చిన్నమ్మకు కేంద్రం నుంచి నిధులు రాబట్టడం చేతకావడం లేదా.. ఎంపీగా తాను ప్రాతినిధ్యం వహిస్తున్న రాజమహేంద్రవరం పార్లమెంటరీ నియోజకవర్గ అభివృద్ధిపై దృష్టి సారించడం లేదా.. బీజేపీ పెద్దల వద్ద ఆమె మాట చెల్లడం లేదా.. టీడీపీ ప్రయోజనాలకే పెద్దపీట వేస్తున్నారనే అనుమానంతో చిన్నమ్మను కేంద్రం దూరం పెట్టిందా.. అంటే అవుననే సమాధానం వస్తోంది రాజకీయ విశ్లేషకుల నుంచి. ఇటీవలి కేంద్ర బడ్జెట్టే దీనికి నిదర్శనంగా నిలుస్తూండగా.. రైల్వే బడ్జెట్‌లో సైతం జిల్లాకు కేటాయింపులు లేకపోవడం పలు విమర్శలకు తావిస్తోంది. సాక్షి, రాజమహేంద్రవరం: బీజేపీ రాష్ట్ర అధ్యక్షురాలిగా ఉన్న దగ్గుబాటి పురందేశ్వరి రాజమహేంద్రవరం ఎంపీగా ప్రాతినిధ్యం వహిస్తున్నారు. సార్వత్రిక ఎన్నికల సమయంలో వలస వచ్చినా ఇక్కడి ప్రజలు ఆమెను ఆదరించారు. 54.82 శాతం ఓట్లు వేసి, 2,39,139 ఓట్ల మెజార్టీతో పట్టం కట్టారు. ఆమె ద్వారా జిల్లాకు మరిన్ని మంచి రోజులు వస్తాయని, తమ గళం ఢిల్లీ వరకూ వినిపిస్తుందని భావించారు. కానీ, ప్రస్తుత పరిస్థితి అందుకు భిన్నంగా కనిపిస్తోంది. తనపై అంత అభిమానం చూపిన జిల్లా ప్రజల అభ్యున్నతి, అభివృద్ధిపై చిన్నమ్మ కనీస శ్రద్ధ కూడా చూపడం లేదన్న విమర్శలు వెల్లువెత్తుతున్నాయి. మొక్కుబడిగా సమావేశాలకు రావడం, వెళ్లడం తప్ప గోదారోళ్ల గుండె ఘోష తెలుసుకునే ప్రయత్నం చేయడం లేదనే ఆరోపణలు వస్తున్నాయి. ఇటీవలి కేంద్ర బడ్జెట్‌లో మోదీ ప్రభుత్వం జిల్లా అభివృద్ధికి తగినన్ని నిధులు కేటాయించకపోవడమే ఇందుకు నిదర్శనమని పలువురు పెదవి విరుస్తున్నారు. స్వయానా తాను ప్రాతినిధ్యం వహిస్తున్న పార్లమెంటరీ నియోజకవర్గ అభివృద్ధికే నిధులు రాబట్టుకోలేని చిన్నమ్మ నిస్సహాయతను చూసి ముక్కున వేలేసుకుంటున్నారు. కనీసం రైల్వే అభివృద్ధికి కూడా పాటు పడిన దాఖలాలు లేకపోవడంతో కొన్నేళ్లుగా పెండింగ్‌లో ఉన్న ప్రాజెక్టులు అలాగే మిగిలిపోయాయి.ప్రత్యామ్నాయ మార్గం ప్రస్తావనేదీ?రాష్ట్రంలో రాజమండ్రి రైల్వే స్టేషన్‌కు అత్యంత ప్రాధాన్యం ఉంది. ప్రతి రోజూ సుమారు 200కు పైగా ప్రయాణికుల, గూడ్సు రైళ్లు ఈ స్టేషన్‌ మీదుగా రాకపోకలు సాగిస్తూంటాయి. మామూలు రోజుల్లో 30 వేల మంది, పండగ సమయాల్లో 40 వేల మందికి పైగా ప్రయాణికులు రైళ్లలో రాకపోకలు సాగిస్తూంటారు. ఆదాయంలోనూ ఈ స్టేషన్‌ మేటిగా నిలుస్తోంది. ఏటా రూ.123 కోట్లకు పైగా ఆదాయంతో ఎన్‌ఎస్‌జీ–2 హోదా సొంతం చేసుకుంటోంది. ఇంతటి ప్రాధాన్యం ఉన్న ఈ రైల్వే స్టేషన్‌ అభివృద్ధికి కేంద్రం బడ్జెట్‌లో నయా పైసా కూడా కేటాయించకపోవడం గమనార్హం. రాజమండ్రి రైల్వే స్టేషన్‌లో ట్రాక్‌లు నిత్యం రైళ్ల రాకపోకలతో రద్దీగా ఉంటాయి. ఈ దృష్ట్యా గోదావరి బ్రిడ్జిల పైన, కొవ్వూరు, ఔటర్‌లోను పలు సందర్భాల్లో రైళ్లను నిలిపివేస్తూ, ప్రయాణికుల సహనాన్ని పరీక్షిస్తున్నారు. ఈ సమస్య పరిష్కారానికి కడియం నుంచి నిడదవోలు వరకూ ప్రత్యామ్నాయ రైల్వే లైన్‌ వేయాలనే ప్రతిపాదన ఉంది. తద్వారా గూడ్స్‌ రైళ్లను అటు మళ్లించడంతో రాజమండ్రి స్టేషన్‌కు ట్రాఫిక్‌ ఒత్తిడి లేకుండా చేయవచ్చని ప్రాథమికంగా అంచనా వేశారు. అయితే, ఈ రైల్వే లైన్‌ నిర్మాణ విషయం బడ్జెట్‌లో ప్రస్తావనకు రాలేదు. నిధుల కేటాయింపుపై ఎలాంటి ప్రకటనా వెలువడలేదు.గత నిధులనే ఇప్పుడిచ్చినట్లు!రాజమండ్రి రైల్వే స్టేషన్‌ అభివృద్ధికి గత వైఎస్సార్‌ సీపీ ప్రభుత్వ హయాంలో సుమారు రూ.271 కోట్లు కేటాయించారు. పనులు టెండర్ల దశలో ఉన్నాయి. ప్రస్తుత రైల్వే బడ్జెట్‌లో మరోసారి కేటాయింపులు ఉంటాయని భావించారు. కానీ, గతంలో మంజూరైన నిధులనే కొత్తగా ఇచ్చినట్లు కలరింగ్‌ ఇచ్చారు. కేంద్రం తెలివితేటలు చూసి, జిల్లా ప్రజలు విస్మయానికి గురవుతున్నారు.ఆర్వోబీల ఏర్పాటుపై నీలినీడలురైల్వే గేట్ల వద్ద ప్రమాదాలు నివారించాలంటే ఆర్వోబీల నిర్మాణం చేపట్టాలని రైల్వే శాఖ భావించింది. దీనికి గాను 2027 నాటికి గేట్లను తొలగించేందుకు ప్రణాళికలు రూపొందించింది. ఇందులో భాగంగా రాజమహేంద్రవరం నగరంలోని అన్నపూర్ణమ్మపేట, కేశవరం, అనపర్తి ఆర్వోబీల ఏర్పాటుకు రైల్వే శాఖ పంపిన ప్రతిపాదనలకు తాజా బడ్జెట్‌లో దిక్కూమొక్కూ లేకుండా పోయింది.కొవ్వూరు – కొత్తగూడెం రైల్వే లైన్‌ ఊసే లేదువిశాఖపట్నం నుంచి హైదరాబాద్‌ మధ్య ప్రయాణ దూరాన్ని సుమారు 130 కిలోమీటర్ల మేర తగ్గించాలనే ఉద్దేశంతో కొవ్వూరు నుంచి భద్రాద్రి జిల్లా కొత్తగూడెం వరకూ కొత్త రైల్వే లైన్‌ నిర్మాణాన్ని చాలా కాలం కిందటే ప్రతిపాదించారు. ఈ ప్రతిపాదన ఇటీవల తిరిగి పట్టాలెక్కినట్టు కనిపించింది. దీని సాధ్యాసాధ్యాలపై అధ్యయనం జరిగింది. ఈ రైల్వే లైను నిర్మాణం అన్నివిధాలుగా ఉపయోగకరమని నివేదికలు సైతం స్పష్టం చేశాయి. దీనికి ప్రస్తుత బడ్జెట్‌లో నిధులు కేటాయిస్తారని భావించినా నిరాశే ఎదురైంది.పుష్కర నిధులపై స్పష్టత ఏదీ?గోదావరి పుష్కరాలకు కేంద్ర ప్రభుత్వం నిధులు మంజూరు చేయాల్సి ఉంది. పుష్కరాల సందర్భంగా చేపట్టాల్సిన అభివృద్ధి పనులకు రూ.1,286 కోట్లు అవసరమని ప్రజాప్రతినిధులు, అధికారులు లెక్కలు వేశారు. ఈ మేరకు కేంద్ర ప్రభుత్వానికి ప్రతిపాదనలు పంపారు. కేంద్ర బడ్జెట్‌లో నిధుల కేటాయింపు జరుగుతుందని భావించారు. కానీ, ఎటువంటి ప్రకటనా లేకపోవడంతో అసలు పుష్కరాలకు కేంద్రం తన వాటా ఇస్తుందా, లేదా.. ఇస్తే ఏ మేరకు అనే ప్రశ్న తలెత్తుతోంది. పుష్కరాల ఏర్పాట్లపై అధికారులతో ఇప్పటికే పలుమార్లు సమీక్ష నిర్వహించిన ఎంపీ పురందేశ్వరి నిధుల మంజూరుపై దృష్టి సారించలేదని ప్రజలు పెదవి విరుస్తున్నారు. అలాగే, రైల్వే సమస్యలపై కూడా ఆమె ఎందుకు శ్రద్ధ చూపలేదని ప్రశ్నిస్తున్నారు.అమృత్‌ స్టేషన్ల అభివృద్ధేదీ?అమృత్‌ భారత్‌ పథకంలో భాగంగా రైల్వే స్టేషన్ల అభివృద్ధికి కట్టుబడి ఉన్నామని ప్రధాని మోదీ ప్రకటించారు. జిల్లావ్యాప్తంగా నిడదవోలు జంక్షన్‌, కొవ్వూరు, రాజమహేంద్రవరం, కడియం, ద్వారపూడి (కోనసీమ జిల్లా), అనపర్తి స్టేషన్ల అభివృద్ధికి ప్రధాని వర్చువల్‌గా శంకుస్థాపనలు చేశారు. ప్రకటనలే తప్ప ఈ పనులు నత్తకు మేనత్తలా మారాయి. ప్రస్తుత బడ్జెట్‌లో వీటికి భారీగా నిధులు కేటాయిస్తారని భావించారు. కానీ, నయాపైసా కూడా ఇవ్వలేదు.

సాక్షి, హైదరాబాద్‌: తెలంగాణలో రైల్వే అభివృద్ధికి కేంద్ర ప్రభుత్వం కృషి చేస్తోందని.. ఈసారి రైల్వేబడ్జెట్‌లో రూ.4,400 కోట్లు కేటాయించామని రైల్వేశాఖ మంత్రి అశ్వనీ వైష్ణవ్‌ తెలిపారు. ప్రపంచ స్థాయి స్టేషన్‌గా సికింద్రాబాద్‌ రైల్వేస్టేషన్‌ను అభివృద్ధి చేస్తున్నామన్నారు. తెలంగాణ, ఏపీలకు రెండు వందే భారత్‌ రైళ్లను అందించామని చెప్పారు. శనివారం సికింద్రాబాద్‌ పరేడ్‌ గ్రౌండ్స్‌లో జరిగిన బహిరంగ సభలో అశ్వనీ వైష్ణవ్‌ మాట్లాడారు. ‘సబ్‌కా సాత్‌.. సబ్‌కా వికాస్, సబ్‌కా విశ్వాస్‌.. సబ్‌కా ప్రయాస్‌’పేరుతో ప్రధాని మోదీ దేశాన్ని అభివృద్ధి చేస్తున్నారని చెప్పారు. రాష్ట్ర ప్రభుత్వం కూడా రైల్వేల అభివృద్ధికి సహకరించాల్సిన అవసరం ఉందని వ్యాఖ్యానించారు. శ్రీవెంకటేశ్వర స్వామి సులభతర దర్శనం కోసమే వందేభారత్‌ రైలును ప్రారంభించినట్లు చెప్పారు.  తెలంగాణను అన్ని రకాలుగా ఆదుకుంటున్నారు: కిషన్‌రెడ్డి  తెలంగాణను అన్ని రంగాల్లో అభివృద్ధి చేయాలన్నదే ప్రధాని మోదీ ఆలోచన అని.. మంచి మౌలిక వసతులు కల్పించేందుకే మోదీ హైదరాబాద్‌కు వచ్చారని కేంద్ర పర్యాటక శాఖ మంత్రి జి. కిషన్‌రెడ్డి పేర్కొన్నారు. కేంద్ర ప్రభుత్వ నిధులతో తెలంగాణతో పాటు దేశవ్యాప్తంగా భారీ ఎత్తున అభివృద్ధి పనులు సాగుతున్నాయని చెప్పారు. తెలంగాణలోని 32 జిల్లాలను జాతీయ రహదారులతో అనుసంధానం చేశామన్నారు. ఇప్పటివరకు దేశంలో 14 వందే భారత్‌ రైళ్లను ప్రారంభించామని, అందులో రెండింటిని తెలంగాణకు ప్రధాని మోదీ బహుమతిగా ఇచ్చారని పేర్కొన్నారు. రూ.714 కోట్లతో సికింద్రాబాద్‌ రైల్వేస్టేషన్‌ను అంతర్జాతీయ స్థాయిలో అభివృద్ధి చేస్తుండటం గర్వకారణమన్నారు. రాష్ట్ర ప్రభుత్వ నిర్లక్ష్యం వల్ల కొంతకాలం ఎంఎంటీఎస్‌ సెకండ్‌ ఫేజ్‌ ఆగిపోయిందని.. బీజేపీ ఎంపీలు వెళ్లి ప్రధానికి విజ్ఞప్తి చేయగా.. కేంద్రం చొరవ తీసుకుని మేడ్చల్‌ వరకు ఎంఎంటీఎస్‌ను, 13 కొత్త ఎంఎంటీఎస్‌ రైళ్లను ప్రారంభిస్తోందని చెప్పారు. తెలంగాణను అన్నిరకాలుగా ఆదుకుంటున్న ప్రధాని మోదీని రాష్ట్ర ప్రజలందరూ ఆశీర్వదించాలని కోరారు.  

సాక్షి, హైదరాబాద్‌: కేంద్ర బడ్జెట్‌లోని రైల్వే పద్దులో మోదీ ప్రభుత్వం ఈసారి తెలంగాణకు కొత్తగా ఎలాంటి ప్రాజెక్టులు ప్రకటించలేదు. కనీసం కొత్త లైన్లు, సర్వేలను సైతం ప్రస్తావించలేదు. కేవలం పాత ప్రాజెక్టులకు నిధులు కేటాయింపులతోనే సరిపెట్టింది. అయితే ప్రస్తుతం రాష్ట్రంలో కొనసాగుతున్న ప్రాజెక్టులకు గత బడ్జెట్‌తో పోలిస్తే కేటాయింపులు మెరుగ్గా ఉండటం ఊరటనిచ్చే అంశం. ఈసారి దక్షిణ మధ్య రైల్వేకు రూ.13,786.19 కోట్లను కేంద్రం కేటాయించింది. ఇది గతేడాది కేటాయించిన రూ. 8,349.75లతో పోలిస్తే 60 శాతం ఎక్కువ. ఇందులో తెలంగాణ పరిధిలోని ప్రాజెక్టులు, ఇతర పనులకు రూ. 4,418 కోట్లు లభించాయి. ఈ మొత్తం గతేడాది కేటాయింపు (రూ. 3,048 కోట్లు)ల కంటే 45 శాతం ఎక్కువ కావడం విశేషం. దక్షిణమధ్య రైల్వే పరిధిలోకే వచ్చే ఏపీలో జరుగుతున్న ప్రాజెక్టులకు కేంద్రం రూ. 8,406 కోట్లు కేటాయించింది. ఇది గతేడాది కేటాయింపు (రూ. 7,032)ల కంటే 20 శాతం ఎక్కువ.   గతం కన్నా రూ. 5,437 కోట్లు ఎక్కువ..  ఈసారి దక్షిణమధ్య రైల్వే జోన్‌కు గత బడ్జెట్‌ కంటే ఏకంగా రూ. 5,437 కోట్లు ఎక్కువగా కేటాయించారు. తెలుగు రాష్ట్రాలతోపాటు జోన్‌ పరిధిలోకి వచ్చే కర్ణాటక, మహారాష్ట్రలో రైల్వే లైన్ల ఏర్పాటుకు కూడా ఈ కేటాయింపులు ఊతమిస్తాయి. సికింద్రాబాద్‌ స్టేషన్‌ అభివృద్ధి పనులతోపాటు జోన్‌ పరిధిలో మరో 105 స్టేషన్లను అభివృద్ధి చేయబోతున్నాం. నగరానికి అత్యంత కీలకమైన ఎంఎంటీఎస్‌ రెండో దశ పనులు పూర్తి చేసేలా ఏకంగా రూ. 600 కోట్లు కేటాయింపు ఆ ప్రాజెక్టుకు పెద్ద మలుపు కానుంది.      – అరుణ్‌కుమార్‌జైన్, జీఎం దక్షిణ మధ్య రైల్వే  

సాక్షి, అమరావతి: ఈ ఏడాది రైల్వే బడ్జెట్‌లోనూ విశాఖపట్నం రైల్వే జోన్‌ కూత వినిపించలేదు. కేంద్ర ఆర్థిక మంత్రి నిర్మలా సీతారామన్‌ లోక్‌సభలో బుధవారం 2023–24 వార్షిక బడ్జెట్‌లో అంతర్భాగంగా ప్రవేశపెట్టిన రైల్వే బడ్జెట్‌ రాష్ట్రానికి తీవ్ర నిరాశ కలిగించింది. రాష్ట్ర ప్రజల దీర్ఘకాలిక డిమాండ్‌ అయిన విశాఖపట్నం కేంద్రంగా దక్షిణ కోస్తా రైల్వే జోన్‌ను ఆచరణలోకి తీసుకువచ్చే అంశంపై కేంద్రం మౌనం దాల్చింది. రాష్ట్ర విభజన చట్టంలో స్పష్టంగా ఇచ్చిన హామీకి కట్టుబడి రైల్వే జోన్‌ను ఆచరణలోకి తేవాలని రాష్ట్ర ప్రభుత్వం, వైఎస్సార్‌సీపీ ఎంపీలు కేంద్ర ప్రభుత్వాన్ని కోరారు. రైల్వే ప్రాజెక్టుల్లో రాష్ట్రానికి జరుగుతున్న అన్యాయాన్ని ప్రస్తావించారు. రైల్వే ప్రాజెక్టుల్లో  రాష్ట్రానికి తగిన ప్రాధాన్యం కల్పించాలని నివేదించారు. రాష్ట్ర ప్రభుత్వం ప్రత్యేకంగా కీలక ప్రతిపాదనలతో కూడిన నివేదికను కేంద్రానికి సమర్పించింది. అయినప్పటికీ కేంద్ర వైఖరిలో ఏమాత్రం మార్పు రాలేదు. బడ్జెట్‌లో రైల్వేశాఖకు కేటాయింపులపై పూర్తి వివరాలతో బ్లూ బుక్‌ వస్తే గానీ రాష్ట్రంలో ఇతర రైల్వే ప్రాజెక్టులపై కేంద్రం విధానమేమిటన్నది స్పష్టం కాదు. ‘బ్లూ బుక్‌’ వస్తేనే.. కేంద్ర బడ్జెట్‌లో రైల్వే శాఖకు కేటాయింపులపై సమగ్ర వివరాలతో ‘బ్లూ బుక్‌’ శుక్రవారం విజయవాడలోని రైల్వే డీఆర్‌ఎం కార్యాలయానికి చేరుతుంది. అది వస్తేగానీ రాష్ట్రంలో రైల్వే ప్రాజెక్టులపై కేంద్రం కేటాయింపులు ఏమిటన్నది తెలియదు. రాష్ట్రంలో రైల్వే ప్రాజెక్టులకు నిధుల కేటాయింపులు, కొత్త లైన్ల కోసం సర్వేలు, కొత్త ఆర్వోబీల నిర్మాణం, ప్రత్యేక ఫ్రైట్‌ కారిడార్‌ ఏర్పాటు, కొత్త రైళ్ల కేటాయింపులు మొదలైన అంశాలపై అప్పుడే స్పష్టత వస్తుంది.  స్పష్టత ఇవ్వని కేంద్రం.. రైల్వే జోన్‌ ఏర్పాటు ప్రక్రియను కొన్ని నెలల క్రితమే సూత్రప్రాయంగా ప్రారంభించినప్పటికీ.. జోన్‌ వాస్తవంగా ఆచరణలోకి ఎప్పుడు వస్తుందన్న దానిపై ఈసారి కేంద్ర బడ్జెట్‌లో అయినా స్పష్టత వస్తుందని అంతా ఆశించారు. కానీ ఎలాంటి స్పష్టతను కేంద్రం ఇవ్వలేదు. ఇప్పటికే విశాఖ కేంద్రంగా ‘దక్షిణ కోస్తా రైల్వే జోన్‌’ ఏర్పాటు కోసం సమగ్ర ప్రాజెక్టు నివేదిక(డీపీఆర్‌)ను రైల్వే శాఖ రూపొందించింది. భవనాలు, ఇతర అవసరాలకోసం విశాఖలో దాదాపు 950 ఎకరాలు అందుబాటులో ఉందని పేర్కొంది. రాష్ట్ర ప్రభుత్వ ఒత్తిడితో విశాఖపట్నంలో రైల్వే జోన్‌ కార్యాలయాల నిర్మాణానికి ఇటీవల రూ.170 కోట్లు కేటాయించింది కూడా. కానీ రైల్వే జోన్‌ ఆచరణలోకి రావాలంటే సాంకేతికంగా కీలక అంశాలపై కేంద్రం మౌనం వహిస్తోంది. భువనేశ్వర్‌ కేంద్రంగా ఉన్న తూర్పు కోస్తా రైల్వే జోన్, సికింద్రాబాద్‌ కేంద్రంగా ఉన్న దక్షిణ మధ్య రైల్వే జోన్‌లతో ఏపీ పరిధిలో ఆస్తుల పంపకం, కొత్త డివిజన్ల ఏర్పాటు, ఉద్యోగుల కేటాయింపు, కొత్త కార్యాలయాల ఏర్పాటు తదితర అంశాలను ఓ కొలిక్కి తీసుకువచ్చి దక్షిణ కోస్తా రైల్వే జోన్‌ను ఆచరణలోకి తీసుకురావాలి. కానీ.. కేంద్ర ప్రభుత్వం బడ్జెట్‌లో ఈ విషయాలేవీ కనీసం ప్రస్తావించలేదు.  ఒడిశాలో రాజకీయ ప్రయోజనాల కోసమేనా! ఒడిశాలో బీజేపీ రాజకీయ ప్రయోజనాల కోసమే ఏపీ విషయంలో కేంద్రం నిర్లక్ష్యంగా వ్యవహరిస్తోందని పరిశీలకులు విమర్శిస్తున్నారు. ప్రధానంగా విశాఖ కేంద్రంగా వాల్తేర్‌ రైల్వే డివిజన్‌ను కొనసాగించాలని రాష్ట్ర ప్రభుత్వం, ప్రజలు డిమాండ్‌ చేస్తుండగా.. వాల్తేర్‌ రైల్వే డివిజన్‌ను రద్దు చేసి.. విశాఖపట్నం, విజయవాడ, గుంటూ­రు, గుంతకల్‌ రైల్వే డివిజన్లతోనే కొత్త జోన్‌ ఏర్పాటుపై డీపీఆర్‌లో ప్రస్తావించా­రు. దీనిపై విశాఖపట్నంతోపాటు యా­వత్‌ రాష్ట్రంలో తీవ్ర విమర్శలు వ్యక్తమయ్యా­యి. విజయవాడ నుంచి విశాఖపట్నం 350 కి.మీ. దూరంలో ఉండగా.. రాష్ట్ర సరిహద్దులో ఉన్న ఇచ్చాపురం 580 కి.మీ. దూరంలో ఉంది. అంతవరకు విజయవాడ రైల్వే డివిజన్‌గా ఏర్పాటు చేస్తే పరిపాలన నిర్వహణ సమస్యలు ఏర్పడతాయి. అందుకే వాల్తేర్‌ రైల్వే డివిజన్‌ను కొనసాగిస్తూనే విశాఖపట్నం కేంద్రంగా రైల్వే జోన్‌ కావాలని రాష్ట్ర ప్రభుత్వం, ప్రజలు డిమాండ్‌ చేస్తున్నారు. కానీ ప్రస్తు­తం తూర్పు కోస్తా జోన్‌లో అత్యధిక రా­బడి ఉన్న వాల్తేర్‌ డివిజన్‌ను ఏకంగా రద్దు చేయాలని కేంద్రం భావిస్తోంది. తద్వారా భువనేశ్వర్‌ కేంద్రంగా ఉన్న తూర్పు కోస్తా రైల్వే జోన్‌ ఆర్థిక ప్రయోజనాలకు పెద్దపీట వేస్తోంది. ఒడిశాలో బీజేపీకి రాజకీయంగా ప్రయోజనం కలిగించేందుకే ఇలా వ్యవహరిస్తోంది. కేంద్ర రైల్వే శాఖ మంత్రి అశ్విని వైష్ణవ్‌ ఒడిశా క్యాడర్‌కు చెందిన మాజీ ఐఏఎస్‌ అధికారి కావడం గమనార్హం. ఆయన కూడా ఒడిశాకు అనుకూలంగా వ్యవహరిస్తూ విశాఖపట్నం రైల్వే జోన్‌ అంశాన్ని నిర్లక్ష్యం చేస్తున్నారని పరిశీలకులు విమర్శిస్తున్నారు.  

రాజంపేట: పార్లమెంట్‌లో నేడు కేంద్ర ఆర్థిక మంత్రి నిర్మలా సీతారామన్‌ బడ్జెట్‌ను  ప్రవేశపెట్టనున్నారు. ఏటా ప్రవేశపెడుతున్న బడ్జెట్‌లో ఉమ్మడి వైఎస్సార్‌ జిల్లా పరిధిలో రైల్వేలకు అనుకున్న స్థాయిలో నిధులు కేటాయించడం లేదు. గత బడ్జెట్‌లో కేవలం పాత ప్రాజెక్టులకే నిధులు కేటాయించి చేతులు దులుపుకున్నారు. దక్షిణ మధ్య రైల్వేలో ఆదాయపరంగా ముందంజలో ఉన్నా రైళ్ల కేటాయింపులోగానీ, పొడిగింపుల్లో కానీ తగిన ప్రాధాన్యత ఇవ్వడం లేదని ఈ ప్రాంత వాసులు ఆవేదన వ్యక్తం చేస్తున్నారు.   నత్తనడకన సాగుతున్న ప్రాజెక్టులు కడప–బెంగళూరుల మధ్య కొత్త ప్రాజెక్టుకు 2008–09లో ప్రణాళికలు తయారు చేసి రూ.2706 కోట్లు కేటాయిస్తూ పనులు ప్రారంభించారు. మొత్తం 255 కి.మీల పొడవు కల్గిన ఈ మార్గంలో ఇప్పటివరకు కేవలం 21 కి.మీలు కడప–పెండ్లిమర్రి మార్గం మాత్రమే పూర్తయింది. గత బడ్టెట్‌లో రూ.289 కోట్లు కేటాయించారు. దివంగత నేత డాక్టర్‌ వైఎస్‌ రాజశేఖరరెడ్డి పట్టుబట్టి దక్కించుకున్న ఈ ప్రాజెక్టు పూర్తయితే కడప, అనంతపురం జిల్లా వాసులకు బెంగళూరు నగరం మరింత దగ్గరవుతుంది.  కలగానే బాలాజీ డివిజన్‌ ప్రతిపాదన  డివిజన్‌ కేంద్రంగా తిరుపతిని చేస్తే కాట్పాడి నుంచి గుంతకల్, నెల్లూరులో గూడూరు , వైఎస్సార్, అన్నమయ్య జిల్లా పరిధిలో 700 కిలోమీటర్ల దూరం వస్తుంది. 400 కిలోమీటర్ల పరిధి ఉంటే డివిజన్‌గా ప్రకటించవచ్చని రైల్వే నిపుణులు అంటున్నారు. బాలాజీ డివిజన్‌ ఏర్పాటైతే  అనుకూలంగా ఉంటుందని నివేదికలు ఉన్నాయి. ఇందులో తిరుపతి–గూడూరు (92.96కి.మీ), తిరుపతి–కాట్పాడి (104.39కి.మీ), పాకాల–మదనపల్లె (83కి.మీ), రేణిగుంట–కడప (125 కి.మీ)లైను కలిపే అంశాన్ని గతంలోనే రైల్వే అధికారులు పరిశీలించారు.    బడ్జెట్‌లో ఆమోదం..సర్వేకే పరిమితం  ∙కడప–గుంతకల్లు–బళ్లారి   ∙కంభం–ప్రొద్దుటూరు   ∙భాకరాపేట–గిద్దలూరు   ∙ముద్దనూరు–ముదిగుబ్బ    నందలూరు రైల్వేకు ఏదీ పూర్వవైభవం  నందలూరు రైల్వేకు పూర్వవైభవం కోసం ఐకేపీఎస్‌ ఆధ్వర్యంలో యూపీఏ పాలన హయాంలో  చేపట్టిన ఉద్యమం దేశరాజధాని ఢిల్లీకి చేరుకుంది. అప్పటి రైల్వేమంత్రి లాలూప్రసాద్‌ కూడా రాజ్యసభలో నందలూరులో రైల్వే ప్రత్యామ్నాయ పరిశ్రమ ఏర్పాటు చేస్తామని ప్రకటించారు. ఆ« తర్వాత ఈ ప్రతిపాదనలు అటకెక్కాయి.    మాట తప్పిన బీజేపీ నేతలు  ప్రతిపక్షంలో ఉన్నప్పుడు నందలూరు రైల్వే పూర్వవైభవం కోసం కృషిచేస్తామన్న బీజెపీ అగ్రనేతలు ఆ తర్వాత అధికారంలోకి వచ్చాక ఈ సమస్యను విస్మరించారు. పరిశ్రమ కాదు..ఉన్న రన్నింగ్‌ స్టాఫ్‌ క్రూసెంటర్‌ను, వివిధ రైళ్లకు ఉన్న స్టాపింగ్స్‌ను కూడా ఎత్తివేసే క్రమంలో రైల్వే శాఖ తీసుకున్న నిర్ణయాలు వివాదాస్పదంగా మారుతున్నాయి.   స్టాపింగ్స్‌కు ఎర్నింగ్‌ అడ్డంకి..  పలురైళ్ల స్టాపింగ్స్‌కు ఎర్నింగ్స్‌ను అడ్డంకిగా చూపుతున్నారు. ప్రజాసేవను దూరంపెట్టేసింది. కేవలం లాభార్జన పరంగా ముందుకువెళ్లడంతో పలురైళ్లు జిల్లా వాసులకు దూరమయ్యాయి.  కమలాపురం, రాజంపేట, నందలూరు, రైల్వేకోడూరుతో పాటు కొన్ని నియోజకవర్గ కేంద్రాలలో కూడా కొన్ని రైళ్ల స్టాపింగ్‌కు ఎర్నింగ్‌ అడ్డంకిగా చూపుతున్నారు.   పుణ్యక్షేత్రాల స్టేషన్లపై శీతకన్ను జిల్లాలో ఉన్న పుణ్యక్షేత్రాల రైల్వేస్టేషన్లపై రైల్వేశాఖ శీతకన్ను వేసింది. రాష్ట్ర విభజన తర్వాత పుణ్యక్షేత్రంగా రాష్ట్రస్థాయిలో గుర్తింపు పొందిన ఒంటిమిట్ట రైల్వేస్టేషన్‌లో ఎక్స్‌ప్రెస్‌ రైళ్లకు స్టాపింగ్స్‌ లేదు. అలాగే మరో పుణ్యక్షేత్రమైన నందలూరు(సౌమ్యనాథాలయం) స్టేషన్‌లో కూడా తెలంగాణ, తమిళనాడు, మహారాష్ట్రల రాజధానుల నుంచి నడిచే ఎక్స్‌ప్రెస్‌రైళ్లకు స్టాపింగ్స్‌ లేవు. ఈ పుణ్యక్షేత్రాలకు దూరప్రాంతాల నుంచి వచ్చే రైలు ప్రయాణికులకు సౌకర్యం కల్పించడంలో రైల్వేశాఖ నిర్లక్ష్యం వహిస్తోంది. కనీసం బుధవారం ప్రవేశపెట్టనున్న బడ్జెట్‌లోనైనా ఉమ్మడి వైఎస్సార్‌ జిల్లాకు రైల్వే పరంగా కొద్దివరకైనా న్యాయం జరుగుతుందో లేక మళ్లీ మొండి చేయి చూపుతారో వేచి చూడాల్సిందే.   కన్నెత్తిచూడని కొత్తరైళ్లు..   ఉమ్మడి వైఎస్సార్‌ జిల్లాను కలుపుతూ నెల్లూరుకు డైలీ డెమో రైలును తీసుకురావాలని ప్రయాణికులు కోరుతున్నారు.  విజయవాడ, తెనాలి, ఒంగోలు, నెల్లూరు, రాపూరు, ఓబులవారిపల్లె, రాజంపేట, నందలూరు మీదుగా కడప వరకు ఎక్స్‌ప్రెస్‌ రైలును తీసుకువస్తే అనుకూలంగా ఉంటుందని భావిస్తున్నారు.   పెన్నా ఎక్స్‌ప్రెస్‌ పేరుతో హిందుపూరం నుంచి వయా ధర్మవరం, అనంతపురం గుత్తి, డోన్, నంద్యాల, జమ్మలమడుగు, ప్రొద్దుటూరు, కడప, నందలూరు, రాజంపేట, ఓబులవారిపల్లె మీదుగా  నెల్లూరు వరకు రైలును తీసుకొస్తే సీమలోని కడప, అనంతపురం, నెల్లూరు జిల్లా మధ్య రాకపోకలకు సులభమవుతుంది.   ∙నంద్యాల–కడప మధ్య నడిచే డెమో ఎక్స్‌ప్రెస్‌రైలును రేణిగుంట వరకు పొడిగింపు నిర్ణయం తీసుకున్నా ఇంతవరకు అమలుకాలేదు.   ∙ముంబయి–చెన్నై రైలు మార్గంలో రాత్రి వేళలో నడిచే నైన్‌ మెయిల్, టెన్‌ మెయిల్‌ రైళ్లు ఇప్పుడు లేకుండా చేశారు. పగటిపూట మాత్రమే అడపాదడపా రైళ్లు నడుస్తున్నాయి..   ∙మచిలీపట్నం–తిరుపతి మధ్య నడిచే ఎక్స్‌ప్రెస్‌ రైలును కడప వరకు పొడిగించే ప్రతిపాదన కార్యరూపందాల్చేలా చూడాల్సిన ఆవశ్యకత ఎంతైనా ఉంది.   జిల్లాలు: వైఎస్సార్, అన్నమయ్య  ప్రధానరైల్వేకేంద్రం: నందలూరు  ప్రధానస్టేషన్లు: కడప, ఎర్రగుంట్ల,  ఓబులవారిపల్లె   ఉమ్మడి వైఎస్సార్‌ జిల్లాలమీదుగా  నడిచే రైళ్లు: 30 (డౌన్, అప్‌)  గూడ్స్‌రైళ్లు: 40  స్టేషన్లు: 25  కార్మికులు: 4000  కిలోమీటర్లు: 180

మళ్లీ కేంద్ర బడ్జెట్‌ వచ్చేసింది. కేంద్రం ఎవరెవరికి ఉపశమనం కలిగిస్తుంది, ఎవరిపై భారం పెరుగుతుందన్నది ఆసక్తిగా మారింది. ఇప్పుడేకాదు ఏటా బడ్జెట్‌ వచ్చిందంటే ఉత్కంఠగానే ఉంటుంది. అయితే బడ్జెట్‌లో లెక్కలే కాకుండా.. మరెన్నో విశేషాలు కూడా ఉంటుంటాయి. అలాంటి కొన్ని విశేషాలు తెలుసుకుందామా? నెహ్రూ.. ఇందిర.. రాజీవ్‌  1958లో అప్పటి ఆర్థికమంత్రి టి.టి.కృష్ణమాచారి రాజీనామా చేసినప్పుడు, జవహర్‌లాల్‌ నెహ్రూ బడ్జెట్‌ను సమర్పించి అలా చేసిన మొదటి ప్రధానమంత్రిగా నిలిచారు. 1970లో ఇందిరాగాంధీ బడ్జెట్‌ ప్రవేశపెట్టినప్పుడు అప్పటి ఆర్థికమంత్రి మొరార్జీ దేశాయ్‌ రాజీనామా చేసి ఉన్నారు. 1987–88లో ఆర్థికమంత్రి వీపీ సింగ్‌ రాజీనామా చేసినప్పుడు, అప్పటి ప్రధాని రాజీవ్‌గాంధీ బడ్జెట్‌ను సమర్పించారు.    తెల్లారింది లేవండోయ్‌.. 2000 సంవత్సరం వరకు, ఫిబ్రవరి నెల చివరి పనిదినం సాయంత్రం 5 గంటలకు బడ్జెట్‌ను సమర్పించేవారు. అయితే, అప్పటి ఆర్థిక మంత్రి యశ్వంత్‌ సిన్హా బడ్జెట్‌ సమర్పణ సమయాన్ని ఉదయం 11 గంటలకు, సభలో మొదటి కార్యక్రమంగా మార్చారు. 2014లో అప్పటి ఆర్థిక మంత్రి అరుణ్‌ జైట్లీ బడ్జెట్‌ను సమర్పించినప్పుడు, 2.5 గంటలపాటు సుదీర్ఘమైన బడ్జెట్‌ ప్రసంగం చేశారు. దీనిని బడ్జెట్‌ సమర్పణలలో సుదీర్ఘ ప్రసంగాలలో ఒకటిగా పరిగణిస్తారు. రైల్వేను కలిపేశారు..  2017 వరకు, ప్రతి సంవత్సరం రెండు వేర్వేరు బడ్జెట్‌లు సమర్పించేవారు. ఆర్థిక బడ్జెట్‌ను ఆర్థికమంత్రి, రైల్వే బడ్జెట్‌ను రైల్వే మంత్రి సమర్పించడం ఆనవాయితీగా ఉండేది. నరేంద్రమోదీ ప్రభుత్వం రెండు బడ్జెట్‌లను కలిపి ఉమ్మడి బడ్జెట్‌ను తీసుకొచ్చింది. 2017లో అప్పటి ఆర్థికమంత్రి అరుణ్‌ జైటీ తొలి ఉమ్మడి బడ్జెట్‌ను ప్రవేశపెట్టారు.  మొదటి బడ్జెట్‌కు 162 ఏళ్లు.. మొదట్లో బ్రిటిష్‌ ఈస్టిండియా కంపెనీ పాలనలో ఉన్న మన దేశాన్ని.. 1857 సిపాయిల తిరుగుబాటు తర్వాత బ్రిటన్‌ నేరుగా పాలించడం మొదలుపెట్టింది. ఆ సమయంలోనే మన దేశానికంటూ మొదటిసారిగా 1860 ఏప్రిల్‌ 7న బడ్జెట్‌ ప్రవేశపెట్టారు. బ్రిటిష్‌ ఇండియా ప్రభుత్వం తరఫున స్కాటిష్‌ ఆర్థికవేత్త, రాజకీయ నాయకుడు జేమ్స్‌ విల్సన్‌ ఆ బడ్జెట్‌ రూపొందించి, బ్రిటిష్‌ పార్లమెంట్‌కు సమర్పించారు. స్వాతంత్య్ర భారతంలో 1947 నవంబర్‌ 26న అప్పటి కేంద్ర ఆర్థిక మంత్రి ఆర్‌కే షణ్ముగం శెట్టి తొలి బడ్జెట్‌ను ప్రవేశపెట్టారు.  రహస్యంగా..ప్రింటింగ్‌నే మార్చేసి కేంద్ర బడ్జెట్‌ రూపకల్పన, పత్రాల ముద్రణ అత్యంత రహస్యంగా సాగుతుంది. బడ్జెట్‌లోని అంశాలు ముందే తెలిస్తే.. ఎవరైనా వాటిని మార్చేలా ప్రభావితం చేయడానికి వీలు ఉంటుందన్నదే దీనికి కారణం. అందుకే బడ్జెట్‌ పత్రాలను ముద్రించినన్ని రోజులు సిబ్బంది ఎవరినీ బయటికి వెళ్లనివ్వరు. 1950 వరకు రాష్ట్రపతి భవన్‌లో బడ్జెట్‌ పత్రాలు ముద్రించేవారు. ఆ ఏడాది బడ్జెట్‌ రహస్యాలు ముందే లీకవడంతో ముద్రణను ఢిల్లీలోని మింట్‌ రోడ్‌లో ఉన్న ప్రింటింగ్‌ ప్రెస్‌కు మార్చారు. 1980 నుంచి కేంద్ర ఆర్థికశాఖ కార్యాలయం ఉండే నార్త్‌బ్లాక్‌లో బడ్జెట్‌ పత్రాలను ముద్రిస్తున్నారు.

సాక్షి, హైదరాబాద్‌: కొత్త రైళ్ల బాధ్యతను ప్రైవేటుకు అప్పగించి మౌలిక వసతుల కల్పనపై రైల్వే శాఖ దృష్టి సారించింది. వీలైనన్ని ప్రైవేటు రైళ్లను పట్టాలెక్కించేందుకు సిద్ధమైన రైల్వేశాఖ దక్షిణమధ్య రైల్వేకు సంబంధించి 11మార్గాలను గుర్తించింది. ఆ మార్గా ల్లో ప్రైవేటు రైళ్లను పరుగు పెట్టించేందుకు కావాల్సిన ప్రణాళికలను రైల్వే బోర్డు పరిశీలిస్తోంది. సొంతంగా నిర్వహించే ఒక్క కొత్త రైలు ప్రస్తావన కూడా లేకుండానే తాజా బడ్జెట్‌ను రూపొందించారు. అయితే ఇప్పటికే మొదలైన కొత్త లైన్లు, డబ్లింగ్, మూడో లైన్ల నిర్మాణాలకు భారీగానే నిధులు కేటాయించారు. తాజా బడ్జెట్‌లో దక్షిణమధ్య రైల్వేకు రూ.6,846 కోట్లను కేటాయించారు. ఇది గత ఏడాది కంటే రూ.922 కోట్లు ఎక్కువ. ప్రారంభమైన లైన్లు పూర్తి చేశాకే కొత్తవి మొదలుపెట్టాలన్న ప్రధాని మోదీ ఆలోచన బడ్జెట్‌లో స్పష్టంగా కనిపించింది. ఇక రాష్ట్ర ప్రభుత్వంతో సంయుక్తంగా చేపడుతున్న కొన్ని ప్రాజెక్టులకు నామమాత్రపు నిధులతో సరిపెట్టింది. తాజా బడ్జెట్‌లో దక్షిణమధ్య రైల్వే జోన్‌కు కేటాయింపుల వివరాలను బుధవారం జీఎం గజానన్‌ మాల్యా రైల్‌ నిలయంలో మీడియాకు వెల్లడించారు.   ఈ ప్రాజెక్టులు ఇక పరుగు పెట్టినట్టే...   మనోహరాబాద్‌–కొత్తపల్లి: రూ.235 కోట్లు..  హైదరాబాద్‌తో కరీంనగర్‌ పట్టణాన్ని రైల్వే ద్వారా అనుసంధానించే కీలక ప్రాజెక్టు మనోహరాబాద్‌–కొత్తపల్లికి రూ.235 కోట్లు కేటాయించారు. ఈ మార్చినాటికి గజ్వేల్‌ వరకు ఈ మార్గంలో రైలును నడిపేందుకు సిద్ధమైన అధికారులు, భూసేకరణ సమస్యలను అధిగమించి సిద్దిపేట వరకు వేగంగా పనులు పూర్తి చేసే యోచనలో ఉన్నారు. 2006–07లో మంజూరైన 151 కి.మీ. ఈ ప్రాజెక్టు గత రెండేళ్లుగా పరుగుపెడుతోంది. రూ.1,160 కోట్ల అంచనాతో ఇది ప్రారంభమైంది.  మునీరాబాద్‌–మహబూబ్‌నగర్‌:  రూ.240 కోట్లు  ఈ ప్రాజెక్టుకు రూ.240 కోట్లు కేటాయించారు. ప్రస్తుతం ఈ మార్గంలో కాచిగూడ నుంచి జక్లేర్‌ వరకు డెమో రైలు నడుస్తోంది. ఆ తర్వాత భూసేకరణలో జరిగిన జాప్యంతో పనుల్లో కొంత ఆటంకం ఏర్పడింది. 243 కి.మీ. ఈ మార్గం పనులు రూ.1,723 కోట్ల అంచనాతో మొదలయ్యాయి. ఇందులో 66 కి.మీ. పరిధి తెలంగాణలో ఉండగా, మిగతాది కర్ణాటక పరిధిలో ఉంది. ద.మ. రైల్వే పరిధికి సంబంధించి జక్లేర్‌–మక్తల్, కృష్ణ–మాగనూరు మధ్య పనులు జరుగుతున్నాయి.  భద్రాచలం–సత్తుపల్లి:  రూ.520 కోట్లు  దక్షిణమధ్య రైల్వేకు ప్రధాన ఆదాయ వనరు అయిన బొగ్గు తరలింపుపై ఆ శాఖ ప్రత్యేక దృష్టి సారించింది. కొత్త గనులతో రైల్వేను అనుసంధానించే క్రమంలో భద్రాచలం–సత్తుపల్లి కొత్త లైను నిర్మాణం చివరి దశకు వచి్చంది. గత బడ్జెట్‌లో రూ.405 కోట్లు కేటాయించగా, ఈసారి రూ.115 కోట్లు ఎక్కువగా కేటాయించింది. ఈ సంవత్సరం పనులు పూర్తి చేసే లక్ష్యంతో ఉంది. 54 కి.మీ.ల ఈ మార్గంలో భూసేకరణ వ్యయాన్ని రైల్వే భరించనుండగా, ప్రాజెక్టు నిర్మాణ ఖర్చు (రూ.704 కోట్లు)ను సింగరేణి సంస్థ భరించాల్సి ఉంది.  ఎంఎంటీఎస్‌కు రూ.40 కోట్లు... ఈ ఆర్థిక సంవత్సరం ఎంఎంటీఎస్‌ రెండో దశకు మరో రూ.40 కోట్లను కేటాయించారు. రాష్ట్ర ప్రభుత్వ భాగస్వామ్యంతో చేపట్టిన ఈ ప్రాజెక్టు వ్యయంలో రాష్ట్రం తన వాటాగా 2/3 వంతు చొప్పున సుమారు రూ.450 కోట్ల వరకు అందజేయవలసి ఉంది. ఈ నిధుల విడుదలలో జాప్యంతో సికింద్రాబాద్‌–»ొల్లారం, పటాన్‌చెరు–తెల్లాపూర్‌ తదితర మార్గాల్లో లైన్‌ల నిర్మాణం, విద్యుదీకరణ, స్టేషన్‌ల ఏర్పాటు పనులు పూర్తయినప్పటికీ రైళ్లను కొనుగోలు చేయలేకపోతున్నారు. ఇక రూ.150 కోట్ల అంచనాలతో మూడేళ్ల క్రితం ప్రతిపాదించిన చర్లపల్లి టర్మినల్‌ విస్తరణకు రాష్ట్ర ప్రభుత్వం వంద ఎకరాల భూమిని కేటాయించవలసి ఉంది. ఇప్పటి వరకు ఆ భూమి ఇవ్వకపోవడంతో రైల్వేకు ఉన్న 50 ఎకరాల్లోనే రూ.80 కోట్లతో గత ఏడాది టరి్మనల్‌ విస్తరణ చేపట్టారు. ఈ ప్రాజెక్టు కోసం ప్రస్తుతం రూ.5 కోట్లు కేటాయించారు. ఘట్కేసర్‌–యాదాద్రి ఎంఎంటీఎస్‌ ప్రాజెక్టు అంచనా వ్యయం రూ.412 కోట్లు. రాష్ట్ర ప్రభుత్వంతో కలసి చేపడుతున్న ఈ ప్రాజెక్టుకు రాష్ట్రం ఇప్పటి వరకు నిధులు ఇవ్వలేదు. కేంద్రం మాత్రం ఈ బడ్జెట్‌లో రూ.10 లక్షలతో సరిపెట్టింది.   డబ్లింగ్, మూడో లైన్‌లకు మహర్దశ... రైళ్ల రద్దీ ఎక్కువగా ఉండే మార్గాల్లో అదనపు లైను నిర్మాణం రైల్వేకు పెద్ద సవాలు. కాజీపేట–బల్లార్షా మూడోలైన్‌కు తాజా బడ్జెట్‌లో ఏకంగా రూ.483 కోట్లు కేటాయించారు. ఇది గత బడ్జెట్‌ కంటే రూ.118 కోట్లు ఎక్కువ. రెండు లైన్లు ఉన్నప్పటికీ సామర్థ్యం కంటే 130 శాతం అధికంగా రైళ్లను నడుపుతున్నారు. ఇప్పటికే ఈ మార్గంలో రాఘవాపురం–పోట్కపల్లి, బిసుగిర్‌షరీఫ్‌–ఉప్పల్, విరూర్‌–మాణిక్‌ఘర్‌ మధ్య మూడోలైన్‌ చివరి దశలో ఉండటంతో త్వరలో పూర్తి చేయనుంది. మిగతా చోట్ల పనులను వేగంగా పూర్తి చేసేందుకు ఇప్పుడు భారీగా నిధులు కేటాయించింది. ఇక కాజీపేట–విజయవాడ మూడో లైన్‌ పనులకోసం రూ.404 కోట్లు కేటాయించారు. గత బడ్జెట్‌లో ఇచ్చింది రూ.110కోట్లే. ఫలితంగా ఈ సారి పనుల్లో వేగం పెరగనుంది. ఈ మార్గంలో కొంతమేర భూసేకరణ సమస్య ఉన్నందున దీన్ని తొందరగా పరిష్కరించాలని ఇప్పటికే స్థానిక అధికారులకు ఆదేశాలు అందాయి.   సికింద్రాబాద్‌–మహబూబ్‌నగర్‌ మధ్య 85 కి.మీ. మేర డబ్లింగ్‌ పనులకు గాను రూ.185 కోట్లు కేటాయించారు. గతేడాది కేటాయించిన రూ.200 కోట్లతో పనులు వేగంగా జరుగుతున్నాయి. షాద్‌నగర్‌–గొల్లపల్లి మధ్య 29 కి.మీ. మార్గం పూర్తి కావచి్చంది. త్వరలో దాన్ని అందుబాటులోకి తెచ్చి రైళ్లను నడిపే ఆలోచనలో అధికారులు ఉన్నారు.   కాజీపేట వర్క్‌షాపు అంతేనా..  కాజీపేటలో నిర్మించతలపెట్టిన పీరియాడికల్‌ ఓవర్‌హాలింగ్‌ వర్క్‌షాప్‌ పరిస్థితి డోలాయమానంలో పడ్డట్టు కనిపిస్తోంది. గత బడ్జెట్‌లో రూ.కోటిన్నర మంజూరు చేసిన రైల్వే ఈసారి నయాపైసా ప్రకటించకపోవటం పట్ల అనుమానాలు తలెత్తుతున్నాయి. అయితే, భూ సమస్య పరిష్కారం కాగానే పనులు చేపట్టేందుకు తాము సిద్ధంగా ఉన్నామని బుధవారం విలేఖరులు అడిగిన ప్రశ్నకు సమాధానంగా రైల్వే జీఎం గజానన్‌ మాల్యా చెప్పటం విశేషం.  ఎయిర్‌లైన్స్‌ తరహాలో ప్రైవేట్‌ రైళ్లు...  ఎయిర్‌లైన్స్‌ తరహాలో ప్రైవేట్‌ రైళ్లు అందుబాటులోకి రానున్నాయి. ఈ క్రమంలోనే హైదరాబాద్‌ నుంచి వివిధ మార్గాల్లో ప్రైవేట్‌ రైళ్లు పట్టాలెక్కనున్నాయి. చర్లపల్లి టరి్మనల్‌ నుంచి ఈ రైళ్లను నడిపేందుకు దక్షిణమధ్య రైల్వే ప్రణాళికలను రూపొందిస్తోంది. చర్లపల్లి–శ్రీకాకుళం, చర్లపల్లి–వారణాసి, చర్లపల్లి–పన్వేల్, లింగంపల్లి–తిరుపతి, సికింద్రాబాద్‌–గౌహతి, చర్లపల్లి–చెన్నై, చర్లపల్లి–షాలిమార్, విజయవాడ–విశాఖ, తిరుపతి–విశాఖ తదితర ప్రాంతాల మధ్య ప్రైవేట్‌ రైళ్లు అందుబాటులోకి రానున్నాయి. అలాగే ఐఆర్‌సీటీసీ ఆధ్వర్యంలో లింగంపల్లి–గుంటూరు, ఔరంగాబాద్‌–పన్వేల్‌ మధ్య తేజాస్‌ రైళ్లను నడుపుతారు. ఈ రైళ్ల కోసం త్వరలో ఓపెన్‌ టెండర్లను ఆహా్వనించనున్నారు.   

సాక్షి, హైదరాబాద్‌: రైల్వే బడ్జెట్‌ అనగానే యావత్తు దేశం ఎదురుచూసేది.. ఏ ప్రాంతానికి ఏ రైలు వస్తుంది, కొత్త రైల్వే లైన్లు ఏ ప్రాంతానికి మంజూరవుతాయి అని ప్రజలు టీవీలకు అతుక్కుపోయేవారు. కానీ, శనివారం కేంద్ర ఆర్థిక శాఖ మంత్రి నిర్మలా సీతారామన్‌ పార్లమెంటులో ప్రవేశపెట్టిన వార్షిక బడ్జెట్‌లో రైల్వే ప్రస్తావనకు కేటాయించిన సమయం రెండుమూడు నిమిషాలు మాత్రమే.అందులోనే కొన్ని విషయాలు ప్రస్తావించారే తప్ప కొత్త రైళ్లు, లైన్లు, సర్వేలు వంటి వాటి ఊసే లేదు. రైల్వే బడ్జెట్‌ను విడిగా ప్రవేశపెట్టకుండా సాధారణ బడ్జెట్‌లో కలిపేసిన తర్వాత, రైల్వేకు చెందిన వివరాలను సంక్షిప్తంగా వెల్లడిస్తున్నారు. కానీ తాజా బడ్జెట్‌ ప్రసంగంలో నామమాత్రపు ప్రస్తావనతోనే సరిపుచ్చటం పట్ల విమర్శలు వెల్లువెత్తుతున్నాయి. స్థూలంగా నాలుగైదు విషయాలతో సరిపుచ్చినప్పటికీ, జోన్ల వారీగా వివరాలను ఆ తర్వాత కూడా వెల్లడించలేదు. పింక్‌బుక్‌ పేరుతో ఉండే పూర్తి వివరాల పుస్తకాన్ని మరుసటి రోజో, ఆ తర్వాతనో విడుదల చేసేవారు. ఈసారి ఆ పింక్‌ బుక్‌ను ఐదో తేదీన విడుదల చేస్తారని చెబుతున్నారు. అంటే అప్పటి వరకు జోన్ల వారీగా కేటాయింపుల విషయాలు వెల్లడయ్యే అవకాశం ఉండదు. రైల్‌నిలయానికి సమాచారం లేదు దక్షిణ మధ్య రైల్వేకు చేసిన కేటాయింపులకు సంబంధించి రైల్‌ నిలయంకు ఎలాంటి సమాచారం అందలేదు. ‘బడ్జెట్‌లో రైల్వేలకు సం బంధించి కనీస వివరాలు కూడా వెల్లడించకపోవటాన్ని తొలిసారి చూస్తున్నాం. కొన్ని ప్రధాన ప్రాజెక్టులు, చేపట్టబోయే కొత్త సంస్కరణలు, కొత్త రైళ్లు లాంటి వివరాలైనా వెల్లడించాల్సింది. ఇక జోన్ల వారీగా కేటాయింపు లు ఎప్పుడిస్తారో కూడా సమాచారం లేదు. ఢిల్లీలోని ప్రధాన కార్యాలయానికి ఫోన్‌ చేసి అడిగినా చెప్పలేదు. ఐదో తేదీన పార్లమెంటు లో పింక్‌బుక్‌ను విడుదల చేసిన తర్వాత వివరాలు వెల్లడించే అవకాశం ఉంది’అని ఓ ఉన్నతాధికారి పేర్కొన్నారు. దక్షిణ మధ్య రైల్వేకు దాదాపు రూ.6,100 కోట్ల మేర నిధులు కేటాయించారని, ప్రస్తుతం పనులు జరుగుతున్న మనోహరాబాద్‌–కొత్తపల్లి, మహబూబ్‌నగర్‌ డబ్లింగ్, కాజీపేట–బల్లార్షా, కాజీపేట–విజయవాడ మూడో లైన్‌ పనులు, మెదక్‌–అక్కన్నపేట, భద్రాచలం–సత్తుపల్లి ప్రాజెక్టులకు రూ.1,200 కోట్ల మేర కేటాయింపులున్నాయని సమాచారం. ఓ హైస్పీడ్‌ కారిడార్, రెండు రైళ్ల ప్రస్తావన ఉందని చెబుతున్నారు. 

న్యూఢిల్లీ: రవాణా రంగంలో మౌలిక సదుపాయాల అభివృద్ధికి కేంద్ర బడ్జెట్‌లో రూ. 1.7 లక్షల కోట్లు కేటాయించినట్లు ఆర్థిక మంత్రి నిర్మలా సీతారామన్‌ తెలిపారు. 2020-21 సంవత్సరానికి గాను కేంద్ర బడ్జెట్‌ను శనివారం నిర్మల పార్లమెంట్‌లో ప్రవేశపెడుతున్నారు. ఈ సందర్భంగా ప్రసంగిస్తూ.. 2023 కల్లా ఢిల్లీ- ముంబై ఎక్స్‌ప్రెస్‌ హైవే నిర్మాణం పూర్తి చేస్తామని.. చెన్నె- బెంగళూరు ఎక్స్‌ప్రెస్‌ వే నిర్మాణం త్వరలోనే ప్రారంభమవుతుందని పేర్కొన్నారు. ముంబై- అహ్మదాబాద్‌ మధ్య త్వరలో హైస్పీడ్‌ రైలు ప్రారంభం కానుందన్నారు. రైల్వేల్లో సోలార్‌ విద్యుత్‌ వినియోగం పెంచి.. రైల్వే లైన్‌ విద్యుదీకరణ చేపడతామని తెలిపారు. అదే విధంగా బెంగళూరులో సబర్బన్‌ రైల్వే ప్రాజెక్టు కోసం రూ. 1800 కోట్లు కేటాయించినట్లు తెలిపారు. పర్యాటక అభివృద్ధికై తేజాస్‌ వంటి మరిన్ని రైళ్లను అందుబాటులోకి తెస్తామని వెల్లడించారు. రైల్వేల్లో మరింత ప్రైవేటీకరణ దిశగా అడుగులు వేస్తున్నామని... ప్రభుత్వ- ప్రైవేటు భాగస్వామ్య(పీపీపీ) పద్ధతిలో 150 రైళ్లు అందుబాటులోకి రానున్నాయని పేర్కొన్నారు.(మరింత ఈజీగా జీఎస్టీ...) అదే విధంగా ఉడాన్‌ పథకం కింద 2024 నాటికి వంద ఎయిర్‌పోర్టులను అభివృద్ధి చేస్తామని తెలిపారు. నేషనల్‌ గ్యాస్‌ గ్రిడ్‌ను విస్తరిస్తామని పేర్కొన్నారు. దేశవ్యాప్తంగా డేటా సెంటర్‌ పార్కులు ఏర్పాటు చేస్తున్నామని.. లక్ష గ్రామ పంచాయతీలకు ఆప్టికల్‌ ఫైబర్‌ అందుబాటులోకి రానుందని తెలిపారు. విద్యుత్‌​ రంగానికి రూ. 22, 000 కోట్లు కేటాయించినట్లు వెల్లడించారు.(బడ్జెట్‌ 2020 : కేంద్ర బడ్జెట్‌ హైలైట్స్‌ కోసం ఇక్కడ క్లిక్‌ చేయండి)

సాక్షి, అమరావతి: పార్లమెంట్‌లో నేడు రైల్వే బడ్జెట్‌ ప్రవేశపెట్టనున్న నేపథ్యంలో ఈసారైనా కేంద్రం కరుణిస్తేనే పలు కీలక ప్రాజెక్టులు పట్టాలెక్కే అవకాశం ఉంది. దక్షిణ మధ్య రైల్వేలో అధిక శాతం ఆదాయం ఏపీ నుంచే లభిస్తున్నా ఆ మేరకు న్యాయం జరగడం లేదు. విశాఖ కేంద్రంగా రైల్వే జోన్‌ ఏర్పాటు చేస్తున్నట్లు ప్రకటించినా నిధులు, విధులు తేలక అయోమయం నెలకొంది. రాష్ట్రంలో ప్రాధాన్య ప్రాజెక్టులన్నీ కాస్ట్‌ షేరింగ్‌ విధానంలో మంజూరయ్యాయి. రాష్ట్రం తన వాటాగా భూ సేకరణ జరిపి భూమిని అప్పగిస్తే రైల్వే శాఖ నిధులు మంజూరు చేసి ప్రాజెక్టులు పూర్తి చేయాలి. నడికుడి–శ్రీకాళహస్తి రైల్వే లైన్‌ అంచనా వ్యయం పెరగకముందే నిధులు కేటాయించి ప్రాజెక్టును త్వరితగతిన పూర్తి చేయాలని కోరుతున్నారు. కోటిపల్లి–నరసాపురం, కడప–బెంగళూరు, డబ్లింగ్‌ ప్రాజెక్టులు, మూడో లైన్ల పూర్తికి కేంద్రం ఏ మేరకు సహకరిస్తుందో చూడాల్సిందే. ఇక 2012, 2013లోనే మంజూరైన భద్రాచలం–కొవ్వూరు, కొండపల్లి–కొత్తగూడెం ప్రాజెక్టులు పూర్తి కావాలంటే నిధులు అత్యవసరం. పట్టాలెక్కని ప్రతిపాదనలు! స్టేషన్‌ రీ డెవలప్‌మెంట్‌ కింద తిరుపతి, విజయవాడ, నెల్లూరు, గుంటూరు, కర్నూలు, గుంతకల్‌ స్టేషన్లను అభివృద్ధి చేసేందుకు రైల్వే శాఖ గతంలో అంగీకరించింది. విజయవాడను శాటిలైట్‌ స్టేషన్‌గా తీర్చిదిద్దాలని ఏన్నో ఏళ్ల నుంచి ప్రతిపాదనలున్నాయి. గతంలో గుంతకల్‌ డివిజన్‌లో చంద్రగిరి, గుంటూరు డివిజన్‌లో న్యూ గుంటూరు, ఫిరంగిపురం, విజయవాడ డివిజన్‌లో రామవరప్పాడు స్టేషన్లను మహిళా స్టేషన్లుగా ప్రకటించారు. మొత్తం మహిళా సిబ్బంది ఈ స్టేషన్లలో విధులు నిర్వహించేలా రైల్వే శాఖ ఆదేశాలిచ్చింది. వీటిని అభివృద్ధి చేయాల్సి ఉంది.   కొత్త రైల్వే లైన్లపై కరుణించేనా? నరసరావుపేట–మచిలీపట్నం, కంభం–ఒంగోలు, చిత్తూరు–కుప్పం వయా పలమనేరు, ఓబులవారిపల్లె–వాయల్పాడు రైల్వే లైన్ల సర్వేపై బోర్డు ఏమీ తేల్చడం లేదు. మచిలీపట్నం–బాపట్ల కనెక్టివిటీ కోసం సర్వే చేసి అంచనా వ్యయం రూ.793 కోట్లుగా తేల్చినా నివేదికను పక్కన పెట్టారు.   ప్రైవేట్‌ రైళ్ల ప్రతిపాదనలు.. విజయవాడ–దువ్వాడ మధ్య 335 కి.మీ. మేర మూడో లైన్‌ను నిర్మించాలి. విశాఖకు కనెక్టివిటీ పెంచేందుకు 2015–16లోనే రూ.3,873 కోట్ల అంచనాతో ప్రతిపాదనలు రూపొందించారు. ఈ బడ్జెట్‌లో మూడో లైన్‌కు నిధులు కేటాయించాలని కోరుతున్నారు. తేజాస్‌ తరహాలో తిరుపతి–విశాఖ, సికింద్రాబాద్‌–విశాఖ మధ్య ప్రైవేట్‌ రైళ్ల ప్రతిపాదనలున్నాయి. 

వైఎస్‌ఆర్‌ జిల్లా,రాజంపేట: కేంద్ర ప్రభుత్వం రేపు రైల్వే బడ్జెట్‌ను ప్రవేశపెడుతోంది. ఏటా మాదిరిగానే జిల్లా ప్రజానీకం ఈ బడ్జెట్‌ అయినా తమ ఆకాంక్షలను నెరవేరుస్తుందా అని ఎదురుచూస్తున్నారు. వారి ఆశలపై నీళ్లు చల్లుతుందో..తీపి కబురు చెబుతుందో తెలియడానికి మరో రోజు మాత్రమే మిగిలి ఉంది. గతేడాది రైల్వేబడ్జెట్‌  జిల్లా ప్రజలను నిరాశ పరిచింది. నిధుల కేటాయింపులో కోతలు విధించింది. జిల్లాలో రైల్వేపరమైన అభివృద్ధి విషయంలో వివక్ష కొనసాగుతోందనేది జనం భావన. ఏళ్లతరబడి  ప్రాజెక్టులు పెండింగులోనే కొనసాగుతూనే ఉన్నాయి. మూడుదశాబ్దాల తర్వాత నంద్యాల–ఎర్రగుంట్ల రైల్వేలైన్‌ అందుబాటులోకి వచ్చినా కొత్తరైళ్లు జిల్లా వైపు కన్నెత్తి చూడటంలేదు.  కడప, రాజంపేట, నందలూరు, ఎర్రగుంట్ల, రైల్వేకోడూరు రైల్వేస్టేషన్లలో మౌలిక వసతులు అంతంత మాత్రంగా ఉన్నాయి. పలురైళ్లు జిల్లాలో ఆగకుండానే వెళుతున్నాయి. తెలంగాణ, ఆంధ్రా, తమిళనాడు రాజధానికి లింక్‌గా డీఎంయు రైళ్లను నడిపించాల్సిన అవసరముందనేది దీర్ఘకాలిక కోరిక. అదీ నెరవేరడం లేదు. వీక్లీ, బైవీక్లీ లాంటి రైళ్లకు స్టాపింగ్‌ ఇవ్వాలన్న వినతులు రైల్వే ఉన్నతాధికారులు పెడచెవిన పెడుతున్నారు. రాజంపేట, రైల్వేకోడూరులో ఆర్‌యూబీలునిర్మాణంలో జాప్యం కొనసాగుతోంది. కొన్ని రైల్వేస్టేషన్‌లో ఫుట్‌ఓవర్‌ బ్రిడ్జిలు లేవు. ప్రయాణీకుల సౌకర్యాలు అరకొరగానే ఉన్నాయి. జిల్లా కు రైల్వేపరిశ్రమ కలేనా.. నందలూరు రైల్వేకేంద్రంలో ప్రత్యామ్నాయ రైల్వేపరిశ్రమ ఏర్పాటు కలగానే మిగిలింది. ఎన్‌డీఏ హయాంలో ఇది కార్యరూపం దాల్చుతుందని జిల్లా వాసులు ఆశించారు. కేంద్రంలో ప్రభు త్వాలేవి మారినా ఈ పరిశ్రమ ఊసెత్తడంలేదు. నందలూరులో రైల్వేపరిశ్రమ ఏర్పాటుచేయాలని కొన్నేళ్లుగా నానుతు న్న విషయం. రాజంపేట ఎంపీ మిధునరెడ్డి లోక్‌సభలో దీనిపై  ప్రస్తావించారు. 250 క్వార్టర్స్‌తో పాటు 150 ఎకరాలు రైల్వేభూమి ఉంది. భూమి విషయంలో ఉన్నతాధికారులకు తప్పుడు సమాచారం ఇచ్చారు. గతంలో రైల్వేమంత్రిగా పనిచేసిన లాలు ప్రసాద్‌యాదవ్‌  వ్యాగన్‌ రిపేరువర్క్‌షాపు పెడతామని ప్రకటించారు. కానీ తర్వాత విస్మరించారు.  బెంగళూరు లైన్‌ నిర్మాణం ముందుకెళ్లేదెపుడో...  2008–09 రైల్వేబడ్జెట్‌లో కడప–బెంగళూరు రైల్వేలైను రైలుమార్గాన్ని ప్రకటించారు. ఈ మార్గం పూర్తికావడానికి అంచనా రూ.2050 కోట్లకు చేరుకుంది. 2010 సెప్టెంబరులో అప్పటి రైల్వేమంత్రి మునియప్ప శంకుస్ధాపన చేశారు. 21.8కిలోమీటర్ల మేర తొలిదశపనులు పూర్తయ్యాయి. అక్కడి వరకు డెమోరైలు నడిపిస్తున్నారు. రెండో వదశలో పెండ్లిమర్రి నుంచి రాయచోటి, లక్కిరెడ్డిపల్లె మీదుగా చిత్తూరు జిల్లా వాయల్పాడువరకు పనులు చేయాల్సి ఉంది. 102వ లైను చేపట్టాల్సి ఉంది. ప్రస్తుతం ఈమార్గంలో పదిశాతం పనులే జరిగాయి.  ప్రయాణీకుల రవాణకు నోచుకోనికృష్ణపట్నం రైల్వేలైన్‌ వైఎస్సార్‌ జిల్లా, నెల్లూరు జిల్లాలను కలిపే కృష్ణపట్నం–ఓబులవారిపల్లె రైల్వేలైన్‌ సరకు రవాణకే పరిమితమైంది. ప్రయాణీకులకు ఈ మార్గంలో వెళ్లే అవకాశం లెేఛీజీ ఈ రైల్వేలైన్‌కు ఇప్పటి వరకు రూ.1186కోట్లు ఖర్చు చేశారు. ఇది కూడా అంచనా రూ.1646కోట్లకు చేరుకుంది. వెంకటాచలం–ఓబులవారిపల్లె మధ్య మార్గం పూర్తయి గూడ్స్‌రైళ్లకే పరిమితమైంది. సర్వేలకే రైలుమార్గాలు ♦ కంభం–ప్రొద్దుటూరు రైల్వేలైన్‌ సర్వే కు గతబడ్జెట్‌లో.1లక్ష మాత్రమే కేటాయించారు. ఈ లైన్‌ సర్వే దశను దాట ♦ భాకరాపేట–గిద్దలూరు రైల్వేలైన్‌ గురించి గత బడ్జెట్‌లో ప్రస్తావనే లేదు. జిల్లాలో రెండు కొత్త రైలుమార్గాలు సర్వేలకే పరిమితమైయ్యాయి.   ♦ కడప–గుంతకల్లు–బళ్లారి రైల్వేలైన్‌ సర్వేకు బడ్జెట్‌ ఆమోదం తెలిపింది. ఇప్పటికే కడప–గుంతకల్లు మధ్య డబుల్‌లైన్‌ నిర్మితమైంది. ఆంధ్రప్రదేశ్, కర్ణాటక రాష్ట్రాలకు సంబంధించి ఈ లైను అనువుగా ఉంటుంది. సర్వే చేపట్టేందుకు ఆమోదం లభించినా అడుగు ముందుకు పడలేదు.   ♦ భాకరాపేట–గిద్దలూరు రైల్వేలైన్‌ కూడా సర్వేలకే పరిమితమైంది. ఈ కొత్త రైలుమార్గం పురోగతి ప్రశ్నార్ధకరంగా మారింది.      ♦ జిల్లా కేంద్రంతో సంబంధం లేకుండా ఎర్రగుంట్ల–నంద్యాల రైల్వేలైన్‌లో రాజధానికి రైలునడుస్తోంది. ♦ జిల్లా కేంద్రం నుంచి రాజధానికి రేణిగుంట మీదుగా వెళ్లే తిరుమల ఎక్స్‌ప్రెస్‌ రైలు ఒక్కటే దిక్కయింది. నంద్యాల రైల్వేలైన్‌విద్యుద్దీకరణ ఎప్పుడో.. ♦ కర్నూలు, వైఎస్సార్‌జిల్లాలను కలుపుతూఏర్పాటైన ఎర్రగుంట్ల–నంద్యాల రైల్వేలైన్‌నువిద్యుద్దీకరణ (ట్రాక్షన్‌) చేయనున్నారు. రూ.20కోట్లు కేటాయించారు. 123 కిలోమీటర్ల మార్గంలో దీనివల్ల కరెంటురైలింజన్లు నడిచే అవకాశాలకు మార్గం ఏర్పడుతుంది. ట్రాక్షన్‌ పూర్తి కావాలంటే రూ111.48కోట్లు వ్యయం చేయాలి.  ఇంకా సర్వేదశలోఈ మార్గం విద్యుద్దీకరణ పనులున్నాయి. 

సాక్షి, కాజీపేట : కేంద్రంలో ప్రవేశపెట్టె బడ్జెట్‌లో రైల్వే పరంగా ఈసారైనా న్యాయం జరిగేనా అని జిల్లా ప్రజలు ఎదురుచూస్తున్నారు. పార్లమెంట్‌లో కేంద్ర ఆర్థిక శాఖ మంత్రి నిర్మలా సీతారామన్‌ శుక్రవారం ప్రవేశపెట్టే బడ్జెట్‌లో కాజీపేట జంక్షన్‌కు న్యాయం జరగాలని జిల్లా ప్రజలు, రైల్వే కార్మికులు ఆకాంక్షిస్తున్నారు. నిజాం రైల్వే కాలంలో 1094లో ఏర్పాటైన కాజీపేట దినాదినాభివృద్ధి చెంది కాజీపేట జంక్షన్‌గా ఏర్పడి ఇప్పుడు దేశంలోని ఉత్తర, దక్షిణ ప్రాంతాలకు గేట్‌వేగా విలసిల్లుతోంది. అయితే, గతంలో ప్రవేశపెట్టే రైల్వే బడ్జెట్లు, ఇప్పుడు ఉమ్మడిగా ప్రవేశపెడుతున్న సాధారణ బడ్జెట్లకు సంబంధించి ఏటా నిరాశే ఎదురవుతోంది. ఈసారైనా కాజీపేట జంక్షన్‌ పరిధిలో పెండింగ్‌లో ఉన్న యూనిట్ల నిర్మాణం, రైల్వే లైన్ల నిర్మాణంతో పాటు ఇతర సమస్యల పరిష్కారానికి అడుగులు పడుతాయని భావిస్తున్నారు. ఫిట్‌లైన్‌ నుండి కొత్త రైళ్లు కాజీపేటలో రూ.15 కోట్ల వ్యయంతో నిర్మాణమవుతున్న ఫిట్‌లైన్‌ పనులను త్వరగా పూర్తి చేసి కాజీపేట కేంద్రంగా కొత్త రైళ్లు ప్రారంభించాలని జిల్లా వాసులు డిమాండ్‌ చేస్తున్నారు. ఇదే జరిగితే కాజీపేట జంక్షన్‌ నుంచి ముంబై, తిరుపతి, సికింద్రాబాద్‌ రూట్లలో కొత్త రైళ్లను ఇక్కడి నుంచే ప్రారంభించవచ్చు. తద్వారా కార్మికుల సంఖ్య పెరగడంతో పాటు కొత్తగా రైల్వే కార్యాలయాలు వస్తాయి. మూడో లేన్‌ కాజీపేట జంక్షన్‌ మీదుగా బల్లార్షా – విజయవాడ వరకు నిర్మాణంలో ఉన్న మూడో రైల్వే లైన్‌ను పూర్తి చేసేందుకు ఈసారి బడ్జెట్‌లో పూర్తి స్థాయి కేటాయింపులు చేయాలని ప్రజలు కోరుతున్నారు. ఈ లేన్‌ పూర్తయితే అయితే న్యూఢిల్లీ, విజయవాడ, హైదరాబాద్‌ మార్గాల్లో ట్రాఫిక్‌ తగ్గిపోతుంది. అలాగే, ఆలస్యాన్ని నివారించచ్చు. వడ్డేపల్లి చెరువు కట్లపై రైల్వే లైన్‌ కాజీపేట వడ్డేపల్లి చెరువు కట్టపై 200 మీటర్ల మేర సర్వే అయిన రేల్‌ అండర్‌ రైల్‌ లైన్‌ నిర్మాణం, కాజీపేట – బల్లార్షా వరకు సర్వే అయిన నాలుగో లేన్‌ నిర్మాణానికి బడ్జెట్‌ కేటాయించాలని స్థానికులు కోరుతున్నారు. సర్వే పూర్తయిన మణుగూరు – రామగుండం లేన్‌కు నిధులు, ఘన్‌పూర్‌ – సూర్యాపేట వరకు వయా పాలకుర్తి, కొడకండ్ల మీదుగా సర్వే అయిన లేన్‌ నిర్మాణానికి ఈ బడ్జెట్‌లో నిధులు మంజూరు చేయాలని, భూపాలపల్లి రైల్వే లేన్‌ నిర్మాణానికి గ్రీన్‌ సిగ్నల్‌ ఇస్తారని జిల్లా ప్రజలు గంపెడాశలతో ఎదురుచూస్తున్నారు. కొత్త రైళ్లు, రైళ్ల పొడిగింపు కాజీపేట జంక్షన్‌ మీదుగా ఈసారి బడ్జెట్‌లో కొత్త రైళ్లు ఉంటాయా, లేదా అనే చర్చ సాగుతోంది. ఇంకా పద్మావతి ఎక్స్‌ప్రెస్, కరీంనగర్‌ – తిరుపతి ఎక్స్‌ప్రెస్, షిర్డీ ఎక్స్‌ప్రెస్‌లను డెయిలీగా మార్చాలనే డిమాండ్‌ ఉంది. అంతేకాకుండా కాజీపేట జంక్షన్‌ మీదుగా వెళ్లే పలు ఎక్స్‌ప్రెస్‌ రైళ్లకు హాల్టింగ్‌ కల్పిస్తూ నిర్ణయం తీసుకోవాలని కోరుతున్నారు. డివిజన్‌ కల నెరవేరేనా? 1904 సంవత్సరంలో ఏర్పాటైన కాజీపేట రైల్వే స్టేషన్‌ 115 ఏళ్ల ప్రస్థానంలో డివిజన్‌ కేంద్రంగా ఏర్పాటు కావాలనేది జిల్లా ప్రజలు, ఇక్కడ పని చేస్తున్న కార్మికుల చిరకాల కోరిక. ఇది ఈసారి బడ్జెట్‌లో నెరవేరుతుందని అనుకుంటున్నారు. కేంద్ర ప్రభుత్వం విశాఖ రైల్వే జోన్‌ను డివిజన్‌గా అప్‌గ్రేడ్‌ చేసినా కాజీపేట జంక్షన్‌ను చేయకపోవడంపై సర్వత్రా నిరసన వ్యక్తమవుతోంది. డివిజన్‌ ఏర్పాటైతే ఈ ప్రాంత అభివృద్దితో పాటు కొత్త రైల్వే పరిశ్రమలు వస్తాయి. పాలన అందరి చెంతకు చేరుతుంది. కొత్త రైళ్లను ఇక్కడకు ప్రారంభించేందుకు వెసలుబాటు కలుగుతుంది. డివిజన్‌ స్థాయి రైల్వే భవనాలు, అధికారులు వస్తారు.  వ్యాగన్‌ పీఓహెచ్‌ షెడ్‌ కాజీపేట కేంద్రంగా పదేళ్ల క్రితం మంజూరైన రైల్వే వ్యాగన్ల తయారీ పరిశ్రమ.. ఆ తర్వాత దీని స్థానంలో మంజూరైన వ్యాగన్‌ పీరియాడికల్‌ ఓవరాలింగ్‌ షెడ్‌(పీఓహెచ్‌ షెడ్‌) నిర్మాణానికి అనేక అడ్డంకులు ఎదురవుతున్నాయి. ఈసారైనా ఇవి తొలగిపోయి బడ్జెట్‌లో నిధులు కేటాయిస్తారని, శంకుస్థాపన జరుగుతుం దని జిల్లా ప్రజలు ఎదురుచూస్తున్నారు. వ్యాగన్‌ పీఓహెచ్‌ షెడ్‌ వస్తే కాజీపేట అభివృద్ధి చెందడమే కాకుండా ప్రాధాన్యత పెరుగుతుంది. కొంత మేరకు నిరుద్యోగం తగ్గుతుంది. దీనికి తోడు అనుబంధంగా చిన్నచిన్న పరిశ్రమలు ఏర్పాటవుతాయి.  

సాక్షి, హైదరాబాద్‌: ఈసారి బడ్జెట్‌లో పెండింగ్‌లో ఉన్న పాత ప్రాజెక్టులను పూర్తిచేసేందుకే కేంద్రం ఎక్కువ ఆసక్తి చూపించింది. కొత్త ప్రాజెక్టుల గురించి ఎలాంటి ప్రకటన చేయకుండా.. పాత వాటికి నిధుల కేటాయింపునకే పెద్దపీట వేసింది. సుదీర్ఘకాలంగా పెండింగ్‌లో ఉన్న కాజీపేట డివిజన్‌ హోదా, వట్టినాగులపల్లి టెర్మినల్‌ నిర్మాణం తదితర డిమాండ్లు ఈ బడ్జెట్‌లోనూ తీరని కోరికలుగానే మిగిలిపోయాయి. కాజీపేట–బల్లార్షా మూడో లైనుకు ఈ ఏడాది కూడా మోక్షం లభించలేదు. మరోవైపు అక్కన్నపేట–మెదక్‌ రైలు మార్గం ఈఏడాది ప్రారంభమయ్యే అవకాశాలున్నాయి. కొత్తపల్లి–మనోహరాబాద్‌కు మార్గంలోనూ మనోహరాబాద్‌–గజ్వేల్‌ వరకు ట్రయల్‌ రన్‌కు అధికారులు సిద్ధమవుతుండటం శుభసూచకం. శుక్రవారం దక్షిణ మధ్య రైల్వే కేంద్రమైన సికింద్రాబాద్‌లోని రైల్‌ నిలయంలో దక్షిణ మధ్య రైల్వే అడిషనల్‌ జనరల్‌ మేనేజర్‌ జాన్‌ థామస్‌ బడ్జెట్‌ వివరాలు వెల్లడించారు.  కీలక ప్రాజెక్టులకు కేటాయింపులు..  1.    మనోహరాబాద్‌ కొత్తపల్లి ప్రాజెక్టుకు రూ.200 కోట్లు  2.    మునీరాబాద్‌–మహబూబ్‌నగర్‌ మార్గానికి రూ.275 కోట్లు   3.    భద్రాచలం–సత్తుపల్లి లైన్‌కు రూ.405 కోట్లు   4.    కాజీపేట–బల్లార్షా మూడో లైన్‌కు రూ.265 కోట్లు  5.    సికింద్రాబాద్‌–మహబూబ్‌నగర్‌ డబ్లింగ్‌కు రూ.200 కోట్లు  6.    కాజీపేట–విజయవాడ మూడోలైన్‌కు రూ.110 కోట్లు  7.    ఘట్‌కేసర్‌–యాదాద్రి ఎంఎంటీఎస్‌ ఫేజ్‌–2కు రూ.20 కోట్లు  8.    చర్లపల్లి శాటిలైట్‌ స్టేషన్‌కు రూ.5 కోట్లు  9.    కాజీపేట ఓవర్‌ హాలింగ్‌ వర్క్‌షాప్‌కు రూ.10 కోట్లు  10.    మౌలాలిలో ఇన్‌స్టిట్యూట్‌ ఆఫ్‌ రైల్వే ఫైనాన్స్‌ మేనేజ్‌మెంట్‌ ఏర్పాటుకు రూ.1.5 కోట్లు  తీరని కలలు... 1980 నుంచి తీరని కలగా మిగిలిన కాజీపేట రైల్వే కోచ్‌ ఫ్యాక్టరీకి ఈసారి కూడా మోక్షం దక్కలేదు. కాజీపేటను డివిజన్‌గా మార్చాలన్న డిమాండ్, లాలాగూడలో మెడికల్‌ కాలేజీ నిర్మించాలన్న డిమాండ్‌ ప్రస్తుతానికి పెండింగ్‌లోనే ఉన్నాయి. దక్షిణమధ్య రైల్వే పరిధిలోని చర్లపల్లి, వట్టినాగులపల్లి టెర్మినళ్ల నిర్మాణం ఇంకా సాకారం కావడం లేదు. ఇక్కడ తెలంగాణ ప్రభుత్వం స్థలం కేటాయించడంలో జాప్యం చేస్తున్నందునే ఇది ఆలస్యమవుతోంది.  ఈ సర్వే పనులకు టెండర్లు పిలుస్తారా?  1.    పటాన్‌చెరు–సంగారెడ్డి–జోగిపేట–మెదక్‌ 95 కిలోమీటర్లు  2.    నిజామాబాద్‌–నిర్మల్‌–ఆదిలాబాద్‌ రూ.125 కోట్లు  3.    కరీంనగర్‌–హుజూరాబాద్‌–ఎల్కతుర్తి: 60 కిమీ   ‘ఓట్ల కోసమే ఈ బడ్జెట్‌ ’ కేంద్రం ప్రవేశపెట్టిన బడ్జెట్‌ కేవలం ఓట్ల కోసమే పెట్టినట్టుందని కాంగ్రెస్‌ ఆరోపించింది. పేదలను వదిలి వ్యాపారుల మన్ననలు పొందేలా ఉన్న ఈ బడ్జెట్‌తో బీజేపీ వ్యాపారస్తుల పార్టీ అని మరోమారు తేలిపోయిందని టీపీసీసీ వర్కింగ్‌ ప్రెసిడెంట్‌ పొన్నం ప్రభాకర్‌ వ్యాఖ్యానించారు. శుక్రవారం గాంధీభవన్‌లో ఏఐసీసీ కిసాన్‌సెల్‌ ఉపాధ్యక్షుడు ఎం.కోదండరెడ్డితో కలసి మాట్లాడుతూ.. కేంద్ర బడ్జెట్‌లో వ్యక్తిగత ఆదాయపు పన్నును మినహాయించినట్టు ప్రకటించి వచ్చే ఏడాది నుంచి అమలు చేస్తామని చెప్పడం దారుణమన్నారు. బడాబాబులకు ఐటీ తగ్గించి పేదలను పట్టించుకోకుండా అంకెలు చూపెట్టారని, మోదీ వల్ల దేశానికి ఒరిగిందేమీ లేదని, రాబోయే ఎన్నికల్లో మోదీ సర్కారును గద్దెదింపేందుకు దేశ ప్రజలు సిద్ధంగా ఉన్నారని అన్నారు. ఇది పూర్తిగా ఎన్నికల బడ్జెట్‌ ఎంపీ కొండా విశ్వేశ్వరరెడ్డి సాక్షి, న్యూఢిల్లీ: కేంద్రం ప్రవేశపెట్టిన బడ్జెట్‌ త్వరలో జరిగే సాధారణ ఎన్నికలకు ప్రచారం మాదిరిగా ఉందని ఎంపీ కొండా విశ్వేశ్వరరెడ్డి అన్నారు. శుక్రవారం కేంద్ర ఆర్థిక మంత్రి లోక్‌సభలో బడ్జెట్‌ ప్రవేశపెట్టిన అనంతరం కొండా విశ్వేశ్వరరెడ్డి మీడియాతో మాట్లాడుతూ.. ఈ బడ్జెట్‌ ద్వారా గతంలో తాను ప్రవేశపెట్టిన అన్ని పథకాలు విఫలమైనట్లుగా కేంద్ర ప్రభుత్వం ఒప్పుకున్నట్టు అయిందన్నారు. రైతుల ఆదాయం రెట్టింపు, మద్దతు ధర, ఈనామ్‌ లాంటివన్నీ విఫలమవడంతో ఇప్పుడు కొత్తగా రైతులకు పెట్టుబడి సాయం పేరుతో ముందుకొచ్చారని విమర్శించారు. ఆదాయ పన్ను పరిమితి పెంపు మంచిదని పేర్కొన్నారు. అయితే, దీన్ని గత ఐదేళ్లలో ఎందుకు చేయలేదని ప్రశ్నించారు. కేంద్రం ప్రవేశపెట్టిన బడ్జెట్‌ పూర్తిగా ఎన్నికల కోణంలో ఉందన్నారు.

న్యూఢిల్లీ: మరో మూడు నెలల్లో ఎన్నికలు జరగనున్న నేపథ్యంలో ఊహించినట్లుగానే రైల్వే చార్జీల పెంపు లేకుండానే తాజా బడ్జెట్‌ వచ్చింది. అంతేకాకుండా గతంలో ఎన్నడూ లేనంత మూలధన వ్యయాన్ని ఈ బడ్జెట్‌లో రైల్వేకు కేటాయించారు. గతేడాది అరుణ్‌ జైట్లీ ఆర్థిక మంత్రిగా ఉండగా రూ. 1.48 లక్షల కోట్లను రైల్వేకు కేటాయించగా, ప్రస్తుతం దాన్ని మరో పది వేల కోట్లు పెంచి రూ. 1,58,658 కోట్లకు పియూష్‌ గోయల్‌ చేర్చారు. అలాగే బడ్జెట్‌ నుంచి మూలధన సాయంగా రూ.64,587 కోట్లను రైల్వేలకు కేటాయించారు. ఇప్పటివరకు రైల్వే చరిత్రలో 2018–19 సంవత్సరమే అత్యంత సురక్షితమైనదనీ, బ్రాడ్‌గేజ్‌ పట్టాలపై వెంట ఉన్ని కాపలా లేని రైల్వే గేట్లను సంపూర్ణంగా తొలగించామని రైల్వే, ఆర్థిక శాఖల మంత్రి పియూష్‌ చెప్పారు. బడ్జెట్‌ ప్రసంగంలో ఆయన మాట్లాడుతూ ‘వచ్చే ఏడాదికి రైల్వేకు కేటాయించిన మూలధన వ్యయం చరిత్రలోనే అత్యధికం.  ఆ మొత్తం రూ. 1.58 లక్షల కోట్లు. దేశీయంగా తయారైన పాక్షిక అత్యంత వేగవంతమైన రైలు వందే భారత్‌ ఎక్స్‌ప్రెస్‌ (ట్రైన్‌ 18) భారతీయ ప్రయాణికులకు ప్రపంచ స్థాయి అనుభవాన్ని ఇవ్వనుంది. పూర్తిగా మన ఇంజినీర్లే తయారు చేసిన ఈ రైలుతో మనం సాంకేతికతలో మరో పెద్ద అడుగు ముందుకేశాం’అని వివరించారు. రైల్వేకు వచ్చే ఆర్థిక ఏడాదిలో రూ. 2.73 లక్షల కోట్ల ఆదాయం వస్తుందని బడ్జెట్‌లో అంచనా వేశారు. గతేడాది ఈ అంచనా రూ. 2.5 లక్షల కోట్లుగా ఉంది. కొత్త మార్గాల నిర్మాణాలకు రూ. 7,255 కోట్లు, గేజ్‌ మార్పిడికి రూ. 2,200 కోట్లు, డబ్లింగ్‌ పనులకు రూ. 700 కోట్లు, ఇంజిన్లు, బోగీలు తదితరాలకు రూ. 6,114.82 కోట్లు, సిగ్నల్‌ వ్యవస్థ, టెలికాంలకు కలిపి రూ. 1,750 కోట్లు, ప్రయాణికులకు సౌర్యాలను మెరుగుపరిచేందుకు రూ. 3,422 కోట్లను ఈ బడ్జెట్‌లో కేటాయించారు. ప్రస్తుత ఆర్థిక సంవత్సరంలో నిర్వహణ నిష్పత్తి 96.2కు మెరుగుపడిందనీ, వచ్చే ఏడాదికి దీనిని 95 శాతానికి తీసుకురావాలని లక్ష్యంగా పెట్టుకున్నామని గోయల్‌ చెప్పారు.  త్వరలో అధునాతన బోగీలు  ఇంజిన్లు, బోగీలు తదితరాల కోసం గతేడాది కన్నా ఈ ఏడాది బడ్జెట్‌లో 64 శాతం అధిక కేటాయింపులకు చేశారు. 2018–19 బడ్జెట్‌లో ఈ కేటగిరీ కోసం రూ. 3,724.93 కోట్లు కేటాయించగా, తాజా ఆ బడ్జెట్‌లో ఆ మొత్తం రూ. 6,114.82 కోట్లుగా ఉంది. దీంతో త్వరలోనే అధునాతన బోగీలు రైల్వే ప్రయాణికులకు అందుబాటులోకి వచ్చే అవకాశం ఉంది. రైలు బోగీల మార్కెట్‌లో ప్రపంచ వ్యాప్తంగా 200 బిలియన్‌ డాలర్ల వ్యాపారం చేయాలన్న ప్రభుత్వ లక్ష్యాన్ని చేరుకునేందుకు తాజా బడ్జెట్‌ కేటాయింపులు ఉపకరించనున్నాయి. భారత్‌లో అత్యంత వేగవంతమైన రైలు ట్రైన్‌ 18 (వందే భారత్‌ ఎక్స్‌ప్రెస్‌), కొత్త ఏసీ కోచ్‌లు, మెట్రో కోచ్‌లు తదితరాల తయారీ విజయవంతం అవ్వడంతో అదే ఉత్సాహంతో 2021 వరకు తయారీ ప్రణాళికలను రైల్వే అధికారులు ఇప్పటికే సిద్ధం చేశారు. ఇవి సరిగ్గా అమలైతే వచ్చే రెండేళ్లలో దేశంలోని వివిధ రైల్వే ఫ్యాక్టరీలు కలిసి దాదాపు 15 వేల బోగీలను తయారు చేయనున్నాయి. ప్రస్తుతం వివిధ నగరాల్లో తిరుగుతున్న ఈమూ, మెమూ రైళ్లకు బదులుగా కొత్త బోగీలను ప్రవేశపెట్టనున్నారు. త్వరలోనే మరో 6 ట్రైన్‌ 18లను తయారు చేయాలని ఇప్పటికే నిర్ణయించారు. ఫస్ట్‌ యాక్సిడెంట్‌.. ప్రపంచంలో తొలిసారి రైలు చక్రాల కింద నలిగిపోయిన అభాగ్యుడెవరో తెలుసా? ఈయనే. పేరు విలియం హస్కిసన్, బ్రిటన్‌ ఎంపీ. 1830 సెప్టెంబర్‌ 15న బ్రిటన్‌లోని లివర్‌పూల్, మాంచెస్టర్‌ రైల్వేలైన్‌ను ప్రారంభించేందుకు వెళ్లి ప్రమాదవశాత్తూ రైలు కింద పడి మరణించారు. ఇదే కార్యక్రమానికి వచ్చిన డ్యూక్‌ ఆఫ్‌ వెల్లింగ్టన్‌ ఆర్థర్‌ వెలస్లీతో మాట్లాడేందుకు పక్కనే ఉన్న పట్టాలపై నడుచుకుంటూ ముందుకు వెళ్లారు. అయితే అదే సమయంలో ఆ పట్టాలపై మరో రైలు వస్తోంది. రైలు దగ్గరికి రాగానే తడబడుతూ పట్టాలపై పడిపోయారు. అందరూ చూస్తుండగానే ఘోరం జరిగిపోయింది. ఓల్డ్‌ ఈజ్‌ గోల్డ్‌ 1850 తొలినాళ్లలో మన దేశంలో ఇలా ఎడ్లే ఇంజిన్లుగా అప్పటి న్యారో గేజ్‌ రైలును లాగేవి.

రైల్వే బడ్జెట్‌లో ఉమ్మడి నల్లగొండ జిల్లాపై కేంద్రం శీతకన్ను వహించింది. దశాబ్దాలుగా ఎదురుచూస్తున్న సికింద్రాబాద్‌ – కాజీపేట మార్గంలో మూడో లేన్‌ ఊసే లేకపోగా.. బీబీనగర్‌–నడికుడి డబ్లింగ్‌ పనులకు మోక్షం కలగలేదు. ఇక సూర్యాపేటకు రైలు మార్గానికి సంబంధించిన ప్రతిపాదనలు ఈసారీ పట్టాలెక్కలేదు. రైల్వే శాఖకు అత్యధిక ఆదాయం సమకూర్చుతున్న విష్ణుపురం మార్గంపైనా జాలి చూపలేదు. రైల్వే ప్రాజెక్టులకు మోక్షం లభిస్తుందని ఎంతో ఆశతో ఎదురుచూసిన ఉమ్మడి జిల్లా వాసులకు నిరాశే మిగిలింది. సాక్షి, యాదాద్రి : ఉమ్మడి నల్లగొండ జిల్లాకు 2018–19 బడ్జెట్‌లో రైల్వే ప్రాజెక్టులకు న్యాయం జరుగలేదు. ఎన్నికల బడ్జెట్‌లో జిల్లాకు సంబంధించిన రైల్వే ప్రాజెక్టులకు మోక్షం కలుగుతుందని.. ప్రజలు ఎంతో ఆశగా ఎదురు చూశారు. ప్రస్తుత కేటాయింపులపై ప్రజలు పెదవి విరుస్తున్నారు. యాదాద్రి వరకు ఎంఎంటీఎస్‌ పొడిగింపు, బీబీనగర్‌ నడికుడి డబ్లింగ్‌ పనులకు మోక్షం లభించలేదు. సూర్యాపేట ప్రాంత ప్రజలు ఎదురుచూస్తున్న ఎక్స్‌ప్రెస్‌ హైవే రైలు మార్గ ప్రతిపాదనలు ఈ సారి కూడా పట్టాలెక్కలేదు. యాదాద్రి వరకు ఎంఎంటీఎస్‌ లైను పొడిగింపునకు అరకొర నిధులు కేటాయించారు. మల్టీ మోడల్‌ ట్రాన్స్‌పోర్టు సిస్టం (ఎంఎంటీఎస్‌) రైలు వస్తుందని భావించిన వారికి మరో ఏడాది పైగా నిరీక్షించకతప్పని పరిస్థితి. ఎంఎంటీఎస్‌ ఫేజ్‌–2కు మొత్తం ప్రాజెక్టు అంచనా వ్యయం రూ.330కోట్లుకాగా.. రూ.21.25కోట్లు మంజూరు చేశారు. సికింద్రాబాద్‌ –కాజీపేట మార్గంలో మూడో లైన్‌ ఊసే లేకుండా పోయింది. ఈ ప్రాజెక్టు కోసం దశాబ్ధాలుగా ఎదురుచూపులు తప్పడం లేదు. గతంలో సర్వే చేసిన అధికారులు ఇప్పుడు దాన్ని మరిచిపోయారు. దక్షిణమధ్య రైల్వే గుంటూరు డివిజన్‌లో గల బీబీనగర్‌– నడికుడి (252 కిలో మీటర్లు) డబ్లింగ్‌ పనులకు ఈ బడ్జెట్‌లో నిధులు కేటాయిస్తారని ఎంతో ఆశగా చూశారు. ఈ మార్గానికి నిధులు కేటాయింపే జరగలేదు. పగిడిపల్లి నుంచి నల్లగొండ, మిర్యాలగూడ మీదుగా నడికుడి జంక్షన్‌ వరకు రైలు మార్గాన్ని డబ్లింగ్‌ చేయాలనేది ఈ ప్రాంత ప్రజల డిమాండ్‌ ఉంది. దక్షిణ, తూర్పు రైల్వే ప్రాంత ప్రజలకు ఈ మార్గం ద్వారా రైలు ప్రయాణం సాగుతోంది. క్రాసింగ్‌లతో  ఎక్స్‌ప్రెస్, సూపర్‌ఫాస్ట్‌ రైళ్లను సైతం ఆపక తప్పడం లేదు. గంటల తరబడి క్రాసింగ్‌లతో ప్రయాణకాలం పెరిగి ప్రజలు ఇబ్బందులు పడుతున్నారు. తెలంగాణ పాటు ఆంధ్రప్రదేశ్, కేరళ, తమిళనాడు, ఒడిశా, పశ్చిమబంగా, కర్ణాటక రాష్ట్రాలతో అనుసంధానం గల ఈ మార్గంపై నిర్లక్ష్యం కొనసాగడం ప్రయాణికులను వేదనకు గురిచేస్తోంది. పగిడిపల్లి నుంచి నల్లపాడు వరకు విద్యుద్దీకరణ పనులకు రూ.291.75కోట్లు మంజూరు చేశారు. ఇందులో మొదటి విడుతగా నల్లపాడు నుంచి రెడ్డిగూడెం వరకు రైల్వే లైన్‌ విద్యుదీకరణ ఈ ఆర్థిక సంవత్సరంలో పూర్తి చేస్తారు. రెడ్డిగూడెం నుంచి పగిడిపల్లి వరకు వచ్చే ఆర్థిక సంవత్సరం 2018–19లో పూర్తి చేస్తారు. సూర్యాపేట రైలు మార్గం ఎక్కడ..?  హైదరాబాద్‌– అమరావతి ఎక్స్‌ప్రెస్‌ రైల్వే కోసం జిల్లాలోని సూర్యాపేట, కోదాడ ప్రజలు ఎన్నో ఏళ్లుగా ఎదురు చూస్తున్నారు. ఈ బడ్జెట్‌లో దాని పేరెత్తలేదు. ప్రస్తుతం ఉన్న జాతీయరహదారి 65కు అనుబంధంగా అమరావతి వరకు నూతన రైలు మార్గాన్ని ప్రతిపాదించారు. దీంతోపాటు  మహబూబాబాద్‌ జిల్లా  డోర్నకల్‌ నుంచి మిర్యాలగూడ వరకు (వయా సూర్యాపేట) మార్గానికి 2013–14లో కొత్త లైన్‌ ఏర్పాటు చేయాలని ప్రతిపాదించారు. దీనికి బడ్జెట్‌లో ఏ మాత్రం ప్రాధాన్యతను ఇవ్వలేదు. గుంటూరు రైల్వే డివిజన్‌లో రైల్వే శాఖకు అత్యధిక ఆదాయం వస్తున్న విష్ణుపురం మార్గంపైనా కేంద్రం జాలి చూపలేదు. మఠంపల్లి నుంచి జాన్‌పహాడ్‌ వరకు ఉన్న 18 కిలోమీటర్లు మార్గాన్ని పూర్తి చేస్తే జగ్గయ్యపేట నుంచి విష్ణుపురం రైలు మార్గం ప్రజలకు అందుబాటులోకి వస్తుంది. యాదగిరిగుట్ట వరకు పొడిగిస్తే బాగుండేది. రైల్వే బడ్జెట్‌లో భువనగిరి ప్రాంతానికి తీవ్ర అన్యాయం జరిగింది. ఘట్‌కేసర్‌ – యాదాద్రి (రాయగిరి) వరకు ఎంఎంటీఎస్‌–2కు రూ.21.25కోట్లు కేటాయించడం బాధాకరం. ఈ ప్రాంతానికి ఎంఎంటీఎస్‌ తీసుకువచ్చే ప్రయత్నంలో పూర్తిస్థాయి బడ్జెట్‌ కేటాయిస్తే బాగుండేది. ఘట్‌కేసర్‌ నుంచి రాయగిరి వరకు కాకుండా 3 కిలోమీటర్ల దూరంలో ఉన్న యాదగిరిగుట్ట పట్టణం వరకు పొడగిస్తే ప్రయాణికులు సంతోషించే వారు. ఎంఎంటీఎస్‌–2ను ఘట్‌కేసర్‌ నుంచి యాదగిరిగుట్ట వరకు పొడగించి, మరిన్ని నిధులు కేటాయించి పూర్తి చేయాలి.         – ఎండీ అతీఫ్, యాదగిరిగుట్ట రాష్ట్రానికి మొండిచేయి.. కేంద్ర ప్రభుత్వం ఈసారి రైల్వే బడ్జెట్‌లో రాష్ట్రానికి మెండి చేయి చూపారు. రూ.1,813 కోట్ల నిధులు కేటాయించడం దారనుణం.  పాత ప్రాజెక్టుల పనులకు మాత్రమే నిధులు కేటాయించారు. కొత్త ప్రాజెక్టులకు కేటాయించలేదు. నామమాత్రం నిధుల కేటాయింపు వల్ల పనుల్లో జాప్యం జరగవచ్చు.  – బాలచందర్, మాజీ వైస్‌ ఎంపీపీ, బీబీనగర్‌  

సాక్షి, హైదరాబాద్‌ ఒక్క కొత్త రైలు రాలేదు.. కీలక మార్గాల్లో కొత్త్త లైన్‌ ఒక్కటీ లేదు.. భారీ ప్రాజెక్టులూ లేవు.. వెరసి మోదీ రైలు తెలంగాణలో ఆగకుండానే దూసుకుపోయింది! కోటి ఆశలతో కేంద్రం వైపు కళ్లు కాయలు కాసేలా ఎదురుచూస్తున్న రాష్ట్రానికి తీవ్ర నిరాశే మిగిల్చింది. రైల్వే లైన్లు పరిమితంగా ఉన్న తెలంగాణ ప్రతిసారీ రైల్వే బడ్జెట్‌ అనగానే కేంద్రం వైపు ఎంతో ఆశతో చూస్తోంది. ప్రతిసారీ ఎంతో కొంత విదిల్చి నిరుత్సాహపరిచే కేంద్రం ఈసారి మరింత పిసినారితనాన్ని ప్రదర్శించింది. బడ్జెట్‌లో రైల్వేకు తొలిసారి రూ.లక్ష కోట్లను మించి (రూ.1,46,500 కోట్లు) నిధులు కేటాయించినా.. అందులో రాష్ట్రానికి విదిల్చింది కేవలం రూ.1,813 కోట్లు. మొత్తం కేటాయింపులో ఇది కేవలం 1.23 శాతం! బడ్జెట్‌ విధానాన్ని మార్చినందున కచ్చితంగా కొత్త ప్రాజెక్టులు మంజూరు చేయాలన్న నిర్ణయం ఉండదని, సంవత్సరంలో ఎప్పుడైనా మంజూరు చేయొచ్చంటున్న కేంద్రం.. ఇప్పటికే పనులు జరుగుతున్న ప్రాజెక్టులకన్నా భారీగా నిధులు ఇచ్చిందా అంటే అదీ లేదు. అత్తెసరు నిధులు విదిల్చి ఆ పనులు ఇప్పట్లో పూర్తి కావనే సంకేతాలనిచ్చింది. పండుగల సమయంలో లక్షల మంది ప్రయాణికులు పోటెత్తినా చాలినన్ని ప్రత్యేక రైళ్లు నడిపే శక్తి దక్షిణ మధ్య రైల్వేకు లేదు. డిమాండ్‌ను తట్టుకునే స్థాయిలో రైల్వే లైన్లు లేకపోవటమే ఇందుకు కారణమని రైల్వేనే చెబుతోంది. రెండు, మూడో లైన్ల నిర్మాణం, కీలక మార్గాల్లో కొత్త లైన్లకు నిధులిస్తే ఈ సమస్య తీరేంది. కానీ ఆ ప్రయత్నం కూడా జరగలేదని బడ్జెట్‌ లెక్కలు స్పష్టం చేస్తున్నాయి. మొత్తంగా సాధారణ కేటాయింపులతో కేంద్ర ఆర్థిక మంత్రి అరుణ్‌జైట్లీ రాష్ట్రానికి మొండిచేయి చూపారు. ఇలాగైతే పదేళ్లయినా పూర్తి కావు దక్షిణ మధ్య రైల్వే పరిధిలో ప్రస్తుతం 2,623 కి.మీ. మేర కొత్త రైల్వే లైన్లకు ఉద్దేశించిన 22 ప్రాజెక్టులు వివిధ దశల్లో ఉన్నాయి. వీటి మొత్తం ప్రాజెక్టు వ్యయం రూ.19,983 కోట్లు. కానీ రాష్ట్రం ఆవిర్భవించినప్పట్నుంచీ ఇప్పటి వరకు వీటిపై చేసిన ఖర్చు రూ.3,026 కోట్లు మాత్రమే. వాటికి తాజా బడ్జెట్‌లో కేటాయించిన మొత్తం రూ.1,757 కోట్లు. అందులో తెలంగాణ వాటా కేవలం రూ.675 కోట్లు. ఇదేరకంగా నిధులు కేటాయిస్తూ పోతే ఆ ప్రాజెక్టులు పూర్తయ్యేందుకు పదేళ్ల కాలం పడుతుంది. ఇక కొత్త లైన్ల సంగతి చెప్పేదేముంది. జరిగిన పనులు 8.2 శాతమే.. పెరుగుతున్న డిమాండ్, రైళ్ల ట్రాఫిక్‌ నేపథ్యంలో ప్రస్తుతం రెండు, మూడో లైన్‌ నిర్మాణం ఎంతో అవసరం. దక్షిణ మధ్య రైల్వే పరిధిలో 2,268 కి.మీ. మేర ఈ పనులు సాగుతున్నాయి. వీటి అంచనా వ్యయం రూ.19,647 కోట్లు. కానీ 2014 నుంచి ఇప్పటివరకు రూ.1,626 కోట్లు మాత్రమే వ్యయం చేశారు. అంటే.. 8.2 శాతం పనులే జరిగాయని ఈ లెక్కలు చెబుతున్నాయి. తాజాగా అందుకు ఇచ్చిన మొత్తం రూ.611 కోట్లు. ప్రస్తుత ఆర్థిక సంవత్సరంలో ఇప్పటి వరకు కొత్త లైన్లకు సంబంధించి 113 కి.మీ., డబ్లింగ్, ట్రిప్లింగ్‌కు సంబంధించి 24.50 కి.మీ. మాత్రమే పూర్తి చేయగలిగారు. నిధుల కేటాయింపుల్లో పెరుగుదల ఏది? రైల్వే వసతి అతి తక్కువ ఉన్న రాష్ట్రంలో ఆది నుంచి బడ్జెట్‌ కేటాయింపులు అత్తెసరే. కానీ 2014లో మోదీ ప్రభుత్వం కొలువు దీరిన తర్వాత కాస్త ఆశలు పెరిగాయి. అప్పటి వరకు ఉన్న నామమాత్రపు కేటాయింపులను కొంత పెంచటమే ఇందుకు కారణం. వరుసగా మూడేళ్లపాటు ఆ పెంపు ఓ మోస్తరుగా ఉండటంతో.. ఎన్నికలకు ముందు ప్రవేశపెట్టిన ఈ చివరి బడ్జెట్‌లో అది మరింత ఆశాజనకంగా ఉంటుందని ఆశించారు. కానీ నామమాత్రపు పెంపుతో నీళ్లు చల్లారు. బడ్జెట్‌లో కేటాయింపులివీ.. ఇక అన్నీ ఎలక్ట్రిక్‌.. : దక్షిణ మధ్య రైల్వేను పూర్తిగా కరెంటు మార్గంగా చేయబోతున్నారు. ఈ జోన్‌ పరిధిలోని బీదర్‌–గుల్బర్గా మార్గం మినహా యావత్తు ద.మ. రైల్వేను ఎలక్ట్రికల్‌ మార్గంగా చేయబోతున్నట్టు బడ్జెట్‌లో ప్రకటించారు. ఇందుకు తాజా బడ్జెట్‌లో 1,261 కి.మీ. మార్గాన్ని విద్యుద్దీకరించేందుకు రూ.1,172 కోట్లు ఖర్చు చేయనున్నట్టు ప్రకటించారు. ఈ ఏడాది మాత్రం ఇందుకు రూ.72 కోట్లు మంజూరు చేశారు. ఇందులో తెలంగాణ వాటా మార్గాలు... లింగంపేట–జగిత్యాల–నిజామాబాద్‌– 95 కి.మీ.(రూ.80.29 కోట్లు) వికారాబాద్‌–పర్లివైజ్‌నాథ్‌–269 కి.మీ.(రూ.262.12 కోట్లు) పింపల్‌కుట్టి–ముద్ఖేడ్‌–పర్లి– 246 కి.మీ.(రూ.224.17 కోట్లు) సికింద్రాబాద్‌ ‘జిగేల్‌’.. రెండేళ్ల తర్వాతే.. దేశంలోని ప్రధాన స్టేషన్‌లను పూర్తిస్థాయిలో అభివృద్ధి చేసే ప్రాజెక్టుకు కేంద్రం గత బడ్జెట్‌లో శ్రీకారం చుట్టింది. తొలిదశలో 25 స్టేషన్‌లను ఎంచుకోగా అందులో సికింద్రాబాద్‌ చోటు దక్కించుకుంది. పీపీపీ పద్ధతిలో వాటిని అభివృద్ధి చేస్తారు. గత సంవత్సరమే రైల్వే టెండర్లు పిలిచింది. కానీ నిబంధనలు చూసిన తర్వాత బిడ్డర్లు వెనకడుగు వేశారు. ఈ ప్రాజెక్టులో లీజు గడువు 40 ఏళ్లుగా రైల్వే నిర్ధారించింది. దాన్ని మారిస్తేనే ముందుకొస్తామని బిడ్డర్లు తేల్చి చెప్పారు. ఫలితంగా ఆ ప్రాజెక్టు దాదాపు ఆగిపోయింది. దీంతో తాజాగా కేంద్రం లీజు సమయాన్ని 99 ఏళ్లకు పెంచాలని నిర్ణయించింది. బిడ్ల తంతు పూర్తి చేసి వచ్చే సంవత్సరం పనులు ప్రారంభించే అవకాశం ఉందని ద.మ. రైల్వే జీఎం వినోద్‌కుమార్‌ యాదవ్‌ వివరించారు. రాష్ట్ర ప్రభుత్వ వైఖరితోనే ‘కాజీపేట’ జాప్యం కొంతకాలం నడిచిన తర్వాత బోగీలను తిరిగి కండీషన్‌లోకి తెచ్చేందుకు ఉద్దేశించిన వ్యాగన్‌ ఓవర్‌హాలింగ్‌ వర్క్‌షాపు ప్రాజెక్టులో రాష్ట్ర ప్రభుత్వ వైఖరితో పనుల్లో జాప్యం జరుగుతోంది. దీనికి కావాల్సిన 150 ఎకరాల భూమిని రాష్ట్ర ప్రభుత్వం కేటాయించింది. కానీ అది దేవాదాయశాఖ భూమి కావటంతో కోర్టుల్లో కేసులు దాఖలయ్యాయి. దీంతో గత బడ్జెట్‌లో రైల్వే శాఖ నిధులు కేటాయించినా పనులు చేపట్టలేకపోయింది. ఇప్పటికీ ఆ భూమి మధ్యలో ఓ బిట్‌పై ఇంకా కేసు కొనసాగుతుండటంతో దాన్ని రైల్వేకు స్వాధీనం చేయలేకపోయారు. తాజా బడ్జెట్‌లో కేంద్రం దానికి రూ.200 కోట్లు కేటాయించింది. రాష్ట్ర ప్రభుత్వం భూమిని అప్పగించిన 18 నెలల్లో వర్క్‌షాపు పూర్తి చేస్తామని దక్షిణ మధ్య రైల్వే జీఎం తెలిపారు. మరిన్ని విశేషాలు.. ⇒ నిత్యం 25 వేల మంది వరకు ప్రయాణికుల తాకిడి ఉండే అన్ని రైల్వే స్టేషన్‌లలో ఎస్కలేటర్లు ఏర్పాటు చేయబోతున్నారు. ఈ సంవత్సరం హఫీజ్‌పేట, ఖమ్మంలలో ఏర్పాటు చేస్తారు. ⇒ అన్ని రైల్వే స్టేషన్‌లలో ఎల్‌ఈడీ లైట్లను ఏర్పాటు చేస్తారు. స్టేషన్‌ భవనాలపైన సౌరఫలకాలు ఏర్పాటు చేసి సౌర విద్యుత్‌ను అందిపుచ్చుకుంటారు. ⇒ కొత్తగా 2 ఆర్‌ఓబీలు, 9 ఆర్‌యూబీలను రూ.195 కోట్ల వ్యయంతో నిర్మిస్తారు. ఇందులో రైల్వే రూ.73.14 కోట్లు భరించనుండగా మిగతా మొత్తాన్ని రాష్ట్రప్రభుత్వం కేటాయించాల్సి ఉంది.   ⇒ సికింద్రాబాద్‌–కరీంనగర్‌ను రైల్వేతో అనుసంధానించేందుకు ఉద్దేశించిన మనోహరాబాద్‌–కొత్తపల్లి ప్రాజెక్టుకు ఈసారి రూ.125 కోట్లు కేటాయించారు. వీటితో మనోహరాబాద్‌–గజ్వేల్‌ మధ్య రైల్వే లైన్‌ ఏర్పాటు చేస్తారు. చర్లపల్లి శాటిలైట్‌ స్టేషన్‌కు భూమి ఏది? సికింద్రాబాద్‌ స్టేషన్‌లో కొత్త ప్లాట్‌ఫామ్స్‌ నిర్మించేందుకు స్థలం లేక రైళ్లను శివార్లలో నిలపాల్సి రావటం ప్రయాణికులకు శాపంగా మారడంతో చర్లపల్లిలో ఆ«ధునిక శాటిలైట్‌ టెర్మినల్‌ నిర్మించాలని రైల్వే శాఖ రెండేళ్ల క్రితం నిర్ణయించింది. దీనికి 150 ఎకరాల స్థలం కావాలంటూ రాష్ట్ర ప్రభుత్వాన్ని లిఖితపూర్వకంగా కోరింది. కానీ స్థలం లభించక పనులు మొదలు పెట్టలేకపోయింది. ఎన్నిసార్లు రాష్ట్రప్రభుత్వాన్ని కోరినా స్పందన లేకపోవటంతో ఇక అక్కడ తనకు ఉన్న 50 ఎకరాల స్థలంలోనే పనులు చేపట్టాలని రైల్వే నిర్ణయించింది. ఉన్న నిధులతో పనులు వేగంగా చేస్తాం గత నాలుగేళ్ల క్రితంతో పోలిస్తే దక్షిణ మధ్య రైల్వేకు మెరుగ్గానే నిధుల కేటాయింపు జరిగింది. వీటితో కొత్త లైన్లు, రెండు, మూడో లైన్ల నిర్మాణంపై దృష్టి పెడతాం. ముఖ్యంగా ఆర్‌ఓబీ, ఆర్‌యూబీల నిర్మాణం, కాపలా లేని లెవల్‌ క్రాసింగ్స్‌ తొలగింపు, హైలెవల్‌ ప్లాట్‌ఫామ్‌ల నిర్మాణాలకు ప్రాధాన్యమిస్తున్నాం. జోన్‌కు కేటాయించిన నిధులను అవసరమైతే మంజూరైన ఇతర పనులకు సర్దుబాటు చేసే అధికారాన్ని జీఎంలకు కల్పించటం శుభపరిణామం. దీంతో ఏదైనా సమస్య వల్ల నిర్ధారిత పనులు ఆగిపోతే ఆ నిధులు వెనక్కు పోకుండా అవసరమైన ఇతర పనులకు ఖర్చు చేసే వెసులుబాటు కలుగుతుంది. ఈ సంవత్సరం సెప్టెంబర్‌ నాటికి కాపలాదారులేని లెవల్‌ క్రాసింగ్స్‌ లేకుండా చేస్తాం. అలాంటివి 214 ఉన్నట్టు గుర్తించాం. యాదాద్రి ఎంఎంటీఎస్‌కు ఈ నెలలోనే టెండర్‌లను ఆహ్వానిస్తాం. –వినోద్‌కుమార్‌ యాదవ్‌. జీఎం, దక్షిణ మధ్య రైల్వే

తిరుపతి మెయిన్‌ రైల్వేస్టేషన్‌లో ప్రయాణికుల రద్దీ నేపథ్యంలో అనుబంధంగా ఉన్న వెస్ట్, రేణిగుంట, తిరుచానూరు రైల్వేస్టేషన్లను ప్రత్యామ్నాయంగా అభివృద్ధి చేసేందుకు తయారు చేసిన డిజైన్లు, ప్రాజెక్ట్‌ రిపోర్టుల కన్సల్టెన్సీలకే పుణ్య కాలం హరించుకుపోతోంది. గడచిన 12 ఏళ్లలో సుమారు రూ.15 కోట్లమేర ఇందుకోసం రైల్వేశాఖ ఖర్చు చేసింది. ఇప్పటికీ రూపురేఖలు మారకపోవడం ఒక ఎత్తయితే.. మౌలిక వసతులు కల్పించకపోవడంపై ప్రయాణికులు పెదవి విరుస్తున్నారు. ఈ నేపథ్యంలో గురువారం రైల్వే బడ్జెట్‌పై జనం ఆశతో ఉన్నారు. తిరుపతి అర్బన్‌: దశాబ్దాల తరబడి జిల్లాకు రైల్వేపరంగా సరైన ప్రాధాన్యం లభించడం లేదు. ఫలితంగా అనేక డిమాండ్లు అమలుకు నోచుకోవడం లేదు.  నేటికీ  రద్దీ మేరకు రైళ్లు లేకపోగా, తిరుపతికి వస్తున్న యాత్రికులకు కనీస వసతులు కల్పించకపోవడంపై సర్వత్రా ఆగ్రహం వ్యక్తమవుతోంది.  తొలి రెండున్నరేళ్లపాటు రైల్వేమంత్రిగా కొనసాగిన సురేష్‌ప్రభుతో జిల్లా ఎంపీలు పలుమార్లు సంప్రదించి నివేదిం చిన అంశాల్లో కొన్నింటికి గ్రీన్‌ సిగ్నల్‌ పడ్డాయి. చాలా అంశాలు నేటికీ ఊరిస్తూ ...ఉసూరుమనిపిస్తూ కాలగమనంలో పడిలేస్తున్నాయి. కొత్త రైళ్లు ఏర్పాటు చేయకపోగా, మీటర్‌గేజ్‌ ఉన్నప్పుడు నడుస్తున్న పాత రైళ్లనైనా పునరుద్ధరించాలన్న డిమాం డ్లకు మోక్షం రావడం లేదు. కానరాని వరల్డ్‌క్లాస్‌....ఊరిస్తున్న మోడల్‌ క్లాస్‌   దక్షిణమధ్య రైల్వే జోన్‌లోనే అత్యధిక రద్దీ, ఆదాయం సమకూరుస్తున్న రెండో రైల్వేస్టేషన్‌ తిరుపతి. అందుకు అనుగుణంగా 2008లో అప్పటి రైల్వే మంత్రి లాలూ ప్రసాద్‌ యాదవ్‌ తిరుపతిని వరల్డ్‌క్లాస్‌ స్థాయికి  తీసుకువెళ్తామంటూ బడ్జెట్‌లో ప్రకటించారు. అనంతరం రైల్వేమంత్రి మారడం, ఉన్నతాధికారుల పర్యటనల్లో మార్పులు సూచించడం వంటి కారణాలతోనే పదేళ్లు గడచిపోయాయి. ఇప్పటికీ వరల్డ్‌క్లాస్‌ హోదా లేదు. ప్రస్తుత రైల్వే జీఎం వినోద్‌కుమార్‌ యాదవ్‌ మాత్రం వరల్డ్‌క్లాస్‌ ఫైల్‌ ముగిసిపోలేదని చెబుతున్నప్పటికీ ఆ స్థాయిలో పనులకు అడుగు పడటం లేదు.  మూడేళ్ల క్రితం మోడల్‌క్లాస్‌ స్థాయికి  చేస్తామంటూ  రైల్వేబోర్డు ఉన్నతాధికారులు ప్రకటించారు.  ఇప్పుడు తిరుపతి రైల్వే వెలుపల గోడలకు మినహా మిగిలిన ప్రాంతాల్లో ఆ ఊసేలేదు. అదికూడా ఎప్పుడో 60 ఏళ్లక్రితం నిర్మించిన గోడలకే రంగులు అద్దడం విశేషం.  దక్షిణం వైపు రూ.500 కోట్లతో మల్టీప్లెక్స్‌లు, సినిమా హాళ్లు, అన్నిరకాల కమర్షి యల్‌ కాంప్లెక్స్‌లు నిర్మించేస్తామంటూ రెండేళ్లుగా ఊరిస్తున్నారు. ఈ ప్రాజెక్ట్‌ పనులకు కూడా ఈసారి బడ్జెట్‌లో నిధులు చాలినన్ని మంజూరు చేస్తారా...? అనేది ప్రశ్నార్థకంగా నిలుస్తోంది. పాత రైళ్లనైనా పునరుద్ధరించేనా...? 15 ఏళ్లక్రితం వరకు ఉన్న మీటర్‌గేజ్‌ కాలంలో అనేక రైళ్లను ఆ తర్వాత బ్రాడ్‌గేజ్‌ వచ్చాక నిలిపేశారు.  ప్రస్తుతం ఆయా మార్గాల్లో పెరిగిపోతున్న రద్దీని దష్టిలో ఉంచుకుని గడచిన మూడేళ్లుగా పాతరైళ్ల పునరుద్ధరణకు ఒత్తిడి పెరిగింది. ఆ దిశగానైనా ఈసారి బడ్జెట్‌లో ఆమోదం వచ్చి గ్రీన్‌ సిగ్నల్‌ పడాలని ఎదురు చూస్తున్నారు. పాత రైళ్లు, పెండింగ్‌ డిమాండ్లు ♦ తిరుపతి నుంచి రామేశ్వరం వరకు 15ఏళ్ల క్రితం నడుస్తున్న డైలీ ఎక్స్‌ప్రెస్‌ ♦ తిరుపతి నుంచి పాకాల–ధర్మవరం మీదుగా హైదరాబాద్‌కు రోజూ ఒకే సమయంలో నడుస్తున్న వెంకటాద్రి ఎక్స్‌ప్రెస్‌ ♦ తిరుపతి నుంచి వారణాసికి 12 ఏళ్లక్రితం వరకు నడుస్తున్న ఎక్స్‌ప్రెస్‌ రైలు ♦ తిరుపతి నుంచి చెన్నైకి రాత్రివేళల్లో నడుస్తుండిన ఎక్స్‌ప్రెస్‌ రైలు ♦ ప్రస్తుతం కోయంబత్తూరు మార్గంలో నడుస్తున్న ఇంటర్‌సిటీని డైలీగా మార్పు చేయాల న్న నాలుగేళ్ల డిమాండ్‌కు మోక్షం కల్పించాలి. ♦ చిత్తూరు జాతీయ రహదారిలో ఎం.బండపల్లి వద్ద రైల్వే ఓవర్‌ బ్రిడ్జి నిర్మాణం పెండింగ్‌లో ఉంది. ♦ రేణిగుంట మీదుగా చెన్నైకి నడుస్తున్న దాదర్‌ ఎక్స్‌ప్రెస్‌ రైలుకు నగరిలో హాల్ట్‌ ఇవ్వాలన్న డిమాండ్‌కు 6 ఏళ్లుగా ఆచరణ రావడం లేదు.

