  పేర్లు రావడం లేవని  ఆవేదన వ్యక్తం చేస్తున్నారు.   ఇదిలా ఉండగా కంప్యూటర్ పహాణీలో కొంత మంది ఖాతా నంబర్లు సక్రమంగా రావడం లేదు.   గ్రామాల్లో పూర్తి స్థాయిలో రెవె న్యూ రికార్డులు కంప్యూటరీకరణ  కాలే దు.  ఇలా అనేక సమస్యలతో రైతులు తీవ్ర ఇబ్బందులకు గురవుతున్నారు.   రెవెన్యూ అధికారులు  అమాయక రైతులను ఇబ్బందులకు గురి చేయకుండా సక్రమంగా పనులు చేయించి పెట్టాలని ప్రజలు  కోరుతున్నారు.


 నల్లపరెడ్డి ప్రసన్నకుమార్‌రెడ్డి
 
 ఇందుకూరుపేట: ఊసరవెల్లి రంగులు మార్చిన తరహాలో సీఎం చంద్రబాబు మాటలు మార్చే నేర్పరి అని వైఎస్సార్ కాంగ్రెస్ పార్టీ అధ్యక్షుడు నల్లపరెడ్డి ప్రసన్నకుమార్‌రెడ్డి అన్నారు. పార్టీ అనుబంధ విభాగాల మండల అధ్యక్షుల నిమాయక ప్రక్రియను జగదేవిపేటలోని పిడూరు సునీల్‌రెడ్డి నివాసంలో శనివారం నిర్వహించారు. ప్రసన్నకుమార్‌రెడ్డి మాట్లాడుతూ ఎన్నికల సమయంలో వ్యవసాయ రుణాలన్నీ మాఫీ చేస్తానన్న చంద్రబాబు ఇప్పుడు మాట మారుస్తున్నారన్నారు.
 
 పంట రుణాలు మాత్రమే మాఫీ చేస్తానని, అది కూడా ఒక్కో ఇంటికి రూ.1.5 లక్ష మాత్రమేనని పేర్కొనడం దారుణమన్నారు. అధికారంలోకి వచ్చాక ఆయన డొంక తిరుగుడు మాటలు మాట్లాడుతూ రైతుల్ని మోసం చేస్తున్నారని మండిపడ్డారు. రైతులు బ్యాంకుల నుంచి పొందిన స్వల్ప, దీర్ఘకాలిక, ప్రాసెసింగ్ తదితర రుణాలన్నీ వ్యవసాయ రుణాల కిందకే వస్తాయన్నారు. ఆంధ్రప్రదేశ్‌లో చాలా తెలివైన వ్యక్తినని, సీఈఓనని ప్రచారం చేసుకునే చంద్రబాబుకు వ్యవసాయ రుణాలకు, పంట రుణాలకు తేడా తెలియకపోవడం విచిత్రంగా ఉందన్నారు.
 
 రుణాలు కట్టవద్దని, తాకట్టుపెట్టిన నగలు, డాక్యుమెంట్లు ఇంటికి వస్తాయని ఆయన చెప్పిన మాటలు నమ్మి రైతులు నిలువున మోసపోయారన్నారు. వడ్డీల భారం పడటమే కాక పంటలు నష్టపోయిన పలువురు బీమా సౌకర్యం సైతం కోల్పోయారని ఆవేదన వ్యక్తం చేశౠరు. ఇచ్చిన హామీలన్నీ తుంగలో తొక్కి ఇప్పుడు ఆర్థిక సమస్యలంటూ వాటిని నెరవేర్చకుండా అందరినీ వంచిస్తున్నారని ధ్వజమెత్తారు. అధికారులు కూడా నాటకాలాడుతున్నారన్నారు.
 
 నెల్లూరులో జరిగిన జన్మభూమి కార్యక్రమానికి వైఎస్సార్‌సీపీ కార్పొరేటర్ హాజరైతే లాఠీలతో కొట్టించి బయటకు నెట్టించేసిన ఓ ఇన్‌స్పెక్టర్ వాడరాని భాష వాడారన్నారు. ఆయన చరిత్ర అంతా సేకరించి ఉన్నతాధికాారులకు నివేదించానన్నారు. కొడవలూరు ఎంపీడీఓ కూడా అలాగే ఉన్నారన్నారు. ఉపాధి హామీ పథకం ద్వారా సుమారు రూ.15 లక్షల నుంచి నుంచి రూ.20 లక్షల వరకు అవినీతి జరిగిందన్నారు.
 
 అధికారుల్లో 60 శాతం మంది నిజాయితీగా వ్యవహరిస్తుండగా 40 శాతం మంది పచ్చా చొక్కాలు వేసుకుని పనిచేస్తున్నారన్నారు. అలాంటి వారికి వైఎస్సార్‌సీపీ తగిన గుణపాఠం చెబుతుందన్నారు. కార్యక్రమంలో పార్టీ జిల్లా స్టీరింగ్ కమిటీ సభ్యులు గొల్లపల్లి విజయ్‌కుమార్, మండల అధ్యక్షుడు మావులూరు శ్రీనివాసులురెడ్డి, జెడ్పీటీసీ సభ్యుడు బీవీ రమణయ్య, విద్యార్థి విభాగం జిల్లా అధ్యక్షుడు ప్రసన్నశ్రావణ్‌కుమార్, గూడూరు ప్రభాకర్‌రెడ్డి, కొళ్లపూడి శ్రీనివాసులురెడ్డి పాల్గొన్నారు.


 సాక్షి ప్రతినిధి, ఒంగోలు: ఏదో ఒక కారణం చూపి రైతుల రుణమాఫీ ఎగ్గొట్టేందుకు ముఖ్యమంత్రి చంద్రబాబునాయుడు చేయని ప్రయత్నం లేదు. రుణమాఫీ పొందే లబ్ధిదారుల సంఖ్య తగ్గించడంతో పాటు వారికి సకాలంలో అందకుండా చేయడం కోసం రోజుకో నిబంధనతో ప్రభుత్వం ముందుకొస్తోంది. మొదటి సంతకం అమలుకు ఐదు నెలలు గడిచిపోయినా ఇంకా ఒక కొలిక్కి రాలేదు. రాష్ట్రవ్యాప్తంగా 60 లక్షల ఖాతాలను గుర్తించామని చెబుతూనే ఇంకా సవరణలకు అవకాశం ఉందని, పూర్తి జాబితా రావడానికి మరో నెలరోజులు పడుతుందని అధికారులు స్పష్టం చేస్తున్నారు.
 
  చంద్రబాబు మాట మార్చడం కారణంగా జిల్లాలో మూడోవంతు రైతులు ఈ రుణమాఫీ నుంచి దూరంగా ఉండాల్సిన పరిస్థితి నెలకొంది. ఉద్యానవన పంటలకు రుణమాఫీ అందదని చెప్పిన ప్రభుత్వం ఇప్పుడు పూర్తిగా పంట రుణాలకే పరిమితమవుతోంది. ఎన్నికల ముందు అన్ని వ్యవసాయ రుణాలు మాఫీ చేస్తామని   చెప్పినా, బ్యాంకు అధికారులు కేవలం పంట రుణాలు తీసుకున్నవారి జాబితాలను మాత్రమే సిద్ధం చేసినట్లు సమాచారం.
  
 కొత్త నిబంధనల ప్రకారం రైతు ఎన్ని ఎకరాలు పొలం కలిగి ఉన్నారు. ఎంత సాగు చేశారు. ఏ పంట సాగు చేశారు. ఆ పంటకు బ్యాంకులో ఎకరాకి ఎంత రుణం మంజూరు చేస్తుందనే దానిపై రుణమాఫీ వర్తింపచేస్తారన్న ప్రచారం సాగుతోంది. మరోవైపు బంగారం తాకట్టు పెట్టి రుణం తీసుకున్న వారికి ఈ రుణమాఫీ అమలు అవుతుందా లేదా అన్న సందేహాలు వ్యక్తమవుతున్నాయి.
 
  మరోవైపు బ్యాంకుల్లో బంగారం కుదవపెట్టి రుణం తీసుకున్న వారు రుణాల చెల్లించాలని.. లేనిపక్షంలో బంగారు వేలం వేస్తామని బ్యాంకులు ప్రకటిస్తున్నాయి. ఇప్పటికే కొనకనమిట్లలో సిండికేట్ బ్యాంకు అధికారులు వేలం వేయనున్నట్లు గ్రామాల్లో ప్రచారం చేస్తున్నారు.
 
  చంద్రబాబునాయుడు ప్రకటించిన రుణమాఫీ కారణంగా బ్యాంకులకు రుణాలు తిరిగి చెల్లించకపోవడంతో బ్యాంకర్లు ఈ ఏడాది రైతులకు రుణాలు ఇవ్వడానికి ముందుకు రాలేదు.  జిల్లా ఏర్పాటైన తర్వాత ఇప్పటి వరకూ రుణ ప్రణాళిక సిద్ధం కానిది ఈ ఏడాదే అంటే ప్రభుత్వ పాలన ఏ విధంగా ఉందో అర్థం చేసుకోవచ్చు. ప్రస్తుతం చంద్రబాబు నాయుడు చేసిన ప్రకటన అసలు విషయాన్ని పక్కదోవ పట్టించి చర్చను మరోపైపుకు తిప్పడమేనని రైతు నాయకులు అంటున్నారు.
 
  తక్షణమే రుణమాఫీ అమలు చేయాలి: దుగ్గినేని గోపీనాథ్, రైతు నేత
  చంద్రబాబునాయుడు తక్షణమే రుణమాఫీ అమలు చేయాలి. వ్యవసాయ రుణాలకు అమలు చేస్తారా? పంట రుణాలకు అమలు చేస్తారా అన్నది పక్కన పెట్టి అయన ప్రకటించినట్లుగా ఒక్కో కుటుంబానికి లక్షన్నర వరకూ రుణమాఫీని వెంటనే అమలు చేయాలి. ఇప్పటికే ఆరు నెలలు గడిచిపోయాయి. మరింత కాలం రుణమాఫీని జాప్యం చేయడం కోసమే చంద్రబాబునాయుడు రోజుకో ప్రకటన చేస్తున్నారు.
 
  ఇది రైతులను మోసం చేయడమే: మారెడ్డి సుబ్బారెడ్డి, వైఎస్సార్ సీపీ రైతు విభాగం జిల్లా అధ్యక్షుడు
  ఎన్నికల ముందు అన్ని వ్యవసాయ రుణాలను మాఫీ చేస్తానని చెప్పిన చంద్రబాబునాయుడు ఇప్పుడు పంట రుణాలు మాత్రమే మాఫీ అని చెప్పడం రైతులను మోసం చేయడమే. అర్హులైన రైతులందరికీ రుణమాఫీ వర్తింప చేయాలి. కుంటిసాకులు చెప్పి రుణమాఫీని ఇప్పటి వరకూ ఇవ్వకుండా జాప్యం చేయడం వల్ల రైతులకు కొత్త రుణాలు రాకుండా పోయాయి.


 టీడీపీ సమావేశంలో ఏపీ సీఎం చంద్రబాబు
 * ఒక కుటుంబానికి రూ.1.50 లక్షలు రద్దు చేస్తామని హామీ ఇచ్చా
 * మొదటి విడత చెల్లించిన తర్వాత రుణాలు రీషెడ్యూలు చేయిస్తాం
 * డ్వాక్రా మహిళలు ఎక్కడంటే అక్కడ డబ్బులు తీసుకోవడం వల్లే అప్పులు
  
 సాక్షి ప్రతినిధి, విజయవాడ: రైతులు పంట పైన తీసుకున్న రుణాలనే మాఫీ చేస్తామని చెప్పామని తెలుగుదేశం పార్టీ అధ్యక్షుడు,  ఏపీ ముఖ్యమంత్రి నారా చంద్రబాబునాయుడు చెప్పారు. ఒక కుటుంబం ఎన్ని బ్యాంకుల్లో రుణం తీసుకున్నా రూ.1.50 లక్షలు మాఫీ చేస్తామని చాలా స్పష్టంగా హామీ ఇచ్చానన్నారు. మహిళలు ఎక్కడంటే అక్కడ రుణాలు తీసుకోవడం వల్ల తిరిగి చెల్లించే శక్తి లేక అప్పుల ఊబిలో చిక్కుకుపోయారని వ్యాఖ్యానించారు.
 
 గురువారం విజయవాడలోని ఏ కన్వెన్షన్ హాలులో జరిగిన టీడీపీ రాష్ట్ర విస్తృతస్థాయి సమావేశానికి చంద్రబాబు అధ్యక్షత వహిం చారు. పార్టీ పొలిట్‌బ్యూరో సభ్యులు, మంత్రులు, ఎంపీలు, ఎమ్మెల్యేలు, జిల్లాల ప్రతినిధులు హాజరైనా   ఉప ముఖ్యమంత్రి కేఈ కృష్ణమూర్తి, కేంద్ర మంత్రి పూసపాటి అశోక్‌గజపతిరాజు, మంత్రి గంటా శ్రీనివాసరావుతోపాటు 113 మంది ఆహ్వానితులు డుమ్మా కొట్టడం గమనార్హం. చంద్రబాబు ప్రసంగంలోని ముఖ్యాంశాలు ఆయన మాటల్లోనే..
 
 ఎన్నికల్లో ఇచ్చిన హామీలపై నేను ప్రమాణ స్వీకారం చేసిన రోజునే సంతకాలు పెట్టాను.  వీటిలో రైతుల రుణాల మాఫీ ముఖ్యమైనది. అయితే ఇంకా డబ్బులు ఇవ్వలేదు. ఇప్పుడు మొదటి ఇన్‌స్టాల్‌మెంట్ ఇస్తాం. తర్వాత రుణాలు రీషెడ్యూల్ చేయిస్తాం.  ఈ నెలాఖరులోగా ఈ హామీని నిలబెట్టుకునే బాధ్యత కూడా తీసుకుంటాం. ఆరు నెలల్లోపు దీనిని పూర్తిగా అమలు చేసే బాధ్యత తీసుకుంటాం.
 
 డ్వాక్రా సభ్యులు ప్రతి ఒక్కరికీ రూ. 10 వేల చొప్పున రుణ విముక్తులను చేస్తామని హామీ ఇచ్చాం. కొన్ని బ్యాంకులు రుణాలకు వడ్డీ తీసుకుంటున్నాయి. మహిళలు వడ్డీ కడితే తిరిగి ఇస్తాం. వడ్డీ కట్టకపోతే పూర్తిగా చెల్లిస్తాం.
 
 రైతులను రుణ విముక్తులను చేయడానికి, వ్యవసాయాన్ని లాభసాటిగా మార్చడానికి రైతు సాధికారిత సంస్థ పెట్టాం.
 
 రాష్ట్రమంతా ఇసుకను ఇష్టానుసారంగా దోచుకున్నారు. అందుకనే డ్వాక్రా సంఘాలకు ఇచ్చాం.  వాళ్లకు ఖర్చులు ఇస్తాం. పని కల్పిస్తాం. ్హ కరెంటు విషయంలో ఎన్నో ఇబ్బందులు వచ్చాయి.  ఇప్పుడు ఇళ్లకు 24 గంటలు, వ్యవసాయానికి  7 గంటలు కరెంటు ఇస్తున్నాం.
 
 ప్రైవేటుకు దీటుగా ప్రభుత్వ ఆస్పత్రులు పనిచేసేలా చర్యలు తీసుకుంటాం. ్హ ఎర్రచందనం దొంగల భరతం పడతాం. స్మగ్లర్లు పగలంతా రాజకీయాలు చేస్తారు. రాత్రులు స్మగ్లింగ్ చేస్తారు.
 
 కరెంటు, సాగునీటి విషయంలో రాష్ట్ర విభజన చట్టంలో ఉన్న దానినే అమలుచేస్తున్నాం. కానీ, దాన్ని వక్రీకరించి సమస్యలు సృష్టిస్తున్నారు. ఇది మంచిది కాదని అక్కడుండే వ్యక్తులకు విజ్ఞప్తి చేస్తున్నాను.
 
 గోదావరి, కృష్ణా నదులను అనుసంధానం చేసి పెన్నాలో కలిపితే రాష్ట్రం సస్యశ్యామలమవుతుంది.


