సుదీర్ఘకాలం పాటు ఢిల్లీ రాజకీయాల్లో కీలకంగా వ్యవహరించిన కాంగ్రెస్‌ నేత షీలా దీక్షిత్ సారధ్యం లేకుండా తొలిసారిగా ఆ పార్టీ లోక్‌సభ ఎన్నికల బరిలోకి దిగుతోంది. 2019 జూలై 20న షీలా దీక్షిత్‌ కన్నుమూశారు. రెండున్నర దశాబ్దాల తర్వాత తొలిసారిగా ఢిల్లీలో కాంగ్రెస్‌ ఈ విధమైన పరిస్థితిని ఎదుర్కొంటోంది.   షీలా దీక్షిత్‌ కన్నుమూయడం, పార్టీ సీనియర్ నేతల్లో చాలామందికి వయసు మీద పడటంతో రాబోయే లోక్‌సభ ఎన్నికల నిర్వహణ బాధ్యత రాష్ట్ర అధ్యక్షుడు అరవిందర్ సింగ్ లవ్లీ భుజస్కంధాలపై పడింది. ఢిల్లీలోని మూడు లోక్‌సభ స్థానాల అభ్యర్థుల గెలుపు బాధ్యత లవ్లీపైననే ఉంది. దీనితోపాటు ఇండియా  కూటమిలోని నాలుగు సీట్ల విషయంలో అతను ‘ఆప్‌’కు సహకరించాల్సి ఉంటుంది.  1984 నవంబర్ నాటి అల్లర్ల కేసులో కాంగ్రెస్‌ నేత సజ్జన్ కుమార్ దోషిగా తేలడంతో జైలులో ఉన్నారు. ఇదే కేసులో మరో నేత జగదీష్ టైట్లర్ దశాబ్దన్నర కాలంగా పలు సమస్యలను ఎదుర్కొంటున్నారు. రాష్ట్ర కాంగ్రెస్‌ మాజీ అధ్యక్షుడు సుభాష్ చోప్రాతో పాటు షీలా ప్రభుత్వంలో మంత్రులుగా ఉన్న నేతలలోని పలువురు వృద్ధాప్య దశకు చేరారు. ఇలాంటి పరిస్థితుల్లో పార్టీని రాబోయే ఎన్నికల్లో ముందుకు నడిపించే బాధ్యత లవ్లీపైనే ఉంది. గతంలో ఈశాన్య ఢిల్లీ స్థానం నుంచి లవ్లీ  పోటీ చేస్తారనే వార్తలు వినిపించాయి. అయితే ఎన్నికల బాధ్యతలు చేపట్టాల్సి రావడంతో లవ్లీ తాను రాబోయే ఎన్నికల్లో పోటీ చేయకూడదని నిర్ణయించుకున్నారు. ఆయనతో పాటు కేంద్ర మాజీ మంత్రి, రాష్ట్ర కాంగ్రెస్‌ మాజీ అధ్యక్షుడు అజయ్‌ మాకెన్‌ కూడా ఎన్నికల బాధ్యతలు చేపట్టి జాతీయ రాజకీయాల్లో క్రియాశీలకంగా మారారు. షీలా దీక్షిత్ నాయకత్వంలో ఢిల్లీ కాంగ్రెస్‌ 1999 లోక్‌సభ ఎన్నికలు మొదలుకొని అన్ని ఎన్నికల్లోనూ పోటీచేస్తూ వచ్చింది. 2004, 2009 లోక్‌సభ ఎన్నికల్లో కాంగ్రెస్‌కు ఆమె భారీ విజయాన్ని అందించారు. 2014లో ఆమె కేరళ గవర్నర్‌గా ఉన్నందున ఆమె నేరుగా లోక్‌సభ ఎన్నికల్లో జోక్యం చేసుకోలేకపోయారు. అయితే ఆమె కుమారుడు సందీప్ దీక్షిత్ తూర్పు ఢిల్లీ స్థానం నుంచి పోటీ చేశారు. ఆరోగ్యం సహకరించకపోయినా షీలా 2019 లోక్‌సభ ఎన్నికల బాధ్యతలు చేపట్టారు. రాష్ట్ర అధ్యక్షురాలిగా ఉంటూనే ఈశాన్య ఢిల్లీ లోక్‌సభ నియోజకవర్గం నుంచి ఎన్నికల్లో ఆమె పోటీ చేశారు. షీలాతో సహా కాంగ్రెస్ అభ్యర్థులంతా ఓడిపోయినా, షీలా నాయకత్వంలో పార్టీకి జవసత్వాలు వచ్చాయి. ఈ ఎన్నికల్లో కాంగ్రెస్ ఓట్ల శాతం పెరిగింది. ఐదు లోక్‌సభ స్థానాల్లో కాంగ్రెస్‌ రెండో స్థానంలో నిలిచింది. అంతకు ముందు 2014 ఎన్నికల్లో మొత్తం ఏడు స్థానాల్లో కాంగ్రెస్‌ మూడో స్థానంలో ఉంది.

న్యూఢిల్లీ: కాంగ్రెస్‌ అగ్రనేత రాహుల్‌ గాంధీ ఆగ్నేయ ఢిల్లీలోని తూర్పు నిజాముద్దీన్‌ ప్రాంతంలో తన నివాసం, కార్యాలయాన్ని త్వరలో ఏర్పాటు చేసుకొనే అవకాశం ఉందని పార్టీ వర్గాలు వెల్లడించాయి. నివాసం, కార్యాలయం ఒకే ప్రాంగణంలో ఉంటాయని తెలిపాయి. మోదీ ఇంటి పేరుకు సంబంధించిన పరువు నష్టం వ్యాఖ్యల కేసులో జైలు శిక్ష పడడం, తద్వారా లోక్‌సభ సభ్యత్వం కోల్పోవడంతో ఆయన అప్పటి వరకూ నివసిస్తున్న 12, తుగ్లక్‌ లేన్‌లోని ప్రభుత్వ బంగ్లాను  ఖాళీ చేయాల్సి వచ్చిన విషయం తెలిసిందే. రాహుల్‌ ప్రస్తుతం తన తల్లి సోనియా గాంధీ అధికారిక నివాసమైన 10, జన్‌పథ్‌లో ఉంటున్నారు. అయితే అక్కడి నుంచి మరో చోటుకు మారాలని భావిస్తున్న రాహుల్‌.. తూర్పు నిజాముద్దీన్‌ ప్రాంతంలోని ఢిల్లీ మాజీ ముఖ్యమంత్రి, దివంగత కాంగ్రెస్‌ నేత షీలా దీక్షిత్‌ నివాసాన్ని ఎంపిక చేసుకున్నట్లు తెలిసింది. షీలాదీక్షిత్‌ మరణానంతరం ఆ ఇంట్లో నివసించిన ఆమె తనయుడు, మాజీ ఎంపీ సందీప్‌ దీక్షిత్‌ అక్కడికి దగ్గరిలోనే సమీప బంధువుల ఇంటికి మారడంతో అది ఖాళీగా ఉంది.  చదవండి: ఢిల్లీలో జల ప్రళయం.. యమునా ఉధృతరూపం.. ఆల్‌టైమ్‌ రికార్డు

సాక్షి, న్యూఢిల్లీ: అసెంబ్లీ ఎన్నికల ఫలితాలు కాంగ్రెస్‌ పార్టీలో అంతర్గత చిచ్చుకు కారణమవుతున్నాయి. తాజా ఎన్నికల్లో పార్టీ ఘోర పరాభవానికి నైతిక బాధ్యత వహిస్తూ ఢిల్లీ కాంగ్రెస్‌ ఇన్‌ఛార్జ్‌ పీసీ చాకో తన పదవికి రాజీనామా చేశారు. ఈ సందర్భంగా మాజీ ఎంపీ, సీనియర్‌ నేత అయిన చాకో మాట్లాడుతూ.. ఢిల్లీలో కాంగ్రెస్ పతనానికి మాజీ సీఎం షీలా దీక్షిత్‌‌ కారణమంటూ వివాదాస్పద వ్యాఖ్యలు చేశారు. 2013లో షీలా దీక్షిత్ ఢిల్లీ సీఎంగా ఉన్నప్పుడే కాంగ్రెస్ పతనం మొదలయ్యిందని ఆయన వ్యాఖ్యానించారు. కాంగ్రెస్ ఓటు బ్యాంకును పూర్తిగా ఆమ్‌ ఆద్మీ పార్టీ సొంతం చేసుకుందన్నారు. పోయిన ఓటు బ్యాంకు తిరిగి పార్టీకి రాలేదని, ఆ ఓటు బ్యాంకు ఇప్పటికీ ఆప్‌తో ఉందని ఆయన పేర్కొన్నారు. పీసీ వ్యాఖ్యలపై స్పందించిన మహారాష్ట్ర కాంగ్రెస్‌ నేత మిలింద్‌ దేవర చాకో వ్యాఖ్యలతో విభేదించారు. నిజానికి షీలా అధికారంలో ఉండగా కాంగ్రెస్ ఓ వెలుగు వెలిగిందని మిలింద్ దేవర అభిప్రాయపడ్డారు. (ఆమ్‌ ఆద్మీ అందగాడు గెలిచేశాడు..!) ఆమె మరణాంతరం ఢిల్లీలో పార్టీ ఓటమికి షీలాను నిందించడం సరికాదన్నారు. ఆమె పార్టీకి, ఢిల్లీ ప్రజలకు తన జీవితాన్ని అంకితం చేశారని ఆయన పేర్కొన్నారు. కాగామొత్తం 70 స్థానాలకు జరిగిన ఢిల్లీ అసెంబ్లీ ఎన్నికల్లో ఆప్ 62 స్థానాల్లో విజయం సాధించి మూడో సారి అధికార పగ్గాలు చేపట్టగా.. బీజేపీ 8 స్థానాలతో సరిపెట్టుకుంది. కాంగ్రెస్ పార్టీ 2015 మాదిరిగానే ఖాతా తెరవలేక ఘోర పరాభవాన్ని మూటగట్టుకుంది. (హస్తిన తీర్పు : ఆప్‌ 62.. బీజేపీ 8)