సాక్షి ప్రతినిధి, కాకినాడ : రైల్వే బడ్జెట్‌ ప్రతిసారీ ఊరించి ఉస్సూరనిపిస్తోంది. కొత్త రైళ్ల ఊసే ఉండడం లేదు. కొత్త రైల్వే లైన్ల పరిస్థితి కూడా అంతే. జిల్లా ఎంపీల నుంచి ప్రతిపాదనలు వెళ్తున్నా రైల్వేశాఖ పట్టించుకోవడం లేదు. రైల్వే స్టేషన్లలో సమస్యల కూతలు వినిపిస్తున్నాయి. ఏటా కొత్త బడ్జెట్‌ ప్రవేశపెడుతున్నా స్టేషన్ల అభివృద్ధి ‘ఎక్కడ వేసిన గొంగళి అక్కడే’ అన్న చందంగా ఉంది. బడ్జెట్‌లో ప్రకటనలు తప్ప ఆచరణకు నోచుకోవడం లేదన్న విమర్శలూ లేకపోలేదు. ప్రధానమైన ప్రతిపాదనలివీ... కాకినాడ–కోటిపల్లి రైల్వేను లైన్‌ నర్సాపురం వరకు విస్తరించేందుకు మరో రూ. 600 కోట్లు రైల్వే శాఖ నుంచి రావల్సి ఉంది. అవి వస్తే తప్ప కోటిపల్లి నుంచి రైల్వే పనులు ప్రారంభంకావు. వీటి విషయంలో అమలాపురం ఎంపీ రవీంద్రబాబు రైల్వే అధికారుల దృష్టికి తీసుకెళ్లారు. ఈ బడ్జెట్‌లో వస్తాయని ఆశాభావం వ్యక్తం చేస్తున్నారు. ♦ 30 ఏళ్ల క్రితం నివేదిక ఆధారంగా పిఠాపురం– కాకినాడ మెయిన్‌ లైన్‌ సాధ్యం కాదని రైల్వే అధికారులు నిర్ణయం తీసుకున్నారు. కానీ ప్రస్తుత పరిస్థితి మారింది. రద్దీ పెరిగింది. కొత్తగా  కోటిపల్లి– నర్సాపురం లైన్‌ వేస్తుండటంతో ఈ మెయిన్‌ లైన్‌ ఎంతో ప్రయోజనకరంగా ఉంటుందని నేరుగా ప్రధానమంత్రి మోదీ దృష్టికి ఎంపీ తోట నర్సింహం తీసుకెళ్లారు. గత బడ్జెట్‌లో 200 కేటాయించినందున దీన్ని పూర్తి చేయాలని కోరారు. ఎంపీ తోట నర్సింహం పరువు నిలుపుతారో లేదో చూడాలి. ♦ రాజమహేంద్రవరం రైల్వే స్టేషన్‌లో 3,4 ప్లాట్‌ఫారమ్‌ల అభివృద్ధి కోసం గత బడ్జెట్‌లో రూ.29 కోట్లు మంజూరయ్యాయి. కానీ ఇంతవరకు ఆ నిధులు రాలేదు. పనులు మొదలు కాలేదు.   ♦ కోటిపల్లి నుంచి నర్సాపురం వరకు లైన్‌ వేసేందుకు టెండర్ల ప్రక్రియ పూర్తయింది. ఇంకాస్త ప్రయోజనకరంగా, పూర్తి స్థాయిలో వినియోగంలోకి రావాలంటే నర్సాపురం నుంచి మచిలీపట్నం, రేపెల్లె, నిజాంపట్నం మీదుగా బాపట్ల వరకు కలిపే కోస్తా రైలు మార్గం అవుతుందని,ప్రయాణికులకు అందుబాటులో ఉంటుందన్న ప్రతిపాదన ఉంది.    ♦ జిల్లాలో ఏ ఒక్క రైల్వే స్టేషన్‌లో ‘వైఫై’ సదుపాయం లేదు. ఇక నూతన రైల్వే లైన్ల ఊసే ఉండటం లేదు. కొత్తగా రైళ్లు రావడం లేదు. ఎంపీలు కోరడమే తప్ప ప్రభుత్వం స్పందించడం లేదు.   వీటికి ఈ బడ్జెట్‌లో మోక్షం కలుగుతుందో లేదంటే ఎప్పటిలాగే ప్రతిపాదనలు పక్కన పెట్టేస్తుందో చూడాలి. గతంలో ప్రకటించిన నిధులు ఈసారైనా విడుదల చేస్తుందో లేదో చూడాలి. దేశ వ్యాప్తంగా ప్రకటించినట్టుగా మన రైల్వే స్టేషన్ల అభివృద్ధి, సౌకర్యాల కోసం ప్రత్యేకంగా నిధులు కేటాయిస్తుందో? గత బడ్జెట్‌ మాదిరిగా మొండి చేయి చూపుతుందో అన్నదానిపై సర్వత్రా ఉత్కంఠ నెలకుంది.

ఎనిమిది దశాబ్దాల కలకు.. ‘బంగారు తెలంగాణ’లోనూ మోక్షం కలగడం లేదు. బోధన్‌–బీదర్‌ రైల్వే లైన్‌ పొడిగింపు అడుగు ముందుకు పడట్లేదు. 1938లో నిజాం హయాంలో ప్రతిపాదించిన ఈ రైల్వే మార్గం.. ఇప్పటికీ పట్టాలెక్కలేదు. 2014లో సర్వే పూర్తయినా నిధుల కేటాయింపు లేక ‘లైన్‌ క్లియర్‌’ కావట్లేదు. ఈ ‘మార్గం’ సుగమం కావాలంటే రాష్ట్ర ప్రభుత్వం రూ.వెయ్యి కోట్లు కేటాయిస్తే, కేంద్రం కూడా ఆ మేరకు నిధులు ఇవ్వనుంది. అయితే, ఈసారి ప్రవేశపెట్టనున్న బడ్జెట్‌లోనైనా రాష్ట్ర ప్రభుత్వం నిధులు కేటాయిస్తుందా..? దశాబ్దాల కల సాకారమవుతుందా? అన్న దానిపై ఆసక్తి నెలకొంది.   బాన్సువాడ: అసంపూర్తిగా ఉన్న బోధన్‌ రైల్వే లైన్‌ను బీదర్‌ వరకు పొడిగిస్తే వెనుకబడిన ప్రాంతాలకు ఎంతో లబ్ధి చేకూరనుంది. ఆయా ప్రాంతాలకు రవాణా వసతులు పెరిగి అభివృద్ధి బాట పట్టే అవకాశముంది. అయితే, సర్కారు నిర్లక్ష్యం కారణంగా ఆయా ప్రాంతాలకు ఇప్పట్లో ‘రైలు బండి’ వచ్చే పరిస్థితి కనిపించట్లేదు. నిధుల కేటాయింపులో నిర్లక్ష్యం కారణంగా ఈ ప్రాజెక్టు కార్యరూపం దాల్చట్లేదు. 201లో రూ.1,029 కోట్ల వ్యయంతో రూపొందిన ఈ ప్రాజెక్టు.. జాప్యం కారణంగా ప్రస్తుత అంచనా వ్యయం రెట్టింపయింది. అయితే, మారిన నిబంధనల ప్రకారం ఈ రైల్వే లైన్‌ కేంద్ర, రాష్ట్ర ప్రభుత్వాల భాగస్వామ్యంతో చేపట్టాల్సి ఉంది. ఈ లైన్‌ ప్రస్తుతం పట్టాలెక్కాలంటే సుమారు రూ.2 వేల కోట్ల వ్యయం కానుంది. ఇందులో రాష్ట్ర ప్రభుత్వం సగం కేటాయిస్తే, కేంద్రం సగం కేటాయించనుంది. అయితే, రాష్ట్ర ప్రభుత్వం నిధులు కేటాయించని కారణంగా ఈ ‘మార్గానికి’ మోక్షం కలగట్లేదు. ఎనిమిది దశాబ్దాల కల.. బోధన్‌–బీదర్‌ రైల్వే లైన్‌ను పొడిగించేందుకు 1938లోనే నిజాం సర్కార్‌ హయాంలో ప్రతిపాదనలు చేశారు. స్వాతంత్య్రం వచ్చిన తర్వాత, ప్రత్యేక రాష్ట్రం ఏర్పడినప్పటికీ ఈ ప్రాంత ప్రజల ఆకాంక్ష అయిన రైల్వే లైన్‌ నిర్మాణం కలగానే మారింది. బోధన్‌–బాన్సువాడ–బీదర్‌ ప్రాంత ప్రజల కోరిక మేరకు 2010లో అప్పటి రైల్వే మంత్రి మమతాబెనర్జీ ఈ మార్గానికి ‘లైన్‌ క్లీయర్‌’ చేశారు. దశాబ్దాల కల అయిన బోధన్‌–బీదర్‌ రైల్వే లైన్‌కు సర్వే కోసం పచ్చజెండా ఊపిన మమతా బెనర్జీ.. ఆదిలాబాద్‌–పటాన్‌చెరు మధ్య కొత్తగా మరో రైల్వే లైన్‌ కోసం సర్వే చేసేందుకు పచ్చ జెండా ఊపారు. దీంతో ఈ ప్రాంతం మీదుగా ఒకేసారి రెండు రైల్వే లైన్ల కోసం సర్వే చేయించేందుకు అనుమతి లభించడంతో అందరూ ఎంతో సంబర పడ్డారు. కానీ ఈ ప్రతిపాదనలు పట్టాలెక్కకుండానే కనుమరుగయ్యాయి. 2014లో సర్వే పూర్తి! 2010లో రైల్వే బడ్జెట్‌లో రెండు లైన్లకు లభించిన సర్వే అనుమతుల దృష్ట్యా సర్వే అయితే పూర్తి చేశారు. 138 కిలోమీటర్ల బోధన్‌–బీదర్‌ రైల్వే లైన్‌ కోసం 2011 ఏప్రిల్‌లో ప్రారంభమైన సర్వే 2014లో పూర్తయింది. బోధన్‌ నుంచి రుద్రూర్, వర్ని, నస్రుల్లాబాద్, బాన్సువాడ, పిట్లం మీదుగా నారాయణఖేడ్, బీదర్‌ వరకు వారు సర్వే నిర్వహించారు. సర్వే ప్రకారం మార్గమధ్యలో భారీ వంతెనలు లేవని తేలింది. కేవలం రూ.1,029 వ్యయంతో లైన్‌ వేయవచ్చని అధికారులు తేల్చారు. బాన్సువాడ–బోధన్‌ ప్రధాన రోడ్డుకు ఆవలి వైపు సుమారు 3 కిలోమీటర్ల వ్యత్యాసంలో సర్వే నిర్వహించి, హద్దు రాళ్లను పాతారు. ఈ మేరకు హద్దు రాళ్లు ఆయా పంట పొలాలు, అడవుల్లో ఇప్పటికీ ఉన్నాయి.  దశల వారీగా నిర్వహించిన ఈ సర్వేలో మార్గ మధ్యలో వచ్చే నదులపై వంతెనలు, ఎత్తుపల్లాలు ఇతర అన్ని రకాల భౌగోళిక పరిస్థితులపై అంచనా వేసి రైల్వే శాఖ ఉన్నతాధికారులకు నివేదికను సమర్పించారు. నిధుల కేటాయింపుపై సందిగ్ధత 2014లో సర్వే పూర్తవడంతో ఏటా రైల్వే బడ్జెట్‌లో ఎంతో కొంత నిధులు మంజూరవుతాయని అంతా భావించారు. కానీ ఇప్పటివరకు మూడు బడ్జెట్లు పూర్తయినా పైసా కూడా మంజూరు కాలేదు. తెలంగాణలోని కొన్ని కొత్త మార్గాల్లో మెండుగా నిధులు కేటాయించిన కేంద్రం.. దశాబ్దాలుగా పెండింగ్‌లో ఉన్న బోధన్‌–బీదర్‌ రైల్వే లైన్‌కు మొండి చేయి చూపింది. అయితే, రాష్ట్ర ప్రభుత్వం స్పందిస్తేనే ఈ లైన్‌ పట్టాలెక్కే అవకాశముంది. ఈ మార్గంలో సర్వే పూర్తయినందున రాష్ట్రప్రభుత్వం 50 శాతం నిధులు కేటాయిస్తే, మరో 50శాతం కేంద్రం కేటాయించనుంది. సుమారు రూ.2వేల కోట్ల అంచనా వ్యయం కాగా, ఇందులో 50శాతం నిధులను రాష్ట్రం కేటాయిస్తేనే కేంద్రం తన వాటా 50 శాతం నిధులు మంజూరు చేయనుం దని అధికారులు చెబుతున్నారు. కానీ రాష్ట్ర ప్రభుత్వం నుంచి మాత్రం స్పందన కరువైంది. ఇప్పటివరకు ప్రవేశపెట్టిన బడ్జెట్‌లలో రూపా యి కూడా కేటాయించలేదు. త్వరలో ప్రవేశపెట్టనున్న బడ్జెట్‌లోనైనా నిధులు కేటాయిం చాలని ఈ ప్రాంత వాసులు కోరుతున్నారు. 50 శాతం నిధులిస్తే.. బోధన్‌–బీదర్‌ రైలు మార్గానికి సర్వే పూర్త యింది. రూ.2వేల కోట్ల తో ఈ ప్రాజెక్టు చేపట్టా ల్సి ఉంది. మారిన నిబంధనల ప్రకారం రాష్ట్ర ప్రభుత్వం 50 శాతం నిధులు కేటాయిస్తే 50 శాతం నిధులను కేంద్రం మంజూరు చేస్తుంది. కేంద్ర, రాష్ట్ర ప్రభుత్వాల భాగస్వామ్యంతోనే ప్రాజెక్టు ముందుకు సాగుతుంది. రాష్ట్ర ప్రభుత్వం నిధుల కేటాయింపుపైనే ప్రాజెక్టు భవితవ్యం ఆధారపడి ఉంది.  – బీబీ పాటిల్, జహీరాబాద్‌ ఎంపీ   ♦ బోధన్‌–బీదర్‌ రైల్వేలైన్‌ ప్రతిపాదించింది    1938 నిజాం హయాంలో ♦ రైల్వే లైన్‌ పొడవు    138 కిలో మీటర్లు                  (తెలంగాణలో 90 కి.మీ.,  మహారాష్ట్ర, కర్ణాటకలో 48 కి.మీ.) ♦ లబ్ధి పొందే జిల్లాలు    నిజామాబాద్, కామారెడ్డి, సంగారెడ్డి, బీదర్‌ ♦ సర్వే పూర్తయినది    2014లో ♦ అప్పట్లో అంచనా వ్యయం    రూ.1,029 కోట్లు ♦ ప్రస్తుత అంచనా    రూ.2 వేల కోట్లు 


 ఇంతకుముందు ప్రవేశపెట్టిన డబుల్ డెకర్ రైళ్లకు ఆదరణ లభించకపోవడంతో.. భారతీయ రైల్వేలు సరికొత్త ప్రయోగం చేస్తున్నాయి. ఎక్కువ డిమాండ్ ఉండే రూట్లలో పూర్తి ఏసీ, వై-ఫై సదుపాయంతో కొత్తగా ఉత్కృష్ట్ డబుల్ డెకర్ ఏఎక్స్ యారీ (ఉదయ్) రైళ్లను నడిపించనున్నాయి. ఇవి జూలై నుంచిప్రారంభం అవుతాయని రైల్వేశాఖ తెలిపింది. ఒక్కో కోచ్‌లో వెనక్కి వాలగలిగేలా 120 సీట్లు ఉంటాయి. ప్రయాణసమయంలో ఎప్పుడు కావాలంటే అప్పుడు తీసుకునేలా ఆటోమేటిక్ టీ/కాఫీ/ కూల్ డ్రింక్ వెండింగ్ మిషన్లు కూడా ప్రతి బోగీలో ఉంటాయి. ఢిల్లీ-లక్నో లాంటి బాగా డిమాండ్ ఉండే మార్గాల్లో ఇవి నడుస్తాయి. మామూలు రైళ్లలో ఉండే థర్డ్ ఏసీ కంటే వీటిలో చార్జి తక్కువగానే ఉంటుందని అంటున్నారు.
 
 ప్రతి బోగీలోనూ ఎల్‌సీడీ స్క్రీన్లు, వై-ఫై స్పీకర్ సిస్టం కూడా ఉంటాయి. మామూలు రైళ్ల కంటే సీట్ల సామర్థ్యం 40 శాతం ఎక్కువగా ఉండటంతో రద్దీని తట్టుకోడానికి ఇవి ఉపయోగపడతాయని రైల్వే అధికారులు చెబుతున్నారు. అయితే.. రాత్రిపూట ప్రయాణించే రైళ్లయినా వీటిలో బెర్తులు లేకపోవడం మాత్రం కొంత ఇబ్బందికరమే అంటున్నారు. దాంతో అదనపు సదుపాయాలతో ప్రయాణాన్ని సుఖవంతం చేస్తున్నామని అధికారులు తెలిపారు. రాత్రిపూట వెనక్కి వాలి, కాళ్లు చాపుకునేలా తగినంత లెగ్ స్పేస్ ఉంటుంది. గంటకు 110 కిలోమీటర్ల వేగంతో వెళ్లే ఈ రైళ్ల గురించి 2016-17 రైల్వే బడ్జెట్‌లో ప్రకటించారు.


 రాజధానికి రైలు మార్గం
 రూ.2,680 కోట్ల నిధులు కేటాయింపు
 
 విజయవాడ – అమరావతి – గుంటూరు కలిపి రైల్వే లైను
 
 106 కిలోమీటర్ల మేర నిర్మాణానికి గ్రీన్‌సిగ్నల్‌
 
 నడికుడి – శ్రీకాళహస్తి పనులకు రూ.340 కోట్లు మంజూరు
 
 తెనాలి–గుంతకల్‌ డబ్లింగ్‌ పనులకు రూ.174 కోట్లు
 
 మచిలీపట్నం పోర్టు వరకు గుడివాడ రైల్వే లైన్‌ పొడిగింపు
 
 కాజీపేట–విజయవాడ మధ్య నాలుగో లైన్‌ సర్వేకు అనుమతి
 
 సాక్షి, విజయవాడ : రాష్ట్ర నూతన రాజధాని అమరావతి ప్రాంతానికి రైలు మార్గం ఖరారైంది. రాజధానిగా ప్రకటించినప్పటి నుంచి ప్రభుత్వం చేసిన వినతులకు ఎట్టకేలకు కేంద్ర రైల్వే శాఖ సానుకూలంగా స్పందించింది. ఈ క్రమంలో రైల్వే బడ్జెట్‌లో గుంటూరు, కృష్ణా జిల్లాలకు పలు ప్రాజెక్టులకు సంబంధించి నిధులు కేటాయించారు. విజయవాడ, గుంటూరు రైల్వే డివిజన్‌ల పరిధిలో ఇప్పటికే కొన్ని పనులు కొనసాగుతున్నాయి. వాటికి నిధుల కేటాయింపుతో పాటు, కొత్త ప్రాజెక్టులు మంజూరు చేశారు. ప్రధానంగా విజయవాడ – అమరావతి – గుంటూరులను కలుపుతూ 106 కిలోమీటర్ల మేర రైల్వే లైను నిర్మాణానికి గ్రీన్‌ సిగ్నల్‌ ఇచ్చారు.
 
 స్వల్పంగా పెరిగిన కేటాయింపులు...
 కేంద్ర ఆర్థిక మంత్రి అరుణ్‌ జైట్లీ బుధవారం సాధారణ బడ్జెట్‌తో పాటు రైల్వే బడ్జెట్‌ను పార్లమెంటులో ప్రవేశపెట్టారు. గుంటూరు, కృష్ణా జిల్లాల పార్లమెంటు సభ్యులు పలు ప్రతిపాదనలను రైల్వే బోర్డుకు, కేంద్ర మంత్రికి అందజేశారు. ఈ క్రమంలో వాటిలో కొంతమేర కేటాయింపులు జరిగాయి. గత ఏడాది కంటే కేటాయింపుల సంఖ్య కొంత పెరిగింది. గత రైల్వే బడ్జెట్‌లో రాష్ట్రానికి రూ.2,195 కోట్ల విలువైన ప్రాజెక్టులు కేటాయించగా, ఈసారి రూ.3,406 కోట్ల నిధులు కేటాయించారు.
 
 రాజధానికి రైల్వే లైన్‌...
 రైల్వే బడ్జెట్‌లో ప్రధానంగా రాజధాని ప్రాంతమైన అమరావతికి రైలు మంజూరైంది. సీఎం చంద్రబాబు సహా రెండు జిల్లాల ఎంపీలు రైలు మార్గం కోసం అనేక పర్యాయాలు వినతి పత్రాలు ప్రభుత్వానికి అందజేశారు. విజయవాడలో నిర్మించనున్న మెట్రో రైలు మార్గాన్ని రాజధాని వరకు కొనసాగించే విషయంపైనా తర్జనభర్జనలు, పరిశీలన జరిగింది. ఈ పరిణామాల క్రమంలో రైల్వే బడ్జెట్‌లో కొత్త రైలు మార్గానికి నిధులు మంజూరయ్యాయి. విజయవాడ నుంచి రాజధాని ప్రాంతమైన అమరావతి (తుళ్లూరు), అక్కడి నుంచి గుంటూరుకు సర్క్యూట్‌ రైలు తరహాలో రాకపోకలు నిర్వహించడానికి వీలుగా రైల్వే లైను నిర్మించనున్నారు. మొత్తం 106 కిలోమీటర్ల నిర్మించే లైనుకు రూ.2,680 కోట్లు నిర్మాణ వ్యయంగా నిర్ణయించి కేటాయింపులు జరిపారు. ప్రాజెక్టు ఖరారు చేసి బడ్జెట్‌లో కేటాయింపులు జరగడంతో మరో రెండు నెలల కాలవ్యవధిలో టెండర్ల దశ దాటి పనులు మొదలయ్యే అవకాశం ఉంటుంది.
 
 నడికుడి లైనుకు రూ.340 కోట్లు
 నిర్మాణ పనులు ప్రారంభమైన నడికుడి– శ్రీకాళహస్తి రైల్వేలైనుకు 2017–18 సంవత్సరానికి రూ.340 కోట్లు కేటాయించారు. కేంద్ర, రాష్ట్ర ప్రభుత్వాల భాగస్వామ్యంతో రూ.2,330 కోట్ల అంచనా వ్యయంతో ప్రారంభమైన ఈ ప్రాజెక్టుకు గత రెండు బడ్జెట్లు కలిపి రూ.290 కోట్లు కేటాయించారు. దీనిలో భాగంగా గుంటూరు జిల్లాలో 42 కిలోమీటర్ల మేర నిర్మించనున్న రైలు మార్గానికి సంబంధించి ఇద్దరు కాంట్రాక్టర్లకు రెండు వర్కులుగా విభజించి కేటాయించారు. అయితే స్థానిక అధికార పార్టీ ప్రజాప్రతినిధి మామూళ్ళ వేధింపులతో ప్రాజెక్టు పనులు పూర్తిగా నిలిచిపోయాయి. ఈ వ్యవహారం కేంద్ర రైల్వే శాఖ దృష్టికి వెళ్ళింది. గత నెల రోజులుగా పనులు నిలిచిపోయిన క్రమంలో బడ్జెట్‌లో కేటాయింపులు జరగడం ప్రాధాన్యత సంతరించుకుంది.
 
 కేటాయింపులు ఇవే...
 విజయవాడ – గుడివాడ లైనును మచిలీపట్నం పోర్టు వరకు పొడిగించాలని నిర్ణయించి దానికి రూ.130 కోట్లు కేటాయించారు. దీనివల్ల మచిలీపట్నం పోర్టు నుంచి సరకు రవాణా సులభం అవుతుంది. పది కిలోమీటర్ల మేర నిర్మించే ఈ రైలు మార్గాలు కేంద్ర, రాష్ట్ర ప్రభుత్వాలు సంయుక్తంగా చేస్తాయి.
 
 ► కాజీపేట–విజయవాడ మధ్య మూడో లైను ఇప్పటికే మూడొంతులు పూర్తయింది. దీనికి రూ.100 కోట్లు కేటాయించారు. అంతేగాక కాజీపేట–విజయవాడ మధ్య నాలుగో లైను ఏర్పాటుకు సర్వే చేయించేందుకు రైల్వేశాఖ గ్రీన్‌ సిగ్నల్‌ ఇచ్చింది.
 ► విజయవాడ – భీమవరం – నిడదవోలు మధ్య 221 కిలోమీటర్ల డబ్లింగ్, ఎలక్ట్రిఫికేషన్‌కు రూ.122 కోట్లు కేటాయించారు.
 ► విజయవాడ – గూడూరు మధ్య 287.67 కిలోమీటర్ల మేర మూడో ట్రాక్‌ నిర్మాణానికి సంబంధించి రూ.100 కోట్లు కేటాయింపు
 ► కొండపల్లి – కిరండోల్‌ మధ్య రైల్వే లైనుకు అనుమతి లభించింది.
 ► కోటిపల్లి– నర్సాపురం– మచిలీపట్నం మార్గానికి రూ.430 కోట్లు కేటాయించారు.
 ► గుంటూరు– తెనాలి రైల్వే లైన్‌ మధ్య 24.38 కిలోమీటర్లు డబ్లింగ్, ఎలక్ట్రిఫికేషన్‌ పనులకు రూ.36 కోట్లు కేటాయింపు
 ► గుంటూరు  – గుంతకల్లు మధ్య 463 కిలోమీటర్ల మేర డబ్లింగ్‌ పనులకు రూ.124 కోట్ల కేటాయింపు
 ► రాయనపాడు రైల్వే కోచ్‌ మెయింటెనెన్స్‌ పనులకు రూ.8.7 కోట్లు కేటాయింపు
 ► గుంటూరు రైల్వే డివిజన్‌ పరిధిలో 72 రైల్వే స్టేషన్‌లలో  సుమారు రూ.1.2 కోట్ల నిధులతో ఎల్‌ఈడీ లైట్ల ఏర్పాటు
 ► రూ.79 కోట్లతో జగ్గయ్యపేట, మేళ్ళచెరువు, జాన్‌ఫహాడ్‌ల మధ్య 24 కిలోమీటర్ల రైల్వే లైను నిర్మాణానికి అనుమతి


 తాజా రైల్వే బడ్జెట్‌లో కేటాయింపు
 
 సాక్షి, అమరావతి: ఆంధ్రప్రదేశ్‌ నూతన రాజధాని అమరావతిని అనుసంధానిస్తూ నూతన రైల్వే మార్గం నిర్మాణానికి తాజా రైల్వే బడ్జెట్‌లో రూ.2,680 కోట్లు మంజూరయ్యాయి. ఆ మేరకు విజయవాడ–అమరావతి–గుంటూరులను కలుపుతూ 106 కిలోమీటర్ల మేరకు రైల్వే ట్రాక్‌ నిర్మించనున్నారు. 2016–17 బడ్జెట్‌లో ఈ రైల్వే లైన్‌కు సర్వే మంజూరవగా.. ఇటీవలే రైల్‌ వికాస్‌ నిగమ్‌ లిమిటెడ్‌ (ఆర్‌వీఎన్‌ఎల్‌) సర్వే పూర్తి చేసి రైల్వే బోర్డుకు నివేదిక అందించింది.
 
 ఈ నేపథ్యంలో తాజా బడ్జెట్‌లో ఈ మార్గానికి  నిధులు కేటాయించడంతో నాలుగేళ్లలో రైల్వే లైన్‌ నిర్మాణం పూర్తి కానుంది. ఏపీ ప్రభుత్వం రైల్వేశాఖతో ఇటీవలే కుదుర్చుకున్న ఒప్పందం ప్రకారం వివిధ  ప్రాజెక్టులకు కేటాయింపులు జరిగాయి. ఆ మేరకు నడికుడి–శ్రీకాళహస్తి, కడప–బెంగళూరు, కోటిపల్లి–నర్సాపురం, అమరావతికి రైల్వే కనెక్టివిటీ... ఈ నాలుగు ప్రాజెక్టులకు నిధులు కేటాయించారు.


 రాష్ట్ర పరిధిలోని రైల్వే లైన్లకు భారీగా నిధులు
 • మొత్తంగా ప్రాజెక్టులకు రూ.1,729 కోట్లు
 • సీఎం కలల ప్రాజెక్టు కొత్తపల్లి– మనోహరాబాద్‌కి రూ.350 కోట్లు
 • బల్లార్షా–కాజీపేట–విజయవాడ మూడో లైన్‌కు రూ.260 కోట్లు
 
 సాక్షి, హైదరాబాద్‌: ఈ సారి రైల్వే బడ్జెట్‌లో రాష్ట్రానికి తగినంత ప్రాధాన్యం లభించింది. పలు పెండింగ్‌ ప్రాజెక్టులు సహా కొత్త రైల్వే మార్గాలకు సైతం ఆశించిన స్థాయిలో నిధులు కేటాయించారు. ముఖ్యమంత్రి కె.చంద్రశేఖర్‌రావు కలల ప్రాజెక్టు అయిన కొత్తపల్లి–మనోహరాబాద్‌ (కరీంనగర్‌–హైదరాబాద్‌) ప్రాజెక్టుకు రూ.350 కోట్లు ఇవ్వడం గమనార్హం. మొత్తంగా దక్షిణ మధ్య రైల్వేకు రూ.5,135 కోట్లను కేటాయించగా.. అందులో తెలంగాణ రాష్ట్ర పరిధిలోని ప్రాజెక్టులకు రూ.1,729 కోట్లు ఇచ్చారు. మొత్తంగా రైల్వే బడ్జెట్‌లో ఒక్క కొత్త రైలును ప్రకటించకున్నా.. కొత్త లైన్ల ఏర్పాటు, ఉన్న లైన్లకు అదనంగా రెండు, మూడు లైన్ల నిర్మాణానికి భారీగా నిధులు కేటాయించడం గమనార్హం.
 
 కొత్త పంథాలో..
 దాదాపు తొమ్మిది దశాబ్దాల ఆనవాయితీని పక్కనపెడుతూ సాధారణ బడ్జెట్‌లోనే రైల్వే బడ్జెట్‌ను కలిపేసిన కేంద్రం.. కేటాయింపుల్లోనూ కొత్త పంథా చూపింది. అయితే బడ్జెట్‌లో రైల్వేకు సంబంధించి ఏయే ప్రాజెక్టులకు ఎన్ని నిధులిచ్చారనే పూర్తి వివరాలను పేర్కొనలేదు. పింక్‌బుక్‌గా వ్యవహరించే ఈ పద్దుల వివరాలను శుక్రవారం పార్లమెంటుకు సమర్పించింది. దీంతో దక్షిణ మధ్య రైల్వే జనరల్‌ మేనేజర్‌ వినోద్‌కుమార్‌ యాదవ్‌ ఆ వివరాలను శుక్రవారం సాయంత్రం వెల్లడించారు. ఆయన వెల్లడించిన ప్రకారం.. దక్షిణ మధ్య రైల్వేకు ఈసారి మొత్తంగా రూ.5,135 కోట్లను కేటాయించారు. ఇందులో తెలంగాణ పరిధిలోని ప్రాజెక్టులకు రూ.1,729 కోట్లు కేటాయించారు. ముఖ్యంగా కొత్త లైన్లు, రెండు, మూడో లైన్‌ నిర్మాణ పనులకు ఎక్కువ నిధులు ఇచ్చారు. బల్లార్షా–కాజీపేట–విజయవాడ మూడో లైన్‌ నిర్మాణానికి రూ.260 కోట్లు, మునీరాబాద్‌–మహబూబ్‌నగర్‌ లైన్‌కు రూ.300 కోట్లు, అక్కన్నపేట–మెదక్‌కు రూ.160 కోట్లు కేటాయించారు. దీంతో ఇంతకాలం నత్తనడకన జరుగుతున్న ఈ పనుల్లో వేగం పెరగబోతోంది.
 
 సీఎం కలల ప్రాజెక్టుకు రూ.350 కోట్లు
 తెలంగాణలో కీలకమైన కరీంనగర్, సిద్దిపేట పట్టణాలకు రాజధానితో రైల్వే అనుసంధానం లేదు. సిద్దిపేటకు అసలు రైల్వే మార్గమే లేదు. దీంతో సికింద్రాబాద్‌ నుంచి సిద్దిపేట మీదుగా కరీంనగర్‌కు రైల్వే లైన్‌ నిర్మించాలంటూ కేసీఆర్‌ రెండు దశాబ్దాలుగా డిమాండ్‌ చేస్తున్నారు. దాదాపు 13 ఏళ్ల క్రితం కేసీఆర్‌ కేంద్రమంత్రిగా ఉన్న సమయంలో ఈ ప్రాజెక్టుకు రైల్వే బడ్జెట్లో చోటు దక్కినా.. ముందుకు సాగలేదు. ఇటీవల సీఎం కేసీఆర్‌ గట్టిగా ప్రయత్నించడంతో కదలిక వచ్చింది. గతేడాది ప్రధాని మోదీ స్వయంగా ఈ రైల్వే లైన్‌ పనులకు శంకుస్థాపన చేశారు. తాజా బడ్జెట్‌లో ఏకంగా రూ.350 కోట్లు కేటాయించారు. హైదరాబాద్‌ శివార్లలోని మనోహరాబాద్‌ నుంచి ప్రారంభమయ్యే ఈ కొత్త లైన్‌.. గజ్వేల్, సిద్ధిపేట, సిరిసిల్లల మీదుగా కరీంనగర్‌ శివారులోని కొత్తపల్లి వరకు 148.9 కిలోమీటర్లు కొనసాగుతుంది.
 
 బల్లార్షా–కాజీపేట–విజయవాడ నాలుగో లైన్‌
 అత్యంత రద్దీ మార్గంగా పేరున్న బల్లార్షా–కాజీపేట–విజయవాడ మార్గంలో ప్రస్తుతం మూడో లైన్‌ నిర్మాణం జరుగుతోంది. అది అందుబాటులోకి రావటానికి మరో రెండేళ్లు పట్టనుంది. అయితే ఆ మార్గంలో నాలుగో లైన్‌ కూడా అవసరమని భావించిన రైల్వే దానికి సర్వే పనులు చేపట్టనుంది. ఇక ఈ ఏడాదితో పూర్తికానున్న పెద్దపల్లి– కరీంనగర్‌–నిజామాబాద్‌ (178 కి.మీ.) లైనుకు రూ.25 కోట్లు కేటాయించారు. ఈ ఏడాదిలోనే ఈ మార్గంలో పూర్తి స్థాయిలో రైళ్లు పరుగెత్తనున్నాయి.
 
 టీకాస్‌కు మరిన్ని నిధులు
 రైళ్లు ఢీ కొనకుండా అభివృద్ధి చేస్తున్న ‘ట్రెయిన్‌ కొలిజన్‌ అవాయిడెన్స్‌ సిస్టం (టీకాస్‌)’ను మరిన్ని చోట్లకు విస్తరించనున్నారు. దీనిని ఇప్పటికే సికింద్రాబాద్‌– వాడి–వికారాబాద్‌–బీదర్‌ సెక్షన్లలో వినియోగి స్తుండగా.. తాజాగా సికింద్రాబాద్‌– గద్వాల–డోన్‌– గుంతకల్‌ మార్గానికి విస్తరించారు. ఇందుకు రూ.120 కోట్లు కేటాయించారు.
 
 కొత్త మార్గం
 ఆర్మూర్‌–ఆదిలాబాద్‌ వయా నిర్మల్‌ (220 కి.మీ). అంచనా వ్యయం రూ.2,800 కోట్లు. (రాష్ట్ర ప్రభుత్వ భాగస్వామ్యంతో ప్రాజెక్టు)
 రైళ్ల క్రాసింగ్స్‌ కోసం కొత్త స్టేషన్ల నిర్మాణం: (అంచనా రూ.15 కోట్లు)
 – వనపర్తి రోడ్డు–కౌకుంట్ల; మానవపాడు–అలంపూర్‌ రోడ్డు; ఇటిక్యాల–మానవపాడు
 
 కొత్త లైన్ల కోసం సర్వే
 ⇔ బొల్లారం–ముద్ఖేడ్‌ డబ్లింగ్‌ (235 కి.మీ)
 ⇔ కాజీపేట–బల్లార్షా నాలుగో లైన్‌(234 కి.మీ)  
 ⇔ కాజీపేట–విజయవాడ నాలుగో లైన్‌ (219 కి.మీ.)
 ⇔ మంచిర్యాల–గడ్చిరోలి కొత్త లైన్‌ (115 కి.మీ.)
 
 
 భద్రతా పరమైన పనులు
 ⇔ 12 రైల్వే ఓవర్‌ బ్రిడ్జిలు (ఆర్‌ఓబీలు), 7 రైల్వే అండర్‌ బ్రిడ్జిలు (ఆర్‌యూ బీ). అంచనా వ్యయం రూ.941 కోట్లు. రైల్వే వాటా రూ.383 కోట్లు, రాష్ట్ర ప్రభుత్వ వాటా రూ.558 కోట్లు
 ⇔ 9 కొత్త వంతెనలకు రూ.31 కోట్లు
 ⇔ లెవల్‌ క్రాసింగ్స్, ఇంటర్‌లాకింగ్‌ పనులకు రూ.69.5 కోట్లు


 న్యూఢిల్లీ :
  తెలంగాణ, ఆంధ్రప్రదేశ్‌లోని రైల్వే ప్రాజెక్టులకు బడ్జెట్లో నిధులు కేటాయించారు. బుధవారం ఆర్థిక మంత్రి అరుణ్‌ జైట్లీ ప్రవేశపెట్టిన సాధారణ బడ్జెట్‌లో దక్షిణ మధ్య రైల్వేకు రూ.5,135 కోట్లు ప్రకటించారు. శుక్రవారం సభకు సమర్పించిన అనంతరం పూర్తి వివరాలను రైల్వే శాఖ వెల్లడించింది. గత బడ్జెట్‌లో తెలంగాణకు కేవలం రూ.601 కోట్లు మాత్రమే కేటాయించగా ఈసారి రూ.1,729 కోట్లు, ఆంధ్రప్రదేశ్‌కు గత బడ్జెట్‌లో రూ.2,195 కోట్లు కేటాయించగా ఈసారి రూ.3,406 కోట్లు కేటాయించటం విశేషం.
 
 దక్షిణ మధ్య రైల్వేలో పలు ప్రాజెక్టులకు బడ్జెట్లో మంజూరైన నిధులు...
 
 -నడికుడి- శ్రీకాళహస్తి మధ్య రైల్వేలైన్‌కు రూ.340కోట్లు
 
 -కడప-బెంగళూరు మధ్య రైల్వేలైన్‌కు రూ.240కోట్లు
 
 -కాకినాడ-పిఠాపురం మధ్య రైల్వేలైన్‌కు రూ.150కోట్లు
  
 -గుంటూరు-గుంతకల్‌ మధ్య రైల్వే డబ్లింగ్‌ పనులకు రూ.124కోట్లు
 
 -కోటిపల్లి-నర్సాపూర్ రైల్వేలైన్‌కు రూ.430 కోట్లు
 
 -ఓబులవారిపల్లె-కృష్ణపట్నం పోర్టు రైల్వేలైన్‌కు రూ.100 కోట్లు
 
 -గుంటూరు-తెనాలి రైల్వేలైన్ డబ్లింగ్ పనులకు రూ.50కోట్లు
 
 -తిరుపతిలో విశ్రాంతి గది నిర్మాణానికి రూ.7 కోట్లు
 
 -గూడూరులో ఫుట్ ఓవర్ బ్రిడ్జికి రూ.2.7 కోట్లు
 
 -విజయవాడ-గుడివాడ లైన్ మచిలీపట్నం పోర్టు వరకు పొడిగింపునకు రూ.130 కోట్లు
 
 -తిరుచానూరు రైల్వేస్టేషన్ అభివృద్ధికి రూ.6 కోట్లు
 
 -కాజీపేట- విజయవాడ మూడో లైన్కు రూ.100 కోట్లు
 
 -కాజీపేట-విజయవాడ మధ్య నాలుగో లైన్ సర్వేకు అనుమతి
 
 - కొండపల్లి-కిరండోల్ మధ్య రైల్వే లైన్ సర్వేకు అనుమతి
 
 - మంత్రాలయం-కర్నూలు మధ్య రైల్వేలైన్ సర్వేకు అనుమతి
 
 - హిందూపురం- చిత్రదుర్గం మధ్య రైల్వేలైన్ సర్వేకు అనుమతి
 
 -మంత్రాలయం-కర్నూలు మధ్య రైల్వే లైన్‌ సర్వేకు అనుమతి
 
 - ఏపీ, తెలంగాణలో 4 రైల్వే క్రాసింగ్‌లకు రూ.19 కోట్లు
 
 -మునిరాబాద్- మహబూబ్ నగర్ రైల్వే లైన్కు రూ. 300 కోట్లు
 
 -మనోహరాబాద్- కొత్తపల్లి రైల్వే లైన్కు రూ.350 కోట్లు
 
 -అక్కన్న పేట-మెదక్ రైల్వే లైన్కు రూ. 196 కోట్లు
 
 -భద్రాచలం-సత్తుపల్లి రైల్వే లైన్కు రూ. 300 కోట్లు
 
 -కరీంనగర్-పెద్దపల్లి రైల్వే లైన్కు రూ.120 కోట్లు


 ఏం మాట్లాడుతున్నారు?
 పెద్ద నోట్ల రద్దుతో తలెత్తిన కష్టాలు తాత్కాలికమేనని, ఆర్థిక వ్యవస్థపై ఇది ప్రభావం చూపలేదని అరుణ్‌ జైట్లీ అంటున్నారు. ఆయన ఏం చూసి ఇలా మాట్లాడుతున్నారో అర్థం కావడం లేదు. బడ్జెట్‌పై నేను వెంటనే స్పందించలేను.
 – మన్మోహన్‌సింగ్‌
 
 దశ, దిశ లేదు..
 ఈ బడ్జెట్‌ తీవ్ర నిరా శకలిగించేలా ఉంది. దశ, దిశ లేదు. రైతులకు మేలు కలిగించే చర్యలేవీ లేవు. యువత కు ఉద్యోగ కల్పన విషయంలో భరోసా ఎక్కడా కనిపించలేదు. జైట్లీ కవితలు చదివి సరిపెట్టారు. ఏమాత్రం ముందు చూపులేని బడ్జెట్‌ ఇది.    
 – రాహుల్‌ గాంధీ
 
 అంతా డొల్ల
 బడ్జెట్‌ అంతా వట్టి డొల్ల. బడుగు బలహీనవర్గాలకు ఎలాంటి మేలు జరగదు. రైల్వే మంత్రి రైల్వే బడ్జెట్‌ ప్రవేశపెట్టనప్పుడు ఆయన ఆ పదవిలో ఎలా కొనసాగుతారు? పనికిమాలిన నిర్ణయాలు తీసుకోవడంలో మోదీ, ట్రంప్‌ కవల పిల్లల్లా ఉన్నారు.
 – లాలూ ప్రసాద్‌ యాదవ్‌
 
 నిరాశ కలిగించింది
 బడ్జెట్‌ నిరాశకలిగించింది. పెద్ద నోట్ల రద్దు నేపథ్యంలో ఎంతమొత్తంలో నల్లధనాన్ని రాబట్టారో వివరాలు ఇవ్వలేదు. నోట్ల రద్దును సమర్థించిన వారిని నిరాశకు గురిచేశారు. సాధారణ బడ్జెట్‌తో రైల్వే బడ్జెట్‌ను కలిపేసి కేంద్ర ప్రభుత్వం రైల్వేలను నాశనం చేసిందని అన్నారు.
 – నితీశ్‌ కుమార్‌
 
 అంతా గిమ్మిక్కే
 బడ్జెట్‌ అంతా గిమ్మిక్కే. ఉద్యోగ, ఉపాధి కల్పనకు సంబంధించి నిర్ధిష్ట చర్యలు లేవు. పైగా ప్రభుత్వం ఆదా యం పెంచుకోవడానికి పరోక్ష పన్నులను పెంచడంతో ప్రజలపై భారం పెరుగుతుం ది. ప్రధాని బాటలో జైట్లీ పయనిస్తున్నారు. మాటల గారడీకే పరిమితమయ్యారు.
 – సీతారాం ఏచూరి
 
 పనికిమాలిన బడ్జెట్‌
 దారీ, తెన్నూ లేని పనికిమాలిన బడ్జెట్‌ ఇది. దేశాభివృద్ధికి దోహదపడే చర్యలు లేవు. అంతా డొల్ల. మోదీ ప్రభుత్వం ప్రజల విశ్వసనీయతను కోల్పోయింది.  ప్రజలకు నోట్ల రద్దు కష్టాలు ఇంకా తీరలేదు. తక్షణం ఆంక్షలు అన్నీ ఎత్తివేయాలి.
 – మమతా బెనర్జీ
 
 మౌలికానికి 3.96 లక్షల కోట్లు
 న్యూఢిల్లీ: మౌలిక సదుపాయాల వృద్ధికి బడ్జెట్‌లో పెద్దపీట వేసినట్లు ఆర్థిక మంత్రి అరుణ్‌ జైట్లీ తెలిపారు. రికార్డు స్థాయిలో మొత్తం రూ. 3,96,135 కోట్లు కేటాయించామని, కేంద్ర ప్రభుత్వానికి ఇది అత్యంత ప్రాధాన్యతా రంగమని చెప్పారు. రైల్వేలు, రోడ్లు, నదులు దేశానికి జీవనాడి వంటివని అన్నారు. మౌలిక సదుపాయాలకు 2016–17 బడ్జెట్‌ అంచనాలు రూ. 3,48,952 కోట్లు కాగా సవరించిన అంచనాలు రూ. 3,58,634 కోట్లు అని తెలిపారు.  మౌలికసదుపాయాల రంగంలో భారీ కేటాయింపులతో దేశంలో ఆర్థిక కార్యకలాపాలు భారీగా పెరగనున్నాయని, దీనివల్ల మరిన్ని ఉపాధి అవకాశాలు లభిస్తాయని పేర్కొన్నారు.
 
 ప్రాంతీయ విమానం.. పైపైకి
 న్యూఢిల్లీ: ప్రాంతీయంగా విమానయాన అనుసంధాన పథకానికి సర్వీస్‌ ట్యాక్స్‌ మినహాయించారు. ఈ మినహాయింపు ఏడాది పాటు అమల్లో ఉంటుంది. ప్రయాణికులకు సదుపాయంగా తీర్చిదిద్దడం, నష్టాలను తగ్గించడం వంటి లక్ష్యాలతో ప్రాంతీయ విమానాశ్రయాలను అనుసంధానిస్తూ పౌర విమానయాన మంత్రిత్వ శాఖ ఈ ప్రాంతీయ విమానయాన అనుసంధాన పథకాన్ని ప్రారంభించింది. ఈ పథకం కింద వయబిలిటీ గ్యాప్‌ ఫండింగ్‌ (వీజీఎఫ్‌) ప్రోత్సాహం లభిస్తుంది. ఈ వీజీఎఫ్‌పై విధించే 14శాతం సర్వీస్‌ ట్యాక్స్‌ను మినహాయిస్తున్నట్లు 2017–18 బడ్జెట్‌లో ఆర్ధిక మంత్రి అరుణ్‌జైట్లీ ప్రకటించారు.
 
 స్వచ్ఛ ఇంధనానికి దన్ను
 న్యూఢిల్లీ: స్వచ్ఛ, పునర్వినియోగ ఇంధనాన్ని ప్రోత్సహించేందుకు జైట్లీ తాజా బడ్జెట్‌లో పలు ప్రతిపాదనలు చేశారు. సోలార్‌ పార్క్‌ డెవలప్‌మెంట్‌ రెండో దశ కింద 20వేల మెగావాట్ల సౌరవిద్యుత్‌ను ఉత్పత్తి చేయాలని లక్ష్యంగా పెట్టుకున్నామన్నారు. సౌర, పవన విద్యుత్‌ ప్లాంట్లలో వాడే పరికరాలపై పరోక్ష పన్నులను జైట్లీ భారీగా తగ్గించారు. సోలార్‌ సెల్స్‌ / ప్యానళ్లు / మ్యాడ్యూల్స్‌ తయారీకి వాడే సోలార్‌ టెంపర్డ్‌ గ్లాస్‌పై ప్రస్తుతం 5 శాతంగా ఉన్న మూల కస్టమ్స్‌ డ్యూటీ(బీసీడీ) పూర్తిగా రద్దు చేశారు.  విద్యుత్‌ శాఖకు రూ. 13,881 కోట్లు, నూతన, పునర్వినియోగ మంత్రిత్వ శాఖకు రూ. 5,473 కోట్లు కేటాయించారు.


 తెలంగాణకు రూ.1,729 కోట్లు.. ఏపీకి రూ.3,406 కోట్లు
 
 సాక్షి, హైదరాబాద్‌: గతంలో ఎన్నడూ లేనివిధంగా బడ్జెట్‌లో దక్షిణ మధ్య రైల్వేకు ఈసారి భారీ నిధులే దక్కాయి. బుధవారం ఆర్థిక మంత్రి అరుణ్‌ జైట్లీ ప్రవేశపెట్టిన సాధారణ బడ్జెట్‌లో దక్షిణ మధ్య రైల్వేకు రూ.5,135 కోట్లు ప్రకటించారు. విడిగా రైల్వే బడ్జెట్‌లు ప్రవేశపెట్టిన సమయాల్లో ఎప్పుడూ దక్షిణ మధ్య రైల్వేకు ఇంతమొత్తం కేటాయించిన దాఖలా లేదు. అయితే ఈ నిధులను ఏయే ప్రాజెక్టులకు ఎంతెంత కేటాయించారనే వివరాలు మాత్రం వెల్లడి కాలేదు. పద్దులను ఇంకా సభకు సమర్పించనందున ఆ వివరాలను వెల్లడించలేదు.
 
 శుక్రవారం సభకు సమర్పించిన అనంతరం వాటిని బహిర్గతం చేయనున్నట్టు రైల్వే శాఖ ప్రకటించింది. కేటాయించిన మొత్తం నిధులను కొత్త ప్రాజెక్టులు, గత బడ్జెట్‌లలో ప్రకటించిన ప్రధాన లైన్ల నిర్మాణానికి కేటాయిస్తే మాత్రం ఈసారి దక్షిణ మధ్య రైల్వే పరిధిలో అభివృద్ధి పనులు వేగంగా సాగుతాయనే అభిప్రాయం వ్యక్తమవుతోంది. గత బడ్జెట్‌లో తెలంగాణకు కేవలం రూ.601 కోట్లు మాత్రమే కేటాయించగా ఈసారి రూ.1,729 కోట్లు, ఆంధ్రప్రదేశ్‌కు గత బడ్జెట్‌లో రూ.2,195 కోట్లు కేటాయించగా ఈసారి రూ.3,406 కోట్లు కేటాయించటం విశేషం.
 
 భద్రతకు ప్రాధాన్యం: జీఎం
 ప్రయాణికులకు పూర్తి భద్రతతో కూడి న రైల్వే సదుపాయం, సేవలు, నాణ్యమైన, మెరుగైన సదుపాయాలను కల్పించడమే లక్ష్యం గా కేంద్ర బడ్జెట్‌లో నిధులు కేటాయించారని దక్షిణ మధ్య రైల్వేజీఎం వినోద్‌ కుమార్‌ యాదవ్‌ తెలిపారు. రైల్వేల అభివృద్ధికి సముచితమైన నిధులను కేటాయించారని సంతృప్తి వ్యక్తం చేశారు. బడ్జెట్‌లో రైల్వే ప్రాధాన్యతలపై బుధవారం విలేకరుల సమావేశంలో ఆయన మాట్లాడారు. రైల్వేల అభివృద్ధి కోసం కేటాయిం చిన బడ్జెట్‌లో ప్రయాణికుల భద్రతకు అత్యధిక ప్రాధాన్యతనిస్తూ రైల్‌ సంరక్షణ ఫండ్‌ను ఏర్పాటు చేయడం సంతోషకరమని పేర్కొ న్నారు. దక్షిణ మధ్య రైల్వే పరిధిలో ప్రస్తుతం 355 కాపలాలేని రైల్వే క్రాసింగ్‌లు ఉన్నాయని, దశలవారీగా 2020 నాటికి మొత్తం తొలగించ నున్నట్లు వెల్లడించారు. దక్షిణ మధ్య రైల్వేలో 4,138 కోచ్‌లకు ఇప్పటి వరకు బయో టాయిలెట్‌ సదుపాయం ఉందని, మరో 3 వేల కోచ్‌లకు ఆ సదుపాయం అందుబాటులోకి వస్తుందని తెలిపారు.


 
 ఐఆర్‌సీటీసీతో చేసే టికెట్‌ బుకింగ్‌లపై నో సర్వీస్‌ చార్జి
 
 దివ్యాంగులకు ఉపయుక్తంగా
 
 ఉండేలా 500 రైల్వే స్టేషన్ల ఆధునీకరణ
 
 2020 నాటికి కాపలాలేని లెవెల్‌క్రాసింగ్‌ల తొలగింపు
 
 న్యూఢిల్లీ: 92 ఏళ్ల సంప్రదాయాన్ని కాదని ఆర్థికమంత్రి అరుణ్‌ జైట్లీ తొలిసారి రైల్వే బడ్జెట్‌ ప్రణాళికను సాధారణ బడ్జెట్లో భాగంగా బుధవారం పార్లమెంట్లో ప్రవేశపెట్టారు. గత సంవత్సరం కన్నా పదివేల కోట్ల రూపాయలు అధికంగా.. రూ. 1.31 లక్షల కోట్లతో రైల్వే బడ్జెట్‌ను జైట్లీ ప్రకటించారు. అందులో రూ. 55 వేల కోట్లను కేంద్ర ప్రభుత్వం రైల్వే శాఖకు అందిస్తుంది. ఇటీవలి వరుస ప్రమాదాల నేపథ్యంలో ఏటా రూ. 20 వేల కోట్ల చొప్పున రానున్న ఐదేళ్లలో రూ. లక్ష కోట్లతో ప్రత్యేక జాతీయ రైలు భద్రత నిధి(నేషనల్‌ రైల్‌ సేఫ్టీ ఫండ్‌)ని ఏర్పాటు చేయనున్నట్లు జైట్లీ ప్రకటించారు. ట్రాక్స్‌తో పాటు సిగ్నలింగ్‌ వ్యవస్థల ఆధునీకరణ, కాపలా లేని లెవెల్‌ క్రాసింగ్‌ల సంపూర్ణ తొలగింపు.. తదితర అవసరాలకు ఆ నిధిని వినియోగించనున్నారు.
 
 అలాగే, 2017–18 సంవత్సరంలో 3500 కిమీల మేర రైల్వే లైన్లను ఏర్పాటు చేయనున్నారు. గత సంవత్సరం అది 2800 కిమీలుగా ఉంది. రైల్వేలో ఇకపై ప్రధానంగా ప్రయాణికుల భద్రత, అభివృద్ధి పనులు, స్వచ్ఛత, ఆర్థిక, అకౌంటింగ్‌ సంస్కరణలపై దృష్టి పెట్టనున్నామని జైట్లీ చెప్పారు. కాగా, బడ్జెట్‌లోని రైల్వేలకు సంబంధించిన ప్రతిపాదనలను రైల్వే మంత్రి సురేశ్‌ ప్రభు స్వాగతించారు. ప్రతిపాదిత భద్రత నిధి ప్రమాదాలను తగ్గించడంతో పాటు రైళ్ల వేగాన్ని పెంచేందుకు ఉపకరిస్తుందన్నారు. రైల్వే బడ్జెట్‌ను విలీనం చేయడంపై స్పందిస్తూ.. ఇప్పుడు దాదాపు ప్రపంచమంతటా ఇదే విధానం అమలవుతోందన్నారు. రైలు, రోడ్డు, విమాన, జల మార్గాల అనుసంధానంతో నూతన విధానం దిశగా వెళ్తున్నామన్నారు. విలీనం వల్ల.. ఇకపై ఆర్థిక శాఖకు రైల్వే శాఖ డివిడెండ్లను చెల్లించాల్సిన అవసరం ఉండబోదని వెల్లడించారు.
 
 ఇతర ముఖ్యాంశాలు..
 ► ఈ టికెటింగ్‌ను ప్రోత్సహించేందుకు ఐఆర్‌సీటీసీ ద్వారా బుక్‌ చేసుకునే టికెట్లపై సర్వీస్‌ చార్జి మినహాయింపు. ఇప్పటివరకు స్లీపర్‌ కోచ్‌లకు రూ. 20, ఏసీ క్లాస్‌లకు రూ. 40 సర్వీస్‌ చార్జీగా ఉంది. తాజా మినహాయింపుతో ఐఆర్‌సీటీసీ ఏటా రూ. 500 కోట్ల వరకు నష్టపోనుంది.
 ► స్టాక్‌ ఎక్సేంజ్‌ల్లో రైల్వేలకు చెందిన సంస్థలైన ఐఆర్‌సీటీసీ(ఇండియన్‌ రైల్వే క్యాటరింగ్‌ అండ్‌ టూరిజం కార్పొరేషన్‌), ఐఆర్‌ఎఫ్‌సీ(ఇండియన్‌ రైల్వే ఫైనాన్స్‌ కార్పొరేషన్‌), ఇర్కాన్‌ల నమోదు.
 ► ఉపాధి అవకాశాలను మరింత పెంచేలా త్వరలో నూతన మెట్రో రైలు విధానం. మెట్రో రైలు వ్యవస్థలో ప్రైవేటు భాగస్వామ్యాన్ని పెంచేలా ప్రస్తుత చట్టాలను మార్చి కొత్త చట్టం రూపకల్పన.
 ► 500 రైల్వే స్టేషన్లలో దివ్యాంగుల కోసం లిఫ్ట్‌లు, ఎస్కలేటర్లు.. తదితర సౌకర్యాల ఏర్పాటు.
 ► రైలు సేవలకు సంబంధించిన అన్ని ఫిర్యాదులు, సేవల కొరకు త్వరలో ‘క్లీన్‌ మిత్ర’ సింగిల్‌విండో.
 ► పర్యాటక, ఆధ్యాత్మిక పర్యటనల కోసం ప్రత్యేక రైళ్ల ఏర్పాటు.
 ► న్యూఢిల్లీ, జైపూర్‌ రైల్వేస్టేషన్లలో బయోడీగ్రేడబుల్‌ వ్యర్థాల నుంచి ఇంధనాన్ని ఉత్పత్తి చేసే ప్లాంట్ల ఏర్పాటు.
 ► ఎంపిక చేసిన సరుకులకు సంబంధించి పూర్తిస్థాయి రవాణాకు సమగ్ర వ్యవస్థ ఏర్పాటు.
 
 2019 నాటికి అన్ని బోగీల్లో బయో టాయిలెట్ల ఏర్పాటు. ‘క్లీన్‌ మై కోచ్‌’ యాప్‌ ద్వారా స్వచ్ఛతకు సంబంధించిన సేవలు పొందే అవకాశం
 2020 నాటికి బ్రాడ్‌గేజ్‌ నెట్‌వర్క్‌లోని అన్ని కాపలా లేని లెవెల్‌ క్రాసింగ్‌ల తొలగింపు


 రైల్వే బడ్జెట్, సాధారణ బడ్జెట్ రెండు కలిసిపోయాయి. 92 ఏళ్ల వేరుకుంపటికి స్వస్తి పలికాయి. ఒకేరోజు కలిసి వస్తామంటూ పార్లమెంట్ ముందుకు వచ్చేశాయి. అయితే రైల్వే బడ్జెట్, సాధారణ బడ్జెట్ ఎప్పుడు విడిపోయాయో తెలుసా?  సరిగ్గా తొంభై రెండేళ్ల క్రితం బ్రిటీష్ వారు భారత్ను పరిపాలించే సమయంలో 1924లో ఈ రెండు వేరు కుంపటి పెట్టాయి. ఆ సమయంలో రైల్వే దేశంలోనే అతిపెద్ద పారిశ్రామిక సంపద. బడ్జెట్లో వీటికి 75 నుంచి 85 శాతం కేటాయింపులుండేవి. జనరల్ బడ్జెట్లోరైల్వేలు ఎక్కువ స్థానాన్ని ఆక్రమించుకుంటుండంతో, దీన్ని వేరుగా తీసుకురావాలని బ్రిటీష్ అధికారులు ప్రతిపాదించారు. 10 మంది సభ్యులు అక్వర్త్ కమిటీ 192-21లో ఈ ప్రతిపాదన తీసుకొచ్చింది. అనంతరం 1924లో దీన్ని సాధారణ బడ్జెట్ నుంచి విడదీశారు.
  
 దీని ద్వారా మంచి విధాన రూపకల్పన, అమలు చేయొచ్చని భావించారు. అప్పటినుంచి రెండు బడ్జెట్లు విడివిడిగా పార్లమెంట్ ముందుకు వస్తున్నాయి.  ప్రస్తుతం మొత్తం సాధారణ బడ్జెట్లో రైల్వేలు కలిగి ఉంది కేవలం 4 శాతం మాత్రమే. దీంతో పాటు రైల్వే తీవ్ర నష్టాలను భరించాల్సి ఉంటుంది. ఈ నేపథ్యంలో రైల్వేను సాధారణ బడ్జెట్ లో కలుపాలని కేంద్రం నిర్ణయించింది. ఈ మేరకు రెండు బడ్జెట్ లను కలిపి పార్లమెంట్లోకి తీసుకొచ్చింది. 70 ఏళ్ల క్రితం అంటే 1994 మార్చి 24న రైల్వే బడ్జెట్ను తొలిసారి లైవ్ టెలికాస్ట్ చేయడం ప్రారంభించారు. 1947 ఆగస్టు 15న భారత్ స్వాతంత్య్రం సాధించిన అనంతరం తొలి రైల్వే మంత్రి జాన్ మతాయి. మొదటి మహిళా రైల్వే మంత్రిగా పశ్చిమ బెంగాల్ ముఖ్యమంత్రి మమతా బెనర్జీ  పనిచేశారు.  


 న్యూఢిల్లీ: నోట్ల రద్దు, జీఎస్టీ, ఐదు రాష్ట్రాల అసెంబ్లీ ఎన్నికల నేపథ్యంలో కేంద్ర ఆర్థిక మంత్రి అరుణ్‌ జైట్లీ బుధవారం ఉదయం సాధారణ బడ్జెట్‌ను పార్లమెంట్లో ప్రవేశపెట్టనున్నారు. 92 ఏళ్ల సంప్రదాయాన్ని కాదని తొలిసారి రైల్వే బడ్జెట్‌ను కూడా సాధారణ బడ్జెట్‌లో భాగంగా ప్రవేశపెడ్తున్నారు. నోట్ల రద్దు నేపథ్యంలో సామాన్య, మధ్యతరగతి ప్రజలకు ఊరటనిచ్చేలా పలు నిర్ణయాలను ఆర్థికమంత్రి ఈ బడ్జెట్‌లో ప్రకటించనున్నారని, పన్ను శ్లాబుల్లోనూ కీలక మార్పులు చోటు చేసుకోనున్నాయని వార్తలు వినిపిస్తున్నాయి.
 కీలకమైన యూపీ సహా ఐదు రాష్ట్రాల్లో అసెంబ్లీ ఎన్నికలు జరగుతుండటంతో..ఆయా ఓటర్లను ఆకట్టుకునేలా బడ్జెట్‌లో పలు ప్రతిపాదనలుండొచ్చు. అయితే, ఎన్నికలను ప్రభావితం చేసేలా ఎలాంటి ప్రకటనలు ఉండొద్దని ఎన్నికల సంఘం స్పష్టం చేయడంతో.. జైట్లీ తాజా పద్దు ఎలా ఉండబోతోందన్న ఆసక్తి నెలకొంది.


 రైల్వే బడ్జెట్‌లో ప్రత్యేకంగా రూ.20 వేల కోట్లు!
 న్యూఢిల్లీ: తొంభై రెండేళ్ల సుదీర్ఘ సంప్రదాయానికి విరుద్ధంగా తొలిసారిగా సాధారణ బడ్జెట్‌తో ప్రవేశపెడుతున్న రైల్వే బడ్జెట్‌లో భద్రత, వేగం, మౌలిక సదుపా యాల కల్పనకు ప్రాధాన్యం ఇస్తున్నారు. దీంతో పాటు రైళ్ల వేగాన్ని 200 కి.మీ. వరకు పెంచే చర్యలు చేపట్టనున్నారు. ఆర్థిక మంత్రి అరుణ్‌జైట్లీ ఈ చారిత్రక బడ్జెట్‌ను బుధవారం సమర్పించనున్నారు. తరచూ రైళ్లు పట్టాలు తప్పుతున్న నేపథ్యంలో కొత్త లైన్ల నిర్మాణం, డబ్లింగ్, కొన్ని స్టేషన్ల ఆధునీ కరణ చేయనున్నారు. దీనికి రానున్న ఐదేళ్లలో రూ.లక్ష కోట్ల రైల్వే భద్రత నిధిని ఏర్పాటు చేసే అవకాశం ఉన్నట్టు సమాచారం. ఈ నిధిలో 2017–18 ఆర్థిక సంవత్సరానికి రూ.20 వేల కోట్లు కేటాయించవచ్చు.
 రైళ్ల భద్రతా ప్రమాణాలు మెరుగు పరిచేందుకు రూ.1.19 లక్షల కోట్ల ప్రత్యేక నిధి కేటా యించాలన్న రైల్వేమంత్రి సురేశ్‌ప్రభు అభ్యర్థన మేరకు జైట్లీ ఈ నిర్ణయం తీసుకున్నారు. రైళ్ల పర్యవేక్షణకు రైలు అభివృద్ధి సంస్థను ప్రకటించే అవకాశం ఉంది. దీంతో పాటు హైస్పీడ్‌ రైల్‌ అథారిటీనీ ఏర్పాటు చేయవచ్చు. అలాగే టిక్కెటేతర ఆదాయాన్ని పెంచుకొనేందుకు కసరత్తు జరుగుతోంది.


 జిల్లా వాసుల ఆశలు పట్టాలెక్కేనా..
 
 కాజీపేట రూరల్‌ : ఉత్తర, దక్షిణ భారతదేశ ప్రాంతాలకు గేట్‌వేగా ఉన్న కాజీపేట జంక్షన్‌కు ఈ సారి రైల్వే బడ్జెట్‌లో న్యాయం జరగాలని ఈ ప్రాంత ప్రజలు, రైల్వే కార్మికులు ఆశిస్తున్నారు. కాజీపేట జంక్షన్‌లో మూడు ఫ్లాట్‌ఫాంలు మాత్రమే ఉన్నాయి. అదనంగా మరో మూడు ప్లాట్‌ఫాంలు కావాలనే డిమాండ్‌ ఉంది. ఈ బడ్జెట్‌లో అదనపు ప్లాట్‌ఫాంలు మంజూరైతే   రైళ్ల సంఖ్య ఇక్కడి నుంచి పెరగడమే కాకుండా వచ్చిన రైళ్లకు ట్రాఫిక్‌ అంతరాయం ఉండదు. అదేవిధంగా సికింద్రాబాద్‌ నుంచి తిరుపతికి కాజీపేట జంక్షన్‌ మీదుగా వెళ్లే పద్మావతి ఎక్స్‌ప్రెస్‌ వారానికి రెండు రోజులు ఉండదు. జిల్లా నుంచి తిరుమలకు వెళ్లే వారి సంఖ్య రోజు రోజుకు పెరుగుతున్న దృష్ట్యా పద్మావతి ఎక్స్‌ప్రెస్‌ను వారం రోజుల పాటు పొడిగించితే ప్రయాణికులకు సౌకర్యంగా ఉంటుంది.
 
 ఎస్కలేటర్‌ ఎప్పుడో..
 ఈ జంక్షన్‌ నుంచి ప్రతి రోజు సుమారు 15 వేల మంది ప్రయాణికులు వివిధ రైళ్ల ద్వారా రాకపోకలు సాగిస్తుంటారు. కాజీపేటలో  చంటి పిల్లవాడి నుంచి వృద్ధుల వరకు పుట్‌ఓవర్‌ బ్రిడ్జి మీదుగానే వెళ్లాలి. ఇక్కడ ఎస్కలేటర్‌ నిర్మాణం జరిగితే అందరికీ సౌకర్యంగా ఉంటుంది. అదేవిధంగా డీజిల్‌ లోకోషెడ్, ఎలక్ట్రిక్‌ లోకోషెడ్‌ల సామర్థ్యం నిర్వాహణ మరింత పెరిగేందుకు బడ్జెట్‌లో నిధులు మంజూరు కావాలని కార్మికులు కోరుతున్నారు.
 
 అప్రెంటీస్‌ ట్రైనింగ్‌ సెంటర్‌ అయ్యేనా..
  కాజీపేటలో ఆక్ట్‌ అప్రంటీస్‌ ట్రైనింగ్‌ సెంటర్‌ను ఏర్పాటు చేయాలని గత పదేళ్ల నుంచి డిమాండ్‌ ఉంది. కాజీపేటలో ఎక్కువ శాతం రైల్వే కార్మికుల పిల్లలు ఐటీఐ చదువుకొని నిరుద్యోగులుగా ఉన్నారు. ఇక్కడ అప్రంటీస్‌ ట్రైనింగ్‌ సెంటర్‌ను ఏర్పాటు చేయాలని కోరుతున్నారు.
 
 కాజీపేట–బెల్లంపల్లికి పుష్‌పుల్‌ వచ్చేనా..
 కాజీపేట నుంచి బెల్లంపల్లి వరకు పుష్‌పుల్‌ ప్యాసింజర్‌ కావాలని ఎప్పటి నుంచో డిమాండ్‌ ఉంది. ప్రతి రోజు మధ్యాహ్నం 12 గంటలకు పాట్నా ఎక్స్‌ప్రెస్‌ తర్వాత సాయంత్రం 5.30 గంటలకు భాగ్యనగర్‌ వరకు ఒక్క రైలు లేదు. ఈ మధ్యకాలంలో పుష్‌పుల్‌ వేస్తే ప్రయాణికులకు సౌకర్యంగా ఉంటుంది.
 
 కాజీపేట టౌన్‌ రైల్వే స్టేషన్‌కు చోటు దొరికేనా..
  కాజీపేట టౌన్‌ రైల్వే స్టేషన్‌ను 2006లో నిర్మించారు. అప్పటి నుంచి ఈ స్టేషన్‌ నుంచి ఒక్కటే ప్యాసింజర్‌ రాకపోకలు చేస్తుంది. ఈ టౌన్‌ స్టేషన్‌ మీదుగా న్యూఢిల్లీ–విజయవాడ, హైదరాబాద్‌ మార్గంలో వందల రైళ్లు రాకపపోకలు సాగిస్తాయి. ఇక్కడ కొన్ని రైళ్లకు హాల్టింగ్‌ కల్పించాలని, స్టేషన్‌ను కూడా అభివృద్ధి చేయాలని ప్రయాణికులు కోరుతున్నారు.
 
 పలు రైళ్లకు హాల్టింగ్‌ లభించేనా..
  కాజీపేటలో ఆగకుండా వెళ్తున్న సికింద్రాబాద్‌–కాకినాడ ఏసీ ఎక్స్‌ప్రెస్, సికింద్రాబాద్‌–విశాఖ వెళ్లే దురంతో, సికింద్రాబాద్‌–విశాఖపట్నం వెళ్లే గరీభ్‌రథ్, సికింద్రాబాద్‌–గౌహతి వెళ్లే గౌహతి, సికింద్రాబాద్‌–నిజాముద్దీన్‌ వెళ్లే దురంతో ఎక్స్‌ప్రెస్‌ రైళ్లకు కాజీపేటలో హాల్టింగ్‌ కల్పించాలని ఈ ప్రాంత ప్రయాణికులు కోరుతున్నారు.


 న్యూఢిల్లీ: కేంద్ర సాధారణ బడ్జెట్‌లో రైల్వే బడ్జెట్‌ను విలీనం చేయడానికి సంబంధించి మార్చిన నిబంధనలను రాష్ట్రపతి ప్రణబ్‌ ముఖర్జీ ఆమోదించారు. రైల్వే శాఖకు కేటాయింపులు సహా, కేంద్ర బడ్జెట్‌ తయారీని ఆర్థిక వ్యవహారాల విభాగానికి అప్పగించినట్లు మంత్రివర్గ కార్యదర్శి తాజాగా ఇచ్చిన ఉత్తర్వులో పేర్కొన్నారు. 
 
 భారత ప్రభుత్వ (వాణిజ్య కేటాయింపులు) నిబంధనలు–1961 చట్టంలో ప్రతిపాదించిన సవరణలకు రాష్ట్రపతి ఆమోదముద్ర వేశారు. రైల్వే బడ్జెట్‌ను సాధారణ బడ్జెట్‌లో విలీనం చేసేందుకు గతేడాది సెప్టెంబరులో కేంద్ర మంత్రివర్గం ఆమోదం తెలిపింది.


 ఫిబ్రవరి 1న బడ్జెట్‌ ప్రవేశపెట్టాలని సీసీపీఏ సిఫారసు
 
 సాక్షి, న్యూఢిల్లీ: పార్లమెంట్‌ బడ్జెట్‌ సమావేశాలు ఈనెల 31 నుంచే ప్రారంభించాలని, ఫిబ్రవరి 1న బడ్జెట్‌ ప్రవేశ పెట్టాలని పార్లమెంట్‌ వ్యవహారాల కేబినెట్‌ కమిటీ (సీసీపీఏ) సిఫారసు చేసింది. కేంద్ర హోం మంత్రి రాజ్‌నాథ్‌ సింగ్‌ అధ్యక్షతన మంగళవారం జరిగిన సీసీపీఏ సమావేశం ఈమేరకు నిర్ణయం తీసుకుంది. దీన్ని త్వరలో రాష్ట్రపతి ప్రణబ్‌ ముఖర్జీకి పంపనున్నారు. ఈ సిఫారసులకు రాష్ట్రపతి ఆమోదం లభిస్తే రైల్వేకు కేటాయింపులతో సహా సాధారణ బడ్జెట్‌ను కేంద్ర ఆర్థిక మంత్రి ఫిబ్రవరి 1న పార్లమెంట్‌లో ప్రవేశపెడతారు.
 
 దాదాపు 92 ఏళ్లుగా రైల్వే బడ్జెట్‌ను విడిగా ప్రవేశపెడుతున్న సంప్రదాయానికి ఈ బడ్జెట్‌తో మంగళం పలకనున్నారు. జనవరి 31న పార్లమెంటు సమావేశాల ప్రారంభంలో రాష్ట్రపతి ప్రణబ్‌ ముఖర్జీ ఉభయ సభలను ఉద్దేశించి ప్రసంగిస్తారు. అదే రోజు ఆర్థిక మంత్రి ఆర్థిక సర్వేను ప్రవేశపెడతారు. బడ్జెట్‌ తొలి విడత సమావేశాలు జనవరి 31 నుంచి ఫిబ్రవరి 9 వరకు నిర్వహించనున్నారు. ఏప్రిల్‌ 1 నుంచి ప్రారంభమయ్యే 2017–18 ఆర్థిక సంవత్సరానికి గాను వివిధ పథకాలకు త్వరితగతిన కేటాయింపులు చేసేందుకు వీలుగా దాదాపు నాలుగు వారాలు ముందుగానే బడ్జెట్‌ను ప్రవేశపెట్టాలని ఎన్డీయే ప్రభుత్వం నిర్ణయించింది.


 ఫిబ్రవరి 1నే సాధారణ బడ్జెట్
 - యూపీ ఎన్నికల తేదీల ఆధారంగా 2017-18 ఏడాది బడ్జెట్ తేదీ ప్రకటన
 - వివేక్ దేవ్‌రాయ్ కమిటీ నివేదికకు కేంద్ర కేబినెట్ ఆమోదం
 - ప్రణాళిక, ప్రణాళికేతర వ్యయం విధానానికీ చెల్లుచీటి
  
  న్యూఢిల్లీ: దాదాపు శతాబ్దకాలంగా(92 ఏళ్లుగా) అమల్లో ఉన్న విధానానికి తెరదించుతూ.. వేరుగా ఉండే రైల్వే బడ్జెట్‌ను సాధారణ బడ్జెట్‌తో కలిపి ప్రవేశపెట్టేందుకు కేంద్ర కేబినెట్ ఆమోదముద్ర వేసింది. దీంతో దేశ ఆర్థిక పరిస్థితి మరింత మెరుగుపడుతుందని కేబినెట్ అభిప్రాయపడింది. ప్రధాని మోదీ అధ్యక్షతన  బుధవారం సమావేశమైన మంత్రివర్గం.. కేంద్ర బడ్జెట్ విధానంలో కీలక మార్పులు తీసుకొచ్చేందుకు.. ప్రణాళిక, ప్రణాళికేతర వ్యయాల విధానానికి స్వస్తి చెప్పాలని దీని ద్వారా బడ్జెట్‌ను మరింత సరళతరం చేయాలని నిర్ణయించింది. కేబినెట్ భేటీ వివరాలను మీడియాకు వెల్లడించిన ఆర్థిక మంత్రి అరుణ్ జైట్లీ..
 
 ఫిబ్రవరి నెల చివరి రోజున బడ్జెట్ ప్రవేశపెట్టాలనే విధానాన్ని పక్కన పెట్టి.. ఈ తేదీని ఫిబ్రవరి 1కి మార్చాలని నిర్ణయించినట్లు తెలిపారు. అయితే 2017-18 ఆర్థిక సంవత్సరం నుంచి ఏ తేదీన బడ్జెట్ ప్రవేశపెడతారనే అంశాన్ని వచ్చే ఏడాది జరిగే యూపీ ఎన్నికల షెడ్యూల్ ఆధారంగా వెల్లడిస్తామన్నారు. ఒకే బడ్జెట్ వల్ల దేశ ఆర్థిక స్థితిని సమగ్రంగా ఆవిష్కరించేందుకు అవకాశం ఉంటుందన్నారు. నీతి ఆయోగ్ సభ్యుడైన వివేక్ దేవ్‌రాయ్ నేతృత్వంలోని కమిటీ ఇచ్చిన నివేదిక ఆధారంగా విలీనంపై నిర్ణయం తీసుకున్నట్లు తెలిపారు. ఈ విలీనం ద్వారా రైల్వేల గుర్తింపు పోకుండా వ్యవహరిస్తామన్నారు.  
 
  రైల్వేలకు లాభమే: సాధారణ బడ్జెట్‌లో రైల్వే బడ్జెట్ విలీనం వల్ల రైల్వే శాఖకు ఎలాంటి నష్టమూ రాదని ఆ శాఖ మంత్రి సురేశ్ ప్రభు తెలిపారు. అంతే కాకుండా రైల్వేల మూలధన వ్యయం పెంచుకోవచ్చన్నారు. ఆర్థిక, రైల్వే శాఖల మధ్య మరింత సమన్వయం ఏర్పడుతుందన్నారు. రైల్వేలు ప్రభుత్వానికి డివిడెండు చెల్లించనక్కర్లేదన్నారు.అయితే ప్రస్తుతానికి 7వ వేతన కమిషన్ అమలు చేసేందుకు రైల్వేలపై రూ. 40వేల కోట్లు, ప్రయాణికులకు సబ్సిడీల రూపంలో మరో రూ. 35వేల కోట్ల భారాన్ని రైల్వే శాఖ మోయాల్సిందే.
  ‘నమామి గంగే’ వేగవంతం: ‘నమామి గంగే’ అమలుకోసం కార్యాచరణను వేగవంతం చేయాలని కేబినెట్ నిర్ణయించింది. జాతీయ గంగానది బేసిన్ అథారిటీ స్థానంలో గంగానది జాతీయ కౌన్సిల్ ఏర్పాటు చేయనుంది.కేంద్ర జలవనరుల మంత్రి ఉమాభారతి ఈ టాస్క్‌ఫోర్స్‌కు అధ్యక్షురాలిగా ఉంటారు. గంగానది నీటిని కలుషితం చేసేవారిపై చట్టపరంగా శిక్ష తీసుకునేలా.. స్వచ్ఛ గంగా జాతీయ మిషన్‌కు అథారిటీ హోదా ఇవ్వాలని కేబినెట్ నిర్ణయించింది.  
 
  మరిన్ని కేబినెట్ నిర్ణయాలు..
 ► స్వాతంత్య్ర సమరయోధులకిచ్చే పింఛనును కేంద్రం  గణనీయంగా పెంచింది. అండమాన్‌తోపాటు భారత్ వెలుపల జైళ్లలో శిక్ష అనుభవించినవారి బంధువుల(భార్య, పిల్లలు) పింఛన్‌ను రూ. 5వేలు పెంచుతూ కేబినెట్ నిర్ణయం తీసుకుంది. సమరయోధుల పింఛను (అన్నిరకాల), పొందుతున్న వారికి అదనంగా 20 % పెంపును కల్పించనున్నట్లు తెలిపింది. ఈ పెంపు(డియర్‌నెస్ రిలీఫ్) 2016 ఆగస్టు 15 నుంచి అమల్లోకి రానుంది.
 
 ► పప్పుధాన్యాలు, నూనెలు, నూనె గింజల నిల్వ విషయంలో వ్యాపారులు, దళారులపై విధించిన నిల్వ పరిమితిని మరో ఏడాది కొనసాగించాలని కేబినెట్ నిర్ణయించింది. ఈ నెలాఖరుతో ఈ పరిమితి గడువు ముగియనుంది.
 ► నౌకాయాన మంత్రిత్వ శాఖ ప్రతిపాదించిన అడిమిరల్టీ(షిప్పింగ్ వివాదాల్లో న్యాయ పరిధి, ఒప్పందం, తీరప్రాంత సమస్యలు) బిల్లు, 2016ను కూడా ఆమోదించింది.
 ► అండమాన్ నికోబార్ దీవుల్లో టెలికం సేవలను విస్తరించేందుకు రూ. 1,102.38 కోట్లతో చెన్నై నుంచి అండమాన్‌కు కేబుల్ లింక్ ఏర్పాటు చేయడానికి  కేబినెట్ ఆమోదం తెలిపింది. 2018 కల్లా ఈ ప్రాజెక్టు పూర్తికావాలని ఆదేశించింది.
  సపర్యాటక రంగ పురోగతి కోసం దేశంలోని వివిధ ప్రాంతాల్లో గుర్తించిన 26 దీవులను (తొలివిడతగా)వేగంగా అభివృద్ధి చేయాలని కూడా ఈ సమావేశంలో నిర్ణయించారు.  
  కాగా, బడ్జెట్‌ల విలీనం వల్ల రైల్వేల స్వయం ప్రతిపత్తికి భంగం కలుగుతున్నందని, ఇది సరైన నిర్ణయం కాదని మాజీ రైల్వే మంత్రి, బిహార్ సీఎం నితీశ్ కుమార్ అన్నారు.


 న్యూఢిల్లీ: 92 ఏళ్లుగా కొనసాగుతూ వస్తున్న ప్రత్యేక రైల్వే బడ్జెట్‌ సంప్రదాయానికి ఇక తెరపడనుంది. వచ్చే ఏడాది నుంచి రైల్వే బడ్జెట్‌ కేంద్ర సార్వత్రిక బడ్జెట్‌లో విలీనం కానుంది. ఈ మేరకు రైల్వేమంత్రి సురేశ్ ప్రభు చేసిన ప్రతిపాదనకు కేంద్ర ఆర్థికమంత్రి అరుణ్‌ జైట్లీ ఆమోదం తెలిపారు.
 
 కేంద్ర బడ్జెట్‌లో రైల్వే బడ్జెట్‌ విలీనంపై విధివిధానాలు ఖరారుచేసేందుకు ఆర్థికమంత్రిత్వశాఖ ఐదుగురు సభ్యుల కమిటీని ఏర్పాటుచేసింది. ఈ కమిటీలో ఆర్థికశాఖ, రైల్వే శాఖ సీనియర్‌ అధికారులు సభ్యులుగా ఉంటారు. ఈ నెల 31నాటికి నివేదిక సమర్పించాల్సిందిగా కమిటీని ఆర్థికశాఖ ఆదేశించింది.
 
 'కేంద్ర బడ్జెట్‌లో రైల్వే బడ్జెట్‌ను విలీనం చేయాల్సిందిగా ఆర్థికమంత్రి జైట్లీకి లేఖ రాశాను. రైల్వే ప్రయోజనాలు, దేశ ప్రయోజనాలు దృష్టిలో పెట్టుకొని ఈ నిర్ణయం తీసుకున్నాం. విలీనం విధివిధానాలపై మేం కసరత్తు చేస్తున్నాం' అని ప్రభు పీటీఐ వార్తాసంస్థకు తెలిపారు.


 - బడ్జెట్ స్వరూపంలో సమూల మార్పులు
 - రైల్వే బడ్జెట్‌కు మంగళం.. ఇక సాధారణ బడ్జెట్‌లోనే..
  
  సాక్షి, హైదరాబాద్ : కేంద్ర, రాష్ట్రాల్లో వచ్చే ఆర్థిక సంవత్సరం నుంచి బడ్జెట్లలో ఇక ప్రధానమంత్రి నరేంద్ర మోదీ మార్కు కనిపించనుంది. ఏళ్ల తరబడి కొనసాగుతున్న వార్షిక బడ్జెట్ రూపకల్పన విధానంలో సమూల మార్పులు తీసుకురావాలని కేంద్ర ప్రభుత్వం నిర్ణయించింది. దీనిపై నీతి ఆయోగ్ కసరత్తు ప్రారంభించింది. బడ్జెట్ స్వరూపంలో పాతకాలం విధానాలకు స్వస్తి పలకాలని నిర్ణయిం చింది. బడ్జెట్ ఏడాదిలో కూడా మార్పులు చేయాలని యోచిస్తోంది. 27వ తేదీన ఢిల్లీలో జరిగిన నీతి ఆయోగ్ సమావేశంలో ఈ అంశాలను అన్ని రాష్ట్రాలకు వివరించింది. ప్రస్తుతం ఏప్రిల్ నుంచి మార్చి నెలాఖరు వరకు బడ్జెట్ సంవత్సరం కొనసాగుతోంది. భారత్ వ్యవసాయ ఆధారిత దేశం కావడంతో బడ్జెట్ సంవత్సరాన్ని జూన్ నుంచి మే వరకు చేయాలా? లేదా జనవరి నుంచి డిసెంబర్ వరకు చేయాలా? అనేదానిపై నీతి ఆయోగ్ రాష్ట్రాలతో సంప్రదింపులు జరుపుతోంది.
 
  ప్రణాళిక, ప్రణాళికేతర పద్దులుండవు!
  ప్రస్తుతం బడ్జెట్‌లో కొనసాగుతున్న ప్రణాళిక, ప్రణాళికేతర పద్దులకు స్వస్తి పలకాలని కేంద్రం ఇప్పటికే నిర్ణయించింది. ఈ పద్దుల కింద కేటాయింపులు, వ్యయాలు వాస్తవానికి భిన్నంగా ఉన్నాయని కేంద్రం భావించింది. ప్రణాళిక పద్దు కింద కేటాయింపులు, వ్యయాలను ఆస్తుల కల్పనకు, ప్రణాళికేతర పద్దు కింద కేటాయింపులు, వ్యయాలను నిర్వహణ, జీతభత్యాలకని పేర్కొంటున్నారు. వాస్తవానికి ప్రణాళిక పద్దు కింద కూడా నిర్వహణ, జీతభత్యాలు ఉంటున్నాయని, ఇది శాస్త్రీయంగా లేదని నీతి ఆయోగ్ తేల్చింది. ఈ నేపథ్యంలో కేపిటల్, రెవెన్యూ వ్యయం పద్దుల కింద మార్చాలా లేక అభివృద్ధి, అభివృద్ధియేతర పద్దుల కింద మార్చాలా అనేదానిపై నీతి ఆయోగ్ కసరత్తు చేస్తోంది. ఏదిఏమైనా వచ్చే ఆర్థిక సంవత్సరంలో ప్రణాళిక, ప్రణాళికేతర పద్దులనేవి ఉండవని రాష్ట్రాలకు తేల్చి చెప్పింది. ఈ పద్దులను మారిస్తే కేంద్ర, రాష్ట్రాల బడ్జెట్లలో సమూల మార్పులు చోటుచేసుకోనున్నాయి.
  
  పీపీపీ తరహా విమానాశ్రయాలు..
  దశాబ్దాలుగా సంప్రదాయంగా వస్తున్న రైల్వే బడ్జెట్‌కు కూడా మంగళం పలకాలని కేంద్రం యోచిస్తోంది. కేంద్ర సాధారణ బడ్జెట్ కంటే ముందుగానే రైల్వే బడ్జెట్‌ను ప్రవేశపెట్టడం ఆనవాయితీగా వస్తోంది. అయితే రైల్వే బడ్జెట్‌ను సాధారణ బడ్జెట్‌లో భాగంగానే ప్రవేశపెట్టడంపై నీతి ఆయోగ్ కసరత్తు చేస్తోంది. దేశంలో విమాన సేవలను మరింతగా విస్తరిం చడంలో భాగంగా రాష్ట్రాల్లోని రీజియన్స్‌లో ప్రభుత్వ-ప్రైవేట్ భాగస్వామ్యం(పీపీపీ) విధానంలో విమానాశ్రయాలను నిర్మించడంతోపాటు విమానాలను నడిపేందుకు వయబులిటీ గ్యాప్ ఫండింగ్ చేయాలని కేంద్రం నిర్ణయించింది. వచ్చే ఆర్థిక సంవత్సరం బడ్జెట్‌లో ఈ అంశం ఉండనున్నట్లు కేంద్ర వర్గాలు పేర్కొన్నాయి. 150 కిలోమీటర్ల దూరం గల రీజియన్స్‌కు విమాన టికెట్ రూ.2,000 నుంచి రూ.2,500 ఉండేలా చర్యలు తీసుకుంటారు. వయబులిటీ గ్యాప్‌లో 80 శాతం కేంద్రం, 20 శాతం రాష్ట్ర ప్రభుత్వాలు భరించనున్నాయి.


 రైల్వే మంత్రి సురేశ్‌ప్రభు వెల్లడి
  
  నెల్లూరు(సెంట్రల్)/ముత్తుకూరు/తిరుపతి అర్బన్: ఆంధ్రప్రదేశ్‌లో రైల్వే పరంగా పెండింగ్‌లో ఉన్న ప్రాజెక్టులను పూర్తి చేసేందుకు రాష్ట్ర ప్రభుత్వంతో కలిసి ప్రత్యేక సంస్థను ఏర్పాటు చేస్తున్నామని కేంద్ర రైల్వే శాఖ మంత్రి సురేష్ ప్రభు తెలిపారు. నెల్లూరు దక్షిణ రైల్వే స్టేషన్‌లో ఫుట్ ఓవర్ బ్రిడ్జి, గూడూరు స్టేషన్‌లో కొత్త ప్లాట్ ఫామ్ నిర్మాణాలకు శంకుస్థాపన, తిరుపతి స్టేషన్‌లో వైఫై సదుపాయాన్ని మరో కేంద్రమంత్రి వెంకయ్యతో కలిసి రిమోట్ ద్వారా ఆదివారం సురేష్ ప్రభు ప్రారంభించారు. ఈ సందర్భంగా మంత్రి మాట్లాడుతూ దేశంలో డిజిటల్ విప్లవం వస్తోందని, అందుకనుగుణంగానే రైల్వేలను కూడా సాంకేతికంగా అభివృద్ధి చేస్తున్నామన్నారు. విజన్ 2030తో దేశంలోని తీర ప్రాంతాలను కలుపుతూ రైలు మార్గాలను ఏర్పాటు చేస్తామని వెల్లడించారు.భవిష్యత్తులో వేగంగా, చౌకగా సరుకులను రవాణా చేసేందుకు లెవల్ టు గూడ్స్ రైళ్లను ప్రవేశపెడుతున్నామని కేంద్ర రైల్వేశాఖ మంత్రి సురేష్ ప్రభు అన్నారు. కృష్ణపట్నం పోర్టులో ఆదివారం పోర్టు ‘సైడ్ కంటైనర్ ఫెసిలిటీ’ విభాగాన్ని, గోల్ఫ్ కోర్సును ఆయన ప్రారంభించారు.
 
  పాత ప్రాజెక్టుల పూర్తికే ప్రాధాన్యం..
  కేంద్ర మంత్రి వెంకయ్యనాయుడు మాట్లాడుతూ రైల్వే బడ్జెట్‌లో కొత్త హామీలివ్వకుండా పాత ప్రాజెక్టులను పూర్తి చేసేందుకు ప్రాధాన్యమివ్వాలని ప్రభును మోదీ కోరారన్నారు.
 
  తమిళనాడులో గ్రీన్ రైల్ కారిడార్!
  చెన్నై: దేశంలోనే తొలిసారిగా తమిళనాడులో రామేశ్వరం-మనామదురై మధ్య 114 కిలోమీటర్ల గ్రీన్ రైల్ కారిడార్‌ను రైల్వే మంత్రి సురేష్ ప్రభు ఆదివారం ప్రారంభించారు. ఇందులోభాగంగా మార్గంలోని రైల్వే ట్రాక్‌లపై మల, మూత్ర వ్యర్థాలు పడకుండా రైళ్లలో బయో టాయ్‌లెట్స్ ఏర్పాటుచేశారు.


 న్యూఢిల్లీ : 92 ఏళ్ల క్రితం నాటి నుంచి ఆనవాయితీగా కొనసాగుతూ వస్తున్న ప్రత్యేక రైల్వే బడ్జెట్ కు ఎన్డీయే ప్రభుత్వం చరమగీతం పాడనుందా..? అంటే అవుననే అనిపిస్తోంది.  రైల్వే బడ్జెట్ ను సాధారణ బడ్జెట్ లో విలీనం చేయాలని కోరుతూ రైల్వే శాఖ మంత్రి సురేష్ ప్రభు, ఆర్థిక మంత్రి అరుణ్ జైట్లీకి లేఖ రాశారు. 92 ఏళ్ల నాటి నుంచి వస్తున్న ప్రత్యేక బడ్జెట్ ను సాధారణ బడ్జెట్ లో కలపడాన్ని సురేష్ ప్రభు ప్రతిపాదించారని సీనియర్ రైల్వే మంత్రిత్వ శాఖ అధికారులు చెప్పారు.
 
 జూన్ లోనే ఆర్థిక మంత్రికి ఈ లేఖను పంపించారని, ఇంకా అరుణ్ జైట్లీ నుంచి ఎలాంటి సమాధాన రాలేదని అధికారులు పేర్కొన్నారు. నీతి ఆయోగ్ సభ్యుడు వివేక్ డేబ్రోయ్ ఈ విలీనాన్ని మొదట  ప్రతిపాదించిన అనంతరం, రైల్వేశాఖ సమాధానం కోరుతూ గత నెల ప్రధానమంత్రి కార్యాలయం ఈ లేఖను పంపింది. ఈ నిర్ణయంపై సానుకూలంగా స్పందిస్తూ.. ఆర్థికమంత్రికి ఈ లేఖను రైల్వే శాఖ పంపించింది. అయితే దీనిపై ఇంకా తుది నిర్ణయం ప్రకటించలేదు.
 ఈ నేపథ్యంలో 2017-18 రైల్వే బడ్జెట్ లేదా 2016-17 బడ్జెట్, రైల్వేకు తుది బడ్జెట్ కానుందని అధికారులు చెప్పారు. ఈ విలీన ప్రతిపాదనతో, మొత్తం ఆర్థిక భారం ఇక నుంచి ఆర్థిక మంత్రి చేతులోకి వెళ్లనుంది. అయితే ఈ విలీనానికి సంబంధించి గత కొంతకాలంగా చర్చలు జరుగుతున్నాయి. ప్రస్తుతం ప్యాసెంజర్ సెగ్మెంట్ లో రైల్వే రూ. 34,000కోట్ల నష్టాలను భరిస్తుంది. రాబడులు సైతం పతనమవుతున్నాయి.


 రైల్వే మంత్రికి మేకపాటి ప్రశ్న
 
  సాక్షి, న్యూఢిల్లీ: చట్టబద్ధంగా ఆంధ్రప్రదేశ్‌కు ఇవ్వాల్సిన విశాఖ రైల్వే జోన్‌ను ఏంచేశారని, ప్రస్తుతం దాని స్థితి ఏంటని వైఎస్సార్‌సీపీ లోక్‌సభాపక్ష నేత మేకపాటి రాజమోహన్‌రెడ్డి రైల్వే మంత్రి సురేష్ ప్రభును ప్రశ్నించారు.
 
 బుధవారం లోక్‌సభలో రైల్వే బడ్జెట్‌పై జరిగిన చర్చకు మంత్రి సమాధానం ఇచ్చిన అనంతరం వివిధ పార్టీల నుంచి ఒక్కొక్కరికి అవకాశం ఇవ్వగా ముందుగా నలుగురైదుగురు సభ్యులు మాట్లాడారు. అప్పటికే ఆలస్యం కావడంతో స్పీకర్ ఇక ఇంతటితో ముగిద్దామని ప్రకటించారు. ఈ సమయంలో నెలకొన్న గందరగోళంలోనే మేకపాటి రైల్వే మంత్రిని ప్రశ్నించారు.


 రైల్వే బడ్జెట్‌పై మంత్రి సురేశ్‌ప్రభు
 ♦ రైల్వే వృద్ధి కోసం మూడంచెల వ్యూహం
  
  న్యూఢిల్లీ: రైల్వే బడ్జెట్‌తో సామాన్యులకు ఒరిగిందేమీ లేదన్న విపక్షాల ఆరోపణలను రైల్వేమంత్రి సురేశ్ ప్రభు తిప్పికొట్టారు. బడ్జెట్ సామాన్యుల కోసమే రూపొందించిందన్నారు. రైల్వే అభివృద్ధి కోసం సేవల మెరుగు,  ఆదాయ సమీకరణ, వ్యయ నియంత్రణ అనే మూడంచెల వ్యూహాన్ని అమలుచేస్తామన్నారు. రైల్వేస్టేషన్లలో స్టాళ్ల కేటాయింపులో ఎస్సీ, ఎస్టీలకు ప్రాధాన్యమిస్తామన్నారు. బుధవారం లోక్‌సభలో రైల్వేబడ్జెట్‌పై చర్చలో ఆయన మాట్లాడారు. రైల్వేలో రిక్రూట్‌మెంట్‌కు ఆన్‌లైన్ పరీక్ష పద్ధతి తెచ్చామన్నారు. ప్రయాణ, రవాణా చార్జీల నుంచి మరింత ఆదాయాన్ని రాబట్టేందుకు కసరత్తు చేస్తున్నామన్నారు.
 
 ప్రయాణికుల చార్జీలు, సరుకు రవాణా చార్జీల సవరణల కోసం ప్రత్యేక వ్యవస్థను ఏర్పాటుచేస్తామని చెప్పారు. ఎప్పుడు ధరలు పెంచినా ధరల కంటే ప్రశ్నలే ఎక్కువగా ఉంటాయని, అందువల్ల దీన్ని నివారించేందుకు కొత్త వ్యవస్థను తీసుకొచ్చేందుకు కృషి చేస్తున్నామన్నారు. రైల్వే రెగ్యులేటరీ అథారిటీ పేరును ‘రైల్వే డెవలప్‌మెంట్ అథారిటీ’గా మార్చాలనుకుంటున్నామని తెలిపారు. ముంబై-అహ్మదాబాద్ మధ్య ప్రతిపాదించిన బుల్లెట్ రైలు ప్రాజెక్టును సెల్ఫ్ ఫైనాన్సింగ్ పద్ధతిలో చేపడతామన్నారు. దీనికయ్యే మొత్తాన్ని 0.1 శాతం నామమాత్ర వడ్డీతో రుణమిచ్చేందుకు జపాన్ అంగీకరించిందన్నారు. జాట్ ఆందోళనల వల్ల రైల్వేకి రూ.55.92 కోట్ల నష్టం వాటిల్లిందన్నారు. చర్చ తర్వాత రైల్వే బడ్జెట్ సంబంధ ద్రవ్యవినియోగ బిల్లులను, గ్రాంట్స్ డిమాండ్లను సభ ఆమోదించింది.
 
  జాతీయ జలరవాణా బిల్లుకు ఆమోదం
  111 నదీమార్గాల్లో జలరవాణాను పెంచేందుకు ఉద్దేశించిన జాతీయ జలరవాణా బిల్లుకు రాజ్యసభ బుధవారం ఆమోదం తెలిపింది. . బిల్లుకు లోక్‌సభ గత ఏడాదే ఆమోదం తెలిపింది.


 అభిప్రాయం
 రాజకీయవేత్తలు.. భారత రైల్వేలనే అద్భుత సంస్థను ఓటర్లకు, నియోజకవర్గాలకు చిల్లర మల్లర ప్రయోజనాలను కలుగచేసేదిగా మార్చినప్పుడే అది కుప్పకూలడం మొదలైంది. ఏదేమైనా ఎట్టకేలకు మన రైల్వేలు సరైన దిశలో వేగంగా ముందుకు కదులుతున్నాయి. మన ప్రభుత్వాలు దుర్వార్తల విషయంలో సంస్థాగతమైన వైఖరిని చేబడుతుంటాయి. తగి నంత దీర్ఘకాలం పాటూ విస్మరిస్తే సమస్య దానికదే పరిష్కారమై పోతుందనేది మొదటి ఆశ. అది, తన తర్వాత వచ్చే మరో మంత్రి సమస్యగా మారేంత వరకు దాని పరిష్కారాన్ని వాయిదా వేస్తూ పోవడం రెండవది.
 
 బ్రిటిష్ పాలకుల నుంచి మనకు మహత్తర వారసత్వంగా సంక్రమించిన భారత రైల్వేలను వరుసగా మన ప్రభుత్వాలన్నీ క్షీణ దశకు చేర్చడానికి చెప్పదగిన వివరణ నిస్సందేహంగా ఇదొక్కటే. బ్రిటిష్ పాలకులు తమ వ్యూహాత్మక, వాణిజ్య అవసరాల కోసమే రైల్వేలను నిర్మించారనడం పూర్తిగా నిజం. అయితే ఆ క్రమంలో వారు దేశవ్యాప్తమైన మౌలిక సదుపాయాలను, నిర్వహణా వ్యవస్థను నెలకొల్పారు. అదే స్వతంత్ర భారత దేశపు జీవ వాహినిగా, ప్రజలకు సేవచేసే అద్భుత రవాణా వ్యవస్థగా మారింది. ఆర్థిక వ్యవస్థను పెంపొందింపజేస్తూ, ఐక్యతకు నిజమైన ఆర్థాన్నిచ్చే అనుసంధానాలను ఏర్పరుస్తోంది.
 
 ప్రజాస్వామ్యం అంటేనే ప్రజాభీష్టానుసారం సాగేది. మన స్వతంత్ర దేశంలో పౌరులు ఎక్కడికి వెళ్లాలనుకుంటే అక్కడికి భారత రైల్వేలు వెళ్తాయి. వైమానిక సేవలు ఒక పౌర విమాన సంస్థ కట్టడిలోంచి విముక్తి చెందడానికి ముందటి ఐదు దశాబ్దాలలో రైల్వేలు... భిన్న భాషలు, సంస్కృతులతో కూడిన దేశంలోని నలుమూలల ప్రజలు ఒకరినొకరు తెలుసుకోడానికి, పరిచయాలు చేసుకోవడానికి సాధనమయ్యాయి. అవి ఆర్థిక వ్యవస్థ నాడీ స్పందన కూడా అయ్యాయి. దేశంలోని కొన్ని ప్రాంతాల్లో క్రమానుగతంగా ఆకలితో అల్లాడే పరిస్థితులు తలెత్తున్నప్పుడు రైల్వేలే ఆ ప్రదేశాలకు ఆహారాన్ని రవాణా చేశాయి. దేశ ఐక్యతకు ఏ ప్రభుత్వం కన్నా మిన్నగా కృషి చేసినది బాలీవుడ్ సినిమాయేనని అప్పుడప్పుడూ అంటుండటం కేవలం పరిహాసోక్తే కాదు. ప్రజా ప్రచార సాధనాల శక్తిని తక్కువగా అంచనా వేయలేం. అయినాగానీ, 1950లు, 1960లలో పొగలు చిమ్ముకుంటూ, ఆవిర్లు వదులుకుంటూ పరుగులు దీసిన రైళ్లూ, ఆ తర్వాతి దశాబ్దాలలో డీజిల్, విద్యుత్ రైళ్లూ దేశ ఐక్యతకు అంతకంటే ఎక్కువే చేశాయి.
 
 ప్రజాదరణ, జనాకర్షణకు తల వంచడం ప్రారంభమైనప్పటి నుంచి రైల్వేల క్షీణత ప్రారంభమైంది. పేర్లను ప్రస్తావిస్తే దివంగతులైన కొందరు గౌరవనీయుల పట్ల అగౌరవాన్ని చూపినట్టవుతుంది. కాబట్టి పేర్లు వద్దు గానీ. మహత్తరమైన, దాదాపు విభ్రాంతికరమైన మన రైలు వ్యవస్థను రాజకీయవేత్తలు... ఓటర్లకు, నియోజక వర్గాలకు చిల్లర మల్లర ప్రయోజనాలను చేకూర్చే సాధనంగా మార్చినప్పటి నుంచి అది కుప్పకూలిపోవడం ప్రారంభమైంది. నియామకాలు, దయ, అనుగ్రహాల కటాక్షంగా మారాయి. ప్రజలకు సేవ చేయడానికి బదులు రైల్వేలు రాజకీయవేత్తలకు ఊడిగం చేయడం ప్రారంభించాయి.
 
 ఒకప్పుడు పార్లమెంటు వార్షిక కార్యక్రమంలో ముఖ్యమైనదిగా ఉండిన రైల్వే బడ్జెట్‌ను ప్రవేశపెట్టే రోజు స్వీయ వంచనగా దిగజారింది. ఒక బూటకపు ఫార్ములాను మంత్రులు పూర్తి స్థాయిలో వాడుకున్నారు. రైల్వేలు అవసానదశకు చేరే రోగగ్రస్తతలోకి  దిగజారిపోతుంటే,.. ఒక ఆస్పిరిన్ దుకాణాన్ని ఏర్పాటు చేసి, నొప్పిని దాచి పెట్టేస్తే ఎవరూ ఆ రోగాన్ని గుర్తించలేరని వారు ఆశించారు. ఆస్పిరిన్ పరిష్కారానికి తోడు దీపావళి బాణసంచా లాంటి  వాగ్దానాల గుప్పింపూ ఉంటుంది. వాటిలో అత్యధికం భ్రమాత్మకమైనవే. ఆహూతులంతా పెదవులు కదిలిస్తూ, త్రేన్పులు తీస్తూ ఉండే బెర్మిసైడ్ విందు భోజనానికి పౌరులను ఆహ్వానించడం లాంటిదే ఇది (అరేబియన్ నైట్స్ కథల్లో ఒకదానిలో బెర్మిసైడ్ అనే ధనికుడు, బిచ్చగాడికి ఇలాగే ఉత్తుత్తి భోజనం పెడతాడు). గత రైల్వే మంత్రులంతా బెర్మిసైడ్లే అనడం సమంజససం కాదు గానీ, చాలా మంది ఆ బాపతే. ఆవర్జా పుస్తకంలో సానుకూల చిట్టాలో కనిపించే వాటిలో రెండు పేర్లు గుర్తుకొస్తున్నాయి. మాధవ్‌రావ్ సింథియా, తాను ప్రవేశపెట్టిన ఏకైక రైల్వే బడ్జెట్లో ఈ సమస్యకు సంబంధించి సమంజస స్థాయి అవగాహనను కనబరి చారు. ఇక దినేష్ త్రివేదీ, ఈ సమస్య పరిష్కారానికి ప్రయత్నించారు గానీ, ఆయన చేతులు కట్టేసి ఉండటంతో చేసింది దాదాపు ఏమీ లేదు.
 