 ఖమ్మం వ్యవసాయం: రుణమాఫీ ప్రక్రియ సక్రమంగా కొనసాగకపోవడంతో జిల్లాలో దాదాపు 1.50 లక్షల మంది రైతుల పరిస్థితి గందరగోళంగా మారింది. లక్ష లోపు పంట రుణాలను మాఫీ చేస్తామన్న ప్రభుత్వం ఈ మేరకు మార్గదర్శకాలను రూపొందించింది. ఆగస్టు 13వ తేదీన ఉత్తర్వులు విడుదల చేసింది. ప్రభుత్వ మార్గదర్శకాల ప్రకారం బ్యాంకుల అధికారులు, ప్రభుత్వశాఖలు లక్ష లోపు (అసలు+వడ్డీ) పంట రుణాలు పొందిన రైతుల జాబితాలను తయారు చేశాయి. రైతులు వివిధ బ్యాంకుల్లో తీసుకున్న రుణాల వివరాలను దశల వారీగా పరిశీలించి రుణమాఫీ అర్హుల జాబితాలను రూపొందించారు.
 
 ఈ జాబితా ప్రకారం జిల్లాలో 3,80,009 మంది రైతులు రుణమాఫీకి అర్హులుగా ప్రకటించారు. వీరు జిల్లాలోని వివిధ బ్యాంకుల నుంచి రూ.1711.39 కోట్లు పంట రుణాలు తీసుకున్నారని తేల్చారు. ఆ రుణాలను మాఫీ చేయాలని జిల్లా అధికారులు ప్రభుత్వానికి నివేదిక పంపారు. దీని ఆధారంగా ప్రభుత్వం పంట రుణాల మొత్తంలో నాల్గో వంతు రూ.427.85 కోట్లను మాఫీ చేస్తూ సెప్టెంబర్ 27వ తేదీన జిల్లాకు మంజూరు చేసింది. మరోసారి అర్హుల జాబితాలను పరిశీలించి ఆయా రైతుల ఖాతాల్లో నగదు జమ చేయాలని ప్రభుత్వం ఆదేశించింది.
 
 రెవెన్యూ, వ్యవసాయ, బ్యాంకుల అధికారుల బృందం రుణమాఫీ అర్హుల జాబితా ఆధారంగా సంబంధిత రైతుల రికార్డులను పరిశీలించారు. రెవెన్యూశాఖ ఇచ్చిన పహణీల ఆధారంగా బ్యాంకులు పంట రుణాలు ఇచ్చాయి. రెవెన్యూ, వ్యవసాయ, బ్యాంకు అధికారులు మరోమారు రికార్డులను పరిశీలించారు. తప్పుడు ధ్రువీకరణ పత్రాలతో రుణాలు ఇచ్చారని, పహణీల్లో సర్వే నంబర్లు తప్పుగా ఉన్నాయని 1,15,894 మంది రైతులకు చెందిన రూ.93.23 కోట్ల రుణాలను పునఃపరిశీలన చేయాలని నిర్ణయించారు.
 
  ప్రభుత్వ శాఖల తప్పిదంతోనే...
  రుణాలు ఇచ్చేటప్పుడు రెవెన్యూశాఖ పట్టాదార్‌పాస్ పుస్తకం, పహణీ నకళ్లు, ధ్రువీకరణ పత్రాలను జారీ చేసింది. వాటి ఆధారంగా బ్యాంకులు రుణాలు ఇచ్చాయి. రుణమాఫీ సమయంలో ఆ ధ్రువీకరణ పత్రాలను క్షుణ్ణంగా పరిశీలిస్తే అనేక తప్పులు బయటపడ్డాయి. సర్వేనంబర్లు తప్పుగా ఉండటం, పహణీల్లోని సర్వేనంబర్లతో రెవెన్యూ రికార్డుల్లోని నంబర్లు సరిపోలకపోవడం..తదితర సమస్యలతో పలువురు రైతుల రుణమాఫీని పెండింగ్‌లో పెట్టారు.
 
 ఈ వ్యవహారం జిల్లాలోని ఏజెన్సీ ప్రాంతంలో ఎక్కువగా చోటుచేసుకుంది. బయ్యారం మండలంలోని బయ్యారం ప్రాథమిక వ్యవసాయ సహకార పరపతి సంఘంలో 2,800 మందికి పైగా పంట రుణాలు ఇచ్చారు. వారిలో కేవలం 583 మంది మాత్రమే అర్హులుగా తేల్చారు. దాదాపు 2,300 మందికి పైగా రైతుల రుణాలను పెండింగ్‌లో పెట్టి, పునఃపరిశీలన చేయాలని నిర్ణయించారు. ఈ వ్యవహారం జిల్లా కలెక్టర్ దృష్టికి కూడా వచ్చింది. రికార్డులను సక్రమంగా పరిశీలించి అర్హులైన రైతులందరి రుణాలను మాఫీ చేయాలని ఆయన ఆదేశించారు.
 
 ఈ విధంగా జిల్లాలోని మణుగూరు, అశ్వాపురం, పినపాక, భద్రాచలం, చండ్రుగొండ, గార్ల, గుండాల, జూలూరుపాడు, కామేపల్లి, టేకులపల్లి, ఇల్లెందు, సింగరేణి, ముల్కలపల్లి తదితర మండలాల్లో రైతుల రుణమాఫీలు పెద్ద సంఖ్యలో పెండింగ్‌లో ఉన్నాయి. రుణమాఫీ ప్రక్రియను వేగవంతం చేసి అర్హులైన రైతుల బ్యాంక్ ఖాతాల్లో నగదు జమయ్యేలా  చర్యలు తీసుకోవాలని జిల్లా అధికారులు ఆదేశిస్తున్నా స్థానిక అధికారుల్లో మాత్రం పెద్దగా చలనం లేదు. కొందరు రైతులు తప్పుడు ధ్రువీకరణ పత్రాలతో రుణాలు పొందినట్లు తెలుస్తోంది. దీన్నిబట్టి నాడు రుణాలు మంజూరు చేసిన అధికారులు అక్రమాలకు పాల్పడినట్లు అర్థమవుతోంది. ఇవన్నీ ఇప్పుడు అధికారులకు తలనొప్పిగా మారాయి.
 
  సరి‘హద్దు’ రైతులకు కొత్త చిక్కులు
  ఆంధ్రప్రదేశ్, తెలంగాణ రాష్ట్రాల సరిహద్దుల్లో ఉన్న రైతులకు కొత్త చిక్కులు వచ్చిపడ్డాయి. జిల్లాలో నివాసముంటూ భూములు సరిహద్దులోని ఆంధ్రప్రదేశ్‌లో ఉన్నవారు, ఏపీలో ఉంటూ జిల్లాలో భూములు కలిగివున్న వారి రుణమాఫీ పెండింగ్‌లో ఉంది. ఇలా సత్తుపల్లి, పెనుబల్లి, అశ్వారావుపేట, కల్లూరు, ఎర్రుపాలెం, మధిర, ముదిగొండ, బొనకల్లు తదితర మండలాల రైతులు ఇబ్బంది పడుతున్నారు. వేలాది మంది అర్హులైన రైతులు దాదాపు రూ.15 కోట్ల రుణామాఫీ పొందదగిన వారు ఈ పథకానికి వర్తించకుండా పోతున్నారని అధికారులే చెబుతున్నారు. దీనిపై సంబంధిత రైతులు జిల్లా కలెక్టర్, ఉన్నతాధికారులు, ఆంధ్రప్రదేశ్ రాష్ర్ట్రంలోని సంబంధిత జిల్లాల అధికారుల చుట్టూ తిరుగుతూ ఉన్నారు.


 నెట్‌వర్క్: సాగు కోసం చేసిన అప్పులు రైతుల ప్రాణాలు తీస్తున్నాయి. మహబూబ్‌నగర్, నిజామాబాద్, నల్లగొండ, మెదక్ జిల్లాల్లో వేర్వేరు ఘటనల్లో ఏడుగురు  రైతులు ఆత్మహత్య చేసుకున్నారు. కరీంనగర్‌లో ఒకరు గుండెపోటుతో మరణించారు. మహబూబ్‌నగర్ జిల్లా పెద్దకొత్తపల్లి మండలం వెన్నచర్లకు చెందిన రైతు మన్నె మాసిరెడ్డి(65) ఐదు ఎకరాలోల మొక్కజొన్న సాగు చేశాడు. దీని కోసం రూ. లక్ష అప్పు చేశాడు. దిగుబడి తగ్గడంతో అప్పు తీరే మార్గం కనిపించక బుధవారం గుళికలు మింగాడు. ఇదే జిల్లా మిడ్జిల్ మండలం కొత్తపల్లికి చెందిన రైతు చిక్కొండ నారాయణ(55) నాలుగు ఎకరాల్లో పత్తి సాగు చేశాడు.
  
  వ్యవసాయంతోపాటు, కూతురు పెళ్లి కోసం రూ. ఐదు లక్షల వరకు అప్పు చేశాడు. వర్షాభావ పరిస్థితుల్లో దిగుబడి భారీగా తగ్గింది. అప్పులు తీరే మార్గం కనిపింకపోవడంతో క్రిమిసంహారక మందు తాగాడు. నిజామాబాద్ జిల్లా భీమ్‌గల్ మండలం బాచన్‌పల్లికి చెందిన రైతు ఆకుల పెద్ద గంగాధర్(63) 20 ఏళ్లు గల్ఫ్‌లో ఉండి ఐదేళ్ల క్రితం వచ్చాడు. తనకున్న ఆరు ఎకరాల్లో సాగు చేస్తున్నాడు. పలుమార్లు బోర్లు వేసినా నీరు పడకపోవడంతో ఈ ఏడాది రెండు ఎకరాలే సాగు చేశాడు. కరెంటు సరిగా లేకపోవడంతో దిగుబడి సరిగా రాలేదు. మనస్తాపంతో బుధవారం ఇంట్లో ఉరి వేసుకున్నాడు. నల్లగొండ జిల్లా చండూరు మండలం ఉడతలపల్లికి చెందిన రైతు కావలి వెంకన్న(35) తండ్రితో కలిసి తమకున్న నాలుగు ఎకరాల్లో పత్తి సాగు చేస్తున్నారు. వ్యవసాయ అవసరాలకు గతేడాది రూ. లక్షకు పైగానే అప్పు చేశాడు. ఈ ఏడాది కూడా అప్పులు చేశాడు.  అప్పుల వారి వేధింపులు పెరగడంతో మంగళవారం సాయంత్రం వ్యవసాయభూమి వద్ద క్రిమిసంహారక మందు తాగాడు.
  
  సంస్థాన్‌నారాయణపురం మండలం అలుగుతండాకు చెందిన మహిళా రైతు కరంటోతు సునీత(25) భర్త కిషన్‌తో కలిసి పత్తిసాగు చేస్తున్నారు. సాగు కోసం రూ. 2 లక్షల వరకు అప్పు చేశారు. పంట దిగుబడి రాకపోవడం.. అప్పుల వారి వేధింపులు పెరగడంతో మనస్తాపానికి గురై మంగళవారం క్రిమిసంహారక మందు తాగింది. నేరేడుచర్ల మండలం బొత్తలపాలెం పరిధి లాలీతండాకు చెందిన రైతు బానోతు కిట్టు అలియాస్ కృష్ణ(32) రెండున్నర ఎకరాల్లో వరి, కౌలుకు తీసుకున్న రెండున్నర ఎకరాల్లో పత్తి వేశాడు. ఇందుకోసం రూ. 4లక్షల వరకు అప్పు చేశాడు. పంటలు దెబ్బతినడంతో క్రిమిసంహారక మందు తాగాడు.
  
  మెదక్ జిల్లా సదాశివపేట మండలం తంగెడపల్లికి చెందిన రైతు ఎల్లారం రాములు తన ఎకరం పొలంతో పాటు మరో రెండు ఎకరాలు కౌలుకు తీసుకొని పత్తి పంటను సాగు చేశాడు. సాగుకు రూ. లక్షకు పైగా అప్పు చేశాడు. పంట దెబ్బతినడంతో అప్పులెలా తీర్చాలో తెలియక  క్రిమిసంహారక మందు తాగాడు.   కరీంనగర్ జిల్లా వీణవంక మండలం దేశాయిపల్లి రైతు ముసిపట్ల రాజారెడ్డి (45) 3 ఎకరాలు కౌలుకు తీసుకుని పత్తి, వరి వేశాడు. రెండేళ్లుగా దిగుబడి రాలేదు. పెట్టుబడి కోసం రూ.80 వేలు అప్పు చేశాడు. అప్పు తీరే మార్గం లేక మనోవేదనతో గుండెపోటుకు గురయ్యాడు.


 రైతు రుణాల మాఫీకి ఏపీ ప్రభుత్వం సవాలక్ష నిబంధనలు పెడుతోంది. ఆధార్ కార్డులు, రేషన్ కార్డులు ఉన్నవాళ్లకు మాత్రమే రుణమాఫీ వర్తిస్తుందని స్పష్టం చేసింది. అలాగే ఉద్యాన పంటలకు కూడా రుణమాఫీ వర్తించదట. పంట రుణాల మాఫీపై అభ్యంతరాలు తెలియజేసేందుకు ఏపీ ప్రభుత్వం మరో రోజు గడువు పెంచింది. ఇప్పటివరకు దాదాపు 3 లక్షల మంది నుంచి అభ్యంతరాలు వచ్చాయి.
 
 రుణమాఫీ కింద మొత్తం 30 లక్షల కుటుంబాలకు లబ్ధి చేకూరుతుందని సర్కారు చెబుతోంది. ఈనెల 13, 14, 15, 16 తేదీలలో లబ్ధిదారుల వడపోత కార్యక్రమం జరుగుతుందని అన్నారు. ఇప్పటివరకు పంట రుణాలు ఉన్నవారిలో మాఫీకి తిరస్కరించిన వారి జాబితాను బ్యాంకులకు పంపించామని ప్రభుత్వ వర్గాలు చెబుతున్నాయి. వచ్చే నెలలో రైతులకు బాండ్లు జారీ చేస్తున్నామని అంటున్నారు.


 నాడు...
  దివంగత ముఖ్యమంత్రి వైఎస్ రాజశేఖరరెడ్డి 2004లో పాలనా పగ్గాలు చేపట్టగానే ఎటువంటి నిబంధనలు లేకుండా బ్యాంకులు తీసుకున్న రుణాలన్నీ, మెట్ట రైతులకు విద్యుత్ బకాయిలతో సహా ఒక్క సంతకంతో మాఫీ చేశారు. రాష్ట్రంలోని అందరి రైతుల్లానే సంతమాగులూరు మండలం కొమ్మాలపాడు రెవెన్యూ గ్రామ పరిధిలోని రైతుల రుణాలు మాఫీ అయ్యాయి. అప్పుల ఊబి నుంచి బయటపడి అన్నదాతలు ఊపిరి పీల్చుకున్నారు.
 
  నేడు...
  ఎన్నికల వేళ రైతులు, డ్వాక్రా మహిళల రుణాలన్నీ మాఫీ చేస్తామని హామీలు గుప్పించి అందలమెక్కిన చంద్రబాబు..రుణ మాఫీ చేస్తామంటూనే రోజుకో నిబంధనతో రైతులకు కుచ్చుటోపీ పెడుతున్నారు. ఆధార్‌కార్టు, రేషన్‌కార్డు, సర్వేనంబర్ల ఆన్‌లైన్, పట్టాదారు పుస్తకాల ఆన్‌లైన్ అంటూ ఆంక్షల వలయంలో రైతన్నను బంధించి రుణమాఫీకి దూరం చేశారు. ఫలితంగా కొమ్మాలపాడు రెవెన్యూ పరిధిలో 2,900 మంది రైతులు రూ.23 కోట్ల రుణమాఫీ కోల్పోయారు.
  
  సంతమాగులూరు: రోజుకో కొత్త నిబంధనతో సాధ్యమైనంత ఎక్కువ మందిని రుణమాఫీకి దూరం చేయాలన్న సర్కారు పన్నాగానికి వేలాది మంది రైతులు నష్టపోతున్నారు. కొమ్మాలపాడు రెవెన్యూ గ్రామ పరిధిలోని అగ్రహారం భూములు సాగు చేసుకుంటున్న రైతులే దీనికి నిదర్శనం.
 
 రైతుల సాగుభూములు వారిపేర్లతో ఆన్‌లైన్ చేయని కారణంతో ఆ రెవెన్యూ పరిధిలోని కొమ్మాలపాడు, మక్కెనవారిపాలెం, సజ్జాపురం, బల్లికురవ మండలం చెన్నుపల్లి గ్రామాలకు చెందిన 2,900 మంది రైతులు రూ.23 కోట్ల మేర రుణమాఫీ సదుపాయాన్ని కోల్పోతున్నారు. రుణమాఫీపై ఆంక్షలు ఎత్తివేసి బ్యాంకులు పంట రుణాలు అందజేసిన అందరికీ మాఫీ వర్తింపజేయాలని రైతు సంఘాల నాయకులు, వామపక్ష పార్టీలు డిమాండ్ చేస్తున్నాయి.  
 