సాక్షి, న్యూఢిల్లీ : కాంగ్రెస్‌ సీనియర్‌ నాయకురాలు, ఢిల్లీ మాజీ ముఖ్యమంత్రి షీలా దీక్షిత్‌కు ప్రధాన మంత్రి నరేంద్ర మోదీ, యూపీఏ చైర్‌పర్సన్‌ సోనియాగాంధీ నివాళులర్పించారు. ఢిల్లీలోని నిజాముద్దీన్‌లొ ఆమె నివాసానికి వెళ్లి పార్థివ దేహం వద్ద పుష్పగుచ్ఛం ఉంచి అంజలి ఘటించారు. అనంతరం షీలా కుటుంబ సభ్యులను ప్రధాని ఓదార్చారు. షీలా దీక్షిత్‌ భౌతిక దేహానికి  నివాళులర్పింపిన వారిలో రక్షణమంత్రి రాజ్‌నాథ్‌సింగ్‌,  మాజీ రాష్ట్రపతి ప్రణబ్‌ ముఖర్జీ, ఢిల్లీ సీఎం అరవింద్‌ కేజ్రీవాల్‌, మాజీ ప్రధాని మన్మోహన్‌సింగ్‌, ఢిల్లీ బీజేపీ అధ్యక్షుడు మనోజ్‌ తివారీ, కాంగ్రెస్‌ నేత జ్యోతిరాధిత్య సింథియా తదితరులు ఉన్నారు. రేపు మధ్యాహ్నం 3 గంటలకు నిగమ్‌ బోధ్‌ ఘాట్‌లో అంత్యక్రియలు నిర్వహించనున్నారు. కాగా షీలాదీక్షిత్‌ మృతికి నివాళిగా ఢిల్లీ ప్రభుత్వం రెండ్రోజుల సంతాప దినాలు ప్రకటించింది.

సాక్షి, అమరావతి : కాంగ్రెస్‌ పార్టీ సీనియర్‌ నేత, ఢిల్లీ మాజీ ముఖ్యమంత్రి షీలా దీక్షిత్‌ మృతి పట్ల ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి సంతాపం తెలియజేశారు. ఆమె మరణ వార్త తనను ఎంతో బాధపెట్టిందన్నారు. భారత దేశం ఓ గొప్ప నాయకురాలిని కోల్పోయిందని తెలిపారు. ముఖ్యమంత్రిగా షీలా దీక్షిత్‌ ఢిల్లీ అభివృద్ధికి ఎనలేని సేవలు అందించారని కొనియాడారు. ఆమె కుటుంబ సభ్యులకు సానుభూతిని ప్రకటించారు. తెలంగాణ ముఖ్యమంత్రి కేసీఆర్‌ కూడా షీలా దీక్షిత్‌ మృతి పట్ల సంతాపం తెలిపారు. ఆమె మృతి దేశానికి తీరని లోటని పేర్కొన్నారు. 

సాక్షి, న్యూఢిల్లీ : కాంగ్రెస్‌ సీనియర్‌ నాయకురాలు, ఢిల్లీ మాజీ ముఖ్యమంత్రి షీలా దీక్షిత్‌ మృతి పట్ల రాష్ట్రపతి రామ్‌నాథ్‌ కోవింద్‌,  ప్రధానమంత్రి నరేంద్ర మోదీ, కాంగ్రెస్‌ అధ్యక్షుడు రాహుల్‌ గాంధీ, తెలంగాణ సీఎం కేసీఆర్‌తో పాటు పలువురు ప్రముఖులు సంతాపం తెలిపారు. ఆమె మృతి తమకు ఎంతో బాధను కలిగిందని ట్విట్‌ చేశారు. ముఖ్యమంత్రిగా షీలా దీక్షిత్‌ ఢిల్లీ అభివృద్ధికి ఎనలేని సేవలు అందించారని కొనియాడారు. ఆమె కుటుంబ సభ్యులకు సానుభూతిని ప్రకటించారు. 'కాంగ్రెస్ పార్టీ ముద్దుల కూతురు షీలా దీక్షిత్ మరణం నన్ను తీవ్రంగా కలచివేసింది. ఆమె కుటుంబానికి నా ప్ర‌గాఢ సంతాపం తెలుపుతున్నా' అని రాహుల్ గాంధీ ట్వీట్ చేశారు. I’m devastated to hear about the passing away of Sheila Dikshit Ji, a beloved daughter of the Congress Party, with whom I shared a close personal bond. My condolences to her family & the citizens of Delhi, whom she served selflessly as a 3 term CM, in this time of great grief. — Rahul Gandhi (@RahulGandhi) July 20, 2019 ఢిల్లీ అభివృద్ధికి ఆమె ఎంతో కృషి చేశారని రాష్ట్రపతి రామ్‌నాథ్‌ కోవింద్‌ అన్నారు. ఢిల్లీ అభివృద్ధికి షీలా దీక్షిత్‌ విశేష కృషి చేశారని ప్రధాని మోదీ అన్నారు. ఆమె మరణ వార్త తనను ఎంతో బాధించిందని ట్విట్ చేశారు. షీలా దీక్షిత్‌ మృతి దేశానికి తీరని లోటని ఢిల్లీ సీఎం అరవింద్‌ కేజ్రీవాల్‌ పేర్కొన్నారు. Deeply saddened by the demise of Sheila Dikshit Ji. Blessed with a warm and affable personality, she made a noteworthy contribution to Delhi’s development. Condolences to her family and supporters. Om Shanti. pic.twitter.com/jERrvJlQ4X — Narendra Modi (@narendramodi) July 20, 2019 ఆమె మృతి దేశానికి తీరని లోటు : మన్మోహన్‌ షీలా దీక్షిత్‌ మృతి దేశానికి తీరని లోటని మాజీ ప్రధానమంత్రి మన్మోహన్‌సింగ్‌ అన్నారు. ఆమె మరణవార్త తనను షాక్‌కు గురి చేసిందన్నారు. ముఖ్యమంత్రిగా ఆమె అందించిన సేవలను ఢిల్లీ ప్రజలు ఎప్పుడూ మరచిపోరని తెలిపారు. మూడు సార్లు ముఖ్యమంత్రిగా పనిచేసిన షీలాదీక్షిత్‌.. ఢిల్లీ అభివృద్ధికి ఎంతో కృషి చేశారని ప్రశంసించారు. (చదవండి : ఢిల్లీ మాజీ సీఎం షీలా దీక్షిత్‌ కన్నుమూత)

సాక్షి, న్యూఢిల్లీ : కాంగ్రెస్‌ పార్టీ సీనియర్‌ నాయకురాలు, ఢిల్లీ మాజీ ముఖ్యమంత్రి షీలా దీక్షిత్‌(81) కన్నుమూశారు. గత కొద్దిరోజులుగా అనారోగ్యంతో బాధపడుతున్న ఆమె ఢిల్లీలోని ఓ ఆస్పత్రిలో చికిత్స పొందుతూ శనివారం తుదిశ్వాస విడిచారు. 15 ఏళ్ల పాటు ఢిల్లీ ముఖ్యమంత్రిగా, కేరళ గవర్నర్‌గా షీలా దీక్షిత్‌ పని చేశారు. 1998 నుంచి 2013 వరకు ఆమె ఢిల్లీ సీఎంగా పనిచేశారు. 2014 మార్చి నుంచి ఆగస్టు వరకు కేరళ గవర్నర్‌గా సేవలు అందించారు. సార్వత్రిక ఎన్నికల ముందే ఢిల్లీ కాంగ్రెస్‌ చీఫ్‌గా బాధ్యతలు స్వీకరించిన షీలా దీక్షిత్‌.. ఈశాన్య ఢిల్లీ పార్లమెంట్‌ నియోజకవర్గం నుంచి పోటీ చేసి బీజేపీ అభ్యర్థి మనోజ్‌ తివారి చేతిలో ఓడిపోయారు. షీలా దీక్షిత్‌  మృతి పట్ల కాంగ్రెస్‌ పార్టీ సంతాపం తెలిపింది.