 సురేశ్ ప్రభు ముందున్న సవాళ్లు చాలా స్పష్టంగానే ఉన్నాయి. ఆయన ఈ క్షీణతను ఆపడమే కాదు, దాన్ని వ్యతిరేక దిశకు మరల్చాల్సి ఉంది. క్షీణత విచ్ఛిన్నత దిశగా దిగజారిపోతుండగా ఆయన పగ్గాలు చేపట్టారు. ఆయన తన ఉత్పత్తిని మెరుగుపరచాల్సి ఉంది. ప్రయాణికుల కోచ్‌లు, సరుకు రవాణా బోగీలు, రైళ్లు,  పట్టాలు, సేవల నాణ్యత, వ్యవస్థలు, స్టేషన్లు అన్నిటినీ ఆయన మెరుగుపరచాలి. అది కూడా అనూహ్యమైన వేగంతో చేయాలి. ఎటు చూసినా మీకు సమస్యలే కనిపిస్తాయి. యూపీఏ ప్రభుత్వ హయాం నాటి భయానక కథనాలను గుర్తు చేసుకోవడంలో అర్థం లేదు. ప్రజలు ప్రభుత్వాలను ఎన్నుకునేది సమస్యలను పరిష్కరించడానికే తప్ప, గతాన్ని తలుచుకుని నిట్టూర్పులు విడవడానికి కాదు. గత ప్రభుత్వం ఘోరంగా లేకపోతే వారు దాన్ని ఎందుకు మారుస్తారు? ప్రభును తీవ్రంగా విమర్శించేవారు సైతం రైల్వేలందించే సేవలలో, పర్యావరణంలో నాణ్యత పెరుగుతున్న క్రమంలో ఉన్నదని ఒప్పుకుంటారు. దేశంలోని వందలాది పట్టణాలలోని 400 రైల్వే స్టేషన్లను చిన్నపాటి ఆర్థిక కేంద్రాలుగా పరివర్తన చెందించడం ప్రభు సాఫల్యతకు కీలకమైన కొలబద్ద అవుతుంది.
 
 తాజాగా పెట్టుబడులను పెట్టడం ద్వారా రద్దీ అత్యధికంగా ఉన్న మార్గాల్లో ప్రపంచ స్థాయి రైళ్లను ప్రవేశపెట్టి సాధించాల్సిన పరివర్తన అంతకంటే కష్టమైన సవాలు. ముంబై, అహ్మదాబాద్‌ల మధ్య హైస్పీడ్ రైలును ప్రవేశపెట్టడం అసమంజసమని లేదా ఉన్నత వర్గాలకు అనుకూలమైనదనీ భావించేవారు... రైలు మార్గాల విద్యుదీకరణను చేపట్టినప్పుడు అది అన్ని చోట్లా ఒకేసారి మొదలు కాలేదని గుర్తుకు తెచ్చుకోవాలి. మన రైల్వేలు భారీ సంస్థ కాబట్టి దానికి పెట్టాల్సిన పెట్టుబడులు కూడా భారీగానే ఉంటాయి.
 పెద్ద ఎత్తున వాటిని విదేశాల నుంచి సమకూర్చుకోవడం అవసరం. ప్రధాని నరేంద్ర మోదీ జపాన్ వంటి దేశాలతో అందుకు కావాల్సిన కష్టభరితమైన  సన్నాహక కృషిని చేశారు. అయితే ఆ రైలు బండి కదిలేలోగా పరిపూర్తి చేయాల్సిన గురుతర కర్తవ్యాలు చాలానే ఉంటాయి. ఏదేమైనా ఎట్టకేలకు మన రైల్వేలు సరైన దిశలో కదలుతున్నాయి. వేగంగా వెనుకకు గాక, వేగంగా ముందుకు పోతున్నాయి.
  
 ఎం.జె. అక్బర్,  సీనియర్ సంపాదకులు, వ్యాసకర్త పార్లమెంటు సభ్యులు, బీజేపీ అధికార ప్రతినిధి


 ♦ టీడీపీపీ సమావేశంలో ఎంపీలకు బాబు సూచన
 ♦ రైల్వే బడ్జెట్‌లో గతం కంటే కేటాయింపులు బాగానే చేశారు
 ♦ రైల్వే జోన్ ఎందుకివ్వలేదో కారణం చెబితే బాగుండేది
 ♦ భేటీకి హాజరైన బీజేపీ సభ్యులు హరిబాబు, గోకరాజు
  
  సాక్షి, విజయవాడ బ్యూరో/హైదరాబాద్: పార్లమెంటు బడ్జెట్ సమావేశాల్లో రాష్ట్రంలోని పెండింగ్ సమస్యలపై కేంద్రంపై ఎలాంటి ఒత్తిడి తీసుకురాకూడదని టీడీపీ నిర్ణయించింది. బతిమాలి నిధులు సాధించుకోవడమొక్కటే మార్గమని అభిప్రాయపడింది. ఆదివారం విజయవాడలోని సీఎం క్యాంపు కార్యాలయంలో చంద్రబాబు అధ్యక్షతన జరిగిన తెలుగుదేశం పార్లమెంటరీ పార్టీ(టీడీపీపీ) సమావేశానికి ఏపీ, తెలంగాణలకు చెందిన టీడీపీ ఎంపీలతోపాటు ఏపీ బీజేపీ ఎంపీలు హరిబాబు, గోకరాజు గంగరాజులు హాజరయ్యారు. రాష్ట్రంలోని పెండింగ్ ప్రాజెక్టులతోపాటు పార్లమెంట్ బడ్జెట్ సమావేశాల్లో అనుసరించాల్సిన వ్యూహంపై చర్చించారు.
 
 రైల్వేబడ్జెట్‌లో ఏపీకి చేసిన కేటాయింపులపట్ల చంద్రబాబు సంతృప్తి వ్యక్తంచేశారు. గతంలో రైల్వేబడ్జెట్‌లలో చేసిన కేటాయింపులకంటే ఈసారి మెరుగుగా ఉన్నాయని అభిప్రాయపడ్డారు. ఒకరిద్దరు ఎంపీలు విశాఖ కేంద్రంగా రైల్వేజోన్ ఏర్పాటు చేయాలని మనం పదేపదే కోరినా బడ్జెట్‌లో ప్రకటన లేకపోవడాన్ని ప్రస్తావించగా.. ప్రకటన చేయకపోవడానికి కారణాలేమిటో తెలియదని, అవేంటో తెలుసుకునే ప్రయత్నం చేయండని చంద్రబాబు వారికి సూచించారు. రాష్ట్రవిభజన సమయంలో కేంద్రమిచ్చిన హామీల అమలులో భాగంగా ఈసారి బడ్జెట్‌లో ఏమైనా కేటాయింపులు, ప్యాకేజీలు మెరుగ్గా ఉంటాయేమో వేచిచూద్దామన్నారు.
 
 ఒకవేళ ఆశించినంతగా లేకపోతే ప్రధాని, ఆర్థికమంత్రి, నీతిఆయోగ్ దృష్టికి లేఖరూపంలో తెలియచేద్దామన్నారు. కరువు, వరదలవల్ల రాష్ట్రానికి నష్టం జరిగినా కేంద్రంనుంచి ఆశించినంతగా నిధుల కేటాయింపు లేదని ఎంపీలు అసంతృప్తి వ్యక్తం చేయగా.. అది నిజమేనని అంగీకరించిన చంద్రబాబు దీన్ని కేంద్రం దృష్టికి తీసుకెళ్లాలని వారిని కోరారు. కాగా ఇప్పటికే ఇసుక విధానంలో అనుసరించిన వైఖరి వల్ల ప్రజలు తీవ్ర ఇబ్బందులు పడడంతో ప్రభుత్వానికి చెడ్డపేరు వచ్చిందని, ఇప్పుడు ఉచిత ఇసుక విధానంతో అపప్రద తెచ్చుకోకుండా చూడాలని ఎంపీలు సూచించారు. ఉచితం పేరుతో పార్టీ నేతలు, ఇతరులు భారీగా ఇసుకను నిల్వచేసి ఇతర రాష్ట్రాలకు తరలించి, రాష్ట్రంలో ఎక్కువ ధరలకు అమ్మితే మరింత చెడ్డపేరు వస్తుందన్నారు.
 
  ప్రత్యేక హోదానా.. అంతకంటే ఎక్కువగానా అనేది తేలుస్తాం: సుజనా
  రాష్ట్రానికి ప్రత్యేకహోదా ఇస్తారా? అంతకంటే ఎక్కువ ప్యాకేజీ ముట్టజెబుతారా? తేల్చేలా కేంద్రంపై ఒత్తిడి తేవాలని టీడీపీపీ సమావేశంలో నిర్ణయించినట్టు కేంద్రమంత్రి సుజనాచౌదరి చెప్పారు. ఎంపీలతో కలసి ఆయన మీడియాతో మాట్లాడారు. ప్రత్యేకహోదాకు చట్టపరమైన ఇబ్బందులున్నందున..ఎక్కువ నిధులు రాబట్టే మార్గాలను చూస్తున్నట్టు చెప్పారు. రైల్వేజోన్‌ను రైల్వే బడ్జెట్ సవరణలో పెట్టకపోయినా అది వస్తుందని చెప్పారు.
  
  ఫిరాయింపులే లక్ష్యంగా పనిచేయండి..
  టీడీపీపీ సమావేశంలో ఫిరాయింపుల అంశం ప్రధానంగా చర్చకు వచ్చింది. ఫిరాయింపులపై నేతలమధ్య భిన్నాభిప్రాయాలు వ్యక్తమైనట్టు సమాచారం. అయితే వలసలే లక్ష్యంగా పనిచేయడంతోపాటు ప్రత్యేకంగా దృష్టి సారించాలని ఎంపీలకు ఈ సందర్భంగా చంద్రబాబు హితబోధ చేశారు. పదవులు, నిధులు, ఇతర విషయాల్లో ప్రాధాన్యత ఇస్తామని చెప్పడంద్వారా ప్రతిపక్ష పార్టీలోని ఎంపీ, ఎమ్మెల్యే, ఎమ్మెల్సీలు, ముఖ్యనేతలను టీడీపీలో చేర్పించేందుకు ప్రత్యేకంగా సమయాన్ని కేటాయించాలని సూచించినట్టు సమాచారం. ఛత్తీస్‌గఢ్, ఒడిశా రాష్ట్రాలలో ప్రతిపక్షాల్ని బలహీనపర్చడంలో అధికారపార్టీలు విజయవంతమయ్యాయని, అందువల్లే అక్కడ ఒకే పార్టీ దశాబ్దాలుగా అధికారంలో కొనసాగుతుందని, ఇక్కడా ఆ పరిస్థితి రావాలంటే ఫిరాయింపులద్వారా పార్టీని బలపర్చుకోవడమే ఏకైక మార్గమని ఎంపీలకు సీఎం సూచించినట్టు తెలుస్తోంది.


 బరంపురం: ఓ ప్రతిపాదిత రైలు బోగీల ఫ్యాక్టరీకి తాజా రైల్వే బడ్జెట్‌లో కేటాయించిన మొత్తం అక్షరాలా రూ.1000! దీంతో ఆ ప్రాజెక్టు అసలు సాధ్యమేనా అని అనుమానాలు తలెత్తుతున్నాయి. ఒడిశాలోని గంజాం జిల్లా సీతల్పల్లిలో ప్రభుత్వ-ప్రైవేట్ భాగస్వామ్య పద్ధతిలో బోగీల ఫ్యాక్టరీని ఏర్పాటు చేస్తున్నట్లు 2011-12 రైల్వే బడ్జెట్‌లో నాటి రైల్వే మంత్రి మమతా బెనర్జీ ప్రకటించారు.
 
 కానీ తర్వాతి బడ్జెట్లలో ప్రాజెక్టుకు అరకొర నిధులే ప్రకటిస్తూ వస్తున్నారు. దీని కోసం రాష్ట్ర సర్కారు 101 ఎకరాలు సేకరించినా నిధుల్లేకపోవడంతో పనులు మొదలు కాలేదు. తాజా రూ. వెయ్యి  విదిలింపుపై సీఎం నవీన్ పట్నాయక్ విచారం వ్యక్తం చేశారని, నిధులు పెంచాలన్ని కేంద్రాన్ని అడిగారని బరంపురం బీజేడీ ఎమ్మెల్యే చ్యాపట్నాయక్ చెప్పారు.


 రైల్వే బడ్జెట్‌లో మనకు తీరని అన్యాయం: రఘువీరా
 
  సాక్షి, హైదరాబాద్: వైఎస్ రాజశేఖరరెడ్డి ముఖ్యమంత్రిగా ఉన్నపుడు లాలూప్రసాద్ యాదవ్ రైల్వే మంత్రిగా ఉండగా, రాష్ట్రానికి అన్యాయం జరిగితే కేంద్రంపై ఒత్తిడి తెచ్చి రాష్ట్ర ప్రయోజనాలు వైఎస్ సాధించారని పీసీసీ అధ్యక్షుడు రఘువీరారెడ్డి గుర్తు చేశారు. ప్రస్తుతం ఒంటెద్దు పోకడలతో రైల్వే బడ్జెట్‌లో రాష్ట్రానికి తీరని అన్యాయం జరుగుతోందన్నారు. శుక్రవారం ఇందిరభవన్‌లో పార్టీ నేతలు శైలజానాథ్, తులసిరెడ్డి తదితరులతో కలిసి విలేకరులతో మాట్లాడారు.
 
 రాష్ట్రానికి కేంద్ర ప్రభుత్వం అన్నింటా మోసం చేస్తున్నా ముఖ్యమంత్రి చంద్రబాబు పట్టించుకోవడం లేదని, రాష్ట్ర ప్రయోజనాలా? రాజకీయాలా? ఏది ముఖ్యమో తేల్చుకోవాలని డిమాండ్ చేశారు. అప్పట్లో రాష్ట్రం నుంచి ప్రాతినిధ్యం వహిస్తున్న ఎంపీలందరితో సమావేశమై కేంద్రం వద్ద పెండింగ్‌లో ఉన్న అంశాల సాధనకు వైఎస్ కృషి చేశారని, ప్రస్తుతం చంద్రబాబు అలాంటి సంప్రదాయాన్ని పక్కనపెట్టేశారన్నారు. చంద్రబాబు నిర్లక్ష్యం, అసమర్థత వల్లే రైల్వే బడ్జెట్‌లో రాష్ట్రానికి తీరని అన్యాయం జరిగిందన్నారు.


 రైల్వే బడ్జెట్ సైడ్‌లైట్స్
  
 న్యూఢిల్లీ: రైల్వే మంత్రి సురేశ్‌ప్రభు తన రెండో రైల్వే బడ్జెట్ సమర్పణ సందర్భంగా మాజీ ప్రధాని అటల్ బిహారీ వాజ్‌పేయి, హరివంశ్‌రాయ్ బచ్చన్ కవితలు మొదలుకొని గౌతం బుద్ధుడి సూక్తులను ప్రస్తావించారు.సురేశ్‌ప్రభు సతీమణి ఉమ, కుమారుడు అమయలు సందర్శకుల గ్యాలరీలో కూర్చొని బడ్జెట్ ప్రసంగాన్ని వీక్షించారు.గంటకుపైగా సాగిన బడ్జెట్ ప్రసంగం సందర్భంగా ప్రధాని మోదీతోపాటు అధికార పార్టీ సభ్యులు పదేపదే బల్లలను చరిచి రైల్వేమంత్రిని అభినందించారు.జిల్లాల్లో చేపట్టిన రైల్వే ప్రాజెక్టుల్లో ఉపాధి కల్పన అవకాశాల గురించి, ఎంపిక చేసిన రైల్వేస్టేషన్లలో వికలాంగులకు టాయిలెట్లు ఏర్పాటుచేస్తామని సురేశ్ చెబుతుండగా మోదీ చప్పట్లు కొడుతూ కనిపించారు.ఉదయం 11.50 గంటలకు సభలోకి వచ్చిన ప్రభు.. 12.05 గంటలకు రైల్వేమంత్రిగా తన అనుభవాలతో మొదలుపెట్టి బడ్జెట్ ప్రసంగాన్ని ప్రారంభించారు.
 
 ‘నూతన ఆదాయం, నూతన విధానం, నూతన నిర్మాణం’ అనే మూడు స్తంభాలపై రైల్వే ఆధారపడి ఉందంటూ తన వ్యూహాన్ని సభ ముందుంచారు.సురేశ్‌ప్రభు తన ప్రసంగాన్ని ముగించే ముందు బుద్ధుడి సూక్తి చెప్పారు. ‘ఎప్పుడైనా ఎవరైనా ప్రయాణం చేయాలని తలచినప్పుడు రెండు తప్పులు చేసే అవకాశముంది. ఒకటి ప్రారంభించకపోవడం.. రెండు తుదికంటా వెళ్లకపోవడం’ అని అన్నారు. ‘మేము ఇప్పటికే ప్రయాణాన్ని ప్రారంభించేశాం.. మేము చివరి వరకూ ప్రయాణిస్తాం.. సమృద్ధి లేక విజయం అనే గమ్యస్థానానికి భారతీయ రైల్వేని తీసుకెళ్లే వరకు విశ్రమించం’ అని చెప్పారు. బడ్జెట్ ప్రసంగం ముగిసే సమయంలో కాంగ్రెస్, వామపక్షాలతోపాటు ఇతర విపక్షాల సభ్యులు లేచి నిలబడి బడ్జెట్‌పై అసంతృప్తి వెలిబుచ్చారు.బడ్జెట్ ముగిసిన వెంటనే ప్రధాని మోదీ.. సురేశ్‌ప్రభు వద్దకు వెళ్లి కరచాలనం చేసి అభినందించారు.
  
  


 ♦ హమ్‌సఫర్, తేజస్, ఉదయ్‌గా నామకరణం
 ♦ అన్‌రిజర్వ్‌డ్ ప్రయాణికుల కోసం అంత్యోదయ ఎక్స్‌ప్రెస్
 ♦ దూరప్రాంత రైళ్లలో 2-4 దీన్ దయాళ్ అన్‌రిజర్వ్‌డ్ బోగీలు
 ♦ రైల్వే బడ్జెట్ ప్రసంగంలో సురేశ్ ప్రభు ప్రకటన
  
  న్యూఢిల్లీ
  రిజర్వేషన్ ప్రయాణికుల సౌకర్యం, సంతృప్తికి పెద్దపీట వేస్తూ రైల్వే మంత్రి సురేశ్ ప్రభు తన బడ్జెట్ ప్రసంగంలో మూడు రైళ్లను ప్రకటించారు. హమ్‌సఫర్, తేజస్, ఉదయ్ పేరిట ఈ సర్వీసులను నడపనున్నట్లు తెలిపారు. ‘‘ప్రతి వినియోగదారుడు మా బ్రాండ్ అంబాసిడర్. మా (రైల్వే) ఉనికికి కారణం వారే. అందుకే అతను/ఆమె ప్రయాణించే ప్రతిసారీ వారి ప్రయాణ సంతృప్తి పెరగాలి. రైలు ప్రయాణాన్ని సంతోషించదగ్గదిగా చేసేందుకు ప్రయాణికులకు మెరుగైన సౌకర్యాలను కొనసాగిస్తూనే ఉంటాం. ఏటా రైళ్లలో ప్రయాణించే 700 కోట్ల మంది ప్రయాణికుల్లో ప్రతిఒక్కరి సంతృప్తి కోసం నిరంతరం శ్రమిస్తాం’’ అని సురేశ్ ప్రభు చెప్పారు.
 
  రిజర్వేషన్ ప్రయాణికుల కోసం...
 ► హమ్‌సఫర్: పూర్తిగా థర్డ్ ఏసీ సర్వీసు. కోరుకున్న ప్రయాణికులకు భోజన సదుపాయం.
 ► తేజస్: దేశ రైలు ప్రయాణ భవిష్యత్తును చాటిచెప్పేలా గంటకు 130 కిలోమీటర్లు, అంతకన్నా ఎక్కవ వేగంతో ప్రయాణం. రైల్లో వినోదం, స్థానిక రుచులు, వైఫై సేవలు.
 ► ఉదయ్: అత్యంత రద్దీ మార్గాల్లో రాత్రిపూట నడిచే ఉత్కృష్ట్ డబుల్ డెకర్ ఎయిర్ కండిషన్డ్ యాత్రీ (ఉదయ్) ఎక్స్‌ప్రెస్. ప్రయాణికుల తరలింపు సామర్థ్యాన్ని 40% వరకు పెంచగల సామర్థ్యం దీనికి ఉంది. టారిఫ్, టారిఫ్‌యేతర చర్యల ద్వారా హమ్‌సఫర్, తేజస్‌ల ఖర్చును తిరిగి రాబడతారు.
 
  అన్‌రిజర్వ్‌డ్ ప్రయాణికుల కోసం...
 ► సామాన్యుల కోసం దూరప్రాంతాలకు పూర్తిగా అన్‌రిజర్వ్‌డ్ బోగీలతో అంత్యోదయ సూపర్‌ఫాస్ట్ ఎక్స్‌ప్రెస్. రద్దీ మార్గాల్లో అందుబాటులో సేవలు.
 ► ఎక్కువ మంది అన్‌రిజర్వ్‌డ్ ప్రయాణికులకు చోటు కల్పించేందుకు వీలుగా దూరప్రాంత రైళ్లలో రెండు నుంచి నాలుగు వరకు దీన్ దయాళ్ బోగీలు.
 ► ఈ బోగీల్లో అందుబాటులోకి తాగునీరు, మరిన్ని మొబైల్ చార్జింగ్ పాయింట్లు.
  
  
  రైల్వే పుష్టికి ‘సప్త’ పది..
  న్యూఢిల్లీ: రైల్వే వ్యవస్థను మరింత సమర్థంగా తయారుచేసేందుకు, ఆర్థికంగా నిలదొక్కుకునేందుకు మంత్రి సురేశ్ ప్రభు తన బడ్జెట్‌లో ఏడు లక్ష్యాలను ప్రకటించారు. అవేంటంటే..
 
  మిషన్ రఫ్తార్: సరుకు రవాణా రైళ్ల సగటు వేగాన్ని రెట్టింపు చేయడం దీని ఉద్దేశం. వచ్చే ఐదేళ్లలో సూపర్ ఫాస్ట్ మెయిల్/ఎక్స్‌ప్రెస్‌ల సగటు వేగాన్ని గంటకు 25 కి.మీ మేర పెంచడం కూడా ఈ మిషన్ లక్ష్యం.
  
  మిషన్ 25 టన్నులు: సరుకు రవాణా సామర్థ్యం పెంచి అధిక ఆదాయం ఆర్జించడం దీని ఉద్దేశం. 2016-17లో 25 టన్నుల యాక్సిల్ లోడ్ వ్యాగన్ల ద్వారా 10-20% సరుకును రవాణా చేయాలని లక్ష్యంగా పెట్టారు. 2019-20 నాటికి 70% సరుకును ఈ వ్యాగన్ల ద్వారా రవాణా చేయాలి.
  
  మిషన్ 100: సైడ్ ట్రాక్‌లు, సరుకు రవాణా కేంద్రాల సంఖ్య పెంచడం దీని లక్ష్యం. ప్రస్తుతం వివిధ చోట్ల వీటి ఏర్పాటుకు 400 ప్రతిపాదనలు ఉన్నాయి. వాటిలో రెండేళ్లలో వంద సైడింగ్స్‌ను ఏర్పాటు చేయాలన్నది లక్ష్యం.
  
  మిషన్ జీరో యాక్సిడెంట్: రైలు ప్రమాదాలను పూర్తిగా నివారించడం దీని లక్ష్యం. వచ్చే రెండుమూడేళ్లలో కాపలా లేని క్రాసింగ్‌లు లేకుండా చేస్తారు. రైళ్లు ఢీకొనకుండా ప్రత్యేక టెక్నాలజీని వినియోగిస్తారు.
  
  మిషన్ పేస్(ప్రొక్యూర్‌మెంట్ అండ్ కన్జప్షన్ ఎఫిషియెన్సీ): రైల్వే పరికరాల కొనుగోలు, సేవల్లో నాణ్యతను పెంచడం దీని లక్ష్యం. దీనిద్వారా 2016-17లో రూ.1,500 కోట్ల ఆదాయం సాధించాలని లక్ష్యంగా పెట్టుకున్నారు.
  
  మిషన్ బియాండ్ బుక్-కీపింగ్: రైల్వేలో ఖాతాల తనిఖీని పక్కాగా నిర్వహించడం దీని ఉద్దేశం.
 
  మిషన్ కెపాసిటీ యుటిలైజేషన్: 2019నాటికల్లా సిద్ధం కాబోయే ఢిల్లీ-ముంబై, ఢిల్లీ-కోల్‌కతా రవాణా కారిడార్‌ను పూర్తిస్థాయిలో వినియోగించుకొని అధిక ఆదాయం ఆర్జించడం ఈ కార్యక్రమం లక్ష్యం.
  
  ప్రాజెక్టుల పరిశీలనకు డ్రోన్లు..
  న్యూఢిల్లీ: రైల్వేలోని ప్రధానమైన ప్రాజెక్టుల పురోగతిని పరిశీలించేందుకు అడ్రోన్లు, జియో స్పేసియల్ శాటిలైట్ వ్యవస్థను వినియోగించుకోవాలని రైల్వే శాఖ నిర్ణయించింది. ప్రాజెక్టుల నిర్వహణ, పర్యవేక్షణకు సాంకేతికతపై ఆధారపడకూడదని నిర్ణయించినట్లు రైల్వే మంత్రి సురేశ్ ప్రభు పేర్కొన్నారు. అలాగే సరుకు రవాణా కారిడార్ పురోగతిని సమీక్షించేందుకు వచ్చే ఆర్థిక సంవత్సరంలో ఈ విధానాన్ని వినియోగిస్తామని ప్రకటించారు.
  
  పర్యాటకం ప్రాముఖ్యత
  రాష్ట్ర ప్రభుత్వాల భాగస్వామ్యంతో ఆయా రాష్ట్రాల్లోని పర్యాటక కేంద్రాలతో ఓ సర్క్యూట్‌ను ఏర్పాటు చేసి దీన్ని నేషనల్ రైల్ మ్యూజియంతో అనుసంధానం చేసి.. యునెస్కో ద్వారా పర్యాటకాన్ని మరింత అభివృద్ధి చేయనున్నారు. ఈ సర్క్యూట్ ప్యాకేజీలో జాతీయ జంతువైన పులులుండే అభయారణ్యాలైన కన్హా, పెంచ్, బాంధవ్‌గఢ్‌లను కలపనున్నారు.
 
  ఆరోగ్యమే మహాభాగ్యం
  కేంద్రం ఆరోగ్య శాఖతో ఒప్పందం కుదుర్చుకుని రైల్వే ఆసుపత్రులు, ప్రభుత్వ ఆసుపత్రులను అనుసంధానం చేయనున్నాయి. దీని ద్వారా రైలు ప్రయాణికులకు దారి పొడవునా ఎక్కడైనా అత్యవసర వైద్యసేవలందేలా చొరవతీసుకుంటారు. గ్యాంగ్‌మెన్‌లకు రక్షక్ పథకం పేరుతో.. ప్రత్యేక సదుపాయాలు కల్పించటం, ట్రాక్ రక్షణ (పెట్రోలింగ్)లో వీళ్లు వాడే పరికరాల బరువు తగ్గించేందుకు ఏర్పాట్లు.
 
  వినియోగదారుల సేవలో..
  ప్రధాన వ్యాపార భాగస్వాములతోపాటు చిరు వ్యాపారులకు ఇబ్బందులు కలగకుండా.. వారి సమస్యలను ఎప్పటికప్పుడు పరిష్కరించేందుకు ప్రతి జోనల్ రైల్వే పరిధిలో కస్టమర్ కమిట్‌మెంట్ కేంద్రాన్ని ఏర్పాటు చేయనున్నారు. వ్యాగన్లను లీజుకు ఇచ్చే వ్యవస్థను సులభతరం చేయనున్నారు.
 
  యువత కోసం..
  ప్రతి ఏడాది వందమంది ఎంబీఏ, ఇంజనీరింగ్ విద్యార్థులకు ఆహ్వానం పలికి 2-6 నెలలపాటు ఇంటర్న్‌న్‌షిప్ ఇవ్వాలని నిర్ణయించారు. దీంతోపాటు నైపుణ్యాభివృద్ధి మంత్రిత్వ శాఖతో సమన్వయం చేసుకుని రైల్వే పరిధిలో స్కిల్ డెవలప్‌మెంట్‌కు కార్యక్రమాలు నిర్వహించనున్నారు.
 
  విద్యుత్, నీటిని ఆదా చేసేందుకు..
  శక్తి వినియోగాన్ని 10 నుంచి 15 శాతం తగ్గించాలనే లక్ష్యంతోపాటు విద్యుత్‌ను ఆదా చేసేందుకు వచ్చే రెండు మూడేళ్లలో దేశవ్యాప్తంగా రైల్వేస్టేషన్లను ఎల్‌ఈడీ లైట్లతో ముస్తాబు చేయనున్నారు.
 ► రైళ్లు, రైల్వే స్టేషన్లో నీటి వినియోగాన్ని అవసరమైనంతమేరకే పరిమితం చేసి.. వృథాను అరికట్టేందుకు ఏర్పాట్లు. 2వేలకు పైగా రైల్వే స్టేషన్లలో వర్షపునీటిని సద్వినియోగపరుచుకునేలా ఏర్పాట్లు చేసేందుకు నిధులు ఇవ్వాలని నిర్ణయించారు.
 ► గిర్డర్ బ్రిడ్జెస్‌లో స్టీల్ స్లీపర్స్‌కు బదులుగా పర్యావరణానికి అనుకూలంగా ఉండే రీసైకిల్ ప్లాస్టిక్‌తో చేసిన స్లీపర్స్‌ను వినియోగించాలని నిర్ణయం.
 ► భవిష్యత్తులో 32 స్టేషన్లు, 10 కోచింగ్ డిపోల్లో నీటి రీసైక్లింగ్ డిపోలను ఏర్పాటుచేయటం.
 
  మొబైల్ యాప్స్..
  టికెటింగ్ సమస్యలు, ఫిర్యాదులు-సూచనలకోసం రెండు యాప్‌లను రూపొందించటం.
  రైలు మిత్ర సేవ...
  కొంకణ్ రైల్వేలో వయోవృద్ధులు, వికలాంగుల కోసం ఉన్న ‘సారథి సేవ’ను బలోపేతం చేయటంతోపాటు రైలు మిత్ర సేవ పేరుతో దేశవ్యాప్తంగా అమలుచేయ టం. దీని ద్వారా బ్యాటరీ ఆధారిత కారు, పోర్టర్ సేవలను విస్తృత పరచటం. సాంకేతికంగా స్టేషన్లను ఆధునీకరించి.. రెండువేల స్టేషన్లలో 20వేల స్క్రీన్స్‌ను ఏర్పాటు చేసి ప్రయాణికులకు ఎప్పటికప్పుడు సూచనలు చేయటం ఇందులో భాగం.
 
  దివ్యాంగుల కోసం..
  దివ్యాంగులకు అన్ని సౌకర్యాలుండేలా స్టేషన్ల ఆధునీకరణ. ఏ1 క్లాసు స్టేషన్లలో దివ్యాంగులను టాయిలెట్ తీసుకెళ్లేందుకు సహాయకుల ఏర్పాటు.
 
  ప్రయాణ బీమా
  బుకింగ్ సమయంలోనే ప్రయాణికులకు ప్రయాణ బీమా కల్పించేలా ఏర్పాటు.
  ట్రెయిన్ నం. 2016 బడ్జెట్ బండిలో ఏముందంటే..?
  
  రైల్వే మంత్రి సురేశ్ ప్రభు బడ్జెట్‌లో అన్ని వర్గాలను సంతృప్తిపరిచేందుకు యత్నించినట్లు కనిపించింది. ప్రధాని మోదీ మానసపుత్రికలైన ‘స్వచ్ఛభారత్’, ‘డిజిటల్ ఇండియా’కు బడ్జెట్‌లో పెద్దపీట వేశారు. మౌలిక వసతులకూ ప్రాధాన్యం ఇచ్చారు. చిరు వ్యాపారులకు కస్టమర్ కేంద్రం నుంచిప్రయాణికులకు బీమా వరకు పలు కొత్త కార్యక్రమాలను ప్రతిపాదించారు. ఆ విశేషాలేమిటంటే..
  
  యాత్రాస్థలాలను కలుపుతూ...
 ► అజ్మీర్, అమృత్‌సర్, బిహార్ షరీఫ్, చెంగనూర్, ద్వారక, గయ, హరిద్వార్, మథుర, నాగపట్నం, నాందేడ్, నాసిక్, పాలి, పారస్‌నాథ్, పూరి, తిరుపతి, వైలకన్ని, వారణాసి, వాస్కో వంటి యాత్రాస్థలాలను కలుపుతూ ‘ఆస్థా సర్క్యూట్’ను ప్రారంభించటంతోపాటు.. ఆయా రైల్వే స్టేషన్లను సుందరంగా తీర్చిదిద్దనున్నారు.
 ► పోర్టర్లకు కొత్త యూనిఫామ్‌లను సమకూర్చటంతోపాటు వారికి సాఫ్ట్‌స్కిల్స్‌ను నేర్పించి సహాయకులుగా పిలవనున్నారు.
 ► జపాన్ ప్రభుత్వ సహకారంతో అహ్మదాబాద్-ముంబై మధ్య హైస్పీడ్ రైలు కారిడార్ ఏర్పాటు. దీని ద్వారా భారతీయ రైల్వే సాంకేతికంగా పురోగతి సాధించటంతోపాటు తయారీ సామర్థ్యాన్ని పెంచుతుంది.
 ► రైళ్లలో వినోదాన్ని అందించేందుకు ఎఫ్‌ఎం రేడియో స్టేషన్లను ఆహ్వానించటం, అన్ని భారతీయ భాషల్లో ‘రైలు బంధు’ను అన్ని రిజర్వ్‌డ్ క్లాసులకు వర్తింపచేయటం.
 ► ‘క్లీన్ మై కోచ్’ సేవ ద్వారా ఎస్‌ఎంఎస్ పంపగానే.. బోగీని శుభ్రపరిచే వ్యవస్థ.
 ► హైటెక్ హంగులతో స్మార్ట్ కోచ్‌ల ఏర్పాటు
 ► సామాన్యుడికి లాభం చేకూర్చేలా పనిచేస్తున్న అన్ని రైల్వే స్టేషన్లలో రైలు ఆగేలా చర్యలు
  
  
  పెట్టుబడుల ‘సూత్ర’ం..ప్రభు మంత్రం
  న్యూఢిల్లీ: రైల్వే శాఖలో పెట్టుబడులు ఆకర్షించేందుకు విశ్లేషించి నిర్ణయించేందుకు ఆ శాఖ ఓ కొత్త బృందాన్ని ఏర్పాటు చేసింది. ఈ బృం దంలోని ఉద్యోగులకు వేతనాలు, స్టార్టప్ కంపెనీల కోసం రైల్వే బడ్జెట్‌లో రూ.50 కోట్లు కేటాయించింది. స్పెషల్ యూనిట్ ఫర్ ట్రాన్స్‌పోర్టేషన్ రీసెర్చ్, అనలిటిక్స్ (సూత్ర) పేరుతో ఓ బృందాన్ని నియమించినట్లు రైల్వే మంత్రి సురేశ్ ప్రభు ప్రకటించారు. సూత్రలో ప్రముఖ విశ్లేషకులు ఉంటారని చెప్పారు. రైల్వే శాఖకు ఏటా 100 టెరా బైట్ల సమాచారం వస్తుందని, అయితే దీన్ని వ్యాపారపరంగా విశ్లేషించి లబ్ధిపొందే పరి స్థితి ఇప్పటి వరకూ లేదన్నారు.
 
 కొత్త ఆవిష్కరణలను ప్రోత్సహించేందుకు సూత్ర కోసం కేటాయించిన నిధులు వినియోగిస్తామన్నారు. భారత రైల్వే ఎదుర్కొంటున్న కీలకమైన సమస్యలకు కొత్త ఆవిష్కరణల ద్వారా పరిష్కారాలు కనుగొంటామని పేర్కొన్నారు. రతన్ టాటా నేతృత్వంలో రైల్వేల పర్యవేక్షణకు ‘కాయకల్ప్’ అనే ఇన్నోవేటివ్ కౌన్సిల్‌ను సురేశ్ ప్రభు ఏర్పాటు చేస్తారు. దేశంలోని ప్రఖ్యాత పెట్టుబడిదారులు, జాతీయ రైల్వే అకాడమీ, రైల్వే బోర్డు ప్రతినిధులు సభ్యులుగా ఉంటారని చెప్పారు. రైల్వే వ్యవస్థ పనితీరు మెరుగుపడేందుకు ఈ కౌన్సిల్ నుంచి సలహాలు, సూచనలు తీసుకుంటామని ప్రభు పేర్కొన్నారు. రైల్వే వర్క్‌షాప్‌లు, ఉత్పత్తి కర్మాగారాల్లోని సిబ్బంది సరికొత్త ఆవిష్కరణలు చేసేందుకు వీలుగా ప్రోత్సహించేందుకు ల్యాబ్‌లను ఏర్పాటు చేయనున్నట్లు తెలిపారు.
  
  రైల్ డెవలప్‌మెంట్ అథారిటీ..
  మెరుగైన సేవలు, పోటీ తత్వం పెంచటం, వినియోగదారుల హక్కులను కాపాడటం, సేవల్లో ప్రమాణాలు పాటించటం వంటి అంశాలపై భాగస్వామ్య పక్షాలతో చర్చించాక నిర్ణయం తీసుకోవటం.
  
 ► నవారంభ్, నవీనీకరణ్: రైల్వే బోర్డును పునర్‌వ్యవస్థీకరించటంతోపాటు బోర్డు చైర్మన్‌కు విశేషాధికారాలను కల్పించాలని నిర్ణయం. బోర్డులో దేశవ్యాప్త డెరైక్టరేట్లను ఏర్పాటుచేసి వెనకబడ్డ జోన్లలో లాభాలు తెచ్చే యత్నాలను ప్రోత్సహించటం. రైల్వేల్లో అధికారుల నియామకాలు చేపట్టడంతోపాటు రైల్వేల వ్యాపారం పెరిగేందుకు పబ్లిక్, ప్రైవేట్ భాగస్వామ్యాలను ప్రోత్సహించటం.
 ► సశస్తీకరణ్: రైల్వేల్లో దీర్ఘకాల(10 ఏళ్లు), మధ్యమ ప్రణాళికలను నిర్దేశించుకుని వాటిని ప్రణాళికాబద్ధంగా అమలు చేసేందుకు ప్లానింగ్, ఇన్వెస్ట్‌మెంట్ ఆర్గనైజేషన్‌ను స్థాపించటం. దేశవ్యాప్తంగా రైలు సేవలను మెరుగుపరిచేందుకు నేషనల్ రైల్ ప్లాన్‌ను రూపొందించుకోవటం.
 ► ఏకీకరణ్: రైల్వే శాఖ నిర్వహిస్తున్న అన్ని కంపెనీలను ఒకే గొడుగు కిందకు తీసుకు రావటం.
 ► శోధ్ ఔర్ వికాస్: భవిష్యత్ అవసరాలను దృష్టిలో పెట్టుకుని రైల్వేల అభివృద్ధి కోసం ప్రయోగాలు చేసేందుకు.. వ్యూహాత్మక సాంకేతికత, సమగ్రాభివృద్ధికి ప్రత్యేక రైల్వే వ్యవస్థ (శ్రేష్ఠ)ను ఏర్పాటుచేసుకోవటం ఇందులో భాగం. ప్రస్తుతమున్న ఆర్డీఎస్‌వో రోజువారీ విషయాలను చూసుకుంటే.. శ్రేష్ఠ దీర్ఘకాలిక అవసరాలపై దృష్టి సారిస్తుంది.
 ► విశ్లేషణ్: వ్యూహాత్మక పెట్టుబడులు, కార్యక్రమాల అమలును పర్యవేక్షించేందుకు స్పెషల్ యూనిట్ ఫర్ ట్రాన్స్‌పోర్టేషన్ రీసెర్చ్ అండ్ అనలిటిక్స్ (సూత్ర)ను ఏర్పాటు చేయాలని నిర్ణయించారు.
 ► నవ్చ్రన: సంస్థ ఉద్యోగులు, చిరు వ్యాపారులు, స్టార్టప్‌లకోసం రూ. 50 కోట్ల మూలధనాన్ని సమకూర్చటం
  
  ఈ రైళ్లు యమా ఫాస్ట్...
   ప్రపంచంలో అత్యంత వేగంగా దూసుకెళ్లే రైళ్లు ఏయే దేశాల్లో ఉన్నాయి? అవి గంటకు ఎంత స్పీడుతో వెళ్తాయి? ఓ లుక్కేద్దామా?
 
  430 కి.మీ షాంఘై మగ్లేవ్- చైనా
  లోంగ్యాంగ్‌లోని మెట్రోలైన్ స్టేషన్ నుంచి షాంఘై పుడాంగ్ ఇంటర్నేషనల్ ఎయిర్ పోర్టు మధ్య ఈ రైలు దూసుకెళ్తుంది. ఏప్రిల్ 2004 నుంచి పట్టాల ‘పైన’ పరుగులు పెడుతోంది.
  
  380 కి.మీ హార్మోనీ సీఆర్‌హెచ్- చైనా
  ఈ సూపర్‌ఫాస్ట్ రైలు బీజింగ్-షాంఘై మధ్య పరుగులు పెడుతుంది. 2010 అక్టోబర్‌లో పట్టాలెక్కింది. చైనాలోనే వుహాన్-గ్వాంగ్‌జో మధ్య కూడా ఈ రకానికి చెందిన రైలు నడుస్తుంది.
  
  360 కి.మీ ఏజీవీ ఇటాలో- ఇటలీ
  యూరోప్‌లో అత్యంత అధునాతనమైన రైలు ఇదే. ప్రస్తుతం ఈ రైలు ఇటలీలోని నపోలీ-రోమా- ఫిరెంజ్- బొలాగ్నా- మిలాన్ కారిడార్ మధ్య నడుస్తోంది. 2012 నుంచి ఇది సేవలు అందిస్తోంది.
  
  350 కి.మీ సీమెన్స్ వెలారో ఇ-స్పెయిన్
  ఇది స్పెయిన్‌లోని బార్సిలోనా-మాడ్రిడ్ మధ్య పరుగెడుతోంది. ఈ ట్రెయిన్‌ను తయారు చేసివ్వాలని స్పెయిన్ రైల్వే.. సీమెన్స్ కంపెనీకి ఆర్డర్ ఇచ్చింది. 2007 నుంచి ఈ రైలు పరుగులు తీస్తోంది.
  
  మన ‘బుల్లెట్’ ఎప్పుడో?
  దేశంలోనే తొలిసారిగా ముంబై-అహ్మదాబాద్ మధ్య (534 కి.మీ.) బుల్లెట్ రైలును కిందటి బడ్జెట్‌లో ప్రకటించారు. ఇది గంటకు 320 కి.మీ. వేగంతో ప్రయాణించనుంది. ఈ ప్రత్యేక కారిడార్ నిర్మాణానికి రూ.90 వేల కోట్లు అవసరమని అంచనా.
  
  ఈ చరిత్ర రైలు పట్టాలపై..
  చరిత్రలో కొన్ని మరుపురాని సంఘటనలు ఉంటాయి. మరికొన్ని చరిత్రనే మలుపు తిప్పిన ఘటనలు ఉంటాయి! అలా రైల్వే కూడా చరిత్రపుటల్లో తనకంటూ ఓ పేజీని లిఖించింది. అలాంటి కొన్ని సంఘటనల సమాహారం..
  
  1893
  అది జాత్యహంకారానికి పరాకాష్ట! నల్లవాడన్న ఒకే ఒక్కకారణంతో మహాత్మా గాంధీకి దక్షిణాఫ్రికాలో 1893లో జరిగిన అవమానం!! ఆ అవమానమే ఆయన్ను.. జీవితాంతం అన్యాయాన్ని ప్రశ్నించేలా చేసింది. డర్బన్ నుంచి ప్రిటోరియా వెళ్లే రైల్లో ఫస్ట్‌క్లాస్ బోగీలో ఎక్కారంటూ గాంధీని పీటర్‌మారిట్జ్‌బర్గ్ వద్ద నిర్దాక్షిణ్యంగా ప్లాట్‌ఫాంపైకి తోసివేశారు. అలా ఆ రైలు ఘటన చరిత్రలో నిలిచిపోయింది!
  
  1901
  
  ‘‘నా జీవితంలో ఇకపై ఎప్పుడు రెలైక్కినా.. నిరుపేదలు వెళ్లే మూడో తరగతి కంపార్టుమెంటుల్లోనే ప్రయాణం చేస్తా...!’’  కలకత్తాలో కాంగ్రెస్ మహాసభల అనంతరం మహాత్మాగాంధీ తీసుకున్న గొప్ప నిర్ణయమిదీ! అన్నట్టుగానే బతికి ఉన్నంతకాలం దేశంలో రైల్లో ఎక్కడికి వెళ్లినా మూడో తరగతిలోనే ప్రయాణం చేశారు. చివరికి ఆయన చితాభస్మాన్ని కూడా అలహాబాద్‌కు మూడో తరగతిలోనే తరలించారు.
  
  1947
  రైల్లో జనం.. రైలుపైన జనం.. డోర్లు.. కిటికీలు పట్టుకుని వేలాడుతూ జనం.. ఒక్క మాటలో చెప్పాలంటే అది రైలు కాదు.. జనప్రవాహం! దేశ విభజన సమయంలో కొత్తగా ఏర్పడిన పాకిస్తాన్ వెళ్లేందుకు.. ఆ దేశం నుంచి భారత్ వచ్చేందుకు ప్రజలు పోటెత్తారు.
  
  1975
  జనవరి 2. బిహార్‌లోని సమస్తిపూర్. అప్పటి రైల్వేమంత్రి ఎల్‌ఎన్ మిశ్రా ఓ రైల్వేలైన్ ప్రారంభించడానికి  వచ్చారు. ఒక్కసారిగా భారీ పేలుడు. శర్మతోపాటు చాలామంది చనిపోయారు. అసలు ఈ బాంబు పేలుడుకు కారణ మెవరు? మంత్రిని ఎందుకు హతమార్చారు? ఈ మిస్టరీ ఇప్పటికీ తేలలేదు.


 సాక్షి, హైదరాబాద్: సీఎం కేసీఆర్, టీఆర్‌ఎస్ ఎంపీల చేతకానితనంతోనే రైల్వే బడ్జెట్‌లో రాష్ట్రానికి అన్యాయం జరిగిందని మాజీ ఎంపీ పొన్నం ప్రభాకర్ విమర్శించారు. గురువారం ఆయన విలేకరులతో మాట్లాడుతూ రాష్ట్రంలో రైల్వేల అవసరాలను కేంద్రప్రభుత్వానికి చెప్పడంలో వారు విఫలమయ్యారని వ్యాఖ్యానించారు.
 
 రైల్వే ప్రాజెక్టులపై సీఎం కేసీఆర్ ఎంపీలతో కనీసం ఒక్క సమావేశాన్ని కూడా నిర్వహించలేదన్నారు. ఇప్పటికైనా కేంద్రం మీద ఒత్తిడి తీసుకురావడానికి ఢిల్లీకి అఖిలపక్షాన్ని తీసుకెళ్లాలని సూచించారు.


 ఈసారి పరిస్థితి మారింది..
  రైల్వే బడ్జెట్ లో పెద్దపల్లి- నిజామాబాద్ రైల్వే లైనుకు రూ. 70 కోట్లు కేటాయించడం సంతోషకరం. బోధన్-బీదర్ రైల్వే లైను మంజూరైంది. మౌలిక సదుపాయాలకు కేటాయింపులు బాగున్నాయి. మహిళల భద్రత కోసం చేపట్టిన చర్యలు బాగున్నాయి. సాధారణంగా ఏ రాష్ట్రానికి చెందిన మంత్రి ఉంటే ఆ రాష్ట్రానికి రైళ్లు కేటాయించుకుంటారు. ఈ సారి పరిస్థితి కొంచెం మారింది.
  -కవిత, నిజామాబాద్ ఎంపీ
  
  ఇదేనా బాబు పలుకుబడి
  రాష్ట్ర విభజనతో ఆంధ్రప్రదేశ్‌కు తీవ్ర అన్యాయం జరిగిందని గగ్గోలు పెట్టే ముఖ్యమంత్రి చంద్రబాబునాయుడు కేంద్ర ప్రభుత్వంలో భాగస్వామిగా ఉన్నా సాధించిందేమీ లేదు. చంద్రబాబును బీజేపీ తురుపుముక్కగా వాడుకుంటోంది. రాష్ట్ర ప్రభుత్వం ప్రతిపాదించిన ఏ ప్రాజెక్టునూ కేంద్రం ఆమోదించనందుకు చంద్రబాబు సిగ్గు పడాలి. విభజన సమయంలో విశాఖ రైల్వేజోన్ ఏర్పాటు చేస్తామన్న హామీని కేంద్రం తుంగలో తొక్కింది.  దీన్ని బట్టే చంద్రబాబుకు కేంద్రంలో ఉన్న పలుకుబడి ఏపాటిదో అర్థమవుతోంది.
  - కె.రామకృష్ణ, పి.మధు (వామపక్ష నేతలు)
  
  నిరాశపరిచింది
  రైల్వే బడ్జెట్‌లో విశాఖ రైల్వే జోన్ ప్రకటించకపోవడం నిరాశ కలిగించింది. పునర్ వ్యవస్థీకరణ చట్టంలో పొందుపరిచిన హామీ మేరకు కొత్త రాజధాని నుంచి వివిధ జిల్లాలకు, హైదరాబాద్‌కు రైల్వే మార్గాలను అనుసంధానించాల్సి ఉండగా.. అది కనిపించలేదు.  
  - మేకపాటి రాజమోహన్‌రెడ్డి, వైఎస్సార్‌సీపీ లోక్‌సభాపక్ష నేత
  
  బాబు అసమర్థతకు రుజువు
  ప్రధాని మోదీ మోసకారితనానికి, సీఎం చంద్రబాబు చేతకాని తనానికి  రైల్వే బడ్జెట్ ప్రతీకగా నిలిచింది.  కనీసం ఒక్క కొత్త రైలు, ఒక్క కొత్త ప్రాజెక్టు కూడా ప్రకటించని రైల్వే బడ్జెట్  చరిత్రలోనే ఇదే తొలిసారి. రాష్ట్ర ప్రయోజనాల సాధనకు టీడీపీ, బీజేపీ నామమాత్రపు ప్రయత్నం కూడా చేయలే దు. విభజన చట్టంలో స్పష్టంగా పేర్కొన్న ప్రత్యేక రైల్వే జోన్‌ను ప్రకటించకుండా ద్రోహం చేశారు. ఎన్‌డీఏ తీరును వ్యతిరేకిస్తూ శుక్రవారం రాష్ట్ర వ్యాప్తంగా నిరసనలు నిర్వహిస్తాం. ప్రధాని మోదీ ఆంధ్రప్రదేశ్ వ్యతిరేక వైఖరి అవలంబిస్తున్నారు. రాష్ట్ర ప్రయోజనాలపై నిలదీయలేని చంద్రబాబు తీరే ఇందుకు కారణం.
  - రఘువీరారెడ్డి, పీసీసీ అధ్యక్షుడు
  
  ఫలిస్తున్న బాబు కృషి
  కేంద్రం నుంచి నిధులు రాబట్టడానికి సీఎం చంద్రబాబు చేస్తు న్న కృషికి  ఫలితంగా  రైల్వే బడ్జెట్ లో ప్రాధాన్యత లభించింది. ఏపీకి కేంద్రం విడతల వారీగా సాయం అందిస్తోంది.  
  - తోట నరసింహం, టీడీపీ లోక్‌సభా పక్ష నేత
  
  తెలంగాణపై వివక్ష: పొంగులేటి
  రైల్వే బడ్జెట్‌లో తెలంగాణకు తీవ్ర అన్యాయం జరిగింది. కేంద్రం వివక్ష చూపింది. భద్రాచలం శ్రీసీతారామచంద్రస్వామిని దర్శించుకునేందుకు దేశం నలు మూలల నుంచి తరలివచ్చే భక్తుల సౌకర్యార్థం పాండురంగాపురం-సారపాక రైల్వే లైన్ ఊసేలేదు. ఈ విషయంపై రానున్న పార్లమెంట్ సమావేశాల్లో ప్రశ్నిస్తాం. అవసరమైతే వైఎస్సార్‌సీపీ ఆధ్వర్యంలో ఆందోళనలు నిర్వహించి కేంద్రానికి కనువిప్పు కలిగేలా చేస్తాం.


 సాక్షి, హైదరాబాద్: ప్రజల అవసరాలను దృష్టిలో పెట్టుకోకుండా, కేవలం రాజకీయ అవసరాలకు అనువుగా రైల్వే బడ్జెట్ కేటాయింపులు జరిగాయని సీపీఐ రాష్ట్ర కార్యదర్శి చాడ వెంకట్‌రెడ్డి విమర్శించారు. గురువారం ఆయన విలేకరులతో మాట్లాడుతూ.. బడ్జెట్‌లో తెలంగాణకు అన్యాయం జరిగిందని ఆరోపించారు.
 
 కాజీపేట కోచ్ ఫ్యాక్టరీ మంజూరు చేయకుండా రాష్ట్రానికి తీవ్ర అన్యాయం చేశారని దుయ్యబట్టారు. రాష్ట్రానికి కొత్త రైళ్లు, లైన్లు, బోగీలకు నిధులు కేటాయించకుండా కేంద్రం వివక్ష చూపిందన్నారు. పెండింగ్ ప్రాజెక్టుల విషయాన్ని పట్టించుకోలేదని పేర్కొన్నారు.
  


 రాష్ట్రానికి ఒక్క రైలు లేదు.. కొత్త ప్రాజెక్టుల ఊసు లేదు
 * పాత ప్రాజెక్టులకు అత్తెసరు నిధులతో సరి
 * మరోసారి మొండిచేయి చూపిన రైల్వేశాఖ
 * కాజీపేటలో వ్యాగన్ వర్క్‌షాపునకు ఓకే
 * యాదాద్రి వరకు ఎంఎంటీఎస్ పొడిగింపు
 * సికింద్రాబాద్‌పై ఒత్తిడి తగ్గించేందుకు చర్లపల్లిలో రైల్ టెర్మినల్
 * ఇవి మినహా రాష్ట్రానికి ఒరిగిందేమీ లేదు
 * కాజీపేట-విజయవాడ మూడో లైన్‌కు కేవలం రూ.50 కోట్లు
 * మణుగూరు-రామగుండం మార్గానికి రూ. లక్ష విదిలింపు
 
  సాక్షి, హైదరాబాద్:
  కొత్త రైలు ఒక్కటీ లేదు.. ఒక్క భారీ ప్రాజెక్టు రాలేదు.. పెద్ద స్టేషన్లకు కొత్త రూపునిచ్చే ప్రయత్నం లేదు.. చిన్న స్టేషన్‌లను ‘ఆదర్శం’గా మార్చే ఊసు లేదు..! కోటి ఆశలతో ఎదురుచూసిన ప్రజల ఆశలపై నీళ్లు చల్లుతూ సురేశ్‌ప్రభు బడ్జెట్ రైలు ‘తెలంగాణ’లో ఆగకుండా దూసుకెళ్లి దుమ్ము మిగిల్చింది!! వరుసగా రెండో ఏడాది కూడా సంస్కరణల హోరులో రాష్ట్రం చిన్నబోయింది. ఆంగ్లేయుల కాలంలో వేసిన లైన్లు మినహా పెద్దగా కొత్త మార్గాలు లేని తెలంగాణను కేంద్ర ప్రభుత్వం మరోసారి విస్మరించింది. కొత్త ప్రాజెక్టులు ఇవ్వకున్నా.. ప్రజల డిమాండ్ మేరకు ఐదారు కొత్త రైళ్లు ఇవ్వటం పరిపాటి. కానీ ఈసారి అవీ లేవు.
 
 సంప్రదాయ బడ్జెట్‌కు భిన్నంగా గత సంవత్సరం ఒక్క కొత్త రైలు ప్రకటించని రైల్వేమంత్రి సురేశ్‌ప్రభు ఈసారి కూడా అదే పంథా అనుసరించారు. ఉన్న లైన్లు రద్దీగా మారిన నేపథ్యంలో కొత్త రైళ్లు ఇవ్వటం సరికాదనుకున్న మంత్రి.. వాటిని మంజూరు చేయటానికి ససేమిరా అన్నారు. భవిష్యత్తులో కొత్త రైళ్లు రావాలంటే ఇప్పుడు కొత్త లైన్ల నిర్మాణం అవసరమన్న విషయాన్ని విస్మరించారు. దశాబ్దాల క్రితం మంజూరై నత్తతో పోటీ పడుతూ పనులు సాగుతున్న లైన్లకు అరకొర నిధులు విదిల్చటం మినహా బడ్జెట్‌లో కొత్త మార్గాలపై దృష్టి సారించలేదు. కాజీపేటలో వ్యాగన్ పిరియాడికల్ ఓవర్‌హాలింగ్ వర్క్‌షాపు ఏర్పాటుకు పచ్చజెండా ఊపటం, హైదరాబాద్‌లోని ఎంఎంటీఎస్ రెండో దశ విస్తరణలో భాగంగా ఘట్కేసర్ వరకు
  
  నిర్మించునున్న మార్గాన్ని ప్రముఖ పుణ్యక్షేత్రం యాదాద్రి (రాయిగిరి) వరకు పొడిగించడం, రైళ్ల రద్దీతో ఇరుగ్గా మారిన సికింద్రాబాద్ రైల్వే స్టేషన్‌పై భారం తగ్గించేందుకు శివారులోని చెర్లపల్లిలో శాటిలైట్ రైల్ టెర్మినల్ నిర్మాణానికి అనుమతి ఇవ్వడం.. ఈ మూడు తప్ప రాష్ట్రానికి ఒరిగిందేమీ లేదు. బడ్జెట్ రోజు వరకు ఆశల పల్లకిలో ఊరేగి ఒక్కసారి ఉస్సూరుమనిపించకుండా సురేశ్‌ప్రభు గతంలోనే స్పష్టమైన సంకేతాలిచ్చారు. దీంతో ఈ బడ్జెట్‌లో పెద్దగా ఏమీ ఉండదన్న విషయం రాష్ట్ర ప్రభుత్వానికి ముందే అర్థమైంది. అందుకే కనీసం బడ్జెట్ ముందు ప్రతిపాదనల జాబితాను కూడా రైల్వే శాఖకు పంపలేదు.
 
  ఇలాగైతే ఎప్పుడు పూర్తయ్యేది?
  దక్షిణ మధ్య రైల్వేలో బిజీగా ఉండే కాజీపేట-విజయవాడ మార్గంలో మూడో లైను నిర్మాణ పనులను వెంటనే పూర్తి చేయాల్సి ఉంది. కానీ ప్రతి బడ్జెట్‌లో అత్తెసరు నిధులు మాత్రమే కేటాయిస్తుండటంతో ఈ పనులు సాగటం లేదు. 220 కి.మీ. నిడివి ఉన్న ఈ ప్రాజెక్టు పూర్తి చేయాలంటే రూ.1,630 కోట్లు అవసరం. 2014-15 నాటికి ఖర్చు చేసింది కేవలం రూ.16 కోట్లు మాత్రమే. గత బడ్జెట్‌లో రూ.100 కోట్లు ప్రకటించినా తుదకు కేటాయించింది మాత్రం రూ.68 కోట్లే. ఈసారి రూ.50 కోట్లతోనే సరిపుచ్చారు. ఈ మార్గంలో లైన్‌ను గరిష్ట స్థాయిని  మించి 175 శాతం మేర వినియోగిస్తుండటంతో పరిస్థితి ప్రమాదకరంగా మారింది. ఫలితంగా డిమాండ్ ఉన్నా అదనపు రైళ్లు నడిపేందుకు అధికారులు జంకుతున్నారు. అలాంటి కీలకమైన మార్గంపై మరోసారి నిర్లక్ష్యం చూపారు. మహారాష్ట్రలోని బల్లార్షా నుంచి కాజీపేట వరకు ట్రిప్లింగ్‌ది కూడా ఇదే దుస్థితి. దీనికి కూడా అత్తెసరుగా రూ.50 కోట్లు కేటాయించారు.
 
  సీఎం కలల ప్రాజెక్టుకూ అత్తెసరు నిధులే..
  రాష్ట్రంలో మరో కీలక మార్గం పెద్దపల్లి-కరీంనగర్-నిజామాబాద్. దీనికి బడ్జెట్‌లో రూ.70 కోట్లు విదిల్చారు. గత బడ్జెట్‌లో రూ.141 కోట్లు మంజూరు చేయగా తుదకు రూ.169 కోట్లకు పెంచారు. ఈసారి అందులో సగం కూడా ఇవ్వలేదు. మునీరాబాద్-మహబూబ్‌నగర్ లైన్‌కు గత బడ్జెట్‌లో రూ.34 కోట్లు ఇవ్వగా ఈసారి రూ.180 కోట్లే కేటాయించారు. కరీంనగర్‌ను రైల్వేతో అనుసంధానం చేసే ముఖ్యమైన మనోహరాబాద్-కొత్తపల్లి లైన్‌కు రూ.30 కోట్లు కేటాయించారు. గత బడ్జెట్‌లో రూ.20 కోట్లు కేటాయిస్తే చివరికొచ్చేసరికి రూ.కోటి మాత్రమే విడుదలైంది. ఇది ముఖ్యమంత్రి కేసీఆర్ కలల ప్రాజెక్టు అయినప్పటికీ రైల్వే శాఖ నిర్లక్ష్యం చూపింది. ఫలితంగా ఈ సంవత్సరం కూడా ప్రాజెక్టులో పెద్దగా పురోగతి ఉండే అవకాశం లేదు.
 
  హవ్వ... రూ.లక్ష?
  బొగ్గు రవాణాలో కీలకంగా మారనున్న మణుగూరు-రామగుండం లైన్‌కు బడ్జెట్‌లో రూ.లక్ష కేటాయించారు! గత బడ్జెట్‌లో రూ.10 లక్షలు ప్రకటించి రూ.8.2 లక్షలు ఖర్చు చేసిన రైల్వేశాఖ.. ఈసారి రూ.లక్ష ఇవ్వటం విస్మయం కలిగించింది. అక్కన్నపేట-మెదక్ మార్గానికి రూ.10 కోట్లు, భద్రాచలం-కొవ్వూరుకు రూ.10 కోట్లు, భద్రాచలం-సత్తుపల్లి రోడ్డుకు రూ.25 కోట్లు కేటాయించారు.
 
 రద్దు చేసి.. జీవం పోసి..
  రాష్ట్రంలో అతిపురాతన ప్రాజెక్టుగా రికార్డుల్లోకెక్కింది మాచెర్ల-నల్లగొండ లైను. ఇది 1997లో మంజూరైనా ఇప్పటివరకు పనులే మొదలు పెట్టలేదు. ఇటీవల ఏకంగా ఆ ప్రతిపాదననే రద్దు చేసుకుంటున్నట్టు స్వయంగా రైల్వే శాఖ ప్రకటించింది. స్థానిక ఎంపీ గుత్తా సుఖేందర్‌రెడ్డి పార్లమెంటులో ప్రశ్నించగా.. ఈ మేరకు సమాధానం వచ్చింది. దీంతో అదెలా కుదురుతుందని ఆయన ఆగ్రహం వ్యక్తం చేశారు. ఇటీవల ఎంపీలతో నిర్వహించిన బడ్జెట్ సన్నాహక సమావేశంలో ఈ విషయమై వాకౌట్ కూడా చేశారు. విచిత్రంగా తాజా బడ్జెట్‌లో ఆ ప్రాజెక్టుకు రూ.20 లక్షలు కేటాయించారు. దీన్ని చూసి ఎంపీ సుఖేందర్‌రెడ్డే ఆశ్చర్యపోయారు. రద్దు చేసిన ప్రాజెక్టుకు మళ్లీ జీవం పోసిన రైల్వే శాఖ మరీ రూ.20 లక్షలు కేటాయించటం విడ్డూరమని ఆయన ఆవేదన వ్యక్తం చేశారు.
  


 బడ్జెట్‌లో గుంటూరు డివిజన్‌కు నూతన కేటాయింపులు శూన్యం
 రైల్వే జోన్ ప్రస్తావనే లేదుమౌలిక వసతులకంటే టెక్నాలజీకే ప్రాధాన్యం
 పెండింగ్ ప్రాజెక్టులకే నిధులుసామాన్య ప్రయాణికుల్లో తీవ్ర నిరాశ
  
 నవ్యాంధ్రరాజధానిలో బడ్జెట్ రైలు ఆగలేదు. గుంటూరు రైల్వే డివిజన్‌కు నూతన కేటాయింపుల ఊసే లేదు. ఇప్పుడిప్పుడే రాజధాని అమరావతి నిర్మాణ పనులు పుంజుకుంటున్న నేపథ్యంలో గుంటూరు రైల్వేస్టేషన్ నుంచి రాష్ట్రంలోని ఇతర ప్రాంతాల వారికి కనెక్టవిటి అత్యవసరం. బడ్జెట్  కేటాయింపుల్లో పెండింగ్ ప్రాజెక్టులకు నిధుల కేటాయింపు మినహా నూతన రైళ్లు, రైల్వే లైన్లు, డబ్లింగ్, విద్యుదీకరణ పనులకు కేటాయింపులు లేకపోవడం తీవ్ర నిరాశకు గురిచేసింది.
  
  
 నగరంపాలెం (గుంటూరు)  కేంద్రమంత్రి సురేష్‌ప్రభు గురువారం పార్లమెంట్ ప్రవేశపెట్టిన రైల్వే బడ్జెట్ గుంటూరు డివిజన్ ప్రజలను నిరాశకు గురిచేంది. రాష్ట్ర ప్రభుత్వం రాజధాని నిర్మాణంపై చేస్తున్న హడావుడి కార్యరూపం దాల్చేందుకు చాలాకాలం పట్టేలా ఉందని భావించారో ఏమో కనీసం రాజధాని ప్రాంతంలో రైల్వేలైన్ల అభివృద్ధిపై హామీలు కూడా బడ్జెట్‌లో ప్రస్తావించలేదు. మౌలిక వసతుల కంటే టెక్నాలజీకే ప్రాధాన్యమిచ్చారు.
 
  వీటికి నిధులొచ్చే అవకాశం..
 గుంటూరు - విజయవాడకు రాజధాని ప్రాంతమైన అమరావతి మీదుగా సుమారు 85 కి.మీ, నల్లపాడు-బీబీనగర్‌కు 243 కి.మీ డబ్లింగ్ సర్వేకు అనుమతించింది. ఇక విభజన చట్టంలో పొందుపరిచిన విధంగా నూతన రైల్వేజోన్ ఊసేలేదు. డివిజన్‌లో ప్రధానమంత్రి ప్రయార్టీ ప్రాజెక్టుల కింద నడుస్తున్న నడికుడి-శ్రీకాళహస్తి పనులకు రూ.182 కోట్లు, గతంలో పనులు ప్రారంభించి ఆగిపోయిన మాచర్ల-నల్లగొండ రైల్వే లైన్‌కు రూ.20 కోట్లు కేటాయించారు. దేశం మెత్తంలోని పెండింగ్ ప్రాజెక్టులు మూడేళ్లలో పూర్తి చేస్తామని తెలపడం ద్వారా డివిజన్‌లో ప్రస్తుతం జరుగుతున్న తెనాలి-గుంటూరు డబ్లింగ్, గుంటూరు- నంద్యాల విద్యుదీకరణ పనులకు బడ్జెట్ నిధులు వచ్చే అవకాశం ఉంది.
 
  ప్రజాప్రతినిధుల సమర్థతను బట్టే సౌకర్యాలు
 రాష్ట్రప్రభుత్వ  కేంద్రమంత్రి సురేష్‌ప్రభు గురువారం పార్లమెంట్‌లో ప్రవేశపెట్టిన రైల్వే బడ్జెట్‌లో భాగస్వామ్యంతో గుంటూరు-నంద్యాల డబ్లింగ్ పనులు చేపట్టనున్నారు. మేళచెర్వు-జగ్గయ్యపేట పెండింగ్ ప్రాజెక్టుకు రూ.110 కోట్లు కేటాయింపు ద్వారా భవిష్యత్తులో గుంటూరు డివిజన్‌కు విష్ణుపురం మీదుగా సరుకురవాణా పెరిగే అవకాశం ఉంది. ప్రత్యేక వివరాలు లేకుండా దేశవ్యాప్తంగా 400 రైల్వేస్టేషన్లకు వైఫై, 311 స్టేషన్లులో సీసీ కెమేరాల ఏర్పాటు, అన్ రిజర్వుడ్, సూపర్‌ఫాస్ట్ అంత్యోదయ ట్రైన్లు, దీన్‌దయాళ్ కోచ్‌లు, రిజర్వేషన్, పర్యటకరంగ ప్రయాణికుల కోసం హమ్‌సఫర్, తేజస్, ఉదయ్, రైళ్లు నడపాలని ప్రకటించారు. దీని వలన జోన్ స్థాయిలో అధికారుల సమర్థతను బట్టి, ప్రజప్రతినిధులు రైల్వే బోర్డుపై తెచ్చే ఒత్తిడి వలనే ఈ సౌకర్యలు డివిజన్‌కు సమకూరే అవకాశం ఉంది.
 
 
  భద్రతకు ఆన్‌లైన్ టెక్నాలజీ
 రైల్వే శాఖలో ఆన్‌లైన్ టెక్నాలజీని ప్రయాణికులకు, భద్రతకు విస్తృతంగా వినియోగించేలా పథకాల రూపకల్పన చేయనున్నారు. ప్లాట్ ఫాం టికెట్‌ను యాప్ ద్వారా అందించాలని నిర్ణయించడమే ఇందుకు నిదర్శనం. సగటు రైల్వే ప్రయాణికుడికి మేలు చేయలేని బడ్జెట్‌గా దీనిని రూపొందించినట్లు విశ్లేషకులు భావిస్తున్నారు. బడ్జెట్‌లో 2016-17 సాధించనున్న లాభాలు ప్రస్తావించటం, పీపీపీ ప్రాజెక్టు కింద రైల్వే స్టేషన్లు అభివృద్ధి చేయాలని నిర్ణయించడం ద్వారా, రైల్వేశాఖలో భవిష్యత్తులో జరిగే ప్రయివేటీకరణకు ఇది నాంది బడ్జెట్ అవుతుందంటున్నారు. ఇక ఉద్యోగుల సంక్షేమంపై కనీస ప్రస్తావనే లేదు.
 
  మంగళగిరికీ మొండిచేయి..
 మంగళగిరి : నవ్యాంధ్ర నూతన అమరావతి రాజధానిలో ప్రధాన స్టేషన్‌గా వున్న మంగళగిరిలోనే బడ్జెట్ రైలు కూత వినిపించలేదు. అధికారులు,అధికారపార్టీనేతలు గొప్పగా చెప్పిన రైల్యే లైన్లు విస్తరణ,దేశనలుమూలలకు నూతన రైళ్లు దక్కకపోగా సామాన్య ప్రయాణికులు కోరుకుంటున్న కనీస మౌలిక వసతులుకు బడ్జెట్‌లో స్థానం దక్కకపోవడం స్థానికులను విస్మయానికి గురి చేసింది. స్టేషన్‌లో  కనీసం రెండో రిజర్యేషన్ కౌంటర్, ప్రయాణికుల విశ్రాంతి గదులతో పాటు మరుగుదొడ్లు, తాగునీరు ఏర్పాటుకు దిక్కు లేకపోవడం విశేషం. గత ఏడాది దక్షిణ మధ్య రైల్యే జీఎం పర్యటించిన సమయంలోనూ స్థానిక ప్రజాప్రతినిధులు, ప్రయాణికుల సంక్షేమసంఘం ప్రతినిధులు కలిసి పలు వినతులు చేశారు.రాజధాని స్టేషన్‌లో మరిన్ని మౌలికవసతులతో పాటు స్టేషన్ అభివృద్ధికి మరిన్ని ప్రతిపాదనలు చేశామని బడ్జెట్‌లో నిధులు కెటాయించిన వెంటనే స్టేషన్‌ను అత్యాధునికంగా తీర్చిదిద్దుతామని చెప్పిన అధికారులు ఆమేరకు చేతలలో సాధించలేకపోవడం గమనార్హం.


 ♦ రైల్వే బడ్జెట్‌లో విశాఖకు.. ఉత్తరాంధ్రకు
 ♦ తీవ్ర అన్యాయం విశాఖ జోన్ ఊసే ఎత్తని
 ♦ రైల్వే మంత్రి టీడీపీ, బీజేపీ పాలకుల
 ♦ హామీలు గాలికి.. భగ్గుమన్న ప్రతిపక్షాలు,
 ♦ ప్రజాసంఘాలు వీటితోనే సరిపెట్టుకోండి
 ♦ ఖరగ్‌పూర్-విజయవాడ సరుకు రవాణా కారిడార్
 ♦ వడ్లపూడి వ్యాగన్ వర్క్‌షాప్‌కు రూ.30 కోట్లు
 ♦ కొత్తవలస-సింహాచలం 4వ లైన్‌కు రూ.2.71 కోట్లు
 ♦ సింహాచలం నార్త్-గోపాలపట్నం డబ్లింగ్ బైపాస్‌కు రూ.4.24 కోట్లు
 ♦ ఖరగ్‌పూర్-విజయవాడ ట్రిప్లింగ్ లైన్
 ♦ విశాఖ స్టేషన్‌లో త్వరలో వైఫై సౌకర్యం
 బడ్జెట్ రైలు వచ్చింది.. వెళ్లింది.. కాదు కాదు.. మెరుపులా మాయమైంది!.. విశాఖ అనే నగరమే లేదన్నట్లుగా హైస్పీడ్‌లో దూసుకుపోయిన బడ్జెట్ రైలు కింద నగర ఆశలన్నీ నుజ్జునుజ్జయ్యాయి. కలలన్నీ చెదిరిపోయాయి... హామీలన్నీ కొట్టుకుపోయాయి.
 అదిగో జోన్.. ఇదిగో జోన్.. అంటూ పాలక టీడీపీ, బీజేపీ నేతలు నిన్నటి వరకు చేసిన ప్రచారం ఉత్త పటాటోపమేనని సురేష్ ప్రభువు తేల్చిపారేశారు.
  అంతేనా.. ఒక కొత్త రైలు లేదు.. ఫ్రీక్వెన్సీ పెంపూ లేదు.. కొత్త ప్రాజెక్టులు లేవు... అసలు రైల్వే బడ్జెట్‌లో విశాఖ అన్న ఊసే లేకుండా రైల్వే మంత్రి బడ్జెట్ పాఠాన్ని అప్పజెప్పేశారు.
 తూర్పు కోస్తా జోన్ పరిధిలో ఉన్న వాల్తేర్ డివిజన్‌కు ఈ బడ్జెట్‌లో వెయ్యి కోట్ల పైచిలుకు నిధులు కేటాయించారని డీఆర్‌ఎం చంద్రలేఖ ఉవాచించినా.. వాటిలో విశాఖేతర ప్రాంతాలకు.. 
 
 ప్రత్యేకించి ఒడిశా, చత్తీస్‌గఢ్ ప్రాంతాలకు పోయేవే ఎక్కువగా ఉన్నాయి.. ఇంతకాలం హామీలతో ఊరించి.. బడ్జెట్‌లో మొండిచెయ్యి చూపడం కళ్లు మూసి జెల్ల కొట్టినట్టుగా ఉందని.. ప్రజా, ఉద్యోగ సంఘాలు, ప్రతిపక్ష పార్టీలు భగ్గుమన్నాయి. రైల్వే బడ్జెట్‌లో విశాఖకు జరిగిన అన్యాయాన్ని నిరసిస్తూ నిరసనలకు దిగాయి.
 ♦ అన్యాయం చేశారు
 ♦ రైల్వే బ డ్జెట్‌పై వైఎస్సార్ సీపీ మండిపాటు
 ♦ రైల్వేస్టేషన్ ముందు ధర్నా
 అనకాపల్లి:  రైల్వే జోన్ విషయంలో విశాఖకు మరోసారి అన్యాయం జరిగింది.. దీనికి బాధ్యత వహిస్తూ రాష్ట్రానికి చెందిన  బీజేపీ, టీడీపీ ఎంపీలు, కేంద్రమంత్రులు రాజీనామా చేయాలి అనివైఎస్సార్ సీపీ అనకాపల్లి పట్టణ అధ్యక్షుడు మందపాటి జానకిరామరాజు డిమాండ్ చేశారు. గురువారం అనకాపల్లి రైల్వేస్టేషన్ ముందు పార్టీ నాయకు, కార్యకర్తలతో కలసి ధర్నాకు దిగారు. రైల్వే బడ్జెట్ నిరాశ మిగిల్చిందన్నారు. మాయమాటలు చెప్పి రైల్వేజోన్ విషయాన్ని పక్కన పెట్టారని విమర్శించారు. ప్రత్యేక హోదా, రాష్ట్ర సమస్యల గురించి తమ పార్టీ అధినేత వైఎస్ జగన్‌మోహన్‌రెడ్డి చిత్తశుద్ధితో పోరాడుతున్నారని పేర్కొన్నారు. పట్టణ కార్యదర్శి సూరిశెట్టి రమణ అప్పారావు మాట్లాడుతూ రెండేళ్ల నుంచి రైల్వేజోన్ వస్తుందని విశాఖ ఎంపీ హరిబాబు, అనకాపల్లి ఎంపీ అవంతి శ్రీనివాసరావు మభ్యపెట్టారని.. కాని రైల్వేబడ్జెట్‌లో ఈ ప్రస్తావనే రాలేదన్నారు.
 మండల అధ్యక్షుడు గొర్లి సూరిబాబు, పట్టణ అధికార ప్రతినిధి ఆళ్ల నాగేశ్వరరావు మాట్లాడారు. కేంద్ర, రాష్ట్ర ప్రభుత్వాలు రాష్ట్రానికి న్యాయం చేయడంలో వైఫల్యం చెందుతున్నాయని చెప్పేందుకు రైల్వేజోన్ ఉదాహరణ అన్నారు. ప్రభుత్వానికి వ్యతిరేకంగా నినదించారు. అంతకుముందు అంబేడ్కర్ విగ్రహానికి పూలమాల నివాళులు అర్పించారు. పార్టీ మహిళా విభాగం అధ్యక్షురాలు ఏవీ రత్నకుమారి, మండల కార్యదర్శి భీశెట్టి జగన్, మామిడి నూకరాజు, సమ్మంగి కనకారావు, పొట్ల అప్పారావు, పెట్ల నాగేశ్వరరావు, ఏడువాకల నారాయణరావు, పిట్టా అప్పలరాజు, మట్టా కుమార్, కె.అత్తిరికుమార్ తదితరులు పాల్గొన్నారు. 
 సాక్షి, విశాఖపట్నం : ఊహించిందే జరిగింది. కేంద్రం విశాఖకు మరోసారి అన్యాయం చేసింది. ఈసారి కూడా రైల్వే బడ్జెట్ నిరాశపరిచింది. తూర్పు కోస్తా రైల్వేలో అతిపెద్ద ఆదాయ వనరుగా ఉన్న వాల్తేరు డివిజన్‌కు రైల్వే బడ్జెట్‌లో మొండిచెయ్యే చూపింది. ఏళ్ల తరబడి ఎన్నో ఆశలు పెట్టుకున్న జోన్ ఆశలను కూడా ఆవిరి చేసేసింది. అదిగో జోన్, ఇదిగో జోన్ అంటూ కొన్నాళ్ల నుంచి అధికార టీడీపీ, బీజేపీ నేతలు ఊదరగొడ్తూ వచ్చారు. తీరా గురువారం నాటి బడ్జెట్‌లో వైజాగ్ ఊసే లేదు. విశాఖపై రైల్వేశాఖకున్న నిర్లక్ష్యం, నేతల ఉదాసీనతలను చూసి విశాఖ వాసులు నివ్వెరపోయారు. ఇంతటి అన్యాయం ఎప్పుడూ లేదంటూ నిప్పులు కక్కుతున్నారు. బడ్జెట్ ప్రసంగంలో రైల్వేమంత్రి సురేష్ ప్రభు నోట ‘విశాఖపట్నం’ అన్న మాటే రాలేదంటే ఏమనుకోవాలి? భవిష్యత్‌లో వాల్తేరుకు వరాలిస్తారని, ప్రత్యేక జోన్ ప్రకటిస్తారంటే ఎవరిని నమ్మాలి? అధికార పార్టీల నేతల చిత్తశుద్ధి లోపమా? లేక వీరిని కేంద్రం పెద్దలు పట్టించుకోకపోవడమా? ఇవీ ఇప్పుడు విశాఖ వాసుల మదిలో మెదులుతున్న ప్రశ్నలు!
  విశాఖ ఘోష వినపడదా?
 దాదాపు 50 ఏళ్ల నుంచి విశాఖ రైల్వే జోన్ డిమాండ్ కొనసా....గుతూనే ఉంది. ప్రజాసంఘాలు, విద్యార్థి సంఘాలు, జేఏసీలు తరచూ జోన్ కోసం ఉద్యమాలు, ఆందోళనలు చేస్తూనే ఉన్నాయి. అయినా రైల్వేశాఖ పెడచెవిన పెడుతూనే వస్తోంది. ఆఖరికి రాష్ట్ర విభజన చట్టంలో రైల్వే జోన్  ఇవ్వాలన్న ప్రస్తావించారు కూడా. కేంద్రంలో బీజేపీ, రాష్ట్రంలోని టీడీపీ జతకట్టి అధికారంలోకి వచ్చాక ఇక జోన్ ఖాయమన్న ప్రచారం ఉధృతమైంది. గత ఏడాది రైల్వే బడ్జెట్‌లోనూ జోన్ ప్రకటన వెలువడుతుందనుకుంటే నిరాశే మిగిలింది. జోన్ ఇవ్వడానికి రైల్వే మంత్రి సురేష్ ప్రభు ఆమోదం తెలిపారని పక్షం రోజుల క్రితం కేంద్రమంత్రులు ప్రకటనలు చేశారు. దీంతో ఈ బడ్జెట్‌లో జోన్ ఇచ్చేస్తారన్న భావన కలిగించారు. తాజా బడ్జెట్‌లో ఎప్పటిలాగానే జోన్ జోలికెళ్లకుండా ఆశలపై నీళ్లు చల్లారు. మరోవైపు విశాఖలో ఏళ్ల తరబడి ఉన్న డిమాండ్లను రైల్వే బడ్జెట్‌లో పట్టించుకోలేదు. కొత్త రైళ్ల ప్రస్తావనే లేదు. కనీసం 2015 బడ్జెట్‌లో కేటాయింపులకూ మోక్షం లేదు.
 కావలసినవి ఇవీ..
 జ్ఞానాపురం వైపు మల్టీపర్పస్ కాంప్లెక్స్ నిర్మాణానికి 2013-14లో ప్రకటన చేశారు. కానీ ఈ బడ్జెట్‌లో నిధులపై స్పష్టతలేదు. ట్రాక్‌ల నవీకరణకు రూ.299 కోట్లు కేటాయించినా నిధులివ్వలేదు. రైళ్ల ట్రాఫిక్ సమస్యను తీర్చేందుకు ఆధునికీకరణ పనులకు రూ.17.78 కోట్లు, 335 కిలోమీటర్ల దువ్వాడ-విజయవాడ కొత్త సర్వే లైన్‌కు రూ.3.34 కోట్లు, దువ్వాడ-విజయవాడ లైను కొత్త పనులకు రూ. 76.60 కోట్లు గత బడ్జెట్‌లో ప్రకటించారు. కానీ ఈ బడ్జెట్‌లో వాటి ఊసే లేదు. రైల్వేస్టేషన్‌లో ప్లాట్‌ఫారాలు 8 నుంచి 12కి పెంపుదల ప్రతిపాదనలను పట్టించుకోలేదు. కనీసం ప్రముఖ పర్యాటక కేంద్రం అరకుకు అద్దాల విస్టాడాం కోచ్ రైలు ప్రస్తావనే లేదు. విశాఖలో వ్యాగన్ తయారీ కేంద్రాన్ని, ఆర్‌ఆర్‌బీ కేంద్రాన్ని ఏర్పాటు చేయాలన్న డిమాండ్ జోలికెళ్లలేదు.
 ప్లాట్‌ఫారాల విస్తరణ మాటేలేదు. విశాఖ నుంచి శ్రీకాకుళం, విజయనగరం, అనకాపల్లి, రాజమండ్రి ప్రాంతాలకు ఈఎంయూ, విశాఖపట్నం-విజయవాడకు రాత్రి వేళ రైళ్లు నడపాలన్న ప్రతిపాదనను పట్టించుకోలేదు. విశాఖ వచ్చే రైళ్లు ఔటర్‌లోనే నిలిచి పోతున్నందున మరో రెండు ట్రాక్‌లు నిర్మించాలన్న డిమాండ్‌ను పెపడచెవిన పెట్టేశారు. రిజర్వేషన్ కేంద్రాల సంఖ్యను పెంచలేదు. రద్దీ దృష్ట్యా తిరుపతికి రోజూ మరిన్ని రైళ్లు నడపాలని, విశాఖ-హైదరాబాద్ దురంతో వారానికి మూడుసార్లకు బదులు రోజూ నడపాలని, విశాఖ-వారణాసి, విశాఖ-ఢిల్లీ మధ్య నడిచే రైళ్ల సమయం తగ్గించాలని, విశాఖ-తిరుపతి మధ్య గరీబ్థ్ ్రనడపాలన్న డిమాండ్‌లను గాలికొదిలేశారు.
  నేతలూ ఎందుకీ సన్నాయి నొక్కులు...!
 తూర్పు కోస్తా రైల్వే జోన్ సరకు రవాణా ఆదాయం ఏటా సుమారు రూ.10 వేల కోట్లు. ఇందులో దాదాపు సగం రూ.6500 కోట్లు వాల్తేరు డివిజన్ నుంచే వస్తోంది. విశాఖ రైల్వే స్టేషన్‌కు రోజూ 112 రైళ్ల ద్వారా రోజుకు లక్షా 20 వేల మంది ప్రయాణికులు వచ్చిపోతుంటారు. సాధారణ టిక్కెట్ల ద్వారా రోజుకు 25 లక్షలు వస్తోంది. ఇది భువనేశ్వర్‌కంటే  రెట్టింపన్న మాట. ఇంతగా కాసులు తె స్తున్న వాల్తేరు డివిజన్‌కు బడ్జెట్‌లో ప్రాధాన్యమే లేకుండా పోయింది. ఇంత జరుగుతున్నా అటు టీడీపీ, ఇటు బీజేపీ నేతలు కిమ్మనడం లేదు. పైగా ఒకరిద్దరు బడ్జెట్ బాగుందంటూ సన్నాయి నొక్కులు నొక్కుతున్నారు.
 ఇచ్చినవి ఇవీ..
 వాల్తేరు డివిజన్‌లో ఈ బడ్జెట్‌లో 15 డబ్లింగ్ పనులకు 1088.95 కోట్లు కేటాయిస్తున్నట్టు పేర్కొన్నారు. ఖరగ్‌పూర్-విజయవాడ ఫ్రైట్ కారిడార్ ఏర్పాటు చేయనున్నారు. దేశవ్యాప్తంగా 400 స్టేషన్లలో వైఫై సదుపాయం కల్పిస్తామని ఈ బడ్జెట్‌లో ప్రకటించారు. వాస్తవానికి గత బడ్జెట్లోనూ ప్రకటించినా ఇప్పటిదాకా అతీగతీ లేదు.  వడ్లపూడి వ్యాగన్ పీవోహెచ్ వర్క్‌షాపునకు రూ.213.71 కోట్లు కేటాయించారు. ఈ ఏడాది రూ.30 కోట్లు మాత్రమే మంజూరు చేశారు. ఇంకా చిన్నా చితక పనులకు నిధులు కేటాయించినట్టు చెబుతున్నా అవేమిటో స్పష్టత లేదు.
 డివిజన్‌కు రూ.1009 కోట్లు
 15 చోట్ల డబ్లింగ్ పనులు
 జోన్‌పై సమాచారం లేదు
 డీఆర్‌ఎం చంద్రలేఖ ముఖర్జీ
 సాక్షి, విశాఖపట్నం : రైల్వే బడ్జెట్‌లో వాల్తేరు డివిజన్‌కు రూ. 1008.95 కోట్లను కేటాయించినట్టు డివిజనల్ రైల్వే మేనేజర్ చంద్రలేఖ ముఖర్జీ తెలిపారు. ఈ నిధులతో డివిజన్ పరిధిలోని 15 చోట్ల డబ్లింగ్ పనులు చేపడతామన్నారు. గురువారం సాయంత్రం తన కార్యాలయంలో జరిగిన విలేకరుల సమావేశంలో ఆమె మాట్లాడారు. ఇందులో విజయనగరం-కొత్తవలస 3వ లైన్‌కు రూ.8 కోట్లు. కొత్తవలస-సింహాచలం 4వ లైన్‌కు రూ.2.71 కోట్లు, సింహాచలం నార్త్-గోపాలపట్నం డబ్లింగ్ బైపాస్‌కు రూ.4.24 కోట్లు, కిరండోల్-జగదల్‌పూర్ లైన్‌కు రూ.120 కోట్లు, జగదల్‌పూర్-కోరాపుట్ లైన్‌కు రూ.120 కోట్లు, విజయనగరం- సంబల్‌పూర్ 3వ లైన్‌కు రూ.225 కోట్లు, కొత్తవలస-జగదల్‌పూర్ లైన్‌కు రూ.350 కోట్లు, కోరాపుట్-సింగపురం రోడ్డుకు రూ.39 కోట్లు, విజయనగరం బైపాస్ లైన్‌కు రూ.10 కోట్లు, భద్రక్, విజయనగరం 3వ లైన్‌కు రూ.210 కోట్లు కేటాయించిన ట్టు వివరించారు. బడ్జెట్‌లో ఖరగ్‌పూర్-విజయవాడ ట్రిప్లింగ్ లైన్ మంజూరైందన్నారు. కాగా వాల్తేరు డివిజన్‌లో 18 ఆటోమేటిక్ వెండింగ్ మిషన్లు ఏర్పాటు చేస్తున్నామన్నారు.
  అంగవికలురకు ఈ-టిక్కెట్టు పొందడానికి వీలుగా వెయ్యిమందికి గుర్తింపు కార్డుల జారీ చేస్తున్నామన్నారు. విశాఖ రైల్వే స్టేషన్లో త్వరలో వైఫై సదుపాయం కల్పిస్తామని తెలిపారు. డివిజన్‌లో 60 కాపలాలేని లెవెల్ క్రాసింగ్‌ల్లో 56 మూసివేశామన్నారు. అరకు వెళ్లే విస్టాడాం కోచ్‌ను జులై నాటికి ప్రారంభించే అవకాశం ఉందన్నారు. విజయనగరం-రాయగడ ఎలక్ట్రికల్ లైన్ వచ్చే నెలలో పూర్తవుతందని చెప్పారు.
  జోన్ సమాచారం లేదు..
 విశాఖపట్నం ప్రత్యేక జోన్ ఏర్పాటుపై తనకు సమాచారం లేదని డీఆర్‌ఎం తెలిపారు. ఆ విషయం రైల్వే మంత్రిత్వశాఖ పరిధిలో ఉందన్నారు. డబుల్ డెక్కర్ రైళ్ల నిర్వహణ సదుపాయం ప్రస్తుతానికి విశాఖలో లేనందున ఇప్పట్లో అవి వచ్చే అవకాశం లేదని చెప్పారు. విశాఖ నుంచి ఢిల్లీ వెళ్లే స్వర్ణజయంతి, సమత ఎక్స్‌ప్రెస్ రైళ్లపై వినైల్ ర్యాపింగ్ ద్వారా అడ్వర్టైజ్‌మెంట్ చేసుకునేందుకు విశాఖ స్టీల్‌ప్లాంట్‌తో ఒప్పందానికి చర్చలు జరుగుతున్నాయని ఆమె తెలిపారు.
 హామీలకు పరిమితం
 అనకాపల్లిరూరల్ (మునగపాక):  రెల్వేబడ్జెట్‌లో విశాఖకు న్యాయం జరగలేదని ఆంధ్రప్రదేశ్ విద్యార్థి రాష్ట్ర ఉపాధ్యక్షులు దూళం గోపీ పేర్కొన్నారు. గురువారం  ఒక ప్రకటన విడుదల చేశారు. విశాఖకు రైల్వేజోన్ హామీలకే పరిమితమైందని పేర్కొన్నారు. టీడీపీ ప్రభుత్వం, ప్రతిపక్ష నాయకులు ఎన్ని లేఖలు ఇచ్చినా రైల్వేజోన్ విషయమై కేంద్ర ప్రభుత్వం పట్టించుకోకపోవడం విచాకరమన్నారు. తమిళనాడుకు రైల్వేహబ్ కేటాయించిన ప్రభుత్వానికి ఆంధ్ర రాష్ట్రం కనిపించలేదా అని ఎద్దేవా చేశారు. రాష్ట్రానికి అన్యాయం చేస్తున్న బీజేపీకి రాష్ట్రంలో సభలు, సమావేశాలు పెట్టే హక్కులేదన్నారు. మంత్రి వెంకయ్యనాయుడు ఏ ముఖం పెట్టుకొని రాష్ట్రానికి వస్తారన్నారు. విశాఖ రైల్వేజోన్ విషయమై ఎంపీలను నిలదీస్తామని తెలిపారు. ప్రజా ఉద్యమం ద్వారా జోన్ సాధనకు సిద్ధం కావాలన్నారు.
 ఆశలు వమ్ము చేశారు...
 అక్కయ్యపాలెం : ప్రత్యేక రైల్వేజోన్ ఆశలపై రైల్వే మంత్రి నీళ్ళు చల్లారని వైఎస్సార్‌సీపీ 13వ వార్డు అధ్యక్షుడు సమయం హేమంత్ కుమార్ అన్నారు. ప్రత్యేక రైల్వే జోన్ వస్తే  పిల్లలకు ఉద్యోగాలోస్తాయని, ఉత్తరాంధ్రా అభివృద్ధి చెందుతుందని ఎంతో ఆశగా ఎదురు చూసిన కోటి మంది ప్రజానీకానికి బడ్జెట్‌లో మొండిచేయి చూపించారన్నారు. రైల్వే బడ్జెట్‌ప్రవేశ పెడుతుండడంతో మీడియాతో మాట్లాడడానికి వెళ్ళిన హేమంత్ కుమార్, ఏపీ స్టూడెంట్ జేఏసీ చైర్మన్ లగుడు గోవింద్, పొలిటికల్ జేఏసీ చైర్మన్ జె.టి.రామారావు, అట్టాడ అవినాష్‌లను పోలీసులు  గురువారం ఉదయం అరెస్టు చేసి ఫోర్త్‌టౌన్ పోలీస్ స్టేషన్‌కు తరలించారు. సాయంత్రం 4:30 గంటలకు సొంత పూచీకత్తుపై విడిచిపెట్టారు.
 బయటకు వచ్చిన అనంతరం విలేకరుల సమావేశంలో మాట్లాడారు. లగుడు గోవింద్ మాట్లాడుతూ ప్రత్యేక జోన్, ప్రత్యేక ైరె ళ్ళు, ప్రత్యేక ప్రాజెక్టులు ఏమీ లేకుండా రైల్వే బడ్జెట్ నిరాశపర్చిందన్నారు. రూ.లక్షా 25 వేల కోట్ల బడ్జెట్‌లో రైల్వే మంత్రి  సురేష్ ప్రభు ఉత్తరాంధ్రాకు మొండిచేయి చూపించారన్నారు. పాలకులకు, ఎంపీలు, కేంద్ర మంత్రులకు చిత్తశుద్ధి ఉంటే  ఈనెల 29 లోగా ప్రత్యేక జోన్‌పై ప్రకటన చేయించాలన్నారు. లేదంటే ఎంపీలను, మంత్రులను అడుగడుగునా అడ్డుకొని నల్ల బాడ్జీలతో నిరసన వ్యక్తం చేస్తామన్నారు. శుక్రవారం రాష్ట్రంలోని అన్ని బీజేపీ జిల్లా కార్యాలయాలను ముట్టడిస్తామన్నారు. జేటీ రామారావు మాట్లాడుతూ ప్రత్యేక జోన్ ప్రకటన లేకుండా ఒట్టి చేతులతో వస్తే ఎంపీలను, మంత్రులను ఎయిర్‌పోర్టులో ఘెరావ్ చేసి టమాటో, కోడి గుడ్లతో కొడతామని హెచ్చరించారు.
  నిరాశపరిచింది...
 విశాఖ కేంద్రంగా ైరె ల్వే జోన్ ఏర్పాటు చేస్తారని ఆశగా ఎదురు చూసిన ఉత్తరాంధ్ర ప్రజలకు నిరాశమిగిలింది. 2014 రాష్ట్ర విభజన చట్టాన్ని కేంద్ర ప్రభుత్వం అగౌరవపరిచింది. రాష్ట్ర ముఖ్యమంత్రి ఆంధ్రుల ఆత్మగౌరవాన్ని నరేంద్రమోడి వద్ద తాకట్టు పెట్టారు. రైల్వే బడ్జెట్‌లో ఆంధ్రప్రదేశ్‌కు సంబంధించి అరకొర కేటాయింపులు తప్ప పెద్దగా చెప్పుకోదగ్గ ప్రాజెక్టులు ఏమీ లేవు. దీనికి రాష్ట్రం నుండి ప్రాతినిధ్యం వహిస్తున్న ఎంపీలు, రాష్ట్ర ముఖ్యమంత్రిదే పూర్తి బాధ్యత. -ద్రోణంరాజు శ్రీనివాసరావు,  కాంగ్రెస్ పార్టీ రాష్ట్ర ప్రధాన కార్యదర్శి
 
 జోన్‌పై మోసగించారు...
 రైల్వే బడ్జెట్ రైల్వేను ప్రెవేటీకరణ చేసే విధంగా ఉంది. అదే కనుక జరిగితే భవిష్యత్తులో రైలు రవాణా సామాన్య ప్రజలకు అందుబాటులో లేకుండా పోతుంది. కేంద్ర ప్రభుత్వానికి ఆంధ్రులతో ఆటలాడుకోవడం అలవాటుగా మారింది. విభజన చట్టంలోని అంశాలను అమలు చేయటంలో చిత్తశుద్ధి లోపించింది. రాష్ట్ర ప్రభుత్వం కూడా కేంద్రంతో లాలూచి పడి ప్రతిదానికి తల ఊపడం ప్రారంభించింది. ఆంధ్రుల ఆత్మగౌరవం అంటూ అధికారంలోకి వచ్చిన చంద్రబాబు దానిని కేంద్రం కాళ్ళ వద్ద తాకట్టు పెట్టాడు. బడ్జెట్‌కు ముందు రైల్వే జోన్ వచ్చేస్తుందంటూ ప్రజల చెవుల్లో పువ్వులు పెట్టారు. ఫైలు ప్రధానిమంత్రి కార్యాలయంలో ఉంది, ఇక ఇవ్వడమే తరువాయి అంటూ ప్రజలను మోసం చేయడం దుర్మార్గం.  -జె.వి.సత్యనారాయణమూర్తి, విశాఖ రైల్వేజోన్ సాధన సమితి కన్వీనర్
 చంద్రబాబు వైఫల్యమే..
 కేంద్రం ప్రవేశపెట్టిన రైల్వే బడ్జెట్‌లో ఆంధ్రప్రదేశ్‌కు ఒక్క ప్రాజెక్టు కూడా కేటాయించ లేదు. దీనికి కేవలం రాష్ట్ర ముఖ్యమంత్రి చంద్రబాబు వైఫల్యమే కారణం. రైల్వే బడ్జెట్ కార్పొరేట్ల కోసమే అన్నట్లు ఉంది. ైరె ల్వే జోన్ కోసం ఆశగా ఎదురుచూస్తున్న విశాఖ ఉత్తరాంధ్ర వాసుల ఆశలు ఆవిరి చేసేలా రైల్వే బడ్జెట్ ఉంది. రాష్ట్ర ముఖ్యమంత్రి చంద్రబాబునాయుడు, కేంద్రమంత్రి వెంకయ్యనాయుడు, విశాఖ ఎంపీ కంభంపాటి హరిబాబు అనేక మార్లు హామీలు గుప్పించి వంచనకు పాల్పడ్డారు. 2017-18లో 9వేలు ఉద్యోగాలు తీస్తామని ప్రకటించారు. 2016-17లో నిరుద్యోగుల సంగతేంటి. -సీహెచ్ నరసింగరావు, సీపీయం రాష్ట్ర కార్యదర్శి వర్గ సభ్యుడు(25వీఎస్‌సీ33)
 చంద్రబాబు రాజీనామా చేయాలి
 కేంద్ర ప్రభుత్వం గురువారం పార్లమెంట్‌లో ప్రవేశపెట్టిన రైల్వే బడ్జెట్‌లో ఆంధ్ర ప్రదేశ్‌కు తీరని అన్యాయం జరిగింది. 32సార్లు ఢిల్లీకి వెళ్లానని చెప్పుకుంటున్న ముఖ్యమంత్రి రాష్ట్రానికి సాధించింది ఏమిటి? రైల్వే బడ్జెట్‌లో రాష్ట్రానికి ఒక్క ప్రాజెక్టు కూడా తీసుకురాలేదు. తొమ్మిదేళ్ళు రాష్ట్రాన్ని పరిపాలించిన ముఖ్యమంత్రి బడ్జెట్‌లో రాష్ట్రానికి అరకొర నిధులను మాత్రమే తీసుకురాగలిగారు. దీనికి పూర్తిగా చంద్రబాబు బాధ్యత వహిస్తూ ముఖ్యమంత్రి పదవికి రాజీనామా చేయాలి. - కొయ్య ప్రసాదరెడ్డి, వైఎస్సార్‌సీపీ రాష్ట్ర అధికార ప్రతినిధి
 చంద్రబాబే కారణం..
 విశాఖకు రైల్వే బడ్జెట్‌లో ప్రత్యేక జోన్‌గా ప్రకటించకపోవడానికి ముఖ్యమంత్రి చంద్రబాబు వైఖరే కారణం. ఒడిశా సీఎంకు భయపడి చంద్రబాబు జోన్‌పై గట్టిగా పోరాడడం లేదు. రైల్వే బడ్జెట్‌లో విశాఖకు జోన్ ప్రకటించలేదు, ఈ డివిజన్‌కు ఏమాత్రం ప్రాధాన్యం ఇవ్వలేదు. ఇవన్నీ చూస్తే అడిగే వారు లేరని ఇక్కడ వారిని కేంద్రంలోని పెద్దలు గొర్రెలు, మేకలుగాను భావిస్తున్నారు. పదేళ్లుగా విశాఖ ప్రత్యేక రైల్వే జోన్‌పై అదిగో ఇదిగో అంటూ కళ్లలో దుమ్ము కొడుతున్నారు. జోన్ సాధించలేకపోయిన ఎంపీ హరిబాబును విశాఖ వాసులు ఊళ్లోకి రానీయవద్దు. దేశంలోనే రాబడిలో మూడో స్థానంలో ఉన్న వాల్తేరు డివిజన్‌పై ఇంతలా నిర్లక్ష్యం తగదు.
                     -సీఎస్ రావు, అధ్యక్షుడు, ప్రజాస్పందన
 ఆశాజనకం
 బ్రాడ్ గేజ్ నెట్‌వర్క్ పరిధిలో ఉన్న మానవరహిత లెవెల్ క్రాసింగ్‌లపై రైల్వే మంత్రి ప్రత్యేక దృష్టి కనబరిచారు. జీరో ప్రమాదప్రాంతంగా రైల్వేను మార్చాలనే ఉద్దేశం కలిగివుంటడం అభినందనీయం. వీటితోపాటు సీసీ కెమెరా సర్వైవలెన్స్, వైఫై వంటి సదుపాయాల కల్పనకు ప్రాముఖ్యతనివ్వడం ఆనందాన్ని కలుగజేసింది. విశాఖ రైల్వేజోన్, కొత్తరైళ్ల విషయంలో నిరాశ ఎదురైంది. -మంత్రి గంటా శ్రీనివాసరావు
 తీవ్ర అన్యాయం
 సురేష్ ప్రభు ప్రవేశపెట్టిన బడ్జెట్‌లో రాష్ట్ర ప్రజలకు తీవ్ర అన్యాయం జరిగింది. ఎంతో ఆశగా ఎదురుచూసినా, ఆ ఆశ నిరాశగానే మిగిలింది. కొత్తరైళ్లు, రైళ్ల పొడిగింపు, ప్రాజెక్టుల విషయంలో మొండిచేయి చూపడం దారుణం. ఈ తరహా బడ్జెట్‌ను గతంలో ఎన్నడూ చూడలేదు.
                -టి.సుబ్బిరామిరెడ్డి, రాజ్యసభ సభ్యుడు
 రైల్వేజోన్ ప్రకటించకపోవడం అన్యాయం
 రాష్ట్రం విడిపోయిన దగ్గరనుంచి ఇదిగో అదిగో అంటూ ఊరిస్తున్న రైల్వే జోన్‌ను బడ్జెట్‌లో ప్రకటించకపోవడం అన్యాయం. ఎన్నికల్లో ఇచ్చిన వాగ్దానం, రాష్ట్రం విడదీసినప్పుడు ఇచ్చిన హామీ మేరకు వెంటనే విశాఖను జోన్‌గా ప్రకటిస్తూ కేంద్ర ప్రభుత్వం ప్రకటన చేయాలి -మంత్రి రాజశేఖర్, ఐఎన్‌టీయుసీ జిల్లా అధ్యక్షుడు
  భగ్గుమన్న  ఆందోళనలు
 తాటిచెట్లపాలెం : రైల్వేబడ్జెట్‌లో విశాఖ రైల్వేజోన్ ప్రతిపాదన అంశానికి కేంద్ర ప్రభుత్వం మొండిచెయ్యి చూపడంపై వామపక్షపార్టీలు ఆందోళనకు దిగాయి. ఈ మేరకు గురువారం విశాఖ రైల్వేస్టేషన్‌లో సీపీఐ, సీపీఎం నేతలు, కార్యకర్తలు రోడ్డుపై బైఠాయించి కేంద్ర, రాష్ట్ర ప్రభుత్వాల వ్యవహారతీరుకి వ్యతిరేకంగా నినాదాలు చేసి, నిప్పులు చెరిగారు. ఈ సందర్భంగా సీపీఐ జిల్లా కార్యదర్శి ఎ.జె.స్టాలిన్ మాట్లాడుతూ ఏపీ పునర్విభజన బిల్లులో పొందుపర్చిన ఏ హామీలనూ కేంద్రప్రభుత్వం నెరవేర్చలేదన్నారు.
 రైల్వే బడ్జెట్‌లో ఇదిగో..జోన్..అదిగో జోన్ అంటూ మభ్యపెట్టిన కేంద్ర, రాష్ట్రప్రభుత్వాల సవతితల్లి ప్రేమ ప్రతిసారీ ప్రవేశపెట్టే రైల్వే బడ్జెట్ లో కానవస్తోందని దుయ్యబట్టారు. సీపీఎం నగర కార్యదర్శి గంగారాం మాట్లాడుతూ సిగ్గులేని పాలనచేస్తూ, పరమానందయ్య శిష్యగణంతో కాలక్షేపం చేస్తున్న తెలుగుదేశం ప్రభుత్వం తన కొలువులో ఉన్న కేంద్ర, రాష్ట్ర ప్రభుత్వ అమాత్య గణం చేత తక్షణం రాజీనామా చేయించాలనీ డిమాండ్ చేశారు. రాష్ట్రంలోని అన్ని పార్టీలు ఏకత్రాటిపై నిల్చుని కేంద్రప్రభుత్వానికి గుణపాఠం చెప్పాలన్నారు. ఈ నిరసనలో సీపీఎం నాయకులు శేఖర్, వరలక్ష్మి, మాధవి తోపాటు సీపీఐ నాయకులు విమల, రాంబాబు,మార్కండేయులు పాల్గొన్నారు.


 సురేష్ ప్రభు రైల్వేబడ్జెట్ నగరానికి నిరాశే మిగిల్చింది. హైదరాబాదు నగరానికి  ఈ సారి ప్రాధాన్యత లభిస్తుందనుకున్న నగరవాసికి నిరాశే మిగిలింది. ప్రధాన రైల్వేస్టేషన్లు అభివృద్ధి చేస్తామన్నారే కానీ.. ఆ వివరాలేవీ ప్రకటించలేదు. యాదాద్రి వరకు ఎంఎంటీఎస్ పొడిగింపు కాస్త ఊరటనిచ్చింది. రాజేంద్రనగర్ ప్రజల చిరకాల వాంఛ అయిన ఎంఎంటీఎస్ పొడిగింపు అంశం ఈ బడ్జెట్‌లో కూడా లేదు. గురువారం రైల్వేమంత్రి ప్రవేశపెట్టిన రైల్వేబడ్జెట్‌పై పలువురు తమ అభిప్రాయాలు వెలిబుచ్చారు.. ఆ వివరాలు వారి మాటాల్లోనే..
  - సికింద్రాబాద్/రాజేంద్రనగర్/పహాడీషరీష్/కాచిగూడ
  
 రైల్వే బడ్జెట్  భేష్
  ఆడంబరాలు,అబద్దాలు లేకుండా కేంద్ర రైల్వే బడ్జెట్ వాస్తవానికి అద్దం పట్టింది. తెలంగాణాకు మొత్తం 569 కోట్ల ప్రాజెక్ట్‌లను కేటాయించారు. ఇందులో ముఖ్యంగా మల్కాజిగిరి నియోకజవర్గంలోని చర్లపల్లి టర్మినల్ విస్తరణ, అధునాతన సదుపాయాల కోసం రూ.80 కోట్లను కేటాయించటం సంతోషకరమైన అంశం. చర్లపల్లి టర్మినల్‌ను విస్తరిస్తే  ప్రయాణీకులు రైళ్లలోనే గంటల తరబడి నిరీక్షించే అవసరం లేకుండా పోతుంది. అదే విధంగా సికింద్రాబాద్ స్టేషన్ నుండి వెళ్లే ప్రతి ఎక్స్‌ప్రెస్ రైలుకు అదనంగా రెండు అన్ రిజర్వుడు బోగీలను వేయాలని నిర్ణయించటం హర్షణీయం.            -  సీహెచ్ మల్లారెడ్డి, ఎంపీ మల్కాజిగిరి
  
  
 జంట నగరాలకు మొండిచేయి
 రైల్వే బడ్జెట్ జంట నగరాల ప్రయాణీకులను నిరాశ పరిచింది. గతంలో సికింద్రాబాద్ స్టేషన్ ఎన్‌డీఏ ప్రకటించిన ప్యాకేజీని పక్కన బెట్టి,  కేవలం యాదాద్రికి ఎంఎంటీఎస్ లైన్, చర్లపల్లి టర్మినల్‌కు నిధులు తప్పితే మరేవీ లేవు.
  -  నగేష్ ముదిరాజ్, రైల్వే సలహా సంఘం మాజీ సభ్యులు
  
 ఆమోదయోగ్యం
 బీజేపీ ప్రభుత్వం ప్రవేశపెట్టిన రైల్వే బడ్జెట్ ఆమోదయోగ్యంగా ఉంది. టికెట్ చార్జీలను పెంచకపోగా, ప్రయాణికులకు వసతుల కల్పనలో పెద్దపీట వేశారు. రైలు ప్రయాణాల్లో భద్రత ప్రమాణాలు పెంచేందుకు, బీమా వంటి సదుపాయాలను ఏర్పాటు చేసేందుకు ప్రతిపాదనలు చేయడం అభినందనీయం. బడ్జెట్‌లో ప్రతిపాదించిన అంశాలను త్వరగా అమలులోకి తెస్తే మంచిది.  -రమేశ్, ప్రయాణికుడు
  
 వసతులు కరువు
  బీజేపీ ప్రభుత్వం ప్రవేశపెట్టిన రైల్వే బడ్జెట్ నిరాశ పరిచేలా ఉంది. ఎంఎంటీఎస్ రెండో దశకు అధిక ప్రాధాన్యత ఇస్తారనుకున్నాం. సికింద్రాబాద్ వంటి పెద్ద రైల్వేస్టేషన్ల ఆధునీకరణకు కూడా ప్రాధాన్యం లభించలేదు. ప్రయాణికులకు వసతులు కరువై ఇబ్బందుల పాలవుతున్నా స్టేషన్ల ఆధునీకరణ కోసం బడ్జెట్‌లో కేటాయింపులు లేకపోవడం విచారకరం.
  -ఖాజా మోహినుద్దీన్, ప్రయాణికుడు
  


  ఎన్నో ఆశలను రేకెత్తించిన రైల్వే బడ్జెట్ నిరుత్సాహపర్చింది. జిల్లా ప్రజల ఆశలపై నీళ్లుచల్లింది. రైల్వేపరంగా ఒక్క సమస్యకూ పరిష్కారం లభించలేదు. కనీసం  జిల్లా డిమాండ్లపై కన్నెత్తయినా చూడలేదు. కొత్త రైలు కూత కూడా వినిపించలేదు. ఏళ్ల తరబడి ఎదురుచూసిన రైళ్లను పొడించనూ లేదు. ఎంతో ఊరించిన రైల్వే జోన్ ప్రస్తావన లేకపోవడం నిరుద్యోగ యువతను నీరుగార్చింది. ఈ ప్రాంతం నుంచి లోక్‌సభకు ప్రాతినిధ్యం వహించిన నేతలు ఒక్క హామీని కూడా నెరవేర్చుకోలేకపోయారు. ప్రతిపాదనల సమర్పణకే పరిమితమయ్యారని జిల్లాప్రజానీకం నిరసిస్తోంది. సదుపాయాల విషయంలో ప్రకటించిన అంశాలు ఆచరణలో కనిపించవని గతం నిరూపించింది. అదే పునరావృతమవుతుందని ప్రయాణికులు పెదవి విరుస్తున్నారు. కనీసం వెనుకబడిన జిల్లాపై కూడా కరుణ చూపకపోవడంపై నిరసన ధ్వనులు వినిపిస్తున్నాయి.
  
  శ్రీకాకుళం టౌన్: కేంద్రరేల్వేమంత్రి సురేష్ ప్రభు పార్లమెంటులో గురువారం ప్రవేశపెట్టిన రేల్వేబడ్జెట్‌లో ఉత్తరాంధ్రకు మరోసారి మొండిచేయి చూపారు. విశాఖ రేల్వేజోన్ ఊసేలేకుండా కొత్తబడ్జెట్‌ను ప్రవేశపెట్టి  ప్రయాణికుల ఆశలపైనీళ్లు చల్లారు. దీనికి తోడు శ్రీకాకుళం జిల్లాకు ఈసారి కొత్తగా ఎటువంటి మంజూర్లు తీసుకురాలేకపో యారు. కేంద్రమంత్రిగా అశోక్‌గజపతిరా జు, ఎంపీలుగా కింజరాపు రామ్మోహననాయు డు, కొత్తపల్లి గీతలు ప్రాతినిథ్యం వహిస్తున్న ఈ జిల్లాలో ప్రజల అవసరాలకు తగ్గట్టుగా కొత్తగా ఏ ఒక్క ప్రాజెక్టును సాధించుకోలేక పోయారు.
  
  విశాఖ జోన్ ఏర్పాటైతే కొత్తగా 6 వేలమందికి ఉద్యోగాలు వస్తాయని ఆశపడ్డ నిరుద్యోగులకు నిరాశ మిగిలింది.  జిల్లాలను ఉత్తరాది రాష్ట్రాల్లో కలపడం వల్ల ఇక్కడున్న నిరుద్యోగులకు అవకాశాలు రాకుండా పోయాయి. ఉత్తరాది యువకులకు జిల్లా వ్యాప్తంగా గ్యాంగ్ మెన్‌లు, ట్రాక్‌మెన్‌లు, గేట్‌మెన్‌లుగా నియమించుకున్నారు. ఈప్రాంతంలో పెద్దసంఖ్యలో వారే విధులు నిర్వర్తిస్తున్నారు. ఇక స్టేషన్ మాస్టరు, టీటీ, రేల్వేకానిస్టేబుళ్లు అంతా వారే పనిచేస్తున్నారు. కొత్తజోన్ వస్తే ఆ అవకాశాలన్నీ తెలుగువారికే దక్కుతాయని ఆశపడ్డా రేల్వే మంత్రి నెరవేర్చలేదు.
  కొత్త రైళ్ల జాడే లేదు...
  