  కొమ్మాలపాడు కథ ఇదీ...
  స్వాతంత్య్రానికి పూర్వం కొమ్మాలపాడు గుంటూరు జిల్లా పరిధిలో ఉండేది. అప్పట్లో ఈ ప్రాంతం జాగర్లమూడి కుప్పుస్వామి జమీందారిలో  సర్వే నంబరు 1 నుంచి 230 వరకు 4,874 ఎకరాలు ఉండేది. స్వాతంత్య్రానంతరం జమీన్‌దారులకు ఏటా కప్పం కడుతూ సాగు చేసుకుంటున్న భూములు రైతుల ఆధీనమయ్యాయి.
 
  అయితే భూములు సాగు చేసుకుంటున్న వారి పేర్లు రికార్డుల్లో నమోదు కాలేదు. 1972లో ప్రకాశం జిల్లా ఆవిర్భావంతో సంతమాగులూరు సమితి ప్రాంతం గుంటూరు జిల్లా నుంచి విడిపోయి ప్రకాశంలోకి వచ్చింది. మండలాల ఏర్పాటుకు పూర్వమే కొమ్మాలపాడు రెవెన్యూ గ్రామ పరిధిలోని భూముల్లో సాగులో ఉన్న రైతులు తమ భూములు రీ సర్వే జరిపి యాజమాన్య హక్కులు కల్పించాలని అనేకమార్లు అధికారులకు మొరపెట్టుకున్నారు.
 
 అయినా ఫలితం శూన్యం. అయితే  రైతువారీగా పంటల వివరాలను, అడంగల్‌లో అనుభవదారులైన రైతుల పేర్లు ఏటా నమోదు  చేస్తున్నారు. బ్యాంకులు కూడా రెవెన్యూ అధికారులు జారీ చేసే అడంగల్ ఆధారంగా ఆయా రైతులకు పంటరుణాలు మంజూరు చేస్తున్నాయి. ఈ క్రమంలోనే 2004లో అప్పటి ముఖ్యమంత్రి వైఎస్.రాజశేఖరరెడ్డి చేసిన రుణమాఫీలో కొమ్మాలపాడు రెవెన్యూ పరిధిలోని రైతులందరికీ రుణాలు పూర్తిగా మాఫీ అయి రుణవిముక్తులయ్యారు.
 
 తాజాగా రుణమాఫీకి అర్థ రహితమైన నిబంధనలు పెట్టడంతో వీరంతా రుణమాఫీ జాబితాలోకి రావడం లేదు. ఈ భూములన్నీ అగ్రహారం భూములని రెవెన్యూ రికార్డుల్లో ఉండటం, రైతు ఖాతాలు ప్రారంభించకపోవడం, ఖాతాలు లేనిదే కంప్యూటర్ అడంగల్ నమోదు కాకపోవడం, అడంగల్‌కు ఆధార్‌కు రుణమాఫీకి లింకు పెట్టడంతో వీరంతా రుణమాఫీ ప్రయోజనాన్ని పొందలేకపోతున్నారు.
 
  ఈ విషయమై ఇటీవల జరిగిన సంతమాగులూరు మండల పరిషత్ సమావేశంలో సభ్యులు తమ ఆవేదనను   వ్యక్తపరచారు. తక్షణమే నిబంధనలు సడలించి కొమ్మాలపాడు రెవెన్యూ పరిధిలోని రైతులందరికీ రుణమాఫీ వర్తింపజేయాలని రైతులు డిమాండ్ చేస్తున్నారు.


 రైతు రుణాలన్నింటినీ ఈనెల 25వ తేదీలోగా మాఫీ చేస్తామని ఏపీ ముఖ్యమంత్రి చంద్రబాబు నాయుడు చెప్పారు. వైఎస్ఆర్ జిల్లా రైల్వేకోడూరు మండలం ఓబనపల్లిలో ఆయన జన్మభూమి కార్యక్రమంలో పాల్గొని మాట్లాడారు. పోలవరం ప్రాజెక్టును త్వరగా పూర్తిచేసి గోదావరి నీళ్లను కృష్ణకు, కృష్ణాజలాలను రాయలసీమకు అందిస్తామని ఆయన అన్నారు.
 
 గాలేరు- నగరి, హంద్రీ నీవా ప్రాజెక్టులను పూర్తిచేసి రాయలసీమను సస్యశ్యామలం చేస్తామన్నారు. కడపలో ఉక్కు ఫ్యాక్టరీ నిర్మాణ బాధ్యతలను తామే చేపడతామని చెప్పారు. ప్రధాని నరేంద్రమోదీ మేక్ ఇన్ ఇండియా అని పిలుపునిచ్చారని, దాన్ని తాను మేక్ ఇన్ ఆంధ్రప్రదేశ్ అంటున్నానని చంద్రబాబు తెలిపారు. ప్రతి ఇంటికీ నీళ్లు, గ్యాస్, ఇంటర్నెట్ సదుపాయాలను కల్పిస్తామని ఆయన చెప్పారు.


 హైదరాబాద్: ఆంధ్రప్రదేశ్ ముఖ్యమంత్రి చంద్రబాబు నాయుడు శుక్రవారం బ్యాంకర్లతో సమావేశమయ్యారు. రైతుల రుణమాఫీ, కొత్త రుణాల గురించి చంద్రబాబు వారితో చర్చించారు. కాగా రైతు సాధికారిక కార్పొరేషన్కు ఇచ్చే నిధుల ఆధారంగానే కొత్త రుణాలు మంజూరు చేస్తామని బ్యాంకర్లు చంద్రబాబుకు స్పష్టం చేశారు.
 
 20 శాతం మేరకే కొత్త లోన్లు ఇస్తామని బ్యాంకర్లు చెప్పారు. రైతులకు అదనంగా రుణాలు మంజూరు చేయాలని చంద్రబాబు బ్యాంకర్లను కోరారు. గత అసెంబ్లీ ఎన్నికల సందర్భంగా చంద్రబాబు రైతు రుణమాఫీ చేయనున్నట్టు హామీ ఇచ్చిన సంగతి తెలిసిందే. అయితే రైతుల రుణాలను ఇంకా మాఫీ చేయలేదు. విడతల వారీగా మాఫీ చేస్తామని చంద్రబాబు చెబుతున్నారు.


 20 శాతం రుణాల మాఫీకిగాను వ్యవసాయ శాఖకు మంజూరు
 నలుగురు డెరైక్టర్లతో రైతు సాధికారిత కార్పొరేషన్ రిజిస్ట్రేషన్
  
 హైదరాబాద్: రైతుల రుణాల్లో 20 శాతం మాఫీ చేయడంలో భాగంగా ఆర్థిక శాఖ శనివారం రూ.5000 కోట్లను వ్యవసాయ శాఖకు విడుదల చేయనుంది. మరోపక్క నలుగురు డెరైక్టర్లతో రైతు సాధికారిత కార్పొరేషన్‌ను ప్రభుత్వం శుక్రవారం రిజిస్టర్ చేసింది. విజయవాడ కేంద్రంగా పనిచేసే ఈ కార్పొరేషన్‌ను ఈ నెల 21న సీఎం ప్రారంభించనున్నట్లు ఆర్థిక శాఖ ఉన్నతాధికారి తెలిపారు. డెరైక్టర్లుగా ఆర్థిక, వ్యవసాయ, పుశుసంవర్ధక శాఖల ముఖ్యకార్యదర్శులు, వ్యవసాయ కమిషనర్ వ్యవహరించనున్నారు. ఈ కార్పొరేషన్‌ను రూ.కోటి మూలధనంతో ఏర్పాటు చేశారు.
 
 ప్రాధాన్యతా క్రమంలో మాఫీ..
 
 ఆర్థిక శాఖ నుంచి వచ్చే 5000 కోట్ల రూపాయలను వ్యవసాయ శాఖ రైతు సాధికారిత కార్పొరేషన్‌కు విడుదల చేయనుంది. అక్కడ నుంచి రుణ మాఫీకి అర్హులైన రైతుల రుణాల్లో 20 శాతం నిధులను బ్యాంకులకు విడుదల చేయనున్నారు. ఈ 20 శాతం నిధుల చెల్లింపును కూడా ప్రాధాన్యత క్రమంలో చేయనున్నారు. తొలుత పంట రుణాలకు, ఆ తరువాత ప్రకృతి వైపరీత్యం సమయంలో దీర్ఘకాలిక రుణాలుగా మారిన పంట రుణాలకు ఇస్తారు. చివరి ప్రాధాన్యతగా బంగారంపై తీసుకున్న రుణాలను పరిగణనలోకి తీసుకున్నారు. బంగారం రుణాలకు 20 శాతం ప్రభుత్వం చెల్లించినప్పటికీ అవి కొత్త రుణాలగా మారబోవని అధికార వర్గాలు తెలిపాయి. ప్రభుత్వం 20 శాతం నిధులను చెల్లిస్తే మిగతా 80 శాతం రుణాన్ని రైతులు చెల్లించి బంగారం విడిపించుకోవాల్సి  ఉంటుంది.అలా కాకుండా మిగతా 80 శాతం కూడా ప్రభుత్వమే చెల్లిస్తుందని, అప్పుడు బంగారం విడిపించుకోవచ్చునని రైతులు అనుకుంటే 14 శాతం మేర వడ్డీ భారం పడుతుంది. బంగారం రుణాలతో పాటు, పంట రుణాలన్నింటికీ గత ఏడాది డిసెంబర్ వరకుగల వడ్డీనే ప్రభుత్వం పరిగణనలోకి తీసుకుంటుందని, జనవరి నుంచి 7 శాతం మేర వడ్డీని, జూలై నుంచి 14 శాతం వడ్డీని రైతులే భరించాలని ఓ అధికారి తెలిపారు.
  
  


 కరీంనగర్ అగ్రికల్చర్: జిల్లాలో ప్రధానంగా ఖరీఫ్ సీజన్‌లో రైతులు అధికంగా పంట రుణాలు తీసుకుంటారు. వ్యవసాయ పెట్టుబడులు ఏటేటా పెరుగుతున్న నేపథ్యంలో సర్కారు పంట రుణాల లక్ష్యాన్ని పెంచుతోంది. ప్రతి సంవత్సరం భారీ లక్ష్యాలు పెట్టుకోవడం, ఆ తర్వాత వాటిని అందుకోలేక చేతులెత్తేయడం రివాజుగా మారింది. కానీ గత ఏడేళ్ల రికార్డులను పరిశీలిస్తే.. ఒక్క 2012-13లో మాత్రమే రుణ లక్ష్యాన్ని చేరుకున్నట్టు స్పష్టమవుతోంది. జూన్ నుంచి సెప్టెంబర్ 30 వరకు గల ఖరీఫ్ సీజన్‌లో సగటున 60 శాతం మంది రైతులు పంట రుణాలు పొందుతున్నారు.
 
 కానీ.. ఈసారి టీఆర్‌ఎస్ సర్కారు రుణమాఫీ విషయంలో తీవ్ర జాప్యం చేయడంతో రైతులకు బ్యాంకు రుణాలు పుట్టలేదు. రుణమాఫీ నిబంధనలపై స్పష్టత లేకపోవడం వల్ల ఆగస్టు వరకు కూడా బ్యాంకర్లు కొత్తగా పంట రుణాలు ఇవ్వలేకపోయారు. ఎట్టకేలకు గత నెలలో రాష్ట్ర సర్కారు రుణమాఫీపై ఒక అడుగు ముందుకు వేసినప్పటికీ అప్పటికే పుణ్యకాలం కాస్తా పూర్తయింది. రుణమాఫీ డబ్బులను నాలుగు విడతలుగా బ్యాంకర్లకు చెల్లించేందుకు ప్రభుత్వం నిర్ణయించింది. రుణమాఫీ కింద జిల్లాకు మొత్తం రూ.1656.856 కోట్లు ఇవ్వాల్సి ఉండగా, తొలి విడతగా 25 శాతం అంటే రూ.41.25 కోట్లను 3,73,876 మంది రైతులకు విడుదల చేసింది.
 
 రుణమాఫీ నిధులు విడుదల కావడంతో రైతులకు పంట రుణాలను ఇవ్వాలని, మాఫీ పొందిన వారికి స్కేల్ ఆఫ్ ఫైనాన్స్ పెంచి ఇవ్వాలని సర్కారు ఆదేశించింది. సెప్టెంబర్ 30కి ఖరీఫ్ గడువు ముగిస్తుండగటంతో ఈ నెల 15 వరకు గడువు పెంచింది. ఈ గడువు ముగిసే దశలో జిల్లా యంత్రాంగం కేవలం ఒక్క రోజులో స్పెషల్‌డ్రైవ్ నిర్వహించి రూ.500 కోట్ల పంట రుణాలు అందించేలా బ్యాంకర్లను ప్రోత్సహించింది. అయితే రుణమాఫీ పొందిన రైతులకు కొత్త రుణాలు ఇవ్వడానికి బ్యాంకర్లు తిప్పలు పెట్టారు. 1బీ రికార్డులు, పహణీ నకలు, 2పాస్‌పోర్టు సైజు ఫొటోలతో రుణమాఫీ హామీ పత్రంపై సంతకం చేసిన రైతులకు కొత్త రుణాలు అందించారు.
 
 సమయం తక్కువ కావడం, 1బీ రికార్డు, పహణీ నకలు కోసం రెవెన్యూ అధికారులు తిప్పుకోవడం, మరోవైపు ఆహారభ ద్రత కార్డు, పెన్షన్లు, ఇతర సర్టిఫికెట్లకు దరఖాస్తులు స్వీకరించడంలో అధికారులు బిజీగా మారడంతో ఖరీఫ్ పంట రుణం గడువు కాస్తా పూర్తయ్యింది. బ్యాంకర్ల మెలికలు, రెవెన్యూ యంత్రాంగం నిర్లక్ష్యం కారణంగా రైతులు పంట రుణాలకు దూరమయ్యే పరిస్థితి నెలకొంది. అలాగే రుణమాఫీ పొందిన రైతులకు స్కేల్ ఆఫ్ ఫైనాన్స్ పెంచి ఇవ్వాలన్న ఆదేశాలను బ్యాంకర్లు పట్టించుకోలేదు.
  
 ఉదాహరణకు బ్యాంకులో రూ.81 వేల అప్పు ఉంటే.. ఇందులో 25 శాతం తొలివిడతగా ప్రభుత్వం బ్యాంకులకు చెల్లించింది. రూ.81 వేలలో నాలుగో వంతు అంటే రూ.20,250 రుణమాఫీ కింద ప్రభుత్వం చెల్లించింది. ఇప్పుడు రైతుకు రూ.60 వేల రుణం ఇవ్వాల్సి ఉండగా, చాలా మందికి రూ.10 నుంచి రూ.20 వేలు మాత్రమే ఇచ్చారు. రబీలోనూ బ్యాంకర్లు ఇదే పంథా కొనసాగిస్తే.. ఇప్పటికే పెట్టుబడుల భారంతో అప్పులపాలైన అన్నదాతల పరిస్థితి మరింత దా‘రుణం’ కానుంది. రబీలో పంట రుణం లక్ష్యం రూ.650 కోట్లు నిర్దేశించినా.. ఏ మేరకు ఇస్తారో చూడాల్సిందే.


 - 60 వేల మంది రైతులకు పంట రుణం
 - ఫలితమిచ్చిన స్పెషల్‌డ్రైవ్
 కరీంనగర్ అగ్రికల్చర్ : ఖరీఫ్‌సీజన్ ఆఖరున అన్నదాతకు కొంతమేర సంతోషాన్నిచ్చింది. పెట్టుబడులు కోల్పోయి వడ్డీవ్యాపారులను అప్పుల కోసం ఆశ్రయించే సమయంలో బ్యాంకర్లు కనికరించారు. ఆఖరు రోజు అరవై వేలమందికిపైగా రూ.307 కోట్ల రుణాలందించినట్లు లీడ్‌బ్యాంకు మేనేజర్ డీఏ.చౌదరి తెలిపారు. ఖరీఫ్ రుణకాలపరిమితి పూర్తయిందని చెప్పారు. ప్రభుత్వ ఆదేశాలు, కలెక్టర్ సమీక్ష అనంతరం మంగళవారం పంట రుణాల మంజూరుకు చేపట్టిన స్పెషల్‌డ్రైవ్ రైతులకు మేలు చేకూర్చింది. జూన్‌లో మొదలైన ఖరీఫ్ సీజన్‌కు గాను రూ.900 కోట్ల పంటరుణాల మం జూరుకు బ్యాంకర్లు లక్ష్యం విధించుకున్నారు.
 