న్యూఢిల్లీ : తనను కించపరచడం ద్వారా ఢిల్లీ సీఎం కేజ్రీవాల్‌ పూర్వాంచల్‌ ప్రజలందరినీ అవమానించారని బీజేపీ నాయకుడు మనోజ్‌ తివారీ ఆరోపించారు. నార్త్‌ ఈస్ట్‌ ఢిల్లీ సిట్టింగ్‌ ఎంపీగా ఉన్న మనోజ్‌ తివారీ.. ఈ లోక్‌సభ ఎన్నికల్లో కూడా అదే స్థానం నుంచి మరోసారి పోటీ చేస్తున్నారు. ఈయనకు పోటీగా కాంగ్రెస్‌ ఢిల్లీ మాజీ సీఎం షీలా దీక్షిత్‌ను బరిలోకి దించగా.. ఆమ్‌ ఆద్మీ పార్టీ దిలీప్‌ పాండేను నిలబెట్టింది. ఈ నేపథ్యంలో దిలీప్‌ పాండేకు మద్దతుగా సీఎం కేజ్రీవాల్‌ శుక్రవారం ప్రచారం నిర్వహించారు. ఈ సందర్భంగా ఆయన మాట్లాడుతూ.. గత ఐదేళ్లలో మనోజ్‌ తివారీ నియోజకవర్గ ప్రజలకు చేసిందేమీ లేదని మండిపడ్డారు. ‘ మనోజ్‌ తివారీకి కేవలం డ్యాన్స్‌ ఎలా చేయాలో మాత్రమే తెలుసు. కానీ పాండేజీకి డ్యాన్స్‌ చేయడం తెలియక పోయినా ప్రజల కోసం పనిచేసే గుణం మాత్రం ఉంది. అందుకే ఈసారి డ్యాన్స్‌ చేసే వాళ్లకు కాకుండా నియోజకవర్గాన్ని అభివృద్ధి చేసే వారికే ఓటేయాలి.  ఈ ఎన్నికలు ఎంతో కీలకమైనవి. అభివృద్ధి చేసేవారిని మాత్రమే గెలిపించాలి. నాచ్‌నేవాలాకు కాదు’ అని మనోజ్‌ తివారీపై విమర్శలు గుప్పించారు. కాగా కేజ్రీవాల్‌ వ్యాఖ్యలపై స్పందించిన మనోజ్‌ తివారీ... తనను కించపరచడం ద్వారా పూర్వాంచల్‌ ప్రజలందరినీ కేజ్రీవాల్‌ అవమానించారని పేర్కొన్నారు. ఇందుకు ఆయన భారీ మూల్యం చెల్లించక తప్పదని హెచ్చరించారు. కాగా భోజ్‌పురిలో మంచి నటుడిగా, గాయకుడిగా గుర్తింపు పొందిన మనోజ్‌ తివారీ ప్రస్తుతం బీజేపీలో కొనసాగుతున్న సంగతి తెలిసిందే. ఇక సార్వత్రిక ఎన్నికల నేపథ్యంలో మే 12న ఢిల్లీలో ఎన్నికలు జరుగనున్నాయి.

సాక్షి, న్యూఢిల్లీ: మాజీ ముఖ్యమంత్రి షీలా దీక్షిత్‌ ఢిల్లీలో సరైన పాలన అందించుంటే ఆమ్‌ ఆద్మీ పార్టీ పుట్టేది కాదన్నారు అరవింద్‌ కేజ్రీవాల్‌. ఢిల్లీలోని రోహిణిలో నిర్వహించిన ఎన్నికల సభలో ఆప్‌ అధినేత, ఢిల్లీ సీఎం కేజ్రీవాల్‌ ప్రసంగించారు. ‘ఈ పరిస్థితుల్లో షీలా దీక్షిత్‌ ఉన్నా మంచి పాలనే అందించేవారని కొందరు విమర్శిస్తున్నారు. ఆమె ఢిల్లీలో అధికారంలో ఉన్న సమయంలో విద్య, ఆరోగ్యం లాంటి కీలకాంశాలను నిర్లక్ష్యం చేశారు. మెరుగైన సౌకర్యాలు, వసతులు కల్పించలేదు. ఢిల్లీని అభివృద్ధి చేయడంలో ఆమె ప్రభుత్వం దారుణంగా విఫలమైంది. అందుకే తాను ఆప్‌ లాంటి కొత్త పార్టీని స్థాపించాల్సి వచ్చింది. కాంగ్రెస్‌ పార్టీ 70 సంత్సరాలు అధికారంలో ఉంది. ఆ పార్టీ మంచి పాలన అందించుంటే మా పార్టీ అసలు ఉనికిలోనే ఉండేది కాద’ని కేజ్రీవాల్‌ అన్నారు. షీలా దీక్షిత్‌ 1998 నుంచి 2003 వరకు జరిగిన ఢిల్లీ ఎన్నికల్లో వరుసగా మూడు పర్యాయాలు గెలిచి అధికారంలో ఉ‍న్న విషయం తెలిసిందే.  మోదీ సర్కార్‌ను తూర్పారపట్టిన కేజ్రీవాల్‌.. ఢిల్లీలో తాము నూతనంగా స్కూళ్లు, ఆసుపత్రులు, మొహల్లా క్లినిక్‌లు నిర్మించాలనుకున్నప్పటికీ, కేంద్రం ప్రతి విషయంలోనూ తమకు అడ్డుపడుతూనే ఉందని, సీసీ కెమెరాల బిగింపునకు సంబంధించిన ఫైల్‌ను గత మూడేళ్లుగా ఆమోదించకుండా మోదీ ప్రభుత్వం మోకాలడ్డేస్తోందని దుమ్మెత్తిపోశారు. ‘మేం ఏ పని చేసినా కేంద్రం అనుమతి తీసుకోవాల్సి వస్తోంది. అదే దేశంలోని మిగతా రాష్ట్రాల విషయంలో ఇవేవీ అవసరం లేదు. వారికా స్వేచ్ఛ ఉంది. అభివృద్ధిని అడ్డుకోవాలని చూసే అలాంటి (బీజేపీ) పార్టీకి ఓటేస్తే, వచ్చే ఐదేళ్లపాటు మళ్లీ అభివృద్ధిని జరగనివ్వరు. కాబట్టి ఆప్‌కు ఓటేయాలి’ అని ప్రజలకు పిలుపునిచ్చారు. ఇదిలా ఉండగా.. కాంగ్రెస్‌ పార్టీ తన ఎన్నికల ప్రచారంలో ఢిల్లీకి పూర్తి స్థాయి రాష్ట్ర హోదా కల్పించే అంశాన్ని తన మేనిఫెస్టోలో చేర్చడం లేదని తెలిసింది. కేవలం జాతీయ సమస్యల మీదే తమ ప్రచారం కొనసాగుతుందని, ఢిల్లీకి పూర్తి రాష్ట్ర హోదా అంశాన్ని తాము ఎన్నికల ప్రచారంలో లేవనెత్తబోవడం లేదని ఢిల్లీ మాజీ సీఎం, ఆ రాష్ట్ర కాంగ్రెస్‌ అధ్యక్షురాలు షీలా దీక్షిత్‌ మీడియాకు తెలిపారు. 