  ఉత్తరాది రాష్ట్రాలను కలుపుతూ కొత్తరైళ్లకు ఈ బడ్జెట్‌లో కేటాయింపులు జరగలేదు. నౌపడా- రాయఘడ్ మార్గాన్ని కలిపేందుకు పర్లాకిమిడినుంచి కొత్తలైన్ మార్గం ఏర్పాటుకు కేటాయింపులు జరగలేదు. జి.సిగడాం నుంచి రాజాం మీదుగా విజయనగరంకు రైలు మార్గం ఏర్పాటు కలగానే మిగిలిపోయింది.
  
  జిల్లాలో కొత్త రేల్వేహాల్ట్‌లు  ఇవ్వలేదు. కేవలం రేల్వేస్టేషన్లలో సీసీ కెమెరాలు ఏర్పాటు, ఎల్‌సీడీ టీవీలు ఏర్పాటుకు బడ్జెట్‌లో కేటాయింపులు చేశారు. పలాస, బెండిగేటు, పొందూరు రేల్వే క్రాసింగ్‌ల వద్ద నిర్మాణంలో ఉన్న ఫ్లైఓవర్ల పనులు పూర్తిచేసేందుకు మాత్రమే నిధులు కేటాయించారు. రేల్వేస్టేషన్ల ఆధునీకరణ ఊసేలేదు.
  
  కొత్తరైళ్ల మంజూరు లేనట్టే..
  జిల్లా మీదుగా ప్రయాణించేందుకు పాతరైళ్లు మినహా కొత్తరైళ్లు ఈ బడ్జెట్‌లో  కేటాయించలేదు. పాతవాటికి హాల్ట్‌లైనా మంజూరవుతాయని ఆశపడ్డ ప్రయాణికులకు నిరాశే మిగిలింది. రైళ్ల వేగం పెంచుతామని మంత్రి ప్రకటించినప్పటికి ఏఏ రైళ్లు వేగం పెరుగుతాయో అందులో పొందుపరచలేదు. కొత్తగా లైన్ల ఏర్పాటు లేకుండా వేగం పెంచడానికి ఎలా వీలౌతుందని రేల్వే ఉద్యోగులే ప్రశ్నిస్తున్నారు.
  


 కొత్త రైళ్లకు రెడ్‌సిగ్నల్  మూడు ప్రాజెక్టులతో సరి
 ఉమ్మడి ప్రాజెక్టులకే గ్రీన్‌సిగ్నల్
 స్పష్టతలేని రైల్వేస్టేషన్‌ల అభివృద్ధి
 రూ.330 కోట్లతో యాదాద్రికి ఎంఎంటీఎస్
 చర్లపల్లి, నాగులపల్లిలో రైల్వేటర్మినళ్లు
  
 సిటీబ్యూరో: రైల్వే బడ్జెట్ ఊరించి ఉసూరుమనిపించింది. మరోసారి నిరాశే మిగిలింది. ముచ్చటగా మూడు అరకొర ప్రాజెక్టులు తప్ప నగరానికి పెద్దగా ఒరిగింది శూన్యం. సికింద్రాబాద్ నుంచి జహీరాబాద్ తప్ప కొత్త లైన్‌ల ఊసే లేదు. సురేష్ ప్రభు బడ్జెట్ రైలు నగరంలో ఆగీ ఆగకుండానే పరుగులు పెట్టింది. నగరంలోని సికింద్రాబాద్, నాంపల్లి, కాచిగూడ  ప్రధాన రైల్వేస్టేషన్‌లను  అభివృద్ధి చేయనున్నట్లు ప్రకటించారు. కానీ నిధుల కేటాయింపు లేదు. ఏ విధంగా అభివృద్ధి చేస్తారనే అంశంలోనూ  స్పష్టత లేదు. అంతర్జాతీయ ప్రమాణాలకు అనుగుణంగా సికింద్రాబాద్ రైల్వేస్టేషన్‌ను అభివృద్ధి చేయనున్నట్లు గతంలో చేసిన ప్రతిపాదన అటకెక్కింది. వరల్‌క్లాస్ స్టేషన్ స్థాయిని కాస్తా ప్రస్తుతం ఏ-1 కు హోదాకు పరిమితం చేశారు. మొత్తంగా రూ.330 కోట్లతో యాదాద్రికి ఎంఎంటీఎస్ పొడిగింపు, రూ.80 కోట్లతో  చర్లపల్లిలో 4వ రైల్వే టర్మినల్, పబ్లిక్ ప్రైవేట్ భాగస్వామ్య పద్ధతిలో వట్టి నాగులపల్లిలో  5వ రైల్వే టర్మినల్ ఈ ఏడాది రైల్వే బడ్జెట్‌లో  నగరానికి  లభించాయి. ఈ  మూడు ప్రాజెక్టుల్లోనూ దక్షిణమధ్య రైల్వే, రాష్ర్టప్రభుత్వ సంయుక్త భాగస్వామ్యంతో  పనులు చేపడుతారు. అయ్యే ఖర్చులో  రాష్ర్టం వాటాగా 51 శాతం, రైల్వే వాటాగా  49 శాతం చొప్పున భరిస్తాయి. మొత్తంగా రైల్వే బడ్జెట్ ఈసారి ఒకింత ఆశ..మరింత నిరాశనే మిగిల్చింది.
 
 యాదాద్రికి ఎంఎంటీఎస్...
 లక్షలాది మంది సందర్శించే పవిత్ర పుణ్యక్షేత్రం యాదాద్రికి ఎంఎంటీఎస్ ట్రైన్ పరుగులు తీయనుంది. రాష్ట్ర ప్రభుత్వం అత్యంత  ప్రతిష్టాత్మకంగా భావిస్తోన్న ఈ ప్రాజెక్టుకు రైల్వేశాఖ కూడా ప్రాధాన్యతనిచ్చింది. సికింద్రాబాద్ నుంచి ఘట్‌కేసర్ వరకు చేపట్టిన  రెండో దశ ఎంఎంటీఎస్ పనులు సాగుతుండగా... ఇప్పుడు మూడో దశ కింద ఘట్‌కేసర్ నుంచి రాయగిరి వరకు 34 కిలోమీటర్‌ల వరకు రైల్వేలైన్‌లను పొడిగించి విద్యుదీకరిస్తారు. రూ.330 కోట్లతో చేపట్టనున్న ఈ పనుల్లో రాష్ర్టప్రభుత్వం తన వంతు వాటాగా  51 శాతం నిధులను సమకూర్చనుంది. ఈ ఆర్థిక సంవత్సరం పనులు ప్రారంభించి వచ్చే రెండు, మూడేళ్లలో దీనిని పూర్తి చే స్తారు. నగరంలోని ఆరు మార్గాల్లో చేపట్టిన రెండో దశ ప్రాజెక్టును వచ్చే ఏడాది డిసెంబర్ నాటికి పూర్తి చేయాలని దక్షిణమధ్య రైల్వే లక్ష్యంగా పెట్టుకుంది. రెండో దశ పూర్తయిన అనంతరం మూడోదశ కింద యాదాద్రికి ఎంఎంటీఎస్ పనులు ప్రారంభిస్తారు. దీంతో హైదరాబాద్ నుంచి యాదగిరిగుట్టకు వెళ్లే భక్తులు సికింద్రాబాద్ నుంచి నేరుగా రాయగిరి వరకు వెళ్లవచ్చు. అక్కడి నుంచి  4 కిలోమీటర్‌ల వరకు రోడ్డు మార్గంలో యాదాద్రికి వెళ్లవ లసి ఉంటుంది. నగరం నుంచి నేరుగా యాదగిరిగుట్టకు వెళ్లే  రైల్వే సదుపాయం అందుబాటులోకి  రావడంతో ఈ మార్గంలో వ్యాపార కార్యకలాపాలు భారీగా పెరిగే అవకాశం ఉంది. ముఖ్యంగా  రియల్ ఎస్టేట్ రంగానికి మహర్దశ పట్టనుంది. ఉపాధి అవకాశాలు కూడా పెరుగుతాయి. ముఖ్యమంత్రి కేసీఆర్ స్వయంగా కోరడంతో  రైల్వేశాఖ ఈ ప్రాజెక్టుకు ప్రాధాన్యతనిచ్చింది. ఎంఎంటీఎస్ పొడిగింపునకు అయ్యే ఖర్చులో రాష్ర్టం తన వంతు వాటాను భరిస్తుందని సీఎం స్పష్టం చేయడంతో  రైల్వేశాఖ  తన వంతు వాటాను కూడా అందజేసి ఎంఎంటీఎస్‌ను పొడిగించేందుకు సంసిద్ధతను వ్యక్తం చేసింది.
 
  ఎంఎంటీఎస్ ప్రస్తానం ఇదీ...
 2003లో ఎంఎంటీఎస్ రైళ్లను ప్రవేశపెట్టారు. సికింద్రాబాద్-లింగంపల్లి, ఫలక్‌నుమా-లింగంపల్లి, నాంపల్లి-ఫలక్‌నుమా, తదితర మార్గాల్లో  లోకల్ రైలు సదుపాయం అందుబాటులోకి వచ్చింది. {పస్తుతం ప్రతి రోజు 121 ఎంఎంటీఎస్ సర్వీసులు వివిధ మార్గాల్లో నడుస్తున్నాయి. లక్షా 40 వేల మంది ఈ సదుపాయాన్ని వినియోగించుకుంటున్నారు.హైదరాబాద్ నగర శివార్లను కలుపుతూ 2013లో ఎంఎంటీఎస్ రెండో దశను ప్రారంభించారు. సికింద్రాబాద్-ఘట్‌కేసర్, మౌలాలి-సనత్‌నగర్, పటాన్‌చెరు-తెల్లాపూర్, ఫలక్‌నుమా-ఉందానగర్ తదితర మార్గాల్లో ఎంఎంటీఎస్ రెండో దశ పనులు జరుగుతున్నాయి.ఉందానగర్-శంషాబాద్ అంతర్జాతీయ విమానాశ్రయం వరకు రెండో దశలో పొడిగించాలనే ప్రతిపాదన ఉన్నప్పటికీ విమానాశ్రయంలో రైల్వేస్టేషన్ నిర్మాణానికి జీఎమ్మార్ నిరాకరించడంతో ప్రస్తుతానికి ఆ లైన్ నిర్మాణం వాయిదా పడింది.
 
 తగ్గనున్న భారం...
 ప్రతి రోజు సుమారు 250కి పైగా రైళ్లు నగరంలోని సికింద్రాబాద్, నాంపల్లి, కాచిగూడ స్టేషన్‌ల నుంచి రాకపోకలు సాగిస్తున్నాయి. సుమారు 4 లక్షల మంది  నిత్యం ఈ స్టేషన్‌లను సందర్శిస్తున్నారు. దీంతో ఈ మూడింటిపైన ఒత్తిడి బాగా పెరిగింది. ఔటర్ రింగురోడ్డుకు అందుబాటులో ఉన్న చర్లపల్లిలో రైల్వే టర్మినల్ ఏర్పాటు చేయడం వల్ల  విజయవాడ , కాజీపేట్ మీదుగా వచ్చేరైళ్లను చర్లపల్లిలో నిలుపుతారు. ఎఫ్‌సీఐ, ఎన్‌ఎఫ్‌సీ, హెచ్‌పీసీఎల్, ఐఓసీ వంటి  భారీ పరిశ్రమలు కూడా  ఈ  ప్రాంతంలో ఉండడం రవాణా రంగం అభివృద్ధికి  విస్తృత అవకాశంగా  రైల్వే భావించింది. ప్రస్తుతం సికింద్రాబాద్, నాంపల్లి, కాచిగూడ నుంచి రాకపోకలు సాగించే రైళ్లలో  కనీసం 150 రైళ్లను చర్లపల్లి నుంచి నడిపేందుకు అవకాశం ఉంటుంది. ఢిల్లీ, ముంబయి, విజయవాడ, విశాఖ, తిరుపతి, చెన్నై తదితర మార్గాల్లో రాకపోకలు సాగించే రైళ్లను ఇక్కడి నుంచి నడిపేందుకు అవకాశం ఉంటుంది.
  
 స్టేషన్‌ల అభివృద్ధికి నిధులే లేవు...
 దేశవ్యాప్తంగా 400 రైల్వే స్టేషన్‌ల రీ డెవలప్‌మెంట్ కార్యక్రమంలో భాగంగా నగరంలో  సికింద్రాబాద్, నాంపల్లి, కాచిగూడ స్టేషన్‌లను అభివృద్ధి చేయనున్నట్లు దక్షిణమధ్య రైల్వే జనరల్ మేనేజర్ రవీంద్రగుప్తా ప్రకటించారు. కానీ ఇందుకోసం ఎలాంటి నిధు లు కేటాయించలేదు. 2010లో ప్రతిపాదించిన సికిం ద్రాబాద్ వరల్డ్‌క్లాస్ అంశాన్ని పక్కన పెట్టి రీ డెవలప్‌మెంట్ పేరుతో ఏ తరహా అభివృద్ధి చేస్తారనే అం శంలో స్పష్టత లేదు. నాంపల్లి రైల్వేస్టేషన్‌లో లిఫ్టులు, ఎస్కలేటర్ల ఏర్పాటు అంశాన్ని పక్కన పెట్టేశారు.
  
  
 కొత్త రైళ్ల ఊసే లేదు...
 {పయాణికుల రద్దీ దృష్ట్యా  హైదరాబాద్, సికింద్రాబాద్ జంటనగరాల నుంచి  పలు మార్గాల్లో కొత్త రైళ్లను నడపాలనే ప్రతిపాదన చాలాకాలంగా ఉంది. మరోవైపు గతంలో ప్రకటించిన రైళ్ల ప్రస్తావన కూడా లేకుండానే ఈ బడ్జెట్ నగర ప్రయాణికులను నిరాశకు గురి చేసింది.సికింద్రాబాద్ నుంచి షిరిడీకి వెళ్లేందుకు ప్రస్తుతం మన్మాడ్ వరకు అజంతా ఎక్స్‌ప్రెస్ ఒక్కటే ఉంది. సికింద్రాబాద్ నుంచి సాయినగర్ వరకు నేరుగా వెళ్లేందుకు మరో రైలు నడపాలనే ప్రతిపాదకు  మోక్షం లభించలేదు.కాచిగూడ నుంచి బెంగళూర్‌కు ప్రస్తుతం రెండు రైళ్లే అందుబాటులో ఉన్నాయి. ప్రయాణికుల రద్దీ దృష్ట్యా మరో 2 కొత్త రైళ్లను ప్రవేశపెట్టాలనే ప్రతిపాదన సైతం పట్టించుకోలేదు.హైదరాబాద్-గుల్బర్గా ఇంటర్‌సిటీ ఎక్స్‌ప్రెస్ ప్రస్తావన లేదు. సికింద్రాబాద్-హజ్రత్ నిజాముద్దీన్ ప్రీమియం ట్రైన్ ఊసు లేదు.
  
 చర్లపల్లిలో భారీ రైల్వే టర్మినల్..
 చర్లపల్లి వద్ద భారీ రైల్వే టర్మినల్ మరో అతిపెద్ద ప్రాజెక్టు. సుమారు 150 ఎకరాల విస్తీర్ణంలో రూ.200 కోట్లతో నిర్మించనున్న ఈ ప్రాజెక్టు కోసం ఈ ఆర్థిక సంవత్సరం రూ.80 కోట్లు కేటాయించారు. మొదట 5 ప్లాట్‌ఫామ్‌లతో ప్రారంభించి దశలవారీగా 10 నుంచి 15 ప్లాట్‌ఫామ్‌ల వరకు అభివృద్ధి చేస్తారు. వీటిలో రైళ్లను శుభ్రం చేసేందుకు పిట్‌లైన్‌లు కూడా ఉంటాయి. ప్రాజెక్టుకు అయ్యే ఖర్చులో  రాష్ర్టం తన వంతు వాటాను  భరిస్తుంది. సికింద్రాబాద్, నాంపల్లి, కాచిగూడ రైల్వేస్టేషన్‌లపై పెరుగుతున్న ఒత్తిడి, ప్రయాణికుల రద్దీ దృష్ట్యా చర్లపల్లి, వట్టినాగులపల్లిలో రైల్వే టర్మినళ్లు నిర్మించాలని చాలాకాలంగా ప్రతిపాదనలు ఉన్నాయి.  నాంపల్లి, సికింద్రాబాద్, కాచిగూడ రైల్వేస్టేషన్ల తరువాత నగరంలో ఇది 4వ అతిపెద్ద రైల్వే టర్మినల్ కానుంది. 5వ టర్మినల్‌గా వట్టినాగులపల్లిలో 250 ఎకరాల్లో పీపీపీ మోడల్‌లో నిర్మిస్తారు.


 కొత్త ఫ్రైట్ కారిడార్లతో
 తగ్గనున్న రవాణా వ్యయం
 రూ.1.84 లక్షల కోట్ల ఆదాయ లక్ష్యం సవాలే...
 రైల్వే బడ్జెట్‌పై పారిశ్రామిక వర్గాల స్పందన...
   
 న్యూఢిల్లీ: రైల్వే బడ్జెట్.. ఆర్థికాభివృద్ధికి చేయూతనిచ్చేవిధంగా ఉందని కార్పొరేట్ ఇండియా అభిప్రాయపడింది. 2019కల్లా ఏర్పాటు కానున్న  మూడు కొత్త ఫ్రైట్ కారిడార్ల(సరుకు రవాణా)తో రవాణా వ్యయం గణనీయంగా తగ్గుముఖం పడుతుందని పారిశ్రామిక ప్రతినిధులు పేర్కొన్నారు. అయితే, రూ.1.84 లక్షల కోట్ల ఆదాయ లక్ష్యం గట్టి సవాలేనని వ్యాఖ్యానించారు. గురువారం పార్లమెంటులో ప్రవేశపెట్టిన రైల్వే బడ్జెట్లో అటు ప్రయాణికుల చార్జీలతో పాటు సరుకు రవాణా చార్జీలను కూడా పెంచలేదు. కొత్తగా మూడు సూపర్ ఫాస్ట్ రైళ్లను ప్రకటించడంతో పాటు నార్త్-సౌత్(ఢిల్లీ-చెన్నై), ఈస్ట్-వెస్ట్(ఖరగ్‌పూర్-ముంబై), ఈస్ట్‌కోస్ట్(ఖరగ్‌పూర్-విజయవాడ).. ఈ మూడు కొత్త ఫ్రైట్ కారిడార్లను 2019 కల్లా ఏర్పాటు చేయనున్నట్లు రైల్వే మంత్రి సురేశ్ ప్రభు ప్రకటించారు.
 
 ‘వచ్చే ఆర్థిక సంవత్సరంలో రూ.1.84 లక్షల కోట్ల ఆదాయ లక్ష్యం చాలా ఎక్కువ. జీడీపీ వృద్ధికి ఆటంకాలు, ఇతరత్రా అంశాలను చూస్తే.. ఈ లక్ష్యం పెద్ద సవాలే. పే కమిషన్ సిఫార్సుల ప్రభావం రైల్వేలపై రూ.30 వేల కోట్ల వరకూ పడుతుంది. అయినప్పటికీ 92% నిర్వహణ పనితీరును సాధించాలన్న లక్ష్యం సవాలుతో కూడుకున్నదే. 2019 కల్లా కొత్త ఫ్రైట్ కారిడార్లను అందుబాటులోకి తీసుకురావాలన్న లక్ష్యం గొప్పదే కానీ, అనేక సవాళ్లు ఉన్నాయి’ అని ఎల్‌అండ్‌టీ సీఈఓ(రైల్వే బిజినెస్) రాజీవ్ జ్యోతి పేర్కొన్నారు.
 
 పోర్టు కనెక్టివిటీ పెంపుపై ఎగుమతిదారుల హర్షం
 పోర్టులతో మరింత అనుసంధానం అయ్యేవిధంగా రైల్వే నెట్‌వర్క్ పెంచేందుకు బడ్జెట్‌లో ప్రాధాన్యం ఇచ్చారని ఎగుమతిదారులు హర్షం వ్యక్తం చేశారు. ఇది ట్రేడర్లకు ఉపయోగకరంగా నిలుస్తుందని చెప్పారు. రైల్వే లైన్లకు అనుసంధానంగా గిడ్డంగుల ఏర్పాటు ప్రతిపాదనల వల్ల ఫ్రైట్ టెర్మినళ్ల వద్ద ఖాళీగా ఉన్న ప్రదేశాల్లో కోల్డ్ స్టోరేజీల అభివృద్ధికి ప్రోత్సాహం లభిస్తుందని భారతీయ ఎగుమతి సంస్థల సమాఖ్య(ఫియో) పేర్కొంది. రైల్వేలకు పోర్టులతో కనెక్టివిటీ పెంపువల్ల ఎగుమతి, దిగుమతిదారులకు వ్యయాలు తగ్గేందుకు దోహదం చేస్తుందని, తద్వారా వ్యాపారాలకు సానుకూల పరిస్థితులు ఏర్పడతాయని ఇంజనీరింగ్ ఎగుమతుల ప్రోత్సాహక మండలి(ఈఈపీసీ) వ్యాఖ్యానించింది. అదేవిధంగా లాజిస్టిక్ పార్కులు, గిడ్డంగులను పీపీపీ పద్ధతిలో ఏర్పాటు చేస్తామని ప్రకటించడం కూడా ఎగుమతిదారులకు ప్రయోజనం చేకూరుస్తుందని ఈఈపీసీ ఇండియా చైర్మన్ టీఎస్ భాసిన్ పేర్కొన్నారు.
 
 
 ఫ్రైట్ కారిడార్లు, స్టేషన్ల అభివృద్ధితో రియల్టీకి బూస్ట్
  ప్రత్యేక ఫ్రైట్ కారిడార్లు, 400 రైల్వే స్టేషన్లను ఆధునీకరించడానికి వీలుగా బడ్జెట్‌లో ప్రతిపాదించడాన్ని రియల్ ఎస్టేట్ రంగం స్వాగతించింది. దీనివల్ల రియల్టీ మార్కెట్‌కు చేయూత లభిస్తుందని ప్రాపర్టీ కన్సల్టెంట్లు పేర్కొన్నారు. అయితే, వీటికి నిధులు సమకూర్చడం, నిర్దిష్ట కాలవ్యవధిలో ప్రాజెక్టులను పూర్తిచేయడం చాలా కీలకమని అభిప్రాయపడ్డారు. ‘400 స్టేషన్లను పీపీపీ విధానంలో ఆధునీకరించనుండటం వల్ల దేశవ్యాప్తంగా స్టేషన్ల పరిధిలో రియల్టీ అభివృద్ధికి వీలు కలుగుతుంది. పెద్ద నగరాల్లో రైల్వే శాఖకు ఉన్న భారీ స్థలాలను వాణిజ్యపరంగా ఉపయోగించుకోవచ్చు’ అని జేఎల్‌ఎల్ ఇండియా చైర్మన్, కంట్రీ హెడ్ అనుజ్ పురి పేర్కొన్నారు.
   
 సాహసోపేతమైన ముందుచూపు..
 ప్రధానంగా ప్రాజెక్టుల పూర్తి, అమలుపై బడ్జెట్‌లో అత్యధికంగా దృష్టిపెట్టడం మంచి పరిణామం. కొత్తగా మూడు రైల్వే ఫ్రైట్ కారిడార్ల ఏర్పాటుతో రవాణా వ్యయాలు తగ్గేందుకు దోహదం చేస్తుంది. పెట్టుబడులు, ఉద్యోగాల కల్పన, భద్రతపై దృష్టిపెడుతూ సాహసోపేతమైన ముందుచూపుతో రూపొందించిన బడ్జెట్ ఇది. వృద్ధికి ఊతమిస్తూ.. పారిశ్రామిక రంగానికి అనేక అవకాశాలను కల్పించారు. - సుమిత్ మజుందార్, సీఐఐ ప్రెసిడెంట్
 
 
  ప్రైవేటు రంగాన్ని ఆకర్షిస్తుంది...
 సరుకు రవాణా పాలసీని హేతుబద్ధీకరించడం, పీపీపీ విధానాన్ని సమీక్షిస్తామని రైల్వే శాఖ మంత్రి పేర్కొన్న నేపథ్యంలో.. ఈ రంగంలో పెట్టుబడులకు ప్రైవేటు కంపెనీలను ఆకర్షించేలా చేస్తుంది. దీనివల్ల రైల్వే రవాణా మెరుగుపడటంతోపాటు ఆదాయం కూడా పెరుగుతుంది. ప్రత్యేక ఫ్రైట్ కారిడార్లు, పోర్టులతో అనుసంధాన్ని మరింత పెంచడం వంటివాటిపై దృష్టిపెట్టడం ఆహ్వానించదగిన విషయం. ఇది అత్యంత ఆచరణాత్మక బడ్జెట్. ముఖ్యంగా దేశ ఆర్థికాభివృద్ధికి రైల్వేలను వెన్నెముకగా మార్చాలన్న లక్ష్యం అత్యంత ప్రధానమైనది. అధునాతన రైల్వే మౌలిక సదుపాయాల అభివృద్ధికి  బడ్జెట్ బాటలు వేసింది. - హర్షవర్ధన్ న్యోతియా, ఫిక్కీ ప్రెసిడెంట్
 
 
 ఆర్థికపరమైన సవాళ్లు ఉన్నా...
  పెట్టుబడి వ్యయాల విషయంలో రాజీపడకుండా... చార్జీల పెంపు కూడా లేకుండా రైల్వే శాఖ మంత్రి బడ్జెట్‌ను ప్రవేశపెట్టారు. ప్రయాణికులు, సరుకు రవాణా రెండింటి సామర్థ్యాలనూ పెంచే విధంగా చర్యలు ఉన్నా యి. కమోడిటీ రంగాల్లో తీవ్ర మందగమనం కారణంగా ఆర్థిక వ్యవస్థకు సవాళ్లు పొంచిఉన్నప్పటికీ రైల్వే బడ్జెట్‌లో వృద్ధికి చేయూతనిచ్చేందుకు ప్రాధాన్యం ఇవ్వడం ప్రశంసనీయం.
  - సునిల్ కనోరియా, అసోచామ్ ప్రెసిడెంట్


 రైల్వే బడ్జెట్‌లో ఒరిగిందేమీలేదు
  తాడేపల్లిగూడెం :ఊరింపులు.. నిరీక్షణలు.. చివరకు ఉసూరుమనిపించాయి. కేంద్ర రైల్వే శాఖ మంత్రి సురేష్ ప్రభు పార్లమెంట్‌లో గురువారం ప్రవేశపెట్టిన రైల్వే బడ్జెట్ జిల్లా ప్రజల ఆశలను నీరుగార్చింది. ప్రజల చిరకాల వాంఛ అయిన కోటిపల్లి-నరసాపురం, కొవ్వూరు-భద్రాచలం రైల్వే లైన్ల నిర్మాణ ప్రతిపాదనలకు మోక్షం కలగలేదు. కోటిపల్లి-నరసాపురం రైల్వే లైన్‌కు రూ.200 కోట్లు కేటాయిస్తున్నట్టు బడ్జెట్‌లో పేర్కొన్నా.. ఆ నిధులు సర్వే పనులకు సైతం సరిపోవు. ఈ లైన్ ప్రతిపాదనను బతికించడానికి చేసిన కేటాయింపులే తప్ప ఎందుకూ అక్కరకు రావన్న విషయం తెలిసి ఉభయ గోదావరి జిల్లాల ప్రజలు నిరుత్సాహానికి గురయ్యారు. మరోవైపు జిల్లా మీదుగా కొత్త రైళ్లు నడిపే ప్రకటనలేవీ లేకపోగా.. కనీసం హాల్టులు కూడా కల్పించలేదు.
  
  ‘కోటి’పల్లి ఆశలపై నీళ్లు
  కేంద్రంలో బీజేపీ అధికారంలో ఉండటం.. ఆ పార్టీ ఎంపీ ఒకరు జిల్లాలో ఉండటం.. అభివృద్ది విషయంలో తరచూ ఢిల్లీ వెళ్లి వినతులు సమర్పించే రాష్ట దేవాదాయ శాఖ మంత్రి పైడికొండల మాణిక్యాలరావు జిల్లాలో బీజేపీ ఆశాజ్యోతిగా ఉండటంతో.. ఈసారి తప్పకుండా రైల్వే పరంగా ఎంతోకొంత ప్రయోజనం కలుగుతుందని అంతా భావించారు. అయినా.. కేంద్రమంత్రి సురేష్‌ప్రభు ఎప్పటిలా మన జిల్లాను చిన్నచూపు చూశారు. నరసాపురం-కోటిపల్లి రైల్వే లైన్ ఈసారి సాకారం అవుతుందని ఉభయ గోదావరి జిల్లాల ప్రజలు ఆశించారు. ఈ లైన్ నిర్మాణం కోసం అటు కోనసీమ, ఇటు నరసాపురంలో ఆందోళనలు సైతం జరిగాయి. కేవలం 60 కిలోమీటర్ల మేర ఈ మార్గాన్ని నిర్మిస్తే ఉభయ గోదావరి జిల్లాలకు ప్రయోజనం కలగటంతోపాటు అవసరమైనప్పుడు రైళ్ల దారి మళ్లింపు, దూరప్రాంత రైళ్ల పెంపు సాధ్యమవుతుంది. సుమారు రూ.3 వేల కోట్లు కేటాయిస్తే తప్ప ఆచరణకు నోచుకోని ఈ లైన్ కోసం రూ.200 కోట్లు విదిల్చి చేతులు దులిపేసుకోవడం చర్చనీయాంశమైంది.
  
  మూడో లైన్ ముచ్చట లేదు
  విజయవాడ నుంచి విశాఖై వెపు గల మార్గంలో రైళ్ల ట్రాఫిక్ విపరీతంగా పెరిగింది. కొత్తగా నడుపుతున్న సూపర్ ఫాస్ట్ రైళ్లకు ప్రధాన స్టేషన్లలో కూడా హాల్టు ఇచ్చే పరిస్థితి కనిపించడం లేదు. ట్రాక్ సామర్థ్యానికి మించి రైళ్లను నడుపుతున్నామని.. ఇకపై కొత్త రైళ్లు నడపలేమని, కొత్త హాల్టులు గాని ఇవ్వలేమని రైల్వే ఉన్నతాధికారులు ప్రభుత్వానికి తేల్చి చెప్పారు. ఈ పరిస్థితి నుంచి బయటపడాలంటే మూడో లైన్ నిర్మాణమే స్పష్టం చేశారు. ఈ నేపథ్యంలో ప్రధాన రైల్వే లైన్ మీదుగా మూడో లైన్ అందుబాటులోకి వస్తుందని ఇటీవల ఏలూరులో దక్షిణ మధ్య రైల్వే డీఆర్‌ఎం చెప్పారు. ఖాజీపేట నుంచి విజయవాడ వరకు మూడోలైన్ నిర్మాణం కోసం బడ్జెట్‌లో రూ.114 కోట్లను కేటాయించారు. ఇదే లైన్‌ను విశాఖ వరకు విస్తరించి ఉంటే జిల్లాకు ప్రయోజనం కలిగేది.
  


 ‘ప్రభ’వించని రైల్వే బడ్జెట్
 7,000 పాయింట్ల దిగువకు నిఫ్టీ
 
 స్టాక్ మార్కెట్ డేటా...
  
  టర్నోవర్ (రూ.కోట్లలో)
  బీఎస్‌ఈ    2,319
  ఎన్‌ఎస్‌ఈ (ఈక్విటీ విభాగం)    18,483
  ఎన్‌ఎస్‌ఈ (డెరివేటివ్స్)     5,95,640
  
  ఎఫ్‌ఐఐ     - 1,466
  డీఐఐ            807
  
  
  
 రైల్వే బడ్జెట్ స్టాక్ మార్కెట్‌ను మెప్పించలేకపోయింది. ఫిబ్రవరి సిరీస్ డెరివేటివ్ కాంట్రాక్టుల ముగింపుకు ప్రపంచ మార్కెట్ల బలహీనతలు కూడా తోడవడంతో గురువారం స్టాక్ మార్కెట్ నష్టాల్లో ముగిసింది. స్టాక్ మార్కెట్ వరుసగా మూడో రోజూ నష్టపోయింది. బీఎస్‌ఈ సెన్సెక్స్ 23,000, ఎన్‌ఎస్‌ఈ నిఫ్టీ 7,000 పాయింట్ల దిగువకు పడిపోయాయి. సెన్సెక్స్ 113 పాయింట్లు నష్టపోయి 22,976 పాయింట్లకు, నిఫ్టీ 48 పాయింట్లు నష్టపోయి 6,971 పాయింట్ల వద్ద ముగిశాయి. బ్యాంక్, ఐటీ, ఇన్‌ఫ్రా, క్యాపిటల్ గూడ్స్ షేర్లు నష్టపోగా, లోహ, ఫార్మా షేర్లు  లాభాల్లో ముగిశాయి. విదేశీ నిధులు తరలిపోతుండటంతో చైనా స్టాక్ సూచీ 6 శాతానికి పైగా క్షీణించడం, రూపాయి 30 నెలల కనిష్టానికి  పతనం కావడం,  ప్రతికూల ప్రభావం చూపాయి.సెన్సెక్స్ లాభాల్లోనే ప్రారంభమైంది.
  
 30 నెలల కనిష్టానికి రూపాయి
 డాలర్‌తో రూపాయి మారకం గురువారం 30 నెలల కనిష్టానికి పడిపోయింది. విదేశీ ఇన్వెస్టర్లు ఈక్విటీలనుంచి నిధులు ఉపసంహరించు కోవడం, బ్యాంక్‌లు, దిగుమతిదారుల నుంచి  డాలర్లకు డిమాండ్ నేపథ్యంలో రూపాయి 15 పైసలు క్షీణించి 68.72 వద్ద ముగిసింది. నెల చివర కావడంతో దిగుమతిదారులు.. ముఖ్యంగా చమురు దిగుమతిదారుల నుంచి డాలర్లకు డిమాండ్ బాగా ఉందని ఒక ఫారెక్స్ డీలర్ వ్యాఖ్యానించారు. ఫారెక్స్ మార్కెట్లో బుధవారం నాటి ముగింపుతో (68.57)తో పోల్చితే డాలర్‌తో రూపాయి మారకం గురువారం  68.47 వద్ద లాభాల్లోనే ప్రారంభమైంది.
    
 ఎస్‌డీఆర్ నిబంధనల సవరణ
 భారత రిజర్వ్ బ్యాంక్(ఆర్‌బీఐ) వ్యూహాత్మక రుణ పునర్వ్యస్థీకరణ(ఎస్‌డీఆర్) నిబంధనలను సవరిం చింది. బ్యాంక్‌లు మొత్తం రుణ విలువలో 15 శాతం వరకూ ఎస్‌డీఆర్‌లకు కేటాయింపులు జరపాలని ఆర్‌బీఐ ఆదేశించింది. బ్యాంకులు తనఖాగా తీసుకున్న ఈక్విటీ విలువ మరింత తగ్గకుండా ఉండేలా ఈ నిబంధనలను ఆర్‌బీఐ రూపొందించింది. ఎస్‌డీఆర్ నిబంధనలో మరింత సరళత్వం కావాలని పలువురు కోరడంతో కొత్త నిబంధనలను ఆర్‌బీఐ అందుబాటులోకి తెచ్చింది. బ్యాంకులు ఎస్‌డీఆర్ ద్వారా తీసుకున్న కంపెనీల్లోని వాటాను 18 నెలలలోపు కొత్త ప్రమోటర్లకు విక్రయించరాదని ఆర్‌బీఐ ఒక నోటిఫికేషన్‌లో పేర్కొంది.


 ఆకట్టుకోని రైల్వే బడ్జెట్   లాభాల్లో లాజిస్టిక్స్ షేర్లు   పలు రైల్వే షేర్లకు నష్టాలు
 
 ముంబై: దలాల్ స్ట్రీట్‌లో సురేశ్ ప్రభు ఆధ్వర్యంలోని  ట్రైన్ నంబర్ టూజీరోవన్‌సిక్స్(2016) పట్టాలు తప్పింది. రైల్వే షేర్లు లాభాల ప్లాట్‌ఫామ్‌పై ఆగకుండా నష్టాల పట్టాలపై పరుగులు పెట్టాయి. ప్రయాణికుల, సరుకు రవాణా చార్జీల పెంపుకు సురేష్ ప్రభు  గ్రీన్ సిగ్నల్ ఇవ్వకపోయినప్పటికీ, స్టాక్ మార్కెట్... ప్రభు బడ్జెట్‌కు రెడ్ సిగ్నల్‌నే ఇచ్చింది. రైల్వే బడ్జెట్ నేపథ్యంలో రైల్వే షేర్లు బాగా నష్టపోయాయి. కొన్ని షేర్లు మాత్రం స్వల్పంగా లాభపడ్డాయి. రైల్వే బడ్జెట్‌లో మూలధన కేటాయింపులు ఆశించిన స్థాయిలో లేవని  నిపుణులంటున్నారు. రైల్వే బడ్జెట్‌కు ముందు ఒడిదుడుకుల్లో ట్రేడైన రైల్వే షేర్లు..సురేశ్ ప్రభు బడ్జెట్ ప్రసంగం మొదలైన తర్వాత నష్టాల బాటలో సాగాయి. బడ్జెట్ ప్రసంగం పూర్తయిన తర్వాత మరింతగా క్షీణించాయి. రైల్వే మంత్రి తన పరిధి మేరకు మంచి బడ్జెట్‌నే అందించారని డాల్టన్ క్యాపిటల్ అడ్వైజర్స్ ఎండీ యూ. ఆర్. భట్ పేర్కొన్నారు. అయితే వ్యాగన్‌లు తయారు చేసే కంపెనీలకు భారీ ఆర్డర్లేమీ లేవని పెదవి విరిచారు.
 
  ప్రతిపాదనలు-షేర్ల ప్రతిస్పందన
 2,000 కిమీ రైల్వే లైన్‌ల విద్యుదీకరించాలని ప్రతిపాదించారు. గత ఆర్థిక సంవత్సరంతో పోలిస్తే ఈ విద్యుదీకరణ బడ్జెట్ 50 శాతం అధికం. అయినప్పటికీ,   రైల్వేల విద్యుదీకరణతో సంబంధమున్న షేర్లు మిశ్రమంగా స్పందించాయి.  కేఈసీ ఇంటర్నేషనల్ 3 శాతం లాభపడి రూ.106 వద్ద ముగిసింది. సీమెన్స్, ఆల్‌స్టోమ్ టీ అండ్ డీ ఇండియా షేర్లు  క్షీణించాయి.
 
 వ్యాగన్‌లు తయారు చేసే కాళింది రైల్, టెక్స్‌మాకో రైల్, టిటాఘర్ వ్యాగన్స్ 8-9శాతం రేంజ్‌లో నష్టపోయాయి.రైల్ సైట్ లాజిస్టిక్ పార్క్‌ల అభివృద్ధి చేస్తారన్న ప్రతిపాదన, రవాణా చార్జీలు పెంచకపోవడం, ప్రతిపాదిత కొత్త రవాణా కారిడార్ల కారణంగా రవాణా వ్యయం తగ్గడం తదితర  కారణాల వల్ల లాజిస్టిక్స్ కంపెనీలైన కంటైనర్ కార్పొరేషన్ ఆఫ్ ఇండియా, గేట్ వే డిస్ట్రిపార్క్స్, అల్‌కార్గో లాజిస్టిక్స్ గతి, టిమ్‌కెన్‌లు మాత్రం 0.4 శాతం నుంచి 3 శాతం వరకూ పెరిగాయి.
 
 మరింత భద్రత కోసం రైల్వే స్టేషన్లలో సీసీటీవీలను ఏర్పాటు చేస్తారన్న ప్రతిపాదన కారణంగా రైల్వే సంబంధిత టెక్నాలజీ కంపెనీలు మిశ్రమంగా ముగిశాయి. మిక్ ఎలక్ట్రానిక్స్ 0.5 శాతం, జికామ్ ఎలక్ట్రానిక్స్ 6.2 శాతం చొప్పున లాభపడ్డాయి. అయితే ఇదే కేటగిరిలోని స్టోన్ ఇండియా 6 శాతం వరకూ క్షీణించింది.
 
 రైల్వే ఆర్డర్లపై ఆధారపడి కార్యకలాపాలు నిర్వహించే  కంపెనీల షేర్లు క్షీణించాయి. టెక్స్‌మాకో రైల్ అండ్ ఇంజినీరింగ్ 8.8 శాతం, కాళింది రైల్ నిర్మాణ్ 9.2 శాతం, టిటాఘర్ వ్యాగన్స్ 8 శాతం, కెర్నెక్స్ మైక్రో సిస్టమ్స్, 4.8 శాతం, హింద్ రెక్టిఫైర్స్ 7.6 శాతం, భెల్ , బీఈఎంఎల్ 4 శాతం, స్టోన్ ఇండియా 6 శాతం చొప్పున నష్టపోయాయి.
 
 వంద స్టేషన్లలో వైఫై సేవలందించనున్న ప్రతిపాదన కారణంగా డి-లింక్ ఇండియా షేర్ ఇంట్రాడేలో 12 శాతం లాభపడి రూ.140ను తాకింది, చివరకు 2 శాతం లాభంతో రూ.126 వద్ద ముగిసింది. స్మార్ట్‌లింక్ నెట్‌వర్క్ సిస్టమ్స్ 20 శాతం అప్పర్ సర్క్యూట్ తో రూ.97 వద్ద ముగిసింది. షేర్ల బై బ్యాక్ చేస్తామని కంపెనీ ప్రకటించడం కూడా ఈ కంపెనీ జోరుకు కలసి వచ్చింది


 హైదరాబాద్ : గురువారం పార్లమెంట్లో ప్రవేశపెట్టిన రైల్వే బడ్జెట్ పై ఎంపీ కవిత హర్షం వ్యక్తం చేశారు. విలేకరులతో మాట్లాడుతూ.. ఈ ఏడాది రైల్వే బడ్జెట్ లో మౌలిక సదుపాయాలకు పెద్ద పీట వేశారని ఆమె అభిప్రాయపడ్డారు. మహిళల భద్రతకు తీసుకుంటున్న చర్యలు బాగున్నాయని అన్నారు. పెద్ద పల్లి- నిజామాబాద్ లైన్ కు నిధుల కేటాయించినందుకు సంతోషంగా ఉందని కవిత పేర్కొన్నారు.


 హైదరాబాద్‌: రైల్వే బడ్జెట్ లో తెలంగాణ రాష్ట్రానికి పూర్తిగా అన్యాయం జరిగిందని కాంగ్రెస్ సీనియర్ నేత పొన్నం ప్రభాకర్ అన్నారు. ఆయన గురువారమిక్కడ విలేకర్లతో మాట్లాడుతూ  రైల్వే ప్రాజెక్టుల్లో రాష్ట్రానికి అన్యాయం జరుగుతున్నా కేసీఆర్ స్పందించడం లేదని విమర్శించారు. 
 ముఖ్య మంత్రి ఫాం హౌస్ కే పరిమితయ్యారని పొన్నం ఎద్దేవా చేశారు. విభజన చట్టంలో హామీ ఇచ్చిన.. రైల్వే కోచ్ ఫ్యాక్టరీ కూడా రాలేదని ఈ సందర్భంగా గుర్తు చేశారు. నిధుల సాధన కోసం కేంద్రం పై ఒత్తిడి పెంచడంలో టీఆర్ఎస్ ఎంపీలు విఫలమయ్యారని పొన్నం విమర్శించారు. నిధులు రాకపోవడానికి బీజేపీ, టీఆర్ఎస్ లే కారణమన్నారు. కేంద్రంపై ఒత్తిడి పెంచడంలో టీఆర్ఎస్ ఎంపీలు విఫలమయ్యారన్నారు. ఇప్పుడు పార్లమెంట్లో సహాయ నిరాకరణ చేయాలని, లేదంటే ముక్కు నేలకు రాసి ప్రజలకు క్షమాపణ చెప్పాలని ఆయన డిమాండ్ చేశారు.


 రైల్వే శాఖ మంత్రి సురేశ్ ప్రభు లోక్సభలో ప్రవేశపెట్టిన రైల్వే బడ్జెట్పై పలు రాష్ట్రాల ముఖ్యమంత్రులు, కేంద్ర మంత్రులు, రాజకీయ ప్రముఖులు స్పందించారు. ఎవరేమన్నారంటే వారి మాటల్లోనే..
 
 ప్రజల ఆకాంక్షను ప్రతిబింబించేలా భవిష్యత్‌ను దృష్టిలో పెట్టుకుని అభివృద్ధికి తోడ్పడే విధంగా బడ్జెట్‌ను రూపొందించిన మంత్రి సురేశ్‌ ప్రభుకు అభినందనలు.             - రాజస్థాన్ ముఖ్యమంత్రి వసుంధర రాజే
  
  సామాన్యుడి సమస్యలను పరిగణనలోకి తీసుకుని, పన్నులు విధించకుండా, వ్యాపారవేత్తలను ప్రోత్సహిస్తూ సమర్థవంతమైన రైల్వే బడ్జెట్‌ను రూపొందించాం.                  - కేంద్ర సమాచార ప్రసార శాఖ మంత్రి రాజ్యవర్ధన్ రాథోడ్
  
  భవిష్యత్ రైల్వే అవసరాలకు అనుగుణంగా, ప్రజాహిత రైల్వే బడ్జెట్‌ను రూపొందించిన ప్రధాని నరేంద్ర మోదీ, రైల్వే మంత్రి సురేశ్ ప్రభుకు అభినందనలు. వికలాంగులు, వయోవృద్ధులు, మహిళల సంక్షేమాన్ని దృష్టిలో పెట్టుకుని బడ్జెట్ తయారు చేశారు. గుజరాత్‌లోని నార్గల్, హజిరా నౌకాశ్రయాలకు రైల్వే లైన్లు నిర్మిస్తున్నందుకు కృతజ్ఞతలు.   - గుజరాత్ ముఖ్యమంత్రి ఆనందీబెన్
  
 నిరుపేదలను దృష్టిలో పెట్టుకుని సంస్కరణలకు అనుగుణంగా రూపొందించిన రైల్వే బడ్జెట్ ఇది. ఈ బడ్జెట్‌కి 10 కి 9 మార్కులేస్తా.
 - కేంద్ర పర్యావరణ, అటవీ శాఖ మంత్రి ప్రకాశ్ జవదేకర్
  
 వాస్తవిక పరిస్థితులను పరిగణనలోకి తీసుకోవడం ద్వారా రైల్వేలను మరింత ప్రాచుర్యంలోకి తీసుకెళ్తున్నారు.
 - కేంద్రమంత్రి వెంకయ్యనాయుడు
  
  భవిష్యత్‌ను దృష్టిలో పెట్టుకుని అన్ని విధాలా సమతుల్యంగా బడ్జెట్‌ను రూపొందించినందుకు శుభాకాంక్షలు. భారత ఆర్థిక వ్యవస్థకు రైల్వేలు వెన్నెముక అని బడ్జెట్ ద్వారా నిరూపించారు. - కేంద్ర ఆర్థిక శాఖ సహాయ మంత్రి జయంత్ సిన్హా
  
  ఈ బడ్జెట్ దేశ ఆర్థికాభివృద్ధికి చేయూతనిస్తుంది. - బీజేపీ అధికార ప్రతినిధి మీనాక్షి లేఖి
  
  మహిళలను దృష్టిలో పెట్టుకుని, పెట్టుబడులను ఆకర్షించే విధంగా బడ్జెట్‌ను రూపొందించినందుకు శుభాకాంక్షలు.
 - కేంద్ర పెట్రోలియం శాఖ మంత్రి ధర్మేంద్ర ప్రదాన్
  
 ఇది నిరుపయోగమైన బడ్జెట్. క్రూడ్ ఆయిల్ ధర తగ్గింది కాబట్టి టికెట్ ధరలు కూడా తగ్గాలి. అంతేకానీ టికెట్ రేట్లు పెంచకుండా ఉండటం గొప్పతనం కాదు. - బిహార్ సీఎం నితీశ్ కుమార్
  
  వాణిజ్య, సూపర్‌ఫాస్ట్ రైళ్లు విమానాలతో పోటీ పడతాయేమో. - జీ చైర్మన్ సుభాష్ చంద్ర
 
 ఇది సామాన్యుడి బడ్జెట్. జనని సేవ పథకం ద్వారా రైల్లో ప్రయాణించే చిన్నారులకు ఆహారం సరఫరా చేస్తున్నందుకు కృతజ్ఞతలు. ఎలాంటి చార్జీలను పెంచకుండా మరిన్ని సౌకర్యాలు కల్పిస్తున్నందుకు ధన్యవాదాలు. - బీజేపీ ఎంపీ పూనం మహాజన్
 
 
 ఈ బడ్జెట్ నిస్సారంగా ఉంది. ముగిసిపోయే ప్రత్యేక రైల్వే బడ్జెట్‌కు ఇది ఒక ఫేర్‌వెల్ బడ్జెట్‌లా ఉంది.        
     -కాంగ్రెస్ నాయకుడు ఎమ్ సింఘ్వి
  
  ప్రభుత్వ కలను బడ్జెట్‌గా మలచినట్లున్నారు. బడ్జెట్‌లోని హామీలు  ఆచరణసాధ్యం కాదు. వాటిని అమలు చేయడం అసాధ్యం.         - లోక్‌సభలో కాంగ్రెస్ నాయకుడు మల్లికార్జున ఖర్గే
 
 ఇది నిరుపయోగమైన బడ్జెట్. గత బడ్జెట్‌లో ప్రకటించిన ప్రతిపాదనల గురించిన ప్రస్తావనే లేదు.   
  - కాంగ్రెస్ నాయకుడు వీరప్ప మొయిలీ
  
  ఒక్క కొత్త రైలు లేదు. కనీసం రైల్వే చార్జీలన్నా తగ్గిస్తారనుకున్నాం అదీ లేదు. ఈ బడ్జెట్ వల్ల ప్రజలకు ఒరిగేదేమీ లేదు.
 - కాంగ్రెస్ ప్రతినిధి రాజీవ్ శుక్లా
  
  బడ్జెట్‌లో ప్రజలకు  హామీలు ఇచ్చారు సరే. కానీ వాటిని అమలు చేయడానికి డబ్బును ఎలా సేకరిస్తారనేది చెప్పలేదు.
      -  రైల్వే శాఖ మాజీ మంత్రి దినేశ్ త్రివేది
  
  చాలా కొత్త ప్రకటనలు చేశారు కానీ గత బడ్జెట్‌లోని ప్రతిపాదనలకు సంబంధించిన వివరాలు, వాటి అమలు తీరును మంత్రి చెప్పలేదు.         - బీఎస్‌పీ చీఫ్ మాయావతి
  
  ఎన్‌డీఏ ప్రభుత్వం ప్రతి ఏటా ముందుచూపుతో కూడిన బడ్జెట్‌ను ప్రవేశపెడుతుంది.  కానీ దానిని అమలు చేయడంలోనే పూర్తిగా విఫలం అవుతుంది.     -ప్రముఖ రాజకీయ విశ్లేషకుడు సల్మాన్ అనీస్‌సోస్
  
  ఈ సంవత్సరం రైల్వే బడ్జెట్ చాలా నిరుత్సాహన్ని కలిగించింది. బడ్జెట్‌లో కొత్తగా చేసిందేమీ లేదు. కేవలం గత బడ్జెట్‌కు పేర్లు మాత్రం మార్చారు. - ప్రముఖ జర్నలిస్ట్ వినోద్ మెహతా
 
  ఈ బడ్జెట్ నన్ను చాలా నిరాశకు గురిచేసింది. బడ్జెట్‌లో ఎలాంటి కొత్తదనం లేదు. పాత ప్రాజెక్టుల కొనసాగింపే కనబడుతోంది. కనీసం చార్జీల తగ్గింపైనా ఉంటుందని ఆశించాం. అది కూడా లేకుండా పోయింది.     - రైల్వే శాఖ మాజీ మంత్రి పవన్ బన్సాల్
 
    ఈ బడ్జెట్ అసలు నాకు అర్ధం కాలేదు. నేను ప్రభుజీని కలిసి బడ్జెట్ గురించి తెలుసుకోవాలి.
  -ఎన్‌సీపీ నాయకురాలు సుప్రియా సూలె


 భువనేశ్వర్: 2016 సంవత్సరానికి గాను మంత్రి సురేశ్ ప్రభు ప్రవేశపెట్టిన రైల్వే బడ్జెట్ మాట ఎలా ఉన్నా.. ప్రముఖ సైకత శిల్పి సుదర్శన్ పట్నాయక్ మాత్రం పలువురి ఆకట్టుకున్నారు. వివిధ సందర్భాలలో  సైకత శిల్పాలతో  ప్రత్యేక ఆకర్షణగా నిలిచే ఆయన మరోసారి తన నైపుణ్యానికి పని చెప్పారు.
 
 సురేష్ ప్రభు రైల్వే బడ్జెట్‌పై ఇసుకతో చక్కటి శిల్పాన్ని తయారుచేశారు. ఒడిశాలో పూరీ సముద్రతీరంలో పట్టాలు, రైలును ఇసుకతో చెక్కారు. దాని పక్కన ఇండియన్ లైఫ్ లైన్ బడ్జెట్ 2016 అని క్యాప్షన్ రాశారు.  అనంతరం దీన్ని ట్విట్టర్ లో  పోస్ట్ చేశారు. సమాజంలో ఆయా పరిస్థితులకు,  పరిణామాలకు సందర్భోచితంగా విలక్షణ శైలిలో సైకత శిల్పాలను రూపొందించడం సుదర్శన్ పట్నాయక్ ప్రత్యేకత.  ఇటీవల  మంచుపర్వతాల్లో చిక్కుకున్న హనుమంతప్ప  కోమాలోకి వెళ్లిన సందర్భంలో త్వరగా కోలుకోవాలంటూ తన సైకత  శిల్పం ద్వారా ఆకాక్షించి పలువురి దృష్టిని తనవైపు తిప్పుకున్నారు.


 న్యూఢిల్లీ: రైల్వే శాఖ మంత్రి సురేష్ ప్రభు గురువారం లోక్సభలో ప్రవేశపెట్టిన రైల్వే బడ్జెట్ అద్భుతంగా ఉందని ప్రధాని నరేంద్ర మోదీ ప్రశంసించారు. రైల్వే మంత్రిని, రైల్వే శాఖ సిబ్బందిని మోదీ అభినందించారు.
 
 'గత ప్రభుత్వాలు ప్రవేశపెట్టిన రైల్వే బడ్జెట్లను విమర్శించదలచుకోలేదు. ఈ బడ్జెట్ వ్యయం రెండున్నర రెట్లు పెరిగింది. దేశ పురోభివృద్ధికి దోహదపడుతుంది. దేశాభివృద్ధిలో దీర్ఘకాలం ప్రభావం చూపుతుంది. ఛార్జీలు పెంచకుండా ప్రయాణికులకు ఊరట కలిగించారు. గతేడాది ప్రవేశపెట్టిన బడ్జెట్ ద్వారా పురోగతి కనిపించింది. ఈ బడ్జెట్ వల్ల మరింత అభివృద్ధి జరుగుతుంది. దేశాభివృద్ధిలో రైల్వే బడ్జెట్ కీలక పాత్ర పోషిస్తుంది' అని మోదీ ట్వీట్ చేశారు.


 ♦ బ్రిటీష్ కాలంనాటి రైల్వేట్రాక్‌లే దిక్కు
 ♦ ఫలించని ఏళ్ల పోరాటం
 ♦ రైల్వే బడ్జెట్‌పై జిల్లావాసుల గంపెడాశలు..
  కొత్తగూడెం : స్వాతంత్య్రం సిద్ధించి ఆరు దశాబ్దాలైంది. బ్రిటీష్ పాలన నుంచి విముక్తి లభించింది. కానీ, బ్రిటీష్‌వారు వేసిన రైల్వే లైన్లే ఇప్పటికీ దర్శనమిస్తున్నాయి. అరవై ఏళ్లుగా మన పాలకులు దేశంలో రైల్వే లైన్లు వేసినవి కొన్నే. కొత్తగూడెం నుంచి కొవ్వూరుకు రైల్వే లైన్ వేయాలని చాలా ఏళ్లుగా పోరాటం జరుగుతోంది. ఏ ఒక్క ప్రభుత్వం పైసా ఇవ్వకపోవడంతో కొత్త ట్రాక్‌ల ఊసేలేదు. భద్రాచలం రోడ్-కొవ్వూరు లైన్, సత్తుపల్లి-కొత్తగూడెం లైన్, పాండురంగాపురం-సారపాక లైన్లు ముందుకు సాగడం లేదు. ప్రస్తుతం ఉన్న రైల్వేలైన్ల ద్వారా కోట్లాది రూపాయల మేరకు ఆదాయం వస్తునప్పటికీ కొత్తలైన్లను నిర్మించడానికి, వాటిని అభివృద్ధి చేయడానికి ఇప్పటి వరకు పాలించిన కేంద్ర ప్రభుత్వాలు నిధులు విడుదల చేయలేదు. సింగరేణి బొగ్గు సరఫరాపైనే ఎక్కువగా జిల్లా నుంచి రైల్వే శాఖకు ప్రతి ఏటా రూ.800 కోట్ల మేరకు ఆదాయం లభిస్తోంది. దీంతోపాటు పర్యావరణశాఖ బొగ్గు రవాణా కేవలం రైల్వే ద్వారానే చేయాలని, రోడ్డు మార్గం ద్వారా చేయవద్దని నిబంధనలు విధించింది. ఈ నేపథ్యంలో సత్తుపల్లి-కొత్తగూడేనికి కొత్త మార్గం ఏర్పాటు చేసేందుకు సింగరేణి సంస్థ ముందుకు వచ్చినప్పటికీ భూ సేకరణ విషయం జఠిలంగా మారడంతో ఇప్పుడు అదికాస్తా పెండింగ్‌లోనే ఉంది.
  సర్వేకే పరిమితం
 భద్రాచలం రోడ్ (కొత్తగూడెం) నుంచి తూర్పుగోదావరి జిల్లాలోని కొవ్వూరు వరకు రైల్వేలైన్ నిర్మాణం చేపట్టాలని ఐదు దశాబ్దాలుగా ప్రజలు కోరుతు న్నా ఫలితం లేదు. ఏటా బడ్జెట్‌లో కొవ్వూరు లైన్ సర్వేలకు మాత్రమే పరిమితమవుతోంది. ఈ రైల్వేలైన్ నిర్మిస్తే హైదరాబాద్ నుంచి విశాఖ వెళ్లేందుకు 149 కిలోమీటర్ల దూరం తగ్గనుంది. దీంతోపాటు జిల్లాలో ఉత్పత్తి అయిన బొగ్గును విశాఖపట్నం తదితర ప్రాంతాలకు రవాణా చేయొచ్చు. సుమారు 150 గిరిజన గ్రామాలకు రైలుమార్గం అందుతుంది. 1969 నుంచి కొవ్వూరు రైల్వే లైన్ ఏర్పాటు చేయాలని ఆందోళన కొనసాగుతోంది. ఈ నేపథ్యంలో 2012లో కొవ్వూరు లైన్‌ను మంజూరు చేస్తూ కేంద్ర ప్రభుత్వం నిర్ణయం తీసుకున్నప్పటికీ నాలుగు బడ్జెట్ సమావేశాలు ముగిసినా ఇప్పటికీ రూపాయి కూడా విడుదల కాలేదు.
  పెరిగిన సత్తుపల్లి లైన్ వ్యయం..
 సత్తుపల్లిలోని జేవీఆర్ ఓసీపీ, కిష్టాపురం ఓసీపీల ద్వారా ఏటా 2 మిలియన్ టన్నుల మేరకు బొగ్గు సరఫరా చేస్తోంది. పర్యావరణశాఖ నిబంధనల నేపథ్యంలో కొత్తగూడెం నుంచి సత్తుపల్లి వరకు 60 కిలోమీటర్ల మేరకు నిర్మించనున్న లైన్‌కు సింగరేణి సంస్థ నిధులు విడుదల చేసేందుకు ముందుకు వచ్చింది. ఫైనల్ సర్వే పూర్తి చేసేందుకు గాను రెండేళ్ల క్రితమే రూ.6 కోట్లు రైల్వే శాఖకు అందించగా సర్వే కూడా పూర్తయింది. రెండేళ్ల క్రితం కేవలం రూ.337.5 కోట్ల మేరకు అంచనా వేసినప్పటికీ జాప్యం కారణంగా సుమారు రూ.900 కోట్ల మేర వ్యయానికి చేరుకుందని అధికారులు అంచనా వేస్తున్నారు. 
  పెండింగ్‌లోనే ప్రాజెక్టులు..
 భద్రాచలం పుణ్యక్షేత్రానికి రైలుమార్గం నిర్మించేందుకు పాండురంగాపురం నుంచి సారపాక వరకు ఏర్పాటు చేయతలపెట్టిన లైన్ కేవలం కాగితాలకే పరిమితమైంది. సింగరేణి సంస్థ ఏర్పాటు చేయనున్న కోల్ కారిడార్‌లో భాగంగా మణుగూరు-రామగుండం లైన్, సత్తుపల్లి లైన్ పూర్తయితే దానిని అనుసంధానం చేసుకుని కొండపల్లి నుంచి కొత్తగూడెం వరకు రైల్వే లైన్‌ను నిర్మించే అవకాశాలున్నాయి. గురువారం కేంద్ర ప్రభుత్వం రైల్వే బడ్జెట్ ప్రవేశపెట్టనున్న నేపథ్యంలో కొత్తగూడెం-కొవ్వూరు, కొత్తగూడెం-సత్తుపల్లి, పాండురంగాపురం-సారపాక, మణుగూరు-రామగుండం రైల్వే లైన్ల నిర్మాణాలకు నిధులు కేటాయిస్తారా? లేదా? అని ప్రజలు ఎదురు చూస్తున్నారు.


 రైళ్ల కేటాయింపులో గుంతకల్లు డివిజన్‌కు ప్రతియేటా అన్యాయం
 ఈ సారైనా సీమ ఎంపీల
 ప్రయత్నాలు ఫలించేనా?
 నేడు రైల్వేబడ్జెట్
    
 గుంతకల్లు :ప్రతియేటా రైల్వే బడ్జెట్‌లో గుంతకల్లు డివిజన్‌కు అన్యాయం జరుగుతోంది. దక్షిణ మధ్య రైల్వే పరిధిలో గుంతకల్లు డివిజన్‌కు ఆదాయపరంగా అత్యంత ప్రాధాన్యత ఉంది. అయినా రైళ్ల కేటాయింపు, పొడిగింపు, ప్రాజెక్టుల విషయంలో తగిన ప్రాధాన్యత ఇవ్వడంలేదు.రెండు దశాబ్దాలుగా రైలే ్వ మంత్రులుగా పనిచేసిన వారందరూ తమ రాష్ట్రాలకు, ప్రాంతాలకు రైళ్లను, ప్రాజెక్టులను కేటాయించుకోవడంలో సఫలీకృతులయ్యారు. డివిజన్‌కు న్యాయం జరిగేలా కేంద్రంపై ఒత్తిడి తేవడంలో రాయలసీమ ప్రజాప్రతినిధులు  పూర్తిగా విఫలమయ్యారన్న విమర్శలున్నాయి.
 
 నేడు రైల్వే బడ్జెట్
 నిధులను రాబట్టడంలో రాయలసీమ ప్రాంత ఎంపీలు చొరవ ఏమాత్రమూ లేదన్న ఆరోపణలున్నాయి. అనంతపురం, కర్నూలు జిల్లాలను దృష్టిలో ఉంచుకుని నాటి రైల్వే సహాయ మంత్రి కోట్ల సూర్యప్రకాష్‌రెడ్డి కర్నూలులో రైలుబోగీల మరమ్మతు కర్మాగారాన్ని రూ.110 కోట్లతో మంజూరు చేయించారు. ఈ ప్రాజెక్టుకు సంబంధించి అప్పటి ఉమ్మడి రాష్ట్ర ప్రభుత్వం భూసేకరణను పూర్తి చేసి రైల్వే శాఖకు అప్పగించింది. ఈ బడ్జెట్‌లోనైనా ఈ ప్రాజెక్టుకు నిధులు కేటాయిస్తే యువతకు ఉపాధి అవకాశాలు లభిస్తాయి. ఈ నేపథ్యంలో గురువారం పార్లమెంటులో రైల్వే శాఖా మంత్రి సురేష్ ప్రభు ప్రవేశపెడుతున్న రైల్వే బడ్జెట్‌లో సీమకు ప్రాధాన్యం ఇవ్వాలని ఎంపీలు ఢిల్లీలో గట్టిగా కోరుతున్నారు.
 
  బోర్డులో నలుగుతున్న ప్రతిపాదనలివీ..
 ►పుట్టపర్తి - షిర్డీ మధ్య నూతన ఎక్స్‌ప్రెస్ రైలు  
 ►హైదరాబాద్ - పుట్టపర్తి (వయా గుంతకల్లు, ధర్మవరం ) నూతన ఇంటర్‌సిటీ ఎక్స్‌ప్రెస్ రైలు  
 ►కడప - షిరిడీ మధ్య నూతన ఎక్స్‌ప్రెస్ రైలు
 ►అమరావతి రాజధాని దృష్ట్యా ధర్మవరం-గుంతకల్లు-విజయవాడ మార్గంలో మరో రెండు ఎక్స్‌ప్రెస్, రెండు ప్యాసింజర్ ైరె ళ్లు
 ►అనంతపురం-విశాఖపట్నం, గుంతకల్లు-ధర్మవరం-తిరుపతి మధ్య ఎక్స్‌ప్రెస్ రైలు
 ►గుంతకల్లు-హైదరాబాద్ మధ్య పగటి పూట ఎక్స్‌ప్రెస్ రైలు
 
 రైళ్ల పొడిగింపు ప్రతిపాదనలు
 సికింద్రాబాద్ - కర్నూలు మధ్య నడుస్తున్న తుంగభద్ర ఎక్స్‌ప్రెస్‌ను గుంతకల్లు లేదా మంత్రాలయం నిలయం వరకు  పొడిగింపు
 కాచిగూడ - గుంటూరు - కాచిగూడ ప్యాసింజర్‌ను ఫాస్ట్ ప్యాసింజర్‌గా మార్పు
 
 అత్యంత కీలకమైన డబ్లింగ్ మార్గాల ప్రతిపాదన
 గుంతకల్లు డివిజన్‌లోని డోన్-పెండేకల్లు, కల్లూరు-ధర్మవరం అత్యవసర డబ్లింగ్ మార్గాలు. ఈ మార్గాల గుండా రైళ్ల రద్దీ అధికం. ఈ పనులు పూర్తి చేస్తే రైళ్ల క్రాసింగ్ సమస్య తీరుతుంది.నత్తనడకన డబ్లింగ్ పనులుగుంతకల్లు-కల్లూరు వయా గూళ్యపాళ్యం, కల్లూరు-ధర్మవరం మధ్య డబ్లింగ్ పనులకు రూ.50 కోట్లు కేటాయించారు. ఈ పనులు నత్తనడకన సాగుతున్నాయి.గుంటూరు-గుంతకల్లు డబుల్‌లైన్ పనులకు రూ.1,400 కోట్లు అవసరమని రైల్వేబోర్డు నివేదికలు తయారు చేసింది. ఈ నిధుల్లో రాష్ట్ర ప్రభుత్వం సగం భరించాల్సి ఉంది.
 
 ►ధర్మవరం-పాకాల మధ్య డబ్లింగ్ పనులకు రూ.10 కోట్లు కేటాయించినా సర్వేలో జాప్యం .
 ►హోస్పేట-గుంతకల్లు మధ్య డబ్లింగ్ పనులు నిధుల లేమితో నత్తనడకన సాగుతున్నాయి.
 ►రేణిగుంట-తిరుపతి మధ్య డబ్లింగ్ పనులకు రూ.1.10 కోట్లు కేటాయించారు.
 ► రాయచూర్-గుంతకల్లు మార్గంలో పెండింగ్‌లో ఉన్న 13 కి.మీల డబ్లింగ్ పనులకు రూ.6 కోట్లు కేటాయించారు.
  


 జిల్లాలో కలగానే  రైల్వే సేవలుఅసంపూర్తిగా పెద్దపల్లి-నిజామాబాద్ రైల్వేలైన్
 సర్వేలకే పరిమితమైనకొత్తలైన్ల నిర్మాణం
 ఎంపీల ప్రతిపాదనలకుమోక్షం కలిగేనా?
 నేడు రైల్వే బడ్జెట్
  
 రైల్వేపరంగా జిల్లా వెనుకబాటు వీడడం లేదు. ఏళ్లు గడుస్తున్నా జిల్లా ప్రజలకు పూర్తిస్థాయి రైల్వే సేవలు కలగానే మిగిలాయి. ఏటా రైల్వే బడ్జెట్ ప్రవేశపెట్టే సమయంలో గంపెడాశలు పెట్టుకోవడం, తీరా జిల్లాకు సంబంధించిన అంశాలు లేకపోవడంతో నిరాశ చెందడం రివాజుగా మారింది. అప్పుడప్పుడు అరకొరగా నిధులు విదిల్చుతున్నా, ఏ మూలకు సరిపోవడం లేదు. నాలుగు దశాబ్దాలు గడుస్తున్నా పెద్దపల్లి-నిజామాబాద్ రైల్వేలైను పూర్తికాకుండా వెక్కిరిస్తోంది. కొత్తగా ప్రతిపాదించిన కొత్తపల్లి-మనోహరబాద్ రైల్వే లైను కాగితాలు దాటడం లేదు. కరీంనగర్ -హుస్నాబాద్- హైదరాబాద్ ప్రతిపాదనైతే కనీసం కాగితాలకు కూడా ఎక్కలేదు. గురువారం రైల్వేశాఖ మంత్రి సురేశ్‌ప్రభు రైల్వే బడ్జెట్ ప్రవేశపెడుతుండగా, ఈ బడ్జెట్‌లోనైనా ప్రభు కనికరం చూపుతారేమోనని ప్రజలు ఆసక్తిగా ఎదురుచూస్తున్నారు.
                                            
 పెద్దపల్లి-కరీంనగర్-నిజామాబాద్ రైల్వే లైన్ పాలకుల నిర్లక్ష్యానికి నిలువెత్తు నిదర్శనంగా నిలుస్తోంది. ఎప్పుడో మూడు దశాబ్దాల క్రితం ప్రారంభమైన ఈ లైను ఇంకా కొనసాగుతూనే ఉంది. శ్రద్ధ చూపి సరిపడా నిధులు కేటాయిస్తే సంవత్సరాల క్రితమే పూర్తయ్యేది. 178 కిలోమీటర్ల దూరం కాగా, చచ్చీచెడీ 150 కిలోమీటర్లు పూర్తి చేయగలిగారు. పాలకుల అలక్ష్యం ఫలితంగా ఇంకా 28 కిలోమీటర్ల మేర దూరం మిగిలే ఉంది. ఇది కూడా పూర్తి చేస్తే కరీంనగర్, నిజామాబాద్ జిల్లాలకు లింక్ ఏర్పడుతుంది. గత బడ్జెట్‌లో ఈ రైలుమార్గానికి కేంద్రప్రభుత్వం రూ.141 కోట్లు మాత్రమే కేటాయించింది. ఈ బడ్జెట్‌లో రూ.100 కోట్లు కేటాయిస్తే వచ్చే సెప్టెంబర్ కల్లా కరీంనగర్-నిజామాబాద్ నడుమ రైళ్లు తిరుగుతాయని అధికారవర్గాలు పేర్కొంటున్నాయి.
 
 కాగితాలు దాటని కొత్తపల్లి-మనోహరాబాద్
 అప్పటి కరీంనగర్ ఎంపీ, ప్రస్తుత సీఎం కేసీఆర్ కరీంనగర్ జిల్లా కేంద్రం నుంచి హైదరాబాద్‌కు వెళ్లేలా 2004లో ప్రతిపాదించిన కొత్తపల్లి-మనోహరాబాద్ రైలు మార్గం కాగితాలను దాటడం లేదు. ఎంపీ వినోద్‌కుమార్ చొరవతో రాష్ట్ర ప్రభుత్వ విజ్ఞప్తి మేరకు కాస్త కదిలిన కేంద్ర ప్రభుత్వం భూసేకరణ, ఐదేళ్లపాటు నిర్వహణ వ్యయాన్ని రాష్ట్ర ప్రభుత్వమే భరించాలంటూ షరతు విధించింది. రూ.వెయ్యి కోట్ల వ్యయంతో పూర్తయ్యే ఈ మార్గానికి ఇప్పటివరకు మంజూరైన రూ.20 కోట్లతో సీఈ కార్యాలయం, మానవ వనరుల లభ్యత తదితర మౌలిక వసతులకు ఖర్చుచేయాలని ఆదేశాలున్నా, ఇప్పటివరకు ఆ దిశగా ఎలాంటి చర్యలు కనిపించడం లేదు.
 
  మంత్రులైనా ఆగాల్సిందే...
 ఉప్పల్, బిజిగిరి షరీఫ్ వద్ద ఫ్లైఓవర్ బ్రిడ్జిలు లేకపోవడంతో ప్రయాణికులు తీవ్ర ఇబ్బందులు ఎదుర్కొంటున్నారు. ఎంపీల ప్రతిపాదనల మేరకు గత బడ్జెట్‌లో ఉప్పల్ వంతెనకు రూ.53.64 కోట్లు, బిజిగిరి షరీఫ్‌కు రూ.50.01 కోట్లు కేటాయించినప్పటికీ పనులు ప్రారంభానికి నోచుకోలేదు. దీంతో రైలు వ స్తుందంటే చాలు హుజూరాబాద్-జమ్మికుంట మార్గంలోని ఉప్పల్ గేటు వద్ద గంటలకొద్ది ప్రయాణికులు పడిగాపులు పడాల్సిన దుస్థితి. చివరకు మంత్రులకు సైతం ఇదే పరిస్థితి ఎన్నోసార్లు ఏర్పడుతోంది. కరీంనగర్ రైల్వేస్టేషన్ సమీపంలోని కరీంనగర్-రాయపట్నం రహదారిలో సైతం ఇదే పరిస్ధితి. ఫ్లైఓవర్ బ్రిడ్జీల నిర్మాణానికి ఇంకా అవసరమైన నిధులు కేటాయించడంతోపాటు పనులు త్వరగా పూర్తి చేస్తే తప్ప ఈ బాధ నుంచి ఆ ప్రాంత ప్రజలు విముక్తికారు.
 
  సా...గుతున్న పనులు
 నిధులుండి కొన్ని, సరిపడా నిధులు రాక మరికొన్ని ప్రతిపాదిత రైల్వే పనులు సా...గుతున్నాయి.
 పెద్దంపేట-మంచిర్యాల మూడో లైను మార్గం కోసం రూ.58 కోట్లు కేటాయించగా పనులు ఇంకా పూర్తి కాలేదు.
 రాఘవాపూర్-మందమర్రి మూడో మార్గం కోసం రూ.24.90 కోట్లు మంజూరు చేయగా పనులు నడుస్తున్నాయి.
 రామగుండం-మణుగూరు లైన్ సర్వేకు రూ.50 లక్షలు, కరీంనగర్-హసన్‌పర్తి లైన్ సర్వేకు రూ.14.73 లక్షలు కేటాయించినా సర్వే మొదలు కాలేదు.
 
 మణుగూరు-భూపాల్‌పల్లి-కమాన్‌పూర్, రామగుండం కోల్ కారిడార్ రైల్వేనిర్మాణం సర్వే కోసం గత బడ్జెట్‌లో రూ.50 లక్షలు కేటాయించగా పనులు ప్రారంభించలేదు. రూ.1500 కోట్లు నిర్మాణ వ్యయమయ్యే ఈ లైన్‌కు అటవీ, పర్యావరణ శాఖ అనుమతులు కావాల్సి ఉండడంతో రైల్వేశాఖ ముందుకురావడం లేదని సమాచారం.
 
 కరీంనగర్-తిరుపతి రైలును ప్రతీరోజు నడిపించాలనే డిమాండ్ ఆచరణకు నోచుకోవడం లేదు.
 రామగుండం, పెద్దపల్లి స్టేషన్లలో చెన్నై-ఢిల్లీ గరీబ్థ్నవజీవన్, జైపూర్, స్వర్ణజయం తి ఎక్స్‌ప్రెస్ రైళ్లను నిలపడం లేదు. రామగుండం-పెద్దపల్లి, కరీంనగర్-జగిత్యాల లైన్‌లో ప్యాసింజర్ రైళ్లు నడిపించాలనే ఎంపీ ల విజ్ఞప్తిని కేంద్రం పట్టించుకోవడం లేదు.
  
  ఎంపీల ప్రతిపాదనలకు మోక్షం లభించేనా?
   
 జిల్లాలో రైల్వే సేవల విస్తృతి కోసం ఎంపీలు ప్రతిపాదనలు చేస్తున్నా, అవి అమలుకు నోచుకోడం లేదు. పలుమార్లు కేంద్ర రైల్వే శాఖ మంత్రిని కలిసి విన్నవిస్తున్నా, కేంద్ర సర్కారు కనికరించడం లేదు. ఒకటీ అరా ప్రతిపాదనలు అంగీకరిస్తున్నా, అవి కూడా అసంపూర్తిగా మిగిలిపోతున్నాయి. ఈ ఏడాది బడ్జెట్ కోసం కరీంనగర్, పెద్దపల్లి ఎంపీలు బి.వినోద్‌కుమార్, బాల్క సుమన్‌లు ఇప్పటికే ప్రతిపాదనలు అందచేశారు. ఇందులో ఎన్ని ప్రతిపాదనలు గురువారం ప్రవేశపెట్టనున్న బడ్జెట్‌లో అమలుకు నోచుకొంటాయో వేచి చూడాలి.
  
  పెద్దపల్లి ఎంపీ బాల్క సుమన్ ప్రతిపాదనలు
   
 ఇంటర్ ఎక్స్‌ప్రెస్‌లో ఏసీకోచ్ సదుపాయం కల్పించాలి.
 రామగిరి ప్యాసింజర్, భాగ్యనగర్ ఎక్స్‌ప్రెస్, కాగజన్‌నగర్ ఎక్స్‌ప్రెస్, సింగరేణి ఫాస్ట్ ప్యాసింజర్లకు అదనపు కోచ్‌ల సదుపాయం కల్పించాలి.తెలంగాణ ఎక్స్‌ప్రెస్, ఏపీ సంపర్క్ క్రాంతి ఎక్స్‌ప్రెస్, నవజీవన్ ఎక్స్‌ప్రెస్, స్వర్ణజయంతి ఎక్స్‌ప్రెస్, కేర ళ ఎక్స్‌ప్రెస్, ఎస్‌సీ-ఎన్‌జీపీ ఎక్స్‌ప్రెస్, జీటీ ఎక్స్‌ప్రెస్‌లను పెద్దపల్లి రైల్వేస్టేషన్‌లో నిలపాలి.
 
 కరీంనగర్-తిరుపతి రైలును ప్రతిరోజు నడిపేలా చర్యలు తీసుకోవాలి.
 పెద్దపల్లి రైల్వేస్టేషన్ కౌంటర్‌లో 24 గంటల రిజర్వేషన్ సౌకర్యం కల్పించాలి.
 సమ్మక్క సారలమ్మ జాతర సందర్భంగా బల్లార్షా-విజయవాడకు ప్రత్యేక రైళ్లు నడిపించాలి.
 పెద్దపల్లి రైల్వేస్టేషన్‌లో గూడ్స్‌షెడ్‌కు మరమ్మతు చేపట్టాలి. సిమెంట్ ప్లాట్‌ఫాం నిర్మించాలి.
 కూనారం, కొలనూరు రైల్వేక్రాసింగ్‌ల వద్ద ఫ్లైఓవర్‌బ్రిడ్జీలు నిర్మించాలి.
 
 సిర్‌పూర్ కాగజ్‌నగర్ నుంచి సికింద్రాబాద్ వరకు ఇంట్రాసిటీ రైలు ప్రవేశపెట్టాలి. ఉదయం 5.30కు కాగజ్‌నగర్‌లో బయలుదేరి, 9.30కు సికింద్రాబాద్ చేరుకునేలా, సాయంత్రం 5.30కు సికింద్రాబాద్ నుంచి బయలుదేరి రాత్రి 9.30కు కాగజ్‌నగర్ చేరేలా ఈ రైలు నడిపించాలి.
 మానిక్‌గర్ నుంచి సికింద్రాబాద్‌ల నడుమ కొత్త రైలు సర్వీసు ప్రవేశపెట్టాలి.భాగ్యనగర్ ఎక్స్‌ప్రెస్‌లో 16 కోచ్‌ల నుంచి 24 కోచ్‌లకు, కాజీపేట నాగ్‌పూర్ ప్యాసింజర్‌కు 12 నుంచి 20 కోచ్‌లకు పెంచాలి.ప్రయాణికుల రద్దీకి అనుగుణంగా, రోడ్డుమార్గం వైపు మళ్లకుండా, రైల్వేకు ఆదాయం సమకూర్చుకునేందుకు రామగుండం రూట్‌లో సమయానుకూలంగా ప్రత్యేక రైళ్లు నడిపించాలి.
 
 ప్రయాణికులను ఆకర్షించేందుకు సింగరేణి ప్యాసింజర్‌లో పరిశుభ్రత ఉండాలి. మంచి కోచ్‌లు ఏర్పాటు చేయాలి. ఏసీ చైర్ , స్లీపర్ ఏర్పాటుచేయాలి.రామగుండం రైల్వేస్టేషన్‌లో వాహనాల పార్కింగ్ ఏర్పాటు చేయాలి. వృద్ధులు, వికలాంగుల సౌకర్యార్థం స్టేషన్‌లో ఎక్స్‌లేటర్‌లు ఏర్పాటు చేయాలి.అయ్యప్ప భక్తుల సౌలభ్యం కోసం శబరిమలై  వెళ్లేందుకు కరీంనగర్, సిర్‌పూర్ కాగజ్‌నగర్ నుంచి కొల్లంకు రెండు ప్రత్యేక రైళ్లు నడిపించాలి.స్వర్ణజయంతి ఎక్స్‌ప్రెస్, నవజీవన్ ఎక్స్‌ప్రెస్, జైపూర్  మద్రాస్ ఎక్స్‌ప్రెస్, కొంగు ఎక్స్‌ప్రెస్, తమిళనాడు ఎక్స్‌ప్రెస్, దర్భంగా ఎక్స్‌ప్రెస్, మిలీనియం(ఎర్నాకులం) రైళ్లకు రామగుండం స్టేషన్‌లో హాల్టింగ్ ఇవ్వాలి.
 
 కమాన్‌పూర్ మండలం రాణాపూర్‌లో లోలెవల్ క్రాసింగ్ బ్రిడ్జి, కన్నాలలో హైలెవెల్ బ్రిడ్జిలు నిర్మించాలి.కాజీపేట జంక్షన్ నుంచి భూపాల్‌పల్లి, తాడిచర్ల, మంథని మీదుగా రామగుండం వరకు కొత్త రైల్వేలైను నిర్మించాలి.రామగుండం రైల్వేస్టేషన్ నుంచి మంథని, తాడిచర్ల, భూపాలపల్లి, ఏటూరునాగారం, కమలాపూర్ మీదుగా మణుగూరు రైల్వేస్టేషన్ వరకు కొత్త రైల్వేై లెను నిర్మించాలి.
  
 కరీంనగర్ ఎంపీ బి.వినోద్‌కుమార్ ప్రతిపాదనలు
 మనోహరాబాద్-కొత్తపల్లి రైల్వే లైన్ సర్వే పనులు త్వరగా పూర్తి చేయాలి.
 ఆర్మూరు-నిజామాబాద్ మధ్యలో రైల్వేలైను పూర్తిచేయాలి.
 కరీంనగర్ నుంచి ముంబై వరకు ఎక్స్‌ప్రెస్‌ను ప్రారంభించాలి.
 బిజిగిరిషరీఫ్, ఉప్పల్‌రైల్వే ఓవర్‌బ్రిడ్జి డిజైన్ ఆమోదించి, వెంటనే పనులు ప్రారంభించాలి.
 కరీంనగర్-తిరుపతి రైలు సర్వీసును ప్రతిరోజు నడపాలి.
 తిరుపతి ఎక్స్‌ప్రెస్‌ను కరీంనగర్-తిరుపతి ఎక్స్‌ప్రెస్‌గా పేరు మార్చాలి.


 రైల్వే బడ్జెట్‌పై అందరి చూపు
 సబర్బన్ ఏర్పాటైతే ట్రాఫిక్ సమస్యలకు చెక్
  
 బెంగళూరు: ట్రాఫిక్ కష్టాలను తీర్చడంతో పాటు బెంగళూరుకు దగ్గరగా ఉన్న పట్టణాలను కలుపుతూ నిర్మించే సబర్బన్ రైలుకు నేడు కేంద్రం ప్రవేశపెట్టే రైల్వే బడ్జెట్‌లో మోక్షం దక్కక పోతుందా అని నగర ప్రజలతో పాటు ప్రభుత్వం ఆశగా ఎదురు చూస్తోంది. ఒకవేళ అదే జరిగితే దశాబ్ధకాలం నాటి ప్రాజెక్టు పట్టాలెక్కనుంది.   రూ.9వేల కోట్ల వ్యయం కాగల ఈ బృహత్  ప్రాజెక్టును మూడు దశల్లో పూర్తి కానుంది.  బెంగళూరుకు దగ్గరగా ఉన్న ద్వితీయ స్థాయి నగరాలు, పట్టణాల నుంచి నిత్యం ఉద్యోగ, వ్యాపార, ఉపాధి నిమిత్తం 12 లక్షల మంది  రాకపోకలు సాగిస్తున్నట్ల్లు పట్టణాభివద్ధి శాఖ గణాంకాలు చెబుతున్నాయి.  వీరు ప్రధానంగా సొంతవాహనాలు, లేదా బస్సుల ద్వారా బెంగళూరుకు వస్తుంటారు. రానున్న పదేళ్ల్లలో ఇది మరింతగా పెరిగి ట్రాఫిక్ సమస్య రెట్టింపు అవుతుంది.  ఈ సమస్యను పరిష్కరించే దిశగా  బెంగళూరుకు 100 కిలోమీటర్ల పరిధిలోని ఏడు జిల్లా కేంద్రాలను, వాటి మధ్య ఉన్న 23 చిన్నచిన్న నగరాలు, పట్టణాలను కలుపుతూ రైలు వ్యవస్థను ఏర్పాటు చేయనుంది.
 
   ప్రాజెక్టులో భాగంగా మొత్తం 440 కిలోమీటర్ల రైలు మార్గం అందుబాటులోకి వస్తుంది. రూ.3,400 కోట్లు ఖర్చుకాగల మొదటి దశలో బెంగళూరు-చిక్కబళ్లాపుర,దొడ్డబళ్లాపుర, రెండోవిడతలోరూ.2,300 కోట్ల నిధులతో బెంగళూరు-రామనగర,మండ్యా, రూ.1,300 కోట్లు ఖర్చుతో మూడో విడతలో  బెంగళూరు-బంగారుపేట మధ్యలో ఉన్న అన్ని చిన్నచిన్న నగరాలకు రైలు సౌకర్యం కల్పిస్తారు. మెట్రోతో పోలిస్తే ఈ నూతన ప్రాజెక్టుకు అయ్యే ఖర్చు తక్కువ. మెట్రోకు కిలోమీటరుకు  సగటున రూ.300 కోట్లు ఖర్చవుతుంది. నూతన ప్రాజెక్టులో కిలోమీటరుకు అయ్యే ఖర్చు రూ. 18 కోట్లు మాత్రమే.  నూతన ప్రాజెక్టుకు కొత్తగా భూమిని సేకరించాల్సిన అవసరం లేదు.
   ఆధునికత సాంకేతిక పరిజ్ఞానంతో పాటు మానవ వనరులను పెంచితే సరిపోతుంది.
  
  


 ♦ కృష్ణా- వికారాబాద్ రైల్వేలైన్‌పై ఆశ
 ♦ శివార్లకు ఎంఎంటీఎస్ వచ్చేనా?
 ♦ శంషాబాద్‌లో ఎయిర్‌కార్గోకు మోక్షం లభించేనా?
 ♦ నేటి రైల్వేబడ్జెట్‌పై జిల్లావాసుల గంపెడాశ
 
 సాక్షి, రంగారెడ్డి జిల్లా ప్రతినిధి: వికారాబాద్- కృష్ణా బ్రాడ్‌గేజ్ రైల్వేలైన్ కేంద్రం కరుణ కోసం నిరీక్షిస్తోంది. నాలుగేళ్ల క్రితం సర్వే పూర్తిచేసుకున్న ఈ లైను పట్టాలెక్కేందుకు నిధులు విదిల్చకపోతారా? అని ఆశగా చూస్తోంది. 121.70 కిలోమీటర్ల ప్రతిపాదిత  ఈ రైలు మార్గానికి రూ.787.80 కోట్లు అవసరమని రైల్వేశాఖ అంచనా వేసింది. అదేసమయంలో సరుకు రవాణాకు ఈలైను అంతగా ఉపయోగపడదని, ప్రయాణికుల నిష్పత్తి కూడా నిర్ధేశితశాతం నమోదు కావడం అసాధ్యమని తేల్చిచెప్పింది. ఈ నేపథ్యంలో ఆర్థికంగా భారంగా మారే ఈ ప్రాజెక్టును చేపట్టడం సాధ్యపడదని స్పష్టం చేసింది. సగటున 14శాతం రేట్ ఆఫ్ రిటర్న్(ఆర్‌ఓఆర్) ఉన్నవాటికే ప్రాధాన్యమిస్తామని, ఈ మార్గంలో కేవలం 6.9 శాతం మాత్రమే వచ్చే వీలుందని రైల్వే ఇంజినీరింగ్ శాఖ తేల్చిచెప్పింది.
 ఈ ప్రాంత సామాజిక అవసరాల దృష్ట్యా నిర్మాణ వ్యయంలో సగం వాటాను రాష్ర్ట సర్కారు భరిస్తే పరిశీలిస్తామని స్పష్టం చేసింది. ఈ నేపథ్యంలో గత ఉమ్మడి ప్రభుత్వం భూసేకరణ సహా ప్రాజెక్టు వ్యయంలో 50 శాతం వెచ్చించేందుకు ముందుకొచ్చింది. అందులో భూసేకరణకు రూ.3,683 కోట్లను కూడా విడుదల చే సేందుకు అంగీకరించింది. అయినప్పటికీ ఆర్థిక సంక్షోభంలో కూరుకుపోయిన రైల్వేబోర్డు ఈ లైన్ నిర్మాణానికి ఆసక్తి చూపడంలేదు. 2019 నాటికి ఈ మార్గాన్ని అందుబాటులోకి తెస్తామని నాలుగేళ్ల క్రితం అప్పటి ప్రభుత్వం స్పష్టం చేసింది. ఈ నేపథ్యంలో రైల్వేశాఖ మంత్రి సురేశ్‌ప్రభు పార్లమెంటులో ప్రవేశపెట్టే బడ్జెట్‌లో కృష్ణా- వికారాబాద్ రైల్వేలైనుకు పచ్చజెండా ఊపుతారో లేదో వేచి చూడాల్సిందే!
  
 రైల్వేమంత్రి సురేశ్‌‘ప్రభు’ రైలుబండిపై
 జిల్లా ప్రజానీకం గంపెడాశలు పెట్టుకుంది. గురువారం పార్లమెంటులో ప్రవేశపెట్టే రైల్వే బడ్జెట్‌లో ‘రైలు కూత’ వినిపించకపోతుందా అని ఆశగా ఎదురుచూస్తోంది. పెండింగ్ ప్రాజెక్టులకు లైన్‌క్లియర్, కొత్త మార్గాలకు కేంద్ర ప్రభుత్వం గ్రీన్‌సిగ్నల్ ఇస్తుందా? లేదా అనేది మరికొన్ని గంటల్లో తేలనుంది. శంషాబాద్ విమానాశ్రయం ఎయిర్‌కార్గో హబ్‌గా ఇంటర్నేషనల్ ఎయిర్‌పోర్టును అభివృద్ధి చేస్తున్నారు. ఈ క్రమం లో సరుకు రవాణాకు అనువుగా రైల్వేలైన్లను విస్తరించాలని భావించినా.. ఇప్పటికీ అతీగతిలేకుండా పోయింది. ఎయిర్‌పోర్టు నుంచి నేరుగా విజయవాడకు ప్రత్యేక రైల్వేలైన్‌ను నిర్మించాలని గతంలో జీఎంఆర్ సంస్థ ప్రతిపాదించిన ఫైలు అటకెక్కింది.
 వికారాబాద్‌లో ఫుట్ ఓవర్ బ్రిడ్జి(ఎఫ్‌ఓబీ) నిర్మించాలనే ప్రతిపాదన కార్యరూపం దాల్చలేదు. రాజ్‌కోట్, గరీబ్థ్ ్రతదితర ఎక్స్‌ప్రెస్ రైళ్లను ఇక్కడ ఆపాలనే డిమాండ్ ఉంది.ఆదర్శ స్టేషన్ల నిర్మాణంలోనూ రైల్వేశాఖ అంతులేని జాప్యం చేస్తోంది. అరకొర నిధుల కేటాయింపులతో నిర్మాణ పనులను ఏళ్ల తరబడి సాగదీస్తోంది. 2011-12లో ప్రకటించిన పనులు కూడా ఇప్పటికీ పూర్తికాలేదు. వికారాబాద్, శంకర్‌పల్లి, మల్కాజ్‌గిరి, శేరిలింగంపల్లి ఆదర్శ స్టేషన్లు అధికారుల నిర్లక్ష్యానికి ఆదర్శంగా నిలుస్తున్నాయి.
 ఈ రైలుబండి.. రాలేదండీ!
 ఎంఎంటీఎస్ (మల్టీ మోడల్ ట్రాన్సిట్ సిస్టమ్) రైళ్లను శివారు ప్రాంతాలకు పొడగించాలని 2006లో అప్పటి ప్రభుత్వం నిర్ణయించింది. అందుకనుగుణంగా రెండో దశ విస్తరణ పనులకు రూ.324 కోట్లను కేటాయించింది. ఈ నిధుల్లో మూడోవంతు నిధులను రైల్వేశాఖ భరిస్తుండగా, మిగతా నిధులను రాష్ర్టం వ్యయం చేస్తోంది. ఈ నిధులతో శివారు ప్రాంతాలకు వెళ్లే మార్గాల్లో రెండో, మూడు లైన్ ను కొత్తగా వేయాలని ప్రతిపాదించారు. రెండో దశ కింద సికింద్రాబాద్ -మేడ్చల్ (28కి.మీ), ఫలక్‌నుమా -శంషాబాద్ (20కి.మీ), సికింద్రాబాద్- ఘట్‌కేసర్ (19కి.మీ), అలాగే మౌలాలి -సనత్‌నగర్ (21కి.మీ), మౌలాలి -కాచిగూడ(10కి.మీ), తెల్లాపూర్ -పటాన్‌చెరు (8కి.మీ) రూట్‌లలో ఎంఎంటీఎస్‌ను విస్తరించాలని నిర్ణయించింది. ముఖ్యంగా సిగ్నలింగ్, విద్యుద్ధీకరణ, స్టేషన్ల నిర్మాణం చేపట్టాలని నిర్ణయించింది. కొత్త ప్రాంతాలకు ఎంఎంటీఎస్ రైళ్లను పొడగించాలనే ఉద్ధేశంతో విడుదల చేసిన నిధులు మూలుగుతున్నా.. ప్రభుత్వం నిర్లక్ష్యం వీడడంలేదు. ఇప్పటివరకు కనీస భూసేకరణ ప్రక్రియ కూడా పూర్తి చేయలేదు.


 25 రైల్వే బడ్జెట్‌పై డివిజన్ ప్రజల ఆశలు
 నడికూడి-శ్రీకాళహస్తికి రెండో విడత నిధుల కోసం ఎదురుచూపులు
 నూతన రైళ్ల కోసం, డివిజన్‌లో డబ్లింగ్, విద్యుదీకరణకు నిధులు మంజూరయ్యేనా..!
 రాష్ట్రానికి నూతన రాజధాని ఏర్పాటు చేశాక మొదటిసారి కేంద్రప్రభుత్వం రైల్వే బడ్జెట్ ప్రవేశపెట్టనుంది. డివిజన్‌కు కేటాయించే నిధులు, నూతన రైల్వే లైన్లు, కేటాయించే ట్రైన్ల పైనే రాజధాని ప్రాంత అభివృద్ధి ఆధారపడి ఉంది. విభజన చట్టంలో పొందుపరిచిన విధంగా నవ్యాంధ్రప్రదేశ్ పరిధి వరకూ ఏర్పాటు చేసే నూతన రైల్వే జోన్‌పై అనిశ్చితి కొనసాగుతోంది.
 
  
 నగరంపాలెం : నూతన రైల్వేజోన్ కేంద్ర కార్యాలయం రాజధానికి సమీపంలోని గుంటూరు జిల్లాలోనే ఏర్పాటు చేసేలా బడ్జేట్‌లో నిర్ణయం తీసుకోవాల్సి ఉంది. ప్రధానమంత్రి ప్రయార్టీ ప్రాజెక్టు కింద డివిజన్‌లో జరగుతున్న భారీ ప్రాజెక్టు నడికుడి - కాళహస్తి నూతన రైల్వే లైన్ పనులు త్వరగా పూర్తి కావాలంటే  రెండో దశ పనులకు ఈ బడ్జెట్‌లో నిధుల కేటాయింపులు జరగాలి.
 
  రీసర్వే జరిగాలి
 గుంటూరు- నంద్యాల విద్యుదీకరణ పనులు కొనసాగుతున్నందున డబ్లింగ్పనులకు, నల్లపాడు -బీబీనగర్ డబ్లింగ్, విద్యుదీకరణ పనులకు నిధులు మంజూరు చేయాలని ప్రయాణికులు కోరుతున్నారు. మాచర్ల  నుంచి మహబూబ్‌నగర్ మీదుగా రాయచూర్ వరకూ నూతన రైల్వే లైన్‌కు గతంలో సర్వే జరిగి ఆగిపోయింది. దీనికి రీసర్వే చేసి పనులు చేపడితే ముంబయికి దగ్గర మార్గంగా మారుతుంది.
 అన్ని ప్రాంతాల నుంచి.. : నూతన రాజధాని ప్రాంతానికి రైల్వే కనెక్టవీటి కోసం సత్తెనపల్లి పెదకూరపాడు నుంచి హెరిటేజ్ అమరావతి మీదుగా రాజధాని అమరావతిని కలుపుతూ మంగళగిరికి ఒక మార్గం, కృష్ణా జిల్లాలోని కొండపల్లికి ఒక మార్గం ఏర్పాటు చేస్తే రాష్ట్రంలోని అన్ని ప్రాంతాల నుంచి నేరుగా రాజధాని ప్రాంతానికి రావడం వీలవుతుంది.
 
 ప్రయాణికుల రద్దీ మేరకు..: రాజధాని ఏర్పాటుతో డివిజన్‌లో గుంటూరుకు ప్రయాణికుల రద్దీ పెగుతుంది. దీంతో డివిజన్ పరిధిలో సర్కులర్ రైళ్లు, ఎక్స్‌ప్రెస్ రైళ్లు పెంచాల్సిన అవసరం ఉంది. విజయవాడ-మంగళగిరి-గుంటూరు - తెనాలికి, వినుకొండ-గుంటూరు-తెనాలికి ఎక్కువ సర్కులర్ రైళ్లు నడపాల్సిన అవసరం ఉంది. దీనికోసం గుంటూరు రేపల్లే వరకూ డబ్లింగ్ విద్యుదీకరణకు నిధులు మంజూరు చేయాల్సి ఉంది. విజయవాడ నుంచి తెనాలి మీదుగా వెళుతున్న నవజీవన్, టాటా తదితర సూపర్‌ఫాస్ట్ ఎక్స్‌ప్రెస్ రైళ్లను మంగళగిరి మీదుగా న్యూ గుంటూరు స్టేషన్ మీదుగా నడపాలి. గుంటూరు- తిరుపతి, గుంటూరు-చెన్నైకి పగటిపూట ఇంటర్‌సిటి ఎక్స్‌ప్రెస్, గుంటూరు-మైసూరుకు బెంగళూరు మీదుగా ఎక్స్‌ప్రెస్, గుంటూరు- మాచర్ల, వినుకొండ-గుంటూరుకు ఫాస్ట్ ప్యాసింజర్లు, గతంలో తెనాలి- సికింద్రాబాద్‌కు నడిచే నాగార్జున ఎక్స్‌ప్రెస్‌ను పునరుద్ధరించాల్సిన అవసరం ఉంది. వీటితో పాటు మచిలీపట్నం-యశ్వంతపూర్, కాకినాడ-ముంబయి లోకమాన్యతిలక్, నర్సాపూర్-నాగర్‌సోల్ బై వీక్లీ ఎక్స్‌ప్రెస్ రైళ్లు రోజూ నడపాలి.
 
 కోట్ పిట్‌లు పెంచాలి : గుంటూరు స్టేషన్ నుంచి నూతన రైళ్లు నడపాలంటే కోచ్ పిట్‌లు కావాల్సి ఉంది. ప్రస్తుతం గుంటూరు స్టేషన్‌లోని రెండు కోచ్ పిట్లలో ఆరు రైళ్ల వరకూ శుభ్రం చేసే అవకాశం ఉంది. వీటి సంఖ్య పెంచి మరిన్ని రైళ్లకు అందుబాటులోకి తేవాల్సి ఉంది. మాచర్ల, రేపల్లే స్టేషన్లను నూతన రైళ్లు నడిపేలా అభివృద్ధి పర్చాల్సి ఉంది. నిధులు భారీగా అవసరం : డివిజన్ ప్రధాన రైల్వేస్టేషన్ అయిన గుంటూరు రైల్వేస్టేషన్‌ను ఎ-గ్రేడ్ నుంచి ఎ-1 గ్రేడ్ స్థాయికి పెంచేందుకు నిధులు మంజూరుచేయాల్సి ఉంది. డివిజన్‌లో ఉద్యోగుల వైద్య సౌకర్యం కోసం ఏర్పాటు చేసిన రైల్వే హెల్త్ యూనిట్‌ను 25 పడకల ఆస్పత్రిగా అప్‌గ్రేడ్ చేయాలి. ఉద్యోగుల క్వార్టర్ల కోసం నిధులు మంజూరుచేయాల్సి ఉంది.
 
 నూతన రైళ్లు నడపాలి : డివిజన్‌లో నూతన రైళ్లు ఎక్కువుగా కేటాయించాలని సౌత్‌సెంట్రల్ రైల్వే మజ్దూరు యూనియన్ గుంటూరు డివిజను సెక్రటరీ హనుమంతరావు కోరారు. గుంటూరు-తిరుపతి, గుంటూరు-చెన్నైకు పగటిపూట ఎక్స్‌ప్రెస్ రైళ్లు నడపటం వలన నిత్యం 2,000 మంది ప్రయాణించే అవకాశం ఉంటుందని తెలిపారు. గుంటూరు రాజధాని ప్రాంతంగా మారడంతో అద్దెలు పెరిగాయని, ఉద్యోగులు తమ జీతంలో 60 శాతం అద్దెలకే ఖర్చుచేస్తున్నారని చెప్పారు. ప్రస్తుతం గుంటూరులోనే 2000 మంది ఉద్యోగులు పనిచేస్తుండగా 220 క్వార్టర్లు మాత్రమే అందుబాటులో ఉన్నాయన్నారు. గత బడ్జెట్‌లో క్వార్టర్ల మెయింటనెన్స్ నిధులు మంజూరు చేయకపోవడంతో 100 క్వార్టర్ల వరకూ శిథిలావస్థకు చేరుకున్నట్లు తెలిపారు.
  


 సాక్షి ప్రతినిధి, కాకినాడ : దేశానికి స్వాతంత్య్రం వచ్చిన తర్వాత జిల్లాకు కొత్త రైల్వే లైన్ ఏ ఒక్కటీ రాలేదనే భావన ప్రజల్లో వ్యక్తమవుతోంది. జిల్లాలో రైల్వే మార్గం నిడివి కేవలం 135 కిలో మీటర్లే. అందుకే కోటిపల్లి-నర్సాపురం రైల్వే లైన్ సాధనకు కోనసీమ యువత ఉద్యమబాట పట్టారు. కాకినాడ-పిఠాపురం రైల్వే లైన్ కోసం డిమాండ్లు వినిపిస్తున్నాయి. ఏటా రూ.వెయ్యి కోట్ల వరకూ దక్షిణ మధ్య రైల్వేకు ఆదాయాన్ని సమకూర్చుతున్నా రైల్వే బడ్జెట్‌లో జిల్లాకు మొండిచెయ్యి మిగులుతోంది. ఈ ఖర్చులో సగం భరించడానికి రాష్ట్ర ప్రభుత్వం ముందుకు వస్తే ఆయా ప్రాజెక్టులను ముందుగా చేపడతామని రైల్వే శాఖ గతంలోనే ప్రకటించినా ఇప్పటివరకూ ఆ దిశగా అడుగులు ముందుకు పడలేదనే విమర్శలు వ్యక్తమవుతున్నాయి. ఈ సారైనా కలల ప్రాజెక్టులు సాకారం అవుతాయో లేదోనని ఆశతో ప్రజలు ఎదురుచూస్తున్నారు. మరో కొద్ది గంటల్లో ఆ విషయం ఏమిటనేదీ తేలిపోతుంది!
  
  ఉన్న రైళ్లు మరింత సౌకర్యం కావాలంటే...
  జిల్లాలో రాజమండ్రి తర్వాత అంత ప్రాధాన్యం ఉన్న నగరం కాకినాడే అయినా రైలు సౌకర్యంలో వెనుకంజలోనే ఉంది. ఇప్పటికే ప్రయాణికుల రద్దీ ఎక్కువగా ఉండే కొన్ని రైళ్లను కొన్ని మార్పులు చేస్తే మరింత సౌకర్యవంతంగా ఉంటాయని ప్రయాణికులు కోరుతున్నారు. కాకినాడ నుంచి ముంబైకి వెళ్లే లోకమాన్య తిలక్ ఎక్స్‌ప్రెస్‌ను బుధ, శనివారాల్లో మాత్రమే వెళ్తోంది. దీన్ని మంగళ, శుక్రవారాలకు మార్చితే కాకినాడ నుంచి సికింద్రాబాద్‌కు ప్రతిరోజూ అదీ ఉదయం పూట రైలు సౌకర్యం లభిస్తుంది. వారానికి మూడు రోజులు తిరుగుతున్న కాకినాడ-షిర్డీ ఎక్స్‌ప్రెస్‌ను రోజువారీ తిప్పాలనే డిమాండు ఉంది.
  
  కాకినాడ నుంచి సికింద్రాబాద్‌కు వారానికి మూడ్రోజులు తిరుగుతున్న కోకనాడ ఏసీ ఎక్స్‌ప్రెస్‌ను ప్రతిరోజూ తిప్పితే ఉపయోగకరంగా ఉంటుంది. పశ్చిమభారత రాష్ట్రాలకు వెళ్లడానికి కాకినాడ నుంచి వారానికి ఒకరోజు మాత్రమే ఉన్న ఏకైక రైలు భావనగర్ ఎక్స్‌ప్రెస్‌ను  వారంలో రెండు లేదా మూడు సార్లు తిప్పితే జిల్లాలో ఉన్న మార్వాడీలు, పర్యాటకులకు ప్రయాణ వెసులుబాటు లభిస్తుంది. కాకినాడ నుంచి చెన్నైకు వెళ్లే సర్కారు ఎక్స్‌ప్రెస్‌ను పుదుచ్ఛేరి వరకూ పొడిగించాలనే డిమాండు కూడా ఎప్పటినుంచో ఉంది.
  
  అన్నవరంలో గరీబ్థ్,్ర కోణార్క్ ఎక్స్‌ప్రెస్‌లకు కూడా హాల్ట్ కల్పించాలి. కాకినాడ-విశాఖపట్నం, కాకినాడ-విజయవాడ ఫాస్ట్ పాసింజర్ రైళ్లు, శేషాద్రి, సర్కారు ఎక్స్‌ప్రెస్ రైళ్లకు అదనపు బోగీలు వేయాలనే డిమాండు ఉంది. అలాగే కోల్‌కతా, న్యూఢిల్లీ (వయా విశాఖపట్నం, వారణాసి), జోథ్‌పూర్ ప్రాంతాలకు కాకినాడ నుంచి కొత్తగా రైళ్లు వేయాలని దీర్ఘకాలంగా డిమాండు వినిపిస్తోంది. ఇక హాల్ట్‌ల విషయానికొస్తే సామర్లకోట, పిఠాపురం, అనపర్తి, అన్నవరం తదితర ముఖ్య పట్టణాల స్టేషన్లలో కొన్ని ప్రధాన రైళ్లకు హాల్ట్ ఇస్తే రైలు సౌకర్యం మరింత మందికి అందుబాటులోకి వస్తుంది.
  
  సౌత్‌కోస్టల్ రైల్వే జోన్ వస్తే...
  యానాం-ఎదుర్లంక వంతెన పూర్తయ్యిన తర్వాత కోనసీమ స్వరూపమే మారిపోయింది. అలా రైల్వే ప్రాజెక్టుల విషయంలోనూ జరుగుతుంది. ఆంధ్రప్రదేశ్‌కు ప్రత్యేకంగా సౌత్‌కోస్టల్ రైల్వే జోన్ అత్యవసరం. ఈ బడ్జెట్‌లోనైనా ప్రకటించాలనే డిమాండు అన్ని వర్గాల నుంచి ఇప్పటికే రైల్వే శాఖకు వినిపించారు. ఇది సాకారమైతే చాలా పెండింగ్ ప్రాజెక్టులకు మోక్షం లభిస్తుంది. తీర ప్రాంతం వెంబడి పోర్టులను అనుసంధానిస్తూ రైల్వేలైను వేస్తే వాణిజ్య కార్యకలాపాలు ఊపందుకుంటాయి. అలాగే కొవ్వూరు-భద్రాచలం రైల్వే లైను వేస్తే హైదరాబాద్, వరంగల్ వైపు ప్రయాణసమయం తగ్గుతుంది.
  - వైడీ రామారావు, అధ్యక్షుడు, తూర్పుగోదావరి జిల్లా-కోకనాడ ప్రయాణికుల సంఘం
  
  
  గ్రీన్ సిగ్నల్ ఇచ్చినా...
  కోనసీమను కలిపే సుమారు 60 కిలోమీటర్ల కోటిపల్లి-నర్సాపురం రైల్వే లైను ప్రాజెక్టు గత 15 ఏళ్లుగా పెండింగ్‌లోనే ఉంది. రూ.345 కోట్ల అంచనా వ్యయంతో 2002, నవంబరు 16న అప్పటి రైల్వే మంత్రి మమతా బెనర్జీ అమలాపురంలో పునాదిరాయి వేశారు. ముక్తేశ్వరం నుంచి అమలాపురం వరకూ లైన్‌కు దాదాపు 85 ఎకరాల భూమిని రైల్వే శాఖ సేకరించింది. అమలాపురం సమీప భట్నవిల్లిలో రైల్వేస్టేషన్ నిర్మాణానికి 2005లో అప్పటి రైల్వే సహాయ మంత్రి తంగవేలు శంకుస్థాపన చేశారు.
  
   ఇప్పటివరకూ దీనికి కేటాయించింది రూ.70 కోట్లు మాత్రమే. ఈ లైనులో గౌతమి, వైనతేయ, వశిష్ట నదులపై భారీ రైలు వంతెనలు, కాలువలపై 15 పెద్దవి, 150 వరకూ చిన్నచిన్న వంతెనలు నిర్మించాల్సి ఉంది. దీనివల్ల కిలోమీటరుకు రూ.50 కోట్ల చొప్పున ఖర్చు అవుతుందని అంచనా. ఆమోదముద్ర పడి ఆగిపోయిన ప్రాజెక్టుల్లో కాకినాడ-పిఠాపురం లైన్ మరొకటి. ఏటా బడ్జెట్‌లో కొంతమొత్తంలో రైల్వేశాఖ కేటాయిస్తూ వస్తోంది తప్ప పూర్తిస్థాయి కేటాయింపులు లేవు.
  
  ఇప్పుడు దీన్ని పూర్తి చేయాలంటే సుమారు రూ.200 కోట్ల వరకూ నిధులు అవసరం. ఈ లైన్ సాకారమైతే కాకినాడకు హౌరా-చెన్నై రైల్వే మార్గంతో అనుసంధానం ఏర్పడుతుంది. దీన్నే ప్రస్తుతం విస్తరణ జరుగుతున్న 216 నంబరు జాతీయ రహదారికి సమాంతరంగా నిర్మించాలనే సూచనలు వస్తున్నాయి. ఇది మరింత ఉపయోగకరం కావాలంటే ఈలైన్‌ను పిఠాపురం దగ్గర గాకుండా కాకినాడ నుంచి తీరం వెంబడి ఎస్‌ఈజడ్ మీదుగా అన్నవరం వద్ద అనుసంధానం చేయాలనే డిమాండ్ కూడా వినిపిస్తోంది.
  


 సందర్భం
  బ్రిటిష్ ఇండియా 96 ఏళ్ల (1853 -1947) హయాంలో 53 వేల కిలో మీటర్ల రైలుమార్గం నిర్మించారు. 68 ఏళ్ల స్వతంత్ర భారతంలో నిర్మించిన రైలుమార్గం 10 వేల కి.మీ. మన పాలకులు రైల్వే వ్యవస్థ మీద ఎంత నిర్లక్ష్యం వహి స్తున్నారో చెప్పడానికి ఈ ఉదాహ రణ చాలు. ఇక భద్రత, పరిశుభ్రత కూడా అంతంత మాత్రమే. ఈ అంశాల పరిశీలన కోసం అనిల్ కకోద్కర్, శాంపిట్రోడా ఇచ్చిన నివేదికలు కూడా అమలుకు నోచుకోలేదు.
 
  2004-2011 మధ్య రైల్వే ప్రయాణికుల చార్జీలు ఏమీ పెంచకుండా ఆదాయాన్ని గణనీయంగా పెంచుకోగలిగింది. నడికుడి-బీబీనగర్ మధ్య కొత్త రైలుమార్గం మినహా, మరో మార్గమేదీ ఇప్పటికీ అందుబాటులోకి రాలేదు. రెండేళ్ల క్రితం అధికారం చేపట్టిన నరేంద్ర మోదీ ప్రభుత్వం 2014 బడ్జెట్‌లో బులెట్ రైళ్లను ప్రవేశపెడతామని చెప్పింది. తొమ్మిది ప్రధాన మార్గాలలో 160- 200 కి.మీ. వేగంతో రైళ్లను నడిపేందుకు కూడా ఆ బడ్జెట్ ఆమోదించింది. 2015-16 రైల్వే బడ్జెట్ మరీ ప్రత్యేకమైనది. ఒక్క కొత్త రైలును కూడా అది ప్రవేశ పెట్టలేదు. తొమ్మిది హైస్పీడ్, సెమీ హైస్పీడ్ మార్గాలలో ఏ ఒక్క దానికీ పనులు ప్రారంభం కాలేదు. కొన్నిచోట్ల దశాబ్దా లుగా పనులు సాగుతూనే ఉన్నాయి. కొత్త రైలు మార్గాలు అందుబాటులోకి రాకుండా, పారిశ్రామికోత్పత్తులు, వ్యవసా యోత్పత్తులు అధికంగా జరిగే ప్రాంతాలకు విస్తరించకుండా ఆదాయం ఎలా పెరుగుతుంది? 1947 నాటి దేశ జనాభా 35 కోట్లు. నేటి జనాభా 120 కోట్లు పైనే. పెరిగిన 85 కోట్ల జనాభాకు అనుగుణంగా రైల్వేలు విస్తరించలేదు. ప్రాజెక్టు లలో తీవ్ర జాప్యం, అధిక వ్యయం, అవినీతి వంటి వాటితో రైల్వే సతమతమవుతోంది.
  రైలు ప్రయాణం కూడా రోజురోజుకూ భారమవు తోంది. 2014, జూన్ నుంచి ప్రయాణికుల చార్జీలను 14.2 శాతం, సరుకు రవాణా చార్జీలను 6.5 శాతం పెంచారు. అదే సంవత్సరం అక్టోబర్ నుంచి ప్రీమియర్ తత్కాల్ విధానంతో 50 శాతం టికెట్లను అధిక ధరలకు అమ్ముతున్నారు. సంవిధ రైళ్ల పేరుతో 20 శాతం టికెట్ల మీద 50 శాతం ధర పెంచి అమ్ముతున్నారు. అంటే 20 శాతం ప్రయాణికులకు మూడు రెట్ల చార్జీని వసూలు చేస్తూ ఆదాయం పెంచుకుంటున్నారు. ఇది 2015 జూలై నుంచి అమలవుతున్నది. ప్లాట్‌ఫాం టికెట్‌ను కూడా రూ. 5 నుంచి రూ.10లకు పెంచారు. రిజర్వేషన్ వ్యవధిని 120 రోజులు ముందుకు తెచ్చి, రద్దు చార్జీలను భారీగా పెంచారు. ఇలా టికెట్ల రద్దు ద్వారా రూ. 4 వేల కోట్ల ఆదాయం వస్తోంది.
 