 ఇప్పటివరకు రూ.400 కోట్లు మాత్రమే 20 శాతం మందికి రుణాలిచ్చారు. ఇంకా రూ.500 కోట్ల పంట రుణాలు ఇవ్వాల్సి ఉంది. రుణమాఫీ విషయంలో చర్చోపచర్చల అనంతరం మొదటివిడతగా జిల్లావ్యాప్తంగా 3,73,877 మంది రైతులకు రూ.1656 కోట్ల పంట రుణాలమాఫీకి గాను.. జిల్లాకు రూ.414.21 కో ట్లు నిధులు విడుదల చేశారు.  వాటిని సంబంధిత బ్యాంకులకు జమచేశారు. ఆఖరు రోజు లబ్ధిదారులందరికీ రుణాలిస్తామంటూ బ్యాంకర్లు ఒక్క రోజే అవకాశం కల్పించారు.
 
 ఒక్కరోజులో మిగిలిన రూ.500 కోట్ల పంటరుణాలను మం జూరుచేయడమే లక్ష్యంగా స్పెషల్‌డ్రైవ్ చేపట్టారు. ఈ ఒక్క రోజులో రూ.307 కోట్ల  పంట రుణాన్ని 60వేల మంది రైతులకు అందజేశారు. మొత్తంగా ఖరీఫ్ సీజన్ లక్ష్యంలో రూ. 183 కోట్ల రుణాలను ఇవ్వలేకపోయారు. సీజన్ మొత్తంలో రూ.900 కోట్ల పంట రుణ లక్ష్యానికిగాను ఇప్పటివరకు రూ.707 కోట్లను 1.40 లక్షల మంది రైతులకు ఇచ్చారు.


 ఎస్‌ఎల్‌బీసీ నివేదన
  
 లక్ష్యం రూ.56,019 కోట్లు.. ఇచ్చింది రూ.7,263 కోట్లు
  1,514 మంది కౌలు రైతులకు రూ.3.81 కోట్ల రుణాలు
  
 హైదరాబాద్:ప్రస్తుత ఆర్థిక సంవత్సరంలో పంట రుణాలన్నీ కలుపుకుని రూ.56,019 కోట్లు ఇవ్వాలనేది లక్ష్యం కాగా, ఇప్పటివరకు కేవలం రూ.7,263 కోట్లు (12.97 శాతం) మాత్రమే రైతులకు రుణ రూపేణా అందించామని మంగళవారం నాటి ఎస్‌ఎల్‌బీసీ సమావేశంలో బ్యాంక ర్లు నివేదించారు. కౌలు రైతుల పరిస్థితి మరింత దయనీయంగా మారింది. 13 జిల్లాల్లో పునరుద్ధరించినవి, కొత్తవి కలిపి 1,86,885 మందికి రుణ అర్హత కార్డులు (ఎల్‌ఈసీ కార్డులు) జారీ చేయ గా, రుణాలిచ్చింది మాత్రం 1,514 మందికి రూ.3.81 కోట్లు మాత్ర మే. రాష్ట్ర వ్యవసాయ శాఖ మంత్రి ప్రత్తిపాటి పుల్లారావు సొంత జిల్లా గుంటూరులో ఒక్క కౌలు రైతుకు రుణ అర్హతకార్డు రెన్యువల్ కాకపోగా, కొత్త కార్డు ఒక్కటీ మంజూరు చేయలేదు. ఇక్కడ పైసా రుణం కూడా కౌలు రైతులకు ఇవ్వలేదని ఎస్‌ఎల్బీసీ గ ణాంకాలు తెలియజేస్తున్నాయి. గుంటూరు, కడప, చిత్తూరు, అనంతపురం, కర్నూలు, నెల్లూ రు, కృష్ణా, పశ్చిమగోదావరి, విశాఖపట్నం జిల్లా ల్లో కౌలు రైతులకు రుణాలు అసలు మంజూరు చేయకుండా మొండిచెయ్యి చూపారు. తూర్పుగోదావరిలో 1,369 మంది కౌలు రైతులకు, ప్రకాశంలో 109, శ్రీకాకుళంలో 25, విజయనగరంలో 11 మంది కౌలు రైతులకు రుణాలిచ్చారు.
 
 బీమా గడువు 31వరకు పెంచాలి..
 
 రాష్ట్రంలో నెలకొన్న ప్రత్యేక వర్షాభావ పరిస్థితుల దృష్ట్యా అక్టోబర్ 31 వరకు పంటల బీమా గడువు పొడిగించాలని సమావేశంలో తీర్మానిం చారు. ఈ తీర్మానాన్ని కేంద్రం పరిధిలోని అగ్రికల్చర్ కార్పొరేషన్ ఆఫ్ ఇండియాకు పంపించాలని నిర్ణయించారు. అయితే ఈ సమావేశానికి హాజరైన వ్యవసాయ బీమా కార్పొరేషన్ ప్రతి నిధి గడువు పెంపు కుదరదని తేల్చి చెప్పారు. ఎస్‌ఎల్‌బీసీ కన్వీనర్ దొరస్వామి సానుభూతితో అంశాన్ని పరిశీలించాలని కోరారు.
 
 నిరర్ధక రుణాలుగా రూ. 32,516 కోట్లు
 
 రాష్ట్రంలోని అన్ని బ్యాంకుల్లో కలిపి రూ.32,516 కోట్ల వ్యవసాయ రుణాలు నిరర్ధక రుణాలుగా మారిపోయినట్లు ఎస్‌ఎల్‌బీసీ నివేదిక వెల్లడించింది. రూ. 94,937 కోట్ల వ్యవసాయ రుణాలు ఇచ్చినట్లు పేర్కొంది. చెల్లించాల్సిన తేదీ దాటిన 90 రోజుల తర్వాత కూడా కనీస మొత్తం జమ చేయని ఖాతాలను తాత్కాలిక నిరర్ధక రుణ (ఓవర్ డ్యూస్) ఖాతాలుగా బ్యాంకులు గుర్తిస్తాయి.
  
 రుణమాఫీలో రాష్ట్ర ప్రభుత్వం ఎంత మొత్తం చెల్లించినా తీసుకోవడానికి బ్యాంకులు సిద్ధం గా ఉన్నాయని ఎస్‌ఎల్‌బీసీ కన్వీనర్ సి.దొరస్వామి చెప్పారు. మంగళవారం ఎస్‌ఎల్‌బీసీ సమావేశానంతరం ఆయన విలేకరులతో ము చ్చటించారు. ‘కిసాన్ వికాస పత్రాలను బ్యాం కులు అంగీకరిస్తాయి. రుణమాఫీ పథకం కింద ప్రభుత్వం జారీ చేసే బాండ్లు ఎలా ఉంటాయి? దానికి ఉన్న సాధికారత ఏమిటి? ఆర్బీఐ వాటిని అంగీకరిస్తే.. బ్యాంకులూ అం గీకరిస్తాయి. బ్యాంకుల నుంచి తీసుకున్న రుణాలను ఎవరు చెల్లించినా, ఏ రూపంలో చెల్లించినా బ్యాంకులు తీసుకుంటాయి’ అని చెప్పారు. తొలుత 20 శాతం చెల్లిస్తామంటూ ప్రభుత్వం చేసిన ప్రతిపాదన గురించి ప్రస్తావించగా.. ‘మీకు ఎవరైనా రూ.100 బాకీ ఉంటే.. రూ. 20 ఇస్తానంటే వద్దంటారా? ఇచ్చినంత తీసుకొని మిగతా మొత్తం ఇవ్వమని అడుగుతారు. బ్యాంకులు కూడా అంతే’ అని స్పందించారు. రాష్ట్ర ప్రభుత్వం 20 శాతం ఇచ్చినా, 30 శాతం ఇచ్చినా తీసుకుంటామని, మిగతా సొమ్మునూ ఇవ్వమని అడుగతామని అన్నారు. 20 శాతం నిధులు చెల్లించిన తర్వాత రైతులకు రుణాలు ఇచ్చే విషయమై ఆర్బీఐ నిబంధనల మేరకే బ్యాంకులు వ్యవహరిస్తాయని చెప్పారు.
  
  


 * ధ్వజమెత్తిన వైఎస్సార్‌సీపీ రైతు విభాగం
 * రైతులకిచ్చిన హామీలు అమలు చేయకపోతే పోరాటమే
 సాక్షి, హైదరాబాద్: అధికారంలోకి వస్తే రైతుల పంట రుణాలన్నింటినీ మాఫీ చేస్తానని హామీ ఇచ్చిన ఏపీ సీఎం చంద్రబాబు తానిచ్చిన హామీలనే మాఫీ చేసే యత్నంలో పడిపోయారని వైఎస్సార్‌సీపీ రైతు విభాగం దుయ్యబట్టింది. బాబు ఎన్నికల సమయంలో రైతులకిచ్చిన హామీలను అమలు చేయకపోతే రైతుల తరపున పోరాటం చేయాలని నిర్ణయించింది. రాష్ట్రంలోని 13 జిల్లాల్లోనూ వ్యవసాయరంగం సంక్షోభంలో ఉందని, రైతుల సమస్యలపై క్రియాశీలంగా ఉంటూ ఎప్పటికపుడు వాటి పరిష్కారానికి ఉద్యమించాలని తీర్మానించింది. రైతు విభాగం అధ్యక్షుడు ఎం.వి.ఎస్.నాగిరెడ్డి అధ్యక్షతన సోమవారం మూడు గంటల పాటు జరిగిన ఈ సమావేశంలో రాష్ట్రంలో నెలకొన్న వ్యవసాయ పరిస్థితులపై లోతుగా చర్చించారు. పార్టీ పర్యవేక్షణ కమిటీ సభ్యుడు వి.విజయసాయిరెడ్డి హాజరైన ఈ సమావేశంలోనే తొలి అధ్యక్షునిగా నాగిరెడ్డి పదవీ స్వీకారం చేశారు. షరతుల్లేకుండా రైతుల పంట రుణాలన్నింటినీ మాఫీ చేస్తానని, వ్యవసాయ పంటలకు మద్దతు ధర కల్పిస్తామని, రూ.ఐదు వేల కోట్లతో ధరల స్థిరీకరణ నిధిని ఏర్పాటు చేస్తానని చంద్రబాబు ఎన్నికల్లో చేసిన వాగ్దానాలను అమలు చేయడం లేదని సమావేశం దుయ్యబట్టింది. జిల్లాల వారీ గా పరిస్థితిని సమీక్షిస్తూ మొత్తం మీద ఒక్క ప్రత్తి మినహా అన్ని పంటల సాగు విస్తీర్ణం గణనీయంగా పడిపోవడంపట్ల ఆందోళన వ్యక్తం చేసింది.  కనీస మద్దతు ధరను నామమాత్రంగా ప్రకటిస్తున్నా కేంద్రం వైఖరిని రాష్ట్రం ప్రశ్నించకపోవడాన్ని సమావేశం గర్హించింది.
  
  బలవంతంగా భూసేకరణ చేస్తే ఊరుకోం..
  రాజధాని నిర్మాణం పేరుతో కృష్ణా, గుంటూరు జిల్లాల రైతుల నుంచి బలవంతంగా భూసేకరణ చేస్తే వైఎస్సార్‌సీపీ రైతు విభాగం ప్రతిఘటిస్తుందని సమావేశం హెచ్చరించింది. స్వచ్ఛం దంగా ముందుకు వచ్చే రైతుల నుంచే ల్యాండ్ పూలింగ్ విధానంలో భూమిని తీసుకుంటామని తొలుత చెప్పిన టీడీపీ ప్రభుత్వం ఇపుడు బల వంతంగానైనా సరే తీసుకుంటామని మాట్లాడుతున్నారని, ఇదెంత మాత్రం శ్రేయస్కరం కాదని రైతు ప్రతినిధులు హెచ్చరించారు. సమావేశానంతరం అధ్యక్షుడు నాగిరెడ్డి, విజయసాయిరెడ్డితో కలిసి మీడియాతో మాట్లాడుతూ... ఒక బాధ్యతాయుతమైన ప్రతిపక్షంగా రైతుల తరపున ఎలా పోరాడాలో అందుకు అనుగుణంగా ప్రణాళిక రూపొందించుకున్నామని చెప్పారు. షరతుల్లేకుండా పంట రుణాల మాఫీ, స్వామినాథన్ కమిటీ సిఫార్సుల అమలు, ధరల స్థిరీకరణ నిధిని ఏర్పాటు చేయకుండా చంద్రబాబు రైతులను మోసం చేశారని విమర్శించారు. సమావేశంలో జిల్లాల రైతు నేతలు కొల్లి రాజశేఖర్, శ్రీధర్, రాజబావు, మధుసూదనరెడ్డి, ప్రసాదరెడ్డి , ఆదికేశవరెడ్డి , సుబ్రమణేశ్వరరెడ్డి,సుబ్బారెడి, శివరామకృష్ణారెడ్డి పాల్గొన్నారు. 


 ఖరీఫ్ సీజన్ మొదలయ్యాక నాలుగు నెలలపాటు రుణంపై దోబూచులాడుకున్న ప్రభుత్వం, బ్యాంకర్లు ఇప్పుడు హడావుడి చేస్తున్నారు. రుణ మాఫీతో కొత్తరుణాల మంజూరుకు లంకె పెట్టుకుని కూర్చున్న బ్యాంకర్లు... ప్రభుత్వం స్పష్టతనివ్వకపోవడంతో ఎవరికీ కొత్త రుణాలు ఇవ్వలేదు. సీజన్ లక్ష్యంగా జిల్లాలో రూ.900 కోట్లు నిర్ణయించుకుని... నాలుగు నెలల్లో రూ.350 కోట్లు మాత్రమే రైతులకందించారు. రైతులకు రుణమాఫీ కింద 25 శాతం నిధులు విడుదల చేస్తూ ప్రభుత్వం నిర్ణయం తీసుకోవడంతో ఇప్పుడు హడావుడి చేస్తున్నారు. మాఫీ డబ్బులు ఖజానాకు చేరడంతో బ్యాంకర్లు, జిల్లా ఉన్నతాధికారులు సోమవారం సమీక్ష నిర్వహించారు. సీజన్ రుణాల మంజూరుకు మంగళవారమే ఆఖరు రోజు కాగా, స్పెషల్ డ్రైవ్ పేరిట ఈ ఒక్కరోజులోనే రూ.550 కోట్లు రుణాలు ఇవ్వాలని టార్గెట్ పెట్టుకున్నారు. నాలుగు నెలల్లో చేయలేని పని ఒక్కరోజులోనే చేస్తామంటున్నారు. 
 
 - పంటరుణాల మంజూరుకు నేడే ఆఖరు
 - బ్యాంకర్లతో సమీక్షించిన కలెక్టర్
 - నేడు స్పెషల్‌డ్రైవ్
 - ఇప్పటికీ స్పష్టతరాని రుణమాఫీ
 కరీంనగర్ అగ్రికల్చర్ : రైతులకు రుణాల మంజూరులో మొదట నిర్లక్ష్యం వహించిన బ్యాంకర్లు, ప్రభుత్వం ఇప్పుడు హడావుడి చేస్తున్నాయి. ఖరీఫ్ సీజన్‌కు గాను జిల్లాలో రూ. 900 కోట్ల పంటరుణాలు మంజూరు చేయూలని బ్యాంకర్లు లక్ష్యం పెట్టుకున్నారు. ఇప్పటివరకు రూ.350 కోట్లు మాత్రమే రుణాలిచ్చారు. ఇంకా రూ.550 కోట్లు మంజూరు చేయూల్సి ఉంది. అయితే రుణమాఫీ చేస్తామన్న సర్కార్ హామీ మేరకు రైతులు గడిచిన కాలమంతా ఎదురుచూశారు. కొత్త రుణాల కోసం వెళ్తే.. పాతబకారుులు కడితేనే తిరిగి రుణం మంజూరు చేస్తామని తెగేచి చెప్పడంతో అన్నదాతలు డైలామాలో పడ్డారు.
 
 10 శాతం మంది వడ్డీకి భయపడి రెన్యూవల్ చేసుకున్నారు. రుణమాఫీ విషయంలో సాగదీయడం..అర్హులను వడపోత.. స్పష్టత లేకపోవడం.. బ్యాంకర్లు ససేమిరా అనడం.. ఇలా చర్చోపచర్చల అనంతరం సమస్య ఓ కొలిక్కి వచ్చింది. జిల్లావ్యాప్తంగా 3,73,877 మంది రైతులకు రూ. 1656 కోట్లు మాఫీ చేయూల్సి ఉంది. మొదటి విడతలో రూ.414.21 కోట్లు విడుదల చేశారు. ఇదంతా పూర్తయ్యే వరకు ఖరీఫ్ ‘కాలం’ అరుుపోరుుంది. ప్రభుత్వ నిర్ణయం కాదనలేదని అనకుండా మంగళవారం ఒక రోజు రుణమంజూరుకు స్పెషల్ డ్రైవ్ చేపట్టింది. నాలుగు నెలల కాలాన్ని ప్రణాళిక బద్ధంగా ముందుకు వెళ్లని బ్యాం కర్లు ఒక్క రోజుల్లో రుణ మంజూరులో లక్ష్యం ఎలాచేరుతారో వారికే తెలియూలి. చివరికి రుణాలు తీసుకోవ డానికి రైతులే ముందుకు రాలేదని చెబుతారో ఏమో!. ఎంతైనా రైతులు అమాయకులే కదా!
  