న్యూఢిల్లీ: ఢిల్లీ కాంగ్రెస్‌ విభాగం అధ్యక్షురాలిగా షీలా దీక్షిత్‌ బాధ్యతలు స్వీకరించిన వేడుకకు ఆ పార్టీ సీనియర్‌ నేత జగదీశ్‌ టైట్లర్‌ హాజరు కావడం ఇప్పుడు వివాదాస్పదంగా మారింది. సిక్కు వ్యతిరేక అల్లర్ల సాక్షులను బెదిరించేందుకే టైట్లర్‌ను కాంగ్రెస్‌ పార్టీ ఆహ్వానించిందని శిరోమణి అకాళీదళ్‌ నేత, ఢిల్లీ సిక్కు గురుద్వారా మేనేజ్‌మెంట్‌ కమిటీ జనరల్‌ సెక్రటరీ మజిందర్‌ సింగ్‌ సిర్సా మండిపడ్డారు. ఇన్నాళ్లు కాంగ్రెస్‌ పార్టీ దూరంగా ఉంచిన జగదీశ్‌ టైట్లర్‌ను షీలా దీక్షిత్‌ మళ్లీ పార్టీ కార్యక్రమాలకు ఆహ్వానించి ఆయనకు అధిక ప్రాధాన్యం ఇవ్వడాన్ని సిర్సా తీవ్రంగా విమర్శించారు. ‘‘1984 నాటి సిక్కు వ్యతిరేక అల్లర్లకు సంబంధించిన కేసులో సాక్షులను జగదీశ్‌ టైట్లర్‌ భయపెట్టారన్న సంగతి బహిరంగ రహస్యమే. అటువంటి వ్యక్తికి కాంగ్రెస్‌ ప్రాధాన్యం ఇవ్వడం సరికాదు. ఈ అల్లర్లకు సంబంధించి జగదీశ్‌ టైట్లర్‌ తోపాటుగా మధ్యప్రదేశ్‌ ముఖ్యమంత్రి కమల్‌నాథ్‌కు కూడా జైలు శిక్ష పడుతుంది. సిక్కు అల్లర్ల కేసులో సాక్షులను బెదిరించేందుకు, టైట్లర్‌కు అధిష్టానం మద్దతు మెండుగా ఉందన్న సందేశాన్ని తెలియచెప్పేందుకే కాంగ్రెస్‌ పార్టీ ఇలా వ్యవహరించింది’’అని ఆయన తన ట్విటర్‌లో పేర్కొన్నారు. ఢిల్లీ కాంగ్రెస్‌ విభాగం అధ్యక్షురాలిగా ఢిల్లీ మాజీ ముఖ్యమంత్రి షీలా దీక్షిత్‌ బుధవారం బాధ్యతల్ని స్వీకరించారు. ఈ కార్యక్రమానికి పార్టీ సీనియర్‌ నేతలు కరణ్‌సింగ్, జనార్దన్‌ ద్వివేది, మీరా కుమార్, పీసీ చాకో, సందీప్‌ దీక్షిత్, అజయ్‌ మాకెన్‌తో పాటుగా పార్టీ ఇతర ముఖ్యనేతలు కూడా హాజరయ్యారు. అయితే జగదీశ్‌ టైట్లర్‌ను ఆహ్వానించడాన్ని షీలా దీక్షిత్‌ సమర్థించుకున్నారు. ‘ఆయన ఎందుకు రాకూడదు? ఆయనను ఇక్కడ మేము గౌరవించుకున్నామ’ని ఆమె వ్యాఖ్యానించారు. ఇందిర నుంచి రాహుల్‌ గాంధీ వరకు టైట్లర్‌ వారికి ప్రధాన అనుచరుడిగా ఉన్నారని కేంద్రమంత్రి హర్‌సిమ్రత్‌ కౌర్‌ బాదల్‌ పేర్కొన్నారు. దీన్ని బట్టే సిక్కుల పట్ల కాంగ్రెస్‌ వైఖరి అర్థమవుతుందన్నారు.

సాక్షి, న్యూఢిల్లీ : ‘నేను ఈసారి రాష్ట్ర అసెంబ్లీలో, అలాగే క్యాబినెట్‌లో ఎక్కువ మంది మహిళలను చూడదల్చుకున్నాను’ అని కాంగ్రెస్‌ పార్టీ అధ్యక్షుడు రాహుల్‌ గాంధీ గత ఫిబ్రవరి 24వ తేదీన బెంగళూరులోని బీఎల్డీ స్కూల్‌ గ్రౌండ్స్‌లో జరిగిన మహిళా శక్తి సమ్మేళనంలో వ్యాఖ్యానించారు. పక్కనే ఉన్న మాజీ రాష్ట్ర ముఖ్యమంత్రి సిద్ధ రామయ్య, కర్ణాటక ప్రదేశ్‌ కాంగ్రెస్‌ కమిటీ చీఫ్‌ పరమేశ్వరల వైపు తిరిగి ఈసారి ఎన్నికల్లో మహిళలకు ఎక్కువ టిక్కెట్లు ఇవ్వడంటూ సభా ముఖంగానే వారిని ఆదేశించారు. చివరకు కర్ణాటక అసెంబ్లీలో 244 సీట్లకుగాను 15 మంది మహిళలకు మాత్రమే పార్టీ టిక్కెట్లు లభించాయి. దాదాపు ఐదు నెలల అనంతరం రాహుల్‌ గాంధీ జూలై 17వ తేదీన 51 మంది సభ్యులతో కాంగ్రెస్‌ వర్కింగ్‌ కమిటీ జాబితాను విడుదల చేశారు. వారిలో 18 మంది శాశ్వత ఆహ్వానితులు, 10 మంది ప్రత్యేక ఆహ్మానితులు ఉన్నారు. మొత్తం 51 శాతం సభ్యుల్లో ఏడుగురంటే ఏడుగురు మాత్రమే మహిళలు ఉన్నారు. అంటే మహిళలకు 13.7 శాతం ప్రాతినిధ్యం లభించింది. ఆ ఏడుగురు మహిళల్లో కూడా నలుగురు శాశ్వత ఆహ్వానితులు, ప్రత్యేక ఆహ్వానితులు ఉన్నారు. ఆహ్వానితులను తీసివేస్తే మొత్తం 23 మంది సీడబ్ల్యూసీ సభ్యులో ముగ్గురు మాత్రమే మహిళలు ఉన్నారు. వారు ఎవరంటే సోనియా గాంధీ, అంబికా సోని, కుమారి సెల్జా. ఈ రకంగా చూస్తే మహిళలకు 13 శాతమే ప్రాతినిధ్యం లభించినట్లు. ఢిల్లీ మాజీ ముఖ్యమంత్రి షీలా దీక్షిత్, రజనీ పాటిల్, ఆశా కుమారిలను శాశ్వత ఆహ్వానితులుగా తీసుకోగా అఖిల భారత మహిళా కాంగ్రస్‌ అధ్యక్షురాలు సుశ్మితా దేవ్‌ను ప్రత్యేక ఆహ్వానితులుగా తీసుకున్నారు. అంతకు 72 గంటల ముందే రాహుల్‌ గాంధీ, చట్టసభల్లో మహిళలకు 33 శాతం రిజర్వేషన్లు కల్పించే బిల్లు సత్వర ఆమోదానికి చర్యలు తీసుకోవాలని కోరుతూ ప్రధాని నరేంద్ర మోదీకి లేఖ రాయడం ఇక్కడ గమనార్హం. కర్ణాటక అసెంబ్లీ ఎన్నికల్లో విజయావకాశాలనే ప్రధానంగా దృష్టిలో పెట్టుకోవడం వల్ల ఎక్కువ మంది మహిళలకు సీట్లు ఇవ్వలేక పోయామని సమర్థించుకున్నారు. మరి పార్టీ విషయంలో ప్రాతినిధ్యం కల్పించక పోవడాన్ని రాహుల్‌ గాంధీ ఎలా సమర్థించుకుంటారు?


 న్యూఢిల్లీ: కాంగ్రెస్‌ పార్టీ ఉపాధ్యక్షుడు రాహుల్‌గాంధీకి ఢిల్లీ మాజీ ముఖ్యమంత్రి షీలా దీక్షిత్‌ హితోపదేశం చేశారు. రాహుల్‌ కూడా సోనియా గాంధీ అంతటి ఓపికను తెచ్చుకోవాలని, కొన్ని ప్రజలకు అనుకూలమైన విధానాలు నేర్చుకోవాలని అన్నారు. పార్టీ కార్యాలయంలో సోనియా రోజుకు రెండు నుంచి మూడు గంటలు గడిపి పరిస్థితులపై అంచనాలు వేసేవారని, రాహుల్‌ కూడా అలాంటి నడవడిక నేర్చుకుంటే మంచిదని సూచించారు. పార్టీ నాయకులు వెంట ఉండాలంటే మరిన్ని నాయకత్వ లక్షణాలు రాహుల్‌ అలవర్చుకోవాలని అన్నారు.
 
 శుక్రవారం మీడియాతో మాట్లాడిన ఆమె ‘రాహుల్‌గాంధీ మరింత చేరువయ్యేలా ఉండాలి’ అని ఆమె అన్నారు. తల్లి సోనియా మాదిరిగానే రాహుల్‌ కూడా పార్టీ కార్యాలయంలో రెండు మూడు గంటలు గడిపి పార్టీ నేతలతో మమేకవ్వాల్సిన అవసరం ఉందన్నారు. తాను చెప్పిన సలహాను పాటిస్తే కాంగ్రెస్‌ పార్టీ కార్యాలయాలు మళ్లీ కళకళలాడుతాయని చెప్పారు. ఇదే మానియా అన్ని పార్టీల కార్యాలయాల్లో చోటుచేసుకుంటుందని అన్నారు. అయితే, రాహుల్‌కు నాయకత్వ లక్షణాలు ఉన్నాయని, అయితే, అవి ఆకట్టుకునేలా సమపాల్లలో తగినంత లేవని చెప్పారు.


 న్యూఢిల్లీ: ప్రధాని నరేంద్ర మోదీని ఎదుర్కొనేందుకు ప్రతిపక్ష పార్టీలను ఏకతాటిపైకి తీసుకుని రావడం ప్రస్తుతానికి కష్టమని కాంగ్రెస్‌ పార్టీ సీనియర్‌ నేత, ఢిల్లీ మాజీ ముఖ్యమంత్రి షీలా దీక్షిత్‌ అభిప్రాయపడ్డారు. అయినా 2019 లోక్‌సభ ఎన్నికల్లో ప్రధాని మోదీకి సవాల్‌ తప్పదని అన్నారు.
 