  చిత్రంగా ప్రభుత్వాలు కొత్త మార్గాల నిర్మాణం, కొత్త రైళ్లు నడపడం, అదనపు బోగీలను జత చేయడం, కేటరింగ్ సదుపాయాలు వంటి అంశాలను నిర్లక్ష్యం చేస్తూనే, ఈ- కేటరింగ్, వైఫై, వేగవంతంగా రిజర్వేషన్, మొబైల్ యాప్; టెక్నాలజీ వెబ్‌సైట్, బయో టాయ్‌లెట్స్ అంటూ చిన్న చిన్న అంశాలను బడ్జెట్‌లో హైలైట్స్‌గా చూపుతున్నారు. గత దశాబ్ద కాలంలో కాట్రా-ఉదంపూర్ మార్గాన్ని (345 కి.మీ.) 2014 జూలైలో ప్రారంభించడం తప్ప, మరో మార్గమేదీ పూర్తి చేసిన దాఖలాలు లేవు. ఒక్కొక్క రాష్ట్రానికి సంవత్సరా నికి రూ. 1,000 కోట్ల వంతున కేటాయిస్తే ప్రతి రాష్ట్రంలో నాలుగేసి కొత్త మార్గాలు అందుబాటులోకి వస్తాయి. ఇందు కోసం నాలుగేళ్ల కాలంలో రూ.28,000 కోట్ల వంతున కేటా యిస్తే 112 కొత్త మార్గాలు అందుబాటులోకి వస్తాయి. అలాగే వేల కోట్లతో వ్యాపారాలు నిర్వహించే పారిశ్రామిక వేత్తలు కార్పొరేట్ సామాజిక బాధ్యతతో రూ. 500 కోట్లు వెచ్చించి ఒక్కొక్క మార్గాన్ని నిర్మించి జాతికి అంకితం చేయ వచ్చు. అలాగే ఎంపీ ల్యాడ్స్ నిధుల నుంచి కొత్త మార్గాల నిర్మాణానికి నిధులు కేటాయించవచ్చు. అలాగే గ్రీన్ స్టేషన్లు, మోడల్ స్టేషన్లు, గ్రానైట్ స్టేషన్ల పేరుతో ప్రజాధనాన్ని దుర్వినియోగం చేయడం ఆపాలి.
 
  తెలంగాణ దుస్థితి
  నిజాం పాలన తరువాత 1966లో సికింద్రాబాద్ కేంద్రంగా దక్షిణ మధ్య రైల్వేను ఏర్పాటు చేశారు. అప్పటి నుంచి నడికుడి నుంచి సికింద్రాబాద్ శివార్లలోని బీబీనగర్ మధ్య 163 కి.మీ. మార్గాన్ని నిర్మించడం మినహా మరో మార్గమేదీ తెలంగాణ ప్రజలకు అందుబాటులోకి రాలేదు. పెద్దపల్లి- కరీంనగర్-నిజామాబాద్ మధ్య 177 కి.మీ. మార్గానికి 1994లో నాటి ప్రధాని పీవీ నరసింహారావు అనుమతిం చారు. ఇందులో పెద్దపల్లి-కరీంనగర్ మార్గం నిర్మాణం 2001 నాటికే పూర్తయింది. కానీ కరీంనగర్-నిజామాబాద్ మార్గం పనులు నేటికీ పూర్తి కాలేదు. భద్రాచలం -కొవ్వూరు మధ్య కొత్త మార్గం నిర్మాణ  ప్రతిపాదనకు స్వాతంత్య్రం వచ్చిన నాటి నుంచి మోక్షం లభించలేదు. 2010లో అను మతి లభించినా ఇంతవరకు నిర్మాణం ఆరంభం కాలేదు. మణుగూరు-రామగుండం, అక్కన్నపేట-మెదక్-మేడ్చల్, కొండపల్లి-కొత్తగూడెం, గద్వాల్-మాచర్ల మార్గాల నిర్మా ణానికి ఆంధ్రప్రదేశ్ విభజనకు ముందే ఒప్పందం జరిగింది. 50:50 ఖర్చు భరించేందుకు అంగీకారం కుదిరింది. అయినా నిర్మాణం ఆరంభం కాలేదు. వీటిని 2010-11 బడ్జెట్‌లో ఆమోదించారు. 2011-12 బడ్జెట్‌లో అక్కన్నపేట-మెదక్, భద్రాచలం- కొవ్వూరుల ప్రస్తావన ఉంది.  
 
  మహబూబ్‌నగర్-గుత్తి, సికింద్రాబాద్-మద్కేడ్- ఆది లాబాద్ మార్గాలలో రెండవ మార్గం నిర్మాణానికి ఆమోదం లభించింది. మనోహరాబాద్-కొత్తపల్లి మార్గానికి ఆమోదం లభించినా కేటాయింపులు లేవు. కరీంనగర్- నిజామాబాద్ మార్గం పూర్తయితే ఖమ్మం, వరంగల్, కరీంనగర్, ఆదిలా బాద్, నిజామాబాద్ జిల్లాలకు ప్రయోజనం కలుగుతుంది. చెన్నై, ముంబై, తిరుపతి వెళ్లేవారికి సౌకర్యం పెరుగుతుంది. భద్రాచలం-కొవ్వూరు మార్గం పూర్తయితే ఈ ప్రాంత ప్రజలు బెంగాల్ వైపు నేరుగా రాక పోకలు సాగించవచ్చు.  
 
  సికింద్రాబాద్ దక్షిణ మధ్య రైల్వేకు కేంద్రమే కాదు, పెద్ద కూడలి. నిత్యం 130 రైళ్లు రాకపోకలు సాగిస్తాయి. కానీ పది ప్లాట్‌ఫారమ్‌లు మాత్రమే ఉండడం వల్ల కొన్ని రైళ్లు గంటల తరబడి స్టేషన్ బయట వేచి ఉండవలసిన పరిస్థితి నెలకొంది. కానీ ఈ ప్లాట్‌ఫారాల సంఖ్య పెంచే సూచన ఏదీ లేదు. దీనితో నిత్యం గంటల తరబడి నిరీక్షణ తప్పడం లేదు. హైదరాబాద్, కాచిగూడ స్టేషన్లలో ప్లాట్‌ఫారాల సంఖ్య పెంచి కొన్ని రైళ్లను నేరుగా అక్కడకు పంపడం వల్ల సికింద్రాబాద్‌కు ఒత్తిడి తగ్గుతుంది. చర్లపల్లిని టెర్మినల్‌గా పెట్టాలని భావిస్తున్నా, అది సమస్యను పరిష్కరించేది కాదు.  అన్ని ప్రధాన స్టేషన్లలో లిఫ్ట్ సౌకర్యం, మెడికల్ షాపుల ఏర్పాటు, పరిశుభ్రమైన ఆహారం అందుబాటులోకి తేవాలి. 50:50 ప్రాతిపదికన ప్రాజెక్టుల పూర్తికి కృషి చేయాలి.
 
  (రైల్వే బడ్జెట్ ప్రవేశపెడుతున్న సందర్భంగా)
  వ్యాసకర్త సోషల్ అవేర్‌నెస్ కాంపెయిన్ సభ్యురాలు ఎం. రోజాలక్ష్మి
  మొబైల్: 94410 48958
  
  


 రైల్వే బడ్జెట్‌ను గురువారం ప్రవేశపెడుతున్నారు. ఏటా బడ్జెట్లో ఎలాంటి ప్రయోజనాలు పొందని ఈ జిల్లావాసులు మరోసారి ఆశగా నిరీక్షిస్తున్నారు. ఈసారైనా రైల్వే మంత్రి సురేష్ ప్రభు తమ ఆకాంక్షలను నెరవేరుస్తారేమోనని ఎదురుచూస్తున్నారు. ఉత్తర దక్షిణాది రాష్ట్రాలకు వారధిగా నిలుస్తున్న శ్రీకాకుళం జిల్లాను ముక్కలు చేసి రేల్వేశాఖ విభజించి పాలిస్తోంది. బ్రిటీష్‌కాలం నాటి రైల్వే లైన్లే కొనసాగుతూ భద్రత తీరును ప్రశ్నిస్తున్నాయి. పగలూ రాత్రి విరామం లేకుండా ఎక్స్‌ప్రెస్‌లు సూపర్‌ఫాస్టుగా పరుగులు తీస్తున్నా ఆగేవి కొన్ని మాత్రమే. దీంతో ప్రయాణికులది ప్రేక్షక పాత్రే. దేశంలోని ఏ ప్రధాన నగరానికి వెళ్లాలన్నా కష్టపడి విశాఖ చేరుకోవల్సిందే. ఆఖరుకు తిరుపతి వెళ్లాలన్నా విశాఖ చూడాల్సిందే. తమ ప్రాంతానికి పొడిగించారని సంబరపడితే విశాఖ ఎక్స్‌ప్రెస్‌ను భువనేశ్వర్ వరకూ తీసుకుపోయి ఆశలపై నీళ్లు చల్లారు.
  
  శ్రీకాకుళం టౌన్:
  రైల్వే బడ్జెట్‌పై జిల్లా కోటి ఆశలను పెట్టుకుంది. ఈసారైనా తమపై రైల్వే మంత్రి కరుణ చూపుతారని ఆశపడుతోంది. చాలాకాలంగా నెరవేరకుండా పోతున్న డిమాండ్లను తీరుస్తారని ఆకాంక్షిస్తోంది. శ్రీకాకుళం పేరుతో ఉన్న ఆమదాలవలస రేల్వేస్టేషన్ మీదుగా ప్రయాణిస్తున్న 22రైళ్లకు ఇక్కడ హాల్ట్ లేదు. విశాఖ ఎక్స్‌ప్రెస్‌ను అతికష్టం మీద పలాసవరకు పొడిగించారు.. కాని ఈ ఆనందం మిగలకుండా భువనేశ్వర్ వరకు పొడిగించారు. గోదావరి ఎక్స్‌ప్రెస్ శ్రీకాకుళం వరకు పొడిగించాలనే దీర్ఘకాలిక కోరిక తీరడం లేదు. యశ్వంతపూర్,తిరుచ్చి వంటి రైళ్లకు ఇక్కడ హాల్ట్ లేకుండా చేశారు. ఆధునీకీకరణ నిధుల మంజూరు అరకొరే. శ్రీకాకుళం రేల్వేస్టేషన్లో వికలాంగులు, హృద్రోగులు రెలైక్కాలంటే అవస్థలే. ర్యాంపుల నిర్మాణం కలగానే మిగులుతోంద. పలాస నుంచి ప్రపంచ వాణిజ్య మార్కెట్‌లో గిరాకీ ఉన్న జీడిపప్పు రవాణా అవుతోంది. అయినా అదనపు ప్లాట్‌ఫారాల డిమాండ్ నెరవేరడం లేదు. లైన్‌పై ఒక రైలు
  
  పట్టాలెక్కని హామీలు
  ఆమదాలవలస: శ్రీకాకుళం రోడ్ (ఆమదాలవలస) రైల్వేస్టేషన్ జిల్లాలోనే పెద్దది. జిల్లా కేంద్రానికి కూతవేటు దూరంలో ఉంది. ప్రయాణికుల తాకిడి ఎక్కువ. ఆదాయం ప్రతినెల రూ.1.60 కోట్లు వస్తున్నట్టు రైల్వేశాఖ గణాంకాలు చెబుతున్నాయి. ఇంత పెద్దమొత్తం లో ఆదాయం వస్తున్నా సౌకర్యాలు మృగ్యమే. నిత్యం ప్రయాణికులకు కష్టాలు తప్పడం లేదు.  స్టేషన్‌లో నాలుగు ఫ్లాట్‌ఫాంలు ఉన్నాయి. ఒకటో నంబర్ ప్లాట్‌ఫాంకు పూర్తిగా పైకప్పు లేదు. మిగతా మూడు ప్లాట్‌ఫాంలకు సగభాగం మాత్రమే పైకప్పు ఉంది. ప్రయాణీకులకు ఎండ, వాన కష్టాలు ఎదురవుతూనే ఉన్నాయి.
  
  ఫ్లాట్‌ఫాంలపై ఉన్న తాగునీటి కుళాయిలు, మరుగుదొడ్ల నిర్వహణ అధికారులు తనిఖీలకు వచ్చినప్పుడు మాత్రమే సక్రమంగా నిర్వహిస్తారు. ఆ తరువాత ఆ సేవలు ప్రయాణుకులకు అందని ద్రాక్షగానే ఉంటున్నాయి. రైల్వేస్టేషన్‌ను మోడల్ రైల్వే స్టేషన్‌గా తీర్చి దిద్దుతానని  ఎంపీ కింజరావు రామ్మోహన్‌నాయుడు పలుమార్లు స్టేషన్‌లో నిర్వహించిన పలు కార్యక్రమాల్లో పాల్గొని హామీ ఇచ్చారు. అధికారం చేపట్టి రెండేళ్లు కావస్తున్నా హామీలు కార్యరూపం దాల్చలేదు.
  
  విశాఖ పట్టణానికి అతి సమీపంలో ఉన్నప్పటికీ ఈ స్టేషన్ భువనేశ్వర్ జోన్‌లో ఉండడం వల్లే స్టేషన్ అభివృద్ధి మసకబారుతోందని స్థానిక రైల్వే అధికారులే బహిరంగంగా విమర్శిస్తున్నారు. స్టేషన్‌లో అటు విశాఖపట్టణం వైపు, ఇటు పలాస వైపు వెళ్లే ఎక్స్‌ప్రెస్ రైళ్లు 29 (వీక్లీలతోపాటు), నాలుగు పాసింజర్‌లు నిలుపుదల చేస్తారు. మరో 13 రైళ్లకు ఇప్పటికీ హాల్ట్‌లేదు. దీంతో అటు విజయనగరం, ఇటు భువనేశ్వర్ వెళ్లి రైళ్లను ఎక్కాల్సిన దుస్థితి నెలకొంది.
  
  స్టేషన్‌లో ఆగని రైళ్లు వివరాలు....
  భువనేశ్వర్-రామేశ్వరం, విశాఖపట్టణం-డిగా, చెన్నయ్-న్యూజయపూర్, మైసూర్-హౌరా, చెన్నయ్-హల్దియా, విల్లిపురం-పురీలియా, విల్లిపురం-ఖరగ్‌పూర్, ఎర్నాకులం-హౌరా, యశ్వంత్‌పూర్-భగల్‌పూర్, పూనే-భువనేశ్వర్, తిరుచునాపల్లి-హౌరా, ఇగ్మోర్- గౌహతి సూపర్‌ఫాస్ట్ ఎక్స్‌ప్రెస్‌లు నిలుపుదల చేయడం లేదు.
  
  టెక్కలి: డివిజన్ కేంద్రమైన టెక్కలికి సుమా రు 5 కిలోమీటర్ల దూరంలోని నౌపడ రైల్వే స్టేషన్‌ను పట్టించుకునే నాథుడే కరువయ్యా డు. గ్రానైట్ పరిశ్రమకు ప్రాధాన్యం ఉన్న ఈ ప్రాంతానికి వివిధ రాష్ట్రాల నుంచి వ్యాపారు ల రాకపోకలు పెరుగుతున్నా రైల్వే అధికారు లు మాత్రం స్టేషన్‌పై నిర్లక్ష్యం చూపుతున్నారు. నౌపడ రైల్వే స్టేషన్‌లో ఫలక్‌నుమా, కోణార్క్, హౌరా-యశ్వంత్‌పూర్ ఎక్స్‌ప్రెస్ రైళ్లకు హాల్ట్ సదుపాయం కల్పించాలని పలుమార్లు కేంద్రమంత్రి స్థాయి పాలకులకు విన్నవించినా ఫలితం శూన్యమే.
  
  ఇక్కడ సాధారణ రిజర్వేషన్, తత్కాల్ రిజర్వేషన్లకు ప్రత్యేక కౌంటర్లు లేకపోవడం సమస్యగా మారింది. కోటబొమ్మాళి మండలం హరిశ్చంద్రపురం రైల్వే స్టేషన్‌లో సమస్యల కూత వినిపిస్తోంది.  స్టేషన్‌లో ప్రయాణికులకు అవసరమైన విశ్రాంతి షెడ్లు లేవు.విశాఖ-గుణుపూర్ ప్యాసింజర్ రైలుతో పాటు ఇంటర్ సిటీ ఎక్స్‌ప్రెస్ రైళ్లకు ఈ స్టేషన్‌లో హాల్టింగ్ కల్పించాలని పలుమార్లు విన్నవించినా ఫలితం లేదు. మరుగుదొడ్లు, మంచినీటి కొరత ప్రయాణికులను వెంటాడుతున్నాయి.


 పట్టాలు తప్పుతాయా ? దూసుకెళ్తాయా?
 న్యూఢిల్లీ: వనరులు పరిమితంగానూ, ఆకాంక్షలు ఆకాశంలో ఉన్న పరిస్థితుల్లో రైల్వే బడ్జెట్ ఎలా ఉండబోతోందోనని సర్వత్రా ఉత్కంఠ నెలకొంది.  తన రెండో బడ్జెట్‌లో సురేశ్ ప్రభు మెరుపులు మెరిపిస్తారా? అరకొర చర్యలతోనే సరిపెడతారా? అని అందరూ ఎదురు చూస్తున్నారు.  రైల్వేల ఆదాయం ఆశించిన స్థాయిలో లేకపోవడం, వ్యయాలు మాత్రం అంచనాలనుమించి పోయిన నేపథ్యంలో  తన రెండో రైల్వే బడ్జెట్‌లో ప్రయాణికుల, రవాణా చార్జీలు పెంచాలా వద్దా అనే సందిగ్ధతలో రైల్వే శాఖమంత్రి సురేశ్ ప్రభు ఉన్నారు. ఈ నేపథ్యంలో వస్తోన్న రైల్వే బడ్జెట్ కారణంగా  రైల్వే సంబంధిత షేర్లు ఎలా స్పందిస్తాయి ? దూసుకుపోతాయా? లేక పట్టాలు తప్పుతాయా ? ఒక విహంగ వీక్షణం.
  రైల్వే బడ్జెట్‌ను నేడు(గురువారం) రైల్వే శాఖ మంత్రి సురేశ్ ప్రభు పార్లమెంట్‌కు సమర్పించనున్నారు. సాధారణంగా రైల్వే బడ్జెట్‌కు ముందు రైల్వేలతో సంబంధమున్న షేర్లు పెరగడం రివాజు. కానీ ఈ సారి రైల్వే షేర్లు పట్టాలు తప్పుతున్నాయి. ఒకటి, అరా తప్ప చాలా రైల్వే సంబంధిత షేర్లు కుదేలవుతున్నాయి. ముడి చమురు ధరల క్షీణతతో ప్రపంచ స్టాక్ మార్కెట్లు పతనం అవుతుండటంతో ఆ ప్రభావం మన స్టాక్ మార్కెట్‌పై పడుతోంది. మొత్తంమీద స్టాక్ మార్కెట్ పతనదిశగా వుండటంతో ఈ దఫా రైల్వే షేర్లు మెరుపులు మెరిపించలేకపోతున్నాయి.  అయితే ఈసారి రైల్వే కేటాయింపులు భారీగా పెరుగుతాయనే అంచనాలున్నాయి. రైల్వేల మూలధన కేటాయింపులు వచ్చే ఆర్థిక సంవత్సరంలో 20-25 శాతం వృద్ధితో రూ.1.25 లక్షల కోట్లకు పెరుగుతాయని అంచనా.
 రైల్వే మౌలిక సదుపాయాలను మెరుగుపరచడం, భద్రత, రైల్వే లైన్ల విద్యుదీకరణ, డబ్లింగ్,  యార్డ్‌ల ఆధునీకరణకు సముచిత రీతిలో కేటాయింపులు ఉండొచ్చని సంబంధిత వర్గాలు వెల్లడిస్తున్నాయి. ప్రయాణికుల చార్జీలను పెంచొచ్చని పరిశ్రమల సమాఖ్య అసోచామ్ పేర్కొంది. కాగా బడ్జెట్ నేపథ్యంలో రైల్వే స్టాక్‌లు బుధవారం మిశ్రమంగా స్పందించాయి. కెర్నెక్స్ మైక్రోసిస్టమ్స్ 3%, టిటాఘర్ వ్యాగన్స్ 2.6 శాతం టెక్స్‌మాకో రైల్ అండ్ ఇంజనీరింగ్ 1.8 శాతం, కాళింది రైల్ నిర్మాణ్ ఇంజనీర్స్ 1.6 శాతం చొప్పున పడిపోయాయి. హింద్ రెక్టిఫైర్స్ 3.4 శాతం, స్టోన్ ఇండియా 0.5 శాతం చొప్పున లాభపడ్డాయి. నేటి రైల్వే బడ్జెట్ నేపథ్యంలో అందరి దృష్టి పడే కొన్ని రైల్వే షేర్ల వివరాలు..
  బీఈఎంఎల్: 1964లో ప్రారంభమైన ఈ ప్రభుత్వ రంగ కంపెనీ రైల్వే కోచ్‌లు, రైల్వే విడిభాగాలు, మైనింగ్ పరికరాలను తయారు చేస్తోంది.
 కాళింది రైల్ నిర్మాణ్ (ఇంజనీర్స్): రైల్వే రంగానికి సంబంధించి ఇంజనీరింగ్, ప్రొక్యూర్‌మెంట్ అండ్ కన్‌స్రక్షన్(ఈపీసీ) కార్యకలాపాలు నిర్వహిస్తోంది. రైల్ రవాణా, సిగ్నలింగ్, టెలికమ్యూనికేషన్స్, ట్రాక్ అండ్ ఇన్ఫర్మేషన్ సిస్టమ్స్ వంటి రైల్వే మౌలిక సదుపాయాలను అందిస్తోంది.
 ఆల్‌స్టోమ్ టీ అండ్ డీ: విద్యుదుత్పత్తి, విద్యుత్ ప్రసారం,రైల్వే మౌలిక సదుపాయాల రంగాల్లో కార్యకలాపాలు నిర్వహిస్తోంది. అధిక, మధ్య తరహా సామర్థ్యమున్న వోల్టేజ్ స్టేషన్లను నిర్మించడం, పవర్‌గ్రిడ్ నిర్వహణ టెక్నాలజీలను డెవలప్ చేస్తోంది.
 సీమెన్స్: వివిధ పరిశ్రమలకు కనెక్టింగ్ సొల్యూషన్లను అందిస్తోంది. రైల్వే  సిగ్నలింగ్, భద్రత వ్యవస్థలు, ట్రాఫిక్ నియంత్రణ, ఆటోమేషన్, ఎలక్ట్రిఫికేషన్, లోకోమేటివ్‌ల ట్రాక్షన్ ఎక్విప్‌మెంట్ తదితర సేవలందిస్తోంది.
 హింద్ రెక్టిఫైర్స్: రైల్వే రవాణాకు సంబంధించిన పరికరాలతో పాటు పవర్ సెమి కండక్టర్లు, పవర్ ఎలక్ట్రానిక్ ఎక్విప్‌మెంట్స్ పై పరిశోధన, తయారీ, మార్కెటింగ్ కార్యకలాపాలను నిర్వహిస్తోంది. ధర రూ.68
 టిటాఘర్ వ్యాగన్స్: రైల్వే వ్యాగన్‌లు, బెయిలీ బ్రిడ్డ్‌లు, మైనింగ్ రంగానికి ఉపయోగపడే భారీ పరికరాలతోపాటు. రక్షణ రంగానికి స్పెషల్ వ్యాగన్లు, షెల్టర్లను, ఇతర ఇంజినీరింగ్ పరికరాలను తయారు చేస్తోంది.
 టెక్స్‌మాకో రైల్ అండ్ ఇంజనీరింగ్: రైల్వే రవాణా కార్లు, హైడ్రో మెకానికల్ ఎక్విప్‌మెంట్‌లు తయారు చేస్తోంది.
 స్టోన్ ఇండియా: రైల్వేలకు సంబంధించిన బ్రేక్ సిస్టమ్స్ తయారీలో అగ్రస్థానంలో ఉన్న కంపెనీ.  రైల్ రహదారి పరిశ్రమకు సంబంధించి మెకానికల్, ఎలక్ట్రికల్ ఉత్పత్తులను అందిస్తోంది.
  ఏతావాతా...
 ♦ రైల్వేలకు పెట్టుబడులు పెంచితే సీమెన్స్, బీఈఎంఎల్, టెక్స్‌మాకో, టిటాఘర్ వ్యాగన్స్, టిమ్‌కెన్ షేర్లు లాభపడతాయి.
 ♦ రైల్వేల ఆధునీకరణ, రైల్వే, మెట్రోల విస్తరణకు అధిక నిధులు వస్తే బీఈఎంఎల్ లాభపడవచ్చు.
 ♦ రైల్వేల మౌలిక సదుపాయాలకు అధిక నిధులు కల్పిస్తే టిటాఘర్ వ్యాగన్స్ షేర్ పెరగవచ్చు.


 నేడు రైల్వే బడ్జెట్
 పలు రైల్వే ప్రతిపాదనలు పెండింగ్
  
 మరి కొద్ది సేపట్లో పార్లమెంట్‌లో ప్రవేశపెట్టనున్న రైల్వే బడ్జెట్ కోసం హైదరాబాద్ మహానగరం కోటి ఆశలతో, ఆకాంక్షలతో  ఎదురు చూస్తోంది. అరకొర సౌకర్యాలు, చాలీచాలని రైళ్లు,  రైల్వేస్టేషన్‌లపై పెరిగిన ఒత్తిడి వంటి అనేక రకాల సమస్యలకు బడ్జెట్ రైలు బండి పరిష్కారాలను మోసుకొస్తుందా...లేక  నగరంలో కూత పెట్టకుండానే తుర్రుమంటుందా అని నగరవాసి సంశయం. సికింద్రాబాద్, నాంపల్లి, కాచిగూడ స్టేషన్‌లపై పెరుగుతున్న ఒత్తిడికి పరిష్కారంగా చర్లపల్లిలో నాల్గవ రైల్వే టర్మినల్‌కు బడ్జెట్‌లో నిధులు కేటాయిస్తారా....ఎంఎంటీఎస్ రెండో దశ  ఈ ఏడాదైనా  వేగం పుంజుకుంటుందా...హైదరాబాద్ నుంచి షిరిడీ వెళ్లేందుకు ప్రస్తుతం ఒకే ఒక్క ట్రైన్ అందుబాటులో ఉంది. సికింద్రాబాద్ నుంచి నేరుగా సాయినగర్ వరకు మరో రైలుకు ఈ బడ్జెట్‌లోనైనా  గ్రీన్‌సిగ్నల్ లభిస్తుందా... సికింద్రాబాద్-హజ్రత్ నిజాముద్దీన్ ప్రీమియం ట్రైన్ పట్టాలెక్కుతుందా, హైదరాబాద్ నుంచి యాదాద్రికి ఎంఎంటీఎస్ రెండో దశకు మార్గం సుగమమవుతుందా...ఇలా ఎన్నో, ఎన్నెన్నో సందేహాలు, ఆశలు. నగర వాసుల కోర్కెలను సురేష్‌ప్రభు నెరవేర్చుతారా..వేచి చూడాల్సిందే.     - సాక్షి,సిటీబ్యూరో
  
 ఆశల ఊగిసలాట..!
 నిరంతరం సిబ్బంది పర్యవేక్షణ.. అనుక్షణం ట్రాక్‌ల పరిశీలన.. ఎప్పుడూ ఎదురుగా ఎలాంటి అడ్డంకులు లేని ప్రయాణం.. తక్కువ ఖర్చు.. ఖర్చుకు తగ్గ సదుపాయాలు.. ఇంతకంటే సురక్షితం ఇంకేముంటుంది..! అందుకే ‘గ్రేటర్’ వాసులు అనుకూల ప్రయాణ సాధనంగా రైలుకే ఓటేస్తున్నారు. దూర ప్రాంతాలకు వెళ్లేందుకు ఇతర అన్ని రకాల రవాణా సదుపాయాల కంటే రైలు ప్రయాణాన్నే ఎంచుకుంటున్నారు. కోటికి చేరువైన మహానగర జనాభాలో 2015లో 9.12 కోట్ల మంది రైళ్లలోనే రాకపోకలు సాగించారు. ఈ సంఖ్య క్రమంగా పెరుగుతోంది. అయితే, పెరుగుతున్న ‘గ్రేటర్’ ప్రయాణికుల అవసరాలకు అనుగుణంగా రైల్వే సేవలు మాత్రం విస్తరించడం లేదు. ఇంకొద్ది గంటల్లో రైల్వేశాఖ మంత్రి సురేష్ ప్రభు బడ్జెట్‌ను ప్రవేశపెట్టనున్నారు. ఈ నేపథ్యంలో ‘గ్రేటర్’ రైల్వే అవసరాలపై ‘సాక్షి’ ప్రత్యేక కథనం.. - సాక్షి, సిటీబ్యూరో
  
 సికింద్రాబాద్ ఆధునికీకరణ నిల్..
 పెరుగుతున్న ప్రయాణికులు.. మహానగరంలో దశాబ్దకాలంగా రైల్వే ప్రయాణికుల సంఖ్య క్రమంగా పెరుగుతోంది. 2006లో నగర జనాభా 60.11 లక్షలు ఉంటే రైళ్ల సంఖ్య సుమారు 150 ఉండేది. వీటిలో ప్రతిరోజు సుమారు లక్షా 30 వేల మంది ప్రయాణించారు. 2012లో రైల్వే ప్రయాణికుల సంఖ్య 1.69 లక్షలకు పెరిగారు. ట్రైన్ సర్వీసుల సంఖ్యను 150 నుంచి 200కు పెంచారు. ప్రస్తుతం ప్రతిరోజు 2.5 లక్షల మంది వివిధ ప్రాంతాలకు రాకపోకలు సాగిస్తున్నారు. ఎంఎంటీఎస్, ప్యాసింజర్, ఎక్స్‌ప్రెస్ సహా 250 ట్రైన్ సర్వీసులు నడుస్తున్నాయి. అయితే, దశాబ్దాలకు పైగా రైల్వే ప్రాజెక్టులు నత్తనడకనే సాగుతున్నాయి. ప్రతి రోజు వేలమందితో రద్దీగా ఉండే సికింద్రాబాద్ రైల్వేస్టేషన్ ఆధునికీకరణ దశాబ్దకాలంగా పెండింగ్‌లో ఉంది. విస్తరిస్తున్న నగర శివార్లను దృష్టిలో ఉంచుకొని ఏర్పాటు చేయాల్సిన టెర్మినళ్లు కార్యరూపం దాల్చలేదు. మూడేళ్ల క్రితం చేపట్టిన ఎంఎంటీఎస్ రెండో దశ ఒక అడుగు ముందుకు నాలుగడుగులు వెనక్కి అన్నట్టుగా ఉంది.
  
 ప్రతిపాదనలోనే కాచిగూడ ఫ్లాట్‌ఫామ్
 ప్రతిరోజు సుమారు 70 రైళ్లు రాకపోకలు సాగించే కాచిగూడ రైల్వే స్టేషన్‌లో ఐదు ఫ్లాట్‌ఫామ్‌లు మాత్రమే ఉన్నాయి. వాటిలో ఒకటి పిట్‌లైన్ కోసం వినియోగిస్తున్నారు. మిగిలిన నాలుగింటిపై తీవ్ర రైళ్ల ఒత్తిడి ఉంది. దీన్ని దృష్టిలో ఉంచుకొని 6వ ఫ్లాట్‌ఫామ్ నిర్మించాలని రెండు సంవత్సరాల క్రితం ప్రతిపాదించారు. కానీ ఆచరణకు నోచలేదు. సికింద్రాబాద్ రైల్వేస్టేషన్ ఆధునికీకరణ కోసం 2010 నుంచి ప్రతిపాదనలు రూపొందిస్తునే ఉన్నారు. ప్రయాణికుల రద్దీ, రైళ్ల ఒత్తిడిని దృష్టిలో ఉంచుకొని అంతర్జాతీయ ప్రమాణాలకు అనుగుణంగా స్టేషన్ అభివృద్ధికి రూపొందించిన ప్రణాళికలు అటకెక్కాయి. ప్రస్తుతం ఉన్న 10 ఫ్లాట్‌ఫామ్‌ల పైనా తీవ్ర ఒత్తిడి పెరుగుతోంది. సికింద్రాబాద్‌కు ప్రత్యామ్నాయంగా రెండేళ్ల క్రితం మౌలాలి స్టేషన్‌ను విస్తరించాలని నిర్ణయించారు. కాగా, ఆ పనులు అటకెక్కాయి. తాజాగా చర్లపల్లి స్టేషన్‌ను అతిపెద్ద రైల్వే టెర్మినల్‌గా అభివృద్ధి చేసేందుకు ప్రతిపాదనలు రూపొందిస్తున్నా ఎప్పటికీ కార్యరూపం దాలుస్తుందో తెలియదు.
  
 నత్తనడకన రెండో దశ..
 సుమారు రూ.850 కోట్లతో చేపట్టిన ఎంఎంటీఎస్ రెండో దశ ప్రాజెక్టు నత్తనడకన సాగుతోంది. మూడేళ్ల క్రితం చేపట్టిన ఈ ప్రాజెక్టుకు రక్షణశాఖ నిరాకరించడం వల్ల ఏడాది క్రితం సనత్‌నగర్- మౌలాలీ మార్గంలో 5 కిలోమీటర్ల మేరకు బ్రేక్ పడింది. ఇప్పటికీ తిరిగి పనులు ప్రారంభం కాలేదు. ఉందానగర్- శంషాబాద్ ఎయిర్‌పోర్టుకు రెండో దశ విస్తరణపై ఎలాంటి పురోగతి లేదు. ఘట్కేసర్ నుంచి యాదాద్రి వరకు రెండో దశను పొడిగించాలని ఇటీవల సీఎం కేసీఆర్ కేంద్రాన్ని కోరిన దృష్ట్యా ఈ ప్రాజెక్టు ప్రాధాన్యతను సంతరించుకుంది. అయితే  ఈ బడ్జెట్‌లోనైనా అడ్డంకులు తొలగి ప్రాజెక్టు సాఫీగా సాగుతుందా లేదా వేచి చూడాల్సిందే.
  
 కొండెక్కిన కొత్త రైళ్లు..
 2013లో ప్రకటించిన సికింద్రాబాద్- హజ్రత్ నిజాముద్దీన్, 2014లో ప్రకటించినహైదరాబాద్- గుల్బర్గా ఎక్స్‌ప్రెస్‌లు ఇప్పటికీ ప్రారంభానికి నోచలేదు.సికింద్రాబాద్- షిర్డీకి ప్రస్తుతం అజంత- మన్మాడ్ ఒక్కటేఅందుబాటులో ఉంది. మరో ట్రైన్ కోసం ప్రయాణికులు చాలాకాలంగా డిమాండ్ చేస్తున్నారు.జమ్ము కాశ్మీర్‌లోని వైష్ణోమాత ఆలయానికి వెళ్లేందుకు సికింద్రాబాద్- కాట్రాకు ట్రైన్నడపాలనే డిమాండ్ ఉంది.కాచిగూడ నుంచి బెంగళూర్‌కు ప్రస్తుతం 2 రైళ్లే నడున్నాయి. ప్రయాణికుల ర ద్దీ దృష్ట్యా మరో 2 రైళ్లకు డిమాండ్ ఉంది.
  
 ‘లింకు’ తెగిన ఎంఎంటీఎస్- సిటీ బస్సు
 మహానగరంలో 2003లో ఎంఎంటీఎస్ అందుబాటులోకి వచ్చింది. ప్రస్తుతం రెండోదశ పనులు కూడా జరుగుతున్నాయి. కానీ ఇప్పటిదాకా సిటీ బస్సుకు, ట్రైన్‌కు లింకు ఏర్పాటు కాలేదు. అన్ని ఎంఎంటీఎస్ స్టేషన్లకు బస్సులు నడిచే ఏర్పాట్లు చేయాలని చేసిన ప్రతిపాదన అమలుకు నోచుకోలేదు. 26 ఎంఎంటీఎస్ స్టేషన్లలో సగానికి పైగా స్టేషన్లకు కనీస రోడ్డు సదుపాయం లేదు. రైలు దిగిన ప్రయాణికులు ఆటో ఎక్కాలన్నా, బస్సెక్కాలన్నా ఫర్లాంగుల కొద్దీ నడవాల్సిందే. ఫలక్‌నుమా, మలక్‌పేట్, లక్డీకాపూల్, నెక్లెస్‌రోడ్డు, సికింద్రాబాద్, బేగంపేట్, హైటెక్ సిటీ తదితర స్టేషన్లకు రోడ్డు సదుపాయం ఉన్నా ఎంఎంటీఎస్ రాకపోకలకు అనుగుణంగా సిటీ బస్సులు అందుబాటులో ఉండవు. ఇక ఫలక్‌నుమా, ఉప్పుగూడ, యాకుత్‌పురా, డబీర్‌పురా స్టేషన్లకు రోడ్డు రవాణా సదుపాయం లేదు.
  
 బడ్జెట్ తర్వాత రైల్వే ప్రైవేటు పరం..
 పెండింగ్‌లో ఉన్న అన్ని రైల్వే ప్రాజెక్టులకు ఈ బడ్జెట్‌లోనే నిధులు రావాలి. కరీంనగర్, పెద్దపల్లిలో అనేక సమస్యలున్నాయి, ఈ యేడాది బడ్జెట్‌లోనైనా వాటికి పరిష్కారం చూపాలి. బడ్జెట్ అనంతరం రైల్వే వ్యాపార వ్యవస్థగా మారబోతుంది. బిబేక్ దేబ్రాయ్ కమిటీ సిఫార్సుల మేరకు రైల్వేను ముక్కలు చేసి కార్పొరేట్లకు అప్పజెప్పడానికి మార్గం సుగుమం చేస్తున్నారు. 400 రైల్వే స్టేషన్లు ప్రైవేటు కంపెనీలకు అప్పజెప్పడానికి టెండర్లు వేశారు. ఇక రైల్వేను ప్రైవే టుకు ఇచ్చి రైళ్లను నడపడానికి అనుమతి ఇచ్చేస్తారు. ప్రజల కోసం మాని లాభాల కోసం రైళ్లు నడపాలని సర్కారు భావిస్తుంది.     
  - కె. శివకుమార్, ఎస్సీఆర్‌ఎంయూ డివిజనల్ కార్యదర్శి
  
 పెండింగ్ ప్రాజెక్టులు పూర్తవ్వాలి..
 2016-17 రైల్వే బడ్జెట్ ద్వారా పెండింగ్‌లో ఉన్న అనేక పనులు పూర్తవుతాయని ఆశిస్తున్నాం. కొంత కాలంగా రైల్వే ప్రాజెక్ట్‌లు పూర్తవలేదు. అక్కన్నపేట్, మెదక్ మధ్య 17 కిలోమీటర్లు పూర్తి చేయాలి. పెద్దపల్లి, కరీంనగర్, నిజామాబాద్‌లో కూడా చాలా ఏళ్ల నుంచి ఎన్నో పనులు పెండింగ్‌లో ఉన్నాయి. ఈ ప్రాజెక్ట్‌లు కూడా పూర్తి చేసే విధంగా కేంద్రం నిధులు ఈ బడ్జెట్‌లోనే  కేటాయించాలని కోరుతున్నాం. మెడికల్, ఇంజినీరింగ్ కళాశాలలకు నిధులు విడుదల చేసి, గ్రూప్-డి, యాక్ట్ యాప్ ఉద్యోగాలలో స్థానికులకు 80 శాతం కేటాయించాలని డిమాండ్ చేస్తున్నాం. రైల్వే, కేంద్ర ప్రభుత్వ ఉద్యోగులకు 7వ పే కమిషన్‌ను జనవరి నుంచి అమలు చేయాలి. రైల్వేలో బిబేక్ దేబ్రాయ్ కమిటీ రిపోర్ట్‌ను రద్దు అమలు చేయవద్దని కోరుతున్నాం.
  - బి. ముత్తయ్య,
  ైరె ల్వే జేఏసీ చైర్మన్
  
 హంగులు లేని నాంపల్లి..
 నాంపల్లి రైల్వే స్టేషన్‌ను అత్యాధునిక సదుపాయాలతో, పర్యాటక హంగులతో అభివృద్ధి చేసేందుకు ప్రణాళికలు రూపొందించారు. దేశవిదేశీ పర్యాటకులకు హైదరాబాద్ చారిత్రక వైభవాన్ని తెలిపే విధంగా స్టేషన్‌ను సమాచార కేంద్రంగా తీర్చిదిద్దాలనే ప్రతిపాదన ఇప్పటికీ కాగితాల్లోనే ఉంది. లిఫ్టులు, ఎస్కలేటర్లు ఏర్పాటు చేయలేదు. స్టేషన్ విస్తరణ అటకెక్కింది. ఆరు ఫ్లాట్‌ఫామ్‌లు దాటాలంటే మెట్ల మార్గమే గత్యంతరం.


 న్యూఢిల్లీ: దశాబ్ద కాలంలో తీవ్ర ఆర్థిక సంక్షోభ పరిస్థితులను ఎదుర్కొంటున్న భారతీయ రైల్వే వ్యవస్థ అదనపు ఆర్థిక వనరుల సమీకరణకు ప్రయాణికులు, సరకు రవాణా చార్జీలు పెంచుతుందా ? అన్న అంశంపై ప్రయాణికుల ఆసక్తి పెరిగింది. గతేడాది ప్రయాణికుల చార్జీలను వదిలేసి రైల్వే మంత్రి సురేశ్ ప్రభు సరకు రవాణా చార్జీలను పెంచారు. అనంతరం ఏడాది మధ్యలో ప్రయాణికుల ఫస్ట్‌క్లాస్, ఏసీ కోచ్‌ల చార్జీలను సెస్ రూపంలో పెంచారు. ఇప్పుడు కూడా అలాంటి వైఖరినే అవలంబిస్తారా ?
 
 గత ఏడాది బడ్జెట్‌లో సురేశ్ ప్రభు ఎలాంటి కొత్త రైళ్లను ప్రవేశపెట్టక పోయినప్పటికీ ఆశించిన టార్గెట్‌లు నెరవేరలేదు. ప్రయాణికులు, సరకు రవాణా చార్జీల వల్ల 1,41,416 కోట్ల రూపాయల రెవెన్యూ సాధించాలని లక్ష్యంగా పెట్టుకోగా, 1,36, 079 కోట్ల రూపాయల రెవెన్యూ మాత్రమే వచ్చింది. రెవెన్యూలో 3.77 శాతం తగ్గుదల కనిపించింది. ప్రతి వంద రూపాయల రెవెన్యూకు ఖర్చును 85.5 తగ్గించాలని లక్ష్యంగా పెట్టుకున్నా ఖర్చు మాత్రం 97.8 రూపాయలకు పెరిగింది. ప్రయాణికులు, సరకు రవాణా లక్ష్యాలు కూడా ఆమడ దూరంనే ఉండిపోయాయి. వచ్చే మార్చినెల నాటికి 8.50 కోట్ల టన్నుల సరకును రవాణా చేయాలని లక్ష్యంగా పెట్టుకోగా, గత డిసెంబర్ నెల నాటికి కేవలం  80 లక్షల టన్నుల సరకును మాత్రమే రవాణా చేసింది. మిగతా లక్ష్యాన్ని అందుకునే ఆస్కారమే లేదు.
 
 దిగజారిన ఆర్థిక పరిస్థితి కారణంగా జనరల్ బడ్జెట్ కేటాయింపులను పెంచాల్సిందిగా రైల్వే శాఖ చేసిన విజ్ఞప్తిని ఆర్థిక శాఖ త్రోసిపుచ్చింది. పైగా గతంలోకన్నా 30 శాతం కోత విధిస్తున్నట్టు వెల్లడించింది. కనీసం గ్రాంట్ రూపంలో ఇచ్చేందుకు కూడా నిరాకరించింది. కేంద్రానికి చెల్లించాల్సిన 8,000 కోట్ల రూపాయల డివిడెంట్‌ను మాఫీ చేయాల్సిందిగా కోరినా ససేమిరా అంది. స్వయంగా ఆర్థిక వనరులను సమకూర్చుకోవాల్సిందిగా ఉచిత సలహా ఇచ్చింది. ఈ పరిస్థితికి తోడు ఏడవ వేతన సంఘం సిపార్సులను ఉద్యోగులకు అమలు చేయడం వల్ల రైల్వేలపై ఈ ఏడాది అదనంగా 32,000 కోట్ల రూపాయల భారం పడనుంది. ఉద్యోగుల రిటైర్మెంట్ కారణంగా పడే భారం దీనికి అదనం.
 
  ఇంతటి ఆర్థిక సంక్షోభ పరిస్థితుల్లో కొత్త రైళ్లను ప్రకటించే అవకాశం లేదని రైల్వే వర్గాలు తెలియజేస్తున్నాయి. ఆధునిక హంగులుగల బోగీలను ప్రవేశపెడతామని రైల్వే శాఖ ఇదివరకే ప్రకటించినందున వాటిని ప్రవేశపెట్టి వాటిపై అదనపు చార్జీలను వసూలు చేసే అవకాశం ఉంది. సరకు రవాణా చార్జీలతో పాటు ప్రయాణికుల చార్జీలను పెంచేందుకు సురేశ్ ప్రభు మొగ్గు చూపుతున్నా రాజకీయ కారణాలు అందుకు సహకరించడం లేదు.
 రానున్న నాలుగు రాష్ట్రాల అసెంబ్లీ ఎన్నికలను దృష్టిలో ఉంచుకొని ప్రయాణికుల చార్జీలను ఇప్పుడు పెంచకపోవచ్చని, ఎన్నికలు అయిన వెంటనే కచ్చితంగా పెంచుతారని విశ్వసనీయ వర్గాల ద్వారా స్పష్టమవుతుంది. ప్రధాని నరేంద్ర మోదీ కలల ప్రాజెక్టు బుల్లెట్ ట్రెయిన్ల సంగతి మాట పక్కన పెడితే ఈసారి కూడా ఎదుగు బొదుగులేని బడ్జెట్‌నే ఆవిష్కరిస్తారని అర్థమవుతుంది.
  


 న్యూఢిల్లీ: ‘నేను ప్యాసింజర్ రైల్లో అహ్మెద్‌పూర్ రైల్వే స్టేషన్‌కు వచ్చాను. కడుపు విపరీతమైన ఉబ్బరంగా ఉంది. రైలు దిగాను. స్టేషన్లో ఓ లోటలో నీల్లు పట్టుకున్నాను. రైలు పట్టాలకు దూరంగా పరిగెత్తాను. కడుపు భారాన్ని దించుకుంటున్నాను. ఇంతలో రైల్వే గార్డు పచ్చ జెండా ఊపాడు. నేను వెనక నుంచి మొత్తుకుంటూ ఒక చేతిలో లోట, మరో చేతిలో దోవతి పట్టుకొని పరుగెత్తుకొస్తున్నాను. కాళ్లకు దోవతి అడ్డంపడి ఊడిపోయింది. స్టేషన్‌లో ఫ్లాట్‌ఫామ్ మీదున్న మహిళలు, పురుషులు అందరి ముందు నా మానం పోయింది. నా కోసం ఐదు నిమిషాలు రైలు ఆపని గార్డుకు ప్రజల తరఫున భారీ జరిమానా విధించాలని ప్రార్థిస్తున్నాను. అలా చేయని పక్షంలో పత్రికలకు నివేదిస్తా’ అని ఓఖిల్ చంద్ర సేన్ అనే ప్రయాణికుడు 1909లో వెస్ట్ బెంగాల్ సాహిబ్‌గంజ్ రైల్వే డివిజనల్ సూపరింటెండెంట్‌కు ఫిర్యాదు చేశారు. ఫ్రేమ్ కట్టిన ఈ ఫిర్యాదు లేఖ ఢిల్లీ రైల్వే మ్యూజియంలో నేటికి కనిపిస్తుంది.
 
  ఈ లేఖనే రైల్వే బోగీల్లో మరుగుదొడ్లు నిర్మించాలనే ఆలోచనకు నాంది పలికింది. వందేళ్ల క్రితం నుంచి నేటికి రైల్వే శాఖపై ఫిర్యాదులు వస్తూనే ఉన్నాయి. సోషల్ మీడియా విస్తరణతో నేడు ఫిర్యాదుల సంఖ్య పెరుగుతోంది. ట్విట్టర్ ఫిర్యాదులను రైల్వే మంత్రియే ప్రత్యక్షంగా పర్యవేక్షిస్తున్నప్పటికీ ప్రయాణికుల సౌకర్యాలు అరకొరగానే ఉంటున్నాయి. ప్రతి ఏడాది రైల్వే బడ్జెట్ ముందు ప్రజాభిప్రాయ సేకరణ పేరిట పార్లమెంట్ సభ్యుల అభిప్రాయాలను, డిమాండ్లను రైల్వే శాఖ స్వీకరిస్తుంది. ఈసారి కూడా ఆ కసరత్తు ఎప్పటి తంతులాగానే జరిగింది. పార్లమెంట్ సభ్యులు కూడా పార్టీల వారిగా విడిపోతారు. కొంత మంది వ్యక్తిగత అభిప్రాయాలను కూడా చెబుతారు. తమ నియోజక వర్గానికి కొత్త రైళ్లు కావాలని, కొత్త స్టాప్‌లు కావాలని, గేజ్ కన్వర్షన్ కావాలని, కొత్తగా రూట్ కావాలనే అందరూ మాట్లాడుతారు. ఎవరు కూడా రైల్వే వ్యవస్థ తీరుతెన్నులు ఎలా ఉన్నాయి? దాన్ని స్వరూపం ఎలా ఉండాలి?  సమస్యలను పరిష్కరించడం ఎలా, భవిష్యత్తుకు బాటలు వేయడం ఎలా ? ఆలోచించరు.
 
 సాక్షాత్తు రైల్వే మంత్రి కూడా ఆ దిశగా ఆలోచించరు. అందుబాటులో ఉన్న బడ్జెన్‌ను సర్దుకోవడం ఎలా ? ప్రయాణికులపై భారం వేయకుండా పెట్టుబడులను సమీకరించడం ఎలా ?, అన్ని ప్రాంతాల వారిని, ముఖ్యంగా పాలకపక్షాల ప్రయోజనాలను ఎలా పరిరక్షించాలనే ధోరణిలో ఆలోచిస్తారు. అందుకనే ఎన్ని చర్యలు తీసుకున్నా సమస్యలు ఎప్పటికి తీరకుండానే ఉంటున్నాయి. రాజకీయ కారణాల వల్ల ప్రయాణికుల చార్జీలను పెంచకుండా సరకు రవాణా చార్జీలను పెంచడం ద్వారా రెవెన్యూ పెంచుకునేందుకు రైల్వేలు గత కొన్నేళ్లుగా ప్రయత్నిస్తు వస్తున్నాయి. గూడ్సు రైళ్లు నడిచేందుకు ప్రత్యేక కారిడార్ లేకపోవడం వల్ల ఆ రైళ్లు నేడు గంటకు 26 కిలోమీటర్ల వేగంతో నడుస్తున్నాయి.
 
 అందుకని వాటిలో సరకు రవాణాకు పెద్దగా డిమాండ్ ఉండడం లేదు. రోడ్డు రవాణా స్పీడ్‌గా ఉండడంతో, రవాణా చార్జీలు రైలుతో సమానంగా లేదా అంతకన్నా తక్కువగా ఉండడంతో వ్యాపారులు సరకు రవాణాకు ఎక్కువ వరకు రోడ్డు మార్గాన్నే ఎంచుకుంటున్నారు. ప్రయాణికుల చార్జీలు కూడా పెద్దగా పెంచక పోవడం వల్ల పెట్టుబడులకు డబ్బులు లేవని, బడ్జెట్ కేటాయింపులు తక్కువగా ఉన్నాయని రైల్వే శాఖ ఎప్పుడూ ఆర్థిక శాఖపై ఆరోపణలు చేస్తుంటుంది. డబ్బుల్లేకనే తాము కొత్త ప్రాజెక్టులను పెద్దగా ప్రకటించలేక పోతున్నామని, కొత్త రైళ్లు ప్రవేశపెట్టలేక పోతున్నామని ప్రస్తుత రైల్వే మంత్రి సురేశ్ ప్రభు గత ఏడాది బడ్జెట్ సందర్భంగా వెల్లడించారు. కేటాయింపులను కూడా సరిగ్గా ఖర్చు పెట్టలేక పోయారన్నది నిపుణుల విశ్లేషన.
 
  రైల్వే శాఖ వద్ద మంజూరై పెండింగ్‌లో ఉన్న ప్రాజెక్టులు 362. ఎలాంటి కొత్త ప్రాజెక్టులు ప్రకటించకుండా కనీసం ఐదేళ్ల హాలిడే ప్రకటిస్తే తప్ప ఈ ప్రాజెక్టులు పూర్తికావు. చైనాలో ప్రయాణికుల చార్జీలు, సరకు రవాణా చార్జీలు మనకన్నా యాభై శాతం తక్కువ. అయినా అవి మనకన్నా రెండింతల లాభాల్లో నడుస్తున్నాయి. వాటి వేగం మన రైళ్లకన్నా మూడింతలు ఎక్కువ. భారత్ నడుపుతున్న 13,000 రైళ్లు సకాలంలో వచ్చి పోయేలా, వాటి భద్రతకు, ఆరోగ్యకరమైన ఆహారానికి, మరుగుదొడ్ల శుభ్రతకు ముందుగా చర్యలు తీసుకోవాలని సామాన్య ప్రయాణికులు కోరుతున్నారు.
 
  


 న్యూఢిల్లీ: పార్లమెంట్ బడ్జెట్ సమావేశాల నేపథ్యంలో లోక్‌సభ స్పీకర్ సుమిత్రా మహాజన్ సోమవారం అఖిల పక్ష సమావేశం నిర్వహించారు. సమావేశాలు సజావుగా సాగాలని, ఆందోళనల వల్ల క్వశ్చన్‌అవర్ నష్టపోకుండా చూడాలంటూ పార్టీలు ఏకాభిప్రాయం వ్యక్తం చేశాయని తెలిపారు. రిజర్వేషన్ల వ్యవస్థ, జేఎన్‌యూ వివాదం నేపథ్యంలో వర్సిటీల నిర్వహణపై చర్చించాలంటూ విపక్షాలు కోరాయని చెప్పారు. రాష్ట్రపతి ప్రసంగంపై ధన్యవాద తీర్మానంతోపాటు, సాధారణ, రైల్వే బడ్జెట్‌లు, మరికొన్ని కీలక అంశాలపై చర్చ ఉంటుంద న్నారు. వచ్చే వారం లోక్‌సభలో చర్చించాల్సిన అంశాలపై ఈ రోజు మధ్యాహ్నం జరిగే బీఏసీ సమావేశంలో అజెండా రూపొందిస్తామని తెలిపారు.


 రైల్వే బడ్జెట్, ఆర్థిక సర్వేలపై అందరి దృష్టి...
 * విశ్లేషకుల అభిప్రాయం...
 * ఫిబ్రవరి ఎఫ్ అండ్ ఓ కాంట్రాక్టుల
 * ముగింపు ఈ వారంలోనే...
 న్యూఢిల్లీ: డెరివేటివ్‌ల కాంట్రాక్టుల ముగింపు వారమైనందున ఈ వారంలో స్టాక్ మార్కెట్ తీవ్రమైన ఒడిదుడుకులకు గురయ్యే అవకాశాలు అధికంగా ఉన్నాయని మార్కెట్ విశ్లేషకులంటున్నారు.
 
 రెండు కీలకమైన అంశాలు-రైల్వే బడ్జెట్, ఆర్థిక సర్వేలపై అందరి కళ్లు ఉంటాయని, ప్రపంచ స్టాక్ మార్కెట్ల పోకడ, ముడి చమురు ధరల గమనం, ఆర్థిక సర్వే, రైల్వే బడ్జెట్‌లో ప్రకటించే సంస్కరణలు, రూపాయి కదలికలు.. ఇవన్నీ మార్కెట్ గమనాన్ని నిర్దేశిస్తాయని వారంటున్నారు.
  
 ఎలాంటి ప్రధాన ప్రపంచ సంఘటనలు లేనందున ఆర్థిక సర్వే, ఎఫ్ అండ్ ఓ ఎక్స్‌పైరీ అంశాలు తగిన ప్రభావం చూపిస్తాయనేది విశ్లేషకుల మాట. ఫిబ్రవరి డెరివేటివ్‌ల కాంట్రాక్టులు ఈ నెల 25న(గురువారం)ముగుస్తాయని, ఈ నేపథ్యంలో స్టాక్ సూచీలు ఒడిదుడుకుల్లోనే చలిస్తాయని, సానుకూలంగానే స్టాక్ మార్కెట్ ఉండొచ్చని హెమ్ సెక్యూరిటీస్ డెరైక్టర్ గౌరవ్ జైన్ చెప్పారు.  అంతర్జాతీయ మార్కెట్ల పోకడలు, విదేశీ ఇన్వెస్టర్ల పెట్టుబడులు, అంతర్జాతీయ మార్కెట్లో చమురు ధరల గమనం ఇత్యాది అంశాలకనుగుణంగానే స్టాక్ మార్కెట్ గమనం ఉంటుందని క్యాపిటల్‌వయా గ్లోబల్ రీసెర్చ్ డెరైక్టర్(రీసెర్చ్) వివేక్ గుప్తా చెప్పారు.
  
 బడ్జెట్ కీలకం...
 వచ్చే ఆర్థిక సంవత్సరానికి సంబంధించి ఈ నెలలోనే పార్లమెంట్‌కు సమర్పించే  రైల్వే బడ్జెట్, సాధారణ బడ్జెట్‌లపైననే  స్టాక్ మార్కెట్ భవిష్యత్ గమనం ఆధారపడి ఉంటుందని  ట్రేడ్ స్మార్ట్ ఆన్‌లైన్ డెరైక్టర్ విజయ్ సింఘానియా  పేర్కొన్నారు.  ఈ మంగళవారం నుంచి బడ్జెట్ సమావేశాలు ప్రారంభం కానున్నాయి. ఈ నెల 25న ప్రవేశపెట్టే రైల్వే బడ్జెట్ కారణంగా స్టీల్, సిమెంట్, బొగ్గు, ఐరన్ ఓర్, ఎరువుల కంపెనీలకు సంబంధించిన షేర్లలో కదలికలు ఉంటాయని సింఘానియా వివరించారు.
 
 మరోవైపు ఈ నెల 26(శుక్రవారం)గత ఏడాది కాలంలో భారత ఆర్థిక వ్యవస్థలో జరిగిన పరిణామాల సమీక్ష-ఆర్థిక సర్వే ఉంటుంది. ప్రభుత్వ విధానాల అమలు తీరును ఈ సర్వే ప్రతిబింబిస్తుంది.  సాధారణ బడ్జెట్ ఈ నెల 29న ప్రవేశపెడతారు.  బడ్జెట్ అంచనాల కారణంగా రంగాల వారీగా కంపెనీల షేర్లు ప్రభావితం కావచ్చని కోటక్ సెక్యూరిటీస్ సీనియర్ వైస్ ప్రెసిడెంట్ దీపేన్ షా చెప్పారు. గత వారంలో సెన్సెక్స్ 723 పాయింట్లు లాభపడి 23,709 పాయింట్ల వద్ద ముగిసింది. కాగా ఈ నెల మొదటి మూడు వారాల్లో సెన్సెక్స్ 1,162 పాయింట్లు(4.67%) నష్టపోయింది.
  
 ఇక అంతర్జాతీయ అంశాల విషయానికొస్తే,  ఈ నెలకు సంబంధించి యూరోజోన్ మార్కెట్ ఎంఎంఐ కాంపొజిట్ ఇండెక్స్ గణాంకాలు నేడు(సోమవారం) వెలువడుతున్నాయి. అమెరికాలో క్యూ4 జీడీపీ గణాంకాలు శుక్రవారం(ఈ నెల 26న) వెలువడుతాయి.
  
 రూ. 4,600 కోట్ల విదేశీ పెట్టుబడులు వెనక్కి..
 ఈ నెలలో ఇప్పటివరకూ విదేశీ ఇన్వెస్టర్లు రూ.4,600 కోట్ల పెట్టుబడులు భారత క్యాపిటల్ మార్కెట్ నుంచి ఉపసంహరించుకున్నారు. అంతర్జాతీయంగా ఆర్థిక వృద్ధిపై ఆందోళన, ముడి చమురు ధరల్లో ఒడిదుడుకులు దీనికి ప్రధాన కారణాలు. దీంతో  ఈ ఏడాది ఇప్పటివరకూ విదేశీ ఇన్వెస్టర్లు భారత క్యాపిటల్ మార్కెట్ నుంచి రూ.13,414 కోట్లు ఉపసంహరించుకున్నట్లైంది.
 
 డిపాజిటరీ సంస్థల గణాంకాల ప్రకారం, ఈనెల 1-18 తేదీల మధ్య విదేశీ ఇన్వెస్టర్లు ఈక్విటీ మార్కెట్ల నుంచి రూ.4,503 కోట్లు, డెట్ మార్కెట్ నుంచి రూ.96 కోట్లు మొత్తం రూ.4,599 కోట్లు నికరంగా తమ పెట్టుబడులు ఉపసంహరించుకున్నారు. కాగా జనవరిలో విదేశీ ఇన్వెస్టర్లు ఈక్విటీ మార్కెట్ నుంచి నికరంగా రూ.13,381 కోట్లు ఉపసంహరించుకోగా, డెట్ మార్కెట్లో రూ.3,274 కోట్లు నికరంగా పెట్టుబడులు పెట్టారు.
 
 ముడి చమురు ధరల పతనం కారణంగా పశ్చిమాసియా దేశాల సావరిన్ వెల్త్ ఫండ్స్.. వర్థమాన దేశాల మార్కెట్లో చేసిన భారీ  ఇన్వెస్ట్‌మెంట్స్‌ను వెనక్కి తీసుకుంటున్నాయని సాస్ ఆన్‌లైన్‌డాట్‌కామ్ సీఓఓ సిద్ధాంత్ జైన్ చెప్పారు. ఫలితంగా భారత్ వంటి వర్థమాన దేశాల నుంచి  విదేశీ నిధులు ఈ స్థాయిలో తరలిపోతున్నాయన్నారు. రూపాయి పతనం, చైనా ఆర్థిక మందగమనంపై ఆందోళన విదేశీ ఇన్వెస్టర్లను కలవరపెడుతున్నాయని వివరించారు.


 దేశంలో ప్రభుత్వ పాలనను మరింత మెరుగుపర్చడానికి, ప్రభుత్వ ఆదాయాన్ని పెంచడానికి అవసరమైన సూచనలు, సలహాలను ఇవ్వాలని నరేంద్ర మోదీ ప్రభుత్వం ఇచ్చిన పిలుపునకు ప్రజల నుంచి స్పందన భారీగా ఉంది. ప్రభుత్వం సూచించిన వెబ్‌సైట్ 'మైగవ్ డాట్ ఇన్'కు ఇప్పటివరకు 70 వేల సూచనలు వచ్చాయని, వాటిలో 50 వేలు సాధారణ బడ్జెట్‌కు సంబంధించినవి కాగా, మిగతా 20 వేల సూచనలు రైల్వే బడ్జెట్‌కు సంబంధించినవి ఉన్నాయి.
 
 అందులో కొన్ని ప్రభుత్వానికి పనికొచ్చే సృజనాత్మక సూచనలు ఉన్నాయని విశ్వసనీయ ప్రభుత్వవర్గాలు గురువారం వెల్లడించాయి. వాటిని తదుపరి పరిశీలన కోసం పీఎంవోకు, సంబంధిత విభాగాలకు పంపామని ఆ వర్గాలు తెలిపాయి. ఆ సూచనల్లో కొన్ని ఇలా ఉన్నాయి..
 
 1. పన్నులపై డబ్బు ఆదా చేసుకునేందుకు దొంగబిల్లుల దాఖలుకు వీలు కల్పిస్తున్న నిబంధనను రద్దు చేయాలి. చెల్లించిన పన్నులపై కొంత మొత్తాన్ని రీఎంబెర్స్ చేసుకోవడానికి ఉద్యోగులు దొంగ బిల్లులను సమర్పించడం ఎప్పుడూ జరిగేదే.
 
 2. నల్ల డబ్బును అరికట్టేందుకు ఆదాయం పన్ను రిటర్న్స్‌లో కుటుంబసభ్యుల వివరాలు, తమమీద ఆధారపడి బతుకుతున్న వారి వివరాలు, వారందరి పాన్ నెంబర్ల వివరాలను ఇవ్వడం తప్పనిసరి చేయాలి. అలా చేస్తే మొత్తం కుటుంబానికి వస్తున్న ఆదాయం వివరాలను సులభంగా తెలుసుకోవచ్చు.
 
 3. అలాగే ఆదాయం పన్ను రిటర్న్స్‌లో బ్యాంకు ఖాతా వివరాలను ఇచ్చినట్లే తాను, తన కుటుంబ సభ్యులు, బంధువుల ఆస్తుల వివరాలను, వాటి మార్కెట్ విలువను, వాటి చిరునామాలను తప్పనిసరిగా సమర్పించాలనే నిబంధనను తీసుకరావాలి. ఎందుకంటే కొంత మంది నల్లడబ్బును తెల్లగా మార్చుకునేందుకు కుటుంబ సభ్యులు, బంధువుల పేర్ల మీదున్న ఆస్తులను ఉపయోగించుకుంటున్నారు.
 
 4. ఈసారి సాధారణ బడ్జెట్‌లో ఔషధాలపై సబ్సిడీలు ఇవ్వాలి. వైన్, సిగరెట్, బీడీ, పాన్ మసాలా, గుట్కా తదితరాలపై పన్నులను పది శాతం పెంచాలి.
 
 5. రైల్వేల ఆర్థిక పరిస్థితి మెరుగుపర్చేందుకు అన్ని రైళ్లలోని అన్ని బోగీలపై వాణిజ్య ప్రకటనలకు అనుమతించాలి. రైల్వే ఆస్తులను, మౌలిక సౌకర్యాలను కూడా వాణిజ్య ప్రకటనల కోసం ఉపయోగించాలి. ఈ విషయంలో అవసరమైతే కార్పొరేట్ సంస్థలతో ఒప్పందం చేసుకోవాలి.
 
 6. పన్నుల విధానాన్ని సులభతరం చేయాలి. ఆస్తిపన్నును రద్దుచేయాలి. దేశంలో యోగాను ప్రోత్సహించేందుకు ప్రత్యేక పన్ను రాయతీని కల్పించాలి.
 
 సాధారణ బడ్జెట్, రైల్వే బడ్జెట్‌లను రూపొందించడానికి ముందు ప్రజల నుంచి సలహాలు, సూచనలు తీసుకోవాలని ప్రధాని నరేంద్ర మోదీ ఇచ్చిన సూచన మేరకు ఆర్థిక, రైల్వేశాఖలు సూచనలను ఇవ్వాలని గత డిసెంబర్ నెలలో ప్రజలను కోరాయి. గత బడ్జెట్‌కు ముందు కూడా ప్రభుత్వం ఇలాంటి సూచనలే కోరింది. అప్పడు ప్రజలనుంచి వచ్చిన కొన్ని సూచనలను జనరల్, రైల్వే బడ్జెట్‌లో పొందుపర్చారు కూడా.


 - ప్రతిపాదనను పరిశీలిస్తున్న రైల్వే శాఖ
 సాక్షి, హైదరాబాద్: సముద్ర తీరప్రాంతం లేని రాష్ట్రాల్లో డ్రైపోర్టులను నిర్మించనున్నట్టు కేంద్ర ప్రభుత్వం ప్రతిపాదించిన నేపథ్యంలో తెలంగాణలో తొలి డ్రైపోర్టు నిర్మాణానికి రంగం సిద్ధమవుతోంది. నల్లగొండ జిల్లా పరిధిలో ఉన్న బీబీనగర్‌లో దీనిని ఏర్పాటు చేసే దిశగా కసరత్తు సాగుతోంది. రాష్ట్ర ప్రభుత్వం సానుకూలంగా ఉండటంతో కేంద్రం కూడా దీనికి పచ్చజెండా ఊపే అవకాశం కనిపిస్తోంది. ఈ నెల 25న ప్రవేశపెట్టే రైల్వే బడ్జెట్‌లో సూత్రప్రాయంగానైనా దీని ప్రస్తావన ఉంటుందని రాష్ట్ర ప్రభుత్వం భావిస్తోంది.
  
  ప్రయోజనాలు ఏమిటి..?
  విదేశాలకు సరుకు ఎగుమతుల్లో నౌకాశ్రయాల పాత్ర కీలకం. తీరప్రాంతాలు వేగంగా అభివృద్ధి చెందేందుకు ఇవి దోహదం చేస్తాయి. కానీ తీరప్రాంతాలు లేని చోట్ల ఆ వెలితి కనిపిస్తోంది. ఇది పెట్టుబడులపైనా ప్రభావం చూపుతోంది. తీరప్రాంతం లేని చోట్ల ఉత్పత్తులను రోడ్డు మార్గం ద్వారానే తరలించాలి. ఆ ఉత్పత్తులు నౌకాశ్రయాలకు వెళ్లిన తర్వాత కస్టమ్ సంబంధిత తంతు ఇతర పనులు పూర్తి కావటానికి సమయం పడుతోంది. అప్పటి వరకు ఉత్పత్తులు అక్కడే ఉండిపోతున్నాయి. దీంతో కంపెనీలపై ఆర్థిక భారం పడుతోంది. ఈ నేపథ్యంలో తీర ప్రాంతాలు లేని చోట్ల డ్రైపోర్టులు నిర్మించి అన్నిరకాల ఎగుమతి తంతులను అక్కడే పూర్తి చేసి రైలు మార్గం ద్వారా నౌకాశ్రయాలకు ఉత్పత్తులు తరలించాలని కేంద్రం భావిస్తోంది.
  
 మరోవైపు కొత్తగా ఏర్పడ్డ రాష్ట్రం కావటంతో పెట్టుబడులను ఆకట్టుకునే క్రమంలో డ్రైపోర్టులు ఏర్పాటు చేసుకోవాలని తెలంగాణ ప్రభుత్వం భావిస్తోంది. ఇటీవల కేంద్రంతో చర్చలు జరిపి కనీసం నాలుగైదు చోట్ల డ్రైపోర్టుల ఏర్పాటుకు అవకాశం కల్పించాలని కోరింది. ఈ క్రమంలో బీబీనగర్ రైల్వే స్టేషన్‌ను అనుసంధానిస్తూ డ్రైపోర్టు నిర్మించాలని స్థానిక ఎంపీ బూర నర్సయ్యగౌడ్ ఇటీవల రైల్వే శాఖకు ప్రతిపాదించారు. వచ్చే రైల్వే బడ్జెట్‌లో దీనికి స్థానం కల్పించాలని ఆయన రైల్వే మంత్రి సురేశ్‌ప్రభును కోరారు. డ్రైపోర్టు ఏర్పాటైతే హైదరాబాద్ చుట్టుపక్కల భారీగా పెట్టుబడులు పెట్టేందుకు బడా సంస్థలు ముందుకు వస్తాయని, ఇది హైదరాబాద్‌తోపాటు సమీప ప్రాంతాల అభివృద్ధికి దోహదం చేస్తుంది.


 రైల్వే బడ్జెట్‌లో తమిళనాడుకు ప్రత్యేకంగా కేటాయింపులు జరపాలని ప్రధాని నరేంద్ర మోదీకి  సీఎం జయలలిత విజ్ఞప్తి చేశారు. పాత పథకాలకు నిధులు, కొత్త ప్రాజెక్టులకు ఆమోద ముద్ర వేయాలని కోరారు. గురువారం ప్రధాని నరేంద్ర మోదీకి లేఖ రాశారు. అందులో రాష్ట్రంలో  పెండింగ్‌లో ఉన్న పథకాల పనులు, కొత్త ప్రాజెక్టులను వివరించారు.
  
  సాక్షి, చెన్నై : తమిళనాడు అభివృద్ధి పథంలో దూసుకెళుతోందని, ఇక్కడ పెట్టుబడులకు పెద్ద ఎత్తున విదేశీ సంస్థలు ముందుకు వస్తున్నాయని వివరించారు. పరిశ్రమల స్థాపన , నిర్మాణాల వేగం పెరిగిందని పేర్కొంటూ, విజన్ 2023 గురించి వివరించారు. తాము రూపకల్పన చేసిన విజన్ మేరకు పది ముఖ్య రైల్వే పథకాలను గురించి ఇప్పటికే రైల్వే శాఖ దృష్టికి తీసుకెళ్లి ఉన్నామన్నారు.  ఇందులో చెన్నై - కన్యాకుమారి రెండు రైల్వే మార్గం, శ్రీ పెరంబదూరు - గిండి మధ్య గూడ్స్ రైల్వే మార్గం, చెన్నై , తూత్తుకుడి మధ్య మరో గూడ్స్ మార్గం , చెన్నై - మదురై, కన్యాకుమారి,  మదురై - కోయంబత్తూరు, కోయంబత్తూరు - చెన్నై, చెన్నై - బెంగళూరుల మధ్య సూపర్ ఫాస్ట్ రైళ్ల కోసం ప్రత్యేక మార్గాలు ఉన్నాయని వివరించారు.
  
  అలాగే, చెన్నై - బెంగళూరు గూడ్స్ ట్రాక్, ఆవడి - గూడువాంజేరి  గూడ్స్ రైళ్ల ట్రాక్, ఆవడి- హార్బర్ వైపుగా మరో ట్రాక్ పనులు గుర్తించామని సూచించారు. వీటిలో తొలి ప్రాధాన్యతగా చెన్నై -తూత్తుకుడి గూడ్స్ రైలు మార్గం, మదురై - కన్యాకుమారి మధ్య సూపర్ ఫాస్ట్‌కు ప్రత్యేక మార్గాన్ని ఎంపిక చేశామని పేర్కొన్నారు. తమ విజన్‌లో ఉన్న పథకాలకు కేంద్ర, రాష్ట్ర ప్రభుత్వాల భాగస్వామ్యంతో చే పట్టేందుకు సిద్ధం అని , ఇందుకు తగ్గ ప్రాధాన్యత ఇవ్వాలని కోరారు. ఇక, గతంలో ప్రవేశ పెట్టిన రైల్వే బడ్జెట్‌లలో తమిళనాడుకు పథకాలు, ప్రాజెక్టుల్ని కేటాయించారని, అయితే, అవి అమలుకు నోచుకోక పోవడం శోచనీయమన్నారు.
  
  ఈ పథకాల్ని అమల్లోకి తెచ్చే విధంగా ప్రత్యేక కేటాయింపులు, ప్రాధాన్యత ఇవ్వాలని విన్నవించారు. ఆ మేరకు గతంలో జరిగిన బడ్జెట్ ప్రకటనల్లోని ప్రాజెక్టులను తమరి దృష్టికి తీసుకొస్తున్నట్టు వివరించారు. ఇందులో మొరన్‌పూర్ - ధర్మపురి కొత్త రైల్వే మార్గం, చెన్నై సెంట్రల్- విల్లివాక్కం ఐదు, ఆరో మార్గం, విల్లివాక్కం - కాట్పాడి కొత్త మార్గం , అరియలూరు - చిదంబరం మీదుగా ఆత్తూరుకు  కొత్త మార్గం, దిండివనం - కన్యాకుమారి రెండో ట్రాక్ పనులు, బోడి - కొట్టాయం  కొత్త మార్గం, రేణిగుంట - అరక్కోణం రెండో రైల్వే  మార్గం,గుమ్మిడి పూండి - అత్తి పట్టు మధ్య మూడు, నాలుగో మార్గం పనులు ఉన్నాయని గుర్తు చేశారు.
  
   అలాగే,  కృష్ణగిరి మీదుగా జోలార్ పేట నుంచి హోసూరుకు కొత్త మార్గం, మైలాడుతురై నుంచి తిరుక్కడయూర్, తరంగంబాడి, తిరునల్లారు మీదుగా కారైక్కాల్‌కు కొత్త మార్గం, తూత్తుకుడి  నుంచి తిరుచెందూరు మీదుగా రామనాధ పురం, కన్యాకుమారిలకు కొత్త మార్గం, రామనాధపురంకు మీదుగా తూత్తుకుడి కారైక్కుడి మీదు కొత్త మార్గం,  శీర్గాలి , కారైక్కాల్ కొత్త మార్గం, పెరంబలూరు, అరియలూరు, కారైక్కాల్ మీదుగా సేలం, నామక్కల్‌కు కొత్త మార్గం, మదురై - బోడి నాయకనూర్ మార్గం విస్తరణ,
  
   బోడి నాయకనూర్- ఎర్నాకులం కొత్త మార్గం, బోడి నాయకనూర్ , తేని మీదుగా దిండుగల్ కుములికి కొత్త మార్గం, తిరునల్వేలి - నాగర్ కోవిల్ మీదుగా కన్యాకుమారికి రెండో మార్గం, సైదా పేట శ్రీ పెరంబదూరు కొత్త మార్గం, చెన్నై నుంచి అరియలూరుకు కొత్త రైల్వే మార్గం, మేలూరు మీదుగా మదురై కారైక్కుడి కి కొత్త మార్గం పనులు ఉన్నాయని వివరించా రు. ఈపనులు చేపట్టేందుకు తగ్గ నిధు లు కేటాయించాలని, తమిళనాడుకు ప్రత్యేకంగా కేటాయింపులు జరపాలని విన్నవించారు. కాగా, అంతకు ముందు సచివాలయంలో వీడియో కాన్పెరెన్స్ ద్వారా సీఎం జయలలిత పలు ప్రారంభోత్సవాలు , శంకుస్థాపనలు చేశారు.
  
  ప్రారంభోత్సవాలు : పెరంబలూరులో నిర్మించిన వృత్తి శిక్షణా కేంద్రాన్ని, కార్మిక శాఖ నేతృత్వంలో రూ. తొమ్మిది కోట్లతో నిర్మించిన భవనాలను, రూ. 30 కోట్లతో కుటీర, చిన్నతరహా పరిశ్రమల కోసం నిర్మించిన భవనాలు ప్రారంభించారు. అలాగే,  రూ. 49 కోట్లతో కార్మిక శాఖ కోసం నిర్మించనున్న భవనం కోసం శంకుస్థాపన చేశారు. ఇక, భవన నిర్మాణ రంగంలో ఉన్న కూలి కార్మికుల కోసం వైద్య సేవల్ని అందించేందుకు వీలుగా మూడు ప్రత్యేక అంబులెన్స్‌లకు జెండా ఊపారు.  ఇక, నిర్మాణ రంగంలో ఉన్న కార్మికులు ప్రమాద వశాత్తు మరణిస్తే నష్ట పరిహారంగా అందిస్తున్న రూ. లక్షను రూ. ఐదు లక్షలకు పెంచుతూ నిర్ణయం తీసుకున్నారు. ఈ పెంపును అమల్లోకి తెస్తూ, ఇటీవల సేలంలో మరణించిన కుమార్ భార్య భానుమతికి రూ. ఐదు లక్షలకు గాను చెక్కును సీఎం జయలలిత అందజేశారు.
  


 న్యూఢిల్లీ: త్వరలోనే రైల్వే బడ్జెట్ కూత పెట్టనుంది. అయితే, కానీ ఆ కూత సామాన్యుల గుండెల్లో భయం పుట్టించకపోవచ్చు. ఎందుకంటే ఈసారి రైల్వే ప్రయాణీకుల ఛార్జీలు పెంచడం లేదని కేంద్ర ప్రభుత్వ వర్గాల సమాచారం. ఈ బడ్జెట్లో ప్రయాణీకులపై ఎలాంటి బరువులు పెట్టకుండానే రైల్వే బడ్జెట్ను పరుగులుపెట్టించేందుకు కేంద్రం ఇప్పటికే అంతా సిద్ధం చేసినట్లు తెలుస్తోంది.
 
 ప్రభుత్వం పది శాతం టికెట్ చార్జీలను పెంచాలని తొలుత భావించిందని, దీనిద్వారా కేవలం రూ.4,500 కోట్ల ఆదాయం మాత్రమే సమకూరనుండగా.. అది కాస్త ఈ బడ్జెట్పై ఉండే సానూకూల దృక్ఫథాన్ని దూరం చేస్తుందని, ప్రజలకు ప్రభుత్వం కోపం వస్తుందని కేంద్రం గ్రహించినట్లు కీలక వర్గాల సమాచారం. అయితే, ఈ మొత్తం ఆదాయాన్ని వేరే ఇతర కార్యకలాపాల ద్వారా, ప్రకటనల ద్వారా రాబట్టాలని భావిస్తున్నట్లు సమాచారం. కేంద్రంలో అధికారంలోకి వచ్చిన ఎన్డీయే ప్రభుత్వం ఇప్పటికే రెండు సార్లు రైల్వే ప్రయాణీకులపై ఛార్జీల భారాన్ని మోపింది. గత ఏడాది నవంబర్ లోనే రెండోసారి ఛార్జీలు పెంచింది. ఈ నేపథ్యంలో మరోసారి అలాంటి నిర్ణయం తీసుకుంటే ప్రతికూల ప్రభావం పడే అవకాశం ఉందని ఈసారి వెనక్కి తగ్గుతున్నట్లు సమాచారం.


 నిధుల కొరతతో ప్రయాణ చార్జీలు పెంచే యోచన
 ♦ 5% నుంచి 10% పెరిగే అవకాశం
  
  న్యూఢిల్లీ: ప్రయాణికులకు షాక్ ఇచ్చేందుకు రైల్వే శాఖ సిద్ధమైంది. నిధుల కొరత నేపథ్యంలో ప్రయాణ చార్జీలు పెంచాలని యోచిస్తోంది. రానున్న బడ్జెట్‌లో రైల్వే ప్రయాణికుల చార్జీలను 5 నుంచి 10 శాతం పెంచే అవకాశం ఉంది. ప్రయాణ, సరుకు రవాణా చార్జీల ద్వారా ఏటా వచ్చే ఆదాయం గణనీయంగా తగ్గడం, ఏడో వేతన సంఘం సిఫార్సుల మేరకు రూ. 32 వేల కోట్ల అదనపు భారం పడిన నేపథ్యంలో ప్రయాణ చార్జీల పెంపు ప్రతిపాదనను పరిశీలిస్తున్నట్టు రైల్వే శాఖ వర్గాలు చెపుతున్నాయి.
 
 స్థూల బడ్జెట్ తోడ్పాటు కింద రైల్వేలకు ఇచ్చే నిధుల్లో 2015-16 ఆర్థిక సంవత్సరానికి ఆర్థిక శాఖ రూ. 8 వేల కోట్ల మేరకు కోత విధించడమూ ఈ ప్రతిపాదనకు ఊతం ఇస్తోంది. అయితే ప్రయాణికుల చార్జీల, సరుకు రవాణా చార్జీల పెంపుతో పాటు పలు ప్రతిపాదనలు ఉన్నాయని, ఇప్పటి వరకూ దేనిపైనా తుది నిర్ణయం తీసుకోలేదని రైల్వే వర్గాలు చెపుతున్నాయి. ప్రయాణ చార్జీలు పెంచాలా లేదా అనేదానిపై త్వరలోనే నిర్ణయం తీసుకోనున్నట్టు తెలిపాయి. అయితే బడ్జెట్‌లోనే చార్జీలు పెంచడం తప్పనిసరి కాదని, ఎప్పుడైనా చార్జీలు పెంచొచ్చన్నాయి. అయితే ఈ నెల 25న ప్రవేశపెట్టే రైల్వే బడ్జెట్‌లో ప్రయాణ చార్జీలు పెంచే అవకాశం ఉందని రైల్ భవన్‌లో జోరుగా ఊహాగానాలు సాగుతున్నాయి.
 
 మార్చిలో వేసవి సీజన్ ప్రారంభం కానుండటంతో ప్రయాణాల జోరు పెరిగే నేపథ్యంలో చార్జీలు పెంచి సొమ్ము చేసుకోవాలని భావిస్తున్నట్టు చెపుతున్నాయి. ప్రస్తుతం ఏసీ తరగతి చార్జీలు, సరుకు రవాణా చార్జీలు ఎక్కువగానే ఉన్నాయి. ఒకవేళ వీటి ధరలు పెంచినట్లయితే స్టీల్, సిమెంట్, కోల్, ముడి ఇనుము, ఎరువుల రవాణా తగ్గిపోయే అవకాశం ఉంది. ఈ ఏడాది జనవరి వరకూ ప్రయాణ చార్జీలు, సరుకు రవాణా చార్జీలు కలిపి రైల్వే శాఖ మొత్తం ఆదాయం రూ. 1,36,079.26 కోట్లు. ఇందులో సుమారు 3.77 శాతం తగ్గుదల నమోదైంది. ఎన్‌డీఏ అధికారంలోకి వచ్చిన తర్వా త 2014లో అన్ని రకాల ప్రయాణ చార్జీలను 14 శాతం పెంచింది. గత ఏడాది మరో పది శాతం పెంచింది.


 25న రైల్వే బడ్జెట్.. 29న కేంద్ర బడ్జెట్
 * రెండు విడతలుగా పార్లమెంటు సమావేశాలు
 * ఈ నెల 23 నుంచి మార్చి 16 వరకూ తొలి విడత
 * ఏప్రిల్ 25 నుంచి మే 13 వరకూ రెండో విడత భేటీ
  
 న్యూఢిల్లీ: పార్లమెంటు బడ్జెట్ సమావేశాలు ఈ నెల 23వ తేదీ నుంచి మొదలుకానున్నాయి. ప్రభుత్వ ఆర్థిక వ్యవహారాలపై దృష్టి కేంద్రీకరించే ఈ సమావేశాల్లో ఈ నెల 25న  రైల్వే బడ్జెట్‌ను, నెలాఖరు రోజైన 29వ తేదీన కేంద్ర ప్రభుత్వ బడ్జెట్‌ను ప్రవేశపెట్టనున్నారు.
 
 సాధారణ బడ్జెట్ ప్రవేశపెట్టటానికి ముందు ఈ నెల 26న ఆర్థిక సర్వేను పార్లమెంటుకు సమర్పిస్తారు. బడ్జెట్ సమావేవాలు రెండు విడతలుగా జరుగుతాయి. తొలి విడత ఈ నెల 23 నుంచి మార్చి 16 వరకూ.. రెండో విడత ఏప్రిల్ 25 నుంచి మే 13 వరకు కొనసాగుతాయి. మార్చి 17 నుంచి ఏప్రిల్ 24 వరకూ పార్లమెంటు సమావేశాలకు విరామం ఉంటుంది. ఈ సమయంలో పార్లమెంటరీ స్థాయీ సంఘాలు వివిధ బడ్జెట్ బిల్లులను పరిశీలిస్తాయి. మొత్తం 81 రోజుల పాటు బడ్జెట్ సెషన్ కాలం ఉండగా.. అందులో 31 రోజులు పార్లమెంటు సమావేశమవుతుంది. ఈ నెల 23వ తేదీన ఉభయ సభల సంయుక్త సమావేశంలో రాష్ట్రపతి ప్రసంగిస్తారు.
  
 సూచనలు, సెలవులు దృష్టిలో ఉంచుకుని నిర్ణయం...
 బడ్జెట్ సమావేశాల షెడ్యూలును గురువారం ఢిల్లీలో కేంద్ర హోంమంత్రి రాజ్‌నాథ్ అధ్యక్షతన సమావేశమైన పార్లమెంటరీ వ్యవహారాలపై మంత్రివర్గ సమావేశంలో ఖరారు చేసినట్లు పార్లమెంటరీ వ్యవహారాల మంత్రి వెంకయ్య మీడియాకు తెలిపారు. లోక్‌సభ స్పీకర్, రాజ్యసభ డిప్యూటీ చైర్మన్‌లు కామన్వెల్త్ పార్లమెంటరీ సదస్సుకు హాజరయ్యేందుకు వీలుగా, వివిధ పార్టీల నేతల సూచనలు, ఏప్రిల్‌లో సెలవులను పరిగణనలోకి తీసుకుని బడ్జెట్ భేటీ తేదీలను నిర్ణయించినట్లు చెప్పారు.
 
 బడ్జెట్ సమావేశాలు జరుగుతుండగానే పలు రాష్ట్రాల శాసనసభలకు ఎన్నికల ప్రక్రియ మొదలుకానుందని.. పార్లమెంటు సమావేశాల్లో విరామం వద్దని తమకు సలహాలు అందాయని చెప్పారు. 2011లో బడ్జెట్ సమావేశాల సమయంలో పలు రాష్ట్రాలకు శాసనసభ ఎన్నికల ప్రక్రియ మొదలైనందున.. బిల్లులను స్థాయీ సంఘాలకు నివేదించరాదని నిర్ణయించిందని వెంకయ్య ప్రస్తావించారు.
  
 పనిదినాలు తగ్గించొద్దు: ప్రతిపక్షాలు
 బడ్జెట్ సమావేశాల ఖరారుపై సీసీపీఏ భేటీకి ముందు ప్రభుత్వం అఖిలపక్ష సమావేశాన్ని నిర్వహించింది. ఐదు రాష్ట్రాల్లో అసెంబ్లీ ఎన్నికలు ఉన్నప్పటికీ బడ్జెట్ సమావేశాలకు కోత పెట్టరాదని ప్రతిపక్షాలు డిమాండ్ చేశాయి. ‘‘సమావేశాల పనిదినాలను తగ్గించరాదు.  మంత్రిత్వశాఖలకు చేసిన బడ్జెట్ కేటాయింపులను స్థాయీ సంఘాలు పరిశీలించేందుకు వీలుగా సమావేశాల మధ్యలో పూర్తి విరామం ఇవ్వాలి’’ అని రాజ్యసభలో ప్రతిపక్ష నేత  ఆజాద్  మీడియాతో పేర్కొన్నారు.
 
 పార్లమెంటు పనిదినాలను తగ్గించరాదన్న అంశంపై పార్టీల మధ్య ఏకాభిప్రాయం ఉందని జేడీయూ నేత శరద్‌యాదవ్ చెప్పారు. పార్లమెంటు సమావేశాలకు సంబంధించి ప్రభుత్వం ప్రతి ఏటా కేలండర్‌ను రూపొందించి ప్రకటించాలని.. దానివల్ల పార్లమెంటు సమావేశాలు జరిగే తేదీలను దృష్టిలో పెట్టుకుని కేంద్ర ఎన్నికల కమిషన్ ఎన్నికల తేదీలను నిర్ణయించటానికి వీలుంటుందని సీపీఎం నేత సీతారాం ఏచూరి సూచించారు.
  
 జీఎస్‌టీ బిల్లు ఆమోదానికి సహకరించాలి
 ఈ బడ్జెట్ సమావేశాల్లో కీలకమైన వస్తువులు, సేవల పన్ను (జీఎస్‌టీ) బిల్లుతో పాటు రియల్ ఎస్టేట్ తదితర అంశాలకు సంబంధించిన బిల్లులు పార్లమెంటు ఆమోదం పొందుతాయని వెంకయ్యనాయుడు ఆశాభావం వ్యక్తంచేశారు. ఈ బిల్లులు దేశ విస్తృత ప్రయోజనాలకు సంబంధించినవి కాబట్టి వాటిని ఆమోదించటానికి సహకరించాలని ప్రతిపక్షాలకు, ప్రత్యేకించి కాంగ్రెస్ పార్టీకి ఆయన విజ్ఞప్తిచేశారు.
 
 కాంగ్రెస్, ఇతర ప్రతిపక్ష పార్టీలు సభా కార్యక్రమాలను స్తంభింపజేసి, కీలక సంస్కరణల బిల్లులను అడ్డుకున్న గత రెండు సమావేశాల తరహాలో కాకుండా.. రాబోయే బడ్జెట్ సమావేశాలు నిర్మాణాత్మకంగా, సానుకూలంగా జరుగుతాయని ఆశిస్తున్నట్లు పార్లమెంటరీ వ్యవహారాల సహాయమంత్రి ముక్తార్ అబ్బాస్‌నక్వీ పేర్కొన్నారు. ‘‘ఈ సమావేశాలు సరైన రీతిలో సాగేందుకు వీలుగా మేం అందరితో చర్చిస్తున్నాం. అన్ని పార్టీలతోనూ అధికారికంగా, అనధికారికంగా మాట్లాడుతున్నాం’’ అని చెప్పారు.


 ♦ కర్ణాటకకు మంజూరైన రైలు బోగీ ఫ్యాక్టరీ ఉత్పత్తికి సిద్ధం
 ♦ ఆరేళ్లు దాటినా పునాదిరాయి పడని కాజీపేట వ్యాగన్ ఫ్యాక్టరీ
 ♦ కర్నూలుకు రెండు వర్క్‌షాపులు మంజూరైనా ఫలితం శూన్యం
 ♦ కేంద్రంపై ఒత్తిడి తేలేకపోతున్న తెలుగు రాష్ట్రాలు
  
  సాక్షి, హైదరాబాద్: రైల్వే ప్రాజెక్టు ప్రకటన... చకచకా నిధుల విడుదల.. సకాలంలో పనులు పూర్తి.. ఉత్పత్తి ప్రారంభం.. కేవలం రెండేళ్ల పరిణామక్రమమిది.పోరాటం ఫలితంగా ఓ ప్రాజెక్టు మంజూరు.. ఆరేళ్లు గడిచినా అతీగతీ లేని పనులు.. అసలు ఆ ప్రాజెక్టు ఉంటుందో ఊడుతుందో తెలియని అయోమయం.
 
  మొదటిది కర్ణాటకలోని యాద్గిర్ వద్ద బడియాల్ గ్రామంలో రైలు బోగీ ఫ్రేములు తయారయ్యే ఫియెట్ బోగీ యూనిట్ పరిస్థితి. రెండోది వరంగల్ జిల్లా కాజీపేటకు మంజూరైన వ్యాగన్ ఫ్యాక్టరీ దుస్థితి. రెంటికి ఎంత తేడా... ‘వడ్డించేవాడు మనవాడైతే’ తరహాలో కర్ణాటక ఆ ప్రాజెక్టును సిద్ధం చేసుకుంటే... తెలంగాణ ప్రభుత్వ ఒత్తిడి లేకపోవడంతో చేతికందిన ప్రాజెక్టును కోల్పోయే పరిస్థితి. మరో రైల్వే బడ్జెట్ పట్టాలెక్కేందుకు సిద్ధమవుతున్న తరుణంలోనూ తెలంగాణతోపాటు ఆంధ్రప్రదేశ్‌కు మంజూరైన ప్రాజెక్టుల విషయంలో రెండు రాష్ట్రాలూ కేంద్రంపై ఒత్తిడి తేలేకపోతున్నాయి.
 
 మంజూరైన ప్రాజెక్టుల ఊసే లేని సమయంలో కొత్త ప్రాజెక్టుల రాక దాదాపు అసాధ్యమే. ఫలితంగా రెండు తెలుగు రాష్ట్రాలు తీవ్రంగా నష్టపోనున్నాయి. కర్ణాటక కాంగ్రెస్ సీనియర్ నేత మల్లికార్జున ఖర్గే రైల్వే మంత్రిగా ఉండగా తాను ప్రాతినిధ్యం వహిస్తున్న ప్రాంతానికి భారీ రైల్వే ప్రాజెక్టు సాధించాలని భావించారు. వెంటనే 2014 రైల్వే బడ్జెట్‌లో యాద్గిర్ ప్రాంతానికి రైల్వే ఫియెట్ బోగీ తయారీ ఫ్యాక్టరీని మంజూరు చేశారు. రూ.750 కోట్లతో పనులు మొదలుపెట్టారు. ఇప్పుడవి పూర్తికావచ్చాయి. జూన్‌లో ఉత్పత్తి మొదలుకానుంది. ఆ యూని ట్‌లో పనిచేసేందుకు ఆసక్తి ఉన్నవారు పేర్లు ఇవ్వాలంటూ రైల్వే బోర్డు నుంచి అన్ని జోన్లకు సర్క్యులర్ వెళ్లింది. ఏడాదికి 600 బోగీ ఫ్రేములు ఇక్కడ తయారు కానున్నాయి. వేలమందికి ఉపాధి దొరకనుంది.
 
  అంతా డోలాయమానం
  కాజీపేటకు మూడు దశాబ్దాల క్రితమే కోచ్ ఫ్యాక్టరీ మంజూరైంది. రాజకీయ పరిణామాలతో దాన్ని రాజీవ్‌గాంధీ ప్రధానిగా ఉండగా పంజాబ్‌లోని కపుర్తలాకు మార్చారు. దాని స్థానంలో ఆరేళ్ల క్రితం కాజీపేటకు వ్యాగన్ ఫ్యాక్టరీ మంజూరు చేశారు. దానికి సకాలంలో రాష్ట్ర ప్రభుత్వం స్థలం ఇవ్వలేదనే కారణంతో పనులకు శ్రీకారమే చుట్టలేదు. ఇటీవల దాన్ని కూడా రద్దు చేసి వ్యాగన్ మరమ్మతు వర్క్‌షాపుగా మార్చాలనే నిర్ణయానికి రైల్వే బోర్డు వచ్చినట్టు తెలిసింది. తుదకు అది కూడా మంజూరవుతుందనే నమ్మకం లేకుండాపోయింది. సికింద్రాబాద్ లాలాగూడలో ఉన్న 300 పడకల రైల్వే ఆసుపత్రికి అనుబంధంగా మౌలాలీలో మెడికల్ కళాశాల మంజూరై నాలుగేళ్ల క్రితం బడ్జెట్‌లో చోటు దక్కించుకున్నా ఇప్పటి వరకు దాని ఊసేలేదు. ఇప్పుడు దాని అవసరం లేదని రైల్వే బోర్డు భావిస్తోందట. దీంతోపాటు సికింద్రాబాద్‌లో ‘సెంట్రలైజ్డ్ ఇన్‌స్టిట్యూట్ ఫర్ ది ఫైనాన్స్ ఆఫీసర్స్’ పేరుతో అధికారుల శిక్షణ కేంద్రం మంజూరైనా అది కూడా అతీగతీ లేదు.
  
  ‘సహాయ మంత్రి’కి మొండిచేయి
   రైల్వే మంత్రిగానో, సహాయ మంత్రిగానో ఉన్నవారు వారి ప్రాంతానికి ప్రాజెక్టులు మంజూరు చేయించుకోవటం సహజం. ఇదే పంథాలో కర్నూలుకు రైల్వే సహాయమంత్రి హోదాలో కోట్ల సూర్యప్రకాశ్‌రెడ్డి రెండు ప్రాజెక్టులు మంజూరు చేయించారు. జీవితకాలం పూర్తి కాకుండా పాడయ్యే కోచులను బాగు చేసే ‘కోచ్ మిడ్‌లైఫ్ రిహాబిలిటేషన్ వర్క్‌షాపు’, డెమూ రైలు బోగీలను మరమ్మతు చేసే మరో వర్క్‌షాపును 2013లో మంజూరు చేయించారు. వీటికి భూమినీ సిద్ధం చేశారు. కానీ వెంటనే పనులు మొదలు పెట్టించలేకపోయారు. యూపీయే స్థానంలో ఎన్డీయే అధికారంరోకి రావటంతో అవి కాస్తా అటకెక్కాయి. రైల్ నీరు తయారయ్యే ఫ్యాక్టరీ విజయవాడకు మంజూరై మూడేళ్లవుతున్నా అది కూడా అంతే.


 రైల్వే బడ్జెట్ సన్నాహక సమావేశంలో ఎంపీల ఆగ్రహం
 ♦ ఈ భేటీలతో టైం వేస్ట్ తప్ప.. ఫలితమేముంది?
 ♦ మా ప్రతిపాదనలను పట్టించుకునే నాథుడే లేడు
 ♦ మేం గతంలో చేసిన సూచనలను ఎందుకు పక్కన పడేశారు
 ♦ జీఎం చెప్పేది వినడం తప్ప చేసేదేమీ లేదు
 ♦ మళ్లీ భేటీ ఏర్పాటు చేస్తే రైల్వే మంత్రి లేదా బోర్డు చైర్మన్ రావాలి
  
  సాక్షి, హైదరాబాద్: ‘‘రెండు దశాబ్దాల కిందట మంజూరైన ప్రాజెక్టు పనులు ఇప్పటికీ మొదలు కాలేదంటే రైల్వేశాఖ పనితీరు ఎలా ఉందో అర్థమవుతోంది. బడ్జెట్‌లో నిధులిచ్చినా పనులు మొదలు కాలేదంటే నా జీవితంలో దాన్ని చూస్తానన్న నమ్మకం పోయింది. దీనిపై పార్లమెంటులో సభాహక్కుల తీర్మానం పెడతా.. అక్కడ నిరాహారదీక్షకు కూర్చుంటా..’’
  - నల్లగొండ ఎంపీ గుత్తా సుఖేందర్‌రెడ్డి
  
  ‘‘ఎలాంటి ఫలితం లేని ఈ సమావేశాలతో మా విలువైన సమయాన్ని ఎందుకు వృథా చేస్తున్నారు. వచ్చే సంవత్సరం మళ్లీ భేటీ ఏర్పాటు చేస్తే రైల్వే మంత్రి లేదా రైల్వే బోర్డు చైర్మన్ రావాల్సిందే..’’
  - మహబూబ్‌నగర్ ఎంపీ జితేందర్‌రెడ్డి
  
  ...రైల్వే బడ్జెట్ నేపథ్యంలో దక్షిణ మధ్య రైల్వే జీఎం రవీంద్రగుప్తా ఏర్పాటు చేసిన సమావేశంలో ఎంపీల ఆగ్రహావేశాలివీ! బుధవారం దక్షిణ మధ్య రైల్వేలోని హైదరాబాద్, సికింద్రాబాద్ డివిజన్ల పరిధిలోని ఎంపీలతో జీఎం రైల్‌నిలయంలో భేటీ నిర్వహించారు. ఎంపీలు నగేశ్, బూర నర్సయ్య గౌడ్, కొండా విశ్వేశ్వరరెడ్డి, బి.వినోద్‌కుమార్, సీతారాం నాయక్, జితేందర్‌రెడ్డి, సీహెచ్ మల్లారెడ్డి, నంది ఎల్లయ్య, గుత్తా సుఖేందర్‌రెడ్డి, బాల్క సుమన్, బీబీ పాటిల్, పసునూరి దయాకర్, రాపోలు ఆనంద భాస్కర్, దేవేందర్‌గౌడ్ తదితరులు ఇందులో పాల్గొన్నారు. ఈ సందర్భంగా రైల్వే పనితీరుపై ఎంపీలు నిప్పులు చెరిగారు. ప్రజలేం కోరుకుంటున్నారో గుర్తించి రైల్వే శాఖ ముందు ప్రతిపాదనలు ఉంచితే వాటిని పట్టించుకునే నాథుడే లేడంటూ అగ్గి మీద గుగ్గిలమయ్యారు. డిమాండ్లను రైల్వే బోర్డుకు చేరవే సి చేతులు దులుపుకునే ఇలాంటి సమావేశాలతో.. సమయం వృథా తప్ప మరో ఉపయోగమే లేదంటూ మండిపడ్డారు.
 
  ఈసారి వాళ్లొస్తేనే మీటింగ్..
  గత బడ్జెట్ ముందు ఇదే తరహాలో నిర్వహించిన సమావేశంలో తాము చేసిన సూచనలను పట్టించుకోకపోవటాన్ని ఎంపీలు ఈ సందర్భంగా లేవనెత్తి ఆగ్రహం వ్యక్తం చేశారు. తమ మాటలు వినడం తప్ప జీఎం చేసేదేమీ లేనప్పుడు ఈ సమావేశాలెందుకని ఎంపీ జితేందర్‌రెడ్డి ప్రశ్నించారు. రైల్వే మంత్రి లేదా రైల్వే బోర్డు చైర్మన్ పాల్గొంటే తప్ప వచ్చేసారి ఇలాంటి సమావేశాలు ఏర్పాటు చేయొద్ద న్నారు. ప్రజాప్రతినిధులుగా ఉన్నప్పటికీ అధికారులు తమను పట్టించుకోవటం లేదని బాల్క సుమన్ మండిపడ్డారు. నియోజకవర్గానికి ఓ సీనియర్ అధికారిని నియమించి తమతో కలిసి పనుల పురోగతిని పరిశీలించే ఏర్పాటు చేస్తేనే ఉపయోగం ఉంటుందని సుమన్‌తోపాటు జితేందర్‌రెడ్డి పేర్కొన్నారు.
 
  వాకౌట్ చేసిన గుత్తా
  రైల్వే శాఖ పనితీరుపై ఆగ్రహం వ్యక్తం చేస్తూ ఎంపీ గుత్తా సుఖేందర్‌రెడ్డి సమావేశం నుంచి వాకౌట్ చేశారు. నల్లగొండ-మాచెర్ల మధ్య 20 ఏళ్ల కిందట కొత్త లైన్ మంజూరైందని, దాన్ని 2011 బడ్జెట్‌లో ప్రత్యేక ప్రాజెక్టుగా గుర్తించారని చెప్పారు. గత బడ్జెట్‌లో రూ.10 కోట్లు కేటాయించారని కానీ ఇప్పటివరకు పనులే ప్రారంభించలేదన్నారు. కోట్ల సూర్యప్రకాశ్‌రెడ్డి రైల్వే సహాయ మంత్రిగా ఉండగా.. పనులు  మొదలుపెట్టాలని కోరినా పట్టించుకోలేదన్నా రు. ఇదే విషయమై వచ్చే పార్లమెంటు సమావేశాల్లో సభా హక్కుల తీర్మానం ప్రవేశపెడతామని, అవసరమైతే నిరాహార దీక్షకు దిగుతానని హెచ్చరించారు. తన జీవితకాలంలో ఆ ప్రాజెక్టును చూస్తానన్న నమ్మకం కూడా లేదం టూ సమావేశం నుంచి వాకౌట్ చేశారు. జగ్గయ్యపేట-మేళ్లచెరువు లైన్ విషయంలో భూసేకరణకు సంబంధించి జిల్లా కలెక్టర్, తాను రైతులతో మాట్లాడుతున్నా రైల్వే అధికారులెవరూ రావటం లేదని ఆయన ఆరోపించారు.
 
  కరీంనగర్-ముంబై ఎక్స్‌ప్రెస్ ప్రారంభించండి
  పెద్దపల్లి-నిజామాబాద్ కొత్త మార్గంలో చిన్న బిట్ మాత్రమే పెండింగులో ఉందని, ఆ పనులు వేగంగా పూర్తిచేసి తెలంగాణ ఆవి ర్భావ దినోత్సవమైన జూన్ 2న కరీంనగర్-ముంబై మధ్య కొత్త ఎక్స్‌ప్రెస్ రైలు ప్రారంభించాలని ఎంపీవినోద్ కోరారు. ‘ఈ ప్రాంతం నుంచి ముంబై వెళ్లేవారి సంఖ్య తీవ్రంగా ఉన్నందున నిత్యం 100 బస్సులు తిరుగుతున్నాయి. అంత డిమాండ్ ఉన్న మార్గం అయినందున దీన్ని పరిగణనలోకి తీసుకోవాలి’’ అని కోరారు. అయితే ట్రయల్ రన్ నిర్వహించాల్సి ఉన్నందున డిసెంబర్ వరకు అది సాధ్యం కాదని జీఎం తెలిపారు. మహబూబ్‌నగర్-సికింద్రాబాద్ డబ్లింగ్ పనులు ఆర్‌వీఎన్‌ఎల్‌కు కేటాయించొద్దని, నేరుగా రైల్వే శాఖనే నిర్వహించాలని ఎంపీ జితేందర్‌రెడ్డి కోరారు.
 
 చర్లపల్లి, నాగులపల్లి, హైటెక్‌సిటీ రైల్వే స్టేష న్‌ల వద్ద ఖాళీ స్థలం అందుబాటులో ఉన్నం దున 3 చోట్ల భారీ టెర్మినళ్లు నిర్మించి ప్రస్తుత స్టేషన్‌లపై భారం తగ్గించాలని వినోద్ సూచిం చారు. బోగస్ ఎస్సీ, ఎస్టీ సర్టిఫికెట్లతో కొందరు రైల్వే ఉద్యోగాలు పొందారని, వారిని గుర్తించి విధుల్లోంచి తొలగించి కేసులు నమోదు చేయాలని బాల్క సుమన్ డిమాండ్ చేశారు. రైల్వేలోని గ్రూప్-డి పోస్టుల్లో తెలంగాణ వారిని కాదని యూపీ, బిహార్, రాజస్థాన్ వారిని స్థాని కంగా నియమించటాన్ని తప్పు పట్టారు. సమ్మక్క జాతర నేపథ్యంలో విజయవాడ-బల్లార్షా మధ్య ప్రత్యేక రైళ్లు నడపాలని కోరారు. మరోవైపు కాజీపేటకు మంజూరైన వ్యాగన్ వీల్ ఫ్యాక్టరీ ప్రతిపాదనను రైల్వే అటకెక్కించినట్లు ఈ సమావేశం ద్వారా తేలిపోయింది. అక్కడ వ్యాగన్ మరమ్మతు కేంద్రాన్ని ఏర్పాటు చేసే ఆలోచనలో ఉన్నట్టు జీఎం గుప్తా ఎంపీల దృష్టికి తెచ్చారు.


  ప్రతి ప్లాట్‌ఫాంపై సమస్యలు తిష్ట వేసి ఉన్నవి..
  ప్రాథమిక వైద్యసౌకర్యం అంతంత మాత్రం
  నేడు దక్షిణమధ్య రైల్వే జీఎంతో ఎంపీల భేటీ
  ఆకాంక్షల్ని సాకారం చేయాలంటున్న జిల్లావాసులు
  
  సాక్షి ప్రతినిధి, కాకినాడ :రైల్వే బడ్జెట్.. ఏటా దీనిపై జిల్లావాసుల్లో ఆశలు మోసులెత్తుతుంటాయి. దీర్ఘకాలంగా పెండింగ్‌లో ఉన్న కోటిపల్లి-నర్సాపురం, కాకినాడ-పిఠాపురం రైల్వే లైన్లకు నిధులు, జిల్లాకు కొత్త రైళ్లు, ఉన్నరైళ్లకే ప్రధాన స్టేషన్లలో హాల్ట్ వంటి ఆకాంక్షల సాకారానికి పచ్చజెండా ఊపుతారని ఎదురు చూస్తుంటారు. రైల్వేస్టేషన్లు ఆధునికీకరణకు నోచుకోవాలని కోరుకుంటారు. జనం ఆశలు, ఆకాంక్షలను బలపడేలా బడ్జెట్‌కు ముందు నేతలు హామీలు గుప్పించడమూ రివాజే. అయితే.. అవి సాకారం కావాలంటే బడ్జెట్ రూపకల్పనలో భాగంగా దఫదఫాలుగా జరిగే సమావేశాల్లో జిల్లాప్రజల వాణిని, ఆకాంక్షలను ఎంపీలు బలంగా వినిపించాలి. ఈ క్రమంలో ముందుగా దక్షిణమధ్య రైల్వే జనరల్ మేనేజర్ రవీంద్రగుప్తాతో రాష్ట్ర ఎంపీల సమావేశం గురువారం విజయవాడలో జరగనుంది. ఈ నేపథ్యంలో జిల్లాలోని రైల్వేస్టేషన్ల పరిస్థితిపై ప్రత్యేక కథనం..
  
  జిల్లా ప్రధాన కేంద్రం కాకినాడలో..
  కాకినాడ జిల్లాకు పరిపాలనా కేంద్రమే అయినా హౌరా-చెన్నై మెయిన్ లైన్లో ఉన్న రాజమండ్రితో పోల్చితే అభివృద్ధి అంతంత మాత్రమే. కాకినాడ రైల్వేస్టేషన్‌లో భానుగుడి వైపు ప్లాట్‌ఫాం నిర్మాణానికి గతంలోనే ఆమోదం లభించినా పనులు మాత్రం ప్రారంభం కాలేదు. రోజూ వచ్చే రైళ్లలో సగం మంది ప్రయాణికులు భానుగుడి వైపు దిగుతున్నారు. ఆ వైపు సౌకర్యాలు కల్పించాలి.
  
  రైల్వే స్టేషన్ నుంచి ఆర్టీసీ కాంప్లెక్స్ వైపు వెళ్లడానికి ట్రాక్ వెంబడి రోడ్డును నిర్మించాలి.
  
  కొండయ్యపాలెం రైల్వే ఓవర్ బ్రిడ్జి (ఆర్వోబీ) ఎంత త్వరగా పూర్తయితే కాకినాడలో ట్రాఫిక్ సమస్య అంత వేగంగా నియంత్రణలోకి వస్తుంది. వంతెన పనులన్నీ రైల్వే శాఖ పూర్తి చేసినా రోడ్లు భవనాల శాఖ చేయాల్సిన పనులే మిగిలాయి. స్థానికంగా ఉన్న స్వల్ప అవరోధాలను సత్వరమే పరిష్కరించాలి. ఆర్వోబీకి అనుసంధానంగా ఉన్న రోడ్డు జగన్నాథపురం నుంచి మొదలై కొండయ్యపాలెం వరకూ వస్తుంది. ఆర్వోబీపై నుంచి వచ్చే రోడ్డును ఇటువైపు మాస్టర్‌ప్లాన్‌లో ఉన్న 80 అడుగుల రోడ్డుకు కలిపితే ప్రయాణికులు నేరుగా నాగమల్లి తోట వద్ద మెయిన్‌రోడ్డుకు చేరుకోవచ్చు. ఈ రోడ్డు అందుబాటులోకి వస్తే ఉదయం, సాయంత్రం వేళల్లో ప్రధాన రహదారిపై ట్రాఫిక్ తాకిడి చాలావరకూ తగ్గిపోతుంది.
  
  ఐటీ పార్కు, ఆటోనగర్‌లతో పాటు జనావాసాలు విస్తరిస్తున్న సర్పవరం జంక్షన్‌లో కూడా ఇప్పుడే ఆర్‌వోబీ నిర్మిస్తే భవిష్యత్తులో ఇబ్బందులు తలెత్తవు.
  
  పోర్టు రైల్వేస్టేషన్ దగ్గర రైళ్ల నిర్వహణకు ఒకటీ లేదా రెండు పిట్‌లైన్లు అదనంగా వేయాలి. కాకినాడలో ఆగిపోయే రైళ్లను శుభ్రం చేసి క్షుణ్నంగా తనిఖీ చేయడానికి ఇవి చాలా అవసరం. అంతేకాదు కాకినాడ నుంచి అదనపు రైళ్లు నడపాలన్నా, కొత్త రైళ్లు వేయాలన్నా రైల్వేశాఖ తొలుత చూసేది ఈ పిట్‌లైన్ల సామర్థ్యాన్నే.
  
  వాణిజ్య రాజధాని రాజమండ్రిలో...
  పుష్కరాల సందర్భంగా రాజమండ్రి, గోదావరి రైల్వేస్టేషన్లకు రంగులు వేశారు. గోదావరి స్టేషన్‌లో ఫుట్‌వోవర్ బ్రిడ్జి నిర్మించారు. అంతకు మించి మౌలిక వసతులేవీ కల్పించలేదు.
  
  రైళ్ల రద్దీ దృష్ట్యా రాజమండ్రి స్టేషన్లో నాలుగో ప్లాట్‌ఫారం అత్యవసరం. పుష్కరాల సమయంలో నిర్మించిన లోలెవెల్ ప్లాట్‌ఫారం అంతగా ఉపయోగపడడం లేదు.
  
  తూర్పు రైల్వేస్టేషన్‌లో రిజర్వేషన్ కౌంటర్ ఏర్పాటు చేయాలి. స్టేషన్ ప్రాంగణంలో సులాభ్ కాంప్లెక్స్ నిర్మించాలి.
  
  కీలక కూడలి సామర్లకోటలో..
  జనరల్ బోగీల్లో ప్రయాణించే వారు వేచి ఉండేందుకు ప్లాట్‌ఫారం ఇరువైపులా షెల్టరు లేదు. ఎండ కాసినా, వర్షం వచ్చినా ప్రయాణికులు ఇబ్బంది పడుతున్నారు. మూడు ప్లాట్‌ఫారంల పైనా అదే పరిస్థితి.
  
  ఫుట్‌వోవర్ బ్రిడ్జి ఒక్కటే ఉంది. పాత బ్రిడ్జి స్థానంలో ఎస్కలేటర్ ఏర్పాటు చేస్తామని హామీ ఇచ్చి ఆరేళ్లవుతోంది. అర్ధాంతరంగా ఆగిన పనులను  పూర్తి చేయాలి.
  
  తూర్పు వైపున రైలు దిగడానికి వీలుగా స్టేషన్‌ను అభివృద్ధి చేయాలి.
  
  ఎక్స్‌ప్రెస్‌లు, ప్యాసింజర్లను కేవలం రెండు నిమిషాలు కాక మూడు నిమిషాలైనా ఆపాలన్న డిమాండ్ ఎప్పటి నుంచో ఉంది.
  