 బ్యాంకర్లతో కలెక్టర్ సమీక్ష...
 కలెక్టరేట్ సమావేశ మందిరంలో ఖరీఫ్ పంటరుణాల మంజూరుపై కలెక్టర్ వీరబ్రహ్మయ్య బ్యాంకర్లతో సమీక్ష సమావేశం నిర్వహించారు. రుణమాఫీకిగాను మొదటివిడత విడుదలైన నిధులను రైతులకు జమచేసి యుద్ధప్రాతిపదికన మంగళవారం ఒక్కరోజే ఖరీఫ్ పంటరుణాలు మంజూరు చేయూలని సూచించారు. తహశీల్దార్ పరిధిలోని ప్రతి బ్యాంకు ఒక రెవెన్యూ అధికారిని డిప్యూట్ చేయూలని ఆదేశించారు. స్పెషల్ ఆఫీసర్లు మండల కేంద్రంలో ఉంటూ పంటరుణాల మంజూరు ప్రక్రియను పర్యవేక్షించాలని సూచించారు.


 లింగంపేట:  నకిలీ పట్టా పుస్తకాల బాగోతం బయటపడుతోంది. బోగస్ పట్టాలు చూపి పంట రుణాలు పొందిన రైతుల గుట్టురట్టు కానుంది. అక్రమాలకు పాల్పడిన వారి అంతు చూడడానికి రంగం సిద్ధమైంది. ఒక్క లింగంపేట మండలంలోనే నకిలీ పాసు పుస్తకాలతో కోటి రూపాయలకు పైగా పంట రుణాలను పొందినట్లు అధికారులు అంచ నాకు వచ్చారు. తవ్విన కొద్దీ నకిలీలు బయటపడుతున్నాయి.  
 
  రికార్డుల పరిశీలన
  పాస్ పుస్తకాలలో నమోదు చేసిన వ్యవసాయ భూముల సర్వే నంబర్లను వన్‌బీ రికార్డులలో ఉందాలేదా అని అధికారులు పరిశీలిస్తున్నారు. ఇందులో పలు ఆసక్తికర  అంశాలు వెలుగుచూస్తున్నాయి. కొందరు రెవెన్యూ సిబ్బంది, అధికారులు డబ్బులకు ఆశపడి తహసీల్దార్, ఆర్డీఓ స్థాయి అధికారుల సంతకాలను ఫోర్జరీ చేసి నకిలీ పాస్ పుస్తకాలను తయారు చేశారు. ఒక్కో రైతు నుంచి రూ. ఐదు వేల నుంచి రూ. పది వేలు దండుకుని వీటిని వారికి అంటగట్టారు. నకిలీ పుస్తకాలతో కొందరు దర్జాగా బ్యాంకుల నుంచి రుణాలు పొందారు.  లింగంపేట మండలంలో సుమారు మూడు వేలకు పైగా నకిలీ పాసుపుస్తకాలు ఉన్నట్లు తేలింది.
 
  మచ్చుకు కొన్ని
  మెంగారం గ్రామానికి చెందిన ఓ మహిళ భూమి లేకపోయినా సర్వే నంబర్194/ఆ, 253/1/1 (పాస్ పుస్తకం నంబర్ 325364, ఖాతా నంబర్ 5033తో స్థానిక ఇండి యన్ ఓవర్సీస్ బ్యాంకులో రూ. 83 వేల పంట రుణం పొందినట్లు అధికారులు గుర్తించారు. అయ్యపల్లి గ్రామానికి చెందిన ఓ వ్యక్తికి ఇండియన్ ఓవర్సీస్ బ్యాంకు అధికారులు ఒకే పట్టా నంబర్, ఒకే పాస్ పుస్తకంపై నాలుగు సార్లు పంట రుణం ఇవ్వడం చర్చనీయాంశంగా మారింది.
 
  రుణమాఫీ తర్వాత
  2008లో అప్పటి సీఎం వైఎస్ రాజశేఖరరెడ్డి రైతులకు రుణమాఫీ చేసి తిరిగి రుణాలు ఇవ్వడంతో, రుణాలు పొందడానికి రైతులు పోటీ పడ్డారు. ఆ సమయంలోనే కొ ందరు రెవెన్యూ అధికారులు,సిబ్బంది కలిసి అధికారుల సంతకాలను ఫోర్జరీ చేశారు. లింగంపేట మండలంలోని నల్లమడుగు, శెట్పల్లిసంగారెడ్డి, లింగంపేట,సింగిల్ వి ండోలతో పాటు స్థానిక ఇండియన్ ఓవర్సీస్ బ్యాంకులో నకిలీ పాసుపుస్తకాలతో రుణాలు పొందినట్లు తెలిసింది.
 
 మండలంలోని ముంబాజాపేట తండా, కొండాపూర్ తండా, ముంబాజీపేట, భవానీపేట గ్రామాలకు చెందిన కొందరు ఇలా రూ. 20 లక్షల పంట రుణాలను పొందినట్లు ప్రచారం జరుగుతోంది. కొందరు రైతులకు అసలు వ్యవసాయ భూమి లేక పోవడం, మరికొందరికి పట్టానంబర్లు లేకపోవడం,మరికొందరివి ఖాతా నం బర్లు లేకపోవడంతో అధికారులు రాత్రింబవళ్లు పరిశీలన చేపడుతున్నారు. మరికొద్ది రోజుల్లో నకిలీల బాగోతం బట్టబయలయ్యే అవకాశం ఉంది.


 బాబు సర్కారుపై జగన్ ధ్వజం
 అక్టోబర్ 16న చేపట్టనున్న ధర్నాను విజయవంతం చేయాలని పిలుపు
 సాక్షి ప్రతినిధి, కడప: ‘‘రైతులకు పంట రుణాల్లేవు. కొత్తగా రుణాలు కావాలని బ్యాంకర్ల వద్దకు వెళ్తే రెన్యువల్స్ చేయమంటున్నారు. అందుకు 14 శాతం వడ్డీ చెల్లించాల్సిందేనంటున్నారు. కొత్తగా రుణాలు లేవు, ఇన్సూరెన్సు లేదు, రుణమాఫీ ఊసే లేదు’’ అని  చంద్రబాబు సర్కారుపై వైఎస్‌ఆర్ కాంగ్రెస్‌పార్టీ అధ్యక్షుడు, వైఎస్ జగన్‌మోహన్‌రెడ్డి ధ్వజమెత్తారు. ఆయన బుధవారం సాయంత్రం పులివెందుల నియోజకవర్గంలోని  లింగాలలో నాగేశ్వరరెడ్డి అనే రైతుకు చెందిన వేరుసెనగ పంట పొలాన్ని పరిశీలించారు. 90 రోజుల క్రితం సాగైన వేరుశనగ పంట ఎదుగు బొదుగు లేకుండా పోయిందని ఆవేదన చెందారు. వేరుశనగ మొక్కలను పీకి పరిశీలిస్తే కనీసం ఒకట్రెండు కాయలు కూడా లేకపోవడాన్ని చూసి ఆయన చలించిపోయారు. తీవ్ర వర్షాభావ పరిస్థితులవల్లే వేరుశనగ ఊడలు సైతం దిగలేదని చెప్పారు. కనీసం పెట్టుబడులు కూడా వచ్చే పరిస్థితి లేదని, పశువుల మేతగా మాత్రమే పనికొచ్చేలా కనిపిస్తోందని ఆవేదన వ్యక్తంచేశారు. వర్షాలు అరకొరగా పడిన నేపథ్యంలో పెట్టుబడి సైతం చేతికందని రైతన్నలను ఆదుకోవాల్సిన అవసరం ఎంతైనా ఉందన్నారు. వెంటనే ప్రభుత్వం పంటల పెట్టుబడి అంచనా వేసి ఇన్‌పుట్ సబ్సిడీ అందించి ఆదుకోవాలని ఆయన డిమాండ్ చేశారు.
  
 రూ.72కోట్లు కేటాయిస్తే లక్ష ఎకరాలకు నీరు
 గండికోట ప్రాజెక్టు క్రింద 22 ముంపు గ్రామాలకు రూ.72కోట్లు ఆర్‌అండ్‌ఆర్ ప్యాకేజి క్రింద మంజూరుచేస్తే లక్ష ఎకరాలకు నీరు అందించే వెసులుబాటున్నా ప్రభుత్వం పట్టించుకొవడం లేదన్నారు. రాష్ట్ర ప్రభుత్వం రుణమాఫీ అమలు చేయకుండా రైతుల పట్ల నిరంకుశంగా వ్యవహరిస్తోన్న నేపథ్యంలో అక్టోబర్ 16న చేపట్టిన ధర్నా కార్యక్రమాన్ని విజయవంతం చేయాలని పిలుపునిచ్చారు.
  
 గ్రామ సమాఖ్య అసిస్టెంట్లకు గౌరవ వేతనం అందించండి
 ఇందిరా క్రాంతిపథంలో సుమారు 12ఏళ్లుగా పనిచేస్తున్న గ్రామ సమాఖ్య సహాయకుల (వీవోఏలు)కు వెంటనే వేతనాలు చెల్లించాలని డిమాండ్ చేశారు.


 రేగోడ్: రుణమాఫీ పొందిన అర్హులైన రైతులందరికీ పంట రుణాలు రీషెడ్యూల్ చేస్తామని జిల్లా వ్యవసాయశాఖ జాయింట్ డెరైక్టర్ (జేడీఏ) హుక్యానాయక్ తెలిపారు. మండలంలోని మేడికుంద గ్రామ శివారులో రైతులు సాగు చేసిన పత్తి పంటలను మంగళవారం ఆయన పరిశీలించారు. ఈ సందర్భంగా జేడీఏ మాట్లాడుతూ.. వరిలో కాండం తొలుచు పురుగు నివారణకు కార్బోఫ్యురాన్ త్రీజీ గుళికలను ఎకరాకు పది కిలోల చొప్పున పొలంలో చల్లుకోవాలని సూచిం చారు. పత్తిలో రసంపీల్చే పురుగు నివారణకు లీటరు నీటిలో 1.5 గ్రాముల ఎసిపేట్ మ ందును పిచికారీ చేయాలని తె లిపారు.
 
 పత్తి గూడ రాలకుండా ఉండేందుకు మల్టీ కే మం దును స్ప్రే చేసుకోవాలని తెలిపారు. పచ్చ పురుగు నివారణకు లీటరు నీటిలో 1.6 మిల్లీలీటర్ల  మోనోక్రొటోఫాస్ ముందును పిచి కారీ చేయాలని చెప్పారు. కందిలో ఆకుముడత పురుగు నివారణకు లీటరు నీటిలో ఒక గ్రాము ఎసిపేట్ మందును లేదా 2.5 మిల్లీలీటర్ల క్లోరోపైరిఫాస్ మందును కలుపుకుని పిచికారీ చేయాలని తెలిపారు. పంటల సాగులో క్రమం తప్పకుండా వ్యవసాయ శాఖ అధికారుల సలహాలు, సూచనలు పాటించాలన్నారు. అనంతరం ఆయన విలేకరులతో మాట్లాడుతూ.. రుణాలను రీషెడ్యూల్‌లో రైతులకు ఇబ్బందులు కలిగించవద్దని బ్యాంకర్లకు సూచించారు.
 
 వట్‌పల్లిలోని బ్యాంక్ అధికారులు తమకు రుణాలు మంజూరు చేయడంలో ఇబ్బందులకు గురిచేస్తున్నారని రైతులు ఆయనతో తెలిపారు. అధికారులతో మాట్లాడి రుణాలు మంజూరు చేయించేం దుకు చర్యలు తీసుకుంటానని జేడీఏ చెప్పారు. దీనిపై ఆందోళన చెందాల్సిన అవసరం లేదని అన్నదాతలకు సూచించారు. ఈ కార్యక్రమంలో డాట్ సెంటర్ శాస్త్రవేత్త డాక్టర్ శ్రీనివాస్, ఏడీఏ శ్రీనివాస్ ప్రసాద్, ఏఈఓ ఇంద్రయ్య, ఎంపీటీసీ అప్పారావ్, నాయకులు టి.శంకరప్ప, రైతులు ఉన్నారు.


 కరీంనగర్ అగ్రికల్చర్ :
  జిల్లాలో 31 మార్చి 2014 వరకు 4,76,717 మంది రైతులు వివిధ బ్యాంకుల నుంచి రూ.2505.66 కోట్లు రుణాలుగా తీసుకున్నారు. ఇందులో రూ.2221.2 కోట్లు పంట రుణాలు, రూ.234.63 కోట్లు బంగారం తాకట్టుపెట్టి తీసుకున్నవి. ఎన్నికల హామీ మేరకు రాష్ట్ర ప్రభుత్వం కుటుంబానికి రూ.లక్ష వరకు మాఫీ చేస్తామని ప్రకటించింది. సర్కారు మార్గదర్శకాల ప్రకారం మండలాల బ్యాంకర్లు, సంయుక్త కమిటీలు విచారిం చి లబ్ధిదారులను గుర్తించారు. జిల్లాస్థాయిలో వివరాలను క్రోడీకరించి తుదిజాబితా రూపొందించారు. వ్యవసాయ శాఖ జిల్లావ్యాప్తంగా 1683.14 కోట్ల మాఫీకి 3,84,105 మంది రైతులను అర్హులుగా జాబితా రూపొందించింది.
  ప్రత్యేక సాఫ్ట్‌వేర్‌తో తనిఖీ
  అధికారుల తనిఖీల్లో వ్యవసాయ యోగ్యత లేని భూములు, నకిలీ పాస్ పుస్తకాలు పెట్టి రుణాలు తీసుకున్నట్లు వెలుగుచూడడంతో సర్కారు పునఃపరిశీలనకు ఆదేశించింది. తహశీల్దార్ల వద్ద ఉన్న 1బీ రికార్డుల ప్రకారం అర్హులను గుర్తించాలని సూచించింది. ఇందుకోసం ప్రత్యేక సాఫ్ట్‌వేర్‌ను పంపించింది. దీని ప్రకారం.. సర్వే నంబర్ల వారీగా పట్టాభూమి, అక్షరమాల ఆధారంగా లబ్ధిదారుల పేర్లు సరిచూసి రుణం తీసుకున్న లబ్ధిదారులను సరిపోల్చి అర్హుల తుది జాబితాను సిద్ధం చేశారు.
  64 మందే బోగస్
  వ్యవసాయ శాఖ సిద్ధం చేసిన పాత జాబితాకు.. కొత్తగా రూపొందించిన జాబితాకు కేవలం 64 మందే తేడా వచ్చారు. వీరిని గుర్తించడం ద్వారా ప్రభుత్వానికి రూ.64లక్షల భారం తప్పింది. తాజాగా అన్ని తనిఖీల తర్వాత 1బీ రికార్డుల పరిశీలన అనంతరం 3,84,041 మందికి 1681.86 కోట్లు మాఫీ అవుతాయని సంబంధిత అధికారులు, బ్యాంకర్లు చెబుతున్నారు. ఈ నివేదిక ప్రకారమే మాఫీ అవుతాయని, నివేదికను కమిషనరేట్‌కు పంపిస్తామని పేర్కొంటున్నారు.
 
 
 
  


  నవాబుపేట: పంట రుణాలను రీ షెడ్యూల్ చేసుకోవాలని అధికారులు చెప్పడంతో రైతులు ఒక్కసారిగా బ్యాంకు తరలివచ్చిన సంఘటన సో మవారం మండల కేంద్రంలో చోటు చేసుకుంది. మండల పరిధిలో ని న వాబుపేట, ఎత్‌రాజ్‌పల్లి గ్రా మాల్లో ఆదివారం రాత్రి  పంట రుణాలను రీషెడ్యూల్ చేసుకోవాలని మండల వ్యవసాయాధికారి నాగలక్ష్మి  చాటి ంపు వేయించారు. దాం తో రెం డు గ్రామాలకు చెందిన సుమారు 200 మంది రైతులు మండల కేంద్రంలోని స్టేట్ బ్యాం కుకు వచ్చారు.
 
 అయితే బ్యాంకు మేనేజర్ పోస్టు గత 20 రోజులుగా ఖాళీగా ఉంది. కొత్త మేనేజర్  శ్రీనివాస్ సోమవారం ఉదయ మే  వచ్చారు. ఇంత మంది రైతులు  వచ్చారేమని మేనేజర్ ఆరా తీయగా రీషెడ్యూల్ కోసమని రైతులు తెలిపారు. తమకు ఇప్పటి వరకు హెడ్‌ఆఫీస్ నుంచి ఆదేశాలు రాలేదని రైతులతో తెలిపారు. అనంతరం ఆయన వ్యవసాయాధికారిని పిలిచి విషయం చెప్పారు.
 