 నెహ్రూ-గాంధీ కుటుంబం లేకపోతే కాంగ్రెస్‌ పార్టీకి మనుగడ లేదని షీలా పేర్కొన్నారు. కాంగ్రెస్‌ పార్టీకి గాంధీ కుటుంబం ఎంతో అవసరమని, పార్టీలో సోనియా గాంధీ, రాహుల్‌ గాంధీలది తిరుగులేని నాయకత్వమని అన్నారు. గాంధీ కుటుంబం కొన్ని దశాబ్దాల పాటు కాంగ్రెస్‌ పార్టీని, దేశాన్ని పాలించిందని చెప్పారు. ఏఐసీసీ ఉపాధ్యక్షుడు రాహుల్ గాంధీ రాజకీయాల్లో బాగా రాణిస్తున్నారని అన్నారు. కాంగ్రెస్‌ నాయకులు కొందరు ఇటీవల పార్టీని వీడి బీజేపీలో చేరడంపై ఆమె స్పందిస్తూ.. తాను ఎప్పటికీ బీజేపీలో చేరే ప్రసక్తే లేదని, మరో జన్మలోనూ సిద్ధాంతపరంగా తాము విభేదిస్తామని స్పష్టం చేశారు.
 
 మోదీకి వ్యతిరేకంగా ప్రతిపక్షాలన్నీ ఓ కూటమిగా ఏర్పడాలని షీలా దీక్షిత్‌ ఆశాభావం వ్యక్తం చేశారు. పార్టీల మధ్య అవగాహన కుదరాలని, కూటమి ఏర్పాటులో జాగ్రత్తగా వ్యవహరించాల్సిన అవసరముందన్నారు. కాంగ్రెస్‌ పార్టీలో మోదీ స్థాయి గల నాయకుడు ఉన్నారా అన్న ప్రశ్నకు.. మాజీ ప్రధాని మన్మోహన్‌ సింగ్‌ అద్భుతంగా పనిచేశారని, సమయం వచ్చినపుడు మోదీని ఎదుర్కొనే నాయకుడిని ప్రకటిస్తామని షీలా చెప్పారు.


 న్యూఢిల్లీ: కాంగ్రెస్‌ పార్టీకి ఢిల్లీ మాజీ ముఖ్యమంత్రి షీలా దీక్షిత్‌ ఓ గుదిబండ అని బీజేపీ తీర్థం పుచ్చుకున్న మాజీ ఢిల్లీ కాంగ్రెస్‌ అధ్యక్షుడు అరవింద్‌ సింగ్‌ లవ్‌లీ అన్నారు. మంగళవారం కాంగ్రెస్‌ పార్టీకి గుడ్‌బై చెప్పి ఢిల్లీ యూత్‌ కాంగ్రెస్‌ అధ్యక్షుడు అమిత్‌ మాలిక్‌తో కలిసి అమిత్‌ షా సమక్షంలో బీజేపీలో చేరిన ఆయన బుధవారం మీడియాతో మాట్లాడుతూ..
 
 ‘మున్సిపల్‌ కార్పొరేషన్‌ ఆఫ్‌ ఢిల్లీ ఎన్నికల ప్రచారం నుంచి షీలా దీక్షిత్‌ పూర్తిగా పక్కకు తప్పుకొని కాంగ్రెస్‌కు భారంగా మారారు. నేను సైనికుల అభీష్టాలకు అనుగుణంగా పనిచేస్తున్న బీజేపీలో చేరాలని నేను నిర్ణయించుకున్నాను. ఢిల్లీ కాంగ్రెస్‌ అధ్యక్షుడు అజయ్‌ మాకెన్‌ ఆయన సుభిక్షంగా ఉండేందుకు ప్రాముఖ్యతనిస్తారు. కష్టపడేందుకు అస్సలు ఇష్టపడరు. ఢిల్లీ బీజేపీ అధ్యక్షుడు మనోజ్‌ తివారీ మురిగి వాడల్లో రాత్రంతా గడుపుతున్నారు. వారి సమస్యలు తెలుసుకునే ప్రయత్నం చేస్తున్నారు. కానీ మాకెన్‌ మాత్రం లోది గార్గెన్‌లో ప్రచారం చేసి వెంటనే ఇంటికి వెళ్లిపోతున్నారు. అసలు ఆయన ఏం చేస్తున్నారో ఒకసారి ఆలోచించుకుంటే మంచింది. బీజేపీ దేశానికి దిశానిర్దేశం చేస్తోంది. నరేంద్రమోదీ, అమిత్‌ షా నాయకత్వంలో రాజకీయాలకు కొత్త నిర్వచనం చెబుతోంది’ అని ఆయన అన్నారు.


 ఢిల్లీ: ఐదు రాష్ట్రాల అసెంబ్లీ ఎన్నికల ఫలితాలలో బీజేపీ దూసుకుపోయింది. ఉత్తరప్రదేశ్, ఉత్తరాఖండ్ రాష్ట్రాల్లో భారీ మెజార్టీతో విజయం సాధించగా, పంజాబ్‌లో కాంగ్రెస్ పార్టీ గెలుపొందింది. గోవా, మణిపూర్ లలో కాంగ్రెస్, బీజేపీలకు స్పష్టమైన మెజార్టీ రాలేదు. అయితే ఉత్తరప్రదేశ్‌లో బీజేపీ 300కు పైగా స్థానాల్లో విజయం సాధించడంతో కాంగ్రెస్, సమాజ్ వాదీ పార్టీ కూటమికి అనూహ్య ఫలితాలు ఎదురయ్యాయి. యూపీలో దారుణ వైఫల్యంపై ఢిల్లీ మాజీ సీఎం షీలాదిక్షిత్ కుమారుడు సందీప్ దీక్షిత్ తీవ్ర స్థాయిలో స్పందించారు. కాంగ్రెస్ ఓటమికి రాహుల్ గాంధీ సహా పార్టీ నేతలంగా బాధ్యత వహించాలన్నారు. యూపీలో షీలాదీక్షిత్‌ను అవమానించారని, కాంగ్రెస్ పార్టీ సీనియర్ల వల్లే యూపీలో పార్టీ దారుణ ఓటమి చవిచూసిందని సందీప్ దీక్షిత్ ఆరోపించారు.
 
 యూపీ అసెంబ్లీ ఎన్నికల్లో కాంగ్రెస్ పార్టీ నుంచి సీఎం అభ్యర్థిగా మొదటగా షీలాదీక్షిత్ పేరును తెరపైకి తీసుకొచ్చారు. ఆ తర్వాత సమాద్ వాదీ పార్టీతో కాంగ్రెస్ జతకట్టడంతో వారి అంచనాలు తారుమారయ్యాయి. యూపీ అసెంబ్లీలో మొత్తం 403 స్థానాలకు గానూ బీజేపీ 322 సీట్లు, ఎస్పీ కూటమి 53 స్థానాలు, బీఎస్పీ 19, ఇతరులు ఐదు స్థానాల్లో విజయం సాధించాయి. మరో నాలుగు స్థానాల ఫలితాలు ఇంకా వెల్లడికాలేదు. ఓటమి అనంతరం అఖిలేశ్ యాదవ్ మీడియాతో మాట్లాడారు.. 'ప్రజల తీర్పును అంగీకరిస్తున్నాను. విజయం సాధించినందుకు మోదీకి అభినందనలు. కాంగ్రెస్‌తో పొత్తు కొనసాగుతుంది. కొత్త ప్రభుత్వం రుణమాఫీ చేస్తుందని ఆశిస్తున్నానని' అఖిలేశ్ అన్నారు.


 న్యూఢిల్లీ: ఏఐసీసీ ఉపాధ్యక్షుడు రాహుల్ గాంధీపై ఢిల్లీ మాజీ ముఖ్యమంత్రి షీలా దీక్షిత్ చేసిన వ్యాఖ్యలు ఆ పార్టీ నేతలను ఇరకాటంలో పడేశాయి. షీలా దీక్షిత్ ఓ ఇంటర్వ్యూలో మాట్లాడుతూ.. రాహుల్ ఇంకా పరిణతి చెందలేదని, మరికొంత సమయం పడుతుందని వ్యాఖ్యానించారు.
 
 ఉత్తరప్రదేశ్‌ అసెంబ్లీ ఎన్నికల్లో కాంగ్రెస్-సమాజ్‌వాదీ పార్టీ కూటమి.. బీజేపీతో హోరాహోరీగా పోరాడుతుండటం, రాహుల్-యూపీ ముఖ్యమంత్రి అఖిలేష్ కలసి ఎన్నికల ర్యాలీలలో పాల్గొంటున్న సమయంలో షీలా ఇలా మాట్లాడటం ప్రత్యర్థులకు అవకాశం ఇచ్చినట్టయ్యింది. బీజేపీ నాయకులు ఏ చిన్న అవకాశం వచ్చినా వదులుకోకుండా రాహుల్‌ను విమర్శిస్తుంటారు. బీజేపీ జాతీయ అధ్యక్షుడు అమిత్‌ షా ఈ వ్యాఖ్యలను ఓ ర్యాలీలో ప్రస్తావించారు. షీలా దీక్షిత్ తన వ్యాఖ్యలపై వివరణ ఇవ్వడంతో పాటు కాంగ్రెస్ నాయకులు నష్టనివారణ చర్యలు చేపట్టారు. రాహుల్ నాయకత్వంపై కాంగ్రెస్‌ పార్టీలోనే సందేహాలు వ్యక్తమవుతున్నాయి. పార్టీని వీడిన రీటా బహుగుణతో పాటు జయంతి నటరాజన్ తదితర సీనియర్ నేతలు రాహుల్‌పై నేరుగా విమర్శలు చేస్తున్నారు.