  ఫలహారశాల మూసేసి పదేళ్లవుతోంది. దీంతో ప్రయాణికులు చాలా ఇబ్బంది పడుతున్నారు.
  
  పుణ్యస్థలి అన్నవరంలో..
  దేవస్థానానికి వెళ్లే భక్తులు మూడో నంబరు ప్లాట్‌ఫాం దాటి కొండపైకి వెళ్లే వాహనాలు ఎక్కి వెళ్లాలి. కానీ ఈ ప్లాట్‌ఫాంపై వేచి ఉండేందుకు గదులు లేవు. టాయిలెట్స్ కూడా లేవు.
  
  టికెట్ బుకింగ్ కాంప్లెక్స్ 1వ నంబరు ప్లాట్‌ఫాం నుంచి మూడో నంబరు ప్లాట్‌ఫాంకు మార్చాలన్నది చిరకాలపు డిమాండ్ కొండవైపు వెళ్లి వచ్చే వాహనాలు స్టేషన్ వద్ద ఆగేచోట ఎలాంటి షెల్టరూ లేదు.  
  
  జిల్లా ప్రవేశద్వారం ‘తుని’లో..
  రైల్వేస్టేషన్‌లో ఉదయం, సాయంత్రం ప్రయాణికుల రద్దీ ఎక్కువగా ఉంటున్నా టికెట్ కౌంటర్ మాత్రం ఒక్కటే ఉంది. రెండో కౌంటర్ ప్రారంభించాలన్న డిమాండ్ ఎప్పటి నుంచో ఉంది.
  
  రెండో ప్లాట్‌ఫారంపై మరుగుదొడ్లున్నా ఎప్పుడూ మూసే ఉంటాయి.
  
  దువ్వాడ-పిఠాపురం మధ్య ఎక్కడ రైల్వే ప్రమాదాలు జరిగినా తుని జీఆర్‌పీ స్టేషన్‌కు రావాలి. ఇది రెండో ప్లాట్‌ఫారానికి వెనుక ఉంటుంది. అక్కడికి ఒకటో నంబరు ప్లాట్‌ఫారం నుంచే వెళ్లాలి. ఈ హడావుడిలో ఎవరైనా ప్లాట్‌ఫాం టికెట్ తీసుకోలేకపోతే జరిమానాలు పడుతున్నాయి. ఈ అగచాట్లు పడలేక ఎదురుగా ఉన్న జీఆర్‌పీ స్టేషన్‌కు పట్టాలు దాటివెళ్లే ప్రయత్నంలో పలువురు ప్రమాదాలకు గురవుతున్నారు.
  
  క్షతగాత్రుల ఆర్తనాదాలు వినరూ..
  రెండు నెలల క్రితం విజయవాడ నుంచి ఉద్యోగం ఇంటర్వ్యూ కోసం విశాఖపట్నం వెళ్తున్న ఓ యువకుడు మంచినీరు పట్టుకోవడానికి సామర్లకోట  స్టేషన్‌లో దిగాడు. రెండు నిమిషాలే హాల్ట్ కావడంతో కదిలిపోతున్న రైలు ఎక్కబోతూ పట్టుతప్పి ఒకటో నంబరు ప్లాట్‌ఫాంపై పడిపోయాడు. తీవ్ర గాయాలతో గంటన్నర పాటు రక్తపుమడుగులోనే ఆర్తనాదాలు చేస్తున్నా ప్రాథమిక వైద్యం చేసేవారే కరువయ్యారు. చివరకు 108 వాహనం వచ్చేసరికి ప్రాణాలు కోల్పోయాడు. అదే రైల్వే ఆస్పత్రి వైద్యులు వెంటనే స్పందించి ఉంటే ప్రాణాలు దక్కేవి. రాజమండ్రి-తుని స్టేషన్ల మధ్య ప్రతి నెలా ఇలాంటి సంఘటనలు రెండైనా చోటు చేసుకుంటున్నాయి. ప్లాట్‌ఫాంపై వైద్య సిబ్బందిలో ఒకరిద్దరిని ఉంచితే క్షతగాత్రులకు ప్రథమ చికిత్స అంది, ప్రాణాపాయం తప్పుతుంది.
  


 హైదరాబాద్ : హైదరాబాద్ను విశ్వనగరం చేయడానికి కేంద్రం సహకరిస్తుందని కేంద్ర మంత్రి బండారు దత్తాత్రేయ ఆదివారం హైదరాబాద్లో తెలిపారు. మైట్రో రైలు పూర్తి చేస్తే ... ఆ ప్రారంభోత్సవ కార్యక్రమానికి ప్రధాని మోదీని తీసుకువస్తానని దత్తాత్రేయ వెల్లడించారు.  ప్రధాని మోదీ, తెలంగాణ సీఎం కేసీఆర్ వేరు కాదు... అందరూ జట్టు సభ్యులే అని దత్తాత్రేయ చెప్పారు.
 వచ్చే రైల్వే బడ్జెట్లో హైదరాబాద్కు అధిక నిధులు కేటాయించేలా చర్యలు తీసుకుంటామని ఆయన వివరించారు. అలాగే మూసి నది ప్రక్షాళనకు నిధులు కేటాయిస్తామని కేంద్రమంత్రి దత్తాత్రేయ పేర్కొన్నారు.  
  


 దక్షిణ మధ్య రైల్వే జీఎం ఆదేశం
 
 హైదరాబాద్: ప్రయాణికులకు మెరుగైన వసతులు కల్పించటంలో నిర్లక్ష్యం చేయొద్దని దక్షిణ మధ్య రైల్వే జీఎం శ్రీవాస్తవ జోన్ పరిధిలోని డివిజినల్ ఇంజినీర్లను ఆదేశించారు. రైల్వే బడ్జెట్‌లో సంతృప్తికరంగా కేటాయింపులు జరిగినందున అన్ని పనులు సకాలంలో పూర్తయ్యేలా చూడాలని పేర్కొన్నారు. గురువారం రైల్ నిలయంలో సీనియర్ డివిజినల్ ఇంజనీర్ల సమన్వయ సదస్సును ఆయన ప్రారంభించారు.
 
 ప్రస్తుత ఆర్థిక సంవత్సరంలో దక్షిణ మధ్య రైల్వే సరుకు లోడింగ్‌లో అదనంగా 10 శాతం లక్ష్యాన్ని రైల్వే బోర్డు పెంచిందని, దీన్ని చేరుకోవాలంటే రైళ్లు, ట్రాక్ జాయింట్స్ వైఫల్యాలు ఉండరాదని ఆయన పేర్కొన్నారు. సంబంధిత ఇంజనీర్లు అప్రమత్తంగా ఉండి చర్యలు తీసుకోవాలని ఆదేశించారు. వర్షాకాలం ప్రణాళికతో రూపొందించిన మాన్‌సూన్-2015 పుస్తకాన్ని ఈ సందర్భంగా ఆయన ఆవిష్కరించారు.
  
  


 
 సదానందగౌడ, ఖర్గే వరాలకు సురేశ్‌ప్రభు గండి
 
  కాజీపేట వ్యాగన్ ఫ్యాక్టరీకి మంజూరైన రూ. 5 కోట్లు వెనక్కి
 
  ప్రీమియం రైళ్ల విషయంలో పునరాలోచన
 
  రైల్వేశాఖలో సంస్కరణల ఫలితం?
 
 సాక్షి, హైదరాబాద్: రైల్వే బడ్జెట్‌లో చోటు దక్కించుకున్న కొన్ని కొత్త రైళ్లు హుష్‌కాకి అయ్యాయి. వాటిని రైల్వేశాఖ దాదాపుగా రద్దు చేసినట్టు సమాచారం. సంస్కరణలకే పెద్దపీట వేస్తున్న రైల్వే మంత్రి సురేశ్ ప్రభాకర్ ప్రభు తీసుకున్న తాజా నిర్ణయం ప్రకారం... గతంలో రెండు తెలుగు రాష్ట్రాలకు మంజూరైన కొన్ని ప్రాజెక్టులు కూడా అటకెక్కినట్టు తెలుస్తోంది. విచిత్రమేంటంటే... ఎన్డీయే ప్రభుత్వం కొలువుదీరిన తర్వాత మధ్యంతర రైల్వే బడ్జెట్‌లో సదానందగౌడ మంజూరు చేసిన రైళ్లు, నిధులను కూడా సురేశ్ ప్రభు నిలిపివేశారు. రాజకీయ ప్రయోజనాలను పూర్తిగా పక్కనపెట్టి ప్రజలకు వెంటనే ఉపయోగం కలిగించే వాటిపైనే దృష్టి సారించాలని ఆయన నిర్ణయించటంతో ఈ మార్పులు చోటుచేసుకుంటున్నాయి. తీవ్ర నష్టాల్లో ఉన్న రైల్వే శాఖను ఇప్పటికిప్పుడు గట్టెక్కించాలంటే
 
 సంస్కరణల రూపంలో
 
 కఠిన నిర్ణయాలు తీసుకోవాలని కేంద్రప్రభుత్వం భావిస్తోంది. ఈ మేరకు ఆర్థికవేత్త బిబేక్ దెబ్రాయ్ ఆధ్వర్యంలో ఏర్పాటు చేసిన కమిటీ నాలుగు రోజుల క్రితం సిఫారసు నివేదిక కూడా అందజేసింది. దాన్ని ప్రభుత్వం దాదాపుగా పరిగణనలోకి తీసుకోబోతోందని అధికారవర్గాలు చెబుతున్న సమాచారం. వెరసి ఇక పాత హామీలు, ఇప్పటికే మంజూరై పట్టాలెక్కని ప్రాజెక్టుల్లో కొన్ని రద్దయ్యే సూచనలు స్పష్టంగా కనిపిస్తున్నాయి.
  
 గడువు దాటినా పట్టాలెక్కని రైళ్లివే....
 
 గత సంవత్సరం ఎన్డీఏ ప్రభుత్వం కొలువుదీరక ముందుయూపీఏ-2 ప్రభుత్వం ఫిబ్రవరిలో తుది బడ్జెట్ ప్రవేశపెట్టింది. నాటి రైల్వే మంత్రి మల్లికార్జున ఖర్గే తెలంగాణ మీదుగా నడిచేలా కామాఖ్య-చెన్నై, హౌరా-యశ్వంత్‌పూర్, మన్నార్‌గుడి-జోథ్‌పూర్ ఏసీ ప్రీమియం ఎక్స్‌ప్రెస్‌లను మంజూరు చేశారు. వాస్తవానికి ఇవి ఇటీవలి మార్చి 31లోపు పట్టాలెక్కాల్సి ఉంది. కానీ వాటి జాడే లేకుండా పోయింది. ఇక బీజేపీ సారథ్యంలోని ఎన్డీఏ ప్రభుత్వం కొలువు దీరిన తర్వాత గత సంవత్సరం  జూలైలో నాటి రైల్వే మంత్రి సదానందగౌడ మధ్యంతర బడ్జెట్ ప్రవేశపెట్టారు.
 
 ఇందులో తెలంగాణకు కాజీపేట-లోకమాన్యతిలక్ టెర్మినస్ (ముంబై) వీక్లీ ఎక్స్‌ప్రెస్, సికింద్రాబాద్-హజ్రత్ నిజాముద్దీన్ (ఢిల్లీ) ఏసీ ప్రీమియం ఎక్స్‌ప్రెస్‌లను కేటాయించారు. వీటితోపాటు తెలంగాణ మీదుగా వెళ్లేలా జైపూర్-మధురై ఏసీ ప్రీమియం ఎక్స్‌ప్రెస్‌ను కూడా మంజూరు చేశారు. ఇప్పుడు ఈ రైళ్లు దాదాపు రద్దయినట్టేనని తెలుస్తోంది. రాష్ట్రం విడిపోయిన నేపథ్యంలో అంధ్రప్రదేశ్‌కు ప్రత్యేకంగా ఏపీ ఎక్స్‌ప్రెస్ కేటాయించాల్సి ఉంది. సదానందగౌడ విజయవాడ-ఢిల్లీ మధ్య కొత్త రైలును ఇదే ఉద్దేశంతో కేటాయించారు. కానీ దాన్ని కూడా బడ్జెట్ గడువు ముగిసినా ఇప్పటి వరకు మొదలుపెట్టకపోవటం ఆశ్చర్యం కలిగిస్తోంది. ఇది రద్దయ్యే అవకాశం లేనప్పటికీ జాప్యం చేయటానికి కారణాలను దక్షిణ మధ్య రైల్వే అధికారులు కూడా విశ్లేషించలేకపోతున్నారు.
  
 వ్యాగన్‌వీల్ ఫ్యాక్టరీ నిధులు వెనక్కి..?
 
 కాజీపేటకు ఐదేళ్ల క్రితం మంజూరైన వ్యాగన్ వీల్ ఫ్యాక్టరీకి సదానందగౌడ 2014 జూలై బడ్జెట్‌లో రూ.5 కోట్లు మంజూరు చేశారు. ఇప్పుడు వాటి విడుదల నిలిచిపోయింది. వ్యాగన్ వీల్ ఫ్యాక్టరీని ప్రైవేటు నిర్వహణకు అప్పగించాలని నిర్ణయించిన నేపథ్యంలో.. దాన్ని కాజీపేటలోనే ఏర్పాటు చేయాలా వద్దా అన్న విషయంలో ఇంకా స్పష్టత రాలేదు. ఫలితంగా మంజూరైన నిధులను కూడా నిలిపివేశారు.
  
 ‘ప్రీమియం’కు మంగళం
 
 వీలైనంత మేర టికెట్ ధరలు పెంచి డబ్బు చేసుకునే ఉద్దేశంతో గతంలో ఇబ్బడిముబ్బడిగా మంజూరు చేసిన ప్రీమియం రైళ్లకు తెర దించాలని సురేశ్‌ప్రభు భావిస్తున్నారు. రోజులు గడిచేకొద్దీ ఈ రైళ్ల టికెట్ ధరలు (డైనమిక్ ప్రైస్) పెరుగుతుంటాయి. విమానాలకు అమలు చేసే పద్ధతిని ప్రీమియం రైళ్ల పేరుతో రైల్వేలోకి చొప్పించారు. దీనికి ప్రజల నుంచి తీవ్ర వ్యతిరేకత రావటంతోపాటు వాటికి ఆదరణ కూడా లేకుండా పోయింది. దీంతో అలాంటి రైళ్లను పక్కన  పెట్టాలని సురేశ్‌ప్రభు భావిస్తున్నట్టు సమాచారం.


 
 రైల్వే బడ్జెట్‌పై చర్చలో మేకపాటి
 
 ర్యాపిడ్ రోడ్ కం రైల్ నెట్‌వర్క్‌ను విస్మరించారు
 
 నడికుడి-శ్రీకాళహస్తి ప్రాజెక్టును త్వరితగతిన పూర్తి చేయండి
 
 సాక్షి, న్యూఢిల్లీ: ఆంధ్రప్రదేశ్ పునర్ వ్యవస్థీకరణ చట్టం-2014లో ఇచ్చిన హామీలను రైల్వే బడ్జెట్‌లో కేంద్రం విస్మరించిందని వైఎస్సార్ సీపీ లోక్‌సభాపక్ష నేత మేకపాటి రాజమోహన్‌రెడ్డి అన్నారు. గురువారం ఆయన రైల్వేబడ్జెట్‌పై జరిగిన చర్చలో తమ అభిప్రాయాలు వెలిబుచ్చారు. ‘‘దేశాభివృద్ధిలో భారతీయ రైల్వే గణనీయమైన పాత్ర పోషిస్తోంది. అయితే పెరుగుతున్న ప్రమాదాలు, అపరిశుభ్రత తదితర అంశాలపై దృష్టిపెట్టాల్సి ఉంది. మా వైఎస్సార్ కాంగ్రెస్ పార్టీ అధ్యక్షుడు, ఎంపీలు కలసి రైల్వే మంత్రికి పలు ప్రాజెక్టులపై ఇప్పటికే ఒక వినతిపత్రం ఇచ్చాం.
 
 నడికుడి-శ్రీకాళహస్తి ప్రాజెక్టును త్వరగా పూర్తిచేయాల్సిన అవసరం ఉంది. అవిభాజ్య ఆంధ్రప్రదేశ్ ప్రభుత్వం, కేంద్ర రైల్వే శాఖ సంయుక్తంగా ఈ ప్రాజెక్టును చేపట్టాయి. ఈ ప్రాజెక్టు మార్గం గుంటూరు, ప్రకాశం, నెల్లూరు, చిత్తూరు జిల్లాల మీదుగా 369 కి.మీ. పొడవునా సాగుతుంది. ఈ నాలుగుజిల్లాల్లోని వెనకబడిన ప్రాంతాల మీదుగా ఈ మార్గం ఉంది. అంతేకాకుండా హైదరాబాద్-చెన్నై మధ్య ఇదొక ప్రత్యామ్నాయ మార్గంగా కూడా అవుతుంది.
 
 రాష్ట్ర ప్రభుత్వం కూడా అన్ని విధాలా సహకరిస్తామని చెప్పంది కాబట్టి లాంఛనాలు పూర్తిచేసి త్వరితగతిన పనిమొదలుపెట్టాల్సిన అవసరం ఉంది. ఈ ప్రాజెక్టు వల్ల ఆ నాలుగు జిల్లాల్లోని చిన్నచిన్న పట్టణాలు అభివృద్ధిచెందే అవకాశం ఉంది. 2014-15 రైల్వే బడ్జెట్‌లో అప్పటి రైల్వే మంత్రి ఏపీ, తెలంగాణల్లో రూ. 29 వేల కోట్ల అంచనా వ్యయం గల 29 ప్రాజెక్టులు పెం డింగ్‌లో ఉన్నాయని చెప్పారు. వాటిని అధికారులతో కూడిన సమన్వయ కమిటీ ద్వారా పరిష్కరిస్తామని చెప్పారు. కానీ ఇప్పటివరకేమీ జరగలేదు. విభజన చట్టంలో కేంద్రం సీమాంధ్రలో ఒక కొత్త రైల్వే జోన్‌కు హామీ ఇచ్చింది.
 
 అంతేకాకుండా కొత్త రాజధాని నుంచి హైదరాబాద్‌కు ర్యాపిడ్ రోడ్ అండ్ రైల్ నెట్‌వర్క్‌ను ఏర్పాటు చేస్తామని ఆ చట్టం హామీ ఇచ్చింది. కానీ ఈ విషయంలో పురోగతి లేదు. విభజన తరువాత ఏపీ ఎక్స్‌ప్రెస్ తరహాలో ఆంధ్రప్రదేశ్ నుంచి ఢిల్లీకి రైలు కావాలని రాష్ట్రం కోరింది. నడికుడి-శ్రీకాళహస్తి, విజయవాడ-నిడదవోలు, జగ్గయ్యపేట-విష్ణుపురం, కాకినాడ-పిఠాపురం, ఓబులవారిపల్లి-కృష్ణపట్నం వంటి ప్రాజెక్టులను ఈ బడ్జెట్‌లో రైల్వే మంత్రి ప్రస్తావించలేదు. అలాగే గుంటూరు-తెనాలి డబ్లింగ్ ప్రస్తావన కూడా లేదు.
  
 నెల్లూరులో కోరమండల్‌ను ఆపాలి..
 
 నెల్లూరులో కోరమండల్ ఎక్స్‌ప్రెస్, తమిళనాడు ఎక్స్‌ప్రెస్, నిజాముద్దీన్ గరీబ్థ్ ్రఎక్స్‌ప్రెస్‌లను ఆపాలి. అలాగే కావలిలో శబరి ఎక్స్‌ప్రెస్, యశ్వంత్‌పూర్-హౌరా ఎక్స్‌ప్రెస్, శేషాద్రి ఎక్స్‌ప్రెస్‌లకు హాల్టింగ్ ఏర్పాటు చేయాలి. కాజీపేట-విజయవాడ మధ్య మూడో లైన్ పనులు మినహా వేటినీ ప్రస్తావించలేదు. గతంలో బిట్రగుంట వద్ద ఒక పెద్ద లోకో షెడ్డు ఉండేది. దానిని ఒక కోచ్/వ్యాగన్ ఫ్యాక్టరీని ఏర్పాటుచేసేందుకు పరిశీలించవచ్చు. ఇక ప్రయాణికులు కోరుకునేది ము ఖ్యంగా రైళ్లు సమయానికి నడవాలని, సురక్షితంగా గమ్యం చేరాలని, స్టేషన్లు, రైళ్లు పరిశుభ్రంగా ఉండాలని, రక్షిత మంచినీరు లభించాలని. విద్య, ఉపాధి కోసం యువత నిత్యం ప్రయాణాలు చేస్తుంటారు. వారికి డిజిటల్ కనెక్టివిటీ అవసరం. రైల్వే బడ్జెట్ వారి ఆకాంక్షలకు పెద్దపీట వేసిందనే చెప్పాలి. ఈ బిల్లుకు వైఎస్సార్‌సీపీ తరపున మద్దతు పలుకుతూ ఆంధ్రప్రదేశ్ ఆకాంక్షలను నెరవేరుస్తారని ఆశిస్తున్నా..’’ అని పేర్కొన్నారు.
  
 మేకపాటి కోరిన కొత్త రైళ్లు..
 1. ఏపీ ఎక్స్‌ప్రెస్- న్యూఢిల్లీ నుంచి తిరుపతి వయా విజయవాడ
 2. మరొక ఏపీ ఎక్స్‌ప్రెస్- న్యూఢిల్లీ నుంచి విశాఖపట్నం
 3. తిరుపతి- షిరిడీ వయా నెల్లూరు, విజయవాడ
 4. విజయవాడ-బెంగళూరు
 5.తిరుపతి-అజ్మీర్ వయా నెల్లూరు విజయవాడ
  
 పోలవరానికి జాతీయహోదా ఇచ్చారా?
 
 పోలవరం ప్రాజెక్టుకు జాతీయ హోదా ఇచ్చారా అంటూ వైఎస్సార్‌సీపీ ఎంపీ మేకపాటి రాజమోహన్‌రెడ్డి కేంద్రాన్ని ప్రశ్నిం చారు. లోక్‌సభలో గురువారం ప్రశ్నోత్తరాల సమయంలో ఎంపీ మేకపాటి రాజమోహన్‌రెడ్డి పోలవరంపై పలు ప్రశ్నలు వేశారు. ప్రాజెక్టు మంజూరీకి ముందు ఒడిశా, ఛత్తీస్‌గఢ్ ప్రభుత్వాలతో జరిపిన సంప్రదింపుల వివరాలు వెల్లడించాలన్నారు. గోదావరి జల వివాదాల ట్రిబ్యునల్ పరిధిలోని పోలవరం రిజర్వాయర్ నిర్వహణ షెడ్యూల్‌ను సెంట్రల్ వాటర్ కమిషన్(సీడబ్ల్యుసి)లోకి బదలాయింపు జరిగిన విషయాన్ని ఒడిశా, ఛత్తీస్‌గఢ్ ప్రభుత్వాలకు తెలియపరిస్తే, అందుకు సంబంధించిన వివరాలు వెల్లడించాలని ఎంపీ మేకపాటి సహా ఎంపీలు మురళీ మోహన్, రీతా తరాయ్ కేంద్రాన్ని ప్రశ్నిం చారు. కేంద్ర జలవనరుల సహాయ మంత్రి సాంవర్‌లాల్ జాట్ బదులిస్తూ ఆంధ్రప్రదేశ్ పునర్వ్యవస్థీకరణ చట్టం-2014 మేరకు పోలవరం ప్రాజెక్టుకు జాతీయ హోదా ప్రకటించామన్నారు.
  
 వైఎస్సార్ కాంగ్రెస్ పార్టీ ఆవిర్భావ వేడుకలు
 
 వైఎస్సార్ కాంగ్రెస్ పార్లమెంటరీ పార్టీ కార్యాలయంలో పార్టీ ఆవిర్భావ దినోత్సవం ఘనంగా జరిగింది. దివంగత నేత డాక్టర్ వై.ఎస్.రాజశేఖరరెడ్డి చిత్రపటానికి పార్టీ లోక్‌సభాపక్ష నేత మేకపాటి రాజమోహన్‌రెడ్డి, విప్ వైవీ సుబ్బారెడ్డి, ఎంపీలు వెలగపల్లి వరప్రసాద్‌రావు, బుట్టా రేణుక, పి.వి.మిథున్‌రెడ్డి, పొంగులేటి శ్రీనివాసరెడ్డి పూలమాల వేసి నివాళులు అర్పించారు.  వైఎస్ ఆశయాలకు అనుగుణంగా అట్టడుగు వర్గాల సంక్షేమానికి కట్టుబడుతూ పార్లమెంటు వే దికగా కృషి చేస్తామని ఎంపీలు ప్రతిజ్ఞ చేశారు.


 
 కొత్త రాష్ట్రం కొండంత ఆశలు పెట్టుకుంది
 
 రైల్వే బడ్జెట్‌పై చర్చలో ఎంపీ పొంగులేటి
 
 సాక్షి, న్యూఢిల్లీ: రైల్వే బడ్జెట్ తెలంగాణ ప్రజల ఆశలు నెరవేర్చలేదని వైఎస్సార్‌సీపీ ఎంపీ పొంగులేటి శ్రీనివాస్‌రెడ్డి ఆందోళన వ్యక్తంచేశారు. బుధవారం లోక్‌సభలో రైల్వేబడ్జెట్‌పై జరిగిన చర్చలో ఆయన మాట్లాడారు. ‘రైల్వే బడ్జెట్ కొత్తగా ఏర్పడిన తెలంగాణ రాష్ట్రంపై అంతగా దృష్టి పెట్టలేదు. ఇది ప్రజలందరినీ నిరుత్సాహ  పరిచింది. కొన్ని దశాబ్దాలుగా ప్రభుత్వం, భారత రైల్వేవిభాగం సగటు మనిషి అవసరాలను, ఆకాంక్షలను తీర్చడంలో విఫలమయ్యాయి.
 
 రైల్వేలో సరైన సదుపాయాలు ఏర్పడక పోవడంతో రోజూ రైల్వే ద్వారా ప్రయాణం చేస్తున్న 2.5 కోట్ల ప్రయాణికులు ఇబ్బంది పడుతున్నారు. భారీ మెజారిటీతో ప్రభుత్వం ఏర్పాటు కావడంతో ఈసారైనా కొంత మేలు జరుగుతుందని ప్రజలు కొండంత ఆశలు పెట్టుకున్నారు. 120 కోట్లుగా ఉన్న ప్రస్తుత దేశ జనాభాకు అనుగుణంగా రైల్వే నెట్ వర్క్ విస్తరించాలని, ప్రజల అవసరాలు తీర్చాలని చాలా డిమాండ్లు ఉన్నాయి. కానీ ఇప్పటివరకు కేవలం 12 వేల కిలోమీటర్ల రైల్వే ట్రాక్ మాత్రమే ఉంది. ఉన్న రైలు మార్గాల్లోనే ఏటా కొత్త రైళ్లను ప్రవేశపెడుతున్నారు.
 
 దీనికారణంగా రైలు మార్గాలపై ఒత్తిడి పెరిగి ప్రమాదాలకు దారితీసే పరిస్థితి ఉంది. విద్యుదీకరణ విషయానికి వస్తే ఇప్పటివరకు మొత్తం 65 వేల కిలోమీటర్ల ట్రాక్‌లో కేవలం 20,833 కిలోమీటర్ల ట్రాక్‌కు మాత్రమే విద్యుదీకరణ పూర్తయ్యింది. ఇప్పటికీ దేశ వాణిజ్య రాజధాని ముంబై, దేశంలోనే ఐదో పెద్ద నగరమైన హైదరాబాద్ మధ్య డీజిల్ లోకోమోటివ్ సర్వీసులు నడుస్తుండటాన్ని మనం గమనించవచ్చు. ఇక అడ్వాన్స్ రిజర్వేషన్‌ను 60 రోజుల నుంచి 120 రోజులకు పెంచారు. సీట్లను బ్లాక్ చేసుకోవడానికి టికెట్ మాఫియాకు ఇదొక సువర్ణ అవకాశంగా మారనుంది.
 
 బహుశా మంత్రి విమానయాన సర్వీసుల్లో మాదిరిగా అడ్వాన్స్ టికెటింగ్ ద్వారా రెవెన్యూ లోటును పూడ్చుకునేందుకు దీనిని ప్రవేశపెట్టారేమో. కానీ విమానయాన సర్వీసుల్లో ముందుగా రిజర్వేషన్ చేసుకుంటే కాస్త చవకగా, డిస్కౌంట్‌తో కూడిన టికెట్ ఇస్తారు. కానీ రైల్వేలో ప్రవేశపెట్టిన ఈ 120 రోజుల ముందస్తు టికెట్‌కు ఏ రకమైన డిస్కౌంట్ లభించదు. అయితే రైల్వే టికెట్ చార్జీలను పెంచకుండా ప్రయాణికులపై భారం వేయనందుకు సంతోషం. దీనిని స్వాగతిస్తున్నాం. మరో ముఖ్యవిషయం ఏంటంటే ఈ బడ్జెట్‌లో ఒక కొత్త రైలును కూడా ప్రకటించలేదు.
 
 ఇది కూడా స్వాగతించదగిన పరిణా మం. గత బడ్జెట్‌లలో చేసిన ప్రకటనలను ఇప్పుడు అమలు చేయాల్సిన అవసరం ఉంది. గతంలో ప్రకటించిన కొత్త రైల్లేవీ ఇంకా పట్టాలెక్కలేదు. అలాగే ఇప్పుడు ట్రాక్ సంబంధిత మౌలిక వసతులను బలోపేతం చేయాల్సిన సమయం వచ్చింది. రైల్వేబోర్డు మాజీ సభ్యుడొకరు ఏం చెప్పారంటే ఒక ప్యాసింజర్ రైలు కి.మీ.కు రూ. 450 సంపాదిస్తే.. గూడ్స్ రైలు రూ. 4,500 సంపాదిస్తుందని చెప్పారు.
 
 అందువల్లే ప్రభుత్వం గూడ్స్ కారిడార్‌ను అభివృద్ధి చేస్తూ ప్యాసింజర్ ట్రాఫిక్‌ను విస్మరిస్తున్నట్టుగా ఉంది. దక్షిణ మధ్య రైల్వేకు మౌలిక వసతుల కోసం రూ. 2,768 కోట్లు కేటాయించారు. అన్ని రాష్ట్రాలకు ఆయా రాష్ట్రాల పేర్లతో ఎక్స్‌ప్రెస్‌లు ఉన్నప్పుడు తెలంగాణ రాష్ట్రానికి ఎందుకు ఉండకూడదు?  తెలంగాణ ఎక్స్‌ప్రెస్‌ను ప్రకటించడంలో గానీ, ప్రస్తుత ఏపీ ఎక్స్‌ప్రెస్‌కు పేరు మార్చకపోవడంపై గానీ రైల్వే శాఖ నిర్ణ యం తీసుకోకపోవడంలో ఉన్న తర్కమేంటో నాకు అర్థం కావడం లేదు. కాజీపేటను డివి జన్‌గా మార్చడం వల్ల వెనకబడిన ప్రజలకు న్యాయం జరుగుతుంది. గత ప్రభుత్వం భద్రాచలం-కొవ్వూరు రైల్వేలైన్‌ను ప్రకటించింది. కానీ దీనికి సరైన కేటాయింపులు లేక ముం దుకు సాగడం లేదు.’ అని పేర్కొన్నారు.
  
 మేనేజ్‌మెంట్ విద్యాసంస్థల మూసివేతపై ప్రస్తావన
 
 విద్యార్థుల కొరత కారణంగా ఎంబీఏ విద్యాసంస్థలు ఉనికి కోల్పోవడంపై వైఎస్సార్ కాంగ్రెస్ పార్టీ ఎంపీ పొంగులేటి శ్రీనివాసరెడ్డి  సహా ఎంపీలు ధృవ్ నారాయణ, జి.హరి లోక్‌సభలో బుధవారం ప్రశ్నించారు. ఉనికి కోల్పోతున్న విద్యాసంస్థల వివరాలను రాష్ట్రాల వారీగా అందజేయాలని, కళాశాలల మూసివేతకు కారణాలపై ప్రభుత్వం చేసిన అధ్యయనం, తీసుకున్న చర్యలను తెలపాలని ప్రశ్నోత్తరాల సమయంలో అడిగారు. ఎంపీల ప్రశ్నలకు కేంద్ర మానవ వనరుల అభివృద్ధిశాఖ మంత్రి స్మృతీ ఇరానీ బదులిస్తూ దేశంలో మేనేజ్‌మెంట్ కోర్సుల్లో విద్యార్థుల కొరతతో ఎంబీఏ విద్యాసంస్థలు ఉనికి కోల్పోతున్న విషయం కేంద్రం దృష్టికి రాలేదన్నారు.  దేశంలో 12 రాష్ట్రాల్లో మేనేజ్‌మెంట్ కోర్సులు నిర్వహిస్తున్న 41 సంస్థలను 2014-15లో మూసివేశామన్నారు. ఆంధ్రప్రదేశ్‌లో 8 విద్యాసంస్థలను మూసివేసినట్టు తెలిపారు.


 సాక్షి, హైదరాబాద్: కాపలాలేని లెవల్ క్రాసింగ్‌ల తొలగింపుపై దక్షిణ మధ్య రైల్వే ప్రత్యే క కార్యాచరణకు ఉపక్రమించింది. ప్రయాణికుల భద్రత దృష్ట్యా తాజా రైల్వే బడ్జెట్‌లో చేసిన ప్రతిపాదనలకు అనుగుణంగా పనులను ప్రారంభించింది. గత ఏడాది మెదక్ జిల్లా మాసాయిపేటలో చోటు చేసుకున్న ఘోర దుర్ఘటన అనంతరం చేపట్టిన పనులను ఈ నెలాఖరు నాటికి యుద్ధ ప్రాతిపదికన పూర్తి చేయాలని దక్షిణ మధ్య రైల్వే జనరల్ మేనేజర్ పి.కె.శ్రీవాస్తవ జోన్‌లోని ఆరు డివిజన్ల రైల్వే మేనేజర్లను, వివిధ విభాగాల ఉన్నతాధికారులను ఆదేశించారు.
 ఈ మేరకు మంగళవారం సికిం ద్రాబాద్ రైల్‌నిలయంలో ఏర్పాటు చేసిన వీడియో కాన్ఫరెన్స్‌లో భద్రతాపర మైన అంశాలపైనా, బడ్జెట్‌లో చేసిన ప్రతిపాదనలపైనా ఆయన సమీక్ష నిర్వహించారు. జోన్ పరిధిలో మొత్తం 1,154 కాపలాలేని లెవల్ క్రాసింగ్‌లు ఉండగా.. వాటిలో 601 లెవల్ క్రాసింగ్‌ల తొలగింపునకు పనులు చేపట్టారు. మిగిలిన 553 కాపలాలేని లెవల్ క్రాసింగ్‌లను 2017 నాటికి తొలగించే విధం గా కార్యాచరణను సిద్ధం చేశారు. ఈ మేరకు పనులు ప్రారంభించాలని అధికారులకు సూచించారు. కాపలాలేని లెవల్ క్రాసింగ్‌లను తొలగించడమే కాక దక్షిణ మధ్య రైల్వేను ప్రమాదరహిత జోన్ స్థాయికి అభివృద్ధి చేయాలని నిర్ణయించారు. 
 రైలు నడిపే సమయంలో లొకో పెలైట్‌లకు సిగ్నల్‌లు అన్నీ ఒకేవైపు కనిపించేవిధంగా అవకాశం ఉన్న అన్ని చోట్లా చర్యలు తీసుకోవాలి. రైల్వే యార్డుల్లో రైళ్ల రాకపోకలపై అప్రమత్తం గా ఉండాలి. అనూహ్య రీతిలో యాక్సిల్ వేడెక్కి ప్రమాద సంకేతాలు అందితే వెంటనే ఆడియో విజువల్ అలారమ్ ద్వారా స్టేషన్‌మాస్టర్లను అప్రమత్తం చేయాలి. గత ఫిబ్రవరి 18న హైదరాబాద్ - చెన్నై ఎక్స్‌ప్రెస్‌లో అగ్నిప్రమా దాన్ని గమనించి వెంటనే రైలును ఆపి, పైఅధికారులకు సమాచారం అందజేసిన గుంటూరు డివిజన్ సీనియర్ టెక్నీషియన్ జి.వెంకటేశ్వర్లుకు జీఎం నగదు అవార్డును అందజేశారు.


 నేటి కేంద్ర బడ్జెట్‌పై కోటి ఆశలు
  విభజన చట్టంలో ఇచ్చిన హామీలపై అందరిచూపు
  ఏపీని ఆదుకోవాలంటూ అధికార పక్షంతో పాటు ప్రతిపక్షం వినతులు
  
  సాక్షి, హైదరాబాద్: రాష్ట్రానికి కొత్త ప్రాజెక్టుల ప్రస్తావన లేకుండా రైల్వే బడ్జెట్‌ను ప్రవేశపెట్టిన నేపథ్యంలో వచ్చే ఆర్థిక సంవత్సరానికి కేంద్ర ప్రభుత్వం ప్రవేశపెట్టబోయే సాధారణ బడ్జెట్‌పైనా సర్వత్రా ఉత్కంఠ నెలకొంది. రాష్ట్రానికి నిధుల కేటాయింపులు ఏ మేరకు ఉంటాయి ఉంటాయన్నది ఆసక్తికరంగా మారింది. రాష్ట్ర విభజన అనంతర పరిస్థితుల్లో.. నరేంద్రమోదీ నేతృత్వంలోని కేంద్ర ప్రభుత్వం శనివారం లోక్‌సభలో ప్రవేశపెట్టనున్న తొలి పూర్తిస్థాయి బడ్జెట్‌పై ఆంధ్రప్రదేశ్ ప్రభుత్వం ఎంతో ఆశతో ఎదురుచూస్తోంది. ఆంధ్రప్రదేశ్‌లో పలు  సంస్థలను ఏర్పాటు చేస్తామని కేంద్రం విభజన చట్టంలో పేర్కొం ది. ఆ సంస్థలకు బడ్జెట్‌లో ఎంత కేటాయిస్తారనేది మరికొన్ని గంటల్లో కేంద్ర ఆర్థిక మంత్రి అరుణ్ జైట్లీ ప్రవేశపెట్టనున్న బడ్జెట్‌తో తేలిపోనుంది.
  
  14 వ ఆర్థిక సంఘం సిఫారసులను ఆమోదించిన ప్రభుత్వం, కేంద్ర ప్రాయోజిత పథకాల్లో ఎక్కువ మేరకు రాష్ట్రాలకే అప్పగిస్తామని ప్రకటించిన నేపథ్యంలో ఆయా పథకాలకు నిధుల వరద ఉంటుందని అంచనా వేస్తున్నారు. విభజన చట్టం సెక్షన్ 94 (3)లో ఏపీ రాజధాని నిర్మాణానికి వసతుల కల్పనకు ఆర్థిక సాయం చేస్తామని ప్రకటించారు. ఇలా వచ్చే ఐదేళ్లలో రూ.1.2 లక్షల కోట్ల ఆర్థిక సాయం అందించాల్సిందిగా కేంద్రాన్ని రాష్ట్ర ప్రభుత్వం కోరింది. ప్రస్తుత బడ్జెట్‌లో కనీసం రూ.5,000 కోట్లు కేటాయించాలని విజ్ఞప్తి చేసింది. ప్రస్తుత  రెవెన్యూ లోటును పూడ్చడానికి రూ.500 కోట్లు,  వెనుకబడిన ఉత్తరాంధ్ర, రాయలసీమ జిల్లాల అభివృద్ధికి జిల్లాకు రూ.50 కోట్ల చొప్పున రూ.350 కోట్లు కేంద్రం ఇప్పటికే మంజూరు చేసింది. ఇంకా ఎంత కేటాయిస్తారో చూడాలి.14 ఆర్థిక సంఘం సిఫారసుల మేరకు కేంద్ర నిధులపై ఇప్పటికే స్పష్టత వచ్చినప్పటికీ.. కేటాయింపులు ఎలా ఉంటాయోనని ప్రభుత్వం  ఎదురుచూస్తోంది.
  
  రాష్ట్రం వినతులు ఇవే...
  హ    పారిశ్రామిక రాయితీల్లో భాగంగా 100 శాతం కేంద్ర ఎక్సైజ్, ఆదాయ, సర్వీసు పన్ను 15 ఏళ్ల పాటు మినహాయింపు, సీలింగ్ లేకుండా 30 శాతం మూల ధన సబ్సిడీ. వర్కింగ్ కేపిటల్‌పై మూడు శాతం వడ్డీ రాయితీ ఇవ్వాలి. 15 ఏళ్ల పాటు నూరు శాతం ఇన్సూరెన్స్ ప్రీమియం ఇవ్వాలి.
  హ విభజన చట్టంలోని సెక్షన్ 94 (3) ప్రకారం నూతన రాజధానిలో వసతుల కల్పనకు సాయం చేయాలి. సెక్షన్ 94 (2) ప్రకారం వెనుకబడిన ప్రాంతాలకు ప్రత్యేక ప్యాకేజీ ఇవ్వాలి. హ పోలవరంపై ఇప్పటికే రాష్ట్రం ఖర్చు చేసిన నిధులివ్వాలి.హసెక్షన్ 46 (3) ప్రకారం రాయలసీమ, ఉత్తరాంధ్రకు రాయితీల కింద తొలి దశలో రూ. 2,000 కోట్లు ఇవ్వాలి.
  హ    కేంద్ర రుణాలు రూ.10,090 కోట్లు రద్దు చేయాలి.హ    ఐఐటీ, ఎన్‌ఐటీ, ఐఐఎం, ఐఐఐటీ, కేంద్ర యూనివర్సిటీ, ఐఐఎస్‌ఈఆర్, గిరిజన వర్సిటీ ఏర్పాటునకు నిధులు కేటాయించాలి.హపెట్రోలియం, వ్యవసాయ వర్సిటీలు, ఎన్‌ఐడీఎం, ఎయిమ్స్ ఏర్పాటు ,దుగరాజపట్నం పోర్టు అభివద్ధికి నిధులు ఇవ్వాలి.హవిభజన జరిగిన ఆరు నెలల్లోగా వైఎస్సార్ జిల్లాలో సమీకృత స్టీల్ ప్లాంటు ఏర్పాటును పరిశీలిస్తామన్న కేంద్రం ఇప్పటివరకు దృష్టి సారించలేదని రాష్ట్రం పేర్కొంది. హగ్రీన్ ఫీల్డ్ కుర్డు ఆయిల్ రిఫైనరీ, పెట్రో కెమికల్ కాంప్లెక్స్ ఏర్పాటుపై పరిశీలన చేస్తామని చట్టంలో పేర్కొంది.
  
  నిధుల కోసం అనేకసార్లు హస్తినకు..
  రాష్ట్ర విభజన తర్వాత సీఎంగా చంద్రబాబు తొమ్మిది నెలల కాలంలో దాదాపు 9 సార్లు ఢిల్లీకి వెళ్లారు. ప్రతిసారీ ప్రధానమంత్రితో పాటు పలువురు కేంద్ర మంత్రులను కలిశారు. విభజన హామీలు నెరవేర్చాలని కోరారు.ఇప్పటివరకు కేంద్రం నుంచి నిర్దిష్టమైన హామీలు లభించలేదు. రాష్ట్రానికి ఇతోధికంగా నిధులిచ్చి ఆదుకోవిపక్ష నేత వైఎస్ జగన్‌మోహన్‌రెడ్డి నాయకత్వంలో పార్టీ ప్రతినిధి బృందం పలు దఫాలుగా ఢిల్లీ వెళ్లి ప్రధానితో పాటు కేంద్ర మంత్రులను కలిసి రాష్ట్రాన్ని ఆదుకోవాలని కోరింది.  
  
  ఇతర ప్రతిపాదనలు
  కొత్త రాజధాని ప్రాంతం చుట్టూ ప్రతిపాదించిన ఔటర్ రింగ్ రోడ్డుకు రూ.9,700 కోట్ల నిధులు కావాలి.్ళఏపీలో 642 కి.మీ మేర జాతీయ రహదారులుగా మార్చడానికి గతంలోనే కేంద్ర మంత్రి గడ్కరీ హామీ ఇచ్చిన నేపథ్యంలో ఈసారి బడ్జెట్‌లో నిధులు కేటాయించాలి. విశాఖపట్నం-కాకినాడ-గంగవరం-శ్రీకాళహస్తి ప్రాంతాలను కలుపుతూ ఆర్థిక ప్రాంతాన్ని  అభివృద్ధి చేయాలి.్ళగత బడ్జెట్‌లో ప్రకటించిన మేరకు వైజాగ్-చెన్నై పారిశ్రామిక కారిడార్ ఏర్పాటునకు ఈ బడ్జెట్‌లో నిధులు కేటాయించాలి. నూతన రాజధాని నుంచి హైదరాబాద్‌కు, తెలంగాణలోని ఇతర నగరాలకు రాపిడ్ రైల్ అండ్ రోడ్డు కనక్టివిటీ ఏర్పాటునకు నిధులివ్వాలి.


 వైఎస్సార్‌సీపీ తెలంగాణ రాష్ట్ర కమిటీ
 అధికార ప్రతినిధి కొండా రాఘవరెడ్డి
  
 సాక్షి, హైదరాబాద్: ప్రభుత్వం ఏటా రైల్వే బడ్జెట్‌లో ఘనంగా అభివృద్ధి కార్యక్రమాలు ప్రకటించడం... ఆ తర్వాత యథావిధిగా మర్చిపోవడం.. ఆనవాయితీగా వస్తుందని వైఎస్సార్ కాంగ్రెస్ పార్టీ తెలంగాణ రాష్ట్ర కమిటీ అధికార ప్రతినిధి కొండా రాఘవరెడ్డి విమర్శించారు. శుక్రవారం లోటపాండ్‌లోని వైఎస్సార్‌సీపీ కేంద్ర కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ గత ఏడాది బడ్జెట్‌లో ప్రకటించిన కొత్త రైల్వే లైన్లు, సర్వేలన్నీ అటకెక్కాయని అన్నారు.
  
  రాష్ట్ర విభజన చట్టంలో పేర్కొన్న కోచ్ తయారీ కేంద్రం.. గతంలో మమతాబెనర్జీ మంత్రిగా ఉన్నప్పుడు ప్రకటించిన వ్యాగన్ ఫ్యాక్టరీ.. ప్రస్తావన ఈ బడ్జెట్‌లో లేనేలేదన్నారు. ఖాజీపేటను రైల్వే డివి జన్‌గా ప్రకటించాలన్న కోరికనూ మన్నించలేదని చెప్పారు. సికింద్రాబాద్-మహబూబ్‌నగర్ లైన్ డబ్లింగ్ పనులకు రూ.1,200 కోట్లు ఖర్చువుతుండగా.. బడ్జెట్‌లో రూ.27.44 కోట్లు కేటాయించారన్నారు. అయినా సీఎం మాత్రం ఇప్పటికీ స్పందించలేదన్నారు.
  
  ఆయన కుమార్తె ఎంపీ కవిత ఫరవాలేదన్నట్లు మాట్లాడటం అర్థరహితమన్నారు. మహానేత దివంగత సీఎం వైఎస్సార్ ఆనాడు కేంద్రమంత్రి పదవులకన్నా బడ్జెట్‌లో ఏపీకి అగ్రస్థానం ఉండాలని కోరారని గుర్తు చేశారు. ఒకనాడు కేంద్రమంత్రి పదవి త్రుణప్రాయంగా వదిలిన కేసీఆర్ ఇప్పుడెందుకు బడ్జెట్‌పై స్పందించాల్సిన స్థాయిలో స్పందించలేదని ప్రశ్నించారు. వైఎస్సార్ సీపీ తెలంగాణ అధ్యక్షడు, ఖమ్మం ఎంపీ పొంగులేటి శ్రీనివాస్ రెడ్డితోపాటు ప్రధానిని కలసి తెలంగాణ ప్రజల రోదన వినిపిస్తామన్నారు. ఈ సమావేశంలో వైఎస్సార్ కాంగ్రెస్ పార్టీ తెలంగాణ రాష్ట్ర కమిటీ అధికార ప్రతినిధి సత్యం శ్రీరంగం, మైనార్టీ ప్రెసిడెంట్ సయ్యద్ మజ్‌తబ అహ్మద్ పాల్గొన్నారు.
  


 సాక్షి,హైదరాబాద్: రైల్వే బడ్జెట్‌లో అతి తక్కువ కేటాయింపులు చేసి తెలుగు రాష్ట్రాలను కేంద్రం అవమానించిందని, ఇరు రాష్ట్రాల ముఖ్యమంత్రులు ఈ బడ్జెట్‌ను తిరస్కరించాలని తెలంగాణ కాంగ్రెస్ ఉపాధ్యక్షుడు, ఎమ్మెల్సీ మహ్మద్ అలీ షబ్బీర్ డిమాండ్ చేశారు. శుక్రవారం గాంధీభవన్‌లో విలేకరులతో మాట్లాడుతూ తెలంగాణకు మొండి చేయి చూపినందుకు నిరసనగా రాష్ట్ర ఎంపీలతో ఢిల్లీలోని జంతర్‌మంతర్ వద్ద సీఎం కేసీఆర్ నిరసన తెలపాలని అన్నారు. కేంద్ర  మంత్రి పదవి కోసమే ఎంపీ కవిత ప్రధాని మోదీని ప్రశంసిస్తున్నారని ఆరోపించారు.
  
  


 సాక్షి, ముంబై: కేంద్ర రైల్వే శాఖ మంత్రి సురేశ్ ప్రభు గురువారం ప్రవేశపెట్టిన రైల్వే బడ్జెట్ ముంబైకర్లను కొంత నిరాశకు గురిచేసింది. అయితే దూర ప్రాంతాల నుంచి వచ్చే రైళ్ల కోసం కొత్త టెర్మినల్స్‌ను నిర్మించనున్నట్లు మంత్రి ప్రకటించడం నగర ప్రజలకు కొంతలో కొంత ఊరటినిచ్చే అంశం. ఈ టెర్మినల్స్ అందుబాటులోకి వస్తే ప్రస్తుతం లోకల్ రైళ్లపై పడుతున్న అదనపు భారం చాలా వరకు తగ్గిపోనుంది. ఫలితంగా కొత్తగా లోకల్ రైళ్లు ప్రవేశపెట్టేందుకు అవకాశం ఉంటుంది.
 
 నగర విస్తరణ, రోజురోజుకు పెరుగుతున్న ప్రయాణికుల సంఖ్యను దృష్టిలో ఉంచుకుని మూడు కొత్త టెర్మినల్స్ నిర్మించాలనే ప్రతిపాదనను పశ్చిమ, సెంట్రల్ రైల్వే పరిపాలన విభాగాలు రైల్వే బోర్డుకు పంపించాయి. ఇందులో పన్వేల్, ఠాకుర్లీ, వసయిరోడ్ స్టేషన్లు ఉన్నాయి. అందులో రెండు టెర్మినల్స్‌కు మంజూరు లభించే అవకాశముందని సూచన ప్రాయంగా మంత్రి వెల్లడించారు. పనులు పూర్తిచేసుకుని వినియోగంలోకి వస్తే ముంబైలో లోకల్ రైళ్లపై పడుతున్న దూరప్రాంతాల రైళ్ల భారం చాలా వరకు తగ్గిపోనుంది. దేశ రాజధాని ఢిల్లీలో ఐదు టెర్మినల్స్ ఉన్నాయి. జనాభాతో పోలిస్తే ముంబైలో టెర్మినల్స్ సంఖ్య రెట్టింపు ఉండాలి. కాని పరిస్థితులు అందుకు భిన్నంగా ఉన్నాయి.
 
 ముంబైలో ప్రస్తుతం ఛత్రపతి శివాజీ టెర్మినస్ (సీఎస్టీ), దాదర్, బాంద్రా, లోక్‌మాన్య తిలక్ (కుర్లా), ముంబై సెంట్రల్ టెర్మినల్స్ మాత్రమే ఉన్నాయి. వీటికి మరో మూడు అదనంగా చేరితే ముంబై వాసుల సమస్యలు చాలా వరకు తగ్గే అవకాశం ఉంది. సెంట్రల్ రైల్వే పన్వేల్, ఠాకుర్లిలో, పశ్చిమ రైల్వే వసయిరోడ్‌లో టెర్మినల్స్ నిర్మించాలనే ప్రతిపాదనను సంబంధిత బోర్డులు పంపించాయి.
 
 గత బడ్జెట్‌లోనే పన్వేల్‌లో టెర్మినస్, కలంబోలి ప్రాంతంలో రైలు బోగీల నిర్వాహణ, మరమ్మత్తుల కోసం కోచింగ్ టెర్మినస్ నిర్మించాలని మంజూరు లభించినా అది అమలుకు నోచుకోలేదు. అవి ఏర్పాటయ్యుంటే నగరంలోని వివిధ టెర్మినల్స్‌పై భారం తగ్గేది. లోకల్ రైళ్ల ట్రిప్పులు పెంచాలంటే కొత్త టెర్మినల్స్ నిర్మాణం జరగాలి. చాలా సందర్భాలలో లోకల్ రైళ్లకు ప్రాధాన్యం ఇచ్చేందుకు ఎక్స్‌ప్రెస్, మెయిల్ రైళ్లను లూప్‌లైన్‌లో పెట్టాల్సి వస్తోంది. కొత్త టెర్మినల్స్ ఏర్పాటైతే ఈ సమస్య కొంత మేర కొలిక్కి వచ్చే అవకాశం ఉంది.


 హైదరాబాద్ : కేంద్ర కేబినెట్లో చేరేందుకే టీఆర్ఎస్ ఎంపీ కవిత...ప్రధాని మోదీ భజన చేస్తున్నారని కాంగ్రెస్ నేత, మాజీమంత్రి షబ్బీర్ అలీ విమర్శించారు. రైల్వే బడ్జెట్లో తెలంగాణకు జరిగిన లబ్ది ఏమిటో టీఆర్ఎస్ చెప్పాలని ఆయన డిమాండ్ చేశారు. శుక్రవారం షబ్బీర్ అలీ పార్టీ కార్యాలయంలో మీడియాతో మాట్లాడుతూ కేంద్రంపై ఒత్తిడి తేవడంలో టీఆర్ఎస్ నేతలు విఫలమయ్యారన్నారు.
  
 రైల్వే బడ్జెట్లో తెలంగాణకు జరిగిన అన్యాయాన్ని ముఖ్యమంత్రి కేసీఆర్ నాయకత్వంలో టీఆర్ఎస్ ఎంపీలు జంతర్ మంతర్ వద్ద నిరసన తెలపాలని షబ్బీర్ అలీ డిమాండ్ చేశారు. కాగా ఉమ్మడి ఆంధ్రప్రదేశ్తో పోలిస్తే ప్రస్తుత రైల్వే బడ్జెట్లో తెలంగాణకు కొంతమేర న్యాయం జరిగిందని టీఆర్ఎస్ ఎంపీ కవిత వ్యాఖ్యానించిన విషయం తెలిసిందే.


 రైల్వే బడ్జెట్ ఈసారి కూడా నిరాశకు గురిచేసింది. పాత ప్రాజెక్టులకు కేటాయించిన నిధులు అరకొరే కాగా కొత్త ప్రాజెక్టుల ఊసే లేదు. ఏటా ఆశించడం ప్రజలు వంతుకాగా.. ఉసూరుమనిపించడం కేంద్రం బాధ్యతగా మారింది. గురువారం రైల్వే మంత్రి పార్లమెంట్‌లో బడ్జెట్ ప్రవేశపెడుతున్న సమయంలో జిల్లా ప్రజలు టీవీలకు అతుక్కుపోయారు. ప్రసంగ పాఠాన్ని వినడానికి ఆసక్తి కనబరిచారు. జిల్లాకు సంబంధించి ప్రాజెక్టుల మంజూరు, నిధుల కేటాయింపుపై దృష్టి పెట్టారు.
 
 అక్కన్నపేట, మనోహరాబాద్ మార్గాలకు అరకొర ఇవ్వడంపై తీవ్ర అసంతృప్తికి లోనయ్యారు. కొత్తపల్లి-మనోహరాబాద్ రైల్వేలైన్‌కు రూ.20 కోట్లు, అక్కన్నపేట-మెదక్ మార్గానికి రూ.5 కోట్లు కేటాయించడంపై పెదవి విరిచారు. ఎంపీ కొత్త ప్రభాకర్‌రెడ్డి, డిప్యూటీ స్పీకర్ పద్మాదేవేందర్‌రెడ్డి మాత్రం పనులు చేపడతామంటున్నారు. మరిన్ని నిధులు రాబట్టే ప్రయత్నం చేస్తామంటున్నారు.
  
 కొత్తపల్లి-మనోహరాబాద్‌కు రూ.20 కోట్లు
 ⇒అక్కన్నపేట-మెదక్ మార్గానికి రూ.5 కోట్లు
 ⇒మొక్కుబడి నిధులపై జిల్లా వాసుల పెదవి విరుపు
 ⇒పనులు ప్రారంభిస్తామంటున్న ప్రజాప్రతినిధులు
 మెదక్: వ్యయం కొండంత... మంజూరు గోరంత అన్నట్లుంది అక్కన్నపేట-మెదక్ రైల్వే లైన్‌కు కేటాయించిన బడ్జెట్. గురువారం కేంద్ర రైల్వేమంత్రి ప్రవేశ పెట్టిన బడ్జెట్‌లో అక్కన్నపేట-మెదక్ రైల్వేలైన్ కోసం రూ.5 కోట్లు విడుదల చేశారు. పెండింగ్‌లో ఉన్న రైల్వే లైన్లకే ఎక్కువ బడ్జెట్ వస్తుందన్న ఆశతో ముఖ్యమంత్రి కేసీఆర్ ప్రతిపాదనలు పంపారు. మొక్కుబడిగా రూ.5 కోట్లు మాత్రమే నిధులు కేటాయించడంతో రైల్వేలైన్ పనులు ఏ మేరకు ముందుకు కదులుతాయన్న అనుమానాలు వ్యక్తమవుతున్నాయి.
 
 అక్కన్నపేట-మెదక్‌కు 17.2 కిలో మీటర్ల మేర రైల్వేలైన్ మంజూరు చేస్తూ 2012-13 బడ్జెట్‌లో ఉత్తర్వులు జారీ అయ్యాయి. ఇందుకు గాను మొత్తం రూ.129.32 కోట్లు అవసరమని నిర్ణయించారు. ఇందులో 50 శాతం రాష్ట్ర ప్రభుత్వం భరిస్తూ... ఉచితంగా భూ సేకరణ చేసివ్వాలని కేంద్రం ఆదేశాలు జారీ చేసింది. ఈ మేరకు 19 జనవరి 2014న రైల్వేలైన్‌కు అప్పటి ఎంపీ విజయశాంతి, మంత్రి సునీతారెడ్డిలు శంకుస్థాపన చేశారు. 2012-13లో రూ.కోటి, 2013-14లో రూ.1.10 కోట్లు, 2014-15లో రూ.10 కోట్లు  కలిసి మొత్తం రూ.12.10 కోట్లు మంజూరయ్యాయి. కాగా రాష్ట్ర వాటాకింద 2012-13లో రూ.కోటి, 2012-14లో రూ.75 లక్షలు కలిపి మొత్తం రూ.1.75 కోట్లు మంజూరయ్యాయి.
 
 గత జనవరిలో రాష్ట్ర ప్రభుత్వం రూ.25.26 కోట్లు, భూ సేకరణ కోసం రూ.10 కోట్లు తన వాటా కింద మంజూరు చేసింది. దీంతో భూ సేకరణ పోనూ రైల్వేలైన్ పనుల కోసం కేంద్ర, రాష్ట్ర ప్రభుత్వాలు కలిసి మొత్తం రూ.24.60 కోట్లు మంజూరు చేసినట్లయింది. అయితే ఇంతవరకు భూ సేకరణ ప్రక్రియ పూర్తి కాలేదు. ఈసారైనా కేంద్రం ఎక్కువ మొత్తంలో నిధులు మంజూరు చేస్తుందని ఆశపడ్డప్పటికీ కేవలం రూ.5 కోట్లు మాత్రమే కేటాయించడంతో మెదక్ వాసులు తీవ్ర అసంతృప్తి వ్యక్తం చేస్తున్నారు.
  
 కేసీఆర్ కల నెరవేరుతుంది..
 అక్కన్నపేట-మెదక్, కొత్తపల్లి-మనోహరాబాద్ రైల్వేలైన్ల ఏర్పాటు ముఖ్యమంత్రి కేసీఆర్ కల. ఉద్యమ సమయం నుంచి ఆయన రైల్వేలైన్ల ఏర్పాటు కోసం డిమాండ్ చేస్తూనే ఉన్నారు. ప్రస్తుతం అక్కన్నపేట-మెదక్‌కు రూ.5 కోట్లు, కొత్తపల్లి-మనోహరబాద్‌కు రూ.20 కోట్లు మంజూరు చేయడం సంతోషం. తెలంగాణ రాష్ట్రం ఏర్పడ్డాక మొదటిసారి నిధులు మంజూరయ్యాయి. ఎప్పుడో బ్రిటీష్ కాలంలో వేసిన రైల్వేలైన్లే ఇప్పటికీ కొనసాగుతున్నాయి. ప్రస్తుతం నిధులతో రైల్వేలైన్ పనులు ప్రారంభించవచ్చు. భవిష్యత్తులో అధిక కేటాయింపులు జరిగేలా కృషి చేస్తా.        - కొత్త ప్రభాకర్‌రెడ్డి, మెదక్ ఎంపీ
  
 కొత్త ప్రాజెక్టులు సాధించుకుంటాం..
 రైల్వే బడ్జెట్‌లో కొత్త ప్రాజెక్టులకు తగిన ప్రాధాన్యత ఇవ్వకపోవడం తీవ్ర నిరాశ పర్చింది. కేవలం పెండింగ్ ప్రాజెక్టులకే ప్రాధాన్యత నిచ్చి, కొత్త వాటి ఊసెత్తక పోవడం సరికాదు. పార్లమెంట్ సమావేశాలు ముగిసే లోగా రైల్వే కొత్త ప్రాజెక్టులను సాధించుకుంటాం. జహీరాబాద్-సికింద్రాబాద్, బోధన్-బీదర్ మధ్య కొత్త రైలు మార్గాల ఏర్పాటుకు తగిన ప్రాధాన్యత ఇవ్వాలని రైల్వే మంత్రిని కోరుతా. కొత్త ప్రాజెక్టులకు మంజూరు లభిస్తుందనే నమ్మకముంది.    
                  - బీబీ పాటిల్, జహీరాబాద్ ఎంపీ
  
 పనులు ప్రారంభిస్తాం..
 అక్కన్నపేట-మెదక్ రైల్వేలైన్ పనుల కోసం బడ్జెట్‌లో కేటాయించింది రూ.5 కోట్లే. ఇది చాలా తక్కువ. మరిన్ని నిధులు కేటాయిస్తే బాగుండేది. అయినా పనులు ప్రారంభిస్తాం. రైల్వేలైన్ పనులు ప్రారంభించే అంశంపై చర్చించేందుకు మార్చి 3న సచివాలయంలో సమావేశం ఏర్పాటు చేయనున్నాం. ఈ సమావేశంలో రెవెన్యూ కార్యదర్శి, అటవీశాఖ చీఫ్ సెక్రెటరీ, రైల్వేబోర్డు ప్రతినిధి, జిల్లా కలెక్టర్ పాల్గొంటారు. ఉన్న నిధులతో భూ సేకరణ పూర్తిచేసి పనులు ప్రారంభించేందుకు చర్యలు చేపడతాం. కేంద్రమిచ్చిన రూ.5 కోట్లకు రాష్ట్ర వాటా కింద మరో రూ.5 కోట్లు మంజూరు చేయాలని సీఎంను కోరతాం.
 - పద్మాదేవేందర్‌రెడ్డి, డిప్యూటీ స్పీకర్ (మెదక్ ఎమ్మెల్యే)
  
 వైఎస్ హయాంలోనే రాష్ట్ర వాటాకు సంసిద్ధత
 అక్కన్నపేట-మెదక్ రైల్వే లైన్ కోసం దివంగత సీఎం వైఎస్ రాజశేఖరరెడ్డి అప్పట్లోనే ఎంతో చొరవ తీసుకున్నారు. ఇందులో సగం వాటాను రాష్ట్రం తరఫున భరించేందుకు ఆయన సంసిద్ధతను వ్యక్తం చేశారు. అప్పట్లో నేను ఎమ్మెల్యేగా ఉన్నప్పుడు ఈ లైన్ కోసం వైఎస్‌కు విజ్ఞప్తి చేశా. ఈ మేరకు రూ.120 కోట్ల వ్యయంతో ప్రతిపాదనలు రూపొందాయి. ప్రస్తుత బడ్జెట్‌లో మంజూరు చేసిన రూ.5 కోట్లు ఏ పనికి కొరగావు. ఇప్పటివరకు భూ సర్వే, సేకరణ పూర్తి కాలేదు. పూర్తిస్థాయి సర్వేకూడా జరగలేదు. గత మూడేళ్లుగా మంజూరైన నిధులు కూడా అరకొరే. కనుక పెండింగ్ ప్రాజెక్ట్‌ల నిధులను అక్కన్నపేట-మెదక్ రైల్వేలైన్ పనులకు మళ్లించాలి. -  పి.శశిధర్‌రెడ్డి, పీసీసీ అధికారి ప్రతినిధి


 - సీఎం కేసీఆర్ చొరవతో ఈసారి ప్రాధాన్యం
 - పెద్దపల్లి-నిజామాబాద్ రూట్‌కు భారీ నిధులు
 - కొత్త లైన్లకు ఆమోదం తెలిపితే  బాగుండేది
 - బడ్జెట్‌పై ఎంపీ కల్వకుంట్ల కవిత స్పందన
  సాక్షి ప్రతినిధి, నిజామాబాద్ : ‘‘ఉమ్మడి రాష్ర్టంలో అనేక ఏళ్లుగా తెలంగాణకు అన్యాయం జరుగుతూ వచ్చింది.తెలంగాణ సాధన అనంతరం తొలి రైల్వే బడ్టెట్ ఇది.
 
  సహచర ప్రజాప్రతినిధులు, ముఖ్యమంత్రి చొరవతో ఈసారి జరిగిన కేటాయింపులలో తెలంగాణ వాటా దక్కిందని భావిస్తున్నా. పెద్దపల్లి-కరీంనగర్-నిజామాబాద్ లై నుకు రూ.141 కోట్లు ఇవ్వ డం సంతోషకరం’’ అని పేర్కొన్నారు నిజామాబాద్ ఎంపీ కల్వకుంట్ల కవిత. ‘‘గత బడ్జెట్లో రూ.35 కోట్లే కేటాయించడంతో పోలిస్తే ఇది హర్షించదగ్గదే.
 
 ఐతే ప్రజలు అ డుగుతున్నటువంటి మనోహరాబాద్-నిజామాబాద్ డబుల్ లైన్ పనులు, కొత్తలైన్లకు ఆమోదం తెలిపి కేటాయింపులు చేస్తే బాగుండేది. తె లంగాణకు ప్రత్యేకించి నిజామాబాద్ జిల్లాకు అవసరమైన ప్రాజెక్టుల కోసం నా ప్రయత్నం ఇక ముందు కూడా కొనసాగుతూ ఉంటుంది. తెలంగాణకు 14 రైల్వే ఓవర్ బ్రిడ్జిలు కూడా కేటాయించడం హర్షించదగ్గ విషయం. మెదక్ జిల్లా మాసాయిపేటలో జరిగిన దుర్ఘటనను దృష్టిలో ఉంచుకుని కాపలా లేని గేట్ల విషయంలో చర్యలు తీసుకోవడాన్ని స్వాగతిస్తున్నాను. ముఖ్యంగా మహిళల భద్రతకు సంబంధించి తీసుకోబోతున్న చర్యలు బాగానే ఉన్నాయి.
 
 స్టేషన్లలో సౌకర్యాలు, టాయిలెట్ల నిర్వహణ మెరుగుపర్చడం మంచి పరిణామం కాగా, రైల్వేలలో రాష్ట్రాలు పెట్టుబడులు పెట్టాలనడాన్ని మేము వ్యతిరేకిస్తున్నాం. ముఖ్యమంత్రి కేసీఆర్ కూడా ఇదే అభిప్రాయంతో ఉన్నారు. రైల్వేలు ఉమ్మడి జాబితాలోని అంశం కాదు. అది కేంద్రం పరిధిలోని అంశం. నిర్వహణ ద్వారా వచ్చే ఆదాయం కేంద్రం మాత్రమే తీసుకుంటుంది. కాబట్టి ఈ ప్రతిపాదన సమంజసం కాదు. దేశానికి రైల్వేలు రక్తనాడుల వంటివి. దేశాభివృద్ధికి, వివిధ ప్రాంతాల సంతులిత అభివృద్ధిలో రైల్వేల పాత్ర కీలకం కాబట్టి ఆ బాధ్యతను కేంద్రమే తీసుకోవాలి.
 
 ఇది బడ్జెట్లో కేటాయింపులు మాత్రమేనని, అసవరమైతే ప్రత్యేక పరిస్థితులలో, సప్లిమెంటరి బడ్జెట్‌లో మరిన్ని కేటాయింపులకు అవకాశం ఉం దని రైల్వే మంత్రి సురేష్ ప్రభు చెప్పారు. అందుకోసం కూడా ఎంపీగా మన ప్రయత్నాలు కొనసాగుతాయి’’ అని వివరించారు.


 ఆశలు ఆవిరయ్యూయి. కేంద్ర రైల్వేబడ్జెట్‌లో ఎప్పటిలాగే జిల్లాకు అన్యాయం జరిగింది. ప్రభుత్వం మారినా అదే మొండిచేయి ఎదురైంది. ఎంతగా వేడుకున్నా రైల్వేమంత్రి సురేశ్‌ప్రభు కనికరించలేదు. భద్రాచలం- కొవ్వూరు లైన్‌కు ఎప్పటిలాగే ఎర్రజెండా చూపారు. గతంలో వచ్చి వెనక్కి మళ్లిన రూ.25 కోట్ల భూసేకరణ నిధులతోనే సరిపెట్టారు. పాండురంగాపురం- సారపాక ప్రస్థావనే లేదు.
 
 కొత్తగూడెం - సత్తుపల్లి లైన్ ఊసే లేదు. ఏ గ్రేడ్‌స్థాయిలో ఉన్న ఖమ్మం రైల్వేస్టేషన్‌కు ఉచిత వైఫై సేవలు అందుబాటులోకి రావడం.. కాజీపేట- విజయవాడ మూడోలైన్ ముచ్చట తీర్చటం మాత్రమే ఊరట.
  
 కేంద్రంపై ఒత్తిడి తెస్తా..
 రైల్వే బడ్జెట్‌లో జిల్లాకు జరిగిన అన్యాయంపై ప్రధానమంత్రిని కలుస్తా. ప్రధాన ప్రాజెక్టు అయిన భద్రాచలం - కొవ్వూరు లైన్‌కు నిధులు కేటాయించడంలో కేంద్రం వివక్ష చూపడం తగదు. జిల్లా ప్రజలు ఎన్నో ఏళ్లుగా ఈ లైన్ నిర్మాణం కోసం ఎదురుచూస్తున్నారు. ఇది జరిగితే గిరిజన జీవితాల్లో మార్పులు వస్తాయి. కానీ కేంద్రం పట్టించుకోవడం లేదు. కేవలం సర్వేలు, భూ సేకరణతో కేంద్రం ఈలైన్ విషయంలో కాలయాపన చేస్తోంది.
 
 మణుగూరు - రామగుండం, కొత్తగూడెం- సత్తుపల్లి లైన్‌కు భారీగా నిధులు కేటాయించాలని కోరుతూ బడ్జెట్ సమావేశాలు ముగిసేలోపు ప్రధానమంత్రిని కలిసి విన్నవిస్తా. ప్రజల ఆకాంక్షలకు అనుగుణంగా ఈ బడ్జెట్ లేదు. తెలంగాణ అభివృద్ధి చెందాలంటే రాష్ట్రంలో పెండింగ్‌లో ఉన్న రైల్వే ప్రాజెక్టులకు కేంద్రం నిధులు కేటాయించాలి.
  - పొంగులేటి శ్రీనివాసరెడ్డి, ఎంపీ, వైఎస్‌ఆర్‌సీపీ రాష్ట్ర అధ్యక్షులు
  
 - నిరాశాజనకంగా కేంద్ర రైల్వేబడ్జెట్
 - జిల్లాకు తీరని అన్యాయం
 - కేవలం భద్రాచలం లైన్‌కు రూ.25 కోట్లు
 - ఖమ్మం స్టేషన్‌కు ఉచిత వైఫై సేవలు
 - వీటితోనే సరిపుచ్చిన కేంద్ర ప్రభుత్వం
 సాక్షి, ఖమ్మం: రైల్వే బడ్జెట్‌లో జిల్లా ప్రజల ఆశలపై ఎన్డీఏ ప్రభుత్వం నీళ్లు చల్లింది. ఏళ్లుగా పెండింగ్‌లో ఉన్న ప్రాజెక్టులకు నిధులు కేటాయించకుండా మొండిచేయి చూపింది. దక్షిణ మధ్య రైల్వేకు గతంలో కన్నా 24 శాతం అధికంగా నిధులు కేటాయించినా.. జిల్లా విషయానికొస్తే మాత్రం పూర్తి నిర్లక్ష్యంగా వ్యవహరించింది. కేవలం భద్రాచలం - కొవ్వూరు రైల్వేలైన్‌కు రూ.25 కోట్లు కేటాయించి చేతులు దులుపుకుంది.
  
 పార్లమెంట్‌లో రైల్వే బడ్జెట్ అనగానే జిల్లా ప్రజలు ఆశించేది.. భద్రాచలం-కొవ్వూరు లైన్‌కు నిధులు కేటాయించాలని. కానీ, గత ప్రభుత్వాల మాదిరిగానే ఈ ప్రభుత్వం కూడా ఈ లైన్ విషయంలో రిక్తహస్తం చూపించింది. నిధులు లేక  ఈ లైన్ నిర్మాణ పనులు ప్రారంభానికి నోచుకోలేదు. కనీసం భూసేకరణకు కూడా నిధులు కేటారుుంచకపోవటం గమనార్హం.  గత బడ్జెట్‌లో రూ.21 కోట్లు భూసేకరణకు కేటాయిస్తే ఇవి ఇప్పటి వరకు ఖర్చు చేయకపోవడంతో మురిగిపోయాయి.
 
 ఇప్పుడు మళ్లీ భూ సేకరణకు కేవలం రూ.25 కోట్లు కేటాయించి కేంద్రంపై జిల్లా ప్రజలు పెట్టుకున్న నమ్మకాన్ని వమ్ము చేసింది. జిల్లా ప్రజల ఆందోళనను కేంద్రం పెడచెవిన పెట్టింది. ప్రయాణికుల భద్రతకు పెద్దపీట వేస్తున్నామని బడ్జెట్‌లో గొప్పలు చెప్పిన ప్రభుత్వం కనీసం పెండింగ్ లో ఉన్న లైన్ల విషయంలోనూ కనికరం చూపలేదు. రెండు తెలుగు రాష్ట్రాల్లో జిల్లాకే తీవ్ర అన్యాయం జరిగింది. దక్షిణ అయోధ్యగా పేరొందిన భద్రాచలం లైన్‌కు కేంద్రం తప్పకుండా భారీ ఎత్తున నిధులు కేటాయిస్తుందని ఈ ప్రాంతవాసులు ఆశించారు. కానీ ఈ లైన్‌పై చిన్నచూపు చూసిన కేంద్రం తీరుపై గిరిజనులు ఆగ్రహం వ్యక్తంచేస్తున్నారు.
 
 ఇక మణుగూరు - రామగుండం లైన్‌ను సర్వేకే పరిమితం చేసింది. పాండురంగాపురం- సారపాక, కొత్తగూడెం - సత్తుపల్లి లైన్ల ఊసే లేదు. జిల్లా నుంచి సింగరేణి గనుల ద్వారా కేంద్ర రైల్వే శాఖకు భారీగా ఆదాయం వస్తున్నా కనీసం బడ్జెట్‌లో ఈలైన్లను ప్రస్తావించకపోడం శోచనీయం. దేశ వ్యాప్తంగా ఏ గ్రేడ్ స్టేషన్లకు బడ్జెట్‌లో ఉచిత వైఫై సేవలను ప్రకటించింది. దీనిలో భాగంగా జిల్లాలో ఏ గ్రేడ్ స్థాయిలో ఉన్న ఖమ్మం స్టేషన్‌లో మాత్ర మే వైఫైసేవలు అందుబాటులోకి రానున్నాయి.
  
 జిల్లాలోనూ మూడు లైన్లు
 కాజీపేట - విజయవాడ మధ్య మూడో లైన్‌కు బడ్జెట్‌లో గ్రీన్ సిగ్నల్ ఇచ్చారు.  కాజీపేట నుంచి ఖమ్మం మీదుగా విజయవాడకు 218 కిలో మీటర్ల దూరం. ప్రస్తుతం ఉన్న రెండు లైన్లతో ఈ మార్గంలో రద్దీ ఎక్కువగా ఉంటుంది. క్రాసింగ్‌లతో గంటల కొద్దీ ప్రయాణం ఆలస్యమవుతోంది. దీన్ని దృష్టిలో పెట్టుకొని మూడో లైన్ నిర్మాణానికి ఈ బడ్జెట్‌లో నిధులు కేటాయిస్తున్నట్లు పేర్కొన్నారు. మూడో లైన్ నిర్మాణం జిల్లాలోని ప్రయాణికులకు కొంతమేరకు ఊరట కలిగించనుంది.
  
 సర్వేలకు అత్తెసరు నిధులు
 కొత్తగూడెం నుంచి ఛత్తీస్‌గఢ్ రాష్ట్రం దంతెవాడ జిల్లా కిరణ్‌డోల్ (బైలడిల్లా) వరకు 180 కిలోమీటర్ల మేరకు కొత్తలైన్ సర్వేకు ఈ బడ్జెట్‌లో రూ.24.94 లక్షలు కేటాయించారు. పారిశ్రామిక అవసరాలను దృష్టిలో పెట్టుకొని కేంద్రం ఈ లైన్ సర్వేకు నిధులు కేటాయించింది. కిరణ్‌డోల్, బైలాడిల్లాలోని ఇనుప ఖనిజం, బొగ్గు కొత్తగూడెం మీదుగా రాష్ట్రానికి.. ఇక్కడి నుంచి అక్కడి ఈ ఖనిజాలను తరలించే వీలుగా ఈ లైన్ నిర్మాణానికి కేంద్రం సంకల్పించింది.
  మణుగూరు నుంచి రామగుండం లైన్ ఎన్నో ఏళ్లుగా పెండింగ్‌లో ఉంది. గత బడ్జెట్‌లో ఈ లైన్ సర్వే కోసం రూ.3 కోట్లను కేంద్రం కేటాయించింది. ప్రస్తుతం ఈలైన్ 200 కి.మీ సర్వే కోసం రూ.50 లక్షలు మంజూరు చేసింది.


  రైల్వే బడ్జెట్‌లో జిల్లాకు కంటితుడుపు కేటాయింపులు
  సాక్షి ప్రతినిధి, కరీంనగర్ : మళ్లీ షరా మామూలే. కేంద్రంలో ప్రభుత్వాలు మారినా కరీంనగర్ జిల్లాపై వివక్ష కొనసాగుతూనే ఉంది. గతంలో మాదిరిగానే రైల్వే బడ్జెట్‌లో ఈసారి కూడా జిల్లాకు నిరాశే ఎదురైంది. పార్లమెంట్‌లో 53 పేజీల ప్రసంగ పాఠాన్ని చదివిన రైల్వేశాఖ మంత్రి సురేష్‌ప్రభు జిల్లా పేరు కాదు కదా, కనీసం తెలంగాణ రాష్ట్రం ఊసే ఎత్తలేదు. ముఖ్యమంత్రి డ్రీమ్ ప్రాజెక్టు కొత్తపల్లి-మనోహరాబాద్ ప్రాజెక్టుకు కేంద్రం పెట్టిన అడ్డగోలు షరతులన్నింటికీ రాష్ట్ర ప్రభుత్వం తలూపినా... జిల్లా ఎంపీలిద్దరు కాలికి బలపం కట్టుకుని ఢిల్లీ చుట్టు చక్కర్లు కొట్టినా.. కంటి తుడుపు చర్యలతోనే సరిపెట్టారు.
  
  ఈ ప్రాజెక్టులో భాగంగా చీఫ్ ఇంజనీర్, డివిజనల్ ఇంజనీర్ కార్యాలయ ఏర్పాటుకు రూ.20 కోట్లు కేటాయించారే తప్ప ప్రాజెక్టు పనులను ప్రస్తావించలేదు. దశాబ్దాలుగా పెండింగ్‌లో రామగుండం-మణుగూరు ప్రాజెక్టుపై స్పందించని కేంద్రం.. రెండు దశాబ్దాల నాటి పెద్దపల్లి-నిజామాబాద్ రైలు ప్రాజెక్టు నిర్మాణాన్ని పూర్తి చేసేందుకు రూ.140 కోట్లు కేటాయించింది. ఉప్పల్, బిజిగిరీషరీఫ్ రైల్వే ఓవర్ బ్రిడ్జిల(ఆర్‌వోబీ) నిర్మాణానికి రూ.110 కోట్లు కేటాయించిన రైల్వే శాఖ.. కరీంనగర్‌లోని మంచిర్యాల చౌరస్తావద్ద నిర్మించ తలపెట్టిన ఆర్‌వోబీకి మాత్రం మొండి చేయిచూపింది.
  
  ఈసారి ఇంతే!
  రూ.20 కోట్లతో ‘కల’ సాకారమయ్యేదెన్నడు?
  కొత్తపల్లి-మనోహరాబాద్ రైల్వే నిర్మాణం ముఖ్యమంత్రి కేసీఆర్ డ్రీమ్ ప్రాజెక్టు. కరీంనగర్ ఎంపీ హోదాలో ఉండగా ఈ ప్రాజెక్టును మంజూరు చేయించారు. 154.2 కిలోమీటర్ల పొడవైన ఈ రైలు మార్గానికి అంచనా వ్యయం రూ.952.95 కోట్లు. 2006-07 బడ్జెట్‌లో రూ.5కోట్లు, ఆ తరువాత రూ.2కోట్ల మాత్రమే కేటాయించి చే తులు దులుపుకున్నారు. గత ఐదేళ్లుగా పైసా కేటాయించలేదు. కేసీఆర్ సీఎం ప గ్గాలు చేపట్టాక దీనిపై ప్రత్యేక శ్రద్ధ తీసుకున్నారు. ప్రాజెక్టు వ్యయంలో మూడో వం తు (రూ.317.65 కోట్లు) నిధులను రాష్ట్ర ప్రభుత్వం భరించేందుకు ఒప్పుకున్నారు. దీనికితోడు ప్రాజెక్టుకు అవసరమైన భూమిని మొత్తాన్ని సేకరించి ఇచ్చే బాధ్యతను కూడా రాష్ట్ర ప్రభుత్వమే తీసుకుంటున్నట్లు ప్రకటించారు. అట్లాగే చరిత్రలో ఎన్న డూ లేనివిధంగా ఐదేళ్ల నష్టాన్ని కూడా భరించేందుకు సిద్ధమని ఒప్పందం కుదుర్చుకున్నారు. ఇన్ని షరతులకు ఒప్పుకున్న నేపథ్యంలో తాజా బడ్జెట్‌లో ప్రాజెక్టు నిధులను మంజూరు చేయడం ఖాయమని అధికార పార్టీ నేతలంతా భావించారు. కరీంనగర్ ఎంపీ బి.వినోద్‌కుమార్ ఈ విషయంలో ప్రత్యేక చొరవ తీసుకున్నారు. ఢిల్లీ వెళ్లినప్పుడల్లా కేంద్ర పెద్దలను కలిసి ఒత్తిడి తెచ్చారు. తీరా చూస్తే బడ్జెట్ రూ.20 కోట్ల కేటాయించడం అందరినీ విస్మయపరిచింది. ఆ డబ్బును కూడా రైల్వే శాఖ అధికారుల కార్యాలయాల ఏర్పాటుకు వినియోగిస్తున్నట్లు పేర్కొన్నారు.
  
  రామగుండం-మణుగూరులైన్‌సర్వేకే పరిమితం
  రైల్వే పెండింగ్ ప్రాజెక్టులన్నింటినీ పూర్తి చేస్తామని కేంద్రం ప్రకటించినప్పటికీ 33 ఏళ్ల క్రితం మంజూరైన రామగుండం-మణుగూరు ప్రాజెక్టు రైలు మార్గం ప్రస్తావన తీసుకురాలేదు. ఈ రైల్వే లైన్ సర్వే కోసం రూ.50 లక్షలు కేటాయించినట్లు పెద్దపల్లి ఎంపీ బాల్క సుమన్ తెలిపారు. వాస్తవానికి ఆనాడు రూ.657 కోట్ల అంచనా వ్యయంతో చేపట్టిన ఈ ప్రాజెక్టును 2013-14 ప్రణాళిక సంఘంలో చేర్చి ప్రైవేటు భాగస్వామ్యంతో చేపడతామని ప్రకటించినప్పటికీ తాజా బడ్జెట్‌లో రూ.50 లక్షలతోనే సరిపెట్టడంతో ప్రాజెక్టు పనులు జరిగే అవకాశాల్లేకుండా పోయాయి. 22 ఏళ్లనాటి పెద్దపల్లి-నిజామాబాద్ రైల్వే పెండింగ్ ప్రాజెక్టును పూర్తి చేయడానికి ఈసారి బడ్జెట్‌లో రూ.140 కోట్లు కేటాయించినట్లు టీఆర్‌ఎస్ ఎంపీలు చెబుతున్నప్పటికీ ఇంకా అధికారిక ప్రకటన వెలువడలేదు.
  
  ఎంపీ ఒత్తిడితో ఆర్‌వోబీలకే కేంద్రం గ్రీన్‌సిగ్నల్
  కరీంనగర్ ఎంపీ బి.వినోద్‌కుమార్ తొలిసారి ఎంపీగా ఎన్నికైన సమయంలో జమ్మికుంట రైల్వే ఓవర్ బ్రిడ్జి (ఆర్‌వోబీ) మంజూరైంది. మళ్లీ ఎంపీగా ఎన్నికయ్యాక ఉప్పల్ ఆర్‌వోబీతోపాటు బిజిగిరిషరీఫ్ రైల్వే స్టేషన్ పరిధిలోని ఓవర్ బ్రిడ్జి నిర్మాణానికి నిధులను మంజూరు చేయించడంలో సఫలీకృతులయ్యారు. తాజా బడ్జెట్‌లో ఉప్పల్ రైల్వేస్టేషన్ పరిధిలోని ఆర్‌ఓబీ నిర్మాణానికి రూ.53.64 కోట్లు, బిజిగిరి షరీఫ్ రైల్వే స్టేషన్ పరిధిలోని ఆర్‌ఓబీ నిర్మాణానికి రూ.50.01 కోట్లు కేటాయించారు.
  
  పెద్దపల్లి పరిధిలోనూ మూడు ఆర్‌ఓబీలకు     అనుమతి
  తాజా బడ్జెట్‌లో పెద్దపల్లి లోక్‌సభ సెగ్మెంట్ పరిధిలోని పెద్దంపేట-రామగుండం, మంచిర్యాల-రవీంద్రఖని, బెల్లంపల్లి-రేచిన్‌రోడ్ స్టేషన్ల మధ్యన రైల్వే ఓవర్ బ్రిడ్జిల నిర్మాణానికి కేంద్రం అనుమతి లభించింది. అయితే ఎన్ని నిధులు కేటాయించారనే విషయంలో స్పష్టత లేదు. అట్లాగే రాఘవపూర్-మందమర్రి మధ్య మూడో లైన్ పనుల కోసం రూ.25 కోట్లు, పెద్దంపేట్-మంచిర్యాల మధ్య మూడోలైన్ కోసం రూ.58 కోట్లు కేటాయించారు.
  
  వీటి ఊసేది?
  కరీంనగర్-తిరుపతి రైలుకు కరీంనగర్ ఎక్స్‌ప్రెస్‌గా నామకరణం చేయడంతోపాటు ప్రతిరోజూ నడపాలన్న ప్రతిపాదనను పట్టించుకోలేదు. కరీంనగర్ స్టేషన్ నుంచి గ్రానైట్ రవాణాను పెంచేందుకు అదనపు ర్యాక్‌లను ఏర్పాటు చేయాలన్న విజ్ఞప్తిని పక్కనపెట్టారు. జగిత్యాల-కాగజ్‌నగర్ వరకు నడిచే పుష్పుల్ రైలులో టాయిలెట్లు ఏర్పాటు చేయాలని చేసిన సూచనను విస్మరించారు. కరీంనగర్-సికింద్రాబాద్, కరీంనగర్-విజయవాడ, కరీంనగర్-బాలార్షా పుష్పుల్ రైళ్లను పెద్దపల్లి మీదుగా నడపాలనే ప్రతిపాదనను గాలికొదిలేశారు. సింగరేణి కార్మికుల కోసం హైదరాబాద్-కాగజ్‌నగర్‌కు ఇంటర్‌సిటీ ఎక్స్‌ప్రెస్‌ను రైలును ప్రవేశపెట్టాలనే డిమాండ్‌ను ఏమాత్రం పరిగణలోకి తీసుకోలేదు.
  
   పెద్దపల్లిలో రైల్వే రిజర్వేషన్ కౌంటర్, డిస్‌ప్లే బోర్డు, బాంబే, మంగళూరు, షిరిడీ ఎక్స్‌ప్రెస్ రైళ్లను కాజీపేట వరకు పొడిగింపు, రామగిరి, భాగ్యనగర్, తెలంగాణ, సింగరేణి రైళ్లకు అదనపు బోగీల ఏర్పాటు, భాగ్యనగర్, కాజీపేట-నాగపూర్ ప్యాసింజర్ రైళ్లలో కోచ్‌ల సంఖ్య పొడిగింపు ప్రతిపాదనలపైనా పెదవి విప్పలేదు. తాండూరు, పాతబెల్లంపల్లి రైల్వే గేట్లవద్ద ఆర్‌వోబీల నిర్మాణం, కమాన్‌పూర్ మండలం రాణాపూర్, కన్నాలవద్ద హైలెవల్ వంతెనలు నిర్మించాలనే ప్రతిపాదనలను రైల్వే మంత్రి పట్టించుకోలేదు. వీటిపై దక్షిణ మధ్య రైల్వే జీఎం స్పందిస్తారని అధికార పార్టీ ఎంపీలు చెప్పినప్పటికీ... గురువారం సాయంత్రం దక్షిణ మధ్య రైల్వే జీఎం విడుదల చేసిన ప్రకటనలో వాటి ఊసే లేకపోవడం గమనార్హం.
  


 ⇒ నిరాశ పరిచిన రైల్వే బడ్జెట్
 ⇒ డెరివేటివ్‌ల కాంట్రాక్ట్ ముగింపు ప్రభావం
 ⇒ 261 పాయింట్లు నష్టపోయిన సెన్సెక్స్
 ⇒ 8,700 దిగువకు నిఫ్టీ
 ⇒ సిమెంట్, లోహ, ఎరువుల షేర్లు పతనం
 ⇒ రవాణా వ్యయం పెంపు ఫలితం
 ⇒ మార్కెట్  అప్‌డేట్
 ముంబై:మోదీ ప్రభుత్వ తొలి పూర్తి స్థాయి రైల్వే బడ్జెట్ స్టాక్ మార్కెట్‌ను నిరాశపరిచింది. దీనికి ఫిబ్రవరి నెల డెరివేటివ్‌ల కాంట్రాక్టు ముగింపు కూడా తోడైంది. దీంతో బీఎస్‌ఈ సెన్సెక్స్ గురువారం 261 పాయింట్లు నష్టపోయి 28,747 పాయింట్ల వద్ద ముగిసింది. నిఫ్టీ 83 పాయింట్లు నష్టపోయి 8,684 పాయింట్ల వద్ద ముగిసింది. నిఫ్టీ 8,700 పాయింట్ల దిగువకు పడిపోయింది. మార్కెట్‌కు 2వారాల్లో  అధ్వాన ముగింపు ఇదే.
  
 బడ్జెట్ నిరాశ: అసలే డిమాండ్ అంతంతమాత్రంగా ఉన్న పరిస్థితుల్లో రైల్వే రవాణా వ్యయం పెరగడంతో వీటిని వినియోగదారుడికి సిమెంట్, ఉక్కు కంపెనీలు పూర్తిగా బదిలీ చేయలేవని ఇన్వెస్టర్లు సందేహాపడుతున్నారు. ఆల్ట్రాటెక్ సిమెంట్, హెడెల్‌బెర్గ్ సిమెంట్, శ్రీ సిమెంట్, ఏసీసీ, అంబుజా సిమెంట్స్ 0.5 శాతం నుంచి 2.1 శాతం రేంజ్‌లో క్షీణించాయి. ఇక ఉక్కు కంపెనీలు జేఎస్‌డబ్ల్యూ స్టీల్, టాటా స్టీల్, సెయిల్ షేర్లు 0.8 శాతం నుంచి 3.2 శాతం రేంజ్‌లో పడిపోయాయి. నేషనల్ ఫెర్టిలైజర్, టాటా కెమికల్స్, గుజరాత్ స్టేట్ ఫెర్టిలైజర్స్, గుజరాత్ నర్మదా వ్యాలీ ఫెర్టిలైజర్స్ కెమికల్స్ 1.8 శాతం నుంచి 0.3 శాతం రేంజ్‌లో తగ్గాయి.
  
 ఆరు సెన్సెక్స్ షేర్లకే లాభాలు : 30 షేర్ల సెన్సెక్స్‌లో 24 షేర్లు నష్టాల్లో ముగిశాయి. ఆరు మాత్రమే లాభాల్లో ముగిశాయి.  1,749 షేర్లు నష్టాల్లో,1,078 షేర్లు లాభాల్లో ముగిశాయి. టర్నోవర్ బీఎస్‌ఈలో రూ.4,868 కోట్లుగా, ఎన్‌ఎస్‌ఈలో రూ.23,260 కోట్లుగా, డెరివేటివ్ సెగ్మెంట్లో రూ.5,81,564కోట్లుగా నమోదైంది. విదేశీ ఇన్వెస్టర్లు రూ.2,312 కోట్లు, దేశీ ఇన్వెస్టర్లు రూ.341 కోట్ల చొప్పున నికర  కొనుగోళ్లు జరిపారు.


 - భారీ ప్రతిపాదనలు లేకపోవడం కారణం
 - లాభాల స్వీకరణతో క్షీణించిన పలు రైల్వే షేర్లు
 ముంబై: ఇన్వెస్టర్ల సెంటిమెంట్‌కు ఊపునివ్వడంలో విఫలమైన రైల్వే బడ్జెట్ కారణంగా రైల్వే షేర్లు కుదేలయ్యాయి. రైల్వేలకు సంబంధించిన పలు షేర్లు ఇంట్రాడే ట్రేడింగ్‌లో పెరిగినప్పటికీ, చివరకు నష్టాల్లోనే ముగిశాయి. రైల్వే బడ్జెట్‌లో భారీ సంస్కరణలు ఉంటాయనే అంచనాలతో గత కొన్ని రోజులుగా పెరుగుతూ వస్తున్న రైల్వే షేర్లలో లాభాల స్వీకరణ జరిగిందని నిపుణులంటున్నారు.
 
 విద్యుదీకరణకు అధిక ప్రాధాన్యత ఇవ్వాలన్న ప్రతిపాదన కారణంగా హింద్ రెక్టిఫైర్ 15 శాతం వృద్ధితో రూ.89కు పెరిగింది. సబర్బన్ రైళ్లలో మహిళల భద్రత కోసం నిఘా కెమెరాలు అమరుస్తామన్న ప్రతిపాదనతో జికామ్  సెక్యూరిటీ సిస్టమ్స్ 5 శాతం పెరిగి రూ.179 వద్ద ముగిసింది. శుభ్రతకు ప్రాధాన్యత ఇస్తామన్న కారణంగా  ఏటూజడ్ ఇంజినీరింగ్ 10 శాతం ఎగసి రూ.19 వద్ద ముగిసింది.  
 
 టిటాఘర్ వ్యాగన్స్ 0.5 శాతం వృద్ధితో రూ.582కు ఎగసింది. కెర్నెక్స్ మైక్రో సిస్టమ్స్ ఎలాంటి మార్పు లేకుండా రూ.49 వద్ద ముగిసింది.సిమ్‌కో 7 శాతం, స్టోన్ ఇండియా 6 శాతం, సింప్లెక్స్ కాస్టింగ్స్ 4.2 శాతం, కాళింది రైల్ నిర్మాణ్ (ఇంజినీర్స్) 4 శాతం చొప్పున క్షీణించాయి. కంటైనర్ కార్పొరేషన్ 3.4 శాతం, టెక్స్‌మాకో రైల్ అండ్ ఇంజినీరింగ్ 2.5 శాతం, బీఈఎంఎల్ 1.6 శాతం, నెల్కో 1.9 శాతం  చొప్పున తగ్గాయి.


 ఆధునీకరణ పట్టాలపైకి ‘సురేశ్‌ప్రభు రైలు’ పరుగులు
 న్యూఢిల్లీ: వచ్చే ఏప్రిల్ 1వ తేదీ నుంచి మొదలు కానున్న 2015-16 ఆర్థిక సంవత్సరానికి రైల్వే బడ్జెట్‌ను సురేశ్‌ప్రభు గురువారం నాడు పార్లమెంటుకు సమర్పించారు. గతంలో ఎన్నడూ లేని విధంగా.. ఈ బడ్జెట్‌లో ఒక్క కొత్త రైలును కానీ, ఒక్క కొత్త రైలు మార్గాన్ని కానీ ప్రకటించలేదు. ఉన్న రైళ్ల సామర్థ్యాన్ని పెంచుతామని, ప్రస్తుత రైలు మార్గాలను పొడిగించి, బలోపేతం చేస్తామని చెప్పారు. కొత్త ప్రాజెక్టులేవీ ఇవ్వలేదు. కొనసాగుతున్న ప్రాజెక్టులను పూర్తిచేయటానికే ప్రాధాన్యమిస్తామని పేర్కొన్నారు. అయితే.. కొత్త రైళ్లు, ప్రాజెక్టుల ప్రతిపాదనలపై సమీక్షించిన తర్వాత నిర్ణయం తీసుకుంటామని తెలిపారు. బడ్జెట్‌లో ప్రయాణ చార్జీలను పెంచలేదు.
  
 కానీ.. సరుకు రవాణా చార్జీలను పది శాతం మేర పెంచారు. వచ్చే ఐదేళ్లలో 8.5 లక్షల కోట్ల రూపాయల పెట్టుబడులతో రైల్వే వ్యవస్థను బలోపేతం చేస్తామన్నారు. ఈ పెట్టుబడులను మార్కెట్ రుణాలు, పింఛను నిధులు, బహుళ అభివృద్ధి బ్యాంకుల నుంచి సమీకరిస్తామని చెప్పారు. ఇందులో రైల్వేలు కేటాయించే నిధులు ఎంతనేది మాత్రం చెప్పలేదు. రాబోయే ఏడాదికి మాత్రం మూలధన వ్యయం ఏకంగా 52 శాతం పెంచుతూ.. వచ్చే ఏడాది లక్ష కోట్ల రూపాయలు పెట్టుబడులు కేటాయిస్తున్నట్లు ప్రకటించారు. రైల్వేల ప్రయివేటీకరణ ఉండదని.. అది ప్రభుత్వరంగ సంస్థగానే ప్రజలకు సేవలందిస్తుందని ఉద్ఘాటించారు. అయితే.. రైల్వేల విస్తరణకు అవసరమైన దీర్ఘకాలిక పెట్టుబడుల కోసం ప్రభుత్వ, ప్రయివేటు భాగస్వామ్యం అమలు చేస్తామన్నారు!  
  
  సరుకు రవాణా చార్జీల పెంపు...
  ‘‘నేను ప్రయాణ చార్జీలను పెంచలేదు’’ అని బడ్జెట్ ప్రసంగం ఆరంభంలోనే ప్రకటించిన సురేశ్ ప్రభు.. 12 రకాల సరకుల రవాణా చార్జీలను మాత్రం పది శాతం మేర పెంచటం గురించి మాత్రం ప్రస్తావించలేదు. సరుకుల రవాణా చార్జీల జాబితా ‘హేతుబద్ధీకరణ’ పేరుతో కాగితాలపైనే ఆ పని కానిచ్చారు. వాస్తవానికి.. డీజిల్ ధరలు గణనీయంగా తగ్గిన నేపథ్యంలో.. వచ్చే ఆర్థిక సంవత్సరంలో రైల్వే శాఖకు 12,000 కోట్ల రూపాయల నుంచి 15,000 కోట్ల రూపాయల వరకూ ఆదా అవుతుందని రైల్వే అధికారుల అంచనా. అయినా.. సరుకు రవాణా ద్వారా మరో రూ. 4,000 కోట్లు ఆదాయం పెంచుకునేలా ఆ చార్జీలను ‘సవరించారు’. ఎరువుల రవాణా చార్జీలు 10 శాతం పెంపు వల్ల.. ఇప్పటికే రూ. 3,000 కోట్ల మేరకు ఉన్న సబ్సిడీ భారం మరో రూ. 300 కోట్ల మేర పెరగనుంది. అయితే.. ఈ భారాన్ని ఎరువుల ధరలను పెంచి రైతులపై మోపబోమని కేంద్ర ప్రభుత్వం తక్షణమే ప్రకటించటం కాస్తంత ఊరటనిచ్చింది. కానీ.. ఆహార ధాన్యాల రవాణా చార్జీలు పది శాతం పెరగటం వల్ల రూ. 600 కోట్ల వరకూ భారం పడుతుందని.. వీటితో పాటు సిమెంట్, బొగ్గు, గ్యాస్, కిరోసిన్ వంటి సరుకులు రవాణా చార్జీల పెంపు వల్ల.. ఆయా సరుకుల ధరలు పెరుగుతాయని.. ఈ భారం అంతిమంగా ప్రజలపైనే పడుతుందని పారిశ్రామిక నిపుణులు చెప్తున్నారు.
  
  4, 5, 11 - ఇది రైల్వేమంత్రి మంత్రం...
  ఎటువంటి భారీ ప్రకటనలూ లేకుండా రూపొందించిన బడ్జెట్‌లో.. రైల్వేల్లో పెట్టుబడుల లోపం అనే విషవలయానికి చరమగీతం పలకడానికి.. నాలుగు లక్ష్యాలు, ఐదు చోదకాలు, 11 ప్రధాన అంశాలపై దృష్టి కేంద్రీకరిస్తున్నామని సురేశ్‌ప్రభు పేర్కొన్నారు. రాబోయే తొమ్మిదేళ్ల కాలంలో అత్యుత్తమ ఆర్థిక పనితీరును కనబరచటం రైల్వేల స్వల్ప కాలిక లక్ష్యమని చెప్పారు. ఆర్థికవ్యవస్థ ప్రధాన చోదకశక్తిగా రైల్వేలను మళ్లీ అభివృద్ధి చేయటం, అధిక పెట్టుబడుల కోసం వనరులను సమీకరించటం, భారీ మార్గాలపై ఒత్తిడిని తగ్గించటం, రైళ్ల వేగాన్ని పెంచటం, ప్రయాణ సదుపాయాలు, భద్రతాచర్యలు మెరుగుపరచటం, రైల్వే మౌలికసదుపాయాల బలోపేతం తదితర 11 అంశాలపై ప్రధాన దృష్టి ఉంటుందని చెప్పారు. ఎంపిక చేసిన శతాబ్ది రైళ్లలో వినోద సదుపాయాలు, బి-కేటగిరీ రైల్వేస్టేషన్లలోనూ వైఫై సదుపాయం, మరో 200 రైల్వే స్టేషన్లు ఆదర్శ స్టేషన్ల పథకం కిందికి తేవటం వంటి చర్యలను రైల్వేమంత్రి ప్రకటించారు.
  
  నాలుగు లక్ష్యాలు
  1) ప్రయాణికుల అనుభూతిని సుస్థిరంగా మెరుగుపరచటం, 2) రైల్వేలను సురక్షితమైన రవాణా సాధనంగా మలచటం, 3) రైల్వే మౌలిక సదుపాయాల సామర్థ్యాలను విస్తరించటం, ఆధునీకరించటం, 4) సామర్థ్య విస్తరణకు, క్షీణిస్తున్న ఆస్తులను తిరిగి బలోపేతం చేయటానికి వీలుగా భారీ మిగులు సృష్టించటం ద్వారా ఆర్థిక స్వావలంబన సాధించటం అనేవి నాలుగు లక్ష్యాలుగా చెప్పారు. వీటిలో.. రోజు వారీ ప్రయాణికుల రవాణా సామర్థ్యాన్ని ప్రస్తుతమున్న 2.1 కోట్ల నుంచి 3 కోట్లకు పెంచటం; రైలు మార్గాల నిడివిని 20 శాతం - ఇప్పుడున్న 1.14 లక్షల కిలోమీటర్ల నుంచి 1.38 లక్షల కిలోమీటర్లకు - పెంచటం; వార్షిక సరుకు రవాణా సామర్థ్యాన్ని 100 కోట్ల టన్నుల నుంచి 150 కోట్ల టన్నులకు పెంచటం వంటివి ఉన్నాయి.
  
  ఐదు చోదకాలు
  1) రైల్వేలను సంపూర్ణంగా రూపాంతరం చేయటానికి ఐదేళ్ల కార్యాచరణ ప్రణాళిక, 2) నిధుల లభ్యత, చిట్టచివరి మైలు అనుసంధానం కోసం రాష్ట్రాలు, ప్రభుత్వ రంగ సంస్థలు, బహుముఖ సంస్థలు, ప్రైవేటు సంస్థలతో భాగస్వామ్యం, 3) ఐదేళ్లలో రూ. 8.5 లక్షల కోట్ల సమీకరణ, 4) నిర్వహణ విధానాలను పునర్‌వ్యవస్థీకరించటం, 5) పాలన, పారదర్శకతల ప్రమాణాలను నిర్దేశించటం అనేవి ఐదు చోదకాలుగా పేర్కొన్నారు.
  
  9,420 కిలోమీటర్ల లైన్ల సామర్థ్యం పెంపు...
  రైళ్లు, రైల్వేస్టేషన్లలో ప్రయాణికుల సౌకర్యాలు, సదుపాయాలను మెరుగుపరిచేందుకు రైల్వేమంత్రి అనేక చర్యలు ప్రకటించారు. గుర్తించిన రైళ్లలో మరిన్ని సాధారణ తరగతి బోగీలను ఏర్పాటు చేస్తామన్నారు. 9,420 కిలోమీటర్ల రైల్వే లైన్ల సామర్థ్యాన్ని విస్తరించటానికి రూ. 96,182 కోట్ల వ్యయంతో ప్రాజెక్టులు చేపడతామని తెలిపారు. నాలుగు ప్రత్యేక సరుకు రవాణా కారిడార్ల నిర్మాణం ఈ ఏడాది పూర్తవుతుందని.. మరో 6,608 కిలోమీటర్ల ట్రాక్ విద్యుదీకరణ పూర్తవుతుందని  చెప్పారు. ప్రైవేటు పెట్టుబడులకు సులభతరంగా ఉండేలా బోగీ తయారీ పథకాన్ని సమీక్షిస్తామని పేర్కొన్నారు. ముంబై - అహ్మదాబాద్ నగరాల మధ్య హైస్పీడ్ రైలు ఏర్పాటుపై అధ్యయన నివేదిక మరో నాలుగైదు నెలల్లో అందుతుందని చెప్పారు. భద్రతా చర్యలకు సంబంధించి వార్షిక లక్ష్యాలను గుర్తించేందుకు.. ఐదేళ్ల కార్పొరేట్ భద్రతా ప్రణాళిక మూడు నెలల్లో సిద్ధమవుతుందని చెప్పారు.
  
  మెట్రో సిటీల మధ్య రైళ్ల వేగం పెంపు
 మెట్రో సిటీల మధ్య నడిచే రైళ్ల వేగం గణనీయంగా 200 కిలోమీటర్ల వరకు పెరగనుంది. ఎంపిక చేసిన తొమ్మిది రైల్వే కారిడార్లలో ఈ మేరకు చర్యలు చేపడుతున్నట్లు రైల్వే మంత్రి సురేశ్ ప్రభు ప్రకటించారు. ఢిల్లీ-కోల్‌కతా, ఢిల్లీ-ముంబై వంటి మెట్రో నగరాల మధ్య ప్రయాణం రాత్రి గడిచేలోగా పూర్తయ్యేలా చూడటమే ఇందులోని ప్రధానాంశం. ఆయా తొమ్మిది రైల్వే కారిడార్లలో ప్రస్తుతం గంటకు 110, 130 కిలోమీటర్లుగా ఉన్న రైళ్ల వేగాన్ని.. ఇకపై 160, 200 కిలోమీటర్లకు పెంచనున్నట్లు మంత్రి చెప్పారు. ఇందుకు తగినట్టుగా ట్రాక్‌లను మెరుగుపరచడం, బోగీలను ఉన్నత ప్రమాణాలకు అనుగుణంగా తీర్చిదిద్దడం, వంటి చర్యలు చేపడతామని తెలిపారు. గూడ్స్ రైళ్ల సగటు వేగాన్ని కూడా పెంచనున్నట్లు తెలిపారు. ముంబై-అహ్మదాబాద్ మధ్య హైస్పీడ్ రైల్ వంటి ప్రత్యేక ప్రాజెక్టుల అమలుకు ప్రయత్నాలు కొనసాగుతాయన్నారు.  
  
  వీలైన ప్రతి చోటా సౌర విద్యుదుత్పత్తి
  ప్రయాణికుల చార్జీలను పెంచకూడదన్న నిర్ణయం వెనుక ఇటీవలి కాలంలో డీజిల్ ధరలో చోటుచేసుకున్న భారీ తగ్గుదల కూడా ఒక కారణమని రైల్వేమంత్రి సురేశ్ ప్రభు తెలిపారు. ప్రయాణికులకు అందిస్తున్న సేవల్లో మెరుగుదలను చూపకముందే చార్జీలను పెంచడం అన్యాయమని తనకు అనిపించిందన్నారు. విద్యుత్ సమస్యను అధిగమించేందుకు రైల్వేలకు చెందిన స్థలాలను, స్టేషన్లను, ట్రాకులను సౌర విద్యుదుత్పత్తి కోసం ఉపయోగించుకుంటామన్నారు. అవకాశమున్న ప్రతి చోటా సౌరఫలకాలను ఏర్పాటుచేసి విద్యుదుత్పత్తి చేస్తామన్నారు.
  
  హైటెక్ మార్గంలో సురేశ్‌ప్రభు రైలు...
  *    400 రైల్వేస్టేషన్లలో ఉచిత వైఫై సదుపాయం
  *    ప్రత్యేక ఈ-టికెటింగ్ వెబ్‌సైట్ రూపకల్పన, డెబిట్ కార్డుతో టికెట్లు పొందే సౌకర్యం
  *    ఆన్‌లైన్‌లో విశ్రాంతి గదుల బుకింగ్, వికలాంగులకు వీల్‌చైర్ బుకింగ్
  *    టికెట్ బుక్ చేసుకునే సమయంలోనే నచ్చిన ఆహారం ఎంచుకునే సదుపాయం
  *    బ్రాండెడ్ సంస్థలు, ఫుడ్-చైన్ సంస్థలతో ప్రయాణికులకు ఆహార సరఫరా
  *    120 రోజుల ముందుగానే ప్రయాణ టికెట్లు బుక్ చేసుకునే అవకాశం
  *    స్టేషన్‌కు వచ్చిన ఐదు నిమిషాల్లోనే సాధారణ టికెట్ పొందేలా సదుపాయాలు
  *    రైల్ కమ్ రోడ్ టికెట్లను మరిన్ని రైల్వేస్టేషన్లకు విస్తరించటం
  *    రైళ్ల రాకపోకల సమాచారాన్ని ఎస్‌ఎంఎస్‌ల ద్వారా తెలియజేయటం
  *    ప్రయాణికుల ఫిర్యాదులు, సూచనల కోసం ప్రత్యేక మొబైల్ అప్లికేషన్ల రూపకల్పన
  *    భద్రత, సేవలకు సంబంధించి 24 గంటలూ పనిచేసే ప్రత్యేక ఫోన్ లైన్లు
  *    బోగీల ద్వారాలను వెడల్పు చేయటం, పెద్ద స్టేషన్లలో లిఫ్టులు, ఎస్కలేటర్ల అమరిక
  *    రైళ్లలో బెర్తుల ఆధునీకరణ, డిజైన్, నాణ్యత, శుభ్రతల ప్రమాణాల పెంపు
  *    స్లీపర్ బోగీల్లో పై బెర్తుల్లోకి ఎక్కేందుకు ఆధునిక మడత నిచ్చెన్ల అమరిక
  *    రైల్వే స్టేషన్లు, రైళ్లను పరిశుభ్రంగా ఉంచేందుకు కొత్త విభాగం ఏర్పాటు
  *    బోగీల్లోనూ చెత్తడబ్బాల ఏర్పాటు, రైలు బోగీల్లో బయో టాయిలెట్లు ఏర్పాటు
  *    శతాబ్ది రైళ్లలో వినోద సదుపాయాలు, అన్ని రైళ్లలో మొబైల్ ఫోన్ చార్జింగ్ సౌకర్యాలు
  *    మహిళల భద్రత కోసం రైళ్లలో సీసీటీవీ కెమెరాలతో నిఘా
  *    9 రైల్వే కారిడార్లలో రైళ్ల వేగాన్ని 200 కిలోమీటర్ల వరకూ పెంచటం
  *    ఎంపిక చేసిన మార్గాల్లో రైళ్లు ఢీకొనకుండా నిరోధించే వ్యవస్థను స్థాపించటం  
  
  అమ్మో.. ఎంత పొడుగో?
      ‘బండెనక బండి కట్టి..’ అన్నట్లు ఒకదాని వెనుక మరొకటి బోగీలతో రైళ్లు సాగిపోతూనే ఉంటాయి. మరి వాటి పొడవెంతుంటుందో తెలుసా?.. మన దేశంలో గూడ్స్ రైళ్లు 1.2 కిలోమీటర్ల వరకూ, ప్రయాణికుల రైళ్లు 600 మీటర్ల వరకూ ఉంటాయి. కానీ పశ్చిమ ఆస్ట్రేలియాలో బీహెచ్‌పీ సంస్థ ఏకంగా 682 వ్యాగన్లతో 7.35 కిలోమీటర్ల పొడవైన గూడ్స్ రైలును నడిపింది. 8 ఇంజన్లను వాడిన ఈ రైలు ఏకంగా లక్ష టన్నుల ఇనుప ఖనిజాన్ని తరలించింది. దక్షిణాఫ్రికాలో 660 వ్యాగన్లతో 7.3 కి.మీ పొడవైన రైలును నడిపారు.. ఇది 16 ఇంజన్లతో 70 వేల టన్నుల సామగ్రిని మోసుకెళ్లింది. రష్యా కూడా 439 వ్యాగన్లతో 6.5 కిలోమీటర్ల పొడవైన రైలును నడిపింది. ఇక బెల్జియంలో 70 కోచ్‌లతో 1.8 కి.మీ. పొడవున్న ప్యాసింజర్  రైలును నడిపారు. సాధారణంగా ఆస్ట్రేలియాలో 90 కోచ్‌లతో 1.2 కి.మీ. పొడవైన రైళ్లను నడుపుతారు.
  
  సామగ్రి మోసుకుపోవడానికి గూడ్స్ రైలు.. మనం వెళ్లడానికి ప్రయాణికుల రైలు.. కానీ ప్రత్యేకంగా రచయితల కోసమే ఒక రైలును నడుపుతారని తెలుసా? అమెరికాలో ‘ఆమ్‌ట్రాక్’ సంస్థ ‘ఆమ్‌ట్రాక్ రెసిడెన్సీ’ పేరిట ఈ రైలును నడుపుతుంది. కొన్ని నెలల పాటు వేలాది కిలోమీటర్ల దూరం సాగే ఈ ప్రయాణంలో రచయితలు ఎలాంటి బాదరబందీ లేకుండా ప్రశాంతంగా రచనలు చేసుకోవచ్చు. ప్రకృతి సోయగం, గ్రామీణ వాతావరణం, వివిధ ప్రాంతాలు, సంస్కృతుల మధ్య జరిగే ఈ రైలు ప్రయాణానికి అవకాశం ఉండేది మాత్రం కేవలం 24 మందికే. ఒక్కొక్కరికి రైల్లోనే ఒక గది, దానిలో బెడ్, రాసుకోవడానికి టేబుల్, భోజన సౌకర్యమూ ఉంటుంది. బాగా డిమాండ్ ఉండే ఈ ‘ఆమ్‌ట్రాక్ రెసిడెన్సీ’లో ప్రయాణం చేయాలంటే మనం రాసే రచనలతో పాటు దరఖాస్తు చేసుకోవాల్సిందే. ఇలా ఈ సారి 16,000 దరఖాస్తులురాగా.. అందులోంచి 115 మందిని షార్ట్‌లిస్ట్ చేశారు. ఇంకా తుది 24 మందిని ఎంపిక చేయాల్సి ఉంది.
  