 రీ షెడ్యూల్ చేయమని తమకు ఆదేశాలు వచ్చాయని ఏవో మేనేజర్‌తో తెలిపారు. 2013 ఏప్రిల్ నుంచి అక్టోబర్ 2013 వరకు రుణాలు తీసుకున్న రైతుల లిస్టు తయారు చేసి వారిని  మాత్రమే బ్యాంకుకు పిలిపించాలని వ్యవసాయాధికారి, మేనేజర్ నిర్ణయించారు.  లిస్టు తయారు చేసి ఆదర్శ రైతుల ద్వారా సదరు రైతులకు తెలియజేస్తామని మేనేజర్ శ్రీనివాస్ తెలిపారు. దాంతో బ్యాంకుకు వచ్చిన రైతులందరూ ఈసురోమని తిరిగి వెళ్లారు.


 ► ఉద్యానవన రైతులు, మత్స్య, పౌల్ట్రీ, డెయిరీ, ఎరువుల లోన్లకు మాఫీ వర్తించదట
 ►పడమటి ప్రాంతాల్లో ఉద్యానవన పంటలే అధికం
 ►ప్రభుత్వ నిబంధనలతో లబోదిబోమంటున్న అన్నదాతలు
 పలమనేరు: చంద్రబాబు ప్రభుత్వం ప్రకటించిన రుణమాఫీ చట్రంలో ఇరుక్కుని రైతులు గిలగిలా కొట్టుకుంటున్నారు. ప్రభుత్వం రోజుకో జీవో విడుదల చేస్తూ రుణమాఫీలో షరతుల పేరిట మాఫీ భారాన్ని తగ్గించుకునే పనిలో పడింది. ఫలితంగా అర్హులైన రైతులు సైతం రుణమాఫీ పొందలేని పరిస్థితి ఏర్పడింది. ముఖ్యంగా ఉద్యానవన రైతులకు మాఫీ వర్తించదని నిబంధనలు చెబుతున్నాయి. తద్వారా తాము ఏమి పాపం చేశామంటూ ఆయూ పంటలు సాగుచేసిన వారు ఆవేదన వ్యక్తం చేస్తున్నారు.
  
 ఈ ప్రాంతంలో ఉద్యానవన పంటలే అధికం
 పలమనేరు, కుప్పం, పుంగనూరు, మదనపల్లె ప్రాంతాల్లో ఉద్యానవన పంటల సాగు ఎక్కువగా ఉంది. ముఖ్యంగా టమాట ఎక్కువగా సాగవుతోంది. పలమనేరు, కుప్పం ప్రాంతాల్లో మాత్రం అన్ని కూరగాయల పంటలు సాగు చేస్తున్నారు. ఇక 20 శాతం వరకు రైతులు మామిడి తోటలు పెంచుతున్నారు. వీరందరూ హార్టికల్చర్ కిందకే వస్తారు. ఈ ప్రాంతంలో మత్స్య కార సహకార సంఘాలు సైతం 80కి పైగానే ఉన్నాయి. పలమనేరు, గంగవరం మండలాల్లో జిల్లాలోనే అధికంగా కోళ్ల రైతులున్నారు. మరోవైపు పాడిఆవుల పెంపకం ద్వారా జీవనోపాధి పొందే రైతులు ఇక్కడ 50 శాతం మంది ఉన్నారు. వీరందరూ వారి అవసరాల కోసం రుణాలు తీసుకున్నారు.
  
 వీరందరికీ రుణమాఫీ వర్తించదట
 టమాట సాగుచేసే రైతులు పంట రుణాలు పొందారు. మరికొందరు 10(1), అడంగల్‌లో టమాట సాగును చూపెట్టి బంగారు రుణాలు తీసుకున్నారు. పలమనేరు, కుప్పం నియోజకవర్గాల్లో పది రకాల కూరగాయల పంటల సాగు కోసం రైతులు వివిధ బ్యాం కుల్లో రుణాలు తీసుకున్నారు. పాడి రైతులు పలు బ్యాంకుల్లో మినీ డెయిరీ పేరిట(నాలుగు పాడి ఆవుల కొనుగోలుకు రుణం పొందవచ్చు)రుణాలు పొందారు.
 
 మత్స్యకారుల సంఘం ఆధ్వర్యంలోనూ సహకార సంఘాల్లో రు ణాలు తీసుకున్నారు. మరికొందరు సంబంధిత సింగిల్‌విండోల్లో ఎరువుల కొనుగోలు కోసం రుణాలు తీసుకున్నారు. జిల్లా మొత్తం మీద 8.7 లక్షల మంది రైతులు రూ.11,180.25 కోట్ల పంట రుణాలు పొందారు. ఒక్క మదనపల్లె డివిజన్‌లోనే ఉద్యానవన పంటల సాగు కోసం రైతులు బ్యాంకు నుం చి తీసుకున్న రుణం దాదాపు రూ.80 కోట్ల వరకు ఉన్నట్టు సమాచారం. ఇ వన్నీ మాఫీ పరిధిలోకి రానట్టే.
  
 లబోదిబోమంటున్న రైతులు
 రుణమాఫీకి సంబంధించి ప్రభుత్వం జారీ చేసిన గైడ్‌లైన్స్(జీవో ఎంఎస్ నం.174)లో ఈ విషయాన్ని స్పష్టంగా తెలిపారు. ఫలితంగా ఈ ప్రాంతంలో ఉద్యానవన పంటలు సాగు చేసే రైతులు తీవ్ర ఆందోళన వ్యక్తం చేస్తున్నారు. ముఖ్యంగా టమాట రైతుల్లో అయోమయం నెలకొంది. రుణాలు మాఫీకాకపోతే వడ్డీ సహా తీర్చడం తలకుమించిన భారంలా మారడం ఖాయం. బా ధిత రైతులు ప్రభుత్వ తీరుపై దుమ్మెత్తిపోస్తున్నారు.
  
 ఇంతకన్నా నమ్మక ద్రోహముందా
 రుణమాఫీ చేస్తామని చంద్రబాబు హామీ ఇచ్చినప్పుడు ఈ మాట చెప్పుంటే బాగుండు. అన్ని రుణాలు మాఫీ అని హా మీ ఇచ్చి ఇప్పుడు సవాలక్ష రూల్స్‌పెట్టి రైతుల నోర్లు కొట్ట డం మంచిది కాదు. ఇంతకన్నా నమ్మక ద్రోహం మరొకటి ఉంటుందా.   -శేషేగౌడు, చీలంపల్లె, బెరైడ్డిపల్లె మండలం
  
 చెరుకు రైతులకే రుణమాఫీ వర్తిస్తుందంటే ఎట్టా
 ఈ ప్రాంతంలో చెరుకుసాగు పూర్తిగా తగ్గింది. సగానికి పై గా రైతులు టమాట, పలు కూరగాయలను సాగుచేస్తున్నా రు. వాటికోసమే బ్యాంకులో అప్పులు తీసుకున్నాం. ఇప్పు డు వాటికి రుణమాఫీ చేయడం కుదరదంటే ఎంతవరకు న్యాయం.  -మోహన్‌రెడ్డి, మేకల నాగిరెడ్డిపల్లె, బెరైడ్డిపల్లె
  
 రుణమాఫీ ఓ ట్రాష్
 ఎన్నికల్లో గెలవాలనే తలంపుతో రుణమాఫీని పెట్టినట్టు అందరికీ తెలిసిపోయింది. రూ.1.5 లక్షల రుణమాఫీలో లే నిపోని రూల్స్ పెట్టి ఇన్ని ఇబ్బందులు పెట్టేది అవసరమా. దీనికన్నా మావల్ల చేతకాదంటూ ఈ ప్రభుత్వం రుణమాఫీ ని వదిలేస్తే పోలా.          -రవి, కూర్మాయి, పలమనేరు


 జిల్లాలో పంట రుణాల మాఫీ లెక్కల అంశం కొలిక్కి వచ్చింది. జిల్లా వ్యాప్తంగా రూ.1035 కోట్లు రుణాలు మాఫీ చేయాల్సిందిగా అధికారులు లెక్క తేల్చారు. మాఫీ ప్రక్రియతో జిల్లాలో  2.10లక్షల మంది రైతులు లబ్ధి పొందనున్నారు.
 
 ఇందులో బంగారంపై రుణాలకు సంబంధించి రూ.101.3కోట్లు మాఫీ కానుంది. రుణమాఫీకి సంబంధించి మండలాల వారీగా వచ్చిన వివరాల ఆధారంగా జిల్లా స్థాయిలో జాబితాను క్రోడీకరించారు. ఈ క్రమంలో రూ.1035 కోట్లుగా అధికారులు లెక్క తేల్చారు. అయితే జిల్లా స్థాయి సంప్రదింపుల కమిటీ(డీసీసీ) ఆమోదం పొందిన అనంతరం ఈ వివరాలను ప్రభుత్వానికి పంపించాల్సి ఉంది. ఈ క్రమంలో శుక్రవారం డీసీసీ ఏర్పాటు చేసేందుకు యంత్రాంగం ఏర్పాట్లు చేస్తోంది.


 సాక్షి, రంగారెడ్డి జిల్లా: రుణమాఫీ అంశం రైతులను గందరగోళానికి గురిచేస్తోంది. మాఫీ తప్పక చేస్తామ ని ప్రభుత్వం అంటుండగా.. ముందు బ్యాంకు రుణాలు చెల్లించాల్సిందేనని బ్యాంకర్లు అంటున్నారు. దీంతో అన్నదాతలు అయోమయానికి గురవుతున్నారు. మాఫీతో సంబ ంధంలేకుండా రుణాలు చెల్లించాలంటూ బ్యాంకర్లు రైతులపై ఒత్తిడి తేవడంతో యాచారం మండలంలో తీవ్ర ఉద్రిక్తతకు దారితీసింది.
 
 రుణమాఫీపై ప్రభుత్వం ఇప్పటికే ప్రకటన చేసింది. ఈక్రమంలో మాఫీ అయ్యే రుణాల వివరాలను తేల్చి నివేదిక ఇవ్వాలని ప్రభుత్వం పేర్కొంది. రుణాల కోసం రైతులను ఇబ్బంది పెట్టొద్దని సూచించినప్పటికీ.. జిల్లాలోని బ్యాంకు అధికారులు ఈ సూచనను పరిగణనలోకి తీసుకోవడంలేదు. బుధవారం యాచారం మండలం తమ్మలోనిగూడ, చింతపట్ల,  కొత్తపల్లి, మంతన్‌గౌరెల్లి తదితర గ్రామాల్లో పర్యటించి రుణాలను చెల్లించాలంటూ రైతులపై ఒత్తిడి తేవడంతో ఆయా గ్రామాల్లో గందరగోళం చోటుచేసుకుంది. మాఫీ అంశాన్ని ప్రస్తావించినప్పటికీ.. తీసుకున్న రుణం చెల్లించాల్సిందేనని, మాఫీ జరిగినప్పుడు తిరిగి చెల్లిస్తామంటూ అధికారులు తేల్చి చెప్పడంతో రైతులు తెల్లముఖం వేయాల్సివచ్చింది. అసలు రుణమాఫీ ఉంటుందా.. ఉండదా అంటూ రైతులు అయోమయం చెందుతున్నారు.
 
  రీషెడ్యూలూ పట్టలేదు..
  గత ఖరీఫ్‌లో పకృతి వైపరిత్యాల కారణంతో జిల్లా రైతాంగం తీవ్రంగా నష్టపోయింది. దీంతో రైతులకు ఆదుకునే క్రమంలో భాగంగా జిల్లాను కరువు ప్రాంతంగా ప్రకటిస్తూ.. రైతులు తీసుకున్న రుణాలను రీషెడ్యూల్ చేయాలంటూ కేంద్ర ప్రభుత్వం గత నెలలో ఆదేశాలు జారీ చేసింది. ఈక్రమంలో ఆర్బీఐ సైతం మార్గదర్శకాలిచ్చింది. దీంతో జిల్లాలోని 32 మండలాల్లో రైతులు తీసుకున్న రుణాలను రీషెడ్యూల్ చేయాలి. ఈ లెక్కన రైతులు రుణాలు చెల్లించకున్నా కొత్తగా రుణాలు ఇవ్వాల్సి ఉంది. కానీ బుధవారం యాచారంలోని పరిస్థితిని పరిశీలిస్తే రీషెడ్యూల్ అంశాన్ని సైతం పట్టించుకోకుండా బ్యాంకర్లు రికవరీ చర్యలకు ఉపక్రమించడం గమనార్హం.


 ఏపీలో పంట రుణాల మంజూరు తీరిదీ..
  
 రుణమాఫీ హామీతో రుణాలు తిరిగి చెల్లించని రైతులు
 {పభుత్వం జీవోకే పరిమితం కావడంతో కొత్తగా రుణాలివ్వని బ్యాంకులు
 ఇప్పట్లో రుణమాఫీ కాదంటూ పోస్టర్ల ద్వారా ప్రచారం
 వడ్డీ కట్టి రెన్యువల్ చేయించుకోమంటూ రైతులపై ఒత్తిడి
  లేకుంటే వడ్డీ భారం, పంటల బీమా నష్టం తప్పదని హెచ్చరికలు
  
 హైదరాబాద్: ఖరీఫ్ సీజన్ సగం పూర్తరుు్యంది. సాధారణంగా అరుుతే రైతులు తాము గత సీజన్‌లో తీసుకున్న పంట రుణాలను తిరిగి చెల్లించేసి , కొత్త రుణాలు తీసుకుని సాగులో నిమగ్నమయ్యేవారు. కానీ ఈసారి పరిస్థితి ఇందుకు భిన్నంగా ఉంది. ఎన్నికల ముందు తెలుగుదేశం అధ్యక్షుడు చంద్రబాబునాయుడు రుణమాఫీ చేస్తామంటూ రైతులకు హామీ ఇచ్చారు. ఆ పార్టీ నేతలైతే ‘బాబు రుణమాఫీ చేస్తారు.. రైతులు రుణాలు చెల్లించొద్దు..’ అంటూ ఏకంగా పోస్టర్లు వేసి మరీ ప్రచారం చేశారు. దీంతో రైతులు బ్యాంకులకు రుణాలు తిరిగి చెల్లించలేదు. ఈ పరిస్థితుల్లో అధికారంలోకి వచ్చిన చంద్రబాబు రుణమాఫీ అంటూ ప్రకటించారు. ఈ మేరకు పలు ఆంక్షలతో కూడిన జీవోను మాత్రం జారీ చేసి చేతులు దులుపుకున్నారు. అరుుతే బ్యాంకులు ఆ జీవోను ఏమాత్రం పట్టించుకోవడం లేదు.
 
 రైతులకు కొత్త రుణాలిచ్చేందుకు ససేమిరా అంటున్నారుు. రైతులు లేదా ప్రభుత్వం రుణ బకారుులు చెల్లిస్తేగానీ కొత్తగా రుణాలు ఇవ్వలేమని తేల్చిచెబుతున్నారుు. ప్రభుత్వ నిర్వాకంతో రాష్ట్రంలో రైతులు పంట రుణాలు లభించక అనేక కష్టాలను ఎదుర్కొంటున్నారు. వడ్డీతో కలసి తడిచిమోపెడైన రుణం తిరిగి చెల్లించలేక, కొత్త రుణం లభించక నానా అవస్థలూ పడుతున్నారు. ఆర్‌బీఐ సూచనల మేరకు రుణాలు చెల్లించిన రైతులకు మాత్రమే బ్యాంకులు కొత్త రుణాలను మంజూరు చేస్తున్నాయి. పాత రుణాలను రైతులైనా చెల్లించాలి, లేదా ప్రభుత్వమైనా చెల్లిస్తేనే ఈ ఖరీఫ్‌లో కొత్త రుణాలు ఇవ్వాలని, లేదంటే రుణాలు మంజూరు చేయరాదని బ్యాంకర్లు దృఢ నిశ్చయంతో ఉన్నారు. ఈ పరిస్థితుల్లో ఇప్పటివరకు ఖరీఫ్‌లో బ్యాంకులు కేవలం రూ.5 వేల కోట్లు మాత్రమే పంట రుణాలుగా అందజేశారుు.
 