 న్యూఢిల్లీ: మిగతా పార్టీకంటే ముందుగా, ఆరు నెలల కిందటే కాంగ్రెస్‌ పార్టీ ఉత్తరప్రదేశ్‌లో తన ముఖ్యమంత్రి అభ్యర్థిని ప్రకటించింది. సార్వత్రిక ఎన్నికల్లో నరేంద్ర మోదీ ఘనవిజయానికి ప్రధాన కారకుడైన ‘వ్యూహకర్త’ ప్రశాంత్‌ కిషోర్‌ సూచన మేరకు ఢిల్లీ మాజీ సీఎం షీలా దీక్షిత్‌ను యూపీ సీఎం అభ్యర్తిగా నిలబెట్టారు. ఆమె ముఖచిత్రంతో రూపొందించిన భారీగా పోస్టర్లతో కొన్నాళ్లు ప్రచారం కూడా నిర్వహించారు. తీరా ఎన్నికలు సమీపించేనాటికి ఆమె పత్తాలేకుండాపోయారు. అటు ప్రశాంత్‌ కిషోర్‌కూడా ఉత్తరప్రదేశ్‌ నుంచి ఉత్తరాఖండ్‌కు వెళ్లిపోయారు. కొన్ని గంటల కిందటే సీఎం అభ్యర్థిత్వాన్ని అధికారికంగా వదులుకున్న షీలా కాసేపు మీడియాతో మాట్లాడారు..
 
 ‘కాంగ్రెస్‌-సమాజ్‌వాదీ పార్టీల ఎన్నికల పొత్తుపై ప్రాథమిక చర్చలు జరుగుతున్నప్పుడే నేనొక మాట చెప్పా.. ఒక్క రాష్ట్రానికి ఇద్దరు ముఖ్యమంత్రులు ఉండరని! ఇప్పుడు పొత్తు ఖరారైంది. కాబట్టి నేను బరిలో ఉండను. యువతరానికి బాధ్యతలు అప్పగించేందుకే నేను సీఎం అభ్యర్థిత్వాన్ని వదులుకున్నా. దేశానికి రాహుల్‌, అఖిలేశ్‌ లాంటి యువ నాయకుల అవసరం చాలాఉంది. పార్టీ నిర్ణయంమే నాకు శిరోధార్యం. మనం నిర్ణయాలు తీసుకుంటాం, అవి నచ్చితే ప్రజలు మనల్ని ఆదరిస్తారు, లేదంటే తిరస్కరిస్తారని మా యువనేత రాహుల్‌ గాంధీ నాతో అన్నారు. ఆయన అభిప్రాయంతో నేను ఏకీభవిస్తున్నా. సీఎం అభ్యర్థిగా నేను తప్పుకోవడం సరైందా? కదా? అన్నది ప్రజలే నిర్ణయిస్తారు’ అని వివరించారు షీలా దీక్షిత్‌.
 
 ఇక అఖిలేశ్‌- ములాయం- శివపాల్‌ యాదవ్‌ల కలహాల గురించి స్పందిస్తూ.. అవి సమాజ్‌వాదీ పార్టీ అంతర్గత వ్యవహారాలని, వాటిపై తాను వ్యాఖ్యానించబోనని షీలా దీక్షిత్‌ అన్నారు. ప్రశాంత్‌ కిషోర్‌లాగే ప్రస్తుతం ఉత్తరప్రదేశ్‌ వ్యవహారాలకు దూరంగా ఉంటోన్న ఆమె ఎన్నికల ప్రచారంలో పాల్గొంటారా? అన్న ప్రశ్నకుమాత్రం సూటిగా బదులు చెప్పలేదు. పార్టీ ఆదేశిస్తే ప్రచారంలో పాల్గొంటానని క్లుప్తంగా అన్నారు. 403 అసెంబ్లీ స్థానాలున్న ఉత్తరప్రదేశ్‌లో పొత్తులో భాగంగా సమాజ్‌వాదీ పార్టీ 298స్థానాల్లోనూ, కాంగ్రెస్‌ 105 స్థానాల్లోనూ పోటీచేస్తున్నాయి. ఫిబ్రవరి 11 నుంచి మార్చి 4వరకు యూపీలో ఏడు విడతల్లో ఎన్నికలు జరగనున్నాయి.


 
 లక్నో: సీఎం అఖిలేశ్‌ యాదవ్‌ నేతృత్వంలోని సమాజ్‌వాదీ పార్టీతో పొత్తుకు కాంగ్రెస్‌ పార్టీ సిద్ధమని ఆ పార్టీ సీఎం అభ్యర్థి షీలా దీక్షిత్‌ స్పష్టం చేశారు. ఐదు రాష్ట్రాల అసెంబ్లీ ఎన్నికలకు నగరా మోగిన నేపథ్యంలో ఆమె మీడియాతో మాట్లాడారు. కాంగ్రెస్‌-ఎస్పీల మధ్య ఎన్నికల పొత్తు కుదిరితే.. పార్టీ సీఎం అభ్యర్థిగా తాను తప్పుకొనేందుకు సిద్ధమని అన్నారు. హిందుత్వ భారతీయ జనతా పార్టీ (బీజేపీ)ని ఎదుర్కొనేందుకు లౌకికవాద భావసారూప్యమున్న పార్టీలు ఏకం కావాల్సిన అవసరముందని ఆమె అభిప్రాయపడ్డారు.
 
 ఉత్తరప్రదేశ్‌ ఎన్నికల్లో కాంగ్రెస్‌- ఎస్పీ మధ్య పొత్తు కుదుర్చుకునేందుకు ఇప్పటికే తెరవెనుక మంతనాలు కొనసాగుతున్నట్టు సమాచారం. అయితే, అధికార సమాజ్‌వాదీ పార్టీలో కుటుంబ అంతర్గత కుమ్ములాటలు తారాస్థాయికి చేరడంతో ఈ పొత్తు చర్చలు ఒక కొలిక్కి రాలేదని సమాచారం. ఉత్తరప్రదేశ్‌లో పెద్దగా రాజకీయ అవకాశాలు లేని కాంగ్రెస్‌ పార్టీ ఎస్పీతో పొత్తు కోసం ఆసక్తిగా ఎదురుచూస్తోంది. ఈ పొత్తు ద్వారా కనీసం వంద సీట్లైనా అడుగాలని ఆ పార్టీ కోరుకుంటోంది.


 స్వతంత్ర విచారణకు ఎందుకు సిద్దపడటం లేదు?
 
 'సహరా-బిర్లా' ముడుపుల విషయంలో కాంగ్రెస్ సీనియర్ నాయకురాలు షీలా దీక్షిత్ తాజాగా రూటు మార్చారు. ఇంతకుముందు ఈ పత్రాల ప్రామాణికతను ప్రశ్నించిన ఆమె.. తాజాగా ఈ విషయంలో ప్రధాని నరేంద్రమోదీపై విమర్శనాస్త్రాలు సంధించారు. ఈ ముడుపుల కేసులో స్వతంత్ర విచారణకు మోదీ ఎందుకు సిగ్గుపడుతున్నారని ఆమె ప్రశ్నించారు.
 
 నిజానికి 'సహరా డైరీల్లో' షీలా దీక్షిత్ పేరు కూడా ఉంది. దీనిపై విలేకరులు ప్రశ్నించడంతో ఈ పత్రాల ప్రామాణికతను ఆమె కొట్టిపారేశారు. మరోవైపు ఈ పత్రాల ఆధారంగానే కాంగ్రెస్ ఉపాధ్యక్షుడు రాహుల్ గాంధీ ప్రధాని మోదీపై వ్యక్తిగత అవినీతి ఆరోపణలు చేశారు. మోదీ గుజరాత్ సీఎంగా ఉన్నప్పుడు సహరా, బిర్లా కంపెనీల నుంచి ముడుపులు తీసుకున్నారని ఆరోపించారు. ఈ నేపథ్యంలో షీలా దీక్షిత్ వ్యాఖ్యలు కాంగ్రెస్ అధినాయకత్వాన్ని ఇరకాటంలో పడేశాయి. యూపీ సీఎం అభ్యర్థిగా షీలాను కాంగ్రెస్ పార్టీ తొలగించే అవకాశముందని, ఆమె యూపీలో పార్టీ ప్రచారానికి దూరంగా ఉంటారని కథనాలు వచ్చాయి. అయితే, ఈ కథనాలను కొట్టిపారేసిన షీలా.. తాజాగా సహరా, బిర్లా ముడుపుల వ్యవహారంలో ప్రధాని మోదీ స్వతంత్ర విచారణకు ఎందుకు సిద్ధపడటం లేదని ప్రశ్నించారు.