  ప్రభుత్వ సహకారం 40,000 కోట్లు!
  ఈ ఆర్థిక సంవత్సరం మొత్తం రైల్వే బడ్జెట్ వ్యయం రూ. 1,00,011 కోట్లు కాగా, అందులో ప్రభుత్వం అందిస్తున్న ఆర్థిక సహకారం రూ. 40 వేల కోట్లు ఉంది. అంటే మొత్తం రైల్వే బడ్జెట్‌లో ప్రభుత్వ స్థూల బడ్జెటరీ మద్దతు(జీబీఎస్) 41.6%. గత ఆర్థిక సంవత్సరం రైల్వేలకు ప్రభుత్వం ఇచ్చిన బడ్జెటరీ మద్దతు రూ. 30 వేల కోట్లు కాగా, ఈ ఏడాది అది భారీగా పెరిగి రూ. 40 వేల కోట్లకు చేరింది. మిగతా మొత్తంలో అంతర్గత వనరుల ద్వారా రూ. 17,793 కోట్లు, డీజిల్ సెస్ ద్వారా రూ. 1,645 కోట్లు, ఇండియన్ రైల్వే ఫైనాన్షియల్ కార్పొరేషన్(ఐఆర్‌ఎఫ్‌సీ) ద్వారా రూ. 17 వేల కోట్లు, ప్రైవేటు, పబ్లిక్ భాగస్వామ్య పథకాల ద్వారా రూ. 6 వేల కోట్లను సేకరించాలనుకుంటోంది. ఇవి పోనూ మిగతా నిధుల సేకరణలో ప్రపంచబ్యాంక్, ఆసియా అభివృద్ధి బ్యాంక్, ఎల్‌ఐసీ తదితర కార్పొరేషన్ల సహకారం తీసుకోనుంది.


 గుంతకల్లు :  రైల్వే బడ్జెట్‌లో గుంతకల్లు రైల్వే డివిజన్‌కు మరోసారి అన్యాయం జరిగింది. గురువారం కేంద్ర రైల్వే మంత్రి సురేష్‌ప్రభు ప్రవేశ పెట్టిన బడ్జెట్ ఏ మాత్రం ఆశాజనకంగా లేదు. దక్షిణ మధ్య రైల్వే పరిధిలోని గుంతకల్లు రైల్వే డివిజన్‌కు ఆదాయపరంగా అత్యంత ప్రాధాన్యత ఉన్నప్పటికీ రైళ్ల కేటాయింపుల్లో కానీ, పొడగింపుల్లో కానీ, ైరె ల్వే ప్రాజెక్టుల కేటాయింపుల్లో కానీ తగినంత ప్రాధాన్యత కల్పించడం లేదన్నది ఈ బడ్జెట్‌తో అవగతమైంది.
  
   రెండు దశాబ్దాలుగా రైలే ్వ మంత్రులుగా పనిచేసిన వారంతా తమ తమ రాష్ట్రాలకు, ప్రాంతాలకు రైళ్లను, ప్రాజెక్టులను కేటాయించుకోవడంలో చూపిన చొరవ, ఆసక్తి రాయలసీమపై చూపలేదన్న వాస్తవాన్ని సురేష్‌ప్రభు పునరావృతం చేయడం సీమ ప్రజల హృదయాలను బాధిస్తోంది. రైల్వే నిధుల కేటాయింపుల విషయంలో ఎంపీలు చొరవ మచ్చుకైనా లేదన్న విషయం గురువారం నాటి  రైల్వేబడ్జెట్‌లో స్పష్టంగా కనిపిస్తుందని రైల్వే వర్గాలు, ఉన్నత స్థాయి మేధావులు బాహాటంగానే పెదవి విరుస్తున్నారు. గుంతకల్లు రైల్వే డివిజన్‌కు వేల కోట్లు నిధులు అవసరమని డివిజనల్ స్థాయి అధికారులు ప్రతిపాదనలు పంపితే రైల్వే మంత్రిత్వ శాఖ అత్తెసరు నిధులు కేటాయింపులు చేసి మమా అనిపించుకుంది.
  
  తాజా బడ్జెట్‌లో గుంతకల్లు రైల్వే డివిజన్‌కు కేటాయింపులు ఇలా :
  నూతన రైలు మార్గాలు :
   నంద్యాల-ఎర్రగుంట్ల రైలు మార్గానికి రూ.130 కోట్లు
  మునీరాబాద్-మహబూబ్‌నగర్ రైలు మార్గానికి రూ 185 కోట్లు
   ఓబుళవారిపల్లి-కృష్ణపట్నం రైలు మార్గ నిర్మాణానికి రూ.లక్ష కేటాయింపులు చేశారు.
   కడప-బెంగుళూరు రైలు మార్గ నిర్మాణానికి రూ. 15 కోట్లు
  కంభం-పొద్దుటూరు రైలు మార్గం నిర్మాణానికి కోటి రూపాయలు
   మద్దికెర-నంచర్ల స్టేషన్ల మధ్య బైపాస్‌లైన్ ఏర్పాటుకు రూ.15 కోట్లు కేటాయించారు.
  డబులింగ్ రైలు మార్గాలు :
   గుంటూరు-గుంతకల్లు, గుంతకల్లు-కల్లూరు వయా గూళ్యపాళ్యం, కల్లూరు-ధర్మవరం మధ్య డబులింగ్ పనులకు రూ. 50 కోట్లు
    ధర్మవరం-పాకాల  మధ్య డబులింగ్ పనులకు     రూ 10 కోట్లు
   హోస్పేట-గుంతకల్లు మధ్య డబులింగ్‌కు రూ.10 కోట్లు
   రేణిగుంట-తిరుపతిల మధ్య డబులింగ్ పనులకు రూ 1.10 కోట్లు
   రాయచూర్-గుంతకల్లు మార్గంలో పెండింగ్‌లో ఉన్న 13 కి.మీల డబులింగ్ పనులకు రూ 6 కోట్లు
  విద్యుద్దీకరణ పనులు :
  పూణె-గుంతకల్లు మధ్య విద్యుద్దీకరణ పనులకు రూ.250 కోట్లు
   కృష్ణపట్నం-వెంకటాచలం స్టేషన్ల మధ్య విద్యుద్దీకరణ పనులకు రూ.5 కోట్లు
   బెంగుళూరు-గుత్తి మధ్య విద్యుద్దీకరణ పనులకు రూ 41.16 కోట్లు
   కల్లూరు-గుంతకల్లు మధ్య విద్యుద్దీకరణ పనులకు రూ 9.37 కోట్లు
  అభివృద్ధి పనులకు.. :
   గుంతకల్లు విద్యుత్ లోకో షెడ్ నిర్మాణానికి రూ 12 కోట్లు
  గుంతకల్లులోని ప్రభాత్‌నగర్‌లో 40 టైప్-2 క్వార్టర్ల నిర్మాణానికి రూ 5 కోట్లు
   గుంతకల్లులో క్వార్టర్స్ మరమ్మతులు, రోడ్లు, పైపులైన్లు, డ్రైనేజీ పనులకు రూ 15 కోట్లు
  పాకాల-ధర్మవరం సెక్షన్‌లో 26 టైప్-2, 9 టైప్-3 క్వార్టర్స్ నిర్మాణానికి రూ.కోటి
   డివిజన్ పరిధిలో రైల్ లెవల్ ప్లాట్‌ఫారాలను అభివృద్ధిపరచడానికి రూ 20 లక్షలు  
   ఈ నిధుల కేటాయింపులో ప్రధానంగా మద్దికెర-నంచర్ల బైపాస్‌లైన్ నిర్మాణం పూర్తయితే ఉత్తరాది నుంచి దక్షణాదికి వెళ్లే రైళ్లన్నీ గుంతకల్లు జంక్షన్ మీదుగా మళ్లే అవకాశం ఏర్పడుతుంది. తాజా బడ్జెట్‌లో గుంతకల్లు రైల్వే డివిజన్ మీదుగా ఒక్క కొత్త రైలు కూడా పరుగులు పెట్టకపోవడం శోచనీయం.
  
  కార్మికులకు ఒరిగిందేమి లేదు
  రైల్వే బడ్జెట్‌లో కార్మికులకు ఒరిగింది శూన్యం. రైల్వే చార్జీలు పెంచలేదంటూనే ప్రీమియం రైళ్లను పెంచారు. ఈ రైళ్లలో సామాన్య ప్రయాణీకులు ప్రయాణించడం కష్టం. గత 20 ఏళ్ల రైల్వే బడ్జెట్‌లో 2002 నూతన రైళ్లను ప్రకటించారు. పట్టాలపై పరుగులు తీసినవి 1360 రైళ్లు మాత్రమే. ఇందుకు ప్రధాన కారణం కోచ్‌ల లేమి. గత ఏడాది రైల్వే బడ్జెట్‌లో కార్మికుల శ్రేయస్సు కోసం ప్రవేశపెట్టిన బెనిఫిట్స్, సంక్షేమాల ఊసే మరిచారు.
  - విజయ్‌కుమార్, మజ్దూర్ యూనియన్
  గుంతకల్లు డివిజన్ అధ్యక్షుడు
  
  ఇలాంటి బడ్జెట్ ఎన్నడూ చూడలేదు
  నా సర్వీస్‌లో ఇలాంటి రైల్వే బడ్జెట్ ఎన్నడూ చూడలేదు. బీజేపీ ప్రభుత్వం రైల్వేలో ఎఫ్‌డీఐలను ప్రోత్సహించడానికి ప్రస్తుత బడ్జెట్ తార్కాణంలా నిలుస్తుంది. పీపీఓ, ఎఫ్‌డీఐలను ప్రోత్సహించి కార్మికులకు వ్యతిరేకంగా నిలిచింది. గుంతకల్లు డివిజన్‌కు ఒక్క రైలు కేటాయించకపోవడం శోచనీయం.  - కేవీ శ్రీనివాసులు, ఎంప్లాయీస్ సంఘ్ డివిజనల్ ప్రధాన కార్యదర్శి
  


 ప్రతి రైల్వేబడ్జెట్‌లో జరుగుతున్న అన్యాయమే ఈసారీ పునరావృతమైంది. రైల్వే శాఖ మంత్రి సురేష్ ప్రభు జిల్లాకు హ్యాండిచ్చారు.  జిల్లా ప్రజల రైల్వే ఆవసరాలను దృష్టిలో పెట్టుకుని ఎంపీలు, ప్రజాప్రతినిధులు చేసిన ప్రతిపాదనలను బీజేపీ సర్కారు తుంగలో తొక్కింది. అరకొర కేటాయింపులతో దశాబ్ధాలుగా రైల్వేలైన్ల నిర్మాణం పూర్తికావడంలేదు. ఈ బడ్జెట్ జిల్లా వాసులను పూర్తిగా నిరాశపరిచింది.
  
  రాజంపేట: రైల్వే బడ్జెట్‌లో జిల్లాకు ఎలాంటి ప్రయోజనాలు చేకూరలేదు. కొత్తరైళ్లు ఊసేలేదు.. గత హామీల అమలులేదు.. అధిక ప్రాధాన్యం ఉన్న ముంబాయి-చెన్నై కారిడార్ పరిధిలో జిల్లా ఉన్నా మంత్రి ఏమాత్రం పట్టించుకోలేదు. ఎర్రగుంట్ల-నొస్సం మధ్య ప్యాసింజర్ రైలును రెండేళ్ల కిందట బడ్జెట్‌లో ప్రకటించగా అది ఇంతవరకు పట్టాలెక్కలేదు. కొత్తరాజధానికి మార్గం లేకపోయినా, కడప నుంచి రేణిగుంట మీదుగా నడిపే విధంగా కొత్తరైలు తీసుకురావాలన్న డిమాండ్‌ను కూడా పక్కనపెట్టేశారు. డీఎంయు (కడప-తిరుపతి-రేణిగుంట) రైళ్లు, తుంగభద్ర ఎక్స్‌ప్రెస్, తిరుపతి-షిర్డి రైళ్ల  ప్రతిపాదన కాగితాలకే పరిమితమైంది.
  
  కనెక్టివిటీ లైన్ల ఊసేలేదు
  రాష్ట్ర విభజన తర్వాత జిల్లా కేంద్రం నుంచి రాజధానిగా మారుతున్న ప్రాంతానికి కనెక్టివిటీ లైన్ల గురించి రైల్వేబడ్జెట్‌లో మంత్రి ప్రస్తావన చేయలేదు. ప్రొద్దుటూరు-కంభం, భాకారపేట-గిద్ద
  లూరు రైల్వేలైన్లను గత బడ్జెట్‌లో ఇచ్చిన సర్వేలకే పరిమితం చేశారు. ఆ లైన్ల కోసం కేటాయింపులు కూడా చేయలేదు. జిల్లా నుంచి రాజధాని కోసం రేణిగుంట మీదుగా ఒక  పొడిగింపు రైలును కూడా మంజూరు చేయలేదు.
  
  రైల్వేపరిశ్రమకూ మొండిచెయ్యే...
  జిల్లాలో బ్రిటిష్ కాలం నుంచి రైల్వేపరంగా ప్రాముఖ్యత కలిగిన నందలూరు రైల్వేకేంద్రంలో ఎప్పటిలాగే రైల్వే పరిశ్రమ ఏర్పాటులో మొండిచెయ్యి మిగిల్చారు. యుపీఏ హయాంలో అప్పటి రైల్వేమంత్రి లాలూప్రసాద్‌యాదవ్ రాజ్యసభలో రైల్వేపరిశ్రమ ఏర్పాటును ప్రకటించారు. రాజంపేట ఎంపీ మిథున్‌రెడ్డి లోక్‌సభలో నందలూరు ప్రాముఖ్యత గురించి సభలో వివరించారు. రెడీమేడ్‌గా ఉన్న వనరులను వినియోగించుకుని జిల్లాకు భారీ రైల్వేపరిశ్రమ ఏర్పాటు చేయాలని కేంద్రాన్ని కోరిన సంగతి విధితమే. బీజెపీ అధికారంలోకి వస్తే రైల్వేపరిశ్రమ ఏర్పాటు దిశగా చర్యలు తీసుకుంటామని ఆ పార్టీపెద్దలు లోకోషెడ్‌ను సందర్శించిన సందర్భంగా మాటలు నీటిమూటలుగా మారిపోయాయని స్ధానికులు విమర్శిస్తున్నారు.
  
  కేటాయింపులు ఇలా..
  రైల్వేబడ్జెట్‌లో జిల్లాలోని 31 కిలోమీటర్లు నిర్మితం కావాల్సిన నంద్యాల-ఎర్రగుంట్లకు రూ.130 కోట్లు కేటాయించారు. కడప-బెంగళూరు రైల్వేలైన్ పెండ్లిమర్రి వరకు ఎర్త్ వర్క్ పనులు జరిగిన నేపథ్యంలో ఈ సారి బడ్జెట్‌లో రూ.265కోట్లు కేటాయించారు.  ఓబులవారిపల్లె-కృష్ణపట్నం రైలుమార్గంలో బడ్జెట్‌లో కేవలం రూ.కోటి నిధులు మాత్రం కేటాయించారు. గత బడ్జెట్‌లో ఆన్‌గోయింగ్ ప్రాజెక్టులకు నిధులు కేటాయింపు విషయంలో 24 శాతం పెరిగినట్లు రైల్వేనిపుణులు అభిప్రాయపడుతున్నారు.


 రైల్వే బడ్జెట్‌ను స్వాగతించిన కార్పొరేట్లు
 ముంబై: ఆధునీకరణకు పెద్ద పీట వేస్తూ, రైల్వే బడ్జెట్ ఆచరణాత్మకంగా ఉందని కార్పొరేట్ దిగ్గజాలు అభిప్రాయపడ్డారు. రైల్వే ముఖచిత్రాన్ని సమూలంగా మార్చే దిశగా స్పష్టమైన ప్రతిపాదనలు బడ్జెట్‌లో ప్రస్తావించారని పేర్కొన్నారు. ఆదాయాన్ని పెంచుకునే దిశగా రైల్వే మంత్రి సురేష్ ప్రభు పలు వినూత్న ప్రతిపాదనలు చేశారని గోద్రెజ్ గ్రూప్ చైర్మన్ ఆది గోద్రెజ్ చెప్పారు. బీమా, పెన్షన్ ఫండ్స్ తదితర మార్గాల ద్వారా రైల్వేలో దీర్ఘకాలికంగా పెట్టుబడులను ఆకర్షించేందుకు ప్రతిపాదించిన చర్యలు దీర్ఘకాలికంగా రైల్వేకు మేలు చేయగలవని ఆయన తెలిపారు. కీలకమైన పలు రైల్ ప్రాజెక్టులను పూర్తి చేసేందుకు ఇవి తోడ్పడగలవన్నారు.
  
 మరోవైపు రైల్వేను లాభసాటి రవాణా సాధనంగా మార్చేందుకు మార్గనిర్దేశం చేసేలా బడ్జెట్ ఉందని ఎల్‌అండ్‌టీ ఫైనాన్స్ హోల్డింగ్ చైర్మన్ వైఎం దేవస్థలి చెప్పారు. మౌలిక సదుపాయాలను మెరుగుపర్చేందుకు మార్కెట్  నుంచి నిధులు సమీకరించేలా చేపట్టిన సంస్కరణలను స్వాగతిస్తున్నట్లు ఆయన పేర్కొన్నారు. స్థిరంగా ఆదాయాన్ని సమకూర్చుకునేలా ప్రభుత్వ, ప్రైవేట్ భాగస్వామ్య ప్రాజెక్టులపై దృష్టి పెట్టడమూ హర్షణీయమన్నారు.
 
 ప్రభుత్వ ప్రైవేట్ భాగస్వామ్యం ప్రాతిపదికన చేపట్టబోయే ప్రాజెక్టులు.. రైల్వేను అత్యాధునికంగా తీర్చిదిద్దేందుకు తోడ్పడగలవన్నారు. రైల్వేలను ఆధునీకరించడానికి మంత్రి సురేశ్ ప్రభు రూపొందించిన సమగ్ర ప్రణాళికగా బడ్జెట్‌ను సీఐఐ ప్రెసిడెంట్ అజయ్ శ్రీరామ్ అభివర్ణించారు. రాబోయే అయిదేళ్లలో రూ. 8.5 లక్షల కోట్ల పెట్టుబడుల ప్రతిపాదనలతో రైల్వేస్ అత్యాధునికంగా మారగలదని, ఆర్థిక వృద్ధికి గణనీయంగా తోడ్పడగలదని ఆయన పేర్కొన్నారు.
  
 ప్రొక్యూర్‌మెంట్ విధానాన్ని సరళతరం చేశారని, దీర్ఘకాలిక దృష్టితో బడ్జెట్‌ను రూపొందించారని త్వరలో సీఐఐకి కొత్త ప్రెసిడెంట్‌గా పగ్గాలు చేపట్టబోయే సుమీత్ మజుందార్ వ్యాఖ్యానించారు. ఒకవైపు ప్రయాణికుల అవసరాలకు పెద్ద పీట వేస్తూ, మరోవైపు రవాణా సేవలను మెరుగుపర్చే విధంగా రైల్వే బడ్జెట్ ఉందని జీఈ దక్షిణాసియా విభాగం ప్రెసిడెంట్ బన్‌మాలి ఆగ్రావాలా చెప్పారు.
  
 కేవలం హామీలే..: జిందాల్ స్టీల్ అండ్ పవర్ సీఈవో రవి ఉప్పల్ మాత్రం రైల్వే బడ్జెట్‌పై పెదవి విరిచారు. సమగ్రంగా లేదని, కేవలం హామీలే గుప్పించారని వ్యాఖ్యానించారు. బొగ్గు రవాణా చార్జీలను పెంచడమనేది.. పరిశ్రమలను, మేక్ ఇన్ ఇండియా నినాదం స్ఫూర్తిని దెబ్బతీసే విధంగా ఉందన్నారు. ఇక, ఉక్కు రవాణా చార్జీలను కూడా పెంచకుండా ఉండాల్సిందని ఉప్పల్ అభిప్రాయపడ్డారు.


 విజయవాడ :  రైల్వే బడ్జెట్‌లో విజయవాడ డివిజన్‌కు నిధులు కేటాయించాలంటూ జనవరి ఆరో తేదీన జరిగిన సమావేశంలో దక్షిణమధ్య రైల్వే జనరల్ మేనేజర్ శ్రీవాస్తవను బందరు ఎంపీ కొనకళ్ల నారాయణ, విజయవాడ ఎంపీ కేశినేని శ్రీనివాస్ (నాని) కోరారు.
  
 కేశినేని నాని ప్రతిపాదనలివీ..
 
  నూతన రాష్ట్ర రాజధానిగా విజయవాడ మారిన నేపథ్యంలో విజయవాడ రైల్వే  స్టేషన్‌ను మోడల్ స్టేషన్‌గా అప్‌గ్రేడ్ చేసి అన్ని సౌకర్యాలూ కల్పించాలి.   రాజధాని ప్రాంతంలో భవిష్యత్తు అవసరాలను దృష్టిలో పెట్టుకుని రైళ్ల సంఖ్య పెంచాలి.   రాయనపాడు వ్యాగన్ వర్క్‌షాపును ఆధునికీకరించాలి.  నగరంలోని రైల్వే ఆస్పత్రిని వెయ్యి పడకలకు విస్తరించి అభివృద్ధి చేయాలి. విజయవాడ నుంచి నడిచే ఒకరైలుకు ఇంద్రకీలాద్రి ఎక్స్‌ప్రెస్‌గా పేరు పెట్టాలి. విజయవాడ నుంచి ముంబయి, కొచ్చిన్, త్రివేండ్రం, సూరత్, గౌహతి, కోయంబత్తూర్‌కు రైళ్లు నడపాలి. గుణదల, వాంబేకాలనీతో పాటు విజయవాడలో అవసరమైన ప్రాంతాల్లో రైల్వే ఓవర్‌బ్రిడ్జిలు నిర్మించి ట్రాఫిక్ సమస్యలను పరిష్కరించాలి.
 
 కొనకళ్ల నారాయణ ప్రతిపాదనలివీ..
  
 బందరు పోర్టు నిర్మాణాన్ని దృష్టిలో ఉంచుకుని మచిలీపట్నం కేంద్రంగా కోస్తా రైల్ కారిడార్‌ను ఏర్పాటుచేయాలి.బందరు నుంచి కోటిపల్లి, రేపల్లె రైల్వే లైన్లను విస్తరిస్తే భవిష్యత్తులో కోస్తా రైలు మార్గం కీలకంగా మారుతుంది.  పోర్టు నిర్మాణం పూర్తయిన తర్వాత ఇక్కడి నుంచి ఎగుమతులు, దిగుమతులు పెరుగుతాయి కాబట్టి అందుకనుగుణంగా మచిలీపట్నం స్టేషన్‌ను అభివృద్ధిచేయాలి.  మచిలీపట్నం-విజయవాడ రైల్వే లైను డబ్లింగ్, ఎలక్ట్రిఫికేషన్ పనులు వేగవంతంగా పూర్తి చేయాలి.  బందరు నుంచి విశాఖపట్నం, తిరుపతికి నడుపుతున్న రైళ్లకు అదనపు బోగీలు ఏర్పాటు చేయాలి. నూజివీడులో మరిన్ని రైళ్లకు హాల్ట్ ఇవ్వాలి.  కొత్త రైళ్ల కేటాయింపులో మచిలీపట్నానికి తగిన ప్రాధాన్యత ఇవ్వాలి.
  
 వినూత్న బడ్జెట్
 
 గత ప్రభుత్వాలు ప్రకటించిన ప్రాజెక్టులను పూర్తిచేసే ఉద్దేశంతో రైల్వేమంత్రి సురేష్ ప్రభు వినూత్నంగా ఈ బడ్జెట్ ప్రవేశపెట్టారు. ప్రయాణికులకు మెరుగైన  సౌకర్యాలు, టికెట్ బుకింగ్ దగ్గర నుంచి రైల్వే ప్రయాణం, గమ్యస్థానం చేరే వరకు అవసరమైన అన్ని రకాల సౌకర్యాల మెరుగుదలే ధ్యేయంగా ఈ బడ్జెట్ ఉంది. గత బడ్జెట్‌లో ప్రవేశపెట్టిన ఏపీ ఎక్స్‌ప్రెస్, రైల్వే యూనివర్శిటీ, రైల్‌నీరు వంటి ప్రాజెక్టుల అమలుకు కేంద్రంపై ఒత్తిడి తెస్తా. ఆర్‌వోబీలు, ఆర్‌యూబీలు, పెండింగ్ ప్రాజెక్టులు పూర్తి చేయడానికి ఈ బడ్జెట్  ఉపయోగపడుతుంది. ఆంధ్రప్రదేశ్‌కు కావాల్సిన ప్రాజెక్టులను కేంద్రం మంజూరు చేస్తుందని నేను భావిస్తున్నాను.
  - కేశినేని నాని, విజయవాడ ఎంపీ
  


 జోన్ ఊసే లేదు
 రైల్వే లైన్లకు అరకొర నిధులు
 కాజీపేట-విజయవాడ మధ్య మూడో లైన్
 రైళ్లలో మహిళల భద్రతకు 182
 సరకు చార్జీల పెంపుపై అసంతృప్తి
  
 విజయవాడ : నవ్యాంధ్రప్రదేశ్ నూతన రాజధాని విజయవాడకు రైల్వే బడ్జెట్‌లో సముచిత స్థానం లభిస్తుందని భావించిన జిల్లావాసులకు నిరాశే మిగిలింది. కొత్త జోన్ కావాలనే ఈ ప్రాంత ప్రజల డిమాండ్ ఈసారీ నెరవేరలేదు. రాబోయే రోజుల్లో రాష్ట్రంలోని అన్ని జిల్లాల నుంచి నూతన రాజధానికి ప్రయాణికులు రాకపోకలు సాగించే అవకాశం ఉన్నందున ఈ ప్రాంతంలో కొత్త రైళ్లు, పెండింగ్‌లో ఉన్న లైన్లకు  నిధులు మంజూరు చేయాలంటూ వచ్చిన ప్రతిపాదనలను రైల్వేమంత్రి సురేష్ ప్రభు పట్టించుకున్న దాఖలాలు లేవు. విజయవాడ రైల్వేస్టేషన్‌పై ఒత్తిడి పెరుగుతున్న నేపథ్యంలో ఇక్కడ శాటిలైట్ స్టేషన్ ఏర్పాటు, రైళ్లు నిలుపుదల చేసేందుకు మార్షలింగ్ యార్డును నిర్మించాలనే ప్రతిపాదన లు కాగితాలకే పరిమితం చేశారు. బడ్జెట్‌లో నిధుల కేటాయింపులు జరగలేదు. విజయవాడ రైల్వేస్టేషన్‌లో రూట్ రిలే ఇంటర్‌లాకింగ్ సిస్టమ్ (ఆర్‌ఆర్‌ఐ) పనులు సాంకేతిక కారణాల వల్ల నిలిచిపోయాయి. ఈ పనులు పూర్తయితే స్టేషన్‌లోని పది ప్లాట్‌ఫారాల్లోనూ 24 బోగీలు ఉన్న రైళ్లను నిలపవచ్చు. దీనికి కావాల్సిన నిధుల గురించి ప్రస్తావించలేదు. దక్షిణ మధ్య రైల్వే జోన్‌కు కేటాయించిన నిధుల్లో ఆర్‌ఆర్‌ఐకి నిధులు కేటాయిస్తారేమో చూడాలని అధికారులు చెబుతున్నారు.
 
  కాజీపేట-విజయవాడ మధ్య మూడో లైనుకు రైల్వేమంత్రి సురేష్ ప్రభు గ్రీన్ సిగ్నల్ ఇచ్చారు. ఇది ఒక్కటే ఈ ప్రాంత ప్రజలకు ఊరట కలిగించే అంశం. దీనికి సుమారు రూ.400 కోట్లు ఖర్చవుతుందని అధికారులు భావిస్తుండగా, ఈ ఏడాది బడ్జెట్‌లో రూ.100 కోట్లు కేటాయించినట్లు రైల్వే వర్గాలు చెబుతున్నాయి.
 
  విజయవాడ - గుడివాడ - మచిలీపట్నం - భీమవరం లైను డబ్లింగ్, ఎలక్ట్రిఫికేషన్‌కు సుమారు రూ.1,100 కోట్ల వరకు ఖర్చవుతుంది. నిధుల కొరత కారణంగా ఈ పనులు నత్తనడకన సాగుతున్నాయి. ఈ బడ్జెట్‌లో కేవలం రూ.100 కోట్లు కేటాయించడంతో ఈ ఏడాది పనులు వేగవంతంగా జరిగే అవకాశం కనిపించడంలేదు. జగ్గయ్యపేట-విష్ణుపురం లైనుకు రూ.100 కోట్లు కేటాయించారు. ఈ లైను పనులు మలిదశకు చేరడంతో ఈ నిధులతో పనులు వేగవంతం చేసే అవకాశం ఉంది.
 
  ఇకనుంచి రైల్వేస్టేషన్లలో తక్కువ ధరకే మంచినీరు అందిస్తామని కేంద్రమంత్రి ప్రకటించారు. కృష్ణా కెనాల్ వద్ద రైల్‌నీర్ ప్రాజెక్టుకు గత ఏడాది గ్రీన్‌సిగ్నల్ ఇచ్చారు. రూ.10 కోట్లు కేటాయిస్తే ఈ ప్రాజెక్టు పూర్తవుతుంది. ఐఆర్‌సీటీసీ అధికారులు బీవోటీ పద్ధతిలో దీన్ని నిర్మించాలని భావిస్తున్నారు. తక్కువ ధరకు స్వచ్ఛమైన నీరు అందించాలంటే ఈ ప్రాజెక్టును ఈ ఏడాది పూర్తి చేయాల్సి ఉంటుంది.
   రైల్వే చార్జీలు పెంచకపోవడం ప్రయాణికులకు ఊరట కలిగించే అంశం. దీనిపై వారినుంచి హర్షం వ్యక్తమవుతోంది. బస్సు చార్జీలు చుక్కలనంటుతున్న నేపథ్యంలో పేద, మధ్యతరగతి ప్రయాణికులు రైళ్లనే ఆశ్రయిస్తున్నారు. చార్జీలు పెంచకపోవడంతో పాటు కొన్ని ముఖ్యమైన రైళ్లలో జనరల్ బోగీలు పెంచడం ప్రజలకు ఊరటనిచ్చే అంశం. సరకు రవాణా చార్జీలను దూరాన్ని బట్టి పదిశాతం పెంచడం పరోక్షంగా  ప్రయాణికులపైనే భారం పడుతుందని చెబుతున్నారు.
 
  రైళ్లలో ప్రయాణించే మహిళలకు భద్రత కల్పించేందుకు టోల్‌ఫ్రీ నంబర్ 182 ఏర్పాటు చేయడంపై మహిళా సంఘాలు హర్షం వ్యక్తం చేస్తున్నప్పటికీ.. ఇప్పటికే ఆర్‌పీఎఫ్‌లో తగినంత మంది పోలీసు సిబ్బంది లేరని, దీనిని ఎలా అమలు చేస్తారని ప్రశ్నిస్తున్నారు.
  
  


 ‘ప్రయాణికులు కేంద్రంగా రూపొందిన దార్శనిక బడ్జెట్ ఇది. అభివృద్ధికి సంబంధించిన అన్ని అంశాలనూ స్పృశిస్తూ.. దేశ ప్రగతికి కీలక చోదక శక్తిగా రైల్వేలను నిలిపే మార్గసూచి ఇది. కొత్త రైళ్లను ప్రకటించే సాధారణ పద్ధతిలో కాకుండా రైల్వేలో సమగ్ర సంస్కరణల దిశగా సాగిన మేలిమలుపు ఈ బడ్జెట్.
 ప్రయాణికులపై ఎలాంటి భారం మోపకుండా.. రూ. 8 లక్షల కోట్లను ఆధునీకరణకు, అభివృద్ధికి కేటాయించి స్పష్టమైన ప్రణాళికను, దార్శనికతను ప్రదర్శించి చరిత్ర సృష్టించారు. రైల్వే బడ్జెట్ చరిత్రలో మొదటిసారి ఆధునిక సాంకేతికతకు పెద్దపీట వేసినందుకు చాలా సంతోషంగా ఉంది. వేగం, సేవ, భద్రత.. వీటన్నింటినీ ఒకే ట్రాక్‌పై పెట్టి సామాన్యుడు లక్ష్యంగా రూపొందించారు. అవినీతిరహిత వ్యవస్థను రూపొందించే దిశగా వేసిన ఒక ముఖ్యమైన అడుగు ఈ బడ్జెట్.’


 స్పష్టత లేని బడ్జెట్
  కేంద్ర ప్రభుత్వం ప్రవేశపెట్టిన 2015-16 రైల్వే బడ్జెట్‌లో ఎలాంటి స్పష్టత లేదు. ఏప్రాజెక్టుకు ఎంత ఇస్తారో.. ఏ జిల్లాకు ఏ మేరకు నిధులు కేటాయిస్తారో స్పష్టం చేయలేదు. బడ్జెట్ సమావేశాలు పూర్తయ్యేలోపు పూర్తి స్థాయిలో స్పష్టం చేయాలి. 45 ఏళ్లుగా డిమాండ్ చేస్తున్న కర్నూలు-మంత్రాలయం రైల్వే లైను నిర్మించేందుకు బడ్జెట్‌లో నిధులు కేటాయించాలి. కోచ్ ఫ్యాక్టరీకి నిధులిచ్చి కరువు జిల్లాలో నిరుద్యోగ సమస్యను పరిష్కరించాలి. ఇతర పెండింగ్ ప్రాజెక్టుల అభివృద్ధికి చర్యలు చేపట్టాలి.
  - బుట్టా రేణుక, కర్నూలు ఎంపీ
  
  కర్నూలు (రాజ్‌విహార్): జిల్లా ప్రజల మొరను ‘ప్రభు’ ఆలకించలేదు. దశాబ్దాల తరబడి జరుగుతున్న అన్యాయంపై కరుణ చూపలేదు. పాతికకు పైగా డిమాండ్లు ఆయన ముందు ఉంచినా ఒక్కటి తప్ప దేనినీ ఒప్పుకోలేదు. రూ.2 వేల కోట్లు అవసరమని అభ్యర్థిస్తే కేవలం రూ.130 కోట్లు ఇస్తామని ప్రకటించారు. ఇతర పెండింగ్ ప్రాజెక్టులను పట్టించుకోలేదు. నూతన మార్గాలు కావాలన్నా వినిపించుకోలేదు. వర్క్‌షాపు నిర్మాణానికి నిధులివ్వలేదు. కొత్త రైళ్లు కావాలని కోరినా ఒప్పుకోలేదు. ఒకటా రెండా.. ఏ డిమాండ్‌ను అంగీకరించలేదు. రైల్వే బడ్జెట్‌లో మళ్లీ జిల్లాకు నిరాశే మిగిలింది.
  
  ‘‘ రైల్వే బడ్జెట్‌లో ప్రతిసారి మన రాష్ట్రానికి తీరని అన్యాయం జరుగుతోంది. ఇందులో మనకు తగిన న్యాయం జరిగి ప్రాజెక్టులు పూర్తి కావాలంటే కేంద్ర మంత్రివర్గంలో మన రాష్ట్రానికి రైల్వే శాఖ మంత్రి పదవిని దక్కించుకోవాలి. అప్పుడే మన అభివృద్ధి సాధ్యమవుతుంది’’ అని రైల్వే బడ్జెట్‌లలో రాష్ట్రానికి అన్యాయం జరిగిన సందర్భాల్లో వైఎస్‌ఆర్ కాంగ్రెస్ పార్టీ అధినేత వైఎస్ జగన్‌మోహన్‌రెడ్డి ఆవేదనతో చెప్పిన మాటలివి.
  
  ‘బీజేపీకి మద్దతిచ్చి కేంద్ర మంత్రివర్గంలో ప్రాతినిథ్యం వహిస్తున్న, రాష్ట్రంలో అధికారంలో ఉన్న తెలుగుదేశం పార్టీ నేతలు మౌనంగా ఉన్నారు. ఉత్తరాది రాష్ట్రాలకే ప్రాధాన్యత లభించినా నోరు మెదపడం లేదు. రైల్వే రంగంలో వెనుకబడి రాష్ట్ర విభజనతో పూర్తిగా నష్టపోయిన అంధ్రప్రదేశ్‌కు ప్రయోజనాలు చేకూరకపోయినా పట్టించుకోవడం లేదు. రాయలసీమలో అత్యంత వెనుకబడినకర్నూలు జిల్లాకు అన్యాయం జరుగుతున్నా ఉప ముఖ్యమంత్రి స్థాయి హోదాలో ఉన్న టీడీపీ నేతలు మౌనంగా ఉన్నారు.
  
  2015-16 రైల్వే బడ్జెట్‌లో జిల్లాకు మరోసారి అన్యాయం జరిగింది. గురువారం పార్లమెంటు సమావేశాల్లో రైల్వే శాఖ మంత్రి సురేశ్ ప్రభు ప్రవేశపెట్టిన రైల్వే బడ్జెట్‌లో జిల్లాకు సరైన కేటాయింపులు చేయలేదు. పెండింగ్ ప్రాజెక్టుల్లో నంద్యాల ఎర్రగుంట్ల లైనుకు రూ.130కోట్లు ఇస్తామని ప్రకటించారు తప్ప ఇతర ప్రాజెక్టుల ప్రస్తావనే లేదు. వర్క్‌షాపు నిర్మాణం, మంత్రాలయం కొత్త రైలు మార్గానికి పట్టిన గ్రహణం వీడలేదు. జిల్లాలోని రైల్వే ప్రాజెక్టుల పురోగతికి రూ.2 వేల కోట్లు కావాల్సి ఉండగా రూ.130 కోట్లు ప్రకటించిన సరిపెట్టారు.
  
  విదిల్చింది రూ.130 కోట్లే
  దీర్ఘకాలికంగా పెండింగ్‌లో ఉన్న  కడప జిల్లా ఎర్రగుంట్ల - బనగానపల్లె- నంద్యాల లైను పనులకు రూ.130 కోట్లు ఇస్తామనిప్రకటించారు. ఈ రైలు మార్గం ఈ ఏడాది చివరి నాటికి పూర్తయ్యే అవకాశం ఉంది. ఇప్పటికే పనులు చేసిన కాంట్రాక్టర్లకు రూ.60 కోట్ల బిల్లులు చెల్లించలేదు. పెండింగ్‌లో ఉన్న 20 కిలోమీటర్ల మేరకు (నంద్యాల క్రాస్‌లైన్ వెంకటేశ్వరపురం వరకు) పనులు పూర్తి చేసేందుకు, అసంపూర్తిగా ఉన్న బనగానపల్లె, కోవెలకుంట్ల రైల్వే స్టేషన్ల పనుల పూర్తికి రూ.70 కోట్లు అవసరం అవుతాయి. మొత్తం రూ.150 కోట్లు కేటాయిస్తే పూర్తి స్థాయిలో పనులు జరిగేవి, కాని రూ.130 కోట్లే ఇచ్చారు.
  
  మంత్రాలయం లైను నిర్మించాలి
  కర్నూలు నుంచి కోడుమూరు మీదుగా ఎమ్మిగనూరు, మంత్రాలయం వరకు కొత్త రైల్వే లైను ఏర్పాటు చేయాలి. జిల్లా కేంద్రం నుంచి పశ్చిమ ప్రాంతానికి రవాణ వ్యవస్థ స్తబ్దుగా ఉంది. ఈ రైలు మార్గం ఏర్పాటుతో రవాణా కష్టాలు తీరుతాయి. కరువు ప్రాంతంలో వ్యాపార, ఉపాధి అవకాశాలు మెరుగుపడుతాయి.
  - బి. షేక్షావలి, ప్యాలకుర్తి
  
  ఢిల్లీ ఎన్నికల ఫలితాల తర్వాత కూడా కనువిప్పు కలగలేదు
  ఢిల్లీ అసెంబ్లీ ఎన్నికల ఫలితాలు చూశాక కూడా కేంద్రానికి కనువిప్పు కలగలేదు.  కొత్త రైలు ఏదీ వేయలేదు. కనీసం మన రాష్ట్ర రాజధాని విజయవాడకు రైలు వేయకుండా సామాన్య ప్రజలపై భారం మోపారు. బెంగుళూరు, విజయవాడలకు కర్నూలు నుంచి రైలు నడపాలి. ప్యాసింజర్ రైలూ నడపాలి. రాజకీయ పార్టీలు కలిసికట్టుగా కేంద్రంతో పోరాడి కొత్త రైళ్లను సాధించుకోవాలి. ఎన్నో ఆశలతో ఎదురుచూసిన రైల్వే బడ్జెట్ నిరాశ కల్గించింది.
  - ఎం.ఎస్. చంద్రశేఖర్,
  మయూరి హైట్స్ ట్రెజరర్
  
  వర్క్‌షాపు నిర్మాణానికి నిధులివ్వాలి
  జిల్లా కేంద్రంలో రైల్వే వర్క్‌షాపు నిర్మాణానికి నిధులు కేటాయించాలి. చదువుకున్న ఎంతో మంది యవకులు నిరుద్యోగులుగా మిగిలిపోతున్నారు. వర్క్‌షాపు, ఇతర ప్రాజెక్టులను నిర్మిస్తే ఉపాధి, ఉద్యోగ అవకాశాలు దక్కుతాయి.
  - అక్బర్ సాహెబ్, లెక్చరర్, నందికొట్కూరు
  


 రైల్వే బడ్జెట్లో జిల్లాకు తీవ్ర అన్యాయం  శ్రీకాళహస్తి-నడికుడి రైలు మార్గానికి నిధులు నిల్
 కడప-బెంగళూరు రైలు మార్గానికి పైసా విదల్చని దుస్థితి  తిరుపతికి ఒక్క కొత్త సర్వీసూ లేదు
  
 అరచేతిలో వైకుంఠం చూపించడం అంటే ఇదే. రైల్వే బడ్జెట్ రూపకల్పన సమయంలో ఓ వైపు టీడీపీ నేతలు, మరో వైపు కమలనాథులు బీరాలు పలికారు, బడ్జెట్‌లో జిల్లాకు పెద్దపీట వేస్తారని ధీమా వ్యక్తం చేశారు. రైల్వే శాఖ మంత్రి సురేష్‌ప్రభు జిల్లా ప్రజలను ఊరించి ఉసూరుమనిపించారు. రైల్వే బడ్జెట్ చరిత్రలో ఎన్నడూ లేని రీతిలో జిల్లాకు అన్యాయం జరిగింది.
  
 తిరుపతి గాంధీరోడ్డు:  కేంద్ర ప్రభుత్వం రైల్వే బడ్జెట్ ప్రవేశ పెట్టక ముందు సీఎం చంద్రబాబు పలు సందర్భాల్లో ఈ ఏడాది జిల్లాకు న్యాయం జరుగుతుందని ధీమా వ్యక్తం చేశారు. శ్రీకాళహస్తి-నడికుడి, బెంగళూరు-కడప రైలు మార్గాలను పూర్తి చేసేందుకు నిధులు మం జూరు చేస్తారని చెప్పుకొచ్చారు. పలమనేరు మీదుగా కుప్పం  వరకు కొత్త రైలుమార్గం నిర్మాణానికి రైల్వే శాఖ ఆమోద ముద్ర వేస్తుం దని బీరాలు పలికారు. ఆధ్యాత్మిక కేంద్రం తిరుపతి నుంచి దేశంలోని ప్రధాన ఆధ్యాత్మిక  కేంద్రాలకు కొత్త సర్వీసులు మంజూరు చేస్తారని స్పష్టీకరించారు. చంద్రబాబు చెప్పిన వాటిల్లో ఒక్కటి కూడా రైల్వే బడ్జెట్లో ప్రకటించలేదు.
  
 అన్యాయం ఇలా..
 
 కడప- మదనపల్లె - బెంగళూరు రైలు మార్గా న్ని 2009-10 బడ్జెట్‌లో రైల్వేశాఖ మంజూరు చేసింది. రూ.2 వేల కోట్ల వ్యయంతో ప్రాజెక్టును రైల్వే, కర్నాటక, ఆంధ్రప్రదేశ్ ప్రభుత్వాలు సంయుక్తంగా చేపట్టాలని నిర్ణయిం చారు. ఈ ప్రాజెక్టులకు 2009-10 బడ్జెట్లో రైల్వే శాఖ రూ.40 కోట్లు కేటాయించింది. అప్పటి వైఎస్ ప్రభుత్వం రాష్ట్ర ప్రభుత్వం తరపున రూ.40 కోట్లు కేటాయించడంతో రూ.80 కోట్లతో పనులు ప్రారంభమయ్యాయి.  2010 -11 బడ్జెట్‌లో రూ.56 కోట్లు, 2011-12 బడ్జెట్‌లో రూ.60 కోట్లను రైల్వేశాఖ  కేటాయించింది. రాష్ట్ర ప్రభుత్వం తన వాటా విడుదల చేయలేదు. 259 కిలోమీటర్ల పొడవు రైలుమార్గం నిర్మించాలి ఉండగా, ప్రస్తుతం 21 కిలోమీటర్ల పొడవున చేపట్టిన రైలుమార్గం పనులు కూడా నిలిచిపోయాయి. మంత్రి సురేష్‌ప్రభు ఈ రైలు మార్గానికి ఒక్క పైసా కూడా విదల్చలేదు.
 
 శ్రీకాళహస్తి - నడికుడి రైలుమార్గాన్ని  కూడా కేంద్ర, రాష్ట్ర ప్రభుత్వాలు సంయుక్తంగా చేపట్టాలని 2009-10 బడ్జెట్‌లో నిర్ణయించారు. రూ.1314 కోట్ల వ్యయంతో 309 కిలోమీటర్ల పొడువునా ఈరైలుమార్గం నిర్మించడానికి ప్రణాళిక  రూపొందించారు. ఈ రైలు మార్గానికి 2013-14 బడ్జెట్‌లో రూ.కోటి కేటాయించారు. ఆ నిధులు సర్వేకు కూడా సరిపోవు. ఈ ఏడాది బడ్జెట్‌లో ఆైరె లు మార్గానికి  ఒక్కపైసా కూడా కేటాయించలేదు. ఇక ఈ రైలు మార్గం మరుగునపడినట్లే లెక్క.  
  
 ఊసే లేని కొత్త రైళ్లు..
 
 కొత్త  రైల్వే  సర్వీసులను మంజూరు చేయడంలోను మంత్రి సురే్ ప్రభు  జిల్లాకు తీరని అన్యాయం చేశారుతిరుపతి- వారణాసి, తిరుపతి- షిర్డీ ఎక్స్‌ప్రెస్ రైళ్లు కాగితాలకే పరిమితమయ్యాయి. రేణిగుంటలోని  కోచ్ రిపేరు వర్క్‌షాప్ సామర్థ్యాన్ని విస్తరించడంపై బడ్జెట్‌లో స్పష్టతలేదు.  ఇంత అన్యాయం జరిగినా సీఎం చంద్రబాబు, టీడీపీ ప్రజాప్రతినిధులు నోరుమెదపక పోవ డం గమనార్హం.
  
 పార్లమెంట్‌లో పోరాడుతాం
 
 శ్రీకాళహస్తి -నడికుడి మార్గానికి నిధులు కేటాయిస్తారనుకున్నాం. ఏపీకే న్యాయం జరగనప్పుడు జిల్లాకు ఏం చేస్తారు? తిరుపతి నుంచి షిర్డికి రైలు ఏర్పాటు చేస్తారని ఆశలున్నాయి. సూళ్ళూరుపేట సబ్ వే పూర్తి చేస్తారనుకున్నాం. ఆ ఊసే లేదు. వెంకటాచలం వద్ద ఓవర్‌బ్రిడ్జి అభివృద్ధి చేస్తారని ప్రజలు ఆశలు పెట్టుకున్నారు. వారి ఆశలపై బీజేపీ ప్రభుత్వం నీళ్లు చల్లింది. దీనిపై పార్లమెంట్‌లో పోరాడుతాం.
  - వెలగపల్లి వరప్రసాద్, తిరుపతి ఎంపీ
 
 జిల్లాకు మొండిచేయి
 
 బీజేపీ రాష్ట్రానికి, జిల్లాకు మొండిచేయి చూపినా బాబు ఏమీ స్పందించరు. రాజధానికి 50 వేల ఎకరాల భూమి సేకరణకే బాబు నిమగ్నమయ్యారు. బాబు రియల్ ఎస్టేట్ చేసుకోవడానికి భూములు సేకరిస్తున్నారు. ఈ పనిలో పడి రాష్ట్రంలో ఏం జరుగుతోంది. బాబు పట్టించుకోవడం లేదు. రైల్వే బడ్జెట్ చూస్తే జిల్లాతో పాటు రాష్ట్రానికి కూడా ఏమీ దక్కకపోయినా రాష్ట్ర అధికార పార్టీ మాత్రం నోరు తెరవడంలేదు.
  - పెద్దిరెడ్డి వెంకట మిథన్ రెడ్డి, రాజంపేట పార్లమెంటు సభ్యులు
  
  బాబు మాటలు పెడచెవిన పెట్టారు
 
  ప్రధాన మంత్రి నరేంద్రమోదీ, కేంద్ర రైల్వేశాఖ మంత్రి సురేష్‌ప్రభు మొండి చేయి చూపారు. ప్రధాని రాష్ట్రానికి ఇచ్చిన హామీలను నెరవేర్చడంలో పూర్తిగా విఫలమయ్యారు. బీజేపీకి పూర్తి సహకారం అందిస్తున్న చంద్రబాబు మాటలు కూడా పెడచెవిన పెట్టడం దారుణం. రైల్వే బడ్జెట్‌లో ఆంధ్రాకు అన్యాయంపై ప్రధా న మంత్రితో చర్చిస్తాం. తిరుపతి రైల్వేస్టేషన్‌ను అంతర్జాతీయ రైల్వేస్టేషన్‌గా తీర్చిదిద్దుతామని కాంగ్రెస్ పార్టీ ప్రగల్భాలు పలికి రాష్ట్రాన్ని ముక్కలు చేసి అన్ని విధాలుగా ఆంధ్ర రాష్ట్రాన్ని నాశనం చేసింది.
  - గాలి ముద్దుకృష్ణమనాయుడు, టీడీపీ పొలిట్ బ్యూరో సభ్యుడు
  


 రైల్వే శాఖ మంత్రి సురేష్ ప్రభు ప్రవేశపెట్టిన రైల్వేబడ్జెట్‌లో రాష్ట్రానికి ఎలాంటి ప్రయోజనాలు అందించలేదని ముఖ్యమంత్రి సిద్ధరామయ్య అసంతృప్తి వ్యక్తం చేశారు. ‘అంతర్జాతీయ మార్కెట్‌లో ఇంధన ధరలు తగ్గిన నేపథ్యంలో ప్రయాణ ఛార్జీలు తగ్గుతాయని సామాన్యులు ఆశించారు. ఇంధన ధరలు తగ్గినా రైల్వేశాఖ నష్టాల్లో ఉందని సాకులు చెబుతూ ప్రయాణ ఛార్జీలు ఏమాత్రం తగ్గించకపోవడం శోచనీయం. ఇంధన ధరల తగ్గింపు కారణంగా రైల్వే శాఖ దాదాపు 16వేల కోట్ల రూపాయలకు పైగా ఆదా చేస్తోంది. ఈ మొత్తాన్ని ప్రజలకు అందజేసేందుకు కేంద్రం ఎలాంటి ప్రయత్నం చేయకపోవడం ఎంతమాత్రం సరికాదు.’ అని తెలిపారు.
 
 ఇక గత ఏడాది డి.వి.సదానంద గౌడ ప్రవేశపెట్టిన రైల్వే బడ్జెట్‌లో రాష్ట్రానికి 8 రైళ్లను ప్రకటించారని, వీటిలో ఏ ఒక్కటి ఇప్పటికీ అందుబాటులోకి రాలేదని విమర్శించారు. ఇక ఈ బడ్జెట్‌లో సైతం ఈ రైళ్లకు సంబంధించి ప్రస్తావించకపోవడం కన్నడిగులను తీవ్ర నిరాశకు గురిచేసిందని అన్నారు. రైల్వే ప్రాజెక్టుల నిర్మాణానికి సంబంధించి రాష్ట్ర ప్రభుత్వం 50శాతం నిర్మాణ వ్యయాన్ని భరించాలన్న కేంద్ర ప్రభుత్వ నిర్ణయంలో మార్పులు చేయాల్సిందిగా ఇప్పటికే తాను కోరానని తెలిపారు. రాష్ట్రంలో ప్రాజెక్టుల నిర్మాణానికి అవసరమైన భూములను కేటాయించడంతో పాటు నిర్మాణ వ్యయంలో 50శాతం భరించడం రాష్ట్రానికి భారంగా పరిణమిస్తుందనే విషయాన్ని కేంద్రానికి వివరించానని చెప్పారు.
  


 కొత్త రైల్వే మార్గాల ఊసేలేదు
 రాష్ట్రానికి మొత్తం రూ.1,307కోట్ల కేటాయింపులు
  ‘బి’ కేటగిరిలోని రైల్వేస్టేషన్‌లలో  అందుబాటులోకి రానున్న వై-ఫై
  
 బెంగళూరు: కొన్ని సంవత్సరాలుగా రాష్ట్రానికి వరాల జల్లు కురిపించిన కేంద్ర రైల్వేశాఖ ప్రస్తుతం మోడు పోయింది. రాష్ట్రానికి చెందిన పలువురు కేంద్ర రైల్వే శాఖ మంత్రులుగా ఉన్న నేపథ్యంలో పలు పథకాలను అప్పట్లో తీసుకువచ్చారు. ప్రస్తుతం రైల్వే శాఖ మంత్రి సురేష్ ప్రభు గురువారం లోక్‌సభలో ప్రవేశపెట్టిన రైల్వే బడ్జెట్ రాష్ట్రానికి ఎలాంటి కొత్త రైళ్ల ప్రకటన లేకుండానే సాగిపోయింది. చాలా కాలంగా రాష్ట్ర వాసులు డిమాండ్ చేస్తున్న వివిధ రైలు మార్గాలతో పాటు గత రెండేళ్లుగా రాష్ట్ర ప్రభుత్వం ప్రతిపాదిస్తూ వస్తున్న ‘బెంగళూరు సబర్బన్’ రైలుకు సంబంధించి కూడా బడ్జెట్‌లో ఎలాంటి ప్రకటన లభించక పోవడం కన్నడిగుల్లో కాస్తంత నిరాశనే కలిగించిందని చెప్పవచ్చు. ఇక ఈ బడ్జెట్‌లో రాష్ట్రంలోని రైల్వే పధకాలు, రైల్వే స్టేషన్‌ల ఆధునికీకరణ తదితర పనుల కోసం మొత్తం రూ.1,307 కోట్లను కేటాయించారు. కాగా ఇందులో వివిధ రైల్వేలైన్ల పనుల కోసం మొత్తం రూ.195 కోట్లను రైల్వే శాఖ మంత్రి సురేష్‌ప్రభు కేటాయించారు. ఇందులో కడూరు-చిక్కమగళూరు మార్గానికి రూ.10కోట్లు, హాసన-బెంగళూరు మార్గానికి రూ.55కోట్లు, బెంగళూరు-సత్యమంగళ(రూ.10కోట్లు), హుబ్లి-అంకోళా(రూ.22కోట్లు), రాయదుర్గ-తుమకూరు(రూ.15కోట్లు), బాగల్‌కోట-కొడచి(రూ.45కోట్లు), కుట్టూరు-హరిహర(రూ.10కోట్లు), తుమకూరు-చిత్రదుర్గ-దావణగెరె(రూ.14కోట్లు)తో పాటు మరికొన్ని మార్గాలకు సంబంధించిన పనులకు, లైన్‌ల ఆధునికీకరణకు ఈ బడ్జెట్‌లో కేటాయింపులు జరిపారు.
 
 అయితే ఆయా రైల్వే మార్గాలను పూర్తి చేయడంతో పాటు వాటి ఆధునికీరణకు ఈ నిధులు ఎంత మాత్రం సరిపోవని రాష్ట్ర ప్రభుత్వం పేర్కొంటోంది. ఇక రైల్వే స్టేషన్‌లలో వై-ఫై సౌకర్యాన్ని ‘బి’ కేటగిరీ స్టేషన్‌లకు సైతం విస్తరిస్తామన్న  సురేష్‌ప్రభు ప్రకటనతో రాష్ట్రంలోని 15 రైల్వేస్టేషన్‌లలో ప్రయాణికులకు వై-ఫై సౌకర్యం అందుబాటులోకి రానుంది. బెంగళూరు, మైసూరు, హుబ్లీ డివిజన్‌లలోని 15 రైల్వేస్టేషన్‌లు ఆధునికతను సంతరించుకొని వై-ఫై సౌకర్యాన్ని ప్రజలకు అందించనున్నాయి. వీటిలో బాగల్‌కోటె, గదగ్, కొప్పాళ, లోండా, తోరణగళ్లు, బానసవాడి, మండ్య, తుమకూరు, యలహంక, అరసికెరె, భద్రావతి, బీరూరు, హరిహర, హావేరి, హాసన రైల్వేస్టేషన్‌లలో ప్రయాణికులకు ఉచిత వై-ఫై సౌకర్యం అందుబాటులోకి రానుంది. వీటితో పాటు మొత్తం 34 రైల్వేస్టేషన్‌లలో విడతల వారీగా వై-ఫై సౌకర్యం ప్రయాణికులకు అందుబాటులోకి రానుంది.
 
 బెంగళూరు రైల్వేస్టేషన్ అభివృద్ధికి రూ.2కోట్లు.... ఇక బెంగళూరులోని సిటీ రైల్వేస్టేషన్‌లో మౌళిక సదుపాయాల కల్పన కోసం ఈ బడ్జెట్‌లో రూ.2కోట్లను కేటాయించారు. ఎంపీ నిధుల నుంచి ఈ మొత్తాన్ని కేటాయించినట్లు సురేష్ ప్రభు తెలిపారు. బెంగళూరు సెంట్రల్ ఎంపీ పి.సి.మోహన్ తన ఎంపీ నిధుల నుంచి ఈ మొత్తాన్ని రైల్వేస్టేషన్‌లో మౌళిక సదుపాయాల కల్పన కోసం అందజేశారు. ఈ నిధులతో బెంగళూరు సిటీ రైల్వే స్టేషన్‌లో ప్రయాణికులకు స్వచ్ఛమైన తాగునీరు, బయో టాయిలెట్, పార్కింగ్ వ్యవస్థలను అందుబాటులోకి తీసుకురానున్నారు.
 
  


 {పత్యేక జోన్‌పై ఆవిరైన ఆశలు
 కొత్త రైళ్ల ఊసేలేదు
 వీక్లీ ట్రెయిన్ల ఫ్రీక్వెన్సీ పెంపు లేనట్టే
 వేగన్ వర్కు షాపు ఒక్కటే వరం
  
 విశాఖపట్నం సిటీ: రైల్వే ‘ప్రభు’ దయతలచలేదు... రైల్వే జోన్‌పై ఆశలు మరోసారి అడియాశలే అయ్యాయి.... రాజ దాని ఎక్స్‌ప్రెస్‌తోసహా ఒక్క కొత్త రైలు కూడా వేయలేదు... కనీసం దువ్వాడ మీదుగా వెళ్తున్న రైళ్లను అయినా విశాఖకు మళ్లించ లేదు.. వీక్లీ రైళ్ల ఫ్రీక్వెన్సీ పెంచనూ లేదు... రద్దీ రైళ్లను అదనపు బోగీలూ వేయ లేదు..హుద్‌హుద్‌తో భారీగా నష్టపోయినా విశాఖ రైల్వే మౌలిక వసతుల మెరుగుదలను పట్టిం చుకోనే లేదు...వెరసి ఎన్‌ఏడీ ప్రభుత్వం కూడా విశాఖ రైల్వేకు దాదాపుగా మొం డి చెయ్యే విదిల్చింది. కొంతలో కొంత మెరుగు అన్నట్లుగా దువ్వాడ సమీపంలో వేగన్ వర్క్‌షాపు ఏర్పాటుకు ఆమోదించారు. కంచరపాలెం-మర్రిపాలెం సిక్ లైన్ ఆధునీకరణకు రూ.20 కోట్లు కేటాయించామని చెప్పారు. దీర్ఘకాలిక  సమస్యల పరిష్కారం ఊసెత్తని బడ్జెట్ జిల్లాను తీవ్రంగా నిరాశపరిచ్చింది. టీవీలకు అతుక్కుపోయి మరీ రైల్వే బడ్జెట్‌ను చూసిన విశాఖవాసులు ఈసురోమని నిట్టూర్చారు. ప్రజాగ్రహాన్ని ప్రతిబింబిస్తూ వైఎస్సార్ కాంగ్రెస్‌తోసహా ప్రతిపక్షాలు, ప్రజాసంఘాలు ఆందోళనబటపట్టాయి.
 
 జోన్ జీరో!: రైల్వే జోన్ ప్రస్తావన లేదు. ఎప్పుడు వస్తుందో తెలియజేయలేదు. రాష్ట్రం విడిపోయిన తర్వాత విభజన చట్టంలో పేర్కొన్న విధంగా జోన్ ప్రకటించకపోవడంపై విశాఖ ప్రజలు ఆగ్రహావేశాలు వ్యక్తం చేశారు.  రైల్వే స్టేషన్ల నిర్వహణ ప్రైవేట్ వ్యక్తుల చేతుల్లో పెట్టడం తప్పితే ఉద్యోగులకు మేలు చేసే ప్రయోజనాలు కలిగించలేదు. రాష్ట్రం విడిపోయిన తర్వాత కచ్చితంగా వస్తాదనుకున్న జోన్ రాకపోవడంపై అందరిలో అనుమానాలు తలెత్తుతున్నాయి. జోన్ ప్రస్తావన వుంటుందని ముఖ్యమంత్రి చంద్రబాబు నేరుగా ప్రకటించినా కార్యరూపం దాల్చకపోవడంపై ఒఢిశా నేతల ఒత్తిడి ముందు కేంద్ర మంత్రి వెంకయ్యనాయుడు, ఎంపీ హరిబాబుల మాటలు సైతం తేలిపోయినట్టు అయ్యాయి. రోజూ లక్ష మందికిపైగా ప్రయాణికులు రాకపోకలు సాగించే విశాఖ స్టేషన్ అభివృద్దికి ఎలాంటి మౌళిక వసతులు కల్పించలేదు. జ్ఞానాపురం వైపు చేపడతారనుకున్న పెద్ద ప్రాజెక్టులను ఈ బడ్జెట్‌లో ప్రకటిస్తారని ఊహించినా అవేవీ కార్యరూపం దాల్చలేదు. పరిశుభ్రత, బయో టాయిలాట్లు మినహా కొత్త అంశాలు కనిపించడం లేదు. అదనపు బోగీల ప్రస్తావన లేకపోవడం కూడా తీవ్ర నిరాశకు గురి చేసింది.  హుద్‌హుద్ తుఫాన్‌కు విశాఖలో రైల్వే వ్యవస్థ పూర్తిగా ఛిన్నాభిన్నమైంది. రైల్వే స్టేషన్‌తో బాటు రైల్వే ఆస్తులన్నీ భారీగా ధ్వర సమయ్యాయి. దాదాపు 200 కోట్ల మేర నష్టం వాటిల్లినా కొన్ని మౌళిక సదుపాయాల కల్పనకు దాదాపు రూ. 70 కోట్లు వ్యయం కాగలదని అంచనా వేశారు. ఆ మొత్తం ఈ బడ్జెట్‌లో వస్తుందని ఆశించారు. కానీ బడ్జెట్‌లో మౌళిక సదుపాయాలకు ఎలాంటి మొత్తం కేటాయించకపోవడంతో వేలాది మంది ఉద్యోగులు తీవ్ర నిరాస చెందారు. ప్లాస్టిక్ కవర్ల నీడలో కుటుంబాలతో నివాసముంటున్న రైల్వే ఉద్యోగులంతా తీవ్ర అసంతృప్తి చెందారు.
 
 ఉన్నంతలో కొత్త ప్రాజెక్టులు ఇవీ..!
 
 దువ్వాడ సమీపంలోని వడ్లపూడి వద్ద వేగన్ వర్క్‌షాపు రూ. 213.97 కోట్ల వ్యయంతో నిర్మించడానికి అమోదించారు. డీజిల్ లోకోషెడ్‌ను ఆధునికీకరించేందుకు రూ. 53 కోట్లు మంజూరు చేశారు.ఎలక్ట్రిక్ లోకోషెడ్‌కు మరో 200 లోకోమెటివ్స్‌కు మరమ్మతులు చేసేందుకు అవసరమైన విస్తరణ కోసం రూ. 19.56 కోట్లు కేటాయించారు.  పాడైన వ్యాగన్‌లను బాగు చేసేందుకు రూ. 20. 71 కోట్లు మంజూరు చేశారు గోపాలపట్నం-దువ్వాడ మధ్య అటోమెటిక్ సిగ్నలింగ్ వ్యవస్థను ఆధునికీకరించేందుకు రూ. 8.39 కోట్లు మంజూరు చేశారు. మరో రూ. 18 కోట్లతో ట్రాఫిక్ అంతరాయం లేకుండా సిగ్నలింగ్ పనులు చేపట్టేందుకు కేటాయించారు. అన్ మేన్డ్ లెవల్ క్రాసింగ్ పనుల నిమిత్తం రూ. 44.68 కోట్లు, ట్రాక్ నిర్వహణ కోసం రూ. 239 కోట్లు మంజూరు చేశారు.
  


 రెడ్ సిగ్నల్
 
 వ్యాగన్‌కు కొత్త మెలిక గల్లంతైన కోచ్ ఫ్యాక్టరీ
 కాజీపేట-విజయవాడ ట్రిప్లింగ్ మూడేళ్లకిత్రమే మంజూరు
 ఆవిరైన రైల్వేవర్సిటీ ఆశలు జిల్లాలో పెరగనున్న రైళ్ల వేగం
 కొత్త రైళ్ల భారం ఎంపీలపైనే..
  
 హన్మకొండ : పార్లమెంట్‌లో గురువారం రైల్వేశాఖ మంత్రి సురేష్ ప్రభు రైల్వే బడ్జెట్‌ను ప్రవేశపెట్టారు. ఇందులో బల్లార్షా- కాజీపేట-విజయవాడ మధ్య మూడోలైను నిర్మాణానికి నిధులు కేటాయించడం మినహా ఒరిగింది శూన్యం. రాష్ట్రస్థాయి ప్రాజెక్టులుగా గుర్తింపు తెచ్చుకున్న రైల్వేకోచ్ కర్మాగారం, వ్యాగన్ వర్క్‌షాప్, కాజీపేటకు డివిజన్ హోదా వంటి కీలక అంశాలన్నీ టెక్నాలజీమంత్రం మాటున మరుగున  పడిపోయాయి. జిల్లావాసులు బడ్జెట్‌పై నిరాశ చెందారు.
 
 వ్యాగన్ గల్లంతు
 
 బడ్జెట్‌లో వ్యాగన్ పరిశ్రమకు నిధులు కేటాయిస్తారని అంతా ఆశించారు. ఇటీవల భూసేకరణ పూర్తికావడం, అంతకుముందే సీఎం కేసీఆర్ స్వయంగా ప్రధాని నరేంద్రమోడీకి ఈ అంశంపై లేఖ రాయడంతో నిధులు కేటారుుస్తారని అందరూ భావించారు. కానీ, సురేష్‌ప్రభు అందరి అంచనాలు తలకిందులు చేశారు. రాబోయే మూడు నెలల కాలంలో ప్రైవేట్ కంపెనీల ఆధ్వర్యంలో వ్యాగన్ల తయారీ, లీజుకు ఇవ్వడం వంటి అంశాలపై ‘వ్యాగన్ ఇన్వెస్ట్‌మెంట్ స్కీం’పై సమాలోచనలు చేస్తామంటూ కొత్త మెలిక పెట్టారు. మూడు నెలల తర్వాత కొత్తగా రూపుదిద్దుకునే విధివిధానాలపై కాజీపేట వ్యాగన్ వర్క్‌షాప్ భవితవ్యం ఆధారపడి ఉంది.
  
 విభజన హామీలదీ అదేదారి..
 
 ఆంధ్రప్రదేశ్ రాష్ట్ర విభజన సందర్భంగా తెలంగాణలో రైలు బోగీల తయారీ కర్మాగారం (రైల్ కోచ్‌ఫ్యాక్టరీ) ఏర్పాటుకు గల అంశాలను పరిశీలించాలని రైల్వేశాఖకు ఆదేశాలు జారీ చేశారు. గత బడ్జెట్‌లో ఈ అంశంపై మూడు నెలల కాలపరిమితితో రైల్వేశాఖ కమిటీ  ఏర్పాటు చేసింది. కానీ,  కాజీపేట కోచ్ ఫ్యాక్టరీ ఏర్పాటుపై సానుకూల స్పందన రాకపోవడంతో జిల్లావాసులు నిరాశకు లోనయ్యూరు. అదేవిధంగా విస్తీర్ణంలో పెద్దదిగా ఉన్న సికింద్రాబాద్ డివిజన్‌ను విభజించి కాజీపేట కేంద్రంగా మరో కొత్త డివిజన్ ఏర్పాటు చేయాలంటూ ఏళ్ల తరబడి ఉన్న డిమాండ్‌ను రైల్వేమంత్రి పెడచెవిన పెట్టారు.
 
 ఆవిరైన రైల్వేవర్సిటీ ఆశలు
 
 భారతీయ రైల్వేల అవసరాలకు అనుగుణంగా ప్రస్తుతం దేశంలో ఉన్న ప్రతిష్టాత్మక విద్యాసంస్థల సహకారంతో రైల్వే వర్సిటీ ఏర్పాటు చేయనున్నామంటూ ఎన్డీఏ మధ్యంతర రైల్వేబడ్జెట్‌లో పేర్కొంది. వరంగల్ నగరంలో కాజీపేటకు అత్యంత సమీపంలో నేషనల్ ఇన్స్‌స్టిట్యూట్ ఆఫ్ టెక్నాలజీ (నిట్, వరంగల్) ఉండటంతో వరంగల్‌లో ఈ వర్సిటీ ఏర్పాటు చేయాలంటూ రాష్ట్రానికి చెందిన ప్రజాప్రతినిధులు డిమాండ్ చేశారు. కానీ రైల్వేశాఖ ప్రధాని నరేంద్రమోడీ సొంత నియోజకర్గమైన ఐఐటీ-వారణాసిలో ఈ విద్యాసంస్థను నెలకొల్పుతున్నట్లుగా ప్రకటన చేశారు. దానితో వరంగల్‌లో రైల్వేవర్సిటీ ఆశలు గల్లంతయ్యాయి.
  
 సర్వేలతో సరి
 
 గత బడ్జెట్‌లో మంజూరై నిధుల కోసం ఎదురు చూస్తున్న భద్రాచలం రోడ్డు- కొవ్వూరు రైల్వేమార్గానికి ఈ బడ్జెట్‌లో మొండిచేయి ఎదురైంది. కేవలం రూ.కోటి కేటాయించారు. డోర్నకల్-మిర్యాలగూడ మార్గం సర్వేకు మరోసారి సర్వే కోసం రూ.14.57 లక్షలు, పాలకుర్తి- స్టేషన్‌ఘన్‌పూర్-సూర్యాపేట మార్గం సర్వేకు రూ 24.50 లక్షలు, హసన్‌పర్తి-కరీంనగర్ మార్గం సర్వేకు రూ 14.5 లక్షలు కేటాంచారు. జిల్లా మీదుగా వెళ్తూ ఇదే పరిధిలోకి వచ్చే మణుగూరు-రామగుండం రైల్వేమార్గానికి మరోసారి సర్వే చేపట్టాలంటూ రూ.50 లక్షలు కేటాయించారు.
 
 మూడోసారి మూడోలైన్
 
 ఢిల్లీ-చెన్నై గ్రాండ్‌ట్రంక్ మార్గంలో ఉన్న బల్లార్షా- కాజీపేట-విజయవాడ మార్గం అత్యంత రద్దీతో ఉంటుంది. ట్రాఫిక్ పరంగా దక్షిణ మధ్య రైల్వే పరిధిలోనే మొదటిస్థానంలో ఉంది. ఈ మార్గంలో మూడోలైను నిర్మిస్తామంటూ మూడేళ్ల కిందట అప్పటి రైల్వేమంత్రి త్రివేది ప్రకటించారు. మూడేళ్లుగా పనులు ముందుకు సాగలేదు. ఈ బడ్జెట్ ఈ మార్గానికి ప్రాధాన్యత దక్కింది. ట్రిప్లింగ్ కోసం దేశవ్యాప్తంగా ఎంపిక చేసిన నాలుగు మార్గాల్లో కాజీపేట-విజయవాడ ఒకటి. 219.6 కిలోమీటర్ల నిడివిగల ఈ మార్గానికి రూ.100 కోట్లు మంజూరు చేసినట్లు సమాచారం. దీనితో పాటు 220 కిలోమీటర్ల నిడివిగల బల్లార్షా-కాజీపేట మార్గంలో ట్రిప్లింగ్‌కు రూ.46.19 కోట్లు కేటాయించారు. అదేవిధంగా కాజీపేట బైపాస్ మార్గంలో డబ్లింగ్‌కు రూ.4.50 కోట్లు కేటాయించారు.
  
 హైస్పీడ్ రైళ్లకు అవకాశం
 
 దేశంలో తొమ్మిది మార్గాల్లో రైళ్ల గరిష్ట వేగాన్ని 110-130 నుంచి 160-200 కిలోమీటర్లకు పెంచుతున్నట్లు ప్రకటించారు. ఈ కేటగిరిలోకి విజయవాడ-కాజీపేట సెక్షన్ రానుంది. డోర్నకల్-వరంగల్‌ల మధ్య ట్రాక్ అనువుగా ఉందా లేదా అనే అంశాన్ని ఇటీవల దక్షిణ మధ్య రైల్వే జీఎం శ్రీవాత్సవ ఈ మార్గంలో పర్యటించి పరిశీలించి సంతృప్తి వ్యక్తం చేశారు. గత బడ్జెట్‌లో సికింద్రాబాద్-విజయవాడ, కాజీపేట-నాగ్‌పూర్‌ల మధ్య హైస్పీడ్ రైళ్లు నడిపేందుకు అధ్యయనం చేస్తామని ప్రకటించారు. ఆ పనులు ఎంత వరకు వచ్చాయనేది గురువారం పార్లమెంటులో ప్రవేశపెట్టిన బడ్జెట్‌లో వివరించలేదు.
 
  వై-ఫై సౌకర్యం
 
 ఏ కేటగిరిలో ఉన్న రైల్వే స్టేషన్లలో వై-ఫై సౌక ర్యం కల్పిస్తామంటూ రైల్వేమంత్రి తెలిపారు. ప్రస్తుతం జిల్లాలో ఏ కేటగిరిలో వరంగల్, కాజీపేట రైల్వేస్టేషన్లు ఉన్నాయి. ఈ రెండు స్టేషన్లలో త్వరలో వై-ఫై సౌకర్యం అందుబాటులోకి రానుంది. అదేవిధంగా యాత్రికులు ఎక్కువగా వచ్చే స్టేషన్లలో స్వయంసేవా పద్ధతిలో లాకర్లను అందుబాటులోకి తెస్తామంటూ మంత్రి సురేశ్‌ప్రభు చెప్పారు. ఈ కోటాలో వరంగల్, కాజీపేటలకు వచ్చే యాత్రికులు, ప్రయాణికులకు లాకర్ సౌకర్యం అందుబాటులోకి వస్తుంది. ఇప్పటికే కాజీపేటకు రెండు లిఫ్టులు మంజూరు కాగా నిధులలేమి కారణంగా పనులు ఆగిపోయాయి. ముఖ్యమైన స్టేషన్లలో ఎస్కలేటర్లు, లిఫ్టుల ఏర్పాటుకు రూ.120 కోట్లు కేటాయించారు. వీటితోపాటు ప్రధాన స్టేషన్లలో మినరల్ వాటర్‌ను తక్కువ ధరకు అందుబాటులోకి తెచ్చేందుకు వాటర్ వెండింగ్ మిషన్లు ఏర్పాటు చేయనున్నారు. జిల్లాలో ఉన్న కాజీపేట, వరంగల్, జనగామ, డోర్నకల్, మహాబూబాబాద్ స్టేషన్లలో ఈ మిషన్లు అందుబాటులోకి వచ్చేందుకు ఆస్కారం ఉంది. వీటితో పాటుగా జిల్లాలో నాలుగు ఆర్‌వోబీ లేదా ఆర్‌యూబీలకు నిధులు మంజూరైనట్లుగా తెలుస్తోంది.
  
 ఎంపీలపైనే భారం
 
 బడ్జెట్ సమావేశాలు ముగిసేలోగా కొత్త రైళ్ల అంశాన్ని కొలిక్కి తెస్తామంటూ మంత్రి ప్రకటించారు. దానితో కొత్త రైళ్లు, ప్రాజెక్టులను జిల్లాకు సాధించాల్సిన బాధ్యత జిల్లాకు చెందిన ఎంపీలపై ఉంది. కాజీపేట-షిరిడీ, భద్రాచలంరోడ్డు-డోర్నకల్-తిరుపతి, భద్రాచలం రోడ్డు-కాగ జ్‌నగర్‌ల మధ్య కొత్త రైళ్లు ప్రవేశపెట్టాలనే డిమాండ్లు చిరకాలంగా ఉన్నాయి. గత బడ్జెట్‌లో ప్రకటించిన ముంబై-కాజీపేట రైలును ఎప్పుడు ప్రారంభిస్తారనే అంశాన్ని పేర్కొనలేదు.
 
 త్వరితగితన సరుకులు రవాణా చేసేందుకు ట్రాన్స్‌పోర్టు లాజిస్టిక్ కార్పొరేషన్ ఆఫ్ ఇండియా అనే సంస్థను ఏర్పాటు చేయబోతున్నట్లు తెలిపారు. దీనికి అనుగుణంగా 30 చోట్ల మల్టీమోడల్ లాజిస్టిక్ పార్కులను నెలకొల్పుతామన్నారు. దీనికి ప్రధాన అర్హత ఖాళీ రైల్వేస్థలాలు అందుబాటులో ఉండటం. డోర్నకల్ సమీపంలో రైల్వేకు వందల ఎకరల స్థలం అందుబాటులో ఉంది. జిల్లాకు చెందిన ప్రజాప్రతినిధులు ఈ అంశంపై దృష్టి పెట్టడం మంచింది.
 
 బొగ్గు, ఉక్కు పరిశ్రమలు ఉన్న ప్రాంతాలను అనుసంధానం చేస్తూ కొత్త మర్గాలు నిర్మిస్తామంటూ మంత్రి సురేశ్‌ప్రభు సెలవిచ్చారు. దాని ప్రకారం మణుగూరు-రామగుండం రైల్వేలైనుకు ప్రత్యేకంగా నిధులు రాబట్టాల్సి ఉంది.
 
 దేశంలో మరో నాలుగు చోట్ల రైల్వే రీసెర్చ్ సెంటర్లు నెలకొల్పుతామంటూ మంత్రి ప్రకటన చేశారు. కనీసం ఈ రీసెర్చ్ సెంటరైనా వరంగల్‌కు దక్కేలా ప్రజాప్రతినిధులు బడ్జెట్ సమావేశాలు పూర్తయ్యేలోపు కసరత్తు చేయాల్సిన అవసరం ఉంది. గతంలో కాజీపేటలో స్కిల్‌డెవలప్‌మెంట్ సెంటర్ ఏర్పాటు చేస్తామని ప్రకటించినా ఇంతవరకు కార్యరూపం దాల్చలేదు.కొత్త డివిజన్ల ఏర్పాటుపై ఎంపీలతో కమిటీ వేస్తామంటూ మంత్రి ప్రకటించారు. కాజీపేట డివిజన్ సాధన దిశగా ఎంపీలు తమ గళం విప్పాల్సిన అవసరం ఉంది.


 ఒక్క ప్రతిపాదన  కూడా పరిశీలించలేదని అసహనం
 సాక్షి ముంబై: కేంద్ర రైల్వే శాఖ మంత్రి సురేష్ ప్రభు ప్రవేశపెట్టిన 2015-16 రైల్వే బడ్జెట్ మహారాష్ట్రలోని తెలుగు ప్రజలతోపాటు అనేక మందిని నిరాశపరిచింది. ముంబైకి చెందిన ప్రభు రైల్వే శాఖ మంత్రిగా ఉన్నందున ముంబైకి వరాలు ప్రకటిస్తారని ప్రజలు భావించారు. ముంబై నుంచి నిజామాబాద్ మార్గంలో కొత్త రైలు లేదా వారానికి ఒకసారి నడిచే ఎల్‌టిటి-నిజామాబాద్ రైలును ప్రతి రోజు నడిపించడం లాంటి ప్రకటనలు వస్తాయని అనుకున్నారు.
 
 తెలంగాణ, ఆంధ్రప్రదేశ్ రాష్ట్రాల మీదుగా వెళ్లే రైళ్లన్నింటిని ఠాణేలో నిలపాలనే డిమాండ్‌తోపాటు షోలాపూర్-హైదరాబాద్ ఇంటర్‌సిటీ ఎక్స్‌ప్రెస్, పుణే-హైదరాబాద్‌ల మధ్య మరో రైలు నడపాలన్న డిమాండ్లలో ఏదో ఒకటి పూర్తవుతుందని భావించారు. అయితే వీటిలో ఏ ఒక్క డిమాండ్‌ను పరిశీలించలేదు. దీంతో తెలుగు ప్రజల్లో నిరసన వ్యక్తమవుతోంది. అయితే రైళ్ల చార్జీలు పెంచకపోవడంతో కొంత ఊరటలభిందని చెప్పొచ్చు. మరోవైపు 2014-15 బడ్జెట్‌లో ఎన్డీఏ ప్రభుత్వం ముంబై-కాజిపేట(వరంగల్) వయా బల్లార్షా వారానికి ఒకసారి కొత్త ఎక్స్‌ప్రెస్ రైలును ప్రకటించిన సంగతి తెలిసిందే. అయితే దీనికి ఇంతవరకు మోక్షం లభించలేదు.  
  
 రైల్వే బడ్జెట్‌లో రాష్ట్రానికి రిక్తహస్తాలే..
 
 సాక్షి ముంబై: కేంద్ర రైల్వే మంత్రి సురేష్ ప్రభు ప్రవేశపెట్టిన రైల్వే బడ్జెట్(2015-16)లో ప్రయాణికులపై ఎలాంటి భారం మోపకపోయినా..మహారాష్ట్ర ప్రజలకు పెద్దగా ఒరిగిందేమీలేదు. కొత్త రైళ్లు, జనాకర్షక పథకాల జోలికి వెళ్లకుండా కేవలం స్వచ్చత, భద్రత, ఆధునీకరణకు పెద్దపీట వేయడం వంటి తదితర అంశాలతోనే ముగించారు. ముఖ్యంగా కొత్త రైలు ఒక్కటీ ప్రకటించకుండానే బడ్జెట్ ప్రవేశపెట్టిన తొలి రైల్వే మంత్రిగా సురేష్ ప్రభు రికార్డు సృష్టించారని చెప్పుకోవచ్చు. మహారాష్ట్రను దృష్టిలో ఉంచుకుని పెద్దగా జనాకర్షక ప్రకటన ఏదీ చేయకపోయినా.. కోంకణ్ రైల్వేలో రాబోయే మూడేళ్లలో 50 వేల ఉద్యోగాల భర్తీ చేస్తామని ఆయన ప్రకటించారు.
 
 ముంబైకి కొంత ఊరట...!
 
 ముంబై-మహారాష్ట్ర ప్రాంతానికి చెందిన సురేష్ ప్రభు రైల్వే మంత్రిగా ఉండడంతో రాష్ట్రానికి పెద్దపీట వేస్తారని ప్రజలంతా భావించారు. అనుకున్న స్థాయిలో పథకాలు ప్రవేశపెట్టకపోయినా... ముంబై వాసులకు ఎయిర్ కండిషన్ లోకల్ రైలు, ముంబై-ఢిల్లీ మార్గంలో హైస్పీడ్ రైళ్లు, ముంబై-అహ్మదాబాద్ బుల్లెట్ రైలు వంటి వాటి సాధ్యాసాధ్యాలపై అధ్యయనం జరుగుతోందన్నారు. బుల్లెట్ రైలును ప్రవేశపెట్టేందుకు మాత్రం మరికొంత సమయం పడుతుందని పేర్కొన్నారు.
  
 మహిళా భద్రత దృష్టి కోణంతో మహిళ బోగీలతోపాటు ముంబై సబర్బన్ (ఉపనగరం) రైల్వేస్టేషన్లలో సీసీ టీవీలు అమర్చనున్నారు. దీంతోపాటు ఐరోలి-కల్వా ఎలివేటెడ్ మార్గం కోసం రూ. 428 కోట్లను కేటాయించారు. విరార్-డహాను మధ్య మూడో, నాలుగో ట్రాక్‌ల నిర్మాణం కోసం రూ. 3,555 కోట్లు, లోకల్ రైళ్ల బోగీల కోసం రూ. 565 కోట్లను ప్రకటించారు.
  
 రైల్వే బడ్జెట్‌పై శివసేన అసంతృప్తి
 
 సాక్షి, ముంబై: కేంద్ర రైల్వేశాఖ మంత్రి సురేష్ ప్రభు ప్రకటించిన రైల్వే బడ్జెట్‌పై శివసేనతోపాటు ప్రతిపక్షాలు అసంతృప్తి వ్యక్తం చేశాయి. ముంబైలోని లోకల్ రైళ్లతోపాటు ఇతర ప్రాంతాల ప్రజలకు కూడా పెద్దగా ఒరిగిందేమిలేదని ఆరోపించింది. రాష్ట్రానికి చెందిన వ్యక్తి రైల్వేశాఖ మంత్రిగా ఉండడంతో అనేక విషయాల్లో మహారాష్ట్రకు పెద్దపీట లభిస్తుందని శివసేన భావించింది. అయితే రాష్ట్రానికి అంతగా ప్రాధాన్యం లభించలేద ని శివసేన పార్లమెంట్ సభ్యులు గజానన్ కీర్తికర్, శివాజీరావ్ ఆడల్‌రావ్‌లు పేర్కొన్నారు.  
 
 నాసిక్-పుణే కొత్త మార్గం సర్వే పనులు పూర్తయ్యాయని, అయితే ఇప్పటివరకు దీనికి సంబంధించిన ప్రక్రియ ముందుకుసాగకపోగా మరోవైపు రతన్ ఇండియా థర్మల్ విద్యుత్ ప్రాజెక్టు కోసం 30 కిలోమీటర్ల రైలు మార్గాన్ని వేసేందుకు సానూకూలత తెలిపారని శివాజీరావ్ ఆడల్‌రావ్ ఎద్దేవా చేశారు. వర్దా-నాగపూర్‌ల మధ్య మూడవ లైను, కోంకణ్  రైల్వేలో 50వేల ఉద్యోగాల భర్తీచేస్తామన్న హామీలు మినహా పెద్దగా ఏమి జరగలేదని అన్నారు.
 
 రాష్ట్రంలో 359 ప్రాజెక్టులకోసం ఈ సారి రైల్వే బడ్జెట్‌లో రూ. 18 కోట్ల నిధులు కేటాయించడంతోపాటు కల్యాణ్-నగర్ రైల్వే మార్గం, విదర్భలోని కొత్త మార్గాలు, పుణే-నాసిక్ రైల్వే మార్గాలకు మోక్షం లభిస్తుందని భావించారు. కాని సురేష్ ప్రభూ నాగపూర్-వర్దా మార్గం మినహా ఎలాంటి కీలక ప్రకటనలు చేయలేదని శివసేన నాయకులు విమర్శించారు.
  
 సామాన్యులకు అనుకూలమైన బడ్జెట్ : ఆఠవలే
 
 ప్రయాణ చార్జీలను పెంచకుండా ప్రకటించిన రైల్వే బడ్జెట్ సామాన్యలకు అనుకూలమైనదిగా ఆర్‌పిఐ అధ్యక్షుడు రామ్‌దాస్ ఆఠవలే అభివర్ణించారు. రాష్ట్రానికి పెద్దగా ఏమి ప్రకటించకపోయినప్పటికీ చార్జీలు పెంచకపోవడం అందరికీ అనుకూలమైన అంశమనిఆయన పేర్కొన్నారు.
  
 బీజేపీ గడ్డుకాలం చూపిస్తోంది!: ఎన్సీపీ
 
 - పుణ్యక్షేత్రాలకే ఈ రైల్వేబడ్జెట్ అని విమర్శ
 - మంత్రి సొంత ప్రాంతానికీ మొండిచెయ్యి: నవాబ్ మాలిక్
  సాక్షి, ముంబై: త్వరలో మంచి రోజులొస్తాయని ప్రకటించిన బీజేపీ ప్రభుత్వం పేదలకు గడ్డు కాలాన్ని చూపిస్తోందని ఎన్సీపీ ప్రతినిధి నవాబ్ మలిక్ ఆరోపించారు. కేంద్ర మంత్రి గురువారం రైల్వే బడ్జెట్ ప్రవేశపెట్టిన అనంతరం ఎన్సీపీ భవన్‌లో ఏర్పాటు చేసిన విలేకరుల సమావేశంలో ఆయన మాట్లాడుతూ... ఈ రైల్వే బడ్జెట్  పేదలను నిరాశపరిచే విధంగా ఉందని, తీర్థ యాత్రలకే ప్రాధాన్యం ఇచ్చారని, ఇది పుణ్యక్షేత్రాలకు వెళ్లే వారికే మేలుచేసే విధంగా ఉందని చురకంటించారు.
 
 ‘మహారాష్ట్రలో పలు ప్రాజెక్టులు చేపడుతున్నట్లు మంత్రి వెల్లడించారు. కాని ముంబైలో చేపడుతున్న ప్రాజెక్టులు ముంబై రైల్వే వికాస్ సంస్థ ఆధ్వర్యంలో ప్రపంచ బ్యాంకు రుణాలు, రాష్ట్ర ప్రభుత్వ సాయంతో జరుగుతున్నాయి. ఈ ప్రాజెక్టులకు రైల్వే బడ్జెట్‌తో ఎలాంటి సంబంధం లేదు. మంత్రి ఇలా పేర్కొనడం ప్రజలను మోసం చేయడమే’ అని ఆరోపించారు. రైల్వే మంత్రి కొంకణ్ ప్రాంతానికి చెందినవారు కావడంతో అక్కడి ప్రజలు గంపెడాశతో ఉన్నారని, వారికి కూడా బడ్జెట్ వల్ల ఒరిగిందేమీ లేదని దుయ్యబట్టారు.
 
 ఈ బడ్జెట్‌లో డిజిటలైజేషన్ మినహా కొత్తదనమేమీ లేదని విమర్శించారు. ఈ సారి ప్రయాణికులకు ఎలాంటి చార్జీలు వడ్డించలేదని బీజేపీ వీపు తట్టుకుంటోందని, ఇందులో ఆశ్చర్యపడాల్సిందేమీ లేదని మలిక్ అన్నారు. ‘వాస్తవానికి డీ జిల్ ధరలు తగ్గడంతో రైల్వేకు రూ.15వేల కోట్లు ఆదా అయ్యాయి. అందుకు చార్జీలు తగ్గించాలి. కాని యథాతథంగా ఉంచి, ఇప్పుడు ఎలాంటి చార్జీల భారం ప్రజలపై మోపలేదని సొంత డప్పు కొట్టుకుంటున్నారు’ అని ఆయన ధ్వజమెత్తారు.


 నగరవాసుల ఆశలు అడియాసలే.. ఉస్సూరనిపించిన రైల్వేబడ్జెట్ ఊసులేని టర్మినల్స్  రెండో దశకు రూ.8 కోట్లు  కొత్త రైళ్ల ప్రతిపాదనే లేదు  కొత్తపల్లి, మహబూబ్‌నగర్ మార్గాలకు నిధులు  నగరంలోని ప్రధాన స్టేషన్లు, పలు ఎంఎంటీఎస్‌ల్లో వైఫై సౌకర్యం
  
 నరేంద్ర మోడీ, సురేష్ ప్రభు రైలు భాగ్యనగరంలో ఆగకుండానే వెళ్లిపోయింది. గురువారం కేంద్ర రైల్వేమంత్రి సురేష్ ప్రభు ప్రవేశపెట్టిన బడ్జెట్ నగరవాసుల ఆశలను అడియాశలు చేసింది. సికింద్రాబాద్, నాంపల్లి, కాచిగూడ ప్రధాన రైల్వేస్టేషన్‌లతో పాటు కొన్ని ఎంఎంటీఎస్ స్టేషన్‌లకు  వైఫై సేవలను అందుబాటులోకి  తేవడం, ప్రధాన రైళ్ల రాకపోకలపై ప్రయాణికులకు ఎస్సెమ్మెస్ ద్వారా సమాచారం అందజేయడం మినహా ముఖ్యమైన ప్రాజెక్టులను పూర్తిగా విస్మరించారు. సుమారు రూ.850 కోట్లతో చేపట్టిన ఎంఎంటీఎస్ రెండో దశకు ఈ ఏడాది కేవలం రూ.8 కోట్లు కేటాయిస్తున్నట్లు  ప్రకటించారు. సికింద్రాబాద్ రైల్వేస్టేషన్ నివారించేందుకు గత బడ్జెట్‌లో మౌలాలి, వట్టినాగులపల్లిలో  భారీ టర్మినళ్లు నిర్మించనున్నట్లు ప్రకటించినా అందుకు సంబందించి సప్రస్తుత బడ్జెట్‌లో ఒక్క రూపాయి కూడా కేటాయించకపోవడం గమనార్హం. సికింద్రాబాద్ స్టేషన్‌ను అంతర్జాతీయ ప్రమాణాలకు అనుగుణంగా అభివృద్ధి చేయాలనే  ప్రతిపాదనపై కూడా ఎలాంటి ప్రస్తావ చేయలేదు. సికింద్రాబాద్ నుంచి మహబూబ్‌నగర్, మనోహరాబాద్ నుంచి కొత్తపల్లి వరకు రెండు  కొత్త రైలు మార్గాలకు మాత్రం  అరకొర నిధులు కేటాయించారు. మొత్తంగా  రైల్వే బడ్జెట్ కొద్దిపాటి సదుపాయాలు మినహా  ఎలాంటి హామీలు, నిధులు, ప్రాజెక్టులు, ప్రతిపాదనలు లేకుండానే ఏటేటా వచ్చే ఒక తంతులాగా సాగిపోయింది.
  - సాక్షి,సిటీబ్యూరో
  
 అందుబాటులోకి వైఫై సేవలు...
  
 నగరంలోని సికింద్రాబాద్, నాంపల్లి,కాచిగూడ ప్రధాన రైల్వేస్టేషన్‌లతో పాటు, బేగంపేట్, లింగంపల్లి, హైటెక్‌సిటీ, మల్కాజిగిరి, మౌలాలీ, ఉందానగర్, తదితర ఎంఎంటీఎస్ స్టేషన్‌లలో  ప్రయాణికులకు కొత్తగా వైఫై సేవలు అందుబాటులోకి రానున్నాయి. అలాగే ప్రయాణికులు తాము బుక్ చేసుకొన్న  రైళ్ల రాకపోకలపై ఎస్సెమ్మెస్ ద్వారా మొబైల్ ఫోన్లకు సమాచారం అందించే సదుపాయం కల్పించారు. కౌంటర్ల కొరత కారణంగా  జనరల్ బోగీ  ప్రయాణికులకు సకాలంలో టిక్కెట్లు దొరక్క రైళ్లు అందుకోలేకపోతున్నారు. ఈ సమస్యను పరిష్కరించేందుకు అన్ని ఎంఎంటీఎస్ స్టేషన్‌లతో పాటు, సికింద్రాబాద్, నాంపల్లి,కాచిగూడ రైల్వేస్టేషన్‌లలో  జనరల్ కౌంటర్ల సంఖ్యను పెంచనున్నారు. మరిన్ని ఆటోమెటిక్ టిక్కెట్ వెండింగ్ యంత్రాలను అందుబాటులోకి తేనున్నారు. మహిళా ప్రయాణికుల భద్రత  దృష్ట్యా   అన్ని లేడీ కంపార్టుమెంట్లలో సీసీ కెమెరాలను ఏర్పాటు చేయనున్నారు. ఈ మేరకు నగరంలోని ఎంఎంటీఎస్ రైళ్లు, మాతృభూమి లేడీస్ స్పెషల్ ట్రైన్‌లో  పటిష్టమైన భద్రత ఏర్పాటు చేయడంతో బోగీల్లో సీసీ కెమెరాలు అందుబాటులోకి రానున్నాయి. జనరల్ బోగీల్లో ప్రయాణించేవారికి మొబైల్ రీ చార్జింగ్ సదుపాయం అందుబాటులో తేనున్నారు.
  
 ‘వంతెన’ దాట వేశారు
  
 ఈసారి  బడ్జెట్‌లో రైల్వే వంతెనల నిర్మాణంపై ఎలాంటి స్పష్టత ఇవ్వలేదు. నగరంలో 13 ప్రాంతాల్లో ఆర్‌ఓబీలు, ఆర్‌యూబీలు నిర్మించాలన్న ప్రతిపాదనలు ఉన్నా ఇప్పటి వరకు లక్డికాఫూల్, ఆలుగడ్డ బావి మినహా ఎక్కడా పూర్తి కాలేదు. కొన్ని చోట్ల నిర్మాణ దశలో ఉన్నాయి. అయితే ఈ ఏడాది వాటిని పూర్తి చేసేందుకు ఒక్కపైసా విడుదల చేయలేదు.
 
 సికింద్రాబాద్ రైల్వేస్టేషన్‌ను వరల్డ్‌క్లాస్ స్టేషన్‌గా అభివృద్ధి చేయడానికి బదులు స్టేషన్ పైన ఉన్న ఖాళీ స్థలాన్ని వాణిజ్య అవసరాల కోసం వినియోగించుకోనున్నట్లు పేర్కొన్నారు. హోటళ్లు, షాపింగ్‌కాంప్లెక్‌లు, ప్రయాణికుల వసతి కేంద్రాలను  ఏర్పాటు చేయాలనే ప్రతిపాదన పరిశీలనలో ఉన్నట్లు దక్షిణమధ్య రైల్వే జీఎం పి.కె.శ్రీవాస్తవ  పేర్కొన్నారు.
  
  
 క్రమసంఖ్య       {పతిపాదన                                        పురోగతి
  
 1)   వట్టినాగులపల్లి,మౌలాలీ టర్మినళ్లు                          ఒక్క రూపాయి  కూడా కేటాయించలేదు.
 2 )   కింద్రాబాద్ వరల్డ్‌క్లాస్  స్టేషన్‌గా అభివృద్ధి                 పూర్తిగా విస్మరించారు.
 3)    లాలాపేట్ ఆసుపత్రికి సూపర్‌స్పెషాలిటీ హోదా          నిధుల ఊసు లేదు.
 4)    రైల్వే నర్సింగ్ కళాశాల                                        మరిచిపోయారు.
 5)    ఏపీ ఎక్స్‌ప్రెస్‌కు తెలంగాణ ఎక్స్‌ప్రెస్‌గా మార్పు           మరిచారు.
 6)    ఎంఎంటీఎస్ రెండో దశ                                         రూ.8 కోట్లు
 7)    సికింద్రాబాద్-మహబూబ్‌నగర్ రైలు మార్గం (113కి.మీ.)    రూ.27.44 కోట్లు
 8)    మనోహరాబాద్-కొత్తపల్లి  (150 కి.మీ.)మార్గం          రూ.20 కోట్లు
 9)    సికింద్రాబాద్-అజ్మీర్ దర్గా, హైదరాబాద్-తిరువనంతపురం రైళ్లు    {పస్తావన లేదు.
 10)  సికింద్రాబాద్-షిరిడీ వైపు కొత్త రైళ్లు    లేవు
 11)   హైదరాబాద్-జిల్లా కేంద్రాలకు ఇంటర్‌సిటీ సర్వీసులు   ప్రస్తావన లేదు
  
 పత్తా లేని కొత్త రైళ్లు...
  
 దేశవ్యాప్తంగా అన్ని ప్రధాన నగరాలకు హబ్‌గా ఉన్న హైదరాబాద్‌లో ప్రయాణికుల రద్దీ అనూహ్యంగా పెరుగుతున్నా అందుకు తగినట్లుగా రైళ్ల సంఖ్య పెరగడం  లేదు. న్యూఢిల్లీ, ముంబయి, బెంగళూర్ వంటి నగరాలతో పాటు, తిరుపతి, షిరిడీ, అజ్మీర్,తదితర ప్రాంతాలకు రైళ్లను పెంచాలని  ప్రయాణికులే కాకుండా  న గరానికి చెందిన ప్రజాప్రతినిధులు, ఎంపీలు కూడా అనేక సార్లు  ప్రతిపాదించారు. అయితే ఈ సారి  బడ్జెట్‌లో కూడా  కొత్త రైళ్ల ఏర్పాటుపై ఎలాంటి ప్రస్తావన లేదు. నగరం నుంచి షిరిడీ  వెళ్లే  భక్తులకు  ప్రస్తుతం మన్మాడ్ ఎక్స్‌ప్రెస్  ఒక్కటే  ఉంది. కాకినాడ నుంచి నేరుగా షిరిడీ వరకు  సాయినగర్ ఎక్స్‌ప్రెస్ వారానికి రెండు రోజులే నడుస్తుంది. ఈ రూట్‌లో  హైదరాబాద్ నుంచి మరో రైలు నడపాలనే డిమాండ్ ఉన్నా పట్టించుకోలేదు. అలాగే ప్రస్తుతం అయ్యప్ప భక్తుల కోసం శబరి ఎక్స్‌ప్రెస్ ఒక్కటే ఉంది. నగరం నుంచి తిరువనంతపురంకు మరో ఎక్స్‌ప్రెస్ తప్పనిసరి. అయితే ఆయా మార్గాల్లో ఒక్క రైలును కూడా అదనంగా ప్రకటించకపోవడం ప్రయాణికులను తీవ్ర నిరాశకు గురి చేసింది.
  
 కొత్త లైన్‌లు...
  
 సికింద్రాబాద్ నుంచి మహబూబ్‌నగర్‌కు నిర్మించతలపెట్టిన 110 కిలోమీటర్‌ల కొత్త లైన్‌లకు  ఈ బడ్జెట్‌లో  రూ.27.44 కోట్లు కేటాయించారు. అలాగే మనోహరాబాద్-కొత్తపల్లి రైల్వే మార్గానికి  మరో రూ.20 కోట్లు కేటాయించారు. ఈ రెండు మార్గాలు తప్ప మిగతా ఏ రూట్‌లోనూ కొత్త లైన్‌లపైన ప్రతిపాదనలు లేవు.
  
 నర్సింగ్ కాలేజీ మరిచారు...
  
 లాలాగూడలోని దక్షిణమధ్య రైల్వే కేంద్రీయ ఆసుపత్రిని సూపర్‌స్పెషాలిటీ హోదాకు పెంచడంతో పాటు, నర్సింగ్ కళాశాలను నిర్మించాలనే గత బడ్జెట్ ప్రతిపాదన కూడా  ఈ సారి  ఆచరణకు నోచుకోలేదు. ఈ రెండు  భవనాల కోసం ఎలాంటి కేటాయింపులు జరపకపోవడం గమనార్హం.
  
  


 సిటీజనుల  పెదవి విరుపు
  
 ‘వరల్డ్ క్లాస్’... నో జోష్    కానరాని కొత్త రైళ్లు
 స్టేషన్ల అభివృద్ధి... విస్తరణ ఊసే లేదు    రైల్వే బడ్జెట్‌లో రాజధానికి నిరాశ
  ఎంఎంటీఎస్ ప్రాజెక్ట్ అంచనా రూ.850 కోట్లు  కేంద్రం విదిల్చింది రూ.8 కోట్లు  
  
  ఆశల రైలు రాజధానికి రాలేదు. ప్రయాణికుల ఆకాంక్షలు నెరవేరలేదు. అభివృద్ధి మంత్రం  వినిపించలేదు.  జంట నగరాల నుంచి ఒక్క రైలూ అదనంగా కదల్లేదు. ఇతర ముఖ్య ప్రాంతాల నుంచి ఇక్కడికి కొత్త ైరెళ్లు రాలేదు. ‘వరల్డ్ క్లాస్’ యోచన ఏమైందో తెలియలేదు. ఎంఎంటీఎస్ ప్రాజెక్ట్‌పై భారీ ఆశలు పెట్టుకుంటే... సాధారణ రహదారికి కేటాయించాల్సిన స్థాయిలోనైనా నిధులు విదల్చలేదు.
  ఈ ప్రాజెక్ట్ అంచనా వ్యయం రూ.850 కోట్లు... బడ్జెట్‌లో కేటాయించింది కేవలం రూ.8 కోట్లే. ‘మెట్రో’ వేగంతో నగరం పరుగులు పెట్టాలనుకుంటుంటే... బడ్జెట్ రైలు బహు దూరంలో ఆగిపోయింది.
  
 సిటీబ్యూరో: గ్రేటర్ సిటీజనులను ఊరించి ఉసూరుమనిపించిన రైల్వే బడ్జెట్‌పై నగర వాసుల్లో మిశ్రమ స్పందన కనిపించింది. కేంద్ర రైల్వే మంత్రి సురేష్ ప్రభు సమర్పించిన తాజా రైల్వే బడ్జెట్‌పై గురువారం ‘సాక్షి’ బృందం గ్రేటర్ పరిధిలో సర్వే నిర్వహించింది. నగర నలుమూలల్లో విభిన్న రంగాలకు చెందిన 300 మంది అభిప్రాయాలను సేకరించింది. ఈ సర్వేలో ఆసక్తికర అంశాలు వెల్లడ య్యాయి.రైల్వే స్టేషన్లలో ఉచిత వై-ఫై సేవలు అందుబాటులోకి రావడంపై పలువురు హర్షాతిరేకాలు వ్యక్తం చేశారు. తమ భద్రతకు 182 టోల్  ఫ్రీనెంబరు ఏర్పాటు చేయడంపై మహిళలు సంతోషం వ్యక్తం చేశారు. ఎంఎంటీఎస్ రెండోదశకు మొక్కుబడిగా రూ.8 కోట్లు కేటాయించడం, సికింద్రాబాద్, నాంపల్లి, కాచిగూడ రైల్వే స్టేషన్ల ఆధునికీకరణ ఊసెత్తకపోవడంపై గ్రేటర్ వాసులు పెదవి విరిచారు.     
  
  


 ఎంయూటీపీ-3కి రూ. 11,500 కోట్ల కేటాయింపుపై హర్షం
 ముంబై: కేంద్రం ప్రవేశపెట్టిన రైల్వే బడ్జెట్ ఆచరణాత్మకమైందని మహారాష్ట్ర ముఖ్యమంత్రి దేవేంద్ర ఫడ్నవీస్ అన్నారు. సాంకేతిక ఆధారిత ఆధునికీకరణకు ప్రాధాన్యమిస్తూ రైల్వేలో పునరుజ్జీవనం నింపేందుకు కృషిచేస్తున్న ప్రధాని మోడీ, రైల్వే మంత్రి సురేశ్ ప్రభులకు కృతజ్ఞతలు తెలిపారు. బడ్జెట్ ప్రగతీ శీలమని, ఆచరణయోగ్యమని వర్ణించారు. ఎంయూటీపీ 3 కోసం రూ. 11, 500 కోట్లు కేటాయించడం హర్షించదగ్గ విషయమన్నారు.
 
 బడ్జెట్‌పై శివసేన వ్యాఖ్యలకు సీఎం స్పందిస్తూ... బహుశా వారు బడ్జెట్‌ను సరిగా విని ఉండరు అని అన్నారు. కాగా, ప్రతిపక్ష కాంగ్రెస్-ఎన్సీపీ మాత్రం సామాన్యులకు, ముఖ్యంగా ముంబై, మహారాష్ట్రకు ఏమాత్రం బడ్జెట్  ఉపయోగకరం కాదని విమర్శించాయి. చార్జీలు పెంచబోమన్న ప్రభు వ్యాఖ్యలకు కాంగ్రెస్ నేత మానిక్‌రావు తీవ్ర స్థాయిలో స్పందించారు. మోడీ ప్రభుత్వం అధికారంలోకి వచ్చిన తర్వాత ప్రయాణికుల చార్జీలను 14.2 శాతం, రవాణా చార్జీలను 6.2 శాతం, ముంబై సబర్జన్ చార్జీలు 200 శాతం పెంచిందని విమర్శించారు.
 
 గత కొంతకాలంగా క్రూడ్ ఆయిల్ ధరలు తగ్గిన నేపథ్యంలో బడ్జెట్‌లో చార్జీలు తగ్గిస్తారని ఆశించామని ఆయన అన్నారు. మహారాష్ట్రలోని మారుమూల ప్రాంతాలను కలిపేలా ఏర్పాటు చేయాలన్న రైల్వే లైన్ల నిర్మాణల ప్రస్తావనే తేలేదని విమర్శించారు. కాగా, మహారాష్ట్ర ప్రదేశ్ కాంగ్రెస్ కమిటీ (ఎంపీసీసీ) అధికార ప్రతినిధి సచిన్ సావంత్ మాట్లాడుతూ... ముంబైలో ఇంటిగ్రేటెడ్ ట్రాన్స్‌పోర్టు అథారిటీ, మల్టీనోడల్ ట్రాన్స్‌పోర్టు హబ్ ఏర్పాటు చేస్తానన్న ప్రభు..తన మాట నిలబె ట్టుకోలేదని విమర్శించారు.


 న్యూఢిల్లీ : రైల్వే బడ్జెట్లో గతంలో కంటే తెలంగాణకు ఈసారి అధికంగా నిధులు వచ్చాయని నిజామాబాద్ ఎంపీ కె. కవిత వెల్లడించారు. కేంద్ర రైల్వే శాఖ మంత్రి సురేష్ ప్రభు గురువారం పార్లమెంట్లో ప్రవేశపెట్టిన రైల్వే బడ్జెట్పై కవిత న్యూఢిల్లీలో స్పందించారు.  తెలంగాణ ప్రత్యేక రాష్ట్రం ఏర్పాటం వల్ల కలిగే ప్రయోజనం ఏమిటనేది రైల్వే బడ్జెట్ ద్వారా వెల్లడయిందని ఆమె తెలిపారు. పెద్దపల్లి - నిజామాబాద్ రైల్వే లైన్కు రూ. 140 కోట్లు కేటాయించినందుకు మోదీ ప్రభుత్వానికి ఈ సందర్బంగా కవిత కృతజ్ఞతలు చెప్పారు.


 అనంతపురం (గుంతకల్లు): గుంతకల్లు రైల్వే డివిజన్‌కు ప్రతి ఏటా రైల్వే బడ్జెట్‌లో తీవ్ర అన్యాయం జరుగుతున్నా కేంద్రాన్ని నిలదీయడం చేతకాని సీమ ఎంపీలు తమ పదవులకు రాజీనామా చేయాలని సీపీఎం డివిజన్ కార్యదర్శి డి.శ్రీనివాసులు డిమాండ్ చేశారు. రైల్వే బడ్జెట్‌లో మరోసారి గుంతకల్లు డివిజన్‌కి మొండిచేయి చూపడాన్ని నిరసిస్తూ సీపీఎం నాయకులు గురువారం సాయంత్రం పొట్టిశ్రీరాములు సర్కిల్‌లో కేంద్ర రైల్వే శాఖా మంత్రి సురేష్‌ప్రభూ దిష్టిబొమ్మను దగ్ధం చేశారు. రైల్వే మంత్రి ప్రవేశపెట్టిన బడ్జెట్ మాటల బడ్జెటే తప్ప, దీని వల్ల రాష్ట్రానికి గానీ, గుంతకల్లు డివిజన్‌కు గానీ ఒరిగింది శూన్యమని ఈ సందర్భంగా ఆయన చెప్పారు.నినాదాలు చేశారు.


 హైదరాబాద్: తాజాగా ఎన్డీయే ప్రభుత్వం ప్రవేశపెట్టిన బడ్జెట్కు దిశానిర్దేశం లేదని రైల్వే శాఖ మాజీ మంత్రి కోట్ల సూర్యప్రకాశ్ రెడ్డి విమర్శించారు. యూపీఏ హయాంలో ఇచ్చిన హామీలు, ప్రతిపాదనలే కేంద్రమంత్రి సురేష్ ప్రభు మరోసారి చదివి వినిపించారని ఆయన అన్నారు. గురువారం సాయంత్రం ఆయన హైదరాబాద్లో తన నివాసంలో విలేకరులతో మాట్లాడారు. నిధులు సమకూర్చుకోవటం, కొత్త ప్రాజెక్టులు రూపొందించటం ప్రతి బడ్జెట్లోనూ ఉంటాయని కోట్ల అన్నారు. తాజాగా ప్రవేశపెట్టిన బడ్జెట్లో మామూలు అంశాలు కూడా లోపించాయని విమర్శించారు. ఈ బడ్జెట్ ప్రజలను పూర్తిగా నిరాశ పరచిందని కోట్ల సూర్య ప్రకాశ్ రెడ్డి అన్నారు.


 విశాఖపట్నం (అల్లిపురం): కేంద్ర రైల్వే బడ్జెట్‌లో విశాఖకు తగిన ప్రాధాన్యత కల్పించలేదని విశాఖపట్నం జిల్లా వైఎస్సార్సీపీ అధ్యక్షుడు గుడివాడ అమర్‌నాథ్ ఆరోపించారు. గురువారం కేంద్ర మంత్రి సురేష్ ప్రభు ప్రవేశపెట్టిన బడ్జెట్‌ను నిరసిస్తూ జిల్లా వైఎస్సార్సీపీ నాయకులు జగదాంబసెంటర్‌లో రాస్తారోకో నిర్వహించారు. ఈ కార్యక్రమంలో జిల్లా అధ్యక్షుడితో పాటు పార్టీ నాయకులు కొయ్య ప్రసాద్ రెడ్డి, వైఎస్సార్సీపీ రాష్ట్ర కార్యదర్శి జాన్ వెస్లీ తదితరులు పాల్గొన్నారు. జగదాంబసెంటర్‌లో రాస్తారోకో నిర్వహిస్తున్న నాయకులను పోలీసులు గురువారం సాయంత్రం అరెస్టు చేశారు.


 సామాన్యుడికి అందుబాటులో ఉండే ప్రయాణ సాధనం రైలు మాత్రమే! అందుకే.. రైల్వే బడ్జెట్ వస్తోందంటే, కొత్త రైళ్ల కోసం, ఉన్న రైలు మార్గాల పొడిగింపు కోసం, కొత్త మార్గాల మంజూరు కోసం, రైల్వే స్టేషన్లలో సౌకర్యాల కోసం వారు వేయి కళ్లతో ఎదురు చూస్తూ ఉం టారు. కానీ, వారికి ఏటా నిరాశే మిగులుతోంది. రైల్వే మంత్రుల బండ్లు ఇందూరు స్టేషన్‌లో ఆగకుండానే దాటిపోతున్నారుు. దశాబ్దాల కోరికలన్నీ కలలుగానే మిగిలిపోతున్నాయి. ఈసారి సురేష్ ‘ప్రభు’ ఏం చేస్తారో?
  
 రైల్వే బడ్జెట్‌లో వాటాపై ఉత్కంఠ
 ⇒ గతంలోనూ ఒరిగిందేమీ లేదు
 ⇒ సురేష్ ‘ప్రభు’ ఈసారి కరుణిస్తారా
 ⇒ బోధన్-బీదర్ రైల్వే మార్గానికి ‘లైన్’ క్లియర్ అవుతుందా
 ⇒ పెద్దపల్లి-నిజామాబాద్ రూట్‌కు రైల్వే మంత్రి భరోసా ఇస్తారా
 ⇒ మన ఎంపీల  ప్రతిపాదనలకు మోక్షం కలుగుతుందా!?
  సాక్షి ప్రతినిధి, నిజామాబాద్: మొన్న త్రివేది, బన్సల్... నిన్న మల్లికార్జున ఖర్గే... తాజాగా సురేష్ ప్రభు... కేంద్ర రైల్వే మంత్రులు ఎవరైనా వారి బడ్జెట్‌లో జిల్లాకు ప్రయోజనం అంతంతే. 2014- 15 లో కొంత మోదం, మరికొంత ఖేదం మిగిల్చిన రైల్వే బడ్జెట్ ఈసారైనా ఆశాజనకంగా ఉంటుందా? అన్న సందేహాలు వ్యక్తమవుతున్నాయి. 67 ఏళ్లుగా నానుతున్న పెద్దపల్లి-నిజామాబాద్ రైల్వేలైన్ ఇంకా 16 కిలోమీటర్లయి పూర్తవుతుంది. దీనికి నిధుల కేటాయింపుపైనే ప్రధానంగా అందరి దృష్టి కేంద్రీకృతమైంది.
 