 వాస్తవానికి ప్రస్తుత ఖరీఫ్‌లో పంట రుణాల మంజూరు లక్ష్యం రూ.56 వేల కోట్లు. ఈ మేరకు రాష్ట్ర స్థాయి బ్యాంకర్ల కమిటీ సమావేశంలో నిర్ణయం తీసుకున్నారు. అయితే ఖరీఫ్ సీజన్ సగం పూర్తి అయినప్పటికీ కేవలం రూ.5 వేల కోట్లు మాత్రమే బ్యాంకులు రుణాలిచ్చాయంటే పరిస్థితి ఏ విధంగా ఉందో అర్ధం అవుతోంది. బ్యాంకులు రుణాలివ్వక పోవడం ఖరీఫ్ సాగుపై తీవ్ర ప్రభావం చూపిస్తోంది.+
 
 గడువు మీరితే 13 శాతం వడ్డీ
 
 ఆంధ్రాబ్యాంకు అయితే.. ఇప్పట్లో రుణ మాఫీ కాదని, పాత రుణాలను చెల్లించి కొత్త రుణాలను తీసుకోవాలని, ప్రభుత్వం డబ్బులిస్తే అప్పుడు రైతుల ఖాతాలకు జమ చేస్తామని పోస్టర్లు వేసి మరీ ప్రచారం చేస్తోంది. రుణాలు ఓవర్ డ్యూస్ (గడువు మీరినవి) అవకుండా చూసుకోవాల్సిన బాధ్యత బ్యాంకుపై ఉన్నందునే ఈ విధమైన ప్రచారం నిర్వహిస్తున్నట్లు బ్యాంకు అధికారులు పేర్కొంటున్నారు. మరోపక్క బ్యాంకర్లు రైతులకు ఫోన్లు చేసి ఇప్పట్లో రుణ మాఫీ కాదని, తొలుత వడ్డీ చెల్లించి రుణాలను రెన్యువల్ చేయించుకోవాలని కోరుతున్నారు. పలానా తేదీలోగా వచ్చి వడ్డీ చెల్లించి రెన్యువల్ చేయించుకోవాలని, లేదంటే వడ్డీ లేని రుణంతో పాటు, పంటల బీమా నష్టపోతారని నచ్చచెబుతున్నారు. రాష్ట్ర ప్రభుత్వం కేవలం గత డిసెంబర్ వరకు తీసుకున్న రుణాలను, అప్పటివరకు అరుున వడ్డీని మాత్రమే మాఫీ పరిధిలోకి తెస్తామని చెప్పడంతో.. జనవరి నుంచి వడ్డీ భారాన్ని రైతులే భరించాల్సి ఉంటుందని కూడా బ్యాంకర్లు పేర్కొంటున్నారు. గడువు మీరిన రుణాలకు 13 శాతం వరకు వడ్డీ చెల్లించాల్సి వస్తుందని, అందువల్ల వడ్డీ చెల్లించి రుణాలను రెన్యువల్ చేసుకోవాలని బ్యాంకర్లు రైతులకు సూచిస్తున్నారు.
  
  


 హైదరాబాద్ : అన్ని ప్రాంతాలకు సమాన దూరంలో రాజధాని ఉండాలన్నదే తమ అభిప్రాయమని ముఖ్యమంత్రి చంద్రబాబు నాయుడు అన్నారు. రాజధానిపై గురువారం అసెంబ్లీలో చర్చ సందర్భంగా మాట్లాడుతూ అన్ని జిల్లాలకు అభివృద్ధి ప్రణాళిక ప్రకటించామన్నారు. హైదరాబాద్ను తానే అభివృద్ధి చేశానని చంద్రబాబు మరోసారి చెప్పుకొచ్చారు. రాజధాని కోసం అన్ని కోణాల్లో పరిశీలించామన్నారు.
 అడవుల్లో రాజధాని పెడితే ఏం ప్రయోజనం అని అన్నారు. ప్రజాభిప్రాయాన్ని శివరామకృష్ణన్ కమిటీ అద్దం పట్టిందన్నారు. భూ సేకరణ కోసం కమిటీ వేశామన్నారు. లాండ్పూల్ సిస్టంతో ఎలాంటి ఇబ్బందులూ ఉండవన్నారు. తిరుపతిలో రాజధాని ఏర్పాటు చేయాలని తనకు ఉందని, తిరుపతిలో తన ఇంటి ముందే పది వేల ఎకరాల ప్రభుత్వ భూమి ఉందన్నారు.
 
 పేదరికంపై గెలుపు అనే కార్యక్రమం ద్వారా అభివృద్ధిని సాధిస్తామని చంద్రబాబు తెలిపారు. రైతుల ఇబ్బందుల్లో ఉన్నారనే పంట రుణాలు మాఫీ చేస్తానన్నారు. ఆడపడుచుల తాళిబొట్టు విడిపించడానికే బంగారంపై రుణమాఫీ చేస్తున్నట్లు ఆయన పేర్కొన్నారు. తాను ఆర్థికశాస్త్ర విద్యార్థినని రైతు రుణాలు ఎలా మాఫీ చేయాలో తనకు తెలుసునని చెప్పారు.
 
 కాగా ఇడుపులపాయ, కడపలో రాజధాని ఏర్పాటు చేయాలనుకుంటున్నారని చంద్రబాబు చేసిన వ్యాఖ్యలపై వైఎస్ఆర్ సీపీ ఎమ్మెల్యేలు తీవ్ర అభ్యంతరం తెలిపారు. ఈ సందర్భంగా వైఎస్ జగన్ మాట్లాడుతూ ఇడుపులపాయలో రాజధాని చేయాలని తాము ఎప్పుడూ కోరలేదన్నారు. చంద్రబాబు పదేపదే అబద్ధాలు చెప్పి నిజం చేయాలని చేస్తున్నారన్నారు.


 అవన్నీ వ్యాపారం కోసం తీసుకున్నవే  
 ఇలాంటి బంగారం రుణాల మాఫీకి నో
 తెలంగాణ సర్కారు మరో మెలిక
 పట్టాదారు పాస్ పుస్తకాలతో తీసుకున్న వారికే రుణ మాఫీ
 బ్యాంకుల కసరత్తు పూర్తి... నేటి నుంచి సామాజిక తనిఖీ
  
 సాక్షి, హైదరాబాద్: రైతుల రుణమాఫీ పథకం అమలుకు సంబంధించి తెలంగాణ రాష్ట్ర ప్రభుత్వం మరో కీలక నిర్ణయం తీసుకుంది. రైతులు పట్టణాలు, నగరాల్లోని బ్యాంకుల్లో బంగారం తాకట్టు పెట్టి తీసుకున్న పంట రుణాలను మాఫీ పరిధిలోకి తీసుకోవద్దని నిర్ణయించింది. అయితే పట్టాదారు పాస్ పుస్తకాలను పెట్టి తీసుకున్న రుణాలకు మాత్రం మాఫీని వర్తింపజేయనుంది. ఈ మేరకు క్షేత్రస్థాయి అధికారులకు ఉన్నతాధికారులు సమాచారం కూడా ఇచ్చారు. పట్టణాలు, నగరాల్లోని బ్యాంకుల్లో బంగారం తాకట్టు పెట్టి రుణాలు తీసుకున్నవారు వాస్తవంగా వ్యవసాయం కోసం ఆ రుణాలు తీసుకుని ఉండరని అధికారులు నిర్ధారణకు వచ్చినట్లు సమాచారం. రైతులు తమ భూమి పాస్ పుస్తకాలను బ్యాంకుల్లో పెట్టి పంట రుణాలు తీసుకుంటే సరేనని... బంగారం తాకట్టు పెట్టడానికి అంతదూరం రావడంలో అర్థం లేదని అధికారుల వాదన. రైతులు దగ్గర్లోని బ్యాంకుల్లోనే రుణాలు తీసుకుంటారని... కానీ కొందరు ఇతర అవసరాల కోసం వడ్డీ తక్కువగా ఉండే పంట రుణాల పేరిట పట్టణాలు, నగరాల్లో రుణాలు తీసుకుంటారని చెబుతున్నారు. అసలు పట్టణాలు, నగరాల్లోని బ్యాంకుల్లో పంట రుణాల పేరిట తీసుకున్న మొత్తం రుణాలను మాఫీ నుంచి తప్పించాలని ఉన్నతాధికారుల సమావేశంలో అభిప్రాయం వచ్చిందని తెలుస్తోంది. అయితే పట్టాదారు పాస్ పుస్తకాలు పెట్టి తీసుకున్న రుణాలను మాఫీ పరిధిలో ఉంచాలని కొందరు అధికారులు సూచించడంతో... కేవలం బంగారం తాకట్టు పంట రుణాలకు మాత్రం మాఫీ వర్తింపజేయవద్దని తీర్మానించారు. మరోవైపు.... రైతులు రుణాలు చెల్లిస్తే వారికి తక్షణమే కొత్త రుణాలు ఇవ్వాలని... రైతులకు నేరుగా వారి ఖాతాల్లోనే డబ్బు జమ చేస్తామని ప్రభుత్వం బ్యాంకర్లకు స్పష్టం చేసింది. దీంతో రైతు రుణాలు ఎన్‌పీఏలుగా మారకుండా ఉండడానికి వీలుగా బ్యాంకర్లు స్వయంగా రైతులను పిలిపించి.. రుణాలు రెన్యువల్ చేయిస్తున్నట్లు సమాచారం. ఇప్పటికే గ్రామీణ బ్యాంకులు, సహకార బ్యాంకులతోపాటు, వాణిజ్య బ్యాంకులు రైతు రుణాలు రెన్యువల్ చేస్తున్నాయని ప్రభుత్వ వర్గాలు వివరించాయి.
  
 6న వీడియో కాన్ఫరెన్స్..
 రుణమాఫీ ప్రక్రియపై శనివారం ప్రభుత్వ సీఎస్ రాజీవ్‌శర్మ జిల్లా కలెక్టర్లు, బ్యాంకర్లతో వీడియో కాన్ఫరెన్స్ నిర్వహించనున్నారు. శనివారం నాటికి రుణ మాఫీకి  సంబంధించి పూర్తి సమాచారం ప్రభుత్వానికి అందుతున్నందున... మొదటి దశలో ఏ మేరకు నిధులు సర్దుబాటు చేయాలన్న అంశంపై స్పష్టత వస్తుందని అధికారవర్గాలు తెలిపాయి. ఆ వీడియో కాన్ఫరెన్స్‌కు ముందు నాగిరెడ్డి అధ్యక్షతన కమిటీ సమావేశం కానుంది. బ్యాంకులు ఇదివరకే తమ కసరత్తు పూర్తి చేశాయని, గురువారం నుంచి సామాజిక తనిఖీ కార్యక్రమాలు మొదలవుతాయని అధికారవర్గాలు తెలిపాయి.


  సాక్షి ప్రతినిధి, ఖమ్మం: జిల్లా రైతుల రుణమాఫీ అమలుకు సంబంధించిన కసరత్తు పూర్తయింది. జిల్లావ్యాప్తంగా 4,56,286 మంది రైతులకు రుణమాఫీ వర్తింపజేయాలని అధికారులు లెక్కతేల్చారు. దీనికి రూ.2,682 కోట్లు అవసరం కానున్నాయి. పంటరుణాలు, బంగారం తాకట్టు పెట్టి తెచ్చిన వ్యవసాయ రుణాలను కుటుంబానికి రూ.లక్ష కంటే ఎక్కువ కాకుండా పరిమితం చేస్తూ రుణమాఫీని వర్తింపజేయనున్నారు. ఈ మేరకు బ్యాంకర్లు తయారు చేసిన జాబితాపై బుధవారం నుంచి గ్రామస్థాయిలో సామాజిక తనిఖీ నిర్వహిస్తారు.
 
  ఈ తనిఖీలు పూర్తయిన వెంటనే తుది జాబితా తయారుచేసి రుణమాఫీని వర్తింపజేస్తామని, ఈ మేరకు తగిన చర్యలు తీసుకోవాలని మండల స్థాయి వ్యవసాయ, ఇతర శాఖల అధికారులతో జిల్లా కలెక్టర్ డాక్టర్. కె. ఇలంబరితి జరిపిన వీడియో కాన్ఫరెన్స్‌లో ఆదేశాలు జారీ చేశారు. ఈ నేపథ్యంలో మరో వారం లోపు జిల్లా రైతాంగానికి రుణమాఫీ ప్రక్రియ పూర్తవుతుందని అధికారులు భావిస్తున్నారు.
 
  నేడు తనిఖీ
  జిల్లాలో రుణమాఫీ ప్రక్రియను ఐదు దశల్లో పూర్తి చేయాలని నిర్ణయించిన కలెక్టర్ ఈ మేరకు కొన్ని దఫాలను పూర్తి చేశారు. రాష్ట్ర ప్రభుత్వం మార్గదర్శకాల ప్రకారం ఎంత మంది రైతులకు రుణమాఫీ వర్తిస్తుందో, ఎంత మొత్తం మాఫీ చేయాల్సి వస్తుందనే అంశాలపై బ్యాంకర్ల నుంచి ఆయన జాబితా తెప్పించారు. మొదటి దశలో పంటరుణాలు, రెండో దశలో బంగారం రుణాల వివరాలను తెప్పించిన కలెక్టర్ మూడో దశలో ఈ మొత్తాన్ని కలిపి ఓ జాబితా రూపొందించారు.
 
  ఈ జాబితాపై ఇప్పటికే మండలస్థాయి బ్యాంకర్ల సమావేశాలు పూర్తికాగా, బుధవారం నాలుగోదశలో భాగంగా గ్రామస్థాయిలో సామాజిక తనిఖీ చేస్తారు. దీనిలో భాగంగా లబ్ధిదారులుగా గుర్తించిన రైతు కుటుంబాలకు వ్యవసాయ రుణాల కింద ఉన్న మొత్తం రుణం ఎంత? ఎన్ని బ్యాంకుల్లో ఉంది? అనే అంశాలను గుర్తిస్తారు. ఒక్కో కుటుంబానికి రూ.లక్షకు మించకుండా (ఎన్ని బ్యాంకుల్లో ఉన్నా) రుణమాఫీని వర్తింపజేస్తారు. ఒక బ్యాంకులో లక్ష రుణం తీసుకుని, మరో బ్యాంకులో ఇంకా అదనంగా తీసుకుంటే ఆ రుణానికి మాఫీ వర్తించదని అధికారులు చెపుతున్నారు.
 
 నాలుగోదశలో ఈ గుర్తింపు ప్రక్రియ పూర్తయ్యాక ఐదో దశలో తుది జాబితా తయారుచేసి రుణమాఫీ మొత్తాన్ని నేరుగా బ్యాంకర్లకు చెల్లించనున్నారు. రుణమాఫీ పొందుతున్న రైతుల వివరాలను నమోదు చేసుకోవడంతో పాటు వారి వివరాలను ఆధార్‌కార్డుతో అనుసంధానం చేయనున్నారు. రెండు, మూడు  రోజుల్లో సామాజిక తనిఖీ పూర్తవుతుందని, ఆ తర్వాత తుదిజాబితా తయారుచేసి వారం రోజుల్లోపు రుణమాఫీ ప్రక్రియను పూర్తి చేస్తామని జిల్లా కలెక్టర్ ఇలంబరితి మంగళవారం ‘సాక్షి’తో చెప్పారు.


 సాక్షి ప్రతినిధి, ఆదిలాబాద్ : ప్రభుత్వం ప్రతిష్టాత్మకంగా భావిస్తున్న, అన్నదాతలు ఆశగా ఎదురు చూస్తున్న రుణమాఫీకి అర్హులైన రైతుల ఎంపిక ప్రక్రియ కొలిక్కి రాలేదు. ఆగస్టు నెలాఖరు వరకు అర్హులైన రైతుల జాబితాను ప్రభుత్వానికి పంపాల్సి ఉండగా, ఇప్పుడిప్పుడే ఆ ప్రక్రియ తుదిదశకు చేరుకుంటోంది. ఆగస్టు 31లోగా ఈ జాబితాను పంపాలని ప్రభుత్వ ప్రధాన కార్యదర్శి రాజీవ్‌శర్మ జిల్లా అధికార యంత్రాంగానికి ఆదేశాలు జారీ చేసిన విషయం విధితమే.
 
  ఈ మేరకు అర్హులైన జాబితాను రూపొందించేందుకు ఆగస్టు మూడో వారంలో మండల స్థాయి బ్యాంకర్ల సంయుక్త కమిటీలను నియమించారు. ఆయా మండలాల తహశీల్దార్లు చైర్మన్‌గా వ్యవహరిస్తున్న ఈ కమిటీలో ఆ మండలంలో ఉన్న బ్యాంకుల మేనేజర్లు, ఎంపీడీవోలు, వ్యవసాయాధికారులు, ఆడిటర్లు తదితరులు సభ్యులుగా ఉన్నారు. జిల్లా వ్యాప్తంగా అన్ని మండలాల్లో ఈ కమిటీ సమావేశాలు నిర్వహించి పంట రుణాలు పొందిన రైతుల వివరాలు సేకరించారు. జిల్లా వ్యాప్తంగా 3.15 లక్షల మంది రైతులు రూ.1,514.35 కోట్ల మేరకు పంట రుణాలు పొందినట్లు ఈ కమిటీలు నిర్ధారించాయి.
 