 సహారా డైరీల అంశంపై తమ సొంత పార్టీ చేసిన ట్వీట్లతో ఢిల్లీ మాజీ ముఖ్యమంత్రి షీలా దీక్షిత్ ఇరుకున పడ్డారు. ఎవరెవరికి ఎంతెంత చెల్లింపులు ఉన్నాయోనన్న మొత్తం జాబితా పార్టీ ట్విట్టర్‌లో ప్రత్యక్షమైంది. దీనిపై ఇప్పుడు మాట్లాడేందుకు తాను సిద్ధంగా లేనని షీలా అన్నారు. అసలు డబ్బులు తీసుకున్నట్లే తనకు గుర్తులేదని కూడా ఆమె చెప్పారు. కాంగ్రెస్ పార్టీ ట్వీట్‌కు వ్యతిరేకంగా తాను ఏమీ మాట్లాడేది లేదని, తన పేరును ఇందులోకి లాగొద్దని అన్నారు. అసలు ఈ వ్యవహారం గురించి తనకు ఏమీ గుర్తుకు రావడం లేదని కూడా షీలా దీక్షిత్ తెలిపారు. ''నాకు దీంతో సంబంధం లేదు. ఏ డైరీ, ఎవరి డైరీ? అందులో ఎవరు ఏం రాశారో నాకు తెలీదు'' అని వ్యాఖ్యానించారు. ''ఎవరిపేర్లు రాశారో నాకేం తెలుసు? అసలు దీని గురించి చెప్పడానికి నా దగ్గర ఏమీ లేదు. నా పేరును ఇందులోకి లాగొద్దు. నేను కెమెరా ముందు ఏమీ మాట్లాడాలని అనుకోవడం లేదు'' అని ఆమె అన్నారు. 
  
 ప్రధాని నరేంద్రమోదీ గుజరాత్ ముఖ్యమంత్రిగా ఉన్న సమయంలో ఆయనకు సహారా గ్రూపు రూ. 40 కోట్లు ముట్టజెప్పిందని ఇంతకుముందు కాంగ్రెస్ ఉపాధ్యక్షుడు రాహుల్ గాంధీ ఆరోపించిన విషయం తెలిసిందే. దీనికి సంబంధించిన జాబితాను కాంగ్రెస్ పార్టీ తన ట్విట్టర్‌లో పెట్టింది. అందులో ఢిల్లీ మాజీ ముఖ్యమంత్రి షీలా దీక్షిత్ పేరు కూడా ఉంది. ఆమెకు 2013 సెప్టెంబర్ 23వ తేదీన కోటి రూపాయలు చెల్లించినట్లు అందులో ఉంది. ప్రధానమంత్రిని ఇరుకున పెట్టబోయి తమ సొంత పార్టీ సభ్యులనే కాంగ్రెస్ పార్టీ తప్పుబట్టడంతో ఈ వ్యవహారం ఆసక్తికరంగా మారింది. 
 
 చదవండి: (సహార పత్రాల్లో మోదీతోపాటు వీరి పేర్లు కూడా...)


 న్యూఢిల్లీ: ప్రధాన మంత్రి నరేంద్ర మోదీ సహార గ్రూప్‌ నుంచి ముడుపులు తీసుకున్నారంటూ రాహుల్‌ గాంధీ చేసిన ఆరోపణలపై ఇరువురి మధ్య వ్యాగ్యుద్ధం చెలరేగుతున్నప్పటికీ ఎవరు కూడా వాస్తవాలను ప్రస్తావించడం లేదు. సహార గ్రూపు పత్రాలను తవ్వి మోదీ పేరును వెలికితీసిన రాహుల్‌ గాంధీ మోదీతోపాటు ఆ పత్రాల్లో ఉన్న ఇతర పేర్లను ఎందుకు ప్రస్తావించడం లేదు? రాహుల్‌ గాంధీ మాట్లాడకపోతేనే భూకంపం వచ్చేదంటూ వ్యంగ్యోక్తులు విసిరిన మోదీ తనపై నేరుగా చేసిన ఆరోపణలను నేరుగా ఎందుకు ఖండించడం లేదు?
 
 ఎవరెవరి పేర్లున్నాయంటే....
 సహార గ్రూప్‌పై ఆదాయం పన్ను శాఖ అధికారులు దాడులు జరిపి స్వాధీనం చేసుకున్న పత్రాల్లో ఏ రాజకీయ పార్టీకీ, ఏ సీఎంకు ఏ రోజున ఎన్ని ముడుపులు ఇచ్చారన్న వివరాలు మొత్తం 11 పేజీల్లో ఉన్నాయి. ‘సీఎం చత్తీస్‌గఢ్‌’కు 2013, అక్టోబర్‌ 1వ తేదీన నాలుగు కోట్ల రూపాయలు ఇచ్చామని సహార పత్రాల్లో ఎంట్రీ ఉంది. సీఎం అనే అక్షరాలు ముఖ్యమంత్రిని ఉద్దేశించి చేసినవే అయితే  అప్పుడు చత్తీస్‌గఢ్‌ సీఎంగా రమణ్‌ సింగ్‌ పదవిలో ఉన్నారు. ‘సీఎం ఢిల్లీ’కి 2013, సెప్టెంబర్‌ 23వ తేదీన కోటి రూపాయలు ఇచ్చినట్లు ఎంట్రీ ఉంది. అప్పుడు ఢిల్లీ ముఖ్యమంత్రిగా షీలాదీక్షిత్‌ ఉన్నారు. ‘సీఎం ఎంపీ’ కి సెప్టెంబర్‌ 29 నుంచి అక్టోబర్‌ 1వ తేదీ మధ్యన పది కోట్ల రూపాయలను చెల్లించామని పత్రాల్లో ఎంట్రీ ఉంది. అది మధ్యప్రదేశ్‌ ముఖ్యమంత్రిని ఉద్దేశించిన చేసిందే అయితే అప్పుడు ఆ రాష్ట్ర ముఖ్యమంత్రిగా శివరాజ్‌ సింగ్‌ చౌవాన్‌ ఉన్నారు. మహారాష్ట్ర బీజేపీ కోశాధికారి షైనా ఎన్‌సీకి 2013, సెప్టెంబర్‌ 10 నుంచి 2014, జనవరి 28 మధ్య ఐదు కోట్ల రూపాయలు ఇచ్చినట్లు ఎంట్రీ ఉంది.
 
 రాజకీయ పార్టీల పేర్లు....
 ముడుపులు ఇచ్చినట్లు పేర్కొన్న సహార పత్రాల్లో భారతీయ జనతా పార్టీ, కాంగ్రెస్, జనతాదళ్‌ (యూ), రాష్ట్రీయ జనతాదళ్, సమాజ్‌వాది పార్టీ, నేషనలిష్ట్‌ కాంగ్రెస్‌ పార్టీ, జార్ఖండ్‌ ముక్తి మోర్చా, జార్ఖండ్‌ వికాస్‌ మోర్చా, తణమూల్‌ కాంగ్రెస్, బిజూ జనతాదళ్, భారతీయ కిసాన్‌ యూనియన్, శివసేన, లోక్‌ జనశక్తి పార్టీ పేర్లు ఉన్నాయి. ఈ పేర్లన్ని 2013 అక్టోబర్‌ నుంచి 2014 ఫిబ్రవరి మధ్యలో సహార గ్రూప్‌ సంస్థలపై ఆదాయం పన్ను శాఖ అధికారులు దాడులు నిర్వహించినప్పుడే బయటపడ్డాయి. అప్పుడు కేంద్రంలో అధికారంలో ఉన్న మన్మోహన్‌ సింగ్‌ ప్రభుత్వం ఉద్దేశపూర్వకంగానే వీటిని వెల్లడించలేదు. ఎందుకంటే, వాటిలో కాంగ్రెస్‌ పార్టీ పేరు, షీలాదీక్షిత్‌ పేర్లు ఉండడమేనని సులభంగానే ఊహించవచ్చు. అందుకని మోదీపై వచ్చిన ఆరోపణలను రాహుల్‌ గాంధీ అప్పుడే ఎందుకు బయటపెట్టలేదని ఢిల్లీ ప్రస్తుత సీఎం అరివింద్‌ కేజ్రివాల్‌ ప్రశ్నిస్తున్నారు.
 
 మోదీపై రాహుల్‌ చేసిన అవినీతి ఆరోపణలను ముందుగా కేజ్రివాల్‌ చేసినవే. ఆయన నెలరోజులగా ఈ ఆరోపణలు చేసినా ఎవరూ పెద్దగా పట్టించుకోలేదు. రాహుల్‌ గాంధీ చేయడంతో ఇప్పుడు ఈ అంశం రాజకీయ దుమారం రేగుతోంది. ఐటీ అధికారుల్లో దొరికిన ఈ సహార పత్రాలు అసలువి కావచ్చు. కాకపోవచ్చు. కేవలం పత్రాల్లో పేర్లున్నంత మాత్రాన అవినీతి చేసినట్లు భావించలేమని సుప్రీం కోర్టే  స్వయంగా భావించడం ఇక్కడ గమనార్హం. ఈ పత్రాలపై వచ్చే జనవరి 11వ తేదీన సుప్రీం కోర్టు తదుపరి విచారణ జరపాల్సి ఉంది. అసలు పత్రాలో, నకిలీ పత్రాలో కోర్టు నిర్ధారించాలి.
 