 2013-14 బడ్జెట్‌లో సికింద్రాబాద్ నుంచి నిజామాబాద్ మీదుగా బాసర, ముథ్కేడ్, ఆదిలాబాద్ వరకు డబుల్ లైన్ మంజూరు చేసినా అరకొర నిధులే కేటాయించారు. 2014-15 బడ్జెట్‌లో వాటి ఊసే ఎత్తలేదు. నిజామాబాద్-ముంబాయి వరకు వేసిన ఎక్స్‌ప్రె స్ రైళ్లు అంత ఆశాజనకంగా లేకపోగా, ఆర్మూరు-ఆదిలాబాద్ వరకు కొత్త రైల్వేలైన్ ప్రతిపాదనలు ఏమవుతాయో తెలియడం లేదు. రైల్వే మంత్రి సురేష్ ప్రభు గురువారం పార్లమెంటులో ప్రవేశపెట్టనున్న బడ్జెట్‌లోనైనా జిల్లాకు ప్రయోజనం దక్కుతుం దా? అన్న సంశయాలు సర్వత్రా వ్యక్తమవుతున్నాయి.
 
 గత బడ్జెట్‌లో జిల్లాకు కొత్త రైళ్లు, నిధులు కేటాయింపులపై రాజకీయ పక్షాలు, ప్రజల నుంచి భిన్నస్వరాలు వినిపించగా, ఆ బడ్జెట్‌లో పేర్కొన్న పలు అంశాలు అమలుకు నోచుకోలేదు. రైల్వేస్టేషన్ల ఆధునికీకరణ, ఫ్లైఓవర్, పుట్ ఓవర్ బ్రిడ్జిల నిర్మాణం, రైల్వే అభివృద్ధిపై బడ్జెట్‌లో ప్రత్యేకంగా నిధులు కేటాయించలేదు. ఎప్పుడో పూర్తి కావాల్సిన మోర్తాడ్-ఇందూరు రైల్వేలైన్ ఇంకా నత్త నడకనే సాగుతోంది. దీనిని పూర్తి చేస్తామని ఇచ్చిన హామీ కూడా అమలు నోచుకోలేదు. ఆర్మూర్- ఆదిలాబాద్ వరకు కొత్త రైల్వేలైన్ పనులు చేపట్టలేదు.
 
 జిల్లా వ్యవసాయక, పారిశ్రామిక, వ్యాపార అభివృద్ధికి ప్రధానమైన ఈ రెండు కొత్త రైల్వేలైన్ల పనులకు ఈసారైనా తు ది రూపు వస్తుందా? అన్న అనుమానాలు వ్యక్తమవుతున్నాయి. ఆరేడు దశాబ్దాలుగా కలల ప్రాజెక్టుగా ఉన్న పెద్దపల్లి-నిజామాబాద్ రైల్వేలైన్ పనుల పూర్తికి సరిగా నిధులు రావడం లేదు. సుమారు 178 కిలోమీటర్ల పొడవున్న ఈ రైలుమార్గం 162 కిలోమీటర్లు పూర్తరుుంది. పెర్కిట్ నుంచి నిజామాబాద్ వరకు ఇంకా 16 కిలోమీటర్ల కు నిధులు ఇవ్వాల్సి ఉంది. గత బడ్జెట్‌లో రూ.76 కోట్లు కేటాయిం చినా 34.98 కోట్లు మాత్రమే విడుదల చేశారు.
  
 ఎంపీల ప్రతిపాదనలు ఫలించేనా!
 రైల్వే బడ్జెట్ సందర్భంగా నిజామాబాద్, జహీరాబాద్ ఎంపీలు కల్వకుంట్ల కవిత, బీబీ పాటిల్ చేసిన ప్రతిపాదనలకు ఈసారైనా పూర్తిస్థాయిలో మోక్షం లభిస్తుంమోనని ఇందూరు ప్రజలు ఆశతో ఎదురు చూస్తున్నారు. గత బడ్జెట్‌లో ఆర్మూర్ ఆదిలాబాద్ వరకు కొత్త రైల్వేలైన్ వేయటానికి గ్రీన్ సిగ్నల్ లభించినప్పటికిఆ బడ్జెట్‌లో తగినన్ని నిధులు కేటాయించలేదు. ఫలితంగా అది ప్రతిపాదనలకే పరిమితమైంది. బోధన్-బీదర్ లైన్, ఆర్మూర్-నిర్మల్ - ఆదిలాబాద్ లైన్లను మరచి పూర్తిగా నిరాశకు గురి చేశారు. సరుకు రవాణా భారం తగ్గించకపోగా మరింత పెంచి, ఆదర్శ స్టేషన్ల అభివృద్ధికి పైసా కూడ విదిల్చలేదు.
 
 కొత్త ప్యాసింజర్ రైళ్ల ప్రతిపాదనలకు మోక్షం కలగలేదు. ఈ నేపథ్యంలో పాత, కొత్త సమస్యలు, ప్రతిపాదనలను కేంద్రం దష్టికి తీసుకెళ్లినట్లు ఎంపీ కవిత ప్రకటించారు. ఈసారి బడ్జెట్‌లో జిల్లాకు అన్యాయం జరగ కుండా ఉండేందుకు ముఖ్యమైన పనులకు సంబంధించిన ప్రతిపాదనలను రెండు నెలల కిందటే సమర్పించామని ఆమె ఇటీవల ‘మీ ట్ దిప్రెస్’లోనూ వెల్లడించారు. ఈ నేపథ్యంలో తాజా బడ్జెట్‌లో జిల్లా సమస్యలు ఏ మేరకు పరిష్కారం అవుతాయి? ఎంపీల ప్రతిపాదనలకు మోక్షం కలుగుతుందా? అన్న చర్చ జరుగుతోంది.


 - రైల్వే బడ్జెట్‌లో ప్రకటనపై ఆశలు అడియాశలేనా?
 - ఏపీలో కొత్త రైల్వే జోన్ ప్రకటన ఉండదని సంకేతాలిచ్చిన రైల్వే శాఖ
 - బాబు, కేంద్ర మంత్రులపై మండిపడుతోన్న
 - రైల్వే జోన్ సాధన సమితి నేతలు
  
 సాక్షి, హైదరాబాద్: కొత్త రైల్వే జోన్‌పై ఆశలు అడియాశలేనా? గురువారం రైల్వే బడ్జెట్ సందర్భంగా ఏపీకి కొత్త రైల్వే జోన్ ప్రకటన ఉండదా? విశాఖ రైల్వే జోన్‌ను ప్రకటిస్తారని ఊదరగొట్టిన ఏపీకి చెందిన కేంద్ర మంత్రులు, ఎంపీలు కేంద్ర ప్రభుత్వంపై ఆ మేరకు ఒత్తిడి తీసుకురాలేకపోయారా? విశాఖ కేంద్రంగా కొత్త రైల్వే జోన్ ఏర్పాటు చేస్తామని అసెంబ్లీ సాక్షిగా ప్రకటించిన సీఎం చంద్రబాబునాయుడు కేంద్రాన్ని ఒప్పించడంలో విఫలమయ్యారా? రైల్వే మంత్రిత్వ శాఖ, ఆ శాఖ మంత్రి సురేశ్ ప్రభు ఇస్తున్న సంకేతాల్ని చూస్తే ఈ అనుమానాలు వ్యక్తమవుతున్నాయి. రాష్ట్ర ప్రభుత్వం కూడా కొత్త రైల్వే జోన్ ఏర్పాటు కోరుతూ కేంద్రానికి ఎలాంటి ప్రతిపాదనలు పంపకపోవడంతో ఈ అనుమానాలు బలపడుతున్నాయి. ఇటీవల త నను కలిసిన ఉత్తరాంధ్ర ఎంపీలకు.. మంత్రి సురేశ్ ప్రభు ఏపీలో కొత్త రైల్వే జోన్ ప్రకటన ఉండదన్నట్టుగానే చెప్పారు. సమాచార హక్కు చట్టం కింద ఓ కార్యకర్త అడిగిన సమాచారానికి రైల్వే శాఖ ఇచ్చిన వివరణను చూసినా కొత్త జోన్ ఉండబోదనే అభిప్రాయమే కలుగుతోంది.
  
  రాష్ట్ర విభజన అనంతరం ఏపీలో కొత్త రైల్వే జోన్ ఏర్పాటుపై విశాఖపట్నం, విజయవాడ డివిజన్‌లు పోటీ పడ్డాయి. ఉత్తర, దక్షిణ భారతావనిలను కలిపే విజయవాడ డివిజన్‌ను కొత్త రైల్వే జోన్‌గా ప్రకటించాలని ఒకవైపు, విశాఖపట్నం కేంద్రంగా ఉన్న వాల్తేరు డివిజన్ (ఈస్ట్ కోస్ట్ రైల్వే)ను జోన్‌గా ప్రకటించాలని మరోవైపు గట్టిగా డిమాండ్లు వచ్చాయి. రాజధాని ప్రాంత ప్రకటన సందర్భంగా.. విజయవాడ చుట్టుపక్కల రాజధాని ఉంటుందని చంద్రబాబు చెప్పారు. అదే సమయంలో విశాఖపట్నం కేంద్రంగా కొత్త రైల్వే జోన్ ఏర్పాటు చేస్తామని, ఈ మేరకు కేంద్రంపై ఒత్తిడి తెచ్చి అయినా సరే జోన్‌ను సాధిస్తామని హామీ ఇచ్చారు.
  
 మరోవైపు ఏపీలో కొత్త రైల్వే జోన్ ఏర్పాటుపై కేంద్రం ఓ కమిటీని ఏర్పాటు చేసింది. అధ్యయనానంతరం ఆర్నెల్లలో ఈ కమిటీ నివేదిక ఇచ్చిన తర్వాత కొత్త జోన్‌పై ప్రకటన చేస్తామని కేంద్రం అప్పట్లో చెప్పింది. అయితే భువనేశ్వర్ కేంద్రంగా ఉన్న ఈస్ట్ కోస్ట్ రైల్వేలోని ఖుర్ధా రోడ్, సంబల్‌పూర్, వాల్తేరు డివిజన్‌లలో మన రాష్ట్రంలోని వాల్తేరు డివిజన్ నుంచే ఈస్ట్ కోస్ట్ రైల్వేకు గణనీయమైన ఆదాయం సమకూరుతోంది. దీంతో ఈ డివిజన్‌ను వదులుకునేందుకు ఒడిశా ప్రభుత్వం ఏమాత్రం సిద్ధంగా లేదు. 2,122 కిలోమీటర్ల ట్రాక్ సామర్ధ్యం ఉన్న ఈ డివిజన్‌కు ఏడాదికి రూ.7 వేల కోట్లకు పైగా ఆదాయం సమకూరుతోంది. ఈ దృష్ట్యానే ఒడిశా ముఖ్యమంత్రి, ఎంపీలు ప్రధాని మోదీని కలిసి వాల్తేరు డివిజన్‌ను ఈస్ట్ కోస్ట్ రైల్వే నుంచి తప్పించవద్దంటూ తీవ్రంగా ఒత్తిడి తీసుకువచ్చారు.
 మరోవైపు కొత్త జోన్ ఏర్పాటుపై నియమించిన కమిటీ కూడా ఇందుకు వ్యతిరేకంగా నివేదిక ఇచ్చింది. ఈ నేపథ్యంలోనే విశాఖ రైల్వే జోన్ అటకెక్కిందని ఉన్నతస్థాయి రైల్వే వర్గాలు అభిప్రాయపడుతున్నాయి. ఒడిశా మాదిరిగా కేంద్రంపై ఒత్తిడి తెచ్చి జోన్ సాధించుకునే విషయంలో చంద్రబాబు ప్రభుత్వం, కేంద్ర మంత్రులు విఫలమయ్యారనే విమర్శలూ వ్యక్తమవుతున్నాయి. వాస్తవానికి 2003లో చంద్రబాబు సీఎంగా ఉన్నప్పుడే వాల్తేరు డివిజన్ ఈస్ట్ కోస్ట్ రైల్వేలో విలీనం అయ్యింది. అప్పుడూ బాబుపై విమర్శలు ఎదురయ్యాయి. రాష్ట్ర ప్రభుత్వం కేంద్రానికి పంపిన ప్రతిపాదనల్లోనూ కొత్త జోన్ లేకపోవడం గమనార్హం.
  
 కొత్త రైళ్ల ప్రకటనకే పరిమితం!
 రైల్వే బడ్జెట్‌లో విశాఖపట్నం మీదుగా మూడు కొత్త రైళ్ల ప్రకటన మాత్రమే ఉంటుందని విశ్వసనీయవర్గాల సమాచారం. అదీ వీక్లీ, బై వీక్లీ రైళ్ళు మాత్రమేనని తెలుస్తోంది. వీక్లీ రైళ్ళుగా విశాఖపట్నం-తిరుపతి, విశాఖపట్నం-న్యూఢిల్లీ (వయా రాయపూర్) సూపర్ ఫాస్ట్, బై వీక్లీగా (వారానికి రెండు సార్లు) భువనేశ్వర్-బెంగళూరు రైళ్లను ప్రకటిస్తారని సమాచారం.  
  


 రైల్వే మంత్రి సురేశ్ ‘ప్రభు’ కరుణపై జిల్లా గంపెడాశలు పెట్టుకుంది. నేడు పార్లమెంటులో ప్రవేశపెట్టే రైల్వే బడ్జెట్‌లో ‘మోడీ కా గాడీ’ జిల్లాలో ఆగుతుందా? వికారాబాద్, శంషాబాద్, మేడ్చల్ వరకు ఎంఎంటీఎస్ విస్తరణకు అదనంగా నిధులు కేటాయిస్తారో.. లేదో.. మరికొన్ని గంటల్లో తేలనుంది.
  
 ⇒ సర్వే పూర్తయినా ‘పట్టా’లెక్కని కృష్ణా- వికారాబాద్ రైల్వే ప్రాజెక్టు
 ⇒50శాతం వ్యయం భరించేందుకు రాష్ట్ర సర్కారు అంగీకారం
 ⇒సానుకూలంగా స్పందించని రైల్వే మంత్రిత్వశాఖ
 ⇒ఆదర్శ స్టేషన్లకు నిధులు విదిల్చేనా.. కొత్త రైళ్లు కూత పెట్టేనా?
 ⇒నేటి రైల్వే బడ్జెట్‌పై జిల్లా ప్రజల ఆశలు
  సాక్షి, రంగారెడ్డి జిల్లా ప్రతినిధి: మూడేళ్లక్రితం సర్వే పూర్తి చేసుకున్న కృష్ణా- వికారాబాద్ బ్రాడ్‌గేజ్ రైల్వే లైనుపై జిల్లా ప్రజానీకం ఆశగా ఎదురుచూస్తోంది. 121.70 కిలోమీటర్ల పొడవునా ప్రతిపాదించిన ఈ రైలు మార్గానికి రూ.787.80 కోట్లు అవసరమని తేల్చిన రైల్వే శాఖ.. సరుకు రవాణాకు ఈ లైన్ అంతగా ఉపయోగపడదని, ప్రయాణికుల నిష్పత్తి కూడా అంతంతమాత్రంగానే ఉంటుందని సర్వేలో తేలినందున ప్రాజెక్టు సాధ్యపడదని స్పష్టం చేసింది. ఈ పరిణామాల నేపథ్యంలో ప్రాజెక్టు వ్యయంలో రాష్ట్ర ప్రభుత్వం సగం భరించేందుకు ముందుకొచ్చినా.. ఇప్పటికీ కేంద్రం వైపు నుంచి స్పందనలేకపోవడం గమనార్హం.
  
 ప్రయాణికుల నిష్పత్తి 6.9 శాతమే..
 సగటున 14శాతం రేట్ ఆఫ్ రిటర్న్(ఆర్‌ఓఆర్) ఉన్నవాటికే ప్రాధాన్యమిస్తామని, ఈ మార్గంలో కేవలం 6.9 శాతం మాత్రమే వచ్చే వీలుందని రైల్వే ఇంజినీరింగ్ శాఖ తేల్చిం ది. ప్రాంత సామాజిక అవసరాల దృష్ట్యా నిర్మాణ వ్యయం లో సగం వాటాను రాష్ట్ర సర్కారు భరిస్తే పరిశీలిస్తామని స్పష్టం చేసింది. ఈ నేపథ్యంలోనే గతప్రభుత్వం భూసేకరణ సహా ప్రాజెక్టు వ్యయంలో 50 శాతం భరించేందుకు అంగీకరించింది.
 
 ఈ మేరకు భూసేకరణకు రూ.36.83 కోట్లను విడుదల చేయనున్నట్లు ప్రక టించింది. అయినప్పటికీ రైల్వేశాఖ నుంచి సానుకూల స్పందన రాకపోవడం గమనార్హం. ఏడెనిమిదేళ్లలో ఈ ప్రాజెక్టుకు కార్యరూపం ఇస్తామని 2012లో రైల్వేశాఖ స్పష్టం చేయడంతో ఈ ప్రాంత ప్రజలు రైలుబండిపై గంపెడాశలు పెట్టుకున్నారు. ఈ నేపథ్యంలో రైల్వేశాఖ మంత్రి సురేశ్‌ప్రభు పార్లమెంటులో ప్రవేశపెట్టే బడ్జెట్‌లో కృష్ణా- వికారాబాద్ రైల్వేలైనుకు పచ్చజెండా ఊపుతారో లేదో వేచి చూడాల్సిందే!
  
 జిల్లాకు రావాల్సిన మరికొన్ని ప్రాజెక్టులు
 ⇒ శంషాబాద్ అంతర్జాతీయ విమానాశ్రయం వరకు ఎంఎంటీఎస్ రైలును పొడిగిస్తామనే ప్రతిపాదనలకు మోక్షం కలగలేదు. 2006లో మొదలైన ఎంఎంటీఎస్ రెండోదశ విస్తరణ పనులు నత్తనడకన సాగుతున్నాయి. ఫలక్‌నుమా -ఉందానగర్ -శంషాబాద్ (20కి.మీ) వరకు కొత్త లైన్ వేయడమేకాకుండా.. ప్రస్తుత మార్గాన్ని డబ్లింగ్, విద్యుద్దీకరణ చేయాలని నిర్ణయించినప్పటికీ ఎలాంటి పురోగతి లేదు.
 ⇒శంషాబాద్ విమానాశ్రయం ఎయిర్‌కార్గో హబ్‌గా ఇంటర్నేషనల్ ఎయిర్‌పోర్టును అభివృద్ధి చేస్తున్నారు. ఈ క్రమంలో సరుకు రవాణాకు అనువుగా రైల్వేలైన్లను విస్తరించాలని భావించినా.. ఇప్పటికీ అతీగతీలేకుండా పోయింది. ఎయిర్‌పోర్టు నుంచి నేరుగా విజయవాడకు ప్రత్యేక రైల్వేలైన్ నిర్మించాలని గతంలో జీఎంఆర్ సంస్థ ప్రతిపాదించిన ఫైలు అటకెక్కింది.
 ⇒సికింద్రాబాద్- బొల్లారం- మేడ్చల్ (28 కి.మీ), మౌలాలి -ఘట్‌కేసర్ (12.2 కి.మీ.) వరకు పొడిగించాలని ప్రతిపాదించిన ఎంఎంటీఎస్‌కు ఇంకా అవరోధాలు తొలగలేదు.
 ⇒వికారాబాద్‌లో ఫుట్ ఓవర్ బ్రిడ్జి(ఎఫ్‌ఓబీ) నిర్మించాలనే ప్రతిపాదన కార్యరూపం దాల్చలేదు. రాజ్‌కోట్, గరీబ్థ్రతదితర ఎక్స్‌ప్రెస్ రైళ్లను ఇక్కడ ఆపాలనే డిమాండ్ ఉంది. ఘట్‌కేసర్‌లో కూడా ఎక్స్‌ప్రెస్ ట్రైన్లకు హాల్టింగ్ ఇవ్వాలని స్థానికులు డిమాండ్ చేస్తున్నారు.
 ⇒ఆదర్శ స్టేషన్ల నిర్మాణంలోనూ రైల్వేశాఖ అంతులేని జాప్యం కనిపిస్తోంది. అరకొర నిధుల కేటాయింపులతో నిర్మాణ పనులను ఏళ్ల తరబడి సాగదీస్తోంది. 2011-12లో ప్రకటించిన పనులు కూడా ఇప్పటివరకు పూర్తికాలేదు. వికారాబాద్, శంకర్‌పల్లి, మల్కాజిగిరి, శేరిలింగంపల్లి ఆదర్శ స్టేషన్లు అధికారుల నిర్లక్ష్యానికి ఆదర్శంగా నిలుస్తున్నాయి. ఇప్పటికీ కొన్నింటికి పునాదిరాయి కూడా పడలేదు.


 రైల్వే బడ్జెట్ మరి కాసేపట్లో పట్టాలెక్కనుంది. తమ ఆశలు నెరవేరుస్తుందా ? లేక ఆనవాయితీగా కొద్దిపాటి కూతలకే పరిమితమవుతుందా ..?  అని  జిల్లా వాసులు ఎదురుచూస్తున్నారు. జిల్లా కేంద్రంలో ఉన్న రైల్వేస్టేషన్‌కూడా అభివృద్ధికి నోచుకోని పరిస్థితి.... కనీసం ఫుట్ ఓవర్ బ్రిడ్జి నిర్మాణం కూడా ముందుకు సాగని దుస్థితి...  సాధారణ బోగీలతో విశాఖ నుంచి హౌరా ఎక్స్‌ప్రెస్‌ను నడపాలన్న 16 ఏళ్ల డిమాండ్‌కు మోక్షమే లేదు.  సుమారు రూ.కోటీ 55లక్షలతో విజయనగరంలో నిర్మించిన రైల్వే మామిడి యార్డ్‌కు ప్రత్యేక లైన్ ఏర్పాటు డిమాండ్ అలాగే ఉండిపోయింది. ప్రతిసారీ నేతలు హామీలిస్తున్నారే తప్పా అవి నెరవేరడం లేదు. ఈ సారైనా బీజేీపీ సర్కార్ జిల్లాపై దృష్టి సారించాలని, చిరకాలంగా ఉన్న డిమాండ్లు నెరవేర్చాలని జిల్లా ప్రజలు కోరుకుంటున్నారు.
  
 విజయనగరం టౌన్ : జిల్లా ప్రయాణికుల ఆశలు ఏటా ఆవిరవుతున్నాయి. ప్రతీ రైల్వే బడ్జెట్‌లో జిల్లాకు మొండిచేయి ఎదురవుతోంది. ఏటా గంపెడు ఆశలు పెట్టుకోవడమే తప్ప సాకారం కావడం లేదు. రైల్వే మంత్రులు ఎంతమంది మారినా జిల్లాకొచ్చే ప్రయోజనం కనిపించడం లేదు.   గత  యూపీఏ ప్రభుత్వం కూడా జిల్లా వాసులకు నిరాశే మిగిల్చింది. కంటితుడుపు చర్యగా కొన్నింటిని  కేటాయించి చేతులుదులిపేసుకుంది. ఇక  కేటాయింపులైనా అమలయ్యాయంటే అదీ లేదు. ప్రకటించిన ఏ ఒక్కటీ ఇంతవరకు కార్యరూపం దాల్చలేదు.   
 
 విజయనగరం నుంచి రాజాం మీదగా పలాసకు ప్రత్యేక రైల్వే లైను, బొబ్బిలి రైల్వే స్టేషన్ ఆధునీకరణ, విజయనగరం రైల్వే స్టేషన్‌లో అవుట్ పేషెంట్ విభాగం, డయోగ్నస్టిక్  సెంటర్ల ఏర్పాటు చేయనున్నట్టు పేర్కొన్నారు.   అయితే వీటిలో ఏ ఒక్కటీ ఇంతవరకు అమలుకు నోచుకోలేదు.  ఇక ఏళ్ల నాటి సమస్యలు అనేకం ఉన్నాయి.  సాధారణ బోగీలతో విశాఖ నుంచి హౌరా ఎక్స్‌ప్రెస్‌ను నడపాలన్న 16 ఏళ్ల డిమాండ్‌కు మోక్షమే లేదు.  
 
 సుమారు రూ.కోటీ 55లక్షలతో విజయనగరంలో నిర్మించిన రైల్వే మామిడి యార్డ్‌కు ప్రత్యేక లైన్ ఏర్పాటు డిమాండ్ అలాగే ఉండిపోయింది. దీనికి ప్రత్యేక లైన్ లేకపోవడం వల్ల  యార్డ్ నిరుపయోగంగా మిగిలిపోయింది.  ఏటా రూ.10 కోట్లకు పైగా ఆదాయాన్ని తీసుకొస్తున్న గూడ్స్ షెడ్ అభివృద్ధిపైనా దృష్టిసారించడం లేదు. విజయనగరం రైల్వేస్టేషన్‌లో ఐదో నంబర్ ఫ్లాట్‌ఫామ్ నుంచి తొమ్మిదో నంబర్ ఫ్లాట్‌ఫామ్ వరకూ ఫుట్ ఓవర్ బ్రిడ్జి ప్రతిపాదన పెండింగ్‌లోనే ఉంది.
  
 ‘లోకో మోటివ్ షెడ్(రైలు బయలుదేరు ప్రదేశం)’పరిస్థితి కూడా ఒక డిమాండ్‌గానే మిగిలిపోయింది.   ఈ విధంగా ఏళ్ల నాటికి సమస్యలకు మోక్షం కలగకపోగా గత బడ్జెట్‌లో చేసిన కేటాయింపులు (కేటాయింపులూ)అమలుకు నోచుకోని దుస్థితి నెలకొంది.అదేవిధంగా ప్రత్యేక రైల్వేజోన్ కేటాయిస్తామంటూ ఊరించిన యూపీఏ ప్రభుత్వం జిల్లావాసుల ఆశలు నీరుగార్చేసింది.   ఈ నేపథ్యంలో బీజేపీ ప్రభుత్వం కొత్తగా ప్రవేశపెడుతున్న  రైల్వే బడ్జెట్‌పై  జిల్లా ప్రజలు మరోసారి ఆశలు పెట్టుకున్నారు.   కేంద్రమంత్రి సురేష్ ప్రభు మంత్రిగా తొలిసారిగా ప్రవేశపెట్టబోయే  రైల్వే బడ్జెట్‌లో జిల్లాకు ఏ మే రకు ప్రాధాన్యం కల్పిస్తారో వేచిచూడాలి.  గత కేటాయింపులకు కొనసాగింపుగా నిధులిస్తారా? ఏళ్ల నాటి డిమాండ్లకు పరిష్కారం చూపుతారా? కొత్తగా వేటినైనా ప్రకటిస్తారా? అనేది చూడాల్సి ఉంది. 


 * రైల్వే బడ్జెట్‌పై తెలంగాణ ప్రజల ఆశలు
 * ఉమ్మడి రాష్ట్రంలో నిర్లక్ష్యమేనని ఆవేదన
 * ప్రత్యేక రాష్ర్టంలో పెండింగ్‌లకు మోక్షం లభించేనా..?
  
 రైల్వే మంత్రి సురేష్‌ప్రభు గురువారం ప్రవేశపెట్టనున్న రైల్వే బడ్జెట్‌పై తెలంగాణ ప్రజలు ఎన్నో ఆశలు పెట్టుకున్నారు. ఉమ్మడి రాష్ట్రంలో నిర్లక్ష్యానికి గురైన తెలంగాణకు ప్రత్యేక రాష్ట్రంలోనైనా ప్రత్యేక ఉంటుందా అని ఎదురుచూస్తున్నారు. గత బడ్జెట్‌లలో నిధులు కేటాయించి... పనులు ప్రారంభానికి నోచుకోక.. ప్రారంభమైనా పూర్తి కాకుండా ఉన్నవాటికి ఈసారైనా మోక్షం లభిస్తుందనే ఆశతో ఉన్నారు. రైల్వేలైన్లు, కొత్త రైళ్లు, స్టేషన్లలో ఆధునిక సౌకర్యాల కల్పనలో రాష్ట్రానికి ప్రాధాన్యం దక్కాలని అంటున్నారు. ఆంధ్రప్రదేశ్ పునర్విభజన చట్టం ప్రకారం తెలంగాణలో రైల్వేకోచ్ కర్మాగారం  దక్కాల్సి ఉంది. ఈ నేపథ్యంలో వివిధ జిల్లాల్లోని పరిస్థితులు.  
  - సాక్షి, నెట్‌వర్క్  
  ఆదిలాబాద్
 *  మంచిర్యాల -జద్గల్‌పూర్ (మధ్యప్రదేశ్) వరకు కొత్త రైల్వేలైన్ నిర్మాణం చేపట్టాలనే డిమాండ్ ఉంది. సికింద్రాబాద్ టు బాసర డబుల్ లైన్ నిర్మాణం చేపట్టాలి.
 *  గత బడ్జెట్ సమావేశాల్లో మంచిర్యాల-ఆదిలాబాద్ నూతన రైలు మార్గాన్ని ప్రకటించినా నేటికీ సర్వే కూడా ప్రారంభం కాలేదు.
 *  2010-11 బడ్జెట్‌లో మంజూరైన ఆదిలాబాద్ నుంచి వయా నిర్మల్, ఆర్మూర్, కామారెడ్డి, హైదరాబాద్ రైల్వేలైను సర్వే పూర్తయినా పనులు ప్రారంభం కాలేదు.
 *  ఆదిలాబాద్‌లో రూ.17 కోట్లతో రైల్వే బ్రిడ్జి నిర్మాణం అంచనాల దశలోనే ఆగిపోయింది.
   వరంగల్
 *  కాజీపేటకు డివిజన్ హోదా కల్పించాలనే డిమాండ్ కార్యరూపం దాల్చడం లేదు.
 * 2012-13 బడ్జెట్‌లో ప్రకటించిన కాజీపేట- విజయవాడ మధ్య మూడోలైన్ నిర్మాణ పనులు ప్రారంభానికి నోచుకోలేదు.
 *  కాజీపేట మీదుగా సికింద్రాబాద్- నాగ్‌పూర్, సికింద్రాబాద్-విజయవాడల మధ్య హైస్పీడ్ రైల్ నెట్‌వర్క్ ఏర్పాటు చేస్తామంటూ 2014-15 రైల్వేబడ్జెట్‌లో ప్రకటించారు. ఇంతవరకు పనులు ప్రారంభం కాలేదు. అదే బడ్జెట్‌లో ప్రకటించిన కాజీపేట నుంచి ముంబై వీక్లీ ఎక్స్‌ప్రెస్ కూడా ప్రారంభం కాలేదు.
 * జిల్లా మీదుగా వెళ్లే డోర్నకల్- మిర్యాలగూడ, మణుగూరు-రామగుండం కొత్త రైల్వేలైన్ల నిర్మాణానికి సర్వేలు చేపట్టినా నిధులు కేటాయించలేదు.
 *  రైల్వేబడ్జెట్ 2012-13లో డోర్నకల్ - భద్రాచలం రోడ్డు-మణుగూరు డబ్లింగ్ పనులు నత్తనడకన సాగుతున్నాయి.
   నిజామాబాద్
 *  మోర్తాడ్ నుంచి నిజామాబాద్ వరకు రైలు మార్గం ఏర్పాటు, వివిధ నిర్మాణాలు, స్టేషన్లు తదితర సౌకర్యాల కల్పనకు రూ. 220 కోట్లు ఖర్చు చేయాల్సి ఉన్నా గత బడ్జెట్‌లో రూ 35 కోట్లు మాత్రమే కేటాయించారు.
 * నిజామాబాద్‌తో పాటు డిచ్‌పల్లి, కామారెడ్డి  రైల్వేస్టేషన్‌ను మాడల్ రైల్వేస్టేషన్‌గా ఎంపిక చేసిన నేటి వరకు ఎలాంటి పనులకు నోచుకోవడం లేదు.
   ఖమ్మం
 *  భద్రాచలం రోడ్డు-కొవ్వూరు రైల్వేలైన్ నిర్మాణం పూర్తవడం ద్వారానే డోర్నకల్ జంక్షన్‌కు పునర్‌వైభవం సాధ్యం. ఈ లైను నిర్మాణ వ్యయం భరించేందుకు సింగరేణి సంస్థ ముందుకు వచ్చినా పనులు మొదలుకాలేదు.
 *  కొత్తగూడెం నుంచి సత్తుపల్లి వరకు 60 కిలోమీటర్ల మేరకు నిర్మించనున్న లైన్‌కు సింగరేణి సంస్థ తనవాటా నిధులు విడుదలకు ముందుకు వచ్చినా పనులు రైల్వే శాఖ నుంచి స్పందన లేదు.
   నల్లగొండ
 *  సికింద్రాబాద్ - భువనగిరి మార్గంలో పెరిగిన రద్దీకి అనుగుణంగా మూడోలైన్ నిర్మాణం చేపట్టాలని 15 సంవత్సరాల క్రితం  చేసిన ప్రతిపాదన కాగితాలకే పరిమితమైంది.
 *  బీబీనగర్ - నడికుడి మార్గంలో డబ్లింగ్, విద్యుద్దీకరణ  పనులు, మంజూరుకు నోచుకోవడంలేదు.
 * ఎంఎంటీఎస్ రైళ్లను భువనగిరి వరకు పొడిగించాలన్న డిమాండ్ ఎండమావిగానే మిగిలింది.
 * నల్లగొండ- మాచర్ల రైల్వే లైన్ నిర్మాణం కోసం  గత దశాబ్దం క్రితం రూపొందించిన ప్రతిపాదన కాగితాలకే పరిమితమైంది.
 * గద్వాల-దేవరకొండ-నాగార్జునసాగర్-మాచర్ల రైల్వే లైన్ ఏర్పాటుకు అతీగతీ లేదు.
   మహబూబ్‌నగర్
 * ఫలక్‌నుమా నుంచి మహబూబ్‌నగర్ వరకు డబ్లింగ్ లైన్ పనులను సర్వే వరకే పరిమితం.
 *  ఒక్క ఆర్‌ఓబీ మాత్రమే పూర్తయింది.
   కరీంనగర్
 * కొత్తపల్లి-మనోహరాబాద్ (వయా కరీంనగర్) రైల్వే ప్రాజెక్టు పనులకు నిధులు కేటాయించాలి. సత్వరమే భూసేకరణ  పనులు చేపట్టాల్సి ఉంది.
 * ఎరువులు ఇతర వస్తువులను నిల్వ చేసేందుకు కరీంనగర్ రైల్వే స్టేషన్ వద్ద వెయ్యి మెట్రిక్ టన్నుల నిల్వ సామర్థ్యంతో షెడ్ నిర్మాణం చేపట్టాలి.
 * పెద్దపల్లి-నిజామాబాద్ రైల్వేలైన్ పనుల్లో భాగంగా మిగిలిపోయిన 28 కి.మీల పనులను పూర్తి చేయాలి.  ఇందుకోసం అవసరమైన రూ.200 కోట్ల మొత్తాన్ని 2015-16 రైల్వే బడ్జెట్‌లోనే మంజూరు చేయాలి.
   రంగారెడ్డి
 * కృష్ణా-వికారాబాద్ మధ్య 121.70 కిలోమీటర్ల బ్రాడ్ రైల్వేలైను కలగానే మిగిలింది. సామాజిక పరిస్థితుల నేపథ్యంలో ఈ ప్రాజెక్టుకు అయ్యే వ్యయంలో సగం రాష్ట్ర ప్రభుత్వం భరిస్తుందని ఉమ్మడి రాష్ట్రంలో అప్పటి ముఖ్యమంత్రి ప్రతిపాదించినా.. రైల్వే శాఖ నుంచి స్పందన లేదు.
 * ప్రతిపాదిత  రైల్వే లైను మక్తల్, లింగంపల్లి, ఉట్కూరు, నారాయణ్‌పేట్, శాసన్‌పల్లి, అబాహంగపూర్, మద్దూర్, నందిపాడ్, కొస్గి, దాదాపూర్, దోమ, పరిగి, నస్కల్, వికారాబాద్ కాగితాలకే పరిమితమైంది.
  
  కాజీపేట వ్యాగన్‌కు లైన్ క్లియర్!
 2011-12 బడ్జెట్‌లో కాజీపేటలో వ్యాగన్ వర్క్‌షాప్ ఏర్పాటుచేయనున్నట్టు ప్రకటించారు. అయితే, ప్రాజెక్టు ఏర్పాటుకు ఎంపిక చేసిన స్థలం దేవాదాయశాఖకు చెందిన కావడంతో భూసేకరణలో జాప్యం జరిగింది. ఎట్టకేలకు 2015 ఫిబ్రవరి 15న దేవాదాయశాఖకు చెందిన 54.15 ఎకరాల భూమిని రైల్వేశాఖకు అప్పగించారు. దీంతో వ్యాగన్ వర్క్‌షాప్ ఏర్పాటుకు లైన్ క్లియర్ అయింది. దీనికోసం రైల్వేశాఖ నుంచి నిధులు విడుదల కావాల్సి ఉంది.
  
  నిధుల్లేక నత్తనడక
  మహబూబ్‌నగర్ జిల్లా దేవరకద్ర-మునీరాబాద్ పనులు పదేళ్లుగా ముందు కు సాగడం లేదు. దేవరకద్ర నుంచి జక్లేర్ వరకు దాదాపు 65 కిలోమీటర్ల వరకు ఏర్పాటుచేశారు. భూసేకరణ ముందుకు సాగకపోవడం, నిధుల కొరతతో పనులు నత్తనడకన సాగుతున్నాయి. రూ.245 కోట్ల అంచనాలతో ప్రారంభమైన ఈ ప్రాజెక్టు పూర్తికావడం లేదు.   
  
  భూసేకరణా లేదు..
  నల్లగొండ జిల్లా మేళ్లచెరువు నుంచి మఠంపల్లి మీదుగా నేరేడుచర్ల మండ లం జాన్‌పహాడ్ వరకు 100 కోట్లతో నిర్మించేందుకు రైల్వేలైన్ నిర్మాణ పను లు రెండేళ్ల క్రితం ప్రారంభించారు. కృష్ణా నది ఒడ్డున ఉన్న పేరెన్నిక గల సిమెంట్ ఫ్యాక్టరీలను కలుపుతూ నిర్మించనున్న ఈ లైన్‌కు ఇప్పటికీ నిధుల మం జూరు లేదు. భూసేకరణ కూడా జరపాల్సి ఉంది.
 
  మెదక్
  2012-13 బడ్జెట్‌లో 129.32 కోట్లు అం చనా వ్యయంతో అక్కన్నపేట-మెదక్‌కు 17.2 కిలోమీటర్ల మంజూరైంది. రాష్ట్ర ప్రభుత్వం సగం ధర భరించడానికి సిద్ధం. భూ సేకరణకు, రైల్వే లైను నిర్మాణానికి నిధులు విడుదలైనా... పనులు ముందుకు సాగలేదు.


 నేడు రైల్వే బడ్జెట్ ప్రవేశ పెట్టనున్న మంత్రి సురేష్ ప్రభు
 నత్తనడకన శ్రీకాళహస్తి-నడిగుడి, కడప-బెంగళూరు రైల్వే మార్గాలు
 తిరుపతి కేంద్రంగా రైల్వే జోన్ ఏర్పాటు చేయాలన్న డిమాండ్‌కు ఊపు
  
 రైల్వే బడ్జెట్‌పై జిల్లా ప్రజానీకం పెట్టుకున్న కొండంత ఆశలు మంత్రి సురేష్‌ప్రభు సాకారం చేస్తారా.. గత రైల్వే మంత్రుల తరహాలోనే నీళ్లు చల్లుతారా.. రాష్ట్ర విభజన నేపథ్యంలో తిరుపతి కేంద్రంగా జోన్ ఏర్పాటు చేయాలన్న డిమాండ్ ఊపందుకుంటున్న నేపథ్యంలో  సర్కార్ ఎలాంటి నిర్ణయం తీసుకుంటుందన్న ఉత్కంఠ నెలకొంది. విభజన నేపథ్యంలో రాష్ట్ర  రైల్వే శాఖ సంయుక్త భాగస్వామ్యంతో చేపట్టిన శ్రీకాళహ స్తి-నడికుడి, కడప-బెంగళూరు రైల్వే ప్రాజెక్టులకు రైల్వే శాఖ నిబంధనలను సమకూర్చాలన్న రాష్ట్ర ప్రభుత్వ డిమాండ్‌ను కేంద్రం ఏమేరకు అంగీకరిస్తున్నదనేది నేడు తేలిపోనుంది.
  
 తిరుపతి గాంధీరోడ్డు: నరేంద్రమోదీ నేతృత్వంలోని ఎన్‌డీఏ ప్రభుత్వంలో రైల్వే శాఖ మంత్రి సురేష్‌ప్రభు గురువారం లోక్‌సభలో పూర్తిస్థాయి రైల్వే బడ్జెట్‌ను ప్రవేశపెట్టనున్నారు. జిల్లా సమగ్రాభివృద్ధి చెందాలంటే రవాణా వ్యవస్థ పటిష్టంగా ఉండాలి. కానీ జిల్లాలో రవాణా వ్యవస్థ అస్తవ్యస్తంగా మారింది. ఇందులో ప్రధానమైన రైలు మార్గాల పరిస్థితి అంతంత మాత్రమే. ఇది జిల్లా పారిశ్రామికాభివృద్ధికి శరాఘాతకంగా మారింది. అపార ఖనిజ సంపదకు..  వ్యవసాయ ఉత్పత్తులకు.. పర్యాటక రంగానికి పెట్టింది పేరైన జిల్లా అభివృద్ధిలో మాత్రం అథమస్థానంలో ఉండడానికి ప్రధాన కారణం రైలు మార్గాలు సక్రమంగా లేకపోవడమేనని నిపుణులు స్పష్టీకరిస్తున్నారు. ఈ నేపథ్యంలోనే జిల్లా పశ్చిమ మండలాల్లో పారిశ్రామిభివృద్ధికి బాటలు వేసేలా కడప, మదనపల్లి, బంగారుపేట, బెంగళూరు రైల్వే మార్గాన్ని దివంగత సీఎం రాజశేఖరరెడ్డి ప్రతిపాదించారు. తూర్పు మండల సమగ్రాభివృద్ధికి దోహదం చేసేలా శ్రీకాళహస్తి, నడికుడి మార్గాన్ని మంజూరు చేయాలని కేంద్రంపై ఒత్తిడి తెచ్చారు.
 
 వాటా నిధుల కేటాయింపునకు సాకుగా..
 
 నిధుల లభ్యత లేదనే సాకుచూపి ఆరెండు రైల్వే మార్గాలను మంజూరు చేసేందుకు అప్పట్లో రైల్వే శాఖ అంగీకరించలేదు. దీంతో ఆ మార్గాలకు అయ్యే వ్యయంలో 50 శాతాన్ని రాష్ట్ర ప్రభుత్వం భరిస్తుందని అప్పట్లో వైఎస్ ప్రతిపాదించారు. ఈ ప్రతిపాదనకు అప్పటి కేంద్ర ప్రభుత్వం అంగీకరించింది. 2008-09 రైల్వే బడ్జెట్‌లో ఆరెండు మార్గాలను మం జూరు చేసింది. 2008-09, 2009-10 బడ్జెట్‌లో దివంగత సీఎం రాజశేఖరరెడ్డి ఆరెండు రైల్వే మార్గాలకు రాష్ట్రప్రభుత్వం చెల్లించిన వాటా నిధులు ఇచ్చారు. ఫలితంగా కడప -బెంగళూరు, శ్రీకాళహస్తి-నడికుడి రైల్వే మార్గాల పనులను కేంద్రం ప్రారంభించింది. ప్రస్తుతం కడప- బెంగళూరు రైల్వే మార్గం పనులు 129 కోట్ల రూపాయల వ్యయంతో కడప నుంచి పెండ్లిమర్రి వరకు 21.59 కిలోమీటర్ల మేర సాగుతోంది. శ్రీకాళహస్తి -నడికుడి రైల్వే మార్గం సర్వే పనులు 2010 నాటికి పూర్తయ్యాయి. పనులు మాత్రం ఇప్పటికీ ఓ కొలిక్కి రాలేదు. ఐదేళ్లల్లో పూర్తి కావాల్సిన ఈ బడ్జెట్‌లో ఎన్నటికీ పూర్తవుతుందో రైల్వే శాఖ ఒక అంచనాకు రాలేక పోతోంది.
 
 దీనికి ప్రధాన కారణం వైఎస్ హఠాత్తు మరణం తర్వాత శ్రీకాళహస్తి-నడికుడి, కడప-బెంగళూరు రైల్వే మార్గాలకు రాష్ట్రం ప్రభుత్వం తనవాటా నిధులను విడుదల చేయకపోవడమే ఇదే సాకుగా చూపి రైల్వే శాఖ కూడా ఆ మార్గాలకు నిధులు కేటాయించడం లేదు. ఈ నేపథ్యంలో సంయుక్త భాగస్వామ్యంతో చేపట్టిన రైల్వే ప్రాజెక్టులకు రైల్వే శాఖే నిధులు కేటాయించాలని సీఎం చంద్రబాబు కోరడం గమనార్హం.
 
 డివిజన్ పోయి జోన్ వచ్చే ..
 
 గుంతకల్లు డివిజన్, గుంటూరు డివిజన్లలో కొన్ని భాగాలు వేరు చేసి తిరుపతి కేంద్రంగా బాలాజీ డివిజన్ ఏర్పాటు చేయాలన్న డిమాండ్ రెండు దశాబ్దాలుగా వినిపిస్తూనే ఉంది. రాష్ట్ర విభజన నేపథ్యంలో ఆంధ్రప్రదేశ్‌లో కొత్త రైల్వే జోన్ ఏర్పాటు చేస్తామని ఎన్నికల ప్రచారంలో నరేంద్రమోదీ హామీ ఇచ్చారు. ఆయన ప్రధానిగా బాధ్యతలు స్వీకరించిన నేపథ్యంలో తిరుపతి కేంద్రంగా రైల్వే జోన్‌ను ఏర్పాటు చేయాలన్న డిమాండ్ ఊపందుకుంటోంది. ఈ మేరకు కేంద్ర ప్రభుత్వానికి, రైల్వే శాఖకు రాజకీయ పారిశ్రామిక వర్గాల ప్రతిపాదనలు కూడా పంపాయి. గురువారం రైల్వే బడ్జెట్‌ను ప్రవేశ పెట్టనున్న నేపథ్యంలో రైల్వే జోన్ ఏర్పాటుపై స్పష్టత  వస్తుందో రాదో చూడాల్సి వుంది.     
 రైళ్ల సంఖ్య పెరగాలి
 
 తిరుపతి నుంచి షిరిడీ, విశాఖ, సికింద్రాబాద్‌లకు దురంతో ఎక్స్‌ప్రెస్‌లు ముంబయి- హౌరా, అహ్మదాబాద్, ఢిల్లీలకు గరీబ్థ్ ్రరై లు ప్రతిపాదనలు చాలా కాలంగా పెండిం గ్‌లో ఉన్నాయి. వీటిని మంజూరు చేయాలి. తిరుపతి నుంచి బెంగళూరు, చెన్నై, మదురై, త్రివేండ్రం, ఢిల్లీ, విశాఖ, కోల్‌కతా తదితర ప్రధాన నగరాలకు, పారిశ్రామిక కేంద్రాలకు, పుణ్యక్షేత్రాలకు రైళ్ల సంఖ్య పెంచాలి.
  
 పెండింగ్ ప్రాజెక్టులకు  నిధులు కేటాయించాలి
  
 తిరుపతి రైల్వే స్టేషన్‌లో యుద్ధప్రాతిపదికన అదనపు ప్లాట్‌ఫారాల నిర్మాణాలకు నిధులు మంజూరు చేయాలి. తిరుపతి-కాట్పాడి మధ్య రెండు లేన్ల మార్గాన్ని తిరుపతి నుంచి ధర్మవరం మీదుగా సికింద్రాబాద్, ముంబ యి రైలు మార్గాలకు ఎక్స్‌ప్రెస్ రైళ్లను పెంచాలి.
  
 ఉద్యోగుల కోర్కెలు
 
 తిరుపతిలో రైల్వే ఆసుపత్రి, ఉద్యోగుల పిల్లల కోసం వైద్య కళాశాల స్థాపించాలి. రైల్వే స్టేషన్‌లో ప్రథమ చికిత్స కేంద్రం ఏర్పాటు చేయాలి.
  పెరిగిన రైళ్లను దృష్టిలో ఉంచుకుని రాష్ట్రవ్యాప్తంగా 8 లక్షల ఉద్యోగాలను నియమించాలి.రైల్వే భద్రతా విభాగంలో 2లక్షల ఖాళీలను వెంటనే భర్తీ చేయాలి. హెచ్‌ఆర్‌ఏ 20 శాతం చెల్లించాలి, ఉద్యోగులకు క్వార్టర్స్ నిర్మించాలి.
  
  


 ఏలూరు/తాడేపల్లిగూడెం : కేంద్ర రైల్వే బడ్జెట్ స్వరూపం ఎలా ఉంటుందన్న అంశంపై ఉత్కంఠ నెలకొంది. రైల్వే శాఖ మంత్రి సురేష్ ప్రభు గురువారం పార్లమెంట్‌లో బడ్జెట్ ప్రవేశపెట్టనున్నారు.  విశాఖను ప్రత్యేక రైల్వేజోన్‌గా ప్రకటిస్తారా, మన జిల్లాలోని పెండింగ్ ప్రాజెక్టులకు ఈసారైనా నిధులు ఇస్తారా.. ఎప్పటిలా ఉసూరుమనిపిస్తారా అనేది కొద్దిగంటల్లోనే తేలిపోనుంది. ఎంపీలు మాత్రం జిల్లాలోని రైల్వే సమస్యలను, అవసరాలను కేంద్ర ప్రభుత్వం దృష్టికి తీసుకెళ్లామని, ఈసారి సానుకూల స్పందన ఉంటుం దని చెబుతున్నారు.
  
 వీటికి మోక్షం కలిగేనా..
 ఏటా రైల్వే బడ్జెట్‌లో జిల్లా ప్రజలకు మొండిచెయ్యే దక్కుతోంది. రాకపోకలు, సరుకుల రవాణా ద్వారా రైల్వేకు రూ.70 కోట్లకు పైగా ఆదాయం జిల్లా నుంచి సమకూరుతోంది. అయినా ఏ స్టేషన్‌లో చూసినా అక్కడి సౌకర్యాలు ప్రయాణికులను అసహనానికి గురి చేస్తున్నాయి.
  
 కొవ్వూరు-భద్రాచలం మధ్య రైల్వే లైన్ ఏర్పాటు చేయాలనే ప్రతిపాదన దశాబ్దాలుగా నలుగుతోంది. ఈ ప్రాజెక్ట్ అంచనా వ్యయం రూ.745 కోట్లకు చేరింది. ఈ ైరె ల్వే లైను పూర్తయితే కొత్తగూడెం, సింగరేణి, మణుగూరు బొగ్గు గనుల నుంచి  విశాఖపట్నం స్టీల్ ప్లాంట్. సింహాద్రి థర్మల్ పవర్‌స్టేషన్‌కు బొగ్గు తరలించడానికి ఉపయోగపడుతుంది. నరసాపురం-కోటిపల్లి రైల్వే లైన్ ప్రతిపాదన దశలోనే ఉంది. భీమవరం-నిడదవోలు-గుడివాడ బ్రాంచి లైన్ డబ్లింగ్ పనులు నత్తనడకన సాగుతున్నాయి.
  
 హాల్ట్‌ల సంగతేంటో..
 ఏలూరు ైరె ల్వేస్టేషన్‌లో కోరమాండల్, గౌహతి, కరియ-యశ్వంతపూర్ ఎక్స్‌ప్రెస్‌లకు హాల్ట్ లేదు. ఒకటో నంబర్ ప్లాట్‌ఫామ్ మీదుగా ఎక్స్‌ప్రెస్ రైళ్లను నడపాలన్న డిమాండ్ నెరవేరడం లేదు.
  తాడేపల్లిగూడెంస్టేషన్‌లో 1, 2 ప్లాట్‌ఫారాలకు లిఫ్టు సౌకర్యం కల్పించాలని ప్రజలు ఎన్నో ఏళ్లుగా కోరుతున్నా ప్రయోజనం లేకపోతోంది.  ఇక్కడి ఫుట్ బ్రిడ్జిని మూడో నంబర్ ప్లాట్‌ఫామ్ వరకు విస్తరిం చే ప్రతిపాదన పెండింగ్‌లోనే ఉంది. కాకినాడ నుంచి భావనగర్ మధ్య ప్రతి గురువారం నడిచే రైలు, విశాఖపట్నం-నిజాముద్దీన్ ఎక్స్‌ప్రెస్ (స్వర్ణజయంతి), దిబ్రూఘర్-కన్యాకుమారి వివేక్ ఎక్స్‌ప్రెస్, విశాఖ పట్నం-కొల్లాం తదితర రైళ్లకు హాల్ట్ ఇవ్వడం లేదు. నరసాపురం నుంచి రోజుకు 23 రైళ్లు రాకపోకలు సాగిస్తున్నా ఒక్కటే ప్లాట్‌ఫాం ఉంది. ఒక్కటే ఫిట్‌లైన్ ఉండటంతో స్టేషన్‌కు వచ్చి వెళ్లే ఎక్స్‌ప్రెస్ రైళ్ల నిర్వహణ కోసం మచిలీపట్నం పంపించాల్సి వస్తోంది.
  
 ఎక్స్‌ప్రెస్‌లు నిలిపేలా చర్యలు
 విశాఖపట్నం వైపు వెళ్లే ఎక్స్‌ప్రెస్ రైళ్లను ఏలూరు పెద్ద రైల్వే స్టేషన్‌లోని ఒకటో నంబర్ ప్లాట్‌ఫామ్‌పై నిలపాలని ప్రజలు ఎన్నో ఏళ్లుగా కోరుతున్నారు. ఈ డిమాండ్ నెరవేర్చేందుకు చర్యలు తీసుకుంటాం. ఇక్కడ ఎస్కలేటర్ ఏర్పాటుకు కృషి చేస్తాం.
  - మాగంటి బాబు, ఏలూరు ఎంపీ
  
 సమగ్ర ప్రతిపాదనలు ఇచ్చాం
 జిల్లాలోని రైల్వే సమస్యలకు సంబంధించి సమగ్ర  ప్రతిపాదనలు ఇచ్చాం. ఈ సారైనా వాటికి మోక్షం కలుగుతుందని ఆశిస్తున్నాం. వైజాగ్‌ను ప్రత్యేక రైల్వే జోన్‌గా ప్రకటించాలని, విజయవాడ, రాజ మండ్రి వైజాగ్ నుంచి ఢిల్లీకి ప్రత్యేక రైలు నడపాలని కోరాం. పుష్కరాల నేపథ్యంలో రాజమండ్రి, కొవ్వూరు, పాలకొల్లు, నరసాపురం, భీమవరం రైల్వే స్టేసన్లలో సౌకర్యాలు మెరుగుపర్చడంతోపాటు  వివిధ పుణ్యక్షేత్రాలను కలుపుతూ ప్రత్యేక రైళ్లను నడపాలని కోరాం. కొవ్వూరు- భద్రాచలం రైల్వే లైన్ నిర్మాణం వంటి అంశాలనూ కేంద్రం దృష్టికి తీసుకెళ్లాం.
  - తోట సీతారామలక్ష్మి, రాజ్యసభ సభ్యులు
  
 దీర్ఘకాలిక సమస్యలపై దృష్టి
 జిల్లాలో దీర్ఘకాలికంగా పరిష్కారం కాకుండా ఉండిపోయిన ప్రాజెక్ట్‌లు, సమస్యలపై ప్రతిపాదనలు ఇచ్చాం. బ్రాంచిలైన్ డబ్లింగ్ పనులు, విద్యుదీకరణతో పాటు భీమవరం, పాలకొల్లు రైల్వేగేట్ల వద్ద ఓవర్ బ్రడ్జిల నిర్మాణానికి నిధులు కేటాయించాలని అడిగాం. బడ్జెట్‌లో వాటికి స్థానం కల్పిస్తారని ఆశిస్తున్నాం.
  - గోకరాజు గంగరాజు, నరసాపురం ఎంపీ


 రైల్వే బడ్జెట్ ప్రవేశపెట్టిన ప్రతిసారీ ఆశగా ఎదురుచూడటం, ఆనక నిరాశకు గురికావడం జిల్లావాసులకు పరిపాటైపోయింది. దాదాపు మూడు దశాబ్దాలుగా ఇదే జరుగుతోంది. ఎన్డీఏ ప్రభుత్వం  గురువారం రైల్వే బడ్జెట్ ప్రవేశపెడుతోంది. కేంద్రంలో బీజేపీ, రాష్ట్రంలో దాని మిత్రపక్షం తెలుగుదేశం అధికారంలో ఉన్నాయి. ఈ తరుణంలో ప్రవేశపెడుతున్న రైల్వే బడ్జెట్ జిల్లావాసుల ఆశలనుచిగురింపజేస్తోంది.
  
  నేడు రైల్వే బడ్జెట్
 
 సాక్షి ప్రతినిధి, కాకినాడ : జిల్లాకు సంబంధించి ప్రధానంగా రెండు కీలక ప్రాజెక్టులు దశాబ్దాల కాలంగా పెండింగ్‌లో ఉన్నాయి. కాకినాడను మెయిన్ లైన్‌తో అనుసంధానం చేసేందుకు కాకినాడ నుంచి పిఠాపురానికి 21 కిలోమీటర్ల బ్రాడ్‌గేజ్ లైన్ నిర్మించాలని నాలుగు దశాబ్దాల క్రితమే ప్రతిపాదించారు. సుమారు రూ.120 కోట్ల ఈ ప్రాజెక్టు పాలకుల్లో చిత్తశుద్ధి లేక ఎప్పటికప్పుడు అటకెక్కుతూ వస్తోంది.
 
 2012 రైల్వే బడ్జెట్‌లో రూ.12 కోట్లు,  2013లో రూ.5 కోట్లు, 2014లో రూ.కోటి కేటాయించారు. ఇటీవల పెండింగ్ రైల్వే ప్రాజెక్టులపై రైల్వే ఉన్నతాధికారులతో ప్రభుత్వ ప్రధాన కార్యదర్శి ఐవైఆర్ కృష్ణారావు హైదరాబాద్‌లో జరిపిన సమీక్ష అనంతరం జిల్లావాసుల్లో ఆశలు చిగురించాయి. సమీక్షలో జిల్లాలోని పెండింగ్ ప్రాజెక్టుల పట్ల రైల్వేశాఖ ఉన్నతాధికారులు సానుకూలంగా స్పందించారన్న కబురు కార్యరూపంలో కనిపిస్తుందో, లేదో బడ్జెట్‌లో కేటాయింపులను బట్టి తేలిపోనుంది.
  
 కృష్ణాజీ కృషి ఫలిస్తుందా?
 రైల్వే ప్రాజెక్టులు సాధిస్తామంటూ ఎన్నికల్లో లబ్ధి పొందడం, ఆనక మరిచిపోవడం జిల్లాలో ఎంపీలకు పరిపాటిగా మారింది. ‘ఇదివరకు ఎంపీలుగా ఉన్న వారు చేసింది లేదు. ఇప్పుడు టీడీపీ నుంచి ప్రాతినిధ్యం వహిస్తున్న ఎంపీ తోట నరసింహం కాకినాడ మెయిన్ లైన్ కోసం చిత్తశుద్ధితో కృషి జరిపి ఉంటే బడ్జెట్‌లో తగిన నిధులు వస్తాయి’ అని జిల్లావాసులు ఎదురుచూస్తున్నారు. ఈ లైన్ కోసం మూడుదశాబ్దాలు ఆందోళనలు చేసి, ఆశయం నెరవేరకుండానే కన్నుమూసిన ప్రయాణికుల సంఘం వ్యవస్థాపక అధ్యక్షుడు ఎస్.కృష్ణాజీ కృషి ఈ బడ్జెట్‌లోనైనా ఫలిస్తుందో, లేదో తేలిపోనుంది.
  
 దశాబ్దిన్నర నాటి పునాదిరాయికి కదలిక వచ్చేనా?
 ఇక కోనసీమవాసులు తమకు ఈ సారైనా రైలు కూత వినిపిస్తారా అని ఎదురుచూస్తున్నారు. లోక్‌సభ దివంగత స్పీకర్ జి.ఎం.సి.బాలయోగి కృషితో 2000 నవంబరు 16న కోటిపల్లి-నర్సాపురం రైల్వే లైన్ నిర్మాణానికి అమలాపురంలో పునాదిరాయి పడింది. అప్పటి రైల్వేమంత్రి మమతాబెనర్జీ, అప్పటి సీఎం చంద్రబాబు కూడా నాటి భూమిపూజ కార్యక్రమంలో పాల్గొని ప్రాజెక్టు పూర్తి చేస్తామని ప్రకటించారు. బాలయోగి ఆకస్మిక మరణం తరువాత కోటిపల్లి-నర్సాపురం రైల్వే లైను వైపు కన్నెత్తి చూసే నాథుడే లేకుండా పోయాడు.
 
 కోటిపల్లి నుంచి కోనసీమ మీదుగా నర్సాపురానికి రైల్వే లైను నిర్మించాలంటే మూడు గోదావరి నదీ పాయలపై బ్రిడ్జిలను నిర్మించాలి. ఈ ప్రాజెక్టు వ్యయం రూ.329 కోట్లు. మూడు వంతెనల నిర్మాణానికి కేటాయించింది రూ.170 కోట్లు. 55 కిలోమీటర్ల రైల్వే లైను నిర్మాణంలో వంతెనలే కీలకం. వశిష్ట గోదావరిపై సఖినేటిపల్లి- నర్సాపురం మధ్య 1.02 కిలోమీటర మేర రోడ్ కం రైలు వంతెన, వైనతేయ నదిపై బోడసకుర్రు-పాశర్లపూడి మధ్య 1.11 కిలోమీటర్ల మేర రైల్వే వంతెన, గౌతమీ నదీపాయపై కోటిపల్లి- ముక్తేశ్వరం మధ్య 1.42 కిలోమీటర్ల మేర రోడ్ కం రైలు వంతెన ప్రతిపాదించారు. మొత్తం ప్రాజెక్టు వ్యయం 2013 నాటికి రూ.వెయ్యి కోట్లు దాటిపోయింది.
 
 ఈ వెయ్యి కోట్ల పైబడి అంచనా బడ్జెట్‌లో 25 శాతం చెల్లించేందుకు రాష్ట్ర ప్రభుత్వం ముందుకు వచ్చినా జిల్లా నుంచి ప్రాతినిధ్యం వహించిన ఎంపీల్లో  చిత్తశుద్ధి లేక ముందడుగు పడలేదు. రైల్వేలైను లక్ష్యంతో కోనసీమ రైల్వే సాధనసమితి ఏర్పాటైంది. అప్పటి నుంచి ఈ సమితి లైను నిర్మాణం, నిధుల కోసం శక్తి మేరకు ఆందోళనలు చేస్తోంది. అమలాపురం మాజీ ఎంపీ హర్షకుమార్ పదవీ కాలమంతటా దీనిని సాధిస్తానని ఆర్భాటంగా చెప్పుకుంటూ వచ్చారు. పదవీ కాలం ముగిసినా ప్రాజెక్టుకు ఆశించిన బడ్జెట్ సాధించలేకపోయారు. ప్రస్తుత ఎంపీ పండుల రవీంద్రబాబు కూడా ఎన్నికల్లో ఈ ప్రాజెక్టు పేరు చెప్పి ఓట్లు పొందారు. ఆయనైనా ఈ రైల్వేబడ్జెట్‌లో ఎంతోకొంత ముందడుగు వేయించాలని ప్రజలు ఆశపడుతున్నారు.
  
 నిధులివ్వకుంటే ఉద్యమం ఉధృతం..
 కోటిపల్లి-నర్సాపురం రైల్వేలైను కోసం గత 10 ఏళ్లుగా శాంతియుతంగా ఉద్యమిస్తున్నాం. అయినా ఇప్పటి వరకు కొంచెమైనా కద లిక లేదు. టీడీపీ తరఫున ఎన్నికైన ప్రజాప్రతినిధులు ఎన్నికల్లో హామీలు గుప్పించారు. రేపటి రైల్వే బడ్జెట్‌లో ఈ లైనుకు తగిన నిధులు కేటాయిస్తేనే ఆ హామీలకు విలువ ఉంటుంది. ఎప్పటిలాగే నిధుల విషయంలో మొండిచేయి చూపిస్తే ప్రజల భాగస్వామ్యంతో ఉద్యమాన్ని ఉధృతం చేస్తాం.
  - డాక్టర్ ఇ.ఆర్.సుబ్రహ్మణ్యం, కోనసీమ రైల్వేలైను సాధన సమితి కన్వీనర్
  
 కనీసం రూ.100 కోట్లు కేటాయించాలి..
 కోటిపల్లి-నర్సాపురం రైల్వేలైనుకు భారీగా నిధులు పట్టుకొస్తానని అమలాపురం ఎంపీ రవీంద్రబాబు హామీలు గుప్పించారు. ఈ బడ్జెట్‌లో కనీసం రూ.100 కోట్లు కేటాయిస్తే పనులు ప్రాథమికంగా ప్రారంభమయ్యే అవకాశం ఉంటుంది. ఏమైనప్పటికీ నిధుల కేటాయింపులో ఈసారి కూడా అన్యాయం జరిగితే గతంలో మాదిరిగా కాకుండా ఈసారి మా పోరాటం తీవ్రంగా ఉంటుంది.
  - కల్వకొలను తాతాజీ, చాంబర్ ఆఫ్ కామర్స్ అధ్యక్షుడు, అమలాపురం
  
  కాకినాడ నుంచి కొత్త రైళ్లు వేయాలి..
  కాకినాడ- ఢిల్లీ, కాకినాడ-కోల్‌కతా, కాకినాడ-బికనీర్, కాకినాడ-వారణాసిలకు కొత్తరైళ్లు వేయాలని గతం నుంచీ కోరుతున్నాం. కోటిపల్లి నుంచి రాయఘడ్‌కు ఒక పాసింజర్ రైలును, కాకినాడ నుంచి పలాసకు ఇంటర్‌సిటీ రైలును ప్రవేశపెడితే బాగుంటుంది. రాష్ట్ర విభజన నేపథ్యంలో ఆంధ్రప్రదేశ్‌లో ప్రత్యేక రైల్వే జోన్ ఏర్పాటుపై కూడా ఆశలు ఉన్నాయి.
  - వై.డి.రామారావు,జెడ్‌ఆర్‌యూసీసీ సభ్యుడు


 నెల్లూరు (రవాణా): జిల్లాలో రైల్వే ప్రగతి ప్రతిపాదనలకే పరిమితమైంది. ఎన్నో ఏళ్లుగా ఊరిస్తున్న శ్రీకాళహస్తి-నడికుడి రైలుమార్గం కలగానే మిగిలింది. కృష్ణపట్నం-ఓబులాపురంల మధ్య రైలు పట్టాలు మధ్యలోనే ఆగిపోయాయి. బిట్రగుంటలో రైలు ఇంజన్లు మరమ్మతుల కర్మాగారం స్థాపన శిలాఫలకానికే పరిమితమైంది.
  
   ఆంధ్రప్రదేశ్‌లో విజయవాడ తర్వాత రైల్వేకు అత్యధిక ఆదాయం తెచ్చిపెట్టేది నెల్లూరు జిల్లానే. ఏడాదికి రూ.1,500 కోట్లు రాబడి జిల్లానుంచి రైల్వేకు వస్తుంది. ఎన్‌డీఏ ప్రభుత్వం గురువారం ర్వైల్వే బడ్జెట్ ప్రవేశపెట్టనుంది. నెల్లూరు వాసి కేంద్రమంత్రి వెంకయ్యనాయుడు కేంద్రప్రభుత్వంలో కీలకంగా వ్యవహరిస్తున్నారు. దీంతో రైల్వే బడ్జెట్‌పై జిల్లా ప్రజలు భారీ ఆశలు పెట్టుకున్నారు.
  
  శ్రీకాళహస్తి-నడికుడి ప్రతిపాదనలకే పరిమితం
  జిల్లాలో ప్రధానంగా మెట్ట ప్రాంతాలను కలుపుతూ శ్రీకాళహస్తి నుంచి గుంటూరు జిల్లా నడికుడి వరకు రైలు మార్గాన్ని నిర్మించాలని నిర్ణయించారు. ఈ ప్రతిపాదనపై 2010-11 బడ్జెట్‌లో మోక్షం లభించింది. శ్రీకాళహస్తి నుంచి రాపూరు, ఆత్మకూరు, వింజమూరు, కనిగిరి తదితర మెట్ట ప్రాంతాల మీదుగా రైల్వేలైను వేయాలని నిర్ణయించారు. 2005లో ఈమార్గానికి ప్రాథమిక సర్వే నిర్వహించారు. శ్రీకాళహస్తి-నడికుడి వరకు రైలుమార్గం వేసేందుకు సుమారు రూ. 1,310 కోట్లుతో అంచనాలు సిద్ధం చేశారు. పీపీపీలో భాగంగా రైల్వేమార్గానికి అయ్యే ఖర్చులో రాష్ట్రం సగం భరించాల్సి ఉంటుంది. అయితే 2012లో కేంద్రం కేవలం రూ. 8లక్షలే కేటాయించారు. కాని అక్కడ నుంచి ఏమాత్రం ప్రగతి లేదు.
  
  గూడూరు-దుగ్గరాజుపట్నం రైల్వేలైన్
  జిల్లాలో గూడూరు నుంచి దుగ్గరాజుపట్నం వరకు రైలుమార్గాన్ని వేయాలని ప్రతిపాదనలు చేశారు. ఆమేరకు సర్వే కూడా పూర్తి చేశారు. 2010-11లో రెల్వేలైనుకు అయ్యేఖర్చు రూ. 278 కోట్లు అంచనా వేశారు. దీనికి సంబంధించి 2013లో రైల్వే బడ్జెట్‌లో నామమాత్రంగా రూ. కోటి కేటాయించారు. ఈ ప్రతిపాదనలు కాగితాలకే పరిమితమయ్యాయి.
 
  కృష్ణపట్నం-ఓబులాపురం
  లైనుకు పూర్తికాని భూసేకరణ
  జిల్లాలోని కృష్ణపట్నం నుంచి ప్రధానంగా బొగ్గు, యూరియా, బియ్యం, ఇనుము తదితర సరుకులు ఇతర ప్రాంతాలకు రవాణా అవుతున్నాయి. వీటిని తరలించేం దుకు కృష్ణపట్నం నుంచి కడప జిల్లా ఓబులాపురం వరకు రైల్వేలైను వేయాలని నిర్ణయించారు. ఈమేరకు పూర్తిస్థాయిలో సర్వే చేశారు. నిర్మాణానికి అయ్యే ఖర్చు రూ. 930 కోట్లుగా అంచనా వేశారు. ఇందుకు గాను 2011లో మొదటివిడతగా రూ. 6 కోట్లు కేటాయించారు. ప్రస్తుతం కృష్ణపట్నం నుంచి వెంకటాచలం వరకు రెండు లైన్లతో కూడిన ట్రాక్‌ను నిర్మించారు. ఈ రైలుమార్గానికి ప్రధానంగా భూసేకరణ అడ్డంకిగా మారింది.
  
  కలగా మారిన రైల్వే
  ఇంజన్ల కర్మాగారం
  బిట్రగుంటలో రైల్వేకు సంబంధించి దాదాపు 2 వేల ఎకరాల భూమి ఉంది. రైల్వే అభివృద్ధి కోసం 2004లో అప్పటి కేంద్ర రైల్వే మంత్రి లాలూప్రసాద్ యాదవ్ శంకుస్థాపన చేశారు. ఈ ప్రాంతంలో రైలు ఇంజన్ల మరమ్మతుల కర్మాగారాన్ని (ఎలక్ట్రికల్ లోకో ఫిరాడికల్ ఓవర్ హోలింగ్) నిర్మించేందుకు శిలాఫలకం వేశారు. గత పదేళ్లుగా రైల్వేబోర్డు పరిశీలనలో ఉన్నప్పటికి ఎక్కడి వేసిన గొంగళి అక్కడే అన్న చందంగా మారింది.
  
  కొత్త రైళ్లు కలేనా ...
  తిరుపతి నుంచి షిర్డీకి ఒంగోలు, విజయవాడల మీదుగా రైలును వేయాలని జిల్లా ప్రజలు ఎదురుచూస్తున్నారు. అదేవిధంగా కొత్తగా నడపనున్న విజయవాడ-ఢిల్లీ ఏపీ ఎక్స్‌ప్రెస్ రైలును తిరుపతి నుంచి ప్రారంభించి గూడూరు, నెల్లూరుల మీదుగా వెళ్లేలా చర్యలు తీసుకోవాలని ప్రజలు కోరుతున్నారు. గంగా కావేరి, కోరమండల్, గరీబ్థ్‌ల్రను నెల్లూరు స్టేషన్‌లో ఆగే విధంగా చూడాలి. రెండేళ్ల క్రితం నెల్లూరు నుంచి సికింద్రాబాద్‌కు ఇంటర్‌సిటీ ఏర్పాటుకు ప్రతిపాదనలు చేశారు. ఇప్పటి వరకు ఆఊసే లేదు. నెల్లూరు నుంచి విజయవాడ, చైన్నైలకు మెమో రైళ్లను నడపాలని నిర్ణయించారు. ప్రస్తుతం అలాంటి ప్రతిపాదనలు కనబడటం లేదు.
  
  ఏ గ్రేడుగా నెల్లూరును చేయాలి
  ప్రస్తుతం ఏ1 స్టేషన్‌గా ఉన్న నెల్లూరును ఏ గ్రేడుగా చేయాలని జిల్లా ప్రజలు కోరుతున్నారు. ఆసియాలోనే అతిపెద్ద నౌకాశ్రయం నెల్లూరులోనే ఉంది. ఇక్కడ నుంచి అత్యధికస్థాయిలో ఇతర ప్రాంతాలకు సరుకులు రవాణా అవుతున్నాయి. నెల్లూరును ఏగ్రేడ్ స్టేషన్‌గా మార్చినట్లయితే నగరాలకు ఉండే సౌకర్యాలు జిల్లావాసులకు లభిస్తాయి. అంతేగాకుండా గూడూరు నుంచి సికింద్రాబాద్ వెళ్లే సింహపురి రైలు బయలుదేరే సమయం పొడగించడంతో జిల్లా ప్రజలు తీవ్రంగా ఇబ్బందులు పడుతున్నారు. ఇంతకు ముందు గూడూరులో రాత్రి 9 గంటలకు బయలుదేరే రైలు సమయాన్ని ప్రస్తుతం 10.40 మార్చడంతో సికిందరాబాద్‌కు మరుసటి రోజు 11 గంటలకు చేరుతుందని పలువురు చెబుతున్నారు. రైలు సమయం మార్పుపై నెల్లూరు ఎంపీ మేకపాటి రాజమోహనరెడ్డి రైల్వే అధికారులును కలసి వినతిపత్రం సమర్పించారు. గతంలో ఉన్న సమయాన్నే పెట్టాలని విజ్ఞప్తి చేశారు.
  


 - పాత వాటికే పెద్ద పీట   
 - నేడు పార్లమెంటులో రైల్వే బడ్జెట్
 - డీజిల్ ధరలు తగ్గినా చార్జీలు తగ్గవు.. పెంచే అవకాశాలూ ఉన్నాయ్
 - పస్తుత ప్రాజెక్టులను పూర్తిచేయడానికే రూ. 1.82 లక్షల కోట్లు అవసరం
 - ఇక కొత్తగా ప్రాజెక్టులు, కొత్త రైళ్ల ప్రకటనపై ఆచితూచి అడుగులు
 - 2015-16 సంవత్సరానికి సురేశ్ ప్రభు రైల్వే బడ్జెట్‌పై అంచనాలివీ
  
 న్యూఢిల్లీ: రైల్వే విభాగం ఆర్థికంగా తీవ్ర ఒత్తిడి ఎదుర్కొంటున్న పరిస్థితుల్లో.. రైల్వే బడ్జెట్‌లో ప్రయాణ చార్జీలు, సరుకు రవాణా చార్జీలను పెంచుతారా? కొత్త ప్రాజెక్టులు ప్రకటిస్తారా లేక పాత వాటికే ప్రాధాన్యమిస్తారా? అనే అంశాలపై ఇప్పుడు అందరి దృష్టీ కేంద్రీకృతమైంది. రైల్వేమంత్రి సురేశ్ ప్రభు గురువారం  ఉదయం పార్లమెంటులో 2015-16 ఆర్థిక సంవత్సర రైల్వే బడ్జెట్‌ను ప్రవేశపెట్టనున్నారు. ఇందులో ‘మేక్ ఇన్ ఇండియా’ చర్యలతో పాటు రైల్వేల్లో భద్రతా ప్రమాణాలను పెంచే ప్రతిపాదనలు ఉంటాయని భావిస్తున్నారు. సరుకు రవాణా చార్జీలతో వచ్చే ఆదాయం నుంచి రూ. 24,000 కోట్ల నిధులను.. ప్రయా ణ చార్జీల్లో వస్తున్న నష్టాన్ని భర్తీ చేసేం దుకు వినియోగిస్తున్న పరిస్థితుల్లో.. దీనిని తగ్గించేం దుకు ప్రభు కత్తి మీద సాము చేయా ల్సి ఉంటుందని పరిశీలకులు వ్యాఖ్యానిస్తున్నారు.
  
  డీజిల్ ధరలు తగ్గినా.. చార్జీలు తగ్గించరు!
  2012-13 సంవత్సరం వరకూ పదేళ్ల పాటు రైల్వే చార్జీలను పెంచలేదు. ఆ ఏడాది నాటి రైల్వేమంత్రి, తృణమూల్ కాంగ్రెస్ నేత దినేష్‌త్రివేది అన్ని తరగతుల ప్రయాణ చార్జీలనూ పెంచారు. అయితే.. సొంత పార్టీ నుంచి కూడా వ్యతిరేకత రావడంతో రెండో తరగతి, స్లీపర్ క్లాస్ చార్జీల పెంపును ఉపసంహరించాల్సి వచ్చింది. ఆ తర్వాతా ప్రయాణ చార్జీలు పెరిగాయి. గత ఏడాది జూలైలో మోదీ ప్రభుత్వం ప్రవేశపెట్టిన తొలి రైల్వే బడ్జెట్‌లో ప్రయాణ చార్జీలను 14.2 శాతం, సరుకు రవాణా చార్జీలను 6.5 శాతం పెంచారు. డీజిల్ ధరలు తగ్గిపోయినప్పటికీ.. రైల్వే చార్జీలను తగ్గించే అవకాశం లేదని రైల్వే  సహాయమంత్రి మనోజ్‌సిన్హా ఇప్పటికే స్పష్టంచేశారు. వాస్తవానికి రైల్వే విభాగం 2013 నుంచి ఇంధన సర్దుబాటు వ్యయం(ఎఫ్‌ఏసీ) ఆధారంగా చార్జీలను సవరించే విధానాన్ని అనుసరిస్తోంది. ప్రస్తుతం డీజిల్ ధరలు తగ్గినప్పటికీ.. విద్యుత్ ధర నాలుగు శాతం పైగా పెరిగిందని.. కాబట్టి చార్జీలను తగ్గించే అవకాశం లేదని చెప్తున్నారు.
  
  ప్రాజెక్టుల పూర్తి కోసం ప్రైవేట్‌కు బాట?
  ఇదిలావుంటే.. రైల్వే ఆమోదించిన మొత్తం ప్రాజెక్టులు 676 ఉన్నాయి. వీటి విలువ రూ. 1,57,883 కోట్లు. వీటిలో 317 ప్రాజెక్టులను మాత్రమే పూర్తిచేయగలిగారు. మిగతా 359 ప్రాజెక్టులను పూర్తిచేయాలంటే ఇప్పుడు రూ. 1,82,000 కోట్లు అవసరం. కీలకమైన ప్రాజెక్టులను పూర్తిచేసేందుకు భారీగా నిధుల ప్రవాహం అవసరమైన నేపధ్యంలో.. సంస్కరణ వాదిగా చెప్పే సురేశ్ ప్రభు.. ప్రభుత్వ రంగ రవాణా సంస్థ అయిన రైల్వేల్లోకి ప్రైవేట్ పెట్టుబడులను ఆహ్వానించేందుకు రోడ్ మ్యాప్ ప్రకటించే అవకాశముంది. అలాగే భారీగా నిధుల కొరత ఎదుర్కొంటున్న పరిస్థితుల్లో కొత్త రైళ్లు, కొత్త ప్రాజెక్టులను ప్రకటించే విషయంలోనూ రైల్వేమంత్రి ఆచితూచి అడుగువేస్తారని చెప్తున్నారు. వ్యూహాత్మకంగా కీలకమైన ప్రాజెక్టులు.. పూర్తికావచ్చిన కొత్త లైన్లు, డబ్లింగ్, విద్యుదీకరణ ప్రాజెక్టులకు మాత్రమే నిధులు కేటాయించవచ్చని తెలుస్తోంది.
 రానున్న 2015-16కు కేంద్రం నుంచిరూ. 50,000 కోట్ల మేర బడ్జెటరీ మద్దతు కోరిన రైల్వేశాఖ.. రైల్వే భద్రత నిధి కింద మరో రూ. 20,000 కోట్లు కేటాయించాలని కేంద్ర ఆర్థికశాఖకు విజ్ఞప్తిచేసింది. రైల్వే ప్రమాదాలకు ప్రధాన కారణంగా ఉన్న మానవరహిత లెవల్ క్రాసింగ్‌లను తొలగించేందుకు ఈ నిధులు ఉపయోగిస్తామని చెప్తోంది. అలాగే.. రైల్వేల ఆదాయ వనరులను పెంచుకునేందుకు.. చార్జీలు కాకుండా కొత్త మార్గాలను అన్వేషించేందుకు ప్రభు ప్రయత్నిస్తారని తెలుస్తోంది. వాణిజ్యప్రకటనల నుంచి ఆదాయాన్ని పెంచుకోవటం, అదనపు భూమిని వినియోగించుకోవటం తదితరాలు ఉంటాయని చెప్తున్నారు.
  
 ‘బుల్లెట్ రైలు’కు ప్రాధాన్యం...
  దేశంలో బుల్లెట్ రైళ్లను ప్రవేశపెడతామన్న ఎన్‌డీఏ సర్కారు హామీకి అనుగుణంగా.. ముంబై-అహ్మదాబాద్‌ల మధ్య తలపెట్టిన హైస్పీడ్ రైలు ప్రాజెక్టు, ప్రతిపాదిత వజ్ర చతుర్భుజి మార్గంలో సర్వే కార్యక్రమాలపై సురేష్‌ప్రభు ప్రకటనలు చేసే అవకాశముంది. రైలు బోగీలోని క్రాంక్ షాఫ్టులు, ఆల్టర్నేటర్లు, ఫోర్జ్‌డ్ వీల్స్ వంటి చాలా పరికరాలను విదేశాల నుంచి దిగుమతి చేసుకోవటానికి బదులుగా.. ‘మేక్ ఇన్ ఇండియా’ పథకంలో భాగంగా దేశంలోనే తయారు చేసేందుకు చర్యలు ప్రకటించవచ్చు. అలాగే.. ప్రయాణికుల సౌకర్యార్థం 100 రైళ్లలో పారిశుద్ధ్య సిబ్బందిని ఏర్పాటు చేయటం, దాదాపు 100 రైల్వేస్టేషన్ల పునరాభివృద్ధి, రైల్వే స్టేషన్లలో సౌకర్యాల పెంపు, ఇంటర్-సిటీ సర్వీసుల్లో ఏసీ బోగీల ఏర్పాటు, ఏసీ డెము రైళ్లను ప్రవేశపెట్టటం వంటి పలు చర్యలు ఉంటాయని చెప్తున్నారు.
  
 ఆకాంక్షలను నెరవేర్చేందుకు కృషి: ప్రభు
  రైల్వేలు కష్ట కాలం ఎదుర్కొంటున్నప్పటికీ.. ఎన్‌డీఏ ప్రభుత్వంపై ప్రజలు పెట్టుకున్న ఆకాంక్షలను నెరవేర్చేందుకు శాయశక్తులా కృషిచేస్తున్నామని రైల్వేమంత్రి సురేశ్ ప్రభు పేర్కొన్నారు. రైల్వే బడ్జెట్‌కు తుది మెరుగులు దిద్దుతున్న మంత్రి బుధవారం మీడియాతో మాట్లాడుతూ.. ఎంపీలు, రాష్ట్ర ప్రభుత్వాలతో సహా వివిధ వర్గాల నుంచి కొత్త రైళ్లు, కొత్త లైన్లు, కొత్త ప్రాజెక్టుల కోసం డిమాండ్లు ఉన్నాయని పేర్కొన్నారు. రైల్వేబడ్జెట్‌ను ఖరారు చేసే ముందు ఆయన పారిశ్రామిక ప్రతినిధులతో కూడా సమావేశమయ్యారు.
  
  


 సంగడిగుంట(గుంటూరు): నవ్యాంధ్రలో గుంటూరు కీలకం కానున్న నేపథ్యంలో కేంద్ర ప్రభుత్వం దీనిపై ఏ మేరకు కరుణ చూపిస్తుందనే దానిపై ఇక్కడి ప్రజలు గంపెడాశతో ఎదురు చూస్తున్నారు. గురువారం రైల్వే బడ్జెట్ ప్రవేశపెడుతున్నందున ఈ ప్రాంతానికి ప్రత్యేక వరాలు లభిస్తాయన్న ఆశతో ఎదురు చూస్తున్నారు. గుంటూరు రైల్వే డివిజన్ ఏర్పడినప్పటి నుంచీ అరకొర నిధులతోనే సరిపెట్టుకుంటూ వచ్చింది.
  
  ఈ డివిజన్ పరిధిలోని గుంటూరు, ప్రకాశం, నెల్లూరు, కర్నూలు, నల్లగొండ జిల్లాల్లో చాలా ప్రాజెక్టులు పెండింగ్‌లో ఉన్నాయి. వీటికి ఏమైనా కదలిక వస్తుందేమోనన్న ఆశతో ఇక్కడి ప్రజలు ఎదురుచూస్తున్నారు.  ఇప్పటికే సర్వే పూర్తి చేసిన గుంటూరు- గుంతకల్- ధర్మవరం రైలు మార్గం డబ్లింగ్ పూర్తయితే రాష్ట్ర రాజధాని నుంచి రాయలసీమకు ప్రయాణం కనీసం 2 గంటలు తగ్గనుంది.
  
  ఈ ప్రాజెక్ట్ పూర్తికి ఏ మేరకు నిధులు కేటాయిస్తారో వేచి చూడాలి. సర్వే కొనసాగుతున్న నడికుడి - శ్రీకాళహస్తి మధ్య రైల్వే లైను అందుబాటులోకి వస్తే గుంటూరు, నెల్లూరు, ప్రకాశం జిల్లాల సరిహద్దులను కలుపుతూ ప్రయాణ దూరం తగ్గవచ్చు. అంతే కాకుండా ప్రధాన రైలు మార్గంలో ఉన్న విజయవాడ, నెల్లూరు స్టేషన్లపై ఒత్తిడి తగ్గనుంది. నిత్యం వెయిటింగ్ లిస్ట్‌లతో ప్రయాణిస్తున్న అన్ని రైళ్లల్లో అదనపు బోగీలను, సాధారణ బోగీలను ఏర్పాటు చేయాల్సిన అవసరం ఉంది.
  
  గుంటూరు నుంచి పక్కరాష్ట్రాల రాజధాని కేంద్రాలైన చెన్నై, భువనేశ్వర్, హైదరాబాద్, ముంబయిలతోపాటు దేశ రాజధాని ఢిల్లీకి రైళ్లు నడపాల్సి ఉంది. గుంటూరు జిల్లా మీదుగా ప్రయాణిస్తూ గుంటూరు స్టేషన్‌కు రాని అన్ని ఎక్స్‌ప్రెస్ రైళ్ళను గుంటూరు మీదుగా నడపాల్సిఉంది. గుంటూరు నగరంలోని డొంకరోడ్ మూడు వంతెనల వెడల్పు, నందివెలుగు రోడ్ మణిహోటల్ సెంటర్ గేటువద్ద, శ్యామలానగర్ రైల్వే గేటు వద్ద ఆర్‌యూబీలు తప్పనిసరిగా ఏర్పాటు చేయాల్సి ఉంది. విజయవాడ నుండి విశాఖకు నడుస్తున్న రత్నాచల్ ఎక్స్‌ప్రెస్ రైలును గుంటూరు నుంచి నడిపితే గుంటూరు నుంచి విశాఖ వరకు పగటిపూట సూపర్‌ఫాస్ట్ ఎక్స్‌ప్రెస్ రైలు అందుబాటులోకి రానుంది.  గుంటూరు నుంచి బయలుదేరి రింగ్‌లైన్‌గా నరసరావుపేట, సత్తెనపల్లి, అమరావతి, తుళ్లూరు, మంగళగిరి, తెనాలి మీదుగా గుంటూరుకు చేరుకునే విధంగా ప్రత్యేక నూతన మార్గాన్ని ఏర్పాటు చేయాలనే డిమాండ్ ఎప్పటినుంచో ఉంది. ఇప్పటివరకు ఢిల్లీ స్టేషన్‌లో అందుబాటులో ఉంచిన ‘వైఫై’ సదుపాయం అన్ని స్టేషన్లకు విస్తరించి మెరుగైన సేవలను అందించాలని ఇక్కడి ప్రజలు కోరుతున్నారు. గుంటూరు డివిజన్‌ను అభివృద్ధి చేసి రాజధానికి దగ్గరలో జోన్‌కేంద్ర కార్యాలయాన్ని ఏర్పాటు చేయడం ద్వారా ముఖ్యమంత్రికి జోన్ జనరల్ మేనేజర్ అందుబాటులో ఉండే అవకాశం ఉంది. వీటిపై ఈ బడ్జెట్‌లో ఏ మేరకు కేటాయింపులు ఉంటాయో వేచి చూడాలి.
  


 రేపు రైల్వే బడ్జెట్
  
 సాక్షి ప్రతినిధి, మహబూబ్‌నగర్: రాష్ట్రంలోనే అతిపెద్ద జిల్లా అయిన మహబూబ్‌నగర్‌కు కేంద్ర రైల్వే బడ్జెట్‌లో ప్రతి ఏడాదీ రిక్తహస్తమే ఎదురవుతోంది. జిల్లానుంచి ప్రాతి నిధ్యం వహిస్తున్న పార్లమెంటు సభ్యులు, ప్రజా ప్రతినిధులు, ప్రజల నుంచి వెళ్తున్న ప్రతిపాదనలు బుట్టదాఖలవుతున్నాయి. ఫలక్‌నుమా మార్గం డబ్లింగ్, విద్యుదీకరణ, ప్రతిపాదనలకు మోక్షం లభించడం లేదు. నిధులు విడుదలైనా రోడ్డు బ్రిడ్జిల నిర్మాణం ముందుకు సాగడం లేదు. రైల్వే ప్రాజెక్టులు చేపట్టేం దుకు అవసరమైన భూసేకరణతో పాటు ప్రాజెక్టు వ్యయంలో 50శాతం రాష్ట్ర ప్రభుత్వం భరించాలనే నిబంధన కూడా రైలు  మార్గాల అభివృద్ధికి ఆటంకంగా మారింది.
 
 దేశవ్యాప్తంగా ఇప్పటికే రూ.8లక్షల కోట్లు విలువ చేసే రైల్వే ప్రాజెక్టులు పెండింగులో ఉన్నాయి. వీటిని పూర్తి చేసేందుకు 25 ఏళ్లు పడుతుందని రైల్వేశాఖ అంచనా వేస్తోంది. ఈ నేపథ్యంలో కొత్త మార్గాలకు ఆమోదం తెలపడం అనుమానంగానే కనిపిస్తోంది. జిల్లాలో 191 కిలోమీటర్ల రైలు మార్గం ఉండగా ప్రతిరోజూ ప్రయాణికులతో 54 రైళ్లు పరుగులు తీస్తున్నాయి. సుమారు అంతే సంఖ్యలో గూడ్సు రైళ్లు సరుకులను రవాణా చేస్తున్నాయి. మరోవైపు దక్షిణ మధ్య రైల్వే హైదరాబాద్ డివిజన్  పరిధిలో మహబూబ్‌నగర్ అతి పెద్ద రైల్వే స్టేషన్. ప్రతి నెలా సుమారు కోటి రూపాయలు జిల్లా నుంచి రైల్వేకు ఆదాయం సమకూరుతోంది. ఈ నేపథ్యంలో గురువారం కేంద్ర మంత్రి సురేశ్‌ప్రభు ప్రవేశపెట్టే రైల్వే బడ్జెట్ ప్రతిపాదనలపై జిల్లా ప్రజలు కోటి ఆశలు పెట్టుకున్నారు.
  
 పట్టాలెక్కని గద్వాల- మాచర్ల
 కర్ణాటకలోని రాయిచూర్ నుంచి గద్వాల, వనపర్తి, నాగర్‌కర్నూలు, కల్వకుర్తి, అచ్చంపేట, నల్లగొండ జిల్లా దేవరకొండ మీదుగా మాచర్ల వరకు గతంలో నూతన రైల్వే లైనును ప్రతిపాదించారు. 1981లో అప్పటి నాగర్‌కర్నూలు ఎంపీ మల్లు అనంతరాములు ప్రతిపాదన మేరకు సర్వే కూడా జరిగింది. మొదటి దశలో భాగంగా రాయిచూరు నుంచి గద్వాల వరకు 59 కిలోమీటర్ల మేర రైల్వే లైను నిర్మాణం పూర్తయింది. మిగతా పనులు చేపట్టే అంశం ఏటా ప్రతిపాదనలకే పరిమితమవుతోంది.
 రెండేళ్లుగా జిల్లా ఎంపీలు ఈ లైను నిర్మాణంపై ప్రతిపాదనలు సమర్పిస్తున్నా రైల్వేబడ్జెట్‌లో ప్రస్తావనకు నోచుకోవడం లేదు. బెంగళూరు, ముంబై, సోలాపూర్ తదితర ప్రాంతాలను జిల్లాతో అనుసంధానించే అతి దగ్గరి రైల్వే మార్గం గద్వాల- రాయిచూర్. అయితే లైను నిర్మాణం పూర్తయినా కేవలం రాయిచూర్ వరకు మాత్రమే డెమో రైలు నడుస్తోంది.
  
 కలగా ఫలక్‌నుమా డబ్లింగ్
 మహబూబ్‌నగర్ జిల్లా కేంద్రంలోని రైల్వేస్టేషన్ మీదుగా ప్రతి రోజు ఎక్స్‌ప్రెస్, సూపర్ ఎక్స్‌ప్రెస్, ప్యాసింజర్లతో కలుపుకొని 54 రైళ్లు రాకపోకలు సాగిస్తున్నాయి. సింగిల్ లైను ఉండటం, ఎలక్ట్రిఫికేషన్ పూర్తి కాకపోవడంతో జిల్లా మీదుగా ప్రయాణించేందుకు ప్రయాణీకులు తీవ్ర అవస్థలు ఎదుర్కొంటున్నారు. క్రాసింగ్ పేరిట రైళ్లను నిలిపివేస్తుండటంతో గంటల తరబడి వేచి చూడాల్సి వస్తోంది. రైల్వే స్టేషన్లలో కనీస సౌకర్యాలు లేకపోవడంతో ప్రయాణం మరింత నరకప్రాయమవుతోంది. రద్దీవేళల్లో మహబూబ్‌నగర్, జడ్చర్ల, షాద్‌నగర్ స్టేషన్‌లలో టికెట్ కౌంటర్ల వద్ద రద్దీతో ప్రయాణీకులు ఇక్కట్లకు గురవుతున్నారు. ఫలక్‌నుమా నుంచి మహబూబ్‌నగర్ వరకు రైల్వే లైను డబ్లింగ్ కోసం 2009-10 బడ్జెట్‌లో సర్వే కోసం రూ.5 కోట్లు మంజూరయ్యాయి. సర్వే పూర్తయినా డబ్లింగ్ కోసం నిధులు మంజూరు కావడం లేదు.
 
 ఆర్‌ఓబీలు నత్తనడక
 జిల్లాలో 101 రైల్వే క్రాసింగులకు గాను గత యేడాది జూలై వరకు 60చోట్ల మాత్రమే గేట్లకు కాపలా ఉంది. సమీప గ్రామాల ప్రజలు ఈ క్రాసింగుల మీదుగా ప్రతీరోజూ ప్రాణాలు అరచేతిలో పెట్టుకుని పట్టాలు దాటుతున్నారు. మెదక్ జిల్లా మాసాయిపేట స్కూలు బస్సు ఘటన నేపథ్యంలో ఆరు నెలల కాలంలో చాలాచోట్ల యుద్ధప్రాతిపదికన అండర్ బ్రిడ్జిలు, కాపలా గేట్లు ఏర్పాటు చేశారు. కాగా కాపలా వుండే గేట్ల వద్ద రద్దీని దృష్టిలో పెట్టుకుని పట్టాల మీదుగా రోడ్ ఓవర్ బ్రిడ్జిలు నిర్మించాలని గతంలో ప్రతిపాదించారు.
 
 అప్పన్నపల్లి, గద్వాల, జడ్చర్ల, దేవరకద్ర రైల్వే క్రాసింగ్‌ల వద్ద రోడ్డ ఓవర్‌బ్రిడ్జి నిర్మాణానికి కేంద్రం, భూసేకరణకు రాష్ట్ర ప్రభుత్వాంలు గతంలో నిధులు కూడా మంజూరు చేశాయి. అయితే రూ.22కోట్ల వ్యయంతో చేపట్టిన అప్పన్నపల్లి బ్రిడ్జి నిర్మాణ పనులు నత్తనడకన సాగి ఇటీవలే ప్రారంభానికి నోచుకుంది. 2008లో నిధులు మంజూరైనా జడ్చర్లలో నేటికీ పనులు ప్రారంభం కాలేదు. దేవరకద్రలో ఇప్పుడిప్పుడే సన్నాహాలు ప్రారంభించగా, గద్వాలలో పిల్లర్ల స్థాయిలో పనులు జరుగుతున్నాయి.
  
  ఇంకా పెండింగులో ప్రతిపాదనలు
      గద్వాల రైల్వే స్టేషన్ సమీపంలోని ఖాళీస్థలంలో రైల్వే డ్రైవింగ్ శిక్షణ కేంద్రం ఏర్పాటు.
      జడ్చర్ల నుంచి నంద్యాల వయా నాగర్‌కర్నూల్, కొల్లాపూర్ రైల్వేలైన్
      ఫలక్‌నుమా నుంచి జిల్లా కేంద్రం వరకు ఎలక్ట్రిఫికేషన్.
      రైల్వేట్రాక్‌ల బలోపేతం.
      అవసరమైన చోట ఆర్‌యూబీ, ఆర్‌ఓబీల నిర్మాణం.
      తిరుపతి డబుల్ డెక్కర్ రైలు చార్జీల తగ్గింపు.
      జోగుళాంబ్ హాల్ట్‌ను రైల్వేస్టేషన్ స్థాయికి పెంచి సౌకర్యాలు కల్పించడం.
  
  డబ్లింగ్ కోసం ప్రతిపాదన
  జడ్చర్ల- నంద్యాల, గద్వాల-మాచర్ల రైలు మార్గాలు చేపట్టాలని ఇటీవల కేంద్ర రైల్వేమంత్రి సురేశ్ ప్రభుకు విజ్ఞప్తి చేశాం. ఫలక్‌నుమా మార్గం డబ్లింగ్‌కు అత్యంత ప్రాధాన్యత ఇవ్వాలని కోరాం. రాష్ట్ర ప్రభుత్వం 50శాతం వాటా భరించేందుకు ముందుకు వచ్చే ప్రాజెక్టులకే నూతనంగా ఆమోదం లభించే అవకాశముందని కేంద్రమంత్రి సూచనప్రాయంగా వెల్లడించారు.
  - ఏ.పీ.జితేందర్‌రెడ్డి, ఎంపీ, మహబూబ్‌నగర్
  
  సవాలక్ష అడ్డంకులు
  జిల్లాలో పెండింగ్ రైల్వే ప్రాజెక్టు పనులకు నిధులు కేటాయించాల్సిందిగా గతంలోనే కేంద్ర ప్రభుత్వానికి ప్రతిపాదనలు సమర్పించాం. జడ్చర్ల- నంద్యాల, గద్వాల-మాచర్ల మార్గం కోసం నివేదించాం. మహబూబ్‌నగర్‌కు ఎంఎంటీఎస్ సౌకర్యం, ఫలక్‌నుమా డబ్లింగ్, విద్యుదీకరణ చేపట్టాలని కోరాం. జోగుళాంబ హాల్ట్‌లో మరిన్ని రైళ్లు ఆపాలని ప్రతిపాదించాం.
  - నంది ఎల్లయ్య, ఎంపీ, నాగర్‌కర్నూలు.
  
  ముందుకు సాగని మునీరాబాద్
  దేవరకద్ర-మునీరాబాద్ రైలు మార్గం పనులు దశాబ్ధకాలంగా ముందుకు సాగడం లేదు. దేవరకద్ర నుంచి మక్తల్ మండలం జక్లేర్ వరకు సుమారు 65 కిలోమీటర్ల మేర పనులు పూర్లయినట్లు రైల్వేవర్గాలు చెబుతున్నాయి. భూసేకరణ ప్రక్రియ పూర్తి కాకపోవడంతో పనులు ముందుకు సాగడం లేదు. రైతులకు పరిహారం చెల్లించక పోవడంతో పలుచోట్ల పనులు నిలిచిపోయాయి. రూ.245 కోట్ల అంచనా వ్యయంతో ప్రారంభమైన ఈ రైలుమార్గం పనులు ఎప్పటికి పూర్తవుతాయో తెలియని పరిస్థితి.
  
  జిల్లా మీదుగా నడిచే రైళ్లు           54
  ప్రయాణించే దూరం            191కి.మీ
  రైల్వే క్రాసింగులు              101
  కాపలా లేనివి                   41


  రైల్వే బడ్జెట్‌లో రాష్ట్రానికి ఈ సారైనా ప్రాధాన్యత దక్కేనా..? రైల్వే మంత్రి సురేష్ ప్రభు దక్షిణ రైల్వేను కరుణించేనా?.. పెండింగ్ ప్రాజెక్టులు పట్టాలెక్కేనా?.. అని తమిళనాడు రాష్ర్ట ప్రజలు ఆలోచనల్లో పడిపోయారు. రైల్వే బడ్జెట్‌ను గురువారం పార్లమెం టులో ప్రవేశపెట్టనుండడమే ఇందుకు కారణం.
  
  చెన్నై, సాక్షి ప్రతినిధి :కేంద్రంలో బీజేపీ ప్రభుత్వం ఏర్పడిన తరువాత గత ఏడాది అప్పటి రైల్వేమంత్రి సదానంద గౌడ మధ్యంతర రైల్వే బడ్జెట్‌ను ప్రవేశపెట్టారు. మోదీ ప్రభుత్వం 2015-16 సంవత్సరానికి పూర్తిస్థాయి రైల్వే బడ్జెట్‌ను ప్రవేశపెట్టడం ఇదే ప్రథమం. రాష్ట్రంలో కొత్త రైళ్లు పరుగులెట్టాలని, కొత్త మార్గాల రూపకల్పన సాగాలని, మరిన్ని సౌకర్యాలు కలగాలని ప్రయాణికులు ఆశించడం సహజం. కొత్త బడ్జెట్‌లో ప్రధానంగా తక్కువ ఖర్చుతో ఏసీలో ప్రయాణించేందుకు వీలు కల్పిస్తున్నట్లుగా ఒక చల్లని వార్త ప్రచారంలో ఉంది. యూపీఏ ప్రభుత్వం ఇచ్చిన హామీలు, పథకాలు ఏనాడో అటకెక్కేశాయి. గత మధ్యంతర బడ్జెట్‌లో తమిళనాడుకు రెండు కొత్త రైళ్లు, అనేక పథకాలను ప్రకటించారు. వీటిలో చెన్నై-బెంగళూరు బుల్లెట్ ట్రైన్ హామీకే పరిమితమైంది.
  
  తిరుచ్చీ-నాగర్‌కోవిల్, చెంగల్పట్టు-దిండుగల్లు డబుల్‌లైన్ పనులు ఎంతోకాలంగా పెండింగ్‌లో ఉన్నాయి. చెన్నై- కన్యాకుమారీ డబుల్‌లైన్ పనులు పదేళ్లుగా సాగుతున్నాయి. నిధుల్లేమి వల్లనే నత్తనడకలా పనులు నిర్వహిస్తున్నామని రైల్వే అధికారులు చెబుతున్నారు. చెన్నై సెంట్రల్-బేసిన్ బ్రిడ్జ్ నడుమ 5, 6వ లైన్ల విస్తరణ పనులకు సైతం నిధుల గ్రహణం పట్టుకోవడంతో పనుల్లో వేగం కొరవడింది. రైల్వే బడ్జెట్‌లో ప్రస్తావించడమేగానీ, నిధులు మంజూరు చేయకపోవడంతో రాష్ట్రానికి సంబంధించి సుమారు 24 పథకాలు బుట్టదాఖలయ్యాయి
  
  రాయపురం వరం దక్కేనా
  రైల్వే బడ్జెట్ అనగానే రాష్ట్ర ప్రజలు ప్రధానంగా ఎదురుచూసేది రాయపురం రైల్వేస్టేషన్ వైభవం. దక్షిణాది రాష్ట్రాల్లోకే ప్రథమంగా బ్రిటిషు దొరలు రాయపురం రైల్వేస్టేషన్‌ను 1856లో నిర్మించగా అదే ఏడాది అక్కడి నుంచి తొలిరైలు పట్టాలపై పరుగులెట్టింది. 1873లో సెంట్రల్ రైల్వేస్టేషన్‌లో సేవలు ప్రారంభం కాగా 1959, 1998లో మరింతగా విస్తరించారు. 1922 వరకు రాయపురం నుండే రైల్వేసేవలు అందగా, ఎగ్మూర్‌లో మరో రైల్వేస్టేషన్ నిర్మించి అదే ఏడాది రాయపురం ైరె ల్వేస్టేషన్ కార్యకలాపాలను బదలాయించారు. ఈ మార్పులో రాయపురం రైల్వేస్టేషన్ కేవలం లోకల్‌రైళ్లకే పరిమితమైంది.
  
  సెంట్రల్, ఎగ్మూర్ రైల్వే స్టేషన్లలో రైళ్ల సంఖ్య ప్రయాణికుల రద్దీ, పెరిగిపోవడంతో అందరి దృష్టి మరలా రాయపురం రైల్వేస్టేషన్‌పై పడింది. చెన్నైలో మూడో రైల్వేస్టేషన్‌గా రాయపురం రైల్వేస్టేషన్‌ను తీర్చిదిద్దాలని 2005లో తమిళనాడుకు చెందిన అప్పటి రైల్వేమంత్రి వేలు నిర్ణయించారు.  అనేక ఇబ్బందులు ఎదురైన దృష్ట్యా ఇది అంతసులువు కాదని తేలడంతో పక్కనపెట్టేశారు. ఈ విషయమై ఇటీవల చెన్నైకి వచ్చిన రైల్వే మంత్రి సురేష్ ప్రభును మీడియా ప్రశ్నించగా సర్వే సాగుతోంది, పరిశీలిస్తున్నామని ముక్తసరిగా సమాధానం ఇచ్చారు. ఈ రైల్వే బడ్జెట్‌లోనైనా రాష్ట్రానికి ప్రాధాన్యం ఏర్పడుతుందోలేదో వేచిచూడాలి మరి?.
  


 కొత్త రైల్వే జోన్ కోసం ఎదురుచూపులు
  ప్రయాణికులకు      సౌకర్యాల కల్పనపై ఆశలు
  ప్రతిపాదనలపై ‘ప్రభు’ కరుణించేనా?
  నేడు పార్లమెంట్‌కు రానున్న రైల్వే బడ్జెట్
  
 రైల్వే మంత్రి సురేష్ ప్రభు గురువారం పార్లమెంటులో ప్రవేశపెట్టనున్న రైల్వే బడ్జెట్ ఈసారైనా జిల్లాపై వరాల జల్లు కురిపించేనా.. అని జిల్లావాసులు ఆశగా ఎదురు చూస్తున్నారు. రాష్ట్ర విభజన నేపథ్యంలో కొత్త రాష్ట్రానికి రైల్వే జోన్ కేటాయిస్తామని కేంద్రం హామీ ఇచ్చింది.
 
 వాల్తేర్ డివిజన్, విశాఖపట్నం, విజయవాడ, గుంటూరు, గుంతకల్ డివిజన్లను కలిపి కొత్త రైల్వే జోన్ ప్రకటిస్తే నవ్యాంధ్రప్రదేశ్ అభివృద్ధికి దోహదపడుతుంది. శాటిలైట్ స్టేషన్‌గా కొండపల్లి అభివృద్ధి, పుష్కరాల పనులకు నిధులు, విజయవాడ స్టేషన్‌లో సౌకర్యాల మెరుగుదల, స్పీడ్, అదనపు రైళ్ల మంజూరు వంటి అంశాలకు బడ్జెట్‌లో చోటు దక్కేనా అనేది వేచిచూడాలి.
                                                  
  


 మళ్లీ రైల్వే బడ్జెట్ వచ్చేసింది. అవే పాత ప్రతిపాదనలు.. డిమాండ్లు. రైల్వే బడ్జెట్‌లో ఏటా జిల్లాకు మొండిచేయి చూపుతుండగా.. ఈసారైనా న్యాయం చేస్తారని జిల్లా ప్రజలు ఆశగా ఎదురుచూస్తున్నారు. ఎంపీ వైవీ సుబ్బారెడ్డి ఇప్పటికే కేంద్ర రైల్వేమంత్రి సురేష్‌ప్రభును కలిసి పలు ప్రతిపాదనలు అందజేశారు. ఆయన సానుకూలంగా స్పందించారు. ఆ హామీలు పట్టాలెక్కుతాయో లేదో చూడాలి.
  
  సాక్షి ప్రతినిధి, ఒంగోలు: ఈసారైనా మోదీ ప్రభుత్వం ప్రకాశం జిల్లాకు న్యాయం చేస్తుందా? నేడు ప్రవేశపెట్టనున్న రైల్వేబడ్జెట్‌లో  కొత్త ప్రాజెక్టులు దక్కుతాయా అన్నది పలువురిని వేధిస్తున్న అంశం. గత ఏడాది జూలైలో మోదీ ప్రభుత్వం తొలిసారి ప్రవేశపెట్టిన బడ్జెట్‌లో ప్రకాశం జిల్లాకు మొండిచెయ్యి మిగిలింది. ఈ ప్రాంతానికి ఒక్క కొత్త ప్రాజెక్టుగానీ, కొత్తరైలు గానీ మంజూరు కాలేదు. ఆంధ్రప్రదేశ్ పునర్ వ్యవస్థీకరణ బిల్లులో ప్రస్తావించిన అంశాలను కూడా రైల్వే మంత్రి పరిగణనలోకి తీసుకోకపోవడంపై తీవ్ర వ్యతిరేకత వ్యక్తమైంది. ఈసారి రైల్వే మంత్రి సురేష్‌ప్రభును ఎంపీలు కలిసినపుడు సానుకూలంగా స్పందించడంతో బడ్జెట్ పట్ల ఆశాభావం వ్యక్తమవుతోంది.
  
 నడికుడి-శ్రీకాళహస్తి రైల్వేలైన్:
  ఈ ప్రాంత ప్రజల చిరకాల స్వప్నమైన నడికుడి - శ్రీకాళహస్తి రైల్వే లైన్‌కు నిధులు మంజూరైతే ఈ ప్రాంతం అభివృద్ధి చెందే అవకాశం ఉంది. ఈ లైన్‌పై అనేక మార్లు సర్వేలు జరిగినా నిధులు మాత్రం మంజూరు కాలేదు.  అయితే 2013-14 బడ్జెట్‌లో  50:50 శాతంతో కేంద్ర ప్రభుత్వం, రాష్ట్ర ప్రభుత్వం ఈ మార్గాన్ని అభివృద్ధి చేయాలని నిర్ణయించాయి. దీనికి రెండేళ్ల క్రితం రైల్వే బడ్జెట్‌లో రైల్వే మంత్రి గ్రీన్ సిగ్నల్ ఇచ్చారు. అయితే ఇదే రైల్వేలైనును అద్దంకి ఎమ్మెల్యే గొట్టిపాటి రవికుమార్ చొరవతో అద్దంకిలోగుండా వెళ్లేలా డిజైన్ మారుస్తూ కూడా రైల్వే శాఖ అంగీకారం తెలిపింది. దీనికి నిధులు కేటాయించాలన్న డిమాండ్ సర్వత్రా వ్యక్తమవుతోంది.
  
 ఎంపీ వైవీ సుబ్బారెడ్డి చేసిన ప్రతిపాదనలివీ...
 ఒంగోలు ఎంపీ వైవీ సుబ్బారెడ్డి పలు ప్రతిపాదనలను రైల్వే మంత్రి ముందుంచారు. ఇప్పటికే ఒకటికి రెండుసార్లు రైల్వే మంత్రిని కలిసి ఈ ప్రాంతాన్ని అభివృద్ధి చేయాలని కోరారు. ఒంగోలు నుంచి హైదరాబాద్‌కు పగటిపూట సూపర్‌ఫాస్ట్ ఎక్స్‌ప్రెస్‌ను వేయాలని ఎంపీ 2015-16 బడ్జెట్ కోసం ప్రతిపాదన పెట్టారు. ముంబై నుంచి గుంటూరుకు వయా గుంతకల్ మీదుగా కొత్త రైలు ఏర్పాటు చేయాలని కోరారు. దీనివల్ల కర్నూలు, మహబూబ్‌నగర్, ప్రకాశం, గుంటూరు జిల్లాల్లోని వేలాదిమంది ముంబైలో నివసించే ప్రయాణికులకు అనుకూలంగా ఉంటుందని ప్రతిపాదించారు. గుంటూరు నుంచి సికింద్రాబాద్‌కు గిద్దలూరు మీదుగా మరో ఎక్స్‌ప్రెస్ రైలుకు అనుమతి ఇవ్వాలని కోరారు.
  
 విజయవాడ - గూడూరు మార్గంలో సరుకు రవాణా కోసం మూడో లైన్ వేయాలన్న ప్రతిపాదన,ఒంగోలు నుంచి దొనకొండ రైల్వే లైను, ఒంగోలులో ఏర్పాటు చేసే ఎస్కలేటర్లు, లిఫ్ట్స్, నడికుడి నుంచి శ్రీకాళహస్తి రైల్వే లైను, విశాఖపట్నం నుంచి గుంటూరు వరకూ వెళ్లే సింహాద్రి ఎక్స్‌ప్రెస్‌ను నంద్యాల వరకూ పొడిగించాలని,  గుంటూరు - ద్రోణాచలం మధ్య నడిచే  రైలును గుంతకల్ వరకూ పొడిగించాలని, నంద్యాల  - కర్నూలు మధ్య నడుస్తున్న డెమో రైలును గిద్దలూరు వరకూ, తెనాలి మార్కాపురం మధ్య నడుస్తున్న రైలును గిద్దలూరు వరకూ, సాయినగర్ షిర్డీ నుంచి విజయవాడ వరకూ ఉన్న ఎక్స్‌ప్రెస్‌ను గూడూరు జంక్షన్ వరకూ పొడిగించాలని ఆయన ప్రతిపాదించారు. ఈ ప్రతిపాదనలు ఆమోదం పొందుతాయో లేదో చూడాలి.
  
 డిమాండ్లు...
 కేరళ ఎక్స్‌ప్రెస్, జోథ్‌పూర్ ఎక్స్‌ప్రెస్, జైపూర్ ఎక్స్‌ప్రెస్, పాండిచ్చేరి ఎక్స్‌ప్రెస్‌లకు ఒంగోలులో హాల్ట్ కేటాయించాలి. తిరుమలా ఎక్స్‌ప్రెస్, సర్కార్ ఎక్స్‌ప్రెస్, చార్మినార్ ఎక్స్‌ప్రెస్, సింహపురి ఎక్స్‌ప్రెస్‌లను టంగుటూరులో ఆపాలని, శబరి ఎక్స్‌ప్రెస్, పద్మావతి ఎక్స్‌ప్రెస్, చార్మినార్ ఎక్స్‌ప్రెస్, మచిలీపట్నం ఎక్స్‌ప్రెస్‌లను సింగరాయకొండలో ఆపాలని, హౌరా వెళ్లే ఎస్‌ఎస్‌పీఎన్ ఎక్స్‌ప్రెస్ వీక్లీ రైలు దొనకొండలో ఆపాలని, ప్రశాంతి ఎక్స్‌ప్రెస్‌ను కురిచేడులో, పూరీ నుంచి బెంగళూరు వెళ్లే గరీభ్ధ్‌న్రు గిద్దలూరులో ఆపాలన్న డిమాండ్లు ఉన్నాయి. వీటిని రైల్వే మంత్రి ఆమోదిస్తారా లేదా అన్నది మరికొన్ని గంటల్లో తేలనుంది.