  అర్హులైన రైతుల ఎంపికకు..
  పంట రుణాలు పొందిన 3.15 లక్షల మంది రైతుల్లో అర్హులైన వారి ఎంపిక కోసం తుది కసరత్తు ప్రారంభించినట్లు లీడ్ బ్యాంక్ మేనేజర్ జి.ఉదయ్ రంజన్ శర్మ ‘సాక్షి’ ప్రతినిధితో తెలిపారు. ఒక్కో రైతు రెండు మూడు బ్యాంకుల్లో పంట రుణాలు పొందారు. అలాగే ఒకే కుటుంబంలో ఇద్దరు ముగ్గురు సభ్యు ల పేర్లతో రుణాలు ఉన్నాయి. కొందరు రైతులు రూ. లక్ష కంటే ఎక్కువ మొత్తంలో రుణాలు తీసుకున్నారు. ఎన్నికల వేళ టీఆర్‌ఎస్ ఇచ్చిన హా మీ మేరకు ఒక్కో రైతు కుటుంబానికి రూ.లక్ష వరకు మాఫీ చేయాలని ప్రభుత్వం నిర్ణయించింది.
 
  ఈ మేరకు ఈ 3.15 లక్షల మంది రైతుల్లో ఇలాంటి రైతులను గుర్తించేందుకు ఆనాగ్జర్-డిని తయారు చేస్తున్నామ ని, అనంతరం అర్హులైన రైతుల జాబితా తెలుస్తుందని లీడ్‌బ్యాంక్ అధికారులు పేర్కొంటున్నారు. త్వరలోనే ఈ ప్రక్రియ పూర్తి చేస్తామని అధికారులు పేర్కొంటున్నారు. రుణమాఫీకి అర్హులైన రైతులెవరో తేలాకే తిరిగి కొత్త రుణాలు మంజూరు ప్రక్రియ ప్రారంభించాలని బ్యాంకర్లు భావిస్తున్నారు. 2014-15 ఆర్థిక సంవత్సరంలో రూ.2,228.60 కోట్ల మేరకు పంట రుణాలు మంజూరు చేయాలని జిల్లా బ్యాంకర్ల కమిటీ లక్ష్యంగా పెట్టుకుంది. కానీ ఖరీఫ్ కాలం దగ్గర పడుతున్నప్పటికీ కనీసం రూ.92 కోట్లు కూడా పంట రుణాలు ఇవ్వలేదు.
 
  రీషెడ్యూల్‌పైనా స్పష్టత కరువు
  రాష్ట్ర వ్యాప్తంగా ఆదిలాబాద్‌తోపాటు మెదక్, రంగారెడ్డి జిల్లా పరిధిలో వంద మండలాల్లో పంట రుణాల రీషెడ్యూల్ చేసేందుకు ఆర్బీఐ అనుమతించింది. ఈ వంద మండలాల్లో ఆదిలాబాద్ ఎన్ని మండలాలు ఈ రీషెడ్యూల్‌కు అనుమతి లభించిందనే అంశంపై స్పష్టత లేకుండా పోయింది. ఈ విషయంలో తమకెలాంటి ఆదేశాలు ప్రభుత్వం నుంచి అందలేదని అధికారులు పేర్కొంటున్నారు.


 సాక్షి ప్రతినిధి, కర్నూలు : వైఎస్ రాజశేఖర్‌రెడ్డి.. ఆ పేరు వింటే రైతన్నలకు ధైర్యం వస్తుంది. వారి మోములు చిరునవ్వుతో విచ్చుకుంటాయి. పేదలు, బడుగు, బలహీన వర్గాల ప్రజలు ఇప్పటికీ ఆయనను గుండెల్లో పెట్టుకొని పూజిస్తున్నారు. ముఖ్యమంత్రిగా తన ఐదేళ్ల కాలంలో వైఎస్సార్.. అన్ని వర్గాల వారికి ఏదోరూపంలో సంక్షేమ ఫలాలను అందించారు. ప్రజలకు సేవ చేయాలనే లక్ష్యంతో ఆయన పనిచేశారు. ముఖ్యంగా రైతును రారాజుగా చూడాలనుకున్నారు. తన తొలి సంతకం ఉచిత విద్యుత్ ఫైలుపై చేసి జిల్లాలో 86 వేల మంది రైతులకు లబ్ధి చేకూర్చారు. అలాగే జిల్లాలోని 2.80 లక్షల మంది రైతులకు రూ.428 కోట్ల రుణాలను మాఫీ చేశారు. 4.73 లక్షల మంది రైతులకు తన ఐదేళ్ల కాలంలో రూ.871 కోట్లు పంట రుణాలు ఇప్పించి తిరిగి వ్యవసాయం చేసుకునే అవకాశం కల్పించారు.
  
  ఎరువులు, విత్తనాలు, వ్యవసాయ పనిముట్లను సబ్సిడీతో ఇప్పించారు. బ్యాంకుల్లో తీసుకున్న రుణాలు సకాలంలో చెల్లించిన రెండు లక్షల మంది రైతులకు రూ.65 కోట్లు ప్రోత్సాహకాల ద్వారా అందించారు. ఏ ఆదరణకు నోచుకోని 3.50 లక్షల మంది వృద్ధులు, వితంతువులు, వికలాంగులకు నెలకు రూ.8 కోట్ల నిధులను విడుదల చేస్తూ.. ఒకటో తేదీన ఠంచన్‌గా ఇచ్చేటట్లు చర్యలు తీసుకున్నారు. ఇందిరమ్మ గృహ నిర్మాణం పేరిట జిల్లాలో 4.73 లక్షల గృహాలు, రాజీవ్ గృహకల్ప పథకం ద్వారా 1876 మందికి ఇళ్ల ప్లాట్లు ఇచ్చి పేదల సొంతింటి కలను సాకారం చేశారు.
  
  ఇందిరప్రభ పథకం ద్వారా 14,109 మంది పేదలకు 30,787 ఎకరాల మిగులు భూములు ఉచితంగా పంపిణీ చేశారు. జిల్లాలో 1,937 మందికి రూ.5.84 కోట్లతో ఆరోగ్యశ్రీ పథకం ద్వారా శస్త్ర చికిత్సలు చేయించారు. మహిళా సాధికారతే లక్ష్యంగా పావలా వడ్డీకే రూ.101.52 కోట్లు రుణాలుగా ఇప్పించారు. వలసల నివారణ, ప్రతి ఒక్కరికి ఉపాధే లక్ష్యంగా జాతీయ ఉపాధి హామీ పథకం ద్వారా జిల్లాలో 3.55 లక్షల మందికి పని కల్పించి రూ.252.31 కోట్లు ఇప్పించారు. జిల్లాలో 3.75 లక్షల మందికి తెల్ల రేషన్ కార్డులు ఇచ్చారు. ఇంకా రాజీవ్ ఉద్యోగశ్రీ, పశుక్రాంతి పథకాలను ప్రవేశపెట్టి ఉపాధి అవకాశాలు కల్పించారు.
  
  దశాబ్దాలుగా పాలకుల నిరాదరణకు గురైన కర్నూలు జిల్లాలోని పల్లెలు, పట్టణాలను దివంగత ముఖ్యమంత్రి వైఎస్ రాజశేఖర్‌రెడ్డి తన ఐదేళ్ల పాలనలో అభివృద్ధిలో ముందంజలో నిలిపారు. ఉపాధి హామీ పథకం కింద జిల్లాలో 53 మండలాల్లో 250 ఇందిరమ్మ చెరువులను గుర్తించి రూ.360 లక్షలతో పనులు చేపట్టారు. దీంతో ఈ చెరువుల కింద ఆయకట్టు సాగు విస్తీర్ణం అనూహ్యంగా పెరిగింది. వైఎస్సార్ హయాంలో సమృద్ధిగా వర్షాలు కురిసి బాగా పంటలు పండాయి.
  
  వైఎస్సార్ హయాంలో జిల్లా అభివృద్ధి ఇదీ..
   ఫీజు రీయింబర్స్ మెంట్ పథకం ద్వారా 2.88 లక్షల మంది విద్యార్థులకు ఫీజుల రూపేణా రూ.67.20 కోట్లు ఇచ్చారు. వైఎస్‌ఆర్ అభయహస్తంతో 14,500 మందికి వృద్ధులకు ఒక్కొక్కరికి రూ.500 చొప్పున లబ్ధి చేకూర్చారు.
  జిల్లా నీటి యాజమాన్య సంస్థ ఆధ్వర్యంలో డీపీఏపీ కింద రూ.81.31 కోట్లతో 14,159 వాటర్‌షెడ్లు నిర్మించారు.
  
  కరువు విమోచనా పథకం కింద ఇందిరమ్మ ఇళ్లు నిర్మించుకుంటున్న వారికి రూ.10 కోట్లతో 28,782 పనులు ఏర్పాటు చేశారు. మొక్కజొన్న, ధాన్యం కొనుగోలు చేసి వ్యాపారం చేయటంలో కర్నూలు జిల్లా మహిళలు ప్రావీణ్యం సంపాదించారు. వారంతా ఇందిరక్రాంతి పథకం కింద రూ.75 కోట్లతో జిల్లా సమాఖ్య సభ్యులు వ్యాపారం చేయటం ప్రారంభించారు.
  
  జిల్లాలో 8,67,536 కుటుంబాలకు 2,203 చౌకధరల దుకాణాల ద్వారా రూ.2కే కిలో బియ్యం పంపిణీ చేసి ఒక్కపూటకే పరిమితమైన వారికి మూడు పూటలా భోజనం అందేలా చూశారు.
  ప్రధానమంత్రి, ముఖ్యమంత్రి ప్యాకేజీల కింద జిల్లాకు 6 వేల ముర్రాజాతి గేదెలు, రూ.35.54 కోట్లతో పాడిగేదెలు, గొర్రెలు, పొట్టేళ్లు, దూడలు పంపిణీ చేశారు.నాలుగేళ్లలో ఎస్సీ కార్పొరేషన్ ద్వారా రూ.17.36 కోట్ల ఆర్థిక సాయాన్ని ఎస్సీలకు అందించారు.
  
  అంటరానితనాన్ని రూపుమాపేందుకు ఎస్సీ, ఎస్టీ, బీసీ, మైనారిటీలంతా ఒకే చోట విద్యనభ్యసించేందుకు ప్రభుత్వం సమీకృత వసతిగృహాలను నిర్మించారు. రూ.1.70 కోట్లతో జిల్లాలో 5 భవనాలు నిర్మించేందుకు శ్రీకారం చుట్టారు.  చెంచుల విద్యాభివృద్ధి కోసం రూ.4.24 కోట్లు ఖర్చు చేశారు. ఐదేళ్లలో రాజీవ్ యువశక్తి పథకం కింద రూ.42 కోట్లు ఖర్చు చేసి 5,713 యూనిట్లను మంజూరు చేశారు.
  
  రాజన్న ‘స్మృతి’లో..
  దివంగత ముఖ్యమంత్రి వైఎస్ రాజశేఖరరెడ్డి జ్ఞాపకార్థం రాష్ట్ర ప్రభుత్వం ఏర్పాటు చేసిన వైఎస్‌ఆర్ సృ్మతివనం జిల్లాకే తలమానికంగా నిలిచింది. రూ.9 కోట్లతో చేపట్టిన ఈ స్మృతివనంలో వైఎస్‌ఆర్ భారీ విగ్రహం పర్యాటకులను ఆకట్టుకుంటోంది.బట్టర్‌ఫ్లై గార్డెన్, 60 అడుగుల ఎత్తులో నిర్మించిన వీక్షణ కేంద్రంపై నుంచి చూస్తే నల్లమల అందాలు కన్పిస్తాయి. అందమైన రకరకాల మొక్కలు, చెట్లు స్మృతివనంలో మరో ఆకర్షణగా నిలుస్తున్నాయి. శ్రీశైలం, మహానంది పుణ్యక్షేత్రాలకు వెళ్లే మహారాష్ట్ర, కర్ణాటక యాత్రికులు స్మృతివనాన్ని సందర్శించి వెళ్తున్నారు.
  
  నేడు సేవా కార్యక్రమాలు
  కర్నూలు: సేవా కార్యక్రమాలతో దివంగత నేత వైఎస్ రాజశేఖరరెడ్డి ఐదో వర్ధంతిని జరుపుకోవాలని వైఎస్సార్ కాంగ్రెస్ పార్టీ శ్రేణులు, వైఎస్సార్ అభిమానులు ఏర్పాట్లు చేశారు. మంగళవారం జిల్లాలో వైఎస్సార్ విగ్రహాలకు పాలభిషేకం చేయనున్నారు. అలాగే  రోగులకు పండ్లు, బ్రెడ్డు పంపిణీ చేస్తారు. రక్తదానం, ఉచిత వైద్య శిబిరాలు, అన్నదానం వంటి సేవా కార్యక్రమాలు నిర్వహిస్తారు. వైఎస్సార్ కాంగ్రెస్ పార్టీ నగర కార్యాలయంతోపాటు జిల్లా కాంగ్రెస్ కార్యాలయం కళా వెంకటరావు భవన్‌లో వైఎస్సార్ వర్ధంతిని నిర్వహించేందుకు ఏర్పాట్లు చేసుకున్నారు.
  
   నంద్యాలలో డాక్టర్ హరినాథ్‌రెడ్డి నేతృత్వంలో మెగా వైద్యశిబిరం నిర్వహిస్తున్నారు. టంగుటూరులో వైఎస్సార్ అభిమానులు, పార్టీశ్రేణుల నేతృత్వంలో రక్తదాన శిబిరం నిర్వహించనున్నారు. మంత్రాలయంలో మండల కన్వీనరు బీవీ రెడ్డి ఆధ్వర్యంలో, ఆత్మకూరులో శ్రీశైలం నియోజకవర్గ ఇన్‌చార్జి బుడ్డా శేషారెడ్డి ఆధ్వర్యంలో వేడుకలు నిర్వహిస్తున్నారు. వైఎస్సార్ స్మృతి వనంలో కాంస్య విగ్రహానికి పూలమాలలు వేసి నివాళులర్పించి.. అక్కడి నుంచి ర్యాలీగా ఆత్మకూరు పట్టణానికి చేరుకుని వైఎస్సార్ విగ్రహానికి పాలాభిషేకం చేయనున్నారు. అలాగే వెలుగోడు, బండిఆత్మకూరు, శ్రీశైలం, మహానంది పట్టణాల్లో కూడా వైఎస్సార్ వర్ధంతిని నిర్వహించేందుకు పార్టీ శ్రేణులు సిద్ధమయ్యాయి.
  


 హైదరాబాద్ : రైతుల రుణ మాఫీపై ప్రభుత్వం స్పష్టంగా ఉన్నప్పటికీ ప్రధాన ప్రతిపక్షం పదే పదే లేనిపోని ఆరోపణలు చేస్తోందని ప్రభుత్వం వ్యాఖ్యానించింది. రాష్ట్రంలో రుణమాఫీలు 96 శాతం రైతులకు ప్రయోజనం కలిగిస్తున్నాయని ప్రభుత్వం వెల్లడించింది. దేశంలో ఎక్కడా లేని విధంగా రుణ మాఫీ అమలు చేశామని ప్రభుత్వం చెప్పుకొచ్చింది. కేంద్ర సహాయం లేకుండా అమలు చేశామని వివరించింది. బడ్జెట్‌లో 5 వేల కోట్లు కేటాయించినంత మాత్రాన రుణమాఫీ అమలు చేయబోమని కాదని ఆర్ధిక మంత్రి యనమల తేల్చి చెప్పారు.
 
 కాగా రుణమాఫీపై  అసత్యాలు చెబుతున్న ప్రభుత్వం.. వీలైనంత వరకు భారం తగ్గించుకునే యత్నం చేస్తోందని ప్రధాన ప్రతిపక్షం స్పష్టం చేసింది. పలు నిబంధనలు పెడుతూ  రైతులకు అన్యాయం చేస్తున్నారని ఆక్షేపించింది. రైతులు, డ్వాక్రా మహిళల రుణాలు దాదాపు లక్ష కోట్లుంటే బడ్జెట్‌లో కేవలం అయిదు వేల కోట్లు మాత్రమే కేటాయించారని ప్రధాన ప్రతిపక్షం గుర్తు చేసింది. ప్రభుత్వ వైఖరి నిరసిస్తూ వాకౌట్ చేస్తున్నట్టు ప్రకటించింది.