 రానున్న ఉత్తరప్రదేశ్‌ అసెంబ్లీ ఎన్నికల్లో కాంగ్రెస్‌ సీఎం అభ్యర్థిగా ప్రకటించిన షీలాదీక్షిత్‌ పేరు కూడా పత్రాల్లో ఉన్నప్పటికీ రాహుల్‌ గాంధీ, మోదీ పేరును ఎలా ప్రస్తావించారన్నది ఇక్కడ ఓ ప్రశ్న. కాంగ్రెస్‌ పార్టీకి ముడుపులు ఇవ్వడమంటే షీలాదీక్షిత్‌కు ఇవ్వడమేనని రుజువైతే సమర్థించుకోవచ్చు. వ్యక్తిగతంగా రాహుల్‌కు వచ్చే నష్టం ఏమీలేదని, మోదీ పరువు ముందు షీలాదీక్షిత్‌ పరువు పోయినా ఫర్వాలేదని ఆయన భావించి ఉండవచ్చు. కోర్టు ముందు ఎలాగు కేసు నిలబడదు కనుక నిజాయితీ పరుడిగా ప్రజల్లో మోదీకున్న పేరును దెబ్బ తీయడమే అసలు లక్ష్యం కావచ్చు.


 న్యూఢిల్లీ: తమ పార్టీ ఎన్నికల వ్యూహకర్త ప్రశాంత్‌ కిషోర్... సమాజ్ వాదీ పార్టీ అధినేత ములాయం సింగ్ యాదవ్ తో భేటీ కావడం పట్ల ఉత్తరప్రదేశ్ కాంగ్రెస్ ముఖ్యమంత్రి అభ్యర్థి షీలా దీక్షిత్ ఆశ్చర్యం వ్యక్తం చేశారు. 'ఈ సమావేశం నాకు కొద్దిగా ఆశ్చర్యం కలిగించింది. ఈ భేటీ ద్వారా ప్రశాంత్ కిశోర్ ఏం చేయదలుచుకున్నారో తెలియద'ని షీలా దీక్షిత్ అన్నారు.
 
 నవంబర్ 1న ములాయంతో ప్రశాంత్ కిశోర్ సమావేశమయ్యారు. అమర్ సింగ్ కూడా ఈ భేటీలో పాల్గొన్నారు. ఉత్తరప్రదేశ్ ఎన్నికల్లో మహాకూటమి ఏర్పడే అవకాశాలున్నాయని వార్తలు వస్తున్న నేపథ్యంలో వీరి భేటీ ప్రాధాన్యం సంతరించుకుంది. అయితే మహాకూటమి గురించి కొన్ని పార్టీలు మాట్లాడుతున్నాయని, తామింకా నిర్ణయం తీసుకోలేదని షీలా దీక్షిత్ తెలిపారు.
 
 ప్రశాంత్‌ కిషోర్ పనితీరుపై సంతృప్తిగా ఉన్నారా అని ప్రశ్నించగా... 'ఆయన మా పార్టీకి సలహాదారు, వ్యూహకర్త. ఆయన పనితీరు పట్ల సంతృప్తికరంగా ఉందా, లేదా అనే విషయం సెక్రటరీలకు తెలుసు. నాకు తెలియద'ని ఆమె సమాధానం ఇచ్చారు. ప్రశాంత్‌ కిషోర్ పనితీరుపై కాంగ్రెస్ అసంతృప్తిగా ఉందని ప్రచారం జరుగుతోంది. ఆయన పనితీరుపై కాంగ్రెస్ వర్గాలు రెండు చీలిపోయినట్టు వార్తలు  వస్తున్నాయి. 


 లక్నో: ఉత్తరప్రదేశ్ ఎన్నికల్లో తాము ఒంటరిగానే బరిలోకి దిగుతామని కాంగ్రెస్ పార్టీ నేత, ఆ పార్టీతరుపున ముఖ్యమంత్రి అభ్యర్థి షీలా దీక్షిత్ చెప్పారు. ఏ ఒక్కపార్టీతో పొత్తుపెట్టుకోబోమని అన్నారు. 2017లో జరిగే ఈ ఎన్నికల్లో ఫలితాలు ప్రతి ఒక్కరని అబ్బురపరుస్తాయని, కాంగ్రెస్ పార్టీ ఇక్కడ ప్రభుత్వాన్ని తప్పక ఏర్పాటు చేస్తుందని విశ్వాసం వ్యక్తం చేశారు.
 
 అయితే, మీరు ఎక్కడి నుంచి ఎన్నికల్లో పోటీ చేస్తారని మీడియా ప్రతినిధులు ప్రశ్నించగా దానిపై ఇంకా నిర్ణయం తీసుకోవాల్సి ఉందని షీలా చెప్పారు. ఉత్తరప్రదేశ్ ప్రజలు ఇప్పటికే బీజేపీ, సమాజ్ వాది పార్టీ, బహుజన్ సమాజ్ వాది పార్టీల పాలనను చూశారని ఇప్పుడు వారంతా గొప్ప ఆశతో కాంగ్రెస్ పాలన కోసం ఎదురుచూస్తున్నారని చెప్పారు. అభివృద్ధి నినాదంతో ప్రజల ముందుకెళ్లి వారి మద్దతు పొందుతామని చెప్పారు. ముఖ్యమంత్రి అఖిలేశ్ యాదవ్ పరిపాలనలో రాష్ట్రంలో శాంతిభద్రతలు లోపించాయని, మతం పేరిట దాడులు పెరిగాయని ఆరోపించారు.


 లక్నో: రాజకీయంగా అత్యంత కీలకమైన ఉత్తరప్రదేశ్‌ అసెంబ్లీ ఎన్నికల్లో గట్టిపోటీ ఇచ్చేందుకు కాంగ్రెస్‌ పార్టీ ఇప్పటినుంచే సర్వశక్తులొడ్డుతోంది. అత్యంత ప్రతిష్టాత్మకంగా భావిస్తున్న ఈ ఎన్నికల్లో ప్రచారం కోసం పక్కా వ్యూహంతో ముందుకెళుతోంది. ఎన్నికల వ్యూహకర్త ప్రశాంత్‌ కిషోర్‌ మార్గనిర్దేశంలో ఇప్పటినుంచి క్షేత్రస్థాయిలోకి దిగుతోంది. ఇందులో భాగంగా లక్నో నుంచి కాన్పూర్ వరకు 600 కిలోమీటర్ల బస్సుయాత్రను ప్రారంభించింది. యూపీ కాంగ్రెస్‌ సీఎం అభ్యర్థి, ఢిల్లీ మాజీ సీఎం షీలా దీక్షిత్, రాష్ట్ర పీసీసీ చీఫ్ రాజ్ బబ్బర్ తదితర సీనియర్ నేతలు పాల్గొనే ఈ బస్సుయాత్రను పార్టీ అధ్యక్షురాలు సోనియాగాంధీ, ఉపాధ్యక్షుడు రాహుల్‌గాంధీ శనివారం జెండాలు ఊపి ప్రారంభించారు.
 
 ఇప్పటివరకు నరేంద్రమోదీ, నితీశ్‌కుమార్‌తో జతకట్టి.. వారికి ఎన్నికల విజయాలు అందించిన ప్రశాంత్ కిషోర్.. యూపీ, పంజాబ్ ఎన్నికల కోసం కాంగ్రెస్‌తో చేతలు కలిపిన సంగతి తెలిసిందే. ఆయన తాజాగా యూపీ కోసం కాంగ్రెస్‌ పార్టీ ప్రచార నినాదాన్ని ఖరారు చేశారు.  27 సాల్‌.. యూపీ బెహాల్ (27 ఏళ్లు యూపీని నాశనం చేశారు) అనే నినాదంతో హస్తం ప్రజల్లోకి వెళ్లనుంది. యూపీలో కాంగ్రెస్‌ అధికారం కోల్పోయిన గత 27 ఏళ్లలో రాష్ట్రాన్ని నాశనం చేశారని కాంగ్రెస్ ప్రచారం చేయనుంది.
 
 మోదీ నియోజకవర్గంలో సానియా
 మరోవైపు ప్రధాని నరేంద్రమోదీ నియోజకవర్గం వారణాసిపైనా కాంగ్రెస్‌ పార్టీ ప్రత్యేక దృష్టి పెట్టింది. ఆగస్టు 2న వారణాసిలో సోనియాగాంధీ భారీ రోడ్డుషో చేపట్టే అవకాశముంది. ఇక రాహుల్‌గాంధీ వచ్చేవారం లక్నోలో 50వేల పార్టీ కార్యకర్తలతో సదస్సు నిర్వహించనున్నారు. బీజేపీకి ఉన్న వ్యవస్థీకృత కార్యకర్తల బలం వల్లే ఆ పార్టీ విజయాలు సాధిస్తున్నదని గ్రహించిన కాంగ్రెస్‌ తన కార్యకర్తలను కూడా వ్యవస్థీకరించుకొని..కట్టుదిట్టంగా ఎన్నికలకు వెళ్లాలని భావిస్తున్నది.